།།རྒྱ་གར་སྐད་དུ། ཨཱརྱ་ཨ་ཤོ་ཀ་དཏྟ་བྱཱ་ཀ་ར་ཎ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་མྱ་ངན་མེད་ཀྱིས་བྱིན་པ་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་གཅིག་གོ་།སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཀྱི་ཕུང་པོའི་རི་ལ་དགེ་སློང་ལྔ་བརྒྱ་ཙམ་གྱི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་བརྒྱ་སྟོང་ཐམས་ཅད་ཀྱང་གཟུངས་ཐོབ་པ། སྤོབས་པ་ཐོགས་པ་མེད་པ། མངོན་པར་ཤེས་པ་བསྒྲུབ་པ་ལ་མཁས་པ། ཆོས་ཟབ་མོའི་ཚུལ་ལ་གནས་པ། སྟོང་པ་ཉིད་ལ་གནས་པ། མཚན་མ་མེད་པ་ལ་གནས་པ། སྨོན་པ་མེད་པ་ལ་གནས་པ། མི་དམིགས་པའི་ཆོས་ལ་གནས་པ། མི་གནས་པའི་ཆོས་སྟོན་པ། མི་སྐྱེ་པའི་ཆོས་ལ་བཟོད་པ་དང་ལྡན་པ་ཤ་སྟག་ལ། འདི་ལྟ་སྟེ། བྱང་ཆུབ་སེམས་དཔའ་ལྷུན་པོ་དང ། བྱང་ཆུབ་སེམས་དཔའ་ལྷུན་པོ་ཆེན་པོ་དང ། བྱང་ཆུབ་སེམས་དཔའ་ཡེ་ཤེས་ལྷུན་པོ་དང ། བྱང་ཆུབ་སེམས་དཔའ་རིན་ཆེན་སེང་གེ་དང ། བྱང་ཆུབ་སེམས་ 387b དཔའ་སེང་གེ་བློ་གྲོས་དང ། བྱང་ཆུབ་སེམས་དཔའ་རྟག་ཏུ་ལག་བརྐྱང་དང ། བྱང་ཆུབ་སེམས་དཔའ་རྟག་ཏུ་ལག་བསྒྲེང་དང ། བྱང་ཆུབ་སེམས་དཔའ་རྟག་ཏུ་བརྩོན་དང ། བྱང་ཆུབ་སེམས་དཔའ་རྟག་ཏུ་འཛུམ་ཞིང་རབ་ཏུ་དགའ་བ་དང ། བྱང་ཆུབ་སེམས་དཔའ་དབང་པོ་ལས་འདས་པ་དང ། བྱང་ཆུབ་སེམས་དཔའ་རྟག་ཏུ་གདུང་དང ། བྱང་ཆུབ་སེམས་དཔའ་རིན་ཆེན་སེམས་དང ། བྱང་ཆུབ་སེམས་དཔའ་ལག་ན་རིན་ཆེན་དང ། བྱང་ཆུབ་སེམས་དཔའ་ལག་ན་རིན་ཆེན་ཐོགས་དང ། བྱང་ཆུབ་སེམས་དཔའ་རིན་ཆེན་བཀྲ་ལྡན་དང ། བྱང་ཆུབ་སེམས་དཔའ་ཁ་ལོ་སྒྱུར་དང ། བྱང་ཆུབ་སེམས་དཔའ་ཁ་ལོ་སྒྱུར་ཆེན་པོ་དང ། བྱང་ཆུབ་སེམས་དཔའ་བདེན་པ་ལ་དགའ་བ་དང ། བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང ། སྐྱེས་བུ་དམ་པ་བརྒྱད་ལ། འདི་ལྟ་སྟེ། བྱང་ཆུབ་སེམས་དཔའ་བཟང་སྐྱོང་དང ། བྱང་ཆུབ་སེམས་དཔའ་དཀོན་མཆོག་འབྱུང་གནས་དང ། བྱང་ཆུབ་སེམས་དཔའ་ཕུག་སྦས་དང ། བྱང་ཆུབ་སེམས་དཔའ་དབང་པོའི་ལྷ་དང ། བྱང་ཆུབ་སེམས་དཔའ་ཆུ་ལྷའི་ལྷ་དང ། བྱང་ཆུབ་སེམས་དཔའ་བློ་གྲོས་ཡངས་པ་དང ། བྱང་ཆུབ་སེམས་དཔའ་བློ་གྲོས་ཁྱད་པར་ཅན་དང ། བྱང་ཆུབ་སེམས་དཔའ་བློ་གྲོས་འཕེལ་དང ། དེ་དག་ལ་སོགས་པ་བྱང་ཆུབ་སེམས་དཔའ་ 388a ༄#། །བརྒྱད་སྟོང་དང་ཐབས་གཅིག་ཏུ་བཞུགས་སོ། །དེ་ནས་དེའི་ཚེ་བཅོམ་ལྡན་འདས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན་གནས་ཤིང་བཞུགས་པ་ལ་རྒྱལ་པོ་མ་སྐྱེས་དགྲ་དང ། རྒྱལ་པོའི་བཀའ་ལ་གཏོགས་པ་དང ། བློན་པོ་དང ། སྣ་ཆེན་པོ་ལ་གཏོགས་པ་དང ། ཞང་བློན་གྱི་བུ་ཚ་དང ། ཞབས་དྲུང་ན་འཁོད་པ་དང ། ཕོ་བྲང་འཁོར་གྱི་མི་དང ། བྲམ་ཟེ་དང ། རྒྱལ་རིགས་དང ། ཁྱིམ་བདག་རྣམས་ཀྱིས་བསྟི་སྟང་དུ་བྱས། བླ་མར་བྱས། རི་མོར་བྱས། མཆོད་པ་བྱས་ཏེ། དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་པ་འདི་ལྟ་སྟེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ།་དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་རབ་ཏུ་སྟོན་ཏོ། །དེ་ནས་ཚེ་དང་ལྡན་པ་ཤཱ་རདྭ་ཏིའི་བུ་དང ། ཚེ་དང་ལྡན་པ་མོའུ་འགལ་གྱི་བུ་ཆེན་པོ་དང ། ཚེ་དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་རབ་འབྱོར་དང ། ཚེ་དང་ལྡན་པ་བྱམས་པའི་བུ་གང་པོ་དང ། ཚེ་དང་ལྡན་པ་རྟ་ཐུལ་དང ། ཚེ་དང་ལྡན་པ་ཉེ་བར་འཁོར་དང ། ཚེ་དང་ལྡན་པ་སྒྲ་གཅན་འཛིན་དང ། ཚེ་དང་ལྡན་པ་ནམ་གྲུ་དང ། ཚེ་དང་ལྡན་པ་ཀུན་དགའ་བོ་དང ། ཚེ་དང་ལྡན་པ་ 388b མ་འགགས་པ་དང ། དེ་དག་དང ། གཞན་ཡང་ཉན་ཐོས་ཆེན་པོ་རབ་ཏུ་མང་པོ་རྣམས་སྔ་དྲོའི་དུས་ཀྱི་ཚེ། ཆོས་གོས་དང ། ཤམ་ཐབས་བགོས་ནས། ལྷུང་བཟེད་ཐོགས་ཏེ། རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་བསོད་སྙོམས་ཀྱི་ཕྱིར་ཞུགས་སོ། །དེ་ནས་ཉན་ཐོས་ཆེན་པོ་དེ་དག་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་མཐར་ཆགས་སུ་བསོད་སྙོམས་ཀྱི་ཕྱིར་རྒྱུ་ཞིང ། མཐར་གྱིས་རྒྱལ་པོ་ཆེན་པོ་མ་སྐྱེས་དགྲའི་ཕོ་བྲང་ག་ལ་བ་དེར་དོང་སྟེ་ལྷགས་ནས། ཕྱོགས་གཅིག་ཏུ་ཅང་མི་སྨྲ་བར་འཁོད་དོ། །ཡང་དེའི་ཚེ་རྒྱལ་པོ་མ་སྐྱེས་དགྲའི་ཕོ་བྲང་ན།་བུ་མོ་མྱ་ངན་མེད་ཀྱིས་བྱིན་པ་ཞེས་བྱ་བ་བཙས་ནས། ལོ་བཅུ་གཉིས་ལོན་པ་འདྲ་བ། གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ། རྒྱས་པ་མཆོག་དང་ལྡན་པ། སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། སངས་རྒྱས་བརྒྱ་སྟོང་མང་པོ་ལ་བསྙེན་བཀུར་བྱས་པ། བླ་ན་མེད་པའི་བྱང་ཆུབ་ལས་ཕྱིར་མི་ལྡོག་པ་དེ་རང་གི་ཕའི་ཁང་བཟང་ན་ཁྲི་གསེར་གྱི་རྐང་པ་ཅན་ཡོད་པ་ལ་འདུག་པར་གྱུར་ཏོ། །དེ་ནས་བུ་མོ་མྱ་ངན་མེད་ཀྱིས་བྱིན་པས་ཉན་ཐོས་ཆེན་པོ་དེ་དག་མཐོང་ནས། ཁྲི་དེ་ལས་མ་ལངས་ཏེ།་བསུར་ཡང་མི་འགྲོ་།ཕྱག་ཀྱང་མི་བྱེད། གཏམ་ཡང་མི་ཟེར། སྟན་ཡང་མི་འདིངས། བསོད་སྙོམས་ཀྱང་མི་འབུལ་བར་ཁ་རོག་སྟེ་འདུག་གོ་།དེ་ནས་རྒྱལ་པོ་མ་སྐྱེས་དགྲས། ཉན་ 389a ༄#། །ཐོས་ཆེན་པོ་དེ་དག་རྒྱལ་པོའི་ཕོ་བྲང་དུ་འོང་ཞེས་ཐོས་ནས། རང་གི་ཁང་བཟང་གི་སྔ་ཁང་ག་ལ་བ་དེར་སོང་སྟེ་ཕྱིན་ནས། ཉན་ཐོས་ཆེན་པོ་དེ་དག་ལ་མཆོག་ཏུ་སྡུག་པར་འཛིན་པས་མངོན་པར་དགའ་ཞིང་སྟན་ཡང་བཏིང་ངོ ། །རྒྱལ་པོ་མ་སྐྱེས་དགྲས། བུ་མོ་མྱ་ངན་མེད་ཀྱིས་བྱིན་པས་ཉན་ཐོས་ཆེན་པོ་དེ་དག་མཐོང་བཞིན་དུ་ཁ་རོག་སྟེ་འདུག་པ་མཐོང་ནས། བུ་མོ་མྱ་ངན་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ་མོ། འདི་དག་ནི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེའི་ཉན་ཐོས་ཆེན་པོ་སྟེ། ཆེ་བ་ཉིད་ཀྱི་ཡོན་ཏན་གྱི་ཆོས་དང་ལྡན་པ། ཟག་པ་ཟད་པ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ།་སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། བསོད་ནམས་ཀྱི་ཞིང་དུ་གྱུར་པ། སྙིང་བརྩེ་བ་ཅན་ཡིན་ཏེ། འཇིག་རྟེན་ལ་སྙིང་བརྩེ་བའི་ཕྱིར། བསོད་སྙོམས་ཀྱི་ཕྱིར་རྒྱུ་བར་ཁྱོད་ཀྱིས་མི་ཤེས་སམ། ཅི་ན་ཁྱོད་ཀྱིས་དེ་དག་མཐོང་ལ། མཐོང་བཞིན་དུ་ཁྲི་ལས་ཀྱང་མི་ལྡང ། བསུ་བར་ཡང་མི་བྱེད། ཕྱག་ཀྱང་མི་འཚལ། གཏམ་ཡང་མི་ཟེར། སྟན་དང་བསོད་སྙོམས་ལ་ཡང་སྤྱན་མི་འདྲེན། དད་པ་དང ། གུས་པ་ཡང་མི་བསྐྱེད་པར། ཅིའི་ཕྱིར་མ་གུས་པ་སྟོན་ཅིང་ཁ་རོག་སྟེ་འདུག ། 389b ཁྱོད་ཀྱིས་དོན་གྱི་དབང་ཅི་ཞིག་མཐོང ། དེ་སྐད་ཅེས་སྨྲས་པ་དང ། བུ་མོ་མྱ་ངན་མེད་ཀྱིས་བྱིན་པས་རང་གི་ཕ་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཡབ། འདི་ཇི་སྙམ་དུ་དགོངས། ཅི།་འཁོར་ལོས་བསྒྱུར་བའི་རྒྱལ་པོ། རྒྱལ་ཕྲན་ལ་ལྡང་བའམ། བསུར་མཆི་བ་ནམ་ཡང་གསན་ཏམ། གཟིགས་སམ། རྒྱལ་པོས་སྨྲས་པ། བུ་མོ། དེ་ནི་མ་ཡིན་ནོ། །བུ་མོས་སྨྲས་པ། ཡབ། ཅི།་ལྷའི་དབང་པོ་བརྒྱ་བྱིན་ལྷ་གཞན་དག་ལ་ལྡང་ངམ། བསུར་མཆིའམ། རྒྱལ་པོས་སྨྲས་པ། བུ་མོ་དེ་ནི་མ་ཡིན་ནོ། །བུ་མོས་སྨྲས་པ། ཡབ། ཅི།་མི་མཇེད་ཀྱི་བདག་པོ་ཚངས་པ་ལྷ་གཞན་དག་ལ་ལྡང་ངམ། བསུར་མཆིའམ། རྒྱལ་པོས་སྨྲས་པ། བུ་མོ་དེ་ནི་མ་ཡིན་ནོ། །བུ་མོས་སྨྲས་པ། ཡབ། ཅི།་རྒྱ་མཚོ་ཆེན་པོ་མཚོ་དང ། མཚེའུ་དང ། ཆུ་མིག་དང ། མཚོ་བྲན་དང ། ལྟེང་ཀ་དང ། ཁྲོན་པ་ལ་ཕྱག་འཚལ་བ་གསན་ཏམ། གཟིགས་སམ། རྒྱལ་པོས་སྨྲས་པ། བུ་མོ། དེ་ནི་མ་ཡིན་ནོ། །བུ་མོས་སྨྲས་པ། ཡབ། ཅི།་རིའི་རྒྱལ་པོ་རི་རབ་ནི་རི་ནག་པོ་གཞན་དག་ལ་འདུད་པའམ། ཕྱག་འཚལ་བ་གསན་ཏམ། གཟིགས་སམ། རྒྱལ་པོས་སྨྲས་པ། བུ་མོ། དེ་ནི་མ་ཡིན་ནོ། །བུ་མོས་སྨྲས་པ། ཡབ། ཅི།་ཉི་མ་དང ། ཟླ་བ་དང ། སྐར་མའི་ཚོགས་སྲིན་བུ་མེ་ཁྱེར་གྱི་འོད་འདོད་པ་གསན་ཏམ། གཟིགས་སམ། རྒྱལ་པོས་སྨྲས་པ། བུ་མོ་དེ་ནི་མ་ཡིན་ནོ། །བུ་མོས་སྨྲས་པ། ཡབ། ཅི།་རི་ 390a ༄#། །དྭགས་ཀྱི་རྒྱལ་པོ་སེང་གེ་ནི། ཝ་ལ་ལྡང་བའམ། བསུར་མཆིས་པ་གསན་ཏམ། གཟིགས་སམ། རྒྱལ་པོས་སྨྲས་པ། བུ་མོ། དེ་ནི་མ་ཡིན་ནོ། ། བུ་མོས་སྨྲས་པ། ཡབ། དེ་བཞིན་དུ་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། བྱམས་པ་ཆེན་པོ་དང ། སྙིང་རྗེ་ཆེན་པོའི་སེང་གེའི་སྒྲ་བསྒྲགས་པ་ལ། དམན་པ་ལ་མོས་པ་ཉན་ཐོས་ཝ་ལྟ་བུར་གྱུར་པ། བྱམས་པ་ཆེན་པོ་དང ། སྙིང་རྗེ་ཆེན་པོ་དང་བྲལ་བ་དག་ལ་དགའ་ཞིང་ལྡང་བའམ། བསུར་མཆི་བའམ། ཕྱག་འཚལ་བའམ། བཀུར་སྟི་བགྱིད། ཡབ། ཆོས་ཀྱི་རྒྱལ་པོ་ཆེན་པོ་སུ་ཞིག་ཆོས་ཀྱི་འཁོར་ལོ་བླ་ན་མེད་པ་བསྐོར་ཏམ། བསྐོར་བར་བགྱིད་པ་ན། ཉན་ཐོས་དམན་པ། ཞན་པ། ཞུམ་པ།་ཉི་ཚེ་བའི་ཤེས་པ་དང་ལྡན་པ་རྣམས་ལ་དགའ་བས་ཕྱག་འཚལ་བའམ། འདུད་པར་བགྱིད། ཡབ། ལྷའི་བདག་པོ་ལྷའི་དབང་པོ་ལྟ་བུ་སུ་ཞིག་རྣམ་པར་དག་པའི་ལྷའི་བདག་པོ་དོན་དུ་གཉེར་བ་ན། དགེ་བ་ཆུང་བའི་ལྷ་ལྟ་བུའི་ཉན་ཐོས་དག་ལ་འདོད་པ་དང ། ཕྱག་འཚལ་བའམ། ལྡང་བའམ། བསུར་མཆི་བར་བགྱིད། ཡང་མི་མཇེད་ཀྱི་བདག་པོ་ཚངས་པ་ལྟ་བུ་སུ་ཞིག་འཇིག་རྟེན་ན་ཚངས་པའི་སྔ་ཁང་བླ་ན་མེད་པ་དོན་དུ་གཉེར་བ་ན། དགེ་བའི་རྩ་བ་ཆུང་བའི་ཚངས་པ་ལྟ་བུའི་ཉན་ཐོས་དག་ལ་འདོད་པའམ། ལྡང་ 390b བའམ། བསུར་མཆི་བའམ། ཕྱག་འཚལ་བར་བགྱིད། ཡབ། སུ་ཞིག་ཡེ་ཤེས་རྒྱ་མཚོ་དཔག་ཏུ་མེད་པ། མི་མཉམ་པ་དང་མཉམ་པའི་ཆོས་རྟོགས་པ་ཚོལ་བ་ན། བ་ལང་གི་རྨིག་རྗེས་ཀྱི་ཆུ་ལྟ་བུའི་ཚུལ་ཁྲིམས་ཀྱི་རྗེས་སུ་སོང་བའི་ཉན་ཐོས་དག་ལ་འདོད་པའམ། ལྡང་བའམ། བསུར་མཆི་བའམ། ཕྱག་འཚལ་བར་བགྱིད། ཡབ། སུ་ཞིག་རི་རབ་ལྟ་བུའི་བསམ་གཏན་དང ། རྣམ་པར་ཐར་པ་དང་ལྡན་པའི་དེ་བཞིན་གཤེགས་པའི་གཟུགས་ཀྱི་སྐུ་དོན་དུ་གཉེར་བ་ན། ཡུངས་འབྲུ་ལྟ་བུ་ཏིང་ངེ་འཛིན་གྱི་སྟོབས་དང་ལྡན་པའི་ཉན་ཐོས་དག་ལ་ལྡང་བའམ། བསུར་མཆི་བའམ། ཕྱག་འཚལ་བའམ། འདུད་པའམ། འདོད་པ་སྐྱེད་པར་བྱེད། ཡབ། སུ་ཞིག་སངས་རྒྱས་བཅོམ་ལྡན་འདས་རྣམས་ཀྱི་ཆེ་བ་ཉིད་ཤེས་རབ་དང ། བསོད་ནམས་དང ། ཡེ་ཤེས་དང ། ཡོན་ཏན་ཉི་མ་དང་ཟླ་བའི་སྣང་བ་དཔག་ཏུ་མེད་པ་ལྟ་བུ་ཐོས་ནས། སྲིན་བུ་མེ་ཁྱེར་གྱི་འོད་ལྟ་བུའི་རང་གི་རྒྱུད་ལ་སྣང་བ་གནས་པ། གཞན་གྱི་སྒྲའི་རྗེས་སུ་སོང་བའི་ཉན་ཐོས་དག་གི་རྣམ་པར་གྲོལ་བ་ལ་འདོད་པ་སྐྱེད་པར་བགྱིད། བདག་ནི་དེ་བཞིན་གཤེགས་པ་རྣམས་ཡོངས་སུ་མྱ་ངན་ལས་འདས་ཀྱང་ཉན་ཐོས་རྣམས་ལ་ཕྱག་མི་འཚལ་ན། བཞུགས་བཞིན་དུ་ལྟ་ཅི་སྨོས། དེ་ཅིའི་སླད་དུ་ཞེ་ན། སུ་ཞིག་ཟླ་བ་དང ། ཉི་མའི་དཀྱིལ་འཁོར་བཏང་སྟེ། སྲིན་བུ་མེ་ཁྱེར་ལ་ཕྱག་འཚལ་ 391a ༄#། །བར་བགྱིད། ཡབ། གང་ཉན་ཐོས་ལ་བརྟེན་པ་ནི་ཉན་ཐོས་ཀྱི་སེམས་དང་གནས་པར་འགྱུར་རོ། །ཡང་དག་པར་རྫོགས་པའི་སངས་རྒྱས་ལ་བརྟེན་ན། ཐམས་ཅད་མཁྱེན་པའི་རིན་པོ་ཆེའི་སེམས་བསྐྱེད་པ་དང་གནས་པར་འགྱུར་རོ། །དེ་ནས་རྒྱལ་པོ་མ་སྐྱེས་དགྲས། བུ་མོ་མྱ་ངན་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །འདི་ལྟར་ཁྱོད་ཉན་ཐོས་འདི་དག་མཐོང་བཞིན་དུ། མི་ལྡང་ཞིང་བསུར་མི་འགྲོ་ལ། ཕྱག་མི་འཚལ་ཞིང་བསྙེན་བཀུར་མི་བྱེད་དེ། འདི་དག་སྟན་དང ། བསོད་སྙོམས་ལ་སྤྱན་མི་འདྲེན་པ་ནི། བུ་མོ་ཁྱོད་ལྷག་པའི་ང་རྒྱལ་ཅན་ཞིག་གོ་།དེ་སྐད་ཅེས་སྨྲས་པ་དང ། བུ་མོ་མྱ་ངན་མེད་ཀྱིས་བྱིན་པས། རང་གི་ཕ་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཡབ། བདག་ནི་ལྷག་པའི་ང་རྒྱལ་ཅན་མ་ལགས་སོ། །དེ་ཅིའི་སླད་དུ་ཞེ་ན། ཡབ་ཁྱོད་གྲོང་ཁྱེར་ཀྱི་དབུལ་པོ་རྣམས་ལ་མི་བཞེན་པ། བསུར་མི་བཞུད། སྟན་མི་འདིངས་པ་ལགས་ན། ཁྱོད་ཉིད་ལྷག་པའི་ང་རྒྱལ་ཅན་ལགས་པ་སྙམ་བགྱིད་དོ། །རྒྱལ་པོས་སྨྲས་པ། བུ་མོ། དེ་དག་ནི་ང་ཡང་མཚུངས་པ་མ་ཡིན་ནི། །བུ་མོས་སྨྲས་པ། ཡབ། དེ་བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་ནི། ཉན་ཐོས་དང་རང་སངས་རྒྱས་ཐམས་ཅད་དང་མཚུངས་པ་མ་ལགས་སོ། ། 391b རྒྱལ་པོས་སྨྲས་པ། བུ་མོ། བྱང་ཆུབ་སེམས་དཔའ་རྣམས་ནི་ང་རྒྱལ་དང ། དྲེགས་པ་སྤངས་ཏེ། སེམས་ཅན་ཐམས་ཅད་ལ་འདུད་ཅིང་ཕྱག་འཚལ་བར་མི་བྱེད་དམ། བུ་མོས་སྨྲས་པ། ཡབ། བྱང་ཆུབ་སེམས་དཔའ་ནི་ཁོན་དུ་འཛིན་པ་དང ། ཐ་བ་དང ། ཁྲོ་བ་དང ། གནོད་སེམས་དང ། ཉེས་པ་སྤང་བ་དང ། དགེ་བའི་རྩ་བ་ཡོངས་སུ་སྨིན་པར་བགྱི་བའི་སླད་དུ་སེམས་ཅན་ཐམས་ཅད་ལ་འདུད་ཅིང་ཕྱག་འཚལ་ལོ། །ཡབ། ཉན་ཐོས་ཆེན་པོ་འདི་དག་ལ་ནི་ཁོན་དུ་འཛིན་པ་དང ། ཐ་བ་དང ། ཁྲོ་བ་དང ། གནོད་སེམས་དང ། ཉེས་པ་བསལ་བར་བགྱིད་བ་མ་མཆིས། སྤང་བར་བགྱི་བ་དང ། དགེ་བ་འཕེལ་བར་བགྱི་བ་ཡང་མ་མཆིས་ཏེ། ཡབ། ཉན་ཐོས་ཐམས་ཅད་ལ་ནི་སངས་རྒྱས་འབུམ་གྱིས། ཉན་ཐོས་ཀྱི་ཚུལ་ཁྲིམས་ཇི་སྙེད་པ་དང ། ཏིང་ངེ་འཛིན་ཇི་སྙེད་པ་དང ། ཤེས་རབ་ཇི་སྙེད་པས་ཆོས་བསྟན་དུ་ལགས་ཀྱང ། ཡབ། དེ་དག་ལ་ནི་ཚུལ་ཁྲིམས་ཀྱང་ག་ལས་མཆི། ཏིང་ངེ་འཛིན་ཀྱང་ག་ལས་མཆི། ཤེས་རབ་ཀྱང་ག་ལས་མཆི། རྣམ་པར་གྲོལ་བ་ཡང་ག་ལས་མཆི། རྣམ་པར་གྲོལ་བའི་ཡེ་ཤེས་མཐོང་བ་ཡང་ག་ལས་མཆི། ཡབ། འདི་ལྟ་སྟེ། དཔེར་ན། བུམ་པ་ཆབ་ཀྱིས་གང་བའི་ནང་དུ་ཆར་བབ་ན། དེ་ཆབ་ཀྱི་ཐིགས་པ་གཅིག་ཀྱང་མི་ལེན་ལ། དེར་གནས་པར་ཡང་མི་འགྱུར་རོ། །ཡབ། དེ་བཞིན་དུ་ཉན་ཐོས་རྣམས་ལ། 392a ༄#། །གལ་ཏེ་སངས་རྒྱས་འབུམ་གྱིས་ཆོས་བཤད་དུ་ལགས་ཀྱང ། དེ་དག་འཛིན་པར་མི་འགྱུར་ལ། ཚུལ་ཁྲིམས་དང ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བ་ཡང་དེ་དག་ལ་གནས་པར་མི་འགྱུར་ཞིང ། རྣམ་པར་འཕེལ་བར་ཡང་མི་འགྱུར་རོ། །ཡབ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་ཆུ་ཀླུང་ཐམས་ཅད་དང ། ཆར་གྱི་རྒྱུན་ཐམས་ཅད་འཛིན་ཅིང་དེར་གནས་པར་འགྱུར་རོ། །དེ་ཅིའི་སླད་དུ་ཞེ་ན། རྒྱ་མཚོ་ཆེན་པོ་ནི་ཚད་མ་མཆིས་པའི་སླད་དུའོ། །ཡབ། བྱང་ཆུབ་སེམས་དཔའ་སེམས་དཔའ་ཆེན་པོ་རྒྱ་མཚོ་ལྟ་བུ་དེ་དག་ཀྱང་དེ་བཞིན་ཏེ། ཆོས་བསྟན་པའི་ཆུ་ཐམས་ཅད་ཡང་དག་པར་འཛིན་ཅིང ། ཆོས་བསྟན་པ་ཐམས་ཅད་དེ་ལ་ཡང་དག་པར་གནས་སོ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐམས་ཅད་མཁྱེན་པ་ཉིད་ཀྱི་སེམས་ཀྱི་སྣོད་དེ་ནི་མི་མཉམ་པ་དང་མཉམ་པའི་སླད་དུའོ། །དེ་ལ་འདི་སྐད་ཅེས་བྱ་སྟེ། མ་སྐྱེས་དགྲ་ཡི་བུ་མོར་གྱུར་པ་ནི། །མྱ་ངན་མེད་བྱིན་ཡོན་ཏན་གཟི་བརྗིད་བརྒྱན། །ཉན་ཐོས་ལྔ་བརྒྱ་དག་ནི་ལྷགས་གྱུར་ཀྱང ། །དེ་ལ་ཕྱག་བྱའི་ཕྱིར་ནི་དེ་མ་ལང ། །མ་སྐྱེས་དགྲ་ཡིས་དེ་ལ་སྨྲས་པ་ནི། །བུ་མོ་དོན་འདི་ང་ལས་ཉན་པར་གྱིས། །ཁྱོད་ཀྱི་ཉན་ཐོས་ལྔ་ 392b བརྒྱ་མཐོང་བཞིན་དུ། །ཕྱག་བྱའི་ཕྱིར་ནི་ཅི་ཕྱིར་ལྡང་མི་བྱེད། །བུ་མོ་མྱ་ངན་མེད་ཀྱིས་བྱིན་ན་རེ། །ཉན་ཐོས་འདི་དག་བདག་གིས་མཐོང་བ་ན། །ཅི་ཕྱིར་ཕྱག་འཚལ་བསམ་པ་མི་སྐྱེ་བ། །བདག་མཆིས་ཡབ་གཅིག་ཚིག་ནི་གསན་པར་གསོལ། །དཔེར་ན་མི་ཞིག་རྒྱ་མཚོར་མཆིས་ནས་ཀྱང ། །རིན་ཆེན་འབྱུང་ཁུངས་ནས་ནི་མཆིང་བུ་བླངས། །དེ་བཞིན་བདག་ནི་ཉན་ཐོས་ཐམས་ཅད་ཀྱང ། །ཡེ་ཤེས་དབྱིངས་ནས་ཉན་ཐོས་བླངས་སྙམ་བགྱིད། །དཔེར་ན་རྒྱལ་པོ་ནོར་གྱི་དབང་དུ་ཕྱུག་པོ། །ས་བདག་འཁོར་ལོས་བསྒྱུར་བ་མཉེས་བགྱིས་ནས། །ཀར་ཤ་བ་ནི་གཅིག་ཙམ་གསོལ་ན་ནི། །དེ་ཡིས་རྒྱལ་པོ་བསྟེན་པ་དོན་མ་མཆིས། །གང་གིས་འཁོར་ལོས་བསྒྱུར་བ་མཉེས་བགྱིས་ནས། །བྱེ་བ་ཕྲག་སྟོང་གསོལ་བ་བགྱིས་ན་ནི། །དེས་ནི་དབུལ་མང་ནོར་དང་ལྡན་པར་བགྱིད། །དེས་ནི་རྒྱལ་པོ་ལེགས་པར་བསྟེན་པ་ལགས། །ཀར་ཤ་པ་ནི་སློང་བའི་མི་བཞིན་དུ། །གང་ཞིག་སངས་རྒྱས་ཡོན་ཏན་མཐའ་ཡས་རྣམས། ། ཐོས་ནས་ཐེག་པ་དམན་ལ་འདོད་སྐྱེད་པ། །ཉན་ཐོས་ཀུན་ལ་བདག་ནི་དེ་སྙམ་བགྱིད། །ནོར་རྣམས་སྒྲུབ་བགྱིད་མི་ནི་ཇི་ལྟ་བུ། །བྱང་ཆུབ་སེམས་དཔའ་མཁས་པ་དེ་འདྲ་སྟེ། ། རྒྱལ་བ་ཆོས་ཀྱི་རྒྱལ་པོ་མཉེས་བགྱིས་ཤིང ། །བྱང་ཆུབ་རེ་གནས་སེམས་ཅན་འདུལ་བར་བགྱིད། །དཔེར་ན་ནད་པ་ནད་བརྒྱས་གཟིར་རྣམས་སྨན་པ་ཡིས། །གྲོལ་བགྱིད་དེ་བཞིན་ 393a ༄#། །གཞན་གྱི་སྒྲ་ཕྱིར་འབྲང་བ་ཡི། །ཉན་ཐོས་ཉོན་མོངས་རྣམས་ཀྱིས་གཟིར་བ་ཐམས་ཅད་ཀྱང ། །བྱང་ཆུབ་སེམས་དཔའ་སྨན་པ་ལྟ་བུས་གྲོལ་བར་བགྱིད་སེམས་ཅན་མང་པོ་གྲོལ་བགྱིད་སྨན་པ་བཏང་ནས་ནི། །སོས་གྱུར་སེམས་ཅན་ལ་ནི་སུ་ཞིག་འདུད་པར་བགྱིད། །དེ་བཞིན་རྫོགས་པའི་སངས་རྒྱས་སྨན་པར་གཉེར་བ་ན། །སོས་གྱུར་ཉན་ཐོས་ལ་ནི་སུ་ཞིག་འདུད་པར་བགྱིད། །ཇི་ལྟར་ནད་པ་སོས་པར་གྱུར་བ་ཐམས་ཅད་ལ། །སྨན་པ་དག་གིས་གསོ་བར་ནུས་པར་མི་འགྱུར་བ། །དེ་བཞིན་ཉན་ཐོས་ཐམས་ཅད་སོས་པར་འགྱུར་བ་ལ། །སངས་རྒྱས་སྨན་པ་དག་གིས་གསོ་བར་མི་སྤྱོད་དོ། །འདི་ནི་སྨན་པ་གང་ཞིག་བདག་གིས་བདག་ཉིད་ལ། །གསོ་བར་སེམས་ཀྱི་སེམས་ཅན་གཞན་ལ་མ་ལགས་ཏེ། །དེ་འདྲའི་བདག་ཉིད་ཁེངས་པར་བགྱིད་པའི་ང་རྒྱལ་གྱིས། །སྨན་པ་དེ་དག་ལ་ནི་འདོད་པའི་སེམས་མི་སྐྱེད། །སྨན་པ་གང་ཞིག་སྙིང་རྗེ་བསྐྱེད་ནས་བདག་ཉིད་ཇི་ལྟ་བར། །དེ་བཞིན་ཕ་རོལ་རྣམས་ཀྱང་ནད་ལས་གྲོལ་བགྱིད་པ། །དེ་ནི་མཆོད་པར་འོས་ཤིང་བསྔགས་པར་བགྱི་བ་དང ། །འཇིག་རྟེན་ཀུན་གྱིས་འདུད་བར་བགྱི་བའི་གནས་ཀྱང་ལགས། །གང་གིས་ཡེ་ཤེས་རིག་པ་གཙོ་བོ་རྟོགས་གྱུར་ནས། །བདག་ཉིད་གྲོལ་བར་བགྱིད་ཀྱི་སེམས་ཅན་གཞན་མ་ལགས། །དེ་ནི་སྨན་པ་བདག་ 393b ཉིད་གྲོལ་བར་བགྱིད་པ་ལྟར། །མཁས་པ་དག་གིས་མཆོད་པ་བགྱི་བའི་གནས་མ་ལགས། །གང་གིས་ཡེ་ཤེས་རིག་པ་གཙོ་བོ་རྟོགས་གྱུར་ནས། །སེམས་ཅན་གྲངས་མེད་སྡུག་བསྔལ་དག་ལས་གྲོལ་བགྱིད་པ། །དེ་དག་བྱང་ཆུབ་མཆོག་ལ་འདུན་བ་སྐྱེད་པ་སྟེ། །དེ་ནི་འཇིག་རྟེན་ཀུན་གྱིས་བསྔགས་པར་བགྱི་བ་ལགས། །ེ་རཎྜ་ཡི་ཤིང་སྡོང་མཛེས་པ་མ་ལགས་ལ། །དེ་དག་རྣམས་ཀྱི་གྲིབ་མའང་ཡངས་པ་མ་ལགས་ཏེ། །ེ་རཎྜ་ཡི་ཤིང་འདྲ་ཉན་ཐོས་ཐམས་ཅད་ཀྱི། །རྣམ་པར་གྲོལ་བའི་གྲིབ་མ་ཉེ་བར་བསྟེན་མ་ལགས། ། ཙནྡན་མཆོག་གི་སྡོང་ཆེན་དག་ནི་ཚ་བ་ཡིས། །གདུངས་པའི་སྐྱེ་བོ་རྣམས་ཀྱི་ཉེ་བར་བསྟེན་པ་ལགས། །དེ་བཞིན་བདག་ནི་བྱུང་ཆུབ་སེམས་དཔའ་རྣམས་ལ་ཡང ། །ལྷ་དང་བཅས་པའི་འཇིག་རྟེན་དག་གིས་དོན་བགྱིད་སྙམ། །བ་ལང་རྨིག་རྗེས་ཆུ་ནི་ཡངས་མ་ལགས། །ཚ་བས་གདུངས་བ་ཞི་བར་མི་བགྱིད་ལ། །གངྒཱའི་ཀླུང་ནི་སེམས་ཅན་བྱེ་བ་སྟོང ། ། ཚིམ་པར་བགྱིས་ནས་རྒྱ་མཚོ་ཆེན་པོར་མཆི། །བ་ལང་རྨིག་རྗེས་ཆུ་འདྲའི་ཉན་ཐོས་ཀུན། །སེམས་ཅན་ཀུན་གྱི་ཚ་བཞི་མི་བགྱིད། །གངྒཱའི་ཀླུང་འདྲའི་བྱང་ཆུབ་སེམས་དཔའ་རྣམས་སེམས་ཅན་མཐའ་ཡས་ཆོས་ཀྱིས་ཚིམ་པར་བགྱིད། །ཇི་ལྟར་རིན་ཆེན་ཆར་ནི་འབབ་པ་ནི། །དབུལ་པོ་དག་ནི་འགྲོན་བུ་ལེན་པར་བགྱིད། །གང་ཞིག་ནོར་མང་དེ་དག་བླངས་ནས་ 394a ༄#། །ནི། །སེམས་ཅན་དབུལ་པོ་ནོར་དང་ལྡན་པར་བགྱིད། །དེ་ལྟར་སངས་རྒྱས་རིན་ཆེན་ཆོས་ཆར་འབེབས། །ཉན་ཐོས་རྣམས་ནི་དམ་ཆོས་རིན་ཆེན་ལས། །ཆུང་དུ་འཛིན་ཏེ་བྱང་ཆུབ་སེམས་དཔའ་རྣམས། །སེམས་ཅན་དོན་སླད་མང་དུ་ལེན་པར་བགྱིད། །ཇི་ལྟར་སེམས་ཅན་དག་ནི་རི་རབ་ཀྱི། །དྲུང་དུ་མཆིས་ན་གསེར་གྱི་མདོག་ཏུ་འགྱུར། །རི་བོ་གཞན་ལ་སེམས་ཅན་རྣམས་མཆིས་ན། །གསེར་གྱི་ཁ་དོག་ཅན་དུ་ཡོང་མི་འགྱུར། །བྱང་ཆུབ་སེམས་དཔའ་རྣམས་ནི་རི་རབ་བཞིན། །གང་དག་མཐུས་ནི་ལྷར་བཅས་སྐྱེ་དགུ་རྣམས། །རྣམ་གྲོལ་མདོག་ཏུ་ཁ་དོག་གཅིག་ཏུ་འགྱུར། །ཉན་ཐོས་རྣམས་ཀྱི་ཡེ་ཤེས་འདོད་མི་བགྱིད། །ཡབ་གཅིག་ཇི་ལྟར་རྩཝ་བྲན་རྩེ་མོ་ཡི། །ཟིལ་པའི་ཐིགས་པས་ལོ་ཏོག་རྒྱས་མི་བགྱིད། །རབ་ཏུ་ཁེབས་པའི་སྤྲིན་གྱིས་ས་སྟེང་འདི། །ཚིམ་བར་བགྱིད་ཅིང་ལོ་ཏོག་འཕེལ་བར་བགྱིད། །ཉན་ཐོས་ཐམས་ཅད་ཟིལ་བའི་ཐིགས་པ་བཞིན། །བྱང་ཆུབ་སེམས་དཔའ་རབ་འབེབས་སྤྲིན་དང་འདྲ། །སྙིང་རྗེ་མངོན་བྱས་གང་དག་བསྟེན་ན་ནི། །སྟོང་གསུམ་དམ་ཆོས་ཆུ་ཡིས་ཚིམ་པར་བགྱིད། །ཀ་ར་བི་རའི་མེ་ཏོག་དྲི་མཆོག་མི་ན། །དེས་ནི་སྐྱེས་པར་བུད་མེད་དགའ་མ་འགྱུར། །ཙམ་བ་ཀ་ཡི་མེ་ཏོག་དྲི་ལ་དགའ། །ུཏྤལ་བར་ཤི་ཀ་ཡང་དེ་བཞིན་ནོ། །ཉན་ཐོས་ཀ་ར་ 394b པི་རའི་དྲི་བཞིན་ཏེ། །དེ་དག་ཤེས་པས་སྐྱེ་དགུ་དགའ་མི་འགྱུར། །ཀུན་མཁྱེན་དྲི་ཅན་བྱང་ཆུབ་སེམས་དཔའ་ལ། །ལྷ་དང་མི་རྣམས་རབ་ཏུ་དགའ་བར་འགྱུར། །གཅིག་པུ་མཆི་བ་དེ་ལ་མཚར་ཅི་མཆིས། །གང་ཞིག་སེམས་ཅན་མཐའ་ཡས་ཁྲིད་པ་རྨད། །ཉན་ཐོས་མི་རེང་གཅིག་པུ་མཆི་བ་བཞིན། །བྱང་ཆུབ་སེམས་དཔའ་རྣམས་ནི་དེད་དཔོན་འདྲ། །མགྲོན་ཞིག་གཞན་གྱིས་སྩལ་པ་འཚལ་བ་དང ། །སྐྱེ་བོ་ཀུན་ལ་སྩོལ་བགྱིད་ཀུན་མགྲོན་བཞིན། །སྒྲ་འབྲང་ཉན་ཐོས་ཀུན་ནི་མགྲོན་དང་འདྲ། །བྱང་ཆུབ་སེམས་དཔའ་ཀུན་ལ་མགྲོན་བགྱིད་བཞིན། །གཟིངས་ལས་བརྟེན་པས་ཆུ་བོ་ཆེན་པོ་ལས། །གཞན་དག་བསྒྲལ་བར་ནུས་པར་མི་འགྱུར་གྱི། །བརྟན་བགྱིས་གྲུ་ཡི་ནང་དུ་ཞུགས་ནས་ནི། །སེམས་ཅན་བྱེ་བ་མང་པོ་སྒྲོལ་བར་བགྱིད། །ཉན་ཐོས་གཟིངས་ལས་བརྟེན་པ་ལྟ་བུ་སྟེ། །སེམས་ཅན་གཞན་དག་སྒྲོལ་བར་ཇི་ལྟར་ནུས། །རྫོགས་པའི་བྱང་ཆུབ་གྲུར་ཞུགས་བྱང་ཆུབ་སེམས། །སྡུག་བསྔལ་མཚོ་ལས་སེམས་ཅན་སྒྲོལ་བར་བགྱིད། །ཇི་ལྟར་གཡུལ་ངོར་བོང་བུ་ཞོན་ན་ནི། །དགྲ་ལས་རྒྱལ་བར་ནུས་པར་མི་འགྱུར་གྱི། །གླང་ཆེན་རྟ་དང་ཤིང་རྟ་ཞོན་ནས་ནི། །གཡུལ་དུ་ལྷགས་བའི་དགྲ་རྣམས་ཆོམས་པར་ནུས། །ཉན་ཐོས་རྣམས་ནི་བོང་བུ་ཞོན་པ་བཞིན། །བྱང་ཆུབ་སེམས་དཔའ་གླང་ཆེན་ཞོན་འདྲ་སྟེ། །སེམས་ཅན་ཀུན་ལ་ཕན་དང་བདེ་སླད་དུ། །དེ་དག་ 395a ༄#། །ཤིང་དབང་དྲུང་དུ་བདུད་རྣམས་འཇོམས། །ཇི་ལྟར་བར་སྣང་སྐར་མས་རྒྱས་གྱུར་ཀྱང ། །དེ་དག་གིས་ནི་མཚན་མོ་མཛེས་མི་འགྱུར། །ཟླ་བ་རབ་ཏུ་རྒྱས་པ་ཤར་བས་ནི། །མཚན་མོ་མཁའ་ལ་ཐིག་ལེ་བཞིན་དུ་མཛེས། །ཡབ་གཅིག་ཉན་ཐོས་འདི་དག་སྐར་མ་འདྲ། །རྒྱལ་པོ་བྱང་ཆུབ་སེམས་དཔའ་ཟླ་བ་བཞིན། །གང་དག་སེམས་ཅན་ཀུན་ལ་སྨན་སླད་དུ། །ཡེ་ཤེས་ཤར་བས་སྐྱེ་བོ་སྣང་བར་བགྱིད། །ཡབ་གཅིག་སྲིན་བུ་མེ་ཁྱེར་ཚོགས་འོད་ཀྱིས། །ལས་རྣམས་ལ་ནི་འཇུག་པར་མི་ནུས་ཀྱི། །འཛམ་གླིང་འདི་ན་ཉི་མའི་འོད་རྣམས་ཀྱིས། །བྱ་བ་སྣང་ཚོགས་བརྒྱ་དག་བགྱིད་པར་འགྱུར། །ཉན་ཐོས་འདི་དག་སྲིན་བུ་མེ་ཁྱེར་འདྲ། །དེ་དག་ཤེས་འོད་ཡང་དག་མཐོང་མི་འགྱུར། །སངས་རྒྱས་རྣམ་གྲོལ་ཉི་མ་ལྟ་བུ་ཡི། །ཤེས་རབ་ཡེ་ཤེས་ཀྱིས་ནི་སེམས་ཅན་འགྲེལ། །ཡབ་གཅིག་ཝ་བརྒྱ་དག་གིས་སྐད་ཕྱུང་ཡང ། །རི་དྭགས་ཚོགས་རྣམས་འདྲོག་པར་མི་འགྱུར་གྱི། །སེངྒེའི་སྐད་ཀྱིས་གླང་ཆེན་རི་དྭགས་དང ། །བྱར་བཅས་རྣམས་ཀྱང་ཕྱོགས་བཅུར་འབྱེར་བར་འགྱུར། །ཡབ་གཅིག་དེ་ལྟར་ཉན་ཐོས་ཝ་འདྲར་གཟིགས། །དེ་དག་སྐད་ཀྱིས་བདུད་རྣམས་སྐྲག་མི་འགྱུར། །རྒྱལ་པོ་བྱང་ཆུབ་སེམས་དཔའི་སྤྱོད་སྤྱད་པས། །བདུད་དང་དེ་བཞིན་བདུད་རིགས་སྐྲག་པར་འགྱུར། །ཡབ་གཅིག་རྒྱུ་འདི་བདག་གིས་མཐོང་བས་ན། །ཐེག་པ་ 395b དམན་པ་དག་ལ་འདོད་མི་སྐྱེད། །སུ་ཞིག་བླ་མེད་བྱང་ཆུབ་སྤངས་ནས་ནི། །ཐེག་པ་དམན་ལ་འདོད་པ་སྐྱེད་པར་བགྱིད། །གང་དག་བྱང་ཆུབ་དམ་པ་ཡོངས་སྤངས་ནས། །ཐེག་པ་དམན་ལ་འདོད་པ་སྐྱེད་པར་བགྱིད། །དེ་དག་འཚོ་ངན་རྙེད་པ་ཐོབ་མ་འགྱུར། །དེ་དག་མིར་སྐྱེས་བ་ནི་ཉེས་པར་མཆིས། །གང་དག་ལྷར་བཅས་འཇིག་རྟེན་སྨན་སླད་དུ། །བྱང་ཆུབ་མཆོག་ལ་འདུན་པ་སྐྱེད་པར་བགྱིད། །དེ་དག་ལེགས་འཚོ་རྙེད་པར་ལེགས་པར་རྙེད། །དེ་དག་མི་ལུས་ཐོབ་པ་ལེགས་པར་མཆིས། །གང་དག་ལུས་དང་ངག་དང་ཡིད་ཀྱིས་ཀྱང ། །འཇིག་རྟེན་སྨན་སླད་ལས་བགྱིད་ཡིད་ཀྱང་རྟོན། །གང་དག་རྟག་ཏུ་སེམས་ཅན་སྨན་སླད་བརྩོན། །དེ་དག་ཨུ་དུམ་ཝ་རའི་མེ་ཏོག་བཞིན། །དེ་ནས་རྒྱལ་པོ་མ་སྐྱེས་དགྲས། བུ་མོ་མྱ་ངན་མེད་ཀྱིས་བྱིན་བས་ཚིགས་སུ་བཅད་པ་བསྟན་པ་འདི་དག་ཐོས་ནས་ཅང་མི་སྨྲ་བར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་སེམས་ཏེ། ཀྱེ་མ་བུ་མོ་འདི་སྤོབས་པ་ཐོགས་པ་མེད་པ་ཞིག་ན། ཅི་བཟོད་པ་ཐོབ་བམ། མ་ཐོབ་པ་བདག་གིས་འདི་བརྟག་པར་བྱར་ངེས་སོ་སྙམ་མོ། །དེ་ནས་ཚེ་དང་ལྡན་པ་ཤཱ་རིའི་བུས། བུ་མོ་མྱ་ངན་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །ཅི་བུ་མོ་ཁྱོད་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་སམ། སྨྲས་པ། མ་ཡིན་ནོ། །རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་སམ། སྨྲས་པ། མ་ 396a ༄#། །ཡིན་ནོ། །བུ་མོ་ཁྱོད་ཅི་ཞིག་དོན་དུ་གཉེར་ན། འདི་ལྟར་སེངྒེའི་སྒྲ་སྒྲོགས་པར་བྱེད། བུ་མོས་སྨྲས་པ། བཙུན་པ་ཤཱ་རིའི་བུ། གལ་ཏེ་བདག་ཆོས་འགའ་ཞིག་དོན་དུ་གཉེར་ན་ནི། བདག་སེངྒེའི་སྒྲ་ཅི་ཡང་མི་སྒྲོགས་པ་ཞིག་ན། བཙུན་པ་ཤཱ་རིའི་བུ། འདི་ལྟར་བདག་ནི་ཆོས་གང་ཡང་དོན་དུ་མི་གཉེར་ཏེ། དེའི་ཕྱིར་བདག་སེངྒེའི་སྒྲ་སྒྲོགས་སོ། །བཙུན་ཕ་ཤཱ་རིའི་བུ། གང་ཡང་འདི་སྐད་དུ་ཅི་བུ་མོ་ཁྱོད་ཉན་ཐོས་ཀྱི་ཐེག་པ་ལ་ཡང་དག་པར་ཞུགས་སམ་ཞེས་ཟེར་བ་ནི། བཙུན་པ་ཤཱ་རིའི་བུས་ཆོས་གང་མངོན་སུམ་དུ་བྱས་པའི་ཆོས་དེ་ལ། ཅི་ཉན་ཐོས་ཞེས་བྱ་བའམ། རང་སངས་རྒྱས་ཞེས་བྱ་བའམ། ཡང་དག་པར་རྫོགས་པའི་སངས་རྒྱས་ཞེས་བྱ་བའི་ཐེག་པ་རྣམ་པར་བཞག་པ་ཡོད་དམ། གནས་པ་བརྟན་ཤཱ་རིའི་བུས་སྨྲས་པ། བུ་མོ། ཆོས་དེ་ལ་ནི་ཐེག་པ་རྣམ་པར་བཞག་པ་མེད་དེ། ཆོས་དེ་ནི་འདི་ལྟར་མཚན་ཉིད་མེད་པར་མཚན་ཉིད་གཅིག་པའོ། །བུ་མོས་སྨྲས་པ། བཙུན་པ་ཤཱ་རིའི་བུ། མཚན་ཉིད་མེད་པའི་ཆོས་ལ་དོན་དུ་གཉེར་བ་ཅི་ཞིག་ཡོད། ཤཱ་རིའི་བུས་སྨྲས་པ། བུ་མོ། ཆོས་དེ་ལ་ནི་དོན་དུ་གཉེར་བ་ཅི་ཡང་མེད་དོ། །གནས་བརྟན་ཤཱ་རིའི་བུས། བུ་མོ་མྱ་ངན་མེད་ཀྱིས་བྱིན་པ་ལ་གཞན་ཡང་འདི་སྐད་ཅེས་སྨྲས་སོ། །བུ་མོ། སངས་རྒྱས་ཀྱི་ཆོས་རྣམས་དང་སོ་སོའི་སྐྱེ་བོའི་ 