།།རྒྱ་གར་སྐད་དུ། ཏ་མོ་པ་ན་མུ་ཁ་ནཱ་མ་སཝཱཧཱ། བོད་སྐད་དུ། མུན་གྱི་ནགས་ཚལ་གྱི་སྒོ་ཞེས་བྱ་བའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་དེའི་ཚེ་ངམ་གྲོག་གསུམ་པོ་ཞེས་བྱ་བའི་ལྗོངས་ཀྱི་སྐྱེ་བོ་དག་གི་ནང་ནས་རི་ཁྲོད་ཀྱི་གྲོང་ཞིག་ན། བྲམ་ཟེ་ལ་བ་ཅན་ཞེས་བྱ་བ་སྤུན་བུ་འདོད་པའི་ཕྱིར་བྲམ་ཟེ་རྔ་ལེབ་ལ་དཀའ་ཐུབ་བྱེད་དེ། ལྷ་སྟོང་ཕྲག་བརྒྱ་ལ་བུ་སློང་ཞིང་གསོལ་བ་འདེབས་པ་དང་ལ་བ་ཅན་ལ་བུ་བཙས་པ་ནི་མིང་རབ་མཐོང་ཞེས་བཏགས་ 252b སོ། །ནུ་བོ་ལ་བཙས་པ་ནི་དགའ་བོ་ཞེས་བཏགས་སོ། །གང་གི་ཉིན་མོ་རབ་མཐོང་བཙས་པ་དེའི་ཉིན་མོ་བྲམ་ཟེ་ལྔ་བརྒྱ་ལ་བུ་ལྔ་བརྒྱ་བཙས་ཏེ། དེ་དག་རིམ་བཞིན་དུ་བུ་ཆེར་སྐྱེས་པ་དང།་རབ་མཐོང་ལ་སོགས་པ་ལྔ་བརྒྱ་ལྷན་ཅིག་ཏུ་རིག་པ་དག་སློབ་པ་ན། རབ་མཐོང་ལ་སོགས་པ་རིག་པའི་གནས་ཐམས་ཅད་ཀྱི་ཕ་རོལ་ཏུ་སོན་ཅིང་ཐམས་ཅད་རྫོགས་པར་ཡང་དག་པར་བྱང་བར་གྱུར་ལ། བསོད་ནམས་ཀྱི་ཚོགས་ཡང་དག་པ་ལས་བྱུང་བའི་སྤྱོད་པ་མཚུངས་པ་མེད་པ་སྟོང་ཕྲག་བརྒྱ་སྙེད་ཐོབ་སྟེ། དབང་བྱེད་པ་གང་གི་དུས་སུ་བྲམ་ཟེ་མ་ཎ་པ་གཅིག་ཡུལ་དབུས་ནས་འོངས་ཏེ་ཕྱིན་ནས་ཕྲད་པ་དང ། དེ་ལ་གསོང་པོར་སྨྲས་ཏེ་གཏམ་དག་ཀྱང་བྱས་ནས་ངེས་པར་གང་ནས་འོངས་པ་ཡིན་ཞེས་དྲིས་པ་དང ། དེས་སྨྲས་པ། ཡུལ་དབུས་ནས་འོངས་པ་ཡིན་ཏེ། དེའང་གྲོང་ཁྱེར་ཆེན་པོ་དྲུག་གོ་།དེའི་ནང་དག་ན་ཚད་མ་དྲུག་ལ་མཁས་ཤིང་ལྟས་ཀྱི་བྱ་བ་དྲུག་ལ་ཐོགས་པ་མེད་པར་བརྗོད་ནུས་པའི་སྟོན་བཅོ་བརྒྱད་ཡོད་དེ། དེ་ན་ཆུ་ཀླུང་ཡང་འབབ་བོ། །དེ་མ་ཡིན་པ་བསོད་ནམས་ཆེན་པོ་དང་ལྡན་པ། དགེ་ཞིང་ཤེས་པ། འཇིག་རྟེན་ཐམས་ཅད་མཁྱེན་པ། སངས་རྒྱས་བཅོམ་ལྡན་འདས་ཀྱང་དེ་ནའོ་ཞེས་བྱས་པ་དང ། རབ་འཐོང་གིས་སྒྲ་དེ་ཐོས་པ་དང ། བ་སྤུ་ལངས་ཡི་གཡོས། རབ་ཏུ་དགའ་སྟེ་དེར་འགྲོའོ་སྙམ་ནས། ཕའི་གན་དུ་སོང་སྟེ་ཕྱིན་ནས། 253a ༄#། །ཡབ།་བདག་ནི་ཡུལ་དབུས་སུ་མཆིའོ། །དེ་ནས་མུ་སྟེག་པ་དག་ལས་རྒྱལ་བར་བགྱིའོ། །མཁས་པར་འགྲངས་པ་དག་དང་ངེས་པར་ལྷན་ཅིག་སྨྲ་བར་བགྱིའོ་ཞེས་གསོལ་པ་དང ། ཕས་དེ་ལྟར་གནང་ངོ ། །དེ་ནས་བསོད་ནམས་ཆེན་པོ་སྦྱིན་པས་དབང་ཕྱུག་ཆེན་པོ་དང་ལྡན་པ། སེམས་ཅན་ཐམས་ཅད་ལ་གཏོང་པ་ཆེན་པོ་ཅན་དེ་ལྷ་དག་གིས་བསྲུངས་པ་ཞིག་པས་ལྷ་དག་ཉེ་བར་འོང་ཞིང་སྔོན་དུ་འགྲོ་སྟེ། རབ་མཐོང་ཆེན་པོ་ལ་མཆོད་པ་བྱོས་ཤིག་དང ། ཕན་ཡོན་མང་པོ་དག་གི་འབྲས་བུ་ཆེན་པོ་འབྱུང་བར་འགྱུར་རོ་ཞེས་སྒྲ་སྒྲོགས་ཤིང་སོང་བ་དང ། རིམ་གྱིས་ལྷ་དང ། མིས་མཆོད་པ་བྱས་ཤིང་མཉན་ཡོད་དུ་ཕྱིན་ཏོ། །དེ་ནས་ལམ་གྱིས་དུབ་པ་རྟ་བསྟིས་ཏེ་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ཀྱིས་དེ་དག་ལ་ཆོས་བསྟན་པ་མཛད་དེ། དེའི་འཁོར་ལྔ་བརྒྱ་པོ་དག་ལྟ་བ་མཆོག་ཏུ་འཛིན་པ་བཤིག་བཅོམ་སྟེ། བདེན་པ་མཐོང་སྟེ་དེ་ཉིད་དུ་རབ་ཏུ་བྱུང ། དགེ་སློང་གི་དངོས་པོ་བཟུང་སྟེ། ཉོན་མོངས་པ་ཐམས་ཅད་བཅོམ་ནས་དགྲ་བཅོམ་པ་མངོན་དུ་བྱས་ཏེ། དགའ་བོ་ནི་མ་གཏོགས་སོ། །སྐྱེ་བོ་མང་པོ་ཀུན་གྱིས་ཀྱང་ཆོས་ཁོང་དུ་ཆུད་དོ། །སྟོན་པ་ཆེན་ 253b པོ་རབ་མཐོང་བལྟ་བའི་ཕྱིར་ལྷ་ལ་སོགས་པ་དག་ཀྱང་འོངས་ཏེ་དེར་ཕྱིན་པ་དང ། བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།དགེ་སློང་རབ་མཐོང་འདི་ནི་ངའི་དགེ་སློང་དང ། དགེ་སློང་དག་གི་ཉན་ཐོས་དག་ལ་ཇི་ལྟར་ལྷ་དང ། མི་མཆོད་པ་བྱེད་དེ། དེ་དག་གི་ནང་ན་ལྷ་དང ། མིས་མཆོད་པར་བྱ་བའི་མཆོག་ནི་དགེ་སློང་རབ་མཐོང་ཡིན་ནོ། །ཞེས་བཅོམ་ལྡན་འདས་ཀྱིས་བཀའ་སྩལ་ཏོ། །དེ་ནས་དུས་དེ་ཉིད་དུ་མི་མཇེད་ཀྱི་བདག་པོ་ཚངས་པ་དང ། ལྷ་རྣམས་ཀྱི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་བཞི་དང་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། དྲི་ཟའི་རྒྱལ་པོ་དང ། གྲུལ་བུམ་གྱི་སྡེ་དཔོན་ཆེན་པོ་ལ་སོགས་པ་རང་རང་གི་གནས་ནས་སོང་སྟེ། ཚེ་དང་ལྡན་པ་རབ་མཐོང་ཆེན་པོ་ག་ལ་བ་དེར་སོང་སྟེ་ཕྱིན་ནས། ཕྱོགས་གཅིག་ཏུ་འཁོད་དེ་མངོན་དུ་ཕྱོགས། ཐལ་མོ་སྦྱར་ཏེ་འདི་སྐད་ཅེས་སྨྲས་སོ། །ཀྱེ།་བཙུན་པ་རབ་མཐོང་ཆེན་པོ། སྔོན་གྱི་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་གཤེགས་ཤིང་བཞུགས་པའི་གནས། རང་སངས་རྒྱས་ཀྱི་བཞུགས་གནས། འདོད་ཆགས་དང་བྲལ་བ་དག་གིས་གནས་པར་བྱ་བ་དྲང་སྲོང་གི་གནས་སུ་གྱུར། དེ་ཁོ་ན་ཉིད་ངེས་པར་མཁྱེན་ནས་འདས་པའི་བསྐལ་པ་དགུ་བཅུ་རྩ་གཅིག་ན་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ 254a ༄#། །ཞེས་བྱ་བ་འཇིག་རྟེན་དུ་བྱུང་སྟེ། དེའི་ཚེ་དགེ་སློང་གསལ་བ་ཞེས་བྱ་བ་ལྷ་དང ། མིས་མཆོད་པའི་མཆོག་ཏུ་གྱུར་པ་དེའི་གནས་ཀྱང་འདི་ལགས་ཏེ། ཡུལ་དབུས་ལས་བྱང་ཕྱོགས་ཀྱིས་མཚམས་ཀྱི་རི་དུང་གི་ལྟེ་བ་ཞེས་བྱ་བ་ནི་རི་དེ་ལ་རྩཝ་རིགས་དུང་གི་ལྟེ་བ་འདྲ་བ་སྐྱེ་བས་དུང་གི་ལྟེ་བའི་རི་ཞེས་བྱ་བར་བཏགས་པར་གྱུར། རི་དེ་དང་ཉེ་བ་ན་ནགས་ཞིག་ན་ཀླུ་མོ་ཨེ་ནི་ཞེས་བྱ་བ་གནས་པས་ཨཻ་ནིའི་ནགས་ཞེས་བྱ་བར་བཏགས་པར་འགྱུར། དེ་ན་ཕུག་ཅིག་ཡོད་པ་དང་ཉེ་བར་ཤིང་པ་ཏི་ལི་ཞེས་བྱ་བ་སྐྱེ་བས་པ་ཏིའི་ཕུག་ཅེས་བཏགས་པར་གྱུར་པ་དེ་ཉིད་དུ་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཞེས་བྱ་བ། འཁོར་དགྲ་བཅོམ་པ་བརྒྱད་ཁྲི་དང་གཤེགས་ཤིང་ཐབས་གཅིག་ཏུ་བཞུགས་པར་གྱུར། དགེ་སློང་གསལ་བའང་དེ་ཉིད་ནའོ། །དེ་ནས་བཅོམ་ལྡན་འདས་འཁོར་དང་བཅས་པ་དག་ཀྱང་རིམ་པ་བཞིན་དུ་མྱ་ངན་ལས་འདས། བསྟན་པ་ནུབ་ནས་རང་སངས་རྒྱས་བདུན་ཁྲི་དག་མངོན་པར་ཤེས་པ་དྲུག་དང་ལྡན་པ་དག་མཉམ་དུ་བྱུང་སྟེ་གཤེགས་ཤིང་བཞུགས་པར་གྱུར། རང་སངས་རྒྱས་དེ་དག་ཀྱང་མྱ་ངན་ལས་འདས་ནས་དྲང་སྲོང་དྲུག་ཁྲི་མངོན་པར་ཤེས་པ་ལྔ་དང་ལྡན་པ་དག་ཀྱང་དེ་ཉིད་དུ་གནས་པར་གྱུར་ཏོ། །བཙུན་པ་རབ་མཐོང་ཆེན་པོ། 