༄##། །རྒྱ་གར་སྐད་དུ། སརྦ་ར་ཧ་སྱོ་ནཱ་མ་ཏ་ནྟྲ་རཱ་ཛཱ། བོད་སྐད་དུ། ཐམས་ཅད་གསང་བ་ཞེས་བྱ་བ་རྒྱུད་ཀྱི་རྒྱལ་པོ། བཅོམ་ལྡན་འདས་ཡེ་ཤེས་སེམས་དཔའ་ལ་ཕྱག་འཚལ་ལོ། །འབྱུང་ལྔ་ཉིད་ཀྱིས་ལྔ་ཡི་བདག་ཉིད་ཅན། །མི་རྣམས་ལུས་ལ་ངེས་པར་མཐོང་བ་དག་།རང་སེམས་རབ་ཏུ་བསྒོམ་པར་གྱུར་ན་ནི། །དངོས་དེར་བསྒོམས་པས་ངེས་པར་སངས་རྒྱས་འགྱུར། །རང་ཤེས་གསང་བ་དམ་པ་ནི། །སངས་ 2a ༄##། །རྒྱས་ཡེ་ཤེས་བླ་མེད་དེ། །གཉིས་མེད་གཉིས་ཀྱི་ཚུལ་ཅན་ཏེ། །སངས་རྒྱས་རྟག་པར་རབ་ཏུ་འདུད། ། ཡང་དག་བདག་མེད་ལས་བྱུང་ཞིང ། །གཉིས་མེད་ཡེ་ཤེས་ལས་བྱུང་བ། །སྡུག་དང་མི་སྡུག་རྣམ་སྤངས་པ། ། ཅི་ལའང་ཕྱག་ནི་མི་འཚལ་ཏོ། །མ་སྐྱེས་པ་ནི་ཡང་དག་བསྐྱེད། །སྐྱེས་པའི་འོག་ཏུ་རྟག་པར་ནི། །སངས་རྒྱས་སྐུར་ནི་སྒོམ་པ་དང ། །རང་གི་ཡེ་ཤེས་མཆོག་ཕྱག་འཚལ། །རྣལ་འབྱོར་པ་དང་སེམས་ཅན་ཀུན། །མ་སྐྱེས་པ་ནི་ཡང་དག་སྐྱེ། །སྐྱེས་པའི་འོག་ཏུ་རྟག་པར་ནི། །ཉོན་མོངས་བག་ཆགས་ཀྱིས་སུན་འབྱིན། །ལུས་ཅན་རྣམས་ནི་འཁོར་གྱུར་པ། ། 2b སྡུག་དང་མི་སྡུག་རྣམ་འབྱེད་ཡིན། །སེམས་གང་དེ་ཉིད་སྡུག་བསྔལ་ཏེ། །སེམས་ཅན་རྣམས་ཀྱི་ལུས་འབྱུང་ངོ ། །སེམས་དེ་ཡི་ནི་རྒྱུན་ཉིད་ཀྱིས། །འགྲོ་བ་སྡུག་བསྔལ་གནོན་པར་འགྱུར། །རྣམ་པར་སྣང་མཛད་རྒྱལ་བ་མགོན། །སངས་རྒྱས་ཐམས་ཅད་བསྡུས་གཅིག་པུ། །སངས་རྒྱས་ཐམས་ཅད་རྟོགས་གྱུར་པ། །སངས་རྒྱས་འཁོར་བ་སྒྲོལ་བ་པོ། །སེམས་ཅན་ཀུན་ལ་ཕན་པའི་ཕྱིར། །ཐུགས་རྗེའི་ཉམས་དང་ཡང་དག་ལྡན། །རྒྱུ་ཡི་དེ་ཉིད་མཉམ་སྦྱོར་བས། །འབྲས་བུའི་དེ་ཉིད་རྣམས་ཀྱང་སྟོན། །འབྲས་བུའི་དེ་ཉིད་ཡང་དག་ཞུགས། །རྒྱུ་ཡི་དེ་ཉིད་མི་འདོད་དོ། །གང་དུ་འདོད་པ་སྐྱེས་གྱུར་པ། །དེ་ཉིད་འཁོར་བའི་བག་ཆགས་ཡིན། །མཁས་པ་ཡི་ནི་ཆོ་ག་ཡིས། །བསྒོམ་པ་རུ་ནི་ཡོངས་སུ་བཏགས། །གང་ཞིག་སླར་ཡང་གཅིག་གྱུར་པ། །རྣལ་འབྱོར་པ་ཡི་རྣལ་འབྱོར་བྱུང ། ། 3a ༄#། །སངས་རྒྱས་རྗེས་དྲན་ལ་དམིགས་ཤིང ། །ཆོས་ནི་རྗེས་སུ་དམིགས་པ་ཡི། །ཚོགས་གཉིས་ཀྱི་ནི་སྦྱོར་བ་ཡིས། །རྐང་གཉིས་དམ་པ་ཉིད་དུ་འགྱུར། །བྷ་གར་ལིང་ག་རབ་བཞག་སྟེ། །སངས་རྒྱས་སྐུར་ནི་རྣམ་པར་བསྒོམ། །སངས་རྒྱས་རྗེས་དྲན་རྣལ་འབྱོར་པ། །སངས་རྒྱས་སྤྲིན་ནི་བསྒོམ་པར་བྱ། །བྷ་གར་ལིང་ག་རབ་བཞག་སྟེ། །རྡོ་རྗེ་ཆོས་ནི་རྣམ་པར་བསྒོམ། །ཆོས་ནི་རྗེས་དྲན་རྣལ་འབྱོར་པ། །ཆོས་ཀྱི་སྤྲིན་ལས་ཆར་རབ་འབེབས། །མཚན་མ་ལིང་ག་ཞེས་བཤད་དེ། །ཕྱག་རྒྱས་མཚན་མ་རྣམ་པ་བཞི། །འཇོམས་པས་བྷ་ག་ཞེས་བཤད་དེ། །ཉོན་མོངས་འཇོམས་པའི་དམ་པ་ཡིན། །སེམས་ཅན་ཀུན་གྱི་དངོས་ཀུན་གྱི། ། རང་སེམས་ཆོས་ནི་བསྡུས་པ་ཡིན། །ཆོས་བདག་མེད་པའི་སྦྱོར་བ་ཡིས། །བསད་ན་རང་ཉིད་འཆི་བར་འགྱུར། །རང་གི་སེམས་ 3b ཉིད་རྫོགས་སངས་རྒྱས། །རྟོགས་པར་བྱ་བ་སེམས་ཉིད་ཡིན། །རང་གི་སེམས་ཉིད་གསང་བྱ་བ། །སེམས་ཉིད་ཁོ་ན་གསད་པར་བྱ། །སྦྱོར་བ་ཉིད་དང་ཡང་དག་འབྲེལ། །གང་ཡང་སྲིད་པ་འབྱུང་མ་ཡིན། །གང་ཚེ་སངས་རྒྱས་དེ་ཚེ་ནི། །སྦྱོར་ལྔ་སངས་རྒྱས་བདག་ཅེས་བསྒོམ། །ཏིང་འཛིན་ཡེ་ཤེས་ལས་བྱུང་བ། །སངས་རྒྱས་ཉིད་ཕྱིར་མདོར་བསྡུས་པས། །སངས་རྒྱས་རྣལ་འབྱོར་མེད་པ་ནི། །རྣལ་འབྱོར་པ་ནི་འཚང་མི་རྒྱ། །ཕྲ་མོའི་དངོས་པོ་ཇི་བཞིན་མཐོང ། །སྡུག་པའི་དངོས་པོར་དེ་བཞིན་ཏེ། །དངོས་དང་དངོས་མེད་ཁྱད་པར་ནི། །བསྒོམ་པ་ཀུན་ཏུ་བརྟགས་པ་ཡིན། །དངོས་པོ་བསྒོམ་པའི་དངོས་མ་ཡིན། །བསྒོམ་པར་བྱ་བ་བསྒོམ་པ་ཡིན། །དངོས་པོ་བསྒོམས་པར་གྱུར་པ་ཡིས། །རང་གི་སེམས་ནི་ཡོངས་སུ་སྦྱངས། །སངས་རྒྱས་སངས་རྒྱས་ཡུལ་མ་ཡིན། །སེམས་ཅན་ཡུལ་དུའང་མི་འགྱུར་གྱི། །རང་སེམས་རྟོགས་པས་སངས་རྒྱས་ཏེ། །སངས་རྒྱས་སངས་རྒྱས་རྟོགས་པས་མིན། །གཉིས་མེད་སྦྱོར་བ་འདི་ལ་ཡང ། །ཏིང་ངེ་འཛིན་གྱི་ཡེ་ཤེས་བརྟགས། རྒྱུ་ཡི་དེ་ཉིད་ཇི་ལྟར་མཐོང ། །འབྲས་བུའི་དེ་ཉིད་དེ་ཉིད་ཡིན། །རྒྱུ་ཡི་དེ་ཉིད་ཅུང་ཟད་མེད། །འབྲས་བུའི་དེ་ཉིད་དེ་བཞིན་ནོ། །དེ་ཉིད་དེ་ནི་དེ་བཞིན་ཤེས། །དེ་ཉིད་རྣལ་འབྱོར་པ་ཀུན་སྤྱོད། །རྒྱུ་ཡིས་རྒྱུ་ནི་དངོས་པོར་མིན། །འབྲས་བུའི་དངོས་པོར་འབྲས་བུས་ 