རྒྱ་གར་སྐད་དུ། ཨརྱ་དྷརྨ་ཨརྠ་བི་བྷ་ག་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཆོས་དང་དོན་རྣམ་པར་འབྱེད་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉམ་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ 65a ༄#། །ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའི་དགེ་འདུན་ཆེན་པོ་དང་ཡང་ཐབས་ཅིག་གོ་།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བས་དགའ་ལ་བཀའ་སྩལ་པ། རིགས་ཀྱི་བུ། སྔོན་བྱུང་བ་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་ཅིང་ཚད་མེད་པར་གྱུར་པ་དེའི་ཚེ་དེའི་དུས་ན་འཇིག་རྟེན་གྱི་ཁམས་མེ་ཏོག་གི་འབྱུང་གནས་ཞེས་བྱ་བ་འབྱོར་བ་རྒྱས་པ། བདེ་བ། ལོ་ལེགས་པ།་ཉམས་དགའ་བ། སྐྱེ་བོ་མང་པོ་དང་མི་རྣམས་ཀྱིས་གང་བ། ལག་མཐིལ་ལྟར་མཉམ་པར་གྱུར་བ་ཞིག་བྱུང་ངོ ། །རིགས་ཀྱི་བུ། འཇིག་རྟེན་གྱི་ཁམས་མེ་ཏོག་གི་འབྱུང་གནས་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ལས་བྱུང་བ་ཞེས་བྱ་བ་ད་ལྟར་ཡང་བཞུགས་ཏེ་འཚོ་ཞིང་གཞེས་ལ་འཁོར་བཞི་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་རྣམས་ལ་ཆོས་ཀྱང་སྟོན་ཏོ། །རིགས་ཀྱི་བུ།་འཇིག་རྟེན་གྱི་ཁམས་མེ་ཏོག་གི་འབྱུང་གནས་དེ་ན་མིའི་དབང་པོ་འཁོར་ལོས་བསྒྱུར་བའི་རྒྱལ་པོ་སྟོང་གསུམ་ཡི་སྟོང་ཆེན་པོའི་འཇིག་རྟེན་གྱི་ཁམས་ལ་དབང་བྱེད་པ་རྒྱལ་བ་ 65b ཐོབ་པ་ཞེས་བྱ་བ་ཞིག་བྱུང་ངོ ། །རིགས་ཀྱི་བུ། རྒྱལ་པོ་རྒྱལ་བ་ཐོབ་པ་དེའི་ཚེ་ཚིག་རབ་ལ་སེམས་ཅན་དེ་དག་བདེ་ཞིང་ཡིད་བདེ་བ་སྐྱེས་ལ། དགེ་བ་བཅུའི་ལས་ཀྱི་ལམ་དང་ལྡན་ཞིང་བདག་གི་ཆུང་མས་མངོན་པར་དགའོ། །སེམས་ཅན་དེ་དག་ཐམས་ཅད་ཀྱང་ཐེག་པ་གཅིག་ལ་ཡང་དག་པར་ཞུགས་པ་ཤ་སྟག་སྟེ། འདི་ལྟ་སྟེ། ཐེག་པ་ཆེན་པོ་ལ་ཡང་དག་པར་ཞུགས་པ།་ཐེག་པ་མཆོག་ལ་ཡང་དག་པར་ཞུགས་པ། ཐེག་པ་གཙོ་བོ་ལ་ཡང་དག་པར་ཞུགས་པ། ཐེག་པ་དམ་པ་ལ་ཡང་དག་པར་ཞུགས་པ། ཐེག་པ་ཁྱད་པར་དུ་འཕགས་པ་དང ། རབ་དང ། ཕུལ་དང ། བླ་མ་དང ། བླ་མའི་ཡང་བླ་མ་དང ། བླ་ན་མེད་པ་ལ་ཡང་དག་པར་ཞུགས་པ། ཐེག་པ་མཉམ་པ་མེད་པ་ལ་ཡང་དག་པར་ཞུགས་པ། ཐེག་པ་མི་མཉམ་པ་དང་མཉམ་པ་ལ་ཡང་དག་པར་ཞུགས་པ། ཐེག་པ་བསམ་གྱིས་མི་ཁྱབ་པ་ལ་ཡང་དག་པར་ཞུགས་པ། ཐེག་པ་གཞལ་དུ་མེད་པ་ལ་ཡང་དག་པར་ཞུགས་པ་ཤ་སྟག་གོ་།རིགས་ཀྱི་བུ ། རྒྱལ་པོ་རྒྱལ་བ་ཐོབ་པ་དེའི་ཚེ་ཚིག་རབ་ལ་ཐེག་པ་ཆེན་པོ་མ་གཏོགས་པར་ཐེག་པ་གཞན་གྱི་མིང་ཡང་མི་གྲགས་སོ། །རིགས་ཀྱི་བུ། རྒྱལ་པོ་རྒྱལ་བ་ཐོབ་པ་དེའི་བཙུན་མོའི་འཁོར་ནི ། དགུ་ཁྲི་དགུ་སྟོང་ཡོད་དེ། དེ་དག་ཐམས་ཅད་ཀྱང་ཐེག་པ་གཞན་མ་ཡིན་པ་ལ་ཡང་དག་པར་ཞུགས་པ། ཐེག་པ་ཆེན་པོའི་ཁོང་སུ་འདུས་པ། ཉིན་མཚན་དུ་ཆོས་འདོད་ཅིང་ཆོས་ལ་ 66a ༄#། །དགའ་བ་ཤ་སྟག་གོ་།རིགས་ཀྱི་བུ། དེ་ནས་རྒྱལ་པོ་དེའི་བཙུན་མོ་དམ་པ་རིན་པོ་ཆེ་དཔལ་ཞེས་བྱ་བ་བྱང་ཆུབ་སེམས་དཔའ་སྡུད་པ། སངས་རྒྱས་དང་ཆོས་དང་དགེ་འདུན་ལ་ཡང་དག་པར་ཞུགས་པ། ཐེག་པ་ཆེན་པོའི་ཁོངས་སུ་འདུས་པ། ཉིན་མཚན་དུ་ཆོས་འདོད་པ། ཆོས་ཀྱི་ཀུན་དགའ་ལ་དགའ་བ་ཞིག་ཡོད་དེ། རིགས་ཀྱི་བུ། རིན་ཆེན་དཔལ་དེ་ཆེན་པོ་ལ་འོས་པའི་སེངྒེའི་ཁྲི་ལ་འདུག་པ་དང ། དེའི་པང་ནས་བུ་རིན་ཆེན་འབྱུང་གནས་ཞེས་བྱ་བ་ལྷའི་རྒྱན་གྱིས་རྣམ་པར་བརྒྱན་པ། ལྷའི་གོས་བགོས་པ། ལུས་མཚན་དང་དཔེ་བྱད་བཟང་པོས་ལེགས་པར་བརྒྱན་པ་ཞིག་སྐྱིལ་མོ་ཀྲུང་བཅས་ཏེ་བྱུང་ནས་གཞོན་ནུ་དེ་བྱུང་མ་ཐག་ཏུ་གཞོན་དུ་དེས་མ་ལ་འདི་སྐད་ཅེས་སྨྲས་སོ། །ཡུམ། དེ་བཞིན་གཤེགས་པ་མེ་ཏོག་ལས་བྱུང་བ་དེ་འཚོའམ། དེ་ནས་རྒྱལ་མོ་རིན་ཆེན་དཔལ་དེས་གཞོན་ནུ་དེ་ལ་འདི་སྐད་ཅེས་སྨྲས་སོ། །བུ་གཅིག་ཀུན་མཁྱེན་འཇིག་རྟེན་མགོན། །བླ་ན་མེད་པ་དགའ་མཛད་པ། །ལྷ་དང་མི་དང་བཅས་པ་ཡི། །འཇིག་རྟེན་ན་ནི་དེ་འཚོ་འོ། །དེ་ནས་རྒྱལ་བུ་རིན་ཆེན་འབྱུང་གནས་ཀྱིས་ཕ་མ་ལ་འདི་སྐད་ཅེས་སྨྲས་སོ། །ཡབ་ཡུམ་ཚུར་གཤེགས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ལས་བྱུང་བ་དེ་ལ་བལྟ་བ་དང ། ཕྱག་བགྱི་བ་དང ། མཆོད་པ་དང ། བསྙེན་བཀུར་བགྱི་བ་དང ། 66b