rKTs


H135

(e-text produced by ACIP)

see text in transliteration
1b
༄##། །རྒྱ་གར་སྐད་དུ། ཨཱརྱ་པྲ་ཏྱུད་པན་ནེ་བུདྡྷ་སམ་མུ་ཁ་ཨ་བ་སྠི་ཏ་ས་མཱ་དྷི་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་
2a
༄#། །ན།་བཅོམ་ལྡན་འདས་རྒྱལ་པོའི་ཁབ་ན་སྨྱིག་མའི་ཚལ་བྱ་ཀ་ལནྟ་ཀ་གནས་པ་ན་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ།་ཉོན་མོངས་པ་མེད་པ། དབང་དང་ལྡན་པར་གྱུར་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ།་སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ། རྣམ་པར་ཐར་པ་བརྒྱད་ཐོབ་པ་ཤ་སྟག་སྟེ། གང་
2b
ཟག་གཅིག་མ་གཏོགས་པ་ནི། འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ཞེས་བྱ་བ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ་བྱང་ཆུབ་སེམས་དཔའ་ལྔ་བརྒྱ་ཙམ་ཐམས་ཅད་ཀྱང་ཁྱིམ་པར་གྱུར་ཅིང་བསླབ་པའི་གཞི་ལྔ་ཡོངས་སུ་བཟུང་བ་ཤ་སྟག་དང་ལྷན་ཅིག་ཏུ་ཆོས་ཉན་པའི་ཕྱིར་བཅོམ་ལྡན་འདས་ཀྱི་ཞབས་འབྲིང་བྱེད་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ཕྱེམ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ལན་བདུན་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འདུག་གོ་།བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་ཀྱང་ཕྱེམ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་
3a
༄#། །ལངས་ནས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་བདུན་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །དགེ་སློང་ལྔ་བརྒྱ་ཙམ་པོ་དེ་དག་ཀྱང་ཕྱེམ་རེད་ཀྱི་དུས་ཀྱི་ཚེ་ནང་དུ་ཡང་དག་འཇོག་ལས་ལངས་ནས་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་བདུན་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །ཡང་དེའི་ཚེ་ཚེ་དང་ལྡན་པ་ཤཱ་རིའི་བུ་དང ། ཚེ་དང་ལྡན་པ་མཽངྒལ་གྱི་བུ་ཆེན་པོ་མཉན་ཡོད་ཀྱི་གྲོང་ཁྱེར་ཆེན་པོར་དབྱར་གནས་ནས་དགེ་སློང་ལྔ་བརྒྱ་ཙམ་དང་ལྷན་ཅིག་ཏུ་རིམ་གྱིས་ཡུལ་རྒྱུ་ཞིང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་
3b
མའི་ཚལ་བྱ་ཀ་ལནྟ་ཀ་གནས་པ་གང་ན་པ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་པས་དགེ་སློང་དག་ཡུལ་སོ་སོ་ན་རྟེན་ཅིང་གནས་པ་དེ་དག་ཐམས་ཅད་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དོ། །ཡང་དེའི་ཚེ་སྨྱིག་མའི་ཚལ་བྱ་ཀ་ལནྟ་ཀ་གནས་པར་དགེ་སློང་འབུམ་ལྷན་ཅིག་ཏུ་འདུས་ཏེ་འཁོད་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་པས་སྐྱ་རྒུའི་བདག་མོ་ཆེན་མོ་གཽ་ཏ་མ་ལ་སོགས་པ་དགེ་སློང་མ་སུམ་ཁྲི་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ལྷགས་ནས་བཅོམ་ལྡན་འདས་ཀྱི་
4a
༄#། །ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་བདུན་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་པས་བྱང་ཆུབ་སེམས་དཔའ་སེམས་དཔའ་ཆེན་པོ་དཀོན་མཆོག་འབྱུང་གནས་ཞེས་བྱ་བ་ཡངས་པའི་གྲོང་ཁྱེར་ཆེན་པོ་ནས་བྱུང་སྟེ་ལི་ཙཱ་བི་གཞོན་ནུ་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལོ་བ་དང ། སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འྩལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཕུག་སྦས་ཀྱང་གྲོང་ཁྱེར་ཆེན་པོ་ཙམ་པ་ཡ་ནས་བྱུང་སྟེ་སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་
4b
ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འདམ་བུས་བྱིན་ཀྱང་གྲོང་ཁྱེར་ཆེན་པོ་ཝཱ་ར་ཎཱ་སི་ནས་བྱུང་སྟེ་སྲོག་ཆགས་ཉི་ཁྲི་ལྔ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཚམས་བཟང་ཡང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་བྱུང་སྟེ་སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དེད་དཔོན་ཆེན་པོ་དང ། ཁྱིམ་བདག་མགོན་མེད་ཟས་སྦྱིན་
5a
༄#། །ཡང་མཉན་ཡོད་ཀྱི་གྲོང་ཁྱེར་ཆེན་པོ་ནས་བྱུང་སྟེ་སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོས་བྱིན་ཀྱང་ཀོའུ་ཤམྦྷིའི་གྲོང་ཁྱེར་ཆེན་པོ་ནས་བྱུང་སྟེ་སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷའང་གནས་བཅས་ཀྱི་གྲོང་ཁྱེར་ཆེན་པོ་ནས་བྱུང་སྟེ་སྲོག་ཆགས་ཉི་ཁྲི་བརྒྱད་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། སྨྱིག་མའི་ཚལ་
5b
བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། རྒྱལ་པོ་མ་སྐྱེས་དགྲའང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ་སྲོག་ཆགས་སུམ་ཁྲི་ཙམ་གྱིས་ཡོངས་སུ་བསྐོར་ཅིང་མདུན་དུ་བདར་ནས་ལྷན་ཅིག་ཏུ་སྨྱིག་མའི་ཚལ་བྱ་ཀ་ལནྟ་ཀ་གནས་པ་ག་ལ་བ་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོ་ས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་དཔལ་བཟང་ཡང་ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ཏེ་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་ནས་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། ལྷའི་བུ་དབང་ཕྱུག་ཆེན་པོའང་གནས་གཙང་མའི་རིས་ཀྱི་ལྷའི་བུ་སྟོང་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་ནས་བཅོམ་ལྡན་འདས་ག་
6a
༄#། །ལ་བ་དེར་དོང་སྟེ་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་པོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་པ་དང ། ལྷ་མ་ཡིན་གྱི་དབང་པོ་བཞིའང་ལྷ་མ་ཡིན་བྱེ་བ་ཁྲག་ཁྲི་བརྒྱ་སྟོང་ཕྲག་དུ་མ་དང་ལྷན་ཅིག་།ཀླུའི་རྒྱལ་པོ་དགའ་བོ་དང ། ཉེ་དགའ་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་།ཀླུའི་རྒྱལ་པོ་མ་དྲོས་ཀྱང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་།ཀླུའི་རྒྱལ་པོ་གཟི་ཅན་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་།ཀླུའི་རྒྱལ་པོ་ཨེ་ལའི་འདབ་མའང་ཀླུ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་མཛད་དོ། །ཡང་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི། འདི་ནས་སྟེང་དུ་ཚངས་པའི་འཇིག་རྟེན་མན་ཆད་ཐ་ན་འཁང་བའི་རྩེ་མོ་གཟུགས་པའི་ས་ཁྱོན་ཙམ་ཡང་དབང་ཆེ་བ་དབང་ཚེ་བར་གྲགས་པའི་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་ཀྱིས་མ་གང་
6b
བ་གང་ཡང་མེད་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་སྟན་ལས་ལངས་ནས་བླ་གྲོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཁྱོད་ཅི་དང་ཅི་འདོད་པ་དྲིས་ཤིག་དང ། དྲིས་པ་དེ་དང་དེ་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་གང་ལ་གནས་ན། ཐོས་པ་རྒྱ་མཚོ་འདྲ་བ་དང ། ཐོས་པ་བསགས་པ་རྣམས་སུ་གྱུར་པ་དང ། ནེ་མ་ནུར་མ་མཆིས་པ་དང ། ཐེ་ཚོམ་མ་མཆིས་པ་དང ། ཡིད་གཉིས་མ་མཆིས་པ་རྣམས་སུ་
7a
༄#། །འགྱུར་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་མི་ཉམས་ཤིང་ཡོངས་སུ་མི་ཉམས་པ་རྣམས་སུ་འགྱུར་པ་དང ། མི་དལ་བ་རྣམས་སུ་མི་སྐྱེ་བ་དང ། སྐྱེ་བ་དྲན་པ་རྣམས་སུ་འགྱུར་བ་དང ། ཐ་ན་རྨི་ལམ་དུའང་དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་སུ་འགྱུར་བ་དང ། གཟུགས་བཟང་ཞིང་མཛེས་ལ་བལྟ་ན་སྡུག་ཅིང་ཁ་དོག་བཟང་པོ་རྒྱས་པ་མཆོག་དང་ལྡན་པ་རྣམས་སུ་འགྱུར་བ་དང ། རིགས་མཐོ་བ་དང་རིགས་ཆེ་བ་རྣམས་སུ་འགྱུར་བ་དང ། གཡོག་འཁོར་མང་ཞིང་གཡོག་འཁོར་མི་ཕྱེད་པ་རྣམས་སུ་འགྱུར་བ་དང ། རྟོགས་པ་དང་ལྡན་པ་རྣམས་སུ་འགྱུར་བ་དང ། དྲན་པ་དང་ལྡན་པ་རྣམས་སུ་འགྱུར་བ་དང ། བློ་གྲོས་དང་ལྡན་པ་རྣམས་སུ་འགྱུར་བ་དང ། དཔལ་དང་ལྡན་པ་རྣམས་སུ་འགྱུར་བ་དང ། བརྟན་པ་དང་ལྡན་པ་རྣམས་སུ་འགྱུར་བ་དང ། རྫུ་འཕྲུལ་དང་ལྡན་པ་རྣམས་སུ་འགྱུར་བ་དང ། ཤེས་རབ་དང་ལྡན་པ་རྣམས་སུ་འགྱུར་བ་དང ། བསོད་ནམས་དང་ལྡན་པ་རྣམས་སུ་འགྱུར་བ་དང ། ངོ་ཚར་ཤེས་ཤིང་ཁྲེལ་ཡོད་པ་དང་ལྡན་པ་རྣམས་སུ་འགྱུར་བ་དང ། ང་རྒྱལ་བཅག་པ་རྣམས་སུ་འགྱུར་བ་དང ། བྱམས་པ་ལ་གནས་པ་རྣམས་སུ་འགྱུར་བ་དང ། ཡེ་ཤེས་དང་ལྡན་པ་རྣམས་སུ་འགྱུར་བ་དང ། བློ་དང་ལྡན་པ་རྣམས་སུ་འགྱུར་པ་དང ། བརྩོན་འགྲུས་དང་ལྡན་པ་རྣམས་སུ་འགྱུར་བ་དང །
7b
མ་ཞུམ་པ་རྣམས་སུ་འགྱུར་བ་དང ། དོན་གྱི་རྗེས་སུ་འགྲོ་བ་རྣམས་སུ་འགྱུར་བ་དང ། ཆོས་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང ། ཞི་གནས་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང ། ལྷག་མཐོང་གི་རྗེས་སུ་འགྲོ་བ་རྣམས་སུ་འགྱུར་བ་དང ། བསམ་གཏན་གྱི་རྗེས་སུ་འགྲོ་བ་རྣམས་སུ་འགྱུར་བ་དང ། ཏིང་ངེ་འཛིན་གྱི་རྗེས་སུ་འགྲོ་བ་རྣམས་སུ་འགྱུར་བ་དང ། ཤེས་རབ་ཀྱི་རྗེས་སུ་འགྲོ་བ་རྣམས་སུ་འགྱུར་བ་དང ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་ཆོས་རྣམས་ཀྱིས་མི་སྐྲག་མི་དངང་དངང་པར་མི་འགྱུར་བ་རྣམས་སུ་འགྱུར་བ་དང ། གཡང་ས་ཆེན་པོར་མི་ལྟུང་བའི་སྟེང་དུ་ཆོས་རབ་ཏུ་འཛིན་པ་དང ། ཆོས་སྨྲ་བ་ཆེན་པོ་རྣམས་སུ་འགྱུར་བ་དང ། སངས་རྒྱས་ཀྱི་ཞིང་གང་དང་གང་དུ་སྐྱེ་བར་སེམས་ཀྱིས་སྨོན་པ་དེ་དང་དེར་སྐྱེ་བ་དང ། མུ་སྟེགས་ཅན་གྱི་གནས་ཐམས་ཅད་ཀྱིས་ཡོངས་སུ་མི་ཟིན་པ་རྣམས་སུ་འགྱུར་བ་དང ། རྒྱུའི་སྟོབས་ཅན་རྣམས་སུ་འགྱུར་གྱི་རྐྱེན་གྱི་སྟོབས་ཅན་རྣམས་སུ་མི་འགྱུར་བ་དང ། བསམ་པའི་སྟོབས་ཅན་རྣམས་སུ་འགྱུར་བ་དང ། སྦྱོར་བའི་སྟོབས་ཅན་རྣམས་སུ་འགྱུར་བ་དང ། དབང་པོའི་སྟོབས་ཅན་རྣམས་སུ་འགྱུར་བ་དང ། དམིགས་པའི་སྟོབས་ཅན་རྣམས་སུ་འགྱུར་བ་དང ། ངེས་པར་སེམས་པའི་སྟོབས་ཅན་རྣམས་སུ་འགྱུར་བ་དང ། ཞི་གནས་ཀྱི་སྟོབས་ཅན་རྣམས་སུ་འགྱུར་བ་དང ། རྣམ་པར་ལྟ་བའི་སྟོབས་ཅན་རྣམས་སུ་འགྱུར་བ་དང ། མོས་པའི་སྟོབས་ཅན་རྣམས་སུ་
8a
༄#། །འགྱུར་བ་དང ། སྨོན་ལམ་གྱི་སྟོབས་ཅན་རྣམས་སུ་འགྱུར་བ་དང ། བསམ་པ་ཡོངས་སུ་མི་ཟད་པ་རྣམས་སུ་འགྱུར་བ་དང ། ཐོས་པ་རྒྱ་མཚོ་དང་མཚུངས་པས་རྒྱ་མཚོ་ཆུ་གཏེར་ལྟ་བུ་རྣམས་སུ་འགྱུར་བ་དང ། དཀར་པོའི་ཆོས་ཡོངས་སུ་རྫོགས་པས་ཟླ་བ་ལྟ་བུ་རྣམས་སུ་འགྱུར་བ་དང ། མི་ཤེས་པའི་མུན་པ་བསལ་བས་ཉི་མ་ལྟ་བ་རྣམས་སུ་འགྱུར་བ་དང ། སྣང་བར་བྱེད་པས་མར་མེ་ལྟ་བུ་རྣམས་སུ་འགྱུར་བ་དང ། ཤིན་ཏུ་མི་གོས་པས་བར་སྣང་ལྟ་བུ་རྣམས་སུ་འགྱུར་བ་དང ། སེམས་ནམ་མཁའ་དང་མཚུངས་པས་མི་གནས་པ་རྣམས་སུ་འགྱུར་བ་དང ། ཆོས་ཐམས་ཅད་ངེས་པར་རྟོགས་པས་རྡོ་རྗེ་ལྟ་བུ་རྣམས་སུ་འགྱུར་བ་དང ། མཐུ་བརྟན་པས་རི་ལྟ་བུ་རྣམས་སུ་འགྱུར་བ་དང ། མི་གཡོ་བས་བརྟན་པའི་ཆོས་ཅན་རྣམས་སུ་འགྱུར་བ་དང ། ལེགས་པར་གནས་པས་སྒོའི་ཐེམ་པ་ལྟ་བུ་རྣམས་སུ་འགྱུར་བ་དང ། སེམས་ལས་སུ་རུང་བས་བྱི་ལའི་པགས་པ་ལྟ་བུ་རྣམས་སུ་འགྱུར་བ་དང ། བྱ་ལྟར་གང་དང་གང་དུ་འདོད་པར་འགྲོ་བས་ཡོངས་སུ་འཛིན་པ་མ་མཆིས་པ་རྣམས་སུ་འགྱུར་བ་དང ། གདོལ་བུ་ལྟ་བུར་ང་རྒྱལ་བཅག་པ་རྣམས་སུ་འགྱུར་བ་དང ། གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། ཕོ་བྲང་འཁོར་ལ་མངོན་པར་དགའ་བ་མི་སྐྱེད་པ་དང ། རི་དྭགས་དང ། སྤྲེའུ་དང་མཚུངས་པས་དགོན་པ་ལ་མངོན་པར་དགའ་བ་རྣམས་སུ་འགྱུར་བ་དང །
8b
ཁྱིམ་པ་དང ། རབ་ཏུ་བྱུང་བ་རྣམས་དང་ལྷན་ཅིག་ཏུ་མི་སྟེན་པས་མ་འདྲེས་པ་རྣམས་སུ་འགྱུར་བ་དང ། ཚོགས་ཡོངས་སུ་སྡུད་པས་ཚོགས་ཀྱི་སྟོན་པ་རྣམས་སུ་འགྱུར་བ་དང ། སེམས་ཅན་ཐམས་ཅད་ཀྱིས་མི་བསྐྱོད་པ་རྣམས་སུ་འགྱུར་བ་དང ། བདུད་ཐམས་ཅད་ཀྱིས་གདུལ་དཀའ་བ་རྣམས་སུ་འགྱུར་བ་དང ། ཆོས་ཐམས་ཅད་ཤིན་ཏུ་ངེས་པར་ཤེས་པས་སོ་སོ་ཡང་དག་པར་རིག་པ་ཐོབ་པ་རྣམས་སུ་འགྱུར་བ་དང ། སངས་རྒྱས་ཀྱི་ཆོས་ཐམས་ཅད་ལ་གཞན་གྱི་དྲིང་ལ་མི་འཇོག་པ་རྣམས་སུ་འགྱུར་བ་དང ། བྱམས་པ་ཆེན་པོ་རབ་ཏུ་མི་གཡོ་བས་ཟིལ་གྱིས་གནོན་པར་དཀའ་ཞིང་བསམ་པ་བརྟན་པ་རྣམས་སུ་འགྱུར་བ་དང ། དམིགས་སུ་མེད་པ་ལ་སྤྱད་ཅིང་བརྗོད་དུ་མེད་པའི་སྤྱོད་ཡུལ་དང་ལྡན་པས་ལྷག་པའི་བསམ་པ་ཟབ་པ་རྣམས་སུ་འགྱུར་བ་དང ། ཆོས་ཀྱི་ཤུགས་ཀྱིས་དགའ་བས་བག་ཡོད་པ་མང་ཞིང་བསམ་པ་མཉེན་པ་རྣམས་སུ་འགྱུར་བ་དང ། སངས་རྒྱས་ཐམས་ཅད་ལ་མཆོད་པ་དང་རིམ་གྲོའི་ལས་བགྱིད་པས་ལྷག་པའི་བསམ་པ་རྒྱ་ཆེ་བ་རྣམས་སུ་འགྱུར་བ་དང ། དགེ་བའི་རྩ་བ་སྣ་ཚོགས་ཡང་དག་པར་སྒྲུབ་པས་ལྷག་པའི་བས་པ་སྣ་ཚོགས་རྣམས་སུ་འགྱུར་བ་དང ། རྒྱན་གྱིས་བརྒྱན་པ་རྣམས་དག་པས་ལྷག་པའི་བསམ་པ་དགེ་བ་རྣམས་སུ་འགྱུར་བ་དང ། རྫུན་དང་ཁོད་ཁྲོ་བའི་སྐྱོན་སྤངས་པས་ལྷག་པའི་བསམ་པ་བཟང་པོ་རྣམས་སུ་འགྱུར་བ་དང ། ཐམས་ཅད་མཁྱེན་པའི་ཡེ་ཤེས་ཀྱི་སྣང་བ་ཐོབ་པས་ལྷག་པའི་བསམ་པ་
9a
༄#། །ཡོངས་སུ་དག་པ་རྣམས་སུ་འགྱུར་བ་དང ། སེམས་དང་ཞིང་ཐ་བ་མེད་ལ་ཤེས་རབ་རྒྱས་པ་ཡོངས་སུ་བཟུང་བས་ཡིད་བདེ་བའི་ལྷག་པའི་བསམ་པ་རྣམས་སུ་འགྱུར་བ་དང ། འཇིག་རྟེན་གྱི་ཁམས་ཐམས་ཅད་རྒྱན་གྱིས་བརྒྱན་པ་རྣམ་པར་དག་པས་བཀོད་པ་ཆེན་པོ་ལ་སྤྱད་པའི་ལྷག་པའི་བསམ་པ་རྣམས་སུ་འགྱུར་བ་དང ། ཉན་ཐོས་དང ། རང་སངས་རྒྱས་ཀྱི་སེམས་ཡིད་ལ་བགྱི་བ་དང་བྲལ་བས་ཚུལ་ཁྲིམས་ཡོངས་སུ་དག་པ་རྣམས་སུ་འགྱུར་བ་དང ། བརྩམས་པ་ཐམས་ཅད་ཉམས་སུ་ལོན་པས་ཡི་དམ་ལ་བརྟན་པ་རྣམས་སུ་འགྱུར་བ་དང ། སེམས་ཅན་ཐམས་ཅད་དགེ་བའི་ཆོས་རྗེས་སུ་སྤྱོད་པའི་སྔོན་དུ་འགྲོ་བ་རྣམས་སུ་འགྱུར་བ་དང ། བྱང་ཆུབ་སེམས་དཔའ་ཐམས་ཅད་ཀྱི་བསླབ་པ་རྣམས་དང ། ཕ་རོལ་ཏུ་ཕྱིན་པ་རྣམས་ལ་ཡོངས་སུ་མི་འཇིགས་པ་རྣམས་སུ་འགྱུར་བ་དང ། སངས་རྒྱས་ཀྱི་ཆོས་ཐམས་ཅད་ལ་ཕྱིར་མི་ལྡོག་པ་རྣམས་སུ་འགྱུར་བ་དང ། བདུད་དང་མུ་སྟེགས་ཅན་གཞན་དང ། ཕས་ཀྱི་རྒོལ་བ་ཐམས་ཅད་ཀྱིས་ཟིལ་གྱིས་མི་ནོན་པ་རྣམས་སུ་འགྱུར་བ་དང ། ཡིད་ལ་བྱེད་པ་རྣམས་སངས་རྒྱས་ཀྱི་ཆོས་རྣམས་ལ་གཞོག་པས་ཆོས་ཐམས་ཅད་ལ་མོས་པ་རྣམས་སུ་འགྱུར་བ་དང ། སངས་རྒྱས་ཐམས་ཅད་ལ་ཕར་འདུ་ཤེས་པ་རྣམས་སུ་འགྱུར་བ་དང ། ཆོས་ཐམས་ཅད་ལ་སྣང་བ་སྐྱེས་པས་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་རྣམས་སུ་འགྱུར་བ་དང །
9b
སངས་རྒྱས་ཀྱི་ཆོས་ཐམས་ཅད་མངོན་དུ་གྱུར་པས་ཤེས་པ་སྒྲིབ་པ་མེད་པ་རྣམས་སུ་འགྱུར་བ་དང ། ཆོས་ཐམས་ཅད་ལ་རློམ་སེམས་མེད་པས་སྒྱུ་མའི་སྐྱེས་བུ་རྣམས་སུ་འགྱུར་བ་དང ། མ་སྐྱེས་མ་འོངས་ཤིང་འགྲོ་བ་མེད་པའི་ཆོས་དང་ལྡན་པས་སྤྲུལ་པ་ལྟ་བུ་རྣམས་སུ་འགྱུར་བ་དང ། དུས་གསུམ་ལ་རྟོག་པས་རྨི་ལམ་ལྟ་བུ་རྣམས་སུ་འགྱུར་བ་དང ། འཇིག་རྟེན་གྱི་ཁམས་ཐམས་ཅད་དུ་རང་གི་ལུས་ཡང་དག་པར་སྟོན་པས་གཟུགས་བརྙན་ལྟ་བུ་རྣམས་སུ་འགྱུར་བ་དང ། འཕོ་བ་མེད་ཅིང་མི་གནས་ལ་རྟེན་པ་མེད་པའི་ཆོས་ཅན་པས་བྲག་ཅ་ལྟ་བུ་རྣམས་སུ་འགྱུར་བ་དང ། འཆི་འཕོ་བ་དང ། སྐྱེ་བ་ཐམས་ཅད་ལ་གྲིབ་མ་ལྟ་བུ་རྣམས་སུ་འགྱུར་བ་དང ། དངོས་པོའི་འདུ་ཤེས་སྤངས་པས་དངོས་པོ་མེད་པར་ཤེས་པ་ལ་གནས་པ་རྣམས་སུ་འགྱུར་བ་དང ། གཉིས་ལ་ཀུན་ཏུ་སྤྱོད་པ་མེད་པས་མཚན་ཉིད་མེད་པའི་ཆོས་ལ་གཞོལ་བ་རྣམས་སུ་འགྱུར་བ་དང ། བྱང་ཆུབ་ཀྱི་སེམས་ཚད་མེད་པས་ཆོས་ཀྱི་དབྱིངས་ཀྱི་མཐས་གཏུགས་པ་རྣམས་སུ་འགྱུར་བ་དང ། སེམས་ཀྱི་རྒྱུད་མི་གཡོ་བས་འཇིག་རྟེན་གྱི་ཁམས་ཐམས་ཅད་དུ་མི་གཡོ་བ་རྣམས་སུ་འགྱུར་བ་དང ། སངས་རྒྱས་ཀྱི་ཞིང་ཐམས་ཅད་ལ་མི་ཆགས་པའི་སྤྱོད་ཡུལ་དང་ལྡན་པ་རྣམས་སུ་འགྱུར་བ་དང ། ཆོས་ཐམས་ཅད་ཀྱི་ཚིག་རབ་ཏུ་དབྱེ་བ་ལ་མཁས་པས་གཟུངས་ཀྱི་སྒོ་རྣམས་སུ་ཞུགས་པ་རྣམས་སུ་འགྱུར་བ་དང ། སངས་རྒྱས་ཀྱི་ཆོས་ཐམས་ཅད་ཀྱི་
10a
༄#། །སྣོད་དུ་གྱུར་བས་ཆོས་ཀྱི་སྣོད་རྣམས་སུ་འགྱུར་བ་དང ། སངས་རྒྱས་ཀྱི་གཟི་བརྗིད་ཀྱིས་བརྟན་པས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་པ་རྣམས་སུ་འགྱུར་བ་དང ། ཁྱུ་མཆོག་དང་སེངྒེའི་སྒྲ་སྒྲོག་པས་བག་ཚ་བ་མེད་པ་རྣམས་སུ་འགྱུར་བ་དང ། འཇིག་རྟེན་ཐམས་ཅད་ལ་ཡང་དག་པར་དགའ་བར་བྱེད་པས་འཇིགས་པ་མེད་པ་རྣམས་སུ་འགྱུར་བ་དང ། སངས་རྒྱས་ཐམས་ཅད་དང་མཉམ་པས་རྨོངས་པ་མེད་པ་རྣམས་སུ་འགྱུར་བ་དང ། ཆོས་ཐམས་ཅད་གཞན་གྱི་དྲིང་མི་འཇོག་ཅིང་ཐེ་ཚོམ་དང་བྲལ་བས་དེ་བཞིན་ཉིད་རབ་ཏུ་རྟོགས་པ་རྣམས་སུ་འགྱུར་བ་དང ། དྲིས་པ་ཐམས་ཅད་ལུང་བསྟན་པ་ལ་སྲིད་པ་དང་དུས་གསུམ་སྟོན་ནུས་པ་རྣམས་སུ་འགྱུར་བ་དང ། སྙིང་རྗེ་ཆེན་པོ་ཐོབ་པས་ཕན་པ་འདོད་པ་རྣམས་སུ་འགྱུར་བ་དང ། ཆོས་སྟོན་པ་ལ་ངལ་བ་མེད་པ་རྣམས་སུ་འགྱུར་བ་དང ། སེམས་ཅན་ཐམས་ཅད་ཡོངས་སུ་མི་གཏོང་བ་ལ་གནས་པ་རྣམས་སུ་འགྱུར་བ་དང ། སྒྱུ་མེད་པས་གཡོ་མེད་པ་རྣམས་སུ་འགྱུར་བ་དང ། འཇིག་རྟེན་ཐམས་ཅད་ཀྱི་སྒྲོན་མར་གྱུར་པས་དྲང་པོ་རྣམས་སུ་འགྱུར་བ་དང ། ཁམས་གསུམ་ཐམས་ཅད་ན་ཚད་མེད་པ་རྣམས་སུ་འགྱུར་བ་དང ། ཐ་སྙད་ཙམ་དུ་རྣམ་པར་དཔྱོད་པས་ཉོན་མོངས་པ་མེད་པ་ལ་གནས་པ་རྣམས་སུ་འགྱུར་བ་དང ། གཞི་མེད་པ་ལ་དགའ་བས་མ་འདྲེས་པར་གནས་པ་
10b
རྣམས་སུ་འགྱུར་བ་དང ། རྣམ་པར་མི་རྟོག་པའི་ཆོས་ཅན་པས་ཡང་དག་པའི་མཐའ་ལ་གནས་པ་རྣམས་སུ་འགྱུར་བ་དང ། ཐེག་པ་ཆེན་པོ་ལ་སེམས་ཅན་ཐམས་ཅད་གཞོག་པས་ཐམས་ཅད་མཁྱེན་པའི་གཏམ་ཡང་དག་པར་སྟོན་པ་རྣམས་སུ་འགྱུར་བ་དང ། འཇིགས་ཤིང་སྤུ་ཟིང་ཞེས་བྱེད་པ་ཐམས་ཅད་དང་བྲལ་བས་མི་འཇིགས་པ་ཐོབ་པ་རྣམས་སུ་འགྱུར་བ་དང ། མདོ་སྡེའི་ཆོས་ཀྱི་རྣམ་གྲངས་ཐམས་ཅད་ལ་དེ་བཞིན་གཤེགས་པའི་དགོངས་ཏེ་གསུངས་པ་ལ་མཁས་པ་རྣམས་སུ་འགྱུར་བ་དང ། འཁོར་ཐམས་ཅད་ཀྱི་ནང་དུ་ཉེ་བར་འགྲོ་བས་བཞིན་ཀུན་ཏུ་སྟོན་པ་རྣམས་སུ་འགྱུར་བ་དང ། ཐེག་པ་ཆེན་པོ་ལ་འཇིག་རྟེན་ཐམས་ཅད་ཀྱིས་མཆོད་ཅིང་ཐམས་ཅད་མཁྱེན་པ་ལྟར་བསོད་ནམས་ཀྱི་བདག་པོ་རྣམས་སུ་འགྱུར་བ་དང ། འཇིག་རྟེན་པ་ཐམས་ཅད་ཀྱི་སྦྱིན་གནས་སུ་གྱུར་པས་ཡོན་ཏན་ཟད་མི་ཤེས་པ་རྣམས་སུ་འགྱུར་བ་དང ། དེ་བཞིན་གཤེགས་པའི་ཞབས་ཀྱི་དྲུང་དུ་དགའ་བ་དང ། དད་པ་ཆེན་པོ་རབ་ཏུ་རྙེད་པ་རྣམས་སུ་འགྱུར་བ་དང ། སངས་རྒྱས་ཀྱི་ཆོས་ཐམས་ཅད་ཡོངས་སུ་དྲི་བ་ལ་དགེ་བའི་སྤོབས་པ་ཅན་རྣམས་སུ་འགྱུར་བ་དང ། འཁོར་གྱི་ནང་དུ་འཇིགས་ཤིང་བག་ཚ་བ་སྤངས་པས་ཡིད་སྤ་མི་འགོང་བ་རྣམས་སུ་འགྱུར་བ་དང ། ཕས་ཀྱི་རྒོལ་བ་ཐམས་ཅད་ཚར་གཅོད་པས་སྨྲ་བའི་སྟག་ལྟ་བུ་རྣམས་སུ་འགྱུར་བ་དང ། ཕ་རོལ་གྱི་ཕྱོགས་ཐམས་ཅད་འཇོམས་པས་དམ་བཅས་པ་
11a
༄#། །མ་ཉམས་པ་རྣམས་སུ་འགྱུར་བ་དང ། སངས་རྒྱས་ཐམས་ཅད་ཀྱིས་གནང་བས་ཆོས་ཀྱི་འབེལ་བའི་གཏམ་གཏན་ལ་འབེངས་པའི་ཕྱིར་སེངྒེའི་སྒྲ་སྒྲོག་ཅིང་སེངྒེའི་ཁྲི་ལ་འདུག་པ་མང་བ་རྣམས་སུ་འགྱུར་བ་དང ། ཡང་དག་པར་བརྗོད་པ་ལ་འཇུག་པ་ཐམས་ཅད་རབ་ཏུ་རྟོག་པས་འཇིག་རྟེན་རྒྱང་པན་པ་ཐམས་ཅད་མ་བསྟན་པ་རྣམས་སུ་འགྱུར་བ་དང ། སངས་རྒྱས་སུ་འགྱུར་བའི་རྒྱུ་ལ་གནས་པས་དམ་པའི་ཆོས་སྨྲ་བ་རྣམས་སུ་འགྱུར་བ་དང ། དེ་བཞིན་གཤེགས་པའི་ཞབས་འབྲིང་བགྱིད་པས་ཆོས་འདོད་པ་རྣམས་སུ་འགྱུར་བ་དང ། དགེ་བའི་བཤེས་གཉེན་ལ་བསྙེན་བཀུར་བགྱིད་པ་ལ་མི་སྐྱོ་བ་རྣམས་སུ་འགྱུར་བ་དང ། ཕྱོགས་བཅུར་རྣམ་པར་རྒྱུ་བས་གནས་མ་མཆིས་པ་རྣམས་སུ་འགྱུར་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བགྱིད་པའི་སྨོན་ལམ་འདེབས་པ་རྣམས་སུ་འགྱུར་བ་དང ། རིན་པོ་ཆེའི་མཆོག་ལ་ངལ་སོས་པར་བགྱིད་པ་ལ་མཁས་པས་ཆོས་ཀྱི་རྒྱ་མཚོར་ཞུགས་པ་རྣམས་སུ་འགྱུར་བ་དང ། འཇིག་རྟེན་གྱི་ཁམས་ཐམས་ཅད་རྣམ་པ་སྣ་ཚོགས་ཀྱིས་བརྒྱན་པས་འཇིག་རྟེན་གྱི་ཁམས་ཐམས་ཅད་མི་གཡོ་བ་རྣམས་སུ་འགྱུར་བ་དང ། སངས་རྒྱས་ཀྱི་ཆོ་འཕྲུལ་གྱིས་རྣམ་པར་རོལ་པ་སྤྱོད་པས་ཆོ་འཕྲུལ་ཆེན་པོ་མྱོང་བ་རྣམས་སུ་འགྱུར་བ་དང ། སངས་རྒྱས་བལྟ་བ་སེམས་ཀྱི་སྐད་ཅིག་གཅིག་ལ་རག་ལས་པ་རྣམས་སུ་འགྱུར་
11b
བ་དང ། ཆོས་ལ་གུས་པ་རྙེད་པས་ཡེ་ཤེས་ཀྱིས་བསྐོར་བ་རྣམས་སུ་འགྱུར་བ་དང ། ཆོས་ཀྱི་སྐུ་དང་འདྲ་བར་རྟོགས་པས་ནམ་མཁའ་ལྟ་བུ་རྣམས་སུ་འགྱུར་བ་དང ། སངས་རྒྱས་ཀྱི་གདུང་མི་ཆད་པར་བགྱིད་པས་བྱང་ཆུབ་སེམས་དཔའ་རྣམས་ལ་ཡང་དག་པར་འཛིན་དུ་འཇུག་པ་རྣམས་སུ་འགྱུར་བ་དང ། བྱང་ཆུབ་སེམས་དཔའི་སྤྱོད་པ་ཐམས་ཅད་རྒྱུན་མི་གཅོད་པ་རྣམས་སུ་འགྱུར་བ་དང ། ལེགས་པར་གནས་ཤིང་མྱུར་བའི་ཅད་ཤེས་པས་གོ་ཆ་ཆེན་པོ་བགོས་པ་རྣམས་སུ་འགྱུར་བ་དང ། དེ་བཞིན་གཤེགས་པ་སྟོབས་བཅུའི་ས་ལ་ཐམས་ཅད་མཁྱེན་པ་ཉིད་དུ་དབང་བསྐུར་བས་དབང་བསྐུར་བ་རྣམས་སུ་འགྱུར་བ་དང ། བགྲང་བའི་ཚུལ་གྱིས་ཆོ་ག་ཤེས་པས་འདུ་ཤེས་ཀྱི་རྣམ་པ་ཐམས་ཅད་རབ་ཏུ་རྟོགས་པ་རྣམས་སུ་འགྱུར་བ་དང ། གྲངས་ཀྱི་རྣམ་པ་ཐམས་ཅད་ཉེ་བར་རྟོགས་པས་འཇིག་པ་དང ། འཆགས་པ་ཐམས་ཅད་ལ་མཁས་པ་རྣམས་སུ་འགྱུར་བ་དང ། གཏོང་བ་ཐམས་ཅད་ལ་ནན་ཏན་བགྱིད་པས་མི་གནས་ཤིང་ལེན་པ་མ་མཆིས་པ་རྣམས་སུ་འགྱུར་བ་དང ། འགྱོང་པ་མེད་པའི་སྦྱིན་བདག་ཆེན་པོར་གྱུར་པས་གཏོང་བ་ལ་མཁས་པ་རྣམས་སུ་འགྱུར་བ་དང ། སྲིད་པའི་འགྲོ་བ་ཐམས་ཅད་ཀྱི་སྐྱེ་བའི་གནས་རྣམས་དོན་དུ་མི་གཉེར་བ་རྣམས་སུ་འགྱུར་བ་དང ། འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་ཀྱི་ཞིང་དག་མཐོང་ཞིང་ཆོས་ཀྱང་ཉན་ལ། དེའང་འཛིན་ཅིང་མི་བསྐྱུད་
12a
༄#། །ལ་ལྔ་མངོན་པར་ཤེས་པའང་མ་ལགས། དྲུག་མངོན་པར་ཤེས་པའང་མ་ལགས་ཤིང ། བྱང་ཆུབ་སེམས་དཔའ་དེ་རྣམས་འཇིག་རྟེན་གྱི་ཁམས་དེ་ནས་ཤི་འཕོས་ཏེ་སངས་རྒྱས་ཀྱི་ཞིང་དེ་དག་ན་གནས་པའང་མ་ལགས་ལ། བྱང་ཆུབ་སེམས་དཔའ་དེ་རྣམས་འཇིག་རྟེན་གྱི་ཁམས་འདི་ཉིད་ན་གནས་བཞིན་དུ་སངས་རྒྱས་རྣམས་ཀྱང་མཐོང་ལ་ཆོས་ཀྱང་ཉན་ཅིང ། དེ་ཐམས་ཅད་ཀྱང་ཀུན་ཏུ་འཛིན་ཏེ། ཇི་ལྟར་བདག་ད་ལྟར་བཅོམ་ལྡན་འདས་ཀྱི་སྤྱན་སྔ་ན་མཆིས་པ་བཞིན་དུ་ཐེ་ཚོམ་དང ། ནེམ་ནུར་མ་མཆིས་པ་དེ་བཞིན་དུ ། བྱང་ཆུབ་སེམས་དཔའ་དེ་རྣམས་ཀྱང་ཐ་ན་རྨི་ལམ་ནའང་སངས་རྒྱས་མཐོང་ཞིང ། ཆོས་ཉན་པ་དང་མི་འབྲལ་བ་རྣམས་སུ་འགྱུར་བའི་ཏིང་ངེ་འཛིན་གང་ལགས། བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་དང་པོའོ།། །།དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། ལེགས་སོ། །ལེགས་སོ། །ཡང་བཟང་སྐྱོང ། ཁྱོད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མེད་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང ། མི་རྣམས་ཀྱི་དོན་དང ། ཕན་པ་དང་བདེ་པའི་ཕྱིར་ཞུགས་ཤིང ། བཟང་སྐྱོང ། ཁྱོད་དེ་ལྟར་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ལེགས་སོ།།
12b
བཟང་སྐྱོང ། ཁྱོད་ནི། སྔོན་གྱི་རྒྱལ་བ་ལ་བྱ་བ་བྱས་ཤིང་དགེ་བའི་རྩ་བ་བསྐྱེད་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པ། ཆོས་དོན་དུ་གཉེར་བ། ཆོས་འདོད་པ། མི་དམིགས་པ། ཚངས་པར་སྤྱོད་པ། བྱང་ཆུབ་སེམས་དཔའ་རྣམས་ལ་ཡང་དག་པར་སློབ་པར་བྱེད་པ། བྱང་ཆུབ་སེམས་དཔའ་རྣམས་ཡང་དག་པར་དགའ་བར་བྱེད་པ། བྱང་ཆུབ་སེམས་དཔའ་རྣམས་ལ་སྟོན་པ། བྱང་ཆུབ་སེམས་དཔའ་རྣམས་ལ་ཡང་དག་པར་འཛིན་དུ་འཇུག་པ། བྱང་ཆུབ་སེམས་དཔའ་རྣམས་ལ་ཡང་དག་པར་གཟེངས་བསྟོད་པ། བྱང་ཆུབ་སེམས་དཔའ་རྣམས་ལ་ལུང་འབོགས་པ། བྱང་ཆུབ་སེམས་དཔའ་རྣམས་ལ་སྒྲུབ་པར་བྱེད་པ། བྱང་ཆུབ་སེམས་དཔའ་རྣམས་ལ་ཕན་པར་འདོད་པ། སྙིང་རྗེ་ཆེ་བ། སེམས་ཅན་ཐམས་ཅད་ལ་སེམས་མཉམ་པ། སེམས་ཀྱི་དབང་ཐམས་ཅད་ཀྱི་དམ་པའི་ཕ་རོལ་ཏུ་སོན་པ། སངས་རྒྱས་མཐོང་བ། སྨོན་ལམ་རྒྱ་ཆེ་བ། སྤྱོད་ཡུལ་ཟབ་པ། ཐམས་ཅད་མཁྱེན་པ་སེམས་པ། བྱང་ཆུབ་ཡང་དག་པར་འཛིན་པ། དེ་བཞིན་གཤེགས་པའི་གདུང་སྟོན་པ། བྱང་ཆུབ་ཀྱི་སེམས་རྡོ་རྗེ་ལྟ་བུ་དང་མཉམ་ཞིང་མཚུངས་པ། སེམས་ཅན་ཐམས་ཅད་ཀྱི་བསམ་པ་ཀུན་ཏུ་སྤྱོད་པ་ལ་མཁས་པ། སངས་རྒྱས་ཐམས་ཅད་དང་མངོན་སུམ་དུ་གནས་པ་སྟེ། བཟང་སྐྱོང ། ཁྱོད་ཀྱི་ཡོན་ཏན་བརྗོད་ན་ལྟ་མཐར་མ་ཕྱིན་ཏོ། །བཟང་སྐྱོང ། ད་ལྟར་གྱི་སངས་རྒྱས་མངོན་སུམ་དུ་བཞུགས་
13a
༄#། །པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་བཟུང་ཞིང་མ་བརྗོད་ལ་རྣ་བླགས་ཏེ་ཉན་ཅིང་སེམས་མི་གཡེང་བ་རྙེད་ན། ཡོན་ཏན་གྱི་ཁྱད་པར་དེ་དག་རྙེད་པ་མི་དཀའ་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། དེ་བས་ན། དེ་བཞིན་གཤེགས་པས་ཏིང་ངེ་འཛིན་དེ་བཤད་པར་གསོལ། དེ་ནི། སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང་མིའི་དོན་དང ། སྨན་པ་དང་བདེ་བར་འགྱུར་ཞིང ། མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལའང་སྣང་བ་ཆེན་པོ་བགྱིས་པར་འགྱུར་རོ།། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས། དེ་བཞིན་ནོ། །ཞེས་གསོལ་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། ཆོས་གཅིག་ལ་ཀུན་ཏུ་བསྟོན།
13b
ངེས་པར་བསྟེན་ཅིང་བསྒོམས་ལ་ལན་མང་དུ་བྱས། ལམ་དུ་བྱས། གཞིར་བྱས། ཡང་དག་པར་བསླངས། ལེགས་པར་བྱང་བར་བྱས། ཤིན་ཏུ་ཡོངས་སུ་སྦྱངས། ཤིན་ཏུ་མཉམ་པར་བཞག་།ཤིན་ཏུ་ཡང་དག་པར་བརྩམས་ན། ཡོན་ཏན་ཐམས་ཅད་ཁྱད་པར་དུ་འཕགས་པར་འགྱུར་རོ། །ཆོས་གཅིག་པོ་གང་ཞེ་ན། འདི་ལྟ་སྟེ། ད་ལྟར་གྱི་སངས་རྒྱས་མངོན་སུམ་དུ་ཞུགས་པ་ཞེས་བྱ་བའི་ཏིང་ངེ་འཛིན་ཏེ། མང་དུ་ཐོས་པ་སྔོན་དུ་འགྲོ་བའི་ཆོས་རྣམས་ཡོངས་སུ་རྫོགས་པར་འགྱུར་རོ། །བཟང་སྐྱོང ། དེ་ལ་ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་དེ་གང་ཞེ་ན། འདི་ལྟ་སྟེ། སངས་རྒྱས་ལ་དམིགས་པའི་སེམས་ཡིད་ལ་བྱེད་པ། སེམས་མི་གཡེང་བ། དྲན་པ་ཉེ་བར་གནས་པ། ཤེས་རབ་ཐོབ་པ།་བརྩོན་འགྲུས་མི་གཏོང་བ། དགེ་བའི་བཤེས་གཉེན་རྣམས་ལ་བསྙེན་བཀུར་བྱེད་པ། སྟོང་པ་ཉིད་ཀུན་ཏུ་སྟེན་པ། སྒོམ་པ་མང་དུ་བྱེད་པ། སྒྲིབ་པ་རྣམས་སྤོང་བ། རྨུགས་པ་དང་གཉིད་རྣམ་པར་སྤོང་བ། གཏམ་ཡོངས་སུ་སྤོང་བ། སྡིག་པའི་གྲོགས་པོ་རྣམས་རྣམ་པར་སྤོང་བ། དགེ་བའི་བཤེས་གཉེན་རྣམས་ལ་ངེས་པར་སྟེན་པ། དབང་པོ་རྣམས་མི་གཡེང་བ། ཟས་ཀྱི་ཚེད་ཤེས་པ། ནམ་གྱི་ཆ་སྟོད་དང ། ཆ་སྨད་ལ་མི་ཉལ་བའི་བརྩོན་འགྲུས་དང་ལྡན་པ། གོས་དང ། ཟས་དང ། མལ་སྟན་དང ། ན་བའི་གསོས་སྨན་དང ། ཡོ་བྱད་རྣམས་ལ་མི་
14a
༄#། །ཆགས་པ། དགོན་པ་ལ་གནས་པ་མི་གཏོང་བ། ལུས་ལ་ཆེད་ཆེ་བར་མི་བྱེད་པ། སྲོག་ལ་མི་ལྟ་བ། ལུས་གཏོང་པ། སེམས་ཅན་ལ་ཕན་འདོགས་པ། གཉེན་རྣམས་ཡོངས་སུ་སྤོང་བ། སྐྱེས་པའི་ས་རིང་དུ་བྱེད་པ། བྱམས་པ་ལ་ཀུན་ཏུ་བརྟེན་པ། སྙིང་རྗེ་ཐོབ་པ། དགའ་བ་ལ་གནས་པ། བཏང་སྙོམས་སྒོམ་པ། ཉེ་བའི་ཉོན་མོངས་པ་རྣམས་ཡོངས་སུ་གཏོང་པ། བསམ་གཏན་རྣམས་སྒྲུབ་ཅིང་དེ་དག་གི་རོ་མྱོང་བར་མི་བྱེད་པ། གཟུགས་ཀྱི་འདུ་ཤེས་རྣམ་པར་འཇིག་པ། མི་སྡུག་པའི་འདུ་ཤེས་རྙེད་པ། དྲན་པ་མི་གཡེང་བ།་ཕུང་པོ་རྣམས་ཡོངས་སུ་མི་འཛིན་པ། ཁམས་རྣམས་ལ་རློམ་སེམས་མེད་པ། སྐྱེ་མཆེད་རྣམས་ལ་མངོན་པར་མི་ཆགས་པ། རིགས་སྨྲ་བས་སྙེམས་པར་མི་བྱེད་པ། ང་རྒྱལ་ཚར་གཅོད་པ། གཞན་གྱིས་རྙེད་པ་ལ་ཕྲག་དོག་མེད་པ། སེམས་ཅན་ལ་ཕན་པའི་གཞིར་གྱུར་པ། སེམས་ཅན་ཐམས་ཅད་ལ་སེམས་མཉམ་པ། སེམས་ཅན་ཐམས་ཅད་མི་གཏོང་བ། སེམས་ཅན་ཐམས་ཅད་ཡོངས་སུ་གྲོལ་བར་བྱེད་པ། སེམས་ཅན་ཐམས་ཅད་ལ་བདག་ཏུ་འདུ་ཤེས་པ། སེམས་ཅན་ཐམས་ཅད་ལ་མར་འདུ་ཤེས་པ། ཕར་འདུ་ཤེས་པ།་བུར་འདུ་ཤེས་པ། གཉེན་དུ་འདུ་ཤེས་པ། སེམས་ཅན་ཐམས་ཅད་ལ་ཉོན་མོངས་པ་མེད་པར་འདུ་ཤེས་པ། དངོས་པོ་ཐམས་ཅད་ཡོངས་སུ་མི་འཛིན་པ། ཚུལ་ཁྲིམས་
14b
མཆོག་ཏུ་མི་འཛིན་པ། ཏིང་ངེ་འཛིན་ལ་ངེས་པར་སྟེན་པ། མང་དུ་ཐོས་པ་འདོད་ཅིང་དེས་ཀྱང་རློམ་སེམས་སུ་མི་བྱེད་པ། ཚུལ་ཁྲིམས་ཀྱི་ཕུང་པོ་ལ་སྐྱོན་མེད་པ། ཏིང་ངེ་འཛིན་གྱི་ཕུང་པོ་ལ་གཡོ་བ་མེད་པ། ཆོས་རྣམས་ལ་ཐེ་ཚོམ་མེད་པ། སངས་རྒྱས་དང་མཐུན་པ། ཆོས་མི་སྤོང་བ། དགེ་འདུན་མི་འབྱེད་པ། ཕྲ་མའི་ཚིག་སྤོང་བ། འཕགས་པ་རྣམས་ཀྱི་དྲུང་དུ་ཉེ་བར་འགྲོ་ཞིང་དེ་དག་ལ་བསྙེན་བཀུར་བྱེད་པ། བྱིས་པ་རྣམས་རྣམ་པར་སྤོང་བ། འཇིག་རྟེན་པའི་གཏམ་ལ་མངོན་པར་མི་དགའ་ཞིང་མི་འདོད་ལ་རིང་དུ་བྱེད་པ། འཇིག་རྟེན་ལས་འདས་པའི་གཏམ་ལ་མངོན་པར་དགའ་ཞིང་འདོད་ལ་འདུན་ཅིང་སྟེན་པ། གཏམ་རྒྱུད་མ་ཡིན་པ་སྤོང་བ། དགའ་བར་བྱེད་པའི་ཆོས་དྲུག་ལ་བརྟེན་པ། སྙེན་པ་རྣམས་སྨྲ་བ། སྒྲིབ་པ་ལྔ་སྤོང་བ། རྣམ་པར་གྲོལ་བའི་སྐྱེ་མཆེད་ལྔ་ལ་བརྟེན་པ། ཕུང་པོ་ལྔ་ཡོངས་སུ་ཤེས་པ། མི་དགེ་བ་བཅུའི་ལས་ཀྱི་ལམ་རྣམ་པར་སྤོང་བ། དགེ་བ་བཅུའི་ལས་ཀྱི་ལམ་སྒོམ་པ། སྟོབས་བཅུ་སྒྲུབ་པ། ཀུན་ནས་མནར་སེམས་ཀྱི་དངོས་པོ་དགུ་རྣམ་པར་སྦྱོང་བ། འདུ་ཤེས་དགུ་རྣམ་པར་འཇིག་པ། ལེ་ལོའི་དངོས་པོ་བརྒྱད་རྣམ་པར་སྤོང་བ། བརྩམ་པའི་དངོས་པོ་བརྒྱད་ལ་ངེས་པར་བརྟེན་པ། ཟིལ་གྱིས་གནོན་པའི་སྐྱེ་མཆེད་བརྒྱད་ལ་ཀུན་ཏུ་བརྟེན་པ། རྣམ་པར་གྲོལ་བ་བརྒྱད་སྒོམ་པ། སྐྱེས་བུ་ཆེན་པོའི་རྣམ་པར་རྟོག་པ་བརྒྱད་ཐོབ་པ། འཕགས་པའི་ལམ་ཡན་ལག་བརྒྱད་པ་དང་
15a
༄#། །མཐུན་པ། བསམ་གཏན་ལ་མི་ཆགས་པ། ཐོས་པས་རློམ་སེམས་མི་བྱེད་པ། ང་རྒྱལ་བཅོམ་པ། ཆོས་ཉན་པར་འདོད་པ། ཆོས་འདོད་པ། ཆོས་དོན་དུ་གཉེར་བ། ཆོས་ལ་འདུན་པ། ཆོས་ལ་ཕྱོགས་པ། ཆོས་ལ་འབབ་པ། ཆོས་ལ་གཞོལ་བ། ཆོས་ལ་བརྩོན་པ། བདག་ཏུ་འདུ་ཤེས་པས་རློམ་སེམས་སུ་མི་བྱེད་པ། སེམས་ཅན་དུ་འདུ་ཤེས་པ་སྤོང་བ། སྲོག་ཏུ་འདུ་ཤེས་པ་མི་དམིགས་པ། གང་ཟག་ཏུ་འདུ་ཤེས་པ་ཡོངས་སུ་སྤོང་བ། ཕུང་པོར་འདུ་ཤེས་པ་རྣམ་པར་སེལ་བ། དངོས་པོར་འདུ་ཤེས་པ་ལ་མི་གནས་པ། མྱ་ངན་ལས་འདའ་བ་མི་འདོད་པ། ཕུང་པོ་རྣམས་མི་འདོད་པ། འཁོར་བ་ལ་མི་ཟད་པའི་འཇིགས་པར་འདུ་ཤེས་པ། ཕུང་པོ་རྣམས་ལ་གཤེད་མར་འདུ་ཤེས་པ། ཁམས་རྣམས་ལ་སྤྲུལ་གདུག་པར་འདུ་ཤེས་པ། སྐྱེ་མཆེད་རྣམས་ལ་གྲོང་སྟོང་བར་འདུ་ཤེས་པ། ཁམས་གསུམ་ལ་མི་བདེ་བར་འདུ་ཤེས་པ། མྱ་ངན་ལས་འདས་པ་ལ་ཕན་ཡོན་དུ་ལྟ་བ། འདོད་པ་རྣམས་ལ་མཆིལ་མའི་ཐལ་བ་ལྟར་སྤོང་བར་འདུ་ཤེས་པ། ཟས་ལ་མི་མཐུན་པར་འདུ་ཤེས་པ། མངོན་པར་འབྱུང་བ་ལ་གཞོལ་བ། ཁྱིམ་ན་གནས་པ་ལ་མངོན་པར་མི་དགའ་བ། བུ་དང་བུ་མོ་རྣམས་ལ་དགྲར་འདུ་ཤེས་པ། ཆུང་མ་ལ་སྲིན་མོར་འདུ་ཤེས་པ། སངས་རྒྱས་ཀྱི་བསྟན་པ་ལ་མི་ཕྱེད་པར་དད་པ། སེམས་ཅན་ཐམས་
15b
ཅད་དང་མི་མཐུན་པ་མེད་པ། འཇིག་རྟེན་གྱི་ཁམས་ཐམས་ཅད་དུ་གནས་པ་མེད་པ། སངས་རྒྱས་ཐམས་ཅད་མངོན་སུམ་དུ་གྱུར་པ། ལེགས་པར་བསྙེན་པར་རྫོགས་ཤིང་ཚངས་པ་ལེགས་པར་སྤྱད་པ། ལུས་ཐམས་ཅད་རྟོགས་པ། མོས་པས་ཡོངས་སུ་དག་པ། ལྷག་པའི་བསམ་པས་དགེ་བ། སེམས་ལས་སུ་རུང་བ། མི་རིགས་པ་ལ་བརྩོན་པ་རྣམས་རྣམ་པར་སྤོང་བ།་རིགས་པར་བརྩོན་པ་རྣམས་ལ་བརྩོན་པ། མཚན་མ་ཐམས་ཅད་རྣམ་པར་སེལ་བ། དུས་གསུམ་མཉམ་པ། སངས་རྒྱས་ཐམས་ཅད་རྗེས་སུ་དྲན་པ། དགེ་བའི་རྩ་བ་ཐམས་ཅད་སྐྱེད་པ།་སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ། ཏིང་ངེ་འཛིན་ཐམས་ཅད་ལ་དབང་བ། སངས་རྒྱས་ཀྱི་སྐུའི་མཚན་ལ་མངོན་པར་མི་ཆགས་པ། ཆོས་ཐམས་ཅད་ལ་མཉམ་པ། འཇིག་རྟེན་དང་མི་རྩོད་པ། བྱ་བ་རྣམས་ལ་མི་མཐུན་པ་མེད་པ། རྟེན་ཅིང་འབྲེལ་བར་འབྱུང་བ་རྟོགས་པ། ངེས་པར་འབྱུང་བའི་ལམ་དེ་བཞིན་གཤེགས་པའི་ས་ལ་བཟོད་པ་ཐོབ་པ། ཆོས་ཀྱི་དབྱིངས་ལ་འཇུག་པ། ནམ་མཁའི་ཁམས་ཡོངས་སུ་ཤེས་པ། སེམས་ཅན་གྱི་ཁམས་ལ་མངོན་པར་མི་ཆགས་པ། མི་སྐྱེ་བ། མི་འགག་པ། གནས་པ་མེད་པ། མྱ་ངན་ལས་འདས་པའི་དབྱིངས་མངོན་སུམ་དུ་གྱུར་པ། ཤེས་རབ་ཀྱི་མིག་རྣམ་པར་སྦྱོང་བ། ཆོས་ཐམས་ཅད་ལ་གཉིས་སུ་མེད་པ། བྱང་ཆུབ་ཀྱི་སེམས་ལ་མཐའ་དང་དབུས་མེད་པ། སེམས་ཀྱི་རྒྱུད་གཅིག་ཏུ་གྱུར་པ།
16a
༄#། །སངས་རྒྱས་ཐམས་ཅད་དང་ཐོགས་པ་མེད་པའི་ཡེ་ཤེས་ལ་འཇུག་པ། ཡེ་ཤེས་ལ་སྒྲིབ་པ་མེད་པ། བྱང་ཆུབ་ཀྱི་ཕྱིར་སེམས་ཡོངས་སུ་སྨིན་པ། སངས་རྒྱས་ཀྱི་ཡེ་ཤེས་གཞན་ལ་རག་མ་ལུས་པ། དགེ་བའི་བཤེས་གཉེན་རྣམས་ལ་སྟོན་པར་འདུ་ཤེས་པ། བྱང་ཆུབ་སེམས་དཔའ་རྣམས་ལ་མི་འབྱེད་པ། བདུད་ཀྱི་ལས་རྣམས་རྣམ་པར་སྤོང་བ། འགྲོ་བ་ཐམས་ཅད་སྤྲུལ་པ་དང་མཚུངས་པ། དེ་བཞིན་གཤེགས་པ་བལྟ་བ་ལ་མིག་ཡོར་དང་མཚུངས་པ། བྱང་ཆུབ་ཀྱི་སེམས་ཡོངས་སུ་ཚོལ་བ། ཕ་རོལ་ཏུ་ཕྱིན་པ་རྣམས་ལ་སེམས་མཉམ་པ། དེ་བཞིན་གཤེགས་པ་རྣམས་བལྟ་བ་ལ་ཡང་དག་པའི་མཐའ་དང་མཉམ་པ། སངས་རྒྱས་ཐམས་ཅད་ལ་ཡོན་ཏན་གྱི་ཆོས་ཐམས་ཅད་མཉམ་པ་འདི་ནི། བཟང་སྐྱོང ། ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཅེས་བྱའོ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་གཉིས་པའོ།། །། བཟང་སྐྱོང ། ཆོས་དེ་རྣམས་ནི། ཏིང་ངེ་འཛིན་དེ་ཡོངས་སུ་སྐྱེད་པར་འགྱུར་ཏེ། བཟང་སྐྱོང ། དེ་ལ་ཏིང་ངེ་འཛིན་གང་ཆོས་དེ་རྣམས་ཀྱིས་ཡོངས་སུ་སྐྱེད་པར་འགྱུར་བའི་ཏིང་ངེ་འཛིན་དེ་གང་ཞེ་ན།་འདི་ལྟ་སྟེ། ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་ཏོ། །བཟང་སྐྱོང ། ད་ལྟར་གྱི་སངས་རྒྱས་མངོན་སུམ་དུ་བཞུགས་པ་ཞེས་བྱ་བའི་ཏིང་ངེ་འཛིན་
16b
དེའང་གང་ཞེ་ན། བཟང་སྐྱོང ། དེ་ལ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་ཚུལ་ཁྲིམས་ཡོངས་སུ་རྫོགས་པར་སྤྱོད་པར་འགྱུར་ལ། དེས་གཅིག་པུ་དབེན་པར་སོང་སྟེ་འདུག་ནས་འདི་སྙམ་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་ཏུ་མེད་དེ་ཕྱོགས་གང་རོལ་ན་གནས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཅིང་བཞུགས་པ་འདི་སྙམ་དུ་སེམས་བསྐྱེད་པར་བྱའོ། །དེས་ཇི་སྐད་དུ་ཐོས་པའི་རྣམ་པས་སངས་རྒྱས་ཀྱི་ཞིང་འདི་ནས་ནུབ་ཕྱོགས་ལོགས་སུ་སངས་རྒྱས་ཀྱི་ཞིང་བྱེ་བ་ཕྲག་འབུམ་འདས་པ་ན་འཇིག་རྟེན་གྱི་ཁམས་བདེ་བ་ཅན་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ། ད་ལྟར་བྱང་ཆུབ་སེམས་དཔའི་ཚོགས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ་བཞུགས་སོ། །འཚོའོ། །གཞེས་སོ། །ཆོས་ཀྱང་སྟོན་ཏོ་སྙམ་དུ་ཡིད་ལ་བྱེད་དེ། དེས་ཀྱང་སེམས་མ་གཡེངས་པས་དེ་བཞིན་གཤེགས་པ་ཡིད་ལ་བྱེད་དོ། །བཟང་སྐྱོང ། འདི་ལྟ་སྟེ། དཔེར་ན། སྐྱེས་པའམ། བུད་མེད་གང་ལ་ལ་ཞིག་ཉལ་བའི་རྨི་ལམ་དུ་གཟུགས་ཀྱི་རྣམ་པ་མཐོང་སྟེ། དངུལ་ལམ། གསེར་རམ། མཛའ་བཤེས་སམ། ཉེ་དུའམ། སྣག་གི་གཉེན་མཚམས་སམ། མཛའ་བོ་དང ། ཡིད་དུ་འོང་བ་དང ། སྡུག་པ་དང ། མི་མཐུན་པ་མེད་པ་དག་མཐོང་ལ། དེ་རྨི་ལམ་
17a
༄#། །ན་དེ་དག་དང་ལྷན་ཅིག་ཏུ་རྩེ་ཞིང་དགའ་ལ་དགའ་མགུར་སྤྱོད་ཅིང་སྨྲ་བ་ཀུན་ཏུ་སྨྲ་བར་རྨིས་པ་ལས་དེ་སད་ནས་ཇི་ལྟར་མཐོང་བ་དང ། ཐོས་པ་དང ། བྱེ་བྲག་ཕྱེད་པ་དང ། རྣམ་པར་ཤེས་པ་དང ། སྨྲས་པ་དང ། ཀུན་ཏུ་སྨྲས་པ་དེ་ཐམས་ཅད་གཞན་ལའང་བརྗོད་ཅིང ། དེ་རྨི་ལམ་གྱི་མཚན་མ་རྗེས་སུ་དྲན་པས་མཆི་མ་ཀློག་པར་བྱེད་པ་དེ་བཞིན་དུ། བཟང་སྐྱོང ། བྱང་ཆུབ་སེམས་དཔའ་མ། ཁྱིམ་པའམ། རབ་ཏུ་བྱུང་བའང་རུང་གཅིག་ཏུ་དབེན་པར་སོང་སྟེ་འདུག་ལ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཇི་སྐད་དུ་ཐོས་པའི་རྣམ་པས་ཡིད་ལ་བྱས་ཏེ་ཚུལ་ཁྲིམས་ཀྱི་ཕུང་པོ་ལ་སྐྱོན་མེད་ཅིང ། དྲན་པ་གཡེང་བ་མེད་པར་ཉིན་ཞག་གཅིག་གམ། གཉིས་སམ། གསུམ་མམ། བཞིའམ། ལྔའམ། དྲུག་གམ། ཉིན་ཞག་བདུན་དུ་ཡིད་ལ་བྱའོ། །དེ་གལ་ཏེ་ཉིན་ཞག་བདུན་དུ་སེམས་མི་གཡེང་བར་དེ་བཞིན་གཤེགས་པ་ཚེ་དཔག་མེད་ཡིད་ལ་བྱེད་པ་དེ་ཉིན་ཞག་བདུན་ཡོངས་སུ་ཚང་སྟེ་འདས་ནས་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་མཐོང་ངོ ། །དེ་གལ་ཏེ་ཉིན་མོ་བཅོམ་ལྡན་འདས་དེ་མ་མཐོང་ན། དེ་ཉལ་བའི་རྨི་ལམ་དུ་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེའི་ཞལ་སྟོན་ཏོ། །བཟང་སྐྱོང ། འདི་ལྟ་སྟེ། དཔེར་ན། བུད་མེད་དམ་སྐྱེས་པ་ཉལ་བའི་རྨི་ལམ་ན་བདག་ཉིད་ཁྱིམ་ན་
