ཞུ་ཆེན་གྱི་ལོ་ཙྪ་བ་བནྡྷེ་ཆོས་གྲུབ་གྱིས་རྒྱའི་དཔེ་ལས་བསྒྱུར་ཏེ་གཏན་ལ་ཕབ་པ། འཕགས་པ་སྤྱན་རས་གཟིགས་དབང་ཕྱུག་གི་གསང་བའི་མཛོད་ཐོགས་པ་མེད་པའི་ཡིད་བཞིན་གྱི་འཁོར་ལོའི་སྙིང་པོ་ཞེས་བྱ་བའི་གཟུངས། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དྲང་སྲོང་གི་རི་ལ་བྱང་ཆུབ་སེམས་དཔའ་སེམས་དཔའ་ཆེན་པོའི་ཚོགས་ 455a ༄#། །མང་པོ་དང་ཐབས་ཅིག་ཏུ་བཞུགས་ཏེ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སྟན་ལས་ལངས་ཏེ་གོས་ཚགས་བཅོས་ནས་པུས་མོ་ས་ལ་བཙུགས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལ་པདྨ་དུ་མ་ཆེན་པོའི་ཚནྡན་གྱི་སྙིང་པོའི་འཁོར་ལོ་ཞེས་བགྱི་བའི་གཟུངས་ཆེན་མོ་སྨོན་ཅིང་བགྱི་བ་ཐམས་ཅད་མངོན་པར་འགྲུབ་པར་བགྱི་བ་མཆིས་ཏེ། གལ་ཏེ་དེ་བཞིན་གཤེགས་པའི་ཐུགས་རྗེ་ཆེན་པོས་བདག་གིས་བཤད་པར་གནང་ན། བདག་བཅོམ་ལྡན་འདས་ཀྱི་བྱིན་གྱི་རླབས་ཀྱི་མཐུས་སེམས་ཅན་ཐམས་ཅད་ལ་སྨན་པར་བགྱི་བའི་སླད་དུ་བཤད་པར་འཚལ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། གཟུངས་འདི་ནི། གཟི་བྱིན་ཆེན་པོའི་མཐུ་དང་ལྡན་པས་ཡིད་བཞིན་གྱི་ནོར་བུ་རིན་པོ་ཆེ་ཆེན་པོ་དང ། ཡིད་བཞིན་གྱི་ལྗོན་ཤིང་བཞིན་དུ་སྨོན་པ་ཐམས་ཅད་ཡོངས་སུ་རྫོགས་པར་བགྱིད་པས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་ལེགས་སོ་ལེགས་སོ་ཞེས་བསྔགས་པ་བརྗོད་ནས་ཁྱོད་ཀྱིས་སྙིང་བརྩེ་བའི་ 455b ཕྱིར་སེམས་ཅན་གྱི་ཆེད་དུ་འདི་ལྟར་ཞུགས་པས་ན། ཁྱོད་ཐོགས་པ་མེད་པའི་གཟུངས་འདི་བཤད་པར་གནང་བར་བྱའོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་དེ་ལྟར་བཀས་གནང་བ་དང ། ལངས་ནས་ཐལ་མོ་སྦྱར་ཏེ་ཕྱག་བྱས་ནས་སླར་སྟན་ལ་འདུག་སྟེ། སེམས་རྩེ་གཅིག་ཏུ་འཁོར་འདུས་པ་དག་ལ་རྣམ་པར་བལྟས་ནས་སྙིང་རྗེ་ཆེན་པོ་དང་ལྡན་པོའི་སེམས་ཀྱིས་སྔགས་འདི་སྨྲས་སོ། །ན་མོ་རཏྣ་ཏྲ་ཡཱ་ཡ། ན་མོ་ཨཱརྱ་བ་ལོ་ཀེ་ཏེ་ཤཝ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཏི་ཀཱ་ཡ། ཏདྱ་ཐཱ། ཨོཾ་ཙ་ཀྲ་པ་ཏི་ཙིནྟ་མ་ཎི་མ་ཧཱ་པདྨེ་རུ་རུ་ཏི་ཥྛ་ཏེ། བཛྲ་བ་ར། ཨཱ་ཀཱ་རཱ་ཡེ་ཧཱུཾ་སཝཱ་ཧཱ། འདི་ནི། ལུས་ཀྱི་སྔགས་སོ། །ོཾ་པདྨེ། ཙིནྟ་མ་ཎི། ཛ་ལ་མ་ཧཱ་བཛྲ་བྷ་ར་ཧཱུཾ། འདི་ནི། སྙིང་པོའི་སྔགས་སོ། །ོཾ་བྷ་ར་ཏ་པདྨེ་ཧཱུཾ། འདི་ནི། སྙིང་གི་སྙིང་པོའི་སྔགས་ལགས་སོ། །དེའི་ཚེ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཡིད་བཞིན་འཁོར་ལོའི་གཟུངས་འདི་སྨྲས་པ་དང ། ས་ཆེན་པོ་ཡང་རྣམ་པ་དྲུག་ཏུ་རབ་ཏུ་གཡོས་པར་གྱུར། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་ལ་སོགས་པའི་ཁང་ཁྱིམ་རྣམས་ཀྱང་རབ་ཏུ་གཡོས་པར་གྱུར། 456a ༄#། །བདུད་ཀྱི་རྒྱལ་པོ་དང ། བདུད་ཀྱི་འཁོར་རྣམས་ཀྱང་ཤིན་ཏུ་སྐྲག་ཅིང་འཇིགས་པ་ཆེན་པོ་སྐྱེས་པར་གྱུར། བདུད་ཀྱི་རྒྱལ་པོའི་གཞལ་མེད་ཁང་ཡང་རབ་ཏུ་འབར་བར་གྱུར། གནོད་སྦྱིན་དང ། འདྲེ་སྲིན་མ་རུངས་པ་གཞན་རྣམ་པ་སྣ་ཚོགས་ཀྱང་དངངས་ཤིང་སྐྲག་པས་གདོང་བཀབ་སྟེ་ས་ལ་འགྱེལ་བར་གྱུར། སེམས་ཅན་དམྱལ་བའི་སྒོ་ཐམས་ཅད་ཕྱེ་ནས་སྡུག་བསྔལ་བའི་སེམས་ཅན་རྣམས་རྣམ་པར་ཐར་ཏེ་ལྷའི་བདེ་བ་མཆོག་མྱོང་བར་གྱུར་ཏོ། །དེའི་ཚེ་ལྷ་རྣམས་ཀྱིས་ཀྱང་རིན་པོ་ཆེའི་མེ་ཏོག་དང ། རིན་པོ་ཆེའི་རྒྱན་གྱི་ཡོ་བྱད་རྣམ་པ་སྣ་ཚོགས་ཀྱི་ཆར་མངོན་པར་ཕབ་པར་གྱུར། ལྷའི་རོལ་མོ་རྣམས་ཀྱང་བར་སྣང་ལ་སྒྲ་སྣ་ཚོགས་ཕྱུང་སྟེ། དེ་བཞིན་གཤེགས་པ་ལ་མཆོད་པ་བྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཚངས་པའི་དབྱངས་ཀྱིས་ཚིགས་སུ་བཅད་དེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་ལ་རིགས་ཀྱི་བུ་ཁྱོད་སེམས་ཅན་ལ་སྙིང་བརྩེ་བའི་ཕྱིར་གཟུངས་འདི་བཤད་པ་ཉིད་ཀྱིས་སེམས་ཅན་རྣམས་ཀྱིས་ཕན་ཡོན་ཆེན་པོ་ཐོབ་པར་འགྱུར་བ་ལེགས་སོ་ལེགས་སོ་ཞེས་བསྔགས་པ་བརྗོད་དོ། ། 456b