rKTs


H60

(e-text produced by ACIP)

see text in transliteration
85a
།།རྒྱ་གར་སྐད་དུ། ཨཱརྱ་པི་ཏཱ་པུ་ཏྲ་ས་མཱ་ག་མ་ན་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཡབ་དང་སྲས་མཇལ་བ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་དང ། འཕགས་པ་ཉན་ཐོས་དང་རང་སངས་རྒྱས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོལ་བ་གྲོལ་བའི་འཁོར་དང་ལྡན་པ། དུལ་བ་དུལ་བའི་འཁོར་
85b
དང་ལྡན་པ། ཞི་བ་ཞི་བའི་འཁོར་དང་ལྡན་པ། རྒལ་བ་རྒལ་བའི་འཁོར་དང་ལྡན་པ། ཕ་རོལ་ཏུ་ཕྱིན་པ་ཕ་རོལ་ཏུ་ཕྱིན་པའི་འཁོར་དང་ལྡན་པ། ཐང་ལ་ཕྱིན་པ་ཐང་ལ་ཕྱིན་པའི་འཁོར་དང་ལྡན་པ། དབུགས་ཕྱིན་པ་དབུགས་ཕྱིན་པའི་འཁོར་དང་ལྡན་པ། དགེ་སློང་དགེ་སློང་གི་འཁོར་དང་ལྡན་པ། ཉོན་མོངས་པ་བཅོམ་པ་ཉོན་མོངས་པ་བཅོམ་པའི་འཁོར་དང་ལྡན་པ། དགེ་སྦྱོང་དགེ་སྦྱོང་གི་འཁོར་དང་ལྡན་པ། སྡིག་པ་བསལ་བ་སྡིག་པ་བསལ་བའི་འཁོར་དང་ལྡན་པ། ཚངས་པ་ཚངས་པའི་འཁོར་དང་ལྡན་པ། སྡིག་པ་བསལ་བའི་ཆོས་ཅན་སྡིག་པ་བསལ་བའི་ཆོས་ཅན་གྱི་འཁོར་དང་ལྡན་པ། རིག་པ་ཅན་རིག་པ་ཅན་གྱི་འཁོར་དང་ལྡན་པ། ཁྲུས་བྱས་པ་ཁྲུས་བྱས་པའི་འཁོར་དང་ལྡན་པ། སྒྲོག་པ་པོ་སྒྲོག་པ་པོའི་འཁོར་དང་ལྡན་པ། ཉོན་མོངས་པ་བྱང་བ་ཉོན་མོངས་པ་བྱང་བའི་འཁོར་དང་ལྡན་པ། ཡན་ལག་ལྔ་རྣམ་པར་གསལ་བ་ཡན་ལག་ལྔ་རྣམ་པར་གསལ་བའི་འཁོར་དང་ལྡན་པ། སྒྲིབ་པ་དང་རྣམ་པར་བྲལ་བ་སྒྲིབ་པ་དང་རྣམ་པར་བྲལ་བའི་འཁོར་དང་ལྡན་པ། ཡིད་རྣམ་པར་དང་བ་ཡིད་རྣམ་པར་དང་བའི་འཁོར་དང་ལྡན་པ། ཡན་ལག་དྲུག་དང་ལྡན་པ་ཡན་ལག་དྲུག་དང་ལྡན་པའི་འཁོར་དང་ལྡན་པ། བསྙེན་བསྲིང་དང་བྲལ་བ་བསྙེན་བསྲིང་དང་
86a
༄#། །བྲལ་བའི་འཁོར་དང་ལྡན་པ། སྲུང་བ་གཅིག་པ་སྲུང་བ་གཅིག་པའི་འཁོར་དང་ལྡན་པ། དྲན་པའི་སྒོ་སྲུང་ཕུན་སུམ་ཚོགས་པ་དྲན་པའི་སྒོ་སྲུང་ཕུན་སུམ་ཚོགས་པའི་འཁོར་དང་ལྡན་པ། རྟོན་པ་བཞི་དང་ལྡན་པ་རྟོན་པ་བཞི་དང་ལྡན་པའི་འཁོར་དང་ལྡན་པ། ཉི་ཚེ་བའི་བདེན་པ་བསལ་བ་ཉི་ཚེ་བའི་བདེན་པ་བསལ་བའི་འཁོར་དང་ལྡན་པ། བཙལ་བ་སྤངས་པ་བཙལ་བ་སྤངས་པའི་འཁོར་དང་ལྡན་པ། མཐར་ཕྱིན་པ་མཐར་ཕྱིན་པའི་འཁོར་དང་ལྡན་པ། དོན་གྱི་མཐར་ཐུག་པ་དོན་གྱི་མཐར་ཐུག་པའི་འཁོར་དང་ལྡན་པ། བདག་ཉིད་བསྒོམས་པ་བདག་ཉིད་བསྒོམས་པའི་འཁོར་དང་ལྡན་པ། ཀུན་ཏུ་རྟོག་པའི་རྙོག་པ་མེད་པ་ཀུན་ཏུ་རྟོག་པའི་རྙོག་པ་མེད་པའི་འཁོར་དང་ལྡན་པ། རྣམ་པར་རྟོག་པ་ཡོངས་སུ་ཆད་པ་རྣམ་པར་རྟོག་པ་ཡོངས་སུ་ཆད་པའི་འཁོར་དང་ལྡན་པ། ལུས་ཀྱི་འདུ་བྱེད་རབ་ཏུ་བསལ་བ་ལུས་ཀྱི་འདུ་བྱེད་རབ་ཏུ་བསལ་བའི་འཁོར་དང་ལྡན་པ། མི་གཡོ་བ་ལ་མངོན་པར་མོས་པ་མི་གཡོ་བ་ལ་མངོན་པར་མོས་པའི་འཁོར་དང་ལྡན་པ། སེམས་ཤིན་ཏུ་རྣམ་པར་གྲོལ་བ་སེམས་ཤིན་ཏུ་རྣམ་པར་གྲོལ་བའི་འཁོར་དང་ལྡན་པ། ཤེས་རབ་ཤིན་ཏུ་རྣམ་པར་གྲོལ་བ་ཤེས་རབ་
86b
ཤིན་ཏུ་རྣམ་པར་གྲོལ་བའི་འཁོར་དང་ལྡན་པ། འཕགས་པ་འཕགས་པའི་འཁོར་དང་ལྡན་པ། ཡལ་ག་དང ། ལོ་མ་དང ། འདབ་མ་དང ། ལྕུག་མ་དང ། ཤུན་ཕྲགས་ཀྱི་སྐྱོན་དང་བྲལ་བ། དག་པ། སྙིང་པོ་ལ་གནས་པ། ཤཱཀྱའི་ཡུལ་ན་སེར་སྐྱའི་གནས་ཤིང་ནྱ་གྲོ་དྷའི་ཀུན་དགའ་ར་བ་ན་ལྔ་སྡེ་དང ། གྲགས་སྦྱིན་དང ། འཆར་ཀ་དང ། ལྟེང་རྒྱས་འོད་སྲུང་དང ། ག་ཡ་འོད་སྲུང་དང ། ཆུ་ཀླུང་འོད་སྲུང་དང ། འོད་སྲུང་ཆེན་པོ་དང ། ཤཱ་རིའི་བུ་དང ། མཽད་གལ་གྱི་བུ་ལ་སོགས་པ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ།་དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། །བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ།་སེམས་ཅན་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་ཕྱིན་པ་ཤ་སྟག་དང་ཐབས་ཅིག་སྟེ། དེའི་ཚེ་ནམ་གྱི་ཐོ་རངས་ཀྱི་རེས་ལ་བཅོམ་ལྡན་འདས་དགེ་སློང་གི་དགེ་
87a
༄#། །འདུན་གྱིས་ཡོངས་སུ་བསྐོར་ཅིང ། །དགེ་སློང་གི་དགེ་འདུན་གྱི་མདུན་གྱིས་བལྟས་ཏེ་བླ་གབ་མེད་པ་ན་བཞུགས་སོ། །དེའི་ཚེ་བཅོམ་ལྡན་འདས་ཅང་མི་གསུང་བར་ཐམས་ཅད་དང་ལྡན་པའི་དགེ་སློང་གི་དགེ་འདུན་ཅང་མི་སྨྲ་བ་ལ་གཟིགས་སོ། །ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།དགེ་སློང་གང་གིས་རྒྱལ་པོ་ཟས་གཙང་མ་མངོན་པར་དད་པར་འགྱུར་བ་དེ་ལྟ་བུ་འགའ་ཞིག་ཚོལ་ཅིག་།དེ་ནས་ཚེ་དང་ལྡན་པ་ཀུན་ཤེས་ཀོའུ་ཌི་ནྱ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་རྒྱལ་པོ་ཟས་གཙང་མ་མངོན་པར་དད་པར་བགྱིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀོའུ་ཌི་ནྱ་ལ་འདི་སྐད་ཅེས་བཀའ་སྩལ་ཏོ། །ཀོའུ་ཌི་ནྱ། ཁྱོད་ནི། བླ་མ་བླ་མར་བྱ་བའི་ཆོས་དང་ལྡན་པར་བྱ་བ་ཡིན་གྱི། འདུག་ཅིག་།དེ་བཞིན་དུ་ཚེ་དང་ལྡན་པ་རླངས་པ་དང ། མིང་ཆེན་དང ། གྲགས་སྦྱིན་དང ། ལྟེང་རྒྱས་འོད་སྲུང་དང ། ཆུ་
87b
ཀླུང་འོད་སྲུང་དང ། ག་ཡ་འོད་སྲུང་དང ། འོད་སྲུང་ཆེན་པོ་དང ། ཚེ་དང་ལྡན་པ་ཤཱ་རིའི་བུ་དང ། མོའུ་དགལ་གྱི་བུ་ཆེན་པོས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་རྒྱལ་པོ་ཟས་གཙང་མ་མངོན་པར་དད་པར་བགྱིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་མོའུ་དགལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་པ། མོའུ་དགལ་གྱི་བུ། ཁྱོད་ཀྱང་བླ་མ་བླ་མར་བྱ་བའི་ཆོས་དང་ལྡན་པར་བྱ་བ་ཡིན་གྱི། འདུག་ཅིག་།དེ་ནས་ཚེ་དང་ལྡན་པ་མོའུ་དགལ་གྱི་བུ་ཆེན་པོ་འདི་སྙམ་དུ་སེམས་ཏེ། རྒྱལ་པོ་ཟས་གཙང་མ་མངོན་པར་དད་པར་བྱེད་པའི་དགེ་སློང་གང་ཞིག་བཅོམ་ལྡན་འདས་བཞེད་སྙམ་སྟེ། དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཏིང་ངེ་འཛིན་གྱི་རྣམ་པ་དེ་ལྟ་བུ་ལ་མཉམ་པར་བཞག་སྟེ། དེ་ལྟར་མཉམ་པར་བཞག་པའི་སེམས་ཀྱིས་བཅོམ་ལྡན་འདས་ཀྱི་དགོངས་པ་ཚེ་དང་ལྡན་པ་འཆར་ཀ་ལ་གནས་ཤིང ། དགེ་སློང་འཆར་ཀ་འདི་རྒྱལ་པོ་ཟས་གཙང་མ་མངོན་པར་དད་པར་བྱེད་དོ། །ཞེས་དགོངས་པ་མཐོང་སྟེ། འདི་ལྟ་སྟེ། དཔེར་ན།་ཁང་པ་བརྩེགས་པའམ། ཁང་པ་བརྩེགས་པའི་ཁྱམས་སྒོ་བྱང་ཕྱོགས་སུ་ལྟ་བའི་ཤར་ཕྱོགས་ཀྱི་སྐར་ཁུང་ནས་ཉི་མའི་འོད་ཟེར་བྱུང་སྟེ་ནུབ་ཕྱོགས་ཀྱི་རྩིག་ངོས་ལ་ཤར་
88a
༄#། །བ་དེ་བཞིན་དུ། དེའི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་བཅོམ་ལྡན་འདས་ཀྱི་དགོངས་པ་ཚེ་དང་ལྡན་པ་འཆར་ཀ་ལ་ཤར་ཅིང ། དགེ་སློང་འཆར་ཀ་འདི་རྒྱལ་པོ་ཟས་གཙང་མ་མངོན་པར་དད་པར་བྱེད་དོ། །ཞེས་དགོངས་པ་མཐོང་ངོ ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཏིང་ངེ་འཛིན་དེ་ལས་ལངས་ཏེ་ཚེ་དང་ལྡན་པ་འཆར་ཀ་ག་ལ་བ་དེར་སོང་ནས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འཆར་ཀ་།བཅོམ་ལྡན་འདས་ནི། ཁྱོད་ལ་དགེ་སློང་འཆར་ཀས་རྒྱལ་པོ་ཟས་གཙང་མ་མངོན་པར་དད་པར་བྱ་བར་ནུས་སོ། །ཞེས་དགོངས་ཤིང་བཞེད་དོ། །ཚེ་དང་ལྡན་པ་འཆར་ཀ་།དེ་ལྟ་ཡིན་གྱི། ཁྱོད་ཀྱིས་རྒྱལ་པོ་ཟས་གཙང་མ་མངོན་པར་དད་པར་བྱ་བར་དད་པ་སྐྱེད་ཅིག་དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མཽད་གལ་གྱི་བུ་ཆེན་པོ། །རིགས་རྣམས་ནི། དད་པར་བྱ་བར་ཤིན་ཏུ་དཀའ་སྟེ། རྒྱལ་པོའི་རིགས་ནི། ལྷག་པར་དཀའོ། །དེ་ཅིའི་ཕྱིར་ཞེ་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ནི། མགུ་བར་དཀའ་སྟེ། ཚེ་དང་ལྡན་པ་མཽ་དགལ་གྱི་བུ་ཆེན་པོ། །འདི་ལྟ་སྟེ།
88b
དཔེར་ན། ཤིང་ཁུར་བཅུའམ། ཉི་ཤུའམ། སུམ་ཅུའམ། བཞི་བཅུའམ། ལྔ་བཅུའམ། ཤིང་ཁུར་བརྒྱ་ཡང་རུང་སྟེ། གཤེར་བག་མེད་ཅིང་སྐམ་ལ་ལོ་མང་དུ་ལོན་པ་ཞིག་ཡོད་པ། དེ་ལ་མི་ལ་ལ་ཞིག་གིས་མེ་བཏང་ན། མེའི་ཕུང་པོ་ཆེན་པོ་འབར་བར་འགྱུར་རོ། །དེ་ལ་ཡང་ལ་ལ་ཞིག་གིས་མར་རམ། འབྲུ་མར་ཞིག་གིས་གཏོར་ན། མེའི་ཕུང་པོ་དེ་བས་ཆེས་ཆེར་འབར་ཏེ། དེའི་སྟེང་ངམ་དྲུང་གི་འཁོར་དུ་འགྲོ་བ་ནི། ཤིན་ཏུ་དཀའོ། །ཚེ་དང་ལྡན་པ་མཽད་གལ་གྱི་བུ་ཆེན་པོ། །དེ་བཞིན་དུ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ནི། མགུ་བར་དཀའོ། །ཚེ་དང་ལྡན་པ་མཽད་གལ་གྱི་བུ་ཆེན་པོ། །འདི་ལྟ་སྟེ། དཔེར་ན། གླང་པོ་ཆེ་མཆེ་བ་ཅན་ཁ་གདངས་པའི་སོ་ཕྲག་ཏུ་འགྲོ་བ་ནི།་ཤིན་ཏུ་དཀའོ། །ཚེ་དང་ལྡན་པ་མཽད་གལ་གྱི་བུ་ཆེན་པོ། །དེ་བཞིན་དུ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ཀྱང་མགུ་བར་དཀའོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འཆར་ཀ་།དེ་ནི། དེ་ལྟ་མོད་ཀྱི། འོན་ཀྱང་ཁྱོད་ནི། དགེ་སློང་འཆར་ཀ་འདིས་རྒྱལ་པོ་ཟས་གཙང་མངོན་པར་དད་པར་བྱ་བར་ནུས་སོ། །ཞེས་བཅོམ་ལྡན་འདས་ཀྱིས་དགོངས་ཤིང་བཞེད་པ་ཡིན་ནོ། །སྨྲས་པ། ཚེ་དང་ལྡན་པ་མཽད་
89a
༄#། །གལ་གྱི་བུ་ཆེན་པོ། །བཅོམ་ལྡན་འདས་ཀྱིས་བདག་ལ་རྒྱལ་པོ་ཟས་གཙང་མ་དད་པར་བྱེད་པར་དགོངས་སམ། སྨྲས་པ། ཚེ་དང་ལྡན་པ་འཆར་ཀ་།དེ་དེ་བཞིན་ཏེ། བཅོམ་ལྡན་འདས་ཀྱིས་དགེ་སློང་འཆར་ཀ་ནི། རྒྱལ་པོ་ཟས་གཙང་མ་དད་པར་བྱེད་དོ། །ཞེས་དགོངས་སོ། །དེ་ནས་བཅོམ་ལྡན་འདས་ཉིད་ཀྱིས་ཚེ་དང་ལྡན་པ་འཆར་ཀ་ལ་བཀའ་སྩལ་པ། འཆར་ཀ། རྒྱལ་པོ་ཟས་གཙང་མ་དད་པར་གྱིས་ཤིག་།དེ་ཅིའི་ཕྱིར་ཞེ་ན། འཆར་ཀ་།རྒྱལ་པོ་ཟས་གཙང་མ་ནི།་ཡང་ན་ངས་དད་པར་བྱའི། ཡང་ན་ཁྱོད་ཀྱིས་དད་པར་བྱའོ། །འཆར་ཀ་།ངའི་ཉན་ཐོས་ཇི་སྙེད་ཡོད་པ་དེ་དག་གི་ནང་ན་ཁྱོད་ནི། འདི་ལྟར་རིགས་དད་པར་བྱེད་པའི་མཆོག་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚེ་དང་ལྡན་པ་འཆར་ཀ་ལ་ཚིགས་སུ་བཅད་དེ་བཀའ་སྩལ་པ། འཆར་ཀ་བཟང་པོ་ང་ལས་ཉན་པར་བྱོས། །ཁྱོད་ནི་རིགས་དད་བྱེད་མཆོག་རབ་ཡིན་གྱི། །ཤཱཀྱའི་རིགས་རྣམས་དགའ་བ་སྐྱེད་པ་ཡི། །རྒྱལ་པོའི་དམ་པ་རབ་ཏུ་དད་པར་བྱོས། །རྒྱལ་པོའི་རབ་དེ་དད་པར་བྱོས་ན་ནི། །རིགས་བུ་ལྷ་དག་དང་ནི་མི་རྣམས་ལ། །མཐའ་དབུས་མེད་པའི་ལེགས་པ་འབྱུང་འགྱུར་གྱི། །མི་ཡི་དམ་པ་མྱུར་དུ་དད་པར་བྱོས། །ད་ལྟ་ན་ནི་ཤཱཀྱའི་
89b
བདག་པོ་དེ། །མངོན་པའི་ང་རྒྱལ་རྟོག་པས་དཀྲུགས་ཤིང་ཉམས། །རི་ཡི་ངོས་ནས་རྦབ་འདྲིལ་ཇི་བཞིན་དུ། །བརྩོན་འགྲུས་རྩོལ་བ་ཐམས་ཅད་བཏང་སྟེ་གནས། །དབང་ཕྱུག་ཉམས་པ་རྗེས་སུ་དྲན་བྱེད་པས། །ཡིད་ལ་གནོད་འགྱུར་སེམས་ལ་ཡིད་ཀྱང་སྟོར། །དཔེར་ན་ཚོང་པ་ནོར་དང་བྲལ་བ་དང ། །རྗེས་སུ་དྲན་ཞིང་ཉོན་མོངས་གནས་པ་བཞིན། །ལྷ་ཡི་གནས་ནས་ལྷ་དག་ཤི་འཕོས་ཤིང ། །ལྷ་རྫས་འདོད་པ་རྗེས་སུ་དྲན་པ་བཞིན། །རྒྱལ་བའི་བསྟན་པ་མངོན་པར་མི་ཤེས་ཤིང ། །རྒྱལ་པོ་སྡེ་ཉམས་སྙིང་རྗེར་སྨྲེ་སྔགས་འདོན། །ང་ཡི་རིན་པོ་ཆེ་ནི་སྣ་བདུན་དང ། །མི་ཡི་ཕུན་སུམ་ཚོགས་པ་བཞི་པོ་དང ། །ལོངས་སྤྱོད་དག་ནི་རྗེས་སུ་དྲན་བྱེད་ཅིང ། །ས་བདག་དེ་ནི་སྙིང་རྗེར་སྨྲེ་སྔགས་འདོན། །མདངས་འཕྲོག་བྱེད་པའི་སྲིན་པོ་སྟོབས་ཅན་གྱིས། །ཇི་ལྟར་མི་ཞིག་ཡོངས་སུ་ནོན་གྱུར་ན། །བདག་ཀྱང་མི་ཤེས་གཞན་ཡང་མི་ཤེས་ལྟར། །ས་ཡི་བདག་པོ་དེ་ཡང་དེ་བཞིན་ནོ། །ཏི་སེའི་གངས་ཀྱི་རི་བོས་བསྒྲིབས་གྱུར་ན། །ཇི་ལྟར་མི་དག་བལྟ་བྱ་མི་མཐོང་བ། །དེ་བཞིན་ང་རྒྱལ་ཆེན་པོས་བསྒྲིབས་པས་ན། །རྒྱལ་པོས་བལྟ་བར་བྱ་བ་མི་མཐོང་ངོ ། །གཉིད་ཀྱིས་ལོག་གམ་ཤི་བས་མྱོས་གྱུར་པའི། །མིས་ནི་རང་གི་སེམས་ཀྱང་མི་ཤེས་ཏེ། །དེ་བཞིན་ང་རྒྱལ་ཆེན་པོ་མྱོས་
90a
༄#། །གྱུར་པས། །རྒྱལ་པོ་དེས་ཀྱང་དགེ་བ་མི་ཤེས་སོ། །དཔེར་ན་ཁྱིམ་ཐབ་ཤི་བས་མྱོས་པ་ཡི། །བུད་མེད་སྙིང་རྗེར་སྨྲེ་སྔགས་འདོན་བྱེད་པ། ། དེ་བཞིན་ང་རྒྱལ་ཆེན་པོས་མྱོས་གྱུར་པས། །རྒྱལ་པོ་དེ་ཡང་སྙིང་རྗེར་སྨྲེ་སྔགས་འདོན། །ད་ལྟ་བས་ན་འཆར་ཀ་ཐབས་མཁས་པ། །ཁྱོད་ཀྱིས་འདིར་ནི་རྒྱལ་པོ་དད་པར་གྱིས། །ང་རྒྱལ་རྒྱལ་མཚན་རབ་ཏུ་བསྙལ་བར་བྱོས། །ཆོས་ཀྱི་རྒྱལ་མཚན་དམ་པ་བསླང་བར་གྱིས། །འཆར་ཀ་ཁྱོད་མ་གཏོགས་པར་སྲིད་པ་ཡི། །འགྲོ་བ་དག་ན་སྐལ་མཐུན་སྤྱད་མེད་པས། །རྒྱལ་པོའི་སེམས་ནི་རབ་ཏུ་དད་བྱ་བར། །གང་གིས་ནུས་པའི་དགེ་སློང་གང་ཡང་མེད། །འཆར་ཀ་སྔོན་གྱི་དུས་ན་བྱུང་བ་ནི། །འདས་པའི་དུས་ན་ས་ཡི་བདག་པོ་ཞིག་།མིང་ནི་བདེན་པ་འཕེལ་ཞེས་བྱ་བ་སྟེ། །ས་སྐྱོང་བྱེད་པ་རྣམ་པར་གྲགས་པ་བྱུང ། །དེ་ནི་ཆོས་ཀྱི་རྒྱལ་པོ་ཆོས་དང་ལྡན། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །རྒྱ་མཚོའི་མཐའ་མར་ཐུག་པའི་ས་འདི་ནི། །ཆོས་དང་ལྡན་པའི་རྒྱལ་པོ་དེས་ཀྱང་བསྐྱངས། །གྲོང་དང་གྲོང་ཁྱེར་དག་ཀྱང་འདབ་ཉེ་ཞིང ། ། བཟའ་ཤིང་འབྲས་བུ་མེ་ཏོག་རྒྱས་པས་གང ། །འཕགས་པའི་སྐྱེ་བོ་དག་དང་ཤེད་ལས་སྐྱེས། །སྡིག་དང་བྲལ་བ་རྣམས་ཀྱིས་རབ་ཏུ་གང ། །དྲི་ཟ་བརྒྱ་མང་དག་གིས་
90b
གང་བ་སྟེ། །སྡོང་དུམ་ཚེར་མ་རྩཝ་ཤིང་ངན་པ་མེད། །འཇམ་ཞིང་དགེ་སྦྱོང་གནས་ཀྱི་ཚོགས་ཀྱིས་སྤྲས། །ཆུ་ཀླུང་འབབ་སྟེགས་བདེ་བས་རབ་ཏུ་བརྒྱན། །དྲང་སྲོང་ཚོགས་བརྒྱ་རྗེས་སུ་རྒྱུ་བ་སྟེ། །སྐྱེ་བོའི་དཀར་ཆོས་རྣམས་ཀྱིས་ཀུན་དུ་བསྒྲུབས། །ངན་སོང་ལམ་ངན་རྣམས་ནི་རབ་ཏུ་བཅད། །དེ་ནས་སེམས་ཅན་ཐམས་ཅད་ལྷ་གནས་འདོད། །རྒྱལ་པོ་དེ་ལ་བུ་དག་ཡོད་པ་ནི། །སྔོན་གྱི་སངས་རྒྱས་བྱུང་བ་མཐོང་བ་སྟེ། །དགེ་བའི་རྩ་བ་དག་ནི་བསྐྱེད་པ་ཅན། །ཡོན་ཏན་མང་པོས་བསྒོས་པའི་བློ་གྲོས་ལྡན། །མིང་ནི་བློ་གྲོས་སྙིང་པོ་ཞེས་བྱ་སྟེ། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །འདོད་པ་རྣམས་ལ་སྐྱོན་དུ་ལྟ་བ་ཅན། །མི་བདག་ཁྱིམ་ན་གནས་ཀྱང་དབེན་ལ་དགའ། །རྒྱལ་པོ་བདེན་པ་འཕེལ་ཞེས་བྱ་བ་དེས། །ལྷ་ཡི་ཕོ་བྲང་འདྲ་བའི་ཁྱིམ་མཆོག་འདིར། །ན་ཆུང་ཚོགས་ཀྱིས་ཀུན་ནས་མདུན་བདར་ཏེ། །འདོད་པའི་ཡོན་ཏན་བཟང་ལ་སྤྱོད་ཅེས་སྨྲས། ། བུ་ཡི་དམ་པ་ཁྱོད་ལ་ང་ཡིས་ནི། །ཇི་ལྟར་འདོད་པའི་བྱ་བ་གང་མ་བྱས། །འདོད་པ་རྣམས་ལ་ཁྱོད་ཡིད་ཅི་ཡི་ཕྱིར། །མ་མོས་ང་ལ་བུ་ཁྱོད་མྱུར་དུ་སྨྲོས། །སྲིད་པའི་འགྲོ་བའི་ཡོན་ཏན་མཁས་བགྱིས་ཏེ། །བུ་ཁྱོད་རིན་ཆེན་ཁྱིམ་ལ་དགའ་བ་བསྐྱེད། །བུད་མེད་རིན་ཆེན་འཁོར་དང་འགྲོགས་བགྱིས་ཏེ། །ཡུལ་ལ་དགའ་ཞིང་མོས་པ་བསྐྱེད་པར་གྱིས། །
91a
༄#། །དཀའ་ཐུབ་ནགས་ན་འཁོད་པའི་དྲང་སྲོང་དག་།དེ་བཏང་ནས་ནི་ཕྱིར་ཡང་འདི་དག་ན། །དཀའ་ཐུབ་བཏང་ཞིང་འདོད་པའི་དགའ་ལ་སྤྱོད། ། འདོད་པ་དེ་དག་བུ་གཅིག་ཁྱོད་ལ་བསྟབས། །དེ་ལྟ་བས་ན་འདོད་པའི་དགའ་ལ་སྤྱོད། །ང་དང་རྒྱལ་སྲིད་ཐམས་ཅད་ཁྱོད་དང་མཐུན། །རྣམ་ཐོས་བུ་ཡི་གནས་དང་འདྲ་བ་ཡི། །གཞལ་མེད་ཁང་གིས་བརྒྱན་ཅན་ཁྱིམ་འདིར་སྤྱོད། །འདི་དག་རྣམས་ཀྱང་མཆོག་གི་གཟུགས་ལྡན་ཞིང ། །ལྷ་མོ་འདྲ་ལ་སྒྱུ་རྩལ་ཚར་ཕྱིན་པ། །རོལ་མོའི་སྒྲ་ཡི་ཚུལ་དང་གླུ་ལ་མཁས། །བསྙེན་བཀུར་སྙོམས་ཤིང་ཡོན་ཏན་ཡིད་ཀྱང་འཕྲོག་།མིག་ནི་པདྨའི་ལོ་མ་འདྲ་བ་སྟེ། །བིམ་པའི་མདོག་འདྲ་མཆུ་མཛེས་ཡིད་དུ་འོང ། །སོ་དང་བཞིན་མདོག་དྲི་མ་མེད་ཅིང་བཟང ། །དཔྲལ་བ་སྨིན་མ་ལེགས་ཤིང་མགུལ་པ་སྡུག་།བརླ་ནི་གླང་པོ་ཆེ་ཡི་སྣ་ཡང་འདྲ། །ཕྲག་སོ་ཤས་རྒྱས་ཐལ་གོང་ལེགས་དང་ལྡན། །ལག་དང་རྐང་པའི་མཐིལ་ནི་ཟངས་ཀྱི་མདོག་།སོར་མོ་བྱིན་པ་ཕྲ་བར་ལེགས་དང་ལྡན། །ལྕེ་ནི་ཟངས་མདོག་འདྲ་བ་སྲབ་ཅིང་ངག་།ཚིག་རན་འཇམ་པར་སྨྲ་བའི་ཚུལ་དང་ལྡན། །སོ་ནི་ཐགས་བཟང་སོ་རྣམས་རད་རོད་མེད། །མཆེ་བ་རབ་དཀར་མཆོག་གི་རྒྱན་དང་ལྡན། །ལྟོ་བ་ཕྱང་ངེར་འདུག་ཅིང་ལྟེ་བ་སྡུག །
91b
སྟ་ཟུར་ཡངས་ཤིང་རྐེད་པ་རྡོ་རྗེ་འདྲ། །བྱིན་པ་གླང་པོ་ཆེ་ཡི་སོ་འདྲ་ཞིང ། །མདའ་རྒྱུ་སྙིང་པོ་ལེགས་པར་སྐྱེས་པ་བཞིན། །དྲེགས་བཅས་གླང་ཆེན་འདྲ་བའི་འགྲོས་དང་ལྡན། །གཞན་དུ་མི་སེམས་ཡིད་ཀྱིས་ཁྱོད་ལ་ལྟ། །རྩེ་བ་འདོད་ཅིང་དར་ལ་བབ་དང་ལྡན། །གཞོན་ནུ་སྙིང་རྗེ་ལྟོས་ལ་རྩེ་བར་བྱོས། །བུ་གཅིག་ཁྱོད་དང་བུད་མེད་འདི་དག་གི་།མདོག་བཟང་བ་དང་དར་ལ་བབ་པ་ཡང ། །ཤིང་གི་རྩེ་མོའི་མེ་ཏོག་བཞིན་ལྷུང་གིས། །ང་རྒྱལ་ཐོང་ལ་འདོད་པ་བསྟེན་པར་གྱིས། །བློ་གྲོས་སྙིང་པོ་ལྡན་དེས་སྨེ་བ་ཡི། །ཕ་དང་འཁོར་རྣམས་ཀུན་ལ་འདི་སྐད་སྨྲས། །ཡབ་ཅིག་ཁྱོད་ནི་མེད་པར་གསུངས་པ་ལགས། །གང་དག་ཚིག་གིས་གྲགས་པ་མ་སྨད་མེད། །ཡོན་ཏན་རྣམས་ལ་མོས་པ་བདག་གི་ཚིག་།བསམ་སྟེ་གཏན་ལ་ཕབ་ལ་རྒྱལ་པོ་གསོན། །ཇི་ལྟར་རྨི་ལམ་ན་ཡང་འདོད་ལ་བདག་།སེམས་མི་དགའ་ཞིང་མ་མོས་དེ་འདྲ་གསོན། །ས་ཡི་བདག་པོས་བཀའ་སྩལ་འདི་དག་ནི། །མཁས་པ་རྣམས་ལ་མཛེས་པ་མ་ལགས་ཏེ། །མི་མཁས་སྐྱེ་བོ་དག་གིས་ཡང་དག་བསམ། །མཁས་པ་རྣམས་ཀྱིས་དེ་དག་རྟག་ཏུ་སྨད། །ལོང་བ་མ་ལགས་ཅི་ཡི་རྒྱུ་ཞིག་གིས། །ལོང་བའི་ཚིག་གིས་ལམ་གོལ་འཛིན་པར་བགྱིད། །ཐང་ལ་གནས་པ་སུ་ཞིག་ཇི་ལྟར་ན། །མགོན་མེད་ཆུས་ཁྱེར་བ་ལ་འདོད་པ་བསྐྱེད། །གྲོལ་བ་ཇི་ལྟ་བུར་ན་བཅིངས་པ་ཡི། །ཚིག་གིས་
92a
༄#། །བཙོན་ར་དེར་ནི་འཇུག་པར་བགྱིད། །ས་མཉམ་གནས་ཤིང་མ་འཁྲུལ་ཇི་ལྟར་ན། །ཉམ་ངར་གནས་ལ་འདོད་པ་སྐྱེད་པར་བགྱིད། །ས་བདག་འདོད་པ་རྣམས་ལ་ཆགས་བཅས་ཤིང ། །འདོད་པའི་ལོངས་སྤྱོད་དག་གི་ཆུས་ཁྱེར་བ། །ལོང་བ་ཆུས་ཁྱེར་བཙོན་རར་གནས་པ་དང ། །ཉམ་ངར་གནས་འདྲར་བདག་ནི་དེ་སྙམ་བགྱིད། །མི་ཡི་བདག་པོ་ཁྱོད་ནི་ལོང་བ་བཞིན། །བདག་ནི་མིག་ཅན་ཁྱད་པར་མཐོང་བ་ལགས། །ཁྱོད་ནི་འདོད་པའི་ཆུ་བོས་ཁྱེར་བ་ལགས། །བདག་ནི་འདོད་པ་རྣམས་ལ་རྣམ་པར་སྨོད། །འདོད་པ་དག་ནི་དུག་གི་ལོ་མ་བཞིན། །སྤྲུལ་གྱི་མགོ་འདྲ་སྡུག་བསྔལ་བགྱིད་པ་སྟེ། །རྩེ་གསུམ་པ་དང་རལ་གྲི་མདུང་ཐུང་འདྲ། །མེ་ཡི་ཕུང་པོ་ཤིན་ཏུ་འབར་བ་བཞིན། །བློ་གྲོས་སྙིང་པོ་ལྡན་པས་དེ་སྐད་དུ། །སྨྲེ་སྔགས་འདོན་པའི་ཕ་དང་འཁོར་ལ་སྨྲས། །རིན་ཆེན་སྣ་བདུན་དག་ལ་མ་བལྟས་བར། །རྒྱལ་སྲིད་རྣམ་པར་སྤངས་ཏེ་རབ་ཏུ་བྱུང ། །སྤྲུལ་གྱི་པགས་སྙིང་བརྗེས་པ་ཅི་འདྲ་དང ། །ངར་སྣབས་རུས་པའི་ཐལ་བ་བཞིན་སྤངས་ཏེ། །བློ་གྲོས་སྙིང་པོ་ལྡན་པ་ཆགས་མེད་པར། །སྡིག་དང་རྣམ་པར་བྲལ་ཏེ་རབ་ཏུ་བྱུང ། །གཞོན་ནུ་དེ་ལྟར་རབ་ཏུ་བྱུང་གྱུར་ནས། །བློན་པོའི་བུ་ཞིག་རྗེས་སུ་རབ་བྱུང་བ། །མིང་ནི་ཟླ་བས་བྱིན་ཞེས་བྱ་བ་སྟེ། །བློ་
92b
གྲོས་སྙིང་པོའི་རྗེས་སུ་རབ་ཏུ་བྱུང ། །གཞོན་ནུ་དེ་ལྟར་རབ་ཏུ་བྱུང་གྱུར་ནས། །ཚངས་པའི་གནས་པ་བཞི་པོ་བསྐྱེད་ནས་ནི། །གྲོགས་དང་བཅས་པས་མངོན་པར་ཤེས་པ་ལྔ། །མ་ལུས་མཐའ་དག་བསྐྱེད་པར་བྱས་པར་གྱུར། །འདོད་པ་རྣམས་ལ་སྐྱོན་དུ་ལྟ་བས་ན། །མི་ཡི་སེངྒེ་དེ་ནི་འདོད་ཁམས་འདས། །ཚངས་པ་ཡང་དག་ཉིད་ནི་ཐོབ་བྱའི་ཕྱིར། །ཚངས་པའི་འཁོར་ལོ་རབ་ཏུ་བསྐོར་བ་བྱས། །དེ་ལྟར་གཞོན་ནུ་རབ་ཏུ་བྱུང་བས་ན། །ཕ་དེ་བུ་ལ་མ་དད་གྱུར་པ་དང ། །ཟླ་བས་བྱིན་པ་དེ་ཡི་གན་སོང་ནས། །ལེགས་པར་བཤད་པའི་ཚིག་གིས་དགའ་བར་བྱས། །འཆར་ཀ་ཁྱོད་ནི་དེ་ལ་ཇི་སྙམ་སེམས། །དེ་ཚེ་བློ་གྲོས་སྙིང་པོ་གཞན་སྙམ་མམ། །ང་ཉིད་དེ་ཡི་ཚེ་ན་དེར་གྱུར་ཏེ། །འདོད་པའི་ལོངས་སྤྱོད་དོན་དུ་གཉེར་བ་མེད། །འཆར་ཀ་ཁྱོད་ནི་དེ་ལ་ཇི་སྙམ་སེམས། །བདེན་པ་འཕེལ་བ་གཞན་ཞིག་ཡིན་སྙམ་མམ། །ས་བདག་ཟས་གཙང་འདི་ཉིད་དེ་ཡི་ཚེ། །རྒྱལ་བོ་བདེན་པ་འཕེལ་ཞེས་བྱ་བར་གྱུར། །འཆར་ཀ་ཁྱོད་ནི་དེ་ལ་ཇི་སྙམ་སེམས། །རྗེས་སུ་རབ་བྱུང་ཟླས་བྱིན་གཞན་སྙམ་མམ། །ཁྱོད་ཉིད་དེ་ཚེ་དེ་ཡི་དུས་ན་ནི། །བདེན་པ་འཕེལ་བ་དད་པར་བྱེད་པ་ཡིན། །དེ་ལྟ་བས་ན་འཆར་ཀ་ཁྱོད་ཀྱིས་འདིར། །རྒྱལ་པོ་ཟས་གཙང་དད་པ་མངོན་སྐྱེད་ཅིག་།ས་སྐྱོང་བྱེད་པ་འདི་ནི་དད་གྱུར་ན། །སྐྱིད་པ་ཆེན་པོ་ཕུན་སུམ་ཚོགས་
93a
༄#། །པར་འགྱུར། །དེ་ནས་ཚེ་དང་ལྡན་པ་འཆར་ཀས་བཅོམ་ལྡན་འདས་ལ་མི་སྨྲ་བས་ཁས་བླངས་སོ། །དེ་ནས་ཚེ་དང་ལྡན་པ་འཆར་ཀ་ཞག་དེ་འདས་ནས་སྔ་དྲོའི་དུས་ཀྱི་ཚེ་ཆོས་གོས་དང་ཤམ་ཐབས་བོགས། ལྷུང་བཟེད་ཐོགས་ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ངོ ། །དེའི་ཚེ་རྒྱལ་པོ་ཟས་གཙང་མ་བཙུན་མོའི་འཁོར་གྱི་མདུན་ན་ཤཱཀྱ་སྟོང་ཙམ་ཞིག་དང་དགོས་པ་ཞིག་གི་ཆེད་དུ་འདུས་ཤིང་འཁོད་དོ། །རྒྱལ་པོ་ཟས་གཙང་མས་ཀྱང་བཅོམ་ལྡན་འདས་སེར་སྐྱའི་གནས་སུ་བྱོན་ཅིང ། སེར་སྐྱའི་གནས་འདི་ཉིད་ན་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་སོ། །ཞེས་ཐོས་ནས་དེ་འདི་སྙམ་དུ་སེམས་ཏེ། གཞོན་ནུ་དེ་རབ་ཏུ་བྱུང་བས་བདག་ནི། དབང་ཕྱུག་གི་ལོངས་སྤྱོད་ཆེན་པོ་ལས་ཉམས་པར་བྱས་སོ། །གལ་ཏེ་གཞོན་ནུ་དེ་ཁྱིམ་ན་གནས་ན་འཁོར་ལོས་བསྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ། ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་ནི། འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་སྟེ། འདི་བདུན་ནོ། །དེ་ལ་བུ་དཔའ་བ། རྟུལ་ཕོད་པ། ཡན་ལག་
93b
མཆོག་གི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ་སྟོང་ཡང་ཚང་བར་འགྱུར་ཞིང ། དེས་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་ཡང་ཆད་པ་མེད་ཅིང་མཚོན་གྱིས་བདའ་བ་མེད་ལ། མཉམ་སྟེ་མི་མཉམ་པ་མེད་ཅིང་ཆོས་དང་མཐུན་པས་ལེགས་པར་ཕབ་ནས་བསྐལ་པ་རྫོགས་པར་ལེགས་པར་བསྐྱངས་པར་འགྱུར་བ་ཞིག་སྟེ། དེ་ལྟར་གྱུར་ན།་བདག་ཅག་ཀྱང་འཁོར་ལོས་བསྒྱུར་བའི་རྒྱལ་སྲིད་ལ་དབང་ཕྱུག་གི་དབང་དང་ལྡན་ཞིང ། རིམ་གྲོར་བྱས་པ་དང ། བཀུར་སྟིར་བྱས་པ་དང ། བསྟི་སྟང་དུ་བྱས་པ་དང ། མཆོད་པར་བྱས་པ་དང ། དབང་ཕྱུག་གི་དབང་ཆེན་པོ་ཡང་རྙེད་པར་འགྱུར་བ་ཞིག་ན། ད་ལྟར་བདག་ཅག་ནི། གཞོན་ནུ་དེ་རབ་ཏུ་བྱུང་བས་དེ་ལྟ་བུའི་ལོངས་སྤྱོད་ཀྱི་དབང་ཆེན་པོ་དང་བྲལ་བར་གྱུར་ཏོ་སྙམ་མོ། །དེས་དེ་སྙམ་དུ་བསམ་ནས་ཤཱཀྱ་རྣམས་ལ་བསྒོ་བ། ངའི་བུ་དེ་ལ་བལྟ་བའམ། བསྙེན་བཀུར་བྱེད་པར་སུའང་མ་འགྲོ་ཞིང ། ལ་ལ་ཞིག་ངའི་བུ་དེ་ལ་བལྟ་བའམ། བསྙེན་བཀུར་བྱ་བའི་ཕྱིར་འགྲོ་ན་དེའི་ལུས་ལ་གནོད་པའི་ཆད་པས་གཅད་དོ། །དེའི་ཚེ་ཤཱཀྱའི་བུ་དགའ་བའི་བཞིན་ཞེས་བྱ་བ་ཞིག་འཁོར་དེ་ནས་བྱུང་ནས་སོང་བར་གྱུར་ཏེ། ཤཱཀྱའི་བུ་དགའ་བའི་བཞིན་གྱིས་ཚེ་དང་ལྡན་པ་འཆར་ཀ་རྒྱང་རིང་པོ་ནས་འོངས་པ་མཐོང་ནས་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ་ཚེ་དང་
94a
༄#། །ལྡན་པ་འཆར་ཀ་ལ་ཡང་དག་པར་མགུ་བར་བྱས་ནས་ཚེ་དང་ལྡན་པ་འཆར་ཀ་ཚུར་སྤྱོན། ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་ཀ་ཡུན་ཀྱང་རིང་ཞིག་ནས་བྱོན་ཏོ། །ཚེ་དང་ལྡན་པ་འཆར་ཀ་།བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་སམ། མི་བདེ་བར་མི་མངའ་འམ། དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས། བདེ་བར་བྱོན་ཏམ། ཤིན་ཏུ་མ་མཉེལ་ཏམ། བསོད་སྙོམས་ཀྱིས་འོ་མ་བརྒྱལ་ཏམ། དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་ཤཱཀྱའི་བུ་དགའ་བའི་བཞིན་ལ་འདི་སྐད་ཅེས་སྨྲས་སོ། །དགའ་བའི་བཞིན། དེ་དེ་བཞིན་ཏེ། བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ། །བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་མེད་དོ། །ཤཱཀྱའི་བུ་ཤིན་ཏུ་ལེགས་པར་སད་ཀྱིས་ཀྱང་ཤཱཀྱའི་བུ་དགའ་བའི་བཞིན་ཚེ་དང་ལྡན་པ་འཆར་ཀ་དང་ལྷན་ཅིག་དབེན་པ་ན་འཁོད་པ་མཐོང་ནས་འཁོར་དེ་ནས་བྱུང་སྟེ་ཚེ་དང་ལྡན་པ་འཆར་ཀ་ག་ལ་བ་དེར་སོང་ནས་ཚེ་དང་ལྡན་པ་འཆར་ཀ་ལ་ཡང་དག་པར་མགུ་བར་བྱས་ཏེ། ཚེ་དང་ལྡན་པ་འཆར་ཀ་ཚུར་
94b
སྤྱོན།་ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་ཀ་ཡུན་ཀྱང་རིང་ཞིག་ནས་བྱོན་ཏོ། །ཚེ་དང་ལྡན་པ་འཆར་ཀ་།བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་སམ། མི་བདེ་བ་མི་མངའ་འམ། དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས། བདེ་བར་བྱོན་ཏམ། ཤིན་ཏུ་མ་མཉེལ་ཏམ།་བསོད་སྙོམས་ཀྱིས་འོ་མ་བརྒྱལ་ཏམ། དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་ཤཱཀྱའི་བུ་ཤིན་ཏུ་ལེགས་པར་སད་ལ་འདི་སྐད་ཅེས་སྨྲས་སོ། །ཤིན་ཏུ་ལེགས་པར་སད། དེ་དེ་བཞིན་ཏེ། བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ།། བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་མེད་དོ། །ཤཱཀྱའི་བུ་མྱ་ངན་མེད་དང ། མྱ་ངན་བྲལ་གྱིས་ཀྱང་ཚེ་དང་ལྡན་པ་འཆར་ཀ་དང ། ཤཱཀྱའི་བུ་དགའ་བའི་བཞིན་དང ། ཤཱཀྱའི་བུ་ཤིན་ཏུ་ལེགས་པར་སད་གནས་དབེན་པ་ན་འཁོད་པ་མཐོང་ནས་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ། ཚེ་དང་ལྡན་པ་འཆར་ཀ་ལ་ཡང་དག་པར་མགུ་བར་བྱས་ནས་ཚེ་དང་ལྡན་པ་འཆར་ཀ་ཚུར་སྤྱོན། ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་ཀ་ཡུན་ཀྱང་རིང་ཞིག་ནས་
95a
༄#། །བྱོན་ཏོ། །ཚེ་དང་ལྡན་པ་འཆར་ཀ་།བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་སམ། མི་བདེ་བ་མི་མངའ་འམ། དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས་བདེ་བར་བྱོན་ཏམ། ཤིན་ཏུ་མ་མཉེལ་ཏམ། བསོད་སྙོམས་ཀྱིས་འོ་མ་བརྒྱལ་ཏམ། དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་ཤཱཀྱའི་བུ་མྱ་ངན་མེད་དང ། མྱ་ངན་བྲལ་ལ་འདི་སྐད་ཅེས་སྨྲས་སོ། །མྱ་ངན་མེད་དང་མྱ་ངན་བྲལ། བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ། །བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་མེད་དོ། །དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དག་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་བྱེད་དོ། །དེ་སྐད་ཅེས་སྨྲས་པ་དང ། ཤཱཀྱའི་བུ་དེ་དག་གིས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །བཙུན་པ་འཆར་ཀ། བདག་ཅག་ནི། བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བར་འདོད་ན། བདག་ཅག་གིས་དེ་ལྟར་མ་ནུས་སོ། །དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་ཟས་གཙང་
95b
མས་ངའི་བུ་ལ་བལྟ་བའམ། བསྙེན་བཀུར་བྱ་བའི་ཕྱིར་སུ་ཡང་མ་འགྲོ་ཞིག་།ལ་ལ་ཞིག་དེ་ལ་བལྟ་བའམ། བསྙེན་བཀུར་བྱ་བའི་ཕྱིར་སོང་ན། ལུས་ལ་གནོད་པའི་ཆད་པས་གཅད་དོ། །ཞེས་བཀའ་སྩལ་ཏོ། །དེ་བས་ན་འཕགས་པ་འཆར་ཀ་དེ་ལྟར་བདག་རྒྱལ་པོས་འཇིགས་པའི་ཕྱིར་བཅོམ་ལྡན་འདས་ལ་བལྟ་བའམ། བསྙེན་བཀུར་བྱེད་དུ་འདོང་བར་མི་ནུས་སོ། །དེ་ནས་ཚེ་དང་ལྡན་པ་འཆར་ཀ་འདི་སྙམ་དུ་སེམས་ཏེ། ཀྱེ་མ་རྒྱལ་པོ་ཟས་གཙང་མ་འདི་ནི། ཤིན་ཏུ་ང་རྒྱལ་གྱིས་ནོན་པར་གྱུར་ན། ཇི་ལྟར་བདག་གིས་དེའི་དྲུང་དུ་འགྲོ་བར་བྱ་སྙམ་ནས་དེས་འདི་སྙམ་དུ་བསམ་མོ། །འོན་ཀྱང་བདག་གིས་ནམ་མཁའ་ལ་རྫུ་འཕྲུལ་གྱིས་ཤིང་རྟ་ལ་བདུན་སྲིད་ཀྱི་སྟེང་གི་བར་སྣང་ལ་སྐྱིལ་མོ་ཀྲུང་བཅས་ཏེ་རྒྱལ་པོ་ཟས་གཙང་མའི་གན་དུ་འགྲོ་བར་བྱའོ། །སྙམ་ནས་དེ་ནས་ཚེ་དང་ལྡན་པ་འཆར་ཀས་ཏིང་ངེ་འཛིན་གྱི་རྣམ་པ་དེ་ལྟ་བུ་ལ་མཉམ་པར་བཞག་སྟེ། སེམས་མཉམ་པར་བཞག་པ་དེས་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ནས་བར་སྣང་ལ་སྐྱིལ་མོ་ཀྲུང་བཅས་ཏེ་རྒྱལ་པོ་ཟས་གཙང་མ་ག་ལ་བ་དེར་སོང་ངོ ། །རྒྱལ་པོ་ཟས་གཙང་མས་ཀྱང་ཚེ་དང་ལྡན་པ་འཆར་ཀ་རྒྱང་རིང་པོ་ནས་ནམ་མཁའ་ལ་ཤིང་རྟ་ལ་བདུན་སྲིད་དུ་འཕགས་ཏེ་རྫུ་འཕྲུལ་གྱིས་བར་སྣང་ལ་སྐྱིལ་མོ་ཀྲུང་བཅས་ཤིང་འོང་བ་མཐོང་ནས་དེ་ལ་ཐལ་མོ་སྦྱར་ཏེ་
96a
༄#། །ཚིགས་སུ་བཅད་ནས་སྨྲས་པ། ཚོན་བསྒྱུར་གོས་ཅན་ཁྱོད་ནི་གང་ནས་འོངས། །ཁྱོད་ལ་ཅི་དགོས་མྱུར་དུ་སྨྲ་བར་བྱོས། །ཁྱོད་ལ་གང་དགོས་དེ་ཡང་མྱུར་དུ་སྦྱིན། །བརྟུལ་ཞུགས་གྲུབ་པ་མཐོང་བར་ཤིན་ཏུ་དཀའ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སླར་སྨྲས་པ། རྒྱལ་པོ་བདག་ནི་ཁྱོད་ཀྱི་སྲས་ཀྱི་བུ། །བདག་ལ་ཆོས་དགོས་རྒྱལ་པོ་གང་ན་བཞུགས། །བདག་ནི་དེ་བཞིན་གཤེགས་པའི་བཤོས་སྐྱེལ་ཏེ། ། བདེ་བར་གཤེགས་པ་སྐྱོབ་པའི་བཤོས་བཀུར་རོ། །ཡུལ་འཁོར་བདག་པོ་ཆེ་བའི་དཔལ་མངའ་བ། །ཁྱོད་ལ་མི་མཆོག་སྲས་མངའ་གྲགས་པ་ཐོབ། །གཟི་བརྗིད་ཀྱིས་ནི་ཕྱོགས་རྣམས་ཀུན་ཏུ་འབར། །སྟོན་གྱི་ཉི་མའི་གུང་གི་འོད་དང་འདྲ། །ཇི་ལྟར་སྤྲིན་མེད་ནམ་མཁའི་ཉི་མ་ནི། །ཕྱོགས་རྣམས་ཀུན་དུ་འོད་བྱེད་མངོན་པར་འབར། ། དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །ཡེ་ཤེས་མངའ་བས་ཕྱོགས་རྣམས་ཀུན་དུ་སྣང ། །ཇི་ལྟར་སྟོན་གྱི་ཉི་མ་ཤར་བ་ན། །སྲིན་བུ་མེ་ཁྱེར་ཟིལ་གྱིས་མནན་ཅིང་སྣང ། ། དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །མུ་སྟེགས་གཞན་རྣམས་ཀུན་བཅོམ་ལམ་མེར་བཞུགས། །ཇི་ལྟར་ཉི་མས་ཟིལ་ནོན་སྐར་མ་རྣམས། །ཉིན་པར་འོད་སྟོང་ལམ་
96b
མེར་མི་རུང་བ། །དེ་བཞིན་རྒྱལ་པོ་གླང་པོ་ཁྱོད་སྲས་ཀྱིས། །ཟིལ་གྱིས་མནན་པས་མུ་སྟེགས་གཞན་མི་སྣང ། །ཇི་ལྟར་ཉི་མའི་ཟིལ་གནོན་ཟླ་བ་ནི། །ནམ་མཁའི་དབྱིངས་ན་འོད་སྟོང་ཉིད་མི་སྣང ། །དེ་བཞིན་ཁྱོད་སྲས་ཟིལ་མནན་མུ་སྟེགས་རྣམས། །ཉི་མས་ཟིལ་ནོན་ཟླ་བཞིན་གསལ་བ་མེད། །སེངྒེའི་ང་རོ་ཐོས་ནས་ཕྲ་མོ་རྣམས། །ཤུགས་ཀྱིས་རྨོངས་ནས་བསམ་པ་ཇི་བཞིན་དུ། །རི་སུལ་གསེབ་ཏུ་བྱེར་ནས་འཁྲ་ཞིང་གནས། །སྟག་གི་ང་རོ་གཞན་གྱིས་བཟོད་པར་དཀའ། །དེ་བཞིན་རྒྱལ་བ་དྲང་སྲོང་ཆེན་པོའི་གསུང ། །བདག་མེད་ང་རོ་མུ་སྟེགས་གཞན་ཐོས་ན། །ཤེས་རབ་དམན་པ་སྲིད་པའི་རྩེར་ཕྱིན་ཀྱང ། །གསུང་ཐོས་པས་ནི་ཐམས་ཅད་འཇིགས་པར་འགྱུར། །ལྷ་དང་བཅས་པའི་འཇིག་རྟེན་ལོང་བ་ལ། །སྤྱན་དང་ལྡན་པ་དེས་ནི་མིག་ཀྱང་སྩལ། །སྣང་བ་མཛད་ཅིང་རྡུལ་ཀྱང་རྣམ་པར་སྦྱངས། །ཡེ་ཤེས་སྣང་བའི་དཀྱིལ་འཁོར་མངོན་པར་ཤར། །བདེ་དང་མི་བདེ་ལམ་གཉིས་རབ་ཏུ་བསྟན། །ལམ་དང་གོལ་བའི་ལམ་ཡང་རྒྱལ་བས་བསྟན། །ལམ་སྟོར་སྐྱེ་བོ་རྣམས་ནི་ལམ་དུ་བཙུད། །འདམ་དུ་བྱིང་བ་རྣམས་ཀྱང་ཐང་ལ་བཏོན། །ཇི་ལྟར་སྐོམ་པའི་ས་ལ་སྤྲིན་གྱིས་ནི། །སྒང་དང་གཤོང་བཅས་ཆར་གྱིས་ངོམས་པར་བྱེད། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །འགྲོ་
97a
༄#། །བ་ལྷར་བཅས་ཆོས་ཀྱིས་ངོམས་པར་མཛད། །ཇི་ལྟར་ཆར་གྱིས་ངོམས་པའི་རི་སུལ་ནགས། །རྩཝ་དང་གེལ་བ་ནགས་ཚལ་ཤིང་རྣམས་དང་།། འཁྲི་ཤིང་སྡོང་པོ་སྨན་གྱི་རྣམ་པ་དང ། །མེ་ཏོག་སྣ་ཚོགས་ཀྱིས་ནི་ས་མཛེས་པ། །དེ་བཞིན་སྟོབས་བཅུ་མི་འཇིགས་མངའ་བ་དང ། །མ་འདྲེས་བཅོ་བརྒྱད་ཆོས་ལྔའི་སྡོང་པོ་ལ། །ཐམས་ཅད་མཁྱེན་པའི་ཡེ་ཤེས་མེ་ཏོག་དང ། །འབྲས་བུ་སྤྲས་པས་རྒྱལ་པོའི་སྲས་མཛེས་སོ། །ཇི་ལྟར་རྒྱ་མཚོའི་དབུས་ན་ལྷུན་པོའི་རི། །ལྷ་ཡི་གནས་གྱུར་མི་བསྒུལ་རྣམ་པར་མཛེས། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །དགེ་སྦྱོང་རྒྱ་མཚོའི་ནང་ན་རྣམ་པར་མཛེས། །བདེ་སོགས་ཁྱིམ་ཐབ་བརྒྱ་བྱིན་ལྷ་དབང་པོ། །ལྷ་ཡི་སྟན་ལ་འདུག་ན་མཛེས་པ་ལྟར། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །དགེ་སྦྱོང་ཚོགས་ཀྱི་དབུས་ན་རྣམ་པར་མཛེས། །བྱམས་པའི་སྟོབས་ཅན་ཟབ་མོའི་འབྲུག་བསྒྲགས་ཏེ། །ཐུགས་རྗེ་ཆེན་པོའི་གློག་ཕྲེང་རིར་ལྡན་པས། །དྲན་པ་ཉེར་གཞག་ཆར་རྒྱུན་འདབ་འཁྲིགས་ཏེ། །རྒྱལ་བ་ཀླུ་མཆོག་དེ་ནི་ཆོས་ཆར་འབེབས། །ཡོངས་དག་དཀྱིལ་འཁོར་ཚུལ་ཁྲིམས་རབ་ཀྱི་ཟེར། །ཏིང་འཛིན་ཉོན་མོངས་ལྷ་མིན་རབ་འཇོམས་ཤིང ། །ཡེ་ཤེས་ཉི་ཟེར་སྲིད་པའི་སྲེད་པ་སྐེམ། །རྒྱལ་བའི་ཉི་ཆེན་འགྲོ་བར་རྣམ་པར་
97b
མཛེས། །ཏིང་འཛིན་ཚུལ་ཁྲིམས་གཟིངས་དང་གྲུ་ཆེན་ཏེ། །དྲན་པ་ཉེ་བར་གཞག་པའི་ནོར་བུ་རིན་ཆེན་ཚོགས། །བྱང་ཆུབ་ཡན་ལག་རིན་ཆེན་འབྱུང་གནས་བསམ་གཏན་རླབས། །ཐར་པ་འདོད་པས་སངས་རྒྱས་རྒྱ་མཚོ་བསྟེན་པར་བྱ། །ཚུལ་ཁྲིམས་རྣམ་དག་རྩ་བ་བརྟན་པར་ཟུག་།ཏིང་འཛིན་ལོ་མ་དྲན་པ་ཡལ་ག་འདབ། །བྱང་ཆུབ་ཡན་ལག་མེ་ཏོག་སྟོང་པའི་སྡོང ། །བདག་མེད་གྲིབ་ལྡན་རྒྱལ་བའི་སྡོང་པོ་བསྟེན། །ཚུལ་ཁྲིམས་ནགས་མཐའ་བསྟེན་པའི་སྟོབས་ཆེན་པོ། །ཏིང་འཛིན་ཞི་བའི་རི་ཁྲོད་ཕུག་ན་གནས། ། སྟོང་པ་མཚན་མེད་སྨོན་མེད་སྤྱོད་ཡུལ་ཅན། །རྒྱལ་བ་སྟོབས་ཅན་སེངྒེ་ཁྱོད་ཀྱི་སྲས། །ཐུབ་པ་མི་གནས་གནས་ནི་རྣམ་པར་སྟོན། །རྒྱལ་བ་ཁྱུ་མཆོག་བརྗིད་པའི་སྟབས་བཞུད་པས། །བྱིས་པ་སོ་སོ་མུ་སྟེགས་གཞན་བསྔགས་ཏེ། །ཁྱོད་ཀྱི་སྲས་ནི་ཁྱུ་མཆོག་སྒྲ་ཡང་འབྱིན། །ཚུལ་ཁྲིམས་གཏེར་དང་ཡོན་ཏན་དབྱིག་གིས་བརྒྱན། །བསམ་གཏན་དང་བའི་ཞི་གནས་ཉེ་བར་བསྐྱབས། །ཡེ་ཤེས་ཀྱིས་བསྲུངས་ཐར་པའི་སྤྱོད་ཡུལ་ཅན། །རྒྱལ་བ་ཚོང་དཔོན་གཙོ་བོ་ནོར་གཏོང་མཛད། །དགེ་བ་ཡོངས་སུ་བཟུང་བས་སྡིག་བཅོམ་སྟེ། །ཉོན་མོངས་ཞི་མཛད་དགེ་བསྙེན་བཀའ་སྩོལ་པས། །ལྷ་དང་ལྷ་མིན་བཅས་པའི་འཇིག་རྟེན་ན། །རྒྱལ་པོ་ཁྱོད་ཀྱི་སྲས་མཆོག་རྣམ་པར་མཛེས།།
98a
༄#། །ཚུལ་ཁྲིམས་མཆོག་སྤྲིན་བློ་རོས་གློག་འབྱིན་ཅིང ། །ཡན་ལག་བརྒྱད་ལམ་ཆེར་ཆེན་རླན་གྱིས་སྤངས། །ཐུབ་པ་གཅེས་པའི་ལོ་ཏོག་འབྲས་བུ་སྩོལ། །ཁྱོད་ཀྱི་སྲས་ནི་ཀླུ་ཆེན་པོ་འབྲུག་སྒྲ་སྒྲོག་།རྒྱལ་པོས་སྨྲས་པ། གང་ཟག་མཆོག་དེ་བདེ་བར་འོངས་སམ་ཅི། །བསོད་སྙོམས་རྒྱུ་བས་འདྲེན་པ་མ་ངལ་ལམ། །དེ་ཡི་ལུས་ལ་ངལ་བས་དུབ་མེད་དམ། །ཐང་གནས་ཨུཏྤ་ལ་བཞིན་མ་རྙིང་ངམ། །འཆར་ཀས་སྨྲས་པ། རྫུ་འཕྲུལ་སྟོབས་མངའ་བསམ་གཏན་སྤྱོད་ཡུལ་ཅན། །དགྱེས་ཤིང་བདེ་བས་ཡན་ལག་ཡོངས་རྒྱས་ཏེ། །ཐུབ་པ་ཞི་བའི་སྙོམས་འཇུག་གནས་བཅས་པས། །གསེར་གྱི་པདྨ་ལྟ་བུར་རྒྱལ་མ་རྙིང ། །རྒྱལ་པོས་སྨྲས་པ། སྔོན་ཆད་རྫ་རྔ་རྔ་བྲན་སྒྲས་བསྐུལ་ཞིང ། །གླིང་བུའི་སྒྲ་སྙན་ང་རོས་བསྐུལ་བྱས་ཏེ། །བུད་མེད་གླུ་ཡི་དབྱངས་ཀྱིས་བསླང་བསླང་ན། །ད་ལྟར་སད་ན་སྡུག་བསྔལ་མི་མྱོང་ངམ། །འཆར་ཀས་སྨྲས་པ། བསམ་གཏན་དགོངས་པས་ཏིང་འཛིན་ཞི་ཡུལ་ཅན། །ཏིང་འཛིན་སྒྲུབ་པའི་ཚུལ་ལ་མཁས་པ་སྟེ། །མནལ་ལམ་བཞེངས་སམ་བཞུད་དམ་བཞུགས་པ་ན། ། སྡུག་བསྔལ་མི་མངའ་རྒྱལ་བ་རྟག་ཏུ་དགྱེས། །རྒྱལ་པོས་སྨྲས་པ། ཆེ་བའི་རྐྱེན་འོས་ལམ་མཆོག་བཤམས་པ་ལ། །མེ་མར་སྡོང་པོས་ཀུན་ནས་མཐའ་བསྐོར་ཏེ། །བུད་
98b
མེད་ཚོགས་ཀྱིས་བསྐོར་ཅིང་ཉལ་ཉལ་ན། །ད་ལྟ་མུན་པར་ཉལ་ན་ཅིས་མི་རྨོངས། །འཆར་ཀས་སྨྲས་པ། ཐུབ་ཆེན་འཕགས་པ་གཟིམས་ལམ་གཟིམས་པ་ནི། །བྱམས་པའི་གདན་བཏིང་ཐུགས་རྗེས་བདེ་བར་བཞེངས། །དགའ་བས་གནས་པས་དགྱེས་དང་ལྡན་པས་ན། །སྲིད་མེད་བཏང་སྙོམས་ཅན་ལ་རྨོངས་མི་མངའ། །རྒྱལ་པོས་སྨྲས་པ། ཤཱཀྱ་དཔའ་བོས་དེ་རྟག་མདུན་དུ་བདར། །བསྟན་བཅོས་མཁས་དང་རྩེ་ཞིང་དགའ་བྱས་ཏེ། །གཞལ་མེད་ཁང་འདྲའི་ཁྱིམ་དུ་དགའ་བྱས་ན། །ང་ཡི་བུ་དེ་ནགས་མཐར་ཇི་ལྟར་དགའ། །འཆར་ཀས་སྨྲས་པ། ཆོས་ཀྱི་བྱུང་བ་ཞི་སེམས་ལྡན་རྣམས་ཀྱིས། །ཞི་བའི་ཐུགས་མངའ་དེ་རྟག་མདུན་དུ་བདར། །ཞི་བའི་དགོན་པར་ཞི་བ་བསྟན་མཛད་པས། ། སྟོན་པ་འཇིགས་བྲལ་དེ་ནི་དེར་དགྱེས་སོ། །རྒྱལ་པོས་སྨྲས་པ། སྔོན་ཆད་གཞོན་ནུ་ཁྱིམ་ན་གནས་པའི་ཚེ། །ཡན་ལག་སྤོས་ཀྱི་འབྲུ་མར་ཞིམ་བྱུགས་ཏེ། །རྒྱལ་པོའི་རྐྱེན་དུ་འོས་པས་ཁྲུས་བྱས་ན། །ནགས་ཀྱི་མཐའ་ན་ཐུབ་པ་སུ་ཡིས་བཀྲུ། །འཆར་ཀས་སྨྲས་པ། ཁྲིམས་གཙང་འབབ་སྟེགས་ཆོས་ཆུ་རྫིང་བུ་སྟེ། །ཐུབ་པ་དེ་བཀྲུ་གཞན་ཡང་དཀྲུ་བ་མཛད། །སྐུ་ལ་མི་གཤེར་སྲས་དང་བཅས་སུ་འབོག་།རང་ཡང་རྒལ་ལ་སྐྱེ་བོ་ཕལ་ཆེན་སྒྲོལ། །རྒྱལ་པོས་སྨྲས་པ། གསེར་གྱི་སྐུད་པ་ནོར་བུའི་ཕྲེང་བས་
99a
༄#། །བརྒྱན། །རྒྱལ་པོའི་རྐྱེན་འོས་གོས་མཆོག་བཟང་པོ་གྱོན། །ཙནྡན་ཞིམ་པོས་ཤིང་འདབ་ལེགས་པར་བྲིས། །ནགས་ཆེན་དེ་གསེབ་ཐུབ་པ་སུ་ཡིས་བརྒྱན། །འཆར་ཀས་སྨྲས་པ། ཚུལ་ཁྲིམས་སྤོས་བྱུགས་ཡོན་ཏན་ཕྲེང་བས་བརྒྱན། །ཁྲེལ་ཡོད་ན་བཟའ་ཏིང་འཛིན་བསམ་གཏན་བརྒྱན། །མངོན་ཤེས་རིག་པ་རྣམ་ཐར་བརྒྱན་པའི་སྐུ། །རྣམ་གྲོལ་གཟི་མངའ་ཐུབ་པ་ནགས་ན་མཛེས། །རྒྱལ་པོས་སྨྲས་པ། རྩེ་གཉིས་མཚོན་དང་རལ་གྲི་མཚོན་ཐོགས་པའི། །དཔའ་བོ་གཡུལ་དུ་འོངས་པས་ལུས་བསྲུངས་ཏེ། །བླ་རེ་གདུགས་ཀྱིས་རྟག་ཏུ་དགབ་དགབ་པ། །གཅིག་པུ་ནགས་ན་འདུག་ན་སུ་ཡིས་བསྲུང ། །འཆར་ཀས་སྨྲས་པ། བྱམས་པའི་སྟོབས་ཀྱིས་ཐུབ་པ་ཡོངས་བསྲུངས་ཏེ། །དེ་དཔུང་ཡེ་ཤེས་ཉན་ཐོས་ཞམ་རིང་གཡོག་།ཡོན་ཏན་ཚོགས་ལ་ངེས་པས་འཇིགས་མི་མངའ། །སྟོབས་བཅུ་དགྱེས་པ་མངའ་ཞིང་མི་འཇིགས་བརྙེས། །རྒྱལ་པོས་སྨྲས་པ། ང་ཡི་བུ་ཡི་ཡོན་ཏན་ཁྱོད་ཀྱིས་སྨྲས། །ཆོས་ལེགས་སྤྱོད་ཅིང་དུབ་མེད་བརྗོད་པ་ཐོས། །ཁྱོད་ཀྱང་ཟན་ཟོ་བསོད་སྙོམས་བཀུར་བར་གྱིས། །བདག་ཀྱང་མི་ཡི་དབང་པོ་བལྟར་འགྲོའོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་
99b
སོ། །རྒྱལ་པོ་ཆེན་པོ། བཅོམ་ལྡན་འདས། དེ་ནི། ཚོགས་ཀྱི་སློབ་དཔོན། ཚོགས་ཀྱི་མཆོག་།དགེ་སྦྱོང་གི་ཚོགས་ཡོངས་སུ་སྡུད་པ་དྲང་སྲོང་ཆེན་པོ་སྟེ། དགེ་སྦྱོང་གི་ཚོགས་ཀྱི་ནང་ན་བཞུགས་ན། དགེ་སྦྱོང་གི་རྒྱལ་པོ་ལྷམ་མེ། ལྷན་ནེ། ལྷང་ངེའོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། ཟླ་བ་ཡར་གྱི་ངོ་ཚེས་བཅོ་ལྔ་ལ་ཟླ་བ་ཉ་སྟེ་ཡོངས་སུ་རྒྱས་པའི་ཚེ་སྐར་མའི་ཚོགས་ཀྱིས་ཀུན་ནས་བསྐོར་བ་ནི། ལྷམ་མེ། ལྷན་ནེ། ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན། ལྷམ་མེ། ལྷན་ནེ། ལྷང་ངེའོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། ཉི་མ་ནི། སྔོན་གྱི་དུས་ན་ཤིན་ཏུ་ལྷམ་མེ། ལྷན་ནེ། ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན། ཤིན་ཏུ་ལྷམ་མེ། ལྷན་ནེ། ལྷང་ངེའོ། །འདི་ལྟ་སྟེ། དཔེར་ན། རིའི་རྒྱལ་པོ་རི་རབ་རྒྱ་མཚོའི་ནང་ན་འདུག་པ་ནི། ལྷམ་མེ། ལྷན་ནེ། ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན། ལྷམ་མེ། ལྷན་ནེ། ལྷང་ངེའོ། །འདི་ལྟ་སྟེ། དཔེར་ན། ལྷའི་དབང་པོ་བརྒྱ་བྱིན་ནི། ཆོས་བཟང་ལྷའི་མདུན་ས་ན་གནས་ན། ལྷམ་མེ། ལྷན་ནེ། ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན། ལྷམ་མེ། ལྷན་ནེ།
100a
༄#། །ལྷང་ངེའོ། །འདི་ལྟ་སྟེ། དཔེར་ན། ལྷའི་བུ་རབ་འཐབ་བྲལ་དང ། ལྷའི་བུ་ཡོངས་སུ་དགའ་ལྡན་དང ། ལྷའི་བུ་རབ་འཕྲུལ་དགའ་དང ། ལྷའི་བུ་གཞན་འཕྲུལ་དབང་བྱེད་ལྷའི་ཚོགས་ཀྱི་ནང་ན་གནས་ན། ལྷམ་མེ། ལྷན་ནེ། ལྷང་ངེའོ། །དེ་བཞིན་དུ་བཅོམ་ལྡན་འདས་ཀྱང་དགེ་སྦྱོང་གི་ཚོགས་ཀྱི་ནང་ན་བཞུགས་ན།་ལྷམ་མེ། ལྷན་ནེ། ལྷང་ངེའོ། །འདི་ལྟ་སྟེ། དཔེར་ན། མི་མཇེད་ཀྱི་བདག་པོ་ཚངས་པ་ནི། ཚངས་པ་བྱེ་བ་ཕྲག་སྟོང་གིས་བསྐོར་ན། ལྷམ་མེ། ལྷན་ནེ། ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན། ལྷམ་མེ། ལྷན་ནེ། ལྷང་ངེའོ། །དེ་ནས་རྒྱལ་པོ་ཟས་གཙང་མ་བཅོམ་ལྡན་འདས་ཀྱི་ཡོན་ཏན་དེ་ལྟ་བུ་བརྗོད་པ་འདི་ཐོས་ནས་འདི་སྙམ་དུ་སེམས་ཏེ། འདི་ནི། བཅོམ་ལྡན་འདས་དེའི་ཉན་ཐོས་སུ་ཟད་ན། འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ་འདི་ལྟར་དབང་ཆེ་བར་གྲགས་ན། བཅོམ་ལྡན་འདས་ཐོག་མ་བཙས་པ་ཉིད་ཀྱི་ཚེ་ས་ཆེན་པོ་འདི་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ། རབ་ཏུ་འགུལ། ཀུན་ཏུ་རབ་ཏུ་འགུལ། ལྡེག་།རབ་ཏུ་ལྡེག་།ཀུན་ཏུ་རབ་ཏུ་ལྡེག་།ཆེམ་ཆེམ། རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་
100b
ཆེམ།་འུར་འུར། རབ་ཏུ་འུར་འུར། ཀུན་ཏུ་རབ་ཏུ་འུར་འུར། འཁྲུགས། རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་ཤིང ། སྣང་བ་དཔག་ཏུ་མེད་པ་བྱུང་བ་ལྟ་ཅི་སྨོས། བཙས་མ་ཐག་ཏུ་སུས་ཀྱང་མ་བརྟེན་པར་ས་ལ་གོམ་བ་བདུན་པོར་བ་དང ། སྟེང་གི་བར་སྣང་ལས་ཆུའི་རྒྱུན་གྲང་དྲོ་རྣམ་པ་གཉིས་བྱུང་སྟེ། དེ་གཉིས་ཀྱིས་ཁྲུས་བྱས་པ་དང ། དེའི་ཚེ་ལྷའི་ཁྲི་བཟང་པོ་དབུས་གསེར་ལས་བྱས་པ་བྱུང་བ་དང ། སྟེང་གི་བར་སྣང་ལས་ལྷའི་གདུགས་རྔ་ཡབ་དང་བཅས་པ་བྱུང་བ་ལྟའང་ཅི་སྨོས། བཙས་མ་ཐག་ཏུ་ལྷ་ཐམས་ཅད་ཕྱག་འཚལ་བར་གྱུར་པ་དང ། གང་གི་ཚེ་བཙས་ནས་གང་གི་ཚེ་མངོན་པར་བྱུང་བ་དེའི་བར་དུ་ནམ་ཡང་འཁྲུལ་པ་མེད་པ། རྟག་ཏུ་དམ་བཅས་པ་ལ་བརྟན་བ། ཇི་སྐད་སྨྲས་པ་དེ་ལྟར་བྱེད་པ། རྟག་ཏུ་རྒྱུན་མི་གཅོད་པར་བརྩོན་འགྲུས་བརྟན་པ། ཡང་དག་པར་སྨྲ་བ། སླུ་བ་མེད་པ་ལྟ་ཅི་སྨོས། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ་བརྒལ་ནས་བསྒྲལ་བར་བྱའོ། །ཞེས་སྨྲས་པ་ལྟ་ཅི་སྨོས་སྙམ་སྟེ། དེས་དེ་ལྟར་བཅོམ་ལྡན་འདས་བྱང་ཆུབ་སེམས་དཔར་གྱུར་པའི་དམ་བཅས་པ་དེ་དྲན་ནས་ཚིགས་སུ་བཅད་པ་འདི་དག་སྨྲས་སོ། །བློ་མཆོག་ལྡན་པ་གང་ཞིག་བལྟམས་མ་ཐག་།ནོར་པ་མེད་པའི་
101a
༄#། །གསུང་ནི་བརྗོད་མཛད་དེ། །གང་ཞིག་ལ་ནི་བདེན་པའི་གསུང་མངའ་བ། །དེ་ལ་མཁས་པ་སུ་ཞིག་ཡིད་མི་ཆེས། །གང་ཞིག་བལྟམས་པར་གྱུར་མ་ཐག་ཉིད་དུ། །འཇིག་རྟེན་གཙོ་བོར་འགྱུར་བར་བྱའོ་ཞེས། །མགོན་འོས་མཉམ་པ་མེད་པའི་གསུང་བརྗོད་པ། །དེ་ལ་མཁས་པ་སུ་ཞིག་ཡིད་མི་ཆེས། །སུ་ཞིག་རྨི་ལམ་རྨི་བའི་དུས་ན་ཡང ། །རྫུན་གྱི་ཚིག་ནི་ནམ་ཡང་མ་གསུངས་ཏེ། །ཇི་སྐད་གསུངས་པ་དེ་དག་མཛད་མཛད་པ། །དེ་ལ་མཁས་པ་སུ་ཞིག་ཡིད་མི་ཆེས། །གསེར་གྱི་ཕུང་པོ་གངས་རིར་མཉམ་པ་ཡིས། །གང་ཞིག་ཆགས་པར་བྱ་བར་མ་ནུས་ཤིང ། །གང་ཞིག་ཆགས་ལས་རྣམ་པར་འདས་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། ། མཚོན་རྣོན་འདྲ་བའི་དག་རྩུབ་ཚིག་རྣམས་ཀྱིས། །གང་ཞིག་ཁྲོ་བར་བྱ་བར་མ་ནུས་ཤིང ། །ཞེ་སྡང་དངོས་པོ་ལས་ནི་རབ་འདས་པ། །དེ་ལ་མཁས་པ་སུ་ཞིག་ཡིད་མི་ཆེས། །ཆགས་པར་འགྱུར་དང་ཞེ་སྡང་རྨོངས་འགྱུར་བས། །གང་ཞིག་ཐུལ་བར་ནུས་པར་མ་གྱུར་ཏེ། །ཤེས་རབ་རྒྱལ་པོ་དང་ནི་ལྡན་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །འདོད་པའི་དགའ་དང་བདེ་རྣམས་དུ་མ་དང ། །ལོངས་སྤྱོད་དག་ལ་རྟོག་པའི་རྣམ་པ་ཡིས། །གང་ཞིག་བཅིང་བར་ནུས་པར་མ་གྱུར་པ། །དེ་ལ་མཁས་པ་
101b
སུ་ཞིག་ཡིད་མི་ཆེས། །རྨད་དུ་བྱུང་བ་རྣམ་པ་བརྒྱད་དག་གིས། །ངོ་མཚར་འཛིན་འཇུག་ནམ་ཡང་མ་ནུས་ཏེ། །དཔལ་སྟུག་ལྡན་ཞིང་ལག་ཏུ་མི་དམ་པ། །དེ་ལ་མཁས་པ་སུ་ཞིག་ཡིད་མི་ཆེས། །མཁས་པ་དག་གིས་བརྗོད་པའི་ཚིག་སྙན་པ། །རྣམ་པ་སྣ་ཚོགས་དུ་མའི་ཚིག་གིས་ཀྱང ། །གང་ཞིག་བཅིང་བར་ནུས་པར་མ་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །དོན་གྱི་ཚུལ་ལ་བརྩོན་དང་ལྡན་པ་དང ། །ཆོས་དང་འདོད་ལ་ངེས་པའི་ཚིག་རྣམས་ཀྱིས། །གང་ཞིག་བཅིང་བར་ནུས་པར་མ་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །དྲི་མ་མེད་སྟོབས་མཐའ་ཡས་ལྡན་གྱུར་པ། །གང་ཞིག་གྲོང་ཁྱེར་མཆོག་ནས་འབྱུང་བའི་ཚེ། །དཔུང་རྣམས་ཀྱིས་ནི་ཐུབ་པར་མ་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །བྱང་ཆུབ་དམ་པ་མངོན་པར་བཞེད་པའི་ཕྱིར། །གང་ཞིག་འདོད་པའི་བདེ་བ་སྤངས་ནས་སུ། །འཆི་མེད་རྒྱུ་ཕྱིར་རི་དྭགས་སྤྱོད་མཛད་པ། །དེ་ཡི་གསུང་ལ་སུ་ཞིག་ཡིད་མི་ཆེས། །བྱང་ཆུབ་དམ་པ་མངོན་པར་བཞེད་པའི་ཕྱིར། །ཞེན་པ་མ་ཡིན་སེམས་ཅན་གང་ཞིག་གིས། །ལོ་དྲུག་བར་དུ་དཀའ་ཐུབ་དྲག་སྤྱད་པ། །དེ་ཡི་གསུང་ལ་སུ་ཞིག་ཡིད་མི་ཆེས། །འཇིག་རྟེན་ལ་ནི་ཕན་དང་བདེ་བའི་ཕྱིར། །བྱང་ཆུབ་དམ་པ་དོན་དུ་གཉེར་བ་ན། །ལོ་དྲུག་ལོན་པའི་ཐ་མར་ཚོད་ཁུ་
102a
༄#། །གསོལ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ལ་ལོ་དྲུག་བར་དུ་བདུད་ཀྱིས་ནི། །རྟག་ཏུ་ཕྱི་བཞིན་འབྲངས་ཏེ་གླགས་བཙལ་ཀྱང ། ། དེ་ལ་གླགས་ནི་རྙེད་པར་མ་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་འདོད་ཆགས་ཞེ་སྡང་བྲལ་གྱུར་ཅིང ། །སུ་ལ་ཅུང་ཟད་ཙམ་ཡང་མི་སློང་ལ། ། འཇིག་རྟེན་དག་གི་དོན་ནི་མཛད་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་གཞན་ལ་གསན་པ་མ་མཛད་པར། །རྟོགས་པ་དཀའ་བ་རབ་ཏུ་ཞི་བ་ཡི། ། བྱང་ཆུབ་བླ་མེད་མངོན་རྫོགས་སངས་རྒྱས་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་ཚངས་པ་ཉིད་ཀྱིས་གསོལ་བཏབ་པས། །བཅོམ་ལྡན་འདས་ཀྱིས་དེ་ཡི་ཚིག་གསན་ཏེ། །ཉིད་ཀྱིས་ཆོས་ནི་རབ་ཏུ་བཤད་པ་ན། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་བདག་ལ་ཐུགས་བརྩེ་དོན་གྱི་ཕྱིར། །ཤཱཀྱའི་གྲོང་ཁྱེར་ཁྱིམ་དུ་བྱོན་གྱུར་ཏེ། །ཤཱཀྱའི་ཚོགས་རྣམས་གྲོལ་བར་མཛད་པ་ན། །དེ་ཡི་གསུང་ལ་སུ་ཞིག་ཡིད་མི་ཆེས། །བརྒལ་བར་གྱུར་པའི་བཅོམ་ལྡན་འདས་གང་གིས། །སྔོན་གྱི་ཐུགས་དམ་བཅས་པ་དགོངས་མཛད་དེ། །བདག་ཅག་སྲིད་པའི་རྒྱུན་ལས་སྒྲོལ་མཛད་པ། །དེ་ཡི་གསུང་ལ་སུ་ཞིག་ཡིད་མི་ཆེས། །དེ་དུས་ང་བབ་དེ་ལྟར་དུས་མཁྱེན་པས། །བཅོམ་
102b
ལྡན་འདས་ཀྱིས་དེ་ཡི་དུས་མཁྱེན་ཏེ། །འདྲེན་པ་དུས་སུ་ཐུགས་བརྩེ་མཛད་པ་པོ། །དེ་ཡི་གསུང་ལ་སུ་ཞིག་ཡིད་མི་ཆེས། །མི་ཡི་འདྲེན་པ་ཡི་ནི་སྐུ་མཆོག་ལ། །བལྟ་བའི་དོན་དུ་བདག་ནི་འགྲོ་བྱ་ཞེས། །རྒྱལ་པོ་དེས་ནི་རང་གི་སེམས་ཀྱིས་སུ། །དེ་སྙམ་དུ་ནི་རྗེས་སུ་བསམ་པ་བྱས། །དེ་ནས་རྒྱལ་པོ་ཟས་གཙང་མས་དེ་ལྟར་རིང་ཞིག་རྗེས་སུ་བསམ་ནས་ཚེ་དང་ལྡན་པ་འཆར་ཀ་ལ་སྨྲས་པ། དགེ་སློང་ཁྱོད་ལ་ཅི་ཞིག་དགོས། །དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སླར་སྨྲས་པ། རྒྱལ་པོ་ཁྱོད་ཀྱི་དོན་དུ་བསམ་བྱས་ཏེ། །ཁྱོད་ཉིད་དད་པར་བྱ་ཕྱིར་བདག་འདིར་འོངས། །སྟོབས་བཅུ་མངའ་ལ་དད་པའི་སེམས་བསྐྱེད་ན། །སྐྱེས་པ་བུད་མེད་དག་ཀྱང་མཐོ་རིས་འདོང ། །སྟོབས་བཅུ་མངའ་ཞིང་ཡོན་ཏན་ཚད་མེད་ལྡན། །དྲང་སྲོང་ཆེན་པོ་ཤཱཀྱ་དགའ་མཛད་པ། །འདིར་སྤྱོན་རྒྱལ་པོ་ཐུགས་དང་སྐྱེད་ཅིག་དང་།། ཁྱོད་ཀྱི་གྲགས་པ་ཚད་མེད་འཇིག་རྟེན་འབྱུང ། །ཁྱོད་ཀྱི་སྲས་ནི་མི་དབང་དམ་པ་སྟེ། །སྟོབས་བཅུ་ཐུགས་རྗེ་ཐུགས་བརྩེ་ཆེ་མངའ་བ། །ཆུ་ཁྲོད་པདྨ་ཇི་བཞིན་ཆགས་མེད་པར། ། སྟོབས་བཅུ་ཆགས་མེད་ཐུགས་མངའ་སྤྱོད་པ་མཛད། །སྲིད་པའི་ཆུ་བོ་བཞི་ལས་བརྒལ་གྱུར་ནས། །འགྲོ་བ་མང་པོ་ཆུ་བོ་ཆེ་ལས་སྒྲོལ། །རྐང་གཉིས་གཙོ་བོ་མི་འཇིགས་ཐང་
103a
༄#། །འདོན་གྱི། །འདྲེན་པ་མི་མཆོག་ལ་ནི་དད་པ་སྐྱེད། །སྲིད་པའི་ཟུག་རྔུ་བཞི་པོ་ཀུན་བཏོན་ཏེ། །སྨན་པའི་གཙོ་བོ་སྐྱེ་རྒུའི་ཟུག་རྔུ་འབྱིན། །གསོལ་བྱེད་པ་མཁས་པ་དམ་པའི་མཆོག་།འདྲེན་པ་མི་མཆོག་ལ་ནི་དད་པ་སྐྱེད། །བདུད་ཀྱི་སྡེ་ཆེན་དཔག་མེད་ཕམ་མཛད་དེ། །ནག་པོའི་ཕྱོགས་རྣམས་སྡེར་བཅས་ཡོངས་མནན་ནས། །མཆོག་ཏུ་ཞི་བའི་བྱང་ཆུབ་རྙེད་གྱུར་གྱི། །འདྲེན་པ་མི་མཆོག་ལ་ནི་དད་པ་སྐྱེད། །འགྲོ་བ་འགྲོལ་ཞིང་ཆོས་ཀྱང་བསྟན་པ་དང ། །འཆི་མེད་ཞི་བ་མི་ལ་བཤད་གསོལ་ཞེས། །མི་དབང་ལ་ནི་ལྷ་དབང་གསོལ་འདེབས་ཀྱི། །འདྲེན་པ་མི་མཆོག་ལ་ནི་དད་བསྐྱེད། །ཕས་ཀྱི་རྒོལ་བའི་ཚོགས་རྣམས་ཟིལ་མནན་ཏེ། །སྟོན་པ་དཔག་ཡས་འཁོར་ལོ་རབ་བསྐོར་ནས། །སེམས་ཅན་བྱེ་བ་ཚད་མེད་འདུལ་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །རྣམ་དག་སྤྱན་མངའ་དེ་ནི་འགྲོ་བ་དག ། མུན་པ་རབ་རིབ་སྟུག་པོས་བསྒྲིབས་པ་ཡི། །མིག་སྦྱོང་རབ་རིབ་སེལ་ཅིང་གསལ་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །རྒ་དང་འཆི་བའི་འཇིགས་པ་ཉོན་མོངས་ལ། །རྒ་ཤི་མེད་མཆོག་མི་ལ་སྟོན་མཛད་ཅིང ། །འཆི་མེད་གནས་སུ་སེམས་ཅན་དོན་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །མེ་ཆེན་གསུམ་གྱིས་
103b
བསྲེགས་པའི་འཇིག་རྟེན་འདི། །མེས་ཚིག་ས་ལ་སྤྲིན་ཆེན་ཆར་པ་བཞིན། །བཞི་གཉིས་དམ་པའི་སྤྲིན་གྱིས་ཆར་འབེབས་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །དྲི་གསུམ་དྲི་མ་སྤངས་ཤིང་སྐྱོན་བསལ་ཏེ། །དྲི་མ་གསུམ་ལས་སྐྱེ་བོ་གྲོལ་མཛད་ཅིང ། །སྟོབས་བཅུ་རྣམ་པར་སྣང་བ་སྐྱེད་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །སྐྱེ་རྒུ་ཀུན་ལ་ཕ་བཞིན་ཐུགས་བརྩེ་བས། །སྟོབས་བཅུ་ཐུགས་རྗེ་མངའ་བ་བྱམས་པར་དགོངས། །ཐུགས་རྗེ་ཐུགས་བརྩེས་སེམས་ཅན་སྒྲོལ་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །བཅོམ་ལྡན་དེ་ནི་མ་དུལ་སེམས་ཅན་འདུལ། །ཐུགས་རྗེ་མངའ་བ་མ་ཞི་ཞི་མཛད་ཅིང ། །རྒོད་པ་རྣམས་ཀྱང་ཉོན་མོངས་ཞི་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །སྐྱེ་བོ་རྣམས་ཀྱི་སྲིད་པའི་རྒྱ་མཚོ་སྐེམ། །རྒྱ་མཚོ་ལ་ནི་ལྷའི་བུ་ཇི་ལྟ་བར། །སྟོབས་བཅུ་ཐུགས་རྗེ་ཆེ་མངའ་སྒྲོལ་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །ཚད་མེད་ཡོན་ཏན་ཚོགས་ཀྱིས་མཛེས་གྱུར་པ། །ཐུགས་རྗེ་ཆེན་པོ་དང་བའི་ཐུགས་ཀྱིས་སྤྱོད། །ཡུན་རིང་འཁྲུགས་པའི་སྐྱེ་བོ་དད་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད། །ནོར་བུ་རིན་ཆེན་ཆུ་དང་བྱེད་པ་བཞིན། །རྒྱལ་བ་སྐྱེ་བ་དང་བར་སྤྱོད་མཛད་ཅིང ། །མི་ཡི་འཐབ་རྙོག་རབ་ཏུ་དང་མཛད་ཀྱི། །འདྲེན་པ་མི་མཆོག་ལ་ནི་དད་པ་སྐྱེད།།
104a
༄#། །ནོར་བུ་རིན་ཆེན་རང་བཞིན་ཡོངས་དག་པ། །མཁས་པའི་སྐྱེ་བོ་དགའ་བ་ཡོངས་སུ་སྐྱེད། །རྒྱལ་བ་དེ་བཞིན་སྐྱོན་བསལ་དག་པའི་ཐུགས། ། མཁས་པའི་སྐྱེ་བོ་དགའ་བ་ཡོངས་སུ་སྐྱེད། །འཇིག་རྟེན་གཙོ་ལ་དད་པ་ཐོབ་གྱུར་ན། །ལྷ་དང་མི་དག་སྡུག་བསྔལ་ཁུར་ཡང་འདོར། །སྲིད་པའི་རྒྱུད་སྤངས་ཞི་བ་མཆོག་ཏུ་འདོང ། །འདྲེན་པ་མི་མཆོག་ལ་ནི་དད་པ་སྐྱེད། །བདག་གིས་ཡོན་ཏན་ཕྱོགས་གཅིག་བརྗོད་པ་ནི། །ནམ་མཁའི་དབྱིངས་ལ་མཁའ་ལྡིང་རྗེས་བཞིན་ཏེ། །བདག་ནི་རྒྱལ་བའི་ཡོན་ཏན་མཐར་ཕྱིན་མིན། །འདྲེན་པ་མི་མཆོག་ལ་ནི་དད་པ་སྐྱེད། །དེ་ནས་རྒྱལ་པོ་ཟས་གཙང་མས་ཚེ་དང་ལྡན་པ་འཆར་ཀ་ལས་ལེགས་པར་བཤད་པ་ཡང་ཐོས། བཅོམ་ལྡན་འདས་བྱང་ཆུབ་སེམས་དཔའ་མཛད་པའི་ཡོན་ཏན་དེ་ལྟ་བུ་ཡང་ཉིད་ཀྱིས་མངོན་དུ་མཐོང ། །སྔོན་བདག་བརྒལ་ནས་སྐྱེས་བུ་ཁྱུ་མཆོག་ཁྱོད་ཀྱང་བསྒྲལ་བར་བགྱིའོ། །ཞེས་དམ་བཅས་པ་ཡང་རྗེས་སུ་དྲན་ནས་དེའི་ཚེ་བཅོམ་ལྡན་འདས་ལ་དད་པ་ཐོབ་པར་གྱུར་ཏོ། །དེ་ལྟར་དད་པ་ཐོབ་པའི་སེམས་ཀྱིས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །དགེ་སློང་ཁྱོད་ནི། ངའི་བུའི་ཆོས་ལས་སྐྱེས་པའི་བུ་ཡིན་ན། ཁྱོད་བདག་ཟན་ཟོ་ལ་བཅོམ་ལྡན་འདས་ཀྱི་བཤོས་ཁྱེར་ཏེ་སོང་
104b
ཞིག་།ད་ཡང་བཅོམ་ལྡན་འདས་ལ་བལྟ་བའི་ཕྱིར་ཕྱི་བཞིན་འོང་ངོ ། །དེ་ནས་ཚེ་དང་ལྡན་པ་འཆར་ཀས་དེ་ལྟར་རྒྱལ་པོ་ཟས་གཙང་མ་མངོན་པར་དད་པར་བྱས་ནས་ཟན་ཟོས་ཏེ་བཅོམ་ལྡན་འདས་ཀྱིས་བཤོས་ཁྱེར་ནས་སོང་ངོ ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།རྒྱལ་པོ་ཟས་གཙང་མ་ནི། དགེ་སློང་འཆར་ཀས་དད་པར་བྱེད་དེ། དེང་སྐྱེ་བོ་ཕལ་པོ་ཆེའི་དོན་དུ་འགྱུར་རོ། །དེ་ནས་ཚེ་དང་ལྡན་པ་འཆར་ཀ་བཅོམ་ལྡན་འདས་ཀྱི་བཤོས་ཁྱེར་ཏེ་བཅོམ་ལྡན་འདས་ག་ལ་བ་དེར་སོང་ནས་བདག་གིས་བྱས་པ་རྣམས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་ལེགས་སོ། །ཞེས་བྱ་བ་གནང་སྟེ། འཆར་ཀ་ལེགས་སོ། །ལེགས་སོ། །དེ་རིང་རྒྱལ་པོ་ཟས་གཙང་མ་དད་པར་བྱས་པས་ཁྱོད་ཀྱིས་བསོད་ནམས་མང་དུ་བསྐྱེད་དོ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།དེ་རིང་དགེ་སློང་འཆར་ཀས་རྒྱལ་པོ་ཟས་གཙང་མ་མངོན་པར་དད་པར་བྱས་པའི་བསོད་ནམས་ཀྱི་ཕུང་པོ་བསྐྱེད་པ་དེ་ལ་གལ་ཏེ་གཟུགས་ཤིག་ཡོད་ན་ནི། ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་རྙེད་ཀྱི་འཇིག་རྟེན་གྱི་ཁམས་སུ་ཡང་བསོད་ནམས་ཀྱི་ཕུང་པོ་དེ་མི་ཤོང་སྟེ། བསོད་ནམས་ཀྱི་ཕུང་པོ་
105a
༄#། །དེ་ནི།་དེ་ཙམ་དུ་དཔག་ཏུ་མེད་དོ། །བམ་པོ་གཉིས་པ། དེ་ནས་བཅོམ་ལྡན་འདས་བཤོས་གསོལ་ནས་ཕྱག་བཅབས། ལྷུང་བཟེད་བཀྲུས་ཏེ་མཚན་མའི་རྣམ་པ་འདི་ལྟ་བུ་མཛད་དོ། །མཚན་མའི་རྣམ་པ་དེ་ལྟ་བུ་མཛད་པས་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་འདི་ལྟ་སྟེ། དཔེར་ན། སྐྱེས་བུ་སྟོབས་དང་ལྡན་པས་ལག་པ་བསྐུམ་པ་ལས་བརྐྱང་པའམ། །བརྐྱང་པ་ལས་བསྐུམ་པ་ཙམ་གྱིས་རྒྱལ་པོ་ཆེན་པོ་རྣམ་ཐོས་ཀྱི་བུ་རང་གི་གནས་ནས་མི་སྣང་བར་གྱུར་ནས་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བྱང་ཕྱོགས་སུ་བརྟེན་ཏེ་སྟེང་གི་བར་སྣང་ལ་གནོད་སྦྱིན་གྱི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ་བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་ཡུལ་འཁོར་སྲུང་ཡང་དྲི་ཟ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཤར་ཕྱོགས་ལོགས་སུ་བརྟེན་ཏེ་སྟེང་གི་བར་སྣང་ལ་དྲི་ཟའི་
105b
ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་འཕགས་སྐྱེས་པོ་ཡང་གྲུལ་བུམ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལྷོ་ཕྱོགས་ལོགས་སུ་བརྟེན་ཏེ་སྟེང་གི་བར་སྣང་ལ་གྲུལ་བུམ་གྱི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་མིག་མི་བཟང་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ནུབ་ཕྱོགས་ལོགས་སུ་བརྟེན་ཏེ་སྟེང་གི་བར་སྣང་ལ་ཀླུའི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། ། ལྷའི་དབང་པོ་བརྒྱ་བྱིན་ཡང་སུམ་ཅུ་རྩ་གསུམ་རིས་ཀྱི་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་དུ་སྟེང་གི་བར་སྣང་
106a
༄#། །ལ་ཐལ་མོ་སྦྱར་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །དེ་བཞིན་དུ་ལྷའི་དབང་པོ་རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དགའ་དང ། ལྷའི་རྒྱལ་པོ་གཞན་འཕྲུལ་དབང་བྱེད་དང ། མི་མཇེད་ཀྱི་བདག་པོ་ཚངས་པ་དང ། ལྷའི་རྒྱལ་པོ་འོད་གསལ་དང ། དགེ་རྒྱས་དང ། འབྲས་བུ་ཆེ་བ་དང ། གནས་གཙང་མའི་རིགས་ཀྱི་ལྷའི་བུ་རྣམས་ཀྱང་གནས་གཙང་མའི་ལྷའི་རིས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་སྟེང་གི་བར་སྣང་ལ་རེ་རེ་ཞིང་ཡང་གཡོག་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ལྷན་ཅིག་ཏུ་བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །ལྷ་མ་ཡིན་གྱི་དབང་པོ་ཐག་བཟང་རིས་ཀྱང་ལྷ་མ་ཡིན་བྱེ་བ་ཁྲག་ཁྲིག་ཕྲག་དྲུག་ཅུ་དང་ལྷན་ཅིག་ཏུ་འདི་ལྟ་སྟེ། དཔེར་ན། སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་པའམ། བརྐྱང་པ་ལས་བསྐུམ་པ་ཙམ་གྱིས་ལྷ་མ་ཡིན་གྱི་དབང་པོ་ཐག་བཟང་རིས་ལྷ་མ་ཡིན་གྱི་གནས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འདུས་པར་གྱུར་ནས་བཅོམ་ལྡན་
106b
འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་ཅིང་འདུས་པར་གྱུར་ཏོ། །བྱའི་རྒྱལ་པོ་འདབ་བཟང་བརྒྱད་ཁྲི་དྲུག་སྟོང་ཡང་རང་རང་གི་གནས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་དང ། དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །གཞན་མུ་སྟེགས་ཅན་ཀུན་ཏུ་རྒྱུ་རྒྱལ་པོའི་ཁབ་ཐ་དད་པ་ནས་ལྷགས་པ་བྱེ་བ་ཕྲག་བརྒྱད་ཅུ་ཡང་འདུས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། ནམ་མཁའ་ཡོངས་སུ་དག་པའི་དབྱིངས་དཀྱིལ་དུ། །མ་ལུས་རྫོགས་གྱུར་ཟླ་བ་ཉ་བ་ཡིས། ། སྐར་མའི་ཚོགས་རྣམས་ཟིལ་གྱིས་མནན་ནས་ནི། །ནམ་མཁའ་ཟླ་བ་བཞིན་དུ་རྣམ་པར་མཛེས། །ཟླ་བ་དྲི་མེད་དཀྱིལ་འཁོར་ཞལ་མངའ་བ། །མུན་པ་རབ་རིབ་སེལ་ཅིང་དྲི་གསུམ་འཇོམས། །རྟོག་གེ་ཅན་ཚོགས་ཟིལ་གྱིས་མནན་ནས་ནི། །མཁའ་ལ་སྐར་མའི་བདག་པོ་བཞིན་དུ་མཛེས། །ཉི་མ་འོད་ཟེར་བརྒྱ་ཡི་ལུས་འཛིན་པ། །སྟོན་གྱི་དུས་ན་མུན་སེལ་རྣམ་མཛེས་ཤིང ། །ལྷ་མིན་ཚོགས་རྣམས་ཟིལ་གྱིས་མནན་ནས་སུ། །ཉི་མ་དེ་ནི་པདྨའི་ཁ་ཡང་འབྱེད། །ཉི་མ་འོད་ཟེར་བརྒྱ་འདྲའི་སྐུ་མངའ་བས། །སྟོང་
107a
༄#། །གསུམ་པོ་དག་ཟིལ་གྱིས་མནན་ནས་ནི། །མི་ཡི་ཉི་མ་རྣམ་པར་མཛེས་གྱུར་ཅིང ། །ཉན་ཐོས་པདྨའི་ཚལ་མཆོག་ཁ་ཡང་འབྱེད། །ལྷ་ཡི་རྒྱལ་པོ་དབང་པོ་བརྒྱ་བྱིན་ནི། །འདུན་སར་ལྷ་ཡི་ཚོགས་ཀྱིས་ཡོངས་བསྐོར་བ། །ལྷ་ཡི་འཁོར་རྣམས་ཟིལ་གྱིས་མནན་ནས་ནི། །བདེ་སོགས་ཁྱིམ་ཐབ་སྦྱིན་ལྡན་རྣམ་པར་མཛེས། །རྐང་གཉིས་དབང་པོ་དཔལ་སྟུག་སྟོབས་བཅུ་ཡང ། །དགེ་སྦྱོང་ཚོགས་ཀྱིས་མདུན་བདར་སྟོང་གསུམ་ནི། །རྟོག་གེ་ཚོགས་རྣམས་ཟིལ་གྱིས་མནན་ནས་ནི། །དགེ་སྦྱོང་ཚོགས་ཀྱི་དབུས་ན་རྣམ་པར་མཛེས། །ལྷ་ཡི་རྒྱལ་པོ་མཐའ་བྲལ་དབང་བྱེད་པ། །མཐའ་བྲལ་བཟང་པོ་ལྷས་མཆོད་བཙུན་བྱས་བ། །མཐའ་བྲལ་བཟང་པོ་ལྷ་ཚོགས་ནང་ཞུགས་ཏེ། །མཐའ་བྲལ་རྣམས་ཀྱི་ནང་ན་འདུག་པ་མཛེས། །གཟི་བརྗིད་མཐའ་ཡས་སྟོབས་བཅུ་མངའ་བ་ཡང ། །ལམ་ངན་ངན་འགྲོར་འགྲོ་བ་ཟིལ་མནན་ནས། །ཡན་ལག་བརྒྱད་པ་རབ་ཏུ་སྟོན་མཛད་ཅིང ། །སྟོབས་བཅུ་ཡོན་ཏན་རྣམས་ཀྱིས་རབ་ཏུ་མཛེས། །ལྷ་ཡི་རྒྱལ་པོ་ཡོངས་སུ་དགའ་ལྡན་དེ། །དགའ་ལྡན་གནས་ན་ལྷ་ཡི་ཚོགས་ཀྱིས་བསྐོར། །ལྷ་ཚོགས་མང་པོ་ཟིལ་གྱིས་མནན་ནས་ནི། །སྔོན་གྱི་དགེ་བའི་རྩ་བས་རབ་ཏུ་མཛེས། །དེ་བཞིན་ལྷ་དང་ལྷ་མིན་བླ་མ་ཡང ། །ལྷ་དང་ལྷ་མིན་ཚོགས་ཀྱིས་
107b
བླ་མར་བྱས། །འཁོར་བརྒྱད་པོ་དག་ཟིལ་གྱིས་མནན་ནས་ནི། །སྐྱེས་བུ་སེངྒེ་དམ་པ་འཇིག་རྟེན་མཛེས། །ལྷ་ཡི་དབང་པོ་བདག་པོ་རབ་འཕྲུལ་ནི། །ལྷ་ཚོགས་མང་པོ་ཟིལ་གྱིས་མནན་ནས་སུ། །རང་གི་བསོད་ནམས་མཐུ་ཡིས་ལྷ་གནས་ན། །གནས་ཤིང་དེ་ནི་རབ་ཏུ་རྣམ་པར་མཛེས། །དེ་བཞིན་ཉོན་མོངས་རྣམས་ལས་རྣམ་གྲོལ་ཞིང ། །སྟོབས་བཅུ་མངའ་བ་ཉོན་མོངས་བྲལ་བ་པོ། །མ་དུལ་འདུལ་མཛད་འདུལ་བའི་རྒྱལ་པོ་ཡང ། །སྐྱེ་བོ་ཟིལ་གྱིས་མནན་ནས་རྣམ་པར་མཛེས། །ལྷ་ཡི་རྒྱལ་པོ་དབང་བསྒྱུར་བྱེད་པ་ནི། །ལྷ་གནས་འདུག་ཅིང་ལྷ་ཚོགས་ཟིལ་མནན་ཏེ། །སྔོན་གྱི་དགེ་བའི་རྩ་བའི་གཟི་བརྗིད་ཀྱིས། །རྣམ་པར་མཛེས་པར་གྱུར་པ་ཇི་བཞིན་དུ། །དེ་ལྟར་རྒྱལ་བ་སྟོབས་བཅུའི་སྤྱོད་པ་དག་།སྔོན་ཆད་སྤྱད་པས་ལྷ་མི་ཟིལ་མནན་ཏེ། །སྔོན་གྱི་དགེ་བའི་རྩ་བའི་གཟི་བརྗིད་ཀྱིས། །རྒྱལ་བ་དེ་ནི་རབ་ཏུ་རྣམ་པར་མཛེས། །ཚངས་པའི་འཇིག་རྟེན་ན་ནི་ཚངས་པ་ཡང ། ། ཚངས་པའི་འཁོར་རྣམས་རང་གིས་ཟིལ་མནན་ཏེ། །ཤིན་ཏུ་སྙན་པ་ཡན་ལག་བརྒྱད་ལྡན་དག་།ཡོངས་སུ་རྗོད་པར་བྱེད་ཅིང་མངོན་དུ་མཛེས། །དེ་ལྟར་རྒྱལ་བ་ཚངས་པ་འདྲར་གྱུར་པ། །དགེ་སྦྱོང་རྒྱལ་པོ་དགེ་སྦྱོང་ཚོགས་རྣམས་ཀྱིས། །མདུན་དུ་བདར་ཏེ་བདེན་པའི་གཏམ་གསུང་ཞིང ། །འཇིག་རྟེན་གསུམ་པོ་དག་ན་མངོན་དུ་མཛེས། །ཉན་པར་འདོད་
108a
༄#། །པ་ལྷ་དང་མི་རྣམས་དང ། །ལྟོ་འཕྱེ་ཆེན་པོ་དག་ནི་འདུས་མཁྱེན་ནས། །སྐྱེས་བུ་ཁྱུ་མཆོག་ཡན་ལག་བརྒྱད་ལྡན་གྱི། །གསུང་རྣམས་ཀྱིས་ནི་རབ་ཏུ་སྟོན་པར་མཛད། །བྱ་ལམ་ནམ་མཁའ་དཔག་པར་ནུས་ཀྱང་སྲིད། །རྒྱ་མཚོ་བུམ་པས་གཞལ་དུ་རུང་ཡང་སྲིད། །རི་རབ་སྲང་ལ་གཅལ་དུ་རུང་ཡང་སྲིད། །སངས་རྒྱས་ཡོན་ཏན་མཐའ་རྟོགས་མི་ནུས་སོ། །རྒྱལ་པོ་མངོན་པར་དད་པར་བྱས་པའི་ལེའུ་སྟེ། དང་པོའོ།། །།དེ་ནས་ཚེ་དང་ལྡན་པ་འཆར་ཀ་སོང་ནས་རིང་པོ་མ་ལོན་པར་རྒྱལ་པོ་ཟས་གཙང་མས་ཤཱཀྱ་རྣམས་ལ་བསྒོ་བ། །གྲོགས་པོ་དག་།འདི་ལྟ་སྟེ། དཔེར་ན། ཉི་མ་འཆར་བའི་སྔ་ལྟས་ནི། གང་འདི་དམར་རེངས་འཆར་བའོ། ། དམར་རེངས་ཤར་ན། ཉི་མ་འཆར་བར་ཤེས་སོ། །གྲོགས་པོ་དག་།དེ་བཞིན་ན་དགེ་སློང་འཆར་ཀ་ཡང་བཅོམ་ལྡན་འདས་ཐམས་ཅད་མཁྱེན་པའི་སྔ་ལྟས་ཡིན་ཏེ། དགེ་སློང་འཆར་ཀས་ཡོན་ཏན་གང་བརྗོད་པ་དེ་དག་ནི། ངེས་པར་ཐམས་ཅད་མཁྱེན་པའི་ཡོན་ཏན་ཡིན་ནོ། །གྲོགས་པོ་དག་།དེ་ལྟ་བས་ན། གཞོན་པའི་མཆོག་རྣམས་སྟོད་དེ་སྟ་གོན་གྱིས་ཤིག་།དེ་ཅིའི་ཕྱིར་ཞེ་ན། དེ་རིང་ཁོ་ན་བདག་ཅག་བཅོམ་ལྡན་འདས་མཆོག་ཏུ་བལྟ་ན་སྡུག་པ་དེ་བལྟ་ཞིང་འདོང་ངོ ། །ལྷ། ལེགས་སོ། །
108b
ཞེས་གསོལ་ནས་ཤཱཀྱ་རྣམས་ཀྱིས་རྒྱལ་པོ་ཟས་གཙང་མའི་ལྟར་མཉན་ཏེ། ཐེག་པའི་མཆོག་རྣམས་མྱུར་དུ་བསྟད་\་Bཥྚཱོཌ?\་དོ། །དེའི་ཚེ་རྒྱལ་པོ་ཟས་གཙང་མ་སེར་སྐྱའི་གནས་དང ། ནྱ་གྲོ་དྷའི་ཀུན་དགའ་ར་བའི་བར་དེ་དག་ཐམས་ཅད་རྒྱལ་པོའི་གཤེགས་ཤུལ་དུ་མཉམ་པར་བྱེད་དུ་བཅུག་ཅིང ། བྱེ་མ་གཙང་མ་བདལ་དུ་བཅུག་སྟེ་ཉམས་དགའ་བ་དང ། མེ་ཏོག་སིལ་མས་གང་བ་དང ། དར་གྱི་ལྡ་ལྡི་དང ། ཕྲེང་བ་མང་པོས་བརྒྱན་ཏེ། སྐབས་སྐབས་སུ་གར་མཁན་དང ། གླུ་མཁན་དང ། གྱད་དང ། བུམ་རྔ་ཐོགས་པ་དང ། སིལ་སྙན་དང ། རོལ་མོ་དང ། ཀླུའི་ཆ་བྱད་དང ། ཡོ་བྱད་ཐམས་ཅད་ཐོགས་པ་དག་བཀོད་པར་གྱུར་ཏོ། །དེ་ནས་རྒྱལ་པོ་ཟས་གཙང་མ་བཞོན་པའི་མཆོག་དང་ཆས་པ་རྣམས་དང ། བདག་ཉིད་ཀྱང་བཞོན་པའི་མཆོག་ལ་ཞོན་ཏེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་བྱུང་ནས་ནྱ་གྲོ་དྷའི་ཀུན་དགའ་ར་བ་ག་ལ་བ་དེར་སོང་ངོ ། །དེའི་ཚེ་ཤཱཀྱ་ལ་ལའི་གཞོན་པའི་མཆོག་ནི། རྣམ་པ་འདི་ལྟ་སྟེ། འདི་ལྟར་ཤིང་རྟ་དག་ཀྱང་སྔོ་ལ། རྟ་སྔོན་པོ་རྣམས་ཀྱིས་དྲངས་ཤིང ། རྒྱན་རྣམས་ཀྱང་སྔོ་ལ་དྲིལ་བུ་གཡེར་ཀའི་དྲ་བས་བརྒྱན་པ། འཁོར་རྒྱན་སྔོན་པོ་ཅན་གྱིས་བསྐོར་བ། །གདུགས་དང ། རལ་གྲི་དང ། ཐོད་དང ། ནོར་བུ་ཅན་གྱི་རྔ་ཡབ་དང ། ལྷམ་རྒྱན་ཅན་སྔོན་པོ་དང་ལྡན་པ། ཁ་
109a
༄#། །ཚར་མ་བཅད་པའི་རས་སྔོན་པོ་གྱོན་ཅིང ། རྒྱན་སྔོན་པོ་ཐོགས་པའི་ཞལ་ཏ་བ་རྣམས་ཞལ་ཏ་བྱེད་པ། རྒྱན་སྔོན་པོ་ཅན་གྱི་ལྕགས་ཐོགས་པ་དང ། ཁྲིད་པ་དུ་མ་དང་ལྡན་པ། རྒྱལ་མཚན་སྔོན་པོ་བསྒྲེང་བ་ཤ་སྟག་སྟེ། ཤིང་རྟ་རེ་རེ་ཞིང་ཡང་རྒྱན་སྔོན་པོ་ཅན་གྱི་མི་བརྒྱ་ཕྲག་རེ་རེས་བསྐོར་བར་གྱུར་ཏོ། །ཤཱཀྱ་ལ་ལའི་བཞོན་པ་རྣམ་པ་འདི་ལྟ་བུ་སྟེ། འདི་ལྟར་ཤིང་རྟ་དག་ཀྱང་ཐམས་ཅད་དུ་སེར་བ་ནས་ཐམས་ཅད་དུ་དམར་བ་དང ། ཐམས་ཅད་དུ་དཀར་བ་དང ། ཐམས་ཅད་དུ་ཁྲ་བ་དང ། ཤིང་རྟ་རེ་རེ་ཞིང་ཡང་རྒྱན་ཁྲ་བོ་ཅན་གྱི་མི་བརྒྱ་ཕྲག་རེ་རེས་བསྐོར་བའི་བར་དུ་སྔ་མ་བཞིན་ནོ། །ཤིང་རྟ་དེ་དག་རེ་རེས་ཕྱི་བཞིན་དུ་ཡང་གླང་པོ་ཆེ་བརྒྱད་ཁྲི་གསེར་གྱི་རྒྱན་གྱིས་བརྒྱན་པ། གསེར་གྱི་རྒྱལ་མཚན་ཅན། གསེར་གྱི་དྲ་བས་གཡོགས་པ་ཤ་སྟག་བཤམས་ཏེ། གླང་པོ་ཆེ་བརྒྱད་ཁྲི་པོ་དེ་དག་གི་སྟེང་དུ་རིན་པོ་ཆེ་སྣ་བདུན་གྱི་ཁང་པ་བརྩེགས་པ། བཀྲ་བ། བལྟ་ན་སྡུག་པ་བརྒྱད་ཁྲི་བཞག་ནས་འདོང་བར་གྱུར་ཏོ། །གླང་པོ་ཆེ་བརྒྱད་ཁྲི་པོ་དེ་དག་གི་ཕྱི་བཞིན་རྟ་གསེར་གྱི་རྒྱན་གྱིས་བརྒྱན་པ། གསེར་གྱི་དྲིལ་བུ་གཡེར་ཁ་བརྒྱུས་པ། རིན་པོ་ཆེ་སྣ་བདུན་གྱི་རྒྱན་དང་ལྡན་པ་བརྒྱད་ཁྲི་བཤམས་ཏེ་འདོང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་
109b
རྒྱལ་པོ་ཟས་གཙང་མ་དང ། ཤཱཀྱ་རྣམས་རྒྱང་རིང་པོ་འོང་བ་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།ཁྱེད་གང་དག་གིས་སུམ་ཅུ་རྩ་གསུམ་གྱི་ལྷ་སྐྱེད་མོས་ཚལ་དུ་འདོང་བ་མ་མཐོང་བ་དེ་དག་གིས་ཤཱཀྱ་སེར་སྐྱའི་གནས་ནས་འོང་བ་འདི་དག་ལ་ལྟོས་ཤིག་།དེ་ཅིའི་ཕྱིར་ཞེ་ན། དགེ་སློང་དག་།ཤཱཀྱ་རྣམས་སེར་སྐྱའི་གནས་ནས་བྱུང་བ་དེ་དག་ནི། སུམ་ཅུ་རྩ་གསུམ་གྱི་ལྷ་སྐྱེད་མོས་ཚལ་དུ་འདོང་བ་དང་རྗེས་སུ་མཐུན་པའོ། །དེ་ལ་འདི་སྐད་ཅེས་བྱ་སྟེ། སེར་སྐྱ་ཞེས་བྱའི་གྲོང་ཁྱེར་དམ་པ་ནས། །རྒྱལ་པོ་ཟས་གཙང་མི་ཡི་ཁྱུ་མཆོག་དེ། །འཁོར་དང་བཅས་ཏེ་ཇི་ལྟར་འོངས་གྱུར་པ། །དེ་ལྟར་བསྟན་གྱི་ཁྱེད་རྣམས་དེ་ཉོན་ཅིག་།ཤིང་རྟ་བརྒྱ་སྟོང་མཆོག་དང་བཅས་པ་དག་།ལེགས་པར་བརྒྱན་ཅིང་མཛེས་པར་སྤྲས་ནས་ནི། །སེར་སྐྱའི་གནས་ཀྱི་གྲོང་ཁྱེར་དམ་པ་ནས། །མི་ཡི་དབང་པོ་དམ་པ་བྱུང་བར་གྱུར། །ཤིང་རྟ་སྔོ་ཞིང་རྒྱན་ཀྱང་སྔོ་བ་དང ། །རྟ་ཡང་སྔོ་ཞིང་སྔོ་བའི་འཁོར་དང་བཅས། །མཚན་མ་ལྔ་པོ་དག་ཀྱང་སྔོ་བ་སྟེ། །དེ་བཞིན་གོས་ཀྱི་དམ་པ་དག་ཀྱང་སྔོ། །ལྕགས་ཀྱང་སྔོ་ཞིང་ཐག་སྲང་རྣམས་ཀྱང་སྔོ། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་སྔོན་པོའི་གོས་ཅན་ཏེ། །རྒྱལ་མཚན་སྔོན་པོ་བསྒྲེང་བས་མཛེས་པར་བྱས། །ཤིང་རྟ་སེར་ཞིང་
110a
༄#། །རྒྱན་ཡང་སེར་བ་དང ། རྟ་ཡང་སེར་ཞིང་སེར་པོའི་འཁོར་དང་བཅས། །མཚན་མ་ལྔ་པོ་དག་ཀྱང་སེར་པོ་སྟེ། །དེ་བཞིན་གོས་ཀྱི་དམ་པ་དག་ཀྱང་སེར། །ལྕགས་ཀྱང་སེར་ཞིང་ཐག་སྲང་རྣམས་ཀྱང་སེར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་སེར་པོའི་གོས་ཅན་ཏེ། །རྒྱལ་མཚན་སེར་པོ་བསྒྲེང་བས་མཛེས་པར་བྱས། །ཤིང་རྟ་དམར་ཞིང་རྒྱན་ཀྱང་དམར་བ་དང ། །རྟ་ཡང་དམར་ཞིང་དམར་པོའི་འཁོར་དང་བཅས། །མཚན་མ་ལྔ་པོ་དག་ཀྱང་དམར་པོ་སྟེ། །དེ་བཞིན་གོས་ཀྱི་དམ་པ་དག་ཀྱང་དམར། །ལྕགས་ཀྱང་དམར་ཞིང་ཐག་སྲང་རྣམས་ཀྱང་དམར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་དམར་པོའི་གོས་ཅན་ཏེ། །རྒྱལ་མཚན་དམར་པོ་བསྒྲེང་བས་མཛེས་པར་བྱས། །ཤིང་རྟ་དཀར་ཞིང་རྒྱན་ཀྱང་དཀར་པ་དང ། །རྟ་ཡང་དཀར་ཞིང་དཀར་པོའི་འཁོར་དང་བཅས། །མཚན་མ་ལྔ་པོ་དག་ཀྱང་དཀར་པོ་སྟེ། །དེ་བཞིན་གོས་ཀྱི་དམ་པ་དག་ཀྱང་དཀར། །ལྕགས་ཀྱང་དཀར་ཞིང་ཐག་སྲང་རྣམས་ཀྱང་དཀར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་དཀར་པོའི་གོས་ཅན་ཏེ། །རྒྱལ་མཚན་དཀར་པོ་བསྒྲེང་བས་མཛེས་པར་བྱས། །ཤིང་རྟ་ཁྲ་ཞིང་རྒྱན་ཀྱང་ཁྲ་བ་དང ། །རྟ་ཡང་ཁྲ་ཞིང་ཁྲ་བའི་
110b
འཁོར་དང་བཅས། །མཚན་མ་ལྔ་པོ་དག་ཀྱང་ཁྲ་བ་སྟེ། །དེ་བཞིན་གོས་ཀྱི་དམ་པ་དག་ཀྱང་ཁྲ། །ལྕགས་ཀྱང་ཁྲ་ཞིང་ཐག་སྲང་རྣམས་ཀྱང་ཁྲ། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་ཁྲ་བའི་གོས་ཅན་ཏེ། །རྒྱལ་མཚན་ཁྲ་བོ་བསྒྲེང་བས་མཛེས་པར་བྱས། །ཤིང་རྟ་དེ་དག་རྣམས་ཀྱི་ཕྱི་བཞིན་དུ། །གླང་པོ་བརྒྱད་ཁྲི་ཚང་བར་བཤམས་པ་ནི། །གསེར་གྱི་རྒྱལ་མཚན་རྣམས་ཀྱིས་ལེགས་པར་བརྒྱན། །གླང་ཆེན་རྣམས་ནི་གསེར་གྱིས་ཚལ་བར་བརྒྱན། །དེ་དག་སྟེང་དུ་རིན་ཆེན་སྣ་བདུན་གྱི། །ཁང་པ་བརྩེགས་པ་དག་ནི་བཞག་ནས་སུ། །རྣམ་པ་སྣ་ཚོགས་རྒྱན་གྱིས་བརྒྱན་པ་ཡི། །ཤིང་རྟ་རྣམས་ཀྱིས་ཕྱི་བཞིན་འབྲང་བར་བཤམས། །དེ་བཞིན་རྟ་མཆོག་སྟོང་ཕྲག་བརྒྱད་ཅུ་ཡང ། །རིན་ཆེན་སྣ་བདུན་རྒྱན་གྱིས་དགའ་བར་བརྒྱན། །རྒྱལ་པོའི་ཆས་གོས་རྒྱལ་པོ་འཆམ་སྟབས་ཅན། །གླང་པོ་དེ་དག་རྣམས་ནི་ཕྱི་བཞིན་འབྲང ། །རབ་ཏུ་དྲི་ཞིམ་ཁ་དོག་ལྔ་པ་ཡི། །མེ་ཏོག་སིལ་མ་རྒྱལ་པོའི་ལམ་དུ་བཀྲམ། །དར་གྱི་ལྡ་ལྡི་དག་ཀྱང་རབ་ཏུ་བྲེས། །བདུག་སྤོས་སྣོད་རྣམས་ཀྱིས་ནི་ལེགས་པར་བརྒྱན། །གླུ་མཁན་གར་མཁན་རྣམས་དང་གྱད་རྣམས་དང ། །བུམ་རྔ་ཐོགས་པ་རྣམས་ཀྱིས་མཛེས་པར་བྱས། །རོལ་མོ་རྣམ་པ་སྣ་ཚོགས་བྱེད་པ་མང ། །རབ་ཏུ་དགའ་ཞིང་རྒྱལ་པོའི་ཕྱི་བཞིན་
111a
༄#། །འབྲང ། །རྒྱལ་པོ་གཤེགས་པའི་ལེའུ་སྟེ། གཉིས་པའོ།། །།དེ་ནས་རྒྱལ་པོ་ཟས་གཙང་མ་དང ། །ཤཱཀྱ་རྣམས་རྟ་བབས་སའི་བར་དུ་བཞོན་པ་དང་དོང་སྟེ་ཕྱིན་ནས་བཞོན་པ་ལས་བབས་ཏེ། རྐང་ཐང་གི་འཁོར་གྱིས་ཡོངས་སུ་བསྐོར་ནས་མདུན་དུ་བདར་ཏེ་ནྱ་གྲོ་དྷའི་ཀུན་དགའ་ར་བར་དོང་ངོ། །དེའི་ཚེ་བཅོམ་ལྡན་འདས་ཀྱིས་རྒྱལ་པོ་ཟས་གཙང་མ་ང་རྒྱལ་ཆེ་བར་མཁྱེན་ནས་མི་གང་ལྷག་ཙམ་གྱི་སྟེང་གི་བར་སྣང་གི་ནམ་མཁའ་ལ་རྒྱལ་པོ་ཟས་གཙང་མ་མངོན་པར་དད་པར་བྱ་བའི་ཕྱིར་འཆག་ཅིང་བཞུགས་པར་གྱུར་ཏོ། །དེའི་ཚེ་བཅོམ་ལྡན་འདས་དེ་ལྟར་འཆག་པའི་གཡས་ཕྱོགས་ནས་མི་མཇེད་ཀྱི་བདག་པོ་ཚངས་པ་ཞལ་འབྲིང་དུ་འཆག་ཅིང་འགྲོའོ། །གཡོན་ཕྱོགས་ནས་ལྷའི་དབང་པོ་བརྒྱ་བྱིན་ཞལ་འབྲིང་དུ་འཆག་ཅིང་འགྲོའོ། །དེ་ལྟར་བཅོམ་ལྡན་འདས་འཆག་པའི་ཞལ་འབྲིང་དུ་ལྷའི་རྒྱལ་པོ་རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དགའ་དང ། གཞན་འཕྲུལ་དབང་བྱེད་རྣམས་བཅོམ་ལྡན་འདས་ལ་མཆོད་པ་བྱ་བའི་ཕྱིར་གདུགས་འཛིན་ཅིང་བསིལ་ཡབ་ཀྱིས་གཡོབ་པར་གྱུར་ཏོ། །རྒྱལ་པོ་ཆེན་པོ་རྣམ་ཐོས་ཀྱི་བུ་དང ། ཡུལ་འཁོར་སྲུང་གཉིས་ཀྱང་བཅོམ་
111b
ལྡན་འདས་འཆག་པའི་ཤར་ཕྱོགས་ལོགས་ཀྱི་ཐོག་མ་ལ་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་སྨད་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་ཕྱག་འཚལ་ཞིང་འཁོད་པར་གྱུར་ཏོ། །རྒྱལ་པོ་ཆེན་པོ་འཕགས་སྐྱེས་པོ་དང ། མིག་མི་བཟང་གཉིས་ཀྱང་བཅོམ་ལྡན་འདས་འཆག་པའི་ནུབ་ཕྱོགས་ལོགས་ཀྱི་ཐོག་མ་ལ་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་སྨད་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་ཕྱག་འཚལ་ཞིང་འཁོད་པར་གྱུར་ཏོ། །དེའི་ཚེ་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷའི་བུ་རྣམས་ཀྱང་བཅོམ་ལྡན་འདས་ལ་མཆོད་པ་བྱ་བའི་ཕྱིར་སྟེང་གི་བར་སྣང་ལ་གནས་ཏེ། ལྷའི་མེ་ཏོག་ཨུཏྤ་ལ་དང ། པདྨ་དང ། ཀུ་མུ་ཏ་དང ། པདྨ་དཀར་པོ་དང ། ལྷའི་མནྡཱ་ར་བ་དང ། མནྡཱ་ར་བ་ཆེན་པོ་དང ། ལྷའི་སྤོས་ཀྱི་ཕྱེ་མ་རབ་ཏུ་འཐོར་བར་གྱུར་ཏོ། །བཅོམ་ལྡན་འདས་ལ་མཆོད་པ་བྱ་བའི་ཕྱིར་ལྷའི་རོལ་མོའི་སིལ་སྙན་དང ། གླུ་དབྱངས་དག་ཀྱང་སྟེང་གི་བར་སྣང་ལ་སྒྲ་འབྱིན་པར་གྱུར་ཏོ། །མིའི་ལས་འདས་པའི་གླུའི་ང་རོ་ཡང་
112a
༄#། །བར་སྣང་ལས་བྱུང་བར་གྱུར་ཏོ། །སྤྲིན་ལས་སྤོས་ཀྱི་ཆར་ཟམ་ཟིམ་ཡང་བབ་པར་གྱུར་ཏོ། །ལྷའི་མེ་ཏོག་ཨུཏྤ་ལ་དང ། ལྷའི་ཙནྡན་གྱི་ཕྱེ་མའི་ཆར་ཡང་བབ་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་རྫུ་འཕྲུལ་གྱི་རྣམ་པ་གང་མངོན་པར་མཛད་པས་ལྷ་དང་མི་རྣམས་ཀྱང་གཅིག་གིས་གཅིག་མཐོང་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་མཛད་དོ། །དེ་ནས་རྒྱལ་པོ་ཟས་གཙང་མས་ལྷ་དེ་དག་བཅོམ་ལྡན་འདས་དེ་ལ་མཆོད་པ་བྱེད་པ་ཡང་མཐོང ། ལྷའི་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པའི་ཁང་པ་བརྩེགས་པས་ཀྱང་བར་སྣང་གང་བར་མཐོང་ནས་དེ་འདི་སྙམ་དུ་སེམས་ཏེ། ཇི་ཙམ་དུ་བཅོམ་ལྡན་འདས་ཀྱིས་ལེགས་པར་གསུངས་པ་དེ་ནི། ངོ་མཚར་ཆེ་སྟེ། སྔོན་བཅོམ་ལྡན་འདས་གཞོན་ནུར་གྱུར་པའི་ཚེ་འདི་སྐད་དུ་ང་ལ་ནི། གླིང་ཆེན་པོ་བཞིའི་དབང་ཕྱུག་ལ་དབང་བར་འགྱུར་བ་ངོ་མཚར་མི་ཆེ་སྟེ། ངས་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་ལྷ་དང་མིའི་ནང་དུ་ཆོས་ཀྱི་དབང་ཕྱུག་ལ་དབང་བར་བྱའོ། །ཞེས་གསུངས་ན། བཅོམ་ལྡན་འདས་ཀྱིས་ཆོས་ཀྱི་དབང་ཕྱུག་ལ་དབང་བ་དེ་ནི། འདི་ཡིན་པར་བལྟ་སྟེ། བདག་ནི། མིའི་འཁོར་ཅན་དུ་ཟད། བཅོམ་ལྡན་འདས་ནི། ལྷ་དང་མིའི་
112b
འཁོར་ཅན་དུ་གྱུར་ཏོ། །སྙམ་མོ། །དེ་ནས་རྒྱལ་པོ་ཟས་གཙང་མས་བླ་གོས་ཕྱོགས་གཅིག་ཏུ་བགོས་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཚིག་འདི་སྐད་ཅེས་སྨྲས་སོ། །བཅོམ་ལྡན་འདས་བལྟམས་མ་ཐག་ཏུ་སུས་ཀྱང་མ་བརྟེན་པར་ས་ཆེན་པོ་ལ་གོམ་པ་བདུན་བཞུད་དེ་ཕྱོགས་བཞིར་གཟིགས་ནས་གསུང་བརྗོད་པ། ང་ནི། འཇིག་རྟེན་ན་མཆོག་།ང་ནི། འཇིག་རྟེན་ན་གཙོ། ང་ནི། འཇིག་རྟེན་ན་རབ་སྟེ། ངས་སྐྱེ་བ་དང ། རྒ་བ་དང ། ན་བ་དང ། འཆི་བ་མཐར་དབྱུང་ངོ ། ། ཞེས་གསུངས་པ་དེའི་ཚེ་ཡང་བདག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་གཏུགས་ཏེ་ཕྱག་བགྱིས་སོ། །གང་གི་ཚེ་བཅོམ་ལྡན་འདས་ཞིང་པའི་གྲོང་དུ་བཞུད་ནས་ཛམྦུའི་གྲིབ་མ་བསིལ་བ་ལ་བཞུགས་པའི་ཚེ་ཉི་མ་ཡོལ་ཡང་ཛམྦུའི་གྲིབ་མས་བཅོམ་ལྡན་འདས་ཀྱི་སྐུ་དེ་མ་བཏང་སྟེ། ལྷའི་བུ་གཞོན་ནུ་དྲུག་ཐལ་མོ་སྦྱར་ནས་ཕྱག་འཚལ་ཞིང་འཁོད་པར་གྱུར་པ་དེའི་ཚེ་ཡང་བདག་གིས་བཅོམ་ལྡན་འདས་ལ་ཕྱག་བགྱིས་སོ། །ད་ཡང་བཅོམ་ལྡན་འདས་ལ་འདི་དང་ལན་གསུམ་དུ་ཕྱག་འཚལ་ལོ། །ཞེས་སྨྲས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །གང་ཚེ་རྐང་གཉིས་གཙོ་བོ་ཁྱོད་བལྟམས་ནས། །ས་ཆེན་འདི་ལ་གོམ་པ་བདུན་བཞུད་དེ། །ང་ནི་འཇིག་རྟེན་འདི་ན་མཆོག་ཅེས་གསུངས། །དེ་ཚེ་མཁས་
113a
༄#། །པ་ཁྱོད་ལ་བདག་ཕྱག་འཚལ། །གང་ཚེ་ཐུབ་ཆེན་ཞིང་བའི་གྲོང་བཞུད་དེ། །ཛམྦུའི་གྲིབ་མས་བཞུགས་པ་མ་བཏང་ཞིང ། །ལྷ་བུ་གཞོན་ནུ་དྲུག་གིས་བཏུད་གྱུར་པ། །དེ་ཚེ་མཆོད་འོས་ཁྱོད་ལ་བདག་ཕྱག་འཚལ། །ད་\་ཎGཱ?\་ཡང་འདི་དང་ཁྱོད་ལ་ལན་གསུམ་དུ། །ཐུབ་པ་ཁྱོད་ཀྱི་ཞབས་ལ་ཕྱག་འཚལ་ལོ། །ཐུགས་རྗེ་ཆེ་མངའ་ལྷ་མིས་མཆོད་པ་གཙོ། །ཁྱོད་འདྲ་འཇིག་རྟེན་མ་མཆིས་ལྷག་ཅི་སྨོས། །མཚན་ནི་དོན་གྲུབ་ལགས་ཞེས་སྔོན་བརྗོད་པ། །ཕ་དང་མ་ཡིས་བསམ་སྟེ་བཏགས་པ་ལགས། །ཁྱོད་ཀྱིས་བསམ་རྫོགས་བདུད་རྩི་བརྙེས་པས་ན། །དོན་གྲུབ་ལགས་པར་བདག་གིས་ང་གདོད་འཚལ། །དེ་ནས་འདོད་པ་ན་སྤྱོད་པའི་ལྷ་རྣམས་ཀྱིས་དེའི་ཚེ་བཅོམ་ལྡན་འདས་ཀྱི་སེངྒེའི་ཁྲི་ལྷའི་ཡིད་བཞིན་གྱི་ངས་བཅོས་བུ་བཏིང་བ་རྣམ་པ་སྣ་ཚོགས་སུ་སྤེལ་བ་བཤམས་སོ། །ཐམས་ཅད་དང་ལྡན་པའི་ནྱ་གྲོ་དྷའི་ཀུན་དགའ་ར་བར་ཡང་ལྷའི་ཡིད་བཞིན་གྱི་རས་བཅོས་བུ་ཡོག་པར་བཏིང་ངོ ། །སྟེང་དུ་ཡང་ལྷའི་ཡིད་བཞིན་གྱི་རས་བཅོས་བུའི་བླ་རེ་བྲེས་སོ། །དེ་ནས་བཅོམ་ལྡན་འདས་བར་སྣང་གི་འཆག་ས་དེ་ནས་བབས་ཏེ་གདན་ཁྲི་བཤམས་པ་ལ་བཞུགས་སོ། །རྒྱལ་པོ་ཟས་གཙང་མ་ཡང་འཁོར་དང་བཅས་པས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་།འདོད་པ་ན་སྤྱོད་པའི་ལྷ་
113b
རྣམས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བར་སྣང་ལ་འཁོད་པར་གྱུར་ཏོ། །འདི་ལ་འདི་ནི། ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །སེར་སྐྱ་ཞེས་བྱ་གྲོང་ཁྱེར་དམ་པ་ཡི། །ནྱ་གྲོ་དྷ་ཡི་ར་བ་ཉམས་དགའ་བར། །རྒྱལ་པོ་ཟས་གཙང་དེ་དང་གང་གི་ཚེ། །འཇིག་རྟེན་མགོན་པོ་ཕྲད་པ་དེ་ཡི་ཚེ། །སྐྱེ་བོ་མང་པོ་དག་ནི་འདུས་གྱུར་ཏེ། །ལྷ་མ་ཡིན་དང་མཁའ་ལྡིང་དབང་པོ་དང ། །ཀླུ་ཚོགས་རྣམས་དང་དེ་བཞིན་གྲུལ་བུམ་དང ། །དྲི་ཟའི་རྒྱལ་པོ་རྣམས་ཀྱང་འདུས་པར་གྱུར། །དེ་བཞིན་གསང་བའི་བདག་པོ་རྣམས་འདུས་ཏེ། །མིའམ་ཅི་ཡི་ཚོགས་དང་མི་རྣམས་དང ། །དེ་བཞིན་འདོད་པ་དག་ན་སྤྱོད་པའི་ལྷ། །རབ་ཏུ་དགའ་བ་རྣམས་ཀྱང་འདུས་པར་གྱུར། །དེ་བཞིན་གཟུགས་ཀྱི་ཁམས་སུ་གཏོགས་པ་ཡི། །ཚངས་པ་རྣམས་དང་ཚངས་པའི་རིས་རྣམས་དང ། །འོད་གསལ་བ་དང་དགེ་རྒྱས་པ་དག་དང ། །འབྲས་བུ་ཆེ་བར་གཏོགས་དང་གནས་གཙང་འདུས། །དགེ་སྦྱོང་དག་དང་དེ་བཞིན་བྲམ་ཟེ་དང ། །སྤྱོད་པ་ཅན་དང་ཀུན་ཏུ་རྒྱུ་དག་དང ། །གཅེར་བུ་པ་དང་མུ་སྟེགས་གཞན་མང་པོ། །ལོག་ལམ་རྗེས་སུ་འབྲང་བ་རྣམས་ཀྱང་འདུས། །སངས་རྒྱས་ཉིད་ཀྱི་གཟི་བརྗིད་དམ་པ་ཡིས། །རྒྱལ་པོ་ཆེན་པོ་ཟས་གཙང་དེ་ཡི་སེམས། །ཡོངས་སུ་སྨིན་པར་བྱ་བའི་དོན་གྱི་ཕྱིར། །དེ་ཡི་ཚེ་ན་འདུས་པ་ཆེན་པོར་གྱུར། །སྔོན་ཆད་བཅོམ་ལྡན་
114a
༄#། །འདས་ཀྱིས་ལེགས་བཤད་པའི། །ཚིག་གིས་འཁོར་རྣམས་ཡོངས་སུ་ཚིམ་པར་མཛད། །ད་ནི་རྒྱལ་བ་རྒྱལ་པོ་ཟས་གཙང་ལ། །རྒྱལ་བའི་མཐུ་ནི་རབ་ཏུ་བསྟན་པར་བཞེད། །བཅོམ་ལྡན་འདས་ལ་རྒྱལ་པོ་ཟས་གཙང་གིས། །གཞོན་ནུ་ཁྱོད་ནི་ས་བདག་ཆེན་པོ་ཡི། །རྒྱལ་པོར་འགྱུར་ཞེས་མཁས་པས་ལུང་བསྟན་གྱི། ། ཁབ་ནས་མ་བྱུང་ཞིག་ཅེས་མངོན་གསོལ་བ། །གླིང་བཞིར་དབང་བའི་འཁོར་ལོས་བསྒྱུར་བ་སྟེ། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །རིན་ཆེན་སྣ་བདུན་དག་དང་ལྡན་པར་འགྱུར། །འབྱོར་པ་བཞི་པོ་དང་ཡང་ལྡན་པར་འགྱུར། །ཆོས་ལ་གནས་ཤིང་ས་ཡང་སྐྱོང་བ་སྟེ། །གླིང་བཞི་དབང་བར་རྒྱལ་རིགས་རྒྱལ་ཆེན་འགྱུར། ། མི་ཡི་བདག་དང་མི་ཡི་མཆོད་པར་འོང ། །ལྟོ་འཕྱེ་ཆེས་མཆོད་འགྱུར་ཞེས་གསོལ་བ་བཏབ། །དེ་ནས་དེའི་ཚེ་བྱང་ཆུབ་སེམས་དཔའ་དེས། །བསྐལ་པ་བྱེ་བ་ཁྲག་ཁྲིག་དཔག་མེད་ནས། །བདག་ནི་རྟག་ཏུ་བདེན་པའི་ཚིག་སྨྲས་ཀྱི། །རྒྱལ་པོ་བདག་གི་ཚིག་ལ་གསོན་ཅེས་གསུངས། །འདི་ལྟར་གླིང་བཞི་པ་ཡི་རྒྱལ་སྲིད་ཀྱིས། །བདག་ལ་སླུ་བ་མཛད་པར་བཞེད་པས་ན། །དེ་ལྟའི་ཚུལ་ལས་རྒྱལ་པོ་ཆེན་པོ་ཁྱོད། །བདག་ལ་ཅུང་ཟད་ཙམ་ཡང་ཐུགས་མི་རེ། །རྒྱལ་པོ་ཆེན་པོ་སྔོན་ཚེ་བྱུང་བ་ནི། །རྒྱ་མཚོའི་རླབས་
114b
ཀྱིས་རུས་སྦལ་གཅིག་ཅིག་འཕངས། །རྒྱ་མཚོའི་རླབས་ནི་ཕྱིར་ལོག་གྱུར་པ་ན། །རུས་སྦལ་དེ་ནི་ཁྲོན་པའི་ནང་དུ་ལྷུང ། །དེ་ལ་ཁྲོན་པའི་ནང་གི་རུས་སྦལ་གྱིས། །རྒྱ་མཚོའི་རུས་སྦལ་ག་ནས་འདིར་འོངས་ཀྱེ། །ང་ཡི་ཐེ་ཚོམ་སྐྱེས་པ་གཅད་པའི་ཕྱིར། །མྱུར་དུ་ང་ལ་སྨྲོས་ཞེས་དེ་སྐད་སྨྲས། །ཁྲོན་པའི་ནང་གི་རུས་སྦལ་དེ་ཉིད་ལ། །རྒྱ་མཚོའི་རུས་སྦལ་བློ་ཆེན་དེས་སྨྲས་པ། །ང་ནི་རྒྱ་མཚོའི་རླབས་ཀྱིས་བཀུར་བཀུར་ཏེ། །ཁྲོན་པ་འདིར་ནི་དེ་རིང་བོར་བར་གྱུར། །རྒྱ་མཚོའི་རླབས་ཆེན་དེ་ནི་ཕྱིར་ལོག་སོང ། །ང་ནི་སླར་ལོག་འགྲོ་བར་མ་ནུས་ཏེ། །ང་ནི་རླབས་དང་བྲལ་བར་གྱུར་པས་ན། །རུས་སྦལ་ཁྱོད་ཀྱི་ཁྲོན་པར་གནས་འཆའ་འོ། །དེ་ལ་ཁྲོན་པའི་ནང་གི་རུས་སྦལ་གྱིས། །རྒྱ་མཚོ་དེ་ནི་ཁྲོན་པ་འདི་ཙམ་མམ། །འོན་ཏེ་ཁྲོན་པ་འདི་བས་ཆེ་བ་ཞིག་།དྲིས་ལན་ང་ལ་མྱུར་དུ་སྨྲོས་ཞེས་སྨྲས། །རྒྱ་མཚོའི་རུས་སྦལ་བློ་ཆེན་རྒྱལ་པོ་དེས། །ཁྲོན་པའི་རུས་སྦལ་དེ་ལ་ཚིག་སྨྲས་པ། །ཁྲོན་པའི་རུས་སྦལ་ཁྱོད་ནི་བྱིས་པ་སྟེ། །བློ་རྒྱ་ཆུང་ཞིང་ཤེས་པ་རབ་ཏུ་ཞན། །ང་ནི་ལན་ཚཝ་ཅན་གྱི་ཆུ་དེར་བཙས། །ཡུན་རིང་དུས་ནས་དེ་ན་སྐྱེ་སྐྱེ་ཡང ། །རྒྱ་མཚོའི་མཐའ་མ་ཤེས་པར་མི་ནུས་ན། །དབུས་ལྟ་ཤེས་པར་ག་ལ་ནུས་ཞེས་སྨྲས། །དེ་ལྟར་མི་ཡི་བདག་པོ་ཁྱོད་ཀྱིས་ཀྱང ། །བདག་གི་མཐུ་ནི་ཐུགས་སུ་མ་ཆུད་དེ། །གླིང་བཞི་བ་ཡི་མཆོད་པ་རྣམས་ཀྱིས་ནི། །ཁྱོད་ཀྱིས་བདག་
115a
༄#། །ལ་སླུ་བ་མཛད་པར་བཞེད། །བདག་ནི་ཆོས་ཅན་ཆོས་ཀྱི་རྒྱལ་པོར་འགྱུར། །ཆད་པས་མི་གཅད་མཚོན་ཆས་བདའ་མེད་པར། །སྟོང་གསུམ་འཇིག་རྟེན་ཁམས་འདི་བསྐྱང་བར་བྱ། །འཇིག་རྟེན་འདས་པའི་མཆོད་པ་ཐོབ་པར་འགྱུར། །རྫུ་འཕྲུལ་སྟོབས་བསྒོམས་པ་ཡི་བདག་ཉིད་ཅན། །བཅོམ་ལྡན་འདས་ཀྱིས་སྔོན་ཚིག་སྦྱང་བཞེད་ནས། །དེ་ཕྱིར་འཁོར་ཆེན་པོ་ནི་དེ་དག་དང ། །སེམས་ཅན་རྣམས་ལ་ཐུགས་ཀྱིས་དགོངས་པ་མཛད། །རྒྱལ་པོ་ཟས་གཙང་སེམས་ནི་མགུ་བྱའི་ཕྱིར། །ཐུགས་ཀྱིས་ཡོངས་སུ་བསྐུལ་བ་མཛད་པ་དང ། །འཇིག་རྟེན་གསུམ་པོ་མཐའ་དག་མ་ལུས་པར། །དེ་ཡི་ཚེ་ན་དེ་ནི་འདུས་པར་གྱུར། །རྒྱལ་པོ་འདུན་པར་བྱས་པའི་ལེའུ་སྟེ། གསུམ་པའོ།། །།དེ་ནས་བཅོམ་ལྡན་འདས་ཀྱིས་དེའི་ཚེ་ལྷ་མ་ཡིན་གྱི་དབང་པོ་ཐག་བཟང་རིས་བཅོམ་ལྡན་འདས་ལ་མཆོད་པ་བྱ་བའི་སེམས་ཐོག་མར་སྐྱེ་བར་འགྱུར་བ་དེ་ལྟ་བུའི་མཚན་མ་མཛད་དོ། །དེ་ནས་ལྷ་མ་ཡིན་གྱི་དབང་པོ་ཐག་བཟང་རིས་ལྷ་མ་ཡིན་ཁྲག་ཁྲིག་ཕྲག་དྲུག་ཅུ་དང ། ལྷ་མ་ཡིན་གྱི་བུ་མོ་ཁྲག་ཁྲིག་ཕྲག་དྲུག་ཅུ་དང་བཅས་པས་བཅོམ་ལྡན་འདས་ལ་མཆོད་པ་ཐོག་མར་བྱས་ཏེ། དེ་ནས་རྒྱ་མཚོ་ཆེན་པོའི་ནང་ན་རིན་པོ་ཆེ་རིན་ཐང་ཡོད་པ་དང ། རིན་ཐང་མེད་པ་ཇི་
115b
སྙེད་ཅིག་ཡོད་པ་དེ་དག་ཐམས་ཅད་བཅོམ་ལྡན་འདས་ལ་མཆོད་པའི་ཕྱིར་ཕུལ་ལོ། །རིན་པོ་ཆེ་གཞན་རྒྱ་མཚོ་ཆེན་པོ་དེ་ན་མེད་པ་དག་ཀྱང་མངོན་པར་སྤྲུལ་པ་བྱས་ཏེ་མཆོད་པ་ཕུལ་ལོ། །རིན་པོ་ཆེ་སྣ་བདུན་གྱི་རང་བཞིན་ཅན་གྱི་ཤིང་རྟ་ཁྲག་ཁྲིག་ཕྲག་དྲུག་ཅུ་ཡང་མངོན་པར་སྤྲུལ་ཏོ། །ཤིང་རྟ་དེ་དག་རེ་རེ་ཞིང་ཡང་རྟ་ཅང་ཤེས་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །རྟ་དེ་དག་ཀྱང་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་ཅན་ལ་རྐང་ལག་གི་རྒྱན་གསེར་ལས་བྱས་པ་རིན་པོ་ཆེ་སྣ་བདུན་གྱིས་སྤྲས་པ་དང་ལྡན་པ། རིན་པོ་ཆེ་སྣ་བདུན་གྱིས་བྱས་པའི་འཕྱར་འདབ་ཅན། གསེར་གྱི་རྒྱན་གྱིས་བརྒྱན་པ་ཤ་སྟག་གོ་།རྟ་ཅང་ཤེས་དེ་དག་གི་རྒྱན་དུ་བྱ་བའི་ཕྱིར་རིན་པོ་ཆེ་སྣ་བདུན་གྱི་བླ་རེ་དག་ཀྱང་མངོན་པར་སྤྲུལ་ཏོ། །ཤིང་རྟ་དེ་དག་ཀྱང་གསེར་གྱི་རྒྱལ་མཚན་ཅན་གསེར་གྱི་རྒྱན་གྱིས་བརྒྱན་པ་ཤ་སྟག་གོ་།ཡིད་བཞིན་གྱི་ནོར་བུའི་བླ་རེ་དེ་དག་ཀྱང་སྟེང་གི་བར་སྣང་ལས་ཤིང་རྟ་དེ་དག་གི་ཕྱི་བཞིན་དུ་འབྲང་བར་གྱུར་ཏེ། ཤིང་རྟ་དེ་དག་འདོང་ན་ནི། རྗེས་སུ་འདོང ། ཤིང་རྟ་དེ་དག་སྡོད་ན་ནི། སྡོད་པ་ཤ་སྟག་གོ་།ཡིད་བཞིན་གྱི་ནོར་བུའི་བླ་རེ་དེ་དག་ལ་ཡང་མཛེས་པར་བྱ་བའི་ཕྱིར་རིན་པོ་ཆེ་སྣ་བདུན་གྱི་ཕྲེང་བའི་ལྡ་ལྡི་མངོན་པར་དབྱངས་སོ། །ཡིད་བཞིན་གྱི་ནོར་བུའི་བླ་རེ་
116a
༄#། །དེ་དག་ཀྱང་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་དང་ལྡན་པར་མངོན་པར་སྤྲུལ་ཏེ། །ཤིང་རྟའི་རྒྱན་དང ། རྟའི་རྒྱན་དང ། ཡིད་བཞིན་གྱི་ནོར་བུའི་བླ་རེའི་རྒྱན་དེ་དག་རླུང་གིས་བསྐྱོད་ན། སྒྲ་སྙན་ཅིང་ཡིད་དུ་འོང་ལ་མཉན་ན་བདེ་བ་ཤ་སྟག་འབྱུང་བར་འགྱུར་ཏེ། འདི་ལྟ་སྟེ། དཔེར་ན། རོལ་མོ་སིལ་སྙན་ཡན་ལག་བརྒྱད་དང་ལྡན་པ་མཁས་པས་སྒྲ་ཕྱུང་ན། སྒྲ་སྙན་ཅིང་ཡིད་དུ་འོང་བ་དང ། མཉན་ན་བདེ་བ་འབྱུང་བ་དེ་བཞིན་དུ་ཤིང་རྟའི་རྒྱན་དེ་དག་དང ། རྟའི་རྒྱན་དེ་དག་དང ། ཡིད་བཞིན་གྱི་ནོར་བུའི་བླ་རེའི་རྒྱན་དེ་དག་རླུང་གིས་བསྐྱོད་ན། སྒྲ་སྙན་ཅིང་ཡིད་དུ་འོང་ལ་མཉན་ན་བདེ་བ་ཤ་སྟག་འབྱུང་བར་གྱུར་ཏེ། །ཤིང་རྟ་དེ་དག་གི་འཕང་གིས་ཀྱང་སྟེང་གི་བར་སྣང་ལ་དཔག་ཚད་དྲུག་ཅུ་བསྒྲིབས་ཏེ་འཁོད་པར་གྱུར་ཏོ། །ཤིང་རྟ་དེ་དག་གི་ཕྱི་བཞིན་ཡང་རོལ་མོ་སིལ་སྙན་སྣ་ཚོགས་རྗེས་སུ་འབྲང་བར་གྱུར་ཏོ། ། ཤིང་རྟ་དེ་དག་ཐམས་ཅད་ལ་ཡང་ལྷ་མ་ཡིན་གྱི་བུ་མོ་རྒྱན་ཐམས་ཅད་ཀྱིས་བརྒྱན་པ་དག་འཁོད་དོ། །བཅོམ་ལྡན་འདས་ལ་མཆོད་པ་བྱ་བའི་ཕྱིར་ལ་ལ་ནི། རོལ་མོ་བྱེད། ལ་ལ་ནི།་སིལ་སྙན་དཀྲོལ། ལ་ལ་ནི། གླུ་ལེན། ལ་ལ་ནི། གར་བྱེད། ལ་ལ་ནི། ཙནྡན་དང་ཨུཏྤ་ལའི་ཕྱེ་མས་འཐོང ། ལ་ལ་ནི། ཨ་ག་རུ་དང ། ཏ་མ་ལའི་ལོ་མའི་ཕྱེ་མས་
116b
འཐོར།་ལ་ལ་ནི། ལྷ་མ་ཡིན་གྱི་རྫས་ཀྱི་ཕྱེ་མས་འཐོར། ལ་ལ་ནི། གསེར་དངུལ་གྱི་ཕྱེ་མས་འཐོར། ལ་ལ་ནི། མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཥ་ཀ་དང ། མཉྫུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྐྱ་སྣར་དང ། སྐྱ་སྣར་ཆེན་པོ་དང ། སྐྱ་སྔར་ཁྲ་བོ་དང ། སྐྱ་སྣར་བཀྲ་ཆེན་གྱི་མེ་ཏོག་མངོན་པར་སྤྲུལ་ཅིང་བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི། གསེར་གྱི་མེ་ཏོག་དང ། དངུལ་གྱི་མེ་ཏོག་དང ། ཤེལ་གྱི་མེ་ཏོག་དང།་བཻ་ཌཱུརྱའི་མེ་ཏོག་དང ། སྤུག་གི་མེ་ཏོག་དང ། མུ་ཏིག་དམར་པོའི་མེ་ཏོག་དང ། རྡོའི་སྙིང་པོའི་མེ་ཏོག་གིས་མངོན་པར་འཐོར་ཏོ། །ལ་ལ་ནི། རིན་པོ་ཆེ་སྣ་བདུན་དང།་དབྱིག་གིས་སྙིམ་པ་བཀང་ཞིང་བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི། ན་བཟའ་དང ། རྒྱན་འབུལ་ལོ། །ལ་ལ་ནི། སྐུ་རགས་དང ། ཞབས་ཀྱི་རྒྱན་དང ། ཕྱག་གི་རྒྱན་དང ། སོར་གདུབ་དང ། གདུ་བུ་དང ། གདུ་བུ་ཐམ་པ་དང ། དབུ་རྒྱན་རྩེ་གསུམ་པ་དང ། དཔུང་རྒྱན་དང ། ཅོད་པན་དང ། གསེར་སྐུད་དང ། མུ་ཏིག་གི་དོ་ཤལ་དང ། ནོར་བུའི་དོ་ཤལ་དང ། སེན་མོ་དོ་དང ། གྱ་དོ་དང ། མགུལ་རྒྱན་སྣ་ཚོགས་འཐོར་བར་གྱུར་ཏོ། །ལ་ལ་ནི། ཙོང་ཙོང་གཤིབས་པ། ལ་ལ་ནི། མགོ་རྒྱན།
117a
༄#། །ལ་ལ་ནི། རྣ་ཆ་གདུབ་ཀོར། ལ་ལ་ནི། གསེར་གྱི་ཕྲེང་བ་རིན་པོ་ཆེས་སྤྲས་པ། ལ་ལ་ནི། རིན་པོ་ཆེའི་ཕྲེང་བ་གསེར་གྱིས་སྤྲས་པ། ལ་ལ་ནི། གསེར་གྱི་དྲ་བ། ལ་ལ་ནི། གསེར་གྱི་ཕྲེང་བ་དང ། ནོར་བུའི་ཕྲེང་བ་དང ། མུ་ཏིག་གི་ཕྲེང་བ་ཐོགས་སོ། །ལ་ལ་ནི། གསེར་གྱི་གདུགས་དང ། དངུལ་གྱི་གདུགས་དང ། བཻ་ཌཱུརྱའི་གདུགས་དང ། ཤེལ་གྱི་གདུགས་དང ། སྤུག་གི་གདུགས་དང ། རྡོའི་སྙིང་པོའི་གདུགས་དང ། མུ་ཏིག་དམར་པོའི་གདུགས་དང ། རིན་པོ་ཆེ་སྣ་བདུན་གྱི་གདུགས་དང ། རིན་པོ་ཆེའི་རྒྱལ་མཚན་སྣ་ཚོགས་ཐ་དད་པ་དང ། རིན་པོ་ཆེ་ཐམས་ཅད་ཀྱི་བ་དན་ཁ་དོག་སྣ་ཚོགས་དང ། ཚོན་སྣ་ཚོགས་ཅན་མང་པོ་ཐོགས་སོ། །ལ་ལ་ནི། སྤོས་ཆུའི་ཆར་འབེབས་ཤིང་འཁོད་པར་གྱུར་ཏོ། །ལ་ལ་ནི། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་པར་གྱུར་ཏོ། །མི་མཆོག་ཁྱོད་ལ་ཕྱག་འཚལ་ལོ། །མི་ཕུལ་ཁྱོད་ལ་ཕྱག་འཚལ་ལོ། །རྐང་གཉིས་གཙོ་ལ་ཕྱག་འཚལ་ལོ། །ཁྱོད་ལ་དོ་ཟླ་ཡོང་མ་མཆིས། །འཇིག་རྟེན་གསལ་ལ་ཕྱག་འཚལ་ལོ། །ཡེ་ཤེས་མཚོ་ལ་ཕྱག་འཚལ་ལོ། །དཔལ་དང་ལྡན་ལ་ཕྱག་འཚལ་ལོ། །རྒྱལ་བའི་འོད་ལ་ཕྱག་འཚལ་ལོ། །ཡོན་ཏན་རྫོགས་ལ་ཕྱག་འཚལ་ལོ། །ཉོན་
117b
མོངས་སེལ་ལ་ཕྱག་འཚལ་ལོ། །སྤྱོད་དག་ཁྱོད་ལ་ཕྱག་འཚལ་ལོ། །སེམས་དག་ཁྱོད་ལ་ཕྱག་འཚལ་ལོ། །གནས་པ་མི་མངའ་ཞུམ་མི་མངའ། །ལེ་ལོ་མི་མངའ་རྒོད་མི་མངའ། །བརྩོན་འགྲུས་བརྩམས་ཤིང་རྟུལ་བ་ཉིད། །ངེས་པར་རྟོགས་ལ་ཕྱག་འཚལ་ལོ། །རིན་པོ་ཆེའི་ཕོ་བྲང་གི་རྡལ་བལྟ་ན་སྡུག་པ། མཛེས་པ། རིན་པོ་ཆེ་སྣ་བདུན་གྱི་རང་བཞིན་ཅན་ཁྲག་ཁྲིག་ཕྲག་དྲུག་ཅུ་ཡང་མངོན་པར་སྤྲུལ་ཏོ། །རིན་པོ་ཆེའི་ཕོ་བྲང་གི་རྡལ་དེ་དག་རེ་རེ་ཞིང་ཡང་བཞུགས་ས་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །བཞུགས་ས་དེ་དག་རེ་རེ་ཞིང་བ་གམ་བཀྲ་བ། བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་བརྒྱ་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །བ་གམ་དེ་དག་རེ་རེ་ལ་ཡང་ཁང་པ་བརྩེགས་པ་བཀྲ་བ། བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །ཁང་པ་བརྩེགས་པ་དེ་དག་རེ་རེ་ཞིང་ཡང་ཁྱམས་བཀྲ་བ།་བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །དེ་ལ་གསེར་གྱི་ཁྱམས་རྣམས་ཀྱི་གདུང་ཕྱམ་ནི། དངུལ། གྲལ་བུ་དང་སྒོ་འཕར་ནི། བཻ་ཌཱུརྱ། ཐེམ་པ་དང་ཁ་ཁྱེར་ནི། ཤེལ། ཀ་བ་ནི། སྤུག་།ཀ་ཞུ་ནི། མུ་ཏིག་དམར་པོ། །ས་གཞི་ནི། རྡོའི་སྙིང་པོའི་རང་བཞིན་ཅན་ཤ་སྟག་གོ་།དངུལ་
118a
༄#། །གྱི་ཁྱམས་རྣམས་ཀྱི་གདུང་ཕྱམ་ནི། གསེར། གྲལ་བུ་དང་སྒོ་འཕར་ནི། བཻ་ཌཱུརྱ། ཐེམ་པ་དང་ཁ་ཁྱེར་ནི། ཤེལ། ཀ་བ་ནི། སྤུག་།ཀ་ཞུན། མུ་ཏིག་དམར་པོ། ས་གཞི་ནི། རྡོའི་སྙིང་པོའི་རང་བཞིན་ཅན་ཤ་སྟག་གོ་།བཻ་ཌཱུརྱའི་ཁྱམས་རྣམས་ཀྱི་གདུང་ཕྱམ་ནི། ཤེལ། གྲལ་བུ་དང་སྒོ་འཕར་ནི། གསེར། ཐེམ་པ་དང་འཁྱེར་ནི། དངུལ། ཀ་བ་ནི། སྤུག་།ཀ་ཞུ་ནི། མུ་ཏིག་དམར་པོ། ས་གཞི་ནི། རྡོའི་སྙིང་པོའི་རང་བཞིན་ཅན་ཤ་སྟག་གོ་།ཤེལ་གྱི་ཁྱམས་རྣམས་ཀྱི་གདུང་ཕྱམ་ནི། བཻ་ཌཱུརྱ། གྲལ་བུ་དང་སྒོ་འཕར་ནི། སྤུག། ཐེམ་པ་དང་ཁ་ཁྱེར་ནི། རྡོའི་སྙིང་པོ། ཀ་བ་ནི། གསེར། ཀ་ཞུ་ནི། དངུལ། ས་གཞི་ནི། མུ་ཏིག་དམར་པོའི་རང་བཞིན་ཅན་ཤ་སྟག་གོ་།སྤུག་གི་ཁྱམས་རྣམས་ཀྱི་གདུང་ཕྱམ་ནི། རྡོའི་སྙིང་པོ། གྲལ་བུ་དང་སྒོ་འཕར་ནི། མུ་ཏིག་དམར་པོ། ཐེམ་པ་དང་ཁ་ཁྱེར་ནི། གསེར། ཀ་པ་ནི། དངུལ། ཀ་ཞུ་ནི།་ཤེལ། ས་གཞི་ནི། བཻ་ཌཱུརྱའི་རང་བཞིན་ཅན་ཤ་སྟག་གོ་།མུ་ཏིག་དམར་པོའི་ཁྱམས་རྣམས་ཀྱི་གདུང་ཕྱམ་ནི། སྤུག་།གྲལ་བུ་དང་སྒོ་འཕར་ནི། རྡོའི་སྙིང་པོ། ཐེམ་པ་དང་ཁ་ཁྱེར་ནི། དངུལ། ཀ་བ་ནི། གསེར། ཀ་ཞུ་ནི། བཻ་ཌཱུརྱ། ས་གཞི་ནི། ཀེ་ཀེ་རུའི་རང་བཞིན་ཅན་ཤ་སྟག་གོ་།རྡོའི་སྙིང་པོའི་ཁྱམས་རྣམས་ཀྱི་གདུང་