17b
འདུག་པར་ཡང་མི་ཤེས། ཕྱོགས་ན་འདུག་པར་ཡང་མི་ཤེས་ཤིང ། དེའི་མིག་གི་དབང་པོ་ལ་རྩིག་པས་སྒྲིབ་པར་ཡང་མི་བྱེད། མུན་པ་དང ། རབ་རིབ་ཏུའང་མི་བྱེད་པ་དེ་བཞིན་དུ། བཟང་སྐྱོང ། བྱང་ཆུབ་སེམས་དཔའ་སེམས་དཔའ་ཆེན་པོ་དེའང་ཇི་ལྟར་འཇིག་རྟེན་གྱི་བར་དག་གིས་སྒྲིབ་པར་ཡང་མི་བྱེད། རིའི་རྒྱལ་པོ་རི་རབ་དང ། རིའི་རྒྱལ་པོ་ཁོར་ཡུག་དང ། ཁོར་ཡུག་ཆེན་པོ་དང ། དེ་བཞིན་དུ་གཞན་ཡང་རི་ནག་པོ་རྣམས་ཀྱིས་མིག་གི་དབང་པོ་ལ་སྒྲིབ་པར་མི་བྱེད་པ་དེ་ལྟ་དེ་ལྟར་སེམས་བསྐྱེད་དེ། བྱང་ཆུབ་སེམས་དཔའ་དེ་ལྷའི་མིག་ཐོབ་པས་དེ་བཞིན་གཤེགས་པ་མཐོང་བའང་མ་ཡིན། ལྷའི་རྣ་བའི་ཁམས་ཐོབ་པས། དམ་པའི་ཆོས་ཉན་པའང་མ་ཡིན། རྫུ་འཕྲུལ་གྱི་སྟོབས་ཐོབ་པས། འཇིག་རྟེན་གྱི་ཁམས་དེར་སྐད་ཅིག་ཏུ་འགྲོ་བའང་མ་ཡིན་གྱི། བཟང་སྐྱོང ། བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་འདི་ཉིད་ན་གནས་བཞིན་དུ། བཅོམ་ལྡན་འདས་དེ་བཞིན་གཤེགས་པ་ཚེ་དཔག་ཏུ་མེད་དེ་མཐོང་ཞིང་བདག་ཉིད་འཇིག་རྟེན་གྱི་ཁམས་དེ་ན་འདུག་པ་སྙམ་དུ་ཤེས་ལ་ཆོས་ཀྱང་ཉན་ཏོ། །འཆད་པ་ཐོས་ནས་ཀྱང་ཆོས་དེ་དག་ཀུན་འཛིན་ཏོ། །ཀུན་ཆུབ་པར་བྱེད་དོ། །འཛིན་པར་བྱེད་དོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ལ་བཀུར་སྟིར་བྱེད་དོ། །བླ་མར་བྱེད་དོ། །རི་མོར་བྱེད་དོ། །མཆོད་པར་བྱེད་དོ། །བྱང་ཆུབ་སེམས་དཔའ་
18a
༄#། །དེའི་ཏིང་ངེ་འཛིན་དེ་ལས་ལངས་ནས་ཀྱང་ཇི་སྐད་དུ་ཐོས་པ་དང ། ཇི་ལྟར་བཟུང་བ་དང ། ཇི་ལྟར་ཀུན་ཆུབ་པར་བྱེད་པའི་ཆོས་དེ་དག་གཞན་ལའང་རྒྱ་ཆེར་ཡང་དག་པར་འཆད་དོ།། །།བམ་པོ་གཉིས་པ། བཟང་སྐྱོང ། འདི་ལྟ་སྟེ། དཔེར་ན། སྐྱེས་བུ་ཞིག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་འདུག་པ་ལས་ཡངས་པ་ཅན་གྱི་གྲོང་ཁྱེར་ན་སྨད་ཚོང་མ་ཡིད་བཟང་ཞེས་བྱ་བ་ཞིག་ཡོད་པར་ཐོས་སོ། །སྐྱེས་བུ་གཉིས་པས་ནི། སྨད་ཚོང་མ་ཨ་མྲ་སྐྱོང་ཞེས་བྱ་བ་ཞིག་ཡོད་པར་ཐོས་སོ། །སྐྱེས་བུ་གསུམ་པས་ནི། སྔོན་གྱི་སྨད་ཚོང་མ་ཨུཏྤ་ལའི་མདོག་ཅེས་བྱ་བ་ཡོད་པར་ཐོས་སོ། །དེ་རྣམས་ཀྱིས་དེ་དག་ཐོས་ནས་སོ་སོར་སོ་སོ་ལ་སེམས་ཆགས་པར་གྱུར་མོད་ཀྱི། སྐྱེས་བུ་དེ་རྣམས་ཀྱིས་སྨད་ཚོང་མ་དེ་རྣམས་མཐོང་བ་ནི། མ་ཡིན་ཏེ། མིང་དང ། གཟུགས་དང ། ཁ་དོག་ཙམ་ཞིག་ཐོས་པས། འདོད་ཆགས་ཀྱི་སེམས་བསྐྱེད་པར་གྱུར་ཏོ། །དེ་དག་ཕྱི་ཕྱིར་ཞིང་དེ་ཡིད་ལ་བྱེད་བཞིན་དུ་ཉལ་བ་དང ། རྨི་ལམ་དུའང་སྨད་ཚོང་མ་དེ་དག་གི་དྲུང་དུ་བདག་ཅག་དོང་བ་སྙམ་དུ་ཤེས་ཏེ། ཇི་ལྟར་སྐྱེས་བུ་དེ་དག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་འཁོད་ཅིང་སྔོན་མ་ཉལ་བར་དེ་ལྟ་ད་ལྟར་འདོད་ཆགས་དང་ལྡན་པའི་སེམས་སྐྱེད་པ་དེ་བཞིན་དུ། སྐྱེས་བུ་དེ་དག་ཉལ་ནས་ཀྱང་རྨི་ལམ་ན་སྨད་ཚོང་མ་དེ་དག་མཐོང་ཞིང་ཕན་ཚུན་སྤྲད་དེ་འཁྲིག་པའི་ཆོས་ལ་བརྟེན་ནས་
18b
འཁྲིག་པ་ལ་དད་པ་དེ་དང་ཡང་བྲལ་བར་གྱུར་པར་རྨིས་སོ། །དེ་དག་སད་ནས་ཇི་ལྟར་མཐོང་བ་དང ། ཐོས་པ་དང ། ཤེས་པ་དང ། རྟོགས་པའི་རྨི་ལམ་ན་མྱོང་བ་རྗེས་སུ་དྲན་ནས་བཟང་སྐྱོང ། ཁྱོད་གང་ན་བ་དེར་དོང་སྟེ་ཕྱིན་ནས་ཁྱོད་ལ་དོན་དེ་དག་བརྗོད་དོ། །ཁྱོད་ཀྱིས་དོན་དེ་དག་ཐོས་ནས་ལུང་འདི་ཉིད་ཀྱིས་ཅི་ནས་ཀྱང་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་དེ་ལྟར་ཆོས་བསྟན་ཏོ། །ངས་ཀྱང་སྐྱེས་བུ་དེ་དག་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལེགས་པར་སད་པ་ཞེས་བྱ་བ་རྣམས་སུ་འགྱུར་རོ། །ཞེས་ལུང་སྟོན་ཏོ། །སྐྱེས་བུ་དེ་དག་བཟོད་པ་རྙེད་ཀྱང་ང་དུང་མངོན་གྱི་མཚན་མ་དེ་དག་མཐོང་ཞིང་རྗེས་སུ་དྲན་ནོ། །བཟང་སྐྱོང ། དེ་བཞིན་དུ་བྱང་ཆུབ་སེམས་དཔའ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་དང་ལྡན་པ་དེ་ནི། འཇིག་རྟེན་གྱི་ཁམས་འདི་ཉིད་ན་འདུག་བཞིན་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ཐོས་སོ། །དེས་དེ་བཞིན་གཤེགས་པ་དེའི་མཚན་དང ། གཟུགས་དང ། ཡོན་ཏན་ཙམ་ཞིག་ཐོས་ནས་སེམས་མི་གཡེང་བར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་དེ་ཡང་དག་པར་རྗེས་སུ་དྲན་པར་བྱེད་དོ། །དེའི་
19a
༄#། །ཕྱི་ཕྱིར་ཞིང་ཡིད་ལ་བྱེད་པས་དེ་བཞིན་གཤེགས་པ་དེ་མཐོང་ངོ ། །ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་དེ་ལ་གནས་ཏེ། དེས་དེ་བཞིན་གཤེགས་པ་དེ་མཐོང་ནས་བཅོམ་ལྡན་འདས། ཆོས་གང་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཁམས་འདིར་སྐྱེ་བར་འགྱུར་ཞེས་ཞུ་བ་ཞུའོ། །དེ་བཞིན་དུ་སངས་རྒྱས་ཀྱི་ཞིང་གང་དང་གང་དུ་སྐྱེ་བར་འདོད་པ་དེའི་ཚེ་དེ་བཞིན་གཤེགས་པ་ལ་ཞུའོ། །དེ་སྐད་ཞུས་ནས་བཅོམ་ལྡན་འདས་དེ་བཞིན་གཤེགས་པ་ཚེ་དཔག་མེད་དེས་བྱང་ཆུབ་སེམས་དཔའ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། སངས་རྒྱས་རྗེས་སུ་དྲན་པ་ཀུན་ཏུ་བསྟེན། ངེས་པར་བསྟེན་ཅིང་བསྒོམས་ལ་མང་དུ་བྱས་ན། འཇིག་རྟེན་གྱི་ཁམས་འདིར་སྐྱེ་བར་བྱེད་དོ། །སངས་རྒྱས་རྗེས་སུ་དྲན་པ་ཀུན་ཏུ་བསྟེན། ངེས་པར་བསྟེན་ཅིང་བསྒོམས་ལ་མང་དུ་བྱས་ན། སངས་རྒྱས་ཀྱི་ཞིང་འདིར་སྐྱེ་བར་འགྱུར་རོ། །རིགས་ཀྱི་བུ། དེ་ལ་སངས་རྒྱས་རྗེས་སུ་དྲན་པ་དེ་གང་ཞེ་ན། འདི་ལྟ་སྟེ། གང་དེ་བཞིན་གཤེགས་པ་ཡིད་ལ་བྱེད་པ་སྟེ། འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ།
19b
ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང ། གསེར་གྱི་མདོག་ལྟ་བུའི་སྐུ་དང་ལྡན་པ། གསེར་གྱི་གཟུགས་འཚེར་ཞིང་གསལ་ལ་ལེགས་པར་གནས་པ་དང་འདྲ་བ། རིན་པོ་ཆེའི་མཆོད་སྡོང་ལྟར་ཤིན་ཏུ་བརྒྱན་པ། ཉན་ཐོས་ཀྱི་དགེ་འདུན་གྱི་ནང་ན་ཆོས་ཀྱང་སྟོན་ཏེ། ཅི་ནས་ཀྱང་ཆུད་མི་ཟ་བ་དེ་ལྟར་སྟོན་ཏོ། །ཅི་ཞིག་ཆུད་མི་ཟ་ཞེ་ན། ས་ཆུད་མི་གཟོན་ཏོ། །ཆུ་དང ། མེ་དང ། རླུང་དང ། འབྱུང་པོ་དང ། ལྷ་དང ། བྲམ་ཟེ་དང ། སྐྱེ་རྒུའི་བདག་པོ་ཆུད་མི་གཟོན་ཏོ། །གཟུགས་ཆུད་མི་གཟོན་ཏོ། །ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ཆུད་མི་གཟོན་ཏོ། །དེ་བཞིན་གཤེགས་པ་རློམ་སེམས་སུ་མི་བྱེད། མི་དམིགས། མངོན་པར་མི་ཆགས། ཡང་དག་པར་མི་ཤེས། མི་རྟོག། རྣམ་པར་མི་རྟོག་།ཡང་དག་པར་རྗེས་སུ་མི་མཐོང་སྟེ། གང་དེ་ལྟར་དེ་བཞིན་གཤེགས་པ་མི་དམིགས་པར་ཡིད་ལ་བྱེད་པས་སྟོང་པ་ཉིད་ཀྱི་ཏིང་ངེ་འཛིན་ཐོབ་པ་དེ་ནི། སངས་རྒྱས་རྗེས་སུ་དྲན་པ་ཞེས་བྱ་སྟེ། བྱང་ཆུབ་སེམས་དཔའ་དེ་ཏིང་ངེ་འཛིན་དེ་བསྒོམས་ཤིང་ཏིང་ངེ་འཛིན་དེ་ལ་མཉམ་པར་བཞག་ནས་ཏིང་ངེ་འཛིན་དེ་ལས་ལངས་ཏེ་བཟང་སྐྱོང ། ཁྱོད་གང་ན་བ་དེར་སོང་ནས་ཕྱིན་པ་དང་ཏིང་ངེ་འཛིན་དེ་བརྗོད་དོ། །བཟང་སྐྱོང ། དེ་ལ་ཁྱོད་ཀྱིས་ཅི་ནས་ཀྱང་བྱང་ཆུབ་སེམས་དཔའ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་དེ་
20a
༄#། །ལྟར་ཆོས་སྟོན་ཏོ། །དེ་ལ་ངས་ཀྱང་སྐྱེས་བུ་དེ་ནི། མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོབས་པ་རྙེད་པ་ཞེས་བྱ་བར་འགྱུར་རོ། །ཞེས་ལུང་སྟོན་ཏོ། །བཟང་སྐྱོང ། ཁྱོད་ཉིད་དང ། གནས་བརྟན་འོད་སྲུང་ཆེན་པོ་དང ། བྱང་ཆུབ་སེམས་དཔའ་དབང་པོ་བྱིན་དང ། བྱང་ཆུབ་སེམས་དཔའ་མཚམས་བཟང་དང ། གཞན་ཡང་བྱང་ཆུབ་སེམས་དཔའ་གང་དག་གིས་ཏིང་ངེ་འཛིན་འདི་ཐོབ་པ་རྣམས་ཏིང་ངེ་འཛིན་འདི་ལ་དབང་དུ་གྱུར་པ་ཡིན་ཏེ། བཟང་སྐྱོང ། སྔོན་བྱུང་བ་འདས་པའི་དུས་ན་སྐྱེས་བུ་གཅིག་ཅིག་དགོན་པའི་མྱ་ངམ་ཞིག་ཏུ་སོང་བ་དང ། དེ་བཀྲེས་ཤིང་སྐོམ་ནས་རྨུགས་པ་དང ། གཉིད་ཀྱིས་ནོན་ཏེ་ཉལ་བ་དང ། རྨི་ལམ་ན་བཟའ་བ་དང ། བཏུང་བ་མང་པོ་ཞིག་རྙེད་དོ། །རྙེད་ནས་ཀྱང་ཇི་ཙམ་ཆོག་པར་ཟོས་ཏེ་བཀྲེས་པ་དང ། སྐོམ་པ་དེ་དག་ཀྱང་མེད་པར་གྱུར་ཏོ། །དེ་སད་པ་དང ། ལུས་དང་ལྟོ་མ་རྒྱས་པར་གྱུར་ནས་དེ་འདི་སྙམ་དུ་འདི་ལྟ་སྟེ། རྨི་ལམ་དང་འདྲ་བ་དེ་ལྟ་བུའི་ཆོས་ཤིག་ཡོད་དོ་སྙམ་སྟེ། དེ་དེ་ལྟར་རྟོགས་པས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །བཟང་སྐྱོང ། དེ་བཞིན་དུ་བྱང་ཆུབ་སེམས་དཔའ་ཁྱིམ་པའམ། རབ་ཏུ་བྱུང་བའང་རུང ། ཕྱོགས་གང་དང་གང་ན་དེ་བཞིན་གཤེགས་པ་བཞུགས་པར་ཐོས་པའི་ཕྱོགས་དེ་དང་
20b
དེ་ལོགས་སུ་དེ་བཞིན་གཤེགས་པ་དེ་ཡིད་ལ་བྱས་ན། དེས་སངས་རྒྱས་མཐོང་བ་ཐོབ་བོ། །དེས་དངོས་པོའི་འདུ་ཤེས་སུ་མི་བྱའི། ནམ་མཁའི་འདུ་ཤེས་སུ་བྱ་སྟེ། དེ་ནམ་མཁའི་འདུ་ཤེས་ལ་ཤིན་ཏུ་གནས་ཤིང་སངས་རྒྱས་ཀྱི་འདུ་ཤེས་ཤིན་ཏུ་ཡིད་ལ་བྱས་པས། དེ་བཞིན་གཤེགས་པ་བཻཌཱུརྱའི་སྐུ་གཟུགས་ལྟ་བུ་བཟང་པོ་བྱང་ཆུབ་སེམས་དཔའ་དེས་མངོན་སུམ་དུ་མཐོང་བར་འགྱུར་ཏེ། བྱང་ཆུབ་སེམས་དཔའ་དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལྟ་བུ་དེ་མཐོང་བར་འགྱུར་རོ། །བཟང་སྐྱོང ། འདི་ལྟ་སྟེ། དཔེར་ན། སྐྱེས་བུ་ལ་ཞིག་རང་སྐྱེས་པའི་ཡུལ་ནས་ལྗོངས་ཀྱི་ཕྱོགས་གཞན་ཞིག་ཏུ་སོང་སྟེ་ཕྱིན་པ་དང ། རང་སྐྱེས་པའི་ཡུལ་དེ་རྗེས་སུ་དྲན་ནས་ཇི་ལྟར་མཐོང་བ་དང ། ཐོས་པ་དང ། ཤེས་པ་དང ། རྟོགས་པའི་ཆོས་རྣམས་ཡིད་ལ་བྱེད་པ་ལས་རྨུགས་པ་དང ། གཉིད་ཀྱིས་ནོན་ཏེ། དེ་ཉལ་བ་དང ། རྨི་ལམ་ན་རང་སྐྱེས་པའི་ཡུལ་དུ་སོང་ནས་དེ་ན་བདག་ཉིད་འདུག་པ་སྙམ་དུ་ཤེས་ཤིང ། ཇི་ལྟར་སྔོན་མཐོང་བ་དང ། ཐོས་པ་དང ། བྱེ་བྲག་ཕྱེད་པ་དང ། རྣམ་པར་ཤེས་པ་དེ་དག་ཀྱང་མཐོང་ངོ ། །དེ་ན་འགྲོ་ཞིང་ལྡོག་པ་དག་ཀྱང་བྱེད་དོ། །དེ་སད་པ་དང་གཉེན་འདབ་དང ། མཛའ་བཤེས་དང ། ཉེ་དུ་དང ། སྣག་གི་གཉེན་མཚམས་རྣམས་ཀྱི་ནང་དུ་ང་ནི། འདི་ལྟར་སོང་སོང་ངོ ། །ངས་ནི། འདི་དག་མཐོང་ངོ ། །དེར་ངས་ནི། འདི་དག་མྱོང་ངོ ། །ཞེས་དོན་དེ་དག་ཀྱང་བརྗོད་དོ། །བཟང་
21a
༄#། །སྐྱོང།་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་པའམ། རབ་ཏུ་བྱུང་བའང་རུང་ཕྱོགས་གང་དང་གང་ན་དེ་བཞིན་གཤེགས་པ་བཞུགས་པ་ཐོས་པའི་ཕྱོགས་དང་དེ་ལོགས་སུ་དྲན་པ་དང་ལྡན་ཞིང ། སེམས་གཡེང་བ་མེད་པས་སངས་རྒྱས་མཐོང་བ་ཐོབ་པར་བྱ་བའི་ཕྱིར་དེ་བཞིན་གཤེགས་པ་དེ་ཡིད་ལ་བྱའོ། ། དེ་ལྟར་བྱང་ཆུབ་སེམས་དཔའ་དེས་དེ་བཞིན་གཤེགས་པ་བཻ་ཌཱུརྱའི་སྐུ་གཟུགས་བཟང་པོར་གནས་པ་མཐོང་པར་འགྱུར་རོ། །བཟང་སྐྱོང ། འདི་ལྟ་སྟེ། དཔེར་ན། དགེ་སློང་མི་སྡུག་པ་སྒོམ་པ་ཞིག་གིས་མདུན་ན་རྣམ་པར་བམ་པའི་གཟུགས་རྣམས་མཐོང་ཞིང་རྣམ་པར་སྔོས་པ་དང ། རྣམ་བར་རྣགས་པ་དང ། རྣམ་པར་དམར་བ་དང ། རྣམ་པར་ཟོས་པ་དང ། ཤ་རྣམས་པགས་པའམ། ཤ་དང་ཁྲག་མེད་པའམ། དཀར་པོའམ། ཁ་དོག་དུང་དང་འདྲ་བའམ། ཀེང་རུས་ཤིག་མདུན་དུ་མཐོང་ན། རྣམ་པར་སྔོས་པ་ནས་ཀེང་རུས་ཀྱི་བར་དུ་དེ་དག་གང་ནས་ཀྱང་མ་འོངས། གང་དུའང་མ་སོང་ངོ ། །དེ་དག་སུས་ཀྱང་མ་བྱས། སུས་ཀྱང་མ་བགགས་ཏེ། བཟང་སྐྱོང ། འོན་ཀྱང་དགེ་སློང་དེའི་སེམས་རྩེ་གཅིག་པའི་དབང་གིས་མདུན་ན་ཀེང་རུས་འདུག་པ་མཐོང་ངོ ། །བཟང་སྐྱོང ། དེ་བཞིན་དུ་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་ཏིང་ངེ་འཛིན་འདི་ལ་གནས་པ་རྣམས་ཕྱོགས་གང་དང་གང་ན་དེ་
21b
བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་པའི་ཕྱོགས་དེ་དང་དེ་ལོགས་སུ་སངས་རྒྱས་མཐོང་བ་འཐོབ་པར་བྱ་བའི་ཕྱིར་ཡིད་ལ་བྱེད་དོ། །ཕྱོགས་དེ་དང་དེ་ལོགས་སུ་ཡིད་ལ་བྱས་པས་དེས་ཕྱོགས་དེ་དང་དེ་ལོགས་སུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ངོ ། །དེ་ཅིའི་ཕྱིར་ཞེ་ན། བཟང་སྐྱོང ། འདི་ལྟ་སྟེ། སངས་རྒྱས་མཐོང་བ་འཐོབ་པར་འགྱུར་བ་འདི་ནི། ཏིང་ངེ་འཛིན་འདིའི་རྒྱུ་མཐུན་པ་ཡིན་ནོ། །ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི། སངས་རྒྱས་ཀྱི་མཐུ་དང ། རང་གིས་དགེ་བའི་རྩ་བའི་སྟོབས་བསྐྱེད་པ་དང ། ཏིང་ངེ་འཛིན་ཐོབ་པའི་ཕྱིར་དང ། འདི་དག་གསུམ་ཚོགས་ཤིང་འདུས་པས་དེ་བཞིན་གཤེགས་པ་རྣམས་མཐོང་ཞིང་སྣང་བར་འགྱུར་རོ། །བཟང་སྐྱོང ། འདི་ལྟ་སྟེ། དཔེར་ན། བུད་མེད་དམ། སྐྱེས་པ་གང་ལ་ལ་མགོ་འཁྲུ་ཞིང་རྒྱན་འདོགས་པའི་རང་བཞིན་ཅན་ཞིག་ཡོད་ལ། དེ་འབྲུ་མར་དང་བའི་སྣོད་དམ།་ཆུ་དང་བའི་སྣོད་དམ། ཡོངས་སུ་ཕྱིས་པའི་མེ་ལོང་གི་དཀྱིལ་འཁོར་རམ། མཐིང་བུས་བསྐུས་པའི་ས་ཕྱོགས་ལ་བདག་ཉིད་བལྟ་བར་བསམ་ནས་དེས་དེར་བདག་ཉིད་ཀྱི་གཟུགས་མཐོང་ན། བཟང་སྐྱོང ། དེ་ལ་ཇི་སྙམ་དུ་སེམས། འབྲུ་མར་དང་པའི་སྣོད་དམ། ཆུ་དང་བའི་སྣོད་དམ། ཡོངས་སུ་ཕྱིས་པའི་མེ་ལོང་གི་དཀྱིལ་འཁོར་རམ། མཐིང་བུས་
22a
༄#། །བསྐུས་པའི་ས་ཕྱོགས་དེ་ལ་གང་སྐྱེས་པའམ། བུད་མེད་ཀྱི་གཟུགས་སྣང་བ་དེ་སྐྱེས་པའམ། བུད་མེད་གང་ཡང་དེའི་ནང་དུ་སོང་བའམ། དེའི་ནང་དུ་ཞུགས་པ་ཡོད་དམ། བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས། དེ་ནི། མ་མཆིས་མོད་ཀྱི། བཙུན་པ་བཅོམ་ལྡན་འདས། འབྲུ་མར་དང ། ཆབ་དེ་དང་ཞིང་རྙོག་པ་མ་མཆིས་པའམ། མེ་ལོང་གི་དཀྱིལ་འཁོར་དེ་ལེགས་པར་ཡོངས་སུ་ཕྱིས་པའམ། མཐིང་བུས་བསྐུས་པའི་ས་ཆེན་པོ་དེ་དག་པའི་སླད་དུ་གཟུགས་བརྙན་མདུན་ན་མཆིས་ཏེ། ཆབ་དང ། འབྲུ་མར་དང ། མེ་ལོང་དང ། ས་ཆེན་པོ་དེ་ལས་སྐྱེས་པའམ། བུད་མེད་ཀྱི་ལུས་འབྱུང་བའང་མ་ལགས། གང་ནས་ཀྱང་མ་མཆིས། གང་དུའང་མ་མཆིས། གང་ནས་ཀྱང་མ་སྐྱེས།་གང་དུའང་མ་འགགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། ལེགས་སོ། །ལེགས་སོ། །བཟང་སྐྱོང ། ཁྱོད་ཡང་ལེགས་སོ། །བཟང་སྐྱོང ། དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། གཟུགས་རྣམས་ཤིན་ཏུ་ཡོངས་སུ་དག་པ་ལས་གཟུགས་བརྙན་རྣམས་སྣང་བར་འགྱུར་རོ། །དེ་བཞིན་དུ་བྱང་ཆུབ་སེམས་དཔའ་དེའང་ཏིང་ངེ་འཛིན་འདི་ཤིན་ཏུ་བསྒོམས་པས་ཚེགས་ཆུང་དུས་དེ་བཞིན་གཤེགས་པ་དེ་རྣམས་བྱང་ཆུབ་སེམས་དཔའ་དེས་མཐོང་ངོ ། །མཐོང་ནས་ཀྱང་ཞུ་བ་ཞུ་ཞིང་ཞུས་པ་ལུང་བསྟན་
22b
བས་ཡིད་རངས་པར་འགྱུར་རོ། །དེ་འདི་སྙམ་དུ་དེ་བཞིན་གཤེགས་པ་འདི་ག་ཞིག་ནས་བྱོན་ཏམ། བདག་ག་ཞིག་ཏུ་སོན་ཏམ་སྙམ་པ་ལས། དེས་དེ་བཞིན་གཤེགས་པ་དེ་གང་ནས་ཀྱང་མ་བྱོན་པར་རབ་ཏུ་ཤེས་སོ། །བདག་གི་ལུས་ཀྱང་གང་དུའང་མ་སོང་བར་རབ་ཏུ་འདུ་ཤེས་ནས་དེ་འདི་སྙམ་དུ་ཁམས་གསུམ་པོ་འདི་དག་ནི། སེམས་ཙམ་མོ། །དེ་ཅིའི་ཕྱིར་ཞེ་ན། འདི་ལྟར་བདག་ཇི་ལྟ་ཇི་ལྟར་རྣམ་པར་རྟོག་པ་དེ་ལྟ་དེ་ལྟར་སྣང་ངོ ། །སེམས་དེའང་ནང་ནའང་མེད། ཕྱི་རོལ་ནའང་མེད། གཉི་ག་མེད་པར་ཡང་མི་དམིགས་ཏེ། གཞན་དུ་ན་དམིགས་པ་ལ་བརྟེན་ནས་སྐྱེའོ།། གང་རྟེན་ཅིང་འབྲེལ་པར་འབྱུང་བ་དེ་ནི། དངོས་པོ་མེད་པའོ། །གང་དངོས་པོ་མེད་པ་དེ་ནི། མ་སྐྱེས་པའོ། །གང་མ་སྐྱེས་པ་དེ་ནི། དམིགས་སུ་མེད་པའོ། །གང་དམིགས་སུ་མེད་པ་དེ་ནི། རང་བཞིན་སྟོང་པའོ། །གང་རང་བཞིན་སྟོང་པ་དེ་ནི། གདགས་སུ་མེད་པའོ། །གང་གདགས་སུ་མེད་པ་དེ་ནི། བལྟ་བའམ། རྣམ་པར་ཤེས་པའམ། ཆགས་པར་བྱ་བའམ། བསྟན་པའམ། ཆུད་གཟན་པར་བྱ་བའམ། རབ་ཏུ་གཞག་པར་བྱ་མི་ནུས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སེམས་ཀྱིས་སངས་རྒྱས་བྱེད་པ་སྟེ། །སེམས་ཉིད་ཀྱིས་ཀྱང་མཐོང་བའོ། །སེམས་ཉིད་ང་ཡི་སངས་རྒྱས་ཏེ། །སེམས་ཉིད་དེ་བཞིན་གཤེགས་པའོ། །སེམས་ཉིད་ང་ཡི་ལུས་ཡིན་ཏེ། །སངས་རྒྱས་སེམས་ཀྱིས་མཐོང་བའོ། །སེམས་
23a
༄#། །ཉིད་ང་ཡི་བྱང་ཆུབ་སྟེ། །སེམས་ཉིད་རང་བཞིན་མེད་པའོ། །སེམས་ཀྱིས་སེམས་ནི་མི་ཤེས་ཤིང ། །སེམས་ཀྱིས་སེམས་ནི་མི་མཐོང་ངོ ། །སེམས་སུ་འདུ་ཤེས་མི་ཤེས་ཡིན། །སེམས་སུ་མི་ཤེས་མྱ་ངན་འདའ། །ཆོས་འདི་དག་ནི་སྙིང་པོ་མེད། །རློམ་སེམས་ལས་ནི་ཀུན་བྱུང་སྟེ། །སྟོང་པ་ཉིད་ལས་གང་རློམ་པའི། །རློམ་སེམས་དེ་འདིར་སྟོང་པ་ཡིན།། བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་གསུམ་པའོ།། །།བཟང་སྐྱོང ། ཏིང་ངེ་འཛིན་དེ་ལ་གནས་པའི་བྱང་ཆུབ་སེམས་དཔའ་དེའི་ཡེ་ཤེས་ནི། དེ་ལྟ་བུ་ཡིན་ནོ། །བཟང་སྐྱོང ། ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་འཐོབ་བོ། །བཞི་གང་ཞེ་ན།་འདི་ལྟ་སྟེ། མི་འཕྲོག་པའི་དད་པ་དང ། ཕྱིར་མི་ལྡོག་པའི་བརྩོན་འགྲུས་དང ། གཞན་གྱི་དྲིང་ལ་མི་འཇོག་པའི་ཤེས་རབ་དང ། དགེ་བའི་བཤེས་གཉེན་ལ་བསྙེན་བཀུར་བྱེད་པ་སྟེ།་བཟང་སྐྱོང ། ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་འཐོབ་བོ། ། བཟང་སྐྱོང ། གཞན་ཡང་ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཞི་གང་ཞེ་ན། འདི་ལྟ་སྟེ། ཟླ་བ་གསུམ་གྱི་བར་དུ་
23b
སེ་གོལ་བརྡབས་པ་ཙམ་ཡང་བདག་གི་འདུ་ཤེས་མི་སྐྱེད་པ་དང ། ཟླ་བ་གསུམ་གྱི་བར་དུ་སེ་གོལ་བརྡབས་པ་ཙམ་ཡང་རྨུགས་པ་དང་གཉིད་ཀྱིས་མི་ནོན་པ་དང ། བཤང་བ་དང ། གཅི་བ་བྱེད་པ་མ་གཏོགས་པར་ཟླ་བ་གསུམ་གྱི་བར་དུ་བརྩོན་འགྲུས་བརྩམས་ཏེ་འཆག་པ་ལ་ཞུགས་ནས་ས་ལ་མི་འདུག་པ་དང ། གཞན་དག་ལའང་ཆོས་ཀྱི་སྦྱིན་པ་རྒྱ་ཆེར་གཏོང་པའི་སྟེང་དུ་རྙེད་པ་དང ། བཀུར་སྟི་དང ། ཚིགས་སུ་བཅད་པ་ལ་མི་རེ་བ་སྟེ། བཟང་སྐྱོང ། ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། ། བཟང་སྐྱོང ། གཞན་ཡང་ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཞི་གང་ཞེ་ན། འདི་ལྟ་སྟེ། སངས་རྒྱས་བལྟ་བར་སེམས་ཅན་རྣམས་ལ་སྐུལ་བ་དང ། ཆོས་མཉན་པར་སེམས་ཅན་རྣམས་ལ་སྐུལ་བ་དང ། བྱང་ཆུབ་ཀྱི་སེམས་སྐྱེད་པར་སེམས་ཅན་རྣམས་ལ་སྐུལ་བ་དང ། ཕྲག་དོག་མེད་པ་སྟེ། བཟང་སྐྱོང ། ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང ། གཞན་ཡང་ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཞི་གང་ཞེ་ན། འདི་ལྟ་སྟེ། ཏིང་ངེ་འཛིན་འདི་འདོད་པས། དེ་བཞིན་གཤེགས་པའི་སྐུ་གཟུགས་བྱེད་དུ་བཅུག་སྟེ། ཐ་ན་རི་མོར་ཡང་འབྲིར་འཇུག་
24a
༄#། །པ་དང ། ཏིང་ངེ་འཛིན་འདི་འདོད་པས། ཏིང་ངེ་འཛིན་འདི་ཡུན་རིང་དུ་གནས་པར་བྱ་བའི་ཕྱིར་ཅི་ནས་ཀྱང་ཏིང་ངེ་འཛིན་འདི་འཛིན་པར་ལེགས་པར་བྲིས་ཤིང ། གླེགས་བམ་སྦྱིན་པ་དང ། མངོན་བའི་ང་རྒྱལ་ཅན་གྱི་གང་ཟག་རྣམས་མངོན་པའི་ང་རྒྱ་མེད་པའི་ཆོས་འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཇོག་པ་དང ། དེ་བཞིན་གཤེགས་པའི་བསྟན་པ་བསྲུང་བ་དང ། སྦ་བ་དང ། ཡང་དག་པར་གཟུང་བའི་ཕྱིར་གནས་པ་སྟེ། བཟང་སྐྱོང ། ཆོས་བཞི་པོ་དེ་དག་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །དེ་ནས་དེའི་ཚེ་བཅོམ་ལྡན་འདས་གྱིས་ཚིགས་སུ་བཅད་པ་འདི་དག་གསུངས་སོ། །བདེ་གཤེགས་བསྟན་པ་ལ་ནི་དད་པ་སྐྱེད། །སྟོང་པ་ཉིད་ཀྱི་ཆོས་བཤད་མ་སྨོད་ཅིག་།བརྩོན་འགྲུས་བརྩམས་ཤིང་གཉིད་ནི་སྤངས་བྱས་ཏེ། །ཟླ་གསུམ་ཚད་བར་ནམ་ཡང་མ་འདུག་ཅིག་།རྙེད་དང་བཀུར་སྟི་ཚིགས་བཅད་མི་རྟེན་པར། །བདེ་གཤེགས་གསུངས་པའི་ཆོས་ནི་བཤད་བྱ་ཞིང ། །མཚུངས་པ་མེད་པའི་བསྟན་པ་རྒྱས་པར་བྱ། །རྟེན་པ་མེད་ན་ཆོས་འདི་ཐོབ་པར་འགྱུར། །ཕྲག་དོག་མེད་ཅིང་ཁྲོ་བ་བསྐྱེད་མི་བྱ། །འདོད་ཆགས་སྤངས་ཤིང་སེམས་ནི་རྣམ་གྲོལ་ལ། །མཉམ་པར་བཞག་ཅིང་བསམ་གཏན་དགའ་བྱས་ཏེ། །སྦྱོར་བར་བྱེད་ན་ཆོས་འདི་འཐོབ་པར་འགྱུར།
24b
གསེར་མདོག་བསོད་ནམས་བརྒྱ་ཡི་མཚན་མངའ་ལ། །མཛེས་ཤིང་ཀུན་ནས་ཡོངས་སུ་རྒྱས་པར་གྱུར། །གསེར་གྱི་གཟུགས་བཞིན་དུ་ནི་བལྟ་སྡུག་པའི། །བསོད་ནམས་མཆོག་མཚན་སངས་རྒྱས་དྲན་པར་བྱོས། །སངས་རྒྱས་འདས་པའམ་ཡང་ན་མ་བྱོན་པ། །ཐལ་མོ་སྦྱར་ཏེ་རྗེས་སུ་དྲན་པར་བྱོས། །མི་མཆོག་གང་དག་ད་ལྟར་བཞུགས་པ་ཡང ། །དེ་དག་མཆོད་ཕྱིར་བདེ་གཤེགས་དྲན་པར་བྱོས། །དང་བའི་སེམས་ཀྱིས་མེ་ཏོག་ཕྲེང་བ་དང ། །བྱུག་པ་དག་དང་བཟའ་དང་བཅའ་བ་ཡིས། །བདེ་བར་གཤེགས་པ་ལ་ནི་མཆོད་པ་བྱོས། །ཏིང་འཛིན་འདི་ནི་རྙེད་པར་དཀའ་མི་འགྱུར། ། ཏིང་ངེ་འཛིན་གྱི་མཆོག་འདི་འདོད་པས་ན། །སེམས་ནི་རངས་ཤིང་དགའ་བ་འདྲ་མེད་པས། །རྔ་དུང་རྫ་རྔ་དག་གི་སིལ་སྙན་དང ། །དཔེ་མེད་རིང་བསྲེལ་ལ་ནི་རོལ་མོ་བྱེད། །ཏིང་ངེ་འཛིན་གྱི་མཆོག་ནི་འདོད་པས་ན། །རི་མོ་ལེགས་པར་བྲིས་ཤིང་མཚན་རྫོགས་ལ། །གསེར་གྱི་མདོག་འདྲ་རྒྱ་ཆེ་སྐྱོན་མེད་པའི། །མཚུངས་པ་མེད་པའི་སྐུ་གཟུགས་བྱེད་པ་དང ། །དགའ་བར་བྱེད་པའི་ཆོས་ནི་མདུན་བཞག་ནས། །ཚུལ་ཁྲིམས་ཡོངས་དག་ཐོས་པ་ཚོལ་བྱེད་ལ། །ལེ་ལོའི་དངོས་པོ་ཡོངས་སུ་སྤངས་བྱས་ན། །ཏིང་འཛིན་འདི་ནི་རིང་པོར་མི་ཐོགས་རྙེད། །ཀུན་ནས་མནར་སེམས་སུ་ལའང་མ་བྱེད་ཅིག་།བྱམས་ལ་གནས་དང་སྙིང་རྗེར་གནས་པ་དང ། །འདོད་པའི་ཡོན་ཏན་བཏང་སྙོམས་བྱས་ནས་ནི། །ཏིང་འཛིན་འདི་ནི་རིང་པོར་མི་ཐོགས་རྙེད། །ཆོས་སྨྲ་བ་ལའང་དེ་བཞིན་བྱམས་པ་སྐྱེད། །
25a
༄#། །སྟོན་པར་འདུ་ཤེས་རྟག་ཏུ་ཉེ་བར་ཞོག་།ང་རྒྱལ་མ་བྱེད་ཆགས་པ་སྤང་བར་བྱོས། །ཆོས་སྦྱིན་པ་ལ་ནམ་ཡང་འཇུངས་མ་གྱུར། །ཕན་ཡོན་བཟང་པོ་འདི་དག་བླང་བར་བྱོས། །གདམས་ངག་གནས་ནི་བདེ་བར་གཤེགས་པས་བསྟན། །འདི་ནི་སངས་རྒྱས་མང་པོའི་བསྟན་པ་སྟེ། །ཏིང་འཛིན་འདི་ནི་རྙེད་པར་དཀའ་མི་འགྱུར། །བཟང་སྐྱོང་གིས་ཞུས་པ་ཏིང་ངེ་འཛིན་གྱི་ལེའུ་སྟེ་བཞི་པའོ།། །།བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འདོད་པས་ཆོས་སྨྲ་བའི་དགེ་སློང་ལ་གུས་པ་དང་བཅས་ཤིང་ཞེ་ས་དང་བཅས་པར་བྱ་སྟེ། ཀླན་ཀ་བཙལ་བ་མེད་པའི་སེམས་ཀྱིས་སྟོན་པར་འདུ་ཤེས་བསྐྱེད་ལ། ཏིང་ངེ་འཛིན་འདི་ལ་སྦྱར་བར་བྱའོ། །བཟང་སྐྱོང ། གལ་ཏེ་བྱང་ཆུབ་སེམས་དཔའ་དེས་ཆོས་སྨྲ་བའི་དགེ་སློང་དེ་ལ་ཀུན་ནས་མནར་སེམས་ཀྱི་སེམས་ཀྱིས་གནས་སམ། ཐ་བའི་སེམས་ཀྱིས་གནས་སམ། སེམས་མ་དང་བས་གནས་ན། བཟང་སྐྱོང ། བྱང་ཆུབ་སེམས་དཔའ་དེས་ཏིང་ངེ་འཛིན་འདི་ཐོབ་པ་ནི། གནས་མ་ཡིན་ཏེ། སྐབས་མེད་དོ། །གལ་ཏེ་ཆོས་སྨྲ་བའི་དགེ་སློང་དེ་ལ་སྟོན་པའི་འདུ་ཤེས་མི་སྐྱེད་ནའང་གནས་དེ་མེད་དོ། །བཟང་སྐྱོང ། དེ་ཅིའི་ཕྱིར་ཞེ་ན། དེ་ལྟར་མ་གུས་པས་ནི། དམ་པའི་ཆོས་ནུབ་པར་འགྱུར་རོ། །བཟང་སྐྱོང ། འདི་ལྟ་སྟེ། དཔེར་ན། མིག་དང་ལྡན་པའི་སྐྱེས་བུ་ཞིག་གིས་ནམ་ཐང་ཞིང་སྤྲིན་མེད་
25b
པའི་མཚན་མོ་ནམ་གྱི་གུང་ཐུན་ལ་གདོང་གྱེན་དུ་བར་སྣང་ལ་བལྟས་ན། དེས་དེར་སྐར་མའི་གཟུགས་མང་པོ་རྣམས་མཐོང་ངོ ། །བཟང་སྐྱོང ། དེ་བཞིན་དུ་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ལ་གནས་པ་ནི། ནམ་མཁའི་འདུ་ཤེས་ཤིན་ཏུ་ཉེ་བར་གནས་ཤིང ། སངས་རྒྱས་ཀྱི་འདུ་ཤེས་ཤིན་ཏུ་བྱིན་གྱིས་བརླབས་པའི་ཕྱིར་སངས་རྒྱས་ཀྱི་མཐུ་དང ། ཏིང་ངེ་འཛིན་འདི་བསྒོམས་པས། འཇིག་རྟེན་གྱི་ཁམས་གཞན་དུ་ཤར་ཕྱོགས་སུ་བལྟས་ན། ཆེགས་ཆུང་དུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ། །ཆོགས་ཆུང་དུས་སངས་རྒྱས་བརྒྱ་ཕྲག་མང་པོ་དང ། སངས་རྒྱས་སྟོང་ཕྲག་མང་པོ་དང ། སངས་རྒྱས་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཕྲག་མང་པོ་དང ། སངས་རྒྱས་བྱེ་བ་བརྒྱ་ཕྲག་མང་པོ་དང ། སངས་རྒྱས་བྱེ་བ་སྟོང་ཕྲག་མང་པོ་དང ། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ཚེགས་ཆུང་དུས་མིག་གི་དབང་པོ་ལ་སྣང་བར་འགྱུར་རོ། །དེ་བཞིན་དུ་ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། ཕྱོགས་མཚམས་བཞི་དང ། འོག་གི་ཕྱོགས་དང ། སྟེང་གི་ཕྱོགས་རྒྱས་པར་བྱ་སྟེ།་དེ་ལྟར་ཕྱོགས་བཅུར་བལྟས་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཚེགས་ཆུང་དུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ། །ཚེགས་ཆུང་དུས་
26a
༄#། །སངས་རྒྱས་བརྒྱ་ཕྲག་མང་པོ་དང ། སངས་རྒྱས་སྟོང་ཕྲག་མང་པོ་དང ། སངས་རྒྱས་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཁྲག་མང་པོ་དང ། སངས་རྒྱས་བྱེ་བ་བརྒྱ་ཕྲག་མང་པོ་དང ། སངས་རྒྱས་བྱེ་བ་སྟོང་ཕྲག་མང་པོ་དང ། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ཚེགས་ཆུང་དུས་མིག་གི་དབང་པོ་ལ་སྣང་བར་གྱུར་ཏོ། །བཟང་སྐྱོང ། དེ་ལྟར་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ལ་གནས་པ་རྣམས་ནི། ཚེགས་ཆུང་དུས་སངས་རྒྱས་མང་པོ་རྣམས་མིག་གི་དབང་པོ་ལ་སྣང་བར་འགྱུར་རོ། ། ཚེགས་ཆུང་ངུས་སངས་རྒྱས་བརྒྱ་ཕྲག་མང་པོ་དང ། སངས་རྒྱས་སྟོང་ཕྲག་མང་པོ་དང ། སངས་རྒྱས་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཕྲག་མང་པོ་དང ། སངས་རྒྱས་བྱེ་བ་བརྒྱ་ཕྲག་མང་པོ་དང ། སངས་རྒྱས་བྱེ་བ་སྟོང་ཕྲག་མང་པོ་དང ། སངས་རྒྱས་བྱེ་བ་བརྒྱ་སྟོང་ཕྲག་མང་པོ་དང ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་རྣམས་ཚེགས་ཆུང་ངུས་མིག་གི་དབང་པོ་ལ་སྣང་བར་འགྱུར་རོ། །བཟང་སྐྱོང ། འདི་ལྟ་སྟེ། དཔེར་ན། སངས་རྒྱས་ཀྱི་སྤྱན་གང་དང་ལྡན་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་
26b
རྫོགས་པའི་སངས་རྒྱས་ཀྱིས་ཐམས་ཅད་ཐུགས་སུ་ཆུད་པ་དང ། ཐམས་ཅད་གཟིགས་པར་འགྱུར་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྤྱན་ཡོད་དོ། །བཟང་སྐྱོང ། དེ་བཞིན་དུ་སངས་རྒྱས་ཀྱིས་ཡོངས་སུ་བཟུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ལ་གནས་པ་རྣམས་ནི། ཚེགས་ཆུང་དུས་མང་དུ་ཐོས་པ་ཡོངས་སུ་རྫོགས་པར་འགྱུར་རོ། །སྦྱིན་པའི་ཕ་རོལ་ཏུ་ཕྱིན་པ་དང ། ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང ། བཟོད་པའི་ཕ་རོལ་ཏུ་ཕྱིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་རོ། །ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བ་ཡོངས་སུ་རྫོགས་པར་འགྱུར་རོ། །བྱང་ཆུབ་སེམས་དཔའི་ཡོན་ཏན་ཐམས་ཅད་ཡོངས་སུ་རྫོགས་པར་འགྱུར་རོ། །བླ་ན་མེད་པའི་ཤེས་རབ་ཀྱི་དབང་པོ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་རྫོགས་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དཔེར་ན་མིག་ལྡན་མི་ཞིག་མཚན་མོ་དབེན་པའི་དུས། །ནམ་གྱི་གུང་ཐུན་ལྡང་བྱས་ནམ་མཁའ་རྣམ་དག་ལ། །དེས་ནི་སྐར་མ་མང་པོ་བརྒྱ་སྟོང་
27a
༄#། །མཐོང་གྱུར་ཏེ། །དྲན་ལྡན་བསམ་ན་ཉིན་བར་དུ་ཡང་དྲན་པར་འགྱུར། །དེ་ལྟར་བྱང་ཆུབ་སེམས་དཔས་ཏིང་འཛིན་འདི་ཐོབ་ནས། །སངས་རྒྱས་དཔའ་བོ་མང་པོ་བརྒྱ་སྟོང་མཐོང་བར་འགྱུར། །དེ་ལས་ལངས་པའི་དུས་ནའང་དྲན་འགྱུར་ཞིང ། །འཁོར་ལ་འཇིག་རྟེན་མགོན་པོ་འདི་འདྲའོ་ཞེས་ཀྱང་སྨྲ། །ཇི་ལྟར་ངའི་མིག་སངས་རྒྱས་སྤྱན་དེ་རྣམ་དག་ལ། །རབ་རིབ་མེད་ཅིང་ཡོངས་དག་དེས་ནི་འཇིག་རྟེན་ལྟ་བ་ལྟར། །དེ་ལྟར་རྒྱལ་སྲས་བྱང་ཆུབ་སེམས་དཔའ་རྣམས་ཀྱི་སྤྱན། །རྡུལ་མེད་ཏིང་འཛིན་འདི་ཡིན་དེས་ནི་མ་གི་དབང་མཐོང ། །སྟོབས་བཅུ་རྐང་གཉིས་དབང་པོ་འཇིག་རྟེན་གཙོ་ལྟའི་ཚེ། །ཐུབ་རྣམས་དངོས་པོའི་འདུ་ཤེས་ནམ་ཡང་མི་སྐྱེད་དོ། །དུག་བཅོམ་ཡོངས་དག་དངོས་པོའི་འདུ་ཤེས་མེད་པ་ཡི། །བྱང་ཆུབ་སེམས་དཔའ་གཙོ་བོ་ཡོན་ཏན་ཁྱད་པར་ཉོན། །ཆོས་མཆོག་བསིལ་བ་དེ་དག་ཀྱང་ནི་མཉན་པར་བྱོས། །སྟོང་པ་ཉིད་ཆོས་བདེ་བ་མྱུར་དུ་དྲན་པར་བྱོས། །ངས་ཀྱང་རྒྱལ་བའི་བྱང་ཆུབ་རྙེད་ནས་སྐྱེ་རྒུ་ལ། །སྐྱེ་བོ་མང་པོ་བདེ་བའི་ཆོས་འདི་བཤད་པར་བྱ། །ཇི་ལྟར་བྱང་ཆུབ་སེམས་དཔའ་ཚེ་དཔག་མེད་སྐྱེས་ནས། །འཇིག་རྟེན་མགོན་པོ་བརྒྱ་སྟོང་མང་པོ་མཐོང་གྱུར་པ། །དེ་ལྟར་བྱང་ཆུབ་སེམས་དཔའི་ཏིང་འཛིན་འདི་ཐོབ་ན། །སངས་རྒྱས་དཔའ་བོ་མང་པོ་བརྒྱ་སྟོང་མཐོང་བར་འགྱུར། །ཇི་ལྟར་དྲན་ལྡན་དགེ་སློང་བཟང་པོ་ཀུན་དགའ་བོས། །
27b
ང་ལས་ཐོས་པ་རབ་བཟུང་དེ་ཡང་ཀུན་འཛིན་པ། །དེ་ལྟར་བྱང་ཆུབ་སེམས་དཔས་ཏིང་འཛིན་འདི་ཐོབ་ན། །ཆོས་མང་ཐོས་ཤིང་ཐམས་ཅད་འཛིན་པར་འགྱུར། །ཏིང་ངེ་འཛིན་འདི་ཐོས་ནས་ཡང་དག་དགའ་སྐྱེད་ལ། །འཇིག་རྟེན་གསང་ཚིག་སྣ་ཚོགས་ཐམས་ཅད་སྤངས་བྱས་ཏེ། །མྱུར་དུ་དད་པར་བྱོས་ལ་ཆོས་ཀྱི་སྦྱིན་པ་བྱིན། །དེ་ལྟར་ཡོངས་དག་ཞི་བའི་ས་འདི་ཐོབ་པར་འགྱུར། ། བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ལྔ་པའོ།། །།བཟང་སྐྱོང ། དེ་ལ་བྱང་ཆུབ་སེམས་དཔའི་ཏིང་ངེ་འཛིན་འདི་ཐོབ་པར་བྱ་བ་དང ། འདི་ལྟ་སྟེ། ཡོངས་སུ་བསྒྲུབ་པར་བྱ་བའི་ཕྱིར་སྤྲོ་བ་དང ། བརྩོན་འགྲུས་ཆེན་པོ་བསྐྱེད་པར་བྱའོ། །བཟང་སྐྱོང ། འདི་ལྟ་སྟེ། དཔེར་ན། རྒྱ་ཚོ་ཆེན་པོའི་གྲུ་རིན་པོ་ཆེས་ཡོངས་སུ་གང་བ་ཞིག་རྒྱ་མཚོ་ཆེན་པོ་རྒལ་ཏེ་འཇིགས་པ་ཐམས་ཅད་སྤངས་པ་ལས་ཚུ་རོལ་གྱི་འགྲམ་དུ་ཆག་ན། དེ་ལ་ཛམྦུའི་གླིང་པའི་མི་རྣམས་ཀྱིས་སྒྲ་ཆེན་པོ་དང ། སྐད་ཆེན་པོ་དང ། འོ་དོད་འབོད་པར་བྱེད་དོ། །བདག་ཅག་ནི།་རིན་པོ་ཆེ་འདི་དག་ལས་ཉམས་སོ། །ཞེས་མྱ་ངན་ཆེན་པོས་སྨྲེ་སྔགས་ཀྱང་གདོན་པར་བྱེད་དོ། །བཟང་སྐྱོང ། དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་རྣ་ལམ་དུ་གྲག་པར་གྱུར་ལ། ཐོས་ནས་ཀྱང་གླེགས་བམ་དུ་འདྲི་བར་མི་བྱེད། སྟོན་
28a
༄#། །པར་མི་བྱེད། འདོན་པར་མི་བྱེད། འཛིན་པར་མི་བྱེད། ཀློག་པར་མི་བྱེད། འཆད་པར་མི་བྱེད། སྒོམ་པར་མི་བྱེད། ནན་ཏན་གྱིས་སྒྲུབ་པར་མི་བྱེད་ན། བཟང་སྐྱོང ། དེ་ལ་ལྷ་དང་བཅས་པའི་འཇིག་རྟེན་གྱིས་སྒྲ་ཆེན་པོ་དང ། སྐད་ཆེན་པོ་དང ། འོ་དོད་འབོད་པར་བྱེད་དོ། །འདི་ལྟར་ཏིང་ངེ་འཛིན་ཟབ་མོ་རིན་པོ་ཆེ་འདི་ལྟ་བུ་སངས་རྒྱས་ཀྱིས་བསྔགས་པ།་སངས་རྒྱས་ཀྱིས་བསྟོད་པ། སངས་རྒྱས་ཀྱིས་བསྟོང་དུ་བཅུག་པ། སངས་རྒྱས་ཀྱི་ཡོན་ཏན་ཐམས་ཅད་ཐོབ་པར་འགྱུར་བ་གང་ཡིན་པ་དེ་ཐོས་ནས་ཡི་གེར་འབྲི་བར་མི་བྱེད། སྟོན་པར་མི་བྱེད། འདོན་པར་མི་བྱེད། འཛིན་པར་མི་བྱེད། ཀློག་པར་མི་བྱེད། འཆད་པར་མི་བྱེད། སྒོམ་པར་མི་བྱེད། ནན་ཏན་གྱིས་སྒྲུབ་པར་མི་བྱེད་ཅིང ། ང་རྒྱལ་གྱིས་ནོན་ལ་མི་ཤེས་ཏེ། མང་དུ་ཐོས་པ་ཡོངས་སུ་རྫོགས་པ་མི་འཛིན་པའི་སེམས་ཅན་དེ་དག་ནི། ཏིང་ངེ་འཛིན་རིན་པོ་ཆེ་འདི་ལྟ་བུ་འདི་ལས་ཡོངས་སུ་ཉམས་སོ། །ཞེས་མྱ་ངན་ཆེན་པོས་སྨྲེ་སྔགས་ཀྱང་གདོན་པར་བྱའོ། །བཟང་སྐྱོང ། ཏིང་ངེ་འཛིན་འདི་ཉན་མི་འདོད་པར་འགྱུར་བ་དང ། ཏིང་ངེ་འཛིན་འདི་འཛིན་པར་མི་འགྱུར་བའི་སེམས་ཅན་དེ་དག་ནི། བཟང་སྐྱོང ། ཡོངས་སུ་ཉམས་པའི་ཆོས་ཅན་ཡིན་པར་ངས་བཤད་དོ། །བཟང་སྐྱོང ། གང་ཏིང་ངེ་འཛིན་རིན་པོ་ཆེ་འདི་ལྟ་བུ་འདི་ཐོས་ནས་ཡི་གེ་འབྲི་བར་མི་བྱེད། སྟོན་པར་མི་བྱེད། འདོན་པར་མི་བྱེད། འཛིན་པར་མི་བྱེད། ཀློག་
28b
པར་མི་བྱེད། འཆད་པར་མི་བྱེད། སྒོམ་པར་མི་བྱེད། ནན་ཏན་གྱིས་སྒྲུབ་པར་མི་བྱེད་པའི་སེམས་ཅན་དེ་དག་གི་ཡོངས་སུ་ཉམས་པ་ཇི་ཙམ་དུ་འགྱུར་བ་ལྟས་ཤིག་།བཟང་སྐྱོང ། སེམས་ཅན་དེ་ལྟ་བུ་དེ་རྣམས་ལ་ནི། ཆོས་དེ་ལྟ་བུ་དག་ཆེད་མི་ཆེ་བར་ངས་བཤད་དོ། །བཟང་སྐྱོང ། འདི་ལྟ་སྟེ། དཔེར་ན། སྐྱེས་བུ་གང་ལ་ལ་ཞིག་བྱིས་པའི་རང་བཞིན་ཅན། ཤེས་རབ་འཆལ་པའི་རང་བཞིན་ཅན་ཞིག་ལ་ཙནྡན་དམར་པོ་གསར་པ་ཞིག་བྱིན་པ་དང ། དེ་དེ་ལ་ཅི་གཙང་བའི་འདུ་ཤེས་སྐྱེད་དོ། །བཙོག་པའི་འདུ་ཤེས་སྐྱེད་དོ། །དེ་ལ་སྐྱེས་བུ་མཁས་པའི་རང་བཞིན་ཅན་ཙནྡན་གྱི་ཚོང་པ་ཞིག་གིས་འདི་སྐད་དུ་ཀྱེ་སྐྱེས་བུ། ཁྱོད་ཙནྡན་གསར་པ་འདི་ལ་མི་གཙང་བའི་འདུ་ཤེས་མ་སྐྱེད་ཅིག་།བཙོག་པའི་འདུ་ཤེས་མ་སྐྱེད་ཅིག་།ཀྱེ་སྐྱེས་བུ། འདིའི་དྲི་ཇི་ཙམ་དུ་དགའ་བར་བྱེད་པ་རེ་ཞིག་སྣོམས་ཤིག་།ཀྱེ་སྐྱེས་བུ། འདིའི་ཁ་དོག་ཅི་ཙམ་དུ་བལྟ་ན་སྡུག་པའང་ལྟོས་ཤིག་ཅེས་སྨྲས་པ་དང ། བྱིས་པའི་རང་བཞིན་ཅན། ཤེས་རབ་འཆལ་པའི་རང་བཞིན་ཅན་གྱི་སྐྱེས་བུ་དེས་ཙནྡན་དམར་པོ་དེ་མཐོང་ནས་སྣོམ་མི་འདོད་པའི་ཕྱིར་རང་གིས་མ་བླངས། བལྟ་མི་འདོད་པའི་ཕྱིར་མིག་ཀྱང་འཛུམ་པར་བྱེད་པ་དེ་བཞིན་དུ། བཟང་སྐྱོང ། མ་འོངས་པའི་དུས་ནས་དགེ་སློང་བྱང་ཆུབ་སེམས་དཔའ་རློམ་སེམས་ཅན་ལུས་མ་བསྒོམས་པ། སེམས་མ་བསྒོམས་པ། ཚུལ་ཁྲིམས་མ་བསྒོམ་པ། ཤེས་རབ་མ་བསྒོམས་པ། ཚུལ་ཁྲིམས་འཆལ་བ། དམ་པའི་ཆོས་ངེས་པའི་དོན་
29a
༄#། །རིན་པོ་ཆེ་མི་ལེན་པ། དམ་པའི་ཆོས་དེས་པའི་དོན་རིན་པོ་ཆེ་ཡོངས་སུ་སྤོང་བར་བྱེད་པ། ཤེས་རབ་འཆལ་བ། ཤེས་རབ་ལས་ཡོངས་སུ་ཉམས་པ། བསམ་གཏན་རྙེད་པས་ལྷག་པའི་ང་རྒྱལ་ཅན། །གང་ཟག་ལ་རྟེན་པ། གང་ཟག་ཏུ་ལྟ་བ། གང་ཟག་ཏུ་གནས་པ། ཆོས་སུ་དམིགས་པ་ལ་མངོན་པར་ཞེན་པ། སྟོང་པ་ཉིད་བཤད་པས་སྐྲག་པ་དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་བཤད་པ་ཐོས་ན། རྣ་བླགས་ཏེ་ཉན་པར་མི་བྱེད། མངོན་པར་དད་པར་མི་བྱེད། འཛིན་པར་མི་བྱེད། ཀུན་ཆུབ་པར་མི་བྱེད། འཆང་བར་མི་བྱེད། ཀློག་པར་ཡང་མི་བྱེད་ན། གཞན་དག་ལ་རྒྱ་ཆེར་འཆད་པ་ལྟ་ཅི་སྨོས། དེ་དག་དེའི་ཕྱིར་བྱམས་པ་དང ། དགའ་བ་རྒྱ་ཆེན་པོའང་མི་འཐོབ་ན། དེ་བཞིན་ཉིད་དུ་སྒྲུབ་པ་ལྟ་ཅི་སྨོས་པའི་སྟེང་དུ་ཐོས་ནས་ཀྱང་སྤོང་བར་བྱེད་དོ། །མངོན་པར་མི་དད་དོ། །མི་ལེན་ཏོ། །མོས་པར་མི་བྱེད་དོ། །དཔྱ་བའི་བསམ་པ་དང ། བསྟིང་བའི་བསམ་པ་དང ། སྨད་པའི་བསམ་པས་ཚིག་ཀྱང་འདི་སྐད་དུ་གསུང་རབ་འདི་དག་འབར་བ་དང ། འདི་ལྟར་དགེ་སློང་ཀུན་དགའ་བོ་འདྲ་བ་འཇིག་རྟེན་དུ་བྱུང་བ་དང ། འདི་ལྟ་བུའི་མདོ་སྡེ་བྱུང་བ་ནི། ངོ་མཚར་ཏོ། །ཞེས་ཟེར་ཞིང ། ལྐོག་ཏུ་དོང་ནས་ཀྱང་ཕན་ཚུན་དུ་མདོ་འདི་ལྟ་བུ་དག་ནི། རང་གིས་བྱས་པ། རང་བཟོ་བྱས་པ་སྟེ། འདི་ནི། སངས་རྒྱས་ཀྱིས་གསུངས་པ་མ་ཡིན། སངས་རྒྱས་ཀྱིས་གནང་བ་མ་ཡིན་
29b
ནོ་ཞེས་དེ་སྐད་ཀྱང་བརྗོད་ཅིང་སྨོད་པར་བྱེད་དེ། སྐྱེས་བུ་བླུན་པོ་དེ་ལྟ་བུ་དག་ནི། དམ་པའི་ཆོས་རིན་པོ་ཆེ་ལས་ཡོངས་སུ་ཉམས་པ་དང ། དམ་པའི་ཆོས་རིན་པོ་ཆེ་ཡོངས་སུ་སྤངས་པར་རིག་པར་བྱའོ། །བཟང་སྐྱོང ། འདི་ལྟ་སྟེ། དཔེར་ན། སྐྱེས་བུ་བྱིས་པའི་རང་བཞིན་ཅན་དེ་ཙནྡན་དམར་པོ་དེ་མཐོང་ནས་མི་བསྣམ་པའི་ཕྱིར་སྣའང་འགོག་པ་དང ། མི་མཐོང་བར་བྱ་བའི་ཕྱིར་མིག་ཀྱང་འཛུམ་པ་དེ་བཞིན་དུ། བཟང་སྐྱོང ། སྐྱེས་བུ་བླུན་པོ་དེ་དག་ཀྱང་ཏིང་ངེ་འཛིན་རིན་པོ་ཆེ་འདི་ལྟ་བུ་ཐོས་ནས་ཕྱི་ཕྱིར་ཞིང་མཉན་པར་མི་སེམས། གཟུང་བ་དང ། ཀུན་ཆུབ་པར་བྱ་བ་དང ། བཅང་བར་བྱ་བ་དང ། བཀླག་པར་བྱ་བར་མི་སེམས་དཔའི་སྟེང་དུ་ཐོས་ནས་ཀྱང་འདི་ལྟ་སྟེ། ཉན་མི་འདོད་པའི་ཕྱིར་གནས་དེ་ནས་འགྲོ་བར་འགྱུར་རོ། །བཟང་སྐྱོང ། འདི་ལྟ་སྟེ། དཔེར་ན།་སྐྱེས་བུ་རིན་པོ་ཆེ་ཚོང་པ་ལ་ལ་ཞིག་གིས་སྐྱེས་བུ་བླུན་པོའི་རང་བཞིན་ཅན་དེ་རྣམས་ལ་ནོར་བུ་རིན་པོ་ཆེ་བཻ་ཌཱུརྱ་རིན་ཐང་མེད་པ་ཞིག་བསྟན་པར་བསམ་པ་དང ། དེ་ལ་སྐྱེས་བུ་བླུན་པོའི་རང་བཞིན་ཅན་དེ་དག་གིས་ནོར་བུ་རིན་པོ་ཆེ་དེ་མཐོང་ནས་དེ་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ། ནོར་བུ་རིན་པོ་ཆེ་འདིའི་རིན་ཇི་ཙམ། རིན་པོ་ཆེ་ཚོང་པ་དེས་དེ་དག་ལ་འདི་སྐད་ཅེས་སྨྲས་སོ། ། ནོར་བུ་རིན་པོ་ཆེ་འདིའི་འོད་ཀྱི་ཕྱོགས་ཇི་ཙམ་ཁྱབ་པ་དེ་ཙམ་གྱི་ཕྱོགས་བཞིར་རིན་པོ་ཆེ་སྣ་བདུན་གྱིས་ཡོངས་སུ་གང་པར་བྱས་པ་དེ་བྱིན་ཅིག་།དེ་ཅིའི་ཕྱིར་ཞེ་ན། ནོར་བུ་རིན་པོ་ཆེ་འདིའི་རིན་
