རྒྱ་གར་སྐད་དུ། བིམྦི་སཱ་ར་པྲ་ཏྱུངྒ་མ་ན་ནཱ་མ་མ་ཧཱ་སཱུ་ཏྲཾ། བོད་སྐད་དུ། མདོ་ཆེན་པོ་གཟུགས་ཅན་སྙིང་པོས་བསུ་བ་ཞས་བྱ་བ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དགེ་སློང་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་སྔོན་རལ་པ་ཅན་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་ཅིག་ཏུ་ཡུལ་མ་ག་དྷ་ར་ཡུལ་རྒྱུ་ཞིང་གཤེགས་པ་ན་མ་ག་དྷ་པ་རྣམས་ཀྱི་མཆོད་རྟེན་རབ་བརྟན་གྱི་སྨྱིག་མའི་ནགས་ཁྲོད་ 468a ༄#། །ག་ལ་བ་དེར་གཤེགས་ཏེ། དེ་ན་བཅོམ་ལྡན་འདས་རབ་བརྟན་དུ་བྱོན་ནས་མ་ག་དྷ་པ་རྣམས་ཀྱི་མཆོད་རྟེན་རབ་བརྟན་གྱི་སྨྱིག་མའི་ནགས་ཁྲོད་ན་བཞུགས་སོ། །ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་དགེ་སློང་སྟོང་གི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་སྔོན་རལ་པ་ཅན། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ་ཤ་སྟག་དང་ཐབས་ཅིག་ཏུ་ཡུལ་མ་ག་དྷར་ཡུལ་རྒྱུ་ཞིང་གཤེགས་པ་ན་མ་ག་དྷ་པ་རྣམས་ཀྱི་མཆོད་རྟེན་རབ་བརྟན་གྱི་སྨྱིག་མའི་ནགས་ཁྲོད་ག་ལ་བ་དེར་གཤེགས་ཏེ། དེ་ན་བཅོམ་ལྡན་འདས་རབ་བརྟན་དུ་བྱོན་ནས་མ་ག་དྷ་པ་རྣམས་ཀྱི་མཆོད་རྟེན་རབ་བརྟན་གྱི་སྨྱིག་མའི་ནགས་ཁྲོད་ན་བཞུགས་སོ། །ཞེས་ཐོས་སོ། །ཐོས་ནས་ཀྱང་རྒྱལ་པོའི་འབྱོར་བ་ཆེན་པོ་དང ། རྒྱལ་པོའི་མཐུ་ཆེན་པོས་ཤིང་རྟ་ཁྲི་ཉིས་སྟོང་དང ། རྟའི་ཁྱུ་ཚན་ཁྲི་བརྒྱད་སྟོང་དང ། ཡུལ་མ་ག་དྷའི་བྲམ་ཟེ་དང་ཁྱིམ་བདག་འབུམ་ཕྲག་དུ་མ་དང་ལྷན་ཅིག་ཏུ་བཅོམ་ལྡན་འདས་ལ་བལྟ་བ་དང ། བསྙེན་བཀུར་ལ་འགྲོ་བའི་ཕྱིར་རྒྱལ་པོའི་ཁབ་ནས་བྱུང་སྟེ། དེ་བཞོན་པས་བགྲོད་པའི་ས་ཇི་སྲིད་པ་དེ་སྲིད་དུ་བཞོན་ 468b པས་སོང་ནས་བཞོན་པ་ལས་བབས་ཏེ་རྐང་པ་ཁོ་ནས་ཀུན་དགའ་ར་བར་ཞུགས་ནས་ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོར་བར་སྐབས་གང་ནས་བཅོམ་ལྡན་འདས་མཐོང་བའི་བར་སྐབས་དེར་རྒྱལ་པོའི་ཆོས་ཀྱི་མཚན་མ་ལྔ་པོ་ཅོད་པན་དང ། གདུགས་དང ། རལ་གྲི་དང ། རྔ་ཡབ་ནོར་བུ་ཅན་དང ། ལྷམ་ཁྲ་བོ་དག་ཕུད་དེ་བཞག་གོ་།དེ་ནས་ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་རྒྱལ་པོའི་ཆོས་ཀྱི་མཚན་མ་ལྔ་པོ་དག་ཕུང་དེ་བཞག་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་པ་དང ། བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ངས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཙུན་པ། བདག་ནི། ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ། །བཙུན་པ། བདག་ནི། ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལགས་སོ། རྒྱལ་པོ་ལགས་སོ། །ཞེས་ལན་གསུམ་གྱི་བར་དུ་རང་གི་མིང་རྗེས་སུ་སྒྲོག་གོ་།བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་དེ་བཞིན་ནོ། །དེ་དེ་བཞིན་ཏེ། རྒྱལ་པོ་ཆེན་པོ། ཁྱོད་ནི། ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡིན་ནོ། ། རྒྱལ་པོ་ཆེན་པོ། ཁྱོད་ནི། ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ཡིན་ནོ། །རྒྱལ་པོ་ཡིན་ནོ། །རྒྱལ་པོ་ཆེན་པོ་ཁྱོད་རང་གི་སྟན་གང་ཡིན་པ་ལ་འདུག་ཅིག་།དེ་ནས་ 469a ༄#། །ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་གོ་།ཡུལ་མ་ག་དྷའི་བྲམ་ཟེ་དང ། ཁྱིམ་བདག་ཁ་ཅིག་གིས་ནི། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །ཁ་ཅིག་གིས་ནི། བཅོམ་ལྡན་འདས་ལ་མངོན་སུམ་དུ་ཕན་ཚུན་ཀུན་དགའ་བར་འགྱུར་བ་དང ། ཡང་དག་པར་དགའ་བར་འགྱུར་བའི་གཏམ་སྣ་ཚོགས་དག་གསོལ་ཏེ་ཕྱོགས་གཅིག་ཏུ་འཁོད་དོ། །ཁ་ཅིག་གིས་ནི། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཕྱོགས་གཅིག་ཏུ་འཁོད་དོ། །ཁ་ཅིག་གིས་ནི། རྒྱང་རིང་པོ་ཁོ་ན་ནས་བཅོམ་ལྡན་འདས་མཐོང་ནས་ཅང་མི་སྨྲ་བར་ཕྱོགས་གཅིག་ཏུ་འཁོད་དོ། །དེའི་ཚེ་ན་རལ་པ་ཅན་ཚ་དང་ལྡན་པ་ལྟེང་རྒྱས་འོད་སྲུང་འཁོར་དེ་ཉིད་དུ་འདུས་ཏེ་འདུག་པར་གྱུར་ཏོ། །དེ་ནས་ཡུལ་མ་ག་དྷའི་བྲམ་ཟེ་དང ། ཁྱིམ་བདག་རྣམས་འདི་སྙམ་དུ་སེམས་ཏེ། ཅི་དགེ་སྦྱོང་ཆེན་པོ་རལ་པ་ཅན་ལྟེང་རྒྱས་འོད་སྲུང་གི་དྲུང་ན་ཚངས་པར་སྤྱད་པ་སྤྱོད་དམ། འོན་ཏེ་རལ་པ་ཅན་ལྟེང་རྒྱས་འོད་སྲུང་ཉིད་དགེ་སྦྱོང་ཆེན་པོའི་སྤྱན་སྔར་ཚངས་པར་སྤྱད་པ་སྤྱོད་དོ་སྙམ་མོ། །དེ་ནས་བཅོམ་ལྡན་འདས་ཀྱིས་ཡུལ་མ་ག་དྷའི་བྲམ་ཟེ་དང ། ཁྱིམ་བདག་རྣམས་ཀྱི་སེམས་ཐུགས་ཀྱིས་མཁྱེན་ནས་ཚེ་དང་ལྡན་ 469b པ་ལྟེང་རྒྱས་འོད་སྲུང་ལ་ཚིགས་སུ་བཅད་པའི་དབྱངས་ཀྱིས་དྲི་བ་དྲིས་པ། ལྟེང་རྒྱས་གནས་པས་འདི་ལ་ཅི་མཐོང་ན། །ཁྱོད་ཀྱིས་མི་སྤངས་བརྟུལ་ཞུགས་ཁོ་ན་སྤྱོད། །ཁྱོད་ཀྱིས་ཇི་ལྟར་ན་ཡི་སྦྱིན་སྲེག་སྤངས། །འོད་སྲུང་དེ་ཡི་དོན་ནི་ང་ལ་སྨྲོས། །ཚེ་དང་ལྡན་པ་ལྟེང་རྒྱས་འོད་སྲུང་གིས་གསོལ་བ། འདི་ན་ཁ་ཅིག་ཟས་དང་སྐོམ་དག་དང ། །རོ་དང་འདོད་པ་བུད་མེད་རྗོད་བགྱིད་བ། །རྫས་བྱུང་དེ་དག་དྲི་མར་རབ་མཐོང་བས། །དེ་སླད་མཆོད་སྦྱིན་སྲེག་ལ་བདག་མི་དགའ། །བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཁྱོད་ནི་འདོད་དང་ཟས་སྐོམ་དང ། །དེ་བཞིན་རོ་རྣམས་དག་ལ་ཡིད་དགར་མི་བདེ་ན། །ཇི་ལྟར་ལྷ་མིའི་འཇིག་རྟེན་དག་ལ་ཁྱོད་ཀྱི་ཡིད། །དགའ་བར་བྱེད་པ་དྲིས་པ་འོད་སྲུང་སྨྲོས། །ཚེ་དང་ལྡན་པ་ལྟེང་རྒྱས་འོད་སྲུང་གིས་གསོལ་པ། གོ་འཕང་ཞི་མཆོག་ཕུང་པོ་མ་མཆིས་ཤིང ། །ཅི་ཡང་མ་མཆིས་འདོད་སྲིད་མ་ཆགས་པ། །མི་འགྱུར་གཞན་གྱིས་མི་དཀྲི་མཐོང་ལགས་པས། །དེ་སླད་མཆོད་སྦྱིན་སྲེག་ལ་བདག་མི་དགའ། །མི་ཉམས་གོ་འཕང་དམ་པ་མ་མཐོང་ཚེ། །མཆོད་སྦྱིན་བརྟུལ་ཞུགས་རྣམས་ཀྱང་ཞུགས་ཀྱིས་ཀྱང ། །གྲོལ་བར་འགྱུར་ཞེས་བདག་ཡིད་རྨོངས་གྱུར་ཅིང ། །ལྡོངས་ཤིང་སྐྱེ་ཤིའི་རྗེས་སུ་ཞུགས་པར་གྱུར། །གཽའུ་ཏམ་སྐྱེ་མང་དོན་དུ་རྣམ་འདྲེན་པ། །ཐུབ་པ་བདེན་པའི་རྩལ་མངའ་ཁྱོད་བྱུང་ཞིང ། །གཙོ་མཆོག་སྐྱོབ་པས་ལེགས་བཤད་དེ་ལྟར་ནི། །གོ་ 470a ༄#། །འཕང་འདུས་མ་བགྱིས་དེ་བདག་གིས་མཐོང ། །བཅོམ་ལྡན་འདས་ཀྱིས་བཀའ་སྩལ་པ། རབ་ཏུ་རྣམ་པར་ཕྱེ་བའི་ཆོས་རྣམས་ལས། །དམ་པ་གང་ཡིན་དེ་ནི་རྟོགས་གྱུར་པ། །དེ་ནི་ཁྱོད་ཀྱིས་ཉེས་བསམ་མ་ཡིན་ཏེ། །ཁྱོད་ཀྱིས་ངེས་པ་ལེགས་པར་རྟོགས་པ་ཡིན། །འོད་སྲུང ། འཁོར་རྣམས་སྐྱོ་བ་མ་སྐྱེད་ཅིག་།དེ་ནས་ཚེ་དང་ལྡན་པ་ལྟེང་རྒྱས་འོད་སྲུང་བཅོམ་ལྡན་འདས་ཀྱིས་སྐབས་ཕྱེ་བས། ཇི་ལྟར་སེམས་མཉམ་པར་བཞག་པ་བཞིན་དུ་བདག་གི་སྟན་གྱི་སྟེང་ན་མི་སྣང་བར་གྱུར་བ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ནས་ཤར་ཕྱོགས་ཀྱི་སྟེང་གི་ནམ་མཁའ་ལ་མངོན་པར་འཕགས་ཏེ་སྤྱོད་ལམ་རྣམ་པ་བཞི་པོ་འདི་ལྟ་སྟེ། འཆག་པ་དང ། འགྲེང་བ་དང ། འདུག་པ་དང ། ཉལ་བ་དག་བྱེད་དོ། །མེའི་ཁམས་ལ་ཡང་སྙོམས་པར་ཞུགས་ཏེ། ཚེ་དང་ལྡན་པ་ལྟེང་རྒྱས་འོད་སྲུང་མེའི་ཁམས་ལ་སྙོམས་པར་ཞུགས་པའི་ལུས་ལས་འོད་ཟེར་རྣམ་པ་སྣ་ཚོགས་འདི་ལྟ་སྟེ། སྔོན་པོ་དག་དང ། སེར་པོ་དང ། དམར་པོ་དག་དང ། དཀར་པོ་དག་དང ། བཙོད་ཀ་དག་དང ། ཤེལ་གྱི་ཁ་དོག་ལྟ་བུ་དག་བྱུང་ངོ ། །ཆོ་འཕྲུལ་ཟུང་དག་ཀྱང་རྣམ་པར་བསྟན་ཏེ། ལུས་ཀྱི་སྨད་ནས་མེ་འབར་ལ་ལུས་ཀྱི་སྟོད་ནས་ཆུ་གྲང་མོའི་རྒྱུན་འབབ་པ་དང ། ལུས་ཀྱི་སྟོད་ནས་མེ་འབར་ལ་ལུས་ཀྱི་སྨད་ནས་ཆུ་གྲང་མོའི་རྒྱུན་ 470b འབབ་པ་དག་ཀྱང་རྣམ་པར་བསྟན་ཏོ། །ཤར་ཕྱོགས་སུ་ཇི་ལྟ་བ་བཞིན་དུ་ལྷོ་དང ། ནུབ་དང ། བྱང་ཕྱོགས་ཀྱི་སྟེང་གི་ནམ་མཁའ་ལ་ཡང་མངོན་པར་འཕགས་ཏེ། སྤྱོད་ལམ་རྣམ་པ་བཞི་པོ་འདི་ལྟ་སྟེ། འཆག་པ་དང ། འགྲེང་བ་དང ། འདུག་པ་དང ། ཉལ་བ་དག་བྱེད་དོ། །མེའི་ཁམས་ལ་ཡང་སྙོམས་པར་ཞུགས་ཏེ། ཚེ་དང་ལྡན་པ་ལྟེང་རྒྱས་འོད་སྲུང་མེའི་ཁམས་ལ་སྙོམས་པར་ཞུགས་པའི་ལུས་ལས་འོད་ཟེར་རྣམ་པ་སྣ་ཚོགས་འདི་ལྟ་སྟེ། སྔོན་པོ་དག་དང ། སེར་པོ་དག་དང ། དམར་པོ་དག་དང ། དཀར་པོ་དག་དང ། བཙོད་ཀ་དག་དང ། ཤེལ་གྱི་ཁ་དོག་ལྟ་བུ་དག་བྱུང་ངོ ། །ཆོ་འཕྲུལ་ཟུང་དག་ཀྱང་རྣམ་པར་བསྟན་ཏེ། ལུས་ཀྱི་སྨད་ནས་མེ་འབར་ལ་ལུས་ཀྱི་སྟོད་ནས་ཆུ་གྲང་མོའི་རྒྱུན་འབབ་པ་དང ། ལུས་ཀྱི་སྟོད་ནས་མེ་འབར་ལ་ལུས་ཀྱི་སྨད་ནས་ཆུ་གྲང་མོའི་རྒྱུན་འབབ་པ་དག་ཀྱང་རྣམ་པར་སྟོན་ཏོ། །དེ་ལྟར་ཕྱོགས་བཞིར་རྫུ་འཕྲུལ་རྣམ་པ་བཞི་བསྟན་ནས་རྫུ་འཕྲུལ་མངོན་པར་འདུ་བྱ་བ་དེ་དག་ཕྱིར་བསྡུས་ཏེ་བླ་གོས་ཕྲག་པ་གཅིག་ཏུ་གཟར་ནས་པུ་ས་མོ་གཡས་པའི་ལྷ་ངས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ནི། བདག་གི་སྟོན་པ་ལགས་སོ། །བདག་ནི། བཅོམ་ལྡན་འདས་ཀྱི་ཉན་ཐོས་ལགས་སོ། །བཅོམ་ལྡན་འདས་ནི། བདག་གི་སྟོན་པ་ 471a ༄#། །ལགས་སོ། །སྟོན་པ་ལགས་སོ། །བདག་ནི། བཅོམ་ལྡན་འདས་ཀྱི་ཉན་ཐོས་ལགས་སོ། །ཉན་ཐོས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། དེ་དེ་བཞིན་ནོ། །དེ་དེ་བཞིན་ཏེ། འོད་སྲུང ། ང་ནི། ཁྱོད་ཀྱི་སྟོན་པ་ཡིན་ནོ། །ཁྱོད་ནི་ངའི་ཉན་ཐོས་ཡིན་ནོ། །འོད་སྲུང ། ང་ནི་ཁྱོད་ཀྱི་སྟོན་པ་ཡིན་ནོ། །སྟོན་པ་ཡིན་ནོ། །ཁྱོད་ནི། ངའི་ཉན་ཐོས་ཡིན་ནོ། །ཉན་ཐོས་ཡིན་ནོ། །འོད་སྲུང ། ཁྱོད་རང་གི་སྟན་གང་ཡིན་པ་ལ་འདུག་ཅིག་།དེ་ནས་ཚེ་དང་ལྡན་པ་ལྟེང་རྒྱས་འོད་སྲུང་གིས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་རང་གི་སྟན་གང་ཡིན་པ་ལ་འདུག་གོ་།དེ་ནས་ཡུལ་མ་ག་དྷའི་བྲམ་ཟེ་དང ། ཁྱིམ་བདག་རྣམས་འདི་སྙམ་དུ་སེམས་ཏེ། དགེ་སྦྱོང་ཆེན་པོ་ནི། རལ་པ་ཅན་ལྟེང་རྒྱས་འོད་སྲུང་གི་དྲུང་ན་ཚངས་པར་སྤྱད་པ་སྤྱོད་པ་མ་ཡིན་གྱི། རལ་པ་ཅན་ལྟེང་རྒྱས་འོད་སྲུང་ཉིད་དགེ་སློང་ཆེན་པོའི་སྤྱན་སྔར་ཚངས་པར་སྤྱད་པ་སྤྱོད་པ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་བཀའ་སྩལ་པ། རྒྱལ་པོ་ཆེན་པོ། གཟུགས་ནི། སྐྱེ་བའང་མ་ཡིན། འཇིག་བའང་མ་ཡིན་ཏེ། དེའི་སྐྱེ་བ་དང་འཇིག་པའང་རྟོགས་པར་བྱའོ། །རྒྱལ་པོ་ཆེན་པོ། །ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ནི། སྐྱེ་བའང་མ་ཡིན། འཇིག་པའང་མ་ཡིན་ཏེ། 471b དེའི་སྐྱེ་བ་དང ། འཇིག་པའང་རྟོགས་པར་བྱའོ། །རྒྱལ་པོ་ཆེན་པོ། གཟུགས་ཀྱི་སྐྱེ་བ་དང ། འཇིག་པའི་ཆོས་ཉིད་རྟོགས་པའི་རིགས་ཀྱི་བུས་ནི། གཟུགས་དེ་ཡོངས་སུ་ཤེས་པ་ཡིན་ནོ། །རྒྱལ་པོ་ཆེན་པོ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པའི་སྐྱེ་བ་དང ། འཇིག་པའི་ཆོས་ཉིད་རྟོགས་པའི་རིགས་ཀྱི་བུས་ནི། རྣམ་པར་ཤེས་པ་དེ་ཡོངས་སུ་ཤེས་པ་ཡིན་ནོ། །རྒྱལ་པོ་ཆེན་པོ། གཟུགས་ཡོངས་སུ་ཤེས་པའི་རིགས་ཀྱི་བུ་ནི། བདག་དང་བདག་གི་ཞེས་ཁས་ལེན་པར་མི་བྱེད། ཉེ་བར་ལེན་པར་མི་བྱེད། ལྷག་པར་ཆགས་པར་མི་བྱེད། མངོན་པར་ཞེན་པར་མི་བྱེད་དོ། །རྒྱལ་པོ་ཆེན་པོ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ཡོངས་སུ་ཤེས་པའི་རིགས་ཀྱི་བུ་ནི།་བདག་དང་བདག་གི་ཞེས་ཁས་ལེན་པར་མི་བྱེད། ཉ་བར་ལེན་པར་མི་བྱེད། ལྷག་པར་གནས་པར་མི་བྱེད། མངོན་པར་ཞེན་པར་མི་བྱེད་དོ། །རྒྱལ་པོ་ཆེན་པོ། གཟུགས་བདག་གིར་མི་བྱེད། ཁས་ལེན་པར་མི་བྱེད། ཉེ་བར་ལེན་པར་མི་བྱེད། ལྷག་པར་གནས་པར་མི་བྱེད། མངོན་པར་ཞེན་པར་མི་བྱེད་པའི་རིགས་ཀྱི་བུ་ནི། ཚད་མེད་པ་དང ། གྲངས་མེད་པ་ཡིན་ཏེ།་མྱ་ངན་ལས་འདས་པ་ཡིན་པར་ང་སྨྲའོ། །རྒྱལ་པོ་ཆེན་པོ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་བདག་གིར་མི་བྱེད། ཁས་ལེན་པར་ 472a ༄#། །མི་བྱེད། ཉེ་བར་ལེན་པར་མི་བྱེད། ལྷག་པར་གནས་པར་མི་བྱེད། མངོན་པར་ཞེན་པར་མི་བྱེད་པའི་རིགས་ཀྱི་བུ་ནི། ཚད་མེད་པ་དང ། གྲངས་མེད་པ་ཡིན་ཏེ།་མྱ་ངན་ལས་འདས་པ་ཡིན་པར་ང་སྨྲའོ། །དེ་ནས་ཡུལ་མ་ག་དྷའི་བྲམ་ཟེ་དང ། ཁྱིམ་བདག་རྣམས་འདི་སྙམ་དུ་སེམས་ཏེ། གལ་ཏེ་གཟུགས་བདག་མ་ཡིན་ཞིང་ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ཡང་བདག་མ་ཡིན་ན། འོ་ན་ཅི་གང་ནམ་ཡང་བྱུང་བར་མ་གྱུར་པ་དང ། འབྱུང་བར་མི་འགྱུར་བ་དང ། ང་ལྟར་ཡང་མེད་པའང་མ་ཡིན་ཞིང ། གང་དེ་དང་དེ་དག་ཏུ་དགེ་བ་དང ། སྡིག་པའི་ལས་བྱས་ཤིང ། བྱས་པ་དག་གི་རྣམ་པར་སྨིན་པ་སོ་སོར་མྱོང་བར་བྱེད་པ་དང ། གང་ཕུང་པོ་འདི་འདོར་ཞིང་ཕུང་པོ་གཞན་དང་ཉིང་མཚམས་སྦྱོར་པར་འགྱུར་བའི་བདག་གམ། སེམས་ཅན་ནམ། སྲོག་གམ། སྐྱེ་བའམ། གསོ་བའམ། གང་ཟག་གམ། ཤེད་ལས་སྐྱེས་སམ། ཤེད་བུའམ། བྱེད་པ་པོའམ། བྱེད་དུ་འཇུག་པ་པོའམ། སྐྱེད་པ་པོའམ། ཀུན་ནས་སྐྱེད་པ་པོའམ། སློང་བ་པོའམ། ཀུན་ནས་སློང་བ་པོའམ། སྨྲ་བ་པོའམ། མྱོང་བ་པོའམ།་སོ་སོར་མྱོང་བ་པོ་དེ་གང་ཞིག་ཡིན་སྙམ་མོ། །དེ་ནས་བཅོམ་ལྡན་འདས་ཀྱིས་མ་ག་དྷའི་བྲམ་ཟེ་དང ། ཁྱིམ་བདག་རྣམས་ཀྱི་སེམས་ཐུགས་ཀྱི་མཁྱེན་ནས་དགེ་སློང་ 472b རྣམས་ལ་བཀའ་སྩལ་པ། དགེ་སློང་དག་།བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ནི། བདག་བདག་ཅེས་ཐ་སྙད་འདོགས་པའི་རྗེས་སུ་ལྷུང་སྟེ། དེ་ལ་ནི། བདག་གམ་བདག་གིར་བྱ་བ་མེད་དོ། །དགེ་སློང་དག་།སྡུག་བསྔལ་འདི་སྐྱེ་བ་ནི། སྐྱེ་ལ། སྡུག་བསྔལ་འགགས་པ་ནི། འགག་གོ་།འདུ་བྱེད་རྣམས་སྐྱེ་བ་ནི། སྐྱེ་ལ། འདུ་བྱེད་རྣམས་འགགས་པ་ནི། འགག་པ་སྟེ།་རྒྱུ་དེ་དག་དང ། རྐྱེན་དེ་དག་ལ་བརྟེན་ནས་སེམས་ཅན་རྣམས་ཀྱི་འདུ་བྱེད་ཀྱི་རྒྱུན་འབྱུང་བར་འགྱུར་ཏེ། དགེ་སློང་དག་།དེ་བཞིན་གཤེགས་པ་ནི། འདུ་བྱེད་ཀྱི་རྒྱུན་ཉིད་མཚམས་སྦྱོར་བར་ཐུགས་སུ་ཆུད་ནས་སེམས་ཅན་རྣམས་ཀྱི་འཆི་འཕོ་དང ། སྐྱེ་བ་འདོགས་པར་མཛད་དོ། །དགེ་སློང་དག་།ངས་ལྷའི་སྤྱན་རྣམ་པར་དག་པ་མིའི་ལས་ཤིན་ཏུ་འདས་པས་སེམས་ཅན་འཆི་འཕོ་བ་དག་དང ། སྐྱེ་བ་དག་དང ། མདོག་བཟང་བ་དག་དང ། མདོག་ངན་པ་དག་དང ། ངན་པ་དག་དང ། བཟང་པོ་དག་དང ། བདེ་འགྲོར་འགྲོ་བ་དང ། ངན་འགྲོར་འགྲོ་བ་དག་ཀྱང་གཟིགས་ལ། སེམས་ཅན་ཤེས་པ་དང་ལྡན་པ་འདི་དག་ནི། ལུས་ཀྱིས་ཉེས་པར་སྤྱོད་པ་དང་ལྡན་པ། ངག་དང་ཡིད་ཀྱིས་ཉེས་པར་སྤྱོད་པ་དང་ལྡན་པ།་འཕགས་པ་རྣམས་ལ་སྐུར་པ་འདེབས་པ། ལོག་པར་ལྟ་བ་དག་སྟེ། ལོག་པར་ལྟ་བའི་ལས་དང ། ཆོས་ཡང་དག་པར་བླངས་པའི་རྒྱུས་ལུས་ཞིག་སྟེ་ཤི་བའི་འོག་ཏུ་ 473a ༄#། །རྒྱུ་དེ་དང་རྐྱེན་དེས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་ཀྱི་ནང་དུ་སྐྱེ་བར་འགྱུར་བ་དང ། སེམས་ཅན་ཤེས་པ་དང་ལྡན་པ་འདི་དག་ནི། ལུས་ཀྱིས་ལེགས་པར་སྤྱོད་པ་དང་ལྡན་པ། ངག་དང་ཡིད་ཀྱིས་ལེགས་པར་སྤྱོད་པ་དང་ལྡན་པ། འཕགས་པ་རྣམས་ལ་སྐུར་བ་མི་འདེབས་པ། ཡང་དག་པར་ལྟ་བ་དག་སྟེ། ཡང་དག་པར་ལྟ་བའི་ལས་དང ། ཆོས་ཡང་དག་པར་བླངས་པའི་རྒྱུས་ལུས་ཞིག་སྟེ་ཤི་བའི་འོག་ཏུ་རྒྱུ་དེ་དང ། རྐྱེན་དེས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཞེས་སེམས་ཅན་རྣམས་ལས་ཇི་ལྟ་བ་བཞིན་དུ་ཉེ་བར་འགྲོ་བ་དག་ཀྱང་ཡང་དག་པ་ཇི་ལྟ་བ་བཞིན་དུ་རབ་ཏུ་མཁྱེན་ཏོ། །དགེ་སློང་དག་།ངས་དེ་ལྟར་མཁྱེན་ཅིང་དེ་ལྟར་གཟིགས་པས་ན། ང་ནི་གང་ནམ་ཡང་བྱུང་བར་མ་གྱུར་པ་དང ། འབྱུང་བར་མི་འགྱུར་བ་དང ། ད་ལྟར་ཡང་མེད་པ་མ་ཡིན་ཞིང ། གང་དེ་དང་དེ་དག་ཏུ་དགེ་བ་དང ། སྡིག་པའི་ལས་བྱས་ཤིང་བྱས་པ་དག་གི་རྣམ་པར་སྨིན་པ་སོ་སོར་མྱོང་བར་བྱེད་པ་དང ། གང་ཕུང་པོ་འདི་འདོར་ཞིང་ཕུང་པོ་གཞན་དང་ཉིང་མཚམས་སྦྱོར་བ་དེ་ཆོས་ཀྱི་བརྔ་མ་གཏོགས་པར་བདག་གམ། སེམས་ཅན་ནམ། སྲོག་གམ། སྐྱེ་བའམ། གསོ་བའམ། གང་ཟག་གམ། ཤེད་ལས་སྐྱེས་སམ། ཤེད་བུའམ། བྱེད་པ་ 473b བོའམ།་བྱེད་དུ་འཇུག་པ་པོའམ། སྐྱེད་པ་པོའམ། ཀུན་ནས་སྐྱེད་པ་པོའམ། སློང་བ་པོའམ། ཀུན་ནས་སློང་བ་པོའམ། སྨྲ་བ་པོའམ། མྱོང་བ་པོའམ། སོ་སོར་མྱོང་བ་པོ་ཡིན་ནོ། །ཞེས་མི་སྨྲའོ། །དེ་ལ་ཆོས་ཀྱི་བརྔ་ནི། འདི་ཡིན་ཏེ། འདི་ལྟ་སྟེ། འདི་ཡོད་པའི་ཕྱིར་འདི་འབྱུང་ལ། འདི་སྐྱེས་པའི་ཕྱིར་འདི་སྐྱེ་བ་སྟེ། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས་འདུ་བྱེད་རྣམས་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་།སྐྱེ་མཆེད་དྲུག་གི་རྐྱེན་གྱིས་རེག་པ།་རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འབྱུང་བར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འབྱུང་བར་འགྱུར་རོ། །འདི་ལྟ་སྟེ། འདི་མེད་པས་འདི་མི་འབྱུང་ལ། འདི་འགགས་པས་འདི་འགག་པ་སྟེ། འདི་ལྟ་སྟེ། མ་རིག་པ་འགགས་པས་འདུ་བྱེད་འགག་།འདུ་བྱེད་འགགས་པས་རྣམ་པར་ཤེས་པ་འགག་།རྣམ་པར་ཤེས་པ་འགགས་པས་མིང་དང་གཟུགས་འགག་།མིང་དང་གཟུགས་འགགས་པས་སྐྱེ་མཆེད་དྲུག་འགག་།སྐྱེ་མཆེད་དྲུག་འགགས་པས་ 474a ༄#། །རེག་པ་འགག་།རེག་པ་འགགས་པས་ཚོར་བ་འགག་།ཚོར་བ་འགགས་པས་སྲེད་པ་འགག་།སྲེད་པ་འགགས་པས་ལེན་པ་འགག་།ལེན་པ་འགགས་པས་སྲིད་པ་འགག་།སྲིད་པ་འགགས་པས་སྐྱེ་བ་འགག་།སྐྱེ་བ་འགགས་པ་རྒ་ཤི་དང ། མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འགག་པར་འགྱུར་ཏེ། དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་པོ་འདི་འགག་པར་འགྱུར་རོ། །དགེ་སློང་དག་།དེ་ལྟར་ན་འདུ་བྱེད་རྣམས་ནི། སྡུག་བསྔལ་བ་ཡིན་ལ།་མྱ་ངན་ལས་འདས་པ་ནི། ཞི་བ་ཡིན་ཏེ། རྒྱུ་ཀུན་འབྱུང་བ་ལས་སྡུག་བསྔལ་ཀུན་འབྱུང་བར་འགྱུར་ལ། རྒྱུ་འགགས་པ་ལས་སྡུག་བསྔལ་འགག་པ་དང ། ལམ་གྱི་རྒྱུན་འཆད་པ་དང ། མི་འབྱུང་བ་དང ། ཉིང་མཚམས་སྦྱོར་བ་མེད་ཅིང་འགག་པར་འགྱུར་ཏེ། སྡུག་བསྔལ་གྱི་མཐའ་ནི། དེ་ལྟ་བུ་ཡིན་ནོ། །དགེ་སློང་དེ་ལ་སྡུག་བསྔལ་གང་ཡིན་པ་དེ་འགགས་པ་དང ། དེ་ཉེ་བར་ཞི་བ་དང ། དེ་བསིལ་བར་གྱུར་པ་དང ། དེ་ནུབ་པར་གྱུར་པ་མ་གཏོགས་པར་སུ་ཞིག་ཡོངས་སུ་མྱ་ངན་ལས་འདས་ཏེ། དགེ་སློང་དག་།འདི་ལྟ་སྟེ། ཕུང་པོ་ཀུན་སྤངས་པ། སྲེད་པ་ཟད་པ། འདོད་ཆགས་དང་བྲལ་བ། འགོག་པ་མྱ་ངན་ལས་འདས་པའི་གོ་འཕང་འདི་ནི། ཞི་བ་ཡིན་ནོ། །དེ་ནས་བཅོམ་ལྡན་འདས་ཀྱིས་ཡང་ལན་ 474b གཉིས་སུ་ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་བཀའ་སྩལ་པ། རྒྱལ་པོ་ཆེན་པོ། ཇི་སྙམ་དུ་སེམས། གཟུགས་རྟག་པ་ཞིག་གམ། མི་རྟག་པ་ཞིག་ཡིན་སྙམ། རྒྱལ་པོས་གསོལ་པ། བཙུན་པ། དེ་ནི། མི་རྟག་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གང་མི་རྟག་པ་དེ་སྡུག་བསྔལ་བ་ཞིག་གམ། སྡུག་བསྔལ་བ་མ་ཡིན། རྒྱལ་པོས་གསོལ་པ། བཙུན་པ། དེ་ནི། སྡུག་བསྔལ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། འོ་ན་གང་མི་རྟག་པ་དང ། སྡུག་བསྔལ་བ་དང ། རྣམ་པར་འགྱུར་བའི་ཆོས་ཅན་དེ་ལ་འཕགས་པ་ཉན་ཐོས་ཐོས་པ་དང་ལྡན་པ་དག་འདི་ནི། བདག་གིའོ། །འདི་ནི་བདག་གོ་།འདི་ནི། བདག་གི་བདག་གོ་།ཞེས་བདག་ཏུ་ཁས་ལེན་པར་བྱེད་དམ། རྒྱལ་པོས་གསོལ་པ། བཙུན་པ། མི་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། ཇི་སྙམ་དུ་སེམས། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་རྟག་པ་ཞིག་གམ། མི་རྟག་པ་ཞིག་ཡིན་སྙམ་མམ། རྒྱལ་པོས་གསོལ་པ། བཙུན་པ། དེ་ནི། མི་རྟག་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གང་མི་རྟག་པ་དེ་སྡུག་བསྔལ་བ་ཞིག་གམ། སྡུག་བསྔལ་བ་མ་ཡིན། རྒྱལ་པོས་གསོལ་པ། བཙུན་པ། དེ་ནི། སྡུག་བསྔལ་བ་ལགས་སོ། །བཅོམ་ 475a ༄#། །ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། འོ་ན་གང་མི་རྟག་པ་དང ། སྡུག་བསྔལ་བ་དང ། རྣམ་པར་འགྱུར་བའི་ཆོས་ཅན་དེ་ལ་འཕགས་པ་ཉན་ཐོས་ཐོས་པ་དང་ལྡན་པ་དག་།འདི་ནི། བདག་གིའོ། །འདི་ནི། བདག་གོ་།འདི་ནི། བདག་གི་བདག་གོ་།ཞེས་བདག་ཏུ་ཁས་ལེན་པར་བྱེད་དམ། རྒྱལ་པོས་གསོལ་པ། བཙུན་པ། མི་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་ལྟ་བས་ན། གཟུགས་གང་ཅི་ཡང་རུང་བ་འདས་པ་དང ། མ་འོངས་ཡང་མ། ད་ལྟར་བྱུང་བའམ། ནང་གིའམ། ཕྱི་རོལ་གྱིའམ། རགས་པའམ། ཕྲ་བའམ། བཟང་པོའམ། ངན་པའམ། གང་རྒྱང་རིང་བའམ། གང་ཐག་ཉེ་བ་དེ་དག་ཐམས་ཅད་ལ་ཡང་དག་པའི་ཤེས་རབ་ཀྱིས་འདི་ནི།་བདག་གི་མ་ཡིན་ནོ། །འདི་ནི། བདག་མ་ཡིན་ནོ། །འདི་ནི། བདག་གི་བདག་མ་ཡིན་ནོ། །ཞེས་དེ་ལྟར་དེ་དག་ལ་ཡང་དག་པ་ཇི་ལྟ་བ་བཞིན་དུ་བལྟ་བར་བྱའོ། །ཚོར་བ་དང ། འདུ་ཤེས་དང ། འདུ་བྱེད་གང་ཅི་ཡང་རུང་བ་དང ། རྣམ་པར་ཤེས་པ་གང་ཅི་ཡང་རུང་བ་འདས་པའམ། མ་འོངས་པའམ། ད་ལྟར་བྱུང་བའམ། ནང་གིའམ། ཕྱི་རོལ་གྱིའམ། རགས་པའམ། ཕྲ་བའམ། བཟང་པོའམ། ངན་པའམ། གང་རྒྱང་རིང་བའམ། གང་ཐག་ཉེ་བ་དེ་དག་ཐམས་ཅད་ལ་ཡང་དག་པའི་ཤེས་རབ་ཀྱིས་འདི་ནི། བདག་གི་མ་ཡིན་ནོ། །འདི་ནི། བདག་མ་ 