།།རྒྱ་གར་སྐད་དུ། པྲཉྩ་ཤིཀྵྱུ་ནུ་ས་ས་སཱུ་ཏྲ། བོད་སྐད་དུ། བསླབ་པ་ལྔའི་ཕན་ཡོན་གྱི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ ་ ་དང།་ཆུ་སྲིན་བྱིས་པ་གསོད་ཀྱི་རི་དང ། སྨན་གྱི་ནགས་རི་དྭགས་རྒྱུ་བའི་གནས་ན་བཞུགས་སོ། །དེ་ནས་བཅོམ་ལྡན་འདས་སྔ་དྲོའི་དུས་སུ་ཆོས་གོས་གྱོན་ལྷུང་བཟོད ་ཐོགས་ཏེ། ཕ་ན་ཀུ་ལའི་ཁྱིམ་བདག་གང་ན་ཡོད་པའི་གནས་དེར་གཤེགས་ཤིང་ཉེ་བར་གཤེགས་ཏེ། གདན་བཤམས་པ་ལ་བཞུགས་སོ། །དེ་ནས་ཡང་ཕ་ན་ཀུ་ལ ་འཁྱིམ་བདག་དང ། མ་ན་ཀུ་ལའི་ཁྱིམ་བདག་མོས། བཅོམ་ལྡན་འདས་གལ་བ་དེ ་མོང ་ཞིང་ཉེ་བར་མོང ་ནས། བཅོམ་ལྡན་འདས་ལ་ཕྱག་བྱས་ཏེ། ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་པ་ན་ཀུ་ལའི་ཁྱིམ་བདག་དེས་བཅོམ་ལྡན་འདས ་འདི་སྐད་ཅེས་གསོལ ་ཏོ། །གང་གི་ཚེ་བཙུན་པ་བཅོམ་ལྡན་འདས། མན་ཀུ་ལའི་ཁྱིམ་བདག་མོ་བདག་ཕྱེའུ་ཡི་དུས་སུ་བུ་མོ་ 422a ༄#། །གཞོན་ནུ་མ་བླངས་ཏེ། མ་ན་ཀུ་ལའི་ཁྱིམ་བདག་མོ་ལས་ལོག་པར་གཡེམ་པའི་སེམས་མ་སྐྱེས་སོ། །ལུས་ཀྱི་སྐྱོན་གང་ཡང་མ་བྱུང་བ་ལས་བཙུན་བ་བཅོམ་ལྡན་འདས་མཐོང་བའི་ཆོས་འདི་ལ་ཕན་ཚུན་དུ་མཐོང་ངོ ། །སྐྱེ་བ་གཞན་དུ་ཕན་ཚུན་དུ་མཐོང་བར་བདག་འདོད་དོ། །མ་ན་ཀུ་ལའི་ཁྱིམ་བདག་མོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གང་གི་ཚེ་བཙུན་པ་བཅོམ་ལྡན་འདས་ཕ་ན་ཀུ་ལའི་ཁྱིམ་བདག་གཞོན་ནུའི་དུས་སུ་བདག་གཞོན་ནུ་མ་བླངས་སོ། །ཕ་ན་ཀུ་ལའི་ཁྱིམ་བདག་ལས་འདོད་པ་ལོག་པར་གཡེམ་པའི་སེམས་མ་སྐྱེས་སོ། །ལུས་ཀྱི་སྐྱོན་མ་བྱུང་བ་གང་ལས་བཙུན་བ་བཅོམ་ལྡན་འདས་མཐོང་བའི་ཆོས་འདི་ལ་ཕན་ཚུན་དུ་མཐོང་ངོ ། ། སྐྱེ་བ་གཞན་དུ་ཕན་ཚུན་དུ་མཐོང་བར་བདག་འདོད་དོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་དང ། ཁྱིམ་བདག་མོ་གཉིས་པོ་ལ་འདོད་པ་ཡོད་པར་གྱུར་པས། མཐོང་བའི་ཆོས་འདི་ལ་ཕན་ཚུན་དུ་མཐོང་བར་གྱུར་ཏོ། །སྐྱེ་བ་གཞན་དུ་མཐོང་བར་འགྱུར་རོ། །གཉིས་པོ་དག་དད་པ་མཉམ་པ་དང ། ཚུལ་ཁྲིམས་མཉམ་པ་དང།་གཏོང་བ་མཉམ་པ་དང ། ཤེས་རབ་མ་ལུས་པ་རྣམས་ཀྱིས་མཐོང་བའི་ཆོས་འདི་ལ་ཕན་ཚུན་དུ་མཐོང་བར་གྱུར་ཏོ། །སྐྱེ་བ་གཞན་དུ་མཐོང་བར་འགྱུར་རོ། །ཡང་ 422b ཚིགས་སུ་བཅད་པ་འདི་བཀའ་སྩལ་ཏེ། གཉིས་ཀ་དད་དང་ཆོས་ཚིག་དང ། །མཉམ་དང་ཆོས་ཀྱི་འཚོ་བ་དང ། །ཕན་ཚུན་དུ་ནི་དགའ་བའི་ཚིག་།དེ་ལྟར་སྐྱེས་པ་བུད་མེད་གཅིག་།ནོར་མང་དང་ནི་ལྡན་པ་དང ། །གནས་ནི་བཟང་པོར་སྐྱེ་བར་འགྱུར། །དགྲ་ནི་དེ་ལ་དགའ་བ་དང ། །གཉིས་ཀ་མཉམ་བའི་ཚུལ་ཁྲིམས་ཀྱིས། །འདི་ལྟར་ཆོས་ནི་སྦྱད་པ་དང ། །གཉིས་ཀ་ཚུལ་ཁྲིམས་ལྡན་པ་དང ། །འདོད་ཅིང་འདོད་ལ་ཡི་རང་བས། །ལྷ་ཡི་གནས་སུ་དགའ་བར་འགྱུར། །དེའི་ཕྱིར་བསླབ་པ་རྣམ་པ་ལྔ་པོ་བསྲུང་བར་བྱའོ། །འདི་ལྟ་སྟེ། སྲོག་གཅོད་པ་སྤོང་བ་དང།་མ་བྱིན་པར་ལེན་པ་སྤོང་བ་དང ། འདོད་པས་ལོག་པར་གཡེམ་པ་སྤོང་བ་དང ། བརྫུན་དུ་སྨྲ་བ་སྤོང་བ་དང ། མྱོས་པར་འགྱུར་བའི་ཆང་གི་བཏུང་བ་སྤོང་བའོ། །བསླབ་པ་ལྔ་བ་འདི་ནི་བསྲུང་བར་བྱའོ། །དེ་ནས་ཡང་དགེ་སློང་རྣམས་ཀྱིས་ཚུལ་ཁྲིམས་ལྔའི་ཕན་ཡོན་ཞུས་པ། གཞན་ཡང ། བཙུན་པ་བཅོམ་ལྡན་འདས། སྲོག་གཅོད་པ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། མ་བྱིན་པར་ལེན་པ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། འདོད་པས་ལེག་པར་གཡེམ་པ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། བརྫུན་དུ་སྨྲ་བ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། མྱོས་པར་འགྱུར་བའི་ཆང་གི་བཏུང་བ་སྤངས་པའི་རྣམ་པར་སྨིན་པ་ཇི་ལྟར་ཤེས་པར་བགྱི། དེ་ནས་བཅོམ་ལྡན་ 423a ༄#། །འདས་ཀྱིས་དེ་རྣམས་ཀྱིས་དྲིས་བདེ་བསྟན་ཅིང་རྟོགས་པར་བྱ་བའི་ཕྱིར་བཀའ་སྩལ་པ། དགེ་སློང་དག། སྲོག་གཅོད་པ་ནི་སྤྲུལ་དུག་ཅན་དང་འདྲ་བར་བལྟ་བར་བྱའོ། །སྡིག་པ་དུ་མ་དང་ལྡན་པ་དང ། ཡི་དྭགས་ཀྱི་སྐྱེ་གནས་སུ་སྐྱེ་བ་དང ། དུད་འགྲོའི་སྐྱེ་གནས་སུ་སྐྱེ་བ་དང ། དམྱལ་བའི་སྐྱེ་གནས་སུ་སྐྱེ་བར་འགྱུར་ཏེ། དེའི་ལུས་ཞིག་ནས་ཤི་བའི་ཕ་རོལ་ཏུ་དམྱལ་བ་ཡང་སོ་སོས་སུ་སྐྱེའོ། །དེ་ནི་དམྱལ་བ་ཡང་སོས་སུ་དམྱལ་བའི་སྲུང་མས་ཡང་དག་པར་བསྲེག་པ་དང ། མཚོན་སྣ་ཚོགས་པ་གཟུང་ནས་དུམ་བུར་གཅོད་ཅིང་ལུས་ལ་བུག་པ་འབུགས་པར་བྱེད་དོ། །རྣམ་པ་ལྔ་ཡིས་བཅིང་ངོ་ཞེས་པས་ལས་བྱེད་ཅིང་བྱེད་ལ། དམྱལ་བའི་སེམས་ཅན་དེ་ཡང་དང ། ཡང་དུ་ཤི་ནས་ཡང་དང ། ཡང་དུ་འཚོ་བས་ན་ཡང་སོས་སུ་སྐྱེའོ། །དེ་རྣམས་དེ་ལ་ཡང་སོས་ཀྱི་སྡུག་བསྔལ་དག་པོ། རྩུབ་པ། ཚ་བ་འཇོམས་ཤིང་འཇོམས་ལ་གང་ཞིག་ལ་ཐམས་ཅད་ལྕི་ཞིང་སྲོག་བཅད་པའི་རྣམ་པར་སྨིན་པ་དེའོ། །དེ་མིར་སྐྱེས་ཀྱང་ཚེ་ཐུང་བར་འགྱུར་རོ། །དབང་པོ་ཡོངས་སུ་མ་ཚང་བར་འགྱུར། གཟུགས་ངན་པ་དང ། ཤེས་རབ་འཆལ་པ་དང ། རྟག་ཏུ་སྐྲག་པ་དང།་རྟག་ཏུ་ཁྲོ་བ་དང ། ནད་དང་བཅས་པ་དང ། མྱ་ངན་དང་བཅས་པ་དང ། དགའ་བ་དང་འབྲལ་བ་དང ། ཐམས་ཅད་དང་འབྲེལ ་བ་དང ། རྟག་ཏུ་ཡུན་རིང་དུ་འབྲལ་བར་ 423b འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། སྐྱེ་བ་ལྔ་བརྒྱར་ཡི་དྭགས་དང ། །ཉ་སྦྲུལ་རི་དྭགས་འུག་པ་དང ། །མ་ཧེ་ཁྱི་དང་ཝ་རྣམས་ནི། །སྲོག་བཅད་པ་ཡི་ཉེས་པའོ། ། འདི་ནི་སྲོག་བཅད་པའི་རྣམ་པར་སྨིན་པའོ། །སྲོག་གཅོད་པ་ནི་སྤངས་པ་ཡིས། །སྐྱེས་པ་འམ་ནི་བུད་མེད་ལུས། །ཐོབ་པར་འགྱུར་ཏེ་ཕན་ཡོན་ནི། །ཡོན་ཏན་ཉི་ཤུ་མི་དམན་པར། །ཡན་ལག་ཉིང་ལག་ཕུན་སུམ་ཚོགས། །ལུས་ནི་ཤེད་དང་ལྡན་པ་དང ། །རིགས་བཟང་པོར་ནི་མྱུར་དུ་སྐྱེ། །ཡན་ལག་གཙང་ཞིང་འཇམ་པ་དང ། །ཚེ་རིང་བ་དང་བདེ་བ་དང ། །དཔའ་ཞིང་སྟོབས་དང་ལྡན་པ་དང ། །ཚིག་ནི་མཆོག་ཏུ་བཟང་བ་དང ། །ལྷ་དང་བཅས་པ་དགའ་བ་དང ། །འཇིག་རྟེན་པ་ཡིས་ངན་མི་བྱེད། །འཕགས་པས་ཚིག་ངན་མི་བརྗོད་དང ། །བྱད་སྟེམས་ངན་བས་མི་འཆི་ཞིང ། །མཐའ་ཡས་པ་ཡི་འཁོར་དང་ལྡན། །ཁ་དོག་གཟུགས་དང་ཡང་དག་ལྡན། །ནད་དང་མྱ་ངན་ཉུང་བ་དང ། །ཁྱིམ་གྱི་གནས་ནི་མི་སྤོང་དང ། །གཞན་གྱིས་མི་དགར་མི་འགྱུར་རོ། །སྲོག་གཅོད་པ་ནི་སྤངས་པ་ཡིས། །སྐྱེས་པ་འམ་ནི་བུད་མེད་ཀྱིས། །ཕན་ཡོན་འདི་ནི་མྱོང་བར་འགྱུར། །ལྷ་རྣམས་དང་ནི་མི་རྣམས་སུའོ། །དེ་ལུས་ཞིག་ཅིང་ཤི་ནས་བདེ་འགྲོ་མཐོ་རིས་ལྷའི་འཇིག་རྟེན་དུ་ཉེ་བར་སྐྱེའོ། །མ་བྱིན་པར་ལེན་པ་ནི་མ་བྱིན་པའི་ཕ་རོལ་ཀྱི་རྫས་རྣམ་པར་ཤེས་པ་དང་བཅས་པ་དང ། རྣམ་པར་ཤེས་པ་མེད་པ་གང་རུང ། 424a ༄#། །ཁང་པ་ཕུག་ནས་རྐུ་བ་ལ་སོགས་པའོ། །ཕ་རོལ་བསླུས་ནས་ལོན་པ་དང ། རང་འཚོ་བའི་ཕྱིར་དེ་རྣམས་དེ་ལྟ་བུའི་རིམ་པས་མ་བྱིན་པར་ལེན་པ་དེའི་ལུས་ཞིག་ནས་ཤི་བའི་ཕ་རོལ་ཏུ་ངུ་འབོད་དུ་སྐྱེ་བར་འགྱུར་རོ། །ངུ་འབོད་ཅེས་པའི་མིང་ནི་ངུ་འབོད་གཉིས་ཏེ། འབར་བའི་ངུ་འབོད་དང ། དུ་བའི་ངུ་འབོད་དོ། །འབར་བའི་ངུ ་འབོད་ནི་ཚེ་བསྐལ་པ་གཅིག་ཏུ་གནས་སོ། །བར་བར་དུ་མེ་འབར་བས་ཡོངས་སུ་གང་བའོ། །དུ་བའི་ངུ ་འབོད་ནི་དུ་བ་འཚུབ་ཅིང་དེ་གཉིས་ལ་མེ་འབར་བས་ངུ་འབོད་དུ་སེམས་ཅན་དམྱལ་བ་རྣམས་འཚེད་དོ། །བུ་ག་དགུ་ནས་མེ་འབྱུང་ཞིང་ལུས་བསྲེག་གོ་།འདི་ནི་དུ་བའི་ངུ་འབོད་དོ། །དུ་བའི་ངུ་འབོད་ནི་སེམས་ཅན་དམྱལ་བ་རྣམས་སུ་འཚེད་དོ། །བུ་ག་དགུ་ནས་དུ་བ་འཚུབ་ཅིང་འབྱུང་ངོ ། །ཇི་ལྟར་ཟན་འཚེད་པ་ལྟར་ལུས་འཚེད་དོ། །སེམས་ཅན་གཉིས་ཀ་མྱ་ངན་གྱི་སྒྲ་ཆེན་པོ་སྒྲོགས་སོ། །དེ་དག་ནི་དེར་སྡུག་བསྔལ་དྲག་ཅིང་རྩུབ་པ་དང།་ཚ་བ་མྱོང་བར་འགྱུར་རོ། །མ་བྱིན་པར་ལེན་པ་ནི། དགེ་སློང་དག། སྦྲུལ་དུག་ཅན་འདྲ་བར་བལྟ་བར་བྱའོ། །དམྱལ་བར་འཇུག་པ་དང ། ཡི་དྭགས་ཀྱི་ཡུལ་དུ་འཇུག་པ་དང ། དུད་འགྲོའི་སྐྱེ་གནས་སུ་སྐྱེ་བར་འགྱུར་རོ། །གང་ཞིག་མ་བྱིན་པར་ལེན་པའི་རྣམ་པར་སྨིན་པ་ནི་ཤིན་ཏུ་ཆེན་པོའོ། །མིར་སྐྱེས་ཀྱང་ལོངས་སྤྱོད་རྣམས་ཉམས་ 424b པར་འགྱུར་བ་དང ། མ་བྱིན་པར་བླངས་པའི་སེམས་ཅན་གྱི་ལག་ཏུ་དངོས་པོ་ཅུང་ཟད་ཀྱང་འཆགས་པར་མི་འགྱུར་རོ། །བཟའ་བ་དང ། བཏུང་བ་དང ། གོས་དང ། སྟན་ལ་སོགས་པ་རྙེད་དཀའ་བར་འགྱུར་བ་དང ། རྒྱུན་མི་འཆད་པར་ཟུག་རྔུ་ཅན་དང ། གཞན་སྡང་བ་དང ། འཚེ་བར་འགྱུར་རོ། །གང་དང ། གང་རྙེད་པ་དེ་དང ། དེ་ནི་ཉམས་པར་འགྱུར་རོ། །གཞན་གྱིས་ལོངས་སྤྱོད་པར་འགྱུར་རོ། །གང་འདོད་པའི་ལོངས་སྤྱོད་ནི་རྙེད་དཀའ་བར་འགྱུར་རོ། །དངོས་པོ་ཡོད་པ་རྣམས་འཕེལ་བར་མི་འགྱུར་རོ། །བདེ་བ་དང་འབྲལ་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་གསུངས་པ། འདིར་ནི་དབུལ་དང་བཀྲེན་པ་དང ། །གཟུགས་ངན་ཉེ་བར་འཚེ་བ་དང ། །རིགས་ངན་དུ་ནི་སྐྱེ་བ་ནི། །མ་བྱིན་ལེན་པའི་ཉེས་པའོ། །མ་བྱིན་པར་ལེན་པའི་རྣམ་པར་སྨིན་པའོ། །མ་བྱིན་ལེན་པ་སྤངས་པ་ཡིས། །སྐྱེས་པ་འམ་ནི་བུད་མེད་ནི། །ཐོབ་པར་འགྱུར་ཏེ་ཕན་ཡོན་ནི། །ཡོན་ཏན་ཉི་ཤུ་མི་དམན་པར། །རྟག་ཏུ་འབྲུ་ནི་མང་བ་དང ། །མཐའ་ཡས་ལོངས་སྤྱོད་ཕུན་སུམ་ཚོགས། །སྔར་མེད་པ་ནི་རབ་ཏུ་འཕེལ། །འདོད་པ་རྣམས་ནི་བརྟན་པ་དང ། །གཟུགས་སྒྲ་རོ་དང་དྲི་དང་ནི། །རེག་བྱ་རྣམས་ནི་ཡིད་དུ་འོང ། །དོམ་དུ་གཉེར་བ་ཐམས་ཅད་ལ། །བསམ་པ་ཐམས་ཅད་མྱུར་དུ་འགྲུབ། །དེ་ལ་རྒྱལ་པོ་ཆོམ་ཀུན ་དང ། །མི་མཛའ་བ་ཡིས་མི་འཕྲོགས་དང ། །མེ་འམ་ཡང་ནི་ཆུ་དང་ནི། །དེ་ 425a ༄#། །རྣམས་ཀྱིས་ནི་འཚེ་མི་འགྱུར། །འདི་འདྲ་བ་ཡི་ལོངས་སྤྱོད་ལྡན། །གང་ཞིག་སྟེར་དང་ཟ་བ་ལ། །མེད་ཅེས་པ་ནི་འབྱུང་མི་འགྱུར། །རྟག་ཏུ་བདེ་བར་གནས་པ་དང ། །མ་བྱིན་ལེན་པ་སྤངས་པ་ཡིས། །སྐྱེས་པ་འམ་ནི་བུད་མེད་ལ། །ཐོབ་པར་འགྱུར་ཏེ་ཕན་ཡོན་ནོ། །ལྷ་རྣམས་དང་ནི་མི་རྣམས་སུ། །དེ་ལུས་ཞིག་ཅིང་ཤི་ནས་བདེ་འགྲོ་མཐོ་རིས་དང ། ལྷའི་འཇིག་རྟེན་དུ་ཉེ་བར་སྐྱེའོ། །འདོད་པ་རྣམས་ལ་ལོག་པར་གཡེམ་པས་ནི་འཚོ་བའི་འཇིག་རྟེན་འདིར་འདོད་པར་བྱེད་པ་ནི། དེའི་ལུས་ཞིག་ནས་ཤི་བའི་ཕ་རོལ་ཏུ་ངུ་འབོད་ཆེན་པོར་སྐྱེ་ཞིང་ལྟུང་བར་འགྱུར་རོ། །དེ་ནས་ཕྱི་རུ་ཆུ་བོ་རབ་མེད་ཀྱི་ངོགས་གཉིས་སུ་ཤཱལ་མ་ལིའི་ནགས་དཔག་ཚད་བརྒྱད་ཅུ་གྱེན་དུ་མཉམ་ཞིང་མཐོ་བ། ཚེར་མ་སོར་བཅུ་དྲུག་པ་ཡལ་ག་རྣམས་ཐུར་ལ་འཕྱང་བ། ལུས་པོ་རྒྱང་གྲགས་བཅུ་གཉིས་དང་ལྡན་ཞིང་ལུས་ལ་མེ་གྱེན་དུ་འབར་བ། དཔག་ཚད་དྲུག་ཅུར་གྱེན་དུ་འགྲོ་ཞིང་དེ་ལ་རྟག་ཏུ་སྣ་ཚོགས་པའི་མཚོན་གྱིས་ཕན་ཚུན་དུ་གསོད་ཅིང ། དེ་ནི་ཤཱལ་མ་ལིའི་ཤིང་གི་ནགས་ལ་ཤོན་ནོ། །ལོ་སྟོང་ཕྲག་མང་པོར་ཤིང་གི་ཚེར་མ་ལ་འཛེག་གོ་།གཞན་ཡང་དམྱལ་བའི་སྲུང་མ་རྣམས་ཀྱིས་མཚོན་བླངས་ནས་རྒྱབ་པས་དུ་ཞིང་མགོ་ཐུར་ལ་བསྟན་ནས་ལྷུང་ངོ ། །ལྷུང་བའི་དུས་སུ་ལྕགས་བསྲེགས་ཀྱིས་གཞིར་གསལ་ཤིང་ 425b བཙུགས་པ་རྣམས་ལ་ལྷུང་ངོ ། །དེ་རྣམས་བཤང་ལམ་ནས་འཐོན་པས། དེ་རྣམས་ཀྱིས་སྡུག་བསྔལ་མྱོང་བར་འགྱུར་རོ། །རྒྱུན་ཏུ་ངུ་ཞིང་དཔག་ཚད་དྲུག་ཅུ་པའི་ལྕགས་ཀྱི་བུམ་པ་ན་བསྐལ་པ་གཅིག་ཏུ་སྡོད་དོ། །མེ་མདག་གིས་ཡོངས་སུ་གང་བར་དམྱལ་བའི་སྲུང་མ་རྣམས་ཀྱིས་ཁར་ལུགས་སོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། རི་ནག་རྩེགས་པ་མཉམ་ཞིང་མཐོ། །ཤིང་ནི་ཚེར་མར་བཅས་པ་དང ། །ལྕགས་ཀྱི་ཚེར་མ་རྣོན་པོ་ཡིས། །འཇིག་རྟེན་མི་ལ་བདེ་བ་མེད། །ཤིང་གི་རྩེ་མོར་གནས་པ་ཡི། །དུས་ཀྱི་ཆུང་མས་ཅི་ཞིག་བྱ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག། འདོད་པ་རྣམས་ལ་ལོག་པར་གཡེམ་པ་ནི། སྦྲུལ་དུག་ཅན་དང་འདྲ་བར་བལྟ་བར་བྱའོ། །དམྱལ་བར་འཇུག་པ་དང ། ཡི་དྭགས་ཀྱི་ཡུལ་དུ་འཇུག་པ་དང ། དུད་འགྲོའི་སྐྱེ་གནས་སུ་སྐྱེ་བར་འགྱུར་རོ། །གང་ཞིག་འདོད་པ་རྣམས་ལ་ལོག་པར་གཡེམ་པའི་རྣམ་པར་སྨིན་པ་ནི་ཤིན་ཏུ་ཆེན་པོའོ། །དེ་མིར་སྐྱེས་ཀྱང ། སྡུག་བསྔལ་ཆེན་པོ་མྱོང་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། སྐྱེ་བ་ལྔ་བརྒྱར་བུད་མེད་འགྱུར། །དེ་བཞིན་དུ་ནི་མ་ནིང་འགྱུར། ། སྐྱུག་བྲོའི་མཛེ་ཅན་ཡང་ཡང་འགྱུར། །ལོག་པར་གཡེམ་པའི་ཉེས་པའོ། །སྐྱེ་བ་དུ་མར་ཉེ་བར་འཚེ ་བ་དང ། དགྲ་མང་བར་འགྱུར་བ་དང ། མི་མཛའ་བ་དང་རྟག་ཏུ་ལྷན་ཅིག་ཏུ་ 426a ༄#། །གནས་པར་འགྱུར་བ་དང ། ཉལ་བ་དང་ལྡང་བའི་ཚེ་སྡུག་བསྔལ་དང་བཅས་པ་དང ། དུས་རྟག་ཏུ་ཁྲོ་བ་དང ། མིས་གནོད་པར་བྱེད་པ་དང ། རྟག་ཏུ་ལུས་སྒུར་བར་འགྱུར་བ་དང ། འོན་པ་དང ། སྐྱེ་བ་ནས་སྐྱེ་བར་དམུས་ལོང་ལ་སོགས་པར་སྐྱེ་བར་འགྱུར་རོ། །རྣམ་པར་འགྱུར་བར་ངེས་པ་དང ། རྟག་ཏུ་སེམས་མི་དགའ་བར་འགྱུར་བ་དང ། ཕན་ཚུན་དུ་འཐབ་པ་ལ་དགའ་བ་དང ། དགའ་བའི་སེམས་དང་འབྲལ་བར་འགྱུར་རོ། །དེ་ལུས་ཞིག་ནས་ཤི་བའི་ཕ་རོལ་ཏུ་ངུ་འབོད་ཆེན་པོའི་དམྱལ་བར་ལྟུང་ཞིང་སྐྱེ་བར་འགྱུར་རོ། །དེར་ཡང་དེ་ལ་སྡུག་བསྔལ་དྲག་པོ་དང ། རྩུབ་པ་དང ། ཚ་བ་ཉམས་སུ་མྱོང་བར་འགྱུར་རོ། །འདོད་པས་ལོག་པར་གཡེམ་པའི་རྣམ་པར་སྨིན་པའོ། །ལོག་པར་གཡེམ་པ་སྤངས་པ་ཡི། །སྐྱེས་པའམ་ནི་བུད་མེད་ཀྱིས། །ཐོབ་པར་འགྱུར་ཏེ་ཕན་ཡོན་ནོ། །ཡོན་ཏན་ཉི་ཤུ་མི་དམན་པ། །དེ་ལ་དགྲ་ནི་མེད་པ་དང ། །འཇིག་རྟེན་ཐམས་ཅད་དགའ་བ་དང ། །བཟའ་དང་བཏུང་བ་རྙེད་པར་སླ། །གོས་དང་སྟན་དང་གནས་རྣམས་དང ། །བདེ་བར་ཉལ་དང་བདེ་བར་འདུག་།དེ་ནི་བདེ་བར་ལྡང་བ་དང ། །ངན་སོང་འཇིགས་ལས་རྣམ་པར་གྲོལ། །མྱ་ངན་མེད་དང་འཇིགས་པའང་མེད། །ནད་རྣམས་ཐམས་ཅད་དེ་ལ་མེད། །མ་ནིང་བུད་མེད་དུ་མི་སྐྱེ། །ཅུང་ཟད་གང་ནི་དོན་གཉེར་འདོད། ། 426b དེ་ཡི་འདོད་པ་གྲུབ་པར་འགྱུར། །ཕན་ཚུན་དུ་ནི་མཛའ་བ་དང ། །གཞན་ནི་མི་དགའ་དེ་ལ་མེད། །དབང་པོ་ཀུན་ནི་ཚང་བ་དང ། །དགེ་བའི་མཚན་ཉིད་ཡང་དག་ལྡན། །མི་བཟོད་ཆུང་དང་དོགས་པ་མེད། །སྐྱེས་པ་བུད་མེད་དོགས་མེད་དོ། །ལོག་པར་གཡེམ་པ་སྤངས་པ་ཡི། །སྐྱེས་པའམ་ནི་བུད་མེད་ཀྱིས། །ཕན་ཡོན་འདི་ནི་མྱོང་བར་འགྱུར། །ལྷའམ་ཡང་ན་མི་རྣམས་ཀྱིས། །དེའི་ལུས་ཞིག་ནས་ཤི་བའི་ཕ་རོལ་ཏུ་མཐོ་རིས་དང ། ལྷའི་འཇིག་རྟེན་དུ་བདེ་འགྲོར་སྐྱེ་བར་འགྱུར་རོ། །གང་ཞིག་སྐྱེས་པ་འདོད་པ་ཡིས། །སྐྱེ་བ་ཡང་དང་ཡང་དུ་ནི། །བུད་མེད་གཞན་ལ་འགྲོ་མི་བྱ། །སེམས་ཀྱི་དྲི་མ་བཀྲུ་བའོ། །བུད་མེད་གང་ཞིག་གིས་གྱོས་སྒྱུག་ལ་ཉེ་བར་མི་བསྙེན་པ་དང ། རང་གི་ཁྱོ་ལ་ཉེ་བར་མི་བསྙེན་པ་དང ། རང་གི་ཁྱོ་ལ་མི་བརྩི་བ་དང ། རང་གི་ཁྱོའི་བུ་བོ་ལ་མི་འདུད་པ་དང ། རང་གི་ཁྱོའི་སྲིང་མོ་རྣམས་ལ་གནོད་པར་བྱེད་པ་དང ། གཞན་ཡང ། ལག་པ་དང ། རྐང་པ་དང ། རྒྱབ་ལ་ལས་སུ་བྱ་བ་མི་བྱེད་པ་དང ། བཟའ་བ་དང ། བཏུང་བ་གང་འདོད་པ་མི་སྟེར་བ་དང ། དེ་རྣམས་ལ་ངོ་ཚ་དང ། ཁྲེལ་དུ་མི་བྱེད་པ་དང ། རང་གི་ཁྱོ་བོ་ལ་ཀློག་པར་བྱེད་པ་དང ། སྐུར་པ་བཏབ་ན་དམྱལ་བར་སྐྱེ་བར་འགྱུར་རོ། །ལྕགས་བསྲེགས་ཀྱི་ས་གཞིའི་སྟེང་དུ་ཉལ་བ་དང ། འབར་བའི་ལྕགས་ཀྱུ་ཁ་རུ་བཅུག་ནས་མཆིལ་བས་ཉ་ལ་བྱ་བ་བཞིན་དུ་ལྕེའི་རྩེ་མོ་ 