30a
༄#། །ཐང་ཚང་བ་ནི། དེ་ཡིན་ནོ། །སེམས་ཅན་བླུན་པོའི་རང་བཞིན་ཅན་དེ་དག་གིས་དེ་ལས་ནོར་བུ་རིན་པོ་ཆེ་དེའི་རིན་ཐང་ཐོས་པ་དང ། གད་མོས་འདེབས་ཤིང་འཕྱ་བར་བྱེད། སྟིང་བར་བྱེ་ལ་ནོར་བུ་རིན་པོ་ཆེ་དེའང་ལག་པ་གཉིས་ཀྱིས་དཔོག་པར་བྱེད་དོ། །བཟང་སྐྱོང ། དེ་བཞིན་དུ་མ་འོངས་པའི་དུས་ན་དགེ་སློང་རྟོག་པ་མང་བ། བསོད་ནམས་ཆུང་བ། དགེ་བའི་རྩ་བ་མ་བསྐྱེད་པ། སྔོན་གྱི་རྒྱལ་བ་ལ་བྱ་བ་མ་བྱས་པ། ང་རྒྱལ་གྱིས་གཟིར་བ། ཕྲག་དོག་གིས་གཟིར་བ། རྙེད་པ་དང ། བཀུར་སྟི་དང ། ཚིགས་སུ་བཅད་པས་གཟིར་བ།་ཚུལ་ཁྲིམས་རྣམས་ཡོངས་སུ་མ་དག་པ། ཏིང་ངེ་འཛིན་རྣམས་མ་ཐོབ་པ། ཤེས་རབ་རྣམས་མ་ཐོབ་པ། ཐོས་པ་ཉུང་བ། སློབ་དཔོན་དང་མ་འགྲོགས་པ། གང་ཟག་ཏུ་ལྟ་བ་དང ། གང་ཟག་ལ་རྟེན་པ། གང་ཟག་ལ་གནས་པ། ཆོས་སུ་དམིགས་པ་ལ་མངོན་པར་ཞེན་པ་རྣམས་ནི། སྟོང་པ་ཉིད་བཤད་པས་སྐྲག་པར་འགྱུར་ཏེ། དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས་རྟོག་པར་མི་འགྱུར། མངོན་པར་དད་པར་མི་འགྱུར། ཡིད་ཆེས་པར་མི་འགྱུར། མོས་པར་མི་འགྱུར་བའི་སྟེང་དུ་ཐོས་ཀྱང་གད་མོས་འདེབས་པར་འགྱུར། འཕྱ་བར་འགྱུར། སྟིང་བར་འགྱུར་རོ། །ལྐོག་ཏུ་དོང་ནས་ཀྱང་ཕན་ཚུན་ནས་སྨོད་པར་བྱེད། སྤོང་བར་བྱེད་ཅིང ། ཚིག་ཀྱང་འདི་སྐད་དུ་དགེ་སློང་
30b
འདི་དག་ནི། སྤྱི་རྟོལ་ཅན་ནོ། །དགེ་སློང་འདི་དག་ནི། མུ་ཅོར་སྨྲ་བ་སྟེ། འདི་ལྟར་འདི་དག་ནི། སངས་རྒྱས་ཀྱིས་མ་གསུངས་པ། རང་གིས་བྱས་ཤིང་རང་བཟོ་བྱས་པ། ཚིག་དང་ཡི་གེ་སྣ་ཚོགས་པ། གཏམ་ཙམ་དུ་བཤད་པ་ལ་མདོ་སྡེའི་མིང་གིས་འཆད་པ་ངོ་མཚར་ཏོ། །ཞེས་ཟེར་ཞིང ། མདོ་སྡེ་འདི་དག་ནི། སངས་རྒྱས་ཀྱིས་གསུངས་པ་མ་ཡིན་ནོ། །ཞེས་ཟེར་བ་དེ་དག་སྐྱེ་བོ་རྣམས་ལའང་དེ་ལྟར་ཤེས་པར་བྱེད་དོ། །དེ་ལྟར་སྐྱེས་བུ་བླུན་པོ་བསོད་ནམས་ཆུང་བ། དགེ་བའི་རྩ་བ་མ་བསྐྱེད་པ། སྔོན་གྱི་རྒྱལ་བ་ལ་བྱ་བ་མ་བྱས་པ། བླ་ན་མེད་པའི་ཆོས་རིན་པོ་ཆེ་ཡོངས་སུ་སྤངས་པས་ཆོས་རིན་པོ་ཆེ་ལས་ཕྱི་རོལ་ཏུ་གྱུར་པ་དེ་དག་བསོད་ནམས་ཆུང་བ་ཉིད་ལ་བསྟེན་པར་འགྱུར། སྒོམ་པར་འགྱུར། མང་དུ་བྱེད་པར་འགྱུར་རོ། །བཟང་སྐྱོང ། དེ་ནའང་སེམས་ཅན་གཞན་ཁ་ཅིག་།སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ་དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས་འདི་ལྟ་སྟེ། རྒྱས་པར་བྱ་བའི་ཕྱིར་འཛིན་པར་འགྱུར། ཀུན་ཆུབ་པར་བྱེད་པར་འགྱུར། ཡི་གེར་འབྲི་བར་འགྱུར། ཡི་གེར་འབྲིར་འཇུག་པར་འགྱུར། འཆད་བར་འགྱུར། ཀློག་པར་འགྱུར། གཞན་ལའང་རྒྱ་ཆེར་ཡང་དག་པར་འཆད་པར་འགྱུར། ལྷག་པར་དད་པར་འགྱུར། རྟོག་པ་མང་བར་འགྱུར། མོས་པ་མང་བར་འགྱུར། སྦྱོད་ལམ་དང་བར་འགྱུར། ངོ་ཚ་ཤེས་པ་དང ། འགྱོད་པ་
31a
༄#། །དང་ལྡན་པར་འགྱུར། བསླབ་པ་འདོད་པར་འགྱུར། ཟབ་མོ་ལ་མོས་པར་འགྱུར། ཤེས་རབ་དང་ལྡན་པར་འགྱུར། མང་དུ་ཐོས་པར་འགྱུར། བྱམས་པ་ལ་གནས་པ་དང་སྙིང་རྗེ་ཐོབ་པར་འགྱུར། དེ་དག་ཏིང་ངེ་འཛིན་འདི་མཉན་པའི་ཕྱིར་གང་ལ་ལར་སོང་བ་དེར་སྟོང་པར་འགྱུར། ཡང་དག་པར་སྟོན་པར་འགྱུར་རོ། །དེ་འདི་སྙམ་དུ་བྱང་ཆུབ་སེམས་དཔའི་ཏིང་ངེ་འཛིན་སངས་རྒྱས་ཀྱིས་གསུངས་པ་འདི་འདྲ་བ་འདི་ཅི་ནས་ཀྱང་ཡུན་རིང་དུ་གནས་པར་གྱུར་ཅིག་།རྒྱས་པར་གྱུར་ཅིག་སྙམ་དུ་སེམས་བསྐྱེད་པར་འགྱུར་རོ། ། བཟང་སྐྱོང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཁོར་འདི་རྣམས་ཀྱི་མདུན་དུ་ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །རིགས་ཀྱི་བུའམ་རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕུལ་བ་བས། རིགས་ཀྱི་བུའམ་རིགས་ཀྱི་བུ་མོ་གང་གིས་དག་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཉན་ཅིང་ཐོས་ནས་ཀྱང་རྟོག་པར་བྱེད། མངོན་པར་དད་པར་བྱེད། ཡིད་ཆེས་པར་བྱེད་ལ། འདི་ནི། བདེན་པ་ཉིད་དོ། །ཞེས་མོས་པར་བྱེད་ཅིང ། སངས་རྒྱས་ཀྱིས་གསུངས་པ་ཡིན་ནོ། །ཞེས་ཚིག་ཏུ་འང་
31b
བརྗོད་ན། རིགས་ཀྱི་བུ་འམ། རིགས་ཀྱི་བུ་མོ་དེའི་བསོད་ནམས་ཆེས་མང་དུ་འཕེལ་བར་འགྱུར་རོ། །དེ་ནས་དེའི་ཚེ་དོན་དེ་ཉིད་བསྟན་པར་བྱ་བའི་ཕྱིར་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་གིས་སྟོང་གསུམ་ཐམས་ཅད་དུ། །རིན་པོ་ཆེས་ནི་བཀང་བྱས་ཏེ། །བྱང་ཆུབ་བཙལ་བར་བྱ་བའི་ཕྱིར། །འཇིག་རྟེན་མགོན་ལ་ཕུལ་བ་བས། །གང་གིས་སངས་རྒྱས་ཀྱིས་བསྔགས་པའི། །མདོ་སྡེ་ཏིང་འཛིན་འདི་ལྟ་བུ། ཐོས་ནས་མོས་པར་བྱེད་ན་ནི། །དེ་ཡི་བསོད་ནམས་ཁྱད་པར་འཕགས། །སྒྱུ་དང་གྱ་གྱུ་གཡོ་དང་ལྡན། །རྒོད་ཅིང་དབང་པོ་མ་བསྡུས་ལ། །སྡིག་པའི་གྲོགས་པོས་ཟིན་གྱུར་པ། །བློ་ངན་རྣམས་ནི་དད་མི་འགྱུར། །ཚུལ་ཁྲིམས་འཆལ་ཅིང་སྡིག་ཆོས་ཅན། །ང་ཞེས་ང་རྒྱལ་དམ་དུ་གནས། །ཕན་ཚུན་དག་ནས་འདུས་ནས་ཀྱང ། །རྒྱལ་བའི་བསྟན་ལ་གང་མོས་འདེབས། །མདོ་སྡེ་དེ་དག་ཆོས་ཀྱི་རྒྱལ། །སངས་རྒྱས་ཀྱིས་ནི་མ་གསུངས་ཞེས། །མ་བསྔམས་དེ་དག་དེ་འདྲ་བའི། །ཚིག་དག་ཀྱང་ནི་བརྗོད་པར་འགྱུར། །གང་ཞིག་ཏིང་ངེ་འཛིན་མདོ་འདི་ལ། ཐོས་ནས་རྟོགས་པར་མི་འགྱུར་བ། །མ་རུངས་ཆུད་ཟོས་མི་ཤེས་ཤིང ། །ལྟ་བ་ངན་ལ་དམིགས་ཅན་ནོ། །སངས་རྒྱས་ཀྱིས་ནི་གསུངས་པ་ཡི། །མདོ་སྡེ་འདི་འདྲ་འདི་དག་ལ། །བསོད་ནམས་ཆུང་ཞིང་དམིགས་གནས་པས། །དད་པར་བྱ་བ་མི་ནུས་སོ། །གང་ཞིག་མདོ་སྡེ་འདི་འདྲ་བ། །ཐོས་ནས་དགའ་བར་འགྱུར་
32a
༄#། །བ་ནི། །མི་མཆོག་ཏུ་ནི་མི་འགྱུར་སྙམ། །དེ་ལ་ཐེ་ཚོམ་མ་བྱེད་ཅིག་།གང་ཞིག་ཚུལ་ཁྲིམས་ཡོངས་དག་ཅིང ། །ལྟ་བའང་རྟག་ཏུ་དྲང་བ་དང ། །ཆོས་འདི་ལ་ནི་གུས་བཅས་པ། །ངས་ནི་དེ་ལ་ཆོས་བཤད་དོ། །གང་གིས་དཔའ་ཆེན་འཇིག་རྟེན་མགོན། འོད་བྱེད་པ་ནི་མཐོང་གྱུར་བ། །དེ་དག་དོན་དུ་བཤད་པར་བྱས། །དེ་དག་ཀྱང་ནི་ཆོས་འཛིན་ཤོག་།བཟང་སྐྱོང་གིས་ཞུས་པའི་ཏིང་ངེ་འཛིན་ལས་ལྷག་པའི་ང་རྒྱལ་ཅན་གྱི་ལེའུ་སྟེ་དྲུག་པའོ།། །།བམ་པོ་གསུམ་པ། བཟང་སྐྱོང ། ད་ལྟར་ང་ཏིང་ངེ་འཛིན་འདི་འཆད་པའི་ཚེ་གང་གིས་ང་ལ་མཉེས་པར་བྱེད་པ་དེ་དག་ནི། ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་སྡིག་པའི་གྲོགས་པོའི་ལག་ཏུ་སོང་པའམ། དགེ་བའི་བཤེས་དང་བྲལ་བ་མ་གཏོགས་པར་ཏིང་ངེ་འཛིན་འདི་ཐོས་ནས་སྤོང་བའམ། སྨོད་པར་འགྱུར་བ་དེ་ནི། གནས་མ་ཡིན་ཏེ། སྐབས་མེད་དོ། །བཟང་སྐྱོང ། འདི་ན་དགེ་བའི་བཤེས་གཉེན་གྱི་ལག་ཏུ་སོང་བ་ལས་ཀྱང་སྐྱེས་བུ་བླུན་པོ་ཁ་ཅིག་ཏིང་ངེ་འཛིན་འདི་ཐོས་ནས་མངོན་པར་དད་པར་མི་བྱེད། ཡིད་ཆེས་པར་མི་བྱེད། མོས་པར་མི་བྱེད་ན། གང་དག་སྡིག་པའི་གྲོགས་པོའི་ལག་ཏུ་སོང་བ་རྣམས་ལྟ་སྨོས་ཀྱང་ཅི་དགོས། བཟང་སྐྱོང ། དེ་ཅིའི་ཕྱིར་ཞེ་ན། མང་དུ་ཐོས་པ་དེ་ནི། དེ་ལྟར་སྒྲུབ་པར་དཀའོ། །སངས་རྒྱས་བལྟ་བ་དེ་ནི། དེ་ལྟར་རྙེད་པར་དཀའོ། །བཟང་སྐྱོང ། སངས་
32b
རྒྱས་ཀྱིས་ཆོས་རྣམས་ལ་མོས་པར་བྱ་བ་ནི། དེ་ལྟར་དཀའོ། བཟང་སྐྱོང ། སངས་རྒྱས་ཀྱི་ཆོས་ཐམས་ཅད་སྐྱེད་པར་བྱེད་པ་ད་ལྟར་གྱི་སངས་རྒྱས་མངོན་སུ་མ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདིའང་དེ་ལྟར་སྒྲུབ་དཀའོ། །བཟང་སྐྱོང ། བྱང་ཆུབ་སེམས་དཔའ་ཁྱིམ་པའམ། རབ་ཏུ་བྱུང་བ་གང་ལ་ལ་ཞིག་ཏིང་ངེ་འཛིན་འདི་ལྟ་བུ་འདི་ཐོས་ནས་མི་སྐྲག་།མི་དངང ། དངང་བར་མི་འགྱུར། གད་མོས་མི་འདེབས། འཕྱ་བར་མི་བྱེད། སྟིང་བར་མི་བྱེད། སྤོང་བར་མི་བྱེད་པའི་སྟེང་དུ་ཐོས་ནས་ཀྱང་རྗེས་སུ་ཡི་རང་བར་བྱེད། མངོན་པར་དད་པར་བྱེད། ཡིད་ཆེས་པར་བྱེད། འདུན་པར་བྱེད་ཅིང་ཏིང་ངེ་འཛིན་འདི་བསྟན་པ་དང ། གཟུང་བ་དང ། ཀུན་ཆུབ་པར་བྱ་བ་དང ། བཅང་བ་དང ། བཀླག་པ་དང ། ཡི་གེར་བྲི་བ་དང ། བཤད་པ་དང ། བསྒོམ་པའི་ཕྱིར་འདོད་པ་སྐྱེད་པ་ནི།་བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་དེ་ལྟ་བུ་དེ་དག་ཐམས་ཅད་དེ་བཞིན་གཤེགས་པས་གཟིགས་སོ། །དེ་དག་ནི། དེ་བཞིན་གཤེགས་པས་མཁྱེན་ཏོ། །བཟང་སྐྱོང ། སྐྱེས་བུ་དམ་པ་དེ་ལྟ་བུ་དེ་དག་ཇི་ལྟར་དེ་བཞིན་གཤེགས་པས་གཟིགས་ཤིང་ཇི་ལྟར་དེ་བཞིན་གཤེགས་བས་མཁྱེན་ཅེ་ན། གང་དག་ཏིང་ངེ་འཛིན་འདི་འཛིན་པར་འགྱུར་བ་དང ། ཀུན་ཆུབ་པར་བྱེད་པར་འགྱུར་བ་དང ། འཆང་བར་འགྱུར་བ་དང ། ཀློག་པར་འགྱུར་བ་དང ། ཡི་གེར་འབྲི་བར་འགྱུར་བ་དང ། སྟོན་པར་འགྱུར་བ་དང ། སྒོམ་པར་འགྱུར་བའི་སྐྱེས་བུ་དམ་པ་དེ་ལྟ་བུ་དེ་དག་ནི། བཟང་སྐྱོང །
33a
༄#། །ཚུལ་ཁྲིམས་འཆལ་བར་མི་འགྱུར། དད་པ་མེད་པར་མི་འགྱུར། ཆོས་མི་འདོད་པར་མི་འགྱུར། ལོག་པར་ལྟ་བར་མི་འགྱུར། དམིགས་པ་ལ་མངོན་པར་ཞེན་པར་མི་འགྱུར་གྱི། བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་དེ་ལྟ་བུ་དེ་དག་ནི། དད་པ་ཅན་དུ་འགྱུར་རོ། །འདི་ལྟ་སྟེ། ཆོས་འདི་ལྟ་བུ་འདི་དག་ལེན་པར་བྱེད་པའི་རིགས་ཀྱི་བུ་དང ། རིགས་ཀྱི་བུ་མོ་དེ་ལྟ་བུ་དེ་དག་ནི། རྟོག་པ་མང་བ་དང ། མོས་པ་མང་བ་དང ། ཡིད་ཆེས་པ་དང ། ཆོས་འདོད་པ་དང ། ཟབ་མོ་ལ་མོས་པ་རྣམས་སུ་འགྱུར་རོ། །བཟང་སྐྱོང ། རིགས་ཀྱི་བུའམ།་རིགས་ཀྱི་བུ་མོ་དེ་ལྟ་བུ་དེ་དག་ནི། བསོད་ནམས་ཆུང་བ་དང ། དགེ་བའི་རྩ་བ་ཆུང་བར་མི་འགྱུར་གྱི། བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་དེ་ལྟ་བུ་དེ་དག་ནི། སྔོན་གྱི་རྒྱལ་བ་ལ་བྱ་བ་བྱས་ཤིང ། དགེ་བའི་རྩ་བ་རྣམས་འབར་བ་ཡིན་ནོ། །བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་དེ་ལྟ་བུ་དེ་དག་ནི། སངས་རྒྱས་གཅིག་ལ་བསྙེན་བཀུར་བྱས་པ་མ་ཡིན།་སངས་རྒྱས་གཅིག་དང ། གཉིས་དང ། གསུམ་ལ་དགེ་པའི་རྩ་པ་བསྐྱེད་པ་མ་ཡིན་གྱི། བཟང་སྐྱོང ། རིགས་ཀྱི་བུ། དེ་ལྟ་བུ་དེ་དག་ནི། སངས་རྒྱས་བརྒྱ་ལ་བསྙེན་བཀུར་བྱས་པར་འགྱུར་རོ། །རིགས་ཀྱི་བུ་དེ་ལྟ་བུ་དེ་དག་ནི། སངས་རྒྱས་བརྒྱ་ལ་དགེ་བའི་རྩ་བ་བསྐྱེད་པར་འགྱུར་རོ། །དེ་བཞིན་གཤེགས་པ་དེ་དག་ལས་རིགས་ཀྱི་བུའམ་རིགས་ཀྱི་བུ་མོ་དེ་དག་གིས་ཏིང་
33b
ངེ་འཛིན་འདི་ཐོས་ཤིང་རྗེས་སུ་ཡི་རང་བ་དང ། མོས་པར་འགྱུར་རོ། །དེ་དག་ཕྱི་མའི་དུས་ཀྱི་ཚེ་ལྔ་བརྒྱ་པ་ཐ་མ་ལའང་ཏིང་ངེ་འཛིན་འདི་ཐོས་ནས་མི་སྤོང་བར་འགྱུར་བའི་སྟེང་དུ་ཐོས་ནས་ཀྱང་རྗེས་སུ་ཡི་རང་བར་འགྱུར། ལེགས་སོ། །ཞེས་བྱ་བ་འབུལ་བར་འགྱུར། འཆང་བར་འགྱུར། ཀློག་པར་འགྱུར། ལུང་ནོད་པར་འགྱུར། འཆད་པར་འགྱུར། སྒོམ་པའི་སྦྱོར་བ་ལ་བརྩོན་པར་འགྱུར་རོ། ། བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཐོས་ནས་མི་སྐྲག་མི་དངང་དངང་བར་མི་འགྱུར་ཞིང ། མི་སྤོང་བའི་སྟེང་དུ་ཐོས་ནས་ཀྱང་རྗེས་སུ་ཡི་རང་བར་བྱེད། མངོན་པར་དང་བར་བྱེད། མངོན་པར་ཡིད་ཆེས་པར་བྱེད། མོས་པར་བྱེད། ལེགས་སོ། །ཞེས་བྱ་བ་འབུལ་བར་བྱེད་ཅིང ། ཐོས་ནས་ཀྱང་འཛིན་པར་བྱེད། ཀུན་ཆུབ་པར་བྱེད། འཆང་བར་བྱེད། ཀློག་པར་བྱེད། ཡི་གེར་འབྲི་བར་བྱེད། ཡི་གེར་འབྲིར་འཇུག་པར་བྱེད། སྟོན་པར་བྱེད་ཅིང་ཐ་ན་ཉིན་ཞག་འགའ་ཡང་ཏིང་ངེ་འཛིན་འདི་བསྒོམ་པའི་ཕྱིར་སྒོམ་པའི་སྦྱོར་བ་ལ་རྗེས་སུ་བརྩོན་པར་བྱེད་ན། བཟང་སྐྱོང ། རིགས་ཀྱི་བུའམ་རིགས་ཀྱི་བུ་མོ་དེ་དག་དེའི་གཞི་ལས་བསོད་ནམས་མང་པོ་སྐྱེད་པར་འགྱུར་རོ། ། བསོད་ནམས་ཀྱི་ཕུང་པོ་ཚད་མེད་པ་དང ། གྲངས་མེད་པ་བསྐྱེད་པར་འགྱུར་རོ། །རིགས་ཀྱི་བུ་དང ། རིགས་ཀྱི་བུ་མོ་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་
34a
༄#། །འགྱུར་རོ། །བསམ་པ་བཞིན་དུ་ཡོངས་སུ་རྫོགས་པའང་འཐོབ་པར་འགྱུར་རོ། །བཟང་སྐྱོང ། འོན་ཀྱང་ཡང་དོན་དེ་ཉིད་ལྷག་པར་ཡོངས་སུ་རྫོགས་པར་བྱ་བའི་ཕྱིར་ཁྱོད་ལ་དཔེ་བསྟན་ཏོ། །བཟང་སྐྱོང ། འདི་ལྟ་སྟེ། དཔེར་ན། མི་ལ་ལ་ཞིག་བྱུང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྡུལ་ཕྲ་རབ་ཀྱི་རྡུལ་དུ་བླགས། གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་རྩཝ་དང ། ཡལ་ག་དང ། ལོ་མ་དང ། འདབ་མ་ཐ་ན་སོར་བཞི་ཙམ་པ་དེ་དག་ཐམས་ཅད་ཀྱང་རྡུལ་ཕྲ་རབ་ཀྱི་རྡུལ་དུ་བླགས་ལ། དེ་ནས་མི་དེས་དེ་ལས་རྡུལ་ཕྲ་རབ་ཀྱི་རྡུལ་གཅིག་བླངས་ཏེ་རྡུལ་ཕྲ་རབ་ཀྱི་རྡུལ་དེ་དག་ཐམས་ཅད་ཇི་སྙེད་ཡོད་པ་དེ་སྙེད་ཀྱི་ཆར་བཅད་དེ། ཚུལ་དེ་ལྟ་བུར་རྡུལ་ཕྲ་རབ་ཀྱི་རྡུལ་དེ་དག་ཐམས་ཅད་ཆ་དེ་སྙེད་དུ་བཅད་ན། བཟང་སྐྱོང ། ཁྱོད་ཇི་སྙམ་དུ་སེམས། རྡུལ་ཕྲ་རབ་ཀྱི་རྡུལ་མང་བ་ཡིན་ནམ། བྱང་ཆུབ་སེམས་དཔའ་བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས། མང་ལགས་སོ། །བཙུན་པ་བདེ་བར་གཤེགས་པ། མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་རྡུལ་ཕྲ་རབ་ཀྱི་རྡུལ་དེ་དག་གི་ཆ་ཇི་སྙེད་ཡོད་པ་དེ་སྙེད་ཀྱི་སངས་རྒྱས་ཀྱི་ཞིང་རྣམས་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ་དེ་བཞིན་གཤེགས་པ་དགྲ་བཅོམ་པ་ཡང་
34b
དག་པར་རྫོགས་པའི་སངས་རྒྱས་རྣམས་ལ་དབུལ་བར་ཕུལ་ན། གཞི་དེ་ལས་བསོད་ནམས་མང་དུ་སྐྱེད་དམ། གསོལ་པ། བཙུན་པ་བཅོམ་ལྡན་འདས། མང་ལགས་སོ། །བཙུན་པ་བདེ་བར་གཤེགས་པ། མང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བཟང་སྐྱོང ། ཡང་རིགས་ཀྱི་བུའམ། རིགས་ཀྱི་བུ་མོ་གང་གིས་དེ་སྙེད་ཀྱི་སངས་རྒྱས་ཀྱི་ཞིང་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ་དེ་བཞིན་གཤེགས་པ་ལ་དབུལ་བར་ཕུལ་བ་བས། བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་གང་གིས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཐོས་ནས་རྟོག་པར་བྱེད། མངོན་པར་དད་པར་བྱེད། ཡིད་ཆེས་པར་བྱེད། མོས་པར་བྱེད་ལ་བརྟགས་ཤིང་མངོན་པར་དད་དེ་ཡིད་ཆེས་ཤིང་མོས་པར་བྱས་ནས་ཀྱང་འཛིན་པར་བྱེད། ཀུན་ཆུབ་པར་བྱེད། འཆང་པར་བྱེད། ཀློག་པར་བྱེད། ཡི་གེ་འབྲི་བར་བྱེད་ཅིང་གཞན་དག་ལའང་རྒྱ་ཆེར་འཆད་པར་བྱེད། སྟོན་པར་བྱེད། ཡང་དག་པར་འཆད་པར་བྱེད་ན། དགེ་བའི་རྩ་བ་སྔ་མ་བས་རིགས་ཀྱི་བུའམ་མ་རིགས་ཀྱི་བུ་མོ་དེའི་བསོད་ནམས་ཀྱི་ཕུང་པོ་ཆེས་མང་དུ་སྐྱེད་ན། གང་ཞིག་ཐ་ན་བ་འཇོས་ཙམ་ཞིག་སྒོམ་པའི་སྦྱོར་བ་ལ་བརྩོན་པར་གནས་པ་ལྟ་ཅི་སྨོས། བཟང་སྐྱོང ། གང་ཞིག་ཏིང་ངེ་འཛིན་འདི་ཐོས་ནས་འཛིན་པར་འགྱུར།
35a
༄#། །ཀུན་ཆུབ་པར་བྱེད་པར་འགྱུར། འཆང་པར་འགྱུར། ཀློག་པར་འྲྒྱུར། ཡི་གེར་འབྲི་བར་འགྱུར་ཞིང ། གཞན་དག་ལའང་རྒ་ཆེར་གོ་བར་བྱེད། སྟོན་པར་བྱེད།་ཡང་དག་པར་འཆད་པར་བྱེད་པའི་རིགས་ཀྱི་བུའམ། རིགས་ཀྱི་བུ་མོ་དེ་དག་གི་བསོད་ནམས་ཀྱི་ཕུང་པོ་དེའི་ཚད་ཀྱང་ང་མི་སྨྲ་ན། བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་གང་ཏིང་ངེ་འཛིན་འདི་བསྒྲུབས་ཏེ་དེ་བཞིན་ཉིད་དུ་སློབ་ཅིང ། དེ་བཞིན་ཉིད་དུ་ནན་ཏན་བྱེད་པ་ལྟ་ཅི་སྨོས། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། ། སྟོང་ཆེན་པོ་ཡི་འཇིག་རྟེན་ཁམས་འདི་དག་།རིན་ཆེན་བཀང་སྟེ་སྦྱིན་པ་བྱིན་པ་ནི། །དེ་ཡི་འབྲས་བུ་ཆུང་བར་ང་སྨྲའོ། །གང་གིས་ཆོས་འདི་འདྲ་བ་ཐོས་པ་དང ། །བསོད་ནམས་མང་འདོད་བྱང་ཆུབ་སེམས་དཔའ་གང ། །ཏིང་འཛིན་འདི་ནི་འཆང་ཞིང་ཀློག་བྱེད་ལ། །ཐོས་ནས་སྙོམ་པ་མེད་པར་སྟོན་པ་ནི། །བསོད་ནམས་ཕུང་པོ་མཐའ་མེད་ལྡན་པར་འགྱུར། །གང་གིས་འཇིག་རྟེན་ཁམས་འདི་རྡུལ་ཕྲན་ལྟར། །བཅད་ཅིང་གཤེགས་སྟེ་རྡུལ་དུ་བྱས་གྱུར་པ། །དེ་སྙེད་ཀྱི་ནི་འཇིག་རྟེན་ཁམས་ཀྱི་རྣམས། །རིན་ཆེན་བཀང་སྟེ་སྦྱིན་པ་བྱིན་པ་བས། ། གང་གིས་ཏིང་འཛིན་སངས་རྒྱས་རྣམས་ཀྱིས་གནང ། །བདེ་གཤེགས་བསྔགས་པ་འདི་ལ་ཚིག་བཞི་པའི། །ཚིགས་བཅད་འགའ་ཞིག་ཀུན་ཏུ་ཆུབ་བྱེད་ན། །དེ་ཡི་བསོད་ནམས་དཔེ་
35b
ཡོད་མི་འགྱུར་ན། །གང་ཞིག་སྐད་ཅིག་ཙམ་མམ་བ་འཇོས་ཙམ། ཀུན་ཆུབ་བྱེད་དམ་འཛིན་དང་ཀློག་པ་ལྟ། །སྨོས་ཀྱང་མི་དགོས་དེ་ཡི་སྟེང་དུ་ཡང ། །དེ་ཡི་བསོད་ནམས་ལ་ནི་ཚད་མི་རྙེད། ། སེམས་ཅན་ཐམས་ཅད་བདེ་བར་གཤེགས་གྱུར་ཏོ། །ཡེ་ཤེས་རྣམ་དག་དོན་དམ་ཐུགས་སུ་ཆུད། །དེ་དག་བསྐལ་པ་བྱེ་བར་མང་ངམ། །དེ་བས་ཚིགས་བཅད་གཅིག་བཤད་བསོད་ནམས་འཕགས། །དེ་སྲིད་བར་དུ་ཆོས་མང་བྱེད་བ་རྣམས། །བསྟན་ནས་དེ་དག་མྱ་ངན་འདས་པ་བས། །ཏིང་འཛིན་འདི་ལས་ཚིགས་བཅད་གང་འཛིན་པ། །དེ་ཡི་བསོད་ནམས་ཚད་གཟུང་སླ་བ་མིན། །ཇི་ཙམ་རྒྱ་ཆེ་འཇིག་རྟེན་ཁམས་ཡོད་པ། །ཕྱོགས་བཞི་དང་ནི་འོག་དང་དེ་བཞིན་སྟེང ། །རིན་ཆེན་བཀང་སྟེ་བསོད་ནམས་འདོད་པའི་ཕྱིར། །འཇིག་རྟེན་མཁྱེན་ལ་དབུལ་བར་ཕུལ་བས་ནི། །གང་ཞིག་ཏིང་འཛིན་ཞི་བ་རྡུལ་མེད་འདི། །རབ་ཏུ་བསྒོམས་ཤིང་གཞན་ལ་སྟོན་བྱེད་བའི། །བསོད་ནམས་དེ་ལ་འཇིག་རྟེན་ཁམས་ཡངས་པས། །དེ་ཡི་ཆ་དང་དཔེར་ཡང་མི་འགྱུར་རོ། །གང་ཞིག་ཏིང་འཛིན་ཞི་བ་འདི་སྒོམ་པ། །དེ་ནི་ནམ་ཡང་ཡིད་གཉིས་ཐེ་ཚོམ་མེད། །དེ་ལ་ནམ་ཡང་ལོག་ལྟུང་འཇིགས་པ་མེད། །དེ་ནི་ཆོས་ལའང་ནེམ་ནུར་མི་འབྱུང་ངོ ། །སངས་རྒྱས་བཤད་པའི་ཏིང་འཛིན་འདི་བསྒོམས་པས། །དེ་ནི་ང་ལའང་བསྙེན་བཀུར་བྱས་པར་འགྱུར། །བསོད་ནམས་རྒྱ་ཆེ་བས་མ་མི་ཁྱབ་པའང་གཟུང ། བྱང་ཆུབ་སེམས་དཔའ་ཐོས་པས་འཕགས་པར་འགྱུར། །གང་ཞིག་ཕྱི་དུས་
36a
༄#། །འཇིགས་བྱེད་ཆེན་པོའི་ཚེ། །ཏིང་འཛིན་འདི་ནི་ཐོས་ནས་འཛིན་བྱེད་པ། །དེ་ནི་ང་དང་འདས་པའི་སངས་རྒྱས་སམ། །མ་བྱོན་དག་ལའང་བསྙེན་བཀུར་བྱས་པར་འགྱུར། མོས་པར་བྱ་ཞིང་ཁོང་དུ་ཆུད་པར་བྱ། །བག་ཡོད་པ་ལས་བརྩོན་འགྲུས་བརྩམ་པར་བྱོས། །དགའ་བའི་སེམས་ཀྱིས་བརྟན་པ་སྦྱོར་བ་བྱོས། །ཏིང་འཛིན་འདི་ནི་རྙེད་པར་དཀའ་མི་འགྱུར། ། ཏིང་འཛིན་འདི་ནི་ཡོངས་སུ་འདྲི་བྱེད་ན། །དེས་ནི་རྒྱལ་བ་བརྒྱ་ཡང་མཉེས་པར་བྱས། །གང་ཞིག་ཕྱི་དུས་འཇིགས་བྱེད་ཆེན་པོའི་ཚེ། །ཏིང་འཛིན་ཐོས་ནས་མངོན་པར་དང་བྱེད་པ། །དེས་ནི་ང་དང་དགེ་སློང་འདི་དག་དང ། །ཁྱིམ་བདག་བཟང་སྐྱོང་ཁྱོད་ཀྱང་མཐོང་བ་ཡིན། །གང་ཞིག་ཏིང་འཛིན་ཞི་བ་འཕགས་པ་འདི། །དང་བའི་སེམས་ཀྱིས་གཞན་ལ་རྗོད་བྱེད་ཅིང ། །ཏིང་འཛིན་ཆེན་པོ་འདི་ནི་ཐོབ་གྱུར་ན། །བྱང་ཆུབ་སེམས་དཔའ་མང་དུ་ཐོས་ཞེས་བྱ། །འདི་ནི་སངས་རྒྱས་ཀུན་གྱིས་མཐུན་པར་བསྔགས། །ཐོས་ཀུན་སངས་རྒྱས་བྱང་ཆུབ་ཏུ་ཡང་བསྐྱེད། །སངས་རྒྱས་ཀྱིས་གནང་མཁས་པས་བསྔགས་པ་ཡི། །ཏིང་འཛིན་འདི་ནི་ཤིན་ཏུ་གོམས་བྱས་ན། །ཇི་ལྟར་གནང་ཞིང་བདེ་གཤེགས་ཀྱིས་བསྔགས་པའི། །ཐོས་པའི་རིགས་ནི་རབ་ཏུ་ཐོས་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བདུན་པའོ།། །།བཟང་སྐྱོང ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་ཏིང་ངེ་འཛིན་འདི་ཇི་ལྟར་བསྒོམ་པར་བྱ་ཞེ་ན་
36b
བཟང་སྐྱོང ། འདི་ལྟ་སྟེ། དཔེར་ན། ང་ད་ལྟར་ཁྱོད་ཀྱི་མདུན་ན་འདུག་ཅིང་ཆོས་སྟོན་པ་དེ་བཞིན་དུ་བཟང་སྐྱོང ། བྱང་ཆུབ་སེམས་དཔས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་སངས་རྒྱས་ཀྱི་གདན་ལ་བཞུགས་ཤིང་ཆོས་སྟོན་པར་ཡང་ཡིད་ལ་བྱའོ། །དེས་རྣམ་པ་ཐམས་ཅད་ཀྱི་མཆོག་དང་ལྡན་པ། གཟུགས་བཟང་བ། མཛེས་པ། བལྟ་ན་སྡུག་པ། སྐུ་ཡོངས་སུ་གྲུབ་པ་དང་ལྡན་པར་དེ་བཞིན་གཤེགས་པ་རྣམས་ཡིད་ལ་བྱའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་སྐྱེས་བུ་ཆེན་པོའི་མཚན་རེ་རེའང་བསོད་ནམས་བརྒྱས་བསྐྱེད་པར་བལྟའོ། །མཚན་མ་རྣམས་ཀྱང་གཟུང་བར་བྱའོ། །སྤྱི་གཙུག་བལྟར་མི་མཐོང་བའང་ཡོངས་སུ་ཞུ་བར་བྱའོ། །ཞུས་ནས་ཀྱང་སྐྱེས་བུ་ཆེན་པོའི་མཚན་རྣམས་ཀྱི་མཚན་མ་རྣམས་ཀྱང་གཟུང་བར་བྱའོ། །བཟུང་ནས་ཀྱང་འདི་ལྟར་བསླབ་པར་བྱ་སྟེ། ཨ་ལ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཛེས་པ་ནི། ངོ་མཚར་ཏེ། བདག་ཀྱང་མ་འོངས་པའི་དུས་ན་ལུས་ཡོངས་སུ་གྲུབ་པ་འདི་ལྟ་བུ་དང་ལྡན་པར་འགྱུར་རོ། །མཚན་འདི་ལྟ་བུ་དག་ཡོངས་སུ་རྫོགས་པར་འགྱུར་རོ། །བདག་ཀྱང་ཚུལ་ཁྲིམས་འདི་ལྟ་བུ་དང་ལྡན་པར་འགྱུར་རོ། །དེ་བཞིན་དུ་ཏིང་ངེ་འཛིན་དང ། དེ་བཞིན་དུ་ཤེས་རབ་དང ། དེ་བཞིན་དུ་རྣམ་པར་གྲོལ་བ་དང ། དེ་བཞིན་དུ་རྣམ་པར་གྲོལ་བའི་ཡེ་ཤེས་མཐོང་བ་དང་ལྡན་པར་འགྱུར་རོ། །བདག་ཀྱང་དེ་བཞིན་དུ་བླ་ན་མེད་པ་ཡང་
37a
༄#། །དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །མངོན་པར་རྫོགས་པར་སངས་རྒྱས་ནས་ཀྱང་འཁོར་བཞི་དང ། ལྷ་དང་བཅས་པའི་འཇིག་རྟེན་ལ་ཆོས་འཆད་པར་འགྱུར་རོ། །སྙམ་དུ་བསླབ་པར་བྱའོ། །དེས་དེ་ལྟར་རྣམ་པ་ཐམས་ཅད་ཀྱི་མཆོག་དང་ལྡན་པར་ཡིད་ལ་བྱས་ནས་ཡང་འདི་ལྟར་བསླབ་པར་བྱ་སྟེ། ང་ཞེས་བྱ་བའི་ཆོས་དེ་ནི།་གང་ཡིན། ངའི་ཞེས་བྱ་བའི་ཆོས་དེའང་གང་ཡིན། བྱང་ཆུབ་དེའང་གང་ཡིན། བྱང་ཆུབ་མངོན་པར་རྫོགས་པར་འཚང་རྒྱ་བ་དེའང་སུ་ཡིན། ཅི་ལུས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱའམ། འོན་ཏེ་སེམས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ། གལ་ཏེ་ལུས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་ཞེས་བྱར་ནི། ལུས་ནི། བེམ་པོ། །གཡོ་བ་མེད་པ། བྱེད་པ་མེད་པ།་སེམས་པ་མེད་པ། རྩཝ་དང ། ཤིང་དང ། རྡོ་དང ། རྩིག་པ་དང ། མིག་ཡོར་དང་འདྲ་བ་ཡིན་ལ། བྱང་ཆུབ་ནི། གཟུགས་མེད་པ། བསྟན་དུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་ན།་བེམ་པོ། །གཡོ་བ་མེད་པ། བྱེད་པ་མེད་པ། སེམས་པ་མེད་པའི་ལུས་ཀྱིས་གཟུགས་མེད་པ། བསྟན་དུ་མེད་པ། མི་སྣང་བ། རྣམ་པར་རིག་པར་མི་བྱེད་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཇི་ལྟར་འགྱུར། ཅི་སྟེ་སེམས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་ཞེས་བྱར་ནི། སེམས་ནི། གཟུགས་མེད་པ། བསྟན་དུ་མེད་པ། མི་སྣང་བ། རྣམ་པར་རིག་པར་བྱེད་
37b
པ་མ་ཡིན་པ། སྒྱུ་མ་ལྟ་བུ་ཡིན་ལ་།བྱང་ཆུབ་ནི། གཟུགས་མེད་པ། བསྟན་དུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་ན། གཟུགས་མེད་པ། བསྟན་དུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་པ། སྒྱུ་མ་ལྟ་བུའི་སེམས་ཀྱིས་གཟུགས་མེད་པ། བསྟན་དུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཇི་ལྟར་འགྱུར་སྙམ་དུ་བསླབ་པར་བྱའོ། །བཟང་སྐྱོང ། དེ་ལ་བྱང་ཆུབ་སེམས་དཔས་འདི་ལྟར་བསླབ་པར་བྱ་སྟེ། ལུས་ཀྱིས་བྱང་ཆུབ་མངོན་པར་རྫོགས་པར་འཚང་མི་རྒྱའོ། །སེམས་ཀྱིས་བྱང་ཆུབ་མངོན་པར་རྫོགས་པར་འཚང་མི་རྒྱའོ། །སེམས་ཀྱིས་སེམས་མེད་པའང་བྱང་ཆུབ་མངོན་པར་རྫོགས་པར་འཚང་མི་རྒྱའོ། །གཟུགས་ཀྱིས་གཟུགས་མེད་པའང་བྱང་ཆུབ་མངོན་པར་རྫོགས་པར་འཚང་མི་རྒྱའོ། །སེམས་ཀྱིས་སེམས་ཀྱང་བྱང་ཆུབ་མངོན་པར་རྫོགས་པར་འཚང་མི་རྒྱའོ། །གཟུགས་ཀྱིས་གཟུགས་ཀྱང་བྱང་ཆུབ་མངོན་པར་རྫོགས་པར་འཚང་མི་རྒྱའོ། །སྙམ་དུ་བསླབ་པར་བྱའོ། །བཟང་སྐྱོང ། དེ་ཅིའི་ཕྱིར་ཞེ་ན། དེ་བཞིན་གཤེགས་པའི་སྐུ་ནི། མཐར་འཛིན་པ་ཐམས་ཅད་རྣམ་པར་སྤངས་པ་སྟེ། དེས་ན་དེ་བཞིན་གཤེགས་པ་ལུས་ལ་ལུས་ཀྱི་རྗེས་སུ་གཟིགས་ཤིང་སྤྱོད་དོ། །སེམས་ལ་སེམས་ཀྱི་རྗེས་སུ་གཟིགས་ཤིང་སྤྱོད་དོ། །བཟང་སྐྱོང ། ཤེས་རབ་གང་ཆོས་ཐམས་ཅད་རབ་ཏུ་ཤེས་པར་བྱེད་པའི་ཤེས་རབ་གཟུགས་མེད་པ། བསྟན་དུ་མེད་པ། མི་སྣང་བ། རྣམ་པར་རིག་པར་བྱེད་པ་མ་ཡིན་པ། ཟག་པ་མེད་
38a
༄#། །པ་དེའང་མངོན་པར་རྫོགས་པར་འཚང་རྒྱ་བར་ཡང་མི་འགྱུར་རོ། །མངོན་པར་རྫོགས་པར་འཚང་མི་རྒྱ་བར་ཡང་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་བཞིན་གཤེགས་པ་རྣམས་ཀྱི་སྐུ་ཟག་པ་མེད་པ། དེ་བཞིན་གཤེགས་པ་རྣམས་ཀྱི་ཐུགས་ཟག་པ་མེད་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་གཟུགས་ཀྱང་ཟག་པ་མེད་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་རྣམས་ཀྱང་ཟག་པ་མེད་པ་ཡིན་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཚུལ་ཁྲིམས་སམ། ཏིང་ངེ་འཛིན་ཏམ། ཤེས་རབ་བམ། རྣམ་པར་གྲོལ་བའམ། རྣམ་པར་གྲོལ་བའི་ཡེ་ཤེས་མཐོང་བ་ཟག་པ་མེད་པ་ཡིན་པ་ལྟ་སྨོས་ཀྱང་ཅི་དགོས། བཟང་སྐྱོང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཆོས་ཐམས་ཅད་ཀྱང་ཟག་པ་མེད་པའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་དམ་པའི་ཆོས་གང་བཤད་པའམ། འཆད་པའམ། འཆད་པར་འགྱུར་བའི་ཆོས་དེའང་ཟག་པ་མེད་པ་སྟེ། བྱིས་པ་མི་མཁས་པ་རྣམས་ཀྱིས་མི་ཤེས་ཀྱི། མཁས་པ་རྣམས་ཀྱིས་ཡང་དག་པར་རྟོགས་སོ། །བཟང་སྐྱོང ། དེའི་ཚེ་ན་བྱང་ཆུབ་སེམས་དཔས་འདི་ལྟར་བསླབ་པར་བྱ་
38b
སྟེ།་ཅི་ལུས་ཀྱིས་བྱང་ཆུབ་མངོན་པར་འཚང་རྒྱའམ། འོན་ཏེ་ཤེས་རབ་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་པར་འགྱུར་སྙམ་དུ་བསླབ་པར་བྱའོ། །བཟང་སྐྱོང ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར་ལུས་ཀྱིས་ཀྱང་བྱང་ཆུབ་མངོན་པར་རྫོགས་པར་འཚང་མི་རྒྱ། ཤེས་རབ་ཀྱིས་ཀྱང་མ་ཡིན་ནོ། །སྙམ་དུ་བསླབ་པར་བྱའོ། །དེ་ཅིའི་ཕྱིར་ཞེ་ན། ཤེས་རབ་དེ་ནི།་ཟག་པ་མེད་ཅིང་རྣམ་པ་ཐམས་ཅད་དུ་ཡོངས་སུ་བཙལ་ཀྱང་མི་དམིགས་ཏེ། དེ་དེའི་རྒྱུས་བྱང་ཆུབ་བཙལ་བ་ལ་བཏང་སྙོམས་སུ་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་དེ་འང་ཟག་པ་མེད་ཅིང་རྣམ་པ་ཐམས་ཅད་དུ་ཡོངས་སུ་བཙལ་ཀྱང་མི་དམིགས་སོ། །དེས་རང་གིས་ལུས་དང ། རང་གིས་སེམས་ཡོངས་སུ་བཙལ་ཀྱང་མི་དམིགས་སོ། །དེས་དེ་ལྟར་ཆོས་ཐམས་ཅད་ཡོངས་སུ་བཙལ་ཀྱང་མི་དམིགས་སོ། །སུ་ཞིག་བྱང་ཆུབ་མངོན་པར་རྫོགས་པར་འཚང་རྒྱ་ཞེས་ཀྱང་མི་དམིགས་སོ། །གང་གིས་བྱང་ཆུབ་མངོན་པར་འཚང་རྒྱ་ཞེས་ཀྱང་མི་དམིགས་སོ། །ཅི་ཞིག་བྱང་ཆུབ་མངོན་པར་རྫོགས་པར་འཚང་རྒྱ་བར་བྱ་ཞེས་ཀྱང་མི་དམིགས་ཤིང་མི་མཐོང་ངོ ། །དེ་ཆོས་ཐམས་ཅད་ལ་དེ་ལྟར་རྣམ་པར་ལྟ་བ་ན་ཡང་དག་པར་མི་མཐོང་ངོ ། །དེ་ཆོས་ཐམས་ཅད་རང་བཞིན་གྱིས་ཞི་བར་ཡང་དག་པར་རྗེས་སུ་མི་མཐོང་ཡང་དེ་དག་རང་བཞིན་གྱིས་ཞི་བ་ནི། མ་ཡིན་ནོ། །དེ་ཅིའི་ཕྱིར་ཞེ་ན། གང་མ་སྐྱེས་པ་དེ་ནི། མ་ཞི་བའི་ཕྱིར་རོ། །དེ་མ་ཞི་བའི་ཆོས་ཐམས་ཅད་ལ་ཞི་བའི་ཆོས་རྣམས་སུ་རྟོག་གོ་།ཞི་བའི་
39a
༄#། །ཆོས་ཐམས་ཅད་ལ་ཞི་བ་དང་བྲལ་བར་རྟོག་གོ་།དེས་དེ་ལྟར་བརྟགས་ནས་ཆོས་རྣམས་ཞི་བ་ཞེས་ཀྱང་བརྟག་པར་མི་བྱའོ། །མ་ཞི་བར་ཡང་བརྟག་པར་མི་བྱའོ། ། བཟང་སྐྱོང ། དེ་ཅིའི་ཕྱིར་ཞེ་ན། ཆོས་ཐམས་ཅད་ནི། མ་སྐྱེས་པ་དང ། ཡོངས་སུ་མ་གྲུབ་པའི་ཕྱིར་རོ། །བཟང་སྐྱོང ། འདི་ལྟ་སྟེ། དཔེར་ན། སྐྱེས་བུ་ལ་ལ་ཞིག་མེ་མ་བུས་མ་འབར་བར་འདི་སྐད་དུ་བདག་གིས་མེ་འདི་ཞི་བར་བྱའོ། །ཞེས་ཟེར་ན། བཟང་སྐྱོང ། དེ་ཇི་སྙམ་དུ་སེམས། སྐྱེས་བུ་དེ་ཡང་དག་པར་སྨྲ་བས་སྨྲ་བ་ཡིན་ནམ། བཟང་སྐྱོང་གིས་གསོལ་པ། བཙུན་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། དེ་བཞིན་ཏེ། ཆོས་ཐམས་ཅད་མི་དམིགས་པའི་ཕྱིར་རོ། །གང་ཞིག་འདི་སྐད་དུ་འཇིག་རྟེན་གྱི་ཀུན་རྫོབ་མ་གཏོགས་པར་ང་ནི། ཆོས་ཐམས་ཅད་ཡོངས་སུ་ཤེས་པར་འགྱུར་རོ། །ང་ནི། ཆོས་ཐམས་ཅད་སྤོང་བར་འགྱུར་རོ། །ང་ནི། ཆོས་ཐམས་ཅད་མངོན་སུམ་དུ་བྱེད་པར་འགྱུར་རོ། །ང་ནི། ཆོས་ཐམས་ཅད་སྒོམ་པར་འགྱུར་རོ། །ང་ནི། ཆོས་ཐམས་ཅད་ཞི་བར་བྱེད་པར་འགྱུར་རོ། །ང་ནི། ཆོས་ཐམས་ཅད་ཐོབ་པར་འགྱུར་རོ། །ང་ནི། རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་རོ། །ང་ནི། ལན་གཅིག་ཕྱིར་འོང་བའི་འབྲས་བུ་ཐོབ་པར་འགྱུར་རོ། །ང་ནི། ཕྱིར་མི་འོང་བའི་འབྲས་བུ་ཐོབ་པར་འགྱུར་རོ། །ང་ནི། དགྲ་བཅོམ་པ་ཉིད་ཐོབ་པར་
39b
འགྱུར་རོ། །ང་ནི། རང་བྱང་ཆུབ་ཐོབ་པར་འགྱུར་རོ། །ང་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །ང་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཆོས་སྟོན་པར་འགྱུར་རོ། །ང་ནི། སེམས་ཅན་རྣམས་འཁོར་པ་ལས་ཡོངས་སུ་ཐར་པར་བྱེད་པར་འགྱུར་རོ། །ཞེས་ཟེར་ན། དེ་ཡང་དག་པས་སྨྲ་བས་སྨྲ་བ་ཡིན་ནམ། བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། དེ་ལྟ་བས་ན། རིགས་ཀྱི་བུའམ། རིགས་ཀྱི་བུ་མོ་དག་ཡང་དག་པར་རྫོགས་པའི་བྱང་ཆུབ་འདོད་པ་དང ། རིགས་ཀྱི་བུའམ། རིགས་ཀྱི་བུ་མོ་རང་བྱང་ཆུབ་འདོད་པ་དང ། དགྲ་བཅོམ་པ་ཉིད་འདོད་པས་ཆོས་དེ་དག་ལ་དེ་ལྟར་བརྟག་པར་བྱའོ། །ཆོས་དེ་དག་ལ་དེ་ལྟར་བརྟགས་ནས་ཆོས་རྣམས་ཞི་བ་ཞེས་བརྟག་པར་མི་བྱའོ། །ཆོས་རྣམས་མ་ཞི་བ་ཞེས་ཀྱང་བརྟག་པར་མི་བྱའོ། །བཟང་སྐྱོང ། དེ་ཅིའི་ཕྱིར་ཞེ་ན། འདི་ལྟར་གང་ལ་ལ་ཞིག་ཅིའང་མེད་ཅིང་མ་སྐྱེས་ཏེ། ཡོངས་སུ་མ་གྲུབ་པའི་ཆོས་ཐམས་ཅད་ལ་ཆོས་ཐམས་ཅད་ཞི་བའོ། །ཞེས་རྟོག་ན། འདི་ནི། མཐའ་གཅིག་གོ་།ཆོས་ཐམས་ཅད་མ་ཞི་བའོ། །ཞེས་རྟོག་ན། འདི་ནི། མཐའ་གཉིས་པའོ། །བཟང་སྐྱོང ། གང་ཞི་བ་དང ། མ་ཞི་བའི་མཐའ་འདི་གཉིས་མི་དམིགས་པ་དང ། མི་རྟོག་པ་དང ། རྣམ་པར་མི་སྒྲུབ་པ་དང ། ཡིད་ལ་མི་བྱེད་པ་དང ། ཀུན་ཏུ་མི་སྤྱོད་པ་འདི་ནི། བགྲང་
40a
༄#། །བའི་ཚུལ་དུ་འཇིག་རྟེན་གྱི་ཀུན་རྫོབ་ཀྱི་བསྟན་པས་དབུ་མའི་ལམ་ཞེས་བྱ་སྟེ། དོན་དམ་པར་ནི། འདི་ལ་མཐའ་དང ། དབུས་དམིགས་སུ་མེད་དོ། །བཟང་སྐྱོང ། དེ་ཅིའི་ཕྱིར་ན།་འདི་ལྟར་ཆོས་དེ་ཐམས་ཅད་ནི། ནམ་མཁའ་དང་འདྲ་བ་མྱ་ངན་ལས་འདས་པ་དང་མཉམ་པ་སྟེ། དེ་དག་ནི། ཆད་པ་མེད་པ། མ་ཞིག་པ། མི་རྟག་པ། ཐེར་ཟུག་ཏུ་གནས་པ་མ་ཡིན་པ། ཡུལ་ན་མི་གནས་པ། ཕྱོགས་ན་མི་གནས་པ། མཚན་མ་མེད་པ། གྲངས་མེད་པ་སྟེ། མཁས་པ་རྣམས་ཀྱིས་ཀྱང་དེ་ལ་གྲངས་ཀྱིས་ཉེ་བར་མི་འགྲོ་ཞིང་མི་དམིགས་པས་ན། ཆོས་ཐམས་ཅད་ནི། གྲངས་མེད་པ་ཞེས་བྱའོ། །བཟང་སྐྱོང ། དེ་ལྟར་བྱང་ཆུབ་སེམས་དཔས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ནས་མངོན་པར་ཞེན་པར་མི་བྱའོ། །དེ་ཅིའི་ཕྱིར་ཞེ་ན། བཟང་སྐྱོང ། ཆོས་ཐམས་ཅད་ནི། མངོན་པར་ཞེན་པར་བྱ་བ་མ་ཡིན་ཞིང ། དེ་དག་ལ་ནི། མངོན་པར་ཞེན་པ་མེད་པ་སྟེ། རྩ་བ་ཆད་པ་དང ། རྩ་བ་དང་བྲལ་བ། རྟེན་པ་མེད་པ་ཞེས་བྱའོ། །བཟང་སྐྱོང ། བྱང་ཆུབ་སེམས་དཔས་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཅི་ནས་ཀྱང་སངས་རྒྱས་བཅོམ་ལྡན་འདས་དེ་དག་མཐོང་ན། མཆོག་ཏུ་འཛིན་བ་མེད་ཅིང་མི་དམིགས་པ་དང ། ལོག་པར་འཛིན་པ་མེད་པ་དེ་ལྟར་བསྒོམ་པར་བྱའོ། །དེ་ཅིའི་ཕྱིར་ཞེ་ན། བཟང་སྐྱོང ། ཆོས་ཐམས་ཅད་ནི། གཟུང་བ་མེད་པ་སྟེ། ཤིན་
40b
ཏུ་ཞི་བ་ནམ་མཁའ་དང་འདྲ་བ་མྱ་ངན་ལས་འདས་པ་དང་མཉམ་པའོ། །ཞེས་དེ་བཞིན་གཤེགས་པས་བཀའ་སྩལ་བའི་ཕྱིར་རོ། །བཟང་སྐྱོང ། འདི་ལྟ་སྟེ། དཔེར་ན། གསེར་གྱི་གར་བུ་ཤིན་ཏུ་བསྲེགས་པ། ཤིན་ཏུ་བཙོས་པ། ལྕགས་ཀྱི་ཐུ་ལུམ་དང་འདྲ་བ་ནི། མཁས་པ་རྣམས་ཀྱིས་འཛིན་པར་མི་བྱེད་དོ། །བཟང་སྐྱོང ། དེ་ཅིའི་ཕྱིར་ཞེ་ན། འདི་ལྟར་དེ་ནི། ཚ་བའི་བདག་ཉིད་དེ། བཟང་སྐྱོང ། དེ་ནི། རིན་པོ་ཆེའི་མཆོག་གསེར་ཡིན་མོད་ཀྱི། འོན་ཀྱང་བཟང་སྐྱོང ། འདི་ལྟ་སྟེ། ཤིན་ཏུ་ཚ་བའི་ཕྱིར་འཛིན་པར་མི་བྱེད་དོ། །བཟང་སྐྱོང ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ན། མངོན་པར་ཞེན་པར་མི་བྱའོ། །གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་རྣམས་སུའང་མངོན་པར་ཞེན་པར་མི་བྱའོ། །ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བར་ཡང་མངོན་པར་ཞེན་པར་མི་བྱའོ། །སངས་རྒྱས་ཀྱི་ཆོས་ཐམས་ཅད་དུའང་མངོན་པར་ཞེན་པར་མི་བྱའོ། །རྣམ་པ་ཐམས་ཅད་དུའང་མངོན་པར་ཞེན་པར་མི་བྱའོ། །བཟང་སྐྱོང ། དེ་ཅིའི་ཕྱིར་ཞེ་ན། འདི་ལྟར་མངོན་པར་ཞེན་པ་ནི། འཁོར་བའི་བདག་ཉིད་ཅན་སྡུག་བསྔལ་གྱི་ཆོས་ཐམས་ཅད་སྐྱེད་པའོ། །བཟང་སྐྱོང ། འོན་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་
41a
༄#། །པ་ཡང་དག་པར་རྫོགས་པའི་སངས་རྒྱས་དེ་དག་མཐོང་ན། འདི་ལྟར་ཡོན་ཏན་གྱི་ཆོས་རྨད་དུ་བྱུང་བ་དང་ལྡན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་འདི་ལྟ་སྟེ། ཡེ་ཤེས་ཆེན་པོ་དང ། སངས་རྒྱས་ཀྱི་ཡེ་ཤེས་དང ། དེ་བཞིན་གཤེགས་པའི་ཡེ་ཤེས་དང ། རང་བྱུང་གི་ཡེ་ཤེས་དང ། མི་མཉམ་པ་དང་མཉམ་པའི་ཡེ་ཤེས་དང ། འཇིག་རྟེན་གསུམ་པོ་ཐམས་ཅད་ལས་ཁྱད་པར་དུ་འཕགས་པའི་ཡེ་ཤེས་ནི། ངོ་མཚར་ཆེའོ། །ཞེས་དེ་ལྟར་ཡོན་ཏན་གྱི་ཆོས་ཁྱད་པར་དུ་འཕགས་པ་ལ་འདོད་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལ་འདོད་པར་བྱའི་ཡེ་ཤེས་དེ་ལ་མངོན་པར་ཞེན་པར་མི་བྱའོ། །བཟང་སྐྱོང ། བྱང་ཆུབ་སེམས་དཔའ་སེམས་དཔའ་ཆེན་པོས་ཏིང་ངེ་འཛིན་འདི་ལའང་མངོན་པར་ཞེན་པར་མི་བྱའོ། །དེ་ཅིའི་ཕྱིར་ཞེ་ན། བཟང་སྐྱོང ། ཆོས་འདི་དག་ནི། མངོན་པར་ཞེན་པ་མེད་པ་རྣམས་ཀྱི་མངོན་སུམ་དུ་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །མེ་ལོང་ཕྱིས་པའམ་འབྲུ་མར་སྣོད་དག་ལ། །བུད་མེད་བརྒྱན་པས་བཞིན་ནི་བལྟས་བྱས་ཏེ། །དེ་ལ་དེ་ནི་འདོད་ཆགས་སྐྱེས་གྱུར་ནས། །འདོད་པ་ཚོལ་ཞིང་ཀུན་ཏུ་རྒྱུག་པར་བྱེད། །མེད་པའི་ཆོས་ལ་བུད་མེད་ཕྱིན་ཅི་ལོག་།མི་བཟད་གདུངས་ཤིང་འདོད་པས་གཟིར་གྱུར་པ། །བུད་མེད་རང་གི་ལུས་ལས་བསླུས་གྱུར་
41b
པ། །ཆོས་འདི་རྣམས་ནི་གསོག་ཏུ་མི་ཤེས་ལྟར། །བྱང་ཆུབ་འཚང་རྒྱ་བདུད་རྩི་རིག་འགྱུར་ཞིང ། །སྡུག་བསྔལ་གཟིར་བའི་སེམས་ཅན་དགྲོ་ལ་འགྱུར་སྙམ། །བྱང་ཆུབ་སེམས་དཔའ་སེམས་ནི་དེ་བཞིན་ཏེ། །མི་ཤེས་པས་ནི་སེམས་ཅན་ཞེས་ཀྱང་བྱ། །དོན་དམ་ལ་ནི་གང་ཞིག་སྐྱེ་འཆི་དང ། །མྱ་ངན་འདས་པའི་སེམས་ཅན་འགའ་མི་དམིགས། །ཆོས་རྣམས་གཟུང་མེད་ནམ་མཁའི་ཟླ་བ་འདྲ། ། བྱང་ཆུབ་བཙལ་ཀྱང་རྙེད་པར་མི་འགྱུར་ཏེ། །གཟུགས་བརྙན་ལྟ་བུ་ནམ་མཁའི་ཟླ་བ་འདྲ། །སྒྱུ་མ་ལྟ་བུ་སྟོང་པ་སྨིག་རྒྱུ་འདྲ། །ཆོས་རྣམས་དངོས་པོ་མེད་ཅིང་རང་བཞིན་སྟོང ། །དེ་ལ་བྱིས་བ་རྟག་ཏུ་ཡོད་འདུ་ཤེས། །འདི་ལ་མི་ནི་ཉོན་མོངས་འགའ་མེད་པར། །བྱང་ཆུབ་མཁས་པ་གང་གིས་ཤེས་གྱུར་ཅིང ། །འཇིག་རྟེན་འཁྲུལ་པར་དོན་དམ་ཤེས་གྱུར་ན། །དེ་ནི་འཇིག་རྟེན་གཙོ་བོ་སངས་རྒྱས་འགྱུར། །སངས་རྒྱས་བྱང་ཆུབ་སེམས་ཀྱིས་བརྟགས་པ་ཡིན། །སེམས་ཀྱང་རྣམ་དག་རང་བཞིན་འོད་གསལ་ཞིང ། །རྙོག་མེད་འགྲོ་བ་ཀུན་དང་མ་འདྲེས་པར། །གང་གིས་ཤེས་པ་བྱང་ཆུབ་མཆོག་འཚང་རྒྱ། །ཆོས་ཀུན་ཟག་པ་མེད་ཅིང་གཟུགས་མེད་ལ། །དབེན་ཞིང་སྟོང་པར་རྣམ་པར་མི་རྟོག་པ། །འདོད་ཆགས་བྲལ་ཞིང་སེམས་ནི་རྣམ་གྲོལ་ཏེ། །གང་གིས་ཤེས་པས་ཏིང་འཛིན་འདི་ཐོབ་བོ། །རྒྱལ་བའི་སྐུ་ལ་དམིགས་པར་བྱས་ནས་སུ། །རང་བཞིན་རྣམ་དག་ཆོས་ནི་མ་ཉན་པར་བྱོས། །སྒོམ་དང་རྣམ་སྒོམ་ཅུང་ཟད་འདིར་མ་བྱེད། །ཏིང་འཛིན་འདི་ནི་རྙེད་པར་དཀའ་
42a
