།།རྒྱ་གར་སྐད་དུ། མཧཱ་ས་ཧ་སྲ་བྲ་མརད་ན་སཱུ་ཏྲ། བོད་སྐད་དུ། སྟོང་ཆེན་མོ་རབ་ཏུ་འཇོམས་པ་ཞེས་བྱ་བའི་མདོ། 504b སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཕུང་པོའི་རིའི་ལྷོ་ཕྱོགས་ཀྱི་ངོས་སངས་རྒྱས་ཀྱི་སྤྱོད་ཡུལ་ཤིང་ལྗོན་པ་རབ་ཏུ་སྣང་བའི་ནགས་ཚོགས་ན་དགེ་སློང་གི་དགེ་འདུན་ཆེན་པོ་སྟོང་ཉིས་བརྒྱ་ལྔ་བཅུ་ལ། འདི་ལྟ་སྟེ། ཚེ་དང་ལྡན་པ་ཤཱ་རིའི་བུ་དང ། ཚེ་དང་ལྡན་པ་མཽངྒལ་གྱི་བུ་ཆེན་པོ་དང ། ཚེ་དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་ག་ཡ་འོད་སྲུང་དང ། ཚེ་དང་ལྡན་པ་ཆུ་ཀླུང་འོད་སྲུང་དང ། ཚེ་དང་ལྡན་པ་ཅང་ཤེས་ཀཽཎྜི་ནྱ་དང ། ཚེ་དང་ལྡན་པ་དགའ་བྱེད་དང ། ཚེ་དང་ལྡན་པ་ཀཱ་ཏྱའི་བུ་ཆེན་པོ་དང ། ཚེ་དང་ལྡན་པ་བཀྐུ་ལ་དང ། ཚེ་དང་ལྡན་པ་རླངས་པ་དང ། ཚེ་དང་ལྡན་པ་གསུས་པོ་ཆེ་དང ། ཚེ་དང་ལྡན་པ་ངག་དབང་དང ། ཚེ་དང་ལྡན་པ་རྟ་ཐུལ་དང ། ཚེ་དང་ལྡན་པ་རབ་འབྱོར་དང ། ཚེ་དང་ལྡན་པ་ལག་བཟང་དང ། ཚེ་དང་ལྡན་པ་མ་འགགས་པ་དང ། ཚེ་དང་ལྡན་པ་ལྟེང་རྒྱས་འོད་སྲུང་དང ། ཚེ་དང་ལྡན་པ་ནམ་གྲུ་ནས་ཚེ་དང་ལྡན་པ་ཀུན་དགའ་བོའི་བར་དེ་ལ་སོགས་པའི་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དག་དང་ཐབས་གཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་དགེ་སློང་གི་དགེ་འདུན་དང་བཅས་པ་ལ་ལུས་འཕགས་མོའི་བུ་ཡུལ་མ་ག་དྷཱའི་རྒྱལ་པོ་མ་ 505a ༄#། །སྐྱེས་དགྲས་ན་བཟའ་དང ། བཤོས་དང ། གཟིམས་ཆ་དང ། བསྙུན་གྱི་གསོས་སྨན་དང ། ཡོ་བྱད་རྣམས་ཀྱིས་བཀུར་བསྟིར་བྱས། བླ་མར་བྱས།་བསྟི་སྟང་དུ་བྱས། མཆོད་པར་བྱས་སོ། །ཡང་དེའི་ཚེ་ས་ཡང་ཆེར་གཡོས་པར་གྱུར། སྤྲིན་འདུས་པ་ཆེན་པོའང་བྱུང ། དུས་མ་ཡིན་པའི་རླུང་དང ། སེར་བ་ཆེན་པོ་དང ། སྤྲིན་ཆེན་པོ་ལས་ཆར་པ་ཆེན་པོའང་འབབ་པར་གྱུར། འབྲུག་ཀྱང་དི་རི་རི་ཟེར། གློག་ཀྱང་བྱུང ། ཕྱོགས་བཅུའང་འཁྲུགས་པར་གྱུར་ཏོ། །མུན་པ་མུན་ནག་ཆེན་པོའང་བྱུང་སྟེ་སྐར་མ་རྣམས་ཀྱང་མི་སྣང ། ཉི་མ་དང ། ཟླ་བ་རྣམས་ཀྱང་འོད་དང་མི་ལྡན་པར་གྱུར་ཏེ་ལྷན་ནེར་མ་ཡིན་ལྷང་དེར་མ་ཡིན་ཞིང་འོད་མི་གསལ་བར་གྱུར་ཏོ། །དེ་ནས་ཡངས་པ་ཅན་གྱི་གྲོང་ཁྱེར་ཆེན་པོར་འཇིགས་པ་དེ་དག་བྱུང་བ་དང ། ཡངས་པ་ཅན་གྱི་ལི་ཙ་བཱི་ཁ་ཅིག་གིས་གྲོང་གཞན་དང ། གྲོང་ཁྱེར་གང་ཡིན་པ་དེ་དག་གདོན་འབྱུང་པོས་བཏབ་པར་གྱུར། གྲོང་གི་གཞོན་ནུ་རྣམས་དང ། རྩིས་མཁན་རྣམས་དང ། བློན་པོ་དང ། བློན་པོ་ཆེན་པོ་དང ། འཁོར་ན་གནས་པ་དང ། བྲན་ཕོ་དང ། བྲན་མོ་དང ། ལས་བྱེད་པ་དང ། མངག་པ་དང ། གཡོག་ཁ་ཅིག་ཀྱང་གདོན་འབྱུང་པོས་བཏབ་པར་གྱུར། ཡུལ་ཡངས་ 505b པ་ཅན་གྱི་ལྗོངས་ཀུན་གྱི་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་ཀྱང་འཇིགས་སྐྲག་དངངས་ཏེ་སྐྱི་བུང་ཞེས་བྱེད་ནས་ཁ་གནམ་དུ་བལྟས་ཏེ་དུ་འབོད་ཅིང་སངས་རྒྱས་དང ། ཆོས་དང ། དགེ་འདུན་ལ་ཕྱག་འཚལ། བྲམ་ཟེ་དང ། ཁྱིམ་བདག་གང་དག་སངས་རྒྱས་ཀྱི་བསྟན་པ་ལ་མངོན་པར་མ་དད་པའི་བྲམ་ཟེ་དང།་ཁྱིམ་བདག་དེ་དག་ཁ་ཅིག་ནི་ཚངས་པ་ལ་ཕྱག་འཚལ། ཁ་ཅིག་ནི་བརྒྱ་བྱིན་ལ། ཁ་ཅིག་ནི་འཇིག་རྟེན་སྐྱོང་བ་རྣམས་ལ་ཕྱག་འཚལ། ཁ་ཅིག་ནི་དབང་ཕྱུག་ཆེན་པོ་དང ། ནོར་བུ་བཟང་པོ་དང ། གང་བ་བཟང་པོ་དང ། འཕྲོག་མ་དང ། ཉི་མ་དང ། ཟླ་བ་དང ། གཟའ་དང ། སྐར་མ་དང ། རི་དང ། ནགས་ཚོགས་དང ། སྨན་དང།་ཤིང་ལྗོན་པ་དང ། ཀླུང་དང ། ལྟེང་ཀ་དང ། མཚེའུ་དང ། རྫིང་བུ་དང ། རྫིང་དང ། མཆོད་རྟེན་གྱི་གནས་ན་གནས་པ་དག་ལ་ཕྱག་འཚལ་ཞིང་བདག་ཅག་འདི་འདྲ་བའི་གནོད་པས་འཇིགས་པའི་གནས་ནས་ཇི་ལྟར་ཐར་བར་འགྱུར་སྙམ་དུ་སེམས་ཤིང་འཁོད་པ་དག་བཅོམ་ལྡན་འདས་ཀྱིས་མི་ལས་འཕགས་པའི་སྤྱན་རྣམ་པར་དག་པས་གཟིགས་སོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་པས་སྟོང་གསུམ་གྱི་སྟོང་ཆེན་པོའི་ 506a ༄#། །འཇིག་རྟེན་གྱི་ཁམས་དབྱངས་ཀྱིས་གོ་བར་གྱུར་ནས་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་དད་པར་གྱུར་ཏེ་འདུས་པར་གྱུར་པ་རྣམ་པ་དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ། མངོན་པར་འདུ་མཛད་དོ། །དེ་ནས་མི་མཛད་ཀྱི་བདག་པོ་ཚངས་པ་དང ། ཚངས་རིས་ཀྱི་ལྷ་རྣམས་དང ། ལྷ་རྣམས་ཀྱི་དབང་པོ་བརྒྱ་བྱིན་དང ། སུམ་ཅུ་རྩ་གསུམ་གྱི་ལྷ་རྣམས་དང ། རྒྱལ་པོ་ཆེན་པོ་བཞི་དང ། རྒྱལ་ཆེན་བཞིའི་རིས་ཀྱི་ལྷ་རྣམས་དང ། གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་དང ། གནོད་སྦྱིན་ཆེན་པོ་སྟོབས་པོ་ཆེ་སུམ་ཅུ་རྩ་གཉིས་དང ། འཕྲོག་མ་བུ་དང་བཅས་འཁོར་དང་བཅས་པ་ཁ་དོག་འཕགས་པ་དག་ནུབ་མོ་འདས་པ་དང ། དག་པ་ལྟ་བུའི་བྱ་རྒོད་ཕུང་པོའི་རི་ལ་བདག་གི་ཁ་དོག་དང་མཐུས་སྣང་བ་ཆེན་པོས་སྣང་བར་བྱས་ཏེ་བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འཁོད་ནས་ཚིག་གཅིག་དབྱངས་གཅིག་ངག་གཅིག་ཏུ་བཅོམ་ལྡན་འདས་ལ་ཚིགས་སུ་བཅད་དེ་མངོན་པར་བསྟོད་པ། ཤིན་ཏུ་འབར་བའི་གསེར་དང་འདྲ། །ཟླ་བ་ཉ་བའི་འོད་དང་མཚུངས། །དཔལ་ལྡན་རྣམ་ཐོས་བུ་བཞིན་བརྟན། །རིན་ཆེན་ 506b རྣམས་ཀྱིས་འབྱུང་གནས་ལེགས། །སེངྒེ་གླང་ཆེན་འདྲ་བའི་འགྲོས། །གླང་ཆེན་མྱོས་པ་བཞིན་དུ་གནོན། །གསེར་གྱི་རི་བོ་དང་ཡང་མཚུངས། །ཛམྦུ་གླིང་གི་གསེར་རྒྱན་འདྲ། །སྐར་མ་རྣམས་ཀྱིས་ཡོངས་བསྐོར་བའི། །ནམ་མཁའི་ཟླ་བ་དྲི་མེད་བཞིན། །ཉན་ཐོས་དགེ་འདུན་རྣམས་ཀྱི་དབུས། །མཚན་རྣམས་ཀྱིས་ནི་བརྒྱན་པར་གྱུར། །ལྷ་དང་བཅས་པའི་འཇིག་རྟེན་འདི། །ཐུབ་པ་ལ་ནི་སྐྱབས་སུ་མཆི། །མི་རྣམས་ལ་ནི་ཕན་པའི་ཕྱིར། །སྲུང་བ་དུས་སུ་ཉེ་བར་གནས། །སངས་རྒྱས་སྔ་མས་བཤད་པ་ཡི། །སྟོང་ཆེན་རབ་འཇོམས་མདོ་སྡེ་འདི། །ཁོར་ཁོར་ཡུག་རི་མཐའི་བར། །མཚམས་གཅོད་པ་ཡི་དམ་པ་ལགས། །ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཆོས་ཀྱི་རྒྱལ་པོ་ཐུབ་ཆེན་ལ། །ཐལ་མོ་སྦྱར་ཏེ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་ཡུད་ཙམ་ཅིག་ཅང་མི་གསུང་བར་དགོངས་ནས་རྒྱལ་པོ་ཆེན་པོ་དག་ལ་བཀའ་སྩལ་པ། རྒྱལ་པོ་ཆེན་པོ་དག་།གང་ཁྱེད་ཀྱི་འཁོར་ངའི་འཁོར་ལ་འཚེ་བར་སེམས་པ་དེ་ནི་ཚུལ་མ་ཡིན་ནོ། །དེ་ཅིའི་ཕྱིར་ཞེ་ན། མིའི་འཇིག་རྟེན་འདིར་སངས་རྒྱས་བྱུང་བ་དང ། ཆོས་ལེགས་པར་གསུངས་པ་དང ། དགེ་འདུན་ལེགས་པ་སྒྲུབ་པ་དེ་ལ་ས་བོན་འདི་བཏབ་ན་སངས་རྒྱས་བཅོམ་ལྡན་འདས་རྣམས་དང ། རང་སངས་རྒྱས་ 507a ༄#། །རྣམས་དང ། དགྲ་བཅོམ་པ་རྣམས་དང ། ཉན་ཐོས་རྣམས་འཇིག་རྟེན་དུ་འབྱུང་བར་འགྱུར། དེ་ལ་འཇིག་རྟེན་དེ་དག་གིས་དགེ་བའི་རྩ་བ་བསྐྱེད་ནས་ལྷའི་རིས་སུམ་ཅུ་རྩ་གཉིས་ལས་ལྷའི་རིས་གང་ཡང་རུང་བ་དག་ཏུ་སྐྱེ་བར་འགྱུར། རྒྱལ་པོ་དག་ཀྱང་དམག་རྣམ་བཞི་དང་ལྡན་པ་ནས་གླིང་བཞི་ལ་དབང་བའི་འཁོར་ལོས་བསྒྱུར་བའི་རྒྱལ་པོར་འགྱུར་རོ། །རྒྱ་མཚོ་ལ་ཐུག་པའི་སའི་དཀྱིལ་འཁོར་ཆེན་པོར་ཆོས་ཀྱི་རྒྱལ་སྲིད་བྱེད་པར་འགྱུར་ཏེ་དེ་དག་ལའང་བུ་དཔའ་བ། རྟུལ་ཕོད་པ།་ཡན་ལག་མཆོག་གི་གཟུགས་དང་ལྡན་པ། ཚན་པོ་ཆེའི་སྟོབས་ཀྱི་ཤུགས་བདོག་པ། ཕ་རོལ་གྱི་སྡེ་རབ་ཏུ་འཇོམས་པ། རིན་པོ་ཆེ་སྣ་བདུན་དང་ལྡན་པ་སྟོང་འབྱུང་བར་འགྱུར་རོ། །དེ་བས་ན་འཇིག་རྟེན་འདིར་རྣམ་པ་འདི་ལྟ་བུ་འབྱུང་བར་འགྱུར་བར་ཁྱེད་སྙིང་ལས་ཆུང་དུས་གནས་པས་གནས་པར་གྱིས་ཤིག་།དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ལ་གྲོང་དང ། སྐྱེད་མོས་ཚལ་དང ། གཞལ་མེད་ཁང་དང ། 507b ཁང་པ་བརྩེགས་པ་དང ། བསིལ་ཁང་དང ། སྒོ་ཁང་དང ། རྟ་བབས་དང ། སྐར་ཁུང་དང ། དར་གྱི་ལྡ་ལྡི་བཟང་ཞིང་མཛེས་པ་རྣམ་པ་སྣ་ཚོགས་དང་ལྡན་པ་དང ། དྲིལ་བུ་དང ། མུ་ཏིག་གི་དྲ་བས་ཡོངས་སུ་བསྐོར་བ་དང ། པོག་ཕོར་ནས་བདུག་པས་བདུགས་པ་དང ། མེ་ཏོག་གིས་གཏོར་བའི་ཁྱིམ་དང ། གནས་དང ། ཁང་པ་ཆེན་པོ་དག་མཆིས་ཏེ་དེར་བདག་ཅག་བུད་མེད་བརྒྱ་ཕྲག་སྟོང་དག་གིས་ཡོངས་སུ་བསྐོར་ཅིང་འདོད་པའི་ཡོན་ཏན་ལྔ་ཚངས་པར་སྤྱོད་པ་དང་ལྡན་པར་གྱུར་ནས་གནས་ཏེ། བཙུན་པ་བཅོམ་ལྡན་འདས་བདག་ཅག་རབ་ཏུ་མྱོས་པས་བག་མ་མཆིས་པར་གནས་པས་གནས་པ་ན་འཁོར་ཟས་དང ། སྐོམ་ཚོལ་དུ་ཕྱོགས་བཅུ་ཀུན་ཏུ་འབྱེར་ཞིང་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་དང ། བཙས་མ་ཐག་པ་དང ། དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་རྣམས་ཀྱི་མདངས་འཕྲོག། འཚེ་བར་བགྱིད། བགེགས་བགྱིད། འགུམ་པར་བགྱིད། གསོད་པར་བགྱིད། སྲོག་དང་བྲལ་བར་བགྱིད་དེ་བཙུན་པ་བཅོམ་ལྡན་འདས་ཀྱི་སྤྱན་སྔར་བདག་ཅག་གིས་འཁོར་བཞིའི་མདུན་དུ་བདག་ཅག་གི་འཁོར་གྱི་ཚུལ་གྱི་མཚན་མ་བསྟན་པར་བགྱིའོ། །གང་གི་འཁོར་གྱི་གདོན་བྱུང་བ་དེར་རྒྱལ་པོ་ཆེན་པོ་དེའི་གཟུགས་མཆོད་རྟེན་དང་བཅས་པ་ཆེན་པོ་བགྱིས་ཏེ་ནད་པས་རྒྱལ་པོ་ཆེན་པོ་ 508a ༄#། །དེའི་མིང་ནས་དབྱུང་ཞིང་དྲི་སྣ་ཚོགས་ཀྱིས་རང་གི་ལག་ནས་བདུག་པར་འགྱིའོ། །དེས་ས་ལ་མེ་ཏོག་བསིལ་མ་བཀྲམ་སྟེ་ཞུགས་མར་བསལ་མཆོད་རྟེན་དེ་ལ་མཆོད་པར་བགྱིའོ། །བཙུན་པ་བཅོམ་ལྡན་འདས། བདག་གི་འཁོར་གནོད་སྦྱིན་གྱི་གདོན་གྱིས་བཏབ་པའི་ཚུལ་གྱི་མཚན་མ་ནི་འདི་ལྟ་བུ་ལགས་ཏེ། ཕྱི་ཕྱིར་རྗོད་\?\་ཅིང་འཇིགས་པར་འགྱུར། །སྨྲ་བར་བགྱིད་ཅིང་ཁྲོ་བར་འགྱུར། །དེ་ནི་གཉིད་ཀྱང་ལོག་པར་འགྱུར། །ཡང་ན་ཤིན་ཏུ་ན་བར་འགྱུར། །རྟག་ཏུ་གྱེན་དུ་བལྟ་བར་འགྱུར། །སྐར་མ་དག་ལ་སྙེགས་པར་བགྱིད། །ནུབ་མོ་ཤིན་ཏུ་དགའ་བར་འགྱུར། །རྟག་ཏུ་འདར་ཞིང་སྒྲ་འབྱིན་ཏེ། །དེ་ལ་སྔགས་ཀྱི་ཚིག་མཆིས་ཀྱི། །འཇིག་རྟེན་མགོན་པོ་བདག་ལ་གསོན། །སྱཱད་ཡ་ཐེ་དན། སིདྡྷེ་སུ་སིདྡྷེ། ས་ཏྭེ་ཨ་རེ། ཨ་རེ་ཎ། བ་ལེ། མཧཱ་བ་ལེ། ཛམྦྷེ། ཛི་ཊི་ལེ། ཨ་ཁ་ནེ། མ་ཁ་ནེ། ཁ་ཁ་ནི། ཁ་རཊྚེ།་ཁར་རྒ་ལེ། ཧ་རི་པིངྒ་ལེ། ཏི་མིངྒི་ལེ་ཏི་མིངྒི་ལེ། ཏི་མིངྒི་ལི་ནི་མངྒ་ལེ་སཝཱ་ཧཱ། བདག་གི་སྔགས་ཀྱི་ཚིག་རྣམས་གྲུབ་པར་གྱུར་ཅིག་།རྒྱལ་པོ་ཆེན་པོ་རྣམ་ཐོས་ཀྱི་བུའི་མིང་དང ། སྟོབས་དང ། དབང་ཕྱུག་དང ། བྱིན་གྱིས་བདག་དགེ་བར་གྱུར་ཅིག་སཝཱཧཱ། དེ་ནས་རྒྱལ་པོ་ཆེན་པོ་ཡུལ་འཁོར་སྲུང་སྟན་ལས་ལངས་ཏེ་བླ་ 508b གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་འཁོར་དྲི་ཟའི་གདོན་གྱིས་བཏབ་པའི་ཚུལ་གྱིས་མཚན་མ་ནི་འདི་ལྟ་བུ་ལགས་ཏེ། གླུ་ལེན་ཅིང་ནི་བྲོ་རྡུང་སྟེ། །རྒྱན་རྣམས་ལ་ཡང་དགའ་བར་བགྱིད། །བརྐམ་པ་མ་མཆིས་མང་པར་སྨྲ། །རྒོད་པར་བགྱིད་ཅིང་ཁྲོ་བར་འགྱུར། །སྐོམ་པར་འགྱུར་ལ་མིག་དམར་ཏེ། །རྟག་ཏུ་རིམས་ཀྱིས་འདེབས་པར་བགྱིད། །མིག་ཀྱང་འབྱེད་པར་མི་བགྱིད་དེ། །རྒྱབ་ཀྱིས་ཕྱོགས་ཤིང་ཉལ་བར་བགྱིད། །དེ་ལ་སྔགས་ཀྱི་ཚིག་མཆིས་ཀྱི། །འཇིག་རྟེན་མགོན་པོ་བདག་ལ་གསོན། སྱཱད་ཡ་ཐེ་དན་\?\། ཨ་ཁེ། ན་ཁེ། བི་ན་ཁེ། བནྡྷེ། བ་རཱངྒེ། ཙ་པ་ལེ། བ་ཁེ། བ་ཁ་ནེ། བ་ཁ་ནེ། ཨ་བི་ནི། ན་ལོ་ནི། བ་ཧུ་ལེ། བྷ་ཁེ། བྷ་གནད་ལེ། བ་ཤེ་བ་ཤ་བརྟི་ནི་སཝཱཧཱ།་རྒྱལ་པོ་ཆེན་པོ་ཡུལ་འཁོར་སྲུང་གི་མིང་དང ། སྟོབས་དང ། དབང་ཕྱུག་དང ། བྱིན་གྱིས་བདག་གདོན་ཐམས་ཅད་ལས་ཐར་བར་གྱུར་ཅིག་སཝཱཧཱ། དེ་ནས་རྒྱལ་པོ་ཆེན་པོ་འཕགས་སྐྱེས་པོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེར་ལོགས་ 509a ༄#། །སུ་ཐལ་མོ་སྦྱར་ནས་བཅོམ་ལྡན་འདས་ཉིད་ལ་ཕྱག་འཚལ་ཞིང་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་འཁོར་ཡི་དྭགས་གྲུལ་བུམ་གྱིས་ཟིན་པའི་ཚུལ་གྱིས་མཚན་མ་ནི་འདི་ལྟ་བུ་ལགས་ཏེ། ཤིན་ཏུ་སྐོམ་པས་འདེབས་པར་གྱུར། །གཡེང་བས་བཏབ་ཅིང་བལྟ་བར་འགྱུར། །བཞིན་ཡང་དམར་པོར་གདའ་བར་འགྱུར། །བསྐུམས་ནས་ས་ལ་ཉལ་བར་འགྱུར། །ཁ་དོག་ངན་ཅིང་ལུས་ཀྱང་སྐེམ། །སྐྲ་དང་སེ་མོ་རིང་བ་སྟེ། །དྲི་མ་ཅན་ལ་དྲི་མི་བདའ། །བརྫུན་དང་ཀྱལ་པ་སྨྲ་བར་བགྱིད། །དེ་ལ་སྔགས་ཀྱི་ཚིག་མཆིས་ཀྱི། །འཇིག་རྟེན་མགོན་པོ་བདག་ལ་གསོན། །སྱཱད་ཡ་ཐེ་དན། ཁ་ཁ་ཁ་མི། ཁ་ལ་ནེ། ཁ་ལ་མི། ཁ་རཱ་ལི། ཁ་ར་ལི། ཀ་ར་ཁེ། ཀ་ཤི་ནེ། ཀ་ར་ཊེ། ཀཱ་ལི། ཀཱ་མི་ནི། བི་བ་ལ། བི་དྷེ་ཡ་ཤ་ནི་ས་པ་བ་ཏེ། ཤ་མ་ཤ་མ་ནི་སཝཱཧཱ། རྒྱལ་པོ་ཆེན་པོ་འཕགས་སྐྱེས་པོའི་མིང་དང ། སྟོབས་དང ། དབང་ཕྱུག་དང ། བྱིན་གྱིས་བདག་གི་གདོན་དང ། གནོད་པ་ཐམས་ཅད་ཞི་བར་གྱུར་ཅིག་སཝཱཧཱ། དེ་ནས་རྒྱལ་པོ་ཆེན་པོ་མིག་མི་བཟང་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་ 509b འདས་ཉིད་ལ་ཕྱག་འཚལ་ཞིང་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་འཁོར་ཀླུ་འདབ་བཟང་གི་གདོན་གྱིས་བཏབ་པའི་ཚུལ་གྱི་མཚན་མ་ནི་འདི་ལྟ་བུ་ལགས་ཏེ། སྐྱིགས་བུས་འདེབས་ཤིང་དབུགས་ཀྱང་འབྱིན། །དེ་བཞིན་དབུགས་ཀྱང་གྲང་བར་འགྱུར། །རྡུལ་ཞིང་དབུ་བ་ཁ་ཆུ་འབྱུང ། །ཕྱི་ཕྱིར་གཉིད་ཀྱང་ལོག་པར་འགྱུར། །ཁ་དོག་ལྡན་ཞིང་དཔའ་བ་སྟེ། །དེ་བཞིན་འདར་ཞིང་རྒྱུག་པར་འགྱུར། །སེན་མོ་དག་ཀྱང་སྟོན་པར་བགྱིད། །དོག་སར་མཆིས་ཤིང་ངུ་བར་བགྱིད། །དེ་ལ་སྔགས་ཀྱི་ཚིག་མཆིས་ཀྱི། །འཇིག་རྟེན་མགོན་པོ་བདག་ལ་གསོན། །སྱཱད་ཡ་ཐེ་དན། ཀྲ་ཀ་མི། ཀྲ་ག་མ་ནི། ཀྲ་ག་སེ། ཀྲུ་གྲ་ཤེ། ཀྲ་ཀྲ། ཤ་མི། ཀྲུ་ཤྲུ་མི་ཀྲུ་ཤྲུ་མི། ཀྲུཀྐེ། ཀྲུག་ཀླུ་མ། ཀྲུ་གེ་། ག་ལེ། ནཱ་ག་ལེ། ས་མ་ག་ལེ། ཀུ་ཧུ་མེ། གུ་མེ། ཨ་ལ་ཀེ། ཀ་ལུ་ཀེ། ཀ་ལ་མ་ལེ། ག་ལ་ལེ། ཨི་རི་མི་རེ། དྷི་རེ། ཨ་རུ་ག་བ་ཏི་སཝཱཧཱ། རྒྱལ་པོ་ཆེན་པོ་མིག་མི་བཟང་གི་མིང་དང ། སྟོབས་དང ། བྱིན་གྱིས་བདག་དགེ་བར་གྱུར་ཅིག་སཝཱཧཱ། དེ་ནས་བཅོམ་ལྡན་འདས་ཀྱིས་དེའི་ཚེ་འཁོར་ཐམས་ཅད་མདུན་དུ་སེང་གེའི་སྒྲ་བསྒྲགས་པ། ང་ནི་སྟོབས་བཅུ་དང་ལྡན་ཞིང་མི་འཇིགས་པ་བཞིས་འཇིགས་པ་མེད་པ་སྟེ་འཁོར་གྱི་ནང་དུ་སེང་གེ་སྒྲ་ཁྱུ་མཆོག་ལྟ་བུ་རྒྱ་ཆེན་པོ་ཡང་དག་པར་བསྒྲགས་ 510a ༄#། །སོ། །ཚངས་པའི་འཁོར་ལོ་བསྐོར་རོ། །སྡེ་དང་མཐུ་དང་བཞོན་བཅས་པའི། །བདུད་ཀྱང་གཅིག་གིས་རབ་ཏུ་བཏུལ། །སེམས་ཅན་ཐམས་ཅད་བསྲུང་བའི་ཕྱིར། །རིག་སྔགས་ཐམས་ཅད་ང་ལ་ཉོན། །སྱཱད་ཡ་ཐེ་དན། ཨ་སང་གེ། ཁཌྒ་བ་ཏེ། བ་ལ་བ་ཏེ། བ་ལ་ནི་རྒྷོ་ཥེ། ཤཱུ་རེ། ཤཱུ་ར་དྷ་རེ་བཛྲ་ས་མེ། བཛྲ་ག་མེ། བཛྲ་དྷ་རེ། སྟམྦྷེ། ཛཾ་བྷེ། དྲྀ་ཌྷ་སཱ་རེ། བི་ར་ཛེ། བི་གྷོ་ཥེ། བ་རཱ་གྲ་པྲཱཔྟེ། ཨ་ར་ཎེ། ཨ་ར་ཎེ་དྷརྨ་ཡུཀྟེ། དི་ཤི་བི་གྷུ་ཥྚེ་སཝཱཧཱ། དེ་བཞིན་གཤེགས་པའི་མཚན་དང ། སྟོབས་དང ། དབང་ཕྱུག་དང ། བྱིན་གྱིས་བདག་དགེ་བར་གྱུར་ཅིག་སཝཱཧཱ། ཕྱོགས་བཞིའི་འཇིག་རྟེན་སྐྱོང་བ་དག་།སངས་རྒྱས་ཀྱི་ནི་གསུང་ཐོས་ནས། །འཇིགས་དང་སྐྲག་དང་དངངས་གྱུར་ཏེ། །ཐལ་མོ་སྦྱར་ནས་འཁོད་པར་གྱུར། །འབྱུང་པོའི་ཚོགས་ནི་ལྷགས་པ་རྣམས། །སྡངས་འཁྲུགས་རོད་རོད་པོར་གྱུར་ནས། །ཕྱོགས་བཅུར་རབ་ཏུ་འབྱེར་བྱེད་ཅིང ། །སྒྲ་བོ་ཆེ་ཡང་སྒྲོགས་པར་བྱེད། །རྒྱལ་པོ་ཆེན་པོས་དེ་ཤེས་ནས། །གསང་བ་གསུམ་ནི་ཡང་དག་སྨྲ། །ཀྱེ་མ་རིག་སྔགས་རིག་སྔགས་ཆེ། །སྟོང་ཆེན་རབ་ཏུ་འཇོམས་བྱེད་པ། །སངས་རྒྱས་ཀྱིས་ནི་གསུངས་པ་དེ། །ཐོས་ནས་འབྱུང་པོ་སྐྲག་གྱུར་ཏེ། །དཔེར་ན་རབ་ཏུ་འབར་མེ་དང ། །ཏིལ་མར་ངར་བཏགས་ 510b རལ་གྲི་བཞིན། །གོའུ་ཏམས་ནི་རབ་བཤད་པའི། །རིག་སྔགས་སྤུ་གྲིའི་སོ་དང་འདྲ། །དྲང་སྲོང་ཚིག་ནི་ལེགས་བཤད་པ། །དེ་ལ་གང་ཞིག་མ་དད་ན། །དེ་ཡི་བུ་ཡི་ཐུ་བོ་ནི། ། ཚངས་པའི་ཞགས་པས་མེད་པར་འགྱུར། །མེ་ནི་རབ་ཏུ་འབར་བྱས་ལ། །བླ་དང་འོག་དང་ཕྱོགས་བཞིར་ཡང ། །སྦྱིན་སྲེག་གི་ནི་ཆུས་གཏོར་ཏེ། །ནས་དང་ཡུངས་ཀར་བླངས་ནས་སུ། །མར་གྱི་སྙིང་པོ་དང་སྦྱར་ནས། །མེ་ཡི་ནང་དུ་བླུག་པར་བྱ། །ལེགས་པར་གསུངས་པ་འདི་ཐོས་ནས། །གལ་ཏེ་མྱུར་དུ་མི་གཏོང་ན། །ཐམས་ཅད་འབར་བར་འགྱུར་བ་ནི། །མར་དང་ཡུངས་ཀར་མེར་བླུགས་བཞིན། །གནོད་སྦྱིན་ཆད་པས་བསྡིགས་ནས་སུ། །དེ་དག་བདེ་བ་མི་རྙེད་དེ། །དེ་ཡི་རྩིབ་ལོགས་གཡས་པར་ནི། །འབྲས་ཆེན་ནད་ཀྱང་འབྱུང་བར་འགྱུར། །གནོད་སྦྱིན་ནད་ཀྱིས་བཏབ་པ་ན། །ཤ་བཀྲའི་ནད་ཀྱིས་བཏབ་པར་འགྱུར། །ལྕང་ལོ་ཅན་གྱི་ཕོ་བྲང་དུ། །གཞན་ཡང་འགྲོ་བར་མི་འགྱུར་རོ། །ལུས་ངན་གྲོགས་དང་ལྡན་པ་ཡི། །ཁྱིམ་ཡང་མཐོང་བར་མི་འགྱུར་ཏེ། །འབྱུང་པོ་མང་པོ་ཚོགས་པ་ན། །སྟན་ཡང་ཐོབ་པར་མི་འགྱུར་རོ། །གནོད་སྦྱིན་དག་གི་དཀྱིལ་འཁོར་དུ། །ཟས་སྐོམ་དང་ཡང་འབྲལ་བར་འགྱུར། །སྟོང་ཆེན་རབ་འཇོམས་མདོ་སྡེ་ལ། །གནོད་སྦྱིན་གང་དག་མི་ཕྱོགས་པ། །དེ་ལ་རྡོ་རྗེ་འཆང་ཁྲོས་ཏེ། །སྤྱི་བོ་དག་ནི་འགེམས་པར་འགྱུར། །སྤུ་གྲིའི་སོ་ནི་རྩུབ་མོ་ཡིས། །དེ་ 511a ༄#། །ཡི་ལྕེ་ནི་གཅོད་པར་འགྱུར། །མཚོན་ཆ་ཤིན་ཏུ་རྣོན་པོ་ཡིས། །དེ་ཡི་སྣ་དང་རྣ་བ་གཅོད། །འཁོར་ལ་སྤུ་གྲིའི་སོ་འདྲ་བས། །ཀླད་པ་རབ་ཏུ་གཤགས་པར་བྱེད། ། ཐོ་བ་ལྕགས་ཀྱིས་དཀྲིས་པ་ཡིས། །དེ་ཡི་སྙིང་ཡང་འཇོམས་པར་བྱེད། །རྣག་དང་ཁྲག་ནི་དྲོན་མོ་དག་།དེ་ཡི་ཁ་ནས་འཛག་པར་གྱུར། །རིག་སྔགས་ཞགས་པའི་ཆད་པ་ཡིས། །རྟག་ཏུ་འཁོར་བར་འགྲོ་བ་ན། །འཁོར་བ་གནོད་སྦྱིན་དཀྱིལ་འཁོར་དུ། །དེ་ཉིད་དུ་ནི་འཁོར་བར་འགྱུར། །རྒྱལ་པོ་ཆེན་པོ་དཔལ་ལྡན་པ། །ཕྱོགས་བཞི་དག་ཏུ་སོང་གྱུར་ནས། །ཆོས་ཀྱི་གོ་ཆ་བགོས་གྱུར་ཏེ། །བཟང་པོའི་ཁྲི་ལ་འདུག་པ་ནི། །ཤར་ཕྱོགས་ན་ནི་ཡུལ་འཁོར་སྲུང ། །ལྷོ་ཕྱོགས་ན་ནི་འཕགས་སྐྱེས་པོ། །ནུབ་ཕྱོགས་ན་ནི་མིག་མི་བཟང ། །བྱང་ཕྱོགས་ན་ནི་ལུས་ངན་པོ། །དཔལ་དང་གཟི་བརྗིད་འབར་བ་ཡི། །རྒྱལ་པོ་དག་ནི་ཕྱིན་པ་དང ། །དེ་ཚེ་སྟོན་པ་ཐམས་ཅད་མཁྱེན། །བར་སྣང་གནས་ལ་རབ་ཏུ་འཕགས། །ཚངས་པས་སྤྲུལ་པའི་གཞལ་མེད་ཁང ། །དེ་ནི་རྡོ་རྗེའི་གདན་ལ་ཞུགས། །དེ་ནས་ཚངས་དང་ཚངས་ཆེན་རྣམས། །ཐལ་མོ་སྦྱར་འཁོད་ཕྱག་འཚལ་ལོ། །དཔལ་ལྡན་གསེར་གྱི་རི་བོ་འདྲ། །གསེར་གྱི་མཆོད་སྡོང་དང་ཡང་མཚུངས། །མེ་ཏོག་པདྨ་བཞིན་དུ་རྒྱས། །སཱ་ལའི་རྒྱལ་བོ་བཞིན་དུ་རྒྱས། །ཉི་མ་དང་འདྲ་ཟླ་ཉ་ལ། །སྐར་མ་རྣམས་ཀྱིས་ཡོངས་བསྐོར་བཞིན། །ཐུབ་སྐུ་ 511b གསེར་གྱི་ཁ་དོག་ལ། །མཚན་རྣམས་ཀྱིས་ནི་ཡོངས་སུ་བསྐོར། །འཇིག་རྟེན་མེས་པོ་ཚངས་པ་ཡིས། །འཇིག་རྟེན་སྒྲོན་མ་བསྟོད་བྱས་ཏེ། །འཇིག་རྟེན་མགོན་པོའི་སྤྱན་སྔར་ནི། །འཇིག་རྟེན་སྐྱེ་ལ་འདི་སྐད་སྨྲས། །འཇིག་རྟེན་སྐྱོང་གི་འཁོར་རྣམས་ཀྱིས། །རྗེས་སུ་བསྟན་པ་མ་ཐོབ་སྟེ། །གང་ཕྱིར་འདི་ལས་སངས་རྒྱས་དང ། །རང་སངས་རྒྱས་དག་འབྱུང་འགྱུར་ཞིང ། །འདི་ལས་ཉན་ཐོས་རྣམས་ཀྱང་སྟེ། །ལྷ་རྣམས་དག་ཀྱང་སྐྱེ་བར་འགྱུར། །རིག་བྱེད་ཡན་ལག་དྲུག་མཐར་ཕྱིན། །བྲམ་ཟེ་རྣམས་ཀྱང་སྐྱེ་བར་འགྱུར། །དྲང་སྲོང་སྐལ་པ་ཆེན་པོ་དང ། །དགེ་སློང་བྲམ་ཟེ་འདི་ལས་སྐྱེ། །ཁྱེད་ཅག་སྙིང་ལས་ཆུང་བྱེད་པ། །མི་ཡི་སྐྱེ་དགུ་གནོད་པར་འགྱུར། །ཚངས་པ་ཡི་ནི་ཚིག་ཐོས་ནས། །འཇིག་རྟེན་སྐྱོང་གི་ཚིག་སྨྲས་པ། །ཚངས་པ་ཆེན་པོ་དེ་བཞིན་ནོ། །ཐུབ་པ་ཆེན་པོ་དེ་བཞིན་ནོ། །བདག་གིས་རི་རབ་བསྒུལ་བྱས་ཤིང ། །ས་ཡང་རབ་ཏུ་བཟློག་བྱས་ལ། །རྒྱ་མཚོ་ལ་ནི་ཐུག་པ་རྣམས། །རྣམ་པར་སྦྱང་བ་ཉིད་དུ་བྱ། །ཞགས་པ་དམ་པོ་མ་ཉམས་པས། །ཉི་མ་ཟླ་བ་རླུང་རྣམས་དང ། །སྐར་མ་དག་ནི་ཐམས་ཅད་ཀྱང ། །བདག་གིས་སུ་ནི་བཅིང་བར་བྱ། །གང་དག་རབ་ཏུ་སྡང་བྱེད་ཅིང ། འཇིག་རྟེན་ལ་ནི་ཕན་མི་བྱེད། །དེ་དག་ལ་ནི་ཐམས་ཅད་དུ། །ཕྱོགས་ཀྱང་སྣང་བར་མི་བྱའོ། །འཇིག་རྟེན་ལྷ་དང་བཅས་པ་དེ། །འབྱུང་བོ་རྣམས་ཀྱི་ཕྱིར་སྨོད་དེ། །འབྱུང་པོ་མི་ཡི་སྐྱེ་དགུ་ལ། །གནོད་པར་བྱེད་ཅིང་འཚེ་ 512a ༄#། །བར་བྱེད། །གང་དག་སྔགས་དང་སྨན་རྣམས་དང ། །རིག་སྔགས་ལས་ནི་འདའ་བྱེད་པ། །འདི་ལ་སྔགས་ཀྱི་དམ་པ་ནི། །ཕ་རོལ་གནོན་པ་སྟོན་པར་བྱེད། །རིག་སྔགས་ལས་ནི་འདའ་བའི་འཁོར། །ཀུན་ཏུ་ཆད་པས་བསྡིགས་བྱས་ཏེ། །འཇིག་རྟེན་མགོན་པོའི་སྤྱན་སྔར་ནི། །ཡང་དག་པར་ཡང་བརྗོད་པར་བགྱིད། །གང་གིས་འབྱུང་པོའི་དཀྱིལ་འཁོར་དུ། །འདི་བཤད་པ་ནི་མི་ཉན་པ། །དེ་དག་ཆད་པ་བཤད་པར་བྱ། །ཚངས་པས་སྤྲུལ་པའི་མདོ་སྡེ་འོ། །སངས་རྒྱས་ཞབས་ལ་ཕྱག་བཙལ་ཏེ། །ཕན་ཚུན་དུ་ནི་བལྟས་བྱས་ལ། ། བཻ་ཌཱུརྱ་དང་གསེར་དང་དངུལ། །མུ་ཏིག་རྣམས་དང་ཤེལ་དག་དང ། །སྤུག་དང་རྡོ་ཡི་སྙིང་པོ་དང ། །རིན་ཆེན་བདུན་གྱིས་བརྒྱན་པ་ཡི། །རྩིབས་སྟོང་ཁ་དོག་གསེར་འདྲ་བའི། །ཤིང་རྟ་རྣམ་བ་བཞི་བྱས་པ། །བཟོ་རྣམས་ཀུན་དང་ལྡན་པ་སྟེ། །རྫུ་འཕྲུལ་གྱིས་ནི་མཁའ་ལ་འགྲོ་།རྒྱལ་པོ་དག་ནི་དེར་བཞུགས་ནས། །འབྱུང་པོའི་དཀྱིལ་འཁོར་ཉིད་དུ་དོང ། །ས་ནི་གསེར་གྱི་ཕྱེ་མ་དང ། །མེ་ཏོག་དག་གིས་བཀང་བྱས་ནས། །མགུལ་བར་ལྟུང་དང་སྐུད་པ་དང ། །ཞགས་པ་དག་ཀྱང་གདགས་བྱོས་ལ། །ཕྱོགས་ཀྱི་ས་ནི་ཇི་སྙེད་པའི། །འབྱུང་པོ་ཐམས་ཅད་ཁྲིད་ཤོག་ཅེས། །གནོད་སྦྱིན་གྱི་ནི་སྡེ་དཔོན་ཀུན། །ཕྱོགས་བཞི་དག་ཏུ་དགྱེ་བ་བྱས། །སྟོང་ཆེན་རབ་ཏུ་འཇོམས་པ་ཡི། །མདོ་སྡེ་ཡི་ནི་དམ་པ་འདི། །ཚངས་པའི་འཇིག་ 512b རྟེན་བར་དུ་བྱུང ། །ལྷ་རྣམས་ཀུན་གྱི་རྣམ་པར་བསམས། །སྟོང་ཆེན་པོ་ཡི་ལུས་ཀྱིས་སུ། །གནོད་སྦྱིན་དང་ནི་སྲིན་པོ་བཏུལ། །ལུས་ངན་པོ་ཡི་ཚིག་ཐོས་ནས། །གནོད་སྦྱིན་གྱི་ནི་སྡེ་དཔོན་དག།་ཕྱོགས་བཞི་དག་ཏུ་སོང་ནས་སུ། །གསང་བ་པོ་ལ་དྲག་ཏུ་བསྒོ། །ཐུབ་པ་འབྱུང་པོ་ཉི་ཤུ་བརྒྱད། །དྲི་ཟ་ལས་བྱུང་གདོན་གྱི་རྣམས། །ཤར་ཕྱོགས་ཆ་ནི་འཁོད་པ་དག་།མདོ་སྡེའི་ཞགས་པས་དེ་དག་ཀུན། །བཅིང་བ་ལྔ་ཡིས་བསྡམས་པ་ཡི། །འབྱུང་པོ་མང་པོ་ང་ལ་ཉོན། །ཐུབ་པ་འབྱུང་པོ་ཉི་ཤུ་བརྒྱད། །གྲུལ་བུམ་ལས་བྱུང་གདོན་གྱི་རིགས། །ལྷོ་ཕྱོགས་ཆ་འདིར་འཁོད་པ་དག་།མདོ་སྡེའི་ཞགས་པས་དེ་དག་ཀུན། །བཅིང་བ་ལྔ་ཡིས་བསྡམས་པ་ཡི། །འབྱུང་པོ་མང་པོ་ང་ལ་ཉོན། །ཐུབ་པ་འབྱུང་པོ་ཉི་ཤུ་བརྒྱད། །ཀླུ་ལས་གདོན་དུ་གྱུར་པ་རྣམས། །ནུབ་ཕྱོགས་ཆ་འདིར་འཁོད་པ་དང ། །མདོ་སྡེའི་ཞགས་པས་དེ་དག་ཀུན། །བཅིང་བ་ལྔ་ཡིས་བསྡམས་པ་ཡི། །འབྱུང་པོ་མང་པོ་ང་ལ་ཉོན། །ཐུབ་པ་འབྱུང་པོ་ཉི་ཤུ་བརྒྱད། །གནོད་སྦྱིན་ལས་ནི་གདོན་གྱུར་པ། །བྱང་ཕྱོགས་ཆ་འདིར་འཁོད་པ་དག་།མདོ་སྡེའི་ཞགས་པས་དེ་དག་ཀུན། །བཅིང་བ་ལྔ་ཡིས་བསྡམས་པ་ཡི། །འབྱུང་པོ་མང་པོ་ང་ལ་ཉོན། །ལུས་ངན་པོ་ཡི་བུ་ཐུ་བོ། །ཀུན་ཏུ་རྒྱལ་བ་མི་ལ་ཞོན། །དེ་ཡི་དྲུང་ན་འཁོད་པ་ཡི། །གནོད་སྦྱིན་བྱེ་བ་དྲུག་ཅུ་དག་།བཅིང་བ་རྣམ་པ་ལྔས་བསྡམས་ནས། །མདོ་སྡེའི་ 513a ༄#། །ཞགས་པས་ཀུན་ཏུ་དྲངས། །དེ་ཉིད་ཀྱི་ནི་བུ་གཉིས་པ། །སྐྱེད་པ་པོ་ཞེས་རྣམ་གྲགས་པ། །དེ་ཡི་དྲུང་ན་འཁོད་པ་ཡི། །གནོད་སྦྱིན་བྱེ་བ་དྲུག་ཅུ་དག་།བཅིང་བ་རྣམ་པ་ལྔས་བསྡམས་ནས། །མདོ་སྡེའི་ཞགས་པས་ཀུན་ཏུ་དྲངས། །དེ་ཉིད་ཀྱི་ནི་བུ་གསུམ་པ། །དེ་ཡི་མིང་ནི་གདོན་པོ་ཆེ། །དེ་ཡི་དྲུང་ན་འཁོད་པ་ཡི། །གནོད་སྦྱིན་བྱེ་བ་དྲུག་ཅུ་རྣམས། ། བཅིང་བ་རྣམ་པ་ལྔས་བསྡམས་ནས། །མདོ་སྡེའི་ཞགས་པས་ཀུན་ཏུ་དྲངས། །དེ་ཉིད་ཀྱི་ནི་བུ་བཞི་པ། །དེ་ཡི་མིང་ནི་བུམ་པའི་ལྟོ། །དེ་ཡི་དྲུང་ན་འཁོད་པ་ཡི། །གནོད་སྦྱིན་བྱེ་བ་དྲུག་ཅུ་རྣམས། །བཅིང་བ་རྣམ་པ་ལྔས་བསྡམས་ནས། །མདོ་སྡེའི་ཞགས་པས་ཀུན་ཏུ་དྲངས། །དབང་ཕྱུག་ཆེན་པོ་ལྷ་ཆེན་པོ། །ལག་བཞི་པ་ལ་སྟོབས་པོ་ཆེ། །དེ་ཡི་དྲུང་ན་འཁོད་པ་ཡི། །གནོད་སྦྱིན་བྱེ་བ་དྲུག་ཅུ་རྣམས། །བཅིང་བ་རྣམ་པ་ལྔས་བསྡམས་ནས། །མདོ་སྡེའི་ཞགས་པས་ཀུན་ཏུ་དྲངས། །འབྱུང་པོ་འཇོམས་པའི་རི་ལ་ནི། །འབྱུང་པོ་ཐམས་ཅད་ལྷགས་ནས་སུ། །རིག་སྔགས་ཐམས་ཅད་འབྱུང་བའི་གནས། །རིག་སྔགས་འདི་ནི་ཀུན་ཏུ་བསམས། །ཆད་པ་མི་བཟད་དྲག་པོ་སྟེ། །གང་ཕྱིར་སངས་རྒྱས་ཀུན་གྱིས་གསུངས། །གོའུ་ཏ་མ་ལ་གུས་པར་ནི། །ཐམས་ཅད་དེ་ལ་སྐྱབས་སུ་སོང ། །གཡོ་མེད་བར་ནི་རྗེས་ཞུགས་ཤིག་།ཐམས་ཅད་མེད་པར་གྱུར་ཏ་རེ། །དེ་ནས་ཐང་ཅིག་ཙམ་གྱིས་ 513b ནི། །འབྱུང་པོ་མང་པོ་ཐམས་ཅད་ལྷགས། །རི་རྣམས་དང་ནི་གཡང་ས་དང ། །རྒྱ་མཚོ་དང་ནི་མཚོ་རྣམས་དང ། །ཀླུང་དང་འབབ་ཆུ་ལུ་མ་དང ། །དབང་ཀློང་དག་ན་གང་འཁོད་དང ། །སྐྱེ་\?\་མོས་ཚལ་དང་གཞལ་མེད་ཁང ། །ཀུན་དགའ་དང་ནི་ནགས་རྣམས་དང ། །མཆོད་རྟེན་གནས་དང་གྲོང་གི་གནས། །ལྗོན་ཤིང་དྲུང་ན་གང་གནས་དང ། །གྲོང་ཁྱེར་སྒོ་ན་གང་གནས་དང། །གྲོང་རྡལ་དང་ནི་ལྗོངས་རྣམས་དང ། །རྒྱལ་པོའི་ཕོ་བྲང་སྒོ་རྣམས་དང ། །གཞལ་མེད་ཁང་ན་གང་གནས་དང ། །དཀྱིལ་འཁོར་དག་དང་དུར་ཁྲོད་དང ། །དེ་བཞིན་ལྷ་ཁང་རྣམས་དང་ནི། །མཚམས་དང་ཤོ་གམ་གནས་རྣམས་དང ། །ཁང་སྟོང་དང་ནི་གྲམས་དང ། །གནོད་སྦྱིན་གང་རྣམས་བླ་འོག་དང ། །ཕྱོགས་བཞི་དང་ནི་མཚམས་རྣམས་ནས། །གནོད་སྦྱིན་བྱེ་བ་སྟོང་རྣམས་ནི། །རིག་སྔགས་ཞགས་པས་བཀུག་པ་རྣམས། །རྫ་རྔ་དག་ནི་བརྡུངས་ནས་སུ། །ལ་ལས་རྔ་ཟླུམ་དག་ནི་བརྡུང ། །པི་ཝང་གླིང་བུ་འཁར་བའི་རྔ། །སྟོབས་ཆེ་རྣམས་ནི་སྒྲ་འབྱིན་ཏེ། །རོལ་མོའི་དབྱངས་སྒྲ་སྣ་ཚོགས་དང ། །གླུ་དང་གར་རྣམས་བྱས་ནས་སུ། །དཔང་པོ་ཟླ་བ་ཆུ་ལྷ་དང ། །བྷ་ར་དྭ་ཛ་སྐྱེ་དགུ་བདག་།མི་ལྡན་པ་དང་ཀུན་ཏུ་ལྟ། །མངོན་ཤེས་གངས་ཅན་རྫོགས་པ་དང ། །ཙནྡན་དང་ནི་འདོད་མཆོག་དང ། །མགུལ་བ་མཛེས་དང་མགུལ་ངེས་དང ། །སྐྱེ་དགུའི་བླ་མར་གྱུར་པ་དང ། །ལྷ་ལས་བྱུང་བའི་མ་ལྡན་དང ། 514a ༄#། །དྲི་ཟ་སྣ་ཚོགས་སྡེ་དང་ནི། །མི་རྒྱལ་རྒྱལ་བ་ཁྱུ་མཆོག་དང ། །དེ་བཞིན་ཕུད་བུ་ལྔ་ཞེས་བྱ། །གཡེར་མ་དང་ནི་ཉི་ཟེར་དང ། །ཉ་ལྕིབས་དང་ནི་རབ་གྲི་བུ། །ཀུན་གྱི་བཤེས་དང་གྲགས་འཛིན་དང ། །འབྲོག་གནས་དང་ནི་ཡིད་བཟང་དང ། །ཁབ་སྣ་དང་ནི་རི་སུལ་ཁ། །ལྔ་འཛིན་དང་ནི་ཁབ་བཟང་དག་།སྡེ་དག་དཔུང་དང་བཞོན་པར་བཅས། །ལྷ་དང་ཀླུ་དང་དྲི་ཟ་དང ། །གནོད་སྦྱིན་སྲིན་པོ་ལྷ་མ་ཡིན། །ཉིན་གསུམ་པ་ཡི་སྨྱོ་བྱེད་དང ། །དེ་བཞིན་བཞི་པའི་རིམས་དག་དང ། །འཇིག་རྟེན་འཚེ་བ་གང་ཡིན་པ། །གནོད་སྦྱིན་སྲིན་པོ་མ་རུངས་རྣམས། །ཕྱོགས་བཞི་ནས་ནི་བཀུག་ནས་སུ། །བཅིང་བ་ལྔ་ཡིས་བསྡམས་པ་རྣམས། །འཇིག་རྟེན་མགོན་པོའི་སྤྱན་སྔ་རུ།། ཐལ་སྦྱར་འཁོད་ནས་འདི་སྐད་སྨྲས། །ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ནས་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །དེ་དག་གི་ནི་མདུན་རྒྱུག་པ། །འབྱུང་པོ་གནོད་སྦྱིན་ལུས་པོ་ཆེ། །ལག་པ་བཞི་པ་མ་རུངས་པ། །རྐང་མང་དང་ནི་རྐང་གཅིག་པ། །རྐང་བཞི་པ་དང་རྐང་གཉིས་པ། །རྐང་པ་སྒྲེང་ལ་སྤྱིའུ་ཚུགས་དང ། །ལུས་མང་མགོ་བོ་གཅིག་པ་དང ། །ལུས་གཅིག་པ་ལ་\?