118b
ཕྱམ་ནི།་མུ་ཏིག་དམར་པོ། གྲལ་བུ་དང་སྒོ་འཕར་ནི། གསེར། ཐེམ་པ་དང་ཁ་ཁྱེར་ནི། དངུལ། ཀ་བ་ནི། བཻ་ཌཱུརྱ། ཀ་ཞུ་ནི། ཀེ་ཀེ་རུ། ས་གཞི་ནི། ཤེལ་གྱི་རང་བཞིན་ཅན་ཤ་སྟག་གོ་།ཁྱམས་དེ་དག་ཏུ་ཡང་སེངྒེའི་ཁྲི་རིན་པོ་ཆེ་སྣ་བདུན་གྱི་རང་བཞིན་ཅན། ལྷ་མ་ཡིན་གྱི་ལྷ་རྫས་ཀྱི་གོས་སྣ་ཚོགས་བཏིང་བ། ཀ་ཙ་ལིནདའི་སྟེང་གཡོགས་ཅན། མཐའ་གཉིས་སུ་རྟེན་མ་བཟང་པོ་བཀོད་པ་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །སེངྒེའི་ཁྲི་དེ་དག་གི་རྐང་རྟེན་རིན་པོ་ཆེ་སྣ་བདུན་གྱི་རང་བཞིན་ཅན་དག་ལ་རས་བཅོས་བུ་སྣ་ཚོགས་འདི་ལྟ་སྟེ། ཤིང་བལ་ལས་བྱས་པ་ཤིན་ཏུ་ཕྲ་བ་དང ། སྲིན་བལ་ལས་བྱས་པ་ཤིན་ཏུ་ཕྲ་བ་དང ། ཟར་མའི་ཤུན་པ་ལས་བྱས་པ་ཤིན་ཏུ་ཕྲ་བ་དང།་ཤུན་ཕྲགས་ལས་བྱས་པ་ཤིན་ཏུ་ཕྲ་བ་དང ། ཀ་ཤི་ཀ་ལས་བྱས་པ་ཤིན་ཏུ་ཕྲ་བ་བྱེ་བ་ཕྲག་དྲུག་ཅུ་དྲུག་ཅུ་བཏིང་བར་གྱུར་ཏོ། །སེངྒེའི་ཁྲི་དེ་དག་གི་རེ་རེའི་ངོས་གཉིས་སུ་ཡང་ལྷ་མ་ཡིན་གྱི་བུ་མོ་རྒྱན་ཐམས་ཅད་ཀྱིས་བརྒྱན་པ། རིན་པོ་ཆེ་སྣ་བདུན་ལས་བྱས་པའི་བསིལ་ཡབ་ཐོགས་པ་གཉིས་གཉིས་མངོན་པར་སྤྲུལ་ཏེ། སེངྒེའི་ཁྲི་དེ་དག་ལ་ལྷ་མ་ཡིན་གྱི་བུ་མོ་གཞོན་ནུ་འཁོད་པ་དག་ལ་གཡོབ་བོ། །ཁྱམས་དེ་དག་རེ་རེ་ཞིང་ཡང་རིན་པོ་ཆེ་སྣ་བདུན་ལས་བྱས་པའི་གདུགས་ཁྲག་ཁྲིག་ཕྲག་དྲུག་ཅུ་དྲུག་
119a
༄#། །ཅུ་མངོན་པར་སྤྲུལ་ཏོ། །ཁྱམས་དེ་དག་རེ་རེ་ཞིང་ཡང་རིན་པོ་ཆེ་སྣ་བདུན་གྱི་རྒྱལ་མཚན་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །དེ་ལ་གསེར་གྱི་ཁྱམས་རྣམས་སུ་ནི། རྒྱལ་མཚན་སྔོན་པོ་ལ་ཡུ་བ་སེར་པོ་ཤེལ་གྱིས་སྤྲས་པ་དག་བཙུགས། དངུལ་གྱི་ཁྱམས་རྣམས་སུ་ནི། རྒྱལ་མཚན་སེར་པོ་ཡུ་བ་དམར་པོ་གསེར་གྱིས་སྤྲས་པ་དག་བཙུགས། བཻ་ཌཱུརྱའི་ཁྱམས་རྣམས་སུ་ནི། རྒྱལ་མཚན་དམར་པོ་ཡུ་བ་སེར་པོ་ཤེལ་གྱིས་སྤྲས་པ་དག་བཙུགས། ཤེལ་གྱི་ཁྱམས་རྣམས་སུ་ནི། རྒྱལ་མཚན་དཀར་པོ་ཡུ་བ་བཻ་ཌཱུརྱ་གསེར་གྱིས་སྤྲས་པ་དག་བཙུགས། རིན་པོ་ཆེ་སྣ་ཚོགས་ཀྱི་ཁྱམས་རྣམས་སུ་ནི། རྒྱལ་མཚན་ཁྲ་བོ་གསེར་གྱི་ཡུ་བ་བཻ་ཌཱུརྱས་སྤྲས་པ་དག་བཙུགས་སོ། །དེ་ལ་རྒྱལ་མཚན་སྔོན་པོ་རྣམས་ནི། ཏོག་སེར་པོ། །རྒྱལ་མཚན་སེར་པོ་རྣམས་ནི། ཏོག་སྔོན་པོ། རྒྱལ་མཚན་དམར་པོ་རྣམས་ནི། ཏོག་དཀར་པོ། རྒྱལ་མཚན་དཀར་པོ་རྣམས་ནི། ཏོག་དམར་པོ། རིན་པོ་ཆེ་སྣ་ཚོགས་ཀྱི་རྒྱལ་མཚན་རྣམས་ནི། ཏོག་རིན་པོ་ཆེ་སྣ་བདུན་པ་ཤ་སྟག་གོ་།རིན་པོ་ཆེའི་ཕོ་བྲང་གི་རྡལ་དེ་དག་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་གསུམ་བསྐོར་བ་བྱེད་པར་གྱུར་ཏོ། །དེ་འདི་ལྟ་སྟེ། དཔེར་ན། སུམ་ཅུ་རྩ་གསུམ་པའི་ལྷ་རྣམས་ཀྱི་གླང་པོ་
119b
ཆེས་སྲུང་གི་བུ་ནི། བར་སྣང་གི་ནམ་མཁའ་ལས་འགྲོ་ཞིང་སུམ་ཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་ཡོངས་འདུས་རྟོལ་དུ་ཉེ་བར་འཇོག་།དེ་བཞིན་དུ་ཕོ་བྲང་གི་རྡལ་དེ་དག་ཀྱང་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་གསུམ་བསྐོར་བ་བྱེད་དོ། །རིན་པོ་ཆེའི་ཕོ་བྲང་གི་རྡལ་དེ་དག་དང ། བག་མ་དེ་དག་དང ། བཞུགས་ས་དེ་དག་དང ། ཁང་པ་བརྩེགས་པ་དེ་དག་དང ། ཁྱམས་དེ་དག་དང ། སེངྒེའི་ཁྲི་དེ་དག་དང ། གདུགས་དེ་དག་དང ། རྒྱལ་མཚན་དེ་དག་དང ། བ་དན་དེ་དག་ལས་ལྷའི་ཙནྡན་དང ། ུཏྤལ་དང ། ་ག་རུའི་ཕྱེ་མའི་ཆར་བབ་པར་གྱུར་ཏོ། །མེ་ཏོག་མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཥ་ཀ་དང ། མཉྫུ་ཥ་ཀ་ཆེན་པོ་དང ། པ་རུ་ཥ་ཀ་དང ། བ་རུ་ཥ་ཀ་ར་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྐྱ་སྣར་དང ། སྐྱ་སྣར་ཆེན་པོ་དང ། སྐྱ་སྣར་ཁྲ་བོ་དང ། སྐྱ་སྣར་བཀྲ་ཆེན་གྱི་ཆར་ཡང་མངོན་པར་བབ་པར་གྱུར་ཏོ། །གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། སྤུག་དང ། རྡོའི་སྙིང་པོ་དང ། མུ་ཏིག་དམར་པོ་དང ། རིན་པོ་ཆེ་ཐམས་ཅད་ཀྱི་མེ་ཏོག་དང ། དབྱིག་དང ། གསེར་དང ། ཡིད་བཞིན་གྱི་རས་བཅོས་བུའི་ཆར་ཡང་མངོན་པར་བབ་པར་གྱུར་ཏོ། །ཡིད་བཞིན་གྱི་ནོར་བུའི་བླ་རེ་དེ་དག་གི་མཐུས་ལྷ་
120a
༄#། །མ་ཡིན་གྱི་བུ་དེ་དག་རིན་པོ་ཆེ་གང་དང་གང་གི་ཆར་དབབ་པར་འདོད་པ་དེ་དང་དེ་དག་ལས་མངོན་པར་བབ་པར་གྱུར་ཏོ། །དེའི་ཚེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་ཁོར་ཡུག་ཏུ་ནི་དཔག་ཚད་དྲུག་ཁྲི་འཕང་དུ་ཡང་དཔག་ཚད་དྲུག་ཁྲིར་ལྷ་མ་ཡིན་གྱི་མཆོད་པ་དེ་ལྟ་བུས་རྒྱས་པར་གང་བར་གྱུར་ཏོ། །རིན་པོ་ཆེའི་ཕོ་བྲང་གི་རྡལ་དེ་དག་གིས་ཀྱང་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ཏོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་ཡང་མི་འགྲེང་བདུན་ཙམ་དུ་མེ་ཏོག་མནྡཱ་ར་བས་རྒྱས་པར་གང་བར་གྱུར་ཏོ། །སྤོས་ཆུས་ཀྱང་རྫབ་ཏུ་གྱུར་ཏོ། །སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་སྤོས་ཆུའི་རྫབ་ཀྱི་དྲི་དེས་ཁྱབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་སེམས་ཅན་གང་དག་གིས་སྤོས་ཆུའི་རྫབ་ཀྱི་དྲི་དེ་ཚོར་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏེ། བྱང་ཆུབ་ཏུ་སེམས་དང་པོ་བསྐྱེད་པ་དག་ནི། སྨོས་ཀྱང་མི་དགོས་སོ། །དེ་ནས་ལྷ་མ་ཡིན་གྱི་དབང་པོ་ཐག་བཟང་རིས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་ལན་གསུམ་བསྐོར་བ་བྱས་ནས་བཅོམ་ལྡན་འདས་ལ་ཙནྡན་གྱི་ཕྱེ་
120b
མས་མངོན་པར་གཏོར་ཏེ་ཚིགས་སུ་བཅད་པ་དག་གིས་མངོན་པར་བསྟོད་པ། བྱང་ཆུབ་དམ་པ་དོན་དུ་གཉེར་སླད་དུ། །སྐྱབས་ཀྱི་དམ་པ་རབ་ཏུ་མི་སྒུལ་བ། །ལྷར་བཅས་འཇིག་རྟེན་མི་འཇིགས་སྩོལ་བ་པོ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །གང་ལ་དགའ་བའི་ཡིད་ཀྱིས་སྐྱབས་སོང་ན། །ལོག་ལྟུང་དག་ཏུ་ལྟུང་བར་མི་འགྱུར་བ། །དེ་ལ་བདག་ནི་སྐྱབས་སུ་ཉེ་བར་མཆི། །དཔེ་མེད་བྱང་ཆུབ་འཚལ་བའི་སླད་དུའོ། །འཁོར་བའི་སྡུག་བསྔལ་དག་ནི་བཤིག་བཅོམ་ཞིང ། །མྱ་ངན་ལས་བརྒལ་ཉོན་མོངས་དག་གྱུར་ལ། །འདྲེན་པ་གཞན་གྱི་དྲིང་ལ་མི་འཇོག་པ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །རྒ་དང་འཆི་བས་ཉེན་པར་གྱུར་པ་ཡི། །ལྷ་དང་མི་རྣམས་འདྲེན་པ་བཅོམ་ལྡན་འདས། །གང་ལ་སྐྱབས་སོང་ཕྱིས་ཀྱང་མི་སྐྱེ་བ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །དེ་ནས་ལྷ་མ་ཡིན་གྱི་དབང་པོ་ཐག་བཟང་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་རྟའི་རྒྱན་དེ་དག་དང ། ཤིང་རྟའི་རྒྱན་དེ་དག་དང ། ལྷ་མ་ཡིན་གྱི་རྒྱན་དེ་དག་དང ། གདུགས་དང ། རྒྱལ་མཚན་དང ། བ་དན་གྱི་རྒྱན་དེ་དག་དང ། བླ་རེ་དང་དྲིལ་བུ་གཡེར་གའི་རྒྱན་དེ་དག་རླུང་གིས་བསྐྱོད་པས་སྒྲ་སྙན་ཅིང་ཡིད་དུ་འོང་ལ་མཉན་ན་དགའ་བ་འདི་ལྟ་བུ་དག་བྱུང་བར་གྱུར་ཏེ། འདི་ལྟ་སྟེ། དཔེར་ན། རོལ་མོ་སིལ་སྙན་ཡན་ལག་བརྒྱད་
121a
༄#། །པ་མཁས་པས་སྒྲ་ཕྱུང་བ་བཞིན་ནོ། །དེ་ལྟར་ལྷ་མ་ཡིན་གྱི་དབང་པོ་ཐག་བཟང་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་སྟེང་གི་བར་སྣང་ལས་ལྷའི་ཙནྡན་དང ། ུཏྤ་ལ་དང ། ་ག་རུ་དང ། ཏ་མ་ལའི་ལོ་མའི་ཕྱེ་མའི་ཆར་མངོན་པར་བབ་པར་གྱུར་ཏོ། །ལྷ་མ་ཡིན་གྱི་སྤོས་ཀྱི་ཕྱེ་མ་རྣམ་པ་སྣ་ཚོགས་དུ་མའི་ཆར་མངོན་པར་བབ་པར་གྱུར་ཏོ། །ལྷའི་མེ་ཏོག་མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཥ་ཀ་དང ། མཉྫུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྐྱ་སྣར་དང ། སྐྱ་སྣར་ཆེན་པོ་དང ། སྐྱ་སྣར་ཁྲ་བོ་དང ། སྣ་སྐྱར་བཀྲ་ཆེན་གྱི་མེ་ཏོག་རྣམས་དང ། སྤྲུལ་པའི་མེ་ཏོག་སྣ་ཚོགས་ཀྱི་ཆར་མངོན་པར་བབ་བོ། །སྟེང་གི་བར་སྣང་ལས་གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། སྤུག་དང ། རྡོའི་སྙིང་པོ་དང ། མུ་ཏིག་དམར་པོ་དང ། རིན་པོ་ཆེ་ཐམས་ཅད་ཀྱི་མེ་ཏོག་གི་ཆར་ཡང་མངོན་པར་བབ་བོ། །ལྷ་དང་ལྷ་མ་ཡིན་གྱི་སྤོས་ཆུའི་ཆར་ཡང་མངོན་པར་བབ་བོ། །སྤོས་ཆུའི་ཆར་དེ་བབས་པས་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་འཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་སྤོས་ཆུས་རྫབ་ཏུ་གྱུར་ཏོ། །སྤོས་ཆུའི་རྫབ་ཀྱི་དྲི་དེས་ཀྱང་སྟོང་གསུམ་གྱི་སྟོང་ཆེན་
121b
པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་ཏོ། །སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ལྟར་ལྷ་མ་ཡིན་གྱི་དབང་པོ་ཐག་བཟང་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་བར་སྣང་ལས་ལྷ་མ་ཡིན་གྱི་ལྷ་རྫས་ཀྱི་སིལ་སྙན་གྱི་སྒྲ་དག་བྱུང་ངོ ། །སིལ་སྙན་དེ་དག་གི་སྒྲས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གྲག་པར་གྱུར་ཏོ། །ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་གང་དག་གིས་སྒྲ་ཐོས་པར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ལྟར་ལྷ་མ་ཡིན་གྱི་དབང་པོ་ཐག་བཟང་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་ལྷ་མ་ཡིན་གྱི་བུ་མོ་བརྒྱ་སྟོང་དག་བཅོམ་ལྡན་འདས་ལ་མཆོད་པ་བྱ་བ་དང ། ལྷ་མ་ཡིན་གྱི་དབང་པོ་ཐག་བཟང་རིས་ཀྱི་འཁོར་བྱ་བའི་ཕྱིར་ལ་ལ་ནི། གླུ་ལེན། ལ་ལ་ནི། སིལ་སྙན་བྱེད། ལ་ལ་ནི། གར་བྱེད། ལ་ལ་ནི། ལུས་ཀྱི་ཚུལ་བསྒྱུར། ལ་ལ་ནི། ཙནྡན་དང ། ུཏྤ་ལ་དང ། ་ག་རུ་དང ། ཏ་མ་ལའི་ལོ་མའི་ཕྱེ་མ་འཐོར། །ལ་ལ་ནི། ལྷའི་མེ་ཏོག་མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཥ་ཀ་
122a
༄#། །དང ། མཉྫུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྐྱ་སྣར་དང ། སྐྱ་སྣར་ཆེན་པོ་དང ། སྐྱ་སྣར་ཁྲ་བོ་དང ། སྐྱ་སྣར་བཀྲ་ཆེན་དང ། སྤྲུལ་པའི་མེ་ཏོག་རྣམས་དང ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། སྤུག་དང ། རྡོའི་སྙིང་པོ་དང ། མུ་ཏིག་དམར་པོ་དང ། རིན་པོ་ཆེ་ཐམས་ཅད་ཀྱི་མེ་ཏོག་རྣམས་འཐོར་ཞིང་བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི། ན་བཟའ་དང ། རྐང་གདུབ་དང ། སྐུ་རགས་དང ། ཕྱག་གི་རྒྱན་དང ། སོར་གདུབ་དང ། གདུ་བུ་དང ། གདུ་བུ་ཐམ་པ་དང ། དབུ་རྒྱན་རྩེ་གསུམ་པ་དང ། དཔུང་རྒྱན་དང ། ཅོད་པན་དང ། གསེར་སྐུད་དང ། མུ་ཏིག་གི་དོ་ཤལ་དང ། ནོར་བུའི་དོ་ཤལ་དང ། སེ་མོ་དོ་དང ། གྱ་དོ་དང ། མགུལ་རྒྱན་སྣ་ཚོགས་དང ། རྣ་ཆ་དང ། རྣ་ཆ་གདུབ་ཀོར་དང ། ཚོང་ཚོང་གཤིབས་པ་དང ། མགོ་རྒྱན་དང ། ཕྲེང་བའི་ལྡ་ལྡི་དང ། སྤོས་ཀྱི་ལྡ་ལྡི་དང ། ནོར་བུའི་ལྡ་ལྡི་དག་འཐོར་ཞིང ། མེ་ཏོག་གི་བླ་རེ་དང ། སྤོས་ཀྱི་བླ་རེ་དང ། ནོར་བུའི་བླ་རེ་དག་ཐོགས་སོ། །ལ་ལ་ནི། སྤོས་ཆུའི་ཆར་འབེབས་སོ། །ལ་ལ་ནི། ཕྱེ་མའི་ཆར་འབེབས་སོ། །ལ་ལ་ནི། མུ་ཏིག་དམར་པོས་སྙིམ་པ་བཀང་སྟེ་བཅོམ་ལྡན་འདས་ལ་མངོན་
122b
པར་འཐོར་རོ། །ལ་ལ་ནི། རིན་པོ་ཆེས་སྙིམ་པ་བཀང ། ལ་ལ་ནི། གསེར་གྱིས་སྙིམ་པ་བཀང་སྟེ་བཅོམ་ལྡན་འདས་ལ་མངོན་པར་འཐོར་རོ། །ཚིགས་སུ་བཅད་པ་འདི་ཡང་སྨྲས་སོ། །གང་བརྟེན་གང་ལ་གནས་བཅས་ནས། །གང་ཟག་མཆོག་ལ་མཆོད་འགྱུར་པ། །དེ་འདྲ་བ་ཡི་གྲོགས་པོ་དང ། །རྟག་པར་རྒྱུན་དུ་ཕྲད་པར་ཤོག་།ལྷ་མ་ཡིན་གྱི་དབང་པོ་ཐག་བཟང་རིས་ཀྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་རབ་སིམ་གྱིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་པ། སྟོབས་བཅུ་བརྩོན་བདེན་ཁྱོད་ལ་ཕྱག་འཚལ་ལོ། །མེ་འཇིགས་འཇིགས་བྲལ་ཁྱོད་ལ་ཕྱག་འཚལ་ལོ། །ཆོས་ལ་མ་འདྲེས་ངེས་པར་གྱུར་པ་པོ། །འགྲོ་བའི་འདྲེན་པ་ཁྱོད་ལ་ཕྱག་འཚལ་ལོ། །ཀུན་སྦྱོར་འཆིང་བ་གཅོད་ལ་ཕྱག་འཚལ་ལོ། །འཁོར་བརྒྱུད་མི་གནས་པ་ལ་ཕྱག་འཚལ་ལོ། །མཐར་ཕྱིན་ཐང་གནས་ཁྱོད་ལ་ཕྱག་འཚལ་ལོ། །འགྲོ་བ་བྱིང་བ་སྒྲོལ་ལ་ཕྱག་འཚལ་ལོ། །སེམས་ཅན་འགྲོགས་ཀྱང་རྒོད་པ་མི་མངའ་ཞིང ། །འགྲོ་བ་ཀུན་ལ་ཐུགས་ནི་རྣམ་གྲོལ་ཏེ། །པདྨ་ཆུ་ཡིས་མི་གོས་འདྲ་བ་པོ། །བློ་ཟབ་བསམ་མི་ཁྱབ་ལ་ཕྱག་འཚལ་ལོ། །སངས་རྒྱས་ཐུབ་པ་ཁྱོད་ཀྱིས་
123a
༄#། །སྟོང་ཉིད་མཁྱེན། །རྣམ་པ་ཀུན་ཏུ་མཚན་མ་ཐམས་ཅད་བཤིག་།ཁྱོད་ནི་གང་དུ་འང་སྨོན་པ་ཡོང་མི་མངའ། །མི་གནས་ནམ་མཁའ་མཉམ་ལ་ཕྱག་འཚལ་ལོ། །ལྷ་མ་ཡིན་གྱི་དབང་པོ་རབ་སིམ་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་ཤིང་རྟ་བཟང་གིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་གསེར་ཕྱེ་དག་གིས་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། ས་དང་བར་སྣང་དང་ནི་ལྷ་ཡུལ་ནའང ། །བདེ་གཤེགས་ཁྱོད་མཉམ་མ་མཆིས་ལྷག་མ་མཆིས། །མཚན་མར་བཟུང་ནས་ཕྱིན་ཅི་ལོག་ཞུགས་པའི། །འགྲོ་བ་སྨིག་རྒྱུ་འདྲ་བར་ཁྱོད་ཀྱིས་མཁྱེན། །འདི་ནི་བྱེད་པ་ཚོར་བ་སེམས་ཅན་མེད། །གང་ཟག་མེད་ཅིང་བདག་གིར་བྱ་བ་མེད། །ཆོས་ཀུན་སྟོང་ཞིང་བྱེད་པ་ཀུན་ལ་དབེན། །རང་བཞིན་མེད་ཅིང་གཡོ་མེད་ཞི་ཞེས་བསྟན། །སུ་ཞིག་བདེ་གཤེགས་བསྟན་པ་འདིར་མོས་ཏེ། །ཆོས་ཀུན་བྱས་པ་མེད་པའི་རྗེས་འབྲང་བ། །དེ་འདིར་འདྲེན་པའི་སྲས་སུ་གྱུར་པ་སྟེ། །ཇི་ལྟར་བསྟན་པ་དེ་བཞིན་ཡབ་ལྟར་སྤྱོད། །རྣམ་འདྲེན་ཁྱོད་ལ་བདག་བསྟོད་བསོད་ནམས་གང་སྐྱེས་ཏེ། །ཇི་ལྟར་རྒྱལ་བ་མཁྱེན་པ་ཡིས་ནི་མཁྱེན་
123b
གྱུར་པ། །དགེ་བའི་རྩ་བ་དེ་ཀུན་མ་ལུས་མཐའ་དག་འདིར། །འགྲོ་ལ་རྩལ་གྱིས་ཐམས་ཅད་སངས་རྒྱས་འགྲུབ་པར་ཤོག།། །།བམ་པོ་གསུམ་པ། ལྷ་མ་ཡིན་གྱི་དབང་པོ་ཤིང་རྟ་བཟང་གིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་སྟོབས་ལྡན་གྱིས་ཀྱང་བཅོམ་ལྡན་འདས་ལ་མཆོད་པ་བྱས་ཏེ་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ནས་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་དངུལ་གྱི་མེ་ཏོག་རྣམས་ཀྱིས་གཏོར་ཏེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། འཁོར་བའི་རྒྱ་མཚོ་ཆུ་ལས་ཕ་རོལ་རྣམ་བརྒལ་བ། །བརྒལ་ནས་སྐྱེ་བོ་རྒྱུན་གྱིས་རྗེས་འགྲོ་སྒྲོལ་མཛད་ཅིང ། །བདེ་གཤེགས་ཕ་རོལ་ཐང་བདེ་འཇིགས་པ་མེད་འཇོག་པ། །སྤྱན་མཛེས་བདེ་བར་གཤེགས་པ་ཁྱོད་ཀྱི་ཞབས་ལ་གཏུགས། །བློ་མཆོག་ཁྱོད་ཀྱིས་འགྲོ་བ་ཐམས་ཅད་ཀུན་ཏུ་མཁྱེན། །ཕྱིན་ཅི་ལོག་ལྟ་ཐིབས་པོར་རབ་ཞེན་བློ་ལྡན་ཏེ། །འཁྲུལ་པ་སྨིག་རྒྱུ་ལྟ་བུར་མ་ཤེས་གྱུར་རྣམས་ལ། །མཚུངས་པ་མེད་པའི་ཐུགས་རྗེ་བསྐྱེད་ནས་རྟོགས་པར་མཛད། །མི་མཆོག་ཁྱོད་ཀྱིས་ཆོས་རྣམས་ཐམས་ཅད་སྒྱུ་མ་དང ། སྨིག་རྒྱུ་འདྲ་ཞིང་མིག་ཡོར་མཚུངས་ཞེས་རབ་ཏུ་བསྟན། །ཐུབ་པ་དམ་པ་ཁྱོད་ཀྱིས་ཆོས་ཀྱི་སྲས་མཆོག་བསྐྱེད། །སྲིད་པ་གསུམ་པོ་དག་ན་མི་ཆགས་སྤྱད་པ་སྤྱོད། །དངོས་པོ་ལོག་པའི་དོན་གྱུར་རང་བཞིན་བྲལ་བ་
124a
༄#། །དང ། །གཞན་གྱི་དངོས་པོས་སྟོང་པར་མི་དབང་ཁྱོད་ཀྱིས་མཁྱེན། །བྱིས་པ་རྨོངས་པའི་བློ་གྲོས་རྨི་ལམ་དགའ་ལྟ་བུར། །མི་དབང་ཁྱོད་ཀྱི་སྲས་ཀྱིས་འཚལ་ནས་སྤྱད་པ་སྤྱོད། །ལྷ་མ་ཡིན་གྱི་དབང་པོ་སྟོབས་ལྡན་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་སྒྲ་གཅན་གྱིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་མེ་ཏོག་སྐྱ་སྣར་ཁྲ་བོ་རྣམས་ཀྱིས་གཏོར་ཏེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། མི་མཆོག་ཁྱོད་ཀྱི་སྐུ་ཡིས་ནི། །ལྷར་བཅས་འཇིག་རྟེན་ཟིལ་གྱིས་མནན། །རི་རབ་ཀྱིས་ནི་ཡུངས་འབྲུ་དང ། །རྒྱ་མཚོས་བ་རྗེས་ཆུ་བཞིན་ནོ། །གཟུགས་མཛེས་མཚན་གྱིས་རབ་ཏུ་བརྒྱན། །གཟུགས་ཀྱིས་གཟུགས་ཀྱི་དམ་པ་དང ། །གཟུགས་རྣམས་ཐམས་ཅད་ཟིལ་གྱིས་མནན། །དཔེར་ན་ཉི་མས་མེ་ཁྱེར་བཞིན། །གཟི་བརྗིད་ཕུང་པོ་གཟི་བརྗིད་ཀྱིས། །སེམས་ཅན་ཟིལ་ལྡན་ཟིལ་གྱིས་མནན། །ཟིལ་མནན་དེ་དག་ལམ་མེ་མིན། །ཉི་མས་མེ་ཁྱེར་ཟིལ་བརླགས་བཞིན། །ཡེ་ཤེས་རྒྱ་མཚོ་ཡེ་ཤེས་ཀྱིས། །འཇིག་རྟེན་གསུམ་ཀུན་ཟིལ་གྱིས་མནན། །ཟིལ་མནན་དེ་དག་ལམ་མེ་མིན། །ཉི་མས་ཟླ་འོད་ཟིལ་བརླགས་བཞིན། །ལྷ་མ་ཡིན་གྱི་
124b
དབང་པོ་སྒྲ་གཅན་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་བདེ་མཆོག་གིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་མེ་ཏོག་སྐྱ་སྣར་ཁྲ་བོས་མངོན་པར་གཏོར་ཏེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །འདྲེན་པའི་བློ་གྲོས་ཞི་བ་པོ། །ཞི་གནས་དགྱེས་པས་འགྲོ་བ་ཡི། །འདོད་སྡང་གཏི་མུག་རྡུལ་ཞི་མཛད། །ཆར་པས་རྡུལ་རྣམས་ཞི་བགྱིད་བཞིན། །འབར་ཞིང་ཆོས་ཚུལ་འབར་བར་མཛད། ། བླགས་སྦྱིན་གྱིས་ནི་མེ་བཞིན་ནོ། །ནགས་བཏང་ནགས་མེས་ཤིང་བསྲེགས་ལྟར། །དེ་བཞིན་ཉོན་མོངས་དྲ་བ་བསྲེགས། །བསྐལ་པ་བྱེ་བ་ཁྲག་ཁྲིག་ནི། །དཔག་ཏུ་མེད་པར་དགེ་རྩ་འཛིན། །ཉོན་མོངས་ཐམས་ཅད་འཇོམས་མཛད་དེ། །བདུད་རྩིས་ལུས་བྱུགས་དུག་བཞིན་ནོ། །མུན་པ་མུན་ནག་སེལ་མཛད་དེ། །མུན་ཁུང་སྒྲོན་མ་འབར་བ་བཞིན། །ཆོས་ཀྱི་ཚུལ་ཡང་སྟོན་མཛད་དེ། །ནོར་མཁན་རིན་ཆེན་ཡོན་ཏན་བཞིན། །ལྷ་མ་ཡིན་གྱི་དབང་པོ་བདེ་མཆོག་གིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་གཡུལ་ལ་མངོན་པར་དགའ་བས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་རིན་པོ་ཆེའི་མེ་ཏོག་
125a
༄#། །རྣམས་ཀྱིས་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། གདུལ་དཀའ་མི་བཟད་སེམས་ནི་ཁྱོད་ཀྱིས་བརྟུལ། །གཡུལ་ལས་དཔའ་བས་གཡུལ་ངོར་དཔའ་བོ་བཞིན། །ཤིན་ཏུ་ཚར་བཅད་རང་གི་དབང་དུ་མཛད། །ཐུགས་དུལ་མི་བསྙེངས་ཁྱོད་ལ་ཕྱག་འཚལ་ལོ། །ཁྱོད་ཀྱིས་དབང་པོ་ཐུལ་ཅིང་དགྲ་ཡང་བཅོམ། །གང་དུའང་མི་བསྙེངས་མི་བསྐྱོད་བདེ་བ་བརྙེས། །ཁྱོད་ནི་ཉོན་མོངས་རྣམས་ཀྱིས་ཡང་མི་འཁྲུགས། །རྣམ་པ་ཀུན་ཏུ་དུག་ནི་མ་ལུས་བཅོམ། ། མཐུ་ཆེན་ཁྱོད་ཀྱིས་བྱམས་པ་ལེགས་བསྒོམས་ཏེ། །ཁྱོད་ཀྱི་ཐུགས་ནི་དགྲ་དང་བྱམས་ལ་མཉམ། །ཐུབ་པ་ཁྱོད་ཀྱིས་སེམས་ཅན་བློ་གྲོས་བཤིག་།འགྲོ་བ་ཀུན་ཏུ་ཁྱོད་ནི་བཞུད་མི་མངའ། །ཤེས་རབ་རྣམ་གྲོལ་སྲིད་པའི་སྲེད་པ་བསྐམས། །ཤེས་རབ་རྣམ་དག་ཁྱོད་ཀྱི་ཐུགས་ཀྱང་དག་།ཆོས་རྣམས་ཀུན་ལ་ཐུགས་ནི་ཆགས་མི་མངའ། ། ཐམས་ཅད་ཟིལ་མནན་ཐུབ་མཆོག་ཁྱོད་འདྲ་མེད། །ལྷ་མ་ཡིན་གྱི་དབང་པོ་གཡུལ་ལ་མངོན་པར་དགའ་བས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་མིག་བཟང་གིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་བཅོམ་ལྡན་འདས་ལ་གཏེར་ཆེན་པོ་
125b
ཡང་ཕུལ་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། དཔའ་བོ་ཆེན་པོ་ཁྱོད་ཀྱིས་ནི། །ཆོས་རྣམས་ཡང་དག་མཚན་ཉིད་མཁྱེན། །གང་འདི་ཆོས་ཞེས་བརྗོད་པ་ཡང ། །དེ་ནི་བརྡར་བཏགས་ཚིག་ཏུ་ཟད། །ཆོས་རྣམས་ཆོས་ཀྱི་ངོ་བོ་ཡིས། །རྣམ་པ་ཀུན་ཏུ་མི་དམིགས་སོ། །གང་འདི་ཆོས་ཞེས་བརྗོད་པ་ཡང ། །དེ་ནི་མིང་ཙམ་ཟད་ཅེས་གསུངས། །མིང་ནི་མིང་གིས་དབེན་པ་སྟེ། །མཚན་ཉིད་ཀྱང་ནི་དེ་བཞིན་ནོ། །ཆོས་རྣམས་མཚན་ཉིད་མེད་པ་སྟེ། །མིང་ཡང་མེད་ཅེས་ཁྱོད་ཀྱིས་བཤད། ། རབ་ཏུ་བཤད་ཅེས་བགྱི་བ་ཡང ། །བཤད་པ་ཅི་ཡང་མ་མཆིས་ཏེ། །གང་གིས་ཀྱང་ནི་མ་བཤད་ཅིང ། །སུ་ལའང་བཤད་པ་མ་མཆིས་སོ། །ཁྱོད་ཀྱི་སྲས་པོ་མི་མཆོག་རྣམས། ། ཆོས་རྣམས་དེ་ལྟར་འཚལ་ནས་ནི། །ཆོས་རྣམས་ལ་ཡང་མི་ཆགས་པར། །རྣམ་པར་སྤྱད་དོ་ཐུབ་པ་ཆེ། །ལྷ་མ་ཡིན་གྱི་དབང་པོ་མིག་བཟང་གིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་འཇིག་རྟེན་གསུམ་རྣམ་པར་གནོན་པས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་བཅོམ་ལྡན་འདས་ལ་མུ་ཏིག་གི་དོ་ཤལ་ཡང་ཕུལ་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། དགྲ་ཟླ་མ་མཆིས་
126a
༄#། །ཁྱོད་ལ་བདག་བསྟོད་དོ། །ཚུལ་ཁྲིམས་དང་ནི་གཟུགས་དང་ཡེ་ཤེས་སྟོབས། །དེས་ནི་འཇིག་རྟེན་གསུམ་ན་མཚུངས་མ་མཆིས། །དེ་ཕྱིར་ཁྱོད་ནི་དགྲ་ཐུལ་མཚུངས་མ་མཆིས། །ཁྱོད་ཀྱི་གཟུགས་ནི་ཆོས་ཀྱིས་བསྐྱེད་པས་ན། །གཟུགས་ཀྱི་སྟོབས་ཀྱིས་ཁམས་གསུམ་ཟིལ་གྱིས་མནན། །སྦྱིན་པའི་སྟོབས་ཀྱིས་མཚན་ནི་ཕུན་སུམ་ཚོགས། །དཔེ་བྱད་ཕུན་སུམ་ཚོགས་ཤིང་གཟུགས་ཀྱང་དག་།ཚུལ་ཁྲིམས་སྟོབས་ཀྱིས་ཁྱོད་ནི་མི་བསྐྱོད་དེ། །སྐྱེ་བོ་མཁས་པས་སོ་སོར་བསམ་མི་ལད།། ཁྱོད་ནི་ཚུལ་ཁྲིམས་ལྡན་ཞིང་ཐུགས་ཀྱང་དག་།མི་ཡི་སེངྒེ་མཛད་པ་ཐམས་ཅད་འབྱོར། །ཤེས་རབ་སྟོབས་ཀྱིས་ཁྱོད་མཚུངས་འགའ་མ་མཆིས། །དེས་ན་མི་བསྙེངས་འཇིག་རྟེན་གསུམ་བཏུལ་ནས། །འཁོར་དུ་སེངྒེ་ལྟ་བུར་སྒྲ་བསྒྲགས་ཏེ། །རྟོག་གེ་ཚོགས་ཀྱི་བློ་གྲོས་ཟིལ་གྱིས་མནན། །ལྷ་མ་ཡིན་གྱི་དབང་པོ་འཇིག་རྟེན་གསུམ་རྣམ་པར་གནོན་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་རྣམ་པར་སྣང་བྱེད་ཀྱིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་རིན་པོ་ཆེས་སྙིམ་པ་བཀང་སྟེ་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་དོ། །ཐུབ་པ་ཆེན་
126b
པོ་སྐྱེ་བོ་ཚོགས་པ་འདི། །དང་བའི་ཡིད་ཀྱིས་ཁྱོད་ཀྱི་ཞལ་དུ་བལྟ། །ཀུན་གྱིས་རྒྱལ་བ་མདུན་ན་བཞུགས་པར་མཐོང ། །དེ་ནི་རྒྱལ་བའི་སངས་རྒྱས་མ་འདྲེས་མཚན། །བཅོམ་ལྡན་འདས་ཀྱིས་གསུང་གཅིག་བརྗོད་པ་ལ། །སྐྱེ་བོ་བསམ་པ་ཇི་བཞིན་སོ་སོར་འཚལ། །ཐུབ་པ་ཁྱོད་ཀྱི་གསུང་དེ་དེ་ལྟར་འབྱུང ། །དེ་ནི་རྒྱལ་བའི་སངས་རྒྱས་མ་འདྲེས་མཚན། །བཅོམ་ལྡན་འདས་ཀྱིས་གསུང་གཅིག་བརྗོད་པ་ལ། །འཁོར་གྱི་ཐ་དད་གསུང་དུ་རྣམ་འཚལ་ཞིང ། །འགྲོ་བས་རང་དོན་ཇི་ལྟ་བཞིན་དུའང་འཚལ། །དེ་ནི་རྒྱལ་བའི་སངས་རྒྱས་མ་འདྲེས་མཚན། །གསུང་གཅིག་རབ་ཏུ་བརྗོད་པ་མཛད་པས་ནི། །གཅིག་ལ་འཇོག་གི་གཞན་ནི་དགག་པར་མཛད། །འདྲེན་པ་སུ་དག་མ་བསླབ་རྟོགས་པར་མཛད། །དེ་ནི་རྒྱལ་བའི་སངས་རྒྱས་མ་འདྲེས་མཚན། །ལྷ་མ་ཡིན་གྱི་དབང་པོ་རྣམ་པར་སྣང་བྱེད་ཀྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་བཏང་བཟུང་གིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་མུ་ཏིག་དམར་པོས་སྙིམ་པ་བཀང་སྟེ་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། རྒྱགས་དང་ང་རྒྱལ་སྡིག་པའི་ལྟ་བ་སྤྱོད་པ་གང ། །ཡིད་དགའ་རབ་ཏུ་དང་བས་མི་དབང་བདེ་གཤེགས་ཀྱི། །བློ་ལ་མངོན་པར་
127a
༄#། །དགའ་བ་དེ་དག་བག་མཆིས་ཏེ། །མཚུངས་མེད་བསྙེན་བཀུར་བགྱིད་པ་དེ་དག་སྟོན་པའི་སྲས། །ཆོས་རྣམས་འདི་དག་ངོ་བོ་ཉིད་ཀྱིས་མ་མཆིས་ཏེ། ། རྨི་ལམ་དགའ་བ་ཐམས་ཅད་ཚད་མ་མ་ལགས་འདྲ། །རྨི་ལམ་དགའ་སྤྱོད་མ་མཆིས་ཀྱང་ནི་འདུ་ཤེས་མཆིས། །དེ་ལྟར་རྒྱལ་བས་ཆོས་རྣམས་ཐམས་ཅད་རབ་ཏུ་གཟིགས། ། སྟོན་ཀའི་སྤྲིན་དང་མཚུངས་ཤིང་ཆུ་ཡི་ཟླ་བ་འདྲ། །བྱིས་པའི་བློ་ལྡན་རྣམས་ཀྱི་ཡིད་ནི་རྨོངས་པར་བགྱིད། །གང་དག་རྟག་ཏུ་བག་མཆིས་བདེ་གཤེགས་བློ་མངའ་བ། །མཁས་པའི་སྐྱེ་བོ་དག་ལ་འདི་ནི་རྨོངས་མི་བགྱིད། །རྒྱལ་བ་ཁྱོད་ཀྱིས་བསྟན་ལ་རྟག་ཏུ་བག་མཆིས་གང ། །མི་མཆོག་དམ་པ་དེ་དག་མི་དལ་ཡོང་མི་མཆི། །ཆོས་རྣམས་ཐམས་ཅད་རྨི་ལམ་འདྲ་བར་རྣམ་བརྟགས་ནས། །ཡང་དག་མཐོང་བ་དེ་དག་ཏིང་འཛིན་ཐོབ་པར་འགྱུར། །དེ་ནས་ཐག་བཟང་རིས་ལ་སོགས་པ་ལྷ་མ་ཡིན་གྱི་དབང་པོ་བྱེ་བ་ཕྲག་དྲུག་ཅུ་པོ་དེ་དག་གིས་མཆོད་པ་རྣམ་པ་འདི་ལྟ་བུ་བྱས་ནས་བྱང་ཆུབ་ཏུ་གཞོལ་བའི་སེམས་ཀྱིས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ་ཐལ་མོ་སྦྱར་ནས་བཅོམ་ལྡན་འདས་ཉིད་ལ་ཕྱག་འཚལ་ཞིང་བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷ་མ་ཡིན་གྱི་དབང་
127b
པོའི་མཆོད་པ་དེ་དག་ཀྱང་གཟིགས། ལྷ་མ་ཡིན་དེ་དག་གི་ལྷག་པའི་བསམ་པ་ཡང་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །འདི་ནི། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ།་གང་གི་ཚེ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་ཁ་དོག་དུ་མ་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེབ་རྒན་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ནས་དེ་དག་གིས་ཐམས་ཅད་དང་ལྡན་པའི་འཇིག་རྟེན་སྣང་བས་རྒྱས་པར་བཀང་སྟེ་ཕྱིར་ལོགས་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་སྟན་ལས་ལངས་ཏེ་བླ་གོས་ཕྲག་པ་ཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འཛུམ་པ་མཛད་པའི་དོན་ཚིགས་སུ་བཅད་དེ་ཞུས་པ། འཇིག་རྟེན་ཕན་བཞེད་རྒྱུ་ཞིག་མ་མཆིས་པར། །མི་ཡི་སེངྒེ་འཛུམ་པ་མི་མཛད་ན། །དྲང་སྲོང་ཆེན་པོ་ཅི་སླད་འཛུམ་པ་མཛད། །སྐྱེས་བུ་མཆོག་གིས་འཛུམ་པའི་རྒྱུ་ཡང་གསུངས། །ལྷ་མིན་མཆོད་པ་རྒྱ་ཆེན་གཟིགས་གྱུར་ནས། །འཇིག་རྟེན་ཕན་བཞེད་ཁྱོད་ནི་འཛུམ་མཛད་ན། །ལྷ་མི་རྣམས་ལ་ལུང་བསྟན་བཀའ་སྩལ་གསོལ། །དེ་ཐོས་བདག་ཅག་རྣམས་
128a
༄#། །ནི་དགའ་བར་འགྱུར། །དེ་རིང་སུ་ཡིས་དོགས་མེད་རྒྱ་ཆེན་སེམས། །འཁོར་འདིར་ཡང་དག་བསྐྱེད་པར་གྱུར་ཅིག་གུ། །དེ་བཞིན་གཤེགས་པས་གང་གི་བསམ་མཁྱེན་ནས། །མི་ཡི་སེངྒེ་འཛུམ་པ་མཛད་པར་གྱུར། །དེ་རིང་ཡོངས་སུ་དག་པའི་ཡིད་ཀྱིས་སུ། །མི་ཡི་མཆོག་ལ་དད་པ་གང་གིས་བསྐྱེད། །དེ་བཞིན་གཤེགས་པས་གང་གི་བསམ་མཁྱེན་ཏེ། །ཡིད་དུ་འོང་བའི་འཛུམ་པ་མཛད་པར་གྱུར། །བདེ་གཤེགས་ཞལ་ནས་འཛུམ་པ་དེ་མཐོང་ནས། །འདི་ལྟར་བདེ་གཤེགས་འཛུམ་པ་མཛད་པ་འདི། །སུ་ཡིས་དཔུང་བཅས་བདུད་ནི་དེང་བཅོམ་ཞེས། །འཁོར་འདི་དེ་རིང་ཐེ་ཚོམ་འཚལ་བར་གྱུར། །དྲང་སྲོང་ཆེན་པོ་རྒྱལ་བ་དགྲ་ལས་རྒྱལ། །ཐེ་ཚོམ་འཚལ་བའི་སོམ་ཉི་གཅད་དུ་གསོལ། །མི་མཆོག་ཁྱོད་ཀྱིས་དེ་རིང་འགྲོ་བ་ཡི། །ཐེ་ཚོམ་མྱུར་ཏེ་ལེགས་པར་གཅད་དུ་གསོལ། །དེ་ནས་ཚེ་དང་ལྡན་པ་རྟ་ཐུལ་གྱིས་ཞུ་བ་ཞུས་པའི་ལན་བཅོམ་ལྡན་འདས་ཀྱིས་ཚིགས་སུ་བཅད་དེ་ཚེ་དང་ལྡན་པ་རྟ་ཐུལ་ལ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །འཇིག་རྟེན་ཕན་ཕྱིར་འཛུམ་པ་ངས་བྱས་པ། །དེ་ཡི་འབྲས་བུ་མ་ལུས་བསྟན་པར་བྱ། །བསྟན་པ་དེ་ནི་རྩེ་གཅིག་ཡིད་ཀྱིས་ཉོན། །བླ་ན་མེད་པའི་བྱང་ཆུབ་འདོད་པའི་ཕྱིར། །ལྷ་མིན་རྣམས་ཀྱིས་ང་མཆོད་འདི་བྱས་ཏེ། །དེ་དག་སེམས་
128b
ནི་ཅི་ལའང་ཆགས་མེད་པས། །ནམ་མཁའི་ངོས་ལ་ལག་མཐིལ་ཆགས་མེད་བཞིན། །ལྷ་མིན་ཚོགས་ཀྱིས་དད་པའི་ཡིད་བྱས་ཏེ། །དེ་དག་ང་ལ་མཆོད་པ་འདི་བྱས་པས། །བློ་ཅན་དེ་དག་ལྷ་མིན་རིས་བོར་ཏེ། །མཐོ་རིས་དོང་ནས་ཡུན་རིང་དགའ་བར་འགྱུར། །དེ་དག་ཕྱི་དུས་རྒྱལ་བ་མིའི་སེངྒེ། །གངྒཱའི་ཀླུང་གི་བྱེ་མ་བྱེ་བ་སྙེད། །བསྙེན་བཀུར་བྱས་ནས་ཡིད་འོང་བསྐལ་པ་ལ། །དེ་དག་ཐམས་ཅད་མཚན་མཐུན་རྒྱལ་བར་འགྱུར། །དེ་ཚེ་བདེ་གཤེགས་ཁྲག་ཁྲིག་དྲུག་ཅུ་རྣམས། །འཇིག་རྟེན་སྒྲོན་མ་ཕྱོགས་སུ་གྲགས་པ་སྟེ། །དེ་དག་མི་གནས་ཆོས་ནི་སྟོན་མཛད་ཅིང ། །ལྷ་དང་བཅས་པའི་འཇིག་རྟེན་འགྲེལ་པར་འགྱུར། །འཇིག་རྟེན་མཁས་པ་དེ་དག་རྣམས་ཀྱི་ཞིང ། །ཤིན་ཏུ་ཡངས་ཤིང་སྙིགས་མ་མེད་པར་འགྱུར།། དེ་ཚེ་ཁྲག་ཁྲིག་དྲུག་ཅུར་ཚང་བ་ཡི། །རྒྱལ་བ་རྣམས་ཀྱིས་སྟོང་གསུམ་སྦྱོང་བར་འགྱུར། །དེ་དག་ངན་སོང་ཐམས་ཅད་སེལ་བར་མཛད། །དེ་དག་ཞིང་དེར་དགའ་བར་སྤྱོད་པར་འགྱུར། །བརྟན་པ་དེ་དག་མི་ཁོམ་ཐམས་ཅད་སྦྱོང ། །བླ་ན་མེད་པའི་ཐེག་པ་སྟོན་པར་འགྱུར། །དེ་དག་ཚེ་ཡི་ཚད་དུ་གྱུར་པ་ནི། །བསྐལ་པ་ཁྲག་ཁྲིག་དྲུག་ཅུ་ཚང་བར་ཡང ། །རྣམ་པར་འདྲེན་པ་དེ་དག་འཚོ་བར་འགྱུར། །ཆགས་པ་མེད་པའི་ཆོས་ཀྱང་སྟོན་པར་མཛད། །ཐུབ་པ་དེ་དག་མྱ་ངན་འདས་གྱུར་ཏེ། །འཇིག་རྟེན་མཁས་པ་རབ་ཏུ་ཞི་གྱུར་ནས། །བསྐལ་
129a
༄#། །པ་ཁྲག་ཁྲིག་དྲུག་ཅུ་ཚང་བར་ནི། །རང་བྱུང་རྣམས་ཀྱི་དམ་ཆོས་གནས་པར་འགྱུར། །བདེ་བར་གཤེགས་པ་དེ་དག་འགྲོ་བའི་ཚོགས། ། གངྒཱའི་བྱེ་མ་སྙེད་ཀྱི་སྐྱེ་བོ་འདུལ། །དགྲ་ལས་རྒྱལ་བའི་རྒྱལ་བར་མཚན་མཐུན་འགྱུར། །ཞིང་དང་ཚད་དང་ཆོས་གནས་འགྱུར་པའང་མཐུན། །བདེ་གཤེགས་དེ་དག་ཁྲག་ཁྲིག་དྲུག་ཅུ་ཡི། །སྐྱེས་པ་བུད་མེད་ཡོངས་སུ་སྨིན་མཛད་དེ། །བླ་ན་མེད་པའི་ཐེག་པས་འདོམས་པར་འགྱུར། །མཁས་པ་དེ་དག་རྒྱལ་བའི་གདུང་ཡང་འཛིན། །རྒྱལ་བས་ལྷ་མིན་དེ་དག་ལུང་བསྟན་པ། །འཇིག་རྟེན་ཕན་ཕྱིར་དྲང་སྲོང་ཆེན་པོས་གསུངས། །ལྷ་དང་བཅས་པའི་འཇིག་རྟེན་དེ་ཐོས་ནས། །ཡིད་རངས་གྱུར་ཅིང་སྟོབས་ཀྱང་སྐྱེས་པར་གྱུར། །ལྷ་མ་ཡིན་ལུང་བསྟན་པའི་ལེའུ་སྟེ། བཞི་པའོ།། །།དེ་ནས་ཚེ་དང་ལྡན་པ་འོད་སྲུང་ཆེན་པོས་ལྷ་མ་ཡིན་གྱི་མཆོད་པ་རྣམ་པ་དེ་ལྟ་བུ་དེ་མཐོང་ནས་ངོ་མཚར་དུ་གྱུར་ཏེ། འདི་སྙམ་དུ་དེ་བཞིན་གཤེགས་པས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་དགེ་བའི་རྩ་བ་ཇི་ལྟ་བུ་ཞིག་མངོན་པར་འདུ་མཛད་ན། འདི་ལྟ་བུའི་རྣམ་པར་སྨིན་པ་གྲུབ་སྙམ་ནས་དེའི་ཚེ་སེམས་ཇི་ལྟར་མཉམ་པར་བཞག་པས་བསྐལ་པ་གྲངས་མེད་པ་ཡང་རྗེས་སུ་དྲན་ཞིང ། བཅོམ་ལྡན་འདས་ཀྱིས་སྲིད་པའི་
129b
རྒྱུད་དེ་དང་དེར་འཆི་འཕོ་དང་སྐྱེ་བ་ན་དགེ་བའི་རྩ་བ་གང་དག་མངོན་པར་འདུ་མཛད་པ་དང ། དགེ་བའི་རྩ་བ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པ་དང ། དགེ་བའི་རྩ་བ་གང་དག་གིས་ཕྱིར་མི་ལྡོག་པ་བརྙེས་པར་གྱུར་པ་དེ་དག་ཐམས་ཅད་རྗེས་སུ་དྲན་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་མཉམ་པར་བཞག་གོ་།དེ་ནས་ཚེ་དང་ལྡན་པ་འོད་སྲུང་ཆེན་པོས་བཅོམ་ལྡན་འདས་ཀྱི་དགེ་བའི་རྩ་བ་བདག་ཉིད་ཆེན་པོ་རྗེས་སུ་དྲན་པར་གྱུར་ནས་འདི་སྙམ་དུ་སེམས་ཏེ། བཅོམ་ལྡན་འདས་ཀྱིས་དགེ་བའི་རྩ་བ་བདག་ཉིད་ཆེན་པོ་དེ་ལྟ་བུ་མཛད་ན། དེའི་ཐུགས་བསྐྱེད་པ་གཅིག་ལ་ཡང་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ན་སེམས་ཅན་གང་ཇི་སྙེད་ཅིག་འཁོད་པ་དེ་དག་ཐམས་ཅད་མིའི་ལུས་ཐོབ་པར་གྱུར་ཏེ། ལྷ་མ་ཡིན་གྱི་མཆོད་པ་ཇི་སྙེད་པ་དེ་སྙེད་དུ་སེམས་ཅན་རེ་རེས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་མཆོད་པ་བྱས་ཀྱང་དེ་དག་གི་ཐུགས་བསྐྱེད་པ་གཅིག་ལ་ཡང་ལན་ལོན་པར་མི་ནུས་སོ། །སྙམ་མོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་ཏིང་ངེ་འཛིན་དེ་ལས་ལངས་ཏེ། ངོ་མཚར་དང་དད་པ་ཐོབ་པར་གྱུར་ནས་དེའི་ཚེ་བཅོམ་ལྡན་འདས་ལ་ཚིགས་སུ་བཅད་དེ་མངོན་པར་བསྟོད་པ། ཐུབ་པ་བྱང་ཆུབ་གཞོལ་བ་ཡི། །ཐུགས་བསྐྱེད་པ་ནི་རེ་རེ་ལའང ། །ལྷ་མ་ཡིན་གྱི་མཆོད་པ་འདིས། །ཆ་ཙམ་མི་སྤྱོད་
130a
༄#། །མིའི་སེངྒེ། །དེ་ལྟའི་ཡོན་ཏན་མཐར་ཕྱིན་ཏེ། །ལྷ་དང་མི་ཡིས་མཆོད་གྱུར་པ། །ཙནྡན་ཕུར་མ་རི་རབ་ཙམ། །མི་མཆོག་ཁྱོད་ལ་མཆོད་པར་འོས། ། མི་ཡི་སེངྒེ་ཁྱོད་ལ་ནི། །གངྒཱའི་བྱེ་མ་ཆེས་མང་བའི། །རྒྱ་མཚོ་རབ་ཏུ་བཀང་བ་ཡི། །སྤོས་ཆུ་དག་གིས་མཆོད་པར་འོས། །ཡོན་ཏན་ཆེན་པོ་མངའ་བ་ལ། །གངྒཱའི་བྱེ་མ་ཆེས་མང་བའི། །མེ་ཏོག་ཚོགས་ནི་རི་བོ་མཆོག་།ཁོར་ཡུག་ཆེན་པོ་མཉམ་མཆོད་འོས། །རྒྱལ་བ་སྒྲོན་མ་རང་བྱུང་བ། །མར་མེའི་སྙིང་པོ་རི་རབ་ཙམ། །འབྲུ་མར་རྒྱ་མཚོའི་ཆུ་སྙེད་ཀྱི། །མར་མེ་རྣམས་ཀྱིས་མཆོད་པར་འོས། །མཐུ་ཆེན་མངའ་བ་དེ་ལྟ་བུར། །ཡོན་ཏན་ཕ་རོལ་ཕྱིན་གྱུར་པ། །གངྒཱའི་བྱེ་མ་ཆེས་མང་བའི། །མེ་ཏོག་མཆོད་རྟེན་མཆོད་པར་འོས། །མི་དབང་མཆོད་པས་ཐུགས་བརྩེ་བ། །རིན་ཆེན་གདུགས་ནི་ཆེ་རྣམས་ཀྱིས། །བསྐལ་པ་ཁྲག་ཁྲིག་རྣམས་སུ་ཡང ། །སེམས་ཅན་མཆོག་ལ་མཆོད་པར་འོས། །ཡོན་ཏན་མཐའ་ཡས་མངའ་བ་ཁྱོད། །རིན་པོ་ཆེ་ཡི་རྒྱལ་མཚན་གྱིས། །ཕྱོགས་བཅུའི་འཇིག་རྟེན་ཁམས་བཀང་སྟེ། །བསྐལ་པ་བསམ་ཡས་མཆོད་པར་འོས། །མི་ཡི་སེངྒེ་ཁྱོད་ལ་ནི། །བསྐལ་པ་ཁྲག་ཁྲིག་དཔག་མེད་པར། །གངྒཱའི་ཕྱེ་མ་ཆེས་མང་བའི། །བ་དན་རྣམས་ཀྱིས་མཆོད་པར་འོས། །དྲང་སྲོང་ཆེན་པོ་སྨྲ་བའི་སྟག་།ལྷ་རྣམས་དང་ནི་མི་དག་དང ། །གཞན་ཡང་
130b
སེམས་ཅན་གང་ཚོགས་པ། །བརྟག་བཟུང་དཔེ་ལ་གསན་དུ་གསོལ། །གལ་ཏེ་གངྒཱའི་བྱེ་སྙེད་ཀྱི། །ཕྱོགས་བཅུའི་འཇིག་རྟེན་ཁམས་རྣམས་ཀྱི། །སེམས་ཅན་ཐམས་ཅད་སངས་རྒྱས་སུ། །མི་མཆོག་སྟོབས་བཅུའི་སྟོབས་ལྡན་ལ། །དེ་དག་རེ་རེའི་མགོ་བོ་ཡང ། །གངྒཱའི་བྱེ་མ་སྙེད་གྱུར་ཏེ། །མགོ་བོ་དེ་དག་རེ་རེ་ཞིང ། །དེ་སྙེད་ཁ་དང་ལྡན་གྱུར་ལ། །ཁ་རྣམས་དེ་དག་རེ་རེ་ཞིང ། །ལྕེ་དང་ཁ་ཡི་གྲངས་མཉམ་ལ། །གངྒཱའི་ཀླུང་གི་བྱེ་སྙེད་ཀྱི། །བསྐལ་པར་བསྟོད་པ་བགྱིས་ཀྱང་ནི། །རྒྱལ་བ་དེ་དག་སྤོབས་མི་བས། །ཁྱོད་ཀྱི་ཡོན་ཏན་མཐར་མི་ཕྱིན། ། རྒྱལ་བ་དེ་ལྟའི་ཡོན་ཏན་གྱི། །ཕ་རོལ་ཏུ་ནི་ཕྱིན་པར་གྱུར། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། །དགེ་སློང་དག། ལེགས་སོ། །ལེགས་སོ། །ངའི་ཉན་ཐོས་རྣམས་ནི། དྲང་པོར་གྱུར་པ། ཡེ་ཤེས་དང་ལྡན་པར་གྱུར་པ། ཆོས་སུ་གྱུར་པ། དབང་དུ་གྱུར་པ། ཚད་མར་གྱུར་པ་ཤ་སྟག་གནས་ཏེ། དེ་དག་ནི། ངའི་ཡོན་ཏན་གྱི་ཚོགས་ལ་འཇུག་པར་ཤ་སྟག་གོ་།དེ་ཅིའི་ཕྱིར་ཞེ་ན། དགེ་སློང་དག་།དེ་བཞིན་གཤེགས་པ་ནི། ཡོན་ཏན་དཔག་ཏུ་མེད་པ་དང་ལྡན་པ་སྟེ། ཡོན་ཏན་བསམ་གྱིས་མི་ཁྱབ་པ་དང་ལྡན་པའོ། །དགེ་སློང་དག་།དེ་བཞིན་གཤེགས་པའི་ཡོན་ཏན་རྣམས་དང ། དེ་བཞིན་གཤེགས་པའི་ཡོན་ཏན་གྱི་ཕ་རོལ་ཏུ་ཕྱིན་པ་དང ། དེ་བཞིན་གཤེགས་པའི་ཡོན་
131a
༄#། །ཏན་གྱི་ཚོགས་ནི། བསམ་གྱིས་མི་ཁྱབ་པའོ། །དགེ་སློང་དག་།དེ་བཞིན་གཤེགས་པའི་ཡོན་ཏན་རྣམས་གཟུགས་ཅན་ཞིག་ཡིན་ན་ནི། སེམས་བསྐྱེད་པ་རེ་རེའི་ཡོན་ཏན་གྱི་ཚོགས་ཀྱང་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དུ་ཤོང་བར་མི་འགྱུར་ཏེ། སེམས་བསྐྱེད་པ་རེ་རེའི་ཡོན་ཏན་གྱི་ཚོགས་ཀྱང་དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ཀྱིས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་གང་འདི་གྲངས་ཀྱིས་ཚད་གཟུང་བར་བརྗོད་ཀྱང་བརྗོད་པར་མི་ནུས། བསམ་ཡང་བསམ་པར་མི་ནུས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་བསྐྱེད་པ་གང་ཡང་སེམས་ཅན་དུ་བསྡུ་བར་བསྡུས་པ་སེམས་ཅན་གང་ཇི་སྙེད་ཅིག་ཡོད་པའི་སེམས་ཅན་དེ་དག་ཐམས་ཅད་ལ་ཕན་པ་དང ། བདེ་བའི་དོན་དུ་མ་བསྐྱེད་པ་གཅིག་ཀྱང་མེད་དེ། སེམས་ཅན་གྱི་ཁམས་ནི། ཚད་མེད་པས་སེམས་ཅན་གྱི་ཁམས་ཇི་སྙེད་པ་དེ་སྙེད་ཀྱི་བསོད་ནམས་དེ་བཞིན་གཤེགས་པའི་སེམས་བསྐྱེད་པ་རེ་རེ་ལས་འབྱུང་ངོ ། །སེམས་ཅན་གྱི་ཁམས་ནི། མི་ཟད་པ་སྟེ། སེམས་ཅན་གྱི་ཁམས་ཇི་ལྟར་མི་ཟད་པ་དེ་ལྟར་མི་ཟད་པའི་བསོད་ནམས་དེ་བཞིན་གཤེགས་པའི་སེམས་བསྐྱེད་པ་རེ་རེ་ལས་འབྱུང་ངོ ། །སེམས་དེ་ནི། སེམས་ཅན་ཐམས་ཅད་ལ་ཕན་
131b
པའི་དོན་དུ་སྐྱེས་པས། སེམས་ཅན་ཐམས་ཅད་ཀྱིས་མཆོད་ཀྱང་ལན་ལོན་པར་མི་ནུས་སོ། །དེ་ཅིའི་ཕྱིར་ཞེ་ན། འཇིག་རྟེན་པའི་མཆོད་པ་ནི། ཟང་ཟིང་དང་བཅས་པ་ཡིན་ལ། བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་སེམས་ཅན་ཐམས་ཅད་ལ་ཕན་པའི་དོན་དུ་འབྱུང་བ་ནི། སེམས་ཅན་འཁོར་བ་ལ་གཞོལ་བ་འདི་དག་མྱ་ངན་ལས་འདས་པ་ལ་ཇི་ལྟར་གཞོལ་བར་འགྱུར་ཞེས་ཏེ། ཟང་ཟིང་མེད་པའི་ཕྱིར་རོ། །དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་རྣམས་ཀྱི་དོན་དུ་ཟང་ཟིང་མེད་པའི་སེམས་དཔག་ཏུ་མེད་པ་བསྐྱེད་པར་གྱུར་ཏོ། །དགེ་སློང་དག། སྔོན་བྱུང་བ་འདས་པའི་འདུས་བསྐལ་པ་དཔག་ཏུ་མེད་པ། བགྲང་དུ་མེད་པ། བསམ་གྱིས་མི་ཁྱབ་པ།་མཚུངས་པ་མེད་པ། གཞལ་དུ་མེད་པ། བརྗོད་དུ་མེད་པ་འདས་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་དབང་པོའི་ཏོག་ཅེས་བྱ་བ་འཇིག་རྟེན་དུ་བྱུང་སྟེ། དགེ་སློང་དག་།དེ་བཞིན་གཤེགས་པ་དབང་པོའི་ཏོག་དེས་སེམས་བསྐྱེད་པ་རེ་རེ་ཞིང་གངྒཱའི་ཀླུང་གི་བྱེ་མ་སྙེད་ཀྱི་འཇིག་
132a
༄#། །རྟེན་གྱི་ཁམས་ཀྱི་སེམས་ཅན་རྣམས་ལ་ཕན་པར་དགོངས་པར་གྱུར་ཏེ། དོན་ཀྱང་མཛད་དོ། །དེ་བཞིན་གཤེགས་པ་དབང་པོའི་ཏོག་གི་སངས་རྒྱས་ཀྱི་ཞིང་ཡང་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ལ་སངས་རྒྱས་ཀྱི་ཞིང་གཅིག་ཏུ་གྱུར་ཏེ་ཡོངས་སུ་དག་ཅིང་ངན་སོང་དང ། མི་ཁོམ་པ་ཐམས་ཅད་ཡོངས་སུ་ཆད་པ་སྟེ། དེ་བཞིན་གཤེགས་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་ལོག་པར་ངེས་པའི་སེམས་ཅན་གྱི་སྐྱེ་བོ་ཡོད་མེད་པར་གྱུར་ཏོ། །ལྟ་བའི་རྣམ་པ་ཡོད་མེད་པར་གྱུར་ཏོ། །མངོན་པའི་རྒྱལ་ཅན་ཡོད་མེད་པར་གྱུར་ཏོ། །ལུས་དང ། ངག་དང ། ཡིད་ཀྱི་ལས་ཀྱི་མཐའ་ཡོངས་སུ་མ་དག་པ་དང་ལྡན་པའི་སེམས་ཅན་ཡོད་མེད་པར་གྱུར་ཏོ། །ངན་སོང་གི་རྒྱུར་འགྱུར་བའི་ཉོན་མོངས་པ་དང ། ལས་འབྱུང་བ་ཡོད་མེད་པར་གྱུར་ཏོ། །དེར་ཅིའི་ཕྱིར་ཞེ་ན། དེ་བཞིན་གཤེགས་པ་དེས་ཡུན་རིང་པོ་ནས་སེམས་ཅན་རྣམས་དགེ་བའི་ཆོས་རྣམས་ལ་བཙུད་ཅིང་གདམས་ཏེ། རྗེས་སུ་བསྟན་ཅིང་བསླབ་པའི་ཕྱིར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་ཏོག་གི་སངས་རྒྱས་ཀྱི་ཞིང་དེ་ན་འཁོད་པའི་སེམས་ཅན་རྣམས་ཀྱང་བདེ་བ་ལྔ་ཐོབ་པར་གྱུར་ཏེ། འདི་ལྟར་ལ་ལ་ནི། འདོད་པའི་བདེ་བ་དང་ལྡན་པར་
132b
གྱུར་ཏོ། །ལ་ལ་ནི། ཁྱིམ་ནས་འབྱུང་བའི་བདེ་བ་དང་ལྡན་པར་གྱུར་ཏོ། །ལ་ལ་ནི། བསམ་གཏན་གྱི་བདེ་བ་དང་ལྡན་པར་གྱུར་ཏོ། །ལ་ལ་ནི། སྙོམས་པར་འཇུག་པའི་བདེ་བ་དང་ལྡན་པར་གྱུར་ཏོ། །ལ་ལ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བདེ་བ་དང་ལྡན་པར་གྱུར་ཏེ། །དེ་དག་བདེ་བ་དེ་ལ་ཡང་སྤྱོད་ལ། བདེ་བ་དེ་དག་ལ་ཡང་མངོན་པར་ཞེན་པ་མེད་པར་གྱུར་ཏེ། །འདི་ལྟ་སྟེ། དཔེར་ན། བུང་བ་མེ་ཏོག་གི་ཁུ་བས་ཉེ་བར་འཚོ་ཡང་དེ་ལ་མངོན་པར་ཞེན་པ་མེད་དོ། །དེ་བཞིན་དུ་སེམས་ཅན་དེ་དག་ཀྱང་བདེ་བ་དེ་ལ་ཡོངས་སུ་སྤྱོད་ཀྱང་དེ་ལ་མངོན་པར་ཞེན་པ་མེད་དོ། །འདི་ལྟ་སྟེ། དཔེར་ན། བར་སྣང་ལ་ཡང་རྒྱུ་བའི་བྱ་ནི། བར་སྣང་ལ་ཡང་རྒྱུ་ལ། དེ་ལ་མངོན་པར་ཆགས་པ་ཡང་མེད་དོ། །དེ་བཞིན་དུ་སེམས་ཅན་དེ་དག་ཀྱང་བདེ་བ་དེ་ལ་ཡོངས་སུ་སྤྱོད་ཀྱང་དེ་ལ་མངོན་པར་ཞེན་པར་མེད་དོ། །དེ་བཞིན་གཤེགས་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་འཁོད་པའི་སེམས་ཅན་རྣམས་ལ་ཡིད་མི་བདེ་བར་འགྱུར་བའི་མི་དགའ་བ་མེད། རྨོངས་པར་འགྱུར་བ་མེད་དེ། གཞན་དུ་ན་ཡིད་བདེ་བར་འགྱུར་བའི་དགའ་བ་ཤ་སྟག་ལ་ཡོངས་སུ་སྤྱད་དེ། དེ་ནི། འདི་ལྟར་སྔོན་དགེ་བའི་རྩ་བ་དེ་ལྟ་བུ་བསྐྱེད་པའི་ཕྱིར་རོ། །དེ་ཅིའི་ཕྱིར་ཞེ་ན། སེམས་ཅན་དེ་དག་ནི། དེ་བཞིན་གཤེགས་པ་དབང་པོའི་ཏོག་དེས་སྔོན་བྱང་ཆུབ་སེམས་དཔའི་
133a
༄#། །སྤྱད་པ་སྤྱོད་པའི་ཚེ་མི་དགེ་བ་ལས་ཡོངས་སུ་བཟློག་སྟེ་དགེ་བའི་རྩ་བ་ལ་བཙུད་པས་དེ་དག་ལ་ལས་གང་གིས་སྡུག་བསྔལ་གྱི་ཚོར་བ་མྱོང་བར་འགྱུར་བའི་རྣམ་པར་སྨིན་པ་དབང་མེད་པར་འབྱུང་བ་མི་དགེ་བའི་ལས་དེ་ལྟ་བུ་ཡོད་མེད་དེ། དེ་མ་བསགས་པའི་ཕྱིར་སྡུག་བསྔལ་ཚོར་བར་འགྱུར་བའི་རྣམ་པར་སྨིན་པ་མི་འབྱུང་ངོ ། །དེ་དག་གིས་རྨོངས་པའི་སེམས་ཙམ་གྱིས་ཀྱང་ལས་གང་གིས་རྨོངས་པ་རྣམས་ལ་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་འབྱུང་བར་འགྱུར་བ་དེ་ལྟ་བུ་མངོན་པར་འདུ་མ་བྱས་ཏེ། དེ་མ་བསགས་པའི་ཕྱིར་རྨོངས་པར་འགྱུར་བའི་ཚོར་བ་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པ་དེ་མི་འབྱུང་ངོ ། །དེ་བཞིན་གཤེགས་པ་དབང་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་རྒྱུ་གང་གིས་སེམས་ཅན་དེ་དག་དུས་གྱུར་པ་ལས་བྱུང་བའི་སྡུག་བསྔལ་མི་འབྱུང་བས་ཉམས་སུ་མི་བདེ་བའི་ཉི་མ་མི་འཆར་རོ། །རླུང་ཉམས་སུ་མི་བདེ་བ་མི་ལྡང་ངོ ། །ཆར་ཉམས་སུ་མི་བདེ་བ་མི་འབབ་བོ། །དེ་བཞིན་གཤེགས་པ་དབང་པོའི་ཏོག་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་དེ་དག་ལ་ལུས་དང ། ངག་དང ། ཡིད་ཀྱི་ལས་ཐམས་ཅད་ཤེས་པ་སྔོན་དུ་འགྲོ་ཞིང་ཤེས་པའི་རྗེས་སུ་འབྲེལ་བ་བསྟན་ཅིང་བཤད་པས་སེམས་ཅན་དེ་
133b
དག་གིས་ཀྱང་བྱང་ཆུབ་སེམས་དཔའ་དེ་ལས་བསྟན་པ་དེ་ཐོས་ནས་ལུས་དང ། ངག་དང ། ཡིད་ཀྱི་ལས་ཐམས་ཅད་ཤེས་པ་མངོན་དུ་འགྲོ་ཞིང་ཤེས་པའི་རྗེས་སུ་འབྲང་བར་ཡོངས་སུ་བསྒྲུབས་པས་ལས་དེའི་རྣམ་པར་སྨིན་པས་དེ་དག་ལ་རྨོངས་པར་འགྱུར་བའམ། ཡིད་མི་དགའ་བར་འགྱུར་བ་མེད་དོ། །རྨོངས་པ་རྣམས་ལ་རྒྱུ་གང་གིས་བདེ་བ་ཡང་མ་ཡིན། སྡུག་བསྔལ་ཡང་མ་ཡིན་པའི་ཚོར་བ་འབྱུང་བ་མེད་དོ། །དེ་ལྟར་སངས་རྒྱས་ཀྱི་ཞིང་དེ་ན་སེམས་ཅན་དེ་དག་ལ་སྡུག་བསྔལ་གྱི་ཚོར་བ་མེད་ཅིང་བདེ་བ་ཡང་མ་ཡིན། སྡུག་བསྔལ་བ་ཡང་མ་ཡིན་པ་མེད་དོ། །སངས་རྒྱས་ཀྱི་ཞིང་དེར་སྐྱེས་པའི་སེམས་ཅན་དེ་བཞིན་གཤེགས་པ་དེས་གདམས་པ་དེ་དག་ནི། ཆོས་ལ་རིམ་གྲོ་བྱ་བ་ཆེན་པོས་ཉེ་བར་གནས་པར་གྱུར་ཏོ། །དེ་དག་འཆག་ན་ཡང་ཆོས་ཉིད་ལ་སེམས་ཤིང་ཆོས་ལ་མོས་པས་ཞེན་པས་ཡིད་ཀྱིས་འཆག་སྟེ། ཆོས་ལ་མོས་ཤིང་ཞེན་པའི་ཡིད་ཀྱིས་འཆག་པ་དེ་དག་ལ་སྡུག་བསྔལ་གྱི་ཚོར་བ་མི་འབྱུང་ངོ ། །དེ་བཞིན་དུ་འགྲེང་བ་དང ། འདུག་པ་དང ། ཉལ་བ་དང ། སད་པ་དང ། སྤྱོད་ལམ་ཐམས་ཅད་དུ་ཡང་སྡུག་བསྔལ་མི་འབྱུང་ངོ ། །སངས་རྒྱས་ཀྱི་ཞིང་དེའི་སེམས་ཅན་དེ་དག་ལ་ཡང་བ་མ་སྤངས་པ་མེད་དེ། དེའི་ཕྱིར་ཡང་བ་མ་སྤངས་པའི་སྡུག་བསྔལ་
134a
༄#། །གྱི་ཚོར་བ་མི་འབྱུང་ངོ ། །ཡང་དག་པའི་སྤང་པ་ཡོད་པས་དེ་དག་ལ་སྐྱོ་བ་མེད་དེ། དེའི་ཕྱིར་དེ་དག་ལ་ཡང་དག་པར་སྤང་བར་བྱ་བའི་སྡུག་བསྔལ་ཡང་མེད་དོ། །སེམས་ཅན་དེ་དག་ལ་འགྱུར་བའི་སྡུག་བསྔལ་ཡང་མེད་དེ། དེ་ནི། འདི་ལྟར་སེམས་ཅན་དེ་དག་ཆོས་ཐམས་ཅད་ལ་མངོན་པར་ཞེན་པ་མེད་པའི་ཕྱིར་རོ། །དེ་དག་ལ་མི་སྡུག་པ་དང་ཕྲད་པའི་སྡུག་བསྔལ་ཡང་མེད་དེ། དེ་ནི། འདི་ལྟར་སེམས་ཅན་དེ་དག་སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་ཉེ་བར་གནས་པའི་ཕྱིར་རོ། །དེ་དག་ལ་སྡུག་པ་དང་བྲལ་བའི་སྡུག་བསྔལ་ཡང་མེད་དེ། དེ་ཅིའི་ཕྱིར་ཞེ་ན། འདི་ལྟར་དེ་དག་ཆོས་ཐམས་ཅད་ལ་མངོན་པར་ཞེན་པ་མེད་པའི་ཕྱིར་རོ། །སྡུག་པ་དང་བྲལ་བའི་སྡུག་བསྔལ་ནི། སྡུག་པ་ལས་འབྱུང་སྟེ། དེའི་ཕྱིར་དེ་ལ་སྡུག་པ་དང་བྲལ་བའི་སྡུག་བསྔལ་ཡང་མེད་དོ། །སེམས་ཅན་དེ་དག་ལ་སྡུག་བསྔལ་བའི་སྡུག་བསྔལ་ཡང་མི་འབྱུང་ངོ ། །འདི་ལྟར་དེ་ན་སྡུག་བསྔལ་གྱི་ཚོར་བ་རྒྱུ་བ་མེད་པའི་ཕྱིར་རོ། །གཞན་དུ་ན་འདུ་བྱེད་ཀྱི་སྡུག་བསྔལ་གཅིག་པུ་ཡོད་དེ། འདི་ལྟ་སྟེ། མི་རྟག་པའི་སྡུག་བསྔལ་ཉིད་དོ། །དེ་བཞིན་གཤེགས་པ་དེ་ནི། དོན་དམ་པའི་ཆོས་སྟོན་ཏོ། །དེ་བཞིན་གཤེགས་པ་དབང་པོ་ཏོག་དེ་
134b
བསྐལ་པ་གངྒཱའི་ཀླུང་གི་བྱེ་མ་སྙེད་དུ་བཞུགས་པའི་ཚེ་དེས་གསུངས་པ་ལ་ཕྱིར་སྨྲ་བའི་སེམས་ཅན་གང་ཡང་སངས་རྒྱས་ཀྱི་ཞིང་དེར་མ་བྱུང་སྟེ། དེ་ནི། འདི་ལྟར་སྔོན་སེམས་ཅན་དེ་དག་ལེགས་པར་ཡོངས་སུ་སྨིན་པར་བྱས་པའི་ཕྱིར་རོ། །དགེ་སློང་དག་།དེ་ལ་ཇི་སྙམ་དུ་སེམས། དགེ་བའི་རྩ་བ་ཞན་པ་དང ། དམའ་བ་དང ། ཞུམ་པ་དང ། ཆུང་བ་དང ། སྡུག་བསྔལ་གྱིས་ཡོངས་སུ་བསྒྲུབས་པ་དང ། སྡུག་བསྔལ་དང་འདྲེས་པ་དང ། སྡུག་བསྔལ་དང་ལྡན་པ་དང ། སྡུག་བསྔལ་གྱིས་ཡོངས་སུ་བཟུང་བ་དང ། ཉེས་པར་བརྩམས་པ་དང ། ཉེས་པར་བསྒྲུབས་པའི་དགེ་བའི་རྩ་བས་སེམས་ཅན་དེ་སྙེད་ཅིག་གི་དོན་བྱ་བའམ། དེ་དག་ལ་ཕན་པར་བསམ་པའམ། བདེ་བ་སྒྲུབ་པའམ།་སྡུག་བསྔལ་བསལ་བའམ། དེ་ལྟར་ཐ་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ། གསོལ་པ།་བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། དགེ་སློང་དག་།དེ་ལ་ཇི་སྙམ་དུ་སེམས། སེམས་ཞེན་པ་དང ། སེམས་དམའ་བ་ནས་ཉེས་པར་བསྒྲུབས་པའི་བར་གྱི་སེམས་ཀྱིས་སེམས་ཅན་དེ་སྙེད་ཅིག་གི་དོན་བྱ་བའམ། དེ་དག་ལ་ཕན་པར་བསམ་པའམ། བདེ་བ་སྒྲུབ་པའམ། སྡུག་བསྔལ་བསལ་བའམ། དེ་
135a
༄#། །ལྟར་ཐ་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། དགེ་སློང་དག་།དེ་ལ་ཇི་སྙམ་དུ་སེམས། དད་པ་ཞན་པ་ནས་ཉེས་པར་བསྒྲུབས་པའི་དད་པའི་བར་དང ། ཚུལ་ཁྲིམས་ཞན་པ་ནས་ཉེས་པར་བསྒྲུབས་པའི་ཚུལ་ཁྲིམས་ཀྱི་བར་དང ། ཐོས་པ་ཞན་པ་ནས་ཉེས་པར་བསྒྲུབས་པའི་ཐོས་པའི་བར་དང ། བརྩོན་འགྲུས་ཞན་པ་ནས་ཉེས་པར་བསྒྲུབས་པའི་བརྩོན་འགྲུས་ཀྱི་བར་དང ། དྲན་པ་ཞན་པ་ནས་ཉེས་པར་བསྒྲུབས་པའི་དྲན་པའི་བར་དང ། ཏིང་ངེ་འཛིན་ཞན་པ་ནས་ཉེས་པར་བསྒྲུབས་པའི་ཏིང་ངེ་འཛིན་གྱི་བར་དང ། ཤེས་རབ་ཞན་པ་ནས་ཉེས་པར་བསྒྲུབས་པའི་ཤེས་རབ་ཀྱི་བར་གྱིས་སེམས་ཅན་དེ་སྙེད་ཅིག་གི་དོན་བྱ་བའམ། དེ་དག་ལ་ཕན་པར་བསམ་པའམ། བདེ་བསྒྲུབ་པའམ། སྡུག་བསྔལ་བསལ་བའམ། དེ་ལྟར་ཐ་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ།་གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་།ལེགས་སོ། །ལེགས་སོ། །དེ་ནི། དགེ་
135b
བའི་རྩ་བ་ཞན་པ་དང ། སེམས་ཞན་པ་དང ། དད་པ་དང ། ཚུལ་ཁྲིམས་དང ། ཐོས་པ་དང ། བརྩོན་འགྲུས་དང ། དྲན་པ་དང ། ཏིང་ངེ་འཛིན་དང ། ཤེས་རབ་ཞན་པ་དང ། དམའ་བ་དང ། ཞུམ་པ་དང ། ཆུང་བ་དང ། སྡུག་བསྔལ་གྱིས་ཡོངས་སུ་བསྒྲུབས་པ་དང ། སྡུག་བསྔལ་དང་འདྲེས་པ་དང ། སྡུག་བསྔལ་དང་ལྡན་པ་དང ། སྡུག་བསྔལ་གྱིས་ཡོངས་སུ་བཟུང་བ་དང ། ཉེས་པར་བསམ་པ་དང ། ཉེས་པར་བསྒྲུབས་པའི་ཤེས་རབ་ཀྱིས་སེམས་ཅན་དེ་སྙེད་ཀྱི་དོན་བྱ་བའམ། དེ་དག་ཕན་པར་བསམ་པའམ། བདེ་བ་སྒྲུབ་པའམ། སྡུག་བསྔལ་བསལ་བའམ། དེ་ལྟར་ཐ་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་མི་ནུས་སོ། །དགེ་སློང་དག་།དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན། དེ་བཞིན་གཤེགས་པ་དབང་པོའི་ཏོག་ཅེས་བྱ་བ་བྱུང་བ་དེ་གང་ཞིག་ཡིན་སྙམ།་དེ་སྐད་ཅེས་བཀའ་སྩལ་པ་དང ། དགེ་སློང་དེ་དག་ཅང་མི་ཟེར་བར་འཁོད་དོ། །དེའི་ཚེ་ཤར་ཕྱོགས་ལོགས་སུ་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཟླ་བའི་འོད་ཟེར་གྱིས་རབ་ཏུ་བརྒྱན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོ་ཞེས་བྱ་བ་ད་ལྟར་བཞུགས་ཏེ་
136a
༄#། །འཚོ་ཞིང་གཞེས་ལ་ཆོས་ཀྱང་སྟོན་ཏེ། དེར་འཇམ་དཔལ་གཞོན་ནུར་གྱུར་པ་འདུས་ཤིང་འདུག་པར་གྱུར་པ་དེས་བཅོམ་ལྡན་འདས་ཀྱི་དགོངས་པ་སེམས་ཀྱིས་ཤེས་ནས་བཅོམ་ལྡན་འདས་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་མི་མཇེད་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་ཤཱཀྱ་ཐུབ་པ་ཆོས་སྟོན་གྱི། བཅོམ་ལྡན་འདས་ཤཱཀྱ་ཐུབ་པ་དེ་ལ་བསྙེན་བཀུར་བགྱི་བའི་སླད་དུ་བདག་ཀྱང་མཆིའོ།། དེ་སྐད་ཅེས་གསོལ་པ་དང ། བཅོམ་ལྡན་འདས་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། དེའི་དུས་ལ་བབ་པར་ཤེས་ན་སོང་ཞིག་།དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བཅོམ་ལྡན་འདས་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོའི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་འདི་ལྟ་སྟེ། དཔེར་ན། སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ་བརྐྱང་པ་ལས་བསྐུམ་པ་ཙམ་གྱིས་འཇམ་དཔལ་གཞོན་ནུར་གྱུར་པ་འཇིག་རྟེན་གྱི་ཁམས་ཟླ་བའི་འོད་ཟེར་གྱིས་རབ་ཏུ་བརྒྱན་པ་དེ་ནས་མི་སྣང་བར་གྱུར་
136b
ཏེ་བཅོམ་ལྡན་འདས་ཤཱཀྱ་ཐུབ་པའི་སྤྱན་སྔ་འདིར་གནས་པར་གྱུར་ཏོ། །དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གང་འདི་སྐད་དུ་དགེ་སློང་དག་།དེ་ལ་ཇི་སྙམ་དུ་སེམས།་དེའི་ཚེ་དེའི་དུས་ན་དེ་བཞིན་གཤེགས་པ་དབང་པོའི་ཏོག་ཅེས་བྱ་བ་བྱུང་བ་དེ་གང་ཞིག་ཡིན་སྙམ་ཞེས་བཀའ་སྩལ་པ་ནི། བཅོམ་ལྡན་འདས། བཅོམ་ལྡན་འདས་ཉིད་ནི།་དེའི་ཚེ་དེའི་དུས་ན་དབང་པོའི་ཏོག་ཅེས་བགྱི་བའི་དེ་བཞིན་གཤེགས་པར་གྱུར་ཏོ། །དེ་ཅིའི་སླད་དུ་ཞེ་ན། འདི་ལྟར་བཅོམ་ལྡན་འདས་ནི། བསམ་གྱིས་མི་ཁྱབ་པའི་ཐབས་མཁས་པ་དང་ལྡན་པ་སྟེ། སེམས་ཅན་ཡོངས་སུ་སྨིན་པར་བགྱི་བ་ལ་ཆོག་པ་མི་མངའ། སངས་རྒྱས་ཀྱི་ཞིང་ཡོངས་སུ་དག་པར་བགྱི་བ་ལ་རྒྱུན་ཆད་པར་བགྱི་བ་མ་མཆིས། སེམས་ཅན་རྣམས་བྱང་ཆུབ་སེམས་དཔའི་ཆོས་རྣམས་ལ་དགོད་པས་ཆོག་པ་མི་མངའ་སྟེ། ལ་ལ་ཞིག་ཡང་དག་པར་སྨྲ་བས་ཡང་དག་པར་སྨྲ་ན། རྒྱལ་བ་གཙོ་བོ། །རྒྱལ་བ་དམ་པ། རྒྱལ་བ་མཆོག་།རྒྱལ་བ་རབ་ཅེས་བརྗོད་པ་དེ་ནི། བཅོམ་ལྡན་འདས་ཉིད་ལགས་པར་ཡང་དག་པར་བརྗོད་པས་ཡང་དག་པར་བརྗོད་དོ། །དེ་སྐད་ཅེས་སྨྲས་
137a
༄#། །ནས་འཇམ་དཔལ་གཞོན་ནུར་གྱུར་པས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དཔའ་བོ་རྣམས་ནི་ཐབས་མཁས་ཏེ། །སེམས་ཅན་རྣམས་ལ་ཐུགས་བརྩེ་ཞིང ། །སེམས་ཅན་ཡོངས་སུ་སྨིན་མཛད་ཕྱིར། །དཔའ་བོ་ཆེན་པོ་རྣམ་པར་འཕྲུལ། །བྱེ་བ་བརྒྱད་ཅུར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང ། །ད་དུང་ཆོག་པའི་འདུ་ཤེས་བསལ། །བྱང་ཆུབ་མཆོག་ཏུ་ཐུགས་ཀྱང་འཇུག་།སྟོང་གསུམ་དྲུག་ཅུ་རྩ་གཅིག་གི་།སངས་རྒྱས་ཞིང་རྣམས་དག་མཛད་པས། །ཇི་ལྟར་ཐུབ་པ་ཐབས་མཁས་པ། །རྒྱལ་བ་ཁྱོད་ནི་ཀུན་གྱིས་འཚལ། །ད་དུང་དང་པོ་ཐུགས་བསྐྱེད་པར། །དེ་དང་དེར་ནི་ཡོངས་བསྟན་ཏེ། །ད་དུང་དུ་ཡང་འདྲེན་པ་ཁྱོད། །སངས་རྒྱས་མང་པོ་སྟོན་པ་མཛད། །རྣམ་པ་སྣ་ཚོགས་གཟུགས་རྣམས་ཀྱིས། །གང་ཟག་མཆོག་ནི་སྤྱོད་པ་མཛད། །ཆོས་ཀྱི་དབྱིངས་ལ་ཆགས་མི་མངའ། །ཁྱོད་ཀྱིས་གང་ཡང་མཁྱེན་མཛད་དེ། །བརྒྱ་བྱིན་ཚངས་པའི་ཆ་བྱད་དང ། །ལ་ལར་བདུད་ཀྱི་ཆ་བྱད་ཀྱིས། །སེམས་ཅན་རྣམས་ཀྱི་དོན་མཛད་དེ། །འཇིག་རྟེན་རྣམས་ཀྱིས་རྟོགས་མི་ནུས། །བུད་མེད་ཆ་བྱད་སྤྱོད་པ་མཛད། །དུད་འགྲོའི་སྐྱེ་གནས་རྣམས་ནའང་གདའ། །འཇིག་རྟེན་ཆོས་ཀྱིས་མི་གོས་ཏེ། །པདྨ་ཆུས་མི་
137b
མི་ཆགས་པ་བཞིན། །འདྲེན་པ་སྣ་ཚོགས་ཁམས་ཅན་གྱི། །འཇིག་རྟེན་འདི་ཡི་རྗེས་འཇུག་མཛད། །དེས་ན་སྐྱེ་རྒུ་འདི་དག་རྣམས། །གདུགས་མཚན་ཁྱོད་ཀྱི་ཡོན་ཏན་བརྗོད། །ལ་ལར་བལྟམས་པ་ཡོངས་སུ་བསྟན། །ལ་ལར་མྱ་ངན་འདས་པ་བསྟན། །ལ་ལ་ན་ནི་འཁོར་ལོ་བསྐོར། །ལ་ལར་སྤྱད་པ་སྤྱོད་པ་མཛད། །སེམས་ཅན་འདུལ་བའི་དོན་སླད་དུ། །དགྱེས་ཤིང་མགུར་ལེན་རོལ་པ་མཛད། །བཤུམས་མོ་དག་ཀྱང་འབྱིན་པར་མཛད། །སེམས་ཅན་སུས་ཀྱང་ཡོད་མ་འཚལ། །འདོད་ཆགས་མི་མངའ་ཆགས་པའི་ཚུལ། །འཇིགས་པ་མི་མངའ་འཇིགས་པ་ལྟར། །སེམས་ཅན་རྣམ་པར་འདུལ་དོན་དུ། །འདྲེན་པ་རྣམ་པར་འཕྲུལ་པ་མཛད། །རྨོངས་མེད་རྨོངས་པའི་ཚུལ་བསྟན་ཏེ།། བྱིས་པ་མ་ལགས་བྱིས་ཚུལ་གྱིས། །སེམས་ཅན་རྣམ་པར་གདུལ་དོན་དུ། །འདྲེན་པ་རྣམ་པར་འཕྲུལ་པ་མཛད། །སྨྱོས་པ་མ་ལགས་སྨྱོས་པའི་ཚུལ། །ཞ་བ་མ་ལགས་ཞ་བ་ལྟར། །རྣམ་པར་འཕྲུལ་པ་སྣ་ཚོགས་ཀྱིས། །སེམས་ཅན་རྣམས་ནི་འདུལ་བ་མཛད། །དེ་ལྟར་བསམ་ཡས་མགོན་པོ་ཁྱོད། །དམ་པའི་ཆོས་ཀྱང་བསམ་མི་ཁྱབ། ། དཔའ་ཆེན་ཁྱོད་ལ་ཕྱག་ཀྱང་འཚལ། །སེམས་ཅན་ཐུབ་ཆེན་འདྲར་གྱུར་ཅིག་།སྔོན་བྱུང་བ་འོད་སྲུང་ཆེན་པོས་ཞུས་པའི་ལེའུ་སྟེ། ལྔ་པའོ།། །།དེ་ནས་
138a
༄#། །བྱའི་རྒྱལ་པོ་འདབ་བཟང་བརྒྱད་ཁྲི་དྲུག་སྟོང་གིས་ལྷ་མ་ཡིན་གྱི་དབང་པོ་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་བཅོམ་ལྡན་འདས་ལ་གཞལ་དུ་མེད་པའི་དད་པ་སྐྱེས་ཏེ་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ནས་བཅོམ་ལྡན་འདས་ལ་མཆོད་པའི་དོན་དུ་རིན་པོ་ཆེ་སྣ་བདུན་གྱི་ཁང་པ་བརྩེགས་པ་ཤིན་ཏུ་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་མངོན་པར་སྤྲུལ་ཏོ། །ལྷའི་རིན་པོ་ཆེ་སྣ་བདུན་ནི། འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། སྤུག་དང ། མུ་ཏིག་དམར་པོ་དང ། རྡོའི་སྙིང་པོ་དང་བདུན་ནོ། །ཁང་པ་བརྩེགས་པ་དེ་དག་ཀྱང་རིན་པོ་ཆེ་སྣ་བཞིའི་ལན་ཀན་གྱི་དྲ་བ་རིས་བཀྲ་བ། བལྟ་ན་སྡུག་པ་རིམ་པ་བདུན་གྱིས་ཀུན་ནས་བསྐོར་ཏོ། །རིན་པོ་ཆེ་སྣ་བཞི་ནི། །འདི་ལྟ་སྟེ། གསེར་དང ། དངུལ་དང ། བཻཌཱུརྱ་དང ། ཤེལ་ལོ། །གསེར་གྱི་ལན་ཀན་རྣམས་ཀྱི་ཀ་བ་དང་གདང་བུ་རྣམས་ནི། གསེར། ཤར་བུ་རྣམས་ནི། དངུལ། དངུལ་གྱི་ལན་ཀན་རྣམས་ཀྱི་ཀ་པ་དང་གདང་བུ་རྣམས་ནི། དངུལ། ཤར་བུ་རྣམས་ནི། གསེར། བཻཌཱུརྱའི་ལན་ཀན་རྣམས་ཀྱི་ཀ་བ་དང་གདང་བུ་རྣམས་ནི། བཻ་ཌཱུ་རྱ། ཤར་བུ་རྣམས་ནི། ཤེལ།
138b
ཤེལ་གྱི་ལན་ཀན་རྣམས་ཀྱི་ཀ་བ་དང་གདང་བུ་རྣམས་ནི། ཤེལ། ཤར་བུ་རྣམས་ནི། དངུལ་ལས་བྱས་པའོ། །ཁང་པ་བརྩེགས་པ་དེ་དག་དྲིལ་བུ་གཡེར་ཀའི་དྲ་བ་བཀྲ་བ།་བལྟ་ན་སྡུག་པ་རིན་པོ་བདུན་གྱིས་ཀུན་ནས་བསྐོར་ཏོ། །དེ་དག་ཀྱང་རིན་པོ་ཆེ་སྣ་བདུན་ལས་བྱས་པ་ཤ་སྟག་སྟེ།་འདི་ལྟར་གསེར་དང ། དངུལ་དང ། བཻ་ཌཱུརྱ་དང།་ཤེལ་དང ། སྤུག་དང ། མུ་ཏིག་དམར་པོ་དང ། རྡོའི་སྙིང་པོ་དང་བདུན་ནོ། །ཁང་པ་བརྩེགས་པ་དེ་དག་རིན་པོ་ཆེ་སྣ་བདུན་གྱི་དྲ་བ་བཀྲ་བ། བལྟ་ན་སྡུག་པ་འདི་ལྟ་སྟེ། གསེར་གྱི་དྲ་བ་དང ། དངུལ་གྱི་དྲ་བ་དང ། བཻ་ཌཱུརྱའི་དྲ་བ་དང ། ཤེལ་གྱི་དྲ་བ་དང ། མུ་ཏིག་དམར་པོའི་དྲ་བ་དང ། སྤུག་གི་དྲ་བ་དང ། རྡོའི་སྙིང་པོའི་དྲ་བས་ཀུན་ནས་བཀབ་པར་འགྱུར་རོ། །གདུགས་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་མངོན་པར་སྤྲུལ་ཏོ། །དེ་དག་ཀྱང་འདི་ལྟར་གསེར་ནས་རྡོའི་སྙིང་པོའི་བར་གྱི་རིན་པོ་ཆེ་སྣ་བདུན་ལས་བསྒྲུབས་པ་ཤ་སྟག་གོ་།རྒྱལ་མཚན་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་ཏེ། རྒྱལ་མཚན་དེ་དག་ཀྱང་གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། རིན་པོ་ཆེ་སྣ་བཞིའི་རྒྱུ་ལས་བསྒྲུབས་པ་ཤ་སྟག་སྟེ། རྒྱལ་མཚན་སྔོན་པོ་རྣམས་ནི། ཏོག་སེར་པོ་ཅན། རྒྱལ་མཚན་སེར་པོ་རྣམས་
139a
༄#། །ནི།་ཏོག་སྔོན་པོ་ཅན། རྒྱལ་མཚན་དམར་པོ་ནི། ཏོག་དཀར་པོ་ཅན་ཤ་སྟག་སྔོན་པོར་སྤྲུལ་ཏོ། །བ་དན་ཁ་དོག་སྣ་ཚོགས་ཅན་བཀྲ་བ།་བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་བར་གྱུར་ཏོ། །བླ་རེ་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་བར་གྱུར་ཏེ། བླ་རེ་དེ་དག་ཀྱང་གསེར་སྐུད་ཀྱི་བླ་རེ་དང ། དངུལ་སྐུད་ཀྱི་བླ་རེ་དང ། བཻ་ཌཱུརྱའི་བླ་རེ་དང ། ཤེལ་གྱི་བླ་རེ་དང ། མུ་ཏིག་དམར་པོའི་བླ་རེ་དང ། སྤུག་གི་བླ་རེ་དང ། རྡོའི་སྙིང་པོའི་བླ་རེ་སྟེ། རིན་པོ་ཆེ་སྣ་བདུན་ལས་བསྒྲུབས་པ་ཤ་སྟག་གོ་།དེ་ནས་བྱའི་རྒྱལ་པོ་འདབ་བཟང་དེ་དག་གིས་ཁང་པ་བརྩེགས་པ་བརྒྱད་ཁྲི་དྲུག་སྟོང་པོ་དེ་དག་དང ། གདུགས་བརྒྱད་ཁྲི་དྲུག་སྟོང་པོ་དེ་དག་དང ། རྒྱལ་མཚན་བརྒྱད་ཁྲི་དྲུག་སྟོང་པོ་དེ་དག་དང ། བ་དན་བརྒྱད་ཁྲི་དྲུག་སྟོང་པོ་དེ་དག་དང ། བླ་རེ་བརྒྱད་ཁྲི་དྲུག་སྟོང་པོ་དེ་དག་བཅོམ་ལྡན་འདས་ལ་ཕུལ་བ་དང ། དེ་དག་ཐམས་ཅད་སྟེང་གི་བར་སྣང་ལ་ལྡིང་ཞིང་བཅོམ་ལྡན་འདས་ལ་ལན་གསུམ་བསྐོར་བ་བྱས་སོ། །འདི་ལྟ་སྟེ།་དཔེར་ན། གླང་པོ་ཆེའི་རྒྱལ་པོ་ས་སྲུང་གི་བུ་ནི། སུམ་ཅུ་རྩ་གསུམ་གྱི་ལྷ་རྣམས་མགོ་ལ་ཁྱེར་ཞིང་ནམ་མཁའ་ལས་སོང་སྟེ་ཡོངས་འདུས་རྟོལ་དུ་གཞོག་གོ་།དེ་
139b
བཞིན་དུ་ཁང་པ་བརྩེགས་པ་དེ་དག་དང ། གདུགས་དེ་དག་དང ། རྒྱལ་མཚན་དེ་དག་དང ། བ་དན་དེ་དག་དང ། བླ་རེ་དེ་དག་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་གསུམ་བསྐོར་བ་བྱེད་པར་གྱུར་ཏོ། །དེ་ནས་འདབ་བཟང་བརྒྱད་ཁྲི་དྲུག་སྟོང་པོ་དེ་དག་གིས་བཅོམ་ལྡན་འདས་ལ་མཆོད་པ་བྱས་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དེ་ཐལ་མོ་སྦྱར་ནས་ཕྱག་འཚལ་ཞིང་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། རྒ་དང་འཆི་ལས་རྣམ་གྲོལ་ཁྱོད་ལ་ཕྱག་འཚལ་ལོ། །རྒ་དང་འཆི་ལས་རྣམ་འགྲོལ་ཁྱོད་ལ་ཕྱག་འཚལ་ལོ། །སེམས་ཅན་གཞལ་ཡས་ཁ་ལོ་སྒྱུར་ལ་ཕྱག་འཚལ་ལོ། །ཁྱོད་དང་མཚུངས་པ་མ་མཆིས་ལྷག་པའང་མ་མཆིས་སོ། །བདག་ཅག་རྣམས་ཀྱང་སྲེད་མེད་བུ་ཡི་ལུས་ལྡན་ཞིང ། །སུམ་ཅུ་རྩ་གཉིས་མཚན་གྱིས་ཡན་ལག་བརྒྱན་པ་དང ། དཔེ་བྱེད་བཟང་པོ་བརྒྱད་ཅུས་ཤིན་ཏུ་མཛེས་བྱས་པའི། །སངས་རྒྱས་རྣམ་པར་འདྲེན་པ་ཁྱོད་འདྲར་འགྱུར་བར་ཤོག་།བདག་ཅག་འདོམ་གང་འོད་ཀྱི་གཟི་ལྡན་ཞིང ། །མངོན་འཕགས་གཟུགས་ཀྱི་དམ་པས་མཛེས་གྱུར་ཏེ། །སྤྱོད་ལམ་མཆོག་དང་བདག་ཅག་ལྡན་གྱུར་ཅིང ། །འགྲོ་བ་རྣམ་སྤྱོད་མྱ་ངན་ཟློ་བར་ཤོག་།བདག་ཅག་ཚུལ་ཁྲིམས་ཏིང་འཛིན་རབ་ལྡན་
140a
༄#། །ཞིང ། །ཤེས་རབ་ལྡན་པས་མཆོག་ཏུ་འགྱུར་བར་ཤོག་།ད་ལྟར་རྣམ་པར་འདྲེན་པ་ཁྱོད་ལྟ་བུར། །སྐྱེ་བོ་རབ་འགྲེལ་སངས་རྒྱས་འགྲུབ་པར་ཤོག་།འདྲེན་པ་འཇིག་རྟེན་མཁས་པ་ཁྱོད་ལྟ་བུར། །བདག་ཅག་འདྲེན་པ་སྟོབས་བཅུ་ལྡན་པ་དང ། །མ་འདྲེས་བཅོ་བརྒྱད་ཆོས་ཀྱི་མཐར་ཕྱིན་ཅིང ། །འཇིག་རྟེན་མཁས་པ་ཐམས་ཅད་མཁྱེན་དུ་ཤོག་།བདག་ཅག་ཀུན་ཀྱང་འགྲོ་བ་དངོས་མེད་དང ། །རྨི་འདྲ་སྒྱུ་འདྲ་གནས་པ་མེད་པ་དང ། །བྲག་ཅ་ནམ་མཁའ་འདྲ་བར་སྟོན་བྱེད་ཅིང ། ། ཇི་ལྟར་རྣམ་འདྲེན་ཁྱོད་སྟོན་བཞིན་དུ་ཤོག་།དེ་ནས་བཅོམ་ལྡན་འདས་ཀྱིས་བྱའི་རྒྱལ་པོ་འདབ་བཟང་དེ་དག་གི་ལྷག་པའི་བསམ་པ་མཁྱེན་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། རྒྱལ་བ་རྣམ་འདྲེན་གཙོ་བོ་སངས་རྒྱས་རྣམས། །རྒྱུ་མ་མཆིས་པར་འཛུམ་པ་མི་མཛད་ན། །འཛུམ་མཛད་འདི་ཡི་རྒྱུ་རྐྱེན་གང་ལགས་པ། །འཇིག་རྟེན་ཕན་མཛད་ཐུགས་རྗེ་མངའ་བས་གསུངས། །འདབ་བཟང་རྣམས་ཀྱིས་རྒྱལ་བ་མཆོད་བགྱིས་ཏེ། །བླ་རེ་ནམ་མཁའ་རྒྱས་པར་གང་བར་བསྟན། །ལྷར་བཅས་འཇིག་རྟེན་འདི་ལ་ངོ་མཚར་བསྐྱེད། །རྐང་གཉིས་དམ་པས་དེ་དག་ལུང་བསྟན་གསོལ། །འགྲོ་བ་ཐམས་ཅད་ཐལ་
140b
མོ་རབ་སྦྱར་ཅིང ། །དགའ་བའི་སེམས་དང་མགུ་བའི་སེམས་ཀྱིས་འཁོད། །མཁའ་ལྡིང་འགྲོ་བ་ཅིར་འགྱུར་ཉན་པར་འཚལ། །རྐང་གཉིས་དམ་པས་དེ་དག་ལུང་བསྟན་གསོལ།། མི་མཆོག་ཁྱོད་ལ་འཁོར་དག་མཆི་བ་ནི། །འགྲོ་བ་ཐམས་ཅད་ཐེ་ཚོམ་མེད་འགྱུར་ཞིང ། །ཐེ་ཚོམ་མེད་པས་འཁོར་དུ་འཇིགས་མེད་འགྱུར། །འདིས་ནི་སངས་རྒྱས་མཉེས་པར་བགྱིས་ཞེས་མཆིས། །འཁོར་འདི་འཇིགས་མེད་རབ་ཏུ་དགའ་བར་འགྱུར། །ཡོངས་སུ་སྦྱངས་ཤིང་ཤིན་ཏུ་སྐྱོན་བསལ་ནས། །རྒྱལ་བས་ལུང་བསྟན་དེ་དག་མངོན་དགའ་སྟེ། །སློབ་མ་མཆོག་ལ་བླ་མས་བསྟན་པ་བཞིན། །ཐེ་ཚོམ་འཚལ་བའི་ཐེ་ཚོམ་གཅད་དུ་གསོལ། །རབ་ཏུ་དགའ་མཛད་རྗེས་སུ་སྨོན་པ་མཛོད། །དགའ་བའི་སེམས་ཀྱིས་འཁོར་འདི་འདུས་གྱུར་གྱི། །རང་བྱུང་མཁའ་ལྡིང་འགྲོ་བ་ཅིར་འགྱུར་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ།་ཐམས་ཅད་ཟིལ་གནོན་སྟོབས་བཅུ་བརྩོན་འགྲུས་བདེན། །རྒྱལ་བ་དབང་པོ་ཐུབ་པ་དེ་བཞིན་གཤེགས། །འདྲེན་པས་ཡན་ལག་བརྒྱད་ལྡན་གསུང་དབྱངས་ཀྱིས།། འདབ་བཟང་འགྲོ་བ་རྟ་ཐུལ་བཀའ་སྩལ་པ། །རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །འཇིག་རྟེན་ཕན་ཕྱིར་འཛུམ་གང་ངས་བསྟན་པ། །དེ་ཡི་འབྲས་བུ་དགའ་བའི་ཡིད་
141a
༄#། །ཀྱིས་ཉོན། །ཐེ་ཚོམ་སོལ་ལ་རབ་ཏུ་དགའ་བ་སྐྱེད། །བླ་ན་མེད་པའི་བྱང་ཆུབ་ཞི་ཚོལ་ཞིང ། །སྟོབས་དང་མི་འཇིགས་བཞི་པོ་གང་རྣམས་ཀྱིས། ། འདྲེན་པ་འཇིགས་མེད་འགྱུར་བ་བཙལ་བའི་ཕྱིར། །འདབ་ཆགས་དབང་པོས་ང་ལ་མཆོད་ལེགས་བྱས། །མ་འདྲེས་བཅོ་བརྒྱད་ཆོས་ནི་སྨྲ་བ་ཡི། །སྲེད་མེད་བུ་ལུས་ཤིན་ཏུ་མཁྲེགས་པ་དང ། །སུམ་ཅུ་གཉིས་མཚན་དཔེ་བྱད་བཟང་པོ་རྣམས། །ཡོངས་སུ་བཙལ་ཕྱིར་ང་ལ་མཆོད་པ་བྱས། །རྒྱལ་བའི་ཚུལ་ཁྲིམས་ཏིང་འཛིན་བཙལ་བ་དང ། །གཞན་ཡང་སངས་རྒྱས་སྤྱོད་ཡུལ་ཤེས་རབ་དང ། །ཕུན་ཚོགས་ཞིང་དང་འགྲོ་བ་རྣམ་དགྲོལ་བ། །འདི་དག་ཀུན་བཙལ་དོན་དུ་མཆོད་པ་བྱས། །དེ་དག་ང་ལ་དགའ་བས་མཆོད་བྱས་པས། །དུད་འགྲོའི་གནས་ནས་དེ་དག་ཤི་འཕོས་ནས། །ལྷ་དང་བརྟུལ་ཞུགས་མཐུན་པར་དེ་དག་འདོང ། །འདི་ནི་ངན་སོང་སྲིད་པའི་ཐ་མ་ཡིན། །བསྐལ་པ་བྱེ་བ་གངྒཱའི་བྱེ་སྙེད་དུ། །དེ་དག་ལྷ་མིའི་ནང་ན་གནས་གྱུར་ཅིང ། །རྣམ་འདྲེན་ཁྲག་ཁྲིག་མཐའ་ཡས་མཆོད་བྱས་ནས། །དེ་དག་དབང་པོ་ཐུལ་བའི་རྒྱལ་བར་འགྱུར། །དེ་དག་ཞིང་དུ་ངན་སོང་མི་འབྱུང་སྟེ། །མི་ཁོམ་མི་འབྱུང་མཚན་དང་མི་ལྡན་མེད། །རྒྱལ་བ་དེ་དག་མཚན་ནི་ཀུན་ཏུ་མཛེས། །རི་རབ་
141b
རྒྱལ་མཚན་བསྐལ་ལ་རབ་བྱུང་འགྱུར། །ལོ་ནི་བྱེ་བ་བརྒྱད་ཅུ་བཞི་བགྲངས་པར། །འཇིག་རྟེན་ཕན་ཕྱིར་འདྲེན་པ་དེ་དག་བཞུགས། །འཇིག་རྟེན་ཕན་ཕྱིར་རྣམ་འདྲེན་མཉམ་བཞག་པས། །ལུས་ཅན་རྣམས་ལ་མཉམ་པའི་དོན་མཛད་འགྱུར། །སྐྱོབ་པ་རྡུལ་མེད་གྱུར་པ་དེ་དག་གི་།འདུས་པ་ང་རྒྱལ་སྤངས་པ་བརྒྱད་ཅུ་འགྱུར། །དེ་ཚེ་སྐྱོབ་པ་རྡུལ་དང་བྲལ་རྣམས་ཀྱི། །ཤིན་ཏུ་སེམས་དུལ་བྱེ་བ་བརྒྱད་ཅུ་འབྱུང ། །འདྲེན་པ་དེ་དག་འགྲོ་བའི་ངལ་བསལ་ཕྱིར། །ཆོས་ཀྱི་འཁོར་ལོ་རབ་ཏུ་བསྐོར་བར་འགྱུར། །མི་དག་དེ་ལྟར་འདི་རྣམས་ང་རྒྱལ་ཆེ། །འདབ་བཟང་ལུས་སུ་གྱུར་ནས་སྟོབས་པོ་ཆེ། །འདི་དག་སྔོན་ཚེ་འདས་པའི་དུས་ཤིག་ན། །དྲང་སྲོང་དཀའ་ཐུབ་དྲག་པོའི་ཚོགས་ཆེན་གྱུར། ། སྟོང་ཕྲག་བརྒྱད་ཅུ་རྩ་དྲུག་ཚང་བ་སྟེ། །དཀའ་ཐུབ་སྤྱད་དེ་རྫུ་འཕྲུལ་ཕུན་སུམ་བཙལ། །དེ་དག་རྫུ་འཕྲུལ་ཐོབ་ནས་ང་རྒྱལ་གྱིས། །དགའ་བས་དཀའ་ཐུབ་དྲག་དང་ལྡན་པར་གྱུར། །ཚུལ་ཁྲིམས་མ་ཞིག་དེ་དག་ནགས་འདབས་སུ། །ཚེ་ཟད་ཤི་འཕོས་གྱུར་ཏེ་ལུས་ཀྱང་ཞིག་།ང་རྒྱལ་དེས་ནི་མཁའ་ལྡིང་མཁའ་འགྲོར་གྱུར། །རྫུ་འཕྲུལ་སེམས་ཀྱིས་རྫུ་འཕྲུལ་ལྡན་པར་སྐྱེས། །ཚུལ་ཁྲིམས་དག་པས་རྒྱལ་བའི་བསྟན་ལ་དད། །ང་རྒྱལ་གྱིས་ནི་བྱང་ཆུབ་སེམས་ཀྱང་བསྐྱེད། །ནམ་མཁའ་ལྡིང་ལུང་བསྟན་པའི་ལེའུ་སྟེ་།དྲུག་
142a
༄#། །པའོ།། །།བམ་པོ་བཞི་པ། དེ་ནས་ཀླུའི་བུ་མོ་བྱེ་བ་ཕྲག་དགུ་བཅུ་རྩ་དྲུག་གིས་ལྷ་མ་ཡིན་གྱི་དབང་པོ་དེ་དག་དང ། ནམ་མཁའ་ལྡིང་གི་དབང་པོ་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་མཆོག་ཏུ་དགའ་བ་ཆེན་པོ་སྐྱེས་ཏེ་དེ་དག་དགའ་མགུ་ཡི་རངས་ནས་རབ་ཏུ་དགའ་སྟེ།་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏོ། །དེ་དག་གིས་རིན་པོ་ཆེ་སྣ་བདུན་གྱི་གདུགས་བཻཌཱུརྱའི་དྲ་བ་ལྡ་ལྡིར་བཀྱེ་བ། མུ་ཏིག་དམར་པོའི་དྲ་བས་བསྐོར་བ། གསེར་གྱི་ཡུ་བ་ཅན། བཻ་ཌཱུརྱའི་ཐུར་མ་བརྒྱད་སྟོང་བཀྱེ་བ། རིན་པོ་ཆེའི་ཆུན་པོ་དབྱངས་པ་བྱེ་བ་ཕྲག་དགུ་བཅུ་རྩ་དྲུག་མངོན་པར་སྤྲུལ་ཏོ། །རྟ་སྔོན་པོ། ཁ་དོག་སྔོན་པོ། །སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ། རྒྱན་སྔོན་པོས་བརྒྱན་པ། བཻ་ཌཱུརྱའི་སྲབ་ཀྱིས་བསྲབས་པ་བྱེ་བ་ཕྲག་དགུ་བཅུ་རྩ་དྲུག་མངོན་པར་སྤྲུལ་ཏོ། །ནོར་བུ་སྐར་མདོག་གི་བླ་རེ་ཁོ་ར་ཁོར་ཡུག་ཏུ་དཔག་ཚད་དྲུག་ཅུ་ཡོད་པ། དེས་འཁོར་དེ་དག་ཐམས་ཅད་ཡོག་པ་གཅིག་ཀྱང་སྟེང་གི་བར་སྣང་ལ་མངོན་པར་སྤྲུལ་ཏོ། །དེ་ལ་རིན་པོ་ཆེ་སྣ་བདུན་གྱི་ལྡ་ལྡི་བཀྲ་བ། མིག་ཏུ་མཛེས་པ། བལྟ་ན་སྡུག་པ་བྱེ་བ་ཕྲག་དགུ་བཅུ་རྩ་དྲུག་
142b
བྲེས་པར་མངོན་པར་སྤྲུལ་ཏོ། །བླ་རེ་དེའི་ཁོ་ར་ཁོར་ཡུག་ཏུ་རིན་པོ་ཆེ་སྣ་བདུན་གྱི་དྲིལ་བུ་གཡེར་ཁའི་དྲ་བ་མངོན་པར་སྤྲུལ་ཏེ་བྲེས་སོ། །རིན་པོ་ཆེ་སྣ་བདུན་གྱི་ཁྲུང་ཁྲུང་རྐང་དག་མངོན་པར་སྤྲུལ་ཏོ། །ཀླུའི་རོལ་མོ་སིལ་སྙན་བྱེ་བ་ཕྲག་དགུ་བཅུ་རྩ་དྲུག་མངོན་པར་སྤྲུལ་ཏོ། །དེ་ནས་ཀླུའི་བུ་མོ་དེ་དག་རྟ་སྔོན་པོ་དེ་དག་ལ་ཞོན་ནས་རིན་པོ་ཆེ་སྣ་བདུན་གྱི་གདུགས་སྟེང་གི་བར་སྣང་ལ་བྲེས་ཏེ་ནམ་མཁའ་ལས་འདོང་ཞིང་རོལ་མོའི་སྒྲ་བྱེ་བ་ཕྲག་དགུ་བཅུ་རྩ་དྲུག་པོ་དེ་དག་ལེན་ཅིང་བཅོམ་ལྡན་འདས་ལ་ལན་གསུམ་བསྐོར་བ་བྱེད་ལ།་ལྷའི་ཙནྡན་གྱི་ཕྱེ་མ་དག་ཀྱང་བཅོམ་ལྡན་འདས་ལ་མངོན་པར་འཐོར། ལྷའི་ཨ་ག་རུ་དང ། ཏ་མ་ལའི་ལོ་མ་དང ། ུཏྤ་ལའི་ཕྱེ་མ་དང ། མེ་ཏོག་སྣ་ཚོགས་ཀྱང་བཅོམ་ལྡན་འདས་ལ་མངོན་པར་འཐོར། མེ་ཏོག་ཨུཏྤ་ལ་དང ། ཙམ་པ་ཀའི་ཕྲེང་བ་དག་ཀྱང་འཐོར། མེ་ཏོག་རྣམ་པ་སྣ་ཚོགས་ཀྱི་ཕྲེང་བ་དག་ཀྱང་འཐོར། སྤོས་སྣ་ཚོགས་ཀྱི་ཕྲེང་བ་དང ། ན་བཟའ་དང་རྒྱན་དག་ཀྱང་འབུལ་ཏེ། ལྷ་མ་ཡིན་གྱིས་ཇི་ལྟར་བྱས་པ་དེ་བཞིན་དུ་མཆོད་པ་རྒྱ་ཆེར་བྱས་སོ། །དེ་ནས་དེ་དག་གིས་རོལ་མོ་སིལ་སྙན་བྱེ་བ་ཕྲག་དགུ་བཅུ་རྩ་དྲུག་པོ་དེ་དག་བྱས་པའི་སྒྲས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་གང་བར་གྱུར་ཏེ། སེམས་ཅན་གང་དག་གིས་རོལ་མོའི་
143a
༄#། །སྒྲ་དེ་ཐོས་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ནོར་བུའི་སྐར་མདོག་གི་བླ་རེ་དག་དང ། རིན་པོ་ཆེ་སྣ་བདུན་གྱི་ལྡ་ལྡི་དེ་དག་དང ། དྲིལ་བུ་གཡེར་ཀའི་དྲ་བ་དག་དང ། ཁྲུང་ཁྲུང་རྐང་དེ་དག་རླུང་གིས་བསྐྱོད་པ་ལས་འདི་ལྟ་སྟེ། ། དཔེར་ན། རོལ་མོ་སིལ་སྙན་ཡན་ལག་བརྒྱད་དང་ལྡན་པ་མཁས་པས་དཀྲོལ་བ་དེ་ལྟ་བུར་སྙན་ལ། དེ་ལྟ་བུའི་ཡིད་དུ་འོང་ཞིང་མཉན་ན་བདེ་བའི་སྒྲ་བྱུང་བར་གྱུར་ཏོ། ། སྒྲ་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་གང་བར་གྱུར་ཏེ། སེམས་ཅན་གང་གིས་རྒྱན་གྱི་སྒྲ་དེ་དག་ཐོས་པར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་ཀླུའི་བུ་མོ་དེ་དག་གིས་མེ་ཏོག་རྣམ་པ་སྣ་ཚོགས་ཀྱི་ཆར་དང ། སྤོས་ཆུ་རྣམ་པ་སྣ་ཚོགས་ཀྱི་ཆར་མངོན་པར་ཕབ་པར་གྱུར་ཏེ། མེ་ཏོག་གི་ཆར་དེ་བབ་པའི་ཚེ་སྤོས་ཀྱི་དྲི་ཞིམ་པོའི་ངད་བྱུང་སྟེ་འགྲོ་ཞིང་ལྡོག་གོ་།སྤོས་ཆུའི་ཆར་དེ་བབ་པས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོའི་ཁོ་ར་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་སྤོས་ཆུས་རྫབ་ཏུ་གྱུར་ཏེ། སྤོས་ཀྱི་དྲི་དེས་ཀྱང་སྟོང་གསུམ་གྱི་སྟོང་ཆེན་
143b
པོའི་འཇིག་རྟེན་གྱི་ཁམས་རྒྱས་པར་གང་བར་གྱུར་ཏོ། །སེམས་ཅན་གང་གིས་སྤོས་ཀྱི་དྲི་དེ་ཚོར་བར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་ཀླུའི་བུ་མོ་དེ་དག་གིས་གདུགས་བྱེ་བ་ཕྲག་དགུ་བཅུ་རྩ་དྲུག་དང ། རྟ་བྱེ་བ་ཕྲག་དགུ་བཅུ་རྩ་དྲུག་དང ། རོལ་མོ་སིལ་སྙན་བྱེ་བ་ཕྲག་དགུ་བཅུ་རྩ་དྲུག་པོ་དེ་དག་གིས་བཅོམ་ལྡན་འདས་ལ་མཆོད་པ་བྱས་ནས་རྒྱན་ཐམས་ཅད་དང་ལྡན་པ་དེ་དག་བར་སྣང་གི་ནམ་མཁའ་ལ་འཁོད་དེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་པར་གྱུར་ཏོ། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །ཀླུ་ཡི་བུ་མོ་མཁས་པ་དེ་དག་ཡིད་རངས་དགའ་མགུ་ཡིད་ཀྱིས་སུ། །བྱང་ཆུབ་ཞི་བ་ཚོལ་ཞིང་ཤཱཀྱ་ཐུབ་ལ་དེར་ནི་མཆོད་པ་ཆེན་པོ་བྱས། །རྒྱན་གྱིས་ལེགས་བརྒྱན་བྱེ་བ་དགུ་བཅུ་དྲུག་གི་གདུགས་རྣམས་མངོན་སྤྲུལ་ཏེ། །བདེ་བར་གཤེགས་ལ་མཆོད་ཅིང་རབ་ཏུ་དུལ་བའི་ཡིད་ཀྱིས་ཆགས་དང་བྲལ། །རྒྱན་གྱིས་ལེགས་བརྒྱན་བྱེ་བ་དགུ་བཅུ་དྲུག་གི་རྟ་རྣམས་མངོན་སྤྲུལ་ཏེ། །ཁ་དོག་སྔོ་ཞིང་རྒྱན་ཀྱང་སྔོ་བའི་རྟ་ལ་རྒྱལ་མཚན་སྔོན་པོས་བརྒྱན། །དེ་དག་ཐམས་ཅད་བར་སྣང་དོང་ནས་ཐུབ་
144a
༄#། །ལ་རྟ་ཡིས་མཆོད་པ་བྱེད། །ཀླུ་ཡི་བུ་མོ་དེ་དག་དང་བའི་ཡིད་ཀྱིས་ཐུབ་ལ་མགོས་ཕྱག་འཚལ། །མཆོག་ལ་མཆོད་པའི་དོན་དུ་ཀླུ་ཡི་གནས་ནས་ཀླུ་ཡི་སིལ་སྙན་གྱིས། །མཆོད་པའི་འོས་གྱུར་འདྲེན་པ་ཤཱཀྱ་ཐུབ་ལ་དེར་ནི་མཆོད་པ་བྱས། །སིལ་སྙན་དེ་དག་བདེ་བར་གཤེགས་ལ་མཆོད་པའི་སྒྲ་དེ་ཁམས་གསུམ་གྲག་།སྒྲ་དེ་ཐོས་པའི་སེམས་ཅན་ཁྲག་ཁྲིག་དག་ནི་བྱང་ཆུབ་ཡང་དག་ཞུགས། །དེ་དག་རྣམས་ཀྱིས་དེར་སྤྲུལ་མཁའ་ལ་བླ་རེ་ཆེན་པོ་གཅིག་ཏུ་གྱུར། །ཕྱོགས་བཅུའི་དཔག་ཚད་དྲུག་བཅུར་རྒྱས་ཤིང་འགྲོ་བ་ཐམས་ཅད་ཁེབས་པར་གྱུར། །ནོར་བུ་རིན་ཆེན་སྐར་མའི་མདོག་གི་གཟི་བརྗིད་ཕྱོགས་སུ་འབར་ཞིང་གསལ། །ཀླུ་ཡི་བུ་མོ་དགའ་ནས་འགྲོ་བའི་དོན་དུ་རྒྱལ་ལ་མཆོད་པ་བྱས། །གཞལ་དུ་མེད་པའི་སེམས་བསྐྱེད་དགའ་ནས་བྱང་ཆུབ་ཞི་བ་ཚོལ་བྱེད་ཅིང ། །འཇིག་རྟེན་དོན་བྱེད་བདེ་གཤེགས་སངས་རྒྱས་འཇིག་རྟེན་མཁས་པ་གྲུབ་པར་ཤོག་།ཇི་ལྟར་སྟོབས་བཅུ་མངའ་བ་ཁྱོད་ནི་སེམས་ཅན་སྡུག་བསྔལ་འགྲོ་བ་ལྟར། །ཆོས་ཀྱང་བསྟན་ཏེ་སེམས་ཅན་ཉོན་མོངས་སྡུག་བསྔལ་བསྒྲིབས་པ་ཁྲག་ཁྲིག་དགྲོལ། །ཆོས་རྣམས་སྒྱུ་མ་སྨིག་སྒྱུ་འདྲ་ཞིང་ལྦུ་བ་ལྟ་བུར་ཉམ་ཆུང་ལ། །ཆར་རྒྱུན་ཆུ་ལ་ཕོག་པའི་ཆུ་བུར་ལྟ་བུར་འཇིག་ཅིང་བདག་པོ་མེད། །མེ་
144b
ལོང་ནང་གི་གཟུགས་བརྙན་འདྲ་བར་འགྲོ་བ་ཐམས་ཅད་བཏགས་ནས་ནི། །འགྲོ་བ་དག་ལ་ཆོས་ཀྱི་རང་བཞིན་ཡང་དག་དེ་ཉིད་བསྟན་པར་བགྱི། །སྒྱུ་མ་བཀོད་པ་ལྟ་བུར་མ་མཆིས་རྫུན་པ་བྱིས་པ་རྨོངས་བགྱིད་པ། །སྐྱེ་བོ་མི་མཁས་ཇི་བཞིན་མ་འཚལ་བ་དག་མ་རུང་རབ་བགྱིད་པ། །བྱིས་པ་རྨོངས་བགྱིད་ཆོས་རྣམས་སྡིག་མེད་ཁྱོད་ཀྱིས་དེ་ལྟར་ལེགས་པར་གཟིགས། །དེ་དག་ཇི་ལྟར་གཟིགས་བ་དེ་བཞིན་དེ་དག་སེམས་ཅན་རྣམས་ལ་བསྟན། །ཇི་ལྟར་ས་ཆེན་འདི་ལ་སྤྲིན་འཁྲིགས་གྱུར་ན་རི་ལྟར་གདའ་བ་ཡང ། །ཡང་དག་ཏུ་ན་རི་ལྟར་ངོ་བོ་ཉིད་ཀྱིས་དེ་ལ་གནས་མ་མཆིས། །དེ་ལྟར་འགྲོ་བ་ཐམས་ཅད་རང་བཞིན་མ་མཆིས་དབང་པོ་རྨོངས་པར་བགྱིད། །ཤེས་པས་བརྟགས་ནས་སྐྱེ་བོ་མཁས་པ་དག་ནི་རྨོངས་པར་འགྱུར་མ་མཆིས། །ཡང་དག་ཏུ་ན་འགྲོ་བ་ཐམས་ཅད་རང་བཞིན་མ་མཆིས་ཁྱོད་སྟོན་པས། །དེས་ན་འདྲེན་པ་རྒྱལ་བ་ཁྱོད་ལ་སྐྱེ་བོ་མཁས་པ་མི་ཕྱེད་འགྱུར། །ཁྱོད་ཀྱི་སྲས་རྣམས་ཆོས་ཀྱིས་ཡོངས་སུ་ཚིམ་ནས་རྫ་བ་ལ་ཟམ་པ་འདྲ། །འདི་ནི་བྱིས་པའི་སྐྱེ་བོའི་ཡུལ་མ་ནི་འགྲོ་བ་འདི་ནི་སྒྲ་ཕྱིར་འབྲང ། །དེ་ལྟ་ལགས་པས་སྡིག་མེད་ཡང་དག་སྟོན་པ་བྱིས་པའི་སྐྱེ་བོའི་མགོན། །སྐྱབས་དང་དཔུང་གཉེན་གནས་དང་རྟེན་དང་རྩ་ལག་ཁྱོད་ལ་སྐྱབས་སུ་མཆི། །གཞལ་ཡས་བྱང་ཆུབ་དེ་བཙལ་སླད་དུ་རྣམ་པར་འདྲེན་པ་ཁྱོད་ལ་
145a
༄#། །མཆོད། །སངས་རྒྱས་གྱུར་ནས་རྟོགས་བགྱིད་སྡིག་བྲལ་འཇིག་རྟེན་དོན་རྣམས་བགྱིད་པར་ཤོག་།དེ་ནས་བཅོམ་ལྡན་འདས་ཀྱིས་ཀླུའི་བུ་མོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །འཇིག་རྟེན་ན་ནི་འཇིག་རྟེན་མཁས་པ་རྣམ་པར་འདྲེན་མཆོག་ཁྱོད་འཛུམ་མཛད། །དཔལ་སྟུག་འཛུམ་པ་མཛད་ལ་རྒྱུ་མ་མཆིས་པ་བདག་གིས་ཡོད་མ་མཐོང ། །མི་ཡི་དབང་པོ་དམ་པ་འཛུམ་པ་མཛད་པའི་རྒྱུ་ནི་ཡང་དག་གསུངས། །དེ་ཐོས་ལྷ་མི་ལྷ་མིན་ཚོགས་དང་ཀླུ་ཡི་བུ་མོ་གསང་བ་པ། །དྲི་བ་རྣམས་ཀྱང་སྐྱོབ་པའི་དགོངས་པ་ཐོས་ནས་ཡིད་ནི་དགའ་བར་འགྱུར། ། འཇིག་རྟེན་དག་ན་འཇིག་རྟེན་རྣམ་འདྲེན་ཁྱོད་ཀྱིས་རྒྱུ་རྣམས་ཐམས་ཅད་མཁྱེན། །རྒྱལ་བས་ཆོས་གང་རྒྱུ་དང་རྣམ་པས་མཁྱེན་པར་མ་གྱུར་ཡོད་མ་མཆིས། །དེ་ལྟར་བདེ་གཤེགས་རྒྱལ་བ་ཁྱོད་ཀྱིས་ཇི་ལྟར་ཐུགས་ཆུད་འཛུམ་རྒྱུ་གསུངས། །དེ་ཐོས་ནས་ནི་འགྲོ་བ་ཐམས་ཅད་ཡིད་རངས་དོགས་པ་ཆད་པར་འགྱུར། །ཐུབ་པ་བདེ་བར་གཤེགས་ཀྱི་བསྟན་པ་མཆོག་ལ་དོན་ཀྱང་ཐོབ་པར་མཆི། །འཁོར་རྣམས་འདི་དག་དོན་མྱོང་གྱུར་ནས་ཡིད་ནི་རབ་ཏུ་ཞི་བར་འགྱུར། །ཀུན་རྟོག་དབང་དུ་མི་འགྱུར་བྱང་ཆུབ་ཡིད་ཀྱིས་རྒྱལ་བའི་སྤྱོད་ཉན་འགྱུར། །
145b
བདེ་གཤེགས་ཁྱོད་ཀྱིས་འཛུམ་མཛད་དོན་ཐོས་རང་བྱུང་ཉིད་དུ་ངེས་པར་འབྱུང ། །འཁོར་འདི་རྒྱལ་བ་ཁྱོད་ཀྱི་ཞལ་ནས་འཛུམ་མཐོང་ཐེ་ཚོམ་འཚལ་གྱུར་ཏེ། །སྡུག་བསྔལ་དོགས་བཅས་ཡིད་མི་བདེ་ཞིང་ཆོས་ལ་སོམ་ཉི་གང་འཚལ་བ། །དེ་དག་ལ་ནི་ཐུབ་པ་སྟོན་པས་དོགས་བསལ་ཐེ་ཚོམ་དགུམ་དུ་གསོལ། །དྲང་སྲོང་ཁྱོད་ཀྱིས་གང་སླད་འཛུམ་བསྟན་མྱུར་དུ་བཀའ་སྩོལ་ཐེ་ཚོམ་ཁུམ། །རྒྱལ་བ་གང་གིས་དེ་རིང་ཡིད་ནི་རྣམ་པར་སྦྱངས་ཤིང་བདུད་བཅོམ་ཐུལ། །སུ་ཞིག་ཡིད་རབ་ཚིམ་ནས་བཅོམ་ལྡན་འདས་ལ་མཆོད་པ་དམ་པ་བགྱིས། ། འདི་ནི་སུ་ཡི་མཐུ་ལགས་སྟོན་པ་འགྲོ་བའི་མདུན་དུ་འདི་བཀའ་སྩོལ། །ཐོས་ནས་བདག་ཅག་ཡིད་རངས་མཆོག་ཏུ་དགའ་བ་སྐྱེས་ནས་བདེ་བར་འགྱུར། །ཁྱོད་ཀྱི་ཞབས་ཀྱི་དྲུང་དུ་འདུས་པའི་གྲོ་བ་འདི་དག་ཐེ་ཚོམ་འཚལ། །འཛུམ་རྒྱུ་དགའ་བ་བསྐྱེད་པ་བཀའ་སྩོལ་ཐུབ་པ་ཐེ་ཚོམ་བསལ་དུ་གསོལ། །དེ་ཐོས་ལྷ་དང་བཅས་པའི་འགྲོ་བ་འདི་དག་ཐེ་ཚོམ་མ་མཆིས་འགྱུར། །རྒྱལ་པའི་གསུང་སྒྲ་ཡང་དག་ཐོས་ནས་དེ་དག་ཡིད་དགའ་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །རྟ་ཐུལ་ལེགས་སོ་རྒྱལ་བའི་དགོངས་པ་འཛུམ་པ་འདི་ནི་ལེགས་པར་དྲིས། །ཀླུ་ཡི་བུ་མོས་མཆོད་དེ་འཇིག་རྟེན་ཕན་ཕྱིར་ངས་ནི་འཛུམ་པ་བསྟན། །དེ་ཡི་འབྲས་བུ་བསྟན་གྱི་ཡིད་གཉིས་ཐ་བ་སྤངས་པའི་སེམས་ཀྱིས་
146a
༄#། །ཉོན། །གང་གི་དོན་དུ་ངས་ནི་འཛུམ་པ་འདིར་མཛད་ང་ཡི་ཚིག་ལ་ཉོན། །ཀླུ་ཡི་བུ་མོ་འདི་དག་ཆགས་མེད་ཡིད་ཀྱིས་བྱང་ཆུབ་ཡང་དག་ཞུགས། །འགྲོ་བ་ཐམས་ཅད་སྟོང་བར་རྣམ་གཞིག་བློ་ལྡན་དོགས་མེད་ལེགས་པར་གནས། །འདི་ནི་བྱེད་མེད་ཚོར་མེད་གང་ཟག་མེད་ཅིང་སྐྱེ་བ་པོ་ཡང་མེད། །ཆོས་རྣམས་འདི་དག་རྫུན་ཞིང་སྨིག་རྒྱུ་མཚུངས་ལ་མེ་ལོང་གཟུགས་བརྙན་འདྲ། །འདི་དག་རྣམས་ཀྱིས་མཆོད་བྱས་བྱས་གཟོ་བློ་གྲོས་ཡང་དག་ནས་ཤེས་སོ། །རྒྱལ་བའི་ཆོས་ཉིད་དང་ནི་འགྲོ་བ་སྟོང་ཞིང་བདག་པོ་མེད་མཐོང་ལེགས། །མཆོད་པ་རྣམ་པར་ཕྱེ་ཞིང་ལེགས་པར་བཀོད་པ་འདི་དག་སྒྱུ་མ་འདྲ། །བྱང་ཆུབ་གཞལ་ཡས་གང་དུ་སྨོན་ལམ་བཏབ་པ་དེ་ཡང་འདི་འདྲར་སྟོང ། །ང་ལ་གཞལ་ཡས་མཆོད་པ་དེ་བྱས་པ་དང་འགྲོ་བ་སྟོང་སྐྱེས་པས། །ཀླུ་ལས་ཤི་འཕོས་ནས་ནི་ལྷ་གནས་བརྒྱ་བྱིན་གནས་སུ་འགྲོ་བར་འགྱུར། །སུམ་ཅུ་རྩ་གསུམ་སོང་སྟེ་ལྷ་ཡི་ནང་དུ་དགའ་བར་ཚེ་རྫོགས་ནས། །མ་སྨད་གྲགས་དང་ལྡན་པའི་ལྷ་གནས་འཐབ་བྲལ་གནས་སུ་འགྲོ་བར་འགྱུར། །འཐབ་བྲལ་ལྷ་ནང་གནས་ཏེ་ལྷ་ཡི་དགའ་བ་སྤྱོད། །ལྷ་འགྱུར་བདེ་གཤེགས་སྲས་རྣམས་དེ་ནི་ཚེ་ཡི་ཚད་དུ་གནས་པར་འགྱུར། །རྒྱལ་བའི་སྲས་རྣམས་འཐབ་བྲལ་དགའ་བ་སྤྱད་ནས་ཆེ་ཚད་ཟད་པ་དང ། །དགའ་ལྡན་གནས་སུ་ལྷ་ཡི་གྲོང་ཁྱེར་ལྷ་དང་བརྟུལ་
146b
ཞུགས་འདྲ་བར་འགྱུར། །དེ་དག་དེ་ནི་ལྷ་ཡི་བུ་མོས་བསྐོར་ནས་ལྷ་ཡི་དགའ་བ་སྤྱོད། །པདྨ་ཆུས་མི་ཆགས་པ་བཞིན་དུ་བདེ་གཤེགས་མི་གནས་བློ་ཅན་གནས། །འགྲོ་བ་ཐམས་ཅད་སྟོང་པར་རྟོགས་རིག་བློ་ལས་ཉམས་པར་ཡོང་མི་འགྱུར། །སྐྱོབ་པ་རྣམས་ཀྱི་དྲན་པ་རྡོ་ལ་བརྐོས་པ་བཞིན་དུ་ཡོང་མི་ཉམས། །དེ་དག་དགའ་ལྡན་གནས་དེར་གནས་ཏེ་ལྷ་ཡི་དགའ་བ་སྤྱད་ནས་ནི། །ཚེ་ཚད་ཡོངས་སུ་ཟད་ནས་དེ་ཚེ་རབ་འཕྲུལ་དག་ཏུ་འགྲོ་བར་འགྱུར། །བདེ་གཤེགས་མ་སྨད་གྲགས་ལྡན་དེར་ཡང་ལྷ་མོའི་ཚོགས་ཀྱིས་མཆོད་འགྱུར་ཏེ། །མི་གནས་བློ་གྲོས་ལྡན་པ་ཚེ་ཆད་བར་དུ་གནས་ན་གནས་པར་འགྱུར། །དེ་དག་གནས་དེར་རབ་འཕྲུལ་གྱུར་ཏེ་ལྷ་ཡི་དགའ་བ་སྤྱད་ནས་ནི། །མཁས་པ་ཆེ་ཟད་བློ་གྲོས་ལྡན་པས་ཆོས་ཀྱི་མཐར་ནི་ཕྱིན་གྱུར་ནས། ། འདྲེན་པ་བསམ་པ་དག་པ་ཆགས་མེད་ཡིད་ལྡན་ཆོས་ཀྱི་བསམ་པ་ཅན། །ཆོས་དང་ལྡན་རྣམས་གཞན་འཕྲུལ་གནས་སུ་ལྷ་འདུ་བར་ནི་འགྲོ་བར་འགྱུར། །དེ་དག་ལ་གནས་དེ་ན་གནས་ཤིང་ལྷ་ཡི་དགའ་བ་སྤྱོད་པར་འགྱུར། །བདེ་གཤེགས་མ་རྨོངས་བློ་ལྡན་དེ་དག་རང་གི་ཚེ་ཚད་གནས་པར་འགྱུར། །མྱ་ངན་འདས་ལྟར་ལྷ་ཡི་འདོད་པའི་ཡོན་ཏན་མཉམ་ཉིད་ཞི་བར་རྟོགས། །བསམ་གཏན་བསམ་པས་ཚངས་གནས་མ་སྨད་གྲགས་དང་ལྡན་པར་འགྲོ་བར་འགྱུར། །ཚངས་པའི་གནས་སུ་བསམ་གཏན་མཁས་ཤིང་བསམ་གཏན་འབྲས་བུ་སྤྱད་གྱུར་ནས། །དེར་གནས་དཔེ་མེད་
147a
༄#། །གྱུར་ཅིང་བྱང་ཆུབ་ཡིད་ཀྱིས་བསྐལ་པར་གནས་པར་འགྱུར། །དེ་དག་བསྐལ་པར་ཚངས་གནས་མཐུན་པར་ཡེ་ཤེས་དོན་གཉེར་བརྟུལ་ཞུགས་བཟང ། །ཐུབ་པ་མཁས་པ་ཐབས་མཁས་དེ་དག་འཇིག་རྟེན་དོན་ནི་མཐའ་ཡས་བྱེད། །མཁས་ཐུབ་དེ་དག་དེ་ན་བསམ་གཏན་སྤྱོད་ཡུལ་བསམ་གཏན་ཆགས་པ་མེད། །བསམ་གཏན་བདེ་བ་མཉམ་ཉིད་འདྲར་རིག་བྱང་ཆུབ་ཕྱིར་ནི་དབང་པོ་ཞི། །ཀུན་དུ་གྲོལ་ཡིད་དྲང་སྲོང་བྱང་ཆུབ་ཕྱིར་ནི་བྱང་ཆུབ་བློ་དང་ལྡན། །མྱ་ངན་འདས་པ་ལྟ་བུར་བསམ་གཏན་བློ་གཅིག་ཞི་བའི་མཚན་ཉིད་འགྱུར། །བདེ་བར་གཤེགས་པ་དང་བཅོམ་ལྡན་སྲས་པོ་བྱང་ཆུབ་ཞི་བ་ཡོངས་ཚོལ་བ། །ཚང་པའི་ཡིད་ལྡན་འཇིག་རྟེན་དོན་བྱེད་དེ་དག་ཚངས་གནས་དེ་ན་གནས། །ཀུན་ཀྱང་ཚངས་པའི་བློ་ལྡན་མཐར་ཕྱིན་ཤ་སྟག་བྱང་ཆུབ་དོན་གྱི་ཕྱིར། །རང་བྱུང་དགོངས་པ་ཁམས་གསུམ་ལ་མ་ལས་འདས་པའི་ངེས་པར་འབྱུང་བ་སྟོན། །ཚངས་པ་ལ་ནི་གུས་པ་བསྐྱེད་ནས་འགྲོ་བ་བྱང་ཆུབ་ཚོལ་བར་འགྱུར། །ཚངས་པའི་བསམ་པ་རང་བྱུང་བསམ་པ་ཉེས་འབྱུང་མཐར་ཐུག་ཤེས་ནས་ནི། །བདེ་བར་གཤེགས་ཀྱི་བསྟན་པ་མཆོག་ལ་བརྩོན་པ་དེ་དག་འགྲོ་བ་ལ། ཅི་ནས་ཆོས་ཚུལ་འབྲས་བུ་མྱུར་དུ་ཤེས་འགྱུར་དེ་ལྟར་ཆོས་ཀྱང་སྟོན། །དེ་དག་ཚངས་གནས་དེ་ན་གནས།
147b
ཤིང་འཇིག་རྟེན་དག་ལ་བྱང་ཆུབ་ཕྱིར། །ཕན་པ་བྱས་ནས་སྲོག་ཆགས་བྱེ་བ་ཁྲག་ཁྲིག་མང་པོ་བྱང་ཆུབ་བཀོད། །རྒྱལ་བ་ཀུན་ལ་མཆོད་ཕྱིར་འཇིག་རྟེན་ཁམས་མང་ཁྲག་ཁྲིག་འགྲོ་བར་འགྱུར། །དབང་པོ་ཞི་བ་དེ་དག་བསྐལ་པ་སྐར་མ་འདྲ་ལ་རྒྱལ་བར་འགྱུར། །ལྷ་དང་མི་དང་ཀླུ་དང་འདབ་བཟང་དག་དང་ལྷ་མིན་བཅས་པ་དང ། །དྲི་ཟ་གྲུལ་བུམ་མིའམ་ཅི་ཚོགས་གནོད་སྦྱིན་འགྲོར་བཅས་དགའ་ཞིང་མགུ། །བཅོམ་ལྡན་འདས་ཀྱིས་བྱང་ཆུབ་ཏུ་ནི་ཡོངས་སྦྱང་ཆོས་ཀྱི་སྟོབས་རྙེད་པ། །དེ་དག་ཐམས་ཅད་ཡི་རང་ཐལ་སྦྱར་བདེ་བར་གཤེགས་ལ་མ་གོས་ཕྱག་འཚལ། །ཀླུའི་བུ་མོ་ལུང་བསྟན་པའི་ལེའུ་སྟེ། བདུན་པའོ།། །།དེ་ནས་ཀླུའི་བུ་མོ་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས། ཡོངས་སུ་རྫོགས་པར་རིག་ནས་ཀླུའི་རྒྱལ་པོ་དགའ་བོ་དང་ཉེ་དགའ་ལ་སོགས་པ་ཀླུ་བྱེ་བ་ཕྲག་དགུ་བཅུ་ངོ་མཚར་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པ་དེ་སེམས་ཅན་ཐམས་ཅད་ཀྱི་བསམ་པ་མཁྱེན་ཅིང ། བཅོམ་ལྡན་འདས་དེ་ལ་མི་མཁྱེན་པའམ། མ་གཟིགས་པའམ། མ་གསན་པའམ། མངོན་དུ་མ་མཛད་པ་གང་ཡང་མེད་ཅིང ། བཅོམ་ལྡན་འདས་ཀྱི་ཆོས་ནི། ལེགས་པར་གསུངས་པ། ཡང་དག་པར་མཐོང་བ། རིམས་ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་
148a
༄#། །བ་ལ་དོན་ཡོད་པ། མཁས་པ་རྣམས་ཀྱིས་རང་གིས་རིག་པར་བྱ་བ་ནི། ངོ་མཚར་རྨད་དུ་བྱུང་བ་སྟེ། དེ་བཞིན་གཤེགས་པ་དེ་ནི། རྫུ་འཕྲུལ་ཆེ་ཞིང་མཐུ་ཆེ་བ་མངའ་བའོ། །འདི་ལྟར་བུད་མེད་དུ་གྱུར་པ་རྒོད་པ་མི་བརྟན་པ་མི་གནས་པ་རྣམས་ཀྱིས་ཀྱང་བཅོམ་ལྡན་འདས་ཀྱིས་ཆོས་བསྟན་པ་ཡོངས་སུ་ཤེས་པ་དང ། དེ་ལྟར་བཅོམ་ལྡན་འདས་ཀྱི་སློབ་མ་དགེ་འདུན་ཡང་ལེགས་པར་ཞུགས་པ། དྲང་པོར་ཞུགས་པ། རིགས་པར་ཞུགས་པ། མཐུན་པར་ཞུགས་པ་འདི་ལྟར་བུད་མེད་དུ་གྱུར་པ་འདོད་ཆགས་དང ། ཞེ་ས་དང་དང ། གཏི་མུག་མི་བཟད་པ་དང་ལྡན་པ་རྣམས་ཀྱང་བཅོམ་ལྡན་འདས་ཀྱི་གསུང་རབ་ལ་འཇུག་པ་ནི། ངོ་མཚར་ཆེའོ། །སྙམ་སྟེ། ངོ་མཚར་ཐོབ་པ་དེ་དག་གིས་བཅོམ་ལྡན་འདས་ལ་མཆོད་པའི་ཕྱིར་ཛམྦུའི་གླིང་རྒྱ་མཚོའི་རིའི་མཐས་གཏུགས་པ་ཐམས་ཅད་སྤོས་ཀྱི་སྤྲིན་ཆེན་པོས་ཀུན་ནས་ཡོག་པར་བྱས་ཏེ་ཐམས་ཅད་དང་ལྡན་པའི་འཇིག་རྟེན་འདི་སྤོས་ཀྱི་ངད་ཀྱིས་ཁྱབ་པར་བྱས་སོ། །སྤོས་ཀྱི་དྲིའི་ངད་དེས་ཀྱང་སངས་རྒྱས་ཀྱི་ཞིང་ཐམས་ཅད་རྒྱས་པར་གང་བར་གྱུར་ནས་སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །བཅོམ་ལྡན་འདས་ལ་
148b
མཆོད་པ་བྱ་བའི་ཕྱིར་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་ཀྱང་དཔག་ཚད་དྲུག་ཅུ་ཚུན་ཆད་མུ་ཏིག་དམར་པོས་པུས་མོ་ནུབ་ཙམ་དུ་རྒྱས་པར་གང་བར་བྱས་སོ། །ནྱ་གྲོ་དྷའི་ཀུན་དགའ་ར་བ་དེ་ཡང་རིན་ཐང་མེད་པའི་ནོར་བུ་རིན་པོ་ཆེས་ཆལ་བར་བཀང་ངོ ། །ཀླུའི་མེ་ཏོག་གི་འདུན་ཁང་རྒྱར་དཔག་ཚད་དྲུག་ཅུ་ཡོད་པ་རིན་པོ་ཆེ་སྣ་བདུན་གྱི་ཀ་བ་དང་ལྡན་པ་དག་མངོན་པར་སྤྲུལ་ཏོ། །ཀླུའི་རོལ་མོ་སིལ་སྙན་དཔག་ཏུ་མེད་པ་དག་ཀྱང་མངོན་པར་སྤྲུལ་ཏེ་སྒྲ་ཕྱུང་ངོ ། །ཀླུའི་མེ་ཏོག་གི་འདུན་ཁང་དེ་ལ་ཡང་མེ་ཏོག་རྣམ་པ་སྣ་ཚོགས་ཀྱི་ལྡ་ལྡི་བྱེ་བ་ཕྲག་དགུ་བཅུ་བྲེས་སོ། །རིན་པོ་ཆེ་སྣ་བདུན་གྱི་ཀ་བ་དེ་དག་ཀྱང་བཻདཱུ་རྱའི་དྲ་བས་ལེགས་པར་བརྒྱན་ཏེ། །འདུན་ཁང་དེའི་གཞི་ཡང་རིན་ཐང་མེད་པའི་ནོར་བུ་རིན་པོ་ཆེས་ཡོག་པར་བྱས་པར་གྱུར་ཏོ། །འདུན་ཁང་དེའི་གཞི་ནི། འཇམ་པ་བསྒྱུར་དུ་རུང་བ་སྟེ། འདི་ལྟ་སྟེ། དཔེར་ན། སུམ་ཅུ་རྩ་གསུམ་པའི་ལྷ་རྣམས་ཀྱི་རྡོ་ལེབ་ཨར་མོ་ནི་ག་ལྟར་འཇམ་པ། ཁ་དོག་བཻ་དཱུརྱ་ལྟར་འདུག་པ། ཀ་ཙ་ལེནྡི་ཀ་ལྟར་རེག་ན་བདེ་བ། ཉམས་དགའ་བ། སེམས་ཅན་མཐོང་བ་རྣམས་ཀྱི་མིག་མྱ་ངན་ལས་འདའ་བར་འགྱུར་བ་མི་དང ། ལྷ་རྣམས་ཀྱི་ཡིད་དུ་འོང་བ་ལྟ་བུའོ། །ནོར་བུ་རིན་པོ་ཆེ་སྣ་ཚོགས་དེ་དག་གི་ནང་ནས་ནོར་བུ་ལ་ལ་ལས་ནི། མེ་འབྱུང ། ལ་ལ་ལས་ནི། ཆུ་འབྱུང་བ་ཤ་སྟག་སྟེ། དེ་
149a
༄#། །ལའང་ལ་ལ་ལས་ནི། ཆུ་ཁ་དོག་སྔོན་པོ་འབྱུང ། ལ་ལ་ལས་ནི། ཆུ་ཁ་དོག་སེར་པོ་འབྱུང ། ལ་ལ་ལས་ནི། ཆུ་ཁ་དོག་དམར་པོ་འབྱུང ། ། ལ་ལ་ལས་ནི། ཆུ་ཁ་དོག་དཀར་པོ་འབྱུང ། ལ་ལ་ལས་ནི། ཆུ་ཁ་དོག་སྣ་ཚོགས་འབྱུང་ངོ ། །ནོར་བུ་ལ་ལ་ལས་ནི། བདེ་བར་བསིལ་བའི་རླུང་འབྱུང ། ནོར་བུ་ལ་ལ་ལས་ནི། དེ་མ་ཡིན་པའི་ཡོ་བྱད་གཞན་དག་བསམ་པ་བཞིན་དུ་འབྱུང ། ལ་ལས་ནི། སྣུམ་གྱི་བྱ་བ་བྱེད། ལ་ལས་ནི། མེ་ལོང་གི་བྱ་བ་བྱེད་དེ། འཁོར་དེ་དག་ཐམས་ཅད་ཀྱང་ནོར་བུ་རིན་པོ་ཆེ་དེའི་ནང་དུ་སྣང་བར་གྱུར་ཏོ། །སེར་སྐྱེའི་གནས་ནས་སེམས་ཅན་གང་ཇི་སྙེད་ཅིག་རྒྱུ་བ་དེ་དག་ཐམས་ཅད་ཀྱང་ནོར་བུ་རིན་པོ་ཆེ་དེ་དག་གི་ནང་དུ་སྣང་བར་གྱུར་ཏེ། ཐམས་ཅད་དང་ལྡན་པའི་འཁོར་གྱིས་བཅོམ་ལྡན་འདས་རྣམ་པར་སྤྲུལ་པའི་ཆོ་འཕྲུལ་དེ་དག་རྣམ་པར་སྤྲུལ་པ་མཛད་པ། ཉན་ཐོས་ཀྱི་དགེ་འདུན་དང་བཅས་པ་ཡང་ནོར་བུ་རིན་པོ་ཆེ་དག་གི་ནང་ན་བཞུགས་པར་མཐོང་བར་གྱུར་ཏོ། །འདུན་ཁང་གི་གཞི་དེའི་འོག་ནས་ཀྱང་ཀླུའི་མཐུས་གདུགས་རྣམ་པ་སྣ་ཚོགས་མངོན་པར་ཐོན་པར་གྱུར་ཏོ། །རྒྱལ་མཚན་རྣམ་པ་སྣ་ཚོགས་དང ། བ་དན་རྣམ་པ་སྣ་ཚོགས་དང ། མེ་ཏོག་གི་ལྡ་ལྡི་རྣམ་པ་སྣ་ཚོགས་དང ། སྤོས་ཀྱི་ལྡ་ལྡི་རྣམ་པ་སྣ་ཚོགས་
149b
དང ། རིན་པོ་ཆེའི་ལྡ་ལྡི་རྣམ་པ་སྣ་ཚོགས་དང ། མུ་ཏིག་གི་ཕྲེང་བ་རྣམ་པ་སྣ་ཚོགས་དང ། མེ་ཏོག་བརྩེགས་མའི་ལྡ་ལྡི་རྣམ་པ་སྣ་ཚོགས་དང ། རྟ་རྣམ་པ་སྣ་ཚོགས་དང ། དྲིལ་བུ་གཡེར་ཀའི་དྲ་བ་རྣམ་པ་སྣ་ཚོགས་ཀྱང་ཐོན་པར་གྱུར་ཏོ། །དེ་ནས་ཀླུའི་རྒྱལ་པོ་དགའ་བོ་དང་ཉེར་དགའ་བོ་ལ་སོགས་པ་ཀླུ་བྱེ་བ་ཕྲག་དགུ་བཅུས་རྟ་དེ་རྣམས་སྔོན་དུ་དཀྲི་སྟེ་རྐང་གིས་དོང་ན་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ནོར་བུ་རིན་པོ་ཆེ་ཀ་ཙ་ལིནྡི་ཀ་ལྟར་རེག་ན་བདེ་བ་དག་གིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །འདུན་ཁང་གི་གཞི་དེ་ནས་རིན་པོ་ཆེ་གང་དག་མངོན་པར་ཐོན་པ་དེ་དག་ཐམས་ཅད་ཀྱང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པའི་སྟེང་དུ་ཆར་བཞིན་དུ་བབ་པར་གྱུར་ཏོ། །ཀླུའི་རོལ་མོ་སིལ་སྙན་དཔག་ཏུ་མེད་པ་དེ་དག་ཀྱང་སྟེང་གི་བར་སྣང་ལས་སྒྲ་འབྱིན་པར་གྱུར་ཏོ། །དེ་ནས་ཀླུ་བྱེ་བ་ཕྲག་དགུ་བཅུ་པོ་དེ་དག་གིས་བཅོམ་ལྡན་འདས་ལ་ལན་གསུམ་པ་བསྐོར་བ་བྱས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ་ཅང་མི་ཟེར་བར་བཅོམ་ལྡན་འདས་རྣམ་པར་རྗེས་སུ་དྲན་པར་བྱེད་ཅིང་མིག་མི་འཛུམ་པར་བལྟ་ལ། འདི་ལྟར་སངས་རྒྱས་ཀྱི་ཡོན་ཏན་འདོད་པའི་ཕྱིར་ལྷག་པའི་བསམ་པས་བྱང་ཆུབ་ཏུ་ཡང་དག་
150a
༄#། །པར་ཞུགས་པར་གྱུར་ཏོ། །དེ་ནས་དེ་དག་གིས་ཅུང་ཟད་ཅིག་ཏུ་མི་སྨྲ་བར་བཅོམ་ལྡན་འདས་ཀྱི་ཡོན་ཏན་རྗེས་སུ་དྲན་པར་བྱས་ནས་སོ་སོ་ནས་བླ་གོས་ཕྲག་པ་གཅིག་ལ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་ཡན་ལག་ལྔས་ཕྱག་འཚལ་ནས་ཚིགས་སུ་བཅད་པ་དག་གིས་མངོན་པར་བསྟོད་པ། མཚན་བརྒྱ་རྫོགས་པ་བརྟུལ་ཞུགས་ལེགས་སྤྱད་པ། །དཀའ་ཐུབ་དགྱེས་པ་དྲི་མེད་ཐུགས་རྗེ་ཅན། །རིན་ཆེན་འབྱུང་གནས་བཅས་པའི་ས་སྤངས་ཏེ། །བདེ་གཤེགས་ཁྱེད་ནི་གྲོང་ཁྱེར་མངོན་པར་བྱུང ། །ལོ་དྲུག་པར་དུ་དཀའ་ཐུབ་དཀའ་མཛད་དེ། །རྒྱལ་བ་ཁྱོད་ཀྱིས་བདུད་རྩི་མ་བརྙེས་ཀྱང ། །བདེ་གཤེགས་ཁྱོད་ཀྱི་ཐུགས་ནི་ཞུམ་མ་གྱུར། །ཐུབ་པ་ཁྱོད་ཀྱིས་བྱང་ཆུབ་ཐུགས་ཀྱིས་སྤྱད། །ཇི་ལྟར་འདྲེན་པ་ལྷ་མིའི་བླ་མ་ཁྱོད། །འགྲོ་ལ་ཕན་བཞེད་དཀའ་ཐུབ་སྤྱད་མཛད་དེ། །འཇིག་རྟེན་མགོན་པོ་སྡུག་བསྔལ་བཏང་གྱུར་པ། །དེ་ཐོས་པས་ཀྱང་བདག་ཅག་ཡིད་མི་དགའ། །ཐུབ་པ་དབུ་དང་སྤྱན་ནི་བཏང་བ་དང ། བྱང་ཆུབ་སེམས་ནི་ཇི་ལྟར་སྒྲུབ་མཛད་པ། །བདེ་བར་གཤེགས་ཀྱི་དཀའ་སྤྱད་ཐོས་གྱུར་ན། །དེ་ཐོས་པས་ཀྱང་བདག་ཅག་བདེ་མི་འགྱུར། །གང་ཚེ་ཀ་ལིང་རྒྱལ་པོ་བཟོད་སྨྲ་བས། །ཞབས་
150b
དང་ཕྱག་དང་སྙན་རྣམས་གཏུབས་གྱུར་ཏེ། །དེ་བཞིན་ཤངས་བཅད་རྒྱལ་བ་མི་འཁྲུགས་པ། །དེ་ཐོས་པས་ཀྱང་བདག་ཅག་ཡིད་མི་དགའ། །ཕུག་རོན་སྐྱབས་སུ་མཆིས་པ་མ་བཏང་སྟེ། །གང་ཚེ་འདྲེན་ཁྱོད་སྲང་ལ་བཅལ་གྱུར་པ། །རྒྱལ་བའི་དེ་ཐོས་པས་ཀྱང་མི་བདེ་སྟེ། །བདེ་གཤེགས་བྱང་ཆུབ་སྤྱོད་པ་སྡུག་བསྔལ་ཆེ། །བདག་ཅག་མི་འཚལ་མ་ལགས་ཅི་ཞེ་ན། །བདེ་བར་གཤེགས་ལ་འགྲོ་བ་གནོད་བགྱིས་པ། །ངན་སོང་མུན་པར་ལྷུང་བས་བདེ་གཤེགས་ཀྱི། །སྡུག་བསྔལ་སྤྱོད་པ་དྲན་ས་པ་མི་དགའ་ལགས། །ཇི་ལྟར་འཇིག་རྟེན་འདྲེན་པ་བློ་འཕགས་དང ། །བདེ་གཤེགས་སྤྱོད་པ་མི་འཚེ་བློར་གྱུར་དང ། །སྒྲུབ་པའི་ཚེ་ན་དེ་ལ་མི་གནོད་པ། །འཇིག་རྟེན་འདྲེན་པ་སྤྱོད་བདེ་བཀའ་སྩལ་གསོལ། །མཐའ་ཡས་བློ་མངའ་བདེ་གཤེགས་སྤྱོད་པ་ལ། །ཐུབ་པ་ཀླུ་ཚོགས་འདི་དག་རབ་ཏུ་བརྩོན། །ཇི་ལྟར་ཁྱོད་ཀྱི་བཞིན་དུ་སྤྱོད་འགྱུར་བ། །དེ་ལྟར་བདེ་གཤེགས་བྱང་ཆུབ་ལམ་བསྟན་གསོལ། །རྒ་ཤི་མ་མཆིས་གོ་འཕང་མཐོར་འཚལ་ཞིང ། །ཀླུ་ཚོགས་འདི་རྣམས་ཐུབ་པ་སྐོམ་པར་གནས། །འགྲོ་བ་འདི་དག་བདེ་བར་འདུལ་འགྱུར་བའི། །བརྟུལ་ཞུགས་སྤྱོད་པ་བདེ་གཤེགས་བཀའ་སྩལ་གསོལ། །དེ་ནས་བཅོམ་ལྡན་འདས་ཀྱིས་ཀླུའི་མཆོད་པ་དེ་དག་ཀྱང་གཟིགས། ལྷག་པའི་བསམ་པས་སྨོན་ལམ་བཏབ་པ་དེ་དག་ཀྱང་ཐུགས་
151a