༄#། །མི་འགྱུར། །ནམ་མཁའི་འདུ་ཤེས་ལ་ནི་གནས་བྱས་ན། །ཕྲ་རབ་རྡུལ་གྱི་འདུ་ཤེས་འགག་པར་འགྱུར། །རྟོག་པ་མེད་ཅིང་མ་བྱས་ཞིག་མེད་པར། །གང་གིས་ཤེས་པས་ཏིང་འཛིན་འདི་ཐོབ་བོ། །གཟུགས་ཀུན་རྟོག་པ་མེད་པར་ཤེས་བྱས་ནས། །མིག་གིས་གང་དུ་བལྟས་ཀྱང་མི་ཆགས་ཤིང ། །འཇིག་རྟེན་འདིར་ནི་ཇི་ལྟར་ཉི་མ་བདུན་ཤར་པ། །དེ་ལྟར་དེས་ནི་སངས་རྒྱས་མཐོང་བར་འགྱུར། །མིག་ཀྱང་རྣམ་དག་རྣ་བའང་ཡོངས་དག་ཅིང ། །བརྩོན་འགྲུས་བརྩམས་ལ་དྲན་ལྡན་ཤེས་བཞིན་གྱིས། །ཏིང་འཛིན་འདི་ནི་ལེགས་པར་བསྒོམས་བྱས་ཏེ། །མང་དུ་ཐོས་པ་བསམ་གྱིས་མི་ཁྱབ་འཛིན། །མི་མཐོང་ཏིང་འཛིན་དེ་ནི་གང་ཡིན་དང ། །སེམས་ཅན་ཀུན་གྱི་ཏིང་འཛིན་གང་ཡིན་དེ། །གང་གིས་མི་མཐོང་གང་གིས་རྣམ་མི་མཐོང ། ། འདིར་ནི་མུ་སྟེགས་མང་པོ་གཞན་བརླག་འགྱུར། །མཚན་མའི་འདུ་ཤེས་དག་ནི་བསལ་བྱས་ན། །དེ་ནི་སེམས་ཀྱང་རྣམ་དག་སངས་རྒྱས་མཐོང ། །མཐོང་བར་གྱུར་ནས་ཕྱིར་ཡང་མི་མཐོང་བ།། དེ་ནི་འཇིག་རྟེན་དུའང་གཙོ་བོ་སངས་རྒྱས་འགྱུར། །དེ་ཡི་མདུན་ན་ས་མེད་ཆུ་ཡང་མེད། །མེ་ཡང་མེད་ཅིང་རླུང་མེད་ནམ་མཁའང་མེད། །དེས་ཀྱང་སངས་རྒྱས་རྣམས་ནི་བཞུགས་གྱུར་ཅིང ། ། དམ་པའི་ཆོས་འཆད་པ་ནི་དམིགས་པར་འགྱུར། །ཇི་ལྟར་ང་ནི་ཆོས་འཆད་འདུག་པ་ལ། །གང་དག་ཆོས་འདོད་པ་རྣམས་ལྟ་བ་བཞིན། །སངས་རྒྱས་དེ་བཞིན་ཆོས་མཆོག་མ་གཏོགས་པར། །དེ་ལ་
42b
དམིགས་པ་གཞན་ནི་མི་འབྱུང་ངོ ། །དེ་ལྟ་བུ་དང་ལྡན་པ་དག་ལ་ནི། །ཏིང་འཛིན་རྡུལ་བྲལ་འདི་ནི་ལེགས་བཟུང་བའི། །སངས་རྒྱས་མང་པོ་འཆད་པ་མ་གཏོགས་པར། །ཉན་སྟོན་གཞན་ནི་གང་ཡང་མི་དམིགས་སོ། །གང་ཞིག་ཏིང་འཛིན་ཞི་བ་འཕགས་པ་འདི། །མ་བཤད་པ་དང་འཆད་པར་མི་འགྱུར་བའི། །སངས་རྒྱས་སྔར་འདས་གང་ཡང་མ་བྱུང་ཞིང ། །མ་བྱོན་པ་ཡང་གང་ཡང་མི་བཞུགས་སོ། །སྲོག་ཆགས་དག་ལ་ཕན་ཕྱིར་འཇིག་རྟེན་དུ། །ད་ལྟར་མི་ཡི་མཆོག་ཏུ་ང་བྱུང་བའང ། །སངས་རྒྱས་འདྲེན་འདི་རྗེས་སུ་དྲན་གྱུར་ཏེ། །ཏིང་འཛིན་ཞི་བ་བལྟ་དཀའ་འདི་འཆད་དོ། །ལུས་དང་དེ་བཞིན་སྲོག་ལ་མི་ལྟ་ཞིང ། །སངས་རྒྱས་ཡོན་ཏན་རྣམས་ནི་ཚོལ་འདོད་པས། །ཏིང་འཛིན་འདི་ལ་གནས་པར་བྱས་ནས་ནི། །སངས་རྒྱས་བྱང་ཆུབ་རྙེད་པར་མི་དཀའ་འོ། །རང་བཞིན་གཅིག་པའི་མི་མཆོག་མང་པོ་དག་།མཁས་པ་གང་གིས་མཐོང་ན་ཞུ་འདོད་པ། །དེས་ནི་རིངས་ཤིང་རིངས་པར་མྱུར་ཚུལ་དུ། །རྡུལ་མེད་དག་པའི་ཏིང་འཛིན་བསྒོམ་པར་བྱ། །གང་ཞིག་སེམས་ཅན་དག་ལ་ཕན་ཕྱིར་ཞུགས། །ཐོས་མང་རྒྱ་ཆེ་བསམ་གྱིས་མི་ཁྱབ་ཚོལ། །དེས་ནི་རིངས་ཤིང་རིངས་པར་མྱུར་ཚོལ་དུ། །རྡུལ་མེད་དག་པའི་འཇིག་རྟེན་བསྒོམ་པར་བྱ། །འདི་ལ་འདོད་ཆགས་མེད་ཅིང་ཞེ་སྡང་མེད། །འདི་ལ་གཏི་མུག་མེད་ཅིང་ཕྲག་དོག་མེད། །འདི་ལ་ཤེས་དང་མི་ཤེས་པའང་མེད། །དེ་བས་ཏིང་འཛིན་ཞི་བ་འདི་ཤེས་བྱོས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བརྒྱད་
43a
༄#། །པའོ།། །།དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འདི་ལྟར་ཏིང་ངེ་འཛིན་ཟབ་མོ་འདི་བཅོམ་ལྡན་འདས་ཀྱིས་བཤད་པ་ངོ་མཚར་ཏོ། །བཙུན་པ་བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་གྱི་གནས་ནས་མངོན་པར་བྱུང་བ་རྣམས་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འཚལ་ན། བཅོམ་ལྡན་འདས། བྱང་ཆུབ་སེམས་དཔའ་དེས་ཆོས་གང་དག་ལ་གནས་ཏེ་ཏིང་ངེ་འཛིན་འདི་ངུད་མནོད་པར་བགྱི། བསྒོམ་པར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བའི་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འདོད་པ་དེས་ཚུལ་ཁྲིམས་ཡོངས་སུ་དག་པར་བྱའོ། །ཚུལ་ཁྲིམས་ལ་སྐྱོན་མེད་པར་བྱའོ། །བྱང་ཆུབ་སེམས་དཔའ་བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཚུལ་ཁྲིམས་ཡོངས་སུ་དག་པ་དང ། ཚུལ་ཁྲིམས་ལ་སྐྱོན་མ་མཆིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ།
43b
བཟང་སྐྱོང ། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་གང་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འདོད་པའི་བྱང་ཆུབ་སེམས་དཔའ་དེས་སོ་སོར་ཐར་པའི་སྡོམ་པས་བསྡམ་པར་བྱའོ། །ཆོ་ག་དང་སྤྱོད་ཡུལ་ཕུན་སུམ་ཚོགས་པ་དང ། ཁ་ན་མ་ཐོ་བ་ཆུང་རབ་ལའང་འཇིགས་པར་ལྟ་བ་དང ། སྤྱོད་ལམ་ཡོངས་སུ་དག་པར་བྱའོ། །ཡང་དག་པར་བླངས་ཏེ་བསླབ་པའི་གཞི་རྣམས་ལ་བསླབ་པར་བྱའོ། །ཟབ་མོ་ལ་མོས་པ་དང ། དམིགས་སུ་མེད་པ་ལ་བཟོད་པར་བྱའོ། །སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་ཆོས་ཐོས་ནས་མི་སྐྲག་པར་བྱའོ། །མི་དངང་བར་བྱའོ། །དངང་བར་མི་འགྱུར་བར་བྱའོ། །བཟང་སྐྱོང ། དེ་ལྟར་ན། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཚུལ་ཁྲིམས་ཡོངས་སུ་དག་པ་དང ། ཚུལ་ཁྲིམས་ལ་སྐྱོན་མེད་པ་ཡིན་ནོ། །བྱང་ཆུབ་སེམས་དཔའ་བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་ཚུལ་ཁྲིམས་ཡོངས་སུ་མ་དག་པ་དང ། ཚུལ་ཁྲིམས་ལ་སྐྱོན་མ་མཆིས་པ་ལགས། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་གང་ལ་ལ་གཟུགས་ལ་གནས་ཏེ་ཚངས་བར་སྤྱད་པ་སྤྱོད་པ་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ལ་གནས་ཏེ་
44a
༄#། །ཚངས་པར་སྤྱད་པ་སྤྱོད་ཅིང ། བདག་གི་ཚུལ་ཁྲིམས་དང ། དཀའ་ཐུབ་དང་ཚངས་པར་སྤྱོད་པ་འདིས་ལྷའམ་ལྷ་ལ་ལ་ཞིག་ཏུ་གྱུར་ཅིག། ཅེས་ཟེར་བ་འདི་ནི། བཟང་སྐྱོང ། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བའི་ཚུལ་ཁྲིམས་ཡོངས་སུ་མ་དག་པ་ཡིན། ཚུལ་ཁྲིམས་ལ་སྐྱོན་ཡོད་པ་ཡིན། འདི་ལྟ་སྟེ། སྲིད་པའི་འདུ་ཤེས་མཆོག་ཏུ་བཟུང་ནས་དེ་འདོད་པ་ལ་བསྟེན་པར་འདོད་ཅིང་སྲིད་པར་སྐྱེ་བའི་གནས་གཟུང་བར་འདོད་པས་ཚུལ་ཁྲིམས་ཡོངས་སུ་མ་དག་པ་ཡིན་ནོ། །བཟང་སྐྱོང ། དེ་བས་ན། བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་གང་ཏིང་ངེ་འཛིན་འདི་ཐོས་ནས་འཆད་པའམ། སྒོམ་པར་འདོད་པ་དེས་ཚུལ་ཁྲིམས་ཡོངས་སུ་དག་པར་བྱའོ། །ཚུལ་ཁྲིམས་ལ་སྐྱོན་མེད་པར་བྱའོ། །ཚུལ་ཁྲིམས་འདྲེན་མ་མ་ཡིན་པར་བྱའོ། །ཚུལ་ཁྲིམས་མ་ཉམས་པར་བྱའོ། །ཚུལ་ཁྲིམས་བསྲ་བསྲེར་མ་གྱུར་པར་བྱའོ། །རྟེན་པ་མེད་པའི་ཚུལ་ཁྲིམས་དང ། མཆོག་ཏུ་འཛིན་པ་མེད་པའི་ཚུལ་ཁྲིམས་དང ། དམིགས་པ་མེད་པའི་ཚུལ་ཁྲིམས་དང ། མ་ཞིག་པའི་ཚུལ་ཁྲིམས་དང ། མཁས་པས་བསྔགས་པའི་ཚུལ་ཁྲིམས་དང ། འཕགས་པས་བསྔགས་པའི་ཚུལ་ཁྲིམས་རྣམས་སུ་བྱའོ། །དེས་སྦྱིན་པ་འགྱེད་པ་ལ་དགའ་བར་བྱའོ། །འདི་ལྟ་སྟེ། སྦྱིན་པའི་མཆོག་།སྦྱིན་པ་བླ་ན་མེད་པ། ཆོས་ཀྱི་སྦྱིན་པ་ལ་བརྩོན་འགྲུས་བརྩམ་པར་བྱའོ། །དྲན་
44b
པ་ཉེ་བར་གནས་པར་བྱའོ། །དད་པ་དང་ལྡན་པར་བྱའོ། །དེས་པ་དང་ངོ་ཚ་ཤེས་པ་དང་ལྡན་པ་དང ། ཁྲེལ་ཡོད་པ་ཕུན་སུམ་ཚོགས་པར་བྱའོ། །རྙེད་པ་དང ། བཀུར་སྟི་དང ། ཚིགས་སུ་བཅད་པ་ལ་ལྷག་པར་མ་ཞེན་པར་བྱའོ། །སེར་སྣ་མེད་ཅིང་ཕྲག་དོག་མེད་པ་དང ། སྦྱངས་པའི་ཡོན་ཏན་དང ། ཡོ་བྱད་བསྙུངས་པར་བྱའོ། །འཇིག་རྟེན་པའི་གཏམ་དོན་དུ་མི་གཉེར་གྱི་གཏམ་ཡོངས་སུ་སྤང་ཞིང ། འཇིག་རྟེན་ལས་འདས་པའི་གཏམ་དོན་དུ་གཉེར་བར་བྱའོ། །བྱས་པ་ཤེས་པ་དང ། བྱས་པ་གཟོ་བར་བྱའོ། །སྒྲ་ཆུང་བ་དང ། སྨྲ་བ་ཉུང་བར་བྱའོ། །གུས་པ་དང་བཅས་པ་དང ། ཞེས་དང་བཅས་པར་བྱའོ། །འདི་ལྟ་སྟེ། དགེ་བའི་བཤེས་གཉེན་ནི། རྙེད་པར་དཀའ་བས་སློབ་དཔོན་དང ། མཁན་པོ་ལ་བསྙེན་བཀུར་བྱ་བར་སྤྲོ་བར་བྱའོ། །དེས་སུ་ལས་ཆོས་འདི་ལྟ་བུ་འདི་རྣམ་པར་ཐོས་པར་འགྱུར་བ་དང ། བླངས་པ་དང ། གླེགས་བམ་དུ་བྲིས་པར་འགྱུར་བ་དང ། ཚིག་གིས་སྟོན་པའི་རག་ལས་པར་འགྱུར་བ་དེ་དང ། གང་ལས་མདོ་སྡེ་འདི་ཀུན་ཆུབ་པར་བྱེད་པའམ། ཀུན་ཆུབ་པར་བྱེད་པར་འགྱུར་བའམ། གླེགས་བམ་དུ་འབྲི་བའམ། བྲིས་པར་འགྱུར་བ་དེ་ལ་དེས་པར་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་དུ་འདུ་ཤེས་བསྐྱེད་པར་བྱའོ། ། སྟོན་པར་འདུ་ཤེས་བསྐྱེད་པར་བྱའོ། །ཆོས་དེ་ལྟ་བུ་འདི་རྣམས་ཀྱི་དོན་དང ། བྱང་ཆུབ་ཡོངས་སུ་སྨིན་པར་བྱ་བའི་ཕྱིར་དེས་དེ་ལ་ལྷག་པར་ཡང་དགའ་བ་དང ། དང་བ་དང ། གུས་པ་བསྐྱེད་པར་
45a
༄#། །བྱའོ། །བཟང་སྐྱོང ། གལ་ཏེ་བྱང་ཆུབ་སེམས་དཔའི་ཐེག་པ་པའམ། ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་དག་ཆོས་འདི་ལྟ་བུ་རྣམས་ཀྱི་ཆོས་འཆད་པའི་དགེ་སློང་ལ་དགའ་བ་དང ། དང་བ་དང ། གུས་པ་མ་སྐྱེད་ཅིང་དགེ་བའི་བཤེས་གཉེན་གྱི་འདུ་ཤེས་དང ། སྟོན་པའི་འདུ་ཤེས་ཀྱང་མི་སྐྱེད་ན། བཟང་སྐྱོང ། བྱང་ཆུབ་སེམས་དཔའི་ཐེག་པ་པའམ། ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་ཆོས་འདི་ལྟ་བུ་ཀུན་ཆུབ་པར་མ་བྱས་པའི་ཆོས་རྣམས་ཀུན་ཆུབ་པར་འགྱུར་བ་དང ། ཀུན་ཆུབ་པར་བྱས་པའི་ཆོས་རྣམས་གནས་པ་དང ། ཆུད་མི་ཟ་བ་དང ། མེད་པར་མི་འགྱུར་བ་ནི། གནས་མ་ཡིན་ཏེ། སྐབས་མེད་དོ། །བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུ་དེས་ཏིང་ངེ་འཛིན་འདི་འཐོབ་པ་དེའང་གནས་པ་མེད་དོ། །བཟང་སྐྱོང ། དེ་ཅིའི་ཕྱིར་ཞེ་ན། འདི་ལྟར་མ་གུས་པས་ནི། དམ་པའི་ཆོས་ནུབ་པར་འགྱུར་པའི་ཕྱིར་རོ། །བཟང་སྐྱོང ། གལ་ཏེ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ། རིགས་ཀྱི་བུ་མོའམ། ཉན་ཐོས་དང ། རང་སངས་རྒྱས་ཀྱི་ཐེག་པ་པའི་རིགས་ཀྱི་བུ་དང ། རིགས་ཀྱི་བུ་མོ་དེ་དག་ཆོས་འདི་ལྟ་བུ་འདི་དག་སྟོན་པར་བྱེད་པའི་དགེ་སློང་དང ། གང་ལ་ལས་ཆོས་ཀྱི་རྣམ་གྲངས་འདི་ལྟ་བུ་འདི་
45b
ཀུན་ཆུབ་པར་བྱེད་པར་འགྱུར་བ་དང ། ཀུན་ཆུབ་པར་བྱས་པ་དང ། གླེགས་བམ་དུ་བྲིས་པར་གྱུར་པ་དེ་དག་ལ་དགའ་བ་དང ། དང་བ་དང ། གུས་པའང་སྐྱེད་ཅིང ། དགེ་བའི་བཤེས་གཉེན་གྱི་འདུ་ཤེས་དང ། སྟོན་པའི་འདུ་ཤེས་ཀྱང་ཉེ་བར་གཞོག་ན། བཟང་སྐྱོང ། བྱང་ཆུབ་སེམས་དཔའི་ཐེག་པ་པའམ། ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་དེ་དག་ཀུན་ཆུབ་པར་མ་བྱས་པའི་ཆོས་རྣམས་ཀུན་ཆུབ་པར་འགྱུར་བ་དང ། ཀུན་ཆུབ་པར་བྱས་པའི་ཆོས་རྣམས་གནས་པ་དང ། ཆུད་མི་ཟ་བ་དང ། མེད་པར་མི་འགྱུར་བའི་གནས་ཡིན་ཏེ། དེ་ནི། གནས་ཡོད་དོ། བཟང་སྐྱོང ། དེ་བས་ན། ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །འདི་ལྟར་ཆོས་འདི་ལྟ་བུ་སྟོན་པའི་དགེ་སློང་རྣམས་ལ་དགའ་བ་དང ། དང་བ་དང ། གུས་པ་བསྐྱེད་པར་བྱའོ། །དགེ་བའི་བཤེས་གཉེན་དུ་འདུ་ཤེས་པ་དང ། སྟོན་པར་འདུ་ཤེས་བསྐྱེད་པར་བྱ་སྟེ། འདི་ནི། ངའི་རྗེས་སུ་བསྟན་པ་ཡིན་ནོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བའི་ཏིང་ངེ་འཛིན་འདི་ལུང་ནོད་པར་འདོད་པ་དང ། སྒོམ་པར་འདོད་པ་དེས་འགྱོད་པ་དང་བྲལ་བར་བྱའོ། །དགོན་པ་ལ་དགའ་བ་དང ། དགོན་པ་ལ་གཞལ་བ་དང ། དགོན་པ་ལ་འབབ་པ་དང ། དགོན་པ་ལ་བབ་པར་བྱའོ། །ལྗོངས་ཀྱི་ཕྱོགས་ལ་མངོན་པར་མི་དགའ་བར་བྱའོ།།
46a
༄#། །མཛའ་བོའི་ཁྱིམ་དང ། ཟས་སྦྱིན་པའི་ཁྱིམ་མི་འདོད་པས་སྲོག་ལ་མི་བལྟ་བར་བྱའོ། །ལུས་གཏོང་བས་ལུས་ལ་མི་ཆགས་པ་དང ། དགོན་པའི་འདུ་ཤེས་ཐོབ་པར་བྱའོ། །རྙེད་པ་དང ། བཀུར་སྟི་དང ། ཚིགས་སུ་བཅད་པ་ལ་མི་བརྟེན་པ་དང ། དམ་པའི་ཆོས་རབ་ཏུ་གཟུང་བར་བྱའོ། །ལྷུང་བཟེད་དང་ཆོས་གོས་ལ་མི་ཆགས་པ་དང ། མི་གསོག་པར་བྱའོ། །མགྲོན་དུ་གཉེར་མི་དགོས་པར་བསོད་སྙོམས་སྤྱད་པར་བྱའོ། །འཛེམ་ཞིང་འགྱོད་པ་དང་ལྡན་པར་བྱའོ། །གསེར་བདག་གིར་མི་བྱེད་པར་བྱའོ། །ཀུན་ནས་ལྡང་བ་མེད་པས་འགྱོད་པ་དང་བྲལ་བར་བྱའོ། །ཁོང་ཁྲོ་བ་སྤངས་པས་བྱམས་པ་ལ་གནས་པར་བྱའོ། །འཚེ་བ་སྤངས་པས་སྙིང་རྗེ་ལ་གནས་པར་བྱའོ། །མངོན་པར་མི་དགའ་བ་སྤངས་པས་དགའ་བ་ལ་གནས་པར་བྱའོ། །མཚན་མ་ཐམས་ཅད་སྤངས་པས་བཏང་སྙོམས་ལ་གནས་པར་བྱའོ། །བརྩོན་འགྲུས་བརྩམས་པས་བསླབ་པ་འདོད་པར་བྱའོ། །རྨུགས་པ་དང་གཉིད་ཀྱིས་མི་ནོན་པར་འཆག་པ་ལ་ཞུགས་པར་བྱའོ། །བཟང་སྐྱོང ། དེ་པས་ན། བྱང་ཆུབ་སེམས་དཔའ་ཁྱིམ་གྱི་གནས་ནས་བྱུང་བ་ཏིང་ངེ་འཛིན་འདི་ཐོས་ནས་ལུང་ནོད་པ་དང ། སྒོམ་པར་འདོད་པ་དེས་ཆོས་དེ་དག་ལ་གནས་ཏེ་ཏིང་ངེ་འཛིན་འདི་ལུང་མནོད་པར་བྱའོ། །བསྒོམ་པར་བྱའོ། །དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་
46b
སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འདི་ལྟར་རྒྱ་ཆེ་ཞིང་བཟང་བའི་ཆོས་འདི་དག་དེ་བཞིན་གཤེགས་པས་བསྟན་ཅིང་གསུངས་པ་ནི།་ངོ་མཚར་ཏོ། །བཙུན་པ་བཅོམ་ལྡན་འདས། བྱང་ཆུབ་སེམས་དཔའ་ལེ་ལོ་ཅན་གང་དག་འབྱུང་བ་དེ་དག་ནི། ཏིང་ངེ་འཛིན་འདི་ཐོས་ནས་སྐྲག་པར་འགྱུར། དངང་བར་འགྱུར། དངང་བར་བགྱིད་པར་འགྱུར་རོ། །ཆོས་དེ་ལྟ་བུར་བཟང་པ་དེ་དག་འཆད་པ་ལའང་དགའ་བ་དང ། མགུ་བ་དང ། དང་བ་རྒྱ་ཆེན་པོ་མི་འཐོབ་ཅིང་དེ་དག་འདི་སྙམ་དུ་བདག་ཅག་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཞན་ལས་ཏིང་ངེ་འཛིན་འདི་བསྒྲུབ་པར་བྱའོ། །ད་ལྟར་ནི། བདག་ཅག་ལུས་སྐེམ་ཞིང་ནད་མང་ངོ་སྙམ་དུ་སེམས་པར་འགྱུར་ཏེ། དེ་དག་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས་ཞུམ་པར་འགྱུར། ཀུན་ཏུ་ཞུམ་པར་འགྱུར་ཞིང ། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་སྒྲུབ་པར་བརྩོན་འགྲུས་ཀྱང་མི་རྩོམ་པར་འགྱུར་རོ། །བཙུན་པ་བཅོམ་ལྡན་འདས། ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་བརྩམས་པ་དང ། དྲན་པ་ལ་གནས་པ། ཆོས་འཚལ་བ། ཆོས་ལ་གུས་པ། ཆོས་འཛིན་པ། ཆོས་སྟོན་པ། ཆོས་སྨྲ་བ། ཆོས་ལ་ཡོངས་སུ་ལན་པ། ཆོས་ཀྱི་རྗེས་སུ་མཐུན་པའི་ཆོས་ལ་སྤྱོད་པ། ལུས་དང་སྲོག་ཡོངས་
47a
༄#། །སུ་གཏོང་བ། རྙེད་པ་དང ། བཀུར་སྟི་དང ། ཚིགས་སུ་བཅད་པ་ལ་མི་རྟེན་པ། ཡོན་ཏན་གྲགས་པ་མི་འཚལ་བ། ལྷུང་བཟེད་དང ། ཆོས་གོས་ལ་མ་ཆགས་པ། གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། རྒྱལ་སྲིད་དང ། ཡུལ་འཁོར་དང ། ཕོ་བྲང་འཁོར་ལ་མངོན་པར་མི་དགའ་བ། དབེན་པ་ལ་གཞོལ་བ། དབེན་པ་ལ་འབབ་པ། དབེན་པ་ལ་བབ་པ་གང་དག་འབྱུང་བ་དེ་དག་ནི། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཐོས་ནས་ཞུམ་པར་མི་འགྱུར། ཀུན་ཏུ་ཞུམ་པར་མི་འགྱུར།་སྐྲག་པར་མི་འགྱུར། དངང་བར་མི་འགྱུར། དངང་བར་བགྱིད་པར་མི་འགྱུར་བའི་སྟེང་དུ་དགའ་བ་དང ། མགུ་བ་དང ། དང་བ་རྒྱ་ཆེན་པོའང་འཐོབ་བོ། །དེ་དག་ཏིང་ངེ་འཛིན་འདི་གཟུང་བ་དང ། ཀུན་ཆུབ་པར་བྱ་བ་དང ། བཅང་བ་དང ། བཀླག་པ་དང ། ཡི་གེར་བྲི་བ་དང ། བསྟན་པ་དང ། བསྒོམ་པའི་སླད་དུ་བརྩོན་འགྲུས་རྒྱ་ཆེན་པོའང་རྩོམ་མོ། །བཙུན་པ་བཅོམ་ལྡན་འདས། རིགས་ཀྱི་བུའམ། རིགས་ཀྱི་བུ་མོ་འདི་དག་ནི། མ་བྱོན་པའི་སངས་རྒྱས་ལས་མང་དུ་ཐོས་པ་འཚལ་བར་མི་འགྱུར་རོ། །སྔགས་དང ། ཡོན་ཏན་དང ། ཆོས་ཀྱི་ཁྱད་པར་བསྒྲུབ་པའི་སླད་དུ་སྦྱོར་བར་ཡང་མི་འགྱུར་རོ། །དེ་ལྟ་ལགས་ཀྱིས་ཀྱང་བཙུན་པ་བཅོམ་ལྡན་འདས། མ་འོངས་པའི་དུས་ན་རིགས་ཀྱི་བུའམ་རིགས་ཀྱི་བུ་མོ་སྔོན་གྱི་རྒྱལ་བ་ལ་བགྱི་བ་བགྱིས་པ། བརྩོན་འགྲུས་
47b
བརྩམས་པ་གང་དག་འབྱུང་བ་དེ་དག་ནི། དེ་བཞིན་གཤེགས་པས་གསུངས་པའི་ཏིང་ངེ་འཛིན་འདི་ལྟ་བུ་འདི་ཐོས་ནས་འདི་སྙམ་དུ་བདག་ཅག་ནི། འདི་ཉིད་དུ་ལུས་དང ། པགས་པ་དང ། ཤ་དང།་ཁྲག་དང ། རུས་པ་དང ། ཆུ་བ་དང ། རྐང་རྣམས་བསྐམས་ཤིང་ཡོངས་སུ་བསྐམས་ཀྱང་བླ་ཡི། འདི་ལྟར་བདག་ཅག་ལེ་ལོ་ཅན་དུ་གྱུར་ཏེ་འཆི་བའི་དུས་བྱེད་པར་མི་བྱའོ། །བདག་ཅག་གིས་ཆོས་རྒྱ་ཆེ་ཞིང་བཟང་པ་འདི་ལྟ་བུ་འདི་དག་ཀུན་ཆུབ་པ་དང ། བཤད་པ་དང ། སྒོམ་པ་མ་བྱས་པར་བརྩོན་འགྲུས་གཏང་བར་མི་བྱའོ་སྙམ་སྟེ། དེ་ལྟར་བརྩོན་འགྲུས་རྩོམ་པར་འགྱུར་རོ། །སྐྱེས་བུ་དམ་པ་བརྩོན་འགྲུས་རྟག་ཏུ་བརྩམས་པ་དེ་ལྟ་བུ་དེ་དག་དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདི་ཐོས་ནས་ཐོས་མ་ཐག་ཏུ་དགའ་བ་དང ། མགུ་བ་དང ། དང་བ་ཤིན་ཏུ་རྒྱ་ཆེ་བའང་འཐོབ་བོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། ། བཟང་སྐྱོང ། ལེགས་སོ། །ལེགས་སོ། །ཡང་བཟང་སྐྱོང ། ཁྱོད་ཀྱིས་རྗེས་སུ་མཐུན་པའི་ཆོས་བཤད་པ་ནི། ཕྱིན་ཅི་མ་ལོག་ཅིང་དེ་ལྟར་དེ་བཞིན་ཡིན་ཏེ། ལེགས་སོ། །ང་ཡང་དེ་ལ་རྗེས་སུ་ཡི་རང་སྟེ། ངས་གང་ལ་རྗེས་སུ་ཡི་རང་བ་དེ་ལ་འདས་པ་དང ། མ་འོངས་པ་དང ། ད་ལྟར་གྱི་སངས་རྒྱས་བཅོམ་ལྡན་འདས་རྣམས་ཀྱང་རྗེས་སུ་ཡི་རང་བར་མཛད་དོ། །དེ་ནས་དེའི་ཚེ་བཅོམ་
48a
༄#། །ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སོ་སོར་ཐར་པར་བསླབ་པ་ངས་བཤད་གང ། །དེ་ཀུན་སློབ་པར་བྱེད་ཅིང་དགོན་པར་སྟེན། །སྦྱངས་པའི་ཡོན་ཏན་དག་ལ་རྟག་སྤྱོད་ན། །ཏིང་འཛིན་འདི་ནི་རྙེད་པར་དཀའ་མི་འགྱུར། །མགྲོན་དུ་གཉེར་བ་ཐམས་ཅད་སྤངས་བྱས་ཤིང ། །རོ་ལ་ཆགས་པའང་ཡོངས་སུ་སྤངས་བྱས་ཏེ། །གང་ལས་མཉན་ལ་སྟོན་པར་འདུ་ཤེས་ཤིང ། །མཉམ་ཞིང་མཚུངས་པའི་འདུ་ཤེས་ཉེ་བར་གཞོག་།ཕྲག་དོག་འདོད་པ་ང་རྒྱལ་སྤངས་བྱས་ལ། །འདོད་ཆགས་ཞེ་སྡང་གཏི་མུག་སྤངས་བྱས་ཏེ། ། བསམ་གཏན་སྦྱོར་སེམས་ཡང་དག་བསྐྱེད་བྱས་ཏེ། ཏིང་ངེ་འཛིན་འདི་ལ་ནི་འཇུག་པར་བྱ། །ཕྲག་དོག་མེད་ཅིང་འདོད་ཆགས་སྤངས་བྱས་ལ། །རབ་ཏུ་བསྡམས་ཤིང་ཁྲོ་བ་སྤངས་བྱས་ཏེ། །རྒྱལ་བའི་སྐུ་ལ་དམིགས་པ་དག་བྱས་ནས། །ཏིང་ངེ་འཛིན་འདི་ལ་ནི་འཇུག་པར་བྱའོ། །བརྩོན་འགྲུས་མི་གཏོང་གཉིད་ཀྱིས་མི་ནོན་ཅིང ། །གཉེན་དང་མཛའ་དང་ལྷན་ཅིག་མི་འགྲོགས་ལ། །འཆག་དང་ལྡན་ཞིང་མང་དང་གྲོགས་སྤངས་ཏེ། །ཏིང་འཛིན་རྡུལ་མེད་དེ་ནི་སྒོམ་པར་བྱོས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་དགུ་པའོ།། །། བམ་པོ་བཞི་པ། དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་
48b
འདས།་ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་སློང་མ་གང་ལ་ལ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འཚལ་ན།་བཙུན་པ་བཅོམ་ལྡན་འདས། དེས་ཆོས་གང་ལ་གནས་ཏེ་ཏིང་ངེ་འཛིན་འདི་ལུང་མནོད་པར་བགྱི། བསྒོམ་པར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་སློང་མ་གང་ལ་ལ་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འདོད་པ་དེས་རྟག་ཏུ་གུས་པ་དང་བཅས་པར་བྱའོ། །རྟག་ཏུ་ཕྲག་དོག་མེད་པ་དང ། མི་ཁྲོ་བར་བྱའོ། །ང་རྒྱལ་བཅོམ་པ་དང ། ཁེངས་པ་མེད་པ་དང ། བརྩོན་འགྲུས་བརྩམ་པར་བྱའོ། །ལེ་ལོ་མེད་པ་དང ། རྨུགས་པ་དང་གཉིད་སྤང་བར་བྱའོ། །མི་ཉལ་བར་སྦྱོར་བ་ལ་བརྩོན་པ་དང ། རྙེད་པ་དང ། བཀུར་སྟི་དང ། ཚིགས་སུ་བཅད་པ་དང ། ཆོས་གོས་དང ། ཟས་དང ། མལ་སྟན་དང ། ན་བའི་གསོས་སྨན་དང ། ཡོ་བྱད་བཙལ་བ་ཐམས་ཅད་སྤང་བར་བྱའོ། །འཚོ་བ་ཡོངས་སུ་དག་པ་དང ། ལུས་དང་སྲོག་ལའང་མི་རྟེན་པར་བྱའོ། །རྟག་ཏུ་ཆོས་འདོད་པ་དང ། མང་དུ་ཐོས་པ་ཚོལ་བ་ལ་བརྩོན་པར་བྱའོ། །མ་ཆགས་པ་དང ། ཞེ་མི་སྡང་བ་དང ། རྨོངས་པ་མེད་པའི་སེམས་སུ་བྱའོ། །བདུད་ཀྱི་ཕྱོགས་སྤང་བར་བྱའོ། །མཉེ་བ་དང ། རྒྱན་པ་དང་
49a
༄#། །ལུས་ལ་ཀླུབས་པ་རྣམས་སྤང་བར་བྱའོ། །ལྷུང་བཟེད་དང་ཆོས་གོས་ལ་མ་ཆགས་པར་བྱའོ། །གྲགས་པ་ལ་མི་ཆགས་པ་དང ། ཕྲ་མ་མེད་པ་དང ། ངོ་མི་རྟག་པ་རྣམས་སྤང་པར་བྱའོ། །བཟང་སྐྱོང ། དེ་བས་ན། ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་སློང་མ་གང་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འདོད་པ་དེས་སློབ་དཔོན་ལ་སྟོན་པའི་འདུ་ཤེས་བཞག་སྟེ་ཏིང་ངེ་འཛིན་འདི་ལུང་མནོད་པར་བྱའོ། །ཆོས་དེ་དག་ལ་གནས་ཏེ་ཏིང་ངེ་འཛིན་འདི་བསྒོམ་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དགེ་སློང་མ་གང་ཏིང་འཛིན་འདི་འདོད་པས། །རྟག་ཏུ་གུས་བྱས་ཕྲག་དོག་ཁྲོ་བ་དང ། །ང་རྒྱལ་དེ་བཞིན་ཁེངས་པ་སྤངས་བྱས་ན། །ཏིང་འཛིན་འདི་ནི་རྙེད་པར་དཀའ་མི་འགྱུར། །ཏིང་ངེ་འཛིན་འདི་ཚོལ་བར་གྱུར་ན་ནི། །བརྩོན་འགྲུས་བརྩམས་ཤིང་གཉིད་ནི་སྤངས་བྱས་ལ། །ཚོལ་བ་ཐམས་ཅད་རྣམ་པར་སྤངས་བྱས་ཏེ། ། སྲོག་ལ་འང་མི་རྟེན་པར་ནི་ཆོས་འདོད་བྱོས། །གང་ཞིག་ཏིང་འཛིན་འདི་ནི་གཟུང་འདོད་པས། །ཉོན་མོངས་གཟིར་བས་འདོད་ཆགས་ཞེ་སྡང་དང ། །ལྡན་པའི་སེམས་དང་གནས་པར་མི་བྱ་ཞིང ། །ནམ་ཡང་བདུད་ཀྱི་ཞགས་པས་མི་ཟིན་བྱོས། །གང་ཞིག་ཏིང་འཛིན་འདི་ནི་གཟུང་འདོད་པས། །སྒྱུ་དང་ལྡན་པར་སྤྱད་པར་མི་བྱ་ཞིང ། །མཉེ་བ་དང་ནི་རྒྱན་དང་ཕྲ་མ་
49b
དང ། །ངོ་མི་རྟག་པ་ཐམས་ཅད་སྤང་བར་བྱ། །ལྷུང་བཟེད་ཕྱིར་དང་བསྔགས་པ་དག་གི་ཕྱིར། །སྐད་ཅིག་ཙམ་ཡང་རྣམ་པར་མི་རྟོག་གོ་།གང་ལས་ཉན་ལ་སྟོན་པར་འདུ་ཤེས་ཤིང ། །མཉམ་ཞིང་མཚུངས་པའི་འདུ་ཤེས་ཉེ་བར་གཞོག་།བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་པའོ།། །།དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བྱང་ཆུབ་སེམས་དཔའ་ཁྱིམ་པར་གྱུར་པ་གོས་དཀར་པོ་འཚལ་ཞིང་ཁྱིམ་ན་གནས་པ་གང་ཏིང་ངེ་འཛིན་འདི་ཐོས་ནས་ཐ་ན་ཞག་གཅིག་གམ། ཞག་གཉིས་སུ་ལུང་ནོད་པའམ། སྒོམ་པར་འཚལ་ན། བཙུན་པ་བཅོམ་ལྡན་འདས། དེས་ཆོས་གང་ལ་གནས་ཏེ་ཏིང་ངེ་འཛིན་འདི་ལུང་མནོད་པར་བགྱི། བསྒོམ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། དེ་བས་ན། བྱང་ཆུབ་སེམས་དཔའི་ཁྱིམ་པར་གྱུར་པ་གོས་དཀར་པོ་གྱོ་ན་ཞིང་ཁྱིམ་ན་གནས་པ་ནི། གང་ཏིང་ངེ་འཛིན་འདི་ཐོས་ནས་ཐ་ན་ཞག་གཅིག་གམ། ཞག་གཉིས་སམ། ཐ་ན་བ་འཇོས་ཙམ་ཡང་ལུང་ནོད་པའམ། སྒོམ་པར་འདོད་ན། བྱང་ཆུབ་སེམས་དཔའ་ཁྱིམ་པར་གྱུར་པ་གོས་དཀར་པོ་གྱོན་ཞིང་ཁྱིམ་ན་གནས་པ་དེས་དད་པ་དང་ལྡན་པར་བྱའོ། །འཇུངས་པ་མེད་པ་དང ། ལྷུག་པར་གཏོང་བར་བྱའོ། །སྦྱིན་པ་བགེད་པ་ལ་དགའ་བ་དང ། རྣམ་པར་སྨིན་
50a
༄#། །པ་ལ་རེ་བ་མེད་པར་བདོག་པ་ཐམས་ཅད་ཡོངས་སུ་གཏང་བར་བྱའོ། །དེས་སངས་རྒྱས་ལ་སྐྱབས་སུ་འགྲོ་བར་བྱའོ། །ཆོས་ལ་སྐྱབས་སུ་འགྲོ་བར་བྱའོ། །དགེ་འདུན་ལ་སྐྱབས་སུ་འགྲོ་བར་བྱའོ། །ཚུལ་ཁྲིམས་ཡོངས་སུ་དག་པར་བྱའོ། །བསླབ་པའི་གཞི་ལྔ་ཡོངས་སུ་གཟུང་བར་བྱའོ། །ལྷ་གཞན་མེད་པར་བྱ་ཞིང་བསམ་པ་སངས་རྒྱས་ཀྱི་རྗེས་སུ་སོང་བར་བྱའོ། ། ཚུལ་ཁྲིམས་ལ་སྐྱོན་མེད་པ་དང ། དགེ་བ་བཅུའི་ལས་ཀྱི་ལམ་ཡང་དག་པར་གཟུང་ཞིང་སྒྲུབ་ལ་གཞན་ལའང་དེ་ཡང་དག་པར་འཛིན་དུ་འཇུག་པ་དང ། ཆང་འཐུང་བ་ལས་ཕྱིར་ལྡོག་པར་བྱའོ།། མ་འཕྱར་བར་བྱའོ། །གཞན་དག་ལ་ཆང་གི་མི་སྙན་པ་བརྗོད་ཅིང་གཞན་ལའང་ཆང་མི་སྦྱིན་པ་དང ། གཞན་དག་ལའང་འདོད་པ་སྨད་ཅིང་ཚངས་པར་སྤྱོད་པར་བྱའོ། །ཕྲག་དོག་མེད་པར་བྱའོ། ། འཚོ་བ་ཡོངས་སུ་དག་པར་བྱའོ། །བུ་ལ་སྲེད་པར་མི་བྱའོ། །བུ་མོ་ལ་སྲེད་པ་མི་བསྐྱེད་དོ། །ཆུང་མ་ལ་སྲེད་པ་མ་སྐྱེད་ཅིག་།ནོར་ལ་སྲེད་པར་མི་བྱའོ། །ཁྱིམ་ལ་སྲེད་པར་མི་བྱའོ། །དེས་རབ་ཏུ་བྱུང་བ་ལ་མངོན་པར་དགའ་བ་དང ། རབ་ཏུ་བྱུང་བ་ལ་སེམས་གཞོལ་བར་བྱའོ། །ཡན་ལག་བརྒྱད་དང་ལྡན་པའི་ཉེ་བར་གནས་པའི་ཏིང་ངེ་འཛིན་ལ་གཞོལ་བ་དང ། གཙུག་ལག་ཁང་ལ་གནས་པར་བྱའོ། །ངོ་ཚ་ཤེས་ཤིང་ཁྲེལ་ཡོད་པ་དང་ལྡན་པ་དང ། སེམས་བྱང་ཆུབ་ལ་གཞོལ་ཞིང་ཐེག་པ་གཞན་མི་འདོད་པར་བྱའོ། །ཚུལ་ཁྲིམས་དང་ལྡན་པའི་དགེ་སློང་རྣམས་ལ་འཕྱ་བར་མི་བྱའོ། །
50b
ཚངས་པར་སྤྱོད་པ་རྣམས་ལ་གུས་པ་དང་བཅས་པ་དང ། ཞེས་དང་བཅས་པར་བྱའོ། །སློབ་དཔོན་གང་ལས་ཏིང་ངེ་འཛིན་འདི་ལུང་མནོས་པ་དེ་ལ་ཤིན་ཏུ་ཕངས་པར་བསམ་པ་དང ། དང་བ་དང ། གུས་པར་བྱའོ། །དགེ་བའི་བཤེས་གཉེན་དུའང་འདུ་ཤེས་ཉེ་བར་གཞག་པར་བྱའོ། །སྟོན་པར་ཡང་འདུ་ཤེས་ཉེ་བར་གཞག་པར་བྱའོ། །དེ་ལ་བདེ་བའི་ཡོ་བྱད་ཐམས་ཅད་དབུལ་བར་བྱའོ། །བྱས་པ་ཤེས་པ་དང ། བྱས་པ་གཟོ་བ་དང ། གུས་པ་དང་བཅས་པས་གནས་པར་བྱ་སྟེ། བཟང་སྐྱོང ། དེ་ལྟར་བྱང་ཆུབ་སེམས་དཔའ་ཁྱིམ་པར་གྱུར་པ་ཁྱིམ་ན་གནས་པས་ཏིང་ངེ་འཛིན་འདི་ལ་སྦྱོར་བར་བྱའོ། །ཆོས་དག་ལའང་གནས་ཏེ་ཏིང་ངེ་འཛིན་འདི་བསྒོམ་པར་བྱའོ། །དེ་ནས་དེའི་ཚ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་ཁྱིམ་ན་གནས་པ་གང ། །ཏིང་འཛིན་འདི་ནི་གཟུང་བར་འདོད་གྱུར་པས། །རྟག་ཏུ་ཚུལ་ཁྲིམས་ཡོངས་སུ་དག་གྱུར་ཅིང ། །མངོན་བྱུང་སེམས་བརྟེན་ཡང་དག་བསྐྱེད་བྱས་ཏེ། །བསླབ་གཞི་ལྔ་ནི་ཡོངས་སུ་བཟུང་བྱས་ལ། །ཡན་ལག་བརྒྱད་པའི་གསོ་སྦྱོང་བསྙེན་བྱས་ཤིང ། །ཁྱིམ་མ་སྤངས་པར་གཙུག་ལག་ཁང་གནས་ཏེ། །ཏིང་ངེ་འཛིན་འདི་ལ་ནི་འཇུག་པར་བྱ། །སུ་ལའང་ཆང་ནི་བླུད་པར་མི་བྱ་ཞིང ། །སངས་རྒྱས་མ་བསྔགས་བཏུང་བ་རྣམས་སྤངས་ལ། །བསླབ་པ་འདི་དག་ལ་ནི་གནས་བྱས་ཏེ། །ཏིང་ངེ་འཛིན་འདི་ལུང་ནི་མནོད་པར་བྱ། །བུ་ལ་མི་སྲེད་བུ་མོར་མི་སྲེད་ལ། །ཆུང་མར་མི་སྲེད་ཁྱིམ་ལའང་མི་སྲེད་ཅིང ། །དགེ་བསྙེན་
51a
༄#། །ངོ་ཚ་ཤེས་དང་ལྡན་བྱས་ཏེ། །དེས་ནི་ཏིང་འཛིན་འདི་ལ་འཇུག་པར་བྱ། །ནད་མེད་བྱ་ཞིང་སུ་དག་ལ་ཡང་ནི། །མི་བསྙེན་མི་བརྗོད་མང་པོ་ཐམས་ཅད་སྤང ། །སྐྱོན་མེད་བཟོད་པ་དག་ལ་གནས་ནས་སུ། །ཏིང་ངེ་འཛིན་འདི་ལ་ནི་འཇུག་པར་བྱ། །ཏིང་འཛིན་འཕགས་པ་འདི་ལ་འཇུག་པ་ན། །སངས་རྒྱས་ཆོས་ལ་རྟག་ཏུ་གུས་བཅས་ཤིང ། །སེམས་ནི་དང་ལ་གཡོ་མེད་ཕྲག་དོག་མེད། །དགེ་འདུན་བསྙེན་བཀུར་བྱ་བར་སྤྲོ་བར་བྱོས། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་གཅིག་པའོ།། །།དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་གང་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འཚལ་ན། བཙུན་པ་བཅོམ་ལྡན་འདས། དེས་ཆོས་གང་ལ་གནས་ཏེ་ཏིང་ངེ་འཛིན་འདི་ལུང་མནོད་པར་བགྱི། བསྒོམ་པར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། དེ་བས་ན། ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་གང་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འདོད་པ་དེས་བསླབ་པའི་གཞི་ལྔ་ཡོངས་སུ་གཟུང་བར་བྱའོ། །བཟང་སྐྱོང །
51b
དགེ་བསྙེན་མས་གསུམ་ལ་སྐྱབས་སུ་སོང་ཞིང་ལྷ་གཞན་མེད་པར་བྱའོ། །བཟང་སྐྱོང ། དགེ་བསྙེན་མས་དགེ་མཚན་དང་ལྟས་ཡོངས་སུ་སྤང་བ་དང་སྒྱུ་མེད་པར་བྱའོ། །བཟང་སྐྱོང ། དགེ་བསྙེན་མས་སྤྱོད་ལམ་མི་བཅོས་པ་དང ། འཇུངས་པ་མེད་པར་བྱའོ། །བཟང་སྐྱོང ། དགེ་བསྙེན་མས་སྦྱིན་པ་བགེད་པ་ལ་དགའ་བ་དང ། ཆོས་འདོད་པར་བྱའོ། །བཟང་སྐྱོང ། དགེ་བསྙེན་མས་ཡོངས་སུ་འདྲི་པའི་རང་བཞིན་ཅན་དང ། གུས་པ་དང་བཅས་པ་དང ། ཞེས་དང་བཅས་པར་བྱའོ། །དགེ་སློང་དང ། དགེ་སློང་མ་དག་མཐོང་ན་སྟན་ལ་བདར་བར་བྱའོ། །བཟང་སྐྱོང ། དེ་བས་ན། ཐེག་པ་ཆེན་པོ་ལ་ཡང་དག་པར་ཞུགས་པའི་དགེ་བསྙེན་མ་གང་ཏིང་ངེ་འཛིན་འདི་ཐོས་ནས་ལུང་ནོད་པའམ། སྒོམ་པར་འདོད་ན། དགེ་བསྙེན་མ་དེས་ཆོས་དེ་ལྟ་བུ་དག་ལ་གནས་ཏེ་ཏིང་ངེ་འཛིན་འདི་ལུང་མནོད་པར་བྱའོ། །བསྒོམ་པར་བྱའོ། །དེས་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅས་པ་འདི་དག་གསུངས་སོ། །སངས་རྒྱས་གནང་ཞིང་བདེ་གཤེགས་བསྔགས་པ་ཡི། །དགེ་བསྙེན་མ་གང་ཏིང་འཛིན་འདི་ཚོལ་བ། །བསླབ་གཞི་ལྔ་པོ་དག་ནི་ཡོངས་བཟུང་སྟེ། །ཏིང་ངེ་འཛིན་འདི་ལ་ནི་འཇུག་པར་བྱ། །སངས་རྒྱས་ཆོས་དང་དེ་བཞིན་དགེ་འདུན་ལས། །ལྷ་གཞན་མེད་ཅིང་གུས་དང་བཅས་བྱས་ཏེ། །ལོག་པའི་ལམ་ནི་ཐམས་ཅད་སྤངས་བྱས་ལ། །ཏིང་ངེ་འཛིན་འདི་ལ་ནི་འཇུག་པར་བྱ། །སྲོག་ཆགས་མི་གསོད་མ་བྱིན་མི་ལེན་ཅིང ། །བརྫུན་དུ་སྨྲ་བ་རྣམས་ཀྱང་མི་ཟེར་ལ། །ནམ་ཡང་འདོད་ལ་ལོག་པར་
52a
༄#། །མི་གཡེམ་པར། །དེས་ནི་ཏིང་ངེ་འཛིན་འདི་ལུང་མནོད་བྱ། །འཇུངས་པ་མེད་པ་རྣམ་སྨིན་མི་རེ་ཞིང ། །སྤྱོད་ལམ་བཅོས་མ་དག་ཀྱང་མེད་བྱས་ལ། །ཕྲག་དོག་དང་ནི་ང་རྒྱལ་ཁྲོ་སྤངས་ཏེ། །དེས་ནི་ཏིང་ངེ་འཛིན་འདི་ལུང་ནོད་བྱ། །དགེ་སློང་དེ་བཞིན་དགེ་སློང་མ་མཐོང་ན། །གུས་དང་བཅས་པས་ལངས་ཤིང་སྟན་འབུལ་ལ། །ཆོས་འདོད་དགེ་བ་གང་ཞེས་ཚོལ་བྱེད་ཅིང ། །དེས་ནི་ཏིང་ངེ་འཛིན་འདི་ལུང་མནོད་བྱ། །བཟང་སྐྱོང་གིས་ཞུས་པའི་ཏིང་ངེ་འཛིན་ལས། །དགེ་བསྙེན་མའི་ལེའུ་སྟེ་བཅུ་གཉིས་པའོ།། །།དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་བ་རྣམས་ཀྱི་ཆེད་དང ། བྱང་ཆུབ་སེམས་དཔའ་འདོད་ཆེན་པ་རྣམས་དང ། ལྷག་པའི་བསམ་པ་ཕུན་སུམ་ཚོགས་པ་རྣམས་དང ། བརྩོན་འགྲུས་བརྩམས་པ་རྣམས་དང ། བརྩོན་པ་མི་འདོར་བ་རྣམས་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས་པ་རྣམས་ཀྱི་ཆེད་དུ་ཆོས་གང་ལ་གནས་ན། ཏིང་ངེ་འཛིན་འདི་ལུང་མནོད་པར་བགྱི་བའམ། བསྒོམ་པར་བགྱི་བའི་ཆོས་རྒྱ་ཆེ་ཞིང་བཟང་བ་གསུངས་པ་ངོ་མཚར་ཏོ། །བཙུན་པ་བཅོམ་ལྡན་
52b
འདས།་མ་འོངས་པའི་དུས་ན་དེ་བཞིན་གཤེགས་པ་མྱ་ངན་ལས་འདས་པ་དེའི་ཚེ་ཅི་ཏིང་ངེ་འཛིན་འདི་ཛམྦུའི་གླིང་འདིར་སྤྱོད་པར་འགྱུར་བ་ལགས་སམ། རྒྱས་པར་བགྱིད་པར་འགྱུར་བ་ལགས་སམ་བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། ང་ཡོངས་སུ་མྱ་ངན་ལས་འདས་ནས་ལོ་བཞི་སྟོང་དུ་ཏིང་ངེ་འཛིན་འདི་ཛམྦུའི་གླིང་ན་སྤྱོད་པར་འགྱུར་རོ། །རྒྱས་པར་བྱེད་པར་འགྱུར་རོ། །དེའི་འོག་ཏུ་སའི་ཁུང་དུ་སོང་བར་འགྱུར་རོ། །ཡང་དེ་ལོ་ལྔ་བརྒྱ་བ་ཐ་མ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ། དམ་པའི་ཆོས་འཇིག་པར་གྱུར་པ། དགེ་སྦྱོང་འཇིག་པར་གྱུར་པ། དམ་པའི་ཆོས་སྤོང་བར་གྱུར་པ། སེམས་ཅན་འཇིག་པར་གྱུར་པ། རྒྱལ་སྲིད་འཁྲུགས་པར་གྱུར་པ། ཚུལ་ཁྲིམས་དང་ལྡན་པའི་ཕྱོགས་དམས་པའི་དུས་ལ་བབ་པ། ཚུལ་ཁྲིམས་འཆལ་བའི་ཕྱོགས་འཕེལ་བའི་དུས་ལ་བབ་པ། དམ་པའི་ཆོས་ཀྱི་ཕྱོགས་དམས་པའི་དུས་ལ་བབ་པ། དམ་པ་མ་ཡིན་པའི་ཕྱོགས་ཀྱི་ཆོས་འཕེལ་བའི་དུས་ལ་བབ་པ། ཟད་པའི་དུས་ལ་བབ་པ་ན། སེམས་ཅན་གང་མདོ་སྡེ་འདི་ལྟ་བུ་ཐོབ་པར་འགྱུར་བའི་ཕྱིར་དགེ་བའི་རྩ་བ་འབར་བ། སྔོན་གྱི་རྒྱལ་བ་ལ་བྱ་བ་བྱས་པ། དགེ་བའི་རྩ་བ་བསྐྱེད་པ། དགེ་བའི་རྩ་བ་སྨིན་པ། ས་བོན་བཏབ་པའི་སེམས་ཅན་རྣམས་ནི་ཉུང་ཟད་ཅིག་འབྱུང་སྟེ། སེམས་ཅན་དེ་ལྟ་བུ་དེ་དག་གི་དོན་དུ་འདི་ལྟ་སྟེ་སངས་རྒྱས་ཀྱི་མཐུས་ཏིང་ངེ་འཛིན་འདི་ཛམྦུའི་གླིང་དུ་སྤྱོད་པར་འགྱུར་རོ། །རྒྱས་པར་བྱེད་པར་འགྱུར་རོ། །དེ་དག་གིས་ཀྱང་ཏིང་
53a
༄#། །ངེ་འཛིན་འདི་ཐོས་ནས་དགའ་བ་དང ། མགུ་བ་དང ། དང་པ་རྒྱ་ཆེན་པོ་འཐོབ་བོ། །ཐོབ་ནས་ཀྱང་འཛིན་པར་འགྱུར། འཆང་བར་འགྱུར། ཀློག་པར་འགྱུར། ཀུན་ཆུབ་པར་བྱེད་པར་འགྱུར། ཡི་གེར་འབྲི་བར་འགྱུར། འཆད་པར་འགྱུར། རྒྱས་པར་བྱེད་པར་འགྱུར། སྒོམ་པའི་སྦྱོར་བ་ལ་བརྩོན་པར་འགྱུར། ཐ་ན་གླེགས་བམ་དུ་བྲིས་ཤིང་འཆང་བར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང ། ལི་ཙ་བཱི་གཞོན་ནུས་བཅོམ་ལྡན་འདས་ལ་ཕྱི་མའི་དུས་ན་དམ་པའི་ཆོས་འདི་འགྱུར་བ་དང ། རྣམ་པར་འཇིག་པ་ཐོས་ནས་ཆོས་ཀྱི་ཤུགས་ཀྱིས་དུ་ཞིང་མཆི་མ་ཀློག་པར་བྱེད་དེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང ། ལི་ཙ་བཱི་གཞོན་ནུ་མཆི་མ་ཕྱིས་ཏེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་གིས་དེ་བཞིན་གཤེགས་པ་མྱ་ངན་ལས་འདས་ནས་ལོ་ལྔ་བརྒྱ་པའི་ཐ་མར་གྱུར་པ། ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ།
53b
དམ་པའི་ཆོས་སྤོང་བར་གྱུར་པ་ནའང་མདོ་སྡེ་འདི་ལྟ་བུ་དག་གཟུང་བར་བགྱིའོ། །ཀུན་ཆུབ་པར་བགྱིའོ། །ཡི་གེར་བྲི་བར་བགྱིའོ། །བཅང་བར་བགྱིའོ། །བཀླག་པར་བགྱིའོ། །རྒྱས་པར་བགྱིའོ། ། སྒོམ་པའི་སྦྱོར་བ་ལ་བརྩོན་པར་བགྱིའོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས། བདག་ཅག་ནི། དེ་བཞིན་གཤེགས་པས་གསུངས་པའི་མདོ་སྡེ་ཟབ་མོ་འདི་ལྟ་བུ་འདི་ཉན་པ་དང ། འབྲི་བ་དང ། འཛིན་པ་དང ། ཀུན་ཆུབ་པར་བགྱིད་པ་དང ། འཆང་བ་དང ། ཀློག་པ་དང ། འཆད་པ་དང ། རྒྱས་པར་བགྱིད་པ་དང ། སྒོམ་པས་ཆོག་མ་འཚལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་ཆེ་བཟང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཚོང་དཔོན་གྱི་བུ་ཕུག་སྦས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱེའུ་འདམ་བུས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཚམས་བཟང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་བཅོམ་ལྡན་འདས་ལས་ལོ་ལྔ་བརྒྱ་པ་ཐ་མར་གྱུར་པ་ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་དམ་པའི་ཆོས་འདི་འགྱུར་བ་དང ། རྣམ་པར་འཇིག་པ་ཐོས་ནས་ཆོས་ཀྱི་ཤུགས་ཀྱིས་དུ་ཞིང་མཆི་མ་ཀློག་པར་བྱེད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་ཆེ་བཟང་དང ། ཚོང་དཔོན་གྱི་བུ་ཕུག་སྤས་དང ། ཁྱེའུ་འདམ་བུས་
54a
༄#། །བྱིན་དང ། རིགས་ཀྱི་བུ་མཚམས་བཟང་དང ། དབང་པོས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་མཆི་མ་ཕྱིས་ནས་སྟན་ལས་ལངས་ཏེ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ཀྱང་མ་འོངས་པའི་དུས་ན་དེ་བཞིན་གཤེགས་པ་མྱ་ངན་ལས་འདས་ནས་ལོ་ལྔ་བརྒྱ་པ་ཐ་མར་གྱུར་པ། ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ། དམ་པའི་ཆོས་སྤོང་བར་གྱུར་པ་ནའང་མདོ་སྡེ་འདི་ལྟ་བུ་དག་གཟུང་བར་བགྱིའོ། །ཀུན་ཆུབ་པར་བགྱིའོ། །ཡི་གེར་བྲི་བར་བྱའོ། །བཅང་བར་བགྱིའོ། ། བཀླག་པར་བགྱིའོ། །གཞན་དག་ལའང་རྒྱ་ཆེར་བཤད་པར་བགྱིའོ། །བསྒོམས་པར་བགྱིའོ། །ཙུན་པ་བཅོམ་ལྡན་འདས། བདག་ཅག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བསྐལ་བ་བྱེ་བ་ཁྲག་ཁྲིག་བརྒྱ་སྟོང་དུ་ཡང་དག་པར་བསྒྲུབས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་རིང་དུ་གནས་པར་བགྱིའོ། ། རྒྱ་ཆེ་བ་དང ། རྒྱས་པར་བགྱིའོ། །དེ་ཅིའི་སླད་དུ་ཞེ་ན། བཙུན་པ་བཅོམ་ལྡན་འདས། བདག་ཅག་ནི། སྔོན་མ་ཐོས་པའི་ཆོས་རྣམས་ཡང་དག་པར་ལེན་པར་བགྱིད་པ་དང ། ཡང་དག་པར་
54b
སྒྲོག་པར་བགྱིད་དོ། །བཙུན་པ་བཅོམ་ལྡན་འདས། བདག་ཅག་ནི། ཆོས་ཟབ་མོ་འཇིག་རྟེན་པ་ཐམས་ཅད་ཡིད་ཆེས་པར་མི་འགྱུར་བ་བསྒོམ་པར་བགྱིའོ། །བསྟན་པར་བགྱིའོ། །དེ་ནས་འཁོར་དེ་དག་ནས་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་སྲོག་ཆགས་ལྔ་བརྒྱ་ཙམ་སྟན་ལས་ལངས་ཏེ་གུས་པ་དང་བཅས། ཞེས་དང་བཅས་པས་བཅོམ་ལྡན་འདས་ལས་ལོ་ལྔ་བརྒྱ་པ་ཐ་མར་གྱུར་པ། ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ་ན་དམ་པའི་ཆོས་རྣམས་འཇིག་པ་དང ། དམ་པའི་ཆོས་མི་ལེན་པའི་དུས་ཐོས་ནས་དམ་པའི་ཆོས་འགྱུར་བའི་ཤུགས་ཀྱིས་དུ་ཞིང་མཆི་མ་ཀློག་པར་གྱུར་ཏོ། །དེ་ནས་སྲོག་ཆགས་ལྔ་བརྒྱ་ཙམ་པོ་དེ་དག་གིས་མཆི་མ་ཕྱིས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བདག་ཅག་ཀྱང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ལོ་ལྔ་བརྒྱ་པ་ཐ་མར་གྱུར་པ། ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མར་གྱུར་པ་ན་མདོ་སྡེ་འདི་ལྟ་བུ་འདི་དག་གཟུང་བར་བགྱིའོ། །བསྒོམ་པར་བགྱིའོ། ། གཞན་དག་ལའང་རྒྱ་ཆེར་བསྒྲག་པར་བགྱིའོ། །སྐྱེས་བུ་དམ་པ་འདི་དག་ལའང་ལུས་ཀྱི་ཞལ་ཏ་བགྱི་བ་བགྱིའོ། །དེ་བཞིན་གཤེགས་པས་གསུངས་པའི་མདོ་སྡེ་འདི་ལྟ་བུ་འདིའང་དེའི་ཚེ་
55a
༄#། །མཉན་པར་བགྱིའོ། །དེར་ཡང་དམ་པའི་ཆོས་ཡོངས་སུ་གཟུང་བར་བགྱིའོ། །དམ་པའི་ཆོས་ཀྱི་སྣོད་དུ་གྱུར་པ་གཞན་དག་ཀྱང་དམ་པའི་ཆོས་དཀོན་མཆོག་འདིས་ཕན་གདགས་པར་བགྱིའོ། །བཅོམ་ལྡན་འདས། ཏིང་ངེ་འཛིན་འདི་སྐྱེས་བུ་དམ་པ་འདི་དག་ལ་གཏད་པར་གསོལ། བཅོམ་ལྡན་འདས། ཏིང་ངེ་འཛིན་འདི་སྐྱེས་བུ་དམ་པ་འདི་དག་ལ་གདམས་པར་གསོལ། དེ་ནས་དེའི་ཚེ་བཅོམ་ལྡན་འདས་ཀྱིས་གསེར་གྱི་ཁ་དོག་ལྟ་བུའི་འཛུམ་པ་མཛད་དེ། དེས་འཇིག་རྟེན་གྱི་ཁམས་མཐའ་ཐུག་པ་མེད་པ་རྣམས་འོད་ཀྱིས་ཁྱབ་པར་བྱས་ཏེ་ཚངས་པའི་འཇིག་རྟེན་གྱི་བར་དུ་མངོན་པར་བྱུང་ནས་ཉི་མ་དང ། ཟླ་བའི་འོད་ཀྱང་ཟིལ་གྱིས་མནན་ཏེ་སླར་ལྷགས་ནས་བཅོམ་ལྡན་འདས་ལ་གཡས་ཕྱོགས་ནས་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་གི་མཚམས་སུ་ནུབ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་མཐུན་པའི་ཚིགས་སུ་བཅད་པ་འདི་ལྟ་བུ་དག་གིས་མངོན་པར་བསྟོད་དོ། །ཚུལ་ཁྲིམས་རྣམ་དག་སྤྱོད་ཡུལ་ཡོངས་སུ་དག་།མཐུ་ཆེ་བ་ཡི་ནང་ནའང་རྫུ་འཕྲུལ་ཆེ། །སྐྱེ་རྒུ་ཀུན་ལས་མཆོག་ཏུ་འཕགས་གྱུར་བ། །
