།།རྒྱ་གར་སྐད་དུ། མཧཱ་ས་མ་ཡ་སཱུ་ཏྲ། བོད་སྐད་དུ། འདུས་པ་ཆེན་པོའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཤཱཀྱའི་ཡུལ་སེར་སྐྱའི་གཞིའི་ཚལ་ཆེན་པོ་ན་དགེ་སློང་གི་དགེ་འདུན་ཆེན་པོ་ལྔ་བརྒྱ་སྟེ། དེ་ཐམས་ཅད་ཀྱང་དགྲ་བཅོམ་པ་རྣམས་དང་ལྷན་ཅིག་ 404a ༄#། །ཏུ་བཞུགས་སོ། །འཇིག་རྟེན་གྱི་ཁམས་བཅུའི་ལྷ་རྣམས་དེ་མ་ཐག་ཏུ་འདུས་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་རྣམས་བལྟ་བའི་ཕྱིར་རོ། །དེ་ནས་གནས་གཙང་མའི་རིས་ཀྱི་ལྷའི་རིས་བཞི་པོ་རྣམས་ཀྱིས་འདི་སྐད་ཅེས་གསོལ་ཏོ། །འདིར་ཡང་བཅོམ་ལྡན་འདས་ཀྱིས་ཤཱཀྱའི་ཡུལ་སེར་སྐྱའི་གཞིའི་ཚལ་ཆེན་པོ་ན་དགེ་སློང་གི་དགེ་འདུན་ཆེན་པོ་ལྔ་བརྒྱ་སྟེ། དེ་ཐམས་ཅད་ཀྱང་དགྲ་བཅོམ་པ་རྣམས་དང་ལྷན་ཅིག་ཏུ་བཞུགས་སོ། །འཇིག་རྟེན་གྱི་ཁམས་བཅུའི་ལྷ་རྣམས་དེ་མ་ཐག་ཏུ་འདུས་ཏེ། བཅོམ་ལྡན་འདས་ཀྱི་དགེ་སློང་གི་དགེ་འདུན་རྣམས་བལྟ་བའི་ཕྱིར་རོ། །གང་དག་དེ་བཞིན་དུ་བཅོམ་ལྡན་འདས་ག་ལ་བ་དེར་དེ་དག་སོང་སྟེ་སོང་ནས། བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་སོ་སོར་བརྗོད་པར་བྱའོ། །དེ་ནས་ལྷ་དེ་རྣམས་ཀྱིས། འདི་ལྟ་སྟེ། སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བ་ཙམ་དང ། བརྐྱང་པ་ལས་བསྐུམ་པ་དེ་བཞིན་དུ་གནས་གཙང་མའི་ལྷ་རྣམས་མི་སྣང་བར་གྱུར་ཏེ། བཅོམ་ལྡན་འདས་ཀྱི་ཐད་དུ་སྣང་བར་གྱུར་ཏོ། །དེ་ནས་ལྷ་དེ་རྣམས་ཀྱིས་བཅོམ་ལྡན་འདས་ལ་ཕྱག་བྱས་ནས་ཕྱོགས་གཅིག་ཏུ་འཁོད་དོ། ། ཕྱོགས་གཅིག་ཏུ་འཁོད་ནས་ཡང་ལྷ་དེ་རྣམས་ཀྱིས་བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་འདི་རྣམས་གསོལ་ཏོ། །འདུས་པ་ཆེན་པོའི་ཚལ་འདི་རུ། །ལྷ་ཡི་ཚོགས་རྣམས་ 404b འདུས་པ་སྟེ། །ཆོས་འདིའི་ཕྱིར་དུ་བདག་འོངས་པ། །དགེ་འདུན་མི་ཕམ་འདུས་པ་བལྟ། །དེ་ནས་ལྷ་གཞན་རྣམས་ཀྱིས་བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་འདི་གསོལ་ཏོ། །དགེ་འདུན་སེམས་རྣམས་དུལ་བ་དང ། །རང་གི་སེམས་ནི་དྲང་པོར་བྱས། །ཁ་ལོ་སྒྱུར་བའི་དྲང་པོར་འཛིན། །དེ་བཞིན་མཁས་པས་དབང་པོ་བསྲུང ། །དེ་ནས་ལྷ་གཞན་རྣམས་ཀྱིས་བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་འདི་གསོལ་ཏོ། །ཁྱིམ་གྱི་འཆིང་བ་བཏོན་པ་དང ། །དབང་པོ་ནས་ནི་སེམས་འགྲོ་ཞིང ། །དག་ཅིང་དྲི་མེད་དེར་འགྲོ་བ། །མིག་ལྡན་གླང་པོ་དུལ་བ་བཞིན།། དེ་ནས་ལྷ་གཞན་རྣམས་ཀྱིས་བཅོམ་ལྡན་འདས་ཀྱི་ཐད་དུ་ཚིགས་སུ་བཅད་པ་འདི་གསོལ་ཏོ། །གང་ཞིག་སངས་རྒྱས་སྐྱབས་འགྲོ་བ། །དེ་ནི་ངན་སོང་འགྲོ་མི་འགྱུར། །མི་ཡི་ལུས་ནི་སྤངས་ནས་སུ། །ལྷ་ཡི་ལུས་ནི་ཡོངས་རྫོགས་འགྱུར། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་བོས་ཏེ་དེ་མ་ཐག་ཏུ། དགེ་སློང་དག ། འཇིག་རྟེན་གྱི་ཁམས་བཅུའི་ལྷ་རྣམས་འདུས་ཏེ་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་བལྟ་བའི་ཕྱིར་རོ། །དགེ་སློང་དག་།གང་དེ་རྣམས་སུ་གྱུར་པ་འདས་པའི་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་རྣམས་བཅོམ་ལྡན་འདས་དེ་ཙམ་དུ་གྱུར་པ་དེ་བཞིན་དུ་ལྷ་རྣམས་འདུས་པར་གྱུར་ཏོ། །འདི་ལྟ་སྟེ། བདག་ཀྱང་འདི་སྐད་ཅེས་སྨྲ་སྟེ། དགེ་སློང་དག་།ལྷའི་ཚོགས་ 405a ༄#། །རྣམས་ཀྱི་མིང་བརྗོད་པར་བྱ་སྟེ། དགེ་སློང་དག་།རབ་ཏུ་གསལ་བར་བྱེད་པ་ཞེས་བྱ་བའི་ལྷའི་ཚོགས་དང ། དགེ་སློང་དག་།ལྷའི་ཚོགས་སྟོན་པར་བྱེད་པ་ཞེས་བྱ་བའོ། །དེ་ཐོས་ནས་ལེགས་པར་ཡིད་ལ་ཟུངས་ཤིག་དང་ངས་བཤད་པར་བྱའོ། །དེ་ལྟར་བཙུན་པ་བཅོམ་ལྡན་འདས་ལ་དགེ་སློང་དེ་རྣམས་ཀྱིས་སོ་སོར་ཞུས་ནས། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཚིགས་སུ་བཅད་པ་སོ་སོར་བཤད། །གང་དུས་གཞི་མཐོང་གྱུར་ནས། །རི་ཡི་ཕུག་ཏུ་གང་གནས་པ། །དེ་རུ་མཉམ་པར་འཇོག་པར་བྱེད། །ས་གཞིར་སེང་གེ་འཇིགས་མེད་བཞིན། །བ་སྤུ་ཙམ་ཡང་གཡོ་བ་མེད། །སེམས་ནི་དག་ཅིང་དཀར་བ་དང ། །ཆུ་ནི་རབ་ཏུ་དྭངས་པ་བཞིན། །ལྔ་བརྒྱ་པོ་ཡིས་ལེགས་ཤེས་ཤིང ། །སེར་སྐྱའི་ཚལ་གནས་མང་པོ་རྣམས། །དེ་ནས་དགེ་སློང་སྟོན་པས་པོས། །བསྟན་ལ་དགའ་བའི་ཉན་ཐོས་རྣམས། །ལྷ་ཡི་ཚོགས་རྣམས་འོངས་ནས་ནི། །དགེ་སློང་རྣམས་ཀྱིས་དེ་ཤེས་བྱ། །ལུས་ནི་གདུང་བར་མ་བྱེད་པར། །སངས་རྒྱས་བསྟན་པ་ཐོས་པས་སོ། །དེ་རྣམས་ཡེ་ཤེས་སྣང་བར་འགྱུར། །མི་མ་ཡིན་རྣམས་མཐོང་འགྱུར་བ། །གང་ཞིག་གིས་ནི་བརྒྱ་མཐོང་ཞིང ། །སྟོང་དང་བདུན་ཅུ་མཐོང་བ་ཡིན། །བརྒྱ་དང་སྟོང་ཕྲག་གཅིག་དང་ནི། །མི་མ་ཡིན་རྣམས་མཐོང་བར་འགྱུར། །གང་ཞིག་གིས་ནི་མཐའ་མེད་མཐོང་།། 405b ཕྱོགས་ཀུན་གང་བར་འགྱུར་བ་མཐོང ། །དེ་རྣམས་ཀྱིས་ནི་རྟོགས་པ་དང ། །སྤྱན་ལྡན་རྣམ་བར་དཔྱད་ནས་ནི། །དེ་ཕྱིར་སྟོན་པ་ཡིས་ནི་བོས། །བསྟན་ལ་དགའ་བའི་ཉན་ཐོས་ཀྱིས། །ལྷ་ཡི་ཚོགས་རྣམས་འོངས་ནས་ནི། །དགེ་སློང་རྣམས་ཀྱིས་དེ་ཤེས་བྱ། །གང་ཞིག་ལ་ནི་བདག་བཤད་བྱ། །གོ་རིམ་བཞིན་དུ་མཉན་པར་གྱིས། །སྟོང་ཕྲག་བདུན་གྱི་གནོད་སྦྱིན་རྣམས། ། སེར་སྐྱའི་ས་ལ་གནས་པ་ནི། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །སྟོང་ཕྲག་དྲུག་ནི་གངས་ཅན་གྱི། །གནོད་སྦྱིན་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བ་དགེ་སློང་ཚལ་དུའོ། །སྣ་ཚོགས་བཤེས་གཉེན་ལྔ་བརྒྱ་པོ། །གནོད་སྦྱིན་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །རྒྱལ་ཁབ་གནོད་སྦྱིན་ཆུ་སྲིན་ནི། །ངོས་ཡངས་རི་ལ་གནས་པ་ཡིན། །སྟོབས་ལྡན་འབུམ་ཕྲག་གཅིག་པོ་ནི། །གནོད་སྦྱིན་རྣམས་ཀྱི་འཁོར་གྱིས་བསྐོར། །རྒྱལ་ཁབ་གནོད་སྦྱིན་ཆུ་སྲིན་ནི། །ཞི་བས་དགེ་སློང་ཚལ་དུའོ། །ཤར་ཕྱོགས་ཀྱི་ནི་རྒྱལ་པོ་ནི། །མིང་ནི་ཡུལ་འཁོར་སྲུང་ 406a ༄#། །ཞེས་པ། །དྲི་ཟ་རྣམས་ཀྱི་བདག་པོ་སྟེ། །རྒྱལ་པོ་ཆེན་པོ་གྲགས་ཆེན་ལྡན། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་ཆེན་པོ། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །ལྷོ་ཡི་ཕྱོགས་ཀྱི་འང་རྒྱལ་པོ་ནི། །མིང་ནི་འཕགས་སྐྱེས་པོ་ཞེས་བྱ། །གྲུལ་བུམ་རྣམས་ཀྱི་བདག་པོ་སྟེ། །རྒྱལ་པོ་ཆེན་པོ་གྲགས་ཆེན་ལྡན། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་ཆེན་པོ། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །ནུབ་ཀྱི་ཕྱོགས་ཀྱི་རྒྱལ་པོ་ནི། །མིང་ནི་མིག་མི་བཟང་ཞེས་གྲགས། །ཀླུ་རྣམས་ཀྱི་ནི་བདག་པོ་སྟེ། །རྒྱལ་པོ་ཆེན་པོ་གྲགས་ཆེན་ལྡན། །དེ་ཡི་བུ་ནི་མང་པོ་རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་དང་ལྡན། །རྫུ་འཕྲུལ་ལྡན་ཞིང་སྟོབས་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །བྱང་གི་ཕྱོགས་ཀྱི་རྒྱལ་པོ་ནི། །དེ་མིང་ལུས་ངན་པོ་ཞེས་གྲགས། །གནོད་སྦྱིན་རྣམས་ཀྱི་བདག་པོ་སྟེ། །རྒྱལ་པོ་ཆེན་པོ་གྲགས་ཆེན་ལྡན། །དེ་ཡི་བུ་ནི་མང་པོ་ 406b རྣམས། །མིང་ནི་གཅིག་ཏུ་ཐོས་པ་སྟེ། །དབང་པོ་ཞེས་བྱ་སྟོབས་ཆེན་པོ། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏོ། །ཞི་བས་དགེ་སློང་ཚལ་དུའོ། །ཤར་ཕྱོགས་ན་ནི་ཡུལ་འཁོར་སྐྱོང ། །ལྷོ་ཕྱོགས་ན་ནི་འཕགས་སྐྱེས་པོ། །ནུབ་ཕྱོགས་ན་ནི་མིག་མི་བཟང ། །བྱང་ཕྱོགས་ན་ནི་ལུས་ངན་པོ། །དེ་རྣམས་རྒྱལ་པོ་ཆེན་པོ་བཞི། །ཕྱོགས་རྣམས་བཞི་པོ་ཀུན་དུའོ། །གཟི་བརྗིད་འབར་བས་འཁོད་ན་ནི། །སེར་སྐྱའི་གཞི་ཡི་ཚལ་དུའོ། །དེ་རྣམས་སྒྱུ་མ་རྩེད་མོ་བསམས། །དྲུང་ལྡན་རྣམས་ནི་ནམ་མཁར་འཁོད། །སྒྱུ་མ་སྐུ་ཌེཎྱ་བཻ་ཌ་ཎུ། །བིརྱཙྪ་བིརྱ་ཌོ་བཅས། །ཙན་དན་དང་འདོད་མཆོག་དང ། །མགུལ་པ་མཛེས་དང་མགུལ་ངེས་དང ། །སྐྱེ་དགུའི་བླ་མར་གྱུར་པ་དང ། །ལྷ་ལས་བྱུང་བའི་ཁ་ལོ་པ། །དྲི་ཟ་སྣ་ཚོགས་སྡེ་དང་ནི། །མི་རྒྱལ་རྒྱལ་བའི་ཁྱུ་མཆོག་དང ། །མདུན་དུ་རྩེ་མོ་ལྔ་དེ་བཞིན། །གཡེར་མ་དང་ནི་ཉི་ཟེར་དང ། །དེ་དང་གཞན་གྱི་རྒྱལ་པོ་རྣམས། །རྒྱལ་པོ་དྲི་ཟ་དང་བཅས་དང ། །ཆོས་གཏམ་བྱ་ཕྱིར་འདིར་འོངས་ནས། །ཞི་བས་དགེ་སློང་ཚལ་དུའོ། །དེ་ནས་གཞན་ཡང་ནམ་མཁའི་ཀླུ། །ཡངས་པ་ཅན་དུ་ལྷན་ཅིག་ནས། །ལ་བ་རྟི ་ཡི་མཆོག་དང་ནི། །རབ་འགྲོ་གཉེན་དང་ལྷན་ཅིག་བ། །ཡ་མུ་ན་དང་ཡུལ་འཁོར་སྐྱོང ། །ཀླུ་ཡི་སྤུན་དང་གྲགས་ལྡན་དང ། །ས་སྲུང་གླང་པོ་ཆེན་པོ་རྣམས། །དེ་ཡང་ནགས་ཀྱི་ཚལ་དུའོ། །གང་ 407a ༄#། །ཞིག་ཀླུ་རྒྱལ་མྱུར་དུ་ལེན། །ལྷ་དང་བྱ་དང་རྣམ་དག་མིག་།ནམ་མཁའ་ལས་འོངས་ཚལ་དེར་སླེབ། །སྣ་ཚོགས་འདབ་བཟང་ཞེས་དེའི་མིང ། །འཇིགས་མེད་བྱིན་པས་ཀླུ་ཡི་རྒྱལ། །མཁའ་ལྡིང་བཟོད་པ་རྟོགས་བས་སོ། །ཕན་ཚུན་དུ་ནི་མི་རྩོད་ཅིང ། །ཀླུ་ཁྱུང་སངས་རྒྱས་སྐྱབས་འགྲོ་བ། །རྡོ་རྗེ་ལག་གིས་རྒྱལ་བ་དང ། །ལྷ་མ་ཡིན་ནི་རྒྱ་མཚོར་གནས། །སྤུན་རྣམས་དེ་ཡི་གནས་དང་ནི། །གཟི་བརྗིད་ལྡན་ཞིང་གྲགས་དང་ལྡན། །ནག་པོ་མིག་སྨན་འཇིགས་བྱེད་ལྡན། །ལྷ་མ་ཡིན་རྣམས་ཁྲོ་བྱེད་དང ། །ཐགས་བཟང་དང་ནི་ཐགས་བཟང་རིས། །མཚན་འཇོམས་ན་མོ་ཙི་དང་བཅས། །སྟོབས་ཀྱི་བུ་ནི་བརྒྱ་པོ་རྣམས། །ཐམས་ཅད་རྣམ་པར་སྣང་མཛད་མིང ། །སྟོབས་ཀྱི་སྡེ་ནི་གོ་བགོས་པ། །སྒྲ་གཅན་བཟང་པོ་སྡུན་དུ་འགྲོ་།བཙུན་པ་དེ་ནི་འདུས་ནས་ནི། །ཞི་བས་དགེ་སློང་ཚལ་དུའོ། །ཆུ་དང་ལྷ་དང་ས་དང་ནི། །མེ་དང་རླུང་ཡང་དེར་འོངས་སོ། །ཆུ་ལྷ་ཆུ་ཡི་ལྷ་དང་ནི། །ཟླ་བ་དང་ནི་གྲགས་པར་ལྡན། །བྱམས་དང་སྙིང་རྗེའི་ཚོགས་ཅན་དང ། །ལྷ་ནི་གྲགས་ལྡན་མདུན་དུའོ། །ཕྱོགས་བཅུའི་འཇིག་རྟེན་ཚོགས་རྣམས་ནི། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །ཁྱབ་ 407b འཇུག་ལྷ་དང་ལྷན་ཅིག་ཏུ། །ཐ་དད་ཐ་དད་འོངས་པ་དང ། །ཟླ་བ་དེ་ཡི་འཁོར་གྱི་ལྷ། །ཟླ་བའི་མདུན་བྱས་འཁོར་དང་ནི། །ཉི་མའི་འཁོར་གྱི་ལྷ་རྣམས་དང ། །ཉི་མའི་མདུན་བྱས་འཁོར་དང་ནི། །རྒྱུ་སྐར་དེ་ཡི་འཁོར་དང་ཡང ། །མདུན་བྱས་པ་ལ་ཧ་ཀ་དང ། །ས་དང་ས་ཡི་གཙོ་བོ་དང ། །བརྒྱ་བྱིན་ཡང་ཡང་སྦྱིན་པ་དང ། །ཕྱོགས་བཅུའི་འཇིག་རྟེན་ཚོགས་རྣམས་དང ། ། ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །དེ་ནས་ཉེར་སྤྱོད་ལྷ་དང་ནི། །ཆུ་དང་མེ་ཡི་རྩེ་མོ་བཞིན། །སྒྲ་ལྡན་སྣང་བར་བྱེད་པ་དང ། །ུ་མའི་མེ་ཏོག་དེ་བཞིན་དུ། །ཆུ་ལྷ་དང་བཅས་ཆོས་དང་ནི། །ཙྩུ་ཏ་དང་དུ་མ་རྣམས། །བཟང་ལེན་མཛེས་པའི་མདུན་དང་ནི། །མདུན་དང་གནས་དང་དུ་མ་དང ། །ཕྱོགས་བཅུའི་འཇིག་རྟེན་ཚོགས་དང་ནི། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན།། ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །འདུས་དང་འདུས་པ་ཆེན་པོ་ནི། །མི་དང་མི་ཡི་མཆོག་དང་ནི། །རོལ་པའི་གོ་འཕང་མདུན་དུ་དང ། །ཡིད་མཆོག་དང་ནི་གོ་འཕང་རྩེ། །དེ་ནས་ལྷ་ཡི་མཆོད་འོས་དང ། །གང་ཡང་དམར་པོའི་གོས་གྱོན་དང ། །ཕ་རོལ་ཕ་རོལ་སོན་ཆེན་དང ། །གྲགས་ཆེན་ལྷ་ 408a ༄#། །ཡི་མདུན་གནས་དང ། །ཕྱོགས་བཅུའི་འཇིག་རྟེན་ཚོགས་དང་ནི། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །དཀར་དང་དྲོད་དང་དམར་པོ་དང ། །སྔོན་བཞུགས་སྟུགས་པོ་ལྷན་ཅིག་དང ། ། དཀར་པོ་འཛིན་པ་ལ་སོགས་དང ། །མཁས་པའི་ལྷ་ནི་སྔོན་དུ་འོ། །རྟག་ཏུ་གླང་ཆེན་མྱོས་འབྲང་བ། །འདྲེས་པ་གྲགས་དང་ལྡན་པ་དང ། །པྲཛྫུ་ན་ནོ་མང་པོ་མདུན་དུ་དང ། །གང་ཞིག་ཕྱོགས་ནི་མཛེས་པ་དང ། །ཕྱོགས་བཅུའི་འཇིག་རྟེན་ཚོགས་རྣམས་དང ། །ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཁ་དོག་དང་ནི་གྲགས་པར་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུ་འོ། །དགེ་བ་དགའ་ལྡན་འཐབ་བྲལ་དང ། །གྲགས་ལྡན་ཤིང་དང་ལྡན་པ་དང ། །འཕྱང་བ་གནས་དང་གཙོ་བོ་དང ། །འོད་དང་བསམ་པ་ཞེས་བྱ་དང ། །འཕྲུལ་དགའ་བ་ནི་སྡུན་དུ་དང ། །དེ་ནས་གཞན་འཕྲུལ་དབང་བྱེད་སྡུན། །ཕྱོགས་བཅུའི་འཇིག་རྟེན་ཚོགས་དང་ནི། ། ཐམས་ཅད་ཁ་དོག་སྣ་ཚོགས་ལུས། །རྫུ་འཕྲུལ་ལྡན་ཞིང་འོད་དང་ལྡན། །ཆོས་གཏམ་བྱ་ཕྱིར་འདིར་འོངས་ཏེ། །ཞི་བས་དགེ་སློང་ཚལ་དུའོ། །སྣ་ཚོགས་དྲུག་པོའི་སྡེ་བ་ནི།། 408b ཐམས་ཅད་ཁ་དོག་སྣ་ཚོགས་ལུས། །མིང་ནི་གྲགས་དང་ལྡན་པ་སྔོན། །གང་གཞན་འདྲ་བ་ལྷན་ཅིག་ཏུ། །མ་ལུས་རིགས་ནི་བརྗོད་པ་དང ། །ཟག་མེད་ཚོགས་ནི་ཕ་རོལ་རྒལ། །གླང་ཆེན་ཚོགས་ནི་བལྟ་བ་དང ། །ཟླ་བ་བཞད་པ་གསུམ་ལྡན་དང ། །ཚངས་བཟང་མཆོག་ནི་ཐོབ་པ་དང ། །རྫུ་འཕྲུལ་ལྡན་པའི་བུ་དང་ནི། །དེ་ཡི་དགའ་བའི་གཞོན་ནུ་ནི། །དེ་རྣམས་ཞི་བས་ཚལ་བུའོ། །ཚངས་པའི་འཇིག་རྟེན་སྟོང་དུ་ནི། །ཚངས་པ་ཆེན་པོ་ཉེ་བར་འཁོད། །འོད་དང་ལྡན་པར་སྐྱེ་བ་དང ། །གྲགས་ལྡན་སྣ་ཚོགས་ལུས་དང་ནི། །དབང་ཕྱུག་བཅུ་པོ་སྔོན་དུ་དང ། །སོ་སོ་དབང་དུ་གྱུར་པ་དང ། །དེ་ཡི་དབུས་དང་སྔོན་དུ་དང ། །འཕྲོག་མ་འཁོར་དང་བཅས་པའོ། །དེ་རྣམས་ཐམས་ཅད་འོངས་གྱུར་ནས། །དབང་པོ་ལྷ་དང་ཚངས་བཅས་འོངས། །བདུད་ཀྱི་སྡེ་རྣམས་འོངས་ནས་ནི། །གཽ་ཏམ་ཐུགས་ནི་བལྟ་བ་དང ། །འདི་ནི་ཟུངས་ཤིག་ཆིངས་ཤིག་བརྗོད། །ཚགས་པ་གླང་པོ་བཅིངས་པ་བཞིན། །འཁོར་དང་བཅས་པས་བསྐོར་ནས་ནི། །གང་དུའང་གཏོང་བ་མ་ཡིན་ནོ། །དེ་ལ་འདི་ནི་བདེ་ཆེན་དང ། །གོ་ཏམ་སྡེ་ལ་གནོད་མི་ནུས། །ལག་པ་ཐལ་མོ་རྡེབས་པ་དང ། །འཇིགས་པར་བྱེད་པའི་ཆོ་ངེ་སྒྲོགས།། ཇི་ལྟར་རླུང་གིས་སྤྲིན་རྣམས་དང ། །མུན་ནགས་གློག་དང་བཅས་པ་ནི། །དེ་མ་ཐག་ཏུ་འཇིགས་དང་བྲལ། །བསམ་པ་ཁྲོ་བ་མེད་པར་གནས། །ལྷ་དེ་རྣམས་ཐམས་ཅད་དང ། 409a ༄#། །ཚངས་པས་བཅོམ་ལྡན་འདས་ལ་ཕྱག་བྱས་ཏེ་བསྐོར་བ་བྱས་ནས་དེ་ཉིད་དུ་མི་སྣང་བར་གྱུར་ཏོ། །བདུད་ཀྱི་སྡེ་དེ་རྣམས་ཀྱང་ཅང་མི་སྨྲ་བའི་ཚུལ་གྱིས་སོང་ངོ ། ། སྟོན་པས་ཉན་ཐོས་བསྟན་པ་ལ་དགའ་བ་རྣམས་བོས་ཏེ། དེ་ཡང་འཇིགས་པ་མེད་བྱེད་དང ། །དག་པའི་སངས་རྒྱས་བསྟན་པ་ལ། །འཇིགས་མེད་འདོད་ཆགས་བྲལ་བ་ནི། །དེ་ཡི་བ་སྤུའང་གཡོ་བ་མེད། །གཡུལ་ནི་ཀུན་ལས་རྒྱལ་བ་དང ། །འཇིགས་པ་འདས་ཤིང་གྲགས་པར་ལྡན། །ལྷ་དང་ལྷན་ཅིག་བརྗོད་པ་དང ། །ཉན་ཐོས་རྣམས་ནི་དེ་གནས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འདུས་པ་ཆེན་པོའི་མདོ་རྫོགས་སོ།། །།པཎྜི་ཏ་ཨཱ་ནནད་ཤྲཱིའི་ཞལ་སྔ་ནས་མང་དུ་ཐོས་པའི་ལོཙྪ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སའི་སྟེང་དུ་ཉི་མ་དང ། ཟླ་བ་ལྟར་གྱུར་ཅིག། |