དེ་ནས་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། སེམས་ཅན་རྣམས་ཀྱི་ཕྱིར་རྫུ་འཕྲུལ་གྱི་རྒྱལ་པོ་ཆེན་པོའི་གཟུངས་འདིའི་ཆོ་ག་ཤོད་ཅིག་།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །རིགས་ཀྱི་བུའམ། རིགས་ཀྱི་བུ་མོའམ། དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། ཁྱེའུ་འམ། བུ་མོ་གཞོན་ནུ་གང་ལ་ལ་ཞིག་གིས་འདི་ཚེ་ཉིད་ལ་རྣམ་པར་སྨིན་པ་མངོན་དུ་མྱོང་བར་འཚལ་ན། གདུགས་མཚན་སེམས་རྩེ་གཅིག་ཏུ་ནན་ཏན་བརྩོན་འགྲུས་ཀྱིས་གཟུངས་འདི་མི་བསྐྱུད་པར་བགྱིས་ཏེ། གདུགས་དང ། དུས་མི་འདམ་པར་གཙང་ཡང་རུང་མི་གཙང་ཡང་རུང་སྟེ། རྟག་པར་ཁ་དོན་དུ་བཟླས་པར་གྱུར་ན། བགྱི་བ་རྣམས་དང་ལྡན་པར་འགྱུར་ལགས་སོ། །ཅི་ཡང་རུང་སྟེ་དོན་དུ་བགྱི་ཞིང་གཉེར་པ་ཞིག་མཆིས་ན། ལན་བརྒྱ་རྩ་བརྒྱད་བཟླས་བརྗོད་བགྱིས་ན་དོན་བརྒྱ་སྟོང་དུ་མ་འགྲུབ་པར་འགྱུར་བས། རིག་སྔགས་གཞན་གང་ཡིད་བཞིན་གྱི་འཁོར་ལོའི་གཟུངས་འདི་དང་སྒྲུན་པར་བཟོད་པ་གང་ཡང་མ་མཆིས་ལགས་སོ། །དེ་ 457a ༄#། །ཅིའི་སླད་དུ་ཞེ་ན། འདས་པ་དང ། ད་ལྟར་གྱི་ལས་ངན་པ་དང ། སྒྲིབ་པ་ལྕི་བ་རྣམས་རབ་ཏུ་འཇོམས་པས་སོ། །གང་ལ་ལ་ཞིག་གཟུངས་འདི་བཟླས་བརྗོད་བགྱིས་ན། མནར་མ་མཆིས་པའི་དམྱལ་བར་ལྟུང་བར་འགྱུར་བའི་རིགས་དག་ཀྱང་ཐར་པར་འགྱུར་ལ། མཚམས་མ་མཆིས་པ་ལྔ་ལ་སོགས་པའི་སྡིག་པ་རྣམས་ཀྱང་འབྱང་བར་འགྱུར་ན། ལས་ངན་པ་དང ། གདོན་བགེགས་དང ། བྲོ་ནད་གཞན་ཐམས་ཅད་ལྟ་སྨོས་ཀྱང་ཅི་འཚལ་ལགས། གང་དག་རིམས་ནད་ཉིན་གཅིག་པ་དང ། ཉིན་གཉིས་པ་དང ། ཉིན་གསུམ་པ་དང ། ཉིན་བཞི་པ་དང ། ཉིན་མཚན་དུ་བྲོ་འཚལ་བའམ། རླུང་དང ། མཁྲིས་པ་དང ། བད་ཀན་ལ་སོགས་པས་བྲོ་འཚལ་བ་དག་ལ་རིག་སྔགས་འདི་བཟླས་བརྗོད་བགྱིས་པར་གྱུར་ན། ཐམས་ཅད་འབྱང་ཞིང་སོས་པར་འགྱུར་ལགས་སོ། །གང་ཞིག་དུག་དང་བྱད་སྟེམས་ཀྱིས་ཕོག་པར་གྱུར་ཏམ། ལྷོག་པ་དང ། གཡན་པ་དང ། མཛེ་ནད་དང ། ཕོལ་མིག་གམ། རླུང་ནད་དམ། སྨྱོས་པའམ། ཀླད་པ་བྲོ་འཚལ་བའམ། རྣ་བ་དང ། སྣ་དང ། མཆུ་དང ། ལྕེ་དང ། མིད་པ་དང ། ཁ་དང ། གདོང་དང ། 457b གཙུག་དང ། ཀླད་རྒྱས་དང ། བྲང་དང ། རྩིབ་ལོགས་དང ། སྙིང་དང ། ལྟོ་བ་དང ། རྐེད་པ་དང ། རྒྱབ་དང ། རྐང་པ་དང ། ལག་པ་ལ་སོགས་པ་ཐམས་ཅད་བྲོ་འཚལ་བར་གྱུར་ན་ཡང་ཐམས་ཅད་སོས་པར་བགྱིད། ཇི་ཙམ་དུ་ལུས་ཀྱི་བྲོ་ནད་ཅི་མཆིས་པ་ཐམས་ཅད་ཀྱང་སོས་པར་བགྱིད་ལགས་སོ། །གནོད་སྦྱིན་དང ། སྲིན་པོ་དང ། བི་ནཱ་ཡ་ཀ་དང ། བདུད་སྡིག་ཅན་དང ། འདྲེ་གདོན་དག་གིས་ཀྱང་གནོད་པར་བགྱིད་པར་མི་འགྱུར་ལགས་སོ། །མཚོན་ཆ་དང ། དམག་ཚོགས་དང ། ཆབ་དང ། ཞུགས་དང ། རླུང་དང ། ཆར་པ་དང ། སེར་བ་མ་རུངས་པ་དག་གིས་ཀྱང་འཇིགས་པར་མི་འགྱུར་རོ། །དགྲ་དང ། ཆོམ་རྐུན་དང ། རྒྱལ་པོ་མ་རུངས་པ་དང ། རྐུན་པོ་མ་རུངས་པ་དག་གིས་ཀྱང་གནོད་པར་བགྱིད་པར་མི་འགྱུར་རོ། །གློ་བུར་དུ་འཆི་བའི་དུས་བྱེད་པར་མི་འགྱུར། རྨི་ལམ་ངན་པ་རྨི་བར་མི་འགྱུར། རྩངས་པ་དང ། སྦྲུལ་དང ། སྡིག་པ་དང ། སྲིན་བུ་གྱི་མེད་དང ། རྐང་མང་དང ། གཅན་གཟན་གདུག་པ་མ་རུངས་པ་དང ། སེངྒེ་དང ། སྟག་དང ། སྤྱང་ཀི་དག་གིས་ཀྱང་གནོད་པ་བགྱིད་པར་མི་འགྱུར་ལགས་སོ། །གཡུལ་ངོར་འཐབ་པའི་ཚེ་ཐམས་ཅད་དུ་རྒྱལ་བར་འགྱུར་ལགས་སོ། །གལ་ཏེ་བླའི་བགྱི་བ་ 458a ༄#། །དག་གིས་རྩོད་པར་གྱུར་ན་ཡང་འདུམ་པར་འགྱུར་ཏེ། གཟུངས་འདི་ལན་གཅིག་བཟླས་ན། གོང་དུ་བསྟན་པ་དེ་དག་ཐམས་ཅད་ཡིད་བཞིན་དུ་འགྲུབ་པར་འགྱུར་ལགས་སོ། །གང་ལ་ལ་ཞིག་གིས་གདུགས་རེ་གཟུངས་འདི་ལན་བརྒྱ་རྩ་བརྒྱད་བཟླས་བརྗོད་བགྱིས་ན། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་འདི་སྐད་དུ། རིགས་ཀྱི་བུ་ཁྱོད་མ་འཇིགས་ཤིག་།ཅི་ཞིག་སྨོན་ཅིང་ཅི་ཞིག་ཡོངས་སུ་གཉེར་བར་བྱེད། ཐམས་ཅད་ཁྱོད་ལ་སྦྱིན་ནོ་ཞེས་བསྒོ་བར་འགྱུར། དེ་བཞིན་གཤེགས་པ་ཚེ་དཔག་མེད་ཀྱང་སྐུ་མངོན་དུ་སྟོན་པར་འགྱུར། མདོ་ལས་གསུངས་པ་བཞིན་དུ་འཇིག་རྟེན་གྱི་ཁམས་བདེ་བ་ཅན་གྱི་བཀོད་པའི་དངོས་པོ་དག་ཀྱང་མཐོང་བར་འགྱུར། འཇིག་རྟེན་གྱི་ཁམས་བདེ་བ་ཅན་གྱི་བྱང་ཆུབ་སེམས་དཔའི་ཚོགས་རྣམས་ཀྱང་མཐོང་བར་འགྱུར། ཕྱོགས་བཅུའི་སངས་རྒྱས་ཐམས་ཅད་ཀྱང་མཐོང་བར་འགྱུར། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་གནས་རི་པོ་ཊ་ལ་ཡང་མཐོང་བར་འགྱུར། བདག་ཉིད་ཀྱི་ལུས་ཀྱང་ཡོངས་སུ་དག་པར་འགྱུར། བདག་ཉིད་ཀྱི་ལུས་ཀྱང་ཡོངས་ 458b སུ་དག་པར་འགྱུར་བས་རྟག་པར་རྒྱལ་པོ་དང ། བློན་པོ་རྣམས་ཀྱིས་བཀུར་ཞིང་རིམ་གྲོ་བགྱིད་པར་འགྱུར། སྐྱེ་བོ་མང་པོས་བྱམས་ཤིང་བཀུར་བར་འགྱུར། སྐྱེ་བ་ཐམས་ཅད་དུ་མའི་མངལ་དུ་མི་སྐྱེ་ཞིང་པདྨའི་སྟེང་དུ་སྐྱེ་བར་འགྱུར། བཀོད་པ་མཆོག་དང་ལྡན་པར་འགྱུར། སྐྱེ་བ་ཐམས་ཅད་དུ་སྔོན་གྱི་གནས་རྗེས་སུ་དྲན་པར་འགྱུར།་འདི་ནས་མངོན་པར་རྫོགས་པར་འཚང་རྒྱ་བའི་བར་དུ་ནམ་ཡང་ངན་འགྲོ་རྣམས་སུ་མི་ལྟུང་ཞིང་རྟག་པར་སངས་རྒྱས་ཀྱི་སྤྱན་སྔར་སྐྱེ་བར་འགྱུར་ལགས་ཏེ།་འདི་ནི། སྡིག་པའི་ལས་ཐམས་ཅད་རྣམ་པར་འཇོམས་པའི་གཟུངས་ཞེས་བགྱི་བ་ལགས་སོ། །སྡིག་པ་ཐམས་ཅད་རྣམ་པར་འཇོམས་པའི་གཟུངས་ཀྱི་ལེའུ་སྟེ་དང་པོའོ།། །།དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སེམས་ཅན་ལ་སྙིང་བརྩེ་བའི་ཕྱིར་ཡང་ཡིད་བཞིན་གྱི་འཁོར་ལོའི་སྙིང་པོའི་གཟུངས་གསང་བའི་ཆོ་ག་བསྟན་པ་སུ་ཡང་རུང་བ་གཅེས་པའི་དོན་གྲུབ་པ་ཞིག་མཆིས་ན། ཐམས་ཅད་རང་ཞི་བར་འགྱུར་ལགས་སོ། །དེ་ཡང་རྣམ་པ་གཉིས་ཏེ། འདི་ལྟ་སྟེ། འཇིག་རྟེན་གྱི་ནོར་དང ། འཇིག་རྟེན་ལས་འདས་པའི་ནོར་གང་ལགས་པའོ། །དེ་ལ་འཇིག་རྟེན་པའི་ནོར་ནི། གསེར་དང ། 459a ༄#། །དངུལ་ལ་སོགས་པའི་རིན་པོ་ཆེ་རྣམས་སོ། །འཇིག་རྟེན་ལས་འདས་པའི་ནོར་ནི། བསོད་ནམས་དང ། ཡེ་ཤེས་ཀྱི་བཀོད་པ་རྣམ་པ་གཉིས་དང་ལྡན་ཞིང ། ལུས་དང་སེམས་རབ་ཏུ་བདེ་བ་དང ། སྐྱེ་བོ་མང་པོས་བྱམས་ཤིང་བཀུར་བ་དང ། སྡུག་བསྔལ་བའི་སེམས་ཅན་ཐམས་ཅད་ཡོངས་སུ་སྐྱོབ་པ་དང ། བྱམས་པའི་སེམས་རྒྱས་ནས་བློ་དང་ལྡན་པ་རྣམས་བདེ་བ་སྩོལ་བ་དང ། འཚོ་བའི་ཡོ་བྱད་འཕེལ་ཞིང་མཐུ་སྟོབས་རྟག་པ་གང་ལགས་པའོ། །གསང་བའི་མཛོད་ཀྱི་སྤྱོད་ཡུལ་འདི་ནི། གཞན་དག་ལ་བརྗོད་པར་མི་བགྱིའོ། །གང་ལ་ལ་ཞིག་བདག་གི་ཡིད་བཞིན་གྱི་འཁོར་ལོའི་གཟུངས་ཀྱི་དངོས་གྲུབ་མཆོག་ཐོབ་པར་འཚལ་ན། སེམས་རྩེ་གཅིག་ཏུ་དུས་ཐམས་ཅད་དང ། གནས་ཐམས་ཅད་དུ་གཙང་ཡང་རུང་མི་གཙང་ཡང་རུང་སྟེ། རྟག་པར་བཟླས་བརྗོད་བགྱིས་ན། ནོངས་པ་ཅི་ཡང་མ་མཆིས་པས་བཟླས་བརྗོད་བགྱི་བའི་གྲངས་ཚང་བར་བགྱིས་ནས་གཞན་ཡང་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་མིང་དང ། ཡིད་བཞིན་གྱི་འཁོར་ལོའི་གཟུངས་ཀྱི་མིང་དང ། གང་ཟག་དེའི་མིང་ནས་བརྗོད་དེ། གལ་ 459b ཏེ་རྒྱལ་པོའམ། རྒྱལ་བུའམ། བཙུན་མོའམ། སྲས་སམ། རྒྱལ་པོའི་བུ་མོའམ། བྲམ་ཟེའམ། རྒྱལ་རིགས་སམ། དམངས་རིགས་སམ། གདོལ་པའམ། སྐྱེས་པའམ། བུད་མེད་དམ། ཁྱེའུ་འམ། བུ་མོ་གཞོན་ནུ་མའམ། མུ་སྟེགས་སྣ་ཚོགས་དག་ལ་སྟེན་ཅིང་མཛའ་བར་འཚལ་ན། དེ་དག་གི་མིང་ནས་བརྗོད་དེ་རྟག་པར་ཐོ་རངས་ཀྱི་ཚེ་བཟླས་པའི་གྲངས་ཚང་བར་བགྱིའོ། །གལ་ཏེ་དངོས་གྲུབ་མཆོག་གཉེར་ཞིང་རྒྱལ་པོ་ལ་བསྟེན་པར་འཚལ་ན། དགུང་ཞག་བདུན་གྱི་བར་དུ་རྟག་པར་ཐོ་རངས་ཀྱི་ཚེ་ལན་སྟོང་རྩ་བརྒྱད་བཟླས་ན་མཇལ་བར་འགྱུར་ལགས་སོ། །གལ་ཏེ་བཙུན་མོ་ལ་བསྟེན་པར་འཚལ་ན། ལན་དགུ་བརྒྱ་བཟླས་པར་བགྱིའོ། ། རྒྱལ་བུ་ལ་བསྟེན་པར་འཚལ་ན། ལན་བརྒྱད་བརྒྱ་བཟླས་པར་བགྱིའོ། །སླས་དག་མཐོང་བར་འཚལ་ན། ལན་བདུན་བརྒྱ་བཟླ་བར་བགྱིའོ། །རྒྱལ་པོའི་བུ་མོ་ལ་བསྟེན་པར་འཚལ་ན། ལན་དྲུག་བརྒྱ་བཟླ་བར་བགྱིའོ། །བྲམ་ཟེ་ལ་བསྟེན་པར་འཚལ་ན། ལན་ལྔ་བརྒྱ་བཟླ་བར་བགྱིའོ། །རྒྱལ་རིགས་ལ་བསྟེན་པར་འཚལ་ན། ལན་བཞི་བརྒྱ་བཟླ་བར་བགྱིའོ། །དམངས་རིགས་ལ་ནི། སུམ་བརྒྱའོ། །གདོལ་པ་ལ་ནི། ཉིས་བརྒྱའོ། །དགེ་སློང་དང་དགེ་སློང་མ་ལ་ནི། ལན་བརྒྱའོ། །དགེ་བསྙེན་ 