རྒྱ་གར་སྐད་དུ། བཛྲ་ཛྙཱ་ན་ས་མུཙྪ་ཡ་ནཱ་མ་ཏནྟྲ། བོད་སྐད་དུ། ཡེ་ཤེས་རྡོ་རྗེ་ཀུན་ལས་བཏུས་པ་ཞེས་བྱ་བའི་རྒྱུད། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཇི་སྐད་དུ་བཅོམ་ལྡན་འདས་ཀྱིས་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས་ཇི་ལྟ་བ་བཞིན་དུ་གསུངས་པའོ། །བྱམས་པ་ལ་སོགས་པ་བྱང་ཆུབ་སེམས་དཔའ་དྲུག་སྟོང་གིས་བཅོམ་ལྡན་འདས་ལ་ཞུས་པ། བཅོམ་ལྡན་འདས། མ་རིག་པ་དང ། སེམས་ལས་བྱུང་བ་དང ། སེམས་ཞེས་བགྱི་བ་ཅི་ལགས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་རྡོ་རྗེས་བཀའ་སྩལ་པ། རིགས་ཀྱི་བུ་ཉོན་ཅིག་།ཡེ་ཤེས་གསུམ་རྡོ་རྗེ་ལས་ཡང་དག་པར་བྱུང་བ་དེའི་ཕྱིར་ཡེ་ཤེས་གསུམ་རྡོ་རྗེའི་རང་བཞིན་ནོ། །བྱམས་པས་གསོལ་བ། བཅོམ་ལྡན་འདས། ཡེ་ཤེས་གསུམ་རྡོ་རྗེའི་ངོ་བོ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཡང་དག་པའི་མཐའ་ཟབ་པ། །འགག་པ་མེད་པ། སྐྱེ་བ་མེད་པ་དེའི་རྐྱེན་གྱིས་མ་རིག་པ་སྟེ། མ་རིག་པ་ཞེས་བྱ་བ་དང ། སྣང་བ་ཉེ་བར་ཐོབ་པ་དང ། སྟོང་པ་ཆེན་པོའོ། །དེ་ཡང་རྟོགས་པར་དཀའ་བའོ། །འོན་ཀྱང་སྣང་བ་དང་བཅས་པར་བརྗོད་པར་བྱའོ། །མ་རིག་པའི་རྐྱེན་གྱིས་སེམས་ལས་བྱུང་བ་སྟེ། དེ་ནི། སྣང་བ་ 182a ༄#། །མཆེད་པ་དང ། ཤིན་ཏུ་སྟོང་པ་ཞེས་གསུངས་སོ། །སེམས་ལས་བྱུང་བའི་རྐྱེན་གྱིས་སེམས་ཏེ། དེ་ནི། སྣང་བ་དང ། སྟོང་པ་སྟེ། སེམས་དང ། སེམས་ལས་བྱུང་བ་དང ། མ་རིག་པའི་རང་བཞིན་བདག་མེད་པའོ། །གསུམ་པོ་དེ་དང་དེ་འོད་གསལ་བ་ལས་བྱུང་བའི་རྡོ་རྗེའི་རང་བཞིན་ནོ། །དེ་ནས་བྱམས་པ་ལ་སོགས་པ་བྱང་ཆུབ་སེམས་དཔའ་དེ་དག་ཐམས་ཅད་ངོ་མཚར་དུ་གྱུར་པས་ཅང་མི་སྨྲ་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་རྡོ་རྗེས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་རྣམས་ཅང་མི་སྨྲ་བར་འདུག་པ་མཐོང་ནས་བཀའ་སྩལ་པ། རིགས་ཀྱི་བུ། ཅིའི་ཕྱིར་ཅང་མི་སྨྲ་བར་གྱུར་པས་འདུག་།དེ་ནས་བྱང་ཆུབ་སེམས་དཔའ་ཆེན་པོ་དེ་རྣམས་ཀྱིས་བཅོམ་ལྡན་འདས་ཀྱི་ཞབས་གཉིས་ལ་ཕྱག་བཙལ་ཏེ་གཏུགས་ནས་གཞན་ཡང་ཞུས་པ། ཨེ་མའོ་སྟོན་པ། རྟོགས་པར་དཀའ་བ་རྣམ་པར་ཤེས་པ་གསུམ་གྱི་དབྱེ་བ་མཆོག་ཏུ་ཟབ་པ་བཅོམ་ལྡན་འདས་བཤད་དུ་གསོལ། བདེ་བར་གཤེགས་པ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གང་འོད་གསལ་བ་ལས་བྱང་ཆུབ་སེ་\?