༄#། །སུ་ཆུད་ནས་དེའི་ཚེ་འཛུམ་པ་མཛད་དོ། །འདི་ནི། ཆོས་ཉིད་དེ། སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པ་དེའི་ཚེ་ཁ་དོག་སྣ་ཚོགས་དང ། ཁ་དོག་དུ་མའི་འོད་ཟེར་བཅོམ་ལྡན་འདས་ཀྱི་ཞལ་གྱི་སྒོ་ནས་བྱུང་སྟེ། ཚངས་པའི་འཇིག་རྟེན་གྱི་བར་དུ་མངོན་པར་འཕགས་ནས་ཕྱིར་ལོག་སྟེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་གྱིས་དེའི་ཚེ་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བརྟུལ་ཞུགས་བཟང་པོ་དགེ་སྦྱོང་ཐུབ་པ་རྣམས། །རྒྱུ་མེད་རྒྱལ་བ་འཛུམ་པ་མི་མཛད་ན། །འདྲེན་པ་བདེ་གཤེགས་ཐུགས་རྗེ་ཆེ་མངའ་བ། །མཚུངས་མེད་བཅོམ་ལྡན་འཛུམ་རྒྱུ་བཀའ་སྩལ་གསོལ།། ཚོགས་ཀྱི་སློབ་དཔོན་སྐྱེ་བོ་འདི་དག་ནི། །འཛུམ་རྒྱུ་ཉན་འཚལ་ཁྱོད་ཀྱི་ཞལ་དུ་བལྟ། །ཡིད་ནི་ཞུམ་གྱུར་ཐེ་ཚོམ་འཚལ་ཞིང་མཆིས། །མཁས་པ་ཐེ་ཚོམ་རྣམ་པར་བསལ་དུ་གསོལ། །འཇིག་རྟེན་མཁས་པ་སྟོན་པ་ཤཱཀྱ་ཐུབ། །དེ་རིང་སུ་ཞིག་ཡིད་ནི་ཡོངས་སུ་དགའ། །གང་གིས་བདུད་ཀྱི་དབང་པོ་མཐོང་གྱུར་ཏེ། །རྨོངས་པར་བགྱིས་ནས་ཡིད་ནི་མི་དགར་བགྱིས། །ཚོགས་ཀྱི་སློབ་དཔོན་འདྲེན་པ་སུ་ཞིག་གིས། །བདེ་གཤེགས་ཆོས་ཉིད་ཡབ་ལ་བསྙེན་བཀུར་བགྱིས། །བདེ་བར་གཤེགས་ལ་མཆོད་པ་དམ་
151b
པ་བགྱིས། །ཤཱཀྱ་སེངྒེ་བཀའ་སྩལ་ཐེ་ཚོམ་ཁུམ། །སོར་བཅུ་ཐལ་མོ་སྦྱར་བ་མགོར་བཞག་ཅིང ། །འགྲོ་བ་འདི་དག་ཐུབ་པའི་ཞལ་དུ་བལྟ། །ཚོགས་ཀྱི་སློབ་དཔོན་ཐེ་ཚོམ་བསལ་དུ་གསོལ། །འདྲེན་པ་འཛུམ་པ་མཛད་པའི་རྒྱུ་ཡང་གསུང ། །དེ་ཐོས་སྐྱེ་བོ་འདི་དག་དགར་འགྱུར་ཏེ། །རྒྱལ་བས་དགོངས་པའི་ཚུལ་ཡང་རྟོགས་པར་འགྱུར། །བདེ་བར་གཤེགས་པ་འཁོར་རྣམས་ཚིམ་བགྱིས་ན། །གཞན་དུ་མི་སེམས་ནན་ཏན་གནས་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ།་ཐུབ་མཁས་འདྲེན་པ་ཚོགས་ཀྱི་སློབ་དཔོན་གྱིས། །ཚངས་འདྲ་ཡན་ལག་བརྒྱད་ལྡན་གསུང་བརྗོད་ཀྱི། །རྟ་ཐུལ་སྐྱོན་མེད་སེམས་ཀྱིས་དད་བྱོས་ལ། །འཛུམ་པ་མཛད་པའི་རྒྱུ་དེ་མཉན་པར་གྱིས། །ཀླུ་ཡི་བདག་པོ་འདི་དག་དད་གྱུར་ཏེ། །འགྲོ་བ་ཟིལ་གྱིས་མནན་ནས་མཆོད་པ་བྱས། །སྐྱེ་བོ་བདེ་བར་ཡོངས་སྨིན་བྱ་བའི་ཕྱིར། །སངས་རྒྱས་བྱང་ཆུབ་འདི་ནི་ཡོངས་སུ་ཚོལ། །སྙིང་རྗེ་ཆེན་པོས་རྣམ་འདྲེན་མེད་པ་ཡི། །འགྲོ་བ་བལྟས་ནས་སྡུག་བསྔལ་ཅིས་མི་བསྟེན། །འགྲོ་བ་བྱང་ཆུབ་རྒྱ་ཆེན་ཐོབ་བྱ་ལ། འདྲེན་པ་དག་ནི་སྐྱོ་བར་ཡོང་མི་འགྱུར། །ཞི་གནས་དགེ་བ་ཡེ་ཤེས་སྟོབས་ལྡན་སྟོབས། །མཚན་མེད་སྟོང་པ་དེ་བཞིན་སྨོན་མེད་པ། །རྣམ་ཐར་སྒོ་གསུམ་ཡོངས་སུ་བསྒོམས་ནས་སུ། །ཤིན་ཏུ་ཡོངས་
152a
༄#། །དག་ཡིད་ཅན་བེ་བར་འགྲོ། །འགྲོ་བ་མཐའ་དག་མཉམ་པ་ཉིད་རྟོགས་ཏེ། །གང་ཚེ་རྒྱལ་བས་ཤེས་རབ་མཚན་ཐོས་ནས།། མཉམ་པའི་སེམས་དང་བྱམས་དང་སྙིང་རྗེ་ཐོབ། །འགྲོ་ལ་སྙིང་རྗེ་ཆེན་པོ་རབ་བསྐྱེད་ནས། །སྙིང་བརྩེ་ལྡན་པ་མཆོག་ཏུ་སྙིང་རྗེ་ཅན། །འཇིག་རྟེན་མཁས་པ་བླ་ན་མེད་པར་འགྱུར།། རྒྱལ་བ་དེ་དག་འགྲོ་འདི་མཚུངས་བསྒྲལ་ནས། །དེ་དག་དགྲ་བཅོམ་རྣམ་པར་འདྲེན་པར་འགྱུར། །རྟག་ཏུ་བདག་མེད་ཚིག་ནི་ཉན་བྱེད་ཅིང ། །འཇིག་རྟེན་གཏམ་གྱི་རྒྱུད་ལ་འཇུག་པ་སྟེ། །དེ་དག་བདེ་བར་གཤེགས་ཀྱི་འཆི་མེད་ཐོབ། །དེ་ན་བདུད་མེད་མུ་སྟེགས་ཚོགས་ཀྱང་མེད། །འདྲེན་པ་བདེ་གཤེགས་སྙིང་རྗེ་ལྡན་པ་ཡི། །རྒྱལ་བ་དེ་དག་འགྲོ་བ་ཀུན་མོས་བྱེད། །བདེ་གཤེགས་བཀའ་དང་ཚིག་རྣམས་ཐམས་ཅད་དང ། །བདེ་བར་གཤེགས་ཀྱི་དགོངས་ལ་མོས་བྱེད་འགྱུར། །སྲིད་པར་བདེ་གཤེགས་རྣམས་ཀྱི་སྤྱད་སྤྱོད་ཅིང ། །རབ་བདེར་འགྲོ་བ་ཡོངས་སྨིན་བྱེད་པར་འགྱུར། །མཚུངས་མེད་ཐུབ་པ་བདེ་བར་མྱུར་དུ་ཡང ། །ཡོངས་སུ་འཚང་རྒྱ་འཆི་མེད་ཐོབ་པར་འགྱུར། །ཐོབ་ནས་འགྲོ་བ་དག་ཀྱང་མོས་པར་འགྱུར། །སྐྱེ་བོ་ཀུན་ཀྱང་གཟུགས་ཀྱི་མཆོག་དང་ལྡན། །འགྲོ་བ་ཐམས་ཅད་བདེ་གཤེགས་དེ་དག་གི། དགོངས་པའི་ཚིག་ནི་མངོན་དུ་ཤེས་
152b
པར་འགྱུར། །ཕྱུགས་དང་བྱ་དང་གནོད་སྦྱིན་མི་དེ་དག་།རང་བྱུང་དགོངས་མིན་ཅུང་ཟད་བྱེད་མི་འགྱུར། །དེ་དག་ཀུན་ཏུ་ཆོས་རྟོགས་དྲན་དང་ལྡན། །བདེ་བར་གཤེགས་རྣམས་འཆི་མེད་ཐོབ་པར་འགྱུར། །དེ་དག་ཚིག་ཐོས་སེམས་ཅན་གང་ཡང་ནི། །བསྟན་པ་དེ་ལ་མི་དགར་འགྱུར་བ་མེད། །བདེ་གཤེགས་དེ་དག་གསུང་ལ་དགའ་བ་ཡི།། འགྲོ་བ་འཆི་མེད་ཡང་དག་ཐོབ་པར་འགྱུར། །དེ་ཚེ་འགྲོ་བས་རྒྱལ་བའི་དགོངས་ལེགས་རྟོགས། །རྒ་བ་དང་ནི་ན་དང་འཆི་བ་དང ། །མྱ་ངན་སྨྲེ་སྔགས་འདོན་ལས་ཡོངས་སུ་དགྲོལ། ། ཚིག་དེ་ཐོས་ནས་ངར་འཛིན་མེད་པར་འགྱུར། །ཀླུ་ཡི་བསམ་པ་ཤཱཀྱ་སེངྒེ་ལ། །ཡོངས་སུ་ཞུས་ནས་ཇི་ལྟར་དེ་དག་རྣམས། །གཞལ་ཡས་བྱང་ཆུབ་ཐོབ་ནས་ཐུབ་རྣམས་ཀྱི། ། ཡེ་ཤེས་འཇུག་འགྱུར་དེ་སྐད་སྲས་ལ་བསྟན། །ཀླུ་རྣམས་ལུང་བསྟན་ཡིད་དུ་འོང་བ་ཡི། །རྒྱལ་བའི་གསུང་ཐོས་འཁོར་རྣམས་ཡིད་དགའ་སྟེ། །དེ་ལ་ཡིད་ནི་རབ་ཏུ་ཞི་གྱུར་ནས། །དགའ་བའི་ཡིད་ཀྱིས་རྒྱལ་བའི་སྐྱབས་སུ་སོང ། །ཀླུ་ལུང་བསྟན་པའི་ལེའུ་སྟེ། བརྒྱད་པའོ།། །།དེ་ནས་གྲུལ་བུམ་བྱེ་བ་ཕྲག་བཅོ་བརྒྱད་ཀྱིས་ལྷ་མ་ཡིན་རྣམས་དང ། ནམ་མཁའ་ལྡིང་རྣམས་དང ། ཀླུའི་བུ་མོ་རྣམས་དང ། ཀླུ་རྣམས་ཀྱི་མཆོད་པ་ཡང་མཐོང ། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ་
153a
༄#། །རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་ངོ་མཚར་ཐོབ་པར་གྱུར་ཏོ། །འདི་ལྟར་དེ་བཞིན་གཤེགས་པ་ལ་ཤེས་རབ་ཀྱི་མངའ་རྒྱ་ཆེན་པོ་མངའ་ཞིང ། འདི་ལྟར་བཅོམ་ལྡན་འདས་ལ་མཆོད་པ་ཆེན་པོ་འདི་ལྟ་བུ་བྱས་པས་ཀྱང་ངོ་མཚར་དུ་མི་དགོངས་ཏེ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི། རྒྱ་ཆེ་ཞིང་ཡོངས་སུ་རྒྱས་པ་ཡིན་པས་མཐོ་བའམ་དམའ་བར་མི་འགྱུར་རོ། །དེ་བཞིན་དུ་བཅོམ་ལྡན་འདས་ཀྱང་ཆོས་ཐམས་ཅད་ལ་ཐེ་ཚོམ་མི་མངའ་ཞིང་ཡོན་ཏན་ཐམས་ཅད་ཡོངས་སུ་རྫོགས་ལ། ཐམས་ཅད་མཁྱེན་པའི་ཡེ་ཤེས་ཡངས་པ་མངའ་བས་མཆོད་པ་འདི་ལྟ་བུ་དག་བཞེས་ཀྱང་མཐོ་བའམ་དམའ་བར་མི་འགྱུར་ཞིང ། ངོ་མཚར་དུ་མི་དགོངས་པ་ནི། ངོ་མཚར་ཤིན་ཏུ་ཆེའོ། །སྙམ་མོ། །དེ་ནས་གྲུལ་བུམ་བྱེ་བ་ཕྲག་བཅོ་བརྒྱད་པོ་དེ་དག་གིས་བདག་ཅག་ཉིད་ཀྱི་མཆོད་པས་བཅོམ་ལྡན་འདས་ལ་མཆོད་པའི་ཕྱིར་རིན་པོ་ཆེ་སྣ་བདུན་གྱི་བླ་རེ་བྱེ་བ་ཕྲག་བཅོ་བརྒྱད་མངོན་པར་སྦྲུལ་ཏེ། འདི་ལྟ་སྟེ། གསེར་གྱི་སྐུད་པའི་བླ་རེ་དང ། དངུལ་གྱི་སྐུད་པའི་བླ་རེ་དང ། བཻ་ཌཱུརྱའི་སྐུད་པའི་བླ་རེ་དང ། ཤེལ་གྱི་བླ་རེ་དང ། མུ་ཏིག་དམར་པོའི་བླ་རེ་དང ། སྤུག་གི་བླ་རེ་དང ། རྡོའི་སྙིང་པོའི་བླ་རེ་ཤ་སྟག་གོ་།རིན་པོ་ཆེའི་བླ་རེ་དེ་དག་ལ་ཡང་
153b
མེ་ཏོག་སྣ་ཚོགས་ཀྱི་ཕྲེང་བའི་ལྡ་ལྡི་མངོན་པར་སྤྲུལ་ཏེ། གསེར་གྱི་སྐུད་པའི་བླ་རེ་རྣམས་ལ་ནི། དངུལ་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ། དངུལ་གྱི་སྐུད་པའི་བླ་རེ་རྣམས་ལ་ནི།་གསེར་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ། བཻ་ཌཱུརྱའི་བླ་རེ་རྣམས་ལ་ནི། ཤེལ་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ། ཤེལ་གྱི་བླ་རེ་རྣམས་ལ་ནི། བཻ་ཌཱུརྱའི་མེ་ཏོག་གི་ཕྲེང་བའི་ལྡ་ལྡི་བཀྱེ། མུ་ཏིག་དམར་པོའི་བླ་རེ་རྣམས་ལ་ནི། སྤུག་གི་མེ་ཏོག་གི་ཕྲེང་བའི་ལྡ་ལྡི་བཀྱེ། སྤུག་གི་བླ་རེ་རྣམས་ལ་ནི། མུ་ཏིག་དམར་པོའི་མེ་ཏོག་གི་ཕྲེང་བའི་ལྡ་ལྡི་བཀྱེ། རྡོའི་སྙིང་པོའི་བླ་རེ་རྣམས་ལ་ནི། ཤེལ་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ་བ་ཤ་སྟག་མངོན་པར་སྤྲུལ་ཏོ། །ཤིང་རྟ་བཀྲ་བ་བལྟ་ན་སྡུག་པ་བྱེ་བ་ཕྲག་བཅོ་བརྒྱད་ཀྱང་མངོན་པར་སྤྲུལ་ཏེ། དེ་དག་ཀྱང་གསེར་ནས་རྡོའི་སྙིང་པོའི་བར་དུ་ཤིང་རྟ་དེ་དག་གི་སྟེང་དུ་རིན་པོ་ཆེ་སྣ་བདུན་གྱི་གདུགས་ཐུར་མ་བརྒྱ་པ་གསེར་གྱི་ཡུ་བ་ཅན་དང ། བཻ་ཌཱུརྱའི་ཡུ་བ་ཅན་དང ། ཤེལ་གྱི་ཡུ་བ་ཅན་བྱེ་བ་ཕྲག་བཅོ་བརྒྱད་མངོན་པར་སྤྲུལ་ཏོ། །གདུགས་དེ་དག་ལ་རིན་པོ་ཆེ་རྣམ་པ་སྣ་ཚོགས་ཀྱི་ལྡ་ལྡི་མངོན་པར་སྤྲུལ་ཏེ། འདི་ལྟ་སྟེ།་གསེར་གྱི་མེ་ཏོག་གི་ལྡ་ལྡི་དང ། དངུལ་གྱི་མེ་ཏོག་གི་ལྡ་ལྡི་དང ། བཻ་ཌཱུརྱའི་མེ་ཏོག་གི་ལྡ་ལྡི་དང ། ཤེལ་གྱི་མེ་ཏོག་གི་ལྡ་ལྡི་དང ། མུ་ཏིག་དམར་པོའི་མེ་ཏོག་གི་ལྡ་ལྡི་
154a
༄#། །དང ། ཀླུའི་ནོར་བུའི་མེ་ཏོག་གི་ལྡ་ལྡི་ཤ་སྟག་གོ་།མུ་ཏིག་དམར་པོའི་དྲ་བ་དག་ཀྱང་མངོན་པར་སྤྲུལ་ཏོ། །དེ་དག་གིས་གདུགས་དེ་དག་དང ། མེ་ཏོག་གི་ཕྲེང་བ་དེ་དག་གི་གཟུགས་བྱས་སོ། །གྲུལ་བུམ་གྱི་རོལ་མོའི་སིལ་སྙན་དག་ཀྱང་མངོན་པར་སྤྲུལ་ཏོ། །ཤིང་རྟ་དེ་དག་རེ་རེ་ཞིང་ཡང་བླ་རེ་དེ་དག་རེ་རེ་རྗེས་སུ་འབྲང་བར་འགྱུར་ཏོ། །དེ་ནས་གྲུལ་དུམ་དེ་དག་རིན་པོ་ཆེ་སྣ་བདུན་གྱི་ཤིང་རྟ་དེ་དག་ལ་ཞོན་ཏེ། རིན་པོ་ཆེ་སྣ་བདུན་གྱི་གདུགས་དང ། བླ་རེ་དང ། མེ་ཏོག་དེ་དག་གིས་བཅོམ་ལྡན་འདས་ལ་མངོན་པར་གཏོར་ཏེ་མཆོད་པ་བྱེད་ཅིང་བཅོམ་ལྡན་འདས་ལ་སྟེང་གི་བར་སྣང་ལས་ལན་གསུམ་བསྐོར་ཏོ། །བསྐོར་ནས་ཤིང་རྟ་དེ་དག་ལས་བབས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དེ། བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། ཐམས་ཅད་དུ་ཡང་མི་བསྙེངས་མངའ་དབང་ཅན། །ཐུབ་པ་ཆེན་པོ་མི་མཐོ་མི་དམའ་སྟེ། །རི་ཡི་རྒྱལ་པོ་ལྷུན་པོའི་རི་འདྲ་བ། །མཆོད་པ་རྒྱ་ཆེན་འདི་དག་བཞེས་སུ་གསོལ། །འགྲོ་བ་ཐམས་ཅད་མིང་དང་མཚན་མ་དང ། །ཐ་སྙད་ཙམ་མཁྱེན་ཐུབ་པ་ཆགས་མི་མངའ། །འདྲེན་པ་ཁྱོད་ཀྱིས་ཏིང་འཛིན་ཞི་བསྒྲུབས་པས། །ཤེས་རབ་ལྡན་པ་དྲེགས་པ་ཡོང་མི་མངའ། །
154b
རྒྱལ་བ་ཁྱོད་ཀྱིས་འགྲོ་བ་སྒྱུ་འདྲར་མཁྱེན། །རང་བཞིན་སྟོང་སྟེ་རྨི་ལམ་དག་འདྲ་དང ། །ཆུ་ཟླ་ནམ་མཁའི་སྨིག་རྒྱུ་ལྟ་བུར་ནི། །བདེ་བར་གཤེགས་པས་འགྲོ་བ་འདི་དག་གཟིགས། ། དྲི་ཟའི་གྲོང་ཁྱེར་ཇི་ལྟར་སྣང་གྱུར་ཀྱང ། །གྲོང་ཁྱེར་དེ་ནི་ཕྱོགས་བཅུ་ཀུན་ན་མེད། །གཞན་དུ་གྲོང་ཁྱེར་དེ་ནི་མིང་ཙམ་སྟེ། །དེ་བཞིན་བདེ་བར་གཤེགས་པས་འགྲོ་འདི་གཟིགས། །མཆོད་པ་འདི་ཀུན་བྲག་ཅ་ཇི་བཞིན་ཏེ། །ཤིང་རྟ་གདུགས་དང་བླ་རེ་སིལ་སྙན་དང ། །མེ་ཏོག་རྒྱལ་མཚན་ཐལ་མོ་སྦྱར་བགྱིས་པ། །བྲག་ཅ་ཇི་བཞིན་དེ་དག་དེ་ལྟར་གདའ། །འདྲེན་པ་མཆོད་པ་འདི་བགྱིས་བདག་ཅག་ཀྱང ། །སངས་རྒྱས་རྐང་གཉིས་མཆོག་ཏུ་མྱུར་འགྱུར་ཤོག་།རྨི་ལམ་འདྲ་བར་འགྲོ་བ་བདག་ཅག་གིས། །རྟོགས་བགྱིས་རྒྱལ་བ་ཁྱོད་བཞིན་བསྟན་པར་བགྱི། །ནད་དང་རྒ་ཤིས་ཡོངས་སུ་གཙེས་གྱུར་པའི། །སྐྱེ་བོ་མཐོང་ནས་བདག་ཅག་རྣམས་ཀྱིས་ཀྱང ། །བྱང་ཆུབ་མྱུར་ཐོབ་རྒ་ཤི་མེད་པའི་གནས། །གང་ཐོས་གྲོལ་འགྱུར་འགྲོ་ལ་བསྟན་པར་གྱིས། །བདག་ཅག་བྱང་ཆུབ་ལམ་མཆོག་སངས་རྒྱས་ནས། །སེམས་ཅན་བློ་སྟོར་རྣམས་ལ་བསྟན་པར་བགྱི། །ཐུབ་པའི་འཁྲུགས་མེད་ཆོས་རྣམས་རབ་སྟན་པ། །མྱ་ངན་འདས་མཆོག་སེམས་ཅན་བསྟན་པར་བགྱི། །དེ་ནས་བཅོམ་ལྡན་འདས་ཀྱིས་གྲུལ་བུམ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་
155a
༄#། །ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། སྟོན་པ་རྒྱུ་མེད་འཛུམ་པ་མི་མཛད་དེ། །རྣམ་འདྲེན་འཇིག་རྟེན་མཁས་ལ་མཚར་མི་མངའ། །ངོ་མཚར་འགྱུར་མེད་རྒྱལ་བས་འཛུམ་མཛད་ན། །འཛུམ་རྒྱུ་ལེགས་པར་བཀའ་སྩལ་ཉན་པར་འཚལ། །རྒྱལ་བའི་ཞལ་ནས་འཛུམ་པ་མཛད་མཐོང་ནས། །འགྲོ་བ་འདི་དག་ཐེ་ཚོམ་སོམ་ཉི་འཚལ། །ཐེ་ཚོམ་འཚལ་བ་རྣམས་ཀྱི་ཐེ་ཚོམ་ཁུམ། །མི་ཡི་དབང་པོ་འཛུམ་པའི་རྒྱུ་ཡང་གསུངས། །གང་གིས་དེ་རིང་ཆོས་ལ་ཡིད་བཞག་འགྱུར། །དེ་རིང་གང་གིས་ཆོས་ཀྱི་རྒྱལ་ཡབ་མཐོང ། །དེང་སུས་སངས་རྒྱས་བསྔགས་པའི་མཆོད་པ་བགྱིས། །མི་ཡི་དམ་པ་བདག་ནི་ཉན་པར་འཚལ། ། དེ་རིང་འདུས་བྱས་སྡུག་བསྔལ་ཤེས་གྱུར་ནས། །གང་གིས་འདུ་བྱེད་གྱུར་པའི་ཡིད་གཅིག་བཅོམ། །གང་ཞིག་ཡང་དག་མཐའ་ལ་མི་གཡོ་གནས། །རྣམ་དག་ཐུགས་མངའ་བདག་ནི་ཉན་པར་འཚལ། །དེ་རིང་སུ་ཡིས་འཁོར་བཅས་བདུད་རྣམས་བཅོམ། །ཐུབ་པ་སྟོན་པ་དེང་སུས་མཉེས་པར་གྱིས། །འདྲེན་པ་སུ་ཞིག་དེ་རིང་གཏིང་རྙེད་གྱུར། །ཐེ་ཚོམ་མཆིས་ཏེ་དེང་བདག་དེ་ཉན་འཚལ། །འཛུམ་མཛད་དེ་ཡི་དོན་ནི་མཉན་སླད་དུ། །འགྲོ་བ་ཀུན་ཀྱང་ཐལ་མོ་སྦྱར་ཅིང་གནས། ། འདྲེན་པ་ཐེ་ཚོམ་འཚལ་བའི་ཐེ་ཚོམ་
155b
སོལ། །རྐང་གཉིས་དམ་པས་ལུང་ཡང་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་བ། རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །འཛུམ་པའི་རྒྱུ་འདི་ཡོངས་སུ་དྲིས་པས་ན། །འགྲོ་བའི་དོན་ཡང་ཁྱོད་ཀྱིས་བྱས་པར་འགྱུར། །དེ་དོན་བསྟན་བྱས་རྟ་ཐུལ་མཉན་པར་གྱིས། །གྲུལ་བུམ་ཚོགས་ཀྱིས་ང་ལ་མཆོད་བྱས་ཏེ། །ཞི་བའི་ཆོས་ལ་དེ་དག་ཡིད་ཀྱང་བཞག་།མཚར་མེད་ང་མཐོང་ནས་ནི་ངོམས་གྱུར་ཏེ། ཞི་བའི་ཆོས་ལ་དེ་དག་ཡིད་ཀྱང་བཞག་།དེ་དག་རྣམས་ཀྱིས་དེ་རིང་ང་མཆོད་དེ། །ཞི་བའི་ཆོས་ལ་བློ་གྲོས་རྣམ་པར་བཏང ། །ལམ་སྟོར་སྐྱེ་བོ་རྣམས་ལ་སྙིང་བརྩེ་ཞིང ། །བསམ་པ་ཐག་པས་སྙིང་རྗེ་ཆེན་པོ་བསྐྱེད། །སྙིང་རྗེ་བས་ནི་ང་ལ་མཆོད་པ་བྱས། །རབ་ཏུ་ལམ་སྟོར་རྣམས་ལ་བྱམས་པར་བསམ། །མཁས་པ་དེ་དག་ལས་དེ་བྱས་པས་ན། །གྲུལ་བུམ་སྐྱེ་གནས་ཤི་འཕོས་བརྟུལ་ཞུགས་བཟུང ། །བརྒྱ་བྱིན་ལྷ་ཡི་དྲུང་དུ་འགྲོ་བར་འགྱུར། །ཐུགས་ཐུབ་བྱམས་དོན་མཛད་སྟོན་དྲུང་དུ་འདོད། །དེས་ནི་ཅུང་ཟད་ཡང་དང་ཡང་བསྟན་ཏེ། །ཕྱིར་ཞིང་ཆོས་ལ་ཐེ་ཚོམ་མེད་པར་འགྱུར། །དེ་དག་བསྐལ་པ་གངྒཱའི་བྱེ་སྙེད་དུ། །ཞིང་ནས་ཞིང་དུ་རྣམ་པར་རྒྱུ་བྱེད་ཅིང ། །བདག་ཉིད་ཆེན་པོའི་ཆོས་ལ་མཆོད་པ་བྱེད། །གོ་ཆ་ཆེན་པོ་རབ་ཏུ་བགོ་བྱེད་ཀྱི། །དེ་དག་སྐྱེ་བོ་མེད་པར་
156a
༄#། །འཇིག་རྟེན་ཁམས། །ཁྲག་ཁྲིག་མཐའ་ཡས་རྣམ་པར་སྤྱད་པར་འགྱུར། །སྐྱེ་བོ་མང་པོའི་དོན་བྱེད་འདྲེན་འགྱུར་ཏེ། །ངོ་མཚར་མེད་ཅེས་བྱ་བའི་རྒྱལ་བར་འགྱུར། །དེ་དག་ཞིང་རྣམས་གང་དུ་འགྲོ་རྒྱུ་བ། །དེར་ནི་འགྲོ་བས་རྒྱལ་བ་བྱུང་བར་ཤེས། །དེ་དག་ཐབས་ཀྱིས་མ་འོངས་དུས་དག་ན། །ངོ་མཚར་མེད་པར་སྐྱེ་བོ་རྣམ་གྲོལ་བྱེད། །རྒྱལ་བ་ངོ་མཚར་མེད་པ་ཞིང་སྦྱོང་ཞིང ། །རྫོགས་པའི་བྱང་ཆུབ་བླ་མེད་ཞི་བ་ཚོལ། །དེ་དག་ཚོལ་བ་ལ་ཡང་མི་གནས་ཏེ། །འདི་ལྟར་བླ་མེད་བྱང་ཆུབ་གནས་ཕྱིར་རོ། །དེ་ལྟར་འཛུམ་རྒྱུ་རྒྱལ་བས་ལུང་བསྟན་ཅིང ། །བདེ་བར་གཤེགས་པས་འཇིག་རྟེན་དོགས་བསལ་ཏེ། །གྲུབ་བུམ་མཆོད་པའི་འབྲས་བུ་དེས་ཐོབ་ནས། །འགྲོ་བ་ཐེ་ཚོམ་བསལ་ཏེ་དགའ་བར་འགྱུར། །གྲུལ་བུམ་ལུང་བསྟན་པའི་ལེའུ་སྟེ། དགུ་པའོ།། །།དེ་ནས་དེའི་ཚེ་དྲི་ཟ་བྱེ་བ་ཕྲག་སུམ་ཅུ་རྩ་དྲུག་གིས་ལྷ་མ་ཡིན་རྣམས་དང ། ནམ་མཁའ་ལྡིང་རྣམས་དང ། ཀླུའི་བུ་མོ་རྣམས་དང ། ཀླུ་རྣམས་དང ། གྲུལ་བུམ་རྣམས་ཀྱི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་ངོ་མཚར་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པས་
156b
ཆོས་ཀྱི་དབྱིངས་འགྱུར་བ་མེད་པ་ཡང་དག་པར་བཀའ་སྩལ། བྱ་བ་རྣམས་ཀྱང་ཡང་དག་པར་བསྟན་ཏེ། དགེ་བའི་རྩ་བ་འཕེལ་བ་ཡང་བསྟན་ལ། ཆོས་གང་ལ་ཡང་ལུང་བསྟན་པ་མེད་པར་ཡང་ཡང་དག་པར་བསྟན་པ་འདི་ནི། ངོ་མཚར་རྨད་དོ། །སྙམ་ནས་དེ་དག་གིས་ཆོས་དེ་ལྟ་བུ་ཁོང་དུ་ཆུད་དེ། དེ་བཞིན་གཤེགས་པ་ལ་རིམ་གྲོ་བྱ་བའི་སེམས་རྒྱ་ཆེན་པོ་སྐྱེས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མོས་པར་གྱུར་ཏེ། རབ་ཏུ་དགའ་བའི་ཡིད་དང་ལྡན་པ་དེ་དག་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། གླང་པོ་ཆེའི་རྒྱལ་པོ་ས་སྲུང་གི་བུ་བྱེ་བ་ཕྲག་སུམ་ཅུ་རྩ་དྲུག་མངོན་པར་སྤྲུལ་ཏོ། །གླང་པོ་ཆེ་ས་སྲུང་གི་བུ་དེ་དག་རེ་རེ་ཞིང་མགོ་བྱེ་བ་ཕྲག་སུམ་ཅུ་རྩ་དྲུག་དྲུག་།མགོ་བོ་རེ་རེ་ཞིང་སོ་བྱེ་བ་ཕྲག་སུམ་ཅུ་རྩ་དྲུག་དྲུག། སོ་རེ་རེ་ལ་རྫིང་བུ་བདུན་བདུན། རྫིང་བུ་རེ་རེ་ཞིང་ཡང་པདྨ་བདུན་བདུན། པདྨ་རེ་རེ་ཞིང་ཡང་འདབ་མ་བྱེ་བ་ཕྲག་སྟོང་སྟོང ། འདབ་མ་རེ་རེ་ཞིང་ལྷའི་བུ་མོ་བདུན་བདུན། ལྷའི་བུ་མོ་རེ་རེ་ཞིང་ཡང་འཁོར་རྒྱན་ཐམས་ཅད་ཀྱིས་བརྒྱན་པ་ལྷའི་བདུག་སྤོས་ཐོགས་པ་བདུན་བདུན་ཞིང་པདྨའི་ལོ་མའི་མཐའ་མཐའ་ན་འཁོད་པས་བསྐོར་བ་མངོན་པར་སྤྲུལ་ཏེ། གླང་པོ་ཆེ་ས་སྲུང་གི་བུ་དེ་དག་གི་མགོ་རེ་རེ་ལ་ཡང་རིན་པོ་ཆེ་སྣ་བདུན་གྱི་གདུགས་
157a
༄#། །ནས་རིན་པོ་ཆེ་སྣ་བདུན་གྱི་དྲ་བ་དག་གིས་གདུགས་བྱས་པ་དང ། རིན་པོ་ཆེ་སྣ་བདུན་གྱི་ལྡ་ལྡི་བྲེས་པའི་བར་དང་ལྡན་པ་བྱེ་བ་ཕྲག་སུམ་ཅུ་རྩ་དྲུག་དྲུག་མངོན་པར་སྤྲུལ་ཏོ། །གླང་པོ་ཆེའི་མགོ་ཐམས་ཅད་ལ་ཡང་ལྷའི་སྤོས་ཀྱི་བླ་རེ་སྣ་ཚོགས་རིན་པོ་ཆེ་སྣ་ཚོགས་ཀྱི་ལྡ་ལྡི་བྲེས་པ་ཤ་སྟག་མངོན་པར་སྤྲུལ་ཏོ། །དེ་ནས་དྲི་ཟ་དེ་དག་གླང་པོ་ཆེ་ས་སྲུང་གི་བུ་བྱེ་བ་ཕྲག་སུམ་ཅུ་རྩ་དྲུག་པོ་དེ་དག་ལ་ཞོན་ཏེ་ལྷའི་རོལ་མོའི་སིལ་སྙན་ལེན་ཅིང་ནམ་མཁའ་ལས་རྒྱུ་སྟེ། བཅོམ་ལྡན་འདས་ལ་ལན་སུམ་ཅུ་རྩ་དྲུག་ཏུ་བསྐོར་བ་བྱས་ནས་ལྷའི་ཙནྡན་གྱི་ཕྱེ་མས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །ལྷའི་ཨ་ག་རུའི་ཕྱེ་མ་དང ། ལྷའི་ཏ་མ་ལའི་ཕྱེ་མ་དང ། ུཏྤ་ལའི་ཕྱེ་མ་དང ། ལྷའི་གསེར་ཕྱེ་དང ། ལྷའི་མེ་ཏོག་མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཤ་ཀ་དང ། མཉྫུ་ཤ་ཀ་ཆེན་པོ་དང ། པ་རུ་ཤ་ཀ་དང ། པ་རུ་ཤ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དག་གིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། སྤུག་དང ། མུ་ཏིག་དམར་པོ་དང ། རྡོའི་སྙིང་པོའི་མེ་ཏོག་རྣམས་དང ། སྤྲུལ་པའི་མེ་ཏོག་
157b
རྣམས་ཀྱིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །སྤོས་ཀྱི་བླ་རེ་དེ་དག་ལ་སྤོས་ཀྱི་ངད་འབྱུང་སྟེ་འགྲོ་ཞིང་ལྡོག་གོ་།ལྷའི་སྤོས་ཆུ་རྣམ་པ་སྣ་ཚོགས་ཀྱི་ཆར་ཡང་སྟེང་གི་བར་སྣང་ལས་མངོན་པར་བབ་བོ། །སྤོས་ཆུའི་ཆར་དེ་མངོན་པར་བབ་པས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་འཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་སྤོས་ཆུས་རྫབ་ཏུ་གྱུར་ཏེ། སྤོས་ཆུའི་རྫབ་དེའི་དྲིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་ནས་སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དང ། རོལ་མོ་སིལ་སྙན་དེ་དག་གི་སྒྲ་ཐོས་པར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ལྟར་དྲི་ཟ་རེ་རེས་ཀྱང་བཅོམ་ལྡན་འདས་ལ་མཆོད་པའི་ཕྱིར་གླང་པོ་ཆེ་ས་སྲུང་གི་བུ་མགོ་བྱེ་བ་ཕྲག་སུམ་ཅུ་རྩ་དྲུག་ལ་ལྷའི་བུ་མོ་གླུ་ལེན་པ་དང ། གར་བྱེད་པ་འཁོད་པ་དག་གི་མཆོད་དེ་སྐྱེ་བོ་ཐམས་ཅད་ཀྱང་འདུན་པར་བྱས་སོ། །ལྷའི་བུ་མོ་དེ་དག་ལས་ལ་ལ་ནི། ལུས་ཀྱི་ཚུལ་བསྒྱུར། ལ་ལ་ནི། ཙནྡན་དང ། ་ག་རུ་དང ། ཏ་མ་ལའི་ལོ་མའི་བྱེ་མ་འཐོར། ལ་ལ་ནི། ལྷ་མ་ཡིན་གྱི་ལྷ་རྫས་ཀྱི་ཕྱེ་མ་དང་སྤོས་རྣམ་པ་སྣ་ཚོགས་ཀྱི་ཕྱེ་མ་འཐོར། །ལ་ལ་ནི། མེ་ཏོག་མནྡཱ་ར་བ་དང །
158a
༄#། །མནྡཱ་ར་བ་ཆེན་པོ་ནས་སྐྱ་སྣར་ཁྲ་བོ་དང ། སྐྱ་སྣར་བཀྲ་ཆེན་གྱི་བར་གྱི་མེ་ཏོག་དང ། སྤྲུལ་བའི་མེ་ཏོག་རྣམས་འཐོར། ལ་ལ་ནི། གསེར་གྱི་མེ་ཏོག་ནས་རྡོའི་སྙིང་པོའི་བར་གྱི་མེ་ཏོག་དང ། དབྱིག་དང ། གསེར་དང ། རིན་པོ་ཆེ་སྙིམ་པས་བླངས་ཏེ་བཅོམ་ལྡན་འདས་ལ་མངོན་པར་འཐོར། ལ་ལ་ནི། ན་བཟའ་དག་འཐོར། ལ་ལ་ནི། ཞབས་ཀྱི་རྒྱན་དང ། སྐུ་རགས་དང ། གསེར་གྱི་ཕྲེང་བ་རིན་པོ་ཆེས་སྤྲས་པའི་བར་དག་འབུལ་ལོ། །ལ་ལ་ནི། གསེར་གྱི་དྲ་བ་དག་འཛིན། ལ་ལ་ནི།་རིན་པོ་ཆེ་ཐམས་ཅད་ཀྱི་རྒྱལ་མཚན་དང ། རིན་པོ་ཆེའི་བ་དན་ཁ་དོག་སྣ་ཚོགས་དང་ཚོན་སྣ་ཚོགས་ཅན་འཛིན། ལ་ལ་ནི། ལྷའི་སྤོས་ཆུའི་ཆར་འབེབས་ཏེ།་ལྷ་མ་ཡིན་གྱི་བུ་མོས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པའི་བར་སྔ་མ་བཞིན་ནོ། །དེ་ནས་དྲི་ཟ་དེ་དག་གླང་པོ་ཆེའི་རྒྱལ་པོ་ས་སྲུང་གི་བུ་དེ་དག་ལ་ཞོན་ནས་བཅོམ་ལྡན་འདས་ལ་བསྐོར་བ་བྱེད་བྱེད་པ་ལས་གླང་པོ་ཆེ་ས་སྲུང་གི་བུ་དེ་དག་ལས་བབས་ཏེ། ཡང་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་ཕྱོག་\་Pཿ YཱོGཥ?\་གཅིག་ཏུ་འཁོད་དོ། །བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་
158b
བསྟོད་པ། བཅོམ་ལྡན་བདེ་གཤེགས་སྲིད་པ་མཐར་འབྱིན་པ། །སྲིད་པའི་བཅིངས་ལས་འགྲོ་བ་རྣམ་གྲོལ་མཛད། །ཁྱོད་འདྲ་སྲིད་གསུམ་གང་ནའང་མ་མཆིས་ཏེ། །ཁྱུ་མཆོག་ཁྱོད་ནི་གཟུགས་དང་མཚན་མཆོག་མངའ། །མི་མཆོག་ཁྱོད་ཀྱིས་ས་ཆེན་འདི་སྟེང་དུ། །གྲགས་པ་མཐའ་ཡས་མངའ་བས་ངོ་མཚར་བསྟན། །འགྱུར་བགྱིད་ཆོས་ནི་གང་ཡང་མ་མཆིས་ལ། །དགེ་བའི་ཚོགས་ལ་འགྲོ་བ་རབ་ཏུ་བཀོད། །བདེ་གཤེགས་འགྱུར་བ་མེད་པའི་དེ་བཞིན་ཉིད། །བརྗོད་པ་ཙམ་སྟེ་གཞན་ནི་ཅི་མ་མཆིས། །ཐ་སྙད་གདགས་དང་ཐ་སྙད་འདོགས་མ་མཆིས། །འོན་ཀྱང་བདེ་གཤེགས་ཁྱོད་ཀྱིས་འགྲོ་བ་སྦྱོང ། །བདེ་བར་གཤེགས་པས་སོང་མེད་འོང་མེད་དང ། །གནས་མེད་རང་བཞིན་གྱིས་ནི་སྟོང་པ་དང ། །ཆོས་རྣམས་འདི་དག་རང་བཞིན་མེད་ཅེས་བསྟན། །རྒྱལ་བ་མཆོག་གིས་བྱ་བ་རྣམས་ཀྱང་བསྟན། །ཆོས་རྣམས་གང་ཡང་བྱ་བ་མེད་མ་མཆིས། །འཇིག་རྟེན་གཙོ་བོ་བྱ་བའང་ཡོངས་སུ་བསྟན། །བདག་དང་གཞན་གྱི་ཡོན་ཏན་མི་དགོངས་ལ། །བཅོམ་ལྡན་འདས་ཀྱིས་བགྱི་བ་ཀུན་ཀྱང་བསྟན། །ཤིང་རྟ་ཡན་ལག་རྣམ་པ་སྣ་ཚོགས། དག་།བདག་དང་གཞན་གྱི་ཡོན་ཏན་མི་སེམས་ཀྱང ། །ཤིང་རྟའི་བགྱི་བ་དག་ཀྱང་བགྱིད་པར་འགྱུར། །དེ་བཞིན་ཆོས་ཀུན་བདེ་བར་གཤེགས་པས་གསུངས། །ཆོས་ནི་ཆོས་
159a
༄#། །ལ་ཡོངས་སུ་བསྐུལ་མི་བགྱིད། །ཆོས་ནི་ཆོས་ལ་དྲན་པར་བགྱིད་མ་མཆིས། །ཆོས་རྣམས་ཆོས་ལ་ཉེ་བར་མི་བརྟེན་ཏེ། །ཆོས་རྣམས་གང་ཡང་མ་སྐྱེས་མཆི་མ་མཆིས། །འགྲོ་བ་འདི་དག་ཀུན་རྫོབ་མངོན་པར་གསུངས། །ཀུན་རྫོབ་དེ་ཡང་དེ་ནི་མ་མཆིས་ཏེ། །འགྲོ་བ་འདི་ཀུན་ཀུན་རྫོབ་ཇི་བཞིན་ཞེས། །ཚོགས་ཀྱི་སློབ་དཔོན་ཁྱོད་ཀྱིས་ཡོངས་དག་གསུངས། །མིག་གི་རང་བཞིན་གང་ནའང་མ་མཆིས་ལ། །བདེ་བར་གཤེགས་པས་བྱ་བ་རྣམ་པར་བཞག་།ཆོས་ཚུལ་འདི་འདྲ་ཡོངས་སུ་བསྟན་པ་ན། །འཇིག་རྟེན་མཁས་པས་ཤིན་ཏུ་ངོ་མཚར་མཛད། །དེ་བཞིན་བདག་ཅག་བདེ་གཤེགས་ཉིད་གྱུར་ཏེ། །ནོར་བའི་འགྲོ་བ་བློ་གྲོས་སྟོར་བ་རྣམས། ། ཆོས་ཀྱིས་ཆོས་ཀྱི་ཚུལ་ལ་བཟུང་བགྱིས་ཏེ། །ཞི་བའི་གོ་འཕང་འཆི་མེད་ཐོབ་པར་བགྱི། །རྣམ་པར་འདྲེན་པ་ཁྱོད་ནི་ཅི་འདྲ་བར། །འདྲེན་པ་བདེ་གཤེགས་གྲགས་པ་མཐའ་ཡས་པ། །ཐུགས་རྗེ་ལྡན་པ་ཕན་བཞེད་འཇིག་རྟེན་མཁས། །བསོད་ནམས་བརྒྱ་ཡི་མཚན་དང་ལྡན་པར་ཤོག་།ཇི་ལྟར་བདེ་གཤེགས་ཁྱོད་བཞིན་བདག་ཅག་གིས། ། ང་རྒྱལ་བསྒྲུབས་པའི་འགྲོ་བ་སྡུག་བསྔལ་བ། །འདོད་པའི་ཡོན་ཏན་རྒྱུན་གྱི་རྗེས་འགྲོ་བ། །མངོན་དགའ་སྡུག་བསྔལ་བརྒྱ་ལས་ཡོངས་སུ་དགྲོལ། །ཇི་ལྟར་བདེ་གཤེགས་
159b
ཁྱོད་བཞིན་བདག་ཅག་གིས། །འགྲོ་བ་སྡུག་བསྔལ་གནོད་པ་མྱོང་འགྱུར་ལ། །གཡོ་ཡི་ཞགས་པས་ཟིན་ཅིང་མུ་མ་མཐོང ། །ཡོངས་འཐོབ་སྤྲེའུ་ལྟར་རྒོད་པ་ཡོངས་སུ་དགྲོལ། །ཇི་ལྟར་བདེ་གཤེགས་ཁྱོད་བཞིན་བདག་ཅག་གིས། །འགྲོ་བ་མི་མཁས་མིག་དང་བྲལ་བ་ཡི། །སྣ་ཚོགས་ཡོངས་སྐྱོ་གཉིད་ཀྱིས་ལོག་གྱུར་ཅིང ། །བདག་ཉིད་ལས་ཀྱི་འབྲས་བུ་ཆུད་ཟིན་དགྲོལ། །དེ་ནས་བཅོམ་ལྡན་འདས་ཀྱིས་དྲི་ཟ་བྱེ་བ་ཕྲག་སུམ་ཅུ་རྩ་དྲུག་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བདེ་གཤེགས་མཐའ་ཡས་གཟིགས་པས་འཛུམ་པ་མཛད། །འདྲེན་པ་རྒྱུ་མ་མཆིས་པར་མི་འཛུམ་ན། །བདེ་གཤེགས་འཛུམ་པའི་རྒྱུ་ནི་མྱུར་དུ་གསུངས། །ནེམ་ནུར་གནོད་གྱུར་རྣམས་ཀྱི་ཐེ་ཚོམ་སོལ། །བདེ་གཤེགས་ཁྱོད་ཀྱི་ཞལ་གྱི་འཛུམ་མཐོང་ནས། །སྐྱེ་བོ་འདི་དག་ཐེ་ཚོམ་རྙེད་པར་གྱུར། །འཛུམ་པའི་དོན་ནི་དེ་དག་ཉན་པར་འཚལ། །ཐུབ་ཆེན་འགྲོ་བའི་ཐེ་ཚོམ་བསལ་དུ་གསོལ། །བདེ་བར་གཤེགས་ཀྱི་བསྟན་ལ་སུ་ཞིག་ཞུགས། །ཐེ་ཚོམ་བྲལ་ཞིང་སོམ་ཉི་བསལ་བར་གྱུར། །བཅོམ་ལྡན་འདས་ཀྱིས་གང་གི་བསམ་མཁྱེན་ནས། །མི་ཡི་མཆོག་གིས་འཛུམ་པ་བསྟན་པ་
160a
༄#། །མཛད། །སུ་ཞིག་བདེ་གཤེགས་བཀའ་སྩལ་ཚུལ་བཞིན་དུ། །བློ་གྲོས་རྟོགས་པ་ཆོས་བཞིན་གནས་པར་གྱུར། །གང་གི་བློ་གྲོས་དྲན་རྟོགས་བློ་མཁྱེན་ནས། །བདེ་གཤེགས་འགྲོ་བའི་ནང་དུ་འཛུམ་པ་མཛད། །འགྲོ་བ་འདི་དག་བློ་གཞན་ཡོངས་བཏང་སྟེ། །བདེ་གཤེགས་འཛུམ་དོན་ཞལ་ནས་ཐོས་པར་དགའ། །སོར་བཅུ་ཐལ་སྦྱར་མགོ་ལ་བཞག་བགྱིས་ཤིང ། །དགའ་བའི་ཡིད་ཀྱིས་སྟོན་པའི་ཞལ་དུ་བལྟ། །ཉོན་མོངས་བྲལ་ཞིང་མྱ་ངན་རབ་སྤངས་པ། །དགྱེས་པའི་ཐུགས་མངའ་ཐུབ་ཆེན་འཇིག་རྟེན་མིག་།འགྲོ་བ་ཡིད་གཉིས་སོམ་ཉི་བསལ་དུ་གསོལ། །རྒྱལ་བ་ཐུགས་རྗེ་ལྡན་པས་འཛུམ་རྒྱུ་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། འགྲོ་བའི་དོན་དུ་འཛུམ་པ་ངས་བཤད་པ། །ཁྱོད་ཀྱིས་དོན་དྲིས་མཐུན་ཞིང་ལེགས་པ་སྟེ། །འཛུམ་པ་དེ་ཡི་དོན་ནི་ལུང་བསྟན་པ། །སྐྱེ་བོའི་ཚོགས་ཆེན་དོན་ནི་དེ་རིང་འཕེལ། །འཛུམ་མཛད་རྒྱུ་དེ་རྟ་ཐུལ་མཉན་པར་གྱིས། །རྣམ་པར་འདྲེན་པ་འཛུམ་པ་འདི་མཛད་པ། །དེ་ནི་མ་ལོག་པར་ཡང་ངས་བསྟན་གྱིས། །བསྟན་པ་དེ་ལ་དགའ་བའི་སེམས་ཀྱིས་ཉོན། །དྲི་ཟ་འདི་རྣམས་ཆོས་ཀྱི་རྗེས་བསྙེགས་ཤིང ། །བདེ་བར་གཤེགས་ལ་མཆོད་པ་འདི་དག་བྱས། །ཆོས་ཉིད་
160b
འབྱུང་བར་འགྱུར་བ་མེད་པ་སྟེ། །ཆོས་ཉིད་ཟད་པར་འགྱུར་བའང་མེད་པ་ཡིན། །རྒྱལ་བ་རྣམ་རྟོག་སྒྱུ་མ་ལྟ་བུར་གནས། །རྟོག་པར་མི་བྱེད་དེ་དག་རྨོངས་པར་འགྱུར། །གང་གིས་ཆོས་གང་རྗེས་སུ་བརྗོད་བྱ་བ། །དེས་ནི་དེ་ཉིད་སྟོང་ཞེས་བདེ་གཤེགས་གསུངས། །དེ་དག་ང་ཡི་ཚིག་དེ་རྟོགས་གྱུར་ནས། །རྟ་མེད་གླང་པོ་མཆོག་གིས་མཆོད་པ་བྱས། །བྱང་ཆུབ་རྒ་མེད་འཆི་མེད་ཚོལ་བྱེད་ཅིང ། །དྲི་ཟའི་རྒྱལ་པོ་རྣམས་ཀྱིས་ང་མཆོད་དོ། །ནོར་བའི་འགྲོ་ལ་སྙིང་རྗེ་བསྐྱེད་ནས་ནི། །ཐམས་ཅད་མཁྱེན་པ་ཉིད་དུ་འདི་དག་མོས། །འདི་དག་ང་ལ་མཆོད་པ་འདི་བྱས་པ། །དྲི་ཟའི་རིས་བོར་དགའ་བའི་ཡིད་གྱུར་ཏེ། །བློ་གྲོས་བཟང་རྣམས་ལྷ་རྣམས་ལྷ་ཡུལ་པ། །བརྒྱ་བྱིན་ལྷ་འདུས་པར་ནི་འགྲོ་བར་འགྱུར། །དེ་དག་སངས་རྒྱས་བདེ་གཤེགས་རྡུལ་མེད་པ། །བྱེ་བ་ཁྲག་ཁྲིག་མང་ལ་མཆོད་བྱེད་འགྱུར། །ཞིང་ནས་ཞིང་དུ་རྗེས་སུ་རྒྱུ་བྱེད་ཅིང ། །དེ་དག་ལ་ནི་མཁས་པ་ཆོས་ཀྱང་ཉན། །དེ་དག་བདེ་གཤེགས་སྤྱོད་པ་ཡོངས་སུ་སྐྱོང ། །དེ་དག་ཞིང་ཡང་རྟག་པར་ཡོངས་དག་འགྱུར། །རྒྱལ་བའི་གདུང་འཛིན་དེ་དག་སེམས་ཅན་ནི། །ཁྲག་ཁྲིག་མང་པོ་དག་ལ་བྱང་ཆུབ་སྟོན། །འགྲོ་བ་འདི་དག་རང་བཞིན་སྟོང་རིག་ནས། །བདེ་གཤེགས་འགྲོ་བ་དག་ལ་སྟོན་པར་འགྱུར། །རྒྱལ་བ་ཐམས་ཅད་མཁྱེན་ཅིང་ཀུན་གཟིགས་པ། །རྡུལ་མེད་བསྐལ་པ་ཁྲག་ཁྲིག་བཞུགས་
161a
༄#། །པར་འགྱུར། །སངས་རྒྱས་མཚན་ནི་མཐའ་ཡས་རྟོགས་པ་སྟེ། །སངས་རྒྱས་རེ་རེ་ཁྲག་ཁྲིག་ཕྲག་མང་བའི། །བསྐལ་པ་རྣམས་སུ་རྡུལ་མེད་གནས་པར་འགྱུར། །ཐམས་ཅད་མཁྱེན་པའི་ལམ་འདི་རྗེས་སུ་སྟོན། །རྒྱལ་བ་ཐུབ་པ་ཉོན་མོངས་བཅོམ་པ་ཡིས། །དེ་ལྟར་དེ་ཚེ་དྲི་ཟས་མཆོད་ལུང་བསྟན། །རྟ་ཐུལ་གྱིས་ནི་འཛུམ་པའི་དོན་ཞུས་པ། །དྲི་ཟ་ལུང་བསྟན་པ་ནི་བཤད་པ་མཛད། །དྲི་ཟ་ལུང་བསྟན་ཡིད་དུ་འཐད་འགྱུར་བ། །དེ་ཐོས་ནས་ནི་འགྲོ་བ་ཐམས་ཅད་དགའ། །དེར་ནི་བདེ་བར་གཤེགས་ཀྱི་གསུང་ཐོས་ན། །ཤཱཀྱ་ཐུབ་ལ་ཐམས་ཅད་སྐྱབས་སུ་དོང ། །དྲི་ཟ་ལུང་བསྟན་པའི་ལེའུ་སྟེ། བཅུ་པའོ།། །།བམ་པོ་ལྔ་པ། དེ་ནས་གནོད་སྦྱིན་བྱེ་བ་ཕྲག་བརྒྱད་ཅུས་ལྷ་མ་ཡིན་རྣམས་ནས་དྲི་ཟའི་བར་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཤེས་རབ་ཀྱི་རྣམ་པ་ལ་རིམ་གྲོ་ཆེན་པོ་བསྐྱེད་དེ་ཆོས་ཉིད་ལ་འཇུག་པ་ཡང་ཐོས་ནས་སྟོན་པའི་འདུ་ཤེས་སྐྱེས་པར་གྱུར་ཏོ། །བཅོམ་ལྡན་འདས་ཀྱང་བློ་ཟད་མི་ཤེས་པའི་འདུ་ཤེས་སྐྱེས་པར་གྱུར་ཏེ། དེ་དག་གིས་བཅོམ་ལྡན་འདས་བློ་ཟད་མི་ཤེས་པ་ཞེས་བྱ་བར་
161b
རིག་ནས་སངས་རྒྱས་ཀྱི་ཆོས་རྣམས་ལ་འདོད་པ་སྐྱེས་པར་གྱུར་ཏོ། །སངས་རྒྱས་ཀྱི་ཆོས་རྣམས་ལ་འདོད་པ་སྐྱེས་པར་གྱུར་ནས་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། མངོན་ཤེས་སྟོབས་ནི་ཀུན་ཏུ་མཐའ་ཡས་ཏེ། །རྒྱ་མཚོའི་ཆུ་འཛིན་པདྨ་འཚལ་དང་འདྲ། །དེ་བས་མཚུངས་མེད་འཇིག་རྟེན་ཕན་མཛད་པ། །མི་ཡི་སེངྒེ་ཁྱོད་ལ་འདི་ལྟར་བསྟོད། །རི་རབ་སྲང་ལ་གཞལ་བར་ནུས་ཀྱང་གདའ། །གཟི་བརྗིད་ཆེན་པོ་ནམ་མཁའ་གཞལ་རུང་གདའ། །ཤེས་རབ་མཆོག་མངའ་བདེ་གཤེགས་ཡེ་ཤེས་སྟོབས། །ཚད་གཟུང་དག་པར་ནུས་པ་ཡོང་མ་མཆིས། །འགྲོ་བ་ཀུན་གྱི་བསམ་པ་ཐུགས་སུ་ཆུད། །སྐྱེ་བོ་དྲང་རུང་མི་རུང་བཏུལ་མིན་པ། །དེ་དག་ལས་ཀྱི་རྣམ་པ་མངོན་པར་མཁྱེན། །དེ་བས་མཚུངས་མེད་ཀུན་ཏུ་མཐའ་ཡང་ཡས། །དེ་དག་ཅི་འདྲའི་ཁམས་ལ་བརྟེན་པ་དང ། །དེ་དག་སེམས་རྒྱུད་ཅི་འདྲར་འབྱུང་བ་དང ། །དེ་དག་མོས་པ་ཅི་འདྲ་མ་ལུས་མཁྱེན། །དེ་བས་མཚུངས་མེད་ཀུན་ཏུ་མཐའ་ཡང་ཡས། །འདོད་ཆགས་སྤྱོད་དང་དེ་བཞིན་ཞེ་སྡང་སྤྱོད། །མི་ཡི་གཏི་མུག་སྤྱོད་པ་དེ་བཞིན་མཁྱེན། །ཕྲག་དོག་རྣམ་པའང་དེ་བཞིན་མཁྱེན་པ་སྟེ། །དེ་བས་མཚུངས་མེད་ཀུན་ཏུ་མཐའ་ཡང་ཡས། །འགྲོ་བ་འདི་
162a
༄#། །དག་ལམ་རྒྱུད་གར་འཁྱམས་པ། །དེ་དག་མཚུངས་མེད་རྣམས་ཀྱིས་རབ་ཏུ་མཁྱེན། །དེ་ལ་ཡེ་ཤེས་རྒྱུན་དུ་རབ་འབྱུང་བས། །དེ་བས་མཚུངས་མེད་ཀུན་ཏུ་མཐའ་ཡང་ཡས། །བདེ་བར་གཤེགས་པས་འགྲོ་ཀུན་རབ་ཏུ་གཟིགས། །ཆུད་ཟའི་ལམ་རྒྱུད་གང་དུ་འཁྱམས་གྱུར་ཅིང ། །བྱམས་པའི་སྟོབས་ལས་རབ་ཏུ་ཉམས་གྱུར་བ། །དེ་དག་མ་ལུས་ཁྱོད་ཀྱིས་རབ་ཏུ་གཟིགས། །འགྲོ་བ་རྣམས་ནི་ཇི་སྲིད་དུས་གནས་ཤིང ། །ཅི་འདྲའི་སྡུག་བསྔལ་དེ་དག་རེག་འགྱུར་དང ། །ལུས་ཀྱི་རྣམ་པ་ཅི་འདྲ་འཆང་བ་རྣམས། །དེ་དག་འདྲེན་པ་ཁྱོད་ཀྱིས་རབ་ཏུ་གཟིགས། །མི་ཡི་སེངྒེས་ལྟ་བ་ཅི་འདྲ་དང ། །གང་གིས་སྡུག་བསྔལ་རྣམ་པ་འཐོབ་འགྱུར་བར། །གང་ལ་བརྟེན་ཅིང་ལས་རྣམས་བགྱིད་འགྱུར་བ། །དེ་དག་རྣམས་ཀྱང་འདྲེན་པས་རབ་ཏུ་གཟིགས། །དེ་དག་རྒྱལ་བའི་བསྟན་ལ་རབ་བྱུང་སྟེ། །རྣམ་པར་ཐར་པའི་སྒོ་ནི་གང་ཞིག་གིས། །ཅི་འདྲའི་ལམ་ལ་དེ་དག་བརྟེན་བགྱིས་ཤིང ། །ཅི་འདྲའི་ཞི་བ་འཐོབ་འགྱུར་ཁྱོད་ཀྱིས་མཁྱེན། །བྱིས་པ་གང་རྣམས་བདེ་གཤེགས་བསྟན་པ་ལ། །རབ་ཏུ་བྱུང་ཞིང་འཇིག་རྟེན་མཁས་པ་ཡི། །བསྟན་པ་རབ་ཕྲ་ཇི་ལྟར་སྤོང་འགྱུར་བ། །དེ་དག་རྣམས་ཀྱང་འདྲེན་པས་རབ་ཏུ་གཟིགས། །འཇིག་རྟེན་ཕན་པའི་བསྟན་ལ་བརྙས་
162b
བགྱིས་པས། །དམྱལ་བ་ཆེན་པོ་ཇི་སྲིད་གནས་པ་དང ། །ཅི་འདྲ་སྡུག་བསྔལ་དེ་དག་མྱོང་འགྱུར་བ། །དེ་དག་རྣམས་ཀྱང་འདྲེན་པས་རབ་ཏུ་གཟིགས། །གང་དག་རྒྱལ་བ་རྣམས་ལ་དད་བསྐྱེད་དེ། །རབ་ཏུ་བྱུང་ནས་རྒྱལ་བའི་བསྟན་འཛིན་ཅིང ། །ཆོས་ཀུན་སྟོང་པ་ཉིད་དུ་ཡོངས་བརྟགས་ནས། །མཚན་མ་ཐམས་ཅད་རྣམ་པར་གཞིག་བགྱིས་ཤིང ། །འགྲོ་རྒྱུད་ཀུན་ཏུ་སྨོན་པ་རྣམས་སྤངས་ཏེ། །ལུས་འདི་སྒྱུ་མ་འདྲ་བར་རབ་བརྟགས་ནས། །ཕུང་པོ་བྲག་ཅ་འདྲ་བར་རྟོགས་གྱུར་ཏེ། །བྱང་ཆུབ་སེམས་ལྡན་དེ་དག་རབ་ཏུ་གཟིགས། །མགོན་པོ་ཁྱོད་ལ་བསྟོད་པའི་བསོད་ནམས་གང ། །མཚུངས་མེད་ཁྱོད་ཀྱིས་ཇི་ལྟར་ཐུགས་ཆུད་པ། །དེ་ཡིས་བླ་མེད་སངས་རྒྱས་གྲུབ་པར་ཤོག་།འགྲོ་བ་ཀུན་ཀྱང་རང་བྱུང་ཐོབ་གྱུར་ཅིག་།དེ་ནས་བཅོམ་ལྡན་འདས་ཀྱིས་དེའི་ཚེ་གནོད་སྦྱིན་བྱེ་བ་ཕྲག་བརྒྱད་ཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། མི་ཡི་སེངྒེས་འཛུམ་པ་འདི་མཛད་པ། །མི་ཡི་ཟླ་བ་རང་བྱུང་གྱུར་པ་ནི། །རྒྱུ་མ་མཆིས་པར་འཛུམ་པ་མི་མཛད་ན། །འཛུམ་པ་དེ་ཡི་རྒྱུ་ནི་བཀའ་སྩལ་གསོལ། །སྟོན་པའི་ཞལ་ནས་འཛུམ་པ་དེ་མཐོང་ནས། །བཅོམ་ལྡན་འཇིག་རྟེན་འདི་དག་ཐེ་ཚོམ་འཚལ། །མགོན་པོས་དེ་དག་
163a
༄#། །ཐེ་ཚོམ་བསལ་དུ་གསོལ། །འཇིག་རྟེན་འདི་དག་དགའ་བའི་ཡིད་དུ་འགྱུར། །དེ་རིང་སུ་ཞིག་རྒྱལ་ལ་དད་པ་བསྐྱེད། །གང་གིས་ཆོས་རྒྱ་ཆེན་པོ་རྣམ་པར་རྟོགས། །གང་གིས་སེམས་ནི་བསྒུལ་ནས་གནས་པར་གྱུར། །དེ་དག་རྒྱལ་བས་འགྲོ་བ་བསྟན་དུ་གསོལ། །དེ་རིང་འཁོར་རྣམས་ཐེ་ཚོམ་ཆེ་འཚལ་ཞིང ། །ཀུན་ཀྱང་རྒྱལ་བའི་ཞལ་དུ་བལྟ་ཞིང་སྡོད། །ཅི་ནས་ཐེ་ཚོམ་མ་མཆིས་ཀུན་འགྱུར་བ། །དེ་ལྟར་དཔའ་བོས་ཐེ་ཚོམ་བསལ་དུ་གསོལ། །དེ་རིང་འདི་ནི་གང་གི་རྣམ་འཕྲུལ་ལགས། ། གང་གིས་བརྩོན་འགྲུས་བཟང་པོ་འདི་བསྟན་ལགས། །གང་ཞིག་ཁྱོད་དང་འདིར་མཇལ་དོན་མཆིས་འགྱུར། །དེ་ནི་ལེགས་པར་འགྲོ་ལ་བཀའ་སྩལ་གསོལ། །རྒྱལ་བ་འགྲོ་བ་དག་ལ་ཕན་བཞེད་པ། །ཐེ་ཚོམ་འཚལ་བ་ཡིད་གཉིས་ལེགས་བསལ་གསོལ། །དེ་ཐོས་ལྷ་དང་བཅས་པའི་འཇིག་རྟེན་རྣམས། །དགའ་ཞིང་མགུ་བ་དག་ཀྱང་འཐོབ་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །དེ་རིང་འགྲོ་བ་དག་གི་དོན་ཆེན་བྱས། །རང་བྱུང་འཛུམ་མཛད་རྒྱུ་ནི་དྲིས་པས་ན། །སྟོན་པའི་དགོངས་པའང་ཁྱེད་ཀྱིས་ལེགས་པར་མཐོང ། །དེ་དག་ལུང་བསྟན་མ་ལུས་བསྟན་
163b
པར་བྱས། །གནོད་སྦྱིན་ཚོགས་ཀྱི་ཡིད་ནི་གཟིགས་གྱུར་ནས། །འགྲོ་ལ་ཕན་པའི་དོན་དུ་འཛུམ་མཛད་པ། །དད་པའི་ཡིད་ཀྱིས་རྟ་ཐུལ་མཉན་པར་གྱིས། །རྒྱལ་བའི་བྱང་ཆུབ་ཞི་བ་ཤེས་གྱུར་ནས། །གནོད་སྦྱིན་ཚོགས་ཀྱིས་མོས་པའི་སེམས་བསྐྱེད་དེ། །འབྱུང་པོའི་ཚོགས་དབུས་སངས་རྒྱས་བསྟོད་བྱས་ནས། །བྱང་ཆུབ་དམ་པ་མཆོག་ཏུ་ཡིད་ཀྱང་བཏང ། །ཆོས་རྣམས་སྟོང་པ་ཉིད་དུ་ཤེས་བྱ་དང ། །མཚན་མ་ཐམས་ཅད་རྣམ་པར་གཞིག་པའི་ཕྱིར། །འགྲོ་བ་ཀུན་ཏུ་སྨོན་པ་རྣམས་སྤངས་ཤིང ། །བྱང་ཆུབ་མཆོག་ཏུ་དེ་དག་ཡིད་ཀྱང་བཏང ། །རྣལ་འབྱོར་སྟོབས་ཀྱིས་ཕུང་པོ་རྣམས་བཤིག་ཅིང ། །ཀུན་རྫོབ་ཙམ་དུ་རིག་ནས་མི་ཆགས་ཏེ། །སྲིད་པ་ཀུན་ཏུ་ཆུ་ལ་པདྨོ་བཞིན། །བྱང་ཆུབ་མཆོག་ཏུ་དེ་དག་ཡིད་ཀྱང་བཏང ། །དེ་དག་སྲིད་པ་གང་དུ་ཆགས་འགྱུར་བ། །སྟོང་པར་བཤིག་སྟེ་ཐམས་ཅད་ལེགས་རྟོགས་པ། །དེ་ཉིད་རྒྱལ་བའི་བླ་མེད་བྱང་ཆུབ་སྟེ། །བྱང་ཆུབ་ཕྱིར་ནི་དབེན་པའི་བརྟུལ་ཞུགས་ཤེས། །སྐྱེ་དང་རྒ་ཤི་ཡོང་གིས་སྟོང་པ་སྟེ། །དེ་ནི་རྒྱལ་བའི་བླ་མེད་བྱང་ཆུབ་ཡིན། །དངོས་པོའི་རང་བཞིན་སྟོང་པར་ཤེས་གྱུར་ནས། །ཞི་བ་བླ་མེད་བྱང་ཆུབ་ཐོབ་པར་འགྱུར། །ཕུང་པོའི་རང་བཞིན་དབེན་ཞིང་སྟོང་པ་ཉིད། །བྱང་ཆུབ་རང་བཞིན་དབེན་ཞིང་སྟོང་པ་ཉིད། །གང་སྤྱོད་དེ་ཡང་རང་བཞིན་སྟོང་པ་སྟེ། །ཡེ་ཤེས་ལྡན་པས་
164a
༄#། །ཤེས་ཀྱི་བྱིས་པས་མིན། །ཡེ་ཤེས་རང་བཞིན་སྟོང་པར་རིག་གྱུར་ཏེ། །ཤེས་བྱའི་རང་བཞིན་སྟོང་པར་རིག་གྱུར་ནས། །ཤེས་པ་པོ་དང་འདྲ་བར་རྟོགས་གྱུར་ན། །བྱང་ཆུབ་ལམ་ལ་དེ་དག་སྤྱོད་ཅེས་བྱ། །སྟོང་པའི་རང་བཞིན་སྟོང་པར་ཤེས་པར་བྱ། །མཚན་མ་མེད་པའང་རང་བཞིན་ཉིད་ཀྱིས་སྟོང ། །སྨོན་པ་མེད་པའང་རང་བཞིན་སྟོང་པ་སྟེ། །དེ་ལྟར་སྤྱོད་ན་གཞན་མིན་སྤྱོད་པ་ཡིན། །དེ་ཐོས་ལྷ་དང་བཅས་པའི་འཇིག་རྟེན་རྣམས། །དགའ་ཞིང་དེ་དག་སྟོབས་དང་ལྡན་པར་གྱུར། །རང་བྱུང་ཆོས་ལ་དེ་དག་ཡིད་ཆེས་ཏེ། །ཞི་བའི་གནས་ཤེས་བྱང་ཆུབ་ཡིད་ལྡན་གྱུར། །གནོད་སྦྱིན་ཚོགས་རྣམས་དེང་མོས་ཡིད་གྱུར་ཏེ། །འདི་ལྟར་ང་ལ་མཆོད་པ་རབ་བྱས་པས།། གནོད་སྦྱིན་རྒྱུད་ནས་ཤི་འཕོས་བློ་ཆེན་རྣམས། །མཐོ་རིས་དོང་ཞིང་ཡུན་རིང་དགའ་བར་འགྱུར། །དེ་དག་མ་འོངས་དུས་ན་རྫུ་འཕྲུལ་གྱིས། །ཞིང་དུ་དོང་ཞིང་སྐད་ཅིག་གཅིག་ལ་ཡང ། །བློ་ཅན་དེ་དག་རྒྱལ་བ་བྱེ་བ་མཆོད། །དེ་དག་བཟོད་མཁྱེན་རྒྱལ་བ་གདམས་ངག་སྟོན། །དེ་དག་འཇིག་རྟེན་ཕྱོགས་བཅུར་རྫུ་འཕྲུལ་གྱིས། །མཚན་མ་མེད་པར་སྤྱོད་ཅིང་དོང་གྱུར་ཏེ། །འཇིག་རྟེན་འདི་དག་སྤྲུལ་པ་འདྲར་ཤེས་ནས། །འཇིག་རྟེན་ཆགས་མེད་མཁས་པ་སྤྱད་པ་སྤྱོད། །དེ་ལྟར་བསྟན་པས་རྒྱལ་བ་རབ་མཆོད་ནས། །
164b
བྱང་ཆུབ་བླ་མེད་དེ་ཡང་ཐོབ་གྱུར་ཏེ། །དེ་དག་རྣམས་ཀྱི་ཞིང་ནི་མཐའ་ཡས་འགྱུར། །སེམས་ཅན་མཐའ་ཡས་པ་དག་རྣམ་པར་འགྲེལ། །སངས་རྒྱས་མཁྱེན་པ་མཐའ་ཡས་གྲགས་པ་ཅན། །དེ་དག་མིང་ནི་འཇིག་རྟེན་མཁས་ཞེས་བྱ། །ཞི་བའི་བློ་ལྡན་རྒྱལ་བ་དེ་དག་གི་།ཚེ་ཚད་བསྐལ་པ་སྟོང་ནི་ཚང་བར་འགྱུར། །དེ་དག་ཉན་ཐོས་དགེ་འདུན་འབྱུང་བ་ནི། །རྒྱལ་སྲས་མང་པོ་སྐར་མའི་ཚོགས་རྙེད་དེ། །ཀུན་ཀྱང་བདེ་བས་བསམ་པ་ཐོས་པར་འགྱུར། །འཇིག་རྟེན་མཁས་པ་རྣམས་ལ་སྡུག་བསྔལ་མེད། །དེ་སྐད་ཐོས་ནས་ལྷར་བཅས་འཇིག་རྟེན་དག་།རབ་ཏུ་དགའ་བའི་སེམས་ཀྱིས་བྱང་ཆུབ་ཚོལ། །ངོམས་པར་གྱུར་ནས་བརྩོན་པ་བརྟན་བརྩམས་ཏེ། །ཀུན་ཀྱང་བརྩོན་འགྲུས་སྟོབས་ཀྱིས་བརྟན་པར་འགྱུར། །གནོད་སྦྱིན་ལུང་བསྟན་པའི་ལེའུ་སྟེ། བཅུ་གཅིག་པའོ།། །།དེ་ནས་མིའམ་ཅིའི་རྒྱལ་པོ་ལྗོན་པ་ལ་སོགས་པ་མིའམ་ཅི་བྱེ་བ་ཕྲག་བརྒྱད་ཀྱིས་ལྷ་མ་ཡིན་གྱི་མཆོད་པ་དེ་དག་དང ། གནོད་སྦྱིན་གྱི་མཆོད་པའི་བར་དག་ཀྱང་མཐོང ། ལུང་བསྟན་པ་ཡང་ཐོས་ནས་ཤིན་ཏུ་ངོ་མཚར་ཐོབ་པར་གྱུར་ཏོ། །ཁྱོད་འདི་ལྟར་སེམས་ཅན་ཡང་མི་དམིགས་ལ།་སྲོག་དང ། སྐྱེ་བ་པོ་དང ། ཤེད་ལས་སྐྱེས་དང ། ཤེད་བུ་དང ། གང་ཟག་དང ། བདག་དང ། བདག་གི་ཡང་གང་ཡང་མེད་ལ། ཕུང་པོ་དང ། ཁམས་དང ། སྐྱེ་མཆེད་
165a
༄#། །གང་ལ་སེམས་ཅན་ཞེས་གདགས་པའི་ཕུང་པོ་དང ། ཁམས་དང ། སྐྱེ་མཆེད་དེ་དག་ཀྱང་མི་དམིགས། ལས་གང་ཡོད་པས་རྣམ་པར་སྨིན་པ་གདགས་པར་བྱ་བའི་ལས་དེ་ཡང་མི་དམིགས། བྱང་ཆུབ་ཀྱང་མི་དམིགས། བྱང་ཆུབ་སེམས་དཔའ་ཡང་མི་དམིགས། སངས་རྒྱས་ཀྱང་མི་དམིགས་ལ། འོན་ཀྱང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལུང་བསྟན་པ་མཛད་པ་འདི་ནི། ངོ་མཚར་རྨད་དོ། །ཅི་ཞིག་ལས་དགོངས་ཏེ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་སངས་རྒྱས་སུ་འགྱུར་རོ། །ཞེས་ལུང་བསྟན་པ་མཛད། ཅི་ཞིག་ལས་དགོངས་ཏེ་བྱང་ཆུབ་སེམས་དཔས་ཡང་དག་པར་སྒྲུབ་པ་དང ། སངས་རྒྱས་ཀྱི་ཆེ་བ་ཉིད་དང ། སེམས་ཅན་ཡོངས་སུ་སྨིན་པ་དང ། ཞིང་གི་བཀོད་པ་དང ། དེར་སྐྱེ་ཞིང་ཡོངས་སུ་དག་པ་དང ། བྱང་ཆུབ་སེམས་དཔའ་རྣམས་ཞིང་ནས་ཞིང་དུ་འདོང་བ་དང ། དེ་བཞིན་གཤེགས་པ་མཆོད་པ་དང ། མཆོད་པ་དེའི་མཐུ་དང ། སེམས་ཅན་རྣམ་པར་དགོད་པ་དང ། བསྐལ་པ་འདི་སྙེད་ཅིག་གིས་སངས་རྒྱས་སུ་འགྱུར་རོ། །ཞེས་བྱ་བ་དང ། བསྐལ་པ་འདི་སྙེད་ཅིག་ཏུ་སངས་རྒྱས་བཅོམ་ལྡན་འདས་རྣམས་བཞུགས་པར་འགྱུར་རོ། །ཞེས་བྱ་བ་དང ། སངས་རྒྱས་བཅོམ་ལྡན་འདས་དེ་དག་གི་ཉན་ཐོས་འདུས་པ་ནི། འདི་སྙེད་ཅིག་ཏུ་
165b
འགྱུར་རོ། །ཞེས་བྱ་བ་དང ། དེ་དག་ཡོངས་སུ་མྱ་ངན་ལས་འདས་ནས་དམ་པའི་ཆོས་བསྐལ་པ་འདི་སྙེད་ཅིག་ཏུ་གནས་པར་འགྱུར་རོ། །ཞེས་དེ་བཞིན་གཤེགས་པས་ལུང་བསྟན་པ་མཛད། ཅི་ཞིག་ལས་དགོངས་ཏེ་སེམས་ཅན་རྣམས་ཉེ་བར་ལེན་པ་མེད་པས་མྱ་ངན་ལས་འདའ་བར་འགྱུར་རོ། །ཞེས་བཅོམ་ལྡན་འདས་ཀྱིས་དགོངས་པ་མཛད་སྙམ་སྟེ། དེ་ནས་མི་འམ་ཅིའི་རྒྱལ་པོ་ལྗོན་པ་དེ་ལྟ་བུའི་ཐེ་ཚོམ་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། རྒྱལ་བའི་གསུང་ནི་ཐོས་གྱུར་ནས། །ཤེས་རབ་ཆེ་མངའ་བདག་དོགས་སྐྱེས། །སྟོང་པ་ཉིད་དང་ལུང་བསྟན་པ། །བདེ་གཤེགས་བདག་གིས་མ་འཚལ་བ། །གསུང་བའི་ཟླ་བ་ཐོས་ཀྱི་དབྱིངས། །འགྱུར་མ་མཆིས་ལ་སྟོང་བ་དང ། །རང་བཞིན་མེད་གཟུང་ཇི་ལྟ་བུ། །མཆོད་པ་འདི་ནི་གང་ཟག་མཆོག་།སྐྱེ་བའང་མ་མཆིས་བྱང་ཆུབ་ཏུ། ། སེམས་བསྐྱེད་པ་ནི་ཇི་ལྟ་བུ། །སྐྱེས་བུ་མཆོག་གིས་བཀའ་སྩལ་པའི། །ལྡེམ་པོ་དག་དེ་བདག་མ་འཚལ། །མི་དབང་བདག་པོ་ཇི་ལྟར་ན། །འགག་པ་མ་མཆིས་འཆི་འཕོ་གསུང ། ། དེ་ནི་ཡང་དག་ལུང་བསྟན་པས། །ཐུབ་པ་བདག་གི་ཐེ་ཚོམ་ཁུམ། །སྒྱུ་མ་འདྲ་ལ་ལྷ་སྐྱེ་ཞེས། །གསུངས་པ་དེ་ནི་འདི་ལྟ་བུ། །ལྡེམ་པོར་གསུངས་པ་འདི་དག་ཀྱང ། །ཤཱཀྱ་སེངྒེ་བདག་མ་
166a
༄#། །འཚལ། །གནས་པའང་མཆིས་པ་མ་ལགས་ལ། །དགེ་བཤེས་བསྟེན་གསུམ་ཇི་ལྟ་བུ། །ལྡེམ་པོར་གསུངས་པ་འདི་དག་ཀྱང ། །སྐྱེས་བུ་ཁྱུ་མཆོག་བདག་མ་འཚལ། །གཡོ་བའང་མ་མཆིས་བགྱི་བ་རྣམས། །རྐང་གཉིས་མཆོག་གསུངས་ཇི་ལྟ་བུ། །ལྡེམ་པོར་གསུངས་པ་འདི་དག་ཀྱང ། །དགྲ་བསལ་བཅོམ་ལྡན་བདག་མ་འཚལ།། རང་བཞིན་སྟོང་སྟེ་སྟོང་པ་ཡང ། །རྟོགས་ཞེས་མགོན་གསུང་ཇི་ལྟ་བུ། །ཐེ་ཚོམ་རྣམ་པ་འདི་འདྲ་སྐྱེས། །ཤེས་རབ་དཔེ་མེད་བདག་མ་འཚལ། །ཞི་བ་ཡོད་ཅེས་བཀའ་སྩལ་པ། ། ཆོས་ཀུན་ཞི་གསུངས་ཇི་ལྟ་བུ། །མཚུངས་མེད་འདི་འདྲའི་ལྡེམ་པོ་དག་།བདག་ལ་རྣམ་པར་བསྟན་དུ་གསོལ། །སྐུ་མཛེས་གྱུར་ཀྱང་ཆོས་ཀྱི་རྣམས། །ནམ་མཁའ་འདྲར་གསུངས་ཇི་ལྟ་བུ། །ཆོས་ནི་རབ་ཏུ་སྤངས་བགྱིས་ན། །མི་མཁས་དམྱལ་ལྷུང་ཇི་ལྟ་བུ། །བརྟན་པ་མཐོ་རིས་འཇིག་རྟེན་དང ། །འགྲོ་བ་གཞན་ཡང་གསུངས་པ་དང ། །ལས་དེ་བགྱིས་པ་མ་མཆིས་ལ། །རང་ལས་ཅན་གསུངས་ཇི་ལྟ་བུ། །བཀའ་སྩལ་ཚུལ་འདི་རྣམ་པ་ཡང ། །ཟིལ་གྱིས་མི་གནོན་བདག་མ་འཚལ། །མགོན་པོ་དེ་ལ་བདག་དོགས་ན། །བདེ་གཤེགས་བདག་གི་ཐེ་ཚོམ་སོལ། །དགེ་བའི་ཚོགས་འགྱུར་མ་མཆིས་ལ། །བྱང་ཆུབ་ཡང་དག་སྒྲུབ་པའང་གསུངས། །དགེ་སྦྱོང་རྒྱལ་པོའི་གསུང་གི་ཚུལ། །དེ་སྐད་བཀའ་སྩལ་བདག་
166b
མ་འཚལ། །ཆོས་རྣམས་ཟད་པ་མེད་གསུངས་ལ། །སྤོང་བྱེད་ལས་ནི་ཟད་བསྟན་པ། །ཚད་མེད་བློ་མངའ་འདི་ལ་ཡང ། །བདག་ནི་ཡིད་གཉིས་ཐེ་ཚོམ་འཚལ། །ཡང་དག་མཐའ་ཡང་བཀའ་སྩལ་ལ། །མ་ནོར་སྦྱིན་པའང་བསྟན་མཛད་པ། །འདི་ཡང་རབ་རིབ་བྲལ་བ་ཡི། །སྤྱན་མངའ་སྡིག་སྤངས་བསྟན་དུ་གསོལ། །ཐམས་ཅད་གཟིགས་པ་མ་གཏོགས་པ། །གཞན་གྱིས་བདག་གི་ཐེ་ཚོམ་འདི། །སེལ་ནུས་མ་མཆིས་དེ་ལྟ་བས། །བདག་ནི་རྒྱལ་བ་མཆོག་ལ་དད། །དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་ལྗོན་པས་ཐེ་ཚོམ་དྲིས་པ་འདི་དག་གསན་ནས་དེ་ལ་ལན་གདབ་པའི་ཕྱིར་མི་འམ་ཅིའི་རྒྱལ་པོ་ལྗོན་པ་ལ་ཚིགས་སུ་བཅད་དེ་སླར་བཀའ་སྩལ་པ། སྟོང་པ་ཉིད་དང་ལུང་བསྟན་པ། །བདག་གིས་མ་འཚལ་ཅེས་སྨྲས་པ། །གལ་ཏེ་འགའ་ཞིག་མི་སྟོན་ན། །རྒྱལ་བས་དེ་ལུང་བསྟན་མི་གསུང ། །ཅིའི་ཕྱིར་ཞེ་ན་འདི་ལྟ་བུ། །རང་གི་རང་བཞིན་གནས་གྱུར་ན། །འགྱུར་བ་མེད་ཅིང་ཐེར་ཟུག་སྟེ། །དེ་ལ་འཕེལ་མེད་འགྲིབ་པ་མེད། །མེ་ལོང་ཤིན་ཏུ་ཡོངས་དག་ལ། །ཇི་ལྟར་རང་བཞིན་མེད་པ་ཡི། །གཟུགས་བརྙན་སྣང་བ་དེ་བཞིན་དུ། །ལྗོན་པ་ཆོས་རྣམས་ཤེས་པར་གྱིས། །ཆོས་ཀྱི་དབྱིངས་ནི་འགྱུར་མེད་ན། །མཆོད་པའི་ཡན་ལག་འགྱུར་གང་ཞེས། །ཡན་ལག་རྣམས་ལ་བརྟགས་བྱོས་ལ། །ལྗོན་པ་མཆོད་པ་འདི་ལ་སྤྱོད། །ཆོས་དབྱིངས་རྣམ་པ་ཐམས་ཅད་དུ། །འགྱུར་མེད་སྐྱེ་
167a
༄#། །བོ་མཁས་པས་རྟོགས། །བྱིས་པ་རྣམས་ནི་འདི་ལ་འཁྲུལ། །བློ་སྦྱངས་པས་ནི་མེད་པར་ཤེས། །སྐྱེ་བའང་མ་མཆིས་སེམས་ཀྱང་བསྐྱེད། །དེ་ནི་མ་འཚལ་ཅེས་སྨྲས་པ། །སྟོབས་བཅུ་མངའ་བའི་ལྡེམ་པོ་དག་།གཞན་དུ་མ་སེམས་མཉན་པར་གྱིས། །བྱིས་པ་འཁོར་བར་དགའ་བ་རྣམས། །འཁོར་བར་མངོན་དགའ་སེམས་ཞེན་པ། ། ལོག་པའི་སེམས་དང་འདུ་ཤེས་ཅན། །འཁོར་བའི་སྡུག་བསྔལ་མྱོང་བར་འགྱུར། །དེ་དག་སྔོན་ཆད་མ་ཐོས་པའི། །སེམས་མེད་ཆོས་ནི་ངས་བཤད་ན། །བྱིས་པའི་བློ་དང་ལྡན་པ་རྣམས། །འདི་ལ་ཀུན་ཏུ་རྨོངས་པར་འགྱུར། །བྱང་ཆུབ་གཞོལ་བའི་སེམས་ཉིད་དང ། །བྱང་ཆུབ་ཕན་ཡོན་ཐོས་གྱུར་ནས། །ཟིལ་གྱིས་མ་ནོན་རང་བྱུང་སེམས། །རྒྱ་ཆེན་དེ་ནི་ཐོབ་པར་འགྱུར། །འགག་པ་མ་མཆིས་འཆི་འཕོ་བ། །དེ་ཡང་མ་འཚལ་ཅེས་སྨྲས་པ། །འཆི་འཕོ་ཡང་དག་ལུང་བསྟན་གྱི། །གཞན་དུ་མ་སེམས་མཉན་པར་གྱིས། །གང་དག་རྟག་འཛིན་དེ་དག་ལ། །འདི་ལ་མི་འགྱུར་ཐེར་ཟུག་མེད། །དངོས་པོ་འདི་དག་མི་རྟག་ཅེས། །བདེ་གཤེགས་འཆི་འཕོ་རྣམ་པར་སྟོན། །སྒྱུ་མ་འདྲ་ལ་ལྷར་སྐྱེས་པ། །ཇི་ལྟ་བུ་ཞེས་དོགས་གྱུར་པ། །མཐར་ཕྱིན་མ་གྱུར་སློབ་པ་དང ། །སྐྱེ་བོ་རྣམས་ལ་མཐོ་རིས་བཤད། །གནས་པའང་ཡོད་པ་མ་ཡིན་ལ། །དགེ་བཤེས་བསྟེན་ཅེས་གང་སྨྲ་བ། །གནས་དང་བྲལ་བར་བྱ་བའི་
167b
ཕྱིར། །གནས་པ་མེད་པའི་དགེ་བཤེས་བསྟེན། །གཡོ་བ་མ་མཆིས་བགྱི་བ་རྣམས། །བསྟན་པ་མ་འཚལ་ཅེས་སྨྲས་པ། །ཤིང་རྟའི་ཡན་ལག་འདུས་པ་དང ། །ཤིང་རྟའི་བྱ་བ་བཞིན་དུ་རྟོགས། །མི་གང་བདག་ཡིད་ཁས་ལེན་ཅིང ། །བྱ་བའང་བདག་གིས་བྱས་ཟིན་པ། །དེ་དག་ལ་ནི་བྱ་བ་དང ། །གཡོ་བ་མེད་པར་བདེ་གཤེགས་བཤད། །རང་བཞིན་སྟོང་སྟེ་སྟོང་པ་ཡང ། ། རྟོགས་ཤེས་ང་ཡིས་གང་སྨྲས་པ། །བྱིས་པ་ལོག་པའི་བློ་ཅན་རྣམས། །རང་བཞིན་སྟོང་པར་མི་ཤེས་པ། །དེ་དག་རྣམས་ལ་བསྟན་པའི་ཕྱིར། །རང་བཞིན་སྟོང་ཞེས་བདེ་གཤེགས་སྟོན། །ཀུན་ཏུ་རྟོག་པའི་རྟོག་པས་བསྐྱེད། །ཡང་དག་མ་ཡིན་རྟོག་པས་བཅིངས། །ཞི་བ་ཡོད་ཅིང་ཆོས་ཀུན་ཀྱང ། །ཞི་བར་མཐོང་ཞེས་སྨྲས་པ་ནི། །མི་ཤེས་རྨོངས་པར་གྱུར་རྣམས་ཀྱི། །ཀུན་ཏུ་རྟོག་ལས་སྲེད་པ་སྐྱེ། །སྐོམ་པས་ཇི་ལྟར་སྨིག་རྒྱུ་ལ། །ཀུན་ཏུ་རྟོག་པས་སྐོམ་པ་སྐྱེ། །མི་མཁས་དེ་ནི་རྟོག་པའི་རྒྱུ། །ཡོད་པ་མིན་ལ་ལོག་པར་བརྟགས། །ཆུ་ཡན་པར་ནི་མཐོང་གྱུར་ཀྱང ། །སྨིག་རྒྱུ་ལ་ནི་ཆུ་མེད་དོ། །དེ་བཞིན་ཡོངས་སུ་རྟོག་པས་དཀྲུགས། །སྡུག་པ་མིན་ལ་སྡུག་པར་རྟོགས། །བྱིས་པ་འདོད་ཆགས་ལྡན་པ་དག་།སྡུག་དང་ལྡན་པ་རང་བཞིན་གྱིས།། སྡུག་མེད་སྨིག་རྒྱུ་ཆུ་བཞིན་ཏེ། །སྨིག་རྒྱུ་ལ་ནི་ཆུ་མེད་དོ། །དེ་བཞིན་གཟུགས་ལ་སྡུག་པ་མེད། །གཟུགས་དེ་སྡུག་པ་མ་ཡིན་ན། །བྱིས་པ་ལོག་པའི་འདུ་ཤེས་ཅན། །སྡུག་པར་རྟོག་པས་
168a
༄#། །བཅིངས་པར་གྱུར། །ཆོས་རྣམས་ནམ་མཁའ་འདྲ་བ་དང ། །སྤོང་བ་དམྱལ་ལྟུང་ཞེས་སྨྲས་པ། །མེད་པ་མཐོང་བར་མ་གྱུར་པ། །མི་མཁས་རྣམས་ནི་སྐྲག་པར་འགྱུར། །རང་བཞིན་ངོ་བོ་ཉིད་སྟོང་ན། །བདག་ཞེན་དུས་ནི་མི་ཤེས་པ། །དེ་དག་སྟོང་ཞེས་ཐོས་གྱུར་ན། །བདག་མེད་འགྱུར་ཞེས་སྐྲག་པ་སྐྱེ། །དེ་དག་བདག་ཏུ་མངོན་ཞེན་ཏེ། ། ནམ་མཁའ་ལ་ནི་མདུད་བོར་ནས། །སྟོང་པ་གྱ་ནོམ་སྤོང་བྱེད་དེ། །མི་མཁས་སེམས་དམྱལ་ཆེན་པོར་ལྟུང ། །མཐོ་རིས་འཇིགས་པ་ངས་བསྟན་དང ། །སྐྱེ་བའི་འགྲོ་རྒྱུད་གཞན་དག་དང ། །ལས་ཀྱང་ངས་ནི་བསྟན་བྱས་ཏེ། །བྱེད་པ་པོ་ནི་རབ་ཏུ་བཀག་།ཡང་དག་ཏུ་ན་འགྲོ་བ་དག་།རྨི་འདྲར་བཤད་པར་ཤེས་པར་གྱིས། །རྨི་ལམ་གང་ལའང་དངོས་པོ་མེད། ། ལོག་པའི་བློ་ལྡན་མངོན་པར་ཞེན། །ངས་ནི་ལས་ཀྱི་རྣམ་པ་བསྟན། །བྱེད་པ་ཕྱོགས་བཅུ་རྣམས་ན་མེད། །ཤིང་རྣམས་རླུང་གིས་བསྒུལ་བ་ལས། །མེ་འབྱུང་འགྱུར་བ་ཇི་བཞིན་ནོ། །བདག་ཅག་མེ་འདི་བསྐྱེད་བྱ་ཞེས། །རླུང་དང་ཤིང་ལ་སེམས་པ་མེད། །འོན་ཀྱང་མེ་ནི་འབྱུང་བ་ལྟར། །ལས་ཀྱི་བྱེད་པོ་དེ་བཞིན་ནོ། །བསོད་ནམས་ཚོགས་ནི་ཡོད་མིན་ལ། ། བྱང་ཆུབ་ཡང་དག་སྒྲུབ་པ་དང ། །ལེགས་སྤྱད་ཡོད་ཅེས་ཟེར་བ་ནི། །དེ་ཚུལ་ཡང་དག་མཉན་པར་བྱོས། །མི་ཡི་ཚེ་ཚད་ལོ་བརྒྱ་སྟེ། །དེ་སྲིད་འཚོ་ཞེས་བརྗོད་མོད་ཀྱི། །ལོ་ལ་ཕུང་
168b
པོར་སྤུངས་པ་མེད། །སྒྲུབ་པ་དེ་ཡང་དེ་དང་མཚུངས། །ཟད་པ་མེད་ཅེས་གང་སྨྲས་དང ། །ལས་ཟད་ཅེས་ནི་ངས་སྨྲས་པ། །སྟོང་པའི་ཚུལ་དུ་ཟད་པ་མེད། །ཐ་སྙད་ཚུལ་དུ་ཟད་པར་བསྟན། །ཡང་དག་མཐའ་ནི་ངས་བཤད་པ། །ཕྱིན་ཅི་ལོག་དེའང་ཡང་དག་མཐའ། །ལོག་པའི་བློ་ཅན་བྱིས་པ་རྣམས། །གང་དག་མཐའ་ནི་མི་ཤེས་སོ། །མཚན་ཉིད་ཐམས་ཅད་གཅིག་ཉིད་དེ། །མཚན་ཉིད་མེད་པར་ཤེས་པ་ཡི། །ཡེ་ཤེས་ལམ་དུ་ཞུགས་རྣམས་ཀྱི། །ངེས་པར་ལྗོན་པ་ཁྱོད་ཉོན་ཅིག་།ཡི་གེ་གཅིག་གིས་འཇུག་པ་ཡི། །བྱང་ཆུབ་བློ་ལྡན་རྣམས་ལ་སྟོན། །ཆོས་རྣམས་ཐམས་ཅད་མ་བྱས་པ། ། ་ཡི་སྒོ་ཡི་གཟུངས་སུ་བསྟན། །དེ་ལྟར་སྤྱོད་པ་བྱེད་རྣམས་ལ། །མཚན་ཉིད་མཐའ་ཡས་ངས་བསྟན་ཏེ། །འདི་འདྲའི་ཚུལ་ལ་འཇུག་པ་ནི། ། ཡི་སྒོ་ཡི་གཟུངས་སུ་བསྟན། །ཆོས་རྣམས་ཐམས་ཅད་འགག་མེད་པ། ། ཡི་ཆོས་ལ་འཇུག་པར་བསྟན། ། ཡི་སྒོ་ཡི་གཟུངས་བསྟན་པ། །དེ་ཡང་ལྗོན་པས་ཤེས་པར་གྱིས། །ཆོས་རྣམས་རྣམ་པར་རྟོག་མེད་པ། །དེ་ཡང་ཆོས་ལ་འཇུག་པར་གསུངས། །ཆོས་ཀུན་འགྱུར་བ་མེད་པར་ཡང ། ། ནི་ཆོས་ཀུན་སྒོ་མོར་བསྟན། ། ཡི་སྒོ་ཡི་གཟུངས་འདི་དག་།ལྗོན་པས་དེ་ལྟར་ཤེས་པར་གྱིས། །མི་ཟད་པ་དང་ཟད་སྨྲས་པ། །ཆོས་ཀུན་མི་ཟད་བརྗོད་བྱ་སྟེ། །སྟོབས་བཅུ་མངའ་བ་ཐམས་ཅད་ཀྱིས། །མི་ཟད་སྒོ་ཡི་གཟུངས་སུ་བསྟན། །ཆོས་རྣམས་ཀུན་ལ་སྒོ་མེད་དེ། །དེ་དག་མེད་པས་སྒོ་མི་འབྱུང ། །
169a
༄#། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་འཇུག་པར་བྱ། །ཆོས་ཀུན་བསམ་གྱིས་མི་ཁྱབ་ཅེས། །ཡང་དག་ཇི་བཞིན་བདེ་གཤེགས་བསྟན། ། ་ཡི་སྒོ་ཡི་གཟུངས་བསྟན་པ། །དེ་ཡང་ལྗོན་པས་ཤེས་པར་གྱིས། །ཆོས་ཀུན་ལུས་མེད་བྱང་ཆུབ་ཅེས། །བློ་ལྡན་རྣམས་ལ་ངས་བསྟན་པ། །འདི་ཡང་གཟུངས་ཀྱི་སྒོ་ཡིན་ཏེ། ། ་ལ་བརྟེན་ནས་འཇུག་པར་བྱ། །ཆོས་རྣམས་འོང་བ་མེད་པ་སྟེ། །མེད་པས་དེ་དག་འོང་བའང་མེད། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་འཇུག་པར་བྱ། །ཆོས་རྣམས་གདགས་པ་མེད་པ་སྟེ། །མེད་པས་དེ་དག་གདགས་པ་མེད། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་འཇུག་པར་བྱ། །ཆོས་རྣམས་རང་བཞིན་མེད་པ་སྟེ། །མེད་པས་དེ་དག་རང་བཞིན་མེད། །འདི་ཡང་གཟུངས་ཀྱི་སྒོ་ཡིན་ཏེ། །བདེ་བར་གཤེགས་པས་གཟུངས་སུ་བསྟན། །གཟུངས་ཀྱི་སྒོ་མོ་ང་ལ་ཉོན། །ཆོས་ཀུན་ཡིད་ལ་བྱ་བ་མེད། །འདི་ཡང་གཟུངས་ཀྱི་སྒོ་ཡིན་ཏེ། །བདེ་བར་གཤེགས་པས་གཟུངས་སུ་བསྟན། །མེད་ཕྱིར་ཆོས་ཀུན་སྒྲིབ་མེད་ཅེས། །དེ་བཞིན་གཤེགས་པས་བསྟན་མཛད་པ། །འདི་ཡང་གཟུངས་ཀྱི་སྒོ་ཡིན་ཏེ། །་ལ་བརྟེན་ནས་ཤེས་པར་བྱ། །ཆོས་ཀུན་ཐོགས་པ་མེད་པ་སྟེ། །ཐོགས་པར་བྱ་བ་དེ་མི་དམིགས། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་འཇུག་པར་བྱ།།
169b
ཆོས་རྣམས་ཐམས་ཅད་མ་སྐྱེས་པར། །མཁས་པས་མཚན་ཉིད་གཅིག་ཤེས་བྱ། །ཆོས་རྣམས་གང་དག་མ་སྐྱེས་པ། །དེ་དག་མིང་མེད་ཤེས་པར་བྱ། །ཆོས་རྣམས་ཡང་དག་མ་ཡིན་ཏེ། ། དེ་དག་མ་ལུས་རང་བཞིན་མེད། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་ཤེས་པར་བྱ། །གང་དག་མ་སྐྱེས་མ་བྱུང་བ། །དེ་དག་མཐོང་མེད་བསྟན་པར་བྱ། །ལྟ་བ་པོ་ནི་མེད་པ་དང ། །དེ་དག་རྣམས་ཀྱང་མེད་ཕྱིར་རོ། །ཆོས་ཀུན་མཉམ་མེད་དེ་བས་ན། །མཚན་ཉིད་གཅིག་ཅིང་མཚན་གཞི་མེད། །ནམ་མཁའ་དང་ནི་འདྲ་བ་སྟེ། །ཆོས་ཀུན་ཡོད་པ་མ་ཡིན་ནོ། ། དེ་ལྟ་ལྷག་མེད་ཆད་པ་མེད། །མཉམ་གཞག་མེད་ཅིང་གཉིས་སུ་མེད། །གདུང་མེད་བསིལ་མེད་ཚ་བའང་མེད། །བལྟ་བའི་ལམ་མིན་མེད་ཕྱིར་རོ། །དྲང་པོ་མ་ཡིན་ཡོན་པོ་མིན། ། མུན་པ་མ་ཡིན་སྣང་བ་མིན། །མཐོང་བ་མེད་ཅིང་ཐོས་མེད་དེ། །མེད་པས་གཟུངས་སུ་ཤེས་པར་གྱིས། །གཡོ་མེད་དྲང་པོའང་མེད་པ་སྟེ། །ཆོས་རྣམས་གསལ་མེད་གཡོ་བ་མེད། །འཁྲུག་པ་མེད་ཅིང་ཁྲོ་བ་མེད། །ཅི་ཡང་མི་བྱེད་ཉེར་ཞི་བྱེད། །སྐྱེ་བ་མེད་ཅིང་གནས་ཀྱང་མེད། །འགྲོ་མིན་ལྡོག་མེད་འགྲོ་སེམས་མེད། །ཉལ་བ་མེད་ཅིང་མི་ཉལ་མེད། །སད་པ་མེད་པར་ཤེས་པར་གྱིས། །མིག་ཅན་མ་ཡིན་ལོང་བ་མིན། །ལྟ་བ་མ་ཡིན་མུན་བསྒྲིབས་མིན། །སྦས་པ་མ་ཡིན་བཞག་པ་མིན། །དུལ་བ་མ་ཡིན་མ་དུལ་མིན། །རྒོད་པ་མ་ཡིན་ཞི་བ་མིན། །འཁོར་
170a
༄#། །མིན་མྱ་ངན་འདས་པ་མིན། །བདེན་མིན་རྫུན་མིན་དེ་ལྟ་བུར། །རྒྱལ་བའི་སྤྱོད་ཡུལ་ཤེས་པར་གྱིས། །འཇིག་རྟེན་འདུལ་བའི་ཕྱིར་ཡིན་གྱི། །འདི་ལ་ཐེ་ཚོམ་གང་ཡང་མེད། །གང་གཅད་བྱ་བའི་ཐེ་ཚོམ་མེད། །དམ་པའི་དོན་དུ་བྱུང་བ་མེད། །དེ་ནས་མི་འམ་ཅིའི་རྒྱལ་པོ་ལྗོན་པ་བཅོམ་ལྡན་འདས་ཀྱིས་ཞུས་པ་ལུང་བསྟན་པ་དང ། གཟུངས་ངེས་པར་བསྟན་པས་ཡོངས་སུ་ཚིམ་པར་གྱུར་ནས་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། ཁང་པ་བརྩེགས་པ་ཤིང་ལ་བརྟེན་པ་དང ། པདྨ་ལ་བརྟེན་པ་དང ། རི་ལ་བརྟེན་པ་དང ། རིན་པོ་ཆེ་སྣ་བདུན་གྱི་རང་བཞིན་ཅན་རིན་པོ་ཆེའི་གདུགས་ཀྱིས་མཛེས་པར་བྱས་པ། གདུགས་ཀྱི་ལྡ་ལྡིས་མཛེས་པར་བྱས་པ། རྒྱལ་མཚན་དང ། བ་དན་གྱིས་བརྒྱན་པ། བླ་རེ་དང ། ལྡ་ལྡིས་བརྒྱན་པ་བྱེ་བ་ཕྲག་བརྒྱད་མངོན་པར་སྤྲུལ་ཏེ། མི་འམ་ཅིའི་རོལ་མོའི་སིལ་སྙན་བྱེ་བ་ཕྲག་བརྒྱད་ཀྱང་མངོན་པར་སྤྲུལ་ནས་རི་སྤོས་ཀྱི་ངད་ལྡང་ལས་སྐྱེས་པ་དང ། ཐང་ལས་སྐྱེས་པ་དང ། ཆུ་ལས་སྐྱེས་པའི་མེ་ཏོག་ཐམས་ཅད་ཀྱིས་ཀྱང་བཅོམ་ལྡན་འདས་ལ་མཆོད་པ་བྱས་ནས་མིའམ་ཅིའི་ཚོགས་དང་ལྷན་ཅིག་ཏུ་ཁང་པ་བརྩེགས་པ་བྱེ་བ་ཕྲག་བརྒྱད་པོ་དེ་དག་ཏུ་འཁོད་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཐང་ལས་སྐྱེས་པ་དང ། ཆུ་ལས་སྐྱེས་པའི་མེ་ཏོག་དེ་དག་གིས་
170b
བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །དེ་ནས་ཁང་བ་བརྩེགས་པ་དེ་དག་ལས་བབས་ཏེ་རྐང་པས་དོང་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ་བཅོམ་ལྡན་འདས་ལ་མིག་མི་འཛུམ་པར་བལྟ་ཞིང་རྣམ་པས་སངས་རྒྱས་ཀྱི་ཡོན་ཏན་རྗེས་སུ་དྲན་པར་བྱེད་ཅིང་ཕྱོགས་གཅིག་ཏུ་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་ལྗོན་པ་འཁོར་དང་བཅས་པའི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བདེ་གཤེགས་དྲི་བྲལ་སྤྱན་མངའ་བ། །རྒྱུ་མ་མཆིས་པར་འཛུམ་མི་མཛད། །ལྷ་མིས་མཆོད་པ་ཡང་དག་ཏུ། །འཛུམ་མཛད་རྒྱུ་དེ་བཀའ་སྩལ་གསོལ། །ཐམས་ཅད་མཁྱེན་པ་འཛུམ་མཛད་པ། །འཁོར་གྱིས་མཐོང་ནས་ཐེ་ཚོམ་འཚལ། །ཟླ་བ་ཚེས་ལ་མི་བཞིན་དུ། །སྨྲ་བའི་ཟླ་བའི་ཞལ་དུ་བལྟ། །བདེ་གཤེགས་མཛེས་པ་དེང་སུ་ཞིག་།གཉིས་མེད་ཆོས་ལ་ཤེས་མཆོག་སྐྱེས། །བདག་ནི་ཐེ་ཚོམ་འཚལ་བར་གྱུར། །མི་མཆོག་དམ་པ་ཐེ་ཚོམ་འཚལ། །བདེ་གཤེགས་གང་གིས་ཆོས་ཉིད་ལ། །དད་པ་ཐོབ་ན་བཅོམ་ལྡན་འདས། །ཇི་ལྟར་འཛུམ་པ་མཛད་པར་གྱུར། །སྨྲ་མཆོག་བདག་གི་ཐེ་ཚོམ་ཁུམ། །ཐམས་ཅད་ལྡན་པའི་
171a
༄#། །འཁོར་འདི་ཡིས། །བཅོམ་ལྡན་སྟན་ཐོས་ཡིད་དགའ་ཞིང ། །ཐེ་ཚོམ་མ་མཆིས་སོམ་ཉི་ཆད། །ཇི་ལྟར་བསྟན་བཞིན་གནས་པར་འགྱུར། །དེ་ལྟར་རྐང་གཉིས་རྣམས་ཀྱི་མཆོག་།འགྲོ་ལ་ཐུགས་བརྩེ་མཛད་པ་དང ། །ཐེ་ཚོམ་གཅད་སླད་ལྗོན་པ་དང ། །མི་ཅི་རྣམས་ཀྱི་ལུང་བསྟན་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་བ། །སྐྱེ་བོ་ཚོགས་ཆེན་རྣམས་ནང་དུ། །སངས་རྒྱས་ཡོན་ཏན་བསྟེན་འགྱུར་བ། །ལྗོན་པའི་ལུང་བསྟན་གང་དྲིས་པ། །རྟ་ཐུལ་ཁྱོད་ཀྱིས་ལེགས་པར་དྲིས། །ཡེ་ཤེས་མཐོང་བ་སྒྲིབ་མེད་པ། །བདེ་གཤེགས་ཡེ་ཤེས་ངོ་མཚར་ཅན་།དེ་ཁྱོད་དང་བའི་ཡིད་ཀྱིས་ཉོན། །སྐྱེ་མེད་ཡིད་ཀྱིས་ང་ལ་ཉོན། ། འཇིག་རྟེན་ཕན་དང་བདེ་བའི་ཕྱིར། །ལྗོན་པས་ཐེ་ཚོམ་གང་དྲིས་པ། །དེ་ཡི་འབྲས་བུ་བརྗོད་པར་བྱའི། །ཐེ་ཚོམ་གཅད་པས་ང་ལ་ཉོན། །ལྗོན་པ་ལ་སོགས་མི་འམ་ཅི། །བྱེ་བ་ཕྲག་བརྒྱད་འདིར་ལྷགས་པ། །དེ་དག་ང་ལ་མཆོད་བྱས་ནས། །འདི་ནས་ཤི་འཕོས་མཐོ་རིས་འདོང ། །བསྐལ་པ་བྱེ་བ་དགུ་བཅུ་དེར། །མི་ཡི་ནང་ན་འཁོར་བར་འགྱུར། ། མངོན་པར་ཤེས་པ་ལྔ་བསྒོམས་ནས། །སེམས་ལ་དབང་བསྒྱུར་དབང་ལྡན་འགྱུར། །མི་ཡི་སེངྒེ་དེ་དག་གིས། །སངས་རྒྱས་ཞིང་ཕྲག་ཁྲག་ཁྲིག་ཏུ། སྤྲུལ་བཀྱེ་རང་ནི་ལྷ་གནས་
171b
ན། །བསམ་གཏན་དགའ་བའི་བདེ་བ་མྱོང ། །བསྐལ་པ་བྱེ་བ་དགུ་བཅུར་ཡང ། །དེ་དག་ལྷ་མིར་འཁོར་འཁོར་ནས། །རང་རང་ཞིང་རྣམས་སྣ་ཚོགས་སུ། །བྱང་ཆུབ་རྣམ་པར་འཚང་རྒྱར་འགྱུར།། རྟག་ཏུ་སྣང་བའི་བསྐལ་པ་ལ། །མི་ཡི་སེངྒེ་འཇིག་རྟེན་མགོན། །ཆགས་མེད་ཡེ་ཤེས་མཐོང་དཔག་ཡས། །སྟོབས་བཅུ་གཟི་བརྗིད་མཐའ་ཡས་འགྱུར། །དེ་དག་ཞིང་དུ་སེམས་ཅན་གང ། ། ཡོངས་སུ་མ་སྨིན་འགའ་མི་སྐྱེ། །ཉན་ཐོས་ཐེག་པས་གང་འབྱུང་བ། །ཀུན་ཀྱང་སྲིད་པ་ཐ་མ་པ། །མི་ཡི་སེངྒེ་ཞིང་དེར་ནི། །བྱང་ཆུབ་སེམས་དཔའ་གང་སྐྱེ་བ། །དེ་དག་ཚེ་གཅིག་ཐོགས་པ་སྟེ། །མི་མཆོག་བྱང་ཆུབ་ཐོབ་པར་འགྱུར། །གང་དག་གཙོ་བོར་གྱུར་པ་རྣམས། །བདག་ཅག་དཔག་མེད་སངས་རྒྱས་ཞིང ། །ཡོངས་སུ་སྦྱང་བར་བྱའོ་ཞེས། །དེ་འདྲའི་བསམ་པས་རབ་ཏུ་ཞུགས། །སེམས་ཅན་རླབས་ཆེན་དེ་དག་ནི། །སྨོན་ལམ་རྒྱ་ཆེན་ཡུན་རིང་བཏབ། །དེ་དག་འདི་ནས་ཤི་འཕོས་ནས། །བསམ་པས་རང་བཞིན་རྣམ་པ་སྤྱོད། །ཉོན་མོངས་འཇོམས་པ་དེ་དག་གི་།ཞིང་གི་བཀོད་པར་འགྱུར་བ་ནི། །དགའ་ལྡན་གནས་ཀྱི་ལོངས་སྤྱོད་རྣམས། །ངན་སོང་ཀུན་ཀྱང་ཡོངས་སུ་དག་།དེ་དག་ཞིང་དུ་རྣམ་ཀུན་ཏུ། །མི་ཁོམ་གང་ཡང་འབྱུང་མི་འགྱུར། །ཞིང་རྣམས་ཡོངས་སྦྱངས་དེ་དག་ནི། །སེམས་ཅན་རྣམས་ཀྱང་བདེ་བར་འདྲེན། །དེ་ལྟར་འཇིག་རྟེན་མགོན་པོ་ཡིས། །མི་ཅི་རྣམས་ཀྱི་ལུང་བསྟན་བཤད། །ལུང་བསྟན་དེ་ཐོས་འཁོར་རྣམས་ནི། །ཀུན་
172a
༄#། །ཀྱང་ཡིད་ནི་རངས་པར་གྱུར། །མི་འམ་ཅི་ལུང་བསྟན་པའི་ལེའུ་སྟེ། བཅུ་གཉིས་པའོ།། །།དེ་ནས་ལྷ་ཕྲེང་ལྡན་གླང་པོ་ཅན་བརྒྱད་ཁྲིས་ལྷ་མ་ཡིན་རྣམས་ནས་མི་འམ་ཅིའི་བར་དག་གི་མཆོད་པ་ཡང་མཐོང ། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་སངས་རྒྱས་ཀྱི་ཆོས་རྣམས་ལ་མོས་ཞིང་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། དེ་དག་གིས་སེར་སྐྱེའི་གནས་ཀྱི་གྲོང་ཁྱེར་ཆེན་པོ་ཐམས་ཅད་ཀྱི་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་མེ་ཏོག་མནྡཱ་ར་བས་པུས་མོ་ནུབ་ཙམ་དུ་གང་བར་བྱས་སོ། །དེ་ནས་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཚིགས་སུ་བཅད་པ་དག་གིས་མངོན་པར་བསྟོད་པ། ཞི་བའི་དབང་པོ་འཛུམ་པའི་ཞལ། སྲོག་ཆགས་ཀུན་ལ་ཐུགས་བརྩེ་བ། །བདེ་བར་གཤེགས་པ་ཐུགས་རྗེ་ཅན། །འཇིག་རྟེན་བདག་པོ་མི་ཡི་སྟག། སངས་རྒྱས་ཆོས་ལ་མོས་པ་ཡི། །འཁོར་འདི་ཇི་སྲིད་འདིར་གནས་པར། །ཞབས་མཆོག་མཛེས་ཤིང་དགའ་ལྡན་པར། །ཐུགས་རྗེས་ཅན་ལ་མགོས་ཕྱག་འཚལ། །ཇི་ལྟར་དགུང་ཟླ་ཉ་བའི་ཚེ། །མི་རྣམས་ཟླ་བ་ཕྱག་འཚལ་དང ། །དེ་བཞིན་ལྷ་ཚོགས་འདི་རྣམས་ཀྱང ། །བཅོམ་ལྡན་འདས་ཀྱི་ཞལ་དུ་བལྟ། །དཔག་ཏུ་མེད་པའི་དགེ་སྤྱོད་པ། །དཔག་མེད་ཡེ་ཤེས་ཕུང་པོ་
172b
ལྡན། །གཟི་བརྗིད་དཔག་ཡས་ཕུང་པོ་ཅན། །བློ་མཆོག་ཁྱོད་ལ་མགོས་ཕྱག་འཚལ། །སྟོབས་བཅུ་མངའ་ཞིང་དཔལ་སྟུག་པ། །དེ་བཞིན་མི་བསྙེངས་དྲི་གསུམ་སེལ། །རྒྱལ་བ་བཅོ་བརྒྱད་ཆོས་དང་ལྡན། །ཐེ་ཚོམ་མི་མངའ་སྨྲ་བའི་མཆོག་།སུམ་ཅུ་རྩ་གཉིས་མཚན་མངའ་ཞིང ། །དཔེ་བྱད་བཟང་པོ་བརྒྱད་ཅུ་ལྡན། །དབང་པོའི་རྒྱལ་མཚན་མཚུངས་མེད་ཐུགས། །བདེ་གཤེགས་ཁྱོད་ལ་ཕྱག་འཚལ་ལོ། །ཚུལ་ཁྲིམས་སྟོབས་ཀྱིས་མཐར་ཕྱིན་པ། །ཏིང་འཛིན་སྟོབས་གནས་མི་བསྐྱོད་པ། །ཡེ་ཤེས་སྟོབས་ཀྱི་མཚོན་ཆ་ཅན། །བདུད་སྟོབས་བཅོམ་ཐུབ་རྒྱལ་བ་ལགས། ཡེ་ཤེས་སྟོབས་མཆོག་རྒྱས་གྱུར་པ། །སེར་སྣ་མི་མངའ་ཉན་ཐོས་བཏུལ། །ཞི་བའི་ཐུགས་ཀྱིས་སྤྱོད་མཛད་ཅིང ། །ལྷ་དང་བཅས་པའི་འཇིག་རྟེན་འདུལ། །སྐྱེས་བུ་སེངྒེ་བདེ་གཤེགས་ཁྱོད།། གཏི་མུག་ཞི་བགྱིད་ཆོས་བརྙེས་པ། །བདག་ཅག་རྣམས་ཀྱང་སྟོབས་བཅུ་ཡི། །ཆོས་རྣམས་འདིར་ནི་ཐོས་པར་ཤོག་།ཇི་ལྟར་ཐུབ་ཁྱོད་སེམས་ཅན་གྱི། །བསམ་མཁྱེན་དད་མཛད་དེ་བཞིན་དུ། །འཇིག་རྟེན་སྣང་མཛད་བདག་ཅག་ཀྱང ། །ལྷ་མིར་བཅས་པའི་འགྲོ་དད་བགྱིད། །དེ་ལྟར་འགྲོ་བའི་དོན་སླད་དུ། །སྙིང་བརྩེ་ཉེ་བར་བཟུང་ནས་ནི། །འགྲོ་བ་འཁོར་བའི་མཚོར་བྱིང་བ། ། སྲིད་པའི་རྒྱུད་ལས་བསྒྲལ་བར་བགྱི། །བདག་ཅག་ལྷར་བཅས་འཇིག་རྟེན་གྱི། འདྲེན་དང་རབ་ཏུ་འདྲེན་གྱུར་ཅིག། འགྲོ་བ་སྡུག་བསྔལ་རྒྱས་ཉེན་པ། །སྲིད་པའི་རྒྱུད་ལས་དགྲོལ་བར་
173a
༄#། །བགྱིད། །དེ་ནས་བཅོམ་ལྡན་འདས་ཀྱིས་ལྷ་ཕྲེང་ལྡན་གླང་བོ་ཅན་རྣམས་ཀྱི་བསམ་པ་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་བ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བདེ་གཤེགས་རྣམ་པར་འདྲེན་པ་པོ། །རྒྱུ་མ་མཆིས་པར་འཛུམ་མི་མཛད། །སྟོབས་བཅུ་ཁྱོད་ནི་འཛུམ་མཛད་པའི། །རྒྱུ་གང་ལགས་པ་བཀའ་སྩལ་གསོལ། །རྒྱལ་བའི་ཞལ་ནས་འཛུམ་མཛད་པ། །འགྲོ་བ་དང་བགྱིད་བྱུང་མཐོང་ནས། །འཁོར་ཀུན་ཐེ་ཚོམ་འཚལ་གྱུར་ཏེ། །འཛུམ་པའི་དོན་ནི་ཉན་པར་འཚལ། །དོན་ཆེན་འཛུམ་པ་མཛད་པའི་དོན། །བཀའ་སྩལ་བཀའ་སྩལ་འདྲེན་པ་མཆོག་།དགེ་སྦྱོང་རྣམས་ཀྱི་རྒྱལ་པོ་ཁྱོད། །ཐེ་ཚོམ་ཆད་འགྱུར་བཀའ་སྩལ་གསོལ། །གང་གིས་རྒྱལ་བ་མཉེས་པར་གྱིས། །གང་གིས་དེང་མཆོད་བླ་མེད་གྱིས། །སུ་ཞིག་དེ་རིང་གཏིང་ཐོབ་གྱུར། །བདེ་གཤེགས་བདག་གི་ཐེ་ཚོམ་ཁུམ། །དེ་རིང་གང་གིས་བདུད་ཀྱི་གནས། །དཀྲུགས་གཡེང་ཀུན་ཏུ་དཀྲུགས་པར་བགྱིས། །དེང་སུས་ལྷ་གནས་ཐམས་ཅད་ཀྱང ། །རབ་ཏུ་དགའ་ཡིད་ལྡན་པར་གྱིས། །རྒྱལ་བ་ཐུབ་པ་དེ་ལུང་སྟོན། ། འགྲོ་བའི་ཐེ་ཚོམ་མྱུར་དུ་ཁུམ། །དེ་ཐོས་བདེ་གཤེགས་འཁོར་འདི་རྣམས། །ཀུན་ཀྱང་རབ་ཏུ་ཡིད་དགའ་འགྱུར། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་ཚེ་དང་ལྡན་
173b
བ་རྟ་ཐུལ་ལ་སླར་བཀའ་སྩལ་པ། ཕྲེང་ལྡན་གླང་པོ་ཅན་ལྷ་ཡི། །ལུང་བསྟན་རྟ་ཐུལ་ཁྱོད་དྲིས་པ། །དྲིས་ན་འགྲོ་བ་མང་པོ་ཡི། །དོན་ཆེན་ཤིན་ཏུ་དེང་བྱས་གྱུར། །སྟོབས་བཅུ་རྒྱལ་བ་མ་དྲིས་པར། །སྲས་མཆོག་བྱང་ཆུབ་ལུང་མི་སྟོན། །དེ་ནི་འགྲོ་བ་མང་དོན་དུ། །དེ་རིང་ཁྱོད་ཀྱིས་རྒྱལ་ལ་ཞུས། །ཕྲེང་ལྡན་གླང་པོ་ལྷ་ཚོགས་ཀྱིས། །ང་ལ་སེམས་དད་ང་མཆོད་པས། ། བསྐལ་པ་གྲངས་མེད་འདས་འོག་ཏུ། །ཉོན་མོངས་ཕམ་བྱས་རྒྱལ་བར་འགྱུར། །དེ་དག་འདི་ནས་ཤི་འཕོས་ནས། །མཐུན་པར་མི་ཡི་ནང་སྐྱེས་ཏེ། །རྒྱལ་བ་བྱེ་བ་དཔག་མེད་ལ། །མེ་ཏོག་མཆོག་གི་མཆོད་པར་འགྱུར། །ཀུན་ཏུ་བདེ་བར་གཤེགས་ཀྱི་སེམས། །བསྐྱེད་པར་འགྱུར་ཞིང་འཕེལ་བྱེད་འགྱུར། །རང་བྱུང་མི་ཡི་སེངྒེ་ལ། །ཚིགས་སུ་བཅད་པས་བསྟོད་པར་འགྱུར།། མ་འོངས་དུས་ན་འདི་ཀུན་གྱིས། །རྒྱལ་བ་ཁྲག་ཁྲིག་དཔག་ཡས་མང ། །མེ་ཏོག་གིས་མཆོད་ཚིགས་བཅད་ཀྱིས། །མི་མཆོག་རྣམས་ལ་བསྟོད་བྱས་ཏེ། །དེ་དག་བདེ་གཤེགས་རྣམས་མཆོད་ཅིང ། །མཐུ་པོ་ཆེ་ཡི་སྐུ་བསྟོད་ནས། །རབ་ཏུ་དགའ་བའི་བསྐལ་པ་ལ། །རྣམ་པར་འདྲེན་པར་འཇིག་རྟེན་འབྱུང ། །གྲགས་པ་མ་སྨད་ནགས་རྒྱུ་བ། །བརྒྱད་ཁྲི་བོ་རྣམས་དེ་དག་ཀུན། །བསྐལ་པ་གཅིག་ལ་བདེ་གཤེགས་འགྱུར། །མེ་ཏོག་རྒྱལ་མཚན་ལྡན་ཞེས་བྱ། །དེ་ན་དམྱལ་དང་དུད་འགྲོ་དང ། །ངན་སོང་གཤིན་རྗེའི་འཇིག་རྟེན་མེད། །ཞིང་དེ་ན་ནི་ལྷ་
174a
༄#། །མིན་མེད། །མི་ཁོམ་ཐམས་ཅད་རབ་ཏུ་བཅོམ། །ཕྲེང་ལྡན་གླང་པོ་ཅན་ལྷ་ཡི། །ལོངས་སྤྱོད་སུམ་ཅུ་རྩ་གསུམ་གྱི། །ཅི་འདྲ་བ་ནི་དེ་འདྲར་འགྱུར། །འགྲོ་བའི་ཚེ་ཚད་དཔག་ཏུ་མེད། །དེ་ཚེ་མི་དགེ་སྒྲ་མི་གྲག་།མི་དགེ་བྱེད་པ་སྨོས་ཅི་དགོས། །དེ་ན་རྣམ་འདྲེན་མཆོག་རྣམས་ཀྱི། །སྐྱེ་བོ་རྣམས་ཀྱང་ཆོས་ཅན་འགྱུར། །སྲོག་ཆགས་བྱེ་བ་ཁྲག་ཁྲིག་ཕྲག་།གངྒཱའི་བྱེ་མ་རབ་མང་སྙེད། །འགྲོ་བར་བྱེད་འགྱུར་སྟོབས་བཅུ་རྣམས། །གནས་པ་མེད་པའི་ཆོས་ཀྱང་སྟོན། །གྲགས་པ་མ་སྨད་དེ་དག་གི་།རིང་བསྲེལ་དག་ཀྱང་རྒྱས་པར་འགྱུར། །དེ་དག་རྣམས་ཀྱི་རིང་བསྲེལ་ལའང ། །རྒྱལ་བའི་སྐུ་མང་འབྱུང་བར་འགྱུར། །གྲགས་པ་མཐའ་ཡས་ལྡན་རྣམས་ཀྱི། །རིང་བསྲེལ་ཆོ་འཕྲུལ་སྐུ་མཐོང་ནས། །སྲོག་ཆགས་བྱེ་བ་ཁྲག་ཁྲིག་མང ། །བྱང་ཆུབ་ཏུ་ནི་སེམས་བསྐྱེད་འགྱུར། །ཕྲེང་ལྡན་གླིང་པོ་ཅན་རྣམས་ཀྱི། །ལུང་བསྟན་འདྲེན་པས་བཀའ་སྩལ་པ། །ཐོས་ཤིང་ཤེས་ནས་འཁོར་ཀུན་ཀྱང ། །དེ་ཚེ་སེམས་ནི་རབ་ཏུ་དགའ། །ཕྲེང་ལྡན་གླང་པོ་ཅན་ལུང་བསྟན་པའི་ལེའུ་སྟེ། བཅུ་གསུམ་པའོ།། །།དེ་ནས་རྒྱལ་པོ་ཆེན་པོ་བཞིའི་རིས་ཀྱི་ལྷ་དགུ་ཁྲིས་ལྷ་མ་ཡིན་རྣམས་ནས་ཕྲེང་ལྡན་གླང་པོ་ཅན་གྱི་ལྷའི་བར་དེ་དག་གི་མཆོད་པ་ཡང་མཐོང ། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང །
174b
དགའ་བ་དང ། ཡིད་བདེ་བ་སྐྱེས་ནས་སངས་རྒྱས་ཀྱི་ཆོས་རྣམས་ཐོབ་པར་བྱ་བའི་ཕྱིར་མོས་པ་དྲག་པོ་བ་སྐྱེད་དེ། འདི་ལྟ་སྟེ། དཔེར་ན། ཁམ་པའི་གྲུ་ལ་ཞོན་པའི་མི་ཞིག་ཆུ་ཡི་དབུས་སུ་ཕྱིན་ན།་གྲུ་ཆག་ཏུ་འོང་ཞེས་ཚུ་རོལ་ནས་ཕ་རོལ་ཏུ་འགྲོ་བར་བྱ་བའི་ཕྱིར་མོས་པ་དྲག་པོ་སྐྱེ་བ་དེ་བཞིན་དུ། རྒྱལ་ཆེན་བཞིའི་རིས་ཀྱི་ལྷ་དགུ་ཁྲི་པོ་དག་ཀྱང་སངས་རྒྱས་ཀྱི་ཆེ་བ་ཉིད་ལ་དད་པ་སྐྱེས་ནས་སངས་རྒྱས་ཀྱི་ཆོས་རྣམས་ཐོབ་པར་བྱ་བའི་ཕྱིར་མོས་པ་དྲག་པོ་སྐྱེས་པར་གྱུར་ནས་དེ་དག་སངས་རྒྱས་ཀྱི་ཆོས་ཚོལ་ཞིང་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ།་དེ་དག་རྒྱལ་པོ་ཆེན་པོ་བཞི་དང་ལྷན་ཅིག་ཏུ་རིན་པོ་ཆེའི་བླ་རེ་བཀྲ་བ་བལྟ་ན་སྡུག་པ་དགུ་ཁྲི་མངོན་པར་སྤྲུལ་ཏོ། །དེ་དག་ཀྱང་ཕལ་ཆེར་མུ་ཏིག་དམར་པོ་དང ། སྐར་མདོག་དང ། བཻ་ཌཱུརྱ་དང ། གསེར་དང ། རྡོའི་སྙིང་པོའི་རང་བཞིན་ཅན་ཤ་སྟག་གོ་།ལྷའི་རོལ་མོའི་སིལ་སྙན་དགུ་ཁྲི་ཡང་མངོན་པར་སྤྲུལ་ཏེ། དེ་དག་ནོར་བུ་རིན་པོ་ཆེ་སྣ་ཚོགས་ཀྱི་བླ་རེ་དགུ་ཁྲི་པོ་དེ་དག་ཐོགས་ནས་རོལ་མོའི་སིལ་སྙན་དགུ་ཁྲི་པོ་དེ་དག་བྱེད་ཅིང་སྟེང་གི་བར་སྣང་ལས་དོང་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱེད་ཅིང་མེ་ཏོག་མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཤ་ཀ་དང ། མཉྫུ་ཤ་ཀ་ཆེན་པོ་དང ། པ་རུ་ཤ་ཀ་དང ། པ་རུ་ཤ་ཀ་ཆེན་པོ་དང ། སྤྲུལ་པའི་མེ་ཏོག་རྣམས་ཀྱིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་
175a
༄#། །ཏུ་གཏོར་ཏེ་དེ་དག་གིས་མཆོད་པ་བྱས་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཚིགས་སུ་བཅད་པ་དག་གིས་མངོན་པར་བསྟོད་པ། རྒྱལ་བའི་ཡོན་ཏན་མཐོང་བ་ཡི། །ལྷ་ནི་དགུ་ཁྲི་ཐམ་པ་དག་།འདྲེན་པ་ཁྱོད་ཀྱི་སྤྱན་སྔ་ན། །ཐལ་མོ་རབ་ཏུ་སྦྱར་ནས་མཆིས། །རྒོད་པ་མ་མཆིས་ཞུམ་མ་མཆིས། །འདོད་པ་མ་མཆིས་འགྱོད་མ་མཆིས། །མི་བླུན་ངོ་མཚར་མ་མཆིས་པར། །རྐང་གཉིས་མཆོག་ལ་ཕྱག་ཀྱང་འཚལ། །ཁྱོད་ནི་སྲིད་པའི་རྒྱུད་རྣམས་བཀུམ། །མི་ཤེས་པ་ནི་རྣམ་པར་སྦྱངས། །སྲེད་པའི་ཕུར་པ་རབ་ཏུ་ཕྱུང ། །ང་རྒྱལ་རྒྱལ་མཚན་ཁྱོད་ཀྱིས་བསྙལ། །ཁྱོད་ནི་ཟུག་རྔུ་ཕྱུང་བ་སྟེ། །རྨ་ལ་གདུག་པ་ཁྱོད་ཀྱིས་སྤངས། །ཁྱོད་ནི་མཁྱེན་བཞིན་སྤྱོད་པ་སྟེ། །འདྲེན་པ་ཁྱོད་ནི་རྨ་རྣམས་སོས། །ཁྱོད་ཀྱིས་ཉོན་མོངས་ཐམས་ཅད་སྤངས། །བཅིང་བ་དག་ནི་ཐམས་ཅད་བཅད། །སྦྱོར་བ་ཀུན་དང་བྲལ་བ་སྟེ། །ཐུབ་པ་ཆགས་པ་ཀུན་ལས་འདས། །རྒྱལ་བ་ཁྱོད་ཀྱི་སྤྱོད་ཡུལ་ནི། །སྟོང་པ་ཉིད་དང་མཚན་མ་མེད། །བཅོམ་ལྡན་ཁྱོད་ལ་སྨོན་པ་ཡང ། །རྣམ་པ་ཀུན་ཏུ་མི་མངའ་འོ། །ཁྱོད་ཀྱིས་སྲེད་པ་དྲུངས་ནས་ཕྱུང ། །མ་རིག་པས་ནི་ཐུགས་ཀྱང་བྱུང ། །རྣམ་པ་བཞི་པོའི་ཕྱིན་ཅི་ལོག་།རྣམ་པ་ཀུན་ཏུ་ཡོངས་སུ་སྤངས། །གང་དུ་འཇིག་རྟེན་མི་ཆུད་དེ། །རི་དྭགས་རྔོན་པས་ཇི་བཞིན་དུ། །འཇིགས་ཤིང་སྐྲག་པར་འགྱུར་བ་ཡི། །ཡང་དག་མཐའ་ནི་ཁྱོད་
175b
ཀྱིས་གཟིགས། །སེམས་ཅན་འཇིག་ཚོགས་ལྟར་ལྷུང་སྟེ། །སྟོང་པ་ཉིད་ནི་མ་འཚལ་བས། །མ་རིག་པ་ཡི་མུན་པས་གཏིབས། །འཁོར་བའི་བརྩོན་རར་དགའ་བར་བགྱིད།། ཁྱོད་ཀྱིས་ཡང་དག་ཇི་བཞིན་དུ། །འགྲོ་དེ་ཆང་བསྟོད་འདྲར་གཟིགས། །གང་གིས་རྣམ་དག་མིག་འགྱུར་བའི། །ཡེ་ཤེས་སྣང་བ་རབ་ཏུ་བསྟན། །ཕུང་པོ་སྟོང་པར་རྣམ་པར་བཤིག་།མིག་དང་གཟུགས་ཀྱང་གསོག་འདྲ་ཞིང ། །ཁམས་རྣམས་དང་ནི་སྐྱེ་མཆེད་དག་།བདག་མེད་སྟོང་པར་རྣམ་པར་བཤིག་།ཆོས་གང་དང་ནི་མིང་གང་གིས། །ཆོས་གང་མངོན་པར་བརྗོད་བགྱི་བ། །ཆོས་དེ་ཆོས་དེས་སྟོང་པ་སྟེ། །ཐུབ་པ་ཁྱོད་ཀྱིས་སྟོང་པར་བསྟན། །སྒྱུ་མའི་མཁན་པོས་མེད་པ་ལ། །སྐྱེ་བོའི་ཚོགས་ཆེན་མངོན་སྤྲུལ་ན། །དེ་ལ་སེམས་ཅན་གདགས་མ་མཆིས། །སྲོག་དང་གང་ཟག་མ་མཆིས་ལྟར། །དེ་བཞིན་ཕུང་པོ་ཁམས་རྣམས་དང ། །དབང་པོ་དག་དང་སྐྱེ་མཆེད་ཀྱང ། །ཡང་དག་མ་ཡིན་སྒྱུ་མ་ཞེས། །སྐྱེས་བུ་དམ་པས་བསྟན་པ་མཛད། །ཇི་ལྟར་རི་མོ་མཁན་ཞིག་གིས། །བུད་མེད་གཟུགས་ནི་རྣམ་བྲིས་ཤིང ། །མཉམ་པ་དང་ནི་མི་མཉམ་དང ། །ལྕི་དང་ཡང་བ་བསྟན་བགྱིས་ན། །བྱིས་པའི་མིག་ནི་བསླུས་པ་སྟེ། །དེ་ལ་མི་མཉམ་ཅི་མ་མཆིས། །དེ་བཞིན་ཆོས་དབྱིངས་ཉམས་ལགས་ན། །བྱིས་པ་རྣམས་ནི་དེ་ལ་རྨོངས། །གང་ཤེས་ཁྱོད་ཀྱི་བསླབ་པ་ལ། །ལེགས་བསླབ་རྨོངས་པར་མི་འགྱུར་བ། །ལག་མཐིལ་
176a
༄#། །སྐྱུ་རུ་ར་བཞིན་དུ། །དེ་ནི་ཀུན་མཁྱེན་ཁྱོད་ཀྱིས་བསྟན། །ཤེས་རབ་ཆེན་པོ་ཁྱེད་ཀྱིས་ནི། །ཡེ་ཤེས་སྒྲོན་མ་རབ་བུས་ཏེ། །ཆོས་ཀྱི་འཁོར་ལོ་རབ་བསྐོར་ནས།། སེམས་ཅན་རྣམས་ལ་ཆོས་བསྟན་པ། །དེ་ལྟར་བདག་ཅག་མྱུར་དུ་ནི། །བླ་མེད་བྱང་ཆུབ་ཞི་ཐོབ་སྟེ། །དེ་ལྟར་འདྲེན་པ་ཁྱོད་བཞིན་དུ། །ཆོས་ཀྱི་འཁོར་ལོ་བསྐོར་བར་བགྱི། །འཁོར་བའི་ལམ་ལོག་འདི་དག་ཏུ། །འཁྱམས་གྱུར་པ་ཡི་སེམས་ཅན་ལ། །ཇི་ལྟར་འདྲེན་པས་བསྟན་པ་བཞིན། །བདག་ཅག་གིས་ཀྱང་ཆོས་མྱུར་བསྟན། །དེ་ནས་བཅོམ་ལྡན་འདས་ཀྱིས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། རྒྱུ་མ་མཆིས་པར་རྫོགས་སངས་རྒྱས། །འདྲེན་པ་འཛུམ་པ་མི་མཛད་ན། །འཛུམ་པ་མཛད་པའི་འཛུམ་གྱི་རྒྱུ། །དཔའ་བོ་ཆེན་པོས་ལུང་བསྟན་གསོལ། །སྐྱེས་བུ་དམ་པ་འཁོར་འདི་དག་།བདེ་གཤེགས་དེང་བཞད་མཐོང་ནས་ནི། །ཡིད་གཉིས་ཆེན་པོ་འཚལ་གྱུར་ཏེ། །ཀུན་ཀྱང་ཐེ་ཚོམ་འཚལ་བར་གྱུར། །དེ་རིང་སུ་ཡིས་བདུད་ཕམ་བགྱིད། །ནེམ་ནུར་གང་གིས་གཅོད་པར་འགྱུར། །སུ་ཞིག་དེ་རིང་ཆོས་རྟོགས་འགྱུར། །སྐྱེས་བུ་མཆོག་གིས་ལུང་བསྟན་གསོལ། །དེ་རིང་ཁྱོད་ལ་སུ་ཡིས་མཆོད། སྟོན་པ་གང་གིས་བསྙེན་བཀུར་བགྱིས།།
176b
འགྲོ་ཀུན་ནེམ་ནུར་འཚལ་གྱུར་ན། །རྣམ་པར་འདྲེན་པས་ལུང་བསྟན་གསོལ། །ཇི་ལྟར་རྐང་གཉིས་མཆོག་ཁྱོད་ཀྱིས། །ལུང་བསྟན་འདི་དག་ཐོས་གྱུར་ན། །འགྲོ་བ་ཐེ་ཚོམ་ཆད་འགྱུར་བ། །འདྲེན་པས་དེ་ལྟར་ལུང་བསྟན་གསོལ། །ཅི་ནས་རྣམ་པ་ཐམས་ཅད་དུ། །ཀུན་མཁྱེན་ལམ་ལ་གནས་པ་རྣམས། །མྱུར་དུ་བྱང་ཆུབ་ཐོབ་འགྱུར་བ། །དེ་ལྟར་འདྲེན་པས་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །འགྲོ་བ་རྣམས་ལ་ཕན་པའི་ཕྱིར། །རྫོགས་པའི་སངས་རྒྱས་མགོན་པོ་ལ། །འཛུམ་པའི་རྒྱུ་རྣམས་དྲི་བྱ་ཞེས། །རྟ་ཐུལ་ཁྱོད་ཀྱིས་དྲིས་པ་ལེགས། །འཇིག་རྟེན་ཀུན་ལ་ཕན་པའི་ཕྱིར། །བསྟན་པ་ཡིད་དུ་འོང་འགྱུར་ཞིང ། །ཉམས་དགའ་བྱེད་པ་དེ་བཤད་ཀྱི། །དྲན་པ་མངོན་བྱོས་མཉན་པར་གྱིས། །དགུ་ཁྲི་ཐམ་པའི་ལྷ་རྣམས་ཀྱིས། །མཆོད་པའི་རྣམ་པ་འདི་ལྟ་བུ། །དེ་རིང་དེ་བཞིན་གཤེགས་པ་ལ། །ཤིན་ཏུ་དད་པའི་ཡིད་ཀྱིས་བྱས། །སངས་རྒྱས་མངོན་པར་བསྟོད་པར་བྱས། །སྟོང་པ་ཉིད་ཀྱང་ཤེས་པར་འགྱུར། །ཆོས་རྣམས་ལ་ནི་ངེས་པ་རྙེད། །ང་ཡི་བསྟན་ལ་རབ་ཏུ་གནས། །སྔོན་ཡང་སངས་རྒྱས་བྱེ་བ་ཕྲག་།བརྒྱད་ཅུ་དག་ལ་འདི་དག་མཆོད། །མ་འོངས་དུས་ནའང་སངས་རྒྱས་ནི། །བྱེ་བ་མཐའ་ཡས་མཆོད་པར་འགྱུར། །འདྲེན་པ་དེ་དག་ཇི་སྲིད་དུ། །སངས་རྒྱས་བྱེ་བ་མ་མཆོད་
177a
༄#། །ཅིང ། །བསྙེན་བཀུར་བྱས་པར་མ་གྱུར་པ། །དེ་སྲིད་བྱང་ཆུབ་འཚང་མི་རྒྱ། །དེ་བས་ཤིན་ཏུ་འཕྱི་བ་ན། །ཀུན་ཀྱང་གང་ཟག་མཆོག་ཏུ་འགྱུར། །མཚན་ནི་འོད་ཟེར་འཆང་བ་སྟེ། །འཇིག་རྟེན་ཀུན་མཁྱེན་ཐུབ་པར་འགྱུར། །འཇིག་རྟེན་སྒྲོན་མ་དེ་དག་གི་།ཉན་ཐོས་འདུས་པར་འགྱུར་བ་ནི། །བློ་ཡི་མཆོག་དང་ལྡན་པ་དག་།འདུས་པ་བརྒྱད་ཅུ་འབྱུང་བར་འགྱུར། །སྒྲིབ་མེད་གཟིགས་པ་དེ་དག་གི་།མི་རྣམས་དེ་ཡི་དུས་ཀྱི་ཚེ། །ལོ་གྲངས་བྱེ་བ་བརྒྱད་ཅུ་ཐམ། །སྲོག་གི་དབང་པོ་གནས་པར་འགྱུར། །ཤེས་རབ་མཐའ་ཡས་དེ་དག་གི་།ཉན་ཐོས་འདོད་ཆགས་བྲལ་བ་རྣམས། །ལུས་ཀྱི་ཐ་མ་འཛིན་པ་དང ། །བྱེ་བ་ཚད་མེད་འབྱུང་བར་འགྱུར། །སེམས་ཅན་རྣམས་ལ་ཐུགས་བརྩེ་བའི། །འཇིག་རྟེན་མགོན་པོ་དཔལ་ལྡན་རྣམས། །མྱ་ངན་འདས་པའི་རིང་བསྲེལ་ཡང ། །ཤིན་ཏུ་རྒྱ་ཆེན་འབྱུང་བར་འགྱུར། །མི་དབང་མྱ་ངན་འདས་གྱུར་ནས། །རྣམ་པར་འདྲེན་པ་དཔལ་ལྡན་པ། །རྒྱལ་བའི་མཆོད་རྟེན་རྣམས་ཀྱིས་ནི། །སངས་རྒྱས་ཞིང་རྣམས་ལེགས་རྒྱས་འགྱུར། །འཇིག་རྟེན་མགོན་པོ་སྐྱོབ་རྣམས་ཀྱི། །མཆོད་རྟེན་དེ་དག་ཐམས་ཅད་ལ། ། སྲོག་ཆགས་བརྒྱ་དང་སྟོང་རྣམས་དང ། །ཁྲག་ཁྲིག་རྣམས་ཀྱིས་མཆོད་བྱས་ནས། །བྱང་ཆུབ་མཆོག་ཏུ་སེམས་བསྐྱེད་དེ། །མྱ་ངན་འདས་པ་ཐོབ་པར་འགྱུར། །རང་བྱུང་མྱ་ངན་
177b
འདས་ནས་ཀྱང ། །དེ་དག་དམ་ཆོས་གནས་འགྱུར་བ། །ལོ་གྲངས་བྱེ་བ་ཁྲག་ཁྲིག་ཕྲག་།བརྒྱད་ཅུ་ཚང་བར་གནས་པར་འགྱུར། །ཆོས་ཀྱི་རྒྱལ་པོའི་སྲས་རྣམས་ཀྱིས། །བཟུང་ཞིང་ཡོངས་སུ་བསྲུངས་པར་གནས། །འཇིག་རྟེན་ཐུགས་བརྩེ་མཛད་པ་དང ། །ཤཱཀྱས་ཡོངས་སུ་སྨིན་མཛད་པ། །རྒྱལ་ཆེན་བཞི་ཡི་རིས་རྣམས་ལ། །འཇིག་རྟེན་སྒྲོན་མས་ལུང་བསྟན་མཛད། །དེ་ཐོས་ནས་ནི་སྐྱེ་བོ་ཀུན། །ཀུན་ཏུ་དགའ་ཞིང་རབ་དགའ་སྟེ། །སེམས་མགུ་ཡིད་ཀྱང་རངས་གྱུར་ནས། །སྟོན་པ་ལ་ནི་མངོན་པར་བསྟོད། །རྒྱལ་ཆེན་བཞིའི་རིས་ལུང་བསྟན་པའི་ལེའུ་སྟེ། བཅུ་བཞི་པའོ།། །།བམ་པོ་དྲུག་པ། དེ་ནས་ལྷའི་དབང་པོ་བརྒྱ་བྱིན་ལ་སོགས་པ་སུམ་ཅུ་རྩ་གསུམ་རིས་ཀྱི་ལྷ་བྱེ་བ་ཕྲག་བརྒྱད་ཅུས་ལྷ་མ་ཡིན་དག་དང ། ནམ་མཁའ་ལྡིང་དག་དང ། ཀླུའི་བུ་མོ་དག་དང ། ཀླུ་དག་དང ། གྲུལ་བུམ་དག་དང ། དྲི་ཟ་དག་དང ། གནོད་སྦྱིན་དག་དང ། མི་འམ་ཅི་དག་དང ། ཕྲེང་ལྡན་གླང་པོ་ཅན་དག་དང ། རྒྱལ་ཆེན་བཞིའི་རིས་ཀྱི་ལྷ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་སངས་རྒྱས་ཀྱི་ཆོས་རྣམས་ལ་ཚིམ་ཞིང་མགུལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་ཡིད་བྱུང་བ་ཆེན་པོ་སྐྱེས་ཏེ། འདོད་པའི་ཚུལ་གྱིས་ལྷའི་དབང་པོ་བརྒྱ་བྱིན་ལ་སོགས་པ་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། དེ་
178a
༄#། །དག་གིས་རིན་པོ་ཆེའི་ཁང་པ་བཀྲ་བ། བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན། མུ་ཏིག་དམར་པོའི་ཕྲེང་བ་དང ། བཻ་ཌཱུརྱའི་ཕྲེང་བས་བརྒྱན་པ། གསེར་གྱི་ཕྲེང་བ་སྣ་ཚོགས་དང ། ནོར་བུ་རིན་པོ་ཆེ་སྐར་མདོག་གི་ཕྲེང་བས་བརྒྱན་པ། ས་གནས་རིམ་པ་བརྒྱ་དང ། བ་གམ་དང ། ཁང་པ་བརྩེགས་པ་དང ། སྐར་ཁུང་གིས་བརྒྱན་པ། གདུགས་དང ། རྒྱལ་མཚན་དང ། བ་དན་དག་གིས་བརྒྱན་པ། ལྷ་རྫས་ཀྱི་སེངྒེའི་ཁྲིས་བརྒྱན་པ། བླ་རེ་ཆེན་པོ་དང ། དྲིལ་བུ་གཡེར་ཀའི་དྲ་བས་བརྒྱན་པ། ལྷའི་རོལ་མོའི་ཚོགས་ཀྱིས་མཛེས་པར་བྱས་པ། ལྷའི་རོལ་མོ་སིལ་སྙན་སྒྲ་རབ་ཏུ་འབྱུང་བ་བྱེ་བ་ཕྲག་བརྒྱད་ཅུ་མངོན་པར་སྤྲུལ་ཏོ། །རྟ་ཅང་ཤེས་ཀྱིས་དྲངས་པའི་ཤིང་རྟ་ལྷ་རྫས་ཀྱི་རྣམ་པས་ལེགས་པར་བརྒྱན་པ། གདུགས་དང ། རྒྱལ་མཚན་དང ། བ་དན་དག་གིས་མཛེས་པར་བྱས་པ་བྱེ་བ་ཕྲག་བརྒྱད་ཅུ་ཡང་མངོན་པར་སྤྲུལ་ཏོ། ། སེར་སྐྱེའི་གནས་ཀྱི་གྲོང་ཁྱེར་ཐམས་ཅད་དང་ལྡན་པའི་ཁོར་ར་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་མེ་ཏོག་མནྡཱ་ར་བ་དང ། ལྷའི་མཆོད་པ་དག་གིས་རྒྱས་པར་གང་བར་བྱས་སོ། །གླང་པོ་ཆེ་ས་སྲུང་གི་བུ་བྱེ་བ་ཕྲག་བརྒྱད་ཅུ་ཡང་མངོན་པར་སྤྲུལ་ཏེ། གླང་པོ་ཆེ་ས་སྲུང་གི་བུ་དེ་དག་རེ་རེ་ཞིང་ཡང་མགོ་བོ་བྱེ་བ་ཕྲག་བརྒྱད་ཅུ་བརྒྱད་ཅུ། གླང་པོ་ཆེ་ས་
178b
སྲུང་གི་བུའི་མགོ་དེ་དག་རེ་རེ་ཞིང་ཡང་སོ་དྲུག་དྲུག་།སོ་དེ་དག་རེ་རེ་ཞིང་རྫིང་བུ་བདུན་བདུན། རྫིང་བུ་དེ་དག་རེ་རེ་ཞིང་ཡང་པདྨ་སྟོང་ཕྲག་བདུན་བདུན། པདྨ་རེ་རེ་ཞིང་ཡང་འདབ་མ་བརྒྱད་ཁྲི་བརྒྱད་ཁྲི། འདབ་མ་རེ་རེ་ཞིང་ཡང་ལྷའི་བུ་མོ་བདུན་བདུན། ལྷའི་བུ་མོ་དེ་དག་རེ་རེ་ཞིང་ཡང་འཁོར་བདུན་བདུན་ཡོད་པ། རྒྱན་ཐམས་ཅད་ཀྱིས་བརྒྱན་པ་ཤ་སྟག་མངོན་པར་སྤྲུལ་ནས་རིན་པོ་ཆེའི་ཁང་པ་དེ་དག་མདུན་དུ་བྱས་ཏེ། དབུས་སུ་གླང་པོ་ཆེ་ས་སྲུང་གི་བུ་དག་བཙུད་ནས་ཕྱི་བཞིན་ཤིང་རྟ་དེ་ལྟར་བཤམས་པ་དེ་དག་བཀྱེ་ནས་བཅོམ་ལྡན་འདས་ལ་མཆོད་པ་བྱས་སོ། ། རིན་པོ་ཆེའི་ཁང་པ་དེ་དག་ལས་ཀྱང་ལྷའི་ཙནྡན་དང ། ་ག་རུ་དང ། ུཏྤ་ལ་དང ། ཏ་མ་ལའི་ལོ་མའི་ཕྱེ་མ་དང ། གསེར་ཕྱེའི་ཆར་མངོན་པར་བབ་པར་གྱུར་ཏོ། །ལྷའི་མེ་ཏོག་མནྡཱ་ར་བ་དང ། མནྡཱ་ར་བ་ཆེན་པོ་དང ། མཉྫུ་ཤ་ཀ་དང ། མཉྫུ་ཤ་ཀ་ཆེན་པོ་དང ། པ་རུ་ཤ་ཀ་དང ། པ་རུ་ཤ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྤྲུལ་པའི་མེ་ཏོག་དག་གི་ཆར་ཡང་མངོན་པར་བབ་པར་གྱུར་ཏེ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། མུ་ཏིག་དམར་པོ་དང ། སྤུག་དང ། རྡོའི་སྙིང་པོ་དང ། རིན་པོ་ཆེ་སྣ་བདུན་གྱི་མེ་ཏོག་གི་ཆར་ཡང་མངོན་པར་བབ་པར་གྱུར་ཏོ། །ལྷའི་བུ་མོ་དེ་དག་ལས་ལ་ལ་ནི། གླུ་ལེན། ལ་ལ་ནི། གར་བྱེད། ལ་ལ་ནི། རོལ་མོ་བྱེད། ལ་ལ་ནི། ལུས་ཀྱི་ཚུལ་སྒྱུར་ཞིང་ལྷ་མ་ཡིན་གྱི་མཆོད་
179a
༄#། །པ་ལྟ་བུ་དང ། གླང་པོ་ཆེ་ས་སྲུང་གི་བུ་དེ་དག་དང ། རིན་པོ་ཆེའི་ཁང་པ་རྣམས་ཀྱིས་མཆོད་པ་བྱས་ནས་དེའི་འོག་ཏུ་རྟ་ཅང་ཤེས་ཀྱིས་དྲངས་པའི་ཤིང་རྟ་བྱེ་བ་ཕྲག་བརྒྱད་ཅུ་ལ་ཞོན་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ལྷའི་ཡོ་བྱད་རྣམ་པ་སྣ་ཚོགས་མང་པོ་ཡང་ཕུལ་བར་གྱུར་ཏོ། །ལྷའི་རོལ་མོ་སིལ་སྙན་བྱེ་བ་ཕྲག་བརྒྱད་ཅུ་ཡང་བར་སྣང་ལས་སྒྲ་འབྱིན་པར་གྱུར་ཏོ། །ཤིང་རྟ་བྱེ་བ་ཕྲག་བརྒྱད་ཅུ་པོ་དེ་དག་ལ་ཡང་ལྷའི་བུ་མོ་གཞན་བྱེ་བ་ཕྲག་བརྒྱད་ཅུ་བརྒྱད་ཅུ་མངོན་པར་སྤྲུལ་ཏེ། ལྷའི་བུ་མོ་དེ་དག་ཀྱང་ལ་ལ་ནི། གླུ་ལེན། ལ་ལ་ནི། གར་བྱེད། ལ་ལ་ནི། རོལ་མོ་བྱེད། ལ་ལ་ནི། ལུས་ཀྱི་ཚུལ་སྒྱུར་ཞིང་ལྷ་མ་ཡིན་གྱི་མཆོད་པ་ཇི་ལྟ་བ་བཞིན་དུ་བྱས་སོ། །དེ་ནས་སུམ་ཅུ་རྩ་གསུམ་རིས་ཀྱི་ལྷ་བྱེ་བ་ཕྲག་བརྒྱད་ཅུ་པོ་དེ་དག་འདི་སྙམ་དུ་སེམས་ཏེ། ཇི་ལྟར་སྤྲུལ་པའི་ལྷའི་བུ་མོ་འདི་དག་བཅོམ་ལྡན་འདས་ལ་མཆོད་པ་བྱེད་པ་ལས་ན། ཆོས་ཐམས་ཅད་སྤྲུལ་པ་དང་འདྲ་བ་ཡིན་དུ་ངེས་སོ། །སྙམ་ནས་དེ་དག་འདི་སྙམ་དུ་ཆོས་འདི་དག་ཐམས་ཅད་ནི། ཇི་ལྟར་དེ་བཞིན་གཤེགས་པས་བསྟན་པ་དེ་བཞིན་ཏེ། སྤྲུལ་པ་དང་འདྲ་བ་ཡིན་ནོ། །སྙམ་དུ་སེམས་པར་གྱུར་ཅིང ། དེ་དག་གིས་ཆོས་ཐམས་ཅད་སྤྲུལ་པ་དང་འདྲ་བར་ཤེས་ནས་ཆོས་ལ་ཐེ་ཚོམ་མེད་པ་ཐོབ་པར་གྱུར་ཏོ། །དེ་དག་དེ་ལྟར་ཐེ་ཚོམ་
179b
མེད་ཅིང་ནེམ་ནུར་མེད་པར་གྱུར་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་དག་ཆོས་ཐམས་ཅད་སྤྲུལ་པ་དང་འདྲ་བར་རྟོག་ཅིང ། བདག་ཅག་ཀྱང་སྤྲུལ་པ་དང་འདྲ་བར་མཐོང ། མཆོད་པ་དེ་དག་ཀྱང་སྤྲུལ་པ་དང་འདྲ་བར་མཐོང ། བཅོམ་ལྡན་འདས་ཀྱང་སྤྲུལ་པ་དང་འདྲ་བར་མཐོང་ནས་བཅོམ་ལྡན་འདས་ཀྱིས་ཆོས་གང་བསྟན་པ་དེ་དག་ཀྱང་སྤྲུལ་པ་དང་འདྲ་བར་ཡང་དག་པར་ཤེས་ཏེ། དེ་དག་གིས་ཆོས་ཐམས་ཅད་སྤྲུལ་པ་ལྟ་བུའོ། །ཞེས་བྱ་བར་ཤེས་ནས་ཐེ་ཚོམ་མེད་ཅིང་ནེམ་ནུར་མེད་པར་གྱུར་ཏེ། དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། འགྲོ་བ་ཀུན་གྱིས་མཆོད་པ་གང་བགྱིས་དང ། །སྤྲུལ་པའི་མཆོད་པ་འདི་དག་གང་བགྱིས་དང ། །ལྷ་རྣམས་ཀྱིས་ནི་སངས་རྒྱས་མཆོད་བྱས་པ། །འདི་ལྟར་ཆོས་འདི་ཐམས་ཅད་སྤྲུལ་པ་ཉིད། །འདྲེན་པས་ཆོས་ཀུན་གསུངས་པ་གང་ལགས་དང ། །དེ་བཞིན་གཤེགས་པས་ལུང་བསྟན་མཐའ་དག་ཀྱང ། །འདི་དག་ཐམས་ཅད་སྤྲུལ་པ་འདྲའོ་ཞེས། །དེ་ལྟར་ལྷ་ཚོགས་དེ་དག་བློ་གྲོས་སྐྱེས། །བཅོམ་ལྡན་སྤྲུལ་པ་འདི་དག་ཇི་བཞིན་དུ། །སྟོན་པའང་དེ་བཞིན་སྤྲུལ་དང་འདྲ་བ་སྟེ། །རྒྱལ་བས་ལུང་བསྟན་བདག་ཅག་འཚལ་གྱུར་པས། །འདི་ལ་བདག་ཅག་ཐེ་ཚོམ་མ་མཆིས་སོ། །རྒྱལ་བས་སོ་སོའི་སྐྱེ་བོ་རྣམས་མཁྱེན་ནས།།
180a
༄#། །བྱིས་པའི་ས་ཐོབ་ཐ་སྙད་གང་བཏགས་པ། །དེ་དག་ཀུན་ཀྱང་སྤྲུལ་པ་ཇི་བཞིན་ཏེ། །བདེ་གཤེགས་འགྲོ་བ་ལུང་བསྟན་དེ་བཞིན་ནོ། །སློབ་པ་རྣམས་དང་གང་དག་མི་སློབ་དང ། །བཅོམ་ལྡན་ཉན་ཐོས་དུལ་བའི་ས་ཐོབ་པ། །དེ་དག་ཀུན་ཀྱང་བཅོམ་ལྡན་སྤྲུལ་དང་འདྲ། །བཅོམ་ལྡན་བསྟན་ལ་ཐེ་ཚོམ་མ་མཆིས་སོ། །བཅོམ་ལྡན་གང་རྣམས་མི་སྨྲ་ལྷུར་ལེན་ཅིང ། །བསེ་རུ་ལྟ་བུར་གཉིས་མེད་ཉོན་མོངས་སྤངས། །དེ་དག་རྣམས་ཀྱང་སྤྲུལ་འདྲར་བཅོམ་ལྡན་འདས། །བདེ་གཤེགས་བསྟན་ལ་ཐེ་ཚོམ་མ་མཆིས་སོ། །གང་རྣམས་འགྲོ་བ་ཀུན་ལ་བདེ་ཕན་ཕྱིར། །རྒྱལ་བའི་བྱང་ཆུབ་སྤྱད་སྤྱོད་བག་ཡོད་པའི། །བྱང་ཆུབ་སེམས་དཔའ་བདེ་གཤེགས་སྲས་དག་ཀྱང ། །ཁྱད་པར་མ་མཆིས་སྤྲུལ་པ་འདི་དང་འདྲ། །བདེ་གཤེགས་རང་བྱུང་རྣམ་པར་འདྲེན་པ་མཆོག་།སྟོབས་བཅུ་ཤེས་རབ་མཐའ་ཡས་ཐུགས་རྗེ་ཅན། །ཡེ་ཤེས་སྟོབས་འཕགས་འཇིག་རྟེན་གཙོ་བོ་དག་།སྤྲུལ་པ་འདི་འདྲ་དེ་དག་རང་བཞིན་མཚུངས། །འདྲེན་པས་འདི་ལ་ཆོས་རྣམས་གང་གསུངས་པ། །གནས་མེད་ཞི་བསིལ་ཉོན་མོངས་མེད་གྱུར་ཅིང ། །སྡུག་བསྔལ་ཞི་བྱེད་མཐར་ཐུག་གྲངས་མེད་པ། །དེ་ཡང་སྤྲུལ་པ་འདི་དག་ཇི་བཞིན་ནོ། །བཅོམ་ལྡན་འདི་ལ་ཆོས་རྣམས་གང་དག་དག་ཀྱང ། །སྤྲུལ་པའི་རང་བཞིན་མ་ལགས་དེ་མ་མཆིས། །གང་ཚེ་གོ་འུ་ཏ་མའི་བསྟན་པ་འདི། །བདག་ཅག་རྟོགས་
180b
ནས་ཐེ་ཚོམ་ཐམས་ཅད་སྤངས། །སྤྲུལ་པ་འདི་འདྲར་ཆོས་རྣམས་ཀུན་མཐོང་ནས། །བདག་ཅག་རྣམས་ཀྱང་འཇིག་རྟེན་མགོན་པོར་འགྱུར། །བདེ་གཤེགས་སྤྱོད་ཡུལ་འདི་ལ་སྤྱོད་པ་རྣམས། །ཐེ་ཚོམ་མ་མཆིས་རང་བྱུང་འདྲེན་པར་འགྱུར། །དེ་ནས་བཅོམ་ལྡན་འདས་ཀྱིས་དེའི་ཚེ་སུམ་ཅུ་རྩ་གསུམ་རིས་ཀྱི་ལྷའི་བུ་བྱེ་བ་ཕྲག་བརྒྱད་ཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། གཞལ་མེད་གྲགས་མང་མཐའ་ཡས་གཟི་བརྗིད་ཅན། །བདེ་གཤེགས་རྣམས་ནི་རྒྱུ་མེད་འཛུམ་མི་མཛད། །རྣམ་པར་འདྲེན་པས་འདིར་ནི་འཛུམ་མཛད་ན། །རྒྱལ་བས་འཛུམ་པའི་ཚིག་གསུངས་ཐེ་ཚོམ་ཁུམ། །རང་བྱུང་བདེ་གཤེགས་ཞལ་ནས་འཛུམ་པ་འདི། །བྱུང་བར་རིགས་ནས་འཇིག་རྟེན་ཐེ་ཚོམ་འཚལ། །འགྲོ་བའི་ཐེ་ཚོམ་ཐུབ་པས་བསལ་དུ་གསོལ། །འགྲོ་བ་འདི་དག་ཐེ་ཚོམ་མ་མཆིས་མཛོད། །ལྷ་ཚོགས་འདི་རྣམས་རབ་ཏུ་ཡིད་དགའ་བས། །རྒྱལ་བ་བསྟོད་དེ་ལྷ་རྫས་རྣམས་ཀྱིས་མཆོད། །བདེ་གཤེགས་དེ་དག་དོན་དུ་འཛུམ་པ་མཛད། །རྒྱལ་བ་འཁོར་འདི་དགའ་མཛད་བཀའ་སྩལ་ཏོ། །ཟླ་འདྲར་དྲི་མེད་འོད་མངའ་མཐའ་ཡས་གཟི། །ཅི་ནས་བདེ་གཤེགས་བཀའ་ནི་འདི་ཐོས་པས། །མགོན་པོ་འགྲོ་བ་ཐམས་ཅད་དགར་འགྱུར་བར། །རྒྱལ་བ་ལྷ་ཚོགས་མཆོད་མཁྱེན་བཀའ་སྩལ་
181a
༄#། །གསོལ། །བདེ་གཤེགས་ལྷ་ཚོགས་འདི་ཡིས་ཆོས་རྣམས་ཀུན། །སྤྲུལ་པ་ལྟ་བུར་རྣམ་པར་རྟོགས་གྱུར་ན། །སྟོབས་བཅུ་མངའ་བས་དོན་འདི་བཀའ་སྩལ་ཏེ། །རབ་རིབ་བྲལ་བ་ལྷ་ཡི་བསླབ་པ་གསུངས། །སྐྱེ་བོ་འདི་དག་ཐེ་ཚོམ་བྲལ་གྱུར་ནས། །ཐུབ་པ་དེ་ལྟར་བྱང་ཆུབ་སྤྱོད་རྩོམ་འགྱུར། །རབ་ཏུ་དཔའ་བ་འཁོར་འདིས་ཐོས་གྱུར་ཏེ། །དགོངས་པ་རིག་ནས་རྒྱལ་ཆེན་རྩོམ་པར་འགྱུར། །དེ་ནས་བཅོམ་ལྡན་འདས་ཀྱི་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ལྷ་ཚོགས་འདི་དག་རབ་ཏུ་དགའ་ཤེས་ནས། །རྟ་ཐུལ་ཁྱོད་ཀྱིས་དུས་དང་ལྡན་པའི་ཚིག་།སྨྲས་པ་དེ་ནི་དུས་ལ་བབ་པ་སྟེ། །འཛུམ་པ་དྲིས་པ་དེ་ནི་ལུང་བསྟན་ཏོ། །ལྷ་རྣམས་བསམ་ཤེས་འཛུམ་པ་དེ་དྲིས་པ། །དེས་ནི་ཁྱོད་ཀྱིས་འགྲོ་བའི་དོན་ཆེན་བྱས། །འཛུམ་པ་མཛད་པའི་རྒྱུ་དེ་ངས་བསྟན་གྱི། །དགའ་ཞིང་དང་བའི་སེམས་ཀྱིས་ང་ལ་ཉོན། །ལྷ་ཚོགས་རྣམས་ཀྱིས་ཆོས་རྣམས་འདི་དག་ནི། །མ་ལུས་སྤྲུལ་པ་ལྟ་བུར་ཤེས་གྱུར་ནས། །ཆགས་མེད་ཡེ་ཤེས་མཐོང་བ་དཔག་མེད་ཅིང ། །རབ་རིབ་བྲལ་བའི་འཇིག་རྟེན་མགོན་པོར་འགྱུར། །སྲིད་པའི་རྒྱུད་ན་སྔོན་ཡང་འཁོར་བའི་ཚེ། །མི་ཡི་གཙོ་བོ་གངྒཱའི་བྱེ་སྙེད་མཆོད། །སྲིང་རྒྱུད་དེ་ན་འདི་དག་ཐུབ་པ་ལས། །ཆོས་རྣམས་སྤྲུལ་པ་ལྟ་བུར་མ་མཐོང་ངོ ། །འདི་དག་ང་ལ་མཆོད་མཆོག་འདིར་
181b
བྱས་པས། །ཆོས་རྣམས་སྤྲུལ་པ་འདྲ་བར་མངོན་དུ་མཐོང ། །བདེ་གཤེགས་བསྟན་པ་འདི་ལ་བྱས་པ་ནི། །ཆུད་ཟོས་མི་འགྱུར་བར་ཆད་ཡོད་མི་འགྱུར། །ལྷ་ཚོགས་འདི་ཡིས་ང་ལ་མཆོད་བྱས་ཏེ། །ཆོས་རྣམས་ཐམས་ཅད་སྤྲུལ་པ་འདྲར་ཤེས་པས། །བསྐལ་པ་པདྨ་ཞེས་བྱ་བྱུང་བའི་ཚེ། །སྨྲ་བའི་ཟླ་བ་མི་ཡི་མཆོག་ཏུ་འགྱུར། །ཁྱུ་མཆོག་ལྡན་པའི་མིང་མཆོག་འགྱུར་བ་ནི། ། བདེ་གཤེགས་རབ་མཁས་དབང་པོའི་ཏོག་རྒྱལ་པོ། །ཆོས་རྣམས་ཐམས་ཅད་སྤྲུལ་པ་འདྲར་སྟོན་ཅིང ། །འགྲོ་བ་ཁྲག་ཁྲིག་དཔག་མེད་འགྲོལ་བར་འགྱུར། །བདེ་གཤེགས་དེ་དག་བསྟན་ལ་བག་ཡོད་པ། །ཆོས་རྣམས་འདི་དག་སྤྲུལ་པ་འདྲ་བར་སེམས། །ཞི་གནས་དེ་ལ་སུ་བརྟེན་བག་ཡོད་པ། །མྱུར་དུ་བླ་མེད་བྱང་ཆུབ་མཆོག་ཞི་ཐོབ། །སུམ་ཅུ་རྩ་གསུམ་པ་ལུང་བསྟན་པའི་ལེའུ་སྟེ། བཅོ་ལྔ་པའོ།། །།དེ་ནས་དེའི་ཚེ་འཐབ་བྲལ་གྱི་ལྷ་བྱེ་བ་ཕྲག་བཞི་བཅུས་ལྷ་མ་ཡིན་རྣམས་ནས་སུམ་ཅུ་རྩ་གསུམ་རིས་ཀྱི་ལྷའི་བར་དུ་དེ་དག་གིས་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ཀྱང་ལུང་བསྟན་པ་ལ་ཐོགས་པ་མི་མངའ་བར་ཤེས་ཤིང ། སངས་རྒྱས་ཀྱི་ཆོས་རྣམས་ནི། ཉམས་དགའ་བ་སྟེ། དེ་དག་ཐོབ་ན། མ་ཤེས་པའམ། མ་མཐོང་བའམ། མ་རྟོགས་པའམ། མངོན་དུ་མ་བྱས་
182a
༄#། །པའམ།་སྐྱེ་བའམ། འགག་པའམ། ལས་སམ། ལས་ཀྱི་རྣམ་པར་སྨིན་པ་གང་ཡང་མེད་དོ། །ཞེས་སངས་རྒྱས་ཀྱི་ཆོས་རྣམས་ལ་འདོད་པ་བསྐྱེད་དོ།། འདི་ལྟར་དེ་བཞིན་གཤེགས་པས་ཀུན་རྫོབ་དང ། དོན་དམ་པ་གཉིས་ཐུགས་སུ་ཆུད་དེ། ཤེས་པར་བྱ་བ་ཡང་ཀུན་རྫོབ་དང ། དོན་དམ་པ་འདིར་ཟད་དོ། །དེ་ཡང་བཅོམ་ལྡན་འདས་ཀྱིས་སྟོང་པ་ཉིད་རབ་ཏུ་གཟིགས། རབ་ཏུ་མཁྱེན། ལེགས་པར་མངོན་དུ་མཛད་པས། དེའི་ཕྱིར་ཐམས་ཅད་མཁྱེན་པ་ཞེས་བྱའོ། །དེ་ལ་ཀུན་རྫོབ་ནི། འཇིག་རྟེན་གྱི་སྤྱོད་པར་དེ་བཞིན་གཤེགས་པས་གཟིགས་སོ། །དོན་དམ་པ་གང་ཡིན་པ་དེ་ནི། བརྗོད་དུ་མེད་པ་སྟེ། ཤེས་པར་བྱ་བ་མ་ཡིན་པ། རྣམ་པར་ཤེས་པར་བྱ་བ་མ་ཡིན་པ། ཡོངས་སུ་ཤེས་པར་བྱ་བ་མ་ཡིན་པ། མ་བསྟན་པ། རབ་ཏུ་མ་བསྟན་པ། མ་ཐོས་པ། ཐོས་པར་མ་བྱས་པ། མ་ཤེས་པ། རྣམ་པར་མ་ཤེས་པ། མ་བསྟན་པ། མ་མཐོང་བ། མ་བརྟགས་པ།་འཛིན་དུ་མ་བཅུག་པ། རྟོགས་པར་མ་བྱས་པ། ཐོབ་པར་མ་བྱས་པ། མ་ཐོབ་པ། ཉེ་བར་མ་བསྙེན་པ། མ་བོར་བ། མ་བཞག་པ། མ་སྤངས་པ། བྱ་བ་མེད་པ། བྱད་པ་མེད་པ།་རབ་ཏུ་ཞི་བ་མེད་པ། མ་སྨད་པ། མ་བསྟོད་པ། ཐོབ་པ་མ་ཡིན་པ། མ་ཐོབ་པ་མ་ཡིན་པ། བདེ་བ་མ་ཡིན་པ། སྡུག་བསྔལ་མ་ཡིན་པ། སྙན་པ་མ་ཡིན་པ། མི་སྙན་པ་མ་
182b
ཡིན་པ།་གཟུགས་མ་ཡིན་པ། གཟུགས་མེད་པ་མ་ཡིན་པ། གྲངས་མེད་པ། བགྲང་བ་མེད་པ། འཇིག་རྟེན་མེད་པ། འཇིག་རྟེན་དང་བྲལ་བ་མེད་པ། ཀུན་ནས་ཉོན་མོངས་པ་མེད་པ། རྣམ་པར་བྱང་བ་མེད་པ། འགྲོ་བ་མེད་པ། ལྡོག་པ་མེད་པ། མ་བརྟགས་པ། རྣམ་པར་མ་བརྟགས་པ། མ་གཡོས་པ། མ་བསམ་པ། མ་བསྐྱོད་པ། མངོན་པར་འདུས་མ་བྱས་པ། མ་སྤྲོས་པ། སྤྲོས་པ་དང་བྲལ་བ་སྟེ། འདི་ལྟར་གཟུགས་ཀྱི་མཚན་མ་མི་དམིགས་པ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་མཚན་མ་མི་དམིགས་པ།་མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་མཚན་མ་མི་དམིགས་པ། གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ཆོས་ཀྱི་མཚན་མ་མི་དམིགས་པ། མིག་གི་རྣམ་པར་ཤེས་པ་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་རྣམ་པར་ཤེས་པའི་མཚན་མ་མི་དམིགས་པ། མིག་གི་འདུས་ཏེ་རེག་པ་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་འདུས་ཏེ་རེག་པའི་མཚན་མ་མི་དམིགས་པ། མིག་གི་འདུས་ཏེ་རེག་པ་ལས་བྱུང་བའི་ཚོར་བའི་མཚན་མ་མི་དམིགས་པ། ཡིད་ཀྱི་འདུས་ཏེ་རེག་པ་ལས་བྱུང་བའི་ཆོར་བའི་བར་གྱི་མཚན་མ་མི་དམིགས་པ། གཟུགས་ཀྱི་འདུ་ཤེས་ཀྱི་མཚན་མ་མི་དམིགས་པ། ཆོས་ཀྱི་བར་གྱི་འདུ་ཤེས་ཀྱི་མཚན་མ་མི་དམིགས་པ། གཟུགས་
