།།རྒྱ་གར་སྐད་དུ། ཨཱརྱ་པྲཧྨ་ཤྲཱི་བྱཱ་ཀ་ར་ཎ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཚངས་པའི་དཔལ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་ 314b བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་མང་པོ་དང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་སྔ་དྲོ་ཤམ་ཐབས་དང ། ཆོས་གོས་གསོལ་ཏེ་ལྷུང་བཟེད་བསྣམས་ནས་མཉན་ཡོད་ཀྱི་གྲོང་ཁྱེར་དུ་བསོད་སྙོམས་ལ་གཤེགས་སོ། །ཡང་དེའི་ཚེ་མཉན་ཡོད་ཀྱི་གྲོང་ཁྱེར་གྱི་ཕྱི་རོལ་ན་བྱིས་པ་ཕལ་པོ་ཆེ་དག་ས་རྡུལ་གྱི་ཁྱིམ་དང ། ས་རྡུལ་གྱི་ར་བ་དང ། ས་རྡུལ་གྱི་ཁང་པ་བརྩེགས་པ་དག་གིས་རྩེ་ཞིང་འཁོད་པ་ལས་བྱིས་པ་ཕལ་པོ་ཆེ་དེ་དག་གིས་ཐག་རིང་པོ་ཞིག་ནས་བཅོམ་ལྡན་འདས་གཤེགས་པ་མཐོང་ངོ ། །མཐོང་ནས་ཀྱང་ལྷག་པར་དགའ་བ་དང ། རབ་ཏུ་དགའ་བ་དང ། ཡིད་བདེ་བ་སྐྱེས་ཏེ་རྩེ་དགའ་ཞིང་འཁོད་དོ། །དེ་ནས་བཅོམ་ལྡན་འདས་ཁྱེའུ་དེ་དག་ལ་ཐུགས་བརྩེ་བའི་ཕྱིར་གང་ན་ཁྱེའུ་དེ་དག་རྩེ་ཞིང་འཁོད་པའི་ས་ཕྱོགས་དེར་གཤེགས་སོ། །དེ་ནས་བྱིས་པ་དེ་དག་གི་ནང་ནས་ཁྱེའུ་ཚངས་པའི་དཔལ་ཞེས་བྱ་བ་ཞིག་བཅོམ་ལྡན་འདས་ཀྱི་ཞབས་ལ་ཕྱག་བཙལ་ནས། བཅོམ་ལྡན་འདས་ཀྱི་སྤྱན་སྔར་འདུག་གོ་།དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་བྱིས་པ་དེ་དག་ལ་འདི་སྐད་ཅེས་བཀའ་སྩལ་ཏོ། །བྱིས་པ། ཁྱོད་འདི་ན་ཅི་བྱེད། དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཁྱེའུ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་ 315a ༄#། །འདས། བདག་ཅག་འདི་ན་ས་རྡུལ་གྱི་ཁྱིམ་དག་དང ། ས་རྡུལ་གྱི་ར་བ་དག་དང ། ས་རྡུལ་གྱི་ཁང་པ་བརྩེགས་པ་དག་གིས་རྩེ་ཞིང་མཆིས་ལགས་སོ། །དེ་ནས་བཅོམ་ལྡན་འདས་ལ་ཁྱེའུ་ཚངས་པའི་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལ་ཐུགས་བརྩེ་བའི་སླད་དུ་ས་རྡུལ་གྱི་ཁང་པ་བརྩེགས་པ་འདི་བཞེས་སུ་གསོལ་དེ་ནས་བཅོམ་ལྡན་འདས་ཀྱིས་ཁྱེའུ་ཚངས་པའི་དཔལ་གྱི་ལྷག་པའི་བསམ་པ་དང ། དགའ་བའི་སེམས་ཐུགས་སུ་ཆུད་ནས་ཐུགས་བརྩེ་བའི་ཕྱིར་ས་རྡུལ་གྱི་ཁང་པ་བརྩེགས་པ་དེ་བཞེས་སོ། །དེ་ནས་སངས་རྒྱས་ཀྱི་མཐུས་སྐད་ཅིག་དེ་དང ། ཡུད་ཙམ་དེ་ལ་ས་རྡུལ་གྱི་ཁང་པ་བརྩེགས་པ་དེ་རིན་པོ་ཆེ་སྣ་བདུན་ལས་གྲུབ་པའི་ཁང་པ་བརྩེགས་པ་ཞིག་ཏུ་གྱུར་ནས། བཅོམ་ལྡན་འདས་ཀྱི་སྤྱན་སྔ་ན་འདུག་པར་གྱུར་ཏེ། དེའི་ཤར་ཕྱོགས་ཀྱི་ངོས་སུ་ནི་གསེར་གྱི་ཀ་བ་བརྒྱད་ཁྲི་བཞི་སྟོང་ཟུག་པར་གྱུར། ལྷོ་ཕྱོགས་ཀྱི་ངོས་སུ་ནི་དངུལ་གྱི་ཀ་བ་བརྒྱད་ཁྲི་བཞི་སྟོང་ཟུག་པར་གྱུར། ནུབ་ཕྱོགས་ཀྱི་ངོས་སུ་ནི་བཻ་ཌཱུརྱའི་ཀ་བ་བརྒྱད་ཁྲི་བཞི་སྟོང་ཟུག་པར་གྱུར། བྱང་ཕྱོགས་ཀྱི་ངོས་སུ་ནི་ཤེལ་གྱི་ཀ་བ་བརྒྱད་ཁྲི་བཞི་སྟོང་ཟུག་པར་གྱུར་ཏོ། །དེ་ནས་དེའི་ཚེ་ཁྱེའུ་ཚངས་པའི་དཔལ་གྱིས་རྫུ་འཕྲུལ་གྱི་ཆོ་འཕྲུལ་དེ་མཐོང་ནས་ལྷག་པར་ཡང་ཆེས་དགའ་བ་དང ། མཆོག་ཏུ་དགའ་བ་ 315b རྒྱ་ཆེན་པོ་སྐྱེས་པར་གྱུར་ཏོ། །ད་ནས་བཅོམ་ལྡན་འདས་ལ་ཁྱེའུ་ཚངས་པའི་དཔལ་གྱིས་ཚིགས་སུ་བཅད་པ་འདི་དག་གསོལ་ཏོ། །ཀྱེ་མ་འཇིག་རྟེན་མགོན་པོ་ཡིས། །རྫུ་འཕྲུལ་ཤིན་ཏུ་རྒྱ་ཆེན་བསྟན། ། བདག་ཉིད་ལ་ནི་ཐུགས་བརྩེའི་ཕྱིར། །སངས་རྒྱས་ཀྱིས་ནི་རྫུ་འཕྲུལ་བསྟན། །དྲང་སྲོང་ཆེ་ལ་བདག་གིས་ནི། །ས་རྡུལ་ཁང་བརྩེགས་ཕུལ་བ་དེ། །རིན་པོ་ཆེ་ལས་གྲུབ་པར་གྱུར། །ཀྱེ་མ་སངས་རྒྱས་བསམ་མི་ཁྱབ། །ཀྱེ་ཀྱེ་ཞིང་ནི་འདི་འདྲ་བ། །སངས་རྒྱས་ཞིང་ནི་བླ་མེད་དང ། །མིག་མེད་མིག་ནི་ཉམས་པ་དང ། །ཤེས་རབ་ཆུང་ངུས་མི་ཤེས་སོ། །རྐང་གཉིས་དམ་པ་འགྲོ་བའི་ཞིང ། །འདི་ནི་བདག་གིས་རྙེད་པ་དང ། །དལ་བ་རབ་དཀོན་ཐོབ་པས་ན། །བྱང་ཆུབ་ཏུ་ནི་སྨོན་ལམ་གདབ། །བདག་ཀྱང་འདྲེན་པ་ཁྱོད་ཀྱི་ནི། །ཡོན་ཏན་རྗེས་སུ་སློབ་པར་ཚལ། །བླ་མེད་བྱང་ཆུབ་ཐོབ་ནས་ནི། །རྫུ་འཕྲུལ་འདི་འདྲ་བདག་གིས་བགྱི། །དེ་ནས་དེའི་ཚེ་བཅོམ་ལྡན་འདས་ཀྱིས་འཛུམ་པ་མཛད་ནས་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་གྱི་ཁ་དོག་དང ། དངུལ་གྱི་ཁ་དོག་ལྟ་བུ་དག་བྱུང་ངོ ། །དེ་དག་བྱུང་ནས་ཚངས་པའི་འཇིག་རྟེན་གྱི་བར་དུ་སོང་སྟེ། ཡང་སླར་ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་དབུའི་གཙུག་ཏོར་དུ་ནུབ་པར་གྱུར་ཏོ། ། 