\་པར་ཤེས་པ་དེ་ཉིད་སེམས་དང ། ཡིད་དང ། རྣམ་པར་ཤེས་པ་ཞེས་བྱ་ལ། དེ་ནི། ཆོས་ཐམས་ཅད་ཀྱི་རྩ་བ་སྟེ། ཀུན་ནས་ཉོན་མོངས་པ་དང ། རྣམ་པར་བྱང་བའི་ 182b བདག་ཉིད་དེ་ལས་རྟོག་པ་གཉིས་སུ་གྱུར་ཏེ་བདག་དང ། གཞན་དག་ཏུའོ། །རྣམ་པར་ཤེས་པ་དེའི་བཞོན་པ་རླུང་ངོ ། །རླུང་ལས་མེའོ། །མེ་ལས་ཆུའོ། །ཆུ་ལས་སའོ། །དེ་རྣམས་ལས་ཕུང་པོ་ལྔ་དང ། སྐྱེ་མཆེད་དྲུག་དང ། ཡུལ་ལྔ་སྟེ། དེ་དག་ཐམས་ཅད་ནི། རྣམ་པར་ཤེས་པ་རླུང་དང་འདྲེས་པའོ། །དེ་ནས་རྣམ་པར་ཤེས་པ་གསུམ་གྱི་རང་བཞིན་གྱི་སྣང་བ་རབ་ཏུ་གསལ་བར་སྤྱོད་པ་རྗེས་སུ་མྱོང་བར་བྱེད་དེ། སྣང་བའི་རྒྱུས་རང་བཞིན་རྣམས་ཡང་དག་པར་འབྱུང་ངོ ། །དེ་ལས་འོད་གསལ་བ། གནས་པ་མེད་པ། འགག་པ་མེད་པ། སྐྱེ་བ་མེད་པ། དོན་དམ་པའི་བདེན་པ། ཡང་དག་པའི་མཐའ་སྟེ། དེ་ལས་བྱུང་བའི་མུན་པའི་སྣང་བ་ནི། མ་རིག་པའོ། །དེའི་རང་བཞིན་ལྟ་བ་དང ། འཁྲུལ་བ་དང ། རྣམ་པར་གཡེང་བ་དང ། བརྗེད་ངེས་པ་དང ། ལེ་ལོ་དང ། མི་སྨྲ་བ་དང ། མི་གསལ་བའོ། །མ་རིག་པ་སེམས་ལས་བྱུང་བ་སྟེ། ཉི་མའི་སྣང་བ་ལྟ་བུ་དང ། ཤིན་ཏུ་གསལ་བའི་སྨིག་རྒྱུ་བ་ལྟ་བུའོ། །དེའི་རང་བཞིན་འདོད་ཆགས་དང ། དགའ་བ་དང ། མཆོག་ཏུ་དགའ་བ་དང ། དྲག་པོ་ལ་སོགས་པ་དང ། ཀུན་རྫོབ་ཏུ་མངོན་སུམ་དུ་སྐྱེས་པའི་གཟུགས་དང ། ལྷའི་ཚོགས་དང ། མཚན་མ་དང ། རྡོ་རྗེའི་བརྡའོ། །སེམས་ལས་བྱུང་བ་ལས་སེམས་ཏེ། ཟླ་བའི་སྣང་བ་དང ། ཤིན་ཏུ་གསལ་བའི་ཆུའི་ཟླ་བ་ལྟ་བུའོ། །རང་བཞིན་ནི། འདོད་ཆགས་དང་བྲལ་བ་ལ་སོགས་པའོ། །ཀུན་རྫོབ་ 183a ༄#། །ཏུ་ནི། མངོན་སུམ་གྱི་བུད་མེད་དང ། བྷུ་ག་དང ། པདྨ་དང ། ལྷ་མོའི་ཚོགས་ཀྱི་བརྡའོ། །རྡོ་རྗེ་དང་པདྨ་ཡང་དག་པར་སྦྱོར་བ་ལས་ཤེས་རབ་ཀྱི་ཡེ་ཤེས་བྱུང་བ་ལས་རང་གི་རྡོ་རྗེའི་འབད་པ་ལས་མེའོ། །མེ་ལས་ཆུ་སྟེ། ནུར་ནུར་པོའི་རྣམ་པ་དང ། དེ་ལས་མེར་མེར་པོ་དང ། ནར་ནར་པོ་དང ། གོར་གོར་བོ་དག་གོ་།དེ་ནས་འདོད་ཆགས་དང་བྲལ་བའི་སྣང་བ་ལ་ཁྲག་གི་གོང་བུ་མཁྲང་གྱུར་རྣམས་སོ། །དེ་ཁུ་བ་དང་ཁྲག་དག་གིས་བསྐྱེད་པའོ། །དེ་ནས་དབང་པོ་གཉིས་མཉམ་པར་སྦྱོར་བ་ལས་འདོད་ཆགས་སོ། ། འདོད་ཆགས་ལས་འདོད་ཆགས་དང་བྲལ་བ་དང ། བར་མའི་འདོད་ཆགས་རབ་ཏུ་ཤེས་པར་བྱ་སྟེ། དེའི་ཕྱིར་ལུས་ཏེ། ལུས་ལས་བྱུང་བའི་སྐྱིལ་ཀྲུང་བཅིང་བ་ལ་སོགས་པ་དང ། གསུང་གི་ཕྱག་རྒྱའི་ཐབས་སུ་གྱུར་པ་ཨཱ་ལི་ཀཱ་ལི་ལས་ཡང་དག་པར་བྱུང་བའི་སྔགས་དང ། སེམས་ཀྱི་ཕྱག་རྒྱའི་ཐབས་སུ་གྱུར་པ་ས་བོན་དང་མཚན་མ་ལས་ལྷར་དམིགས་པའོ། །གཟུགས་ལ་སོགས་པའི་ཡུལ་ནི། དབང་པོ་གཉིས་སྙོམས་པར་ཞུགས་པའི་ཐབས་སུ་གྱུར་པའོ། །རྡོ་རྗེ་དང་པདྨ་ཡང་དག་པར་སྦྱོར་བ་ནི། སེམས་དང་སེམས་ལས་བྱུང་བ་དག་གི་ཐབས་སུ་གྱུར་པའོ། །སེམས་དང་སེམས་ལས་བྱུང་བ་མཉམ་པར་སྦྱར་བ་ནི། བདེ་བ་ཆེན་པོའི་ཏིང་ངེ་འཛིན་གྱི་ཐབས་སུ་གྱུར་པའོ། །དེ་སྒྱུ་མའི་དཔེས་ཉེ་བར་མཚོན་ 183b པ་སྟེ།་དེའི་ཕྱིར་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་ཀྱི་དེ་བཞིན་གཤེགས་པ་རྣམས་ནི། སྒྱུ་མ་ལྟ་བུ་དང ། ཆུ་ཟླ་དང ། མིག་ཡོར་དང ། སྨིག་རྒྱུ་དང ། རྨི་ལམ་དང ། སྒྲ་བརྙན་དང ། དྲི་ཟའི་གྲོང་ཁྱེར་དང ། མིག་འཕྲུལ་དང ། དབང་པོའི་གཞུ་དང ། གློག་དང ། ཆུ་བུར་དང ། མེ་ལོང་གི་གཟུགས་བརྙན་ལྟ་བུ་སྟེ། སྒྱུ་མའི་དཔེ་བཅུ་གཉིས་ཀྱིས་བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པར་བྱེད་པ་ཡིན་ནོ། །ཇི་ལྟར་འོ་མ་བསྲུབས་པ་ལས་མར་དང ། ཇི་ལྟར་ཏིལ་ལས་ཏིལ་མར་ཏེ། དེ་བཞིན་དུ་རྡོ་རྗེས་ནི། ཐབས་ཀྱི་ཡེ་ཤེས་ཉེ་བར་མཚོན་པའི་ཕྱིར་དང ། པདྨས་ནི། ཤེས་རབ་ཀྱི་ཡེ་ཤེས་ཉེ་བར་མཚོན་པའི་ཕྱིར་རོ། །ཇི་ལྟར་འོ་མ་དང་ཏིལ་ཡང་དག་པར་མངོན་པར་འདུས་བྱས་པ་མེད་པར་མར་དང་ཏིལ་མར་མི་འབྱུང་བ་དེ་བཞིན་དུ་སྔགས་དང་ཕྱག་རྒྱས་མངོན་པར་འདུས་བྱས་པའི་རྡོ་རྗེ་དང་པདྨ་མཉམ་པར་སྦྱར་བ་མེད་པར་རྣམ་པར་ཤེས་པ་གསུམ་ཉེ་བར་མཚོན་པར་མི་ནུས་སོ། །གང་གིས་བྷ་ག་དང་ལིངྒ་ཡང་དག་པར་སྦྱོར་བར་མི་ནུས་པ་དེས་ནི། བདེ་བ་ཆེན་པོའི་ཏིང་ངེ་འཛིན་མི་རྙེད་དོ། །བདེ་བ་ཆེན་པོའི་ཏིང་ངེ་འཛིན་འབའ་ཞིག་ལ་ལྷག་པར་མོས་པ་ཙམ་གྱིས་ནི། ལས་དང་པོ་པའི་ས་ལ་གནས་པར་འགྱུར་ཏེ། ཕྱིར་མི་ལྡོག་པ་ལ་ཡང་སློབ་པར་འགྱུར་རོ། །གང་རྡོ་རྗེ་དང་པདྨ་མཉམ་པར་སྦྱོར་བའི་བདེ་བས་རང་བཞིན་སྣང་བ་ཡང་དག་པར་ཉེ་བར་མཚོན་པར་བྱེད་པ་ 184a ༄#། །དེ་ནི།་བདེ་བ་ཆེན་པོའི་གོ་འཕང་ལ་རབ་ཏུ་གནས་པར་འགྱུར་རོ། །འདི་ནི། སྦས་པའི་བཤད་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས། སྤྱིའི་དོན་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། ཉན་ཐོས་ལ་སོགས་པ་འདོད་ཆགས་དང་བྲལ་བའི་ཆོས་སྤྱོད་པ་རྣམ་པར་རྟོག་པའི་བག་ཆགས་ལས་མ་གྲོལ་བ་རྣམས་རྣལ་འབྱོར་ཆེན་པོའི་རྒྱུད་དག་ཏུ་བཙུན་མོའི་བྷ་ག་ལ་བཞུགས་ཞེས་བྱ་བ་ལ་སོགས་པ་འདོད་ཆགས་ཀྱི་ཆོས་གསལ་བར་བྱེད་པ་ངོ་མཚར་ཅན་གྱི་རྡོ་རྗེའི་ཚིག་ཐོས་ནས་སྨོད་པར་བྱེད་པ་དེ་རྣམས་དང་མི་འགལ་བའི་སྒོ་ནས་བཤད་པ་དེ་ནི། སྤྱིའི་དོན་དུ་བཤད་པ་གསུངས་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས། འདོད་ཆགས་ལ་སྤྱོད་པའི་ཆོས་ཀྱི་ཚུལ་དུ་མཐར་ཐུག་པ་ཇི་ལྟར་ལགས། དེ་ནས་བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་རྣམས། །ལེགས་སོ་ལེགས་སོ། །བྱང་ཆུབ་སེམས་དཔའ་ཆེན་པོ་སྙིང་རྗེ་མཆོག་དང་ལྡན་པ་རྣམས་ཉོན་ཅིག་།མཐའ་ནི། མུ་སྟེ། འོད་གསལ་བ་ཡང་དག་པའི་ཚུལ་ཞེས་བྱ་བ་མཐར་ཐུག་པའོ། །བྱང་ཆུབ་སེམས་དཔའ་སེམས་དཔའ་ཆེན་པོས་གསོལ་པ། བཅོམ་ལྡན་འདས། ཐབས་གང་གིས་མཐར་ཐུག་པ་ཐོབ་པ་ལགས། བཅོམ་ལྡན་འདས་ 184b ཀྱིས་བཀའ་སྩལ་པ། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་མཐའ་སྟོང་པ་གསུམ་མོ། །སྟོང་པ་གསུམ་གྱི་མཐའ་འོད་གསལ་བའོ། །བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ།་བཅོམ་ལྡན་འདས། སྟོང་པ་གསུམ་འོད་གསལ་བའི་མཐར་ཇི་ལྟར་འགྱུར་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་མེས་ཤིང་བསྲེགས་ཏེ་ཐལ་བར་བྱེད་པ་དེ་བཞིན་དུ་འོད་གསལ་བར་ཤེས་རབ་ཀྱི་ཡེ་ཤེས་ཡུན་རིང་པོས་རྣམ་པར་སྦྱོང་བར་བྱེད་དོ། །ཇི་ལྟར་ཏ་ལའི་ལོ་མ་ཐལ་བར་བྱེད་པ་དེ་བཞིན་དུ་ཐབས་ཀྱིས་ཡེ་ཤེས་རྣམ་པར་སྦྱོང་བར་བྱེད་དོ། ། ཇི་ལྟར་རས་བལ་གྱི་འདབ་མ་བསྲེགས་པ་དེ་བཞིན་དུ་སྣང་བ་ཐོབ་པའི་ཡེ་ཤེས་མཆོག་ཏུ་མྱུར་བས་རྣམ་པར་སྦྱོང་བར་བྱེད་དོ། །དེ་བས་ན་རིམ་པ་འདིས་ཤིང་ཏ་ལའི་ལོ་མ་དང ། རས་བལ་གྱི་འདབ་མ་ཐལ་བར་འགྱུར་བ་དེ་བཞིན་དུ་སྟོང་པ་དང ། ཤིན་ཏུ་སྟོང་པ་དང ། སྟོང་པ་ཆེན་པོ་རྣམས་མཐར་འོད་གསལ་བར་འགྱུར་རོ། །འདི་ནི། མཐར་ཐུག་པའི་བཤད་པ་གསུངས་པའོ། །བྱམས་པས་གསོལ་བ། བཅོམ་ལྡན་འདས། རྣལ་འབྱོར་གྱི་རྒྱུད་དུ་དེ་བཞིན་གཤེགས་པ་ཐམས་ཅད་ཀྱི་མཐའ་དྲུག་གིས་བཤད་པ་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། དགོངས་པས་བཤད་པ་དང ། དགོངས་པ་མ་ཡིན་པས་བཤད་པ་དང ། དྲང་བའི་དོན་དང ། ངེས་པའི་དོན་དང ། སྒྲ་ཇི་བཞིན་པ་དང ། སྒྲ་ཇི་བཞིན་པ་མ་ཡིན་པ་རྣམས་སོ། །བྱམས་པས་གསོལ་པ། བཅོམ་ 185a ༄#། །ལྡན་འདས་ཐུགས་བརྩེ་བ་ཉེ་བར་བཞག་སྟེ་ཚིག་རེ་རེའི་བཤད་པ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། གང་མཐར་ཐུག་པ་བཤད་པ་དེ་ཉིད་དགོངས་པས་བཤད་པ་སྟེ། འདི་ལྟ་སྟེ། འདོད་ཆགས་མ་ཡིན་པ་དང ། འདོད་ཆགས་དང་བྲལ་བ་མ་ཡིན་པ་དང ། བར་མ་ཉེ་བར་མི་དམིགས་པ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི། །དགོངས་པས་བཤད་པའོ། །ལུས་དང་ངག་དང་ཡིད་མེད་པ་དང ། བདག་མེད་པ་དང ། ཐམས་ཅད་སྟོང་པ་དང ། དག་པ་དང ། འོད་གསལ་བཞེས་བྱ་བ་ལ་སོགས་པ་རྡོ་རྗེའི་ཚིག་ནི། དགོངས་པ་མ་ཡིན་པས་བཤད་པའོ། །ག་བུར་དང ། ཁྲག་ཆེན་པོ་དང ། ཙནྡན་དམར་པོ་དང ། རྡོ་རྗེ་དང ། པདྨ་དང ། ཕྱག་རྒྱ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི། དྲང་བའི་དོན་སྟེ། ག་བུར་ནི། ཁུ་བ་དང ། ཁྲག་ཆེན་པོ་ནི། ཟླ་མཚན་གྱི་ཁྲག་དང ། ཙནྡན་དམར་པོའི་ཁུ་བ་དང་བསྲེས་པ་ནི། ཙནྡན་དམར་པོའོ། །རྡོ་རྗེ་ནི། མཚན་མ་སྟེ།་ཐབས་སོ། །པདྨ་ནི། བྷ་ག་སྟེ། ཤེས་རབ་དང ། ཕྱག་རྒྱ་དང ། བཙུན་མོ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི། ངེས་པའི་དོན་ཏོ། །གཉི་ག་དང ། སྤྱོད་པ་དང ། བྱ་བའི་རྒྱུད་རྣམས་སུ་དོན་གསལ་བར་གསུངས་པ་འདི་ལྟ་སྟེ། དཀྱིལ་འཁོར་དང ། མཆོད་སྦྱིན་དང ། གཏོར་མ་དང ། སྨན་དང ། ཞི་བ་ལ་སོགས་པའི་ལས་ཀྱི་ཚོགས་རྣམས་དང ། དེ་བཞིན་དུ་འཇིག་ 185b རྟེན་པའི་དངོས་གྲུབ་ཆེན་པོ་བརྒྱད་གསུངས་པ་རྣམས་ནི། སྒྲ་ཇི་བཞིན་པ་སྟེ། དེ་ནི། ཡི་གེའི་དོན་གྱི་བཤད་པའོ། །ཀོ་ཊཱ་ཁྱ། ཀོ་ཊཱ་བ། ཀོ་ཊཱཿ ། ཀོ་ཊཱ་བཤྩ། ཀོ་ཊ་རཱ་གཱ། ཀོ་ལ་ཁྱ། ཀོ་ལ་ཝ། ཀོ་ལ།་ཀོ་ལ་བཤྩ། ཀོ་ལ་སྟ་ཐ། འདིས་དབང་པོ་དང ། ཡུལ་གསུངས་ཏེ། དེ་ལྟ་བུ་ལ་སོགས་པ་རྡོ་རྗེའི་ཚིག་རྣམས་ནི། སྒྲ་ཇི་བཞིན་པ་མ་ཡིན་པས་བཤད་པའོ། །བྱང་ཆུབ་སེམས་དཔའ་ཆེན་ཕོས་གསོལ་པ། །བཅོམ་ལྡན་འདས། རྣལ་འབྱོར་ཆེན་པོའི་རྒྱུད་དང ། གཉི་གའི་རྒྱུད་དང ། སྤྱོད་པའི་རྒྱུད་དང ། བྱ་བའི་རྒྱུད་དང ། རྟོག་པའི་རྒྱུད་རྣམས་ཀྱི་ཚད་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། རྣལ་འབྱོར་ཆེན་པོའི་རྒྱུད་ཀྱི་མིང་སྟོང་ཕྲག་བཅུ་གཉིས་ཞེས་བྱ་སྟེ། རྒྱས་པར་ཕྱེན་གྲངས་མེད་དོ། །གཉིས་ཀའི་རྒྱུད་སྟོང་ཕྲག་དྲུག་གོ། སྤྱོད་པའི་རྒྱུད་སྟོང་ཕྲག་བརྒྱད་དོ། །བྱ་བའི་རྒྱུད་སྟོང་ཕྲག་བཞིའོ། །རྟོག་པའི་རྒྱུད་སྟོང་ཕྲག་བཞིའོ། །དེ་དག་ནི། སྟོང་ཕྲག་སུམ་ཅུ་རྩ་བཞི་སྟེ། རྒྱུད་དང་རྟོག་པའི་མིང་གི་མཐའ་མའི་ཡི་གེ་ཇི་སྙེད་པ་ནི། ཀ་ཁ་ག་གྷ་ང ། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧཀྵ་འདི་དག་ནི། མིང་གི་ཡི་གེའི་མཐའ་མ་རྣམས་སོ། །བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་པ། བཅོམ་ལྡན་འདས། དེ་རྣམས་ཀྱི་བྱེད་པ་དང ། ཆོ་ག་དང ། བསྒྲུབ་བྱ་དང ། སྒྲུབ་པ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དོན་དམ་པའི་ 186a ༄#། །བདེན་པ་ལས་བདག་བྱིན་གྱིས་བརླབ་པའི་རིམ་གྱིས་ལངས་ཏེ་འདོད་ཆགས་ལས་བྱུང་བའི་བྱང་ཆུབ་ཀྱི་གནས་རབ་ཏུ་བསྟན་པའི་ཕྱིར་བཙུན་མོའི་འཁོར་གྱི་དབུས་སུ་འཁོར་ལོས་བསྒྱུར་བའི་གཟུགས་ཀྱིས་བདེ་བ་ཆེན་པོའི་ཏིང་ངེ་འཛིན་གྱིས་བཙུན་མོའི་བྷ་ག་ལ་ཡང་དག་པར་བཞུགས་ཏེ། འཇིག་རྟེན་གྱི་སྤྱོད་པ་དང་འགལ་བ། རྨད་དུ་བྱུང་བའི་རྡོ་རྗེའི་ཚིག་གི་མཐའ་དྲུག་གང་གིས་རབ་ཏུ་དཔྱད་དེ་སྒྲུབ་པར་བྱེད་པ་ནི། རྣལ་འབྱོར་ཆེན་པོའི་རྒྱུད་ལ་བཞུགས་སོ། །རིག་པའི་ལྷ་མོ་རྣམས་དང་ལྷན་ཅིག་དཀྱིལ་འཁོར་གྱི་འཁོར་ལོ་ལ་དགོད་པ་དང ། དེ་ལས་བྱུང་བའི་བྱེད་པ་དང་ལས་དང་སྒྲུབ་པ་ལ་སོགས་པ་དེ་ཁོ་ན་ཉིད་རྣམ་པ་བཅུ་རབ་ཏུ་དཔྱད་དེ་སྒྲུབ་པར་བྱེད་པ་ནི། གཉི་གའི་རྒྱུད་ལ་བཞུགས་སོ།། ལས་ཀྱི་བྱ་བ་སྣ་ཚོགས་ཕྱག་རྒྱ་ཆེན་པོ་བྱ་བའི་རྒྱུད་ཀྱི་ཕྱག་རྒྱ་དམིགས་པའི་མཚན་ཉིད་རབ་ཏུ་དཔྱད་པས་བསྒྲུབ་པར་བྱ་བ་དང་སྒྲུབ་པར་བྱེད་པ་ནི། སྤྱོད་པའི་རྒྱུད་ལ་བཞུགས་སོ། །འཇིགས་པར་དམིགས་ཤིང་ཤིན་ཏུ་གཙང་སྤྲ་བྱེད་པ་དང ། ཡེ་ཤེས་སེམས་དཔའི་བདེ་བ་དམ་པ་མེད་པ་དང ། བདག་ཉིད་ལྷའི་སྙེམས་པ་མེད་པ་དང ། རྨད་དུ་བྱུང་བའི་སྤྱོད་ཡུལ་མ་ཡིན་པ་དང ། སྐྱོན་གྱི་རྒྱུའི་རྟོག་པས་རབ་ཏུ་སྤྱོད་པས་སྒྲུབ་པར་བྱེད་པ་ནི། བྱ་བའི་རྒྱུད་ལ་བཞུགས་སོ། །སྔགས་དང ། སྨན་དང ། སྦྱིན་སྲེག་དང ། ཕྱེ་མ་དང ། མིག་སྨན་ 186b དང ། རྐང་མགྱོགས་ལ་སོགས་པ་དངོས་གྲུབ་ཆེན་པོ་བརྒྱད་རབ་ཏུ་དཔྱད་པ་སྒྲུབ་པར་བྱེད་པ་ནི། རྟོག་པའི་རྒྱུད་ལ་བཞུགས་སོ། །བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་བ། བཅོམ་ལྡན་འདས། རྒྱན་རྣམ་པ་བདུན་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། གླང་བསླང་བ་རྣམ་པ་ལྔ་དང ། མཐའ་དྲུག་གི་བཤད་པ་དང ། རིག་པ་རྣམ་པ་བཞི་དང ། བཤད་པ་རྣམ་པ་བཞི་དང ། དབྱེ་བ་རྣམ་པ་གཉིས་དང ། གང་ཟག་རྣམ་པ་ལྔའི་སློབ་མ་བརྟག་པ་དང ། བདེན་པ་རྣམ་པ་གཉིས་ཀྱི་དགོངས་པ་རྣམས་སོ། །གླེང་བསླང་བ་རྣམ་པ་ལྔ་ནི། འདི་ལྟ་སྟེ། མིང་དང ། གང་གི་དོན་དུ་བྱས་པ་དང ། བྱེད་པ་པོ་དང ། ཚད་དང ། དགོས་པ་རྣམས་སོ། །མཐའ་དྲུག་ཏུ་བཤད་པ་ནི། འདི་ལྟ་སྟེ། དགོངས་པས་བཤད་པ་དང ། དགོངས་པ་མ་ཡིན་པས་བཤད་པ་དང ། དྲང་བའི་དོན་དང ། ངེས་པའི་དོན་དང ། སྒྲ་ཇི་བཞིན་པ་དང ། སྒྲ་ཇི་བཞིན་པ་མ་ཡིན་པ་རྣམས་སོ། །རིགས་པ་རྣམ་པ་བཞི་ནི། རྒྱུད་དང ། གླེང་གཞི་དང ། ངེས་ཚིག་དང ། རྒྱུ་རྣམས་སོ། །བཤད་པ་རྣམ་པ་བཞི་ནི། ཡི་གེའི་དོན་དང ། སྤྱིའི་དོན་དང ། སྦས་པ་དང ། མཐར་ཐུག་པ་རྣམས་སོ། །དབྱེ་བ་རྣམས་པ་གཉིས་ནི། འདི་ལྟ་སྟེ། ཚོགས་ལ་བཤད་པ་དང ། སློབ་མ་ལ་བཤད་པའོ། །གང་ཟག་རྣམ་པ་ལྔའི་སློབ་མ་བརྟག་པ་ནི་།འདི་ལྟ་སྟེ། རིན་པོ་ཆེ་དང ། ཙནྡན་དང ། པདྨ་དང ། པདྨ་དཀར་པོ་དང ། ུཏྤ་ལ་རྣམས་སོ། །བདེན་པ་ 187a ༄#། །རྣམ་པ་གཉིས་ཀྱི་དགོངས་པ་ནི། འདི་ལྟ་སྟེ། ཀུན་རྫོབ་ཀྱི་བདེན་པ་དང ། དོན་དམ་པའི་བདེན་པའོ། །རིགས་ཀྱི་བུ། ཀུན་རྫོབ་ནི། མི་བརྟན་པ་དང ། གཡོ་བའོ།། དེའི་བདེན་པ་ནི། ཆུ་ཟླ་ལྟ་བུའོ། །དོན་དམ་པའི་བདེན་པ་ནི། སྟོང་པ་ཆེན་པོ་བཅོ་བརྒྱད་དོ། །དེའི་མཐའ་ནི། གནས་སོ། །བྱང་ཆུབ་སེམས་དཔའ་རྣམས་ཀྱིས་གསོལ་བ། དོན་དམ་པའི་བདེན་པ་ལ་རབ་ཏུ་གནས་པའི་རྣལ་འབྱོར་ཆེན་པོ་བས་ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ལ་བརྟེན་ནས་སེམས་ཅན་གྱི་དོན་ཇི་ལྟར་རབ་ཏུ་སྤྱོད་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། ཇི་སྲིད་དུ་ཞི་བ་ལ་སོགས་པའི་ལས་ཀྱིས་སེམས་ཅན་གྱི་དོན་མི་བྱེད་པ་དེ་སྲིད་དུ་ཡང་དག་པའི་མཐའ་ལ་རབ་ཏུ་གནས་པར་འགྱུར་རོ། །གང་དུ་སེམས་ཅན་གྱི་དོན་བྱ་བར་མཐོང་བ་དེའི་ཚེ་བདག་བྱིན་གྱིས་བརླབ་པའི་རིམ་པས་ཡང་དག་པའི་མཐའ་ལས་ལངས་ཏེ་སེམས་ཅན་གྱི་དོན་བྱས་ནས་ཡང་དག་པའི་མཐའ་ཉིད་དུ་འཇུག་པར་བྱེད་དོ། ། དེ་ནས་བྱམས་པ་ལ་སོགས་པ་བྱང་ཆུབ་སེམས་དཔའ་ཆེན་པོ་རྣམས་དགའ་ཞིང་མགུ་ལ་ཡིད་རངས་ཏེ་དགའ་བ་དང་ཡིད་བདེ་བ་སྐྱེས་ནས་ཅང་མི་སྨྲ་བར་གྱུར་ཏོ། །ཡེ་ཤེས་རྡོ་རྗེ་ཀུན་ལས་བཏུས་པ་ཞེས་བྱ་བ་རྣལ་འབྱོར་ཆེན་པོའི་རྒྱུད་ལས། བདེ་བ་ཆེན་པོའི་ལེའུ་སྟེ་རིམ་པར་ཕྱེ་བ་གཉིས་པའོ། །རྫོགས་སོ།། །།རྒྱ་གར་གྱི་མཁན་པོ་ཛྙཱ་ན་ཀ་རའི་ཞལ་སྔ་ 187b ནས་དང ། ཞུ་ཆེན་གྱི་ལོ་ཙཱ་པ་ཁུ་སྟོན་དངོས་གྲུབ་ཀྱིས་བསྒྱུར། སླད་ནས་བླ་མ་དེ་ཉིད་དང ། དགེ་སློང་ཚུལ་ཁྲིམས་རྒྱལ་བས་ཞུས་ཤིང་གཏན་ལ་ཕབ་པ། ཡེ་ཤེས་རྡོ་རྗེ་ཀུན་ལས་བཏུས། །རྣལ་འབྱོར་ཆེན་པོའི་གསལ་བྱེད་ཡིན། །ཡེ་ཤེས་རང་བཞིན་འཁོར་བ་དང ། །མྱ་ངན་འདས་པའི་ངོ་བོ་ལ། །དེ་གཉིས་དབྱེར་མེད་རྡོ་རྗེ་སྟེ། །ཀུན་འདིར་འདུས་པས་ཀུན་ལས་བཏུས། །དེ་སྟོན་པ་ལ་དེར་བརྟགས་ནས། །གཞུང་ལའང་མིང་དོན་འཚམ་པ་ཡིན།། |