475b ཡིན་ནོ། །འདི་ནི། བདག་གི་བདག་མ་ཡིན་ནོ། །ཞེས་དེ་ལྟར་དེ་དག་ལ་ཡང་དག་པ་ཇི་ལྟ་བ་བཞིན་དུ་བལྟ་བར་བྱའོ། །རྒྱལ་པོ་ཆེན་པོ། དེ་ལྟར་ལྟ་བའི་འཕགས་པ་ཉན་ཐོས་ཐོས་པ་དང་ལྡན་པ་ནི།་གཟུགས་ལ་ཡང་སྐྱོ་བར་འགྱུར། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་ལ་ཡང་སྐྱོ་བར་འགྱུར་རོ། །སྐྱོ་ན་འདོད་ཆགས་དང་བྲལ་བར་འགྱུར་རོ། །འདོད་ཆགས་དང་བྲལ་ན་རྣམ་པར་གྲོལ་བར་འགྱུར་རོ། །རྣམ་པར་གྲོལ་བས་བདག་ནི། སྐྱེ་བ་ཟད་དེ། ཚངས་པར་སྤྱོད་པ་བསྟེན་ཏོ། །བྱ་བ་བྱས་སོ། །སྲིད་པ་འདི་ལས་གཞན་མི་ཤེས་སོ། །ཞེས་རྣམ་པར་གྲོལ་བ་ཤེས་ཤིང་མཐོང་བར་འགྱུར་རོ། །ཆོས་ཀྱི་རྣམ་གྲངས་འདི་བཤད་པ་ན་ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་དང ། ལྷ་བརྒྱད་ཁྲི་དང ། ཡུལ་མ་ག་དྷའི་བྲམ་ཟེ་དང ། ཁྱིམ་བདག་འབུམ་ཕྲག་དུ་མ་དག་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དེ་ནས་ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་ཆོས་མཐོང་ཞིང་ཆོས་ཐོབ་ལ། ཆོས་རྟོགས་ཤིང་ཆོས་ཀྱི་གཏིང་སླེབས་ཏེ་ནེམ་ནུར་ལས་རྒལ་ཏེ་ཐེ་ཚོམ་ལས་རྒལ་ཅིང་གཞན་གྱི་དྲིང་མི་འཇོག་པ་དང ། གཞན་གྱིས་བཀྲིར་མི་ཟུག་པ་དང ། སྟོན་པའི་བསྟན་པའི་ཆོས་རྣམས་ལ་མི་འཇིགས་པ་ཐོབ་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ 476a ༄#། །བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། བདག་ནི། མངོན་པར་ཞུགས་པ་ལགས་སོ། །བདག་ནི། མངོན་པར་ཞུགས་པ་ལགས་སོ། །བདག་བཅོམ་ལྡན་འདས་དང ། ཆོས་དང ། དགེ་སློང་གི་དགེ་འདུན་ལ་སྐྱབས་སུ་མཆི་ལགས་ཀྱི། བདག་དེང་སླན་ཆད་ཇི་སྲིད་འཚོའི་བར་དུ་སྲོག་གཅོད་པ་ལ་སོགས་པ་སྤངས་པ། སྐྱབས་སུ་མཆིས་པ། མངོན་པར་དད་པར་གྱུར་པའི་དགེ་བསྙེན་ལགས་པར་གཟུང་དུ་གསོལ། བདག་གིས་ཇི་སྲིད་འཚོའི་བར་དུ་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ན་བཟའ་དང ། བསོད་སྙོམས་དང ། གཟིམས་ཆ་དང ། གདན་དང ། སྙུན་གྱི་གསོས་སྨན་ཡོ་བྱད་དག་གིས་བསྙེན་བཀུར་བགྱི་བར་འཚལ་ན། བཅོམ་ལྡན་འདས་རྒྱལ་པོའི་ཁབ་ཏུ་གཤེགས་པར་ཅི་གནང ། བཅོམ་ལྡན་འདས་ཀྱིས་ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོ་ལ་ཅང་མི་གསུང་བས་གནང་བར་མཛད་དོ། །དེ་ནས་ཡུལ་མ་ག་དྷའི་རྒྱལ་པོ་བཟོ་སྦྱངས་གཟུགས་ཅན་སྙིང་པོས་བཅོམ་ལྡན་འདས་ཀྱིས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་བསྟོད་ཅིང་རྗེས་སུ་ཡི་རང་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ཀྱི་སྤྱན་སྔ་ནས་ 476b ཕྱིར་སོང་ངོ ། །མདོ་ཆེན་པོ་གཟུགས་ཅན་སྙིང་པོས་བསུ་བ་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། པྲ་ཛྙཱ་ཝརྨ་དང ། ཞུ་ཆེན་གྱི་ལོ་ཙཱ་བ་བནྡྷེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། |