\་མགོ་བཞི་པ། །མིག་མང་པོ་ལ་ལུས་ཕྱེད་དང ། །མིག་གཅིག་ལྟོ་ནི་བཅུ་ 514b གཉིས་དང ། །བོང་བུ་རྔ་མོ་གླང་ཆེན་མགོ་།ལག་པ་བསྒྲེང་ལ་མགོ་བཏུད་དང ། །མཚོན་ཆའི་སོ་དང་མཚོན་ཆའི་ལག་།མཚོན་ཆའི་རྐང་པ་སྲིན་པོའི་རྣམས། །ཟངས་ཀྱི་སྐྲ་དང་ཟངས་ཀྱི་སོ། །ཟངས་ཀྱི་མིག་དང་ཟངས་ཀྱི་ལག་།ཟངས་ཀྱི་ཐོ་བའི་རྐང་པ་དང ། །ཟངས་ཀྱི་སྣ་དང་ཟངས་ཀྱི་ཁ།\?\་རྐང་ལག་ཀུན་ཏུ་འབར་བ་དང ། །མི་ཡི་ལུས་སུ་གནས་པ་རྣམས། །སྒུར་ཞར་ཝ་བ་གསུམ་ཡོད་པ། །མིག་མི་སྡུག་ལ་ཁ་གླལ་བ། །ཆུ་སྲིན་སྟག་གི་གཟུགས་དང་ནི། །གཟུགས་མི་སྡུག་དང་ཁ་རལ་པོ། །མཆུ་འཕྱངས་པོ་དང་སོ་ཡོན་པོ། །རབ་ཏུ་གཏུམ་པོ་ཁྲོ་གཉེར་ཅན། །གསུས་པོ་ཆེ་དང་བུམ་རྣ་བོ། །རྣ་འཕྱངས་པ་དང་རྣ་བ་མེད། །ལག་རིང་དང་ནི་རྣ་བ་རིང ། །སྣ་ཡི་རྩེ་དང་ལ་རྩེ་རིང ། །ལུས་སྐམ་ལུས་ནི་རིང་བ་དང ། །སྐྲ་རིང་རབ་ཏུ་བརྒྱན་པ་དང ། །རྐང་པ་མིད་པ་ཕྲ་བ་དང ། །དྲི་ང་བ་དང་བུམ་ལྟོ་བོ། །ཡན་ལག་ཆུ་སྲིན་འདྲ་བ་དང ། །གཏུན་ཤིང་ཐོ་བ་འདྲ་བའི་ལྟོ། །གནམ་ལྟོ་བོ་ལ་རྣ་བོ་ཆེ། །གྱེན་དུ་བརྫེས་སྐྲ་རབ་ཏུ་དམར། །མགོ་བོ་ཆེ་ལ་གཞུ་མགྲིན་པོ། །སྐམ་པོ་སྒུར་པོ་བུམ་ལྟོ་བོ། །རི་རབ་རྩེ་མོ་བསྒུལ་ནས་སུ། །མེ་འདག་གི་ནི་ཆར་པ་འབེབས། །ལྗོན་ཤིང་རི་དང་རྡོ་བ་དང ། །སྤྲིན་\?\་གྱི་ཚོགས་ཀྱི་མདོག་འདྲ་བ། །དུང་དང་རྔ་ཆེན་རྫ་རྔ་དང ། །གྲུལ་བུམ་རྔ་ཕྲན་རྣམས་ཀྱི་སྒྲ། །འཇིགས་པའི་སྒྲ་ནི་རབ་ཏུ་འབྱིན། །མིད་པོ་ཆེ་ལ་བོང་བུའི་སྒྲ། །ནག་པོ་སེར་པོ་སྔོན་པོ་དང ། །དམར་སེར་ 515a ༄#། །མེ་ལྟར་དམར་སེར་དང། །ཁ་པ་འདྲའི་སྤུ་དང་རལ་གྲིའི་སྒྲ། །དམར་པོ་ཁྲག་གིས་བསྐུས་པ་རྣམས། །མི་རོ་དག་ནི་ཁྱེར་ནས་སུ། །ཟ་བཞིན་དུ་ནི་རྣམ་པར་རྒྱུག་།སོ་རྣོན་ལག་པ་དམར་པོ་དང ། །མཆུ་ནི་ཁྲག་གིས་བསྐུས་པ་དང ། །ལུས་ཕྱེད་དག་ནི་ཟོས་པ་དང ། །མཁལ་མ་སྙིང་དང་ནང་ཁྲོལ་གྱིས། །སྙིམ་པ་ཤིན་ཏུ་བཀང་བ་དང ། །བྱིས་པ་དག་ནི་ཟ་བཞིན་དུ། །མེར་མེར་པོ་དང་སྲོག་ཆགས་ཀྱིས། །རྐང་ལག་རྣམས་ཀྱི་སྟོབས་ཀྱང་འཕྲོག་།ཀེང་རུས་ཀྱི་ནི་ལུས་ཀྱིས་སུ། །སྐྱེ་བོ་མང་པོ་སྐྲག་པར་བྱེད། །ཁྲག་གིས་རབ་ཏུ་བཀང་བ་ཡིས། །མི་ཡི་པགས་པ་ཐོགས་ནས་སུ། །མི་བཟད་དུག་གིས་ཀུན་བསྐུས་ཏེ། །ཕྱོགས་ཕྱོགས་དག་ཏུ་རྣམ་པར་རྒྱུག་།གྲོང་ཁྱེར་རྣམས་ཀྱི་སྒོ་དག་དང ། །ཁྱིམ་ནས་ཁྱིམ་དུ་རྣམ་པར་འཐོར། །རླུང་དང་བད་ཀན་མཁྲིས་པ་རྣམས། །ཕྱོགས་བཞི་དག་ཏུ་འཁྲུག་པར་བྱེད། །དེ་ལྟར་དེ་ན་རྒྱལ་པོ་ཡི། །གདོན་དང་འཇིགས་པ་ཆེན་པོ་རྣམས། །ལྷགས་པ་དེ་དག་ཐམས་ཅད་ཀྱང ། །རིག་སྔགས་ཞགས་པས་རབ་ཏུ་བསྡམས། །ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་སྐྱོད་\?\་ལ། །ཐལ་མོ་སྦྱར་ནས་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །གྲོང་ཁྱེར་གྲོང་དང་ཡུལ་འཁོར་དང ། །ཕོ་བྲང་འཁོར་ན་རྒྱུ་བ་ནི། །གནོད་སྦྱིན་མ་ 515b རུངས་མདངས་འཕྲོག་པ། །སྙིང་རྗེ་མེད་ཅིང་ཁྲག་འཐུང་བ། །ལུས་ཆེན་འཇིགས་པ་ཆེན་པོ་སྟེ། །སྟོབས་པོ་ཆེ་ལ་སྒྲ་ཡང་ཆེ། །མགྲིན་བཅུ་པོ་ལ་མིག་སྟོང་པོ། །གདོན་ཆེན་མིག་ནི་དམར་པོ་རྣམས། །འཁོར་ནི་མང་པོ་རྣམས་བཏང་སྟེ། །ལག་ན་མཚོན་ཐོགས་རབ་ཏུ་འཇིགས། །སྦྲུལ་གྱི་ཞགས་པ་ཐོགས་པ་དང ། །ལག་བཞི་ལག་ན་སྒྲོན་མ་ཐོགས། །ལག་ན་མཚོན་དང་དབྱིག་པ་ཐོགས། །རྡོ་རྗེ་མ་དུང་རྩེ་ལག་པར་ཐོགས། །རབ་ཏུ་དྲག་པའི་དམག་བརྒལ་ནས། །ཕྱོགས་ཀུན་ཏུ་ནི་སྐྲག་པར་བྱེད། །སྡང་བའི་གནས་ན་འཁོད་པ་ཡི། །གསང་བ་པོ་ནི་དད་ཀུན་ཀྱང། །མི་ཡི་འཇིག་རྟེན་འདི་དག་ཏུ། །སྐྱེས་པ་བུད་མེད་གཞན་ཡང་འཛིན། །ཤ་ཁྲག་དྲོན་མོར་བཅས་པ་ལ། །རྣམ་པར་འཁྲུལ་ཅིང་འདོད་པའི་གཟུགས། །སེང་གེ་དང་ནི་སྟག་དང་རྟ། མ་ཧེ་བ་ལང་བོང་བུ་རྔ། །གླང་པོ་ཆེ་ཡི་གཟུགས་འདྲ་བ། །དོམ་དང་གཟིག་དང་སྤྱང་ཀི་དང ། །ཁྱི་དང་ཝ་དང་ར་དག་དང ། །བྱི་ལ་བྱི་བ་སྤྲེའུའི་གཟུགས། །བསེ་དང་ཕག་དང་སྲེ་མོང་དང་།། ཉ་དང་རུས་སྤལ་དག་གི་གཟུགས། །ཁ་ཅིག་དག་ནི་སྲམ་གྱི་གཟུགས། །ཁཝ་དང་འུག་པ་ཁུ་བྱུག་དང ། །བྱ་རྒོད་ཁྲ་དང་ཉ་མིད་བཅས། །རྨ་བྱ་དང་པ་ཐི་བྱ་དང ། །ཁྲུང་ཁྲུང་དང་ནི་བྱ་རྣམས་དང། །ཁ་ཅིག་བྱ་གག་གཟུགས་རྣམས་སུ། །གནོད་སྦྱིན་རྣམས་ནི་མི་ཡིས་མཐོང་\?\། །འདབ་བཟང་བྱ་ཡི་ཚུལ་གྱིས་ཀྱང ། །སྐྱེ་བོ་མང་པོ་སྐྲག་པར་བྱེད། །ཁ་ཅིག་མི་ཡི་མགོ་ཅན་ལ། །ལུས་ 516a ༄#། །ནི་བྱ་གག་བོང་བུ་འདྲ། །ཁ་ཅིག་མཚོན་གྱིས་རབ་ཏུ་འཚེ། །ལུས་དང་བྲལ་བ་དག་ཏུ་སྣང ། །རྣམ་པར་འཁྲུགས་ཤིང་འདོད་ལ་མོས། །རྒྱུ་མའི་ཕྲེང་བས་ཀུན་ཏུ་དཀྲིས། །རྩེ་གསུམ་མདུང་གིས་རབ་འདེབས་ཤིང ། །སྲོག་ཆགས་རྣམས་ལ་གནོད་བར་བྱེད། །མི་བཟད་གདུག་པའི་དབུགས་འབྱིན་ཅིང ། །སྐྱེ་དགུ་འདི་དག་སྐྲག་པར་བྱེད། །སྲོག་ཆགས་རྒྱུད་ནི་ཇི་སྙེད་པར། །སྣ་ཚོགས་ཀྱི་ནི་གཟུགས་སུ་སྣང ། །ཁ་ཅིག་དག་ནི་རི་ཡང་ཐོགས། །ལ་ལ་རལ་གྲི་འཁོར་ལོ་ཐོགས། །གྲངས་ནི་བརྒྱ་ཕྲག་སྟོང་རྣམས་ཏེ། །དབྱུག་པས་བསྡིགས་ཤིང་ཁ་དྲག་པོ། །མིག་ཕྱུང་བ་ལ་བཞིན་མི་སྡུག་།སྲིན་པོ་སོ་ནི་རྣོ་བ་དང ། །སྣ་དང་རྣ་བ་བཅད་པ་དང ། །ལྕེ་སྤྱང་གདོང་ནི་གཉེར་མ་ཅན། །རྐང་ལག་དང་ནི་བཏུབས་པ་དང ། །མགོ་བོ་བཅད་པའི་སྲིན་པོ་རྣམས། །སྐབས་ནི་རབ་ཏུ་ཚོལ་བར་བྱེད། །སྡིག་པ་ཅན་རྣམས་མདངས་ཀྱང་འཕྲོག་།མི་དག་གི་ནི་ལུས་རྣམས་ལ། །རབ་ཏུ་ཕྲ་བའི་གདོན་དུ་སྣང ། །སྤུ་ཡི་བར་དང་གནད་རྣམས་དང ། །དེ་བཞིན་རྨ་ཡི་ཁ་རྣམས་སུ། །ལྷགས་པ་དེ་དག་ཐམས་ཅད་ཀྱང ། །རིག་སྔགས་ཞགས་པས་རབ་ཏུ་དྲངས། །ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ནས་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །རི་ཡི་རྒྱལ་པོ་རི་རབ་དང ། །དེ་བཞིན་ 516b ཁོར་ཁོར་ཡུག་དང ། །བྱ་རྒོད་ཕུང་པོ་གཤོལ་མདའ་འཛིན། །སྤོས་ངད་ལྡང་དང་གངས་ཀྱི་རི། །སྣ་ཚོགས་བརྩེགས་དང་པཎྜ་པཱ། །ན་ལ་དཱ་ཡི་རི་གཉིས་དང ། །དཔལ་གྱི་རི་ཡི་རྩེ་མོ་ནི། །གང་དག་ཤིན་ཏུ་མཐོར་འཕགས་དང ། །རི་པོ་དེ་དག་ཀུན་ལ་ཡང ། །ལྷ་དང་དྲང་སྲོང་གང་གནས་པ། །དེ་དག་ཐམས་ཅད་མི་དགའ་ཞིང ། །འཇིགས་པའི་ཡིད་ཀྱི་མྱ་ངན་བྱེད། །བྱེ་བ་སྟོང་གི་ལྷ་དག་དང ། །བྱེ་བ་ཕྲག་བརྒྱའི་ལྷ་རྣམས་དང ། །ལྷ་ཡི་བུ་མོ་སྐལ་ཆེན་དག་།ཐལ་མོ་རབ་ཏུ་སྦྱོར་བར་བྱེད། །ཐགས་བཟང་རིས་དང་སྒྲ་གཅན་དང། །སིམ་པར་བྱེད་པའང་དེར་ཕྱིན་ཏོ། །ལྷ་མིན་བྱེ་བ་ཕྲག་སྟོང་དང ། །ལྷ་མིན་བྱེ་བ་ཕྲག་བརྒྱ་དང ། །དེ་དག་བུ་མོ་འཕྲུལ་ལྡན་པ། །མང་པོ་ཀུན་ཀྱང་ཐལ་མོ་སྦྱོར། །རབ་ཏུ་གནས་དང་རྒྱ་མཚོ་དང ། །ཀླུ་ཡི་རྒྱལ་པོ་གཟི་ཅན་དང ། །ཀླུ་ཡི་རྒྱལ་པོ་མ་དྲོས་དང ། །དགའ་བོ་ཉེ་དགའ་གཉིས་དག་དང ། །རྡོ་རྗེ་བློ་གྲོས་པཀྴུ་དང ། །གངྒཱ་དགའ་བོ་སིནྡྷུ་མཚོ། །བྱ་ཡི་རྒྱལ་པོ་འདབ་བཟང་དང ། །རྒྱ་མཚོ་ཆེན་པོ་འཁྲུག་བྱེད་དང ། །སྟོང་ཕྲག་བྱེ་བའི་ཀླུ་ཡི་རྣམས། །བྱེ་བ་བརྒྱ་ཡི་ཀླུ་དག་དང ། །དེ་དག་བུ་མོ་སྐལ་ཆེན་རྣམས། །ཐལ་མོ་རབ་ཏུ་སྦྱོར་བར་བྱེད། །ཉི་མ་ཟླ་བ་གཉིས་ཀ་ཡང ། །སྐར་མའི་འཁོར་གྱིས་ཡོངས་སུ་བསྐོར། །གསེར་གྱི་མེ་ཏོག་ཡན་ལག་ན། །མ་ག་དྷཱ་ན་འཇིགས་བྱེད་པ། །གསོ་བའི་མཐའ་ན་ 517a ༄#། །མི་ཐོད་ཅན། །ཀོ་ས་ལ་ན་རབ་ཏུ་དཀར། །བཟང་པོའི་ཡུལ་ན་ཁ་སྤུ་ཅན། །གྱད་ཀྱི་ཡུལ་ན་གྲགས་པ་འཛིན། །ལྔ་འཛིན་པ་ན་སྐྲག་བྱེད་པ། །རྟ་སྐྱེ་བ་ན་མིག་དམར་གནས། །སྲུང་བྱེད་པ་ན་སེར་སྐྱ་སྟེ། །སེམས་པ་ན་ནི་མིག་སེར་པོ། །བེའུ་ལ་ན་བུམ་པའི་ལྟོ། །དགའ་བའི་ཡུལ་ན་རིང་པོར་སྐྱེས། །བ་ལང་འཛིན་ན་རབ་ཏུ་ །། དུང་ཡུལ་ན་ནི་ཉི་མའི་གྲོགས། །ལྗོངས་ཆེན་རྣམས་ཀྱི་གནོད་སྦྱིན་ནི། །བརྗོད་པ་བཅུ་དྲུག་དེ་དག་དང ། །ལག་ན་རྡོ་རྗེ་གནོད་སྦྱིན་ཆེ། །ཆོས་སྐྱོང་རབ་ཏུ་དཀར་བ་དང ། །སེར་སྐྱ་རབ་མཛེས་ཁྱབ་འཇུག་པ། །བུམ་ལྟོ་གསུས་པ་ཟླུམ་པོ་དང ། །ཆུ་སྲིན་བདེན་པ་འཆང་བ་དང ། །ལྔ་ལྡན་རྒྱལ་བ་ཁྱུ་མཆོག་དང ། །གནོད་སྦྱིན་ཆེན་པོ་དབང་ཕྱུག་ཆེ། ། ལག་པ་བཞི་ཅན་སྟོབས་པོ་ཆེ། །སྡེ་པ་རབ་ཏུ་འདུལ་བ་ནི། །མཐུ་བོ་ཆེ་ལ་སྟོབས་པོ་ཆེ། །གཤིན་རྗེ་གཤིན་རྗེའི་ཕོ་ཉ་དང ། །བདུད་རྣམས་སྡེ་དང་བཅས་པ་དང ། །གནོད་སྦྱིན་བྱེ་བའི་གཡོག་འཆང་བ། །གནོད་སྦྱིན་དེ་མིང་འཕྲོག་པོ་ཡིན། །ཤ་རི་ཏ་ནི་སྡེར་བཅས་དང ། །རི་ཡི་བུ་མོ་གནོད་སྦྱིན་མ། །གཟི་བརྗིད་ཆེན་མོ་འཇིགས་པའི་གཟུགས། ། འཕྲོག་མ་ཞེས་ཀྱང་གྲགས་པ་དང ། །གདོལ་པ་\?\་མོ་ནི་གཏུམ་པོ་དང ། །བུ་རྣམས་ལྔ་བརྒྱས་བསྐོར་བ་དང ། །མི་རྡུང་ནག་མོ་ཀརྐ་ཏེ། །པདྨ་དང་ནི་པདྨ་ཅན། །མེ་ཏོག་སོ་དང་ས་ 517b ག་དང ། །སྲིན་མོ་བོང་བུའི་རྣ་ཅན་དང ། །ཙནྡན་དང་ནི་ཁྱབ་འཇུག་ལེན། །སེང་གེ་སེར་སྐྱ་དམར་སེར་པོ། །གླང་པོ་ཀླུ་ཡི་སོ་ཅན་དང ། །རི་བཤེས་དྲག་པོའི་མཆེ་བ་ཅན། །སྲིན་པོ་སོ་བཟང་ཡོད་པ་དང ། །ཚངས་པ་ལེན་དང་ཁྱབ་འཇུག་ལེན། །གནོད་སྦྱིན་ཧ་ལ་ཧ་ལ་དང ། །གནོད་སྦྱིན་རྣམ་པའི་མཆུ་ཅན་དག་།མདུང་དང་མདའ་གཞུ་ཀུན་ཐོགས་ཤིང ། །མི་རྟ་བ་ལང་རི་དྭགས་རྣམས། །ཟ་ཞིང་འཚེ་བ་དེ་དག་ནི། །ཕྱོགས་རྣམས་ཀུན་ཏུ་རྒྱུག་ཅིང་འདོང ། །ས་འདི་རབ་ཏུ་གཡོ་བར་བྱེད། །ནགས་ཚལ་རྣམས་ཀྱང་རབ་ཏུ་སྐེམས། །རི་རྣམས་ཀུན་ནས་གཡོ་བར་བྱེད། །སྐྱེ་དགུ་འདི་དག་འཚེ་བྱེད་ཅིང ། །ཕན་ཚུན་ནས་ནི་འདུ་བ་དག་།རིག་སྔགས་ཀྱིས་ནི་དྲངས་ནས་ལྷགས། །ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ནས་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །འཇིག་རྟེན་མགོན་པོའི་སྤྱན་སྔ་རུ། །དེ་དག་ལྷགས་པར་གྱུར་པ་དང ། །དེ་ནས་རྒྱལ་པོ་རྣམ་ཐོས་བུས། །འཇིག་རྟེན་མགོན་ལ་འདི་སྐད་གསོལ། །བདག་གི་ཕྱོགས་ཆ་བྱང་ཕྱོགས་སུ། །རྒྱལ་པོའི་གནས་སུ་སྤྲུལ་པ་ནི། །ལྕང་ལོར་ལྡན་པ་ཡིད་དུ་མཆི། །དེ་བས་བདག་ནི་ལྕང་ལོའི་བདག་།རྒྱལ་པོའི་ཕོ་བྲང་ལྕང་ལོ་ཅན། །ལྷ་རྣམས་ཀུན་གྱིས་བསམ་པར་གྱུར། །ཕྱིར་ཤིན་ཏུ་མཐོན་པོ་ཅན། །རིན་ཆེན་ཀུན་གྱིས་བརྒྱན་པ་ལགས། །འཕང་དུ་ 518a ༄#། །དཔག་ཚད་བཅུ་དྲུག་སྟེ། །གསེར་གྱི་རྒྱུ་ལས་བགྱིས་པ་ལགས། །ཕྱོགས་བཞི་ལྕོག་ནི་རེ་རེ་ལའང ། །གནོད་སྦྱིན་རྡོ་རྗེ་འཆང་བ་དག་།ཀུན་ནས་རབ་ཏུ་གནས་པར་གྱུར། །ལག་ན་མཚོན་ཆ་ལེགས་པར་སྤྲུལ། །རྒྱལ་པོའི་ཕོ་བྲང་དེ་ཡི་སྒོ། །བཞི་པོ་གཏོད་པར་བགྱིད་པ་ནི། །གཅིག་ནི་གསེར་ལས་བགྱིས་པའི་སྒོ། །གཉིས་པ་དངུལ་ལས་བགྱིས་པ་སྟེ། །གསུམ་པ་ཤེལ་གྱི་སྒོ་མོ་ལགས། །བཞི་པ་གསེར་གྱིས་རྣམ་པར་སྤྲས། །གྲོང་ཁྱེར་དེ་ཡི་ནང་དག་ན། །སྐྱེད་མོས་ཚལ་གྱིས་མེ་ཏོག་རྒྱས། །དེ་ཡི་ནང་ན་གཞལ་མེད་ཁང ། །རིན་ཆེན་བདུན་རྒྱུ་སྣ་ཚོགས་མཆིས། །རིན་ཆེན་སྣ་ཚོགས་ལྗོན་ཤིང་ཅན། །བྱ་ཕྲན་སྣ་ཚོགས་སྐད་ཀྱང་འབྱིན། །མེ་ཏོག་སྣ་ཚོགས་ལེགས་པར་བཀྲམ། །སྣ་ཚོགས་སྤོས་ཀྱིས་བྱུགས་པ་ལགས། །གནོད་སྦྱིན་མོ་ནི་འཇོམས་པ་དང ། །གླུ་དང་རོལ་མོས་རབ་ཏུ་བརྒྱན། །དཔལ་གྱི་དམ་པ་ཉམས་སུ་མྱོང ། །དེར་ནི་འབྱུང་པོའི་དཀྱིལ་འཁོར་དེར། །གང་དག་འཁོར་ཞིང་མཆིས་པ་དག་།རྣམ་པའི་མཆོག་ཀུན་ལྡན་པ་སྟེ། །ཆོས་འཚལ་བ་དང་ཆོས་སྤྱོད་པ། །སྲོག་ཆགས་རྣམས་ལ་འཚེ་མི་བགྱིད། ། ཟས་དང་སྐོམ་གྱིས་མི་བྲེལ་ཏེ། །སྐྱེ་དགུ་མི་བཟད་གཞན་དག་ནི། །ལོངས་སྤྱོད་ཆེན་པོ་ཚོལ་བགྱིད་ཅིང ། །ཕྱོགས་བཞི་ཀུན་ཏུ་རྣམ་པར་ལྟ། །གྲོང་ཁྱེར་སྒོ་ཡི་གོམ་ཡོ་དང ། །བཟའ་ 518b ཤིང་རབ་ནགས་ཚལ་ན། །གནོད་སྦྱིན་སྲིན་པོ་འབྱུང་པོའི་ཚོགས། །བྱེ་བ་སྟོང་ཕྲག་བརྒྱ་མཆིས་པ། །དེ་དག་ཐམས་ཅད་མདོ་སྡེ་ཡི། །ཞགས་པས་དྲངས་ཏེ་བརླག་པར་བགྱི། །རྒྱལ་པོའི་ཕོ་བྲང་དབུས་ན་ནི། །ཆོས་ཀྱི་རྒྱལ་པོའི་གནས་གྱུར་པ། །བསིལ་བའི་རྫིང་བུས་བསྐོར་བ་སྟེ། །ཙནྡན་ནགས་ཀྱི་འཁོར་བ་ལགས། །ཀུན་ནས་དཔག་ཚད་དྲུག་ཅུ་སྟེ། །ཁང་པ་བརྩེགས་མ་སྤྲུལ་པ་དག་།གཅིག་ནི་གསེར་ལས་བགྱིས་པ་སྟེ། །གཉིས་ནི་དངུལ་ལས་བགྱིད་པ་ལགས། །གསུམ་པ་བཻ་ཌཱུརྱ་ལས་བགྱིས། །བཞི་པ་གཙང་དང་ཤེལ་གྱི་རྒྱུ། ། ལྔ་པ་མུ་ཏིག་དམར་པོ་སྟེ། །དྲུག་པ་རྡོ་ཡི་སྙིང་པོ་ལགས། །བདུན་པ་སྤུག་ལས་བགྱིས་པ་སྟེ། །བརྒྱད་པ་རིན་ཆེན་བདུན་ལས་བགྱིས། །བུད་མེད་སྟོང་ཕྲག་བརྒྱ་དག་ཀྱང ། །དེ་དག་རེ་རེ་ཀུན་ན་གནས། །ལྷབ་ལྷུབ་སྣ་ཚོགས་མཆོག་དག་དང ། །ཆ་བྱད་སྣ་ཚོགས་མང་པོས་བརྒྱན། །གླུ་དང་རོལ་མོ་སྣ་ཚོགས་དང ། །བཟོ་ཡི་གནས་ལ་མཁས་པ་མཆིས། ། དེ་ལྟའི་རབ་ཏུ་དགའ་བ་ཡིས། །བདེ་ཞིང་ཚིམ་པའི་ཡིད་གྱུར་ཅིང ། །དེ་ན་བདག་ནི་དགུན་སྐྱེམས་དང ། །འདོད་པ་དག་གིས་རབ་མྱོས་པས། །བདག་གི་འཁོར་རྣམས་འཕྱན་བགྱིད་ཅིང། །ཕྱོགས་བཅུ་དག་ཏུ་འཇིགས་པ་སྐྱེད། །བུད་མེད་དག་དང་སྐྱེས་པ་དང ། །དེ་བཞིན་ཁྱེའུ་བུ་མོ་དང ། །མངལ་ན་གནས་པའང་འཇིགས་པར་བགྱིད། །དུད་འགྲོའི་སྐྱེ་གནས་ 519a ༄#། །གཏོགས་ལའང་འཚེ། །སྐར་མ་དག་དང་ཉི་ཟླ་དང ། །གཏུམ་པའི་གཟའ་རྣམས་གནོད་པར་བགྱིད། །ལོ་ཏོག་ས་བོན་འབྲས་བུ་དང ། །མེ་ཏོག་སྨན་དང་ཟས་སྐོམ་དང ། །མི་རྣམས་ཀྱི་ནི་དཔལ་འཕྲོག་ཅིང ། །མཐོན་པོ་རྣམས་ཀྱང་དམའ་བར་བགྱིད། །འཇིག་རྟེན་དག་ན་ནོངས་པ་རྣམས། །དམག་དང་འཐབ་མོ་ཤར་གཉེར་དང། །ཚིག་གམ་ཞིག་གམ་བསད་ཕྱེ་བ། །དེ་ཀུན་འབྱུང་པོའི་རྣམ་པར་གྱུར། །སྦེད་ཅིང་སྟོན་པར་བགྱིད་པ་དང ། །བཟློག་པར་བགྱིད་ཅིང་རྒོད་པར་བགྱིད། །འཇིགས་པར་བགྱིད་ཅིང་ལྟ་བར་བགྱིད། །དགྲར་འགྱུར་བ་ཡང་སྟོན་པར་བགྱིད། །སྡིག་པའི་རྨི་ལམ་མཐོང་བར་བགྱིད། །ཉལ་བ་དག་ལ་གནོད་པར་བགྱིད། །སྒོ་ནས་སེ་གོལ་སྒྲ་ཕྱུང་ཞིང ། །མི་སྙན་བརྗོད་དེ་ཟ་བར་བགྱིད། །མཛའ་བོ་གཉེན་བཤེས་གཟུགས་དག་ཏུ། །གདའ་ཞིང་བཀའ་མཆིད་སྨྲ་བར་བགྱིད། །བུ་མོ་སྡུག་གུའི་གཟུགས་དག་ཏུ། །འདོད་ལ་སྤྱོད་པ་དགའ་བར་བགྱིད། །ཉི་མ་སྐར་མའི་གཟུགས་དང་ནི། །ཟླ་བའི་གཟུགས་སུ་གདའ་བར་བགྱིད། །རླུང་དང་སྐར་མདའ་ལྕེ་གཟུགས་སུ། །ཚེ་ལ་གནོད་པར་དེ་དག་གདའ། །སྐར་མདའི་ཚོགས་དང་འདྲ་བ་དག་།འཇིགས་པར་བགྱིད་པ་ཝ་དང་ཁྱིར། །རྣམ་པར་སྤྲུལ་ནས་ལྗོན་ཤིང་དང ། །མཆོད་རྟེན་དག་ནི་གནས་ན་གདའ། །སྐྱེས་པ་གཞོན་ནུའི་ ་ 519b མཛེས་པ། །འབར་ཞིང་ཤིང་རྟའི་སྒྲ་ཡང་འབྱིན། །གནས་རྣམས་དང་ནི་ཤུལ་དག་ཏུ། །རྣམ་པ་སྣ་ཚོགས་རྗེས་ཀྱང་སྟོན། །གྲོང་ཁྱེར་དག་དང་ཁྱིམ་རྣམས་ཀྱི། །སྒོ་ཡང་གནོད་སྦྱིན་དེ་དག་འབྱེད། །སྲོག་དང་ལུས་ཀྱང་བླངས་བགྱིད་ཅིང ། །ལམ་ངན་ཀུན་ཏུ་སྐོར་བར་བགྱིད། །རྣམ་པ་སྣ་ཚོགས་གཟུགས་དག་དང ། །རྣམ་པ་སྣ་ཚོགས་སྒྲ་རྣམས་དང ། ། རྣམ་པ་སྣ་ཚོགས་ནད་ཀྱིས་རྣམས། །ལུས་ལ་ན་བ་གནས་པར་སྟོན། །ནད་རྣམས་ཀུན་གྱི་མཚན་ཉིད་ཀྱང ། །ཕྱིན་ཅི་ལོག་ཏུ་སྟོན་པར་བགྱིད། །ཇི་སྙེད་འཇིག་རྟེན་རང་བཞིན་དག་།ཐམས་ཅད་ལོག་པར་དེ་དག་སྟོན། །རིག་སྔགས་ཞགས་པས་དྲངས་པས་ན། །དེ་དག་ཀུན་ཀྱང་འདིར་མཆིས་སོ། །དེ་ནས་རྒྱལ་པོ་རྣམ་ཐོས་བུ། །ལངས་ཏེ་ཐལ་མོ་རབ་སྦྱར་ནས། །ཞབས་ལ་འཁོར་ལོའི་མཚན་མངའ་བ། །གསེར་གྱི་མཆོད་སྡོང་འབར་བ་བཞིན། །འཇིག་རྟེན་སྣང་བར་མཛད་པ་པོ། །ཐུབ་པ་ཆེན་པོ་མེ་དང་འདྲ། །གནོད་སྦྱིན་གསང་སྔགས་མི་བཟད་ཅན། །སྟོང་ཕྲག་དྲུག་ཅུ་རྩ་བཞི་དག་།བྱང་གི་ཕྱོགས་ཆའི་ཕྱོགས་ན་གནས། །བྱང་ཕྱོགས་དག་ཏུ་གནོད་པར་བགྱི། །འཇིག་རྟེན་མགོན་པོའི་སྤྱན་སྔར་ནི། །དེ་དག་ཆད་པ་བདག་གིས་བཤད། །སྱད་ཡ་ཐེ་དན། ཁངྒེ་ཁངྒེ། ཁངྒ་གརྦྷེ། བི་ཙིཀྵ་ཎེ་ཙཀྲ། རཱ་ཛ་ནེ། ཙནྡྲེ། ཙ་བ་\?\་ལེ། པཱ་ཏཱ་ཁེ། བྷཱི་མ་བ་ད་བ་ཏི། ཁ་ར་གྲེ་བྷྲཾ་ཀུ་ 520a ༄#། །ཊི་ལ་ཀ་རཱ་གྲེ་།ེ་ཀཱ་ཀྵི། པར་ག་བ་ཏི། སཱ་རཾ་ག་བ་ཏི། མཱརྒ་བ་ཏི། ཙི་ཏྲ་བ་ཏི། ཙི་ཏྲ་ཀཱནྟི། བདག་བྱང་ཕྱོགས་སུ་དགེ་བར་གྱུར་ཅིག་སཝཱཧཱ། ཚངས་པ་དང་ནི་བརྒྱ་བྱིན་དང ། །འཇིག་རྟེན་སྐྱོང་དང་དབང་ཕྱུག་ཆེ། །གནོད་སྦྱིན་སྡེ་དཔོན་ཐམས་ཅད་དང ། །འཕྲོག་མ་བུ་དང་བཅས་པ་ཡང ། །བདག་གི་མེ་ཏོག་སྤོས་དག་དང་།། སྦྱིན་སྲེག་འདི་ནི་བླང་བར་གྱིས། །དེ་དག་གི་ནི་བརྩོན་འགྲུས་དང ། །གཟི་བརྗིད་དབང་ཕྱུག་སྟོབས་ཀྱིས་ཀྱང ། །ནད་རྣམས་ཐམས་ཅད་བཅོམ་པར་གྱུར། །བདག་ ་པ་དང ། གནོད་པ་ཐམས་ཅད་ལས་དགེ་བར་གྱུར་ཅིག་།ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ནས་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །རྒྱལ་ཆེན་ཡུལ་འཁོར་སྲུང་བ་ཡང ། །ལངས་ཏེ་ཐལ་མོ་སྦྱར་བཏུད་ནས། །མེ་ཏོག་ཚོགས་ལྟར་རྒྱས་གྱུར་ཅིག་།ཀ་ལ་པིང་ཀའི་སྒྲ་དབྱངས་ཅན། །ཁུ་བྱུག་དང་ནི་རྨ་བྱའི་སྒྲ། །རྔ་དང་འབྲུག་གི་སྒྲ་སྒྲོགས་པ། །ཐུབ་ཆེན་གནོད་སྦྱིན་སྲིན་པོ་དང ། །དྲི་ཟ་སྟོང་ཕྲག་དྲུག་ཅུ་བཞི། །ཤར་གྱི་ཕྱོགས་ཆའི་ཕྱོགས་ན་གནས། །ཤར་ཕྱོགས་པ་ལ་གནོད་པར་བྱེད། །འཇིག་རྟེན་མགོན་གྱི་སྤྱན་སྔར་ནི། །དེ་དག་ཆད་པ་བདག་གིས་བཤད། །སྱཱད་ཡ་ཐེ་དན། དྷཱ་ར་ཎི་དྷཱ་ར་ཎི། པྲ་ 520b དྷཱ་\?\་ན་ས་ན་བྷཉྫ་ནི། པྲ་བྷཉྫ་ནི་བི་དྷ་མ་ནི། ཀིམ་པུ་རུ་ཥེ། ཤ་ཀ་ལེ། སཱ་ར་ཐེ། སཱ་ར་བ་ཏི། ཤཱུ་ལ་དྷ་རེ། ཤཱུ་ལ་དྷཱརི་ཎི། ཤུདྡྷེ་ཙ་ར་ཎེ། གྷོ་ཥ་བ་ཏི། ཤཱ་རཱ་གྲེ། ཤཱནྟེ། བདག་ཤར་ཕྱོགས་སུ་དགེ་བར་གྱུར་ཅིག་སཝཱཧཱ། ཚངས་པ་དེ་བཞི་བརྒྱ་བྱིན་དང ། །འཇིག་རྟེན་སྐྱོང་དང་དབང་ཕྱུག་ཆེ། །གནོད་སྦྱིན་སྡེ་དཔོན་ཐམས་ཅད་དང ། །འཕྲོག་མ་བུ་དང་བཅས་པ་ཡང། །བདག་གི་མེ་ཏོག་སྤོས་དག་དང ། །སྦྱིན་སྲེག་འདི་ནི་བླང་བར་གྱིས། །དེ་དག་གི་ནི་བརྩོན་འགྲུས་དང ། །གཟི་བརྗིད་དབང་ཕྱུག་སྟོབས་ཀྱིས་ཀྱང ། །ནད་རྣམས་ཐམས་ཅད་བཅོམ་བར་གྱུར། །བདག་འཇིགས་པ་ཐམས་ཅད་དང ། གནོད་པ་ཐམས་ཅད་ལས་དགེ་བར་གྱུར་ཅིག་སཝཱ་ཧཱ། ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ཏེ་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །རྒྱལ་པོ་ཆེན་པོ་འཕགས་སྐྱེས་ཀྱང ། །ཐལ་མོ་སྦྱར་ཏེ་དེ་ནས་ལངས། །ཐམས་ཅད་མཁྱེན་པ་ཐམས་ཅད་གཟིགས། །སྨྲ་བ་ཐམས་ཅད་རབ་འཇོམས་པ། །ཐེ་ཚོམ་ཐམས་ཅད་གཅོད་མཛད་པ། །འཇིག་རྟེན་ཐམས་ཅད་རྣམ་འདྲེན་པ། །གྲུལ་བུམ་ཡི་དྭགས་སྲུལ་པོ་དག ། སྟོང་ཕྲག་དྲུག་ཅུ་རྩ་བཞི་རྣམས། །ལྷོ་ཡི་ཕྱོགས་ཆའི་ཕྱོགས་ན་གནས། །དེ་ནས་བྱུང་ལ་གནོད་པར་བགྱིད། །འཇིག་རྟེན་མགོན་པོའི་སྤྱན་སྔར་ནི། །དེ་དག་ཆད་པ་བདག་གིས་ 521a ༄#། །བཤད། །སྱཱད་ཡེ་ཐེ་དན། ཤཱནྟི། ཤཱ་ར་བ་ཏི། ཀཱནྟི། ཀཱ་ར་བ་ཏི། ཀིཾ་ཀ་ར་སི། ཀིཾ་ཀ་ར་ཏི། ཀི་ཀ་སི་ཀི་རི་ཎི། ཀིཾ་ར་ཏེ། ཀིཾ་བ་ཏེ། དྷ་ར་ཎི། བརྡྷ་ནི། བྷཱུ་མི། དྷཱ་རྀ་ཎི། ཧི་མ་བ་ཏི། ཛྱོ་ཏིཥྩ་ར་ཎེ། མཱ་ལཱ་གྲེ། བདག་ལྷོ་ཕྱོགས་སུ་དགེ་བར་གྱུར་ཅིག་སཝཱ་ཧཱ། ཚངས་\?\་པ་དང་ནི་བརྒྱ་བྱིན་དང ། །འཇིག་རྟེན་སྐྱོང་དང་དབང་ཕྱུག་ཆེ།། གནོད་སྦྱིན་སྡེ་དཔོན་ཐམས་ཅད་དང ། །འཕྲོག་མ་བུ་དང་བཅས་པ་ཡང ། །བདག་གི་མེ་ཏོག་སྤོས་དག་དང ། །སྦྱིན་སྲེག་འདི་ནི་བླང་བར་བགྱི། །དེ་དག་གིས་ནི་བརྩོན་འགྲུས་དང ། །གཟི་བརྗིད་དབང་ཕྱུག་སྟོབས་ཀྱིས་ཀྱང ། །ནད་རྣམས་ཐམས་ཅད་བཅོམ་པར་གྱུར། །བདག་འཇིགས་པ་ཐམས་ཅད་དང ། གནོད་པ་ཐམས་ཅད་ལས་དགེ་བར་གྱུར་ཅིག་སཝཱ་ཧཱ། ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ཏེ་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །རྒྱལ་པོ་མིག་མི་བཟང་བ་ཡང ། །ཐལ་མོ་སྦྱར་བ་བྱས་ནས་ལངས། །སྤྲིན་ཆེན་སེང་གེ་ཆེན་པོ་པ། །ཆེ་བའི་ཆེ་བ་རྒྱ་མཚོ་ཆེ། །གསུང་བ་ཆེན་པོ་དཔའ་ཆེན་པོ། །གཡུལ་ཆེན་རབ་ཏུ་འཇོམས་མཛད་པ། །ཀླུ་དང་འདབ་བཟང་གསང་བ་པོ། །སྟོང་ཕྲག་དྲུག་ཅུ་རྩ་བཞི་དག་།ནུབ་ཀྱི་ཕྱོགས་ཆའི་ཕྱོགས་ན་གནས། །དེ་ནས་བྱུང་ལ་གནོད་པར་བགྱིད།། 521b འཇིག་རྟེན་མགོན་པོའི་སྤྱན་སྔར་ནི། །དེ་དག་ཆད་པ་བདག་གིས་བཤད། །སྱཱད་ཡ་ཐེ་དན། དྷ་རྨི་བ་རཱ་གྲེ། བ་ལ་པ་ཏེ། བ་ལི་ནི། བི་ཤི་གེ་།བི་ཙ་ཤི་།སཱ་ག་རེ། ཁཱ་རཱི། ཀ་པ་ལི།་ཙཎྜ་ལི། ཀི་རི་ཎི། ནཱི་རཉྫ་ནེ། བི་དྷཱ་ར་ཎི། བ་ལླ་མ་ཧི། ཨ་ཙ་ལེ། བདག་ནུབ་ཕྱོགས་སུ་དགེ་བར་གྱུར་ཅིག་སཝཱ་ཧཱ། ཚངས་པ་དང་ནི་བརྒྱ་བྱིན་དང ། །འཇིག་རྟེན་སྐྱོང་དང་དབང་ཕྱུག་ཆེ། །གནོད་སྦྱིན་སྡེ་དཔོན་ཐམས་ཅད་དང ། །འཕྲོག་མ་བུ་དང་བཅས་པ་ཡང ། །བདག་གི་མེ་ཏོག་སྤོས་དག་དང ། །སྦྱིན་སྲེག་འདི་ནི་བླང་བར་བགྱིས། །དེ་དག་གི་ནི་བརྩོན་འགྲུས་དང ། །གཟི་བརྗིད་དབང་ཕྱུག་སྟོབས་ཀྱིས་ཀྱང ། །ནད་རྣམས་ཐམས་ཅད་བཅོམ་པར་གྱུར། །བདག་འཇིགས་པ་དང ། གནོད་པ་ཐམས་ཅད་ལས་དགེ་བར་གྱུར་ཅིག་སཝཱ་ཧཱ། ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ཏེ་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །དེ་ནས་ཚངས་པ་ཚངས་ཆེན་ཡང ། །ཐལ་མོ་སྦྱར་བ་བྱས་ནས་ལངས། །ཚངས་པས་བཀྲུས་པ་དག་པ་པོ། །རིག་བྱེད་ཀུན་གྱི་ཕ་རོལ་ཕྱིན། །སྐྱེ་བོ་དགའ་མཛད་སྨན་པའི་རྗེ། །འཇིག་རྟེན་ཐམས་ཅད་གསོ་མཛད་པ། །གནོད་སྦྱིན་སྲིན་པོ་གང་གི་རྣམས། །ཕྱོགས་དང་ཕྱོགས་མཚམས་གནས་པ་དང ། །ས་ཡི་འོག་དང་བར་དང་སྟེང་།། 522a ༄#། །ནམ་མཁའ་དག་ལ་གནས་པའི་གདོན། །འཇིག་རྟེན་མགོན་གྱི་སྤྱན་སྔར་ནི། །དེ་དག་ཆད་པ་བདག་གིས་བཤད། །སྱཱད་ཡ་ཐེ་དན། བྲཧྨེ། བྲཧྨ་གྷོ་ཥེ། བྲཧྨ་སཝ་རེ། བཛྲེ་བཛྲ་གྷོ་ཥེ། བཛྲ་དྷ་རེ། སྠི་ཏེ་སཱ་རེ། ཨ་ཙ་ལེ། ཨ་ར་ཎེ། ཨི་ཥ་ནི། ཨ་རཱ་ཎི་ཏེ། ཤཱུ་རེ། བ་རཱ་གྲ་།པྲཱ་པྟེ། སཱ་ག་ར་པ་ཏེ། བདག་ཕྱོགས་ཐམས་ཅད་དུ་དགེ་བར་གྱུར་ཅིག་སཝཱ་ཧཱ། ཚངས་པ་དང་ནི་བརྒྱ་བྱིན་དང ། །འཇིག་རྟེན་སྐྱོང་དང་དབང་ཕྱུག་ཆེ། །གནོད་སྦྱིན་སྡེ་དཔོན་ཐམས་ཅད་དང ། །འཕྲོག་མ་བུ་དང་བཅས་པ་ཡང ། །བདག་གི་མེ་ཏོག་སྤོས་དག་དང ། །སྤྱིན་སྲེག་འདི་ནི་བླང་བར་བགྱིས། །དེ་དག་གི་ནི་བརྩོན་འགྲུས་དང ། །གཟི་བརྗིད་དབང་ཕྱུག་སྟོབས་ཀྱིས་ཀྱང ། ། ནད་རྣམས་ཐམས་ཅད་བཅོམ་པར་གྱུར། །བདག་འཇིགས་པ་དང ། གནོད་པ་ཐམས་ཅད་ལས་དགེ་བར་གྱུར་ཅིག་སཝཱ་ཧཱ། རླུང་ལས་གྱུར་དང་མཁྲིས་ལས་གྱུར། །བད་ཀན་ལས་གྱུར་འདུས་ལས་གྱུར། །ནད་རྣམས་ཐམས་ཅད་བཅོམ་པར་གྱུར། །བདག་འཇིགས་པ་དང ། གནོད་པ་ཐམས་ཅད་ལས་དགེ་བར་གྱུར་ཅིག་སཝཱ་ཧཱ། ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ཏེ་ཕྱག་འཚལ་ལོ། །ཆོས་རྒྱལ་ཁྱོད་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ 522b འདི་སྙམ་དུ་དགོངས་ཏེ་སངས་རྒྱས་བཅོམ་ལྡན་འདས་རྣམས་ནི་རྒྱལ་སྲིད་གཅིག་གི་ཕྱིར་འཇིག་རྟེན་དུ་བྱུང་བ་མ་ཡིན། སངས་རྒྱས་བཅོམ་ལྡན་འདས་རྣམས་ནི་གྲོང་ཁྱེར་དང ། གྲོང་རྡལ་དང ། ལྗོངས་དང ། གྲོང་དང ། ཁྱིམ་ནས་སེམས་ཅན་གཅིག་གི་བར་གྱི་དོན་གྱི་ཕྱིར་འཇིག་རྟེན་དུ་བྱུང་བ་མ་ཡིན་གྱི། འཇིག་རྟེན་ལྷ་དང་བཅས་པ། བདུད་དང་བཅས་པ། ཚངས་པ་དང་བཅས་པ། དགེ་སྦྱོང་དང ། བྲམ་ཟེར་བཅས་པའི་སྐྱེ་དགུ་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་དོན་དུ་སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་བྱུང་སྟེ། དེ་ནི། དཔེར་ན། སྨན་པ་མཁས་པའི་མཆོག་ཏུ་ཕྱིན་པ། གསོ་བ་ལ་བརྩོན་པ། སྨན་པས་ཤེས་པར་བྱ་བ། ཤིན་ཏུ་བསླབས་པ་རྒྱལ་པོ་གཅིག་གི་དོན་དུ་བྱུང་བ་མ་ཡིན། ཡུལ་གཅིག་གི་དོན་དུ་བྱུང་བ་མ་ཡིན་པ་ནས་སེམས་ཅན་གཅིག་གྱི་དོན་གྱི་བར་དུ་བྱུང་བ་མ་ཡིན་པ་དང་འདྲའོ། །དེ་ཅིའི་ཕྱིར་ཞེ་ན།་ཕྱོགས་གང་ན་སངས་རྒྱས་བཅོམ་ལྡན་འདས་བཞུགས་པའི་ཕྱོགས་དེ་དག་ཏུ་མི་རྣམས་དང ། མི་མ་ཡིན་པ་དག་ཀྱང་རྣམ་པར་འཚེ་བར་མི་བྱ་བར་སེམས་ཀྱི། ངའང་ཡངས་པ་ཅན་གྱི་གྲོང་ཁྱེར་ཆེན་པོ་ག་ལ་བ་དེར་སོང་བ་དང ། ཡངས་པ་ཅན་གྱི་གྲོང་ཁྱེར་ཆེན་པོའི་སྐྱེ་བོའི་ཚོགས་ཕལ་པོ་ཆེའི་དོན་ཀྱང་བྱས་པར་འགྱུར། སངས་རྒྱས་ཀྱི་ 523a ༄#། །མཛད་པའང་བྱས་པར་འགྱུར་རོ་སྙམ་དུ་དགོངས་ཏེ། དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཆོས་གོས་དང ། ཤམ་ཐབས་མན་བས་ནས་ལྷུང་བཟེད་བསྣམས་ཏེ་དགེ་སློང་སྟོང་ཉིས་བརྒྱ་ལྔ་བཅུ་དང་ཐབས་གཅིག་ཏུ་བྱ་རྒོད་ཕུང་པོའི་རི་ལས་ཤོད་དུ་གཤེགས་པ་དང ། མི་མཇེད་ཀྱི་བདག་པོ་ཚངས་པས་ལྷའི་གདུགས་ལྔ་བརྒྱ་ཙམ་བླངས་ཏེ་བཅོམ་ལྡན་འདས་ལ་གཡས་རོལ་ནས་ཕུལ་ལོ། །ཕུལ་ནས་བཅོམ་ལྡན་འདས་ལ་རྡུལ་ཡབ་ཀྱིས་གཡོབ་ཅིང་འདུག་པར་གྱུར་ཏོ།། ལྷ་རྣམས་ཀྱི་དབང་པོ་བརྒྱ་བྱིན་གྱིས་ཀྱང་གདུགས་ལྔ་བརྒྱ་ཙམ་བླངས་ཏེ་བཅོམ་ལྡན་འདས་ལ་གཡོན་རོལ་ནས་ཕུལ་ལོ། །ཕུལ་ནས་བཅོམ་ལྡན་འདས་ལ་རྡུལ་ཡབ་ཀྱིས་གཡོབ་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་བཞིས་ཀྱང་རེ་རེ་ཞིང་ལྷའི་གདུགས་ལྔ་བརྒྱ་ཙམ་བླངས་ཏེ་བཅོམ་ལྡན་འདས་ལ་སྣམ་ལོགས་ནས་བཅོམ་ལྡན་འདས་ལ་རྡུལ་ཡབ་ཀྱིས་གཡོབ་ཅིང་འདུག་པར་གྱུར་རོ། །ལྷའི་བུ་དབང་ཕྱུག་ཆེན་པོ་དང ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། གནོད་སྦྱིན་མཐུ་བོ་ཆེ་སུམ་ཅུ་རྩ་གཉིས་དང ། འཕྲོག་མའི་བུ་ལྔ་བརྒྱ་འཁོར་དང་བཅས་པས་ཀྱང་སོ་སོ་ནས་ལྷའི་གདུགས་དག་བླངས་ཏེ། ཉན་ཐོས་རྣམས་ལ་བུལ་ནས་རྡུལ་ཡབ་ 523b ཀྱིས་གཡོབ་ཅིང་འདུག་པར་གྱུར་ཏོ། །དེ་ལྟ་བུའི་གྲགས་པ་དང ། བཀུར་སྟི་དང ། བརྙས་པར་བྱ་བ་བརྙེས་ནས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་གཅིག་ཏུ་བྱ་རྒོད་ཕུང་པོའི་རི་ལས་ཤོད་དུ་བབས་ཏེ་ཡངས་པ་ཅན་གྱི་གྲོང་ཁྱེར་ཆེན་པོ་ག་ལ་བ་དེར་གཤེགས་པ་དང ། ཡངས་པ་ཅན་གྱི་ལིཙྪ་པཱི་རྣམས་ཀྱིས་བཅོམ་ལྡན་འདས་ཤིན་ཏུ་མཛེས་པ། དད་པར་འོས་པ། དབང་པོ་ཞི་བ། ཐུགས་ཞི་བ། དབང་པོ་དུལ་བ། ཐུགས་དུལ་བ། དུལ་བ་དང ། ཞི་གནས་ཀྱི་དམ་པའི་ཕ་རོལ་ཏུ་ཕྱིན་པ་བརྙེས་པ། དབང་པོ་དབེན་ཞིང་ཁུགས་པ། གླང་པོ་ཆེན་པོ་ལྟ་བུ་ཤིན་ཏུ་དུལ་བ། མཚོ་ལྟར་དྭངས་ཤིང་རྙོག་པ་མེད་ལ་རྣམ་པར་གསལ་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་སྐུ་ལེགས་པར་བརྒྱན་པ། དཔེ་བྱད་བཟང་པོ་བརྒྱད་ཅུས་ཤིན་ཏུ་བརྒྱན་པ། ཤིང་སཱ་ལའི་རྒྱལ་པོ་ལྟར་དེ་བཞིན་གཤེགས་པའི་སྐུ་རྣམ་པར་སྤྲས་པ། ཉི་མ་ལྟར་འོད་ཟེར་གྱི་དྲ་བ་ཀུན་ཏུ་འགྱེད་པ། མཚན་མོ་མུན་པའི་ནང་ན་རི་བོའི་སྤོ་ལ་མེའི་ཕུང་པོ་རབ་ཏུ་འབར་བ་དང་འདྲ་ཞིང་བཅོམ་ལྡན་འདས་གསེར་གྱི་རི་བོ་ཆེན་པོ་དམ་པ་ལྟར་ལྷམ་མེ། ལྷན་ནེ། ལྷང་ངེ་རྒྱང་རིང་པོ་ནས་གནས་དེར་གཤེགས་པ་མཐོང་ངོ ། །མཐོང་མ་ཐག་ཏུ་ཡངས་པ་ཅན་གྱི་ལིཙྪ་བཱི་རྣམས་བཅོམ་ལྡན་འདས་ལ་སེམས་དད་པར་གྱུར་ནས་སེམས་ 524a ༄#། །དད་པར་གྱུར་པ་དེ་དག་བཅོམ་ལྡན་འདས་ཡངས་པ་ཅན་གྱི་གྲོང་ཁྱེར་ཆེན་པོར་ལམ་གང་ནས་གཤེགས་པའི་ལམ་དེ་ཕྱགས་ཤིང་ཆག་ཆག་འདེབས། བྱི་དོར་བྱེད། མེ་ཏོག་འཐོར། དར་གྱི་ལྡ་ལྡི་དང ། དྲིལ་བུ་དང ། གདུགས་དང ། རྒྱལ་མཚན་དང ། བ་དན་སྣ་ཚོགས་ཀྱིས་བརྒྱན་ཏེ་བདུག་སྤོས་སྣ་ཚོགས་ཀྱིས་གདུགས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ལོ། །དེ་ནས་བཅོམ་ལྡན་འདས་ཀྱི་ཕྱག་གི་མཐིལ་འཁོར་ལོ་རྩིབས་སྟོང་དང་ལྡན་པའི་རི་མོ་ཅན། མེ་ཏོག་པདྨའི་སྙིང་པོ་ལྟར་འཇམ་པ། སྔོན་ལེགས་པར་སྤྱད་པའི་མཚན་གྱིས་བརྒྱན་པ། གཞོན་ཤ་ཆགས་ཤིང་འཇམ་པ། ཉི་མའི་འོད་ཟེར་བས་ལྷག་པའི་འོད་དང་ལྡན་པ། འོད་ཟེར་བརྒྱ་ཕྲག་མང་པོ་ཀུན་ཏུ་འཕྲོ་བ། དྲི་མ་མེད་པའི་ཕྱག་གིས་ལིཙྪ་པཱི་དག་གི་མགོ་ལ་བྱུགས་ཏེ་རྗེས་སུ་བསྟན་པ་མཛད་དོ། །དེ་ནས་བཅོམ་ལྡན་འདས་ཡངས་པ་ཅན་གྱི་གྲོང་ཁྱེར་ཆེན་པོའི་ནང་དུ་གཤེགས་ནས་ནམ་གྱི་གུང་ཐུན་ལ་སྒོ་སྐྱེས་ཀྱི་གཞི་ཞབས་ཀྱིས་མནན་ནས་ཕྱོགས་བཞིར་གཟིགས་ཏེ། ཕྱག་གསེར་གྱི་མདོག་ཅན་བརྐྱང་ནས་ན་བཟའ་བླ་གོས་གསོལ་ཏེ་བཀའ་སྩལ་པ། ཕྱི་མའི་དུས་ན་དགེ་སློང་ངམ། དགེ་སློང་ 524b མ་འམ། དགེ་བསྙེན་ནམ། དགེ་བསྙེན་མའམ། གང་སུ་ཡང་རུང་བ་དག་དེ་བཞིན་གཤེགས་པའི་སྐུ་གདུང་རིང་བསྲེལ་ཡུངས་འབྲུ་ཙམ་ལ་མཆོད་པ་བྱེད་པ་དང ། སྟོང་ཆེན་པོ་རབ་ཏུ་འཇོམས་པའི་རིག་སྔགས་ཀྱི་རྒྱལ་མོ་གདོན་ཐམས་ཅད་ལས་ཐར་བར་བྱེད་པའི་ཆོས་ཀྱི་རྣམ་གྲངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཕྱག་རྒྱ་འདི་འཛིན་ཅིང་འཆང་བ་དང ། ཀློག་ཅིང་སྟོན་པ་དང ། ཀུན་ཆུབ་པར་བྱེད་པ་ལ་ཡམས་ནད་དང།་འཇིགས་པ་དང ། འཚེ་བ་དང ། ནད་འགོ་བ་དང ། འཁྲུགས་པ་དང ། འཐབ་པ་དང ། རྩོད་པ་དང ། འཆིང་བ་དང ། ཁ་མཆུ་དང ། ཤགས་དང ། ཐ་ན་ཕྲ་མ་དང།་སྡིག་པ་མི་དགེ་བའི་སྡུག་བསྔལ་བའི་ལས་ཀྱིས་མི་ཚུགས་ཤིང་འཚེ་བར་བྱེད་པ་ཐམས་ཅད་ཀྱིས་མི་ཐུབ་པར་འགྱུར་རོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་མི་མཇེད་ཀྱི་བདག་པོ་ཚངས་པས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། སྟོང་ཆེན་པོ་རབ་ཏུ་འཇོམས་པ་ཞེས་བྱ་བའི་གསང་སྔགས་ཀྱི་རྒྱལ་མོ་གདོན་ཐམས་ཅད་ལས་ཐར་བར་བགྱིད་པའི་ཆོས་ཀྱི་རྣམ་གྲངས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་ 525a ༄#། །སྙེད་རྣམས་ཀྱིས་སངས་རྒྱས་ཀྱི་ཕྱག་རྒྱ་དེ་གང་ལགས་དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་མི་མཇེད་ཀྱི་བདག་པོ་ཚངས་པ་ལ་འདི་སྐད་ཅེས་བཀའ་སྩལ་ཏོ། །ཚངས་པ། དེའི་ཕྱིར་ཁྱོད་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །བཙུན་པ། དེ་བཞིན་ནོ་ཞེས་གསོལ་ནས་མི་མཇེད་ཀྱི་བདག་པོ་ཚངས་པ་བཅོམ་ལྡན་འདས་ཀྱི་ལྟར་མཉན་པ་དང ། དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །སྱཱད་ཡ་ཐེ་དན།་ཨ་ཙ་ལེ། མ་ཙ་ལེ། སཱ་ར་མ་ཙ་ལེ། པྲ་ཀྲི་ཏེ་བརྞེ་པྲ་ཀྲྀ་ཏི་ནིརྒྷོ་ཥེ། ས་མནྟ་མུ་ཁེ། སྠི་རེ་སྠཱ་བ་རེ་བི་གྷུཥྚེ། ཤཔྟེ་པྲ་ག་ལ་ཎི། པཱ་རངྒ་མེ་སཱ་རཱ་སུ་ཏེ་སཱ་རངྒ་བ་ཏེ་བ་ལེ་མཧཱ་བ་ལེ་མཧཱ་ནིརྦྷཱ་སེ་སཝཱ་ཧཱ། དེ་ལ་འདི་སྐད་ཅེས་བྱ་སྟེ། ལུས་སུ་གཏོགས་པ་དྲན་པ་དང ། ཞི་གནས་དང ། ལྷག་མཐོང་དང ། ཏིང་ངེ་འཛིན་གསུམ་དང ། རྫུ་འཕྲུལ་གྱི་རྐང་པ་བཞི་དང ། ཡང་དག་པར་སྤོང་བ་བཞི་དང ། དྲན་པ་ཉེ་བར་གཞག་པ་བཞི་དང ། བསམ་གཏན་བཞི་དང ། འཕགས་པའི་བདེན་པ་བཞི་དང ། དབང་པོ་ལྔ་དང ། སྟོབས་ལྔ་དང ། རྗེས་སུ་དྲན་པ་དྲུག་དང ། བྱང་ཆུབ་ཀྱི་ཡན་ལག་བདུན་དང ། འཕགས་པའི་ལམ་ཡན་ལག་བརྒྱད་པ་དང ། མཐར་གྱིས་གནས་པའི་ 525b སྙོམས་པར་འཇུག་པ་དགུ་དང ། དེ་བཞིན་གཤེགས་པའི་སྟོབས་བཅུ་དང ། རྣམ་པར་གྲོལ་བའི་སྐྱེ་མཆེད་བཅུ་གཅིག་དང ། རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་དང ། རྣམ་པ་བཅུ་གཉིས་དང་ལྡན་པའི་ཆོས་ཀྱི་འཁོར་ལོ་དང ། དབུགས་དབྱུང་བ་དང ། རྡུབ་\?\་པ་རྗེས་སུ་དྲན་པ་བཅུ་དྲུག་དང ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང ། ཡི་གེ་\?\་བཞི་བཅུ་རྩ་གཉིས་ཏེ་ཚངས་པ། དེ་ནི་སྟོང་ཆེན་པོ་རབ་ཏུ་འཇོམས་པ་ཞེས་བྱ་བའི་རིག་སྔགས་ཀྱི་རྒྱལ་མོ་གདོན་ཐམས་ཅད་ལས་ཐར་བར་བྱེད་པའི་མདོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་རྣམས་ཀྱི་སངས་རྒྱས་ཀྱི་ཕྱག་རྒྱ་སྟེ་སངས་རྒྱས་བསྒྲུབས་པའོ། །ཆོས་བསྒྲུབས་པའོ། །དགེ་འདུན་བསྒྲུབས་པའོ། །ཚངས་པ་བསྒྲུབས་པའོ། །དབང་པོ་བསྒྲུབས་པའོ། །འཇིག་རྟེན་སྐྱོང་བ་བསྒྲུབས་པའོ། །དབང་ཕྱུག་བསྒྲུབས་པའོ། །བདེན་པ་བསྒྲུབས་པའོ། །ལམ་བསྒྲུབས་པའོ། །རྟེན་ཅིང་འབྲེལ་པར་འབྱུང་བ་བསྒྲུབས་པའོ། །ཟླ་བ་བསྒྲུབས་པའོ། །ཉི་མ་བསྒྲུབས་པའོ། །གཟའ་བསྒྲུབས་པའོ། །རྒྱུ་སྐར་བསྒྲུབས་པའོ། །སྱཱད་ཡ་ཐེ་དན། སཱ་ལེ་ཀ་སི་ནི། བི་དྷ་ར་ཎི་བ་རཱ་གྲ་།སཱ་རེ་ཨཱ་མཪྵ་ཎི། ཨ་མོ་གྷ་བ་ཏི། ས་ཙ་ནེ་ཀཱ་ལ། ན་ཀ་ལི། ཀཱ་ཤི་ཀ་པ་ཏི། བྷ་ར་ཎི། བྷ་ར་ཀ་ཤ་ཁེ། ས་མནྟ་པྲཱཔྟེ། 526a ༄#། །ས་ར་པྲཱཔྟེ། སྟམྦྷ་ནེ། སྟམྦྷ་ན་པྲཱཔྟེ། བཛྲ་དྷ་རེ་སཝཱ་ཧཱ། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འཇིག་རྟེན་འདི་འམ་གང་དག་འདས་པ་དང ། །མཐོ་རིས་དག་ན་རིན་ཆེན་མཆོག་ཡོད་པ། །དེ་བཞིན་གཤེགས་པ་ལྷ་ཡི་ལྷར་གྱུར་པ། །མི་ཡི་མཆོག་དང་འདིར་ནི་མཚུངས་པ་མེད། ། དེ་བས་འདིར་ནི་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག་།ཟད་པ་ཆགས་བྲལ་བདུད་རྩི་འདུས་མ་བྱས། །ཤེས་པས་ཤཱཀྱ་ཐུབ་དེས་རབ་ཏུ་ཕྱེ། །བདུད་རྩི་ཞི་བ་འདུས་བྱས་མ་ཡིན་པ། །ཆོས་དེ་དང་ནི་མཚུངས་པ་གང་ཡང་མེད། །དེ་བས་འདི་ནི་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདི་ནི་དགེ་བར་ཤོག ། མཆོག་ཏུ་གང་འདོད་ཚུལ་བཞིན་རབ་བསྟན་པ། །སྟོན་པའི་རྣལ་འབྱོར་བླ་མེད་རྟག་སྒྲུབ་པ། །རྡོ་རྗེ་ལྟ་བུའི་མི་གཉིས་ལམ་མཐོང་བ། །ཏིང་འཛིན་དེ་དང་མཉམ་པ་ཡོད་མ་ཡིན། །དེ་བས་འདི་ནི་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག་།གང་ཟག་ཆེན་པོ་བརྒྱད་པོ་རབ་བསྔགས་ཤིང ། །གང་ཟག་ཟུང་བཞིར་བརྗོད་པ་དེ་དག་ནི། །དྲང་སྲོང་ཆེན་པོ་གང་ཟག་མཚུངས་མེད་པ། །བདེ་བར་གཤེགས་པས་སྦྱིན་པའི་གནས་ཞེས་གསུངས། །དེ་ལ་བྱིན་ན་འབྲས་བུ་ཆེར་གྱུར་ཏེ། །ཞིང་རབ་གཤིན་ལ་ 526b ས་བོན་བཏབ་པ་བཞིན། །འདི་ནི་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག་།གང་དག་བརྟན་པའི་ཡིད་ཀྱིས་རབ་བརྩོན་ཞིང ། །གཽ་ཏ་མའི་བསྟན་ལ་འཇུག་བྱེད་པ། །དེ་དག་ཐོབ་ནས་བདུད་རྩི་འཇུག་ཐོབ་སྟེ། །མུན་པ་བསལ་ནས་མྱ་ངན་འདས་ཐོབ་པ། །དེ་བས་དགེ་འདུན་རིན་ཆེན་མཆོག་ཏུ་གསུངས། ། བདེན་པ་དེ་ཡིས་འདིར་ནི་དགེ་བར་ཤོག་།ལྟ་བ་འདི་ལ་སྦྱར་མ་ཐག་ཏུ་ནི། །འཇིག་ཚོགས་ལྟ་དང་ཚུལ་ཁྲིམས་བརྟུལ་ཞུགས་དང ། །ཐེ་ཚོམ་དང་ནི་ཉོན་མོངས་གསུམ་པོ་དག་།ཅིག་ཅར་སྤངས་ཏེ་འཕགས་པའི་བདེན་མཐོང་བ། །དེས་ན་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག་།ལུས་སམ་ངག་གམ་འོན་ཏེ་ཡིད་ཀྱིས་ཀྱང། །སྡིག་པ་རྣམ་གསུམ་ནམ་ཡང་མི་བྱེད་ཅིང ། །གློ་བུར་བྱས་ནའང་འཆབ་པར་མི་བྱེད་ལ། །དེ་ལྟར་དེ་དག་ལྟ་བས་འཛིན་མི་བྱེད། །དེ་བས་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདི་ནི་དགེ་བར་ཤོག་།ཇི་ལྟར་དབང་པོའི་སྡོང་པོ་སར་བཙུགས་པ། །ཕྱོགས་བཞིའི་རླུང་རྣམས་ཀྱིས་ནི་མི་གཡོ་ལྟར། །འཕགས་པའི་ལམ་གྱི་དམ་པ་མཐོང་བ་ཡི། །གང་ཟག་འཕགས་པའི་དགེ་འདུན་དེ་བཞིན་ནོ། །དེས་ན་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག་།ཤེས་རབ་ཟབ་མོ་ཤིན་ 527a ༄#། །ཏུ་བསྟན་པ་ཡི། །འཕགས་པའི་བདེན་པ་སུ་དག་རྣམ་སྒོམ་ཞིང ། །ལུས་ཀྱང་སྦྱིན་པར་ཡིད་ལ་བྱས་པ་ནི། །དེ་དག་འཇིགས་པ་བརྒྱད་དང་ཕྲད་མི་འགྱུར། །དེས་ན་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག་།ཇི་ལྟར་མེ་ནི་རླུང་གིས་རབ་གཏོར་བ། །ལག་ཏུ་བླངས་ཏེ་བགྲང་དུ་མེད་པ་ཉིད། །དེ་ལྟར་ཀུན་ཏུ་སྦྱོར་བ་རབ་བཏང་བ། །སངས་རྒྱས་སྲས་རྣམས་བསྟན་དུ་མེད་པར་འགྲོ་།དེས་ན་དགེ་འདུན་རིན་ཆེན་མཆོག་ཏུ་གསུངས། །བདེན་པ་དེ་ཡིས་འདིར་ནི་དགེ་བར་ཤོག་།སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེར་གྱུར་ཅིག་།སྟོན་མཆོག་ལྷ་དང་མིས་ནི་མཆོད་འོས་པ། །སངས་རྒྱས་ཕྱག་འཚལ་དེང་འདིར་དགེ་བར་ཤོག་།སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེར་གྱུར་ཅིག་།ཞི་བ་ཆགས་བྲལ་ལྷ་མིས་མཆོད་འོས་པ། །ཆོས་ལ་ཕྱག་འཚལ་དེང་འདིར་དགེ་བར་ཤོག་།སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེར་གྱུར་ཅིག་།ཚོགས་ཀྱི་དམ་པ་ལྷ་མིས་མཆོད་འོས་པ། །དགེ་འདུན་ཕྱག་འཚལ་དེང་འདིར་དགེ་བར་ཤོག་།སེམས་ཅན་གང་དག་འགྲོ་དང་མི་འགྲོ་བ། །དེ་དག་ཐམས་ཅད་འདིར་ནི་བདེར་གྱུར་ཅིག་།འབྱུང་པོ་གང་དག་འདིར་ནི་ལྷགས་གྱུར་ཏེ། ། 527b ས་འམ་འོན་ཏེ་བར་སྣང་འཁོད་པ་དག་།སྐྱེ་དགུ་རྣམས་ལ་རྟག་ཏུ་བྱམས་བྱེད་ཤོག་།ཉིན་དང་མཚན་དུ་ཆོས་ཀྱང་སྤྱོད་པར་ཤོག་།འདི་ནི་རྒྱལ་བ་དགྲ་རྒྱལ་བདེན་གང་གིས། །ཤིན་ཏུ་བདེན་པ་གསུང་ཞིང་རྫུན་མེད་པ། །བདེན་པ་དེ་ཡིས་འདིར་ནི་དགེ་བར་ཤོག་།དེ་ཀུན་འཇིགས་པ་ཆེ་ལས་ཐར་གྱུར་ཅིག་སཝཱ་ཧཱ། སྱཱད་ཡ་ཐེ་དན། དྷི་རེ་དྷི་དྷི་རེ། པ་ལ་ནིརྒྷོ་ཥེ། པ་ལི་ས་རེ། སཱ་ར་བ་ཏེ། སྟུ་ཏི་པྲ་སྟུ་ཏི་པྲཱཔྟེ། ཨཱ་ར་བེ། ཨ་ར་ནིརྒྷོ་ཥེ། ཨཱ་ར་བ་ཏི། ཨ་ཙྱུ་ཏེ། བ་ལ་བ་ཏེ། ཤཱུ་ར་པྲཱཔྟེ། སཱ་རངྒ་མེ། སུརྱ་བ་ལེ། སུརྱ་ནིརྒྷོ་ཥེ་སཝཱ་ཧཱ། ཚངས་པ། སྟོང་ཆེན་པོ་རབ་ཏུ་འཇོམས་པ་ཞེས་བྱ་བའི་རིག་སྔགས་ཀྱི་རྒྱལ་མོ་གདོན་ཐམས་ཅད་ལས་རབ་ཏུ་ཐར་བར་བྱེད་པ་འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཕྱག་རྒྱའོ། །སངས་རྒྱས་ཀྱི་གནས་སོ། །ཆོས་ཀྱི་གནས་སོ། །དགེ་འདུན་གྱི་གནས་སོ། །ཚངས་པའི་གནས་སོ། །དབང་པོའི་གནས་སོ། །འཇིག་རྟེན་སྐྱོང་བའི་གནས་སོ། །དབང་ཕྱུག་གི་གནས་སོ། །དྲང་སྲོང་ཆེན་པོའི་གནས་སོ། །འབྱུང་པོའི་གནས་སོ། །མིག་གི་གནས་སོ། །རྒྱུའི་གནས་སོ། །ཕྱོགས་ཀྱི་གནས་སོ། །བསྟན་པའི་གནས་སོ། །སངས་རྒྱས་རྣམས་ཀྱིས་མངོན་པར་རྫོགས་པར་སངས་རྒྱས་པའོ། །ཉན་ཐོས་རྣམས་ཀྱིས་རེག་པའོ། །ཚངས་པས་བྱིན་གྱིས་བརླབས་པའོ།། 528a ༄#། །དབང་པོས་རབ་ཏུ་བསྔགས་པའོ། །འཇིག་རྟེན་སྐྱོང་བ་རྣམས་ཀྱིས་མཆོད་པའོ། །དབང་ཕྱུག་གིས་ཕྱག་བྱས་པའོ། །ལྷ་ཐམས་ཅད་ཀྱིས་ཀུན་ཏུ་མཆོད་པའོ། །རྣལ་འབྱོར་སྤྱོད་པ་རྣམས་ཀྱིས་བསྔགས་པའོ། །མཁས་པ་རྣམས་མངོན་པར་དགའ་བར་གྱུར་པའོ། །དྲང་སྲོང་རྣམས་ཀྱིས་རབ་ཏུ་བསྔགས་པའོ། །ཚངས་པ་རྣམས་ཀྱིས་རབ་ཏུ་བརྒྱན་པའོ། །ལྷ་རྣམས་ཀྱིས་མངོན་པར་བསྟོད་པའོ། །ཁྲུས་བྱེད་པ་རྣམས་ཀྱིས་བསང་པའོ། །རིགས་བཞིའི་འཇིག་རྟེན་གྱིས་དགའ་བར་བྱས་པའོ། ། སངས་རྒྱས་ཐམས་ཅད་ཀྱི་སྤྱོད་ཡུལ་ལོ། །རང་སངས་རྒྱས་རྣམས་ཀྱི་སྐྱེད་མོས་ཚལ་ལོ། །དྲང་སྲོང་རྣམས་ཀྱི་གནས་སོ། །ཉན་ཐོས་རྣམས་ཀྱི་མྱ་ངན་ལས་འདས་པའོ། ། རྣལ་འབྱོར་སྤྱོད་པ་རྣམས་ཀྱིས་གནས་སོ། །བྱང་ཆུབ་ཀྱི་ཕྱོགས་ཀྱི་ཆོས་རྣམས་ཀྱི་འབྱུང་གནས་སོ། །ཉོན་མོངས་པ་རྣམས་འཇོམས་པའོ། །བག་ལ་ཉལ་གྱི་ཟུག་རྔུ་རྣམས་འབྱིན་པའོ། །འཕགས་པའི་ལམ་ཀུན་ཏུ་སྟོན་པའོ། །ཐར་པའི་སྒོ་རྣམས་འབྱེད་པའོ། །འཇིག་ཚོགས་ལ་ལྟ་བ་རྣམས་འཇིག་པར་བྱེད་པའོ། །ང་རྒྱལ་གྱི་རི་རབ་ཏུ་བསྙིལ་བར་བྱེད་པའོ། །འཁོར་བའི་རྒྱ་མཚོ་སྐེམས་པའོ། །འཁོར་བའི་རྒྱ་མཚོར་ལྷུང་བའི་སེམས་ཅན་ཐམས་ཅད་སྒྲོལ་བའོ། །བདུད་ཀྱི་ཞགས་པ་གཅོད་པའོ། །བདུད་ཀྱི་འཁོར་སྐྲག་པར་ 528b བྱེད་པའོ། །བདུད་ཀྱི་མཆིལ་མ་འདོར་བའོ། །ཉོན་མོངས་པའི་གཡུལ་ལས་སྒྲོལ་བའོ། །མྱ་ངན་ལས་འདས་པའི་གྲོང་ཁྱེར་དུ་འཇུག་པའོ། །འཁོར་བའི་ཁྱིམ་ནས་འབྱུང་བར་བྱེད་པའོ། ། སྱཱད་ཡ་ཐེ་དན། ཁཌྒེ་ཁཌྒེ། ཁཌྒེ་གྷོ་ཥེ། ཨུ་ཤོ་དྷ་ནེ། སཱ་ར་ཐི། པྲ་བྷེ་དེ། བི་བུ་ལ་པྲ་བྷེ། སང་ཀརྛ་ཎི། བི་ཀརྠ་ཎི། བི་ཤ་གྲ་བ་ཏེ། ཤུདྷ་སཱ་དྷ་ནི། བ་རུ་ཎ་བ་ཏེ། བཱ་ས། བེ་བི་བྷུ་ཥེ་ཎེ།་བི་སང་ག་མེ། པ་ཤུ་པ་ཏི། པུཥྤ་གརྦྷེ། བདག་དང ། སེམས་ཅན་ཐམས་ཅད་འཇིགས་པ་དང ། ཉེ་བར་འཚེ་བ་དང ། ངལ་བ་ཐམས་ཅད་ལས་བདེ་ལེགས་སུ་གྱུར་ཅིག་སཝཱ་ཧཱ། སྟོང་ཆེན་པོ་རབ་ཏུ་འཇོམས་པ་ཞེས་བྱ་བའི་རིག་སྔགས་ཀྱི་རྒྱལ་མོ་གདོན་ཐམས་ཅད་ལས་ཐར་བར་བྱེད་པའི་མདོ་སྡེ་འདི་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཕྱག་རྒྱ་སྟེ། འདིས་ནི་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ཕྱག་རྒྱས་བཏབ་པ་སྟེ་མྱ་ངན་ལས་འདས་པའི་གྲོང་ཁྱེར་བླ་ན་མེད་པར་ཞུགས་སོ། །དེའི་དོན་གྱི་ཕྱིར་སྔོན་མངོན་པར་རྫོགས་པར་སངས་རྒྱས་པའི་ཡང་དག་པར་རྫོགས་པའི་སངས་རྒྱས་དང ། རང་སངས་རྒྱས་རྣམས་དང ། ཉན་ཐོས་རྣམས་དང ། ཕ་མ་དང ། སྦྱིན་གནས་དང ། བླ་མ་ལྟ་བུ་རྣམས་ལ་བསྙེན་བཀུར་ཏོ། །ཚངས་པར་སྤྱོད་པ་སྤྱད་དོ། །ཚུལ་ཁྲིམས་བསྲུངས་སོ། །སྦྱིན་པ་ 529a ༄#། །བྱིན་ནོ། །སྙིང་རྗེའི་ཕ་རོལ་ཏུ་ཕྱིན་པ་ཡོངས་སུ་བསྐངས་སོ། །བྱང་ཆུབ་ཐོབ་པར་བསྒྲུབས་སོ། །བདུད་ཕམ་པར་བྱས་སོ། །དེ་ནས་མི་མཇེད་ཀྱི་བདག་པོ་ཚངས་པ་དང ། ལྷ་རྣམས་ཀྱི་དབང་པོ་བརྒྱ་བྱིན་དང ། རྒྱལ་པོ་ཆེན་པོ་བཞི་དག་གིས་སྐད་ཅིག་བློ་གྲོས་གཅིག་དང ། དབྱངས་གཅིག་གིས་བཅོམ་ལྡན་འདས་ལ་ཕྱག་བཙལ་ནས་གསོལ་པ། ཀྱེ་མ་རིག་སྔགས་རིག་སྔགས་ཆེ། །སྟོང་ཆེན་རབ་ཏུ་འཇོམས་བྱེད་པ། །སངས་རྒྱས་ཕྱག་རྒྱ་དེ་ཡིས་ནི། །ཕྱོགས་བཞིའི་སེམས་ཅན་ཐམས་ཅད་བསྲུངས། །ཕྱག་རྒྱ་གང་གིས་བཏབ་གྱུར་ན། །འབྱུང་པོ་ཐམས་ཅད་སྐྲག་བགྱིད་པ། །སྟོང་ཆེན་རབ་ཏུ་འཇོམས་པའི་མདོ། །ཕྱག་རྒྱ་བདག་ཅག་སྩལ་བར་བགྱི། །མི་གང་རབ་ཏུ་སྡང་བ་དང ། །བསྟན་པ་འདི་ལ་མ་དད་པ། །དེ་དག་ཚངས་པས་སྤྲུལ་པ་ཡི། །རིག་སྔགས་ཆད་པས་གཅད་པར་བགྱི། །བརྒྱ་བྱིན་གྱིས་ནི་སྤྱི་བོས་བླངས། །འཇིག་རྟེན་སྐྱོང་བས་རྒྱས་བཏབ་བོ། །སྱཱད་ཡ་ཐེ་ད་ན། ཀ་ལིངྒེ། བ་ར་དེ། ཛཽ་ཏཱ་གྲེ། ཛཱ་མ་ནི། སིཾ་ཧ་བ་དེ། སཱ་རཱ་གྲ་པྲཔྟེ། ཧཾ་ས་གཱ་མི་ནི། མཱ་ལི་ནི། ཧུ་ལེ་སི་ཧུ་ལེ་སི་ཧུ་ལེ་སི་ཧུ་ལེ་མེ། ཧ་ཧ་མ། ཧ་ཧ་མ། སུ་ད་ནི། པ་རཱ་གྲ་བ་ཏི། ཧསྟི་ནེ། ནེ་བ་ར་མི་ཏ། ཙཎྜ་ལེ། ཙ་ར་མེ། ཙ་རཱ་མེ་ཙ་རཱ་རེ་སཝཱ་ཧཱ། སྟོང་ཆེན་མོ་རབ་ཏུ་འཇོམས་པ་ཞེས་བྱ་བ་རིག་སྔགས་ཀྱི་རྒྱལ་པོ་འདི་བཤད་པའི་ཚེ་སྟོང་གསུམ་གྱི་ 529b སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་གཡོས། ཀུན་ཏུ་རབ་ཏུ་གཡོས། ཕྱོགས་བཞིའི་གནོད་སྦྱིན་དང ། སྲིན་པོ་ཤ་ཟ་བ་རྣམས་ཀྱིས་སྒྲ་སྐད་དྲག་པོ་ཕྱུང་བ། ཀྱེ་མའོ་སྡུག་བསྔལ་ཀྱེ་མའོ་བརླག་།བདག་ཅག་འབྱུང་པོའི་ཚོགས་ཕུང་ངོ ། །འབྱུང་པོའི་ཚོགས་ནི་རབ་ཏུ་ཕྲང ། །བདག་ཅག་རྟག་ཏུ་དབང་གིས་ཁྲིད། །སྲོག་ཆགས་འབྱུང་པོ་ཐམས་ཅད་ནི། །དེ་རིང་དགྲར་བཅས་དབང་མེད་དོ། །དེ་དག་ས་ལ་འཁོད་ནས་ནི། །ཞུམ་ཞིང་རྣམ་པར་ཞུམ་གྱུར་ནས། །འགྲེ་ཞིང་ལྡོག་པར་རབ་ཏུ་བྱེད། །དེ་ནས་བཅོམ་ལྡན་འདས་ཀྱིས་ས་གཞི་རྡོ་རྗེར་མངོན་པར་སྤྲུལ་པ་དང ། དེ་དག་ཀྱང་ཕྱོགས་བཞིར་བྱེར་རོ། །དེ་ནས་རྒྱལ་པོ་ཆེན་པོ་བཞིས་ཕྱོགས་བཞིར་མེ་ལྕེའི་ཕུང་པོ་ཆེན་པོ་མངོན་པར་སྤྲུལ་པ་དང ། དེ་དག་ནམ་མཁའ་ལ་རྒྱུག་གོ་།དེ་ནས་མི་མཇེད་ཀྱི་བདག་པོ་ཚངས་པས་ནམ་མཁའ་ལྕགས་སུ་མངོན་པར་སྤྲུལ་པ་དང ། དེ་དག་ཤིང་ཏ་ལ་བདུན་ཙམ་ནས་ནམ་མཁའ་ལ་ཀུན་ཏུ་རྒྱུག་གོ་།དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་རལ་གྲི་དང ། མདའ་དང ། མདུང་ཐུང་དང ། མདུང་དང ། མདའ་བོ་ཆེ་དང ། ཤིང་ལྗོན་པ་དང ། རིའི་ཆར་མངོན་པར་ཕབ་བོ། །དེའི་ཚེ་གནོད་སྦྱིན་ལྔ་སྟོང་མི་མཇེད་ཀྱི་འཇིག་རྟེན་གྱི་ཁམས་ཀུན་ནས་འདུས་པ་རྣམས་རིག་སྔགས་ཀྱི་དམོད་པས་ 530a ༄#། །བཅོམ་སྟེ། རིམས་ནད་ཀྱིས་བཏབ་ནས་མྱོས་ཏེ་རྨྱ་ཞིང་བཅོམ་ལྡན་འདས་ཀྱི་ཞབས་གཉིས་ལ་གཏུགས་ཏེ་གསོལ་པ། དགེ་སྦྱོང་གཽ་ཏ་མ་ནི་ ་ཅན་ཐམས་ཅད་ལ་ཕན་པ་དང ། ཐུགས་བརྩེ་བ་ཅན་ལགས་ཀྱི། དགེ་སྦྱོང་གཽ་ཏ་མས་བདག་ཅག་བསྐྱབ་ཏུ་གསོལ། དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་དེ་དག་ལ་བྱམས་པས་ཁྱབ་པ་མཛད་ནས་བསླབ་པའི་གཞི་འཛིན་དུ་བཙུད་དོ། །བདག་ཅག་ཕྱག་རྒྱ་སྤོང་གྱུར་ན། །མ་བསད་པ་ཡི་འགྲོ་གང་དང ། །ཕ་བསད་པ་ཡི་འགྲོ་གང་དང ། །དགྲ་བཅོམ་པ་ཡང་གསོད་གང་དང ། །དགེ་འདུན་དབྱེན་བགྱིད་འགྲོ་གང་དང ། །རྫོགས་སངས་རྒྱས་ལ་སྡང་སེམས་ཀྱིས། །སྐུ་མཚལ་ཕྱུང་བ་བགྱིས་པ་ཡིས།། འགྲོ་བ་གང་ལགས་དེར་མཆིའོ། །རྫ་ཀ་ཡི་དོག་པ་ལྟར། །མགོ་ནི་ཚལ་པ་བདུན་འགས་ཤིང ། །གནོད་སྦྱིན་ནད་ཀྱིས་བཏབ་པ་དང ། །བདག་ལུས་ཤ་བཀྲ་འབྱུང་བར་ཤོག་།གང་འདི་རྒྱལ་བས་གསུངས་པའི་མདོ། །སྟོང་ཆེན་རབ་ཏུ་འཇོམས་པ་ཡི། །རིག་སྔགས་རྒྱལ་ལས་འགལ་བགྱིས་ན། །བདག་ཅག་འདོད་བཞིན་མི་འགྱུར་རོ། ། དེའི་ཚེ་གྲོང་ཁྱེར་ཆེན་པོ་ཡངས་པ་ཅན་ན་ཡམས་ཀྱི་ནད་དང ། འཇིགས་པ་དང ། གནོད་པ་དང ། ནད་འགོ་བ་དང ། འཁྲུག་པ་ཐམས་ཅད་རྒྱུན་ཆད་པར་གྱུར་ཏོ། །གནོད་སྦྱིན་ 530b དང།་སྲིན་པོ་དང ། མི་དང ། མི་མ་ཡིན་པ་རྣམས་ཀྱང་རང་རང་གི་སྤྱོད་ཡུལ་ལས་འདས་སོ། །ངང་པ་དང ། ནེ་ཙོ་དང ། རི་སྐེགས་དང ། ཁུ་བྱུག་དང ། རྨ་བྱ་དང ། ངུར་པ་དང ། ཤང་ཤང་ཏེའུ་དང ། བྱའི་ཚོགས་རྣམས་ཀྱང་སྒྲ་སྙན་པ་འབྱིན་ནོ། །མི་འམ་ཅི་རྣམས་ནི་ལྷའི་བུ་མོ་བཞིན་དུ་ལུས་ལ་གནོད་པ་མེད་དོ། །རིན་པོ་ཆེའི་ཆ་བྱད་རྣམས་ཀྱང་མ་དཀྲོལ་བར་འཁྲོལ་ལོ། །རྔ་བོ་ཆེ་དང ། དུང་དང ། རྫ་རྔ་དང ། རྔ་བྲན་དང ། པི་ཝང་དང ། གླིང་བུ་རྣམས་ཀྱང་ཇི་ལྟར་གནས་སུ་བཀོད་པ་བཞིན་དུ་སྒྲ་བྱུང་ངོ ། །བལ་པོ་སེའུ་དང ། བིལ་བ་དང ། སྐྱུ་རུ་ར་དང ། ནྱ་གྲོ་དྷ་དང ། བྱང་ཆུབ་ཀྱི་ཤིང་དང ། སྤྲེའུ་གནས་དང ། བླཀྵ་དང ། ུ་དུམ་བཱ་ར་དང ། སཱ་ལ་དང ། ཏ་མ་ལའི་ཤིང་ལྗོན་པ་རྣམས་ཀྱང་དྲི་རབ་ཏུ་འབྱིན་ནོ། །ལྷ་བརྒྱ་སྟོང་དག་གིས་ཀྱང་ཨ་ལ་ལ་ཞེས་བྱ་བའི་སྒྲ་ཕྱུང་སྟེ་བར་སྣང་ལ་མེ་ཏོག་གི་ཆར་མངོན་པར་ཕབ་བོ། །མི་མ་ཡིན་པའི་དྲི་དག་ཀྱང་འཇིག་རྟེན་དུ་བྱུང་ངོ ། །དེ་ནས་རྒྱལ་པོ་ཆེན་པོ་བཞིས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། གང་ལ་ལ་ཞིག་གིས་བསླབ་པའི་གཞི་ཡོངས་སུ་བཟུང་སྟེ་གོས་ངུར་སྨྲིག་བགོས་ནས་སྟོང་ཆེན་པོ་རབ་ཏུ་འཇོམས་པའི་མདོ་སྡེའི་རྒྱལ་པོ་གདོན་ཐམས་ཅད་ལས་ཐར་བར་བྱེད་པ། སངས་རྒྱས་ཀྱི་ཕྱག་རྒྱའི་ཆོས་ཀྱི་རྣམ་གྲངས་འདི་བླངས་ཤིང་ 531a ༄#། །གཟུང་སྟེ་བཀླགས་ཤིང་བཤད་ལ་ཀུན་ཆུབ་པར་བགྱིས་ཤིང་ཡི་གེར་བྲིས་ནས་མདུད་པ་བོར་ཏེ་འཆད་ན། དེ་ལ་ཡམས་ཀྱི་ནད་དང ། འཇིགས་པ་དང།་གནོད་པ་དང ། ནད་འགོ་བ་དང ། འཁྲུག་པ་དང ། ཁྲག་ཁྲུག་དང ། འཐབ་མོ་དང ། བཅིང་བ་དང ། རྩོད་པ་དང ། འགྱེད་པ་ནས་ཕྲ་མའི་བར་གྱི་སྡིག་པ་མི་དགེ་བའི་ཆོས་རྣམས་ཀྱིས་མི་ཚུགས་པར་འགྱུར་ལགས་སོ། །རྣམ་པར་འཚེ་བ་ཐམས་ཅད་ལས་རྒྱལ་བར་འགྱུར་ལགས་སོ། །ཡུལ་འཁོར་མཚམས་གཅད་པར་འཚལ་བ། ཁྲུས་བགྱིས་པ། ཟས་དཀར་གསུམ་འཚལ་བ། ཟས་ངན་པ་རྣམ་པ་ལྔ་སྤངས་པ། མིའི་བསླབ་པའི་གཞི་ཐམས་ཅད་ཡོངས་སུ་བཟུང་བ། སེམས་ཅན་ཐམས་ཅད་ལ་སེམས་སྙོམས་པ། ཤིན་ཏུ་བརྒྱན་པ། གོས་དང ། རྒྱན་དང་ལྡན་པ་དེས་གྲོང་དང ། གྲོང་ཁྱེར་དང ། གྲོང་རྡལ་དང ། ཡུལ་འཁོར་དང ། སུམ་མདོ་དང ། ཁྱིམ་རྣམས་ཉལ་ཉིལ་གྱི་ཕུང་པོ་མ་མཆིས་པར་བགྱིད་ཏེ་རྒྱལ་པོའི་ཕོ་བྲང་འཁོར་གྱི་དབུས་ཀྱི་དོག་ས་རྣམས་སུ་མེ་ཏོག་སིལ་མ་བཀྲམ་ལ་སྤོས་སྣ་ཚོགས་ཀྱིས་རབ་ཏུ་བདུག་པར་བགྱིའོ། ། ཕྱོགས་བཞིར་བུ་མོ་ཤིན་ཏུ་ཁྲུས་བགྱིས་པས་བརྒྱན་པ་ལག་ན་མཚོན་ཐོགས་པ་བཞི་དང ། དྲིལ་བུ་བཞི་དང ། རིན་པོ་ཆེའི་སྣོད་བཞི་བཞག་གོ་།སྔ་དྲོའི་དུས་ཀྱི་ཚེ་གདུགས་ 531b ཤར་བ་དང ། རིག་སྔགས་བཀླགས་པར་བགྱི་སྟེ་མདོ་སྟེ་བཟླས་ཤིང་བཀླག་པར་བགྱིའོ། །ཡི་གེར་བྲིས་ཏེ་མཆོད་རྟེན་ཆེན་པོ་དང ། ཤིང་ལྗོན་པ་ཆེན་པོ་དང ། རྒྱལ་མཚན་ཆེན་པོའི་རྩེ་མོ་ལ་བསྟོད་དེ་བཏགས་ལ་མེ་ཏོག་སྣ་ཚོགས་དང ། སྤོས་སྣ་ཚོགས་དག་གིས་དགུང་ཟླ་ཕྱེད་ཀྱི་བར་དུ་མཆོད་པར་བགྱིའོ། །གདུགས་རེ་རེ་ཞིང་རིག་སྔགས་ལན་རེ་བཀླག་པར་བགྱིའོ། །དེ་ལྟར་ན་ཡུལ་འཁོར་ཡོངས་སུ་ཐར་བར་འགྱུར་རོ། །དེ་ལྟར་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། ཕོ་བྲང་འཁོར་དང ། གནས་དང།་གཙུག་ལག་ཁང་དང ། ཁྱིམ་དང ། ཞིང་དང ། ལས་ཁང་དང ། ཤིང་ལྗོན་པ་དང ། འབྲས་བུ་དང ། ནེའུ་སིང་དང ། ཀུན་དགའ་ར་བ་དང ། གནག་ལྷས་དང ། ་ལྷས་རྣམས་ཉལ་ཉིལ་མ་མཆིས་པར་བགྱིས་ཏེ་སེང་ལྡེང་དང ། རྒྱ་ཤུག་གི་ཞུགས་བལྟམས་ལ་དོག་ས་ལ་མེ་ཏོག་སིལ་མ་བཀྲམ་སྟེ་སྒོ་ཁང་གཡས་གཡོན་ནས་དྲི་སྣ་ཚོགས་ཀྱིས་བདུགས་ལ་ས་བོན་ཐམས་ཅད་མར་གྱིས་བསྐུས་ཏེ་ཕྱོགས་བཞིར་གཏོར་བར་བགྱི། ཆབ་སྒོར་ཚོན་སྐུད་སྣ་ཚོགས་བྲེ་བར་བགྱིའོ། །དུད་འགྲོའི་སྐྱེ་གནས་སུ་གྱུར་པ་དག་ནི་བཏོན་ལ་སླར་ཡང་གཟུད་པར་བགྱིའོ། །རིག་སྔགས་ཀྱང་བཀླག་པར་བགྱིའོ། །ཡི་གེར་བྲིས་སམ། མདུད་པ་མདུད་དེ་མཐོན་པོའི་ཁར་བཏགས་ལ་མཆོད་པར་བགྱིའོ། །ནད་པའི་ 532a ༄#། །མདུན་དུ་སངས་རྒྱས་ཀྱི་སྐུ་གཟུགས་སམ། སངས་རྒྱས་ཀྱི་རིང་བསྲེལ་ལམ། ཚངས་པའི་གཟུགས་སམ། བརྒྱ་བྱིན་གྱི་གཟུགས་སམ། རྒྱལ་པོ་ཆེན་པོ་བཞིའི་གཟུགས་ཁྲིའུམ། ཟ་མ་ཏོག་གི་སྟེང་དུ་བཞག་སྟེ་ཕྱག་རྒྱ་བཞི་བགྱིས་ལ་བཞག་པར་བགྱིའོ། །མེ་ཏོག་སྣ་ཚོགས་དང ། སྤོས་སྣ་ཚོགས་དང ། ཚངས་པ་དང ། བརྒྱ་བྱིན་དང།་རྒྱལ་པོ་ཆེན་པོ་བཞི་དང ། དབང་ཕྱུག་ཆེན་པོ་དང ། གནོད་སྦྱིན་གྱི་སྡེ་དཔོན་དང ། གནོད་སྦྱིན་སྟོབས་པོ་ཆེ་དང ། འཕྲོག་མ་ལ་སོགས་པའི་མིང་གིས་དཀོན་མཆོག་གསུམ་ལ་མཆོད་པར་བགྱིའོ། །དེ་རྣམས་ཀྱི་སྟོབས་དང ། དབང་ཕྱུག་དང ། བྱིན་གྱིས་བདག་དགེ་བར་གྱུར་ཅིག་།བདག་ལ་སྲུང་བ་གྱིས་ཤིག་།ནད་ཐམས་ཅད་ལས་ཐར་བར་གྱུར་ཅིག་།ནད་པའི་ཟས་དང ། སྐོམ་དང ། སྨན་རྣམས་ཀྱང་རིག་སྔགས་འདིས་བཏབ་ཏེ་སྩལ་བར་བགྱིའོ། །རྫོགས་སངས་རྣམ་པར་སངས་རྒྱས་ཚེ། །འཇིག་རྟེན་སྐྱོང་བས་ཕྱོགས་བཞི་ནས། །སྣོད་བཞི་དག་ནི་བླངས་ནས་སུ། །བདེ་བར་གཤེགས་ལ་ཕུལ་བ་དང ། །མཐུ་ཡིས་གཅིག་ཏུ་སྤྲུལ་མཛད་པ། །ལྷ་ཡི་སྣོད་མཆོག་དེ་དང་ནི། །བདུད་རྩི་འདྲ་བའི་སྨན་གྱི་རྣམས། །སྟོན་པའི་ཕྱག་ན་བསྣམས་གྱུར་པ། །བདེན་པའི་ཚིག་ནི་དེ་དག་གིས། །སྨན་རྣམས་བདུད་རྩིར་གྱུར་པར་ཤོག་།དེ་བཞིན་ལྷ་མོ་འཕྲོག་མ་ཡིས།། 532b ལྷ་རྫས་དགེ་བ་ཨ་རུ་ར། །བླངས་ནས་སྟོན་ལ་རབ་ཕུལ་བ། །བདུད་རྩི་འདྲ་བའི་སྨན་གྱི་རྣམས། །བདེན་པའི་ཚིག་ནི་འདི་དག་གིས། །ནད་པ་རྣམས་ཀྱི་ནད་སེལ་ཅིག་།ཉེས་པ་ཐམས་ཅད་འཕྲོག་བྱེད་པ། །སྨན་རྣམས་བདུད་རྩིར་གྱུར་པར་ཤོག་།སངས་རྒྱས་རྣམ་གཟིགས་གཟི་བརྗིད་དང ། །གཙུག་ཏོར་ཅན་གྱི་སྟོབས་རྣམས་དང ། །ཐམས་ཅད་སྐྱོབ་ཀྱི་བདེན་ཚིག་དང ། །ལོག་དད་སེལ་གྱི་ཏིང་འཛིན་དང ། །གསེར་ཞེས་བྱ་བའི་ཡེ་ཤེས་དང ། །འོད་སྲུང་གི་ནི་རྫུ་འཕྲུལ་དང ། །ཤཱཀྱ་སེང་གེའི་མཐུ་རྣམས་ཀྱིས། །སྨན་རྣམས་བདུད་རྩིར་གྱུར་པར་ཤོག་།ནད་པ་ཤར་ཕྱོགས་ཁ་བསྟན་ལ། །སྨན་རྣམས་ཉེ་བར་སྩལ་བར་བགྱི། །དེ་ཡི་ཚེ་ན་རིག་སྔགས་འདི། །ལག་མཐིལ་བཞག་སྟེ་བཀླག་པར་བགྱི། །སྱཱད་ཡ་ཐེ་ད་ན། ཁ་ཊེ། ཁ་ཊེ། ཁ་ཊེ། ཁ་ཊེ་བི་ཁ་ཊེ། བི་མ་ལེ། བི་ལམ་བེ། བ་ལེ། བ་ལ་བ་ཏི། ཙནྡྲེ། ཙ་ར་ཎེ། ཨ་མྲྀ་ཏ་ནིརྒྷོ་ཥེ་སཝཱ་ཧཱ། རླུང་ལས་གྱུར་དང་མཁྲིས་ལས་གྱུར། །བད་ཀན་ལས་གྱུར་འདུས་ལས་གྱུར། །ནད་རྣམས་ཐམས་ཅད་རབ་བཅོམ་སྟེ། །བདག་ལ་རྟག་ཏུ་དགེ་བར་ཤོག་།བྱད་དང ། རོ་ལངས་དང་ལྡན་པའི་ལས་ ་ལ་སྐྱེས་པའམ། བུད་མེད་གདུགས་ཞག་གཅིག་སྨྱུང་བ་བགྱིས་པ། རབ་ཏུ་ཁྲུས་བགྱིས་པ། ཤིན་ཏུ་བརྒྱན་པ་དེས་དོག་ས་ལ་མེ་ཏོག་སིལ་མ་བཀྲམ་སྟེ་སྤོས་སྣ་ཚོགས་ཀྱིས་ 533a ༄#། །བདུགས་ལ་སེང་ལྡེང་དང ། རྒྱ་ཤུགས་རིགས་གཉིས་ཀྱི་ཞུགས་བུས་ཏེ་ས་བོན་ཐམས་ཅད་ཕྱོགས་བཞིར་གཏོར་བར་བགྱིའོ། །ཞུགས་ཀྱི་ནང་དུའང་གཏོར་བར་བགྱིའོ། །རྩ་བ་ཐམས་ཅད་དང ། མེ་ཏོག་ཐམས་ཅད་ཚོན་སྐུད་སྣ་ཚོགས་ལ་བརྒྱུས་ཏེ་རལ་གྲིའམ། མདུང་རྩེ་གསུམ་པའམ། མདུང་ངམ། མདའ་ལ་གདགས་པར་བགྱིའོ། །སྤོས་ཆབ་སྣ་ཚོགས་སྦྱར་ཏེ་བུམ་པ་ཆེན་པོའི་ནང་དུ་བླུགས་ལ་གང་བྱད་སྟེམས་ཀྱིས་ཕོག་པ་དེ་སྐུད་པ་དེས་བཅིངས་ཏེ་བུམ་པའི་ཆབ་ཀྱིས་བཀྲུ་བར་བགྱི། སྐུད་པའང་རལ་གྲིས་བཅད་དེ་ཞུགས་ཀྱིས་ནང་དུ་དོར་རོ། །སྟོང་ཆེན་པོ་རབ་ཏུ་འཇོམས་པའི་མདོ་སྡེ་འདིའང་བརྗོད་པར་བགྱིའོ། །གང་དག་སངས་རྒྱས་རང་སངས་རྒྱས། །སངས་རྒྱས་རྣམས་ཀྱི་ཉན་ཐོས་དང ། །ཚངས་དབང་དང་ནི་འཇིག་རྟེན་སྐྱོང ། །གནོད་སྦྱིན་སྡེ་དཔོན་དབང་ཕྱུག་དང ། །དེ་བཞིན་གནོད་སྦྱིན་སྟོབས་ཆེན་དང། །འཕྲོག་མ་བུ་དང་བཅས་པ་དང ། །དེ་དག་མཐུ་དང་གཟི་བརྗིད་ཀྱིས། །རོ་ལངས་ལས་རྣམས་ཆད་གྱུར་ཅིག་།རྡོ་རྗེས་རིན་ཆེན་ཕུག་པ་དང ། །མེ་ཡིས་བུད་ཤིང་སྲེག་པ་དང ། །རླུང་གིས་སྤྲིན་ནི་འཐོར་བ་དང ། །ཉི་མས་ནགས་ཚལ་སྐེམས་བྱེད་པ། །བདེན་པའི་ཚིག་ནི་དེ་དག་གིས། །བྱད་སྟེམས་ལས་རྣམས་ཚིག་པར་ཤོག ། 533b སྤོས་དང་མེ་ཏོག་སྣ་ཚོགས་ཀྱིས། །སྡིག་པ་ཐམས་ཅད་ངེས་པར་བསལ། །ཏདྱ་ཐཱ། ཧུ་མེ་ཧུ་མེ། ཀ་ཁ་ལི། ཀ་ཁ་ལི། ཁ་ར་ལེ། ཛུ་ཧཝི་ནི། ཛ་བ་ལེ། ཧ་རཱ་གྲེ། ཧ་རི་ཎི་ཤཱ་བ་རི།་ཤཱནྟི། ཤཱནྟི་སཝཱ་ཧཱ། བྷཱ་བ་ནི་སཝཱ་ཧཱ། པྲ་དྷཱ་བ་ནི་སཝཱ་ཧཱ། གཱན་དྷ་ར་བྷེ་སཝཱ་ཧཱ། པྲ་ལང་གི་ནི་སཝཱ་ཧཱ། སརྦ་ཀཱ་ཁོར་ཀྲྀ་ཏ་བེཏཱ་རཙྪེ་\?\་ད་ནི་སཝཱ་ཧཱ། ལྷ་ཐམས་ཅད་ཀྱི་གསང་སྔགས་འདི་དག་གིས་བདག་གི་བྱད་ ་དག་རོ་ལངས་དང ། སྨན་དང ། སྔགས་དང ། དུག་དང ། དུག་སྦྱར་མ་རྣམས་བཅད་དོ། །བཤིག་གོ་།ཕམ་པར་བྱས་སོ། །ཕ་རོལ་ཕམ་པར་བྱས་སོ་སཝཱ་ཧཱ། ལྦ་བ་དང ། ཤུ་བ་དང ། སྨྱོ་བ་དང ། འབྲས་དང ། འབྲུམ་བུ་དང ། རྐོམ་པོ་དང ། དུག་འཐུངས་པ་ལས་ཐར་བར་འཚལ་བ། ཤིན་ཏུ་ཁྲུས་བགྱིས་པ།་ཤིན་ཏུ་བརྒྱན་པ། སྟན་པ་བཟང་པོའི་སྟེང་དུ་མཆིས་ཏེ་རིག་སྔགས་འདི་བརྗོད་པར་བགྱིའོ། །སངས་རྒྱས་ཀུན་གྱི་གཟི་བརྗིད་དང ། །རང་རྒྱལ་དག་གི་གཟི་བརྗིད་དང་།། དགྲ་བཅོམ་དག་གིས་མཐུ་དག་དང ། །གསང་སྔགས་འཛིན་པ་ཐམས་ཅད་དང ། །ཤཱ་རིའི་བུ་ཡི་ཤེས་རབ་དང ། །མཽངྒལ་བུ་ཡི་རྫུ་འཕྲུལ་དང ། །མ་འགགས་པ་ཡི་མིག་དང་ནི། །འོད་སྲུང་སྦྱངས་པའི་ཡོན་ཏན་དང ། །ཀཽཎྜི་ནྱས་སྔར་ཐོབ་དང ། །ཀུན་དགའ་བོ་ཡི་ཐོས་པ་དང ། །ཚངས་པ་ཡི་ནི་བྱམས་པ་དང ། །བརྒྱ་བྱིན་གྱི་ནི་དབང་རྣམས་དང ། །འཇིག་ 534a ༄#། །རྟེན་སྐྱོང་བའི་ཡུལ་རྣམས་དང ། །དབང་ཕྱུག་ཆེན་པོའི་སྟོབས་དག་དང ། །སྡེ་དཔོན་རྣམས་ཀྱི་མཐུ་དག་དང ། །འཕྲོག་མའི་གཟི་བརྗིད་རྫུ་འཕྲུལ་དང། །དེ་དག་རྣམས་ཀྱི་མཐུ་དང་གཟིས། །བདག་གིས་དུག་ནི་དུག་མེད་ཤོག་།དུག་མེད་དུག་རྣམས་འཇིགས་བྱེད་པ། །གསང་སྔགས་ཚིག་རྣམས་དེ་ལགས་སོ། །སྱཱད་ཡ་ཐེ་དན།་ཧ་རི་ཀེ་ཤི་ན་ཀི་ལི། ཨེ་ཧེ་རེ། ཨ་མ་རེ། ཨཎྜ་རེ། པཎྜ་རེ། ཀ་ཊ་ཀེ་།ཀེ་ཡཱུ་རེ། ཧ་སེ་ཧ་སེ་ཧ་སེ། ཁ་སེ་ཁ་སེ་ཁ་སེ། ཁ་རཾ་གེ་།མ་རུ་ག་ཧ་ཎེ་སཝཱ་ཧཱ། མུ་མུ་ཀྵུ་སཝཱ་ཧཱ། ཧི་ལེ་སཝཱ་ཧཱ། མུ་ལེ་སཝཱ་ཧཱ། འབྲས་དང་རྨ་དང་ཤུ་བ་དང ། །གཡན་པ་དང་ནི་འབྲུམ་བུ་དང ། །ལྷོག་པ་དང་གཡའ་བ་ནི། །བདུན་པ་ལགས་ཏེ་རབ་ཏུ་བཅོམ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་སངས་རྒྱས་དུག་མི་མངའ། །སངས་རྒྱས་གཟི་ཡིས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་ཏེ། །བཅོམ་ལྡན་ཆོས་ནི་དུག་མི་མངའ། །ཆོས་ཀྱི་གཟི་ཡིས་དུག་བཅོམ་མོ། །འདོད་ཆགས་ཞེ་སྡང་གཏི་མུག་རྣམས། །དེ་དག་འཇིག་རྟེན་དུག་གསུམ་སྟེ། །བཅོམ་ལྡན་དགེ་འདུན་དུག་མི་མངའ། །དགེ་འདུན་གཟི་ཡིས་དུག་བཅོམ་མོ། །ས་ནི་དུག་གི་མ་ཡིན་ཏེ། །ས་ནི་དུག་གི་ཕ་ཡང་ཡིན། །བདེན་ 534b པའི་བདེན་ཚིག་དེ་དག་གིས། །བདག་ནི་དུག་ནི་དུག་མེད་ཤོག་།དུག་ནི་ས་ཡི་ནང་དུ་སོང ། །གང་བའི་སྣོད་དུ་དུག་སོང་ཞིག་སཝཱ་ཧཱ། །དེ་ནས་ཁྲག་ཁྲུག་དང ། འཐབ་པ་དང ། རྩོད་པ་དང།་འགྱེད་པ་དང ། ཕ་རོལ་གྱི་དམག་ཚོགས་དང ། དགྲ་རྣམས་ལས་རྒྱལ་བར་འཚལ་བས་ཐོག་མར་མཆོད་རྟེན་ཆེན་པོ་ལ་མཆོད་པ་བགྱིའོ། །སྟོང་ཆེན་པོ་རབ་ཏུ་ ་པའི་རིག་སྔགས་ཀྱི་རྒྱལ་མོ་འདིའང་བརྗོད་པར་བགྱིའོ། །སངས་རྒྱས་ཀྱིས་ནི་བདུད་ཕམ་མཛད། །ཆོས་མ་ཡིན་ནི་ཆོས་ཀྱིས་སོ། །དགེ་འདུན་གྱིས་ནི་མུ་སྟེགས་ཕམ། །དབང་པོས་ལྷ་མིན་ཕམ་པར་གྱུར། །ལྷ་མིན་རྣམས་ཀྱིས་ཟླ་བ་ཕམ། །ནམ་མཁའ་ལྡིང་གིས་རྒྱ་མཚོའོ། །མེ་ཡིས་ཤིང་རྣམས་ཕམ་པར་གྱུར། །ཆུས་ནི་མེ་ཡང་ཕམ་པར་འགྱུར། ། རླུང་གི་སྤྲིན་རྣམས་རབ་ཏུ་ཕམ། །རྡོ་རྗེ་ཡིས་ནི་རིན་ཆེན་ཕུག་།ལྷ་རྣམས་བདེན་པར་རབ་ཏུ་གསུངས། །ས་ཡང་བདེན་པར་གནས་པ་ལགས། །སངས་རྒྱས་དང་ནི་ཆོས་ཀྱང་བདེན། །བདེན་པ་རྒྱལ་གྱུར་བརྫུན་མ་ལགས། །སྱཱད་ཡ་ཐེ་དན། ཨ་མྲྀ་ཏེ། ཨ་གྲ་པུཥྤེ། བ་ཧུ་ཕ་ལེ། ནི་བཱ་ར་ཎི། སརྦ་ཨརྠ་སཱ་དྷ་ནི། ཨ་པ་རཱ་ཛི་ཏེ། བ་ར་ཊེ་དྷ་ར་ཎི། གུ་ཧྱཱ་བ་ར་ཏེ།་གཽ་ཏ་མེ། གུ་གུ་མ་ཏི། ཛམྦྷ་ནི་སཝཱ་ཧཱ། པྲ་ཛམྦྷ་ནི་སཝཱ་ཧཱ། བ་ལ་པྲ་བྷཉྫ་ནི་སཝཱ་ཧཱ། ཛ་ཡེ་སཝཱ་ཧཱ། བི་ཛ་ཡེ་སཝཱ་ཧཱ། ཛ་ཡ་བི་ཛ་ཡེ་སཝཱ་ཧཱ། ཕྱིར་རྒོལ་བ་ནི་ཀུན་ལས་རྒྱལ། །སྡིག་པ་ ་ 535a ༄#། །ཅད་རབ་ཏུ་ཕམ་སཝཱ་ཧཱ། དེ་ནས་སྟོན་པ་ཀུན་མཁྱེན་གྱིས། །ཚིགས་སུ་བཅད་པ་འདི་དག་གསུངས། །མི་འཁྲུགས་པ་དང་སྣང་མཛད་སྤྱན་རས་ ་ཀྱི་དབང ། །རིན་ཆེན་འོད་འཕྲོ་རི་རབ་མུ་ཁྱུད་འོད་དཔག་མེད། །རྡོ་རྗེ་རྣམས་ཀྱི་མཚན་རྣམས་རྟག་ཏུ་བཟུང་ན་ནི། །འཇིགས་པར་འགྱུར་བ་མ་ཡིན་ནོན་པར་མི་འགྱུར་རོ། །གང་གིས་མཐུ་སྟོབས་ཆེན་པོ་བརྒྱད་པོ་འདི་དག་གི་།མཚན་རྣམས་རྗེས་སུ་གཟུང་བའི་ཕྱིར་ནི་རབ་བརྗོད་ཅིང ། །ཀུན་ཏུ་བསྐྱབ་པ་བྱས་ན་དེ་ཡི་ལུས་ལ་ནི། །མེ་དང་དུག་དང་མཚོན་གྱིས་ཚུགས་པར་མི་འགྱུར་རོ། །གལ་ཏེ་དེ་ལ་གནོད་པ་བྱེད་པ་ཉེ་བར་གནས། །གཤེད་མས་མཚོན་རྣམས་ཀྱིས་ནི་གདབ་པར་གཟས་པ་ལས། །སྤྱན་རས་གཟིགས་ཀྱི་དབང་པོ་རྗེས་སུ་དྲན་ན་ནི། །མཚོན་ཆ་དེ་དག་དུམ་བུ་དུམ་བུར་ཆག་ཅིང་འབྲུལ། །གལ་ཏེ་མཚོན་ཆ་རྣམས་ནི་ཐོགས་པར་གྱུར་ན་ཡང ། །ལག་པ་ཆག་ནས་ས་ལ་རབ་ཏུ་ལྟུང་བར་འགྱུར།། དེ་ཡི་ལུས་ལ་ཅུང་ཟད་འབབ་པར་མི་འགྱུར་ཏེ། །སྔན་ཆད་བྱས་པ་གང་ཡིན་པ་ནི་མ་གཏོགས་སོ། །ལྷ་རྣམས་ཀྱིས་མཐུན་པར་ཚིགས་སུ་བཅད་པ་འདི་དག་གསོལ་ཏོ། །སངས་རྒྱས་སྤྱོད་ཡུལ་མཐའ་ཡས་ཁྱོད་ལ་ཕྱག་འཚལ་ལོ། །བདེན་པ་རབ་སྟོན་ཐུབ་པ་ཁྱོད་ལ་ཕྱག་འཚལ་ལོ། །དེང་ནི་བདེན་པ་རྣམས་ལ་གནས་ནས་མཆི་བར་བགྱི། །བདག་གི་ལས་ 535b རྣམས་ཐམས་ཅད་འབྲས་བུར་བཅས་གྱུར་ཅིག་།དེ་ནས་ཚངས་པ་ཚངས་ཆེན་གྱིས། །ལངས་ཏེ་ཐལ་མོ་སྦྱར་བཏུད་ནས། །སྟོང་ཆེན་རབ་ཏུ་འཇོམས་བྱེད་པ། །ལེགས་པར་ ་པའི་ ་སྔགས་འདི། །བྱིས་པ་རྣམས་ལ་ཕན་བགྱིད་པ། །རིག་སྔགས་བདག་གིས་བརྗོད་པར་བགྱི། །གང་གིས་དང་པོར་འཛམ་གླིང་དུ། །རིག་སྔགས་རབ་ཏུ་སྟོན་མཛད་པ། ། ཆོས་ཀྱི་རྒྱལ་པོ་སྣང་མཛད་པ། །སངས་རྒྱས་དཔལ་ལ་ཕྱག་འཚལ་ལོ། །ཁྱད་པར་འཕགས་པའི་ཆོས་རྣམས་དང ། །ཚོགས་ཀྱི་དམ་པ་དགེ་འདུན་དང ། །སངས་རྒྱས་ཞབས་ལ་ཕྱག་འཚལ་ནས། །ཚངས་པས་འདི་སྐད་ཚིག་གསོལ་ཏོ། །གང་དག་སངས་རྒྱས་རང་སངས་རྒྱས། །སངས་རྒྱས་ཀྱི་ནི་ཉན་ཐོས་དང ། །དྲང་སྲོང་དང་ནི་འཇིག་རྟེན་སྐྱོང ། །ལྷ་རྣམས་ཇི་སྙེད་མཆིས་པ་དག་།དེ་ཀུན་མི་ཡི་འཇིག་རྟེན་ན། །འདི་ལས་སྐྱེས་པ་ཤ་སྟག་གོ་།ཐུབ་ཆེན་མངལ་ལ་འཚལ་བ་ཡི། །གནོད་སྦྱིན་སྲིན་པོ་འདི་ན་མཆིས། །རྒྱལ་པོ་རྣམས་ཀྱིས་མཐོང་མི་ནུས། །བསྟན་པར་ཡང་ནི་མི་ནུས་སོ། །གང་ལ་བུ་ནི་མི་འཆགས་དང ། །གང་གི་མངལ་ནི་མི་གནས་དང ། །སྐྱེས་པ་བུད་མེད་འདུ་བ་ནི། །དབང་པོ་རྣམས་ནི་མྱོས་པར་བགྱིད། །མེར་མེར་པོ་དང་ནུར་ནུར་པོ། །བུ་ཡི་ས་བོན་མ་རུང་བགྱིད། །གང་ཡང་མངལ་ནི་ཐུར་དུ་གྱུར། །ཤ་མ་མི་འབྱུང་གནོད་བགྱིད་པ། །དེ་རྣམས་ཀྱི་ནི་མིང་བརྗོད་ཀྱི། །འཇིག་རྟེན་ 536a ༄#། །མགོན་པོ་བདག་ལ་གསོན། །འཇམ་པ་པོ་དང་རི་དྭགས་རྒྱལ། །སྐེམ་བྱེད་བརྗེད་བྱེད་ཁུ་ཚུར་ཅན། །མ་མོ་དང་ནི་ཛ་མི་ཀ་།འདོད་པ་ཅན་དང་ནམ་གྲུ་དང། །སྲུལ་པོ་དང་ནི་མ་དགའ་བྱེད། །བྱ་དང་གཉའ་བའི་ལག་ཅན་དང ། །བཞིན་རྒྱན་དང་ནི་མིག་འཕྱང་བ། །དེ་དག་ཐམས་ཅད་ས་ལ་རྒྱུ། །གདོན་རྣམས་བཅོ་ལྔ་དེ་དག་ནི། །བྱིས་པ་རྣམས་ལ་འཇིགས་པར་བགྱིད། །ཇི་ལྟར་བྱིས་པ་འཛིན་པ་ཡིས། །མཚན་དང་གཟུགས་ཀྱང་བརྗོད་པར་བགྱི། །འཇམ་པ་པོས་ནི་ཟིན་གྱུར་ན། །མིག་ནི་རབ་ཏུ་འགྱུར་བར་བགྱིད། །རི་དྭགས་རྒྱལ་གྱིས་ཟིན་གྱུར་ན། །སྐྱུགས་པ་མི་བཟད་སྐྱུག་པར་འགྱུར། །སྐེམ་བྱེད་ཀྱིས་ནི་ཟིན་གྱུར་ན། །སྐེམ་བྱེད་པས་ནི་བྱིས་བ་འགུལ། ། བརྗེད་བྱེད་ཀྱིས་ནི་ཟིན་གྱུར་ན། །འགྲེ་ཞིང་དེ་ལྟར་སྒྲ་ཡང་འབྱིན། །དབུ་བ་དང་ནི་ཁ་ཆུ་འཛག་།ཁུ་ཚུར་ཅན་གྱིས་རབ་ཟིན་ན། །ཁུ་ཚུར་འཆང་ཞིང་འབྱེད་པར་བགྱིད། ། མ་མོ་ཡིས་ནི་ཟིན་གྱུར་ན། །རྒོད་ཅིང་དེ་བཞིན་སྒྲ་ཡང་འབྱིན། །ཛ་མི་ཀས་ནི་རབ་ཟིན་ན། །ནུ་ཞོ་ནུ་བར་མངོན་མི་དགའ། །འདོད་པ་ཅན་གྱིས་རབ་ཟིན་ན། །མལ་ན་གཉིད་ལོག་དུ་\?\་བར་འགྱུར། །ནམ་གྲུས་རབ་ཏུ་ཟིན་གྱུར་ན། །ལྕེ་ལ་སོས་ནི་འཆའ་བར་བགྱིད། །སྲུལ་པོས་རབ་ཏུ་ཟིན་གྱུར་ན། །ཀུ་ཅོ་འདོན་ཅིང་སྒྲ་ཡང་འབྱིན། །མ་དགའ་བྱེད་ 536b པས་ཟིན་གྱུར་ན། །རྣམ་པ་སྣ་ཚོགས་གཟུགས་སུ་འགྱུར། །བྱ་ཡིས་རབ་ཏུ་ཟིན་གྱུར་ན། །མནམ་པའི་དྲི་ནི་འབྱུང་བར་འགྱུར། །གཉའ་ལག་ཅན་གྱིས་ཟིན་གྱུར་ན། །མགུལ་པ་རབ་ཏུ་འགག་པར་འགྱུར། །བཞིན་རྒྱན་གྱིས་ནི་ཟིན་གྱུར་ན། །རིམས་ཀྱིས་བཏབ་ཅིང་འཁྲུ་བར་འགྱུར། །མིག་འཕྱང་བས་ནི་ཟིན་གྱུར་ན། །སྐྱིགས་བུ་དང་ནི་སྔམ་པ་འབྱུང ། །བྱིས་པ་ཇི་ལྟར་སྐྲག་བགྱིད་པ། །དེ་ཡི་གཟུགས་ནི་བརྗོད་པར་བགྱི། །འཇམ་པ་པོ་ནི་བ་ལང་གཟུགས། །རི་དགས་རྒྱལ་པོ་རི་དགས་འདྲ། །སྐེམ་བྱེད་པ་ནི་གཞོན་ནུའི་གཟུགས། ། བརྗེད་བྱེད་པ་ནི་ཝ་འདྲ་འོ། །ཁུ་ཚུར་ཅན་ནི་བྱ་རོག་གཟུགས། །མ་མོ་དེ་ནི་མི་ཡི་གཟུགས། །ཛ་མི་ཀ་ནི་རྟ་ཡི་གཟུགས། །འདོད་པ་ཅན་ནི་རྡོ་རྗེའི་གཟུགས། །ནམ་གྲུ་ཁྱི་ཡི་གཟུགས་ཀྱིས་ཏེ། །སྲུལ་པོ་ཕག་གི་གཟུགས་ཀྱིས་སོ། །མ་དགའ་བྱེད་པ་བྱི་ལའི་གཟུགས། །བྱ་ནི་འདབ་ཆགས་གཟུགས་ཀྱིས་སོ། །གཉའ་ལག་ཅན་ནི་བྱ་གག་གཟུགས། །བཞིན་རྒྱན་འུག་པའི་གཟུགས་སུ་ཏེ། །མིག་འཕྱང་བ་ནི་ཕ་ཝང་གཟུགས། །འདི་དག་བྱིས་པ་སྐྲག་པར་བགྱིད། །འདི་དག་བུ་འཕྲོག་མ་རུངས་པ། །བྱིས་པ་རྣམས་ལ་འཇིགས་བགྱིད་པ། ། མདོ་སྡེའི་ཞགས་པས་དྲངས་ནས་ནི། །འདི་དག་ཤིན་ཏུ་དགུག་པར་བགྱིད། །གནོད་སྦྱིན་སྡེ་དཔོན་ཆེན་པོ་ནི། །དྲི་ཟ་ཙནྡན་ཞེས་བགྱི་བ། །ཡི་གེ་ཕྱག་རྒྱ་དེ་སྩལ་དེ། །སོང་ལ་གདོན་ 537a ༄#། །ནི་དྲག་པོ་པ། །བཅོ་ལྔ་དེ་དག་ཁུག་ཅིག་ཅེས། །ཕོ་ཉར་ཡང་ནི་བཏང་བར་བགྱི། །དེ་དག་རྣམས་ནི་སྐད་ཅིག་གིས། །བཅིང་བ་ལྔ་ཡི་བཅིང་བཞིན་བཀུག་དེ་ནས་འཇིག་རྟེན་མགོན་པོ་ལ། །ཚངས་ཆེན་ཐལ་སྦྱར་འདི་སྐད་གསོལ། །སྲོག་ཆགས་ས་བོན་འཇིག་བགྱིད་པ། །འབྱུང་པོ་འདི་དག་རྣམས་ལྷགས་ཏེ། །མགོན་པོ་ཡི་ནི་སྤྱན་སྔ་རུ། །འདི་དག་ཆད་པས་བཤད་པར་བགྱིད། །བུད་མེད་གང་དག་བུ་མི་འཚལ། །གང་ཞིག་བཙས་པ་འཛིན་འཚལ་བས། །ཚེས་བརྒྱད་དང་ནི་བཅུ་བཞི་ལ། ། བསླབ་གཟུང་དམ་ཆོས་སྐྱབས་མཆིས་ལ། །མཆོད་རྟེན་ལེགས་པར་མཆོད་པར་བགྱི། །ཁྲུས་བགྱིས་ཤིན་ཏུ་བརྒྱན་ནས་\?\་ནི། །ས་གཞིར་ཡུངས་ཀར་གཏོར་ནས་སུ། །མེ་ཏོག་སྤོས་ཀྱིས་བརྒྱན་པར་བགྱི། །སྣ་ལྔའི་ཚོན་གྱི་སྐུད་པས་ནི། །ཁོར་ཡུག་ཏུ་ནི་བསྐོར་བར་བགྱི། །ནམ་ཕྱེད་བར་དུ་མཆིས་ནས་ནི། །སྤྱི་བོར་ཡུངས་ཀར་བཞག་ནས་སུ། །ཚངས་པས་རབ་ཏུ་བྱས་པ་ཏེ། །ཚངས་པས་སྤྲུལ་ཅེས་བརྗོད་པར་བགྱི། །ལོ་གྲངས་བཅུ་གཉིས་བར་དུ་ནི། །གཞོན་ནུ་རྣམས་ལ་ཕན་བགྱིད་པ། །ཚངས་པས་སྤྲུལ་པའི་མདོ་སྡེ་ཡི། །རིག་སྔགས་འདི་ལ་གང་གདང་\?\་བ། །རྫ་ཀ་ཡི་དོག་པ་བཞིན། །མགོ་བོ་ཚལ་པ་བདུན་དུ་འགས། །སྱཱད་ཡ་ཐེ་དན། ཨཾ་གེ་།བཾ་གེ་།བཾ་གི་ནི། བྷ་བ་ནེ། ཨི་ནནྡེ། 537b བི་ནནྡེ། ས་ལ་རི། གི་རི་གི་རི། ཤ་བ་རི། ག་རུ་ཎི། ཤ་རུ་ཎི། གི་རི། ག་བ་རེ། ལོ་ཙ་ནི། རོ་ཥ་ནི། ལ་ས་ནེ། རོ་ཙ་ནེ། ཨ་ལ་བྷེ། ཨ་ག་ནེ། ཨ་ལ་བྷེ། ཏ་ལ་བྷེ། པྲ་ཀཪྵ་ཎི་སཝཱ་ཧཱ། མངལ་ན་བདེ་བར་གནས་གྱུར་ཅིག་།དབང་པོ་ཡང་དག་འཕེལ་བར་ཤོག་།མངལ་ན་འདུག་པ་བདེར་གྱུར་ཅིག་།བཙས་པ་འཇིག་པར་མ་གྱུར་ཅིག་།མངལ་ན་བདེ་བར་གནས་གྱུར་ཅིག་།དུས་བཞིན་དུ་ནི་འབྱུང་བར་ཤོག་།ཚོན་སྐུད་སྣ་ཚོགས་རྣམས་དང་ནི། །ཡུངས་ཀར་འབྲུ་ནི་མ་གྲུགས་པ། །དེ་དག་བསྲུང་བར་གསུངས་པ་སྟེ། །བྱིས་པ་རིང་དུ་འཚོ་བར་ཤོག་།དེ་ནས་སྟོན་པ་ཀུན་མཁྱེན་གྱིས། །རིག་པའི་སྔགས་ནི་འདི་དག་གསུངས། །མངལ་ན་འདུག་པ་བསྲུང་བར་ཤོག་།བྱིས་པ་རྣམས་ནི་བདེར་གྱུར་ཅིག་།སྱཱད་ཡ་ཐེ་དན། བོ་དྷི་བོ་དྷི། མཧཱ་བོ་དྷི། བྷོ་དྷ་ཨ་ནུ་མ་ཏེ། ཕ་ལི་ནི། བ་ཧུ་ཕ་ལེ། ཤིཀྵ་ཤིཀྵ། སཱ་ར་བ་ཏེ། སཱེ་ར་བ་ཏེ། སཱ་ག་ལི། དུ་རཱ་ས་དེ། དུ་རཱ་ག་མེ། ཤཱུ་ར་པྲཔྟེ། ཤཱུ་ར་བ་ཏེ། བྷ་གེ། བྷ་གཱ་བྷ་གེ་།བྷཱ་གི་ནི་ནི་བཱ་ར་ཎི་སཝཱ་ཧཱ། དེ་ནས་གདོན་ནི་བཅོ་ལྔ་པོ། །རྟག་ཏུ་ཁྲག་ལ་འཐུང་རྣམས་ཀྱིས། །འཇིག་རྟེན་མགོན་ལ་ཕྱག་བཙལ་ཏེ། །ཐལ་མོ་སྦྱར་ནས་འདི་སྐད་གསོལ། །གྲོང་ངམ་ཁྱིམ་མམ་གྲོང་ཁྱེར་རམ། །གང་ན་ལེགས་པར་གསུངས་པ་ཡི། །མདོ་སྡེ་འདི་ནི་བཞུགས་པ་དེར། །བྱིས་པ་རྣམས་ནི་འཆི་མི་འགྱུར། །ཐུབ་ཆེན་ཁྱོད་ནི་ 538a ༄#། །ཇི་བཞིན་དུ། །རྗེས་སུ་མཐུན་པར་འཇུག་པར་བགྱི། །སངས་རྒྱས་བཅོམ་ལྡན་འདས་ལ་ཕྱག་འཚལ་ལོ། །ཚངས་པ་ལ་ཕྱག་འཚལ་ལོ། །གསང་ ་ཀྱི་ཚིག་རྣམས་གྲུབ་པར་གྱུར་ཅིག་།གྲུབ་པར་གྱུར་ཅིག་།རིག་སྔགས་ཀྱིས་སྒྲོལ་བར་གྱུར་ཅིག་།ཚངས་པས་བསམ་པར་གྱུར་ཅིག་སཝཱ་ཧཱ། དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་བླ་གོས་ཕྲག་པ་གཅིག་ཏུ་གཟར་ནས་ཐལ་མོ་སྦྱར་ཏེ་བཅོམ་ལྡན་འདས་ལ་ཕྱག་བཙལ་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས། ཉན་ཐོས་གང་ལ་ལ་སྟོང་ཆེན་པོ་རབ་ཏུ་འཇོམས་པའི་མདོ་སྡེ་འདི་འཛིན་ཏམ། འཆང་ངམ།་སྟོན་ཏམ། ཀློག་གམ། ཀུན་ཆུབ་པར་བགྱིད་པ་དེས་མང་དུ་ཐོས་པ་ལ་བརྩོན་པར་བགྱིའོ། ། མཆོད་རྟེན་མཆོད་པ་ལ་བརྩོན་པར་བགྱིའོ། །ཚེས་བརྒྱད་དང ། བཅུ་བཞི་དང ། བཅོ་ལྔའི་དུས་སུ་མཆོད་རྟེན་ལ་མཆོད་པ་རྒྱ་ཆེན་པོ་བགྱིས་ནས་རིག་སྔགས་བཀླག་པར་བགྱིའོ། །ཚེས་བརྒྱད་ཀྱི་ཚེ་ནི་རྒྱལ་པོ་ཆེན་པོ་བཞིའི་སྐྱེས་བུ་དག་རྒྱལ་པོ་ཆེན་པོ་རྣམས་ཀྱི་མདུན་ན་དེ་ལ་སེམས་པར་བགྱིད། མིང་ནས་ཀྱང་འདོན་པར་བགྱིད་དོ། །ཚེས་བཅུ་བཞིའི་ཚེ་ནི་རྒྱལ་པོ་ཆེན་པོ་བཞི་པོ་དག་ཉིད་མདུན་ན་སེམས་པར་བགྱིད། མིང་ནས་ཀྱང་འདོན་པར་བགྱིད་དོ། །ཚེས་བཅོ་ལྔའི་ཚེ་ནི་རྒྱལ་པོ་ཆེན་པོ་དག་ཉིད་སེམས་པར་བགྱིད་ 