ཆོས་མཉམ་པའི་སླད་དུ་གཤེགས་སོ། །དེ་ཅིའི་སླད་དུ་ཞེ་ན། ཡབ་ཡུམ། དེ་བཞིན་གཤེགས་པ་དེ་ནི། ལྷ་དང་མིར་བཅས་པའི་འཇིག་རྟེན་ན་དཀའ་བ་མཛད་པ་སྟེ། མ་གྲོལ་བ་རྣམས་གྲོལ་མཛད་མགོན། །ལྗོངས་པ་རྣམས་ལ་མིག་སྦྱིན་མཛད། །ཆོས་ལ་དཔའ་ཞིང་ཆེར་དཔའ་བ། །ལྷུན་པོ་ལྟ་བུར་མི་གཡོས་སོ། །དེ་ནས་རྒྱལ་པོ་རྒྱལ་བ་ཐོབ་དང ། རྒྱལ་མོ་རིན་ཆེན་དཔལ་གྱིས་བུ་དེ་བླངས་ཏེ་བཙུན་མོའི་འཁོར་དང་གཡོག་ཏུ་བཅས་པར་བཅོམ་ལྡན་འདས་དེའི་ཞབས་ཀྱི་དྲུང་དུ་ཕྱིན་ནས་བཅོམ་ལྡན་འདས་ལ་ལན་བདུན་བསྐོར་བ་བྱས་ཏེ་བརྒྱ་སྟོང་རི་བའི་མུ་ཏིག་གི་སེ་མོ་དོ་ཕུལ་ལོ། །ཕུལ་ནས་ཀྱང་འཁོར་དེ་ཉིད་དུ་འདུག་པར་གྱུར་ཏོ། །རིགས་ཀྱི་བུ། དེ་ནས་རྒྱལ་བུ་དེས་རྫུ་འཕྲུལ་གྱི་སྟོབས་སྐྱེད་པ་བྱས་ནས་ཤིང་ཏ་ལ་བདུན་སྲིད་ཙམ་གྱི་བར་སྣང་གི་ནམ་མཁའ་ལ་འདུག་སྟེ་བཅོམ་ལྡན་འདས་མེ་ཏོག་ལས་བྱུང་བ་དེ་ལ་རིན་པོ་ཆེའི་ཆར་དང ། མེ་ཏོག་གི་ཆར་དང ། སྤོས་ཀྱི་ཆར་རྣམས་ཀྱིས་གཏོར། མངོན་པར་གཏོར་ཏེ། །གཏོར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སྟོན་པ་རྒལ་ནས་སེམས་ཅན་རྣམས། །སྡུག་བསྔལ་ཆུ་བོ་ཆེ་ལས་སྒྲོལ། །བདག་ནི་ཐམས་ཅད་མཁྱེན་པ་ཁྱོད། །བལྟ་བའི་སླད་དུ་འདིར་མཆིས་སོ། །འཇིག་རྟེན་མགོན་པོ་བླ་ན་མེད། །ལྷ་དང་མི་ཡི་འཇིག་རྟེན་ན། །ཁྱོད་ཀྱིས་ཡོན་ཏན་གང་བསྟན་དང ། །ཁྱོད་འདྲ་བ་ནི་ཡོང་མ་མཆིས། །སེམས་ 67a ༄#། །ཅན་ཤུལ་ངན་ལྷུང་གྱུར་ཅིང ། །འདོད་ཆགས་ཞེ་སྡང་དབང་མཆིས་རྣམས། །ཐེག་པ་དམན་ལ་བཞག་མཛད་ནས། །ཐེག་པ་ཆེན་པོ་རྗོད་པར་མཛད། ཐབས་ལ་མཁས་ཤིང་དཔའ་བ་སྟེ། །ཐུགས་རྗེ་ཆེན་པོའི་དབང་དུ་གྱུར། །ཆོས་ནི་དོན་ཏེ་ཆོས་ཀྱི་ངོམས། །ཆོས་རྩོམ་ཡོན་ཏན་འབྱུང་གནས་སོ། །གང་དག་སྐྱེ་བ་མ་མཆིས་པ།། ཆོས་དེ་སྙིང་པོ་མེད་མཁྱེན་ནས། །ཆོས་ཉིད་ཀྱང་ནི་ཁྱོད་ཀྱིས་མཁྱེན། །དེས་ན་ཁྱོད་ཀྱིས་དཀའ་བ་མཛད། །དེ་ནས་གཞོན་ནུ་དེས་ཚིག་འདི་དག་གིས་བཅོམ་ལྡན་འདས་དེ་བླ་བསྟོད་ནས་ཡང་བསྐོར་བ་བྱས་ཏེ་བཅོམ་ལྡན་འདས་ཀྱི་ཞབས་ཀྱི་དྲུང་དུ་འདུག་གོ་།དེ་ནས་བཅོམ་ལྡན་འདས་ཀྱིས་པདྨའི་འདབ་མ་ལྟར་ཡངས་པའི་སྤྱན་གྱིས་ཕྱོགས་ཐམས་ཅད་དུ་གཟིགས་ཏེ་འཁོར་བཞི་པོ་དེ་དག་གི་སེམས་དང་སེམས་ལས་བྱུང་བ་མཁྱེན་ནས་རྒྱལ་པོ་རྒྱལ་བ་ཐོབ་པ་དེ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། ཕུང་པོ་ལྔ་པོ་དེ་དག་ནི། སྙིང་པོ་མེད་པ་ཡིན་ནོ། བྱིས་པ་སོ་སོའི་སྐྱེ་བོ་རྣམས་ནི། སྙིང་པོར་འདུ་ཤེས་སོ། །རྒྱལ་པོ་ཆེན་པོ། ཕུང་པོ་རྣམས་ནི། ཁ་དོག་ངན་པ། དྲིང་བ། ཁྲག་དང་རང་འབྱུང་བ། ཤིང་དང ། བོང་བ་དང ། ལམ་དང་མཚུངས་པ། སྙིང་པོ་མེད་པ། གཡོ་བ་མེད་པ་དང ། དགའ་བ་དང་མི་དགའ་བར་འབྲེལ་བ། སྲིད་པའི་ལུ་གུ་རྒྱུད་ཀྱིས་ཕན་ཚུན་ 67b སྦྲེལ་བ།་ཉོན་མོངས་པ་མང་བ། སྨད་པ་ཡིན་ན། སྙིང་པོ་མེད་པ་ལ་སྙིང་པོར་འདུ་ཤེས། མི་རྟག་པ་ལ་རྟག་པར་འདུ་ཤེས། མི་སྡུག་པ་ལ་སྡུག་པར་འདུ་ཤེས། མི་གཅང་བ་ལ་གཙང་བར་འདུ་ཤེས། བདེན་པ་མ་ཡིན་པ་ལ་བདེན་པར་འདུ་ཤེས་སོ། །རྒྱལ་པོ་ཆེན་པོ། ཕུང་པོ་ང་ནི། རང་གི་ལས་ཀྱིས་རྣམ་པར་བྲིས་པ་སྟེ། རྒྱལ་པོ་ཆེན་པོ། དཔེར་ན། རྨ་བྱའི་འཇུག་ཚོགས་ཚོན་སྣ་ལྔ་པ་དེ་ལ་རི་མོ་མཁན་གྱིས་བྲིས་པའང་མེད། ཚོན་ཀྱང་ཅིའང་མེད་དེ། །དེ་ནི། རང་གི་ལས་ཀྱིས་རྣམ་པར་བྲིས་པ་ཉིད་དོ། །རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་རྣམས་ཀྱང་རང་གི་ལས་ཀྱིས་རྣམ་པར་བྲིས་པ་ཕན་ཚུན་གྱི་རྐྱེན་ལས་བྱུང་བ་དག་གོ་།དེ་ནས་འཁོར་དེའི་ནང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མི་ཕམ་དབང་ཕྱུག་ཅེས་བྱ་བ་དེ་སྟན་ལས་ལངས་ཏེ་བཅོམ་ལྡན་འདས་ལ་བསྐོར་བ་བྱས་ནས་བླ་གོས་ཕྲག་པ་གཅིག་ཏུ་གཟར་ཏེ་བུས་མོ་གཡས་པའི་ལྷ་ང་ས་ལ་བཙུགས་ནས་ལུས་བཏུད་ལུས་སྨད་དེ་སོར་མོ་བཅུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཕུང་པོ་འདི་དག་ནི། ཁ་དོག་ངན་པ། དྲིང་བ། ཁྲག་དང་རང་འབྱུང་བ། ཤིང་དང ། བོང་བ་དང ། རྩིག་པ་དང ། ལམ་དང་འདྲ་བ། སྙིང་པོ་མ་མཆིས་པ། གཡོ་བ་མ་མཆིས་པ་ལགས་ན། བྱིས་པ་སོ་སོའི་སྐྱེ་བོ་རྣམས་ནི། སྙིང་པོར་འདུ་ཤེས་ཏེ། 68a ༄#། །ཡང་དག་པ་མ་ལགས་པ། ལྡོངས་པ། རྨོངས་པ་དང་འདྲ་བ། གཏི་མུག་ལ་གཞོལ་བ། མུན་པ་དང ། རབ་རིབ་དང ། ལིང་ཏོག་གིས་ཀུན་ནས་ཁེབས་པ། ལྟ་བ་ཐམས་ཅད་ཀྱི་ཚང་ཚིང་ཐིབས་པོས་གཏིབས་པ་ལགས་སོ། །བཅོམ་ལྡན་འདས། ཆོས་ཀྱི་ཕུང་པོ་བཞི་པོ་འདི་དག་ནི། ཟབ་སྟེ། ནམ་མཁའ་དང་མཚུངས་ཤིང་འདྲ་བ་ལགས་སོ། །བཅོམ་ལྡན་འདས། གང་དག་འདི་ལྟ་བུའི་མདོ་སྡེའི་ཚིག་བཤད་པ་འདི་དག་ལ་ཡང་དག་པའི་འདུ་ཤེས་སྐྱེད་པའི་སེམས་ཅན་དེ་དག་འབྱུང་བར་འགྱུར་ལགས་སམ།་དེ་སྐད་ཅེས་གསོལ་པ་དང ། བཅོམ་ལྡན་འདས་མེ་ཏོག་ལས་བྱུང་བ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། གང་གི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འབྱུང་བ་དེའི་ཚེ་སེམས་ཅན་རྣམས་སྦྱང་བའི་ཕྱིར་འབྱུང་སྟེ། མོས་པ་ཇི་ལྟ་བ་བཞིན་དུ་སེམས་ཅན་རྣམས་ལ་ཆོས་ཀྱང་སྟོན་ཏོ། །སྲེད་པས་ཉམ་ཐག་པ་རྣམས་ཀྱི་སྲེད་པ་གཅོད་དོ། །སྡུག་བསྔལ་གྱིས་ཉམ་ཐག་པ་རྣམས་ཀྱི་མྱ་ངན་སེལ་ཏོ། །ཆོས་ཐམས་ཅད་སྙིང་པོ་མེད་པར་ཤེས་ཏེ་ནམ་མཁའ་དང་མཚུངས་ཤིང་འདྲ་བར་ཤེས་ནས་སེམས་ཅན་རྣམས་ཆོས་ཉིད་ལ་རབ་ཏུ་འགོད་དེ། དེའི་ཚེ་བྱང་ཆུབ་སེམས་དཔའ་རྣམས་སེམས་ཅན་སྦྱོང་བར་བྱེད་པ་ཞེས་བྱའོ། །བཅོམ་ལྡན་ 68b འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ལས་བྱུང་བ་དེས་སེམས་ཅན་བསྟན་པ་འདི་བཤད་པ་ན་རྒྱལ་པོ་རྒྱལ་བ་ཐོབ་པ་བུ་དང་བཅས་པ་དང ། རྒྱལ་མོ་རིན་ཆེན་དཔལ་དེ་དང ། བཙུན་མོའི་འཁོར་དང ། གཡོག་འཁོར་དུ་བཅས་པ་ཐམས་ཅད་སྐྲ་དང་ཁ་སྤུ་བྲེགས་ཏེ་བཅོམ་ལྡན་འདས་དེ་ལས་རབ་ཏུ་བྱུང་ངོ ། །དེ་ནས་བཅོམ་ལྡན་འདས་ཀྱིས་འཁོར་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དག། རྒྱལ་བུ་གཞོན་ནུ་འདི་ལ་ལྟོས། རིགས་ཀྱི་བུ་དག་།སྐྱེས་བུ་དམ་པ་འདིས་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་དགུ་བཅུ་རྩ་དགུ་ལ་དགེ་བའི་རྩ་བ་བསྐྱེད་དེ། ཐམས་ཅད་དུའང་ཆོས་སྨྲ་བར་གྱུར་ཏོ། །འདི་ནི། རྟག་ཏུ་སྐྱེས་བུ་དམ་པ་འདིའི་ཕར་གྱུར་ཏེ། རྟག་ཏུ་སྐྱེས་བུ་དམ་པ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡོངས་སུ་སྨིན་པར་བྱས་སོ། །རིགས་ཀྱི་བུ་དག་།རྒྱལ་བུ་གཞོན་ནུ་རིན་ཆེན་འབྱུང་གནས་འདི་ནི། ང་ཡོངས་སུ་མྱ་ངན་ལས་འདས་མ་ཐག་ཏུ་སངས་རྒྱས་སུ་འགྱུར་ཏེ། རིན་པོ་ཆེ་དུ་མ་བཀོད་པའི་བྱང་ཆུབ་ཀྱི་ཤིང་དྲུང་དུ་འདུག་ནས་དེ་བྱང་ཆུབ་ཐོབ་པའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་ 69a ༄#། །པ། སངས་རྒྱས་བཅོམ་ལྡན་འདས་འོད་ཟེར་ཀུན་ནས་མངོན་འཕགས་དཔལ་བརྩེགས་རྒྱལ་པོ་ཞེས་བྱ་བར་འགྱུར་རོ། །འཇིག་རྟེན་གྱི་ཁམས་ནི། ཀུན་ནས་རིན་པོ་ཆེས་ཡང་དག་པར་བྲིས་པ་ཞེས་བྱ་བར་འགྱུར་རོ། །དེའི་ཉན་ཐོས་ཀྱི་དགེ་འདུན་ནི། ཚད་མེད་པར་འགྱུར་རོ། །དེའི་ཚེའི་ཚད་ནི། བསྐལ་པ་བྱེ་བ་ཁྲག་ཁྲིག་ཕྲག་དགུ་བཅུ་རྩ་དྲུག་ཐུབ་པར་འགྱུར་རོ། །དེའི་དམ་པའི་ཆོས་ཀྱི་གཟུགས་བརྙན་ནི། ལོ་འབུམ་ཕྲག་བདུན་ཅུ་རྩ་ལྔར་གནས་པར་འགྱུར་རོ། །རིགས་ཀྱི་བུ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོའི་ལུང་བསྟན་པ་བརྗོད་པ་བཤད་པ་ན་སྲོག་ཆགས་བརྒྱད་ཁྲི་བཞི་སྟོང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །རིགས་ཀྱི་བུ། དེའི་ཚེ་དེའི་དུས་ཀྱི་དེ་བཞིན་གཤེགས་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟའམ་ཡིད་གཉིས་སུ་གྱུར་ན། དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཅེས་བྱ་བ་འདི་དེའི་ཚེ་དེའི་དུས་ན་དེ་བཞིན་གཤེགས་པ་མེ་ཏོག་ལས་བྱུང་ཞེས་བྱ་བར་གྱུར་ཏེ། འཇིག་རྟེན་གྱི་ཁམས་དེར་ཆོས་བསྟན་པར་གྱུར་ཏོ། །རིགས་ཀྱི་བུ། དེའི་ཚེ་དེའི་དུས་ན་གཞོན་ནུ་རིན་ཆེན་འབྱུང་གནས་ཞེས་བྱ་བ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟའམ་ཡིད་གཉིས་ 69b སུ་གྱུར་ན། དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རིགས་ཀྱི་བུ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་འདི་དེའི་ཚེ་དེའི་དུས་ན་རྒྱལ་པོ་རྒྱལ་བ་ཐོབ་པ་ཞེས་བྱ་བ་དེའི་བུར་གྱུར་ཏེ།་དེ་བཞིན་གཤེགས་པ་དེས་ང་ལས་འཚང་རྒྱ་བར་འགྱུར