རྒྱ་གར་སྐད་དུ། ཨཱརྱ་མཉྫུ་ཤྲཱི་ཤྲི་ནཱ་མ་ཨཥྚ་ཤ་ཏ་ཀཾ་།བོད་སྐད་དུ། འཕགས་པ་འཇམ་དཔལ་གྱི་མཚན་བརྒྱ་རྩ་བརྒྱད་པ། འཇམ་དཔལ་གཞོན་ནུར་གྱུར་པ་ལ་ཕྱག་ 96a ༄#། །འཚལ་ལོ། །ཤིན་ཏུ་དང་བའི་སེམས་ཀྱིས་སུ། །ཐུབ་ལ་མགོ་བོས་ཕྱག་འཚལ་ཏེ། །སངས་རྒྱས་རྣམས་ཀྱིས་བསྔགས་པ་ཡི། །མཚན་རྣམས་འདིར་ནི་བརྗོད་པར་བགྱི། །གཟུགས་མཛེས་གཟུགས་དང་ལྡན་པ་སྟེ། །གཟུགས་རྣམས་ཀུན་གྱི་བླ་ན་མེད། །མཚན་རྣམས་ཐམས་ཅད་ཀུན་ཏུ་རྫོགས། །འཇམ་དཔལ་དཔལ་གྱི་དམ་པ་ལགས། །བསམ་གྱིས་མི་ཁྱབ་བསམ་དང་བྲལ། །མཐུ་རྩལ་བསམ་ཡས་རྨད་དུ་བྱུང ། །སྐུ་གསུང་འཕྲིན་ལས་བསམ་མི་ཁྱབ། །དེ་བཞིན་ཐུགས་ཀྱང་བསམ་མི་ཁྱབ། །སྟོང་ཉིད་སྒོམ་པའི་བདག་ཉིད་ཅན། །སྟོང་པའི་ཆོས་དང་ཡང་དག་ལྡན། །སྟོང་པ་ཉིད་ལ་ལྷག་པར་མོས། །སྲིད་པ་གསུམ་པོ་སྟོང་པར་སྟོན། །ཐམས་ཅད་མཁྱེན་ཅིང་ཐམས་ཅད་གཟིགས། །ས་རྣམས་ཀུན་གྱི་མཆོག་ཏུ་གྱུར། །སེམས་ཅན་ཀུན་གྱི་མཆོག་ཏུ་གྱུར། །སེམས་ཅན་ཀུན་གྱིས་ཕྱག་བགྱིས་པ། །ངན་འགྲོ་ཀུན་དང་དེ་བཞིན་དུ། །མུ་སྟེགས་ཅན་རྣམས་ཐམས་ཅད་འཇོམས། །ཕས་ཀྱི་རྒོལ་བ་ཚར་གཅོད་པ། །སྨྲ་བའི་སེངྒེ་མི་ཡི་མཆོག་།དུལ་ཞིང་ཉོན་མོངས་དགྲ་རྣམས་དང ། །སྒྲིབ་པ་དྲི་མ་ཀུན་མི་མངའ། །སེམས་ཅན་ཐམས་ཅད་ཡོངས་སུ་སྐྱོབ། །གྲོལ་ཞིང་འཇིག་རྟེན་གྲོལ་མཛད་པ། །རལ་པ་མུན་ཛ་བརྟུལ་ཞུགས་ 96b ཅན། །ཚངས་པ་ཚངས་པའི་གནས་ན་བཞུགས། །བགྲང་ནོར་ཐོགས་ཤིང་ཕྱག་མཁར་བསྣམས། །དག་ཅིང་དག་པ་རྣམས་དང་ལྡན། །འཇམ་པའི་དབྱངས་ཅན་མངའ་བདག་མཛད། །པདྨ་ལས་འཁྲུངས་པདྨ་ཅན། །པདྨའི་ཟེ་བའི་ཁ་དོག་འདྲ། །བཞུགས་པའི་གདན་ཁྲི་པདྨ་ལགས། །གཙང་མ་ཨུཏྤལ་སྔོན་པོ་བསྣམས། །བསམ་དག་ཞི་བའི་ཐུགས་དང་ལྡན། །ཁྱོད་ནི་སངས་རྒྱས་རང་སངས་རྒྱས། །ཁྱོད་ནི་དང་པོའི་སངས་རྒྱས་ལགས། །རྫུ་འཕྲུལ་ལྡན་ཞིང་མངའ་དབང་བརྙེས། །བདེན་པ་བཞི་དག་སྟོན་པ་པོ། །འཇིག་རྟེན་སྐྱོང་བ་སྤྱན་སྟོང་མངའ། །ཁྱོད་ནི་དབང་ཕྱུག་སྐྱེ་རྒུའི་བདག་།ཁྱོད་ནི་ཞི་བའི་སེམས་ཅན་རྣམས། །ཀུན་གྱི་མངའ་བདག་ཡོན་ཏན་གཙོ། །ཁྱོད་ནི་ཁྱུ་མཆོག་སྐྱེ་རྒུའི་གཙོ། །ཐུ་བོ་དེ་བཞིན་ཚེ་རབས་དགོངས། །རྣམ་པར་འདྲེན་དང་འདུལ་མཛད་པ། །རྒྱལ་སྲས་རྒྱལ་བ་ཉིད་ལས་འཁྲུངས། །འོད་ཟེར་སྟོང་ལྡན་ཉི་མ་ཁྱོད། །ཟླ་བ་དང་ནི་ཕུར་བུའང་ཁྱོད། །རྣམ་ཐོས་བུ་དང་ཆུ་ལྷའང་ལགས། །དབང་ཕྱུག་ཆེ་ཁྱོད་ཁྱབ་འཇུག་ཁྱོད། །ཀླུ་ཡི་རྒྱལ་པོ་མཐའ་ཡས་ཁྱོད། །དེ་བཞིན་སྡེ་དཔོན་སྐེམ་བྱེད་ལགས། །ལྷ་མིན་དབང་པོ་ཐགས་བཟང་རིས། །མིག་དམར་གཟའ་ལག་པ་སངས། །སྤེན་པ་དཔའ་བོ་ལྷ་ཀུན་ལགས། །ལྷ་རྣམས་ཀུན་གྱིས་ཕྱག་ 