183a
༄#། །སུ་སེམས་པའི་མཚན་མ་མི་དམིགས་པ། ཆོས་ཀྱི་བར་དུ་སེམས་པའི་མཚན་མ་མི་དམིགས་པ། ཡིད་ལ་བྱ་བའི་མཚན་མ་མི་དམིགས་པ། ས་དང ། ཆུ་དང ། མེ་དང ། རླུང་དང ། ནམ་མཁའ་དང ། རྣམ་པར་ཤེས་པའི་ཁམས་ཀྱི་མཚན་མ་མི་དམིགས་པ། འདོད་པ་དང ། གཟུགས་དང ། གཟུགས་མེད་པའི་ཁམས་ཀྱི་མཚན་མ་མི་དམིགས་པ། འདུས་བྱས་དང ། འདུས་མ་བྱས་པའི་མཚན་མ་མི་དམིགས་པ་སྟེ། འདི་ལྟར་ཆོས་གང་དང་གང་བརྗོད་པའི་རང་བཞིན་གང་དང་གང་གིས་བརྗོད་པའི་ཆོས་དེ་དང་དེ་བརྗོད་པའི་རང་བཞིན་དེ་དང་དེས་མི་བརྗོད་པ་སྟེ། སངས་རྒྱས་ཀྱི་ཆོས་རྣམས་ནི། དེ་ལྟར་ཉམས་དགའ་བ་ཡིན་ན། དེ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་མི་ཤེས་པ་རྣམས་ཀྱིས་ཐོས་ན། འཇིགས་ཤིང་སྔངས་པ་དང ། སྐྲག་པར་འགྱུར་ཏེ། དེས་འཇིགས་པར་གྱུར་པས། ཐམས་ཅད་མཁྱེན་པའི་ཡེ་ཤེས་ལས་ཉམས་པར་འགྱུར་ཏེ། དེ་དག་ནི། ལྷ་དང་བཅས་པའི་འཇིག་རྟེན་གྱིས་མྱ་ངན་དུ་བྱ་བ་སྟེ། འཁོར་བ་ན་ཡོད་པའི་སྡུག་བསྔལ་གྱི་རྒྱུན་ཏོ། །ཞེས་ཏེ། དེ་དག་གིས་འདི་ལྟར་སངས་རྒྱས་ཀྱི་ཆོས་རྣམས་ལ་འདོད་པ་བསྐྱེད་ནས་སངས་རྒྱས་ཀྱི་ཆོས་རྣམས་ཀྱི་དོན་དུ་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། དེ་དག་གིས་སུམ་ཅུ་རྩ་གསུམ་པའི་མཆོད་པ་ལས་
183b
ཁྱད་པར་དུ་འཕགས་པས་བཅོམ་ལྡན་འདས་ལ་མཆོད་དེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་འཐབ་བྲལ་གྱི་ལྷ་དེ་དག་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། རྒྱལ་བ་ཁྱོད་ཀྱིས་ཕུང་པོ་དབེན་པར་གཟིགས། །ཁམས་དང་སྐྱེ་མཆེད་རྣམས་ཀྱང་དེ་བཞིན་ཏེ། །དབང་པོའི་གྲོང་ནི་མཚན་མས་དབེན་པ་དག་།ཀུན་ཀྱང་ཐུབ་པ་ཁྱོད་ཀྱིས་ཇི་བཞིན་གཟིགས། །འཇིག་རྟེན་མཁས་པའི་བདེན་པ་དེ་གཉིས་ཏེ། །ཁྱོད་ཀྱིས་གཞན་ལས་མ་གསན་རང་གིས་གཟིགས། །དེ་ནི་ཀུན་རྫོབ་བདེན་དང་དོན་དམ་སྟེ། །བདེན་པ་གསུམ་པ་གང་ཡང་མ་མཆིས་སོ། །གང་གིས་བདེ་བར་གཤེགས་ལ་འགྲོ་བ་རྣམས། །བདེ་བའི་དོན་དུ་དད་པ་སྐྱེ་འགྱུར་བ། །རྒྱལ་བས་འགྲོ་བ་རྣམས་ཀྱི་དོན་སླད་དུ། །འཇིག་རྟེན་ཕན་ཕྱིར་ཀུན་རྫོབ་དེ་བསྟན་ཏོ། །སེམས་ཅན་ཚོགས་ཀྱི་འགྲོ་དྲུག་གང་བསྟན་པ། །སེམས་ཅན་དམྱལ་དང་དུད་འགྲོ་ཡི་དྭགས་དང ། །ལྷ་མིན་རིས་དང་མི་དང་ལྷ་ཡི་རྣམས། །མི་ཡི་སེངྒེས་ཀུན་རྫོབ་བཏགས་པ་མཛད། །རིགས་དམའ་དེ་བཞིན་མཐོ་བའི་རིགས་རྣམས་དང ། །ཕྱུག་པོའི་ཁྱིམ་དང་དབུལ་བའི་ཁྱིམ་རྣམས་དང ། །བྲན་གྱི་ཚོགས་དང་དེ་བཞིན་གཡོ་གི་ཚོགས། །བུད་མེད་ཚོགས་དང་སྐྱེས་པ་མ་ནིང་དང ། །འགྲོ་
184a
༄#། །བའི་ཁྱད་པར་ཇི་སྙེད་གང་ཡང་རུང ། །མཚུངས་མེད་ཁྱོད་ཀྱིས་འཇིག་རྟེན་བསྟན་མཛད་པ། །ཀུན་རྫོབ་བདེན་པར་མཁས་པས་ཐུགས་ཆུད་ནས། །འཇིག་རྟེན་ཕན་པས་མི་ལ་དེ་བསྟན་ཏོ། །དེ་ལ་དགའ་བའི་འགྲོ་བ་འཁོར་བ་ནི། །འགྲོ་བའི་ཆོས་བརྒྱད་དེ་ལ་མི་འབྱུང་སྟེ། །ཐོབ་དང་མ་ཐོབ་སྙན་དང་མི་སྙན་དང ། །བསྟོད་དང་སྨད་དང་བདེ་དང་སྡུག་བསྔལ་ལོ། །ཐོབ་པ་རྙེད་ན་དེ་ལ་ཆགས་པ་སྐྱེད། །མ་ཐོབ་གྱུར་ན་དེས་ཀྱང་འཁྲུག་པར་འགྱུར། །གང་གཞན་མ་བསྟན་ཚུལ་འདིས་ཤེས་པར་བྱ། །ནད་རྣམས་བརྒྱད་ཀྱིས་དེ་རྒྱུད་གནོད་པར་འགྱུར། །ཀུན་རྫོབ་དེ་ལ་དོན་དམ་སུ་སྨྲ་བ། །དེ་དག་ནོར་བའི་བློ་ལྡན་ཤེས་པར་བྱ། །མི་སྡུག་སྡུག་དང་སྡུག་བསྔལ་བདེ་བ་དང ། །བདག་མེད་རང་བཞིན་བདག་ཏུ་སྨྲ་པ་དང ། །མི་རྟག་ཆོས་ལ་རྟག་ཅེས་སྨྲ་བགྱིད་ཅིང ། །དེ་ལྟར་དགའ་སྟེ་མཚན་མར་གང་གནས་པ། །དེ་དག་བདེར་གཤེགས་གསུངས་ནི་ཐོས་གྱུར་ན། །འཇིགས་ཤིང་ཇི་བཞིན་མི་རྟོགས་སྤོང་བར་བགྱིད། །དེ་དག་བདེ་གཤེགས་གསུང་ནི་སྤངས་གྱུར་པས། །སེམས་ཅན་དམྱལ་བར་སྡུག་བསྔལ་མི་བཟད་མྱོང ། །དེ་དག་ཚུལ་མིན་བདེ་བ་ཚོལ་བགྱིད་ཀྱང ། །སྡུག་བསྔལ་བརྒྱད་དག་བྱིས་པས་མྱོང་བར་འགྱུར། །འཇིག་རྟེན་ཕན་པའི་བསྟན་པ་སུ་ཞིག་གིས། །མ་ལོག་བློས་ནི་རྣམ་པར་རྟོགས་གྱུར་ན། །སྦྲུལ་གྱི་པགས་པ་རྙིང་ལྟར་རབ་
184b
སྤངས་ཏེ། །སྲིད་པ་ཀུན་ལས་འདས་ནས་ཞི་བར་འགྱུར། །ཆོས་འདི་ཐམས་ཅད་རང་བཞིན་དབེན་པ་སྟེ། །སྟོང་པ་མཚན་མ་མེད་པ་དོན་དམ་ཞེས། །གང་གིས་ཐོས་ནས་དགའ་བ་སྐྱེ་འགྱུར་བ། །དེ་དག་བླ་མེད་བྱང་ཆུབ་ཐོབ་པར་འགྱུར། །ཇི་ལྟར་བདེ་བར་གཤེགས་པས་གསུངས་པའི་ཆོས། །དེ་ལ་ལྷ་རྣམས་ཐེ་ཚོམ་མ་མཆིས་ཏེ། །འགྲོ་བ་ཐམས་ཅད་ཡོངས་སུ་དགྲོལ་བའི་ཕྱིར། །དེ་དག་བླ་ན་མེད་པའི་བྱང་ཆུབ་ཚོལ། །བྱང་ཆུབ་བློ་ཅན་རྣམ་དག་བློ་ཅན་རྣམས། །སྐྱེས་བུ་མཆོག་གིས་དགའ་བ་བསྐྱེད་དུ་གསོལ། །དེ་ཐོས་འགྲོ་བ་ཀུན་ལ་སྨན་སླད་དུ། །བླ་ན་མེད་པའི་བྱང་ཆུབ་ཐོབ་པར་འགྱུར། །དེ་ནས་དེའི་ཚེ་བཅོམ་ལྡན་འདས་ཀྱིས་འཐབ་བྲལ་རིས་ཀྱི་ལྷ་བྱེ་བ་ཕྲག་བཞི་བཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་བ། འཇིག་རྟེན་ཕན་པས་འཛུམ་པ་གང་མཛད་དེས། །ཁྱོད་ཀྱི་འཁོར་ནི་ཐེ་ཚོམ་འཚལ་བར་འགྱུར། །མི་མཆོག་འཛུམ་པའི་རྒྱུ་དེ་བཀའ་སྩལ་གསོལ། །དེས་ནི་འཁོར་འདི་རབ་ཏུ་དགའ་བར་འགྱུར། །ལྷ་རྣམས་ལུང་བསྟན་དེ་ནི་ཐོས་གྱུར་ན། །འཁོར་འདི་ཤིན་ཏུ་དགའ་ཞིང་མགུ་བར་འགྱུར། །རིགས་པ་ལྡན་པ་བསྟན་པ་འདི་ཉིད་ལ། །བདེ་བ་ནན་ཏན་བགྱིད་ཅིང་རྩོམ་པར་འགྱུར། །རྒྱལ་བ་ཁྱོད་འཁོར་འདིར་ནི་མཆོག་ལྡན་ཏེ། །དྲང་
185a
༄#། །སྲོང་ཆེན་པོ་སངས་རྒྱས་ཡོན་ཏན་སྣོད། །འགྲོ་བ་འདི་རྣམས་བསྡུ་བ་མཛད་སླད་དུ། །སྙན་པའི་གསུང་ནི་ལེགས་པར་བརྗོད་དུ་གསོལ། །སངས་རྒྱས་ཡོན་ཏན་མཐུ་དག་ཐོས་གྱུར་ན། །སྐྱེ་རྒུ་ཀུན་ལ་རབ་ཏུ་སྨན་པར་འགྱུར། །བདེ་བར་གཤེགས་པས་ལུང་བསྟན་དེ་ཐོས་ན། །མཁས་པ་རྣམས་ནི་ཚུལ་བཞིན་རྩོམ་པར་འགྱུར། ། མི་ཡི་དམ་པ་སྨྲ་བའི་མཆོག་གིས་འདིར། །ཐེ་ཚོམ་འཚལ་བའི་ནེམ་ནུར་ལེགས་པར་གསོལ། །འཁོར་རྣམས་ཐམས་ཅད་ཐོས་པར་དགའ་ཞིང་བསྟོད། །ལྷ་རྣམས་ལུང་བསྟན་པ་ནི་བཀའ་སྩལ་གསོལ། །ཀུན་ཀྱང་རིམ་གྲོར་གུས་པར་རྣ་བླགས་ཏེ། །ཁྱོད་ཀྱི་ལུང་བསྟན་རབ་ཏུ་དགའ་བ་ལ། །སྒྲིབ་པ་རབ་ཏུ་སྤངས་ཤིང་དེ་དག་ཉན། །འཇིག་རྟེན་ཕན་ཕྱིར་སྐྱེས་བུ་མཆོག་གིས་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། འཇིག་རྟེན་ཕན་ཕྱིར་མཁས་པས་འཛུམ་མཛད་པ། །རྟ་ཐུལ་ཁྱོད་ཀྱིས་དྲིས་པ་དུས་དང་ལྡན། །སངས་རྒྱས་ཡོན་ཏན་མཐུ་ནི་ཐོས་གྱུར་ན། །སྐྱེ་བོ་ཚོགས་ཆེན་རྣམས་ཀྱི་དོན་དུ་འགྱུར། །སངས་རྒྱས་ཡོན་ཏན་ཚོགས་ལ་བློ་ཞན་ཅིང ། །འདོད་ཆགས་བློ་དང་ཞེ་སྡང་བློ་ལྡན་དང ། །ཚེ་རབས་བརྒྱར་ནི་རྩོད་པའི་བློ་ཅན་དང ། །གཏི་མགུ་བློ་ཅན་དགའ་བ་སྐྱེར་མི་འགྱུར། །གང་རྣམས་རྒྱལ་བས་བསྟན་ལ་
185b
དགའ་བ་དང ། གང་གིས་རྒྱལ་བ་རྣམས་ལ་སྔོན་དྲིས་དང ། །གང་རྣམས་སྙིང་རྗེ་ཆེ་དང་ལྡན་པ་དག་།དེ་ཀུན་སངས་རྒྱས་ཡོན་ཏན་ལྡན་པར་འགྱུར། །གང་གིས་འགྲོ་བ་གནོད་ཟིན་མཐོང་གྱུར་ཏེ། །མི་ཡི་སེངྒེ་སྙིང་རྗེ་སྐྱེད་བྱེད་པ། །དེ་དག་སངས་རྒྱས་ཡོན་ཏན་འདི་ཐོས་ན། །ུཏྤལ་ཕྲེང་བཞིན་མགོ་ལ་ཁྱེར་བར་འགྱུར། །ང་ཡི་འཁོར་འདི་རབ་ཏུ་དགའ་གྱུར་པ། །སྔོན་གྱི་རྒྱལ་ལ་བསྙེན་བཀུར་སྔོན་བྱས་ཏེ། །དེ་དག་སངས་རྒྱས་ཡོན་ཏན་ཡིད་འོང་འདི། །མེ་ཏོག་ཕྲེང་བཞིན་དེ་དག་ཡང་དག་ལྟ། །འཐབ་བྲལ་ལྷ་རྣམས་སྔོན་གྱི་རྒྱལ་ཀུན་ལ། །བསྙེན་བཀུར་བྱས་ཤིང་ཆགས་པ་སྤངས་པ་སྟེ། །ཉོན་མོངས་སྨད་ཅིང་སངས་རྒྱས་བློ་ལྡན་འགྱུར། །སྙིང་རྗེ་ལྡན་ཞིང་ཉོན་མོངས་མེད་བློ་ལྡན། །རྒྱལ་བ་མི་ཡི་སེངྒེ་གངྒཱ་ཡི། །བྱེ་སྙེད་ཀུན་ལ་སྔོན་ཆད་བསྙེན་བཀུར་བྱས། །བྱང་ཆུབ་བླ་ན་མེད་པར་སྨོན་བྱེད་ཅིང ། །དགེ་བ་མཐའ་ཡས་འདི་དག་ཀུན་གྱིས་བྱས། །སེམས་ཅན་ཉོན་མོངས་འདམ་བྱིང་རིག་གྱུར་ནས། །སྡུག་བསྔལ་གྱུར་པ་རྣམས་ལ་སྙིང་རྗེ་བསྐྱེད། །དེ་དག་མི་མཆོག་སེམས་ཅན་ཡང་མཛད་ལ། །ཆོས་ཚུལ་མཐའ་ཡས་ཡོངས་སུ་དྲིས་པར་གྱུར། །གང་ཐོས་ནས་ནི་རྣམ་པར་འདྲེན་གྱུར་པ། །རྣམ་འདྲེན་ཆོས་ལ་འཇུག་པ་འཆད་པར་གྱུར། །མི་ཡི་ཉོན་མོངས་སྤྱོད་པ་རབ་མཁྱེན་ནས། །དེ་དག་རྣམས་ལ་རྒྱ་ཆེན་ཆོས་ཀྱང་འཆད། །རྣམ་འདྲེན་སྐྱེས་བུ་དམ་པའི་མཆོག་དེ་དག་།རང་བཞིན་མེད་
186a
༄#། །པ་སྟོང་པ་ཉིད་ཀྱང་འཆད། །དེ་དག་རྒྱལ་བའི་གསུང་དེ་ཐོས་གྱུར་ནས། །འགྲོ་བ་ཐམས་ཅད་སྟོང་པར་རབ་ཏུ་རྟོགས། །ཅིས་སྟོང་ཞེ་ན་མཚན་མའི་རྣམ་པས་སྟོང ། །རང་བཞིན་མེད་ཅིང་མཚན་མ་མེད་པ་སྨྲ། །རྒྱལ་བའི་ཆོས་རྣམས་དེ་ལྟར་ཤེས་གྱུར་ནས། །ཀུན་ཀྱང་སངས་རྒྱས་ཡོན་ཏན་རྣམས་ལ་གནས། །དེ་དག་ང་ལ་མཆོད་པ་རྒྱ་ཆེན་བྱས། །བདག་གིས་ཆོས་བཞིན་དུ་ནི་ལུང་བསྟན་ནས། །སྐར་ཚོགས་མཉམ་པའི་བསྐལ་བ་དམ་པ་ལ། །བླ་ན་མེད་པའི་བྱང་ཆུབ་ཐོབ་པར་འགྱུར། །བདེ་གཤེགས་མཉམ་པ་མེད་པ་བྱེ་བ་ཕྲག་།ཉི་ཤུ་ཉི་ཤུས་ཡོངས་སུ་གང་བར་འགྱུར། །བློ་གྲོས་དག་ཅེས་བྱ་བའི་གྲངས་སུ་འགྲོ་།སེམས་ཅན་བསམ་ཡས་ཡོངས་སུ་སྦྱོང་བར་འགྱུར། ། འཐབ་བྲལ་འཁོད་པའི་ལྷ་ཡི་བསམ་པ་རྣམས། །རྟ་ཐུལ་གྱིས་ནི་ཡོངས་སུ་ཞུས་བྱས་པ། །རྒྱལ་བ་དགྲ་རྒྱལ་དྲང་སྲོང་ཆེན་པོ་ཡིས། །ལུང་བསྟན་ལྷ་དང་བཅས་པའི་འཇིག་རྟེན་དགའ། །འཐབ་བྲལ་བ་ལུང་བསྟན་པའི་ལེའུ་སྟེ། བཅུ་དྲུག་པའོ།། །།དེ་ནས་དགའ་ལྡན་རིས་ཀྱི་ལྷ་བྱེ་བ་ཕྲག་བརྒྱད་ཅུས་ལྷ་མ་ཡིན་རྣམས་ནས་འཐབ་བྲལ་གྱི་རིས་ཀྱི་ལྷའི་བར་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་འདི་སྙམ་དུ་སེམས་ཏེ། གང་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་
186b
བྱང་ཆུབ་ཏུ་ལུང་བསྟན་པའི་ཆོས་དེ་གང་ཞིག་།ཅི་གཟུགས་སམ། འོན་ཏེ་ཚོར་བའམ། འོན་ཏེ་འདུ་ཤེས་སམ། འོན་ཏེ་འདུ་བྱེད་དམ། འོན་ཏེ་རྣམ་པར་ཤེས་པ་ཞིག་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་སྙམ་ནས་དེ་དག་འདི་སྙམ་དུ་སེམས་ཏེ། གཟུགས་ནི།བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ནི། བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། གཟུགས་ཀྱང་མ་སྐྱེས་པ། བྱང་ཆུབ་ཀྱང་མ་སྐྱེས་པ་ན། ཇི་ལྟར་མ་སྐྱེས་པས་མ་སྐྱེས་པ་མངོན་པར་རྫོགས་པར་འཚང་རྒྱ་བར་བྱ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ཡང་མ་སྐྱེས་པ། བྱང་ཆུབ་ཀྱང་མ་སྐྱེས་པ་ན། དེ་ལ་ཇི་ལྟར་མ་སྐྱེས་པས་མ་སྐྱེས་པ་མངོན་པར་རྫོགས་པར་འཚང་རྒྱ་བར་བྱ། གཟུགས་ཀྱང་འགག་པ་མེད་པ། བྱང་ཆུབ་ཀྱང་འགག་པ་མེད་པ། རྣམ་པར་ཤེས་པའི་བར་ཡང་འགག་པ་མེད་པ། བྱང་ཆུབ་ཀྱང་འགག་པ་མེད་པ། གཟུགས་ཀྱང་སྤྲོས་པ་མེད་པ། བྱང་ཆུབ་ཀྱང་སྤྲོས་པ་མེད་པ། རྣམ་པར་ཤེས་པའི་བར་ཡང་སྤྲོས་པ་མེད་པ། བྱང་ཆུབ་ཀྱང་སྤྲོས་པ་མེད་པ། གཟུགས་ཀྱང་གཉིས་
187a
༄#། །སུ་མེད་པ། བྱང་ཆུབ་ཀྱང་གཉིས་སུ་མེད་པ། རྣམ་པར་ཤེས་པའི་བར་ཡང་གཉིས་སུ་མེད་པ། བྱང་ཆུབ་ཀྱང་གཉིས་སུ་མེད་པ། གཟུགས་ཀྱང་གཡོ་བ་མེད་པ།་བྱང་ཆུབ་ཀྱང་གཡོ་བ་མེད་པ། རྣམ་པར་ཤེས་པའི་བར་ཡང་གཡོ་བ་མེད་པ། བྱང་ཆུབ་ཀྱང་གཡོ་བ་མེད་པ། གཟུགས་ཀྱང་དམིགས་སུ་མེད་པ། བྱང་ཆུབ་ཀྱང་དམིགས་སུ་མེད་པ། རྣམ་པར་ཤེས་པའི་བར་ཡང་དམིགས་སུ་མེད་པ། བྱང་ཆུབ་ཀྱང་དམིགས་སུ་མེད་པ་ན། ཇི་ལྟར་འགག་པ་མེད་པ་དང ། སྤྲོས་པ་མེད་པ་དང ། གཉིས་སུ་མེད་པ་དང ། གཡོ་བ་མེད་པ་དང ། དམིགས་སུ་མེད་པས་འགག་པ་མེད་པ་དང ། དམིགས་སུ་མེད་པའི་བར་དུ་མངོན་པར་རྫོགས་པར་འཚང་རྒྱ་བར་བྱ། དེ་ལྟར་ཆོས་ཐམས་ཅད་མི་དམིགས་ན། འདི་ལ་སངས་རྒྱས་ནི། གང ། བྱང་ཆུབ་སེམས་དཔའ་ནི། གང ། བྱང་ཆུབ་ནི། གང ། ལུང་བསྟན་པ་ནི། གང ། གཟུགས་ནི། གཟུགས་ཀྱིས་སྟོང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ནི། རྣམ་པར་ཤེས་པས་སྟོང ། སངས་རྒྱས་ནི། སངས་རྒྱས་ཀྱི་ངོ་བོ་ཉིད་ཀྱིས་སྟོང ། བྱང་ཆུབ་སེམས་དཔའ་ནི། བྱང་ཆུབ་སེམས་དཔའི་ངོ་བོ་ཉིད་ཀྱིས་སྟོང ། བྱང་ཆུབ་ནི། བྱང་ཆུབ་ཀྱི་ངོ་བོ་ཉིད་ཀྱིས་སྟོང ། ལུང་བསྟན་པ་ནི། ལུང་བསྟན་པའི་ངོ་བོ་ཉིད་ཀྱིས་སྟོང་སྟེ། དེ་ལྟར་ཆོས་ཐམས་ཅད་
187b
རང་བཞིན་གྱིས་སྟོང་པ་ལ་གཟུགས་ཞེས་བྱ་བ་དང ། རྣམ་པར་ཤེས་པའི་བར་ཞེས་བྱ་བ་དང ། སངས་རྒྱས་ཞེས་བྱ་བ་དང ། ལུང་བསྟན་པའི་བར་ཞེས་བྱ་བ་དེ་དག་ནི། ཐ་སྙད་ཙམ། མིང་ཙམ།་བརྡ་ཙམ། ཀུན་རྫོབ་ཙམ། བརྗོད་པ་ཙམ། གདགས་པ་ཙམ་སྟེ། དེ་ལ་མཁས་པ་རྣམས་ཀྱིས་མངོན་པར་ཞེན་པར་བྱ་བའི་མི་ཆའོ། །འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་འདོད་པའི་ཡོན་ཏན་ལྔ་དང་ལྡན་ཞིང་རྩེ་རྩེ་བ་ལས། དེ་ལ་ཉལ་བ་ལས་སད་ན། འདོད་པའི་ཡོན་ཏན་དེ་དག་མི་མཐོང་སྟེ། དེ་རྗེས་སུ་དྲན་ན་ཡང་མི་རྙེད་ཅིང ། དེ་ལྟར་མ་རྙེད་པའི་ཕྱིར་སྡུག་བསྔལ་དུ་འགྱུར་བ་དེ་བཞིན་དུ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་རྣམས་ཀྱང་བྱང་ཆུབ་ཚོལ་ན། དེ་དག་བྱང་ཆུབ་དང་ཕྲད་པར་མི་འགྱུར་ཏེ། བྱང་ཆུབ་མ་རྙེད་ཅིང་རོ་མ་མྱོང་བས་སྡུག་བསྔལ་དུ་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་ཐམས་ཅད་ནི། རྨི་ལམ་ལྟ་བུ་ནོར་བ་སྟེ། ཆོས་དེ་དག་གི་དོན་ནི། རྣམ་པ་གཞན་ལ། སོ་སོའི་སྐྱེ་བོ་དེ་དག་ཀྱང་རྣམ་པ་གཞན་དུ་ཞེན་ཏོ། །ཆོས་དེ་དག་ནི། དེ་ལྟར་ཤེས་པར་བྱ་བ་ཡིན་ན། དེ་ལ་ཆོས་གང་ཞིག་སངས་རྒྱས་ཡིན། གང་ཞིག་བྱང་ཆུབ་སེམས་དཔའ་ཡིན། གང་ཞིག་བྱང་ཆུབ་ཡིན།་གང་ཞིག་ལུང་བསྟན་པ་ཡིན། །དེ་ལྟར་ཆོས་ཐམས་ཅད་དམིགས་སུ་མེད་དེ། སོ་སོའི་སྐྱེ་བོ་ཡང་དམིགས་སུ་མེད་དེ། སོ་སོའི་སྐྱེ་བོའི་ཆོས་ཀྱང་དམིགས་སུ་མེད། ཉན་ཐོས་ཀྱང་
188a
༄#། །དམིགས་སུ་མེད། ཉན་ཐོས་ཀྱི་ཆོས་ཀྱང་དམིགས་སུ་མེད། རང་སངས་རྒྱས་ཀྱང་དམིགས་སུ་མེད། རང་སངས་རྒྱས་ཀྱི་ཆོས་ཀྱང་དམིགས་སུ་མེད་བྱང་ཆུབ་སེམས་དཔའ་ཡང་དམིགས་སུ་མེད། བྱང་ཆུབ་སེམས་དཔའི་ཆོས་ཀྱང་དམིགས་སུ་མེད། སངས་རྒྱས་ཀྱང་དམིགས་སུ་མེད། སངས་རྒྱས་ཀྱིས་ཆོས་ཀྱང་དམིགས་སུ་མེད། བྱང་ཆུབ་ཀྱང་དམིགས་སུ་མེད། མྱ་ངན་ལས་འདས་པ་ཡང་དམིགས་སུ་མེད་དོ། །བཅོམ་ལྡན་འདས། དེ་ལ་ནི། བདག་ཅག་ཐེ་ཚོམ་མ་མཆིས། ཡིད་གཉིས་མ་མཆིས་སོ། །ཞེས་གསོལ་ནས་དགའ་ལྡན་རིས་ཀྱི་ལྷའི་བུ་དེ་དག་ཆོས་དེ་དག་ལ་ཐེ་ཚོམ་མེད་ཅིང་ནེམ་ནུར་མེད་པར་གྱུར་ཏེ། བཅོམ་ལྡན་འདས་ལ་མཆོད་པ་བྱ་བའི་ཕྱིར་བརྩོན་པར་གྱུར་ནས་དེ་དག་གིས་འཐབ་བྲལ་གྱི་མཆོད་པ་ལས་ཁྱད་པར་དུ་འཕགས་པས་བཅོམ་ལྡན་འདས་ལ་མཆོད་པ་བྱས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་དུ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། གང་དག་སངས་རྒྱས་ཡོན་ཏན་རབ་གནས་པ། དེ་དག་འཇུག་པ་དེ་བཞིན་གཤེགས་པས་གསུངས། །རྣམ་ཐར་སྒོ་གསུམ་དེ་ནི་རྙེད་གྱུར་པས། །མཚུངས་
188b
པ་མེད་པའི་སྤྱོད་ཡུལ་སྤྱོད་པར་འགྱུར། །གཟུགས་དང་ཚོར་བ་འདུ་ཤེས་མ་མཆིས་ཏེ། །སེམས་དང་བསམ་པ་དེ་བཞིན་མ་མཆིས་པ། །ཆགས་མེད་བློ་མངའ་རྣམས་ཀྱི་སྤྱོད་ཡུལ་ལགས། །མི་ཡི་སེངྒེ་ཕུང་པོ་དབེན་ལ་དགྱེས། །སྐྱེས་བུ་དམ་པ་མཁས་པ་དེ་དག་གི་།བྱང་ཆུབ་སེམས་ཀྱང་ནམ་ཡང་འབྱུང་མ་མཆིས། །ཕུང་པོ་དབེན་པའི་ཡོན་ཏན་མྱོང་གྱུར་ནས། །སངས་རྒྱས་དགོངས་ལ་ནེམ་ནུར་སྤངས་བློ་ལྡན། །དེ་དག་བྱང་ཆུབ་སྨོན་པ་མ་མཆིས་ཤིང ། །བྱང་ཆུབ་སེམས་ལའང་དེ་དག་མི་སྨོན་དེ། །དགའ་དང་ཞུམ་པར་འགྱུར་བ་མ་མཆིས་པར། །བདེ་གཤེགས་སྲས་རྣམས་སྤྱད་པ་སྤྱོད་བྱེད་པས། །བདེ་གཤེགས་རྣམས་ཀྱིས་ཆོས་རྣམས་མཉམ་པར་གཟིགས། །དེ་ལ་རྒྱལ་སྲས་འཇིགས་དང་བྲལ་བ་རྣམས། ། ཡང་དང་ཉིད་དུ་སངས་རྒྱས་ལེགས་སྤྱོད་ཅིང ། །མཁས་པ་དེ་དག་འཇིག་རྟེན་འདི་ན་སྤྱོད། །གཟུགས་ཀྱི་མཚན་མ་རྣམ་པར་གཞིག་བགྱིས་ཤིང ། །མཚན་མའི་རྣམ་པ་ཐམས་ཅད་རབ་སྤངས་ཏེ། །སྲིད་པ་གསུམ་ལ་དེ་དག་ཡོང་མི་སྨོན། །དངོས་པོ་སྟོང་པར་སྨོན་ལམ་དེ་དག་བགྱིད། །ཕུང་པོ་འདི་དག་མ་སྐྱེས་རྟོགས་གྱུར་ཅིང ། །ལུང་བསྟན་བདེ་གཤེགས་ཉིད་ཀྱང་མ་སྐྱེས་ལ། །བྱང་ཆུབ་སེམས་དཔའ་བྱང་ཆུབ་ཀྱང་མ་སྐྱེས། །དེ་ལྟར་གང་འཚལ་དེ་ལ་རྨོངས་མ་མཆིས། །སྐྱེ་བོའི་ཆོས་དང་སངས་རྒྱས་ཡོན་ཏན་རྣམས། །དེ་དག་
189a
༄#། །ཀུན་དང་བདེ་གཤེགས་མ་སྐྱེས་ཏེ། །མི་ཡི་སེངྒེ་དེ་ལྟར་གང་འཚལ་བ། །དེ་ནི་ཁྱོད་སྲས་ཁྱོད་ནི་དེ་ཡི་ཡབ། །གང་ཞིག་ཕུང་པོ་འགག་པ་མ་མཆིས་ཤིང་ཁམས་དང་སྐྱེ་མཆེད་དེ་བཞིན་རྒྱལ་བའི་ཆོས། །བྱང་ཆུབ་རྒྱལ་བ་དེ་བཞིན་ལུང་བསྟན་པ། །བཅོམ་ལྡན་འདས་འདི་ཀུན་འགག་མེད་འཚལ་བ་དང ། །གང་རྣམས་བྱང་ཆུབ་འཚལ་ཅིང་སྤྱོད་བགྱིད་པ། །འཇིག་རྟེན་མཁས་པ་དེ་དག་འགག་མ་མཆིས། །འགྲོ་བ་ཐམས་ཅད་འགག་མེད་བློར་གྱུར་ན། །དེ་འདྲའི་བློ་ཅན་བྱང་ཆུབ་རྙེད་མི་དཀའ། །ཕུང་པོ་སྐྱེ་མཆེད་དག་དང་ཁམས་རྣམས་དང ། །བྱང་ཆུབ་རྒྱལ་བ་རྒྱལ་ལས་མི་གཡོ་བར། །གང་གིས་འཚལ་བ་དེ་དག་རྒྱལ་སྲས་ཏེ། །དེ་དག་རྒྱལ་བའི་ཆོས་འདི་འཛིན་པ་ལགས། །ཕུང་པོ་སེམས་མེད་དེ་བཞིན་སྐྱེ་མཆེད་དང ། །ཁམས་དང་བྱང་ཆུབ་རྒྱལ་བ་རྒྱལ་སྲས་དང ། །ལུང་བསྟན་དེ་བཞིན་སེམས་དཔའ་མ་མཆིས་པར། །གང་གིས་འཚལ་བ་དེ་དག་རྒྱལ་བའི་སྲས། །རང་བྱུང་ཕུང་པོ་དངོས་ཉིད་སྟོང་པ་སྟེ། །ཁམས་དང་སྐྱེ་མཆེད་དག་དང་རྒྱལ་བ་དང ། །བྱང་ཆུབ་དང་ནི་ལུང་བསྟན་རྒྱལ་སྲས་རྣམས། །ངོ་བོ་ཉིད་ཀྱིས་སྟོང་པར་གང་སྤྱོད་དང ། །ཕུང་པོ་སྤྲོས་འདྲ་དེ་བཞིན་ཁམས་རྣམས་དང ། །སྐྱེ་མཆེད་རྐང་གཉིས་མཆོག་དང་བྱང་ཆུབ་དང ། །ལུང་བསྟན་སྤྲོས་པ་མེད་པར་གང་སྤྱོད་ཅིང ། །དེ་ལྟར་གང་འཚལ་དེ་
189b
དག་རྒྱལ་བའི་སྲས། །གནས་པ་མ་མཆིས་མི་གནས་མ་ལགས་ཏེ། །མཆིས་པ་མ་ལགས་མ་མཆིས་ཡོད་མ་ལགས། །འདུས་བྱས་མ་ལགས་འདུས་མ་བྱས་མ་ལགས། །དེ་ལྟར་གང་འཚལ་དེ་དག་རྒྱལ་བའི་སྲས། །རྒྱལ་དང་འགྲོ་འདི་དེ་ལྟར་ཡོངས་མཐོང་ཞིང ། །སྟོན་པའི་དགོངས་པ་དེ་ལྟར་འཚལ་གྱུར་ལ། །དེ་ལྟར་བགྱིས་ན་གང་ཟག་མཆོག་མཆོད་ཅིང ། །འདྲེན་པ་འཁོར་དང་བཅས་ལ་བསྙེན་བཀུར་ལགས། །རྣམ་པར་འདྲེན་པ་བསྟོད་པའི་བསོད་ནམས་གང ། །ཇི་སྙེད་འཇིག་རྟེན་ཕན་མཛད་མཁྱེན་པ་ཡི། །དགེ་བ་འདི་ཡིས་འགྲོ་བ་རང་བྱུང་པ། །རྒྱལ་བ་མཚན་མཆོག་ལྡན་པར་འགྲུབ་པར་ཤོག་།དེ་ནས་བཅོམ་ལྡན་འདས་ཀྱིས་དགའ་ལྡན་རིས་ཀྱི་ལྷ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། ། དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འདྲེན་པ་རྒྱུ་ཡི་སྟོབས་ནི་གང་ཞིག་གིས། །སྟོབས་ཆེན་བརྙེས་པ་འདི་ལྟར་འཛུམ་མཛད་པ།། འཛུམ་པའི་རྒྱུ་དེ་འདྲེན་པས་བཀའ་སྩལ་གསོལ། །དེས་ནི་འཇིག་རྟེན་འདི་དག་དགའ་བར་འགྱུར། །ཤཱཀྱ་ཐུབ་པའི་ཞལ་ནས་འཛུམ་མཛད་པ། །འགྲོ་བ་འདིས་མཐོང་ཐེ་ཚོམ་འཚལ་གྱུར་ཏེ། །ཉན་པར་འཚལ་ཞིང་གཞན་དུ་མི་སེམས་པར། །ཀུན་ཀྱང་འཇིག་རྟེན་ཕན་པའི་ཞལ་དུ་ལྟ། །འདི་ལྟར་དཔེར་ན་ནད་པ་ནད་སྐྱོ་བ། །སྨན་པས་བསྒོ་བ་བཞིན་དུ་འཛིན་བགྱིད་པ། །དེ་
190a
༄#། །བཞིན་འཁོར་འདི་ལུང་བསྟན་ཐོས་འཚལ་ཞིང ། །རྐང་གཉིས་དབང་པོ་བདེ་གཤེགས་ཞལ་དུ་ལྟ། །འཁོར་འདི་ཐམས་ཅད་རྒྱ་ཆེན་ལྡན་པ་སྟེ། །སངས་རྒྱས་དགོངས་ལ་ཞེན་པའི་ཡིད་དང་ལྡན། །རྒྱལ་བས་ལུང་བསྟན་དེ་དག་ཐོས་འཚལ་ཏེ། །ཀུན་ཀྱང་བདེ་གཤེགས་ཞལ་དུ་ལྟ་ཞིང་སྡོད། །དེ་ལ་རྒྱལ་བས་ཐུགས་རྗེ་ཆེ་བསྐྱེད་ཅིང་།། ཅི་ནས་འཁོར་འདི་རབ་ཏུ་དགའ་འགྱུར་དང ། །སངས་རྒྱས་དགོངས་ལ་བསམ་པ་གཞོག་འགྱུར་བས། །ཡེ་ཤེས་སྟོབས་ཀྱིས་ཐེ་ཚོམ་གཅད་དུ་གསོལ། །མི་ཡི་ཁྱུ་མཆོག་ལུང་བསྟན་དུས་ལ་བབ། །ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །སངས་རྒྱས་སླར་བསྡོའི་དགྲ་ནི་མི་མངའ་ན། །རྟོག་གེའི་ཚོགས་ཀྱི་སྡེ་ནི་གཞིག་ཏུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་འཇིག་རྟེན་སྒྲོན་མཛད་ལ། །འཛུམ་པའི་དོན་དྲིས་དེ་ནི་དུས་དང་ལྡན།། དེ་ལྟར་འཇིག་རྟེན་མཁས་ལ་དྲིས་པས་ན། །དེ་རིང་འགྲོ་བ་འདི་ཡི་དོན་ཆེན་བྱས། །འཇིག་རྟེན་ཕན་ཕྱིར་འཛུམ་པ་འདི་མཛད་པ། །གང་གིས་ཆོས་རབ་འདི་དག་ཤེས་གྱུར་ཏེ། ། ང་ལ་མཆོད་པ་རྒྱ་ཆེན་འདི་བྱས་པའི། །དགའ་ལྡན་ལྷ་ཡི་བསམ་པ་མཁྱེན་ནས་མཛད། །འགྲོ་བ་ཡང་དག་རྟོགས་པ་བཞིན་དུ་མཐོང ། །རྒྱལ་བའི་དགོངས་པས་ཆོས་ཉིད་བརྙེས་
190b
པར་གྱུར། །གང་ལ་འགྲོ་བ་ཐམས་ཅད་རྨོངས་གྱུར་པའི། །རྣམ་པར་ཐར་པའི་སྒོ་གསུམ་རབ་ཏུ་རྟོགས། །སྔོན་གྱི་རྒྱལ་བ་རྣམས་ལ་ལྷག་བྱ་བྱས། །བསམ་པ་གཅིག་གིས་ཞུ་བ་ལེགས་པར་ཞུས། །དེ་ཉིད་དུ་ནི་སྟོང་ཉིད་ལེགས་པར་བསྒོམས། །སྔོན་ཆད་བྱས་པ་དེ་ནི་འདིར་ཡང་བསྟན། །དེ་དག་དེ་བཞིན་གཤེགས་དང་དེང་ཕྲད་ཅིང ། །སྐྱེས་བུ་མཆོག་དང་འགྲོགས་པ་ཐོབ་གྱུར་ནས། །སྟོང་པ་ཉིད་ཀྱིས་འདྲེན་པ་བསྟོད་བྱས་པས། །དེ་རིང་འགྲོ་བའི་དོན་ཆེན་ཤིན་ཏུ་བྱས། །འགྲོ་བ་ཐམས་ཅད་སྐྱེ་མེད་ཇི་བཞིན་དུ། །བྱང་ཆུབ་རྒྱལ་བ་དེ་བཞིན་ལུང་བསྟན་དང ། །གང་དག་ཞི་བ་ཐོབ་ནས་སྤྱོད་པ་དང ། །བྱང་ཆུབ་དེ་བཞིན་དེ་དག་སྐྱེ་བ་མེད། །འགྲོ་བ་ཀུན་གྱི་ཆོས་ཉིད་དེ་འདྲ་བ། །དེ་ཤེས་བྱང་ཆུབ་ཐོབ་པར་འགྱུར་རོ་ཞེས། །ལྷ་རྣམས་གང་ཡང་དེ་ལ་ཐེ་ཚོམ་མེད། །བྱང་ཆུབ་སེམས་ཀྱིས་རྟག་པར་དེ་ལྟར་སྤྱོད། །དེ་བཞིན་འགྲོ་བ་འགག་མེད་ཇི་བཞིན་དུ། །ལྷ་ཚོགས་འདི་དག་རྟོག་པའི་བློ་ལྡན་ཏེ། །མཁས་པ་འདི་དག་ནེམ་ནུར་མེད་པས་ན། །དེ་ཕྱིར་འདི་དག་རྒྱལ་བ་རང་བྱུང་འགྱུར། །གནས་པ་མེད་པ་ལ་ནི་ངེས་གྱུར་ནས། །གཡོ་བ་མེད་པ་དེ་ལ་ནེམ་ནུར་མེད། །འགྲོ་བ་ཀུན་ལ་སེམས་པ་ཡོད་མིན་པ། །དེ་ལའང་ལྷ་རྣམས་ཐེ་ཚོམ་ཡོད་མེད་དོ། །ཆོས་རྣམས་ངོ་བོ་ཉིད་ཀྱིས་རང་བཞིན་མེད། །བྱང་ཆུབ་སེམས་དང་དེ་བཞིན་བྱང་ཆུབ་ཀྱང ། །ཐམས་ཅད་ངོ་བོ་ཉིད་ཀྱིས་རང་བཞིན་མེད། །དེ་ལའང་ལྷ་རྣམས་
191a
༄#། །ཐེ་ཚོམ་རྣམ་པར་དག་།བློ་མཆོག་ལྡན་པའི་དགའ་ལྡན་ལྷ་འདི་རྣམས། །ཀུན་ཀྱང་གནས་མེད་དེ་ལ་རབ་གནས་ཏེ། །དེ་ཕྱིར་ལྷ་རྣམས་བྱང་ཆུབ་རྙེད་མི་དཀའ། །རང་བྱུང་ཉིད་ནི་མྱུར་དུ་ཐོབ་པར་འགྱུར། །འདྲེན་པ་སྐར་མ་འདྲ་བའི་བསྐལ་པ་ལ། །འགྲོ་བ་མཐའ་ཡས་རྣམ་པར་འགྲོལ་བར་འགྱུར། །རྒྱལ་བ་དེ་དག་མཚན་དུ་འགྱུར་བ་ནི། །རང་བྱུང་ཆོས་ལ་རྣམ་ངེས་རྒྱལ་པོའོ། །དེ་ལྟར་རྒྱལ་བས་དགའ་ལྡན་ལྷ་རྣམས་ཀྱི། །བསམ་པ་མཁྱེན་ཏེ་འགྲོ་ལ་བསྟན་མཛད་པ། །དེ་ཐོས་ནས་ནི་ལྷར་བཅས་འཇིག་རྟེན་ཡང ། །ཡི་རང་གྱུར་ཅིང་སྟོབས་ཀྱང་ཐོབ་པར་གྱུར། །དགའ་ལྡན་པ་ལུང་བསྟན་པའི་ལེའུ་སྟེ། བཅུ་བདུན་པའོ།། །།དེ་ནས་དེའི་ཚེ་རབ་འཕྲུལ་ལ་སོགས་པ་འཕྲུལ་དགའ་བ་བྱེ་བ་ཕྲག་བདུན་ཅུས་ལྷ་མ་ཡིན་རྣམས་ནས་དགའ་ལྡན་རིས་ཀྱི་བར་གྱི་ལྷ་དེ་དག་གི་མཆོད་པ་ཡང་མཐོང ། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་ཡང་དག་པའི་མཐའ་ལ་གནས་ཤིང ། དེ་བཞིན་ཉིད་ལ་ཐེ་ཚོམ་མེད་པར་གྱུར་ནས་སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་
191b
འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པའི་དོན་བདག་ཅག་གིས་འཚལ་བ་ལྟར་ན། ཆོས་ཐམས་ཅད་ནི། ཡང་དག་པའི་མཐའ་དང ། སྒྲིབ་པ་མ་མཆིས་པའི་མཐའ་དང ། མཐའ་ཡས་པའི་མཐའ་དང ། མི་གནས་པའི་མཐའ་དང ། མི་ཟད་པའི་མཐའ་དང ། མི་གཉིས་པའི་མཐའ་སྟེ། མཐའ་མ་མཆིས་པའོ། །བཅོམ་ལྡན་འདས། དེ་ལ་མ་ནོར་བའི་སླད་དུ་ཡང་དག་པའི་མཐའ་ཞེས་བགྱིའོ། །ཚད་མ་མཆིས་པའི་སླད་དུ་མཐའ་ཡས་པའི་མཐའ་ཞེས་བགྱིའོ། །ཆགས་པ་མ་མཆིས་པའི་སླད་དུ་སྒྲིབ་པ་མ་མཆིས་པའི་མཐའ་ཞེས་བགྱིའོ། །ངོ་བོ་ཉིད་མ་མཆིས་པའི་སླད་དུ་མི་གནས་པའི་མཐའ་ཞེས་བགྱིའོ། །འབྱུང་བ་མ་མཆིས་པའི་སླད་དུ་མི་ཟད་པའི་མཐའ་ཞེས་བགྱིའོ། །རོ་གཅིག་པའི་སླད་དུ་མི་གཉིས་པའི་མཐའ་ཞེས་བགྱིའོ། །མ་མཆིས་པའི་སླད་དུ་མཐའ་མ་མཆིས་པ་ཞེས་བགྱིའོ། །བཅོམ་ལྡན་འདས། ཡང་དག་པའི་མཐའ་འདི་ནི། ཐམས་ཅད་ཀྱི་རྗེས་སུ་སོང་བ་ལགས་ཏེ།་ཆོས་གང་ཡང་དག་པའི་མཐའ་མ་ལགས་པའི་ཆོས་དེ་གང་ཡང་མ་མཆིས་སོ། །བཅོམ་ལྡན་འདས། །བྱང་ཆུབ་ཅེས་བགྱི་བ་འདི་ནི། ཡང་དག་པའི་མཐའ་སྟེ། བྱང་ཆུབ་གང་ཞེ་ན། བཅོམ་ལྡན་འདས། ཆོས་ཐམས་ཅད་རང་བཞིན་མ་མཆིས་པ་ནི། བྱང་ཆུབ་ལགས་པར་རིག་པར་བགྱིའོ། །ཐ་ན་མ་ཚམས་\་ཾཊཥཱཾཥ?\་མེད་པ་རྣམས་ཀྱང་བྱང་ཆུབ་བོ། །དེ་ཅིའི་
192a
༄#། །སླད་དུ་ཞེ་ན། བཅོམ་ལྡན་འདས། བྱང་ཆུབ་ནི། རང་བཞིན་མ་མཆིས་པ་སྟེ། མཚམས་མེད་པ་རྣམས་ཀྱང་རང་བཞིན་མ་མཆིས་པ་ལགས་པས། དེའི་སླད་དུ་མཚམས་མེད་པ་རྣམས་ཀྱང་བྱང་ཆུབ་ཅེས་བགྱིའོ། །བཅོམ་ལྡན་འདས། ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ནི། རང་བཞིན་མ་མཆིས་པ་སྟེ། མཚམས་མེད་པ་རྣམས་ཀྱང་དེའི་རང་བཞིན་ནོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཐམས་ཅད་ནི། ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ཏེ། མཚམས་མེད་པ་རྣམས་ཀྱང་དེའི་རང་བཞིན་ནོ། །བཅོམ་ལྡན་འདས། གང་སུ་དག་ཡོངས་སུ་མྱ་ངན་ལས་འདས་པར་འཚལ་བ་དེ་དག་ནི། གནོད་པར་འགྱུར་བའི་ཆོས་ཅན་ཏེ། དེ་ཅིའི་སླད་དུ་ཞེ་ན། གལ་ཏེ་འཁོར་བར་ཞུགས་པ་ཞིག་མཆིས་ན་ནི། མྱ་ངན་ལས་འདས་པ་ཡང་འཚལ་བར་འགྱུར་ན། ཡང་དག་པའི་མཐའ་ལ་ནི། འཁོར་བར་ཞུགས་པ་གང་ཡང་མ་མཆིས་ན། དེ་མྱ་ངན་ལས་འདས་པ་ཅི་ཞིག་ཚོལ་བར་འགྱུར། བཅོམ་ལྡན་འདས། ཡང་དག་པའི་མཐའ་ནི། གཉིས་སུ་མ་མཆིས་པ་སྟེ། བཅོམ་ལྡན་འདས། དེ་ལ་བདག་ཅག་སོམ་ཉི་མ་མཆིས། ཐེ་ཚོམ་མ་མཆིས་སོ། །བཅོམ་ལྡན་འདས། །གང་ལ་ལ་ཞིག་ཆོས་འདི་ལ་ནེམ་ནུར་དང ། ཐེ་ཚོམ་མ་མཆིས་ན། དེ་ནི། སྔོན་གྱི་དེ་བཞིན་གཤེགས་པ་
192b
དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འཚལ་བར་བགྱིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ལྷའི་རྒྱལ་པོ་རབ་འཕྲུལ་ལ་སོགས་པ་འཕྲུལ་དགའི་རིས་ཀྱི་ལྷ་བྱེ་བ་ཕྲག་བདུན་ཅུ་པོ་དེ་དག་རང་གིས་རང་ལུང་བསྟན་པ་གསན་ནས་འགྲོ་བ་ཐམས་ཅད་རབ་ཏུ་དགའ་བར་བྱ་བའི་ཕྱིར་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་ཕན་པར་བཞེད་པས་འཛུམ་པ་མཛད། །འཛུམ་པའི་རྒྱུ་ནི་ཁྱོད་ཀྱིས་མ་བསྟན་ཏེ། །རང་བྱུང་སྐྱེས་བུ་དམ་པ་གང་དག་ཀྱང ། །རྒྱུ་མ་མཆིས་པར་འཛུམ་པ་མི་མཛད་པས། །ཁྱོད་ཀྱི་ཞལ་ནས་འཛུམ་པ་དེ་མཛད་པ། །མཐོང་ནས་ལྷར་བཅས་འཇིག་རྟེན་ཐེ་ཚོམ་འཚལ། །འཛུམ་པའི་རྒྱུ་དེ་གང་ལགས་རང་བྱུང་གསུངས། །ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །ཁྱོད་ཀྱིས་འཛུམ་མཛད་རྒྱུ་དེ་ཐོས་གྱུར་ན། །འཁོར་འདི་ཐམས་ཅད་ངོ་མཚར་ཐོབ་པར་འགྱུར། །བྱང་ཆུབ་མཆོག་ནི་ཡོངས་སུ་བསྒྲུབ་སླད་དུ། །དེ་དག་ལམ་མཆོག་ཤིན་ཏུ་རྣམ་དག་འགྱུར། །ཐེ་ཚོམ་འཚལ་བ་དག་ནི་ནམ་དུ་ཡང ། །བྱང་ཆུབ་ཡིད་བཞིན་བདེ་བར་མི་འགྲུབ་སྟེ། །ཐེ་ཚོམ་སོམ་ཉི་བསལ་ནས་མཁས་པ་རྣམས། །བྱང་ཆུབ་མཆོག་གི་རྒྱུ་དང་སྐལ་ལྡན་འགྱུར། །རྐང་གཉིས་དབང་པོ་ཁྱོད་ཀྱི་འཁོར་འདི་དག་།སྡིག་པ་ཡོངས་
193a
༄#། །སྤངས་བྱང་ཆུབ་སེམས་དང་ལྡན། །ལྷ་རྣམས་ལུང་བསྟན་དེ་དག་ཐོས་གྱུར་ན། །རྒྱལ་བའི་གོ་འཕང་རྒྱ་ཆེན་ཐོབ་པར་འགྱུར། །དེ་བས་རྒྱལ་བ་ཐུགས་རྗེ་ཆེ་བསྐྱེད་ཅིང ། །ཐེ་ཚོམ་འཚལ་བ་རྣམས་ལ་ཐུགས་བརྩེ་བས། །ལྷ་ཚོགས་འདི་དག་ཐམས་ཅད་ལུང་བསྟན་ཅིང ། །འགྲོ་བ་འདི་དག་ཐམས་ཅད་དགའ་བར་མཛོད། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ངས་ནི་འཇིག་རྟེན་ཕན་ཕྱིར་འཛུམ་པ་མཛད། །རྟ་ཐུལ་ཁྱོད་ཀྱིས་ཞུ་བ་དེ་ཞུས་པ། །ལུང་བསྟན་དེ་ནི་ཁྱོད་ལ་མ་ལུས་པར། །བསྟན་པར་ངས་བྱའི་དང་བས་ཀུན་ཀྱང་ཉོན། །འཕྲུལ་དགའི་རིས་ཀྱི་ལྷ་ཚོགས་འདི་རྣམས་ཀྱིས། །ཐམས་ཅད་མཁྱེན་པར་བདག་ཅག་ལུང་བསྟན་ཏེ། །མུ་སྟེགས་ཚོགས་ཀྱི་བསམ་པ་ཟིལ་མནན་ནས། །འཁོར་འདིར་སེངྒེའི་ང་རོ་ཆེན་པོ་བསྒྲགས། །གནམ་དུ་རྡོ་འཕངས་ས་ལ་ལྷུང་བ་ལྟར། །དེ་ལ་ཐེ་ཚོམ་ཟ་བར་མི་འགྱུར་ཏེ། །དེ་ལྟར་ཐེ་ཚོམ་མེད་པའི་ཚུལ་ཐོབ་པ། །བདག་ཅག་ཉིད་ནི་སྟོབས་བཅུར་འགྱུར་བར་ཤེས། །ཉི་མ་ནུབ་གྱུར་ནམ་སྲོས་གྱུར་པའི་ཚེ། །མི་རྣམས་ཟླ་བ་མྱུར་དུ་འཆར་བར་ཤེས། །དེ་བཞིན་རྒྱལ་བའི་སྲས་པོ་ཚུལ་ཐོབ་དག་།བདག་ཅག་ཉིད་ནི་སྟོབས་བཅུར་འགྱུར་བར་ཤེས། །སྐར་ཚོགས་དབུས་ན་ཟླ་བ་གནས་པ་ནི། །སེམས་ཅན་མཚུངས་
193b
པར་འདི་ལ་ཐེ་ཚོམ་མེད། །དེ་བཞིན་རྒྱལ་བའི་སྲས་པོ་ཚུལ་ཐོབ་དག་།བདག་ཅག་ཐམས་ཅད་མཁྱེན་དུ་འགྱུར་བར་ཤེས། །ཇི་ལྟར་ཉི་མ་ནུབ་པར་གྱུར་པའི་ཚེ། །ཉི་མ་མི་མཐོང་སེམས་ཅན་དེ་དག་ཤེས། །དེ་བཞིན་བདེ་གཤེགས་སྲས་པོ་ཚུལ་ཤེས་པ། །ཡེ་ཤེས་དམ་པ་ཐོབ་པར་འགྱུར་དུ་ཤེས། །ཆུ་ཀླུང་ཇི་ལྟར་གཞོལ་བར་འབབ་འགྱུར་ཞིང ། །རྒྱ་མཚོར་འབབ་པར་མཁས་པ་རྣམས་ཀྱིས་ཤེས། །དེ་བཞིན་བདེ་གཤེགས་སྲས་པོ་ཚུལ་ཤེས་པ། །བྱང་ཆུབ་རྒྱ་ཆེན་ཐོབ་པར་འགྱུར་བར་ཤེས། །ཇི་ལྟར་གནམ་དུ་བོང་བ་འཕངས་པ་ནི། །ས་ལ་ལྟུང་བར་འགྱུར་དུ་ཐེ་ཚོམ་མེད། །དེ་བཞིན་རྒྱལ་སྲས་མཁས་པ་དེ་དག་ཀྱང ། །འཇིག་རྟེན་མཁས་པར་མྱུར་འགྱུར་ཡེ་ཤེས་འཇུག་།གང་ཐོས་ནས་ནི་ཐེ་ཚོམ་མེད་འགྱུར་ཞིང ། །སངས་རྒྱས་ཡོན་ཏན་གནས་པར་བདག་ཤེས་ལ། །རང་གི་སར་ཉེ་ལག་སྟོང་མ་ཡིན་པར། །མཁས་པ་རྣམས་ཀྱིས་ཆོས་ཉིད་རབ་ཏུ་མཐོང ། །གལ་ཏེ་བདུད་ཀྱི་ཚོགས་ནི་བྱེ་བ་དག་།སངས་རྒྱས་གཟུགས་བསྒྱུར་བར་ཆད་སྨྲ་བྱས་ཀྱང ། །ཆོས་ལ་མཁས་པ་ཆོས་ཉིད་རབ་མཐོང་བ། །དེ་དག་བྱང་ཆུབ་ལས་ནི་བཟློག་མི་ནུས། །དེ་ལྟར་སངས་རྒྱས་ཡོན་ཏན་རབ་གནས་ཤིང ། །བདག་གིས་བདག་ཉིད་ལུང་བསྟན་རྗོད་བྱེད་པ། །དེ་ལ་འདྲེན་པ་ཆོག་ཚུལ་མཁྱེན་པ། །མི་དབང་ལུང་བསྟན་དེ་ལ་ཡི་རང་མཛད། །དེ་ལྟར་ལྷ་ཚོགས་འདི་དག་ཚུལ་འདི་ལ། །གཞན་གྱི་དྲིང་ལ་མི་
194a
༄#། །འཇོག་མངོན་ཤེས་ཤིང ། །དེ་བས་བདེ་གཤེགས་འགྱུར་ཞེས་རང་སྨྲ་ལ། །འཇིག་རྟེན་མཁས་པ་རྗེས་སུ་ཡི་རང་མཛད། །རྟ་ཐུལ་དེ་བས་མཁས་པ་གང་གི་རྣམས། །བླ་མེད་བྱང་ཆུབ་ཐོབ་པར་བྱར་སེམས་པ། །དེ་དག་ཚུལ་འདི་ཤེས་པར་གང་གྱུར་བའི། །འཕགས་པའི་སྐྱེ་བོ་མཁས་ལ་བསྟེན་པར་བྱ། །གང་དག་ཚུལ་ལ་འཇུག་པར་རབ་མཐོང་ཞིང ། །མཁས་པ་གང་དག་བདེ་གཤེགས་བསྙེན་བཀུར་བ། །དེ་དག་བྱང་ཆུབ་ལག་མཐིལ་འདྲ་བར་གསལ། །ཚུལ་ཤེས་དེ་དག་རང་གིས་རང་འབྱུང་འགྱུར། །གང་གིས་བསྐལ་པ་སྟོང་དུ་དཀའ་ཐུབ་སྤྱད། །ཤ་ཁྲག་པགས་ལ་མི་ལྟ་བྱས་པ་བས། །གང་གིས་ཚུལ་འདི་སྐད་ཅིག་རྟོགས་གྱུར་ན། །དེ་ནི་ཁྱད་འཕགས་དཀའ་ཐུབ་དེ་ལྟ་མིན། །འདས་པའི་རང་བྱུང་གང་རྣམས་བྱུང་བ་དང ། །མ་འོངས་སེམས་ཅན་ཕན་བཞེད་གང་འབྱུང་དང ། །ད་ལྟར་དུས་ན་འདྲེན་པ་གང་བཞུགས་པ། །ཀུན་ཀྱང་ཚུལ་གྱིས་བདེ་བར་གཤེགས་པ་ཐོབ། །རབ་འཕྲུལ་ལྷ་ཚོགས་ཐུབ་པའི་ཚུལ་ཤེས་པ། །འདི་དག་ང་ལ་མཆོད་པ་མཆོག་བྱས་ཤིང ། །འདྲེན་པ་ཐམས་ཅད་བསྙེན་བཀུར་རབ་བྱས་ནས། །ཚུལ་གྱིས་སུ་ནི་རང་བྱུང་ཐོབ་པར་འགྱུར། །འཇིག་རྟེན་མཁས་པའི་ཏིང་ངེ་འཛིན་གང་ཡིན་པ། །དེ་ཡིས་རྒྱལ་བ་རང་བྱུང་གནས་པའི་རྣམས། །དེ་དག་ཐམས་ཅད་རྒྱལ་བའི་སྤྱོད་ཡུལ་པ། །ཚུལ་ཐོབ་རྣམས་ཀྱིས་སྔོན་
194b
བསྟེན་མྱུར་དུ་ཐོབ། །དེ་ལ་རྟ་ཐུལ་སངས་རྒྱས་སྲས་རྣམས་ནི། །སངས་རྒྱས་གནས་པ་དེ་ལ་ནེམ་ནུར་མེད། །སངས་རྒྱས་ཚུལ་ལ་སེམས་ཅན་རྣམས་རྩེ་བ། །ཚུལ་ཤེས་པ་དག་སྟོན་པའི་ལམ་ལ་སྤྱོད། །དེ་ལྟར་ཚུལ་ལ་དང་བའི་ཡིད་བྱས་ཏེ། །བརྩམ་པར་བྱ་ཡི་སྡུག་བསྔལ་སྤྱོད་ལ་མིན། །རྟག་ཏུ་དགེ་བཤེས་མཁས་པ་བསྟེན་བྱས་ན། །བླ་མེད་བྱང་ཆུབ་མྱུར་དུ་ཐོབ་པར་འགྱུར།། བདེ་བར་གཤེགས་པའི་གསུང་མཆོག་ཐོས་ནས་ནི། །འཁོར་ཀུན་རྒྱལ་བའི་བྱང་ཆུབ་ཡིད་རངས་ཏེ། །རྗེས་སུ་ཡི་རང་ཐེ་ཚོམ་མེད་གྱུར་ནས། །མཐར་ཕྱིན་བློ་གྲོས་ལ་ནི་ཞུགས་པར་གྱུར། ། འཕྲུལ་དགའ་བ་ལུང་བསྟན་པའི་ལེའུ་སྟེ། བཅོ་བརྒྱད་པའོ།། །།བམ་པོ་བདུན་པ། དེ་ནས་དེའི་ཚེ་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་ཀྱི་རིས་ཀྱི་ལྷ་ཁྲག་ཁྲིག་ཕྲག་བརྒྱད་ཅུས་ལྷ་མ་ཡིན་རྣམས་ནས་འཕྲུལ་དགའི་ལྷའི་བར་དག་གི་མཆོད་པ་ཡང་མཐོང ། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཕྲུལ་དགའི་ལྷ་རྣམས་ཀྱིས་ཡང་དག་པའི་མཐའ་ཞེས་གང་སྨྲས་པ་དེ་ལ་བདག་ཅག་གིས་ནི། ཡང་དག་པ་ཡང་མ་དམིགས་ན། དེའི་མཐའ་ལྟ་སྨོས་ཀྱང་ཅི་འཚལ། །དེ་ཅིའི་སླད་དུ་ཞེ་ན། བཅོམ་ལྡན་འདས། གང་ལ་ལ་ཞིག་གིས་ཡང་དག་པ་
195a
༄#། །དམིགས་ན་ནི། མཐའ་ཡང་དེས་དམིགས་པར་འགྱུར་ཏེ། དེ་ནི། གཉིས་ཀྱིས་སྤྱོད་པའོ། །དེ་ལྟ་བུ་དེ་ནི། ཐེག་པ་ལ་ཡང་དག་པར་ཞུགས་པའི་རིགས་ཀྱི་བུ་དང ། རིགས་ཀྱི་བུ་མོ་རྣམས་ཀྱི་སྤྱོད་ཡུལ་མ་ལགས་སོ། །བཅོམ་ལྡན་འདས། གང་ལ་ལ་ཞིག་གཉིས་སུ་མ་མཆིས་པའི་ཆོས་རྣམས་ལ་ཆོས་རྣམས་ནི། གཉིས་སུ་མེད་དོ། །ཞེས་མི་སྤྱོད་མ་མོས་ན། དེ་འདི་སྙམ་དུ་བདག་གིས་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ། །སྙམ་དུ་སེམས་སུ་ལགས་ཀྱང་དེ་ནི། ལམ་ལོག་པར་ཞུགས་པར་འཚལ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། གང་འདི་བྱང་ཆུབ་ཏུ་སྨོན་པ་དེ་ནི། ལམ་ལོག་པར་ཞུགས་པ་ལགས་ཏེ། བཅོམ་ལྡན་འདས། གང་མངོན་པར་རྫོགས་པར་འཚང་རྒྱ་བར་བགྱི་བའི་ཆོས་དེ་གང་ཡང་མ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་འགའ་ཞིག་དམིགས་པར་གྱུར་ན། བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ། །བཅོམ་ལྡན་འདས། ཆོས་ནི། འདས་པ་མ་ལགས། མ་འོངས་པ་ལགས། ད་ལྟར་བྱུང་བ་མ་ལགས། འདུས་བྱས་མ་ལགས།་འདུས་མ་བྱས་མ་ལགས། དངོས་པོ་མ་ལགས། དངོས་པོ་མ་མཆིས་པ་མ་ལགས། མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས།
195b
སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་སོ། །བཅོམ་ལྡན་འདས། བྱང་ཆུབ་ཅེས་བགྱི་བ་དེ་ཡང་ཆོས་གང་གི་གཉེན་པོ་ཡང་མ་ལགས་ལ།་ཆོས་གང་ཡང་ཆོས་དེའི་གཉེན་པོ་མ་ལགས་སོ། །དེ་ཅིའི་སླད་དུ་ཞེ་ན། ཆོས་དེ་ནི། ཀུན་ནས་ཉོན་མོངས་པ་མ་ལགས། རྣམ་པར་བྱང་བ་མ་ལགས་ཏེ། གང་གིས་ཆོས་གཞན་གྱི་གཉེན་པོར་གྱུར་པའི་ཆོས་དེ་ཡང་རང་བཞིན་གྱིས་མི་དམིགས་ལ། གང་ཆོས་དེའི་གཉེན་པོར་གྱུར་པའི་ཆོས་གཞན་དེ་གང་ཡང་རང་བཞིན་གྱིས་མི་དམིགས་སོ། །དེ་ཅིའི་སླད་དུ་ཞེ་ན།་བཅོམ་ལྡན་འདས། ཆོས་ཐམས་ཅད་ནི། མཚན་མ་དང་བྲལ་བ་སྟེ། དེ་དག་ནི། མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས། སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་ཏེ། བཅོམ་ལྡན་འདས། གཟུགས་ནི། གཟུགས་ཀྱི་མཚན་མ་དང་བྲལ་བའོ། །ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ནི། རྣམ་པར་ཤེས་པའི་མཚན་མ་དང་བྲལ་བའོ། །གཟུགས་ཀྱི་སྐྱེ་བའི་མཚན་མ་ནས་རྣམ་པར་ཤེས་པའི་བར་གྱི་སྐྱེ་བ་གང་ལགས་པ་དེ་ཡང་སྐྱེ་བའི་མཚན་མ་དང་བྲལ་བའོ། །གཟུགས་ཀྱི་འགག་པ་ནས་རྣམ་པར་ཤེས་པའི་བར་གྱི་འགག་པ་གང་ལགས་པ་དེ་ཡང་འགག་པའི་མཚན་མ་དང་བྲལ་བའོ། །བཅོམ་ལྡན་
196a
༄#། །འདས།་འདས་པ་དང ། མ་འོངས་པ་དང ། ད་ལྟར་བྱུང་བ་ཡང་འདས་པ་དང ། མ་འོངས་པ་དང ། ད་ལྟར་བྱུང་བ་དང་བྲལ་བའོ། །འདུས་བྱས་ཀྱང་འདུས་བྱས་ཀྱི་མཚན་མ་དང་བྲལ་བའོ། །འདུས་མ་བྱས་ཀྱང་འདུས་མ་བྱས་ཀྱི་མཚན་མ་དང་བྲལ་བའོ། །བཅོམ་ལྡན་འདས། དེ་ལྟར་ཇི་ཙམ་དུ་ཕུང་པོས་བཟུང་བའམ། སྐྱེ་བ་དང་འགག་པས་བཟུང་བའམ། འདས་པས་བཟུང་བའམ། མ་འོངས་པས་བཟུང་བའམ། ད་ལྟར་བྱུང་བས་བཟུང་བའམ། འདུས་བྱས་ཀྱི་བཟུང་བའམ། འདུས་མ་བྱས་ཀྱིས་བཟུང་བ་དེ་དག་ནི། རྣམ་པ་ཐམས་ཅད་དུ་མི་དམིགས་ཏེ། དེ་ལྟར་མི་དམིགས་པ་དེ་ནི། མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས།་སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་ཏེ། བཅོམ་ལྡན་འདས། གང་དག་དེ་ལྟར་ཞུགས་པའི་རིགས་ཀྱི་བུ་དང ། རིགས་ཀྱི་བུ་མོ་དེ་དག་ནི། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཞེས་བགྱིའོ། །དེ་ནས་གཞན་འཕྲུལ་དབང་བྱེད་རིས་ཀྱི་ལྷ་དེ་དག་གིས་ཇི་ལྟར་ཤེས་པའི་ཆོས་དེ་ལྟར་ལུང་བསྟན་ནས་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བཅོམ་ལྡན་སྲིད་པ་མཐར་ཕྱིན་ལེགས་པར་གསུངས། །
196b
འདྲེན་པས་སྲིད་པའི་སྙིང་པོ་མ་བརྙེས་ན། །སྐྱེ་བོ་མི་མཁས་དེ་དག་འཇིགས་པ་ཡིས། །འཁོར་བའི་ཕ་རོལ་བགྲོད་ཕྱིར་རབ་ཏུ་ཞུགས། །ཕུང་པོ་རྣམས་ནི་ཀུན་ཏུ་མི་དམིགས་ཏེ། །ཕུང་པོའི་མཚན་མས་ཕུང་པོ་སྟོང་པ་ཉིད། །ཆོས་གང་གང་གི་གཉེན་པོར་འགྱུར་བ་ནི། །མཚན་མས་སྟོང་སྟེ་གང་ཡང་མ་མཆིས་སོ། །ངོ་བོ་ཉིད་ཀྱིས་སྟོང་ཕྱིར་དངོས་པོ་གང ། །ཡོངས་ཤེས་བྱ་དང་སྤང་བསྒོམ་མངོན་བྱ་བ། །གང་ཡང་མ་མཆིས་གང་དུའང་མི་དམིགས་ཏེ། །དངོས་པོ་རྣམས་ནི་དངོས་མེད་རང་བྱུང་གསུང ། །བྱང་ཆུབ་གང་ཡང་མཚན་མར་མི་དམིགས་ཏེ། །བྱང་ཆུབ་ཕྱོགས་ཀྱི་ཆོས་རྣམས་དེ་བཞིན་ནོ། །སངས་རྒྱས་གང་ཡང་མཚན་མར་མི་དམིགས་ཏེ། །བྱང་ཆུབ་སེམས་དཔའ་མཚན་མས་རྟོགས་མི་འགྱུར། །མི་མཁས་གང་དག་མཚན་མར་མངོན་ཞེན་པ། །དེ་དག་བྱང་ཆུབ་འཚང་རྒྱར་སེམས་བསྐྱེད་ཀྱང ། །མཚན་མར་སྤྱོད་ཅིང་སྤྱོད་ཡུལ་ལག་པ་སྟེ། །བློ་གྲོས་ངན་པས་བྱང་ཆུབ་ལམ་མི་སྤྱོད། ། མཚན་མ་སུས་སྤངས་སངས་རྒྱས་སྤྱོད་ཡུལ་ལ། །སྤྱོད་པ་དེ་དག་སངས་རྒྱས་བསྟན་ལ་མཁས། །མཚན་མ་དེ་བཞིན་མཚན་མ་མེད་སྤངས་ཏེ། །སྟོང་དང་མི་སྟོང་དེ་བཞིན་དམིགས་མེད་པ། །མཁས་པ་དེ་དག་བྱང་ཆུབ་ལམ་ལ་སྤྱོད། །དེ་དག་བྱང་ཆུབ་དམ་པ་ཞི་བ་འཐོབ། །ཕས་ཀྱི་རྒོལ་བ་ཀུན་གྱི་སྤྱོད་ཡུལ་མིན། །གནས་དེ་ཉན་ཐོས་རྣམས་ཀྱིས་བགྲོད་བྱ་མིན།།
197a
༄#། །རང་རྒྱལ་རྣམས་ཀྱང་དེ་ལ་མི་འགྲོ་སྟེ། །རྣམ་གྲོལ་སེམས་ལྡན་ཟག་མེད་ཐ་བ་མེད། །དགྲ་བཅོམ་བསྟན་པ་འདི་ལ་གང་བརྩོན་དང ། །དེ་བཞིན་རང་རྒྱལ་སྐྱོབ་པར་གྱུར་པ་དག་།མཁས་པའི་སྤྱོད་ཡུལ་དེ་ལ་སྤྱོད་ཡུལ་མེད། །གོ་འཕང་དེ་ནི་མཚན་མ་སྤྱོད་པ་དང ། །ཉི་ཚེའི་སྟོང་པ་ཉིད་ལ་སྒོམ་པ་དང ། །གང་རྣམས་སྟོང་པས་སྟོང་ཞེས་སྟོང་སྨྲ་དང ། །ཆོས་ཀུན་རང་བཞིན་ཡོད་སྨྲས་འཐོབ་མི་ནུས། །སངས་རྒྱས་མ་སྨད་རྣམས་ཀྱི་བསླབ་པ་ལ། །སློབ་དང་རྣམ་བྲལ་སློབ་པ་སློབ་པའི་རྣམས། །མཁས་ཏེ་རྟོགས་པ་མེད་པས་བྱང་ཆུབ་རྟོགས། །སྟོན་པས་བསྟན་པ་བཞིན་དུ་དགྱེས་བྱེད་ལགས། །སངས་རྒྱས་རྐང་གཉིས་གཙོ་བོ་བསྟོད་པས་ན། །བདག་ཅག་བསོད་ནམས་མི་ཆུང་གང་ཐོབ་དེས། ། འགྲོ་བ་བྱང་ཆུབ་དམ་པ་འཚང་རྒྱ་ཞིང ། །མི་ཤེས་སྟོན་མཛད་སངས་རྒྱས་གྲུབ་པར་ཤོག་།དེ་ནས་བཅོམ་ལྡན་འདས་ཀྱིས་དེའི་ཚེ་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་ཀྱི་རིས་ཀྱི་ལྷ་ཁྲག་ཁྲིག་བརྒྱད་ཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་སྐྱེ་བོ་ཕལ་པོ་ཆེ་དེ་དག་གི་དགེ་བའི་རྩ་བ་བསྐྱེད་པའི་ཕྱིར་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། གཞན་འཕྲུལ་དབང་བྱེད་ལྷ་ཡི་བསམ་མཁྱེན་ནས། །རྐང་གཉིས་གཙོ་བོ་ཁྱོད་
197b
ཀྱིས་འཛུམ་མཛད་ལ། །ཐུབ་པས་འཛུམ་པའི་རྒྱུ་ནི་མ་གསུངས་ན། །རྒྱལ་བ་འཛུམ་པའི་རྒྱུ་ནི་བསྟན་དུ་གསོལ། །འདྲེན་པ་རྒྱུ་མེད་འཛུམ་པ་མི་མཛད་ཅེས། །རྒྱལ་བ་ཁྱུ་མཆོག་དམ་པས་དེ་སྐད་གསུངས། །འཇིག་རྟེན་དོན་སླད་འཛུམ་པ་མཛད་པའི་རྒྱུ། །འདྲེན་པ་བཀའ་སྩོལ་ཐེ་ཚོམ་བསལ་དུ་གསོལ། །དྲང་སྲོང་ཆེན་པོའི་ཞལ་ནས་འཛུམ་རིག་ནས། །ཐུབ་ཆེན་ཁྱོད་ནི་འཁོར་རྣམས་ཐེ་ཚོམ་འཚལ། །གཽ་ཏམ་རྒྱལ་བ་འདྲེན་པས་དེ་དག་ལ། །འཇིག་རྟེན་སྨན་སླད་འཛུམ་རྒྱུ་ལུང་བསྟན་གསོལ། །འདི་དག་འཁོར་བའི་རྒྱུད་ལ་རྒྱབ་ཕྱོགས་ཏེ།། མྱ་ངན་འདས་པའི་སེམས་ཀྱིས་ཐལ་སྦྱར་སྡོད། །འཁོར་འདི་ཡངས་པའི་སེམས་ལྡན་ཐེ་ཚོམ་འཚལ། །དོན་ཡོད་གྲགས་མངའ་སོམ་ཉི་བསལ་དུ་གསོལ། །བདེ་གཤེགས་བསྟན་ལ་ཐེ་ཚོམ་མ་མཆིས་ཏེ། །ཕྱིར་ཞིང་དད་བསྐྱེད་རིམ་གྲོར་ཆེར་བགྱིད་དེ། །ཐེ་ཚོམ་མི་འཚལ་སེམས་ནི་གྲོལ་འགྱུར་བར། །རྒྱལ་བས་སྐྱེ་བོའི་ཐེ་ཚོམ་ལེགས་པར་ཁུམ། །བདེ་གཤེགས་བསྟན་ལ་འདི་དག་བདེར་གནས་ཤིང ། །གང་ལམ་རང་བྱུང་རྒྱལ་བ་གཤེགས་གྱུར་པ། །ལམ་དེ་ནས་ནི་ཐེ་ཚོམ་མ་མཆིས་མཆི། །དེ་བས་སྐྱེ་བོའི་ཐེ་ཚོམ་གཅད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ཚིགས་སུ་བཅད་དེ་སླར་བཀའ་སྩལ་པ། སྐྱེ་བོ་ཚོགས་ཆེན་དོན་དབང་བརྟེན་བྱས་ནས། །ཚིགས་སུ་བཅད་དེ་དུས་སུ་
198a
༄#། །གང་སྨྲས་ཤིང ། །འཛུམ་པའི་དོན་གྱི་རྒྱུ་ནི་ཡོངས་ཞུས་པ། །ཁྱོད་ཀྱི་ཚིག་ནི་དུས་དང་ལྡན་པ་ཡིན། །རྟ་ཐུལ་དྲི་བ་དེ་ཡི་དོན་དྲིས་པས། །སྐྱེ་བོ་ཚོགས་ཆེན་འདི་ཡི་དོན་བྱས་གྱུར། །ཁྱོད་ཀྱིས་དེ་དྲིས་སྐྱེ་བོ་ཚོགས་ཆེན་དོན། །བྱང་ཆུབ་མཆོག་ཏུ་ཡང་དག་ཞུགས་པར་འགྱུར། །གཞན་འཕྲུལ་དབང་བྱེད་བསམ་པ་ངས་མཁྱེན་ཏེ། །རྟ་ཐུལ་འཛུམ་པ་དེ་ནི་ངས་བསྟན་ཏོ། །འཇིག་རྟེན་མཁྱེན་པས་བསྟན་པའི་ལམ་དེ་ནས། །དོན་དུ་གཉེར་བ་འདི་དག་དེ་བཞིན་འདོང ། །གང་གིས་འགྲོ་བ་འདི་དག་མཚན་མེད་པར། །སྨིག་རྒྱུ་ལ་ནི་ཇི་ལྟར་ཆུ་བཞིན་མཐོང ། །བྱིས་པ་རྨོངས་པ་མཁས་པའི་ཚུལ་བཞིན་ཏེ། །དེ་དག་རྗེས་སུ་བྱང་ཆུབ་འདོད་པས་བསླབ། །མཚན་མའི་འདུ་ཤེས་སྤང་ཕྱིར་མི་རྣམས་གང ། །རྟག་ཏུ་མཚན་མ་མངོན་དགའ་འཇིག་འགྱུར་ཞིང ། །མཚན་མའི་འདུ་ཤེས་ལོག་པའི་ལམ་དུ་འདོང ། །མཚན་མ་མེད་པས་བྱང་ཆུབ་མཆོག་ཐོབ་འགྱུར། །མེད་པའི་རྟོག་ལྡན་མཚན་མར་རྣམ་བརྟགས་ནས། །ཇི་ལྟར་བརྟགས་པ་དེ་ལྟར་འཆིང་བ་ཡིན། །མཚན་མ་སྟོང་པར་རྣམ་མཐོང་མཁས་པ་ཡི། །ཞི་བ་དག་ནི་གྲགས་ལྡན་དམ་པ་འཐོབ། །འདུ་ཤེས་མཚན་ཅན་མི་མཉམ་སེམས་རྒྱུད་ཀྱིས། །སྡིག་པ་བརྒྱ་དག་མི་མཁས་དེ་དག་བྱེད། །འགྲོ་བ་ཀུན་ཏུ་སྡུག་བསྔལ་མི་ཆུང་མྱོང ། །དེ་ལྟར་
198b
མི་མཁས་མཚན་མར་བརྟག་པ་བྱས། །མཚན་མར་འདུ་ཤེས་པ་ནི་ཕུང་པོ་དང ། །སངས་རྒྱས་བྱང་ཆུབ་བྱང་ཆུབ་སེམས་དཔའ་འཐོབ། །དེ་ལྟར་མཚན་མ་མེད་ཅིང་སྟོང་མཐོང་ན། །བྱང་ཆུབ་གཞལ་མེད་བླ་ན་མེད་པ་འཐོབ། །འདུ་ཤེས་མཚན་མ་ཅན་ལ་ཉོན་མོངས་འཕེལ། །མཚན་མ་མེད་པ་ཀུན་ཏུ་སྦྱོར་བ་སྤོང ། །མཚན་མ་ལས་ནི་ཀུན་སྦྱོར་གཞན་མེད་དེ། །ཀུན་ཏུ་སྦྱོར་བ་དེ་ཉིད་མཚན་མེད་ཡིན། །གང་རྣམས་བྱང་ཆུབ་འཐོབ་པར་བྱ་རྟོག་པ། །རྟོག་པ་དེ་ཉིད་མི་མཁས་པར་ཆད་ཡིན། །མཁས་པའི་ལོངས་སྤྱོད་རྣམ་པར་ཐོབ་བྱེད་ན། །ལོངས་སྤྱོད་དེ་ཉིད་མཚན་མ་མེད་པར་འགྱུར། །ཆོས་རྣམས་གང་ཡང་རང་བཞིན་ཉིད་ཀྱིས་མེད། །རྣམ་པར་རྟོགས་པས་ཆོས་འབྱུང་ཀུན་ཀྱང་སྟོང ། །རྟོག་པ་མེད་པས་མཚན་མ་མེད་པར་འགྱུར། །དེ་ཉིད་བྱང་ཆུབ་གཞན་དུ་མཁས་མི་སྨྲ། །རྒྱལ་བས་གསུངས་པ་དེ་དག་ཐོས་གྱུར་ནས། །མི་འཇིགས་ལྡན་པའི་འཁོར་ནི་ཐེ་ཚོམ་བསལ། །དཔེར་ན་ཙམ་པའི་ཕྲེང་བ་འཛིན་པ་ལྟར། །མཁས་རྣམས་ཐུབ་པས་གསུངས་ལ་ལེགས་ཞེས་འཛིན། །འཇིགས་པ་མེད་པའི་ལྷ་ཚོགས་འདི་དག་གིས། །མཆོད་པ་འཕགས་པ་བླ་ན་མེད་བྱས་ཤིང ། །རྒྱལ་བའི་སྤྱོད་ཡུལ་ཆོས་ཀྱང་རྣམ་ཤེས་ནས། །འགྲོ་བ་རྣམ་པར་འདྲེན་པ་ཀུན་མཁྱེན་འགྱུར། །གཞན་འཕྲུལ་དབང་བྱེད་པ་ལུང་བསྟན་པའི་ལེའུ་སྟེ། བཅུ་དགུ་པའོ།། །།དེ་ནས་ཚངས་རིས་ཀྱི་ལྷ་བྱེ་བ་ཕྲག་
199a
༄#། །དྲུག་ཅུས་ལྷ་མ་ཡིན་རྣམས་ནས་གཞན་འཕྲུལ་དབང་བྱེད་རིས་ཀྱི་ལྷའི་བར་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་སྔོན་དགེ་བའི་རྩ་བ་བསགས་པ་དང ། སྔོན་གྱི་རྒྱལ་བ་ལ་བསྙེན་བཀུར་བྱས་པ་དང ། བསམ་པ་ཡོངས་སུ་དག་པའི་ཕྱིར་འཇིག་རྟེན་པའི་བསམ་གཏན་ལ་མི་འདོད་པ་སྐྱེས་ཤིང ། དེ་བཞིན་གཤེགས་པའི་བསྟན་པ་འདི་ལ་ནི། སྣང་བ་ཐོབ་སྟེ། ཆོས་ཟབ་མོ་ལ་བཟོད་པ་ཐོབ་པར་གྱུར་ནས་དེ་དག་གིས་ཆོས་ཐམས་ཅད་བྱས་པ་ཡང་མ་ཡིན། མ་བྱས་པ་ཡང་མ་ཡིན་ཞེས་བྱ་བར་ཤེས་པར་གྱུར་ཏོ། །དེ་བཞིན་དུ་སྐྱེས་པ་ཡང་མ་ཡིན། མ་སྐྱེས་པ་ཡང་མ་ཡིན། །བྱུང་བ་ཡང་མ་ཡིན། མ་བྱང་བ་ཡང་མ་ཡིན། གྲུབ་པ་ཡང་མ་ཡིན། མ་གྲུབ་པ་ཡང་མ་ཡིན། འགག་པ་ཡང་མ་ཡིན། མ་འགག་པ་ཡང་མ་ཡིན ། གནས་པ་ཡང་མ་ཡིན། མི་གནས་པ་ཡང་མ་ཡིན། ཀུན་ནས་ཉོན་མོངས་པ་ཡང་མ་ཡིན། རྣམ་པར་བྱང་བ་ཡང་མ་ཡིན། རྗེས་སུ་ཆགས་པ་ཡང་མ་ཡིན། ཁོང་ཁྲོ་བ་ཡང་མ་ཡིན།་རྨོངས་པ་ཡང་མ་ཡིན། མ་རྨོངས་པ་ཡང་མ་ཡིན། ཤེས་པ་པོ་ཡང་མ་ཡིན། ཤེས་པ་པོ་མེད་པ་ཡང་མ་ཡིན། མཐོང་བ་པོ་ཡང་མ་ཡིན། མཐོང་བ་པོ་མེད་པ་
199b
ཡང་མ་ཡིན། ཚོར་བ་པོ་ཡང་མ་ཡིན། ཚོར་བ་པོ་མེད་པ་ཡང་མ་ཡིན། སྟོན་པ་པོ་ཡང་མ་ཡིན། སྟོན་པ་པོ་མེད་པ་ཡང་མ་ཡིན། ཡོད་པ་ཡང་མ་ཡིན། མེད་པ་ཡང་མ་ཡིན། དངོས་པོ་ཡོད་པ་ཡང་མ་ཡིན། དངོས་པོ་མེད་པ་ཡང་མ་ཡིན། དམིགས་པ་ཡང་མ་ཡིན། མི་དམིགས་པ་ཡང་མ་ཡིན། འགྲོ་བ་ཡང་མ་ཡིན། འོང་བ་ཡང་མ་ཡིན། སོང་བ་ཡང་མ་ཡིན། མ་སོང་བ་ཡང་མ་ཡིན། སྟོང་པ་ཡང་མ་ཡིན། མི་སྟོང་པ་ཡང་མ་ཡིན། མཚན་མ་ཡོད་པ་ཡང་མ་ཡིན། མཚན་མ་མེད་པ་ཡང་མ་ཡིན། སྨོན་པ་ཡོད་པ་ཡང་མ་ཡིན། སྨོན་པ་མེད་པ་ཡང་མ་ཡིན་ནོ། །ཞེས་བྱ་བར་ཤེས་པར་གྱུར་ཏོ། །དེ་དག་དེ་ལྟར་ཆོས་ཐམས་ཅད་ལ་ཡང་མི་གནས་པའི་ཡིད་ཀྱིས་དེ་དག་མིང་ལ་མི་གནས། ཐ་སྙད་ལ་ཡང་མི་གནས། བརྗོད་པ་ལ་ཡང་མི་གནས་ཏེ། དེ་དག་ནི། བརྗོད་པའི་འདུ་ཤེས་ཅན་ཡང་མ་ཡིན། བརྗོད་དུ་མེད་པའི་འདུ་ཤེས་ཅན་ཡང་མ་ཡིན། བྱ་བའི་འདུ་ཤེས་ཅན་ཡང་མ་ཡིན། བྱ་བ་མེད་པའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོ་མ་ཡིན་པའི་འདུ་ཤེས་ཅན་ཡང་མ་ཡིན ། སོ་སོའི་སྐྱེ་བོའི་ཆོས་ཀྱི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོ་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་
200a
༄#། །མ་ཡིན་པའི་འདུ་ཤེས་ཅན་ཡང་མ་ཡིན། ཉན་ཐོས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་མ་ཡིན་པའི་འདུ་ཤེས་ཅན་ཡང་མ་ཡིན། རང་སངས་རྒྱས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན།་རང་སངས་རྒྱས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའ་མ་ཡིན་པའི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའི་ཆོས་ཀྱི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའ་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན ། སངས་རྒྱས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་མ་ཡིན་པའི་འདུ་ཤེས་ཅན་ཡང་མ་ཡིན། སངས་རྒྱས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། མྱ་ངན་ལས་འདས་པའི་འདུ་ཤེས་ཅན་ཡང་མ་ཡིན། མྱ་ངན་ལས་འདས་པ་མ་ཡིན་པའི་འདུ་ཤེས་ཅན་ཡང་མ་ཡིན། འཁོར་བའི་འདུ་ཤེས་ཅན་ཡང་མ་ཡིན། འཁོར་བ་མེད་པའི་འདུ་ཤེས་ཅན་ཡང་མ་ཡིན་ཏེ། དེ་ལྟར་ཐམས་ཅད་ཀྱི་ཐམས་ཅད་དུ་རྟོག་པ་མེད་པའི་བློ་ཅན་ནམ་མཁའ་བཞིན་དུ་དག་
200b
ཅིང་གོས་པ་མེད་པར་གྱུར་ནས་དེ་རྣམས་དག་པ་དང་གོས་པ་མེད་པའི་ཕྱིར་དེའི་ཚེ་དེ་དག་ཞི་བས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། ཞི་ལ་ཞི་བའི་ཐུགས་མངའ་ཞི་བ་སྤྱད་ཅིང་ཞི་བའི་ཕ་རོལ་བྱོན། །ཞི་བ་བསྟེན་པར་མཛད་ཅིང་འགྲོ་ལ་ཞི་བ་སྟོན་པ་རྗེས་སུ་སྟོན། །ཞི་བའི་སྤྱོད་ཡུལ་དགྱེས་ཤིང་བྱང་ཆུབ་ཞི་ལ་དྲི་བྲལ་འཁྲུག་མ་མཆིས།། ཁྱོད་ཀྱིས་འཆི་མེད་ཞི་བ་འགྲོ་རྒྱུད་ཐམས་ཅད་ཟད་པ་མྱུར་དུ་བརྙེས། །ཞི་བ་ཐོབ་པར་བགྱིད་པའི་ཞི་བའི་ལམ་མཆོག་ཞི་བ་ཡང་དག་བསྟེན། །ཡན་ལག་བརྒྱད་པས་ཉོན་མོངས་ཀློང་རྣམས་ཞི་མཛད་འགྲོ་བ་ཐམས་ཅད་བཏོན། །སྔོན་གྱི་རྒྱལ་བས་བསྟེན་པའི་བྱང་ཆུབ་གཞལ་ཡས་ཞི་བ་དེ་ལ་འགོད། །དེ་སྟོན་སངས་རྒྱས་འཕགས་པས་བསྟེན་པའི་གྲོང་ཁྱེར་ཞི་བར་དེང་ཞེས་གསུང ། །འདྲེན་པ་དེ་ལྟར་འགྲོ་བ་འདི་ལ་རྒྱལ་བས་བསྟེན་པའི་བསླབ་པ་བསྟན། །གལ་ཏེ་བསླབ་པ་དེ་སློབ་འགྲོ་བ་འདི་དག་བྱང་ཆུབ་གཞལ་ཡས་འཐོབ། །བསླབ་ནས་ཞི་ཞིང་ཡིད་ཞི་ཞི་བའི་ལམ་དོང་དབང་པོ་ཞི་བ་དག་།འཇིག་རྟེན་མཁས་པ་འགྲོ་བ་ཞི་བྱེད་མཐུ་ཆེན་ཞི་བ་ཤེས་པར་འགྱུར། །འདྲེན་པ་ཁྱོད་ཀྱི་སྲས་མཆོག་ཞི་བ་འགྲོ་བ་ཞི་བགྱིད་གང་དག་གིས། །འཆི་མེད་ཞི་བ་མཚན་མ་ཐམས་ཅད་ཟད་པ་རྣམ་པར་རྟོགས་གྱུར་པ། །དེ་དག་འདྲེན་པ་ཚུལ་ལ་མཆོད་པའི་མཆོད་པ་མཆོག་གིས་མཆོད་པར་འགྱུར། །ཉོན་མོངས་ཞི་ཞིང་
201a
༄#། །མཚན་མ་ཀུན་སྤངས་ཞི་བ་རྟག་ཏུ་སྟོན་པར་འགྱུར། །འགྲོ་བ་ཐམས་ཅད་ཞི་ཞིང་མཚན་མ་བྲལ་བ་དེ་ཉིད་མྱ་ངན་འདས། །ཐུབ་པ་གང་དག་ཞི་ལས་ཞི་འདོད་སེམས་པ་དེ་དག་ཉོན་མོངས་འགྱུར། །རྒྱལ་བ་ཁྱོད་ཀྱི་བྱང་ཆུབ་དང་ནི་འགྲོ་ཀུན་ཆོས་ཀུན་བསམ་མི་ཁྱབ། །ཐུབ་པ་བློ་ལྡན་འདམ་ལས་རྒལ་བ་དེ་ལ་བདག་ཅག་དོགས་མ་མཆིས། །གང་དག་ཕུང་པོ་བོར་ཏེ་བྱང་ཆུབ་ཞི་ཚོལ་དེ་ལ་ཞི་བར་རྟོགས། །ཕུང་པོས་འཇིགས་པ་དེ་དག་ཤཱཀྱ་ཐུབ་པའི་བསྟན་ལ་དགའ་མ་ལགས། །དབེན་པའི་བློ་གྲོས་ལྡན་པ་ཞི་ཚོལ་དེ་དག་བློ་འཁྲུགས་གྱུར་པ་སྟེ། །ཆོས་ཀྱི་མཚན་མ་སྤྱོད་ཡུལ་འདི་དག་བྱིས་པ་ཞེས་ནི་སྟོན་པས་གསུངས། །ཐམས་ཅད་མཁྱེན་པས་ཞི་དང་མཚན་མའི་འཆིང་བ་འདི་དག་རབ་ཏུ་གསུངས། །ཐུབ་པ་གང་དག་ཕུང་པོ་རྣམས་ལ་རྣམ་པ་ཀུན་ཏུ་མཚན་མི་རྙེད། །དེ་དག་ཤཱཀྱ་ཐུབ་པའི་བསྟན་པ་མཛེས་བྱེད་གང་དག་མཚན་མེད་དགའ། །དེ་དག་བྱང་ཆུབ་སྐྱོན་བྲལ་ཞི་བ་མཁས་པའི་སྤྱོད་ཡུལ་ཐོབ་པར་འགྱུར། །བདུད་ཀྱི་རྩོད་ལས་རྒྱལ་ནས་ཉོན་མོངས་ཞི་བ་ཐམས་ཅད་མཁྱེན་པ་ཐོབ། །རྣམ་འདྲེན་ཞི་བ་མཛད་ལ་བསྟོད་པས་བདག་ཅག་བསོད་ནམས་གང་རྙེད་པ། །ཆགས་མེད་ཐུགས་མངའ་བདེ་བར་གཤེགས་པས་འདི་ཙམ་ཞེས་ནི་མཁྱེན་གྱུར་པ། །དེས་ནི་འགྲོ་བ་ཐམས་ཅད་ལམ་
201b
མཆོག་ཐམས་ཅད་མཁྱེན་པས་བསྟེན་གྱུར་པ། །ཞི་བྱེད་ཞི་བ་བསྟེན་ནས་མཁས་པ་མཆོད་པའི་རང་བྱུང་སྡིག་མེད་ཤོག་།དེ་ནས་མི་མཇེད་ཀྱི་བདག་པོ་ཚངས་པས་ཚངས་པ་རྣམས་དང་ལྷ་རྣམས་ཀྱིས་བཅོམ་ལྡན་འདས་ལ་བསྟོད་པར་རིག་ནས་བདག་ཉིད་ཀྱིས་ཚུལ་དང་འདྲ་བའི་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། མི་དབང་ཁྱོད་ཀྱིས་ཆོས་རྣམས་ཐམས་ཅད་ནི། །ལོག་པར་རྨོངས་བྱེད་ཆང་པ་སྟོང་འདྲ་ཞིང ། །སྟོན་གྱི་སྤྲིན་འདྲ་མིག་འཁྲུལ་འདྲ་བར་མཁྱེན། །རྒྱལ་བས་འདོད་པའི་ཡོན་ཏན་མེད་པར་མཁྱེན།། ཇི་ལྟར་མི་ཞིག་རྨི་ལམ་བཀྲེས་གྱུར་པས། །ཁ་ཟས་རོ་བརྒྱ་ཟོས་ཀྱང་མ་འགྲངས་པ། །དེ་ལ་བཀྲེས་མེད་ཟས་མེད་སེམས་ཅན་མེད། །རྨི་ལམ་དེ་འདྲར་ཆོས་རྣམས་ཐམས་ཅད་གཟིགས།། སྐོམ་པའི་མི་ཞིག་ཉལ་བའི་རྨི་ལམ་ན། །ཆུ་བསིལ་དང་ཞིང་རྙོག་མེད་འཐུངས་གྱུར་ཀྱང ། །ངོམས་མེད་ཚ་བ་ཞི་བར་མི་འགྱུར་ཏེ། །དེ་བཞིན་ཁྱོད་ཀྱིས་ཆོས་རྣམས་ཐམས་ཅད་གཟིགས།། འདི་ལ་བྱེད་མེད་ཚོར་མེད་སེམས་ཅན་མེད། །བྱས་པ་དེ་བཞིན་མེད་ཅིང་རྣམ་སྨིན་མེད། །འབྲས་བུ་མྱོང་བར་འགྱུར་པ་དེ་མེད་ཅེས། །འདི་འདྲའི་ཆོས་མཁྱེན་ཐེ་ཚོམ་ཡོང་མི་མངའ། ། མི་ཞིག་ཡིད་དུ་འོང་བའི་ཚིག་སྨྲ་ན། །དགའ་བར་འགྱུར་ཡང་ཚིག་ལ་འཕོ་བ་མེད། །ཚིག་ཉིད་མེད་ཅིང་དགར་འགྱུར་དངོས་མེད་ཀྱང ། །དེ་མཁྱེན་དེ་ལ་ཐེ་ཚོམ་ཡོང་མི་མངའ། །
202a
༄#། །པི་ཝང་སྒྲ་སྙན་མཉན་ན་རྣར་སྙན་ཏེ། །སྒྲ་དེ་རང་བཞིན་གང་ཡང་ཡོད་མ་ཡིན། །དེ་ལྟར་མཁས་པས་ཕུང་པོ་འདི་གཟིགས་ན། །ཕུང་པོའི་རང་བཞིན་གང་ཡང་དམིགས་མི་མངའ། །ནོར་བུ་རིན་ཆེན་རང་བཞིན་གསལ་དག་པ། །གོས་གྱི་དྲུང་བཞག་སྣ་ཚོགས་ཚོན་དུ་འགྱུར། །དེ་ལྟར་རང་བཞིན་ཡོངས་དག་ཆོས་རྣམས་ཀྱང ། །ལོག་པའི་རྣམ་པར་རྟོག་པས་དེ་ལྟར་འགྱུར། །ཙནྡན་དྲི་མེད་སྐྱོན་དང་བྲལ་བ་ཡང ། །རྐྱེན་དང་སྦྱར་ན་དྲི་ཞིམ་གཞན་དུ་འགྱུར། །དེ་ལྟར་རང་བཞིན་ཡོངས་དག་ཆོས་རྣམས་ཀྱང ། །སོ་སོར་རང་གིས་བརྟགས་པའི་རྣམ་པ་བཞིན། །ཇི་ལྟར་མི་ཡི་དུང་གི་སྒྲ་ཐོས་ཏེ། །སྒྲ་འདི་ག་ལས་བྱུང་ཞེས་བརྟགས་བྱས་ཀྱང ། །རང་བཞིན་སྟོང་པའི་དངོས་པོ་དེ་མི་དམིགས། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །ཇི་ལྟར་མི་ཞིག་བསོད་པའི་ཁ་ཟས་ལ། །ཡན་ལག་སྲོག་ཕན་ཇི་ལྟར་འགྱུར་བརྟགས་ན། །དངོས་མེད་ཡན་ལག་སྲོག་ཀྱང་དེ་བཞིན་ཏེ། །དྲང་སྲོང་ཆེན་པོས་དེ་བཞིན་ཆོས་ཀུན་གཟིགས། །ཇི་ལྟར་མི་ཞིག་ནམ་མཁའི་འཇའ་མཐོང་ན། །ཡན་ལག་གཞིགས་བརྟགས་རང་བཞིན་མེད་ཅིང་སྟོང ། །ནམ་མཁའི་འཇའ་བཞིན་ཁྱོད་ཀྱིས་ཡན་ལག་སྟོང ། །དྲང་སྲོང་ཆེན་པོས་དེ་བཞིན་ཆོས་ཀུན་གཟིགས། །གྲོང་ཁྱེར་མཆོག་ཀྱང་ཡན་ལག་རྣམ་གཞིགས་ན། །གྲོང་ཁྱེར་རང་བཞིན་དེ་བཞིན་མིང་མི་དམིགས། །གྲོང་
202b
ཁྱེར་ཇི་བཞིན་དེ་ལྟར་ཡན་ལག་སྟོང ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུ་དགའ་བར་རྔ་ཞིག་བརྡུངས་བགྱིས་ན། །དགའ་བ་སྐྱེད་ཀྱང་སྒྲ་ཡི་རང་བཞིན་སྟོང ། །ཇི་ལྟར་སྒྲ་བཞིན་དེ་ལྟར་ཡན་ལག་སྟོང ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་ནི་ཕྱོགས་སུ་མི་འགྲོ་འབྱུང་བ་མེད། །ཕྱོགས་སུ་དེ་བཞིན་འགགས་པར་མི་འགྱུར་ཏེ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །ཐོགས་པ་མེད་ཅིང་སྙན་པའི་རང་བཞིན་ཏེ། །ཁྱོད་ཀྱི་ཡན་ལག་རྔ་སྒྲ་དེ་དང་འདྲ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་དེ་འཇིག་རྟེན་དགའ་བར་རྟོག་པ་མེད། །ཇི་ལྟར་སྒྲ་བཞིན་ཁྱོད་ཀྱིས་ཡན་ལག་སྟོང ། །མི་དབང་ཁྱོད་ཀྱིས་ཆོས་ཀུན་དེ་ལྟར་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །གཡོ་བ་མེད་ཅིང་ཞི་བའི་དངོས་ཀྱང་མེད། །ཇི་ལྟར་རྔ་བཞིན་ཁྱོད་ཀྱི་ཡན་ལག་སྟོང ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་དེ་ཡན་ལག་མ་བྱུང་རང་དབང་མིན། །ཇི་ལྟར་སྒྲ་བཞིན་ཁྱོད་ཀྱི་ཡན་ལག་སྟོང ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །དེ་ནས་བཅོམ་ལྡན་འདས་ཀྱིས་ཚངས་རིས་ཀྱི་ལྷ་དེ་དག་དང ། མི་མཇེད་ཀྱི་བདག་པོ་ཚངས་པ་དེའི་ལྷག་པའི་
203a
༄#། །བསམ་པ་ཐུགས་སུ་ཆུད་ཅིང་ཞི་གནས་དང་ཡེ་ཤེས་མཐོང་བའི་བསྟོད་པ་དེས་དེ་ལྟར་བསྟོད་པས། འཁོར་དེ་ཡང་དགེ་བའི་རྩ་བ་བསགས་པར་གྱུར་པར་གཟིགས་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། ཤཱཀྱ་ཐུབ་པའི་ཞལ་ནས་འཛུམ་མཛད་དྲི་མེད་དག་མཐོང་ནས། །ལྷར་བཅས་མིར་བཅས་ཀླུ་དང་གནོད་སྦྱིན་བཅས་པའི་འཇིག་རྟེན་ཀུན། །སྐྱོབ་པའི་འཛུམ་མཐོང་ཐམས་ཅད་ལྡན་པའི་འགྲོ་བ་ཐེ་ཚོམ་འཚལ། །བདེ་གཤེགས་ཞལ་བཟང་དེ་ལ་བལྟ་ཞིང་ཐོས་པར་དགའ་སྟེ་སྡོད། །རྒྱལ་བ་འཛུམ་མཛད་ལེགས་པར་བཀའ་སྩོལ་ཐེ་ཚོམ་དགུམ་དུ་གསོལ། །རྣམ་པར་འདྲེན་པ་ཐུབ་མཆོག་ཀུན་མཁྱེན་སངས་རྒྱས་འདྲེན་པ་རྣམས། །རྒྱུ་མ་མཆིས་པར་འཇིག་རྟེན་དོན་བྱེད་འཛུམ་མཛད་མ་མཐོང་ན། །བདེ་གཤེགས་ཁྱོད་ཀྱིས་གང་སླད་འཛུམ་མཛད་ཐེ་ཚོམ་རྒྱུ་དེ་གསུངས། །རྒྱལ་བ་འཛུམ་མཛད་རྒྱུ་ཐོས་འགྲོ་བ་རྣམས་ནི་དགའ་བར་འགྱུར། །འཁོར་འདི་ཐེ་ཚོམ་འཚལ་ནས་ཐལ་མོ་སྦྱར་ཏེ་ཁྱོད་ལ་སེམས། །བདེ་གཤེགས་ཐུབ་པའི་གསུང་མཆོག་ཐེ་ཚོམ་གཅོད་པ་ཉན་འཚལ་ན། །རྣམ་འདྲེན་ཐུབ་པ་འཛུམ་མཛད་རྒྱུ་དེ་དེ་དག་རྣམས་ལ་གསུངས། །ཐོས་ནས་འགྲོ་བ་དགའ་ཞིང་ཐེ་ཚོམ་མ་མཆིས་འཕེལ་བར་འགྱུར། །
203b
འཁོར་འདི་སྙིང་པོ་ལྡན་ཞིང་རྙོག་མེད་སངས་རྒྱས་ཡོན་ཏན་འཚལ། །སྟོན་པ་ཁྱོད་ཀྱི་ཞལ་མཛེས་ཟླ་བ་མཛེས་པ་འདྲ་ལ་བལྟ། །འདྲེན་པ་ཆགས་མེད་རྫོགས་པ་ཚངས་པ་འདྲ་བའི་གསུང་བསྒྲག་གསོལ། །དེ་ཐོས་འཁོར་རྣམས་ཐེ་ཚོམ་ཆད་ཅིང་ཆོས་ལ་གནས་པར་འགྱུར། །ཁྱོད་ཀྱི་ཚངས་པའི་གསུང་མཆོག་དོན་ལྡན་འཇིག་རྟེན་འདས་རིག་ནས། །སྐྱེ་བོ་དགའ་ཞིང་མགུ་བའི་ཡིད་ལྡན་ཐམས་ཅད་མཁྱེན་པས་ཚིམ། །དེ་དག་དོགས་བསལ་སྦྱངས་པའི་ཡིད་ཀྱིས་ཐམས་ཅད་མཁྱེན་དུ་སྒྲུབ། །བརྩོན་འགྲུས་སྟོབས་ཆེན་བསྐྱེད་ནས་འདུན་པ་སྟོབས་ལྡན་རྩོམ་པར་བགྱིད། །དེ་ལྟ་ལགས་པས་འཇིག་རྟེན་འདྲེན་པ་ཕན་མཛད་གསུང་བསྒྲག་གསོལ། །རྐང་གཉིས་དམ་པའི་གསུང་མཆོག་མི་གཡོ་ཐོས་ནས་དེ་ཡིས་ནི། །དགེ་བ་ཐོབ་པའི་འཁོར་འདི་ཐམས་ཅད་མཁྱེན་དུ་སེམས་འགྱུར་བར། །སྟོབས་བཅུ་མངའ་བ་འགྲོ་བ་ཀུན་ལ་ཕན་པ་ལགས་པར་དགོངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ང་ཡིས་ཕན་ཆེད་འཛུམ་པ་འགྲོ་བ་ཀུན་ལ་གང་བསྟན་པ། །རྩེ་གཅིག་ཡིད་ཀྱིས་སྙན་ཅིང་བསྔགས་པ་མཛེས་པ་དེ་ནི་མཉན་པར་བྱོས། ། དེ་ཐོས་འགྲོ་བ་ཡོན་ཏན་བསགས་པ་མྱུར་དུ་འཇིག་རྟེན་དོན་བྱེད་པ། །ཕན་དང་ལྡན་པའི་བྱ་བ་སངས་རྒྱས་བཀའ་སྩལ་དེ་ལ་བརྩོན་འགྲུས་རྩོམ། །ཚངས་པ་ཀུན་འཁོར་འདི་དག་དགའ་
204a
༄#། །ཞིང་ཆོས་རྣམས་ལ་ནི་ཐེ་ཚོམ་མེད། །བསྐལ་པ་ཁྲག་ཁྲིག་གངྒཱའི་བྱེ་མ་སྙེད་དུ་དགེ་བ་ལེགས་པར་སྤྱད། །ཀུན་ཏུ་རྣམ་པར་དགེ་ལ་མ་ཆགས་ཡིད་གྱུར་འདུ་ཤེས་མཁའ་འདྲ་སྟེ། །དེ་ལྟར་གྱུར་ཀྱང་བདེ་གཤེགས་བྱང་ཆུབ་རྫོགས་པར་འཚང་རྒྱ་སེམས་མ་བསྐྱེད། །འདི་དག་མ་འོངས་དུས་ན་བསྐལ་པ་བྱེ་བ་བརྒྱ་ཕྲག་གཞལ་ཡས་པ། །གངྒཱའི་བྱེ་མ་སྙེད་ན་རྡུལ་བསལ་ཐམས་ཅད་མཁྱེན་པའི་སྟོབས་ལ་གནས། །དེ་དག་ཕྱི་ནས་བདེ་བར་གཤེགས་པ་ཚེ་ལྡན་སངས་རྒྱས་འདྲེན་ཆེ་བ། །སྲེད་པ་སེལ་ཅིང་འགྲོ་བ་སྟོང་པར་སྟོན་པའི་བཅོམ་ལྡན་འདས་སུ་འགྱུར། །སྐྱོབ་པ་དེ་དག་ཇི་ལྟར་སྤྱོད་པ་སྐུ་ཚེའི་ཚད་ཀྱང་དེ་ལྟར་འགྱུར། །བདེ་གཤེགས་མཐའ་ཡས་གྲགས་ལྡན་འཇིག་རྟེན་སྡུག་བསྔལ་འགྲེལ་ཅིང་གནས་པར་འགྱུར། །དེ་དག་རྣམས་ཀྱི་སངས་རྒྱས་ཞིང་ནི་ཞིང་གི་འབྱོར་པ་གཞལ་ཡས་ཏེ། །འདྲེན་པ་ཆེན་པོ་རྣམས་ཀྱིས་བསྐལ་པ་ཁྲག་ཁྲིག་རྣམ་པ་དུ་མར་ནི། །སངས་རྒྱས་མཐའ་ཡས་རྣམས་ཀྱིས་གསུངས་ཀྱང་དེ་དག་བཀོད་པ་ཟས་མི་ནུས། །དེ་ཚེ་དེ་དག་ཡེ་ཤེས་སྟོབས་ལྡན་ཞེས་བྱའི་རྒྱལ་བར་མཐུན་པར་འགྱུར། །གཡོ་བ་མེད་ཅིང་སེམས་མེད་མི་གནས་ཆོས་ནི་འགྲོ་ལ་སྟོན་པར་འགྱུར། །དེ་དག་ཞིང་མཆོག་རྣམས་སུ་སྐྱོབ་པའི་ཐམས་ཅད་མཁྱེན་ལམ་མ་སྦྱངས་པའི། །སེམས་ཅན་གཅིག་ཀྱང་མི་འབྱུང་
204b
སྲིད་པ་དེ་ལ་ཕལ་ཆེར་མྱ་ངན་འདའ། །དེ་དག་ན་ནི་དེ་ཚེ་འགྲོ་བ་དེ་དག་སྡུག་བསྔལ་གཅིག་ཤེས་ཏེ། །མི་རྟག་འདུ་བྱེད་སྡུག་བསྔལ་རབ་ཏུ་འཇིགས་པ་སེམས་ཅན་ཡིད་འབྱུང་བའོ། ། དེ་ན་འགྱུར་བའི་སྡུག་བསྔལ་དང་ནི་སྡུག་བསྔལ་སྡུག་བསྔལ་ཡོད་མི་འགྱུར། །དེ་དག་ཐམས་ཅད་བློ་མཐུན་འགྱུར་ཞིང་སླ་ཡི་ལམ་ལ་མྱུར་བར་འགྱུར། །དེ་ན་མི་རྣམས་དག་གི་སྒྲ་སྐད་རང་བཞིན་གཞན་ནི་འབྱུང་མི་འགྱུར། །མི་སྡུག་མི་རྟག་དེ་བཞིན་ཉིད་དང་སྡུག་བསྔལ་དེ་བཞིན་བདག་མེད་དང ། །ཞི་བ་སྟོང་ཉིད་མཚན་མེད་འཆི་མེད་མྱ་ངན་འདས་དང་བྱང་ཆུབ་ཞི། །སྒྲ་སྐད་དེ་དག་ཡང་དང་ཡང་འབྱུང་དེ་དག་རྣ་ལ་གནས་པར་འགྱུར། །སྒྲ་གང་ཐོས་ནས་དེ་དག་འཁོར་བ་གྲོལ་གནས་ཐོབ་པར་མི་འགྱུར་བ། །དེ་འདྲའི་སྒྲ་དེ་ཤིང་ངམ་རྩིག་པ་དག་དང་གང་ནའང་ཡོད་མི་འགྱུར། །བླ་གབ་མེད་དང་མཁའ་དང་གཙུག་ལག་ཁང་དང་གནས་དང་གནས་ཁང་རྣམས་ན་མེད། །དེ་ཚེ་སངས་རྒྱས་མཐུ་ཡིས་ཡན་ལག་བརྒྱད་དང་ལྡན་པའི་སྒྲ་དབྱངས་འབྱུང ། །དེ་ཚེ་འདྲེན་པའི་ཉེས་པ་མེད་ཅིང་འདོད་ཆགས་དང་ནི་ཞེ་སྡང་དང ། །གཏི་མུག་དག་གིས་གཟིར་བ་རྣམས་ཀྱི་རྣར་ནི་དགེ་བའི་སྒྲ་གྲག་འགྱུར། །འགྲོ་བ་ཐམས་ཅད་འཁོར་བ་ལས་ནི་འབྱུང་ཞིང་མྱ་ངན་འདས་འགྲོར་འགྱུར། །དེ་ཚེ་ཞིང་མཆོག་སྟོང་པ་ཐམས་ཅད་དགའ་བའི་སྐྱེ་བོས་གང་བར་འགྱུར། །སྐྱེས་བུ་དམ་པ་དེ་དག་བསྐལ་བ་ཁྲག་ཁྲིག་བྱང་
205a
༄#། །ཆུབ་བརྩོན་བྱས་ནས། །དྲང་སྲོང་ཆེན་པོ་དེ་དག་སྨོན་ལམ་གྱིས་ནི་འབྱོར་པ་འདི་བརྩམས་ཏེ། །ཞིང་མཆོག་དེ་ན་སེམས་ཅན་ཚོགས་གང་ཡོད་པ་དེ་ཀུན་བདེ་གཤེགས་འགྱུར། །ཚངས་པའི་སྨོན་ལམ་ཡངས་པ་རྒྱ་ཆེར་ཞི་བ་འགྲོ་བས་མཐོང་གྱུར་ན། །ཇི་ལྟར་སངས་རྒྱས་བཀའ་སྩལ་བཞིན་དུ་ཚངས་པའི་ཚོགས་ཀྱིས་བསྟེན་གྱུར་པ། །དེ་ལ་བསླབ་ནས་འགྲོ་བ་ཐམས་ཅད་ཐོགས་པ་མེད་པའི་འདྲེན་པར་འགྱུར། །དེ་དག་རྒྱལ་བ་ཐོབ་ནས་འགྲོ་བ་འདི་ཀུན་དངོས་པོ་མེད་ཅེས་སྟོན། །དེ་ལྟ་བས་ན་ཚུལ་ཀུན་འཇུག་ལ་མཁས་པའི་སྤྱོད་པ་བསྟེན་པར་གྱིས། །ཚངས་པ་ལུང་བསྟེན་པའི་ལེའུ་སྟེ། ཉི་ཤུ་པའོ།། །།དེ་ནས་འོད་གསལ་གྱི་ལྷ་བྱེ་བ་ཕྲག་ལྔ་བཅུ་རྩ་བརྒྱད་ཀྱིས་ལྷ་མ་ཡིན་རྣམས་ནས་ཚངས་པའི་བར་གྱི་ལྷ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔས་ཚུལ་ལ་འཇུག་པའི་སླད་དུ་གང་ལ་བསླབ་པས་ཆོས་ཐམས་
205b
ཅད་སྣང་བར་འགྱུར་བའི་ཏིང་ངེ་འཛིན་ཆོས་ཐམས་ཅད་སྣང་བ་ཞེས་བགྱི་བ་མཆིས་ཏེ། དེས་ཆོས་ཐམས་ཅད་ཀྱི་ཚུལ་ལ་འཇུག་པ་རྟོགས་པར་བགྱིད་དོ། །དེ་རྟོགས་པས་བསམ་གྱིས་མི་ཁྱབ་པའི་སྤོབས་པ་དང ། ཐོགས་པ་མ་མཆིས་པའི་སྤོབས་པ་དང ། བྱིན་གྱིས་བརླབས་པའི་སྤོབས་པ་དང ། སྣ་ཚོགས་ཀྱི་སྤོབས་པ་དང ། འཇམ་པའི་སྤོབས་པ་དང ། དགེ་བའི་སྤོབས་པ་དང ། རིག་པའི་སྤོབས་པ་དང ། གྲོལ་བའི་སྤོབས་པ་དང ། ཉེ་བར་གྱུར་པའི་སྤོབས་པ་དང ། །ཟབ་པའི་སྤོབས་པ་དང ། ཕྲ་བའི་སྤོབས་པ་དང ། ཐུན་མོང་མ་ཡིན་པའི་སྤོབས་པ་ཅན་དུ་འགྱུར་ཏེ། སངས་རྒྱས་ཀྱི་སྤོབས་པ་ཡང་ཐོབ་པར་འགྱུར་རོ། །ཆོས་ཐམས་ཅད་སྣང་བ་ཞེས་བགྱི་བའི་ཏིང་ངེ་འཛིན་དེ་གང་ཞེ་ན། བཅོམ་ལྡན་འདས། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་ཚུལ་ལ་འཇུག་པའི་སླད་དུ་རྣམ་པར་རྟོག་པ་དང ། རྣམ་པར་དཔྱོད་པ་ཐམས་ཅད་ཡིད་ལ་མི་བགྱིད་དེ། དེ་འདི་སྙམ་དུ་ཆོས་ཐམས་ཅད་ནི། རྣམ་པར་རྟོག་པ་མེད་དེ། རྣམ་པར་རྟོག་པ་ཡོངས་སུ་ཆད་པའོ། །གང་རྣམ་པར་མི་རྟོག་པ་དེ་ནི། ཐམས་ཅད་དུ་སོང་བ་སྟེ། ཆོས་གང་ཡང་རྣམ་པར་རྟོག་པར་ནུས་པ་མ་མཆིས་སོ། །དེ་ཅིའི་སླད་དུ་ཞེ་ན། རང་བཞིན་མ་མཆིས་པའི་སླད་དུ་སྟེ། ཆོས་གང་ལ་རང་བཞིན་མ་མཆིས་པ་དེ་ལ་ཇི་ལྟར་རྣམ་པར་རྟོག་པར་འགྱུར་ཞེས་ཆོས་ཐམས་ཅད་
206a
༄#། །ལ་རྣམ་པར་མི་རྟོག་པར་ཨ་ལ་འཇུག་པའི་སྤོབས་པ་རབ་ཏུ་ཐོབ་ཅིང ། །དེ་དག་ཨའི་སྒོ་ལ་ཞུགས་པས་སྤོབས་པ་མཐའ་ཡས་པར་འགྱུར་ཏེ། ཨ་ཞེས་བགྱི་བ་ནི། མཐའ་ཡས་པ། ཀུན་ཏུ་མཐའ་ཡས་པ། མ་བགྱིས་པ། མངོན་པར་འདུས་མ་བགྱིས་པ། ཡོངས་སུ་མ་གྲུབ་པ། དངོས་པོ་མ་མཆིས་པ། མི་གནས་པ། མི་གཡོ་བ།་འདུས་པ་མ་མཆིས་པ། འཕྲོ་བ་མ་མཆིས་པ། རྟོག་པ་མ་མཆིས་པ། རྣམ་པར་རྟོག་པ་མ་མཆིས་པ། མ་བསྒྲུབས་པ། ཡོངས་སུ་གྲུབ་པ་མ་མཆིས་པ། མ་བརྟགས་པ། གཟུགས་མ་མཆིས་པ། བསྟན་དུ་མ་མཆིས་པ། བལྟར་མ་མཆིས་པ། མ་མཐོང་བ། བསམ་དུ་མ་མཆིས་པ། རྣམ་པར་མི་གནས་པ། མ་ཤེས་པ། རྣམ་པར་མ་ཤེས་པ། མ་སྨོས་པ། མ་བསྟན་པ། བསམ་གྱིས་མི་ཁྱབ་པ། བསམ་དུ་མ་མཆིས་པ། སོང་བ་མ་མཆིས་པ། འོང་བ་མ་མཆིས་པ། ཉེ་བ་མ་ལགས་པ། རིང་བ་མ་ལགས་པ། མ་བཏགས་པ། གདགས་པ་མ་མཆིས་པའི་ཆོས་ཅན། མིང་མ་མཆིས་པ། ཐ་སྙད་མ་མཆིས་པ། གཉེན་པོ་མ་མཆིས་པ། སྒྲིབ་པ་མ་མཆིས་པ། འཕོ་བ་མ་མཆིས་པ ། འཁྲུག་པ་མ་མཆིས་པ། བརྟག་ཏུ་མ་མཆིས་པ། མི་ཟད་པ། གཉིས་སུ་མ་མཆིས་པ། མ་བྱུང་བ། རྫུན་པ་མ་ལགས་པ། བདེན་པ་མ་ལགས་པ། ཤོ་བེ་མ་ལགས་པ །
206b
མ་སྐྱེས་པ། མ་འགགས་པ། སྦྱངས་པ་མ་ལགས་པ། སྦྱང་བར་འོས་པ་མ་ལགས་པ། གདགས་སུ་མ་མཆིས་པ། མཚན་མས་མ་བསྐྱོད་པ། མ་བཟུང་བ། མ་བོར་བ། འཛིན་པ་མ་མཆིས་པ། ཡོངས་སུ་འཛིན་པ་མ་མཆིས་པ། གཏན་དུ་མ་མཆིས་པ། ཡོངས་སུ་གཏན་དུ་མ་མཆིས་པ། མ་བཏང་བ། ཡོངས་སུ་མ་བཏང་བ་སྟེ། ཨ་ཞེས་བགྱི་བ་ནི། སུས་ཀྱང་མ་བགྱིས་པ། ཆོས་གང་གི་བྱེད་པ་པོ་ཡང་མ་ལགས་སོ། ། ནི། མ་སྐྱེས་པ་སྟེ། ཆོས་གང་ཡང་སྐྱེ་བར་བགྱིད་པ་མ་ལགས་སོ། ། ནི། ། ནི། མ་སྐྱེས་པ་སྟེ། ཆོས་གང་གི་སྐྱེ་བའི་རྒྱུར་འགྱུར་བའང་མ་ལགས་སོ། ། ནི། མ་འགག་པ་སྟེ། ཆོས་གང་གི་འགག་པའི་རྒྱུར་འགྱུར་བའང་མ་ལགས་སོ། ། ནི། མ་འགག་པ་ཡང་མ་ལགས་ཏེ། ཆོས་གང་གིས་མི་འགག་པའི་རྐྱེན་དུ་འགྱུར་བ་མ་ལགས་སོ། ། ནི། གནས་པ་ཡང་མ་ལགས། མི་གནས་པ་ཡང་མ་ལགས། ཨ་ནི། བཏགས་པ་ཡང་མ་ལགས། མ་བཏགས་པ་ཡང་མ་ལགས། ཨ་ནི། སྤངས་པ་ཡང་མ་ལགས། མ་སྤངས་པ་ཡང་མ་ལགས། ཨ་ནི། ཤེས་པ་ཡང་མ་ལགས། མ་ཤེས་པ་ཡང་མ་ལགས། ཨ་ནི། དམིགས་པ་ཡང་མ་ལགས། མི་དམིགས་པ་ཡང་མ་ལགས། ཨ་ནི། སྟོང་པ་ཡང་མ་ལགས། མི་སྟོང་པ་ཡང་མ་ལགས། ཨ་ནི། དམིགས་སུ་མཆིས་པ་ཡང་མ་ལགས། དམིགས་སུ་མ་མཆིས་པ་ཡང་མ་ལགས། ཨ་ནི།
207a
༄#། །མཚན་མ་ཡང་མ་ལགས། མཚན་མ་མ་མཆིས་པ་ཡང་མ་ལགས། ཨ་ནི། སྨོན་པ་ཡང་མ་ལགས། སྨོན་པ་མ་མཆིས་པ་ཡང་མ་ལགས་ཏེ། བཅོམ་ལྡན་འདས། དེ་ལྟར་ན། ཆོས་ཐམས་ཅད་ཀྱི་མཚན་ཉིད་ནི། ཨའི་ཚུལ་ལོ། །ཆོས་ཐམས་ཅད་ནི། ཚུལ་གཅིག་པ་སྟེ། ཨའི་ཚུལ་ལོ། །ཆོས་ཐམས་ཅད་ནི ། འགྲོ་བ་གཅིག་པ་སྟེ། ཨའི་འགྲོ་བའོ། །ཆོས་ཐམས་ཅད་ནི། འཇུག་པ་གཅིག་པ་སྟེ། ཨ་ལ་འཇུག་པའོ། །ཆོས་ཐམས་ཅད་ནི། གདགས་པ་གཅིག་པ་སྟེ། ཨས་གདགས་པའོ། །ཆོས་ཐམས་ཅད་ནི། ཐ་སྙད་གཅིག་པ་སྟེ། ཨའི་ཐ་སྙད་དོ། །ཆོས་ཐམས་ཅད་ནི། བརྗོད་པ་གཅིག་པ་སྟེ། ཨས་བརྗོད་པའོ། །བཅོམ་ལྡན་འདས། ཆོས་གང་མ་སྐྱེས་པ་དེ་དག་ནི། རྟོགས་པར་བགྱི་བ་མ་མཆིས་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་བྱུང་བ་དེ་དག་ནི། དངོས་པོ་མ་མཆིས་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་གྲུབ་པ་དེ་དག་ནི། མ་གྲུབ་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་འགགས་པ་དེ་དག་ནི། འགག་པ་མ་མཆིས་པའི་ཚུལ་གྱིས་རྟོགས་པར་བགྱིའོ། །བཅོམ་ལྡན་འདས། ཆོས་གང་མངོན་པར་འདུ་མ་བགྱིས་པ་དེ་དག་ནི། འདུས་མ་བགྱིས་པའི་ཚུལ་གྱིས་རྟོགས་པར་བགྱིས་ཏེ། དེ་ནི། ཆོས་
207b
ཐམས་ཅད་ཀྱི་ཚུལ་ལོ། །བཅོམ་ལྡན་འདས། ཆོས་གང་མ་སྐྱེས་པ་དེ་དག་གི་ཐ་སྙད་ཇི་ལྟར་རྟོགས་པར་བགྱི་ཞེ་ན། འདི་ལྟ་སྟེ། དཔེར་ན། རྨི་ལམ་ན་བྱ་བ་སྣ་ཚོགས་འབྱུང་བ་དེ་བཞིན་དུ་ཆོས་ཐམས་ཅད་བལྟ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་གྱི་བྱ་བ་ནི། མ་སྐྱེས་པ། མ་བྱུང་བ། དངོས་པོ་མ་མཆིས་པ་སྟེ། འོན་ཀྱང་དེ་དག་ལ་གདགས་པར་གསུངས་སོ། །དེ་བཞིན་དུ་ཆོས་ཐམས་ཅད་ཀྱི་བྱེད་པ་ཡང་འཚལ་བར་བགྱིའོ། །བཅོམ་ལྡན་འདས། འདི་ལྟ་སྟེ། དཔེར་ན། བྲག་ཅ་ལ་ཐ་སྙད་མཆིས་པ་བཞིན་དུ་ཆོས་ཐམས་ཅད་ཀྱི་ཐ་སྙད་ཀྱང་བལྟ་བར་བགྱིའོ། །བཅོམ་ལྡན་འདས། འདི་ལྟ་སྟེ། དཔེར་ན། སྒྱུ་མའི་སྐྱེས་བུ་ལ་གདགས་པ་མ་མཆིས་པ་དེ་བཞིན་དུ་ཆོས་ཐམས་ཅད་ཀྱི་གདགས་པར་བལྟའོ། །བཅོམ་ལྡན་འདས། འདི་ལྟ་སྟེ། དཔེར་ན། སྨིག་རྒྱུ་ལ་ཆབ་ཏུ་གདགས་པའི་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་བལྟ་བར་བགྱིའོ། །བཅོམ་ལྡན་འདས།་འདི་ལྟ་སྟེ། དཔེར་ན། མེ་ལོང་གི་དཀྱིལ་འཁོར་ལ་བུད་མེད་ཀྱི་གཟུགས་སམ། སྐྱེས་པའི་གཟུགས་ཀྱི་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་བལྟ་བར་བགྱི་སྟེ།་བཅོམ་ལྡན་འདས། བྱིས་པ་རྣམས་དགའ་བར་བགྱི་བའི་སླད་དུ་རྨི་ལམ་གྱི་བྱ་བ་ཐ་སྙད་དུ་བགྱི་ཡི། རྨི་ལམ་གྱི་བྱ་བ་དེ་དག་ནི། མ་མཆིས་སོ། །བཅོམ་ལྡན་འདས། དེ་བཞིན་
208a
༄#། །དུ་བྱིས་པ་དགའ་བར་བགྱི་བའི་སླད་དུ་མིག་ཡོར་དང ། སྨིག་རྒྱུ་དང ། བྲག་ཅའི་བྱ་བ་དག་ཀྱང་ཐ་སྙད་དུ་བགྱི་སྟེ། བྲག་ཅ་ལ་བྱ་བ་མ་མཆིས་སོ། ། བཅོམ་ལྡན་འདས། དེ་ལྟར་བདག་ཅག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་ཏོ། །བཅོམ་ལྡན་འདས། འདི་ནི། ཆོས་ཐམས་ཅད་སྣང་བ་ཞེས་བགྱི་བའི་ཏིང་ངེ་འཛིན་ཏོ། །དེ་སྐད་ཅེས་གསོལ་ནས་འོད་གསལ་གྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བདེ་གཤེགས་ཁྱོད་ཀྱིས་ཚུལ་གཅིག་མཁྱེན་ཏེ་འོན་ཀྱང་གཞན་དང་གཞན་དུ་གསུངས། །ཐུབ་པ་འཇིག་རྟེན་མཁས་པའི་སྲས་རྣམས་རྣམ་པར་རོལ་པའང་དེ་བཞིན་ནོ། །དེ་ལ་འཇིག་རྟེན་བློ་མེད་བདག་ཏུ་ལྟ་བ་རྣམས་ཀྱིས་ཁོང་མི་ཆུད། །བདག་གི་དོན་དེ་ཕྱོགས་བཅུར་མ་མཆིས་བདག་ཉིད་ཀྱིས་ནི་འགྲོ་བ་སྟོང ། །སྒྱུ་མ་གསོག་དང་སྨིག་རྒྱུ་ཆུ་མ་མཆིས་ལ་ཆབ་ཀྱི་འདུ་ཤེས་ཅན། །བྱིས་པ་དེ་དག་བློ་ལོག་དེ་བཞིན་འཁྲུལ་ཏེ་བདག་ཏུ་སྦྱོར་བ་བགྱིད། །དེ་དག་ཡང་དག་མ་འཚལ་མི་མཁས་གནས་མིན་དངོས་ལ་བརྟེན་ཀྱང་འཚལ། །དེ་བཞིན་བྱིས་པའི་སྐྱེ་བོ་སྨིག་རྒྱུ་འདྲ་བའི་ཕུང་པོ་ཡོང་མ་འཚལ། །འཁོར་བར་དགའ་བས་ཟུག་རྔུས་ཟུག་ཅིང་སྡུག་བསྔལ་དེ་ཡིས་དབང་པོ་འདས། །གང་ལ་མི་མཁས་ངེས་པར་སྡུག་
208b
བསྔལ་མྱོང་བ་དེ་ལ་དངོས་མ་མཆིས། །བློ་སྟོར་ཡིད་ནོར་སྡུག་བསྔལ་རྣམས་ལ་བདེ་བར་འདུ་ཤེས་ནོར་པ་ལ། །ཉོན་མོངས་འཇིགས་པ་ཆེ་དང་དུག་གསུམ་རྣམས་ཀྱང་རྗེས་སུ་འགྲོ་ཞིང་འབྲང ། །འདོད་ཆགས་ཞེ་སྡང་གཏི་མུག་དུག་ཆེན་ཉོན་མོངས་མཚུངས་མེད་རྗེས་སུ་འབྲང ། །བློ་སྟོར་དེ་དག་སྡུག་བསྔལ་གང་གིས་སྡུག་བསྔལ་གྱུར་བའི་སྡུག་བསྔལ་བ། །དེ་རྣམས་དེ་དག་རྗེས་འབྲང་བྱིས་པ་མི་མཁས་གནོད་པ་ཁུར་ཡང་ཁྱེར། །དེ་དག་རྒྱལ་བའི་ཚུལ་སྒོ་ཐར་པར་བགྱིད་པ་སྟོང་པ་འདི་ཐོས་ནས། །སྐྱེས་བུ་ངན་པ་བློ་ཞན་དེ་དག་བསྟན་དག་བདེ་བ་ཉིད་ཀྱིས་འཇིགས། །བདེ་གཤེགས་ཁྱོད་ཀྱིས་ཨ་ཡི་ཡི་གེ་ཚུལ་ཆེན་སྒོ་གཅིག་དེ་ལྟར་བསྟན། །དེ་ལ་ཡང་དག་བློ་ཅན་ས་ལས་ཤིང་སྐྱེ་བཞིན་དུ་ཡིད་བསྐྱེད་ཅིང ། །བདུད་རྣམས་བྱེ་བ་དཔུང་དང་བཅས་བཏུལ་བྱང་ཆུབ་ཞི་བ་མངོན་འཚང་རྒྱ། །ཡན་ལག་བརྒྱད་པའི་གྲུར་བཅས་སྐྱེ་བོ་ཉོན་མོངས་རྒྱ་མཚོ་ཆེ་ལས་སྒྲོལ། །བདེ་བར་གཤེགས་པ་ཅང་མཁྱེན་ངེས་པ་རྣམས་ནི་ཚུལ་གྱི་དམ་པ་དེས། །མྱུར་དུ་ཉོན་མོངས་དུག་བསལ་བྱང་ཆུབ་དཔག་ཡས་ཞི་བ་ཐོབ་འགྱུར་ཞིང ། །གྲོལ་ནས་དུག་མེད་གྱུར་པ་སྐྱེ་བོ་གཞན་མཐོང་ངེས་པའི་མཁྱེན་བརྙེས་ནས། །ཕ་རོལ་མྱུར་ཕྱིན་དུག་མེད་བདེ་ཞིང་གདུག་པ་ཐམས་ཅད་འཇོམས་པར་མཛད། །བདེ་གཤེགས་ཐམས་ཅད་སྟོང་ཡང་བདག་ཏུ་རྟོག་རྣམས་ཚུལ་དང་ཚུལ་མིན་རྟོག་།འགྲོ་བ་
209a
༄#། །ཀུན་གྱི་ནང་ནས་མཁས་པ་ཚུལ་དང་ཚུལ་མིན་བསླབ་པ་དག་།གྲོལ་ནས་འགྲོ་བ་ཀུན་ལ་ཆགས་མེད་ཡིད་ཀྱིས་ངོ་བོ་ཉིད་ཀྱི་ཆོས། །དེ་ཡི་ཚུལ་མཐོང་ཚུལ་ལ་མཁས་པ་དེ་དག་མཐུ་ཆེན་མགོན་པོར་འགྱུར། །འཆིང་དང་བཅིངས་པ་མེད་ཅིང་བདེ་བར་གཤེགས་པ་ཆོས་རྣམས་ཆོས་ཉིད་མེད། །དེ་བཞིན་ཉིད་དང་མ་ནོར་དེ་བཞིན་ཉིད་ཞི་མི་དགའ་ཉོན་མི་མོངས། །ཉོན་མོངས་མཚན་མ་མེད་ཅིང་ཞི་བྱེད་མེད་ལ་ཉོན་མོངས་རྣམས་ཀྱང་མེད། །གང་གིས་ཚུལ་ཆེན་དམ་པ་འདི་མཐོང་དེ་དག་ཐམས་ཅད་མཁྱེན་དུ་འགྱུར། །གྲོལ་ཞིང་འགྲོལ་མཛད་ཞི་བའི་ཆོས་ཅན་ཞི་མཛད་ངོ་མཚར་འགྱུར་མི་མངའ། །བཅོམ་ལྡན་འདས་ལྷར་བཅས་འཇིག་རྟེན་དཔྱིད་ཀྱི་སྨིག་རྒྱུ་བཞིན་དུ་འཁྲུལ་བ་དེ། །ཀུན་རྟོགས་བདག་ཉིད་ཟིལ་གནོན་བདག་དང་གཞན་མེད་སྐྱེས་པ་བུད་མེད་རྟོག་།འགྲོ་བ་སྡུག་བསྔལ་དེ་ན་སྣ་ཚོགས་ཀྱིས་བསྐྱེད་སེམས་ཀྱིས་སེམས་ཀྱང་ནི། །ལས་དང་འབྲས་བུ་མེད་ཅིང་དེ་མྱོང་གང་གྱུར་དེ་ཡང་མེད། །བདེ་གཤེགས་དེ་ལྟར་སངས་རྒྱས་རྣམས་ཀྱི་སྤྱོད་ཡུལ་ཚུལ་ནི་བདག་ཅག་འཚལ། །དེས་ན་དེ་ལྟར་བདེ་གཤེགས་ཞི་ཐུགས་དབང་པོ་ཞི་ཞིང་ངེས་པ་སྟེ། །དགེ་བའི་བློ་མངའ་དགྲ་གཙང་དྲི་མེད་ཆོས་ཀྱིས་རབ་ཏུ་མཆོད་པར་འགྱུར། །སངས་རྒྱས་འཇིག་རྟེན་འཕགས་པའི་གཙོ་བོ་བསྟོད་པས་བསོད་ནམས་
209b
གང་བྱུང་བ། །ཇི་སྙེད་དཔལ་སྟུག་རྐང་གཉིས་གཙོ་བོ་རྣམ་སྨིན་ཡོངས་སུ་མཁྱེན་གྱུར་པའི། །བདག་ཅག་དགེ་རྩ་དེ་ཡིས་འགྲོ་བ་འདི་ཀུན་ཀུན་མཁྱེན་ཉིད་ཐོབ་ཤོག་།བསོད་ནམས་འདི་ཀུན་འགྲོ་བ་ཀུན་གྱི་དོན་བསྔོ་ཀུན་ཀྱང་རྒྱལ་བར་ཤོག་།དེ་ནས་བཅོམ་ལྡན་འདས་ཀྱིས་འོད་གསལ་གྱི་ལྷ་དེ་དག་གི་ལྷག་པའི་བསམ་པ་ཡོངས་སུ་དག་པ་དང ། །ཚུལ་གྱི་རྗེས་སུ་འགྲོ་བའི་སྤོབས་པ་ཕུན་སུམ་ཚོགས་པ་ཡང་ཐུགས་སུ་ཆུད་ལ། འཁོར་དེ་དག་གིས་ཀྱང་ཁྱད་པར་ཐོབ་པར་འགྱུར་བར་མཁྱེན་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་དོན་མཛད་རྣམ་པར་འདྲེན་མཆོག་ཀུན་མཁྱེན་ཐམས་ཅད་ཟིལ་གནོན་པ། །བདེ་གཤེགས་ཐུགས་རྗེ་ལྡན་རྣམས་རྒྱུ་མ་མཆིས་པར་བཞད་པ་མི་མཛད་ན། །རྒྱལ་བ་དཔལ་སྟུག་རྐང་གཉིས་མཆོག་གིས་འཇིག་རྟེན་ཐུགས་བརྩེས་བཀའ་སྩལ་གསོལ། །འཇིག་རྟེན་འདས་ཁྱོད་ཅི་སླད་འཛུམ་མཛད་དེ་རྒྱུ་བདག་ཅག་རྣམས་ལ་གསུངས། །གཙོ་བོ་དེ་ཐོས་འགྲོ་བ་འདི་དག་ཡིད་ནི་རབ་ཏུ་དང་འགྱུར་ཞིང ། །རྣམ་པར་འདྲེན་པ་ངེས་འབྱུང་ལས་དང་འབྲས་བུ་གཞན་ཡང་བགྱིད་པར་འགྱུར། །དེས་ནི་ལྷ་མིར་བཅས་པའི་འཇིག་རྟེན་འཁོར་བར་སྡུག་བསྔལ་ཉམ་ཐག་འདི། །འཕགས་ལམ་ཡན་ལག་བརྒྱད་བསྟན་སྲིད་པའི་རྒྱ་མཚོ་འདི་ལས་སྒྲོལ་
210a
༄#། །བར་འགྱུར། །དྲང་སྲོང་ཆེན་པོའི་གསུང་མཆོག་ཡན་ལག་བརྒྱད་ལྡན་བཟང་པོ་འདི་ཐོས་ནས། འགྲོ་བ་ཐམས་ཅད་སངས་རྒྱས་ཉིད་འཚལ་དགེ་ལ་བརྩོན་ཞིང་དགའ་བར་འགྱུར། །ཐེ་ཚོམ་བྲལ་གྱུར་རྣམ་དག་ཡིད་ཀྱིས་བརྩོན་འགྲུས་དྲག་པོའི་སྟོབས་བསྐྱེད་ཅིང ། །བདེ་བར་གཤེགས་པའི་བསྟན་པ་བཞིན་བགྱིད་ཁྱོད་དང་མཐུན་འབྱུང་སྲས་སུ་འགྱུར། །འཁོར་རྣམས་འདི་དག་རྟེན་པ་གཞན་མ་མཆིས་པར་ཁྱོད་ཀྱི་ཞལ་དུ་ལྟ། །འགྲོ་བའི་རྩ་ལག་རྟོག་པ་ཡིད་གཉིས་བསལ་ཞིང་ལུང་བསྟན་བཀའ་སྩལ་གསོལ། །བཅོམ་ལྡན་འཇིག་རྟེན་འདི་དག་ཁྱོད་ཀྱི་ཞམ་རིང་གནས་ཤིང་ཉན་པར་འཚལ། །གསུང་རབ་ལེགས་བརྗོད་བདུད་རྩིའི་ཆར་ཕོབ་གང་དག་སྐོམ་པ་འཚལ་བར་འགྱུར། །འདྲེན་པ་ཆེན་པོ་ཁྱོད་ཀྱི་འཁོར་འདི་དག་ཅིང་སངས་རྒྱས་ཡོན་ཏན་འཚལ། །རིང་དུ་སོང་བའི་མ་ལ་བུ་ལྟ་བཞིན་དུ་ཁྱོད་ཀྱི་ཞལ་དུ་ལྟ། །བདེ་གཤེགས་ལྷ་རྣམས་ལུང་བསྟན་བཀའ་སྩལ་བཞད་པའི་དོན་ཀྱང་བསྟན་དུ་གསོལ། །སྐྱོབ་པའི་གསུང་མཆོག་ཐོས་ན་འཇིག་རྟེན་དོན་ཆེན་ཤིན་ཏུ་ཐོབ་པར་འགྱུར། །ཐུབ་པ་དེ་རིང་སུ་ཞིག་དགེ་བ་འཕེལ་ཅིང་གྲགས་པ་དོན་དུ་གཉེར། །སུ་ཞིག་འདྲེན་པའི་ཡོན་ཏན་གཏེར་རྙེད་འགྱུར་པ་བདག་ཅག་དེ་ཉན་འཚལ། །རྒྱལ་བའི་འཁོར་རྣམས་ཁྱོད་ཀྱིས་གསུངས་པ་དེ་དག་ཐོས་
210b
ཤིང་དག་གྱུར་ནས། །ཚུལ་འདི་སྟོན་ཅིང་ཏིང་འཛིན་སྟོབས་ལྡན་ཤེས་རབ་ལ་ཡང་སྒོམ་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱི་སྤོབས་པ་ལེགས་པར་དུས་ལྡན་སྐྱེས་པ་ཤིན་ཏུ་ལེགས། །བདེ་གཤེགས་རྣམ་པར་སྤྲུལ་བཞིན་དེ་ལྟར་ཁྱོད་ཀྱི་བློ་གྲོས་འབྱུང་འགྱུར་ཞིང ། ། སྤོབས་བ་ཆེ་འབྱུང་དེ་ཕྱིར་གང་དང་གང་དག་ཁྱོད་ཀྱིས་དྲིས་གྱུར་པ། །དེ་དག་ལུང་བསྟན་ངས་བཤད་ཀུན་ཀྱང་དབང་པོ་ཞི་བས་མཉན་པར་གྱིས། །འོད་གསལ་བ་ཡི་ལྷ་རྣམས་བློ་དག་སྔོན་གྱི་རྒྱལ་བ་མཐོང་བ་སྟེ། །འཇིག་རྟེན་མགོན་མེད་ཡིད་ཅན་དག་མཐོང་བྱང་ཆུབ་ཡང་དག་ཞུགས། །བྱང་ཆུབ་ངེས་འབྱུང་ལམ་མཆོག་ཡང་དག་རྒྱལ་བས་སྤྱད་པ་སྤྱོད། །བྱང་ཆུབ་འགྲོ་འདོད་གང་ཚེ་སྟོན་མེད་ལམ་སྟོར་རྣམས་ལ་སྟོན་པར་འགྱུར། །ཚུལ་གྱི་དམ་པ་ཤིན་ཏུ་གསལ་སྒྲ་ཐུན་མོང་མ་ཡིན་འདི་ཐོས་ནས། །སངས་རྒྱས་ཡོན་ཏན་དོན་གཉེར་བློ་སྦྱངས་དེ་དག་བྱང་ཆུབ་ཞི་ཐོབ་འགྱུར། །དེ་དག་སྟོབས་སྐྱེས་ཚུལ་དང་ཚུལ་མིན་མཁས་ཤིང་བྱང་ཆུབ་ཡིད་ངེས་གྱུར། །བུ་སྐྱེས་མ་བཞིན་དགའ་བས་བྱང་ཆུབ་མཆོག་ཏུ་དེ་དག་སྨོན་ལམ་བཏབ། །འོད་གསལ་ལྷ་རྣམས་འདི་དག་བྱང་ཆུབ་འདོད་ལ་ཚུལ་གྱི་སྒོ་བསྟན་ཏེ། །བསྐལ་པ་ཁྲག་ཁྲིག་བརྗོད་དུ་མེད་པར་ཕྲ་བའི་ཚུལ་འདི་བསྟན་བྱས་ནས། །སེམས་ཅན་སྐར་
211a
༄#། །མའི་གྲངས་པས་ཆེས་མང་བ་དག་བྱང་ཆུབ་དགའ་བྱས་ཏེ། །དེ་ཡི་འོག་ཏུ་འཇིག་རྟེན་མཁས་པ་རང་བྱུང་སྐྱོན་བྲལ་ཀུན་མཁྱེན་འགྱུར། །དེ་དག་ཞིང་མཆོག་བརྗོད་དུ་མེད་པ་ཞིང་རྣམས་བྱེ་བ་བརྒྱ་བགྲངས་པར། །ཡངས་ཤིང་ཤིན་ཏུ་དགའ་ལ་མཐའ་དག་བཀོད་པ་རྣམས་ཀྱིས་བརྒྱན་པ་སྟེ། །ཀུན་གྱི་ཞིང་དུ་ངན་སོང་རྣམས་དང་དེ་བཞིན་མི་ཁོམ་ཡོང་མི་འབྱུང ། །བདེ་བར་གཤེགས་རྣམས་ཐུགས་བརྩེས་སེམས་ཅན་ཐམས་ཅད་རང་བྱུང་མཛད་པར་འགྱུར། །ཞིང་རྣམས་དེ་དག་གང་ནའང་ཉན་ཐོས་ཐེག་པ་སྟོན་པར་མི་འགྱུར་ཏེ། །སེམས་ཅན་ཐམས་ཅད་རང་བྱུང་ཉིད་དུ་མངོན་ཕྱོགས་འཕྲོག་པ་མེད་པར་འགྱུར། །དེ་ན་རང་བྱུང་སངས་རྒྱས་ཉིད་སྟོན་མཛད་པ་འཇིག་རྟེན་མཁས་རྣམས་ཀྱི། །སྐུ་ཚེའི་ཚད་ནི་བསྐལ་པ་བྱེ་བ་བརྒྱ་གྲངས་གངྒཱའི་བྱེ་སྙེད་འགྱུར། །རྟ་ཐུལ་འཇིག་རྟེན་ཁྲག་ཁྲིག་ཁམས་ཀྱི་ཉན་ཐོས་མྱ་ངན་བཟླས་པ་བས། །གང་ཡང་སྐྱེས་པའམ་བུད་མེད་གཅིག་ཅིག་བྱང་ཆུབ་ཡང་དག་དགའ་བྱས་ན། །བསོད་ནམས་དེ་ལ་སྔ་མས་གྲངས་སམ་དཔེར་ཡང་བྱ་བར་མི་ནུས་སོ། །དེ་བས་བྱང་ཆུབ་ཞུགས་པའི་སྐྱེས་བུ་དམ་པ་བྱང་ཆུབ་དགའ་བར་གྱིས། །རྟ་ཐུལ་འདི་ལ་འདྲེན་པ་ཐམས་ཅད་མཁྱེན་པ་འབྱུང་བ་རྙེད་སླ་མིན། །དེ་ནི་ཨུ་དུམ་ཝ་རའི་མེ་ཏོག་འདྲ་ཞེས་སངས་རྒྱས་མཐའ་ཡས་བློ་མངའ་གསུངས། །དེ་ཕྱིར་བླ་
211b
ན་མེད་པའི་ཞི་བདེ་བྱང་ཆུབ་མི་གང་འདོད་པ་ཡིས། །ཤིན་ཏུ་བློ་ཕྲ་བསྟེན་བཟང་མཁྱེན་པ་ཚུལ་མཁས་འདྲེན་ལ་བརྟེན་པར་བྱ། །དེ་བཞིན་གཤེགས་ཀྱི་ཞལ་ནས་དོན་བྱེད་གསུངས་དགེ་དེ་འདྲ་ཐོས་གྱུར་ནས། །འཁོར་རྣམས་ཐམས་ཅད་ཡི་རང་མཆོག་ཏུ་དགའ་ཞིང་ཡང་དག་དགའ་བར་གྱུར། །ཁྲག་ཁྲིག་ལྷ་རྣམས་ནམ་མཁར་འཁོད་ནས་གོས་ཀྱི་གཡབ་མོ་འདོར་བར་བྱེད། །དགའ་ནས་སངས་རྒྱས་དབང་ཕྱུག་ཁྱོད་ལ་ཕྱག་འཚལ་ལོ་ཞེས་སྒྲ་ཡང་ཕྱུང ། །ཞི་བ་ཐུགས་ཞི་སྐྱེ་བོ་ཉོན་མོངས་རྒོད་པས་རྒོད་གྱུར་ཞི་བར་མཛོད། །བདུད་རྩི་སྟོན་ཅིང་དུག་གསུམ་ཞི་མཛད་སེམས་ཅན་དུག་ནི་སྐྱུག་ཏུ་གསོལ། །ཁྱོད་ཀྱི་ཡེ་ཤེས་ཐོས་ནས་སྐྱེ་རྒུའི་དུག་མེད་འགྱུར་ཞིང་དགྲ་མེད་འགྱུར། །སྡུག་བསྔལ་རྣམས་ཀྱི་འདྲེན་ལས་ཚུལ་ཐོས་མི་ཟད་སྲིད་པའི་རྒྱུད་ལས་འགྲོལ། །འོད་གསལ་བ་ལུང་བསྟན་པའི་ལེའུ་སྟེ། ཉི་ཤུ་གཅིག་པའོ།། །།བམ་པོ་བརྒྱད་པ། དེ་ནས་དགེ་རྒྱས་ཀྱི་རིས་ཀྱི་ལྷ་ཁྲག་ཁྲིག་ཕྲག་བཅུ་གཉིས་ཀྱིས་ལྷ་མ་ཡིན་རྣམས་ནས་འོད་གསལ་བའི་ལྷའི་བར་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ཞིང་དགའ་བ་དང ། །ཡིད་བདེ་བ་སྐྱེས་ནས་བདག་ཅག་ཚུལ་ཕུན་སུམ་ཚོགས་པར་གྱུར་པ་ཡང་བརྗོད་ཅིང ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་
212a
༄#། །ལྡན་འདས། ཆོས་ཐམས་ཅད་ལ་བདེ་བར་འགྲོ་བ་ཞེས་བགྱི་བའི་ཏིང་ངེ་འཛིན་མཆིས་ཏེ། ཏིང་ངེ་འཛིན་དེ་ཐོབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པའི་དངོས་པོ་ཐམས་ཅད་ལ་བདེ་བའི་ཚོར་བ་ཤ་སྟག་མྱོང་བར་འགྱུར་ཞིང་སྡུག་བསྔལ་གྱི་ཚོར་བ་མི་མྱོང་ལ། སྡུག་བསྔལ་བ་ཡང་མ་ལགས། བདེ་བ་ཡང་མ་ལགས་པ་ཡང་མི་མྱོང་སྟེ། སེམས་ཅན་དམྱལ་བའི་གནོད་པས་གནོད་པར་བགྱིས་ཀྱང་བདེ་བའི་འདུ་ཤེས་ཉེ་བར་གནས་པ་དང ། མིའི་གནོད་པས་གནོད་པར་བགྱིས་ཀྱང་བདེ་བའི་འདུ་ཤེས་ཉེ་བར་གནས་པ་དང ། ལག་པ་བཅད་དམ། རྐང་པ་བཅད་དམ། རྐང་ལག་བཅད་དམ། རྣ་བའམ། སྣའམ། རྣ་བ་དང ། སྣ་གཏུབས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང ། སྦ་ལྕག་གིས་བཞུས་སམ། སྤ་ལྕག་ཕྱེད་ཚལ་ལམ། ལྕག་གིས་བཞུས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང ། བཙོན་རར་བཅུག་གམ། ལྕགས་སྒྲོག་དང ། ཤིང་སྒྲོག་ཏུ་བཅུག་གམ། བཙོན་ཆད་མ་པོ་ལ་རྒྱས་བཏབ་བམ། བྱིས་པའི་གཙུག་ཕུད་ལྟར་བཅིངས་སམ། དུགས་ཀྱི་སྣོད་ལྟར་གདུགས་སམ། བུ་རམ་ཤིང་བརྡུང་བ་ལྟར་བརྡུངས་སམ། འདམ་བུ་བཅོམ་པ་ལྟར་བཅོམ་མམ། འབྲུ་མར་གྱི་མར་མེ་ལྟར་འབར་བར་བྱས་སམ། མར་
212b
གྱི་མར་མེ་དང ། ཞོ་བསྐོལ་བ་ལྟར་འབར་བར་བྱས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང ། མེའི་ནང་དུ་བོར་རམ། སེངྒེའི་ཁར་བསྟབས་སམ། སྟག་གི་ཁར་བསྟབས་སམ། སྐམ་རིལ་བྱ་བ་ལྟར་དྲིལ་ཏམ། བྱི་བའི་ཆད་པ་ལྟ་བུས་བཅད་དམ། ཉེས་པ་བྱུང་བ་བསྒྲགས་པ་ལྟར་བསྒྲགས་སམ། ཀཪྴ་པ་ཎི་ཙམ་དུ་གཏུབས་སམ། འབྲས་ཕྱེ་བཙོ་བ་ལྟར་བཙོས་སམ། གླང་པོ་ཆེ་རྣམས་ཀྱིས་བཅོམ་ཡང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང ། མིག་ཕྱུང་ངམ། གསལ་ཤིང་གི་རྩེ་མོ་ལ་བཞག་གམ། བསད་པའི་གནས་སུ་ཁྲིད་དེ་རྣམ་པ་ཐམས་ཅད་དུ་མགོ་གཅོད་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་ཏེ། བདེ་བ་ཡང་མ་ལགས་མི་བདེ་བ་ཡང་མ་ལགས་པའི་འདུ་ཤེས་རྣམ་པ་ཐམས་ཅད་དུ་མི་འབྱུང་ངོ ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེས་ཡུན་རིང་པོ་ནས་སྤྱད་པ་སྤྱོད་པའི་ཚེ་སྨོན་ལམ་འདི་ལྟར་བཏབ་སྟེ ། གང་གིས་བདག་ལ་ཁ་ཟས་བྱིན་པ་དེ་དག་ཉེ་བར་ཞི་བའི་བདེ་བ་ཐོབ་པར་གྱུར་ཅིག་།གང་གིས་བདག་ལ་སྒོམ་བླུད་པ་དེ་དག་དང ། གང་གིས་བདག་ལ་རིམ་གྲོ་བྱས་པ་དང ། བཀུར་སྟིར་བྱས་པ་དང ། བསྟི་སྟང་དུ་བྱས་པ་དང ། མཆོད་པ་བྱས་པ་དེ་དག་ཐམས་ཅད་ཀྱང་ཉེ་བར་ཞི་བའི་བདེ་བ་ཐོབ་པར་གྱུར་ཅིག་།གང་ཡང་བདག་ལ་གཤེ་བ་དང ། མི་བདེ་བར་
213a
༄#། །བྱེད་པ་དང ། བརྡེག་པ་དང ། མཚོན་གྱིས་འདེབས་པ་དང ། རྣམ་པ་ཐམས་ཅད་དུ་སྲོག་གཅོད་པའི་བར་དུ་བྱེད་པ་དེ་དག་ཐམས་ཅད་ཀྱང་བྱང་ཆུབ་ཀྱི་བདེ་བ་ཐོབ་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་།ཅེས་སྨོན་ལམ་བཏབ་སྟེ། དེ་ཡིད་ལ་བྱ་བ་དེ་དག་དང་ལྡན་ཞིང ། དེ་ལྟ་བུའི་ལས་དང ། དེ་ལྟ་བུའི་སྨོན་ལམ་དང་ལྡན་པས་སེམས་ཅན་ཐམས་ཅད་ཀྱི་རྗེས་སུ་སོང་བའི་བདེ་བའི་འདུ་ཤེས་ལ་བརྟེན་ཅིང་བསྙེན་ལ་སྒོམ་ཞིང་མང་དུ་བྱེད་དེ།་དེ་ལས་དེའི་རྣམ་པར་སྨིན་པས་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་རབ་ཏུ་ཐོབ་བོ། །གང་གི་ཚེ་བྱང་ཆུབ་སེམས་དཔས་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་ཐོབ་པར་གྱུར་པ་དེའི་ཚེ་བདུད་ཀྱི་ལས་ཐམས་ཅད་ཀྱིས་མི་འཕྲོག་ཅིང་མི་འཁྲུགས་པར་འགྱུར་ཏེ། དེའི་ཚེ་འདི་ལྟར་ཚེ་ལ་དབང་བ་དང ། སྐྱེ་བ་ལ་དབང་བ་དང ། ལས་ལ་དབང་བ་དང ། རྣམ་པར་རྟོག་པ་ལ་དབང་བ་དང ། ཡོ་བྱད་ལ་དབང་བ་སྟེ། དབང་ལྔ་ཐོབ་པར་རིག་པར་བགྱིའོ། །དེ་འཚལ་ན། ཚེ་བརྗེས་མ་ཐག་ཏུ་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་འཚལ་ན། བསྐལ་པ་གྲངས་མ་མཆིས་པ་གནས་སོ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་
213b
དེ་ཐེག་པ་ཆེན་པོ་ལ་ཡང་དག་པར་ཞུགས་ཤིང་བྱང་ཆུབ་སེམས་དཔའ་སྒྲུབ་པ་དང ། བྱང་ཆུབ་སེམས་དཔའ་ཡོངས་སུ་འཛིན་པ་དང ། ངན་འགྲོ་ཐམས་ཅད་རབ་ཏུ་བསལ་བ་དང ། འགྲོ་བ་དྲུག་པོ་ཀུན་ཏུ་སྐྱེས་པ་དང ། བྱང་ཆུབ་སེམས་དཔའི་བསླབ་པ་ཐམས་ཅད་ལ་བསླབ་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་བ་དང ། ཐབས་མཁས་པ་དང་ལྡན་པ་དང ། བདུད་ཀྱི་ལས་ལས་རྣམ་པར་རྒྱལ་བ་དང ། ཆོས་ཐམས་ཅད་ཁོང་དུ་ཆུད་པར་རིག་པར་བགྱི་བའི་སླད་དུ་སྟེ། བཅོམ་ལྡན་འདས། གང་གིས་བྱང་ཆུབ་སེམས་དཔའ་ཆོས་ཐམས་ཅད་ལ་ངེས་པའི་རྟོགས་པ་ཐོབ་པར་འགྱུར་བ་ཐམས་ཅད་ནི། དེ་བཞིན་གཤེགས་པའི་མཐུའོ། །དེ་ནས་དགེ་རྒྱས་རིས་ཀྱི་ལྷ་རྣམས་ཀྱི་ཏིང་ངེ་འཛིན་འདི་བརྗོད་ནས་དེའི་ཚེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། དགེ་རྒྱས་ལྷ་ཚོགས་འདི་དག་ཐམས་ཅད་ཆོས་ལ་མཐར་ཐུག་གྱུར་པ་སྟེ། །སྟོན་པ་དབང་པོ་ཞི་ཞིང་ཞི་བ་མཁྱེན་ལ་མགོ་བོས་སྐྱབས་སུ་མཆི། །དེ་དག་མཁས་པས་མཆོད་པའི་སངས་རྒྱས་དོན་མཁྱེན་འཁོར་བ་བརྒལ་གྱུར་པ། །ཐུབ་པ་མི་ཡི་འདྲེན་པ་ཚུལ་མཁས་རྒྱལ་བ་འདྲེན་པ་འདྲེན་ལ་བསྟོད། །འདི་ན་རང་བཞིན་ངེས་པའི་ཐུབ་ཆོས་གནས་པ་གང་ནའང་མ་མཆིས་ཏེ། །སྒྱུ་མའི་མཁན་པོས་སྒྱུ་མ་ཇི་བཞིན་ཁྱོད་ཀྱིས་ཐུབ་པ་ལེགས་པར་མཁྱེན། །ཡན་ལག་སྣ་ཚོགས་སྒྲ་
214a
༄#། །བརྙན་རི་ཁྲིད་འབྱུང་བ་མཁས་པས་རྟོགས་པ་ལྟར། །དེ་བཞིན་གཤེགས་པའི་དྲང་སྲོང་ཁྱོད་ཀྱིས་ལྷ་མིར་བཅས་པའི་འཇིག་རྟེན་གཟིགས། །འདི་ནི་སེམས་ཅན་སྲོག་དང་ཤེད་བུ་གསོ་བ་གང་ཟག་མ་མཆིས་ཏེ། །མི་མཆོག་ཁྱོད་ཀྱིས་འདུ་ཤེས་རྣམ་པར་བཤག་ཅིང་སྟོང་པར་རྣམ་བཞག་ལ། །རྐང་གཉིས་དམ་པ་སེམས་ཅན་གཙོ་བོ་བྱམས་པ་གཞལ་ཡས་སྒོམ་པའང་མཛད། །རྒྱལ་བ་སངས་རྒྱས་དགོངས་པ་འདི་ནི་འགྲོ་བ་ཀུན་གྱིས་རྟོགས་པར་དཀའ། །བྱམས་པ་དགེ་སྒོམ་སེམས་ཅན་དམིགས་པ་ཡིན་ཞེས་འདྲེན་པས་བཀའ་སྩལ་ལ། །སེམས་ཅན་རྣམ་པར་བཤིག་ཅིང་འགྲོ་བ་ཐམས་ཅད་སེམས་ཅན་མེད་པར་མཁྱེན། །དེ་ལྟར་རྐང་གཉིས་དམ་པ་རྙོག་པ་མི་མངའ་ཐེ་ཚོམ་བྲལ་ཐུགས་ལྡན། །དེས་ན་བདེ་གཤེགས་པ་རྣམ་བརྟགས་བློ་མངའ་མཆོད་འོས་ཁྱོད་ལ་མཆོད་པར་འཚལ། །བདེ་བར་གཤེགས་པ་སྡུག་བསྔལ་ཕྱོགས་བཅུར་གནས་པ་ཀུན་ཏུ་མི་དམིགས་ཀྱང ། །ལྷ་ཡི་ལྷར་གྱུར་ཁྱོད་ཀྱིས་སེམས་ཅན་རྣམས་ལ་སྙིང་རྗེ་བགྱི་བར་གསུངས། །དེ་ལྟར་རྒྱལ་མཆོག་བདག་ཅག་རྒྱལ་བའི་དགོངས་པ་ཇི་བཞིན་ཀུན་ཏུ་འཚལ། །དེས་ན་རྐང་གཉིས་གཙོ་བོ་མི་མཆོག་མཆོད་འོས་ཁྱོད་ལ་མཆོད་པར་འཚལ། །ཐུབ་པ་ཁྱོད་ཀྱིས་སེམས་ཅན་དང་ནི་བསལ་བགྱི་སྡུག་བསྔལ་མི་གཟིགས་ལ། །དགྱེས་པ་སྐྱེས་
214b
ནས་རབ་ཏུ་དགྱེས་པའི་ཐུགས་ཀྱིས་མི་དགྱེས་རྣམ་པར་བསལ། །དེ་ལྟར་སངས་རྒྱས་ཚུལ་ནི་བསམ་གྱིས་མི་ཁྱབ་ཚུལ་འདི་ཇི་བཞིན་འཚལ། །དེས་ན་མི་མཆོག་ཁྱོད་ལ་མཆོད་ནས་བརྙེས་པའི་འབྲས་བུ་ཐོབ་པར་བགྱི། །སྐྱོན་བྲལ་ཁྱོད་ཀྱིས་འགྲོ་བ་ཀུན་ཏུ་སྡུག་བསྔལ་མྱ་ངན་འདས་མ་དམིགས། །འོན་ཀྱང་འཁོར་བར་སེམས་ཅན་གཟིགས་ཤིང་དོན་མཛད་སྟོབས་དང་ལྡན་པ་བསྐྱེད། །སེམས་ཅན་སྡུག་བསྔལ་འགྲོ་དང་ཐུབ་དང་མྱ་ངན་འདས་དང་གནས་མ་མཆིས། །སངས་རྒྱས་ཚུལ་འདི་རྟོགས་ནས་ཐུབ་པ་མཆོད་འོད་ཁྱོད་ལ་མཆོད་པར་འཚལ། །འདྲེན་པ་ཚད་མེད་བཞི་པོ་གཟིགས་ཤིང་དེ་ཡང་གཉིས་སུ་མེད་པར་བསྟན། །གང་ཞིག་དེར་རྡུལ་མ་གཟིགས་གང་ཡང་ཚད་མེད་གནས་པ་དེ་མ་གཟིགས། ། ཐུབ་པས་བག་མེད་གང་ཡང་མ་གཟིགས་བག་ཡོད་མི་ཡང་མ་གཟིགས་ཏེ། །སངས་རྒྱས་ཚུལ་འདི་འཚལ་ནས་ཐུབ་པ་སྟོན་པ་ཁྱོད་ལ་མཆོད་པར་བགྱིས། །ཐུབ་པ་སྐུ་ནི་རྣམ་པར་སྤངས་པས་སྐུ་བཙལ་མཛད་ན་མ་བརྙེས་ཀྱང ། །དེ་ལྟར་འདྲེན་པ་དྲན་པ་མ་གསུང་མ་ལགས་བསྙེལ་བ་ཡོང་མི་མངའ། །བདེ་བར་གཤེགས་པས་ལུས་ལ་སོང་བའི་སྒོམ་པ་སྒོམ་པར་གྱིས་ཞེས་གསུངས། །སངས་རྒྱས་ཚུལ་འདི་ནི་གནས་བདེ་བར་གཤེགས་པ་སྐྱོབ་ལ་མཆོད་པ་བགྱིས། །འདྲེན་པས་ཚོར་བའི་རང་བཞིན་བཙལ་བ་མཛད་ན་བརྙེས་པར་མ་
215a
༄#། །གྱུར་ལ། །ཚོར་བ་ཚོར་བར་བགྱིད་པའང་ཐུབ་པས་ཡོངས་སུ་བཙལ་ན་མ་བརྙེས་ཏེ། །དེ་ལྟར་གང་ཞིག་དྲན་སྒོམ་དེ་ནི་སངས་རྒྱས་ཀྱིས་ཀྱང་ཡོང་མ་གཟིགས། །སངས་རྒྱས་ཚུལ་འདི་འཚལ་ནས་སྟོན་པ་ལ་ནི་བདག་ཅག་མཆོད་པ་བགྱིས། །ཐུབ་པས་སེམས་དང་སེམས་ལས་བྱུང་བ་དགོངས་ཏེ་བཙལ་ན་མ་རྙེད་ལ། །གང་གི་ཉེ་བར་བཞག་པ་དེ་ཡང་དྲན་པ་མེད་པར་རབ་མཁྱེན་ཀྱང ། །ཐར་པ་འདོད་པ་རྣམས་ཀྱིས་སེམས་འདུས་དྲན་པ་སྒོམ་པར་གྱིས་ཞེས་གསུངས། །བདེ་བར་གཤེགས་པའི་དགོངས་པ་འདི་འཚལ་ནས་ནི་སྟོན་ལ་མཆོད་པར་བགྱིས། །འཇིག་རྟེན་ཕན་པར་བཞེད་པས་ཆོས་དང་ཆོས་ལ་གང་སྤྱོད་དེ་མ་གཟིགས། །སྒོམ་པར་གང་གསུངས་དྲན་པ་དེ་ཡང་འདི་ན་རང་བཞིན་མ་མཆིས་ལ། །ཐར་པ་འདོད་པ་རྣམས་ཀྱིས་ཆོས་འདུས་དྲན་པ་སྒོམ་པར་གྱིས་ཞེས་གསུངས། །སངས་རྒྱས་ཚུལ་བཞི་པོ་འདི་རབ་ཏུ་འཚལ་ནས་སྐྱོབ་ལ་མཆོད་པ་བགྱིས། །གནས་གཅིག་མཆིས་པ་མ་ལགས་གཉིས་སམ་གསུམ་མམ་བཞི་ལྟ་ག་ལ་མཆིས། །གང་གི་གནས་སུ་བརྗོད་པའི་དྲན་པ་དེ་ཡང་གང་ནའང་མ་མཆིས་ཏེ། །དེ་བས་གང་གི་བདེ་བའམ་སྡུག་བསྔལ་ཡང་དག་གང་ནའང་དེ་མ་མཆིས། །སྟོན་པའི་ཚུལ་འདི་འཚལ་ནས་དེས་ན་བདག་ཅག་ཁྱོད་ལ་མཆོད་པ་འཚལ། །སྟོན་པའི་ཚུལ་
215b
