།།རྒྱ་གར་སྐད་དུ། ཡ་མཱ་རི་ཀྲྀཥྞ་ཀརྨ་སརྦ་ཙཀྲ་སིདྡྷ་ཀ་ར་ནཱ་མ་ཏནྟྲ་རཱ་ཛཱ། བོད་སྐད་དུ། གཤིན་རྗེ་གཤེད་དགྲ་ནག་པོའི་འཁོར་ལོ་ལས་ཐམས་ཅད་གྲུབ་པར་བྱེད་པ་ཅེས་བྱ་བའི་རྒྱུད་ཀྱི་རྒྱལ་པོ། བཅོམ་ལྡན་འདས་རྡོ་རྗེ་མཁའ་འགྲོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བཙུན་མོའི་བྷ་ག་ལ་གཏི་མུག་རྡོ་རྗེ་དང ། སེར་སྣ་རྡོ་རྗེ་དང ། འདོད་ཆགས་རྡོ་རྗེ་དང ། ཕྲག་དོག་རྡོ་རྗེ་དང ། ས་རྡོ་རྗེ་དང ། ཆུ་རྡོ་རྗེ་དང ། མེ་རྡོ་རྗེ་དང ། རླུང་རྡོ་རྗེ་དང ། བྱང་ཆུབ་ཀྱི་སེམས་བདེ་བ་ཆེན་པོ་མ་དང ། ཡོན་ཏན་གྱི་ཕྲེང་བ་མ་དང ། སེམས་ཀྱི་རྒྱུད་ཚིམ་པར་བྱེད་པ་མ་དང ། བརྩོན་འགྲུས་ཀྱི་ངོ་བོ་མ་དང ། བདུག་སྤོས་མ་དང ། མེ་ཏོག་མ་དང ། མར་མེ་མ་དང ། དྲི་ཆབ་མ་དང ། དེ་ལ་སོགས་པ་དཔག་ཏུ་མེད་པ་དང་ཐབས་ཅིག་ཏུ་བཞུགས་སོ། །དེ་ནས་ལྷ་མོ་བེ་ཏ་ལཱི་སྟན་ལས་ལངས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ད་ལྟར་འདི་ན་གདུག་པ་ཅན་རྣམས་ཀྱིས་སེམས་ཅན་ཐམས་ཅད་ལ་ 373b འཚེ་བར་བགྱིད་པ་དང ། མ་འོངས་པ་ན་ཡང་ཐེག་པ་ཆེན་པོ་པ་དང ། སེམས་ཅན་ཐམས་ཅད་ལའང་འཚེ་བར་བགྱིད་པ་དག་འབྱུང་ན། དེ་རྣམས་ཇི་ལྟར་ཚོར་གཅད་པར་བགྱི། དེ་ནས་བཅོམ་ལྡན་འདས་བགེགས་ཐམས་ཅད་འཇོམས་པར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་ཉིད་ཀྱི་སྐུ་གསུང་ཐུགས་རྡོ་རྗེ་ལས་སྙིང་པོ་འདི་ཕྱུང་ངོ ། །ཧྲཱིཿ ་དེ་མ་ཐག་ཏུ་བཅོམ་ལྡན་འདས་ཉིད་ཞལ་དྲུག་པ་ཕྱག་དྲུག་པ་ཞབས་དྲུག་པའི་ངོ་བོར་གྱུར་ནས་མ་ཧེ་རཝ་གཉིས་པ་ལ་བརྫིས་ཏེ། མ་ཧེའི་བདག་པོ་ཆུང་མ་བཅས་པར་ཨོཾ་ཧྲཱིཿ ་ཥྚིཿ ་ལྦི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སཝཱཧཱ། ཞེས་ཞལ་བཞད་པ་དང་བས་པས་ཨོཾ་གསུང་ཞིང་མནན་པར་གྱུར་ཏོ། །ལྷ་དང ། ལྷ་མ་ཡིན་དང ། བདུད་ཐམས་ཅད་ཀྱང་སྐྲག་ཅིང་འདར་བ་དང་བཅས་པས་འདུད་པར་གྱུར་ཏོ། །ཚངས་པ་དང་དབང་པོ་ལ་སོགས་པ་ཐམས་ཅད་ཀྱང་ཕྱག་འཚལ་ཞིང་འདུད་པར་གྱུར་ཏོ། །དེ་ནས་བཅོམ་ལྡན་ཁྲོ་བོ་ཡི། །རྒྱལ་པོ་ཆེན་པོ་རབ་འཇིགས་པ། །ཐུགས་རྗེ་ཆེན་པོ་དང་ལྡན་པས། །གསུང་ནི་འདི་སྐད་བཀའ་སྩལ་ཏོ། །དེ་ནས་སྒྲུབ་པ་བཤད་བྱ་བ། །རྩིབས་བརྒྱད་དབུས་ཀྱི་ལྟེ་བ་ལ། །བདག་ཉིད་ཕྱག་དར་ཞལ་རྣམས་ནི། །དྲུག་དྲུག་ལྡན་པར་གྱུར་པ་བསྒོམ། །ཞབས་ཀྱང་དེ་དང་འདྲ་བར་སྟེ། །གཡས་ཀྱི་དང་པོའི་ཕྱག་ན་ནི། །རྡོ་རྗེ་ཐོ་པ་གཡས་གཉིས་ན། །རལ་གྲི་དེ་བཞིན་གཡོན་གྱི་ཡང ། །དང་པོར་ཞགས་པ་སྡིགས་མཛུབ་ 374a ༄#། །ལྡན། །གཉིས་པར་གཏུན་ཤིང་ལེགས་པར་འཛིན། །རྡོ་རྗེ་དྲིལ་བུ་ཐ་མས་བསྣམས། །སྟེང་ཞལ་ནག་པོ་རབ་འཇིགས་པ། །ཞབས་གཉིས་རྡོ་རྗེ་སྐྱིལ་ཀྲུང་སྟེ། ། བརྐྱང་བསྐུམ་གར་གྱིས་ཞབས་བཞིར་གནས། །སྟག་ལྤགས་ཀྱིས་ནི་རྣམ་དཀྲིས་ཤིང ། །སེངྒེ་རལ་རལ་པ་ནི། །གྱེན་འགྲེང་བསྡུས་ཏེ་སྤྱི་བོར་ཡང ། །ཐོད་པའི་ཕྲེང་བས་རྣམ་པར་བཅིངས། །འདི་ནི་ཁྲོ་བོ་འཆོལ་པ་སྟེ། །ལག་ཆ་སྣ་ཚོགས་དག་དང་ལྡན། །ཤར་རྩིབས་ལ་སོགས་རྣམ་བཞི་ལ། །གཏི་མུག་སོགས་ཏེ་བཞི་པོ་ཡང ། །དཀར་དང་སེར་དང་དམར་བ་ཡང ། །དེ་བཞིན་བཞི་པ་ལྗང་གུ་སྟེ། །གཡས་ཀྱིས་འཁོར་ལོ་རིན་ཆེན་འབར། །པདྨ་སྣ་ཚོགས་རྡོ་རྗེ་སྟེ། །གཡོན་གྱིས་དྲིལ་བུ་ལེགས་པར་འཛིན། །མཚམས་སུ་ལཾ་སོགས་ལས་སྐྱེས་པ། །ལྷ་མོ་བཞི་པོ་ངེས་པར་བསམ། །བདག་པོ་འདྲ་སྟེ་སྒེག་ཉམས་འཛིན། །གྲཝ་ཡི་ལྷ་མོ་མཚན་ལ་ནི། །ལཱ་སྱེ་མུ་ཏི་ཀུར་ལྡན་ནོ། །རིན་ཆེན་ཕྲེང་བ་ཕྱག་གཉིས་བསྣམས། །པི་ཝང་སྒྲེག་པའི་གསུང་དབྱངས་ཅན། །གར་གྱི་རྒྱས་པར་འགྲོ་བ་ཡི། །དོན་ལ་རྟག་ཏུ་བརྩོན་འགྲུས་ལྡན། །བདུག་སྤོས་སོགས་དང་\?\་བཞི་པོ་ཡང ། །རང་གི་མཚན་མ་ངེས་པར་འཛིན། །ཕྱག་རྒྱའི་སྔགས་རྣམས་བརྗོད་པས་སོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གཏི་མུག་རྡོ་རྗེའི་སྔགས་ 374b འདི་གསུངས་སོ། །ོཾ་ཛ་ནི་ཛིཀ་།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་སྔགས་འདི་གསུངས་པ་ནི། སེར་སྣ་རྡོ་རྗེའོ། །ོཾ་རཏྣ་དྷརྀ་ཀ་།དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་སྔགས་འདི་གསུངས་སོ། །ོཾ་ཨཱ་རོ་ལི་ཀ་སྟེ། འདོད་ཆགས་རྡོ་རྗེའོ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཕྲག་དོག་རྡོ་རྗེའི་སྔགས་འདི་གསུངས་སོ། །ོཾ་པྲ་ཛྙཱ་དྷརྀཀ་།དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་བདེ་བར་གཤེགས་པས་ས་རྡོ་རྗེའི་སྔགས་འདི་གསུངས་སོ། །ོཾ་ལོ་ཙ་ན་ཧཱུཾ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་ཆུ་རྡོ་རྗེའི་སྔགས་འདི་གསུངས་སོ། །ོཾ་མཱ་མ་ཀཱི་ཏྲའཾ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་མེ་རྡོ་རྗེའི་སྔགས་འདི་གསུངས་སོ། །ོཾ་པཱཎྜ་རི་ཧྲཱི། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་རླུང་རྡོ་རྗེའི་སྔགས་འདི་གསུངས་སོ། །ཏཱ་ར་ཨ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བདེ་བ་ཆེན་པོ་སྐྱེད་པར་བྱེད་པའི་སྔགས་འདི་གསུངས་སོ། །ོཾ་ལཱ་སྱེ། དེ་ནས་ཡང་ཡོན་ཏན་བརྒྱུད་པ་བླ་མའི་སྔགས་འདི་གསུངས་སོ། །ོཾ་མཱ་ལེ། དེ་ནས་བཅོམ་ལྡན་ 375a ༄#། །འདས་ཀྱིས་དབྱངས་ཅན་མ་སྐྱེད་པར་བྱེད་པའི་སྔགས་འདི་གསུངས་སོ། །ོཾ་གཱི་ཏི། དེ་ནས་ཡང་བཅོམ་ལྡན་འདས་ཀྱི་གར་མའི་སྔགས་འདི་གསུངས་སོ། ། ོཾ་ནརྀ་ཏི།་དེ་ནས་བཅོམ་ལྡན་འདས་ཀྱིས་མཆོད་པའི་སྔགས་རྣམས་གསུངས་པ་ནི། ཨོཾ་བཛྲ་དྷཱུ་པ། ཨོཾ་བཛྲ་པུཥྤ། ཨོཾ་བཛྲ་དཱི་པ། ཨོཾ་བཛྲ་གནྡྷ། དེ་ནས་ཡང་བཅོམ་ལྡན་འདས་ཐམས་ཅད་འགུགས་པར་བྱེད་པའི་སྔགས་དང ། དེ་བཞིན་གཤེགས་པ་ཐམས་ཅད་གཞུག་པ་དང ། དེ་བཞིན་གཤེགས་པ་ཐམས་ཅད་བཅིང་བ་དང ། དེ་བཞིན་གཤེགས་པ་ཐམས་ཅད་རྗེས་སུ་དགྱེས་པར་བྱེད་པའི་སྔགས་རྣམས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་གསུངས་པ་ནི། ཨོཾ་བཛྲ་ཨཾ་ཀུ་ཤ་ཛཿ ། ཨོཾ་བཛྲ་པཱ་ཤ་ཧཱུཾ།་ཨོཾ་བཛྲ་སྥོ་ཊ་བཾ། ཨོཾ་བཛྲ་ཨཱ་བེ་ཤ་ཧོཿ ། བློ་ལྡན་མཁས་པས་ཅི་ནུས་ཀྱིས། །ཐིག་གིས་ཐིག་ནི་གདབ་པ་ལ། །ཚད་ལྡན་འཇུར་མདུད་མེད་པ་དང ། །གཤེར་ཞིང་གསར་བ་མཛེས་པ་ཡིས། །ཤར་དུ་བལྟས་ཏེ་གདབ་པར་བྱ། །ཚངས་ཐིག་གཉིས་པ་གདབ་པ་ཡང ། །ལྷོ་རུ་བལྟས་ཏེ་གདབ་པར་བྱ། །དེ་འོག་མཐའ་ཡི་ཐིག་གདབ་པ། །བྱིན་ཟར་གནས་ཏེ་དབང་ལྡན་བལྟ། །རླུང་གནས་བདེན་བྲལ་ཁ་བལྟས་ཏེ། །ནུབ་ཏུ་ལེགས་པར་བྲི་བར་བྱ། །དེ་ནས་ཤར་དུ་ཁ་བལྟས་ཏེ། །བྱང་དུ་བྲིས་ཏེ་བྱིན་ཟར་གནས། །བདེན་བྲལ་མིན་པའི་མཐའ་མ་གདབ།། 375b བལྟ་བ་བདེན་བྲལ་ཕྱོགས་སུ་འོ། །སློབ་དཔོན་ལྡང་མིན་གྲོགས་པོ་ནི། །རི་དྭགས་ཞོན་པའི་ཕྱོགས་འདུག་སྟེ། །ཚངས་ཐིག་དང་པོ་གདབ་པར་བྱ། །གཉིས་པའང་བདེན་བྲལ་ཕྱོགས་འདུག་སྟེ། །བགེགས་ཕྱོགས་བརྐྱང་ལ་གདབ་པར་བྱ། །དབུས་དང་མཐའ་མར་ཕྱེ་བ་ཡི། །གཞལ་ཡས་ཁང་པའི་མཚན་ཉིད་ནི། །གྲུ་བཞིར་བགྱི་ཞིང་སྒོ་བཞི་དང ། །རྟ་བབས་བཞིས་ནི་བརྒྱན་པ་ཡི། །དབུས་ཀྱི་རྩིབས་བརྒྱད་ལྟེ་བ་ལ། །རྡོ་རྗེ་ཐོ་བ་བྲི་བར་བྱ། །ཉི་མའི་དཀྱིལ་འཁོར་དབུས་ཉིད་དུ། །གྲི་གུག་ཀྱང་ནི་བྲི་པར་བྱ། །ཤར་རྩིབས་འཁོར་ལོ་ཆེན་པོ་སྟེ། །རིན་ཆེན་ལྷོ་ཡི་ཕྱོགས་རྩིབས་ལ། །པདྨ་དམར་པོ་ནུབ་ཏུ་བྲི། །བྱང་དུ་རྡོ་རྗེ་ཀུན་ཏུ་རྩེ། །ཤར་ལྷོ་ཕྱོགས་སུའང་དེ་དང་འདྲ། །གྲ་བཞིར་བརྒྱད་པོའང་ཉིས་བརྩེགས་སུ། །མཚན་མ་རྣམས་ནི་ལེགས་པར་བྲི། །སྒོ་བཞི་དག་ཏུ་བྲི་བར་ཡང ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །གཞན་ཡང་རྒྱན་ཀུན་ལེགས་པར་བྲི། །མཆོད་པ་ལེགས་པར་དགྲམ་པར་བྱ། །ཁུ་ཚུར་དཀུ་གཉིས་བཞག་པ་དང ། །དེ་བཞིན་དཔྲལ་བར་ཉུག་པ་དང ། །ཁ་ནས་འབྱིན་དང་གར་བསྐྱོད་དང ། །བདུག་སྤོས་ཉུག་དང་མེ་ཏོག་འཐོར། །མཐེ་བོང་བསྒྲེངས་ཏེ་རང་ལུས་ལའང ། །གཞན་ལ་ཉུག་ཚུལ་གནས་པ་ནི། །བརྒྱད་པོ་མཆོད་པའི་ལྷ་མོ་དག་།བསྐྱེད་དང་ལེགས་གནས་ཕྱག་རྒྱ་ཡིན། །སྐུ་གསུང་ཐུགས་ཀྱི་ལྷ་རྣམས་དང ། །རང་ལུས་བཅུག་སྟེ་གནས་པ་ལ། །སྔགས་ཀྱིས་བྱིན་ 376a ༄#། །གྱིས་བརླབ་པ་ནི། །ོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སཝ་བྷཱ་བ་ཨཱཏྨ་ཀོཉཧཾ། ཨོཾ་སརྦ་ཏ་ཐཱ་ག་ཏ་ཝཱ་ཀ་བཛྲ་སཝ་བྷཱ་བ་ཨཱཏྨ་ཀོཉྷཾ། ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་བྷཱ་བ་ཨཱཏྨ་ཀོཉཧཾ། མིག་སོགས་བྱིན་གྱིས་བརླབ་པ་ལ། །གཏི་མུག་རྡོ་རྗེ་སོགས་ཀྱིས་སྲུང ། །དབང་སྦུབས་སྟོང་པ་ཉིད་བྱས་ཏེ། །སྙིང་པོའམ་མིང་གི་ཡི་གེ་ཡིས། །རིགས་ཀྱི་ཕྱག་མཚན་བསྣམས་པ་ཡི། །སྐུ་རྣམས་ངེས་པར་བསྐྱེད་པས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་བདུད་རྩི་མྱང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་སྔགས་འདི་གསུངས་སོ། །ོཾ་ཨཱཿ ་ཧཱུཾ། དག་ཅིང་འབར་བར་རྣམ་བརྟགས་ཏེ། །ཉི་མའི་དཀྱིལ་འཁོར་དབུས་གནས་པར། །ཞེ་སྡང་རྡོ་རྗེའི་བདག་པོ་སྟེ། །ཟླ་བའི་དབུས་སུ་གཏི་མུག་བསམ། །རིན་ཆེན་དབུས་སུ་བསམ་པ་ཡང ། །སེར་སྣ་ཉིད་དུ་བསམ་པར་བྱ། །པདྨའི་དབུས་སུ་འདོད་ཆགས་བསམ། །སྣ་ཚོགས་དབུས་སུ་ཕྲག་དོག་བསམ། །བསམ་བྱ་ལྗགས་ལ་ས་བོན་ཏེ། །འཕྲོས་པས་བཀུག་སྟེ་ཚིམ་པར་བྱ། །ཤར་ནི་དཀར་པོ་ཆེན་པོ་སྟེ། །ལྷོ་ནི་སེར་པོ་ཉིད་དུ་འོ། །ནུབ་ནི་དམར་པོར་ངེས་པར་ཤེས། །བྱང་ནི་ལྗང་གུར་ཡང་དག་ལྡན། །དེ་ལས་དེ་བཞིན་རེ་ཁཱའི་རིམ། །དཀྱིལ་འཁོར་སྒོམ་པའི་ཚེ་ན་ཡང ། །བྱམས་དང་སྙིང་རྗེ་དགའ་བཏང་སྙོམས། །ཚད་མེད་པ་ 376b ཡི་རིམ་པ་ཡིས། །སེམས་ཅན་རྣམས་ལ་ཕན་གདགས་ཕྱིར། །བརྟན་དང་གཡོ་བའི་དངོས་པོ་རྣམས། །ཡོད་མིན་མེད་མིན་གཉིས་ཀ་མིན། །གཉིས་ཀ་མིན་པའང་མ་ཡིན་ཏེ། ། སྤྲོས་བྲལ་ངོ་བོ་མེད་པར་བསྒོམ། །ོཾ་ཤཱུ་ནྱ་ཏཱ་ཛྙཱ་ན་བཛྲ་སཝ་བྷཱ་བ་ཨཱཏྨ་ཀོཉཧཾ། རཾ་ལས་ཉི་མ་རྣམ་བསྒོམས་ཏེ། །དེ་དབུས་ལས་ཀྱི་རྡོ་རྗེ་ནི། །ཀུན་ཏུ་རྩེ་ལྔའི་རང་བཞིན་ཏེ། །དེ་དབུས་ཧཱུཾ་ལས་རྡོ་རྗེ་ནི། །ཀུན་ཏུ་ཕྲ་མོས་བགེགས་བཅོམ་སྟེ། །ར་བ་གུར་དང་ས་གཞི་ཡང ། །དེ་ཡི་འོག་ཏུ་ངེས་པར་བསྒོམ། །གྲུ་གསུམ་གྱེན་བསྒྲེང་དཀར་པོ་ནི། །ཤིན་ཏུ་གསལ་བར་བདག་གིས་དམིགས། །ཞེ་སྡང་ལས་ནི་སྔར་མ་བྱུང ། །བྱུང་ཞིང་འབྱུང་བར་མི་འགྱུར་རོ། །བྱང་ཆུབ་སེམས་ལ་གཞོལ་བ་དང ། །གཏོང་ཞིང་ཐོས་པའི་ཁེངས་པ་མེད། །ལེ་ལོ་བཅོམ་ཞིང་ཁྲོ་བ་མེད། །སེར་སྣ་མེད་དེ་གཡོ་ཡང་མེད། །སྒྱུ་སྤངས་ཤེས་རབ་གསལ་བ་དང ། །གཅིག་ཏུ་ཐེག་པ་ཆེ་ལ་གཞོལ། །དེས་ནི་དཀའ་བ་མེད་པར་ཡང ། །གཞན་གྱི་དོན་དུ་འདི་བརྩམས་ན། །གྲངས་ནི་བྱེ་བ་ཚང་བ་ཡིས། །བཅུ་བཞིར་ཚང་བའི་གསང་སྔགས་ཀྱིས། །ལས་རྣམས་ཀུན་གྲུབ་ཐེ་ཚོམ་མེད། །ཡང་ལྷ་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་ཡི་འཁྲུལ་འཁོར་ཇི་ལྟ་བུ། །ཡི་གེ་རྣམས་ནི་ཇི་ལྟར་བྲི། །བཅོམ་ལྡན་འདས་ཀྱིས་བཀའ་སྩལ་པ། །བདུན་ཚན་བདུན་དང་ལྡན་པ་ཡི། །རེ་མིག་ལེགས་པར་ 377a ༄#། །བྲི་བར་བྱ། །ལས་ཀུན་བྱེད་པའི་འཁོར་ལོ་ལ། །མཆོད་པ་ཡིས་ཀྱང་ལེགས་མཆོད་ལ། །དེ་འོག་ལས་རྣམས་བརྩམ་པར་བྱ། །བཟླས་པའི་མཚན་མ་རྨི་ལམ་མམ། །མངོན་སུམ་བྱུང་བར་གྱུར་ནས་ཀྱང ། །འཁྲུལ་འཁོར་རྣམས་ནི་བྲི་བྱ་བའི། །རྨི་ལམ་མཚན་མ་འདི་ཡིན་ཏེ། །ཚལ་ཆེན་ཟུག་པའི་གླིང་དག་དང ། །ལྷ་གང་མཆོད་རྟེན་གཞལ་ཡས་སུ། །དམ་པ་རྣམས་དང་ངེས་ཕྲད་དེ། །དབང་བསྐུར་རི་ལ་འཛེག་པ་དང ། །རྒྱ་མཚོར་བཅས་པའི་ཆུ་རྒལ་ལམ། །ཀླ་ཀློ་བྲན་དུ་འཁོར་རྨིས་ན། །ངེས་པར་འགྲུབ་སྟེ་འཁོར་ལོ་བྲི། །དེ་ནས་ཡང་བཅོམ་ལྡན་འདས་ཀྱིས་འབྱུང་བའི་དཀྱིལ་འཁོར་སྒོམ་པ་གསུངས་ཏེ། ཡཾ་ལས་བྱུང་བའི་རླུང་དཀྱིལ་འཁོར། །སྔོན་པོ་གཞུ་ཡི་དབྱིབས་ཅན་ལ། ། བ་དན་ལྡན་པར་ངེས་པར་བསམ། །རཾ་ལས་བྱུང་བའི་མེའི་དཀྱིལ་འཁོར། །གྲུ་གསུམ་དམར་པོ་བསམ་པར་བྱ། །བཾ་ལས་བྱུང་བ་ཆུ་ཡིན་ཏེ། །དཀར་པོ་ཟླུམ་པོ་བསམ་པར་བྱ། ། ལཾ་བྱུང་ས་ཡི་དཀྱིལ་འཁོར་ནི། །ལྗང་སེར་གྲུ་བཞི་བསམས་བྱས་ཏེ། །སྔོན་དུ་བསམ་བྱ་ལྟ་རིམ་བཞིན། །ཏྭ་ར་ཕྱི་ནས་ངེས་པར་བསམ། །བྷཱུཾ་ལས་བྱུང་བའི་འཁོར་ལོའི་རྩིབས། །དྲུག་གཉིས་ལྡན་པའི་ལྟེ་བ་ལ། །བྷྲུཾ་ལས་གཞལ་ཡས་ཁང་པ་སྟེ། །གདན་དང་ལྡན་པར་སྒྲུབ་པོས་བསམ། །དེ་ནས་ཡང་བཅོམ་ལྡན་འདས་ཀྱིས་རྡོ་རྗེ་བསྡུ་བའི་ཕྱག་ 377b རྒྱ་དང་སྔགས་ཀྱིས་བདེ་བར་གཤེགས་པ་འཁོར་དང་བཅས་པ་བསྡུ་བར་བྱའོ། །ོཾ་བཛྲ་ས་མཱ་ཛཿ ། ལག་ངར་གཉིས་ནི་ངེས་བསྣོལ་ལ། །མཛུབ་གཉིས་ལྕགས་ཀྱུའི་ཚུལ་བྱས་ཏེ། །སེ་གོལ་བརྡབ་ཅིང་བརྡུང་བར་བྱ། །ལྕགས་ཀྱུ་ལ་སོགས་རྣམ་པ་བཞིས། །ངེས་པར་དགུག་པ་ལ་སོགས་བྱ། །དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོས་མཆོད་པའི་སྔགས་འདི་གསུངས་སོ། །ོཾ་ཨརྒྷཾ་པྲ་ཏཱི་ཙྪ་སཝཱཧཱ། པྲ་བ་ར་སད་ཀཱ་ར་ཕྲ་ཏིཙྪ་སཝཱཧཱ། ནག་པོ་རབ་རི་མེད་པ་ཡི། །བུམ་པ་ལྟོ་ཆེ་བྲེ་ཚང་པ། །མཆུ་འཕྱང་མགྲིན་རིང་གདན་ལྡན་པར། །སྙིང་པོར་ལྡན་པའི་སྨན་སོགས་གཞུག་།མགྲིན་པར་རས་བཟང་དག་གིས་དཀྲི་།འདབ་མར་ལྡན་པའི་ལྕུག་མ་ཡང ། །དྲི་དང་ལྡན་པས་ཁ་བརྒྱན་ཏེ། ། བདུད་རྩིར་ལྡན་པ་ཡིས་ཀྱང་མཆོད། །བླ་རེ་གདུགས་དང་རྒྱལ་མཚན་དང ། །བ་དན་སིལ་སྙན་རོལ་མོ་ཡིས། །གུས་པས་དཀྱིལ་འཁོར་ལ་ཡང་མཆོད། །འཛམ་བུའི་གླིང་ངམ་གླིང་གཞན་དག་།ནོར་བུ་རིན་ཆེན་བཀང་བ་ཡང ། །སྟོང་གསུམ་ལ་སོགས་དེ་བཞིན་ཏེ། །ཞུམ་པ་མེད་པར་བྱས་ཏེ་དབུལ། །བློ་ལྡན་སྒྲུབ་པོས་སེམས་ཅན་ལ། །ཕན་པའི་སེམས་ཀྱིས་སྲོག་མི་གཅོད། །མ་བྱིན་པར་ཡང་མི་བླང་ངོ ། །འདོད་པ་མི་སྤྱད་བརྫུན་མི་སྨྲ། །གནོད་པའི་རྒྱུ་ཕྱིར་ཆང་མི་བཏུང ། །གདུག་པ་རྣམས་ལས་ལྡོག་སྟེ་བྱ། །དངོས་སུའམ་ཡང་ན་ 378a ༄#། །སྔགས་དང་གཞན། །འཁྲུལ་འཁོར་དང་ནི་ཏིང་ངེ་འཛིན། །སྨན་གྱིས་ཀྱང་ནི་བྱ་བ་སྟེ། །དེ་ལྟར་མི་བྱེད་དེ་ཡི་ནི། །ངེས་པར་དམ་ཚིག་ཉམས་པར་འགྱུར། ། གདོན་དང་ལོག་འདྲེན་དག་གིས་ཀྱང ། །ངེས་པར་འཆི་སྟེ་དམྱལ་བར་ནི། །ཡུན་རིང་སྡུག་བསྔལ་གྱིས་སྡུག་སྟེ། །དེ་བས་ནན་ཏན་ལྡན་པ་རུ། །བཟོད་པ་མི་བསྐྱེད་སྙིང་རྗེ་ཡིས། །སྔགས་ཀྱིས་ངེས་པར་བསད་པར་བྱ། །མི་ལྡོག་པ་ཡི་སེམས་སུ་གནས། །བྱང་ཆུབ་ཆུ་ཡིས་ར་རོ་ཞིང ། །ཤེས་རབ་ཕ་རོལ་ཕྱིན་པ་ཡི། །ཕྱག་རྒྱ་ཆེ་ལ་དེ་གཞོལ་ཏེ། །ངོ་བོ་དང་བྲལ་དངོས་པོ་འཇིག་།མ་བྱིན་བྱང་ཆུབ་བླང་བ་ལ། །བརྩོན་པས་ལེ་ལོ་དོར་བར་བྱ། །བརྫུན་དུ་ཤེས་བྱ་དངོས་པོ་རྣམས། །དེ་ནས་དེ་བཞིན་གཞན་ལ་བརྗོད། །རྒྱས་བཏབ་པ་ཡི་དངོས་པོ་ལ། །རྒྱ་བཤིག་ཤེས་རབ་རལ་གྲི་ཡིས། །བཅད་ཅིང་རྣམ་པ་མེད་པ་ལ། །བསད་པ་ཡང་ནི་ང་ཡིས་བསྒྲགས། །ུ་མེད་པ་ཡི་ཡི་གེ་རྣམས། །སྟེང་གི་གཡས་ཕྱོགས་ཉིད་ནས་བྲི།། འོག་གི་ཡི་གེ་བྲི་བ་ནི། །དེ་ཉིད་གཡོན་གྱི་ཕྱོགས་ནས་བྲི། །ཱ་ལི་ཀཱ་ལི་ངེས་བྲིས་ཏེ། །ཀྵ་མ་གཏོགས་པར་དབུས་སྟོང་སྟེ། །དེ་ལ་བགེགས་ཀྱི་མཚན་མའམ། །མིང་སོགས་ངེས་པར་བྲི་བ་ཡང ། །ལྟོ་བའི་ནང་དུ་ཆུད་པར་བྲི། །འཁོར་ལོ་ཉིད་ཀྱང་དེ་འདྲ་བ། །གྲུ་བཞི་དག་ཏུ་བྲི་བ་ནི། །མ་ནིང་འདོད་པའི་ཀཱ་ལི་དང ། །ཱ་ལི་མིན་ཏེ་ལྷག་མ་ཡིན། །གདུག་ 378b པའི་ཡི་གེ་བཅུ་བཞི་པོ། །མིང་དང་བཅས་པར་ཕྱོགས་བཞིར་བྲི། །དབྱངས་ཀྱི་ཡི་གེ་བཞི་པ་ཡིས། །བཞི་པ་གཅིག་གི་མགོ་སྟེང་དུ། །སུམ་བསྐོར་ཉིད་ནི་ཤིས་པ་ཡིན། །ལས་ཀུན་བྱེད་པའི་འཁོར་ལོ་དེ། །འབྲི་བར་བྱེད་པའི་སྤྱི་དུས་དང ། །ཁྱད་པར་དུས་ཚེས་ལྷ་ཡི་ནི། །རྣལ་འབྱོར་མེད་པས་བྱ་བ་མིན། །ཕྱོགས་སུ་བལྟ་བའི་བྱེ་བྲག་གིས། །ལས་ཀྱི་སྒྲུབ་པོས་ཤེས་པར་བྱ། །ལས་ཀུན་བྱེད་པའི་འཁོར་ལོ་ནི། །བདེ་གཤེགས་ཀུན་གྱི་སྙིང་པོ་སྟེ། །དེ་བཞིན་གཤེགས་པའི་གསང་བའང་ཡིན། །འཁོར་ལོ་འདིར་ནི་བཅུག་པ་གང ། །སངས་རྒྱས་ཀྱང་ནི་ངེས་པར་འཇིག་།དམ་ཆོས་སྨོད་པའང་དེ་བཞིན་ཞི། །འཁོར་ལོས་བསྒྱུར་བའང་དབང་དུ་འདུ། །ལྷ་མིན་པྲ་ཏིའང་ཞི་བར་བྱེད། །དགྲ་བཅོམ་གསོད་པའང་དེ་ཞི་ལ། །བརྒྱ་བྱིན་ཉིད་ཀྱང་དབང་དུ་ངེས། །དེ་ལྟ་བུ་ཡི་འཁོར་ལོ་དེ། །ཐོག་མར་བྲིས་ཏེ་དེ་འོག་ཏུ། །བྱིན་རླབས་མ་ནོར་དེ་ཉིད་ལ། །མཆོད་པ་གུས་པར་བདག་གིས་བྱ། །མཆོད་མིན་ལས་རྣམས་བྱས་པ་ལ། །འབྲས་བུ་འབྱུང་མིན་འཁྲུལ་པ་ལའང ། །འབྲས་མེད་ངལ་བ་ཉིད་ཡིན་ནོ། །ཡང་ལྷ་མོ་རོ་ལངས་མ་ཉིད་སྟན་ལས་ལངས་ཏེ་མཆོད་པ་ཆེན་པོ་བྱས་ཏེ་འདི་སྐད་ཅེས་གསོལ་བ་བཏབ་བོ། །འཁོར་ལོ་འབྲི་བའི་སྣག་ཚ་གང ། །བྲི་གཞི་སྨྱུག་གུ་ཇི་ལྟ་བུ། །གཅིག་གམ་འོན་ཏེ་དེ་ཐ་དད། །བཅོམ་ལྡན་འདས་ཀྱིས་བཤད་དུ་གསོལ། །བཅོམ་ལྡན་ 379a ༄#། །འདས་ཀྱིས་བཀའ་སྩལ་པ། ལེགས་སོ་ལེགས་སོ། །ངའི་ཕྱིར་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་བཤད་དོ། །ཇི་ལྟར་ལས་རྣམས་བྱེ་བྲག་ཡོད་པ་ལྟར། །བྲི་བའི་གནས་དང་གཞུག་པའི་གནས། །ཐ་དད་དེ་བཞིན་འཁོར་ལོ་བསྒྲུབ། །སྣག་ཚ་ཐ་དད་འབྲུ་རྣམས་བཞིན། །གྲོང་ཁྱེར་ཆེན་པོ་སྲུང་འདོད་དམ། །སྐྱེས་པ་སྲུང་བར་འདོད་ན་ཡང ། །གྲོ་ག་དེ་བཞིན་ཨུ་བྷི་ཤུན། །ལ་གོར་ཞོ་ཤའི་ཤུན་པ་འམ། །རས་ལ་ཁ་ཆེས་འཁོར་ལོ་ནི། །བསྐུལ་བའི་ཚིག་དང་ལྡན་པར་རོ། །སོ་མ་བཏང་བའི་ཁམ་ཕོར་དུ། །སྦྲང་མར་དག་དབུས་འཁོར་ལོ་གཞུག་།སྐུད་པ་དཀར་པོས་ལེགས་པར་དཀྲི། །ནང་པར་ཤར་དུ་ཁ་བལྟས་ཏེ། །མེ་ཏོག་དཀར་པོ་དག་གིས་མཆོད། །བདག་ཉིད་དཀར་པོའི་མདོག་ཏུ་བསམ། །མདུན་དུ་སྐྱེས་པ་ཟླ་བ་ལ། །མཐའ་དག་གནས་པ་མདུན་དུ་བསམ། །སངས་རྒྱས་ཕྱོགས་བཅུར་བཞུགས་པ་ཡིས། །བདུད་རྩི་ལྔས་གང་བུམ་པ་ཡིས། །ཆུ་རྒྱུན་དག་གིས་དབང་བསྐུར་ཏེ། །དེ་འོག་བཟླས་པ་བརྩམ་པར་བྱ། །སཝཱཧཱའི་སྔོན་དུ་སྐུལ་ཚིག་ལྡན། །བུད་མེད་ལ་ནི་གི་ཝང་སྟེ། །ཕྱི་རོལ་མཚམས་བཞིར་ཕུར་པ་ཡིས། །བགེགས་བསྐྲད་སྟེང་དུ་བླ་རེ་བྲེ། །ཕྱི་མ་སྐྱེས་པའི་ཇི་བཞིན་ནོ། །བྱེ་བྲག་ཏུ་ཡང་སྐྱེས་པ་འམ། །བུད་མེད་ཞི་བར་འདོད་ན་ཡང ། །ག་པུར་ཙནྡན་དག་གིས་ནི། །ཤིཪྴ་ 379b ཤིང་གི་ཤུན་པ་ལ། །འཁོར་ལོ་ཡི་གེ་ལེགས་བྲིས་ཏེ། །ཤར་དུ་ནང་པར་བལྟས་ཏེ་མཆོད། །ལས་ཀུན་བྱེད་པའི་ཐབ་ལ་ཡང ། །སྔོན་གསུངས་ཞལ་ལྡན་དགོད་པར་བྱ། །ཕྱི་རོལ་མཚམས་བཞིར་ཕུར་པ་ཡིས། །བགེགས་བསྐྲད་སྟེང་དུ་བླ་རེ་བྲེ། །བུམ་པ་ཁ་རྒྱན་དང་ལྡན་ཞིང ། །རིན་ཆེན་འབྲུ་དང་སྨན་དུ་ལྡན། །དྲི་ཞིམ་ཆུ་དང་ལྡན་པར་བྱ། །གོས་བཟང་གིས་ནི་མགྲིན་པ་དཀྲི། །ཕྱོགས་བཞི་དག་ཏུ་གཞག་པར་བྱ། །ཐང་གའམ་དཀྱིལ་འཁོར་ལ་མཆོད་དེ། །དྲི་འམ་ཆུ་དང་མེ་ཏོག་དང ། །བསྲེས་པའི་སྐྱོར་མེས་ཆུ་ཡང་བླུགས། །གཟར་བུ་སྟོང་གིས་སྦྱིན་སྲེག་བྱ། །ཆུ་དེས་གཞན་ཡང་གཏོར་བར་བྱ། །བར་མ་ཆད་པར་ཉིན་བདུན་དུ། །དེ་ལྟར་རྒྱུན་དུ་གཏོར་མ་སྦྱིན། །ཕྱི་ནས་འཁོར་ལོ་རིན་ཆེན་དེ། །བུམ་པའི་ནང་ནས་རྣམ་ཕྱུང་སྟེ། །རྒྱལ་མཚན་རྩེ་ལ་བཏགས་ནས་སུ། །གནས་མཐོན་པོར་ཡང་གཞག་པར་བྱ། །ཞི་བར་བྱེད་པར་ཐེ་ཚོམ་མེད། །སྔར་བཤད་པ་ཡི་ཤིང་ཤུན་དང ། །དུར་ཁྲོད་རས་ལ་སྒྲུབ་པོ་ཡིས། །ཡུང་བའི་ཁུ་བས་འཁོར་ལོ་བྲི། །སོ་མ་བཏང་བའི་ཁམ་ཕོར་དུ། །སྒྲུབ་པའི་རྐང་རྗེས་ས་དག་དང ། །སྣང་མཛད་ཆུ་ངོགས་ས་དག་དང ། །རི་དང་ལམ་ས་བཏགས་ནས་ནི། །ལྡོང་རོས་དང་ནི་ཡུང་བ་ཡིས། །ཁུ་བས་སྦྲུས་ཏེ་གཟུགས་བྱས་ལ། །འཁོར་ལོ་གཉིས་དྲིལ་ཡུང་བ་དང ། །ལྡོང་རོས་ཀྱི་ནི་ཁུ་བས་བསྐུ། །སྙིང་གར་བཅུག་སྟེ་གཞུག་པར་བྱ། །སེང་ལྡེང་ 380a ༄#། །ཕུར་པ་སོར་བརྒྱད་པས། །ལུས་ལ་སོགས་པ་གདབ་པར་བྱ། །དགྲ་རྣམས་འོང་བའི་ལམ་དུ་ཡང ། །ཁུང་བུར་བརྐོས་ཏེ་གཞུག་པར་བྱ། །ལཾ་ལས་དབང་ཆེན་གྱིས་མནན་ཅིང ། །སུཾ་ལས་སྐྱེས་པ་དེ་སྟེང་ན། །སྣ་ཚོགས་ལས་ཀྱིས་མནན་པ་ཡིས། །ཁམ་ཕོར་སྐུད་སེར་དཀྲི་བར་བྱ། །རྒྱལ་ཆེན་དག་ནི་སེར་པོ་ཡང ། །དབང་ཆེན་ལ་གནས་ལྷོར་བལྟས་ཏེ། །བསྒྱུར་བྱ་སེར་པོའི་རིས་མནན་པར། །བསམས་ནས་བཟླས་པ་བརྩམ་པར་བྱ། །སཝཱཧཱ་མེད་པར་སྟམྦྷ་ཡ། །ལཾ་གྱི་མཐའ་ཅན་ལྔ་སྟོང་བཟླས། །གཏོར་མ་རྒྱུན་དུ་སྦྱིན་པར་བྱ། །རེངས་པ་ཆེན་པོའི་ལས་འདི་ཡིས། །དམག་གི་དཔུང་ཡང་ངེས་པར་རེངས། །འགའ་ཙམ་ལ་ནི་སྨོས་ཅི་དགོས། །སྲན་ནེ་ལན་གསུམ་བསྔགས་པ་ཡིས། །དུར་ཁྲོད་རས་ལ་འཁོར་ལོ་བྲི། །རིམས་དང་དུག་གིས་ཟིན་པ་སྟེ། །དེ་ཡི་སྟེང་དུ་གཞག་པར་བྱ། །བདག་ཉིད་དཀར་པོར་རྣམ་བསམས་ཏེ། །ཆོ་གས་བྱབ་ཅིང་གདོན་པར་བྱ། །དེ་ནི་དེ་ནས་ཞི་བར་འགྱུར། །ངག་དག་རེངས་པར་འདོད་ན་ཡང ། །སྨྱོ་བྱེད་ཁུ་བ་དུར་ཁྲོད་སོལ། །བཙག་རྣམས་བསྲེས་ཏེ་སོ་མ་བཏང ། །ཁམ་ཕོར་གཉིས་ལ་འཁོར་ལོ་འདི། །ཕོ་དང་མོ་ཡི་བསྐོར་ཕྱོགས་གཉིས། །མ་ནོར་བྲིས་ཏེ་ཁ་སྦྱར་ལ། །རེ་བསྲེགས་ས་དང་ཐལ་བས་གཡོགས། །སྟེང་དུ་བཟླས་ཤིང་སྤེལ་བ་ནི། །སྟམྦྷ་ན་དང་ཀུ་རུ་ལཾ། སཝཱཧཱ་མེད་པའི་སྔགས་འདི་ཡིས། །ཁ་བཅིང་ 380b བ་ནི་ངེས་\?\་པར་འགྱུར། །གང་ཞིག་གསོད་པར་བྱེད་པ་ལ། །སྙིང་རྗེར་ལྡན་པའི་གང་ཟག་གིས། །གདུག་བྱེད་ལས་འདི་བྱེད་པ་ལ། །གཤིན་དགྲ་ལྷ་ཡི་རྣལ་འབྱོར་གྱིས། །ཞག་གཅིག་གིས་ནི་འགྲུབ་པར་བྱེད། །བཅུ་བཞི་ཉི་མ་ཕྱེད་པ་ན། །བྱ་རོག་སྒྲོ་རྩེའི་སྨྱུ་གུ་ཡིས། །དུར་ཁྲོད་ཀྱི་ནི་རས་དག་ལ། །དུག་དང་ཚ་དང་སྐེ་ཚེ་དང ། །ནིམ་པ་ཚ་བ་གསུམ་དག་དང ། །ཚ་བའི་མར་ཁུ་དུར་ཁྲོད་སོལ། །སྨྱོ་བྱེད་མཛུབ་མོའི་ཁྲག་གིས་བྲི། །རོ་བསྲེགས་པ་ཡི་ཐལ་བ་དང ། །བསྒྲུབ་བྱའི་རྐང་པའི་རྗེས་ཀྱི་ས། །མི་ཡི་རུས་ཕྱེ་ལ་སོགས་པ། །གཟུགས་བྱས་དེ་ཡི་སྙིང་གར་གཞུག་།དུར་མེ་དག་ལ་དེ་བསྲོ་ཞིང ། །ཁྲོས་པའི་སེམས་ཀྱིས་ཁྲི་བཟླས་ན། །སྐད་ཅིག་ཙམ་གྱིས་འཆི་བ་ནི། །དེ་ཡི་ཁྱིམ་མམ་དུར་དུ་སྦ། །དེ་ལྟའི་ལས་ཀྱིས་དེ་འགྲུབ་སྟེ། །མཚན་མོ་ཕྱེད་ན་ཁ་ལྷོར་བལྟ། །བདག་ཉིད་འཇིགས་པའི་གཟུགས་ཅན་ཏེ། །ཞལ་སོགས་སྔོན་དུ་གསུངས་པ་ལྟར། །མ་ཧེའི་སྟེང་ན་མཆེ་བ་གཙིགས། །གསུས་ཁྱིམ་ཆེ་ལ་གྱེན་སྐྲ་འབར། །སྤུ་སོགས་གཞན་ཡང་དེ་འདྲའོ། །བ་སྤུ་དག་གི་བུ་ག་ནས། །འཇིགས་མཚོན་སྣ་ཚོགས་ཐོགས་པ་ཡི། །ཁྲོ་བོ་མང་པོ་འཕྲོ་བ་སྟེ། །བདག་ཉིད་བསྐལ་པའི་མེ་ལྟར་འབར། །བསྒྲུབ་བྱ་མདུན་དུ་བསམ་བྱ་བ། །མཚམས་མེད་རྫོགས་པའི་སྡིག་དང་ལྡན། །དྲི་མ་ཅན་དེ་ཕྱོགས་གོས་འཆང ། །གྲོང་ཁྱེར་སྐྱེ་བོས་འཚེ་བ་ཅན། །གྲང་བའི་རེག་པས་ལུས་ལ་རྒྱས། །མཚོན་གྱིས་ 381a ༄#། །བཏབ་པ་བྱས་པ་ལ། །གཅན་གཟན་སོགས་ཟ་མདུན་དུ་བསམ། །ངག་ཏུའང་དེ་ལྟར་ཡང་ཡང་བརྗོད། །ལྕགས་ཀྱི་ཁྱུད་མོས་ཡན་ལག་བསྡམས། །ཚེར་མས་དབུགས་པ་བྱས་པ་སྟེ། །ལུས་ནི་པགས་པ་མེད་པར་བསམ། །སྐེ་ཚེ་ལན་ཚས་ལུས་བྱུགས་ཏེ། ། ཆུ་བ་ཡི་སྒྲ་འབྱིན་བསམ། །དེ་ཡི་མགོན་སྐྱབས་བསལ་བྱས་ནས། ། གཤིན་རྗེའི་ལྟོ་བའི་ཐ་མར་བཞག་།བེ་ཅེན་ཐོགས་པས་དེ་ཟ་འོ། །འདི་ལྟར་བསད་པས་སངས་རྒྱས་ཀྱི། །སྲས་སུ་དེ་ནི་སྐྱེ་བར་འགྱུར། །ལས་ཀྱི་སྡིག་ལས་དེ་གྲོལ་ལོ། །གསོད་པའི་སྔགས་དེ་སྦེལ་བ་ནི། །ཧཱུཾ་ཆེ་གེ་མོ་མཱ་ར་ཡ་ཧཱུཾ། །བསྒྲུབ་བྱ་ནང་དག་དབྱེ་བ་ན། །མ་ཧེ་རྟ་ཡི་པགས་པ་དག་།ཡང་ན་རོ་དང་དུར་ཁྲོད་རས། །རྟ་དང་མ་ཧེ་བྱི་ལ་འམ། །ཁྱི་དང་ནིམ་པའི་འདབ་ཁུ་དང ། །ཁྱིམ་བྱའི་ཁྲག་དང་སྐེམ་ཚེ་བསྲེ། །དེར་ནི་འཁོར་ལོ་འདི་བྲིས་ཏེ། །རྣམ་པར་འགྲས་པ་བསྐུལ་དང་ལྡན། །རྟ་སྤལ་དག་གི་ནང་བཅུག་སྟེ། །མ་ཧེའི་རྨིག་པའི་ནང་བཅུག་ལ། །སྟོང་ཕྲག་བཅུ་ནི་ཚང་བར་བཟླས། །ནིམ་པའི་ཤིང་བསྲོས་དེ་ནང་སྤ། །དེ་ནང་འགྲས་པ་ཉིད་དང་ནི། །དཔག་ཚད་བརྒྱས་མཆོད་འཐབ་པར་འགྱུར། ། མུ་ཀི་དང་ཨ་མུ་ཀི་།བི་དྭེ་ཥ་ཡ་ཕཊ། རིམས་ཀྱིས་ཐེབས་པར་བྱ་བ་ལ། །དུར་ཁྲོད་ཀོ་བ་ཆེ་བ་ལ། ། རྐ་ཤིང་གི་ལོ་མ་དང ། །ཙི་ཏྲ་ཀ་དང་སྐེ་ཚེ་དང ། །ཁྲག་གིས་འཁོར་ལོ་བྲི་བར་བྱ།། 381b བྲི་བ་བསྐོས་ལ་རི་མོས་དགང ། །སེང་ལྡེང་འདབ་མ་དུག་མེད་ལ། །བསྲོ་ཞིང་ཁྲོས་པས་ལྔ་བརྒྱ་བཟླ། །ཁྱིམ་དང་ལམ་གྱི་བཞི་མདོ་དང ། །དུར་ཁྲོད་སྦས་ན་རིམས་ཀྱིས་འཛིན། །རྒྱས་པའི་ལས་ཀྱིས་རྒྱས་འདོད་ན། །གི་ཝང་གིས་ནི་གྲོ་ག་ལ། །འཁོར་ལོ་གཉིས་ནི་རྣམ་བྲིས་ཏེ། །སྐུལ་ཚིག་ལྡན་པར་ཡི་གེ་བྲི། །ཟླ་དྲུག་ཐང་གའི་མདུན་དག་ཏུ། །གནོད་སྦྱིན་དང་ནི་གནོད་སྦྱིན་མོས།། རིན་ཆེན་ཆར་ནི་འབེབས་པ་དང ། །གཤིན་དགྲ་སེར་པོ་ཟླ་སེར་ལ། །གནས་པར་བསམས་ཏེ་ཁྲི་བཟླས་ན། །འཕགས་པ་ནོར་འཛིན་འདྲ་བར་འགྱུར། །ོཾ་ཆེ་གོ་མོ་པུཥྚིཾ་ཀུ་རུ་ཨོཾ། །གྲོ་ག་སོགས་ཀྱི་ཤོག་ཤོག་ལ། །གི་ཝང་དང་ནི་རང་བྱུང་གྲི་།མེ་ཏོག་དག་གིས་བྲི་བ་སྟེ། །ཡང་ན་ཐ་ལྟག་ཁྲག་དང་ནི། །བིལ་བའི་ལོ་མའི་ཁུ་བ་དང ། །རས་དམར་པོ་ཡི་ཁུ་བ་དང ། །སེན་རྩི་རྣམས་བསྲེས་བྲི་བར་བྱ། །སྥྲ་ཚིལ་ཀྱིས་ནི་འཁོར་ལོ་བྲི། །བུམ་པ་མར་སྦྲམ་ལྡན་པར་བཞག་།དུས་བཞི་དག་ཏུ་མཆོད་པ་ནི། །མེ་ཏོག་དམར་པོས་མཆོད་པ་འོ། །དེ་ཚེ་བཟླས་པ་ཚུལ་དག་ནི། །ཧོ་བ་ཤཾ་ཀུ་རུ་ཧོ། །དེ་མ་ཐག་ཏུ་ལྷ་རྣམས་ཀྱང ། །དབང་དུ་བྱེད་པར་ངེས་འགྱུར་རོ། །གྲོ་ག་དག་ལ་བྲི་བ་ནི། །ཟླ་བ་གཟས་ཟིན་དུས་དག་གམ། །རྒྱལ་གྱི་ཉིན་པར་བྲི་བྱ་སྟེ། །སྐུད་པ་དམར་པོས་འཁོར་ལོ་དཀྲི་།མེ་ཏོག་དམར་པོས་མཆོད་པ་བྱ། །ཐོད་པ་ཁ་སྦྱར་ནང་བཞག་སྟེ། །བཟླས་པ་ཁྲིས་ནི་བརྒྱ་བྱིན་གྱི། །བུ་མོའང་རྙེད་པར་ངེས་འགྱུར་རོ། །དུར་ཁྲོད་ཀྱི་ནི་ 382a ༄#། །རས་དག་ལ། །གུར་གུམ་སོགས་ཀྱིས་འཁོར་ལོ་བྲི། །ཡི་གེ་ཐིག་ལེས་རྣམ་བསྐོར་ཏེ། ། མུ་ཀི་དང་མཱ་མ་ཀཱི། །མོ་ཧ་ན་དང་རྣམ་སྦེལ་ལ། །བསྒྲུབ་བྱའི་གོས་ཀྱི་མཐའ་མ་ལ། །ལེགས་བཏགས་ཆོས་ཀྱི་དབྱིངས་ཉིད་དུ། །བསྒོམས་ནས་ཟློས་ཤིང་འགྲོ་ན་ཡང ། །ལྷ་དང་ལྷ་མིན་གྱིས་མི་མཐོང ། །བདག་ཉིད་གཤིན་དགྲ་ཉིད་བསྒོམས་པས། །ཆུ་ཡི་སྟེང་ནས་འགྲོ་འདོད་ན། །རྡུལ་ཕྲན་ལྷ་ཡི་རྣམ་པར་ཏེ། །ུ་ཌྱན་དུ་ནི་བདག་རང་ཉིད། །ངེས་པར་སྟེང་འགྲོ་གཞན་དག་ཀྱང ། །བུ་མོས་ནགས་ཀྱི་རས་བལ་ལ། །སྐུད་པ་བཀལ་བ་གཞོན་ནུ་མས། །སུམ་སྒྲིལ་དུ་ཡང་དེ་ཡིས་བྱ། །གདུག་སྔགས་སྟོང་དུ་ཚང་བར་ཏེ། །བཟླས་ཚུལ་སྔོན་དུ་གསུངས་པ་བཞིན། །སྐར་མ་རྒྱལ་གྱི་དུས་ལ་བཟླ། །བྲི་བའི་ཉིན་མོའང་དེའང་དེ་ལ་འོ། །དཀྱིལ་འཁོར་གྱི་ནི་ལྷར་བརྟག་པ། །གཡོན་གྱིས་མདུན་བྱས་གཞན་ལ་གདགས། །མ་ལུས་མཚོན་དག་རེངས་བྱེད་དེ། །གཅེར་བུ་ལ་ཡང་རེངས་པར་བྱེད། །མེ་ཏོག་ལས་ནི་གཞན་དུ་མིན། །ཤ་ལྔ་སོགས་ཀྱི་རིལ་བུ་ནི། །ལེགས་པར་གྲིབ་མ་དག་ལ་བསྐམས། །ལྕགས་གསུམ་དག་གིས་དཀྲི་བར་བྱ། །བཟླས་ཤིང་མཆོད་པ་བྱེད་པའི་ཚེ། ། དངུལ་དག་གི་ནི་རེངས་བཞིན་བྱ། །འབར་བར་གྱུར་པ་ཉིད་ན་ཡང ། །མཆོད་པ་ལེགས་པར་རྣམ་བྱས་ཏེ། །བསྐོར་བ་བརྒྱ་ཕྲག་དུ་མ་བྱས། །དེ་ནས་བློ་ལྡན་སྒྲུབ་པ་པོས། །ཁར་ 382b བཅུག་ཙམ་གྱིས་འདོད་པ་སྒྲུབ། །ཕྱུང་ན་སྔོན་ལྟར་རྣལ་མ་ཉིད། །གསོ་བ་འདྲ་བར་འོ་མས་ཀྱང ། །ངེས་པར་འཁྲུལ་འཁོར་བཀྲུ་བར་བྱ། །རིག་སྔགས་འཁྲུལ་འཁོར་ལས་གྲོལ་ཏེ། །རྣལ་མ་ཉིད་ལ་གནས་པ་ཡིན། །སྣུམ་སྟེར་དག་གི་ས་བོན་ལ། །ཉ་ལྕིབས་དང་ནི་བྱི་ཏང་ཀ་།ཁུ་བས་ཡང་དེ་བྱུགས་པ་ལ། །ཐོད་པ་སས་ནི་རྣམ་བཀང་བར། །སྤས་ཏེ་བཟླས་པ་གྲངས་མེད་བྱ། །དེ་ཚེ་མཆོད་དང་གཏོར་མ་དག་།ཡོངས་རྒྱས་འབྲས་བུ་རྣམས་བླངས་ཏེ། །ཁར་བཅུག་མཁའ་འགྲོ་བྱར་འགྱུར་རོ། །དེ་ལ་འདི་སྐད་ཅེས་བྱ་སྟེ། །ཞུས་དང་འདས་བྱུང་གདུག་པ་དང ། །མངོན་པར་རྟོགས་པའི་ཏིང་ངེ་འཛིན། །དཀྱིལ་འཁོར་རྣམ་པར་སྤྲོས་པ་དང ། །ཐིག་གིས་གཞལ་ཡས་མཚོན་པ་དང ། །རྡུལ་ཚོན་ཕྱོགས་ལས་རྣམ་པར་བརྟག་།ཡང་དག་བྱིན་གྱིས་བརླབ་པ་དང ། ། བདུད་རྩི་མྱང་བར་བྱ་བ་དང ། །ཚངས་པའི་གནས་བཞི་བསྒོམ་པ་དང ། །སྔགས་ཀྱི་དངོས་མེད་དེ་བཞིན་མཚམས། །ཆོས་འབྱུང་དང་ནི་སྒྲུབ་པོ་དང ། །བཟླས་དང་དེ་ཡི་གྲངས་ཚང་དང ། །འཁོར་ལོ་དང་ནི་ཡི་གེ་གཉིས། །ངེས་པར་ཞུས་དང་མཆོད་པ་དང ། །འཁོར་ལོ་འབྲི་བའི་མཚན་མ་དང ། །འབྱུང་བ་བཞི་དང་བསྡུ་སོགས་དང ། །སྡོམ་པ་འཁོར་ལོའི་ཡི་གེ་བྲི། །བཞི་དང་དེ་བཞིན་སྣག་ཚ་དང ། །སོ་སོ་ལས་ཀྱི་བྱེ་བྲག་སྟེ། །བསྡུས་ཏེ་ང་ཡིས་བསྟན་པ་ཡིན། །དེ་ནས་བཅོམ་ལྡན་འདས་ཀྱིས་འབྱུང་པོ་རྣམས་ལ་གཏོར་མས་ཚིམ་པར་བྱ་བ་ཞེས་བྱ་བའི་ཏིང་ངེ་འཛིན་ལ་ 383a ༄#། །སྙོམས་པར་ཞུགས་ཏེ་སྐུ་དང་གསུང་དང་ཐུགས་རྡོ་རྗེ་ལས་སྔགས་འདི་ཕྱུང་ངོ ། །ོཾ་ཧྲཱིཿ ཥྚཱིཿ ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སཝཱཧཱ། འབྱུང་པོ་རྣམས་དང་རྣམ་སྤེལ་ཏེ། །ཐ་མར་སྦྱར་བ་བྱས་པ་ནི། །ཧི་ཧི་ཧི་ཧཱུཾ་ཕེཾ་ཕེཾ་ཕེཾ་སཝཱཧཱ། དུར་ཁྲོད་རྒྱན་གྱིས་རྣམ་བཞུགས་པའི། །ཞེ་སྡང་གཤིན་གཤེད་རྡོ་རྗེ་ནི། །སྤྲོས་མེད་ནམ་མཁའ་ལྟ་བུ་ལས། །སྙིང་རྗེ་ཐབས་ཀྱིས་སྐུ་སྤྲུལ་པ། །ཡེ་ཤེས་ཁྲོ་རྒྱལ་རབ་འཇིགས་པའི། །དུད་ཁ་མུན་ཆེན་སྐུ་ལ་འདུད། །གར་དགུ་ཉམས་དང་ལྡན་པ་ཡི། །གཏི་མུག་རྡོ་རྗེ་གཤིན་རྗེ་གཤེད། །སྐྱེ་མེད་དོན་དམ་ངང་ཉིད་ལས། །ཐབས་ཀྱིས་སྤྲུལ་པའི་སྐུར་བསྟན་པ། །འཇིགས་བྱེད་དྲག་པོའི་ཆ་ལུགས་ཅན། །ཟླ་བ་ཉ་འདྲ་ཁྱོད་ལ་འདུད། །བསྐལ་པའི་མེ་ལྟར་འབར་བ་ཡི། །སེར་སྣ་གཤིན་རྗེ་རྡོ་རྗེ་ནི། །འཛིན་པ་པོ་ལས་གྲོལ་བ་ཡིས། །གདུག་པ་འདུལ་ཕྱིར་ཁྲོ་བོ་སྤྲུལ། །གཏེར་འཆང་སེར་སྣ་གྲོལ་མཛད་པ། །བཙོ་མ་གསེར་འདྲ་ཁྱོད་ལ་འདུད། །ཆགས་པས་མ་ལུས་དབང་མཛད་པའི། །འདོད་ཆགས་གཤིན་རྡོ་རྗེ་ནི། །སྐྱེ་མེད་རྣམ་དག་ཆོས་དབྱིངས་ལ། །ཁམས་གསུམ་པ་དག་ཁྲོ་བོར་སྤྲུལ། །མ་ཆགས་སྤྱན་ལྡན་ཐུགས་རྗེ་ཅན། །བན་དུ་ལྟ་བུའི་སྐུ་ལ་འདུད། །ཤེས་རབ་ཐབས་ལྡན་ཧེ་རུ་ཀ་།ཕྲག་དོག་གཤིན་རྡོ་རྗེ་རྗེ་ནི། །རྣམ་རྟོག་དཔེ་དང་བྲལ་བ་ལས། །ཐུགས་རྗེའི་སྤྲུལ་པའི་ཁྲོ་བོ་ནི། །འགྲོ་ 