97a ༄#། །བགྱིས་པ། །འཇིག་རྟེན་ཆོས་ཀྱི་དྲི་མ་བྲལ། །ཁྱོད་ནི་འཇིག་རྟེན་གང་ཟག་མཆོག་།འཇིག་རྟེན་མཁྱེན་པ་འཇིག་རྟེན་རིག་།ཡེ་ཤེས་ཅན་གྱི་དམ་མཆོག་པ། །དམ་པ་སྦྱིན་དང་གནས་དང་སྐྱབས། །བདུད་ཀྱི་ལས་ཀྱིས་ཡོངས་མི་བརྫི། །ཁ་ན་མ་ཐོ་མི་མངའ་ཟབ། །དགེ་བའི་བཤེས་གཉེན་ཀུན་ཏུ་གྲགས། །ཁྱོད་ནི་སྨན་པ་ཟུག་རྔུ་འབྱིན། །མི་འདུལ་ཁ་ལོ་སྒྱུར་བའི་མཆོག་།བློ་གྲོས་ལྡན་ཞིང་རྟོགས་དང་ལྡན། །བློ་དང་ལྡན་ཞིང་མཁས་པ་ལགས། ། ཁྱོད་ནི་བསོད་ནམས་དཔག་བསམ་ཤིང ། །བྱང་ཆུབ་ཡན་ལག་མེ་ཏོག་བརྒྱན། །རྣམ་གྲོལ་འབྲས་བུ་ཕུན་སུམ་ཚོགས། །ལུས་ཅན་ཀུན་གྱི་མཆོག་ཏུ་གྱུར། །ཡིད་དུ་འོང་ཞིང་ཡིད་འཕྲོག་པ། །སྡིག་པ་མི་མངའ་ཚངས་པར་སྤྱོད། །ཁྱོད་ནི་མཇུག་རིང་གཟའ་མཆོག་ལགས། །ཁྱོད་ནི་དྲང་སྲོང་ཐུབ་པ་མཆོག ། ཁྱོད་ནི་རྒྱལ་ཚབ་དབང་བསྐུར་བ། །ས་བཅུའི་དབང་ཕྱུག་གཙོ་བོ་ལགས། །དེད་དཔོན་འགྲོ་བ་རྣམས་ཀྱི་གཙོ། །མྱ་ངན་འདས་པ་མཆོག་སྟོན་བཞིན། །ཁྱོད་ནི་ནམ་མཁའ་ས་ཆུ་བཞིན། །ཁྱོད་ནི་མེ་དང་རླུང་ལྟ་བུ། །ཁྱོད་ནི་ཡིད་བཞིན་ནོར་བུ་ལྟར། །སེམས་ཅན་རེ་བ་ཀུན་རྫོགས་མཛད། །འབྱུང་པོ་ཀུན་གྱིས་ཕྱག་བགྱིས་ 97b པ། །རིན་ཆེན་ཁྱོད་ལ་ཕྱག་འཚལ་ལོ། །འཇམ་དཔལ་གྱིས་ནི་བཀའ་སྩལ་པ། །ོཾ་ཝཱ་ཀྱེ་དཾ་ན་མ་སཝཱ་ཧཱ། ཇི་སྐད་སྨོས་པའི་མཚན་རྣམས་དང ། །རིག་སྔགས་བཅས་པར་འཛིན་ན་ནི། །སྡིག་གྱུར་རྣམ་དག་རབ་ཏུ་ཐོབ། །བརྒྱ་ལས་རྩ་བརྒྱད་ལྷག་པའི་མཚན། །སྐྱེས་བུ་དུས་གསུམ་སུ་ཀློག་པ། །དེ་འདོད་བསམ་རྒུ་ཡིད་བཞིན་དུ། །གདོན་མི་ཟ་བར་འགྲུབ་པར་འགྱུར། །བཟང་པོའི་མཚན་རྣམས་དྲན་ན་ནི། །མཚམས་མེད་སྐལ་པ་མཉམ་པ་ཡི། །ལས་རྣམས་མི་བཟད་གང་བྱས་པ། །དེ་དག་ཐམས་ཅད་མྱུར་དུ་འབྱང ། །འཇིག་རྟེན་ཕ་རོལ་འཕོ་བ་དང ། འཇིགས་པ་ཆེན་པོ་འབྱུང་བའི་ཚེ། །སེམས་ཅན་དག་པས་དྲན་བྱས་ན། །འཇམ་པའི་དབྱངས་ཀྱང་ཐོབ་པར་འགྱུར། །བློ་དང་ལྡན་པས་དྲན་བྱས་ཏེ། །ངེས་པར་གནས་ནས་སུ་ཀློག་པ། །སངས་རྒྱས་ཉིད་ནི་འདོད་ན་ཡང ། །ཐོབ་འགྱུར་འདི་ལ་ཐེ་ཚོམ་མེད།། །།འཕགས་པ་འཇམ་དཔལ་གྱི་མཚན་བརྒྱ་རྩ་བརྒྱུད་པ་རྫོགས་སོ།། །། |