396b ཆོས་རྣམས་ལ་བྱེ་བྲག་ནི་ཅི་ཡོད། ཐ་དད་དུ་དབྱེ་བ་ནི་ཅི་ཡོད། བུ་མོས་སྨྲས་པ། བཙུན་པ་ཤཱ་རིའི་བུ། སྟོང་བ་ཉིད་དང ། དབེན་པ་ཉིད་ལ་བྱེ་བྲག་ནི་ཅི་ཡོད། ཐ་དད་དུ་དབྱེ་བ་ཅི་ཡོད། ཤཱ་རིའི་བུས་སྨྲས་པ། བྱེ་བྲག་མེད་ཅིང་ཐ་དད་དུ་དབྱེ་བ་ནི་ཅི་ཡང་མེད་དོ། །བུ་མོས་སྨྲས་པ། བཙུན་པ་ཤཱ་རིའི་བུ། སྟོང་པ་ཉིད་དང ། དབེན་པ་ཉིད་ལ་ཇི་ལྟར་བྱེ་བྲག་མེད་ཅིང་ཐ་དད་དུ་དབྱེ་བ་ཅི་ཡང་མེད་པར་དེ་བཞིན་དུ། བཙུན་པ་ཤཱ་རིའི་བུ། སངས་རྒྱས་ཀྱི་ཆོས་རྣམས་དང ། སོ་སོའི་སྐྱེ་བོའི་ཆོས་རྣམས་ལ་ཡང་བྱེ་བྲག་མེད་ཅིང་ཐ་དད་དུ་དབྱེ་བ་ཅི་ཡང་མེད་དོ། །བཙུན་པ་ཤཱ་རིའི་བུ། འདི་ལྟ་སྟེ། དཔེར་ན། ནམ་མཁའ་དང ། བླག་བ་མེད་པ་ལ་ཡང ། བྱེ་བྲག་མེད་ཅིང་ཐ་དད་དུ་དབྱེ་བ་ཅི་ཡང་མེད་དོ། །བཙུན་པ་ཤཱ་རིའི་བུ། དེ་བཞིན་དུ་སངས་རྒྱས་ཀྱི་ཆོས་རྣམས་དང ། སོ་སོའི་སྐྱེ་བོའི་ཆོས་རྣམས་ལ་ཡང་བྱེ་བྲག་མེད་ཅིང་ཐ་དད་དུ་དབྱེ་བ་ཅི་ཡང་མེད་དོ། །གནས་བརྟན་ཤཱ་རིའི་བུ་ཅང་མི་སྨྲ་བར་གྱུར་ཏོ།། དེ་ནས་ཚེ་དང་ལྡན་པ་མོའུ་འགལ་གྱི་བུ་ཆེན་པོས། བུ་མོ་མྱ་ངན་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ་མོ། ཅི་ཁྱོད་དེ་སྐད་ཅེས་ཟེར་བ་ལས་ན། སངས་རྒྱས་ཀྱི་ཆོས་རྣམས་ནི་ཤིན་ཏུ་ཆེས་ལྷག་པ་ཞིག་ཏུ་མཐོང་ལ། ཉན་ཐོས་ཀྱི་ཆོས་རྣམས་ཤིན་ཏུ་དམན་ལ་མཐོང་ངམ་ཅི་ན། ཁྱོད་ཉན་ཐོས་ཆེན་པོ་རྣམས་མཐོང་ན་ལྡང་བར་ཡང་མི་བྱེད། ཕྱག་ཀྱང་མི་ 397a ༄#། །འཚལ། བསུར་ཡང་མི་འགྲོ། གཏམ་ཡང་མི་ཟེར། སྟན་དང་བསོད་སྙོམས་ལ་ཡང་སྤྱན་འདྲེན་པར་མི་བྱེད། དེ་སྐད་ཅེས་སྨྲས་པ་དང ། བུ་མོ་མྱ་ངན་མེད་ཀྱིས་བྱིན་པས་གནས་བརྟན་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པོ་མོའུ་འགལ་གྱི་བུ་ཆེན་པོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན། སྐར་མའི་གཟུགས་སུ་གཏོགས་པ་ཇི་སྙེད་ཅིག་ཡོད་པ་ཤེས་སམ། མོའུ་འགལ་གྱི་བུ་ཆེན་པོས་སྨྲས་པ། བུ་མོ། སྙོམས་པར་ཞུགས་ན་ནི་ཁོ་བོས་གྲངས་ཤེས་ཀྱི།་སྙོམས་པར་མ་ཞུགས་ན་ནི་མི་ཤེས་སོ། །བུ་མོས་སྨྲས་པ། བཙུན་པ་མོའུ་འགལ་གྱི་བྱ་ཆེན་པོ། དེ་བཞིན་གཤེགས་པས་ནི་ལན་གཅིག་མཉམ་པར་བཞག་པ་ཉིད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དག་ན། སེམས་ཅན་འདས་པ་དང ། མ་འོངས་པ་དང ། ད་ལྟར་བྱུང་བ་ཐམས་ཅད་ཀྱི་སེམས་ཀྱི་སྤྱོད་པ་ཡང་རབ་ཏུ་མཁྱེན་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་ཏུ་གཏོགས་པའི་སེམས་ཅན་རྣམས་ཀྱི་ལྟ་ཅི་སྨོས་ཏེ། བཙུན་པ་མོའུ་འགལ་གྱི་བུ་ཆེན་པོ། འདི་ནི་དེ་བཞིན་གཤེགས་པ་དང ། ཉན་ཐོས་རྣམས་ཀྱི་ཁྱད་པར་ཡིན་ཏེ། འདི་ནི་ཐ་དད་དུ་དབྱེ་བ་ཡིན་ནོ། །བཙུན་པ་མོའུ་འགལ་གྱི་བུ་ཆེན་པོ། ཕྱོགས་བཅུའི་འཇིག་ 397b རྟེན་ན། སངས་རྒྱས་ཀྱི་ཞིང་འཇིག་པ་ནི་ཇི་སྙེད་ཅིག་ཡོད། འཆགས་པ་ནི་ཇི་སྙེད་ཅིག་ཡོད་ཤེས་སམ། མོའུ་འགལ་གྱི་བུས་སྨྲས་པ། བུ་མོ། དེ་ནི་མི་ཤེས་སོ། །བུ་མོས་སྨྲས་པ་བཙུན་པ་མོའུ་འགལ་གྱི་བུ་ཆེན་པོ། སངས་རྒྱས་བཅོམ་ལྡན་འདས་འདས་པ་ནི་ཇི་སྙེད་ཅིག་ཡོད། མ་བྱོན་པ་ནི་ཇི་སྙེད་ཅིག་ཡོད། ད་ལྟར་བཞུགས་པ་ནི་ཇི་སྙེད་ཅིག་ཡོད་ཤེས་སམ། མོའུ་འགལ་གྱི་བུས་སྨྲས་པ། བུ་མོ། དེ་ནི་མི་ཤེས་སོ། །བུ་མོས་སྨྲས་པ། བཙུན་པ་མོ་འགལ་གྱི་བུ་ཆེན་པོ། སེམས་ཅན་འདོད་ཆགས་ལ་སྤྱོད་པ་ནི་ཇི་སྙེད་ཅིག་ཡོད། ཞེ་སྡང་ལ་སྤྱོད་པ་ནི་ཇི་སྙེད་ཅིག་ཡོད། གཏི་མུག་ལ་སྤྱོད་པ་ནི་ཇི་སྙེད་ཅིག་ཡོད། ཆ་མཉམ་པ་ལ་སྤྱོད་པ་ཇི་སྙེད་ཅིག་ཡོད་ཤེས་སམ། མོའུ་འགལ་གྱི་བུས་སྨྲས་པ། བུ་མོ། དེ་ནི་མི་ཤེས་སོ། །བུ་མོས་སྨྲས་པ། བཙུན་པ་མོའུ་འགལ་གྱི་བུ་ཆེན་པོ། ཉན་ཐོས་ཀྱི་ཐེག་པ་པའི་སེམས་ཅན་ནི་ཇི་སྙེད་ཅིག་ཡོད། རང་སངས་རྒྱས་ཀྱི་ཐེག་པ་ནི་ཇི་སྙེད་ཅིག་ཡོད། ཐེག་པ་ཆེན་པོ་ལ་ཡང་དག་པར་ཞུགས་པ་ནི་ཇི་སྙེད་ཅིག་ཡོད་ཤེས་སམ། མོའུ་འགལ་གྱི་བུས་སྨྲས་པ། བུ་མོ། དེ་ནི་མི་ཤེས་སོ། །བུ་མོས་སྨྲས་པ། བཙུན་པ་མོའུ་འགལ་གྱི་བུ་ཆེན་པོ། ཉན་ཐོས་ཀྱིས་འདུལ་བའི་སེམས་ཅན་ནི་ཇི་སྙེད་ཅིག་ཡོད། རང་སངས་རྒྱས་ཀྱིས་འདུལ་བའི་སེམས་ཅན་ནི་ཇི་སྙེད་ཅིག་ཡོད། སངས་རྒྱས་ཀྱིས་འདུལ་བའི་སེམས་ཅན་ནི་ 398a ༄#། །ཇི་སྙེད་ཅིག་ཡོད་ཤེས་སམ། མོའུ་འགལ་གྱི་བུས་སྨྲས་པ། བུ་མོ། དེ་ནི་མི་ཤེས་སོ། །བུ་མོས་སྨྲས་པ། བཙུན་པ་མོའུ་འགལ་གྱི་བུ་ཆེན་པོ། ཡང་དག་པ་ཉིད་དུ་ངེས་པའི་སེམས་ཅན་ནི་ཇི་སྙེད་ཅིག་ཡོད། ལོག་པ་ཉིད་དུ་ངེས་པའི་སེམས་ཅན་ནི་ཇི་སྙེད་ཅིག་ཡོད། མ་ངེས་པའི་སེམས་ཅན་ནི་ཇི་སྙེད་ཅིག་ཡོད་ཤེས་སམ། མོའུ་འགལ་གྱི་བུས་སྨྲས་པ། བུ་མོ། དེ་ནི་མི་ཤེས་སོ། །བུ་མོས་སྨྲས་པ། བཙུན་པ་མོའུ་འགལ་གྱི་བུ་ཆེན་པོ། དེ་བཞིན་གཤེགས་པས་ནི། དེ་དག་དང ། གཞན་ཡང་དེའི་གོང་དུ་གང་ཉན་ཐོས་དང ། རང་སངས་རྒྱས་ཐམས་ཅད་ཀྱི་ས་མ་ཡིན་པ་དག་ཀྱང་རབ་ཏུ་མཁྱེན་ན། སེམས་ཅན་གཞན་དག་གི་ལྟ་ཅི་སྨོས་ཏེ། བཙུན་པ་མོའུ་འགལ་གྱི་བུ་ཆེན་པོ། འདི་ནི་དེ་བཞིན་གཤེགས་པའི་བླ་མའི་ཁྱད་པར་ཡིན་ནོ། །བཙུན་པ་མོའུ་འགལ་གྱི་བུ་ཆེན་པོ། གཞན་ཡང་དེ་བཞིན་གཤེགས་པས་ཁྱོད་རྫུ་འཕྲུལ་ཆེན་པོ་རྣམས་ཀྱི་མཆོག་ཏུ་བསྟན་གྱི། བཙུན་པ་མོའུ་འགལ་གྱི་བུ་ཆེན་པོ་འཇིག་རྟེན་གྱི་ཁམས་སྤོས་ཀྱི་འོད་ཅེས་བྱ་བ་གང་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་རབ་ཏུ་འགྱེད་པའི་འོད་ཟེར་ད་ལྟར་བཞུགས་ཏེ། འཚོ་ཞིང་གཞེས་ལ། བྱང་ཆུབ་སེམས་དཔའ་རྣམས་ལ་ཆོས་ཀྱང་སྟོན་པའི་སངས་རྒྱས་ཀྱི་ཞིང་དེ་ན། ཤིང་ལྗོན་ 398b པ་ཐམས་ཅད་ལས་ཙནྡན་སྦྲུལ་གྱི་སྙིང་པོའི་སྤོས་གང་གིས་སངས་རྒྱས་ཀྱི་ཞིང་དེ་ཁྱད་པར་འགྱུར་བའི་སྤོས་ཀྱི་ངད་ལྡང་བ་ཡོད་པ་དེར་སོང་ཞིག་།གནས་བརྟན་མོའུ་འགལ་གྱི་བུ་ཆེན་པོས་སྨྲས་པ། བུ་མོ། སངས་རྒྱས་ཀྱི་ཞིང་དེའི་མིང་ཡང་དེ་ཁོ་བོས་ད་གདོད་ཐོས་ན། སངས་རྒྱས་ལ་ལྟ་བ་དང ། ཆོས་མཉན་པའི་ཕྱིར་ཇི་ལྟར་འགྲོ་བར་བྱ། དེ་ནས་བུ་མོ་མྱ་ངན་མེད་ཀྱིས་བྱིན་པས་ཁྲི་དེ་ལས་མ་ལངས་བཞིན་དུ་ཚིག་འདི་སྐད་ཅེས་སྨྲས་སོ། །བདེན་པ་དང་བདེན་པའི་ཚིག་གང་གིས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཉན་ཐོས་དང ། རང་སངས་རྒྱས་ཐམས་ཅད་ཟིལ་གྱིས་གནོན་པ་ལྟ་ན། བདེན་པ་དང་བདེན་པའི་ཚིག་དེས། དེ་བཞིན་གཤེགས་པ་སྤོས་རབ་ཏུ་འགྱེད་པའི་འོད་ཟེར་དེས། བདག་ཉིད་དང ། རང་གི་སངས་རྒྱས་ཀྱི་ཞིང་ཉན་ཐོས་ཆེན་པོ་འདི་དག་ལ་སྟོན་པར་གྱུར་ཅིག་།ཙནྡན་གྱི་དྲི་དེ་དག་ཀྱང་ཉན་ཐོས་ཆེན་པོ་འདི་དག་གིས་ཚོར་བར་གྱུར་ཅིག་།ཅེས་བྱས་སོ།། དེ་ནས་བུ་མོ་མྱ་ངན་མེད་ཀྱིས་བྱིན་པས། ཚིག་དེ་སྐད་སྨྲས་མ་ཐག་ཏུ་བདེན་པའི་བྱིན་གྱི་རླབས་དེས། བཅོམ་ལྡན་འདས་དེ་བཞིན་གཤེགས་པ་སྤོས་རབ་ཏུ་འགྱེད་པའི་འོད་ཟེར་གྱིས། དེ་ཉིད་ཀྱི་ཚེ་འོད་གང་གིས་ཉན་ཐོས་ཆེན་པོ་དེ་དག་གིས་འཇིག་རྟེན་གྱི་ཁམས་སྤོས་ཀྱི་འོད་དེ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་རབ་ཏུ་ 399a ༄#། །འགྱེད་པའི་འོད་ཟེར་དེ་ཆོས་སྟོན་ཅིང་བཞུགས་པ་མཐོང་བར་འགྱུར་བ་དེ་ལྟ་བུའི་འོད་སྐུ་ལས་བཀྱེའོ། །ཆོས་བསྟན་པ་དེ་ཡང་སངས་རྒྱས་ཀྱི་མཐུས་འཇིག་རྟེན་གྱི་ཁམས་འདིར་ཐོས་སོ། །ཙནྡན་སྦྲུལ་གྱི་སྙིང་པོའི་དྲི་དེས་ཀྱང་འཇིག་རྟེན་གྱི་ཁམས་མི་མཇེད་འདི་ཁྱབ་པར་གྱུར་ཏོ། །དེ་བཞིན་གཤེགས་པ་སྤོས་རབ་ཏུ་འགྱེད་པའི་འོད་ཟེར་དེས་ཀྱང ། གསུང་གི་ཡན་ལག་དྲུག་ཅུ་དང་ལྡན་པའི་ཚིག་གིས་འདི་སྐད་ཅེས་བཀའ་སྩལ་ཏོ། །བུ་མོ་མྱ་ངན་མེད་ཀྱིས་བྱིན་པས་ཇི་སྐད་སྨྲས་པ་དེ་བཞིན་ཏེ། བྱང་ཆུབ་སེམས་དཔའ་སེམས་དཔའ་ཆེན་པོས་སེམས་དང་པོ་བསྐྱེད་མ་ཐག་ཏུ་ཉན་ཐོས་དང ། རང་སངས་རྒྱས་ཐམས་ཅད་ཟིལ་གྱིས་གནོན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་བྱ་རྒོད་ཀྱི་ཕུང་པོ་ལ་གནས་པས་ཙནྡན་སྦྲུལ་གྱི་སྙིང་པོའི་དྲི་ཚོར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཙནྡན་སྤྲུལ་གྱི་སྙིང་པོའི་དྲི་འདི་ག་ལས་བྱུང་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་ལ་འདི་སྐད་ཅེས་བཀའ་སྩལ་ཏོ། །བྱམས་པ། བུ་མོ་མྱ་ངན་མེད་ཀྱིས་བྱིན་པ་འདིས། ཉན་ཐོས་ཆེན་པོ་རྣམས་ཀྱི་མདུན་དུ་སེངྒེའི་སྒྲ་བསྒྲགས་ཏེ། དེས་ཉན་ཐོས་ཆེན་ 399b པོ་དེ་དག་ལ་བདེན་པའི་བྱིན་གྱི་རླབས་ཀྱིས་འཇིག་རྟེན་གྱི་ཁམས་སྤོས་ཀྱི་འོད་ཅེས་བྱ་བ་ན། དེ་བཞིན་གཤེགས་པ་སྦོས་རབ་ཏུ་འགྱེད་པའི་འོད་ཟེར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཆོས་སྟོན་ཅིང་བཞུགས་པ་ཡང་བསྟན། འཇིག་རྟེན་གྱི་ཁམས་སྤོས་ཀྱི་འོད་དེའི་ཙནྡན་སྤྲུལ་གྱི་སྙིང་པོའི་དྲི་དེས་ཀྱང་འཇིག་རྟེན་གྱི་ཁམས་འདི་ཁྱབ་པར་བྱས་སོ། །དེ་ནས་བུ་མོ་མྱ་ངན་མེད་ཀྱིས་བྱིན་པས། ཚེ་དང་ལྡན་པ་མོའུ་འགལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མོའུ་འགལ་གྱི་བུ་ཆེན་པོ། མཁས་པ་སུ་ཞིག་བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་ཆོ་འཕྲུལ་དང ། རྣམ་པར་འཕྲུལ་བ་བསམ་གྱིས་མི་ཁྱབ་པ་རྨད་དུ་བྱུང་བ་འདི་ལྟ་བུ་དག་མཐོང་ངམ་ཐོས་ན། ཉན་ཐོས་དམན་པ། ཞན་པ། ཞུམ་པ། ཉི་ཚེ་བའི་ཤེས་པ་དང་ལྡན་པ་རྣམས་ལ་ལྡང་བའམ། བསུར་འགྲོ་བའམ། ཕྱག་འཚལ་བར་བྱེད། བཙུན་པ་མོའུ་འགལ་གྱི་བུ་ཆེན་པོ། འཇིག་རྟེན་གྱི་ཁམས་སྤོས་ཀྱི་འོད་དེ་ཇི་ཙམ་དུ་ཐག་རིང་བ་ཤེས་སམ། མོའུ་འགལ་གྱི་བུས་སྨྲས་པ། བུ་མོ། དེ་ནི་མི་ཤེས་སོ། །བུ་མོས་སྨྲས་པ། བཙུན་པ་མོའུ་འགལ་གྱི་བུ་ཆེན་པོ། གལ་ཏེ་ཁྱོད་འདྲ་བའི་རྫུ་འཕྲུལ་ཅན་ཤ་སྟག་གིས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི། དཔེར་ན། བུ་རམ་ཤིང་གི་ཚལ་ལམ། འོད་མའི་ཚལ་ལམ། འདམ་བུའི་ཚལ་ལམ ། 400a ༄#། །འབྲས་སཱ་ལུའི་ཞིང་བཞིན་དུ་མཚམས་མེད་པར་གང་བར་གྱུར་ནས། དེ་དག་ཐམས་ཅད་ཀྱིས་བསྐལ་པར་བརྩིས་ཀྱང ། འཇིག་རྟེན་གྱི་ཁམས་སྤོས་ཀྱི་འོད་ཅེས་བྱ་བ་དེ།་སངས་རྒྱས་ཀྱི་ཞིང་ཇི་སྙེད་ཅིག་འདས་པའི་ཕ་རོལ་ན་འདུག་པ། བགྲང་བའི་ཐབས་ཀྱིས་རྟོགས་པར་མི་ནུས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་སྤོས་རབ་ཏུ་འབྱེད་པའི་འོད་ཟེར་གྱིས་འོད་དེ་དག་མི་སྣང་བར་མཛད་དེ། སངས་རྒྱས་ཀྱི་ཞིང་དེ་ཡང་མི་སྣང་བར་མཛད་དོ། །དེ་ནས་ཚེ་དང་ལྡན་པ་འོད་སྲུང་ཆེན་པོས། བུ་མོ་མྱ་ངན་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ་མོ་ཁྱོད་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་སྔོན་མཐོང་ངམ། བུ་མོས་སྨྲས་པ། བཙུན་པ་འོད་སྲུང་ཆེན་པོ། དེ་བཞིན་གཤེགས་པ་མཐོང་བར་ནུས་སམ། དེ་བཞིན་གཤེགས་པས། གང་དག་ང་ལ་གཟུགས་སུ་མཐོང ། ། གང་དག་ང་ལ་སྒྲར་ཤེས་པ། །ལོག་པས་སྤོང་བར་ཞུགས་པ་སྟེ། །སྐྱེ་བོ་དེ་དག་ང་མི་མཐོང ། །སངས་རྒྱས་རྣམས་ནི་ཆོས་ཉིད་ལྟ། །འདྲེན་པ་རྣམས་ནི་ཆོས་ཀྱི་སྐུ། །ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། །ཞེས་མ་གསུངས་སམ། བཙུན་པ་འོད་སྲུང་ཆེན་པོ། གཞན་ཡང་བུ་མོ་ཁྱོད་ཀྱིས་བཅོམ་ལྡན་འདས་དེ་བཞིན་གཤེགས་ 400b དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེ་སྔོན་མཐོང་ངམ་ཞེས་དེ་སྐད་ཟེར་བ་ནི། བཙུན་པ་འོད་སྲུང་ཆེན་པོ། བདག་གིས་དེ་བཞིན་གཤེགས་པ་མཐོང་མོད་ཀྱི། ཤའི་མིག་གིས་མ་ཡིན་ཏེ། གཟུགས་སུ་མ་ཡིན་ནོ། །ལྷའི་མིག་གིས་མ་ཡིན་ཏེ། ཚོར་བར་མ་ཡིན་ནོ། །ཤེས་རབ་ཀྱི་མིག་གིས་མ་ཡིན་ཏེ། འདུ་ཤེས་ཀྱིས་མ་ཡིན་ནོ།། ཆོས་ཀྱི་མིག་གིས་མ་ཡིན་ཏེ། འདུ་བྱེད་དུ་མ་ཡིན་ནོ། །སངས་རྒྱས་ཀྱི་མིག་གིས་མ་ཡིན་ཏེ། རྣམ་པར་ཤེས་པར་མ་ཡིན་ནོ། །བཙུན་པ་འོད་སྲུང་ཆེན་པོ། གཞན་ཡང་བདག་གིས་དེ་བཞིན་གཤེགས་པ་མཐོང་སྟེ། དཔེར་ན། གནས་བརྟན་གྱིས་མ་རིག་པ་དང ། སྲིད་པ་ལ་སྲེད་པ་མཐོང་བ་བཞིན་ནོ། །བཙུན་པ་འོད་སྲུང་ཆེན་པོ། གཞན་ཡང་བདག་གིས་དེ་བཞིན་གཤེགས་པ་མཐོང་སྟེ། དཔེར་ན། གནས་བརྟན་གྱིས་ངར་འཛིན་པ་དང ། ང་ཡིར་འཛིན་པ་མཐོང་བ་བཞིན་ནོ། །གནས་བརྟན་འོད་སྲུང་ཆེན་པོས་སྨྲས་པ། བུ་མོ། འདི་ལྟར་མ་རིག་པ་དང ། སྲིད་པ་ལ་སྲེད་པ་དང ། ངར་འཛིན་པ་དང ། ང་ཡིར་འཛིན་པའི་ཆོས་འདི་གཉིས་ནི་མེད་པ་ཡིན་ནོ། །ཆོས་གང་མེད་པ་དེ་ནི་བལྟ་བར་མི་ནུས་སོ། །བུ་མོ་མྱ་ངན་མེད་ཀྱིས་བྱིན་པས་སྨྲས་པ། བཙུན་པ་འོད་སྲུང་ཆེན་པོ། དེ་དེ་བཞིན་ནོ། །ཆོས་ཐམས་ཅད་ནི་མེད་པ་ཡིན་ཏེ། དེ་དག་ནི་བལྟ་བར་མི་ནུས་སོ། །འོད་སྲུང་ཆེན་པོས་སྨྲས་པ། བུ་མོ། 401a ༄#། །ཅི་སངས་རྒྱས་ཀྱི་ཆོས་ཀྱང་མེད་དམ། བུ་མོས་སྨྲས་པ། གནས་བརྟན། སངས་རྒྱས་ཀྱི་ཆོས་རྣམས་སམ། སོ་སོའི་སྐྱེ་བོའི་ཆོས་རྣམས་ཀྱང་རུང་སྟེ།་ཆོས་འགའ་ཞིག་ཡོངས་སུ་གྲུབ་པར་འདོད་དམ། འོད་སྲུང་ཆེན་པོས་སྨྲས་པ། བུ་མོ། ཁོ་བོས་ནི་སོ་སོའི་སྐྱེ་བོའི་ཆོས་རྣམས་ལ་ཡང་ཡོངས་སུ་གྲུབ་པར་མི་འདོད་ན། སངས་རྒྱས་ཀྱི་ཆོས་རྣམས་ལྟ་ཅི་སྨོས། བུ་མོས་སྨྲས་པ། བཙུན་པ་འོད་སྲུང་ཆེན་པོ། ཆོས་གང་དག་ཡོངས་སུ་གྲུབ་པ་མེད་པའི་ཆོས་དེ་དག་ཅི་ཡོད་པ་ཡིན་ནམ། འོན་ཏེ་མེད་པ་ཡིན། འོད་སྲུང་ཆེན་པོས་སྨྲས་པ། བུ་མོ། མེད་པ་དེ་དག་ནི་མེད་པ་ཡིན་ནོ། །བུ་མོས་སྨྲས་པ། བཙུན་པ་འོད་སྲུང་ཆེན་པོ། དེ་བས་ན་ཆོས་ཐམས་ཅད་ནི་མེད་པ་ཉིད་དོ། །མེད་པ་གང་ཡིན་པ་དེ་དག་ལ་ནི་ལྟ་བ་རྣམ་པར་སྦྱང་བར་བྱ་བ་མེད་དོ། །བཙུན་པ་འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་སངས་རྒྱས་ལ་ལྟ་བ་རྣམ་པར་སྦྱང་བར་འདོད་པས་ནི་བདག་ལ་ལྟ་བ་རྣམ་པར་སྦྱང་བར་བྱའོ། །འོད་སྲུང་ཆེན་པོས་སྨྲས་པ། བུ་མོ། བདག་ལ་ལྟ་བ་ཇི་ལྟར་རྣམ་པར་དག་པར་འགྱུར། བུ་མོས་སྨྲས་པ། བཙུན་པ་འོད་སྲུང་ཆེན་པོ། གང་གི་ཚེ་བདག་རང་བཞིན་མེད་པའི་ཕྱིར་ཆོས་ཐམས་ཅད་རང་བཞིན་མེད་པ་ཉིད་དུ་མོས་ན། དེ་ཙམ་གྱིས་ན་བདག་ལ་ལྟ་བ་རྣམ་པར་དག་པར་འགྱུར་རོ། །འོད་སྲུང་ཆེན་པོས་ 401b སྨྲས་པ། བུ་མོ། བདག་གིས་རང་བཞིན་ཅི་ཡིན། བུ་མོས་སྨྲས་པ། བཙུན་པ་འོད་སྲུང་ཆེན་པོ། བདག་གིས་རང་བཞིན་ནི་སྟོང་པ་ཉིད་དོ། །བདག་གི་རང་བཞིན་མེད་པའི་ཕྱིར་བདག་དབེན་པ་ཡང་ཡིན་ནོ། །རང་བཞིན་མེད་པ་དེས་བདག་དབེན་ནོ། །རང་བཞིན་མེད་པ་དེས་ཆོས་ཐམས་ཅད་དབེན་ནོ། །འོད་སྲུང་ཆེན་པོས་སྨྲས་པ། བུ་མོ་ཁྱོད་ཀྱིས་སུ་ལས་ཆོས་ཐོས་ན ། འདི་ལྟར་ཁྱོད་ཀྱི་ཡང་དག་པའི་ལྟ་བ་སྐྱེས་པར་གྱུར། བུ་མོ། ཡང་དག་པའི་ལྟ་བ་སྐྱེས་པ་ལ་ནི་རྒྱུ་གཉིས་དང ། རྐྱེན་གཉིས་ཡོད་དེ། གཞན་གྱི་སྒྲ་དང ། བདག་ཉིད་ཀྱི་ཚུལ་བཞིན་ཡིད་ལ་བྱེད་པ་ལས་འབྱུང་ངོ་ཞེས་དེ་སྐད་གསུངས་སོ། །བུ་མོས་སྨྲས་པ། བཙུན་པ་འོད་སྲུང་ཆེན་པོ། གང་དག་གཞན་གྱི་དྲིང་མི་འཇོག་པའི་ཤེས་རབ་ཅན་དེ་དག་ནི་གཞན་གྱི་སྒྲ་དང ། བདག་ཉིད་ཀྱིས་ཚུལ་བཞིན་དུ་སོ་སོར་རྟོགས་པ་ལས་ལྟ་བ་རྣམ་པར་དག་པར་འགྱུར་རོ། །བཙུན་པ་འོད་སྲུང་ཆེན་པོ། གང་དག་གཞན་གྱི་དྲིང་མི་འཇོག་པའི་ཤེས་རབ་ཅན་དག་ནི་གཞན་གྱི་སྒྲ་མི་ཚོལ་ལོ། །བཙུན་པ་འོད་སྲུང་ཆེན་པོ། ཇི་ལྟར་ན་དགེ་སློང་ཚུལ་བཞིན་དུ་ཞུགས་པ་ཡིན། འོད་སྲུང་ཆེན་པོས་སྨྲས་པ། བུ་མོ། གང་གི་ཚེ་དགེ་སློང་ཇི་སྐད་ཐོས་པའི་ཆོས་རྣམས་ཀྱི་དོན་ལ་ཉེ་བར་རྟོག་པར་བྱེད་པ་དེ་ལྟར་ན། དགེ་སློང་ཚུལ་བཞིན་དུ་ཞུགས་པ་ཡིན་ནོ། །འོད་སྲུང་ཆེན་པོས་སྨྲས་པ། བུ་མོ། ཇི་ལྟར་ན་བྱང་ཆུབ་སེམས་དཔའ་ཚུལ་བཞིན་དུ་ཞུགས་ 402a ༄#། །པ་ཡིན། བུ་མོས་སྨྲས་པ། བཙུན་པ་འོད་སྲུང་ཆེན་པོ། གང་གིས་བྱང་ཆུབ་སེམས་དཔའ་སེམས་ཅན་ཐམས་ཅད་དང་ལྷན་ཅིག་གནས་ཀྱང་སེམས་ཅན་དུ་འདུ་ཤེས་སྐྱེད་པར་མི་བྱེད་པ་དེ་ལྟར་ན། བྱང་ཆུབ་སེམས་དཔའ་ཚུལ་བཞིན་དུ་ཞུགས་པ་ཡིན་ནོ། །བཙུན་པ་འོད་སྲུང་ཆེན་པོ། ཞུགས་པ་ཞེས་བྱ་བ་ནི། ཆོས་ཐམས་ཅད་ནི་སྔོན་གྱི་མཐའི་དེ་བཞིན་ཉིད་དང་ལྡན་ནོ། །ཆོས་ཐམས་ཅད་ནི་ཕྱི་མའི་མཐའི་དེ་བཞིན་ཉིད་དང་ལྡན་ནོ། །ཆོས་ཐམས་ཅད་ནི་ད་ལྟར་བྱུང་བའི་དེ་བཞིན་ཉིད་དང་ལྡན་ནོ། ། ཞེས། བཙུན་པ་འོད་སྲུང་ཆེན་པོ། བྱང་ཆུབ་སེམས་དཔའ་སྦྱོར་བ་དེ་ལྟ་བུས་སྦྱོར་བར་མི་བྱེད་ན། དེ་ཙམ་གྱིས་ན་བྱང་ཆུབ་སེམས་དཔའ་ཚུལ་བཞིན་དུ་ཞུགས་པ་ཡིན་ནོ། །འོད་སྲུང་ཆེན་པོས་སྨྲས་པ། བུ་མོ། ཆོས་དེ་དག་ལ་ཇི་ལྟར་སྦྱར་བར་བྱ། བུ་མོས་སྨྲས་པ། བཙུན་པ་འོད་སྲུང་ཆེན་པོ། ཇི་ལྟར་དེ་བཞིན་ཉིད་ལ་སྦྱོར་བ་ཡང་མེད། མི་སྦྱོར་བ་ཡང་མེད་པར་མཐོང་བ་དེ་བཞིན་དུ་ཆོས་ཐམས་ཅད་ལ་སྦྱར་པར་བྱའོ། །འོད་སྲུང་ཆེན་པོས་སྨྲས་པ། བུ་མོ། ཇི་ལྟར་མཐོང་ན་ཆོས་ཐམས་ཅད་མཐོང་བ་ཡིན། བུ་མོས་སྨྲས་པ ། བཙུན་པ་འོད་སྲུང་ཆེན་པོ། ཆོས་ཐམས་ཅད་ལ་གཉིས་སུ་མེད་པར་མཐོང་ལ། མི་བྱེད་ཅིང་འཇིག་པར་ཡང་མི་བྱེད་ན། དེ་ལྟར་ན་ཆོས་ཐམས་ཅད་མཐོང་བ་ཡིན་ནོ། །བཙུན་པ་ 402b འོད་སྲུང་ཆེན་པོ། མཐོང་བ་ཞེས་བྱ་བ་དེ་ནི། མཐོང་བ་མེད་པའི་ཚིག་བླ་དྭགས་སོ། །འོད་སྲུང་ཆེན་པོས་སྨྲས་པ། བུ་མོ། བདག་ཇི་ལྟར་བལྟ་བར་བྱ། བུ་མོས་སྨྲས་པ། བཙུན་པ་འོད་སྲུང་ཆེན་པོས་ཇི་ལྟར་མཐོང་བ་བཞིན་དུ་བལྟ་བར་བྱའོ། །འོད་སྲུང་ཆེན་པོས་སྨྲས་པ། བུ་མོ། ཁོ་བོས་ནི་བདག་དང་བདག་གི་མ་མཐོང་ངོ ། །བུ་མོས་སྨྲས་པ། བཙུན་པ་འོད་སྲུང་ཆེན་པོ། ཇི་ལྟར་བདག་མེད་ཅིང་བདག་གི་མེད་པ་དེ་བཞིན་དུ་ཆོས་ཐམས་ཅད་བལྟ་བར་བྱའོ། །གཏམ་དེ་སྐད་བརྗོད་པའི་སྐབས་སུ་གནས་བརྟན་རབ་འབྱོར་གྱིས་བུ་མོ་མྱ་ངན་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ་མོ་ཁྱོད་ཀྱི་སྤོབས་པ་འདི་འདྲ་བ་ནི་ཁྱོད་ཀྱིས་རྙེང་\་RཎYཱེཌ\་པ་ལེགས་པར་རྙེད་དོ། །བུ་མོ་མྱ་ངན་མེད་ཀྱིས་བྱིན་པས་སྨྲས་པ། བཙུན་པ་རབ་འབྱོར། རྙེད་པ་ལས་ནི་སྤོངས་པར་མི་འགྱུར་གྱི། གང་གིས་ཅི་ཡང་མ་རྙེད་པ་དེ་སྤོབས་པ་དང་ལྡན་ཞིང ། གང་གིས་ནང་ངམ་ཕྱི་རོལ་ཅི་ཡང་མི་དམིགས་པ་དེ་སྤོབས་པ་དང་ལྡན་པ་ཡིན་ནོ། །རབ་འབྱོར་གྱིས་སྨྲས་པ། བུ་མོ། གང་མ་རྙེད་ན་སྤོབས་པ་དང་ལྡན་པ་ཡིན། བུ་མོས་སྨྲས་པ། གང་གིས་བདག་མ་རྙེད་ཅིང་གཞན་མ་ཡིན། དགེ་བ་མ་ཡིན། མི་དགེ་བ་མ་ཡིན། ཁ་ན་མ་ཐོ་བ་དང་བཅས་པ་མ་ཡིན། ཁ་ན་མ་ཐོ་བ་མེད་པ་མ་ཡིན། ཟག་པ་དང་བཅས་པ་མ་ཡིན། ཟག་པ་མེད་པ་མ་ཡིན། འདུས་བྱས་མ་ཡིན། འདུས་མ་བྱས་མ་ཡིན། འཇིག་རྟེན་མ་ཡིན། འཇིག་ 403a ༄#། །རྟེན་ལས་འདས་པ་མ་ཡིན། ཀུན་ནས་ཉོན་མོངས་པ་མ་ཡིན། རྣམ་པར་བྱང་བ་མ་ཡིན་ཏེ། འཁོར་བ་དང ། མྱ་ངན་ལས་འདས་པ་མ་རྙེད་ན། སོ་སོའི་སྐྱེ་བོའི་ཆོས་མི་དམིགས་ཤིང་འཕགས་པའི་ཆོས་ཀྱང་མི་དམིགས་ཏེ། སངས་རྒྱས་ཀྱི་ཆོས་མི་དམིགས་ན། བཙུན་པ་རབ་འབྱོར། དེ་ལྟར་ན་གང་གིས་ཅི་ཡང་མ་རྙེད་པའི་སྤོབས་པ་དང་ལྡན་པ་ཡིན་ནོ། །རབ་འབྱོར་གྱིས་སྨྲས་པ། ཇི་ལྟར་སྤོབས་པར་འགྱུར། བུ་མོས་སྨྲས་པ། བཙུན་པ་རབ་འབྱོར་གྱིས་ཇི་ལྟར་ཆོས་ཐམས་ཅད་མ་རྙེད་པ་དེ་བཞིན་དུ་དེ་སྤོབས་པར་འགྱུར་རོ། །ཆོས་ཀྱི་དེ་བཞིན་ཉིད་གང་གིས་གནས་བརྟན་ཉོན་མོངས་པ་མེད་པ་རྣམས་ཀྱི་མཆོག་ཏུ་བསྟན་པའི་ཆོས་ཀྱི་དེ་བཞིན་ཉིད་དེ་ཅི་བརྗོད་ཅིང ། སྨྲར་རུང་ངམ། ཉོན་མོངས་པ་མེད་པ་དེ་དང ། ཆོས་ཀྱི་དེ་བཞིན་ཉིད་དེ་ལ་སྤོབས་པ་ཅི་ཡང་ཡོད་དམ། རབ་འབྱོར་གྱིས་སྨྲས་པ། ཉོན་མོངས་པ་མེད་པ་དང ། དེ་བཞིན་ཉིད་ནི་བསྟན་པའམ། བརྗོད་པར་མི་ནུས་སོ། །བུ་མོས་སྨྲས་པ། བཙུན་པ་རབ་འབྱོར། ཆོས་ཐམས་ཅད་ནི་བརྗོད་དུ་མེད་པ་ཡིན་ན། ཁྱོད་ཀྱིས་བུ་མོ་ཁྱོད་སྤོབས་པ་འདི་ལྟ་བུ་དང་ལྡན་པ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །ཞེས་བྱ་བ་དེ་ཇི་ལྟ་བུ་ཡིན། རབ་འབྱོར་གྱིས་སྨྲས་པ། བུ་མོ་ཁྱོད་ནི་འདི་ལྟར་མེད་པའི་སྤོབས་པས་སྟོན་ཏོ། །བུ་མོས་སྨྲས་པ། གནས་བརྟན་རབ་ 403b འབྱོར། ཆོས་ཐམས་ཅད་ལ་བྲག་ཅ་ལྟ་བུར་མོས་སམ། རབ་འབྱོར་གྱིས་སྨྲས་པ། བུ་མོ། མོས་སོ། །བུ་མོས་སྨྲས་པ། གནས་བརྟན་རབ་འབྱོར། ཅི་བྲག་ཅ་ལ་སྤོབས་པ་ཅི་ཡང་ཡོད་དམ། རབ་འབྱོར་གྱིས་སྨྲས་པ། བུ་མོ། དེ་ནི་མེད་དེ། བུ་མོ། རྒྱུ་དང་རྐྱེན་ཚོགས་པ་ལས་སྒྲ་འབྱུང་བར་ཟད་དོ། །བུ་མོས་སྨྲས་པ། བཙུན་པ་རབ་འབྱོར། བརྟེན་ནས་སྒྲ་འབྱུང་བ་གང་ཡིན་པ་དེ་ལ་རང་བཞིན་གྱིས་གྲུབ་པ་ཅི་ཡང་མེད་དོ། །དེ་ཅིའི་ཕྱིར་ཞེ་ན། འདི་ལྟར་གང་བརྟེན་ནས་བྱུང་བ་དེ་ལ་ནི་སྐྱེ་བ་ཅི་ཡང་མེད་པའི་ཕྱིར་རོ། །རབ་འབྱོར་གྱིས་སྨྲས་པ། བུ་མོ། ཆོས་ཐམས་ཅད་ནི་བརྟེན་ནས་བྱུང་བའོ། །བུ་མོ་སྨྲས་པ། བཙུན་པ་རབ་འབྱོར། དེ་བས་ན་ཆོས་ཐམས་ཅད་ནི་རང་བཞིན་གྱིས་མ་སྐྱེས་པའོ། །རབ་འབྱོར་གྱིས་སྨྲས་པ། བུ་མོ། གལ་ཏེ་ཆོས་ཐམས་ཅད་རང་བཞིན་གྱིས་མ་སྐྱེས་པ་ཡིན་ན། བཅོམ་ལྡན་འདས་ཀྱིས་དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ནི་འོངས་ཏེ་གཤེགས་སོ། །དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ནི་མ་འོངས་པ་ན་འབྱུང་བར་འགྱུར་རོ། །དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་ནི་ད་ལྟར་བཞུགས་སོ། །ཞེས་ཅིའི་ཕྱིར་བསྟན། བུ་མོས་སྨྲས་པ། བཙུན་པ་རབ་འབྱོར། མི་སྐྱེ་བ་ནི་སྐྱེ་བར་མི་འགྱུར་རོ། །དེ་ཅིའི་ཕྱིར་ཞེ་ན། བཙུན་པ་རབ་འབྱོར། ཆོས་ཀྱི་དབྱིངས་ལ་ནི་སྐྱེ་བའམ་ནུབ་པར་འགྱུར་བར་མི་འདོད་པའི་ཕྱིར་རོ། །རབ་འབྱོར་གྱིས་སྨྲས་ 404a ༄#། །པ།་བུ་མོ་ཁྱོད་ནི་འདི་ལྟར་སྐྱེ་བ་མེད་པ་དོན་དམ་པའི་ཚིག་སྟོན་ཏོ། །བུ་མོས་སྨྲས་པ། བཙུན་པ་རབ་འབྱོར། བསྟན་པ་ཐམས་ཅད་ནི་བསྟན་དུ་མེད་པའོ། །དེའི་ཕྱིར་བསྟན་པ་ཐམས་ཅད་བསྟན་དུ་མེད་ཅེ་ན། དེ་ནི་བསྟན་ཀྱང་རུང ། མ་བསྟན་ཀྱང་རུང་བ་དངོས་པོ་མ་ཡིན་ཏེ། དངོས་པོ་མེད་པ་དང ། བརྗོད་དུ་མེད་པའི་མཐའ་མི་སྤོང་བའི་ཕྱིར་རོ། །རབ་འབྱོར་གྱིས་སྨྲས་པ། བུ་མོ་ཁྱོད་ཁྱིམ་ན་གནས་བཞིན་དུ་འདི་ལྟ་བུའི་ཆོས་ལ་གནས་ཤིང ། འདི་ལྟ་བུའི་རྣམ་པར་དག་པ་སྟོན་པ་འདི་ནི་ངོ་མཚར་ཏོ། །བུ་མོས་སྨྲས་པ། བཙུན་པ་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ལ་ནི་ཁྱིམ་པའམ། རབ་ཏུ་བྱུང་བ་ཞེས་གཟུང་བར་མི་བྱའོ། །དེ་ཅིའི་ཕྱིར་ཞེ་ན། དེ་དག་ནི་བསམ་པས་ཕྱེ་བ་ཡིན། ཤེས་རབ་ཀྱིས་ཕྱེ་བ་ཡིན། ཡེ་ཤེས་ཀྱིས་ཕྱེ་བ་ཡིན་པའི་ཕྱིར་རོ། །བཙུན་པ་རབ་འབྱོར། བྱང་ཆུབ་སེམས་དཔའི་གནས་པ་ཁྱོད་ཀྱིས་ཤེས་སམ། རབ་འབྱོར་གྱིས་སྨྲས་པ། བུ་མོ་ཁྱོད་ཀྱིས་ཤོད་ཅིག་དང ། ཁོ་བོས་མཉན་ཏོ། །བུ་མོས་སྨྲས་པ། བཙུན་པ་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བརྒྱད་དང་ལྡན་ན། ཁྱིམ་པའམ་རབ་ཏུ་བྱུང་བ་ཞེས་མི་བྱ་སྟེ། སྤྱོད་ལམ་གང་དང་གང་གིས་གནས་ཀྱང་ཁ་ན་མ་ཐོ་བ་མེད་པར་འགྱུར་རོ། །བརྒྱད་གང་ཞེ་ན། འདི་ལྟ་སྟེ། བཙུན་པ་རབ་ 404b འབྱོར། འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷག་པའི་བསམ་པ་ཕུན་སུམ་ཚོགས་པ་ཡིན་ཏེ། ལྷག་པའི་བསམ་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་རོ། །སེམས་ཅན་ཐམས་ཅད་ཡོངས་སུ་མི་གཏོང་བར་གནས་པའི་ཕྱིར་བྱམས་པ་ལ་གནས་པ་ཡང་ཡིན་ནོ། །འཇིག་རྟེན་པའི་དགའ་བ་དང་སྤྱོད་པ་དང་བྲལ་བའི་ཕྱིར་སྙིང་རྗེ་ཆེན་པོ་ལ་གནས་པ་ཡང་ཡིན་ནོ། །ལུས་དང་སྲོག་ལ་མི་ལྟ་བའི་ཕྱིར་བཏང་སྙོམས་ལ་གནས་པ་ཡང་ཡིན་ནོ། །ཡོངས་སུ་བསྔོ་བ་ལ་མཁས་པ་ཤིན་ཏུ་རྫོགས་པའི་ཕྱིར་ཐབས་ལ་མཁས་པ་ཡང་ཡིན་ནོ། །ལྟ་བ་ཐམས་ཅད་དང་བྲལ་བའི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ངེས་པར་འབྱུང་བ་ཡང་ཡིན་ནོ། །དགེ་བའི་རྩ་བ་ཚོལ་བ་ལ་བརྩོན་པས་ཆོག་མི་ཤེས་པའི་ཕྱིར་བརྩོན་འགྲུས་བརྩམས་པ་ཡང་ཡིན་ནོ། །བཟོད་པ་ཤིན་ཏུ་ཐོབ་པའི་ཕྱིར་མ་བསྟན་པར་ཤེས་པ་ཡང་ཡིན་ཏེ། བཙུན་པ་རབ་འབྱོར། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བརྒྱད་པོ་དེ་དག་དང་ལྡན་ན། ཁྱིམ་པའམ། རབ་ཏུ་བྱུང་བ་ཞེས་མི་བྱ་སྟེ། སྤྱོད་ལམ་གང་དང་གང་གིས་གནས་ཀྱང་ཐམས་ཅད་དུ་ཁ་ན་མ་ཐོབ་མེད་པར་འགྱུར་རོ། །དེ་ནས་ཚེ་དང་ལྡན་པ་སྒྲ་གཅན་ཟིན་གྱིས། བུ་མོ་མྱ་ངན་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ་མོ་ཁྱོད་མལ་ཁྲི་གསེར་གྱི་རྐང་པ་ཅན་ལ་འདུག་ཅིང་སྟན་ཤིན་ཏུ་མཐོ་བ་ལ་ 405a ༄#། །འདུག་ནས། ཉན་ཐོས་ཆེན་པོ་དག་དང་གཏམ་ཟེར་བ་དེ་ནི་རུང་བ་མ་ཡིན་པར་གནས་པ་ཡིན་ནོ། །བུ་མོ་མིན་བར་སྟན་མཐོན་པོ་ལ་འདུག་པ་ལ་སྟན་དམའ་པ་ལ་འདུག་པས་ཆོས་བཤད་པར་མི་བྱའོ། །ཞེས་བྱ་བ་ཅི་ཁྱོད་ཀྱིས་མ་ཐོས་སམ། དེ་སྐད་ཅེས་སྨྲས་པ། བུ་མོ་མྱ་ངན་མེད་ཀྱིས་བྱིན་པས་ཚེ་དང་ལྡན་པ་སྒྲ་གཅན་ཟིན་ལ་འདི་སྐད་ཅེས་སྨྲས་སོ། །བཙུན་པ་སྒྲ་གཅན་ཟིན། འཇིག་རྟེན་ན་གང་དག་ནི་རུང་བ་ཡིན། འཇིག་རྟེན་ན་གང་དག་ནི་རུང་བ་མ་ཡིན་པ་ཁྱོད་ཀྱིས་ཤེས་སམ། སྒྲ་གཅན་ཟིན་གྱིས་སྨྲས་པ། བུ་མོ་ཁོ་བོས་ཤེས་ཏེ། གང་དག་ཇི་ལྟར་བཅས་པའི་བསླབ་པ་ལ་སློབ་ཅིང ། བསླབ་པ་དེ་ལས་འགལ་བར་མི་བྱེད་པ་དེ་དག་ནི་རུང་བ་ཞེས་བྱའོ། ། གང་དག་བསླབ་པ་དེ་ལས་འགལ་བར་བྱེད་པ་དེ་དག་ནི་རུང་བ་མ་ཡིན་པ་ཞེས་བྱའོ། །བུ་མོ་མྱ་ངན་མེད་ཀྱིས་བྱིན་པས་སྨྲས་པ། བཙུན་པ་སྒྲ་གཅན་ཟིན་ཐོང ། དེ་སྐད་མ་ཟེར་ཅིག་།བཙུན་པ་སྒྲ་གཅན་ཟིན། གང་དག་ཇི་ལྟར་བཅས་པའི་བསླབ་པ་ལ་སློབ་པ་དེ་དག་ནི་རུང་བ་མ་ཡིན་པའོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་རྟོག་ཅིང་རྣམ་པར་རྟོག་པའི་ཕྱིར་རོ། །བཙུན་པ་སྒྲ་གཅན་ཟིན། གང་དག་མི་རྟོག་ཅིང་རྣམ་པ་མི་རྟོག་པ་དེ་དག་ནི་རུང་བ་ཞེས་བྱའོ། །བཙུན་པ་སྒྲ་གཅན་ཟིན། རུང་བ་ཞེས་བྱ་བ་ 405b འདི་ནི་དགེ་སློང་དགྲ་བཅོམ་པ་ཟག་པ་ཟད་པ་རྣམས་ཀྱི་ཚིག་བླ་དྭགས་ཡིན་ཏེ། དེ་དག་ནི་བསླབ་པ་ལས་འགལ་བར་མི་བྱེད་དོ། །དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱི་ཉན་ཐོས་རྣམས་ནི་བསླབ་པ་ལས་ཡང་དག་པར་འདས་པའི་ཕྱིར་ཏེ། དེ་དག་ནི་ཕྱིར་ཡང་བསླབ་པར་འདོད་པ་མ་ཡིན་པས། དེ་དག་ནི་རུང་བ་ཡིན་ནོ། །དེ་དག་ནི་ཁམས་གསུམ་དུ་ཕྱིར་མི་འོང་བ་ཡིན། དེ་དག་ནི་བསླབ་པ་ལས་ཡང་དག་པར་འདས་པ་ཡིན་ཏེ། མི་སློབ་པ་ཞེས་བྱའོ། །དེ་ལྟར་ན་དེ་དག་གི་བསླབ་པ་ནི་མི་དམིགས་ཏེ་ཁམས་གསུམ་པས་བཏགས་བ་ཙམ་དུ་ཤེས་སོ། །དེའི་ཕྱིར་དེ་དག་ནི་རུང་བ་ཞེས་བྱའོ། །སྒྲ་གཅན་ཟིན་གྱིས་སྨྲས་པ། བུ་མོ། རུང་བ་དང ། རུང་བ་མ་ཡིན་པ་ལ་ཐ་དང་དུ་དབྱེ་བ་ཅི་ཞིག་ཡོད། བུ་མོས་སྨྲས་པ། བཙུན་པ་སྒྲ་གཅན་ཟིན། འདི་ལྟ་སྟེ། དཔེར་ན། གསེར་དུལ་མ་རྒྱན་དུ་བྱས་པ་དང ། རྒྱན་དུ་མ་བྱས་པ་ལ་ཐ་དད་དུ་དབྱེ་བ་ཅི་ཞིག་ཡོད། སྒྲ་གཅན་ཟིན་གྱིས་སྨྲས་པ། བུ་མོ། ཐ་དད་དུ་དབྱེ་བ་ཅི་ཡང་མེད་དོ། །བུ་མོས་སྨྲས་པ། བཙུན་པ་སྒྲ་གཅན་ཟིན། དེ་བཞིན་དུ་རུང་བ་དང ། རུང་བ་མ་ཡིན་པ་ལ་ཡང་ཡི་གེའི་ཐ་སྙད་མཉམ་པ་ཉིད་གྱི་ཕྱིར་ཐ་དད་དུ་དབྱེ་བ་ཅི་ཡང་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་ཅི་དང་ཡང་བྲལ་བའི་ཕྱིར་ཏེ། རང་བཞིན་གྱིས་ཀུན་ནས་ཉོན་མོངས་པ་ཅན་མ་ཡིན་ནོ། །བཙུན་པ་སྒྲ་གཅན་ཟིན། ཡང་ 406a ༄#། །འདི་སྐད་དུ། སྟན་ཤིན་ཏུ་མཐོ་བ་ལ་འདུག་སྟེ་ཆོས་ཉན་ཏམ་ཟེར་བ་ལ། བྱང་ཆུབ་སེམས་དཔའ་ནི་རྩ་གཏིང་བ་ལ་འདུག་ཀྱང་ཤིན་ཏུ་མཐོ་བ་ལ་འདུག་པ་ཡིན་ནོ། །སྒྲ་གཅན་ཟིན་གྱིས་སྨྲས་པ། རྣམ་གྲངས་གང་གིས་ཁྱོད་དེ་སྐད་སྨྲ། བུ་མོས་སྨྲས་པ། བཙུན་པ་སྒྲ་གཅན་ཟིན། འདི་ཇི་སྙམ་དུ་སེམས། བྱང་ཆུབ་སེམས་དཔའ་གང་ལ་འདུག་སྟེ། བྱང་ཆུབ་ཐོབ་པར་འགྱུར། སྒྲ་གཅན་ཟིན་གྱིས་སྨྲས་པ། རྩཝ་བཏིང་བ་ལ་བཞུགས་ནས་བྱང་ཆུབ་ཐོབ་བོ། །བུ་མོས་སྨྲས་པ། བཙུན་པ་སྒྲ་གཅན་ཟིན། ཅི་བྱང་ཆུབ་སེམས་དཔའ་རྩཝ་བཏིང་བ་ལ་འདུག་པ་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཚངས་པའམ། བརྒྱ་བྱིན་ནམ། འཇིག་རྟེན་སྐྱོང་ངམ། དེ་ལས་གཞན་པ་འོག་མིན་མན་ཆད་ཀྱི་ལྷ་གང་ཡིན་པ་དེ་དག་ཐམས་ཅད་ཀྱིས་ལུས་བཏུད་དེ། ཐལ་མོ་སྦྱར་ནས་བྱང་ཆུབ་སེམས་དཔའི་ཞབས་ལ་གཏུག་པར་བྱེད་དམ། སྒྲ་གཅན་ཟིན་གྱིས་སྨྲས་པ། བུ་མོ། དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་བཞིན་ནོ། །བུ་མོས་སྨྲས་པ། བཙུན་པ་སྒྲ་གཅན་ཟིན། དེའི་ཕྱིར་རྣམ་གྲངས་དེས་ཀྱང ། དཔེར་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྩཝ་བཏིང་བ་ལ་འདུག་ཀྱང ། སྟན་ཤིན་ཏུ་མཐོ་བ་ལ་འདུག་པ་ཡིན་གྱི། ཉན་ཐོས་ཚངས་པའི་འཇིག་རྟེན་ན་འདུག་པ་ནི་དེ་ལྟ་མ་ཡིན་པར་རིག་པར་བྱའོ། ། 406b དེ་ནས་རྒྱལ་པོ་མ་སྐྱེས་དགྲས་བུ་མོ་མྱ་ངན་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ་མོ། བཙུན་པ་སྒྲ་གཅན་ཟིན་ནི་བཅོམ་ལྡན་འདས་ཤཱཀྱ་ཐུབ་པའི་སྲས་ཡིན་ཏེ། བསླབ་པ་འདོད་པ་རྣམས་ཀྱི་མཆོག་ཡིན་ན། ཅི་ཁྱོད་ཀྱིས་མི་ཤེས་སམ། བུ་མོ་མྱ་ངན་མེད་ཀྱིས་བྱིན་པས་སྨྲས་པ། ཡབ་ཐོང་ཞིག་།ཐོང་ཞིག་།འདི་ལྟར་བཙུན་པ་སྒྲ་གཅན་ཟིན་བཅོམ་ལྡན་འདས་ཤཱཀྱ་ཐུབ་པ་དེའི་སྲས་ཡིན་ཞེས་མ་གསུངས་ཤིག། རི་དྭགས་ཀྱི་རྒྱལ་པོ་སེངྒེ་རལ་པ་ཅན་ཅོད་པ་ན་བཏགས་པ་ལྟ་བུས། བུ་ཝ་བསྐྱེད་པར་འགྱུར་བ་ནམ་ཡང་གསན་ཏམ། གཟིགས་སམ། རྒྱལ་པོས་སྨྲས་པ། བུ་མོ། དེ་ནི་མ་ཡིན་ནོ། །བུ་མོས་སྨྲས་པ། ཡབ། དེ་བཞིན་དུ་དེ་བཞིན་གཤེགས་པ་སེང་གེའི་རྩལ་ལྟ་བུས་གཤེགས་པ།་དམ་པའི་ཆོས་ཀྱི་འཁོར་ལོས་བསྒྱུར་བ་ཞབས་འབྲིང་བ་ནི། ཉན་ཐོས་མཛེས་པ་མ་ལགས་སོ། །ཡབ། དེ་བཞིན་གཤེགས་པའི་སྲས་གང་ཡིན་ཞེས་ཡང་དག་པའི་སྨྲ་བས་གང་སྨྲ་ན། བྱང་ཆུབ་སེམས་དཔའ་ཉིད་ཡིན་ནོ་ཞེས་དེ་དག་ལ་ཡང་དག་པའི་སྨྲ་བས་སྨྲའོ། །ཡབ། དེ་ལྟ་བས་ན་དེ་བཞིན་གཤེགས་པའི་སྲས་སུ་ཁས་ལེན་པར་འཚལ་བས་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །གཏམ་འདི་བརྗོད་པའི་སྐབས་སུ་རྒྱལ་པོ་མ་སྐྱེས་དགྲའི་བཙུན་མོའི་འཁོར་ནས། བཙུན་མོ་ཉི་ཤུས་ 407a ༄#། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ལྷའི་བུ་བརྒྱ་ཐམ་པས་ཀྱང་བུ་མོ་དེའི་སེང་གེའི་སྒྲ་འདི་ཐོས་ནས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཚིག་འདི་སྐད་དུ་བདག་ཅག་འདི་རྣམས་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་ཀྱི་སྲས་སུ་ཁས་ལེན་ཏོ། །ཞེས་ཀྱང་སྨྲས་སོ། །ལྷའི་བུ་དེ་དག་གིས་འདི་ལྟར་བུ་མོ་བྱ་ངན་མེད་ཀྱིས་བྱིན་པ་ལ་མཆོད་པ་བྱ་བའི་ཕྱིར། རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ཐམས་ཅད་ལྷའི་མེ་ཏོག་དག་གིས་མངོན་པར་གཏོར་ཏོ། །དེ་ནས་བུ་མོ་མྱ་ངན་མེད་ཀྱིས་བྱིན་པ་ཁྲི་གསེར་གྱི་རྐང་པ་ཅན་ལས་བབས་ཏེ། ཉན་ཐོས་ཆེན་པོ་དེ་དག་གི་རྐང་པ་ལ་མགོ་བོས་ཕྱག་འཚལ་ནས། བཟའ་བ་དང ། བཅའ་བ་དང ། བལྡག་པ་དང ། བཞིབ་པ་དང ། མྱང་བར་བྱ་བ་བསོད་པ་མང་པོ་དག་གིས་བཀུར་སྟིར་བྱས་ཏེ། དད་པ་དང ། གུས་པས་རང་གི་ལག་ནས་ཉན་ཐོས་ཆེན་པོ་དེ་དག་ཚིམ་པར་བྱས་ནས། འདི་སྐད་དུ། བཙུན་པ་དང ། རང་དགར་སླང་དྲོ་བཅོམ་ལྡན་ལ་ཆོས་ཉན་དུ་བཞུད་ཅིག། བཙུན་པ་དག། བདག་ཀྱང་མཆི་བར་འཚལ་ལོ། །ཞེས་ཀྱང་སྨྲས་སོ། །དེ་ནས་བུ་མོ་མྱ་ངན་མེད་ཀྱིས་བྱིན་པ། ཕ་མ་ལ་སོགས་པ་འཁོར་མང་པོ་དང ། སྐྱེ་བོ་ཕལ་ཆེས་ཡོངས་སུ་བསྐོར་ 407b ནས། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་།རྒྱལ་པོ་བཙུན་མོའི་འཁོར་དང་བཅས་པས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་གནང་སྟེ་ཕྱོགས་གཅིག་ཏུ་འདུག་གོ་།ཉན་ཐོས་ཆེན་པོ་དེ་དག་ཀྱང་བཅོམ་ལྡན་འདས་ཀྱི་ཐད་དུ་དོང་སྟེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། བུ་མོ་མྱ་ངན་མེད་ཀྱིས་བྱིན་པའི་སྤོབས་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། བུ་མོ་འདིས་ནི་ཐོག་མ་ཉིད་དུ་བྱང་ཆུབ་དོན་དུ་གཉེར་བ་ན། སངས་རྒྱས་བྱེ་བ་ཁྲག་ཁྲིག་ཕྲག་དགུ་བཅུ་རྩ་གཉིས་ལ་དགེ་བའི་རྩ་བ་དག་བསྐྱེད་དོ། །ཤཱ་རིའི་བུས་གསོལ་པ། བཅོམ་ལྡན་འདས། ཅིའི་སླད་དུ་བུ་མོ་འདིས་བུད་མེད་ཀྱིས་ལུས་མ་བསྒྱུར། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། འདི་ཇི་སྙམ་དུ་སེམས། བུ་མོ་མྱ་ངན་མེད་ཀྱིས་བྱིན་པ་ལ་བུད་མེད་དོ་སྙམ་དུ་སེམས་ན་དེ་ལྟར་མི་བལྟའོ། །བྱང་ཆུབ་སེམས་དཔའ་དག་ནི་སེམས་ཅན་ཡོངས་སུ་སྨིན་པར་བྱ་བའི་ཕྱིར། སྨོན་ལམ་གྱིས་བདག་ཉིད་བུད་མེད་ཀྱི་གཟུགས་སུ་སྟོན་ཏོ། །དེ་ནས་དེའི་ཚེ་བུ་མོ་མྱ་ངན་མེད་ 408a ༄#། །ཀྱིས་བྱིན་པས་བདེན་པའི་བྱིན་གྱིས་བརླབས་བྱས་ཏེ། བདེན་པའི་བྱིན་གྱི་བརླབས་གང་གིས་ཆོས་ཐམས་ཅད་སྐྱེས་པ་ཡང་མ་ཡིན། བུད་མེད་ཀྱང་མ་ཡིན་པ་ལྟ་ན། བདེན་པ་དང་བདེན་པའི་ཚིག་དེས་བདག་སྐྱེས་པའི་ལུས་སུ་གྱུར་ཅིག་།ཐམས་ཅད་དང་ལྡན་པའི་འཁོར་འདིས་ཀྱང་མཐོང་བར་གྱུར་ཅིག་།ཚིག་དེ་སྐད་ཅེས་སྨྲས་མ་ཐག་ཏུ། བུད་མེད་ཀྱི་མཚན་མ་མི་སྣང་བར་གྱུར་ཏེ་སྐྱེས་པའི་མཚན་མ་བྱུང་ནས། སྟེང་གི་བར་སྣང་ལ་ཏ་ལ་བདུན་སྲིད་ཙམ་དུ་འཕགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་རིའི་བུ་ལ་བཀའ་སྩལ་པ། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་མེད་ཀྱིས་བྱིན་པ་སྟེང་གི་བར་སྣང་ལ་འཕགས་པ་ཁྱོད་ཀྱིས་མཐོང་ངམ། ཤཱ་རིའི་བུས་གསོལ་པ། བཅོམ་ལྡན་འདས། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་མེད་ཀྱིས་བྱིན་པ་འདི་ནི་བསྐལ་པ་གྲངས་མེད་པ་བདུན་གྱིས་འཇིག་རྟེན་གྱི་ཁམས་དྲི་མ་མེད་པའི་འོད་ཅེས་བྱ་བར་དེ་བཞིན་གཤེགས་པ་དག་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་པ་ཞེས་བྱ་བར་འགྱུར་ཏེ། ཚེའི་ཚད་ནི་བསྐལ་པ་བརྒྱར་ཡང་འགྱུར་རོ། །དམ་པའི་ཆོས་ནི་བསྐལ་པ་ 