383b དོན་བརྩོན་པའི་རལ་གྲི་ཅན། །སྣ་ཚོགས་མདོག་ཅན་ཁྱོད་ལ་འདུད། །ཐམས་ཅད་སྐྱེད་པའི་ལྷ་མོ་ཆེ། །དབང་པོ་ལྟ་བུར་བསྒྱུར་མཛད་པ། །ཁམས་གསུམ་གཟིགས་པའི་སྤྱན་དང་ལྡན། ། རྣམ་སྣང་ཅན་གྱིས་བདུད་བཞི་འཇིགས། །བདེ་བ་ཆེན་པོས་རྟག་ཏུ་དགྱེས། །ཡེ་ཤེས་སྤྱན་ཅན་ཁྱོད་ལ་འདུད། །ཀུན་སྡུད་ལྷ་མོ་རིན་པོ་ཆེ། །རྣམ་རྟོག་སྐྱོན་ལས་རྣམ་གྲོལ་ཡང ། །དུས་གསུམ་བདེ་གཤེགས་བདག་གིར་བྱེད། །རིན་ཆེན་ཏོག་ཅན་མཛེས་པའི་སྐུ། །དོན་དམ་ཐུགས་ཆུད་འཁོར་བ་སེལ། །མ་ལུས་ཀུན་གྱི་བདག་ལ་འདུད། །འདུས་བྱས་མ་ལུས་སྲེག་བྱེད་པ། །རྣམ་རྟོག་ཞི་བའི་རང་བཞིན་ལས། །ཁམས་གསུམ་མ་ལུས་སྒྲོལ་པར་བྱེད། །འོད་དཔག་མེད་ཀྱིས་རབ་མཛེས་པ། །མ་ཆགས་ཕྱག་ན་བསྣམས་པ་ཡི། །འཕྲིན་ལས་དག་བྱེད་ཅན་ལ་འདུད། །ཐུགས་རྗེས་གཡོ་བའི་རང་བཞིན་ཅན། །འཇིག་རྟེན་གསུམ་དག་སྒྲོལ་བར་བྱེད། །གཉིས་མེད་བདེ་ཆེན་ངང་ཉིད་ལས། །འཕྲིན་ལས་གྲུབ་པའི་རང་བཞིན་ཅན། །བཏང་སྙོམས་བཞུགས་པས་འགྲོ་བ་འདུལ། །ཀུན་ཏུ་ལས་ཀྱི་རྒྱལ་ལ་འདུད། །ཅེས་གཟུགས་རྡོ་རྗེ་ལ་སོགས་པ་ལ་སོ་སོར་ཡོངས་སུ་བསྟོད་དོ། །དེ་ནས་ཡང་ཐམས་ཅད་ཀྱི་བདག་པོས་ལེགས་སོ་ཞེས་བྱ་བ་བྱིན་ཏེ། ལྷ་མོ་རྣམས་ཀྱི་སྐུ་ལ་བཏུད་དེ། གདུག་པ་འཇིགས་པའི་ཡི་གེ་ནི། །བཅུ་བཞི་པ་ལ་དམིགས་པ་ཡང ། །འཁོར་བར་དམིགས་པར་བྱ་བ་འམ། །ཉི་མའི་སྟེང་ན་སྐྱེས་ 384a ༄#། །པ་ལྟར། །དམིགས་ཏེ་མ་ཡེངས་བརྗེད་པ་མེད། །བཟླས་པ་ཉིད་ནི་དེ་ལྟར་བྱ། །བྱེ་བ་ཚང་བར་བཟླས་པ་ཡིས། །རབ་འབྱམས་ལས་ལ་མི་འགྲུབ་པ། །མེད་དེ་དེ་ཡིས་ཐམས་ཅད་འགྲུབ། །འབུམ་དང་ས་ཡ་བཟླས་པས་ཀྱང ། །ཕྲ་མོའི་ལས་རྣམས་འགྲུབ་པར་བྱེད། །གཞན་དུ་མི་འགྲོའི་སེམས་ཀྱིས་ནི། །དེ་ལྟའི་ཚུལ་དུ་བཟླས་པ་བྱ། །ཡུལ་གཞན་བློ་ནི་འགྲོ་བ་ཡིས། །བསྐལ་པར་བཟླས་ཀྱང་འབྲས་མི་འབྱིན། །མི་འཕྲོ་སེམས་ཀྱིས་འདི་བཟླས་ཤིང ། །ལམ་དུ་ཞུགས་པའི་སྐྱེས་བུ་ལ། །སྟག་སོགས་ཆུ་ཡིས་མི་འཇིགས་སོ། །དེ་ནས་ཡང་དག་བཤད་བྱ་བ། །དབང་གིས་བློ་སྦྱངས་རབ་ལྡན་པས། །འབྲས་ཐོབ་དེ་མེད་མི་འགྲུབ་སྟེ། །དེ་བས་དེ་ནི་བཤད་པར་བྱ། །བུམ་པའི་དབང་གིས་ཐོག་མར་སྦྱང ། །གསང་བའི་དབང་གིས་གཉིས་པར་སྟེ། །གསུམ་པར་བྱ་བ་དེ་ཉིད་ནི། །ཤེས་རབ་ཡེ་ཤེས་དེ་ཡིན་ཏེ། །དེ་ལྟར་དེ་བཞིན་པ་ཡིན། །བརྟན་གཡོ་དངོས་པོ་མ་ལུས་པ། །བསྒོམ་པར་བྱ་བའི་དུས་ཉིད་ལ། །བློས་ནི་ཡོངས་སུ་མི་སྒོམ་སྟེ། །ཀུན་གྱི་མཚན་ཉིད་མ་ཤེས་ན། །སྒོམ་པ་ཁོ་ན་དེ་མིན་ཏེ། །ཐམས་ཅད་དངོས་ཉིད་ཡོངས་ཤེས་ན། །དེ་ནི་སྒོམ་པར་ཡོངས་སུ་བསྒྲགས།། དེ་ཉིད་བླ་མའི་ཁ་ཡིས་ཏེ། །འབད་པས་མཉས་བྱ་དེ་མི་སྨད། །དེ་ལ་ཐམས་ཅད་འབྱུང་བ་སྟེ། །བླ་མ་ལ་སྨད་གཡོ་སྒྱུ་ཅན། །ངེས་པར་དེ་ནི་དུག་དང་ཡང ། །གདོན་ཆེན་དག་ནི་མ་ 384b ལུས་པས། །འཆི་ཞིང་བརླགས་པར་དེ་གྱུར་ནས། །དམྱལ་བ་དག་ཏུ་ཡུན་རིང་ལྟུང ། །བསྐལ་པ་དུ་མར་སྡུག་བསྔལ་ཏེ། །རྟག་ཏུ་ཆོ་ངེས་འདེབས་པར་བྱེད། །དེ་པས་བློ་གྲོས་ཆེན་པོ་ལ། །ནམ་དུའང་མི་སྨད་གཞན་དུ་ན། །བཀུར་སྟི་ཕུ་དུད་འགྲོ་བ་ལ། །ཕན་པའི་སེམས་ཀྱིས་དེ་ལྟར་བྱ། །གཞན་ཡང་བསྒོམ་པར་བྱ་བ་ཉིད། །གང་དག་དབང་པོའི་ལམ་འགྲོ་བ། །དེ་དེའི་ངོ་བོར་བདག་གིས་བྱ། །བསམ་གཏན་མི་བྱེད་དེ་བློ་ཡིས། །ཀུན་ཏུ་བློ་ཡིས་བསྒོམ་པར་བྱ། །བཅོམ་ལྡན་བདག་པོ་ཆེན་པོ་ཡིས། །གསང་དབང་ལག་ན་རྡོ་རྗེ་ལ། །བོས་ནས་གསང་བའི་དབྱངས་འདི་གསུངས། ། གཟུགས་སྒྲ་ལ་སོགས་དྲུག་པོ་རྣམས། །དངོས་མེད་མཁའ་དང་འདྲ་བ་ལས། །ལོངས་སྤྱོད་ཡུལ་དུ་དུ་མར་སྣང ། །ཤེལ་ལ་ཚོན་ནི་ཇི་བཞིན་དུ། །འདོད་པ་ལྔ་དང་ཆོས་རྣམས་ལ། །རྟག་ཏུ་རྣལ་འབྱོར་སྤྱོད་པར་ཤོག་། ལ་ལ་ཧོ། །རོལ་དུ་གསོལ། བསྣམས་པར་མཛོད། མི་འཛིན་སྒྱུ་མ་ལྟ་བུ་ལ། །གར་གྱིས་དགྱེས་པའི་རོལ་པ་མཛོད། །རིག་བྱ་དགག་པ་མེད་པ་ལ། །མི་གཡོ་བཞིན་དུ་རོལ་པར་མཛོད། །ཧོ། ཆགས་པ་མེད་པས་ཆགས་པར་མཛོད། །དེ་ནས་ཡང་དག་རབ་བཤད་པ། །སྔགས་དང་ཕྱག་རྒྱ་དབང་བསྐུར་བའི། །དེ་ཡི་མཚན་ཉིད་བཤད་པའི་ཕྱིར། །གསུང་ནི་འདི་སྐད་བཀའ་སྩལ་ཏོ། །ལྕེ་ལ་སྒོམ་པའི་རྡོ་རྗེ་ནི། །རྡོ་རྗེ་གནོད་མཛེས་ནག་པོ་སྟེ། །ཁ་ནི་ཀུན་ཏུ་གྱེས་པ་ཡི། །ལག་གཉིས་ཐལ་མོ་ངེས་སྦྱར་ཏེ། །གུང་མོའི་རྩ་བའི་ཚིགས་ཉིད་ལ། །མཐེ་ 385a ༄#། །བོང་ངེས་པར་སྦྱར་བར་བྱ། །མཛུབ་མོ་གུང་མོའི་རྒྱབ་རྩེར་སྦྱར། །འདི་ནི་དམ་ཚིག་ཕྱག་རྒྱ་སྟེ། །སྙིང་ག་དཔྲལ་བ་ལྐོག་མ་དང ། །སྤྱི་བོར་བྱིན་གྱིས་བརླབས་པར་བྱ། །ོཾ་ཧྲའིཿ ་ཥྚཱིཿ ་ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཨ་དྷི་ཏིཥྵ་སཝཱ་མཱཾ། གཞན་ཡང་རྡོ་རྗེ་སེམས་མ་སོགས། །ཕྱག་རྒྱས་དབང་བསྐུར་དབུ་རྒྱན་བརྟག་།གཏི་མུག་རྡོ་རྗེ་ལ་སོགས་པ། །སོ་སོའི་བདག་པོ་དབུ་བརྒྱན་ཅིང ། །དབང་བསྐུར་ཚེ་ན་བུམ་པ་ཆེ། །ཕྱག་གིས་བསྣམས་ཏེ་དབང་བསྐུར་རོ། །འཁོར་ལོ་ལས་ཀུན་བྱེད་པ་ལ། །གསང་དབང་ལག་ན་རྡོ་རྗེ་ཡིས། །བསྟོད་པའི་རྒྱལ་པོ་འདི་ཡིས་བསྟོད། །གདུག་པ་སྐྲག་བྱེད་འཁོར་ལོ་མེ་ལྟར་འབར། །དུས་གསུམ་ཁྲོ་རྒྱལ་ཧེ་རུ་ཡི་ཐུགས། །ལས་རྣམས་དག་བྱེད་ཕྲག་དོག་རྡོ་རྗེ་སྟེ། །མ་ལུས་ཚེམས་གཅོད་གསོལ་བས་སྐུ་ཡི་དང ། །ཧཱུཾ་དང་ཕཊ་ཀྱི་གདུག་རྩུབ་སྦྱོར་བས་གསུང ། །ཀུན་གྱི་རང་བཞིན་ཁྱོད་ཀྱིས་གཤིན་རྗེ་ཡི། །ལྟོར་འཛུད་བཀའ་ལས་དེས་ཀྱང་མི་འདའ་ཞིང ། །ཕྱོགས་བཅུའི་སྤྲུལ་པས་གནས་ན་འགུགས་མཛད་པ། །མ་ལུས་ཀུན་བྱེད་འཁོར་ལོ་ཆེ་མཆོག་ལ། །གཞན་གྱི་དོན་རྫོགས་གུས་པས་ཕྱག་འཚལ་ལོ། །ཁྱོད་ནི་དཔའ་བོ་ཐུབ་ཆེན་ཀུན་གྱི་བདུད། །ང་ཡིས་ལམ་བསྟན་བདུད་རྣམས་མི་ཕྱེད་ཀྱང ། །དམ་ལས་འདའ་ཞིང་ལོག་པ་ཀུན་སྐྱེད་ལ། །ཁྱོད་ཀྱང་བཀའ་ལས་མ་འདའ་ལས་རྣམས་སྒྲུབས། །ཚེ་དང་སྲོག་བསྡུས་ 385b ཡན་ལག་རྣམ་པར་བཅིངས། །བདུད་རྩི་ཆུ་རྒྱུན་རྣལ་འབྱོར་ངལ་ལ་འདོད་བསྒྲུབ་ན། །ངས་ནི་སྦྱིན་བྱ་ཁྱོད་ནི་དམ་ལས་མ་འདའ་ཟྮིག་།ཅེས་དཔལ་གཤིན་རྗེ་དགྲ་ནག་པོའི་འཁོར་ལོ་གཞན་གྱི་ལྟོ་བ་ལ་གནས་འཆའ་བར་འདོད་པའི་གཏན་འཕོ་བ་མ་ཡིན་པའི་ཚེ་བྱའོ། །འཁོར་ལོ་སྙིང་གར་ལྟ་བའི་ཚེ། །ས་བོན་ཚུལ་ཏེ་ལྟེ་བ་ལ། །ཡི་གེ་མ་ལུས་འདོད་པ་ཡང ། །མཚན་ཉིད་ངན་པའི་རྟོག་པ་ལས། །གྲོལ་ཏེ་མཐའ་གསུམ་ངོ་བོ་ལས། །ཀྵ་ནི་ཟད་པའི་བདག་ཉིད་ལ། །ུ་ནི་ཧཱུཾ་གི་བདག་ཉིད་དེ། །དེ་ནི་སེམས་ཀྱི་རང་བཞིན་ཉིད། །དགའ་ལས་འདས་པའི་ཡེ་ཤེས་ཏེ། །ཐབས་ནི་ཤེས་རབ་ལྡན་པ་ལས། །དུས་ཐབས་བསྟེན་པའི་བདག་ཉིད་ཀྱིས། །འཐོབ་སྟེ་གཞན་དུ་དེ་མི་འཐོབ། །ཆུ་འགྲམ་ཆེན་པོས་བས་མཐའ་དང ། །དུར་ཁྲོད་ཤིང་དྲུང་དགོན་པ་སྟེ། །དབེན་པའི་ཡུལ་དང་མོའི་ཁྱིམ། །དེར་ནི་མགོན་པོ་འདི་ལ་འབད།། གཞན་དུ་བསྒྲུབ་ཀྱང་དེ་མི་འགྲུབ། །སྐད་ཅིག་དེ་ལ་རང་བཞིན་ཀུན། །ངེས་པར་མི་སྣང་རིག་པ་ཡི། །ལམ་དུ་གྱུར་པ་མེད་པར་ཤེས། །འབྲས་བུ་དེ་ནི་རྒྱ་ཆེན་ཏེ། །མཐའ་ཡི་འཐོབ་པ་ད་ཡིན་ནོ། །དེ་ནས་ཡང་ཐམས་ཅད་ཀྱི་བདག་པོ་བདེ་བར་གཤེགས་པས་རྡོ་རྗེ་ཆོ་ག་གསུངས་པ་ནི། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྲུང་བའི་དཀྱིལ་འཁོར་རབ་གནས་པས། །སྡང་བའི་ལོག་ 386a ༄#། །འདྲེན་སྐྱེ་བོ་དང ། །བགེགས་རྣམས་བསལ་བ་འདི་སྐད་གསུངས། །དཔལ་ལྡན་བདག་ནི་རྡོ་རྗེ་འཛིན། །སྲུང་བའི་འཁོར་ལོ་རབ་སྦྱོར་བས། །བདག་གིས་ཡེ་ཤེས་རྡོ་རྗེ་ཡིས། །ལུས་ངག་ཡིད་དུ་བཅས་པ་དག་།སངས་རྒྱས་ཀུན་གྱི་བདག་ཉིད་ནི། །ཁྲོ་བོ་གཤིན་རྗེ་ནག་པོའི་བདག་།སློབ་དཔོན་གྱི་ནི་དཀྱིལ་འཁོར་བྲི། །ཞེས་ལན་གསུམ་གྱི་བར་དུ་བརྗོད་པར་བྱའོ། །དཀྱིལ་འཁོར་གྱི་ནི་དྲུང་ཉིད་དུ། །དར་གྱིས་གདོང་ནི་བཀབ་པ་ལ། །སྒོ་དྲུང་གནས་པ་ཁྱོད་གང་ཡིན། །སློབ་དཔོན་གྱིས་ནི་རབ་བརྗོད་དོ། །དེ་བདག་སྐལ་པ་ལྡན་པར་བརྗོད། །ཇི་ལྟར་བླ་མེད་དཔའ་བོ་ཡིས། །མགོན་ལ་དབང་ནི་བསྐུར་བ་བཞིན། །བླ་མེད་བྱང་ཆུབ་གནས་བྱའི་ཕྱིར། །བདག་ལའང་མགོན་པོས་དབང་བསྐུར་གསོལ། །མེ་ཏོག་སོགས་ཏེ་མཆོད་པའི་མཆོག་།རབ་འབྱམས་རྒྱ་མཚོ་མ་ལུས་པས། །སློབ་དཔོན་དཔའ་བོ་དེ་ཉིད་ལ། །ཡང་ཡང་མཆོད་ཅིང་བསྟོད་པའི་ཚོགས། །རྒྱས་པར་མཉེས་བྱ་དེ་འོག་ཏུ། །དཔའ་བོས་དེ་ལ་དབང་རྣམས་སྦྱིན། །དེ་ནས་རྒྱལ་པོ་བདེ་ཆེན་པོ། །དཔའ་བོ་ལོངས་སྤྱོད་ཀུན་ལྡན་པ། །འགྲོ་དོན་བརྩོན་པའི་སྐུ་གསུམ་བདག་།ཉིད་ཀྱིས་འདི་སྐད་བཀའ་སྩལ་ཏོ། །སྦྱིན་སྲེག་མེད་ན་འབྲས་མི་འབྱིན། །དེ་བས་བདག་ཉིད་དམ་པ་ཡིས། །དེ་ཡི་ལས་ལ་འབད་པར་བྱ། །གོས་ནག་རྒྱན་གྱིས་རྣམ་བརྒྱན་ལ། །གཤིན་རྗེར་རྣམ་བལྟས་རྣལ་འབྱོར་པས། །ཁྲོ་བོའི་ 386b སྐྱིལ་ཀྲུང་བཅས་པ་ཡིས། །སྲ་བའི་སྟན་ལ་བདག་འདུག་ནས། །ལས་རྣམས་བསྒྲུབ་པར་བྱ་བ་ནི། །མཚན་མོ་འམ་ཉི་མ་ཕྱེད་ཉིད་ལ། །རང་བྱུང་མེ་ཡི་དཀྱིལ་འཁོར་དུ། །ཧཱུཾ་ཕཊ་མཐའ་ན་ཡོད་བ་ཡི། །སྔགས་ཀྱིས་ཐོག་མ་བར་ཐ་མར། །སྦྱིན་སྲེག་བྱ་སྟེ་དེ་མེ་ནི། །དུར་ཁྲོད་མེ་འམ་རུས་པ་འམ། །རྡོ་ཉིད་ལས་ནི་བྱུང་བ་འམ། །ཙཎྜ་ལི་ཡི་ཁྱིམ་ཉིད་ནས། །ཐབ་ཁུང་གྲུ་གསུམ་ཅན་དེར་ནི། །ཚེར་མ་ཅན་གྱི་བུད་ཤིང་བརྫང ། །རླུང་ཡབ་སྦར་ཏེ་ཧཱུཾ་ཛྭ་ལ་རཾ། །ཛ་ལ་ཧཱུཾ་བརྗོད་མེ་སྦར་བརྗོད། །ལག་གཡས་ཀུ་ཤ་བཅས་པ་ཡིས། །མཐེ་བོང་སྲིན་ལག་རྩ་རུ་གཟུགས། །ོཾ་ཨེ་ཧྱེ་ཧི་མ་ཧཱ་བྷཱུ་ཏ་དེ་བ་རི་ཥི་དྭི་ཛ་སཏྟ་མ་གྲི་ཧི་ཏྭ་ཨ་ཧཱུཾ་ཏི་ཨ་ཧཱ་རཾ་ཨསྨ་ནི་སཾ་ནི་ཧི་ཏོ་བྷ་བ་ཞེས་བརྗོད་ལ་སྤྱན་དྲང་ངོ ། །འབར་བ་མེ་ཡི་དབུས་ཉིད་དུ། །མིང་དེ་ཟད་བྱེད་ཅེས་བྱ་བ། །ཁྲོ་བོ་མེ་ལྟར་ཕུན་སུམ་ཚོགས། །བ་སྤུ་ཁམ་པ་དེ་བཞིན་དུ། །དུ་མདོག་ཟུར་མིག་སྟེང་དུ་གཟིགས། །སྒྲ་ཆེ་མཆེ་བཞི་ལྡན་སྟོབས་ཆེ། །ཡཾ་ལས་རླུང་གི་དཀྱིལ་འཁོར་ཏེ། །བཞུགས་ནས་དྲག་པོའི་ཡི་གེ་བརྗོད། །སྤྱན་གསུམ་པ་ལ་ཕྱག་བཞི་པ། །རིག་པའི་གནས་ལ་ལེགས་པར་བཞུགས། །ཞལ་བདུན་རྣམ་གཙེགས་མ་ཧེ་ལ། །བཅིབས་པ་དུ་བའི་ཕྲེང་རྣམས་འཁྲིགས། །ཕྱག་གཉིས་མདུང་དང་རྡོ་རྗེ་འཛིན། །གཉིས་ཀྱིས་རལ་གྲི་གྲི་གུག་འཛིན། །དེ་ཡི་གཡས་ཀྱི་ཕྱོགས་ཉིད་དུ། །དེ་བཞིན་མདུན་གྱི་ཕྱོགས་ཉིད་དམ། །སྤྱན་དྲངས་བྱིན་རླབས་ལྡན་པ་ལ། །རྒྷཾ་སོགས་ཀྱིས་མཆོད་ 387a ༄#། །པ་བྱ། །ོཾ་ཨརྒྷཾ་པྲ་ཏཱི་ཙྪ་སཝཱཧཱ། ལག་གཡས་མཛུབ་མོ་མཐེ་བོང་དག་།སྐམ་པ་ལྟ་བུར་རྣམ་བྱས་པས། །ཆུ་བླངས་བསྐྱོད་པས་དབུལ་བར་བྱ། །ོཾ་བ་ཏྱཾ་མཐར་ནི་སྔོན་གྱི་བརྗོད། །ཞབས་བཀྲུ་བ་ལ་ཤིས་པ་ཡིན། །དགང་གཟར་ཡུ་བ་སོར་བཅུ་དྲུག་།དེ་མིན་སོར་བཞི་ཟབས་སོར་གཉིས། །ཟུར་གསུམ་དབུས་སུ་སོར་གཉིས་ཚད། །རྩེ་གསུམ་ཕྲེང་བས་ཡོངས་སུ་བསྐོར། །དེ་ཡི་དབུས་སུའང་མཚན་མ་སྟེ། །སྟག་སྦྲུལ་གང་འདོད་པས་མཚན་བྱ། །ཁུ་བཅུད་འཛག་པ་སོར་གཅིག་གོ་།ཁྲོ་བོ་རྡོ་རྗེ་མཆུ་ཡི་དབྱིབས། །བྱིན་རླབས་སོར་གཅིག་ཚད་ཅན་ནོ། །བླུགས་གཟར་ཡུ་བ་སོར་བཅུ་བཞི། །ཟབས་སུ་སོར་གཅིག་གྲུ་གསུམ་དང ། །ཡུ་བའི་མཐར་ནི་རྩེ་གསུམ་པ། །གདེངས་པ་བྱིན་རླབས་མངོན་སྤྱོད་ཀྱི། ། གཟར་བུ་ཡིན་པར་ང་ཡིས་བསྟན། །གནམ་ལྕགས་ཚེར་མ་ཅན་སོགས་ཤིང ། །དེ་ལ་དེ་བྱས་སངས་རྒྱས་འཇིགས། །བསྲེག་རྫས་གཟུགས་བརྙན་ལ་སོགས་སྲེག་།སྟོང་དུ་ཚང་བས་འབྲས་བུ་ནི། །ངེས་པར་འབྱིན་པར་བྱེད་པ་ཡིན། །གཡོན་གྱི་རྩ་དེར་དགང་གཟར་ལ། །གཡས་པ་བླུགས་པའི་གཟར་བུ་ཡིན། །ཁ་ནི་པདྨའི་འདབ་མ་ཡིན། །སོར་མོ་གཉིས་པར་དེ་རྒྱས་སོ། །རྡོ་རྗེ་བར་གྱི་ཐོད་པ་དག་།བསྲེག་རྫས་ཀྱི་ནི་སྣོད་ཡིན་ལ། །རྫས་རྣམས་རྡོ་རྗེ་རིན་ཆེན་དཔའ། །ཧཱུཾ་ཕཊ་ཀྱི་ནི་མཐའ་ཅན་གྱིས། །བསྲེག་བྱ་ས་ཆུ་མེ་དང་རླུང ། །ནམ་ 387b མཁའ་ལྟ་བུའི་དབུས་སུ་གནས། །ཁ་བྱེ་གནས་པ་རྟག་ཏུ་འོ། །ཀུན་ཏུའང་ཁ་བྱེ་བསྐོར་བར་བྱ། །བཞི་གཉིས་འདབ་མའི་སྟེང་དུ་སྟེ། །ལྟེ་བ་དང་ནི་ཡང་དག་ལྡན། །ལྷན་ཅིག་རྣམ་པར་ཤེས་པའི་ལྷ། །ནམ་མཁའི་ཉིད་དུ་ངེས་པར་འབར། །དེ་ཡི་མཚན་མར་ཤེས་བྱ་བ། །རྡུལ་གྱི་རྣམ་པར་དེ་ཉིད་དོ། །ཐིག་ལེ་ཡི་གེ་མེད་པ་སྟེ། །རྒྱུན་མི་འཆད་པར་འོད་ཀྱིས་གནས། །བརྒྱར་བཤགས་སྐྲ་ཡི་ཚད་ཀྱིས་སོ། །རྐས་རབ་ཏུ་སྦར་བར་བྱ། །སྔར་གསུངས་འབྱུང་བ་རྣམ་བཞི་དང ། །ནམ་མཁའ་ཡང་དག་ལྡན་པ་ཡིས། །སོར་མོ་ལྔ་དང་ངེས་ལྡན་པས། །གང་གི་སྦྱིན་སྲེག་དེས་བྱའོ། །གཞན་དག་སོར་མོ་གསུམ་གྱིས་བསྲེས། །དམིགས་པ་ཐམས་ཅད་འགགས་པར་འགྱུར། །རྟེན་མེད་སྟོང་པ་ནམ་མཁའ་འདྲ། །ཤེས་རབ་ཕ་རོལ་ཕྱིན་པ་ཡི། །ཕྱག་རྒྱ་ཆེན་པོ་དབང་དུ་འགྱུར། །བདེ་གཤེགས་ཀུན་དང་མཉམ་འགྱུར་བ། །ཤེས་རབ་དང་ནི་སྙིང་རྗེ་ཆེས། །འགག་པ་མེད་པའི་ཆོས་འགྱུར་རོ། །བདེ་ཆེན་ནམ་མཁའ་ལྟ་བུ་སྟེ། །རྣལ་འབྱོར་པ་ཡི་དམིགས་པ་ཡིན། །མདོག་ནག་འདབ་བརྒྱད་ལྟ་བུ་ལ། །རྒྱ་དང་ཟབས་སུ་སོར་མོ་ནི། །ཉི་ཤུ་དེ་བཞི་བཅུ་པའི་ཐབ། །བྱང་དུ་རྩེ་མོ་བསྟན་པ་ལ། །རྡོ་རྗེ་ཐོ་བའི་མཚན་མ་དེ། །སོར་ནི་བཞི་པར་བྲི་བར་བྱ། །དེ་སྟེང་སོར་མོ་གསུམ་བོར་བར། །ཁ་ཁྱེར་ཀྱང་ནི་དེ་ཡི་ཚད། །ས་ནག་བོང་བུ་རྔ་མོའི་སྤངས། །མི་རུས་འབྲས་ཀྱི་ཕུབ་མ་དང ། །སོལ་བའི་ཕྱེ་མས་རྣམ་བྱུགས་ལ། །མི་ཞིམ་དྲི་ 388a ༄#། །དང་བདུག་པས་མཆོད། །དུར་ཁྲོད་ཤིང་ངམ་བོང་བུ་དང ། །རྔ་མོའི་སྦང་བསྐམས་བུད་ཤིང་ངོ ། །སོར་གཅིག་གིས་ནི་དམའ་བ་ཡིན། །ནིམ་པ་དེ་བཞིན་སེང་ལྡེང་དང ། །སེ་བ་དེ་བཞིན་བསེ་ཤིང་དང ། །དུར་ཁྲོད་ཤིང་བུ་སོར་བཅུ་པ། །རྩ་བའི་ཆ་ལས་རྣམ་བྱུང་བ། །དུར་ཁྲོད་མར་ཁུ་རྣམས་བསྙུགས་ལ། །དེ་ཡིས་ཡམ་ཤིང་བྱ་བ་ཡིན། །བྱ་རོག་འུག་པའི་གཤོག་པ་དང ། །ནིམ་པའི་འདབ་མ་ཐལ་བ་དང ། །རྐང་རྗེས་ས་དང་བོང་བུ་དང ། །རྔ་མོ་སོགས་ཀྱི་སྦང་དང་ནི། །སྐྲ་དང་ཞག་དང་བཤད་པ་དང ། །གཅི་བ་མི་རུས་ཡུངས་ཀར་དང ། །ཡུངས་མར་ཁྲག་དང་ལན་ཚཝ་དང ། །དེ་ལ་སོགས་པ་རེ་རེ་ཞིང ། །ཇི་ལྟར་རྙེད་པའི་རྫས་རྣམས་ནི། །དུག་དང་ཁྲག་དང་སྨྱོ་བྱེད་ཀྱི། །འདབ་ཁུ་ཐལ་བ་སོལ་བ་དང ། །འབྲས་ཀྱི་ཕུབ་མ་ལ་སོགས་ལ། །དགྲ་བོ་དག་གི་གཟུགས་བྱས་ལ། །མགོ་ནས་བརྩམས་ཏེ་རལ་གྲི་ཡིས། །དུམ་བུར་གཏུབ་ཅིང་ལྕགས་ཕོར་དུ། །ཁྲག་དང་ཆུ་དང་མི་རྣམས་དང ། །བོང་བུའི་གཅིན་ལ་ཕཊ་ལྡན་པའི། །གདུག་པའི་ཡི་གེ་རྣམས་བཟླས་པའི། །རྫས་ལ་གསང་གཏོར་བྱས་ནས་ཀྱང ། །སློབ་དཔོན་ལ་སྡང་རྨོངས་པ་འདི། །བརྗོད་ཅིང་སྦྱིན་སྲེག་དབུལ་བར་བྱ། །དེ་ལ་འདི་སྐད་ཅེས་བྱ་སྟེ། །འབྱུང་བ་ཚིམ་བྱ་གཏོར་མ་དང ། །བསྟོད་བཟླས་མཉེས་པར་བྱ་བ་དང ། །དབང་གི་དབྱེ་བ་བསྟན་པ་དང ། །དཀྱིལ་ 388b \?\་འཇུག་པར་བྱ་བ་དང ། །དེ་ཡི་ས་ལ་མཆོད་པ་སོགས། །ཅོད་པན་དུ་ནི་བདེ་གཤེགས་བཞག་།མངོན་སྤྱོད་ཧོམ་གྱི་ཆོ་ག་དང ། །བསྡུས་ནས་བར་དུ་རྣམ་པ་བརྒྱད། །པདྨ་དཀར་འདྲ་མགྲིན་པ་རིང ། །གཟུགས་མཛེས་ཧ་ཅང་རིང་བ་མིན། །ལུས་ལ་རྡུལ་འབྱུང་ཡིད་འཕྲོག་མ། །དྲི་ནི་ཤིན་ཏུའང་ཞིམ་པ་ཡིན། །ལྟ་སྟངས་མིག་སོགས་རི་དྭགས་འདྲ། །མགྲིན་དང་ལྟོ་བའང་རི་དྭགས་ཀྱི། །སྐལ་བཟང་རྐེད་པའང་རི་དྭགས་ཀྱི། །གླང་ཆེན་དྲི་ལྡན་བཞིན་འཕེལ་ཆེ། །མྱོས་ཤིང་ནུ་མ་རབ་ཏུ་རྒྱས། །གཞན་ཡང་ཀུན་རྫོབ་བདེན་པ་ནི། །བོང་ཐུང་དེ་ཡི་སྐྲ་ཡང་ཐུང་།། རྐང་ལག་རིང་ཞིང་བཞིན་རིང་མ། །ཉ་ཡི་དྲི་བྲོ་བོང་རིང་མ། །ཟླ་འདྲ་སྐྱེ་གནས་རབ་ཏུ་རིང ། །སྐྱེས་གནས་ཆུང་ཞིང་ཡན་ལག་རྩུབ། །བོང་རིང་དེ་བཞིན་ནུ་མ་མཁྲང ། །སྐྲ་སྲབ་དལ་སྨྲ་ཡན་ལག་ཆུང ། །སྔོ་བསངས་རི་མོ་མཉམ་པ་དེ། །གསང་བ་ཤེས་རབ་རྣམ་གཉིས་ལ། །རིག་མར་ང་ཡིས་བསྒྲགས་པ་ཡིན། །ངང་པའི་འགྲོས་ཅན་སྐྲ་འཁྱིལ་མ། །བཞིན་ཟླུམ་ནུ་རྒྱས་ལུས་ཀྱང་རྒྱས། །ཤིན་ཏུ་རིང་མིན་དལ་བར་སྨྲ། །དབུས་ནས་རྣ་འཕྱང་གཉེར་གསུམ་ཅན། །མཚན་ཉིད་ངན་ཞིང་ལེ་ལོ་ཆེ། །ཡན་ལག་ནག་ཅིང་སྐྲ་འཁྱིལ་མ། །ཁང་པར་གནས་ཤིང་ལུས་རྩུབ་མ། །སཱ་ལའི་དྲི་འབྱུང་སཱ་ལའི་བྲོ། །ནུ་སྤངས་དེ་ནི་སྐྱེས་བུ་བཞིན། །ཆང་གིས་མྱོས་པའི་དཔའ་མོ་སྟེ། །ཆང་ལ་ཤིན་ཏུ་ཆགས་པ་ཡིན། །དེ་གཉིས་དེ་ལ་ཤིས་པ་ཡིན། །ཐ་མ་ཐ་མར་ 389a ༄#། །ངེས་པར་ཡིན། །འཆི་བའི་བསམ་གཏན་དེ་ཉིད་ནི། །བདེ་བ་དམ་པར་ཁོ་བོས་འདོད། །འདི་ལའང་བདེ་བ་དེ་ཉིད་ཡིན། །ཀ་སོགས་སྤངས་པའི་ཨཱ་ལི་ནི། །བཅུ་དྲུག་ཡིན་ཏེ་ཕྲག་གཉིས་པོ། །འཁོར་ལོ་སོགས་པའི་ས་བོན་ཡིན། །ཟླ་བ་དེ་དག་སུམ་ཅུ་གཉིས། ། སོགས་སྤངས་པའི་ཀཱ་ལི་སྟེ། །བཅུ་བདུན་གཉིས་པ་དེ་སྟེང་དུ། །ཡ་སོགས་སྤངས་པ་མིན་པ་ཉིད། །གསུམ་པའི་གསུམ་དང་བཞི་པའི་གཉིས། །བཅུ་ཕྲག་བཞི་སྟེ་དེ་ཕྲག་གཉིས། །སེན་མོ་ཟངས་སོགས་ས་བོན་ཏེ། །ཉི་མར་རྣམ་བསྒྲགས་དེ་དབུས་གནས།། ཧཱུཾ་དང་ཨ་ཡི་རང་བཞིན་ལས། །རྡོ་རྗེ་ཐོ་སོགས་སོ་སོར་རྟོག་།ཐིམ་པས་ནན་ཏན་ཡེ་ཤེས་ཏེ། །ཆོས་ཀྱི་དབྱིངས་ཉིད་དག་པ་སྟེ། །གཤིན་དགྲར་བདག་ཉིད་འདོད་པ་ཡིན། །རྒྱན་གྱི་བྱེ་བྲག་ལུས་ལ་གནས། །དེ་ནི་འདི་སྐད་བྱ་བ་སྟེ། །རིག་པ་ཤེས་རབ་བསྟན་པ་དང ། །སྐྱེད་པའི་རྒྱུ་ཡི་བྱེ་བྲག་ནི། །ཐ་མར་བསྟེན་ཏེ་སྔོམ་གསུམ་མོ། །མཚོན་པར་བྱེད་པའི་བདག་ཉིད་དེ། །མཚོན་བྱ་སྔོན་བསྟན་ཉིད་ཡིན་ནོ། །གཤིན་རྗེ་གཤེད་ནག་པོའི་ལས་ཐམས་ཅད་གྲུབ་པར་བྱེད་པའི་འཁོར་ལོའི་རྒྱུད་ཀྱི་རྒྱལ་པོ་ཆེན་པོ་རྫོགས་སོ།། །།པཎྜི་ཏ་བྷ་རོ་ཕྱག་རྡུམ་གྱི་ཞལ་སྔ་ནས་རཝ་རྡོ་རྗེ་གྲགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། |