4a ༄#། །མིན། །རྒྱུ་དེ་འབྲས་བུའི་དངོས་པོར་རུང ། །རང་གི་སེམས་ནི་སོ་སོར་རྣང ། །ཡེ་ཤེས་དེ་ནི་རྒྱུ་དངོས་ཏེ། །གསང་དེ་འབྲས་བུའི་དངོས་པོ་ཡིན། །གསང་བ་གཉིས་མེད་སྤྱོད་པ་ཡིས། །དེ་ཡིས་དངོས་པོས་མཆོག་ཡིན་ནོ། །དེ་ཉིད་དེ་ཉིད་རྟོགས་གྱུར་པ། །གསང་དེ་གསང་བའི་རྣལ་འབྱོར་བ། །གསང་བ་དེ་རིག་ཤེས་པ་སྟེ། ། མཆོག་ནི་མཆོག་གི་རྣལ་འབྱོར་པ། །སྡུག་པའི་ངོ་བོར་གང་བཤད་པ། །མི་སྡུག་པ་ཡང་དེ་ཡི་དངོས། །སྡུག་དང་མི་སྡུག་གཟུགས་གང་ཡིན། །མི་མཐོང་དེ་ནི་དེ་བཞིན་གཤེགས། །རྣམ་ཤེས་ཙམ་ནི་མེད་པ་རུ། །རྣལ་འབྱོར་རྣལ་འབྱོར་འབྱུང་མི་འགྱུར། །ཇི་ལྟར་ཡེ་ཤེས་མཆོག་དག་པ། །དེ་ལྟར་དག་པ་དེ་བཞིན་གཤེགས། །རྣམ་པར་ཤེས་པ་རྣམ་པ་བཞི། །ཕྱག་རྒྱ་བཞི་ཡི་ཆོ་ག་ཡིས། །གསང་བ་གཉིས་མེད་སྦྱོར་བ་ཡིས། །སྐུ་གསུང་ཐུགས་ནི་ཡང་དག་བྱུང ། །ཐུགས་ནི་ཕྱག་རྒྱ་ཆེན་པོ་སྟེ། །དམ་ཚིག་ཕྱག་རྒྱ་ཀུན་ཏུ་འགྲོ། །ཆོས་ཀྱི་ཕྱག་རྒྱ་གསུང་གི་སྟེ། །ལས་ཀྱི་ཕྱག་རྒྱ་སྐུ་ཡི་ཡིན། །རྒྱ་ཡིས་རྒྱས་བཏབ་དངོས་པོ་ནི། །གསང་བདག་གསང་བའི་རྣལ་འབྱོར་པའོ། ། རང་རིག་པ་ཡི་ངོ་བོ་ཡིས། །ཏིང་འཛིན་ཡེ་ཤེས་བརྟགས་པ་ཡིན། །ལུས་ངག་སེམས་སུ་རྣམ་བརྟགས་པའི། །བྱ་བ་རྒྱུད་དུ་རྣམ་བཏགས་པ། །གསང་བ་རྣམ་པ་གསུམ་ 4b དུ་བཤད། །རྡོ་རྗེ་ལས་ཅན་སྣ་ཚོགས་བཞིན། །སངས་རྒྱས་ལྔ་ཡི་བདག་ཉིད་ནི། །གསང་བའི་ཡེ་ཤེས་བླ་མེད་ཡིན། །ཕྱག་རྒྱ་བཞི་པོ་གསང་བ་དེ། །རྣལ་འབྱོར་པ་ཡིས་ལས་གྲུབ་བྱེད། །འབྱུང་བ་ཆེན་པོ་བཞི་པོ་ཡང ། །ཕྱག་རྒྱ་བཞི་ཞེས་བཤད་པ་ཡིན། །ཕྱག་རྒྱ་བཞི་ཡིས་མཉམ་སྦྱོར་བ། །ལྷ་མོ་བཞི་དང་ཡང་དག་སྦྱོར། །ས་ནི་སྤྱན་ཞེས་བཤད་པ་ཡིན། །ཆུ་ནི་མཱ་མ་ཀཱི་ཞེས་བཤད། །མེ་དང་རླུང་ཞེས་གྲགས་པ་ནི། །གོས་དཀར་མོ་དང་སྒྲོལ་མ་ཡིན། །དབང་ཆེན་ས་ཡི་ཁམས་ཡིན་ཏེ། །ཆུ་ཡི་ཁམས་ནི་ཆུ་དཀྱིལ་འཁོར། །མེ་ནི་མེ་ཡི་ཁམས་ཡིན་ཏེ། །རླུང་ནི་རླུང་གི་དཀྱིལ་འཁོར་རོ། །དབང་ཆེན་ཁ་དོག་སེར་པོ་སྟེ། །གྲུ་བཞི་པ་སྟེ་རྒྱས་པ་ཡིན། །ཆུ་ཡི་དཀྱིལ་འཁོར་ཟླུམ་པོ་སྟེ། །དཀར་པོའི་མདོག་ཅན་ཞི་བའི་ཡིན། །མེ་ཡི་དཀྱིལ་འཁོར་ཁ་དོག་དམར། །གྲུ་གསུམ་དབང་གི་ལས་རྣམས་ལའོ། །རླུང་གི་དཀྱིལ་འཁོར་གཞུ་ཡི་དབྱིངས། །ནག་པོའི་གདུག་པའི་ལས་རྣམས་ལ། །འབྱུང་བ་ཆེ་བདག་ལས་གྲུབ་པ། །ལས་ཀྱི་དངོས་གྲུབ་ཡོན་ཏན་བཞི། །ལས་ཀྱི་དངོས་གྲུབ་དངོས་གྲུབ་མཆོག་།འཁོར་ལོས་བསྒྱུར་བ་རྣམ་པ་བཞི། །ཞི་བ་ལ་ནི་སྤྱན་གྱི་ཚུལ། །རྒྱས་པ་པདྨའི་རྡོ་རྗེ་ཅན། །དབང་ལ་རྣམ་པར་སྣང་མཛད་གནས། །རྡོ་རྗེ་ཁྲོ་བོ་མངོན་སྤྱོད་ལའོ། །ཞི་བ་དགོངས་ཀ་བྱ་བ་ཡིན། །དེ་བཞིན་རྒྱས་པ་སྔ་དྲོ་ལ། །གདུག་པའི་ 5a ༄#། །ལས་རྣམས་ཉི་མའི་གུང ། །དབང་གི་ལས་ནི་མཚན་ཕྱེད་བྱ། །ཞི་ལ་དཀར་པོ་སྦྱར་བར་བྱ། །སེར་པོར་སྣང་བ་རྒྱས་པ་ལ། །དབང་གི་ལས་ལ་དམར་པོ་སྟེ། །གདུག་པ་ནག་པོ་རབ་ཏུ་སྦྱར། །ཏིང་འཛིན་ཡེ་ཤེས་ལས་བྱུང་བ། །ལས་ཀྱི་བསྒྲུབ་པ་དམ་པ་ཡིན། །བཅོམ་ལྡན་དག་པ་བསྒོམ་བྱ་སྟེ། །སངས་རྒྱས་ཀུན་ལས་མི་གཡོ་གྱུར། །བྷ་གའི་དབུས་སུ་གསང་བའི་བདག་།རྡོ་རྗེའི་དབྱིངས་ནི་དེ་བཞིན་གཤེགས། །ལྔ་ཡི་བདག་གྱུར་བདག་ཉིད་ནི། །བསྒོམས་ན་གཡོ་བ་མེད་པར་འགྱུར། །སྙིང་ལ་གནས་པའི་ལྷ་མོ་ཆེ། །རྣལ་འབྱོར་པ་ཡི་རྣལ་འབྱོར་བསྐྱེད། །སངས་རྒྱས་ཐམས་ཅད་བསྐྱེད་མཛད་ཡུམ། །རྡོ་རྗེ་དབྱིངས་ཀྱི་དབང་མོར་བཤད། །འདོད་ཆགས་ཞེ་སྡང་གཏི་མུག་སྟེ། །འདི་དག་འཇིག་རྟེན་དུག་གསུམ་ཡིན། །སངས་རྒྱས་བཅོམ་ལྡན་འདུག་མི་མངའ། །རྡོ་རྗེ་དབྱིངས་ནི་དེ་བཞིན་གཤེགས། །ཆགས་དང་སྡང་དང་རྨོངས་པ་རྣམས། ། བསྒོམས་ནས་ཁམས་གསུམ་པ་ཡི་བདག་།སངས་རྒྱས་བཅོམ་ལྡན་འདས་གྱུར་ཏེ། །སངས་རྒྱས་བདེན་པས་གདུག་བཅོམ་མོ། །རང་སེམས་སོ་སོར་རྟོགས་པ་ཡིས། །གཏི་མུག་སེམས་ནི་དེ་བཞིན་གཤེགས། །རྨོངས་པ་ཉིད་ནི་འཇིག་རྟེན་གྱུར། །སེམས་ཅན་ཀུན་ལ་བལྟ་བར་བྱ། །ཞེ་སྡང་སེམས་ནི་དེ་བཞིན་གཤེགས། །ཕྲ་མོའི་ཡེ་ཤེས་ 5b