538b ཅིང་མིང་ནས་ཀྱང་གདོན་པར་བགྱིད་དེ། བཅོམ་ལྡན་འདས་ཀྱི་ཉན་ཐོས་གང་སྟོང་ཆེན་པོ་རབ་ཏུ་འཇོམས་པའི་མདོ་སྡེ་འདི་ལེན་པ་དང ། འཆང་བ་དང ། སྟོན་པ་དང ། ཀློག་པ་དང།་ཀུན་ཆུབ་པར་བགྱིད་པ་དེ་ནི་སྲོག་ཆགས་འབྱུང་པོ་ཐམས་ཅད་ལ་སྙིང་བརྩེ་ཞིང་ཕན་པར་བགྱིད་ལགས་སོ། །བཙུན་པ་བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞིས་ཀྱང་དེ་ལ་གོས་དང ། ཟས་དང ། མལ་ཆ་དང ། སྟན་དང ། ན་བའི་གསོས་སྨན་དང ། ཡོ་བྱད་རྣམས་ཀྱིས་མི་བྲེལ་བར་བགྱིའོ། །སེམས་ཅན་ཐམས་ཅད་ཀྱང་བསྟི་སྟང་བགྱིད་པར་འགྱུར་རོ། །རྒྱལ་པོ་དང ། བློན་པོ་དག་གིས་ཀྱང་བླ་མར་བགྱི་བ་དང ། རིམ་གྲོ་བགྱི་བ་དང ། མཆོད་པར་བགྱིད་པར་འགྱུར་རོ། །གཞན་མུ་སྟེགས་ཅན་དང ། དགེ་སྦྱོང་དང ། བྲམ་ཟེ་དང ། སྤྱོད་པ་ཅན་དང ། ཀུན་ཏུ་རྒྱུ་དང ། མཛའ་བ་དང ། མི་མཛའ་བ་དག་གི་ནང་དུ་མཆིས་ཀྱང་མཆོད་པར་འགྱུར་རོ། །རིགས་ཀྱི་བུའམ། རིགས་ཀྱི་བུ་མོ་དད་པ་དེས་གཙང་མར་བགྱིས་ཏེ། ལུས་གཙང་བ་དང ། གོས་དང ། རྒྱན་དང ། མལ་ཆ་དང ། སྟན་དང ། ཡོ་བྱད་ཁྱད་པར་ཅན་གཙང་མར་བགྱི། ཡུལ་ངན་པ་རྙེད་པར་མི་བགྱིད། ཡུལ་ངན་པའི་མཛའ་བོ་དང་བསྟེན་པར་མི་བགྱི། ཡུལ་ངན་པ་ན་གནས་པ་ལ་བསྔགས་པར་མི་བགྱིའོ། །གང་འབྱུང་པོའི་གདོན་གྱིས་ཟིན་པའི་མདུན་དུ་སྟོང་ 539a ༄#། །ཆེན་པོ་རབ་ཏུ་འཇོམས་པའི་མདོ་སྡེ་འདི་དྲན་པར་གྱུར་ན་དེ་ལ་རྒྱལ་པོ་ཆེན་པོ་བཞི་པོ་དག་ཉིད་སྲུང་བ་དང ། སྐྱོབ་པ་དང ། སྦེད་པར་བགྱིད་པར་འགྱུར་རོ། །བཙུན་པ་བཅོམ་ལྡན་འདས། དེ་ལྟར་ན་སྟོང་ཆེན་པོ་རབ་ཏུ་འཇོམས་པའི་མདོ་སྡེ་འདི་མཐུ་ཆེ་སྟེ། གང་གིས་རང་གི་ཁྱིམ་དུ་མཚན་གཅིག་གམ། ཉིན་གཅིག་ཀྱང་རུང་ཡང་དག་པར་བསམས་ན། དེ་ལ་ལོ་གཅིག་གི་བར་དུ་མི་མ་ལགས་པས་གླགས་རྙེད་པར་མི་འགྱུར་རོ། །འབྱུང་པོའི་ཚོགས་ཐམས་ཅད་ཀྱིས་ཕྱག་བགྱི་བའི་འོས་སུ་འགྱུར་བ་ལགས་སོ། །གང་སྟོང་ཆེན་པོ་རབ་ཏུ་འཇོམས་པའི་མདོ་སྡེ་འདི་འཆང་བ་དེ་འཚལ་ན། རྒྱལ་པོ་ཆེན་པོ་བཞིའང་བཞིན་སྟོན་པར་འགྱུར་ན། གནོད་སྦྱིན་དང ། སྲིན་པོ་དང ། ཕལ་པ་གཞན་ལྟ་སྨོས་ཀྱང་ཅི་འཚལ། དེ་ཅིའི་ཕྱིར་ཞེ་ན། སེམས་ཅན་རྣམས་ལ་སྨན་པའི་སླད་དུ་འཇིག་རྟེན་ལ་གང་སུ་དག་རིག་སྔགས་བགྱིད་པ་དེ་དག་པས་གསང་སྔགས་ཀྱིས་ཚིག་འདི་དག་རབ་མཆོག་།གཙོ་བོ། ཁྱད་པར་དུ་འཕགས་པ། དམ་པ། ཟབ་པ། རྒྱ་ཆེ་བ། ཚད་མ་མཆིས་པ། འཇུག་པར་དཀའ་བ། ཐུན་མོང་མ་ལགས་པའི་སླད་དུ་སྟེ།་འདི་ནི་ཆོས་ཀྱི་ཕྱག་རྒྱ་ལགས་སོ། །དེ་ནས་དབང་པོ་མིག་སྟོང་པོ། །ལྷ་ཡི་རྒྱལ་པོ་བདེ་སོགས་ཁྱོད། །ཐལ་མོ་སྦྱར་ཏེ་ཕྱག་བཙལ་ནས། །འཇིག་རྟེན་མགོན་ལ་འདི་སྐད་ 539b གསོལ། །འཇིག་རྟེན་ཀུན་ལ་ཕན་བགྱིད་པ། །རིག་སྔགས་འདི་ནི་ལེགས་པར་གསུངས། །གསང་སྔགས་སྨན་དང་ལྡན་པ་ཡི། །རིག་སྔགས་བདག་གི་བརྗོད་པར་བགྱི། །ཤིང་ཤ་མེ་ཏོག་ཨ་པ་མཱརྒ་དང ། །ཀ་ཏ་ཀྵ་ཡི་འབྲས་བུ་ཨ་ག་རུ། །རྡོ་དྲེག་དང་ནི་མི་དཱ་བཙོད་རྣམས་དང ། །སུ་ཀ་རཱི་དང་ཛཱ་ཡ་མརྒ་ཏི། །པ་རི་བེ་ལ་ས་ར་བཱི་རཱ་དང ། །སཱ་མ་ཀ་དང་པུསྤ་རྒྱ་སྤོས་དང ། །ཙནྡན་ཨ་བརྟ་ཀ་རུ་རྟ་དང ། །སྡེར་མོ་ལོ་མ་ཀ་ཊ་མཱ་ར་དང ། །པྲི་ཡང་ཀུ་དང་འབུ་གསུག་སྨིག་བཅུད་དང ། །ཡུངས་ཀར་དག་དང་ལྡོང་རོས་རྣམས་དང་ནི། །ཤིང་ཚ་ཤུ་དག་གུར་གུམ་ཤིང་ཀུན་དང ། །ལོ་མ་དག་དང་ལྡན་པའི་བརྣ་ཀཾ་།དེ་དག་སྦྱར་ཏེ་རེང་བུར་བགྱིས་པ་ནི། །གདོན་རྣམས་ཀུན་ལས་གྲོལ་བར་བགྱིད་པ་སྟེ། །འབྱུང་པོ་དག་ནི་ཀུན་གྱི་འགྱུར་བ་ལ། །མིག་ལ་དེ་ཡིས་བསྐུས་པ་བགྱིད་ན་ནི། །དེ་ནས་འབྱུང་པོ་རྡོ་རྗེ་དང ། །གནམ་ལྕགས་མདའ་ཡིས་ཟིན་ལས་ཐར། །ལྗོན་ཤིང་ཆེ་དང་དེ་བཞིན་དུ། །མཆོད་རྟེན་ཆེ་ལ་བསྐུས་བགྱིད་ན། །གང་གིས་གནས་དེ་མཐོང་བ་དེ། །འབྱུང་པོ་ལ་ནི་འཇིགས་མ་མཆིས། །དེར་ནི་འབྱུང་པོ་མི་གནས་ཏེ། །གནོད་བྱེད་གཞན་ཡང་མ་ལགས་སོ། །རྔ་ཆེན་དུང་དང་རྫ་རྔ་དང། །རྔ་བྲན་དག་ལའང་བསྐུས་ན་ནི། །དེ་དག་སྒྲ་ནི་གར་གྲགས་པར། །འབྱུང་པོའི་དཀྱིལ་འཁོར་སྐྲག་པར་འགྱུར། །གྲོང་དུ་རྒྱུ་བའི་བྱ་རྣམས་ཀྱི། །འདབ་མ་དག་ལ་བསྐུས་ན་ནི། ། 540a ༄#། །ཡུལ་དང་ཕྱོགས་ནི་གཞན་དག་ཏུ། །བྱ་དེ་གང་དུ་མཆིས་པ་དེར། །འབྱུང་པོ་རྣམས་ནི་མི་གནས་ཏེ། །གནོད་བྱེད་གཞན་ཡང་མ་ལགས་སོ། །ཆུ་མིག་མཚོ་དང་ལྟེང་ཀ་འམ། །གང་དང་གང་དུ་བོར་ཡང་རུང ། །དེ་ནི་དཔག་ཚད་ཁོར་ཡུག་ཏུ། །བདེ་བ་དང་ནི་ཞི་བར་འགྱུར། །ཕ་རོལ་དམག་ཚོགས་ནང་མཆིས་ཏེ། །མཚོན་ཆ་དག་ནི་འབབ་པ་ནི། །གནས་རྣམས་ཀུན་ཏུ་བྱུགས་བགྱིས་ན། །བདེ་བླག་དུ་ནི་ཐར་བར་འགྱུར། །ལྦ་བ་དང་ནི་གཞང་ནད་དང ། །མེ་དབལ་དང་ནི་འབྲས་བྱུང་དང ། །གདུག་པས་ཟིན་དང་དུག་འཐུངས་པས། །འཐུངས་སམ་བྱུགས་ན་ཐར་བར་འགྱུར། །ལུས་ལ་དེ་ཡིས་བྱུགས་ན་ནི། །བྱད་སྟེམས་ཐམས་ཅད་གཅོད་པར་བགྱི། །རྩོད་པ་རྣམས་ལས་ཐར་བར་འགྱུར། །རྒྱལ་པོའི་གྱོད་ལས་ཐར་བར་འགྱུར། །མ་གྲུབ་པ་ཡང་གྲུབ་པར་འགྱུར། །དབུལ་པོ་ལས་ནི་ཕྱུག་པོར་འགྱུར། །བུ་མ་མཆིས་པ་བུ་རྙེད་འགྱུར། །ནོར་མ་མཆིས་པ་ནོར་རྙེད་འགྱུར། །རིག་སྔགས་འཆང་གནས་བར་དུ་ཡང ། །འདིས་ནི་གསང་སྔགས་གྲུབ་པར་བགྱིད། །དུད་འགྲོའི་སྐྱེ་གནས་གྱུར་པ་དང ། །ལྗོན་ཤིང་རྣམས་ཀྱི་འབྲས་བུ་དང ། །རིག་སྔགས་འཆང་བ་ཐོབ་ལ་ཡང ། །འདི་ནི་ཞི་བའི་ལས་དགེ་བྱེད། །འདི་ལ་གསང་སྔགས་ཚིག་མཆིས་ཏེ། །དཔེར་ན་དབང་པོའི་ཚིག་བཞིན་ནོ། །སྱཱད་ 540b ཡ་ཐེད་ན། ཨ་ཀྲ་མེ། བི་ཀྲ་མེ། བྷུ་ཏ་གྷོ་ཥེ་བྷུ་ཏཾ་ག་མེ། ད་ཧ་ནི་དྷ་དྷ་རེ། དྷ་ར་བ་རེ། ད་དྷི་ནི། ནི་ཁུ་མེ། ཁུ་ཁུ་མེ། ཁ་ཁ་ཁ་ཁ། སཱ་རཾ་ག་མེ། ཙནྡྲེ། ཙ་པ་ལེ། ཧི་ལི་མེ། ཧ་ལེ། ཧཱ་རཱ་ཎི་སཝཱ་ཧཱ། ཕྱོགས་ཐམས་ཅད་ནས་བདག་གི་སྡིག་པ་ཐམས་ཅད་ཞི་བར་གྱུར་ཅིག་སཝཱ་ཧཱ། དེ་ནས་ཚངས་པ་དབང་པོ་དང ། །འཇིག་རྟེན་སྐྱོང་དང་དབང་ཕྱུག་ཆེ། །གནོད་སྦྱིན་སྡེ་དཔོན་ཐམས་ཅད་དང ། །འཕྲོག་མ་བུ་དང་བཅས་པ་ཡང ། །ཐལ་མོ་དག་ནི་རབ་སྦྱར་ནས། །སྒྲ་སྐད་གཅིག་ཏུ་འདི་སྐད་གསོལ། །ཉི་མ་སྟོང་ལྟར་གསལ་བ་པོ། །ཟླ་བ་ཉ་ལྟར་འོད་གསལ་བ། །ལྷ་མིར་བཅས་པའི་འཇིག་རྟེན་ན། །ཁྱོད་དང་འདྲ་བ་ཡོང་མ་མཆིས། །ལེགས་བསམ་ལེགས་པར་སྦྱར་ན་ནི། །གནོད་སྦྱིན་སྲིན་པོ་རྣམས་འཇོམས་པ། །རྒྱལ་སྲིད་ཐར་བགྱིད་ཅེས་བགྱི་བ། །རིག་སྔགས་རྒྱལ་སྲིད་རབ་སྦྱོར་བ། །སྟོང་ཆེན་གྱི་ནི་འཇིག་རྟེན་ན། །བསྲུང་བའི་མདོ་སྡེ་དམ་པ་ལགས། །ཕྱག་འཚལ་སྐྱེས་བུ་དཔའ་ཁྱོད་ལ། །ཕྱག་འཚལ་སྐྱེས་བུ་མཆོག་ཁྱོད་ལ། །ཐལ་མོ་སྦྱར་ཏེ་ཕྱག་བཙལ་ནས། །དེ་ཉིད་དུ་ནི་མི་སྣང་གྱུར། །དེ་ནས་བཅོམ་ལྡན་འདས་ནུབ་ཁའི་དུས་ཀྱི་ཚེ་ནང་དུ་ཡང་དག་འཇོག་ལས་བཞེངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།སྟོང་ཆེན་པོ་རབ་ཏུ་འཇོམས་པ་ཞེས་བྱ་བའི་མདོ་སྡེ་ལོངས་ཤིག་།ཆོངས་ཤིག་།ལྷོགས་ཤིག་།སྟོན་ཅིག་།ཀུན་ཆུབ་ 541a ༄#། །པར་གྱིས་ཤིག་།དེ་ལྷ་དང་བཅས་པའི་འཇིག་རྟེན་ལ་ཡུན་རིང་པོའི་དོན་དང ། ཕན་པ་དང ། བདེ་བ་དང ། བདེ་བ་ལ་རེག་པར་གནས་པར་འགྱུར་རོ། །དགེ་སློང་དག་།ངའི་དགེ་སློང་གང་ལ་ལ་ཞིག་གིས་སྟོང་ཆེན་པོ་རབ་ཏུ་འཇོམས་པའི་མདོ་སྡེ་འདིས་ཤིང་སྐམ་པོ་ལ་སྐུད་པས་བཅིངས་ན་དེ་ལ་ལོ་མ་དང ། མེ་ཏོག་དང ། འབྲས་བུ་རྣམས་སྐྱེ་བར་འགྱུར་ན། རྣམ་པར་ཤེས་པ་དང་བཅས་པའི་ལུས་ལ་ལྟ་སྨོས་ཀྱང་ཅི་དགོས་ཏེ། སྔོན་གྱི་ལས་ཀྱི་རྣམ་པར་སྨིན་པ་ནི་མ་གཏོགས་སོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་དགེ་སློང་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཀྱིས་མདོ་སྡེ་ཆེན་པོ་ལྔ་གསུངས་པ་དེ་དག་ནི། འདི་ལྟ་སྟེ། སྟོང་ཆེན་པོ་རབ་ཏུ་འཇོམས་པ་དང ། རྨ་བྱ་ཆེན་མོ་དང ། བསིལ་པའི་ཚལ་ཆེན་མོ་དང ། སོ་སོར་འབྲང་བ་ཆེན་མོ་དང ། གསང་སྔགས་ཀྱི་རྗེས་སུ་འབྲང་བ་ཆེན་མོ་ལགས་ཏེ། བཙུན་པ་བཅོམ་ལྡན་འདས་ཀྱིས་དེ་དག་ཟས་རྣམ་པ་ལྔ་ཡོངས་སུ་སྤོངས་ལ་ཆོངས་ཤིག་ཅེས་ཀྱང་བཀའ་སྩལ་ལ། ཟས་བསོད་སྙོམས་ལ་བརྟེན་ཏེ་རབ་ཏུ་བྱུང་ཞིག་ཅེས་ཀྱང་གསུངས་ན། བཅོམ་ལྡན་འདས་ཟས་རྣམ་པ་ལྔ་དང་མ་འདྲེས་པའི་བསོད་སྙོམས་ནི་ཉུང ། འདི་ལྟར་ཟས་རྣམ་པ་ལྔ་དང་འདྲེས་པ་དེ་ནི་མང་ལགས་ན། བཙུན་པ་བཅོམ་ལྡན་འདས། དེ་ལ་བདག་ 541b ཅག་གིས་ཇི་ལྟར་ནན་ཏན་དུ་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་དགེ་སློང་དེ་དག་ལ་འདི་སྐད་ཅེས་བཀའ་སྩལ་ཏོ། །དགེ་སློང་དག་།དེ་ཉིད་ཀྱི་ཕྱིར་སུ་སྟོང་ཆེན་པོ་རབ་ཏུ་འཇོམས་པའི་མདོ་སྡེ་འཆང་བ་དེས། རྨ་མེད་པའི་ནོར་བུའི་གཟུངས་ཞེས་བྱ་བ་དེ་བདག་ཉིད་བསྲུང་བར་བྱ་བའི་ཕྱིར་ཆོངས་ཤིག་།དེས་བསོད་སྙོམས་ལེན་པའི་ཚེ་ཟས་ལ་མི་མཐུན་པ་མེད་པའི་འདུ་ཤེས་བསྐྱེད་པར་བྱའོ། །ཟས་རྣམ་པ་ལྔ་དང་འདྲེས་པའི་བསོད་སྙོམས་ལའང་ཟས་རྣམ་པ་ལྔ་དང་མ་འདྲེས་པའི་འདུ་ཤེས་བསྐྱེད་པར་བྱ། འདུས་བྱས་ཐམས་ཅད་ལ་མི་རྟག་པའི་འདུ་ཤེས་དང ། མི་རྟག་པ་ལ་སྡུག་བསྔལ་བའི་འདུ་ཤེས་དང ། སྡུག་བསྔལ་བ་ལ་བདག་མེད་པའི་འདུ་ཤེས་བསྐྱེད་པར་བྱའོ། །ཟས་རྣམ་པ་ལྔ་པོ་དག་ག་ལ་ཡོད། ཟས་རྣམ་པ་ལྔ་པོ་སུའི་ཡིན། སུ་ཞིག་ཟས་རྣམ་པ་ལྔ་པོ་ཟ། སེམས་ཅན་དམིགས་སུ་མེད་དོ། །དེ་ལ་ཟས་རྣམ་པ་ལྔ་དང་འདྲེས་ན་ཚེས་བརྒྱད་དང ། བཅུ་བཞི་དང ། བཅོ་ལྔ་ལ་བདག་བསྲུང་བ་བྱས་ཏེ། རྒྱལ་རིགས་ཀྱི་བུ་མོ་ལེགས་པར་བཀྲུས་པ། ཤིན་ཏུ་བརྒྱན་པ། ཉིན་ཞག་གཅིག་ཟས་བཅད་པ་བསླབ་པའི་གནས་ལྔ་བཟུང་བ། སྐུད་པ་དམར་པོ་བཞི་སྒྲིལ་དུ་འཁལ་དུ་བཅུག་ལ་གསང་འཛིན་པའི་རིག་སྔགས་དྲན་པར་བྱས་ཏེ། སྐུད་པ་དེ་མདུད་པ་མདུད་ལ་སྐུད་པ་དེ་མཚོན་གསར་པ་བཅད་དེ་ 542a ༄#། །བསྲེགས་ལ་རིན་པོ་ཆེའི་སྣོད་དམ། ལྕགས་ཀྱི་སྣོད་ཀྱང་རུང་ཆུས་ཁོང་སྟེ། མེ་ཏོག་གིས་ཁྱབ་པར་ཁྲོམས་ལ་བདུག་པ་སྣ་ཚོགས་ཀྱིས་གདུགས་ཏེ། སྣོད་ཀྱི་ནང་ནས་སྐུད་པ་དེ་སླར་འབྱོར་ཏེ་མ་བྱུང་བར་དུ་རིག་སྔགས་འདི་བརྗོད་པར་བྱའོ། །དེའང་ལག་པ་ལ་བཅིངས་ལ་ཚིག་འདི་སྐད་བརྗོད་དོ། །བྲམ་ཟེ་རྣམས་ཀྱིས་བསླུས་ནས་སུ། །ཤཱཀྱ་སེང་གེ་སྐྱོབ་པ་ལ། །དཔལ་སྦས་ཀྱིས་ནི་དུག་ཅན་གྱི། །བསོད་སྙོམས་དག་ནི་ཕུལ་བ་དང ། །དེ་ལས་དེ་ནི་བླངས་ནས་སུ། །སྟོན་པས་དུག་ནི་བསད་ནས་གསོལ། །བདེན་པའི་ཚིག་ནི་འདི་ཡིས་སུ། །ཟས་ནི་བདུད་རྩིར་འགྱུར་བར་ཤོག་།རྣམ་པར་གཟིགས་པ་ལྷ་གང་དང ། །གཙུག་ཏོར་ཅན་དང་ཀུན་སྐྱོབ་དང ། །ལོག་པར་དད་པ་སེལ་བ་ལ། །སྟོབས་ཆེན་ལྷ་གང་དད་པ་དང ། །གསེར་དང་དཔལ་ལྡན་འོད་སྲུང་དང ། །ཤཱཀྱ་ཡི་ནི་སེང་གེ་ལ། །རབ་དད་ལྷ་ཡི་དབང་པོ་དང ། །ཚངས་དབང་སུམ་ཅུའི་དབང་ཕྱུག་དང ། །འཇིག་རྟེན་སྐྱོང་བ་བཞི་དག་དང ། །ནོར་བུ་བཟང་དང་དབང་ཕྱུག་ཆེ། །སྲིན་མོ་ནག་མོ་ཆེན་མོ་དང ། །དེ་བཞིན་གདོལ་མ་གཏུམ་མོ་དག་།མེ་ཏོག་དང་ནི་བདུག་པ་དང། །བདག་གི་སྦྱིན་སྲེག་འདི་བཞེས་ཤིག་།དེ་དག་ཚིམ་ཞིང་མཆོད་གྱུར་ནས། །བདག་གིས་ཁ་ཟས་བྱང་བར་མཛོད། །ཟས་ལྔ་དག་དང་འདྲེས་པ་ཡང ། །བདག་ལ་མ་འདྲེས་ 542b མཛད་དུ་གསོལ། །ཁ་ཟས་ལྔ་དང་འདྲེས་པ་ཡང ། །ཟས་དེ་ཀུན་ནི་བཟའ་བར་བགྱི། །ས་བོན་དག་གིས་ཚོགས་ཀུན་ལ། །ས་ཡི་བཅུད་ནི་ཞུགས་པ་ཡི། །ཁ་ཟས་འདྲེས་པ་ཐམས་ཅད་ཀྱང ། །བདག་ལ་མ་འདྲེས་མཛད་དུ་གསོལ། །ཇི་ལྟར་སྐུད་པ་བཅད་བསྲེགས་པ། །དེ་ལྟ་བུ་ཡང་སླར་འབྱོར་པ། །དེ་ལྟར་ཟས་རྣམས་འདྲེས་པ་ཡང ། །མ་འདྲེས་པར་ཡང་བདག་ལ་མཛོད། །སྱཱད་ཡ་ཐེ་ད་ན། ཁ་ཁ་མེ། ཁ་ཁ་ཁ་ཁ། ཁུ་ཁུ་མེ། ཤི་མེ་ཤི་མེ། ཤི་ཧུ་མེ། ཤི་མེ། ཤི་མེ། སཝ་སྟི་སཝ་སྟི་སཝ་སྟི་སཝ་སྟི། མ་མ་ཤཱནྟེ། ཤཱ་རཱ་གྲེ། ཁ་ཟས་ལྔ་དང་འདྲེས་པ་ཡང། །ཇི་ལྟར་མ་འདྲེས་ཟས་བཞིན་དུ། །གང་གིས་ཇི་ལྟར་སྐུད་བསྲེགས་པ། །དེ་འདྲའི་བདེན་པ་མཛད་དུ་གསོལ། །སྱཱད་ཡ་ཐེ་དན། ཀ་ལ་ཀ། ཀ་ལ་ལེ། བ་ལ་ནི། ཀ་རུ་ཏ། ཨཱ་ལ་ཡེ། མགྣེ་།སཾ་ཀྲཱ་མ་ཎ་\?\་སཝཱ་ཧཱ། སངས་རྒྱས་རྣམ་པར་གཟིགས་དང་གཙུག་ཏོར་ཅན། །བདེ་གཤེགས་ཀུན་སྐྱོབ་སངས་རྒྱས་ལོག་པར་དད་སེལ་དང ། །གསེར་ཐུབ་འོད་སྲུང་ཤཱཀྱ་ཐུབ་པ་གཽ་ཏ་མ་བསྙེངས་པ་མི་མངའ་བ་ལ་སྐྱབས་སུ་མཆི་བར་བགྱི། །མི་མཆོག་བདུན་པོ་དེ་དག་གི་ནི་སྐུ་རྣམས་ལ། །མེ་ཏོག་དག་དང་སྤོས་རྣམས་ཀྱིས་ནི་མཆོད་པར་བགྱི། །ལུས་དང་ངག་དང་རབ་\?\་ཏུ་དང་བའི་སེམས་ཀྱིས་ནི། །དེ་དག་རྣམས་ལ་སྐྱབས་སུ་ཉེ་བར་མཆི་བར་བགྱི། །སངས་རྒྱས་རྫུ་འཕྲུལ་ཆེ་དང་ལྡན་པ་དེ་དག་ལ། །ལྷ་གང་མངོན་པར་རབ་ཏུ་དང་བ་ཡོད་པ་ཡི། །ལྷ་ 543a ༄#། །དེ་མགུ་ཞིང་ཡིད་ནི་རབ་ཏུ་དགར་གྱུར་ནས། །རབ་ཏུ་དང་བའི་ཡིད་ཀྱིས་བདག་ལ་བསྲུང་དུ་གསོལ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།་དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྟོང་ཆེན་པོ་རབ་ཏུ་འཇོམས་པ་ཞེས་བྱ་བའི་མདོ་རྫོགས་སོ།། །། རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང ། ཛྙཱ་ན་སིདྡྷི་དང ། ཤཱཀྱ་པྲ་བྷ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ། །སླར་ཡང་ལོ་ཙཱ་བ་གཞོན་ནུ་དཔལ་གྱིས་ཆོས་རྗེ་ཆག་ལོའི་རྒྱ་དཔེ་དང་བསྟུན་ནས་ཞུས་དག་པར་བགྱིས་སོ།། །། |