254b དེ་ནས་ཡང་བསྐལ་པ་དྲུག་ཅུ་རྩ་གཅིག་ན་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་གཙུག་ཏོར་ཅན་ཞེས་བྱ་བ་འཇིག་རྟེན་དུ་བྱུང་སྟེ། དེའི་དགེ་སློང་རབ་གསལ་ཞེས་བྱ་བ་ལྷ་དང ། མིས་མཆོད་པའི་མཆོག་ཏུ་གྱུར་པའང་དེ་ཉིད་ནའོ། །མཚམས་ཀྱི་རི་དེ་ཉིད་ལ་རྩཝའི་རིགས་རོ་ཧི་ཏཱི་ཞེས་བྱ་བ་སྐྱེ་བས་རོ་ཧི་ཏཱི་རི་ཞེས་བྱ་བར་བཏགས་པར་གྱུར། ཀླུ་མོ་གོས་མེད་ཅེས་བྱ་བ་གནས་པས་གོས་མེད་ཀྱི་ནགས་ཞེས་བྱ་བར་བཏགས་པར་གྱུར། ཤིང་ཤིར་ཤ་སྐྱེ་བས་ཤིང་ཤིར་ཤའི་ཕུག་ཅེས་བཏགས་པར་གྱུར། ཡང་དག་པར་རྫོགས་སངས་རྒྱས་གཙུག་ཏོར་ཅན་འཁོར་དགྲ་བཅོམ་པ་བདུན་ཁྲི་དང་ཡང་དེར་གཤེགས་ཤིང་ཐབས་གཅིག་ཏུ་བཞུགས་པར་གྱུར། དེ་དག་ཀྱང་མྱ་ངན་ལས་འདས། བསྟན་པ་ནུབ་ནས་རང་སངས་རྒྱས་དྲུག་ཁྲིའང་དེར་གཤེགས་ཤིང་བཞུགས་པར་གྱུར། རང་སངས་རྒྱས་དེ་དག་ཀྱང་མྱ་ངན་ལས་འདས་ནས་དྲང་སྲོང་ལྔ་ཁྲིའང་མངོན་པར་ཤེས་པ་ལྔ་དང་ལྡན་པ་དེ་འདི་ཉིད་ན་གནས་པར་གྱུར་ཏོ། །བཙུན་པ་རབ་མཐོང་ཆེན་པོ། དེ་ནས་ཡང་བསྐལ་པ་སུམ་ཅུ་རྩ་གཅིག་ན་ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་ཅེས་བྱ་བ་འཇིག་རྟེན་དུ་བྱུང་སྟེ། དེའི་དགེ་སློང་ཆོས་གསལ་ཞེས་བྱ་བ་ལྷ་དང ། མིས་མཆོད་པའི་མཆོག་ཏུ་གྱུར་པའང་དེ་ཉིད་ནའོ། །མཚམས་ཀྱི་རི་དེ་ལ་རྩཝའི་རིགས་ 255a ༄#། །བྷ་ས་བྷ་ཞེས་བྱ་བ་སྐྱེ་བས་བྷ་ས་བྷའི་རི་ཞེས་བཏགས་པར་གྱུར། ཀླུ་མོ་བྲག་ཅེས་བྱ་བ་གནས་པས་བྲག་གི་ནགས་ཞེས་བཏགས་པར་གྱུར། ཤིང་ཨ་ཤཝད་ཐ་སྐྱེ་བས་ཨ་ཤཝད་ཐའི་ཕུག་ཅེས་བཏགས་པར་གྱུར། ཡང་དག་པར་རྫོགས་པའི་སངས་རྒྱས་ཐམས་ཅད་སྐྱོབ་འཁོར་དགྲ་བཅོམ་པ་དྲུག་ཁྲི་དང་དེ་ཉིད་དུ་གཤེགས་ཤིང་ཐབས་གཅིག་ཏུ་བཞུགས་པར་གྱུར། དེ་དག་མྱ་ངན་ལས་འདས། བསྟན་པ་ནུབ་ནས་རང་སངས་རྒྱས་ལྔ་ཁྲིའང་གཤེགས་ཤིང་བཞུགས་པར་གྱུར། རང་སངས་རྒྱས་དེ་དག་ཀྱང་མྱ་ངན་ལས་འདས་ནས་དྲང་སྲོང་མངོན་པར་ཤེས་པ་ལྔ་དང་ལྡན་པ་བཞི་ཁྲིའང་གནས་པར་གྱུར་ཏོ། །འདི་ནི་བཙུན་པ་རབ་མཐོང་ཆེན་པོ། སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་བཞི་ཁྲི་ཐུབ་པ་ན། ཡང་དག་པར་རྫོགས་པའི་སངས་རྒྱས་ལོག་པར་དད་སེལ་ཞེས་བྱ་བ་འཇིག་རྟེན་དུ་བྱུང་སྟེ། དེའི་དགེ་སློང་ཆོས་ལྡན་ཞེས་བྱ་བ་ལྷ་དང ། མིས་མཆོད་པའི་མཆོག་ཏུ་གྱུར་པའང་དེ་ཉིད་ནའོ། །མཚམས་ཀྱི་རིའི་རྩཝའི་རིགས་ཀཽ་ཤི་ཀ་ཞེས་བྱ་བ་སྐྱེ་བས་ཀཽ་ཤི་ཀའི་རི་ཞེས་བཏགས་པར་གྱུར། སྤྲིན་ཅེས་བྱ་བའི་ཀླུ་མོ་གཅིག་གནས་པས་སྤྲིན་གྱི་ནགས་ཞེས་བཏགས་པར་གྱུར། ཤིང་ཨུ་དུམ་ཝཱ་ར་སྐྱེ་བས་ཨུ་དུམ་ཝཱ་རའི་ཕུག་ཅེས་བཏགས་པར་གྱུར། ཡང་དག་པར་རྫོགས་པའི་ 