55b
དྲི་མ་བྲལ་བའི་ཉི་མ་བཞིན་དུ་མཛེས། །མ་ཆགས་མཁྱེན་ལྡན་ཤིན་ཏུ་རྣམ་གྲོལ་ཐུགས། །ཀ་ལ་པིངྐའི་གསུང་ལྡན་ལྷ་ཡི་ལྷ། །ཕས་ཀྱི་རྒོལ་བ་ཀུན་གྱིས་མི་བསྐྱོད་པ། །འཛུམ་པ་འདི་མཛད་རྒྱུ་རྐྱེན་ཅི་ཞིག་ལགས། །ཕན་ཕྱིར་ཐུགས་བརྩེ་རྐང་གཉིས་ནང་ན་གཙོ། །དོན་དམ་གསལ་བས་ལུང་ནི་བསྟན་པར་གསོལ། །ཁྱོད་ཀྱི་གསུང་སྒྲ་ཡིད་དུ་འོང་ཐོས་ན། །འཕགས་པའི་དགའ་བ་ཟང་ཟིང་མེད་པ་འཐོབ། །རྒྱལ་མཆོག་རྣམ་པར་འདྲེན་པ་རྒྱུ་མེད་པར། །གང་ཟག་མཆོག་ནི་འཛུམ་པ་མི་མཛད་ན། །འཛུམ་པ་འདི་མཛད་རྒྱུ་རྐྱེན་ཅི་ཞིག་ལགས། །འཇིག་རྟེན་ཕན་ཕྱིར་ཐུགས་བརྩེ་ཁྱོད་ལ་ཞུའོ། །འཇིག་རྟེན་མགོན་པོ་འཛུམ་པ་མཛད་པ་ལས། །དེ་རིང་སུ་ཡི་དགོས་པ་རྒྱ་ཆེར་འབྱུང ། །སུ་ཞིག་སངས་རྒྱས་ཡེ་ཤེས་བརྟན་པར་གནས། །སུ་ཞིག་དེ་རིང་རྒྱལ་སྲིད་མཆོག་ཐོབ་འགྱུར། །སུ་ཞིག་དེ་རིང་བསོད་ནམས་བརྟན་པར་གནས། །སུ་ཞིག་ཆོས་མཛད་འདི་ནི་འཛིན་པར་འགྱུར། །སུ་ཞིག་དེ་རིང་ཅོད་པན་ཆེ་ཐོགས་ཏེ། །རང་གི་ལག་གིས་རང་གི་མགོ་ལ་འདོགས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་སླར་ཚིགས་སུ་བཅད་དེ་གསུངས་པ། ཀུན་དགའ་གྲོགས་པོ་ལྔ་བརྒྱ་ཚོགས་པ་དག ། དགའ་བའི་སེམས་ཀྱིས་མདུན་དུ་འཁོད་གྱུར་ཅིང ། །བདག་ཅག་ཆོས་འདི་ཐོབ་པར་ཤོག་ཅིག་ཅེས། །ཚིག་ཏུ་རྗོད་པར་བྱེད་པ་འདི་དག་ལྟོས། །ནམ་ཞིག་བདག་ཅག་འདི་འདྲར་འགྱུར་ཞེས་
56a
༄#། །ཏེ། །དེ་དག་ང་ལ་ཡང་ནི་ལྟ་བར་བྱེད། །བདག་ཅག་བྱང་ཆུབ་མཆོག་འདི་འཛིན་ཏོ་ཞེས། །ང་ཡི་མདུན་དུ་འདུག་ནས་ཚིག་ཏུ་བརྗོད། །མ་འོངས་ཕྱི་དུས་དེ་འདྲར་གྱུར་པའི་ཚེ། །མདོ་སྡེ་འདི་དག་བསྒྲག་པར་བྱ་བའི་ཕྱིར། །མཁས་པ་བརྒྱད་པོ་འདི་དག་ལ་སོགས་པ། །ལྔ་བརྒྱ་འདི་དག་རྣམས་ཀྱང་ལངས་པར་གྱུར། །མོས་པར་བྱ་ཞིང་ཁོང་དུ་ཆུང་པར་བྱ། །འདིར་ནི་ང་ཡི་ཡེ་ཤེས་ཆགས་པ་མེད། །འདི་དག་གིས་ནི་རྒྱལ་བ་གཅིག་པུ་ལ། །ཐལ་མོ་སྦྱར་བ་བྱས་ནས་ལངས་པ་མིན། །སྔོན་དག་དྲན་ཏེ་སྐྱེ་བ་སྔ་མ་ལ། །སངས་རྒྱས་སྟོང་ཕྲག་བརྒྱད་ཅུ་ཚང་བར་བྱུང ། །ཆོས་འདི་དག་ནི་བསྒྲག་པར་བྱ་བའི་ཕྱིར། །དེ་ལའང་འདི་དག་བརྒྱད་ལ་སོགས་པའང་ལངས། །དེ་བས་ཀྱང་ནི་ཤིན་ཏུ་སྔ་བ་ན། །ཚུལ་ཁྲིམས་རྣམ་དག་གྲགས་པ་ཆེན་པོ་པ། །བྱེ་བ་ཁྲག་ཁྲིག་སྟོང་ཕྲག་བརྒྱད་ཅུ་བྱུང ། །དེ་དག་ལས་ཀྱང་རྒྱ་ཆེ་ཆོས་འདི་བླངས། །ང་ཡི་གསུང་རབ་རྒྱ་ཆེ་བ་དག་ཀྱང ། །དོན་དུ་གཉེར་ཅིང་ཡོངས་སུ་འཛིན་པར་བྱེད། །སེམས་ནི་དགའ་ཞིང་མགུ་བ་དཔེ་མེད་པས། །མང་པོ་བྱང་ཆུབ་སེམས་ལ་སྐུལ་བར་བྱེད། །དེ་ནི་ཕྱི་དུས་མྱ་ངན་ང་འདས་ཚེ། །སྐུ་གདུན་ཐམས་ཅད་རྒྱས་པར་བྱས་གྱུར་ནས། །སངས་རྒྱས་བྱང་ཆུབ་འདི་དག་ལེགས་བཟུང་སྟེ། །ཡི་གེ་བྲིས་ནས་སྒྲོམ་དུ་བཅུག་ནས་ཀྱང ། །མཆོད་རྟེན་ས་དང་བྲག་དང་རི་དག་དང ། །ལྷ་དང་དེ་བཞིན་ཀླུ་ཡི་ལག་དག་ཏུ། །མདོ་སྡེ་བཞག་པ་བྱས་ནས་དེ་དག་
56b
རྣམས། །ལྷ་ཡི་བརྟུལ་ཞུགས་འདྲ་བར་བྱ་ཕྱིར་འགྲོ། །དེ་དག་ཕྱི་མའི་དུས་ཚེ་སོ་སོའི་རིགས། །ཐམས་ཅད་པོར་ཏེ་སླད་དུ་བབས་གྱུར་ནས། །སངས་རྒྱས་བྱང་ཆུབ་འདི་དག་ལེགས་བཟུང་སྟེ། །བསམ་པ་ཇི་བཞིན་དུ་ནི་བྱེད་པར་འགྱུར། །དེ་དག་ཆོས་འདི་འདོད་པས་ཡུལ་ཡུལ་དུ། །དོང་ཞིང་མདོ་སྡེ་བཟང་པོ་འདི་རྙེད་འགྱུར། །རྙེད་ནས་ཡིད་ནི་མཆོག་ཏུ་དགའ་གྱུར་པས། །རྟེན་པ་མེད་པར་སྐྱེ་བོ་མང་ལ་གཏོང ། །ལུས་དང་དེ་བཞིན་སྲོག་ཀྱང་སྤངས་བྱས་ཏེ། །མཁས་པ་དག་དང་ཆོས་འདོད་ཆོག་མི་ཤེས། །ཕས་ཀྱི་རྒོལ་བ་ཀུན་དང་མི་ ་ཞིང ། །གྱ་ནོམ་རྒྱ་ཆེ་ཆོས་ནི་སྦྱིན་པར་བྱེད། །གང་དག་ང་ཡི་མདུན་ན་ལངས་གྱུར་པ། །ལྔ་བརྒྱ་འདི་དག་ཐམས་ཅད་མ་གཏོགས་པར། །མདོ་སྡེ་འདི་ལ་འཛིན་པར་བྱེད་པ་དང ། །འཆང་དང་ཀློག་པར་བྱེད་པ་སུ་ཡང་མེད། །དགེ་སློང་བརྒྱད་དང་དེ་བཞིན་བྱང་ཕྱོགས་སུ། །ཡོངས་སུ་ལེན་ཅིང་ཆོས་འཛིན་དགའ་བ་དག་།ཆོས་འདོད་འཇིག་རྟེན་ཕན་ཞིང་བརྩེས་བ་དག། ལེན་པའི་ཕྱིར་ནི་མང་པོ་འབྱུང་བར་འགྱུར། །གང་དག་དེར་ནི་ཤིན་ཏུ་རྒྱས་འཛིན་ཅིང ། ། སྙན་ཚིག་རྙེད་ལ་མི་རྟེན་འབྱུང་བ་ནི། །བརྒྱད་ལ་སོགས་པ་དགེ་སློང་ལྔ་བརྒྱ་བོ། །འདི་དག་ཐམས་ཅད་རྣམས་ནི་ཚང་བའོ། །དགེ་སློང་དགེ་སློང་མ་དང་དགེ་བསྙེན་དང ། །དགེ་བསྙེན་མ་ནི་མཁས་ཤིང་འཇུངས་བྲལ་འདི། །གང་དག་ལངས་ཤིང་ཕྱི་དུས་ཆེས་འཛིན་པ། །དེ་དག་ཐམས་ཅད་མི་མཆོག་རྒྱལ་བར་འགྱུར། །ཡོན་ཏན་བསམ་གྱིས་མི་ཁྱབ་ཀུན་དང་ལྡན། །གསེར་གྱི་ཁ་དོག་བསོད་ནམས་
57a
༄#། །བརྒྱ་ཡི་མཚན། །ཕན་ཕྱིར་ཐུགས་བརྩེ་སེམས་ཅན་མང་པོ་འགྲོལ། །བདེ་བ་སྦྱིན་ཞིང་ཉོན་མོངས་ཐམས་ཅད་སེལ། །དེ་དག་འདི་ནས་འཆི་འཕོས་ཕྱི་ནས་ཀྱང ། ། ལོག་ལྟུང་སར་ནི་ནམ་ཡང་འགྲོ་མི་འགྱུར། །སྐྱེ་བ་ཐམས་ཅད་དུ་ནི་འདུས་གྱུར་ཅིང ། །མི་མཆོག་རྣམས་ནི་མཉེས་པར་བྱེད་པར་འགྱུར། །དེ་དག་གིས་ནི་མི་ཁོམ་བརྒྱད་ཀྱང་སྤངས། །དེས་ནི་ངན་སོང་ཐམས་ཅད་སྤངས་པའོ། །དེས་ནི་བསོད་ནམས་ཚད་མེད་ཇི་སྙེད་བཟུང ། །ཡོན་ཏན་མཐའ་ནི་བཤད་པར་མི་ནུས་སོ། །སངས་རྒྱས་ཞིང་འདིར་མཉེས་པར་བྱེད་པར་འགྱུར། །འདུས་པར་གྱུར་ནས་སངས་རྒྱས་གང་འགྱུར་བ། །དེ་དག་ཕན་པའི་ཕྱིར་ནི་སྙིང་བརྩེ་ལ། །བླ་མེད་ཞི་ལམ་ཚོལ་ཞིང་གུས་པར་བྱེད། །དེ་དག་བསྐལ་པ་གཅིག་ལ་འདུས་གྱུར་ཏེ། །རྐང་གཉིས་གཙོ་ལ་མཆོད་པ་དག་བྱས་ནས། །བླ་ན་མེད་པའི་རྡུལ་མེད་བྱང་ཆུབ་ཕྱིར། །འཕགས་པ་ཟང་ཟིང་མེད་པའི་བཟོད་འཐོབ་འགྱུར། །དེ་དག་ན་ཡང་དེ་བཞིན་ཆོས་འཛིན་པ། །ཕྱི་མའི་དུས་ནའང་དེ་བཞིན་བར་མའི་དུས། །དེ་ན་ཚངས་པར་སྤྱོད་པ་འདི་སྤྱད་ནས། །ཚེ་དཔག་མེད་པའི་སངས་རྒྱས་མཉེས་པར་བྱེད། །བསྐལ་པ་བཟང་པོ་འདི་ལ་ཇི་སྙེད་ཀྱི། །འཇིག་རྟེན་དོན་མཛད་འོད་མཛད་འབྱུང་བ་དག་།དེ་དག་གི་ཡང་ཆོས་ཀྱི་ཚུལ་འཛིན་པ། །དུས་གསུམ་ལ་ནི་གནས་པའི་དཔའ་བོའོ། །མ་འོངས་སངས་རྒྱས་བྱེ་བ་ཕྲག་མང་པོ། །བསམ་གྱིས་མི་ཁྱབ་གང་དག་ཚད་
57b
མེད་པ། །དེ་ལ་དེས་ནི་རྒྱ་ཆེ་མཆོད་བྱས་ནས། །སངས་རྒྱས་བྱང་ཆུབ་ལ་ནི་མཉེས་བྱེད་འགྱུར། །བྱང་ཆུབ་ཞི་ལ་དེ་དག་རེག་པར་འགྱུར། །དེ་ལ་འདུས་ནས་གུས་པར་བྱེད་པར་འགྱུར། །བསྐལ་པ་ཁྲག་ཁྲིག་མང་པོ་འདས་གྱུར་པ། །དེ་སྲིད་ན་ནི་ས་བོན་དངོས་པོར་འགྱུར། །ཁྱིམ་གྱི་བདག་པོ་བཟང་སྐྱོང་འདི་དང་ནི། །རིན་ཆེན་འབྱུང་བའི་རིན་ཆེན་འབྱུང་གནས་དང ། །དེད་དཔོན་བཟང་དང་ཕུག་སྦས་བྲམ་ཟེའི་ཁྱེའུ། །སངས་རྒྱས་གངྒཱའི་བྱེ་སྙེད་མཐོང་བར་འགྱུར། །དེ་དག་དེ་རྣམས་དང་ནི་དེ་བས་ཀྱང ། །སངས་རྒྱས་བྱེ་བ་མང་པོ་ཆོས་འཛིན་པ། །བསྐལ་པ་བྱེ་བ་མང་པོ་དེ་ཡི་ཚད། །བརྗོད་པར་བྱ་ཞིང་མཐའ་རྟོགས་མི་ནུས་སོ། །སེམས་ཅན་ཆེན་པོ་གང་གིས་རྨི་ལམ་ནའང ། །དཔའ་བོ་འདི་དག་གི་ནི་མིང་དང་ཐབས། །ཐོས་པ་དེ་དག་རྒྱལ་བ་ཆེན་པོར་འགྱུར། །གང་དག་མཐོང་ངམ་ཡང་ན་ཐོས་ནས་ཀྱང ། །འདོད་པར་བྱེད་དམ་ཡང་ན་དང་བྱེད་ན། །ཐམས་ཅད་བྱང་ཆུབ་འགྱུར་བར་ཐེ་ཚོམ་མེད། །དེ་ལ་བསྙེན་བཀུར་བྱེད་པ་སྨོས་ཅི་དགོས། །བསམ་གྱིས་མི་ཁྱབ་ཆོས་འདི་ཡོངས་སུ་འཛིན། །མིང་དང་དེ་བཞིན་ཚེ་ཡང་བསམ་མི་ཁྱབ། །སྣང་བ་བསམ་མེད་ཡོན་ཏན་བསམ་མི་ཁྱབ། །ཤེས་རབ་ཡེ་ཤེས་དེ་བཞིན་བསམ་མི་ཁྱབ། །བླ་ན་མེད་པའི་བྱང་ཆུབ་ཚོལ་བྱེད་ཅིང ། ། སྔོན་གྱི་སངས་རྒྱས་ཚུལ་ཁྲིམས་རྣམ་དག་པ། །གངྒཱའི་བྱེ་སྙེད་བསམ་མི་ཁྱབ་བྱུང་བ། །དེ་ལའང་སྦྱིན་པ་རྒྱ་ཆེན་དག་ནི་ཕུལ། །སངས་རྒྱས་བྱེ་བ་མང་པོས་བཤད་གྱུར་ཀྱང ། །དེ་ཡི་བསོད་ནམས་
58a
༄#། །ཚད་ནི་ཅུང་ཟད་མེད། །འདྲ་བའི་སྲས་དང་གྲོགས་པོ་དེ་དག་ཀྱང ། །བྱང་ཆུབ་འགྱུར་བར་ཐེ་ཚོམ་འགའ་ཡང་མེད། །ཀུན་དགའ་ལ་ལ་གང་ཞིག་མདོ་སྡེ་འདི། །ལེན་ཏམ་འཛིན་ཏམ་ཀློག་པར་བྱེད་པ་དང ། །ལྔ་བརྒྱ་ཚང་བ་པོ་ནི་དེ་དག་ལ། །ཐེ་ཚོམ་མེད་པར་དེ་ལ་དགའ་བ་སྐྱེད། །ཀུན་དགའ་ལ་ལ་གང་ཞིག་མདོ་སྡེ་འདི། །བཙལ་བའི་ཕྱིར་ནི་འདུན་པ་བརྟན་བྱེད་ཅིང ། །གཉིད་ནི་སྤངས་ལ་བརྩོན་འགྲུས་བརྩོན་བྱེད་ན། །དེ་དག་ཏིང་ངེ་འཛིན་འདི་རྙེད་མི་དཀའ། །མདོ་སྡེ་འདི་འདྲ་བ་དག་བཟུང་བྱས་ནས། །རྙེད་པ་རབ་རྙེད་ངན་འགྲོ་དག་ཀྱང་སྤངས། །བདེ་གཤེགས་བསྟན་པ་ལ་ནི་དོན་ཡོད་དང ། །མི་ཁོམ་ཐམས་ཅད་རྣམ་པར་སྤངས་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་ལས། །སྤྲོ་བ་སྐྱེད་པའི་ལེའུ་སྟེ་བཅུ་གསུམ་པའོ།། །། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལི་ཙ་བཱི་གཞོན་ནུ་རིན་ཆེན་འབྱུང་གནས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཚོང་དཔོན་གྱི་བུ་ཕུག་སྦས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྲམ་ཟེའི་ཁྱེའུ་འདམ་བུས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རིགས་ཀྱི་བུ་མཚམས་བཟང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཁྱིམ་བདག་དེད་དཔོན་བཟང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དབང་པོས་བྱིན་དང །
58b
བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་དང་ལྷན་ཅིག་ཏུ་ལེགས་པར་གསུངས་པའི་ཕྱིར་རས་བཅོས་བུ་ཟུང་ལྔ་བརྒྱ་བཅོམ་ལྡན་འདས་ཀྱི་སྐུ་ལ་གསོལ་ཏོ། །བཅོམ་ལྡན་འདས་ལ་རིན་པོ་ཆེ་འགྲིམ་པར་ཡང་བྱེད་དོ། །བཅོམ་ལྡན་འདས་ལ་བསྙེན་བཀུར་ཡོངས་སུ་སྤྱོད་པར་བྱེད་པར་གསོལ་བ་འདེབས་སོ། །དེ་ནས་བཅོམ་ལྡན་འདས་ཀྱིས་བཟང་སྐྱོང་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ལྔ་བརྒྱ་ཙམ་པོ་དེ་དག་ལ་ཆོས་ཀྱི་གཏམ་གྱིས་ཡང་དག་པར་རབ་ཏུ་དགའ་བར་མཛད། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་མགུ་བར་མཛད་དོ། །དེ་དག་དགའ་བའི་སེམས་དང ། སྐྱོན་མེད་པའི་སེམས་དང ། འཇམ་པའི་སེམས་དང ། འདོད་པར་བྱ་བའི་སེམས་དང ། དང་བའི་སེམས་དང ། སྒྲིབ་པ་དང་བྲལ་བའི་སེམས་ཀྱིས་བཅོམ་ལྡན་འདས་ཀྱི་སྤྱན་སྔར་ཐལ་མོ་སྦྱར་ཏེ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་དུ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་པར་འགྱུར། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། ཆོས་བཞི་དང་ལྡན་ན། བྱང་ཆུབ་སེམས་དཔའ་
59a
༄#། །སེམས་དཔའ་ཆེན་པོ་ཏིང་ངེ་འཛིན་འདི་ཐོབ་བོ། །བཞི་གང་ཞེ་ན། འདི་ལྟ་སྟེ། གཞན་མུ་སྟེགས་ཅན་གྱི་གསང་ཚིག་ལ་མི་རྟེན་པ་དང ། འདོད་པའི་ཡོན་ཏན་ལ་མི་ཆགས་པ་དང ། སྦྱངས་པའི་ཡོན་ཏན་དང་ཡོ་བྱད་བསྙུངས་པ་རྣམས་ཀྱིས་མ་ཕམ་པ་དང ། སྲིད་པའི་འགྲོ་བའི་སྐྱེ་བའི་གནས་རྣམས་ལ་སྨོད་པ་སྟེ། བཟང་སྐྱོང ། ཆོས་བཞི་པོ་དེ་དག་དང་ལྡན་ན།་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང ། བྱང་ཆུབ་སེམས་དཔའ་གང་ལ་ལ་ཞིག་ཏིང་ངེ་འཛིན་འདི་འཆང་བར་བྱེད། ཀློག་པར་བྱེད། ཡི་གེར་འབྲི་བར་བྱེད། འཛིན་པར་བྱེད། ཀུན་ཆུབ་པར་བྱེད། གཞན་དག་ལའང་རྒྱ་ཆེར་ཡང་དག་པར་སྟོན་པར་བྱེད་ན། བཟང་སྐྱོང ། བྱང་ཆུབ་སེམས་དཔའ་དེའི་ཡོན་ཏན་གང་ཚེ་འདི་ཉིད་ལ་འཐོབ་པར་འགྱུར་བ་ལྔ་བརྒྱ་ཡོད་པར་རིག་པར་བྱའོ། །ལྔ་བརྒྱ་གང་ཞེ་ན། བཟང་སྐྱོང ། འདི་ལྟ་སྟེ། དཔེར་ན། བྱམས་པ་ལ་གནས་པའི་ལུས་ལ་དུག་གིས་མི་ཚུགས། མཚོན་གྱིས་མི་ཚུགས། ཆུར་མི་འཆི། མེས་མི་འཚིག་།རྒྱལ་པོས་གླགས་ལྟ་བ་དག་གིས་གླགས་མི་རྙེད་པ་དེ་བཞིན་དུ་བཟང་སྐྱོང ། ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེའང་དུག་གིས་མི་ཚུགས། མཚོན་གྱིས་མི་ཚུགས། ཆུས་འཆི་བར་མི་བྱེད། མེས་མི་འཚིག་།རྒྱལ་པོས་གླགས་ལྟ་བ་དག་གིས་གླགས་མི་རྙེད་དོ། །བཟང་སྐྱོང ། གཞན་ཡང་གལ་ཏེ་བསྐལ་པས་སྲེག་པ་བྱུང་བར་གྱུར་ཏེ། ཏིང་
59b
ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེའང་མེའི་ཕུང་པོ་དེའི་ནང་དུ་མཆོང་ན། མེའི་ཕུང་པོ་དེ་ཞི་བར་འགྱུར་རོ། །འདི་ལྟ་སྟེ། དཔེར་ན། ཆུའི་བུམ་པ་ཆེན་པོས་ནི། མེའི་ཕུང་པོ་ཞི་བར་བྱེད་དོ། ། བཟང་སྐྱོང ། ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ནི། སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་རྒྱལ་པོའམ། ཆོམ་རྐུན་ནམ། མེའམ། ཆུའམ། སྐྱེ་བོའམ། ཀླུའམ། རོ་ལངས་སམ། གནོད་སྦྱིན་ནམ། སྲིན་པོའམ། སེངྒེའམ། སྟག་གམ། ཁྱིའམ། ཝའམ། སྤྱང་ཀིའམ། མིའམ། མི་མ་ཡིན་པའམ། ཡི་དྭགས་སམ། གྲུལ་བུམ་གྱིས་བར་ཆད་བྱེད་ན། ལུས་སམ། སྲོག་གམ། ལྷུང་བཟེད་དམ། གོས་སམ། ཚངས་པར་སྤྱོད་པའམ། འཆད་པའམ། ཁ་ཏོན་བྱེད་པའམ། བསམ་གཏན་ནམ། ཚུལ་བཞིན་ཡིད་ལ་བྱེད་པའི་བར་ཆད་བྱེད་པ་འདི་ནི།་གནས་མ་ཡིན། སྐབས་མ་ཡིན་ཏེ། དེ་ནི། གནས་མེད་དོ། །བཟང་སྐྱོང ། ཏིང་ངེ་འཛིན་འདི་འཛིན་པའི་དགེ་སློང་དེ་སྔོན་གྱི་ལས་ཀྱི་རྣམ་པར་སྨིན་པ་མ་གཏོགས་པར་མིག་ནད་ཀྱིས་འདེབས་པའམ།་རྣ་ནད་ཀྱིས་འདེབས་པའམ། སྣ་ནད་ཀྱིས་འདེབས་པའམ། ལྕེ་ནད་ཀྱིས་འདེབས་པའམ། ལུས་ནད་ཀྱིས་འདེབས་པའམ། སེམས་ནད་ཀྱིས་འདེབས་པའམ། དེ་དག་ལས་གཞན་པའི་ནད་ཀྱི་རྣམ་པས་བྱང་ཆུབ་སེམས་དཔའ་དེའི་འཚོ་བ་འགོག་པར་བྱེད་པ་ནི། གནས་མ་ཡིན། སྐབས་མ་ཡིན་ཏེ། དེ་ནི། གནས་མེད་དོ། །བཟང་སྐྱོང ། གཞན་ཡང་ཏིང་ངེ་འཛིན་འདི་འཛིན་པའི་
60a
༄#། །བྱང་ཆུབ་སེམས་དཔའ་དེ་ལ་ལྷ་རྣམས་ཀྱང་སྲུང་ངོ ། །ཀླུ་རྣམས་ཀྱང་སྲུང་ངོ ། །གནོད་སྦྱིན་རྣམས་ཀྱང་སྲུང་ངོ ། །དྲི་ཟ་རྣམས་ཀྱང་སྲུང་ངོ ། །མི་རྣམས་ཀྱང་སྲུང་ངོ ། །མི་མ་ཡིན་པ་རྣམས་ཀྱང་སྲུང་ངོ ། །ལྷ་མ་ཡིན་རྣམས་ཀྱང་སྲུང་ངོ ། །ནམ་མཁའ་ལྡིང་རྣམས་ཀྱང་སྲུང་ངོ ། །མིའམ་ཅི་རྣམས་ཀྱང་སྲུང་ངོ ། །ལྟོ་འཕྱེ་ཆེན་པོ་རྣམས་ཀྱང་སྲུང་ངོ ། །རྒྱལ་པོ་ཆེན་པོ་བཞི་དང ། ལྷ་རྣམས་ཀྱི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་མཚམས་བཟང་རྣམས་ཀྱང་སྲུང་ངོ ། །དེ་དག་ལས་གཞན་པ་ལྷའི་བུ་གཟི་བརྗིད་ཆེ་བ་གཟི་བརྗིད་ཆེ་བ་དག་ཀྱང་སྲུང་ངོ ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང་སྲུང་ངོ ། །སངས་རྒྱས་བཅོམ་ལྡན་འདས་རྣམས་ཀྱང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་སྲུང་ངོ ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ལྷ་རྣམས་དང ། ཀླུ་རྣམས་དང ། གནོད་སྦྱིན་རྣམས་དང ། ལྷ་མ་ཡིན་རྣམས་དང ། ནམ་མཁའ་ལྡིང་རྣམས་དང ། མིའམ་ཅི་རྣམས་དང ། ལྟོ་འཕྱེ་ཆེན་པོ་རྣམས་དང ། བརྒྱ་བྱིན་དང ། ཚངས་པ་རྣམས་དང ། རྒྱལ་པོ་ཆེན་པོ་རྣམས་དང ། བྱང་ཆུབ་སེམས་དཔའ་རྣམས་དང ། སངས་རྒྱས་བཅོམ་ལྡན་འདས་རྣམས་ལ་སྡུག་པར་འགྱུར་རོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་ལྷ་རྣམས་ཀྱང་སྙན་པར་སྒྲོག་གོ་།ཀླུ་རྣམས་ཀྱང་སྙན་པར་སྒྲོག་
60b
གོ་།གནོད་སྦྱིན་རྣམས་ཀྱང་སྙན་པར་སྒྲོག་གོ་།མི་རྣམས་ཀྱང་སྙན་པར་སྒྲོག་གོ་།མི་མ་ཡིན་པ་རྣམས་ཀྱང་སྙན་པར་སྒྲོག་གོ་།ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་རྣམས་ཀྱང་སྙན་པར་སྒྲོག་གོ་།བརྒྱ་བྱིན་དང ། ཚངས་པ་དང ། རྒྱལ་པོ་ཆེན་པོ་རྣམས་ཀྱང་སྙན་པར་སྒྲོག་གོ་།བྱང་ཆུབ་སེམས་དཔའ་རྣམས་དང ། སངས་རྒྱས་བཅོམ་ལྡན་འདས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་སྙན་པར་སྒྲོག་གོ་།བཟང་སྐྱོང ། གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ལྷ་རྣམས་ཀྱང་ལྟ་བར་འདོད་དོ། །ཀླུ་རྣམས་ཀྱང་ལྟ་བར་འདོད་དོ། །གནོད་སྦྱིན་རྣམས་ཀྱང་ལྟ་བར་འདོད་དོ། །དྲི་ཟ་རྣམས་ཀྱང་ལྟ་བར་འདོད་དོ། །མིའམ་ཅི་རྣམས་ཀྱང་ལྟ་བར་འདོད་དོ། །མི་རྣམས་ཀྱང་ལྟ་བར་འདོད་དོ། །མི་མ་ཡིན་པ་རྣམས་ཀྱང་ལྟ་བར་འདོད་དོ། །ལྷ་མ་ཡིན་དང ། ནམ་མཁའ་ལྡིང་དང ། ལྟོ་འཕྱེ་ཆེན་པོ་རྣམས་ཀྱང་ལྟ་བར་འདོད་དོ། །བྱང་ཆུབ་སེམས་དཔའ་རྣམས་དང ། སངས་རྒྱས་བཅོམ་ལྡན་འདས་དག་ཀྱང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་ཐ་ན་རྨི་ལམ་དུའང་ཞལ་སྟོན་པར་མཛད་དོ། །མིང་ནས་རྗོད་པར་ཡང་མཛད་དོ། །བཟང་སྐྱོང ། གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་བྱང་ཆུབ་སེམས་དཔའ་རྣམས་ཀྱང་ལྟ་བར་འདོད་དོ། །སངས་རྒྱས་བཅོམ་ལྡན་འདས་རྣམས་ཀྱང་གཟིགས་པར་བཞེད་དོ། །བཟང་སྐྱོང ། གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་
61a
༄#། །དཔའ་དེ་ལ་ལྷ་རྣམས་ཀྱང་བལྟར་འོང་ངོ ། །ཀླུ་རྣམས་ཀྱང་བལྟར་འོང་ངོ ། །གནོད་སྦྱིན་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང་མི་རྣམས་ཀྱང་བལྟར་འོང་ངོ ། །ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་མཚམས་བཟང་ཡང་བལྟར་འོང་ངོ ། །བཟང་སྐྱོང ། གཞན་ཡང་ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་དེ་ལ་མ་བཤད་ཅིང་མ་ཐོས་པའི་མདོ་སྡེ་དག་ཀྱང་ཐ་ན་རྨི་ལམ་དུའང་སྒྲ་གྲག་ཅིང་དབྱངས་ཐོས་པར་འགྱུར་རོ། །བཟང་སྐྱོང ། ཏིང་ངེ་འཛིན་འདི་འཛིན་པའི་བྱང་ཆུབ་སེམས་དཔའ་གང་ཏིང་ངེ་འཛིན་འདི་འཛིན་ཏམ། ཀུན་ཆུབ་པར་བྱེད་དམ། འཆང་ངམ། ཀློག་གམ། ཡི་གེར་འབྲིའམ། འཆད་པར་བྱེད་པ་དེ་ལ་བསྐལ་པའམ། བསྐལ་པ་ལས་ལྷག་པར་ཡང་ང་སྙན་པ་རྗོད་ཅིང་ཡོན་ཏན་སྒྲོག་པར་བྱེད་ན། གང་སྒྲུབ་པར་བྱེད་པ་ལྟ་ལ་སྨོས་ཀྱང་ཅི་དགོས། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །བྱང་ཆུབ་སེམས་དཔའ་གང་ཞིག་ཏིང་ངེ་འཛིན། །བདེ་བར་གཤེགས་པས་གསུངས་པ་འདི་འཆད་པའི། །ཡོན་ཏན་ཡོངས་སུ་བཤད་པར་བྱ་བ་ནི། །གངྒཱའི་བྱེ་མ་སྙེད་ལས་གཅིག་བླངས་བཞིན། །གང་ཞིག་ཏིང་ངེ་འཛིན་འདི་འཆད་བྱེད་པ། །དེ་ལ་མེ་དང་མཚོན་གྱིས་མི་ཚུགས་ཤིང ། །དེ་ལ་རྐུན་པོས་གནོད་པར་བྱེད་མི་འགྱུར། །དེ་ལ་རྒྱལ་པོ་མི་བྱམས་
61b
མི་བྱེད་དོ། །གདུག་པའི་སྦྲུལ་དག་འཁྲུགས་ཤིང་འཇིགས་བྱེད་པས། །གདུག་པའི་ཡིད་ཀྱིས་མི་ལ་འཚེ་བྱེད་ན། །གང་ཞིག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་གྱིས་དེ་དག་དུག་མེད་འགྱུར། མི་དང་ཀླུ་དང་གནོད་སྦྱིན་སྲིན་པོ་དག་།ཕས་ཀྱི་རྒོལ་བ་འཁྲུགས་ཤིང་འཇིགས་བྱེད་པས། །གང་དག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་ལ་ནམ་ཡང་མི་བཟོད་དོ། །དགོན་པའི་གཅན་གཟན་མི་སྲུན་གང་འཁོད་པ། །སྤྱང་ཀི་ཝ་དང་དེ་བཞིན་སེངྒེ་སྟག་།དེ་དག་དགོན་པའི་གནས་སུ་གནས་པ་དེའི། །གྲོགས་བྱེད་པ་དང་གཡོག་བྱེད་པར་ཡང་འགྱུར། །གནོད་སྦྱིན་ཤ་ཟ་མདངས་འཕྲོག་འཇིགས་བྱེད་པ། །གདུག་པའི་ཡིད་ཀྱིས་མི་ལ་འཚེ་བྱེད་ན། །གང་ཞིག་ཏིང་འཛིན་འདི་ལ་འཇུག་བྱེད་པ། །དེ་ཡི་བྱིན་གྱིས་དེ་དག་སྤ་ཡང་འགོད། །གང་ཞིག་ཏིང་འཛིན་འདི་ནི་འཆད་བྱེད་པ། །དེ་ནི་རྣ་ནད་མེད་ཅིང་ལུས་ནད་མེད། །མིག་གི་དབང་པོ་རྣམས་ཀྱང་ཉམས་མི་འགྱུར། །ཚིག་ཀྱང་གསལ་ཞིང་སྤོབས་པས་སྨྲ་བར་འགྱུར། །གང་ཞིག་ཏིང་འཛིན་འདི་ལ་འཇུག་པ་དེ། །དེ་ལ་ནམ་ཡང་སེམས་དམྱལ་ངན་འགྲོ་མེད། །དེ་ཡི་ལུས་ལ་ནད་ཀྱིས་མི་འདེབས་ཤིང ། །དེ་ལ་ནམ་ཡང་ལོག་ལྟུང་འཇིགས་པ་མེད། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ལ་ལྷ་དང་ཀླུ་དང་གྲུལ་བུམ་དང ། །ལྷ་མ་ཡིན་དང་ལྟོ་འཕྱེ་ཆེ་རྣམས་སྲུང ། །དེ་ལ་གདུག་པར་སེམས་པའང་དང་བར་འགྱུར། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ལ་ལྷ་མི་ཀླུ་དང་
62a
༄#། །ལྷ་མ་ཡིན། །གནོད་སྦྱིན་མིའམ་ཅི་དག་ཆེར་སྙན་སྒྲོག་།སངས་རྒྱས་རྣམས་ཀྱང་བུ་གཅིག་བཞིན་དུ་བསྟོད། །ཁ་ཏོན་བྱས་ཏེ་གཞན་ལ་སྟོན་བྱེད་ན། །དེ་ནི་ཆོས་ལ་ཐེ་ཚོམ་འབྱུང་མི་འགྱུར། །དེ་ནི་བྱང་ཆུབ་ཐེ་ཚོམ་ཡོང་མི་འབྱུང ། །དེ་ཡི་གཟུགས་དང་མཉམ་པའང་མི་འབྱུང་ངོ ། །ཏིང་འཛིན་དེ་ནི་ཁ་ཏོན་བྱེད་པ་དེ། །རྒྱལ་པོ་འཁྲུགས་དང་དེ་བཞིན་སེམས་ཅན་འཁྲུགས། །མུ་གེའི་དགོན་པ་བྱུང་བར་གྱུར་ན་ཡང ། །དེ་ལ་གནོད་དང་བཀྲེས་པར་མི་འགྱུར་རོ། །ཏིང་འཛིན་འདི་ནི་ཁ་ཏོན་བྱེད་པ་དེ། །སེམས་ཅན་དག་ལ་བདུད་ནི་ཉེར་གནས་ཀྱང ། །དེ་ནི་མི་སྐྲག་པ་སྤུ་མི་གཡོ་སྟེ། །དེ་ཡི་ཡོན་ཏན་བསམ་གྱིས་མི་ཁྱབ་འགྱུར། །འཚེ་བ་དང་ནི་ཉེས་དང་ཉོན་མོངས་པ། །ཇི་སྙེད་གང་དག་ངས་ནི་བཤད་གྱུར་པ། །སྔོན་གྱི་ལས་ཀྱི་རྣམ་སྨིན་མ་གཏོགས་པར། །དེ་དག་དེ་ཡི་ལུས་ལ་མི་ཚུགས་སོ། །ཟད་པ་ཕྱི་མའི་དུས་ན་གང་ལག་ཏུ། །མདོ་སྡེ་རྒྱ་ཆེ་འདི་དག་འོངས་པ་ནི། །སྲས་ཀྱི་ཐུ་བོ་བཞིན་དུ་མདུན་བཞག་སྟེ། །བསྟོད་ཅིང་བསླང་ལ་སྙན་པ་དག་ཀྱང་གསུང ། །བག་ཡོད་པར་ཡང་བརྩོན་འགྲུས་བརྩམས་པར་བྱོས། །མཐུན་པར་བྱས་ཏེ་ཆོས་ཀྱང་སྦྱད་པར་བྱོས། །གང་ཞིག་འཛིན་ཅིང་ཀློག་ལ་སྟོན་བྱེད་པ། །ཁྱེད་ཀྱི་དོན་དུ་འདི་དག་འཆད་པར་བྱེད། །བཟང་སྐྱོང་གིས་ཞུས་པའི་ཏིང་ངེ་འཛིན་ལས། ཆོས་སྨྲ་བ་བསྔགས་པའི་ལེའུ་སྟེ་བཅུ་བཞི་པའོ།། །།བམ་པོ་ལྔ་པ། ཡང་བཅོམ་ལྡན་འདས་ཀྱིས་བྱང་ཆུབ་སེམས་
62b
དཔའ་སེམས་དཔའ་ཆེན་པོ་བཟང་སྐྱོང་ལ་བཀའ་སྩལ་པ། བཟང་སྐྱོང ། ངས་མངོན་པར་ཤེས་ཏེ། འདས་པའི་དུས་བསྐལ་པ་གྲངས་མེད་པ། རྒྱས་པ། ཚད་མེད་པ། བསམ་གྱིས་མི་ཁྱབ་པ། གཞལ་དུ་མེད་པར་གྱུར་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་ཞེས་བྱ་བ། རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ ། །བཟང་སྐྱོང ། དེའི་ཚེ་ཚོང་དཔོན་གྱི་བུ་བཟང་སྦྱིན་ཞེས་བྱ་བ་ཞིག་ཡོད་པར་གྱུར་ཏེ། དེ་སྲོག་ཆགས་ཉི་ཁྲིས་ཡོངས་སུ་བསྐོར་ཞིང་མདུན་དུ་བདར་ནས་ལྷན་ཅིག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ག་ལ་བར་དོང་སྟེ་ལྷགས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེའི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་ཚོང་དཔོན་གྱི་བུ་བཟང་སྦྱིན་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལ་ཏིང་ངེ་འཛིན་འདི་ཡོངས་སུ་ཞུས་སོ། །བཟང་སྐྱོང ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེས་ཀྱང་ཚོང་དཔོན་གྱི་བུ་བཟང་སྦྱིན་དེའི་
63a
༄#། །ལྷག་པའི་བསམ་པ་མཁྱེན་ནས་ཏིང་ངེ་འཛིན་འདི་རྒྱ་ཆེར་བསྟན་ཏོ། །ཡང་དག་པར་བཤད་དོ། །བཟང་སྐྱོང ། དེ་ནས་ཚོང་དཔོན་གྱི་བུ་བཟང་སྦྱིན་དེས་ཏིང་ངེ་འཛིན་འདི་ཐོས་ནས་འཛིན་པར་བྱེད་དོ། །བཟུང་ནས་སྒོམ་པར་བྱེད་དོ། །བསྒོམས་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལས་སྐྲ་དང་ཁ་སྤུ་བྲེགས་ཏེ་གོས་ཚོན་ཅན་གྱོན་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་ཚངས་པར་སྤྱོད་དོ། །ལོ་བརྒྱད་ཁྲིར་ཏིང་ངེ་འཛིན་འདི་སྒོམ་ཞིང་གནས་པར་གྱུར་ཏོ། །དེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བའི་རྒྱལ་པོ་དེ་ལས་ཐོས་པ་ཐམས་ཅད་བཟུང་ཞིང ། འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལས་ཀྱང་ཐོས་པ་ཐམས་ཅད་བཟུང་སྟེ། དེ་མང་དུ་ཐོས་པ་བསམ་གྱིས་མི་ཁྱབ་པ་དང་ལྡན་པར་གྱུར་ཏོ། །དེ་དུས་གཞན་ཞིག་ན་ཚེ་བརྗེས་ནས་ལུས་ཞིག་སྟེ་ཤི་བ་དང ། བདེ་འགྲོ་མཐོ་རིས་ཀྱི་འཇིག་རྟེན་དུ་སུམ་ཅུ་རྩ་གསུམ་པའི་ལྷ་རྣམས་དང་སྐལ་པ་མཉམ་པར་སྐྱེས་སོ། །སྐྱེས་ནས་ཀྱང་དེས་འཇིག་རྟེན་གྱི་ཁམས་དེ་ཉིད་དུ་དེ་བཞིན་གཤེགས་པ་གཉིས་པ་གློག་གི་ལྷ་ཞེས་བྱ་བ་མཉེས་པར་བྱས་སོ། །བསྐལ་པ་དེ་ཉིད་ལ་རྒྱལ་རིགས་ཤིང་སཱ་ལ་ཆེན་པོ་ལྟ་བུར་སྐྱེས་ཏེ། རྒྱལ་རིགས་ཤིང་སཱ་ལ་ཆེན་པོ་ལྟ་བུ་དེ་ལས་མངོན་པར་བྱུང་ནས་དེ་བཞིན་གཤེགས་པ་
63b
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གློག་གི་ལྷ་དེ་ལས་རབ་ཏུ་བྱུང་སྟེ་ལོ་བརྒྱད་ཁྲིར་ཏིང་ངེ་འཛིན་འདི་སྒོམ་ཞིང་ཚངས་པར་སྤྱད་པ་སྤྱོད་དོ། །དེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསུམ་པ་འོད་ཟེར་གྱི་རྒྱལ་པོ་ཞེས་བྱ་བ་མཉེས་པར་བྱས་སོ། །བསྐལ་པ་དེ་ཉིད་ལ་བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུར་སྐྱེས་ཏེ། བྲམ་ཟེའི་རིགས་ཤིང་སཱ་ལ་ཆེན་པོ་ལྟ་བུ་དེ་ལས་མངོན་པར་བྱུང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཟེར་གྱི་རྒྱལ་པོ་དེ་ལས་རབ་ཏུ་བྱུང་སྟེ་ལོ་བརྒྱད་ཁྲི་བཞི་སྟོང་དུ་ཏིང་ངེ་འཛིན་འདི་སྒོམ་ཞིང་ཚངས་པར་སྤྱད་པ་སྤྱོད་དོ། །ཚོང་དཔོན་གྱི་བུ་བཟང་སྦྱིན་དེའང་དེ་ནས་ཕྱིས་བསྐལ་པ་བརྒྱད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །བཟང་སྐྱོང ། དེའི་ཚེ་དེའི་དུས་ན་ཚོང་དཔོན་གྱི་བུ་བཟང་སྦྱིན་ཞེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་དེ་ལྟར་ཐེ་ཚོམ་མམ། ཡིད་གཉིས་སམ། སོམ་ཉི་ཟ་བར་གྱུར་ན།་བཟང་སྐྱོང ། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དེ་དེའི་ཚེ་དེའི་དུས་ན་ཚོང་དཔོན་གྱི་བུ་བཟང་སྦྱིན་ཞེས་བྱ་བར་གྱུར་ཏོ། །བཟང་སྐྱོང ། ཚོང་དཔོན་གྱི་བུ་བཟང་སྦྱིན་དེ་ཆོས་དོན་དུ་གཉེར་ཞིང་ཆོས་འདོད་ལ་ཆོས་ལ་འདུན་པ་དང་ལྡན་ཏེ། དེའི་ཕྱིར་མྱུར་དུ་བླ་ན་མེད་པ་ཡང་དག་པར་རྫོགས་
64a
༄#། །པའི་བྱང་ཆུབ་མངོན་པར་རྫོགས་པར་སངས་རྒྱས་པ་ལ་ལྟོས། བཟང་སྐྱོང ། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཡེ་ཤེས་སྐྱེད་པ་དང ། ཐོས་པ་རྒྱ་མཚོ་ལྟ་བུར་འགྱུར་བ་ལ་ཇི་ཙམ་དུ་ཕན་པ་མང་པོར་གྱུར་པ་ལ་ལྟོས། བཟང་སྐྱོང ། དེ་བས་ན། ཁྱོད་ཀྱིས་ཏིང་ངེ་འཛིན་འདི་གཟུང་བར་བྱའོ། །ཀུན་ཆུབ་པར་བྱའོ། །ཡི་གེར་བྲི་བར་བྱའོ། །བཅང་བར་བྱའོ། །བཀླག་པར་བྱའོ། །བཟུང་ཞིང་ཀུན་ཆུབ་པར་བྱས་ནས་གཞན་དག་ལའང་རྒྱ་ཆེར་ཡང་དག་པར་བཤད་པར་བྱའོ། །བསྟན་པར་བྱའོ། །བརྗོད་པར་བྱའོ། །སྒོམ་པའི་སྦྱོར་བ་ལའང་བརྩོན་པར་བྱའོ། །དེ་ཅིའི་ཕྱིར་ཞེ་ན། བཟང་སྐྱོང ། དེ་ནི། འདི་ལྟར་ཏིང་ངེ་འཛིན་འདི་ཕྱི་ཕྱིར་བསྟེན་ཅིང་བསྒོམས་ལ་མང་དུ་བྱས་ན། སངས་རྒྱས་ཀྱི་ཡེ་ཤེས་འཐོབ་པར་འགྱུར་བ་དང ། དེ་བཞིན་གཤེགས་པའི་ཡེ་ཤེས་དང ། རང་བྱུང་གི་ཡེ་ཤེས་དང ། ཐམས་ཅད་མཁྱེན་པའི་ཡེ་ཤེས་དང ། བསམ་གྱིས་མི་ཁྱབ་པའི་ཡེ་ཤེས་དང ། མི་མཉམ་པ་དང་མཉམ་པའི་ཡེ་ཤེས་དང ། བླ་ན་མེད་པའི་ཡེ་ཤེས་དང ། ལྟག་ན་མེད་པའི་ཡེ་ཤེས་འཐོབ་པར་འགྱུར་བ་མ་གཏོགས་པར་ཆོས་གཞན་འཐོབ་པར་མི་འགྱུར་རོ། །ཡང་བཟང་སྐྱོང ། ཡང་དག་པར་སྨྲ་བས་གང་ལ་མིག་ཏུ་གྱུར་པ་བྱང་ཆུབ་སེམས་དཔའ་རྣམས་སྐྱེད་པ། སངས་རྒྱས་ཀྱི་ཆོས་
64b
རྣམས་སྐྱེད་པར་བྱེད་པ་ཞེས་སྨྲ་བ་དེ་དག་ནི། བཟང་སྐྱོང ། ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང ། ཡང་དག་པར་སྨྲ་བས་གང་ལ་སངས་རྒྱས་ཀྱི་རིགས་སོ། །ཆོས་ཀྱི་རིགས་སོ། །དགེ་འདུན་གྱི་རིགས་སོ། །སངས་རྒྱས་ཀྱི་སའོ། །ཐོས་པའི་རིགས་སོ། །ཐོས་པ་རྒྱ་མཚོ་ལྟ་བུའོ། །ཐོས་པ་བསགས་པའོ། །ཐོས་པའི་གཞིའོ། །ཡོན་ཏན་བསགས་པའོ། །བཟོད་པ་སྐྱེད་པའོ། །བྱམས་པ་སྐྱེད་པའོ། །སྙིང་རྗེ་ཐོབ་པའོ། །བྱང་ཆུབ་སྐྱེད་པའི་ཆོས་སོ། །ཞེས་སྨྲ་བ་དེ་དག་ནི། བཟང་སྐྱོང ། ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང ། ཡང་དག་པར་སྨྲ་བས་གང་ལ་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་གྱི་མུན་པ་སེལ་བར་བྱེད་པའི་ཆོས་སོ། །སྣང་བ་ཆེན་པོ་བྱེད་པའི་ཆོས་སོ། །ཞེས་སྨྲ་བ་དེ་དག་ནི། བཟང་སྐྱོང ། ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །ཡང་བཟང་སྐྱོང ། ཡང་དག་པར་སྨྲ་བས་གང་ལ་དེ་བཞིན་གཤེགས་པའི་སྟོབས་བཅུ་དང ། དེ་བཞིན་གཤེགས་པའི་མི་འཇིགས་པ་བཞི་དང ། སོ་སོ་ཡང་དག་པར་རིག་པ་བཞི་དང ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་སྐྱེད་པར་བྱེད་པའི་ཆོས་སོ། །ཞེས་སྨྲ་བ་དེ་དག་ནི། བཟང་སྐྱོང ། ཏིང་ངེ་འཛིན་འདི་ལ་ཡང་དག་པར་སྨྲ་བས་སྨྲ་བ་ཡིན་ནོ། །བཟང་སྐྱོང ། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དག་འདི་ཉིད་ན་འདུག་བཞིན་དུ་འཇིག་རྟེན་གྱི་ཁམས་གཞན་དག་གི་སངས་རྒྱས་ཀྱང་ལྟ། ཆོས་ཀྱང་ཉན།
65a
༄#། །དགེ་འདུན་ཡང་ལྟ་བར་བྱེད་པའི་ད་ལྟར་ཀྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ཇི་ཙམ་དུ་རྒྱ་ཆེ་བ་ལ་ལྟོས། བཟང་སྐྱོང ། དེ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་རིན་པོ་ཆེ་འདི་སྒྲུབ་པར་འདོད་པས་དྲན་པ་ཉེ་བར་གཞག་པ་བཞི་ལ་བརྟུལ་བ་བརྟན་པར་བྱའོ། །བཟང་སྐྱོང ། བྱང་ཆུབ་སེམས་དཔའ་སེམས་དཔའ་ཆེན་པོ་ཇི་ལྟར་དྲན་པ་ཉེ་བར་གཞག་པ་བཞི་ལ་བརྟུལ་བ་བརྟན་པར་བྱ་ཞེ་ན། བཟང་སྐྱོང ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ལུས་ལ་ལུས་ཀྱི་རྗེས་སུ་བལྟ་བར་བྱ་སྟེ། ལུས་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་ནི། མི་བྱའོ། །ཚོར་བ་ལ་ཚོར་བ་རྗེས་སུ་བལྟ་བར་བྱ་སྟེ། ཚོར་བ་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་མི་བྱའོ། །སེམས་ལ་སེམས་ཀྱིས་རྗེས་སུ་བལྟ་བར་བྱ་སྟེ། སེམས་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་མི་བྱའོ། །ཆོས་ལ་ཆོས་ཀྱི་རྗེས་སུ་བལྟ་བར་བྱ་སྟེ།་ཆོས་དང་ལྡན་པའི་རྣམ་པར་རྟོག་པ་རྣམ་པར་བརྟག་པར་མི་བྱའོ། །བཟང་སྐྱོང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པ་རྣམས་དང ། ཉན་ཐོས་ལུས་མངོན་སུམ་དུ་བྱེད་པ་རྣམས་མ་གཏོགས་པར་ཏིང་ངེ་འཛིན་འདི་ལ་སུ་ཞིག་མངོན་པར་དང་བར་འགྱུར། བཟང་
65b
སྐྱོང ། དེ་ཅིའི་ཕྱིར་ཞེ་ན། ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ལ་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་ནི། འཁྲུལ་ཏོ། །བཟང་སྐྱོང ། དེ་ཅིའི་ཕྱིར་ཞེ་ན། ཆོས་དེ་དག་ཉིད་ཡིད་ལ་བྱ། ཆོས་དེ་དག་ཉིད་བལྟ་བར་བྱ། སངས་རྒྱས་བཅོམ་ལྡན་འདས་དག་ཀྱང་ཉིད་ལ་བྱ། དེ་བཞིན་གཤེགས་པ་རྣམས་ཀྱང་བལྟ་བར་བྱ། ཆོས་ཀྱང་མཉན་པར་བྱ་སྟེ། མངོན་པར་ཞེན་པར་ནི། མི་བྱའོ། །བཟང་སྐྱོང ། དེ་ཅིའི་ཕྱིར་ཞེ་ན། ཆོས་འདི་དག་ཐམས་ཅད་ནི། རང་བཞིན་གྱིས་སྟོང་པ། རང་བཞིན་གྱིས་ཡོངས་སུ་དག་པ་སྟེ། ཐོག་མ་ཉིད་ནས་ཉེ་བར་ཞི་བའོ། །བཟང་སྐྱོང ། ཆོས་འདི་དག་ཐམས་ཅད་ནི། དམིགས་པའི་དབང་དུ་གྱུར་པས་དམིགས་སུ་མེད་པའོ། །ཆོས་འདི་དག་ཐམས་ཅད་ནི། ཡིད་ལ་བྱ་བ་དེ་ཉིད་ཀྱིས་དབེན་པའོ།། ཆོས་འདི་དག་ཐམས་ཅད་ནི། རང་བཞིན་གྱིས་དམིགས་སུ་མེད་པས་གཟུང་དུ་མེད་པའོ། །ཆོས་འདི་དག་ཐམས་ཅད་ནི། ནམ་མཁའ་དང་འདྲ་བས་མི་ཆགས་པའོ། །ཆོས་འདི་དག་ཐམས་ཅད་ནི། བདག་དང་སེམས་ཅན་གྱི་འདུ་ཤེས་དང་བྲལ་བའི་ཕྱིར་ཤིན་ཏུ་རྣམ་པར་དག་པའོ། །ཆོས་འདི་དག་ཐམས་ཅད་ནི། རྒྱུའི་དབང་ལས་གྱུར་པས་ཉོན་མོངས་པ་མེད་པའོ། །ཆོས་འདི་དག་ཐམས་ཅད་ནི། སྲོག་དང་གང་ཟག་མི་དམིགས་པའི་ཕྱིར་བགྲང་དུ་མེད་པའོ། །ཆོས་འདི་དག་ཐམས་ཅད་ནི། རང་བཞིན་གྱིས་འོད་གསལ་བས་མྱ་ངན་ལས་འདས་པ་དང་མཉམ་པའོ། །ཆོས་འདི་དག་ཐམས་ཅད་ནི།
66a
༄#། །དངོས་པོ་མི་དམིགས་པའི་ཕྱིར་ཉེ་བར་གྱུར་པའོ། །བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཏིང་ངེ་འཛིན་འདི་སྒོམ་པར་འདོད་པར་གྱུར་ན། དེས་ཅི་ནས་ཀྱང་སངས་རྒྱས་བཅོམ་ལྡན་འདས་རྣམས་ཀྱང་མཐོང་ཞིང་སངས་རྒྱས་རྗེས་སུ་དྲན་པ་དང་ལྡན་པའི་དྲན་པ་ཡང་དག་པ་བྱང་ཆུབ་ཀྱི་ཡན་ལག་ཀྱང་སྒོམ་པར་བྱེད། ཆོས་ཀྱང་ཉན་ཅིང་ཆོས་ལ་ཆོས་འབྱེད་པ་ཡང་དག་བྱང་ཆུབ་ཀྱི་ཡན་ལག་ཀྱང་སྒོམ་པར་བྱེད་ལ། བདག་ཀྱང་མི་དམིགས་ཤིང་ཆོས་ཀྱང་མི་སྙེམས་པ་དེ་ལྟར་མཚན་མའི་རྣམ་པས་འཇུག་པས་མཚན་མ་མེད་པའི་འཇུག་པ་ལ་འཇུག་པར་བྱའོ། །བཟང་སྐྱོང ། དེ་ཅིའི་ཕྱིར་ཞེ་ན། འདི་ལྟར་དངོས་པོའི་འདུ་ཤེས་ཅན་གྱིས་སངས་རྒྱས་མཐོང་བར་མི་འགྱུར་རོ། །ཆོས་ཀྱི་འདུ་ཤེས་ཅན་གྱིས་ཆོས་མཐོང་བར་མི་འགྱུར་རོ། ། རྣམ་པར་སྨིན་པ་ལ་རེ་བས་ནི། གཏོང་བ་ཕུན་སུམ་ཚོགས་པར་མི་འགྱུར་རོ། །སྒོམ་པ་ལ་མངོན་པར་དགའ་བས་ནི། ཚུལ་ཁྲིམས་རྣམ་པར་དག་པར་མི་འགྱུར་རོ། །ཆོས་ལ་སེར་སྣ་བྱེད་པས་ནི། མང་དུ་ཐོས་པར་མི་འགྱུར་རོ། །གང་ཟག་ལ་རྟེན་པས་ནི། ཡོངས་སུ་མྱ་ངན་ལས་འདའ་བར་མི་འགྱུར་རོ། །བྲེ་མོ་གཏམ་ལ་མངོན་པར་དགའ་བས་ནི། དབེན་པ་མཐོང་བར་མི་འགྱུར་རོ། །གནས་ལ་དགའ་བས་ནི། འབྲས་བུ་ཐོབ་པར་མི་འགྱུར་རོ། །རྗེས་སུ་ཆགས་པས་ནི། སྐྱོན་མཐོང་བར་མི་འགྱུར་རོ། །གནོད་སེམས་ལ་མངོན་པར་དགའ་བས་ནི། །བཟོད་པ་དང་དེས་པར་མི་འགྱུར་རོ། །ཞེ་
66b
སྡང་ཞིང་ཞེ་འགྲས་པས་ནི། ཕན་ཡོན་མཐོང་བར་མི་འགྱུར་རོ། །ཉན་ཐོས་ཀྱི་ཐེག་པ་པའི་རིགས་ཀྱི་བུའམ་།རིགས་ཀྱི་བུ་མོས་གང་གི་ཕྱིར་བཟོད་པ་ཐོབ་པར་འགྱུར་བའི་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་མངོན་སུམ་དུ་མི་འགྱུར་རོ། །བྱང་ཆུབ་སེམས་དཔའ་ལ་ནི། སེར་སྣ་མི་འབྱུང་ངོ ། །དམིགས་པ་ཅན་ནི། སྟོང་པ་ཉིད་སྒོམ་པར་མི་འགྱུར་རོ། །ལེ་ལོ་ཅན་ནི། མངོན་པར་རྟོགས་པ་ཐོབ་པར་མི་འགྱུར་རོ། །འདོད་པ་ལ་སྟེན་པ་ནི། ཞི་གནས་སུ་མི་འགྱུར་རོ། །རྟེན་པ་ནི། སྒོམ་པ་འགྲུབ་པར་མི་འགྱུར་རོ། །བཟང་སྐྱོང ། དེ་བས་ན།་ཏིང་ངེ་འཛིན་འདི་ཅི་ནས་ཀྱང་ནུབ་པར་མི་འགྱུར་བར་ལྷ་དང་བཅས་པའི་འཇིག་རྟེན་ལ་གཏད་དོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པའི་ཚེ་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་ཁྲག་ཁྲིག་ཕྲག་བཅོ་བརྒྱད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སྲོག་ཆགས་ལྷ་དང ། མི་དང ། ལྷ་མ་ཡིན་དུ་བཅས་པའི་སྐྱེ་རྒུ་བརྒྱད་སྟོང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །དེ་དག་ཐམས་ཅད་ཀྱང་དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ལ་སེམས་རྣམ་པར་གྲོལ་བར་གྱུར་ནས་གང་བླ་ན་མེད་པའི་བྱང་ཆུབ་ཏུ་སེམས་དང་པོ་བསྐྱེད་པ་དེ་དག་མིང་ཐ་དད་ཀྱིས་ཀྱང་ཚེའི་ཚད་གཅིག་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ན།
67a
༄#། །བཟང་སྐྱོང ། ཡང་གང་གིས་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ང་ལ་མཉེས་པར་བྱས་པ་ལྟ་ཅི་སྨོས། གང་གིས་ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་གྲོགས་པོར་གྱུར་པ་ལྟ་སྨོས་ཀྱང་ཅི་དགོས་ཏེ། དེ་དག་ནི། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བཟང་སྐྱོང ། ཆོས་འདི་བཤད་པའི་ཚེ་སེམས་ཅན་ཚད་མེད་པ་རྣམས་ཀྱང་ཡེ་ཤེས་མཐོང་བ་སྐྱེས་སོ། །དགེ་སློང་བརྒྱད་བརྒྱའང་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་དག་ཏིང་འཛིན་འདི་ནི་འཛིན་གྱུར་པ། །དེ་དག་ཤེས་རབ་ཚད་ནི་ཅུང་ཟད་མེད། །ཚུལ་ཁྲིམས་ཚད་དང་རྡུལ་དང་དྲི་མ་མེད། །ཚུལ་ཁྲིམས་རྣམ་དག་སེམས་ཀྱང་ཡོངས་སུ་དག་།གང་དག་ཏིང་འཛིན་འདི་ནི་འཛིན་གྱུར་པ། །དེ་དག་ཤེས་རབ་ནམ་ཡང་ཉམས་པ་མེད། །ཏིང་འཛིན་ཐོས་ནས་ནམ་ཡང་ཉམས་པ་མེད། །ཟླ་བ་བཞིན་དུ་ཡོན་ཏན་ཐམས་ཅད་སྟོན། །གང་དག་ཏིང་འཛིན་འདི་ནི་འཛིན་གྱུར་པ། །དེས་ནི་སངས་རྒྱས་བསམ་མི་ཁྱབ་པ་བསྟོད། །དེས་ནི་ཆོས་ཀྱང་བསམ་མི་ཁྱབ་པ་མཐོང ། ། དེ་ལ་བསམ་མི་ཁྱབ་པའི་ལྷ་རྣམས་སྲུང ། །སྔོན་གྱི་སངས་རྒྱས་བསམ་གྱིས་མི་ཁྱབ་བྱུང ། །དེས་ནི་བསམ་གྱིས་མི་ཁྱབ་ཆོས་བཤད་པ། །གང་ཞིག་ཏིང་འཛིན་འདི་ནི་འཛིན་གྱུར་པ། །དེས་ནི་