མཆོག་བཞི་པོ་འདི་རྣམས་དགེ་སློང་གང་དག་འཛིན་བགྱིས་ན། །འདི་དག་ཐར་པ་ཉིད་ཀྱི་ལམ་སྟེ་འཁོར་བ་ལས་ནི་འབྱུང་བར་འགྱུར། །དེ་ལྟར་དེ་ནི་ཚུལ་འདིར་མ་བཅིངས་མ་གྲོལ་བྱང་ཆུབ་འདྲེན་པ་མིན། །བཅོམ་ལྡན་འདས་ཀྱིས་བཏགས་པ་མ་བཤིག་དེས་ན་ཁྱོད་ལ་མཆོད་པར་འཚལ། །ཐར་མཛད་སླད་དུ་བཅོམ་ལྡན་འདས་ཀྱིས་ལམ་ཞི་རྫུ་འཕྲུལ་རྐང་པ་གསུངས། །འདི་དག་བསྒོམས་ན་མི་རྣམས་དབང་པོ་དུལ་ཞིང་མྱ་ངན་འདའ་བར་འགྱུར། །ཡང་དག་ཏུ་ནི་རྫུ་འཕྲུལ་དང་ནི་རྐང་པ་སྒོམ་པ་མི་དམིགས་ཏེ། །ཆད་པར་མི་འགྱུར་བྱ་བའང་སྟོན་ཅིང་བྱེད་པ་པོ་ཡང་མི་དམིགས་ལ། །ཐམས་ཅད་མཁྱེན་གྱི་བསྟན་འདིར་ལྷ་ཚོགས་ཐེ་ཚོམ་གང་ནའང་མ་མཆིས་ཏེ། །དེ་དག་དེ་ན་ནེམ་ནུར་མ་མཆིས་དེ་བཞིན་སོམ་ཉི་མ་མཆིས་འགྱུར། །འདི་ན་མཆོད་པ་བཟང་པོ་མཆོག་ཅེས་མཆོད་འོས་སངས་རྒྱས་རྣམས་ཀྱིས་གསུངས། །དེས་ན་བདེ་གཤེགས་དཔེ་མེད་སྤྱོད་མངའ་མཆོད་འོས་ཁྱོད་ལ་མཆོད་པ་འཚལ། །ཐར་པར་མཛད་སླད་འཇིག་རྟེན་མཁས་པས་ངེས་འབྱུང་དབང་པོ་ལྔ་ཡང་གསུངས། །རྟག་ཏུ་བག་ཡོད་བྱོས་ལ་མྱ་ངན་འདས་འགྲོའི་ལམ་འདི་སྒོམས་ཞེས་བསྟན། །ཐུབ་པ་དབང་པོ་དང་ནི་སྒོམ་པ་པོ་དང་ཐར་པའང་མི་དམིགས་ཏེ། །འདི་ལ་ལྷ་འཁོར་ཐེ་ཚོམ་མ་མཆིས་དེ་སླད་ཁྱོད་ལ་མཆོད་པ་འཚལ། །སངས་རྒྱས་རྣམས་ཀྱི་མྱ་
216a
༄#། །ངན་འདས་པར་འགྲོ་བའི་དྲང་ལམ་སྟོབས་ལྔ་པོ། །དེ་དག་ཉོན་མོངས་ཟད་བགྱིད་ཐར་པར་བགྱིད་ཅེས་སྟོན་པ་ཐུབ་པས་གསུངས། །དེ་དག་རང་བཞིན་མ་མཆིས་ཉོན་མོངས་མ་མཆིས་རྒྱལ་བ་མ་མཆིས་ཏེ། །ཐུབ་པ་བདག་ཅག་གང་ལའང་ཐེ་ཚོམ་མ་མཆིས་དེ་སླད་ཁྱོད་ལ་མཆོད། །བྱང་ཆུབ་ཡན་ལག་བདུན་པོ་འདི་དག་དགེ་བ་ལམ་གྱི་དམ་པ་སྟེ། །སངས་རྒྱས་རྣམས་ཀྱི་མྱ་ངན་འདས་འགྲོའི་དྲང་ལམ་མཆོག་ཅེས་ཐུབ་པས་གསུངས། །འཆིང་བ་མཆིས་པ་མ་ལགས་གྲོལ་བ་མ་མཆིས་བཅིངས་པའང་མ་མཆིས་ཏེ། །སེམས་ཅན་དཀོན་མཆོག་འདི་ལ་བདག་ཅག་ཐེ་ཚོམ་མ་མཆིས་ཁྱོད་ལ་མཆོད། །རྐང་གཉིས་གཙོ་བོ་ཁྱོད་ཀྱིས་བཞི་ཕྲག་གཉིས་ལམ་སེམས་ཅན་རྣམས་ལ་བསྟན། །བརྩོན་འགྲུས་ལྡན་པར་འཕགས་ལམ་སྡུག་བསྔལ་མཐར་མར་འབྱིན་པ་སྒོམས་ཞེས་གསུངས། །མི་མཆོག་ལམ་དང་དེ་བཞིན་ཉོན་མོངས་འདི་གཉིས་གཡོ་བ་མ་མཆིས་ཏེ། །འདི་ལ་ལྷ་ཚོགས་ཐེ་ཚོམ་མ་མཆིས་གྱུར་པས་མཆོད་འོས་ཁྱོད་ལ་མཆོད། །འདོད་ཆགས་གཉེན་པོར་ཞི་གནས་བཀའ་སྩལ་ཞེ་སྡང་གཉེན་པོར་བྱམས་པ་གསུངས། །གཏི་མུག་གཉེན་པོར་ལྷག་མཐོང་ཐུབ་པ་མཆོག་གིས་སེམས་ཅན་རྣམས་ལ་བསྟན། །འདི་དག་ཐམས་ཅད་གཡོ་བ་མ་མཆིས་སྐད་ཅིག་དག་
216b
མིན་ཉོན་མོངས་མིན། །འདི་ལ་ལྷ་ཚོགས་ཐེ་ཚོམ་མ་མཆིས་ཐུབ་པ་མཆོད་སླད་རྟག་ཏུ་བརྩོན། །སྡུག་བསྔལ་ཞི་བྱ་ཕྱིར་ནི་ཞི་གནས་ལྷག་མཐོང་ལམ་ཡང་སྒོམས་ཞེས་གསུངས།། བཅོམ་ལྡན་གང་གིས་འགྲོ་བ་ཉོན་མོངས་བག་ཆགས་བཅས་དྲི་དེ་དག་ཞི། །ཐུབ་པ་ཞི་གནས་ལྷག་མཐོང་དེ་བཞིན་དྲི་མ་ཐམས་ཅད་སྟོང་པ་སྟེ། །འདི་ལ་ལྷ་ཚོགས་གང་དུའང་ཐེ་ཚོམ་མ་མཆིས་སྐྱོན་བྲལ་ཁྱོད་ལ་མཆོད། །སྟོབས་བཅུ་སེམས་ཅན་རྣམས་ལ་དགེ་བ་བཅུ་ཡི་ལས་ལམ་བསྟན་མཛད་དེ། །གསོད་དང་འཁྲིག་དང་མ་བྱིན་ཕྲ་མ་རྫུན་དང་ཞེ་གཅོད་ཀྱལ་ཚིག་དང ། །གནོད་སེམས་དང་ནི་མི་རིགས་འདོད་དང་དེ་བཞིན་ལོག་པར་རྟོག་པ་རྣམས། །མི་དགེའི་ལས་ལམ་འདི་ཡང་བཅོམ་ལྡན་འདས་ཀྱིས་སེམས་ཅན་རྣམས་ལ་བསྟན། །སེམས་ཅན་མི་དམིགས་གསོད་པ་ག་ལ་མཆིས་ཏེ་ལྷག་མ་དེ་དང་འདྲ། །གཉེན་པོ་དགེ་བ་མ་མཆིས་དེ་ནི་ངོ་བོ་ཉིད་ཀྱིས་སྟོང་པ་སྟེ། །བདེ་གཤེགས་ཐུབ་པ་ཟག་པ་མི་མངའ་རྣམས་ཀྱང་ངོ་བོ་ཉིད་ཀྱིས་སྟོང ། །རྣམ་འདྲེན་ཐེ་ཚོམ་སོམ་ཉི་མ་མཆིས་དེ་སླད་ཁྱོད་ལ་ཕྱག་ཀྱང་འཚལ། །སངས་རྒྱས་སྲས་པོ་དགེ་བའི་བློ་ཅན་གང་ཞིག་སྤྱོད་པ་འདི་བསྟན་པ། །མཁས་པ་ཀུན་ཏུ་དགེ་བ་ཉིད་མྱོང་སྡུག་བསྔལ་མྱོང་བར་ཡོང་མི་འགྱུར། །བཅོམ་ལྡན་བདེ་གཤེགས་ཡེ་ཤེས་དེས་ནི་ཚུལ་འདི་བདེ་བར་ཐོབ་པར་བགྱིས། །འདི་ལ་ལྷ་ཚོགས་
217a
༄#། །ཐེ་ཚོམ་མ་མཆིས་མཆོད་འོས་ཁྱོད་ལ་མཆོད་པར་འཚལ། །དེ་ལྟར་དགེ་རྒྱས་ཀྱིས་ལྷ་རྣམས་ཀྱིས་བཅོམ་ལྡན་འདས་ལ་མངོན་པར་བསྟོད་ནས་ཅང་མི་ཟེར་བར་འཁོད་དོ། །དེ་ནས་བཅོམ་ལྡན་འདས་ཀྱིས་དགེ་རྒྱས་ཀྱི་ལྷ་རྣམས་ཅང་མི་ཟེར་བར་འཁོད་པ་ཡང་མཁྱེན། དེ་དག་གི་ལྷག་པའི་བསམ་པས་བསྒྲུབས་པ་ཡང་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་བ། སྐྱེ་བོ་འདི་ཀུན་བཅོམ་ལྡན་ཁྱོད་ཀྱི་མཁྱེན་པའི་ཟིལ་གྱིས་ཟིལ་མནན་ནས། །བདེ་གཤེགས་རྒྱལ་བ་མཆོག་ཁྱོད་ཀྱིས་ནི་འཛུམ་པ་མཛད་འདི་འཇིག་རྟེན་བསྟན། །རྒྱུ་མ་མཆིས་པར་ཆོས་ཀུན་མཁས་པ་རྣམས་ནི་འཛུམ་པ་མི་མཛད་ན། །འཛུམ་རྒྱུ་དོན་གཉེར་མི་མིག་མེད་རྣམས་ལ་འཇིག་རྟེན་མཁས་པས་བཀའ་སྩལ་གསོལ། །མ་ལུས་འདི་དག་ཐམས་ཅད་གཞན་དུ་མི་སེམས་ཁྱོད་འཛུམ་རེ་ཞིང་འཁོད། །དཔལ་སྟུག་ཁྱོད་ལ་བསྟོད་པ་བགྱིད་ཅིང་ཉན་པ་འཚལ་བའི་ཡིད་ཀྱིས་གནས། །སངས་རྒྱས་གསུང་གི་དབང་ཕྱུག་ཐོས་ནས་ཡིད་ནི་རབ་ཏུ་རངས་གྱུར་ཏེ། །ཆོས་རྣམས་ཀུན་ལ་ངེས་པའི་བློ་དགེ་ལྡན་པའི་སྟོན་པར་སྐྱེ་བར་འགྱུར། །བདེ་གཤེགས་མི་མཆོག་དགེ་བའི་ཐུགས་ཅན་དེ་རིང་སུ་ཞིག་བློ་གྲོས་བསྐྱེད། །དེ་རིང་གང་གིས་འཆི་མེད་ཞི་བ་རྟོགས་
217b
ཤིང་ཕྱོགས་རྣམས་སྣང་བར་བགྱིས། །སུ་ཞིག་འཇིག་རྟེན་ཐུགས་བརྩེ་རྒྱལ་བ་འདྲེན་པ་དཔག་ཏུ་མེད་འགྱུར་བ། །དེ་དག་བཀའ་སྩོལ་དྲང་སྲོང་འཁོར་འདི་ལེགས་པར་གསུངས་པས་ཚིམ་པར་མཛོད། །རྒྱལ་བ་ཁྱུ་མཆོག་དགེ་སྦྱོང་དམ་པ་དེང་སུ་བཙུན་ལ་དད་པ་སྐྱེས། །བདུད་ཀྱིས་མི་འཕྲོག་བློ་ལྡན་གང་ཞིག་ཆོས་ལ་ཡང་དག་ཡོངས་སུ་གནས། །སངས་རྒྱས་སྲས་པོ་ཚུལ་མཁས་གང་ཞིག་དེ་རིང་ངེས་པ་ཐོབ་པར་འགྱུར། །རྐང་གཉིས་གཙོ་བོ་དེ་དག་བཀའ་སྩོལ་འགྲོ་འདི་ཐེ་ཚོམ་མ་མཆིས་མཛོད། །བདེ་གཤེགས་དེང་སུ་འགྲོ་ལ་དད་བསྐྱེད་སྐྱེ་རྒུ་རྣམས་ལ་བྱམས་གྱུར་ཅིང ། །བྱང་ཆུབ་མཐར་ཕྱིན་བློ་གྲོས་བརྟན་ཞིང་ཐམས་ཅད་མཁྱེན་པ་ཉིད་ལ་གནས། །གང་ལ་འཛུམ་པ་དེང་བསྟན་བདེ་གཤེགས་བསྟན་པ་འཛིན་པ་དེ་གང་ལགས། །བསོད་ནམས་བརྒྱ་ཡི་མཚན་མངའ་དེ་དག་བཀའ་སྩོལ་བདག་གི་ཐེ་ཚོམ་ཁུམ། །འདྲེན་པ་ཁྱོད་གསུང་ཡན་ལག་བརྒྱད་ལྡན་ལེགས་པར་བཀའ་སྩལ་ཐོས་གྱུར་ན། ། བདེ་གཤེགས་གསུང་གིས་ཐོག་མར་བདག་ཅག་འདོང་ཞིང་འགྲོ་བ་གཞན་ཡང་འདྲེན། །དེ་ལྟར་གྱུར་ན་བདེ་གཤེགས་བསྟན་རབ་འདི་ནི་སྲས་ལ་གནས་པར་འགྱུར། །འཇིག་རྟེན་འདི་དག་ཡིད་ནི་མྱུར་དུ་བདེ་གཤེགས་རྣམས་ལ་གནས་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ང་ཡི་འཇིག་
218a
༄#། །རྟེན་དོན་བྱེད་འཛུམ་མཛད་རྟ་ཐུལ་ཁྱོད་ཀྱིས་མཐོང་གྱུར་ཅིང ། །སྐྱེས་བུ་དམ་པ་ཁྱོད་ཀྱིས་དུས་སུ་དྲིས་ཏེ་འགྲོ་བའི་དོན་བྱས་པ། །ཁྱོད་ཀྱི་བསོད་ནམས་འཕེལ་བ་བརྗོད་དུ་མེད་དེ་དེ་ནི་ཟད་མི་འགྱུར། །དེ་ནི་ཁྱོད་ལ་བསྟན་གྱི་ཁྱོད་དང་འགྲོ་བ་འདི་དག་དགའ་བས་ཉོན། །དགེ་རྒྱས་ལྷ་ཚོགས་འདི་དག་ང་ཡི་ཆོས་ཉིད་ལ་ནི་ཐེ་ཚོམ་མེད།། ཀུན་ཀྱང་ཡི་རང་རབ་ཞི་ཡིད་ཀྱིས་ཚིགས་བཅད་དག་གིས་ང་ལ་བསྔགས། །སྔོན་གྱི་སངས་རྒྱས་བྱེ་བ་ཁྲག་ཁྲིག་སྟོང་གྲངས་མཆོད་འོས་མཆོད་བྱས་ཏེ། །ཐེ་ཚོམ་མེད་པའི་ཡིད་ཀྱིས་ཚུལ་དྲིས་ཀུན་ཏུ་སོམ་ཉི་མེད་པར་གྱུར། །དེ་ལྟར་སྔོན་གྱི་རྒྱུ་དེས་འདིར་ཡང་ཚིགས་སུ་བཅད་པས་ང་ལ་བསྟོད། །བསྐལ་པ་བཟང་པོའི་རྒྱལ་བ་བསྟོད་འོས་ཀུན་ལའང་འདི་དག་བསྟོད་པར་འགྱུར། །འདི་དག་བསྐལ་པ་ཨུཏྤལ་ལ་ལ་རྒྱལ་བ་དགྲ་རྒྱལ་མཐུ་ཆེན་འགྱུར། །འདི་དག་སེམས་ཅན་ཁྲག་ཁྲིག་བསམ་ཡས་ཡོངས་སུ་མྱ་ངན་འདའ་བར་བྱེད། །སངས་རྒྱས་དྲང་སྲོང་ཆེན་པོ་དེ་དག་ཡིད་འོང་མཚན་དུ་གང་འགྱུར་བ། །དེ་ཡང་བསྟན་གྱི་དང་བའི་ཡིད་ཀྱིས་སེམས་ཀྱི་ཐ་བ་སྤངས་ཏེ་ཉོན། །རྒྱལ་བ་དེ་ཀུན་ཆོས་ཀྱི་ཏོག་ཅེས་བྱ་བའི་འདྲེན་པ་གཞལ་ཡས་འགྱུར། །འདི་དག་རེ་རེས་ཀྱང་ནི་ཁྲག་ཁྲིག་བསམ་ཡས་མྱ་ངན་ཟློ་བར་འགྱུར། །དེ་ཡི་ཚེ་ན་བདེ་གཤེགས་ཀུན་གྱི་རིང་བསྲེལ་ཤིན་ཏུ་རྒྱས་འགྱུར་ཏེ། །དེ་ཚེ་ཞིང་རྣམས་
218b
ཀུན་ཏུ་རྒྱལ་བའི་མཆོད་རྟེན་མེ་ཏོག་རྒྱས་པར་འགྱུར། །ཐུབ་པ་གྲགས་ཆེན་དེ་དག་ཡོངས་སུ་མྱ་ངན་འདས་པར་གྱུར་པ་ན། ཐུབ་པ་སྐྱོབ་པ་དེ་དག་ཀུན་གྱི་རིང་བསྲེལ་རྒྱས་པས་དོན་ཆེན་འགྱུར། །སེམས་ཅན་ཁྲག་ཁྲིག་བསམ་ཡས་རྣམས་ཀྱིས་དེའི་ཚེ་རིང་བསྲེལ་མཆོད་བྱས་ཏེ། །རིང་བསྲེལ་དེ་དག་མཆོད་ནས་མྱ་ངན་འདས་པ་ཞི་བ་འཆི་མེད་འཐོབ། །ཐུབ་པ་རྐང་གཉིས་གཙོ་བོ་དེ་དག་གྲགས་པ་རྒྱུན་ཆད་མི་འགྱུར་ཏེ། །སློབ་པ་ཁྲག་ཁྲིག་བསམ་ཡས་རྣམས་ཀྱང་དེ་ཚེ་རྒྱལ་བའི་དྲུང་དུ་འདུ། །ཇི་ལྟར་བྱེ་བ་བརྒྱ་གྲངས་ང་ལ་ལེགས་པར་སྤྱད་པ་བྱས་ནས་སུ། །བྱམས་པ་བལྟ་ཕྱིར་རྒྱ་ཆེན་ཡིད་ཀྱིས་བྱམས་པའི་འཁོར་དུ་འདོང་འགྱུར་བ། །དེ་ལྟར་རྒྱལ་བའི་ཉན་ཐོས་སློབ་ཚོགས་དེ་དག་རྒྱལ་ནས་རྒྱལ་འཁོར་དུ། །རྐང་གཉིས་གཙོ་བོ་དེ་དག་ཀུན་གྱི་རིང་བསྲེལ་མཆོད་པ་བྱ་ཕྱིར་འདོང ། །བདེ་གཤེགས་གསུང་སྙན་འགྲོ་བ་ཐམས་ཅད་ངོ་མཚར་གྱུར་པ་དེས་ཐོས་ཤིང ། །དགེ་རྒྱས་རིས་ཀྱི་ལྷ་ཡི་བདག་ཉིད་ཆེན་པོ་དེ་ཚེ་ཐོས་གྱུར་ནས། །འཁོར་རྣམས་ཐམས་ཅད་རབ་ཏུ་དགའ་སྟེ་ཕལ་ཆེར་བྱང་ཆུབ་སེམས་ཀྱང་བསྐྱེད། །བདག་ཉིད་ཆེན་པོ་དེ་ཚེ་ཤེས་ནས་ཐུབ་པའི་ཞབས་ལ་མགོ་བོས་རབ་ཏུ་གཏུགས། །དགེ་རྒྱས་རིས་ལུང་བསྟན་པའི་ལེའུ་སྟེ། ཉི་ཤུ་རྩ་གཉིས་པའོ།། །།དེ་ནས་དེའི་ཚེ་འབྲས་བུ་ཆེ་བའི་རིས་ཀྱི་ལྷ་བྱེ་བ་ཕྲག་བརྒྱད་ཅུས་ལྷ་
219a
༄#། །མ་ཡིན་རྣམས་ནས་དགེ་རྒྱས་ཀྱི་ལྷའི་བར་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡིད་རངས་ཏེ། རབ་ཏུ་དགའ་ཞིང་མགུ་བ་དང ། ཡིད་བདེ་བ་སྐྱེས་ནས་ཚུལ་གཅིག་ལ་ཞུགས་པ་དང ། ཆོས་རེ་རེ་ལས་ཀྱང་ཆོས་ཀྱི་སྒོ་མཐའ་ཡས་པ་འབྱུང་བར་ཡང་དག་པར་མཐོང་ཞིང་ཚུལ་ལ་འཇུག་པ་ཐམས་ཅད་ལས་ཀྱང་མཐའ་ཡས་པའི་སྤོབས་པ་དང ། མི་ཆོད་པའི་སྤོབས་པ་དང ། རིག་པའི་སྤོབས་པ་དང ། གྲོལ་བའི་སྤོབས་པ་དང ། ཐོགས་པ་མེད་པའི་སྤོབས་པ་དང ། ཉེ་བའི་སྤོབས་པ་དང ། ཕྲ་བའི་སྤོབས་པ་དང ། ཟབ་པའི་སྤོབས་པ་དང ། སྣ་ཚོགས་ཀྱི་སྤོབས་པ་དང ། འཇམ་པའི་སྤོབས་པ་དང ། འབྲེལ་བའི་སྤོབས་པ་དག་ཀྱང་འབྱུང་བར་ཤེས་ནས་བཅོམ་ལྡན་འདས་ལ་དགའ་བ་སྐྱེས་ཏེ་ཆོས་ཉིད་བརྗོད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སྒོའི་ཚུལ་མཐའ་ཡས་པ་ཞེས་བགྱི་བའི་ཏིང་ངེ་འཛིན་མཆིས་ཏེ། དེ་ལ་བརྩོན་པར་བགྱིས་ན། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་ཐོབ་ཅིང་མི་ཆོད་པའི་སྤོབས་པ་ཐོབ་པར་འགྱུར་བ་དང ། དམིགས་པ་དང་སྙོམས་པར་འཇུག་པ་ཐམས་ཅད་ལ་རྨོངས་པ་མ་མཆིས་པར་འགྱུར་རོ། །དེ་ལ་དམིགས་པ་གང་ཡང་གཟུགས་ལགས་པར་མ་འཚལ་བའི་
219b
ཚུལ་གྱིས་སྒྲིབ་པར་མི་འགྱུར་རོ། །དེ་ནི། ཕུང་པོ་ལ་འཇུག་པས་ཀྱང་སྒོའི་ཚུལ་མཐའ་ཡས་པའི་གཟུངས་ཐོབ་པར་འགྱུར། ཁམས་ལ་འཇུག་པ་དང ། སྐྱེ་མཆེད་ལ་འཇུག་པ་དང ། དབང་པོ་ལ་འཇུག་པ་དང ། བདེན་པ་ལ་འཇུག་པ་དང ། རྟེན་ཅིང་འབྲེལ་པར་འབྱུང་བ་ལ་འཇུག་པ་དང ། སེམས་ཅན་ལ་འཇུག་པ་དང ། སེམས་ཅན་མ་མཆིས་པ་ལ་འཇུག་པ་དང ། དངོས་པོ་ལ་འཇུག་པ་དང ། དངོས་པོ་མ་མཆིས་པ་ལ་འཇུག་པ་དང ། དམིགས་པ་ལ་འཇུག་པ་དང ། དམིགས་པ་མ་མཆིས་པ་ལ་འཇུག་པ་དང ། བདག་ལ་འཇུག་པ་དང ། སྟོང་པ་ལ་འཇུག་པ་དང ། མཚན་མ་ལ་འཇུག་པ་དང ། མཚན་མ་མ་མཆིས་པ་ལ་འཇུག་པ་དང ། སྨོན་པ་ལ་འཇུག་པ་དང ། སྨོན་པ་མ་མཆིས་པ་ལ་འཇུག་པ་དང ། གནས་པ་ལ་འཇུག་པ་དང ། གནས་པ་མ་མཆིས་པ་ལ་འཇུག་པ་དང ། འདུས་བྱས་ལ་འཇུག་པ་དང ། འདུས་མ་བྱས་ལ་འཇུག་པས་ཀྱང་སྒོའི་ཚུལ་མཐའ་ཡས་པའི་གཟུངས་ཐོབ་པར་འགྱུར་ཏེ། ཐམས་ཅད་ལ་ཐོགས་པ་མ་མཆིས་པའི་སྤོབས་པ་དང་ལྡན་པར་འགྱུར་རོ། །དེ་ནི། ཕུང་པོ་ལ་འཇུག་པས་ཀྱང་འདི་ལྟ་སྟེ། ཕུང་པོ་ཞེས་བྱ་བའི་ཆོས་འདི་ནི།་ཡོངས་སུ་མ་གྲུབ་པའོ། །ཞེས་གཟུངས་རབ་ཏུ་ཐོབ་བོ། །དེ་ཅིའི་སླད་དུ་ཞེ་ན། གཟུགས་ནི། གང་ཡང་ཡོངས་སུ་གྲུབ་པ་མ་མཆིས་ཏེ། ས་ནི། སར་ཡོངས་སུ་མ་གྲུབ། དེ་བཞིན་
220a
༄#། །དུ་ཆུ་དང ། མེ་དང ། རླུང་ནི། རླུང་དུ་ཡོངས་སུ་མ་གྲུབ་པའོ། །དེ་ཅིའི་སླད་དུ་ཞེ་ན། ས་ནི། རང་བཞིན་མ་མཆིས་པ་སྟེ། ཆོས་གང་ལ་ཡང་རང་བཞིན་མ་མཆིས་པ་དེ་ནི། ཡོངས་སུ་མ་གྲུབ་པའོ། །ཆུ་དང ། མེ་དང ། རླུང་ནི། རང་བཞིན་མ་མཆིས་པ་སྟེ། ཆོས་གང་ལ་ཡང་རང་བཞིན་མ་མཆིས་པ་དེ་ནི། ཡོངས་སུ་མ་གྲུབ་པའོ། །དེ་ལྟར་ཡོངས་སུ་མ་གྲུབ་པའི་གཟུགས་ནི། འདས་པ་ཞེས་གདགས་པར་མི་བགྱི། མ་འོངས་པ་ཞེས་གདགས་པར་མི་བགྱི། ད་ལྟར་བྱུང་བ་ཞེས་གདགས་པར་མི་བགྱིའོ། །དེ་ཅིའི་སླད་དུ་ཞེ་ན། འདི་ལྟར་གཟུགས་ནི། དངོས་པོ་མ་མཆིས་པ་སྟེ། དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་ཏེ། གང་མ་སྐྱེས་མ་འགགས་པ་དེ་ནི། གདགས་སུ་མ་མཆིས་པའོ། །དེ་བཞིན་གཤེགས་པས་ཀྱང་འདས་པ་དང ། མ་འོངས་པ་དང ། ད་ལྟར་བྱུང་བའི་གཟུགས་གང་ཅི་ཡང་རུང་སྟེ། དེ་དག་ཐམས་ཅད་གཅིག་དུ་བསྡུས་ནས་གཟུགས་ཀྱི་ཕུང་པོའོ། །ཞེས་བཀའ་སྩལ་ཏོ། གཟུགས་ཀྱི་རང་བཞིན་ནི། དམིགས་སུ་མ་མཆིས་ན། འདས་པར་ལྟ་ག་ལ་འགྱུར། །མ་འོངས་བར་ལྟ་ག་ལ་འགྱུར། ད་ལྟར་བྱུང་བར་ཡང་ལྟ་ག་ལ་འགྱུར་ཏེ། དེ་བས་ན། གཟུགས་ཀྱི་ཕུང་པོ་ནི། དམིགས་སུ་
220b
མ་མཆིས་པའོ། །ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་ཕུང་པོ་རྣམས་ཀྱང་དེ་བཞིན་ཏེ། དེའི་སླད་དུ་ཕུང་པོ་རྣམས་ནི། དམིགས་སུ་མ་མཆིས་སོ། ། ཕུང་པོ་དམིགས་སུ་མ་མཆིས་པས། གཟུངས་དམིགས་སུ་མ་མཆིས་ཏེ། དེ་ལྟར་ཕུང་པོ་ལ་འཇུག་པས་གཟུངས་ལ་འཇུག་པར་འགྱུར་རོ། །གཟུངས་དེ་ཡང་མིང་ཙམ་དང ། ཐ་སྙད་ཙམ་དང ། བརྡ་ཙམ་དང ། ཀུན་རྫོབ་ཙམ་དང ། བརྗོད་པ་ཙམ་དང ། གདགས་པ་ཙམ་མ་གཏོགས་པར་གཟུངས་ལ་འཇུག་པ་མི་དམིགས་ཏེ། འདི་ལ་ཕུང་པོ་ཡང་མི་དམིགས་གཟུངས་ཀྱང་མི་དམིགས། འཇུག་པ་ཡང་མི་དམིགས། གཟུངས་ཀྱང་རང་བཞིན་གྱིས་མི་དམིགས་སོ། །དེ་ཅིའི་སླད་དུ་ཞེ་ན། གང་འདི་ཕུང་པོ་ཞེས་བགྱི་བ་དེ་ནི། མ་བགྱིས་པའི་ཆོས་ཏེ།་ཆོས་གང་ཡང་མ་བགྱིས་པ་དེ་ལ་སྤུངས་པ་ཡང་ག་ལ་མཆིས་ཏེ། ཕུང་པོ་ནི། སྤུངས་པའི་སླད་དུ་ཕུང་པོ་ཞེས་བགྱིའོ། །དཔེར་ན། ཁྱིམ་དང ། ཁང་བཟང་དང ། བསིལ་ཁང་དང ། ཁང་པ་བརྩེགས་པ་དང ། སྐར་ཁུང་ཁོལ་མ་དང ། བ་གམ་དང ། དྲ་བ་དང ། སྟེགས་བུ་དང ། ཁ་ཁྱེར་དང ། སྐར་ཁུང་དང ། རྟ་བབས་དང ། ར་བ་དང ། ཤིང་ཐགས་དང ། འོབས་དང ། ཆོས་མང་པོ་བསགས་པ་ལ་གྲོང་ཁྱེར་ཞེས་བགྱི་བ་བཞིན་དུ་ཕུང་པོ་ཞེས་བགྱི་བའང་དེ་བཞིན་ཏེ། གཟུགས་དེ་ཡང་ངོ་བོ་ཉིད་ཀྱིས་མི་དམིགས་ན། དེ་ལ་སྤུངས་
221a
༄#། །པ་ལྟ་ག་ལ་མཆིས། སྤུངས་པ་མ་མཆིས་པས་ན། གཟུགས་ཀྱང་མ་མཆིས། གཟུགས་ཀྱི་ཕུང་པོ་ཡང་མ་མཆིས་སོ། །དེ་བཞིན་དུ་ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ཡང་རང་བཞིན་གྱིས་དམིགས་སུ་མ་མཆིས་ན། དེ་ལ་སྤུངས་པ་ལྟ་ག་ལ་མཆིས་ཏེ། སྤུངས་པ་མ་མཆིས་པའི་སླད་དུ་རྣམ་པར་ཤེས་པ་ཡང་མ་མཆིས། རྣམ་པར་ཤེས་པའི་ཕུང་པོ་ཡང་མ་མཆིས་སོ། །དེ་ལྟར་ཕུང་པོ་ལ་འཇུག་པས་གཟུངས་ཐོབ་པར་འགྱུར། གཟུངས་ཐོབ་པས་སྤོབས་པ་ཐོབ་པར་འགྱུར་རོ། །དེ་ལ་སྐྱེ་མཆེད་ལ་འཇུག་པས་གཟུངས་ཐོབ་པར་འགྱུར་བ་ནི། མིག་གི་སྐྱེ་མཆེད་ཅེས་བགྱི་བ་ནི། ཅིའི་སྐྱེ་མཆེད་ཅེས་བགྱི་ན། སྡུག་བསྔལ་གྱི་སྐྱེ་མཆེད་དོ། །དེ་ལ་མིག་གང་ཞེ་ན། འབྱུང་བ་ཆེན་པོ་བཞི་དང་བ་སྟེ། སའི་ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་དང་བའོ། །དེ་ལ་སའི་ཁམས་དང་བ་ནི། རང་བཞིན་མ་མཆིས་པ་སྟེ། ཆོས་གང་གིས་རང་བཞིན་མི་དམིགས་པ་དེ་ནི། ཡོངས་སུ་མ་གྲུབ་པའོ། །དེ་བཞིན་དུ་ཆུའི་ཁམས་དང་བ་དང ། མེའི་ཁམས་དང་བ་དང ། རླུང་གི་ཁམས་དང་བ་ནི། རང་བཞིན་མ་མཆིས་པ་སྟེ། ཆོས་གང་གི་རང་བཞིན་མི་དམིགས་པ་དེ་ནི། ཡོངས་སུ་མ་གྲུབ་པའོ། །དེ་ལྟར་ཡོངས་སུ་མ་གྲུབ་པའི་
221b
མིག་གི་སྐྱེ་མཆེད་དེ་ནི། འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །དེ་ཅིའི་སླད་དུ་ཞེ་ན ། འདི་ལྟར་མིག་གི་སྐྱེ་མཆེད་ནི། དངོས་པོ་མ་མཆིས་པ་སྟེ། དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་པ་སྟེ།་གང་མ་སྐྱེས་མ་འགགས་པ་དེ་ནི། གདགས་སུ་མ་མཆིས་པའོ།། །དེ་ལྟར་མིག་ཀྱང་མ་སྐྱེས་མ་འགགས། སྐྱེ་མཆེད་དང་སྡུག་བསྔལ་ཡང་མ་སྐྱེས་མ་འགགས་བའོ། །གང་མ་སྐྱེས་མ་འགགས་པ་དེ་ནི། མིང་ཙམ་དང ། ཐ་སྙད་ཙམ་དང ། བརྡ་ཙམ་དང ། ཀུན་རྫོབ་ཙམ་དང ། བརྗོད་པ་ཙམ་མ་གཏོགས་པར་གདགས་སུ་མ་མཆིས་པ་སྟེ། མིང་དེ་ཡང་མིང་གིས་མ་མཆིས་པའོ། །དེ་ཅིའི་སླད་དུ་ཞེ་ན། ཆོས་གང་ལ་མིག་ཅེའམ། སྐྱེ་མཆེད་ཅེའམ། སྡུག་བསྔལ་ཞེས་གདགས་པར་བགྱི་བའི་ཆོས་དེ་གང་ཡང་དམིགས་སུ་མ་མཆིས་ཏེ། མིང་ཡང་མིང་དུ་བརྗོད་དུ་མ་མཆིས་སོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ཆོས་རྣམས་ཀྱང་དེ་བཞིན་ཏེ། དེའི་སླད་དུ་སྐྱེ་མཆེད་ལ་འཇུག་པས་གཟུངས་ཐོབ། གཟུངས་ལ་འཇུག་པས་སྤོབས་པ་ཐོབ་བོ། །དེ་ལ་ཁམས་ལ་འཇུག་པས་གཟུངས་ཐོབ་
222a
༄#། །པ་ནི།་མིག་ནི། མིག་གིས་མ་མཆིས་པ། ཁམས་ནི། ཁམས་ཀྱིས་མ་མཆིས་པ་སྟེ། དེ་ཅིའི་སླད་དུ་ཞེ་ན། མིག་ནི། མིག་གི་རང་བཞིན་དང་བྲལ་བ།་ཁམས་ནི། ཁམས་ཀྱི་རང་བཞིན་དང་བྲལ་བའི་སླད་དུ་སྟེ། ཆོས་གང་ལ་རང་བཞིན་མ་མཆིས་པ་དེ་ནི། དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི།་ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ལ་ནི། སྐྱེ་བ་མ་མཆིས་སོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་སོ། །གང་མ་སྐྱེས་མ་འགག་པ་དེ་ནི། མིང་ཙམ་དང ། ཐ་སྙད་ཙམ་དང ། བརྡ་ཙམ་དང ། ཀུན་རྫོབ་ཙམ་དང ། བརྗོད་པ་ཙམ་མ་གཏོགས་པར་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །མིང་དེ་ཡང་མིང་གིས་མ་མཆིས། བརྗོད་པའི་བར་དེ་ཡང་བརྗོད་པས་མ་མཆིས་པ་སྟེ། ཆོས་གང་ལ་རང་བཞིན་མ་མཆིས་པ་དེ་ནི། དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི། ཡོངས་སུ་མ་གྲུབ་པ་སྟེ། ཡོངས་སུ་མ་གྲུབ་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་སོ། །གང་མ་སྐྱེས་མ་འགགས་པ་དེ་ནི། འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་
222b
པར་བགྱི་བ་མ་ལགས་སོ། གང་དུས་གསུམ་དུ་གདགས་པར་བགྱི་བ་མ་ལགས་པ་དེ་ནི། མིང་མ་མཆིས་པ། མཚན་ཉིད་མ་མཆིས་པ། མཚན་མ་མ་མཆིས་པ། ཐ་སྙད་མ་མཆིས་པ།་བརྡ་མ་མཆིས་པ། དངོས་པོ་མ་མཆིས་པ། འདྲིས་པ་མ་མཆིས་པ། བརྗོད་དུ་མ་མཆིས་པ། འོང་བ་མ་མཆིས་པ། འགྲོ་བ་མ་མཆིས་པ། མ་བསྟན་པ། རབ་ཏུ་མ་བསྟན་པ། མངོན་པར་ཤེས་པར་བགྱི་བ་མ་ལགས་པ། ཡོངས་སུ་ཤེས་པར་བགྱི་བ་མ་ལགས་པ། དཀར་པོ་མ་ལགས་པ། ནག་པོ་མ་ལགས་པ། གནས་མ་ལགས་པ། རྟེན་མ་ལགས་པ།་ཐོབ་པ་མ་ལགས་པ། ཐོབ་པར་བགྱི་བ་མ་ལགས་པ། རྟོགས་པ་མ་ལགས་པ། རྟོགས་པར་བགྱི་བ་མ་ལགས་པ། མངོན་དུ་བགྱིས་པ་མ་ལགས་པ། མངོན་དུ་བགྱི་བ་མ་ལགས་པ། སོ་སོའི་སྐྱེ་བོའི་ས་མ་ལགས་པ། ཉན་ཐོས་ཀྱི་ས་མ་ལགས་པ། རང་སངས་རྒྱས་ཀྱི་ས་མ་ལགས་པ། བྱང་ཆུབ་སེམས་དཔའི་ས་མ་ལགས་པ། སངས་རྒྱས་ཀྱི་ས་མ་ལགས་པ་སྟེ།་ས་ཡང་མ་ལགས། ས་མ་ལགས་པ་ཡང་མ་ལགས་སོ། །དེ་ནི། དེ་བཞིན་ཉིད་དང ། མ་ནོར་བ་དེ་བཞིན་ཉིད་དང ། གཞན་མ་ལགས་པ་དེ་བཞིན་ཉིད་དང ། ཞི་བ་དང་མཚན་ཉིད་མ་ལགས་པ་སྟེ། ཐ་སྙད་ཙམ་དུ་བཏགས་པའོ། །དེས་ཐ་སྙད་དུ་དེ་བཞིན་གཤེགས་པ་ཞེས་བགྱི་སྟེ། དོན་དམ་པར་ནི། མ་ལགས་སོ། །དེ་ཅིའི་སླད་དུ་ཞེ་ན། གང་ལ་དེ་བཞིན་གཤེགས་
223a
༄#། །པ་ཞེས་བགྱི་བའི་ཆོས་དེ་མི་དམིགས་སོ། །དེ་བཞིན་དུ་གཟུགས་ཀྱི་ཁམས་དང ། མིག་གི་རྣམ་པར་ཤེས་པའི་ཁམས་དང ། ཡིད་ཀྱི་ཁམས་དང ། ཆོས་ཀྱི་ཁམས་དང ། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་རྒྱ་ཆེར་ཁམས་ཀྱི་ཆོས་ཀྱི་དབྱིངས་ལ་འཇུག་པར་བགྱིའོ། །བཅོམ་ལྡན་འདས། ཆོས་ཀྱི་དབྱིངས་ནི། ཕུང་པོར་བཏགས་ཀྱང་ཆོས་ཀྱི་དབྱིངས་ཉིད་མི་འདོར། ཁམས་དང ། སྐྱེ་མཆེད་དང ། དབང་པོ་དང ། བདེན་པ་དང ། རྟེན་ཅིང་འབྲེལ་པར་འབྱུང་བར་བཏགས་ཀྱང་ཆོས་ཀྱི་དབྱིངས་ཉིད་མི་འདོར་ཏེ། ཆོས་ཀྱི་དབྱིངས་དེ་མིང་གང་དང་གང་གིས་བཏགས་ཀྱང་དེ་དང་དེས་ཆོས་ཀྱི་དབྱིངས་ཉིད་མི་འདོར་རོ། །བཅོམ་ལྡན་འདས། འདི་ལྟ་སྟེ། དཔེར་ན། སའི་ཁམས་ནི། མིང་གང་དང་གང་གིས་ཐ་སྙད་དུ་བགྱིས་ཀྱང་དེ་དང་དེས་སའི་ཁམས་ཉིད་མི་འདོར་རོ། །བཅོམ་ལྡན་འདས། དེ་བཞིན་དུ་ཆོས་ཀྱི་དབྱིངས་ཀྱང་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆོས་ཀྱི་དབྱིངས་ཉིད་མི་འདོར་རོ། །བཅོམ་ལྡན་འདས། འདི་ལྟ་སྟེ། དཔེར་ན། ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་ནི། མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་\་ཌཱེ་ཥཱ?\་ཆུ་དང ། མེ་དང ། རླུང་དང ། ནམ་མཁའི་ཁམས་ཉིད་མི་འདོར་རོ། །བཅོམ་ལྡན་འདས། དེ་
223b
བཞིན་དུ་ཆོས་ཀྱི་དབྱིངས་ཀྱང་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆོས་ཀྱི་དབྱིངས་ཉིད་མི་འདོར་ཏེ། དེ་ལྟར་ན། ཁམས་ལ་འཇུག་པས་གཟུངས་ཐོབ། །གཟུངས་ལ་འཇུག་པས་སྤོབས་པ་ཐོབ་བོ། །བཅོམ་ལྡན་འདས། དེ་ལ་དབང་པོ་ལ་འཇུག་པས་ཆོས་ཀྱི་དབྱིངས་ལ་འཇུག་པ་ནི། དབང་པོ་ཉི་ཤུ་རྩ་གཉིས་ཏེ། འདི་ལྟ་སྟེ། མིག་གི་དབང་པོ་དང ། རྣ་བའི་དབང་པོ་དང ། སྣའི་དབང་པོ་དང ། ལྕེའི་དབང་པོ་དང ། ལུས་ཀྱི་དབང་པོ་དང ། ཡིད་ཀྱི་དབང་པོ་དང ། མོའི་དབང་པོ་དང ། ཕོའི་དབང་པོ་དང ། སྲོག་གི་དབང་པོ་དང ། བདེ་བའི་དབང་པོ་དང ། སྡུག་བསྔལ་གྱི་དབང་པོ་དང ། ཡིད་བདེ་བའི་དབང་པོ་དང ། ཡིད་མི་བདེ་བའི་དབང་པོ་དང ། བཏང་སྙོམས་ཀྱི་དབང་པོ་དང ། དད་པའི་དབང་པོ་དང ། བརྩོན་འགྲུས་ཀྱི་དབང་པོ་དང ། དྲན་པའི་དབང་པོ་དང ། ཏིང་ངེ་འཛིན་གྱི་དབང་པོ་དང ། ཤེས་རབ་ཀྱི་དབང་པོ་དང ། མི་ཤེས་པ་ཀུན་ཤེས་པར་བྱེད་པའི་དབང་པོ་དང ། ཀུན་ཤེས་པའི་དབང་པོ་དང ། ཀུན་ཤེས་པ་དང་ལྡན་པའི་དབང་པོ་སྟེ། དེ་ལ་མིག་ནི། མིག་གིས་མ་མཆིས། དབང་པོ་ནི། དབང་པོས་མ་མཆིས་པའོ། །དེ་ཅིའི་སླད་དུ་ཞེ་ན། མིག་ནི།་མིག་གི་རང་བཞིན་དང་བྲལ་བ་སྟེ། ཆོས་གང་ལ་རང་བཞིན་མ་མཆིས་པ་དེ་ནི། དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི། ཡོངས་སུ་མ་གྲུབ་པའོ། །གང་
224a
༄#། །ཡོངས་སུ་མ་གྲུབ་པ་དེ་ནི། མི་སྐྱེ་བ། གང་མི་སྐྱེ་བ་དེ་ནི། མི་འགགས་པ། གང་མ་སྐྱེས་མ་འགགས་པ་དེ་ནི། འདས་པ་ཞེས་གདགས་པར་བགྱི་བ་མ་ལགས།་མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མི་དམིགས་པ་དེ་ནི། མིག་མ་ལགས། དབང་པོ་མ་ལགས་སོ། །གང་མིག་མ་ལགས་ཤིང ། དབང་པོ་མ་ལགས་པ་དེའི་ཐ་སྙད་ཇི་ལྟར་འཚལ་བར་བགྱི། འདི་ལྟ་སྟེ། དཔེར་ན། ཆད་པ་སྟོང་པ་ནི། རྫུན་པ་ཡང་དག་པ་མ་ལགས་པ་མ་མཆིས་པ་སྟེ།་འདི་ལྟར་མིང་དུ་གདགས་པར་བས་ཀྱི། དོན་དམ་པར་ནི། སྟོང་པ་ཡང་མི་དམིགས། ཆད་པ་ཡང་མི་དམིགས་སོ། །དེ་བཞིན་དུ་མིག་དང་དབང་པོ་ཡང་ཆད་པ་སྟོང་པ་ལྟར་རྫུན་ཞིང་མ་མཆིས་ལ་ཡང་དག་པ་མ་ལགས་པ་སྟེ། །གསོབ། གསོག། ལོག་པ། སླུ་བའི་ཆོས་ཅན། བྱིས་པ་འདྲིད་པ། གླེན་པ་རྨོངས་པར་བགྱིད་པ་སྟེ། འདི་ལྟར་མིང་དུ་གདགས་པར་བས་ཀྱི། དོན་དམ་པར་ནི། མིག་ཀྱང་མི་དམིགས། དབང་པོ་ཡང་མི་དམིགས་ན། དེ་ནི། བཅོམ་ལྡན་འདས་ཀྱིས་ཐམས་ཅད་མཁྱེན་པའི་ཡེ་ཤེས་བརྙེས་ནས་ཇི་ཙམ་དུ་ཕྱིན་ཅི་ལོག་ལ་གནས་པའི་སེམས་ཅན་རྣམས་གཟུད་པའི་སླད་དུ་དབང་པོ་ཞེས་བཏགས་ཀྱི། དོན་དམ་པར་ནི། མ་ལགས་སོ། །དབང་པོ་ནི། རང་བཞིན་དང་བྲལ་ཞིང་དབང་པོའི་
224b
ངོ་བོ་ཉིད་ཀྱིས་སྟོང་པ་སྟེ། ཆོས་གང་ཆོས་གང་གིས་སྟོང་པ་དེ་ལ་དེས་ཐ་སྙད་དུ་བགྱི་བ་ནི། རྫུན་པ། གསོབ། གསོག། ལོག་པ། སླུ་བའི་ཆོས་ཅན། བྱིས་པ་འདྲིད་པ། གླེན་པ་རྨོངས་པར་བགྱིད་པ། རང་བཞིན་དང་བྲལ་བ་སྟེ། དེ་ནི། མི་སྐྱེ་མི་འགག་གོ་།གང་མ་སྐྱེས་མ་འགགས་པ་དེ་ནི། འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མ་མཆིས་པ་དེ་ནི། མིང་མ་མཆིས་པ། མཚན་མ་མཆིས་པ། རྫུན་པ་མཚན་ཉིད་མ་མཆིས་པ། གདགས་སུ་མ་མཆིས་པ། གདགས་པ་མ་ལགས་པ། མ་ཤེས་པ། ཤེས་པར་བགྱི་བ་མ་ལགས་པ། རྣམ་པར་མ་ཤེས་པ། རྣམ་པར་ཤེས་པར་བགྱི་བ་མ་ལགས་པ། མ་ཐོས་པ། ཐོས་པར་བགྱི་བ་མ་ལགས་པ། རྣམ་པར་མ་རིག་པ། རྣམ་པར་རིག་པར་བགྱི་བ་མ་ལགས་པ། མ་རྟོགས་པ། རྟོགས་པར་བགྱི་བ་མ་ལགས་པ། མ་ཐོབ་པ། ཐོབ་པར་བགྱི་བ་མ་ལགས་པ།་མ་མཐོང་བ། མཐོང་བར་བགྱི་བ་མ་ལགས་པ། མ་རྙེད་པ། རྙེད་པར་བགྱི་བ་མ་ལགས་པའོ། །དེ་ཅིའི་སླད་དུ་ཞེ་ན། མ་མཆིས་ཤིང་མཆིས་པ་མ་ལགས་པའི་སླད་དུའོ། །འདི་ལྟ་སྟེ། དཔེར་ན། མི་ཞིག་རྨི་ལམ་ན་རྒོད་པ་དང ། དགའ་བ་དང ། རྩེས་པ་དང ། དགའ་མགུར་སྤྱད་པ་དག་ཉལ་ཉལ་བ་ལས་སད་དེ་རྗེས་སུ་དྲན་པ་དེ་དྲན་ཡང་རྙེད་
225a
༄#། །པར་མི་འགྱུར། འཐོབ་པར་མི་འགྱུར་རོ། །དེ་ཅིའི་སླད་དུ་ཞེ་ན། རྨི་ལམ་ན་ཡང་མི་དེས་རྒོད་པ་དང ། དགའ་བ་དང ། རྩེས་པ་དང ། དགའ་མགུར་སྤྱད་པ་དེ་དག་མ་ཐོབ་མ་རྙེད་ན། ཉལ་བ་ལས་སད་པའི་ཚེ་ལྟ་སྨོས་ཀྱང་ཅི་འཚལ་ཏེ། ཐོབ་པ་དང་རྙེད་པར་བགྱི་བ་དེའི་གནས་མ་མཆིས་སོ། །བཅོམ་ལྡན་འདས། དེ་བཞིན་དུ་དབང་པོ་རྣམས་ནི། རྨི་ལམ་ལྟ་བུ་སྟེ། ཇི་ལྟར་རྨི་ལམ་ནི་རྒོད་པ་དང ། དགའ་བ་དང ། རྩེས་པ་དང ། དགའ་མགུར་སྤྱད་པ་དེ་དག་དམིགས་སུ་མ་འཚལ་བ་དེ་བཞིན་དུ་ཆོས་ཐམས་ཅད་ཀྱང་ངོ་བོ་ཉིད་ཀྱིས་དམིགས་སུ་མ་མཆིས་པ་སྟེ། དེ་དག་ནི། འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་དམིགས་སུ་མ་མཆིས་པ་དེ་དག་ནི། བརྗོད་དུ་མ་མཆིས་པ་ཞེས་བགྱི་སྟེ། དབང་པོ་ཐམས་ཅད་ཀྱང་དེ་བཞིན་དུ་རིག་པར་བགྱིའོ། ། དེ་ལྟར་ན། ཆོས་ཀྱི་དབྱིངས་ལ་འཇུག་པས་ཆོས་ཐམས་ཅད་ལ་འཇུག་པར་བགྱི། ཆོས་ཐམས་ཅད་ལ་འཇུག་པས་ཀྱང་ཆོས་ཀྱི་དབྱིངས་ལ་འཇུག་པར་བགྱིའོ། །དེ་ལ་ཇི་ལྟར་ན།་བདེན་པ་ལ་འཇུག་པས་ཆོས་ཀྱི་དབྱིངས་ལ་འཇུག་པར་བགྱི་ཞེ་ན། བཞི་པོ་འདི་དག་ནི། བདེན་པ་སྟེ། སྡུག་བསྔལ་དང ། ཀུན་འབྱུང་བ་དང ། འགོག་པ་དང ། ལམ་མེ། །
225b
བཅོམ་ལྡན་འདས་ཀྱིས་ཀྱང་ཆོས་ཐམས་ཅད་ནི། སྟོང་པ་སྟེ། སེམས་ཅན་མེད་པ། སྲོག་མེད་པ། གང་ཟག་མེད་པ། མཚན་མ་མེད་པ། མཚན་ཉིད་མེད་པའོ། །ཞེས་བཀའ་སྩལ་ཏེ།་དེ་ལ་བདག་ཅག་ཐེ་ཚོམ་མ་མཆིས། སོམ་ཉི་མ་མཆིས་སོ། །བཅོམ་ལྡན་འདས། དེ་ལ་སེམས་ཅན་མ་མཆིས་པའི་སླད་དུ་སྡུག་བསྔལ་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། གང་ལ་སེམས་ཅན་མ་མཆིས་པ་དེ་ལ་སྡུག་བསྔལ་ཡང་མ་མཆིས་སོ། །བཅོམ་ལྡན་འདས། སྡུག་བསྔལ་མ་མཆིས་པའི་སླད་དུ་ཀུན་འབྱུང་ཡང་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། གང་ལ་འབྲས་བུ་མ་མཆིས་པ་དེ་ནི། རྒྱུ་མ་མཆིས་པའི་སླད་དུའོ། །བཅོམ་ལྡན་འདས། ཀུན་འབྱུང་བ་མ་མཆིས་པའི་སླད་དུ་འགོག་པ་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། ཀུན་འབྱུང་བ་མ་མཆིས་པ་ལ་སྤངས་པ་མ་མཆིས་པའི་སླད་དུའོ། །བཅོམ་ལྡན་འདས། འགོག་པ་མ་མཆིས་པའི་སླད་དུ་ལམ་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། གང་སྤོང་བར་མི་བགྱིད་པ་དེ་ནི། ལམ་མ་ལགས་ཏེ། ལམ་གྱི་འབྲས་བུ་ནི། འགོག་པ་མ་ལགས་ལ། གང་སྤང་བའི་འགོག་པའི་ཉོན་མོངས་པ་དེ་ནི། མི་དམིགས་ཏེ། འགོག་པ་དམིགས་སུ་མ་མཆིས་ན། ལམ་དུ་འཐད་པ་མ་ལགས་ཏེ། འབྲས་བུ་མ་མཆིས་པའི་
226a
༄#། །ལམ་ཡང་མ་མཆིས་པས། དེ་ལྟར་ན། འཕགས་པའི་བདེན་པ་བཞི་པོ་དེ་དག་ནི། བརྟགས་པ་རྣམ་པར་བསྒྲུབས་པ་སྟེ། གང་བརྟགས་ཤིང་རྣམ་པར་བསྒྲུབས་པ་དེ་ནི། མ་མཆིས་པའོ། །གང་མ་མཆིས་པ་དེ་ལ་ནི། འདས་པ་ཞེས་ཐ་སྙད་དུ་བགྱི་བ་མ་མཆིས་སོ། །མ་འོངས་པ་དང ། ད་ལྟར་བྱུང་བ་ཞེས་ཐ་སྙད་དུ་བགྱི་བ་མ་མཆིས་སོ། །གང་དུས་གསུམ་དུ་མི་དམིགས་པ་དེ་ནི། མ་སྐྱེས་པ། མ་འགགས་པ། མཚན་ཉིད་མ་མཆིས་པ། མཚན་མ་མ་མཆིས་པ། མ་བརྟགས་པ།་གདགས་པར་མི་བགྱི་བ། མ་བསྟན་པ། རབ་ཏུ་མ་བསྟན་པ། བསྟན་པར་བགྱི་བ་མ་ལགས་པ། རབ་ཏུ་བསྟན་པར་བགྱི་བ་མ་ལགས་པ། མ་བརྗོད་པ། བརྗོད་པར་བགྱི་བ་མ་ལགས་པ། མངོན་པར་མ་བརྗོད་པ། མངོན་པར་བརྗོད་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་ཤེས་པ། ཤེས་པར་བགྱི་བ་མ་ལགས་པ། ཁོང་དུ་མ་ཆུད་པ། ཁོང་དུ་ཆུད་པར་བགྱི་བ་མ་ལགས་པ། མ་རྟོགས་པ། རྟོགས་པར་བགྱི་བ་མ་ལགས་པ། མ་རྙེད་པ། རྙེད་པར་བགྱི་བ་མ་ལགས་པ། མ་ཐོབ་པ། ཐོབ་པར་བགྱི་བ་མ་ལགས་པ། མ་ཐོས་པ། ཐོས་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་བསྒྲུབས་པ།
226b
བསྒྲུབ་པར་བགྱི་བ་མ་ལགས་པ། མངོན་དུ་མ་བགྱིས་པ། མངོན་དུ་བགྱི་བ་མ་ལགས་པ། དཀར་པོ་མ་ལགས་པ། ནག་པོ་མ་ལགས་པ། སྣང་བ་མ་ལགས་པ། མུན་པ་མ་ལགས་པ།་འགྲོ་བ་མ་ལགས་པ། འོང་བ་མ་ལགས་པ། གསལ་བ་མ་ལགས་པ། ཟབ་པ་མ་ལགས་པ། འཁྲུགས་པ་མ་ལགས་པ། དང་བ་མ་ལགས་པ། འཇིག་པ་མ་ལགས་པ།་བདེ་བ་མ་ལགས་པ། འཆིང་བ་མ་ལགས་པ། གྲོལ་བ་མ་ལགས་པ། རྗེས་སུ་ཆགས་པ་མ་ལགས་པ། ཁོང་ཁྲོ་བ་མ་ལགས་པ། ཀུན་ནས་ཉོན་མོངས་པ་མ་ལགས་པ།་རྣམ་པར་བྱང་བ་མ་ལགས་པ། ཡེ་ཤེས་མ་ལགས་པ། རྣམ་པར་ཤེས་པ་མ་ལགས་པ། ལམ་མ་ལགས་པ། ལམ་གོལ་བ་མ་ལགས་པ། འཇིག་པ་མ་ལགས་པ།་རྣམ་པར་འཇིག་པ་མ་ལགས་པ། གཟུང་བ་མ་ལགས་པ། མི་གཟུང་བ་མ་ལགས་པ། དོར་བ་མ་ལགས་པ། རབ་ཏུ་དོར་བ་མ་ལགས་པ། དམིགས་པ་མ་ལགས་པ། དམིགས་སུ་མ་མཆིས་པ་མ་ལགས་པ། སེམས་ཅན་མ་ལགས་པ། སེམས་ཅན་མ་མཆིས་པ་མ་ལགས་པ། སྲོག་མ་ལགས་པ། སྲོག་མ་མཆིས་པ་མ་ལགས་པ། གང་ཟག་མ་ལགས་པ། གང་ཟག་མ་མཆིས་པ་མ་ལགས་པ། བདག་མ་ལགས་པ། བདག་མ་མཆིས་པ་མ་ལགས་པ། དངོས་པོ་མ་ལགས་པ། དངོས་པོ་མ་མཆིས་པ་མ་ལགས་པ། སྟོང་
227a
༄#། །པ་མ་ལགས་པ། མི་སྟོང་པ་མ་ལགས་པ། མཚན་མ་མ་ལགས་པ། མཚན་མ་མ་མཆིས་པ་མ་ལགས་པ། སྨོན་པ་མ་ལགས་པ། སྨོན་པ་མ་མཆིས་པ་མ་ལགས་པ། གནས་པ་མ་ལགས་པ། གནས་པ་མ་མཆིས་པ་མ་ལགས་པ། འདུས་བྱས་མ་ལགས་པ། འདུས་མ་བྱས་མ་ལགས་པ། ཆད་པ་མ་ལགས་པ།་རྟག་པ་མ་ལགས་པ། ལོག་པ་མ་ལགས་པ། ཡང་དག་པ་མ་ལགས་པ། བདེན་པ་མ་ལགས་པ། རྫུན་པ་མ་ལགས་པ། མངོན་པར་ཞེན་པ་མ་ལགས་པ། མངོན་པར་ཞེན་པ་མ་མཆིས་པ་མ་ལགས་པ། རྟེན་མ་ལགས་པ། རྟེན་མ་མཆིས་པ་མ་ལགས་པ། གཞི་མ་ལགས་པ། གཞི་མ་མཆིས་པ་མ་ལགས་པ། མངོན་པར་ཤེས་པར་བགྱི་བ་མ་ལགས་པ། ཡོངས་སུ་ཤེས་པར་བགྱི་བ་མ་ལགས་པ། སྤང་བ་མ་ལགས་པ། བསྒོམ་པ་མ་ལགས་པ། མངོན་དུ་བགྱི་བ་མ་ལགས་པ། རྙེད་པ་མ་ལགས་པ།་རྙེད་པར་བགྱི་བ་མ་ལགས་པ། འཁོར་བ་མ་ལགས་པ། མྱ་ངན་ལས་འདས་པ་མ་ལགས་པ། སངས་རྒྱས་མ་ལགས་པ། འཚང་རྒྱ་བར་བགྱི་བ་མ་ལགས་པ། སོ་སོའི་སྐྱེ་བོའི་སྤྱོད་ཡུལ་མ་ལགས་པ། འཕགས་པའི་སྤྱོད་ཡུལ་མ་ལགས་པ། ཉན་ཐོས་ཀྱི་སྤྱོད་ཡུལ་མ་ལགས་པ། རང་སངས་རྒྱས་ཀྱི་སྤྱོད་ཡུལ་མ་ལགས་པ། བྱང་
227b
ཆུབ་སེམས་དཔའི་སྤྱོད་ཡུལ་མ་ལགས་པ། སངས་རྒྱས་ཀྱི་སྤྱོད་ཡུལ་མ་ལགས་པ། སྤྱོད་ཡུལ་ཡང་མ་ལགས་པ། སྤྱོད་ཡུལ་མ་ལགས་པ་ཡང་མ་ལགས་པ། བགྱིས་པ་པ་མ་ལགས་པ། མ་བགྱིས་པ་མ་ལགས་པ། དག་པ་མ་ལགས་པ། དག་པར་བགྱི་བ་མ་ལགས་པ་སྟེ། དེ་ལྟར་བདེན་པ་ལ་འཇུག་པས་ཆོས་ཀྱི་དབྱིངས་ལ་འཇུག་པར་འགྱུར། ཆོས་ཀྱི་དབྱིངས་ལ་འཇུག་པས་གཟུངས་ཐོབ་པར་འགྱུར། གཟུངས་ཐོབ་པས་སྤོབས་པ་ཐོབ་པར་འགྱུར་རོ། །དེ་ལ་ཇི་ལྟར་ན་རྟེན་ཅིང་འབྲེལ་པར་འབྱུང་བ་ལ་འཇུག་པས་ཆོས་ཀྱི་དབྱིངས་ལ་འཇུག་ཅེ་ན། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ནས་དེ་ལྟར་ན་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ། །ཞེས་བགྱི་བའི་བར་དུ་སྟེ། འདི་ནི། རྟེན་ཅིང་འབྲེལ་བར་འབྱུང་བའོ། །བཅོམ་ལྡན་འདས། དེ་ལ་མ་རིག་པ་ནི། མ་རིག་པས་མ་མཆིས་པའོ། །དེ་ཅིའི་སླད་དུ་ཞེ་ན། འདི་ལྟར་མ་རིག་པ་ནི། རང་བཞིན་དང་བྲལ་བ་སྟེ། ཆོས་གང་ལ་རང་བཞིན་མ་མཆིས་པ་དེ་ནི། དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི། ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ནི། མི་སྐྱེ་བའོ། །གང་མི་སྐྱེ་བ་དེ་ནི། མི་འགག་པའོ། །གང་མ་སྐྱེས་མ་འགགས་པ་དེ་ནི། འདས་པ་ཞེས་གདགས་པར་བགྱི་བ་མ་ལགས། མ་
228a
༄#། །འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མི་དམིགས་པ་དེ་ནི། མིང་མ་མཆིས་པ། མཚན་ཉིད་མ་མཆིས་པ། མཚན་མ་མ་མཆིས་པ། གདགས་སུ་མ་མཆིས་པ་སྟེ། གཞན་དུ་ན་མིང་ཙམ་དང ། བརྡ་ཙམ་དང ། ཐ་སྙད་ཙམ་དང ། ཀུན་རྫོབ་ཙམ་དང ། བརྗོད་པ་ཙམ་དང ། གདགས་པ་ཙམ་དུ་སེམས་ཅན་རྣམས་གཟུད་པའི་དོན་དུ་བགྱི་བ་མ་གཏོགས་པར་མ་རིག་པ་དེ་ནི། དོན་དམ་པར་དམིགས་སུ་མ་མཆིས་སོ། ། ཆོས་གང་དོན་དམ་པར་དམིགས་སུ་མ་མཆིས་པ་དེ་ནི། གདགས་སུ་མ་མཆིས་པ། ཐ་སྙད་དུ་བགྱིར་མ་མཆིས་པ། བརྗོད་དུ་མ་མཆིས་པ་སྟེ། བཅོམ་ལྡན་འདས། གང་མིང་ཙམ་ཞེས་བགྱི་བ་ནས་གདགས་པ་ཙམ་གྱི་བར་དེ་དག་ཀྱང་ཡང་དག་པ་མ་ལགས་པ། རྫུན་པ། ལོག་པར་བརྟགས་པ། རྣམ་པར་བསྒྲུབས་པ། ཡོངས་སུ་བརྟགས་པ།་རྣམ་པར་བརྟགས་པ། རྣམ་པར་དཔྱད་པ། མ་ཞི་བ། རབ་ཏུ་སྤྲོས་པའོ། །མ་རིག་པའི་རྐྱེན་གྱིས་འདུ་བྱེད་རྣམས་ཞེས་བགྱི་བ་ཡང་ཆོས་གང་གི་ངོ་བོ་ཉིད་ཀྱིས་མ་མཆིས་པ་དེ་འདུ་བྱེད་བསྐྱེད་པར་ཡང་ཇི་ལྟར་འགྱུར་ཏེ། དེ་བས་ན། མ་རིག་པ་ནི། མ་མཆིས་པའོ། །དེ་ལྟར་ན། མ་རིག་པ་མ་མཆིས་པས་འདུ་བྱེད་རྣམས་ཀྱང་མ་སྐྱེས་པའོ། །གང་
228b
མ་སྐྱེས་པ་དེ་ནི། རྒ་བར་མི་འགྱུར། ན་བར་མི་འགྱུར། འཆི་བར་མི་འགྱུར། ཤི་འཕོ་བར་མི་འགྱུར། སྐྱེ་བར་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་གང་ཡང་མ་སྐྱེས་པ་དེ་ལ་རྒ་བ་ག་ལ་མཆིས་ཏེ། གང་ལ་རྒ་བ་མ་མཆིས་པ་དེ་ནི། ན་བར་མི་འགྱུར། འཆི་བར་མི་འགྱུར། ཤི་འཕོ་བར་མི་འགྱུར། སྐྱེ་བར་མི་འགྱུར་རོ། །འདི་ནི།་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་སྟེ། མིང་ཙམ་དུ་བས་ཀྱི། དོན་དམ་པར་ནི། མ་ལགས་སོ། །མ་རིགས་པ་གང་ལགས་པ་དེ་ཉིད་བྱང་ཆུབ་བོ། །དེ་བཞིན་དུ་སྲིད་པའི་ཡན་ལག་ཐམས་ཅད་ཀྱང་ཤེས་པར་བགྱི་སྟེ། དེ་ལྟར་ན་རྟེན་ཅིང་འབྲེལ་བར་འབྱུང་བ་ལ་འཇུག་པས་ཆོས་ཀྱི་དབྱིངས་ལ་འཇུག་པར་འགྱུར་རོ། །བཅོམ་ལྡན་འདས། དེ་བཞིན་གཤེགས་པ་ནི། མ་སྐྱེས་པ་སྟེ། ཆོས་ཐམས་ཅད་ཀྱང་མ་སྐྱེས་པའོ། །དེ་བས་ན། ཆོས་ཐམས་ཅད་ནི། དེ་བཞིན་གཤེགས་པའོ། །བཅོམ་ལྡན་འདས། དེ་བཞིན་གཤེགས་པ་ནི། མ་འགག་པ་སྟེ། ཆོས་ཐམས་ཅད་ཀྱང་མ་འགག་པའོ། །བཅོམ་ལྡན་འདས། དེ་བཞིན་དུ་དེ་བཞིན་གཤེགས་པ་ནི། མཚན་ཉིད་མ་མཆིས་པ། མཚན་མ་མ་མཆིས་པ། དམིགས་སུ་མ་མཆིས་པ། ཀུན་ནས་ཉོན་མོངས་པ་མ་མཆིས་པ། རྣམ་པར་བྱང་བ་མ་མཆིས་པ། རྗེས་
229a
༄#། །སུ་ཆགས་པ་མ་མཆིས་པ། ཁོང་ཁྲོ་བ་མ་མཆིས་པ་སྟེ། ཆོས་ཀྱི་དབྱིངས་དང ། དེ་བཞིན་ཉིད་དང ། ཡང་དག་པའི་མཐའ་སྟེ། ཆོས་ཐམས་ཅད་ཀྱང་ཡང་དག་པའི་མཐའོ། །དེའི་སླད་དུ་ཆོས་ཐམས་ཅད་ནི། དེ་བཞིན་གཤེགས་པ་སྟེ། བཅོམ་ལྡན་འདས། དེ་ལྟར་ན། ཆོས་གང་དང་གང་དག་གིས་དེ་བཞིན་གཤེགས་པ་མ་མཆིས་པའི་ཆོས་དེ་དང་དེ་དག་གིས་ཆོས་ཐམས་ཅད་མ་མཆིས་ཏེ། དེའི་སླད་དུ་ཆོས་ཐམས་ཅད་ནི། དེ་བཞིན་གཤེགས་པའོ། །བཅོམ་ལྡན་འདས། གང་ལ་ལ་ཞིག་འདི་སྐད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་མངོན་པར་རྫོགས་པར་སངས་རྒྱས་སོ། །ཞེས་མཆི་ན། དེ་དག་ཐམས་ཅད་ནི། ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི། གཉིས་སུ་མ་མཆིས་པ་སྟེ། བྱང་ཆུབ་ཀྱང་གཉིས་སུ་མ་མཆིས་པ་ལགས་པས་གཉིས་སུ་མ་མཆིས་པས་ནི། གཉིས་སུ་མ་མཆིས་པ་མངོན་པར་རྫོགས་པར་འཚང་མི་རྒྱའོ། །བཅོམ་ལྡན་འདས། དེ་བཞིན་དུ་གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏོ། །ཞེས་མཆི་ན། དེ་དག་ཐམས་ཅད་ནི། ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་
229b
དུ་ཞེ་ན། དེ་བཞིན་གཤེགས་པ་ནི། བཟློག་པའམ་བསྐོར་བར་མཛད་པ་མ་ལགས་སོ། །བཅོམ་ལྡན་འདས། གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་སེམས་ཅན་ཚད་མེད་པ་ཡོངས་སུ་མྱ་ངན་ལས་བཟླས་སོ། །ཞེས་མཆི་ན། དེ་དག་ཐམས་ཅད་ནི། ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཐམས་ཅད་ནི། སེམས་ཅན་མ་མཆིས་པ་སྟེ། དེ་ལ་ཡོངས་སུ་མྱ་ངན་ལས་འདས་པ་གང་ཡང་མ་མཆིས་སོ། །བཅོམ་ལྡན་འདས། གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་སེམས་ཅན་ཚད་མེད་པའི་དོན་མཛད་དོ། །ཞེས་མཆི་ན། དེ་དག་ཐམས་ཅད་ནི། ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། དེ་བཞིན་གཤེགས་པ་ནི་ཆོས་གང་ལ་ཡང་ཕན་པའམ་གནོད་པའི་རྣམ་པར་ཉེ་བར་གནས་པ་མ་ལགས་སོ། །བཅོམ་ལྡན་འདས། གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་ཚེའི་འདུ་བྱེད་བོར་རོ། །ཞེས་མཆི་ན། དེ་དག་ཐམས་ཅད་ནི། ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཀྱི་དབྱིངས་ནི། ཅིའང་འདོར་བའམ། ལེན་པ་མ་མཆིས་སོ། །བཅོམ་ལྡན་འདས། གང་ལ་ལ་ཞིག་འདི་སྐད་དུ། དེ་བཞིན་གཤེགས་པ་ནི། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་
230a
༄#། །དབྱིངས་སུ་ཡོངས་སུ་མྱ་ངན་ལས་འདས་སོ། །ཞེས་མཆི་ན། དེ་དག་ཐམས་ཅད་ནི། ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཀྱི་དབྱིངས་ནི། འཁོར་བའམ། ཡོངས་སུ་མྱ་ངན་ལས་འདའ་བ་མ་ལགས་སོ། །བཅོམ་ལྡན་འདས། གང་ལ་ལ་ཞིག་འདི་ལྟ་བུའི་ཆོས་ལ་ངེས་པར་གྱུར་ན། དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་སྟེ། བཅོམ་ལྡན་འདས། ཆོས་ཀྱི་དབྱིངས་ལ་ནི། འགྱུར་བ་མ་མཆིས་ཀྱང་གདའི། རིགས་ཀྱི་བུའམ། རིགས་ཀྱི་བུ་མོ་དེ་དག་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་མི་གདའོ།། །།བམ་པོ་དགུ་པ། དེ་ནས་འབྲས་བུ་ཆེ་བའི་ལྷ་བྱེ་བ་ཕྲག་བརྒྱད་ཅུས་བཅོམ་ལྡན་འདས་ཀྱི་སྤྱན་སྔར་ཆོས་ཉིད་ལ་ངེས་པ་འགྲོ་བ་བརྗོད་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་སྦྱར་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་པ། བདེ་གཤེགས་མཐུ་ཆེན་འདྲེན་པ་ཚུལ་དང་ཚུལ་མིན་མཁྱེན་ལ་ཕྱག་འཚལ་ལོ། །འགྲོ་བ་ཀུན་ལ་ཐུགས་
230b
བརྩེ་ཐུབ་པ་ཡང་དག་ཇི་བཞིན་སྟོན་མཛད་པ། །འདྲེན་པ་ཚུལ་མཁས་ཁྱོད་ཀྱིས་ཚུལ་ནི་ཡང་དག་ཉིད་དུ་ཡང་དག་བསྟན། །མཐའ་ཡས་ཡོན་ཏན་མངའ་ཞིང་ཡེ་ཤེས་མངོན་པར་འཕགས་ལ་མགོས་ཕྱག་འཚལ། །ཁྱོད་ཀྱིས་བྱང་ཆུབ་ངེས་པར་འབྱུང་བའི་དྲང་ལམ་གཅིག་པུ་བགྲོད་པ་བསྟན། །ཁྱོད་ཀྱིས་བྱང་ཆུབ་དམ་པ་གཞལ་ཡས་ཞི་བ་ཤིས་པ་མི་གཡོ་བརྙེས། །སྲོག་ཆགས་བྱེ་བ་ཁྲག་ཁྲིག་འཁོར་བའི་སྡུག་བསྔལ་ཉམ་ཐག་འགྲོལ་མཛད་པ། །མཐའ་ཡས་ཡོན་ཏན་མངའ་ཞིང་ཡེ་ཤེས་མངོན་པར་འཕགས་ལ་མགོས་ཕྱག་འཚལ། །ཕུང་པོ་རྣམས་ནི་ངོ་བོ་ཉིད་སྟོང་ཤིན་ཏུ་ཕུང་པོ་རྣམས་དང་བྲལ། །བྱིས་པ་རྨོངས་བྱེད་རྣམས་ནི་རབ་ཏུ་བྲལ་བར་ཁྱོད་ཀྱིས་ཡོངས་སུ་བརྟགས། །ཤེས་པ་མི་ལྡན་སྐྱེ་བོ་ཕལ་ཆེན་འདིར་བཅིངས་རྙོང་ལ་སྤྲེ་འུ་ཐོགས་པ་བཞིན། །གྲོལ་བ་མཁས་པ་རྣམས་ནི་མཁའ་ལ་རླུང་བཞིན་ཆགས་པ་མེད་པར་འདོང ། །ཁམས་རྣམས་ཁམས་ཀྱི་རྣམ་པ་ཀུན་ཏུ་སྟོང་པར་ཐམས་ཅད་མཁྱེན་པས་གསུངས། །དཔེར་ན་བྲག་ཅ་རྣམ་པ་ཀུན་ཏུ་ཤིན་ཏུ་སྒྲ་དང་བྲལ་བ་འདྲ། །དེས་ནི་མི་མཁས་སྐྱེ་བོ་ཡང་དག་ཇི་བཞིན་མི་ཤེས་མང་པོ་བཅིངས། །གྲོལ་བ་མཁས་པ་ཡང་དག་རྟོགས་པ་རྣམས་ནི་ཁམས་གསུམ་ཆགས་མ་མཆིས། །སྐྱེ་མཆེད་ངོ་བོ་ཉིད་ཀྱིས་རྟག་ཏུ་སྟོང་ཞེས་ཐམས་ཅད་མཁྱེན་པས་བསྟན། །ཡང་དག་མ་ལགས་རྫུན་
231a
༄#། །ཞིང་བྱིས་པ་བསླུ་བ་ཆད་པ་སྟོང་བ་འདྲ། །མི་མཁས་སྐྱེ་བོ་ཆོས་ལ་གཅིག་ཏུ་མ་ངེས་མང་པོ་དེ་ལ་ཆགས། །དཔེར་ན་འགྲོན་པོ་རྒྱ་མཚོ་ཆེན་པོར་འཁྱམས་པ་བཞིན་དུ་འཁོར་བར་ལྷུང ། །འདྲེན་པ་དབང་པོ་འདི་དག་དབང་པོ་ཉིད་ཀྱིས་ཤིན་ཏུ་སྟོང་པ་སྟེ། །ཐུབ་པ་མེ་ལོང་ནང་གི་བཞིན་གྱི་དཀྱིལ་འཁོར་ལྟ་བུར་ཤིན་ཏུ་སྟོང ། །མི་མཁས་སྐྱེ་བོ་ཡང་དག་མ་འཚལ་མང་པོ་དག་ནི་དེ་ལ་ཆགས། །བྱ་དང་མཚོ་ཡི་ཉ་དང་སྲོག་ཆགས་དག་ནི་རྒྱ་ལ་ཐོགས་པ་བཞིན། །སེམས་ཅན་སེམས་ཅན་ཉིད་སྟོང་སེམས་ཅན་བྲལ་ཞིང་ངོ་བོ་ཉིད་ཀྱིས་སྟོང ། །ཐུབ་པ་སེམས་ཅན་རི་མོ་མཁན་གྱིས་གཟུགས་བྲིས་བཞིན་དུ་མ་མཆིས་ན། །མི་མཁས་སྐྱེ་བོ་ཡང་དག་ཇི་བཞིན་མ་འཚལ་མང་པོ་དེ་ལ་ཆགས། །མཁས་པ་ཡང་དག་རྟོགས་རྣམས་སྒོ་ངའི་སྦུབས་ནས་བྱུང་བའི་བྱ་བཞིན་གྲོལ། །རྟེན་འབྱུང་ཆོས་རྣམས་དེ་དག་སྐད་ཅིག་པ་སྟེ་སྟོང་ཞིང་དམིགས་མ་མཆིས། །རྨི་ལམ་དགའ་བ་བཞིན་དུ་གཟུང་དུ་མ་མཆིས་བྱིས་པ་རྨོངས་བགྱིད་པ། །མི་ཤེས་རྟོག་པའི་སླད་དུ་དེས་ཀྱང་མི་མཁས་སྐྱེ་བོ་མང་པོ་བཅིངས། ། མཁས་པ་ཡང་དག་རབ་ཏུ་རྟོགས་རྣམས་གཟེབ་ནས་ཐར་པའི་བྱ་བཞིན་གྲོལ། །ཐུབ་པས་ཆོས་ཉིད་བསམ་ཡས་ཇི་བཞིན་ཆོས་རྣམས་ཐམས་ཅད་བསམ་མི་ཁྱབ། །ཐུབ་པ་
231b
ཞི་བ་མྱ་ངན་འདས་པ་ཇི་བཞིན་ཆོས་ཀུན་མཚན་ཉིད་བྲལ། །ཐུབ་པ་ཁམས་གསུམ་མི་ཆགས་བཞིན་དུ་ཆོས་ཀུན་གནས་པ་མ་མཆིས་ཏེ། །དེ་སླད་ཚུལ་གཅིག་འདི་འཚལ་གྱུར་ན་འགྲོ་ཀུན་བདེ་བར་གཤེགས་པར་འགྱུར། །ཐུབ་པ་བདག་དང་གཞན་དུ་མི་མཁྱེན་ལྟ་བུར་ཆོས་ཀུན་གཡོ་བ་མེད། །ཐུབ་པའི་ཡེ་ཤེས་རྒྱལ་བའི་བསྟན་པ་ཇི་བཞིན་ཆོས་ཀུན་བསམ་མི་ཁྱབ། ། ཐུབ་པ་བྱིས་པའི་སྤྱོད་ཡུལ་མ་ལགས་ཇི་བཞིན་ཆོས་ཀུན་བརྟགས་མ་ལགས། སངས་རྒྱས་རྣམས་ཀྱི་སྤྱོད་ཡུལ་འདི་ནི་རབ་གསལ་དེ་བཞིན་ཤེས་པར་གྱིས། །མི་མཁས་གང་དག་རྒྱལ་བས་བྱང་ཆུབ་གཞལ་ཡས་བརྙེས་ཞེས་སྨྲས་པ་དང ། །གང་དག་རྒྱལ་བས་འཁོར་ལོ་དམ་པ་གཞལ་ཡས་མཆོག་བསྐོར་སྨྲ་བ་དང ། །གང་དག་བདེ་གཤེགས་སྐྱོབ་པས་སྲོག་ཆགས་ཁྲག་ཁྲིག་མྱ་ངན་འདས་སྨྲ་བ། །དེ་དག་ཐམས་ཅད་ཡང་དག་མ་འཚལ་ལྟ་བ་ཐིབས་པོས་ཡོངས་སུ་དཀྲིས། །གང་དག་བདེ་བར་གཤེགས་པས་ཚེ་ཡི་འདུ་བྱེད་བཏང་བཟུང་སྨྲ་བ་དང ། །གང་དག་སྟོབས་བཅུ་འགྲོ་བའི་དོན་མཛད་ཡོངས་སུ་མྱ་ངན་འདས་སྨྲ་བ། །དེ་དག་ཐམས་ཅད་ལྟ་བར་སོང་ལ་ཡིད་ཆགས་བདུད་ཀྱི་ལག་ཏུ་མཆིས། །ཆོས་ཀྱིས་དེ་བཞིན་ཉིད་མ་འཚལ་ཏེ་འདྲེན་པས་མཁྱེན་བཞིན་འཚལ་བར་བགྱི། །གང་དག་ཚུལ་དང་ཚུལ་མིན་འདི་ལ་མཁས་པ་དེ་དག་འདྲེན་པ་འཚལ། །དེ་དག་རྐང་གཉིས་གཙོ་བོས་དཔལ་
232a
༄#། །སྟུག་འཇིག་རྟེན་ཐུགས་བརྩེ་རྒྱལ་བར་འགྱུར། །དེ་བཞིན་ཉིད་འདི་འགྱུར་བའི་དབང་དང་ལྡན་ཏེ་དེ་ཉིད་ཆོས་ཉིད་ལགས། །དེ་ལྟར་འདི་འཚལ་གྱུར་ནས་ཚུལ་ལ་མཁས་པ་མི་ཡི་མཆོག་ཏུ་འགྱུར། །དེ་ལྟར་འབྲས་བུ་ཆེ་བའི་ལྷ་ཚོགས་ཆོས་རྣམས་ངེས་པར་རྟོགས་གྱུར་པ། །སྟོན་པའི་སྤྱན་སྔར་བརྗོད་དེ་ལྷག་པའི་བསམ་པ་དེ་ཡང་བསྟན་བྱས་ནས། །ཁ་ཅིག་ཡི་རང་དོགས་མེད་ཡིད་ཀྱིས་སངས་རྒྱས་ཉིད་དུ་བདག་མཐོང་ནས། །འདྲེན་སྲས་དེ་དག་ཚུལ་འདི་ཉིད་ཀྱིས་བདག་གིས་བདག་ལུང་བསྟན་པར་གྱུར། །དེ་ནས་བཅོམ་ལྡན་འདས་ཀྱིས་འབྲས་བུ་ཆེ་བའི་ལྷ་དེ་དག་གི་ལྷག་པའི་བསམ་པ་ཕུན་སུམ་ཚོགས་པ་དང ། ཆོས་རྣམས་ངེས་པར་རྟོགས་པ་ཐུགས་སུ་ཆུད་ནས་སེམས་ཅན་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། དཔལ་སྟུག་འདྲེན་པ་རྣམས་ནི་རྒྱུ་ཞིག་གཟིགས་ནས་འཛུམ་པ་མཛད་ལགས་ཏེ། །རྒྱུ་མེད་མི་མཛད་བཀའ་སྩལ་བདག་གིས་བདེ་གཤེགས་མངོན་སུམ་དེ་སྐད་ཐོས། །འདི་ལྟར་འདྲེན་པ་ཁྱོད་ཀྱིས་ཞི་བ་བདེ་བ་བསིལ་བའི་འཛུམ་མཛད་ན། །རྒྱལ་བ་ལྷ་མི་ལྷ་མིན་བླ་མ་འཛུམ་པ་མཛད་པའི་རྒྱུ་དེ་གསུངས། །དེ་རིང་འདི་ལྟར་འདྲེན་པ་ཁྱོད་ཀྱིས་ཞལ་ནས་འཛུམ་
232b
མཛད་བསིལ་མཐོང་ནས། །འགྲོ་བ་འདི་ཀུན་ཐེ་ཚོམ་འཚལ་ཏེ་བདེ་གཤེགས་ཁྱོད་ཀྱི་ཞལ་དུ་བལྟ། །མི་མཆོག་ཐུགས་རྗེ་ལྡན་པ་ཁྱོད་ཀྱིས་འཛུམ་རྒྱུ་དེ་ནི་མྱུར་དུ་གསུངས། །དེ་ཐོས་གྱུར་ནས་རྒྱལ་མཆོག་འགྲོ་བ་འདི་དག་ཐེ་ཚོམ་མ་མཆིས་འགྱུར། །འདྲེན་པ་དམ་པ་ལྷ་ཚོགས་གང་དག་རང་གིས་རང་ལ་ལུང་བསྟན་པ། །དེ་དག་སུ་ཞིག་གང་གིས་ཅི་ཐོབ་མཐའ་བཅས་རྣམ་པར་འཕྲུལ་བ་གསུངས། །མི་མཆོག་ཚངས་པའི་གསུངས་དབྱངས་བསྒྲགས་ཏེ་ཐེ་ཚོམ་ཀུན་ཏུ་བསལ་དུ་གསོལ། །དེ་ཐོས་རྒྱལ་བའི་འཁོར་འདི་རབ་ཏུ་དགའ་ཞིང་མཆོག་ཏུ་མགུ་བ་འཐོབ། །བདེ་གཤེགས་རྒྱལ་མཚན་མཐོན་པོ་དེ་དག་ཐམས་ཅད་གཞན་དུ་མི་སེམས་པར། །འདྲེན་པའི་སྲས་རྣམས་བྱང་ཆུབ་གཞལ་ཡས་ཞི་བ་དམ་པ་སེམས་ཤིང་མཆིས། །ཐུབ་པ་འདྲེན་མཆོག་ཐེ་ཚོམ་འཚལ་བ་དེ་དག་རྣམས་ཀྱི་ཐེ་ཚོམ་ཁུམ། །དེས་ནི་ཡེ་ཤེས་སྟོབས་ལྡན་ཚུལ་དང་ཚུལ་མིན་མཁས་ཀུན་རྒྱལ་བར་འགྱུར། །རྐང་གཉིས་གཙོ་བོའི་ཡན་ལག་བརྒྱད་ལྡན་གསུང་ཐོས་གྱུར་ནས་རབ་དགའ་སྟེ། །བདེ་གཤེགས་བསྟན་པ་བཞིན་དུ་བགྱིད་ཅིང་གསུངས་པའི་རྗེས་འཇུག་མཁས་པར་འགྱུར། །དེ་དག་དོན་གྱི་དབང་ལ་བརྟེན་ནས་བདེ་གཤེགས་འདྲེན་པ་བཀའ་སྩལ་གསོལ། །དེས་ནི་ཡིད་རངས་གྱུར་ཏེ་འགྲོ་བ་ཆོས་ཀྱི་མཐའ་མར་ཕྱིན་པར་འགྱུར། །འདྲེན་པ་
233a
༄#། །ཆེན་པོ་ལྷ་དེ་དག་གི་སྔོན་གྱི་སྤྱོད་པ་ཐོས་གྱུར་ཅིང ། །རྒྱལ་བའི་གསུང་ཐོས་གྱུར་ནས་བརྣག་པ་ཡོངས་རྫོགས་ཞི་ཞིང་རབ་དགའ་སྟེ། །ཚུལ་ལ་ཞུགས་ཤིང་ཚུལ་ལ་མཁས་རྣམས་མྱུར་དུ་ཐམས་ཅད་མཁྱེན་པར་འགྱུར། །འགྲོ་བ་རབ་ཏུ་འགྲོལ་མཛད་ཇི་བཞིན་ཡང་དག་སྟོན་པར་མཛད་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ལྷ་ཚོགས་རྣམས་ཀྱི་ཆེད་དུ་ང་ཡིས་འཛུམ་པ་འཇིག་རྟེན་བསྟན་མཛད་པ། །རྟ་ཐུལ་ཁྱོད་ཀྱིས་དུས་དང་ཚོད་ཤེས་ང་ལ་དྲིས་པ་ཤིན་ཏུ་ལེགས། །གང་ཕྱིར་ང་ཡིས་འཛུམ་པ་མཛད་པ་འདི་ཡི་ཚུལ་དང་རྒྱུ། །དེ་ཁྱོད་བསྟན་གྱི་ཁྱོད་དང་འགྲོ་བརྩེ་གཅིག་ཡིད་ཀྱིས་ཉོན། །ཐམས་ཅད་མཁྱེན་པ་རྣམས་ནི་རྒྱུ་ཡི་འབྲས་བུ་རྣམ་པ་གསུམ་གཟིགས་ཤིང ། །རྒྱུ་ལ་གཟིགས་ནས་རྐང་གཉིས་དམ་པ་དཔལ་སྟུག་རྣམས་ནི་འཛུམ་པ་མཛད། །ཁ་ཅིག་བློ་ཞན་བདག་ཅག་ཉན་ཐོས་འགྱུར་ཞེས་མྱ་ངན་འདས་ཞུགས་དང ། །ཁ་ཅིག་ཁ་རོག་འདུག་ལ་དགའ་ཞིང་རང་རྒྱལ་བྱང་ཆུབ་འདོད་ཞུགས་དང ། །ཁ་ཅིག་བདག་ཅག་འཇིག་རྟེན་འདྲེན་པ་མཐུ་བོ་ཆེར་ནི་འགྱུར་བྱས་ཏེ། །སྐྱེ་བོ་སྡུག་བསྔལ་ལྷུང་བ་འགྲོལ་ཞེས་ཞུགས་པའི་བསམ་པ་མཁྱེན་གྱུར་ནས། །འཛུམ་པ་ཆུང་མཛད་གང་བྱུང་ཉན་ཐོས་
233b
དོན་དུ་མཛད་པར་ཤེས་པར་བྱ། །འཛུམ་པ་འབྲིང་མཛད་གང་བྱུང་རང་རྒྱལ་དོན་དུ་མཛད་པར་རིག་པར་བྱ། །འཛུམ་མཆོག་ངས་གང་མཛད་པ་འདི་ནི་འདྲེན་པའི་དོན་དུ་ཤེས་པར་བྱ། །རབ་འབྲིང་ཐ་མ་རྣམ་པ་འདི་གསུམ་འཛུམ་པ་མཛད་པའི་རྒྱུར་གསུངས་ཏེ། །ཁ་ཅིག་ཐར་པ་དོན་གཉེར་ལམ་གསུམ་ཞུགས་པའི་འཇིག་རྟེན་འདི་མཁྱེན་ནས། །དེས་ན་འཇིག་རྟེན་མཁས་པ་རྣམ་པར་འདྲེན་པ་དམ་པ་འཛུམ་པ་མཛད། །རྟ་ཐུལ་དེ་ལ་ཉན་ཐོས་དོན་དུ་འཛུམ་མཛད་ཞལ་དུ་ནུབ་པར་འགྱུར། །རང་རྒྱལ་དོན་དུ་འཛུམ་པ་གང་མཛད་སྐུ་ཡི་དབུས་སུ་ནུབ་པར་འགྱུར། །འདྲེན་པ་སྟོབས་བཅུའི་དོན་དུ་འཛུམ་པ་མཛད་པ་གཙུག་ཏུ་ནུབ་པར་འགྱུར། །དེ་ལྟར་རྟ་ཐུལ་ཁྱོད་ཀྱིས་འཛུམ་པའི་རྒྱུ་ནི་རྣམ་གསུམ་ཤེས་པར་གྱིས། ། རྒྱལ་བ་མཆོག་རྣམས་དོན་དུ་གང་འཛུམ་དེ་ཀུན་ང་ཡི་གཙུག་ཏུ་ནུབ། །སྡིག་པ་གཞོམ་པའི་ཚུལ་དུ་དེ་ལྟར་འཛུམ་པ་ངས་བསྟན་ཤེས་པར་གྱིས། །འདྲེན་པ་རྣམས་ཀྱི་འཛུམ་པ་གང་ཡིན་དེ་རྒྱུ་རྣམ་གསུམ་ཡང་བཤད་ཀྱི། །ཀུན་ཀྱང་རྩེ་གཅིག་ཡིད་བྱོས་དེ་ནི་ང་ལས་ལེགས་པར་ཉན་པར་གྱིས། །དང་པོའི་དོན་དུ་འདྲེན་པ་འཛུམ་པ་ངས་མཛད་མྱུར་དུ་ཐོག་མར་ནུབ། །འབྲིང་གི་དོན་ནི་དུས་ཚོད་ཅུང་ཟད་བསྡད་ཅིང་ཕྱི་ནས་ནུབ་པར་འགྱུར། །བློ་མཆོག་ལྡན་ཕྱིར་འཛུམ་པ་རྒྱལ་བ་ངས་མཛད་ཤིན་ཏུ་རིང་དུ་གནས། །རྟ་ཐུལ་ཉན་ཐོས་
234a
༄#། །དོན་དུ་གང་གནས་འཛུམ་དེ་ཐེག་པའི་དབང་གིས་མཛད། །གཞན་ཡང་འཛུམ་རྒྱུ་རྣམ་གསུམ་བཤད་ཀྱི་རྟ་ཐུལ་ཁྱོད་ཀྱིས་ཉན་པར་གྱིས། །གང་དག་རྒྱལ་བ་དྲང་པོ་སྟོབས་བཅུ་པོ་ལ་བསྐོར་བ་བྱེད་པ་ནི། །དེ་དག་ང་ལ་སྐྱེན་པར་བསྐོར་ནས་མྱུར་དུ་ཤིན་ཏུ་མཁས་པར་འགྱུར། །འབྲིང་དོན་ཕྱིར་ནི་སྲབ་ཅིང་ཆེ་ལ་དལ་གྱིས་བསྐོར་བ་བྱེད་པར་འགྱུར། །དལ་གྱིས་གཡས་ཕྱོགས་བསྐོར་བ་བྱས་ནས་རྒྱ་ཆེར་འགྱུར་ཞིང་མནན་པར་འགྱུར། །གང་དག་གསེར་རྒྱན་ལ་དཀར་སྟེང་བཞག་འདྲ་བའི་བདེ་གཤེགས་མཐོང་གྱུར་ན། །དེ་ནི་རྐང་གཉིས་དམ་པ་ཐུབ་པའི་སྐུ་ཀུན་ཁྱབ་པར་གནས་པར་འགྱུར། །ཐམས་ཅད་མཁྱེན་པས་འཛུམ་བསྟན་འདི་ནི་ཞིང་གི་དབང་དུ་ཤེས་པར་བྱ། །གང་ཚེ་གདུགས་འདྲ་མཐའ་ཡས་མིག་ལྡན་པས་ནི་འདྲེན་དེ་འགེབས་པ་དང ། །གང་ཚེ་མེ་ཏོག་འདྲ་ལ་འདྲེན་པའི་སྟེང་གི་མཁའ་ལ་ལྡིང་བ་དང ། །གང་ཚེ་སྒོ་མོ་འདྲ་ཞིང་བདེ་བར་གཤེགས་ལ་ལན་གསུམ་བསྐོར་བྱེད་པ། །དེ་ནི་འཇིག་རྟེན་འདས་པ་ཚེ་ཡི་དབང་དུ་འཛུམ་མཛད་ཤེས་པར་བྱ། །བདེ་གཤེགས་རྒྱལ་བ་རྣམས་ཀྱིས་འཛུམ་མཛད་རྒྱུ་ནི་རྣམ་གསུམ་དེ་ཙམ་བསྟན། །རྟ་ཐུལ་ཁྱོད་ཀྱིས་འཛུམ་མཛད་རྒྱུ་རྣམ་གསུམ་པོ་དེ་དག་ཤེས་པར་གྱིས། །དེས་ན་འཇིག་རྟེན་དོན་བསྟན་བཞེད་ནས་འཇིག་རྟེན་རྣམ་འདྲེན་འཛུམ་པ་མཛད། །དེ་ཐོས་གྱུར་
234b
ནས་ཐམས་ཅད་མཁྱེན་གྱི་སྟན་ལ་ཐེ་ཚོམ་མེད་པར་གྱིས། །འབྲས་བུ་ཆེ་བའི་ལྷ་ཚོགས་བྱེ་བ་བརྒྱད་ཅུ་ཐམ་པ་འདི་དག་ནི། །ཞིང་རྣམས་དག་ཏུ་ཆོས་ཚུལ་ཤིན་ཏུ་རྒྱ་ཆེན་སྨྲ་བའི་རྒྱལ་བར་འགྱུར། །མཁས་པ་དེ་དག་དཔག་མེད་ཚེ་ལྡན་བསྐལ་པ་མང་པོར་གནས་པར་འགྱུར། །དེའི་ཕྱིར་བདེ་བར་གཤེགས་པས་འཛུམ་པ་རྒྱ་ཆེན་མཆོག་གི་ཆ་འདི་བསྟན། །དེ་དག་སྔོན་གྱི་བསྐལ་པ་སུམ་ཅུ་དྲུག་གི་རྒྱལ་བ་རྣམས་ཀྱང་མཐོང ། །བསྐལ་པ་སུམ་ཅུ་དྲུག་ཏུ་ཐམས་ཅད་མཁྱེན་པ་བསྙེན་བཀུར་སྤྱད་པ་སྤྱོད། །ད་དུང་ཚུལ་མཁས་འདི་དག་བསྐལ་པ་གྲངས་མེད་སུམ་ཅུ་རྩ་དྲུག་ཏུ། །གང་ཟག་ཆེན་པོ་འདི་དག་རྒྱལ་བ་ཁྱུ་མཆོག་མཆོད་པ་བྱེད་ཅིང་གནས། །ཐམས་ཅད་དུ་ཡང་ཕུན་སུམ་ཚུལ་རྟོགས་རྒྱལ་བའི་མཆོག་ལ་མཆོད་པ་བྱེད། །རྐང་གཉིས་གཙོ་བོ་མཆོད་དེ་བྱང་ཆུབ་ཞི་བ་ཡོངས་སུ་བཙལ་བྱས་ནས། །དེ་དག་དེ་ཡི་འོག་ཏུ་དཔལ་སྟུག་རྐང་གཉིས་དམ་པ་སྐྱེས་བུ་མཆོག་།འདྲེན་པ་མཐུ་ཆེན་ཡོན་ཏན་ལྡན་པར་གསེར་གྱི་རྒྱལ་མཚན་བསྐལ་ལ་འབྱུང ། །རྒྱལ་བ་དེ་དག་སྣ་ཚོགས་ཞིང་ན་གནས་ཤིང་རང་རང་ཞིང་སྦྱངས་ཏེ། །སེམས་ཅན་དམ་པ་དེ་ཀུན་ཉི་མའི་འོད་ཀྱི་དཀྱིལ་འཁོར་དཔལ་ཞེས་བྱ། །དེ་ཚེ་ཡོན་ཏན་ལྡན་པ་དེ་དག་རྣམས་ཀྱི་འདུས་པ་གྲངས་མེད་དེ། །དེ་ཚེ་ཐུབ་པ་རེ་རེའི་ཉན་ཐོས་འདུས་པར་འགྱུར་བ་དེ་དག་ནི། །གལ་ཏེ་བསྐལ་པ་ཁྲག་ཁྲིག་དག་ཏུ་སྟོབས་
235a
༄#། །བཅུས་ཉན་ཐོས་དེ་བགྲངས་ཀྱང ། །ལེགས་མཛད་རྣམས་ཀྱི་ཉན་ཐོས་འདུས་པ་དག་ནི་མཐར་ཕྱིན་བགྲངས་མི་འགྱུར། །འདུས་པ་དེ་དག་ཐམས་ཅད་གྲངས་མེད་འདུས་པ་དེས་ནི་ཅི་འདྲ་བ། །དེ་ལས་ཉིས་འགྱུར་དེ་ཚེ་བྱང་ཆུབ་ཏུ་ནི་ཡང་དག་ཞུགས་པར་འགྱུར། །དེ་ཚེ་རྒྱལ་བར་ཞུགས་ཀྱི་རྒྱལ་བ་ཐམས་ཅད་མཁྱེན་པ་ཉིད་མ་ཡིན།། དེ་དག་ཐམས་ཅད་ཡོངས་དག་ཞིང་དུ་སྤྱད་ནས་ཀུན་ཀྱང་རྒྱལ་བར་འགྱུར། །བདེ་གཤེགས་དེ་དག་སྤྱོད་པ་གང་ཡིན་པ་དེ་དག་རྣམས་ཀྱིའང་དེ་ཉིད་འགྱུར། །འཇིག་རྟེན་མཁས་པ་དེ་དག་མྱ་ངན་འདས་པར་གྱུར་ནས་དམ་པའི་ཆོས། །དེ་ཚེ་སྲས་ཀྱིས་བཟུང་ཞིང་བསྐལ་པ་བྱེ་བ་བརྒྱད་ཅུར་གནས་པར་འགྱུར། །དེ་དག་འདས་ནས་སྟོན་པའི་གསུང་རབ་དེ་ལ་བྱང་ཆུབ་སེམས་བསྐྱེད་པ། །གངྒཱའི་ཀླུང་གི་བྱེ་མ་བས་ཀྱང་ཤིན་ཏུ་མང་བ་འབྱུང་བར་འགྱུར། །དེ་དག་འདས་ནས་སྟོན་པ་སྐྱོབ་པ་རྣམས་ཀྱི་གསུང་རབ་དེ་ལ་ནི། །ཉན་ཐོས་རྒྱ་མཚོ་ཀུན་གྱི་བྱེ་སྙེད་དཔག་ཡས་མྱ་ངན་འདའ་བར་འགྱུར། །དེ་ལྟར་འཇིག་རྟེན་དོན་རྣམས་མཛད་པ་རང་བྱུང་དེ་དག་ཐམས་ཅད་ཀྱི། །བསྟན་པ་གང་ཡིན་དེ་ནི་ཆོས་དང་ཡོངས་སུ་ལེགས་པར་ལྡན་གྱུར་ཅིང ། །ཡང་དག་ཤར་བར་འགྱུར་ཏེ་དེ་ནི་བསྟན་པ་རྣམས་ཀྱི་ཆོས་ཉིད་ཡིན། །མི་མཆོག་དེ་ཡི་གསུང་རབ་དེ་ཐོས་འགྲོ་བ་མ་ལུས་དད་གྱུར་ནས། །རྐང་གཉིས་དམ་པ་
235b
གཞལ་ཡས་འཇིག་རྟེན་དོན་བྱེད་བདག་ཅག་འགྱུར་ཞེས་ཏེ། །ཐམས་ཅད་དགའ་ནས་རྒྱལ་བའི་ཞབས་ལ་ཕྱག་འཚལ་སྐྱེ་བོ་རབ་ཏུ་དགའ། །བདེ་བར་གཤེགས་ལ་དགའ་བ་གཞལ་ཡས་བསྐྱེད་ནས་ཆོས་ཀྱིས་བསྙེན་བཀུར་བྱས། །དེ་ལྟ་བས་ན་དགའ་བར་བྱོས་ལ་མགོ་ལ་འབར་བཞིན་སྤྱད་སྤྱོད་དེ། །རྟག་ཏུ་ཤེས་རབ་ཕ་རོལ་ཕྱིན་དང་དགེ་བའི་བཤེས་གཉེན་བསྟེན་བྱོས་ལ། །ཡང་དག་མཐོང་བའི་སྤྱོད་པ་དགེ་བ་འདི་ལ་ཀུན་ཏུ་བསྟེན་བྱོས་ཏེ། །དགེ་སློང་ཁྱེད་ཅག་རྐང་གཉིས་གཙོ་བོ་འཇིག་རྟེན་ཐུགས་བརྩེར་འགྱུར་བར་གྱིས། །འབྲས་བུ་ཆེ་བའི་ལྷ་ལུང་བསྟན་པའི་ལེའུ་སྟེ། ཉི་ཤུ་རྩ་གསུམ་པའོ།། །།དེ་ནས་གནས་གཙང་མའི་རིས་ཀྱི་ལྷ་རྣམས་ཀྱིས་དེའི་ཚེ་སེམས་ཅན་དཔག་ཏུ་མེད་པ་བྱང་ཆུབ་ཏུ་ཡང་དག་པར་ཞུགས་པར་རིག་ཅིང ། སངས་རྒྱས་ཀྱི་ཆོས་རྣམས་ལ་ཐེ་ཚོམ་མེད་པར་གྱུར་པར་རིག་ནས་ཚིམ་ཞིང་མགུ་ལ་ཡིད་རངས་ཏེ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་སོ་སོ་ནས་མངོན་པར་བསྟོད་དོ། །དེ་ནས་ལྷའི་བུ་སྦྱིན་པ་ལ་མོས་པས་གསོལ་པ། ཁྱོད་ཀྱིས་སྡུག་པའི་སྲས་རྣམས་དང ། །བཙུན་མོ་དང་ནི་སྲོག་ཕངས་བཏང ། །རྒྱལ་སྲིད་བཏང་བ་ཅི་སྨོས་ཏེ། །སྦྱིན་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་ཚུལ་ཁྲིམས་ལ་མོས་པས་གསོལ་པ། ཁྱོད་ཀྱི་
236a
༄#། །ཚུལ་ཁྲིམས་རྣམས་སྦྱངས་པ། །རྣམ་པ་ཀུན་ཏུ་བསྙེངས་མི་མངའ། །ཤིན་ཏུ་བསླབ་པས་མཐར་ཕྱིན་པ། །ཁྲིམས་མཐར་ཕྱིན་ལ་ཕྱག་ཀྱང་འཚལ།། ལྷའི་བུ་བཟོད་པ་ལ་མོས་པས་གསོལ་པ། ཁྱོད་ཀྱིས་བཟོད་པ་བསྟེན་མཛད་པས། །ཡན་ལག་གཏུབས་པའང་བཟོད་པར་མཛད། །ཟབ་མོར་སྒྱིད་ལུག་མ་ལགས་ཏེ། །བཟོད་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བརྩོན་འགྲུས་ལ་མོས་པས་གསོལ་པ། བརྩོན་པ་མ་བཏང་བརྩོན་འགྲུས་ཏེ། །སྟོབས་ཆེན་བརྩོན་འགྲུས་ལྡན་གྱུར་པས། །རྫོགས་པའི་བྱང་ཆུབ་མཆོག་བརྙེས་པ། །བརྩོན་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བསམ་གཏན་ལ་མོས་པས་གསོལ་པ། ཁྱོད་ཀྱིས་བསམ་གཏན་བསྟེན་མཛད་པ། །དེ་ལ་འཇིག་རྟེན་གཏིང་མི་རྙེད། །དུས་གསུམ་མཉམ་པ་ཉིད་བརྙེས་པ། །བསམ་གཏན་མཐར་ཕྱིན་ཕྱག་ཀྱང་འཚལ། །ལྷའི་བུ་གཟི་བརྗིད་དང་ལྡན་པས་གསོལ་པ། དཔའ་བོས་ཤེས་རབ་ཕ་རོལ་ཕྱིན། །ཡང་དང་ཡང་དུ་བསྒོམས་པས་ན། །ཐམས་ཅད་མཁྱེན་པ་ཉིད་བརྙེས་པ། །ཤེས་རབ་མཐར་ཕྱིན་ཕྱག་ཀྱང་འཚལ། །ལྷའི་བུ་ཁམས་ཀྱི་བློ་གྲོས་ཀྱིས་གསོལ་པ། སྦྱིན་པ་དག་དང་ངག་སྙན་དང ། །དོན་སྤྱད་མཐུན་པའི་དོན་དག་གིས། །འཇིག་རྟེན་འདི་དག་ཁྱོད་ཀྱིས་བཏུལ། །འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་
236b
བུ་དགེ་བའི་བློ་གྲོས་ཀྱིས་གསོལ་པ། བྱམས་ཆེན་ཐུགས་རྗེ་ཆེན་པོ་དག་།ཡུན་རིང་དུས་ནས་བསྒོམས་མཛད་དེ། །སེམས་ཅན་དཔག་ཡས་ཡོངས་སུ་བསྒྲལ། །གདོས་འཛིན་ཁྱོད་ལ་ཕྱག་ཀྱང་འཚལ། །ལྷའི་བུ་དག་པའི་སེམས་ཀྱིས་གསོལ་པ། ཉོན་མོངས་མེད་པའི་མཐར་ཕྱིན་ཅིང ། །ཐུབ་ཆེན་དུལ་བའི་སེམས་མངའ་བས། །མ་ཐུལ་ཐམས་ཅད་དུལ་མཛད་པ། ། ཁ་ལོ་སྒྱུར་ལ་ཕྱག་ཀྱང་འཚལ། །ལྷའི་བུ་བློ་གྲོས་དྲི་མ་མེད་པས་གསོལ་པ། སེམས་དག་མཉེན་པའི་སེམས་མངའ་བ། །སེམས་དུལ་དབང་པོ་ཞི་མངའ་བ། །སེམས་ཅན་ཀུན་གྱིས་སེམས་མཁྱེན་པ། །སེམས་མཁྱེན་ཁྱོད་ལ་ཕྱག་ཀྱང་འཚལ། །ལྷའི་བུ་བློ་གྲོས་རྣམ་པར་དག་པས་གསོལ་པ། ཤེས་རབ་ལྡན་པའི་བློ་གྲོས་ཅན། །བློ་གྲོས་མཆོག་ལ་རབ་ཏུ་ཞུགས། །ཐུགས་གསལ་ཕུན་སུམ་ཚོགས་པའི་བློ། །མི་མཁས་རྟོགས་མཛད་ཕྱག་ཀྱང་འཚལ། །ལྷའི་བུ་སེམས་རྒྱན་གྱིས་གསོལ་པ། ཁྱོད་ཀྱིས་སེམས་ནི་རྣམ་པར་སྦྱངས། །སངས་རྒྱས་ཞིང་ཡང་རྣམ་དག་མཛད། །སེམས་ཅན་བློ་ཡང་རྣམ་སྦྱངས་པ། །ཀུན་དག་ཁྱོད་ལ་ཕྱག་ཀྱང་འཚལ། །ལྷའི་བུ་ཕམ་པ་མེད་པས་གསོལ་པ། དགོངས་པ་ཕམ་པ་མི་མངའ་བ། །ཁྱོད་ཀྱིས་བདུད་ཀྱི་དཔུང་ཡང་བཅོམ། །ཁྱོད་ཀྱིས་ལྷ་ཚོགས་ཐམས་ཅད་ཀྱང ། །རབ་ཏུ་དགའ་བའི་ཡིད་དུ་བསྒྱུར། །ལྷའི་བུ་མྱུར་དུ་བྱེད་པས་གསོལ་པ། ཁྱོད་ཀྱིས་ཆོས་རྣམས་མྱུར་བར་
237a
༄#། །མཁྱེན། །སེམས་ཅན་མྱུར་བར་རྣམ་པར་སྦྱངས། །ཟབ་ཅིང་བལྟ་དཀའི་ཆོས་དག་ལ། །མྱུར་དུ་མཛད་ལ་ཕྱག་ཀྱང་འཚལ། །ལྷའི་བུ་བརྩོན་འགྲུས་བརྟན་བས་གསོལ་པ། བྲལ་གྱུར་ཡོངས་སུ་བྲལ་གྱུར་པ། །ཆུ་བོ་རྒལ་ཏེ་ཟག་པ་སྤངས། །ཕ་རོལ་ཕྱིན་ཅིང་ཐང་ལ་བཞུགས། །བརྩོན་འགྲུས་བརྟན་ལ་ཕྱག་ཀྱང་འཚལ། །ལྷའི་བུ་སྤྱོད་ལམ་དང་ལྡན་པས་གསོལ་པ། འདོད་ཆགས་སྤངས་ཤིང་ཞེ་སྡང་སྤངས། །གཏི་མུག་སྤངས་པ་ཟག་མེད་པ། །སྦྱིན་གནས་བསོད་ནམས་ཞིང་གྱུར་པ། །འཇིག་རྟེན་མཆོད་འོས་ཕྱག་ཀྱང་འཚལ། །ལྷའི་བུ་ཤིན་ཏུ་བརྟན་པས་གསོལ་པ། ཁྱོད་ཀྱིས་དམ་ཆོས་ཤིན་ཏུ་བསྟན། །འཇིག་རྟེན་གསུམ་དུ་རབ་ཏུ་མཆོད། །གཅིག་པུ་བགྲོད་པས་བདེ་བ་བརྙེས། །དེ་ཕྱིར་ཁྱོད་ལ་ཕྱག་ཀྱང་འཚལ། །ལྷའི་བུ་མི་འཁྲུགས་པས་གསོལ་པ། ལྷུན་སྟུག་གཅིག་ཏུ་གྱུར་པའི་རི། །རླུང་གིས་བསྐྱོད་པར་མི་ནུས་ཏེ། །དེ་བཞིན་བསྟོད་དང་སྨད་པ་ཡིས། །བདེ་གཤེགས་བསྐྱོད་པར་མི་ནུས་སོ། །ལྷའི་བུ་མཉམ་པ་ཉིད་ཐོབ་པས་གསོལ་པ། དཔའ་བོ་ཆེན་པོ་ཟབ་ཅིང་མཉམ། །མཚན་རབ་སུམ་ཅུ་རྩ་གཉིས་ཅན། །ཤེས་རབ་ཟབ་མོ་བློ་ལྡན་པ། །རྒྱལ་བ་མཛེས་ལ་ཕྱག་ཀྱང་འཚལ། །ལྷའི་བུ་ཟབ་པའི་བློ་གྲོས་ཀྱིས་གསོལ་པ། སྐུ་ཆེན་ཁྱོད་ལ་སྐུ་མི་མངའ། །དེ་བཞིན་ཉིད་ལ་རབ་ཏུ་ཞུགས། །ཡང་དག་
237b
མཐའ་ཡང་རབ་ཏུ་སྟོན། །ཁྱོད་མཚུངས་གང་ཟག་ཡོང་མ་མཆིས། །ལྷའི་བུ་བློ་གྲོས་དང་བས་གསོལ་པ། གཉིས་སུ་མེད་པ་ཡང་དག་སྟོན། །དཔའ་བོ་དཔའ་བོས་རྣམ་པར་གནོན། ། གང་ཟག་ཟབ་ལ་ཞུམ་མ་མཆིས། །དེ་དག་ཁྱོད་ཆོས་ཕ་རོལ་ཕྱིན། །ལྷའི་བུ་རབ་ཏུ་དགའ་བས་གསོལ་པ། མཆོག་ཏུ་དགའ་ཡིད་བརྟན་པ་དག་།ཁྱོད་ཀྱི་སློབ་ལ་བསླབ་པའི་རྣམས།། སྤྲུལ་རྣམས་བགས་པ་རྙིང་འདོར་བཞིན། །སྲིད་པ་གསུམ་པོ་འདི་དག་འདོར། །ལྷའི་བུ་ཞི་བའི་ཡིད་ཀྱིས་གསོལ་པ། ཇི་ལྟར་མར་མེ་མར་ཟད་ཅིང ། །སྙིང་པོ་ཟད་པས་ཞི་གྱུར་བཞིན། ། ཁྱོད་ཀྱི་བསྟན་པ་མྱུར་ཐོས་ན། །ཤེས་རབ་ཆེན་པོ་མྱ་ངན་འདའ། །ལྷའི་བུ་ཞི་གནས་ལ་གནས་པས་གསོལ་པ། གང་གིས་ཀུན་མཁྱེན་ཁྱོད་མཐོང་བའི། །མི་རྣམས་འདོད་ཆགས་བཅིངས་པ་ཡང ། །ཤེས་རབ་མཚོན་གྱིས་མཁས་པ་དག་།འདོད་ཆགས་ཞགས་པ་གཅོད་པར་འགྱུར། །ལྷའི་བུ་ཞི་གནས་མང་གིས་གསོལ་པ། ཞི་བའི་སེམས་མངའ་ཞི་ལ་སྤྱོད། །ཆོ་ག་སྤྱོད་ཡུལ་རབ་ཏུ་ཞི། །ཉོན་མོངས་ཐམས་ཅད་ཞི་གྱུར་པ། །དགྲ་རྣམས་ཞི་ལ་ཕྱག་ཀྱང་འཚལ། །ལྷའི་བུ་ཞི་གནས་འཇིགས་མེད་ཀྱིས་གསོལ་པ། ཁྱོད་ཀྱིས་ཞི་གནས་བསླབ་པ་ཡི། ། བྱང་ཆུབ་སེམས་དཔའ་གྲགས་ཆེན་དག་།ཞི་གནས་ཉིད་ཀྱིས་འབྱུང་འགྱུར་ཞིང ། །སེམས་ཞི་དེ་བཞིན་གཤེགས་པར་འགྱུར། །ལྷའི་བུ་ཞི་གནས་ཟས་ཀྱིས་གསོལ་པ། ཆོས་རྣམས་ཀུན་
238a
༄#། །གྱི་ཞི་བ་ནི། །དཔའ་བོ་ཁྱོད་ཀྱིས་རབ་ཏུ་བསྟན། །ཤེས་རབ་ཆེན་པོས་དེ་འཚལ་ན། །དེ་དག་དེ་བཞིན་གཤེགས་པར་འགྱུར། །ལྷའི་བུ་རྟག་ཏུ་རྣམ་པར་བལྟ་བས་གསོལ་པ། ཁྱོད་ཀྱིས་སེམས་ཅན་རྟག་ཏུ་གཟིགས། །མཁས་པ་ཁྱོད་ལྟར་སློབ་པ་རྣམས། །ཡེ་ཤེས་མཆོག་གིས་མཉམ་བཞག་ཅིང ། །བྱང་ཆུབ་མཆོག་ཀྱང་ཐོབ་པར་འགྱུར། །ལྷའི་བུ་སྣང་འཛིན་གྱིས་གསོལ་པ། ཤེས་རབ་ཕ་རོལ་ཕྱིན་གྱུར་པ། །ཐུབ་ཆེན་ཁྱོད་ལས་གང་སློབ་པ། །དེ་དག་འཇིག་རྟེན་སྣང་འཛིན་ཅིང ། །སྒྲིབ་པ་མེད་པར་གཟིགས་པར་འགྱུར། །ལྷའི་བུ་འོད་བྱེད་ཀྱིས་གསོལ་པ། འཇིག་རྟེན་སྒྲོན་མ་ཁྱོད་ཀྱི་གསུང ། །ཡེ་ཤེས་རྒྱ་མཚོ་དེ་ཐོས་ནས། །དེ་དག་དྲི་མེད་བདེ་བ་འཐོབ། །བསམ་གྱིས་མི་ཁྱབ་འོད་ཀྱང་འབྱུང ། །ལྷའི་བུ་དྲི་མ་མེད་པའི་འོད་ཀྱིས་གསོལ་པ། ཆོས་རྣམས་ཐམས་ཅད་རྣམ་མི་རྟོག་།ཐབས་ལ་མཁས་པས་དེ་དག་གསུངས། །དེ་འདྲའི་ཡེ་ཤེས་སྟོན་བགྱིད་པ། །དེ་དག་གང་ཟག་མཆོག་ཏུ་འགྱུར། །ལྷའི་བུ་རབ་ཏུ་མི་གནས་ཀྱིས་གསོལ་པ། གནས་མ་མཆིས་ཤིང་བླང་མ་མཆིས། །ཆོས་རྣམས་ཐམས་ཅད་སེམས་མ་མཆིས།། བདག་དང་གཞན་གྱི་རྣམ་འགྱུར་བ། །དེ་དག་ཁྱོད་ཀྱིས་དེ་བཞིན་མཁྱེན། །ལྷའི་བུ་གནས་མེད་བློ་གྲོས་ཀྱིས་གསོལ་པ། ཆོས་རྣམས་ཐམས་ཅད་གཞི་མེད་པར། །རྣམ་པར་འདྲེན་
238b
པ་ཁྱོད་ཀྱིས་གཟིགས། །དེ་དག་ཁྱོད་ཀྱིས་ལུགས་བཟློག་སྟེ། །སེམས་ཅན་རྣམས་ལ་བསྟན་པ་མཛད། །ལྷའི་བུ་མི་རྟེན་བློ་གྲོས་ཀྱིས་གསོལ་པ། ཆོས་རྣམས་ཐམས་ཅད་རྟེན་མ་མཆིས། །སེམས་ཅན་མ་མཆིས་ཕན་ཚུན་མིན། །ལག་མཐིལ་སྐྱུ་རུ་ར་བཞག་བཞིན། །ཡང་དག་ཇི་བཞིན་ཁྱོད་ཀྱིས་བསྟན། །ལྷའི་བུ་བར་སྣང་རྒྱུ་བས་གསོལ་པ། བདེ་གཤེགས་ཁྱོད་ཀྱིས་ཆོས་ཀྱི་རྣམས། །བར་སྣང་ལྟ་བུར་སྣང་བ་སྟེ། །སྐྱེ་དང་འགོག་པ་མེད་པར་གཟིགས། །དེ་སླད་འཇིག་རྟེན་ཆགས་མི་མངའ། །ལྷའི་བུ་ངར་འཛིན་མེད་པས་གསོལ་པ། ཁྱོད་ཀྱིས་འགྲོ་བ་འདི་དག་ཀུན། །ལུས་ཀྱི་ངོ་བོ་ཉིད་ཀྱིས་ནི། །གཡོ་བ་མེད་ཅིང་ངར་འཛིན་མེད། །སྤྱོད་མེད་རྩོལ་བ་མེད་པར་གཟིགས། །ལྷའི་བུ་བློ་གྲོས་རྣམ་པར་བསྒོམས་ཀྱིས་གསོལ་པ། སྒྱུ་མ་སྣ་ཚོགས་ལགས་བགྱིས་པ། །སྒྱུ་མའི་མཁན་པོས་བསྟན་གྱུར་ན། །དེ་བཞིན་མ་ལགས་དེ་བཞིན་གདའ། །ཐུབ་པ་དེ་ལྟར་མཉམ་མ་མཆིས། །ལྷའི་བུ་རབ་ཏུ་སད་པའི་ངང་ཚུལ་གྱིས་གསོལ་པ། གཟུགས་བརྙན་ཇི་ལྟར་མེ་ལོང་ལ། །གདའ་ཡང་དེ་ལྟར་མ་མཆིས་པ། །དེ་བཞིན་ཆོས་རྣམས་ཁྱོད་ཀྱིས་གཟིགས། །དེ་བས་འཇིག་རྟེན་རྨོངས་མི་མངའ། །ལྷའི་བུ་ཡིད་བཞིན་རྣམ་པར་འཇིག་གིས་གསོལ་པ། སངས་རྒྱས་གཟུགས་བརྙན་ལྟ་བུ་སྟེ། །དེ་བཞིན་སངས་རྒྱས་ཆོས་ཀྱི་རྣམས། །དེ་བཞིན་ཁྱོད་ཀྱིས་བསྟན་པ་མཛད། །དེ་ལྟར་འགྲོ་བ་ཀུན་
239a
༄#། །ཀྱང་མཁྱེན། །ལྷའི་བུ་སྤོབས་པ་ཐོགས་མེད་ཀྱིས་གསོལ་པ། ཆོས་ཉིད་ལ་ནི་ཁོར་ཡུག་ཏུ། །སྤོབས་པ་རབ་ཏུ་འབྱུང་འགྱུར་ཞིང ། །ཆོས་ཉིད་དེ་ཡང་བརྙེས་པས་ན། །དེ་སླད་ཁྱོད་ནི་སྤོབས་པ་ལྡན། །ལྷའི་བུ་ཆགས་མེད་བློ་གྲོས་ཀྱིས་གསོལ་པ། ཁྱོད་ཡིས་ཆོས་འདི་ཐམས་ཅད་ནི། །རང་བཞིན་མཚན་ཉིད་མ་མཆིས་པར། །ཡང་དག་ཇི་བཞིན་རབ་ཏུ་མཁྱེན། །དེ་བས་ཐུབ་པས་རབ་རིབ་བསལ། །ལྷའི་བུ་མྱ་ངན་བྲལ་གྱིས་གསོལ་པ། མྱ་ངན་མེད་ཅིང་ཉེར་ལེན་མེད། །སྤྲོས་པ་མེད་ཅིང་རྙོག་པ་མེད། །ཆོས་རྣམས་ཀུན་ཏུ་ཉོན་མ་མོངས། །དེ་དག་རང་བཞིན་ཁྱོད་ཀྱིས་མཁྱེན། །ལྷའི་བུ་རྟོགས་པ་ཕུན་སུམ་ཚོགས་པས་གསོལ་པ། ཆོས་རྣམས་ཡང་དག་མ་ལགས་ཏེ། །འགྲོ་དང་འོང་བ་མ་མཆིས་པ། །དེ་དག་ཁྱོད་ཀྱིས་ཡང་དག་མཁྱེན། །དེ་བཞིན་རབ་ཏུ་བསྟན་པ་མཛད། །ལྷའི་བུ་བློ་གྲོས་མཆོག་གིས་གསོལ་པ། ལྷུན་གྱིས་གྲུབ་ཅིང་བླང་མེད་པ། །རྨོངས་པ་མེད་ཅིང་ཤེས་པ་མེད། །ཆོས་རྣམས་ཅི་ཡང་མི་བགྱིད་པ། །ཁྱོད་ཀྱིས་རང་བཞིན་ཐུགས་སུ་ཆུད། །ལྷའི་བུ་སྒྲིབ་མེད་ཐོབ་ཀྱིས་གསོལ་པ། སྣང་བ་མ་མཆིས་མུན་མ་མཆིས།། གཟུགས་མེད་མ་ལགས་གཟུགས་ཅན་མིན། །བཟུང་བ་མ་མཆིས་གྲོལ་མ་མཆིས། །ཁྱོད་ཀྱིས་རང་བཞིན་ཐུགས་སུ་ཆུད། །ལྷའི་བུ་མིག་དཔས་ཀྱིས་གསོལ་པ། ཡུལ་དང་
239b
ཕྱོགས་ན་མི་གནས་པ། །ཡོད་དང་མེད་པ་མ་ལགས་པར། །རྨི་ལམ་འདོད་པ་ཇི་བཞིན་དུ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མིག་མི་འཛུམ་གྱིས་གསོལ་པ། བྱིས་པ་རྣམས་ཀྱིས་བློ་རྨོངས་པ། །མ་སྐྱེས་པ་དང་མ་འགགས་པ། །བར་ནའང་གནས་པ་མ་མཆིས་པ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་སྟོང་པ་ཉིད་ལ་གནས་པས་གསོལ་པ། གང་ཟག་སེམས་ཅན་མ་མཆིས་པ། །མ་མཆིས་ཐ་སྙད་མ་མཆིས་པ། །བསྟན་པའི་སླད་དུ་བརྗོད་བགྱི་བ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མཚན་མ་མེད་པ་ལ་གནས་པས་གསོལ་པ། གང་གིས་ཐ་སྙད་གདགས་པ་ཡི། །མཚན་མ་དེ་དག་མ་མཆིས་ཏེ། །ཆོས་ཀུན་མཚན་མ་མཆིས་པར། །རྣམ་པར་འདྲེན་པ་ཁྱོད་ཀྱིས་གཟིགས། །ལྷའི་བུ་སྨོན་པ་མེད་པ་ལ་གནས་པས་གསོལ་པ། ཇི་ལྟར་མཚན་མ་སྟོང་གྱུར་ཅིང ། །སྨོན་པ་དམིགས་སུ་མ་མཆིས་དང ། །སུ་ལ་སྨོན་ལམ་མཆིས་གྱུར་པ། །དེ་ཡང་དེ་ལྟའི་ཚུལ་དུ་མཁྱེན། །ལྷའི་བུ་ཏིང་འཛིན་ལ་གཞོལ་བས་གསོལ་པ། རྣམ་ཐར་སྒོ་ལ་བརྟེན་བགྱིས་ཤིང ། །གང་ཞིག་དགྲོལ་འགྱུར་དེ་མ་མཆིས། །དེ་བཞིན་ཀུན་ནས་ཉོན་མོངས་པ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མ་སྨད་པས་གསོལ་པ། ཁྱོད་ནི་སྡིག་པ་ཀུན་སྤངས་ཤིང ། །བསོད་ནམས་ཐམས་ཅད་བསགས་གྱུར་ཏེ། །བདེ་གཤེགས་
240a
༄#། །ཁྱོད་ལ་སྨད་མི་མངའ། །སུ་སྨོད་དེ་དག་མཁས་མ་ལགས། །ལྷའི་བུ་གློག་གི་སྤྲིན་གྱིས་གསོལ་པ། ཇི་ལྟར་གློག་བཅས་སྤྲིན་གྱི་ཚོགས། །ཆར་གྱིས་ས་ཆེན་ངོམས་པར་བགྱིད། །དེ་བཞིན་འདྲེན་པས་ཆོས་ཆར་གྱིས། །འཇིག་རྟེན་རྣམས་ནི་ངོམས་པར་མཛད། །ལྷའི་བུ་བསམ་པ་དོན་ཡོད་ཀྱིས་གསོལ་པ། ཐུབ་མཆོག་གསུང་ནི་དོན་མཆིས་ཏེ། །ཆོས་ཀྱི་འཁོར་ལོ་རབ་ཏུ་བསྐོར། །ཤིན་ཏུ་བརྟགས་ཏེ་མཛད་པས་ན། །དེ་ནི་ཐམས་ཅད་མཁྱེན་པའི་མཚན། །ལྷའི་བུ་བློ་གྲོས་ཕུན་སུམ་ཚོགས་པས་གསོལ་པ། ཆོས་རྣམས་ཐམས་ཅད་དངོས་ཉིད་ཀྱིས། །མ་སྐྱེས་འགགས་པ་མ་ལགས་ཏེ། །དེ་དག་བདེ་གཤེགས་ཁྱོད་ཀྱིས་མཁྱེན། །གཞན་ཡང་དེ་བཞིན་རྟོགས་པར་མཛད། །ལྷའི་བུ་སེངྒེ་ང་རོས་གསོལ་པ། ཁྱོད་ཀྱིས་སྟོང་པ་ཉིད་བསྟན་ཏེ། །སེངྒེའི་ང་རོ་བསྒྲགས་མཛད་པས། །མུ་སྟེགས་ཅན་ཀུན་རབ་འཇིགས་པ། །སེངྒེས་རི་དྭགས་ཕྲ་མོ་བཞིན། །ལྷའི་བུ་བག་ཡོད་ལས་ཀྱིས་གསོལ་པ། བག་ཡོད་སྔོན་དུ་བཏང་མཛད་དེ། །ཁྱོད་ཀྱིས་སྤྱོད་པ་སྤྱད་བགྱིས་པས། །སངས་རྒྱས་ཆོས་ལ་འདྲེན་པ་ཁྱོད། །བག་ཡོད་པས་ནི་ངེས་པར་བྱུང ། །ལྷའི་བུ་བག་ཡོད་རབ་གནས་ཀྱིས་གསོལ་པ། བག་ཡོད་པ་ལ་རབ་གནས་ཏེ། །ཁྱོད་ཀྱིས་ཉིད་ཀྱི་ཆོས་ཀྱང་སྤེལ། །སྟོབས་བཅུ་གཞལ་ཡས་སངས་རྒྱས་ཆོས། །བསམ་གྱིས་མི་ཁྱབ་རབ་ཏུ་
240b
སྤེལ། །ལྷའི་བུ་བག་ཡོད་སྐྱེས་ཀྱིས་གསོལ་པ། བག་ཡོད་པ་ལ་བརྩོན་རྣམས་ནི། །བྱང་ཆུབ་ཕྱོགས་རྣམས་ཡང་དག་སྐྱེས། །ཐུབ་ཆེན་རང་ཡང་གྲོལ་གྱུར་ནས། །དེ་དག་རྣམས་ནི་འཇིག་རྟེན་འགྲེལ། །ལྷའི་བུ་བག་ཡོད་ངེས་པར་འབྱུང་གིས་གསོལ་པ། བྱང་ཆུབ་སེམས་དཔའ་ཉན་ཐོས་དག་།ཇི་སྙེད་ཐར་ལ་བརྟེན་པའི་རྣམས། །ཀུན་ཀྱང་ཁྱོད་ལ་བསླབ་པ་སྟེ། །ངག་ཡོད་པས་ནི་ངེས་པར་འབྱུང ། །ལྷའི་བུ་བག་ཡོད་གནས་པས་གསོལ་པ། བག་ཡོད་ཡོངས་སུ་མ་བཏང་བས། །རྣམ་པར་འདྲེན་པ་ཁྱོད་ཀྱི་སྲས། །འགྲོ་བ་འདི་ལ་མ་ཆགས་པར། །ཐམས་ཅད་མཁྱེན་དུ་ངེས་པར་འབྱུང ། །ལྷའི་བུ་བག་ཡོད་སྲུང་གིས་གསོལ་པ། བྱང་ཆུབ་ལམ་ལ་བརྟེན་མཛད་ཅིང ། །ཁྱོད་ནི་བག་གིས་བསྲུངས་པས་ན། །ཐུགས་རྗེ་ཆེན་པོ་མཁས་པ་ཡི། །བྱང་ཆུབ་དམ་པ་བརྙེས་པར་འགྱུར། །ལྷའི་བུ་བག་ཡོད་བརྩོན་གྱིས་གསོལ་པ། བག་ཡོད་པ་ལ་རབ་བརྩོན་ཞིང ། །མཚན་ཉིད་གཅིག་པོ་རྟོགས་བགྱིས་པ། །དཔའ་བོ་ཆེན་པོ་ཁྱེད་ཀྱི་སྲས། །ཡབ་ཀྱི་དཀོར་ཀྱང་ཐོབ་པར་འགྱུར། །ལྷའི་བུ་བག་ཡོད་མངོན་པར་དགའ་བས་གསོལ་པ། བག་ཡོད་དགའ་བའི་བརྟན་པ་རྣམས། །དེ་དག་སངས་རྒྱས་ཡེ་ཤེས་ཀྱིས། །དཔའ་བོ་ཉོན་མོངས་རི་འཇིགས་པས། །ང་རྒྱལ་རི་ཡང་དེ་བཞིན་བསྙིལ། །ལྷའི་བུ་བག་ཡོད་འཛིན་གྱིས་གསོལ་པ། སངས་རྒྱས་ཡེ་ཤེས་ཚོལ་མཛད་ཚེ། །ཁྱོད་ནི་བག་གིས་
241a
༄#། །བཟུང་བ་ན། །བསྐལ་པ་བྱེ་བ་གྲངས་མེད་དུ། །ཁྱོད་ཀྱི་ཐུགས་ནི་སྐྱོར་མ་གྱུར། །ལྷའི་བུ་ཞི་གནས་བརྩོན་གྱིས་གསོལ་པ། ཆོས་རྣམས་དེ་དག་རང་བཞིན་ཞི། །དེ་ནི་སངས་རྒྱས་སྤྱོད་ཡུལ་ལགས། །བྱང་ཆུབ་ཡང་དག་གང་ཞུགས་དང ། །ཐམས་ཅད་མཁྱེན་པ་དེར་མི་འཇིགས། །ལྷའི་བུ་ཞི་གནས་ལ་ཡང་དག་པར་གནས་པས་གསོལ་པ། སངས་རྒྱས་ཞི་གནས་བཞུགས་པ་སྟེ། །འོན་ཀྱང་དེ་ལ་ཆགས་མི་མངའ། །སེམས་ཅན་ཉོན་མོངས་ཞི་བར་མཛད། །རྡུལ་འཐུལ་བ་ལ་ཆར་བ་བཞིན། །ལྷའི་བུ་ཞི་གནས་ལ་རབ་ཏུ་གནས་ཀྱིས་གསོལ་པ། སངས་རྒྱས་ཞི་ལ་རབ་ཏུ་ཞུགས། །སུས་ཀྱང་མི་བསྐྱོད་རི་བོ་བཞིན། །ཁྱོད་ལ་གནོད་བགྱིར་མི་ནུས་ཏེ། །སེམས་ཞི་ཁྱོད་ལ་ཕྱག་ཀྱང་འཚལ། །ལྷའི་བུ་ཞི་གནས་དུལ་གྱིས་གསོལ་པ། ཁྱོད་ཀྱི་སྲས་རྣམས་མ་སྨད་པ། །ཞི་གནས་ཀྱིས་ནི་ཡོངས་སུ་དུལ། །བདུད་རྣམས་བྱེ་བས་མི་ཚུགས་ཏེ། །འདོད་ཆགས་ཀྱིས་ནི་གནོད་མི་འགྱུར། །ལྷའི་བུ་ཞི་གནས་ངེས་པར་འབྱུང་གིས་གསོལ་པ། ཞི་བའི་ཡིད་མངའ་ཞིར་གནས་ལ། །དཔའ་བོ་ཆེན་པོ་སྒྲོལ་མཛད་པས། །ཅི་ལ་གནས་ཏེ་བསམ་གཏན་མཛད། །སུས་ཀྱང་ཁྱོད་ཀྱི་ཚུལ་མ་འཚལ། །ལྷའི་བུ་ཞི་གནས་སྔོན་དུ་འགྲོ་བས་གསོལ་པ། སྟོན་པས་སངས་རྒྱས་ཆོས་རྣམས་ཀྱི། །སྔོན་དུ་ཞི་གནས་འགྲོ་ཞེས་
241b
གསུངས། །གང་གིས་བྱང་ཆུབ་འགྲུབ་འགྱུར་བའི། །ཆོས་གཞན་དེ་ཡི་རྗེས་སུ་འབྲང ། །ལྷའི་བུ་ཞི་གནས་རྗེས་སུ་འབྲང་གིས་གསོལ་པ། འཇིག་རྟེན་སྒྲོན་མས་ཞི་གནས་ནི། །སེམས་ཀྱི་རྙོག་པ་དང་བར་བགྱི། །ཞི་བའི་སེམས་ལྡན་རྣམས་ཀྱི་འཆིང ། །དེ་ཁྱོད་མཐའ་ཡས་དབང་དུ་མཛད། །ལྷའི་བུ་ཞི་གནས་སྤྱོད་ཡུལ་གྱིས་གསོལ་པ། ཆོས་རྣམས་ཀུན་གྱི་སྤྱོད་ཡུལ་ནི། །ཞི་གནས་ཡིན་ཞེས་འདྲེན་པས་གསུངས། །དེ་ལ་ཆགས་མེད་སྤྱོད་པ་ནི། །རྣམ་པར་འདྲེན་པ་སངས་རྒྱས་འགྱུར། །ལྷའི་བུ་ཞི་གནས་བརླན་གྱིས་གསོལ་པ། བསམ་གཏན་གྱིས་ནི་མངོན་བརླན་ཏེ། །ཤེས་རབ་ཀྱིས་ནི་སེམས་བསྒོམས་པས། །དེ་ཕྱིར་རྫོགས་པའི་བྱང་ཆུབ་བརྙེས། །དེ་བཞིན་སྐྱེ་བོ་རྣམས་ཀྱང་འདྲེན། །ལྷའི་བུ་ཞི་གནས་ལྷུར་ལེན་གྱིས་གསོལ་པ། སངས་རྒྱས་ཆོས་རྣམས་གང་ལ་ཡང ། །ལམ་གཞན་དག་གིས་མ་མཐོང་སྟེ། །ཞི་གནས་ཡེ་ཤེས་ཆེ་ཐོབ་ན། །རང་བྱུང་ཉིད་དུ་ངེས་པར་འབྱུང ། །ལྷའི་བུ་ལྷག་མཐོང་མངོན་དགས་གསོལ་པ། དཔའ་བོ་ཆེན་པོ་ལྷག་མཐོང་ནི། །ཆོས་རྣམས་ཐམས་ཅད་སྟོན་པ་སྟེ། །དེ་ལ་ཁྱོད་ཀྱི་སྲས་སྤྱོད་ཅིང ། །རང་བྱུང་ཉིད་ནི་ཐོབ་པར་འགྱུར། །ལྷའི་བུ་ལྷག་མཐོང་འབྱུང་གིས་གསོལ་པ། ཤེས་རབ་ཕ་རོལ་ཕྱིན་གནས་ཤིང ། །རྣམ་པར་འདྲེན་པ་འབྱུང་བར་འགྱུར། །སྨན་པའི་རྒྱལ་པོ་སྟོན་པ་སྟེ། །དེ་བས་ལྷག་མཐོང་དགེ་བ་ལགས། །ལྷའི་བུ་ལྷག་མཐོང་
242a
༄#། །རབ་གནས་ཀྱིས་གསོལ་པ། ཆོས་རྣམས་ཐམས་ཅད་བཙལ་བགྱིས་ཏེ། །ཡང་དག་ཇི་བཞིན་མཐོང་གྱུར་ན། །བརྟན་པ་རྫོགས་པའི་བྱང་ཆུབ་ཐོབ། །བྱང་ཆུབ་ཉིད་ལ་གནས་པར་འདོང ། །ལྷའི་བུ་ལྷག་མཐོང་ངེས་འབྱུང་གིས་གསོལ་པ། གང་ཟག་མཆོག་རྣམས་ཡེ་ཤེས་ཀྱིས། །བྱང་ཆུབ་མཆོག་ཏུ་ངེས་པར་བྱུང ། །རྫོགས་པའི་བྱང་ཆུབ་ཡེ་ཤེས་ཀྱིས། །བརྙེས་པའི་དྲན་པ་སྐྱེ་མི་འགྱུར། །ལྷའི་བུ་ལྷག་མཐོང་མངོན་དགས་གསོལ་པ། ཡང་དག་ཇི་བཞིན་ཡང་དག་ཏུ། །ཆོས་རྣམས་རྣམ་པར་གཟིགས་པས་ན། །བྱང་ཆུབ་གཞལ་ཡས་བརྙེས་གྱུར་ཏེ། །དེ་བས་རྣམ་འདྲེན་སངས་རྒྱས་ལགས། །ལྷའི་བུ་ལྷག་མཐོང་ལ་མངོན་པར་བརྩོན་པས་གསོལ་པ། མཁས་པ་ཡེ་ཤེས་གང་བརྩོན་ཞིང ། །དཀའ་བ་མང་པོ་སྤྱོད་བགྱིད་པ། དེ་དག་རྒོལ་ཚོགས་ཐམས་ཅད་ཀྱིས། །ཕམ་པར་བགྱི་བར་ཡོང་མི་ནུས། །ལྷའི་བུ་ལྷག་མཐོང་འབྱུང་གིས་གསོལ་པ། ཆོས་རྣམས་རྣམ་མཐོང་བགྱི་སླད་དུ། །རྒྱལ་སྲས་གང་དག་ཞུགས་པའི་རྣམས། །ཆོས་རྣམས་ངོ་བོ་ཉིད་འཚལ་ཞིང ། །རང་བྱུང་ཉིད་ནི་ཐོབ་པར་འགྱུར། །ལྷའི་བུ་ལྷག་མཐོང་ལ་བརྟེན་པས་གསོལ་པ། རྣམ་འདྲེན་ཁྱོད་ཀྱིས་ཡུན་རིང་དུ། །ཡེ་ཤེས་ལ་ནི་བརྟེན་མཛད་པས། །ཐམས་ཅད་མཁྱེན་
242b
པ་བརྙེས་ནས་ནི། །སྲོག་ཆགས་བྱེ་བ་གྲོལ་བར་མཛད། །ལྷའི་བུ་ཁྱད་པར་ལྡན་གྱིས་གསོལ་པ། སངས་རྒྱས་མཁྱེན་པས་ཐམས་ཅད་མཁྱེན། །འདྲེན་པ་དམ་པ་མངོན་པར་འཕགས། །སྲིད་པའི་རྒྱ་མཚོས་ཁྱེར་བ་ཡི། །འཇིག་རྟེན་དེ་ཡིས་སྒྲོལ་བར་མཛད། །ལྷའི་བུ་ལྷག་མཐོང་གནས་ཀྱིས་གསོལ་པ། ལྷག་མཐོང་ལ་ནི་གནས་མཛད་ཅིང ། །ཆོས་ཀུན་རྣམ་པར་གཟིགས་པས་ན། །སངས་རྒྱས་ཆོས་རྣམས་འཕེལ་འགྱུར་ཏེ། །ས་བཟང་ནྱ་གྲོ་དྷ་སྐྱེས་འདྲ། །ལྷའི་བུ་ལྷག་མཐོང་དང་མ་བྲལ་བས་གསོལ་པ། རྣམ་པར་འདྲེན་པ་ཁྱོད་ཀྱི་སྲས། །ཡེ་ཤེས་ཀྱིས་ནི་ཡོངས་བཟུང་སྟེ། །བྱང་ཆུབ་མཆོག་ནི་ཐོབ་བགྱིས་ཤིང ། །སྐྱེ་བོ་མང་པོ་འགྲོལ་བར་བགྱིད། །ལྷའི་བུ་ལྷག་མཐོང་ལ་རྣམ་པར་རྩེ་བས་གསོལ་པ། སངས་རྒྱས་མཁྱེན་པས་རྣམ་པར་རོལ། །ཆོས་རྣམས་ཀུན་ལ་འཇིགས་མི་མངའ། །ཞུམ་པ་མ་མཆིས་དངང་མི་མངའ། །ཐུབ་པ་འཇིག་རྟེན་ཐམས་ཅད་མཁྱེན། །ལྷའི་བུ་ལྷག་མཐོང་ལ་ཡང་དག་པར་འཇུག་གིས་གསོལ་པ། དཔའ་བོ་ཆེན་པོས་ཆོས་ཀུན་ནི། །ལྷག་མཐོང་ཉིད་དུ་ཡང་དག་འདུ། །རང་བཞིན་མེད་པར་རྣམ་མཐོང་ན། །དེ་ནི་རང་བྱུང་བྱང་ཆུབ་ལགས། །ལྷའི་བུ་ལྷག་མཐོང་སྙིང་པོས་གསོལ་པ། སངས་རྒྱས་ལྷག་མཐོང་སྙིང་པོ་སྟེ། །ཆོས་རྣམས་ཀུན་ལ་འཇིགས་མི་མངའ། །འཇིག་རྟེན་སྡུག་བསྔལ་འདི་གཟིགས་
243a
༄#། །ཤིང ། །ཐུགས་རྗེ་ཆེན་པོ་ཤིན་ཏུ་བསྐྱེད། །ལྷའི་བུ་ལྷག་མཐོང་འགྲོས་ཀྱིས་གསོལ་པ། བྱང་ཆུབ་ཕྱིར་ནི་ཤེས་འགྲོལ་བའི། །འཇིག་རྟེན་མཁས་པ་ངེས་པར་འབྱུང ། །དེ་དག་བྱང་ཆུབ་མཆོག་ཀྱང་ཐོབ། །གྲོལ་ནས་སྐྱེ་རྒུ་འདི་དག་འགྲེལ། །ལྷའི་བུ་སྟོང་པ་ཉིད་ལ་རྟོན་གྱིས་གསོལ་པ། སྟོང་པ་ཉིད་ཀྱི་ཆོས་བསྟེན་པའི། ། མཁས་པ་བྱང་ཆུབ་འཚང་རྒྱ་སྟེ། །སེམས་ཅན་བཅིངས་ལས་གྲོལ་བགྱིད་ཅིང ། །འཆིང་བ་ཐམས་ཅད་རྣམ་པར་གཅོད། །ལྷའི་བུ་སྟོང་པ་ཉིད་ལ་མོས་ཀྱིས་གསོལ་པ། སྟོང་པ་ཉིད་ལ་མོས་གྱུར་པས། །འགྲོ་བ་འདི་དག་སྲོག་མེད་གཟིགས། །དམིགས་མེད་ངོ་བོ་ཉིད་མེད་པ། །དེ་ལྟར་སྲོག་ཆགས་རྣམས་ལ་སྟོན། །ལྷའི་བུ་སྟོང་པ་ཉིད་ཀྱི་སྤྱོད་ཡུལ་གྱིས་གསོལ་པ། སངས་རྒྱས་ཀུན་གྱི་སྤྱོད་ཡུལ་ནི། །ཆོས་རྣམས་རང་བཞིན་སྟོང་པ་སྟེ། །སྲོག་ཆགས་རྣམས་ལ་ཐུགས་བརྩེ་བས། །དཔའ་བོས་དེ་ལ་སྤྱད་པར་མཛད། །ལྷའི་བུ་སྟོང་པ་ཉིད་ཀྱི་བསམ་པས་གསོལ་པ། སྐྱོན་དང་བྲལ་ཞིང་བཅིངས་མེད་ལ། །འཇིགས་སྐྲག་ཐམས་ཅད་རབ་ཏུ་སྤངས། །ཆོས་རྣམས་ཀུན་ལ་མི་གནས་ཤིང ། །ནམ་མཁའི་རླུང་བཞིན་སྤྱོད་པ་མཛད། །ལྷའི་བུ་སྟོང་པ་ཉིད་ལ་མངོན་པར་དགའ་བས་གསོལ་པ། སྟོང་ཉིད་ཆོས་ལ་བརྟེན་བགྱིད་ཅིང ། །སངས་རྒྱས་
243b
སྤྱོད་ཡུལ་གང་མོས་པ། །དེ་དག་སྟོན་པ་མཆོད་པ་སྟེ། །མཆོད་པ་དེ་ནི་བླ་ན་མེད། །ལྷའི་བུ་སྟོང་པ་ཉིད་ཀྱིས་ཡང་དག་པར་འཕགས་ཀྱིས་གསོལ་པ། གང་གིས་འདྲེན་པ་འཕགས་གྱུར་པའི། །དེ་ནི་ཡང་དག་འཕགས་ཞེས་གསུངས། །སྟོང་ཉིད་ཆོས་ལ་བརྟེན་བགྱིད་པ། །མ་སྨད་དེ་དག་སངས་རྒྱས་འགྱུར། །ལྷའི་བུ་སྟོང་པ་ཉིད་ཀྱིས་འདྲེན་གྱིས་གསོལ་པ། དཔའ་བོ་ཆེན་པོ་ཆོས་རྣམས་ཀྱང ། །མྱ་ངན་འདས་མིན་སྟོན་པ་མཆིས། །ཀུན་ཀྱང་མྱ་ངན་འདས་པར་འདྲེན། །དྲང་སྲོང་ཆེན་པོའི་བྱང་ཆུབ་ལགས། །ལྷའི་བུ་སྟོང་པ་ཉིད་ཀྱིས་ཡང་དག་ཤར་གྱིས་གསོལ་པ། སྟོང་ཉིད་ཞི་ལ་བརྟེན་ནས་ནི། །ཁྱོད་ཀྱི་སློབ་མ་ཡང་དག་ཤར། །སྟོང་པ་ཉིད་ལ་གང་བརྟེན་པ། །དེ་དག་རིམ་གྲོ་བགྱིད་པ་ལགས། ལྷའི་བུ་སྟོང་པ་ཉིད་ལ་བརྟེན་གྱིས་གསོལ་པ། །གང་རྣམས་སྟོང་པ་ཉིད་བརྟེན་པ། །མཁས་པ་དེ་དག་རྨོངས་མི་འགྱུར། །ཉོན་མོངས་མེད་ཅིང་ལྟ་མེད་རྣམས། །བྱང་ཆུབ་རྡུལ་མེད་འཐོབ་པར་འགྱུར། །ལྷའི་བུ་སྟོང་པ་ཉིད་ཕུན་སུམ་ཚོགས་པས་གསོལ་པ། གང་རྣམས་སྟོང་ཉིད་བརྟེན་བགྱིད་པ། །སངས་རྒྱས་ཆོས་ཀུན་ཕུན་སུམ་ཚོགས། །རང་བྱུང་ཕམ་པ་མེད་པར་འགྱུར། །འཇིག་རྟེན་དོན་ཀྱང་བགྱིད་པར་འགྱུར། །ལྷའི་བུ་སྟོང་པ་ཉིད་ལ་ཡང་དག་པར་ཞུགས་པས་གསོལ་པ། སངས་རྒྱས་ཆོས་ལ་ཞུགས་གྱུར་ཏེ། །སྟོང་པ་ཉིད་
244a
༄#། །ལ་གང་བརྟེན་པ། །དེ་ལ་བདུད་རྣམས་བྱེ་བ་ཕྲག་།སྟོང་གིས་དཀྲུགས་པར་མི་ནུས་སོ། །ལྷའི་བུ་མཚན་མ་མེད་པ་ལ་དགའ་བས་གསོལ་པ། མཚན་མ་མེད་ལ་མངོན་དགྱེས་ཏེ། །དངོས་པོ་ཐམས་ཅད་རྣམ་བཤིག་ནས། །སངས་རྒྱས་འཇིག་རྟེན་རྣམས་ནས་བྱུང ། །མཚན་མ་རྣམས་ལ་ཆགས་མི་མངའ། །ལྷའི་བུ་མཚན་མ་མེད་ལ་གནས་པས་གསོལ་པ། མཚན་མ་མེད་ལ་སྤྱོད་གྱུར་ཅིང ། །ཞི་བ་ཞི་ལ་སྤྱོད་པ་རྣམས། །མཚན་མ་རྣམ་པར་བཤིག་རྣམས་ཀྱིས། །ཚུལ་ནི་བདུད་ཀྱིས་ཤེས་མི་ནུས་ལྷའི་བུ་མཚན་མ་མེད་པའི་སྤྱོད་ཡུལ་གྱིས་གསོལ་པ། སངས་རྒྱས་ཀུན་གྱི་སྤྱོད་ཡུལ་ལ། །འདྲེན་པ་ཁྱོད་ནི་སྤྱོད་མཛད་དེ། །མཚན་མ་མི་མངའ་རྟོགས་དཀའ་ཞིང ། །ཞི་སྤྱོད་ཁྱོད་ལ་ཕྱག་ཀྱང་འཚལ། །ལྷའི་བུ་མཚན་མ་མེད་པས་སྐོམ་གྱིས་གསོལ་པ། ཐུབ་པའི་འཁོར་འདི་ཐམས་ཅད་ནི། །མཚན་མ་མེད་པས་སྐོམ་གྱུར་ཏེ། །ཡབ་ཀྱི་དཀོར་ནི་འཚལ་གྱུར་ནས། །དེ་བཞིན་གཤེགས་ལ་བཀུར་སྟི་བགྱིད། །ལྷའི་བུ་མཚན་མ་མེད་པ་ལ་སྤྱོད་པས་གསོལ་པ། མཚན་མ་མེད་ལ་ཉིན་མཚན་དུ། །གང་ཟག་མཆོག་ནི་སྤྱོད་མཛད་པ། །ལྷ་དང་དྲི་ཟ་མི་དག་ཀྱང ། །ཁྱོད་ཀྱི་ཚུལ་ནི་མ་འཚལ་ཏོ། །ལྷའི་བུ་མཚན་མ་མེད་པས་རྣམ་པར་གྲོལ་གྱིས་གསོལ་པ། ཆོས་རྣམས་ཐམས་ཅད་རྣམ་བཤིག་ཅིང ། །དཔལ་ཆེན་འཇིག་
244b
རྟེན་སྒྲོན་མ་ཁྱོད། །མཚན་མ་མེད་ལ་གནས་པར་མཛད། །དེ་བས་ཁྱོད་ལ་ཕྱག་ཀྱང་འཚལ། །ལྷའི་བུ་མཚན་མ་མེད་པ་ལ་རྣམ་པར་རྩེ་བས་གསོལ་པ། ཐུབ་ཆེན་དཔའ་བོ་ཆེན་པོ་ཁྱོད། །མཚན་མ་མེད་ལ་རྣམ་པར་རོལ། །འགྲོ་རྣམས་ཡོངས་སུ་སྨིན་མཛད་ཅིང ། །སངས་རྒྱས་ཡེ་ཤེས་མཆོག་ལ་ཞུགས། །ལྷའི་བུ་མཚན་མ་མེད་པས་ཡོངས་གྲུབ་ཀྱིས་གསོལ་པ།་གང་གིས་མཚན་མ་སྤངས་གྱུར་པ། །དེ་དག་བྱང་ཆུབ་གྲུབ་པ་སྟེ། །ཡབ་ཀྱི་ཆོས་ཀྱི་བརྟུལ་ཞུགས་ཅན། །དེ་དག་རྫོགས་པའི་སངས་རྒྱས་མཆོད། །ལྷའི་བུ་མཚན་མ་མེད་པ་ལ་དགའ་བས་གསོལ་པ། གང་གིས་མཚན་མ་རྣམ་བཤིག་པ། །དེ་དག་སངས་རྒྱས་ཆོས་ལ་དགའ། །བླ་མའི་གནས་ལ་གནས་པ་སྟེ། །སེམས་ཅན་ཀུན་ཀྱི་མཆོད་རྟེན་ལགས། །ལྷའི་བུ་མཚན་མ་མེད་པ་ལ་བརྟེན་པས་གསོལ་པ། ཞི་ལ་སྤྱོད་ཅིང་རྣམ་གྲོལ་བ། །སངས་རྒྱས་འཇིག་རྟེན་བླ་ན་མེད། །འབྱུང་པོ་ཀུན་གྱི་སྐྱབས་དང་རྟེན། །དཔུང་གཉེན་དེ་བཞིན་གནས་ཀྱང་ལགས། །ལྷའི་བུ་མཚན་མ་མེད་པ་ལ་མོས་པས་གསོལ་པ། མཚན་མ་མེད་ལ་མོས་གྱུར་ཅིང ། །ཞི་བས་དགྲ་ལས་རྒྱལ་གྱུར་པ། །སངས་རྒྱས་བརྒལ་བ་འགྲོ་སྒྲོལ་བ། །དེ་དག་ཚད་ནི་ག་ལ་མཆིས། །ལྷའི་བུ་སྨོན་པ་མེད་པ་རྟོགས་ཀྱིས་གསོལ་པ། མགོན་པོ་གང་དག་སྨོན་ལམ་ནི་།རྣམ་པ་ཀུན་ཏུ་མི་དམིགས་པ། །དེ་དག་འཇིག་རྟེན་བྲལ་བ་སྟེ། །སངས་
245a
༄#། །རྒྱས་འཇིག་རྟེན་ནང་ནས་བྱུང ། །ལྷའི་བུ་སྨོན་པ་མེད་པ་ལ་བརྟེན་པས་གསོལ་པ། ཞི་བའི་ཐུགས་དང་ལྡན་པ་ཁྱོད། །སྲིད་པ་རྣམས་སུ་སྨོན་མི་མཛད། །སྲིད་པ་ཡོངས་སུ་ཆད་པས་ན། །སངས་རྒྱས་འཇིག་རྟེན་ཡོངས་མི་གོས། །ལྷའི་བུ་སྨོན་པ་མེད་པས་སྐྱེས་ཀྱིས་གསོལ་པ། གང་གིས་སྲེད་པ་ཡོངས་བཅོམ་པ། །དེ་དག་གཟི་མཆོག་བསྐྱེད་པ་སྟེ། །དེ་དག་འཇིག་རྟེན་མགོན་པོའི་སྲས། །རང་གི་ཡབ་ལ་ཕྱག་ཀྱང་འཚལ། །ལྷའི་བུ་སྨོན་པ་མེད་པས་སྐྱེས་ཀྱིས་གསོལ་པ། ཁྱོད་ཀྱི་སྲས་རྣམས་མ་སྨད་པ། །སྲེད་པ་ཡོངས་སུ་བཅད་པས་ན། །སྲིད་པ་འཇིགས་བགྱིད་སྲིད་པ་ལ། །དེ་དག་སྨོན་པ་མི་བགྱིད་དོ། །ལྷའི་བུ་སྨོན་པ་མེད་པས་ཡོངས་སུ་གྲོལ་བས་གསོལ་པ། གང་དག་སྨོན་པ་མི་བགྱིད་པ། །གཟི་ལྡན་ཁྱོད་ཀྱི་སྲས་ཀྱི་རྣམས། །རེ་བ་བཏང་ཞིང་བཅིངས་གྲོལ་བ། །དེ་དག་ཡོངས་སུ་གྲོལ་བར་འགྱུར། །ལྷའི་བུ་སྨོན་པ་མེད་པས་བྱུང་གིས་གསོལ་པ། གང་གིས་སྲེད་པ་རབ་བཅོམ་པ། །དེ་དག་མྱ་ངན་དགོན་པ་རྒལ། །དེ་དག་མི་སྐོམ་ཟང་ཟིང་མེད། །དཔལ་ཆེན་ཁྱོད་ལ་དེང་ཕྱག་འཚལ། །ལྷའི་བུ་སྨོན་པ་མེད་ལ་ངེས་པས་གསོལ་པ། གང་གིས་སྲིད་དང་སྡུག་བསྔལ་དང ། །བདེ་བ་དངོས་པོ་མེད་བསྒོམས་ལ། །མགོན་ཁྱོད་དེ་དག་རྣམས་ཀྱི་ཡབ། །དེ་དག་ཁྱོད་ཀྱི་སྲས་ཀྱང་ལགས། །ལྷའི་བུ་སྨོན་པ་མེད་པའི་འཁོར་གྱིས་
245b
གསོལ་པ། སྲིད་པའི་སྡུག་བསྔལ་སུས་མཐོང་བ། །དེ་དག་ཁྱོད་ཀྱི་བསྟན་ལ་དུལ། །ཁ་ལོ་བསྒྱུར་ཞིང་སྲིད་སེལ་བ། །སེམས་དུལ་ཁྱོད་ལ་ཕྱག་ཀྱང་འཚལ། །ལྷའི་བུ་སྨོན་པ་མེད་པས་བྱུང་གིས་གསོལ་པ། སྲིད་པའི་དགོན་ལས་བྱུང་བ་རྣམས། །བདེ་བ་ཐོབ་ཅིང་ཞི་གནས་ཏེ། །ཉོན་མོངས་དགྲ་རྣམས་ཕམ་མཛད་པ། །འཇིག་རྟེན་མགོན་ལ་ཕྱག་འཚལ། །ལྷའི་བུ་སྨོན་པ་མེད་པས་ཡ་མཚན་དུ་གྱུར་པས་གསོལ་པ། གཡུལ་ལས་རྒྱལ་བར་གྱུར་པ་སྟེ། །ཁྱོད་ནི་རྣམ་རྒྱལ་ཕམ་མི་མངའ། །བདུད་ཀྱི་དཔུང་རྣམས་ཕམ་མཛད་ཅིང ། །སྲིད་པ་ཀུན་ཏུ་སྨོན་མི་མཛད། །ལྷའི་བུ་སྨོན་པ་མེད་པ་སྟོབས་ལྡན་གྱིས་གསོལ་པ། ཐར་པའི་ཆོས་ལ་སྟོབས་ལྡན་པས། །བདུད་ཀྱི་ཞགས་པ་ཡོངས་བཅད་ཅིང ། །ཁྱོད་ཀྱི་སྲས་རྣམས་བདུད་དག་ལ། །བསྐྱབ་པའི་འདུ་ཤེས་མི་བགྱིད་དོ། །ལྷའི་བུ་ལུས་རྣམ་པར་བརྟགས་ཀྱིས་གསོལ་པ། ལུས་མེད་འཆི་བ་མེད་ཚུལ་དུ། །ལུས་འདི་གང་གིས་མཐོང་གྱུར་པ། །དེ་དག་སངས་རྒྱས་སྤྱོད་ཡུལ་དགའ། །འདྲེན་པ་ཁྱོད་ཀྱི་རྗེས་སུ་ཞུགས། །ལྷའི་བུ་ལུས་ངེས་པར་སེམས་པས་གསོལ་པ། མི་གཙང་རུལ་པའི་རྣག་ཟག་པ། །ལུས་འདི་མི་ཟད་ངེས་བསམ་སྟེ། །ཡང་དག་ཇི་བཞིན་འཚལ་གྱུར་ནས། །རྣམ་འདྲེན་ཁྱོད་ལ་ཕྱག་ཀྱང་འཚལ། །ལྷའི་བུ་ལུས་རྟོགས་ཀྱིས་གསོལ་པ། ལུས་ལ་མི་གཙང་བརྟགས་བགྱིས་ཏེ། །ལུས་ལ་དྲན་པ་རྣམ་དཔྱད་ཅིང་།།
246a
༄#། །ལུས་ཀྱི་སྡུག་བསྔལ་རྣམ་གྲོལ་ནས། །ངེས་པ་ཁྱོད་ལ་ཕྱག་ཀྱང་འཚལ། །ལྷའི་བུ་ལུས་ཡོངས་སུ་གཏོང་གིས་གསོལ་པ། སྤྲུལ་གྱི་པགས་པ་རྙིང་བཞིན་དུ། །རྣག་ཅན་ལུས་འདི་སྤངས་ནས་ནི། །དེ་བཞིན་གཤེགས་པ་སྐུ་བོ་ཆེ། །སྐུ་མི་མངའ་ལ་ཕྱག་ཀྱང་འཚལ། །ལྷའི་བུ་ལུས་ལ་སྨོད་པས་གསོལ་པ། མི་གཙང་དྲི་ང་རྣག་ཟག་ཅིང ། །རུལ་པའི་ལུས་ལ་རྟག་སྨད་དེ། །མི་གཙང་གང་བ་རྣམ་སྤངས་ནས། །འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་ལུས་ཀྱིས་ཡོངས་སུ་སྐྱོ་བས་གསོལ་པ། གང་དག་རུལ་པའི་ལུས་སྐྱོ་ཞིང ། །རྒྱལ་སྲས་གཙང་བ་འཚལ་བ་རྣམས། །ཆོས་ཀྱིས་རབ་ཏུ་བསྐྱེད་པའི་སྲས། །དེ་དག་སངས་རྒྱས་ཕྱག་འཚལ་འགྱུར། །ལྷའི་བུ་ལུས་ཀྱིས་སྐྲག་པས་གསོལ་པ། འབྱུང་བ་ཆེན་པོ་སྤྲུལ་གདུག་འདྲ། །གང་གིས་ཤིན་ཏུ་རྟོགས་གྱུར་པ། །དེ་དག་ལུས་ལས་འདས་པ་སྟེ། །རྐང་གཉིས་གཙོ་ལ་ཕྱག་ཀྱང་འཚལ། །ལྷའི་བུ་ལུས་ཀྱི་སྐྱོན་མཐོང་བས་གསོལ་པ། ལུས་ཀྱི་སྐྱོན་ལ་མངོན་སུམ་སྟེ། །ཡེ་ཤེས་གཟིགས་པའི་སྤྱན་མངའ་བ། །སངས་རྒྱས་མཁྱེན་པ་མཁས་པ་དག། སྲིད་གསུམ་ཐམས་ཅད་ཡོངས་སུ་གཟིགས། །ལྷའི་བུ་ལུས་ལ་འདོད་ཆགས་དང་བྲལ་བས་གསོལ་པ། ལུས་ཀྱི་འདུ་ཤེས་འདོད་ཆགས་བྲལ། །ཆོས་ཀྱི་འདུ་ཤེས་མི་གནས་པས། །ཀུན་སྦྱོར་ཀུན་ལས་
246b
འདས་པ་སྟེ། །རྣམ་འགྲེལ་སངས་རྒྱས་ཕྱག་ཀྱང་འཚལ། །ལྷའི་བུ་སྲིད་པའི་དགྲའི་བློ་གྲོས་ཀྱིས་གསོལ་པ། སྲིད་པར་སྲིད་པ་འཇོམས་མཛད་པ། །ཁྱོད་ཀྱིས་དགྲ་ཡི་འདུ་ཤེས་མཁྱེན། །ཁྱོད་ཀྱི་སྲས་རྣམས་སྒོམ་བགྱིད་ཅིང ། །མཁས་པ་བྱང་ཆུབ་མངོན་འཚང་རྒྱ། །ལྷའི་བུ་སྲིད་པ་སེལ་བས་གསོལ་པ། སྲིད་པ་ཀུན་གྱི་ཉེས་དམིགས་མཐོང ། །མྱ་ངན་འདས་ལ་འཇིགས་མེད་མཐོང ། །ཁྱོད་ཀྱི་སྲས་རྣམས་འགྲོ་ཕན་ཕྱིར། །བྱང་ཆུབ་སྤྱད་པ་སྤྱོད་པ་བགྱིད། །ལྷའི་བུ་སྲིད་པ་རྣམ་པར་སྤངས་ཀྱིས་གསོལ་པ། གང་གིས་སྲིད་པ་རྣམ་སྤངས་ཤིང ། །འཇིག་ལ་མངོན་པར་མི་དགའ་བ། །བྲལ་བར་གྱུར་ཅིང་སེམས་དག་པ། །མཁས་ཁྱོད་ཞབས་ལ་ཕྱག་ཀྱང་འཚལ། །ལྷའི་བུ་སྲིད་པ་བསལ་གྱིས་གསོལ་པ། མི་ཡི་དམ་པ་ཁྱོད་ཀྱི་སྲས། །སྲིད་པར་ཁྲིད་པ་རབ་བསལ་ཏེ། །ཁྱོད་ཀྱི་བསླབ་ལ་བསླབ་པ་དག་།སྟོང་གསུམ་འདི་ན་རྣམ་པར་མཛེས། །ལྷའི་བུ་སྲིད་པ་ལས་བརྒལ་བས་གསོལ་པ། སྲིད་པའི་མཚོ་ལས་བརྒལ་བ་ཡི། །འཇིག་རྟེན་མགོན་མཆོག་སྐྱོབ་རྣམས་ལ། །གྲངས་ཀྱི་རྒྱུད་དུ་བགྲང་བ་ཡི། །གྲངས་ནི་འཇིག་རྟེན་འདི་ན་མེད། །ལྷའི་བུ་སྲིད་པ་འཇོམས་ཀྱིས་གསོལ་བ། །སྲིད་པ་ཐམས་ཅད་ཡོངས་བཅོམ་སྟེ། །གང་དག་རྟག་ཏུ་དྲན་སྤྱོད་པ། །དེ་དག་རྫོགས་པའི་སངས་རྒྱས་མཆོད། །སྲོག་ཆགས་རྣམས་ལ་ཆོས་ཀྱང་སྟོན། །ལྷའི་བུ་སྲིད་པ་
247a
༄#། །ལས་རབ་ཏུ་གྲོལ་བས་གསོལ་པ། སྲིད་པའི་རྒྱུན་ལས་རབ་ཏུ་གྲོལ། །རྣམ་པར་འདྲེན་པ་སྲིད་པ་རྒལ། །སྲིད་པ་མཐར་འབྱིན་སངས་རྒྱས་ཏེ། །སྲིད་པ་སེལ་ལ་ཕྱག་ཀྱང་འཚལ། །ལྷའི་བུ་སྲིད་པ་རབ་ཏུ་ཞི་བྱེད་ཀྱིས་གསོལ་པ། སྲིད་པར་ཁྲིད་པ་རབ་ཞི་ཞིང ། །སྲིད་པ་ཕམ་པར་མཛད་ནས་གཤེགས། །བསྟན་པ་སྲིད་པ་མཐར་འབྱིན་པ། །ཁྱོད་ལ་དོ་ཟླ་མ་མཆིས་སོ། །ལྷའི་བུ་སྲིད་པའི་མཐར་འགྲོ་བས་གསོལ་པ། སྲིད་པའི་མཐར་ཕྱིན་རབ་ཞི་བ། །མགོན་པོ་ཁྱོད་ཀྱི་སྲིད་པའི་མཐའ། །སྲིད་པར་ཕྱིར་ལོག་ཐམས་ཅད་མཁྱེན། །སངས་རྒྱས་འཇིག་རྟེན་རྟོགས་པར་མཛད། །ལྷའི་བུ་སྲིད་པ་ཐ་མའི་ལུས་འཛིན་གྱིས་གསོལ་པ། སྲིད་པའི་རྒྱུ་ནི་རྣམ་སྤངས་ཏེ། །སྲིད་པ་ཐ་མ་འཛིན་མཛད་པ། །གང་གིས་སྲིད་པ་ལེན་གྱུར་པའི། །ཁྱོད་ཀྱིས་ཀུན་ཏུ་སྦྱོར་བ་མཐོང ། །ལྷའི་བུ་སྲིད་པ་རབ་ཏུ་ཞི་བ་ཐོབ་ཀྱིས་གསོལ་བ། ཁྱོད་ཀྱིས་སྲིད་པ་སྟོང་མཁྱེན་ཏེ། །སྲིད་པའི་རྒྱུ་ཡང་དེ་བཞིན་ནོ། །ཞུམ་དང་རབ་ཏུ་ཞུམ་མི་མངའ། །མཉམ་ཉིད་གྱུར་ལ་ཕྱག་ཀྱང་འཚལ། །ལྷའི་བུ་སྲིད་པའི་ཕ་རོལ་ཏུ་འགྲོ་བས་གསོལ་པ། སྲིད་པའི་ཕ་རོལ་བརྒལ་བ་སྟེ། །སྲིད་པར་ཁྲིད་པ་ཡང་དག་བསལ། །རྣམ་པར་འདྲེན་པ་ཐུགས་བརྩེ་བས། །སྐྱེ་བོ་གཞན་ནི་སྒྲོལ་བ་མཛད།། །།བམ་པོ་བཅུ་པ། ལྷའི་བུ་ཚོར་བས་མནར་གྱིས་གསོལ་པ།
247b
ཚོར་བ་བདག་ཏུ་བགྱི་མ་མཆིས། །སེམས་པ་མ་མཆིས་རྩོལ་མ་མཆིས། །བསམ་གཏན་མཛད་པ་ཆེ་ཁྱོད་ཀྱིས། །ཚོར་བ་ཆུ་བུར་ལྟ་བུར་མཁྱེན། །ལྷའི་བུ་ཚོར་བ་སྟོན་པས་གསོལ་པ།་ངོ་བོ་ཉིད་ཀྱིས་དངོས་མེད་པར། །ཚོར་བ་ཁྱོད་ཀྱིས་རབ་ཏུ་མཁྱེན། །རྨི་ལམ་སྡུག་གུའི་དགའ་འདྲ་བ། །དེ་ལ་སོ་སོའི་སྐྱེ་བོ་ཆགས། །ལྷའི་བུ་ཚོར་བ་ལ་ཡོངས་སུ་རྟོག་པས་གསོལ་པ།་ཤེས་རབ་བཅས་པས་ཡོངས་བརྟགས་ན། །ཚོར་བ་འགྲོ་བར་མ་སོང་ཞིང ། །འོང་བ་མེད་ལ་དངོས་མེད་པར། །དེ་ནི་ཐུབ་ཆེན་ཁྱོད་ཀྱིས་གཟིགས། །ལྷའི་བུ་ཚོར་བ་དང་བྲལ་བས་གསོལ་པ།་ཚོར་བ་དང་ནི་ཚོར་བ་པོ། །རང་བཞིན་མེད་པར་ཁྱེད་ཀྱིས་གཟིགས། །ཟབ་མོ་བསྟན་དཀའི་ཚིག་དེ་ཡང ། །ཁྱོད་ཀྱིས་སེམས་ཅན་རྣམས་ལ་བསྟན། །ལྷའི་བུ་ཚོར་བའི་རྒྱུད་ལ་ངེས་པས་གསོལ་བ། ཚོར་བ་དེ་ནི་ཀུན་རྫོབ་ཙམ། །དོན་དམ་ཉིད་དུ་མི་དམིགས་ཏེ། །ཁྱོད་ཀྱིས་སེམས་ཅན་དེར་བཏུལ་བས། །འགྲོ་བ་ཐེ་ཚོམ་མ་མཆིས་འགྱུར། །ལྷའི་བུ་ཚོར་བ་ལ་མཁས་པས་གསོལ་པ། ཚོར་བའི་ཕུང་པོ་མཁས་པ་པོ། །མཁའ་ལ་རླུང་གི་དཀྱིལ་འཁོར་བཞིན། །བྱིས་པའི་བློ་ཅན་རྨོངས་བགྱིད་ན། །དེ་ནི་ཁྱོད་ཀྱིས་ཡང་དག་གཟིགས། ། ལྷའི་བུ་ཚོར་བ་མངོན་པར་ཤེས་པས་གསོལ་པ། ཚོར་བའི་ཕུང་པོ་མངོན་མཁྱེན་པ། །རིག་ཅིང་རིག་པའི་མཐར་བྱོན་པའི། །མཁས་པ་རྣམས་ཀྱི་མཆོག་ཁྱོད་ཀྱིས། །ཚོར་བ་བདག་མེད་
248a
༄#། །རབ་ཏུ་གཟིགས། །ལྷའི་བུ་ཚོར་བ་ལས་བརྒལ་བས་གསོལ་པ། རྐང་གཉིས་གཙོ་བོ་དམ་པ་ཁྱོད། །བརྒལ་དཀའ་ཚོར་བའི་མཚོ་ལས་བརྒལ། ། འདམ་ལས་བརྒལ་ཅིང་སྡིག་མེད་པ། །བྱང་ཆུབ་མཆོག་འདི་སངས་རྒྱས་འགྱུར། །ལྷའི་བུ་ཚོར་བ་ལས་བྱུང་གིས་གསོལ་པ། རྣམ་པར་འདྲེན་པས་འཇིག་རྟེན་དུ། །ཚོར་བ་རྣམས་ནི་འབྱུང་མཁྱེན་ནས། །ཚོར་བའི་ཕུང་པོ་རབ་བརྒལ་ཏེ། །སངས་རྒྱས་འཇིག་རྟེན་ཆགས་མི་མངའ། །ལྷའི་བུ་ཚོར་བ་རིག་པས་གསོལ་པ། མི་རྣམས་དག་ལ་གང་འཆིང་བའི། །ཚོར་བ་ཐམས་ཅད་ཁྱོད་ཀྱིས་མཁྱེན། །ཉོན་མོངས་ཞགས་པས་འཆིང་འགྱུར་བ། །དེ་ཡི་རང་བཞིན་ཁྱོད་ཀྱིས་གཟིགས། །ལྷའི་བུ་སེམས་ལ་མཁས་པས་གསོལ་པ། ཁྱོད་ཀྱིས་སེམས་ཀྱི་ཉོན་མོངས་ཕམ། །བདུད་རྣམས་ཀྱང་ནི་སྤ་བཀོང་སྟེ། །སེམས་དེ་རང་བཞིན་མ་མཆིས་པར། །ཐུབ་པ་ཆེན་པོ་ཁྱོད་ཀྱིས་གཟིགས། །ལྷའི་བུ་སེམས་ཡོངས་སུ་ཤེས་པས་གསོལ་པ། ཇི་ལྟར་སྒྱུ་མའི་མཁན་པོ་ཡིས། །སྒྱུ་མ་སྣ་ཚོགས་སྤྲུལ་པ་བཞིན། །སེམས་ནི་བདེ་གཤེགས་ཁྱོད་ཀྱིས་མཁྱེན། །དེ་ཕྱིར་ཁྱོད་ལ་འཇིག་རྟེན་མཆོད། །ལྷའི་བུ་སེམས་ལ་ཡང་དག་པར་རྟོག་པས་གསོལ་པ། སྒྱུ་མ་མཁན་ནམ་སློབ་མ་བཞིན། །གང་གིས་འགྲོ་བ་འདི་བཅིངས་པའི། །སེམས་དེ་ཁྱོད་ཀྱིས་ཡང་
