།།རྒྱ་གར་སྐད་དུ། ནནྡོ་པ་ནནད་ནཱ་ག་རཱ་ཛ་ད་མ་ན་སཱུ་ཏྲ། བོད་སྐད་དུ། ཀླུའི་རྒྱལ་པོ་ 435a ༄#། །དགའ་བོ་ཉེར་དགའ་འདུལ་བའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན།་བཅོམ་ལྡན་འདས་མཉན་ཡོད་ན་རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །ཁྱིམ་བདག་མགོན་མེད་ཟས་སྦྱིན་དུས་གཅིག་ན། བཅོམ་ལྡན་འདས་ཀྱིས་ཆོས་བསྟན་པ་ཐོས་ནས། བཙུན་པ་དགེ་སློང་ལྔ་བརྒྱ་དང་བཅས་པ་སང་ནང་པར་བདག་གི་ཁྱིམ་དུ་གདུགས་ཚོད་ལ་འབྱོན་པར་ཞུ་ཞེས་མགྲོན་དུ་གཉེར་ཏོ། ། བཅོམ་ལྡན་འདས་ཀྱིས་དེ་ལ་གནང་ནས། དེའི་ཉིན་མོའི་ལྷག་མ་དང ། མཚན་མོའི་མཐའ་འདས་ནས་ཐོ་རངས་ཀྱི་དུས་སུ་སྟོང་ཕྲག་བཅུའི་འཇིག་རྟེན་གྱི་ཁམས་ལ་ཐུགས་ཀྱིས་རྣམ་པར་དགོངས་སོ། །དེ་ནས་ཀླུའི་རྒྱལ་པོ་དགའ་བོ་ཉེར་དགའ་ཞེས་བྱ་བ་ཡེ་ཤེས་ཀྱི་སྒོ་ནས་མངོན་དུ་བྱས་སོ། །དེ་ལ་ངེས་པར་ལེགས་པའི་ས་བོན་ཡོད་དམ་ཞེས་བརྟགས་པ་ན། འདི་ནི་ལོག་པར་ལྟ་བ་ཅན་དཀོན་མཆོག་གསུམ་ལ་དད་པ་མེད་པར་གཟིགས་སོ། །གཟིགས་ནས་གང་ཞིག་འདི་ནི་ལོག་བར་ལྟ་བ་ལས་རྣམ་པར་གྲོལ་བར་བྱ་བའི་ཕྱིར། འདུལ་བར་བྱེད་པ་གནས་བརྟན་ཆེན་པོ་མཽ་དགལ་གཟིགས་སོ། །དེ་ནས་མཚན་མོ་ཐོ་རངས་ཀྱི་དུས་སུ་སྐུའི་བྱི་དོར་མཛད་ནས། ཚེ་དང་ལྡན་པ་ཀུན་དགའ་བོ་བོས་ 435b ཏེ་བཀའ་སྩལ་པ། ཀུན་དགའ་བོ། དགེ་སློང་ལྔ་བརྒྱ་དང་བཅས་པའི་བཅོམ་ལྡན་འདས་ལྷའི་འཇིག་རྟེན་དུ་གཤེགས་སོ་ཞེས་སྟོན་ཅིག། དེས་བཙུན་པ་བཀའ་བཞིན་འཚལ ་ལོ་ཞེས་གསོལ་ནས་དགེ་སློང་རྣམས་ལ་དོན་དེ་སྨྲས་སོ། །དེའི་ཉི་མ་ལ་དགའ་བོ་ཉེར་དགས་ཉེར་བསྡོགས་བྱས་སོ། །དེ་ལྷའི་རིན་པོ་ཆེའི་སྟེང་དུ་སྐྱིལ་ཀྲུང་གིས་གནས་ཏེ། ལྷའི་གདུགས་དཀར་པོ་བཟུང་ངོ ། །ཀླུ་དང ། ཀླུ་མོ་གར་བྱེད་ཅིང་ཀླུའི་འཁོར་གཡོག་དུ་མས་བསྐོར་ཏེ་ལྷའི་སྣོད་ཉེ་བར་བཞག་ནས་བཟའ་བ་དང ། བཏུང་བ་རྣམ་པ་སྣ་ཚོགས་པ་ལ་རྟོག་པར་བྱེད་དོ། ། དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་ཇི་ལྟ་བར་གཟིགས་སོ། །དེ་ལྟར་བྱས་པ་གཟིགས་ནས་དེའི་མགོ་བོའི་སྟེང་གི་བླ་བྲེས་ཀྱི་སྟེང་ཉིད་ནས། བཅོམ་ལྡན་འདས་དགེ་སློང་ལྔ་བརྒྱ་དང་བཅས་པས་གཤེགས་ཏེ། སུམ་ཅུ་རྩ་གསུམ་གྱི་ལྷའི་བར་མངོན་སུམ་དུ་གྱུར་ཏོ། །དེའི་ཚེ་དེའི་དུས་ན་ཀླུའི་རྒྱལ་པོ་དགའ་བོ་ཉེར་དགའ་དེ་ལྟ་བུའི་གཟུགས་ཀྱིས་སྡིག་པའི་ལྟ་བར་ལྷུང་བ་ལྟ་བ་ངན་པའི་སེམས་སྐྱེས་སོ། །དགེ་སྦྱོང་མགོ་རེག་འདི་ངའི་སྟེང་ནས་སུམ་ཅུ་རྩ་གསུམ་གྱི་ལྷའི་འཇིག་རྟེན་གྱི་གནས་སུ་གཤེགས་པར་འགྱུར་རོ། །འདི་ནི་དེ་ལྟ་ནས་ངའི་མགོ་བོ་ལ་རྐང་པའི་རྡུལ་མགོ་བོའི་སྟེང་དུ་ལྷུང་བར་བྱེད་པས་འགྲོ་དུ་མི་སྟེར་རོ་སྙམ་སྟེ། ལངས་ནས་རི་རབ་ཀྱི་རྩ་བར་སོང་ངོ ། །རང་གི་གཟུགས་བོར་ཏེ་རི་བོ་མཆོག་ 436a ༄#། །རབ་སྟེང་འོག་ཐམས་ཅད་རང་གི་ལུས་ཀྱིས་ལན་བདུན་བཀྲིས་ནས། སྟེང་དུ་གདེངས་ཀ་བྱས་ཏེ། སུམ་ཅུ་རྩ་གསུམ་པ་རྣམས་ཀྱིས་མི་མཐོང་བར་བྱ་བའི་ཕྱིར་རོ། །དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ། སྔར་བཞིན་གནས་འདིའི་ཕྱོགས་སུ་འདུག་ན་རིའི་མཆོག་རབ་མཐོང་ངོ ། །རི་བོ་མཆོག་རབ་འཁོར་དང་བཅས་པ་མཐོང་ངོ ། །སུམ་ཅུ་རྩ་གསུམ་མཐོང་ངོ ། །རྣམ་པར་རྒྱལ་བའི་ཁང་བཟང་མཐོང་ངོ ། །རྣམ་པར་རྒྱལ་བའི་ཁང་བཟང་གི་སྟེང་གི་རྒྱལ་མཚན་མཐོང་ངོ ། །བཙུན་པ། ཅིའི་རྒྱུ་ཅིའི་རྐྱེན་ལགས། ད་ནི་རི་བོ་མཆོག་རབ་མི་མཐོང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཡུལ་འཁོར་སྐྱོང ། འདི་ནི་ཀླུའི་རྒྱལ་པོ་དགའ་བོ་ཉེར་དགའ་ཞེས་བྱ་བ་ཁྱེད་རྣམས་ལ་ཁྲོས་པར་གྱུར་ཏེ། རི་བོ་མཆོག་རབ་ལན་བདུན་དུ་ལུས་ཀྱི་དཀྲིས་ནས་སྟེང་དུ་གདེངས་ཀས་བསྒྲིབས་སོ། །མུན་པ་མུན་ནག་ཏུ་བྱས་ནས་གནས་སོ། །གསོལ་པ། བཙུན་པ། བདག་གིས་འདུལ་བར་བགྱིའམ། བཅོམ་ལྡན་འདས་ཀྱིས་གནང་བ་མ་བྱིན་ནོ། །དེ་ནས་ཚེ་དང་ལྡན་པ་བཟང་ལྡན་དང ། ཚེ་དང་ལྡན་པ་སྒྲ་གཅན་འཛིན་ཏེ། གྲོ་རིམ་བཞིན་དུ་དགེ་སློང་ཐམས་ཅད་ཀྱིས་ཞུས་སོ། །བཅོམ་ལྡན་འདས་ཀྱིས་རྗེས་སུ་གནང་བ་མ་བྱིན་ནོ། །ཐམས་ 