67b
ཐམས་ཅད་མཐོང་ཞིང་བསྙེན་བཀུར་བྱས། །གང་ཞག་ཏིང་འཛིན་འདི་ནི་འཛིན་གྱུར་པ། །རྒྱལ་བ་གང་དག་སྡུག་བསྔལ་ཀུན་སྒྲོལ་བ། །འཇིག་རྟེན་དོན་དུ་བྱུང་སྟེ་བཞུགས་པ་ཡི། །རྒྱལ་བ་དེ་དག་དེ་ཡིས་གུས་བྱས་འགྱུར། །མ་བྱོན་སངས་རྒྱས་མང་པོ་བསམ་མི་ཁྱབ། །དང་བའི་སེམས་ཀྱིས་བསྙེན་བཀུར་བྱ་བའི་ཕྱིར། །བྱང་ཆུབ་སེམས་དཔའ་གང་ཞིག་ལྟ་འདོད་པས། །ཏིང་ངེ་འཛིན་མཆོག་འདི་ནི་གཟུང་བར་བྱོས། །གང་ཞིག་ཏིང་འཛིན་འདི་ནི་འཛིན་གྱུར་པ། །མི་དེ་དག་ནི་རྙེད་པ་བསམ་མི་ཁྱབ། །དེ་དག་མི་ཡི་འཇིག་རྟེན་ལེགས་པར་འོངས། །རང་བྱུང་ལེགས་སྤྱད་བསོད་སྙོམས་ལེགས་པར་ཟོས། །ཕྱི་མའི་དུས་ན་ཏིང་འཛིན་མཆོག་འདི་ནི། །གང་གི་ལག་ཏུ་གནས་པར་གྱུར་པ་དེ། །རྙེད་པ་དམ་པ་ཤིན་ཏུ་ལེགས་པར་རྙེད། །དེས་ནི་བསམ་གྱིས་མི་ཁྱབ་ཆོས་ཀྱང་བཟུང ། ། བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅོ་ལྔ་པའོ།། །།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཐུགས་བརྩེ་བའི་སླད་དུ་སང་དགེ་སློང་གི་དགེ་འདུན་དང་ཐབས་ཅིག་ཏུ་བདག་གི་བཤོས་གསོལ་བར་ཅི་གནང ། བཅོམ་ལྡན་འདས་ཀྱིས་ཐུགས་བརྩེ་བའི་ཕྱིར་བྱང་ཆུབ་སེམས་དཔའ་སེམས་
68a
༄#། །དཔའ་ཆེན་པོ་བཟང་སྐྱོང་ལ་ཅང་མི་གསུང་བས་གནང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་ཤེས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་དྲུང་ནས་སོང་སྟེ། དགེ་སློང་མ་སྐྱེ་རྒུའི་བདག་མོ་ཆེན་མོ་ག་ལ་བ་དེར་སོང་ནས་ཕྱིན་པ་དང ། དགེ་སློང་མ་སྐྱེ་རྒུའི་བདག་མོ་ཆེན་མོ་གཽ་ཏ་མའི་རྐང་པ་ལ་མགོ་བོས་ཕྱག་བཙལ་ནས་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་དགེ་སློང་མ་སྐྱེ་རྒུའི་བདག་མོ་ཆེན་མོ་གཽ་ཏ་མ་ལ་འདི་སྐད་ཅེས་སྨྲས་སོ། །འཕགས་མ་ཐུགས་བརྩེ་བའི་སླད་དུ་སང་དགེ་སློང་མའི་དགེ་འདུན་དང་ཐབས་ཅིག་བདག་གི་བཤོས་གསོལ་བར་ཅི་གནང ། དགེ་སློང་མ་སྐྱེ་རྒུའི་བདག་མོ་ཆེན་མོ་གཽ་ཏ་མས་སྙིང་བརྩེ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་ཅང་མི་སྨྲ་བས་གནང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་དགེ་སློང་མ་སྐྱེ་རྒུའི་བདག་མོ་ཆེན་མོ་གཽ་ཏ་མས་ཅང་མི་སྨྲ་བས་གནང་བར་རིག་ནས་དགེ་སློང་མ་སྐྱེ་རྒུའི་བདག་མོ་ཆེན་མོ་གཽ་ཏ་མའི་རྐང་པ་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་སོང་ངོ ། །སོང་ནས་ཀྱང་ལི་ཙ་བྱི་གཞོན་ནུ་རིན་ཆེན་འབྱུང་གནས་ག་ལ་བ་
68b
དེར་སོང་སྟེ་ཕྱིན་པ་དང ། ལི་ཅ་བྱི་གཞོན་ནུ་རིན་ཆེན་འབྱུང་གནས་ལ་འདི་སྐད་ཅེས་སྨྲས་ས། །ཉེ་དུ་བོ་རྒྱལ་པོའི་ཁབ་འོད་མའི་ཚལ་བྱ་ཀ་ལནྟ་ཀ་གནས་པ་འདིར་རྒྱལ་པོའི་ཁབ་འདིའམ། ལྗོངས་ཀྱི་ཕྱོགས་གཞན་དག་ནས་དགེ་བསྙེན་ཇི་སྙེད་ཅིག་འདུས་པ་ཐམས་ཅད་འཁོར་དང་བཅས་ཏེ་ཁོ་བོའི་ཚིག་གིས་སང་གི་གདུགས་ཚོད་ལ་མགྲོན་དུ་བོས་ཤིག་།དེ་ནས་ལི་ཙ་བྱི་གཞོན་ནུ་རིན་ཆེན་འབྱུང་གནས་ཀྱིས་འཁོར་དེར་དགེ་བསྙེན་ཇི་སྙེད་ཅིག་འདུས་པ་དེ་དག་ཐམས་ཅད་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་ཁྱེད་ཅག་འཁོར་དང་བཅས་པར་སང་མགྲོན་དུ་བོས་སྟེ།། ཞེས་བསྒོའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལི་ཙ་བྱི་གཞོན་ནུ་རིན་ཆེན་འབྱུང་གནས་དང ། ཁྱིམ་བདག་དེད་དཔོན་ཆེ་བཟང་དང ། ཚོང་དཔོན་གྱི་བུ་ཕུག་སྦས་དང ། བྲམ་ཟེ་འདམ་བུས་བྱིན་དང ། ཁྱིམ་བདག་ཆུ་ལྷ་དང ། ཁྱིམ་བདག་དབང་པོས་བྱིན་དང ། ཁྱིམ་བདག་གཞན་དག་ཀྱང་རང་རང་གི་སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་དགེ་སློང་གི་དགེ་འདུན་གྱི་ཞབས་ལའང་མགོ་བོས་ཕྱག་བཅལ་ཏེ་འོད་མའི་ཚལ་ནས་བྱུང་ནས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང ། བཟང་སྐྱོང་གི་ཁྱིམ་ག་ལ་བ་དེར་དོང་སྟེ་ལྷགས་པ་དང ། དེ་ཉིད་ཀྱི་ནུབ་མོ་དེ་དག་ཐམས་ཅད་དང ། ཐ་ན་སློང་བ་རྣམས་ཀྱི་ཕྱིར་ཡང་བཅའ་བར་བྱ་བ་དང ། བཟའ་བར་བྱ་བ་དང ། མྱང་བར་
69a
༄#། །བྱ་བ་དང ། བདག་པར་བྱ་བ་བསོད་པ་མང་དུ་སྦྱར་རོ། །ཟས་རོ་བརྒྱ་པའང་བཤམས་ཤིང་གཡོས་སོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསམ་པ་རླབས་པོ་ཆེ་དང ། བརྙས་པ་མེད་པ་ལ་གནས་ཤིང ། སེམས་ཅན་ཐམས་ཅད་ལ་སེམས་མཉམ་པར་ཞུགས་པ་ཡིན་ནོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། ལྷའི་བུ་མཚམས་བཟང་དང ། རྒྱལ་པོ་ཆེན་པོ་བཞི་རྣམས་ཀྱིས་མི་མང་པོའང་སྤྲུལ་ཏེ་སྐྱོ་བ་སྐྱེ་བའི་ཚུལ་དུ་ཁྱིམ་བདག་དེ་རྣམས་ལ་བྱང་ཆུབ་ཀྱི་ཕན་གདགས་པ་དང ། ཡོངས་སུ་སྨིན་པར་བྱ་བའི་ཕྱིར་བརྩོན་པར་བྱེད་པར་གྱུར་ཏོ། །དེ་ནས་བྱང་ཆུབ་སེམས་དཔའ་བཟང་སྐྱོང་དང ། ལི་ཙ་བྱི་གཞོན་ནུ་རིན་ཆེན་འབྱུང་གནས་དེ་དག་དང ། ཁྱིམ་བདག་གཞན་དག་ཀྱང་རང་རང་གི་གཉེན་རྣམས་དང་ལྷན་ཅིག་ཏུ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ཐམས་ཅད་དང་ལྡན་པར་ཕྱག་དར་བྱ་བ་རྣམས་ཀྱང་ཕྱག་དར་ལེགས་པར་བྱས། དར་གྱི་ལྡ་ལྡི་ནི། བྲེས། སྤོས་ཀྱི་སྣོད་ཀྱིས་ནི། བདུགས། མེ་ཏོག་གི་སིལ་མས་ནི། འཐོར་དུ་བཅུད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་རང་གི་གཉེན་དང་བཅས་པས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོའང་བརྒྱན། རོ་བརྒྱ་དང་ལྡན་པའི་བཤོས་ཀྱང་སྦྱར་ཏེ། དེའི་མཚན་མོ་འདས་ནས་གཉེན་གྱིས་བསྐོར་ཅིང་མདུན་དུ་
69b
བདར་ཏེ་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཙུན་པ་བཅོམ་ལྡན་འདས། བཤོས་ཀྱི་དུས་ལ་བབ་པོ། །བཙུན་པ་བཅོམ་ལྡན་འདས། བཤོས་ཀྱི་ཚོད་ལ་བབ་བོ། །བཤོས་ནི། སྦྱར་ལགས་ཏེ། ད་དེའི་དུས་ལ་བབ་པར་མཁྱེན་པར་མཛད་དུ་གསོལ་ཞེས་གདུགས་ཚོད་ལ་བབ་པར་གསོལ་ལོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཆོས་གོས་དང་ཤམ་ཐབས་མནབས། ལྷུང་བཟེད་བསྣམས་ནས་དགེ་སློང་གི་དགེ་འདུན་དང་ཐབས་ཅིག་།དགེ་སློང་མའི་དགེ་འདུན་དང་ཐབས་ཅིག་།དགེ་བསྙེན་དང ། དགེ་བསྙེན་མའི་འཁོར་རྣམས་དང་ཡང་ཐབས་ཅིག་བསྐོར་ཅིང་མདུན་དུ་བདར་ཏེ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གི་ཁྱིམ་ག་ལ་བ་དེར་གཤེགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་མཛད་པས་བདག་གི་ཁྱིམ་འདི་ཡངས་ཤིང་རྒྱ་ཆེ་ལ་བཻ་ཌཱུརྱ་སྔོན་པོ་ལྟ་བུར་གྱུར་ཏེ། གྲོང་ཁྱེར་གྱི་སྐྱེ་བོ་ཐམས་ཅད་ཀྱིས་ཀྱང་མཐོང་ཞིང་འཁོར་མང་པོ་འདི་དག་ཀྱང་བག་ཡོངས་སུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་མཛད་པ་མངོན་པར་མཛད་ན་ལེགས་སོ། །སྙམ་དུ་བསམ་མོ། །དེ་ནས་བཅོམ་ལྡན་འདས་ཀྱི་ཐུགས་ཀྱིས་བྱང་ཆུབ་སེམས་དཔའ་སེམས་དཔའ་
70a
༄#། །ཆེན་པོ་དེའི་སེམས་ཀྱི་རྟོག་པ་མཁྱེན་ནས་ཇི་ལྟ་བུའི་རྫུ་འཕྲུལ་མངོན་པར་མཛད་པ་མངོན་པར་མཛད་པས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གི་ཁྱིམ་དེ་ཡངས་ཤིང་རྒྱ་ཆེ་ལ་བཻཌཱུརྱ་སྔོན་པོ་ལྟ་བུར་གྱུར་ཏེ། གྲོང་ཁྱེར་གྱི་སྐྱེ་བོ་ཐམས་ཅད་ཀྱིས་ཀྱང་ཅི་ནས་ཀྱང་མཐོང་ཞིང་འཁོད་དེ། དེ་དག་ཐམས་ཅད་ཀྱང་བག་ཡངས་སུ་འཁོད་པ་དེ་ལྟ་བུའི་རྫུ་འཕྲུལ་མངོན་པར་མཛད་པ་མངོན་པར་མཛད་དོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གི་ཁྱིམ་དུ་གཤེགས་སོ། ། གཤེགས་ནས་ཀྱང་དགེ་སློང་དང ། དགེ་སློང་མའི་དགེ་འདུན་དང ། དགེ་བསྙེན་དང ། དགེ་བསྙེན་མའི་འཁོར་རྣམས་དང་ཐབས་ཅིག་ཏུ་གདན་བཤམས་པ་ལ་བཞུགས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལི་ཙ་བྱི་གཞོན་ནུ་རིན་ཆེན་འབྱུང་གནས་དང ། ཁྱིམ་བདག་དེད་དཔོན་ཆེ་བཟང་དང ། ཚོང་དཔོན་གྱི་བུ་ཕུག་སྦས་དང ། བྲམ་ཟེ་འདམ་བུས་བྱིན་དང ། ཁྱིམ་བདག་དབང་པོས་བྱིན་དང ། ཁྱིམ་བདག་ཆུ་ལྷ་རྣམས་ཀྱིས་བཅོམ་ལྡན་འདས་བཞུགས་པར་རིག་།དགེ་སློང་གི་དགེ་འདུན་དང ། དགེ་སློང་མའི་དགེ་འདུན་དང ། དགེ་བསྙེན་དང ། དགེ་བསྙེན་མའི་འཁོར་རྣམས་ཀྱང་འཁོད་པར་རིག་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་དང ། དགེ་སློང་མའི་དགེ་འདུན་དང ། དགེ་བསྙེན་དང །
70b
དགེ་བསྙེན་མའི་འཁོར་རྣམས་ལ་རང་གི་ལག་གིས་བཅའ་བར་བྱ་བ་དང ། བཟའ་བར་བྱ་བ་དང ། མྱང་བར་བྱ་བ་དང ། རོ་རྣམ་པ་བརྒྱ་དང་ལྡན་པའི་ཐས་བསོད་པ་མང་པོས་ཚིམ་པར་བྱས་སོ། ། བསྟབས་སོ། །རང་གི་ལག་གིས་བཟའ་བར་བྱ་བ་དང ། བཅའ་བར་བྱ་བ་དང ། མྱང་བར་བྱ་བ་དང ། རོ་སྣ་བརྒྱ་དང་ལྡན་པའི་ཟས་བསོད་པ་མང་པོས་ཚིམ་པར་བྱས་ཤིང་བསྟབས་ནས་བཅོམ་ལྡན་འདས་བཤོས་གསོལ། ཕྱག་བཅབས། ལྷུང་བཟེད་གྱུ་བར་རིག་པ་དང ། ཅི་རིགས་པའི་སྟན་ཞིག་བླངས་ནས་བཅོམ་ལྡན་འདས་ལ་མདུན་གྱིས་བལྟས་ཏེ་བཅོམ་ལྡན་འདས་ཀྱི་སྤྱན་སྔར་འདུག་གོ་།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལི་ཙ་བྱི་གཞོན་ནུ་རིན་ཆེན་འབྱུང་གནས་དང ། ཁྱིམ་བདག་དེད་དཔོན་ཆེ་བཟང་དང ། ཚོང་དཔོན་གྱི་བུ་ཕུག་སྦས་དང ། བྲམ་ཟེ་འདམ་བུས་བྱིན་དང ། ཁྱིམ་བདག་དབང་པོས་བྱིན་དང ། ཁྱིམ་བདག་ཆུ་ལྷ་རྣམས་དང ། འཁོར་བཞི་པོ་དེ་དག་ལ་ཆོས་ཀྱི་གཏམ་གྱིས་ཡང་དག་པར་དགའ་བར་མཛད་དོ། །ཡང་དག་པར་འཛིན་དུ་བཅུག་གོ་།ཡང་དག་པར་གཟེངས་བསྟོད་དོ། །ཡང་དག་པར་མགུ་བར་མཛད་དོ། །ཆོས་ཀྱི་གཏམ་གྱིས་ཡང་དག་པར་དགའ་བར་མཛད། ཡང་དག་པར་འཛིན་དུ་བཅུག་།ཡང་དག་པར་གཟེངས་བསྟོད། ཡང་དག་པར་མགུ་བར་མཛད་ནས་བཞེངས་ཏེ། དགེ་སློང་གི་དགེ་འདུན་དང་ཐབས་ཅིག་ཏུ་སླར་གཤེགས་སོ། །དེ་ནས་བྱང་ཆུབ་
71a
༄#། །སེམས་དཔའ་སེམས་དཔའ་ཆེན་པོ་བཟང་སྐྱོང་ཟས་ཀྱི་བྱ་བ་བྱས་ནས་རང་གི་མཛའ་བོ་དང ། གཉེན་དང ། སྣག་གི་གཉེན་མཚམས་རྣམས་དང་ལྷན་ཅིག་ཏུ་སྲོག་ཆགས་འབུམ་དུ་ཚང་བས་བསྐོར་ཅིང་མདུན་དུ་བདར་ཏེ་ལྷན་ཅིག་ཏུ་བཅོམ་ལྡན་འདས་ག་ལ་བ་དེ་ལོགས་སུ་དོང་སྟེ་ལྷགས་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་རིན་ཆེན་འབྱུང་གནས་དང ། དེད་དཔོན་ཆེ་བཟང་དང ། ཕུག་སྦས་དང ། འདམ་བུས་བྱིན་དང ། མཚམས་བཟང་དང ། དབང་པོས་བྱིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཆུ་ལྷ་རྣམས་ལྷན་ཅིག་ཏུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་འཁོར་ཐམས་ཅད་འཁོད་པར་རིག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཆོས་དུ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་འཐོབ་པར་འགྱུར། རྣ་བླགས་ཏེ་ཉན་པ་དང ། སེམས་མི་གཡེང་བའི་སླད་དུ་ཀུན་ཏུ་འཛིན་པ་དང ། མི་བསྐྱུད་པར་འགྱུར། ཀུན་ཏུ་བཟུང་ནས་
71b
ཀྱང་འཐོབ་པར་འགྱུར། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང ། ཆོས་ལྔ་དང་ལྡན་ན།་བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་ཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་འཐོབ་པར་འགྱུར་རོ། །རྣ་བླགས་ཏེ་ཉན་པ་དང ། སེམས་མི་གཡེང་བའི་ཕྱིར་ཀུན་ཏུ་འཛིན་པ་དང ། མི་བརྗེད་པར་འགྱུར། ཀུན་ཏུ་བཟུང་ནས་ཀྱང་འཐོབ་པར་འགྱུར་རོ། །བཟང་སྐྱོང ། ལྔ་གང་ཞེ་ན། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཟབ་མོ་ལ་བཟོད་པ་དང་ལྡན་པ་ཡིན་ཏེ། ཟད་མི་ཤེས་པ། ཟད་པ་དང་བྲལ་བ། མི་ཟད་པ། རྣམ་པར་མི་ཟད་པ། རྙོག་པ་མེད་པ། རྙོག་པ་ལས་ཡང་དག་པར་འདས་པ། དྲི་མ་མེད་པ།་དྲི་མ་དང་བྲལ་བ། རྡུལ་མེད་པ། རྡུལ་དང་བྲལ་བ། རྡུལ་ལས་འདས་པ། རྡུལ་ཐམས་ཅད་དང་བྲལ་བའི་མི་སྐྱེ་བའི་ཆོས་ལ་བཟོད་པ་དང་ལྡན་པ་སྟེ། བཟང་སྐྱོང ། ཆོས་དང་པོ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་འདུ་བྱེད་ཐམས་ཅད་ལ་སྤྱོད་ཅིང ། བྱང་ཆུབ་ལ་རྟེན་པ་མ་གཏོགས་པར་སྐྱེ་བའི་གནས་ཐམས་ཅད་མི་འདོད་པ་དང ། སངས་རྒྱས་བཅོམ་ལྡན་འདས་ལ་ལྟ་བར་འདོད་ཅིང ། མུ་སྟེགས་ཅན་གྱི་སྐྱེ་
72a
༄#། །མཆེད་ཐམས་ཅད་དང ། མུ་སྟེགས་ཅན་གྱི་སྔགས་ཐམས་ཅད་ལ་མི་རྟེན་པ་དང ། འདོད་པའི་ལོངས་སྤྱོད་མི་འདོད་པ་དང ། ཚངས་པར་སྤྱོད་པ་ལ་མངོན་པར་དགའ་སྟེ་འཁྲིག་པའི་ཆོས་སྤངས་ནས་དེ་རྟོག་པ་ཙམ་གྱིས་ཀྱང་འདོད་པ་ལ་མི་རྟེན་ན། དབང་པོ་གཉིས་སྤྲོད་པ་ལྟ་ཅི་སྨོས་ཏེ། བཟང་སྐྱོང ། ཆོས་གཉིས་པ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཚད་མེད་པ་རྣམས་བསྒོམས་ཤིང ། སེམས་ཤིན་ཏུ་ལེགས་པར་བསྡུས་ལ་གནོད་པ་མེད་པའི་སེམས་སུ་གྱུར་པ་དང ། སེམས་ཅན་ཐམས་ཅད་ལ་སེམས་མཉམ་པར་གྱུར་ཅིང་སེམས་ཅན་ཐམས་ཅད་ལ་བསྡུ་བའི་དངོས་པོ་བཞིས་སྡུད་པ་སྟེ། བཞི་གང་ཞེ་ན། སྦྱིན་པ་དང ། སྙན་པར་སྨྲ་བ་དང ། དོན་སྤྱོད་པ་དང ། དོན་མཐུན་པ་སྟེ། བཞིའོ། །བཟང་སྐྱོང ། ཆོས་གསུམ་པ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ཆེན་པོ་དང་ལྡན་པར་གྱུར་པ་དང ། སྙིང་རྗེ་ཆེན་པོ་དང ། དགའ་བ་ཆེན་པོ་དང ། བཏང་སྙོམས་ཆེན་པོ་ལ་སྤྱོད་པ་ཡིན་ཏེ། དེ་དགེ་སློང་ངམ། དགེ་སློང་\?\་ན་ལྟུང་བ་བྱུང་བ་མི་གླེང་ཞིང་དང་དུ་ལེན་པའི་རང་བཞིན་ཅན་ཡིན་པས་བཟོད་པ་ཡིན། དེ་མཁན་པོ་དང་སློབ་དཔོན་ལ་གུས་
72b
པ་དང་བཅས། ཞེས་དང་བཅས་ཤིང་སྟོན་པར་འདུ་ཤེས་པ་ཡིན། བདག་ཀྱང་བདག་ཏུ་སྨྲ་བ་མ་ཡིན། སེམས་ཅན་དུ་སྨྲ་བ་མ་ཡིན། སྲོག་ཏུ་སྨྲ་བ་མ་ཡིན། གང་ཟག་ཏུ་སྨྲ་བ་མ་ཡིན། གསོ་བར་སྨྲ་བ་མ་ཡིན། སྐྱེས་བུར་སྨྲ་བ་མ་ཡིན། ཤེད་ལས་སྐྱེས་སུ་སྨྲ་བ་མ་ཡིན། ཤེད་བུར་སྨྲ་བ་མ་ཡིན་ཞིང་གཞན་དག་ཀྱང་ཆོས་འདི་ལ་སྐུལ་བ་སྟེ། བཟང་སྐྱོང ། ཆོས་བཞི་པོ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་རྗེས་སུ་མཐུན་པའི་ཆོས་ལ་ནན་ཏན་བྱེད་པ་ཡིན། ལུས་ཀྱི་སྤྱོད་པ་ཡོངས་སུ་དག་པ་དང ། ངག་གི་སྤྱོད་པ་ཡོངས་སུ་དག་པ་དང ། ཡིད་ཀྱི་སྤྱོད་པ་ཡོངས་སུ་དག་པ་དང ། ལྟ་བ་ཡོངས་སུ་དག་པ་དང ། འཚོ་བ་ཡོངས་སུ་དག་ཅིང་མང་དུ་ཐོས་པ་ཡིན། སངས་རྒྱས་བཅོམ་ལྡན་འདས་རྣམས་དང་ཐབས་ཅིག་ཏུ་དགོངས་པའི་ཚིག་ལ་མཁས་པ་ཡིན་ཏེ། བཟང་སྐྱོང ། ཆོས་ལྔ་པོ་འདི་\?\་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ནི། ཏིང་ངེ་འཛིན་འདི་འཐོབ་བོ། །བཟང་སྐྱོང ། ཆོས་ལྔ་པོ་དེ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཞན་ལྔ་དང་ལྡན་ན། ཏིང་ངེ་འཛིན་འདི་འཐོབ་སྟེ། ལྔ་གང་ཞེ་ན། བཟང་སྐྱོང ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་
73a
༄#། །པའི་བདག་པོ་སྦྱིན་པ་བྱེད་པ་ཡིན་ཏེ། སེམས་ལ་བསྲི་བ་མེད་པ། འཇུངས་པ་མེད་པ། ལྷུག་པར་གཏོང་བ། ལག་པ་བརྐྱང་པ། སྦྱིན་པ་འགེད་པར་དགའ་བ། རྣམ་པར་སྨིན་པ་ལ་རེ་བ་མེད་པར་བདོག་པ་ཐམས་ཅད་ཡོངས་སུ་གཏོང་བ། སེམས་ཅན་རྣམས་ལ་སྙིང་བརྩེ་བ། འགྱོད་པ་དང་བྲལ་བ། སྦྱིན་པ་བྱིན་ནས་འགྱོད་པར་མི་བྱེད་པ་ཡིན་ཏེ། བཟང་སྐྱོང ། ཆོས་དང་པོ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་ཐ་ན་ཐོས་པ་ཙམ་ཡང་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་བདག་པོ་སྦྱིན་པ་བྱེད་པ་ཡིན་ཏེ། འདི་ལྟར་བླ་ན་མེད་པའི་ཆོས་སྦྱིན་པར་བྱེད་པ། ཤིན་ཏུ་ངེས་པར་གསུངས་པའི་ཚིག་དང ། ཡི་གེ་དང ། ཐོགས་པ་མེད་པའི་ཚིག་དང ། ཡི་གེ་དང ། འཆབ་པ་མེད་པའི་ངེས་པའི་ཚིག་དང ། ཟབ་མོ་དོན་དམ་པའི་ཚུལ་བསྟན་པ་དེ་བཞིན་གཤེགས་པས་གསུངས་པའི་བླ་ན་མེད་པའི་ཆོས་ཀྱི་སྦྱིན་པ་གཏོང་ཞིང་དེ་ལ་གནས་པར་གྱུར་པ། བཟོད་པ་ཕུན་སུམ་ཚོགས་པ་དང ། དེས་པ་ཕུན་སུམ་ཚོགས་པར་གྱུར་པ་དང ། དེ་གཞན་གྱིས་ཁ་བྱས་ཤིང་སྤྱོས་ཀྱང་མི་ཁྲོ། མི་གཤེ། གནོད་པར་མི་བྱེད། རྨོངས་པར་མི་བྱེད། ཡི་ཆད་པར་མི་འགྱུར་ཞིང ། ཁྲོ་བ་མང་བར་མི་འགྱུར་ཞིང ། འཇིགས་པ་མེད་པ་ཡིན་ཏེ། བཟང་
73b
སྐྱོང ། ཆོས་གཉིས་པ་འདི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་ཐོས་ནས་དམ་པའི་ཆོས་ཡུན་རིང་དུ་གནས་པར་བྱ་བ་དང ། རྒྱས་པར་བྱེད་པར་བྱ་བའི་ཕྱིར་གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། གཞན་དག་ལའང་རྒྱ་ཆེར་ཡང་དག་པར་བཤད་པར་བྱ། གླེགས་བམ་དུའང་བྲིས་ཏེ་བཅང་བར་བྱ་ཞིང་ཆོས་ལ་འཇུངས་པ་མེད་པར་བྱ་སྟེ། བཟང་སྐྱོང ། ཆོས་གསུམ་པ་དེ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཕྲག་དོག་མེད་པ། གདུང་བ་མེད་པ། རྨུགས་པ་དང་གཉིད་དང་བྲལ་བ། སྒྲིབ་པ་རྣམས་དང་བྲལ་བ། བདག་ལ་མི་བསྟོད་པ་གཞན་ལ་མི་སྨོད་པ་ཡིན་ཏེ། བཟང་སྐྱོང ། ཆོས་བཞི་པ་དེ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ།། བཟང་སྐྱོང ། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དད་པ་དང་ལྡན་པ་དང ། དང་བ་མང་བ་ཡིན། རྐན་པ་དང ། བར་མ་དང ། གཞོན་པ་རྣམས་ལ་གུས་པ་དང་བཅས། རྗེས་དང་བཅས་པ་ཡིན། བྱས་པ་ཤེས་པ་དང་བྱས་པ་གཟོ་བ་ཡིན། དེ་བྱས་པ་ཅུང་ཟད་ལའང་དྲིན་དུ་གཟོན། མང་པོ་ལྟ་ཅི་སྨོས། བདེན་པའི་ཚིག་ལ་གནས་ཤིང་གཞན་དུ་མི་སྨྲ་བ་ཡིན་ཏེ།
74a
༄#། །བཟང་སྐྱོང ། ཆོས་དེ་ལྔ་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཏིང་ངེ་འཛིན་འདི་འཐོབ་བོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཟབ་མོའི་ཆོས་ལ་བཟོད་པ་སྐྱེད་བྱེད་ཅིང ། །འགྲོ་བ་ཐམས་ཅད་ལ་ནི་སྨོད་བྱེད་པ། །འགྲོ་བ་དྲུག་པོ་ཀུན་ཀྱང་མི་འདོད་པ། །དེ་འདྲ་ངེས་ནི་ཏིང་འཛིན་མྱུར་དུ་འཐོབ།། ཕས་ཀྱི་རྒོལ་བ་ཀུན་ལ་མི་རྟེན་ཅིང ། །གསང་ཚིག་ཉན་པར་མི་བྱེད་ག་ལ་འཛིན། །འདོད་པའི་ཡོན་ཏན་ལྔས་ནི་སྐྱོ་བར་གྱུར། །དེ་འདྲ་དེས་ནི་ཏིང་འཛིན་མྱུར་དུ་ཐོབ། །ཚུལ་ཁྲིམས་རྣམ་དག་ཚངས་པར་སྤྱོད་གནས་ཏེ། །བུད་མེད་ལ་ནི་ནམ་ཡང་རྟོག་མི་སྐྱེད། །འདོད་ཆགས་སྤངས་ཤིང་བདེ་གཤེགས་སྲས་གྱུར་བ། །དེ་འདྲ་དེས་ནི་ཏིང་འཛིན་མྱུར་དུ་ཐོབ། །རྣམ་སྨིན་མི་རེ་བར་ནི་སྦྱིན་པ་བྱིན། །རྟེན་པ་མེད་པར་བྱིན་ནས་མི་གདུང་ཞིང ། །སངས་རྒྱས་ཡེ་ཤེས་རེག་བྱ་མ་གཏོགས་པར། །སྦྱིན་པ་བྱིན་ནས་སྨོན་པ་ཅུང་ཟད་མེད། །སེམས་ཅན་སྙིང་བརྩེ་ཕྱིར་ནི་སྦྱིན་བྱིན་ནས། །མྱ་ངན་བྱེད་པ་མེད་ཅིང་འགྱོད་པ་མེད། །སྦྱིན་དང་དུལ་དང་བསྡམས་ལ་རྟག་ཏུ་གནས། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །གང་ཞིག་འཇུངས་མེད་སྦྱིན་བདག་སྦྱིན་བྱེད་པ། ། གྱ་ནོམ་པ་དང་ཡིད་འོང་སྦྱིན་པ་བྱིན། །བྱིན་ནས་དེ་ནི་ཡིད་ཀྱང་དགའ་བར་འགྱུར། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །བདེ་གཤེགས་གསུངས་པ་ཟབ་ཅིང་ཞི་བ་ཡི། །གྱ་ནོམ་
74b
མདོ་སྡེ་དག་ནི་འཆང་བྱེད་ཅིང ། །གང་དག་ཆོས་ཀྱི་སྦྱིན་བདག་གྱུར་པ་ནི། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །ཆོས་ལ་རྟག་ཏུ་གནས་པར་གྱུར་བྱས་ནས། །བཟོད་དང་དེས་ལ་གནས་ཤིང་ཕྲག་དོག་མེད། །གཞན་དག་ཁྲོས་ན་ཁྲོ་བར་མི་བྱེད་པ། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །གང་དག་ལ་ལ་ཏིང་འཛིན་འདི་འདོན་ཅིང ། །ཆོས་འདི་རིང་དུ་གནས་པར་བྱ་བའི་ཕྱིར། །གཞན་ལའང་སྟོན་ཅིང་བྲིས་ནས་འཇོག་བྱེད་པ། །དེ་འདྲ་དེས་ནི་ཏིང་འཛིན་འདི་རྙེད་འགྱུར། །ནམ་ཡང་ཆོས་ལ་འཇུངས་པར་མི་འགྱུར་ཞིང ། །བདེ་གཤེགས་སྲས་འགྱུར་ཕྱིར་ནི་མ་གཏོགས་པར། །རྙེད་དང་བཀུར་སྟིའི་ཕྱིར་ནི་མི་འཆད་པ། །དེ་འདྲ་དེས་ནི་ཆོས་འདི་རྙེད་པར་འགྱུར། །ཕྲག་དོག་མེད་ཅིང་སྒྲིབ་པ་རྣམ་པར་སྤངས། །གཉིད་དང་བྲལ་ལ་ཀུན་ཏུ་གདུང་བ་མེད། །བདག་ལ་མི་བསྟོད་གཞན་ལ་མི་སྨོད་པ། །དེས་ནི་བདག་མེད་འདུ་ཤེས་རྙེད་མི་དཀའ། །དད་དང་ལྡན་ལ་སྒྱུ་མེད་གཡོ་མེད་ཅིང ། །སངས་རྒྱས་ཆོས་དང་དགེ་འདུན་རྣམས་ལ་དད། །དེས་ནི་བྱས་པ་ཤེས་ཤིང་བྱས་པ་སྲུང ། །དེས་ནི་ཅུང་ཟད་ཙམ་ཡང་རྙེད་མི་དཀའ། །རྟག་ཏུ་བདེན་པའི་ཚིག་ནི་སྨྲ་བྱེད་ཅིང ། །ཆུང་ངམ་ཉུང་ངམ་མང་ངམ་བཟང་ཡང་རུང ། །ནམ་ཡང་ལེགས་སྤྱད་ཆུད་མི་གསོན་པ་ཡི། །ཆོས་འདོད་དེ་ནི་རྙེད་པར་དཀའ་མི་འགྱུར། །ཚུལ་ཁྲིམས་རྣམ་དག་བྱས་པ་སྲུང་བ་ཡི། །མི་གང་ལ་ལ་ཆོས་འདི་འཆང་བྱེད་པ། །དེས་ནི་བྱང་ཆུབ་རྙེད་པར་མི་དཀའ་ན། །ཏིང་འཛིན་ཞི་བ་འདི་ལྟ་སྨོས་ཅི་དགོས། །
75a
༄#། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་དྲུག་པའོ།། །།བཟང་སྐྱོང ། ངས་མངོན་པར་ཤེས་ཏེ། འདས་པའི་དུས་ན་དེ་བཞིན་གཤེགས་པ་མར་མེ་མཛད་མཐོང་མ་ཐག་ཏུ་དེ་ལས་ངས་ཏིང་ངེ་འཛིན་འདི་ཐོབ་བོ། །ངས་ཏིང་ངེ་འཛིན་འདི་ཐོབ་མ་ཐག་ཏུ་དེའི་མོད་ལ་ཚད་མེད་གྲངས་མེད་པའི་སངས་རྒྱས་བཅོམ་ལྡན་འདས་ངའི་མིག་ལམ་དུ་སྣང་བར་གྱུར། དམ་པའི་ཆོས་འཆད་པའང་ཐོས་ཤིང་དེ་ཐམས་ཅད་ཀྱང་ཇི་སྐད་དུ་ཐོས་པ་བཞིན་དུ་འཛིན་པར་གྱུར་ཏོ། །སངས་རྒྱས་བཅོམ་ལྡན་འདས་དེ་དག་ཀྱང་ང་ལ་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འགྱུར་རོ། །ཞེས་ལུང་བསྟན་ཏོ། ། བཟང་སྐྱོང ། དེ་བས་ན། ཁྱེད་ཀྱིས་འཕགས་པ་བྱིས་པ་རྣམས་སྤངས་པ་མཚན་མ་ཐམས་ཅད་དང་བྲལ་བའི་ཆོས་འདི་ལ་བསླབ་པར་བྱའོ། །དེ་ནས་ཁྱེད་ཏིང་ངེ་འཛིན་འདི་ལ་གནས་པ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མི་དཀའ་བར་རྙེད་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་མར་མེ་མཛད་
75b
མཐོང་ནས། །ངས་ནི་ཏིང་ངེ་འཛིན་ཀྱང་བསྒོམས། །སངས་རྒྱས་མང་པོ་མཐོང་ནས་ཀྱང ། །མཆོག་གི་ཆོས་ཀྱང་ཐོབ་པར་གྱུར། །ཇི་ལྟར་བསོད་ནམས་བྱས་པ་དག་།བསམ་པ་བཟང་པོ་འགྲུབ་པ་བཞིན། །ཁྱེད་ཀྱང་ཆོས་ལ་སྤྱོད་ཅིག་དང ། །བྱང་ཆུབ་མཆོག་ནི་ཐོབ་པར་འགྱུར། །སངས་རྒྱས་བྱེ་བ་བསམ་མི་ཁྱབ། །མཐའ་མེད་ཅིང་ནི་མུ་མེད་པ། །བྱང་ཆུབ་ཞི་བ་ཚོལ་བྱེད་ཅིང ། །གང་དག་ངས་ནི་སྔོན་བཀུར་བ། །བྱང་ཆུབ་དེ་ནི་ངས་རྙེད་དེ། །ཆོས་ཀྱི་འཁོར་ལོ་རབ་ཏུ་བསྐོར། །གང་དག་བྱང་ཆུབ་བཞག་པ་ནི། །སེམས་ཅན་བྱེ་བ་དུ་མའོ། །ལྷ་དང་ཀླུ་དང་གནོད་སྦྱིན་དང ། །དྲི་ཟ་མི་འམ་ཅི་ཡི་རྣམས། །ེ་མའོ་སངས་རྒྱས་བསམ་ཡས་ཤེས། །མཆོད་པས་ང་ལ་མཆོད་པ་བྱེད། །མཁས་པས་མི་ནི་གང་དག་ཀྱང ། །སངས་རྒྱས་ཆོས་ལ་སྟོན་འདོད་པས། །མང་དུ་ཐོས་པར་བྱ་བའི་ཕྱིར། །འདུན་པ་ཉིད་ནི་བསྟན་པར་བྱ། །སངས་རྒྱས་བྱེ་བ་ཕྲག་གསུམ་ཅུ། ཤཱཀྱ་སེངྒེ་མི་ཡི་མཆོག་།བྱང་ཆུབ་ཞི་བ་ཚོལ་བྱེད་ཅིང ། །གང་དག་ངས་ནི་སྔོན་བཀུར་བ། །སངས་རྒྱས་བསམ་ཡས་དེ་དག་གིས། །དེར་ནི་ང་ལ་ལུང་མ་བསྟན། །དམིགས་སུ་མེད་པའི་ཡེ་ཤེས་ལ། །ང་ནི་གནས་པར་མ་གྱུར་ཏོ། །སངས་རྒྱས་གཙོ་བོ་སྐྱོབ་པའི་རྣམས། །དེ་བཞིན་བསྡུས་པར་ཤེས་པར་བྱེད། ། བྱེ་བ་ཁྲག་ཁྲིག་དུ་མའི་རྣམས། །གང་དག་ངས་ནི་སྔོན་བཀུར་བ། །དེས་ནི་ང་ཡི་བསམ་མཁྱེན་ནས། །དེ་བཞིན་གཤེགས་པས་ལུང་བསྟན་ཀྱང ། །སངས་རྒྱས་ཡེ་ཤེས་བསམ་ཡས་ལ།།
76a
༄#། །ང་ནི་གནས་པར་མ་གྱུར་ཏོ། །དེ་ཡི་ཕྱིར་ནི་དོན་དམ་ལ། །བརྩོན་པ་བཟང་པོ་དག་ཀྱང་བྱོས། །སངས་རྒྱས་བསམ་གྱིས་མི་ཁྱབ་པའི། །ཡེ་ཤེས་མཆོག་ལའང་བསླབ་པར་བྱོས། །མདོ་སྡེ་འདི་ལ་བསླབ་བྱས་ནས། །འཇིག་རྟེན་མགོན་པོའི་སྤྱོད་ཡུལ་ལ། །བླ་ན་མེད་པའི་ཡེ་ཤེས་མཆོག་།བསམ་གྱིས་མི་ཁྱབ་རྟོགས་པར་འགྱུར། །ེ་མའོ། བླ་མེད་ཡེ་ཤེས་དང ། །སངས་རྒྱས་ཡེ་ཤེས་བསམ་ཡས་ཤེས། །བཟང་སྐྱོང་སེམས་ནི་དགའ་མགུ་ཞིང ། །གུས་པ་དང་ཡང་བཅས་པར་གྱུར། །མ་འོངས་དུས་ན་བདག་ཅག་ཀྱང ། ། ཆོས་འཛིན་ཕྱི་མར་འགྱུར་ཞེས་ཏེ། །ལྔ་བརྒྱ་ཚང་བ་དེ་དག་ཀྱང ། །སེམས་དགའ་གུས་དང་བཅས་པར་གྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་བདུན་པའོ།། །།བམ་པོ་དྲུག་པ། དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། བྱང་ཆུབ་སེམས་དཔས་ཏིང་ངེ་འཛིན་འདི་ཇི་ལྟར་བསྒོམ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཏིང་ངེ་འཛིན་འདི་སྒོམ་འདོད་པར་གྱུར་ན། དེས་གཟུགས་ལ་གནས་པར་མི་བྱའོ། །ཚོར་བ་དང ། སེམས་དང ། ཆོས་ལ་གནས་པར་མི་བྱའོ། །སྐྱེ་བ་ལ་གནས་པར་མི་
76b
བྱའོ། །ཆོས་ཐམས་ཅད་ལ་གནས་པར་མི་བྱའོ། །སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ལ་གནས་པར་མི་བྱའོ། །བྱམས་པ་ལ་གནས་པར་མི་བྱའོ། །བཟང་སྐྱོང ། དེ་ལ་ཏིང་ངེ་འཛིན་གང་ཞེ་ན། གང་ཆོས་དེ་དག་ལ་ནན་ཏན་དུ་བྱེད་ཀྱི། ལོག་པའི་ནན་ཏན་དུ་བྱེད་པ་མ་ཡིན་པའོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་གང་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཀྱི།་ལུས་དང་ལྡན་པའི་རྣམ་པར་རྟོག་པ་ནི། རྣམ་པར་མི་རྟོག་པ་དང ། ཚོར་བ་དང ། སེམས་དང ། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཀྱི། ཆོས་དང་ལྡན་པའི་རྣམ་པར་རྟོག་པ་ནི། རྣམ་པར་མི་རྟོག་པའོ། །བྱང་ཆུབ་སེམས་དཔའ་དེ་ནི། ཏིང་ངེ་འཛིན་འདི་འཐོབ་བོ། །དེ་ཅིའི་ཕྱིར་ཞེ་ན། བཟང་སྐྱོང ། དེ་ནི། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། ལུས་དང་ལྡན་པའི་རྣམ་པར་རྟོག་པ་ནི། རྣམ་པར་མི་རྟོག་།ཚོར་བ་དང ། སེམས་དང ། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཏེ། ཆོས་དང་ལྡན་པའི་རྣམ་པར་རྟོག་པ་ནི།་རྣམ་པར་མི་རྟོག་ན། ཆོས་ཐམས་ཅད་མི་དམིགས་པར་འགྱུར་རོ། །ཆོས་ཐམས་ཅད་མི་དམིགས་པ་དེ་མི་རྟོག་།རྣམ་པར་མི་རྟོག་གོ་།བཟང་སྐྱོང ། གང་མི་རྟོག་།རྣམ་པར་མི་རྟོག་པ་དེ་ནི། ཆོས་གང་ཡང་མི་མཐོང་ངོ ། །བཟང་སྐྱོང ། གང་ལ་ཆོས་གང་ཡང་མི་མཐོང་བདེ་ནི། སྒྲིབ་པ་མེད་པའི་ཡེ་ཤེས་ཞེས་བྱའོ། །བཟང་སྐྱོང ། གང་སྒྲིབ་པ་མེད་པའི་ཡེ་ཤེས་དེ་ནི། བཟང་སྐྱོང ། ཏིང་
77a
༄#། །ངེ་འཛིན་ཅེས་བྱའོ། །བཟང་སྐྱོང ། བྱང་ཆུབ་སེམས་དཔའ་གང་ཏིང་ངེ་འཛིན་འདི་དང་ལྡན་པ་དེ་ནི། སངས་རྒྱས་ཚད་མེད་གྲངས་མེད་པ་རྣམས་མཐོང་ངོ ། །དམ་པའི་ཆོས་ཀྱང་ཐོས་སོ། །ཐོས་ནས་ཀྱང་ཀུན་ཆུབ་པར་བྱེད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་གང་སྒྲིབ་པ་མེད་པའི་རྣམ་པར་གྲོལ་བའི་ཡེ་ཤེས་མཐོང་བ་དང ། ཐོགས་པ་མེད་པའི་ཡེ་ཤེས་ཀྱང་འཐོབ་བོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་ལུས་ལ་ལུས་ཀྱི་རྗེས་སུ་ལྟ་ཞིང་གནས་ཏེ། གནས་ནས་ཀྱང་ཆོས་གང་ཡང་མི་མཐོང་ངོ ། །མ་མཐོང་ནས་ཀྱང་མི་རྟོག་།རྣམ་པར་མི་རྟོག་ཅིང ། དམུས་ལོང་ཡང་མ་ཡིན། འོན་པའང་མ་ཡིན་ནོ། །དེ་བཞིན་དུ་ཚོར་བ་དང ། སེམས་དང ། ཆོས་ལ་ཆོས་ཀྱི་རྗེས་སུ་ལྟ་ཞིང་གནས་ཏེ། གནས་ནས་ཀྱང་ཆོས་གང་ཡང་མི་མཐོང་ངོ ། །མ་མཐོང་ནས་ཀྱང་མི་རྟེན་པར་འགྱུར། མི་རྟེན་ནས་ཀྱང་ལམ་སྒོམ་པར་བྱེད། ལམ་རྣམ་པར་བསྒོམས་པའི་ཕྱིར་དེ་ཆོས་རྣམས་ལ་ཐེ་ཚོམ་དུ་མི་འགྱུར། ཐེ་ཚོམ་མེད་བས་སངས་རྒྱས་མཐོང་བར་འགྱུར་རོ། །སངས་རྒྱས་མཐོང་ནས་ཀྱང་ཆོས་ཐམས་ཅད་འབྱུང་བ་མེད་པའི་ཕྱིར་རྣམ་པར་གྲོལ་བ་འབྱུང་ངོ ། །དེ་ཅིའི་ཕྱིར་ཞེ་ན། བཟང་སྐྱོང ། གལ་ཏེ་བྱང་ཆུབ་སེམས་དཔའ་ཆོས་ཀྱི་འདུ་ཤེས་འཇུག་ན། དེ་ཉིད་དེའི་དམིགས་པར་ལྟ་བར་འགྱུར་རོ། །དེ་ཉིད་ཡོད་པར་ལྟ་བ་དང །
77b
བདག་ཏུ་ལྟ་བ་དང ། སེམས་ཅན་དུ་ལྟ་བ་དང ། སྲོག་ཏུ་ལྟ་བ་དང ། གང་ཟག་ཏུ་ལྟ་བར་འགྱུར་རོ། །དེ་ཉིད་ཕུང་པོར་ལྟ་བ་དང ། ཁམས་སུ་ལྟ་བ་དང ། སྐྱེ་མཆེད་དུ་ལྟ་བ་དང ། མཚན་མར་ལྟ་བ་དང ། དངོས་པོར་ལྟ་བ་དང ། རྒྱུར་ལྟ་བ་དང ། རྐྱེན་དུ་ལྟ་བ་དང ། དམིགས་པ་འཛིན་པར་འགྱུར་རོ། །དེ་ཅིའི་ཕྱིར་ཞེ་ན། བཟང་སྐྱོང ། ཆོས་ཐམས་ཅད་ནི། རང་བཞིན་གྱིས་སྟོང་པ་དང ། ཆོས་ཐམས་ཅད་ནི། མཚན་མ་མེད་པ། མི་གཟུང་བ། གཟུང་བ་མེད་པར་བྱང་ཆུབ་སེམས་དཔས་མཐོང་སྟེ། དེ་དག་ཆོས་ཐམས་ཅད་མི་དམིགས་སོ། །རློམ་སེམས་སུ་མི་བྱེད་དོ། ། མི་མཐོང་ངོ ། །ཇི་ལྟར་མི་དམིགས་ཤིང་རློམ་སེམས་སུ་མི་བྱེད་ལ་མི་མཐོང་ཞེ་ན། བཟང་སྐྱོང ། འདི་ལྟ་སྟེ། དཔེར་ན། གཞན་མུ་སྟེགས་ཅན་ནམ། གཞན་མུ་སྟེགས་ཅན་གྱི་ཉན་ཐོས་བདག་ཏུ་འདུ་ཤེས་པ་ལ་གནས་པ། སེམས་ཅན་དང ། སྲོག་དང ། གང་ཟག་ཏུ་འདུ་ཤེས་པ་ལ་གནས་པ། ཆོས་ཐམས་ཅད་དུ་འདུ་ཤེས་པ་ལ་གནས་པ། ཆོས་རྣམས་ལ་དམིགས་ཤིང་།རློམ་སེམས་སུ་བྱེད་པ། མཐོང་བར་བྱེད་པ་དེ་ལྟར་བཟང་སྐྱོང ། བྱང་ཆུབ་སེམས་དཔས་མི་མཐོང་ངོ ། །བཟང་སྐྱོང ། ཡང་བྱང་ཆུབ་སེམས་དཔས་ཇི་ལྟར་མཐོང་ཞེ་ན། བཟང་སྐྱོང ། འདི་ལྟ་སྟེ། དཔེར་ན། དེ་བཞིན་གཤེགས་པ་དང ། ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་དང ། རང་སངས་རྒྱས་རྣམས་དང ། ཉན་ཐོས་དགྲ་བཅོམ་པ་རྣམས་
78a
༄#། །ཀྱིས་ཆོས་ཐམས་ཅད་མཐོང་བ་དེ་བཞིན་དུ་བཟང་སྐྱོང ། བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་བལྟ་བར་བྱའོ། །དེ་མཐོང་ནས་མངོན་པར་དགའ་བར་མི་བྱའོ། །མངོན་པར་དགའ་བ་མེད་པས་དགའ་བ་ཅན་དུ་མི་འགྱུར་ཞིང་དགའ་བ་དང་བྲལ་ཏེ་དགའ་བ་ཡང་དག་པར་བཅོམ་པའི་བྱང་ཆུབ་སེམས་དཔའ་ནི། ཏིང་ངེ་འཛིན་འདི་སྒོམ་མོ། །བཟང་སྐྱོང ། འདི་ལྟ་སྟེ། དཔེར་ན། ནམ་མཁའ་གཟུགས་མེད་པ། བསྟན་དུ་མེད་པ། གནས་པ་མེད་པ། ཤིན་ཏུ་རྣམ་པར་དག་པ། ཉོན་མོངས་པ་མེད་པ་དེ་བཞིན་དུ་བྱང་ཆུབ་སེམས་དཔས་ཆོས་ཐམས་ཅད་ལ་བལྟ་སྟེ། འདུས་བྱས་དང ། འདུས་མ་བྱས་ཀྱི་ཆོས་རྣམས་ལ་དེའི་མིག་ཐོགས་པ་མེད་པར་འགྱུར་རོ། །བྱང་ཆུབ་སེམས་དཔའ་མིག་ཐོགས་པ་མེད་པ་དེ་ལ་ཆོས་རྣམས་མངོན་སུམ་དུ་འགྱུར་ཏེ། དེ་ཡིད་ལ་བྱས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་གྱི་ཀ་བ་བརྒྱན་པ་ལྟ་བུ། འོད་ཟེར་གྱི་རྒྱལ་པོ་མངོན་པར་འཕགས་པ་ལྟ་བུ། ཟླ་བ་ཉ་བ་སྐར་མས་བསྐོར་བ་ལྟ་བུ། འཁོར་ལོས་བསྒྱུར་བའི་རྒྱལ་པོ་སྟོབས་ཀྱི་ཚོགས་ཀྱིས་བསྐོར་བ་ལྟ་བུ། ཚངས་པ་ཚངས་པའི་འཇིག་རྟེན་ན་ཚངས་པའི་སྟན་ལ་འདུག་པ་ལྟ་བུ། ལྷའི་རྒྱལ་པོ་བརྒྱ་བྱིན་སུམ་ཅུ་རྩ་གསུམ་པའི་ལྷས་བསྐོར་བ་ལྟ་བུ། རིའི་རྩེ་མོ་ལ་མེ་འབར་བ་ལྟ་བུ། སྨན་པའི་རྒྱལ་པོ་སྨན་གཏོང་བ་
78b
ལྟ་བུ།་རི་དྭགས་ཀྱི་རྒྱལ་པོ་སེངྒེ་རལ་པ་ཅན་འཇིགས་པ་མེད་པར་ཝ་ཐམས་ཅད་སྐྲག་པར་བྱེད་པ་ལྟ་བུ། ངང་པའི་མཆོག་བར་སྣང་ལ་འཕུར་བ་ལྟ་བུ། རིའི་རྒྱལ་པོ་རི་རབ་རྒྱ་མཚོའི་ནང་ནས་མངོན་པར་འཕགས་པ་ལྟ་བུ། རིའི་རྒྱལ་པོ་གངས་རི་མེ་ཏོག་དང་སྨན་ཐམས་ཅད་ཡོངས་སུ་རྒྱས་པ་ལྟ་བུ། རི་ཁོར་ཡུག་རླུང་གི་བུ་ལས་སྐྱེས་པས་འཛིན་ཅིང་འགྲེང་བ་ལྟ་བུ། རླུང་གི་ཕུང་པོས་ཆུའི་ཕུང་པོ་འཛིན་པ་ལྟ་བུ། ཆུའི་ཕུང་པོས་སའི་ཕུང་པོ་འཛིན་པ་ལྟ་བུ་མཐོང་ངོ ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །རི་རབ་ཀྱི་ནི་རྩེ་མཛེས་པ། ། དྲི་མེད་དྲི་མ་བྲལ་ཞིང་དག་།ནམ་མཁའ་དང་ནི་མཉམ་ཞིང་འདྲ། །ལྷ་རྣམས་ཀྱིས་ནི་རབ་ཏུ་བརྒྱན། །བཟང་སྐྱོང ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གཟི་བརྗིད་དང ། དཔལ་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་དུ་ལྷམ་མེ། ལྷན་ནེ། ལྷང་ངེར་དམིགས་པར་བྱས་ཏེ་མཐོང་ཞིང་ཆོས་འཆད་པའང་ཐོས་པར་འགྱུར་རོ། །ཐོས་ནས་ཀྱང་འཛིན་པར་བྱེད། ཀུན་ཆུབ་པར་བྱེད། འཆང་བར་བྱེད་དེ། བྱང་ཆུབ་སེམས་དཔའ་དེའི་ཏིང་ངེ་འཛིན་འདི་ལས་ལངས་ནས་ཀྱང་ཆོས་ཇི་སྐད་དུ་ཐོས་པ་དང ། ཇི་ལྟར་བཟུང་བ་དང ། ཇི་ལྟར་ཀུན་ཆུབ་པར་བྱས་པ་བཞིན་དུ་གཞན་དག་ལའང་རྒྱ་ཆེར་སྟོན་པར་འགྱུར། འཆད་པར་འགྱུར་རོ། །བཟང་
79a
༄#། །སྐྱོང ། དེ་ལྟར་ཏིང་ངེ་འཛིན་འདི་ནི། བྱང་ཆུབ་སེམས་དཔའ་རྣམས་ལ་ཕན་འདོགས་པ་མང་དུ་བྱེད་པའོ། །འདི་ལྟ་སྟེ། འཇིག་རྟེན་དང ། འཇིག་རྟེན་ལས་འདས་པའི་ཆོས་རྣམས་ཀྱི་ཡོན་ཏན་མང་པོ་སྐྱེད་པར་བྱེད་པའོ། །བཟང་སྐྱོང ། དེ་བས་ན། བྱང་ཆུབ་འདོད་པའི་རིགས་ཀྱི་བུའམ་རིགས་ཀྱི་བུ་མོས་ཏིང་ངེ་འཛིན་འདི་གཟུང་བར་བྱའོ། ། ཀུན་ཆུབ་པར་བྱའོ། །བཅང་བར་བྱའོ། །བཀླག་པར་བྱའོ། །བྲི་པར་བྱའོ། །གཞན་དག་ལའང་རྒྱ་ཆེར་བཤད་པར་བྱའོ། །བསྟན་པར་བྱའོ། །བསྒྲག་པར་བྱའོ། །སྒོམ་པའི་སྦྱོར་བ་ལའང་བརྩོན་པར་བྱའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དྲི་བྲལ་རྡུལ་བྲལ་དྲི་མེད་སངས་རྒྱས་ཏེ། །ཆགས་པ་མེད་ཅིང་སྐྱེ་བོ་མང་པོས་མཆོད། །རྔ་རྡུང་འཁར་རྔ་ལྷ་ཡི་རོལ་མོའི་སྒྲ། །རོལ་མོ་ཕྲག་བརྒྱས་ཕན་མཛད་ཕྱག་བྱ་བ། །མེ་ཏོག་སིལ་མ་དག་གིས་གཏོར་བྱས་ཤིང ། །སྐྱེ་བོ་མང་པོས་རིང་བསྲེལ་མཆོད་རྟེན་མཆོད། །ལྷ་ཡི་ཕྲེང་བ་དྲི་དང་གདུགས་སྣ་ཚོགས། །ཏིང་འཛིན་འདི་ནི་ཚོལ་ཞིང་འདོགས་པར་བྱེད། །གང་ཞིག་ཀུན་རྫོབ་ལ་ནི་གནས་བྱས་ནས། །ཤིན་ཏུ་རྒྱས་ཆོས་བལྟ་དཀའ་གྱ་ནོམ་བྱེད། །མ་ཆགས་ཡེ་ཤེས་རྒྱལ་བ་དྲན་བྱེད་ཅིང ། །སྟོང་པ་ཉིད་ལས་ནམ་ཡང་ཉམས་མི་འགྱུར། །ཟླ་བ་དྲི་མེད་ཉི་མ་ཤར་བའམ། །ཚངས་པའི་འཇིག་རྟེན་ཚངས་པ་འདུག་པ་བཞིན། །
79b
རྣམ་དག་སེམས་ཀྱིས་རྒྱལ་བ་དྲན་བྱེད་ཅིང ། །སྟོང་པ་ཉིད་ནི་ནམ་ཡང་མི་འདོར་རོ། །ཇི་ལྟར་སུམ་ཅུ་རྩ་གསུམ་ལྷ་ཡི་རྒྱལ། །སུམ་ཅུ་རྩ་གསུམ་ལྟ་བས་ཟིལ་གྱིས་གནོན། །དེ་ལྟར་རྒྱལ་བས་འཇིག་རྟེན་ཟིལ་མནན་ཏེ། །དཔལ་གྱིས་ལྷམ་མེ་ལྷན་ནེ་ལྷང་ངེའོ། །ཚལ་གྱི་མཆོག་ལ་མེ་དག་མཆེད་གྱུར་ཏེ། །མར་གྱི་མེ་བསྲེགས་མེ་ལྕེ་རབ་འབར་བ། །འོད་ཟེར་བརྒྱ་སྟོང་དག་ནི་འབྱུང་བ་ལྟར། ། དེ་བཞིན་རྒྱལ་བ་མཚན་གྱིས་རྒྱས་པ་ལྟོས། །ཇི་ལྟར་སྨན་པ་ཟུག་རྔུ་འབྱིན་བྱེད་པ། །ནད་པ་རྣམས་ལ་ནད་དཔྱད་བྱེད་པ་ལྟར། །རྒྱལ་བ་མི་ཡི་སེངྒེ་སྨན་པ་མཆོག་།ཇི་ལྟར་མཐུན་པར་བདེ་གཤེགས་གཏམ་ཡང་གསུང ། །འཁོར་ལ་སེངྒེའི་སྒྲ་ནི་སྒྲོག་མཛད་ཅིང ། །ཁྱུ་མཆོག་སངས་རྒྱས་འཇིག་རྟེན་ཀུན་མི་བསྙེངས། །ནགས་གནས་སེངྒེ་ཝ་ལ་ཇི་བཞིན་དུ། །ཕས་ཀྱི་རྒོལ་བ་ཐམས་ཅད་ཟིལ་གྱིས་གནོན། །ཇི་ལྟར་ངང་པའི་རྒྱལ་པོ་མཆོག་དག་ནི། །མཁའ་ལ་འཕུར་ན་དཀར་ཞིང་རྣམ་དག་མཛེས། །དེ་ལྟར་བདེ་བར་གཤེགས་པ་གསེར་གྱི་མདོག་།བདེ་གཤེགས་སྲས་ཀྱི་ཐུ་བོ་རྣམས་ཀྱང་དྲན། །ཇི་ལྟར་རི་རྒྱལ་གངས་ཅན་ལྷམ་མེ་ཞིང ། །ལྷག་གེ་བ་དང་རྒྱལ་རིགས་རྒྱལ་པོའམ། །ཇི་ལྟར་ཀ་བ་རིན་ཆེན་སྣ་ཚོགས་བརྒྱན། །དེ་ལྟར་རྒྱལ་བ་མཚན་གྱིས་བརྒྱན་པར་བལྟ། ། མི་གཡོ་མ་རལ་ཇི་ལྟར་རྡོ་རྗེ་འདྲ། །ཁོར་ཡུག་རི་ནི་རླུང་གི་བུ་སྐྱེས་འཛིན། །དེ་ལྟར་བདེ་གཤེགས་བསྐལ་པ་ཕྱོགས་འཛིན་ཅིང ། །ཕན་དང་ལྡན་ཞིང་བྱམས་ལྡན་ཆོས་ཀྱང་ཆེ། །ཇི་
80a
༄#། །ལྟར་ཆུ་ལ་ས་དག་བརྟེན་པ་དང ། །ཇི་ལྟར་རླུང་ལ་ཆུ་ཡང་བརྟེན་པ་དང ། །ཇི་ལྟར་ནམ་མཁའ་ལ་ནི་རླུང་བརྟེན་པ། །དེ་ལྟར་རྒྱལ་བ་ཡོན་ཏན་ཀུན་ལ་བཞུགས། །ཇི་ལྟར་སུམ་ཅུ་རྩ་གསུམ་རི་རབ་རྒྱལ། །ལྷན་ནེ་ལྷག་གེ་ཐམས་ཅད་ཡོངས་སུ་རྒྱལ། །དེ་ལྟར་བདེ་གཤེགས་རི་རབ་ལྟ་བུ་ཡང ། །རིན་ཆེན་ཚོགས་ཀྱི་ནང་ན་བཞུགས་པ་མཛེས། །མ་ཆགས་སེམས་ལྡན་རྒྱལ་བ་དྲན་བྱེད་ན། །མུན་དང་བྲལ་ཞིང་མི་སྣང་མེད་པ་ཡི། །ཏིང་འཛིན་རྡུལ་བྲལ་རྣམ་དག་དེ་མིག་འགྱུར། །དེ་ནི་དངོས་པོའི་འདུ་ཤེས་ཀུན་དང་བྲལ། །རྒྱལ་བ་རྣམ་དག་སེམས་ནི་དྲན་བྱེད་ན། །རྡུལ་དང་དྲི་མ་བྲལ་ཞིང་ཁྲོ་བ་སྤངས། །མ་རིག་བྲལ་ཞིང་དེ་ཡི་ཡེ་ཤེས་དག་།དེ་ཡི་ཡེ་ཤེས་རྡུལ་བྲལ་འབྱུང་བར་འགྱུར། །རྒྱལ་བ་ཚུལ་ཁྲིམས་རྣམ་དག་དྲན་བྱེད་ན། །དེ་ཡི་ཡེ་ཤེས་རབ་རིབ་བྲལ་ཞིང་དག། ང་དང་བདག་ལྟ་དེ་ལ་ཕྱིས་ཀྱང་མེད། །དངོས་པོའི་འདུ་ཤེས་ནམ་ཡང་འབྱུང་མི་འགྱུར། །དེ་ནི་སྲིད་པའི་རྒྱུད་ལ་ལྟ་དང་བྲལ། །ཐེ་ཚོམ་ལམ་བྲལ་ཡེ་ཤེས་རྣམ་པར་དག་།ནམ་ཡང་གཟུགས་ཀྱི་འདུ་ཤེས་མི་འགྱུར་ཞིང ། །ཞི་ལམ་བསིལ་བའི་དངོས་པོའི་ཆོས་ཀྱང་ཉན། །ས་དང་ཆུ་དང་མེ་དང་རླུང་དག་ནི། །རང་གི་དངོས་པོ་མེད་ཅིང་ཐམས་ཅད་སྟོང ། །རྒྱལ་བ་མཆོག་རབ་བསྟན་པ་ཐོས་ནས་ཀྱང ། །དེ་ནི་དངོས་པོའི་འདུ་ཤེས་མི་འབྱུང་ངོ ། །དངོས་སུ་ཤེས་པ་ཐམས་ཅད་ཚར་བཅད་ཅིང ། །འགྲོ་བ་