248b
དག་བརྟགས། །དེ་ནི་ཁྱོད་ཀྱིས་ཇི་བཞིན་མཁྱེན། །ལྷའི་བུ་སེམས་ཀྱི་སྤྱོད་ཡུལ་ལ་སྤྱོད་པས་གསོལ་པ། སེམས་ཀྱི་སྤྱོད་ཡུལ་ཁྱོད་ཀྱིས་མཁྱེན། །རྣམ་པར་འདྲེན་པ་རྨི་ལམ་ན། །ཇི་ལྟར་ཚོགས་ཀྱི་གྲངས་བཞིན་དུ། །བྱིས་པའི་སེམས་རྨོངས་བགྱིད་པར་གཟིགས། །ལྷའི་བུ་སེམས་ཀྱི་དབང་ཕྱུག་གིས་གསོལ་པ། དུལ་གྱུར་ལས་སུ་རུང་བ་ཡི། །སེམས་ཀྱི་རང་བཞིན་རྟོགས་མེད་པ། །གང་ལ་འཇིག་རྟེན་གཏིང་མི་རྙེད། །མཚན་ཉིད་བརྟན་པ་ཁྱོད་ཀྱིས་གཟིགས། །ལྷའི་བུ་སེམས་ལ་དཔའ་བས་གསོལ་པ། གང་གིས་སེམས་ལ་སེམས་མེད་ཤེས། །མཁས་པ་སྒྱིད་ལུག་མི་འགྱུར་ཞིང ། །བདུད་སྡེ་རབ་ཏུ་འདུལ་བགྱིད་པ། །དེ་དག་འདིར་ནི་དཔའ་ཞེས་བགྱི། །ལྷའི་བུ་སེམས་ཀྱིས་ཡང་དག་འཕགས་ཀྱིས་གསོལ་པ། གང་དག་སེམས་ལ་སེམས་མེད་ཤེས། །དེ་དག་སངས་རྒྱས་སྲས་ལགས་ཏེ། །དཔའ་ཆེན་སངས་རྒྱས་ཆོས་རྣམས་ལ། །སྐྱེས་བུ་དེ་དག་ཡང་དག་འཕགས། །ལྷའི་བུ་ཞི་བའི་སེམས་ཀྱིས་གསོལ་པ། གང་གིས་སེམས་ལ་དབང་བགྱིས་པ། །སེམས་ཅན་དེ་དག་ཞི་རབ་ཞི། །བདུད་ཀྱི་ཞགས་ལས་རབ་གྲོལ་བས། །དེ་དག་བདུད་ཀྱི་དབང་མི་མཆི། །ལྷའི་བུ་སེམས་མཉེན་པས་གསོལ་པ། མི་རྣམས་གང་དག་སེམས་མཉེན་ཞིང ། །བསྙེན་པར་དཀའ་དང་དཔའ་བ་དང ། །ཁྱོད་ཀྱི་བསྟན་ལ་གང་མོས་པ། །དེ་དག་འདོད་པར་ཞུམ་མི་འགྱུར། །ལྷའི་བུ་སེམས་
249a
༄#། །དག་པས་གསོལ་པ། སེམས་དག་ལས་རྣམས་གཙང་གྱུར་ཅིང ། །ཡང་དག་རྟོགས་པས་སྤྱོད་བགྱིད་པ། །དེ་དག་རྒྱལ་བའི་བསྟན་ཐོས་ན། །ཟབ་མོ་རྣམས་ལ་ཞུམ་མི་འགྱུར། །ལྷའི་བུ་ཆོས་ཉིད་ལ་གནས་པས་གསོལ་པ། གང་གི་ཡིད་ནི་ཆོས་ཉིད་ལ། །རབ་ཏུ་དགའ་ཞིང་ཐོགས་མེད་པ། །དེ་དག་མི་དབང་སྲས་པོ་སྟེ། །ཞི་བའི་སར་ནི་ཕྱིན་པ་ལགས། །ལྷའི་བུ་ཆོས་ལ་སེམས་པས་གསོལ་པ། ཆོས་རྣམས་ཐམས་ཅད་ཆོས་དབྱིངས་སུ། །འདྲེན་པ་དེ་ལ་བསླབ་པ་རྣམས། །ཆོས་ཉིད་ལ་ནི་གང་སེམས་པ། །དེ་དག་སྤྱོད་ཡུལ་མ་ཡིན་མེད། །ལྷའི་བུ་ཆོས་ཀྱི་དབྱིངས་ལས་ངེས་པར་བྱུང་གིས་གསོལ་པ། མི་མཆོག་ཁྱོད་ཀྱི་སྲས་ཀྱི་རྣམས། །ཆོས་ཀྱི་དབྱིངས་ལ་ངེས་འབྱུང་སྟེ། །འདྲེན་པ་ཁྱོད་ཀྱི་སྲས་དེ་དག་།མཚན་ཉིད་གཅིག་གིས་ངེས་བྱུང་ལགས། །ལྷའི་བུ་ཆོས་ཀྱི་དབྱིངས་ཀྱི་སྤྱོད་ཡུལ་གྱིས་གསོལ་པ། ཆོས་རྣམས་ཀུན་གྱི་སྤྱོད་ཡུལ་ནི། ། ཆོས་ཀྱི་དབྱིངས་ཞེས་རྒྱལ་བས་གསུངས། །དཔའ་བོ་ཁྱོད་ནི་གང་སྤྱོད་པའི། །ཡེ་ཤེས་དེ་ནི་བསམ་མི་ཁྱབ། །ལྷའི་བུ་ཆོས་ཀྱི་དབྱིངས་ལ་ཞུགས་པས་གསོལ་པ། ཆོས་ཀྱི་དབྱིངས་ལ་གང་ཞུགས་པ། །དེ་དག་ཡེ་ཤེས་བསམ་ཡས་ཏེ། །སངས་རྒྱས་ཆོས་ལ་ཐེ་ཚོམ་མེད། །སེམས་ཅན་བསམ་ལ་དེ་དག་མཁས། །ལྷའི་བུ་ཆོས་ཀྱི་དབྱིངས་ལ་བབ་
249b
གྱིས་གསོལ་པ། གང་དག་ཆོས་ཀྱི་མཚན་ཉིད་གཅིག་།ཆོས་ཀྱི་དབྱིངས་ལ་བབ་པ་རྣམས། །དེ་དག་སྤོབས་པའི་སྟོབས་བསྐྱེད་པ། །བསམ་གྱིས་མི་ཁྱབ་ཐོབ་པར་འགྱུར། །ལྷའི་བུ་ཆོས་ཀྱི་དབྱིངས་ལ་འཇིགས་པ་མེད་པས་གསོལ་པ། གང་ལ་དེ་དག་གནས་པ་ཡི། །འཇིགས་པ་མེད་པ་ཐོབ་མེད་པས། །དེ་དག་རྣམས་ཀྱི་སྤོབས་དང་སྟོབས། །དེ་ལ་མཚུངས་པ་མེད་པ་འབྱུང ། །ལྷའི་བུ་ཆོས་ཀྱི་དབྱིངས་ལ་མཁས་པས་གསོལ་པ། ཁྱོད་ནི་ཆོས་དབྱིངས་མཁས་པ་སྟེ། །ཆོས་རྣམས་ཀུན་ལ་ཤིན་ཏུ་མཁས། །ལག་མཐིལ་སྐྱུ་རུ་ར་བཞག་བཞིན།། ཆོས་ཀྱི་དབྱིངས་ཀྱང་རྣམ་པར་སྟོན། །ལྷའི་བུ་ཆོས་ཀྱི་དབྱིངས་ལ་གནས་པས་གསོལ་པ། ཆོས་རྣམས་རང་བཞིན་མེད་གཟིགས་པས། །ཁྱོད་ནི་ཆོས་ཀྱི་དབྱིངས་ལ་ཞུགས། །མི་གནས་ཞུམ་པ་མ་མཆིས་ཏེ། །གཟུང་བ་མ་མཆིས་བཏང་མ་མཆིས། །ལྷའི་བུ་ཆོས་ཀྱི་དབྱིངས་ལ་སྤྱོད་པས་གསོལ་པ། སངས་རྒྱས་སྤྱོད་ཡུལ་གང་ལགས་པའི། །ཆོས་ཀྱི་དབྱིངས་ལ་ཁྱོད་སྤྱོད་དེ། །བར་སྣང་མཁའ་དང་འདྲ་བ་ཡི། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་དབྱིངས་ལ་རྟོན་པས་གསོལ་པ། གང་དང་གང་གི་སྒོ་དག་ནས། །སྐྱེས་བུ་དམ་པ་སྟོན་མཛད་པ། །དེ་ཡི་སྒོ་ནས་ཆོས་དབྱིངས་སྟོན། །དེ་ཕྱིར་རྟགས་དང་གཟུགས་མ་མཆིས། །ལྷའི་བུ་ཆོས་ཀྱི་དབྱིངས་ལ་བརྩོན་པས་གསོལ་པ། མངོན་པར་བརྩོན་པས་
250a
༄#། །ཆོས་ཀྱི་དབྱིངས། །སྐྱེས་བུ་དམ་པ་ཁྱོད་ཀྱིས་མཁྱེན། །བརྩོན་པས་རྫོགས་པའི་སངས་རྒྱས་རྣམས། །ཡེ་ཤེས་ཕ་རོལ་ཕྱིན་པར་གྱུར། །ལྷའི་བུ་ཆོས་ཀྱིས་ཚིམ་གྱིས་གསོལ་པ། དཔའ་བོ་ཁྱོད་ཀྱིས་སྐྱེ་བོ་འདི། །ཆོས་ཀྱིས་རབ་ཏུ་ཚིམ་པར་མཛད། །ཆོས་ཀྱི་དབྱིངས་ནི་རྣམ་མཁྱེན་པས། །འདྲེན་པ་བྱང་ཆུབ་མཆོག་ལ་ཞུགས་ལྷའི་བུ་ཆོས་ཉིད་ཀྱི་གཏིང་རྙེད་པས་གསོལ་པ། གཏིང་རྙེད་གྱུར་པའི་འགྲོ་བ་ཀུན། །འདྲེན་པ་ཁྱོད་ཀྱི་ཞལ་དུ་ལྟ། །ཆོས་དབྱིངས་རྣམ་པར་མཁྱེན་པ་ཡི། །འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་གནས་ཤེས་པ་ལ་རབ་ཏུ་གནས་པས་གསོལ་པ། མི་མཆོག་འདྲེན་པ་སངས་རྒྱས་ཀྱི། །ཡེ་ཤེས་གནས་འདི་ཆོས་དབྱིངས་ཏེ། །རྣམ་པར་འདྲེན་པ་སྟོབས་བཅུ་པོ། །གང་ལ་སྤྱོད་པ་དེ་ལགས་སོ། །ལྷའི་བུ་གནས་ལ་གནས་པས་གསོལ་པ། ཆོས་ཀྱི་དབྱིངས་ནི་གནས་ཆེན་ཏེ། །ཐམས་ཅད་མཁྱེན་པ་བཞུད་པའི་ལམ།། དེ་ནི་ཆོས་རྣམས་ཐམས་ཅད་ཀྱང ། །མཚན་ཉིད་གཅིག་པར་ཤེས་པ་ལགས། །ལྷའི་བུ་གནས་མངོན་པར་ཤེས་པས་གསོལ་པ། ཁྱོད་ནི་ཆོས་དབྱིངས་མངོན་པར་མཁྱེན།། མཚན་ཉིད་གཅིག་ལ་མཁས་པ་སྟེ། །སེམས་ཅན་ཀུན་གྱི་བསམ་པ་ཡང ། །རྐང་གཉིས་གཙོ་བོ་ཁྱོད་ཀྱིས་མཁྱེན། །ལྷའི་བུ་གནས་ནས་ངེས་པར་བྱུང་གིས་གསོལ་པ། རྣམ་
250b
པར་འདྲེན་པ་ཁྱོད་ཀྱི་སྲས། །གནས་སུ་བྱ་བ་ཆོས་དབྱིངས་ཞེས། །གསལ་བར་འཚལ་བའི་མཁས་པ་རྣམས། །རང་བྱུང་ཉིད་དུ་ངེས་པར་བྱུང ། །ལྷའི་བུ་གནས་ལ་བསླབ་པས་གསོལ་པ།་ཆོས་ཀྱི་དབྱིངས་ལ་གང་བསླབ་པའི། །སྐྱེས་བུ་དེ་དག་བྱང་ཆུབ་ཞུགས། །རང་བྱུང་ཉིད་དུ་གནས་རྙེད་པས། །དེ་དག་རྐང་གཉིས་མཆོག་ཏུ་འགྱུར། །ལྷའི་བུ་གནས་མེད་པ་ལ་མཁས་པས་གསོལ་པ། གནས་མེད་པ་ནི་གང་འཚལ་བ། །དེ་དག་བདེ་གཤེགས་དགོངས་ལ་མོས། །བདུད་རྣམས་བྱེ་བ་སྟོང་གིས་ཀྱང ། །དེ་དག་རྨོངས་པར་ཡོང་མི་ནུས། །ལྷའི་བུ་གནས་མེད་པ་ལ་མངོན་པར་ཤེས་པས་གསོལ་པ། གནས་མེད་གང་གིས་རིག་གྱུར་པ། །དེ་དག་བདག་ཅག་བདུད་ཀྱི་ཚོགས། །བྱེ་བས་བྱང་ཆུབ་མི་བསྐྱོད་ཅེས། །མཁས་པ་དེ་དག་ཤིན་ཏུ་དགའ། །ལྷའི་བུ་གནས་མེད་པའི་དགོངས་པ་ལ་མཁས་པས་གསོལ་པ། གནས་མེད་འདུ་ཤེས་མཁས་པ་ནི། །ཆོས་ཉིད་ལ་ནི་རབ་གནས་ཏེ། །སྡིག་ཅན་བདུད་རྣམས་བཤལ་བ་ནི། །ཇི་ལྟར་རྟ་ཡིས་ཤིང་རྟ་བཞིན། །ལྷའི་བུ་གནས་མེད་པ་ལ་མཁས་པས་གསོལ་པ། མཚན་ཉིད་གཅིག་ལ་མཁས་པ་པོ། །ཆོས་ཀྱི་དབྱིངས་ལ་བགེགས་བགྱིད་པའི། །བདུད་ཀྱི་ལས་ནི་གནས་མེད་དེ། །གནས་མེད་དོ་ཞེས་རྒྱལ་བས་གསུངས། །ལྷའི་བུ་གནས་དང་གནས་མ་ཡིན་པ་རྟོགས་པས་གསོལ་པ། གནས་དང་དེ་བཞིན་གནས་མིན་
251a
༄#། །པ།་བྱིས་པའི་བློ་ཅན་རྣམས་ལ་བསྟན། །རང་གིས་དེ་ནི་ཐུགས་ཆུད་ནས། །སེམས་ཅན་རྣམས་ལ་ཁྱོད་ཀྱིས་བསྟན། །ལྷའི་བུ་སྦྱིན་པ་ལ་མཁས་པས་གསོལ་པ། སྔོན་ཆད་རྒྱུ་ནི་གང་དག་དང ། །ལས་འདྲ་འབྱུང་བ་མ་འཚལ་བའི། །རྒྱུ་དེ་ཁྱོད་ཀྱིས་ཐུགས་སུ་ཆུད། །ལས་ཀྱི་གནས་ཀྱང་རབ་ཏུ་མཁྱེན། །ལྷའི་བུ་ལས་ལ་མཁས་པས་གསོལ་པ། ཆགས་དང་ཞེ་སྡང་གཏི་མུག་ནི། །ལས་ཀྱི་རྒྱུ་ཞེས་ཁྱོད་ཀྱིས་མཁྱེན། །གང་གིས་རྒྱུ་ཡིས་བགྱིད་དེ་ཡང ། །གང་ཟག་མཆོག་གིས་ཐུགས་སུ་ཆུད། །ལྷའི་བུ་མ་འོངས་པ་ལ་མཁས་པས་གསོལ་པ། མ་འོངས་པ་ཡི་དུས་དག་ན། །མི་རྣམས་ལས་གང་བགྱིད་འགྱུར་བ། །དེ་ཡི་རྒྱུ་དང་ལེན་པ་དང ། །གནས་དང་ལས་ཀྱང་ཁྱོད་ཀྱིས་མཁྱེན། །ལྷའི་བུ་ད་ལྟར་བྱུང་བ་ལ་ལྟ་བས་གསོལ་པ། ཕྱོགས་བཅུའི་འཇིག་རྟེན་འདི་དག་གི་།སེམས་ཅན་རྣམས་དང་རྒྱུ་དང་ལས། །གནས་དང་ལས་ཀྱི་ལེན་པ་རྣམས། །ཀུན་ཀྱང་འདྲེན་པ་ཁྱོད་ཀྱིས་མཁྱེན། །ལྷའི་བུ་སྟོབས་ཀྱི་སྤྱོད་ཡུལ་གྱིས་གསོལ་པ། མི་དབང་ཁྱོད་ཀྱིས་མ་གཟིགས་པའི། །ལས་དང་རྒྱུ་དག་མ་མཆིས་ཏེ། །གནས་དང་སྐྱེ་བའང་མ་མཆིས་སོ། །དེ་བས་ཁྱོད་ནི་གང་ཟག་མཆོག་།ལྷའི་བུ་སྟོབས་ལ་མངོན་པར་དགའ་བས་གསོལ་པ། ལས་དང་རྒྱུ་དང་དེ་བཞིན་གནས། །དུས་ལ་རྣམ་སྨིན་རྣམ་
251b
གསུམ་དང ། །ཇི་ལྟར་དེ་ཡི་ལེན་པ་ཡང ། །ཁྱོད་ཀྱིས་མཁྱེན་པས་དེ་སླད་མཆོད། །ལྷའི་བུ་སྟོབས་ཀྱི་བློ་གྲོས་ཀྱིས་གསོལ་པ། རྒྱུ་དང་ལས་དང་ལེན་པ་དང ། །རྣམ་པར་སྨིན་དང་རྐྱེན་དང་གནས། །རང་བཞིན་བྲལ་བར་ཁྱོད་ཀྱིས་མཁྱེན། །དེ་ཕྱིར་རྒྱལ་བ་མཉམ་པ་མེད། །ལྷའི་བུ་སྟོབས་ཀྱིས་བྱུང་གིས་གསོལ་པ། རྒྱུ་དང་ལས་དང་ལེན་པ་དང ། །གནས་དང་རྐྱེན་དང་རྒྱུད་རྣམས་དང ། །རྣམ་སྨིན་སོ་སོ་ཡང་དག་རིག་།ཐམས་ཅད་སྟོང་པ་རབ་ཏུ་མཁྱེན། །ལྷའི་བུ་སྟོབས་ལ་དགའ་བས་གསོལ་པ། རྒྱུ་དང་ལས་དང་ལེན་པ་དང ། ། གནས་དང་རྐྱེན་དང་རྒྱུད་ཀྱི་རྣམས། །ཁྱོད་ཉིད་རང་གིས་མངོན་མཁྱེན་ཏེ། །རང་བཞིན་མེད་པར་བསྟན་པ་མཛད། །ལྷའི་བུ་སྟོབས་ཀྱིས་རྣམ་པར་རྩེ་བས་གསོལ་པ། རྒྱུ་དང་ལས་དང་ལེན་པ་དང ། །གནས་དང་རྐྱེན་དང་རྒྱུད་ཀྱི་རྣམས། །འཕོ་མེད་དབང་ཕྱུག་མེད་པ་སྟེ། །རྟེན་ཅིང་འབྱུང་བར་ཁྱོད་ཀྱིས་མཁྱེན། །ལྷའི་བུ་སྟོབས་ཀྱིས་འཕགས་ཀྱིས་གསོལ་པ། རྒྱུ་དང་རྐྱེན་དང་ལས་རྣམས་དང ། །རྣམ་པར་སྨིན་པ་བརྟེན་པ་རྣམས། །དེ་ཀུན་རང་བཞིན་སྟོང་ངོ་ཞེས། །སེངྒེའི་ང་རོར་ཁྱོད་ཀྱིས་གསུངས། །ལྷའི་བུ་སྟོབས་ཀྱི་རྗེས་སུ་འབྲང་བས་གསོལ་པ།་འཇིག་རྟེན་ལས་ནི་གང་ཞིག་གིས། །ཁམས་ནི་གང་ཞིག་སྤེལ་གྱུར་པས། །དེ་དག་རྐང་གཉིས་གཙོ་བོས་མཁྱེན། །དེ་བས་ཁྱོད་ནི་དོ་ཟླ་མེད། །ལྷའི་བུ་སྟོབས་དང་ལྡན་གྱིས་
252a
༄#། །གསོལ་པ། ཁམས་གང་ལ་ནི་བརྟེན་བགྱིས་ཤིང ། །གང་གིས་མངོན་པར་ལས་བགྱིས་དང ། །དེ་ཡི་རྣམ་སྨིན་ཅི་འདྲ་བ། །དེ་ཀུན་སྤྱན་དང་ལྡན་པས་མཁྱེན།། ལྷའི་བུ་སྟོབས་ཡང་དག་འཕགས་ཀྱིས་གསོལ་པ། ཁམས་གང་ལ་ནི་བརྟེན་བགྱིས་ཤིང ། །ཅི་འདྲའི་རང་བཞིན་གྱུར་པ་ཡི། །སེམས་ཅན་ཐམས་ཅད་ཁྱོད་ཀྱིས་མཁྱེན། །ཕྱག་གི་སོར་མོ་ལྔ་དང་འདྲ། །ལྷའི་བུ་སྟོབས་ལ་སྤྱོད་པས་གསོལ་པ། ཁམས་གང་ལ་ནི་བརྟེན་བགྱིས་ཤིང ། །བཤེས་གཉེན་ཅི་འདྲ་རྙེད་གྱུར་ནས། །འདུ་འཛི་ཇི་འདྲ་བགྱིད་གྱུར་པ། །དེ་ཀུན་བླ་ན་མེད་པས་མཁྱེན། །ལྷའི་བུ་སྟོབས་ཀྱིས་བྱིན་གྱིས་བརླབས་པས་གསོལ་པ། སྟོབས་ཀྱི་བྱིན་གྱིས་བརླབས་མཁྱེན་ཅིང ། །འདྲེན་པ་དེ་ཡི་ཁམས་དང་ནི། །འདུ་འཛིན་བཤེས་གཉེན་ཚོགས་ཀྱི་རྣམས། །དེ་དག་མི་མཆོག་ཁྱོད་ཀྱིས་མཁྱེན། །ལྷའི་བུ་ཁམས་ངེས་པས་གསོལ་པ། ཁམས་དེ་དང་ནི་དེ་ལེན་དང ། །བཤེས་གཉེན་དེ་དང་དེ་འགྲོགས་པ། །དེ་ལ་ཁྱོད་ཀྱི་མཁྱེན་པ་ངེས། །དེ་ཕྱིར་ཐེ་ཚོམ་ཡོང་མི་མངའ། །ལྷའི་བུ་ཁམས་ལ་བརྟེན་པས་གསོལ་པ། སེམས་ཅན་གང་ན་གནས་གནས་པའི། ། འཁོར་བ་དེ་དང་ཁམས་དེ་དང ། །སྤྱོད་དང་སྐད་དང་འགྲོ་བ་རྣམས། །མི་མཆོག་ཁྱོད་ཀྱིས་རབ་ཏུ་མཁྱེན། །ལྷའི་བུ་ཁམས་ལ་མཁས་པས་གསོལ་པ། ཡེ་ཤེས་གང་གིས་
252b
ཁམས་དེ་ནི། །འདྲེན་པས་མངོན་པར་མཁྱེན་པ་ཡི། །མཁྱེན་ཏེ་མཁྱེན་པས་སྟོང་ངོ་ཞེས། །བློ་མཆོག་མངའ་བས་ཡང་དག་བསྟན། །ལྷའི་བུ་ཁམས་ན་ངེས་པར་བྱུང་གིས་གསོལ་པ། ཁམས་གང་ལ་ནི་བརྟེན་བགྱིས་ན། །འདུས་བྱས་དག་ལ་ཇི་སྲིད་གནས། །དེ་ནི་ཁྱོད་ཀྱིས་ཇི་བཞིན་མཁྱེན། །ཁྱོད་ལ་དོ་ཟླ་མ་མཆིས་སོ། །ལྷའི་བུ་ཁམས་ཀྱི་རྗེས་སུ་སོང་བས་གསོལ་པ། ཁམས་གང་ལ་ནི་བརྟེན་བགྱིས་པ། །ཡོན་ཏན་ཇི་སྙེད་བསྐྱེད་པ་དང ། །རྣམ་པར་སྨིན་དང་འབྲས་བུ་དག་།དེ་དག་མ་ལུས་ཁྱོད་ཀྱིས་མཁྱེན། །ལྷའི་བུ་ཁམས་ལ་ཡང་དག་ཞུགས་པས་གསོལ་པ། ཁམས་གང་ལ་ནི་བརྟེན་བགྱིད་ཅིང ། །འགྲོ་བ་ཅི་འདྲ་འདོད་བགྱིས་པ། །དེ་ཡང་ཁྱོད་ཀྱིས་ཐོགས་མེད་མཁྱེན། །དེ་ཕྱིར་ཁྱོད་ནི་མཁས་པས་མཆོད། །ལྷའི་བུ་ལམ་མངོན་པར་ཤེས་པས་གསོལ་པ། ཁམས་གང་ལ་ནི་བརྟེན་བགྱིས་པས། །འགྲོ་བ་ཅི་འདྲར་མཆིས་པ་ཡི། །སེམས་ཅན་རྣམས་ཀྱི་ལམ་དག་ཀྱང ། །ཡེ་ཤེས་མཁས་པ་ཁྱོད་ཀྱིས་མཁྱེན། །ལྷའི་བུ་ལམ་ལ་མི་འཇིགས་པས་གསོལ་པ། སེམས་ཅན་ལོག་པ་ཉིད་ངེས་ཤིང ། །མྱ་ངན་འདས་འགྲོ་སྐལ་མེད་པ། ། ཕུང་པོ་གསུམ་པོ་དེ་དག་ལ། །ཁྱོད་ཀྱིས་ཡེ་ཤེས་ངེས་པར་འཇུག་།ལྷའི་བུ་ལམ་གྱིས་ངེས་པར་བྱུང་གིས་གསོལ་པ། སེམས་ཅན་ཡང་དག་ཉིད་ངེས་ཏེ། །ངན་འགྲོར་འགྲོ་བའི་སྐལ་
253a
༄#། །མེད་པ། །དེ་ལ་འཇིག་རྟེན་སྒྲོན་མ་ཁྱོད། །རྟོགས་པ་ཐོགས་པ་མེད་པར་འཇུག་།ལྷའི་བུ་ལམ་ལ་མོས་པས་གསོལ་པ། མ་ངེས་ཕུང་པོར་གྱུར་པ་ལ། ། གང་ཟག་གང་རྣམས་གནས་པ་རྣམས། །དེ་ལ་ངན་སོང་ངན་འགྲོ་དང ། །མྱ་ངན་འདས་པའང་ཁྱོད་ཀྱིས་བསྟན། །ལྷའི་བུ་སྟོབས་ཀྱི་བརྡས་གསོལ་པ། སངས་རྒྱས་བརྡ་ཙམ་ཉིད་ལགས་ཏེ། །དེ་བཞིན་སྟོབས་དང་ཡེ་ཤེས་དང ། །མི་འཇིགས་བཞི་ཡང་དེ་བཞིན་དུ། །ཀུན་རྫོབ་ཅེས་ནི་ཐུབ་པས་གསུངས། །ལྷའི་བུ་ཡང་དག་པ་མཐོང་བས་གསོལ་པ ། སངས་རྒྱས་སངས་རྒྱས་ཆོས་རྣམས་མོས། །ཡེ་ཤེས་གནས་པ་གཞན་ཡང་མེད། །དོན་དམ་ཉིད་དུ་བསྟན་ཏོ་ཞེས། །དེ་བཞིན་གཤེགས་པ་ཁྱོད་ཀྱིས་མཁྱེན། །ལྷའི་བུ་སྟོབས་ལ་གནས་ཀྱིས་གསོལ་པ། སངས་རྒྱས་ཆོས་ལ་སྟོབས་གནས་པས། །དེས་ན་དེ་ལ་འཇིགས་མེད་དེ། །རྒྱལ་བ་དེ་བཞིན་གཤེགས་ཀྱི་སྲས། །ཇི་ལྟར་འདོད་རྒུ་རྣམ་པར་འཕྲུལ། །ལྷའི་བུ་ཆོས་ལ་འཇིགས་མེད་ཀྱིས་གསོལ་པ། ཀུན་རྫོབ་དང་ནི་དོན་དམ་དང ། །དེ་དག་རབ་ཏུ་བསྟན་མཆིས་ཀྱང ། །ཀུན་རྫོབ་དང་ནི་དོན་དམ་དང ། །བརྡ་ཡང་དམིགས་སུ་མ་མཆིས་སོ། །ལྷའི་བུ་ཡེ་ཤེས་ལྷུར་ལེན་གྱིས་གསོལ་པ། བརྗོད་པ་ཐམས་ཅད་རྣམ་པ་གཞན། །ཆོས་ཀྱི་མཚན་ཉིད་རྣམ་པ་གཞན། །མཚན་ཉིད་མ་མཆིས་བརྗོད་མ་
253b
མཆིས། །ཁྱོད་ཀྱིས་ཆོས་ཀྱི་མཚན་ཉིད་གཟིགས། །ལྷའི་བུ་ལམ་ལ་བརྩོན་པས་གསོལ་པ། ངེས་པར་གྱུར་པའི་སེམས་ཅན་རྣམས། །གཞན་གྱི་རྒྱུད་མཆིའི་གནས་མ་མཆིས། ། ལོག་པར་ངེས་རྣམས་ཀུན་ཏུ་འགྲོར། །དྲང་སྲོང་ཆེན་པོ་ཁྱོད་ཀྱིས་གཟིགས། །ལྷའི་བུ་མོས་པའི་སྟོབས་ཀྱིས་གསོལ་པ། ཁམས་གང་ལ་ནི་བརྟེན་བགྱིས་ཏེ། །གང་རྣམས་ཅི་འདྲར་མོས་འགྱུར་ཞིང ། །འདོད་ཆགས་ཁམས་ལ་སྡུག་བསྔལ་བ། །དེ་དག་ཐུབ་ཆེན་ཁྱོད་ཀྱིས་གཟིགས། །ལྷའི་བུ་མི་སྡུག་པ་ལས་ངེས་པར་བྱུང་གིས་གསོལ་པ། མ་མཆིས་ཡོངས་སུ་བརྟགས་པས་ན། །འདོད་ཆགས་ཁམས་ནི་རབ་ཏུ་བྱུང ། །དེ་ལ་མོས་པ་ངེས་འབྱུང་བ། །དེ་དག་ཁྱོད་ཀྱིས་ཇི་བཞིན་གཟིགས། །ལྷའི་བུ་བྱམས་པས་ངེས་པར་བྱུང་གིས་གསོལ་པ། མ་མཆིས་ཡོངས་སུ་བརྟགས་པས་ན། །ཞེ་སྡང་ཁམས་ནི་རབ་ཏུ་བྱུང ། །དེ་ལ་མོས་པ་ངེས་འབྱུང་པ། །དེ་དག་ཁྱོད་ཀྱིས་ཇི་བཞིན་གཟིགས། །ལྷའི་བུ་རྐྱེན་གྱིས་ངེས་པར་བྱུང་གིས་གསོལ་པ། མ་མཆིས་ཡོངས་སུ་བརྟགས་པས་ན། །གཏི་མུག་ཁམས་ནི་རབ་ཏུ་བྱུང ། །དེ་ལ་མོས་པ་ངེས་འབྱུང་བ། །དེ་དག་ཁྱོད་ཀྱིས་ཇི་བཞིན་གཟིགས ། ལྷའི་བུ་གཏོང་བས་ངེས་པར་བྱུང་གིས་གསོལ་པ། མཚོ་མེད་འཇིགས་པ་རྙེད་པ་དག་།སེར་སྣ་མངོན་དུ་འཕེལ་འགྱུར་ཏེ། །དེ་ལ་མོས་པ་ངེས་འབྱུང་བ། །དེ་དག་ཐུབ་ཆེན་ཁྱོད་
254a
༄#། །ཀྱིས་གཟིགས། །ལྷའི་བུ་དགེ་བའི་བཤེས་གཉེན་གྱིས་ངེས་པར་བྱུང་གིས་གསོལ་པ། སྡིག་པའི་གྲོགས་དང་འགྲོགས་པ་ན། །མཐུན་པའི་ཁམས་ནི་རབ་ཏུ་བྱུང ། །དེ་ལ་མོས་པ་ཐོབ་འགྱུར་བ། །དེ་དག་འདྲེན་པས་རྣམ་པར་མཁྱེན། །ལྷའི་བུ་རྣམ་པར་ཤེས་པ་སྙིང་པོར་འཛིན་པས་གསོལ་པ། འཁོར་བ་ན་ནི་འཁོར་རྣམས་ཀྱིས། །ཅི་འདྲའི་ཁམས་ལ་བརྟེན་པ་དང ། །མོས་པ་དེ་མཐར་ཕྱིན་པ་དག་།ཁྱོད་ཀྱིས་མ་ལུས་རབ་ཏུ་མཁྱེན། །ལྷའི་བུ་ནན་ཏན་སྙིང་པོར་བྱེད་པས་གསོལ་པ། འཁོར་བ་ན་ནི་འཁོར་རྣམས་ཀྱིས། །གང་གིས་རྒྱུ་འབྱུང་ནན་ཏན་དང ། །མོས་པ་དེ་ལས་འབྱུང་བ་ཡང ། །སྨད་པ་མེད་པ་ཁྱེད་ཀྱིས་གཟིགས། །ལྷའི་བུ་དབང་པོ་ལ་མོས་པས་གསོལ་པ། སེམས་ཅན་གང་གིས་ཁམས་གང་ལ། །བརྟེན་ན་ཇི་ལྟར་འགྱུར་བ་ཡི། །རྒྱུ་དེ་ཁྱོད་ཀྱིས་རབ་ཏུ་མཁྱེན། །དེས་ན་ཁྱོད་ནི་དགའ་བར་མཛད། ། ལྷའི་བུ་དབང་པོ་ལ་སྤྱོད་པས་གསོལ་པ། སྦྱོར་བ་གང་གིས་སྐྱེ་བ་དང ། །གང་གིས་རྒྱ་ཆེན་སྐྱེ་བ་དང ། །དམིགས་པ་དང་ནི་ཞིང་རྣམས་དང ། །དབང་པོ་ཁྱོད་ཀྱིས་རབ་ཏུ་མཁྱེན།། ལྷའི་བུ་དབང་པོས་ངེས་པར་བྱུང་གིས་གསོལ་པ། འདོད་པའི་སྡུག་བསྔལ་གནོད་གྱུར་དང ། །སྲིད་པར་མངོན་པ་འཇུག་པ་དང ། །སྲེད་པ་ཞི་བར་བགྱིད་པའི་དོན། །དེ་དག་སྨྲ་
254b
བའི་མཆོག་གིས་མཁྱེན། །ལྷའི་བུ་དབང་པོའི་སྤྱོད་ཡུལ་གྱིས་གསོལ་པ། དབང་པོ་ཉམ་ཆུང་རྣམ་དག་ནི། །གཟུགས་ཀྱི་འདོད་ཆགས་དབེན་པར་འཚལ། །སྲེད་པ་རྣམ་པར་གཞིག་པ་ཡང ། །རྐང་གཉིས་དམ་པས་བསྟེན་པ་མཛད། །ལྷའི་བུ་དབང་པོ་རྣམ་པར་རྒྱལ་བས་གསོལ་པ། དབང་པོ་རྟུལ་པོ་དུར་ཁྲོད་བསྟེན། །རང་གི་འདོད་ཆགས་ཞི་བར་བགྱིད། །རྐང་གཉིས་གཙོ་བོའི་ཞལ་མཐོང་ནས། །སྲེད་དང་བཅས་པས་ཁྱོད་ལ་བལྟ། །ལྷའི་བུ་དབང་པོ་རྟོགས་ཀྱིས་གསོལ་པ། འདོད་ཆགས་ཅན་དང་འདོད་ཆགས་དང ། ། ཞི་དང་ཤེས་དང་མི་ཤེས་དང ། །སྲེད་པ་ཞི་དང་དབང་པོ་རྣམས། །རྣམ་པར་གཟིགས་ལ་མངོན་མི་དམིགས། །ལྷའི་བུ་དབང་པོ་ལ་གནས་པས་གསོལ་པ། ཞེ་སྡང་གཉེན་པོར་གྱུར་པ་ཡི། །གནོད་སེམས་མེད་དང་དབེན་པ་དག་།དབང་པོ་རྟུལ་པོ་བསྟེན་པའི་ཚེ། །ཁྱོད་ཀྱི་འགྲོ་བའི་བསམ་པ་གཟིགས། །ལྷའི་བུ་དབང་པོ་ལ་བརྩོན་པས་གསོལ་པ། ཞེ་སྡང་གཉེན་པོར་བྱམས་པ་གསུངས། །སེམས་ཅན་ཤེས་པ་རྗེས་སུ་སྐྱེ། །ཞེ་སྡང་ཁམས་ནི་ཞི་བར་བགྱིད། །དེ་དག་མི་མཆོག་ཁྱོད་ཀྱིས་མཁྱེན། །ལྷའི་བུ་དབང་པོ་ཚོལ་བས་གསོལ་པ། གནོད་སེམས་མེད་དང་བྱམས་པ་དང ། །ཞི་བའི་ངོ་བོ་ཉིད་མ་གཟིགས། །དགྲ་དང་ཉོན་མོངས་མ་དམིགས་ཏེ། །དེས་ན་འཇིག་རྟེན་ཁྱད་པར་འཕགས། །ལྷའི་བུ་དབང་
255a
༄#། །པོ་རྗེས་སུ་འབྲང་གིས་གསོལ་པ། ལོག་པར་རྣམ་པར་རྟོག་པ་དང ། ལོག་པ་ཉེ་བར་སྟོན་པ་ཡང ། །ཉོན་མོངས་དམ་ཕྱིར་ཀུན་སྦྱོར་ཏེ། །ལྡོག་པས་ཐར་བར་འགྱུར་བ་གཟིགས། །ལྷའི་བུ་ཡེ་ཤེས་ཡང་དག་ཤར་གྱིས་གསོལ་པ། འདོད་ཆགས་ཞེ་སྡང་གཏི་མུག་དང ། །དངོས་ལ་འཛིན་པ་མུན་པ་སྟེ། །ལྡོག་པས་སྣང་བ་ཆེན་པོར་འགྱུར། །དེ་ནི་གྲགས་ཆེན་ཁྱོད་ཀྱིས་མཁྱེན། །ལྷའི་བུ་ཡེ་ཤེས་འདོད་ཆགས་ཆད་པས་གསོལ་པ། འདོད་ཆགས་ཞེ་སྡང་གཏི་མུག་དང ། །མུན་པ་སྣང་བ་དངོས་པོ་རྣམས། །རང་བཞིན་ཉིད་ཀྱིས་མ་མཆིས་ཏེ། །དེ་ནི་རྐང་གཉིས་གཙོ་བོས་གཟིགས། །ལྷའི་བུ་སྣང་བ་འཛིན་གྱིས་གསོལ་པ། སེམས་ཅན་གང་གིས་ཤེས་པ་གང ། །ཇི་ཙམ་ཡོངས་སུ་བསྒྲུབས་བགྱིས་དང ། །སྣོད་དུ་གང་རུང་ཇི་སྙེད་པ། །དེ་དག་མི་མཆོག་ཁྱོད་ཀྱིས་མཁྱེན། །ལྷའི་བུ་དབང་པོ་དང་ཞེ་འགྲས་པས་གསོལ་པ། ཉོན་མོངས་སྤང་ཕྱིར་ཤེས་གང་གིས། །ཤེས་པ་དེ་ལ་རྟོག་བགྱིད་པ། །དེ་ཡང་སྟོན་པ་ཁྱོད་ཀྱིས་མཁྱེན། །དེ་བས་ཁྱོད་ལ་མངོན་པར་དགའ། །ལྷའི་བུ་དབང་པོ་ལ་དགའ་བས་གསོལ་པ། ཡུལ་དང་དུས་དང་གནས་དག་དང ། །སྤྱོད་པ་རྣམ་པར་སྒོམ་པ་དང ། །ཉོན་མོངས་ཉོན་མོངས་རྣམ་དག་པ། །ཐུབ་པ་ཁྱོད་ཀྱིས་སྟོང་པར་གཟིགས། །ལྷའི་
255b
བུ་ཡེ་ཤེས་རྒྱལ་མཚན་གྱིས་གསོལ་པ། དབང་པོ་རྣོ་རྟུལ་འབྲིང་དག་དང ། །གང་ཟག་གང་གི་བསམ་པ་དང ། །བཅིངས་དང་ཐར་དང་ཟད་པའང་ཤེས། །གཡོ་བ་མེད་པར་ཁྱོད་ཀྱིས་མཁྱེན། །ལྷའི་བུ་དབང་པོའི་རྒྱལ་མཚན་གྱིས་གསོལ་པ། དབང་པོ་རབ་འབྲིང་རྟུལ་བ་དང ། །ཉོན་མོངས་ཡེ་ཤེས་ཚོར་བ་དང ། །གདུལ་དང་འདུལ་བར་བགྱིད་པ་དག་།ཁྱོད་ཀྱིས་མཚན་ཉིད་མེད་པར་གསུངས། །ལྷའི་བུ་དབང་པོ་རྣམ་པར་བརྟགས་ཀྱིས་གསོལ་པ། སེམས་ཅན་རྣམས་ཀྱི་བསམ་གཏན་དང ། །རྣམ་ཐར་ཀུན་ནས་ཉོན་མོངས་དང ། །སྙོམས་འཇུག་ཏིང་འཛིན་ལྡན་པ་དང ། །རྣམ་བྱང་ཐུབ་པ་ཁྱོད་ཀྱིས་མཁྱེན། །ལྷའི་བུ་སྟོབས་ཀྱི་ཤུགས་ཀྱིས་གསོལ་པ། ཞི་བའི་ཏིང་ངེ་འཛིན་བསྟེན་ཏེ། །ཆོས་ཀུན་ངོ་བོ་ཉིད་ཀྱིས་ནི། །རང་བཞིན་མེད་པར་ཁྱོད་ཀྱིས་མཁྱེན། །དེས་ན་ཐམས་ཅད་མཁྱེན་ཞེས་བགྱིས། །ལྷའི་བུ་སྟོབས་ཀྱི་གོ་ཆས་གསོལ་པ། ཆོས་རྣམས་གང་དག་རང་བཞིན་གང ། །ཆོས་གང་གིས་ནི་བརྗོད་བགྱིས་པ། །ཡང་དག་ཇི་བཞིན་ཐུགས་སུ་ཆུད། །དེས་ན་དུས་གསུམ་ཆགས་མི་མངའ། །ལྷའི་བུ་སྟོབས་འདོད་ཀྱིས་གསོལ་པ། ལོག་པར་བརྟགས་པས་ཀུན་ཉོན་མོངས། །རྣམ་པ་བཞི་ནི་སྐྱེ་བར་འགྱུར། །ལས་ལས་སྐྱེས་པར་དེ་དག་མཁྱེན། །དེས་ན་ཁྱོད་ནི་དོ་ཟླ་མེད། །ལྷའི་བུ་སྟོབས་ཤེས་ཀྱིས་གསོལ་པ། ཉོན་མོངས་རྣམས་དང་ལས་རྣམས་ཀྱི། །གཉེན་པོ་རྣམ་པར་
256a
༄#། །བྱང་བ་དང ། །བསྟན་པའང་ཁྱོད་ཀྱིས་རབ་ཏུ་མཁྱེན། །དེས་ན་ཁྱོད་ལ་དོ་ཟླ་མེད། །ལྷའི་བུ་སྟོབས་ཀྱི་འོད་ཀྱིས་གསོལ་པ། བསམ་གཏན་རྣམ་ཐར་ལྡང་བ་དང ། །སྙོམས་པར་འཇུག་དང་ཏིང་འཛིན་དང ། །ཀུན་ནས་ཉོན་མོངས་རྣམ་བྱང་དག་།མིང་ཙམ་མོ་ཞེས་ཁྱོད་ཀྱིས་བསྟན། །ལྷའི་བུ་སྟོབས་ལས་བྱུང་གིས་གསོལ་པ། བསམ་གཏན་རྣམ་ཐར་རྣམ་བྱང་དང ། །སྙོམས་པར་འཇུག་དང་ཏིང་ངེ་འཛིན། །བག་ཡོད་པ་ལས་བྱུང་བ་སྟེ། །དེ་ལ་ཁྱོད་ཀྱི་ཡེ་ཤེས་འཇུག་།ལྷའི་བུ་སྟོབས་རྣམ་པར་སྤེལ་བས་གསོལ་པ། དཔའ་བོ་ཁྱོད་ཀྱི་མཁྱེན་པ་ནི། །བསམ་གཏན་ལ་སོགས་དེ་དག་དང ། །ལྡན་དང་རྣམ་པར་བྱང་ལ་འཇུག་།དེ་ནི་རླུང་ལྟར་ཆགས་པ་མེད། །ལྷའི་བུ་སྔོན་གྱི་མཐའ་ལ་མཁས་པས་གསོལ་པ། བསྐལ་པ་བྱེ་བ་གྲངས་མེད་དུ། །སྲིད་པ་འདི་ན་སྔོན་བཞུགས་ཚེ། །སྲིད་པའི་སྐྱོན་དང་ཡོང་མ་འདྲེས། །དེས་ན་ཁྱོད་ལ་དོ་ཟླ་མེད། །ལྷའི་བུ་སྔོན་གྱི་མཐའ་ལ་གནས་པས་གསོལ་པ། བསྐལ་པ་བྱེ་བ་གྲངས་མེད་དུ། །བྱང་ཆུབ་གཞལ་ཡས་ཚོལ་མཛད་ཅིང ། །འདྲེན་པས་ཡོངས་སུ་སྤྱད་པས་ན། ། དེས་ན་ཁྱོད་ནི་དཔའ་བོ་ལགས། །ལྷའི་བུ་སྔོན་གྱི་མཐའ་ལ་རྟོག་པས་གསོལ་པ། སྔོན་མཐར་སྦྱིན་པ་སྣ་ཚོགས་དག་།བློ་མཆོག་གསུང་ཚེ་གསོལ་བས་ན། །སྤོབས་པ་སྣ་
256b
ཚོགས་རབ་མངའ་བར། །རྣམ་པར་འདྲེན་པ་དེ་ངེས་བྱུང ། །ལྷའི་བུ་སྔོན་མཐའ་ལ་བྱང་བས་གསོལ་པ། སྔོན་ཆད་འཁོར་བར་སྤྱོད་པའི་ཚེ། །ཚུལ་རྣམས་ལ་ནི་ཚུལ་མཁས་པ། །འཇིག་རྟེན་སྒྲོན་རྣམས་ཁྱོད་ཀྱིས་གཟིགས། །དེས་ན་ཁྱོད་ནི་ཚུལ་ལ་མཁས། །ལྷའི་བུ་སྔོན་གྱི་མཐའ་ཚར་ཕྱིན་པས་གསོལ་པ། སྔོན་མཐར་ཆོས་རྒྱལ་མང་པོ་ལ། །དཔའ་བོས་སྔོན་ཆད་སྤྱོད་མཛད་པས། །ཐམས་ཅད་མཁྱེན་དུ་ངེས་པར་བྱུང ། །སེམས་ཅན་མཁས་ལ་ཕྱག་ཀྱང་འཚལ། །ལྷའི་བུ་སྔོན་གྱི་ཚུལ་ཕུན་སུམ་ཚོགས་པས་གསོལ་པ། བྱང་ཆུབ་མཆོག་ནི་བཙལ་བའི་ཕྱིར། །བསྐལ་པ་བྱེ་བ་གྲངས་མེད་དུ། །སངས་རྒྱས་བྱེ་བ་མཐའ་ཡས་པ། །དེ་ལ་ཁྱོད་ཀྱིས་ས་བོན་བཏབ། །ལྷའི་བུ་སྔོན་གྱི་ཚུལ་ལ་ངེས་པས་གསོལ་པ། བསྐལ་པ་བྱེ་བ་བརྟགས་མཛད་པས། །ཆོས་ཀུན་སེམས་ཅན་མེད་པ་ཞེས། །ཆོས་རྣམས་ཐམས་ཅད་ངེས་པར་མཁྱེན། །འདུ་འཕྲོད་ཙམ་དུ་རྒྱལ་བས་གསུངས། ། ལྷའི་བུ་སྔོན་གྱི་མཐའ་ལ་སེམས་པས་གསོལ་པ། བསྐལ་པ་བྱེ་བ་གྲངས་མེད་དུ། །གནས་དང་གནས་མིན་རབ་མཁྱེན་པར། །རྣམ་པར་འདྲེན་པ་སྤྱོད་མཛད་པས། །དེས་ན་འཇིག་རྟེན་རྨོངས་མི་མངའ། །ལྷའི་བུ་སྔོན་གྱི་མཐའ་ལ་སྤྱོད་པས་གསོལ་པ། གནས་དང་གནས་མིན་བསྟེན་བགྱིས་ནས། །ལས་དང་རྒྱུ་རྣམས་དཔྱད་པས་ན། །ཁམས་དང་
257a
༄#། །དབང་པོ་མོས་པ་དང ། །བསམ་གཏན་སྔོན་གྱི་མཐའ་ཡང་མཁྱེན། །ལྷའི་བུ་སྔོན་གྱི་མཐའ་ལ་ཡོངས་སུ་རྟོག་པས་གསོལ་པ། ཁྱེད་ཀྱིས་སྔོན་མཐའ་ཡོངས་བརྟགས་པས། །སྟོབས་ཀྱི་ཡེ་ཤེས་རྣམ་བཅུ་པོ། །དཔའ་བོ་ཆེན་པོས་རྣམ་པར་སྤེལ། །དེས་ན་འཇིག་རྟེན་འདི་ལ་གཟིགས། །ལྷའི་བུ་སྔོན་གྱི་མཐའི་སྤྱོད་ཡུལ་གྱིས་གསོལ་པ། དཔའ་བོས་སེམས་ཅན་ཐམས་ཅད་ཀྱི། །སྔོན་གྱི་མཐའ་ཡི་སྤྱོད་པ་དང ། །དགེ་དང་མི་དགེའི་རྒྱུ་བ་རྣམས། །མཁྱེན་པས་འཇིག་རྟེན་གསོ་བ་མཛད། །ལྷའི་བུ་སྔོན་གྱི་མཐའི་སྤྱོད་པ་ལ་སོ་སོར་རྟོག་པས་གསོལ་པ། ཐུབ་པས་སྔོན་གྱི་སེམས་ཅན་གྱི། །སྔོན་མཐའི་སྤྱོད་པ་རབ་མཁྱེན་ཅིང ། །ཁམས་དང་མོས་པ་མཁྱེན་པས་ན། །དེ་ཕྱིར་སེམས་ཅན་གསོ་བ་མཛད། །ལྷའི་བུ་མོས་པའི་སྟོབས་ཅན་གྱིས་གསོལ་པ། བསྐལ་པ་བྱེ་བ་མཐའ་ཡས་སུ། །སྔོན་གྱི་མཐའ་ལ་བརྟགས་བགྱིས་ཀྱང ། །ཁྱོད་ཀྱི་དགོངས་པ་ཆགས་མི་མངའ། །དེས་ན་མགོན་ལ་བདག་མོས་ལགས། །ལྷའི་བུ་ཡེ་ཤེས་ལ་མོས་པས་གསོལ་པ། བསྐལ་པ་བྱེ་བ་གྲངས་མེད་དུ། །སྔོན་མཐའི་སྲིད་པ་བསམ་བགྱིས་ཀྱང ། །རྐང་གཉིས་གཙོ་བོས་ཡོན་ཏན་གྱི། །ཕ་རོལ་ཕྱིན་ནུས་འགའ་མ་མཆིས། །ལྷའི་བུ་ཕྱི་མའི་མཐའ་ལ་མཁས་པས་གསོལ་པ།
257b
ཕྱོགས་བཅུའི་འཇིག་རྟེན་འདི་དག་གི་།སྐྱེ་རྒུ་སྣ་ཚོགས་ལས་ལྡན་པ། །ཤི་འཕོ་སྐྱེ་བར་འགྱུར་བ་དག་།ཁྱོད་ཀྱིས་སངས་རྒྱས་སྤྱན་གྱིས་གཟིགས། །ལྷའི་བུ་ཕྱི་མའི་མཐའ་ལས་ངེས་པར་བྱུང་གིས་གསོལ་པ། རྒྱུ་གང་གིས་ནི་ལས་གང་ཞིག་།བགྱིས་ཤིང་རྒྱུད་དྲུག་མཆིར་འགྱུར་པ། །དེ་དག་ཐམས་ཅད་རྒྱལ་བས་མཁྱེན། །དེས་ན་ཐམས་ཅད་མཁྱེན་ཅེས་བགྱི། །ལྷའི་བུ་ཤི་འཕོ་དང་སྐྱེ་བ་མངོན་པར་ཤེས་པས་གསོལ་པ། ཁམས་གང་གི་ནི་སེམས་ཅན་གང ། །བསྒོས་པར་གྱུར་ཅིང་ལས་བགྱིས་པའི། །བག་ཆགས་ལས་དང་སེམས་ཅན་དག་།ཁྱོད་ཀྱིས་གཡོ་བ་མེད་པར་མཁྱེན། །ལྷའི་བུ་ཤི་འཕོ་དང་སྐྱེ་བ་རིག་པས་གསོལ་པ། བཤེས་གཉེན་ཇི་འདྲ་བསྟེན་བགྱིས་ཤིང ། །ལས་གང་མངོན་པར་འདུས་བགྱིས་པ། །འགྲོ་བ་གང་དུ་མཆིས་འགྱུར་བ། །ཐུབ་པ་ཁྱོད་ཀྱིས་དེ་ཡང་མཁྱེན། །ལྷའི་བུ་དགོངས་པ་ལ་མཁས་པས་གསོལ་པ། ལས་དེ་ཡི་ནི་བགྱིས་པ་གང ། །དགོས་པ་ཁྱོད་ཀྱིས་རབ་ཏུ་མཁྱེན། །གང་གིས་སླད་དུ་ལས་བགྱིས་པའི། །དེ་ཡང་མ་ལུས་རབ་ཏུ་མཁྱེན། །ལྷའི་བུ་དངོས་པོ་ལ་མཁས་པས་གསོལ་པ། དངོས་པོ་གང་དག་དམིགས་པ་དང ། །ལས་གང་མངོན་པར་འདུ་བགྱིས་པ། །ཐམས་ཅད་མཁྱེན་པས་དེ་མཁྱེན་ཏེ། །དེ་ནི་སངས་རྒྱས་སྤྱོད་ཡུལ་ལགས། །ལྷའི་བུ་དངོས་པོ་ལ་རིག་པས་གསོལ་པ། སེམས་
258a
༄#། །ཅན་རྣམས་ཀྱི་བསམ་མཁས་པ། །དངོས་དེ་ཇི་ལྟར་ཆགས་པ་དང ། །དེ་ནི་ཇི་ལྟར་གྲུབ་པ་ཡི། །ལས་དེ་ཁྱོད་ཀྱིས་མངོན་པར་མཁྱེན། །ལྷའི་བུ་ཤེས་པ་ལ་མཁས་པས་གསོལ་པ། ཤེས་པ་གང་གིས་དངོས་པོ་དེ། །བརྟགས་པར་གྱུར་པ་རབ་ཏུ་མཁྱེན། །དེ་ལ་ཇི་ལྟར་ཆགས་གྱུར་པའང ། །ཐུབ་པ་ཁྱེད་ཀྱིས་ཤིན་ཏུ་མཁྱེན། །ལྷའི་བུ་མངོན་པར་འདུ་བྱེད་པ་ལ་མཁས་ཀྱིས་གསོལ་པ། ཆགས་པ་གང་གིས་ལས་དེ་རྣམས། །ཉོན་མོངས་གང་གིས་འདུ་བགྱིས་པའི། །ཉོན་མོངས་དེ་དག་ཡང་དག་མཁྱེན། །དེ་བས་ཁྱོད་ནི་བདག་གི་མགོན། །ལྷའི་བུ་འགྲོ་བ་ལ་མཁས་པས་གསོལ་པ། འགྲོ་བ་གང་དུ་ལས་གང་གིས། །མཆི་ཞིང་སྒྲིབ་པ་གང་རྙེད་ནས།། འབྲས་བུ་ཐོབ་པར་མི་འགྱུར་བ། །དེ་ཀུན་སྤྱན་ལྡན་ཁྱོད་ཀྱིས་མཁྱེན། །ལྷའི་བུ་དམིགས་པ་ལ་མཁས་པས་གསོལ་པ། འགྲོ་བ་དག་ཏུ་སྐྱེས་རྣམས་ཀྱི། །གང་གི་ལས་རྣམས་སྨིན་གྱུར་པའི། །དམིགས་པ་ཁྱོད་ཀྱིས་རབ་མཁྱེན་ཏེ། །དེ་ལ་ཁྱོད་ཀྱི་བློ་གྲོས་འཇུག་།ལྷའི་བུ་བག་ཆགས་ལ་མཁས་པས་གསོལ་པ། འགྲོ་དང་འགྲོ་བར་མི་རྣམས་ཀྱིས། སྔོན་ཆད་བགྱིས་པའི་སྡིག་ལས་དང ། །དེ་བཞིན་དགེ་བའི་ལས་རྣམས་ཀྱི། །བག་ཆགས་ཁྱོད་ཀྱིས་རབ་ཏུ་མཁྱེན། །ལྷའི་བུ་ལས་ལ་མཁས་ཀྱིས་གསོལ་པ། འགྲོ་བར་
258b
འབྱུང་པོ་ཐམས་ཅད་ཀྱི། །རྙེད་དང་གསེར་དང་སླད་མ་དང ། །ལས་རྣམས་གསུམ་པོ་ཁྱོད་ཀྱིས་མཁྱེན། །དེ་ལ་སོ་སོའི་སྐྱེ་བོ་འཁྲུལ། །ལྷའི་བུ་རྣམ་པར་སྨིན་པ་ལ་མཁས་ཀྱིས་གསོལ་པ། ཆུང་ཞིང་རྣམ་སྨིན་ཆེ་བ་དང ། །ཆེ་ཞིང་རྣམ་སྨིན་ཆུང་བ་དང ། །ཆུང་ངམ་ཆེ་འམ་མཉམ་པའང་རུང ། །དེ་ལ་མུ་སྟེགས་ཅན་རྣམས་རྨོངས། །ལྷའི་བུ་ལས་ལ་མཁས་ཀྱིས་གསོལ་པ། །ཚེ་འདིའི་ལས་རྣམས་གང་ལགས་དང ། །སྐྱེས་པའི་ལས་རྣམས་གང་ལགས་དང ། །ལན་གསུམ་གཞན་གྱི་གང་ལགས་པ། །དེ་དག་སྤྱན་ལྡན་ཁྱོད་ཀྱིས་མཁྱེན། །ལྷའི་བུ་ཚེ་འདི་ལ་མྱོང་བར་འགྱུར་བ་ལ་མཁས་ཀྱིས་གསོལ་པ། ཚེ་འདི་ལ་ནི་གང་བགྱིས་པའི། །ལས་ཀྱི་རྣམ་སྨིན་མི་གང་དག་།མྱོང་བར་འགྱུར་བ་གང་དག་ལ། །སོ་སོའི་སྐྱེ་བོ་རྨོངས་པ་མཁྱེན། །ལྷའི་བུ་སྐྱེས་ནས་མྱོང་བར་འགྱུར་བ་ལ་མཁས་ཀྱིས་གསོལ་པ། གང་གིས་ལས་གང་བསགས་གྱུར་ཏེ། །སྐྱེས་ནས་རྣམ་པར་སྨིན་གྱུར་པ། །གང་ལ་འཇིག་རྟེན་གཏིང་མི་རྙེད། །ཤེས་རབ་ཆེན་པོས་དེ་ཡང་མཁྱེན། །ལྷའི་བུ་ལན་གྲངས་གཞན་ན་མྱོང་བར་འགྱུར་བ་ལ་མཁས་ཀྱིས་གསོལ་པ།་ལས་གང་བསྐལ་པ་བྱེ་བ་ཡི། །ཕྱི་དུས་རྣམ་པར་སྨིན་འགྱུར་ཞིང ། །དུས་གཞན་དག་ནི་ཡང་འབྱུང་བ། །དེ་དག་ཡང་དག་ཉིད་དུ་མཁྱེན། །ལྷའི་བུ་ཡོངས་སུ་མ་སྨིན་པ་
259a
༄#། །མྱོང་བར་འགྱུར་བ་ལ་མཁས་ཀྱིས་གསོལ་པ། ལས་རྣམས་གང་ཞིག་བགྱིས་གྱུར་པ། །ཡོངས་སུ་སྨིན་པར་མ་གྱུར་ན། །དེ་སྲིད་འབྲས་བུ་མི་འབྱིན་པ། །རྐང་གཉིས་མཆོག་གིས་དེ་ཡང་མཁྱེན། །ལྷའི་བུ་ཡོངས་སུ་མ་སྨིན་པ་མྱོང་བར་འགྱུར་བ་ལ་རྟོག་པས་གསོལ་པ། ལས་གང་དང་ནི་ལྡན་པས་ན། །སེམས་ཅན་འདི་ནི་སྐྱེར་འགྱུར་བ། །ཕམ་པ་མེད་པས་དེ་མཁྱེན་ཏེ། །ཡོངས་སུ་བརྟགས་ནས་རབ་ཏུ་མཁྱེན། །ལྷའི་བུ་ཡོངས་སུ་སྨིན་པ་མྱོང་བར་འགྱུར་བ་ལ་མཁས་པས་གསོལ་པ། ལས་ནི་ཇི་ལྟར་ཡོངས་སྨིན་ན། །འབྲས་བུ་དཀར་བར་འགྱུར་བ་མཁྱེན། །དེ་ལ་སྟོང་པར་རྣམ་པར་མཁྱེན། །དེ་ལ་ཁྱོད་ཀྱི་ཡེ་ཤེས་འཇུག་།ལྷའི་བུ་ཡོངས་སུ་སྨིན་པ་མྱོང་བར་འགྱུར་བ་ལ་ངེས་པས་གསོལ་པ། ཐམས་ཅད་མཁྱེན་པས་ལས་ཀྱི་རྣམས། །ལྕི་དང་ཡང་བ་རབ་ཏུ་མཁྱེན། །སེམས་ཅན་བསམ་པ་ཐུགས་སུ་ཆུད། །དེ་སླད་བཅོམ་ལྡན་བདག་གི་བླ། །ལྷའི་བུ་ལྕི་ཡང་ལ་མཁས་ཀྱིས་གསོལ་པ། ལས་གང་གིས་ནི་སེམས་ཅན་རྣམས། །ངན་སོང་མཆི་བར་འགྱུར་བ་དང ། ། ལྕི་བ་དང་ནི་ཡང་བ་གཟིགས། །དེ་ཤེས་མཁྱེན་པས་རབ་ཏུ་མཁྱེན། །ལྷའི་བུ་སེམས་ཅན་གྱི་སྤྱོད་པ་ལ་མཁས་ཀྱིས་གསོལ་པ། སེམས་ཅན་སྤྱོད་པ་ཉེར་བཟུང་ཞིང ། །
259b
ལས་ཀྱི་ལྕི་དང་ཡང་བ་དག་།དཔའ་བོ་ཁྱོད་ཀྱིས་རབ་ཏུ་མཁྱེན། །མུ་སྟེགས་ཅན་རྣམས་དེ་ལ་རྨོངས། །ལྷའི་བུ་སེམས་ཅན་གྱི་སྤྱོད་པ་ལ་སྤྱོད་པས་གསོལ་པ། སེམས་ཅན་སྤྱོད་པ་སྤྱད་མཛད་ཅིང ། །ལས་ཀྱི་རྣམ་པར་སྨིན་པ་བསྟན། །ཕོར་བུའི་ཆུ་དང་གངྒཱའི་ཆུ། །ལན་ཚཝས་རྣམ་པར་བསྟན་པ་བཞིན། །ལྷའི་བུ་ལས་ལ་མཁས་ཀྱིས་གསོལ་པ།་སློབ་དང་མི་སློབ་རྣམ་པར་སྨིན། །རྐང་གཉིས་དམ་པ་སྟོན་མཛད་ཅིང ། །ཀུན་ནས་ཉོན་མོངས་ལས་མྱོང་ནས། །ལས་ནི་ཟད་པར་འགྱུར་བ་བསྟན། །ལྷའི་བུ་སངས་རྒྱས་ཀྱི་ཡེ་ཤེས་ལ་རེག་པར་བྱེད་པས་གསོལ་པ། སངས་རྒྱས་སྤྱན་གྱིས་ཁམས་གསུམ་ན། །ལས་ཀྱི་འབྲས་བུ་བསྟན་པ་ན། །བྱིས་པ་དག་དང་མཁས་པ་གཟིགས། ། ཕྲ་གཟིགས་ཁྱོད་ལ་ཕྱག་འཚལ་ལོ། །ལྷའི་བུ་ལས་ཟད་པར་བྱེད་པས་གསོལ་པ། འཇིག་རྟེན་དག་ན་རྣམ་འདྲེན་ཁྱོད། །སེམས་ཅན་རྣམས་ཀྱི་ཤི་འཕོ་དང ། །སྐྱེ་བ་ཀུན་ལ་ཡེ་ཤེས་འཇུག་།མཁྱེན་པས་འཇིགས་མེད་ཕྱག་ཀྱང་འཚལ། །ལྷའི་བུ་དམིགས་པ་མེད་པ་ལ་སྤྱོད་པས་གསོལ་པ། འཆི་འཕོ་བ་དང་སྐྱེ་དང་ལས། །འགྲོ་དང་དེ་བཞིན་སེམས་ཅན་དང ། །རྣམ་སྨིན་རྨི་ལམ་འདྲར་བསྟན་པ། །འདྲེན་པ་རྐང་གཉིས་མཆོག་གིས་མཁྱེན། །ལྷའི་བུ་ཉོན་མོངས་པ་ལ་རྟོག་པས་གསོལ་པ། །ཇི་ལྟར་རྨི་ལམ་སྐོམ་པ་
260a
༄#། །ཞི། །ཤིན་ཏུ་བསིལ་བའི་ཆུ་འཐུངས་བཞིན། །རྐང་གཉིས་མཆོག་ཁྱོད་འདོད་ཆགས་དང ། །ཞེ་སྡང་གཏི་མུག་རྣམས་ཀྱང་ཟད། །ལྷའི་བུ་ཡོངས་སུ་རྟོག་པ་དང་བྲལ་བས་གསོལ་པ། འདོད་ཆགས་ཞེ་སྡང་གཏི་མུག་རྣམས། །ཡོངས་སུ་རྟོག་ལས་སྐྱེས་པ་སྟེ། །རྨི་ལམ་དགའ་བར་རྩེ་བ་བཞིན། །སྨྲ་མཆོག་ཁྱོད་ལ་ཕྱག་ཀྱང་འཚལ། །ལྷའི་བུ་ཡོངས་སུ་རྟོག་པ་ཞི་བར་བྱེད་པས་གསོལ་པ། ཡོངས་སུ་རྟོག་པ་རབ་ཞི་བས། །ཉོན་མོངས་ཟད་པ་རབ་བསྟན་ཏེ། །རྨི་ལམ་ན་ནི་སྤྲིན་མེད་ལྟར། །མི་མཆོག་ཁྱོད་ཀྱིས་རབ་ཏུ་བསྟན། །ལྷའི་བུ་ཟག་པ་ལ་རྟོག་པས་གསོལ་པ། རྨི་ལམ་ཆར་ཆེན་འབབ་པ་ལྟར། །དེ་བཞིན་ཟག་པ་རྣམས་འབྱུང་བར། །ཟག་པ་འབྱུང་བ་མཁས་པ་པོ། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་རྨི་ལམ་རྟོག་གིས་གསོལ་པ། རྨི་ལམ་ཆར་ཆེན་འབབ་པ་ལྟར། །དེ་བཞིན་ཟག་པ་རྣམས་འབྱུང་སྟེ། །ནོར་བ་རྣམས་ལ་ཟག་འབྱུང་བར། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་ཇི་ལྟ་བ་བཞིན་དུ་རྟོག་པས་གསོལ་པ། ཇི་ལྟར་བུ་མོའི་རྨི་ལམ་ན། །བུ་ཞིག་བྱུང་ལ་ཤི་འཕོས་ན། །དགའ་དང་སྡུག་བསྔལ་ཚོར་འགྱུར་བ། །དེ་བཞིན་འགྲོ་བ་ཁྱོད་ཀྱིས་གཟིགས། །ལྷའི་བུ་རྨི་ལམ་
260b
རྟོག་པས་གསོལ་པ། རྨི་ལམ་དག་ན་མགོ་བཅད་བཞིན། །ཁྱོད་ཀྱིས་ཟག་པ་ཟད་པ་གཟིགས། །དེ་ནི་མཁས་པ་རྣམས་ལ་བསྟན། །ཐམས་ཅད་གཟིགས་ལ་ཕྱག་ཀྱང་འཚལ།། ལྷའི་བུ་བློ་གྲོས་ངེས་པར་རྟོགས་ཀྱིས་གསོལ་པ། ཆོས་ཀུན་མཁྱེན་པ་ཁྱོད་ཀྱིས་ནི། །ཇི་ལྟར་རྨི་ལམ་མཛའ་ཕྲད་དང ། །བྲལ་བ་ཡང་དག་མ་མཆིས་གཟིགས། །འགྲོ་བ་ཇི་བཞིན་ཚིམ་པར་མཛད། །ལྷའི་བུ་ཡེ་ཤེས་ཡིད་ཀྱིས་གསོལ་པ། ཁྱོད་ཀྱིས་དམ་པའི་ཆོས་སྟོན་པ། །ཐོས་ནས་ཡིད་ནི་དགའ་འགྱུར་ཏེ། །རྨི་ལམ་དག་ན་རྨི་བསྟན་བཞིན། །དེ་ལྟར་རྒྱལ་པས་བསྟན་པར་མཛད། །ལྷའི་བུ་ཡོངས་སུ་དགའ་བའི་ཡིད་ཀྱིས་གསོལ་བ། མེ་ལོང་གཟུགས་བརྙན་སྣང་བ་བཞིན། །འགྲོ་བ་མཐའ་དག་གཟིགས་པས་ན། །བསམ་གཏན་མངའ་བ་ཁྱོད་ལ་ནི། །ལྷར་བཅས་འཇིག་རྟེན་ཡིད་ཀྱང་དགའ། །ལྷའི་བུ་བློ་གྲོས་ངེས་པས་གསོལ་པ། ཐུབ་པ་པི་ཝང་སྒྲ་འདྲ་བའི། །ཁྱོད་ཀྱི་དམ་ཆོས་ཐོས་གྱུར་ན། །ལྷའི་བུ་རྣམས་ཀྱང་ཐེ་ཚོམ་བོར། །རྒྱལ་བ་མཆོག་ལ་ཕྱག་ཀྱང་འཚལ། །ལྷའི་བུ་སྒྱུ་མས་ཚིམ་གྱིས་གསོལ་པ། སྒྱུ་མའི་མཁན་པོས་སྒྱུ་མ་དག་།བྱིས་པ་རྨོངས་བྱེད་ཡོངས་བསྟན་ན། །མི་མཁས་དེ་ལ་རྨོངས་པར་འགྱུར། །སྒྱུ་མ་བཞིན་དུ་ཁྱོད་ཀྱིས་བསྟན། །ལྷའི་བུ་སྤྲུལ་པ་ལ་སེམས་ཀྱིས་གསོལ་པ། ཇི་ལྟར་རྨི་ལམ་སྒྱུ་མཐོང་བ། །དེ་ལྟར་ཁྱོད་ཀྱིས་འགྲོ་བ་གཟིགས། །
261a
༄#། །མགོན་པོའི་བསྟན་པ་དེ་ཐོས་ནས། །བདག་ཅག་ཐེ་ཚོམ་མ་མཆིས་སོ། །ལྷའི་བུ་སྒྱུ་མ་ལས་ངེས་པར་བྱུང་གིས་གསོལ་པ། སྒྱུ་མའི་མཁན་པོས་སྒྱུ་སྤྲུལ་ཀྱང ། །སྒྱུ་མ་ལགས་པར་འཚལ་བས་ན། །དེ་ལ་རྨོངས་པར་འགྱུར་མ་མཆིས། །དེ་བཞིན་ཁྱོད་ཀྱིས་འགྲོ་བ་གཟིགས། །ལྷའི་བུ་རྟོགས་པའི་རྗེས་སུ་རྟོགས་ཀྱིས་གསོལ་པ། ཇི་ལྟར་བརྩོན་པས་རྨི་ལམ་ན། །སངས་རྒྱས་སྐུ་གཟིགས་བརྟགས་པ་བཞིན། །དེ་ལྟར་རྟོག་པས་འཇིག་རྟེན་བསྐྱེད། །རྣམ་པར་འདྲེན་པ་ཁྱོད་ཀྱིས་གཟིགས་ལྷའི་བུ་ཀུན་ཏུ་རྟོག་པ་འཇོམས་གྱིས་གསོལ་པ། ཀུན་རྟོག་འདོད་ཆགས་རྒྱུ་ལས་ཏེ། །འདོད་ཆགས་དངོས་པོས་བསྐྱེད་མ་ལགས། །རྟོག་པ་ངན་ལས་འདོད་ཆགས་བྱུང ། །དེ་ནི་རྣམ་འདྲེན་ཁྱོད་ཀྱིས་གཟིགས། །ལྷའི་བུ་ཡོངས་སུ་ཤེས་པ་དང་ལྡན་པས་གསོལ་པ། རི་སུལ་དག་ན་སྒྲ་བྱུང་བ། །བྲག་ཅ་སེམས་ཅན་སྒྲ་མ་ལགས། །དེ་བཞིན་འཇིག་རྟེན་ཁྱོད་ཀྱིས་གཟིགས། །དེ་སླད་འཇིག་རྟེན་ཆགས་མི་མངའ། །ལྷའི་བུ་སྟོན་པ་ལ་མཁས་པས་གསོལ་པ། སྒྲ་ནི་གང་ཡང་མ་མཆིས་ཏེ། །སྒྲ་ནི་བྲག་ཅ་འདྲ་བ་ལགས། །འོན་ཀྱང་མི་དབང་ཁྱོད་ཀྱིས་བསྟན། །བྱིས་པ་མང་པོ་རབ་ཏུ་བཙུད། །ལྷའི་བུ་ནན་ཏན་ལ་མཁས་པས་གསོལ་པ། ཆོས་རྣམས་དོན་ནི་གཞན་ལགས་ཀྱང ། །བྱིས་པ་རྣམས་ཀྱིས་
261b
གཞན་དུ་བརྟགས། །ནན་ཏན་ཆོས་ལས་ཤེས་པར་གྱིས། །དེ་ལ་བདག་ནི་ཐེ་ཚོམ་ཆད། །ལྷའི་བུ་དོན་གྱི་རྗེས་སུ་འབྲང་བས་གསོལ་པ། ཆོས་དོན་ཡང་དག་གང་ལགས་པ། །དེ་ནི་སུས་ཀྱང་མ་རྟོགས་ཤིང ། །སུས་ཀྱང་མ་བསྟན་འཚལ་མ་གྱུར། །དེ་སྐད་ཐུབ་པའི་མཆོག་གིས་གསུངས། །ལྷའི་བུ་ཆོས་ཀྱི་བརྡ་རྟོགས་པས་གསོལ་པ། ཟག་དང་དྲི་མ་ཉོན་མོངས་དང ། །བག་ཆགས་དང་ནི་རྟོགས་དང་རྟོག་།ཀུན་ནས་ཉོན་མོངས་རྣམ་དག་པ། །ཐུབ་པ་བརྡ་ཡི་ཚིག་ཀྱང་ལགས། །ལྷའི་བུ་ཀུན་ཏུ་རྟོག་པ་ལ་མཁས་པས་གསོལ་པ། ཀུན་ནས་ཉོན་མོངས་རྣམ་དག་དང ། །ཟག་པ་དག་དང་ཉོན་མོངས་དང ། །ངག་དང་བཤད་དང་ཉེ་དུ་དང ། །སྟོན་པ་འདི་ཀུན་མིང་ཙམ་ལགས། །ལྷའི་བུ་མི་གནས་པའི་བློ་གྲོས་ཀྱིས་གསོལ་པ།་ཁམས་གསུམ་རྣམས་ལ་མ་ཆགས་ཏེ། །ནམ་མཁའ་འདྲ་བའི་ཐུགས་མངའ་བ། །བྲལ་བར་གྱུར་ཅིང་སྦྱིན་པའི་གནས། །ཞི་བའི་སེམས་ལ་ཕྱག་ཀྱང་འཚལ། །ལྷའི་བུ་མ་གོས་པས་གསོལ་པ། ཐུབ་པ་ཁྱོད་ཀྱིས་ཐུགས་ཡིད་ནི། །གཟུགས་དང་གཟུགས་མེད་མི་གནས་ཤིང ། །འདོད་དང་མྱ་ངན་འདས་པ་ལ། །གནས་པ་མ་མཆིས་བར་སྣང་འདྲ། །ལྷའི་བུ་རེ་བ་མེད་པས་གསོལ་པ། འདོད་པའི་ཁམས་ལ་རེ་བ་སྤངས། །གཟུགས་དང་གཟུགས་མེད་གཉི་གར་མིན། །འདུ་འཛི་དག་དང་བྲལ་གྱུར་བ། །སྲེད་ཟད་ཁྱོད་ལ་ཕྱག་ཀྱང་
262a
༄#། །འཚལ། །ལྷའི་བུ་སྲེད་པ་བྱུང་བས་གསོལ་པ། འབྱུང་བ་དག་དང་འཇིག་པ་ལ། །ཁྱོད་ཀྱི་སྲེད་པ་ཡང་དག་ཆད། །ཁམས་གསུམ་ཀུན་ལ་ཆགས་མི་མངའ། །རྣམ་པར་འདྲེན་ལ་ཕྱག་ཀྱང་འཚལ། །ལྷའི་བུ་སྲེད་པ་ཟིལ་གྱིས་གནོན་གྱིས་གསོལ་པ། འཇིག་རྟེན་འདི་དག་ཟིལ་མནན་ནས། །ཁྱུ་མཆོག་དམ་པ་སྤྱོད་མཛད་ཅིང ། །སེམས་ཅན་འཇིག་རྟེན་སྒྲོལ་མཛད་པ། །ཐུགས་བརྩེ་ཁྱོད་ལ་ཕྱག་ཀྱང་འཚལ། །ལྷའི་བུ་སྲེད་པ་དང་བྲལ་གྱིས་གསོལ་པ། ཀུན་ཏུ་སྦྱོར་དང་བྲལ་བ་སྟེ། །ཡང་སྲིད་བས་པས་ཞིར་གྱུར་བ། །དག་པའི་བདག་ཉིད་དག་པའི་སེམས། །དུས་དང་བྲལ་ལ་ཕྱག་འཚལ་ལོ། །ལྷའི་བུ་ཇི་ལྟ་བ་བཞིན་དུ་རིག་པས་གསོལ་པ། ཆོས་རྣམས་ཐམས་ཅད་དངོས་མེད་པ། །ཇི་བཞིན་དཔའ་བོ་ཁྱོད་ཀྱིས་མཁྱེན། །བཅིངས་པ་མ་མཆིས་གྲོལ་མ་མཆིས། །ཡང་དག་གཟིགས་ལ་ཕྱག་ཀྱང་འཚལ། །ལྷའི་བུ་འདམ་ལས་བརྒལ་བས་གསོལ་པ། འདོད་པའི་འདམ་ལས་བརྒལ་བ་སྟེ། །སྲིད་པའི་འདམ་ལས་དེ་བཞིན་བརྒལ། །གཟིགས་པ་མི་མངའ་ལེན་མི་མངའ། །ཡང་སྲིད་བརྒལ་ལ་ཕྱག་ཀྱང་འཚལ། །ལྷའི་བུ་ཟང་ཟིང་སྤངས་ཀྱིས་གསོལ་པ། ཟང་ཟིང་སྤངས་ཤིང་དྲི་མ་སྤངས། །རེ་བ་སྤངས་ཤིང་སྡིག་པའང་སྤངས། །སངས་རྒྱས་སྒྲིབ་པ་
262b
རྣམས་སྤངས་པ། །དོན་རྟོགས་ཁྱོད་ལ་ཕྱག་ཀྱང་འཚལ། །ལྷའི་བུ་རེ་བ་སྤངས་ཀྱིས་གསོལ་པ། དོན་དང་དོན་མ་ལགས་པ་སྤངས། །ཆགས་པ་མི་མངའ་ངེས་རྟོགས་པ། །བདུད་ཀྱི་ཞགས་ལས་རྣམ་འདས་པ། །ལེན་མེད་ཁྱོད་ལ་ཕྱག་ཀྱང་འཚལ། །ལྷའི་བུ་ཕན་པར་འདོད་པས་གསོལ་པ། བདག་ཉིད་དང་ནི་གཞན་རྣམས་ཀྱི། །ལམ་གང་ཉོན་མོངས་རིམ་མེད་པ། །སྒྲིབ་པ་མེད་པར་གཟིགས་པ་པོ། །དཔའ་ཆེན་ཁྱོད་ཀྱིས་དེ་ཡང་གཟིགས། །ལྷའི་བུ་གྲགས་པ་ཐོབ་ཀྱིས་གསོལ་བ། འདྲེན་པ་འཇིག་རྟེན་རྣམ་གྲགས་པ། ། ཁྱོད་ཀྱིས་མཁྱེན་ལ་བརྩོན་པ་རྣམས། །ཇི་སྐད་བསྟན་བཞིན་རབ་རྟོག་ན། །ཉོན་མོངས་རྣམས་ནི་ནུབ་པར་འགྱུར། །ལྷའི་བུ་འཇིགས་པ་མེད་པས་གསོལ་པ། ཆོས་རྣམས་ཀུན་ལ་ངེས་པས་ན། །བསྔོ་བ་གང་ཡང་ཡོང་མ་གཟིགས། །ཡེ་ཤེས་རྒྱ་མཚོ་མི་བསྙེངས་པར། །སེངྒེའི་སྒྲ་ནི་སྒྲོག་པར་མཛད། །ལྷའི་བུ་གང་ནས་ཀྱང་འཇིགས་པ་མེད་པས་གསོལ་པ། འཇིགས་པ་ཀུན་ལས་ཡང་དག་བརྒལ། །ཟུག་རྔུ་ཐམས་ཅད་ཀུན་ཏུ་སྟོན། །བསྙེངས་པ་མི་མངའ་ཞུམ་མི་མངའ། །ཐམས་ཅད་ཟིལ་གནོན་ཕྱག་ཀྱང་འཚལ། ། ལྷའི་བུ་གནས་མེད་ཀྱིས་གསོལ་པ། ལྷ་རྣམས་དང་ནི་དྲི་ཟ་དང ། །བདུད་དང་ཚངས་པར་བཅས་པ་ཡིས། །ཁྱོད་ཀྱི་ཆོས་ལ་བརྒལ་མི་ནུས། །དེ་བས་ཁྱོད་ལ་བསྙེངས་མི་མངའ།།
263a
༄#། །ལྷའི་བུ་སེངྒེའི་རྩལ་གྱིས་གསོལ་པ། ཆོས་རྣམས་ཐམས་ཅད་ཡོངས་མཁྱེན་པས། །སངས་རྒྱས་གྱུར་ལ་འཇིགས་མི་མངའ། །བདག་ལ་ཆོས་ཀྱིས་སུས་རྒོལ་ཞེས། །བདེ་གཤེགས་ཁྱོད་ལ་དོགས་མི་མངའ། །ལྷའི་བུ་སྐྲག་མེད་ཀྱིས་གསོལ་པ། སེངྒེ་རི་སུལ་གནས་པ་ནི། །འཇིགས་པ་མ་མཆིས་སྐྲག་མ་མཆིས། ། རི་དྭགས་ཕྲ་མོ་ཡོངས་བཏུལ་ཏེ། །སྤ་བཀོང་གནས་ན་ང་རོ་སྒྲོག་།དེ་བཞིན་ཐམས་ཅད་མཁྱེན་པ་ཡང ། །མུ་སྟེགས་ཅན་རྣམས་ཡོངས་སྐྲག་སྟེ། །ལྷ་ཀླུ་དྲི་ཟའི་འཇིག་རྟེན་ན། ། མཚུངས་མེད་གཟིགས་ནས་གསུང་ཡང་སྒྲོག་།ལྷའི་བུ་ཐམས་ཅད་ཟིལ་གྱིས་གནོན་གྱིས་གསོལ་པ། འཇིག་རྟེན་རྣམ་འདྲེན་འཇིག་རྟེན་ན། །སངས་རྒྱས་ཉིད་ལ་བསྔོ་བགྱིད་པ། །འཇིག་རྟེན་གསུམ་ན་མ་མཆིས་ཏེ། །དེས་ན་རྒྱལ་བ་བདག་གི་སྐྱབས། །ལྷའི་བུ་སེངྒེའི་བློ་གྲོས་ཀྱིས་གསོལ་པ། ཐམས་ཅད་མཁྱེན་པ་ཐམས་ཅད་གཟིགས།། ཆོས་རྣམས་ཀུན་ལ་འཇིགས་མི་མངའ། །ཁྱོད་འདྲ་འཇིག་རྟེན་མ་མཆིས་ཏེ། །ཅིས་མི་བསྙེངས་ལ་ཕྱག་ཀྱང་འཚལ། །ལྷའི་བུ་རྗེས་སུ་མཐུན་པར་སྐྱེས་ཀྱིས་གསོལ་པ། སངས་རྒྱས་ཉིད་དུ་དམ་བཅས་ན། །འདི་ན་ཁྱོད་ལ་རྒོལ་མ་མཆིས། །འཇིག་རྟེན་འདྲེན་པ་ཆོས་ཀྱིས་ནི། །ཁྱོད་ལ་གང་རྒོལ་དེ་མ་མཆིས། །ལྷའི་བུ་མཛོད་འཛིན་གྱིས་
263b
གསོལ་པ། སེངྒེའི་ང་རོ་གསུང་བསྒྲགས་ཏེ། །ཁྱོད་ཀྱི་ཆོས་ཀྱི་མཛོད་བཟུང་བས། །སྲོག་ཆགས་བྱེ་བ་སྟོང་དག་གིས། །བྱང་ཆུབ་མཆོག་ཏུ་སེམས་ཀྱང་སྐྱེས། །ལྷའི་བུ་བརྟུལ་ཞུགས་རྗེས་སུ་མཐུན་གྱིས་གསོལ་པ། སངས་རྒྱས་རྗེས་མཐུན་བརྟུལ་ཞུགས་ཅན། །དཔལ་ཆེན་དེ་དག་ཐོབ་ཆེན་ཐོབ། །བྱང་ཆུབ་མཆོག་ཏུ་སེམས་བཏུད་ཅིང ། །གང་ཟག་མཆོག་ཏུ་དེ་དག་འགྱུར། །ལྷའི་བུ་རྗེས་སུ་མཐུན་པའི་ཆོས་ལ་དགའ་བས་གསོལ་པ། ཁྱོད་ཀྱི་བསྟན་པ་སུས་ཐོས་ཏེ། །བྱང་ཆུབ་མཆོག་ཏུ་སེམས་བཏུད་པ། །དེ་དག་འཇིག་རྟེན་སེམས་ཅན་ཆེ། །གང་ཟག་མཆོག་ཏུ་དེ་དག་འགྱུར། །ལྷའི་བུ་སེམས་དག་པས་གསོལ་པ། འཇིག་རྟེན་དག་ན་རྒོལ་མེད་པའི། །རྫོགས་པའི་སངས་རྒྱས་གསུང་ཐོས་ནས། །སྲོག་ཆགས་བྱེ་བ་སྟོང་དག་གིས། །བྱང་ཆུབ་མཆོག་ཏུ་སེམས་ཀྱང་བསྐྱེད། །ལྷའི་བུ་སེམས་རྒྱུན་ཡོངས་སུ་དག་པས་གསོལ་པ། ཡུན་རིང་དུས་ན་མི་དབང་གིས། །སངས་རྒྱས་བསླབ་ལ་ལེགས་བསླབ་པས། །དེ་སླད་ཁྱོད་ནི་ཐུགས་རྒྱུད་དག་།མཚན་རབ་སུམ་ཅུ་གཉིས་དང་ལྡན། །ལྷའི་བུ་ཟག་པ་མེད་པའི་ཡིད་ཀྱིས་གསོལ་པ། ཟག་པ་ཟད་པའི་སངས་རྒྱས་ཀྱིས། །སེངྒེའི་ང་རོ་བསྒྲགས་མཛད་དེ། །དམ་བཅས་པ་ལ་མངོན་བཞུགས་ན། །རྒོལ་བ་འདི་ན་ཡོང་མ་མཆིས། །ལྷའི་བུ་དེ་ཁོ་ནའི་རྗེས་སུ་སོང་བས་གསོལ་པ། ཁྱོད་ཀྱི་
264a
༄#། །གསུང་ལ་སྨྲ་འགྱུར་བའི། །ལྷ་དང་ལྷ་བུ་མི་དག་ནི། །འཇིག་རྟེན་གསུམ་ན་མ་མཆིས་ཏེ། །དེས་ན་ཐུབ་པ་སྟོབས་དང་ལྡན། །ལྷའི་བུ་ཟག་པ་ཟད་པ་ལ་མཁས་པས་གསོལ་པ། དགེ་སྦྱོང་དམ་པའི་ཟག་པ་ནི། །མ་ལུས་ཡོངས་སུ་བས་པ་སྟེ། །འདི་ན་ཁྱོད་ལ་རྒོལ་མ་མཆིས། །དེས་ན་སངས་རྒྱས་བདག་གི་ཕ། །ལྷའི་བུ་རྟག་ཏུ་བརྩོན་གྱིས་གསོལ་པ། ཁྱོད་ལ་ཉོན་མོངས་ལུས་སོ་ཞེས། །མི་དབང་ཁྱོད་ལ་གང་རྒོལ་བ། །རྣམ་པ་ཀུན་ཏུ་མི་དམིགས་ཏེ། །དེས་ན་སངས་རྒྱས་བསྙེངས་མི་མངའ། །ལྷའི་བུ་སེམས་ཞི་བས་གསོལ་པ། འདོད་ཆགས་ཞེ་སྡང་ཞི་བ་སྟེ། །གཏི་མུག་བག་ཆགས་བཅས་པར་ཞི། །ཉེས་སྤྱོད་ལས་ཀྱང་ཞི་བས་ན། །སེམས་ཞི་ཁྱོད་ལ་ཕྱག་འཚལ་ལོ། །ལྷའི་བུ་རྣལ་འབྱོར་སྤྱོད་པས་གསོལ་པ། རྣལ་འབྱོར་གང་གིས་ཉོན་མོངས་གང ། །བས་པར་འགྱུར་བ་ལྟ་བའི་ཚེ། །དེ་ལ་ཁྱོད་ཀྱིས་མཁྱེན་ཀུན་འཇུག ། དེས་ན་ཁྱོད་ལ་ཕྱག་ཀྱང་འཚལ། །ལྷའི་བུ་རྣལ་འབྱོར་ལ་མཁས་པས་གསོལ་པ། འདྲེན་པས་གང་ལ་བསླབ་པ་ཡི། །རྣལ་འབྱོར་ཚོགས་ནི་མཐའ་ཡས་ཏེ། །ཐམས་ཅད་མཁྱེན་པ་དེ་སླད་དུ། །ཉོན་མོངས་ཐམས་ཅད་མ་ལུས་བསལ། །ལྷའི་བུ་རྣལ་འབྱོར་བློ་གྲོས་ཀྱིས་གསོལ་པ། འཇིག་རྟེན་སྒྲོན་མ་ཁྱོད་ཀྱི་བློ། །རྣལ་འབྱོར་ལས་ནི་ཉམས་
264b
མ་མཆིས། །དེས་ན་ཁྱོད་ཀྱིས་ཉོན་མོངས་ཀུན། །བག་ཆགས་བཅས་པར་ཡོངས་སུ་བཙལ། །ལྷའི་བུ་ཞི་བ་རིག་པས་གསོལ་པ། ཉོན་མོངས་ཐམས་ཅད་ཞི་གྱུར་ནས། །བག་ཆགས་མ་ལུས་ཡོངས་སུ་བསལ། །བསྙེངས་པ་མི་མངའ་རྒྱལ་སྲས་དང ། །ཅིས་ཀྱང་མི་བསྙེངས་སྤྱོད་པ་མཛད། །ལྷའི་བུ་ཟད་པ་ལ་རྟོག་པས་གསོལ་པ། ཐུབ་པ་ཐམས་ཅད་མཁྱེན་པ་ཁྱོད། །ཉོན་མོངས་བག་ཆགས་བཅས་པར་བས། །འཇིག་རྟེན་སྒྲོན་མ་ཁྱོད་ལ་ནི། །མཚུངས་པ་གང་ཡང་མི་དམིགས་སོ། །ལྷའི་བུ་བག་ལ་ཉལ་ཕྱུང་གིས་གསོལ་པ།་ཁྱོད་ཀྱིས་བག་ཆགས་མ་ལུས་བསལ། །ཁྱོད་ལ་སྐྱོན་དྲི་ཡོང་མ་མཆིས། །དེ་སླད་སངས་རྒྱས་ཐམས་ཅད་མཁྱེན། །ལྷ་རྣམས་ཀུན་གྱི་ཐུབ་པའི་ཐུབ། །ལྷའི་བུ་མཐའ་ལ་གནས་པས་གསོལ་པ། ཟག་པ་རྣམས་ནི་སྤངས་པས་ན། །སྐྱེ་བ་ཡང་སྐྱེ་མ་ལགས་ཏེ། །ཐུབ་ཁྱོད་སྐྱེ་བ་ཐ་མ་པ། །དེས་ན་མགོན་པོ་བསྙེངས་མི་མངའ། །ལྷའི་བུ་ཚད་སྲུང་གིས་གསོལ་པ།་དཔའ་བོ་ཁྱོད་ཀྱིས་ས་བོན་སྤངས། །སྡུག་བསྔལ་མྱུ་གུ་ཚིག་པར་གྱུར། །མྱ་ངན་འཁྲི་ཤིང་རྣམ་པར་བསྐམས། །གདུང་བ་མེད་ལ་ཕྱག་ཀྱང་འཚལ། །ལྷའི་བུ་ཤིང་ཐགས་བཏོན་གྱིས་གསོལ་པ། ཐུབ་པ་ཐམས་ཅད་མཁྱེན་པ་ཁྱོད། །མ་རིག་ཤིང་ཐགས་རྣམས་ཀྱང་བསལ། །སངས་རྒྱས་སྤྱོད་པ་རྣམ་པར་སྦྱངས། །དེ་བས་ཚོན་པ་བསྙེངས་མི་
265a
༄#། །མངའ། །ལྷའི་བུ་སྲིད་པའི་ཕ་རོལ་ཏུ་སོང་བས་གསོལ་པ། སྲིད་པའི་མཚོ་ལས་ཡང་དག་བརྒལ། །རྣམ་པར་འདྲེན་པ་བྱ་བ་བྱས། །ཁྱོད་ཀྱིས་སྣང་བ་ཡང་དག་ཕྱུང ། །འཇིགས་མེད་ཁྱོད་ནི་དོན་ཀྱང་གྲུབ། །ལྷའི་བུ་མྱ་ངན་ལས་འདའ་བར་འགྲོ་བས་གསོལ་པ། ཐམས་ཅད་མཁྱེན་པ་ཞིར་གྱུར་པ། །ཉོན་མོངས་ཐམས་ཅད་རབ་ཏུ་བཤིག་།བག་ཆགས་རྡུལ་ཙམ་ཡོང་མི་མངའ། །མགོན་པོ་ཁྱོད་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་རྒྱལ་མཚན་གྱིས་གསོལ་པ། ཁྱོད་ཀྱིས་ཆོས་ཀྱི་རྒྱལ་མཚན་བསྒྲངས། །ང་རྒྱལ་རྒྱལ་མཚན་རབ་ཏུ་བསྙལ། །ཆོས་ཀྱི་ལམ་སྲང་མཐའ་ཡས་པ། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་ཆོས་ཀྱི་འབྱུང་གནས་ཀྱིས་གསོལ་པ།་སངས་རྒྱས་ཆོས་ཀྱི་འབྱུང་གནས་སོ། །ཐུབ་པ་ཆོས་རྣམས་ཀུན་མཁྱེན་པ། །སེམས་ཅན་ཀུན་གྱི་དགེ་བཤེས་གཉེན། །ཡེ་ཤེས་གཙོ་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་གོས་ཅན་གྱིས་གསོལ་པ། ཁྱོད་ཀྱི་སྲས་པོ་འཇིགས་མེད་པ། །སེངྒེའི་ང་རོ་རྣམ་སྒྲོག་ཀྱང ། །རྒྱལ་སྲས་དེ་དག་ཆོག་མེད་ཅིང ། །སངས་རྒྱས་ཆོས་ཀྱི་དོན་གྱིས་བསྒོམ། །ལྷའི་བུ་ཆོས་དོན་དུ་གཉེར་བས་གསོལ་པ། སངས་རྒྱས་ཆོས་རྣམས་དོན་གཉེར་བར། །ཁྱོད་ཀྱིས་སྲས་རྣམས་སེམས་བསྐྱེད་ཅིང ། །ཁྱོད་ཀྱིས་མི་འཇིགས་ཐོས་
265b
གྱུར་ནས། །མཁས་པ་དེ་དག་བྱང་ཆུབ་ཚོལ། །ལྷའི་བུ་ཆོས་ཀྱིས་སྐོམ་གྱིས་གསོལ་པ། ཁྱོད་ཀྱིས་མི་འཇིགས་ཐོབ་གྱུར་ནས། །སངས་རྒྱས་ཆོས་རྣམས་བཙལ་བའི་ཕྱིར། །སྲོག་ཆགས་བྱེ་བ་སྐོམ་གྱུར་ཏེ། །བརྩོན་འགྲུས་བརྟན་པ་རབ་ཏུ་བརྩོན།། །།བམ་པོ་བཅུ་གཅིག་པ། ལྷའི་བུ་ཆོས་ཀྱི་འཕགས་ཀྱིས་གསོལ་པ། སངས་རྒྱས་ཆོས་ཀྱིས་མངོན་འཕགས་ཤིང ། །འཇིགས་པ་མེད་པར་འདུལ་མཛད་པའི། །གསུང་བའི་མཆོག་གྱུར་ཁྱོད་མཐོང་ནས། །བརྟུལ་ཞུགས་མཆོག་ཅན་བྱང་ཆུབ་ཚོལ། །ལྷའི་བུ་ཆོས་འཛིན་གྱིས་གསོལ་པ། ཐུབ་པ་ཟབ་ཅིང་བལྟ་དཀའ་བའི། །ཆོས་ནི་ཁྱོད་ཀྱིས་རབ་བསྟན་པ། །ཁྱོད་ཀྱི་སྲས་ཀྱིས་ཐོས་གྱུར་ནས། །དེ་དག་བླ་མེད་བྱང་ཆུབ་ཚོལ། །ལྷའི་བུ་ལྟ་བ་མེད་པས་གསོལ་པ། ཁྱོད་ཀྱིས་སེངྒེའི་གསུང་ཐོས་ནས། །ཁྱོད་ཀྱི་སྲས་པོ་དཔའ་དེས་\་ཎGཱེཥ?\་པ། །ལུས་དང་སྲོག་ལ་མི་ལྟ་བར། །བྱང་ཆུབ་དོན་དུ་གཉེར་བར་བགྱིད། །ལྷའི་བུ་གཞན་དུ་མི་སེམས་པའི་བློ་གྲོས་ཀྱིས་གསོལ་པ། ཐུབ་པ་བསྙེངས་པ་མི་མངའ་བ། །ཁྱོད་ཀྱི་དམ་ཆོས་འདིར་ཐོས་ནས། །གཞན་དུ་སེམས་པ་མ་མཆིས་པར། །བརྟུལ་ཞུགས་མཆོག་ཅན་བྱང་ཆུབ་ཚོལ། །ལྷའི་བུ་གཞན་དུ་མི་འགྲོ་བས་གསོལ་པ། མི་དབང་ཁྱོད་ཀྱི་གསུང་ཐོས་ནས། །ཐེག་པ་གཉིས་པོ་སྤངས་བགྱིས་ཤིང ། །ལམ་གཞན་དུ་ནི་མི་མཆི་བར། །བླ་ན་མེད་པའི་བྱང་ཆུབ་ཚོལ།།
266a
༄#། །ལྷའི་བུ་ཉེ་བར་གནས་ཀྱིས་གསོལ་པ། སེངྒེའི་ང་རོ་འདི་བསྒྲགས་པ། །རྒྱལ་བའི་སྲས་ཀྱིས་ཐོས་གྱུར་ནས། །བྱང་ཆུབ་མཆོག་ལ་ཉེར་གྱུར་ཅིང ། །དེ་དག་རྐང་གཉིས་དམ་པར་འགྱུར། །ལྷའི་བུ་སྤོབས་པ་ཉེ་བར་གྱུར་པས་གསོལ་པ། གྲགས་ཆེན་ཁྱོད་ཀྱིས་གསུང་བརྗོད་པའི། །སྤོབས་པ་དེ་ནི་ཐོས་གྱུར་ནས། །སངས་རྒྱས་ཆོས་ལ་ཁྱོད་ཀྱི་སྲས། །ཀུན་ཀྱང་དགའ་བ་རབ་ཏུ་སྐྱེས། །ལྷའི་བུ་སྤོབས་པ་ཐོབ་པས་གསོལ་པ། འཇིགས་མེད་ཁྱོད་ཀྱིས་གསུང་བསྒྲགས་པ། །མ་སྨད་སྲས་ཀྱིས་ཐོས་གྱུར་ན། །དེ་དག་སྤོབས་པ་ནམ་དུ་ཡང ། །སངས་རྒྱས་ཉིད་ལས་ཕྱིར་མི་ལྡོག་།ལྷའི་བུ་རྟག་ཏུ་རབ་དགས་གསོལ་པ། འཇིགས་མེད་ཁྱོད་ཀྱིས་གསུང་བསྒྲགས་པས། །སྟོབས་ཆེན་ཁྱོད་ཀྱི་སྲས་ཀྱི་རྣམས། །རྟག་ཏུ་རབ་ཏུ་དགའ་གྱུར་ཅིང ། །མ་སྨད་དེ་དག་བྱང་ཆུབ་ཚོལ། །ལྷའི་བུ་ཡིད་ཞུམ་པ་མེད་པས་གསོལ་པ། ཁྱོད་ཀྱིས་གསུང་བསྒྲགས་ཐོས་གྱུར་ནས། །རྐང་གཉིས་དམ་པ་ཁྱོད་ཀྱི་སྲས། །དགའ་ཞིང་ཞུམ་པ་མ་མཆིས་པར། །བྱང་ཆུབ་མཆོག་ནི་ཚོལ་བར་བགྱིད། །ལྷའི་བུ་ཐོགས་མེད་ཡིད་ཀྱིས་གསོལ་པ། ཁྱོད་ཀྱིས་གསུང་བསྒྲགས་ཐོས་པས་ན། །སེམས་རངས་གྱུར་ཅིང་ཡིད་དགའ་སྟེ། །དེ་དག་ཡིད་ནི་ནམ་དུ་ཡང ། །བྱང་ཆུབ་ཉིད་དུ་ཐོགས་མ་མཆིས། །ལྷའི་བུ་ཆོས་ལ་བར་ཆད་
266b
མེད་ལ་མཁས་པས་གསོལ་པ། ཆོས་རྣམས་གང་ལ་བརྟེན་བགྱིས་ཀྱང ། །དཀར་པོའི་ཕྱོགས་དག་མི་འགྲིབ་ཅིང ། །དེ་ཡི་བར་ཆད་མི་འགྱུར་བའི། །གནས་ནི་ཐུབ་པ་ཁྱོད་ཀྱིས་མཁྱེན། །ལྷའི་བུ་ཆོས་ངེས་པར་བསྟན་པ་ལ་མཁས་པས་གསོལ་པ། དཀར་པོའི་ཕྱོགས་ལ་སྤྱོད་པ་ལ། །བར་ཆད་འབྱུང་བར་མི་འགྱུར་ཞིང ། །གནས་ཀྱང་མེད་པར་ཐུབ་པས་མཁྱེན། །དེས་ན་སྟོན་པ་བསྙེངས་མི་མངའ། །ལྷའི་བུ་ཆོས་ཀྱི་ངོ་བོ་ཉིད་ལ་མཁས་པས་གསོལ་པ། དགེ་ལ་ཀུན་ནས་ཉོན་མོངས་པ། །ནག་པོའི་ཕྱོགས་ཀྱི་རང་བཞིན་ཏེ། །ཁྱོད་ཀྱི་ཐུགས་ནི་དེས་མི་གོས། །གནས་ཀྱང་མེད་པར་ཐུབ་པས་མཁྱེན། །ལྷའི་བུ་རིགས་པ་ལ་མཁས་པས་གསོལ་པ། ནག་པོའི་ཆོས་ནི་ནམ་དུ་ཡང ། །དཀར་པོའི་ཆོས་དང་མི་འགྲོགས་པར། །རིགས་པར་བཅོམ་ལྡན་ཁྱོད་ཀྱིས་གསུངས། །དེས་ན་བཅོམ་ལྡན་བདག་གི་བླ། །ལྷའི་བུ་དགེ་བ་དང་མི་དགེ་བ་རིག་པས་གསོལ་པ། ཆོས་རྣམས་ཐམས་ཅད་མ་འདྲེས་པ།། དཔའ་བོ་ཆེན་པོ་ཁྱོད་ཀྱིས་མཁྱེན། །ཀུན་ནས་ཉོན་མོངས་བརྟགས་པས་ན། །དཀར་པོའི་ཕྱོགས་ལས་འགྲིབ་པར་འགྱུར། །ལྷའི་བུ་ལམ་ལ་མཁས་པས་གསོལ་པ། ཀུན་ནས་ཉོན་མོངས་སྤྱོད་པ་ལ། །དཀར་པོའི་ཕྱོགས་ནི་མི་འབྱུང་སྟེ། །དེ་ལྟར་འཚལ་བར་མ་གྱུར་ལ། །བར་ཆད་དུ་ནི་འགྱུར་བར་གསུངས། །ལྷའི་བུ་ཐར་པ་འདོད་ཀྱིས་གསོལ་པ། ནག་
267a
༄#། །པོའི་ཕྱོགས་ལ་བརྟེན་བགྱིད་ན། །ཐར་པར་འདོད་པ་མང་པོ་ཡི། །བར་དུ་གཅོད་པར་འགྱུར་ཞེས་གསུངས། །དེས་ན་རྒྱལ་ཁྱོད་ཐམས་ཅད་མཁྱེན།། ལྷའི་བུ་དག་པའི་སེམས་ཀྱིས་གསོལ་པ། སེམས་གྲོལ་བགྱི་བར་གང་འཚལ་བས། །ཀུན་ནས་ཉོན་མོངས་ཤེས་བྱ་ཞེས། །དཔའ་བོ་ཆེན་པོ་ཁྱོད་ཀྱིས་གསུངས། །དེ་ཁྱོད་འཇིག་རྟེན་མཆོད་རྟེན་ལགས། །ལྷའི་བུ་ཉོན་མོངས་མཐོང་གིས་གསོལ་པ། ཀུན་ནས་ཉོན་མོངས་སྤྱོད་བགྱིད་པ། །ཀུན་ནས་ཉོན་མོངས་མ་འཚལ་ན། །དམ་པའི་ཆོས་ནི་ཤེས་མི་ནུས། །དེ་སྐད་བདེ་བར་གཤེགས་པས་གསུངས། །ལྷའི་བུ་སྡིག་མཐོང་གིས་གསོལ་པ། སྡིག་པ་རྣམས་ལ་བརྟེན་བྱས་ཀྱང ། །དགེ་བ་མི་འགྲིབ་གང་སྨྲ་བ། དེ་ནི་ཐར་ཆོས་སྐལ་མེད་ཅེས། །རྐང་གཉིས་དམ་པ་ཁྱོད་ཀྱིས་གསུངས། །ལྷའི་བུ་གདུལ་བར་བྱ་བས་གསོལ་པ། ཆགས་པ་གདུལ་བར་གང་འདོད་དང ། །ཞེ་སྡང་གཏི་མུག་གདུལ་འདོད་པས། །ཐུབ་པའི་སྤོབས་པ་ཅི་འདྲ་བ། །དེ་ལྟ་བུ་ནི་ནན་ཏན་བགྱི། །ལྷའི་བུ་ཀུན་ནས་ཉོན་མོངས་པ་དག་པས་གསོལ་པ། དག་དང་ཀུན་ནས་ཉོན་མོངས་པ། །མི་མཁས་གང་རྣམས་མི་ཤེས་པ། །དེ་དག་སྟོན་པ་སངས་རྒྱས་མིན། །དེ་སྐད་དྲང་སྲོང་མཆོག་གིས་གསུངས། །ལྷའི་བུ་ཐར་པ་ལ་བརྩོན་པས་གསོལ་པ། ཉོན་མོངས་འགྲིབ་
267b
པར་འགྱུར་བའི་ཆོས། །རྒྱལ་བ་ཡིས་ནི་གང་བསྟན་པ། །དེ་བརྟེན་ཉོན་མོངས་མི་ཟད་ཅེས། །ཁྱོད་ལ་རྒལ་བ་ཡོང་མ་མཆིས། །ལྷའི་བུ་ཐར་པ་ལ་མངོན་པར་ཕྱོགས་པས་གསོལ་པ།་ཆོས་གང་ཉོན་མོངས་གང་གི་རྣམས། །ཟད་འགྱུར་ཐུབ་པས་བསྟན་པ་ལ། །ཡང་དག་བརྩོན་བྱས་མི་ཟད་ཅེས། །རྒོལ་བ་འདི་ན་ཡོང་མི་དམིགས། །ལྷའི་བུ་རྣལ་འབྱོར་ལ་བརྩོན་པས་གསོལ་པ། རྒྱལ་བ་ཁྱོད་ཀྱིས་ཉན་ཐོས་ལ། །གང་གི་དོན་དུ་ཆོས་བསྟན་པ། །དེ་བརྩོན་བགྱིས་པས་མི་ཐོབ་ཅེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་མི་འཇིགས་དཔལ་གྱིས་གསོལ་པ། འདོད་ཆགས་སྤང་ཕྱིར་མི་སྡུག་པ། །བསྟན་ལ་ཡང་དག་བརྩོན་བགྱིས་ན། །འདོད་ཆགས་ཟད་པར་མི་འགྱུར་ཞེས། །ཁྱོད་ལ་རྒོལ་བ་ཡོང་མ་མཆིས། ། ལྷའི་བུ་འགྲོ་བ་མེད་པ་རབ་ཏུ་ཤེས་ཀྱིས་གསོལ་པ། ཤིན་ཏུ་བསྙེངས་པ་མི་མངའ་བ། །ཞེ་སྡང་སྤང་ཕྱིར་བྱམས་གསུངས་པ། །དེ་བསྒྲུབས་སེལ་བར་མི་འགྱུར་ཞེས། །དགྲ་འཇོམས་ཁྱོད་ལ་རྒོལ་མ་མཆིས། །ལྷའི་བུ་མིག་རྣམ་པར་དག་གིས་གསོལ་པ། །ཤེས་རབ་གཏི་མུག་སྤང་བའི་ཕྱིར། །གསུངས་པ་དེ་ལ་བརྟེན་བགྱིས་ཀྱང ། །གཏི་མུག་སེལ་བར་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་རྣམ་པར་རྟོག་པ་འཇོམས་ཀྱིས་གསོལ་པ། རྣམ་པར་རྟོག་པའི་གཉེན་པོར་ནི། །དབུགས་འབྱུང་རྔུབ་པ་དྲན་
268a
༄#། །གསུངས་པ། །དེ་ལ་བརྩོན་བགྱིས་མི་ཞི་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་མཚན་མ་མེད་པ་ལྷུར་ལེན་པས་གསོལ་པ། ངའོ་སྙམ་པ་སྤང་སླད་དུ། །སྟོང་ཉིད་ཁྱོད་ཀྱིས་བཀའ་སྩལ་ཏེ། །དེས་ནི་དེ་ཞི་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་ངའོ་སྙམ་པའི་ང་རྒྱལ་སྤངས་ཀྱིས་གསོལ་པ། ང་སྙམ་ང་རྒྱལ་སྤང་སླད་དུ། །མཚན་མ་མེད་པ་ཁྱོད་ཀྱིས་གསུངས། །བསྟན་ཀྱང་ཞི་བར་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་སེམས་རྒྱུད་རྣམ་པར་དག་པས་གསོལ་པ། ལྷག་པའི་བསམ་པ་དག་པ་ཡིས། །ཉོན་མོངས་ཐམས་ཅད་འཇིག་པར་འགྱུར། །དེས་ནི་ཉོན་མོངས་མི་ཟད་ཅེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་འདུ་ཤེས་རྣམ་པར་བཤིག་གིས་གསོལ་པ། ཕྱོགས་དང་གཉེན་པོའི་རྣམ་པ་དང ། །ཉོན་མོངས་ལམ་དང་ལམ་འཇུག་པ། །འཇིགས་པ་མེད་པར་རྒོལ་བ་ན། །ཐུབ་པ་ཆེན་པོ་མ་མཐོང་ངོ ། །ལྷའི་བུ་ཐ་སྙད་ཤིན་ཏུ་ཤེས་པས་གསོལ་པ། བཅོམ་ལྡན་ཕྱོགས་དང་ཕྱོགས་མིན་དང ། །ཟད་དང་མ་ཟད་ཐ་སྙད་ཙམ། །འཇིགས་པ་མ་མཆིས་རྒོལ་བགྱིད་པ། །ཐུབ་པ་དེ་ནི་མིང་ཙམ་མོ། །ལྷའི་བུ་ལུས་ཀྱི་ལས་དུལ་བས་གསོལ་པ། མཁྱེན་པས་ཡོངས་སུ་མཁྱེན་གྱུར་ནས། །ཁྱོད་ཀྱི་
268b
སྐུ་ཡི་འཕྲིན་ལས་འཇུག་།ཐམས་ཅད་མ་ལུས་མཁྱེན་པས་ན། །དེས་ན་འདྲེན་པ་ཐམས་ཅད་མཁྱེན། །ལྷའི་བུ་ལུས་ཀྱི་ལས་ཡོངས་སུ་ཤེས་པས་གསོལ་པ། སེམས་ཅན་རྣམས་ལ་ཐུགས་བརྩེ་བས། །དཔའ་ཁྱོད་སྐུ་ཡི་འཕྲིན་ལས་ནི། །མཐའ་དག་ཤིན་ཏུ་ངེས་པ་ལགས། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་ལུས་ཀྱི་ལས་ཤིན་ཏུ་ངེས་པས་གསོལ་པ། སྐུ་ཡི་འཕྲིན་ལས་རབ་ངེས་པར། །ལུས་ཅན་ཀུན་ལ་སྨན་སླད་དུ། །འཇིག་རྟེན་སྒྲོན་མ་ཁྱོད་མཛད་དེ། །དེས་ན་ཁྱོད་ནི་གང་ཟག་མཆོག་།ལྷའི་བུ་ལུས་ཀྱི་ལས་ཀྱི་མཐའ་ཤིན་ཏུ་མཐོང་བས་གསོལ་པ། སེམས་ཅན་ཀུན་ལ་སྨན་སླད་དུ། །འདྲེན་པ་ཐམས་ཅད་མཁྱེན་པ་ནི། །སྐུ་ཡི་འཕྲིན་ལས་དག་པ་དང ། །ལེགས་པར་ཡོངས་སུ་བརྟགས་དང་ལྡན། །ལྷའི་བུ་ལུས་ཀྱི་ལས་ཀྱི་མཐའ་ཤིན་ཏུ་མཉམ་པར་བཞག་པས་གསོལ་པ། ཤིན་ཏུ་མཉམ་པར་བཞག་སྐུ་དང ། །སྐུ་ཡི་འཕྲིན་ལས་དག་པ་དང ། །ལྡན་པར་སེམས་ཅན་བདེ་དོན་དུ། །གང་ཟག་མཆོག་ནི་སྤྱོད་པ་མཛད། །ལྷའི་བུ་ཚིག་གྲུབ་ཀྱིས་གསོལ་པ། སྙན་ཅིང་ཡོན་ཏན་ལྡན་པ་དང ། །རྩུབ་པ་ཡོངས་སུ་སྤངས་བའི་གསུང ། །མཁྱེན་པས་ཤིན་ཏུ་ཡོངས་བརྟགས་ཤིང ། །མགོན་པོ་ཁྱོད་ནི་གསུང་བ་མཛད། །ལྷའི་བུ་དུས་སུ་སྨྲ་བས་གསོལ་པ། དུས་སུ་དོན་དང་ལྡན་པ་དང ། །དོན་
269a
༄#། །མེད་ཡོངས་སུ་སྤངས་པའི་གསུང ། །གཟུང་བར་འོས་དང་བླང་འོས་པ། །འདྲེན་པ་ཁྱོད་ནི་གསུང་བ་མཛད། །ལྷའི་བུ་སྡུམས་བྱེད་བློ་གྲོས་ཀྱིས་གསོལ་པ། དབྱེན་དུ་འགྱུར་བ་ཡོངས་སྤངས་ཏེ། །འདུམ་པར་འགྱུར་དང་ཡིད་འོང་བ། །དབྱེན་མེད་འབྲས་བུ་རྣམ་པར་སྨིན། །སྔོན་ཆད་ཁྱོད་ཀྱིས་གསུང་དུ་བརྗོད། །ལྷའི་བུ་མི་སླུ་བས་གསོལ་པ། སྲོག་གི་དོན་དུའང་ཁྱོད་ཀྱིས་ནི། །སྲིད་པ་རྣམས་སུ་རྫུན་མ་གསུངས། །དེ་བས་ཁྱོད་ཀྱི་གྲགས་པ་ཀུན། །འཇིག་རྟེན་དག་ན་ཐོགས་མ་མཆིས། །ལྷའི་བུ་ཡང་དག་པར་སྨྲ་བས་གསོལ་པ། འདི་ལྟར་འགྲོ་བ་ཐམས་ཅད་ཀྱང ། །སངས་རྒྱས་ཆོས་རྣམས་བཙལ་སླད་དུ། །ཐུབ་པའི་གསུང་ལ་བསྟོད་པ་ནི། །ཡང་དག་གསུངས་བའི་རྒྱུ་མཐུན་ལགས། །ལྷའི་བུ་ཡང་དག་པའི་མཐའ་ལས་ངེས་པར་བྱུང་གིས་གསོལ་པ། མི་མཆོག་ཁྱོད་ཀྱི་བདེན་པ་ཡིས། །རྫོགས་པའི་བྱང་ཆུབ་འདི་བསྒྲུབས་ཏེ། ། ཆོས་ཀྱི་ཡང་དག་རང་བཞིན་ཡང ། །རྐང་གཉིས་དམ་པ་ཁྱོད་ཀྱིས་མཁྱེན། །ལྷའི་བུ་ཡང་དག་པ་ལ་བརྟུལ་བས་གསོལ་པ། འདུས་བྱས་དག་ནི་ཆོས་ཀྱི་རྣམས། །ཡང་དག་ཇི་བཞིན་ལྟ་བ་དང ། །ཆོས་རྣམས་ཡང་དག་མཚན་ཉིད་ཀྱང ། །མི་ཡི་དབང་བོས་རབ་ཏུ་མཁྱེན། །ལྷའི་བུ་ལས་ལ་རྟོག་པས་གསོལ་པ། ཡེ་ཤེས་ཡོངས་སུ་དག་པ་ཡིས། །
269b
བདག་ཉིད་དང་ནི་གཞན་དག་གི་།ཚིག་གི་ལས་ཀྱང་རབ་ཏུ་མཁྱེན། །དེས་ན་རྒྱལ་བ་མཉམ་མ་མཆིས། །ལྷའི་བུ་ཡིད་ལ་རྟོག་པས་གསོལ་པ། མི་ཡི་དབང་པོའི་ཐུགས་ཀྱི་ལས། །ཇི་སྙེད་གང་དག་འཇུག་པ་ནི། །དེ་དག་འགྲོ་བ་ཐུགས་རྗེས་འཇུག་།འགྲོ་ཕན་ཁྱོད་ལ་ཕྱག་ཀྱང་འཚལ། །ལྷའི་བུ་ཡིད་ཀྱི་རྣམ་པར་རྟོག་པ་ལ་མཁས་པས་གསོལ་པ ། འགྲོ་བ་ཐུགས་རྗེ་བསྐྱེད་ནས་ནི། །གང་ལ་ཁྱོད་ནི་སྤྱོད་མཛད་པ། །དེ་ལ་ཐུགས་ནི་དུལ་བར་བྱུང ། །འགྲོ་ཕན་ཁྱོད་ལ་ཕྱག་ཀྱང་འཚལ། །ལྷའི་བུ་ཐབས་ལ་མཁས་པས་གསོལ་པ།་འགྲོ་བའི་བསམ་པ་རྣམ་དཔྱོད་ནས། །རྣམ་འདྲེན་ཐུགས་ཀྱི་འཕྲིན་ལས་འཇུག་།ཐུབ་པ་ཡེ་ཤེས་སྣ་ཚོགས་ནི། །མཁྱེན་བཞིན་ཀུན་ཏུ་རབ་ཏུ་འཇུག་།ལྷའི་བུ་ཡིད་རྣམ་པར་བཤིག་གིས་གསོལ་པ། སངས་རྒྱས་ས་དང་ཡིད་ཀྱི་ལས། །སེམས་ཅན་ཐུགས་རྗེས་གཟིགས་པས་འབྱུང ། །སངས་རྒྱས་ཉིད་ལ་ཡེ་ཤེས་ཐབས། །རང་བཞིན་མེད་པར་རབ་ཏུ་མཁྱེན། །ལྷའི་བུ་འདས་པ་ལ་མཁས་པས་གསོལ་པ། སྦྱིན་དང་ཚུལ་ཁྲིམས་བཟོད་པ་དང ། །བརྩོན་འགྲུས་བསམ་གཏན་དག་ལ་ཡང ། །གང་གིས་གང་ལ་མངོན་སྤྱད་པ། །སྔོན་གྱི་དུས་ཀྱང་རབ་ཏུ་མཁྱེན། །ལྷའི་བུ་འདས་པ་ལ་རྟོག་པས་གསོལ་པ། བྱང་ཆུབ་མཆོག་ནི་ཚོལ་མཛད་ཅིང ། །གང་དྲུང་ཁྱོད་ཀྱིས་སྔོན་སྤྱད་པ། །སྔོན་གྱི་སྤྱོད་པ་
270a
༄#། །ཡོངས་བརྟགས་ནས། །སངས་རྒྱས་བྱེ་བ་རབ་ཏུ་མཁྱེན། །ལྷའི་བུ་སྔོན་གྱི་ཚུལ་ཕུན་སུམ་ཚོགས་པས་གསོལ་པ། བསྐལ་པ་བྱེ་བ་གྲངས་མེད་དུ། །གང་དུ་ཁྱོད་ཀྱིས་སྔོན་སྤྱད་པ། །སྔོན་གྱི་ཚུལ་ནི་དགོངས་མཛད་ཀྱང ། །ཁྱོད་ཀྱི་ཐུགས་ཡིད་ཐོགས་མི་མངའ། །ལྷའི་བུ་སྔོན་གྱི་ཚུལ་ལ་ཡོངས་སུ་རྟོག་པས་གསོལ་པ། སངས་རྒྱས་མང་ལས་བྱུང་བ་ཡི། །ཏིང་འཛིན་མངོན་པར་བསྒྲུབ་བྱ་བ། །སངས་རྒྱས་བྱེ་བ་གྲངས་མེད་ལ། །རྣམ་པ་འདྲེན་པ་ཁྱོད་ཀྱིས་ཞུས། །ལྷའི་བུ་སྔོན་གྱི་སྦྱོར་བ་ལས་ངེས་པར་བྱུང་གིས་གསོལ་པ། སྔོན་གྱི་སངས་རྒྱས་དྲུང་དག་ཏུ། །གྲངས་མེད་དཔག་ཏུ་མེད་པ་ཡི། །ཏིང་འཛིན་སྒོ་དག་འདྲེན་པ་ཡིས། །ཞུས་ཤིང་སྒོམ་པ་མཛད་པར་འགྱུར། །ལྷའི་བུ་སྔོན་གྱི་གནས་ལ་རྟོག་པས་གསོལ་པ། འཁོར་བའི་ཉེས་པ་རབ་མང་དང ། །བཀུར་སྟི་རྣམ་པ་སྣ་ཚོགས་དག་།གཟིགས་པས་སེམས་ཅན་རྣམས་ལ་སྟོན། །སེམས་ཅན་ལོང་བ་རྣམས་ཀྱང་འགྲེལ། །ལྷའི་བུ་སྔོན་གྱི་དུས་ན་འཕྲུལ་པས་གསོལ་པ། གཞན་དང་གཞན་དག་ཟོས་ཤིང་འཚལ། །རྩེ་ཞིང་རབ་ཏུ་དགའ་བ་བགྱིས། །གནོད་པ་མི་ཟད་བགྱིས་པ་དག་།གཞན་དང་གཞན་ཡང་ཁྱོད་ཀྱིས་གཟིགས། །ལྷའི་བུ་སྔོན་གྱི་སྤྱོད་པས་ཡང་དག་པར་བྱུང་གིས་གསོལ་པ། ཐམས་ཅད་མཁྱེན་པ་
270b
འགྲོ་རྟོགས་པ། །ཁྱོད་ཀྱི་ཡེ་ཤེས་འདས་དུས་ཀྱི། །ལས་དང་བསམ་གཏན་སྙོམས་འཇུག་དང ། །འགྲོ་བ་རྣམས་ལ་ཐོགས་མ་མཆིས། །ལྷའི་བུ་ཕྱི་མའི་མཐའ་ལ་མཁས་པས་གསོལ་པ། འདྲེན་པ་ཁྱོད་ཀྱི་མཁྱེན་པ་ནི། །མ་འོངས་དུས་ཀྱི་འཆི་འཕོ་དང ། །སྐྱེ་དང་ལས་ཀྱི་རྣམ་སྨིན་ལ། །ཐོགས་པར་འགྱུར་བ་མ་མཆིས་སོ། །ལྷའི་བུ་མ་འོངས་པའི་སྤྱོད་ཡུལ་གྱིས་གསོལ་པ། བརྟན་པ་འགྲོ་བ་མཁས་ཁྱོད་ཀྱི། །མཁྱེན་པ་ཕྱི་དུས་སེམས་ཅན་གྱི། །བསམ་དང་ལས་ཀྱི་འབྲས་བུ་དང ། །འགྲོ་བ་རྣམས་ལ་ཐོགས་མ་མཆིས། །ལྷའི་བུ་སྲིད་པ་ལས་བསྐྱོད་ཀྱིས་གསོལ་པ། ཁམས་རྣམས་གསུམ་པོ་འདི་དག་དང ། །དུས་གསུམ་ཀུན་ལ་མཁས་ཁྱོད་ཀྱི། །ཡེ་ཤེས་མཆོག་ནི་མི་ཆགས་ཏེ། །སྲིད་པའི་སྤྱོད་ཡུལ་ཁྱོད་ཀྱིས་མཁྱེན། །ལྷའི་བུ་ཐ་སྙད་ལ་སྤྱོད་པས་གསོལ་པ། ལས་དང་སེམས་ཅན་འགྲོ་བ་དང ། །རྣམ་པར་སྨིན་པ་མྱོང་བ་དག་།དེ་དག་ཐམས་ཅད་མིང་ཙམ་དུ། །རྐང་གཉིས་དམ་པ་བསྟན་པ་མཛད། །ལྷའི་བུ་ད་ལྟར་བྱུང་བ་ལ་ཡང་དག་པར་རྟོག་པས་གསོལ་པ། དཔའ་བོ་ཁྱོད་ཀྱི་མཁྱེན་པ་ནི། །ད་ལྟར་བྱུང་བ་ཐོགས་མ་མཆིས། །གྲངས་མེད་སངས་རྒྱས་ཞིང་རྣམས་ནི། འཇིག་རྟེན་མགོན་པོ་རབ་ཏུ་མཁྱེན། །ལྷའི་བུ་ད་ལྟར་བྱུང་བ་ལ་རྣམ་པ་དཔྱོད་པས་གསོལ་པ། མི་ཡི་དབང་པོས་རྣམ་དཔྱད་ནས། །བྱིས་པའི་བློ་གྲོས་རྨོངས་
271a
༄#། །བགྱིས་པ། །དུས་གསུམ་དངོས་པོ་མ་མཆིས་པར། །ངེས་པར་མཉམ་པ་ཉིད་དུ་གཟིགས། །ལྷའི་བུ་མི་གནས་པའི་བློ་གྲོས་ཀྱིས་གསོལ་པ། དུས་གསུམ་གནས་པ་མ་མཆིས་ཤིང ། །ངོ་བོ་ཉིད་ལ་མི་གནས་ཏེ། །དངོས་པོ་ཐམས་ཅད་དངོས་མེད་པར། །རྣམ་པར་འདྲེན་པ་ཁྱོད་ཀྱིས་གཟིགས། །ལྷའི་བུ་དུས་གསུམ་མངོན་པར་བསྐུལ་བས་གསོལ་པ། འདས་པ་དག་དང་མ་འོངས་དང ། །ད་ལྟར་བྱུང་བའི་ཕུང་པོ་རྣམས། །མ་མཆིས་དངོས་པོ་མ་མཆིས་པར། །སྐྱེས་བུ་དམ་པས་བསྟན་པ་མཛད། །ལྷའི་བུ་ཆགས་མེད་ཡིད་ཀྱིས་གསོལ་པ། དུས་གསུམ་སེམས་ཅན་ཐམས་ཅད་ལ། །སྙིང་པོ་མཆིས་པར་མ་བསྟན་ཏེ། །སྒྱུ་མ་སྨིག་རྒྱུ་མིག་ཡོར་དང ། །བྲག་ཅ་ལྟ་བུར་ཁྱོད་ཀྱིས་བསྟན། །ལྷའི་བུ་དུས་གསུམ་དཔོག་གིས་གསོལ་པ། འདྲེན་པ་ཁྱོད་ཀྱིས་མཁྱེན་པ་ནི། །དུས་གསུམ་པོ་དག་ཀུན་ཏུ་ཡང ། །སྒྱུ་མ་ལྟ་བུར་མཁྱེན་པ་ན། ། ཁྱོད་ཀྱི་དབང་པོ་ཆགས་མི་མངའ། །ལྷའི་བུ་མོས་པ་ཡོངས་སུ་རིག་པར་བྱེད་ཀྱིས་གསོལ་པ། གང་གི་ནུབ་མོ་དཔའ་ཁྱོད་ཀྱིས། །བྱང་ཆུབ་མངོན་དུ་བགྱིས་གྱུར་པ། །དེ་དུས་ཚུན་ཆད་མོས་པ་ལ། །བྲི་བར་གྱུར་པར་ཡོང་མི་གདའ། །ལྷའི་བུ་མོས་པ་ཡང་དག་ཐོབ་ཀྱིས་གསོལ་པ། འཇིག་རྟེན་སྒྲོན་མའི་མོས་པ་ནི། །རབ་ཏུ་རྒྱུན་ཆད་མི་འགྱུར་ཏེ། །རྟག་པར་
271b
ཁྱོད་ཀྱི་མོས་པ་དེས། །ཁྱོད་ཀྱི་སྲས་རྣམས་མོས་པ་ཆེ། །ལྷའི་བུ་མོས་པས་མངོན་འཕགས་ཀྱིས་གསོལ་པ། ཆབ་ལས་པདྨ་ཇི་བཞིན་དུ། །ཁྱོད་ནི་མོས་པས་མངོན་དུ་འཕགས། ། འཇིག་རྟེན་དག་གིས་མི་གོས་ཏེ། །པདྨར་ཆབ་ཀྱིས་ཇི་བཞིན་ནོ། །ལྷའི་བུ་མོས་པས་ཡོངས་སུ་གྲོལ་གྱིས་གསོལ་པ། འཇིག་རྟེན་མགོན་དང་མོས་པ་ནི། །ཆོས་ཀྱི་དབྱིངས་ཞེས་བརྗོད་པ་སྟེ། །གཉིས་མེད་གཉིས་སུ་བགྱིར་མ་མཆིས། །སྨད་པ་མེད་པ་ཁྱོད་ཀྱིས་གཟིགས། །ལྷའི་བུ་བརྩོན་འགྲུས་ཡང་དག་ཐོབ་ཀྱིས་གསོལ་པ། གཟི་བརྗིད་ཆེན་པོ་བརྩོན་འགྲུས་ཀྱིས། །བྱང་ཆུབ་ཡང་དག་བརྙེས་པར་གྱུར། །མཛད་པ་མཛད་ཀྱང་མགོན་པོ་ཁྱོད། །བརྩོན་འགྲུས་བཏང་བ་ཡོང་མ་མཛད། །ལྷའི་བུ་དྲན་པ་ཕུན་སུམ་ཚོགས་པས་གསོལ་པ། དཔའ་བོ་ཆེན་པོའི་དགོངས་པ་ནི། །ཐམས་ཅད་ཀུན་ཏུ་རྗེས་སུ་འཇུག་།མཛད་པ་མཛད་ཀྱང་མགོན་པོ་ཁྱོད། །དགོངས་པ་བྲི་བ་ཡོད་མ་མཆིས། །ལྷའི་བུ་སེམས་མཉམ་པར་བཞག་པས་གསོལ་པ། མགོན་པོ་རྟག་ཏུ་མཉམ་བཞག་སྟེ། །སེམས་ཅན་རྣམས་ཀྱི་སྤྱོད་པ་མཁྱེན། །འདྲེན་པ་སྤྱོད་པའི་དབང་གིས་ནི། །སེམས་ཅན་རྣམས་ལ་ཆོས་ཀྱང་སྟོན། །ལྷའི་བུ་ཤེས་རབ་ལྷུར་ལེན་གྱིས་གསོལ་པ། །འཇིག་རྟེན་སྒྲོན་མར་གྱུར་ཁྱོད་ཀྱིས། །ཡེ་ཤེས་རྒྱ་མཚོའི་མཐའ་མ་ནི། །བསྐལ་པ་བྱེ་བར་བརྗོད་བགྱིད་ཀྱང ། །སངས་
272a
༄#། །རྒྱས་རྣམས་ཀྱིས་བཤད་མི་སྤྱོད། །ལྷའི་བུ་རྣམ་པར་གྲོལ་བ་ལ་མཁས་པས་གསོལ་པ། རྣམ་པར་གྲོལ་དང་མ་གྲོལ་བ། །གང་སླད་ཁྱོད་ཀྱིས་མ་བརྙེས་པས། །མཚུངས་པ་མེད་པ་ཁྱོད་ལ་ནི། །རྣམ་གྲོལ་ཡོངས་སུ་ཉམས་མི་མངའ། །ལྷའི་བུ་རྣམ་པར་གྲོལ་བའི་ཡེ་ཤེས་ལ་བརྩོན་པས་གསོལ་པ། ཐུབ་པ་ཁྱོད་ནི་རྣམ་གྲོལ་ནས། །ངོ་བོ་ཉིད་མེད་མཁྱེན་པས་ན། །རྣམ་གྲོལ་ཡེ་ཤེས་གཟིགས་པ་ནི། །ཡང་དག་མཁྱེན་པ་ཉམས་མི་མངའ། །ལྷའི་བུ་སྔོན་གྱི་སྲིད་པ་རྣམ་པར་སྤྱོད་ཀྱིས་གསོལ་པ། མར་མེ་མཛད་པ་ཚུན་ཆད་དུ། །དཔའ་བོ་ཡང་དག་གཟིགས་ཁྱོད་ཀྱིས། །སྤྱོད་ལ་འཁྲུལ་པ་མི་མངའ་སྟེ། །དེས་ན་སངས་རྒྱས་ལགས་ཞེས་བསྟོད། །ལྷའི་བུ་ཟབ་མོ་ལ་སྤྱོད་པས་གསོལ་པ། སྲོག་ཆགས་གཞན་དག་ཇི་བཞིན་དུ། །བདེ་གཤེགས་ཁྱོད་ལ་ཆགས་མི་མངའ། །ཆོས་ཀྱི་རང་བཞིན་མཁྱེན་པས་ན། ། རང་བཞིན་དེ་ལ་རྨོངས་མི་མངའ། །ལྷའི་བུ་བློ་གྲོས་ཡངས་པས་གསོལ་པ། ཐམས་ཅད་མཁྱེན་པ་ཁྱོད་ལ་ནི། །རྣམ་པ་ཀུན་ཏུ་བསྙེལ་མི་མངའ། །མགོན་པོ་དགོངས་པ་ཉེར་བཞག་པས། །ཐུབ་པ་འབྲུ་མར་སྣོད་དང་འདྲ། །ལྷའི་བུ་སེམས་གཡེང་བ་མེད་ཀྱིས་གསོལ་པ། འཇིག་རྟེན་སྒྲོན་མ་ཁྱོད་ལ་ནི། །མཉམ་པར་མ་བཞག་སེམས་མི་
272b
མངའ། །མ་འདྲེས་སངས་རྒྱས་ཆོས་ཀྱི་རྣམས། །སྲོག་ཆགས་ཀུན་གྱིས་ཤེས་པར་དཀའ། །ལྷའི་བུ་ཡེ་ཤེས་ལ་རབ་ཏུ་གནས་ཀྱིས་གསོལ་པ། བདེ་བར་གཤེགས་པ་ཁྱོད་ལ་ནི། །མ་བརྟགས་བཏང་སྙོམས་མི་མངའ་སྟེ། །མི་ཡི་དབང་པོའི་སངས་རྒྱས་ཆོས། །མ་འདྲེས་པ་ནི་བསམ་མི་ཁྱབ། །ལྷའི་བུ་ཐམས་ཅད་ཟིལ་གནོན་གྱིས་གསོལ་པ། སྐྱེས་བུ་ཁྱུ་མཆོག་ཁྱོད་ལ་ནི། །འཇིག་རྟེན་གསུམ་ན་མཚུངས་མ་མཆིས། །ཐམས་ཅད་མཁྱེན་པ་མ་ཕམ་པ། །ཁྱོད་ཀྱིས་ཆོས་རྣམས་ཐམས་ཅད་མཁྱེན། །ལྷའི་བུ་སྙིང་པོ་བླངས་པས་གསོལ་པ། སེམས་ཅན་སྙིང་པོ་བླ་ན་མེད། །ཆོས་རྣམས་ཀུན་ལ་འཇིགས་མི་མངའ། །སངས་རྒྱས་ཀུན་དང་མཉམ་བརྙེས་པ། །སངས་རྒྱས་བྱང་ཆུབ་ཕྱག་འཚལ་ལོ། ། གནས་གཙང་མའི་ལེའུ་སྟེ། ཉི་ཤུ་རྩ་བཞི་པའོ།། །།དེ་ནས་དེའི་ཚེ་གཞན་མུ་སྟེགས་ཅན་སྤྱོད་པ་ཅན་དང ། ཀུན་ཏུ་རྒྱུ་དྲུག་ཁྲིས་ལྷ་མ་ཡིན་དང ། ནམ་མཁའ་ལྡིང་དང ། ཀླུའི་བུ་མོ་དང ། ཀླུ་དང ། གྲུལ་བུམ་དང ། དྲི་ཟ་དང ། གནོད་སྦྱིན་དང ། མི་འམ་ཅི་དང ། ཕྲེང་ལྡན་གླང་པོ་ཆེ་ཅན་དང ། རྒྱལ་ཆེན་བཞིའི་རིས་དང ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ཚངས་པ་དང ། འོད་གསལ་དང ། དགེ་རྒྱས་དང ། འབྲས་བུ་ཆེ་
273a
༄#། །བའི་ལྷ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས། གནས་གཙང་མའི་རིས་ཀྱི་ལྷ་དག་གིས་བསྟོད་པ་བརྗོད་པ་ཡང་ཐོས་ནས་ངོ་མཚར་ཐོབ་པར་གྱུར་ཏེ། ཆོས་ཀྱི་ཚུལ་ལ་འཇུག་པ་འདི་ཐོས་ནས་འདི་ལྟར་སྔོན་ཆད་མ་ཐོས་པའི་ཆོས་ཀྱི་ཚུལ་ཐོས་པས་ཡིད་གཉིས་སུ་གྱུར། ནེམ་ནུར་དང་ཐེ་ཚོམ་ཟ་བར་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ། སྔོན་ཆད་མ་ཐོས་པའི་ཆོས་བསྟན་པ་འདི་ཐོས་ནས་བདག་ཅག་ནི། ཀུན་ཏུ་རྒྱུའི་གནས་ཀྱང་མི་འཚལ། ཁྱིམ་གྱི་གནས་ཀྱང་མི་འཚལ་བར་གྱུར་ཅིང ། འདི་ལྟར་སྔོན་ཆད་མ་ཐོས་པའི་ཆོས་ཀྱི་ཚུལ་འདི་ཐོས་ནས་ཆོས་འདི་ལ་ནེམ་ནུར་དང་ཐེ་ཚོམ་དུ་གྱུར་ཏེ།་སེམས་དང་བར་ཡང་མ་གྱུར་མོད་ཀྱི། འོན་ཀྱང་དགེ་སྦྱོང་གཽ་ཏ་མ་ཁྱོད་ལ་བདག་ཅག་ཡིད་ཆེས་པ་མཆིས་སོ། །དེ་ཅིའི་སླད་དུ་ཞེ་ན། འདི་ལྟར་དགེ་སྦྱོང་གཽ་ཏ་མ་ཁྱོད་ཀྱིས་རྫུ་འཕྲུལ་མངོན་པར་འདུ་བྱ་བ་འདི་ལྟ་བུ་མངོན་པར་མཛད་དེ། རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་མཛད་པས་བདག་ཅག་གིས་ལྷའི་འཁོར་རྒྱ་ཆེན་པོ་འདི་དང ། ཐམས་ཅད་དང་ལྡན་པའི་འཁོར་ཕལ་ཆེར་གཽ་ཏ་མ་ཁྱེད་ཀྱིས་ལེགས་པར་གསུངས་པ་འཚལ་ཅིང་ཡིད་རངས་པར་གྱུར་པ་མཐོང་སྟེ། དེས་ན། བདག་ཅག་
273b
དགེ་སྦྱོང་གཽ་ཏ་མ་ཁྱོད་ལ་དད་པ་མཆིས་པར་གྱུར་ཏོ། །ཀྱེ་གཽ་ཏ་མ། གང་འབྲས་བུ་ཆེ་བའི་ལྷ་རྣམས་ཀྱིས་ཆོས་ཐམས་ཅད་ནི། དེ་བཞིན་གཤེགས་པའོ། །ཞེས་སྨྲས་པ་དེ་ལ་ཇི་ལྟར་ཆོས་ཐམས་ཅད་དེ་བཞིན་གཤེགས་པ་སྙམ་དུ་བདག་ཅག་ཐེ་ཚོམ་ཆེར་འཚལ་ལོ། །དགེ་སྦྱོང་གཽ་ཏ་མ། ཁྱོད་ནི། ཅི་ནས་བདག་ཅག་ལེགས་པར་བཤད་པའི་དོན་དེ་རྟགས་ནས་མུན་པ་མེད་པར་གྱུར་ཏེ་སྟན་འདི་ལས་ལྡང་བར་འགྱུར་བ་དེ་ལྟར་བདག་ཅག་ལ་ཆོས་སྟོན་སྤྱོད་དོ། །སྙམ་སྟེ། བདག་ཅག་དགེ་སྦྱོང་གཽ་ཏ་མ་ཁྱོད་ལ་དེ་ལྟར་མངོན་པར་དག་པར་གྱུར་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་གཞན་མུ་སྟེགས་ཅན་སྤྱོད་པ་ཅན་དང ། ཀུན་ཏུ་རྒྱུ་རྣམས་ལ་འདི་སྐད་ཅེས་བཀའ་སྩལ་ཏོ། ། ཀུན་ཏུ་རྒྱུ་དག་།དེའི་ཕྱིར་ཁྱོད་ཉིད་ལ་དྲིའི། ཁྱོད་ཀྱིས་ཇི་ལྟར་བཟོད་པ་དེ་ལྟར་ལན་ཐོབ་ཅིག་།དགེ་སྦྱོང་གཽ་ཏ་མ། ལེགས་སོ། །ཞེས་གསོལ་ཏེ། ཀུན་ཏུ་རྒྱུ་དེ་དག་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་རྒྱུ་དག་།ཁྱོད་ཀྱིས་ཇི་ལྟར་མངལ་དུ་འཇུག་པ་ཤེས་སམ་།དེ་དག་ནས་གསོལ་པ། ཀྱེ་གཽ་ཏ་མ། བདག་ཅག་གིས་བསྟན་བཅོས་ལས་ཐོས་ན་གསུམ་འདུས་ནས་མངལ་དུ་འཇུག་པར་འགྱུར་ཏེ། གང་འདི་ཕ་དང་མ་གཉིས་ཀྱང་ཚོགས་པ་
274a
༄#། །དང ། ཆགས་པར་ཡང་གྱུར་པ་དང ། ཆགས་ནས་ཀྱང་འདོད་པའི་རྣམ་པར་རྟོག་པ་རྣམས་ཀྱིས་རྣམ་པར་བརྟགས་པས། འདོད་ཆགས་ཀྱང་འབྱུང་བ་དེའི་ཚེ་མངལ་དུ་འཇུག་པར་འགྱུར་རོ། །ཞེའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་རྒྱུ་དག་།འདི་ལ་ཇི་སྙམ་དུ་སེམས། ཕ་དང་མ་གཉིས་རྣམ་པར་རྟོག་པའི་ཚེ་འདོད་ཆགས་དེ་མའི་སེམས་ལས་བྱུང་ངམ། གསོལ་བ། ཀྱེ་གཽ་ཏ་མ། མ་ལགས་སོ། །མའི་རྣམ་པར་རྟོག་པ་ལས་བྱུང་ངམ། ཀྱེ་གཽ་ཏ་མ། མ་ལགས་སོ། །ཕའི་སེམས་ལས་བྱུང་ངམ། ཀྱེ་གཽ་ཏ་མ། མ་ལགས་སོ། །ཕའི་རྣམ་པར་རྟོག་པ་ལས་བྱུང་ངམ། ཀྱེ་གཽ་ཏ་མ། མ་ལགས་སོ། །ཀུན་ཏུ་རྒྱུ་དག་།འདི་ལ་ཇི་སྙམ་དུ་སེམས།་ཕའི་འདོད་ཆགས་གང་ཡིན་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ། དེ་ནི། མ་ལགས་སོ། །ཀུན་ཏུ་རྒྱུ་དག་།འདི་ཇི་སྙམ་དུ་སེམས། ཕའི་སེམས་གང་ཡིན་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ། དེ་ནི། མ་ལགས་སོ། །ཀུན་ཏུ་རྒྱུ་དག། འདི་ལ་ཇི་སྙམ་དུ་སེམས། ཕའི་ཀུན་ཏུ་རྟོག་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ། དེ་ནི། མ་ལགས་སོ། །ཀུན་ཏུ་རྒྱུ་དག་།འདི་ལ་ཇི་སྙམ་དུ་སེམས། མངལ་ན་གནས་པ་དེ་ལྷ་ལས་འཆི་འཕོས་ཏེ་མའི་མངལ་དུ་ཞུགས་སམ། ཀྱེ་གཽ་ཏ་མ། མ་འཚལ་
274b
ཏོ། །ཀུན་ཏུ་རྒྱུ་དག་།འདི་ལ་ཇི་སྙམ་དུ་སེམས། མངལ་ན་གནས་པ་མི་དང ། ལྷ་མ་ཡིན་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་ནས་ཤི་འཕོས་ཏེ་མའི་མངལ་དུ་ཞུགས་སམ། ཀྱེ་གཽ་ཏ་མ། མ་འཚལ་ལོ། །ཀུན་ཏུ་རྒྱུ་དག་།འདི་ལ་ཇི་སྙམ་དུ་སེམས། མངལ་ན་གནས་པ་དེ་གཟུགས་ཡོད་པའམ ། གཟུགས་མེད་པ་ཞིག་མའི་མངལ་དུ་ཞུགས་སམ། ཀྱེ་གཽ་ཏ་མ། མ་འཚལ་ཏོ། །ཀུན་ཏུ་རྒྱུ་དག་།འདི་ལ་ཇི་སྙམ་དུ་སེམས། གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་མའི་མངལ་དུ་ཞུགས་སམ། ཀྱེ་གཽ་ཏ་མ། མ་འཚལ་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་གཞན་མུ་སྟེགས་ཅན་ཀུན་ཏུ་རྒྱུ་དེ་དག་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་རྒྱུ་དག་།ཆོས་འདི་ནི། ཟབ་ཅིང་ཕྲ་སྟེ། མཁས་པ་ཤེས་པ་བློ་དང་ལྡན་པས་རིག་པར་བྱ་བ་ཡིན་ཏེ། བརྟག་ཏུ་མེད་ཅིང་བརྟག་པའི་ཡུལ་མ་ཡིན་ལ་བལྟ་དཀའ་ཞིང་ཤེས་པར་དཀའ་བས་དེ་ནི། ཁྱོད་ཡུན་རིང་པོར་གཞན་དུ་བལྟས་པ། གཞན་དུ་མོས་པ། གཞན་དུ་དད་པ། གཞན་དུ་བརྩོན་པ། གཞན་གྱི་ལྟ་བའི་གནས་ལ་གནས་པ་རྣམས་ཀྱིས་ཤེས་པར་མི་ནུས་མོད་ཀྱི། ཀུན་ཏུ་རྒྱུ་དག་།འོན་ཀྱང་རིགས་ཀྱི་བུའམ་རིགས་ཀྱི་བུ་མོ་དག་ཚུལ་དང་འདྲ་བའི་དགེ་བའི་
275a
༄#། །བཤེས་གཉེན་ལ་བརྟེན་ནས་ཆོས་ཟབ་མོ་རྣམས་ལ་མིག་སྐྱེ་བར་འགྱུར་ཏེ། ཀུན་ཏུ་རྒྱུ་དག་།འདི་ལྟ་སྟེ། དཔེར་ན། མི་མིག་གི་དབང་པོ་ཉམས་པ་ནི། དེའི་ཚུལ་དང་འདྲ་བའི་གསོ་བ་བྱེད་པ་དགེ་བའི་བཤེས་གཉེན་ལ་བརྟེན་ན། ཚེ་འདི་ཉིད་ལ་མིག་ཡོངས་སུ་དག་པར་འགྱུར་ཏེ། མིག་དེས་ཀྱང་ཚེ་འདི་ཉིད་ལ་གཟུགས་རྣམས་མཐོང་བར་འགྱུར་རོ། །ཀུན་ཏུ་རྒྱུ་དག་།དེ་བཞིན་དུ་རིགས་ཀྱི་བུའམ། རིགས་ཀྱི་བུ་མོ་ཤེས་རབ་ཀྱི་མིག་ཉམས་པར་གྱུར་པས་ཀྱང་ཚུལ་དང་འདྲ་བའི་དགེ་བའི་བཤེས་གཉེན་ལ་བརྟེན་ན། ཤེས་རབ་ཀྱི་མིག་རྣམ་པར་དག་པར་འགྱུར་ཏེ། དེས་ཀྱང་ཆོས་ཟབ་མོ་རྣམས་མཐོང་བར་འགྱུར་རོ། །ཀུན་ཏུ་རྒྱུ་དག་།ཁྱེད་ཀྱང་ཡུན་རིང་པོ་ནས་གཞན་དུ་བལྟས་པ། སྔོན་ལོག་པའི་གདམས་ངག་གིས་བསླུས་པ། ཆོས་མ་ཡིན་པ་ལ་ཆོས་སུ་འདུ་ཤེས་པ། ཐར་པ་མ་ཡིན་པ་ལ་ཐར་པར་འདུ་ཤེས་པ། འབྱུང་བ་མ་ཡིན་པ་ལ་འབྱུང་བར་འདུ་ཤེས་པ། ཆུད་ཟོས་པ་རྣམས་ཀྱིས་ཆུད་གཟན་པ་ཡིན་ཏེ། ཀུན་ཏུ་རྒྱུ་དག་།འདི་ལྟ་སྟེ། དཔེར་ན། ལོང་བའི་དམིགས་བུ་ལོང་བས་བྱས་ན་གང་འདི་བཀྲི་བ་དང ། ཁྲིད་པ་དེ་གཉི་ག་ཡང་ཚུལ་མ་ཡིན་པར་སྡུག་བསྔལ་ཐོབ་པར་འགྱུར་བར་ཤེས་པར་བྱའོ། །ཀུན་ཏུ་རྒྱུ་དག་།དེ་བཞིན་
275b
དུ་དགེ་སྦྱོང་ངམ། བྲམ་ཟེ་གང་ལ་ལ་སྟོན་པ་མ་ཡིན་པར་བདག་ཅག་ནི། སྟོན་པ་ཡིན་ནོ། །ཞེས་ཁས་འཆེ་བ་དང ། ཡང་དག་པར་རྫོགས་པའི་སངས་རྒྱས་མ་ཡིན་པར་བདག་ཅག་ནི། ཡང་དག་པར་རྫོགས་པའི་སངས་རྒྱས་ཡིན་ནོ། །ཞེས་ཁས་འཆེ་བ་དང ། འབྱུང་བ་ལ་མཁས་པ་མ་ཡིན་པར་བདག་ཅག་ནི། འབྱུང་བ་ལ་མཁས་པའོ། ། ཞེས་ཁས་འཆེ་བ་དང ། འབྱུང་བ་མཐོང་བ་མ་ཡིན་པར་བདག་ཅག་ནི། འབྱུང་བ་ཡིན་ནོ། །ཞེས་ཁས་འཆེ་བ་དང ། མུ་སྟེགས་བྱེད་པ་མ་ཡིན་པར་བདག་ཅག་ནི། མུ་སྟེགས་ཅན་བྱེད་པ་ཡིན་ནོ། །ཞེས་ཁས་འཆེ་བ་ཡིན་ཏེ། དེ་དག་སྟོན་པ་མ་ཡིན་པར་སྟོན་པའོ། །ཞེས་ཁས་འཆེ་ཞིང་གང་རྗེས་སུ་སྟོན་པ་དེ་ནི། ལོག་པར་རྗེས་སུ་སྟོན་པར་འགྱུར། ཡང་དག་པར་རྫོགས་པའི་སངས་རྒྱས་མ་ཡིན་པར་གང་ཁོང་དུ་ཆུད་པར་བྱེད་པ་དེ་ནི། ལོག་པར་ཁོང་དུ་ཆུད་པར་བྱེད་པར་འགྱུར། གང་འབྱུང་བ་ལ་མཁས་པ་མ་ཡིན་པར་གང་འབྱིན་པ་དེ་ནི། ལོག་པར་འབྱིན་པར་འགྱུར། འབྱུང་བ་མཐོང་བ་མ་ཡིན་པར་གང་འབྱུང་བ་སྟོན་པ་དེ་ནི། ལོག་པར་སྟོན་པར་འགྱུར། མུ་སྟེགས་བྱེད་པ་མ་ཡིན་པར་གང་སྒྲོལ་བ་དེ་ནི། ལོག་པར་སྒྲོལ་བར་འགྱུར་ཏེ། དེ་དག་ནི། ཚུལ་མ་ཡིན་པར་སྡུག་བསྔལ་ཐོབ་པར་འགྱུར་རོ། །ཀུན་ཏུ་རྒྱུ་དག། འདི་
276a
༄#། །ལྟ་སྟེ།་དཔེར་ན། བ་ལང་རྫི་རབ་ཀ་ལ་མཁས་པ་མ་ཡིན་པས་རབ་ཀ་མ་ཡིན་པར་བ་ལང་བསྒྲལ་ན། དེའི་བ་ལང་དེ་དག་གིས་ཕ་རོལ་དང་ཚུ་རོལ་གྱི་འགྲམ་མི་རྙེད་པར་འཁྱིལ་ཏེ། དེ་ཉིད་དུ་ཚུལ་མ་ཡིན་པར་སྡུག་བསྔལ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བ་ལང་རྫི་དེ་རབ་ཀ་ལ་མི་མཁས་པའི་ཕྱིར་རོ། །ཀུན་ཏུ་རྒྱུ་དག་།དེ་བཞིན་དུ་གང་ལ་ལ་མུ་སྟེགས་བྱེད་པ་མ་ཡིན་པར་མུ་སྟེགས་བྱེད་པར་ཁས་འཆེ་ཞིང་གང་སྒྲོལ་བ་དེ་ནི། ཚུལ་མ་ཡིན་པར་སྡུག་བསྔལ་ཐོབ་པར་འགྱུར་རོ། །ཀུན་ཏུ་རྒྱུ་དག་།ང་ནི། སྟོན་པ་ཉིད་ཡིན་ལ་སྟོན་པར་ཁས་འཆེ་བས་ང་གང་རྗེས་སུ་སྟོན་པ་དེ་ཡང་དག་པར་རྗེས་སུ་སྟོན་པ་ཡིན། ཡང་དག་པར་རྫོགས་པའི་སངས་རྒྱས་ཉིད་ཡིན་ལ་ཡང་དག་པར་རྫོགས་པའི་སངས་རྒྱས་སུ་ཁས་འཆེ་བས་ང་གང་ཁོང་དུ་ཆུད་པར་བྱེད་པ་དེ་ཡང་དག་པར་ཁོང་དུ་ཆུད་པར་བྱེད་པ་ཡིན། འབྱུང་བ་ལ་མཁས་པ་ཉིད་ཡིན་ལ་འབྱུང་བ་ལ་མཁས་པར་ཁས་འཆེ་བས་ང་གང་འབྱིན་པ་དེ་དག་ཡང་དག་པར་འབྱིན་པ་ཡིན། འབྱུང་བ་མཐོང་བ་ཉིད་ཡིན་ལ་འབྱུང་བ་སྟོན་པར་ཁས་འཆེ་བས་ང་གང་འབྱུང་བ་སྟོན་པ་དེ་ཡང་དག་པར་སྟོན་པ་ཡིན། མུ་སྟེགས་བྱེད་པ་ཡིན་ལ་མུ་སྟེགས་བྱེད་པར་ཁས་འཆེ་བས་ང་གང་སྒྲོལ་བ་
276b
དེ་ཡང་དག་པར་སྒྲོལ་བ་ཡིན་ཏེ། སྟོན་པའི་ཆོས་རབ་ཏུ་ཤེས་ནས་ནི། རྗེས་སུ་སྟོན། སངས་རྒྱས་ཀྱི་ཆོས་རབ་ཏུ་ཤེས་ནས་ནི། ཁོང་དུ་ཆུད་པར་བྱེད། འབྱུང་བ་རབ་ཏུ་ཤེས་ནས་ནི།་འབྱིན་པ་ཡང་དག་པར་མཐོང་ནས་ནི། སྟོན། མུ་སྟེགས་རབ་ཏུ་ཤེས་ནས་ནི། སྒྲོལ་ཏེ། གང་སྒྲོལ་བ་དེ་ཡང་མུ་སྟེགས་བདེ་བས་རབ་ཏུ་སྒྲོལ་བ་ཡིན་ནོ། ། འདི་ལྟ་སྟེ། ཀུན་ཏུ་རྒྱུ་དག། ཁྱེད་ཀྱང་ཐར་པ་འདོད་པ་ཡིན་ལ་ང་ཡང་སྟོན་པ་སྔོན་དུ་བཞུགས་པ་ཡིན་ཏེ། ཡང་དག་པར་སྟོན་པ། ཡང་དག་པར་ཁོང་དུ་ཆུད་པར་བྱེད་པ།་འབྱུང་བ་ཕུན་སུམ་ཚོགས་པ། འབྱུང་བ་མཐོང་བ་ཡང་དག་པའི་མུ་སྟེགས་བྱེད་པ་ཡིན་གྱི། དེའི་ཕྱིར་རྣ་བ་བླགས་ཏེ་མོས་པ་བསྐྱེད་ལ་དྲན་པ་ཉེ་བར་བཞག་སྟེ་ཡིད་འདུན་པར་གྱིས་ལ་མ་ཐོབ་པའི་ཆོས་རྣམས་ཐོབ་པར་བྱ་བ་དང ། སྔོན་མ་ཕྱིན་པའི་ལམ་དུ་འགྲོ་བར་བྱ་བ་དང ། སྔོན་མ་སོང་བའི་ཕྱོགས་སུ་འགྲོ་བར་བྱ་བ་དང ། སྔོན་མ་འགྲོགས་པའི་ལམ་གྲོགས་དང་འགྲོགས་པར་བྱ་བ་དང ། སྔོན་མ་བཙལ་བའི་ལམ་བཙལ་བར་བྱ་བ་དང ། སྔོན་མ་ཐོབ་པའི་ཆོས་ཀྱི་མཛོད་ཐོབ་པར་བྱ་བའི་ཕྱིར་བརྩོན་འགྲུས་ཡང་དག་པར་རྩོམས་ཤིག་།ཀུན་ཏུ་རྒྱུ་དག་།ཆོས་གསུམ་མངོན་དུ་གྱུར་པས་མངལ་དུ་འཇུག་ཅེས་གང་སྨྲ་བ་དེ་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང །
277a
༄#། །མངལ་དུ་འཇུག་པ་ཞེས་བྱ་བའི་ཆོས་ཀྱི་རྣམ་གྲངས་འདི་ཁྱེད་ལ་ངས་བཤད་དོ། །ཀུན་ཏུ་རྒྱུ་དག་།དེ་ལ་མ་ཞེས་གང་སྨྲས་པ་དེ་ནི། སྔོན་གྱི་ལས་བསགས་པའི་རྐྱེན་དུ་གསུངས་སོ། །ཕ་ཞེས་བྱ་བ་དེ་ནི། སྔོན་གྱི་ལས་བསགས་པའི་རྒྱུར་གསུངས་སོ། །དྲི་ཟ་ཞེས་བྱ་བ་དེ་ནི། རྣམ་པར་ཤེས་པ་ལས་ཀྱིས་འཕངས་པའི་ཚིག་བླ་དྭགས་སོ། །མེར་མེར་པོ་ཞེས་བྱ་བ་དེ་ནི། ལས་ཀྱིས་འཕངས་པའི་རྣམ་པར་ཤེས་པའི་གནས་དང་གཞིའོ། །མའི་མངལ་ཞེས་བྱ་བ་དེ་ནི། རྣམ་པར་ཤེས་པ་ལས་ཀྱིས་འཕགས་པའི་གཞི་སྟེ། འདི་ལྟར་མའི་མངལ་ན་གནས་པའི་རྣམ་པར་ཤེས་པ་ནི། སྐྱེ་བ་དང ། འཕེལ་བ་དང ། རྒྱས་པར་འགྱུར་ར་རོ། །ཀུན་ཏུ་རྒྱུ་དག་།འདི་ལྟ་སྟེ། དཔེར་ན། ས་ཆེན་པོ་ལ་གནས་ན། རྩཝ་དང ། ཤིང་གེལ་བ་དང ། སྨན་དང ། ནགས་ཚལ་དག་སྐྱེ་ཞིང་འཕེལ་བ་དང ། རྒྱས་པར་འགྱུར་རོ། །དེ་བཞིན་དུ་མའི་མངལ་ན་གནས་པའི་རྣམ་པར་ཤེས་པ་ཡང་སྐྱེ་བ་དང ། འཕེལ་བ་དང ། རྒྱས་པར་འགྱུར་ཏེ། འཕེལ་ནས་སྐྱེ་བར་འགྱུར་རོ། །བཙས་ནས་རྣམ་པར་འཕེལ་ལོ། །འཕེལ་ནས་སྤྱོད་པ་སྣང་བར་འགྱུར་རོ། །འགྲོ་བ་གང་དང་གང་ནས་ཤི་འཕོས་ནས་དེ་དང་དེར་སྐྱེས་ནས་དེ་དང་འདྲ་བའི་སྤྱོད་པ་དེ་དག་སྤྱོད་པར་འགྱུར་
277b
ཏེ།་དེ་དག་ཀྱང་མཁས་པས་ཤེས་པར་བྱ་བ་ཡིན་གྱི། གླེན་པས་ནི། མ་ཡིན་ནོ། །ཡུན་རིང་པོ་ནས་འགྲོགས་འགྲོགས་པས་ཤེས་པར་བྱ་བ་ཡིན་གྱི། ཡུན་ཐུང་ངུས་མ་ཡིན་ནོ། །ཡང་དག་པར་སེམས་པས་ཤེས་པར་བྱ་བ་ཡིན་གྱི། མི་བརྩོན་པས་མ་ཡིན་ནོ། །ཀུན་ཏུ་རྒྱུ་དག་།དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གི་རྟགས་མཁས་པས་ཤེས་པར་བྱ་བ་ནི། འདི་དག་ཡིན་ཏེ། འདི་ལྟ་སྟེ། སྐད་ཤ་ཤ་པོ་ཡིན། སྐད་གྱོ་དུམ་གྱི་སྒྲ་ལྟ་བུ་ཡིན། སྐད་བརྟག་དགོས་པ་ཡིན། སྐད་ཆེ་བ་ཡིན། སྐད་ལྷང་ལྷང་པོ་ཡིན། རྟག་ཏུ་དངང་པ་ཡིན། རྟག་ཏུ་འདར་བ་ཡིན། རྟག་ཏུ་སྤུ་ཟིང་ཞེས་བྱེད་པ་ཡིན། རྨི་ལམ་ན་མེའི་ཕུང་པོ་འབར་བ་མཐོང་བ་ཡིན། རི་རྒྱུག་པར་མཐོང་བ་ཡིན།་མེ་མདག་འབར་བ་མཐོང་བ་ཡིན། ལྕགས་ཟངས་ཀྱི་ནང་དུ་བཙོ་བ་མཐོང་བ་ཡིན། ལག་ན་དབྱིག་པ་ཐོགས་པའི་མི་དག་མཐོང་བ་ཡིན། སྲིན་པོ་དག་གིས་བདག་འཕངས་པར་མཐོང་བ་ཡིན། བདག་ཉིད་གསོན་པོར་གསལ་ཤིང་གིས་གཟུགས་པར་མཐོང་བ་ཡིན། ཁྱི་དག་གིས་བདག་འབྲད་པར་མཐོང་བ་ཡིན། ཁྱི་དག་གིས་བདག་བསྐོར་བར་མཐོང་བ་ཡིན། བདག་ཉིད་གླང་པོ་ཆེ་དང་སྦྲུལ་གྱིས་གཙེས་པར་མཐོང་བ་ཡིན། ཕྱོགས་བཞིར་བྲོས་ན་ཕྱོགས་མི་ཤེས་པ་ཡིན། སེམས་ཅན་ཀུན་ལ་ཡིད་མི་
278a
༄#། །རྟོན་པ་ཡིན་ཏེ། ཀུན་ཏུ་རྒྱུ་དག་།རྣམ་པ་ཉི་ཤུ་པོ་དེ་དག་གིས་སེམས་ཅན་དམྱལ་བ་ནས་ཤི་འཕོས་པའི་གང་ཟག་ཏུ་རིག་པར་བྱའོ། །ཀུན་ཏུ་རྒྱུ་དག་།དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གི་མཚན་མ་ནི། འདི་དག་ཡིན་ཏེ། འདི་ལྟ་སྟེ། རྨུགས་ཤིང་གཉིད་ཆེ་བ་ཡིན། ལེ་ལོ་ཆེ་བ་ཡིན། མང་དུ་ཟ་བ་ཡིན། ས་ལ་འདྲུད་པ་ཡིན། མི་འཇིགས་པ་མེད་པ་ཡིན། མི་གསལ་བར་སྨྲ་བ་ཡིན། གླེན་པ་ལ་དགའ་བ་ཡིན། མུན་པ་ལ་དགའ་བ་ཡིན། འདམ་རྫབ་ལ་དགའ་པ་ཡིན།་ཡང་དང་ཡང་སོས་རྩཝ་གཅོད་པ་ཡིན། རྒྱུན་དུ་རྐང་པའི་མཐེ་བོས་ས་རྐོ་བ་ཡིན། ཡང་དང་ཡང་མགོ་ལ་སྦྲང་མ་འདུ་བ་ཡིན། ཡང་དང་ཡང་ནམ་མཁའ་ལ་སོས་འདེབས་པ་ཡིན། ཀུན་ཏུ་བསྐུམས་ཏེ་ཉལ་བ་ཡིན། ས་ལ་ཉལ་བ་ཡིན། མི་གཙང་བས་མི་འདག་པ་ཡིན། ཡང་དང་ཡང་ནམ་མཁའ་ལ་སྣམ་པ་ཡིན། ཡང་དང་ཡང་མ་སྨིན་པ་ཟ་བ་ཡིན། གཞན་དུ་སྨྲ་ཞིང་གཞན་དུ་བྱེད་དེ་གཡོ་བྱེད་པ་ཡིན། བབ་བབ་ཏུ་སྤྱོད་པ་ཡིན། རྨི་ལམ་ན་བདག་རྫབ་ཀྱིས་གོས་པར་རྨི་བ་ཡིན། རྨི་ལམ་ན་བདག་ནགས་སུ་སོང་སྟེ་རྩཝ་ཟ་བར་རྨི་བ་ཡིན། སྦྲུལ་གདུག་པས་བདག་བསྐོར་བར་མཐོང་བ་ཡིན། བདག་ཉིད་རི་ཁྲོད་དུ་ཞུགས་པར་མཐོང་བ་ཡིན་ཏེ། ཀུན་ཏུ་རྒྱུ་དག་།དེ་དག་ལ་སོགས་
278b
བདུད་འགྲོའི་སྐྱེ་གནས་ནས་འཆི་འཕོས་པའི་གང་ཟག་གི་མཚན་མ་རྣམ་པ་དུ་མར་ཤེས་པར་བྱ་སྟེ། དེ་དག་ནི། བསྐལ་པའམ་བསྐལ་པ་ལས་ལྷག་པར་བརྗོད་ཀྱང་ཟད་པར་མི་ནུས་སོ། །ཀུན་ཏུ་རྒྱུ་དག་།དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གི་མཚན་མ་ནི། འདི་དག་ཡིན་ཏེ། འདི་ལྟ་སྟེ། སྐྲ་སེར་བ་ཡིན། མིག་ཝའི་མིག་འདྲ་བ་ཡིན། རྟག་པར་བཀྲེས་པ་ཡིན། རྟག་ཏུ་སྐོམ་པ་ཡིན། སེར་སྣ་ཆ་བ་ཡིན། འདོད་ཆེན་ཆེ་བ་ཡིན། ཐོབ་པ་མི་རྙེད་པ་ཡིན། གཞན་གྱི་ལ་རེ་བ་ཡིན། ཁྲོ་བ་ཡིན། མིག་དམར་བ་ཡིན། བཟའ་བ་ཐམས་ཅད་ལ་སྲེད་པ་ཡིན། བདོག་པ་ཐམས་ཅད་ལ་ཆགས་པ་ཡིན། སྦྱིན་པའི་གནས་དག་མཐོང་བར་མི་འདོད་པ་ཡིན། དངོས་པོ་ཀུན་ལ་ཡང་དེ་རྐུ་བའི་སེམས་ཡོད་པ་ཡིན། དངོས་པོ་ངན་པ་རྣམས་ལ་ཡང་དགའ་བ་ཡིན། ཐོབ་པ་ལ་མོས་པ་ཡིན། ཟས་སྐོམ་མི་གཙང་བ་ལ་དགའ་བ་ཡིན། གཞན་གྱི་ཕུན་སུམ་ཚོགས་པ་ལ་ཕྲག་དོག་བྱེད་པ་ཡིན། གཞན་གྱི་ལོངས་སྤྱོད་ལ་སྲེད་པ་བསྐྱེད་པ་ཡིན། གཞན་གྱི་ལོངས་སྤྱོད་གང་ཡིན་པ་དེ་དག་ལ་བདག་གི་སྙམ་དུ་སེམས་པ་ཡིན། ཟས་གཏོད་ན་སེམས་མི་དགའ་བ་ཡིན། ཚོང་འདུས་ཀྱི་སྲང་དག་ནས་ཀྱང་ཤིང་ཏོག་ལེན་པ་ཡིན་ཏེ། ཀུན་ཏུ་རྒྱུ་དག་།གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གི་རྟགས་ཀྱི་བྱེ་བྲག་
279a
༄#། །ནི།་དེ་དག་ལ་སོགས་པ་མཐའ་ཡས་པར་ཤེས་པར་བྱའོ། །ཀུན་ཏུ་རྒྱུ་དག་།དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གི་མཚན་མ་ནི། འདི་དག་ཡིན་ཏེ། །འདི་ལྟ་སྟེ། ཁེངས་པ་ཡིན། འཐབ་བཀྲོལ་ཆེ་བ་ཡིན། འཁོན་དུ་འཛིན་པ་ཡིན། ང་རྒྱལ་ཆེ་བ་ཡིན། ལུས་ཆེ་བ་ཡིན། མིག་ཆེ་བ་ཡིན། མིག་དཀར་བ་ཡིན། མཆེ་བ་སྣང་བ་ཡིན། མཐུ་དང་ལྡན་པ་ཡིན། འཐབ་མོའི་བློ་ཅན་ཡིན། དབྱེན་ལ་དགའ་བ་དང ། བྱ་བ་ཐམས་ཅད་ལ་ང་རྒྱལ་ཆེ་བ་ཡིན། །སོ་སྣང་བ་ཡིན།་འཇིག་རྟེན་ཐམས་ཅད་ལ་བརྙས་པའི་འདུ་ཤེས་ཅན་ཡིན། མཚོན་ཆ་རྣོ་བ་ཡིན། ཚིག་ན་བ་ཡིན། བདག་གཟེངས་བསྟོད་པ་ཅན་ཡིན། མི་ཤེས་པའི་སྟོབས་ཅན་ཡིན། ཉོན་མོངས་པའི་སྟོབས་ཅན་ཡིན་ཏེ། ཀུན་ཏུ་རྒྱུ་དག། དེ་དག་ལ་སོགས་པ་ནི། ལྷ་མ་ཡིན་ལས་ཤི་འཕོས་པའི་གང་ཟག་གི་མཚན་མར་ཤེས་པར་བྱའོ། །ཀུན་ཏུ་རྒྱུ་དག་།དེ་ལ་མི་ལས་ཤི་འཕོས་པའི་གང་ཟག་གི་མཚན་མ་ནི། འདི་དག་ཡིན་ཏེ། འདི་ལྟ་སྟེ། ངོ་མཚར་དུ་འཛིན་པ་ཅན་ཡིན། འཕགས་པ་དང་བསྟེན་པ་ཡིན། འཕགས་པ་མ་ཡིན་པ་ལ་སྨོད་པ་ཡིན། དགེ་བ་བྱེད་པ་ཡིན། མངོན་རྟགས་འདོད་པ་ཡིན། གྲགས་པ་འདོད་པ་ཡིན། སྙན་པ་འདོད་པ་ཡིན། བཟོ་
279b
ལ་དགའ་བ་ཡིན། ཤེས་པ་ལ་དགའ་བ་ཡིན། ཉོན་མོངས་པ་ཆུང་བ་ཡིན། ཁྲེལ་ཡོད་ཅིང་ངོ་ཚ་ཤེས་པ་ཡིན། རིགས་ཀྱི་བུའི་ཚུལ་ཕུན་སུམ་ཚོགས་པ་ཡིན། བྱས་པ་གཟོ་བ་ཡིན། མཛའ་བོ་ལ་གདུང་པ་ཡིན། ཡོངས་སུ་གཏོང་བ་དང་ལྡན་པ་ཡིན། བྱེ་བྲག་ཤེས་པ་ཡིན། བྱས་པ་དང་མ་བྱས་པ་ལ་རྟོག་པ་ཡིན། ཚིག་གི་མཐུ་ཡོད་པ་ཡིན།་གྲོས་གཟུང་བར་བྱ་བའི་མཐུ་ཡོད་པ་ཡིན། འདུམ་པར་བྱ་བ་དང ། འཐབ་མོ་བྱ་བ་ལ་མངོན་པར་མཁས་པ་ཡིན། ཕོ་ཉ་ནུས་པ་ཡིན། སྐད་ཐམས་ཅད་འཛིན་པའི་མཐུ་ཡོད་པ་ཡིན། གནས་དང་གནས་མ་ཡིན་པ་ལ་མངོན་པར་ཤེས་པ་ཡིན་ཏེ། ཀུན་ཏུ་རྒྱུ་དག་།དེ་དག་ལ་སོགས་པ་ནི། མི་ལས་ཤི་འཕོས་པའི་གང་ཟག་གི་རྟགས་ཡིན་ནོ། །ཀུན་ཏུ་རྒྱུ་དག་།དེ་ལ་ལྷ་ལས་ཤི་འཕོས་པའི་གང་ཟག་གི་རྟགས་ནི། འདི་དག་ཡིན་ཏེ། འདི་ལྟ་སྟེ། མཛེས་པ་ཡིན། གཙང་སྦྲ་ཆེ་བ་ཡིན། ཕྲེང་བ་ལ་དགའ་བ་ཡིན།་སྤོས་ལ་དགའ་བ་ཡིན། བདུག་པ་ལ་དགའ་བ་ཡིན། གླུ་ལེན་པའི་ངང་ཚུལ་ཅན་ཡིན། བྱུག་པ་ལ་དགའ་བ་དང ། འདོད་པའི་ཡོན་ཏན་ངན་ངོན་གྱིས་མི་མགུ་ཞིང་རྒྱ་ཆེན་པོས་དགའ་བ་ཡིན། རོལ་མོའི་སྒྲ་ཐམས་ཅད་ལ་དགའ་བ་ཡིན། །གླུ་ཐམས་ཅད་ལ་དགའ་བ་ཡིན། སྐྱེ་བོ་རྒྱ་ཆེན་པོ་དང་འགྲོགས་པར་དགའ་བ་ཡིན། ཁང་པ་དང །
280a
༄#། །ཁང་པ་བརྩེགས་པ་དང ། ཁྱིམ་དང ། ལོངས་སྤྱོད་རྒྱ་ཆེན་པོ་ལ་དགའ་བ་ཡིན། །དེའི་སེམས་བྱམས་པ་སྔོན་དུ་འགྲོ་བ་ཡིན། རྒོད་པའི་ངང་ཚུལ་ཅན་ཡིན། འཇམ་པར་སྨྲ་བ་ཡིན། དགའ་བ་ལ་མཁས་པ་ཡིན། རྒྱན་ལ་དགའ་བ་ཡིན། ཆེ་བའི་ངང་ཚུལ་ཅན་ཡིན། འགྲོ་བའི་ངང་ཚུལ་ཅན་ཡིན། ལུས་ཀྱི་ཤུགས་འབྱིན་པའི་ངང་ཚུལ་ཅན་ཡིན། །ཆགས་པའི་མཚན་མ་དང ། མི་ཆགས་པའི་མཚན་མ་ཤེས་པ་ཡིན། ཕན་པར་བྱ་བ་ལ་མཁས་པ་ཡིན་ཏེ།་ཀུན་ཏུ་རྒྱུ་དག་།མཚན་མ་དེ་དག་ལ་སོགས་པས་མཐོ་རིས་ནས་ཤི་འཕོས་པའི་གང་ཟག་ཏུ་ཤེས་པར་བྱའོ། །ཀུན་ཏུ་རྒྱུ་དག་།དེ་ལ་མཚན་མ་དེ་དག་ལས་ཡང་དག་པར་འདའ་བར་བྱ་བའི་ཕྱིར་རིགས་ཀྱི་བུའམ། རིགས་ཀྱི་བུ་མོ་དག་གིས་དགེ་བའི་བཤེས་གཉེན་གང་དག་མཚན་མ་དེ་དག་ལས་འདའ་བར་བྱ་བའི་ཕྱིར་ཆོས་སྟོན་པར་བྱེད་པ་དེ་ལྟ་བུའི་དགེ་བའི་བཤེས་གཉེན་རྣམས་ལ་བསྟེན་པར་བྱ། བསྙེན་པར་བྱ། བསྙེན་བཀུར་བྱའོ། །དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གིས་ནི། སྔོན་མིར་གྱུར་པའི་ཚེ་ཞེ་སྡང་ལ་ཡོངས་སུ་བརྟེན་པས་དེས་ཞེ་སྡང་ལས་བྱུང་བའི་ལས་མངོན་པར་འདུས་བྱས་པས་དེ་ལས་དེས་སེམས་ཅན་
280b
དམྱལ་བར་སྐྱེ་སྟེ། དེའི་ཕྱིར་དེ་སེམས་ཅན་དམྱལ་བར་གནས་པ་རྙེད་ནས་སེམས་ཅན་དམྱལ་བའི་སྤྱོད་པ་ཅན་དུ་གྱུར་པས་དེ་མིའི་ནང་དུ་སྐྱེས་ཏེ་སྤྱོད་པའི་རྟགས་འདི་དག་ཐོས་ནས་བདག་ནི། སེམས་ཅན་དམྱལ་བ་ནས་ཤི་འཕོས་པའོ། །ཞེས་བདག་ཉིད་ཀྱིས་ཤེས་པར་བྱ་ཞིང ། དེས་སེམས་ཅན་དམྱལ་བའི་ལས་ཀྱི་རྒྱུ་སྤང་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ཞེ་སྡང་གི་གཉེན་པོར་བྱམས་པ་སྟོན་ཏོ། །བྱམས་པ་དང་ལྡན་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་དང ། བྱམས་པ་དང་ལྡན་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟོན་ཏོ། །དེས་ཀྱང་དེའི་ཞེ་སྡང་གི་བག་ལ་ཉལ་སྤོང་བར་འགྱུར་ཏེ། བྱམས་པ་ཆེན་པོ་བསྒོམས་པས་ཕ་རོལ་ཏུ་ཕྱིན་པ་དྲུག་པོ་ཐམས་ཅད་ཡོངས་སུ་རྫོགས་པར་འགྱུར་རོ། །ཀུན་ཏུ་རྒྱུ་དག་།དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གིས་ནི། སྔོན་མིར་གྱུར་པའི་ཚེ་གཏི་མུག་ལ་ཡོངས་སུ་བསྟེན་པས་དེས་གཏི་མུག་ལས་བྱུང་བའི་ལས་མངོན་པར་འདུས་བྱས་པས་དེ་ལས་དེས་དུད་འགྲོའི་སྐྱེ་གནས་སུ་སྐྱེས་ཏེ། དེའི་ཕྱིར་དུད་འགྲོའི་སྐྱེ་གནས་ན་གནས་པ་རྙེད་ནས་དུད་འགྲོའི་སྐྱེ་གནས་ཀྱི་སྤྱོད་པ་ཅན་དུ་གྱུར་པས། དེ་དུད་འགྲོའི་སྐྱེ་གནས་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་དུད་འགྲོའི་སྐྱེ་གནས་ཀྱི་སྤྱོད་པ་དེ་དག་ཉིད་སྤྱོད་
281a