436b ཅད་ཀྱིས་རྗེས་སུ་གནས་བརྟན་ཆེན་པོ་མཽ་དགལ་གྱི་བུས་བཙུན་པ་བདག་གིས་གདུལ་བར་བགྱིའམ། ཞེས་ཞུས་པ་དང ། མཽ་དགལ་གྱི་བུ། ཐུལ་ཅིག། ཅེས་བཅོམ་ལྡན་འདས་ཀྱིས་གནང་བ་བྱིན་ནོ། །གནས་བརྟན་རང་གི་ལུས་བོར་ལ་ཀླུའི་རྒྱལ་པོའི་ལུས་ཆེན་པོར་སྤྲུལ་ཏེ། དགའ་བོ་ཉེར་དགའི་ལུས་ཀྱི་སྟེང་དུ་ལན་བཅུ་བཞི་ལུས་ཀྱིས་དཀྲི་བ་དང ། དེའི་གདེངས་ཀའི་སྟེང་དུ་རང་གི་གདེངས་ཀ་བྱའོ། །རི་བོ་མཆོག་རབ་དང་བཅས་པ་ཐམས་ཅད་ནོན་ཅིག་།ཅེས་བཀའ་སྩལ་པ་དང ། གནས་བརྟན་མཽ་དགལ་གྱི་བུས་དེ་བཞིན་དུ་བྱས་སོ། །དེ་ནས་ཀླུའི་རྒྱལ་པོ་དགའ་བོ་ཉེར་དགས་ཁ་རླངས་ཀྱི་དུ་བ་བཏང་ངོ ། །གནས་བརྟན་གྱིས་ཀྱང་ཁྱེད་ཀྱི་ལུས་ལ་ཁ་རླངས་ཀྱི་དུ་བ་ཡོད་ལ་ངེད་ལ་མེད་པ་ཡིན་ནམ་ཞེས་ཁ་རླངས་བཏང་ངོ ། ། ཀླུའི་རྒྱལ་པོ་དགའ་བོ་ཉེར་དགའི་དུ་བས་གནས་བརྟན་ལ་གནོད་པར་མ་གྱུར་རོ། །གནས་བརྟན་གྱི་ཁ་རླངས་ཀྱི་དུ་བས་ཀླུའི་རྒྱལ་པོ་ལ་གནོད་པར་གྱུར་ཏོ། །ཀླུའི་རྒྱལ་པོ་རབ་ཏུ་འབར། གནས་བརྟན་གྱིས་ཁྱེད་ཀྱི་ལུས་ལ་འབར་བ་ཡོད་པ་བཞིན་ངེད་ལ་མེད་དམ་ཞེས་འབར་བར་བྱས་སོ། །ཀླུའི་རྒྱལ་པོའི་མེ་འོད་ཀྱིས་གནས་བརྟན་ལ་གནོད་པར་མ་གྱུར་ཏོ། །གནས་བརྟན་གྱི་མེ་འོད་ཀྱིས་ཀླུའི་རྒྱལ་པོ་ལ་གནོད་པར་གྱུར་ཏོ། །ཀླུའི་རྒྱལ་པོས་བསམས་པ། འདི་ནི་བདག་གི་ལུས་རི་བོ་མཆོག་རབ་དར་བཅས་པ་ངེས་པར་མནན་ནས་དུ་བ་དང ། མེ་འབར་བར་ 437a ༄#། །བྱེད་དོ་སྙམ་ནས། ཁྱེད་གང་ཡིན་ཞེས་དྲིས་སོ། །བདག་མཽ་དགལ་ཞེས་བྱ་བའོ། །བཙུན་པ་རང་གི་གཟུགས་ཀྱིས་གནས་པར་གྱིས་ཤིག་།གནས་བརྟན་གྱིས་ཀླུའི་ལུས་དོར་ནས། དེའི་རྣ་བ་གཡས་པའི་བུ་ག་ནས་ཞུགས་ཏེ། རྣ་བ་གཡོན་པའི་བུ་ག་ནས་འཐོན་ནོ། །ཡང་རྣ་བ་གཡོན་པའི་བུ་ག་ནས་ཞུགས་ནས། རྣབ་གཡས་པའི་བུ་ག་ནས་འཐོན་ནོ། །དེ་བཞིན་དུ་སྣ་གཡས་པའི་བུ་ག་ནས་ཞུགས་ནས། སྣ་གཡོན་པའི་བུ་ག་ནས་འཐོན་ཏེ། ཡང་སྣ་གཡོན་པའི་བུ་ག་ནས་ཞུགས་ནས། སྣ་གཡས་པའི་བུ་ག་ནས་འཐོན་ནོ། །དེ་ནས་ཀླུའི་རྒྱལ་པོའི་ཁ་གདངས་སོ། །གནས་བརྟན་ཁར་ཞུགས་ནས། གསུས་པའི་ནང་དུ་མདུན་རྒྱབ་ཏུ་ཡང་དང ། ཡང་དུ་རྒྱུས་སོ། །བཅོམ་ལྡན་འདས་ཀྱིས་མཽ་དགལ་རྫུ་འཕྲུལ་ཆེར་ཡིད་ལ་གྱིས་ཤིག། ཀླུ་རྫུ་འཕྲུལ་ཆེན་པོ་དང་ལྡན་པ་ཡིན་ནོ་ཞེས་བཀའ་སྩལ་ཏོ། །གནས་བརྟན་གྱིས། བཙུན་པ། བདག་གིས་རྫུ་འཕྲུལ་གྱི་རྐང་པ་བཞི་བསྒོམ་པ་དང།་མང་དུ་བྱས་པ་དང ། བརྩོན་པར་བྱས་པ་དང ། གཞིར་བྱས་པ་དང ། རྗེས་སུ་བསྒྲུབས་པ་དང ། འདྲིས་པར་བྱས་པས་ལེགས་པར་བརྩམས་སོ། །བཙུན་པ། དགའ་བོ་ཉེར་དགའ་ལྟ་ཞོག། དགའ་བོ་ཉེར་དགའ་དང་མཚུངས་པར་བརྒྱའི་ཚོགས་དང ། སྟོང་གི་ཚོགས་དང ། འབུམ་གྱི་ཚོགས་ཀྱང་བདག་གིས་གདུལ་བར་ནུས་སོ་ཞེས་གསོལ་ཏོ། ། 437b ཀླུའི་རྒྱལ་པོས་བསམས་པ། ནང་ན་རྒྱུ་བ་བདག་གིས་མ་མཐོང་ངོ ། །ཕྱིར་འབྱུང་བའི་ཚེ་མཆེ་བ་གཉིས་ཀྱི་བར་དུ་བཟའ་འོ་སྙམ་ནས། བཙུན་པ། ཕྱིར་ཤོག་།ངའི་ལྟོ་བའི་ནང་དུ་ཡང་དང ། ཡང་དུ་རྒྱུ་བ་དང ། སྔོད་པས་ཅི་བྱ་ཞེས་པས་གནས་བརྟན་ཕྱིར་བྱོན་ནས་གནས་སོ། །ཀླུའི་རྒྱལ་པོས་མཐོང་ནས། འདི་ཡིན་ནམ། ཞེས་སྨྲས་ཏེ། སྣའི་རླུང་ཕྱིར་བཏང་ངོ ། །གནས་བརྟན་བསམ་གཏན་བཞི་པོ་མཉམ་པར་ཐོབ་པས་བ་སྤུའི་བུ་ག་གཅིག་ཏུ་ཡང་སྣའི་རླུང་གིས་བསྐྱོད་པར་མ་ནུས་སོ། །དེ་ལས་གཞན་པའི་དགེ་སློང་རྣམས་ཀྱིས་དང་པོ་རྣམས་ཀྱིས་ཆོ་འཕྲུལ་ཐམས་ཅད་བྱེད་པར་ནུས་ཀྱི། གནས་འདི་རྣམས་ལ་རབ་ཏུ་ཞུགས་ནས། བསམ་གཏན་བཞི་པོ་མྱུར་དུ་བསྒྲུབ་པར་མི་ནུས་སོ། །དེའི་ཕྱིར་བཅོམ་ལྡན་འདས་ཀྱིས་ཀླུའི་རྒྱལ་པོ་འདུལ་བ་དེ་རྣམས་ལ་གནང་བ་མ་ཡིན་ནོ། །ཀླུའི་རྒྱལ་པོ་བདག་གིས་དགེ་སློང་འདིའི་བ་སྤུའི་བུ་ག་ཙམ་ཡང་སྣའི་རླུང་གིས་བསྐྱོད་པར་མ་ནུས་པས་རྫུ་འཕྲུལ་ཆེན་པོར་བསམས་སོ། །གནས་བརྟན་གྱིས་དགེ་སློང་གི་གཟུགས་དོར་ནས། འདབ་བཟང་བྱ་ཁྱུང་གི་གཟུགས་སུ་མངོན་པར་སྤྲུལ་ཏོ། །འདབ་བཟང་གི་ལུས་དེ་མཐོང་ནས་ཀླུའི་རྒྱལ་པོ་བྲོས་པར་གྱུར་ཏོ། །འདབ་བཟང་གི་རྗེས་སུ་འབྲེལ་པར་ཀླུའི་རྒྱལ་པོས་རང་གི་གཟུགས་དོར་ནས་བྲམ་ཟེའི་ཁྱེའུ་ཡི་གཟུགས་སུ་སྤྲུལ་ཏོ། །བཙུན་པ། ཁྱེད་ལ་སྐྱབས་སུ་འགྲོའོ་ཞེས་རྗེད་པར་བྱེད་ཅིང་ 