རྒྱ་གར་སྐད་དུ། ཨལྤ་དེ་བ་ཏཱ་སཱུ་ཏྲ། བོད་སྐད་དུ། ལྷའི་མདོ་ཉུང་དུ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་ལྷ་ཞིག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་ལྷ་དེས་བཅོམ་ལྡན་འདས་ལ་ཞུ་བ་ཞུས་ 396a ༄#། །པ།་ཚུལ་ཁྲིམས་གང་ལགས་སྤྱོད་པ་གང ། །ཡོན་ཏན་གང་ལགས་ལས་གང་གིས། །གནས་པ་ཇི་ལྟར་ཤེས་རབ་གང ། །སྐྱེ་བོ་གང་དག་མཐོ་རིས་མཆི།། ལྷ་ལ་ཐུགས་པ་རྩེ་ཉེར་བཟུང་ནས། །སྟོན་པས་དེ་ལ་ལུང་བསྟན་པ། །སྐྱེ་བོ་མཐོ་རིས་གང་འགྲོ་བ། །ལྷ་ཁྱོད་ང་ལ་རབ་ཏུ་ཉོན། །སྲོག་གཅོད་པ་ལས་ཕྱིར་ལྡོག་ཅིང ། །ཁྲིམས་བཟུང་ཡང་དག་སྡོམ་ལ་དགའ། །གང་དག་འབྱུང་པོ་མི་འཚེ་བ། །སྐྱེ་བོ་དེ་དག་མཐོ་རིས་འགྲོ། གང་དག་མ་བྱིན་ལེན་སྤོང་ཞིང ། །སྦྱིན་པ་གཏོང་ལ་རྟག་དགའ་སྟེ། །རྐུ་བ་སྤོང་ཞིང་མི་རྐུ་བ། །སྐྱེ་བོ་དེ་དག་མཐོ་རིས་འགྲོ། གཞན་གྱི་ཆུང་མའི་ཐད་མི་འགྲོ། ལོག་པར་གཡེམ་པ་རྣམ་པར་སྤོང ། །བདག་གི་ཆུང་མས་ཆོག་སེམས་པ། །སྐྱེ་བོ་དེ་དག་མཐོ་རིས་འགྲོ། །གཞན་གྱི་དོན་ལ་རྐུ་བྱེད་དང ། །བདག་གི་ཕྱིར་དང་འཇིགས་པའི་ཕྱིར། །རྫུན་གྱི་ཚིག་རྣམས་མི་སྨྲ་བ། །སྐྱེ་བོ་དེ་དག་མཐོ་རིས་འགྲོ། གྲོགས་པོ་རྟག་པར་འབྱེད་བྱེད་པ། །ཕྲ་མའི་ཚིག་རྣམས་རབ་སྤོང་ཞིང ། །གང་དག་འདུན་པར་རབ་དགའ་བ། །སྐྱེ་བོ་དེ་དག་མཐོ་རིས་འགྲོ། རྒྱགས་ལ་རྟེན་ཅིང་ཞེ་གཅོད་པ། །ཚིག་རྩུབ་དག་ནི་རྣམ་སྤོང་ཞིང ། །འཇམ་པོའི་ཚིག་ཏུ་གང་སྨྲ་བ། །སྐྱེ་བོ་དེ་དག་མཐོ་རིས་འགྲོ། དོན་མེད་གནས་དང་ལྡན་པ་ཡི། །ཀྱལ་བའི་ཚིག་རྣམས་རབ་སྤོང་ཞིང ། །གང་ཡང་དུས་སུ་ཆོས་ 396b སྨྲ་བ། །སྐྱེ་བོ་དེ་དག་མཐོ་རིས་འགྲོ།་གྲོང་ངམ་འོན་ཏེ་དགོན་པ་ན། །གཞན་གྱིས་བདག་གིར་བྱས་པ་ལ། །དེ་ལ་ཆགས་སེམས་གང་མེད་ལ། །སྐྱེ་བོ་དེ་དག་མཐོ་རིས་འགྲོ། བྱམས་པའི་སེམས་ཀྱིས་མི་འཚེ་ཞིང ། །གནོད་པར་སེམས་པ་མེད་པ་ཡིས། །སྐྱེ་བོ་ཀུན་ལ་མི་གནོད་པ། །སྐྱེ་བོ་དེ་དག་མཐོ་རིས་འགྲོ། ལས་དང་ལས་ཀྱི་རྣམ་སྨིན་དང ། །གཉིས་ཀ་ལ་ཡང་གང་དད་ཅིང ། །ཡང་དག་ལྟ་བ་ཡང་དག་འཛིན། །སྐྱེ་བོ་དེ་དག་མཐོ་རིས་འགྲོ། དགེ་བའི་ཆོས་རྣམས་འདི་དག་ནི། །དཀར་པོ་ཆོས་ཀྱི་ལམ་བཅུ་སྟེ། །གང་དག་ཡང་དག་འཛིན་འགྱུར་བ། །སྐྱེ་བོ་དེ་དག་མཐོ་རིས་འགྲོ་།བྲམ་ཟེ་མྱ་ངན་འདས་པ་དང ། །དགྲ་དང་འཇིགས་པ་ཀུན་འདས་ཤིང ། །འཇིག་རྟེན་ཆགས་མེད་བརྒལ་བ་ནི། །མང་པོ་ཡོད་པར་མ་མཐོང་ངོ་།། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ལྷ་དེ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ལྷའི་མདོ་ཉུང་དུ་རྫོགས་སོ།། །། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། |