རྒྱ་གར་སྐད་དུ། ཤྲཱི་མ་ཧཱ་ཀཱ་ལ་ཏནྟྲ། བོད་སྐད་དུ། དཔལ་ནག་པོ་ཆེན་པོའི་རྒྱུད། དབང་གི་རྟ་མཆོག་སྐུ་ལ་ཕྱག་ 189a ༄#། །འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། ཤར་ལྷོའི་དུར་ཁྲོད་ཆེན་པོ་ཧ་ཧ་དྲག་ཏུ་དགོད་པའི་གནས་ཤིང་ཙནྡན་གྱི་ནགས་ཚལ་རབ་ཏུ་དགའ་བའི་མིང་ཞེས་བྱ་བ་མི་མ་ཡིན་ཕོ་མོ་མང་པོ་འདུས་པའི་ཕོ་བྲང་དུ་དཔལ་ནག་པོ་ཆེན་པོ་ཞེས་བྱ་བ་བི་ནཱ་ཡ་ཀ་ལ་སོགས་ཏེ་འཁོར་གདུག་པ་ཅན་རྣམས་ཀྱི་དབུས་ན་སྐྱེ་འགྲོ་སེམས་ཅན་རྣམས་ཀྱི་སྲོག་དབུགས་ལ་དབང་བྱེད་པའི་ནག་པོ་ཆེན་པོ་ཞེས་བྱ་བ་ཞིག་ཡོད་དེ། དེའི་ཚེ་དེའི་དུས་ན་ནུབ་ཕྱོགས་ཀྱི་འཇིག་རྟེན་གྱི་ཁམས་ན་མཐར་བྱེད་རྟའི་རྒྱལ་པོ་ཞེས་བྱ་བ་རྒྱལ་པོ་ཆེན་པོ་བཞི་ལ་སོགས་པའི་འཁོར་བྱིས་བསྐོར་ཏེ་དྲེགས་པ་ཅན་འདུལ་བའི་ཏིང་ངེ་འཛིན་ལ་སྙོམས་པར་ཞུགས་ནས་ལྕགས་ཀྱུའི་ཕྱག་རྒྱ་བཅས་ནས་ཨོཾ་བཛྲ་ཀྲོ་དྷ་ཧ་ཡ་གྲི་བ་ཧཱུཾ་ཧུ་ལུ་ཧུ་ལུ་ཧཱུཾ་བཾ་ཞེས་བརྗོད་པས། དུར་ཁྲོད་ཧ་ཧ་དྲག་ཏུ་དགོད་པའི་གནས་ནས་ནག་པོ་རང་དབང་མེད་པར་མཐར་བྱེད་རྟའི་རྒྱལ་པོའི་མངོན་དུ་བྱུང་སྟེ་ལས་ཅི་བྱ་ཟེར་ཞིང་རང་རྟགས་སྲོག་གི་སྙིང་པོ་འདི་མདོངས་གསོལ་དུ་ཕུལ་བ། ཨོཾ་བཛྲ་མ་ཧཱ་ཀཱ་ལ་ཀྵིཾ་ཀྵེ་ཏྲ་བིགྷྣའཾ་བི་ནཱ་ཡ་ཀ་ཧཱུཾ་ཧཱུཾ་ཕཊ་ཅེས་ཕུལ་ལོ། །དཔལ་ནག་པོ་ཆེན་པོའི་རྒྱུད་ལས། གླེང་གཞིའི་ལེའུ་སྟེ་དང་པོའོ།། །།དེ་ནས་རྒྱལ་པོ་མིག་མི་བཟང་གིས་མཐར་ 189b བྱེད་རྟའི་རྒྱལ་པོ་ལ་འདི་སྐད་ཅེས་གསོལ་ཏོ། །ེ་མ་པདྨ་ཁྲོས་པའི་བདག་།ནག་པོ་ཆེན་པོ་དྲག་ཤུལ་ཅན། །གསང་བའི་སྒྲུབ་པ་བཤད་དུ་གསོལ། །མགོན་པོ་བསྒྲུབ་པར་བྱ་བ་གང ། །གསད་ཅིང་ལུས་སྲོག་དབྱེ་བ་དང ། །མ་གྲུབ་ཤི་ས་བསྟན་པ་དང ། །མགོན་པོའི་རྟགས་དང་སེར་བ་རྣམས། །རྟ་མཆོག་ཆེན་པོས་བདག་ལ་སྩོལ། །ཅེས་ཞུས་པས། དེ་ནས་པདྨ་ཁྲོས་པ་ཡིས། །ནག་པོའི་སྒྲུབ་ཐབས་ཆེད་དུ་བརྗོད། །དམ་ཚིག་ལྡན་པའི་སྔགས་པ་ཡིས། །སངས་རྒྱས་བསྟན་པ་བསྲུང་སླད་དུ། །གཟའ་སྐར་ཚེས་གྲངས་ཤིས་པ་ལ། །དུར་ཁྲོད་ལ་སོགས་ཤིང་གཅིག་ཏུ། །བསོད་ནམས་ཚོགས་ནི་བསགས་བྱས་ལ། །ནག་པོ་ཆེན་པོ་བསྒྲུབ་པར་བྱ། །ཕུང་སའམ་ས་ནག་དག་ལ་ནི། །སྟེགས་བུ་གྲུ་བཞི་བྱས་ནས་ནི། །དྲི་སྤོས་ཁྲག་གིས་ཆག་ཆག་བྱ། །དབུས་སུ་གྲུ་གསུམ་ཟླ་ཁམ་ལྡན། །ཕྱི་རོལ་པདྨ་འདབ་བརྒྱད་བྲི། །དེ་དབུས་ཐོད་ཆེན་ནང་དུ་ནི། །ཤ་ལྔ་སྙིང་སྣས་བརྒྱན་པ་ཡི། །གཏོར་མ་བཤོས་བུ་ཁྲུ་གང་ཚད། །དེ་ལ་མདའ་གཟུགས་དམར་ནག་དར། །གྲི་སྙིང་ཙ་ཀ་ལི་ཡང་གཟུགས། །དེ་ཉིད་མགོན་པོའི་རྟེན་དུ་གཞག། ཌཱ་མ་རུ་ཡི་པགས་པའི་ནང ། །མགོན་པོའི་སྲོག་སྔགས་བྲི་བར་བྱ། །ལྡོ་ཡི་ནང་དུ་བླ་རྡོས་དྲིལ། །སྤོས་དང་རྒྱུན་གཏོར་གཏང་བར་བྱ། །དཀོན་མཆོག་སྤྱི་ལ་མཆོད་པ་བཤམ། །དེ་ནས་པདྨར་བདག་བསྒོམས་ 190a ༄#། །ལ། །ཐུགས་ཀའི་ཧྲཱི་ལས་འོད་འཕྲོས་པས། །བླ་མ་སངས་རྒྱས་ལ་སོགས་པ། །རང་གི་མདུན་དུ་བསམ་བྱས་ལ། །མཆོད་པ་རྣམས་ལྔ་དབུལ་བར་བྱ། །རྣམ་དག་བདུན་གྱི་འོག་ཏུ་ནི། །ཚད་མེད་བཞི་པོ་བསྒོམ་པར་བྱ། །བཏང་སྙོམས་ལ་སོགས་པཾ་རཾ་ཏྲི། །པད་སྟེང་ཡི་གེ་ཧཱུཾ་ལས་ནི། །ནག་པོ་ཞལ་གཅིག་ཕྱག་དྲུག་པ། །གྲི་གུག་ཕྲེང་བ་ཌཱ་མ་རུ། །ཐོད་པ་མདུང་དང་ཞགས་པ་བསྣམས། །གཡས་གཡོན་རིམ་པས་བསྣམས་པའོ། །སྦྲུལ་དང་རིན་ཆེན་རྒྱན་གྱིས་བརྒྱན། །སྐུ་སྨད་བ་ཏི་ཁྲ་བོ་གསོལ། །སྟག་ལྤགས་ཞིང་གི་ཤམ་ཐབས་ཅན། །གཏུམ་པོ་སྤྱན་གསུམ་མཆེ་བ་གཙིགས། །དཔྲལ་བར་དྲི་ཡི་ཐིག་ལེས་བརྒྱན། །སྤྱི་གཙུག་མི་བསྐྱོད་སྤྲུལ་སྐུ་བརྟན། །དེ་ལྟར་བདག་མདུན་གསལ་བསྒོམས་ནས། །སྤྱན་དྲངས་མཆོད་དང་བཟླས་པར་བྱ། །གཏོར་མ་པཱུ་ཛ་ལ་སོགས་པས། །ནག་པོ་ཆེ་ལ་སྦྱིན་པར་བྱ། །མགོན་པོའི་ཐུགས་ཀའི་ཧཱུཾ་ལས་ནི། །སྲོག་གི་ཡི་གེ་གཡས་ནས་བསྐོར། །ཁོར་ཡུག་དག་གིས་བཟླ་བར་བྱ། །ོཾ་བཛྲ་མ་ཧཱ་ཀ་ལ་ཀྵིཾ་ཀྵེ་ཏྲ་བིགྷྣཱཾ་བི་ནཱ་ཡ་ཀ་ཧཱུཾ་ཧཱུཾ་ཕཊ། དེ་སྐད་ཅེས་ནི་རབ་བརྗོད་པས། །ནག་པོ་གྲུབ་པའི་རྟགས་རྣམས་འབྱུང ། །དཔལ་ནག་པོ་ཆེན་པོའི་རྒྱུད་ལས། བསྙེན་ཅིང་སྒྲུབ་པའི་ལེའུ་སྟེ་ 190b གཉིས་པའོ།། །།དེ་ནས་ཡང་དག་བཤད་བྱ་བ། །སངས་རྒྱས་བསྟན་པ་བཤིག་པ་དང ། །རྣལ་འབྱོར་བར་ཆད་བྱེད་པ་རྣམས། །ནག་པ་ཆེན་པོས་བསྒྲལ་འདོད་ན། །སྟེགས་བུ་གྲུ་བཞི་བྱས་ནས་ཀྱང ། །དྲག་པོ་ཨེ་ཡི་ནང་དུ་ནི། །ཕོ་མོ་རབས་ཆད་ཐོད་པའི་ནང ། །གཟུགས་ནི་སྦྲ་ཚིལ་དག་ལ་བྱ། །མིང་རུས་དག་ནི་བཀོད་ནས་ཀྱང ། །བསད་དང་ན་བ་སྐབས་དང་སྦྱར། །མགོན་པོའི་སྐུ་དང་དམ་རྫས་རྣམས། །ཁ་དང་ཁ་ལ་དགོད་པར་བྱ། །ཕག་ཐོད་ནང་དུ་ཐུན་རྫས་བླུགས། །རྟག་གཏོར་རྒྱུན་གཏོར་གཡས་དང་གཡོན། །གསང་སྔགས་འདི་ཡིས་གསད་པར་བྱ། །ོཾ་བཛྲ་མ་ཧཱ་ཀ་ལ་ཀཥིཾ་ཀྵེ་ཏྲ་བིགྷྣཱཾ་བི་ནཱ་ཡ་ཀ་ཧཱུཾ་ཧཱུཾ་ཕཊ། ཨོཾ་མ་ཧཱ་ཀཱ་ལཱ་ཡ་ཤཱ་ས་ན་ཨུ་པ་ཧ་རི་ཎི་ཨེ་ཥ་ཨ་པ་ཤྩི་མ་ཀ་ལོ་ཨ་ཡཾ་ཨི་དཾ་རཏྣ་ཏྲ་ཡ་ཨ་པ་ཀ་རི་ཎཾ་ཡ་དི་པྲ་ཏི་ཛྙཱ་སྨ་ར་སི་ཏ་དཱ་ཨི་དཾ་དུ་ཥྚཾ་ཁ་ཁ་ཁཱ་ཧི་ཁཱ་ཧི། མཱ་ར་མཱ་ར། གྲིཧྞ་གྲིཧྞ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དེ་ན་མེ་ཀེ་ན་དགྲ་བོ་མཱ་ར་ཡ་ཧཱུཾ་ཧཱུཾ་ཕཊ་ཕཊ། ཧཱུཾ་བི་ནཱ་ཡ་ཀ་བི་ལ་ས་ཏྲཾ་བི་ཧྲྀ་ཧཱུཾ་ཛ་སི་མ་བུ་བི་ནཱ་ཡ་ཀ་ཨ་མུ་ཀ་པྲི་སྲོག་ཧུར་ཐུམས་ཛ་མཱ་ར་ཡ་རྦད། དྲག་སྔགས་བཟླས་ཤིང་ཐུན་གྱིས་བྲབ། །ཞག་བདུན་བར་དུ་སྨྲ་མི་བྱ། །དེ་ལ་རྟགས་རྣམས་རྫོགས་པར་འགྱུར། །དཔལ་ནག་པོ་ཆེན་པོའི་རྒྱུད་ལས། ལུས་སྲོག་དབྱེ་བའི་ལེའུ་སྟེ་གསུམ་པའོ།། །།དེ་ནས་ཡང་དག་ 191a ༄#། །བཤད་བྱ་བ། །ལས་མཐའ་སྦྱིན་སྲེག་དག་གིས་བརྟུལ། །གྲུ་གསུམ་དབུས་སུ་གདུག་པའི་ཤིང ། །དབུས་སུ་ནག་པོ་འཁོར་བཅས་བསྐྱེད། །ལིངྒ་གཏོར་མ་དམ་རྫས་རྣམས། །ནག་པོའི་ཞལ་དུ་དབུལ་བར་བྱ། །སྔགས་འདི་བཟླས་ཤིང་བསྲེག་པར་བྱ། །གྣི་ཛྭ་ལ་རཾ་ལས་རྫོགས། །ཐལ་བ་རླུང་དམར་དག་ལ་བསྐུར། ། མུ་ཀ་ནི་མྱུར་དུ་རློག་།དཔལ་ནག་པོ་ཆེན་པོའི་རྒྱུད་ལས། མཐའ་བརྟུལ་བའི་ལེའུ་སྟེ་བཞི་པའོ།། །།དེ་ནས་ཡང་དག་བཤད་བྱ་བ། །དེ་ལྟར་བསྒྲུབས་ཀྱང་མ་གྲུབ་ན། །གཅིག་དང་གཉིས་ལ་ནན་ཏན་བསྐྱེད། །དེ་ལྟར་བྱས་ཀྱང་མ་གྲུབ་ན། །ས་གསུམ་ཁྲག་གསུམ་དུག་གསུམ་ལ། །ཁྲུ་གང་པ་ཡི་གཟུགས་ཀྱི་ཚད། །གྲུ་གསུམ་དབུས་སུ་ནག་པོའི་གཟུགས། །སྤྱི་ཚར་དག་ཏུ་ལྡིང་དུ་གཞུག་།བྲིས་སྐུ་དམ་རྫས་བླ་རྡོ་རྣམས། །རང་གི་གྲུ་གསུམ་མལ་གྱི་འོག་།དུག་དང་ཚེར་མས་སྟེང་ནས་དགབ། །ཐུན་རྫས་བྲབ་ཅིང་སྔགས་འདི་བཟླས། །ོཾ་བཛྲ་ཀྲོ་དྷ་ཧ་ཡ་གྲི་བ་ཧཱུཾ་ཧུ་ལུ་ཧུ་ལུ་ཧཱུཾ་ཕཊ། ཕཊ་ཧཱུཾ་ཧཱུཾ་ཀ་ཡ་ནཱ་བི་གྷཱཾ་བི་ཀྲ་ཀྵེ་ཀྵིཾ་ལ་ཀཱ་\?\་ཧཱ་མ་བཛྲ་ཨོཾ། །དེ་སྐད་བརྗོད་ཅིང་ཐུན་གྱིས་བྲབ། །དེ་ལ་རྟགས་རྣམས་རྫོགས་པ་དང ། །དེ་ནས་གསོ་བའི་ཆོ་ག་བྱ། །བྲིས་སྐུ་བླ་རྡོ་དམ་རྫས་རྣམས། །སྤོས་ 191b ཆུས་བཀྲུ་ཞིང་སྔགས་འདི་བཟླས། །ོཾ་བཛྲ་མ་ཧཱ་ཀ་ལ་ཀྵིཾ་ཀྵེ་ཏྲ་བིགྷྣཱི་བི་ནཱ་ཡ་ཀ་ཧཱུཾ་ཧཱུཾ་ཕཊ་སོས་སོས་སཝཱ་ཧཱ། དེ་སྐད་བྱས་ལ་གནས་སུ་ནི། །མགོན་པོའི་གཟུགས་ཀྱང་སྤོས་ཆུས་བཀྲུ། །གྲུ་གསུམ་དབུས་སུ་བླངས་བྱས་ལ། །དགྲ་བོའི་མིང་རུས་སྙིང་གར་གཞུག་།ཞག་བདུན་བསྒྲུབས་ལ་དགྲ་ལ་བསྐྱལ། ། མུ་ཀ་ནི་མྱུར་དུ་བརླག། །དཔལ་མགོན་བོ་ནག་པོའི་རྒྱུད་ལས། མ་གྲུབ་ན་སྤོགས་པའི་ཆོ་ག་དང་གསོ་བའི་ལེའུ་སྟེ་ལྔ་པའོ།། །།དེ་ནས་ཡང་དག་བཤད་བྱ་བ། །བྱ་ནག་འཕུར་ཞིང་ལྡིང་བ་དང ། །མོན་པ་ཨ་ཙ་ར་དང་ནི། །དགེ་བཤེས་བནྡྷེ་སློབ་དཔོན་དང ། །འོད་དང་སྒྲ་དང་ཁང་པ་འཚེག་།མགོན་པོའི་སྐུ་དག་དངོས་སུ་མཐོང ། །དགྲ་ལ་དམག་དྲངས་སེམས་ཅན་བསད། །མི་ནག་དག་ལ་སྙིང་སྟོབས་དང ། །མཛེ་བོ་དང་ནི་སྤྲང་པོ་དང ། །བྱ་ནག་ཐང་ལ་ལྷུང་བ་འབྱུང ། །དཔལ་མགོན་པོ་ནག་པོའི་རྒྱུད་ལས། རྟགས་ཀྱི་རིམ་བའི་ལེའུ་སྟེ་དྲུག་པའོ།། །།དེ་ནས་ཡང་དག་བཤད་བྱ་བ། །སེར་བ་དབབ་པའི་ལས་བྱ་ན། །མོན་ནམ་མཛེ་ཅན་ཐོད་པ་རུ། །འཁོར་ལོ་རྩིབས་བཞི་བྲིས་ནས་ཀྱང ། །རིགས་ལྔ་ཀླུ་ཡི་ས་བོན་དགོད། །རྩིབས་མཆན་སེར་སྲུང་མིང་རུས་དང ། །ཡུལ་དུ་ཕོབ་ཅེས་བྱ་བ་བྲི། །དེ་མཐར་འཁོར་ལོ་རྩིབས་དགུ་ལ། །དྲེགས་ 192a ༄#། །པའི་སྔགས་དག་བྲི་བར་བྱ། །རྒྱབ་ཏུ་གང་ཡིན་ཡུལ་མིང་དང ། །རླུང་གི་སྙིང་པོ་བྲི་བར་བྱ། །བདག་ཉིད་པདྨ་ཁྲོས་པར་བསྒོམ། །གསང་སྔགས་འདི་ཡིས་གནད་ལ་བོར། །ོཾ་བཛྲ་མ་ཧཱ་ཀཱ་ལ་ཀྵི་ཀྵེ་ཏྲ་བི་གྷྣཱཾ་བི་ནཱ་ཡ་ཀ་ཧཱུཾ་ཧཱུཾ་ཕཊ། ནཱ་ག་སྙིང་གཟེར། ཕུ་ཧུར་ཐུམས་ཛ་ཁྲོམ་ཤར་ཧྲིལ་བྷྱོ། །དེ་སྐད་ཅེས་ནི་རབ་བརྗོད་ལ། །ཉུངས་ཀར་ཉུངས་ནག་སྐེ་ཚེ་དང ། །ཁྲག་དང་དུག་གིས་ཐོད་པར་བྲབ། །ལོ་འབྲས་རླུང་ཁྱེར་རྟགས་བྱུང་ན། །དགྲ་ཡི་ཡུལ་དུ་དབབ་པར་བྱ། །གལ་ཏེ་འཇིག་རྟེན་ཕུང་བའོ་།དཔལ་མགོན་པོ་ནག་པོའི་རྒྱུད་ལས། སེར་བ་དབབ་པའི་ལེའུ་སྟེ་བདུན་པའོ།། །།དེ་ནས་ཡང་དག་ངེས་གསུངས་པ། །ེ་མ་འཁོར་འདུས་ངོ་མཚར་ཅན། །མ་འོངས་དམ་ཅན་སྒྲུབ་བྱེད་ན། །དམ་ཚིག་ལ་གནས་སྡོམ་པ་གཟུང ། །གཏོར་མ་དག་ལ་བརྩོན་པར་བྱ། །དམ་རྫས་བླ་རྡོ་ལུས་ལ་བསྲེལ། །ཞེས་གསུངས་པས་རྒྱལ་པོ་མིག་མི་བཟང་ལ་སོགས་པའི་འཁོར་རྣམས་ཡིད་རངས་ནས་ནག་པོ་ཆེན་པོས་བསྟན་པ་སྲུང་བར་ཁས་བླངས་ནས་མི་སྣང་བར་གྱུར་ཏོ། །དཔལ་ནག་པོ་ཆེན་པོའི་རྒྱུད་ལས། ལེའུ་བརྒྱད་པ་རྫོགས་སོ།། །།རྒྱ་གར་གྱི་མཁན་པོ་ཨ་མོ་གྷ་བཛྲ་དང ། བོད་ཀྱི་ལོ་ཙཱ་བ་ཕུར་བུ་ 192b འོད་ཀྱིས་བསྒྱུར་བའོ།། །། |