438a ༄#། །གནས་བརྟན་གྱི་ཞབས་ལ་ཕྱག་བཙལ་ཏོ། །གནས་བརྟན་གྱིས་སྟོན་པའི་ཐད་དུ་ཤོག་ཅིག། འགྲོ་བ་ཡིན་ནོ་ཞེས་ཀླུའི་རྒྱལ་པོ་བཏུལ་ནས་དུག་མེད་པར་བྱས་ཏེ། བཅོམ་ལྡན་འདས་ཀྱི་དྲུང་དུ་ཕྱིན་ནོ། །ཀླུའི་རྒྱལ་པོས་བཅོམ་ལྡན་འདས་ལ་ཕྱག་བྱས་ཏེ། བཙུན་པ། ཁྱེད་ལ་སྐྱབས་སུ་འགྲོའོ་ཞེས་གསོལ་ཏོ། །བཅོམ་ལྡན་འདས་ཀྱིས་ལེགས་སོ་ཞེས་བཀའ་སྩལ་ནས། དགེ་སློང་འཁོར་དང་བཅས་པ་མགོན་མེད་ཟས་སྦྱིན་གྱི་གནས་སུ་གཤེགས་སོ། །མགོན་མེད་ཟས་སྦྱིན་གྱིས། བཙུན་པ་ཡུན་རིང་པོར་མི་འབྱོན་པ་ཅི་ཞེས་གསོལ་པ་དང ། བཅོམ་ལྡན་འདས་ཀྱིས། མཽ་དགལ་གྱི་བུ་དང ། དགའ་བོ་ཉེར་དགའ་གཉིས་གཡུལ་བཀྱེའོ་ཞེས་བཀའ་སྩལ་ཏོ། །བཙུན་པ། སུ་ཞིག་ཕམ།་སུ་ཞིག་རྒྱལ་བར་གྱུར་ཞེས་གསོལ་པས། ཁྱིམ་བདག། མཽ་དགལ་གྱི་བུ་རྒྱལ་བར་གྱུར། དགའ་བོ་ཉེར་དགའ་ཕམ་པར་གྱུར་ཏོ། །ཞེས་བཀའ་སྩལ་ཏོ། །མགོན་མེད་ཟས་སྦྱིན་གྱིས་བཙུན་པ་བཅོམ་ལྡན་འདས་ལ་ཞག་བདུན་དུ་རིམ་པ་བཞིན་དུ་གདུགས་ཚོད་གསོལ་བར་ཞུས། གནས་བརྟན་ལ་བཀུར་སྟི་དང ། བསྟི་བཏང་བགྱིད་པར་ཞུས་སོ། །སངས་རྒྱས་ལ་སོགས་པའི་དགེ་སློང་ལྔ་བརྒྱ་པོ་རྣམས་ལ་བཀུར་སྟི་དང ། བསྟི་བཏང་ཞག་བདུན་དུ་བགྱིད་པར་འཚལ་ལོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ 438b པ་དང ། དགེ་སློང་དེ་རྣམས་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ཀླུའི་རྒྱལ་པོ་དགའ་བོ་ཉེར་དགའ་འདུལ་བའི་མདོ་རྫོགས་སོ།། །།པཎྜི་ཏ་ཆེན་པོ་ཨ་ནནྟ་ཤྲཱིའི་ཞལ་སྔ་ནས། མང་དུ་ཐོས་པའི་ལོ་ཙྪ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་སྐད་གཉིས་སྨྲ་བ་རྣམས་ཀྱིས་གདན་ས། གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ།། སའི་སྟེང་དུ་ཉི་མ་དང ། ཟླ་བ་ལྟར་གྱུར་ཅིག། |