255b སངས་རྒྱས་ལོག་པར་དད་སེལ་འཁོར་གྱི་དགྲ་བཅོམ་པ་ལྔ་ཁྲི་དང་ཐབས་གཅིག་ཏུ་གཤེགས་ཤིང་བཞུགས་པར་གྱུར། དེ་དག་ཀྱང་མྱ་ངན་ལས་འདས་ནས་མངོན་པར་ཤེས་པ་ལྔ་དང་ལྡན་པ་དྲང་སྲོང་སུམ་ཁྲིའང་དེ་ན་གནས་པར་གྱུར་ཏོ། །འདི་ནི་བཙུན་པ་རབ་མཐོང་ཆེན་པོ། སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་སུམ་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་གསེར་ཐུབ་ཅེས་བྱ་བ་འཇིག་རྟེན་དུ་བྱུང་སྟེ། དེའི་དགེ་སློང་ཆོས་འཕགས་ཞེས་བྱ་བ་ལྷ་དང ། མིས་མཆོད་པའི་མཆོག་ཏུ་གྱུར་པའང་དེ་ཉིད་ནའོ།། མཚམས་ཀྱི་རི་དེ་ལ་རྩཝའི་རིགས་ཁ་དོག་ལྗང་ལོ་ཅན་ཞེས་བྱ་བ་སྐྱེ་བས་ཁ་དོག་ལྗང་ལོ་རི་ཞེས་བཏགས་པར་གྱུར། ཐིག་ལེ་ཞེས་བྱ་བའི་ཀླུ་མོ་གནས་པས་ཐིག་ལེའི་ནགས་ཞེས་བཏགས་པར་གྱུར། ཤིང་ཀ་པི་ཏ་སྐྱེ་བས་ཀ་པི་ཏའི་ཕུག་ཅེས་བཏགས་པར་གྱུར། ཡང་དག་པར་རྫོགས་པའི་སངས་རྒྱས་གསེར་ཐུབ་འཁོར་དགྲ་བཅོམ་པ་བཞི་ཁྲི་དང་གཤེགས་ཤིང་ཐབས་གཅིག་ཏུ་བཞུགས་པར་གྱུར། དེ་དག་ཀྱང་མྱ་ངན་ལས་འདས། བསྟན་པ་ནུབ་ནས་རང་སངས་རྒྱས་སུམ་ཁྲིའང་གཤེགས་ཤིང་བཞུགས་པར་གྱུར། རང་སངས་རྒྱས་དེ་དག་ཀྱང་མྱ་ངན་ལས་འདས་ནས་མངོན་པར་ཤེས་པ་ལྔ་དང་ལྡན་པ་དྲང་སྲོང་ཉི་ཁྲིའང་དེ་ཉིད་ན་གནས་པར་གྱུར་ཏོ། །འདི་ནི་བཙུན་པ་རབ་མཐོང་ཆེན་པོ། སྔོན་བྱུང་ 256a ༄#། །བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་ཡང་དག་པར་རྫོགས་པའི་སངས་རྒྱས་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། དེའི་དགེ་སློང་ཤེ་ཌོ་ཀ་ཞེས་བྱ་བ་ལྷ་དང ། མིས་མཆོད་པའི་མཆོག་ཏུ་གྱུར་པའང་དེ་ཉིད་ནའོ། །མཚམས་ཀྱི་རི་ལ་རྩཝའི་རིགས་ཟླ་བ་ཞེས་བྱ་བ་སྐྱེ་བས་ཟླ་བའི་རི་ཞེས་བཏགས་པར་གྱུར། ཀླུ་མོ་རྒྱལ་བ་ཞེས་བྱ་བ་གནས་པས་རྒྱལ་བའི་ནགས་ཞེས་བྱ་བར་བཏགས་པར་གྱུར། ཤིང་ཛམྦུ་ཞེས་བྱ་བ་སྐྱེ་བས་ཛམྦུའི་ཕུག་ཅེས་བཏགས་པར་གྱུར། ཡང་དག་པར་རྫོགས་པའི་སངས་རྒྱས་འོད་སྲུང་འཁོར་གྱི་དགྲ་བཅོམ་པ་ཉི་ཁྲི་དང་གཤེགས་ཤིང་ཐབས་གཅིག་ཏུ་བཞུགས་པར་གྱུར། དེ་དག་ཀྱང་མྱ་ངན་ལས་འདས ། བསྟན་པ་ནུབ་ནས་རང་སངས་རྒྱས་ཁྲི་ལྔ་སྟོང་གཤེགས་ཤིང་བཞུགས་པར་གྱུར། རང་སངས་རྒྱས་དེ་དག་ཀྱང་མྱ་ངན་ལས་འདས་ནས་མངོན་པར་ཤེས་པ་ལྔ་དང་ལྡན་པ་དྲང་སྲོང་ཁྲི་གནས་པར་གྱུར་ཏོ། །འདི་ནི་བཙུན་པ་རབ་མཐོང་ཆེན་པོ། བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་བརྒྱ་ཐུབ་པ་ན་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་འཇིག་རྟེན་དུ་བྱུང་སྟེ། འཕགས་པ་རབ་མཐོང་ཆེན་པོ་ཁྱོད་ལྷ་དང ། མིས་མཆོད་པའི་མཆོག་ཏུ་གྱུར་པའང་འདི་ཉིད་ནའོ། །མཚམས་ཀྱི་རི་ལ་རྩཝའི་རིགས་ཨུ་ཤི་ 256b ཤ་སྐྱེ་བས་ཨུ་ཤིའི་རི་ཞེས་བཏགས་པར་གྱུར། ཀླུ་མོ་ཏ་མ་ཞེས་བྱ་བ་གནས་པས་ཏ་མའི་ནགས་ཚལ་ཞེས་བཏགས་པར་གྱུར། ཤིང་ཨ་མྲ་སྐྱེ་བས་ཨ་མྲའི་ཕུག་ཅེས་ད་ལྟར་བཏགས་པ་ཡིན་ཏེ། བཙུན་པ་རབ་མཐོང་ཆེན་པོ། ཨུ་ཤི་ཤའི་རི་བྲག་འདི་ཉིད་དུ་ཐུགས་བརྩེ་བར་དགོངས་ཏེ་བཞུགས་པ་ནི་ལེགས་སོ། །དེ་ནས་ཡང་ཚངས་པ་དང ། ལྷའི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་དག་གིས་གནས་བརྟན་ཆེན་པོའི་རྐང་པ་ལ་ཕྱག་བཙལ་ཏེ་ཐལ་མོ་སྦྱར་བ་བྱས་ནས་རབ་ཏུ་གུས་པས་འདི་སྐད་ཅེས་སྨྲས་སོ། །ཐུགས་བརྩེ་བ་ཅན། ནགས་འདི་ནི་གཤེགས་ཤིང་བཞུགས་པའི་གནས་ཡིན་ཏེ། བདག་ཅག་ཀྱང་ཉེ་གནས་བགྱིད་ལ་གཞན་དག་ཀྱང་གཟུང་དུ་གསོལ། དེ་ནི་སྙན་པར་གྲགས་ཤིང་ལེགས་ཏེ་ཆུ་ནི་གཟིགས་པར་དབྱུང་བར་འཚལ་ལོ་ཞེས་གསོལ་བ་བཏབ་བོ། །གཞན་ཡང ། གནོད་སྦྱིན་གྱི་སྡེ་དཔོན་བརྒྱད་པོ་འདི་དག་སྟེ། སིངྒ་ལ་ཞེས་བྱ་བ་དང ། ཆོས་སྐྱོང་ཞེས་བྱ་བ་དང ། དོན་གྲུབ་ཅེས་བྱ་བ་དང ། གཞན་ལས་རྒྱལ་ཞེས་བྱ་བ་དང ། གླང་རྣ་ཞེས་བྱ་བ་དང ། དབྱིག་རྣ་བ་ཞེས་བྱ་བ་དང ། ཆོས་ལྡན་ཞེས་བྱ་དང ། ཆོས་འཕགས་ཞེས་བྱ་བས་ཀྱང་གནས་བརྟན་ཆེན་པོའི་རྐང་པ་ལ་ཕྱག་བཙལ་ཏེ་ཐལ་མོ་སྦྱར་ནས་རབ་ཏུ་གུས་པས་འདི་སྐད་ཅེས་སྨྲས་སོ། །ཐུགས་བརྩེ་བ་ཅན། ནགས་དེ་ནི་གཤེགས་ཤིང་བཞུགས་ 257a ༄#། །པའི་གནས་ཡིན་ཏེ། བདག་ཅག་ཀྱང་ཉེ་གནས་བགྱིད་ལ་གཞན་དག་ཀྱང་གཟུང་དུ་གསོལ། དེ་ནི་སྙན་པར་གྲགས་ཤིང་ལེགས་ཏེ་ཆུ་ནི་གཟིགས་པར་དབྱུང་བར་འཚལ་ལོ་ཞེས་གསོལ་བ་བཏབ་བོ། །གཞན་ཡང ། གནོད་སྦྱིན་མ་ཆེན་མོ་བརྒྱད་འདི་དག་སྟེ། ཨ་ཤི་ཌི་ཞེས་བྱ་བ་དང ། བུ་མང་ཤེ་ཞེས་བྱ་བ་དང ། འཕྱང་མ་ཞེས་བྱ་བ་དང ། རབ་ཏུ་འཕྱང་མ་དང ། དྲག་མོ་ཞེས་བྱ་བ་དང ། གཏུམ་མོ་ཞེས་བྱ་བ་དང ། མདུང་ཐུང་འཛིན་ཅེས་བྱ་བ་དང ། བར་སྣང་མ་ཞེས་བྱ་བས་ཀྱང་གནས་བརྟན་ཆེན་པོའི་རྐང་པ་ལ་ཕྱག་བཙལ་ཏེ་ཐལ་མོ་སྦྱར་བ་བྱས་ནས་རབ་ཏུ་གུས་པས་འདི་སྐད་ཅེས་སྨྲས་སོ། །ཐུགས་བརྩེ་བ་ཅན། ནགས་དེ་ནི་གཤེགས་ཤིང་བཞུགས་པའི་གནས་ཡིན་ཏེ་བདག་ཅག་ཀྱང་ཉེ་གནས་བགྱིད་ལ་གཞན་དག་ཀྱང་གཟུང་དུ་གསོལ། དེ་ནི་སྙན་པར་གྲགས་ཤིང་ལེགས་ཏེ་ཆུ་ནི་གཟིགས་པར་དབྱུང་བར་འཚལ་ལོ་ཞེས་གསོལ་བ་བཏབ་བོ། །དེ་བཞིན་དུ། གཞན་ཡང ། ཀླུ་ཆེན་པོ་བརྒྱད་པོ་འདི་དག་སྟེ། སེར་སྐྱ་ཞེས་བྱ་བ་དང ། དྲི་མ་ཞེས་བྱ་བ་དང ། ཆུ་ལྡན་ཞེས་བྱ་བ་དང ། དྲག་ཤུལ་ཞེས་བྱ་བ་དང ། ལྷའི་བང་རིམ་ཞེས་བྱ་བ་དང ། བུམ་པའི་བང་རིམ་ཞེས་བྱ་བ་དང ། ཉེ་བའི་ཀླུ་ཞེས་བྱ་བ་དང ། ོ་ཌ་སུ་ཏ་ཞེས་བྱ་བས་ཀྱང་གནས་བརྟན་ཆེན་པོའི་རྐང་པ་ལ་ཕྱག་བཙལ་ཏེ། 257b