༄#། །པར་འགྱུར་ཏེ། དེས་སྤྱོད་པ་དེ་དག་གིས་བདག་ནི། དུད་འགྲོའི་སྐྱེ་གནས་ནས། ཤི་འཕོས་ནས་མིའི་ནང་དུ་སྐྱེས་སོ། །ཞེས་བདག་ཉིད་ཀྱིས་ཤེས་པར་བྱ་ཞིང ། དེ་དུད་འགྲོའི་སྐྱེ་གནས་ཀྱི་ལས་དེ་དག་ལས་ཡང་དག་པར་འདའ་བར་བྱ་པའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་དག་ལ་དགེ་བའི་བཤེས་གཉེན་དེ་དག་གཏི་མུག་སྤང་བའི་ཕྱིར་རྟེན་ཅིང་འབྲེལ་པར་འབྱུང་བ་སྟོན་ཏོ། །དེས་ཀྱང་དེའི་གཏི་མུག་གི་བག་ལ་ཉལ་སྤོང་བར་འགྱུར་རོ། །ཡང་ན་ཤེས་རབ་ཀྱི་ཕ་རོལ་ཏུ་ཕྱིན་པ་དུས་གསུམ་མཉམ་པ་ཉིད་སྟོན་ཏེ། དེས་དེའི་གཏི་མུག་དེ་ནི། རང་བཞིན་མེད་པའོ། །ཞེས་བྱ་བར་ཤེས་པ་སྐྱེ་བར་འགྱུར་རོ། །ཡང་ན་དེ་ལ་ཆོས་ཐམས་ཅད་མཉམ་པ་ཉིད་སྟོན་ཏེ། དེས་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཤིང་ཐམས་ཅད་མཁྱེན་པ་ཉིད་ཐོབ་པར་འགྱུར་རོ། །ཀུན་ཏུ་རྒྱུ་དག་།དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གིས་ནི། སྔོན་མིར་གྱུར་པའི་ཚེ་སེར་སྣ་ལ་ཀུན་ཏུ་བརྟེན་ཅིང་བསྒོམས་ཏེ་མང་དུ་བྱས་པས། དེས་སེར་སྣ་དང་ལྡན་པ་བག་ཆགས་ལས་བྱུང་བའི་ལས་མངོན་པར་འདུ་བྱས་པས་དེ་ལས་བྱས་པ་དང ། བསགས་པ་དང ། ཟིན་པར་བྱས་པ་དང ། རྫོགས་པར་བྱས་པ་དང ། བླངས་པ་
281b
དེས་གཤིན་རྗེའི་འཇིག་རྟེན་དུ་སྐྱེས་ཏེ། དེ་དག་གཤིན་རྗེའི་འཇིག་རྟེན་ན་གནས་པ་དེས་གཤིན་རྗེའི་འཇིག་རྟེན་པའི་སྤྱོད་པ་ཅན་དུ་གྱུར་པས། དེ་དག་གཤིན་རྗེའི་འཇིག་རྟེན་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་གཤིན་རྗེའི་འཇིག་རྟེན་གྱི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི། གཤིན་རྗེའི་འཇིག་རྟེན་ནས་ཤི་འཕོས་པའོ། །ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང ། དེས་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ།་དེ་ལ་དགེ་བའི་བཤེས་གཉེན་དེ་དག་སེར་སྣ་སྤང་བའི་ཕྱིར་གཏོང་བ་སྟོན་ཏེ། དེས་ཀྱང་དེའི་སེར་སྣའི་བག་ལ་ཉལ་སྤོང་བར་འགྱུར་རོ། །ཡང་ན་དེ་ལ་གཏོང་བ་དང་ལྡན་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་སྟོན། སྦྱིན་པའི་ཕ་རོལ་ཏུ་ཕྱིན་པ་སྟོན་ཏེ། དེ་བསྒོམས་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །ཀུན་ཏུ་རྒྱུ་དག་།དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གིས་ནི། སྔོན་མིར་གྱུར་པའི་ཚེ་དགེ་བའི་རྩ་བ་རྒྱ་ཆེན་པོ་དག་ཀྱང་མངོན་པར་འདུ་བྱས་ལ། ང་རྒྱལ་ལ་ཡང་ཡོངས་སུ་བརྟེན་པས་དེ་ང་རྒྱལ་དང་ལྡན་པའི་ལས་བྱས་པ་དང ། བསགས་པ་དང ། ཟིན་པར་བྱས་པ་དང ། རྫོགས་པར་བྱས་པ་དང ། བླངས་པ་དེས་ལྷ་མ་ཡིན་དུ་སྐྱེ་སྟེ། ལྷ་མ་
282a
༄#། །ཡིན་དུ་སྐྱེས་ཏེ་ལྷ་མ་ཡིན་གྱི་གནས་ན་གནས་པ་དེས་ལྷ་མ་ཡིན་གྱི་སྤྱོད་པ་ཅན་དུ་གྱུར་པས། དེ་ལྷ་མ་ཡིན་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་ལྷ་མ་ཡིན་གྱི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི། ལྷ་མ་ཡིན་ལས་ཤི་འཕོས་པའོ། །ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང ། དེས་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ང་རྒྱལ་སྤང་བ་དང ། ངའོ་སྙམ་པའི་ང་རྒྱལ་གཞོམ་པའི་ཕྱིར་སྐྱེ་མཆེད་རྣམས་སྟོང་ཏོ། །དེས་ཀྱང་དེའི་ང་རྒྱལ་སྤོང་བར་འགྱུར་རོ། །ཡང་ན་དེ་ལ་སྟོང་པ་ཉིད་སྟོན་ཏེ། དེས་དེའི་ང་རྒྱལ་གྱི་བག་ལ་ཉལ་སྤོང་བ་དང ། བདག་རྣམ་པར་འཇིག་པར་འགྱུར་རོ། །ཡང་ན་ཇི་ལྟར་བྱ་བ་འབྱུང་བ་སྣ་ཚོགས་པ་ལས་འབྱུང་བའི་ཚུལ་སྟོན་ཏེ། ངས་དེའི་ང་རྒྱལ་གྱི་བག་ལ་ཉལ་སྤོང་བར་འགྱུར་རོ། །ཡང་ན་དེ་ལ་ཆོས་རྣམས་ཀྱི་མཚན་ཉིད་གཅིག་པ་སྟོན་ཏེ། དེས་དེའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་ཞིང ། དེ་བསྒོམས་པས་ཐམས་ཅད་མཁྱེན་པ་ཉིད་དུ་འགྲུབ་པར་འགྱུར་རོ། །ཀུན་ཏུ་རྒྱུ་དག། དེ་ལ་མི་ལས་ཤི་འཕོས་པའི་གང་ཟག་གིས་ནི། སྔོན་
282b
མིར་གྱུར་པའི་ཚེའང་དགེ་བ་བཅུའི་ལས་ཀྱི་ལམ་ལ་ཀུན་ཏུ་བརྟེན་ཅིང་བསྒོམས་ཏེ་མང་དུ་བྱས་པས་དེས་ལས་དེ་བྱས་པ་དང ། བསགས་པ་དང ། ཟིན་པར་བྱས་པ་དང ། རྫོགས་པར་བྱས་པ་དང ། བླངས་པ་དེས་མིར་སྐྱེས་ཏེ། མིའི་ནང་ན་གནས་པ་དེས་མིའི་སྤྱོད་པ་ཅན་དུ་གྱུར་པས། དེ་མིའི་ནང་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་མིའི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེ་སྤྱོད་པ་དེ་དག་གིས་བདག་ནི། མིའི་ནང་ནས་ཤི་འཕོས་པའོ། །ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང ། དེས་མིའི་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་མི་རྟག་པའི་འདུ་ཤེས་སྟོན་ཏེ། དེས་ཀྱང་དེའི་སྤྱོད་པ་བག་ལ་ཉལ་དང་བཅས་པར་སྤོང་བར་འགྱུར་རོ། །ཡང་ན་དེ་ལ་འཁོར་བའི་མི་བསྔགས་པ་དང ། མྱ་ངན་ལས་འདས་པའི་བསྔགས་པ་སྟོན་ཏེ། དེས་དེ་འཁོར་བ་ལ་མི་དགའ་ཞིང་མྱ་ངན་ལས་འདའ་བ་དོན་དུ་གཉེར་བར་འགྱུར་རོ། །ཡང་ན་དེ་ལ་ཕ་རོལ་ཏུ་ཕྱིན་པ་དྲུག་སྟོན་ཏེ། དེ་ཐོས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ། །དེ་ལ་ཐབས་མཁས་པ་ཡང་སྟོན་ཏེ། དེས་དེའི་ཕ་རོལ་ཏུ་ཕྱིན་པ་དྲུག་པོ་དེ་དག་བཟུང་བ་དང ། ཐམས་ཅད་མཁྱེན་པ་
283a
༄#། །ཉིད་ཀྱང་མྱུར་དུ་ཐོབ་པར་འགྱུར་རོ། །ཀུན་ཏུ་རྒྱུ་དག་།དེ་ལ་མཐོ་རིས་ནས་ཤི་འཕོས་པའི་གང་ཟག་གིས་ནི། སྔོན་མིར་གྱུར་པའི་ཚེ་ཚངས་པར་སྤྱོད་པ་མཆོག་ཏུ་བཟུང་སྟེ་སྤྱད་པ་དང ། སྦྱིན་པ་མཆོག་ཏུ་བཟུང་སྟེ་བྱིན་པ་དང ། ཚུལ་ཁྲིམས་མཆོག་ཏུ་བཟུང་སྟེ་བསྲུངས་པས་ལས་དེ་བྱས་པ་དང ། བསགས་པ་དང ། ཟིན་པར་བྱས་པ་དང ། རྫོགས་པར་བྱས་པ་དང ། བླངས་པས་ལྷའི་ནང་དུ་སྐྱེས་ཏེ། དེ་ལྷའི་ནང་ན་གནས་པ་དེས་ལྷའི་སྤྱོད་པ་ཅན་དུ་གྱུར་པས། དེ་ལྷ་ལས་ཤི་འཕོས་ཏེ་མིའི་ནང་དུ་སྐྱེས་ཀྱང་ལྷའི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི། ལྷའི་ནང་ན་ཤི་འཕོས་པའོ། །ཞེས་བདག་ཉིད་ཀྱིས་ཤེས་པར་བྱ་ཞིང ། དེས་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ཚངས་པར་སྤྱོད་པ་མཆོག་ཏུ་འཛིན་པའི་ཉེས་པ་སྟོན་ཅིང ། མི་གནས་པའི་ཚངས་པར་སྤྱོད་པའི་ཡོན་ཏན་བརྗོད་དོ། །མཆོག་ཏུ་འཛིན་པའི་སྦྱིན་པ་ལ་སྨོད་ཅིང་མཆོག་ཏུ་འཛིན་པ་མེད་པའི་སྦྱིན་པ་བསྔགས་པར་འགྱུར་རོ། །མཆོག་ཏུ་འཛིན་པའི་ཚུལ་ཁྲིམས་ལ་སྨོད་ཅིང་མཆོག་ཏུ་འཛིན་པ་མེད་པའི་ཚུལ་ཁྲིམས་ལ་བསྔགས་པར་འགྱུར་རོ། །དེས་
283b
དེའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་བག་ལ་ཉལ་དང་བཅས་པར་སྤོང་བར་འགྱུར་རོ། །ཡང་ན་དེ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟོན་ཏེ། དེ་བསྒོམས་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་ལ་ཐབས་མཁས་པ་ཡང་སྟོན་ཏེ། དེ་དང་ལྡན་པས་མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་རོ། །ཀུན་ཏུ་རྒྱུ་དག་།དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གིས་ནི། དགེ་བའི་བཤེས་གཉེན་ལ་བརྟེན་ཏེ་དུས་གསུམ་མཉམ་པ་ཉིད་མཉན་པར་བྱའོ། །ཐོས་ནས་ཀྱང་ཤེས་ཆེར་གནས་པར་བྱ་སྟེ། གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་དག་ན་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། འཁོར་བཞི་པོ་ཡོད་པ་དག་ཏུ་གནས་པར་བྱ་ཞིང་དེ་དག་དང་འགྲོགས་པར་བྱའོ། །དེས་འགྲོ་བ་བྱས་ཏེ་གོམས་པའི་རྗེས་སུ་འགྲོ་བས་ཆོས་ཐམས་ཅད་ནི། དངོས་པོ་མེད་པའི་ངོ་བོ་ཉིད་དོ། །ཞེས་དུས་གསུམ་མཉམ་པ་ཉིད་མཐོང་དུ་འགྱུར་རོ། །ཀུན་ཏུ་རྒྱུ་དག་།དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གིས་ནི། དགེ་བའི་བཤེས་གཉེན་ལ་བརྟེན་ཏེ་གཏི་མུག་གི་གཉེན་པོར་བསྟན་བཅོས་ལ་མཁས་པའི་སྐྱེ་བོ་དང་ལྷན་
284a
༄#། །ཅིག་དགའ་བར་གནས་པར་བྱའོ། །དེས་དེའི་གཏི་མུག་སྤོང་བར་འགྱུར་ཏེ། དེས་བསྟན་བཅོས་དེ་དང ། བསྟན་བཅོས་ཤེས་པ་དེ་དག་རང་བཞིན་གྱིས་ཡང་དག་པར་བརྟག་པར་བྱའོ། །དེའི་ཕྱིར་དེ་ལ་བསྟན་བཅོས་དང ། བསྟན་བཅོས་ཤེས་པ་རྣམས་ཀྱང་རང་བཞིན་མེད་དོ། །དྲང་བཞིན་མེད་དོ། །ཞེས་བྱ་བར་སྣང་བར་གྱུར་ཏེ། དེས་དེ་ལ་དུས་གསུམ་མཉམ་པ་ཉིད་མངོན་དུ་འགྱུར་ཞིང ། མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་རོ། །ཀུན་ཏུ་རྒྱུ་དག་།དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གིས་ནི། གང་ལ་བརྟེན་ན་སྦྱིན་པའི་བློ་སྐྱེ་བར་འགྱུར་བ་དང ། གང་གིས་དེ་ལ་དུས་གསུམ་མཉམ་པ་ཉིད་དང ། གང་འདི་མཚན་ཉིད་མེད་པར་མཚན་ཉིད་གཅིག་མངོན་དུ་འགྱུར་བ་དང ། དེ་བསྒོམས་པས་མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་བའི་དགེ་བའི་བཤེས་གཉེན་ལ་བརྟེན་པར་བྱ། ཡོན་ཏན་ལ་བརྟེན་པར་བྱའོ།། །།བམ་པོ་བཅུ་གཉིས་པ། ཀུན་ཏུ་རྒྱུ་དག་།དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གིས་ནི། དགེ་བའི་བཤེས་གཉེན་ལ་བརྟེན་ཏེ་ཉོན་མོངས་པའི་འདུད་དང་འཐབ་པར་བྱའོ། །འདི་སྟ་སྟེ། ང་རྒྱལ་ཞེས་བྱ་བའི་ཆོས་དེ་ནི། གང་ཞིག་།དེ་ནི། ཅི་
284b
ཞིག་གིས་ཡོངས་སུ་བཟུང ། དེ་ནི། སུ་ལས་ཀུན་ནས་ལངས། སུ་ཞིག་དེ་སྤང་བར་བྱེད་ཅེས་དེ་ཡང་དག་པར་བཙལ་ན། ང་རྒྱལ་དེ་མི་དམིགས་སོ། །གང་གིས་དེ་ཡོངས་སུ་བཟུང་བ་དང ། གང་ལ་དེ་ཀུན་ནས་ལངས་པ་དང ། གང་དེ་སྤང་བའི་ཕྱིར་རྩོལ་བ་དེ་ཡང་མི་དམིགས་པ་དེ་ནི། ཡང་དག་པ་མ་ཡིན་པར་ཡོངས་སུ་བཟུང་བས་བདག་དང་འཇིག་རྟེན་བསླུས་པར་ཡང་དག་པར་རྗེས་སུ་མཐོང་ངོ ། །དེས་ཆོས་ཐམས་ཅད་རང་བཞིན་མེད་པར་ཡང་དག་པར་རྗེས་སུ་མཐོང་ཞིང་ཆོས་གང་ལ་རང་བཞིན་མེད་པ་དེ་ནི ། དངོས་པོ་མེད་པའོ། །ཞེས་བྱ་བར་རབ་ཏུ་ཤེས་སོ། །དངོས་པོ་མེད་པས་ཡོངས་སུ་མ་གྲུབ་བོ། །ཞེས་བྱ་བར་རབ་ཏུ་ཤེས་སོ། ཡོངས་སུ་མ་གྲུབ་པས་མི་སྐྱེ་བ་སྟེ། གང་མ་སྐྱེ་བ་དེ་ནི། མི་འགག་གོ། །གང་མི་སྐྱེ་འགག་པ་དེ་ནི། གདགས་སུ་མེད་པའོ། །ཞེས་བྱ་བར་རབ་ཏུ་ཤེས་སོ། །གང་གདགས་སུ་མེད་པ་དེ་ནི། འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ནོ། །གང་དུ་གསུམ་དུ་མི་དམིགས་པ་དེ་ནི། ཐོབ་པ་ཡང་མ་ཡིན། ཆུད་ཟོས་པ་ཡང་མ་ཡིན་ནོ། །ཞེས་བྱ་བར་རབ་ཏུ་ཤེས་སོ། །ཀུན་ཏུ་རྒྱུ་དག་།དེ་ལྟར་ན། དེ་ནི། ཆོས་ཐམས་ཅད་ཀྱི་ཆོས་ཉིད་དེ། ཆོས་ཉིད་གང་གིས་ཐམས་ཅད་དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་
285a
༄#། །ཡིན་པ་དེ་བཞིན་ཉིད་དེ། དེ་བཞིན་གཤེགས་པ་ཡང་དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད་པས་དེའི་ཕྱིར་ཆོས་ཐམས་ཅད་དེ་བཞིན་གཤེགས་པའོ། །ཀུན་ཏུ་རྒྱུ་དག། ངས་ནི། སྔོན་ཆད་དང ། ད་ལྟར་ཡང་འཇིག་རྟེན་བརྟགས་པ་ནི། ང་རྒྱལ་གྱི་རང་བཞིན་ནོ། །ཞེས་བཤད་དེ། ང་རྒྱལ་གྱིས་ནི། མི་ལས་ཤི་འཕོས་པ་གདགས་པར་འགྱུར་རོ། །ང་རྒྱལ་གྱིས་ནི། མཐོ་རིས་ནས་ཤི་འཕོས་པ་གདགས་པར་འགྱུར་རོ། །ང་རྒྱལ་གྱིས་ནི།་སེམས་ཅན་དམྱལ་བའི་བར་དུ་ཤི་འཕོས་པ་གདགས་པར་འགྱུར་རོ། །ང་རྒྱལ་མེད་ན། གདགས་པ་མེད་དོ། །ཀུན་ཏུ་རྒྱུ་དག་།དེ་ནི། ང་རྒྱལ་མེད་པའི་ཡེ་ཤེས་ཞེས་བྱའོ། །དེ་ཡང་ཐབས་མཁས་པ་དང་ལྡན་ཞིང ། ཤེས་རབ་ཀྱི་ཕ་རོལ་ཏུ་ཕྱིན་པ་དང ། དགེ་བའི་བཤེས་གཉེན་གྱིས་ཡོངས་སུ་ཟིན་པས་ཤེས་པར་ནུས་སོ། ། དེ་ནས་ཀུན་ཏུ་རྒྱུ་དྲུག་ཁྲི་བོ་དེ་དག་གིས་བསྟན་པ་འདི་ཐོས་ནས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏེ། དེ་དག་ནི། མི་སྐྱེ་བའི་ཆོས་ལ་བཟོད་པ་ཐོབ་ནས་སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་ཀྱང་དེའི་ཚེ་བཅོམ་ལྡན་
285b
འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་པ། མགོན་པོ་ཡེ་ཤེས་སྟོབས་ཀྱིས་ཡང་དག་འཕགས། །འགྲོ་བ་ཀུན་ལ་གཞན་གྱི་དྲིང་མི་འཇོག་།འགྲོ་བ་ཀུན་ན་སྤྱོད་པ་རྣམས་གཟིགས་ཏེ། །ལག་པའི་མཐིལ་དུ་སྐྱུ་རུ་ར་བཞག་བཞིན། །འཇིག་རྟེན་ལྟ་བའི་རྣམ་པས་ཀུན་ཏུ་དཀྲིགས། །སྤྲིན་སྟུག་དག་གིས་ནམ་མཁའ་ཡོག་པ་བཞིན། །དེ་དག་གིས་ནི་བྱིས་པ་རྨོངས་ནས་སྤྱོད། །ལོང་བའི་ཚོགས་རྣམས་རབ་ཏུ་ལམ་སྟོར་བཞིན། །འཇིག་རྟེན་རྟག་དང་འཇིག་རྟེན་མི་རྟག་དང ། །རྟག་ཀྱང་རྟག་ལ་མི་རྟག་ཁ་ཅིག་མཆི། །རྟག་པ་མ་ཡིན་མི་རྟག་མིན་ཞེས་ཏེ། །གླང་པོའི་དབང་པོ་ཁྱིམ་དུ་བཏགས་ལྟར་བརླག། །འཇིག་རྟེན་མཐའ་ཡོད་འཇིག་རྟེན་མཐའ་མེད་དང ། །མཐའ་ཡང་ཡོད་ལ་མཐའ་མེད་ཁ་ཅིག་མཆི། །མཐའ་ཡོད་མ་ཡིན་མཐའ་མེད་མིན་ཅེས་ཏེ། །དཔེར་ན་བྱ་ནི་གཟེབ་ཏུ་བཅུག་པ་བཞིན། །ལ་ལ་དག་ནི་ལུས་ལ་བདག་ཅེས་མཆི། །ལ་ལ་དག་ནི་ལུས་འདི་གཞན་ཞེས་མཆི། །རྟོག་པས་ཡོངས་སུ་དཀྲིས་ནས་ཉལ་བགྱིད་དེ། །བྱ་ནི་བྱ་རྒྱར་ཆུད་ནས་ཐོགས་པ་བཞིན། །ལ་ལ་དག་ནི་དབང་ཕྱུག་སྤྲུལ་ཞེས་མཆི། །ལ་ལ་རྒྱུ་མེད་བྱུང་ཞེས་འདོགས་པར་བགྱིད། །ལྟ་བའི་རྣམ་པ་དག་གིས་ཀུན་ནས་དཀྲིས། །མཁའ་ལ་གནས་པའི་ཟླ་ལྟར་རྒྱལ་བས་གཟིགས། །ཇི་ལྟར་གཟེབ་ཏུ་བཅུག་པའི་བྱ་རྨོངས་
286a
༄#། །པ། །པུ་ག་བུ་གར་ཐར་དུ་རེ་བ་ལྟར། །མི་མཁས་ལྟ་བའི་རྣམ་པས་འདས་པར་འགྱུར། །ཐར་པ་མི་ཐོབ་རྐང་གཉིས་བཏགས་པ་བཞིན། །ཚངས་དང་སྐྱེ་རྒུ་བདག་དང་སྐེམ་བྱེད་དང ། །གཞོན་དང་འཁོར་ལོ་འཛིན་དང་རྣམ་ཐོས་བུ། །ཕྱོགས་དང་རྒྱ་མཚོ་ཀུན་ལ་ཕྱག་འཚལ་ཏེ། །རྒྱལ་པོས་མཚན་མོ་རྐུན་པོ་བཟུང་བ་བཞིན། །དབུལ་པོ་བུ་ལོན་ཆགས་པ་བུ་ལོན་པས། །བཟུང་ན་གཉེན་སྦྲོན་གསོལ་བ་འདེབས་པ་བཞིན། །ལྷ་བའི་རྣམ་པར་གནས་པའི་བྱིས་པ་དག་།དབང་ཕྱུག་ལས་ནི་བདེ་བ་ཚོལ་བགྱིད་པ། །རྐུན་པོའི་ཚོགས་རྣམས་བཙོན་རར་སྩལ་བ་བཞིན། །འགྲོ་བ་རྣམས་སུ་སྡུག་བསྔལ་བརྒྱ་མྱོང་བ། །དེ་དག་དེ་བཞིན་གཤེགས་པ་ཁྱོད་ཀྱིས་གཟིགས། །ཕྱག་གི་མཐོང་ན་སོར་མོ་ལྔ་དང་མཚུངས། །དེ་ལ་མི་དབང་ཐུགས་རྗེ་བསྐྱེད་ནས་ནི། །འགྲོ་བ་མཁྱེན་པ་འགྲོ་བ་སྤྱོད་མཛད་དེ། །བློ་མཆོག་ཚེ་རབས་འགྲོ་བ་བཀྲོལ་བ་ནི། །དཔེར་ན་རྒྱལ་པོས་བཙོན་རྣམས་བཀྱེ་བ་བཞིན། །འཇིག་རྟེན་སྨན་སླད་བསྐལ་པ་བསམ་ཡས་སུ། །དཀའ་བ་མཛད་ནས་བྱང་ཆུབ་མཆོག་བརྙེས་ཏེ། །ལྟ་བའི་རྣམ་པར་སེམས་ཅན་འཁྱམས་མཁྱེན་ནས། །དེ་དག་བཅིངས་ལས་ཁྱོད་ཀྱིས་གྲོལ་བར་མཛད། །བདེ་གཤེགས་མི་ཡི་སེངྒེ་རྐང་གཉིས་གཙོ། །ཆོས་ཚོགས་གང་ལ་
286b
མངའ་དབང་ཁྱོད་མཛད་པ། །ལྟ་བའི་རྣམ་པ་སྒྱུ་འདྲར་རྨོངས་མི་མངའ། །བདེ་གཤེགས་ཁྱོད་ནི་དེ་འདྲར་བདག་ཅག་འཚལ། །སྟོབས་རྣམས་གང་གིས་རྒྱལ་བ་སྟོབས་བརྙེས་ཤིང ། །མི་འཇིགས་གང་གིས་བསྔོ་བའི་དགྲ་བསལ་ཏེ། །འཁོར་གྱི་ནང་དུ་སེངྒེའི་སྒྲ་སྒྲོག་པ། །བློ་མཆོག་དེ་ནི་བདག་ཅག་ཐོབ་པར་ཤོག་།གང་གིས་རྒྱལ་བ་འཇིག་རྟེན་གསུམ་བསྐྱོད་དང ། །གང་གིས་མཐའ་ཡས་འོད་ནི་འགྱེད་པ་དང ། །བདག་གིས་མི་མཆོག་སེམས་ཅན་ལུང་སྟོན་པ། །དེ་རིང་ཡུད་ཀྱིས་བདག་ཅག་དེ་ཐོབ་ཤོག་།དེ་ནས་དེའི་ཚེ་བཅོམ་ལྡན་འདས་ཀྱིས་ཀུན་ཏུ་རྒྱུ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་ཕན་བཞེད་འཛུམ་པ་གང་མཛད་པ། །མུ་སྟེགས་ཚོགས་འདི་ཤིན་ཏུ་འཕགས་གྱུར་ཏམ། །མི་མཆོག་རང་བྱུང་ཅི་སླད་འཛུམ་པ་མཛད། །འཛུམ་རྒྱུ་དེ་ནི་ཁྱོད་ཀྱིས་བཀའ་སྩལ་གསོལ། །བདེ་བར་གཤེགས་པས་འཛུམ་པ་མཛད་མཐོང་ནས། །འཇིག་རྟེན་ཕན་བཞེད་འགྲོ་འདི་ཐེ་ཚོམ་འཚལ། །ཟླ་བ་ཉ་ལ་འགྲོ་བ་བལྟ་བ་བཞིན། །བལྟ་ཞིང་མཆིས་ན་རྒྱལ་བ་འཛུམ་རྒྱུ་གསུངས། །སུ་ཞིག་རྒྱལ་ལ་མཆོད་པ་དམ་པ་བགྱིས། །གང་གིས་དེ་རིང་ཡབ་ནི་མཉེས་པར་བགྱིས།།
287a
༄#། །རྒྱལ་བའི་ཡོན་ཏན་དེ་རིང་གང་གིས་མཐོང ། །མཁས་པ་མྱུར་དུ་ལེགས་པར་བཀའ་སྩལ་གསོལ། །མུ་སྟེགས་ཅན་རྣམས་ལུང་བསྟན་དེ་ཐོས་ན། །འཇིག་རྟེན་ཐམས་ཅད་རབ་ཏུ་དགའ་བར་འགྱུར། །འདི་ལྟར་འདི་དག་བདེ་བར་གཤེགས་པས་བཏུལ། །དེས་ན་འགྲོ་བ་ཀུན་གྱི་རྣམ་འབྲེན་ལགས། །རྒྱལ་བས་ཐེ་ཚོམ་ལེགས་པར་བསལ་དུ་གསོལ། །སོམ་ཉི་འཚལ་བའི་སོམ་ཉི་དགུམ་དུ་གསོལ། །དེས་ན་འཁོར་རྣམས་འདི་ཡིད་རངས་ཤིང་གནས། །སངས་རྒྱས་ཁྱོད་ཀྱི་དགོངས་ལ་དད་པར་མཆི། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དུས་འདི་ཤེས་གྱུར་ན། །རྒྱལ་བ་དགྲ་ལས་རྒྱལ་ལ་དྲིས་པ་ལེགས། །འདྲེན་པ་རང་བྱུང་ཉིད་ལ་དེ་དྲིས་པས། །འཇིག་རྟེན་ཕན་པའི་ཚིག་ཀྱང་བརྗོད་པར་འགྱུར། །འཛུམ་པ་འདི་ནི་ཇི་ལྟར་ངས་མཛད་པ། །འཛུམ་རྒྱུ་ངས་དེ་ཁྱོད་ལ་བསྟན་པར་བྱའི། །ཡང་དག་ཇི་བཞིན་ང་ཡི་བསྟན་པ་ལ། །དགའ་བའི་ཡིད་དུ་བྱོས་ཏེ་དེང་ཉོན་ཅིག་།མུ་སྟེགས་ཚོགས་འདི་རབ་ཏུ་དུལ་འགྱུར་ཏེ། །ལྟ་བའི་རྣམ་སྤངས་ལྟ་བ་བཟང་པོར་འགྱུར། །ལྟ་བའི་རྣམ་པར་འཇིག་རྟེན་འཁྱམས་མཐོང་ནས། །སྙིང་རྗེ་ཅན་གྱུར་བྱང་ཆུབ་རབ་ཏུ་ཞུགས། །ལྟ་བའི་རྣམ་པ་
287b
དག་ནི་རབ་སྤངས་ཏེ། །ལྟ་བ་དྲང་པོ་རྙོག་མེད་རྟོགས་གྱུར་ཅིང ། །ང་ཡིས་ལུང་བསྟན་ཐོགས་མེད་ཐོས་གྱུར་ནས། །དེ་དག་ཀུན་གྱིས་ཐམས་ཅད་མཁྱེན་སེམས་བསྐྱེད། །སྔོན་གྱི་རྒྱལ་བ་དག་ལ་དད་བསྐྱེད་དེ། །ཐུགས་རྗེ་ལྡན་པ་རྐང་གཉིས་དམ་པ་པོ། །རྒྱལ་བ་བྱེ་བ་ཉི་ཤུར་ཚང་བ་ལ། །བླ་མེད་བྱང་ཆུབ་ཚོལ་ཞིང་བསྙེན་བཀུར་བྱས། །རྒྱལ་བ་རྣམས་ལ་སྦྱིན་པ་མི་ཉུང་ཕུལ། །ཁྲིམས་དང་ཞི་བའི་ཏིང་ངེ་འཛིན་རྣམ་པར་སྦྱངས། །ཤེས་རབ་བརྩོན་འགྲུས་སྟོབས་ཀྱང་འབར་བར་བྱས། །ཐུགས་རྗེ་ལྡན་རྣམས་དྲུང་དུ་བཟོད་པ་སྟེ། །བྱང་ཆུབ་དམ་པ་བཙལ་ནས་ཡུན་རིང་དུ། །ཕ་རོལ་ཕྱིན་པ་དྲུག་ལ་བློ་ཡང་ཞུགས། །རྒྱལ་བ་དགྲ་ལས་རྒྱལ་ལ་ཞུ་བ་ཞུས། །སངས་རྒྱས་བརྒྱ་བགྲངས་དག་ལ་ཡིད་དགའ་བྱས། །དེ་དག་སྡིག་པའི་གྲོགས་ཀྱི་དབང་གིས་ནི། །ལྟ་བའི་རྣམ་པ་སྟུག་ལ་གནས་གྱུར་པ། །དེ་དག་བདེ་གཤེགས་རང་བྱུང་མཐོང་གྱུར་ནས། །ཆགས་པ་མེད་པས་ལྟ་བའི་རྣམ་པ་སྤངས། །སྟོན་པའི་དགོངས་པ་ཡང་དག་རྣམ་པར་རྟོགས། །སྟོན་པའི་དགོངས་པ་རྣམས་ལ་དད་པ་གནས། །མ་འོངས་དུས་ན་བྱང་ཆུབ་ཚོལ་བྱེད་ཅིང ། །རྒྱལ་བ་བྱེ་བ་བསྙེན་བཀུར་བྱེད་པར་འགྱུར། །མ་འོངས་བསྐལ་པ་སྐར་མ་འདྲ་བ་ལ། །རྒྱལ་བ་ང་རྒྱལ་བཅོམ་པ་མཚན་མཐུན་པ། །གྲགས་པ་ཆེན་པོར་ཕྱོགས་སུ་རྣམ་
288a
༄#། །པར་གྲགས། །འཇིག་རྟེན་མཁས་པ་འགྲོ་བ་འགྲེལ་བར་འགྱུར། །དེ་དག་སངས་རྒྱས་ཞིང་ཡང་དག་འགྱུར་ཏེ། །དེ་དག་བཀོད་པ་སྣ་ཚོགས་མཚུངས་པ་མེད། །སངས་རྒྱས་ཞིང་དེར་སྡིག་པའི་བློ་ཅན་མེད། །བློ་གྲོས་དག་པར་མཐུན་པ་ཤ་སྟག་གནས། །དེ་ནི་ངན་སོང་ཐམས་ཅད་རྣམ་པར་སྦྱངས། །མི་ཁོམ་བསལ་ཏེ་དུས་དེའི་ཐ་མ་ལ། །རྒྱལ་བ་དེ་དག་སྐུ་ཚེའི་སྟོབས་ལྡན་ཏེ། །ལོ་ནི་སྟོང་ཕྲག་བརྒྱད་ཅུ་ཐུབ་པར་འགྱུར། །མི་དེ་དག་གིས་བྱང་ཆུབ་འདི་ཐོས་ནས། །དེ་ཚེ་མི་མཉེས་པར་ནི་བྱེད་མི་འགྱུར། །ཆགས་མེད་བློ་མངའ་རྣམས་ཀྱི་མཚན་ཐོས་ན། །བུད་མེད་རྣམས་ཀྱང་སྐྱེས་པའི་ལུས་ཐོབ་འགྱུར། །དེ་ལྟར་ང་རྒྱལ་བཅོམ་པ་དྲང་སྲོང་ཆེ། །སྟོན་པས་མུ་སྟེགས་ལུང་བསྟན་བཀའ་སྩལ་པ། དེ་ཐོས་གྱུར་ནས་ལྷར་བཅས་འཇིག་རྟེན་རྣམས། །ཡིད་རངས་གྱུར་ཅིང་སྟོབས་ཀྱང་སྐྱེས་པར་འགྱུར། །མུ་སྟེགས་ཅན་ལུང་བསྟན་པའི་ལེའུ་སྟེ། ཉི་ཤུ་ལྔ་པའོ།། །།དེ་ནས་རྒྱལ་པོ་ཟས་གཙང་མ་འཁོར་དང་བཅས་པས་ལྷ་མ་ཡིན་རྣམས་དང ། ནམ་མཁའ་ལྡིང་རྣམས་ནས་ཀུན་ཏུ་རྒྱུ་རྣམས་ཀྱི་བར་གྱི་ལུང་བསྟན་པ་ཐོས་ནས་འདི་སྙམ་དུ་སེམས་པར་གྱུར་ཏེ། འདི་ལྟར་བཅོམ་ལྡན་འདས་ཀྱིས་ལེགས་པར་གསུངས་པས་འགྲོ་བ་ཐམས་ཅད་
288b
ཚིམ་པར་བྱས་པ་ནི། ངོ་མཚར་ཏོ། །སྙམ་ནས་དེ་ཡང་བུ་ལ་ཆགས་པས་ཀུན་ཏུ་དཀྲིས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་མའི་སེམས་ཐུགས་སུ་ཆུད་ནས་རྒྱལ་པོ་ཟས་གཙང་མ་ལ་བཀའ་སྩལ་པ། རྒྱལ་པོ་ཆེན་པོ། ཁྱོད་ལ་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། །ཚིག་འབྲུ་བཟང་པོ། །མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བའི་ཆོས་འདི་ལྟ་སྟེ། ཁམས་དྲུག་རྣམ་པར་དབྱེ་བ་ཞེས་བྱ་བའི་ཆོས་ཀྱི་རྣམ་གྲངས་བཤད་ཀྱི། དེ་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་བཤད་དོ། །བཅོམ་ལྡན་འདས། ལེགས་སོ། །ཞེས་གསོལ་ནས་རྒྱལ་པོ་ཟས་གཙང་མ་བཅོམ་ལྡན་འདས་ཀྱི་ལྟར་ཉན་པ་དང ། དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། ཁམས་དྲུག་རྣམ་པར་དབྱེ་བ་ཞེས་བྱ་བའི་ཆོས་ཀྱི་རྣམ་གྲངས་དེ་གང་ཞེ་ན། རྒྱལ་པོ་ཆེན་པོ། སྐྱེས་བུ་གང་ཟག་འདི་ནི། ཁམས་དྲུག་པ། རེག་པའི་སྐྱེ་མཆེད་དྲུག་པ། ཡིད་ཀྱི་ཉེ་བར་སྤྱོད་པ་བཅོ་བརྒྱད་པ་སྟེ། སྐྱེས་བུ་འདི་ནི། ཁམས་དྲུག་པ་ཞེས་གང་སྨྲས་པ་ཅི་ལ་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ། ཁམས་དྲུག་ནི། འདི་དག་གོ། དྲུག་གང་ཞེ་ན། འདི་ལྟ་སྟེ། སའི་ཁམས་དང ། ཆུའི་ཁམས་
289a
༄#། །དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་སོ། །རྒྱལ་པོ་ཆེན་པོ། དེ་དག་ནི།་ཁམས་དྲུག་སྟེ། སྐྱེས་བུ་འདི་ནི། ཁམས་དྲུག་པའོ། །ཞེས་གང་ངས་སྨྲས་པ་དེ་ནི། དེ་ལ་བརྟེན་ཏེ་སྨྲས་སོ། །སྐྱེས་བུ་འདི་ནི། རེག་པའི་སྐྱེ་མཆེད་དྲུག་པའོ། ། ཞེས་གང་སྨྲས་པ་དེ་ཅི་ལ་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ། རེག་པའི་སྐྱེ་མཆེད་དྲུག་ནི། འདི་དག་སྟེ། དྲུག་གང་ཞེ་ན། གཟུགས་རྣམས་ལ་བལྟ་བའི་ཕྱིར་མིག་གི་རེག་པའི་སྐྱེ་མཆེད་དང ། སྒྲ་རྣམས་ལ་ཉན་པའི་ཕྱིར་རྣ་བའི་རེག་པའི་སྐྱེ་མཆེད་དང ། དྲི་རྣམས་ལ་སྣོམ་པའི་ཕྱིར་སྣའི་རེག་པའི་སྐྱེ་མཆེད་དང ། རོ་རྣམས་ལ་མྱང་བའི་ཕྱིར་ལྕེའི་རེག་པའི་སྐྱེ་མཆེད་དང ། རེག་བྱ་རྣམས་ལ་རེག་པའི་ཕྱིར་ལུས་ཀྱི་རེག་པའི་སྐྱེ་མཆེད་དང ། ཆོས་རྣམས་རྣམ་པར་ཤེས་པའི་ཕྱིར་ཡིད་ཀྱི་རེག་པའི་སྐྱེ་མཆེད་དོ། །རྒྱལ་པོ་ཆེན་པོ། དེ་དག་ནི། རེག་པའི་སྐྱེ་མཆེད་དྲུག་སྟེ། སྐྱེས་བུ་འདི་ནི། རེག་པའི་སྐྱེ་མཆེད་དྲུག་པའོ། །ཞེས་གང་ངས་སྨྲས་པ་དེ་ནི། དེ་ལ་བརྟེན་ཏེ་སྨྲས་སོ། །རྒྱལ་པོ་ཆེན་པོ། སྐྱེས་བུ་དེ་ནི། ཡིད་ཀྱི་ཉེ་བར་སྤྱོད་པ་བཅོ་བརྒྱད་པའོ། །ཞེས་གང་སྨྲས་པ་དེ་ཅི་ལ་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ། ཡིད་ཀྱི་ཉེ་བར་
289b
སྤྱོད་པ་བཅོ་བརྒྱད་ནི། འདི་དག་སྟེ། བཅོ་བརྒྱད་གང་ཞེ་ན། འདི་ལ་མི་མིག་གིས་གཟུགས་མཐོང་ན། ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་གཟུགས་ལ་ཉེ་བར་སྤྱོད་དོ། །རྣ་བས་སྒྲ་ཐོས་ན། ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་སྒྲ་ལ་ཉེ་བར་སྤྱོད་དོ། །སྣས་དྲི་ཚོར་ན། ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་དྲི་ལ་ཉེ་བར་སྤྱོད་དོ། །ལྕེས་རོ་མྱོང་ན། ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་རོ་ལ་ཉེ་བར་སྤྱོད་དོ། །ལུས་ཀྱིས་རེག་བྱ་ལ་རེག་ན། ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་རེག་བྱ་ལ་ཉེ་བར་སྤྱོད་དོ། །ཡིད་ཀྱིས་ཆོས་རིག་ན། ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་ཆོས་ལ་ཉེ་བར་སྤྱོད་དོ། །རྒྱལ་པོ་ཆེན་པོ། དེ་ལ་གང་དག་ཡིད་བདེ་བར་ཉེ་བར་སྤྱོད་པ་དྲུག་དང ། གང་དག་ཡིད་མི་བདེ་བར་ཉེ་བར་སྤྱོད་པ་དྲུག་དང ། གང་དག་བཏང་སྙོམས་སུ་འགྱུར་བར་ཉེ་བར་སྤྱོད་པ་དྲུག་པོ་དེ་དག་གཅིག་ཏུ་བསྡུས་ན། ཡིད་ཀྱི་ཉེ་བར་སྤྱོད་པ་བཅོ་བརྒྱད་དུ་འགྱུར་རོ། །རྒྱལ་པོ་ཆེན་པོ། བཅོ་བརྒྱད་པོ་དེ་དག་ནི། ཡིད་ཀྱི་ཉེ་བར་སྤྱོད་པ་སྟེ། རྒྱལ་པོ་ཆེན་པོ། སྐྱེས་བུ་འདི་ནི། ཡིད་ཀྱི་ཉ་བར་སྤྱོད་པ་བཅོ་བརྒྱད་བའོ། །ཞེས་
290a
༄#། །གང་དེས་སྨྲས་པ་དེ་ནི། དེ་ལ་བརྟེན་ཏེ་སྨྲས་སོ། །རྒྱལ་པོ་ཆེན་པོ། དེ་ལ་སའི་ཁམས་ནི། རྣམ་པ་གཉིས་ཏེ། ནང་གི་ཡང་ཡོད། ཕྱི་རོལ་གྱི་ཡང་ཡོད་དོ། །རྒྱལ་པོ་ཆེན་པོ། ནང་གི་སའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་སྲ་བ་དང་མཁྲང་བའི་རྣམ་པ་དང ། ཉེ་བར་གྱུར་པ་དང ། ཟིན་པའོ། །དེ་ཡང་གང་ཞེ་ན། འདི་ལྟ་སྟེ། སྐྲ་དང ། སྤུ་དང ། སེན་མོ་དང ། སོ་དང ། རྡུལ་དང ། དྲི་མ་དང ། པགས་པ་དང ། ཤ་དང ། རྩ་དང ། ཆུ་རྒྱུས་དང ། རུས་པ་དང ། རྐང་དང ། སྙིང་དང ། མཆིན་པ་དང ། གློ་བ་དང ། མཁལ་མ་དང ། སུལ་མང་དང ། མཆིན་དྲི་དང ། རྒྱུ་མ་དང ། གཉེ་མ་དང ། ལྒང་པ་དང ། མཆོར་\?\་པ་དང ། ཕྱི་ས་དང ། གཞང་དང ། ཀླད་པ་དང ། ཀླད་རྒྱས་དང ། གཞན་ཡང་གང་ལུས་འདི་ལ་ནང་གི་ཁོང་ན་སྲ་བ་དང་མཁྲང་བའི་རྣམ་པ་དང ། ལུས་སུ་གཏོགས་པར་གྱུར་པ་དང ། ཟིན་པ་འདི་ནི། ནང་གི་སའི་ཁམས་ཞེས་བྱའོ། །རྒྱལ་པོ་ཆེན་པོ། ཕྱི་རོལ་གྱི་སའི་ཁམས་གང་ཞེ་ན། གང་ཅི་ཡང་རུང་སྟེ། ཕྱི་རོལ་གྱི་སྲ་བ་དང་མཁྲང་བའི་རྣམ་པ་དང ། ལུས་སུ་མ་གཏོགས་པ་དང ། མ་ཟིན་པ་འདི་ནི། ཕྱི་རོལ་གྱི་སའི་ཁམས་ཞེས་བྱའོ། །རྒྱལ་པོ་ཆེན་པོ། དེ་ལ་ནང་གི་སའི་
290b
ཁམས་འབྱུང་བའི་ཚེ་གང་ནས་ཀྱང་མི་འོང ། །འགག་པའི་ཚེ་ཡང་གང་དུའང་གསོག་པར་མི་འགྲོའོ། །རྒྱལ་པོ་ཆེན་པོ། བུད་མེད་ནང་དུ་བདག་ནི། བུད་མེད་དོ། །ཞེས་རྟོག་ཅིང ། དེ་ནང་དུ་བུད་མེད་ཅེས་བརྟགས་ནས་ཕྱི་རོལ་དུ་སྐྱེས་པའོ། །ཞེས་རྟོག་གོ་།ཕྱི་རོལ་དུ་སྐྱེས་པ་ལ་སྐྱེས་པ་ཞེས་བརྟགས་ནས་ཆགས་པར་གྱུར་ཏེ། ཕྱི་རོལ་གྱི་སྐྱེས་པ་དང་འཕྲད་པར་འདོད་དོ། །སྐྱེས་པ་དེ་ཡང་ནང་དུ་བདག་སྐྱེས་པ་ཞེས་རྟོག་སྟེ། དེ་ནང་དུ་བདག་ནི། སྐྱེས་པ་ཞེས་བརྟགས་ནས་ཕྱི་རོལ་ཏུ་བུད་མེད་ཅེས་རྟོག་གོ་།ཕྱི་རོལ་དུ་བུད་མེད་ལ་བུད་མེད་ཅེས་བརྟགས་ནས་ཆགས་པར་གྱུར་ཏེ། ཕྱི་རོལ་དུ་བུད་མེད་དང་འཕྲད་པར་འདོད་དོ། །འཕྲད་པར་འདོད་པས་འཕྲད་པར་འགྱུར་རོ། །འཕྲད་པའི་རྐྱེན་གྱིས་མེར་མེར་པོ་སྐྱེ་བར་འགྱུར་དུས་དེ་ཡོད་དོ། །རྒྱལ་པོ་ཆེན་པོ། གང་ལ་ཀུན་ཏུ་བརྟག་པ་དང ། གང་ཀུན་ཏུ་རྟོག་པ་དེ་གཉིས་ཀ་ཡང་མེད་དེ། བུད་མེད་ལ་ནི། བུད་མེད་མེད་དོ། །སྐྱེས་པ་ལ་ནི། སྐྱེས་པ་མེད་དོ། །དེ་ལྟར་མེད་ཅིང་ཡང་དག་པ་མ་ཡིན་པར་ཀུན་ཏུ་རྟོག་པ་སྐྱེ་སྟེ། ཀུན་ཏུ་རྟོག་པ་དེ་ཡང་ངོ་བོ་ཉིད་ཀྱིས་མེད་དོ། །ཀུན་ཏུ་རྟོག་པ་ཇི་ལྟ་བ་དེ་བཞིན་དུ་འཕྲད་པ་དང་མེར་མེར་པོ་ཡང་ངོ་བོ་ཉིད་ཀྱིས་མེད་དོ། །གང་ངོ་བོ་ཉིད་ཀྱིས་མེད་པ་དེ་ཇི་ལྟར་སྲ་བ་བསྐྱེད་པར་འགྱུར། །རྒྱལ་པོ་ཆེན་པོ། དེ་ལྟར་ཀུན་ཏུ་རྟག་པ་
291a
༄#། །ཤེས་པར་བྱས་ནས་སྲ་བ་ཉིད་རྟོགས་པར་བྱས་ཏེ་ཅི་ནས་སྲ་བ་ནི། སྐྱེ་བའི་ཚེ་གང་ནས་ཀྱང་མི་འོང་བར་ཤེས་པར་བྱའོ། །རྒྱལ་པོ་ཆེན་པོ། འདི་ལྟར་གང་ལུས་འདི་དུར་ཁྲོད་ཀྱི་མཐར་འགྱུར་བའི་དུས་དེ་ཡོད་དེ། དེའི་སྲ་བ་དེ་འཇིག་ཅིང་འགག་པར་འགྱུར་བའི་ཚེ་ཤར་ཕྱོགས་སུ་མི་འགྲོ། ལྷོ་ཕྱོགས་དང ། ནུབ་ཕྱོགས་དང།་བྱང་ཕྱོགས་དང ། སྟེང་དང ། འོག་དང ། ཕྱོགས་མཚམས་རྣམས་སུ་ཡང་མི་འགྲོ་སྟེ། རྒྱལ་པོ་ཆེན་པོ། ནང་གི་སའི་ཁམས་ནི། དེ་ལྟར་བལྟའོ། །རྒྱལ་པོ་ཆེན་པོ།་འཇིག་རྟེན་གནས་པ་འདི་ནམ་མཁར་གྱུར་པ་ལ་ཚངས་པའི་གཞལ་མེད་ཁང་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པ་གནས་པའི་དུས་ཡོད་དེ། རྒྱལ་པོ་ཆེན་པོ། དེའི་སྲ་བ་དེ་འབྱུང་བའི་ཆ་གང་ནས་ཀྱང་མི་འོང་ངོ ། །གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གཞལ་མེད་ཁང་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པ་བྱུང་ཡང་རྒྱལ་པོ་ཆེན་པོ།་དེའི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ ། །འཁོར་ཡུག་དང་འཁོར་ཡུག་ཆེན་པོའི་རི་རྡོ་རྗེའི་རྒྱུ་ལས་གྲུབ་པ་སྲ་ཞིང་བརྟན་ལ་ལྷུན་སྟུག་པ་རྣམས་གནས་པར་གྱུར་ཀྱང་དེ་དག་གི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ ། །རིའི་རྒྱལ་པོ་རི་རབ་དག་དང ། གཉའ་ཤིང་འཛིན་དག་དང ། མུ་ཁྱུད་འཛིན་དག་དང ། གཤོལ་མདའ་
291b
འཛིན་དག་དང ། རྡོ་རྗེ་འཛིན་དག་དང ། སེང་ལྡེང་ཅན་དག་དང ། རྣམ་པར་འདུད་དག་དང ། རི་རྟ་རྣ་དག་དང ། བལྟ་ན་སྡུག་དག་དང ། བལྟ་ན་སྡུག་ཆེན་པོ་དག་དང ། ཐེར་སྒྲེ་དག་དང ། སྤོས་ཀྱི་དད་ལྡང་དག་དང ། གངས་རི་དག་དང ། དེ་མ་ཡིན་པའི་རི་ནག་པོ་དག་ན་གནས་པ་དང ། ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གནས་པ་དང ། རྔམས་སུ་དཔག་ཚད་བརྒྱད་ཁྲི་བཞི་སྟོང་ཡོད་པ་རྒྱར་དཔག་ཚད་དྲུག་ཁྲི་ཡོད་པའི་ས་ཆེན་པོ་གནས་པར་གྱུར་ཀྱང་རྒྱལ་པོ་ཆེན་པོ། །སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ ། །རྒྱལ་པོ་ཆེན་པོ། འཇིག་རྟེན་འདི་འཇིག་པར་འགྱུར་བའི་ཚེ་ས་ཆེན་པོ་འདི་མེས་ཚིག་པའམ། ཆུས་བཤིག་པའམ། རླུང་གིས་གཏོར་བར་འགྱུར་བའི་དུས་དེ་ཡོད་དེ། དེ་མེས་ཚིག་ན་ནི། དུ་བ་ཡང་མི་མངོན། ཐལ་བའི་ལྷག་མ་ཡང་མི་མངོན་པར་འགྱུར་རོ། །འདི་ལྟ་སྟེ། དཔེར་ན། ནམ་མཁའ་ལ་མར་རམ།་འབྲུ་མར་གྱི་མེས་བསྲེགས་ན་དུ་བ་ཡང་མི་མངོན་ཞིང་ཐལ་བའི་ལྷག་མ་ཡང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་མེས་ཚིག་པའི་ཚེ་དུ་བ་ཡང་མི་མངོན་ཞིང་ཐལ་བའི་ལྷག་མ་ཡང་མི་མངོན་པར་འགྱུར་རོ། །ཆུས་བཤིག་པའི་ཚེ་ཡང་ལྷག་མ་ཡང་མི་མངོན་པར་འགྱུར་ཏེ། འདི་ལྟ་སྟེ།
292a
༄#། །དཔེར་ན། ལན་ཚཝ་ཆུའི་ནང་དུ་ཞུ་བ་ནི། ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་ཆུས་བཤིག་པའི་ཚེ་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །རླུང་གིས་གཏོར་བའི་ཚེ་ཡང་ལྷག་མ་ཅུང་ཟད་ཀྱང་མི་མངོན་པར་འགྱུར་ཏེ། འདི་ལྟ་སྟེ། དཔེར་ན། རྣམ་པར་འཐོར་རླུང་གིས་འདས་པའི་བྱེའུ་ནི། ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རླུང་གིས་གཏོར་བའི་ཚེ་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །རྒྱལ་པོ་ཆེན་པོ། དེ་ལྟར་སའི་ཁམས་དེ་འབྱུང་བ་ཡང་སྟོང ། སའི་ཁམས་འཇིག་པ་དང ། འབྱུང་བ་ཡང་ངོ་བོ་ཉིད་ཀྱིས་སྟོང་ངོ ། །རྒྱལ་པོ་ཆེན་པོ། སའི་ཁམས་ནི། ཐ་སྙད་ཙམ་མ་གཏོགས་པར་སའི་ཁམས་ཉིད་དུ་མི་དམིགས་ཏེ། ཐ་སྙད་དེ་ཡང་བུད་མེད་མ་ཡིན། སྐྱེས་པ་མ་ཡིན་གྱི། རྒྱལ་པོ་ཆེན་པོ། དེ་ལྟར་དེ་ཡང་དག་པ་ཇི་ལྟ་བ་བཞིན་གྱི་ཤེས་རབ་ཀྱིས་རྟོགས་ཤིག་།རྒྱལ་པོ་ཆེན་པོ། དེ་ལ་ཆུའི་ཁམས་ནི ། རྣམ་པ་གཉིས་ཏེ། ནང་གི་དང ། ཕྱི་རོལ་གྱིའོ། །ནང་གི་ཆུའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་ཆུ་དང ། ཆུའི་རྣམ་པ་དང ། ཆུ་ཉིད་
292b
དང ། རླན་པ་དང ། རླན་པའི་རྣམ་པ་དང ། རླན་པ་ཉིད་དང ། གཤེར་བ་ཉིད་དང ། ལུས་སུ་གཏོགས་པ་དང ། ཟིན་པའོ། །དེ་ཡང་གང་ཞེ་ན། འདི་ལྟ་སྟེ། མཆི་མ་དང ། རྡུལ་དང ། མཆིལ་མ་དང ། སྣབས་དང ། ཆུ་སེར་དང ། ཚིལ་བུ་དང ། མཁྲིས་པ་དང ། ངར་སྣབས་དང ། རྣག་དང ། ཁྲག་དང ། འོ་མ་དང ། གཅིན་དང ། གཞན་ཡང་གང་ལུས་འདི་ལ་ནང་གི་ཁོང་ན་ཆུ་དང ། ཆུའི་རྣམ་པ་དང ། ཆུ་ཉིད་དང ། རླན་པ་དང ། རླན་པའི་རྣམ་པ་དང ། རླན་པ་ཉིད་དང ། གཤེར་བ་ཉིད་དང ། ལུས་སུ་གཏོགས་པ་དང ། ཟིན་པ་འདི་ནི། ནང་གི་ཆུའི་ཁམས་ཞེས་བྱའོ། །ཕྱི་རོལ་གྱི་ཆུའི་ཁམས་གང་ཞེ་ན། གང་ཕྱི་རོལ་གྱི་ཆུ་དང ། ཆུའི་རྣམ་པ་དང ། ཆུ་ཉིད་དང ། རླན་པ་དང ། རླན་པའི་རྣམ་པ་དང ། རླན་པ་ཉིད་དང ། གཤེར་བ་ཉིད་དང ། ལུས་སུ་མ་གཏོགས་པ་དང ། མ་ཟིན་པ་འདི་ནི། ཕྱི་རོལ་གྱི་ཆུའི་ཁམས་ཞེས་བྱའོ། །རྒྱལ་པོ་ཆེན་པོ།་དེ་ལ་ནང་གི་ཆུའི་ཁམས་འབྱུང་བའི་ཚེ་གང་ནས་ཀྱང་མི་འོང་ངོ ། །རྒྱལ་པོ་ཆེན་པོ། སྡུག་པ་མཐོང་ན་མཆི་མ་འབྱུང་བ་དང ། སྡུག་བསྔལ་གྱིས་ཉེན་པ་དང ། ཆོས་ཀྱི་ཤུགས་ཀྱིས་མཆི་མ་འབྱུང་བ་དང ། རླུང་གིས་བཏབ་བམ། རྣམ་པ་གཞན་དག་གིས་ཀྱང་མཆི་མ་འབྱུང་སྟེ། དཔྱད་བྱས་པས་ཀྱང་ནང་གི་ཆུའི་ཁམས་འཕེལ་བར་འགྱུར་
293a
༄#། །བའི་དུས་དེ་ཡོད་དེ། རྒྱལ་པོ་ཆེན་པོ། ཆུའི་ཁམས་དེ་འབྱུང་བའི་ཚེ་གང་ནས་ཀྱང་མི་འོང་ངོ ། །རྒྱལ་པོ་ཆེན་པོ། གང་ནང་གི་ཆུའི་ཁམས་ཡོངས་སུ་སྐམ་པར་འགྱུར་བའི་དུས་དེ་ཡོད་དེ། དེ་ཡོངས་སུ་སྐམ་ཞིང་འགག་པའི་ཚེ་གང་དུའང་མི་འགྲོའོ། །རྒྱལ་པོ་ཆེན་པོ། གང་ནང་གི་མེའི་ཁམས་ཤས་ཆེ་བར་གྱུར་ན།་དེས་ནང་གི་ཆུའི་ཁམས་ཡོངས་སུ་གདུང་བར་གྱུར་པའི་དུས་དེ་ཡོད་དེ། གདུངས་པའི་ཚེ་གང་དུའང་མི་འགྲོའོ། །རྒྱལ་པོ་ཆེན་པོ། དེ་བཞིན་དུ་ནང་གི་ཆུའི་ཁམས་འབྱུང་བའི་ཚེ་གང་ནས་ཀྱང་མི་འོང ། །འགག་པའི་ཚེ་གང་དུའང་མི་འགྲོའོ། །རྒྱལ་པོ་ཆེན་པོ། གང་འཇིག་རྟེན་འདི་ཆགས་པར་འགྱུར་བའི་དུས་དེ་ཡོད་དེ ། འཇིག་རྟེན་གྱི་ཁམས་འདི་ཆགས་པར་འགྱུར་བའི་ཚེ་ནམ་མཁའ་འདི་ལ་ཀུན་ཏུ་སྤྲིན་ཤིན་ཏུ་སྟུག་པོའི་ཚོགས་སུམ་ཅུ་རྩ་གཉིས་འཁྲིགས་པར་འགྱུར་ཏེ། དེ་དག་འཁྲིགས་པས་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཡོག་པར་འགྱུར་ཏེ། དེ་ལས་བསྐལ་པ་བར་མ་ལྔའི་བར་དུ་གཤོལ་མདའ་ཙམ་གྱི་ཆར་གྱི་རྒྱུན་འབབ་བོ། །བསྐལ་པ་བར་མ་ལྔའི་བར་དུ་གླང་པོ་ཆེའི་ཕོ་མཚན་ཙམ་གྱི་ཆར་འབབ་བོ། །བསྐལ་པ་བར་མ་ལྔའི་བར་དུ་རྒྱུན་མི་འཆད་
293b
པའི་ཆར་འབབ་བོ། །བསྐལ་པ་བར་མ་ལྔའི་བར་དུ་ཐིགས་པ་ཆེན་པོའི་ཆར་འབབ་བོ། །ངེས་ས་ཆེན་འདི་ནས་ཚངས་པའི་འཇིག་རྟེན་གྱི་བར་དུ་ཆུས་ཁྱབ་པར་གང་བར་འགྱུར་ཏེ།་རྒྱལ་པོ་ཆེན་པོ། ཆུའི་ཕུང་པོ་ཆེན་པོ་དེ་འབྱུང་བའི་ཚེའང་གང་ནས་ཀྱང་མི་འོང་ངོ ། །རྒྱལ་པོ་ཆེན་པོ། གང་འཇིག་རྟེན་འདི་འཇིག་པར་འགྱུར་བའི་དུས་དེ་ཡོད་དེ། འཇིག་རྟེན་གྱི་ཁམས་འཇིག་པར་འགྱུར་བའི་ཚེ་ཉི་མ་གཉིས་འཇིག་རྟེན་དུ་འབྱུང་བར་འགྱུར་ཏེ། ཉི་མ་གཉིས་འཇིག་རྟེན་དུ་བྱུང་བས་ཆུ་མིག་དང ། ཆུ་བྲན་རྣམས་སྐམ་པར་འགྱུར་རོ། །དེ་ནས་ཉི་མ་གསུམ་འཇིག་རྟེན་དུ་འབྱུང་སྟེ། ཉི་མ་གསུམ་འཇིག་རྟེན་དུ་བྱུང་བས་ཆུ་མིག་ཆེན་པོ་དང ། ཆུ་ཀླུང་ཆེན་པོ་རྣམས་སྐམ་པར་འགྱུར་རོ། །དེ་ནས་ཉི་མ་བཞི་འཇིག་རྟེན་དུ་འབྱུང་སྟེ། ཉི་མ་བཞི་འཇིག་རྟེན་དུ་བྱུང་བས་གང་ན་ཆུ་ཀླུང་ཆེན་པོ་བཞི་པོ་འདི་དག་འབབ་པའི་མཚོ་ཆེན་པོ་མ་དྲོས་པ་དེ་ཡང་ཡོངས་སུ་སྐམ་པར་འགྱུར་རོ།། ཐིམ་པར་འགྱུར་ཏེ་མེད་པར་འགྱུར་རོ། །དེ་ནས་ཉི་མ་ལྔ་འཇིག་རྟེན་དུ་བྱུང་སྟེ། ཉི་མ་ལྔ་འཇིག་རྟེན་དུ་འབྱུང་བས་རྒྱ་མཚོ་ཆེན་པོ་ཡང་དཔག་ཚད་གཅིག་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་གཉིས་དང ། གསུམ་དང ། བཞི་དང ། ལྔ་དང ། བཅུ་དང ། ཉི་ཤུ་དང ། སུམ་ཅུ་དང ། བཞི་བཅུ་དང ། དཔག་ཚད་ལྔ་བཅུ་ཙམ་གྱི་ཆུ་
294a
༄#། །ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་བརྒྱ་དང ། ཉིས་བརྒྱ་དང ། སུམ་བརྒྱ་དང ། བཞི་བརྒྱ་དང ། དཔག་ཚད་ལྔ་བརྒྱ་དང ། དཔག་ཚད་སྟོང་དང ། ཉིས་སྟོང་དང ། སུམ་སྟོང་དང ། དཔག་ཚད་བཞི་སྟོང་ཙམ་དུ་རྒྱ་མཚོ་ཆེན་པོ་ལས་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །རྒྱལ་པོ་ཆེན་པོ། རྒྱ་མཚོ་ཆེན་པོ་ལ་དཔག་ཚད་བཞི་ཁྲིའི་ཆུ་ལུས་པར་འགྱུར་བ་དང ། དཔག་ཚད་སུམ་ཁྲི་དང ། ཉི་ཁྲི་དང ། ཁྲི་དང ། དགུ་སྟོང་དང ། བརྒྱད་སྟོང་དང ། བདུན་སྟོང་དང ། དྲུག་སྟོང་དང ། ལྔ་སྟོང་དང ། བཞི་སྟོང་དང ། སུམ་སྟོང་དང ། ཉིས་སྟོང་དང ། སྟོང་གི་ཆུ་ལུས་པར་འགྱུར་བ་དང ། དཔག་ཚད་དགུ་བརྒྱའི་ཆུ་ལུས་པར་འགྱུར་བ་དང ། དཔག་ཚད་བརྒྱད་བརྒྱ་དང ། བདུན་བརྒྱ་དང ། དྲུག་བརྒྱ་དང ། ལྔ་བརྒྱ་དང ། བཞི་བརྒྱ་དང ། སུམ་བརྒྱ་དང ། ཉིས་བརྒྱ་དང ། བརྒྱའི་ཆུ་ལུས་པར་འགྱུར་བ་དང ། དཔག་ཚད་ལྔ་བཅུ་དང ། བཞི་བཅུ་དང ། སུམ་ཅུ་དང ། ཉི་ཤུ་དང ། བཅུ་དང ། དགུ་དང ། བརྒྱད་དང ། བདུན་དང ། དྲུག་དང ། ལྔ་དང ། བཞི་དང ། གསུམ་དང ། གཉིས་དང ། དཔག་ཚད་གཅིག་གི་ཆུ་ལུས་པར་འགྱུར་བ་དང ། ཤིང་ཏ་ལ་བཅུ་དང ། དགུ་དང ། བརྒྱད་དང ། བདུན་དང ། དྲུག་དང ། ལྔ་དང ། བཞི་དང ། གསུམ་
294b
དང ། གཉིས་དང ། ཤིང་ཏ་ལ་གཅིག་ཙམ་གྱི་ཆུ་ལུས་པར་འགྱུར་བ་དང ། མི་འགྲེང་བཅུ་དང ། དགུ་དང ། བརྒྱད་དང ། བདུན་དང ། དྲུག་དང ། ལྔ་དང ། བཞི་དང ། གསུམ་དང ། མི་འགྲེང་གཉིས་ཙམ་གྱི་ཆུ་ལུས་པར་འགྱུར་བ་དང ། ལྐོག་མ་ནུབ་ཙམ་དང ། མཆན་ཁུང་ནུབ་ཙམ་དང ། ལྟེ་བ་ནུབ་ཙམ་དང ། པུས་མོ་ནུབ་ཙམ་གྱི་ཆུ་ལུས་པར་འགྱུར་བ་ནས་བ་ལང་གི་མིག་རྗེས་ཀྱི་ཆུ་ཙམ་གྱི་བར་དུ་ལུས་པར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ། གང་རྒྱ་མཚོ་ཆེན་པོ་ལས་ཟིལ་པ་ཕྲམ་ཕྲུམ་ཙམ་ལུས་པར་འགྱུར་བའི་དུས་དེ་ཡོད་དོ། །འདི་ལྟ་སྟེ། དཔེར་ན། ཆར་པའི་ཐིགས་པ་ཆེན་པོ་བབ་ན། ས་ཆེན་པོ་ལ་ཐོགས་མར་ཟིལ་པ་ཕྲམ་ཕྲུམ་ཙམ་དུ་འགྱུར་རོ། །རྒྱལ་པོ་ཆེན་པོ། དེ་བཞིན་དུ་རྒྱ་མཚོ་ཆེན་པོ་དེ་ཡང་ཟིལ་པ་ཕྲམ་ཕྲུམ་ཙམ་ལུས་པར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ། གང་རྒྱ་མཚོ་ཆེན་པོ་ལ་མཛུབ་མོ་བསྣུན་པ་ཙམ་གྱི་ཆུའང་མ་ལུས་པར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ། དེ་ཙམ་དུ་ཆུའི་ཁམས་དེ་འགགས་པའི་ཚེའང་གང་དུའང་མི་འགྲོ་སྟེ། ཤར་ཕྱོགས་དང ། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། སྟེང་དང ། འོག་དང ། ཕྱོགས་མཚམས་སུ་མི་འགྲོའོ། །རྒྱལ་པོ་ཆེན་པོ། ཆུའི་ཁམས་དེ་ནི། སྐྱེ་བ་ཡང་སྟོང ། འཇིག་པ་ཡང་སྟོང ། གནས་
295a
༄#། །བའི་ཚེའང་ཆུའི་ཁམས་དེ་རང་བཞིན་གྱིས་སྟོང་སྟེ། རྒྱལ་པོ་ཆེན་པོ། ཆུའི་ཁམས་དེ་ནི། ཐ་སྙད་ཙམ་མ་གཏོགས་པར་ཆུའི་ཁམས་ཀྱིས་སྟོང་ཞིང་མི་དམིགས་པ་སྟེ། ཐ་སྙད་དེ་ཡང་བུད་མེད་མ་ཡིན། སྐྱེས་པ་མ་ཡིན་ནོ། །དེ་ལྟར་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་ཤིག ། རྒྱལ་པོ་ཆེན་པོ། དེ་ལ་མེའི་ཁམས་ནི། རྣམ་པ་གཉིས་ཏེ། ནང་གི་དང ། ཕྱི་རོལ་གྱིའོ། ནང་གི་མེའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་མེ་དང ། མེའི་རྣམ་པ་དང ། དྲོ་བ་དང ། དྲོ་བའི་རྣམ་པ་དང ། ལུས་ལ་གཏོགས་པ་དང ། ཟིན་པའོ། །དེ་ཡང་གང་ཞེ་ན། གང་གིས་ལུས་འདི་གདུངས་པ་དང ། ཀུན་ཏུ་གདུང་བ་དང ། ཡོངས་སུ་གདུང་བ་དང ། གང་གིས་ཟོས་པ་དང ། འཐུངས་པ་དང ། འཆོས་པ་དང ། མྱང་བ་རྣམས་བདེ་ཞིང་ལེགས་པར་ཞུ་བར་འགྱུར་བ་དང ། གང་གི་ཤས་ཆེས་ན། རིམས་སོ། ། རིམས་སོ། །ཞེས་བྱ་བའི་གྲངས་སུ་འགྲོ་བ་དང ། གཞན་ཡང་གང་ལུས་འདི་ལ་ནང་གི་ཁོང་ན་མེ་དང ། མེའི་རྣམ་པ་དང ། དྲོ་བ་དང ། དྲོ་བའི་རྣམ་པ་དང ། ལུས་སུ་གཏོགས་པ་དང ། ཟིན་པ་འདི་ནི། ནང་གི་མེའི་ཁམས་ཞེས་བྱའོ། །ཕྱི་རོལ་གྱི་མེའི་ཁམས་གང་ཞེ་ན། གང་ཕྱི་རོལ་གྱི་མེ་དང ། མེའི་རྣམ་པ་དང ། དྲོ་བ་དང ། དྲོ་
295b
བའི་རྣམ་པ་དང ། ལུས་སུ་མ་གཏོགས་པ་དང ། མ་ཟིན་པ་སྟེ། དེ་ནི། མི་དག་རྩུབ་ཤིང་དང་ལྡན་པའམ། རྩཝ་དང་ལྡན་པའམ། བ་ལང་གི་ལྕི་བའི་བུར་མའམ། ཤིང་བལ་གྱི་སྒོ་ང་དང་ལྡན་པར་བྱས་ཤིང་མེ་འབྱིན་ཏེ། དེ་བྱུང་ནས་གྲོང་ཡང་ཚིག་།གྲོང་གི་ཕྱོགས་ཀྱང་ཚིག་།གྲོང་ཁྱེར་རམ། གྲོང་ཁྱེར་གྱི་ཕྱོགས་སམ། ཡུལ་ལམ། ཡུལ་གྱི་ཕྱོགས་སམ།་གླིང་ངམ། རྩཝའི་གཏོས་སམ། ནགས་སམ། ཤིང་ངམ། རྩཝའམ། བ་ལང་གི་ལྕི་བ་དག་བསྲེག་ཅིང་འགྲོ་བ་དང ། གཞན་ཡང་གང་ཚུལ་འདི་དང་འདྲ་བ་འདི་ནི། ཕྱི་རོལ་གྱི་མེའི་ཁམས་ཞེས་བྱའོ། །རྒྱལ་པོ་ཆེན་པོ། དེ་ལ་ཕྱི་རོལ་གྱི་མེའི་ཁམས་ནི། འབྱུང་བའི་ཚེའང་གང་ནས་ཀྱང་མི་འོང ། །འགག་པའི་ཚེ་ཡང་གང་དུ་ཡང་གསོག་པར་མི་འགྲོ་སྟེ།་དེ་ནི། རང་བཞིན་དང་བྲལ་བའི་ཕྱིར་མེད་པ་ལས་ཡོད་པར་འགྱུར་ཞིང ། ཡོད་པར་གྱུར་ནས་ཀྱང་མེད་པར་འགྱུར་རོ། །རྒྱལ་པོ་ཆེན་པོ། དེ་ལ་རླུང་གི་ཁམས་ཀྱང་རྣམ་པ་གཉིས་ཏེ། ནང་གི་དང ། ཕྱི་རོལ་གྱིའོ། །དེ་ལ་ནང་གི་རླུང་གི་ཁམས་ཤེ་ན། གང་ལུས་འདི་ལ་རླུང་དང ། རླུང་གི་རྣམ་པ་དང ། ཡང་བ་ཉིད་དང ། གཡོ་བ་ཉིད་དང ། ལུས་སུ་གཏོགས་པ་དང ། ཟིན་པའོ། །དེ་ཡང་གང་ཞེ་ན། འདི་ལྟ་སྟེ། གྱེན་དུ་འགྲོ་བའི་རླུང་དང ། ཐུར་དུ་འགྲོ་བའི་རླུང་དང ། ཐད་ཀར་འགྲོ་བ་དང ། རྒྱབ་ཏུ་འགྲོ་བ་དང །
296a
༄#། །རྒྱབ་ཏུ་གནས་པ་དང ། ལྟོ་ན་གནས་པ་དང ། འཆད་པར་བྱེད་པ་དང ། འགག་པར་བྱེད་པ་དང ། གཟེར་བ་དང ། འདར་བུ་དང ། སྣ་སྐད་དང ། རླུང་སྐྲན་དང ། དབུགས་འབྱུང་བ་དང ། རྔུབ་པ་དང་ལྡན་པ་དང ། ཡན་ལག་དང་ལྡན་པ་དང ། ཡན་ལག་དང་ཉིད་ལག་ལ་གནས་པའི་རླུང་དག་དང ། གཞན་ཡང་གང་དག་ལུས་འདི་ལ་ནང་གི་ཁོང་ན་རླུང་དང ། རླུང་གི་རྣམ་པ་དང ། ཡང་བ་ཉིད་དང ། གཡོ་བ་ཉིད་དང ། ལུས་སུ་གཏོགས་པ་དང ། ཟིན་པ་འདི་ནི། ནང་གི་རླུང་གི་ཁམས་ཞེས་བྱའོ། །ཕྱི་རོལ་གྱི་རླུང་གི་ཁམས་གང་ཞེ་ན། གང་ཕྱི་རོལ་གྱི་རླུང་དང ། རླུང་གི་རྣམ་པ་དང ། ཡང་བ་ཉིད་དང ། གཡོ་བ་ཉིད་དང ། ལུས་སུ་མ་གཏོགས་པ་དང ། མ་ཟིན་པ་དག་སྟེ། ཕྱི་རོལ་གྱི་རླུང་དེ་ལ་ཡང་ཤར་ཕྱོགས་ཀྱི་རླུང་ཡོད་དོ། །ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་ཀྱི་རླུང་ཡོད་དོ། །རྡུལ་དང་བཅས་པ་དང ། རྡུལ་མེད་པ་དང ། ཆུང་བ་དང ། ཆེ་བའི་རླུང་ཡོད་དོ། །ཀུན་ཏུ་ཁྱབ་པའི་རླུང་དང ། རྣམ་པར་འཐོར་བའི་རླུང་དང ། ཚུབ་མའི་རླུང་དག་ཀྱང་ཡོད་དོ། །རྒྱལ་པོ་ཆེན་པོ།་རླུང་གི་ཕུང་པོ་ཆེན་པོ་ལངས་ན། ཤིང་དག་ཀྱང་གཅོག་།རྩིག་པའི་ཁ་དོག་དང ། རིའི་རྩེ་མོ་དག་ཀྱང་བསྙིལ་ཞིང ། བསྙིལ་ནས་རྨེག་\?\་མེད་པར་འགྱུར་བ་དག་དང་།།
296b
ཡང་སེམས་ཅན་དག་གོས་ཀྱི་མཐའ་མའམ། སྦུད་པའམ། རླུང་ཡབ་དག་གིས་རླུང་དེ་གཡོབ་པའི་དུས་དེ་ཡོད་དེ། གཞན་ཡང་གང་ཚུལ་འདི་དང་འདྲ་བ་དེ་ནི། ཕྱི་རོལ་གྱི་རླུང་གི་ཁམས་ཞེས་བྱའོ། །རྒྱལ་པོ་ཆེན་པོ། དེ་ལ་ནང་དང ། ཕྱིའི་རླུང་གི་ཁམས་ནི། འབྱུང་བའི་ཚེའང་གང་ལས་ཀྱང་མི་འོང ། འགག་པའི་ཚེའང་གང་དུ་ཡང་གསོག་པར་མི་འགྲོ་སྟེ། རང་བཞིན་དང་བྲལ་བའི་ཕྱིར་མེད་པ་ལས་ཡོད་པར་འགྱུར་ཞིང ། ཡོད་པར་གྱུར་ནས་ཀྱང་མེད་པར་འགྱུར་རོ། །རྒྱལ་པོ་ཆེན་པོ། དེ་ལ་ནམ་མཁའི་ཁམས་ཀྱང་རྣམ་པ་གཉིས་ཏེ། ནང་གི་དང ། ཕྱི་རོལ་གྱིའོ། །ནང་གི་ནམ་མཁའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་ལུས་ལ་ཡོད་པ་དང ། ཟིན་པ་དང ། ནམ་མཁའ་དང ། ནམ་མཁའི་དམ་པ་ནང་ཞེས་བྱ་བའི་གྲངས་སུ་འགྲོ་བ་མ་གང་བ། པགས་པ་དང ། ཤ་དང ། ཁྲག་གིས་དགང་བར་བྱ་བ་མ་ཡིན་པའོ། །དེ་ཡང་གང་ཞེ་ན། ལུས་འདི་ལ་མིག་གི་ནང་ཞེའམ། རྣ་བ་དང ། སྣའི་ནང་ཞེའམ། ཁ་ཞེའམ། ཁའི་ནང་ཞེའམ། ཁའི་སྒོ་ཞེའམ། ལྐོག་མ་ཞེའམ། མིད་པ་ཞེའམ ། གང་ནས་མིད་བ་དང ། གང་དུ་གནས་པ་དང ། གང་གིས་ཟོས་པ་དང ། འཐུངས་པ་དང ། འཆོས་པ་དང ། མྱངས་པ་རྣམས་ཐུར་དུ་རྒྱུ་བར་བྱེད་པ་དང ། གཞན་ཡང་གང་ལུས་
297a
༄#། །འདི་ལ་ནང་གི་ཁོང་ན་ལུས་ལ་ཡོད་པ་དང ། ཟིན་པ་དང ། ཕུང་པོར་གྱུར་པའམ། ཁམས་སུ་གྱུར་པའམ། སྐྱེ་མཆེད་དུ་གྱུར་པ་དག་གི་ནམ་མཁའ་དང ། ནམ་མཁའི་རྣམ་པ་དང ། མ་གང་བ་དང ། པགས་པ་དང ། ཤ་དང ། ཁྲག་གིས་དགང་བར་བྱ་བ་མ་ཡིན་པ་ནང་གི་གྲངས་སུ་འགྲོ་བ་ཁོང་སྟོང་དང ། བུ་ག་ཞེས་བྱ་བ་དག་སྟེ། དེ་ནི། ནང་གི་ནམ་མཁའི་ཁམས་སོ། །ཕྱི་རོལ་གྱི་ནམ་མཁའི་ཁམས་གང་ཞེ་ན། གང་ཅི་ཡང་རུང་སྟེ། ཕྱི་རོལ་གྱི་ནམ་མཁའ་དང ། ནམ་མཁའི་རྣམ་པ་དང ། མ་གང་བ་དང ། གཟུགས་སུ་གྱུར་པས་དགང་བར་བྱ་བ་མ་ཡིན་པ། མ་འདྲེས་པ། ཁོང་སྟོང་དང ། བུ་གར་གྱུར་པ་འདི་ནི། ཕྱི་རོལ་གྱི་ནམ་མཁའི་ཁམས་ཞེས་བྱའོ། །རྒྱལ་པོ་ཆེན་པོ། གང་ལས་ཀྱི་རྐྱེན་གྱིས་སྐྱེ་མཆེད་རྣམས་འབྱུང་བའི་དུས་དེ་ཡོད་དེ། དེ་དག་ནམ་མཁའི་ཁམས་ལ་སྒྲིབ་པར་འགྱུར་ཏེ། དེ་ནང་གི་ནམ་མཁའི་ཁམས་ཞེས་བྱ་བའི་གྲངས་སུ་འགྲོ་ཡང་དེ་ནི། གང་ལས་ཀྱང་མ་འོངས་སོ། །རྒྱལ་པོ་ཆེན་པོ། གཟུགས་ཞིག་ན། ཐམས་ཅད་ནམ་མཁར་འགྱུར་བའི་དུས་དེ་ཡོད་དོ། །དེ་ཅིའི་ཕྱིར་ཞེ་ན། ནམ་མཁའི་ཁམས་ནི། ཟད་མི་ཤེས་པའི་ཕྱིར་རོ། །དེ་ནི། ནམ་མཁའི་ཁམས་ཞེས་བྱ་སྟེ། གནས་ཤིང་མི་
297b
གཡོ་བའོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། འདུས་མ་བྱས་ནི། མྱ་ངན་ལས་འདས་པའི་དབྱིངས་ཏེ། དེ་བཞིན་དུ་ནམ་མཁའི་ཁམས་ཀྱང་ཐམས་ཅད་དུ་སོང་བར་བལྟ་བར་བྱའོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་གིས་ཐང་ལ་ཁྲོན་པའམ། རྫིང་བུའམ། ཁྲོན་རིང་ངམ། རྫིང་ཞིག་བརྐོས་ན། རྒྱལ་པོ་ཆེན་པོ། འདི་ལ་ཇི་སྙམ་དུ་སེམས། དེའི་ནམ་མཁའ་དེ་གང་ལས་འོངས། གསོལ་པ། བཅོམ་ལྡན་འདས། དེ་ནི། གང་ནས་ཀྱང་མ་མཆིས་སོ། །རྒྱལ་པོ་ཆེན་པོ། འདི་ལྟ་སྟེ ། དཔེར་ན། མི་དེས་ཁྲོན་པ་ནས་རྫིང་གི་བར་དེ་དག་ཕྱིར་བཀང་ན། རྒྱལ་པོ་ཆེན་པོ། དེ་ལ་ཇི་སྙམ་དུ་སེམས། དེའི་ནམ་མཁའ་དེ་གང་དུ་སོང ། གསོལ་པ། བཅོམ་ལྡན་འདས།་དེ་ནི། གང་དུ་ཡང་མ་མཆིས་ཏེ། དེ་ཅིའི་སླད་དུ་ཞེ་ན། ནམ་མཁའི་ཁམས་ནི། འགྲོ་བའམ་འོང་བར་ཉེ་བར་གནས་པ་མ་ལགས། བུད་མེད་ཀྱི་དངོས་པོ་དང ། སྐྱེས་པའི་དངོས་པོར་ཉེ་བར་གནས་པ་མ་ལགས་པའི་སླད་དུའོ། །བཀའ་སྩལ་པ། རྒྱལ་པོ་ཆེན་པོ། དེ་ལྟར་ན། ཕྱི་རོལ་གྱི་ནམ་མཁའི་ཁམས་ནི། མི་གཡོ་མི་འགྱུར་བའོ། །དེ་ཅིའི་ཕྱིར་ཞེ་ན། ནམ་མཁའི་ཁམས་ནི། ནམ་མཁའི་ཁམས་ཀྱིས་སྟོང་ཞིང ། ནམ་མཁའི་ཁམས་ནི། ནམ་མཁའི་ཁམས་དང་བྲལ་བ་སྟེ། ནམ་མཁའི་ཁམས་
298a
༄#། །ནི།་བུད་མེད་ཀྱི་དངོས་པོར་ཉེ་བར་མི་གནས། སྐྱེས་པའི་དངོས་པོར་ཉེ་བར་མི་གནས་ཀྱི། དེ་ལྟར་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་ཤིག་།རྒྱལ་པོ་ཆེན་པོ། དེ་ལ་རྣམ་པར་ཤེས་པའི་ཁམས་གང་ཞེ་ན། མིག་གི་དབང་པོ་ནི། བདག་པོ་དམིགས། གཟུགས་ནི། དམིགས་པ།་གཟུགས་སོ་སོར་རྣམ་པར་རིག་པ་སྟེ། སྔོན་པོ་རྣམ་པར་རིག་པའམ། སེར་པོ་དང ། དམར་པོ་དང ། ཁྲ་བོ་རྣམ་པར་རིག་པའམ། རིང་པོ་དང ། ཐུང་ངུ་དང ། སྦོམ་པོ་དང ། ཕྲ་མོ་རྣམ་པར་རིག་པ་སྟེ། རྒྱལ་པོ་ཆེན་པོ། དེ་ལྟར་གང་ཅི་ཡང་རུང ། ཁ་དོག་དང ། དབྱིབས་རྣམ་པར་རིག་པ་འདི་ནི། མིག་གི་རྣམ་པར་ཤེས་པའི་ཁམས་ཞེས་བྱའོ། དེ་བཞིན་དུ་གང་ཅི་ཡང་རུང ། རྣ་བའི་དབང་པོ་ནི། བདག་པོ་ནས་ཡིད་ཀྱི་དབང་པོ་ནི། བདག་པོ། ཆོས་ནི། དམིགས་པ་སྟེ། སྒྲ་རྣམ་པར་རིག་པའམ། དྲི་རྣམ་པར་རིག་པའམ། རོ་རྣམ་པར་རིག་པའམ། རེག་རྣམ་པར་རིག་པའམ། ཆོས་རྣམ་པར་རིག་པ་འདི་ནི། རྣ་བའི་རྣམ་པར་ཤེས་པའི་ཁམས་ནས་ཡིད་ཀྱི་རྣམ་པར་ཤེས་པའི་བར་གྱི་ཁམས་ཞེས་བྱ་སྟེ། དེ་ལྟར་དབང་པོ་དྲུག་ནི། བདག་པོ། ཡུལ་དྲུག་ནི། དམིགས་པ་ཡིན་ལ། ཡུལ་རྣམ་པར་རིག་པ་འདི་ནི། རྣམ་པར་ཤེས་པའི་ཁམས་
298b
ཞེས་བྱའོ། །རྒྱལ་པོ་ཆེན་པོ། རྣམ་པར་ཤེས་པའི་ཁམས་དེ་ནི། དབང་པོ་ལ་མི་བརྟེན། ཡུལ་རྣམས་ལས་མ་འོངས། བར་གྱི་དབུས་ན་མི་གནས་ཏེ། དེ་ནི། ནང་ན་ཡང་མ་ཡིན། ཕྱི་རོལ་ན་ཡང་མ་ཡིན། གཉི་ག་མེད་པ་ལ་ཡང་མ་ཡིན་ནོ། །རྣམ་པར་ཤེས་པའི་ཁམས་དེ་ནི། དངོས་པོ་སོ་སོར་རྣམ་པར་རིག་ནས་འགག་སྟེ། དེ་འབྱུང་བའི་ཚེ་གང་ནས་ཀྱང་མ་འོངས། འགག་པའི་ཚེ་གང་དུ་ཡང་མི་འགྲོའོ། །རྣམ་པར་ཤེས་པའི་ཁམས་དེ་འབྱུང་བ་ཡང་སྟོང ། འཇིག་པ་ཡང་སྟོང་སྟེ། རྣམ་པར་ཤེས་པའི་ཁམས་དེ་བྱུང་ཡང་རང་བཞིན་གྱིས་སྟོང་ངོ ། །རྒྱལ་པོ་ཆེན་པོ། དེ་ལྟར་ན། ཐ་སྙད་མ་གཏོགས་པར་རྣམ་པར་ཤེས་པའི་ཁམས་དེ་ནི། རྣམ་པར་ཤེས་པའི་ཁམས་ཉིད་ཀྱིས་སྟོང་སྟེ། ཐ་སྙད་དེ་ཡང་སྐྱེས་པ་མ་ཡིན། བུད་མེད་མ་ཡིན་གྱི། དེ་ནི། དེ་ལྟར་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་ཤིག་།རྒྱལ་པོ་ཆེན་པོ། དེ་ལ་མིག་གི་སྐྱེ་མཆེད་གང་ཞེ་ན། དེ་ནི། འབྱུང་བ་ཆེན་པོ་བཞི་དང་བ་སྟེ། འདི་ལྟར་སའི་ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་སོ། །དེ་ལ་སའི་ཁམས་དང་བ་ནི། མིག་གི་སྐྱེ་མཆེད་མ་ཡིན་ནོ། །ཆུའི་ཁམས་དང་བ་ཡང་མ་ཡིན་ནོ། །མེའི་ཁམས་དང་བ་ཡང་མ་ཡིན་ནོ། །རླུང་གི་ཁམས་དང་བ་ཡང་
299a
༄#། །མིག་གི་སྐྱེ་མཆེད་མ་ཡིན་ནོ། །དེ་ཅིའི་ཕྱིར་ཞེ་ན། སའི་ཁམས་དང་བ་ནི། ཆོས་གང་ལ་ཡང་སྐྱེ་མཆེད་དམ། སྐྱེ་མཆེད་ཐོབ་པར་བྱ་བར་ཉེ་བར་མི་གནས་སོ། །དེ་བཞིན་དུ་རླུང་གི་བར་གྱི་ཁམས་དང་བ་ནི། ཆོས་གང་ལ་ཡང་སྐྱེ་མཆེད་དམ། སྐྱེ་མཆེད་ཐོབ་པར་བྱ་བར་ཉེ་བར་མི་གནས་སོ། །དེ་ཅིའི་ཕྱིར་ཞེ་ན། ཆོས་དེ་དག་ནི། སེམས་པ་མེད་ཅིང་བྱེད་པ་མེད་ལ་ཅི་ཡང་མི་ནུས་པ་སྟེ། རྒྱལ་པོ་ཆེན་པོ། ཆོས་རྣམས་ནི། རེ་རེ་ནས་བཙལ་ན་ཐ་སྙད་ཙམ་མ་གཏོགས་པར་མིག་གི་སྐྱེ་མཆེད་མི་དམིགས་སོ། །དེ་ཅིའི་ཕྱིར་ཞེ་ན། སའི་ཁམས་དང་བ་ནི། སའི་ཁམས་དང་བས་སྟོང ། རླུང་གི་ཁམས་དང་བའི་བར་ནི། རླུང་གི་ཁམས་དང་བས་སྟོང་སྟེ། ཆོས་གང་དག་རང་བཞིན་གྱིས་སྟོང་པ་དེ་དག་ལ་དང་བའམ། འཁྲུགས་པར་འགྱུར་བའང་ག་ལ་ཡོད་དེ། གང་ལ་དང་བའམ། འཁྲུགས་པ་མི་དམིགས་པ་དེ་དག་ཇི་ལྟར་གཟུགས་ལ་ལྟ་བར་འགྱུར། དེ་ལྟར་མིག་གི་སྐྱེ་མཆེད་ནི། མིག་གི་སྐྱེ་མཆེད་ཀྱི་རང་བཞིན་གྱིས་ཤིན་ཏུ་སྟོང་སྟེ། དེ་ནི། འོང་བ་དང ། འགྲོ་བ་མེད་པའི་ཕྱིར་སྔོན་གྱི་མཐར་མི་དམིགས་སོ། །ཕྱི་མའི་མཐར་ཡང་མི་དམིགས་སོ། །རང་བཞིན་མེད་པའི་ཕྱིར་དེ་ལ་གནས་པ་ཡང་མི་དམིགས་སོ། །གང་རང་བཞིན་གྱིས་མེད་པ་དེ་ནི། བུད་མེད་ཀྱང་མ་
299b
ཡིན།་སྐྱེས་པ་ཡང་མ་ཡིན་ནོ། །གང་བུད་མེད་ཀྱང་མ་ཡིན། སྐྱེས་པ་ཡང་མ་ཡིན་པ་དེ་ནི། དེས་རློམ་སེམས་སུ་ནི། ག་ལ་འགྱུར་ཏེ། རྒྱལ་པོ་ཆེན་པོ། རློམ་སེམས་ནི། བདུད་ཀྱི་སྤྱོད་ཡུལ་ལོ། །རློམ་སེམས་མེད་པ་ནི། སངས་རྒྱས་ཀྱི་སྤྱོད་ཡུལ་ལོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི། རློམ་སེམས་དང་བྲལ་བའོ། །རྒྱལ་པོ་ཆེན་པོ། ཡང་དག་པ་ཇི་ལྟ་བ་བཞིན་དུ་རྟོགས་ན། མིག་གི་སྐྱེ་མཆེད་ནི། མིག་གི་སྐྱེ་མཆེད་ཀྱིས་སྟོང་ངོ ། །དེ་ཅིའི་ཕྱིར་ཞེ་ན། མིག་གི་སྐྱེ་མཆེད་འདི་ལ་ནི། མཚན་མ་མེད་དེ། དེའི་ཕྱིར་མིག་གི་སྐྱེ་མཆེད་ཀྱི་མཚན་མ་འདི་ནི། མིག་གི་སྐྱེ་མཆེད་ཀྱིས་སྟོང་སྟེ། འདི་ནི། སྟོང་པ་ཉིད་དོ། །མིག་གི་སྐྱེ་མཆེད་ནི། མཚན་མས་མཚན་མ་དང་བྲལ་བ་སྟེ། འདི་ནི། མཚན་མ་མེད་པའོ། །དེ་ནི། སྨོན་པར་མི་བྱེད་པས་འདི་ནི། སྨོན་པ་མེད་པའོ། །རྒྱལ་པོ་ཆེན་པོ། དེ་ལྟར་ན། མིག་གི་སྐྱེ་མཆེད་ནི། རྣམ་པར་ཐར་པའི་སྒོ་གསུམ་སྟེ། མིག་གི་སྐྱེ་མཆེད་ནི། རྣམ་པར་ཐར་པ་ལ་མངོན་པར་ཕྱོགས་པའོ། །རྒྱལ་པོ་ཆེན་པོ། དེ་ལ་རྣ་བའི་སྐྱེ་མཆེད་ནས་ལུས་ཀྱི་སྐྱེ་མཆེད་ཀྱི་བར་གང་ཞེ་ན། གང་འབྱུང་བ་ཆེན་པོ་བཞི་དང་པའོ། །རྒྱལ་པོ་ཆེན་པོ། དེ་ལྟར་ན། ཆོས་ཐམས་ཅད་ཀྱི་བར་ནི། རྣམ་པར་ཐར་པ་ལ་མངོན་པར་ཕྱོགས་པ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་ཀླས་
300a
༄#། །པ།་གདགས་སུ་མེད་པ། ཐ་སྙད་མེད་པ། བརྗོད་པ་མེད་པ། བརྗོད་པར་བྱ་བ་མ་ཡིན་པའོ། །རྒྱལ་པོ་ཆེན་པོ། གང་ལ་དབང་པོ་རྣམས་ཐོགས་པར་འགྱུར་བ་དེ་ནི། ཡུལ་རྣམས་ཞེས་བྱ་སྟེ། མིག་ནི། གཟུགས་རྣམས་ལ་ཐོགས་པར་འགྱུར་བས་དེའི་ཕྱིར་གཟུགས་རྣམས་ནི། མིག་གི་ཡུལ་ཞེས་བྱའོ། །དེ་བཞིན་དུ་རྣ་བ་ནི། སྒྲ་རྣམས་ལ། སྣ་ནི། དྲི་རྣམས་ལ། ལྕེ་ནི། རོ་རྣམས་ལ། ལུས་ནི། རེག་བྱ་རྣམས་ལ། ཡིད་ནི། ཆོས་རྣམས་ལ་ཐོགས་པར་འགྱུར་བས་དེའི་ཕྱིར་ཆོས་རྣམས་ནི། ཡིད་ཀྱི་ཡུལ་ཞེས་བྱའོ། །དེ་ལ་མིག་གཟུགས་རྣམས་ལ་ཐོགས་སོ། །ཞེས་བྱ་བ་འདི་ནི། འབབ་པའི་ཐོགས་པར་འགྱུར་བར་བསྟན་ཏེ། འདི་ལྟར་མིག་ནི། གཟུགས་རྣམས་ལ་རྣམ་པ་གསུམ་དུ་འབབ་སྟེ། མཐུན་པ་རྣམས་ལ་སྡུག་པའི་འདུ་ཤེས་ཀྱིས་འབབ་པ་དང ། མི་མཐུན་པ་རྣམས་ལ་ཁོང་ཁྲོ་བའི་འདུ་ཤེས་ཀྱིས་འབབ་པ་དང ། མཐུན་པ་ཡང་མ་ཡིན། མི་མཐུན་པ་ཡང་མ་ཡིན་པ་རྣམས་ལ་བཏང་སྙོམས་ཀྱི་འདུ་ཤེས་ཀྱིས་འབབ་པའོ། །དེ་བཞིན་དུ་ཡིད་ནི། ཆོས་རྣམས་ལ་ཐོགས་པར་འགྱུར་རོ། །ཞེས་བྱ་བ་འདི་ནི། འབབ་པའི་ཐོགས་པར་འགྱུར་བར་བསྟན་ཏེ། འདི་ལྟར་ཡིད་ནི། ཆོས་རྣམས་ལ་རྣམ་པ་གསུམ་དུ་འབབ་སྟེ། མཐུན་པ་རྣམས་ལ་རྗེས་
300b
སུ་ཆགས་པས་འབབ་པ་དང ། མི་མཐུན་པ་རྣམས་ལ་ཁོང་ཁྲོ་བས་འབབ་པ་དང ། མཐུན་པ་ཡང་མ་ཡིན། མི་མཐུན་པ་ཡང་མ་ཡིན་པ་རྣམས་ལ་རྨོངས་པས་འབབ་པའི་ཡུལ་དེ་དག་ནི། ཡིད་ཀྱི་སྤྱོད་ཡུལ་ཞེས་བྱ་སྟེ། དེ་ལ་ཡིད་སྤྱོད་ཅིང་རྣམ་པར་སྤྱོད་པས་དེའི་ཕྱིར་ཡིད་ཀྱི་སྤྱོད་ཡུལ་ཞེས་བྱའོ། །རྒྱལ་པོ་ཆེན་པོ། ཡིད་དེ་མཐུན་པའི་གཟུགས་རྣམས་ལ་རྗེས་སུ་ཆགས་པར་སྤྱོད་པ་དེས་ནི། དེའི་འདོད་ཆགས་སྐྱེ་བར་འགྱུར། མི་མཐུན་པའི་གཟུགས་རྣམས་ལ་ཁོང་ཁྲོ་བར་སྤྱོད་པ་དེས་ནི། དེའི་ཞེ་སྡང་སྐྱེ་བར་འགྱུར། མཐུན་པ་ཡང་མ་ཡིན། མི་མཐུན་པ་ཡང་མ་ཡིན་པ་རྣམས་ལ་རྨོངས་པར་སྤྱོད་པ་དེས་ནི། དེའི་གཏི་མུག་སྐྱེ་བར་འགྱུར། དེ་བཞིན་དུ་སྒྲ་དང ། དྲི་དང ། རོ་དང ། རེག་བྱ་རྣམས་ལ་ཡང་ཆོས་རྣམ་པ་གསུམ་ལ་དམིགས་པ་མྱོང་བར་འགྱུར་ཏེ། རྗེས་སུ་ཆགས་པ་དང ། ཁོང་ཁྲོ་བ་དང ། རྨོངས་པར་འགྱུར་བའོ། །ཡིད་ཀྱི་ཤེས་བྱ་མཐུན་པའི་ཆོས་རྣམས་ལ་རྗེས་སུ་ཆགས་པར་སྤྱོད་པ་དེས་ནི། དེའི་འདོད་ཆགས་སྐྱེ་བར་འགྱུར། མི་མཐུན་པའི་ཆོས་རྣམས་ལ་ཁོང་ཁྲོ་བར་སྤྱོད་པ་དེས་ནི། དེའི་ཞེ་སྡང་སྐྱེ་བར་འགྱུར། མཐུན་པ་ཡང་མ་ཡིན། མི་མཐུན་པ་ཡང་མ་ཡིན་པའི་ཆོས་རྣམས་ལ་རྨོངས་པར་སྤྱོད་པ་དེས་ནི། དེའི་གཏི་མུག་སྐྱེ་བར་འགྱུར་རོ། །རྒྱལ་པོ་ཆེན་པོ། དེ་ལ་དབང་པོ་རྣམས་ནི། སྒྱུ་མ་ལྟ་བུ །
301a
༄#། །ཡུལ་རྣམས་ནི། རྨི་ལམ་ལྟ་བུར་ཤེས་པར་བྱ་སྟེ། རྒྱལ་པོ་ཆེན་པོ། །འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་ཡུལ་གྱི་བཟང་མོ་དང་ལྷན་ཅིག་ཏུ་ཡོངས་སུ་སྤྱོད་པར་རྨི་ལམ། དེ་ལ་ཉལ་བ་ལས་སད་ན། བུད་མེད་ཡུལ་གྱི་བཟང་མོ་དེ་རྗེས་སུ་དྲན་པར་གྱུར་ན། རྒྱལ་པོ་ཆེན་པོ། དེ་ལ་ཇི་སྙམ་དུ་སེམས། རྨི་ལམ་ན་མཐོང་བའི་ཡུལ་གྱི་བཟང་མོ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། འདི་ལ་ཇི་སྙམ་དུ་སེམས།་སྐྱེས་བུ་གང་རྨི་ལམ་ན་ཡུལ་གྱི་བཟང་མོ་མཐོང་བའི་བུད་མེད་དེ་དག་ལྷན་ཅིག་རྩེ་བ་དང ། དགའ་བ་དང ། མངོན་པར་ཞེན་པར་འགྱུར་བ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་ན་མཐོང་བའི་ཡུལ་གྱི་བཟང་མོ་དེ་ནི ། ཤིན་ཏུ་མ་མཆིས་ཤིང་མི་དམིགས་ན། དེ་དང་ལྷན་ཅིག་ཡོངས་སུ་སྤྱོད་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་པ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། །དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་
301b
གཟུགས་མཐོང་ན། ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། དེ་ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། སྟེང་དང ། འོག་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་གི་ན་མ་ཡིན། བར་མ་དོན་མ་ཡིན་ཏེ། དུས་གཞན་ཞིག་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང ། སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཡུལ་གྱི་བཟང་མོ་དང་འདྲ་བར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་
302a
༄#། །པོ་འབྱུང་སྟེ། ཡང་ན་ནི། སེམས་ཅན་དམྱལ་བར། ཡང་ན་ནི། དུད་འགྲོའི་སྐྱེ་གནས་སུ། ཡང་ན་ནི། གཤིན་རྗེའི་འཇིག་རྟེན་དུ། ཡང་ན་ནི། ལྷ་མ་ཡིན་གྱི་རིས་སུ། ཡང་ན་ནི། མིའི་ནང་དུ། ཡང་ན་ནི། ལྷའི་ནང་དུ་འབྱུང་བར་འགྱུར་ཏེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་དེ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི།་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་སྟེ། རྒྱལ་པོ་ཆེན་པོ། དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བའང་མེད་ན། འཆི་འཕོ་དང་སྐྱེ་བར་མངོན་པའང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་
302b
མ་ནི།་རྣམ་པར་ཤེས་པ་ཐ་མས་སྟོང ། ལས་ནི། ལས་ཀྱིས་སྟོང ། རྣམ་པར་ཤེས་པ་དང་པོ་ནི། རྣམ་པར་ཤེས་པ་དང་པོས་སྟོང ། འཆི་འཕོ་ནི། འཆི་འཕོས་སྟོང ། སྐྱེ་བ་ནི། སྐྱེ་བས་སྟོང་ལ། ལས་རྣམས་འབྲས་བུ་མེད་པར་མི་འགྱུར་ཞིང ། རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ་ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་དགྲ་དང་འཐབ་པ་ཞིག་རྨིས་ལ། ཉལ་ཉལ་པ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ལ་ཇི་སྙམ་དུ་སེམས། རྨི་ལམ་དུ་རྨིས་པའི་དགྲ་དེའམ། དགྲ་དེ་དང་འཐབ་པ་ཡོད་དམ། གསོལ་པ། བཅོམ་ལྡན་འདས། དེ་ནི།་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། འདི་ལ་ཇི་སྙམ་དུ་སེམས། འོ་ན་སྐྱེས་བུ་གང་རྨི་ལམ་གྱི་དགྲ་ལ་མངོན་པར་ཞེན་པའམ། དགྲ་དང་འཐབ་པར་གྱུར་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་ན་མཐོང་བའི་དགྲ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེ་དང་འཐབ་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་
303a
༄#། །པ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་མཐོང་ན། ཡིད་མི་བདེ་བར་གྱུར་པ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་པར་གྱུར་ནས་ཁོང་ཁྲོ་བར་འགྱུར། ཁོང་ཁྲོ་བར་གྱུར་ནས་ཞེ་སྡང་བར་འགྱུར། ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། སྟེང་དང ། འོག་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ཞིག་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་དགྲ་དང་འཐབ་པ་དང་འདྲ་བར་ཡིད་
303b
ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། སྐྱེས་སོ། །ཞེས་བྱ་བའི་གྲངས་སུ་འགྲོའོ། །རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བར་འགྱུར་རོ། །དེ་ལ་གང་རྣམ་པར་ཤེས་པ་ཐ་མ་འགགས་པར་མངོན་པ་ཡང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་སྐྱེས་པའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དེ་དང ། སྐྱེ་བ་དེ་དང ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་ཡང་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མས་སྟོང ། རྣམ་པར་ཤེས་པ་དང་པོ་ནི། རྣམ་པར་ཤེས་པ་དང་པོས་སྟོང ། ལས་ནི། ལས་ཀྱིས་སྟོང ། འཆི་འཕོ་ནི། འཆི་འཕོས་སྟོང ། སྐྱེ་བ་ནི། སྐྱེ་བས་སྟོང་ལ།་ལས་རྣམས་འབྲས་བུ་མེད་པར་མི་འགྱུར་ཞིང་རྣམ་པར་སྨིན་པ་མྱོང་བར་མངོན་པར་ཡང་ཡོད་དེ། དེ་ལ་མིང་གི་བརྡར་བྱ་བ་མ་གཏོགས་པར་བྱེད་པ་པོའམ་ཟབ་པོ་གང་
304a
༄#། །ཡང་མེད་དོ། །བམ་པོ་བཅུ་གསུམ་པ།། །།རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་འདྲེས་ནོན་པ་རྨིས་ཏེ། འཇིག་པས་ཤིན་ཏུ་རྨོངས་པར་གྱུར་ལ། ཉལ་བ་ལས་སད་ནས་འདྲེ་དེ་དང་ཤིན་ཏུ་རྨོངས་པར་གྱུར་པ་དེ་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་ན་མཐོང་བའི་འདྲེ་དང ། ཤིན་ཏུ་རྨོངས་པར་གྱུར་པ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས།་འོ་ན་དེ་ལྟར་རྨི་ལམ་ན་མཐོང་བའི་འདྲེ་ལ་མངོན་པར་ཞེན་ཅིང་ཤིན་ཏུ་རྨོངས་པར་གྱུར་པའི་མི་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་གྱི་འདྲེ་དེ་ནི། ཤིན་ཏུ་མ་མཆིས་ན། ཤིན་ཏུ་རྨོངས་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་མཐོང་ན། བཏང་སྙོམས་སུ་གྱུར་པ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་
304b
པར་ཞེན་པར་གྱུར་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་ཀུན་ནས་ཉོན་མོངས་པར་འགྱུར་རོ། །ཀུན་ནས་ཉོན་མོངས་པར་གྱུར་པའི་གཏི་མུག་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། སྟེང་དང ། འོག་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན ། ཉལ་ཉལ་བ་ལས་སད་པའི་འདྲེ་དང ། ཤིན་ཏུ་རྨོངས་པ་དང་འདྲ་བར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་བྱུང་སྟེ། རྣམ་པར་ཤེས་པ་དང་པོ་
305a
༄#། །དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་སྟེ། རྒྱལ་པོ་ཆེན་པོ། དེ་ལྟར་ན།་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་མེད་ལ་འཆི་འཕོ་དང་སྐྱེ་བར་མངོན་པ་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུའང་མི་འགྲོའོ། །ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུའང་མི་འགྲོའོ། །རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མས་སྟོང ། ལས་ནི། ལས་ཀྱིས་སྟོང ། རྣམ་པར་ཤེས་པ་དང་པོ་ནི། རྣམ་པར་ཤེས་པ་དང་པོས་སྟོང ། འཆི་འཕོ་ནི། འཆི་འཕོས་སྟོང ། སྐྱེ་བ་ནི། སྐྱེ་བས་སྟོང་ལ། ལས་རྣམས་འབྲས་བུ་མེད་པར་མི་འགྱུར་བར་མངོན་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་
305b
ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་ཡུལ་གྱི་བུད་མེད་བཟང་མོ་གླུ་ལེན་པའི་གླུ་སྙན་པ་དང ། པི་ཝང་ལེན་པའི་སྒྲ་སྙན་པ་ཉན་ཅིང ། དེ་གླུ་དང་རོལ་མོའི་སྒྲ་དེས་ཡོངས་སུ་སྤྱོད་པ་རྨིས་ལ། ཉལ་བ་ལས་སད་ནས་གླུ་དང་རོལ་མོའི་སྒྲ་དེ་ཉིད་བྲན་པར་གྱུར་ན། རྒྱལ་པོ་ཆེན་པོ། དེ་ལ་ཇི་སྙམ་དུ་སེམས། རྨི་ལམ་ན་མཐོང་བའི་ཡུལ་གྱི་བུད་མེད་བཟང་མོ་དང ། གླུ་དང་རོལ་མོའི་སྒྲ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། འོ་ན་དེ་ལྟར་རྨི་ལམ་ན་མཐོང་བའི་ཡུལ་གྱི་བུད་མེད་བཟང་མོ་དང ། གླུ་དང་རོལ་མོའི་སྒྲ་ལ་མངོན་པར་ཞེན་པའི་མི་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། རྨི་ལམ་ན་མཐོང་བའི་ཡུལ་གྱི་བཟང་མོ་དེ་ནི། ཤིན་ཏུ་མ་མཆིས་ཤིང་མི་དམིགས་ན། དེའི་གླུ་དང་རོལ་མོའི་སྒྲ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་ཞེན་པའི་མི་དེ་ནི།་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་
306a
༄#། །ལྡན་པ་ཡང་རྣ་བས་སྒྲ་ཐོས་ན། ཡིད་དུ་འོང་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་པས་འདོད་ཆགས་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་དེ་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཡུལ་གྱི་བཟང་མོའི་གླུ་དང་རོལ་མོའི་སྒྲ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་ཀྱི་དམིགས་པ་
306b
དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་འགགས་མ་ཐག་ཏུ་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར་རོ། །གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་སྟེ། རྒྱལ་པོ་ཆེན་པོ། དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ།་འཆི་འཕོ་བ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མས་སྟོང ། ལས་ནི། ལས་ཀྱིས་སྟོང ། རྣམ་པར་ཤེས་པ་དང་པོ་ནི། རྣམ་པར་ཤེས་པ་དང་པོས་སྟོང ། འཆི་འཕོ་ནི། འཆི་འཕོས་སྟོང ། སྐྱེ་བ་ནི། སྐྱེ་བས་སྟོང་ལ། ལས་
307a
༄#། །རྣམས་འབྲས་བུ་མེད་པར་མི་འགྱུར་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ་ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་མ་ཤི་བའམ། ཕ་ཤི་བའམ། སྡུག་པ་གང་ཡང་རུང་བ་དག་དང་བྲལ་ཏེ།་སྡུག་པ་དང་བྲལ་བས་མྱ་ངན་དུ་གྱུར་ནས་ཉམ་ཐག་པར་ངུ་བ་ཞིག་རྨིས་ལ། དེ་ཉལ་བ་ལས་སད་ནས་སྡུག་པ་དང་བྲལ་བ་དེ་དང ། སྡུག་བསྔལ་ཞིང་ངུ་ངུ་བ་དེ་དྲན་ན།་རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་གྱི་སྡུག་པ་དང་བྲལ་བ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། འོ་ན་སྐྱེས་བུ་གང་རྨི་ལམ་གྱི་སྡུག་པ་དང་བྲལ་བ་དང ། སྡུག་བསྔལ་བར་ངུ་ངུ་བ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ།་བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་ན་མཐོང་བའི་སྡུག་པ་ཉིད་ཀྱང་ཤིན་ཏུ་མ་མཆིས་ན། དེ་དང་བྲལ་བ་དང ། མྱ་ངན་བགྱིས་པ་དང ། ངུས་པ་དང ། སྨྲེ་སྔགས་བཏོན་པ་ལྟ་ག་ལ་མཆིས་ཏེ། གཞན་དུ་ན་གང་རྨི་ལམ་ན་སྡུག་པ་དང་བྲལ་བ་དང ། སྡུག་བསྔལ་བ་
307b
དང ། དུས་པ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་རྣ་བས་སྒྲ་ཐོས་ན། ཡིད་དུ་མི་འོང་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར། ཁོང་ཁྲོ་བར་གྱུར་ནས་ཞེ་སྡང་བར་འགྱུར། ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་གི་ན་མ་ཡིན།་བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་སྡུག་པ་དང ། སྡུག་བསྔལ་བར་དུ་བ་ལྟ་བུར་ཡིད་ཀྱིས་དམིགས་
308a
༄#། །པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ་འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང ། ལས་དང ། རྣམ་པར་སྨིན་པ་
308b
དང ། རྣམ་པར་ཤེས་པ་དང་པོ་ནི། རྣམ་པར་ཤེས་པ་དང་པོའི་རང་བཞིན་གྱིས་སྟོང ། འཆི་འཕོ་ནི། འཆི་འཕོའི་རང་བཞིན་གྱིས་སྟོང ། སྐྱེ་བ་ནི། སྐྱེ་བའི་རང་བཞིན་གྱིས་སྟོང ། འཁོར་བ་ཡང་འཁོར་བའི་རང་བཞིན་གྱིས་སྟོང་སྟེ། རྒྱལ་པོ་ཆེན་པོ། དེ་ལྟར་ཆོས་ཐམས་ཅད་སྟོང་པ་འདི་ནི། རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི། རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི། རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ།་དེ་ལྟར་ན། ཆོས་ཐམས་ཅད་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་ཚིག་གི་དོན་མ་ཤེས་པའི་སྒྲ་ཞིག་ཐོས་ལ། ཉལ་བ་ལས་སད་ནས་སྒྲ་དེ་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་ན་ཐོས་པའི་སྒྲ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ།་རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་རྨི་ལམ་ན་དོན་མ་ཤེས་པའི་སྒྲ་ཐོས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ །
309a
༄#། །བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་ཕྱིར་ཞེ་ན། བཅོམ་ལྡན་འདས། རྨི་ལམ་ན་ཐོས་པའི་སྒྲ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། ཚིག་དེའི་དོན་ཤེས་པའམ། ཚིག་གི་དོན་མ་ཤེས་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་རྣ་བས་སྒྲ་ཐོས་ན། བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱེད་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་
309b
ཏེ།་དུས་གཞན་དུ་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཚིག་གི་དོན་མ་ཤེས་པའི་སྒྲ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་དེ་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་དེ་འབྱུང་སྟེ། རྣམ་པར་ཤེས་པ་དང་པོ་དེ་འགག་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ།་དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ཡང་
310a
༄#། །སྐྱེ་བའི་ཚེ་གང་ནས་ཀྱང་མི་འོང ། འགག་པའི་ཚེ་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང ། ལས་ནི། ལས་ཀྱི་རང་བཞིན་གྱིས་སྟོང ། རྣམ་པར་སྨིན་པ་ནི། རྣམ་པར་སྨིན་པའི་རང་བཞིན་གྱིས་སྟོང ། རྣམ་པར་ཤེས་པ་དང་པོ་ནི། རྣམ་པར་ཤེས་པ་དང་པོའི་རང་བཞིན་གྱིས་སྟོང ། འཆི་འཕོ་དང་སྐྱེ་བ་ནི། འཆི་འཕོ་དང་སྐྱེ་བའི་རང་བཞིན་གྱིས་སྟོང ། འཁོར་བ་ནི།་འཁོར་བའི་རང་བཞིན་གྱིས་སྟོང་ལ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ་ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་ཙནྡན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གཞན་གང་ཡང་རུང་བས་བདག་གི་ལུས་བསྐུས་པར་རྨིས་ལ། ཉལ་ཉལ་བ་ལས་སད་ནས་ཙནྡན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གཞན་གང་ཡང་རུང་བ་དེ་དག་དྲན་པར་གྱུར་ན། རྒྱལ་པོ་ཆེན་པོ། དེ་ལ་ཇི་སྙམ་དུ་སེམས། རྨི་ལམ་ན་མཐོང་བའི་ཙནྡན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་
310b
གཞན་གང་ཡང་རུང་བ་དེ་དག་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་དེ་ལྟར་རྨི་ལམ་ན་མཐོང་བའི་ཙནྡན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གང་ཡང་རུང་བ་དེ་དག་ལ་མངོན་པར་ཞེན་ཅིང་དེས་བདག་གི་ལུས་སྐུད་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་གྱི་ཙནྡན་ནམ། ཏ་མ་ལའི་ལོ་མའམ། སྤོས་ཀྱི་རྣམ་པ་གང་ཡང་རུང་བ་དེ་དག་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེས་སྐུད་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་སྣས་དྲི་ཚོར་ན། ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་རོ། །དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི །
311a
༄#། །རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཙནྡན་ནམ། ཏ་མ་ལའི་ལོ་མའམ། སྲོག་ཀྱི་རྣམ་པ་གང་ཡང་རུང་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དང ། སྐྱེད་ལ་ཉིད་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་
311b
པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ།་དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ།་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང ། ལས་ནི། ལས་ཀྱི་རང་བཞིན་གྱིས་སྟོང ། རྣམ་པར་སྨིན་པ་ནི། རྣམ་པར་སྨིན་པའི་རང་བཞིན་གྱིས་སྟོང ། རྣམ་པར་ཤེས་པ་དང་པོ་ནི ། རྣམ་པར་ཤེས་པ་དང་པོའི་རང་བཞིན་གྱིས་སྟོང ། འཆི་འཕོ་དང་སྐྱེ་བ་ནི། འཆི་འཕོ་དང་སྐྱེ་བའི་རང་བཞིན་གྱིས་སྟོང ། འཁོར་བ་ནི། འཁོར་བའི་རང་བཞིན་གྱིས་སྟོང་ལ།་ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་
312a
༄#། །དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་ཁྱི་རོའམ། མི་རོའམ། སྦྲུལ་གྱི་རོ་མགུལ་དུ་བཏགས་པ་ཞིག་རྨིས་ལ། དེ་ཉལ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་གྱི་ཁྱི་རོ་དང ། མི་རོ་དང ། སྤྲུལ་གྱི་རོ་དེ་དག་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། འོ་ན་སྐྱེས་བུ་གང་རྨི་ལམ་གྱི་ཁྱི་རོ་དང ། མི་རོ་དང ། སྦྲུལ་གྱི་རོ་མགུལ་དུ་བཏགས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན།་བཅོམ་ལྡན་འདས། རྨི་ལམ་ན་མཐོང་བའི་ཁྱི་རོའམ། མི་རོའམ། སྦྲུལ་གྱི་རོ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེ་མགུལ་དུ་བཏགས་པ་ལྟ་ག་ལ་ཞིག་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ།་རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་སྣས་དྲི་ཚོར་ན། ཡིད་དུ་མི་འོང་བ་རྣམས་ལ་ཡང་མངོན་པར་ཞེན་པར་འགྱུར་
312b
ཏེ།་མངོན་པར་ཞེན་ནས་ཁོང་ཁྲོ་བར་འགྱུར། ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཁྱི་རོ་དང ། མི་རོ་དང ། སྦྲུལ་གྱི་རོ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་
313a
༄#། །རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི་འཆི་འཕོ་བ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན།་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་རང་བཞིན་གྱིས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། དེ་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་རང་བཞིན་གྱིས་སྟོང་ཞིང་མེད་པ་དེ་ནི་མཚན་མ་མེད་པའོ། །གང་མཚན་མ་མེད་པ་དེ་ནི་སྨོན་པ་མེད་པའོ། །རྒྱལ་པོ་ཆེན་པོ། དེ་ལྟར་ཆོས་
313b
ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་བདག་ཉིད་སྣའི་དབང་པོ་ཉམས་པར་རྨིས་ལ། ཉལ་ཉལ་བ་ལས་སད་ནས་སྣའི་དབང་པོ་ཉམས་པར་གྱུར་པ་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་ན་མཐོང་བའི་སྣའི་དབང་པོ་དེ་ཡོད་དམ། གསོལ་པ། བཅོམ་ལྡན་འདས། དེ་ནི་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་དེ་ལྟར་རྨི་ལམ་ན་སྣའི་དབང་པོ་ཉམས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི་མ་ལགས་ཏེ། དེ་ཅིའི་ཕྱིར་ཞེ་ན། བཅོམ་ལྡན་འདས། རྨི་ལམ་ན་མཐོང་བའི་སྣའི་དབང་པོ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེའི་ཉམས་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་
314a
༄#། །ཡང་སྣས་དྲི་ཚོར་ན། བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ་ཤིན་ཏུ་རྨོངས་པར་གྱུར་ནས་གཏི་མུག་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་སྣའི་དབང་པོ་ཉམས་པ་ལྟ་བུར་ཡིད་ཀྱིས་དམིགས་པར་འགྱུར་རོ། རྒྱལ་པོ་ཆེན་པོ། །དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ།་རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་
314b
རྣམ་པར་ཤེས་པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར་རོ། །གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ།་དེ་ལྟར་ན། ཆོས་གང་ཡང་འཇིག་རྟེན་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ་འཆི་འཕོ་དང་སྐྱེ་བར་མངོན་པར་ཡང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མ་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི།་འཁོར་བའི་རང་བཞིན་གྱིས་སྟོང་བའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ་ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་བཀྲེས་པ་ལས་རོ་སྣ་བརྒྱ་དང་ལྡན་པའི་ཁ་ཟས་ལ་ཚིམ་ཚིམ་དུ་ཟེར་བ་ཞིག་རྨིས་ལ། ཉལ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་ན་མཐོང་བའི་ཁ་ཟས་རོ་སྣ་བརྒྱ་དང་ལྡན་པ་དེ་ཡོད་དམ་
315a
༄#། །གསོལ་པ། བཅོམ་ལྡན་འདས། དེ་ནི་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་ཁ་ཟས་རོ་སྣ་བརྒྱ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་གྱི་ཁ་ཟས་རོ་སྣ་བརྒྱ་དང་ལྡན་པ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེས་དོན་དེ་ལ་ཡོངས་སུ་སྤྱོད་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལྕེས་རོ་མྱོང་ན། ཡིད་བདེ་བར་འགྱུར་བ་རྣམས་ལ་མངོན་པར་ཞེན་ཏེ། དེ་ལ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། དེ་ནི་ཤར་
315b
ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་དེ་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཁ་ཟས་རོ་སྣ་བརྒྱ་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར་རོ། །གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ།་རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་སྐྱེ་བའི་ཚེ་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་
316a
༄#། །པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི། འཁོར་བའི་རང་བཞིན་གྱིས་སྟོང་པའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་ཀུན་རྫོབ་ཀྱི་བརྡ་ཙམ་མ་གཏོགས་པར་བྱེད་པ་པོའམ་ཟ་བ་བོ་གང་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་ཤིན་ཏུ་བཀྲེས་པར་གྱུར་ཏེ་སྐུ་བ་ཁ་བོའི་ས་བོན་ནམ། ཀོ་ཤ་ཀའི་ས་བོན་ནམ། བི་\་Pཱི?\་ཙུ་མརདའི་ས་བོན་ཞིག་ཟོས་པར་རྨིས་ལ།་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་གྱི་སྐུ་བ་ཁ་བོ་དང ། བི་\་Pཱི?\་ཙུ་མརདའི་ས་བོན་གྱི་བར་དུ་ཡོད་དམ ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། འོ་ན་སྐྱེས་བུ་གང་རྨི་ལམ་གྱི་སྐུ་བ་ཁ་བོ་དང ། བི་\་Pཱི?\་ཙུ་མརདའི་ས་བོན་གྱི་བར་དུ་ཟོས་པ་དེ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་ན་
316b
མཐོང་བའི་སྐུ་བ་ཁ་བོ་དང ། བི་\་Pཱི?\་ཙུ་མརདའི་ས་བོན་གྱི་བར་དེ་དག་ཉིད་ཀྱང་མ་མཆིས་ཤིང་མི་དམིགས་ན། དེ་དག་ཟོས་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལྕེས་རོ་མྱོང་ན། ཡིད་དུ་མི་འོང་བ་རྣམས་ལ་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན།་ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཚེ་སྐུ་བ་ཁ་བོ་དང ། བི་\་Pཱི?\་ཙུ་མརདའི་ས་
317a
༄#། །བོན་གྱི་བར་དུ་ཟ་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བར་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི། འཁོར་བའི་རང་བཞིན་གྱིས་
317b
སྟོང་བའི་བར་དུ་སྟེ། རྒྱལ་པོ་ཆེན་པོ། དེ་ལྟར་ན། ཆོས་ཐམས་ཅད་སྟོང་པ་འདི་ནི། རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི། རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་པ་འདི་ནི། རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ། དེ་ལྟར་ཆོས་ཐམས་ཅད་ནི། རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། ། རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་བདག་ཉིད་ལྕེའི་དབང་པོ་ཉམས་པར་རྨིས་ལ། ཉལ་བ་ལས་སད་ནས་ལྕེའི་དབང་པོ་ཉམས་པར་གྱུར་པ་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་ན་མཐོང་བའི་ལྕེའི་དབང་པོ་ཉམས་པ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་རྨི་ལམ་ན་ལྕེའི་དབང་པོ་ཉམས་པར་གྱུར་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་ན་མཐོང་པའི་ལྕེའི་དབང་པོ་ཉིད་ཀྱང་ཤིན་ཏུ་
318a
༄#། །མ་མཆིས་ཤིང་མི་དམིགས་ནས། དེའི་ཉམས་པ་ལྟ་མཆིས་པར་ག་ལ་འགྱུར་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལྕེས་རོ་མྱོང་ན ། བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ།་དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཚེ་ལྕེའི་དབང་པོ་ཉམས་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་
318b
ཆེན་པོ།་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །གང་དེ་ལ་རྣམ་པར་ཤེས་པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པར་ཡང་ཡོད་དེ། རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང་བ་ནས་འཁོར་བ་ནི། འཁོར་བའི་རང་བཞིན་གྱིས་སྟོང་བའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་ཀུན་རྫོབ་ཀྱི་བརྡ་ཙམ་མ་གཏོགས་པར་བྱེད་པ་པོའམ་ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་
319a
༄#། །ཉལ་པའི་རྨི་ལམ་ན་ཡུལ་གྱི་བཟང་མོ་ཞིག་པང་དུ་འཁྱུད་པར་རྨིས་ལ། དེ་དང་རེག་པ་ཉམས་སུ་མྱོང་ནས་ཉལ་བ་ལས་སད་དེ་ཡུལ་གྱི་བཟང་མོ་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ལ་ཇི་སྙམ་དུ་སེམས། རྨི་ལམ་ན་མཐོང་བའི་ཡུལ་གྱི་བཟང་མོ་དེ་དང་རེག་པ་དེ་ཡོད་དམ། གསོལ་པ། བཅོམ་ལྡན་འདས། དེ་ནི།་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ། རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་ཡུལ་གྱི་བཟང་མོ་དེ་དང་རེག་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་གྱི་ཡུལ་གྱི་བཟང་མོ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེ་དང་རེག་པ་ལྟ་ག་ལ་མཆིས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་པོ་ཐོས་པ་དང་མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན། ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི། རྣམ་
319b
པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་པི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་དེ་འགགས་པའི་ཚེ་འདི་ལྟ་སྟེ།་དཔེར་ན། ཉལ་ཉལ་བ་ལས་སད་པའི་ཡུལ་གྱི་བཟང་མོ་ལ་རེག་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པར་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི།་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན། ཆོས་གང་ཡང་
320a
༄#། །འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དོ། རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། ལས་རྣམས་ཆུད་མི་ཟ་ཞིང་རྣམ་པར་སྨིན་པར་མྱོང་བར་མངོན་པར་ཡང་ཡོད་དེ། དེ་ལ་ཀུན་རྫོབ་ཀྱི་བརྡ་ཅམ་\་ཊZཱཾ?\་མ་གཏོགས་པར་བྱེད་པ་པོའམ་ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ།་འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་ཟངས་ཀྱི་སྤང་ལེབ་ཤིན་ཏུ་འབར་བ་ཞིག་པང་དུ་འཁྱུད་པར་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་གྱི་ཟངས་ཀྱི་སྤང་ལེབ་ཤིན་ཏུ་འབར་བ་ལ་རེག་པ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། ། བཀའ་སྩལ་པ། རྒྱལ་པོ་ཆེན་པོ། འོན་སྐྱེས་བུ་གང་རྨི་ལམ་གྱི་ཟངས་ཀྱི་སྤང་ལེབ་ཤིན་ཏུ་འབར་བ་པང་དུ་འཁྱུད་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་ན་མཐོང་བའི་ཟངས་ཀྱི་སྤང་ལེབ་ཤིན་ཏུ་འབར་
320b
བ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེ་ལ་རེག་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན། ཡིད་དུ་མི་འོང་བ་རྣམས་ལ་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེས་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཆེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཟངས་ཀྱི་སྤང་ལེབ་ཤིན་ཏུ་འབར་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་
321a
༄#། །ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགག་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར་རོ། །གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགགས་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ཡང་འཁོར་བའི་རང་བཞིན་གྱིས་སྟོང་པའི་བར་དུ་སྟེ། རྒྱལ་པོ་ཆེན་པོ། དེ་ལྟར་ཆོས་ཐམས་ཅད་སྟོང་པ་འདི་ནི། རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི། རྣམ་པར་ཐར་པའི་སྒོ་མཚན་མ་མེད་པའོ། །གང་
321b
ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི། རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ། དེ་ལྟར་ན། ཆོས་ཐམས་ཅད་ནི། རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ། འདི་ལྟ་སྟེ།་དཔེར་ན། མི་ཞིག་ཉལ་བའི་རྨི་ལམ་ན་བདག་ཉིད་ལུས་ཀྱི་དབང་པོ་ཉམས་པར་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས།་རྨི་ལམ་ན་མཐོང་བའི་ལུས་ཀྱི་དབང་པོ་ཉམས་པ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས།་འོ་ན་རྨི་ལམ་ན་ལུས་ཀྱི་དབང་པོ་ཉམས་པར་གྱུར་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ།་དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་ན་མཐོང་བའི་ལུས་ཀྱི་དབང་པོ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེའི་ཉམས་པ་ལྟ་ག་ལ་མཆིས་ཏེ། གཞན་དུ་ན།་གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་
322a
༄#། །སོའི་སྐྱེ་བོ་ཐོས་པ་དང་མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན། བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི ། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱེད་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ལུས་ཀྱི་དབང་པོ་ཉམས་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་
322b
བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ། འདི་ལྟ་སྟེ། དཔེར་ན། རྣམ་པར་ཤེས་པ་ཐ་མ་དེ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མས་སྟོང་པ་ནས་འཁོར་བ་ནི། འཁོར་བའི་རང་བཞིན་གྱིས་སྟོང་པའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ་ཟ་བ་པོ་གང་ཡང་མེད་དོ།། །།བམ་པོ་བཅུ་བཞི་པ། རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་སྒྱུ་མའི་མཁན་པོས་སྤྲུལ་པའི་འདོད་པའི་ཡོན་ཏན་ལྔ་དང་ལྡན་པར་གྱུར་ཏེ་ཤིན་ཏུ་ཚིམ་པར་ཡོངས་སུ་སྤྱོད་པ་ཞིག་རྨིས་ལ། ཉལ་བ་ལས་སད་ནས་འདོད་པའི་ཡོན་ཏན་དེ་དག་དྲན་པར་གྱུར་ན། རྒྱལ་པོ་ཆེན་
323a
༄#། །པོ།་དེ་ཇི་སྙམ་དུ་སེམས། རྨི་ལམ་ན་མཐོང་བའི་འདོད་པའི་ཡོན་ཏན་ལྔ་སྒྱུ་མའི་མཁན་པོས་སྤྲུལ་པ་དེ་དག་ཡོད་དམ། གསོལ་པ། བཅོམ་ལྡན་འདས།་དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་འདོད་པའི་ཡོན་ཏན་ལྔ་པོ་སྒྱུ་མའི་མཁན་པོས་སྤྲུལ་པ་དེ་དག་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་གྱི་སྒྱུ་མའི་མཁན་པོ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། སྤྲུལ་པའི་འདོད་པའི་ཡོན་ཏན་ལྔ་པོ་དེ་དག་དང ། དེ་དག་ལ་ཡོངས་སུ་སྤྱོད་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ།་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན། ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་ལ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་
323b
ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་འདོད་པའི་ཡོན་ཏན་ལྔ་པོ་སྒྱུ་མ་མཁན་གྱིས་སྤྲུལ་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་ཡང་ན་ནི། སེམས་ཅན་དམྱལ་བ་རྣམས་སུ། ཡང་ན་ནི། དུད་འགྲོའི་སྐྱེ་གནས་སུ། ཡང་ན་ནི། གཤིན་རྗེའི་འཇིག་རྟེན་དུ། ཡང་ན་ནི། ལྷ་མ་ཡིན་གྱི་རིས་སུ། ཡང་ན་ནི།་མིའི་ནང་དུ། ཡང་ན་ནི། ལྷའི་ནང་དུ་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་
324a