80b
ཐམས་ཅད་སྟོང་པར་རིག་ནས་ཀྱང ། །ཇི་ལྟར་འདབ་ཆགས་ནམ་མཁར་མི་ཆགས་བཞིན། །ནམ་ཡང་ཡིད་ནི་ཆགས་པར་མི་འགྱུར་རོ། །མཆོག་རབ་རྒྱལ་ལ་རི་མོ་བྱས་པས་ནི། །རྫུ་འཕྲུལ་སྟོབས་ལ་གནས་ཤིང་ཡིད་རྣོ་བས། །འཇིག་རྟེན་ཀུན་ནས་ཕྱོགས་བཅུར་རྣམ་པར་སྣང ། །ཡོན་ཏན་ཚད་མེད་པ་ནི་ཀུན་དང་ལྡན། །ལག་པ་རྐང་པ་དེ་བཞིན་མགོ་བོ་མིག་།རྒྱལ་སྲིད་རྟ་དང་བ་ལང་ཐམས་ཅད་དང ། །འཇིག་རྟེན་པ་ཡི་རིན་ཆེན་ཀུན་ཀྱང་གཏོང ། །ཚུལ་ཁྲིམས་ཕུང་པོ་ཡོངས་སུ་གཏོང་མི་བྱེད། །སྙིང་རྗེ་བསྐྱེད་ནས་འཇིག་རྟེན་ཀུན་ཕན་ཕྱིར། །ཆོས་ཀྱི་གཙོ་བོ་རིན་ཆེན་སྟོན་པར་བྱེད། །འདུས་བྱས་མ་ལུས་ཐམས་ཅད་སྤོང་བྱེད་ཀྱང ། །བྱང་ཆུབ་སེམས་ནི་ཡོངས་སུ་གཏོང་མི་བྱེད། །དགེ་སློང་དང་ནི་རྒྱལ་སྲས་ལེགས་ཞུགས་དང ། །དེ་བཞིན་དགེ་སློང་མ་དང་དགེ་བསྙེན་དང་།། དད་ལྡན་ཆགས་དང་བྲལ་བའི་དགེ་བསྙེན་མས། །རྗེས་སུ་དྲན་པར་བྱས་ན་གནས་འདི་འཐོབ། །ཏིང་འཛིན་ཞི་བ་འདི་ནི་སུ་འཆང་པའི། །བདེ་གཤེགས་སྲས་པོ་ཏིང་ངེ་འཛིན་མཁས་པ། །དེ་ལ་ཡོན་ཏན་མང་པོ་དེ་དག་འབྱུང ། །བླ་མེད་རྣམ་པ་མང་པོ་གནས་འབྱུང་ངོ ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅོ་བརྒྱད་པའོ།། །།བཟང་སྐྱོང ། དེ་ལྟ་བས་ན།་བྱང་ཆུབ་སེམས་དཔའ་གང་ཏིང་ངེ་འཛིན་འདི་འཆད་པའམ་འཐོབ་པར་འདོད་པ་དེས་དང་པོ་ཉིད་ནས་མཚན་མའི་འདུ་ཤེས་རྣམས་བསལ་བར་བྱའོ། །མཚན་མའི་འདུ་ཤེས་རྣམས་བསལ་
81a
༄#། །ནས་ལྷག་པའི་ང་རྒྱལ་དུ་མི་བྱ་སྟེ། བྱང་ཆུབ་སེམས་དཔའ་ལྷག་པའི་ང་རྒྱལ་སྤངས་ཤིང ། ཡིད་ལ་མཚན་མ་དང་བྲལ་བས་ཏིང་ངེ་འཛིན་འདི་ལུང་མནོད་པར་བྱ་སྟེ། རྩོད་པར་མི་བྱའོ། །དེ་ལ་ཇི་ལྟར་ན་རྩོད་པ་མེད་པར་འགྱུར་ཞེ་ན། གང་སྟོང་པ་ཉིད་མི་སྤོང་བ་སྟེ། འདི་ནི། རྩོད་པ་མེད་པའོ། །བཟང་སྐྱོང ། རྩོད་པ་མེད་པ་གཙོ་བོར་བྱེད་པའི་བྱང་ཆུབ་སེམས་དཔས་ཏིང་ངེ་འཛིན་འདི་ལུང་མནོད་པར་བྱའོ། །བཟང་སྐྱོང ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་ཏིང་ངེ་འཛིན་འདི་ལུང་ནོད་པར་འདོད་པར་གྱུར་ན། དེས་ཆོས་བཅུ་དང་ལྡན་པར་བྱ་སྟེ། ཏིང་ངེ་འཛིན་འདི་ལུང་མནོད་པར་བྱའོ། །བཅུ་གང་ཞེ་ན། འདི་ལྟ་སྟེ། བཟང་སྐྱོང ། ང་རྒྱལ་བཅོམ་པའི་རིགས་ཀྱི་བུ་དང ། གཞན་གྱི་རྙེད་པ་དང ། བཀུར་སྟི་དང ། ཚིགས་སུ་བཅད་པ་ལ་ཕྲག་དོག་མེད་པ་དང ། གུས་པ་དང་བཅས་ཤིང་རྗེས་དང་བཅས་པ་དང ། བྱས་པ་ཤེས་ཤིང་བྱས་པ་གཟོ་བ་དང ། འཇུངས་པ་མེད་ཅིང་འགྱོད་པ་དང་བྲལ་བ་དང ། དད་པ་དང་ལྡན་ཞིང་བརྟགས་པ་མང་བ་དང ། བརྩོན་འགྲུས་བརྩམས་ཤིང་འཆག་པ་ལ་ཞུགས་པ་དང ། མགྲོན་དུ་གཉེར་བ་ལ་མི་ལྟོས་པར་བསོད་སྙོམས་བྱེད་པ་དང ། ཟབ་མོ་ལ་མོས་པས་ཏིང་ངེ་འཛིན་འདི་ལུང་མནོད་པར་བྱའོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལས་ཏིང་ངེ་འཛིན་འདི་ལུང་ནོད་པར་འདོད་པ་དེ་ལ་སྟོན་པའི་འདུ་ཤེས་ཉེ་བར་བཞག་སྟེ་ཏིང་
81b
ངེ་འཛིན་འདི་ལུང་མནོད་པར་བྱ། གདོན་པར་བྱ། བཅང་བར་བྱ་སྟེ། བཟང་སྐྱོང ། ཆོས་བཅུ་པོ་དེ་དག་དང་ལྡན་ན། རིགས་ཀྱི་བུའམ་རིགས་ཀྱི་བུ་མོ་དེས་ཏིང་ངེ་འཛིན་འདི་མནོད་པར་བྱའོ། ། དེ་ལྟར་ཞུགས་པ་དེ་ནི། ཆོས་བརྒྱད་འཛིན་ཏོ། །བརྒྱད་གང་ཞེ་ན། འདི་ལྟ་སྟེ། ཤིན་ཏུ་བྱང་བའི་ཕྱིར་ཚུལ་ཁྲིམས་རྣམ་པར་དག་པ་དང ། ཤེས་རབ་དང་ལྡན་པས་ལྟ་བ་རྣམ་པར་དག་པ་དང ། ཡང་འབྱུང་བ་མེད་པས་ཤེས་རབ་རྣམ་པར་དག་པ་དང ། འཁོར་ཐམས་ཅད་དོན་དུ་མི་གཉེར་བས་གཏོང་པ་ཡོངས་སུ་དག་པ་དང ། ཤིན་ཏུ་བརྗོད་པ་མེད་པས་ཐོས་པ་རྣམ་པར་དག་པ་དང ། བྱང་ཆུབ་འཐོབ་པས་བརྩོན་འགྲུས་རྣམ་པར་དག་པ་དང ། རྟེན་པ་མེད་པས་བཀུར་སྟི་ཐོབ་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སེམས་ཅན་ཐམས་ཅད་ཀྱིས་མི་བསྐྱོད་པ་སྟེ། བཟང་སྐྱོང ། བྱང་ཆུབ་སེམས་དཔའ་ནི། ཆོས་བརྒྱད་པོ་འདི་དག་རབ་ཏུ་འཛིན་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །མཁས་པས་མཚན་མའི་འདུ་ཤེས་མི་བསྐྱེད་ཅིང ། །ང་རྒྱལ་ངའོ་སྙམ་པའི་ང་རྒྱལ་སྤང ། །བཟོད་པ་རྡུལ་བྲལ་འདུས་མ་བྱས་བསྐྱེད་ནས། །དེས་ནི་ཏིང་འཛིན་འདི་ལའང་ལུང་མནོད་བྱ། །མཁས་པས་སྟོང་པ་ཉིད་དང་མཚན་མེད་དང ། །ཞི་བ་མྱ་ངན་འདས་ལ་རྩོད་མི་བྱ། །མི་བསྐྱོད་ཆོས་ཅན་སྟོན་པ་དང་ཡང་མཐུན། །དེ་འདྲ་དེས་ནི་ཏིང་འཛིན་འདི་ལུང་ནོས། །མཁས་པ་ང་རྒྱལ་ཕྲག་དོག་མི་བྱེད་
82a
༄#། །ཅིང ། །བྱས་གཟོ་སངས་རྒྱས་ཆོས་དང་དགེ་འདུན་ལ། །དང་བ་སྐྱེས་པར་གྱུར་ཅིང་མི་བསྐྱོད་པ། །དེས་ནི་ཏིང་འཛིན་འདི་ཡང་མྱུར་ལུང་ནོས། །འཇུངས་པ་མེད་ཅིང་མུན་བྲལ་མི་རྩུབ་ལ། །བརྟག་དང་ལྡན་ལ་ཤིན་ཏུ་དད་པ་ཅན། །འཆག་སར་ཞུགས་ཤིང་བརྩོན་འགྲུས་རྩོམ་བྱེད་པས། །ཏིང་འཛིན་འདི་ནི་རབ་ཏུ་འདོད་པར་བྱ། །དགེ་སློང་རྟག་ཏུ་བསོད་སྙོམས་སྤྱད་བྱ་སྟེ། །མགྲོན་དུ་བོས་པའང་སྤང་ན་གསོག་ཅི་སྨོས། །དོན་དམ་དམིགས་སུ་མེད་ལ་རབ་ཏུ་མཁས། །དེ་འདྲ་དེས་ནི་ཏིང་འཛིན་འདི་ཟུངས་ཤིག་།གང་ལས་ཏིང་འཛིན་འཕགས་པ་འདི་བྲིས་སམ། །བཅངས་སམ་གཞན་དག་ལ་ཡང་བསྟན་བྱས་ན། །དེ་ལས་དེས་ནི་དང་པོར་འདི་ཐོབ་ནས། །མཁས་པས་དེ་ལ་སྟོན་པར་འདུ་ཤེས་བསྐྱེད། །ཡོན་ཏན་ཕུན་སུམ་ཚོགས་པ་འདིར་གནས་ཏེ། །གང་ཞིག་ཏིང་འཛིན་འདི་ལུང་ནོད་བྱེད་པ། །དེ་ནི་རྒྱལ་བས་གནང་ཞིང་རྡུལ་བྲལ་ལ། །རྣམ་པར་དག་པའི་ཆོས་བརྒྱད་མྱུར་དུ་འཛིན། །མཁས་པ་གང་ལ་ཡོན་ཏན་འདི་སྣང་བ། །ཚུལ་ཁྲིམས་ཀྱང་ནི་རྣམ་པར་དག་པར་འགྱུར། །ཏིང་འཛིན་དག་ཅིང་དེ་བཞིན་ལྟ་བ་དག་།དེས་ནི་སྲིད་པར་སྲིད་པ་དག་ཀྱང་སྦྱངས། །མཁས་པ་གང་ལ་ཡོན་ཏན་འདི་སྣང་བ། །ཡང་སྲིད་མེད་པས་ཤེས་རབ་རྣམ་པར་དག་།རྟེན་པ་དག་ཀྱང་མེད་ཅིང་གཏོང་བ་དག་།མང་དུ་ཐོས་ཤིང་ཉམས་པར་མི་འགྱུར་རོ། །མཁས་པ་གང་ལ་ཡོན་ཏན་འདི་སྣང་བ། །བརྩོན་འགྲུས་
82b
བརྩམས་ཤིང་བྱང་ཆུབ་ལས་མི་ཉམས། །རྙེད་དང་བཀུར་སྟི་ཅུང་ཟད་མི་རྟེན་ཏེ། །དེ་ནི་བླ་ན་མེད་པའི་བྱང་ཆུབ་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་བཅུ་དགུ་བའོ།། །། བཟང་སྐྱོང ། ཆོས་བརྒྱད་པོ་འདི་དག་དང་ལྡན་ན། བྱང་ཆུབ་སེམས་དཔའ་དེ་བཞིན་གཤེགས་པའི་སྟོབས་བཅུ་འཐོབ་བོ། །བཅུ་གང་ཞེ་ན། བཟང་སྐྱོང ། འདི་ལ་དེ་བཞིན་གཤེགས་པ་གནས་ལ་གནས་སུ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན། གནས་མ་ཡིན་པ་ལ་གནས་མ་ཡིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་ཡང་དེ་བཞིན་གཤེགས་པས་གནས་ལ་གནས་དང ། གནས་མ་ཡིན་པ་ལ་ཡང་གནས་མ་ཡིན་པར་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དང་པོ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང་འཇིག་རྟེན་འདི་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། གཞན་ཡང་དེ་བཞིན་གཤེགས་པས་འདས་པ་དང ། མ་འོངས་པ་དང ། ད་ལྟར་བྱུང་བའི་ལས་རྣམས་དང ། ལས་ཡང་དག་པར་འཛིན་པ་རྣམས་ཀྱི་གནས་དང ། རྒྱུ་དང ། རྣམ་པར་སྨིན་པ་མཁྱེན་པ་ཡང་
83a
༄#། །དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་གཉིས་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང ། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། གཞན་ཡང་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་དེ་བཞིན་གཤེགས་པས་ཐམས་ཅད་དུ་འགྲོ་བའི་ལམ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་གསུམ་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། གཞན་ཡང་དེ་བཞིན་གཤེགས་པས་ཁམས་དུ་མ་དང ། ཁམས་སྣ་ཚོགས་པའི་འཇིག་རྟེན་
83b
མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་དེ་བཞིན་གཤེགས་པས་ཁམས་དུ་མ་དང ། ཁམས་སྣ་ཚོགས་པའི་འཇིག་རྟེན་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བཞི་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང ། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། གཞན་ཡང་དེ་བཞིན་གཤེགས་པས་སེམས་ཅན་གཞན་དག་དང ། གང་ཟག་གཞན་རྣམས་ཀྱི་མོས་པ་དུ་མ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་ཡང་དེ་བཞིན་གཤེགས་པས་སེམས་ཅན་གཞན་དང ། གང་ཟག་གཞན་མོས་པ་དུ་མ་དང ། མོས་པ་སྣ་ཚོགས་པ་རྣམས་ཀྱི་མོས་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་ལྔ་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང ། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ་
84a
༄#། །ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། གཞན་ཡང་དེ་བཞིན་གཤེགས་པས་སེམས་ཅན་གཞན་དག་དང ། གང་ཟག་གཞན་རྣམས་ཀྱི་དབང་པོ་མཆོག་དང ། མཆོག་མ་ཡིན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་ཡང་དེ་བཞིན་གཤེགས་པས་སེམས་ཅན་གཞན་དག་དང ། གང་ཟག་གཞན་རྣམས་ཀྱི་དབང་པོ་མཆོག་དང ། མཆོག་མ་ཡིན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དྲུག་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། གཞན་ཡང་དེ་བཞིན་གཤེགས་པས་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་ཀུན་ནས་ཉོན་མོངས་པ་དང ། རྣམ་པར་བྱང་བ་དང ། རྣམ་པར་གཞག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་ཡང་དེ་བཞིན་གཤེགས་པས་བསམ་
84b
གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་ཀུན་ནས་ཉོན་མོངས་པ་དང ། རྣམ་པར་བྱང་བ་དང ། རྣམ་པར་གཞག་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། བཟང་སྐྱོང ། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བདུན་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང ། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། གཞན་ཡང་དེ་བཞིན་གཤེགས་པས་སྔོན་གྱི་གནས་རྗེས་སུ་དྲན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་ཡང་དེ་བཞིན་གཤེགས་པས་སྔོན་གྱི་གནས་རྗེས་སུ་དྲན་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། བཟང་སྐྱོང ། དེ་བཞིན་རྣམས་ཀྱི་དེ་བཞིན་གཤེགས་པའི་སྟོབས་བརྒྱད་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །
85a
༄#། །བཟང་སྐྱོང ། གཞན་ཡང་དེ་བཞིན་གཤེགས་པས་ལྷའི་མིག་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་ཡང་དེ་བཞིན་གཤེགས་པས་ལྷའི་མིག་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་དགུ་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པས་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང་འཇིག་རྟེན་ན་དག་སྦྱོང་ངམ།་བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། གཞན་ཡང་དེ་བཞིན་གཤེགས་པས་ཟག་པ་ཟད་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏེ། བཟང་སྐྱོང ། གང་ཡང་དེ་བཞིན་གཤེགས་པས་ཟག་པ་ཟད་པ་མཁྱེན་པ་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་པ་འདི་ནི། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་སྟོབས་བཅུ་པ་སྟེ། སྟོབས་དེ་ལ་བརྟེན་ནས་དེ་བཞིན་གཤེགས་པའི་ཁྱུ་མཆོག་གི་གནས་རབ་ཏུ་མཁྱེན་ལ་འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་སྒྲོག་ཅིང ། འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་
85b
ཆོས་དང་མཐུན་པར་བསྐོར་བར་མི་ནུས་པའི་ཚངས་པའི་འཁོར་ལོ་བསྐོར་རོ། །བཟང་སྐྱོང ། དེ་བཞིན་གཤེགས་པའི་སྟོབས་བཅུ་པོ་འདི་དག་བྱང་ཆུབ་སེམས་དཔས་ཡོངས་སུ་འཛིན་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་སྐད་གསུངས་སོ། །འཇིག་རྟེན་མགོན་པོ་སྐྱོབ་པ་ཡིས། །སྟོབས་རྣམས་ཀྱི་ནི་ས་བཤད་པ། །ཏིང་འཛིན་འདི་ལ་གནས་ན་ནི། །བྱང་ཆུབ་སེམས་དཔས་ཐོབ་པར་འགྱུར། །གནས་དང་དེ་བཞིན་གནས་མ་ཡིན། །ཡང་དག་ཇི་བཞིན་མཁྱེན་པ་ནི། །འཇིག་རྟེན་མགོན་པོ་སྐྱོབ་མཛད་པ། །སངས་རྒྱས་རྣམས་ཀྱི་སྟོབས་དང་པོ། །འཇིག་རྟེན་མགོན་པོ་སྐྱོབ་མཛད་པ། །རང་བྱུང་རྣམས་ཀྱི་སྟོབས་དང་པོ། །དེ་ལ་གནས་ནས་རྫོགས་སངས་རྒྱས། །སྲོག་ཆགས་རྣམས་ལ་ཆོས་སྟོན་ཏོ། །འདས་དང་མ་འོངས་ད་ལྟར་གྱི། །ལས་རྣམས་རབ་ཏུ་མཁྱེན་པ་ནི། །འཇིག་རྟེན་མགོན་པོ་སྐྱོབ་མཛད་པ། །སངས་རྒྱས་རྣམས་ཀྱི་སྟོབས་གཉིས་པའོ། །མོས་པ་ཆུང་དང་མཆོག་རྣམས་དང ། །འབྲིང་དག་རབ་ཏུ་མཁྱེན་པ་ནི། །དཔལ་ལྡན་རྫོགས་པར་སངས་རྒྱས་པའི། །སྟོབས་གསུམ་པ་ནི་དེ་ཡིན་ནོ། །དབང་པོ་རྣོ་དང་བར་མ་དང ། །ཐ་མའི་ཁྱད་པར་མཁས་པ་ནི། །དྲང་སྲོང་ཆེན་པོ་རྫོགས་སངས་རྒྱས། ། སངས་རྒྱས་རྣམས་ཀྱི་སྟོབས་བཞི་པའོ། །ཁམས་རྣམས་སྣ་ཚོགས་རབ་མཁྱེན་ཅིང ། །ཁམས་རྣམས་ཀྱི་ནི་ཕ་རོལ་ཕྱིན། །གནས་འདི་དག་ནི་རང་བྱུང་གི་།སྟོབས་ནི་ལྔ་པ་ཉིད་ཡིན་ནོ། །ཐམས་
86a
༄#། །ཅད་དུ་ནི་འགྲོ་བའི་ལམ། །དེ་དང་དེར་ནི་འགྲོད་པ་སྟེ། །དེ་དག་ཐམས་ཅད་རབ་མཁྱེན་པ། །བསམ་གྱིས་མི་ཁྱབ་སྟོབས་དྲུག་པའོ། །བསམ་གཏན་རྣམ་ཐར་སྙོམས་པར་འཇུག་།ཀུན་ནས་ཉོན་མོངས་རབ་མཁྱེན་ཅིང ། །གནས་དང་གནས་མིན་མཁྱེན་པ་ནི། །སྟོབས་བདུན་པ་ཞེས་བྱ་བའོ། །སྔོན་གྱི་བྱེ་བ་ཚུན་ཆད་ཀྱི། །བདག་ནི་སྔོན་ན་གར་གནས་པའི། །སྔོན་གྱི་གནས་རྣམས་རབ་མཁྱེན་པ། །དེ་ཡི་སྟོབས་ཀྱང་བརྒྱད་པའོ། །འཆི་འཕོ་དང་ནི་སྐྱེ་བ་མཁྱེན། །མཐོ་རིས་དང་ནི་ངན་སོང་གཟིགས། །མིག་གི་ཕ་རོལ་ཕྱིན་ཐོབ་པ།། འདི་ནི་སྟོབས་ཀྱང་དགུ་པའོ། །གང་དག་ལྷ་འམ་གང་དག་མི། །ཟག་པ་ཐམས་ཅད་ང་ལ་ཟད། །ང་ལ་ཡང་སྲིད་ཟད་པ་ནི། །བསམ་གྱིས་མི་ཁྱབ་སྟོབས་བཅུ་པའོ། །འཇིག་རྟེན་མགོན་པོ་སྐྱོབ་མཛད་པ། །རང་བྱུང་རྣམས་ཀྱི་སྟོབས་འདི་དག་།ཏིང་འཛིན་འདི་ལ་གནས་ན་ནི། །དེ་དག་ཐམས་ཅད་རྙེད་མི་དཀའ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་པའོ།། །།བཟང་སྐྱོང ། བྱང་ཆུབ་སེམས་དཔས་ཏིང་འཛིན་འདི་ལ་ཞུགས་ན། དེ་བཞིན་གཤེགས་པའི་མི་འཇིགས་པ་གང་དག་ཐོབ་པར་འགྱུར་བ་དེ་གང་ཞེ་ན། བཟང་སྐྱོང ། བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་ཐོབ་པར་འགྱུར་བའི་དེ་བཞིན་གཤེགས་པའི་མི་འཇིགས་པ་ནི། འདི་བཞིའོ། །བཞི་གང་ཞེ་ན། འདི་
86b
ལྟ་སྟེ།་ང་ཡང་དག་པར་རྫོགས་པར་སངས་རྒྱས་པ་ལ་འདི་ལ་ཆོས་འདི་མངོན་པར་སངས་མ་རྒྱས་སོ། །ཞེས་ང་ལ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས་དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་བསྒྲག་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི། བཟང་སྐྱོང ། གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་དང་པོའོ། །བཟང་སྐྱོང ། གཞན་ཡང་ང་ཟག་པ་ཟད་པ་ལ་དེ་ལ་ཟག་པ་འདི་རྣམས་ཡོངས་སུ་ཟད་པར་མ་གྱུར་ཏོ། །ཞེས་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས་དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་
87a
༄#། །བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་བསྒྲག་པར་བྱའོ། །འཇིག་རྟེན་ན་དགེ་སྦྱོང་ངམ།་བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི། བཟང་སྐྱོང ། གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་གཉིས་པའོ། །བཟང་སྐྱོང ། གཞན་ཡང་གང་ངས་པར་དུ་གཅོད་པའི་ཆོས་སུ་བསྟན་པ་དེ་དག་ལ་བརྟེན་ན་བར་དུ་གཅོད་པའི་ཆོས་སུ་མི་འགྱུར་རོ། །ཞེས་ང་ལ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོང་སྟེ། རྒྱུ་ཡང་དག་པར་རྗེས་སུ་མ་མཐོང་བས་དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་བསྒྲག་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་མ་བསྐོར་བའི་ཚངས་པའི་
87b
འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི། བཟང་སྐྱོང ། གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་གསུམ་པའོ། །བཟང་སྐྱོང ། གཞན་ཡང་གང་ངས་འཕགས་པའི་ངེས་པར་འབྱུང་བར་འགྱུར་བ་དེ་བྱེད་པའི་སྡུག་བསྔལ་ཡང་དག་པར་ཟད་པར་འགྱུར་བའི་ཆོས་བཤད་པ་དེ་ལ་འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་ཚིག་ཏུ་བརྗོད་ཅིང་རྒོལ་བར་འགྱུར་བའི་རྒྱུ་ཡང་དག་པར་རྗེས་སུ་མི་མཐོབ་སྟེ། རྒྱུ་ཡང་དག་པར་རྗེས་སུ་མ་མཐོང་བས་དབུགས་འབྱིན་པ་ཐོབ་པར་གནས་སོ། །བག་ཚ་བ་མེད་པ་ཐོབ་པར་གནས་སོ། །བདེ་བ་ཐོབ་པར་གནས་སོ། །མི་འཇིགས་པ་ཐོབ་པར་གནས་སོ། །འཁོར་གྱི་ནང་དུ་གཤེགས་ཏེ་སེངྒེའི་སྒྲ་ཡང་དག་པར་བསྒྲག་པར་བྱའོ། །འཇིག་རྟེན་ན་དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། སུས་ཀྱང་ཆོས་དང་མཐུན་པར་མ་བསྐོར་བའི་ཚངས་པའི་འཁོར་ལོ་བསྐོར་བར་བྱའོ། །ཞེས་བྱ་བ་འདི་ནི། བཟང་སྐྱོང ། བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་མི་འཇིགས་པ་བཞི་པའོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་མི་འཇིགས་གང་ཡིན་པ། །མི་འཇིགས་རྣམས་ནི་བཤད་
88a
༄#། །པར་བྱ། །སེངྒེའི་སྒྲ་ནི་བསྒྲགས་བྱས་ཏེ། །འཁོར་རྣམས་ལ་ནི་ཆོས་ཀྱང་སྟོན། །ཡང་དག་རྫོགས་སངས་རྒྱས་སྨྲ་ལ། །ཆོས་འདི་སངས་རྒྱས་མ་གྱུར་ཅེས། །རྒོལ་བ་དེ་ནི་མ་མཐོང་སྟེ། །དེ་ཕྱིར་སངས་རྒྱས་མི་འཇིགས་པའོ། །ཟག་པ་ཟད་པར་སྨྲས་པ་ལ། །ཟག་པ་འདི་དག་མ་ཟད་ཅེས། །ལྷ་དང་བཅས་པའི་འཇིག་རྟེན་ན། །རྒོལ་བ་དེ་ནི་མ་མཐོང་ངོ ། །གང་དག་པར་དུ་གཅོད་པའི་ཆོས། །དེ་དག་གང་གིས་བསྟེན་བྱས་ཀྱང ། །བར་དུ་གཅོད་པར་མི་འགྱུར་ཞེས། །ང་ལ་རྒོལ་བ་དེ་མ་མཐོང ། །མྱ་ངན་འདས་པ་ཐོབ་པའི་ཕྱིར། །ངས་ནི་ཆོས་མཆོག་གང་བཤད་པ། །མྱ་ངན་འདའ་བའི་ཚིག་གི་མཆོག་།དེས་ནི་ང་ལ་རྒོལ་བ་མེད། །འཇིག་རྟེན་མགོན་པོ་སྐྱོབ་མཛད་པས། །མི་འཇིགས་གསུངས་པ་འདི་དག་ནི། །ཏིང་འཛིན་འདི་ལ་གནས་པ་ཡི། །བྱང་ཆུབ་སེམས་དཔས་འཐོབ་པར་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གཅིག་པའོ།། །།བཟང་སྐྱོང ། གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་ཞུགས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་པོ་དེ་དག་གང་ཞེ་ན། བཟང་སྐྱོང་འདི་ལྟ་སྟེ། ནམ་གྱི་ནུབ་མོ་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནས་ནམ་གྱི་ནུབ་མོ་ཕུང་པོ་ལྷག་མ་མ་ལུས་
88b
པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་པ་དེའི་བར་དུ་དེ་བཞིན་གཤེགས་པ་ལ་འཁྲུལ་བ་མི་མངའོ། །ཅ་ཅོ་མི་མངའོ། །བསྙེལ་བ་མི་མངའོ། །སེམས་མཉམ་པར་མ་བཞག་པ་མི་མངའོ། །ཐ་དད་པའི་འདུ་ཤེས་མི་མངའོ། །སོ་སོར་མ་བརྟགས་པའི་བཏང་སྙོམས་མི་མངའོ། །འདུན་པ་ཉམས་པ་མི་མངའོ། །བརྩོན་འགྲུས་ཉམས་པ་མི་མངའོ། །དྲན་པ་ཉམས་པ་མི་མངའོ། །ཏིང་ངེ་འཛིན་ཉམས་པ་མི་མངའོ། །ཤེས་རབ་ཉམས་པ་མི་མངའོ། །རྣམ་པར་གྲོལ་བ་ཉམས་པ་མི་མངའོ། །རྣམ་པར་གྲོལ་བའི་ཡེ་ཤེས་གཟིགས་པ་ཉམས་པ་མི་མངའོ། ། འདས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ་།མ་འོངས་པའི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ་།ད་ལྟར་གྱི་དུས་ལ་མ་ཆགས་མ་ཐོགས་པའི་ཡེ་ཤེས་མཐོང་བ་འཇུག་གོ་།དེ་བཞིན་གཤེགས་པའི་སྐུའི་འཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ ། །དེ་བཞིན་གཤེགས་པའི་གསུང་གི་འཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ ། །དེ་བཞིན་གཤེགས་པའི་ཐུགས་ཀྱི་འཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་ངོ ། ། བཟང་སྐྱོང ། འདི་དག་ནི། གང་བྱང་ཆུབ་སེམས་དཔས་ཏིང་ངེ་འཛིན་འདི་ལ་གནས་ན་འཐོབ་པར་འགྱུར་བའི་དེ་བཞིན་གཤེགས་པ་རྣམས་ཀྱི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཡིན་ནོ། །
89a
༄#། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་ལ་གནས་ནས་དེ་བཞིན་གཤེགས། །ཆོས་ཀྱི་འཁོར་ལོ་བསྐོར་མཛད་པའི། །སངས་རྒྱས་ཀྱི་ནི་མ་འདྲེས་ཆོས། །བཤད་ཀྱི་ང་ལ་མཉན་པར་བྱོས། །ནམ་གྱི་ནུབ་མོ་རྫོགས་སངས་རྒྱས། །དེ་བཞིན་གཤེགས་པས་བྱང་ཆུབ་བརྙེས། །ནམ་གྱི་ནུབ་མོ་ལེན་མེད་པར། །མྱ་ངན་ལས་ནི་འདས་པར་འགྱུར། །དེ་ཡི་བར་དུ་གང་གསུངས་དང ། །གསུང་དང་གསུང་བར་འགྱུར་བའི་རྣམས། །དེ་ཀུན་ཡང་དག་ཇི་བཞིན་ཏེ། །དེ་ནི་མ་འདྲེས་དང་པོའོ། ། ང་ལ་འཁྲུལ་པ་ཅུང་ཟད་མེད། །ཅ་ཅོ་ང་ལ་མི་མངའ་འོ། །གསུང་ལ་ཉམས་པ་མི་མངའ་སྟེ། །ང་ལ་ཞུམ་པ་མི་མངའ་འོ། །ང་ལ་བསྙེལ་བ་ཡོད་མ་ཡིན། །ང་ལ་མ་བརྟགས་བཏང་སྙོམས་མེད། །ཆོས་ལ་སྣ་ཚོགས་བྱེད་པ་མེད། །རྟག་ཏུ་མཉམ་པར་བཞག་པ་ཉིད། །ང་ཡི་འདུན་པ་མ་ཉམས་ཤིང ། །བརྩོན་འགྲུས་ཀྱང་ནི་མ་ཉམས་སོ། །ཏིང་འཛིན་ལས་ནི་མི་གཡེང་ཞིང ། ། ང་ལ་ཉམས་པ་མི་མངའ་འོ། །ང་ཡི་ཤེས་རབ་ཉམས་པ་མེད། །རྣམ་པར་གྲོལ་བ་འང་ཉམས་པ་མེད། །ང་ཡི་རྣམ་གྲོལ་ཡེ་ཤེས་མཐོང ། །ང་ལའང་ཉམས་པ་མི་མངའ་འོ། །ང་ནི་འདས་པའི་དུས་ལ་ཡང ། །ཡེ་ཤེས་ཐོགས་པ་མི་མངའ་འོ། །མ་འོངས་པ་ཡི་དུས་ལ་ཡང ། །ང་ལ་སྒྲིབ་པ་མི་མངའ་འོ། །ད་ལྟར་བྱུང་བའི་དུས་ལ་ཡང ། །ང་ལ་ཆགས་པ་མི་མངའ་འོ། །སྐྱོབ་པ་ང་ནི་
89b
ཆོས་ཀུན་ལ། །ཡེ་ཤེས་བསྒྲིབས་པ་མེད་པའོ། །ང་ཡི་སྐུ་ཡི་འཕྲིན་ལས་ཀུན། །ཡེ་ཤེས་ཀྱི་ནི་རྗེས་སུ་འབྲང ། །ང་ཡི་གསུང་ཐུགས་འཕྲིན་ལས་ཀུན། །ཡེ་ཤེས་སྔོན་དུ་འགྲོ་བ་ཡིན། །གང་ལ་གནས་ནས་དེ་བཞིན་གཤེགས། །ཆོས་ཀྱི་འཁོར་ལོ་བསྐོར་མཛད་པའི། །རྫོགས་སངས་རྒྱས་ཀྱི་མ་འདྲེས་ཆོས། །བཅོ་བརྒྱད་པོ་ནི་དེ་དག་གོ་།ཏིང་འཛིན་འདི་ལ་བསྒོམས་བྱས་ན། །སངས་རྒྱས་ཆོས་ནི་བཅོ་བརྒྱད་དང ། །སྟོན་པ་ཡི་ནི་སྟོབས་བཅུ་དང ། །མི་འཇིགས་རྣམས་ནི་རྙེད་མི་དཀའ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གཉིས་པའོ།། །། བཟང་སྐྱོང ། གཞན་ཡང་བྱང་ཆུབ་སེམས་དཔས་ཏིང་ངེ་འཛིན་འདི་ལ་རྗེས་སུ་ཡི་རང་བ་བཞིན་རྗེས་སུ་ཡི་རང་བར་བྱའོ། །བཞི་གང་ཞེ་ན། འདི་ལྟ་སྟེ། ཇི་ལྟར་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཏིང་ངེ་འཛིན་འདི་གསན་ནས་ལུང་ནོས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་བ་དེ་བཞིན་དུ་བདག་ཀྱང་ཏིང་ངེ་འཛིན་འདི་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་ངོ ། །བཟང་སྐྱོང ། འདི་ནི། བྱང་ཆུབ་སེམས་དཔའི་རྗེས་སུ་ཡི་རང་བ་དང་པོའོ། །བཟང་སྐྱོང ། གཞན་ཡང་ཇི་ལྟར་མ་བྱོན་པའི་དེ་བཞིན་
90a
༄#། །གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་བྱང་ཆུབ་སེམས་དཔའི་སྤྱད་པ་སྤྱོད་པར་འགྱུར་བ་ན་ཏིང་ངེ་འཛིན་འདི་གསན་ནས་ལུང་ནོས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཐོབ་པར་བྱ་བ་དང ། མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་བར་འགྱུར་བ་དེ་བཞིན་དུ་བདག་ཀྱང་རྗེས་སུ་ཡི་རང་ངོ ། །བཟང་སྐྱོང ། འདི་ནི། བྱང་ཆུབ་སེམས་དཔའི་རྗེས་སུ་ཡི་རང་བ་གཉིས་པའོ། །བཟང་སྐྱོང ། གཞན་ཡང་བྱང་ཆུབ་སེམས་དཔས་འདི་སྐད་དུ་ཇི་ལྟར་ད་ལྟར་བྱུང་བའི་དུས་ན་ད་ལྟར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཏིང་ངེ་འཛིན་འདི་གསན་ནས་ལུང་ནོས་ཏེ་རྗེས་སུ་ཡི་རང་ནས་མང་དུ་ཐོས་པ་ཡོངས་སུ་རྫོགས་པར་མཛད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང ། ད་ལྟར་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ལ་ཇི་ལྟར་རྗེས་སུ་ཡི་རང་བ་དེ་བཞིན་དུ་བདག་ཀྱང་ད་ལྟར་གྱི་ཏིང་ངེ་འཛིན་འདི་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་ཡོངས་སུ་རྫོགས་པར་བྱ་བའི་ཕྱིར་རྗེས་སུ་ཡི་རང་ངོ ། །ཞེས་བརྗོད་པར་བྱ་སྟེ། བཟང་སྐྱོང ། འདི་ནི། བྱང་ཆུབ་སེམས་དཔའི་རྗེས་སུ་ཡི་རང་བ་གསུམ་པའོ། །བཟང་སྐྱོང ། གཞན་
90b
ཡང་བྱང་ཆུབ་སེམས་དཔས་འདི་སྐད་དུ་བདག་གིས་རྗེས་སུ་ཡི་རང་བ་དང་ལྡན་པའི་བསོད་ནམས་འདི་ཐམས་ཅད་སེམས་ཅན་ཐམས་ཅད་དང་ལྷན་ཅིག་ཏུ་ཐུན་མོང་དུ་བྱས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་གྱུར་ཅིག་།ཏིང་ངེ་འཛིན་འདིའང་ཐོབ་པར་གྱུར་ཅིག་།མང་དུ་ཐོས་པ་ཡོངས་སུ་རྫོགས་པར་གྱུར་ཅིག་།ཅེས་བརྗོད་པར་བྱ་སྟེ། བཟང་སྐྱོང ། འདི་ནི། བྱང་ཆུབ་སེམས་དཔའི་རྗེས་སུ་ཡི་རང་བ་དང་ལྡན་པའི་བསོད་ནམས་བཞི་པའོ། །བཟང་སྐྱོང ། རྗེས་སུ་ཡི་རང་བ་དང་ལྡན་པའི་བསོད་ནམས་དང ། ཏིང་ངེ་འཛིན་འདི་ཐོབ་པའི་བྱང་ཆུབ་སེམས་དཔའ་དག་ནི། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའོ། །བཟང་སྐྱོང ། བྱང་ཆུབ་སེམས་དཔས་ཏིང་ངེ་འཛིན་འདི་ལ་རྗེས་སུ་ཡི་རང་བ་དེ་དག་གིས་རྗེས་སུ་ཡི་རང་ཞིང་བསྔོས་ནས་བསོད་ནམས་ཀྱི་ཕུང་པོ་ཇི་སྙེད་ཅིག་འཛིན་པར་འགྱུར་བའི་དཔེ་ཙམ་ཞིག་བསྟན་ཏོ། །བཟང་སྐྱོང ། འདི་ལྟ་སྟེ། དཔེར་ན། སྐྱེས་བུ་ལ་ལ་ཞིག་ཚེ་ལོ་བརྒྱ་ཕྲག་དུ་མ་ཐུབ་པ། ལོ་བརྒྱ་ཕྲག་དུ་མར་འཚོ་བ། མགྱོགས་པའི་མཐུ་རླུང་དང་འདྲ་བ་ཞིག་ཡོད་ལ་དེ་མི་འདུག་པར་ལོ་བརྒྱ་ཚང་བར་ཤར་ཕྱོགས་སུའང་སོང ། དེ་བཞིན་དུ་ལྷོ་དང ། ནུབ་དང ། བྱང་དང ། འོག་དང ། སྟེང་གི་ཕྱོགས་སུའང་སོང་ན། བཟང་སྐྱོང ། དེ་ཇི་སྙམ་དུ་སེམས། ཚེ་ལོ་བརྒྱ་ཐུབ་ཅིང་ལོ་བརྒྱར་འཚོ་བ། མགྱོགས་པའི་མཐུ་རླུང་དང་འདྲ་བའི་
91a
༄#། །སྐྱེས་བུ་དེས་མི་འདུག་པར་ཕྱོགས་དྲུག་ཏུ་ཕྱོགས་གཅིག་ཅིང་ཡང་ལོ་བརྒྱ་བརྒྱ་སོང་བའི་སྐྱེས་བུ་དེས་དཔག་ཚད་དུ་ཞིག་ཏུ་སོང་བར་གྱུར་བ་བགྲང་བའམ། གཞལ་བའམ།་བསམ་པའམ། དཔག་པར་སྐྱེས་བུ་ལ་ལ་སྤྲོའམ། བྱང་ཆུབ་སེམས་དཔའ་བཟང་སྐྱོང་གིས་གསོལ་པ། བཙུན་པ་བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང ། གནས་བརྟན་ཤཱ་རདྭ་ཏིའི་བུ་དང ། ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་མ་གཏོགས་པར་དེ་ནི། མི་ནུས་སོ། །བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང ། བུད་མེད་དམ། སྐྱེས་པ་གང་ལ་ལ་ཞིག་གིས་སྐྱེས་བུ་ལོ་བརྒྱར་གནས་པ་རླུང་གི་མགྱོགས་པ་བཞིན་དུ་མགྱོགས་པར་འགྲོ་བ་དེའི་སྤྱོད་ཡུལ་རྣམས་གསེར་དང ། དངུལ་གྱིས་གང་བར་བྱས་ཏེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་ཕུལ་ལ་ཏིང་ངེ་འཛིན་འདི་ནི། ཉན་པ་དང ། བྱང་ཆུབ་སེམས་དཔའ་གང་ཡང་ཏིང་ངེ་འཛིན་འདི་ཐོས་ནས་རྗེས་སུ་ཡི་རང་བ་བཞི་པོ་དེ་དག་གིས་རྗེས་སུ་ཡི་རང་ཞིང་རྗེས་སུ་ཡི་རང་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཆེད་དུ་མང་དུ་ཐོས་པ་འདོད་པས་བསྔོ་བར་ཡང་བྱེད་ན། བཟང་སྐྱོང ། བསོད་ནམས་ཀྱི་ཕུང་པོ་འདི་ལ་བསོད་ནམས་ཀྱི་ཕུང་པོ་སྔ་མ་དེས་བརྒྱའི་ཆར་ཡང་ཉེ་བར་མི་འགྲོའོ། །སྟོང་དང །
91b
སྟོང་ཕྲག་བརྒྱ་དང ། བྱེ་བ་ཕྲག་བརྒྱ་དང ། བྱེ་བ་ཁྲག་ཁྲིག་ཕྲག་བརྒྱ་སྟོང་དང ། གྲངས་དང ། ཆ་དང ། བགྲང་བ་དང ། དཔེ་དང ། རྒྱུར་ཡང་ཉེ་བར་མི་འགྲོའོ།། །།བམ་པོ་བདུན་པ་སྟེ་ཐ་མ་བཟང་སྐྱོང ། ཏིང་ངེ་འཛིན་འདི་ལ་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་བྱང་ཆུབ་སེམས་དཔའ་རྣམས་ལ་ཇི་ཙམ་དུ་དོན་ཆེ་བ་ལ་ལྟོས། བཟང་སྐྱོང ། དེ་བས་ན། རྣམ་གྲངས་འདིས་ཀྱང་ཏིང་ངེ་འཛིན་འདི་ལ་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་བྱང་ཆུབ་སེམས་དཔའ་རྣམས་ཀྱི་དོན་ཆེན་པོ་ཡིན་པར་རིག་པར་བྱའོ། །བཟང་སྐྱོང ། སྔོན་བྱུང་བ་འདས་པའི་དུས་ན་བསྐལ་བ་གྲངས་མེད་པ་བས་ཀྱང་ཆེས་གྲངས་མེད་པ། ཤིན་ཏུ་རྒྱས་པ། ཚད་མེད་པ། བསམ་གྱིས་མི་ཁྱབ་པར་བྱུང་བ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེངྒེའི་བློ་གྲོས་ཞེས་བྱ་བ་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ ། །བཟང་སྐྱོང ། དེའི་ཚེ་ཛམྦུའི་གླིང་འདིའང་འབྱོར་བ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། ཉམས་དགའ་བ་དང ། སྐྱེ་བོ་མང་པོ་དང ། མིས་གང་བར་གྱུར་ཏོ། །བཟང་སྐྱོང ། དེའི་ཚེ་ཛམྦུའི་གླིང་འདི་ན་གྲོང་ཁྱེར་ཆེན་པོ་ཐམས་ཅད་ཀྱང་རིན་པོ་ཆེ་སྣ་བདུན་ལས་གྲུབ་པ། ཁྱིམ་བྱེ་བ་ཕྲག་དགུ་ཡོད་པ།
92a
༄#། །དཔག་ཚད་བཅུ་གཉིས་པ་སྟོང་ཕྲག་དྲུག་ཅུ་རྩ་བརྒྱད་ཡོད་པར་གྱུར་ཏོ། །བཟང་སྐྱོང ། དེའི་ཚེ་ཛམྦུའི་གླིང་འདིའང་འདི་ལྟ་སྟེ། དཔག་ཚད་སྟོང་ཕྲག་དྲུག་ཅུ་རྩ་བརྒྱད་ཡོད་དེ། ཡངས་ཤིང་རྒྱ་ཆེ་བར་གྱུར་ཏོ། །བཟང་སྐྱོང ། དེའི་ཚེ་ཛམྦུའི་གླིང་འདི་ན་གང་དུ་དེ་བཞིན་གཤེགས་པ་དེ་སྐྱེ་བའི་སར་གྱུར་པ་འདི་ལྟ་སྟེ། བཟང་པོ་བྱུང་བ་ཞེས་བྱ་བའི་གྲོང་ཁྱེར་ཆེན་པོ་གཅིག་ཅིག་ཡོད་དེ། གྲོང་ཁྱེར་ཆེན་པོ་དེ་ན་སྲོག་ཆགས་བྱེ་བ་ཕྲག་དྲུག་ཅུ་གནས་སོ། །བཟང་སྐྱོང ། ཡང་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེངྒེའི་བློ་གྲོས་དེའི་ཉན་ཐོས་འདུས་པ་དང་པོ་ནི། དགྲ་བཅོམ་པ་བྱེ་བ་ཕྲག་དགུ་བཅུ་འདུས་པར་གྱུར་ཏོ། །ཞག་བདུན་འདས་ནས་ཉན་ཐོས་འདུས་པ་གཉིས་པ་ནི། ཉན་ཐོས་བྱེ་བ་ཕྲག་དགུ་བཅུ་འདུས་པར་གྱུར་ཏོ། །ཞག་བདུན་པ་གཉིས་འདས་ནས་ཉན་ཐོས་འདུས་པ་གསུམ་པ་ནི། བྱེ་བ་ཕྲག་དགུ་བཅུ་འདུས་པར་གྱུར་ཏོ། །དག་པའི་བྱང་ཆུབ་སེམས་དཔའ་བྱེ་བ་ཕྲག་དགུ་བཅུའང་འདུས་པར་གྱུར་ཏོ། །དེ་ནས་ཕྱིས་ནི། བཅོམ་ལྡན་འདས་དེའི་ཉན་ཐོས་གྲངས་ཀྱིས་མི་ཆོད་པ་ཞིག་བྱུང་ངོ ། །བཟང་སྐྱོང ། དེའི་ཚེ་དེའི་དུས་ན་མི་དེ་དག་དགེ་བ་བཅུའི་ལས་ཀྱི་ལམ་ཡང་དག་པར་ལེན་པར་གྱུར་ཏེ། འདི་ལྟ་སྟེ། དཔེར་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པའི་གསུང་རབ་ལ་
92b
སེམས་ཅན་རྣམས་དགེ་བ་བཅུའི་ལས་ཀྱི་ལམ་དང་ལྡན་པར་འགྱུར་བ་བཞིན་ནོ། །བཟང་སྐྱོང ། དེའི་ཚེ་སེམས་ཅན་རྣམས་ཀྱི་ཚེའི་ཚད་ནི། ལོ་བརྒྱད་ཁྲི་བཞི་སྟོང་ཐུབ་པར་གྱུར་ཏོ། །བཟང་སྐྱོང ། དེའི་ཚེ་གྲོང་ཁྱེར་ཆེན་པོ་དེ་ན་འཁོར་ལོས་བསྒྱུར་བའི་རྒྱལ་པོ་ཁྱད་པར་དུ་འགྲོ་བ་ཞེས་བྱ་བ་རིན་པོ་ཆེ་སྣ་བདུན་དང་ལྡན་པ་བུ་སྟོང་དུ་ཚང་བ་ཞིག་ཡོད་དེ། དེ་བཅོམ་ལྡན་འདས་དེ་བཞིན་གཤེགས་པ་སེངྒེའི་བློ་གྲོས་དེའི་དྲུང་དུ་སོང་ཞིང་བསྙེན་བཀུར་བྱེད་དོ། །བཟང་སྐྱོང ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེངྒེའི་བློ་གྲོས་དེས་རྒྱལ་པོ་ཁྱད་པར་དུ་འགྲོ་བ་དེའི་བསམ་པ་ཐུགས་སུ་ཆུད་ནས་ཏིང་ངེ་འཛིན་འདི་བསྟན་ཏོ། །ཡང་དག་པར་བཤད་དོ། །བཟང་སྐྱོང ། དེ་ནས་རྒྱལ་པོ་ཁྱད་པར་དུ་འགྲོ་བ་དེས་ཏིང་ངེ་འཛིན་འདི་ཐོས་ནས་རྗེས་སུ་ཡི་རང་ངོ ། །རྗེས་སུ་ཡི་རང་ནས་ཀྱང་བཅོམ་ལྡན་འདས་དེ་ལ་རིན་པོ་ཆེ་སྤར་གང་གིས་གཏོར་ཏོ། །དེ་དེ་ནས་ཤི་འཕོས་པ་དང ། དགེ་བའི་རྩ་བ་དེས་དེ་བཞིན་གཤེགས་པ་དེ་མྱ་ངན་ལས་འདས་པའི་འོག་ཏུའང་ཛམྦུའི་གླིང་འདིར་རྒྱལ་པོའི་ཁྱིམ་དེ་ཉིད་དུ་སྐྱེས་སོ། །བཟང་སྐྱོང ། དེའི་ཚེ་དེ་བཞིན་གཤེགས་པ་དེའི་གསུང་རབ་ལ་དགེ་སློང་ཆོས་སྨྲ་བ་རིན་ཆེན་མཆོག་ཅེས་བྱ་བ་ཞིག་བྱུང་སྟེ། དེས་འཁོར་བཞི་ལ་ཏིང་ངེ་འཛིན་འདི་རྒྱ་ཆེར་སྟོན་ཏོ། །ཡང་དག་པར་སྒྲོག་གོ་།བཟང་སྐྱོང ། དེའི་ཚེ་རྒྱལ་པོ་ཁྱད་པར་དུ་འགྲོ་བ་ཞེས་བྱ་བ་དེ་རྒྱལ་པོའི་བུ་ཚངས་པས་
93a
༄#། །བྱིན་ཞེས་བྱ་བར་གྱུར་ཏོ། །དེས་དགེ་སློང་དེ་ཏིང་ངེ་འཛིན་འདི་འཆད་པ་ཐོས་སོ། །ཐོས་ནས་ཀྱང་ཐོས་མ་ཐག་ཏུ་དང་བརྙེད་པར་གྱུར་ཏེ། དང་བའི་སེམས་ཀྱིས་གསེར་སྟོང་ཕྲག་བརྒྱ་དང ། རས་བཅོས་བུ་ཟུང་གཅིག་གིས་དགེ་སློང་དེ་ལ་གཡོགས་སོ། །བཟང་སྐྱོང ། དེ་ནས་རྒྱལ་པོའི་བུ་ཚངས་པས་བྱིན་དེས་དགེ་སློང་དེ་ལས་ཏིང་ངེ་འཛིན་འདི་ཐོས་ནས་དགེ་སློང་དེས་ལེགས་པར་བཤད་པའི་ཕྱིར་དགབ་པ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཏིང་ངེ་འཛིན་འདོད་པའི་ཕྱིར་ཆོས་སྨྲ་བའི་དགེ་སློང་དེ་ལས་སྲོག་ཆགས་སྟོང་དུ་ཚང་བ་དང་ལྷན་ཅིག་ཆོས་འདོད་པས་སྐྲ་དང་ཁ་སྤུ་བྲེགས་ཏེ་གོས་དུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་རབ་ཏུ་བྱུང་ནས་ལོ་བརྒྱད་སྟོང་དུ་རང་གི་འཁོར་སྲོག་ཆགས་སྟོང་པོ་དེ་དག་དང་ལྷན་ཅིག་ཏུ་དགེ་སློང་དེ་ལ་བསྙེན་བཀུར་བྱེད་ཅིང་རྗེས་སུ་འབྲངས་ཀྱང་ཉན་པ་ཙམ་ཞིག་ཐོབ་པ་མ་གཏོགས་པར་དགེ་སློང་དེ་ལས་ཏིང་ངེ་འཛིན་འདི་མ་ཐོབ་བོ། །དེ་འང་ལན་གཉིས་མ་ཡིན་གྱི། ལན་གཅིག་ཁོ་ན་ཞིག་ཐོས་ནས་རྗེས་སུ་ཡི་རང་བ་བཞི་པོ་འདི་དག་གིས་རྗེས་སུ་ཡི་རང་ངོ ། །དེས་སྲོག་ཆགས་སྟོང་དུ་ཚང་བ་དེ་དག་དང་ལྷན་ཅིག་ཏུ་དགེ་བའི་རྩ་བ་དེས་སངས་རྒྱས་སྟོང་ཕྲག་དྲུག་ཅུ་རྩ་
93b
བརྒྱད་མཉེས་པར་བྱས་སོ། །སྐྱེ་བ་ཐམས་ཅད་དུའང་ཏིང་ངེ་འཛིན་འདི་བཤད་ཅིང་གཞན་དག་ལའང་རྒྱ་ཆེར་ཡང་དག་པར་བསྒྲགས་ཏེ། དེས་རིམ་གྱིས་སངས་རྒྱས་གཞན་སྟོང་ཕྲག་དྲུག་ཅུ་རྩ་བརྒྱད་ཀྱང་མཉེས་པར་བྱས་སོ། །དེ་རྗེས་སུ་ཡི་རང་བ་དང་ལྡན་པའི་དགེ་བའི་རྩ་བ་དེ་ཉིད་དང ། ཏིང་ངེ་འཛིན་འདི་ཐོས་པས་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་བརྟན་པ་ཞེས་བྱ་བར་གྱུར་ཏེ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་གོ་།སྲོག་ཆགས་སྟོང་པོ་དེ་དག་ཀྱང་ཏིང་ངེ་འཛིན་གྱིས་ཡོངས་སུ་སྨིན་པར་བྱས་པའི་དགེ་བའི་རྩ་བ་འདི་ཉིད་ཀྱིས་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ཐམས་ཅད་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་རྫོགས་པའི་སངས་རྒྱས་དཔའ་བརྟན་པ་ཞེས་བྱ་བར་གྱུར་ཏེ། སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བཞག་གོ ། བཟང་སྐྱོང ། ཏིང་ངེ་འཛིན་འདི་ལ་རྗེས་སུ་ཡི་རང་བ་དང་ལྡན་པའི་བསོད་ནམས་ཀྱི་ཕུང་པོ་ཇི་ཙམ་དུ་དོན་ཆེ་བ་ལ་ལྟོས། འདི་ལྟར་རྗེས་སུ་ཡི་རང་བ་དང་ལྡན་པའི་ཚིག་ཏུ་བརྗོད་པས་ཀྱང་བླ་ན་མེད་པ་ཡང་དག་
94a
༄#། །པར་རྫོགས་པའི་བྱང་ཆུབ་སྒྲུབ་པར་བྱེད་ན། བཟང་སྐྱོང ། བྱང་ཆུབ་སེམས་དཔའ་གང་ཏིང་ངེ་འཛིན་འདི་ཐོས་ནས་འཛིན་པ་དང ། ཀུན་ཆུབ་པར་བྱེད་པ་དང ། འཆང་བ་དང ། ཀློག་པ་དང ། གཞན་དག་ལའང་རྒྱ་ཆེར་ཡང་དག་པར་སྒྲོག་པ་དང ། སྒོམ་པའི་སྦྱོར་བ་ལ་བརྩོན་པར་གནས་པ་ལྟ་ཅི་སྨོས་ཏེ། བཟང་སྐྱོང ། ཏིང་ངེ་འཛིན་འདི་ཐོས་ནས་རྗེས་སུ་ཡི་རང་བར་མི་བྱེད། ལུང་ནོད་པར་མི་བྱེད། ཀུན་ཆུབ་པར་མི་བྱེད། འཆང་བར་མི་བྱེད། གཞན་དག་ལའང་རྒྱ་ཆེར་ཡང་དག་པར་སྒྲོག་པར་མི་བྱེད། སྒོམ་པའི་སྦྱོར་བ་ལ་བརྩོན་པར་མི་གནས་པ་ལྟ་སུ་ཞིག་ཡོད། དེ་ཅིའི་ཕྱིར་ཞེ་ན། བཟང་སྐྱོང ། འདི་ལྟར་ཏིང་ངེ་འཛིན་འདི་ཐོས་པས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་བའི་ཕྱིར་རོ། །བཟང་སྐྱོང ། དེ་བས་ན། ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་རྣམས་ཀྱིས་གལ་ཏེ་ཏིང་ངེ་འཛིན་འདི་དཔག་ཚད་ཙམ་ན་ཡོད་པར་ཐོས་ན། བཟང་སྐྱོང ། བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེས་ཏིང་ངེ་འཛིན་འདི་མཉན་པའི་ཕྱིར་དཔག་ཚད་ཙམ་གྱི་བར་དེར་འགྲོ་བར་བྱའོ། །ཐོས་ནས་ཀྱང་གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། གཞན་དག་ལའང་
94b