ཐལ་མོ་སྦྱར་བ་བྱས་ནས་རབ་ཏུ་གུས་པས་འདི་སྐད་ཅེས་སྨྲས་སོ། །ཐུགས་བརྩེ་བ་ཅན། ནགས་དེ་ནི་གཤེགས་ཤིང་བཞུགས་པའི་གནས་ཡིན་ཏེ། བདག་ཅག་ཀྱང་ཉེ་གནས་བགྱིད་ལ་གཞན་དག་ཀྱང་གཟུང་དུ་གསོལ། དེ་ནི་སྙན་པར་གྲགས་ཤིང་ལེགས་ཏེ། ཆུ་ནི་གཟིགས་པར་དབྱུང་བར་འཚལ་ལོ་ཞེས་གསོལ་བ་བཏབ་བོ། །གཞན་ཡང ། ཀླུ་མོ་བརྒྱད་པོ་འདི་དག་སྟེ། མུན་ཞེས་བྱ་བ་དང ། འགྲོ་འདོད་ཅེས་བྱ་བ་དང ། མཐོང་མོ་ཞེས་བྱ་བ་དང ། གྲང་མོ་ཞེས་བྱ་བ་དང ། ཁུར་དྲང་མོ་ཞེས་བྱ་བ་དང ། ལབ་འཐོར་མ་ཞེས་བྱ་བ་དང ། སྣ་ཚོགས་སྡེ་ཞེས་བྱ་བ་དང ། དྲི་ཟ་མོ་ཞེས་བྱ་བ་དག་གིས་ཀྱང་གནས་བརྟན་ཆེན་པོའི་རྐང་པ་ལ་ཕྱག་བཙལ་ཏེ། ཐལ་མོ་སྦྱར་བ་བྱས་ནས་རབ་ཏུ་གུས་པས་འདི་སྐད་ཅེས་སྨྲས་སོ། །ཐུགས་བརྩེ་བ་ཅན། ནགས་དེ་ནི་གཤེགས་ཤིང་བཞུགས་པའི་གནས་ཡིན་ཏེ། བདག་ཅག་ཀྱང་ཉེ་གནས་བགྱིད་ལ་གཞན་དག་ཀྱང་གཟུང་དུ་གསོལ། །དེ་ནི་སྙན་པར་གྲགས་ཤིང་ལེགས་ཏེ་ཆུ་ནི་གཟིགས་པར་དབྱུང་བར་འཚལ་ལོ་ཞེས་གསོལ་བ་བཏབ་པ་དང ། ཚེ་དང་ལྡན་པ་རབ་མཐོང་ཆེན་པོས་ཅང་མི་སྨྲ་བར་དང་དུ་བླངས་སོ། །ལྷ་དང ། ལྷ་མ་ཡིན་དང།་ནམ་མཁའ་ལྡིང་དང ། མིའམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་ལ་སོགས་པ་དེ་དག་གིས་ཚེ་དང་ལྡན་པ་རབ་མཐོང་ཆེན་པོས་ཅང་མི་སྨྲ་བ་དང་དུ་བླངས་པར་རིག་ 258a ༄#། །ནས་དགའ་མགུ་ཡི་རངས་པར་གྱུར་ཏོ། །དེ་ནས་ཚེ་དང་ལྡན་པ་རབ་མཐོང་ཆེན་པོས་སྟོན་པའི་ཞལ་དུ་ལྟ་བ་མཐོང་ནས་ཏ་མ་སའི་ནགས་སུ་སོང་སྟེ།་ཕྱིན་ནས་བླ་གབ་མེད་པར་འགྲེང་སྟེ་གཎྜི་བརྡུངས་ཏེ། གཎྜིའི་སྒྲ་དེས་ཛམྦུའི་གླིང་ཁྱབ་པར་སྒྲ་གྲགས་པར་གྱུར་པ་ན་དགེ་སློང་དག་གིས་སྒྲ་ཐོས་ཏེ་སེམས་པ་ལ་ཞུགས་པ་དང ། སྒྲ་འདི་ནི་མུན་གྱི་ནགས་ནས་བྱུང་ངོ་སྙམ་མོ། །དེའང་སྔོན་གྱི་ཡང་དག་པར་རྫོགས་པའི་སངས་རྒྱས་དག་གི་བཞུགས་གནས། རང་སངས་རྒྱས་རྣམས་ཀྱིས་གནས་བཅས་པ། འདོད་ཆགས་དང་བྲལ་བ་དག་དང་དྲང་སྲོང་དག་གིས་གནས་སུ་གྱུར་པ་ཡིན་ལ་ད་ལྟར་ཡང་དེ་ཁོ་ན་བཙུན་པ་རབ་མཐོང་ཆེན་པོ་ཡིན་པར་གོ་ཞིང་ཤེས་ནས་མཐོང་སྟེ། དག་བཅོམ་པ་ཁྲི་བརྒྱད་སྟོང་སྙེད་ཀྱིས་མུན་གྱི་ནགས་སུ་ཕྱིན་ཏེ་དབྱར་གྱི་གནས་པའང་བཅས། ཚངས་པ་ལྷའི་དབང་པོ་དང ། འཇིག་རྟེན་སྐྱོང་བ་དེ་དག་གིས་དེ་བཞིན་གཤེགས་པའི་དབུ་སྐྲ་དང ། སེན་མོ་ཁྱེར་ཏེ་འོངས་ནས་དབུ་སྐྲ་དང ། སེན་མོའི་མཆོད་རྟེན་ཞིག་བཞེངས་སུ་གསོལ། གཙུག་ལག་ཁང་ཞིག་ཀྱང་བརྩིགས། རྡོ་རྗེའི་གཙུག་ལག་ཁང་དུ་མཚན་གསོལ། མི་མཇེད་བདག་པོ་ཚངས་པ་དང ། འཇིག་རྟེན་སྐྱོང་བ་བཞིས་ཀྱང་སོ་སོ་ནས་གཙུག་ལག་ཁང་རེ་རེ་བཞེངས་སུ་གསོལ། ལོ་དང་པོ་ལ་ལྷ་རྣམས་ཀྱིས་གནས་བཅས། 258b