ཡང་དག་བསྐྱེད། །སྡང་གྱུར་རྡོ་རྗེ་ཉིད་དུ་གྱུར། །སེམས་ཅན་ཐམས་ཅད་གཞིག་པར་བྱ། །འདོད་ཆགས་སེམས་ནི་དེ་བཞིན་གཤེགས། །བྱང་ཆུབ་སེམས་ནི་ཡང་དག་བསྐྱེད། ། ཆགས་གྱུར་བཟང་པོ་ཉིད་གྱུར་པ། །སངས་རྒྱས་ཐམས་ཅད་ཆགས་པར་བྱ། །བྱམས་པའི་སེམས་ནི་དེ་བཞིན་གཤེགས། །ང་རྒྱལ་ཡང་དག་བསྐྱེད་ནས་ནི། །མཛའ་བོར་གྱུར་ཅིང་ཀུན་ཉིད་གྱུར། །སངས་རྒྱས་ཀུན་ལ་འཁྱུད་པར་བྱ། །ཆགས་པའི་ལྟ་བས་བྱམས་པ་སྟེ། །ཐུགས་རྗེའི་ཆོས་ནི་སྨྲ་བ་དང ། །ཀུན་ལ་མི་འཇིགས་སྦྱིན་པ་དང ། །སངས་རྒྱས་ཐམས་ཅད་མཉེས་བྱའོ། །རྣལ་འབྱོར་སྦྱིན་ལས་རབ་དགའ་སྟེ། །ཚུལ་ཁྲིམས་ལྡན་ལས་དྲི་མེད་འགྱུར། །བཟོད་པ་ལས་ནི་འོད་བྱེད་པ། །བརྩོན་ལས་འོད་འཕྲོ་ཅན་དང་ལྡན། །བསམ་གཏན་ལས་ནི་སྦྱང་དཀའ་བ། །ཤེས་རབ་ཀྱིས་ནི་མངོན་གྱུར་མཐོང ། །ཐབས་ཆེན་ལས་ནི་རིང་དུ་སོང ། །སྟོབས་དང་ལྡན་ལས་མི་གཡོ་འགྱུར། །སྨོན་ལམ་གྱིས་ནི་ལེགས་བློ་ལྡན། །ཡེ་ཤེས་ལྡན་ལས་ཆོས་ཀྱི་སྤྲིན། །རྒྱལ་བ་དེ་བཞིན་གཤེགས་པ་ནི། །རང་རིག་བདག་ཉིད་བཅུ་གཅིག་འགྱུར། །ཕ་རོལ་ཕྱིན་པ་བཅུ་རྣམས་དང ། ། སྟོབས་དང་དབང་ནི་རྫོགས་གྱུར་ཅིང ། །ས་བཅུ་ལས་ནི་འདས་གྱུར་བ། །མཚན་མ་བརྟན་གྱུར་དེ་ལས་ནི། །རྡོ་རྗེ་ཆུ་ནི་རྫོགས་སངས་རྒྱས། །ཆོས་ཀྱི་བདུད་རྩི་བཅུད་ལེན་ 6a ༄#། །ཡིན། །སངས་རྒྱས་ཀུན་གྱི་མཐའ་ཡས་པ། །གཟུང་དང་འཛིན་པ་སྤངས་པ་ཡིན། །ཆོས་ཀྱི་བདུད་རྩི་བཅུད་ཀྱིས་ལེན། །རྡོ་རྗེའི་ཆུ་ནི་དག་འཐུངས་པས། །རྡོ་རྗེ་སློབ་དཔོན་རྣལ་འབྱོར་བ། །འདོད་ནས་དག་པར་དེ་ཚེ་འགྱུར། །འདོད་ནས་དག་པར་གནས་གྱུར་པ། །དེ་ནས་བྱང་ཆུབ་སེམས་སུ་འགྱུར། །བྱང་ཆུབ་སེམས་ཀྱི་བདག་ཅན་འགྱུར། །བྱང་ཆུབ་སེམས་དཔའ་དེ་བཞིན་གཤེགས། །རྣམ་པར་གྲོལ་བའི་རས་ཀྱིས་གཡོགས། །བྱང་ཆུབ་སེམས་ནི་བླ་ན་མེད། །ཡང་དག་བསྐྱེད་གྱུར་རྣལ་འབྱོར་པ། །རྡོ་རྗེ་སེམས་དཔའ་སྙིང་ལ་འདུག་།སེམས་ཅན་ཁམས་ནི་མཐའ་ཡས་པའི། །མར་གྱུར་དམ་ཚིག་འཛིན་བྱེད་པ། །རྡོ་རྗེ་དམ་ཚིག་གིས་སྤྱོད་ན། །རྟག་ཏུ་དམ་ཚིག་གནས་པར་གྱུར། །ཁམས་གསུམ་ལམ་ནི་ཉམས་དགའ་བར། །བུད་མེད་ཅེས་བཤད་ཇི་སྙེད་པ། །ཆོ་ག་བཞིན་དུ་ཀུན་སྤྱོད་ཅིང ། །ཐུགས་ཀྱི་རྡོ་རྗེ་སྨད་མི་བྱ། །རྡོ་རྗེ་གསུམ་གྱི་སྐུ་ལ་གནས། །དམ་ཚིག་ཕྱག་རྒྱ་ཇི་སྙེད་པ། །རྡོ་རྗེ་དམ་ཚིག་གསུམ་གྱིས་བྱ། །གསུང་གི་རྡོ་རྗེ་སྨད་མི་བྱ། །རྡོ་རྗེ་སེམས་དཔའ་ལས་བྱུང་བའི། །ཕྱག་རྒྱ་ཀུན་ནི་བུད་མེད་བཟང ། །དེ་རྣམས་སྟེན་པའི་རྣལ་འབྱོར་པ། །ཕྱག་རྒྱ་ཐམས་ཅད་དབང་དུ་འགྱུར། །འཇིག་རྟེན་ཁམས་ནི་ཐམས་ཅད་ན། །བུད་མེད་ཅེས་བྱ་ཇི་སྙེད་པ། །ཕྱག་རྒྱ་ཆེན་ 6b པོའི་སྦྱོར་བ་ཡིས། །དེ་དག་ཀུན་ལ་ཉེ་བར་སྤྱད། །གསང་བ་མཆོག་གི་རྣལ་འབྱོར་པ། །ཏིང་འཛིན་ཡེ་ཤེས་དམ་པ་ཡིན། །གལ་ཏེ་དངོས་གྲུབ་མཆོག་འདོད་ན། །ང་རྒྱལ་མ་ཡིན་ཧཱུཾ་མ་ཡིན། །རིག་པ་མ་ཡིན་སྔགས་རིག་མིན། །ལག་པའི་ཕྱག་རྒྱའང་མི་བཅའ་འོ། །མཆོད་རྟེན་གྱི་ནི་ལས་མི་བྱ། །གླེགས་བམ་དག་ཀྱང་བཀླག་མི་བྱ། །དཀྱིལ་འཁོར་དག་ནི་མི་བྱ་ཞིང ། །རྡོ་རྗེ་མཆོག་གསུམ་ཕྱག་མི་བཙལ། །སློབ་དཔོན་སྨད་པར་མི་བྱ་སྟེ། །བླ་མ་སངས་རྒྱས་ཀུན་དང་མཉམ། །ཁྱོད་ཀྱི་སྲོག་ཆགས་གསད་པར་བྱ། །བརྫུན་གྱི་ཚིག་ཀྱང་སྨྲ་བར་བྱ། །ཁྱོད་ཀྱིས་མ་བྱིན་བླང་བྱ་ཞིང ། །གཞན་གྱི་བུད་མེད་བསྟེན་པར་བྱ། །སྦྱིན་སྲེག་ཡང་ན་བསམ་གཏན་མིན། །ལུས་ངག་ཡིད་ནི་མི་ཕྱེད་པ། །གཞན་མིན་སེམས་ཀྱིས་བྱ་བ་སྟེ། །འདི་ནི་གསང་བའི་མཆོག་ཡིན་ནོ། །སྔགས་རྣམས་ཐམས་ཅད་རབ་ཏུ་འགྲུབ། །རྣལ་འབྱོར་ཀུན་ཀྱང་རྣམ་ཀུན་ཏུ། །དེ་བས་འབད་པ་ཐམས་ཅད་ཀྱིས། །སངས་རྒྱས་ཆོས་ཉིད་བསྒོམ་པར་བྱ། །མ་འདྲེས་ཆོས་ནི་བཅོ་བརྒྱད་པོ། །སངས་རྒྱས་ཆོས་ཞེས་བཤད་པ་ཡིན། །དེ་རྣམས་རྟག་ཏུ་བསྒོམ་པ་ནི། །སངས་རྒྱས་ཆོས་ནི་སྒྲུབ་བྱེད་ཡིན། ། བསམ་གཏན་བཞི་དང་གཟུགས་མེད་བཞི། །རྟག་ཏུ་ཐོབ་པར་བྱས་པ་དང ། །འགོག་པའི་སྙོམས་འཇུག་དེ་ཡིས་ནི། །སངས་རྒྱས་བྱང་ཆུབ་རབ་ཏུ་བསྒྲུབ། །བྱང་ཆུབ་ཕྱོགས་ 7a ༄#། །ནི་སུམ་ཅུ་བདུན། །ཆོས་སུ་ཡང་དག་བཤད་པ་གང ། །དེ་རྣམས་བསྒོམས་པས་དག་པ་དང ། །བྱང་ཆུབ་སེམས་དཔའ་འགྲོ་ཕན་ཡིན། །འགྲོ་བ་རྣམས་ལ་སྤྲོ་བའི་སེམས། །བརྟན་ཞིང་སྙིང་པོ་རབ་བསྒོམས་པ། །སྟོང་པའི་དེ་ཉིད་ལས་བྱུང་བ། །རྡོ་རྗེ་ཡེ་ཤེས་ཞེས་བྱ་བ་བཤད། །ཆོས་བདག་མེད་ལས་ཡང་དག་བྱུང ། །གཉིས་མེད་ཡེ་ཤེས་དམ་པ་སྟེ། །ཆོས་ཉིད་མཆོག་གི་ཡེ་ཤེས་ནི། །ཆོས་ཀྱི་དབྱིངས་ཞེས་ཡང་དག་བཤད། །འདི་ནི་ཆོས་དབྱིངས་ཡེ་ཤེས་ཏེ། །རྡོ་རྗེ་ལྟ་བུའི་ཏིང་འཛིན་སྐྱེས། ། རྡོ་རྗེ་ཡེ་ཤེས་རང་བཞིན་སེམས། །རྡོ་རྗེ་དབྱིངས་ཞེས་བྱ་བར་བཤད། །སེམས་ཀྱི་སྤྲོ་བའི་སྦྱོར་བ་ཡིས། །ཕྲ་མོའི་ཡེ་ཤེས་སོགས་སྦྱོར་བ། །དེ་བཞིན་གཤེགས་ཀུན་ཡེ་ཤེས་ནི། །རྣམ་པར་སྣང་མཛད་ཅེས་བྱར་བཤད། །བྱམས་པ་སྤྲོ་བའི་སྦྱོར་བ་ཡིས། །སྦྱོར་བ་སྤྱོད་པར་བྱེད་པའི་མཆོག་།ཟག་མེད་བརྟན་པར་གྱུར་བ་ཡི། །ཐུགས་ནི་མི་བསྐྱོད་པ་ཞེས་བཤད། །ཐུགས་རྗེ་སྤྲོ་བའི་ཚུལ་གྱིས་ནི། །སེམས་ཅན་ཕན་འདོགས་མཛད་པ་པོ། །ཐུགས་ནི་འགྲོ་དོན་ཡང་དག་ལྡན། །རིན་ཆེན་འབྱུང་ལྡན་ཞེས་བཤད་དོ། །དགའ་བས་སྤྲོ་བའི་སྦྱོར་བ་ཡིས། །ཐེག་ཆེན་མཆོག་ནི་དྲི་མ་མེད། །ཐུགས་ནི་འོད་གསལ་དག་པ་ནི། །འོད་དཔག་མེད་ཅེས་དེ་བཤད་དོ། །བཏང་སྙོམས་ 7b སྤྲོ་བར་མཛད་པའི་ཤུགས། །སེམས་ཅན་ཐམས་ཅད་རྟོགས་མཛད་པ། །དོན་ཡོད་བླ་མེད་བྱ་བ་ནི། །དོན་ཡོད་གྲུབ་པར་དེ་བཤད་དོ། །བྱང་ཆུབ་རང་བཞིན་ཡེ་ཤེས་མཆོག་།དེ་འདིར་རྡོ་རྗེ་ཞེས་བཤད་དོ། །རྡོ་རྗེ་ཡེ་ཤེས་ལས་བྱུང་བ། །རྡོ་རྗེ་སེམས་དཔར་དེ་བཤད་དོ། །སངས་རྒྱས་ཐམས་ཅད་སྤྱན་འདྲེན་པ། །རྡོ་རྗེ་ལྕགས་ཀྱུ་ཞེས་བཤད་དེ། །རྡོ་རྗེའི་རིགས་རྣམས་ཀུན་གྱི་རྒྱལ། །རྡོ་རྗེ་རྒྱལ་པོར་དེ་བཤད་དོ། །སངས་རྒྱས་ཐམས་ཅད་ཆགས་བྱེད་པས། །མཉེས་པར་བྱེད་པ་ཞེས་བཤད་དོ། །བདུད་ཀྱི་སྦྱོར་བ་ཆགས་པ་ཆེ། །རྡོ་རྗེ་ཆགས་པར་དེ་བཤད་དོ། །སངས་རྒྱས་ཐམས་ཅད་མཉེས་བྱེད་ཅིང ། །ལེགས་སོ་ཞེས་པ་རབ་སོགས་པ། །བྱང་ཆུབ་སེམས་དཔའ་དགའ་བྱེད་པས། །རྡོ་རྗེ་ལེགས་པར་དེ་བཤད་དོ། །བྱང་ཆུབ་སེམས་དཔའི་སྦྱིན་པ་གང ། །མཁའ་མཉམ་རྡོ་རྗེ་ལས་བྱུང་བ། །དོན་ཡོད་རིན་ཆེན་ཆེན་པོ་དེ། །རྡོ་རྗེ་རིན་ཆེན་དེ་བཤད་དོ། །མ་རིག་བྲལ་བའི་ཡེ་ཤེས་ནི། །ཚོགས་དག་ལས་ནི་ངེས་པར་བྱུང ། །ཐར་པའི་སྣང་བ་གཟི་བརྗིད་ཆེ། །རྡོ་རྗེ་ཉི་མར་དེ་བཤད་དོ། །རྣམ་པ་ཀུན་གྱི་དངོས་ཡེ་ཤེས། །ཐར་པའི་ལམ་འཇུག་ཐོབ་མཛད་གང ། །ཆོས་ཀྱི་རྒྱལ་མཚན་ཏོག་ཆེན་པོ། །རྡོ་རྗེ་དཔལ་དུ་དེ་བཤད་དོ། །རྡོ་རྗེ་བཤད་པ་རྣལ་འབྱོར་ཆེ། །སངས་རྒྱས་ཀུན་འབྱུང་རྨད་བྱུང་བ། །འདི་ནི་བྱང་ཆུབ་སེམས་དཔའ་ཆེ། །རྡོ་རྗེ་བཞད་ 8a ༄#། །པར་དེ་བཤད་དོ། །སངས་རྒྱས་ཀུན་གྱི་རྣལ་འབྱོར་ཆེ། །སངས་རྒྱས་ཆོས་ནི་རྟོགས་མཛད་པ། །དེ་བཞིན་གཤེགས་པའི་ཆོས་དག་པ། །རྡོ་རྗེ་ཆོས་སུ་དེ་བཤད་དོ། །ཤེས་རབ་རྣོན་པོ་ཐེག་པ་ཆེ། །ཉོན་མོངས་ཐམས་ཅད་ངེས་གཅོད་མཛད། །ཤེས་བྱའི་སྒྲིབ་པ་གཅོད་པ་པོ། །རྡོ་རྗེ་རྣོན་པོར་དེ་བཤད་དོ། །སངས་རྒྱས་རོལ་མོའི་འཁོར་ལོ་ནི། །ཆོས་ཀྱི་འཁོར་ལོ་རབ་བསྐོར་བས། །སེམས་དཔའ་ཆེན་པོ་ཐེག་པ་ཆེ། །རྡོ་རྗེ་རྒྱུ་ཞེས་དེ་བཤད་དོ། །ཤེས་རབ་ཡེ་ཤེས་རང་བཞིན་དག་།གསུང་གི་སྒྲ་ནི་རྣམ་པར་སྤང ། །འཇམ་པའི་གསུང་གི་བདག་ཉིད་གྱུར། །རྡོ་རྗེ་སྨྲ་བར་དེ་བཤད་དོ། །ཕ་རོལ་ཕྱིན་པ་ཀུན་གྱི་ཞབས། །ཆོས་རྣམས་ཐམས་ཅད་རྟོགས་མཛད་པ། །སེམས་ཅན་ཀུན་དོན་སྤྲུལ་པ་པོ། །རྡོ་རྗེ་ལས་ཞེས་བྱ་བར་བཤད། །སངས་རྒྱས་རྗེས་དྲན་ཡང་དག་གྲུབ། །ཐེག་པ་དམན་པ་རྣམ་སྤངས་ཤིང ། །བྱང་ཆུབ་སེམས་ལ་རབ་ཞུགས་པ། །རྡོ་རྗེ་བསྲུང་བར་དེ་བཤད་དོ། །སྡིག་པ་ཐམས་ཅད་ཟད་བྱེད་ཅིང ། །དེ་བཞིན་ཉོན་མོངས་རྣམས་སྲེག་ལ། །ཉོན་མོངས་ཟད་པ་ཉེར་ལེན་པས། །རྡོ་རྗེ་གནོད་སྦྱིན་དེ་བཤད་དོ། །སྐུ་གསུང་ཐུགས་ཀྱི་རྡོ་རྗེ་རྣམས། །བཅིང་བ་རུ་ནི་ཡང་དག་གྱུར། །དེ་ཉིད་དེ་ཉིད་ཡེ་ཤེས་ཏེ། །རྡོ་རྗེ་ཁུ་ཚུར་ཞེས་བཤད་དོ། །དམ་ཚིག་ཕྱག་རྒྱ་ཐམས་ཅད་ནི། ། 8b རྡོ་རྗེ་བསྔམས་ལས་ཡང་དག་བྱུང ། །རྡོ་རྗེ་ཁུ་ཚུར་གཉིས་གྱུར་པ། །ལས་ཀྱི་ཕྱག་རྒྱ་ཞེས་བཤད་དོ། །ང་རྒྱལ་མེད་ཅིང་སྣང་བ་མེད། །མཚན་མ་མེད་ཅིང་ཞེན་པ་མེད། །བདག་མེད་མཉམ་ཉིད་ཡེ་ཤེས་ནི། །རྡོ་རྗེ་སེམས་དཔའ་ཞེས་བྱར་བཤད། །གསང་བའི་མཉམ་པར་འབྱོར་བ་འདིར། །ཡེ་ཤེས་ཕ་རོལ་ཕྱིན་དགེ་བ། །རྣམ་པ་བཅུ་གཉིས་ཡང་དག་བྱུང ། །རྡོ་རྗེ་ཕ་རོལ་ཕྱིན་པའི་འོད། །བྱང་ཆུབ་སེམས་ནི་རབ་བསྒོམས་པས། །ཕ་རོལ་སངས་རྒྱས་ཉིད་སོན་པའི། །ཕ་རོལ་ཕྱིན་ཐོབ་ཡེ་ཤེས་ནི། །རྡོ་རྗེ་སེམས་མར་བཤད་པ་ཡིན། །བསྡུ་བའི་དངོས་པོ་བཞི་རྣམས་ནི། །ཤེས་རབ་ཕ་རོལ་ཕྱིན་རྡོ་རྗེ། །ཆོས་བཞི་གཅིག་ཏུ་གྱུར་པ་ནི། །རྡོ་རྗེ་རིན་ཆེན་མར་བཤད་དོ། །གསང་བའི་ཡེ་ཤེས་ཡེ་ཤེས་ཆེ། །དེ་ཉིད་ཕ་རོལ་ཕྱིན་དགེ་བ། །ཕ་རོལ་ཕྱིན་པ་ཆེ་ལས་བྱུང ། །རྡོ་རྗེ་ཆོས་མར་ཤེས་པར་བྱ། །ཕ་རོལ་ཕྱིན་པའི་དགེ་བ་ནི། །སྦྱོར་བའི་ཐབས་སུ་རབ་བསྟན་པ། །རྡོ་རྗེ་ལས་མར་ཤེས་པར་བྱ། །གང་ཕྱིར་དེ་ནི་རོལ་པ་དགེ། །སྒེག་མོ་སྦྱིན་པའི་ཕ་རོལ་ཕྱིན། །ཚུལ་ཁྲིམས་ཕ་རོལ་ཕྱིན་དགེ་བས། །བརྒྱན་པའི་ཡན་ལག་ཡིད་འོང་ཡིན། །གླུ་མ་བཟོད་པའི་ཕ་རོལ་ཕྱིན། །ཆེད་དུ་བརྗོད་པའི་ཆོས་བརྗོད་པའོ། །གར་མ་བརྩོན་འགྲུས་ཕ་རོལ་ཕྱིན། །མྱུར་དུ་སངས་རྒྱས་ཉིད་སྟེར་བའོ། །བདུག་པ་ཤེས་རབ་ཕ་རོལ་ཕྱིན། །ཀུན་ཏུ་ཁྱབ་པར་སྤྲོས་ཕྱིར་རོ། །མེ་ཏོག་བསམ་ 9a ༄#། །གཏན་ཕ་རོལ་ཕྱིན། །འདོད་པའི་འདམ་གྱིས་མ་གོས་པའོ། །མར་མེ་སྨོན་ལམ་ཕ་རོལ་ཕྱིན། །ཕྱོགས་ཀུན་སྣང་བར་བྱེད་པ་ཡིན། །དྲི་ནི་ཐབས་ཀྱི་ཕ་རོལ་ཕྱིན། །དྲི་ངན་ཐུར་སེལ་དགེ་བ་ཡིན། །སངས་རྒྱས་ཀུན་གྱི་ཐབས་ཆེན་པོ། །དབྱེ་བ་རྣམ་པ་བཞི་ཡིས་གནས། །ཐམས་ཅད་འདོད་པའི་ཐབས་ཆེན་པོ། །རྡོ་རྗེ་ལྕགས་ཀྱུ་ཞེས་བཤད་དོ། །བྱང་ཆུབ་སྤྱད་པ་སྤྱོད་བྱེད་པ། །རྡོ་རྗེ་ཞགས་པ་ཞེས་བཤད་དོ། །ཐེག་པ་འདི་ལ་བརྟེན་འགྱུར་གང ། །རྡོ་རྗེ་ལྕགས་སྒྲོག་ཅེས་བཤད་དོ་།ཆོས་རྣམས་ཐམས་ཅད་མ་སྐྱེས་ཤིང ། །གདོད་ནས་ཞི་བ་མཁའ་དང་མཉམ། །དེ་ལྟའི་ཚིག་ནི་རབ་འཇུག་པས། །རྡོ་རྗེ་དྲིལ་བུ་ཞེས་བཤད་དོ། །ཚོགས་གཉིས་ཀྱི་ནི་སྦྱོར་བ་ཡིས། །སེམས་ཅན་ཀུན་གྱི་དོན་སྟོན་པའི། །སེམས་ནི་རང་བཞིན་གྱིས་འོད་གསལ། །ཟླ་བའི་དཀྱིལ་འཁོར་ཡིན་པར་བཤད། །ཡང་དག་རྡོ་རྗེ་རྟོགས་པ་སྟེ། །འཛིན་པའི་སྦྱོར་ཉིད་ལྕགས་ཀྱུ་ཡིན། །ཕྲ་རབ་འབིགས་པ་མདའ་ཞེས་བྱ། །དགྱེས་པས་ལེགས་སོ་ཞེས་བྱ་བ། །སྤྲས་པས་རིན་པོ་ཆེ་རུ་བཤད། །གཟི་བརྗིད་ཅེས་བྱ་ཉི་མ་ཡིན། །སྒྲེང་བས་ཏོག་ཏུ་བཤད་པ་སྟེ། །རྣམ་པར་འབྱེད་པས་བཞད་པར་བཤད། །འདོད་ཆགས་དག་པ་པདྨ་ཡིན། །ཉོན་མོངས་དགྲ་བཅོམ་རལ་གྲི་སྟེ། །དཀྱིལ་འཁོར་སྦྱོར་བས་འཁོར་ལོ་ 9b ཡིན། །གང་གི་བརྗོད་པས་སྨྲ་བར་བཤད། །ཀུན་ཉིད་སྣ་ཚོགས་རྡོ་རྗེ་ཡིན། །གཞིག་དཀའི་སྦྱོར་བ་གོ་ཆ་ཡིན། །འཇིགས་པའི་སྤྱོད་པས་མཆེ་བ་སྟེ། །ཕྱག་རྒྱའི་སྦྱོར་ཉིད་བཅིང་བ་ཡིན། །དཀྱིལ་འཁོར་དུ་ནི་གང་བཤད་པ། །ཡིད་ཀྱི་དཀྱིལ་འཁོར་དམ་པ་ཡིན། །གཞལ་ཡས་ཁང་ནི་ཡེ་ཤེས་ཏེ། །སེམས་ཀྱི་བརྩེགས་པ་སྒྲེང་བ་ཡིན། །ཕྱི་ཡི་གྲུ་བཞི་པ་གང་ཡིན། །ཚད་ཀྱིས་མཉམ་པ་ཉིད་གྱུར་པ། །བྱམས་པ་ལ་སོགས་སེམས་གང་ཡིན། །ཐིག་བཞི་ཞེས་ནི་བཤད་པ་ཡིན། །ཆོས་ཀྱི་སྦྱོར་བ་རྗེས་དྲན་ཉིད། །གང་དེ་རྡོ་རྗེ་ཐིག་དུ་བཤད། །ལྟ་བ་ཀུན་ལས་རྣམ་གྲོལ་བ། །ཡེ་ཤེས་ཐིག་ཏུ་བཤད་པ་ཡིན། །ཚུལ་ཁྲིམས་ཚོགས་ཀྱི་དམ་པ་ནི། གང་ཞིག་རྒྱན་དུ་བཤད་པ་ཡིན། །དད་དབང་ལ་སོགས་སེམས་གང་ཡིན། །ར་བ་ལྔར་ནི་ཡང་དག་བྱུང ། །རྣམ་པར་ཐར་པ་བཞི་པོ་ནི། །སྒོ་རྣམས་སུ་ནི་ཡང་དག་བཤད། །ཡང་དག་སྤོང་བ་བཞི་པོ་ནི། །རྟ་བབས་རྣམས་དང་ཀ་བར་བྱུང ། །དྲན་པ་ཉེར་གཞག་བཞི་པོ་ནི། །ཁྱམས་རྣམས་བཞི་པོར་ཤེས་པར་བྱ། །རྫུ་འཕྲུལ་རྐང་པ་བཞི་པོ་ནི། །དེ་ནི་སྒོ་ཁྱུད་རྣམ་བཞི་ཡིན། །བྱང་ཆུབ་ཡན་ལག་བདུན་པོ་ནི། །ཕྲེང་བ་མེ་ཏོག་ཆུན་བརྒྱན་པ། །འཕགས་ལམ་ཡན་ལག་བརྒྱད་པོ་ནི། །ཀ་པ་བརྒྱད་ཅེས་བྱ་བར་བཤད། །སྒྲིབ་པ་གཉིས་ལས་རྣམ་གྲོལ་ཞིང ། །ཏིང་འཛིན་ཡེ་ཤེས་ 10a ༄#། །ཀྱིས་བརྟགས་པ། །ལམ་གྱི་ཡེ་ཤེས་ཁྱད་པར་རྣམས། །རྔ་ཡབ་ཅེས་ནི་ཡང་དག་བཤད། །ཉོན་མོངས་ཐམས་ཅད་ངེས་གཅོད་ཅིང ། །ཉོན་མོངས་འཕྲོག་པས་དྲ་བ་སྟེ། །ཡང་དག་གཅོད་ཅིང་སྤོང་བ་ཉིད། །སེལ་བའི་སྤོང་བ་ལ་གནས་པ། །ཚོགས་གཉིས་ཀྱི་ནི་སྦྱོར་པ་ཉིད། །ཉོན་མོངས་པ་ཡི་ཕྱེད་འཕྲོག་པ། །དྲ་བ་ཕྱེད་ཅེས་བྱ་བར་བཤད། །རང་བཞིན་འོད་གསལ་གང་ཡིན་དེ། །བྱང་ཆུབ་སེམས་ནི་བླ་མེད་ཡིན། །སེམས་ནི་དོན་ཀུན་སྐྱེད་བྱེད་པ། །ཟླ་བའི་དཀྱིལ་འཁོར་ཡིན་པར་བཤད། །ཤེས་རབ་ཡེ་ཤེས་རང་བཞིན་དག་།རྡོ་རྗེ་ལྟ་བུའི་ཏིང་འཛིན་སྐྱེས། །ཐར་པའི་སྣང་བ་གཟི་བརྗིད་ཆེ། །ཉི་མའི་དཀྱིལ་འཁོར་ཡིན་པར་བཤད། །ཚོན་རྩི་ལྔར་ནི་ཡང་དག་ཅེས། །ལྟ་བ་ལྔ་ཡི་མེ་ཏོག་ཡིན། །ཡེ་ཤེས་ལྔ་ཡི་ངེས་སྦྱོར་ཉིད། །སངས་རྒྱས་ལྔ་ཞེས་ཡང་དག་བཤད། །ནམ་མཁའ་བཞིན་དུ་བདག་མེད་པའི། །རྣམ་ཤེས་ཡེ་ཤེས་དམ་པ་ཡིན། ། ཡེ་ཤེས་དེ་ཡི་རྒྱན་བཤད་པ། །ཆགས་པའི་སེམས་ཞེས་བྱ་བར་བཤད། །ཆགས་བྲལ་ལས་ནི་བྱང་ཆུབ་འབྱུང ། །ཆགས་པའི་སེམས་ལས་གཞན་ཡིན་ནོ། །དེ་བས་ཆགས་དང་ཆགས་བྲལ་བ། །བྱང་ཆུབ་སེམས་ཞེས་ཡང་དག་བཤད། །འཇིག་རྟེན་ཆགས་དང་བྲལ་བས་འདུལ། །ཕྱག་རྒྱའི་དངོས་གྲུབ་ཆགས་ལས་བྱུང ། །དེར་ནི་ 10b ཐབས་ཀྱི་སྒོམ་པ་དག་།དངོས་གྲུབ་ཐམས་ཅད་སྟེར་བ་ཡིན། །ཇི་ལྟར་འཇིག་རྟེན་འདུལ་འགྱུར་བ། །དེ་ལྟར་རྣལ་འབྱོར་བ་ཡིས་སྤྱད། །ཇི་ལྟར་གདུལ་བྱ་དག་གྱུར་པ། །ཞེན་པ་ཀུན་ཏུ་མཆོད་པར་འགྱུར། །མཚན་ཉིད་གང་ཞིག་ཡང་དག་བཤད། །མཚན་ཉིད་དེས་ནི་མཚོན་པར་འགྱུར། །སྐུ་གསུང་ཐུགས་ཀྱི་ཕྱག་རྒྱ་ཡིས། །རྒྱས་བཏབ་ཡེ་ཤེས་ཡིན་པར་བཤད། །ཕྱག་རྒྱ་བསྒོམས་པས་རྣལ་འབྱོར་བ། །རྟག་ཏུ་ཕྱག་རྒྱའི་བདག་ཅན་འགྱུར། །རྒྱས་བཏབ་དངོས་པོ་ཤེས་ནས་ནི། །བསྒོམས་ན་ཕྱག་རྒྱས་བཏབ་པར་འགྱུར། ། མཚན་དང་མཚན་ཉིད་འབྲེལ་བ་ནི། །ཤེས་ནས་རྣལ་འབྱོར་ཡང་དག་སྤྱོད། །ཇི་ལྟར་མཚན་ཉིད་ཡང་དག་གྲུབ། །དེ་བཞིན་དག་པ་མྱུར་དུ་འགྲུབ། །གཡས་པའི་ཆ་ཡི་མཚན་མས་ནི། །ཤེས་རབ་ཅན་ནི་རབ་ཏུ་བསྟན། །གཡོན་གྱི་མཚན་མ་ཇི་ལྟར་མཐོང ། །དེ་ཡིས་ཐུགས་རྗེ་མཚོན་པ་ཡིན། །ཕྱག་ནི་གཉིས་ཀའི་མཉམ་སྦྱོར་ལས། །ཏིང་འཛིན་གཉིས་སུ་བཤད་པ་ཡིན། །ཞབས་གཉིས་ཀྱི་ནི་མཚན་མ་ཡིས། །ཚོགས་གཉིས་དག་ནི་བསྟན་པ་ཡིན། །སོར་མོ་ལྔ་ཡི་མཉམ་སྦྱོར་ལས། །དཀྱིལ་འཁོར་ལྔ་ཡིས་བརྒྱན་པ་ཡིན། ། སངས་རྒྱས་ལྔ་ཡེས་མངོན་བྱང་ཆུབ། །རིམ་པ་བཞིན་དུ་བསྟན་བྱ་སྟེ། །གང་ཞིག་གུང་མོ་སྟོན་པ་ནི། །ནམ་མཁའ་ལས་ནི་བྱུང་བ་མཚོན། །གང་ཞིག་མཛུབ་མོ་སྟོན་པ་ནི། །དེས་ 11a ༄#། །ནི་དབང་ཆེན་དཀྱིལ་འཁོར་ཡིན། །སྲན་ལག་ཏུ་ནི་ཡང་དག་བཤད། །ཆུ་ཡི་དཀྱིལ་འཁོར་ཞེས་བཤད་དོ། །གང་ཞིག་མཐེ་བོ་སྟོན་པ་ནི། །དེ་ཡིས་མེ་ནི་མཚོན་པ་ཡིན། །གང་ཞིག་མཐེའུ་ཆུང་སྟོན་པ་ནི། །རླུང་གི་དཀྱིལ་འཁོར་ཉིད་དུ་འགྱུར། །གང་ཞིག་ལྟེ་བ་སྟོན་པ་ནི། །རྡོ་རྗེ་དབྱིངས་ཀྱི་དབང་ཕྱུག་བཤད། །གང་ཞིག་སྙིང་ག་སྟོན་པ་ནི། །རྡོ་རྗེ་སེམས་མར་རྗེས་སུ་དཔག་།གང་ཞིག་སྨིན་མཚམས་སྟོན་པ་ནི། །རྡོ་རྗེ་རིན་ཆེན་མ་ཞེས་བྱ། །གང་ཞིག་ལྐོག་མ་སྟོན་པ་ནི། །རྡོ་རྗེ་ཆོས་མར་ཤེས་པར་བྱ། །གང་ཞིག་སྤྱི་བོ་སྟོན་པ་ནི། །རྡོ་རྗེ་ལས་མར་ཤེས་པར་བྱ། །བྱང་ཆུབ་ལྔར་མངོན་བྱང་ཆུབ་པའམ། །ཡང་ན་ཡེ་ཤེས་ལྔ་རྣམས་སམ། །སངས་རྒྱས་ལྔ་དང་ཡང་དག་ལྡན། །དཀྱིལ་འཁོར་བྱང་ཆུབ་ཡིན་པར་བསྟན། །སྔོན་གྱི་སྒྲར་ནི་ཇི་སྐད་བཤད། །མདུན་དུ་དེ་ནི་རབ་ཏུ་བསྟན། །རྒྱབ་ཀྱི་སྒྲར་ནི་ཇི་ལྟར་བཤད། །ཕྱི་མར་དེ་ནི་ཡང་དག་བསྟན། །གང་དུ་ཐོག་མའི་སྒྲར་གྱུར་པ། །དེ་ནི་རྒྱུ་ཡི་སྒྲ་རུ་བསྟན། །གང་ཞིག་ཐ་མའི་སྒྲར་གྱུར་བ། །འདི་ནི་འབྲས་བུར་ཡང་དག་བསྟན། །སངས་རྒྱས་བཅོམ་ལྡན་གཉིས་མི་མངའ། །རྒྱུ་དང་འབྲས་བུར་ལྡན་འགྱུར་མིན། །གང་ཕྱིར་ཐོག་མ་ཐ་མ་མོད། །དེ་ཕྱིར་རྟག་པ་ཞེས་བཤད་དོ། །རང་སེམས་རྟོགས་པས་སངས་རྒྱས་ཏེ། །རྟོགས་པར་བྱ་ 11b ཞིང་སེམས་ཉིད་ཡིན། །སངས་རྒྱས་ཞིང་ཞེས་བཤད་པ་དང ། །བྱང་ཆུབ་སེམས་སུ་ཤེས་པར་བྱ། །རང་བཞིན་དག་པའི་སེམས་ཅན་ནི། །ཀུན་ཏུ་རིག་པར་ཡང་དག་བཤད། ། སེམས་ཅན་རང་བཞིན་དག་པ་ནི། །བྱང་ཆུབ་སེམས་སུ་ཤེས་པར་བྱ། །དང་པོར་གྱུར་པ་སྙིང་གར་རྡེབས། །བརྟན་པ་ཉིད་དུའང་རང་ཉིད་འགྱུར། །སྒྲ་འཛིན་པ་ནི་རལ་པའི་དབུས། ། འོད་དཔག་མེད་དུ་མཉམ་གཞག་ཡིན། །ཙུམ་པ་ན་ནི་རྗེས་བཤད་པ། །དེ་བཞིན་གཤེགས་པ་རྡོ་རྗེ་གསུང ། །དབང་པོ་གཉིས་ནི་མཉམ་སྦྱོར་བ། །རྣམ་པར་སྣང་མཛད་ཅེས་བཤད་དོ། །བུ་མོ་ལོ་གྲངས་བཅུ་གཉིས་པར། །སྐྱེས་མཆོག་ཐུབ་པས་གང་གསུངས་པ། །ཕ་རོལ་ཕྱིན་པ་བཅུ་གཉིས་སུ། །གསུངས་ཀྱི་གཞན་དུ་མི་བརྟག་གོ་།བུ་མོ་ལོ་གྲངས་བཅུ་དྲུག་པར། །དེ་བཞིན་གཤེགས་པས་གང་གསུངས་པ། །རྡོ་རྗེ་སེམས་སོགས་སེམས་དཔའ་ཡི། །བསྒོམ་པའི་དོན་གྱི་སྒྲ་ཡིན་ནོ། །ལྷ་མོ་ལོ་གྲངས་ཉི་ཤུ་པར། །འཁོར་ལོས་བསྒྱུར་བས་ཇི་སྐད་གསུངས། །མཆོད་པ་ཉི་ཤུའི་བདག་ཉིད་ཅན། །ཉི་ཤུ་པོ་དང་རིམ་བཞིན་ནོ། །རང་གི་ཆུང་མ་རང་རིག་ལས། །བྱུང་བའི་རང་རིག་ཡིན་པར་བཤད། ། གཞན་གྱི་ཆུང་མར་གང་བསྟན་པ། །གཞན་སྡུག་གཞན་གྱི་རིག་པ་ཡིན། །གཅི་དང་རྡོ་རྗེ་ཞེས་བཤད་པ། །རྡོ་རྗེ་ཡེ་ཤེས་བླ་མེད་ཡིན། །བཤང་དང་པདྨ་ཞེས་བཤད་པ། །ཆོས་ 12a ༄#། །ཀྱི་ཡེ་ཤེས་རྙོག་མེད་ཡིན། །ཡོངས་སུ་གསལ་བར་རྣམ་ཤེས་པ། །དཀྱིལ་འཁོར་ཐུགས་ཀྱི་དམ་པ་ཡིན། །སྐུ་གསུང་ཐུགས་ཀྱི་སྤྱོད་པ་ཡིས། །འབད་པ་ཡིས་ནི་མཆོད་བྱེད་པ། །རང་གི་རྡོ་རྗེ་པདྨར་ལྡན། །དབང་པོ་གཉིས་ལས་བྱུང་བ་ཡི། །རང་གི་ཁུ་བ་ཐིག་ལེ་ཡིས། །རྡོ་རྗེ་སེམས་དཔའ་མཆོད་པར་བྱ། །ཚོགས་གཉིས་ཀྱི་ནི་སྦྱོར་བ་ཡིས། །སངས་རྒྱས་ཐམས་ཅད་གཅིག་བསྡུས་པ། །གཉིས་མེད་གཉིས་ཉིད་ལ་བརྟེན་པ། །ཐུགས་རྗེ་ཉམས་དང་ཡང་དག་ལྡན། །དབང་པོ་གཉིས་ཀྱིས་མཉམ་སྦྱོར་བས། ། རང་གི་ཁུ་བ་མཁས་པ་ཡིས། །རྣལ་འབྱོར་ཆེན་པོ་བྱུང་ནས་ནི། །དཀྱིལ་འཁོར་ཡང་དག་བྱིན་གྱིས་བརླབ། །དགོད་དམ་རབ་ཏུ་སྨྲ་བའམ། །སངས་རྒྱས་རོལ་མོའི་གར་བྱེད་པ། ། ལྷ་མོ་བཞི་ཡིས་མཉམ་སྦྱོར་བས། །རྒྱུ་དང་མི་རྒྱུ་རྣམས་ཀྱིས་རོལ། །གསང་ཞིང་ལེགས་པར་བསྒྲིལ་བ་དང ། །ཚད་དང་ལྡན་ཞིང་མཛེས་པ་ཡིས། །ཤེས་རབ་ཅན་གྱིས་ཐིག་གདབ་པ། །སྐུ་གསུང་ཐུགས་ནི་བསྒོམས་པས་སོ། །ཟུར་བཞི་པ་ལ་སྒོ་བཞི་པ། །རྟ་བབས་བཞིས་ནི་མཛེས་བྱས་ལ། །ཐིག་བཞི་དང་ནི་ཡང་དག་ལྡན། །དར་དང་མེ་ཏོག་ཕྲེང་བས་བརྒྱན། །གྲཝ་ཡི་མཚམས་ནི་ཐམས་ཅད་དང ། །སྒོ་ཁྱུད་ཀྱི་ནི་ནད་རྣམས་སུ། །རྡོ་རྗེ་རིན་ཆེན་སྤྲས་པས་ནི། །ཕྱི་ཡི་དཀྱིལ་འཁོར་ཐིག་གདབ་པོ། །རྡོ་རྗེའི་ཐིག་གིས་ཡོངས་ 12b བསྐོར་ཞིང ། །ཀ་བ་བརྒྱད་ཀྱིས་ཉེ་བར་མཛེས། །ཀ་བ་བརྒྱད་ཀྱི་ནང་གནས་པའི། །དཀྱིལ་འཁོར་བརྒྱད་པར་བསྟན་པ་དང ། །གྲཝ་ཡི་དཀྱིལ་འཁོར་དོར་བར་ནི། །རྡོ་རྗེ་ལྷ་མོའི་ཚོགས་ཀྱིས་མཆོད། །འཁོར་ལོ་ལྔ་དང་ཡང་དག་ལྡན། །དཀྱིལ་འཁོར་ལྔ་ཡིས་རྣམ་པར་བརྒྱན། །དྲ་བ་དྲ་ཕྱེད་ཀྱིས་བརྒྱན་ཅིང ། །རྔ་ཡབ་ཀྱིས་ནི་ཉེར་སྤྲས་པ། །ཁྲུ་ནི་བཅུ་གཉིས་བྱ་བའམ། །ཁྲུ་བཅུ་དྲུག་ཏུ་རབ་ཏུ་བརྟག་།ཡང་ན་ཁྲུ་ནི་ཉི་ཤུ་ཙམ། །ཉི་ཤུ་ལྔ་དང་ལྡན་པ་ཡིས། །ཁྲུ་ནི་ཉི་ཤུ་ལྔ་པ་ཡིས། །དཀྱིལ་འཁོར་ཡང་དག་བྱིན་གྱིས་བརླབ། །སྒོ་རྣམས་ཀྱི་ནི་དབུས་མའི་ཆ། །ཆ་དགུ་རུ་ནི་རྣམ་དབྱེ་བ། །དཀྱིལ་འཁོར་སྒོ་རུ་བསམས་ནས་ནི། །སྒོ་ཁྱུད་དེར་ནི་བྱ་བ་ཡིན། །སྒོ་ཁྱུད་དཀྱིལ་འཁོར་རྣམ་པ་ནི། །སྙིང་པོའི་དཀྱིལ་འཁོར་དང་མཉམ་པར། །དགུ་ཆ་རུ་ནི་རྣམ་བགོས་ཏེ། །གྲཝ་ཡི་དཀྱིལ་འཁོར་དོར་བར་བྱ། །ཐ་མར་ཁྱམས་དང་ལྡན་པ་ཡི། །དཀྱིལ་འཁོར་ལྔས་ནི་བརྒྱན་པ་དང ། །ཁ་དོག་ལྔ་དང་ཡང་དག་ལྡན། །གྲུ་བཞི་པར་ནི་བརྟག་པར་བྱ། །ལྟ་བ་ལྔ་པོ་བགྲོད་དཀའ་ཆེ། །ཁ་དོག་ལྔ་ཡི་དེ་བཞིན་གཤེགས། །སངས་རྒྱས་ལྔ་དང་མཉམ་སྦྱོར་བས། །ས་ནི་ཚོན་གྱིས་རབ་ཏུ་བསྒྱུར། །དཀྱིལ་འཁོར་ལྔ་ཡི་དབུས་སུ་ནི། །སངས་རྒྱས་ལྔ་ནི་དགོད་པར་བྱ། །ཁ་དོག་ལྔ་དང་ཏིང་འཛིན་གྱིས། །འདོད་པའི་ཡོན་ཏན་ལྔ་ཡིས་ཁྱབ། །ཤེལ་དང་ཟླ་བའི་འོད་འདྲ་ཞིང ། །སངས་རྒྱས་ 13a ༄#། །ཐམས་ཅད་གཅིག་བསྡུས་པ། །དེ་བཞིན་གཤེགས་པ་རྣམ་སྣང་མཛད། །དཔའ་བོའི་ལྟ་བ་དེ་བཞིན་གཤེགས། །ིནྡྲ་ནཱི་ལའི་འོད་འདྲ་ཞིང ། །རྡོ་རྗེ་ཐམས་ཅད་གཅིག་བསྡུས་པ། །མི་བསྐྱོད་ཡེ་ཤེས་ལས་བྱུང་བ། །རྡོ་རྗེའི་ལྟ་བ་དེ་བཞིན་གཤེགས། །འཛམ་བུའི་གསེར་གྱི་འོད་འདྲ་ཞིང ། །སངས་རྒྱས་ཐམས་ཅད་གཅིག་བསྡུས་པ། ། སེམས་ཅན་ཀུན་གྱི་དོན་དུ་བྱུང ། །འབར་བའི་ལྟ་བ་དེ་བཞིན་གཤེགས། །དཔའ་བོ་ཆེན་པོ་པདྨ་འདྲ། །པདྨ་རཱ་གའི་ནོར་བུའི་འོད། །ཆོས་ཀྱི་ཡེ་ཤེས་ལས་བྱུང་བ། །ཆགས་པའི་ལྟ་བ་དེ་བཞིན་གཤེགས། །མ་རྒད་ཀྱི་ནི་འོད་འདྲ་ཞིང ། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་གཅིག་ལས་བྱུང་བ། །བྱམས་པའི་ལྟ་བ་དེ་བཞིན་གཤེགས། །དབུས་མའི་ས་ཡི་གཞི་དག་པ། །ནོར་བུ་ཆུ་ཤེལ་མདོག་འདྲ་བ། །ཤར་ཕྱོགས་ཉིད་དུ་སྔོན་པོ་ཆེ། །ལྷོ་རུ་སེར་པོ་ཡང་དག་ལྡན། །ནུབ་ཕྱོགས་དེར་ནི་དམར་པོ་སྟེ། །བྱང་དུ་ལྗང་དང་ཡང་དག་ལྡན། །ཀུན་ཏུ་ཁྱམས་དང་ལྡན་པ་ལ། །སྒོར་ནི་ཁྱམས་དང་བྲལ་བའོ། །གང་ཞིག་དབུས་མར་ཡང་དག་བཤད། །སངས་རྒྱས་ཡེ་ཤེས་བླ་མེད་ཡིན། །གཞན་དག་དོན་ཀུན་ཡང་དག་ལྡན། །ཏིང་འཛིན་ཡེ་ཤེས་དམ་པ་ཡིན། །ནམ་མཁའི་དབྱིངས་ཀྱི་དབུས་གནས་པར། །ཟླ་བའི་དཀྱིལ་འཁོར་དམ་པ་བསམ། ། 13b སངས་རྒྱས་སྐུ་ནི་རྣམ་བསྒོམས་ལ། །སྤྱན་ནི་དབུས་སུ་བསམ་པར་བྱ། །བཞིན་བཟང་སྤྱན་ནི་ཡངས་པ་དང ། །ནོར་བུ་ཆུ་ཤེལ་མདོག་འདྲ་ལ། །མཚན་རྣམས་ཐམས་ཅད་ཡོངས་སུ་རྫོགས། །བུད་མེད་སྒྱུ་མའི་མཆོག་འཛིན་པ། །ཕྱག་ཏུ་འཁོར་ལོ་བསྒོམ་བྱ་སྟེ། །ཁམས་གསུམ་པ་ནི་དབང་བྱེད་པ། །དངོས་ཀུན་གྲུབ་བྱེད་ཡེ་ཤེས་ནི། །འཁོར་ལོ་ཡིད་བཞིན་ནོར་བུའི་མདོག་།ནམ་མཁའི་རྡོ་རྗེ་དབུས་ཆུད་པར། །ཟླ་བའི་དཀྱིལ་འཁོར་དམ་པ་བསམ། །སངས་རྒྱས་སྐུ་ནི་རྣམ་བསྒོམས་ལ། །ནམ་མཁའི་རྡོ་རྗེ་མཆོག་བསྒོམ་མོ། །ཞལ་མཛེས་སྤྱན་ནི་ཡངས་པ་དང ། །ུཏྤལ་སྔོན་པོའི་འདབ་མའི་མདོག་།མཚན་རྣམས་ཐམས་ཅད་ཡང་དག་རྫོགས། །ནམ་མཁའི་སྒྱུ་མའི་མཆོག་བསམ་མོ། །ཕྱག་ཏུ་ཨུཏྤལ་སྔོ་དམར་སྟེ། །ཁམས་གསུམ་པས་ནི་ཕྱག་བྱས་པ། །སངས་རྒྱས་བྱང་ཆུབ་བྱེད་པའི་མཆོག་།གསང་བའི་དངོས་གྲུབ་རྡོ་རྗེ་ཅན། །ནམ་མཁའ་རྡོ་རྗེའི་དབུས་ཆུད་པར། །ཟླ་བའི་དཀྱིལ་འཁོར་དམ་པ་བསམ། །སངས་རྒྱས་སྐུ་ནི་རྣམས་བསྒོམས་ལ། །རྡོ་རྗེ་ཆོས་མར་རྣམ་པར་བསམ། །མཛེས་པའི་ཞལ་ལ་སྤྱན་ཡངས་པ། །པདྨ་རཱ་ག་ལྟ་བུའི་མདོག ། སྐུ་མདོག་དམར་པོ་ཡང་དག་བྱུང ། །ཆགས་པའི་པདྨ་འཛིན་སྡུག་པ། །མཚན་རྣམས་ཐམས་ཅད་ཡང་དག་རྫོགས། །རྒྱན་རྣམས་ཀུན་གྱིས་རྣམ་པར་བརྒྱན། །ཕྱག་ཏུ་ 14a ༄#། །ུཏྤལ་དམར་པོ་ནི། །སངས་རྒྱས་ཐམས་ཅད་རབ་བསྒོམས་པའོ། །ཆོས་ཀྱི་ཡེ་ཤེས་བྱེད་པ་མཆོག་།གསང་བ་དམ་ཚིག་རྡོ་རྗེ་ཅན། །མཁའ་དབྱིངས་རྡོ་རྗེའི་དབུས་ཆུད་པར། །ཟླ་བའི་དཀྱིལ་འཁོར་དམ་པ་བསམ། །སངས་རྒྱས་གཟུགས་ན་རྣམ་བསྒོམས་ལ། །སྒྲོལ་མ་མཆོག་ནི་བསམ་པར་བྱ། །ཞལ་མཛེས་སྤྱན་ནི་ཡངས་པ་དང ། །སྣ་ཚོགས་རྒྱན་གྱིས་རབ་ཏུ་བརྒྱན། །ཁ་དོག་སེར་པོ་ཉིད་བསམ་ཞིང ། །བུད་མེད་སྒྱུ་མའི་དྲེགས་པོར་བ། །ཕྱག་ཏུ་ཨུཏྤལ་དམ་པ་ནི། །སེར་པོ་སྣང་བ་བསྒོམ་པར་བྱ། །རྡོ་རྗེ་ཉིད་འཛིན་ལས་བྱུང་བ། །སེམས་ཅན་ཀུན་གྱིས་ཕྱག་བྱས་པའོ། །ོཾ་རུ་རུ་སྥུ་རུ་ཛྭ་ལ་ཏི་ཥྛ་སིདྡྷ་ལོ་ཙ་ནེ། སརྦ་ཨརྠ་སཱ་དྷ་ནི་སཝཱཧཱ། །ོཾ་ཤཾ་ཀ་རེ་ཤཱནྟི་ཀ་རེ་གྷུཊྚ་གྷུ་ཊྚི་ནི། གྷཱ་ཏ་ཡ་གྷཱ་ཏ་ ་གྷུ་ཊྚི་ནི་སཝཧཱ། ཨོཾ་ཀ་ཊེ་བི་ཀ་ཊེ་ནི་ཀ་ཊེ་ཀ་ཊཾ་ཀ་རེ་སཝའྷ། ཏོཾ་ཏཱ་རེ་ཏུ་ཏྟ་རེ་ཏུ་རེ་སཝཱཧའ། །རིག་པའི་ལྷ་མོ་བཞིའོ། །སྐུ་ནི་ལུས་ཀྱི་ངོ་བོ་ཡིས། །ཐུགས་ནི་སེམས་ཀྱི་རྣམ་པ་ཉིད། །གསུང་ནི་ངག་གི་རྣམ་པ་ཡིས། །མཆོད་ནམ་ཆོད་པའི་བདག་ཉིད་འགྱུར། །སྐུ་གསུང་ཐུགས་ཀྱི་གསང་བ་ནི། །མཁས་པ་ཡིས་ནི་བསྲུང་བྱ་སྟེ། །བསྲུངས་ན་མཆོག་ཏུ་གསང་བ་ནི། །རྟག་པར་ཀུན་ཏུ་འབྱུང་བར་འགྱུར། །དངོས་པོ་ཡོངས་སུ་དག་པ་ནི། །མེད་པས་ཀུན་ཏུ་བརྟག་མི་འབྱུང ། །རྣལ་འབྱོར་བ་ཡིས་རྣལ་འབྱོར་ཐོབ། །ཚོགས་མེད་ 14b ཡང་དག་མི་མཐོང་ངོ ། །དེ་བས་གསང་བའི་ཡེ་ཤེས་འབྱུང ། །རྣལ་འབྱོར་ཀུན་ཏུ་འབྱུང་བར་འགྱུར། །ཤེས་རབ་ཕ་རོལ་ཕྱིན་པའི་ཐབས། །ཏིང་འཛིན་ཡེ་ཤེས་བརྟགས་པ་ཡིན། །ཆོས་རྣམས་ཐམས་ཅད་རྣམ་དག་པ། །དག་པ་ཉིད་དུ་གྱུར་པ་ནི། །ཇི་ལྟར་ལྷ་ཡི་ནོར་བུ་ནི། །རང་གི་འོད་ཀྱིས་རྟག་ཏུ་སྣང ། །སྲིད་པ་ཡོངས་སུ་དག་པ་ཡང ། །རྣལ་འབྱོར་རྣལ་འབྱོར་ཐོབ་བྱེད་ཡིན། །རྡོ་རྗེ་དབྱིངས་ནི་གསང་ཆེན་དུ། །གང་ཞིག་དབང་བསྐུར་མཁས་པ་ལ། །ཐུགས་ཀྱི་གསང་བའི་རྣལ་འབྱོར་མཆོག་།མཁས་པས་དེ་ལ་བཤད་པར་བྱ། །ཐམས་ཅད་གསང་བ་ཞེས་བྱ་བའི་རྒྱུད་ཀྱི་རྒྱལ་པོ་རྫོགས་སོ།། །རྒྱ་གར་གྱི་མཁན་པོ་པདྨ་ཀཱ་ར་བ་རྨ་དང ། ཞུས་ཆེན་གྱི་ལོ་ཙྪ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། |