460a ༄#། །དང་དགེ་བསྙེན་མ་ལ་ནི། ལན་དགུ་བཅུའོ། །ཁྱེའུ་གཞོན་ནུ་དང་བུ་མོ་གཞོན་དུ་མ་ལ་ནི། ལན་དྲུག་ཅུའོ། །འདི་ནི། བསྟེན་ཅིང་མཛའ་བར་བགྱི་བའི་ཆོ་ག་ཞེས་བགྱི་སྟེ། ནོར་དང ། བྲན་དང ། རྟ་དང ། བདེ་བའི་ཡོ་བྱད་ཐམས་ཅད་འབྱོར་བར་བགྱིད་ལགས་སོ། །གང་ལ་ལ་ཞིག་སྙིང་དུ་སྡུག་ཅིང་མཛའ་བ་དག་རིང་པོ་ན་མཆི་བ་དང་མཇལ་བར་འཚལ་ན། ཡིད་ལ་བསམ་པ་བཞིན་དུ་རླུང་བཞིན་དུ་མཆི་བར་འགྱུར་ལགས་སོ། །ཅི་བགྱིའོ་འཚལ་བཟླས་བརྗོད་བགྱི་བར་གྲངས་ཚང་བར་གྱུར་ན། དོན་དེ་དག་འགྲུབ་པར་འགྱུར་ལགས་སོ། །གལ་ཏེ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་མཐོང་བར་འཚལ་ན། ལན་སྟོང་རྩ་བརྒྱད་བཟླས་བརྗོད་བགྱིས་ན་དེའི་ལུས་ཡང་དག་པ་ཉིད་མཐོང་ཞིང་བསམ་པ་ཐམས་ཅད་རྫོགས་པར་བགྱིད་ལགས་སོ། །གལ་ཏེ་ལག་ན་རྡོ་རྗེ་མཐོང་བར་འཚལ་ན། བཟླས་བརྗོད་ལན་ཁྲི་བགྱིས་ན་ལུས་མངོན་སུམ་དུ་བསྟན་ནས་དེ་ལ་བརྩེ་ཞིང་ཕས་བུ་ལ་བྱམས་པ་བཞིན་དུ་སེམས་ཀྱིས་སྨོན་པ་རྣམས་སྩོལ་བར་འགྱུར་ལགས་སོ། །གལ་ཏེ་སངས་རྒྱས་དང ། འཁོར་འདུས་པ་མང་པོ་མཐོང་བར་འཚལ་ན། ལན་ཁྲི་ 460b སུམ་སྟོང་བཟླས་བརྗོད་བགྱིས་ན་དེ་བཞིན་དུ་མཐོང་བར་འགྱུར་ལགས་སོ། །གལ་ཏེ་གདུགས་མཚན་བདུན་གྱི་བར་དུ་རྒྱུན་ཆད་པ་མ་མཆིས་པར་བཟླས་བརྗོད་བགྱིས་ན། རིག་སྔགས་འཆད་རྣམས་མངོན་སུམ་དུ་སྟོན་ཅིང ། སོ་སོ་ནས་རང་རང་གི་སྔགས་ཀྱི་མཐུ་ཅི་མཆིས་པ་གང་ཟག་དེ་ལ་སྩལ་ནས་ཡོངས་སུ་སྲུང་བར་བགྱིད་དེ། ཞག་བདུན་པ་ལ་ནི། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་དབང་པོ་དང ། བརྒྱ་བྱིན་ལྷའི་དབང་པོ་རྣམས་འཁོར་དང་བཅས་ཏེ་མཆིས་ནས་དེའི་སྨོན་པ་རྣམས་སྩོལ་བ་བགྱིད་དོ། །བཟླས་བརྗོད་ཀྱི་ཆོ་ག་གོང་དུ་བསྟན་པ་བཞིན་དུ་བགྱིས་ན། སྨོན་པ་རྣམས་ཡོངས་སུ་རྫོགས་པར་བགྱིད་དེ། འདི་ནི།་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་གསང་བའི་མཛོད་ལས། ཐམས་ཅད་བྱམས་ཤིང་མོས་པར་འགྱུར་བའི་ཆོ་ག་ཞེས་བགྱི་བ་ལགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་གསང་བའི་མཛོད་ལས། ཐམས་ཅད་བྱམས་ཤིང་མོས་པར་འགྱུར་བའི་ཆོ་གའི་ལེའུ་སྟེ་གཉིས་པའོ།། །།དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གཞན་ཡང་སེམས་ཅན་རྣམས་ལ་སྙིང་བརྩེ་བའི་ཕྱིར་གང་གིས་མཐོང་ 461a ༄#། །བདག་བྱམས་ཤིང་དགའ་བར་འགྱུར་བའི་སྨན་སྦྱར་ནས་ལུས་ལ་ཐོགས་ཏེ་འགྲོ་ན་མཆོག་ཏུ་མངོན་པར་འགྲུབ་ཅིང་བསམ་པ་ཐམས་ཅད་ཡིད་ཤིན་ཏུ་འགྲུབ་པའི་ཆོ་ག་བསྟན་པ། གིའུ་ཝཾ་དང ། ཙནྡན་དཀར་པོ་དང ། གུར་གུམ་དང ། ག་བུར་དང ། གླ་རྩི་དང ། ཛཱ་ཏི་ཕ་ལ་དང ། ལི་ཤི་དང ། ཀོ་ཀོ་ལ་དང ། པདྨ་དང ། ུཏྤལ་སྔོན་པོ་དང ། གསེར་གྱི་གྱིམ་པག་རྣམས་ཆ་མཉམ་པར་བགྱིས་ཏེ་བརྡུངས་ནས་སྦྲང་རྩི་དཀར་པོས་སྦྲུས་ཏེ་སྔ་མའི་སྔགས་སྟོང་རྩ་བརྒྱད་བཟླས་ནས་ལུས་ལ་བདུག་གམ། གོས་ལ་བདུག་གམ། མིག་ལ་བསྐུས་སམ། དཔྲལ་བ་ལ་ཐིག་ལེ་བགྱིས་སམ། ལུས་ལ་བྱུགས་ན། རྒྱལ་པོ་དང ། བཙུན་མོ་དང ། བློན་པོ་རྣམས་དང ། བྲན་རྣམས་དང ། སྐྱེས་པ་དང ། བུད་མེད་ལ་སོགས་པ་བྱམས་ཤིང་དགའ་བ་དང ། ལམ་གྱི་ཆོས་ལ་བཀུར་ཞིང་བྱང་ཆུབ་ཏུ་སེམས་བསྐྱེད་ནས་ལུས་ཀྱི་ཞོ་ཤ་དང ། ནོར་རྫས་དག་ཕངས་པ་མ་མཆིས་པར་གཏོར་རིམ་གྲོ་བགྱིད་པར་འགྱུར་ཏེ། བརྗོད་ཀྱིས་མི་ལང་ལགས་སོ། །ཇི་ལྟར་ཉི་ཟླ་ཐམས་ཅད་ཀྱིས་མཐོང་བར་མོས་པ་བཞིན་དུ་སྒྲུབ་པའི་དོན་རྣམས་འབྱོར་ཅང་འགྲུབ་པར་འགྱུར་ལགས་སོ། །གང་ལ་ལ་ཞིག་སྨན་ 461b འདི་ཐོགས་པར་འགྱུར་ན། ཁ་ན་མ་ཐོ་བའི་སྒྲིབ་པ་རྣམས་ཞུ་བྱང་ནས་བགེགས་ཐམས་ཅད་ལས་ཐར་པར་འགྱུར་ལགས་སོ། །རྒྱལ་པོའི་མཐུས་ནན་གྱིས་འཕྲོག་པ་དང ། ཆབ་ཀྱིས་དེད་པ་དང ། ཞུགས་ཀྱིས་ཚིག་པ་དང ། མཚོན་ཆ་རྣམ་པ་སྣ་ཚོགས་དང ། དུག་དང ། འཆིང་བའི་ཉོན་མོངས་པ་ཐམས་ཅད་ལས་ཐར་པར་འགྱུར་ལགས་སོ། །བསམ་པ་ཐག་པ་ནས་སྨན་ཨ་ཀ་ཏ་སྦྱོར་བའི་ཆོ་ག་འདི་བགྱིས་ན། ཐམས་ཅད་ཀྱིས་བྱམས་ཤིང་དགའ་བར་འགྱུར་ལགས་སོ། །སྨན་འདིས་བདུགས་པས་བབ་ཆོལ་དུ་གཡར་ཁར་སྩལ་བར་བགྱི་སྟེ། འདི་ནི། སྤྱན་རས་གཟིགས་དབང་ཕྱུག་གིས་གཞན་དག་ལ་བྱམས་ཤིང་དགའ་བར་འགྱུར་བའི་སྨན་གྱི་ཆོ་ག་ཞེས་བགྱི་ལགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་ཡིད་བཞིན་གྱི་འཁོར་ལོའི་གཟུངས་ལས། གཞན་དག་ལ་བྱམས་ཤིང་དགའ་བར་འགྱུར་བའི་སྨན་ཨ་ཀ་ཏ་སྦྱོར་བའི་ཆོ་གའི་ལེའུ་སྟེ་གསུམ་པའོ།། །།བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་གཞན་ཡང་སེམས་ཅན་རྣམས་ལ་སྙིང་བརྩེ་བའི་ཕྱིར་ཐམས་ཅད་ཀྱི་ཡིད་དུ་འོང་ཞིང་དགའ་བར་འགྱུར་བའི་སྨན་ཁར་མུར་བའི་ཆོ་ག་བསྟན་ 462a ༄#། །པ།་ག་པུར་དང ། གླ་རྩི་དང ། གུར་གུམ་ཞིབ་མོར་བཏགས་ཏེ་གིའུ་ཝ་ང་དང་བསྲེས་ན། གོང་དུ་བསྟན་པའི་སྔགས་རྣམས་པ་གསུམ་རེ་རེ་ཡང་ལན་སྟོང་རྩ་བརྒྱད་བཟླས་ཏེ་ཆབ་གཙང་མས་སྦྱར་ནས་རིལ་བུ་ཆེ་ཆུང་ཤིང་མགོ་སྟོང་གི་འབྲས་བུ་ཙམ་དུ་བགྱིས་ཏེ། ཡང་སྔགས་གོང་མ་གསུམ་ལན་བརྒྱ་རྩ་བརྒྱད་བཟླས་ནས་གྲིབ་མ་ལ་བསྐམས་ཏེ། གདུགས་དང ། རླུང་གིས་མ་ཕོག་པར་བགྱིས་ནས་རིལ་བུ་རེ་རེ་ལ་ཡང་གོང་མའི་སྔགས་རྣམ་པ་གསུམ་ལན་བདུན་བདུན་གྱིས་བཏབ་སྟེ། རིལ་བུ་གཅིག་ཁར་མུར་ནས་རྒྱལ་པོའམ། བློན་པོ་ཉེ་ཕན་ནམ། སྐྱེ་བོའི་ཚོགས་མང་པོ་དག་ལ་གཏམ་བགྱིས་པར་གྱུར་ན། བཀུར་སྟི་བགྱིས་ནས་ནོར་དང ། རིན་པོ་ཆེ་དག་འཕངས་པ་མ་མཆིས་པར་ཅི་དང་ཅི་འཚལ་བ་ཐམས་ཅད་སྩོལ་པར་འགྱུར། ཚིག་ཏུ་སྨྲས་སོ་འཚལ་ཐམས་ཅད་ཀྱིས་ཡིད་ཆེས་ཤིང་ཉན་པར་འགྱུར། བསྒོ་བ་ཞིག་མཆིས་ན་ཡང་ཐམས་ཅད་ཉན་ཅིང་བགྱིད་པར་འགྱུར་ལགས་སོ། །ཁར་སྨན་མུར་བའི་ཆེ་རྟག་པར་སྔགས་བཟླ་འཚལ་ཏེ། སྤྱན་རས་གཟིགས་དབང་ཕྱུག་གིས་སྨོན་པ་རྣམས་འགྲུབ་པར་བགྱིད་ལགས་སོ། །བྱང་ཆུབ་སེམས་ 462b དཔའ་སྤྱན་རས་གཟིགས་དབང་ཕྱུག་གི་གཟུགས་ཀྱི་མདུན་དུ་སྤོས་ཆབ་ཀྱིས་དཀྱིལ་འཁོར་གྲུ་བཞི་པ་ཆུ་ཞེང་ཁྲུ་བཞིས་འཁོར་བ་ཞིག་བགྱིས་ཏེ། དཀྱིལ་འཁོར་གྱི་ནང་དུ་རྩི་ཤིང་གི་མེ་ཏོག་རྣམ་པ་སྣ་ཚོགས་ཅི་འབྱོར་བ་བཀྲམ་ཞིང ། ཙནྡན་དཀར་པོ་བསྲེགས་ནས་སྨན་གྱི་རིལ་བུ་སྔ་མ་བླངས་ཏེ་དཀྱིལ་འཁོར་གྱི་ནང་དུ་བཞག་ནས་རྒྱལ་མཚན་བཞི་གཟུགས་ཤིང ། ཡོལ་བ་དང ། བླ་རེ་དཀར་པོ་བྲིས་ཏེ་དཀྱིལ་འཁོར་གྱི་སྟེང་དུ་པདྨ་དཀར་པོ་བཞི་ཡང་བྲིས་ཏེ། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་མཆོད་པ་བགྱིས་ལགས་པའི་རྗེས་ལ་སྙིང་པོའི་སྔགས་དང ། སྙིང་གི་སྙིང་པོའི་སྔགས་ལན་བརྒྱ་རྩ་བརྒྱད་བཟླ་བར་བགྱིའོ། །ལུས་ཀྱི་སྔགས་ཀྱང་ལན་བརྒྱ་རྩ་བརྒྱད་བཟླས་ནས་ཙནན་དཀར་པོ་བསྲེགས་ཏེ་མོ་ཏོག་གཏོར་ན། དེའི་ཚེ་སྨོན་པ་ཐམས་ཅད་ཀྱང་འགྲུབ་པར་འགྱུར་ལ། དཀྱིལ་འཁོར་གྱི་ནང་ན་མཆིས་པའི་སྨན་བླངས་ཏེ་ལུས་ལ་བཏགས་ན། ཕྱོགས་གང་དུ་མཆི་ཡང་རུང་སྟེ། ཅི་དང་ཅི་གཉེར་བ་ཐམས་ཅད་འགྲུབ་པར་འགྱུར། ཚིག་ཏུ་སྨྲས་པ་ཐམས་ཅད་ཀྱིས་ཡིད་ཆེས་ཤིང་ཉན་པར་འགྱུར། དོན་དུ་སྒྲུབ་པ་ཐམས་ཅད་འགྲུབ་པར་འགྱུར་ལགས་སོ། །སེམས་རྩེ་གཅིག་ 463a ༄#། །ཏུ་མ་བགྱིས་པ་ནི། མ་གཏོགས་ཏེ། འདི་ནི། ཡིད་བཞིན་གྱི་འཁོར་ལོ་ལས་སྨན་མུར་བའི་ཆོ་ག་ཞེས་བགྱི་ལགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་ཡིད་བཞིན་གྱི་འཁོར་ལོ་ལས། སྨན་མུར་བའི་ཆོ་གའི་ལེའུ་སྟེ་བཞི་པའོ།། །།དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་གཞན་ཡང་སེམས་ཅན་རྣམས་ལ་སྙིང་བརྩེ་བའི་ཕྱིར་སྐྱེ་བོ་མང་པོ་ཐམས་ཅད་ཀྱིས་མཐོང་ན་བྱམས་ཤིང་དགའ་བར་འགྱུར་བའི་ཆོ་གའི་སྟན་པ། སྨན་ཤི་རི་ཀ་ཀུ་ཤུ་དང ། པདྨ་ལེ་བརྒན་དང ། པདྨ་སྔོན་པོ་དང ། རྒྱ་མཚོའི་ཆབ་ཀྱི་དབུ་བ་དང ། ཉ་རྐུན་མ་ནག་པོའི་རུས་པ་དང ། བ་བླ་དང ། ཀ་ཀུན་བན་སྱ་དང ། གི་ཧང་དང ། གུར་གུམ་དང ། རྒྱའི་གུར་གུམ་དང ། པི་པི་ལིང་དང ། ན་ལེ་ཤམ་དང ། བཅའ་སྒ་རྣམས་ཆ་མཉམ་པར་བགྱིས་ཏེ་བརྡུངས་ནས་ཞིབ་མོར་བཙགས་ཏེ་སྨན་སྔ་མ་སྲང་གཅིག་མཆིས་ན། གླ་རྩི་དང ། ག་པུར་སྲང་ཕྱེད་སྩལ་ནས་ཞིབ་ཏུ་བདར་ཏེ་སྤྱན་རས་གཟིགས་དབང་ཕྱུག་གི་གཟུགས་ཀྱི་མདུན་དུ་སྦྱར་བ་བགྱིས་ལགས་པས། སྔ་མའི་སྔགས་རྣམ་པ་གསུམ་རེ་རེ་ཡང་ལན་སྟོང་རྩ་བརྒྱད་ 463b བཟླས་ཏེ། སེམས་ཅན་ཐམས་ཅད་ལ་བྱམས་པ་དང ། སྙིང་བརྩེ་བའི་སེམས་བསྐྱེད་ནས་སྨན་དེ་དག་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་རྐང་པའི་དྲུང་དུ་གཞག་པར་བགྱིའོ། །དེའི་རྗེས་ལ་རེག་པར་བགྱིས་ནས་ཁར་བའི་ཐུར་མས་བླངས་ཏེ་མིག་ཏུ་སྩལ་ན། མིག་དང ། ཀླད་པ་བྲོ་འཚལ་བ་དང ། ལིང་ཏོག་གིས་བསྒྲིབས་པ་ཐམས་ཅད་དང ། སྤྲིན་དཀར་དང ། མཆི་མ་འཛག་པ་དང ། སྤྲིན་དམར་དང ། ལོང་ནད་དང ། ཀླད་པ་བྲོ་འཚལ་བ་ཐམས་ཅད་སོས་པར་འགྱུར་ལགས་སོ། །རྟག་པར་གདུགས་རེ་བཞིན་དུ་སྨན་འདི་མིག་ཏུ་སྩལ་ན། མིག་ནད་ཐམས་ཅད་འབྱང་བར་འགྱུར་ལགས་སོ། །གདུགས་གཉིས་སྩལ་ན། ལུས་ཀྱི་བྲོ་ནད་ཐམས་ཅད་འབྱང་བར་འགྱུར་རོ། །གདུགས་གསུམ་སྩལ་ན། སྨྱོ་བའི་བྲོ་ནད་རྣམ་པ་བརྒྱད་ཅུ་རྩ་བཞི་འབྱང་བར་འགྱུར་ལགས་སོ། །གདུགས་བཞི་སྩལ་ན། ཕྱི་ནང་གི་སྒྲིབ་པ་ཐམས་ཅད་ཀྱིས་སྒྲིབ་པར་མི་འགྱུར་རོ། །གདུགས་ལྔ་སྩལ་ན། དགྲ་དང་འཐབ་པ་ན་ཐམས་ཅད་དུ་རྒྱལ་བར་འགྱུར་རོ། །གདུགས་དྲུག་སྩལ་ན། སྡིག་པའི་ལས་དང ། ཉོན་མོངས་པ་དང ། ལྕི་བ་བཞི་དང ། མཚམས་མ་མཆིས་པ་ལྔ་དང ། རྨི་ལམ་ངན་པ་དང ། 464a ༄#། །བྱད་སྟེམས་ཐམས་ཅད་རྣམ་པར་འཇོམས་ཤིང ། ངན་འགྲོ་རྣམས་སུ་ནམ་ཡང་ལྟུང་བར་མི་འགྱུར་ལགས་སོ། །གདུགས་བདུན་སྩལ་ན། རྒྱལ་པོ་དང ། བློན་པོ་ཆེན་པོ་དང ། སྐྱེ་བོ་མང་པོ་ཐམས་ཅད་རྗེས་སུ་འབྲང་ཞིང་བཀུར་སྟི་བགྱིས་ནས་ཡིད་ཆེས་ཤིང་བྱམས་པར་འགྱུར་རོ། ། ཞག་བདུན་ཕྲག་གཉིས་ཀྱི་བར་དུ་སྩལ་ན། རང་དབང་ཆེན་པོ་ཐོབ་པར་འགྱུར་རོ། །ཞག་བདུན་ཕྲག་གསུམ་གྱི་བར་དུ་སྩལ་ན། རྒྱལ་པོ་དང ། བློན་པོ་ཆེན་པོ་དག་མཛའ་བར་འགྱུར་རོ། །ཞག་བདུན་ཕྲག་བཞིའི་བར་དུ་སྩལ་ན། གནོད་སྦྱིན་འཁོར་དང་བཅས་པ་རྣམས་རིམ་གྲོ་བགྱིད་བར་འགྱུར་རོ། །ཞག་བདུན་ཕྲག་ལྔའི་བར་དུ་སྩལ་ན། ལྷ་མ་ཡིན་དང ། ཀླུ་དང ། གནོད་སྦྱིན་དང ། །སྲིན་པོ་རྣམས་གཡོག་བགྱིད་པར་འགྱུར་རོ། །ཞག་བདུན་ཕྲག་དྲུག་གི་བར་དུ་སྩལ་ན། ནམ་མཁའ་ལྡིང་དང ། སྲིན་པོའི་མཐུ་ཆེན་པོ་དང་ལྡན་པ་རྣམས་ཀྱིས་མངོན་པར་རྫོགས་པར་འཚང་རྒྱ་བའི་བར་དུ་ཡོངས་སུ་སྲུང་བར་བགྱིད་པས། བྱད་སྟེམས་དང ། འདྲེ་གདོན་རྣམས་ཀྱིས་ཚུགས་པར་མི་འགྱུར་རོ། །ཞག་བདུན་ཕྲག་བདུན་གྱི་བར་དུ་སྩལ་ན། 464b ལྷ་ནག་པོ་ཆེན་པོ་དང ། འདྲེ་སྲིན་བརྒྱད་རྣམས་ཉེ་བར་ལྷགས་ནས་རྗེས་སུ་འབྲང་ཞིང་གཡོག་བགྱིད་པར་འགྱུར་རོ། །ཞག་བདུན་ཕྲག་བརྒྱད་ཀྱི་བར་དུ་སྩལ་ན། ཨནྟ་ད་ནར་འགྱུར་རོ། །ཞག་བདུན་ཕྲག་དགུའི་བར་དུ་སྩལ་ན། གཏེར་ཐམས་ཅད་མཐོང་བར་འགྱུར་རོ། །ཞག་བདུན་ཕྲག་བཅུའི་བར་དུ་སྩལ་ན། ལྷ་མ་ཡིན་གྱི་ཁང་ཁྱིམ་གྱི་སྒོ་རང་བྱེ་ནས། དེ་ན་ཅི་མཆིས་པ་ཐམས་ཅད་མཐོང་བར་འགྱུར་རོ། །འབྱུང་ཞིང་འཇུག་པ་ལ་ཐོགས་པ་མ་མཆིས་པར་འགྱུར་རོ། །ཞག་བདུན་ཕྲག་བཅུ་གཅིག་གི་བར་དུ་སྩལ་ན། སྨན་ཞུགས་ལྟར་འབར་བ་ཇི་སྙེད་པ་ཐམས་ཅད་མངོན་སུམ་དུ་དགའ་བར་འགྱུར་བས། ཚེ་རིང་བར་འགྱུར་འཚལ་ལམ། མཐུ་ཆེན་པོ་དང་ལྡན་པར་འཚལ་ན་ཡང་དེ་བཞིན་དུ་འགྲུབ་པར་འགྱུར་རོ། །ཞག་བདུན་ཕྲག་བཅུ་གཉིས་ཀྱི་བར་དུ་སྩལ་ན། དྲང་སྲོང་མང་པོ་རྣམས་ཀྱིས་རིན་པོ་ཆེའི་གཏེར་རྣམས་ཕྱེ་སྟེ། ཉེ་བར་བསྟན་ནས་ཡིད་བཞིན་དུ་ལོངས་སྤྱོད་པར་འགྱུར་རོ། །ཞག་བདུན་ཕྲག་བཅུ་གསུམ་གྱི་བར་དུ་སྩལ་ན། ཀླུའི་གཞལ་མེད་ཁང་རྣམས་སྒོ་རང་བྱེ་ནས། ལྟ་བ་དག་ལ་ཐོགས་པ་མ་མཆིས་པར་འགྱུར་རོ། །ཞག་བདུན་ཕྲག་བཅུ་བཞིའི་བར་དུ་སྩལ་ན། འདོད་པའི་ཁམས་ཀྱི་ལྷ་རྣམས་ཀྱི་གཞལ་མེད་ 465a ༄#། །ཁང་དག་སྒོ་རང་བྱེ་བར་འགྱུར་བས་ཐམས་ཅད་མཐོང་བར་འགྱུར་རོ། །ཞག་བདུན་ཕྲག་བཅོ་ལྔའི་བར་དུ་སྩལ་ན། མཚན་མོ་མུན་ནག་གི་ནང་དུ་ཡང་བདུགས་བཞིན་དུ་གསལ་བར་འགྱུར་རོ། །ཞག་བདུན་ཕྲག་བཅུ་དྲུག་གི་བར་དུ་སྩལ་ན། སའི་འོག་གི་རྡོ་རྗེའི་ས་གཞི་དང ། རླུང་གི་དཀྱིལ་འཁོར་ཡང་མཐོང་བར་འགྱུར་རོ། །ཞག་བདུན་ཕྲག་བཅུ་བདུན་གྱི་བར་དུ་སྩལ་ན། གླིང་བཞི་པོ་རྣམས་སུ་སེམས་ཅན་དམྱལ་བའི་སེམས་ཅན་ཇི་སྙེད་མཆིས་པ་ཡང་ཐམས་ཅད་མཐོང་བར་འགྱུར་རོ། །དེའི་མཐུའི་དབང་གིས་སྡུག་བསྔལ་མྱོང་བའི་སེམས་ཅན་དེ་དག་ཐམས་ཅད་ཀྱང་ཐར་བར་འགྱུར་རོ། །ཞག་བདུན་ཕྲག་བཅོ་བརྒྱད་ཀྱི་བར་དུ་སྩལ་ན། གང་དག་དེ་ཉི་མ་ལྟ་བུའི་མཐུ་ཐོབ་པར་འགྱུར་རོ། །ཞག་བདུན་ཕྲག་བཅུ་དགུའི་བར་དུ་སྩལ་ན། །ལག་ན་རྡོ་རྗེའི་ལུས་ཡང་དག་པར་ཉིད་མཐོང་བར་འགྱུར་བས་སྨོན་པ་རྣམས་ཡོངས་སུ་རྫོགས་པར་བགྱིད་དོ། །ཞག་བདུན་ཕྲག་ཉི་ཤུའི་བར་དུ་སྩལ་ན། སྤྱན་རས་གཟིགས་དབང་ཕྱུག་སྙིང་རྗེ་ཆེན་པོ་དང་ལྡན་པ་མཐོང་བར་འགྱུར་བས་སྨོན་པ་ཐམས་ཅད་ཡོངས་སུ་རྫོགས་པར་བགྱིད་དོ། །ཞག་བདུན་ཕྲག་ཉི་ཤུ་རྩ་གཅིག་ 465b གི་བར་དུ་སྩལ་ན། རྫུ་འཕྲུལ་གྱི་རྐང་པ་ཐོབ་པར་འགྱུར། གཟུགས་ཀྱི་ཁམས་ཀྱི་ལྷ་རྣམས་ཀྱི་གཞལ་མེད་ཁང་གི་སྒོ་རྣམས་རང་བྱེ་ནས་ཐམས་ཅད་མཐོང་བར་འགྱུར་རོ། །ཕྱོགས་བཅུའི་སངས་རྒྱས་དང ། བྱང་ཆུབ་སེམས་དཔའ་རྣམས་དང ། སངས་རྒྱས་ཀྱི་ཞིང་ཡོངས་སུ་དག་པ་རྣམས་ཀྱང་མཐོང་བར་འགྱུར་རོ། ། ལོ་གཅིག་གི་བར་དུ་སྩལ་ན། ཡོངས་སུ་དག་པའི་མིག་ལྔ་འཐོབ་པར་འགྱུར་ལགས་སོ། །གང་ལ་ལ་ཞིག་སྤྱོད་པའི་ཆོ་ག་འདི་མངོན་པར་འགྲུབ་པར་འཚལ་པ་གང་ལགས་པ་དེས་བསྟན་པ་འདི་ལ་ཤིན་ཏུ་མངོན་པར་ཡིད་ཆེས་པར་བགྱི་ཞིང ། སེམས་ཅན་ལ་སྙིང་བརྩེ་བར་བགྱི་སྟེ། ཐེ་ཚོམ་མ་མཆིས་ན། གོང་དུ་བསྟན་པ་བཞིན་དུ་ཐམས་ཅད་འགྲུབ་པར་འགྱུར་ལགས་སོ། །གལ་ཏེ་ཐེ་ཚོམ་འཚལ་བར་འགྱུར་ན། །ཆོ་ག་རྣམས་འགྲུབ་པར་དཀའ་སྟེ། འདི་ནི། སྤྱན་རས་གཟིགས་དབང་ཕྱུག་གི་ཙནྡན་ནོར་བུའི་འཁོར་ལོ་ལས། མིག་སྨན་གྱི་ཆོ་ག་ཞེས་བགྱི་བ་ལགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་སེམས་ཀྱི་འཁོར་ལོའི་ལས། མིག་སྨན་གྱི་ལེའུ་སྟེ་ལྔ་པའོ།། །།དེའི་ཚེ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་གཞན་ 466a ༄#། །ཡང་སེམས་ཅན་རྣམས་ལ་སྙིང་བརྩེ་བའི་ཕྱིར་སྒྲུབ་པའི་དོན་ཐམས་ཅད་གྲུབ་པར་བྱེད་པ་ཉོན་མོངས་པ་དང ། ཁ་ན་མ་ཐོ་བའི་སྒྲིབ་པ་དང ། ལས་ངན་པ་ཐམས་ཅད་རྣམ་པར་འཇོམས་པ། དགྲ་ཐམས་ཅད་འདུལ་བ། བི་ནཱ་ཡ་ཀ་ཁྲོ་བའི་སེམས་ཉེ་བར་ཞི་ནས་སྐྱེ་བོ་མང་པོ་ལ་གནོད་པ་མི་བྱེད་ཅིང ། བྱམས་པའི་སེམས་སྐྱེ་བར་འགྱུར་བ། སྦྱིན་སྲེག་ཧོཾ་བཀྲ་ཤིས་ཀྱི་ཆོ་ག་བསྟན་པ། དོགས་བརྐོས་ཏེ་ཞུགས་ཐབ་ཁྲུ་གང་གྲུ་བཞི་པ་ཞིག་བགྱིས་ནས་མེ་ཏོག་མན་ལེན་ཙ་སུ་དང ། ཡུངས་ཀར་དང ། ཞོ་དང ། སྦྲང་རྩི་དང ། ཆབ་མར་ཆ་མཉམ་པར་བསྲེས་ཏེ་ཨ་ག་རུ་དང ། ཙནྡན་དང ། ཤིང་དྲི་ཅན་སོ་སོ་ནས་སྲིད་དུ་སོར་བཅུ་གཉིས། ཞེང་དུ་སོར་གཅིག་མཆིས་པ་གཏུབས་ཏེ་ཐབ་ཏུ་བསྲེག་པར་བགྱི་ཞིང ། སྨན་ཉུང་ཟད་ཅིག་བླངས་ནས་ལན་གཅིག་སྔགས་བཏབ་སྟེ། ཞུགས་ཀྱི་ནང་དུ་དོར་བ་ལན་སྟོང་རྩ་བརྒྱད་ཚང་བར་བགྱིས་ན། ལས་ཀྱི་སྒྲིབ་པ་ཐམས་ཅད་རྣམ་པར་འཇོམས་ཤིང ། ཚེ་ལོ་བརྒྱ་ཉི་ཤུ་ཐུབ་བར་འགྱུར་ལགས་སོ། །ཞག་བདུན་གྱི་བར་དུ་རྒྱུན་ཆད་པ་མ་མཆིས་པར་ཧོཾ་གྱི་ཆོ་ག་བཞིན་བགྱིས་ན། ཚེ་ལོ་སྟོང་ཐུབ་ཅིང་ལུས་ཀྱང་ཡོངས་སུ་དག་པར་ 466b འགྱུར་རོ། །ཞག་བདུན་ཕྲག་གཉིས་ཀྱི་བར་དུ་ཆོ་ག་བགྱིས་ན། རྒྱལ་པོ་དང ། རྒྱལ་བུ་དང ། བློན་པོ་ཆེན་པོ་ཉེ་ཕན་དང ། སྐྱེ་བོ་ཕལ་བ་རྣམས་ཀྱང་སྐྱབས་སུ་མཆོས་ནས་བསྙེན་བཀུར་བགྱིད་པར་འགྱུར་རོ། །ཞག་བདུན་ཕྲག་གསུམ་གྱི་བར་དུ་ཆོ་ག་བཞིན་དུ་བགྱིད་ན། སུམ་ཅུ་རྩ་གསུམ་གྱི་ལྷ་རྣམས་འཁོར་དང་བཅས་པ་དང ། ཉི་ཟླའི་ལྷ་དང ། རྒྱལ་པོ་ཆེན་པོ་བཞི་འཁོར་དང་བཅས་པ་ཡང་ཉེ་བར་ལྷགས་ནས་ཡོངས་སུ་སྲུང་པར་འགྱུར། ལག་ན་རྡོ་རྗེས་ཀྱང་དངོས་གྲུབ་ཆེན་པོ་སྩོལ་བར་འགྱུར། བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ཀྱང་སྨོན་པ་ཆེན་པོ་རྣམས་ཡོངས་སུ་སྐོང་བར་འགྱུར་ལགས་སོ། ། གལ་ཏེ་ཡུལ་ཁམས་སུ་ཆར་དཀོན་པར་གྱུར་ན། ཡུངས་ཀར་དང ། ཆབ་མར་ལ་སྔགས་འདིས་བཏབ་སྟེ་གདུགས་གསུམ་གྱི་བར་དུ་ཞུགས་ཀྱི་ནང་དུ་བསྲེགས་ན། ཆར་པ་འབབ་པར་འགྱུར། གལ་ཏེ་ཆར་ཆེས་ཏེ་མེ་ཁུམས་ན། ཐབ་དེའི་ཐལ་བ་བླངས་ནས་སྔགས་ལན་བརྒྱ་རྩ་བརྒྱད་ཀྱིས་བཏབ་སྟེ་གནམ་དུ་གཏོར་ན། ཆར་པ་ཁུམས་པར་འགྱུར་རོ། གལ་ཏེ་སེར་བ་མ་རུང་བ་བབས་སམ། རླུང་དྲག་པོ་གློ་བུར་དུ་ལངས་པར་གྱུར་ན་ཡང་ཐལ་བ་དེ་བླངས་ནས་ལན་བརྒྱ་ 467a ༄#། །རྩ་བརྒྱད་སྔགས་ཀྱིས་བཏབ་སྟེ་སྤྲིན་མཆིས་པའི་ཕྱོགས་སུ་གཏོར་ན། ཞི་བར་འགྱུར་ལགས་སོ། །སྔགས་འདི་རྟག་པར་བཟླས་བརྗོད་བགྱིས་ན། མཐུ་སྟོབས་མཐུ་པོ་ཆེ་དང་འདྲ་བར་འགྱུར་བས། ལུས་འདི་སྤངས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར། མངོན་པར་རྫོགས་པར་འཚང་རྒྱ་བའི་བར་དུ་སྐྱ་བ་ཐམས་ཅད་དུ་སྔོན་གྱི་གནས་རྗེས་སུ་དྲན་པ་ཐོབ་པར་འགྱུར་ལགས་སོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཙནྡན་གྱི་སྙིང་པོའི་འཁོར་ལོའི་གཟུངས་འདི་བདག་གིས་བསྟན་པ་བཞིན་དུ་དགེ་སློང་དམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། སྐྱེས་པའམ། བུད་མེད་གང་ལ་ལ་ཞིག་གིས་ལན་གཅིག་འཆང་བར་བགྱིད་ན། གདོན་མི་ཟ་བར་འགྲུབ་པར་འགྱུར་བས་ཐེ་ཚོམ་གྱི་བསམ་པ་བསྐྱེད་པར་མི་བགྱིའོ། །ཡིད་ལ་བསམ་པའི་དོན་ཐམས་ཅད་ཐོབ་པར་འགྱུར་བས་ཤིན་ཏུ་མངོན་པར་ཡིད་ཆེས་པར་བགྱི་ཞིང་ཐེ་ཚོམ་བསྐྱེད་པར་མི་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་ 467b དཔའ་སྤྱན་རས་གཟིགས་དབང་ཕྱུག་ལ་ཁྱོད་སྙིང་རྗེ་ཆེན་པོས་ཡིད་བཞིན་གྱི་འཁོར་ལོའི་གཟུངས་ཀྱི་ཆོ་ག་གྱ་ནོམ་འདི་ཡང་དག་པར་བཤད་དེ། འཛམ་བུའི་གླིང་གི་སེམས་ཅན་ཐམས་ཅད་ལ་ཕན་པ་དང ། བདེ་བར་བྱས་པ་ལེགས་སོ་ལེགས་སོ་ཞེས་བསྔགས་པ་བརྗོད་དོ། །གང་ལ་ལ་ཞིག་གིས་སེམས་བསྐྱེད་དེ་ཁ་ནས་བཟླས་བརྗོད་བྱས་ན། དངོས་གྲུབ་ཐོབ་པར་འགྱུར་རོ། །དེ་ལྟར་ཡིན་མོད་ཀྱི། ངས་བསྟན་པ་བཞིན་དུ་སེམས་ཅན་རྣམས་ལ་ཡང་ནས་ཡང་དུ་ནན་ཏན་བརྩོན་འགྲུས་ཀྱིས་རྗེས་སུ་བསྟན་ནས་དངོས་གྲུབ་ཐོབ་པར་བྱ་བའི་ཆེད་དུ་ལུས་ཉེ་བར་སྟོན་ལ། ངའི་ཚིག་དག་འགལ་བར་མ་བྱེད་ཅིག་དང ། ང་ཡང་རྗེས་སུ་ཡི་རང་ངོ ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི།་བསྐལ་པ་དཔག་ཏུ་མ་མཆིས་པ་ནས་བྱམས་པ་དང་བརྩེ་བའི་སེམས་ཀྱིས་སེམས་ཅན་ལ་རྗེས་སུ་སྟོན་ཅིང ། རྟག་པར་ཡོངས་སུ་བསྲུངས་ནས་དངོས་གྲུབ་སྩལ་བར་ནི། བཅོམ་ལྡན་འདས་ཉིད་ཀྱིས་མཁྱེན་ཅིང་དཔང་དུ་གྱུར་པ་ལགས་སོ། །སེམས་ཅན་རྣམས་ཀྱི་སླད་དུ་ཡིད་བཞིན་གྱི་འཁོར་ལོའི་གཟུངས་ 468a ༄#། །འདི་བཤད་པ་ལགས་པས། གང་ལ་ལ་ཞིག་གིས་ལེན་ཅིང་འཆང་བ་དང ། རྟག་པར་བདག་ཉིད་བཟླས་བརྗོད་བགྱི་བའི་གྲངས་ཚང་བར་བགྱིས་ན། སྨོན་པ་རྣམས་འགྲུབ་པར་འགྱུར་ཏེ། བདག་ནི། དེ་ལྟར་བཅོམ་ལྡན་འདས་ཀྱི་བྱིན་གྱི་རླབས་ཀྱི་མཐུས་སེམས་ཅན་སྡུག་བསྔལ་བ་རྣམས་ཡོངས་སུ་བསྐྱབ་པར་བགྱིད་པ་ལགས་སོ། །དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གིས་ཡིད་བཞིན་གྱི་འཁོར་ལོའི་གཟུངས་འདི་སྨྲས་པ་དང ། འཁོར་འདུས་པ་ཆེན་པོ་ཐམས་ཅད་རབ་ཏུ་དགའ་ནས་མངོན་པར་ཡིད་ཆེས་པས་ཡང་དག་པར་བླངས་ཏེ་སྤྱོད་པར་གྱུར་ཏོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་ཡིད་བཞིན་གྱི་འཁོར་ལོའི་གཟུངས་ལས། སྦྱིན་སྲེག་ཧོཾ་གྱི་ཆོ་ག་སྨན་སྦྱོར་བའི་ལེའུ་སྟེ་དྲུག་པའོ།། །།འཕགས་པ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་གསང་བའི་མཛོད་ཐོགས་པ་མེད་པའི་ཡིད་བཞིན་གྱི་འཁོར་ལོའི་སྙིང་པོ་ཞེས་བྱ་བའི་གཟུངས་རྫོགས་སོ།། །།ཞུ་ཆེན་གྱི་མཁན་པོ་དང ། ལོ་ཙཱ་བ་བཅོམ་ལྡན་འདས་ཀྱི་རིང་ལུགས་ 468b བ་བནྡྷེ་ཆོས་གྲུབ་ཀྱིས་རྒྱའི་དཔེ་ལས་བསྒྱུར་ཅིང་ཞུས་ཏེ་གཏན་ལ་ཕབ་པ། |