༄#། །ཀྱི་རྒྱུད་སྐལ་བ་འདྲ་བ་འབྱུང་ངོ ། །རྒྱལ་པོ་ཆེན་པོ། དེ་ལྟར་ན། ལས་ཀྱང་དམིགས་ཤིང་རྣམ་པར་སྨིན་པ་ཡང་དམིགས་ལ། དེ་ལ་མིང་གི་བརྡ་ཙམ་མ་གཏོགས་པར་ཚོར་བ་པོ་གང་ཡང་མེད་དོ། །རྒྱལ་པོ་ཆེན་པོ། དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པར་ཡང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མས་སྟོང་པ་ནས་འཁོར་བའི་བར་དུ་འཁོར་བའི་རང་བཞིན་གྱིས་སྟོང ། མྱ་ངན་ལས་འདས་པ་ཡང་མྱ་ངན་ལས་འདས་པའི་རང་བཞིན་གྱིས་སྟོང ། ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱིས་སྟོང་སྟེ། རྒྱལ་པོ་ཆེན་པོ། དེ་ལྟར་ན། ཆོས་ཐམས་ཅད་སྟོང་པ་འདི་ནི། རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་
324b
མཚན་མས་སྟོང་པ་འདི་ནི། མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི། རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ། དེ་ལྟར་ན། ཆོས་ཐམས་ཅད་ནི། རྣམ་པར་ཐར་པའི་སྒོ་སྟེ། སྟེང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། སྨོན་པ་དང་བྲལ་བ། མྱ་ངན་ལས་འདས་པ་ལ་གཞོལ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་བདག་ཉིད་གཡོག་འཁོར་དང་བཅས་ཏེ་ཆུ་བོ་ཆེན་པོས་ཁྱེར་ནས་དེ་དེ་ན་སེམས་ལས་བྱུང་བའི་སྡུག་བསྔལ་དང ། ཡིད་མི་བདེ་བ་རྣམ་པ་དུ་མ་མྱོང་བར་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་གྱི་ཆུ་ཆེན་པོ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་སྐྱེས་བུ་གང་རྨི་ལམ་ན་བདག་ཉིད་ཆུ་ཆེན་པོས་ཁྱེར་ཞིང་སྡུག་བསྔལ་དང ། ཡིད་མི་བདེ་བ་མཐོང་བ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་
325a
༄#། །ལྡན་འདས། རྨི་ལམ་ན་ཆུ་གང་གིས་མི་དེ་ཁྱེར་བའི་ཆུ་ཆེན་པོ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། དེའི་སྡུག་བསྔལ་དང ། ཡིད་མི་བདེ་བ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན། ཡིད་མི་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་གནོད་སེམས་སུ་འགྱུར་རོ། ། གནོད་སེམས་སུ་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་
325b
ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ།་དཔེར་ན། ཉལ་ཉལ་བ་ལས་སད་པའི་ཆུ་ཆེན་པོས་ཁྱེར་ཞིང་ཡིད་མི་བདེ་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆོད་པར་གང་ལ་རྣམ་པར་སྨིན་པར་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །རྒྱལ་པོ་ཆེན་པོ།་དེ་ལྟར་ན། ལས་ཀྱང་དམིགས་ལ་བྱེད་པ་པོ་ཡང་གང་ཡང་མེད། རྣམ་པར་སྨིན་པ་ཡང་དམིགས་ལ་མིང་གི་བརྡ་ཙམ་མ་གཏོགས་པར་འདི་ལ་ཚོར་བ་པོ་གང་ཡང་མེད་དོ། །རྒྱལ་པོ་ཆེན་པོ། དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི། འཆི་འདི་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ། དེ་ལྟར་ན། ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་
326a
༄#། །འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ ། རྣམ་པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བའི་བར་དུ་ནི། འཁོར་བའི་རང་བཞིན་གྱིས་སྟོང ། མྱ་ངན་ལས་འདས་པ་དེ་ཡང་མྱ་ངན་ལས་འདས་པའི་རང་བཞིན་གྱིས་སྟོང ། ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱིས་སྟོང་སྟེ། འདི་ནི། རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི། རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ།་འདི་ནི། རྣམ་པ་མཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ། དེ་ལྟར་ན། ཆོས་ཐམས་ཅད་ནི། རྣམ་པར་ཐར་པའི་སྒོ་སྟེ། སྟོང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། སྨོན་པ་དང་བྲལ་བ། མྱ་ངན་ལས་འདས་པ་ལ་གཞོལ་བ། ཆོས་ཀྱི་དབྱིངས་སུ་ངེས་པ། ནམ་མཁའི་
326b
ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མི་ཞིག་ཉལ་བའི་རྨི་ལམ་ན་ཆང་གིས་ར་རོ་སྟེ། བདག་ཉིད་ཤིན་ཏུ་གཏི་མུག་པར་གྱུར་ནས་དེ་དེ་ན་དགེ་བ་ཡང་མི་ཤེས། མི་དགེ་བ་ཡང་མི་ཤེས། ཁ་ན་མ་ཐོ་བ་དང་བཅས་པ་ཡང་མི་ཤེས། ཁ་ན་མ་ཐོ་བ་མེད་པ་ཡང་མི་ཤེས། ཕན་པ་ཡང་མི་ཤེས།་གནོད་པ་ཡང་མི་ཤེས། ཡོན་ཏན་དང་ཉེས་པ་ཡང་རྣམ་པ་ཐམས་ཅད་དུ་མི་ཤེས་པར་གྱུར་པ་ཞིག་རྨིས་ལ། དེ་ཉལ་ཉལ་བ་ལས་སད་ནས་ཆང་གིས་ར་རོ་བའི་གཏི་མུག་དེ་དྲན་པར་གྱུར་ན། རྒྱལ་པོ་ཆེན་པོ། དེ་ཇི་སྙམ་དུ་སེམས། རྨི་ལམ་ན་མཐོང་བའི་ཆང་གིས་ར་རོ་ཞིང་གཏི་མུག་པ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ། དེ་ཇི་སྙམ་དུ་སེམས། འོ་ན་རྨི་ལམ་གྱི་ཆང་གིས་ར་རོ་བ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས། དེ་ནི། མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས། རྨི་ལམ་ན་མཐོང་བའི་ཆང་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། གཏི་མུག་པ་ལྟ་ག་ལ་མཆིས་ཏེ། གཞན་དུ་ན། གང་དེ་ལ་མངོན་པར་ཞེན་པའི་མི་དེ་ནི། ཕོངས་
327a
༄#། །ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན། བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི། རྣམ་པ་གསུམ། ངག་གིས་ནི། རྣམ་པ་བཞི། ཡིད་ཀྱིས་ནི། རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་གི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡོངས་སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ། དཔེར་ན། ཉལ་ཉལ་བ་ལས་སད་པའི་ཆང་གིས་ར་རོ་སྟེ་གཏི་མུག་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ། དེ་ལ་རྣམ་པར་ཤེས་པ་ཐ་
327b
མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་རྣམ་པར་ཤེས་པ་དང་པོ་འགྲོ་བ་རྣམས་སུ་འབྱུང་སྟེ། རྣམ་པར་ཤེས་པ་དང་པོ་དེ་འགག་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་འདྲ་བ་འབྱུང་ངོ ། །རྒྱལ་པོ་ཆེན་པོ། དེ་ལྟར་ན། ལས་ཀྱང་དམིགས་ལ་བྱེད་པ་པོ་ཡང་གང་ཡང་མེད། རྣམ་པར་སྨིན་པ་ཡང་དམིགས་ལ་མིང་གི་བརྡ་ཙམ་མ་གཏོགས་པར་འདི་ལ་ཚོར་བ་པོ་གང་ཡང་མེད་དོ། །རྒྱལ་པོ་ཆེན་པོ། དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི། འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི། སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ།་དེ་ལྟར་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ། རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། འཆི་འཕོ་དང ། སྐྱེ་བ་དང ། རྣམ་པར་ཤེས་པ་དང་པོ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་
328a
༄#། །པར་ཤེས་པ་ཐ་མ་ནི། རྣམ་པར་ཤེས་པ་ཐ་མའི་རང་བཞིན་གྱིས་སྟོང ། སྐྱེ་བ་དང ། འཇིག་པ་དང ། ལས་དང ། རྣམ་པར་སྨིན་པ་དང།་རྣམ་པར་ཤེས་པ་དང་པོ་དང ། འཆི་འཕོ་དང ། སྐྱེ་བ་དང ། འཁོར་བ་དང ། མྱ་ངན་ལས་འདས་པ་ནི། མྱ་ངན་ལས་འདས་པའི་རང་བཞིན་གྱིས་སྟོང ། ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱིས་སྟོང་སྟེ། འདི་ནི། རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི།་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི། རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ།་དེ་ལྟར་ན། ཆོས་ཐམས་ཅད་ནི། རྣམ་པར་ཐར་པའི་སྒོ་སྟེ། སྟོང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། སྨོན་པ་དང་བྲལ་བ།་མྱ་ངན་ལས་འདས་པ་ལ་གཞོལ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ། ཁྱོད་ཀྱིས་འདི་ལ་སེམས་ངེས་པར་གཞག་པ་དང ། སེམས་ངེས་པར་གཞག་པ་ལ་བརྩོན་པར་བྱའོ། །གཞན་གྱི་དྲིང་ལ་མི་འཇོག་ཅིང་བདག་ཉིད་ཀྱིས་ཤེས་པར་བྱ་སྟེ། འདི་ནི།
328b
འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་སྟེ། དབང་ཕྱུག་ལ་མངོན་པར་ཞེན་པ་ཐམས་ཅད་རབ་ཏུ་འཇོམས་པ།་སྲེད་པ་ཐམས་ཅད་ཡོངས་སུ་སྐོམ་པ། ང་རྒྱལ་ཐམས་ཅད་སྙིལ་བ། ལྟ་བའི་རྣམ་པ་དང་ཐེ་ཚོམ་ཐམས་ཅད་ཡང་དག་པར་གཅོད་པ། ཆོས་ཐམས་ཅད་ཀྱི་མཉམ་པ་ཉིད་དེ། བྱིས་པ་སོ་སོའི་སྐྱེ་བོ་རྣམས་ཀྱིས་མ་ཡིན་པ། ཉན་ཐོས་རྣམས་ཟིལ་གྱིས་གནོན་པ། རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་པ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་ཐུགས་སུ་ཆུད་པ་ཡིན་གྱི། རྒྱལ་པོ་ཆེན་པོ། ཁྱོད་ཀྱིས་ཇི་ལྟར་ན། བདག་ལྷ་དང་བཅས་པའི་འཇིག་རྟེན་གྱི་མིག་དང ། སྒྲོན་མ་དང ། མར་མེ་དང ། སྣང་བ་དང ། གྲུ་དང ། ངོགས་དང ། འབབ་སྟེགས་དང ། འདྲེན་པ་དང ། ཡོངས་སུ་འདྲེན་པ་དང ། སྟོན་པ་དང ། དེད་དཔོན་དང ། སྔོན་དུ་འགྲོ་བར་འགྱུར་སྙམ་པ་དང ། བདག་གྲོལ་ནས་དགྲོལ་བར་བྱའོ། །བརྒལ་ནས་བསྒྲལ་བར་བྱའོ། །དབུགས་ཕྱིན་ནས་དབུགས་དབྱུང་བར་བྱའོ། །ཡོངས་སུ་མྱ་ངན་ལས་འདས་ནས་ཡོངས་སུ་མྱ་ངན་ལས་བཟླ་བར་བྱའོ། །སྙམ་དུ་ཡིད་ལ་གཞག་པར་བྱའོ། །རྒྱལ་པོ་ཆེན་པོ། དབང་ཕྱུག་ལྟ་ཞིག་ནི། སྔོན་མྱོང་
329a
༄#། །བར་གྱུར་པའི་མཐའ་ཡང་མི་མངོན་ཏེ། རྒྱལ་པོ་ཆེན་པོ། དེ་ལྟར་དབང་པོ་རྣམས་ནི། སྒྱུ་མ་ལྟ་བུ་སྟེ། ཆོག་མི་ཤེས་པའོ། །ཚིམ་པར་མི་རུང་བའོ། ། ཡུལ་རྣམས་ནི། རྨི་ལམ་ལྟ་བུ་སྟེ། ཚིམ་པར་མི་ནུས་པ། ངོམས་པར་མ་གྱུར་པའོ། །རྒྱལ་པོ་ཆེན་པོ། སྔོན་བྱུང་བ་འདས་པའི་དུས་ན་རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཞེས་བྱ་བ་བྱུང་སྟེ།་རྒྱལ་པོ་ཆེན་པོ། རྒྱལ་པོ་གྲགས་པ་མཐའ་ཡས་དེ་ནི། ཁྱོགས་དང ། དཔུང་དང ། བཞོན་པ་མཐའ་ཡས་ཤིང ། འཁོར་ལོ་ཐོགས་པ་མེད་པས་བསྒྱུར་བ་མི་འཁྲུགས་པའི་ཐེག་པ་དང ། ཚུལ་ཕུན་སུམ་ཚོགས་པ་དང་ལྡན་པ། སྔོན་གྱི་སངས་རྒྱས་ལ་དགེ་བའི་རྩ་བ་བསྐྱེད་པ། ཡིད་བཞིན་དུ་འགྱུར་བའི་སྟོབས་དང་ལྡན་པ་སྟེ། དེ་གང་ཅི་སེམས་ཀྱང་རུང ། དེའི་དེ་ཐམས་ཅད་གྲུབ་ཅིང་དེའི་བསམ་པ་དོན་མེད་པར་འགྱུར་བ་གང་ཡང་མེད་དོ། །དེ་ལྟར་རྒྱལ་པོ་ཆེན་པོ་དེ་ནི། རང་གི་དགེ་བའི་རྩ་བའི་གཟི་བརྗིད་ཀྱིས་བསམ་པ་ཡིད་བཞིན་དུ་དོན་མེད་པ་མ་ཡིན་པར་གྱུར་ཏོ། །རྒྱལ་པོ་ཆེན་པོ། དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་བདག་གི་བསོད་ནམས་ཀྱི་སྟོབས་ཉམས་པ་མེད་པ་ལ་བརྟག་པར་བྱའོ། །སྙམ་ནས་དེ་འདི་སྙམ་དུ་སེམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་ཤིང་ལྗོན་པ་ཇི་སྙེད་
329b
ཅིག་ཡོད་པ་དེ་དག་ཐམས་ཅད་ཡིད་བཞིན་དུ་འབྲས་བུ་ཆགས་པར་གྱུར་ཅིག་།སྙམ་པ་དང ། རྒྱལ་པོ་གྲགས་པ་མཐའ་ཡས་དེའི་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་ཤིང་ལྗོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཡིད་བཞིན་དུ་འབྲས་བུ་ཆགས་པར་གྱུར་ཏོ། །རྒྱལ་པོ་ཆེན་པོ། གཞན་ཡང་རྒྱལ་པོ་གྲགས་པ་མཐའ་ཡས་དེས་ཡང་བདག་གི་དགེ་བའི་རྩ་བའི་སྟོབས་བསྐྱེད་པ་ལ་བརྟག་པར་འདོད་ནས་འདི་སྙམ་དུ་སེམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་ན་སེམས་ཅན་འཁོད་པ་འདི་དག་ཐམས་ཅད་གནོད་པ་ཐམས་ཅད་རྒྱུན་ཆད་པར་གྱུར་ཏེ་ཡིད་ལ་བསམ་པ་དོན་ཡོད་པར་གྱུར་ཅིག་།སྙམ་པ་དང ། རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཅིག་འཁོད་པ་དེ་དག་ཐམས་ཅད་གནོད་པ་ཐམས་ཅད་རྒྱུན་ཆད་དེ་ཡིད་ལ་བསམ་པ་ཐམས་ཅད་དོན་ཡོད་པར་གྱུར་ཏོ། །རྒྱལ་པོ་ཆེན་པོ། གཞན་ཡང་རྒྱལ་པོ་གྲགས་པ་མཐའ་ཡས་ཀྱིས་བདག་གི་དགེ་བའི་རྩ་བའི་སྟོབས་བསྐྱེད་པ་ལ་བརྟག་པར་འདོད་ནས་འདི་སྙམ་དུ་སེམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་སྤོས་ཆུའི་ཆར་རབ་ཏུ་འབབ་པར་གྱུར་ཅིག་།སྙམ་པ་དང ། རྒྱལ་པོ་ཆེན་པོ་རྒྱལ་པོ་གྲགས་
330a
༄#། །པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཐམས་ཅད་དུ་སྤོས་ཆུའི་ཆར་རབ་ཏུ་བབ་པར་གྱུར་ཏོ། །རྒྱལ་པོ་ཆེན་པོ། དེ་ནས་ཡང་རྒྱལ་པོ་གྲགས་པ་མཐའ་ཡས་ཀྱིས་བདག་གི་དགེ་བའི་རྩ་བའི་སྟོབས་བསྐྱེད་པ་ལ་རྒྱ་ཆེར་བརྟག་པར་འདོད་ནས་འདི་སྙམ་དུ་སེམས་ཏེ།་ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་མེ་ཏོག་གི་ཆར་རབ་ཏུ་འབབ་པར་གྱུར་ཅིག་།སྙམ་པ་དང ། རྒྱལ་པོ་ཆེན་པོ། རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཐམས་ཅད་དུ་མེ་ཏོག་གི་ཆར་རབ་ཏུ་བབ་པར་གྱུར་ཏོ། །རྒྱལ་པོ་ཆེན་པོ། གཞན་ཡང་རྒྱལ་པོ་གྲགས་པ་མཐའ་ཡས་ཀྱིས་འདི་སྙམ་དུ་སེམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་ལྷའི་འོས་ཀྱི་ཆར་དང ། དབྱིག་གི་ཆར་དང ། གསེར་གྱི་ཆར་དང ། རིན་པོ་ཆེ་སྣ་ཚོགས་ཀྱི་ཆར་དང ། ཡོ་བྱད་ཐམས་ཅད་ཀྱི་ཆར་རབ་ཏུ་འབབ་པར་གྱུར་ཅིག་།སྙམ་པ་དང ། རྒྱལ་པོ་ཆེན་པོ། རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་འདི་ལྟར་སེམས་ཅན་ཐམས་ཅད་དང་ཐུན་མོང་དུ་བསགས་པའི་དགེ་བའི་རྩ་བ་ཡངས་པ་དང་ལྡན་པའི་རྒྱུས་ལྷའི་གོས་
330b
ཀྱི་ཆར་དང ། དབྱིག་གི་ཆར་དང ། གསེར་གྱི་ཆར་དང ། རིན་པོ་ཆེ་སྣ་ཚོགས་ཀྱི་ཆར་དང ། ཡོ་བྱད་ཐམས་ཅད་ཀྱི་ཆར་རབ་ཏུ་བབ་བོ། །རྒྱལ་པོ་ཆེན་པོ། དེའི་ཚེ་འཛམ་བུའི་གླིང་འདི་ནི། རྒྱར་དཔག་ཚད་ཁྲི་བརྒྱད་སྟོང་ཡོད་པར་གྱུར་ཏེ། དེའི་ཚེ་འཛམ་བུའི་གླིང་འདི་ནི། གྲོང་ཁྱེར་བྱེ་བ་ཕྲག་དྲུག་ཅུ་ཡོད་པར་གྱུར་ནས་འཛམ་བུའི་གླིང་དེའི་དབུས་སུ་རིན་པོ་ཆེས་རབ་ཏུ་བརྒྱན་པ་ཞེས་བྱ་བའི་གྲོང་ཁྱེར་རྒྱལ་པོའི་ཕོ་བྲང་འཁོར་དུ་གྱུར་པ་ཆུ་ཞེང་དུ་དཔག་ཚད་བཅུ་གཉིས་བཅུ་གཉིས་ཡོད་པ། གྲུ་བཞི་ལྷམ་པ། དྲི་མ་མེད་པ་ཤིན་ཏུ་འབྲེལ་པར་བྲེས་པ་ཞིག་ཡོད་པར་གྱུར་ཏེ། རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ནི། ཤིང་ཏ་ལའི་ཕྲེང་པ་རིམ་པ་བདུན་གྱིས་ཀུན་ནས་ཡོངས་སུ་བསྐོར་བ་སྟེ། ཏ་ལ་དེ་དག་ཀྱང་རིན་པོ་ཆེ་སྣ་བཞིའི་རྒྱུ་ལས་བྱུང་སྟེ། གསེར་དང ། དངུལ་དང ། བཻཌཱུ་རྱ་དང ། ཤེལ་གྱི་ཏ་ལ་ཤ་སྟག་གོ་།དེ་ལ་གསེར་གྱི་ཏ་ལ་རྣམས་ནི། དངུལ་གྱི་ལོ་མ་དང ། མེ་ཏོག་དང ། འབྲས་བུ་དང་ལྡན་པར་གྱུར་ཏོ། །དངུལ་གྱི་ཏ་ལ་རྣམས་ནི། གསེར་གྱི་ལོ་མ་དང ། མེ་ཏོག་དང ། འབྲས་བུ་དང་ལྡན་པར་གྱུར་ཏོ། །བཻཌཱུརྱའི་ཏ་ལ་རྣམས་ནི། ཤེལ་གྱི་ལོ་མ་དང ། མེ་ཏོག་དང ། འབྲས་བུ་དང་ལྡན་པར་གྱུར་ཏོ། །ཤེལ་གྱི་ཏ་ལ་རྣམས་ནི། བཻ་ཌཱུརྱའི་
331a
༄#། །ལོ་མ་དང ། མེ་ཏོག་དང ། འབྲས་བུ་དང་ལྡན་པར་གྱུར་ཏོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་བཀྲ་བ། བལྟ་ན་སྡུག་པ་རིམ་པ་བདུན་སྟེང་དུ་བྲེས་པར་གྱུར་ཏོ། །རིན་པོ་ཆེའི་དྲ་བ་ཆེན་པོའི་རིན་པོ་ཆེ་སྣ་བདུན་ནི། འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། མུ་ཏིག་དམར་པོ་དང ། སྤུག་དང ། རྡོའི་སྙིང་པོ་དང་བདུན་ནོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ཀུན་ནས་འོབས་ཟབ་པ། ཆུ་འབྱུང་བ། ཟབས་སུ་དཔག་ཚད་བྱེད་ཡོད་པ། ཁ་ཚོན་དུ་དཔག་ཚད་གཅིག་ཡོད་པ། ཡན་ལག་བརྒྱད་དང་ལྡན་པའི་ཆུས་བྱ་རོག་གིས་བཏུང་དུ་རུང་བ་ཙམ་ཏུ་ཁ་ད་ཆད་དུ་ཡོངས་སུ་གང་བ། མེ་ཏོག་ཨུཏྤ་ལ་དང ། པདྨ་དང ། ཀུ་མུ་ཏ་དང ། པདྨ་དཀར་པོས་ཀུན་ཏུ་གང་བ། གསེར་གྱི་བྱེ་མ་བདལ་བ། རིམ་པ་བདུན་གྱིས་ཡོངས་སུ་བསྐོར་བར་གྱུར་ཏེ། འོབས་དེ་དག་གི་ཁོར་ཡུག་ནས་འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། རིན་པོ་ཆེ་དེ་བཞི་ལས་བྱས་པའི་ཐེམ་སྐས་བཀྲ་བ། བལྟ་ན་སྡུག་པ་ཤ་སྟག་བཀོད་པར་གྱུར་ཏོ། །དེ་ལ་གསེར་གྱི་གཞི་ལ་ནི། དངུལ་གྱི་ཐེམ་པ་བཀྱེ། དངུལ་གྱི་གཞི་ལ་ནི། གསེར་
331b
གྱི་ཐེམ་པ་བཀྱེ། བཻ་ཌཱུརྱའི་གཞི་ལ་ནི། ཤེལ་གྱི་ཐེམ་པ་བཀྱེ། ཤེལ་གྱི་གཞི་ལ་ནི། བཻ་ཌཱུརྱའི་ཐེམ་པ་བཀྱེ་བ་ཤ་སྟག་སྟེ། ཐེམ་སྐས་དེ་དག་ཀྱང་རིན་པོ་ཆེ་སྣ་བདུན་གྱི་ཁ་ཁྱེར་བཀྲ་བ། བལྟ་ན་སྡུག་པ་རིམ་པ་བདུན་གྱིས་ཀུན་ནས་བསྐོར་བར་གྱུར་ཏོ། །རིན་པོ་ཆེའི་ཐེམ་སྐས་དེ་དག་གི་སྟེང་དུ་རིན་པོ་ཆེ་སྣ་བདུན་གྱི་རྟ་བབས་བཀྲ་བ། བལྟ་ན་སྡུག་པ་ཤ་སྟག་བཙུགས་པར་གྱུར་ཏེ། ཐེམ་སྐས་དེ་དག་སོ་སོའི་ཁར་འཛམ་བུ་ཆུ་བོའི་གསེར་གྱི་ཆུ་ཤིང་ལྗོན་པ་བཀྲ་བ། བལྟ་ན་སྡུག་པ་ཤ་སྟག་བཙུགས་པར་གྱུར་ཏོ། །འོབས་ཀྱི་ཆུ་དེ་དག་རེ་རེ་ཞིང་ཡང་རིན་པོ་ཆ་སྣ་བདུན་གྱི་གྲུ་བ་ཀྲ་བ། བལྟ་ན་སྡུག་པ་ཤ་སྟག་བཅས་པར་གྱུར་ཏོ། །རྒྱལ་པོ་ཆེན་པོ། རྒྱལ་པོ་གྲགས་པ་མཐའ་ཡས་གྱི་བསོད་ནམས་ཀྱི་གཟི་བརྗིད་ཀྱིས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་ཁོར་ཡུག་ཏུ་སྐྱེད་མོས་ཚལ་བཀྲ་བ། བལྟ་ན་སྡུག་པ། བདག་གིར་བྱ་བ་མེད་པ། ཡོངས་སུ་བཟུང་བ་མེད་པ་བརྒྱད་ཁྲི་བྱས་པར་གྱུར་ཏོ། །དེ་དག་ཀྱང་རྒྱལ་པོ་གྲགས་པ་མཐའ་ཡས་ཀྱིས་སྐྱེ་བོ་ཐམས་ཅད་ཡོངས་སུ་ལོངས་སྤྱོད་པའི་ཕྱིར་བྱིན་ཏེ། མི་དེ་དག་སྐྱེད་མོས་ཚལ་དེ་དག་ཏུ་དོང་ནས་ཕུན་སུམ་ཚོགས་པའི་བདེ་བ་མཆོག་གིས་རྩེ་དགའ་ཞིང་ཡོངས་སུ་སྤྱོད་པར་གྱུར་ཏོ། །སྐྱེད་མོས་ཚལ་དེ་དག་རེ་རེ་ཞིང་ཡང་རྫིང་བུ་བརྒྱད་བརྒྱད་
332a
༄#། །བཤམས་པར་གྱུར་ཏོ། །རྫིང་བུ་དེ་དག་ཀུན་ཀྱང་རྒྱར་རྒྱང་གྲགས་ཕྱེད་ཕྱེད་ཡོད་པ་ཤ་སྟག་གོ་།རྫིང་བུ་དེ་དག་རེ་རེ་ཞིང་ཡང་རིན་པོ་ཆེ་སྣ་བཞི་ནི། འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་གྱི་ཐེམ་སྐས་བཀྲ་བ། བལྟ་ན་སྡུག་པ་བརྒྱད་བརྒྱད་དང་ལྡན་པར་གྱུར་ཏོ། །ཐེམ་སྐས་དེ་དག་གི་སྟེང་དུ་ཡང་རིན་པོ་ཆེ་སྣ་བདུན་གྱི་རྟ་བབས་བཀྲ་བ། བལྟ་ན་སྡུག་པ་ཤ་སྟག་བཙུགས་པར་གྱུར་ཏོ། །ཐེམ་སྐས་དེ་དག་རེ་རེའི་ཁར་ཡང་འཛམ་བུ་ཆུ་བོའི་གསེར་གྱི་ཆུ་ཤིང་ལྗོན་པ་བཀྲ་བ།་བལྟ་ན་སྡུག་པ་ཤ་སྟག་བཙུགས་པར་གྱུར་ཏོ། །རྫིང་བུ་དེ་དག་ཀྱང་ཆུ་ཡན་ལག་བརྒྱད་དང་ལྡན་པས་བྱ་རོག་གི་བཏུང་དུ་རུང་བ་ཙམ་དུ་ཁ་ད་ཆད་དུ་ཡོངས་སུ་གང་བར་གྱུར་ཏོ། །རྫིང་བུ་དེ་དག་ཏུ་མེ་ཏོག་ཆུ་ལས་སྐྱེས་པ་འདི་ལྟ་བུ་དག་བསྐྱེད་པར་གྱུར་ཏེ། འདི་ལྟར་མེ་ཏོག་ཨུཏྤ་ལ་དང ། པདྨ་དང ། ཀུ་མུ་ཏ་དང ། པདྨ་དཀར་པོ་དང ། དྲི་ཞིམ་ལྡན་རྣམས་སོ། །ཁོར་ཡུག་ཏུ་ཡང་ཐང་ལས་སྐྱེས་པའི་མེ་ཏོག་འདི་ལྟ་བུ་དག་བསྐྱེད་པར་གྱུར་ཏེ། འདི་ལྟར་ཨ་ཏི་མུཀྟ་ཀ་དང ། ཙམ་པ་ཀ་དང ། བར་ཤ་ཀ་དང ། སྣ་མའི་མེ་ཏོག་དང ། མ་ཡུ་ཀ་དང ། དྷ་ནུ་སྐ་རི་དང ། ད་མ་ཡིན་པའི་མེ་ཏོག་ཐང་ལས་སྐྱེས་པ་མང་པོ་དག་ཀྱང་བསྐྱེད་པར་གྱུར་ཏོ། །རྒྱལ་པོའི་ཕོ་བྲང་འཁོར་
332b
རིན་པོ་ཆེས་རབ་ཏུ་བརྒྱན་པ་དེའི་སྟེང་གི་བར་སྣང་ལ་དྲིལ་བུ་གཡེར་ཤའི་དྲ་བ་ཆེན་པོས་བྲེས་པ་དང ། རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་ཤིང་ཏ་ལ་དེ་དག་དང ། རིན་པོ་ཆེའི་དྲ་བ་དེ་དག་དང ། དྲིལ་བུ་གཡེར་ཀའི་དྲ་བ་དེ་དག་རླུང་གིས་བསྐྱོད་པ་ལས་འདི་ལྟ་བུའི་སྒྲ་སྙན་ཅིང་ཡིད་དུ་འོང་ལ་མཉན་ན་བདེ་བ། འདི་ལྟ་སྟེ། དཔེར་ན། ཡན་ལག་ལྔ་དང་ལྡན་པའི་རོལ་མོ་སིལ་སྙན་མཁས་པས་ལེགས་པར་བླངས་པའི་སྒྲ་ལྟ་བུ་བྱུང་བར་གྱུར་ཏོ། །དེའི་ཚེ་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ན་མི་ཇི་སྙེད་ཅིག་འཁོད་པ་དེ་དག་ཐམས་ཅད་ཀྱང་སྒྲ་དེས་རྩེ་དགའ་ཞིང་ཡོངས་སུ་སྤྱོད་པར་གྱུར་ཏོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ན་འབྱོར་པ་རྒྱས་པ།་བདེ་བ། ལོ་ལེགས་པ། སྐྱེ་བོ་མང་པོ་དང་མིས་ཡོངས་སུ་གང་བ། མེ་ཏོག་ཨུཏྤ་ལ་དང ། པདྨ་དང ། ཀུ་མུ་ཏ་དང ། པདྨ་དཀར་པོས་ཡོངས་སུ་གང་བར་གྱུར་ཏོ། །དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི། ཤར་གྱི་ལུས་འཕགས་གླིང་དུ་འགྲོའི་སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ཤར་གྱི་ལུས་འཕགས་གླིང་ག་ལ་བ་དེར་སོང་སྟེ། དེས་དེར་ལོ་བརྒྱ་ཕྲག་མང་པོ་དང ། ལོ་སྟོང་ཕྲག་མང་པོར་
333a
༄#། །རྒྱལ་པོ་བྱས་སོ། །དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི། ནུབ་ཀྱི་བ་ལང་སྤྱོད་ཀྱི་གླིང་དུ་འགྲོའོ་སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ནུབ་ཀྱི་བ་ལང་སྤྱོད་ག་ལ་བ་དེར་སེང་སྟེ། དེས་དེར་ལོ་བརྒྱ་ཕྲག་མང་པོ་དང ། ལོ་སྟོང་ཕྲག་མང་པོར་རྒྱལ་པོ་བྱས་སོ། །དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི། བྱང་གི་སྒྲ་མི་སྙན་གྱི་གླིང་དུ་འགྲོའོ་སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་བྱང་གི་སྒྲ་མི་སྙན་གྱི་གླིང་ཆེན་པོ་ག་ལ་བ་དེར་སོང་སྟེ། དེས་དེར་ལོ་བརྒྱ་ཕྲག་མང་པོ་དང ། ལོ་སྟོང་ཕྲག་མང་པོར་དཔུང་གི་ཚོགས་ལ་རྗེས་སུ་བསྟན་ཏོ། །དེ་ནས་རྒྱལ་པོ་གྲགས་པ་མཐའ་ཡས་ཡུན་རིང་པོ་འདས་པའི་དུས་ཞིག་ན་འདི་སྙམ་དུ་སེམས་ཏེ། སུམ་ཅུ་རྩ་གསུམ་ཞེས་བྱ་བའི་ལྷ་རི་རབ་ཀྱི་ཟོམ་ལ་གནས་པ་དག་ཡོད་ན། བདག་ནི། སུམ་ཅུ་རྩ་བསུམ་\་Gཥཱུཾ?\་པའི་ལྷ་ག་ལ་བ་དེར་འགྲོའོ་སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་
333b
འཕགས་ནས་གླང་པོ་རིན་པོ་ཆེས་བྱ་ལ་ཁར་ཞོན་ཏེ་རིའི་རྒྱལ་པོ་རི་རབ་ཀྱི་སྟེང་དུ་སོང་ངོ ། །དེ་ནས་རྒྱལ་པོ་གྲགས་པ་མཐའ་ཡས་ཀྱིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ། གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་ཇི་ལྟར་མཐོང ། ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ། འདི་ལྟ་སྟེ། དཔེར་ན། རྫ་མཁན་གྱི་འཁོར་ལོ་དབྱིག་པས་འཕངས་ན། ཡོངས་སུ་འཁོར་བ་དེ་བཞིན་དུ་གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་འདི་ཡང་ཡོངས་སུ་འཁོར་བར་མཐོང་ངོ ། །རྒྱལ་པོས་སྨྲས་པ།་ཁ་ལོ་སྒྱུར་བ། འོ་ན་ད་དུང་གླང་པོ་རིན་པོ་ཆེས་འགྲོས་མ་ཕྱུང་ངོ ། །ཡང་རྒྱལ་པོ་གྲགས་པ་མཐས་ཡས་ཀྱིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ། གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་འདི་ཇི་ལྟ་བུར་མཐོང ། ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ། གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་དག་ད་ནི། འགུལ་ཞིང་རབ་ཏུ་འགུལ་བ་དང ། ཀུན་ཏུ་རབ་ཏུ་འགུལ་བར་མཐོང་ངོ ། །རྒྱལ་པོས་སྨྲས་པ། ཁ་ལོ་སྒྱུར་བ། འོ་ན་ད་དུང་གླང་པོ་རིན་པོ་ཆེས་འགྲོས་མ་ཕྱུང་ངོ ། །ཡང་རྒྱལ་པོ་གྲགས་པ་མཐའ་ཡས་ཀྱིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ། གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་འདི་ད་ཇི་ལྟར་མཐོང །
334a
༄#། །ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ། ད་ནི། གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་དག་ཀྱང་གཡོ་བའམ་འགུལ་བའམ། ལྡེག་པ་མ་མཆིས་པར་གནས་པར་མཐོང་ངོ ། །རྒྱལ་པོས་སྨྲས་པ། ཁ་ལོ་སྒྱུར་བ། ད་ནི། གླང་པོའི་རྒྱལ་པོས་འགྲོས་བསླང་བ་ལྟས་རིང་པོ་མི་ཐོགས་པར་རིའི་རྒྱལ་པོ་རི་རབ་ཀྱི་རྩེ་མོར་ཕྱིན་པར་འགྱུར་རོ། །དེ་ནས་རྒྱལ་པོ་གྲགས་པ་མཐའ་ཡས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་རིང་པོར་མ་ཐོགས་པར་རིའི་རྒྱལ་པོ་རི་རབ་ཀྱི་རྩེ་མོར་ཕྱིན་པ་དང ། ལྷའི་དབང་པོ་བརྒྱ་བྱིན་གྱིས་རྒྱལ་པོ་གྲགས་པ་མཐའ་ཡས་རྒྱང་རིང་པོ་ནས་འོང་བ་མཐོང་ངོ ། །མཐོང་ནས་སྟན་གྱི་ཕྱེད་ལ་བདར་ཏེ་རྒྱལ་པོ་ཆེན་པོ་ཚུར་སྤྱོན། རྒྱལ་པོ་ཆེན་པོ་བྱོན་པ་ལེགས་སོ། །རྒྱལ་པོ་ཆེན་པོ་སྟན་གྱི་ཕྱེད་ལ་བཞུགས་ཞེས་སྨྲས་པ་དང ། རྒྱལ་པོ་གྲགས་པ་མཐའ་ཡས་ལྷའི་དབང་པོ་བརྒྱ་བྱིན་གྱི་སྟན་གྱི་ཕྱེད་ལ་འདུག་སྟེ། དེས་དེར་ལོ་བརྒྱ་ཕྲག་མང་པོར་སུམ་ཅུ་རྩ་གསུམ་པའི་ལྷའི་རྒྱལ་སྲིད་ཕྱེད་ཀྱི་དབང་ཕྱུག་ལ་དབང་བྱས་པར་གྱུར་ཏོ། །དེ་ནས་རྒྱལ་པོ་གྲགས་པ་མཐའ་ཡས་ཡུན་རིང་པོར་འདས་པའི་དུས་ཞིག་ན་འདི་སྙམ་དུ་སེམས་ཏེ། ཀྱེ་མ་བདག་གིས་བརྒྱ་བྱིན་གྱི་སྟན་ཐམས་ཅད་ལ་འདུག་པར་
334b
བྱའོ། །སྙམ་པ་དང ། དེས་སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་སྟན་ཕྱེད་པོ་དེ་ལས་ཉམས་ནས་འཛམ་བུའི་གླིང་དུ་གནས་པར་གྱུར་ཏེ།་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་སྐྱེད་མོས་ཚལ་གྱི་ར་བ་ན་འཁོད་པའི་མི་རྣམས་ཀྱིས་རྒྱལ་པོ་གྲགས་པ་མཐའ་ཡས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་རིན་པོ་ཆེའི་སྐྱེད་མོས་ཚལ་དུ་འོངས་ཤིང་དེ་ན་འདུག་པ་མཐོང་ནས་མཐོང་མ་ཐག་ཏུ་མྱུར་བ་མྱུར་བར་རིངས་པའི་གཟུགས་ཀྱིས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ན་རྒྱལ་པོ་དགའ་བྱེད་ཅེས་བྱ་བ་རྒྱལ་པོ་བྱེད་ཅིང་འདུག་པ་ལ་སྦྲན་ཏོ། །རྒྱལ་པོ་དགའ་བྱེད་དེས་རིན་པོ་ཆེའི་ཟ་མ་ཏོག་གི་སྐྱེད་མོས་ཚལ་ན་ལྷའི་མི་ཞིག་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་གནས་ཞེས་ཐོས་ནས་མྱུར་བ་མྱུར་བར་རིངས་པའི་གཟུགས་སུ་བཞོན་པའི་མཆོག་ལ་ཞོན་ནས་ཡན་ལག་བཞི་པའི་དཔུང་གི་ཚོགས་དང་ལྡན་ཅིག་ཏུ་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་ནས་བྱུང་ནས་རིན་པོ་ཆེའི་ཟ་མ་ཏོག་གི་སྐྱེད་མོས་ཚལ་ག་ལ་བ་དེར་སོང་ངོ ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་ན་འཁོད་པ་ཐམས་ཅད་ཀྱང་ངོ་མཚར་དུ་གྱུར་ནས་རྒྱུག་པར་གྱུར་ཏོ། །དེ་ནས་རྒྱལ་པོ་དགའ་བྱེད་བཞོན་
335a
༄#། །པ་ལས་བབས་ཏེ་རྒྱལ་པོ་གྲགས་པ་མཐའ་ཡས་ག་ལ་བ་དེར་སོང་ནས་དེས་སྤོས་དང ། མེ་ཏོག་དང ། ཕྲེང་བ་དང ། བྱུག་པ་དང ། བདུག་སྤོས་ཕུལ་ཏེ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་རྒྱལ་པོ་གྲགས་པ་མཐའ་ཡས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་རྒྱལ་པོ་གྲགས་པ་མཐས་ཡས་ལ་ཁྱོད་སུ་ཞིག་ལགས་ཞེས་དྲིས་སོ། །རྒྱལ་པོས་དེ་ལ་སྨྲས་པ། རྒྱལ་པོ་གྲགས་པ་མཐའ་ཡས་ཞེས་བྱ་བ་ཞིག་བྱུང་བ་དེ་ཁྱོད་ཀྱིས་ཐོས་སམ། རྒྱལ་པོ་དགའ་བྱེད་ཀྱིས་སྨྲས་པ། བདག་གིས་རབ་ཏུའང་ཐོས་ཏེ། རྒན་རབས་དག་མཆི་ན། རྒྱལ་པོ་གྲགས་པ་མཐའ་ཡས་ཞེས་བགྱི་བ་འཁོར་ལོས་བསྒྱུར་བ། ཁྱོགས་དང ། དཔུང་དང ། བཞོན་པ་དང་བཅས་ཏེ་མཐོ་རིས་སུ་བཞུད་དོ། །ཞེས་ཐོས་སོ། །སྨྲས་པ། ང་ནི། རྒྱལ་པོ་གྲགས་པ་མཐའ་ཡས་ཞེས་བྱ་བ་དེ་ཡིན་ནོ། །དེ་ནས་རྒྱལ་པོ་གྲགས་པ་མཐའ་ཡས་དེ་མིའི་གཟི་བརྗིད་ཀྱིས་མིག་མ་གང་སྟེ། མིའི་ལོངས་སྤྱོད་མི་བཟོད་པར་གྱུར་ནས་བྱིང་ཞིང་མི་གནས་པར་གྱུར་ཏེ། འདི་ལྟ་སྟེ། དཔེར་ན། མར་གྱི་གོང་བུའམ་མར་སར་གོང་བུ་བྱེ་མ་ཚ་བ་ལ་བཞག་པ་ནི། འཇུ་ཞིང་མ་གནས་སོ། །དེ་བཞིན་དུ་རྒྱལ་པོ་གྲགས་པ་མཐའ་ཡས་ཀྱང་བྱིང་
335b
ཞིང་མི་གནས་པར་གྱུར་ཏོ། །དེ་ནས་རྒྱལ་པོ་དགའ་བྱེད་ཀྱིས་རྒྱལ་པོ་གྲགས་པ་མཐའ་ཡས་དེ་ལྟར་བྱིང་བ་དེ་ལ་འདི་སྐད་ཅེས་སྨྲས་སོ། །རྒྱལ་པོ་གྲགས་པ་མཐའ་ཡས་ཀྱིས་ལེགས་པར་བརྗོད་པ་ཇི་སྐད་ཅིག་གསུངས་ཞེས་མཆི་ན། བདག་གིས་འཇིག་རྟེན་རྣམས་ལ་ཇི་སྐད་ཅིག་ལུང་བསྟན་པར་བགྱི། དེས་སྨྲས་པ། རྒྱལ་པོ་ཆེན་པོ་གྲགས་པ་མཐའ་ཡས་ནི།་གླིང་ཆེན་པོ་བཞིའི་རྒྱལ་སྲིད་ཀྱི་དབང་ཕྱུག་ལ་དབང་བྱས་ཤིང་བསམ་པ་ཡིད་བཞིན་དུ་གྲུབ་ལ་དོན་མེད་པར་མ་གྱུར་པའང་མེད་ལ། ཤིང་ཐམས་ཅད་ཡིད་བཞིན་དུ་འབྲས་བུ་ཆགས་པ་དང ། གནོད་པ་ཐམས་ཅད་རྒྱུན་ཆད་པ་དང ། སེམས་ཅན་ཐམས་ཅད་ཀྱིས་ཡིད་ལ་བསམ་པ་དོན་ཡོད་པ་དང ། སྦས་ཀྱི་ཆུའི་ཆར་འབབ་པ་དང ། ལྷའི་ཡིད་བཞིན་གྱི་གོས་ཀྱི་ཆར་འབབ་པ་དང ། དབྱིག་གི་ཆར་འབབ་པ་དང ། གསེར་གྱི་ཆར་འབབ་པ་དང ། རིན་པོ་ཆེ་སྣ་ཚོགས་ཀྱི་ཆར་འབབ་པ་དང ། ཡོ་བྱད་ཐམས་ཅད་ཀྱི་ཆར་འབབ་པ་ཡང་མྱོང་བར་གྱུར་ནས་གླིང་ཆེན་པོ་བཞི་པོ་དག་ཏུ་གནས་ཏེ་གླིང་ཆེན་པོ་བཞིའི་རྒྱལ་སྲད་\་ཥRཱིཌ?\་ཀྱི་དབང་ཕྱུག་ལ་དབང་བྱས་ནས་བརྒྱ་བྱིན་གྱི་སྟན་ཕྱེད་མནན་པ་ལས་འདོད་པ་ཆེན་པོས་མ་བཏང་སྟེ། འདོད་པས་མ་ངོམས་བཞིན་དུ་འཆི་བའི་དུས་བྱས་སོ། །ཞེས་རྒྱལ་པོ་ཆེན་པོ་ཁྱོད་ཀྱིས་ལུང་སྟོན་ཅིག་།དེ་སྐད་ཅེས་སྨྲས་ནས་
336a
༄#། །རྒྱལ་པོ་གྲགས་པ་མཐའ་ཡས་དེ་འཆི་བའི་དུས་བྱས་པར་གྱུར་ཏོ། །རྒྱལ་པོ་ཆེན་པོ། དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་གྲགས་པ་མཐའ་ཡས་ཞེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་ཁྱོད་དོགས་ཤིང་ཐེ་ཚོམ་ཟ་ན། དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། ང་ཉིད་དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་གྲགས་པ་མཐའ་ཡས་ཞེས་བྱ་བར་གྱུར་ཏོ། །དེ་བས་ན། རྒྱལ་པོ་ཆེན་པོ། ཁྱོད་ཀྱིས་དབང་པོ་རྣམས་ནི། སྒྱུ་མ་ལྟ་བུ། ཡུལ་རྣམས་ནི། རྨི་ལམ་ལྟ་བུའོ། །ཞེས་དེ་ལྟར་རིག་པར་བྱས་ནས་སེམས་ངེས་པར་གཞག་པར་བྱ་སྟེ། གཞན་གྱི་དྲིང་མི་འཇོག་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འདོད་པའི་དབང་ཕྱུག་རྣམས་ལས་ནི། །སེམས་ནི་མཁས་པས་བསྐྱོད་བྱས་ཏེ། །ཆོས་ཀྱི་དབང་ཕྱུག་དགའ་བ་ལ། །སེམས་ནི་ཡང་དག་ཉིད་དུ་གཏང ། །འདོད་དེའི་དབང་ཕྱུག་སྤངས་བྱས་ཤིང ། །ཆོས་ཀྱི་དབང་ལ་ཡིད་བཞག་སྟེ། །སེམས་བཏུལ་བ་ལ་རབ་བརྟེན་ན། ། ཉོན་མོངས་རབ་ཏུ་ཚར་ཆོད་འགྱུར། །ཉོན་མོངས་ཚར་བཅད་བརྟེན་ནས་ནི། །ལས་ཀྱི་ལམ་ཡང་འཆད་པར་འགྱུར། །ལས་ཀྱི་ལམ་ཡང་ཆད་གྱུར་ན། །འཇིག་རྟེན་
336b
གྱི་ནི་མཆོད་རྟེན་འགྱུར། །འདོད་པ་ཀུན་ལས་ཉོན་མ་མོངས། །འདོད་པའི་ཉེས་པ་རབ་བསྟན་ཏེ། །སེམས་ཅན་རྣམས་ལ་ཕན་སེམས་པས། །དེ་ཕྱིར་མཆོད་པའི་རྟེན་ཅེས་བྱ།། འདོད་པའི་ཉེས་པ་ཐོས་གྱུར་ནས། །མི་ནི་འདོད་པའི་འདོད་ཆགས་ལས། །སེམས་སྦྱོང་བྱེད་པ་ཐམས་ཅད་མཁྱེན། །དེ་ཕྱིར་མཆོད་པའི་རྟེན་ཅེས་བྱ། །སེམས་ཅན་རྣམས་ཀྱི་སྡང་སྤངས་པ། །གང་ཟག་མཆོག་གིས་རབ་མཁྱེན་ཏེ། །སྡང་ལས་སེམས་ནི་འགྲོལ་མཛད་པས། །དེ་ཕྱིར་མཆོད་པའི་རྟེན་ཅེས་བྱ། །སེམས་ཅན་རྣམས་ཀྱི་རྨོངས་སྤངས་པ། །ཤཱཀྱའི་ཁྱུ་མཆོག་རབ་མཁྱེན་ཏེ། །རྨོངས་ལས་སེམས་ནི་སྦྱོང་མཛད་པས། །དེ་ཕྱིར་མཆོད་པའི་རྟེན་ཅེས་བྱ། །སེམས་ཅན་ང་རྒྱལ་སྤང་བ་ཡང ། །སེམས་ཅན་ཁ་ལོ་སྒྱུར་པས་མཁྱེན། །ང་རྒྱལ་དག་ལས་སེམས་སྦྱོང་བས། །དེ་ཕྱིར་མཆོད་པའི་རྟེན་ཅེས་བྱ། །བཅོམ་ལྡན་འདས་ཀྱིས་གཞན་ཡང་རྒྱལ་པོ་ཟས་གཙང་མ་ལ་བཀའ་སྩལ་པ།་རྒྱལ་པོ་ཆེན་པོ། སྔོན་བྱུང་བ་འདས་པའི་དུས་ན་རྒྱལ་པོ་སའི་ལྷ་ཞེས་བྱ་བ་ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་བྱུང་སྟེ། དེའི་རིན་པོ་ཆེ་སྣ་བདུན་ནི། འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་
337a
༄#། །པོ་ཆེ་དང ། བློན་པོ་རིན་པོ་ཆེ་དང་བདུན་ནོ། །རྒྱལ་པོ་སའི་ལྷ་དེའི་ཕ་ནི། རྒྱལ་པོ་ས་བྱུང་ཞེས་བྱ་བར་གྱུར་ཏོ། །རྒྱལ་པོ་ས་བྱུང་དེའི་བུ་ཐུ་བོ་ནི། གཞོན་ནུ་སའི་ལྷ་སྟེ། དེ་ནས་རྒྱལ་པོ་ས་བྱུང་འཆི་བའི་དུས་བྱེད་པའི་ཚེ་རྒྱལ་པོ་གཞོན་ནུ་སའི་ལྷ་རྒྱལ་སྲིད་ལ་དབང་བསྐུར་རོ། །དེ་ནས་རྒྱལ་པོ་སའི་ལྷ་དེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བར་གྱུར་ཏོ། །དེ་ནས་རྒྱལ་པོ་སའི་ལྷ་རྒྱལ་རིགས་སྤྱི་བོ་ནས་དབང་བསྐུར་བ་དེ་གསོ་སྦྱོང་གི་ཉི་མ་ཟླ་བ་ཉ་བའི་ཚེ་སྐྲ་བཀྲུས་ཏེ་རས་བཅོས་བུ་གསར་པ་བགོས། སྐྲ་དང་ཁ་སྤུ་བཅོས། ཕྲེང་བ་དང་རྒྱན་བཏགས། ནོར་བུ་དང་རྣ་ཆ་གདུབ་ཀོར་བཏགས་ནས་ཁང་སྟེང་དུ་བུད་མེད་ཀྱི་འཁོར་གྱིས་བསྐོར་ཅིང་མདུན་དུ་བདར་ཏེ་འདུག་པ་དང ། ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་རྩིབས་སྟོང་དང་ལྡན་པ། ལྟེ་བ་དང་བཅས་པ། མུ་ཁྱུད་དང་བཅས་པ། རྣམ་པ་ཐམས་ཅད་ཀྱི་མཆོག་དང་ལྡན་པ། འོད་ཟེར་དང་ལྡན་པས་འོད་གསལ་བ་འཕང་དུ་ཁྲུ་བདུན་ཡོད་པ་ཐམས་ཅད་གསེར་ལས་བྱས་པ་བྱུང་བར་གྱུར་ཏོ། །རྒྱལ་པོ་སའི་ལྷ་དེས་སྔོན་ཡང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གང་གསོ་སྦྱོང་གི་ཉི་མ་ཟླ་བ་ཉ་བའི་ཚེ་ཞེས་བྱ་བ་ནས་བུད་མེད་ཀྱི་ཚོགས་ཀྱིས་བསྐོར་ཅིང་མདུན་དུ་བདར་བའི་བར་དུ་སྔ་མ་བཞིན་ཏེ། ཤར་ཕྱོགས་
337b
ནས་ལྷའི་འཁོར་ལོ་རིན་པོ་ཆེ་རྩིབས་སྟོང་དང་ལྡན་པ་ཞེས་བྱ་བ་ནས་ཐམས་ཅད་གསེར་ལས་བྱས་པའི་བར་དང་ལྡན་པ་བྱུང་བར་གྱུར་པ་དང ། དེ་འཁོར་ལོས་བསྒྱུར་བའི་རྒྱལ་པོར་འགྱུར་རོ། །ཞེས་ཐོས་པས་དེ་འདི་སྙམ་དུ་སེམས་ཏེ། བདག་འཁོར་ལོས་བསྒྱུར་བའི་རྒྱལ་པོ་ལྟ་ཡིན་ནམ། དེ་ལ་བདག་གིས་སད་པར་བྱའོ། །སྙམ་ནས་རྒྱལ་པོ་སའི་ལྷ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ལྷའི་འཁོར་ལོ་རིན་པོ་ཆེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ལྷའི་འཁོར་ལོ་རིན་པོ་ཆེ་དེ་ལ་འདི་སྐད་ཅེས་སྨྲས་སོ། །ཀྱེ་འཁོར་ལོ་རིན་པོ་ཆེ། བབས་ཏེ་ས་ལ་གནོས་ཤིག་།ཅེས་བྱས་པ་དང ། དེ་ནས་ལྷའི་འཁོར་ལོ་རིན་པོ་ཆེ་དེ་ནམ་མཁའ་ལས་བབས་ཏེ་ས་ལ་གནས་པར་གྱུར་ཏོ། །དེ་ནས་རྒྱལ་པོ་སའི་ལྷ་དེས་ལྷའི་འཁོར་ལོ་རིན་པོ་ཆེ་དེ་གོས་ཁྱེའུ་གཙང་གིས་ཕྱིས་ཏེ་ལག་པ་གཡས་པས་བསྐུལ་ནས་འདི་སྐད་ཅེས་སྨྲས་སོ། །ཀྱེ་འཁོར་ལོ་རིན་པོ་ཆེ། ཤར་ཕྱོགས་ལས་རྣམ་པར་རྒྱལ་པར་གྱིས་ཤིག་།དེ་ནས་འཁོར་ལོ་རིན་པོ་ཆེ་དེ་ཤར་ཕྱོགས་ལོགས་སུ་གྱུར་པ་དང ། ཤར་ཕྱོགས་ཀྱི་གནས་རྣམས་སུ་དེ་ཉིད་ཀྱི་ཚེ་སྔོན་གྱི་འཁོར་ལོས་བསྒྱུར་བ་རྣམས་ཀྱི་ལམ་མཉན་ཤིང་ཤིན་ཏུ་བདེ་བ། ཉམས་དགའ་བ། རིན་པོ་ཆེ་སྣ་བདུན་གྱི་རྒྱུ་
338a
༄#། །ལས་གྲུབ་པ། མེ་ཏོག་སིལ་མ་སྣ་ཚོགས་ཀྱིས་གང་བ་བྱུང་བར་གྱུར་ཏེ། དེའི་གཤོང་དུ་གྱུར་པའི་ཕྱོགས་རྣམས་ནི། མཐོ་བར་གྱུར་ཏོ། །སྒང་དུ་གྱུར་པ་རྣམས་ནི། དམའ་བར་གྱུར་ཏོ། །དེའི་ཁྲོན་པ་དང་འབབ་ཆུའི་ངོས་དང ། མཚོ་དང ། མཚེའུ་དང ། ཆུ་ཀླུང་བསྐམས་པ་རྣམས་སུ་ནི། ཡན་ལག་བརྒྱད་དང་ལྡན་པའི་ཆུ་བྱུང་བར་གྱུར་ཏེ། འདི་ལྟ་སྟེ། བསིལ་བ་དང ། ཞིམ་པ་དང ། ཡང་པ་དང ། འཇམ་པ་དང ། དང་བ་དང ། དྲི་ང་བ་མེད་པ་དང ། འཐུངས་ན་ལྐོག་མར་མི་གནོད་པ་དང ། འཐུངས་ན་ལྟོ་བ་བདེ་བས་ཡོངས་སུ་གང་བར་གྱུར་ཏོ། །མེ་ཏོག་གི་ཤིང་ལྗོན་པ་རྣམས་ལ་ཡང་མེ་ཏོག་ཆགས་པར་གྱུར་ཏོ། །འབྲས་བུའི་ཤིང་ལྗོན་པ་རྣམས་ལ་ཡང་འབྲས་བུ་ཆགས་པར་གྱུར་ཏོ། །མེ་ཏོག་རྒྱས་པའི་ཤིང་རྣམས་ཀྱང་རྟག་ཏུ་མེ་ཏོག་རྒྱས་པར་གྱུར་ཏོ། །འབྲས་བུ་ཆགས་པའི་ཤིང་རྣམས་ཀྱང་རྟག་ཏུ་འབྲས་བུ་ཆགས་པར་གྱུར་ཏོ། །འཁོར་ལོས་བསྒྱུར་བའི་རྒྱལ་པོ་དཔུང་གི་ཚོགས་ཡན་ལག་བཞི་དང་ལྷན་ཅིག་ཏུ་འཁོར་ལོ་རིན་པོ་ཆེ་དེའི་ཕྱིར་བཞིན་དུ་སོང་སྟེ། ས་ཕྱོགས་གང་དུ་འཁོར་ལོ་རིན་པོ་ཆེ་དེ་འདུག་པར་གྱུར་པ་དེར་འཁོར་ལོས་བསྒྱུར་བའི་རྒྱལ་པོ་ཡང་དཔུང་གི་ཚོགས་ཡན་ལག་བཞི་དང་ལྷན་
338b
ཅིག་ཏུ་འདུག་པར་གྱུར་ཏོ། །དེའི་ཚེ་ཤར་ཕྱོགས་ཀྱི་རྒྱལ་པོའམ། ཁམས་ཀྱི་རྒྱལ་པོའམ། གྲོང་རྡལ་གྱི་མིའམ། ཞིང་པ་དེ་དག་ཐམས་ཅད་གསེར་གྱི་གཞོང་པ་དངུལ་སིལ་མས་བཀང་བ་དང ། དངུལ་གྱི་གཞོང་པ་གསེར་ཕྱེས་བཀང་བ་དག་ཐོགས་ཏེ་འཁོར་ལོས་བསྒྱུར་བའི་རྒྱལ་པོ་དེ་བསུ་ཞིང ། ལྷ་ཚུར་གཤེགས། ལྷ་གཤེགས་པ་ལེགས་སོ། །ལྷའི་ཆབས་འོག་ཏུ་མངའ་བ་འདི་དག་ནི། འབྱོར་ཅིང་རྒྱས་ལ་ལོ་ལེགས་ཤིང་སྐྱེ་བོ་མང་པོ་དང་མིས་གང་བ་སྟེ། འདི་དག་དང་བདག་ཅག་ལ་ལྷ་མངའ་མཛད་དུ་གསོལ།་དེ་སྐད་ཅེས་སྨྲས་པ་དང ། འཁོར་ལོས་བསྒྱུར་བའི་རྒྱལ་པོ་དེས་དེ་དག་ལ་འདི་སྐད་ཅེས་སྨྲས་སོ། །ང་ལ་ལོངས་སྤྱོད་འདི་དག་མི་དགོས་ཀྱི། འདི་དག་ཁྱོད་ཀྱི་ལོངས་སྤྱོད་དུ་གྱུར་ཏེ་ཉེ་བར་འཚོ་བར་གྱིས་ཤིག། ཁྱེད་འདི་ལྟར་ངའི་རྗེས་སུ་འབྲང་བར་གྱིས་ཤིག་།གལ་ཏེ་ཁྱེད་ཀྱིས་སྲོག་བཅོད་\་GCཱོཌ?\་པ་སྤངས་ཏེ། མ་བྱིན་པར་ལེན་པ་སྤངས་ཤིང ། ལོག་པར་ལྟ་བའི་བར་དུ་སྤངས་ན། ང་ཡང་བདག་གིས་ནི། ཡུལ་འདི་དག་ལས་རྒྱལ་ཏེ། མི་གང་དག་མར་འཛིན་པ་དང ། ཕར་འཛིན་པ་དང ། དགེ་སྦྱོང་དུ་འཛིན་པ་དང ། བྲམ་ཟེར་འཛིན་པ་དང ། རིགས་ཀྱི་གཙོ་བོ་ལ་རིམ་གྲོ་བྱེད་པ་དེ་དག་ནི། ངའི་རྗེས་སུ་འབྲང་བ་ཡིན་ནོ། །སྙམ་དུ་སེམས་སོ། །ད་ཕན་ཆད་ཁྱོད་ཡུལ་འཁོར་དུ་ཆོས་
339a
༄#། །མ་ཡིན་པའི་སྤྱོད་པ་དང ། མི་རིགས་པའི་སྤྱོད་པ་འདོད་པར་མ་བྱེད་ཅིག་།དེ་ལྟར་བྱས་ན་ཡུལ་འདི་དག་རྣམས་ལས་རྒྱལ་ཞིང་མི་དེ་དག་ཀྱང་ངའི་རྗེས་སུ་འབྲང་བ་ཡིན་པར་སེམས་སོ། །དེ་དག་གིས་དེ་ལ་ལེགས་སོ། །ཞེས་པ་ནས་དེ་བཞིན་དུ་ནན་ཏན་དུ་བྱེད་དོ། །དེ་ལ་ལྷའི་འཁོར་ལོ་རིན་པོ་ཆེས་དེས་ཤར་ཕྱོགས་སུ་རྣམ་པར་རྒྱལ་བར་བྱས་ཏེ་ཤར་ཕྱོགས་ཀྱི་རྒྱ་མཚོ་ལས་བརྒལ་ནས་མདུན་དུ་ཤིང་རྟའི་སྲོག་ཤིང་བཙུགས་པ་ལྟར་འདུག་པར་གྱུར་ཏོ། །དེ་བཞིན་དུ་ལྷོ་ཕྱོགས་དང ། ནུབ་ཕྱོགས་སུ་ཡང་རྒྱ་ཆེར་རྣམ་པར་རྒྱལ་བར་བྱས་ནས་བྱང་ཕྱོགས་སུ་བྱང་གི་སྒྲ་མི་སྙན་གྱི་གླིང་ཆེན་པོའི་བར་ལས་རྣམ་པར་རྒྱལ་བར་བྱས་ཏེ། བྱང་ཕྱོགས་ཀྱི་རྒྱ་མཚོ་ལས་བརྒལ་ནས་འཁོར་ལོས་བསྒྱུར་བའི་རྒྱལ་པོ་ཕོ་བྲང་གི་སྒོའི་སྟེང་དུ་ཤིང་རྟའི་སྲོག་ཤིང་བཙུགས་པ་བཞིན་དུ་འདུག་པར་གྱུར་ཏོ། །རྒྱལ་པོ་སའི་ལྷས་འཁོར་ལོ་རིན་པོ་ཆེ་བསྐོར་མ་ཐག་ཏུ་དེ་ནས་དེའི་མོད་ལ་གླིང་ཆེན་པོ་བཞི་པ་ཐམས་ཅད་རིན་པོ་ཆེའི་རང་བཞིན་བཀྲ་བ་བལྟ་ན་སྡུག་པར་གནས་པར་གྱུར་ཏོ། །རིན་པོ་ཆེ་སྣ་བདུན་ནི། འདི་ལྟ་སྟེ། གསེར་དང ། དངུལ་དང ། བཻ་ཌཱུརྱ་དང ། ཤེལ་དང ། མུ་ཏིག་དམར་པོ་དང ། སྤུག་དང ། རྡོའི་སྙིང་པོ་དང་བདུན་ནོ། །
339b
རྒྱལ་པོ་སའི་ལྷས་འཁོར་ལོ་རིན་པོ་ཆེ་དེ་བསྐོར་མ་ཐག་ཏུ་སེམས་ཅན་དམྱལ་བ་ཐམས་ཅད་རྒྱུན་ཆད་པར་གྱུར། དུད་འགྲོའི་སྐྱེ་གནས་ཐམས་ཅད་དང ། གཤིན་རྗེའི་འཇིག་རྟེན་ཐམས་ཅད་དང ། ལྷ་མ་ཡིན་གྱི་རིས་ཐམས་ཅད་དང ། མི་ཁོམ་པ་ཐམས་ཅད་ཀྱང་རྒྱུན་ཆད་པར་གྱུར་ཏོ། །མི་དགེ་བའི་སྒྲ་རྣམས་ཀྱང་ཡོངས་སུ་ནུབ་པར་གྱུར་ཏོ། །འདི་ལྟར་རྒྱལ་པོ་སའི་ལྷའི་སྔོན་གྱི་སྨོན་ལམ་གྱིས་གླིང་ཆེན་པོ་བཞི་པོ་ཐམས་ཅད་དུ་མ་རྨོས་མ་བཏབ་པའི་འབྲས་སཱ་ལུའི་འབྲུ་ཡང་བྱུང་བར་གྱུར ། དཔག་བསམ་གྱི་ཤིང་རྣམ་པ་སྣ་ཚོགས་ཀྱིས་གང་བར་གྱུར་ཏོ། །སེམས་ཅན་དེ་དག་གི་ནད་ཀྱི་རྣམ་པ་ཡང་འདི་ལྟ་སྟེ། འདོད་པ་དང ། ཁ་ཟས་མི་ཟ་བ་དང ། དགའ་བ་གསུམ་མ་གཏོགས་པར་ཐམས་ཅད་རྒྱུན་ཆད་པར་གྱུར་ཏོ། །སེམས་ཅན་དེ་དག་གི་ཚེའི་ཚད་ནི། ལོ་བྱེ་བ་ཚང་བར་གྱུར་ཏོ། །སེམས་ཅན་དེ་དག་སྡུག་བསྔལ་གྱི་སྡུག་བསྔལ་རྣམ་པ་ཐམས་ཅད་དུ་མི་མངོན་ཞིང་མི་གནོད་པར་གྱུར་ཏེ། དེའི་ཚེའི་འདི་དག་དང ། གཞན་ཡང་ངོ་མཚར་རྨད་དུ་བྱུང་བ་མཐའ་ཡས་པ་བྱུང་བར་གྱུར་ཏོ། །རྒྱལ་པོ་ཆེན་པོ། །དེ་ནས་རྒྱལ་པོ་སའི་ལྷ་དེ་འདི་སྙམ་དུ་སེམས་ཏེ། མིའི་འཇིག་རྟེན་ན་ལོངས་སྤྱོད་འདི་ལྟ་བུ་ཡོད་ན། ལོངས་སྤྱོད་འདི་བས་རྒྱ་ཆེ་བ་དང ། འདི་ལས་ཁྱད་པར་དུ་
340a
༄#། །འཕགས་པའི་ལོངས་སྤྱོད་གཞན་འགའ་ཞིག་ཡོད་དམ་མེད་སྙམ་ནས་དེ་འདི་སྙམ་དུ་སེམས་ཏེ། བདག་གིས་སུམ་ཅུ་རྩ་གསུམ་པའི་ལྷ་ཞེས་བྱ་བ་རི་རབ་ཀྱི་རྩེ་མོ་ལ་གནས་པ་དག་ཅིག་ཡོད་ཅེས་ཐོས་ན། དེ་དག་གི་ལོངས་སྤྱོད་དེ་ཅི་འདྲ་བ་ཞིག་ཡོད་སྙམ་མོ། །དེ་ནས་རྒྱལ་པོ་སའི་ལྷ་དེ་འདོད་པ་མ་སྤངས་པའི་ཕྱིར་མིའི་ལོངས་སྤྱོད་ལ་ནི། སྨོད། ལྷའི་ལོངས་སྤྱོད་ལ་ནི། བསྟོད་ཅིང་འདི་སྙམ་དུ་འོ་ན་བདག་སུམ་ཅུ་རྩ་གསུམ་པའི་གནས་སུ་འགྲོ་བར་བྱའོ། །སྙམ་དུ་སེམས་བསྐྱེད་པར་གྱུར་ཏོ། །རྒྱལ་པོ་ཆེན་པོ། དེ་ནས་རྒྱལ་པོ་སའི་ལྷ་དེས་སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་དང་ལྷན་ཅིག་ཏུ་རིའི་རྒྱལ་པོ་རི་རབ་ཀྱི་རྩེ་མོ་ལ་ཕྱིན་པར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་སའི་ལྷ་རྒྱང་རིང་པོ་ནས་འོང་བ་མཐོང་ནས་འདི་སྐད་ཅེས་སྨྲས་ཏེ། རྒྱལ་པོ་ཆེན་པོ་ཚུར་སྤྱོན། རྒྱལ་པོ་ཆེན་པོ་བྱོན་པ་ལེགས་སོ། །ཞེས་སྟན་གྱི་ཕྱེད་ལ་བདར་ཏེ། རྒྱལ་པོ་ཆེན་པོ། གང་གི་དུས་ལ་དབབ་པར་མཁྱེན་ན། སྟན་འདི་ལ་བཞུགས་ཤིག་ཅེས་སྨྲས་པ་དང ། རྒྱལ་པོ་སའི་ལྷ་ཡང་བརྒྱ་བྱིན་གྱི་སྟན་ཕྱེད་ལ་འདུག་སྟེ། དེས་དེར་ལོ་བརྒྱ་སྟོང་ཕྲག་མང་པོར་སུམ་ཅུ་རྩ་གསུམ་པའི་ལྷའི་ནང་དུ་རྒྱལ་སྲིད་ཀྱི་དབང་ཕྱུག་ཕྱེད་ལ་དབང་བྱས་
340b
སོ། །དེ་ཡུན་རིང་པོ་འདས་པའི་དུས་ཤིག་ན་འདོད་པ་ཆེན་པོའི་དབང་གིས་འདི་སྙམ་དུ་སེམས་པར་གྱུར་ཏེ། ཀྱེ་མ་བདག་གིས་སུམ་ཅུ་རྩ་གསུམ་པའི་ལྷའི་ནང་དུ་རྒྱལ་སྲིད་ཀྱི་དབང་ཕྱུག་ཐམས་ཅད་ལ་དབང་བྱའོ། །སྙམ་པ་དང ། སེམས་བསྐྱེད་མ་ཐག་ཏུ་ལྷའི་དབང་པོ་བརྒྱ་བྱིན་གྱི་སྟན་ཕྱེད་ལས་ཉམས་ནས་ཕྱིར་འཛམ་བུའི་གླིང་གི་གྲོང་ཁྱེར་བདེ་བའི་ཁྱིམ་ཞེས་བྱ་བར་གནས་པར་གྱུར་ཏོ། །དེ་ལྟར་ལྷའི་གཟི་བརྗིད་དང་ལྡན་པ་ལས་འཛམ་བུའི་གླིང་དུ་གནས་པར་གྱུར་པས་མིའི་གཟི་བརྗིད་མི་བཟོད་པར་གྱུར་ནས་དེ་བྱིང་ཞིང་མི་གནས་པར་གྱུར་ཏོ། །དེ་ནས་རྒྱལ་པོ་སའི་ལྷ་ས་ལ་བྱིང་བ་ན་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་སྲིད་དབང་ཕྱུག་རྒྱ་ཆེན་གྱིས། ། འདོད་ལ་སྲེད་པ་ཞི་མི་འགྱུར། །མི་ལ་རྩཝ་ཤིང་ཇི་བཞིན་ཏེ། །དེ་བས་འདོད་པ་རྣམ་པར་སྤང ། །ཡུན་རིང་རྒྱུད་ཀྱིས་འདོད་པ་ལ། །བརྟེན་ན་ངོམས་པར་མི་འགྱུར་ཏེ། །སྐོམ་པས་ཉེན་པ་ཚཝ་ཆུ་ལ། །རབ་ཏུ་འཐུངས་ཀྱང་ཡོངས་གདུགས་བཞིན། །ཆུ་བོ་རྣམས་ཀྱིས་ནམ་དུ་ཡང ། །རྒྱ་མཚོ་ངོམས་པར་མི་འགྱུར་ཏེ། །དེ་བཞིན་འདོད་པ་བསྟེན་བྱས་ན། ། གཞན་ཡང་ངོམས་པར་མི་འགྱུར་རོ། །ཤིང་དང་རྩཝ་དག་རབ་བསྲེགས་ཀྱང ། །མེ་ནི་ངོམས་པར་མི་འགྱུར་རོ། །དེ་བཞིན་འདོད་པ་བསྟེན་བྱས་ན། །འདོད་པའི་ལོངས་སྤྱོད་ངོམས་
341a
༄#། །མི་མྱོང ། །མེ་ལོང་ཇི་ལྟར་གཟུགས་བརྙན་གྱིས། །ནམ་ཡང་ངོམས་པར་མི་འགྱུར་བ། །དེ་བཞིན་གཟུགས་རྣམས་བསྟེན་བྱས་ན། ། འདོད་པའི་ལོངས་སྤྱོད་ངོམས་མི་མྱོང ། །བྲག་ཅ་ཇི་ལྟར་སྒྲ་རྣམས་ཀྱིས། །ནམ་ཡང་ངོམས་པར་མི་འགྱུར་བ། །དེ་བཞིན་སྒྲ་རྣམས་བསྟེན་བྱས་ན། །འདོད་པའི་ལོངས་སྤྱོད་ངོམས་མི་མྱོང ། །ཇི་ལྟར་སྤོས་སྣོད་སྤོས་རྣམས་ཀྱིས། །ནམ་ཡང་ངོམས་པར་མི་འགྱུར་བ། །དེ་བཞིན་དྲི་རྣམས་བསྟེན་བྱས་ཀྱང ། །སྣ་ནི་དྲི་ཡིས་ངོམས་མི་མྱོང ། ། ཇི་ལྟར་གཟར་བུ་རོ་མཆོག་གིས། །ནམ་ཡང་ངོམས་པར་མི་འགྱུར་བ། །དེ་བཞིན་ལྕེ་ནི་རོ་མཆོག་གིས། །ནམ་ཡང་ངོམས་པར་མི་འགྱུར་རོ། །ཇི་ལྟར་ནམ་མཁའ་རླུང་རྣམས་ཀྱིས། །ནམ་ཡང་ངོམས་པར་མི་འགྱུར་བ། །དེ་བཞིན་ལུས་ནི་རེག་རྣམས་ཀྱིས། །ནམ་ཡང་ངོམས་པར་མི་འགྱུར་རོ། །དཔེར་ན་རྨི་ལམ་རྨིས་པ་ཡིས། །ཆུ་འཐུངས་ངོམས་པར་མི་འགྱུར་བ། །དེ་བཞིན་འདོད་ལ་ཆགས་པ་ཡི། །ཡིད་ཀྱང་ངོམས་པར་འགྱུར་བ་མེད། །སེམས་ཅན་འདོད་ལ་བརྟེན་པ་ནི། །ཕྱིར་ཞིང་སྲེད་པ་འཕེལ་འགྱུར་ཏེ། །ཡུལ་ལ་ཉེ་བར་བརྟེན་བྱས་ན། །འདོད་པ་ནམ་ཡང་ངོམས་པ་མེད། །སྐོམ་དང་མེ་འདྲའི་འདོད་པ་ལས། །སྡུག་བསྔལ་འབྱུང་བ་སུས་མཐོང་བ། །དེ་
341b
དག་སྲེད་པ་ཞིར་འགྱུར་ཏེ། །མེ་ལ་ཆུ་ནི་བླུགས་པ་བཞིན། །རྒྱལ་པོ་ཆེན་པོ། དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་སའི་ལྷ་ཞེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་དོགས་ཤིང་ཐེ་ཚོམ་ཟ་བའམ། ཡིད་གཉིས་སུ་གྱུར་ན། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། ང་ཉིད་དེའི་ཚེ་དེའི་དུས་ན་འཁོར་ལོས་བསྒྱུར་བའི་རྒྱལ་པོ་སའི་ལྷ་ཞེས་བྱ་བར་གྱུར་ཏོ། །དེ་ཙམ་དུ་ཆེ་ཞིང་དེ་ཙམ་དུ་ཡངས་པའི་དབང་ཕྱུག་ལ་དབང་བྱས་ཀྱང་དབང་ཕྱུག་གིས་མ་ངོམས་བཞིན་དུ་འཆི་བའི་དུས་བྱས་པར་གྱུར་ཏོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། དབང་པོ་རྣམས་ནི། མི་ངོམས་ཤིང་ངོམས་པར་མི་འགྱུར། ཡུལ་རྣམས་ནི། ངོམས་པར་མི་བྱེད་པ་སྟེ། དབང་པོ་རྣམས་ནི། མེ་ལོང་དང་འདྲ། ཡུལ་རྣམས་ནི། གཟུགས་བརྙན་དང་འདྲ། དབང་པོ་རྣམས་ནི། བྲག་ཅ་དང་འདྲ། ཡུལ་རྣམས་ནི། སྒྲ་བརྙན་དང་འདྲ། དབང་པོ་རྣམས་ནི། སྒྱུ་མ་དང་འདྲ། ཡུལ་རྣམས་ནི། རྨི་ལམ་དང་འདྲ་བ་ཡིན་གྱི། རྒྱལ་པོ་ཆེན་པོ། ཁྱེད་དེ་ལ་ཡིད་བཞག་ཅིང་གཞན་གྱི་དྲིང་མི་འཇོག་པར་གྱིས་ཤིག། །།བམ་པོ་བཅོ་ལྔ་པ་སྟེ། ཐ་མ།་རྒྱལ་པོ་ཆེན་པོ། གཞན་ཡང་སྔོན་བྱུང་བ་འདས་པའི་དུས་ན་རྒྱལ་པོ་ང་ལས་ནུ་ཞེས་བྱ་བ་རྫུ་འཕྲུལ་ཆེ་ཞིང་མཐུ་ཆེ་ལ་དབང་ཆེ་བར་གྲགས་པ། རྒྱལ་པོ་གསོ་སྦྱོང་འཕགས་
342a
༄#། །ཀྱི་སྤྱི་བོ་ནས་བྱུང་བ། སྔོན་དགེ་བའི་རྩ་བ་བསགས་པ། སངས་རྒྱས་དཔག་ཏུ་མེད་པ་མཐོང་བ། དགེ་བའི་རྩ་བ་ཡང་དག་པར་བསྒྲུབས་པ། སངས་རྒྱས་བྱེ་བ་ཁྲག་ཁྲིག་མང་པོ་ལ་ཆོས་དཀར་པོ་ཡོངས་སུ་བསྒྲུབས་པ་ཞིག་བྱུང་སྟེ། དེས་གླིང་ཆེན་པོ་བཞིར་དབང་ཕྱུག་ལ་དབང་བྱས་སོ། །དེ་འཛམ་བུ་གླིང་ན་གནས་པ་དེའི་ཚེ་འདོད་པའི་ཁམས་ཀྱི་སེམས་ཅན་མི་དང ། ལྷ་གང་ཇི་སྙེད་ཅིག་འདོད་པ་ལ་སྤྱོད་པར་གྱུར་པ་དེ་དག་གི་ནང་ན་རྒྱལ་པོ་ང་ལས་ནུ་དེ་འདི་ལྟར་འདོད་པ་ལ་ལོངས་སྤྱོད་པས་མཆོག་ཏུ་བརྗོད་དོ། །དེའི་ཚེ་འཛམ་བུའི་གླིང་ནི། འབྱོར་ཞིང་རྒྱས་ལ། བདེ་ཞིང་ལོ་ལེགས་པ་དང ། སྐྱེ་བོ་མང་པོ་དང་མིས་གང་བ་དང ། གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་ཡང་འདབ་ཉེ་བར་གྱུར་པ། གྲོང་རྣམས་ཀྱང་བྱ་གག་གི་འཕུར་སྟབས་ཀྱིས་སོན་པ་ཙམ་དུ་ཉེ་བར་གྱུར་ཏོ། །འདི་ལྟར་ཆོས་ཀྱིས་གནས་པར་གྱུར་པས་ས་ཆེན་པོ་འདི་ཡང་གསེག་མ་དང་གྱོ་མོ་མེད་ཅིང ། གསེར་དངུལ་མང་པོ་དང ། ཀུན་དགའ་ར་བ་དང ། སྐྱེད་མོས་ཚལ་དང ། རྫིང་བུ་དང ། མཚེའུ་དག་གིས་མཛེས་པར་བྱས་པར་གྱུར་ཏོ། །རྒྱལ་པོ་ང་ལས་ནུའི་རྒྱལ་པོའི་ཕོ་བྲང་འཁོར་ནི། གྲོང་ཁྱེར་མི་ཚུགས་པ་ཞེས་བྱ་
342b
བར་གྱུར་ཏེ། ཤར་ནུབ་ཏུ་ཆུར་ནི། དཔག་ཚད་བཅུ་གཉིས། ལྷོ་བྱང་གི་ཞེང་དུ་ནི། དཔག་ཚད་བདུན་ཡོད་པར་གྱུར་ཏོ། །དེ་ནི། བསྐལ་པ་དང་པོར་འབྱུང་བའི་འཁོར་ལོས་བསྒྱུར་བའི་རྒྱལ་པོ་རིགས་ཆེན་པོར་གྲགས་པར་སྐྱེས་པའི་རྒྱལ་པོ་རྣམས་ཀྱི་དང་པོའི་གྲོང་ཁྱེར་དུ་གྱུར་པ་སྟེ། འདི་ལྟ་སྟེ། དཔེར་ན། སུམ་ཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་ཆེན་པོ་བལྟ་ན་སྡུག་ཅེས་བྱ་བ་ནི། སྟེང་གི་ཕྱོགས་ནས་དྲིལ་བུ་གཡེར་ཀའི་དྲ་བ་བྲེས་པའི་བར་དུ་རྒྱ་ཆེ་སྟེ། དེ་བཞིན་དུ་རྒྱལ་པོ་ང་ལས་ནུའི་དཔྱིད་གནས་པ་ནི།་ཟླ་བ་འཆར་བ་ཞེས་བྱ་བའི་ཁང་བཟང་བཤམས་པར་གྱུར་ཏོ། །དབྱར་གནས་པ་ནི། བཻ་ཌཱུརྱའི་སྙིང་པོ་ཞེས་བྱ་བའི་ཁང་བཟང་བཤམས་པར་གྱུར་ཏེ། འདི་ལྟ་སྟེ། དཔེར་ན། ལྷའི་དབང་པོ་བརྒྱ་བྱིན་གྱི་རྣམ་པར་རྒྱལ་བའི་ཁང་བཟང་ལྟ་བུའོ། །རྒྱལ་པོ་ང་ལས་ནུའི་དགུན་གནས་པ་ནི། ཉི་མའི་འོད་ཟེར་ཡང་དག་འཕགས་ཞེས་བྱ་བའི་ཁང་བཟང་བཤམས་པར་གྱུར་ཏེ། འདི་ལྟ་སྟེ། དཔེར་ན། ལྷའི་དབང་པོ་བརྒྱ་བྱིན་གྱི་རྣམ་པར་རྒྱལ་བའི་ཁང་བཟང་ལྟ་བུའོ། །རྒྱལ་པོ་ང་ལས་ནུའི་ཁང་བཟང་ཟླ་བ་འཆར་བར་གནས་པའི་ཚེ་ནི། བཙུན་མོ་དང་བཅས་པར་འདི་ལྟ་སྟེ། དཔེར་ན། ཙནྡན་གྱིས་བསྐུས་པ་བཞིན་དུ་ལུས་བསིལ་བར་འགྱུར་རོ། །ཁང་བཟང་བཻ་ཌཱུརྱའི་སྙིང་པོར་
343a
༄#། །གནས་པའི་ཚེ་ནི། འདི་ལྟ་སྟེ། དཔེར་ན། ཏ་མ་ལའི་ལོ་མས་བསྐུས་པ་བཞིན་དུ་ལུས་དུས་དང་ལྡན་པར་བདེ་བར་འགྱུར་རོ། །ཁང་བཟང་ཉི་མའི་འོད་ཟེར་ཡང་དག་འཕགས་སུ་གནས་པའི་ཚེ་ནི། འདི་ལྟ་སྟེ། དཔེར་ན། ཨ་ག་རུས་བསྐུས་པ་བཞིན་དུ་ལུས་དྲོ་བར་གྱུར་ཏོ། །རྒྱལ་པོ་ཆེན་པོ། རྒྱལ་པོ་ང་ལས་ནུའི་བསམ་པའི་དབང་གིས་ཁང་བཟང་དེ་དག་ཀྱང་ཉམས་སུ་བདེ་བའི་རེག་པ་འབྱིན་པར་གྱུར་ཏོ། །བསམ་པའི་དབང་གིས་རླུང་ལྡང་བར་འགྱུར། ཆར་འབབ་པར་འགྱུར། རོལ་མོའི་སྒྲ་འབྱུང་བར་འགྱུར་རོ། །བསམ་པའི་དབང་གིས་སྐྱིད་པ་དང ། ལོངས་སྤྱོད་པ་དང ། ཡོངས་སུ་སྤྱོད་པའི་རྣམ་པ་འབྱུང་ངོ ། །རྒྱལ་པོ་ཆེན་པོ། དེ་ནས་རྒྱལ་པོ་ང་ལས་ནུ་འདི་སྙམ་དུ་སེམས་ཏེ། ཀྱེ་མ་བདག་གི་ཕོ་བྲང་དུ་ཞག་བདུན་དུ་དབྱིག་གི་ཆར་འབབ་པར་གྱུར་ཅིག་།སྙམ་པ་དང ། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུའི་ཕོ་བྲང་དུ་ཞག་བདུན་དུ་དབྱིག་གི་ཆར་བབ་པར་གྱུར་ཏོ། །རྒྱལ་པོ་ཆེན་པོ། དེ་ནས་རྒྱལ་པོ་ང་ལས་ནུས་ཞག་བདུན་པོ་དེ་འདས་ནས་དབྱིག་གི་ཆར་བབ་པ་དེ་ལ་འདི་སྙམ་དུ་སེམས་ཏེ། ཇི་ཙམ་དུ་ཡོངས་སུ་དག་པའི་ལས་ཀྱི་རྣམ་པར་སྨིན་པས་བསམ་པ་ཡིད་བཞིན་དུ་ཡོངས་སུ་རྫོགས་པ་དམིགས་ཤིང་བསོད་
343b
ནམས་དག་ཀྱང་མི་སླུ་བ་འདི་ནི། ངོ་མཚར་རྨད་དུ་བྱུང་ངོ ། །སྙམ་ནས་དེ་ཡང་འདི་སྙམ་དུ་སེམས་ཏེ། བདག་གི་གླིང་ཆེན་པོ་འཛམ་བུའི་གླིང་འབྱོར་ཅིང་རྒྱས་ལ་བདེ་ཞིང་ལོ་ལེགས་པ་དང ། སྐྱེ་བོ་མང་པོ་དང་མིས་གང་བ་ལ་ཡང་དབང་བྱས། བདག་གི་ཁྱིམ་དུ་ནི། ཞག་བདུན་དུ་དབྱིག་གི་ཆར་བབ་ན། ད་ནི། བདག་ནུབ་ཀྱི་བ་གླང་སྤྱོད་ཀྱི་གླིང་དུ་འགྲོའོ། །སྙམ་པ་དང ། སེམས་བསྐྱེད་མ་ཐག་ཏུ་རྒྱལ་པོ་ཆེན་པོ། རྒྱལ་པོ་ང་ལས་ནུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ཏེ།་འཛམ་བུའི་གླིང་ནས་ནུབ་ཀྱི་བ་ལང་སྤྱོད་ཀྱི་གླིང་དུ་ཕྱིན་ནས་དེས་དེར་ལོ་བརྒྱ་སྟོང་ཕྲག་མང་པོར་མིའི་ལས་འདས་ཤིང་ལྷ་རྫས་སུ་མ་གྱུར་པའི་ལོངས་སྤྱོད་དང་ལྡན་པར་རྒྱལ་པོ་བྱས་སོ། །དེ་ནུབ་ཀྱི་བ་ལང་སྤྱོད་ཀྱི་གླིང་ཆེན་པོ་དེ་ན་གནས་པའི་ཚེ་ཡང་སེམས་བསྐྱེད་མ་ཐག་ཏུ་འཛམ་བུའི་གླིང་དུ་བབ་པ་བཞིན་དུ་ཞག་བདུན་གྱི་བར་དུ་དབྱིག་གི་ཆར་བབ་པར་གྱུར་ཏོ། །རྒྱལ་པོ་ཆེན་པོ། དེ་ནས་རྒྱལ་པོ་ང་ལས་ནུ་དེ་འདི་སྙམ་དུ་སེམས་ཏེ། བདག་གིས་འཛམ་བུའི་གླིང་འབྱོར་ཞིང་རྒྱས་པ་ནས་སྐྱེ་བོ་མང་པོ་དང་མིས་གང་བའི་བར་ལ་ནི། དབང་བྱས། བདག་གི་ཁྱིམ་དུ་ཞག་བདུན་དུ་ནི། དབྱིག་གི་ཆར་ནི། བབ། བདག་གིས་ནུབ་ཀྱི་བ་ལང་སྤྱོད་ཀྱི་གླིང་ཆེན་པོ་ལ་ཡང་དབང་བྱས་ཏེ། བདག་
344a
༄#། །ཁྱིམ་འདིར་ཡང་ཞག་བདུན་དུ་དབྱིག་གི་ཆར་བབ་ན། ཤར་གྱི་ལུས་འཕགས་ཞེས་བྱ་བའི་གླིང་ཆེན་པོ་ཡོད་ཀྱི། བདག་ནི། གླིང་ཆེན་པོ་ཤར་གྱི་ལུས་འཕགས་པོ་གང་ན་བ་དེར་འགྲོའོ། །སྙམ་པ་དང ། སེམས་བསྐྱེད་མ་ཐག་ཏུ་རྒྱལ་པོ་ཆེན་པོ་ང་ལས་ནུ་དེ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ཤར་གྱི་ལུས་འཕགས་པོའི་གླིང་ཆེན་པོར་ཕྱིན་པར་གྱུར་ཏེ། །དེས་དེར་ཡང་ལོ་བརྒྱ་སྟོང་ཕྲག་མང་པོར་མིའི་ལས་འདས་ཤིང་ལྷ་རྫས་སུ་མ་གྱུར་པའི་ལོངས་སྤྱོད་དང་ལྡན་པར་རྒྱལ་པོ་བྱས་སོ། །རྒྱལ་པོ་ཆེན་པོ། དེ་ནས་རྒྱལ་པོ་ང་ལས་ནུས་དེར་ཡང་འདི་སྙམ་དུ་སེམས་ཏེ། བདག་གི་འཛམ་བུའི་གླིང་དང ། ནུབ་ཀྱི་བ་ལང་སྤྱོད་དང ། ཤར་གྱི་ལུས་འཕགས་པོ་ལ་ནི། དབང་བྱས་ན། ད་ནི། བདག་བྱང་གི་སྒྲ་མི་སྙན་གྱི་གླིང་ཆེན་པོར་འགྲོའོ། །དེའི་མི་རྣམས་ནི།་ང་ཡིར་བྱ་བ་མེད་ཅིང་ཡོངས་སུ་འཛིན་པ་མེད་མོད་ཀྱི། འོན་ཀྱང་དེར་སོང་སྟེ། རང་གི་དཔུང་གི་ཚོགས་ལ་རྗེས་སུ་བསྟན་པར་བྱའོ། །སྙམ་པ་དང ། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དེས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ཤར་གྱི་ལུས་འཕགས་པོའི་གླིང་
344b
ཆེན་པོ་ནས་བྱང་གི་སྒྲ་མི་སྙན་གྱི་གླིང་ཆེན་པོར་ཕྱིན་པར་གྱུར་ཏེ། དེས་དེར་ཡང་མི་རྣམས་ང་ཡིར་བྱ་བ་མེད་ཅིང་ཡོངས་སུ་འཛིན་པ་མེད་པའི་ནང་དུ་ལོ་བརྒྱ་སྟོང་ཕྲག་དུ་མར་བདག་གི་དཔུང་གི་ཚོགས་རྣམས་ལ་རྗེས་སུ་བསྟན་ཏོ། །རྒྱལ་པོ་ཆེན་པོ། དེ་ནས་ལོ་བརྒྱ་སྟོང་ཕྲག་མང་པོ་འདས་པ་ཞིག་ན་རྒྱལ་པོ་ང་ལས་ནུ་དེ་འདི་སྙམ་དུ་སེམས་ཏེ། བདག་གིས་འཛམ་བུའི་གླིང་ལ་ནི། དབང་བྱས་ཏེ་ཞག་བདུན་དུ་ནི། ཁྱིམ་དུ་དབྱིག་གི་ཆར་བབ། བདག་གིས་ནུབ་ཀྱི་བ་ལང་སྤྱོད་ཀྱི་གླིང་ཆེན་པོ་ལ་ནི། དབང་བྱས། བདག་གིས་ཤར་གྱི་ལུས་འཕགས་ཀྱི་གླིང་ཆེན་པོ་ལ་ཡང་དབང་བྱས། བདག་གིས་བྱང་གི་སྒྲ་མི་སྙན་གྱི་གླིང་ཆེན་པོ་ལ་ཡང་དབང་བྱས་ན། ད་ནི། སུམ་ཅུ་རྩ་གསུམ་པ་ཞེས་བྱ་བའི་ལྷ་རི་རབ་ཀྱི་རྩེ་མོ་ལ་གནས་པ་ཡོད་པ་ཞིག་ཡོད་ཅེས་གྲག་གི་།སུམ་ཅུ་རྩ་གསུམ་གྱི་གནས་སུ་འགྲོའོ། །སྙམ་དུ་སེམས་སོ། །རྒྱལ་པོ་ཆེན་པོ། དེ་ནས་རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་རི་རབ་ཀྱི་རྩེ་མོ་ལ་ཕྱིན་པར་གྱུར་ཏོ། །དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཆོས་བཟང་ལྷའི་མདུན་ས་ཞེས་བྱ་བ་ན་འདུས་ཤིང་འཁོད་འཁོད་པ་ལས། ལྷའི་དབང་པོ་བརྒྱ་བྱིན་གྱིས་རྒྱལ་པོ་ང་ལས་ནུ་རྒྱང་རིང་པོ་ནས་འོང་བ་
345a
༄#། །མཐོང་སྟེ། མཐོང་ནས་བསྟན་གྱི་ཕྱེད་ལ་བདར་ཏེ་རྒྱལ་པོ་ཆེན་པོ་ཚུར་སྤྱོན། རྒྱལ་པོ་ཆེན་པོ་བྱོན་པ་ལེགས་སོ། །གང་གི་དུས་ལ་དབབ་པར་ཤེས་ན། སྟན་གྱི་ཕྱེད་ལ་བཞུགས་ཤིག་ཅེས་སྨྲས་པ་དང ། རྒྱལ་པོ་ང་ལས་ནུ་ལྷའི་དབང་པོ་བརྒྱ་བྱིན་གྱི་སྟན་གྱི་ཕྱེད་ལ་འདུག་གོ་།རྒྱལ་པོ་ང་ལས་ནུ་བརྒྱ་བྱིན་གྱི་སྟན་གྱི་ཕྱེད་ལ་འདུག་མ་ཐག་ཏུ་སུམ་ཅུ་རྩ་གསུམ་པའི་ལྷ་ཐམས་ཅད་ལྷའི་གནས་བཅུས་ཟིལ་གྱིས་མནན་ཏོ། །བཅུ་གང་ཞེ་ན། ལྷའི་ཚེ་དང ། ལྷའི་གྲངས་དང ། ལྷའི་ཁ་དོག་དང ། ལྷའི་བདེ་བ་དང ། ལྷའི་དབང་ཕྱུག་ལ་དབང་བ་དང ། ལྷའི་གཟུགས་དང ། ལྷའི་སྒྲ་དང ། ལྷའི་དྲི་དང ། ལྷའི་རོ་དང ། ལྷའི་རིག་དང་རྣམ་པ་བཅུ་སྟེ། དེ་དག་གིས་ལྷའི་དབང་པོ་བརྒྱ་བྱིན་མ་གཏོགས་པ་ཐམས་ཅད་ཟིལ་གྱིས་མནན་ཏོ། །དེ་ཅིའི་ཕྱིར་ཞེ་ན། མིག་འཛུམ་པ་དང ། མིག་མི་འཛུམ་པ་ཙམ་ལས་ལྷ་རྣམས་ཀྱིས་འདི་ནི། རྒྱལ་པོ་ང་ལས་ནུའོ། །འདི་ནི། ལྷའི་དབང་པོ་བརྒྱ་བྱིན་ནིའོ། །ཞེས་བྱ་བར་ཤེས་པ་མ་གཏོགས་པར་རྒྱལ་པོ་ང་ལས་ནུ་དེ་དང ། ལྷའི་དབང་པོ་བརྒྱ་བྱིན་གཉིས་ཀྱང་གཟུགས་མཉམ་པར་གྱུར། སྤྱོད་པ་མཉམ་པར་གྱུར། ལོངས་སྤྱོད་མཉམ་པར་གྱུར་ཏེ། རྒྱལ་པོ་ཆེན་པོ། མིར་གྱུར་པ་དང །
345b
ལྷར་གྱུར་པ་གཉིས་ལུས་མཉམ་པར་གྱུར་པ་དེ་ནི། ངོ་མཚར་ཆེའོ། །རྒྱལ་པོ་ཆེན་པོ་ང་ལས་ནུས་དེར་ལོ་བརྒྱ་སྟོང་ཕྲག་མང་པོར་སུམ་ཅུ་རྩ་གསུམ་པའི་ལྷའི་ནང་དུ་རྒྱལ་སྲིད་ཀྱི་དབང་ཕྱུག་ཕྱེད་ལ་དབང་བྱས་སོ། །རྒྱལ་པོ་ཆེན་པོ། དེ་ནས་རྒྱལ་པོ་ང་ལས་ནུས་གླིང་ཆེན་པོ་བཞིའི་དབང་ཕྱུག་ལ་དབང་བྱས། སུམ་ཅུ་རྩ་གསུམ་པའི་ལྷའི་རྒྱལ་སྲིད་ཕྱེད་ལ་དབང་བྱས་ཀྱང་དབང་ཕྱུག་གིས་མ་ངོམས་ནས་འདི་སྙམ་དུ་སེམས་བསྐྱེད་དེ། ཀྱེ་མ་བདག་གིས་སུམ་ཅུ་རྩ་གསུམ་པའི་ལྷའི་རྒྱལ་སྲིད་ཀྱི་དབང་ཕྱུག་ཐམས་ཅད་ལ་དབང་བྱའོ། །སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་སུམ་ཅུ་རྩ་གསུམ་པའི་གནས་ནས་ཉམས་ཏེ། འཛམ་བུའི་གླིང་དུ་རྒྱལ་པོ་ཆེན་པོའི་སྐྱེད་མོས་ཚལ་མཆོག་ཏུ་ཕྱིན་པར་གྱུར་ཏོ། །དེ་འཛམ་བུའི་གླིང་དུ་གནས་པར་གྱུར་པའི་ཚེ་ཕྱོགས་ཐམས་ཅད་ཀྱང་སྣང་བར་འགྱུར་ཏེ། ཉི་མའི་འོད་ཀྱང་ཟིལ་གྱིས་མནན་ནས་འདི་ལྟ་སྟེ། དཔེར་ན། ཟླ་བའི་འོད་ཉི་མས་ཟིལ་གྱིས་མནན་པ་ལྟ་བུའོ། །ཉི་མ་ནམ་མཁའ་ལ་འདུག་པ་ཡང་ལྷ་མ་མེ་མ་ཡིན་ཏེ། འདི་ལྟ་སྟེ། དཔེར་ན། ཟླ་བའི་དཀྱིལ་འཁོར་སྟེང་གི་བར་སྣང་ལ་འདུག་པ་ཉི་མས་ཟིལ་གྱིས་ནོན་ན་མི་སྣང་བ་བཞིན་ནོ། །དེ་ནས་གྲོང་ཁྱེར་མི་ཚུགས་པའི་ཕོ་བྲང་དམ་པ་ན་མི་འཁོད་
346a
༄#། །པ་རྣམས་ཀྱིས་རྒྱལ་པོ་དེ་སྐྱེད་མོས་ཚལ་དེར་ཕྱིན་པ་མཐོང་བར་གྱུར་ཏོ། །མཐོང་ནས་ཀྱང་ངོ་མཚར་དུ་གྱུར་ཏེ་དེ་དག་གྲོང་དུ་དོང་ནས་ཀྱེ་གྲོགས་པོ་དག་།འདི་ལྟར་ལྷའི་བུ་ཞིག་བར་སྣང་ནས་བབས་ཏེ། རྒྱལ་པོའི་སྐྱེད་མོས་ཚལ་འདིར་ཕྱིན་ཏོ། །ཞེས་ཚིག་ཏུ་བརྗོད་ཅིང་སྒྲ་བསྒྲགས་སོ། །རྒྱལ་པོ་ཆེན་པོ། དེ་ནས་ཡུལ་འཁོར་གྱི་མི་དང་རྒྱལ་པོར་བཅས་པས་དེ་སྐད་ཐོས་ནས་མྱུར་བ་མྱུར་བར་རིངས་པའི་གཟུགས་སུ་གླུ་དང ། རོལ་མོ་དང ། མེ་ཏོག་དང ། སྤོས་དང ། ཕྲེང་བ་དང ། བདུག་སྤོས་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་དང ། བླ་རེ་དག་ཐོགས་ནས་གཙང་སྦྲའི་སྤྱོད་པས་གྲོང་ཁྱེར་དེ་ནས་བྱུང་སྟེ་སྐྱེད་མོས་ཚལ་ག་ལ་བ་དེར་དོང་ངོ ། །རྒྱལ་པོ་ཆེན་པོ། རྒྱལ་པོ་ང་ལས་ནུ་དེ་སྐྱེད་མོས་ཚལ་དེར་འདུག་མ་ཐག་ཏུ་ས་ཆེན་པོ་འདི་ཡང་རྣམ་པར་དྲུག་ཏུ་གཡོས་པར་གྱུར་ཏོ། །རྒྱལ་པོ་ཆེན་པོ། དེ་ནས་ཡུལ་འཁོར་གྱི་མི་དང་རྒྱལ་པོར་བཅས་པས་མིའི་དྲི་ཁྱད་པར་དུ་འཕགས་པས་རྒྱལ་པོ་ང་ལས་ནུའི་དྲུང་དུ་དོང་བ་དང ། རྒྱལ་པོ་ང་ལས་ནུ་ལྷའི་ལོངས་སྤྱོད་ལ་གོམས་པས་མིའི་ལོངས་སྤྱོད་མི་བཟོད་པར་གྱུར་ནས་ས་ལ་བྱིང་ཞིང་མི་གནས་པར་གྱུར་ཏེ། འདི་ལྟ་སྟེ། དཔེར་ན། མར་གྱི་གོང་བུའམ་མར་
346b
གསར་གྱི་གོང་བུ་བྱེ་མ་ཚ་བ་ལ་བཞག་ན་ཞུ་ཞིང་མི་གནས་པ་དེ་བཞིན་དུ་ཡུལ་འཁོར་གྱི་མི་དང་རྒྱལ་པོ་བཅས་པས་དེ་བྱིན་བར་མཐོང་ནས་ཁྱོད་སུ་ཞིག་ལགས་ཞེས་དྲིས་སོ། །དེ་ནས་རྒྱལ་པོ་ང་ལས་ནུས་རྒྱལ་པོ་དང་ཡུལ་འཁོར་གྱི་མིར་བཅས་པ་དེ་དག་ལ་འདི་སྐད་ཅེས་སྨྲས་སོ། །ཁྱེད་ཀྱི་རྒྱལ་པོ་ང་ལས་ནུ་ཞེས་བྱ་བ་ཞིག་བྱུང་བ་དེ་ཐོས་སམ། དེ་དག་གིས་སྨྲས་པ། བདག་ཅག་གིས་རྒན་རབས་དག་ལས་རྒྱལ་པོ་ང་ལས་ནུ་ཞེས་བགྱི་བ་ཞིག་ལུས་དེ་ཉིད་ཀྱིས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་མཐོ་རིས་སུ་བཞུད་དོ། །ཞེས་ཐོས་སོ། །རྒྱལ་པོ་ང་ལས་ནུས་དེ་དག་ལ་སྨྲས་པ། གྲོགས་པོ་དག་།རྒྱལ་པོ་ང་ལས་ནུ་ཞེས་བྱ་བ་དེ་ནི། ཁོ་བོ་ཡིན་ཏེ། མཐོ་རིས་ནས་ཉམས་ནས་ལྷུང་བར་གྱུར་ཏོ། །ཞེས་སྨྲས་ནས་རྒྱལ་པོ་དང་ཡུལ་འཁོར་གྱི་མིར་བཅས་པ་དེ་དག་གིས་གླུའི་དབྱངས་ཀྱིས་ཚིགས་སུ་བཅད་པས་དེ་ལ་འདི་སྐད་ཅེས་སྨྲས་སོ། །བདག་ཅག་རྣམས་ཀྱིས་རྒན་རབས་ལས། །མི་ཡི་བདག་པོ་རྫུ་འཕྲུལ་ཆེ། །མྱ་ངན་བྲལ་ཞིང་གྲགས་ཆེན་ལྡན། །ང་ལས་ནུ་ཞེས་བྱ་བ་བྱུང ། །དེ་ནི་ཁྱོད་དཔུང་བཞོན་པར་བཅས། །གཡོག་བཅས་མཐོ་རིས་འཇིག་རྟེན་བཞུད། །མི་དབང་གཙོ་བོ་ལྷ་གནས་བཞུགས། །ཆོས་ཀྱིས་ས་ཡང་སྐྱོང་ཞེས་ཐོས། །དེས་སྨྲས་མི་ཡི་དབང་པོ་དེ། །མི་རྟག་
347a
༄#། །ཉན་ཏེ་ཕོངས་པར་གྱུར། །བདེ་བ་སྟོར་ཏེ་སྡུག་བསྔལ་ཐོབ། །རྒྱལ་པོ་དེ་ནི་ཁོ་བོ་ཡིན། །དེས་སྨྲས་སྐྱེ་བོ་ཐམས་ཅད་ཀྱིས། །ཐལ་མོ་སྦྱར་ཏེ་རྐང་པར་གཏུགས། །རྒྱལ་པོ་བདག་ཅག་ཅི་བརྗོད་པ། །ཡ་མཚན་ངོ་མཚར་བཀའ་སྩལ་གསོལ། །དེས་སྨྲས་རྒྱལ་པོ་ལྷ་ལས་ཉམས། །སྡུག་བསྔལ་རྙེད་པའི་ངོ་མཚར་ཉོན། །ཡུན་རིང་བདེ་བ་འདོད་པ་ཡི། །མིས་ནི་རྟག་ཏུ་བག་ཡོད་བྱ། །ང་ལས་ནུ་བ་རྒྱལ་པོ་མཆོག་།རྒྱལ་པོས་གླིང་བཞི་རབ་བསྟེན་ནས། །འདོད་པའི་ལོངས་སྤྱོད་མཆོག་ལྡན་ཏེ། །འདོད་པས་མ་ངོམས་དེ་འདས་སོ། །དེ་ཡི་ཁྱིམ་དུ་ཞག་བདུན་དུ། །དབྱིག་གི་དྲ་བའི་ཆར་པ་བབ། །གླིང་བཞི་པ་ལ་རབ་བསྟན་ནས། །འདོད་པས་མ་ངོམས་དེ་བྱིང་ངོ ། །ལྷ་ཡི་དབང་པོ་བརྒྱ་བྱིན་གྱི། །སྟན་ཕྱེད་ལ་ནི་རྒྱལ་པོ་འདུག་།ཀུན་ཏུ་རྟོག་པའི་རྟོག་པས་བརླགས། །བདག་འདོད་ང་རྒྱལ་བཅོམ་ནས་རྒུད། །མི་མཁས་འཁོར་བའི་རྒྱ་མཚོ་འདིར། །འགྲོ་བ་དག་ཏུ་ཡང་ནུབ་སྟེ། །འདོད་པ་རབ་ཏུ་བསྟེན་བྱས་ན། །རྒྱལ་བས་བསྔགས་པས་ངོམས་མི་རྙེད། །རྨི་ལམ་རྨིས་པའི་ཆུ་ལྟ་བུ། །མཐུངས་ཀྱང་ངོམས་པར་མི་འགྱུར་བ། །དེ་ལྟར་འདོད་པའི་ལོངས་སྤྱོད་རྣམས། །བསྟེན་ན་ངོམས་པར་མི་འགྱུར་རོ། །བློ་གྲོས་ལྡན་པ་གང་དག་གིས། །ཤེས་པས་
347b
ནུས་པ་རྣམས་བསལ་ཏེ། །ངོམས་པར་བྱ་ཕྱིར་བཅོམ་ལྡན་གྱི། །འཕགས་པའི་ཤེས་རབ་ཡང་དག་རྟོག་།སྲིད་པ་རྣམ་གཞིག་བློ་གྲོས་ཅན། །རྒ་དང་ཤི་དང་སྐྱེ་ལ་རྟོག་།སྲེད་པ་རབ་ཏུ་སྤངས་ནས་སུ། །སྲིད་པ་སྤངས་ཏེ་ལེན་མི་བྱེད། །ཚོར་བའི་རྣམ་པ་མེ་འདྲར་རིག་།རེག་པའང་མེ་འདྲར་རིག་ནས་ནི། །ཚོར་བ་འཕགས་པ་མ་ཡིན་དང ། །རེག་པ་དེ་ལ་སྲེད་མི་བྱེད། །རོལ་མོ་སིལ་སྙན་བརྡུང་བ་ལྟར། །ཡུལ་དང་དབང་པོ་མི་བྱེད་དོ། །རྒྱལ་བསྟན་བྱེད་པ་དབང་པོ་རྟོགས། །རང་བཞིན་མཐོང་ལ་དབང་པོ་འདོར། །སྐྱེ་མཆེད་དྲུག་པོ་ཡོད་མིན་ཡང ། །གཟུགས་དང་འབྲེལ་བར་ཡིད་བསྐྱེད་དོ། །རྣམ་པར་ཤེས་པས་བརྟགས་པའི་ཕྱིར། །ཚོར་བ་ཀུན་ཏུ་རྟོག་ཅེས་བརྗོད། །དེ་ལྟར་རིག་ནས་འཕགས་པ་རྣམས། །སྲིད་པའི་རྒྱུ་ལ་ཡིད་མི་རྟོན། །ཤེས་རབ་འཕགས་པས་ངོམས་གྱུར་ཏེ། །ཤིང་མེད་མེ་བཞིན་ཞི་བར་འགྱུར། །སྲིད་པ་མི་རྟག་བསྟན་བྱས་ཏེ། །རྒྱལ་པོ་ཡུལ་འཁོར་མིར་བཅས་ལ། །ང་ནུས་དེ་སྐད་ལུང་བསྟན་ནས། །མི་ཡི་བདག་པོ་ནུབ་པར་གྱུར། །རྒྱལ་པོ་ཆེན་པོ། དེའི་ཚེ་དེའི་དུས་ན་རྒྱལ་པོ་ང་ལས་ནུ་ཞེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་དོགས་ཤིང་ཐེ་ཚོམ་ཟའམ། ནེམ་ནུར་དུ་གྱུར་ན། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། ང་ཉིད་དེ་ཚེ་དེའི་དུས་ན་
348a
༄#། །འཁོར་ལོས་བསྒྱུར་བའི་རྒྱལ་པོ་ང་ལས་ནུ་ཞེས་བྱ་བར་གྱུར་ཏེ། རྒྱལ་སྲིད་ཀྱི་དབང་ཕྱུག་ཆེན་པོ་ལ་དབང་བྱས་ཀྱང་འདོད་པས་མ་ངོམས་བཞིན་དུ་འཆི་བའི་དུས་བྱས་པར་གྱུར་པ་ཡིན་ནོ། །རྒྱལ་པོ་ཆེན་པོ། དེ་ལྟ་བས་ན། དེ་ལྟར་རིག་པར་བྱས་ལ་དབང་ཕྱུག་གི་དྲེགས་པ་སྤངས་ཏེ་བག་ཡོད་པར་བྱའོ།། བག་ཡོད་པ་ལ་གནས་ཏེ་ཁྱོད་ཀྱི་དགེ་བའི་རྩ་བ་རྣམས་ཡང་དག་པར་བསྒྲུབ་པར་བྱའོ། །རྒྱལ་པོ་ཆེན་པོ། བག་ཡོད་པ་ལ་མངོན་པར་དགའ་བ་ནི། དོན་གྲུབ་པར་འགྱུར་གྱི། རྒྱལ་པོ་ཆེན་པོ། བག་ཡོད་པར་ཁམས་མཉམ་པ་ཉིད་ཡང་དག་པར་བསྒྲུབ་པར་བྱ་སྟེ། རྒྱལ་པོ་ཆེན་པོ། འདུས་བྱས་ཀྱི་ཁམས་དང་འདུས་མ་བྱས་ཀྱི་ཁམས་ནི། བུད་མེད་མ་ཡིན། སྐྱེས་པ་མ་ཡིན། འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་གྱི། རྒྱལ་པོ་ཆེན་པོ། འདི་ལ་ཁྱོད་ཀྱིས་སེམས་ངེས་པར་བཞག་ཅིང་གཞན་གྱི་དྲིང་མི་འཇོག་པར་བྱའོ། །རྒྱལ་པོ་ཆེན་པོ། སྔོན་བྱུང་བ་འདས་པའི་དུས་ན་རྒྱལ་པོ་མུ་ཁྱུད་ཅེས་བྱ་བ་ཆོས་དང་ལྡན་པ་ཆོས་ཀྱི་རྒྱལ་པོ་བག་ཡོད་པ་ལྷུར་ལེན་པ་ཞིག་བྱུང་སྟེ། དེ་བྱ་བ་གང་དང་གང་རྩོམ་ཡང་དེ་དང་དེ་ཐམས་ཅད་ལ་བག་ཡོད་པར་སྤྱོད་ཅིང་བྱེད་དོ། །རྒྱལ་པོ་ཆེན་པོ། རྒྱལ་
348b
པོ་མུ་ཁྱུད་དེ་ཆོས་འདི་དག་ཐམས་ཅད་ནི། དུས་གསུམ་མཉམ་པ་ཉིད་ཀྱིས་མཉམ་པ་སྟེ། འདས་པའི་དུས་ན་ཡང་ཆོས་ཐམས་ཅད་རང་བཞིན་དང་བྲལ་བའོ། །མ་འོངས་པ་དང་ད་ལྟར་བྱུང་བའི་དུས་ན་ཡང་ཆོས་ཐམས་ཅད་རང་བཞིན་དང་བྲལ་བའོ། །ཞེས་དུས་གསུམ་མ་མཉམ་པ་ཉིད་ལ་བརྩོན་པར་གྱུར་ཏོ། །དེས་ཆོས་ཐམས་ཅད་དུས་གསུམ་མཉམ་པ་ཉིད་དུ་མཐོང་བས་ཆོས་ཐམས་ཅད་ལ་མངོན་པར་ཞེན་པ་མེད་པར་གྱུར་ཏོ། །དེས་སེམས་ཅན་ཕྱིན་ཅི་ལོག་བཞིས་སེམས་ཕྱིན་ཅི་ལོག་ཏུ་གྱུར་ཅིང་མི་སྡུག་པ་ལ་སྡུག་པར་འདུ་ཤེས་པ་དང ། སྡུག་བསྔལ་བ་ལ་བདེ་བར་འདུ་ཤེས་པ་དང ། མི་རྟག་པ་ལ་རྟག་པར་འདུ་ཤེས་པ་དང ། བདག་མེད་པ་ལ་བདག་ཏུ་འདུ་ཤེས་པ་དག་མཐོང་ནས་དེ་འདི་སྙམ་དུ་སེམས་ཏེ། འདི་ལྟར་སེམས་ཅན་འདི་དག་ནི། ཆོས་ཐམས་ཅད་སྟོང་པར་མ་མཐོང་བས་ཀྱེ་མ་ཀྱི་ཧུད་འཇིག་རྟེན་གནས་པ་འདི་ནི། ཕུང་ངོ ། ། ཀྱེ་མ་འཇིག་རྟེན་ན་གནས་པ་འདི་ནི། རྣམ་པར་ཕུང་ངོ ། །སྙམ་ནས་དེ་འདི་སྙམ་དུ་སེམས་ཏེ། བདག་གིས་སེམས་ཅན་འདི་དག་བསྡུ་བའི་དངོས་པོ་བཞིས་བསྡུ་བར་བྱའོ།། བདག་གིས་དེ་དག་བསྡུ་བའི་དངོས་པོ་བཞིས་བསྡུས་ན། ཆོས་ལ་སྦྱར་བ་ལ་དབང་དུ་འགྱུར་རོ། །སྙམ་མོ། །རྒྱལ་པོ་ཆེན་པོ། དེ་ནས་རྒྱལ་པོ་མུ་ཁྱུད་ཀྱིས་ཐབས་མཁས་
349a
༄#། །པ་སྔོན་དུ་བཏང་སྟེ། སེམས་ཅན་རྣམས་བསྡུ་བའི་དངོས་པོ་བཞིས་བསྡུས་ནས་དུས་གསུམ་མཉམ་པ་ཉིད་དུ་གདམས་ངག་གིས་བསྟན་ཏེ། ཀྱེ་སེམས་ཅན་དག་།ཆོས་ཐམས་ཅད་ནི། རང་བཞིན་གྱིས་སྟོང་པ་སྟེ། ཀྱེ་སེམས་ཅན་དག། ཆོས་གང་ལ་རང་བཞིན་མེད་པ་དེ་ནི། འདས་པ་ཡང་མ་ཡིན།་མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། རང་བཞིན་མེད་པའི་ཕྱིར་ཏེ། འདས་པ་ཞེས་གདགས་པར་བྱ་བ་མ་ཡིན། མ་འོངས་པ་དང་ད་ལྟར་བྱུང་བ་ཞེས་གདགས་པར་བྱ་བ་མ་ཡིན་ནོ། །རྒྱལ་པོ་ཆེན་པོ། དེ་ནས་སེམས་ཅན་དེ་དག་རྒྱལ་པོ་མུ་ཁྱུད་དེས་དེ་ལྟར་དུས་གསུམ་མཉམ་པ་ཉིད་ལ་བསྐུལ་བས་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཆོས་བཟང་ལྷའི་མདུན་ས་ན་འདུས་ཤིང་འཁོད་འཁོད་པའི་ནང་དུ་བར་སྐབས་སུ་འདི་ལྟར་བུའི་གཏམ་བརྗོད་པ་བྱུང་སྟེ། འདི་ལྟར་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ལ་ཐབས་མཁས་པས་ཕྱིན་ཅི་ལོག་མེད་པར་ཡང་དག་པར་སྟོན་པ། ཆོས་ཅན། ཆོས་ཀྱི་རྒྱལ་པོ་ཐབས་མཁས་པ་དང་ལྡན་པ་མུ་ཁྱུད་འདི་སུ་ཞིག་
349b
གི་རྒྱལ་པོ་ཡིན་པའི་མི་རྣམས་ནི། ཀྱེ་མའོ། །རྙེད་པ་དང་ལྡན་པ་སྟེ། ཀྱེ་མ་མི་རྣམས་ཀྱིས་ནི། རྙེད་པ་ལེགས་པར་རྙེད་པའོ། །ཞེས་ཟེར་བར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་གྱིས་ཆོས་བཟང་ལྷའི་མདུན་ས་ག་ལ་བ་དེར་སོང་སྟེ་ཕྱིན་ནས་རང་གི་སྟན་ལ་འདུག་སྟེ། སུམ་ཅུ་རྩ་གསུམ་པའི་ལྷ་རྣམས་ལ་སྨྲས་པ། ཁྱེད་ད་ལྟར་འདི་ན་འཁོད་པ་རྣམས་གཏམ་ཅི་ཞིག་བྱེད་བྱེད། དེ་སྐད་ཅེས་སྨྲས་པ་དང ། སུམ་ཅུ་རྩ་གསུམ་པའི་ལྷ་རྣམས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ལྷའི་དབང་པོ་བརྒྱ་བྱིན། བདག་ཅག་ཆོས་བཟང་ལྷའི་མདུན་ས་འདི་ན་མཆིས་པའི་ཚེ་བར་སྐབས་སུ་འདི་ལྟ་བུའི་གཏམ་བརྗོད་པ་བྱུང་སྟེ། འདི་ལྟར་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ལ་ཐབས་མཁས་པས་གང་འདི་ཆོས་ཐམས་ཅད་རང་བཞིན་མེད་པའོ། །ཞེས་ཕྱིན་ཅི་མ་ལོག་པར་སྟོན་པ། ཆོས་ཅན། ཆོས་ཀྱི་རྒྱལ་པོ་ཐབས་ལ་མཁས་པ་དང་ལྡན་པ་མུ་ཁྱུད་འདི་སུ་དག་གི་རྒྱལ་པོ་ཡིན་པའི་མི་རྣམས་ནི། ཀྱེ་མའོ། །རྙེད་པ་དང་ལྡན་པ་སྟེ། ཀྱེ་མའོ། །མི་རྣམས་ནི། རྙེད་པ་ལེགས་པར་རྙེད་པའོ། །ཞེས་བགྱིས་སོ། དེ་སྐད་ཅེས་སྨྲས་པ་དང ། ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་དེ་དག་ལ་འདི་སྐད་ཅེས་སྨྲས་སོ། །ཀྱེ་གྲོགས་པོ་དག་།རྒྱལ་པོ་མུ་ཁྱུད་ཅེས་བྱ་བ་ནི། ཐབས་
350a
༄#། །མཁས་པ་བསམ་གྱིས་མི་ཁྱབ་པ་དང་ལྡན་པ་ཡིན་ན། རྒྱལ་པོ་མུ་ཁྱུད་དེ་འདིར་འོངས་ནས་མཐོང་བར་ཁྱེད་འདོད་དམ་མི་འདོད། སུམ་ཅུ་རྩ་གསུམ་པའི་ལྷ་རྣམས་ཀྱིས་སྨྲས་པ། ལྷའི་དབང་པོ། རྒྱལ་པོ་མུ་ཁྱུད་དེ་འདིར་མཆིས་ཏེ་མཐོང་བར་བདག་ཅག་ཀྱང་འཚལ་ལོ། །དེ་ནས་ལྷའི་དབང་པོ་བརྒྱ་བྱིན་གྱིས་ཁ་ལོ་སྒྱུར་བ་མ་ཏ་ལི་ལ་སྨྲས་པ། མ་ཏ་ལི་ཚུར་ཤོག་།ཁྱོད་ལྷའི་ཤིང་རྟ་ཅང་ཤེས་རྩིབས་སྟོང་དང་ལྡན་པ་ཁྲིད་ལ་རྒྱལ་པོ་མུ་ཁྱུད་ག་ལ་བ་དེར་སོང་སྟེ་རྒྱལ་པོ་མུ་ཁྱུད་ལ་འདི་སྐད་གྱིས་ཤིག་།རྒྱལ་པོ་ཆེན་པོ་སུམ་ཅུ་རྩ་གསུམ་པའི་ལྷ་རྣམས་ཀྱིས་ཤིང་རྟ་ཅང་ཤེས་རྩིབས་སྟོང་དང་ལྡན་པ་བཀྲིས་ཏེ་མཆིས་ན། རྒྱལ་པོ་ཆེན་པོ་ཐགས་ཐོགས་མ་མཆིས་པར་འདི་ལ་ཆིབས་སུ་གསོལ། །སུམ་ཅུ་རྩ་གསུམ་པའི་ལྷ་རྣམས་ནི། ཁྱོད་མཐོང་བར་དགའོ་ཞེས་གྱིས་ལ། ཤིང་རྟ་ལ་ཞོན་པ་དང་འདི་སྐད་ཅེས་གྱིས་ཤིག་།རྒྱལ་པོ་ཆེན་པོ། ལམ་གང་ནས་གཤེགས་པར་བགྱི། གང་གིས་ཕྱིན་ཅི་ལོག་ཏུ་གྱུར་པའི་ཕྱིན་ཅི་ལོག་གི་ས་ནས་བཞུད་དམ། ཕྱིན་ཅི་ལོག་མ་ལགས་པ་རྣམས་ཀྱི་ཕྱིན་ཅི་ལོག་མ་མཆིས་པའི་ས་ནས་བཞུད་ཅེས་གྱིས་ཤིག་།ལེགས་སོ། །ཞེས་སྨྲས་ནས་ཁ་ལོ་སྒྱུར་བ་མ་ཏ་ལི་ལྷའི་དབང་པོ་བརྒྱ་
350b
བྱིན་གྱི་ལྟར་མཉན་ནས་བབས་ཏེ། ཇི་སྐད་བསྒོ་བ་བཞིན་རྒྱལ་པོ་མུ་ཁྱུད་དེ་ལ་འདི་སྐད་ཅེས་སྨྲས་སོ། །དེ་སྐད་ཅེས་སྨྲས་པ་དང ། རྒྱལ་པོ་མུ་ཁྱུད་ཀྱིས་ཁ་ལོ་སྒྱུར་བ་མ་ཏ་ལི་ལ་འདི་སྐད་ཅེས་སྨྲས་སོ། །མ་ཏ་ལི། དེ་ལྟ་བས་ན། ལམ་དེ་གཉི་ག་ནས་འདོང་ངོ ། །ཞེས་བྱས་པ་དང ། ཁ་ལོ་སྒྱུར་བ་མ་ཏ་ལིས་རྒྱལ་པོ་མུ་ཁྱུད་ཕྱིན་ཅི་ལོག་སུ་གྱུར་པ་རྣམས་ཀྱི་ཕྱིན་ཅི་ལོག་གིས་དང ། ཕྱིན་ཅི་ལོག་མེད་པ་རྣམས་ཀྱི་ཕྱིན་ཅི་ལོག་མེད་པའི་ས་དེ་གཉི་ག་ནས་དྲངས་ཏེ་དོང་ངོ ། །རྒྱལ་པོ་ཆེན་པོ། དེ་ནས་མུ་ཁྱུད་ཀྱིས་ཁ་ལོ་སྒྱུར་བ་མ་ཏ་ལི་ལ་སྨྲས་པ། མ་ཏ་ལི། དེ་བས་ན། ཕྱིན་ཅི་ལོག་ཏུ་གྱུར་པའི་ས་བལྟའི། ཡུད་ཙམ་ཞིག་ཤིང་རྟ་སྡོང་དུ་ཆུག་ཅིག་།དེ་ནས་ཁ་ལོ་སྒྱུར་བ་མ་ཏ་ལིས་ཤིང་རྟ་སྡོད་དུ་འཇུག་པའི་ཡུན་ཇི་སྲིད་པ་དེ་ཉིད་ཀྱི་བར་སྐབས་སུ་རྒྱལ་པོ་མུ་ཁྱུད་ཀྱིས་སྲོག་ཆགས་བྱེ་བ་ཕྲག་བརྒྱད་ཅུ་དེ་ཁོ་ན་ངེས་པར་བསྟན་པའི་ཏིང་ངེ་འཛིན་ལ་བཀོད་པར་གྱུར་ཏེ།་འདི་ལྟར་བག་ཡོད་པ་དང ། མངོན་པར་ཤེས་པས་རྣམ་པར་རྩེ་བའི་ཕྱིར་རོ། །དེ་དག་གིས་ཀྱང་མི་སྐྱེ་བའི་ཆོས་ལ་བཟོད་པར་གྱུར་ཏོ། །ཁ་ལོ་སྒྱུར་བ་ཏ་ལིས་ནི།་རྒྱལ་པོ་མུ་ཁྱུད་ཀྱིས་ལས་ཅི་བྱས་པ་ཤེས་པར་མ་གྱུར་ཏོ། །དེ་ནས་ཁ་ལོ་སྒྱུར་བ་མ་ཏ་ལིས་དེ་བཞིན་དུ་དྲངས་ཏེ་རྒྱལ་པོ་མུ་ཁྱུད་དང་རི་རབ་ཀྱི་རྩེ་མོ་ལ་ཕྱིན་
351a
༄#། །ཏོ། །དེ་ནས་རྒྱལ་པོ་མུ་ཁྱུད་ཀྱིས་རིང་པོ་ནས་ནགས་ཚལ་སྟུག་པོ་རྣམ་པ་ཐམས་ཅད་དུ་སྔོ་བ་མཐོང་སྟེ། མཐོང་ནས་ཁ་ལོ་སྒྱུར་བ་མ་ཏ་ལི་ལ་འདི་སྐད་ཅེས་སྨྲས་སོ། །མ་ཏ་ལི། ནགས་ཚལ་སྟུག་པོ་འདི་ནི། ཐེ་ཚོམ་མེད་པར་ཕྱིན་ཅི་ལོག་མེད་པའི་སེམས་ཅན་རྣམས་ཀྱི་གནས་ཡིན་ནོ། །མ་ཏ་ལིས་སྨྲས་པ། རྒྱལ་པོ་ཆེན་པོ། །འདི་ནི། སུམ་ཅུ་རྩ་གསུམ་པའི་ལྷ་རྣམས་ཀྱི་ཆོས་བཟང་ལྷའི་མདུན་ས་ལགས་ཏེ། སུམ་ཅུ་རྩ་གསུམ་པའི་ལྷ་རྣམས་ཀྱང་འདིར་འདུས་ཀྱི། རྒྱལ་པོ་ཆེན་པོ་ཐགས་ཐོགས་མ་མཆིས་པར་བཞུད་ཅིག་།སུམ་ཅུ་རྩ་གསུམ་པའི་ལྷ་རྣམས་ནི། ཁྱོད་མཐོང་བར་འཚལ་ལོ། །རྒྱལ་པོ་ཆེན་པོ། །དེ་ནས་རྒྱལ་པོ་མུ་ཁྱུད་འཛིན་དེ་ཐགས་ཐོགས་མེད་པར་ནང་དུ་སོང་བ་དང ། ལྷའི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་རྒྱང་རིང་པོ་ནས་འོང་བ་མཐོང་ངོ ། ། མཐོང་ནས་སྟན་གྱི་ཕྱེད་ལ་བདར་རོ། །དེ་ནས་རྒྱལ་པོ་མུ་ཁྱུད་ཀྱང་བརྒྱ་བྱིན་གྱི་སྟན་ཕྱེད་ལ་འདུག་གོ་།དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་སྟན་ལ་འདུག་པར་ཤེས་ནས་ལེགས་པར་ཤིན་ཏུ་དགའ་བར་བྱས་ཏེ། རྒྱལ་པོ་ཆེན་པོ། ཁྱོད་ཀྱིས་དེ་ལྟར་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་འཇིག་
351b
རྟེན་དུ་བཞག་པ་ནི། ཁྱོད་ཀྱིས་རྙེད་པ་ལེགས་པར་རྙེད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་རྣམས་ལ་སྨྲས་པ། །ཀྱེ་མ་གྲོགས་པོ་དག་།རྒྱལ་པོ་མུ་ཁྱུད་འདི་ནི། ཐབས་མཁས་པ་བསམ་གྱིས་མི་ཁྱབ་པ་དང་ལྡན་པ་སྟེ། འདི་ལྟར་སྐད་ཅིག་ཙམ་ལ་སྲོག་ཆགས་བྱེ་བ་ཕྲག་བརྒྱད་ཅུ་སངས་རྒྱས་ཀྱི་ཆོས་ལ་བཏུལ་བར་གྱུར་ཏོ། །དེ་ནས་རྒྱལ་པོ་མུ་ཁྱུད་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ལྷའི་དབང་པོ། བདག་ནི། ཕྱིར་འཛམ་བུའི་གླིང་དུ་འགྲོ་བར་འདོད་དོ། །དེ་ཅིའི་ཕྱིར་ཞེ་ན། བདག་དེར་སོང་སྟེ་དེ་བཞིན་གཤེགས་པའི་བསྟན་པ་ཡོངས་སུ་གཟུང་བར་བྱའོ། །བརྒྱ་བྱིན་གྱིས་དེ་ལ་སྨྲས་པ། རྒྱལ་པོ་ཆེན་པོ། ཁྱོད་གང་གི་དུས་ལ་བབ་པར་མཁྱེན་ན་བཞུད་ཅིག་།དེ་ནས་རྒྱལ་པོ་མུ་ཁྱུད་དེ་ཕྱིར་འཛམ་བུའི་གླིང་དུ་ཕྱིན་ནས་སྙིང་རྗེ་ཆེན་པོ་དང་ལྡན་ཞིང་ཐབས་མཁས་པ་ཤིན་ཏུ་བསླབ་པས་སེམས་ཅན་བྱེ་བ་དཔག་ཏུ་མེད་པ་དག་སངས་རྒྱས་ཀྱི་བསྟན་པ་ལ་བཏུལ་བར་གྱུར་ཏོ། །རྒྱལ་པོ་ཆེན་པོ། དེའི་ཚེ་དེའི་དུས་ན་རྒྱལ་པོ་མུ་ཁྱུད་ཅེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་ཐེ་ཚོམ་མམ་ནེམ་ནུར་ཟ་ན། རྒྱལ་པོ་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། ང་ཉིད་དེའི་ཚེ་དེའི་དུས་ན་རྒྱལ་པོ་མུ་ཁྱུད་ཅེས་བྱ་བར་གྱུར་ཏོ། །རྒྱལ་
352a
༄#། །པོ་ཆེན་པོ། འདི་ལྟར་རྒྱལ་པོ་མུ་ཁྱུད་ལྷའི་དབང་པོ་བརྒྱ་བྱིན་གྱི་སྟན་ཕྱེད་ལ་དགའ་བ་མེད་པས་མུ་ཁྱུད་ཀྱིས་བག་ཡོད་པའི་སྟོབས་བསྐྱེད་པ་ལ་ལྟོས།་རྒྱལ་པོ་ཆེན་པོ། དེ་ལྟ་བས་ན། ཁྱོད་ཀྱིས་བག་ཡོད་པར་སངས་རྒྱས་ཀྱི་ཆོས་རྣམས་ལ་བརྩོན་པར་བྱའོ། །རྒྱལ་པོ་ཆེན་པོ། སངས་རྒྱས་ཀྱི་ཆོས་དེ་དག་ཀྱང་གང་ཞེ་ན། རྒྱལ་པོ་ཆེན་པོ། ཆོས་ཐམས་ཅད་ནི། སངས་རྒྱས་ཀྱི་ཆོས་སོ། །དེ་སྐད་ཅེས་བཀའ་སྩལ་བ་དང ། རྒྱལ་པོ་ཟས་གཙང་མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེའི་སླད་དུ་གལ་ཏེ་ཆོས་ཐམས་ཅད་སངས་རྒྱས་ཀྱི་ཆོས་ལགས་ན། དེ་ལྟར་ན་ནི། སེམས་ཅན་ཐམས་ཅད་ཀྱང་སངས་རྒྱས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གང་དག་ཕྱིན་ཅི་མ་ལོག་པ་དེ་དག་ནི། སངས་རྒྱས་སོ། རྒྱལ་པོ་ཆེན་པོ། སངས་རྒྱས་ཞེས་བྱ་བ་དེ་ནི། དེ་ཁོ་ན་མཐོང་བའི་ཚིག་བླ་དྭགས་སོ། །དེ་ཁོ་ན་མཐོང་བ་ཞེས་བྱ་བ་དེ་ནི། ཡང་དག་པའི་མཐའི་ཚིག་བླ་དྭགས་སོ། །ཡང་དག་པའི་མཐའ་ཞེས་བྱ་བ་ནི། ཆོས་ཀྱི་དབྱིངས་ཀྱི་ཚིག་བླ་དྭགས་སོ། །རྒྱལ་པོ་ཆེན་པོ། ཆོས་ཀྱི་དབྱིངས་ཞེས་བྱ་བ་དེ་ནི། གཞན་དུ་ན་མིང་ཙམ་མམ། བརྡ་ཙམ་མམ། ཐ་སྙད་
352b
ཙམ་མམ། ཀུན་རྫོབ་ཙམ་མམ། བརྗོད་པ་ཙམ་མམ། གདགས་པ་ཙམ་མ་གཏོགས་པར་བསྟན་པར་མི་ནུས་སོ། །རྒྱལ་པོ་ཆེན་པོ། ཆོས་ཐམས་ཅད་སྐྱེ་བ་མེད་པ་འདི་ནི།་གཟུངས་ཀྱི་སྒོ་སྟེ། དེ་ཅིའི་ཕྱིར་ཞེ་ན། དེ་ལ་ཆོས་ཐམས་ཅད་མི་གཡོ་མི་འགུལ་ཞིང་རློམ་སེམས་མེད་པས་དེའི་ཕྱིར་དེ་ནི། གཟུངས་ཀྱི་སྒོའོ། །རྒྱལ་པོ་ཆེན་པོ། ཆོས་ཐམས་ཅད་འགག་པ་མེད་པ་དེ་ནི། གཟུངས་ཀྱི་སྒོ་སྟེ། དེ་ཅིའི་ཕྱིར་ཞེ་ན། དེ་ལ་ནི། ཆོས་ཐམས་ཅད་མི་གཡོ་མི་འགུལ་ཞིང་རློམ་སེམས་མེད་པས་དེའི་ཕྱིར་དེ་ནི། གཟུངས་ཀྱི་སྒོའོ། །དེ་བཞིན་དུ་ཆོས་ཐམས་ཅད་མཚན་ཉིད་མེད་པ་དང ། མཚན་མ་མེད་པ་དང ། མ་སྐྱེས་པ་དང ། རང་བཞིན་མེད་པ་དང ། རྣམ་པར་རིག་པ་མེད་པ་དང ། མ་བྱས་པ་དང ། མངོན་པར་འདུས་མ་བྱས་པ་དང ། འོང་བ་མེད་པ་དང ། འགྲོ་བ་མེད་པ་དང ། སེམས་ཅན་མེད་པ་དང ། སྲོག་མེད་པ་དང ། གསོ་བ་མེད་པ་དང ། གང་ཟག་མེད་པ་དང ། སྤྲོས་པ་མེད་པ་དང ། མཚན་མ་མེད་པ་དང ། རྟགས་མེད་པ་དང ། ཀུན་ནས་དཀྲིས་པ་མེད་པ་དང ། བག་ལ་ཉལ་བ་མེད་པ་དང ། ཀུན་ནས་ཉོན་མོངས་པར་འགྱུར་བ་མེད་པ་དང ། རྣམ་པར་བྱང་བ་མེད་པ་དང ། རྗེས་སུ་ཆགས་པ་མེད་པ་དང ། ཁོང་ཁྲོ་བ་མེད་པ་དང ། བཅིངས་པ་མེད་པ་དང ། གྲོལ་བ་མེད་པ་དང ། འགྲོ་བ་
353a
༄#། །མེད་པ་དང ། རྒྱུག་པ་མེད་པ་དང ། ལྡོག་པ་མེད་པ་དང ། དམའ་བ་མེད་པ་དང ། གནས་པ་མེད་པ་དང ། འདུག་པ་མེད་པ་དང ། མཉམ་པར་གཞག་པ་མེད་པ་དང ། ནོར་པ་མེད་པ་དང ། ཤེས་པ་པོ་མེད་པ་དང ། རྣམ་པར་ཤེས་པ་མེད་པ་དང ། མཐོང་བ་པོ་མེད་པ་དང ། མི་མཐོང་བ་མེད་པ་དང ། ཚུལ་ཁྲིམས་མེད་པ་དང ། ཚུལ་ཁྲིམས་མ་ཡིན་པ་མེད་པ་དང ། འགྱོད་པ་མེད་པ་དང ། མི་འགྱོད་པ་མེད་པ་དང ། མཆོག་ཏུ་དགའ་བ་མེད་པ་དང ། མཆོག་ཏུ་མི་དགའ་བ་མེད་པ་དང ། དགའ་བ་མེད་པ་དང ། མི་དགའ་བ་མེད་པ་དང ། ཤིན་ཏུ་སྦྱངས་པ་མེད་པ་དང ། ཤིན་ཏུ་མ་སྦྱངས་པ་མེད་པ་དང ། བདེ་བ་མེད་པ་དང ། མི་བདེ་བ་མེད་པ་དང ། ཏིང་ངེ་འཛིན་མེད་པ་དང ། ཏིང་ངེ་འཛིན་མ་ཡིན་པ་མེད་པ་དང ། ཡང་དག་པ་ཇི་ལྟ་བ་བཞིན་མེད་པ་དང ། ལོག་པ་མེད་པ་དང ། ཡིད་བྱུང་བ་མེད་པ་དང ། ཡིད་མ་བྱུང་བ་མེད་པ་དང ། འདོད་ཆགས་དང་བྲལ་བ་མེད་པ་དང ། འདོད་ཆགས་དང་མ་བྲལ་བ་མེད་པ་དང ། ལྟ་བ་མེད་པ་དང ། ལྟ་བ་མ་ཡིན་པ་མེད་པ་དང ། རྣམ་པར་གྲོལ་བ་མེད་པ་དང ། རྣམ་པར་མ་གྲོལ་བ་མེད་པ་དང ། ཤེས་པ་མེད་པ་དང ། མི་ཤེས་པ་མེད་པ་དང ། མཐོང་བ་མེད་པ་དང ། མ་
353b
མཐོང་བ་མེད་པ་དང ། ལས་མེད་པ་དང ། རྣམ་པར་སྨིན་པ་མེད་པ་དང ། ཚུལ་བཞིན་མེད་པ་དང ། ཚུལ་བཞིན་མ་ཡིན་པ་མེད་པ་དང ། རྣམ་པའི་སྒོ་བདུན་ཅུ་པོ་དེ་དག་གིས་རྒྱལ་པོ་ཆེན་པོ། ཆོས་ཐམས་ཅད་ལ་འཇུག་པར་བྱའོ། །རྒྱལ་པོ་ཆེན་པོ། གཟུགས་ཀྱི་རང་བཞིན་ནི། མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། དེ་བཞིན་དུ་ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་རང་བཞིན་ནི། མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། གཟུགས་བརྙན་གྱི་གཟུགས་ཀྱི་རང་བཞིན་ནི། མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། དེ་བཞིན་དུ་གཟུགས་ཀྱི་རང་བཞིན་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་རང་བཞིན་ཡང་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། བྲག་ཅའི་སྒྲའི་རང་བཞིན་ཡང་མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་རང་བཞིན་ཡང་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། སྨིག་རྒྱུའི་ཆུའི་རང་བཞིན་ནི། མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་དང ། ཚོར་བ་དང ། འདུ་ཤེས་
354a
༄#། །དང ། འདུ་བྱེད་དང ། རྣམ་པར་ཤེས་པའི་རང་བཞིན་ཡང་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། ལྦུ་བ་སྡོས་པ་ནི། སྙིང་པོ་མེད་དེ། མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། རྨི་ལམ་གྱི་ཡུལ་གྱི་བཟང་མོ་ནི། མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། རྨི་ལམ་གྱི་མོ་གཤམ་གྱི་བུ་སྐྱེ་བ་ནི། མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། ནམ་མཁའ་ལ་གནས་མེད་དོ། །དེ་བཞིན་དུ་གཟུགས་ནས་རྣམ་པར་ཤེས་པའི་བར་དུ་གནས་མེད་དོ། །རྒྱལ་པོ་ཆེན་པོ། གཟུགས་ལ་ནི། སྐྱེ་བ་མེད་དོ། །དེ་བཞིན་དུ་རྣམ་པར་ཤེས་པའི་བར་དུ་སྐྱེ་བ་མེད་དོ། །རྒྱལ་པོ་ཆེན་པོ། གཟུགས་ལ་ནི། འགག་པ་མེད་དོ། །དེ་བཞིན་དུ་རྣམ་པར་
354b
ཤེས་པའི་བར་དུ་འགག་པ་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། མྱ་ངན་ལས་འདས་པའི་དབྱིངས་ལ་སྐྱེ་བའམ་འགག་པ་མེད་དོ། །དེ་བཞིན་དུ་གཟུགས་ནས་རྣམ་པར་ཤེས་པའི་བར་ལ་སྐྱེ་བའམ་འགག་པ་མེད་དོ། །རྒྱལ་པོ་ཆེན་པོ། འདི་ལྟ་སྟེ། དཔེར་ན། ཆོས་ཀྱི་དབྱིངས་ལ་སྐྱེ་བའམ་འགག་པ་མེད་དོ། །དེ་བཞིན་དུ་གཟུགས་ནས་ནམ་པར་ཤེས་པའི་བར་ལ་སྐྱེ་བའམ་འགག་པ་མེད་དོ། །རྒྱལ་པོ་ཆེན་པོ། ཆོས་འདི་དག་ནི། དེ་བཞིན་གཤེགས་པའི་སྤྱོད་ཡུལ་ཏེ། བསམ་གྱིས་མི་ཁྱབ་པའི་སྤྱོད་ཡུལ་ལོ། །བྱིས་པ་སོ་སོའི་སྐྱེ་བོ་ཐམས་ཅད་དང་ཐུན་མོང་མ་ཡིན་པའི་སྤྱོད་ཡུལ་ཏེ། ཉན་ཐོས་དང ། རང་སངས་རྒྱས་ཐམས་ཅད་དང་ཐུན་མོང་མ་ཡིན། ཕྲི་བ་མ་ཡིན། བསྣན་པ་མ་ཡིན། ཐོབ་པ་མ་ཡིན། སྟོར་བ་མ་ཡིན། མངོན་པར་རྫོགས་པར་སངས་རྒྱས་པ་མ་ཡིན། མངོན་པར་རྫོགས་པར་སངས་རྒྱས་མ་རྒྱས་པ་མ་ཡིན། མངོན་པར་ཤེས་པ་མ་ཡིན།་མངོན་པར་མ་ཤེས་པ་མ་ཡིན། ཡོངས་སུ་ཤེས་པ་མ་ཡིན། ཡོངས་སུ་མ་ཤེས་པ་མ་ཡིན། སྤངས་པ་མ་ཡིན། མ་སྤངས་པ་མ་ཡིན། བསྒོམས་པ་མ་ཡིན། མ་བསྒོམས་པ་མ་ཡིན། མངོན་དུ་བྱས་པ་མ་ཡིན། མངོན་དུ་མ་བྱས་པ་མ་ཡིན། བསྟན་པ་མ་ཡིན། མ་བསྟན་པ་མ་ཡིན། རབ་ཏུ་བསྟན་པ་མ་ཡིན། རབ་ཏུ་མ་བསྟན་
355a
༄#། །པ་མ་ཡིན། བསྒྲགས་པ་མ་ཡིན། མ་བསྒྲགས་པ་མ་ཡིན། ཐོས་པར་བྱས་པ་མ་ཡིན། ཐོས་པར་མ་བྱས་པ་མ་ཡིན། ཐོས་པ་མ་ཡིན།་མ་ཐོས་པ་མ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། གང་བསྣན་པར་བྱ་བའམ། དབྲི་བར་བྱ་བའི་ཆོས་དེ་ནི། མི་དམིགས་ཏེ། རྒྱལ་པོ་ཆེན་པོ། ཆོས་ཐམས་ཅད་ནི། རང་བཞིན་མེད་པ་ཡིན་གྱི། རྒྱལ་པོ་ཆེན་པོ། འདི་ལ་ཡིད་ཡོངས་སུ་དགའ་བར་བྱ་ཞིང་གཞན་གྱི་དྲིང་མི་འཇོག་པར་བྱའོ། །དེ་ནས་རྒྱལ་པོ་ཟས་གཙང་མ་འདི་སྙམ་དུ་སེམས་ཏེ། འདི་ལ་ནི། གང་རྟོགས་པས་སངས་རྒྱས་ཞེས་བྱ་བའི་ཆོས་དེ་གང་ཡང་མི་དམིགས་མོད་ཀྱི། འོན་ཀྱང་དམིགས་སུ་མེད་པའི་ཆོས་རྣམས་ལ་དེ་བཞིན་གཤེགས་པས་གདགས་པ་བསྟན་ཏོ། །སྙམ་ནས་དེའི་ཚེ་རྒྱལ་པོ་ཟས་གཙང་མ་ལ་སོགས་པ་ཤཱཀྱ་བདུན་ཁྲི་མི་སྐྱེ་བའི་ཆོས་ལ་བཟོད་པ་སྐྱེས་སོ། ། དེ་ནས་བཅོམ་ལྡན་འདས་ཀྱིས་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །འདི་ནི། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ་འོད་ཟེར་ཁ་དོག་སྣ་ཚོགས་ཅན་ཁ་དོག་དུ་མ་དང་ལྡན་པ་དག་བཅོམ་ལྡན་འདས་ཀྱི་ཞལ་གྱི་སྒོ་ནས་བྱུང་སྟེ་འཇིག་རྟེན་གྱི་ཁམས་
355b
མཐའ་ཡས་མུ་མེད་པ་དག་སྣང་བས་རྒྱས་པར་བཀང་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ་ཕྱིར་ལོག་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་བསྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་དེ་ཞུས་པ། འཇིག་རྟེན་རྣམ་པར་འདྲེན་པ་པོ། །དཔའ་ཆེན་ཁྱོད་ཀྱིས་འཛུམ་མཛད་པ། །འཇིག་རྟེན་སྣང་བ་མཛད་པ་པོ། །འཛུམ་པའི་འཛུམ་རྒྱུ་བཀའ་སྩལ་གསོལ། །ཐམས་ཅད་མཁྱེན་པ་འདྲེན་པ་པོ། །རྒྱུ་གང་གིས་ནི་འཛུམ་བསྟན་པ། །ཁྱོད་ཀྱིས་འགྲོ་བ་རྣམས་ལ་སྟོན། ། བདག་གི་ཐེ་ཚོམ་མྱུར་དུ་ཁུམ། །ཤཱཀྱའི་ཚོགས་ཀྱི་དོན་སླད་དུ། །གཽ་ཏ་མས་ནི་འཛུམ་པ་མཛད། །དཔའ་བོ་འགྲོ་བ་དགའ་མཛད་པ། །འགྲོ་བའི་ཐེ་ཚོམ་བསལ་དུ་གསོལ། བསམ་གཏན་ཆེན་པོ་ཁྱོད་ཀྱིས་གསུངས། །ཐོས་ནས་འགྲོ་བའི་ཐེ་ཚོམ་འཆད། །མཆོག་ཏུ་དགའ་བའི་ཡིད་གྱུར་ཏེ། །ཀུན་ཀྱང་ཁྱོད་ཀྱི་བསྟན་པ་འཐོབ། །རྒྱལ་བའི་འཛུམ་གྱི་འཕྲིན་ལས་འདི། །ཁྱོད་ཀྱི་སྲས་རྣམས་འཚལ་གྱུར་ན། །ནན་ཏན་གྱིས་ནི་རབ་ངེས་ཤིང ། །ཤེས་པས་རྗེས་སུ་མཆི་བར་འགྱུར། །རྒྱལ་བ་ཁྱུ་མཆོག་ཁྱོད་ཀྱིས་ནི། །འགྲོ་
356a
༄#། །བའི་ཐེ་ཚོམ་བསལ་དུ་གསོལ། །འཇིག་རྟེན་ཐེ་ཚོམ་ཆད་གྱུར་ན། །བདེ་བ་རྒྱ་ཆེན་ཐོབ་པར་འགྱུར། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ངས་ནི་འཛུམ་ཞིག་གང་མཛད་པ། །རྟ་ཐུལ་དེ་ནི་ང་ལ་ཉོན། །ཤཱཀྱ་རྣམས་ཀྱིས་བློ་ངེས་པ། །ཡང་དག་ཇི་བཞིན་ལུང་བསྟན་ཏོ། །ཆོས་རྣམས་དམིགས་སུ་མེད་པར་ནི། །ཤཱཀྱ་རྣམས་ཀྱིས་ཡང་དག་ཤེས། །དེ་ཕྱིར་སངས་རྒྱས་ཆོས་རྣམས་ལ། །འདི་དག་ཡིད་ནི་ངེས་པར་བཞག་།དམིགས་སུ་མེད་པ་བསྟེན་ནས་ནི། །ཤཱཀྱ་གྲགས་པ་ཆེན་པོ་པ། །ཆོས་རྣམས་ཀུན་ལ་ངེས་གྱུར་ནས། །བླ་མེད་བྱང་ཆུབ་ཐོབ་པར་འགྱུར། །ཤཱཀྱ་ངེས་པ་འདི་དག་ནི། །མི་ཡི་ནང་ནས་ཤི་འཕོས་ནས། །བདེ་བ་ཅན་གྱི་འཇིག་རྟེན་དུ། །འོད་དཔག་མེད་པའི་དྲུང་དུ་འགྲོ། །བྱང་ཆུབ་སེམས་དཔའ་འཇིགས་མེད་པ། །བདེ་བ་ཅན་ན་གནས་པའི་ཚེ། །སངས་རྒྱས་བྱེ་བ་གྲངས་མེད་ལ། །ཕྱོགས་བཅུ་དག་ཏུ་མཆོད་བྱེད་འགྱུར། །མཁས་པ་རྣམས་ནི་ཁམས་གཅིག་ན། །སངས་རྒྱས་བཞུགས་རྣམས་བསྙེན་བཀུར་བྱེད། །སེམས་ཅན་ཀུན་ལ་ཕན་ཚོལ་ཞིང ། །བྱང་ཆུབ་མཆོག་ཏུ་སྨོན་ལམ་འདེབས། །དེ་
356b
བཞིན་གཤེགས་རྣམས་མཆོད་བྱེད་ཅིང ། །ཞིང་ནས་ཞིང་དུ་རྣམ་པར་རྒྱུ། །གང་དུ་སངས་རྒྱས་འབྱུང་བ་ཡང ། །རྫུ་འཕྲུལ་སྟོབས་ཀྱིས་འདོང་བར་འགྱུར། །བསྐལ་པ་བྱེ་བ་གྲངས་མེད་དུ། །མེ་ཏོག་རྣམ་པ་སྣ་ཚོགས་ཀྱིས། །དེ་བཞིན་གཤེགས་པ་རྣམ་མཆོད་ནས། །དེ་ཡི་འོག་ཏུ་འདྲེན་པར་འགྱུར། །དེ་ཚེ་སངས་རྒྱས་རེ་རེ་ཞིང ། །སེམས་ཅན་ཁྲག་ཁྲིག་མང་པོ་དག་།བྱང་ཆུབ་ཕྱིར་ནི་སངས་རྒྱས་ཀྱིས། །སངས་རྒྱས་དགོངས་ལ་འགྲོ་བ་འདུལ། །སངས་རྒྱས་ཀུན་གྱི་ཞིང་རྣམས་ན། །བྱང་ཆུབ་སེམས་དཔའ་རྣམས་ལ་སྟོན། །དེ་ན་སངས་རྒྱས་གང་ཡང་ནི། །ཉན་ཐོས་འདུལ་བར་ཡོང་མི་འགྱུར། །སངས་རྒྱས་དེ་དག་རེ་རེ་ཞིང ། །དེ་ན་ཚེ་ཚད་གྱུར་པ་ནི། །བྱེ་བ་གྲངས་མེད་ལོ་རྣམས་སུ། །ཆོས་བསྟན་པ་དག་གནས་པར་འགྱུར། །དེ་དག་མྱ་ངན་ཡོངས་འདས་ནས། །བྱང་ཆུབ་སེམས་དཔའ་འཇིགས་མེད་པས། །རྒྱལ་བའི་སྲས་དག་ལོ་གྲངས་ནི། །བྱེ་བ་སྟོང་དུ་དམ་ཆོས་འཛིན། །མི་དབང་སྲས་པོ་དེ་དག་ཀྱང ། །སྟོང་པ་ཉིད་ཀྱི་ཆོས་བསྟན་པས། །སེམས་ཅན་བྱེ་བ་བསམ་ཡས་དག་།བྱང་ཆུབ་ལ་ནི་འདུལ་བར་འགྱུར། ། བག་ཡོད་པ་ཡི་མི་རྣམས་ནི། །བག་ཡོད་པ་ལ་གནས་བཅས་ཏེ། །སྟོང་པ་ཉིད་ཀྱི་ཆོས་བསྟེན་ནས། །ཐམས་ཅད་མཁྱེན་དུ་ངེས་པར་འབྱུང ། །རྫོགས་སངས་རྒྱས་ཀྱིས་
357a
༄#། །ཤཱཀྱ་ཡི། །བུ་ཡི་འགྲོ་བསྟན་འདི་ཐོས་ནས། །ལྷར་བཅས་འཇིག་རྟེན་དགའ་གྱུར་ཏེ། །བྱང་ཆུབ་ཕྱིར་ནི་ཡིད་ཀྱང་བཏང ། །ཤཱཀྱ་ལུང་བསྟན་པའི་ལེའུ་སྟེ། ཉི་ཤུ་རྩ་དྲུག་པའོ།། །།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ། བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་བྱང་ཆུབ་སེམས་དཔའ་མཐར་ཕྱིན་པ་རྣམས་ལ་བསྒྲག་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ།་ཏིང་ངེ་འཛིན་འདི་ནི། གང་ཟག་མེད་པ་སྟེ། དེ་ལ་དེ་བཞིན་གཤེགས་པས་ཆོས་གང་ཡང་མ་དམིགས་སོ། །གང་མ་དམིགས་པ་དེ་ནི། མངོན་པར་རྫོགས་པར་སངས་མ་རྒྱས་སོ། །གང་མངོན་པར་རྫོགས་པར་སངས་མ་རྒྱས་པ་དེ་ནི། མ་བསྟན་ཏོ། །གང་མ་བསྟན་པ་དེ་ནི། མ་ཤེས་པའོ། །གང་མ་ཤེས་པ་དེ་ནི། འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་སྟེ། དེ་ནི། དེ་བཞིན་གཤེགས་པ་རྣམས་ཀྱི་ཆོས་ཀྱི་རྔ་ཆེན་པོ་ཡིན་གྱི།་ཅི་ནས་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་གཟུང་བ་དང ། བཀླག་པ་དང ། གཞན་དག་ལ་ཡང་རྒྱ་ཆེར་ཡང་དག་པར་
357b
བསྟན་པར་བྱ་བ་འདི་ཤཱ་རིའི་བུ། ཁྱོད་ལ་ཡོངས་སུ་གཏད་དོ། །ཤཱ་རིའི་བུ། བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ་རིགས་ཀྱི་བུ་མོ་གང་གིས་བསྐལ་པ་བཅུའི་བར་དུ་ཕ་རོལ་ཏུ་ཕྱིན་པ་ལྔ་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བར་སྤྱད་པ་བས། ཤཱ་རིའི་བུ། གང་གིས་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་ཐ་ན་ཐོས་པར་གྱུར་ཀྱང་དེ་ཉིད་དེ་བས་བསོད་ནམས་ཆེས་མང་དུ་འཕེལ་ལོ། །ཤཱ་རིའི་བུ། གང་གིས་བསྐལ་པ་བཅུའི་བར་མཉན་པ་བས།་གང་གིས་སེམས་ཅན་གཅིག་ཅིག་ལ་འདི་བསྟན་ན། དེ་ཉིད་དེ་བས་བསོད་ནམས་ཆེས་མང་དུ་འཕེལ་ལོ། །གང་གིས་བསྐལ་པ་བཅུའི་བར་དུ་མཉན་ཏེ་གཞན་ལ་བསྟན་པ་བས།་གང་གིས་སེ་གོལ་གཏོགས་པ་ཙམ་དུ་འདི་བསྒོམས་ན། དེ་ཉིད་དེ་བས་ཆེས་བསོད་ནམས་མང་དུ་འཕེལ་ལོ། །ཤཱ་རིའི་བུ། དེ་ལྟ་བས་ན། བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་ཉིད་ལ་བྱང་ཆུབ་སེམས་དཔའ་རྣམས་ནན་ཏན་ཐམས་ཅད་ཀྱིས་གདམས་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ། བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་བསྒོམས་པས་ནི། མྱུར་དུ་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་ཏེ། ཤཱ་རིའི་བུ། གང་བླ་ན་
358a
༄#། །མེད་པ་ཡང་དག་པར་རྫོགས་པའི་བྱང་ཆུབ་ཏུ་ངས་ལུང་བསྟན་པའི་བྱང་ཆུབ་སེམས་དཔའི་ཚོགས་འདི་དག་ཐམས་ཅད་ཀྱང་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་ལ་རབ་ཏུ་གནས་པ་ཤ་སྟག་གོ་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཤཱ་རིའི་བུ་དང ། དགེ་སློང་དེ་དག་དང ། རྒྱལ་པོ་ཟས་གཙང་མ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་པ་དེ་དག་དང ། ཐམས་ཅད་དང་ལྡན་པའི་འཁོར་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། དེ་ཁོ་ན་ངེས་པར་བསྟན་པ་ཡབ་དང་སྲས་མཇལ་པའི་ལེའུ་ཞེས་བྱ་བ་སྟེ། འདུས་པ་བཅུ་དྲུག་པ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང ། ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོ་ཙྪ་བ་ཞང་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་བཅད་ཀྱིས་ཀྱང་བཅོས་ནས་གཏན་ལ་ཕབ་པ།