427a ༄#། །ཕྱི་རོལ་ཏུ་ཕྱུང་སྟེ། ཐག་པས་བཅིངས་ནས་ཕྱི་རོལ་ཏུ་འདོན་ཏོ། །དེ་ལྟར་ཕྱི་རོལ་ཏུ་བཏོན་པ་ལ། ལྕེའི་རྩེ་མོ་ལ་མཚོན་ཆས་བརྒྱབ་པའི་གནས་སུ་མཆུ་རང་ལ་སྐྱེས་པའི་སྲིན་འབུ་ཆེན་པོས་ཟའོ། །དེ་ལྟར་ཟོས་བས་ཅུང་ཟད་ཀྱང་སྨྲ་བར་མི་ནུས་སོ། །དེ་ལྟར་དེ་ནི་དེ་ལ་ལོ་སྟོང་ཕྲག་དུ་མར་འཚེད་པར་འགྱུར་རོ། །བཙོས་ནས་ཡང་དམྱལ་བ་ཆེན་པོར་ལྷུང་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། གང་ཞིག་བུད་མེད་སྐྱེས་པ་འདོད། །སྐྱེ་བ་སྐྱེ་བར་ཡང་དང་ཡང ། །ལྷ་དང་ལྷ་མོ་ཇི་བཞིན་དུ། །རང་གི་ཁྱོ་ནི་སྤང་མི་བྱ། །བརྫུན་དུ་སྨྲས་པས་སླར་ཡང་ཐིག་ནག་ཏུ་སྐྱེ་བར་འགྱུར་རོ། །དེར་ཡང་དམྱལ་བའི་སྲུང་མ་རྣམས་ཀྱིས་སྒྲ་ཆེན་པོའི་ཚིག་སྒྲོགས་ཤིང།་མཚོན་ཆ་འབར་བ་སྣ་ཚོགས་པ་བླངས་ནས་ལྕགས་བསྲེགས་ཀྱི་ས་གཞི་ལ་དམྱལ་བའི་སེམས་ཅན་གཅིག་གིས་གཅིག་འགྲུད་པ་དང ། འབར་བའི་ཐིག་ནག་པོས་འདེབས་པ་དང ། འབར་བའི་མཚོན་ཆ་བཟུང་ནས་ཡང་དག་པར་བསྒྱུར་བ་དང ། ཞིབ་མས་འཚག་པ་བཞིན་དུ། སྟེའུ་དང ། དགྲ་སྟས་གཞོགས་པ་དང ། དེ་རྣམས་ཀྱིས་སྒྲ་ཆེན་པོ་སྒྲོགས་ཏེ་དུ་ཞིང་གནས་སོ། །རང་གི་ཁྲག་འཐུང་ཞིང་ནང་དུ་དེར་གནས་པ་དེ་ཐིག་ནག་སྟེ། བརྫུན་དུ་སྨྲས་པས་སྐྱེའོ། །དེར་སྡུག་བསྔལ་དྲག་པ་དང ། རྩུབ་པ་དང ། 427b ཚ་བའི་ཚོར་བ་མྱོང་བར་འགྱུར་རོ། །དགེ་སློང་དག། བརྫུན་དུ་སྨྲ་བ་ནི་སྦྲུལ་དུག་ཅན་དང་འདྲ་བར་ཡིད་ལ་བྱའོ། །དེས་སྡུག་བསྔལ་མང་པོ་བྱེད་དོ། །དམྱལ་བར་འཇུག་པ་དང ། ཡི་དྭགས་ཀྱི་ཡུལ་དུ་འཇུག་པ་དང ། དུད་འགྲོའི་སྐྱེ་གནས་སུ་སྐྱེ་བར་འགྱུར་རོ། །གང་ཞིག་བརྫུན་དུ་སྨྲ་བ་ནི། །རྣམ་པར་སྨིན་པ་ཆེན་པོའོ། །དེ་མིར་སྐྱེས་ཀྱང་སྙིང་རྗེ་མེད་པ་དང ། སྐད་བྱ་རོག་གི་དང་འདྲ་བ་དང ། ལྕེ་མི་བདེ་བ་དང ། སོ་ལ་སྲིན་འབྱུང་བ་དང ། ཁ་དྲི་མི་ཞིམ་པ་དང ། སོ་མི་སྙོམས་པ་དང ། ཚིག་རྩུབ་པ་དང ། གྲེ་བ་འཛེར་བ་དང ། མཆུ་མི་བདེ་བ་དང ། ཕྲག་དོག་དང་བཅས་པ་དང ། རྟག་ཏུ་སྲེད་པ་དང་ལྡན་པ་དང ། དེ་ལུས་ཞིག་ནས་ཤི་བའི་ཕ་རོལ་ཏུ་ཐིག་ནག་ཏུ་སྐྱེ་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། ཁ་ནས་རྣག་གི་དྲི་ལྡང་ཞིང ། །དཔག་ཚད་གཅིག་ཏུ་དྲི་ངན་འགྲོ་།ཆོས་ནི་ཤེས་པར་ཡང་མི་འགྱུར། །བརྫུན་དུ་སྨྲས་པའི་ཉེས་པའོ། །བརྫུན་དུ་སྨྲས་པའི་རྣམ་པར་སྨིན་པའོ། །བརྫུན་དུ་སྨྲ་བ་སྤངས་པ་ཡིས། །སྐྱེས་པའམ་ནི་བུད་མེད་ནི། །ཐོབ་པར་འགྱུར་ཏེ་ཕན་ཡོན་ནི། །སུམ་ཅུ་རྩ་གསུམ་མི་ཉུང་བ། །མིག་དང་རྣ་བ་སྣ་དང་ནི། །ལྕེ་དང་ལུས་དང་དེ་བཞིན་ཡིད། །དེ་ལ་རྣམ་པར་དག་པར་འགྱུར། །པདྨའི་ཟེ་འབྲུ་ལྟར་མཚུངས་སོ། །མིག་དང་སོ་ནི་མཉམ་པ་དང ། །ལུས་ནི་མི་རིང་མི་ཐུང་ལ། །ཧ་ཅང་སྦོམ་དང་ཕྲ་བ་ 428a ༄#། །མིན། །འདི་ལྟར་ལེགས་པར་བཤད་པའི་ཚིག་།ཇི་ལྟར་ཨུཏྤ་ལ་ཡི་དྲི། །རྟག་ཏུ་ཀུན་ནང་ཁ་ཡི་དྲི། །གཡོག་རྣམས་ཐམས་ཅད་བསྙེན་བཀུར་འགྱུར། ། མཆོད་པར་འོས་པར་ཚིག་གིས་སོ། །ཆོས་རྣམས་ཀུན་ལ་མཁས་པ་དང ། །དོན་དང་ཚིག་འབྲུ་རྣམ་པར་མཁས། །སེམས་ཀྱི་རྟོག་པ་ལ་ཞུ་མ་མེད། །རྟག་ཏུ་ཁྱད་པར་འཕགས་པའི་ཚིག། བརྫུན་དུ་སྨྲ་བ་སྤངས་པ་ཡི། །སྐྱེས་པའམ་ནི་བུད་མེད་ཀྱིས། །ཕན་ཡོན་འདི་ནི་མྱོང་བར་འགྱུར། །ལྷ་དང་མི་རུ་སྐྱེས་པ་ན། །དེའི་ལུས་ཞིག་ནས་ཤི་བའི་ཕ་རོལ་ཏུ་བདེ་འགྲོ་ལྷའི་འཇིག་རྟེན་དང ། མཐོ་རིས་སུ་སྐྱེའོ། །བརྫུན་དུ་སྨྲ་བ་ཞེས་བྱ་བ་ནི། ཁ་ན་མ་ཐོ་བ་དང་བཅས་པའོ། །འདོད་པའི་དོན་རྣམས་ལ་རིགས་ཀྱི་བུས་མི་བྱ་བ་ཉིད་དོ། །བདེན་པ་དང ། ལེགས་པའི་བཅུད་རྣམས་དེ་ལྟ་བུ་ནི་བླང་བར་བྱའོ། །བརྫུན་དུ་སྨྲ་བ་ཞེས་བྱ་བ་དོན་མེད་པར་བྱེད་པའོ། །འཇིག་རྟེན་སླུ་བར་བྱེད་དོ། །སྐྱེ་བ་གཞན་དུ་མར་མནར་མེད་པའི་དམྱལ་བར་སྐྱེ་བར་འགྱུར་རོ། །དེའི་ཕྱིར་འཚོ་བའི་སླད་དུ་བརྫུན་དུ་སྨྲ་བར་མི་བྱའོ། །ཐམས་ཅད་མཁྱེན་པ་སངས་རྒྱས། བྱང་ཆུབ་སེམས་དཔའ་སྒྲིབ་པ་དང་བཅས་པའི་དུས་ནའང་ཕྲ་མ་ནི། ཡུང་ངའི་ཁ་དོག་ལྟར་ཡུན་རིང་པོར་མི་གནས་སོ། །ཕུབ་མའི་ཕུང་པོའི་སྟེང་དུ་ཕུར་པ་བཙུགས་ན་ཡུན་རིང་དུ་མི་གནས་པ་བཞིན་ནོ། །རྟའི་རྒྱབ་ཏུ་ 428b ཤིང་ཐོག་རིལ་བུ་བཞག་ན་ཡུན་རིང་དུ་མི་གནས་པ་བཞིན་དུ་སྨྲས་པའི་ཚིག་ལ་རལ་གྲིས་སྐེ་འབྲེག་པའི་ཚེ་ཚིག་གཉིས་མི་སྨྲ་བ་བཞིན་ནོ། །བདེན་པ་ཡུན་རིང་པོར་སྨྲས་བས་དགེ་སྦྱོང་དང ། བྲམ་ཟེས་ཕ་རོལ་ཏུ་སྒྲོལ་བར་བྱེད་དོ། །ཆང་འཐུངས་པ་ནི་ཚ་བའི་དམྱལ་བར་ལྟུང་ཞིང་སྐྱེ་བར་འགྱུར་རོ། །དེར་ལྷུང་བའི་སེམས་ཅན་ནི་ལོ་སྟོང་ཕྲག་མང་པོར་འཚེད་པར་འགྱུར་རོ། །དེ་ནས་ཕྱིར་ཕྱུང་ནས་ཆུ་བོ་རབ་མེད་ཀྱི་ངོགས་སུ་སྐྱུར་བར་བྱེད་དོ། །གང་དུའང་འགྲོ་ས་མེད་པར་ཡང་དང ། ཡང་དུ་རྐྱལ་བར་བྱེད་དོ། །དེར་དམྱལ་བ་སྲུང་མ་རྣམས་ཀྱིས་མཆིལ་པས་ཉ་འདོན་པ་ལྟར་ལྕགས་བསྲེགས་ཀྱི་ས་གཞི་ལ་རྡེབས་པར་བྱེད་དོ། །འདི་ལྟར་སྒྲོགས་ཏེ། ཀྱེ། སྐྱེས་བུ་ཁྱོད་ཅི་འདོད། ཇོ་བོ། སྐོམ་མོ། །དམྱལ་བའི་སྲུང་མ་དེས་ལྕགས་འབར་བའི་ལྕགས་ཀྱུས་ཁ་ཕྱེ་སྟེ་ལྕགས་བཞུ་བའི་ཁུ་བ་ལྡུགས་པར་བྱེད་དོ། །དེ་ལ་དེའི་མཆུ་སྲེག་གོ་།མགྲིན་པ་ཡང་སྲེག་གོ་།བྲང་སྲེག་གོ་།རྒྱུ་མ་སྲེག་གོ། སྙིང་ཡང་སྲེག་གོ ། བཤང་ལམ་ན་མར་འཐོན་པར་བྱེད་དོ། །དེ་རྣམས་ཀྱིས་སྡུག་བསྔལ་མྱོང་བར་བྱེད་ཅིང ། དུལ་འདྲེ་བར་བྱེད་དོ། །དེའི་དུས་སུ་ཡང་འཆི་བར་ནི་མི་འགྱུར་ཏེ ། ཇི་སྲིད་ཀྱི་བར་དུ་སྡིག་པའི་ལས་ཀྱི་འབྲས་བུ་མྱོང་བར་བྱེད་དོ། །དེ་སྲིད་དུ་དེ་རྣམས་ཀྱིས་རྣམ་པར་སྨིན་པའི་ཚོར་བ་མྱོང་བར་བྱེད་དོ། །དེའི་ཕྱིར་བཅོམ་ལྡན་འདས་ཀྱིས་ 429a ༄#། །བཀའ་སྩལ་པ། ཚ་ཞིང་རྩུབ་པའི་ཆུ་བོ་ནི། །རབ་མེད་ཤིན་ཏུ་བགྲོད་པར་དཀའ། །ལྕགས་ཀྱི་པདྨའི་འདབ་མ་རྣམས། །འདབ་མ་རྣོ་བའི་སྟེང་དུ་འགྲེ ། ཆུ་བོ་རབ་མེད་གཞི་མེད་པར། །ཆོས་མིན་ཇི་ལྟར་སྤྱོད་པར་འགྱུར། །གང་ཞིག་ཆད་འཐུང་བ་དེ་ནི་སྡིག་པ་ཆུང་བ་མ་ཡིན་ནོ། །དེ་མིར་གྱུར་ཀྱང་རྟག་ཏུ་བརྗེད་ངས་པ་དང ། ལུག་ལྟར་ལྐུགས་པ་དང ། ཤེས་རབ་འཆལ་པ་དང ། རིག་པ་མི་ཤེས་པ་དང ། རྟག་ཏུ་གཉིད་དུ་འགྲོ་བ་དང ། བློ་གོས་དམན་པ་དང ། གཏི་མུག་ཆེ་བ་དང ། འཇིགས་པ་དང ། སྐྲག་པར་འགྱུར་བ་དང ། དོགས་པར་འགྱུར་བ་དང ། ཕྲ་མ་ཅན་དང ། ཚིག་མི་བརྟན་པ་དང ། སེར་སྣ་ཅན་དང ། ཕྲག་དོག་ཅན་དང ། ངེས་པར་མི་འབྱུང་བ་དང ། ངོ་ཚ་མེད་པ་དང ། ཁྲེལ་མེད་པ་དང ། ཤེས་རབ་ཆུང་བ་དང ། དགེ་བའི་ཆོས་རྣམས་མི་རེག་པ་སྟེ། སྐྱེ་བ་ལྔ་བརྒྱར་གནོད་སྦྱིན་སྟེ། །སྐྱེ་བ་ལྔ་བརྒྱར་ཁྱི་དང་ནི། ། མཐའ་ཡས་སྨྱོན་པར་སྐྱེ་བར་འགྱུར། །ཆང་འཐུངས་པ་ཡི་ཉེས་པའོ། །མྱོས་པར་འགྱུར་བའི་ཆང་གི་བཏུང་བའི་རྣམ་པར་སྨིན་པའོ། །ཆང་འཐུངས་བ་ནི་སྤངས་པ་ཡིས། །སྐྱེས་པའམ་ནི་བུད་མེད་ནི། །ཐོབ་སྐྱེ་དེ་ཡི་ཕན་ཡོན་ནི། །སུམ་ཅུ་རྩ་དྲུག་མི་དམན་པར། །འདས་དང་མ་འོངས་པ་ཡི་དུས། །ད་ལྟར་བྱུང་བ་ཅུང་ 429b ཟད་དུ། །མྱུར་དུ་ཤེས་པར་འགྱུར་བ་དང ། །རྟག་ཏུ་དྲན་པ་གནས་པ་དང ། །དེ་ནི་སྨྱོ་བར་མི་འགྱུར་ཞིང ། །ཁྱད་པར་འཕགས་པའི་ཤེས་རབ་དང ། །མི་རྨོངས་པ་དང་བག་ཡོད་དང ། །ཚིག་ནི་ཤིན་ཏུ་གསལ་བ་དང ། །ངོ་ཚ་ཤེས་ཤིང་ཚིག་ནི་གསལ། །དེ་ནི་ལོག་པར་སྨྲ་མི་འགྱུར། །ཕྲ་མ་དང་ནི་ཚིག་རྩུབ་མེད། །དོན་མེད་པ་ལ་མི་བསྟོད་ཅིང། །ཉིན་དང་མཚན་དུ་དེ་བཞིན་བྱ། །བྱས་པ་ཤེས་ཤིང་བྱས་པ་ཚོར། །འདོད་མེད་གཏོང་དང་ཚུལ་ཁྲིམས་ལྡན། །ཁྲོ་བ་མེད་ཅིང་ཚིག་ནི་དྲང ། །འཇིགས་པ་མེད་ཅིང་རྣམ་པར་མཁས། །ངོ་ཚ་ཁྲེལ་ཡོད་ཕུན་སུམ་ཚོགས། །འཇིགས་པ་དང་ནི་དོགས་པ་མེད། །ཡིད་གཞུངས་ཐོས་པ་འཛིན་པ་དང ། །དོན་ཡོད་སྐྱེ་བོ་མང་ནང་མཁས། ། ཆང་གི་བཏུང་བ་སྤངས་པ་ཡིས། །སྐྱེས་པ་འམ་ནི་བུད་མེད་ཀྱིས། །ཕན་ཡོན་འདི་རྣམས་མྱོང་བར་འགྱུར། །ལྷ་རྣམས་དང་ནི་མི་རྣམས་སུ། །དེའི་ལུས་ཞིག་ནས་ཤི་བའི་ཕ་རོལ་ཏུ་བདེ་འགྲོ་མཐོ་རིས་ལྷའི་འཇིག་རྟེན་དང ། མཐོ་རིས་སུ་སྐྱེའོ། །ཚུལ་ཁྲིམས་འདི་རྣམས་བསྲུང་བར་བྱའོ། །འདི་གང་ཟག་གང་སུ་དག་སྐྱེས་པའམ། བུད་མེད་ཀྱིས་ཚུལ་ཁྲིམས་བསྲུང་བར་མི་བྱེད་པ་དང ། བསྒོམ་པར་མི་བྱེད་ན་དེའི་ལུས་ཞིག་ནས་ཤི་བའི་ཕ་རོལ་ཏུ་ངན་སོང་ངན་འགྲོ་ལོག་པར་ལྟུང་བར་སྐྱེ་བར་འགྱུར་རོ། །གང་སུ་དག ། 430a ༄#། །ཚུལ་ཁྲིམས་སྲུང་བར་བྱེད་པ་དང ། སྒོམ་པར་བྱེད་པ་རྣམས་ནི། དེའི་ལུས་ཞིག་ནས་ཤི་བའི་ཕ་རོལ་ཏུ་བདེ་འགྲོ་མཐོ་རིས་དང ། ལྷའི་འཇིག་རྟེན་དུ་སྐྱེ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཚུལ་ཁྲིམས་ལྔའི་ཕན་ཡོན་བསྟན་པའི་མདོ་རྫོགས་སོ།། །།པཎྜི་ཏ་ཆེན་པོ་ཨ་ནནད་ཤྲཱིའི་ཞལ་སྔ་ནས། མང་དུ་ཐོས་པའི་ལོ་ཙྪ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས། གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སའི་སྟེང་དུ་ཉི་མ་ཟླ་བ་ལྟར་གྱུར་ཅིག། |