ལྷའི་དབང་པོ་བརྒྱ་བྱིན་གྱིས་རང་གི་ལ་གནས་ལོ་གཅིག་གི་ཆོས་གོས་ལ་སོགས་པ་ཡོ་བྱད་ཀྱི་རིན་སྦྱར། ལྷའི་བུ་མོ་བདེ་སོགས་ཀྱིས་དགེ་སློང་རེ་རེ་ཞིང་རས་ཡུག་རེ་རེ་ཆོས་གོས་ཀྱི་རྒྱུའང་ཕུལ། དེ་ནས་ཚེ་དང་ལྡན་པ་རབ་མཐོང་ཆེན་པོ་གནས་ཁང་དུ་ལྷའི་འཁོར་གྱིས་བསྐོར་ཏེ་གནས་བཅས་པ་ན་འདི་སྐད་ཅེས་སྨྲས་སོ། །གནས་བཅས་པ་འདི་ཡུན་རིང་གནས་བཅས་པར་འགྱུར་བའི་ཕྱིར་ལྷ་དང ། མིའི་གྲོང་ཁྱེར་གནས་བཅའ་བའི་ཕྱིར་རྒྱལ་རིགས་རྩུབ་པོ་ཞེས་བྱ་བ་ལ་སོགས་པའི་མི་རྣམས་ལ་ཆོས་བསྟན་པས་ཡིད་རབ་ཏུ་དགའ་ཞིང ། དད་པར་གྱུར་ཏེ། རྒྱལ་པོ་ཆེན་པོ་རྩུབ་པོས་དཀོན་མཆོག་གསུམ་ལ་སྐྱབས་སུ་འགྲོ་བ་བྱས། གཞན་དག་ཀྱང་དད་པར་གྱུར་ཏེ། ཕུག་ལྔ་བརྒྱའི་ལས་ཀྱང་བྱས། དྲང་སྲོང་མངོན་པར་ཤེས་པ་ལྔ་དང་ལྡན་པ་ལྔ་བརྒྱའང་རབ་ཏུ་བྱུང་སྟེ། དགྲ་བཅོམ་པ་མངོན་དུ་བྱས། གནས་དེ་ན་བྲམ་ཟེ་སྨྲ་བ་ལ་མཁས་པ་ཞིག་ཡོད་པ་དེ་ལས་རྒྱལ་བར་གྱུར། བཏུལ་ནས་རབ་ཏུ་བྱུང་སྟེ།་དེས་ཀྱང་དགྲ་བཅོམ་པ་མངོན་དུ་བྱས་ཏེ་ཏ་མ་སའི་ནགས་ན་ཚེ་དང་ལྡན་པ་རབ་མཐོང་ཆེན་པོ་ལ་སོགས་པ་དགྲ་བཅོམ་པ་ཁྲི་བརྒྱད་སྙེད་གནས་བཅས་སོ་ཞེས། རྒྱལ་པོའི་ཕོ་བྲང་འཁོར་དང ། གྲོང་ཁྱེར་དང ། གྲོང་ཁྱེར་ཀུན་ཏུ་གྲགས་པར་གྱུར། རྒྱལ་པོ་རྩུབ་པོ་ལ་སོགས་པ་མི་རྣམས་ནི་འཕགས་པའི་དགེ་འདུན་གྱི་སླད་དུ་ཉིན་རེ་བཞིན་དུ་དར་བ་འབུལ། མི་ 259a ༄#། །མ་ཡིན་པ་དག་ནི་དེ་བཞིན་དུ་ཞུན་མར་འབུལ་བར་བྱེད། གཞན་ཡང ། དགའ་བ་དང ། དང་བས་མགུ་ཞིང་རངས་པས་ལེགས་པར་ལས་དང ། བྱ་བའང་བྱེད་དོ། །དེ་བཞིན་དུ་ཀླུ་དག་གིས་དགའ་བ་དང ། མགུ་བས་ཐ་དད་པའི་བྱེ་བྲག་བཅོ་བརྒྱད་ཀྱི་བཟའ་བ་དང ། བཅའ་བ་སྦྱར་བ་ཕུལ་ལོ། །གཞན་ཡང ། འདི་ལྟར་སྐྱེ་དགུའི་ལུས་ཅན་སེམས་བསྐྱེད་པ། འདི་ལྟ་སྟེ། བློན་པོ་དང ། རྒྱལ་རིགས་སྤྱིར་འདུས་ཏེ། ཀུན་དགའ་ར་བ་ཞིག་ཀྱང་བྱས་ཏེ། དེ་དག་ཏུ་མེ་ཏོག་གི་ཤིང་དང ། འབྲས་བུའི་ཤིང་མཛེས་པ་འདི་དག་སྟེ། ཨ་མྲའི་ཤིང་དང ། པ་ཏིའི་ཤིང་དང ། སེང་ལྡེང་གི་ཤིང་དང ། ནྱ་གྲོ་དྷའི་ཤིང་དང ། ་ཤཝད་ཐའི་ཤིང་དང ། འབྲས་བུ་གསུམ་གྱི་ཤིང་དང ། མེ་ཏོག་ཙམ་པ་ཀའི་ཤིང་དང ། ུ་དུ་ཀའི་ཤིང་དང ། མ་དུ་ཀའི་ཤིང་དང ། བིལ་བའི་ཤིང་དང ། འབྲ་ཧོའི་ཤིང་དང ། ཛམྦུའི་ཤིང་དང ། དུ་ནའི་ཤིང་དང ། ཆུ་ཤིང་ལ་སོགས་པ་དང ། མེ་ཏོག་མ་ལི་ཀ་དང ། ཀུན་དྷ་དང ། ཛ་ཧི་ཀ་ལ་སོགས་པ་མཛེས་པ་སྣ་ཚོགས་དགེ་སློང་བདེ་བར་གནས་པ་དགེ་བའི་ཕྱོགས་བྱེད་པ་དང་མཐུན་པ་ཞིག་ཀྱང་བྱས་ཏེ་དགེ་འདུན་ལ་ཕུལ་ལོ། ། དེ་ནས་དགེ་སློང་དག་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ། ཚེ་དང་ལྡན་པ་རབ་མཐོང་གིས་ལས་ཅི་བགྱིད་ན་ལས་གང་ 259b ཡང་རྣམ་པར་སྨིན་པ་ཕྱུག་ཅིང་ནོར་མང་ལ་ལོངས་སྤྱོད་དང་ལྡན་པའི་རིགས་སུ་སྐྱེས། གཟུགས་མཛེས་ཤིང་ལྷ་དང ། མིས་མཆོད་པའི་མཆོག་ཏུ་གྱུར། བསོད་ནམས་ཆེན་པོ་དང་ལྡན་པ་ཤེས་པར་འཆལ་ལགས་སོ་ཞེས་ཞུས་པ་དང ། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།འདས་པའི་བསྐལ་པ་དགུ་བཅུ་རྩ་གཅིག་ན་ཡང་དག་པར་རྫོགས་པའི་སངས་རྒྱས་རྣམ་པར་གཟིགས་ཞེས་བྱ་བ། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་སྟེ། རྒྱལ་པོ་གཉེན་ལྡན་གྱི་ཁབ་ན་བཞུགས་ཏེ། དུས་དེའི་ཚེ་ཞལ་ཞལ་མཁན་གྱི་རིགས་ལས་ཕྱུག་པ་ག་གེ་མོ་ཞེས་བྱ་བ་ཞིག་གིས་རྣམ་པར་གཟིགས་ཀྱི་སླད་དུ་གཙུག་ལག་ཁང་བརྩིགས་ཏེ། མེ་ཏོག་དང ། འབྲས་བུའི་ཤིང་ལེགས་པར་བཙུགས་ཏེ། ཀུན་ཏུ་དྲི་བསུང་གི་ངད་དང་ལྡན་པ་འབྱུང་བར་གྱུར་ཏེ་ཕུལ། སྟོན་པ་དེ་ཉིད་ཀྱི་བསྟན་པ་ལའང་རབ་ཏུ་བྱུང ། ཡང་དག་པར་རྫོགས་པའི་སངས་རྒྱས་རྣམ་པར་གཟིགས་མྱ་ངན་ལས་འདས་ནས་སྐུ་གདུང་གི་མཆོད་རྟེན་གྱི་རྨང་གི་འོག་ཏུ་རིན་པོ་ཆེའི་རྡོ་རིང་བ་ཅིག་བསྒྲེང་ངོ ། །ཞལ་ཞལ་མཁན་གྱི་རིགས་ལས་རབ་ཏུ་བྱུང་བ་དེའི་འཁོར་མང་པོའང་རྗེས་སུ་ཡི་རང་ཞིང་མོས་པར་གྱུར་ཏེ། ཁྱེད་ 260a ༄#། །སྟོན་པ་ལ་མོས་པར་གྱུར་པ་དེ་བཞིན་བདག་ཅག་ཀྱང་དད་ཅིང་མོས་པར་བགྱིད་དེ། སྟོན་པའི་བཀའ་བཞིན་དུ་བགྱིད་ཅིང་མཉེས་པར་བགྱིད་ལ་མི་མཉེས་པར་མ་གྱུར་ཅིག་ཅེས་སྨོན་ལམ་བཏབ་བོ། །དགེ་སློང་དག་།ཇི་སྙམ་དུ་སེམས། དེའི་ཚེ་དེའི་དུས་ན་ཞལ་ཞལ་མཁན་གང་ཡིན་པ་དེ་ནི་ཚེ་དང་ལྡན་པ་རབ་མཐོང་ཆེན་པོ་ཉིད་ཡིན་ལ། སྐྱེ་དགུའི་ལུས་ཅན་དེ་དག་ནི་ད་ལྟར་གྱི་ལྷ་དང་མི་འདི་དག་ཡིན་ཏེ། ད་ལྟར་ཡང་འདུལ་བར་བྱེད་པ་ཡིན་ནོ། །གཞན་ཡང ། བཅོམ་ལྡན་འདས་འོད་སྲུང་གི་བསྟན་པ་ལ་རབ་ཏུ་བྱུང་སྟེ། དེའི་མཁན་པོ་ནི་ལྷ་དང ། མིས་མཆོད་པའི་མཆོག་ཏུ་གྱུར་པ་ཡིན་ཏེ། ཇི་ལྟར་བདག་གི་མཁན་པོ་ལྷ་དང ། མིས་མཆོད་པའི་མཆོག་ཏུ་གྱུར་པ་དེ་བཞིན་དུ་བདག་ཀྱང་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་ལ་ལྷ་དང ། མིས་མཆོད་པའི་མཆོག་ཏུ་གྱུར་ཅིག་ཅེས་སྨོན་ལམ་བཏབ་བོ། །དེས་ན་ད་ལྟར་ལྷ་དང ། མིས་མཆོད་པའི་མཆོག་ཏུ་གྱུར་པ་ཡིན་ནོ། །དེ་ལྟ་བས་ན་དགེ་སློང་དག་གཅིག་ཏུ་གནག་པའི་ལས་ནི་རྣམ་པར་སྨིན་པའང་གཅིག་ཏུ་གནག་གོ་།རབ་ཏུ་དཀར་བ་ལས་ནི་དཀར་བའོ། །འདྲེས་པ་ལ་ནི་འདྲེས་པའོ། །དེ་བས་ན། དགེ་སློང་དག། རབ་ཏུ་གནག་པ་དང ། འདྲེས་མ་དག་ནི་སྤོངས་ཤིག། རབ་ཏུ་དཀར་བ་དག་ལ་སྤྱད་པར་བྱ་སྟེ། དགེ་སློང་དག་།དེ་བཞིན་དུ་བསླབ་པར་གྱིས་ 260b ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་དེ་དག་བཅོམ་ལྡན་འདས་ཀྱིས་བཤད་པ་ཡིད་ལ་བྱེད་དེ་མངོན་པར་དགའོ། །མུན་གྱི་ནགས་ཚལ་གྱི་སྒོ་ཞེས་བྱ་བའི་མདོ་རྫོགས་སོ།། །།བྱང་ཕྱོགས་རྒྱུད་ཀྱི་ཕྲེང་བའི་མདོ་ཁྲི་བའི་ནང་ནས་ཡུལ་ཟ་ལེནྡྲའི་བྱང་ཕྱོགས་ཀྱི་མཚམས་ཀྱི་རི་ཨུ་ཤི་རིའི་བསྔགས་པའོ།། །། |