408b བཅུར་གནས་པར་འགྱུར་རོ། །དེའི་དགེ་འདུན་ནི་བྱང་ཆུབ་སེམས་དཔའ་འབའ་ཞིག་ཏུ་འགྱུར་ཏེ། ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཕྲག་སུམ་ཅུ་རྩ་གཉིས་ཡོད་དོ། །འཇིག་རྟེན་གྱི་ཁམས་དེ་ཡང་བཻ་ཌཱུརྱ་ལས་གྲུབ་པ། རིན་པོ་ཆེ་སྣ་བདུན་གྱིས་བཀྲ་བར་བྱས་ཤིང ། མིག་མང་རིས་སུ་བྲིས་ལ། རིན་པོ་ཆེའི་པདྨས་ཁེབས་པ་དང ། ངན་སོང་ཐམས་ཅད་རྣམ་པར་སྤངས་པར་འགྱུར་རོ། །ལྷ་དང་མི་རྣམས་ཀྱི་ལོངས་སྤྱོད་དག་ཀྱང་ཁྱད་པར་མེད་དོ། །ཤཱ་རིའི་བུ། དགའ་ལྡན་གྱི་ལྷ་རྣམས་ཀྱི་ཉེ་བར་སྤྱད་པ་དང ། ལོངས་སྤྱོད་ཇི་ལྟ་བ་བཞིན་དུ་མི་རྣམས་ཀྱི་ཡང་དེར་དེ་བཞིན་དུ་འགྱུར་རོ། །དེ་ནས་བྱང་ཆུབ་སེམས་དཔའ་མྱ་ངན་མེད་ཀྱིས་བྱིན་པའི་མ། རྒྱལ་པོ་མ་སྐྱེས་དགྲའི་བཙུན་མོ་དམ་པ་ཟླ་བ་ཅན་ཞེས་བྱ་བ་དེས་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་སྐྱེས་བུ་དམ་པ་འདི་དགུང་ཟླ་དགུར་རུམ་ན་བཟུང་བ་ནི། བདག་གིས་རྙེད་པ་ལེགས་པར་རྙེད་ལགས་སོ། །བཅོམ་ལྡན་འདས། བདག་གིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱི་སྟེ། དགེ་བའི་རྩ་བ་འདིས་བདག་འཇིག་རྟེན་གྱི་ཁམས་དྲི་མ་མེད་པའི་འོད་དེ་ཉིད་དུ། འདིའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་ 409a ༄#། །འཚང་རྒྱ་བར་གྱུར་ཅིག་།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ། སྲིང་མོ་ཟླ་བ་ཅན་འདི་ཁྱོད་ཀྱིས་མཐོང་ངམ། ཤཱ་རིའི་བུས་གསོལ་པ། བཅོམ་ལྡན་འདས། མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། རྒྱལ་པོའི་བཙུན་མོ་ཟླ་བ་ཅན་འདི་ནི་འདི་ནས་ཤི་འཕོས་ནས། སུམ་ཅུ་རྩ་གསུམ་པའི་ལྷ་རྣམས་དང་སྐལ་པ་མཉམ་པར་སྐྱེ་བར་འགྱུར་ཞིང ། ལྷའི་བུ་རིན་ཆེན་མཆོག་ཅེས་བྱ་བར་འགྱུར་ཏེ། གང་གི་ཚེ་བྱང་ཆུབ་སེམས་དཔའ་བྱམས་པས་བྱང་ཆུབ་ཐོབ་པར་འགྱུར་བ་དེའི་ཚེ་རྒྱལ་པོ་དུང་ཞེས་བྱ་བ་དེའི་བུ་རྒྱལ་པོ་གཞོན་ནུ་མཐོང་ན་དགའ་བ་ཞེས་བྱ་བར་གྱུར་ནས། དེ་བཞིན་གཤེགས་པ་བྱམས་པ་ལ་མཆོད་པ་བྱས་སྟེ་རབ་ཏུ་འབྱུང་བར་འགྱུར་རོ། །དེས་དེ་བཞིན་གཤེགས་པ་བྱམས་པའི་ངམ་\་ཌཱཾ\་པའི་ཆོས་ཐོག་མ་དང ། བར་དང ། ཐ་མའི་བར་དུ་འཛིན་པར་འགྱུར་ཏེ། བསྐལ་པ་བཟང་པོ་འདི་ལ་སངས་རྒྱས་བཅོམ་ལྡན་འདས་གང་དག་འབྱུང་བར་འགྱུར་བ་དེ་དག་ཐམས་ཅད་ཀྱང་མཉེས་པར་བྱེད་ཅིང་མཆོད་པར་འགྱུར་རོ། །དེ་མཐར་གྱིས་དེ་བཞིན་གཤེགས་པ་མྱ་ངན་མེད་པས་བྱང་ཆུབ་ཐོབ་པ་ན། འཁོར་ལོས་བསྒྱུར་བའི་རྒྱལ་པོ་མུ་ཁྱུད་འཛིན་ཅེས་བྱ་བར་འགྱུར་ཏེ། དེས་དེ་བཞིན་གཤེགས་པ་དེ་ལ་མཆོད་པ་ཚད་མེད་པ་དག་བྱས་ནས ། 409b སངས་རྒྱས་ཀྱི་ཞིང་དེ་ལྟ་བུ་དེ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་ཀུན་ཏུ་འོད་ཟེར་ཞེས་བྱ་བར་འགྱུར་རོ། །དེ་ནས་རྒྱལ་པོའི་བཙུན་མོ་ཟླ་བ་ཅན་གྱིས་བདག་ཉིད་ལུང་བསྟན་པ་ཐོས་ནས། ཚིམ་ཞིང་མགུ་སྟེ་ཡི་རངས་ནས། བཅོམ་ལྡན་འདས་ལ་མུ་ཏིག་གི་དོ་ཤལ་བརྒྱ་སྟོང་རི་བ་ཕུལ་ཏེ།་ཚངས་པར་སྤྱོད་པ་རྒྱལ་པོས་གནང་ནས་བསླབ་པའི་གཞི་དག་བཟུང་ངོ ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་མེད་ཀྱིས་བྱིན་པས། ལྷས་ཕུལ་བའི་མེ་ཏོག་མནད་ར་བ་དག་གིས་བཅོམ་ལྡན་འདས་དང་འཁོར་ཐམས་ཅད་ལ་གཏོར་ཏོ། །དེ་ནས་བར་སྣང་ལས་བབས་ཏེ་ཕྱོགས་གཅིག་ཏུ་འདུག་ནས། ཚིག་འདི་སྐད་དུ་བདེན་པ་དང་བདེན་པའི་ཚིག་གང་གིས་བདག་གིས་བྱང་ཆུབ་ཐོབ་པ་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་བརྫུས་ཏེ་སྐྱེས་ཤིང ། ཆོས་གོས་ངུར་སྨྲིག་གྱོན་ལ་རིན་པོ་ཆེའི་པདྨ་དག་ལ་སྐྱིལ་མོ་ཀྲུང་བཅས་ཏེ་སྐྱེ་བར་འགྱུར་བ་ལྟ་ན་བདེན་པ་དང་བདེན་པའི་ཚིག་དེས། དཔེར་ན། དགེ་སློང་བསྙེན་པར་རྫོགས་ནས་ལོ་བརྒྱ་ལོན་པའི་སྤྱོད་ལམ་ཇི་ལྟ་བ་བཞིན་དུ་བདག་གནས་པར་གྱུར་ཅིག་།ཅེས་སྨྲས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་མེད་ཀྱིས་བྱིན་པས་བདེན་པའི་བྱིན་གྱི་རླབས་བྱས་མ་ཐག་ཏུ་དགེ་སློང་གི་སྤྱོད་ 410a ༄#། །ལམ་དང་ལྡན་པར་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་མེད་ཀྱིས་བྱིན་པས་པ་རྒྱལ་པོ་མ་སྐྱེས་དགྲ་ལ་འདི་སྐད་ཅེས་སྨྲས་སོ། །ཡབ། འདི་ལྟར་ཆོས་ཐམས་ཅད་ནི་བཅོས་མ་སྟེ། རྣམ་པར་བསྒྲུབས་པས་ཉེ་བར་གནས་པའི་མཚན་ཉིད་དང ། ཡོངས་སུ་བརྟགས་པ་ལས་ལངས་པ་མེད་བཞིན་དུ་ཕྱིན་ཅི་ལོག་དང་མཚུངས་པར་ལྡན་པ་ལགས་སོ། །རྒྱལ་པོ་ཆེན་པོ་གཟིགས་ཤིག་དང ། དེ་རིང་ཁོ་ནའི་གདུགས་གཅིག་ལ་བུ་མོའི་གཟུགས་སུ་ཡང་གཟིགས། ཁྱེའུ་ཡི་གཟུགས་སུ་ཡང་ཁྱོད་ཀྱིས་གཟིགས། ད་ནི་བདག་ལ་དགེ་སློང་གི་གཟུགས་སུ་ཡང་ཁྱོད་ཀྱིས་གཟིགས་ན། འདི་ལ་གང་ཡང་དག་པའི་གཟུགས་ལགས། རྒྱལ་པོ་ཆེན་པོ། དེ་ལྟར་ན་ཡ་མ་རླའི་ཆོས་ཐམས་ཅད་ལ་འདི་ན་ཁ་ཅིག་ལྟ་བའི་ཀུན་ནས་དཀྲིས་པས་ཀུན་ནས་གླགས་ཤིང་མཆིས་ཏེ། རང་གི་རྒྱུད་ལ་མཆིས་པའི་ཉོན་མོངས་པ་རྣམས་ཀྱིས་ཡོངས་སུ་བསྲེག་གོ་།ཡོངས་སུ་བསྲེགས་པས་ཆོས་འདུལ་བ་འདི་མ་འཚལ་ཏེ། འགྱོད་པ་མ་ལགས་པ་ལ་འགྱོད་པར་སེམས་སོ། །རྒྱལ་པོ་ཆེན་པོ། དེ་ལྟར་ན་ཁྱོད་ཀྱིས་བག་ཡོད་པར་མཛོད་ལ་རྒྱལ་སྲིད་ཉམ་ང་བ་ན་བཞུགས་བཞིན་དུ་རྟག་ཏུ་བཅོམ་ལྡན་འདས་ཀྱི་ཐད་དུ་བཞུད་ཅིག་དང ། འཇམ་དཔལ་གཞོན་ནུར་གྱུར་པས་ཁྱོད་ཀྱི་ཡོད་ 410b པ་མ་ཡིན་པ་ཕྱིན་ཅི་ལོག་ལས་བྱུང་བའི་འགྱོད་པ་སེལ་བར་འགྱུར་རོ། །རྒྱལ་པོ་ཆེན་པོ་ཁྱོད་ནི་བྱ་བ་མང་ཞིང་བྱེད་པ་མང་བ་ལགས་ཀྱི་བཞུད་ཅིག་།དེ་ནས་རྒྱལ་པོ་མ་སྐྱེས་དགྲ་དང ། བཙུན་མོ་ཟླ་བ་ཅན་དང ། བཙུན་མོའི་འཁོར་ཐམས་ཅད་ཀྱིས་བཅོམ་ལྡན་འདས་དང ། བྱང་ཆུབ་སེམས་དཔའ་མྱ་ངན་མེད་ཀྱིས་བྱིན་པ་དང ། དགེ་སློང་གི་དགེ་འདུན་རྣམས་ལ་ཕྱག་འཚལ་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ནི་བགྱི་བ་མང་ཞིང་བགྱིད་པ་མང་བ་ལགས་ཀྱི་བདག་ཅག་མཆིའོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། ད་དེའི་དུས་བབ་པར་ཤེས་ན་སོང་ཞིག་ཅེས་བཀའ་སྩལ་ནས། རྒྱལ་པོ་མ་སྐྱེས་དགྲ་བཙུན་མོ་ཟླ་བ་ཅན་ལ་སོགས་པ་བཙུན་མོའི་འཁོར་ཆེན་པོ་དག་དང་ལྷན་ཅིག་ཏུ་བྱ་རྒོད་ཀྱི་ཕུང་པོའི་རི་ལས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོར་དོང་ངོ ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་གཟུང་ཞིག་།ཆོངས་ཤིག་།ལྷོགས་ཤིག་།ཀུན་ཆུབ་པར་གྱིས་ཤིག་།གཞན་དག་ཡང་རྒྱ་ཆེར་རབ་ཏུ་སྟོན་ཅིག་།ཀུན་དགའ་བོས་གསོལ་པ། བཅོམ་ལྡན་འདས། ཆོས་ཀྱི་རྣམ་གྲངས་འདི་བདག་གིས་བཟུང་ལགས་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་ 411a ༄#། །བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེའི་ཕྱིར་ཆོས་ཀྱི་རྣམ་གྲངས་འདི་མྱ་ངན་མེད་ཀྱིས་བྱིན་པའི་སེངྒེའི་སྒྲ་ཞེས་བྱ་བ་དང།་མྱ་ངན་མེད་ཀྱིས་བྱིན་པ་ལུང་བསྟན་པ་ཞེས་བྱ་བར་གཟུང་ཞིག་།གཞན་དག་ལ་ཡང་སྟོན་ཅིག་།ཀུན་དགའ་བོ། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་ཚོགས་ཀྱིས་ཡོངས་སུ་བཀང་སྟེ་སྦྱིན་པ་བྱིན་པ་བས། གང་གིས་ཆོས་ཀྱི་རྣམ་གྲངས་འདི་ཐ་ན་རྣ་ལམ་དུ་ཐོས་ན་འདི་ནི་དེ་བས་ཆེས་བསོད་ནམས་མང་དུ་བསྐྱེད་ན། གང་འཛིན་པ་དང ། ཀུན་ཆུབ་པར་བྱེད་པ་དང ། འཆང་བ་དང ། ཀློག་པ་དང ། བརྗོད་པའི་ལུང་ཇི་སྐད་ཕོག་པ་བཞིན་དུ་ནན་ཏན་དུ་སྒྲུབ་པ་ལྟ་ཅི་སྨོས། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་མེད་ཀྱིས་བྱིན་པ་དང ། ཉན་ཐོས་ཆེན་པོ་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། འཕགས་པ་མྱ་ངན་མེད་ཀྱིས་བྱིན་པ་ལུང་བསྟན་པ་ཞེས་བྱ་བའི་ལེའུ་སྟེ། འདུས་པ་སུམ་ཅུ་རྩ་གཉིས་པ་རྫོགས་སོ།། །། 411b རྒྱ་གར་གྱི་མཁན་པོ་ཛི་ན་མི་ཏྲ་དང ། སུ་རེནྡྲ་བོ་དྷི་དང ། ལོ་ཙྪ་བ་ཞང་ཡེ་ཤེས་སྡེས་ཞུས་ཏེ་གཏན་ལ་ཕབ་པ།། |