།རྒྱ་གར་ 304a ༄#། །སྐད་དུ། ཨཱརྱ་ས་མནྟ་མུ་ཁ་པ་རི་བརྟན་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཀུན་ནས་སྒོའི་ལེའུ་ཞེས་བྱ་བ་ཐེག་པ་ཆེན་པོའི་མདོ། ། བམ་པོ་གཅིག་པ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཀྱི་ཕུང་པོའི་རི་ལ་དགེ་སློང་བརྒྱད་བརྒྱའི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་བཞི་ཁྲི་ཉིས་སྟོང་དང་ཐབས་ཅིག་ཏུ་བཞུགས་ཏེ། དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་ཞེས་བྱ་བ་བྱང་ཆུབ་སེམས་དཔའ་དགུ་ཁྲི་ཉིས་སྟོང་དང་ལྷན་ཅིག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཀུན་ཏུ་རྒྱས་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་སྤྱོད་པ་ཡོངས་སུ་དག་པ་དང་ལྡན་པ་ནས་འཇིག་རྟེན་གྱི་ཁམས་མི་མཇེད་འདིའི་བྱ་རྒོད་ཀྱི་ཕུང་པོའི་རི་ག་ལ་བ་དང ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་སོང་ངོ ། །བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་བྱང་ཆུབ་སེམས་དཔའི་ཚོགས་ཆེན་པོས་ཡོངས་ 304b སུ་བསྐོར་ཅིང་བྱང་ཆུབ་སེམས་དཔའི་ཚོགས་ཀྱི་མདུན་དུ་བདར་ནས་ནམ་མཁའ་ལས་འོང་བར་བཅོམ་ལྡན་འདས་ཀྱིས་གཟིགས་སོ། །གཟིགས་ནས་ཀྱང་བཅོམ་ལྡན་འདས་འདི་སྙམ་དུ་དགོངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོ་འདི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཀུན་ཏུ་རྒྱས་པས་ཀུན་ནས་སྒོའི་ལེའུའི་ཆོས་ཀྱི་རྣམ་གྲངས་འདི་ཡང་དག་པར་ཡོངས་སུ་གཟུང་བའི་ཕྱིར་འདིར་འོང་བར་གནང་སྟེ་བཏང་གི་།ངས་ཀྱང་བྱང་ཆུབ་སེམས་དཔའ་དག་བསྡུ་བར་བྱ་བར་ངེས་སོ། །སྙམ་དུ་དགོངས་སོ། །དེ་ནས་བཅོམ་ལྡན་འདས་ཀྱིས་དགོངས་པ་དེ་ལྟ་བུ་དགོངས་ནས་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ན་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་འཁོད་པ་དེ་དག་འཇིག་རྟེན་གྱི་ཁམས་མི་མཇེད་འདིའི་བྱ་རྒོད་ཀྱི་ཕུང་པོའི་རི་ག་ལ་བ་དང ། བཅོམ་ལྡན་འདས་ག་ལ་བ་དར་ལྷགས་སོ། །ལྷགས་ནས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་དོ། །བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་བྱ་རྒོད་ཀྱི་ཕུང་པོའི་རི་ལ་ནང་དུ་ཡང་དག་འཇོག་ལ་ཞུགས་པ་དེ་དག་ཐམས་ཅད་ཀྱང་འདུས་སོ། །དེ་ནས་བྱང་ཆུབ་སེམས་དཔའ་སེམས་ 305a ༄#། །དཔའ་ཆེན་པོ་དྲི་མ་མེད་པའི་སྙིང་པོ་རིན་པོ་ཆེ་སྣ་བདུན་ལས་བྱས་པའི་པདྨ་འདབ་མ་སྟོང་དང་ལྡན་པ་ཐོགས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ག་ལ་བ་དེར་སོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་པདྨ་འདབ་མ་སྟོང་དང་ལྡན་པ་དེ་ཕུལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་གྱི་ཁམས་སྤྱོད་པ་ཡོངས་སུ་དག་པ་དང་ལྡན་པ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཀུན་ཏུ་རྒྱས་པ། བཅོམ་ལྡན་འདས་ལ་སྙུན་གསོལ་ཏེ། གནོད་པ་ཆུང་ངམ། ཉམ་ང་བ་ཆུང་ངམ། བསྐྱོད་པ་ཡང་ངམ། འཚོའམ། སྟོབས་དང་བདེ་བར་རེག་པ་ལ་གནས་སམ། བཅོམ་ལྡན་འདས་ལ་སྙུན་མི་མངའ་འམ། གནོད་པ་ཆུང་ངམ་ཞེས་སྙུན་གསོལ་ཞིང་འདི་སྐད་ཅེས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཀུན་ནས་སྒོའི་ལེའུ་བསམ་གྱིས་མི་ཁྱབ་པ་ལ་འཇུག་པའི་ཆོས་ཀྱི་རྣམ་གྲངས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་སྟོན་ཏམ་ཞེས་ཀྱང་གསུང་ངོ ། །དེ་ 305b ནས་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོས་བཅོམ་ལྡན་འདས་ལ་རྣམ་པ་དེ་དག་གསོལ་ནས་བྱང་ཆུབ་སེམས་དཔའ་དེ་དག་དང་ལྷན་ཅིག་ཏུ་འཁོར་དང་བཅས་ཏེ་ནམ་མཁའ་ལ་སྐྱིལ་མོ་ཀྲུང་བཅས་ནས་འདུག་གོ་།ཡང་དེའི་ཚེ་ན་འཇམ་དཔལ་གཞོན་ནུར་གྱུར་པ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ་།དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་རྣམས་རྗེས་སུ་གཟུང་བའི་སླད་དུ་བཅོམ་ལྡན་འདས་དེ་བཞིན་གཤེགས་པས་ཀུན་ནས་སྒོའི་ལེའུ་བསམ་གྱིས་མི་ཁྱབ་པ་ལ་འཇུག་པའི་ཆོས་ཀྱི་རྣམ་གྲངས་ལེགས་པར་བཤད་དུ་གསོལ། བཅོམ་ལྡན་འདས། བདག་གིས་མངོན་པར་འཚལ་ཏེ།་འདས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་སྣང་བའི་སྒྲོན་མ་ལས་ཆོས་ཀྱི་རྣམ་གྲངས་འདི་ཐོས་ནས་ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞི་བསྐྱེད་པར་གྱུར། གཟུངས་སྒྲུབ་པའི་སྒོ་བྱེ་བ་ཁྲག་ཁྲིག་བརྒྱ་སྟོང་ཕྲག་བདུན་ཅུ་རྩ་བདུན་ཡང་རྟོགས་པར་གྱུར་ཏོ། །དེ་ 306a ༄#། །ལྟ་ལགས་པས་བཅོམ་ལྡན་འདས་ཀྱིས་ཀྱང་བྱང་ཆུབ་སེམས་དཔའ་རྣམས་རྗེས་སུ་གཟུང་བའི་སླད་དུ་ལེགས་པར་བཤད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །དེའི་ཕྱིར་འཇམ་དཔལ། ཁྱོད་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་བཤད་དོ། །འཇམ་དཔལ་གཞོན་ནུར་གྱུར་བས་བཅོམ་ལྡན་འདས། དེ་ལྟར་འཚལ་ལོ། །ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་གཟུགས་ཏིང་ངེ་འཛིན་དུ་རྟོགས་པར་བྱའོ། །སྒྲ་ཏིང་ངེ་འཛིན་དུ་རྟོགས་པར་བྱའོ། །དྲི་ཏིང་ངེ་འཛིན་དུ་རྟོགས་པར་བྱའོ། །རོ་ཏིང་ངེ་འཛིན་དུ་རྟོགས་པར་བྱའོ། །རེག་བྱ་ཏིང་ངེ་འཛིན་དུ་རྟོགས་པར་བྱའོ། །ཡིད་ཀྱི་ཁམས་ཏིང་ངེ་འཛིན་དུ་རྟོགས་པར་བྱའོ། །བུད་མེད་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །སྐྱེས་པའི་གཟུགས་ཏིང་ངེ་འཛིན་དུ་རྟོགས་པར་བྱའོ། །ཁྱེའུའི་གཟུགས་ཏིང་ངེ་འཛིན་དུ་རྟོགས་པར་བྱའོ། །བུ་མོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །ལྷའི་གཟུགས་ཏིང་ངེ་འཛིན་དུ་ 