316a ༄#། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཚིགས་སུ་བཅད་དེ་གསོལ་པ། རྒྱལ་མཆོག་འདྲེན་པ་འགྲོ་བའི་གཙོ་བོ་རྣམས། །རྒྱུ་མ་མཆིས་པར་འཛུམ་པ་མི་མཛད་ན། །ཐུགས་རྗེ་ལྡན་པ་འཇིག་རྟེན་སྨན་སླད་དུ། །དེང་འདིར་ཅི་ཕྱིར་འཛུམ་མཛད་བདག་ལ་གསུངས། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ཁྱོད་ཀྱིས་ཁྱེའུ་ཚངས་པའི་དཔལ་འདི་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཁྱེའུ་འདི་དགེ་བའི་རྩ་བ་འདི་དང ། སེམས་ཀྱི་སྨོན་པ་འདིས་ནི་བསྐལ་པ་སུམ་སྟོང་ཉིས་བརྒྱའི་བར་དུ་ནམ་ཡང་སེམས་ཅན་དམྱལ་བར་འགྲོ་བར་མི་འགྱུར་རོ། །དེས་བྱང་ཆུབ་བསྒྲུབས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་ལས་མངོན་པར་འཕགས་པ་ཞེས་བྱ་བར་འགྱུར་རོ། །ཞེས་གསུངས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་ལ་ནི་དད་པ་ཡིས། །བསོད་ནམས་ཆུང་ངུ་སྐྱེ་མི་འགྱུར། །ཆོས་མཆོག་ཐོས་དང་དགེ་འདུན་ལ། །གུས་པར་བྱས་པའང་དེ་བཞིན་ནོ། །སངས་རྒྱས་ལ་ནི་དད་པ་ལ། །བྱང་ཆུབ་ཐོབ་པར་དཀའ་བ་ 316b མེད། །དེ་ཕྱིར་བྱང་ཆུབ་འདོད་པས་འདིར། །འཇིག་རྟེན་འདྲེན་པ་མཆོད་པར་བྱ། །ཀུན་དགའ་ཁྱེའུ་འདི་རྐང་གཉིས་ཀྱི། །མཆོག་སྟེ་དཔལ་དང་ལྡན་པ་ཡི། །མངོན་པར་འཕགས་པ་ཞེས་བྱ་བ། །འཇིག་རྟེན་གྱི་ནི་འདྲེན་པར་འགྱུར། །དེ་ལྟར་སངས་རྒྱས་བསམ་མི་ཁྱབ། །སངས་རྒྱས་ཆོས་ཀྱང་དེ་བཞིན་ཏེ། །བསམ་མི་ཁྱབ་ལ་དད་པ་ཡི། །རྣམ་པར་སྨིན་པའང་དེ་བཞིན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང ། ཁྱེའུ་ཚངས་པའི་དཔལ་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །འཕགས་པ་ཚངས་པའི་དཔལ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་བི་ཤུདྡྷ་སིདྷ་དང ། ལོ་ཙཱ་བ་བནྡེ་དགེ་བ་དཔལ་གྱིས་བསྒྱུར། རྒྱ་གར་གྱི་མཁན་པོ་བིདྱཱ་ཀ་ར་སིདྷི་དང ། ཞུས་ཆེན་གྱི་ལོ་ཙཱ་བ་བནྡེ་དེ་བ་ཙནྡྲས་ཞུས་ཏེ་གཏན་ལ་ཕབ་པ།། |