་རོ། །ཞེས་ལུང་བསྟན་ཏོ། །དེ་ནས་འཁོར་དེའི་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བས་དགའ་ཞེས་བྱ་བས་བཅོམ་ལྡན་འདས་ལ་སོར་མོ་བཅུའི་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདི་ནི། སེམས་ཅན་དགེ་བའི་རྩ་བ་མ་བསྐྱེད་པ་རྣམས་ཀྱི་རྣ་ལམ་དུ་གྲགས་པར་ཡང་མི་འགྱུར་རོ། །གང་དག་ཡི་གེར་འབྲི་བ་དང ། ཡི་གེར་འབྲིར་སྩོལ་བ་དང ། འཛིན་པ་དང ། ཁ་ཏོན་བགྱིད་པ་དང ། མེ་ཏོག་དང ། བདུག་པ་དང ། སྤོས་རྣམས་ཀྱིས་མཆོད་པར་འགྱུར་བ་ལྟ་སྨོས་ཀྱང་ཅི་འཚལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བས་དགའ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། གང་དག་གིས་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་ལ་བསྙེན་བཀུར་བྱས་པ་དེ་དག་གིས་མདོ་སྡེ་འདི་རྙེད་པར་འགྱུར་རོ། །རིགས་ཀྱི་བུ།་ཆོས་ཀྱི་རྣམ་གྲངས་འདི་དག་གང་གི་རྣ་ལམ་དུ་གྲག་པར་གྱུར་ལ་ཐེ་ཚོམ་མི་ཟ་བའི་སེམས་ཅན་དེ་དག་འདི་ནས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །རིགས་ 70a ༄#། །ཀྱི་བུ།་གང་ན་མདོ་སྡེ་འདི་ལྟ་བུ་དག་འཛིན་པའི་ས་ཕྱོགས་དེ་དག་ཕྱག་བྱ་བའི་འོས་སུ་འགྱུར་རོ། །རིགས་ཀྱི་བུ། ཕྱི་མའི་ཚེ་ཕྱི་མའི་དུས་ན་བུད་མེད་གང་ལ་ལ་ཞིག་ཆོས་ཀྱི་རྣམ་གྲངས་འདི་འཆང་ངམ། ཀློག་ན། དེ་བུད་མེད་ཀྱི་ལུས་བརྗེས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། དེ་ཉིད་དེའི་བུད་མེད་ཀྱི་ལུས་ཀྱི་ཐ་མ་ཡིན་ནོ། །འཆི་བའི་དུས་ཀྱི་ཚེ་ནའང་དེ་བཞིན་གཤེགས་པ་འོད་དཔག་མེད་མཐོང་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བས་དགའ་བ་དང ། བྱང་ཆུབ་སེམས་དཔའ་དེ་དག་དང ། དགེ་སློང་དེ་དག་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་སྟོད་དོ། །འཕགས་པ་ཆོས་དང་དོན་རྣམ་པར་འབྱེད་པ་ཞེས་བྱ་བ་ཐག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོ་ཙཱ་བ་བནྡྷེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། |