306b རྟོགས་པར་བྱའོ། །ཀླུའི་གཟུགས་ཏིང་ངེ་འཛིན་དུ་རྟོགས་པར་བྱའོ། །གནོད་སྦྱིན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །དྲི་ཟའི་གཟུགས་ཏིང་ངེ་འཛིན་དུ་རྟོགས་པར་བྱའོ། །ལྷ་མ་ཡིན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །ནམ་མཁའ་ལྡིང་གི་གཟུགས་ཏིང་ངེ་འཛིན་དུ་རྟོགས་པར་བྱའོ། །མི་འམ་ཅིའི་གཟུགས་ཏིང་ངེ་འཛིན་དུ་རྟོགས་པར་བྱའོ། །ལྟོ་འཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །སེམས་ཅན་དམྱལ་བའི་གཟུགས་ཏིང་ངེ་འཛིན་དུ་རྟོགས་པར་བྱའོ། །དུད་འགྲོའི་སྐྱེ་གནས་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །གཤིན་རྗེའི་འཇིག་རྟེན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འདོད་ཆགས་ཏིང་ངེ་འཛིན་དུ་རྟོགས་པར་བྱའོ། །ཞེ་སྡང་ཏིང་ངེ་འཛིན་དུ་རྟོགས་པར་བྱའོ། །གཏི་མུག་ཏིང་ངེ་འཛིན་དུ་རྟོགས་པར་བྱའོ། །དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །མི་དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །འདུས་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །འདུས་མ་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །དེ་ལྟར་ཆོས་ཐམས་ཅད་ཏིང་ངེ་འཛིན་དུ་རྟོགས་པར་བྱ་སྟེ། འཇམ་དཔལ། དེ་ལྟ་བུའི་ཏིང་ངེ་འཛིན་ཐམས་ཅད་དང་ལྡན་པའི་བྱང་ཆུབ་སེམས་དཔའ་སེམས་དཔའ་ 307a ༄#། །ཆེན་པོ་ནི། ཐམས་ཅད་དུ་འགྲོ་བའི་བློ་དང་ལྡན་པ་ཡིན་ལ། ཀུན་ནས་སྒོའི་ལེའུའི་ཆོས་ཀྱི་རྣམ་གྲངས་འདི་ཉིད་ལ་ཡང་བསླབ་པ་ཡིན་ནོ། ། འཇམ་དཔལ། དེ་ལ་ཇི་ལྟར་ན་བྱང་ཆུབ་སེམས་དཔས་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། གཟུགས་ནི། ལྦུ་བ་ལྟ་བུར་གསུངས། །དེ་ལ་སྙིང་པོ་མི་རྙེད་དོ། །སྙིང་པོ་མེད་ཕྱིར་གཟུང་མེད་ཕྱིར། །དེས་ནི་ཏིང་ངེ་འཛིན་ཞེས་བསྟན། །འཇམ་དཔལ། དེ་ལྟར་ན། གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་སྒྲ་ཏིང་ངེ་འཛིན་དུ་རྟོགས་པར་བྱ་ཞེ་ན། སྒྲ་ནི་བྲག་ཅ་ལྟ་བུ་སྟེ། །དེ་ལ་དངོས་པོ་ཡོད་མ་ཡིན། །ཐ་དད་དབྱེ་བ་མི་ཤེས་ཤིང ། མཚན་ཉིད་མེད་ཅིང་བྱེ་བྲག་མེད། །མཚན་ཉིད་མེད་ཅིང་བྱུང་བ་མེད། །ཡ་མ་བྲལ་དང་འདུས་མ་བྱས། །བྲག་ཅ་ལྟ་བུར་ཤེས་པས་ན། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ། དེ་ལྟར་ན། སྒྲ་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་དྲི་ཏིང་ངེ་འཛིན་དུ་རྟོགས་པར་བྱ་ཞེ་ན།་ཇི་ལྟར་རྒྱ་མཚོའི་གཏིང་དག་ནི། །ནམ་ཡང་ཅིས་ཀྱང་གང་མེད་ལྟར། །བསྐལ་པ་བྱེ་བར་བསྣམས་བྱས་ཀྱང ། །སྣ་ནི་ཚིམ་པར་འགྱུར་བ་མེད། །སྣ་ཡི་རྣམ་ 307b རིག་གཟུང་མེད་དེ། །སླུ་བའི་ཆོས་དེ་ཡོད་མ་ཡིན། །གལ་ཏེ་ཡང་དག་ཡིན་གྱུར་ན། །དེ་ལྟར་མྱུར་དུ་ཚིམ་པར་འགྱུར། །གཟུང་བ་མེད་ཅིང་ཡང་དག་མིན། །སྣ་ཡང་ཡོད་མིན་གསོག་ཏུ་ཤེས། །གསོབ་དང་སྟོང་པར་ཤེས་པས་ན། །དེས་ནི་ཏིང་ངེ་འཛིན་ཅེས་བསྟན། །འཇམ་དཔལ། དེ་ལྟར་ན། དྲི་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན། བྱང་ཆུབ་སེམས་དཔས་རོ་ཏིང་ངེ་འཛིན་དུ་རྟོགས་པར་བྱ་ཞེ་ན། ལྕེ་ནི་ཚ་དང་ཁ་བའང་མིན། །སྒྱུར་དང་ལན་ཚ་འང་མ་ཡིན་ཏེ། །ཇི་འདྲའི་རྐྱེན་དང་ལྡན་པ་ལས། །ལྕེ་ཡང་དེ་དང་འདྲ་བར་འགྱུར། རོ་འདི་རྒྱུ་ལས་བྱུང་བ་དང ། །རྐྱེན་ལ་རག་ལས་ཤེས་གྱུར་ཅིང ། །བསམ་གྱིས་མི་ཁྱབ་ཤེས་པས་ན། །དེས་ན་ཏིང་ངེ་འཛིན་ཅེས་བསྟན། །འཛམ་དཔལ། དེ་ལྟར་ན། རོ་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་རེག་བྱ་ཏིང་ངེ་འཛིན་དུ་རྟོགས་པར་བྱ་ཞེ་ན། རྣམ་རིག་ལས་བྱུང་རེག་བྱ་ནི། །ངོ་བོ་ཉིད་ཀྱིས་ཡོད་མ་ཡིན། །འཇམ་པ་དང་ནི་རྩུབ་པ་ཉིད། །རྐྱེན་རྣམས་ལས་ནི་བྱུང་བ་ཡིན། །རེག་བྱ་གནས་པ་མེད་པ་སྟེ། །བདག་མེད་ཉེ་བར་གནས་པ་ཡིན། །ཚོགས་རྣམས་སྦྱོར་བར་ཤེས་པས་ན། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ། དེ་ལྟར་ན། རེག་བྱ་ཏིང་ངེ་ 308a ༄#། །འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་ཡིད་ཀྱི་ཁམས་ཏིང་ངེ་འཛིན་དུ་རྟོགས་པར་བྱ་ཞེ་ན། གང་དག་སྟོང་གསུམ་སེམས་ཅན་རྣམས། །དེ་དག་གནས་གཅིག་གནས་གྱུར་ཏེ། །ཡིད་ཁམས་རྣམ་པར་ཤེས་བྱེད་ཀྱང ། །དེ་ཡི་དངོས་པོ་རྙེད་མི་འགྱུར། །བསགས་པ་དང་ནི་གོང་བུ་ཡང ། །རྣམ་པར་རིག་ལ་གནས་པ་མེད། །ཁ་དོག་སྣ་ཚོགས་རྣམས་སྟོན་ཀྱང ། །ཕྱི་དང་ནང་ན་གནས་མ་ཡིན། །གནས་པ་མེད་ཅིང་གནས་ཀྱང་མེད། །སྒྱུ་མ་ལྟ་བུར་དངོས་པོ་མེད། །མེད་ཅིང་ཡ་མ་བརླར་ཤེས་པས། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ། དེ་ལྟར་ན། ཡིད་ཀྱི་ཁམས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་བུད་མེད་ཀྱི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། འབྱུང་བ་ཆེན་པོ་བཞི་པོ་དག་།དེ་ལ་བུད་མེད་ཡོད་མིན་ཡང ། །བྱིས་པ་རྣམས་ནི་རྨོངས་པའི་བློས། །འདོད་པའི་གསོག་ལ་སྤྱོད་པར་བྱེད། །སྒྱུ་མའི་བུད་མེད་མཚན་མེད་ཀྱང ། །བུད་མེད་གཟུགས་སུ་སྣང་བ་ལ། །གང་དག་མུན་པས་བསྒྲིབས་པའི་མི། །དེ་དག་ཀུན་དུ་ཆགས་པ་བསྐྱེད། །ཇི་ལྟར་སྒྱུ་མའི་བུད་མེད་ལ། །འདོད་ཆགས་ལྡན་པའི་སེམས་ 308b སྐྱེད་ཀྱང ། །དེ་ལ་བུད་མེད་ཡོད་མ་ཡིན། །ཕྱིན་ཅི་ལོག་གི་སེམས་ཀྱིས་ནི། །བསྐལ་པ་བྱེ་བ་གྲངས་མེད་དུ། །བློ་གྲོས་ཆུང་རྣམས་འཁོར་བར་བྱེད། །དེ་ནས་དངོས་པོ་མེད་ཤེས་ན། ། བུད་མེད་ཐམས་ཅད་མཚན་ཉིད་མེད། །ཏིང་འཛིན་ཞི་བ་བརྗོད་པ་ནི། །བུད་མེད་གཟུགས་ཀྱིས་རབ་ཏུ་བསྟན། །འཇམ་དཔལ། དེ་ལྟར་ན། བུད་མེད་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔའ་སྐྱེས་པའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། འདི་ནི་བུད་མེད་བདག་སྐྱེས་པར། །ཇི་ལྟར་སྐྱེས་པས་བརྗོད་པ་ལས། །དེ་ཡི་ཚེ་ན་དེ་ཡི་སེམས། །འདོད་ཆགས་ལྡན་པ་རྫུན་པ་འབྱུང ། །སེམས་ནི་གཟུགས་མེད་གཟུང་བ་མེད། །བུད་མེད་སྐྱེས་པ་བསྟན་པ་མེད། །ཀུན་ཏུ་རྟོགས་པས་སྒྲོ་བཏགས་ནས། །སྐྱེས་པའི་འདུ་ཤེས་འབྱུང་བར་འགྱུར། །འདི་ནི་བུད་མེད་བདག་དཔའ་ཞེས། །འདུ་ཤེས་གང་གིས་རྣམ་བརྟགས་པ། །དེ་ངས་སྨིག་རྒྱུ་འདྲར་གསུངས་ཏེ། །དེ་ལ་སྐྱེས་པ་ཡོད་མ་ཡིན། །སྐྱེས་པ་ཉིད་ནི་རྫུན་པས་ན། །དེ་ནི་མེད་ལས་བྱུང་བ་ཡིན། །ཏིང་ངེ་འཛིན་ཞི་བ་བརྗོད་པ་ནི། །དཔའ་བོའི་གཟུགས་ཀྱིས་རབ་ཏུ་བསྟན། །འཇམ་དཔལ།་དེ་ལྟར་ན། སྐྱེས་བའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་ཁྱེའུའི་གཟུགས་ཏིང་ངེ་འཛིན་དུ་རྟོགས་ 309a ༄#། །པར་བྱ་ཞེ་ན། ལྗོན་པའི་མྱུ་གུ་ཡོད་མིན་ན། །མེ་ཏོག་འབྱུང་བར་ག་ལ་འགྱུར། །མེ་ཏོག་ཡོད་པ་མ་ཡིན་ན། །འབྲས་བུ་ཐོབ་པའང་མེད་པ། ལྟར། །བུད་མེད་ཡོད་པ་མ་ཡིན་པས། །ཁྱེའུ་ཡང་དམིགས་པར་མི་འགྱུར་ཏེ། །བརྟགས་པའི་དབང་དུ་སོང་རྣམས་ཀྱིས། །ཁྱེའུ་ཞེས་བྱ་བར་བརྟགས་པ་ཡིན། །བུད་མེད་སྐྱེས་པ་མེད་ཤེས་ན། །ཁྱེའུ་ཡང་འབྱུང་བ་ཡོད་མིན་ཏེ། །དངོས་པོ་ཐམས་ཅད་མེད་རྟོགས་པས། །དེས་ན་ཁྱེའུའི་ཏིང་འཛིན་བསྟན། །འཇམ་དཔལ། དེ་ལྟར་ཁྱེའུའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་བུ་མོའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ཇི་ལྟར་ཏ་ལའི་མགོ་བཅད་པ། །དེ་ནི་ནམ་ཡང་མི་སྐྱེ་སྟེ། །མཁས་པས་ཤེས་ནས་དེ་ལ་ནི། །འབྲས་བུ་ཐོབ་པར་འདོད་པ་མེད། །དེ་བཞིན་མཁས་པས་བུད་མེད་ཀྱང ། ། རྣམ་ཀུན་སྐྱེ་བ་མེད་ཤེས་པས། །བརྟན་པ་བུ་མོ་སྐྱེས་སོ་ཞེས། །ཕྱིན་ཆད་རྟོགས་པར་མི་བྱེད་དོ། །ས་བོན་བསྐམས་པར་གྱུར་པ་ལ། །རྣམ་ཀུན་སྐྱེ་བ་མེད་ཤེས་པས། ། ཏིང་འཛིན་ཞི་བ་བརྗོད་པ་ནི། །བུ་མོ་གཟུགས་ཀྱིས་རབ་ཏུ་བསྟན། །འཇམ་དཔལ། དེ་ལྟར་ན། བུ་མོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། 309b དེ་ལ་ཇི་ལྟར་ན། བྱང་ཆུབ་སེམས་དཔས་ལྷའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། རྣམ་རྟོག་དགེ་ལས་བྱུང་བ་ཡི། །ལས་དགེའི་འབྲས་བུ་ལྷ་རྣམས་ཏེ། །རབ་ཏུ་དང་བའི་ཡིད་ཀྱིས་ནི། །མཛེས་པའི་ལྷ་རྣམས་མངོན་པར་གྲུབ། །གཞལ་མེད་ཁང་པ་ཉམས་དགའ་བ། །དེ་དག་གཞན་སུས་བྱས་པ་མིན། །མེ་ཏོག་མནྡཱ་ར་བ་ཡང ། །དེ་དག་གཞན་སུས་བསྐྱེད་པ་མིན། །སྒྱུ་མའི་ལས་ལས་ཀུན་བྱུང་བས། །བྱུང་བ་རྣམས་ཀྱང་བསམ་དུ་མེད། །བཟང་པོར་སྣང་བའི་བཻ་ཌཱུརྱ། །ལོག་པས་གྲུབ་པ་རྣམས་ཀྱང་རྫུན། །ཡང་དག་མིན་པས་ཀུན་བསྐྱེད་པས། །ལྷ་རྣམས་རྫུན་པར་ཤེས་པས་ན། །ཏིང་འཛིན་ཞི་བ་བརྗོད་པ་ནི། །ལྷ་ཡི་གཟུགས་ཀྱིས་བསྟན་པ་ཡིན། །འཇམ་དཔལ། དེ་ལྟར་ན། ལྷའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་ཀླུའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། མི་བཟོད་བསྐྱེད་པ་བྱས་ནས་ནི། །ཡོད་མིན་སྤྲིན་གྱི་གཟུགས་བསྟན་ཅིང ། །ཆར་པའི་རྒྱུན་དག་རབ་འབེབས་པ། །དེ་དག་ནང་ན་མི་གནས་ཀྱང ། །འཇམ་བུའི་གླིང་འདིར་རྒྱ་མཚོ་དང ། །ཀླུ་དང་དུག་ཅན་ཡོངས་སུ་འགེངས། །སྔོན་གྱི་མཐའ་འམ་ཕྱི་མའི་མཐར། །ཆུ་ནི་འབྱུང་བ་ཡོད་མ་ཡིན། །དེ་དང་མཚུངས་པའི་སེམས་ཅན་ཀུན། །རྩོམ་ 310a ༄#། །པ་སྣ་ཚོགས་བསླབ་པ་རྣམས། །ལས་རྣམས་སྣ་ཚོགས་སྟོན་བྱེད་ཀྱང ། །ལས་དེ་འབྱུང་བ་ཡོད་མ་ཡིན། །མཁས་པས་བྱིས་པ་རྨོངས་བྱེད་པའི། །རྒྱུ་འདི་མ་བྱུང་ཤེས་པས་ན། །བདེན་པ་མ་ཡིན་བདེན་སྣང་བས། །ཀླུ་ནི་ཏིང་ངེ་འཛིན་དུ་བསྟན། །འཇམ་དཔལ། དེ་ལྟར་ན་ཀླུའི་གཟུགས་ཏིང་ངེ་འཛིན་དུ་རྟོགས་པར་བྱའོ། ། འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་གནོད་སྦྱིན་གྱི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། སེམས་ནི་རྣམ་པར་གྱུར་པ་ལས། །འཇིགས་པའི་གཟུགས་ནི་མངོན་གྲུབ་པ། །ལུས་ཀྱི་བོད་ཚད་ཆེ་བ་ཡང ། །སེམས་གཅིག་གིས་ནི་ཀུན་ཏུ་བསྐྱེད། །སེམས་ལ་འཇིགས་པ་ཡོད་མིན་ཏེ། །ཚོགས་པ་དག་ལས་འཇིགས་པ་སྐྱེ། །ཡོད་པ་མིན་པའི་ལས་རྣམས་ལས། །མི་སྡུག་རྣམ་པ་བསམ་ཡས་ལྟོས། །མི་སྡུག་རྣམ་པ་བསམ་ཡས་པ། །ཤིན་ཏུ་སྟོང་པར་ཤེས་པས་ན། །ཏིང་འཛིན་ཞི་བ་བརྗོད་པ་ནི། གནོད་སྦྱིན་གཟུགས་ཀྱིས་བསྟན་པ་ཡིན། །འཇམ་དཔལ། དེ་ལྟར་ན་གནོད་སྦྱིན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་དྲི་ཟའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ཆོས་དེ་ཤིན་ཏུ་འགྲོ་མེད་ཀྱང ། །འགྲོ་བའི་སྒྲ་ནི་བརྗོད་པས་ན། །འགྲོ་བས་འགྲོ་ 310b བ་མེད་ཤེས་པས། །དྲི་ཟས་ཏིང་འཛིན་བསྟན་པ་ཡིན། །འཇམ་དཔལ། དེ་ལྟར་ན་དྲི་ཟའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔའ་ལྷ་མ་ཡིན་གྱི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ཨ་ཡི་རྒྱས་བཏབ་ལྷ་མིན་ཏེ། །སྐྱེ་བ་མེད་ལས་ཡང་དག་བྱུང ། །འགག་མེད་འབྱུང་བ་ཡོད་མིན་པས། །ལྷ་མ་ཡིན་གྱིས་ཏིང་འཛིན་བསྟན། །འཇམ་དཔལ། དེ་ལྟར་ན་ལྷ་མ་ཡིན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་ནམ་མཁའ་ལྡིང་གི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། འཛིན་པ་མེད་ལ་འཛིན་བྱས་ནས། །བརྗོད་པས་མིང་དུ་བཏགས་པས་ན། །མིང་དང་གཟུགས་ནི་ཡོད་མིན་པས། །ནམ་མཁའ་ལྡིང་གིས་ཏིང་འཛིན་བསྟན། །འཇམ་དཔལ། དེ་ལྟར་ན་ནམ་མཁའ་ལྡིང་གི་གཟུགས་ཏིང་ངེ་འཛིན་དུ་རྟོགས་པར་བྱའོ། ། འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་མི་འམ་ཅིའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། བྱས་མིན་བྱས་པའི་ལས་རྣམས་ཀྱིས། །མི་འམ་ཅི་ཉིད་ཀུན་དུ་བསྐྱེད། །འདི་དག་སྐྱེ་བ་མེད་ཤེས་པས། །མི་འམ་ཅི་ཡིས་ཏིང་འཛིན་བསྟན། །འཇམ་དཔལ། །དེ་ལྟར་ན་མི་འམ་ཅིའི་གཟུགས་ཏིང་ངེ་འཛིན་དུ་རྟོགས་པར་བྱའོ། ། 311a ༄#། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དང་ས་ལྟོ་འཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། མིང་གང་གིས་ནི་ཆོས་འདི་དག་།འཇིག་རྟེན་དག་ཏུ་སྣ་ཚོགས་གཞག་།ཆོས་དེ་འདི་ལ་ཡོད་མ་ཡིན། །མེད་ལས་ཐམས་ཅད་ཀུན་ཏུ་བརྟགས། །ཀུན་དུ་བརྟགས་པས་ཀུན་ཤེས་ནས། །ངོ་བོ་ཉིད་ཀྱིས་ཀུན་རྟོག་མེད། །ཏིང་འཛིན་ཞི་བ་བརྗོད་པ་ནི། །ལྟོ་འཕྱེ་ཆེན་པོའི་གཟུགས་ཀྱིས་བསྟན། །འཇམ་དཔལ། དེ་ལྟར་ན། ལྟོ་འཕྱེ་ཆེན་པོའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ་དེ་ལ་ཇི་ལྟར་ན། བྱང་ཆུབ་སེམས་དཔས་སེམས་ཅན་དམྱལ་བའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། རྡུལ་དང་བྲལ་ཞིང་རྡུལ་མེད་གསོག་།དེ་ལ་བྱེད་པོ་འགའ་ཡང་མེད། །རང་གི་རྟོགས་པས་ཀུན་བསྐྱེད་དེ། །རྟོག་པ་དེ་ཡང་ཡོད་མ་ཡིན། །དམྱལ་པ་དྲི་མེད་དྲི་བྲལ་ཞིང ། །དག་དང་ཡང་དག་འོད་གསལ་དང ། །མཚན་ཉིད་མེད་ཅིང་མཚན་མེད་པར། །བྱང་ཆུབ་སྙིང་པོར་ངས་ཤེས་ཏེ། །མཚན་ཉིད་མེད་ཅིང་བྱུང་མེད་དོ། །ནམ་མཁའ་འདྲ་བར་ཤེས་པས་ན། །ཏིང་འཛིན་ཞི་བ་བརྗོད་པ་ནི། །སེམས་ཅན་དམྱལ་བའི་གཟུགས་ཀྱིས་བསྟན། །འཇམ་དཔལ། དེ་ལྟར་ན། སེམས་ 311b ཅན་དམྱལ་བའི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་དུད་འགྲོའི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། དཔེར་ན་ཇི་ལྟར་སྤྲིན་གྱི་གཟུགས། །ཁ་དོག་སྣ་ཚོགས་འབྱུང་བ་དང་།དེ་ལ་ཁ་དོག་ཡོད་མིན་ཡང ། །མི་མཁས་པ་དག་རྨོངས་པར་བྱེད། །དེ་བཞིན་སེམས་ཀྱང་མེད་པའི་ཕྱིར།། སྤྲིན་གྱི་གཟུགས་དང་མཚུངས་འདྲ་ཡང ། །དུད་འགྲོའི་སྐྱེ་གནས་རྣམས་སུ་ནི། །རྣམ་པ་སྣ་ཚོགས་ལུས་ཀྱང་སྟོན། །ལས་ནི་སྒྱུ་མའི་རང་བཞིན་དང ། །བྱུང་མེད་མཚན་ཉིད་མེད་པར་ཤེས། །ཏིང་འཛིན་ཞི་བ་བརྗོད་པ་ནི། །དུད་འགྲོའི་གཟུགས་ཀྱིས་བསྟན་པ་ཡིན། །འཇམ་དཔལ། དེ་ལྟར་ན། དུད་འགྲོའི་སྐྱེ་གནས་ཀྱི་གཟུགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་གཤིན་རྗེའི་འཇིག་རྟེན་གྱི་གཟུགས་ཏིང་ངེ་འཛིན་དུ་རྟོགས་པར་བྱ་ཞེ་ན། ནག་པོ་དང་ནི་དཀར་པོ་ཡི། །སྡིག་དང་ཁ་ན་མ་ཐོ་དང ། །ཁ་ན་མ་ཐོ་མེད་པའི་ལས། །རབ་འབྲིང་ཐ་མ་འདྲེས་བྱས་པས། །གཤིན་རྗེའི་འཇིག་རྟེན་སྡུག་བསྔལ་ཞིང ། །ཚོལ་བར་ཀུན་དུ་འཁོར་བ་ཡིན། །དེ་ལ་གཤིན་རྗེའི་འཇིག་རྟེན་མེད། །དེ་ནི་ངོ་བོ་ཉིད་ཀྱིས་སྟོང ། །རྨི་ལམ་ན་ནི་མྱོང་བ་བཞིན། །འཇུག་པ་མེད་ཅིང་གྲུབ་པ་མེད། །གཤིན་རྗེའི་འཇིག་རྟེན་ཡོད་མིན་ 312a ༄#། །པས། །དེས་ན་ཏིང་ངེ་འཛིན་དུ་བསྟན། །འཇམ་དཔལ། དེ་ལྟར་ན། གཤིན་རྗེ་འཇིག་རྟེན་གྱི་གཟུགས་ཏིང་ངེ་འཛིན་དུ་རྟོགས་པར་བྱའོ། ། འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་འདོད་ཆགས་ཏིང་ངེ་འཛིན་དུ་རྟོགས་པར་བྱ་ཞེ་ན། ཡོངས་སུ་རྟོགས་ལས་འདོད་ཆགས་འབྱུང ། །རྟོགས་པ་དེ་ཡང་འབྱུང་བ་མེད། །འབྱུང་བ་མེད་ལ་གནས་པ་མེད། །དེ་ཡི་གནས་ཀྱང་རྙེད་མི་འགྱུར། །གནས་མེད་གནས་པ་ཡོད་མིན་པས། །འདོད་ཆགས་ནམ་མཁའ་འདྲ་བ་ཡིན། །བྱིས་པ་བསླད་པར་གྱུར་རྣམས་ཀྱིས། །ཀུན་ནས་ཉོན་མོངས་ཡོངས་སུ་བརྟགས། །ཀུན་ནས་ཉོན་མོངས་མེད་ཆོས་དེ། །འདོད་ཆགས་ཞེས་བྱའི་མིང་གིས་བརྗོད། །ཕྱོགས་བཅུ་དག་ཏུ་བཙལ་བྱས་ཀྱང ། །དེ་ཡི་དངོས་པོ་རྙེད་མི་འགྱུར། །འདོད་ཆགས་དངོས་པོ་མེད་པ་ལ། །བྱིས་པ་རྨོངས་པ་འཇིགས་བྱེད་དེ། །འཇིགས་མེད་འཇིགས་པའི་འདུ་ཤེས་ཅན། །དེ་དག་ལ་ནི་བདེ་བ་མེད། །ཇི་ལྟར་སྐྱེས་བུ་ལ་ལ་དག་།མཁའ་ལ་འཇིགས་པར་འདུ་ཤེས་ནས། །སྐྲག་ཅིང་བདག་གིས་ནམ་མཁའ་ནི། །མི་མཐོང་བྱ་ཞེས་འབྲོས་བྱེད་ཀྱང ། །ནམ་མཁས་ཀུན་ཏུ་ཁྱབ་པས་ན། །སུ་ཡང་དེ་ལས་མི་ཐར་ཏེ། །བྱིས་པ་བསླད་པར་གྱུར་རྣམས་ཀྱིས། །ཕྱིན་ཅི་ལོག་ 312b ཏུ་རྣམ་པར་བརྟགས། །དེ་ལྟར་ཆོས་རྣམས་མཁའ་འདྲ་བར། །ཤེས་པའམ་གྱུར་བྱིས་པ་རྣམས། །དངོས་པོ་མེད་པའི་འདོད་ཆགས་ལ། །ཡོངས་སུ་སྤང་བར་མངོན་པར་འདོད། །འདོད་ཆགས་ནམ་མཁའ་འདྲ་བས་ན། །སུ་ཡང་དེ་ལས་འགྲོལ་བ་མེད། །གྲོལ་ཞིང་རྣམ་གྲོལ་ཕུན་སུམ་ཚོགས། །ཆོས་རྣམས་མྱ་ངན་འདས་དང་འདྲ། །སངས་རྒྱས་གང་དག་འདས་པ་དང ། །འདྲེན་པ་གང་དག་བཞུགས་པ་དང ། །གང་དག་འབྱུང་འགྱུར་རྫོགས་སངས་རྒྱས། །དེ་ཀུན་སྤྱོད་ཡུལ་འདོད་ཆགས་ཡིན། །འདོད་ཆགས་སྟོང་པར་ཤེས་གྱུར་ན། །ཆགས་པས་གྲོལ་བ་གང་ཡང་མེད། །གང་དག་ཆགས་ལ་འཇིགས་འདུ་ཤེས། །དེ་དག་ཆགས་ལས་གྲོལ་བྱང་སེམས། །ཅི་ཡང་མེད་པའི་མཐའ་འདི་ནི། །འདོད་ཆགས་མཐའ་སྟེ་འོད་གསལ་ཞིང ། །མཚན་མ་མེད་ལ་བརྟག་མཉམ་པར། །བྱང་ཆུབ་སྙིང་པོར་ང་ཡིས་མཐོང ། །དངོས་པོར་འདུ་ཤེས་སེམས་ཅན་གང ། །དེ་དག་འདོད་ཆགས་འབྲི་བར་འགྱུར། །ཡོད་པ་མིན་པ་ཡོངས་སུ་བརྟགས་པས། །དེ་དག་གིས་ནི་སྤོང་བ་བརྟགས། །བདག་གིས་འདོད་ཆགས་སྤང་བྱ་ཞེས། ། དེ་འདྲའི་འདུ་ཤེས་སྐྱེས་ནས་ནི། །དེ་ལ་སྤངས་ཞེས་བརྗོད་པར་བྱ། །འགྲོ་བ་འདི་དག་འདུ་ཤེས་ཙམ། འདོད་ཆགས་མཐའ་ནི་བསམ་ཡས་ཏེ། །མཐའ་དེ་འཇིག་པ་མེད་ 313a ༄#། །པས་ན།་ཡང་དག་མཐའ་དང་དེ་མཉམ་པས། །དེ་ལས་གྲོལ་བར་མ་རྟོགས་ཤིག་།གལ་ཏེ་ཆགས་ལས་གྲོལ་འགྱུར་ན། །སྟོང་པ་ཉིད་ལས་གྲོལ་བར་འགྱུར། འདོད་ཆགས་དང་ནི་སྟོང་པ་ཉིད། །དེ་གཉིས་གཉིས་སུ་ཡོད་མ་ཡིན། འདི་ལྟར་སྐྱེ་བ་མེད་པ་ལ། །དེ་དག་སྐྱེ་བར་རྣམ་བརྟགས་པས། །བྱིས་པ་གཉིས་སུ་ཤེས་རྣམས་ལ། །ངས་ནི་སྤོང་བ་རབ་ཏུ་བསྟན། །འདོད་ཆགས་དེ་ནི་སྐྱེ་མེད་ན། །འདོད་ཆགས་ཞེས་བྱའི་མིང་དུ་བརྗོད། །མིང་རྣམས་ཀུན་ཏུ་ཆགས་མེད་པས། །མིང་ལ་སུ་ཡང་ཆགས་པ་མེད། །འདོད་ཆགས་ཆགས་པ་མེད་ཤེས་ཤིང ། །མཐའ་ལས་འདས་པའི་སྟོང་མཐོང་ན། །འདོད་ཆགས་རྣམ་པར་གཞིག་པའི་ཕྱིར།། ཐར་པ་མཁས་པས་མི་མཐོང་ངོ ། །འདོད་ཆགས་སངས་རྒྱས་ཆོས་མཚུངས་ཤིང ། །མྱ་ངན་འདས་པ་འདྲར་ཤེས་ནས། །རྡུལ་དང་བྲལ་བའི་ཏིང་ངེ་འཛིན། །འདོད་ཆགས་སྒྲས་ནི་ངས་བསྟན་ཏོ། །ཞི་པའི་དབྱིངས་ལ་བརྟེན་པ་ཡིན། །འདོད་ཆགས་རབ་ཏུ་ཞི་ཤེས་ནས། །མཁས་པ་རྣམས་ལ་ང་ཡིས་ནི། །ཏིང་འཛིན་འདོད་ཆགས་སྒྲར་བསྟན་ཏོ། །འཇམ་དཔལ། དེ་ལྟར་ན། བྱང་ཆུབ་སེམས་དཔས་འདོད་ཆགས་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་ 313b སེམས་དཔས་ཞེ་སྡང་ཏིང་ངེ་འཛིན་དུ་རྟོགས་པར་བྱ་ཞེ་ན། སྤོང་ལས་ཞེ་སྡང་ཀུན་ཏུ་འབྱུང ། །ཉོན་མོངས་པ་ཡང་རྐྱེན་པས་སྐྱེས། །བདག་མེད་པ་ལས་བྱུང་བའི་བདག་།མང་པོའི་ཚོགས་ལས་སྐྱེས་པ་ཡིན། །རྩུབ་པོའི་སྒྲ་ལས་ཞེ་སྡང་ནི། །དུག་རྣོན་ལྟ་བུ་ཀུན་ཏུ་འབྱུང ། །སྒྲ་ནི་ང་རོའི་རང་བཞིན་པས། །ཤིན་ཏུ་ཡོད་པ་མ་ཡིན་ནོ། །ཇི་ལྟར་ཚོགས་པས་གཙུབ་ཤིང་དང ། །གཙུབ་སྟན་ལས་ནི་མེ་འབྱུང་སྟེ། །ཚོགས་དང་བྲལ་བར་གྱུར་ན་ནི། །དེ་ན་མེ་ཡང་ཡོད་མིན་ལྟར། །དེ་བཞིན་ཡོད་དུ་མི་འོང་བའི། །སྒྲ་ལས་ཞེ་སྡང་གསོག་འབྱུང་ཞིང ། །གསོག་གི་སྒྲ་ལ་ཡོངས་བརྟགས་ན། །དེ་ལས་ཞེ་སྡང་རྙེད་མི་འགྱུར། །ཞེ་སྡང་སྒྲ་ལས་མ་བྱུང་ཞིང ། །ནང་ན་གནས་པའང་མ་ཡིན་ལ། །ཞེ་སྡང་ཕྱི་རོལ་ནས་འོངས་ཏེ། །བྱུང་བ་མེད་པས་གསོག་ཡིན་ནོ། །རྒྱུ་རྣམས་ཕན་ཚུན་འདུས་པ་ལས། །ཞེ་སྡང་ཀུན་ཏུ་འབྱུང་བ་ཡིན། །ཕན་ཚུན་བྲལ་བར་གྱུར་ན་ནི། །དེ་ལ་ཞེ་སྡང་རྙེད་མི་འགྱུར། །ཇི་ལྟར་ཞོ་དང་འོ་མ་ལ། །སྐྱེས་བུས་བརྩལ་ཏེ་སྲུབ་ཤིང་གིས། །བསྲུབས་པ་བྱས་པས་རྐྱེན་རྣམས་ལས། །མར་ནི་ཀུན་ཏུ་འབྱུང་བ་ལྟར། །དེ་བཞིན་ཡིད་དུ་མི་འཐད་པའི། །སྒྲ་ལས་ཞེ་སྡང་གསོག་འབྱུང་ཞིང ། །ཡོངས་སུ་བརྟགས་པས་དེའི་གནས་ལ། །མི་མཁས་པ་དག་རབ་ཏུ་འབར། །ཀུན་ཏུ་བརྟགས་པས་ཞེ་སྡང་ 314a ༄#། །ནི། །ཤིན་ཏུ་དངོས་མེད་ཤེས་པས་ན། །ཏིང་འཛིན་ཞི་བ་བརྗོད་པ་ནི། །ཞེ་སྡང་སྒྲ་ཡིས་རབ་ཏུ་བསྟན། །ཞེ་སྡང་ཡང་དག་མཐའ་དང་མཉམ། །དེ་བཞིན་ཉིད་ལ་བསྟན་པ་ཡིན། །ཆོས་ཀྱི་དབྱིངས་དང་འདྲར་ཤེས་པས། །དེས་ན་ཏིང་ངེ་འཛིན་ཅེས་བསྟན། །འཇམ་དཔལ། དེ་ལྟར་ན། ཞེ་སྡང་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་གཏི་མུག་ཏིང་ངེ་འཛིན་དུ་རྟོགས་པར་བྱ་ཞེ་ན། མ་རིག་པ་ལས་གཏི་མུག་བྱུང ། །མ་རིག་པ་ཡང་ཡོད་མ་ཡིན། །གང་ན་གཏི་མུག་ཡོད་མིན་པ། །དེ་ན་ཡང་རྨོངས་པ་མེད། །རྨོངས་མེད་སེམས་ཅན་རྨོངས་གྱུར་ཅིང ། །ཆགས་མེད་ཆགས་པར་འདུ་ཤེས་པ། །ཇི་ལྟར་བྱིས་པས་ནམ་མཁལ་ལ། །མདུད་པ་བོར་བ་གསོག་བཞིན་ནོ། །ཡོད་པ་མ་ཡིན་ཆོས་རྣམས་ལ། །ཀུན་ནས་ཉོན་མོངས་རྣམས་བརྟགས་པ། །བྱིས་པ་རྣམས་ཀྱི་འདི་མཚར་ཏེ། །མཆོག་ཏུ་ཤིན་ཏུ་བྱ་བར་དཀའ། །ཇི་ལྟར་སྐྱེས་བུ་ལ་ལ་ཞིག་།ནམ་མཁའ་ལ་ནི་འཇལ་བྱེད་ཅིང ། །བསྐལ་པ་བྱེ་བར་གཞལ་བྱས་ཀྱང ། །དེ་ལ་ཕུང་པོ་མི་རྙེད་ལྟར། །དེ་བཞིན་རྨོངས་པས་བྱིས་པ་ཡི། །སྔོན་གྱི་མཐའ་ནི་བསམ་མི་ཁྱབ། །གཏི་མགུ་ཕུང་པོར་འབྱུང་མེད་དེ། ། 314b དེས་ནི་ཅི་ཡང་བཀང་བ་མེད། །ཇི་ལྟར་ནམ་མཁའ་གཞལ་བྱས་ཀྱང ། །དེ་ལ་སྔོན་གྱི་མཐའ་མེད་ཅིང ། །དེ་ནས་ཅི་ཡང་བཀང་བ་མེད། །གཞལ་བ་ནུས་པ་མེད་པ་ལྟར། །དེ་བཞིན་བསྐལ་པ་སྟོང་རྣམས་སུ། །ཀུན་ཏུ་རྨོངས་པས་དགང་བྱད་ཀྱང ། །དེ་ལ་བཀང་བ་ཅི་ཡང་མེད། །ངོམས་པའང་ཉུང་ཟད་ཡོད་མ་ཡིན། །ཇི་ལྟར་སྐྱེས་བུ་ལ་ལ་ཡིས། །སྤུད་པ་སྟོང་པ་བུད་བྱས་ཤིང ། །བཞག་ནས་སྦུད་པ་རྙོངས་པ་ན། །དེ་ཡི་ནང་ན་རྙེད་མིན་ལྟར། །དེ་བཞིན་འདོད་པ་སྦུད་འདྲ་བ། །ཀུན་ཏུ་རྨོངས་པས་སྤྱོད་པར་བྱེད། །དེ་ནི་ངོམས་པར་མི་འགྱུར་ཏེ། ། ཕྱིར་ཞིང་འདོད་པ་ཚོལ་བར་བྱེད། །གཏི་མགུ་ཡོད་པ་མིན་ཞེས་བརྗོད། །རྩ་བ་ཆད་ཅིང་དངོས་པོ་མེད། །རྩ་བ་མེད་ཅིང་གནས་ཀྱང་མེད། །དེས་ན་གཏི་མུག་ཟད་པ་མེད། །འདི་ལྟར་གཏི་མུག་མི་ཟད་པས། །དེ་ཡི་མཐའ་མ་རྙེད་མི་འགྱུར། །དེ་ཕྱིར་སེམས་ཅན་ཐམས་ཅད་ལ། །ཟད་པར་བྱ་བར་ངས་མི་ནུས། །གལ་ཏེ་དཔེ་ཙམ་བརྗོད་བྱ་ན། །བསྐལ་པ་བྱེད་བ་བསམ་ཡས་སུ། །ང་ཡི་ཚེ་ནི་གནས་གྱུར་ལ། །ཉིན་གཅིག་བཞིན་དུ་ཉིན་རེ་ལ། །སྟོང་གསུམ་སེམས་ཅན་ཇི་སྙེད་པ། །ཐམས་ཅད་མྱ་ངན་བཟླས་བྱས་ཤིང ། །ཐམས་ཅད་དེ་ལྟར་བྱས་ཀྱང་ནི། སེམས་ཅན་ཁམས་ལ་ཟད་པ་མེད། །གཏི་མུག་གིས་ནི་བསྐྱེད་པའི་ཁམས། །སེམས་ཅན་ཁམས་ལ་མཚན་ཉིད་མེད། །གཏི་མུག་དེ་ནི་སྒྱུ་མ་འདྲ། ། 315a ༄#། །དེས་ན་དེ་ཡི་མཐའ་མི་རྙེད། །སངས་རྒྱས་གཏི་མུག་མཉམ་པས་ན། །དེ་དག་གཉིས་སུ་མེད་པར་བསྟན། །རྨོངས་གྱུར་གྱིས་པ་དེ་དག་གིས། ། འདིར་ནི་སངས་རྒྱས་རྣམ་པར་བརྟགས། །ཐམས་ཅད་མཁྱེན་ཉིད་གཏི་མུག་མཉམ། །གཏི་མུག་ཐམས་ཅད་ཡོད་མ་ཡིན། །གཏི་མུག་སེམས་ཅན་ཀུན་དང་མཉམ། ། སེམས་ཅན་ཀུན་ཀྱང་བསམ་མི་ཁྱབ། །བསམ་མི་ཁྱབ་དང་གཏི་མུག་ནི། །སེམས་བསྐྱེད་པ་ཡིས་རྣམ་པར་བརྟགས། །སེམས་ཀུན་བསམ་གྱིས་མི་ཁྱབ་སྟེ། །དེ་ཡི་ཚད་ནི་ཡོད་མ་ཡིན། །གཏི་མུག་དེ་ལ་ཚད་མེད་པས། །དེ་ཡི་འབྱུང་བ་རྙེད་མི་འགྱུར། །འབྱུང་བ་ཡོད་པ་མ་ཡིན་ནོ། །སྐྱེ་བ་ཡོད་པར་ག་ལ་འགྱུར། །གཏི་མུག་སྐྱེས་པ་མ་ཡིན་ན། །དེ་ཡི་རྨོངས་བྱེད་ཅི་འདྲ་ཞིག་།དེ་ཡི་རྨོངས་བྱེད་ཅི་འདྲ་བ། །སངས་རྒྱས་ཀུན་ཀྱང་དེ་དང་འདྲ། །ཐ་དད་དབྱེ་བ་མེད་ཤེས་ན། །ཆོས་རྣམས་ཐམས་ཅད་གཉིས་སུ་མེད། །ཏིང་འཛིན་ཞི་བ་བརྗོད་པ་ནི། །གཏི་མུག་སྒྲ་ཡིས་རབ་ཏུ་བསྟན། །གང་ཚེ་ང་ཡིས་མཉམ་ཉིད་ཤེས། །དེ་ནི་དེ་དང་གཏི་མུག་མཉམ། །དེ་དག་ཐམས་ཅད་མཉམ་ཤེས་ནས། །ཏིང་འཛིན་དེ་ལྟར་ཤེས་པར་གྱིས། །འཇམ་དཔལ། དེ་ལྟར་ན། གཏི་མུག་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ ། 315b དེ་ལ་ཇི་ལྟར་ན། བྱང་ཆུབ་སེམས་དཔས་མི་དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱ་ཞེ་ན། འདོད་ཆགས་སྤྱོད་པའི་རྟགས་གང་དང ། །ཞེ་སྡང་སྤྱོད་པའི་གཡོ་བ་དང ། །གཏི་མུག་སྤྱོད་པ་གང་ཡིན་པ། །ཐམས་ཅད་ཏིང་འཛིན་ཤེས་པར་གྱིས། །ཉོན་མོངས་ཀུན་གྱི་སྒྲུབ་པ་ནི། །ཏིང་འཛིན་ཡིན་པར་མོས་པར་གྱིས། །རྫུན་དང་ཡང་དག་མ་ཡིན་པར། །ཐམས་ཅད་དེ་བཞིན་སྒོམ་པར་གྱིས། །འཇམ་དཔལ། དེ་ལྟར་ན། མི་དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱ་ཞེ་ན། སེམས་ཅན་རྣམས་ཀྱི་ཇི་སྙེད་དགེ་།སེམས་དང་སྤྱོད་པ་ཅི་འདྲ་བ། ། སྤྱོད་པ་ཐམས་ཅད་སྤྱོད་གཅིག་སྟེ། །དེ་ལྟར་ཏིང་འཛིན་ཤེས་པར་གྱིས། །སེམས་ཅན་ཀུན་གྱི་སྤྱོད་པ་དག་།སྒྲུབ་པ་གཅིག་ཏུ་ཤེས་པས་ན། །ཏིང་འཛིན་ཞི་བ་བརྗོད་པ་ནི། །ཀུན་གྱི་སྒྲ་ཡིས་བསྟན་པ་ཡིན། །འཇམ་དཔལ། དེ་ལྟར་ན། དགེ་བ་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །འཇམ་དཔལ། དེ་ལ་ཇི་ལྟར་ན ། བྱང་ཆུབ་སེམས་དཔས་འདུས་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱ་ཞེ་ན། འདུ་བྱེད་ཐམས་ཅད་འདུ་བྱེད་མིན། །དེ་དག་བགྲང་བས་གཞལ་བྱས་ན། ། 316a ༄#། །གཞལ་དུ་མེད་ཅིང་དཔག་ཏུ་མེད། །དེ་ལྟར་ཏིང་འཛིན་ཤེས་པར་གྱིས། །དཔག་ཏུ་མེད་པར་ཤེས་ན་ནི། །ལུས་མེད་དངོས་པོ་ཡོད་མིན་པས། །ཏིང་འཛིན་ཞི་བ་བརྗོད་པ་ནི། །འདུ་བྱེད་ཀུན་གྱིས་བསྟན་པ་ཡིན། །འཇམ་དཔལ། དེ་ལྟར་ན། འདུས་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། ། འཇམ་དཔལ། དེ་ལ་ཇི་ལྟར་ན། བྱང་ཆུབ་སེམས་དཔས་འདུས་མ་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱ་ཞེ་ན། ཆོས་འདི་རང་བཞིན་ཞི་བས་ན། །དེ་ལ་གྲངས་ནི་ཡོད་མ་ཡིན། །མ་རིག་པ་ཡིས་བསྒྲུབ་ཞི་བ། །ཏིང་ངེ་འཛིན་གྱིས་བསྒྲུབ་པར་བསྟན། །འདུས་བྱས་ཀུན་ལ་བརྗོད་མེད་ཅིང ། །སྒྲུབ་པ་མེད་པ་ཤེས་ནས་ནི། །སེམས་ཅན་གང་དག་བརྗོད་ལ་ཆགས། །དེ་དག་རྣམས་ལ་དེ་ལྟར་བསྟན། །འཇམ་དཔལ། དེ་ལྟར་ན། འདུས་མ་བྱས་ཐམས་ཅད་ཏིང་ངེ་འཛིན་དུ་རྟོགས་པར་བྱའོ། །ཚིགས་སུ་བཅད་པ་མངོན་པར་སྒྲུབ་པའི་སྒྲ་བསམ་གྱིས་མི་ཁྱབ་པ་བསྟན་པ་འདི་བཤད་པ་ན། བྱང་ཆུབ་སེམས་དཔའ་དགུ་ཁྲི་ཉིས་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་བོ། ། ལྷ་བྱེ་བ་ཁྲག་ཁྲིག་བརྒྱ་སྟོང་ཕྲག་བདུན་ཅུ་རྩ་གཉིས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་སློང་སུམ་ཁྲི་དྲུག་སྟོང་ནི། ལེན་པ་ 316b མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་མ་དྲུག་སྟོང་ཉིས་བ་རྒྱས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་བསྙེན་ས་ཡ་བརྒྱད་འབུམ་གྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དགེ་བསྙེན་མ་ས་ཡ་ཕྲག་བཞི་དང་ཉིས་འབུམ་གྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་དབང་པོ་རྣོན་པོ་གང་དག་འབྱུང་བ་དེ་དག་གིས་ཏིང་ངེ་འཛིན་རྣམས་ཀྱི་མིང་ཐོས་ན། ཆོས་ཐམས་ཅད་ལ་སྣང་བ་ཐོབ་པར་འགྱུར་བ་དང ། བདུད་ཀྱི་རིས་ཀྱི་ལྷའི་བུ་ཐམས་ཅད་དང ། གང་ཟག་དམིགས་པའི་ལྟ་བ་ཅན་རྣམས་ཀྱིས་ཐུལ་བར་དཀའ་བ་དང ། ཡི་གེ་གཅིག་གིས་ཡི་གེ་ཐམས་ཅད་རྟོགས་པར་འགྱུར་བ་དང ། ཡི་གེ་ཐམས་ཅད་ཀྱིས་ཡི་གེ་གཅིག་རྟོགས་པར་འགྱུར་པ་དང ། ཐོགས་པ་མ་མཆིས་པའི་སྤོབས་པས་སེམས་ཅན་ཐམས་ཅད་ལ་ཆོས་སྟོན་པ་ལ་མཁས་པར་འགྱུར་བ་དང ། ཆོས་ཟབ་མོ་ལ་བཟོད་པར་འགྱུར་བ་དང ། སྤྱོད་པ་ཐམས་ཅད་ལ་མཚན་ཉིད་གཅིག་ཏུ་རྟོགས་ཤིང་སོ་སོ་ཡང་དག་པར་རིག་པ་བཞིས་མུན་པ་མ་མཆིས་པ་ཐོབ་པར་ 317a ༄#། །འགྱུར་བའི་ཏིང་ངེ་འཛིན་རྣམས་ཀྱི་མིང་བཅོམ་ལྡན་འདས་ཀྱིས་བསྟན་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་བཤད་དོ། །འཇམ་དཔལ་གཞོན་ནུར་གྱུར་པས་བཅོམ་ལྡན་འདས། དེ་བཞིན་ནོ། །ཞེས་གསོལ་ཏེ་བཅོམ་ལྡན་འདས་ཀྱི་ལྟར་མཉམ་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། མཐའ་ཡས་དྲི་མ་མེད་ཅེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་གཟུངས་ཐམས་ཅད་ཡོངས་སུ་དག་པར་སྟོན་ཏོ། །འཇམ་དཔལ། མགྱོགས་པར་འགྲོ་བ་ཞེས་བྱ་བའི་ཏིང་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་ཉི་མ་དང ། ཟླ་བའི་འོད་ཟིལ་གྱིས་གནོན་པར་བྱེད་དོ། །འཇམ་དཔལ། འོད་ཟེར་འབྱུང་བ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་བརྒྱ་བྱིན་དང ། ཚངས་པ་དག་གི་གཟི་བརྗིད་ཟིལ་གྱིས་གནོན་པར་བྱེད་དོ། །འཇམ་དཔལ། ཡུལ་སྟོན་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་ 317b དེ་ཐོབ་ན། བྱང་ཆུབ་སེམས་དཔའ་འཁོར་འདུས་པ་ཐམས་ཅད་ཀྱི་འདོད་ཆགས་དང ། ཞེ་སྡང་དང ། གཏི་མུག་ཞི་བར་བྱེད་དོ། །འཇམ་དཔལ། འོད་ཟེར་ཐོགས་པ་མེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་སངས་རྒྱས་ཀྱི་ཞིང་ཐམས་ཅད་འོད་ཟེར་གྱིས་སྣང་བར་བྱེད་དོ། །འཇམ་དཔལ། ཆོས་ཐམས་ཅད་མི་བརྗེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་སངས་རྒྱས་ཀྱི་ཆོས་བསྟན་པ་ཐམས་ཅད་འཛིན་ཅིང་གཞན་ལ་ཡང་སྟོན་པར་བྱེད་དོ། །འཇམ་དཔལ། སེངྒེའི་སྒྲ་མངོན་པར་བསྒྲགས་པའི་དབྱངས་ཡིད་དུ་འོང་བ་རྗེས་སུ་སྒྲོག་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན།་བྱང་ཆུབ་སེམས་དཔའ་ཚངས་པའི་འཇིག་རྟེན་གྱི་བར་དུ་སྒྲས་མངོན་པར་གོ་བར་བྱེད་དོ། །འཇམ་དཔལ། དགའ་བ་དང ། མགུ་བ་དང ། ཚིམ་པ་ཐམས་ཅད་ཡང་དག་པར་བསྐྱེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སེམས་དང་བསམ་པ་སྣ་ཚོགས་ཡང་དག་པར་མགུ་བར་བྱེད་དོ། །འཇམ་དཔལ། ལྟ་བས་ཆོག་མི་ཤེས་ཤིང་མཆོག་ཏུ་དགའ་བ་དང་ལྡན་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་ 318a ༄#། །སེམས་དཔའ་ལྟ་བ་དང་མཉན་པས་ཆོག་མི་ཤེས་པར་འགྱུར་རོ། །འཇམ་དཔལ། ཡོན་ཏན་བསམ་གྱིས་མི་ཁྱད་པའི་འབྱུང་གནས་ཤེས་རབ་ཀྱི་ཡུལ་རིན་པོ་ཆེའི་འབྱུང་ཁུངས་རྒྱུན་གཅིག་པ་ཉོན་མོངས་པ་མེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་རྫུ་འཕྲུལ་བསྟན་པ་ཐམས་ཅད་སྟོན་པ་དང ། སེམས་ཅན་རྣམས་འདུལ་བར་བྱེད་དོ། །འཇམ་དཔལ། སྒྲ་སྐད་ཐམས་ཅད་ཀྱི་བརྡ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་སྒྲ་སྐད་དང ། བརྗོད་པ་དང ། བརྡ་ཐམས་ཅད་རྟོགས་ཤིང་ཡི་གེ་ཐམས་ཅད་ཀྱིས་ཡི་གེ་གཅིག་སྟོན་པ་དང ། ཡི་གེ་གཅིག་གིས་ཡི་གེ་ཐམས་ཅད་སྟོན་པར་བྱེད་དོ། །འཇམ་དཔལ། ལས་ཀྱི་རྣམ་པར་སྨིན་པ་ལས་བྱུང་བའི་བསོད་ནམས་དང ། དགེ་བའི་རྩ་བ་ཐམས་ཅད་གསོག་ཅིང་སྟོན་པར་བྱེད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་ཅང་མི་སྨྲ་བར་སྙོམས་པར་ཞུགས་ཏེ་ཡི་གེ་གཅིག་ཙམ་ཡང་མི་བརྗོད་པར་སེམས་ཅན་ཐམས་ཅད་ཀྱིས་སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། ཉན་ཐོས་ཀྱི་སྒྲ་དང ། རང་སངས་རྒྱས་ཀྱི་སྒྲ་དང ། བྱང་ཆུབ་སེམས་ 318b དཔའི་སྒྲ་དང ། ཕ་རོལ་ཏུ་ཕྱིན་པའི་སྒྲ་ཐོས་པར་བྱེད་དོ། །འཇམ་དཔལ། གཟུངས་ཐམས་ཅད་ལས་མངོན་པར་འཕགས་པའི་རྒྱལ་པོ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་གཟུངས་མཐའ་ཡས་པ་སྒྲུབ་པ་ལ་འཇུག་པ་ཁོང་དུ་ཆུད་པར་འགྱུར་རོ། །འཇམ་དཔལ། ཆོས་ཐམས་ཅད་ལ་སྤོབས་པ་བཀོད་པ་ཞེས་བྱ་བའི་ཏིང་ངེ་འཛིན་ཡོད་དེ། ཏིང་ངེ་འཛིན་དེ་ཐོབ་ན། བྱང་ཆུབ་སེམས་དཔའ་ཡི་གེ་ཐམས་ཅད་ལ་སྤོབས་ཤིང་སྒྲ་སྐད་ཐམས་ཅད་དང ། དབྱངས་ཐམས་ཅད་དང ། བརྗོད་པ་ཐམས་ཅད་ལ་ཡང་སྤོབས་པར་འགྱུར་རོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཆོས་ཀྱི་རྣམ་གྲངས་འདིའི་ཡོན་ཏན་བརྗོད་པའི་ཁྱད་པར་ལ་སྤོབས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཁྱོད་སྤོབས་པར་གྱིས་ཤིག་།འཇམ་དཔལ་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་དག་ནེམ་ནུར་མ་མཆིས་པ་དང ། ཐེ་ཚོམ་མ་མཆིས་པའི་སེམས་ཀྱིས་ཆོས་ཀྱི་རྣམ་གྲངས་འདི་སྟོན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལ་རྒྱ་ཆེར་ཡང་དག་པར་རབ་ཏུ་སྟོན་པར་བགྱིད་པ་དེ་ཚེ་འདི་ཉིད་ལ་གདོན་མི་འཚལ་བར་ 319a ༄#། །སྤོབས་པ་ཐོབ་པར་རེ་བར་བགྱི་སྟེ། སྤོབས་པ་མྱུར་བ་དང ། སྤོབས་པ་རྒྱ་ཆེ་བ་དང ། ཟབ་མོ་ལ་སྤོབས་པ་དང ། མི་བརྗེད་པའི་སྤོབས་པ་དང ། སྤོབས་པ་སྣ་ཚོགས་པ་ཐོབ་པར་རེ་བར་བགྱིའོ། །དེ་ནི། སེམས་ཅན་ཐམས་ཅད་ལ་ཞེ་འགྲས་པ་མ་མཆིས་པའི་སེམས་སུ་འགྱུར་བར་རེ་བར་བགྱིའོ། །དེ་ཅིའི་སླད་དུ་ཞེ་ན ། གང་ཇི་ཙམ་དུ་ཆོས་ཀྱི་རྣམ་གྲངས་འདི་སྒྲུབ་པ་དེ་ནི། སྤྱོད་པ་འདི་ཉིད་དང་རྗེས་སུ་འབྲེལ་བ་ལགས་པའི་སླད་དུའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ། །ཞེས་བྱ་བ་བྱིན་ཏེ། འཇམ་དཔལ། ལེགས་སོ། །ལེགས་སོ། །ཁྱོད་ཀྱིས་ཚིག་འདི་ལེགས་པར་སྨྲས་སོ། །འཇམ་དཔལ། འདི་ལྟ་སྟེ། དཔེར་ན། སྦྱིན་པ་ནི། ལོངས་སྤྱོད་ཆེན་པོ་ཐོབ་པར་སླུ་བ་མེད་དོ། །ཚུལ་ཁྲིམས་ནི། མཐོ་རིས་སུ་སྐྱེ་བར་སླུ་བ་མེད་དོ། །ཐོས་པ་ནི། ཤེས་རབ་ཆེན་པོར་འགྱུར་བར་སླུ་བ་མེད་དོ། །སྒོམ་པ་ནི། འབྲལ་བར་འགྱུར་བར་སླུ་བ་མེད་དོ། །འཇམ་དཔལ། དེ་བཞིན་དུ་ཆོས་ཀྱི་རྣམ་གྲངས་འདི་ཡང་ཚེ་འདི་ཉིད་ལ་སྤོབས་པ་སྐྱེ་བར་སླུ་བར་མེད་དོ། །འཇམ་དཔལ། འདི་ལྟ་སྟེ། དཔེར་ན། ཉི་མ་ཤར་བས་ནི། མུན་པ་མུན་ནག་ཐམས་ཅད་སེལ་བར་བྱེད་དོ། །འཇམ་དཔལ། དེ་བཞིན་དུ་ཆོས་ཀྱི་རྣམ་གྲངས་ 319b འདི་ཡང་བསྟན་མ་ཐག་ཏུ་སྤོབས་པ་སྐྱེ་བར་རེ་བར་བྱའོ། །འཇམ་དཔལ། འདི་ལྟ་སྟེ། དཔེར་ན། བྱང་ཆུབ་ཀྱི་སྙིང་པོ་ལ་འདུག་པའི་བྱང་ཆུབ་སེམས་དཔའ་ནི། ངེས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །འཇམ་དཔལ། དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་ཀྱི་རྣམ་གྲངས་འདི་རབ་ཏུ་འདོན་པ་དེ་ཡང་ཐེ་ཚོམ་མེད་པར་ངེས་པར་ཚེ་འདི་ཉིད་ལ་སྤོབས་པ་ཐོབ་པར་འགྱུར་རོ། །འཇམ་དཔལ། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོ་ཚེ་འདི་ཉིད་ལ་སྤོབས་པ་ཐོབ་པར་འདོད་པས་ནེམ་ནུར་མེད་པ་དང ། ཐེ་ཚོམ་མེད་པའི་སེམས་ཀྱིས་ཆོས་ཀྱི་རྣམ་གྲངས་འདི་གཟུང་བར་བྱ། བཅང་བར་བྱ།་ཁ་ཏོན་དུ་བྱ། བཀླག་པར་བྱ། ཀུན་ཆུབ་པར་བྱ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་བཅོམ་ལྡན་འདས་ཡོངས་སུ་མྱ་ངན་ལས་འདས་ནས་བྱང་ཆུབ་སེམས་དཔའ་གང་ནེམ་ནུར་མ་མཆིས་པ་དང ། ཐེ་ཚོམ་མ་མཆིས་པའི་སེམས་ཀྱིས་ཆོས་ཀྱི་རྣམ་གྲངས་འདི་འཛིན་པ་དང ། འཆང་ 320a ༄#། །བ་དང ། ཀློག་པ་དང ། ཀུན་ཆུབ་པར་བགྱི་བ་དང ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པར་འགྱུར་བ་དེ་ལ་སྤོབས་པ་ཉེ་བར་བསྒྲུབ་པར་བགྱིའོ། །དེ་ནས་བདུད་སྡིག་ཅན་དུ་ཞིང་སྨྲེས་སྔགས་འདོན་བཞིན་དུ་བཅོམ་ལྡན་འདས་ག་ལ་བ་དེར་སོང་སྟེན་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། ཐུགས་རྗེ་དང་ལྡན་ཞིང་སེམས་ཅན་སྡུག་བསྔལ་བ་རྣམས་ལ་བདེ་བ་རབ་ཏུ་སྩོལ་བ་ལགས་ན། བཅོམ་ལྡན་འདས་ཀྱིས་བདག་གི་ཡིད་མི་བདེ་བ་དེ་ལེགས་པར་བསལ་བའི་སླད་དུ་ཆོས་ཀྱི་རྣམ་གྲངས་འདི་སླར་ཞིང་བྱིན་གྱིས་མི་བརླབ་ཏུ་གསོལ། བཅོམ་ལྡན་འདས། གང་གི་ཚེ་བཅོམ་ལྡན་འདས་བྱང་ཆུབ་ཀྱི་སྙིང་པོ་ལ་བཞུགས་པ་དང ། ད་ལྟར་ཆོས་ཀྱི་རྣམ་གྲངས་འདི་བསྟན་པའི་ཚེ་བདག་འདིར་ཤིན་ཏུ་ཆེར་སྡུག་བསྔལ་ཞིང་ཡིད་མི་བདེ་བ་དང ། མྱ་ངན་གྱི་ཟུག་རྡུས་གཟིར་བར་གྱུར་ལགས་སོ། །བཅོམ་ལྡན་འདས། ཐ་ན་ཆོས་ཀྱི་རྣམ་གྲངས་འདི་སེམས་ཅན་གང་དག་གི་རྣ་ལམ་དུ་གྲག་པར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་ 320b དག་པར་རྫོགས་པའི་བྱང་ཆུབ་ལས་སླར་མི་ལྡོག་པར་འགྱུར་ལགས་ན། གང་དག་གིས་ཐོས་ནས་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལ་རྒྱ་ཆེར་ཡང་དག་པར་རབ་ཏུ་སྟོན་པར་བགྱིད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་སླར་མི་ལྡོག་པར་འགྱུར་བ་ལྟ་སྨོས་ཀྱང་ཅི་འཚལ་ཏེ། སེམས་ཅན་དེ་དག་ཐམས་ཅད་ནི། ཡོངས་སུ་མྱ་ངན་ལས་འདའ་བར་འགྱུར་ལགས་སོ། །བཅོམ་ལྡན་འདས། དེའི་སླད་དུ་བདག་གི་བདུད་ཀྱི་གནས་སྟོང་པར་འགྱུར་ལགས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། ཐུགས་རྗེ་དང་ལྡན་ཞིང་སྡུག་བསྔལ་བ་རྣམས་ལ་བདེ་བ་སྩོལ་བ་ལགས་ན། བཅོམ་ལྡན་འདས། བདག་དབུགས་དབྱུང་དུ་གསོལ། བདེ་བར་གཤེགས་པ། བདག་དབུགས་དབྱུང་དུ་གསོལ། དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན། མ་འཇིགས་ཤིག་།སེམས་ཅན་ཐམས་ཅད་ཀྱང་ཡོངས་སུ་མྱ་ངན་ལས་འདའ་བར་མི་འགྱུར་ལ། སྡིག་ཅན། ང་ཡང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་ཀྱི། སྡིག་ཅན། མ་འཇིགས་ 321a ༄#། །ཤིག་།དེ་ནས་བཅོམ་ལྡན་འདས་ཀྱིས་དབུགས་དབྱུང་བ་མཛད་པས་བདུད་སྡིག་ཅན་ཚིམ་ཞིང་དགའ་ལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་དེ་ཉིད་དུ་མི་སྣང་པར་གྱུར་ཏོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཅི་ལས་དགོངས་ཏེ་འདི་སྐད་དུ ། ང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་དོ། །ཞེས་བདུད་སྡིག་ཅན་ལ་བཀའ་སྩལ།་བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི། བྱིན་གྱི་རླབས་མེད་པས་བྱིན་གྱིས་བརླབས་པ་ཡིན་ཏེ། ཆོས་ཀྱི་རྣམ་གྲངས་འདི་ཡང་བྱིན་གྱི་རླབས་མེད་པས་བྱིན་གྱིས་བརླབས་པ་ཡིན་པས་འཇམ་དཔལ། དེའི་ཕྱིར་ངས་བདུད་སྡིག་ཅན་ལ་འདི་སྐད་དུ། ང་ཆོས་ཀྱི་རྣམ་གྲངས་འདི་ལ་བྱིན་གྱིས་རློབ་པར་མི་བྱེད་དོ། །ཞེས་སྨྲས་སོ། །འཇམ་དཔལ། བདེན་པ་དང ། བདེན་པའི་ཚིག་གང་གིས་ཆོས་ཐམས་ཅད་བྱིན་གྱི་རླབས་མེད་པས་བྱིན་གྱིས་བརླབས་པ་དང ། ཐ་དད་དུ་དབྱེར་མེད་པ་དང ། བརྗོད་དུ་མེད་པ་དང ། མཚན་ཉིད་མེད་པ་དང ། བསྙད་དུ་མེད་པ་དང ། སྨྲར་མེད་པ་དང ། གཉིས་སུ་ 321b མེད་པ་དང ། གཉིས་དང་བྲལ་བ་དང ། ཡང་དག་པར་མཐའ་དང་མཉམ་པ་དང ། དེ་བཞིན་ཉིད་དུ་ཞུགས་པ་དང ། ཆོས་ཀྱི་དབྱིངས་ཀྱི་མཚན་ཉིད་ཡིན་པའི་བདེན་པ་དང ། བདེན་པའི་ཚིག་དེས་ཆོས་ཀྱི་རྣམ་གྲངས་འདི་འཛམ་བུའི་སླིང་ན་རབ་ཏུ་སྤྱོད་པར་གྱུར་ཅིག་།དེ་ནས་བཅོམ་ལྡན་འདས་ཀྱིས་བདེན་པའི་བྱིན་གྱི་རླབས་དེ་མཛད་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གང་ཡིན་པ་དང ། ཆོས་ཀྱི་རྣམ་གྲངས་འདི་གང་ཡིན་པ་དེ་དག་ནི།་མཉམ་པའི་ཕྱིར་ཁྱོད་ཀྱིས་ཀུན་ནས་སྒོའི་ཆོས་ཀྱི་རྣམ་གྲངས་འདི་ཟུངས་ཤིག་།ཆོངས་ཤིག ། ལྷོགས་ཤིག་།ཀུན་ཆུབ་པར་གྱིས་ཤིག་།གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག་།དེ་ཅིའི་ཕྱིར་ཞེ་ན། ཀུན་དགའ་བོ། དེ་བཞིན་གཤེགས་པ་ནི། ཀུན་ནས་སྒོའི་ཆོས་ཀྱི་དབྱིངས་འདི་ལེགས་པར་ཐུགས་སུ་ཆུད་ནས་སེམས་ཅན་རྣམས་ལ་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟོན་པར་མཛད་པའི་ཕྱིར་རོ། །ཀུན་དགའ་བོ། དེ་ལྟ་བས་ན། ཆོས་ཀྱི་རྣམ་གྲངས་འདི་ལེགས་པར་སྲུང་པ་དང ། ལེགས་པར་གཟུང་བ་དང ། ལེགས་པར་ཀུན་ཆུབ་པར་གྱིས་ཤིག ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་པའི་ 322a ༄#། །སྙིང་པོ་དང ། །འཇམ་དཔལ་གཞོན་ནུར་གྱུར་པ་དང ། ཚེ་དང་ལྡན་པ་ཀུན་དགའ་བོ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས།་ཀུན་ནས་སྒོའི་ལེའུ་ཞེས་བྱ་བ་སྟེ། ལེའུ་བཅུ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་སུ་རེནྡྲ་པོ་དྷི་དང ། ཞུ་ཆེན་གྱི་ལོ་ཙཱ་བ་བནྡྷེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། |