རྒྱ་ཆེར་བསྟན་པར་བྱ། བཤད་པར་བྱ། བསྒྲག་པར་བྱའོ། །སྒོམ་པ་ལའང་མངོན་པར་དགའ་བར་བྱའོ། །བཟང་སྐྱོང ། དཔག་ཚད་ཙམ་ལྟ་ཞོག་གི་།དཔག་ཚད་གཉིས་ཙམ་མམ། དཔག་ཚད་གསུམ་ཙམ་མམ། དཔག་ཚད་བཞི་ཙམ་མམ། དཔག་ཚད་ལྡ་ཙམ་ནས་དཔག་ཚད་བཅུའི་བར་ཙམ་མམ། བཟང་སྐྱོང ། དཔག་ཚད་བཅུ་ཙམ་ལྟའང་ཞོག་གི་།གལ་ཏེ་བྱང་ཆུབ་སེམས་དཔས་དཔག་ཚད་བརྒྱ་ན་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་བྱང་ཆུབ་སེམས་དཔའི་ཏིང་ངེ་འཛིན་འདི་ལྗོངས་ཀྱི་ཕྱོགས་ཆེ་གེ་མོ་ཞིག་ན་སྤྱོད་དོ། །ཞེས་ཏིང་ངེ་འཛིན་འདི་དཔག་ཚད་བརྒྱའི་བར་ཙམ་ན་ཡོད་པར་ཐོས་ནའང་བཟང་སྐྱོང ། བྱང་ཆུབ་སེམས་དཔའ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེས་ཞུམ་པ་མེད་པ་དང ། སྙོམ་ལས་མེད་པ་དང ། འཇིགས་པ་མེད་པ་དང ། སྒྱིད་ལུག་པ་མེད་པ་དང ། གདུང་བ་མེད་པའི་སེམས་དང ། བརྩོན་འགྲུས་བརྩམས་པ་མི་ལྷོད་པས་ཏིང་ངེ་འཛིན་འདི་ཐ་ན་མཉན་པ་ཉི་ཚེ་ཙམ་གྱི་ཕྱིར་ཡང་དཔག་ཚད་བརྒྱ་བོ་དེར་འགྲོ་བར་བྱ་ན། ལུང་མནོད་པ་དང ། ཀུན་ཆུབ་པར་བྱ་བ་དང ། བསྒྲག་པར་བྱ་བ་དང ། བསྒོམ་པར་བྱ་བའི་ཕྱིར་ལྟ་སྨོས་ཀྱང་ཅི་དགོས་ཏེ། དེ་ཅིའི་ཕྱིར་ཞེ་ན། བཟང་སྐྱོང ། འདི་ལྟར་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཀྱི་ཕྱོགས་ཀྱི་ཆོས་རྣམས་ནི། ཏིང་ངེ་འཛིན་འདི་ལ་རག་ལས་པའི་ཕྱིར་རོ། །བཟང་སྐྱོང ། དེ་ལ་བྱང་ཆུབ་སེམས་དཔའ་
95a
༄#། །ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་དོན་དུ་གཉེར་བ་དེ་དག་གིས་དཔག་ཚད་བརྒྱ་པོ་དེར་སོང་ནས་གང་ལས་ཏིང་ངེ་འཛིན་འདི་ཐོས་པར་གྱུར་པའི་སློབ་དཔོན་དེ་ལ་དེས་སྟོན་པའི་འདུ་ཤེས་བསྐྱེད་པར་བྱའོ། །ཆོས་སྨྲ་བའི་རིགས་ཀྱི་བུ་དེ་ལ་བསྙེན་བཀུར་ཐམས་ཅད་ཀྱིས་བསྙེན་བཀུར་བྱེད་ཅིང་ཕྱི་བཞིན་འབྲང་བར་བྱའོ། །ཐ་ན་ཏིང་ངེ་འཛིན་འདི་མཉན་པ་ཙམ་གྱི་ཕྱིར་ཡང་ལོ་གཅིག་གམ། གཉིས་སམ། གསུམ་མམ། བཞིའམ། ལྔའམ། ལོ་བཅུའམ། བརྒྱའམ། ཇི་སྲིད་འཆིའོ་བར་དུ་ཕྱི་བཞིན་འབྲང་བར་བྱ་ན། ལུང་མནོད་པའམ། ཀུན་ཆུབ་པར་བྱ་བའམ། བྲི་བའམ། བཅང་བའམ། བསྒྲག་པའམ། བསྒོམ་པའི་ཕྱིར་ལྟ་སྨོས་ཀྱང་ཅི་དགོས། བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་དེས་རང་ཉམས་གཏང་བར་བྱ་སྟེ། བཏང་ནས་ཀྱང་སློབ་དཔོན་དེའི་བློ་བཞིན་དུ་འཇུག་པར་བྱའོ། །གུས་པ་དང་བཅས་པ་དང ། ཞེ་ས་དང་བཅས་པས་སློབ་དཔོན་གྱི་ཕྱིར་འབྲང་བར་བྱའོ། །བཀའ་བཞིན་དུ་བྱེད་པས་ཕྱི་བཞིན་འབྲང་བར་བྱའོ། །བཀའ་མི་གཅོག་པ་དང ། མཛའ་བ་རྟག་པ་དང ། ངོ་མི་རྟག་པ་སྤངས་པ་དང ། ཉེས་པར་ལྟ་བ་མེད་པས་ཕྱི་བཞིན་འབྲང་བར་བྱའོ། །དགེ་བའི་བཤེས་གཉེན་གྱི་འདུ་ཤེས་ཀྱང་བསྐྱེད་པར་བྱའོ། །དེ་ལ་སྟོན་པའི་འདུ་ཤེས་ཀྱང་ཉེ་བར་གཞག་པར་བྱའོ། །བཟང་སྐྱོང ། བྱང་ཆུབ་
95b
སེམས་དཔའང་སློབ་དཔོན་དེ་ལ་དེ་ལྟར་ན་ན་ཏན་བྱེད་ན། སྔོན་ཆོས་ཀྱིས་ཕོངས་པར་འགྱུར་བའི་ལས་བྱས་ཤིང་བསགས་པ་མ་གཏོགས་པར་ཐ་ན་ཏིང་ངེ་འཛིན་འདི་ཉན་པ་ཙམ་ཡང་མི་ཐོབ་པ་ནི། གནས་མ་ཡིན་སྐབས་མ་ཡིན་ཏེ། དེ་ནི། གནས་མེད་དོ། །བྱང་ཆུབ་སེམས་དཔའ་དེས་སློབ་དཔོན་དེ་ལ་ཁྲེལ་ཡོད་པ་དང ། བྱས་བ་གཟོ་བ་དང ། བྱས་པ་ཤེས་པར་བྱའོ། ། དེ་ལྟར་ན། དེའི་ཏིང་ངེ་འཛིན་དེའི་ཚིག་དང་ཡི་གེ་དེ་ཡུན་རིང་དུ་གནས་པ་དང ། རྨོངས་པ་མེད་པར་འགྱུར་ན། བཟང་སྐྱོང ། བྱང་ཆུབ་སེམས་དཔའ་གང་ཏིང་འཛིན་འདི་གྲོང་གཞན་ན་ཡོད་པར་ཐོས་སམ། གྲོང་གི་ཞིང་གཞན་ན་ཡོད་པར་ཐོས་ལ། ཐོས་ནས་ཀྱང་ཐ་ན་མཉན་པ་ཙམ་གྱི་ཕྱིར་ཡང་འགྲོ་བར་བྱ་བ་ལྟ་ཅི་སྨོས། ལུང་མནོད་པར་བྱ་བ་དང ། ཀུན་ཆུབ་པར་བྱ་བ་དང ། བཅང་བར་བྱ་བ་དང ། བཀླག་པར་བྱ་བ་དང ། བྲི་བར་བྱ་བ་དང ། བསྒོམ་པར་བྱ་བ་དང ། གཞན་དག་ལའང་ཡང་དག་པར་བསྒྲག་པར་བྱ་བའི་ཕྱིར་ལྟའང་སྨོས་ཀྱང་ཅི་དགོས། བཟང་སྐྱོང ། བྱང་ཆུབ་སེམས་དཔའ་གང་ཏིང་ངེ་འཛིན་འདི་ཚོལ་བས་ཐ་ན་ཏིང་ངེ་འཛིན་འདི་ཐོས་པ་ཙམ་ཡང་ཐོབ་པ་ནི། བཟང་སྐྱོང ། ཁྱོད་མོས་པར་བྱ། ཁྱོད་ཀྱིས་ཁོང་དུ་ཆུད་པར་བྱ་སྟེ། བྱང་ཆུབ་སེམས་དཔའ་དེ་ནི། ཏིང་ངེ་འཛིན་འདི་ཉིད་ཚོལ་བའི་དགེ་བའི་རྩ་བ་དང ། ཆོས་དོན་དུ་གཉེར་བའི་དགེ་བའི་རྩ་བ་དང ། ཆོས་འདོད་པའི་དགེ་བའི་རྩ་བ་དང ། བརྩོན་འགྲུས་བརྩམས་པའི་དགེ་
96a
༄#། །བའི་རྩ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་པར་རིག་པར་བྱ་ན། བཟང་སྐྱོང ། བྱང་ཆུབ་སེམས་དཔའ་གང་ཏིང་ངེ་འཛིན་འདི་ལུང་ནོད་པར་བྱེད། ཀུན་ཆུབ་པར་བྱེད། འཆང་བར་བྱེད། ཀློག་པར་བྱེད་ལ། ལུང་མནོད་པ་དང ། ཀུན་ཆུབ་པར་བྱ་བ་དང ། བཅང་བར་བྱ་བ་དང ། བཀླགས་པར་བྱས་ནས་ཀྱང་གཞན་དག་ལ་སྟོན་པར་བྱེད། སྒྲོག་པར་བྱེད། ཡང་དག་པར་སྒྲོག་པར་བྱེད་ཅིང་སྒོམ་པའི་སྦྱོར་བ་ལ་བརྩོན་པར་གནས་པ་ལྟ་སྨོས་ཀྱང་ཅི་དགོས། དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སྔོན་གྱི་དེ་བཞིན་གཤེགས་པ་མི་ཡི་མཆོག་།སེངྒེའི་བློ་གྲོས་ཞེས་བྱ་རྗེས་དྲན་ཏེ། །དེར་ནི་མི་ཡི་དབང་པོ་རྒྱལ་པོ་དེས། །ཏིང་འཛིན་འདི་ནི་དེ་ཚེ་ཐོས་པར་གྱུར། །རྒྱལ་པོས་ཏིང་འཛིན་འདི་ནི་ཐོས་ནས་ཀྱང ། །སེམས་མགུ་དགའ་བ་དཔེ་མེད་པས་བཟུང་སྟེ། །མི་མཆོག་སངས་རྒྱས་སེངྒེའི་བློ་གྲོས་ལ། །སྔར་གང་གི་ནི་རིན་པོ་ཆེས་ཀྱང་གཏོར། །བཅོམ་ལྡན་འདས་ཀྱིས་ལེགས་གསུངས་ཏིང་འཛིན་འདི། །སེམས་ཅན་ཐམས་ཅད་ལ་ནི་ཕན་པར་ཤོག་།ཁྱོད་ལ་སྐྱབས་སུ་དེ་རིང་མཆིའོ་ཞེས། །དེ་སྙམ་བསམ་ནས་ཚིག་ཏུའང་བརྗོད་པར་གྱུར། །རྒྱལ་པོ་དེ་ནི་དེ་ཡི་ལས་ཀྱིས་ནི། །ཤི་ནས་དེ་ཉིད་དུ་ནི་ཡང་སྐྱེས་ཏེ། །དེས་ནི་དགེ་སློང་རིན་ཆེན་ཞེས་བྱ་བར། །ཕྱོགས་སུ་གྲགས་པ་མཐུ་ཆེན་
96b
མཐོང་བར་གྱུར། །དེ་ལས་དེ་ཉིད་ཀྱང་ནི་ཐོས་གྱུར་ཏེ། །ཐོས་ནས་དགའ་བ་ཤིན་ཏུ་རྒྱས་པ་སྐྱེད། །བསྐྱེད་ནས་བྱང་ཆུབ་ཞུགས་པ་དགའ་གྱུར་ཏེ། །གསེར་དང་གོས་ཀྱིས་དགེ་སློང་དགབ་བྱས་ནས། །དེ་ནི་ཏིང་འཛིན་འདི་ཡང་འདོད་པའི་ཕྱིར། །སྲོག་ཆགས་སྟོང་དང་ལྷན་ཅིག་རབ་ཏུ་བྱུང ། །ལོ་ནི་སྟོང་ཕྲག་བརྒྱ་སྙེད་ཚང་བར་ཡང ། །དེ་དག་ཀུན་གྱི་དགེ་སློང་དེ་ཕྱིར་འབྲངས། །ཐོས་པ་རྒྱ་མཚོ་ལྟ་བུའི་ཏིང་འཛིན་འདི། །ལན་གཉིས་མ་ཡིན་ལན་གཅིག་ཁོ་ན་ཐོས། །དེ་ཡི་དྲན་པ་སྐྱོ་བ་མ་སྐྱེས་ཤིང ། །ཏིང་འཛིན་ཞི་བ་འདི་ནི་ཡོངས་སུ་ཚོལ། །དེ་དག་ཀུན་གྱིས་ལས་འདི་བྱས་པའི་ཕྱིར། །སྟོང་ཕྲག་དྲུག་ཅུ་རྩ་བརྒྱད་ཚང་བ་ཡི། །སངས་རྒྱས་མཐུ་ཆེན་རྣམས་ནི་མཉེས་པར་བྱས། །དེ་ལས་ཏིང་འཛིན་འདི་ནི་ཐོས་པར་གྱུར། །དེ་ནས་བདེ་པར་གཤེགས་པ་གཞན་དག་ཀྱང ། །སྟོང་ཕྲག་དྲུག་ཅུ་རྩ་བརྒྱད་ཚང་བར་བརྗོད། །བདེ་བར་གཤེགས་པ་སེངྒེའི་བློ་གྲོས་ལ། །བདག་ནི་རྗེས་སུ་ཡི་རང་བགྱིད་ཅེས་བརྗོད། །བསོད་ནམས་བྱས་པ་དེ་ཡིས་རྒྱལ་པོ་དེ། ། བརྩོན་འགྲུས་བརྟན་པ་ཞེས་བྱའི་སངས་རྒྱས་གྱུར། །སྲོག་ཆགས་བྱེ་བ་ཁྲག་ཁྲིག་བསམ་མི་ཁྱབ། །ཐམས་ཅད་དེ་ཡིས་སྐྱེ་ཞིང་འཆི་ལས་བཀྲོལ། །སྟོང་དུ་ཚང་བའང་རྗེས་སུ་སློབ་སློབ་ནས། ། སངས་རྒྱས་གྱུར་ཏེ་དཔའ་བརྟན་ཞེས་བྱ་བར། །ལྷར་བཅས་འཇིག་རྟེན་ལ་ནི་གྲགས་པར་གྱུར། །ཏིང་འཛིན་སྒྲས་ཀྱང་བྱང་ཆུབ་རེག་གྱུར་ན། །སྲིད་པ་ཐམས་ཅད་ལ་ནི་མི་བརྟེན་པར། །གང་ཞིག་
97a
༄#། །ཏིང་འཛིན་འདི་ནི་རྒྱ་ཆེ་བར། །སྟོན་པ་དེ་དག་བྱང་ཆུབ་འགྱུར་བར་ནི། །སྨོས་ཅི་དགོས་ཏེ་ནམ་ཡང་ཐེ་ཚོམ་མེད། །སངས་རྒྱས་ཀྱིས་གསུངས་ཏིང་འཛིན་ཞི་བ་འདི། ། དཔག་ཚད་བརྒྱ་ན་གལ་ཏེ་ཡོད་གྱུར་ཀྱང ། །བྱང་ཆུབ་དོན་དུ་གཉེར་བ་ཉིན་མཚན་དུ། །ནམ་ཡང་མི་འདུག་སོང་སྟེ་མཉན་པར་བྱ། །གལ་ཏེ་སོང་ནས་འདི་ནི་མ་རྙེད་ན། །འོན་ཀྱང་དེ་ཡི་བསོད་ནམས་ཚད་མེད་དེ། །དེ་ནི་དེ་ཡི་བྱང་ཆུབ་བསྐྱེད་ཡིན་ན། །གང་གིས་སོང་སྟེ་འདི་ཐོས་སྨོས་མི་དགོས། །དེ་ཕྱིར་གང་ཞིག་ཏིང་འཛིན་འདི་འདོད་པས། །དང་པོར་ཚངས་པས་བྱིན་དེ་དྲན་པར་བྱོས། །དགེ་སློང་གང་ལ་ཏིང་འཛིན་འདི་ཡོད་ལ། །སྐྱོ་བའི་སེམས་ནི་མེད་པར་བསྟེན་པར་བྱ། །རྗེས་སུ་དྲན་ཏེ་སྐྱེ་བ་སྔ་མ་ལ། །སྟོང་ཕྲག་སུམ་ཅུ་རྩ་དྲུག་ལོ་ཚང་བར། །ངས་ནི་ཆོས་སྨྲ་བ་ལ་རྟག་བསྟེན་ཀྱང ། །ཏིང་འཛིན་འདི་ནི་ནམ་ཡང་ཐོས་མ་གྱུར། །སྔོན་གྱི་སངས་རྒྱས་བདེན་ཞེས་བྱ་བ་བྱུང ། །དེ་ན་དགེ་སློང་གཞོན་ནུ་ཐོས་མང་ཞིང ། །བདེ་བར་གཤེགས་པའི་བསྟན་པ་ནུབ་འོག་ཏུ། །དེ་ཚེ་དེས་ནི་ཏིང་འཛིན་འདི་ཉིད་བཟུང ། །ང་ནི་དེ་ན་རྒྱལ་རིགས་རྒྱལ་པོ་སྟེ། །དགེ་སློང་ཆེ་གེ་མོ་ཞིག་ཏིང་འཛིན་འདི། །འཛིན་གྱི་དྲུང་དུ་ལེགས་པར་ཉོན་ཅིག་ཅེས། །རྨི་ལམ་དུ་ནི་ཏིང་འཛིན་འདི་ཐོས་ནས། །མྱུར་དུ་ལངས་ཏེ་རིངས་བའི་ཚུལ་གྱིས་ནི། །འདི་འཛིན་པ་ཡི་དགེ་སློང་དེ་བཙལ་ཏེ། །མཐོང་ནས་རབ་ཏུ་བྱུང་བ་དེ་ལས་ནི། །འདི་ཉིད་ལན་འགའ་ཐོས་ལྟ་སྲིད་དམ་ཞེས། །
97b
སྟོང་ཕྲག་དྲུག་ཅུ་རྩ་དྲུག་ལོ་ཚང་བར། །ངས་ནི་དགེ་སློང་དེ་ལ་དགའ་བས་བཀུར། །བདུད་ཀྱིས་བྱིན་གྱིས་བརླགས་པར་གྱུར་པའི་ཕྱིར། །ལན་འགའ་ཙམ་ཡང་ཐོས་པར་མ་གྱུར་ཏེ། །དེ་ཕྱིར་དགེ་སློང་རྣམས་དང་དགེ་སློང་མ། །དགེ་བསྙེན་དག་དང་དགེ་བསྙེན་མ་རྣམས་ལ། །ཏིང་འཛིན་ཐོས་ནས་མྱུར་དུ་ཟུངས་ཤིག་ཅེས། །མོས་པར་བྱེད་ཅིང་ཁོང་དུ་ཆུད་པར་བྱེད། །དེར་ནི་བསྐལ་པ་ཚང་བར་འདུག་ནས་ཀྱང་།། ཏིང་འཛིན་འཛིན་པ་དེ་ནི་བསྙེན་ཅིང་བསྟེན། །བསྐལ་པ་སྟོང་དུ་ལེགས་པར་བསྙེན་བཀུར་བྱས། །དེས་ནི་ཏིང་འཛིན་འདིའང་བཤད་པར་གྱུར། །ཏིང་འཛིན་རྡུལ་མེད་འདི་ལ་རབ་སྤྱོད་པའི། །དགེ་སློང་གྲོང་དུ་སློང་བ་དེ་ཉིད་ལ། །བཟའ་བ་དང་ནི་བཅའ་དང་མལ་ཆ་དང ། །དེ་བཞིན་གོས་དང་བྱེ་བ་བྱིན་པར་གྱུར། །བཅའ་དང་བཟའ་དང་མལ་སྟན་དེ་བཞིན་གོས། །མང་པོ་བྱེ་བ་ཐམས་ཅད་ལྟ་འང་ཞོག་།གལ་ཏེ་རང་གི་ཤ་སྦྱིན་ཐོབ་ན་ནི། །ལེགས་སྤྱད་ཡིན་ན་ཟས་སྐོམ་སྨོས་ཅི་དགོས། །རྟག་ཏུ་བྲན་གྱུར་བསྙེན་བཀུར་བྱེད་ཅིང་ནི། །ཏིང་འཛིན་ཞི་བ་འདིའང་ཚོལ་བྱེད་ལ། །མཁས་པས་རྙེད་ནས་དེའང་མྱུར་བྱེད་ཀྱང ། །དེ་ལ་བྱས་པ་གཟོ་བ་མ་ཡིན་ནོ། །བསྐལ་པ་མང་པོ་བྱེད་པར་བཙལ་ཀྱང་ནི། །ཏིང་འཛིན་འདི་ནི་ཤིན་ཏུ་རྙེད་པར་དཀའ། །འདི་ཡི་སྐྲ་ཡང་བརྒྱ་ལམ་ཐོས་གྱུར་ན། །ཁ་ཏོན་བྱས་ནས་སྟོན་པ་སྨོས་ཅི་དགོས། །གང་གིས་གངྒཱའི་བྱེ་སྙེད་འཇིག་རྟེན་ཁམས། །རིན་པོ་ཆེས་ནི་བཀང་སྟེ་བྱིན་པ་བས། །གང་ཞིག་འདི་ལས་ཚིགས་བཅད་འགའ་ལུང་ནོས། །དེ་ཡི་བསོད་ནམས་ཚད་གཟུང་མི་སླའོ།།
98a
༄#། །བསྐལ་པ་བྱེ་བ་གངྒྣའི་བྱེ་སྙེད་དུ། །གང་རྟག་བརྩོན་འགྲུས་བརྩམས་ཏེ་གནས་པ་བས། །གང་ཞིག་འདི་ལས་ཚིགས་བཅད་འགའ་ལུང་མོས། །དེ་ཡི་བསོད་ནམས་ཚད་གཟུང་མི་སླའོ། །བསྐལ་པ་བྱེ་བ་གངྒའི་བྱེ་སྙེད་དུ། །གང་དག་མི་རྟེན་བསམ་གཏན་སྒོམ་པ་བས། །གང་ཞིག་འདི་ལས་ཚིགས་བཅད་འགའ་ལུང་ནོས། །དེ་ཡི་བསོད་ནམས་ཚད་གཟུང་མི་སླའོ། །བསྐལ་པ་བྱེ་བ་གངྒཱའི་བྱེ་སྙེད་དུ། །གང་རྟག་ཤེས་རབ་གནས་པར་གྱུར་པ་བས། །གང་ཞིག་འདི་ལས་ཚིགས་བཅད་འགའ་ལུང་མནོས། །དེ་ཡི་བསོད་ནམས་ཚད་གཟུང་མི་སླའོ། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་གསུམ་པའོ།། །།བཟང་སྐྱོང ། དེ་བས་ན། དད་པའི་རིགས་ཀྱི་བུའམ། རིགས་ཀྱི་བུ་མོས་ཏིང་ངེ་འཛིན་འདི་གུས་པར་བྱས་ཏེ་མཉན་པར་བྱའོ། །ཐོས་ནས་ཀྱང་གཟུང་བར་བྱ། ཀུན་ཆུབ་བར་བྱ། ཡི་གེར་བྲི་བར་བྱ། བཅང་བར་བྱ། བཀླག་པར་བྱའོ། །བཟུང་ཞིང་ཀུན་ཆུབ་པར་བྱས་ནས་ཀྱང་གཞན་དག་ལ་རྒྱ་ཆེར་ཡང་དག་པར་བསྒྲག་པར་བྱའོ། །ལེགས་པར་བྲིས་ཏེ་གཞག་པར་བྱའོ། །དེ་ཅིའི་ཕྱིར་ཞེ་ན། བཟང་སྐྱོང ། ང་འདས་པའི་འོག་ཏུ་མ་འོངས་པའི་དུས་ན་བྱང་ཆུབ་སེམས་དཔའ་དད་པ་ཅན། དང་བ། བརྟག་པ་མང་པོ་མང་པོ་འབྱུང་བར་འགྱུར་ཏེ། དེ་དག་སེམས་ཅན་རྣམས་ལ་ཕན་པ་དང་བདེ་བའི་ཕྱིར་མང་དུ་ཐོས་པ་ཚོལ་པར་འགྱུར་རོ།།
98b
དེ་དག་མང་དུ་ཐོས་པ་ཚོལ་བས་དམ་པའི་ཕྱིར་ཕྱོགས་དང ། ཕྱོགས་མཚམས་དག་ཏུ་རྒྱུ་བར་འགྱུར་ཏེ། བཟང་སྐྱོང ། སེམས་ཅན་དེ་ལྟ་བུ་ཆོས་དོན་དུ་གཉེར་བ། ཆོས་ལ་མོས་པ། ཆོས་འདོད་པ།་ཆོས་ཡོངས་སུ་འཛིན་པ། ཤིན་ཏུ་རྒྱས་པ་འཛིན་པའི་སེམས་ཅན་རྣམས་ཀྱི་དོན་དང་ཆེད་དུ་ཏིང་ངེ་འཛིན་འདི་ལུང་ནོས་ཤིང་བསྟན་ལ། དེ་བཞིན་གཤེགས་པ་རྣམས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་ཏེ་གླེགས་པ་བ་ཆེན་པོར་ལེགས་པར་བྲིས་ནས་དེ་བཞིན་གཤེགས་པ་རྣམས་ཀྱི་ཕྱག་རྒྱས་བཏབ་ལ་གཞག་པར་བྱའོ། །བཟང་སྐྱོང ། དེ་ལ་དེ་བཞིན་གཤེགས་པ་རྣམས་ཀྱི་ཕྱག་རྒྱ་གང་ཞེ་ན། འདི་ལྟ་སྟེ། ཆོས་ཐམས་ཅད་བྱེད་པ་མེད་པ། བྱ་བ་མེད་པ། མངོན་པར་འདུས་མ་བྱས་པ། ཆགས་པ་མེད་པ། དམིགས་སུ་མེད་པ། སྟོང་པ་ཉིད། མཚན་མ་མེད་པ། སྨོན་པ་མེད་པ། མཚན་ཉིད་མེད་པ། གཉིས་སུ་མེད་པ། འཇུག་པ་མེད་པ། བརྟེན་པ་མེད་པ། བགྲང་དུ་མེད་པ། རྣམ་པར་གཞག་ཏུ་མེད་པ། གཟུང་བ་མེད་པ། དོར་བ་མེད་པ།་གནས་པ་མེད་པ། ཆོས་ཐམས་ཅད་རྟག་པ་མེད་པ། ཆད་པ་མེད་པ། རྒྱུ་ཟད་པ། སྡུག་བསྔལ་ཟད་པ། དངོས་པོ་ཟད་པ། མི་སྐྱེ་བ། མི་འགག་པ། མི་གནས་པ། མི་འཇིག་པ། ལམ་མེད་པ།་ལམ་གྱི་འབྲས་བུ་མེད་པ། འཕགས་པ་ཐམས་ཅད་ཀྱིས་མ་དཀྲུགས་པ། བྱིས་པ་ཐམས་ཅད་ཀྱིས་སྤངས་པ། མི་ཤེས་པ་རྣམས་ཀྱིས་བོར་བ། མཁས་པ་རྣམས་ཀྱིས་ཡོངས་སུ་བཟུང་
99a
༄#། །པ་སྟེ།་བཟང་སྐྱོང ། འདི་ནི། དེ་བཞིན་གཤེགས་པ་རྣམས་ཀྱིས་ཕྱག་རྒྱ་གང་གིས་དེ་བཞིན་གཤེགས་པས་གསུངས་པ་རྣམས་ལ་བཏབ་པའི་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའོ། །བཟང་སྐྱོང ། དེ་བས་ན། བྱང་ཆུབ་དོན་དུ་གཉེར་བའི་རིགས་ཀྱི་བུའམ། རིགས་ཀྱི་བུ་མོས་ཕྱི་མའི་ཚེ་ཕྱི་མའི་དུས་དེར་ཏིང་ངེ་འཛིན་འདི་ལུང་མནོད་པར་འདོད་པས་ལུང་མནོས་ཤིང་ཁ་ཏོན་དུ་བྱས་ནས་གཞན་དག་ལའང་རྒྱ་ཆེར་ཡང་དག་པར་བསྒྲག་པར་བྱའོ། །བཟང་སྐྱོང ། དེ་ལ་ཆོས་བཞི་དང་ལྡན་ན། བྱང་ཆུབ་སེམས་དཔའ་ཐ་ན་ཏིང་ངེ་འཛིན་འདི་ཉན་པའི་ཕྱིར་ཡང་བརྩོན་པར་འགྱུར་ན། ལུང་མནོད་པ་དང ། ཁ་ཏོན་བྱ་བའི་ཕྱིར་ལྟ་སྨོས་ཀྱང་ཅི་དགོས། བཞི་གང་ཞེ་ན། སྔོན་ལྷག་པའི་བསམ་པ་ཡོངས་སུ་སྦྱངས་པ་དང ། སྔོན་སྨོན་ལམ་བཏབ་པ་དང ། ཐམས་ཅད་མཁྱེན་པའི་ཡེ་ཤེས་ལ་མོས་པ་དང ། ཇི་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མར་ཡང་དག་པར་བསྒྲུབས་པའི་ཆོས་དཀོན་མཆོག་གི་མཛོད་འདི་འཆང་བར་འགྱུར། སྟོན་པར་འགྱུར་སྙམ་ནས་ཆོས་ཀྱི་ཚུལ་ཐམས་ཅད་ལེན་པ་སྟེ། བཟང་སྐྱོང ། ཆོས་བཞི་པོ་འདི་དག་དང་ལྡན་ན། བྱང་ཆུབ་སེམས་དཔའི་ཏིང་ངེ་འཛིན་འདི་མཉན་པ་དང ། གཟུང་བ་དང ། བཅང་པའི་ཕྱིར་བརྩོན་པར་འགྱུར་རོ། །བཟང་སྐྱོང །
99b
གཞན་ཡང་ཆོས་བཞི་དང་ལྡན་ན། བྱང་ཆུབ་སེམས་དཔའ་ཏིང་ངེ་འཛིན་འདི་བཙལ་བ་ལ་ཐ་ན་ཡི་གེར་བྲི་བ་ཙམ་གྱི་ཕྱིར་ཡང་བརྩོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། སངས་རྒྱས་ཡིད་ལ་བྱེད་པ་དང ། ཕྱི་ཕྱིར་ཞིང་ཆོས་རྗེས་སུ་དྲན་པ་ལ་མཁས་པ་དང ། ཆོས་ཐམས་ཅད་དམིགས་པ་ཡོངས་སུ་གཅོད་པ་ཡིད་ལ་བྱེད་པ་དང ། མཚན་མ་ཐམས་ཅད་རྣམ་པར་འཇིག་པ་ལ་མཁས་པ་སྟེ། བཟང་སྐྱོང ། ཆོས་དེ་བཞི་དང་ལྡན་ན། བྱང་ཆུབ་སེམས་དཔའ་ཏིང་ངེ་འཛིན་འདི་བཙལ་པ་ལ་ཐ་ན་བྲི་བ་ཙམ་གྱི་ཕྱིར་ཡང་བརྩོན་པར་འགྱུར་རོ། །བཟང་སྐྱོང ། དེ་ལ་ཆོས་བཞི་དང་ལྡན་ན། བྱང་ཆུབ་སེམས་དཔའ་ཏིང་ངེ་འཛིན་འདི་བཙལ་བ་ལ་བརྩོན་པར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། ཆོས་ཐམས་ཅད་གཟུང་དུ་མེད་པའི་དངོས་པོ་ཡོངས་སུ་གཅོད་པའི་ཤེས་པས་བྱང་ཆུབ་སེམས་དཔའ་ཏིང་ངེ་འཛིན་འདི་ལ་བརྩོན་པར་རིག་པར་བྱའོ། །སངས་རྒྱས་ཀྱི་སྐུ་དམིགས་པ་རྣམ་པར་སྒོམ་པ་ལ་མཁས་པས་བྱང་ཆུབ་སེམས་དཔའ་ཏིང་ངེ་འཛིན་འདི་ལ་བརྩོན་པར་རིག་པར་བྱའོ། །དམིགས་པ་ཐམས་ཅད་དུ་སངས་རྒྱས་དམིགས་པ་ཡིད་ལ་བྱེད་པས་བྱང་ཆུབ་སེམས་དཔའ་ཏིང་ངེ་འཛིན་འདི་ལ་བརྩོན་པར་རིག་པར་བྱའོ། །ཆོས་ཐམས་ཅད་དངོས་པོ་དང་བྲལ་བར་མོས་པ་ལ་མཁས་པས་བྱང་ཆུབ་སེམས་དཔའ་ཏིང་ངེ་འཛིན་འདི་ལ་བརྩོན་པར་རིག་པར་བྱ་སྟེ། བཟང་སྐྱོང ། ཆོས་དེ་བཞི་དང་ལྡན་ན། བྱང་ཆུབ་སེམས་དཔའ་ཏིང་ངེ་འཛིན་འདི་བཙལ་
100a
༄#། །པ་ལ་མངོན་པར་བརྩོན་པར་རིག་པར་བྱའོ། །བཟང་སྐྱོང ། ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་དམ་པའི་ཆོས་ཀུན་ཏུ་འཁྲུག་པའི་ཚེ་སེམས་ཅན་ཐམས་ཅད་ལ་ཕན་གདགས་པ་དང ། སེམས་ཅན་ཐམས་ཅད་ལ་སྙིང་བརྩེ་བའི་ཕྱིར་གང་ལ་ལ་ཞིག་ཏིང་ངེ་འཛིན་འདི་བཙལ་བ་ལ་བརྩོན་པར་གྱུར་ཅིང ། དེ་འདི་སྙམ་དུ་ཏིང་ངེ་འཛིན་འདི་ཇི་ལྟར་ན་ཤིན་ཏུ་རྒྱས་པ་དང ། རྒྱ་ཆེ་བ་དང ། ཡུན་རིང་དུ་གནས་པར་འགྱུར་སྙམ་དུ་སེམས་བསྐྱེད་པར་གྱུར་ན། རིགས་ཀྱི་བུ། དེའི་བསོད་ནམས་མང་དུ་བསྐྱེད་དེ། བསོད་ནམས་ཀྱི་ཕུང་པོ་དེ་ཐམས་ཅད་མཁྱེན་པ་ཉིད་དུ་གཞོལ་བར་རིག་པར་བྱ་བ་མ་གཏོགས་པར་བསོད་ནམས་ཀྱི་ཕུང་པོ་དེའི་མཐའ་རྟོགས་པར་མ་ནུས་སོ། །དེ་དག་གི་བསོད་ནམས་ཀྱི་ཕུང་པོ་དེ་སྨོན་ལམ་གྱི་དབང་གིས་མྱུར་དུ་ཐམས་ཅད་མཁྱེན་པ་ཉིད་དུ་གཞོལ་བར་འགྱུར་ཏེ། དགེ་བའི་རྩ་བའི་ཚོགས་ཆེན་པོ་དང་ལྡན་པ། བདག་མེད་པར་གནས་པ་ལས་ངེས་པར་བྱུང་བ། གང་དག་གིས་བསྐལ་པ་ཚད་མེད། གྲངས་མེད། གཞལ་དུ་མེད།་བསམ་གྱིས་མི་ཁྱབ་པའམ། དེ་བས་ཀྱང་ལྷག་པར་གོ་ཆ་ཆེན་པོ་བགོས་པ་རྣམས་ནི། མ་གཏོགས་ཏེ། དེ་དག་ཐམས་ཅད་ནི། བསམ་པ་ཇི་ལྟ་བ་བཞིན་དུ་ཐམས་ཅད་ཡོངས་སུ་རྫོགས་པར་འགྱུར། དེ་དག་ཐམས་ཅད་ནི། སྤྱོད་པའི་ཁྱད་པར་ཇི་ལྟ་བ་དང ། ཚོགས་ཇི་ལྟ་བ་བཞིན་དུ་ངེས་པར་འབྱུང་ངོ ། །བཟང་སྐྱོང ། བྱང་ཆུབ་སེམས་དཔའི་ཐེག་པ་ལ་ཞུགས་པའི་
100b
རིགས་ཀྱི་བུའམ། རིགས་ཀྱི་བུ་མོ་ཆོས་ཐམས་ཅད་ཀྱི་ཕ་རོལ་ཏུ་ཕྱིན་པ་དང ། ཐམས་ཅད་མཁྱེན་པའི་ཡེ་ཤེས་ཀྱི་ཕ་རོལ་ཏུ་ཕྱིན་པ་ཐོབ་པར་འདོད་པ་དང ། དགེ་བའི་རྩ་བ་རྣམ་པར་དག་པ་ཐོབ་པར་འདོད་པས་ཕྱི་མའི་དུས་ཕྱི་མའི་ཚེ་འཇིགས་པ་ཆེན་པོ་འབྱུང་བ། དམ་པའི་ཆོས་རྣམ་པར་འཇིག་པའི་དུས་དེར་ཏིང་ངེ་འཛིན་འདི་ཡི་གེར་བྲི་བ་དང ། ལུང་མནོད་པ་དང ། ཁ་ཏོན་བྱ་བ་དང ། གཞན་དག་ལའང་རྒྱ་ཆེར་ཡང་དག་པར་བསྒྲག་པར་བྱ་བའི་ཕྱིར་སྦྱོར་བར་བྱའོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ཀྱི་རྣམ་པ་ཐམས་ཅད་མཁྱེན་པ་ཉིད་ཀྱི་ཡེ་ཤེས་ནི། བཟང་སྐྱོང ། ཏིང་ངེ་འཛིན་འདིའི་ནང་དུ་འདུས་སོ། །སངས་རྒྱས་རྗེས་སུ་དྲན་པ་ལ་མཁས་པ་བསྒྲུབས་པས་ཆོས་ཐམས་ཅད་དངོས་པོ་མེད་པའི་རང་བཞིན་དུ་རྟོགས་པ་འདི་ནི། སངས་རྒྱས་རྗེས་སུ་དྲན་པ་སྟེ། དེ་ལ་གནས་པའི་བྱང་ཆུབ་སེམས་དཔའ་རྣམས་དམིགས་པ་ཐམས་ཅད་སངས་རྒྱས་ལ་དམིགས་པར་མོས་སོ། །དམིགས་པ་ཐམས་ཅད་དེ་བཞིན་གཤེགས་པའི་མཐར་འཇུག་པར་བྱེད་དོ། །དམིགས་པའི་དངོས་པོ་ཐམས་ཅད་རང་བཞིན་གྱིས་ཡ་མ་བསླར་ཤེས་སོ། །དེ་དག་ཇི་ལྟ་ཇི་ལྟར་དེ་བཞིན་གཤེགས་པ་རྣམས་དམིགས་པར་བྱེད་པ་དང ། ཡིད་ལ་བྱེད་པ་དེ་ལྟ་དེ་ལྟར་དེ་བཞིན་གཤེགས་པ་མཐོང་བ་རྣམ་པར་དག་སྟེ། དེ་ལྟ་བུ་ལ་གནས་པ་དེ་དག་ནི། ཕྱོགས་གང་དུའང་དེ་བཞིན་གཤེགས་པ་མངོན་སུམ་དུ་མི་འགྱུར་བ་མེད་དེ། དེ་དག་ནི། ཕྱོགས་ཐམས་ཅད་དུ་དེ་བཞིན་གཤེགས་པ་མཐོང་བ་རྣམ་
101a
༄#། །པར་སྦྱོང་ངོ ། །དེ་བཞིན་གཤེགས་པ་མཐོང་བ་རྣམ་པར་དག་ནས་ཚེགས་ཆུང་ངུས་འཇིག་རྟེན་གྱི་ཁམས་འདི་ཉིད་དུ་དམིགས་པ་བྱས་ན། འདི་ཉིད་དུ་དེ་བཞིན་གཤེགས་པ་དེ་དག་མངོན་སུམ་དུ་མཐོང་བར་འགྱུར་རོ། །ཚད་མེད་པས་དེ་དག་གི་དེ་བཞིན་གཤེགས་པ་མངོན་སུམ་དུ་མཐོང་བ་ཡོངས་སུ་དག་པར་འགྱུར་ཏེ། དེ་བཞིན་གཤེགས་པ་ཚད་མེད་པ་རྣམས་དེའི་མིག་ལམ་དུ་སྣང་བར་འགྱུར་རོ། །དམིགས་པ་ཐམས་ཅད་ཀྱི་རང་བཞིན་ནི། གཟུང་བ་མེད་པའི་ཕྱིར་དམིགས་པ་གཅིག་གིས་དམིགས་པ་ཐམས་ཅད་འཛིན་པའང་མ་ཡིན། དམིགས་པ་ཐམས་ཅད་ཀྱིས་དམིགས་པ་གཅིག་འཛིན་པའང་མ་ཡིན་ནོ། །ཆོས་ཐམས་ཅད་ཀྱི་རང་བཞིན་ཉེ་བར་བརྟགས་ན། ཤིན་ཏུ་ཉེ་བར་ཞི་བའི་ཕྱིར་དངོས་པོ་མེད་པ་ཉིད་དུ་གྲུབ་པའོ། །བཟང་སྐྱོང ། དེ་ལྟ་བུ་ལ་གནས་པ་དེ་དག་ནི། དེ་བཞིན་གཤེགས་པ་ཐམས་ཅད་མཐོང་བ་རྣམ་པར་དག་པར་འགྱུར་ལ། རྣམ་པར་དག་ནས་ཀྱང་རློམ་སེམས་སུ་མི་བྱེད། སྤྲོས་པར་མི་བྱེད་དེ། དེ་དག་ནི། དེ་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་འདི་སྒོམ་པ་ཡོངས་སུ་རྫོགས་པར་འགྱུར་རོ། །བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཀྱང་ཡོངས་སུ་རྫོགས་པ་ལ་གནས་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །དེ་བཞིན་གཤེགས་པས་གང་དག་གསུངས་པ་ནི། །ཇི་ལྟ་བཞིན་དུ་ཡེ་ཤེས་འཇུག་པ་ཡིན། །དེ་ནི་
101b
འཇིག་རྟེན་གཙོ་བོ་སྟོན་པའི་སྲས། །ཏིང་ངེ་འཛིན་འདི་ལ་ནི་ཡིད་ཀྱང་བརྩོན། །གང་གིས་སངས་རྒྱས་དམིགས་བརྗེས་དྲན་པ། །དམིགས་པའི་དོན་ནི་དུ་མ་མཐོང་བར་འགྱུར། །དེ་ལ་ཏིང་འཛིན་ཞི་བ་བལྟ་དཀའ་འདི། །ཕྱི་མའི་དུས་ན་མངོན་སུམ་དུའང་འགྱུར། །མཁས་པ་གང་ཞིག་ཆོས་ཀུན་མི་རྟེན་ཅིང ། །སེམས་ཅན་དག་ལ་ཕན་ཕྱིར་ཡིད་བརྩོན་པ། །དེ་དག་ཕྱི་དུས་འཇིགས་པ་ཆེན་པོའི་ཚེ། །ཏིང་ངེ་འཛིན་འདི་ལ་ནི་སྦྱོར་བར་འགྱུར། །སེམས་ཅན་རྣམས་ལ་ཕན་ཞིང་གཟུང་བའི་ཕྱིར། །གང་ཞིག་རྟག་ཏུ་བལྟ་དཀའ་ཆོས་འདི་ལ། །དྲན་པ་བརྟན་པར་འཇོག་ཅིང་བརྩོན་བྱེད་པ། །དེ་ཡི་ལག་ཏུ་ཏིང་འཛིན་འདི་འགྲོ་འགྱུར། །གང་ཞིག་དྲན་དང་བློ་གྲོས་རྟོགས་པ་དག་།སངས་རྒྱས་དམིགས་པར་རྟག་ཏུ་འཇོག་བྱེད་ཅིང ། །གཞན་དྲིང་མི་འཇོག་རྣལ་འབྱོར་བརྩོན་པ་དེ། །ཏིང་འཛིན་ཆེན་པོ་འདི་ལ་གནས་པར་འགྱུར། །རྗེས་སུ་གཟུང་ཕྱིར་བལྟ་དཀའ་ཚིག་ལ་གནས། །འཇིག་རྟེན་ཐམས་ཅད་ལ་ནི་ཡིད་སྐྱོ་ཞིང ། །མཁས་པ་སྲིད་པ་ཐམས་ཅད་མི་འདོད་པ། །དེ་དག་ཏིང་འཛིན་ཆེན་པོ་འདི་ལ་བརྩོན། །བྱང་ཆུབ་འདོད་ཅིང་ཕན་ཕྱིར་སྙིང་བརྩེ་གང ། །དེ་བཞིན་གཤེགས་པ་རྣམས་ཀྱི་སྐུ་ལ་རྟོག་།ཞི་བའི་ཆོས་ལ་སྨོན་ལམ་འདེབས་བྱེད་པ། །དེ་དག་ཏིང་འཛིན་འདི་ལ་བརྟེན་པར་བརྩོན། །འཐབ་པ་མེད་ཅིང་རྩོད་པ་མེད་ལ་ཞི། །བདེ་བར་གཤེགས་པས་བསྟོད་པའི་ཆོས་ཚོལ་ཞིང ། །སངས་རྒྱས་དམིགས་པ་ལ་ནི་རྟག་གནས་པ། །དེ་དག་ཏིང་འཛིན་འདི་ལ་བརྟག་བརྩོན་ཡིན།།
102a
༄#། །གང་དག་ཕྱི་མའི་སྡིག་པའི་དུས་དེ་ན། །ཏིང་ངེ་འཛིན་འདི་ལ་ནི་བརྩོན་བྱེད་པ། །སྤྱོད་པའི་ཡོན་ཏན་མཐའ་ཡས་ལ་གནས་པ། །དེ་ཡི་ཡོན་ཏན་འཇིག་རྟེན་མགོན་པོས་མཁྱེན། །གང་དག་ཟག་པ་མེད་པའི་ཆོས་ཤེས་ཤིང ། །ཤིན་ཏུ་ཚུལ་བཞིན་ཟག་པ་རྣམས་ཀྱང་ཤེས། །རྟོག་པ་མེད་སྤྱོད་མཉམ་པ་ཉིད་གནས་པ། །དེ་དག་ཏིང་འཛིན་འདི་ལ་བརྟག་བརྩོན་ཡིན། །གང་དག་བདེ་གཤེགས་ཆོས་ནི་ཚད་མེད་ལ། །ཤེས་བཞིན་དུ་ཡང་ཀུན་སྨོན་ལམ་འདེབས་ཤིང ། །ཀུན་མཁྱེན་ཡེ་ཤེས་ལ་ནི་བརྟན་གནས་པ། །དེ་ལ་ཏིང་འཛིན་ཞི་བ་འདི་སྟོན་ཏོ། །མཚན་ཉིད་མེད་ཅིང་མཚན་ཉིད་ལས་ཀྱང་འདས། །ཉོན་མོངས་པ་དང་རྣམ་དག་གང་ཡང་མེད། །རང་བཞིན་སྟོང་པའི་ཆོས་རྣམས་གང་ཤེས་པ། །དེ་དག་བདེ་བར་གཤེགས་པ་ཚད་མེད་མཐོང ། །གང་ཞིག་དམིགས་པ་མཐའ་མེད་བརྩོན་བྱེད་ཀྱང ། །དམིགས་པ་ཐམས་ཅད་སྟོང་པ་ཉིད་དུ་ཤེས། །བལྟ་བར་དཀའ་དག་མཐོང་ནས་རློམ་སེམས་མེད། ། དེས་ནི་བདེ་བར་གཤེགས་པ་ཚད་མེད་མཐོང ། །གང་ཞིག་དོན་མཐོང་ཡིད་ཀྱང་རྣམ་པར་དག་།ཉོན་མོངས་མེད་ཅིང་ཞི་བའི་གོ་འཕང་གནས། །རྡུལ་དང་བྲལ་ཞིང་མཉན་དོན་ཆོས་སྟོན་པ། །དེ་ལ་ཏིང་འཛིན་ཞི་བ་འདི་བཤད་དོ། །བདེ་གཤེགས་སྲས་པོ་ཟུག་རྡུ་ཕྱུང་བ་གང ། །བདེན་པ་མ་ཉམས་ཐེ་ཚོམ་རྣམས་དང་བྲལ། །སྲོག་ཆགས་ཕན་ཕྱིར་བྱམས་པ་སྒོམ་བྱེད་པ། །དེ་
102b
དག་ལ་ནི་དོན་མཆོག་འདི་བཤད་དོ། །གང་ཞིག་རང་བཞིན་གྱིས་ནི་མ་རིག་བྲལ། །རིག་པས་མ་རིག་གནས་ནི་སེལ་བྱེད་ཅིང ། །དོན་མཆོག་འདི་ལ་བརྩོན་པར་སྦྱོར་བྱེད་པ། །དེ་ལ་ཏིང་འཛིན་ཞི་བ་འདི་བཤད་དོ། །རྣམ་དག་གནས་ཤིང་ཀུན་ནས་ཉོན་མོངས་མེད། །ཡེ་ཤེས་མཐའ་ཡས་མངོན་པར་འདོད་བྱེད་ཅིང ། །ངེས་དོན་འདི་ལ་མཆོག་ཏུ་དགའ་ཐོབ་པ། །དེ་ལ་རྣམ་ཐར་ཞི་བ་འདི་བཤད་དོ། །གང་ཞིག་ཀུན་ཏུ་སྦྱོར་བ་ཀུན་ལས་གྲོལ། །བརྟན་ཞིང་སྲོག་ཆགས་ཀུན་ལ་སྙིང་བརྩེ་ཞིང ། །གནོད་སེམས་མེད་ཅིང་ཞི་ལམ་དགའ་བརྟེན་པ། །དེ་ལ་ཏིང་འཛིན་འདི་ནི་ཡང་དག་བསྒྲགས། ། བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་བཞི་པའོ།། །།བཟང་སྐྱོང ། ཆོས་འདི་བཞི་ནི། བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ཐོབ་པར་འགྱུར་པའོ། །བཞི་གང་ཞེ་ན། འདི་ལྟ་སྟེ། སངས་རྒྱས་ལ་གུས་པ་དང ། མི་ཕྱེད་པའི་དང་བ་ཡིད་ལ་བྱེད་པ་དང ། ཆོས་ལ་གུས་ཤིང་ཉན་འདོད་པ་དང ། ཆོས་ཀྱི་རྗེས་སུ་མཐུན་པའི་ཚིག་སྒྲུབ་པ་སྟེ།་བཟང་སྐྱོང ། ཆོས་བཞི་པོ་དེ་དག་ནི། བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ཐོབ་པར་འགྱུར་བའོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ཐོབ་པར་འགྱུར་བའི་ཆོས་བཞིའོ། །བཞི་གང་ཞེ་ན། འདི་ལྟ་སྟེ། ཡིད་ལ་ཕྱིན་ཅི་ལོག་མེད་པས་སངས་རྒྱས་ལ་དམིགས་པའི་སེམས་པ་དང ། ཆོས་ལ་ཐེ་ཚོམ་མེད་པས་དམིགས་པའི་
103a
༄#། །ངོ་བོ་ཉིད་རང་བཞིན་གྱིས་དགེ་བ་ལ་རྟོག་པ་དང ། དངོས་པོ་ལ་མཁས་པ་ལ་རྟོག་པས་ངོ་བོ་ཉིད་ཀྱིས་སྟོང་པ། རང་བཞིན་གྱིས་སྟོང་པ། ཤིན་ཏུ་སྟོང་པའི་ཆོས་ཐམས་ཅད་ལ་ཡང་དག་པར་གཞོལ་བ་དང ། འདུ་ཤེས་རྣམ་པར་འཇིག་པ་ལ་མཁས་པ། ཡོངས་སུ་གཅོད་པ་ཤེས་པ་ལ་རྟོག་པས་དངོས་པོ་ཡ་མ་བརླ་རྣམ་པར་འཇིག་པ་སྟེ། བཟང་སྐྱོང ། ཆོས་དེ་བཞི་ནི། བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་འཐོབ་པར་འགྱུར་བའོ། །བཟང་སྐྱོང ། གཞན་ཡང་བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་འཐོབ་པར་འགྱུར་བའི་ཆོས་བཞིའོ། །བཞི་གང་ཞེ་ན། འདི་ལྟ་སྟེ། སངས་རྒྱས་ཐམས་ཅད་ཀྱིས་རྗེས་སུ་བཟུང་བ་དང ། དམ་པའི་ཆོས་འཛིན་པ་ལ་མཁས་ལ་དམ་པའི་ཆོས་སྲུང་ཞིང་སྦེད་པ་དང ། སེམས་ཅན་ཐམས་ཅད་ལ་བདེ་བར་སྦྱོར་ཞིང་སེམས་ཅན་ཐམས་ཅད་ལ་སྙིང་བརྩེ་བའི་སེམས་དང ། སེམས་ཅན་གྱི་འདུ་ཤེས་རྣམ་པར་འཇིག་པ་ལ་མཁས་པ་སྟེ། བཟང་སྐྱོང ། ཆོས་དེ་བཞི་ནི། བྱང་ཆུབ་སེམས་དཔའ་རྣམས་ཏིང་ངེ་འཛིན་འདི་ཐོབ་པར་འགྱུར་བའོ། །བཟང་སྐྱོང ། དེ་བས་ན། ཕྱི་མའི་དུས་ཕྱི་མའི་ཚེ་ལྔ་བརྒྱ་པ་ཐ་མ་ལ་དམ་པའི་ཆོས་ཆེར་འཁྲུག་པའི་ཚེ་དེར་བྱང་ཆུབ་སེམས་དཔའ་ལུས་དང་སྲོག་ཀྱང་ཡོངས་སུ་བཏང་བ་ལ་གནས་ཏེ། ཏིང་ངེ་འཛིན་འདི་གཟུང་བར་བྱའོ། །ཀུན་ཆུབ་པར་བྱའོ། །བཅང་བར་བྱའོ།།
103b
བཟང་སྐྱོང ། ཆེས་ཐམས་ཅད་གཟུང་བ་ལ་མཁས་པ་ལ་བརྩོན་པའི་བྱང་ཆུབ་སེམས་དཔའ་རྣམས་ནི། དེ་བཞིན་གཤེགས་པ་རྣམས་ཀྱིས་བསྐལ་པ་བྱེ་བ་མཐའ་ཡས་པར་ཡང་དག་པར་བསྒྲུབས་པའི་ཆོས་རིན་པོ་ཆེའི་མཛོད་འདི་ཡུན་རིང་དུ་གནས་པར་བྱ་བའི་ཕྱིར་འཇོག་པར་འགྱུར། ཆོས་འདི་ལྟ་བུ་འདི་ཡང་དག་པར་བསྟན་པ་དང ། རྣམ་པར་དབྱེ་བ་དང ། ཡང་དག་པར་བསྒྲག་པར་བྱ་བའང་ནུས་པར་འགྱུར་རོ། །བཟང་སྐྱོང ། བྱང་ཆུབ་སེམས་དཔའ་རྣམས་ལ་བརྩོན་འགྲུས་ཀྱི་གནས་འདི་དག་ནི། ཡོད་དེ། བྱང་ཆུབ་སེམས་དཔའ་རྣམས་བརྩོན་འགྲུས་ཀྱི་བྱིན་གྱི་རླབས་ཀྱིས་སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་ཕྱིར་སྨོན་ལམ་ལ་འཇུག་པར་འགྱུར་རོ། །བཟང་སྐྱོང ། གང་ཞིག་ཕྱི་མའི་ཚེ་ཕྱི་མའི་དུས་དེར་ཆོས་འདི་དག་འཇོག་པར་བྱེད། ཡང་དག་པར་འཛིན་པར་འགྱུར་བའི་རིགས་ཀྱི་བུའམ་རིགས་ཀྱི་བུ་མོ་དེ་དག་ནི། སེམས་ཅན་ཐམས་ཅད་ལ་ཕན་པ་དང ། སེམས་ཅན་ཐམས་ཅད་ཡོངས་སུ་གཟུང་བ་དང ། སེམས་ཅན་ཐམས་ཅད་ཡང་དག་པར་གཟུང་བའི་ཕྱིར་ཞུགས་པ་ཡིན་ཏེ། དེ་དག་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཡོངས་སུ་བཟུང་བར་འགྱུར་རོ། །བྱང་ཆུབ་སེམས་དཔའ་དེ་འཇིག་རྟེན་གྱི་ཁམས་གཞན་ན་འདུག་ཀྱང་འཇིག་རྟེན་གྱི་ཁམས་གཞན་ན་བཞུགས་པའི་སངས་རྒྱས་བཅོམ་ལྡན་འདས་རྣམས་ཀྱིས་
104a
༄#། །དགོངས་པར་འགྱུར་རོ། །དེ་ནི། ཆོས་འདོད་པ་དང ། ཆོས་དོན་དུ་གཉེར་བ་དང ། ཆོས་བསྒྲུབ་པའི་ཕྱིར་ཕྱི་མའི་ཚེ་ཕྱི་མའི་དུས་ན་ཏིང་ངེ་འཛིན་འདིའི་ཕྱིར་བརྩོན་པར་འགྱུར་རོ། །གང་དག་ཕྱི་མའི་ཚེ་ཕྱི་མའི་དུས་ན་ཆོས་ཀྱི་རྣམ་གྲངས་འདི་ལྟ་བུ་འདི་འཛིན་པར་འགྱུར་བ་དེ་དག་ནི། བྱང་ཆུབ་སེམས་དཔའི་ཆོས་རྣམས་དང ། བྱང་ཆུབ་སེམས་དཔའི་ནོར་རྣམས་ཀྱིས་ཡང་དག་པར་བཟུང་བར་འགྱུར་རོ། །གང་དག་ཕྱི་མའི་ཚེ་ཕྱི་མའི་དུས་ན་ཆོས་འདི་ལྟ་བུ་འདི་དག་ཡོངས་སུ་གཟུང་བའི་ཕྱིར་གནས་པར་འགྱུར་བ་དེ་དག་ནི། དེ་བཞིན་གཤེགས་པའི་སྟོབས་བཅུ་དང ། མི་འཇིགས་པ་བཞི་དང ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང ། སངས་རྒྱས་ཀྱི་ཆོས་ཐམས་ཅད་ཀྱང་མྱུར་དུ་འཛིན་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །གང་ཞིག་བརྟན་པ་ཆོས་སེམས་པ། །ཕྱི་མའི་དུས་སུ་གྱུར་པ་ན། །དམ་ཆོས་གཟུང་ཕྱིར་གནས་གྱུར་པ། །དེ་དག་ལ་ནི་གཟུངས་འདི་བཤད། །གང་དག་དམ་ཆོས་རིན་ཆེན་ཕྱིར། །འཇིགས་པ་མེད་པར་བརྩོན་བྱེད་ཅིང ། །སྙིང་ཡང་བརྩེ་ལ་སྙིང་རྗེ་ཅན། །དེ་དག་ཆོས་ཀྱང་འཛིན་པར་གནས། །བརྟན་ཅིང་བག་ཡོད་དགའ་བ་དང ། །ཐུབ་པའི་ཆོས་ཀྱི་མཛོད་འཛིན་པ། །དེ་དག་དོན་དུ་ཏིང་ངེ་འཛིན། །སངས་རྒྱས་བསྔགས་པ་བསྟན་པ་ཡིན། །གང་ཞིག་ཆོས་རྒྱལ་སྐྱོབ་པ་ཡིས། །གང་དག་བྱིན་གྱིས་
104b
བརླབས་གྱུར་པ། །དེ་དག་ཕྱི་དུས་འཇིགས་བཅས་ཚེ། །ཆོས་ཉིད་འདི་ནི་འཛིན་པར་འགྱུར། །ཤིན་ཏུ་ངོ་བོ་ཉིད་ཀྱིས་ནི། །ཆོས་རྣམས་སྟོང་ཞིང་སྤྲོས་མེད་པར། །དྲན་དང་ལྡན་པ་གང་གིས་ཤེས། ། དེ་དག་ཆོས་ཀྱང་འཛིན་པར་འགྱུར། །ཐམས་ཅད་ཆོས་ཀྱི་ངོ་བོ་ཉིད། །དེ་ལ་བསམ་ཡས་ཚིགས་སུ་བཅད། །ངེས་པ་ཉིད་དུ་ཤེས་གྱུར་པ། །དེ་དག་ཆོས་ཀྱང་འཛིན་པར་འགྱུར། །ཟད་པ་ཤེས་ལ་གནས་གྱུར་ཅིང ། །མི་སྐྱེ་བ་ལའང་རབ་གནས་ལ། །སེམས་ནི་དུལ་ཞིང་ངོ་ཚ་ལྡན། །དེ་དག་ཆོས་ཀྱང་འཛིན་པར་འགྱུར། །བདེ་བའི་ལམ་ནི་བླ་ན་མེད། །ཅང་ཤེས་ལམ་ལ་ཞུགས་གྱུར་པ། ། བརྩོན་འགྲུས་བྱིན་གྱིས་བརླབས་དང་ལྡན། །དེ་དག་ཆོས་འཛིན་གནས་པ་ཡིན། །དེ་བཞིན་ཉིད་དང་མི་རྟོག་དོན། །གང་གིས་ཆོས་ཉིད་རབ་ཏུ་ཤེས། །དེ་ལ་སྤྲོས་པ་ཅི་ཡང་མེད། །དེ་དག་ཆོས་ཀྱང་འཛིན་པར་འགྱུར། །ཐམས་ཅད་ཆོས་ནི་བྱེད་མེད་པར། །དེས་པ་གང་གིས་ཤེས་པ་དེ། །ཅི་ཡང་མེད་ཅིང་ལེན་མེད་པའི། །ཆོས་ཉིད་དེ་ནི་སྒྲོག་པར་འགྱུར། །འཛིན་པ་མེད་ཅིང་འཛིན་དང་བྲལ། ། ཆོས་ཀུན་སྔོན་ནས་ཡོངས་དག་པར། །གང་གིས་ཤེས་པ་དེ་དག་ནི། །ཆོས་ཀྱི་སྤྱོད་ཡུལ་གནས་པ་ཡིན། །ཆོས་ཀུན་ངོ་བོ་མེད་པར་ནི། །དེ་ལྟར་ཆོས་ལ་གང་གིས་ཤེས། །དེ་དག་ཆོས་ཉིད་འདི་སྟོན་འགྱུར། །དེ་ནི་འཇུག་པ་ཡིན་པར་བཤད། །མིང་མེད་མིང་དང་བྲལ་གྱུར་ཅིང ། །སྤྲོས་པ་མེད་ཅིང་མི་སྐྱེ་བར། །གང་གིས་ཆོས་ཉིད་རབ་ཤེས་པ། །དེ་དག་སྟོང་པ་ཉིད་ཀྱང་སྒྲོག །
105a
༄#། །གནས་པ་མེད་ཅིང་འགྲོ་བ་མེད། །ནམ་མཁའི་གནས་བཞིན་དག་པར་ནི། །གང་གིས་ཆོས་འདི་ཤེས་གྱུར་པ། །དེ་ལ་ཏིང་འཛིན་སྐྱེ་བར་འགྱུར། །གང་དག་འདུ་ཤེས་དོན་རྟོག་བྲལ། །ངོ་བོ་ཉིད་དུ་མ་སྐྱེས་ཤིང ། །དངོས་པོའི་འདུ་ཤེས་བྲལ་གྱུར་པ། །དེ་དག་ཆོས་ཉིད་སྟོན་པར་འགྱུར། །རྒྱས་གང་བ་དེ་ནི་རྒྱ་མེད་དེ། །དགོངས་པའི་ཚིག་ཏུ་གསུངས་པ་ཡིན། །གང་གིས་དེ་ལྟར་ཤེས་གྱུར་པ། །དེ་དག་ཆོས་ཉིད་འདི་འཛིན་འགྱུར། །བཟང་སྐྱོང་གིས་ཞུས་པའི་ཏིང་ངེ་འཛིན་གྱི་ལེའུ་སྟེ་ཉི་ཤུ་རྩ་ལྔ་པའོ།། །།བཟང་སྐྱོང ། དེ་ལྟ་བས་ན། རིགས་ཀྱི་བུའམ། རིགས་ཀྱི་བུ་མོ་དེ་དག་གིས་བག་ཡོད་པ་ལྷུར་བླངས་ཏེ་ཆོས་འདི་དག་ཡང་དག་པར་བསྡུ་བར་བྱའོ། །འདིའི་ཕན་ཡོན་དུ་ཡང་སྦྱར་བར་བྱའོ། ། ཚུལ་བཞིན་དང་ཡང་ལྡན་པར་བྱའོ། །ཚུལ་བཞིན་མ་ཡིན་པའང་ཡོངས་སུ་སྤང་བར་བྱ་སྟེ། དེ་ལྟར་ན་ཆོས་ཟབ་མོ་བལྟ་བར་དཀའ་བ། རྟོགས་པར་དཀའ་བ་གང་སངས་རྒྱས་ཀྱི་ཆོས་ཐམས་ཅད་སྐྱེད་པར་བྱེད་པ། རང་བྱུང་རྣམས་ཀྱི་ཡེ་ཤེས་དང ། ཐོགས་པ་མེད་པའི་ཡེ་ཤེས་ཐོབ་པར་བྱེད་པ་འདི་རྙེད་མི་དཀའ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་དང ། ཚེ་དང་ལྡན་པ་འོད་སྲུང་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། ལི་ཙ་བྱི་གཞོན་ནུ་རིན་ཆེན་འབྱུང་གནས་དང །
105b
ཁྱིམ་བདག་དེད་དཔོན་ཆེ་བཟང་དང ། ཚོང་དཔོན་གྱི་བུ་ཕུག་སྤས་དང ། བྲམ་ཟེ་འདམ་བུས་བྱིན་དང ། བྱང་ཆུབ་སེམས་དཔའ་དབང་པོས་བྱིན་དང ། ཁྱིམ་བདག་ཆུ་ལྷ་དང ། བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་དང ། འཁོར་བཞི་པོ་ལས་ཇི་སྙེད་ཅིག་འདུས་པ་དེ་དག་ཐམས་ཅད་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་རྣམས་ལ་བཀའ་སྩལ་པ།་རིགས་ཀྱི་བུ་རྣམས། ངས་བསྐལ་པ་བྱེ་བ་ཁྲག་ཁྲིག་ཕྲག་བརྒྱ་སྟོང་དུ་ཡང་དག་པར་བསྒྲུབས་པ་བླ་ན་མེད་པའི་ཆོས་རིན་པོ་ཆེ་འདིའི་མཛོད་དང ། འཇིག་རྟེན་ཐམས་ཅད་ཡིད་ཆེས་པར་མི་འགྱུར་བ་ཟབ་མོ། །དོན་ཟབ་པ། རྣམ་པར་ཐར་པ་སྒོ་གསུམ་གྱི་ཚུལ་བཤད་པ་ཟབ་མོ། །བྱང་བ། མཐོང་བར་དཀའ་བ། རྟོགས་པར་དཀའ་བ། མཁས་ཤིང་ཤེས་པས་རིག་པ། རྒྱ་ཆེ་བ།་གྱ་ནོམ་པ། དོན་ཕུན་སུམ་ཚོགས་པའི་མདོ་སྡེ་འདི་ལྟ་བུ་འདིའང་ཁྱེད་ལ་གཏད་དོ། །རྗེས་སུ་གཏད་དོ། །གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྟེན་དུ་གྱུར་པ་དེ་དག་ཀྱང་ཁྱེད་ལ་ཉིས་འགྱུར་དུ་རྗེས་སུ་གཏད་གྱི། ཁྱེད་ཀྱིས་ཀྱང་ཅི་ནས་ཀྱང་བྲི་བར་བྱའོ། །མཉན་པར་བྱའོ། །གཟུང་བར་བྱའོ། །ཀུན་ཆུབ་པར་བྱའོ། །བཅད་པར་བྱའོ། །བཀླག་པར་བྱའོ། །ཤིན་ཏུ་རྒྱས་པ་དང ། རྒྱ་ཆེར་བྱ་བའི་ཕྱིར་གཞན་དག་ལའང་རྒྱ་ཆེར་བཤད་པར་བྱའོ། །བསྟན་པར་བྱའོ། །ཡང་དག་པར་བསྒྲག་པར་བྱའོ། །སེམས་ཅན་ཐམས་ཅད་རྗེས་སུ་
106a
༄#། །གཟུང་བའི་ཕྱིར་སྒོམ་པའི་སྦྱོར་བ་ལ་བརྩོན་པར་བྱའོ། །འདི་སྐད་\?\་བསྟན་པ་བཞིན་དུ་ཆོས་ཀྱི་རྗེས་སུ་མཐུན་པའི་ཆོས་བསྒྲུབ་པར་བྱ་སྟེ། དེ་ཅི་ནས་ཀྱང་སྐྱེས་བུ་ཐ་མ་པར་མ་གྱུར་པར་བྱའོ། །བཟང་སྐྱོང ། རིགས་ཀྱི་བུའམ། རིགས་ཀྱི་བུ་མོ་གང་\?\་ལ་ལ་ཞིག་ཏིང་ངེ་འཛིན་འདི་ཐོས་ལ་ཐོས་ནས་ཀྱང་ལུང་ནོད་པར་བྱེད། ཁ་ཏོན་དུ་བྱེད། ཀུན་ཆུབ་པར་བྱེད་ན། དེས་ལྷག་པའི་བསམ་པས་གུས་པར་བྱ་སྟེ། མཉན་པར་བྱའོ། །ལུང་མནོད་པར་བྱའོ། །བཤད་པར་བྱའོ། །གང་དག་གཞན་དག་ལ་སྟོན་ཏམ། ཀློག་ཏུ་འཇུག་ན། དེས་ཀྱང་ལྷག་པའི་བསམ་པས་རྒྱ་ཆེར་བྱ་བའི་ཕྱིར་ཅི་ནས་ཀྱང་ཏིང་ངེ་འཛིན་འདི་ཡུན་རིང་དུ་གནས་པ་དང ། ཤིན་ཏུ་རྒྱས་པ་དང ། ཤིན་ཏུ་རྒྱ་ཆེ་བར་གཞན་དག་ལ་བསྟན་པར་བྱ། ཀློག་ཏུ་གཞུག་པར་བྱ་སྟེ། འདི་ནི། ཁྱེད་ལ་རྗེས་སུ་བསྟན་པ་ཡིན་ནོ། །ཆོས་ཀྱི་རྣམ་གྲངས་འདི་བཤད་པའི་ཚེ་སེམས་ཅན་གྲངས་མེད་ཚད་མེད་པ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བ་བསྐྱེད་དོ། །བྱང་ཆུབ་སེམས་དཔའ་གང་སངས་རྒྱས་ཀྱི་ཞིང་དཔག་ཏུ་མེད་པ་ནས་འདུས་པ་གངྒཱའི་ཀླུང་གི་བྱེ་མ་སྙེད་ཀྱིས་ཏིང་ངེ་འཛིན་འདི་ཉིད་ཐོབ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའང་རྣམ་པ་དྲུག་ཏུ་
106b
གཡོས་སོ། །ལྷ་རྣམས་ཀྱིས་ཀྱང་བར་སྣང་ལས་མེ་ཏོག་གི་ཆར་ཕབ་བོ། །རྔ་བོ་ཆེ་དག་ཀྱང་མ་བརྡུངས་པར་སྒྲ་བྱུང་ངོ ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་དང ། དགེ་སློང་དེ་དག་དང ། བྱང་ཆུབ་སེམས་དཔའ་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ།་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ད་ལྟར་གྱི་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་ཅེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་པྲ་བྷ་དང ། ཞུ་ཆེན་གྱི་ལོ་ཙཱ་བ་བནྡྷེ་རཏྣ་རཀྵི་ཏས་ཞུས་ཏེ་གཏན་ལ་ཕབ་པ། སྐད་གསར་བཅད་ཀྱིས་ཀྱང་བཅོས་ལགས །