དཀོན་མཆོག་གསུམ་ལ་ཕྱག་འཚལ་ལོ། །ཟས་སྐོམ་བཟང་པོའི་རོ་ཞིམ་ཞིང་མདོག་སྡུག་ལ་དྲི་བསུང་དང་ལྡན་ཞིང་ངད་ལྡང་བ། ཡོན་ཏན་ཕུན་སུམ་ཚོགས་པས་བརྒྱན་པ། དཔག་བསམ་གྱི་ཤིང་ལྗོན་པའི་ནགས་ཚལ་དཀོན་ཞིང་དྲི་མ་མེད་ལ་རྒྱན་གྱིས་ཀླུབས་པ། ཡལ་གའི་ཐོར་ཏོའི་ལྗིད་ཀྱིས་གཟུར་ཟ་ལ་མགོ་ལྕོགས་མེ་ཏོག་ཁ་ཕྱེ་ཞིང་འདབ་མས་ལེགས་པར་བརྒྱན་ཏེ་བུང་བ་ལང་ལོང་ཁྱུས་ལྡིང་ཞིང་འཕུངས་པ་རྣམས་ཀྱིས་བཞིབ་ཅིང་ནོན་པའི་ཤུགས་ཀྱིས་བག་ཙམ་ 354b འདར་ལྡེམ་ལྡེམ་ལ་རིན་ཆེན་ཡལ་ག་དང ། མ་རྒད་ལྕུག་ཕྲན་གྱི་བླ་རེ་འཇོལ་བ་དང ། མངོན་པར་སྒྲུབ་པར་བྱེད་པ། འགྲོ་བ་དག་ཏུ་མཚོར་བར་འགྲོ་བའི་གཡངས་ཆེན་པོ་ཡང་བ་དག་ཏུ་མར་མེ་སྣང་གསལ་དག་ཅིང་དྲི་མ་མེད་པ་ལྟ་བུ་བྱིན་པ་གང་ལས་བསོད་ནམས་དང ། བསོད་ནམས་ཀྱི་རྒྱུ་མཐུན་པ་དང ། དགེ་བ་དང ། དགེ་བའི་རྒྱུ་དང ། མཐུན་པ་བདེ་དགུའི་གཞིར་གྱུར་པ་དེས་ན་སྦྱིན་བདག་ཆེན་པོ་བདག་ཉིད་ཆེ་བ་ཆེ་གེ་མོ་ཞིག་གི་ལུས་དགེ་བ་བཅུའི་ལས་ཀྱི་ལམ་གྱིས་བསྒྲུབས་པ་ལ་ཚེ་དང ། ཁ་དོག་དང ། སྟོབས་དང ། གཟི་བྱིན་དང ། ལོངས་སྤྱོད་དང ། དབང་ཕྱུག་དང ། ཤེས་རབ་དང ། སྤོབས་པ་ཕུན་སུམ་ཚོགས་པར་གྱུར་ཅིག་།སྦྱིན་བདག་གི་བསོད་ནམས་མ་སྐྱེས་པ་རྣམས་ནི་སྐྱེ་བར་གྱུར་ཅིག་།སྦྱིན་བདག་གི་ལོངས་སྤྱོད་ཀྱི་ས་ཟིན་བ་རྣམས་ནི་འཕེལ་ཞིང་རྒྱས་པར་གྱུར་ཅིག་།དེ་བཞིན་དུ་སྦྱིན་བདག་གི་ཕ་མ་མཆོག་ཏུ་དཀའ་བ་བྱེད་བྱེད་བ། གསོ་གས། གནམ་གནམ། བསྐྱེད་བསྐྱེད། བསྲིང་བསྲིང་ལ་ཛམྦུའི་གླིང་བཀྲ་ཡེར་ཡེར་མིག་གིས་མཐོང་བར་བྱེད་པས་ཀྱང་བསོད་ནམས་ཀྱི་ཕུད་ཀྱི་སྐལ་ཤས་ཐོབ་པར་གྱུར་ཅིག་།དེ་བཞིན་དུ་སྦྱིན་བདག་གི་ཆུང་མ་རྣམས་དང ། བུ་རྣམས་དང ། བུ་མོ་རྣམས་དང ། སྦྱིན་བདག་གི་གཉེན་འདབ་མཛའ་བཤེས་རྒྱས་བའི་ཚན་རིས་གང་དག་འཁོད་ཅིང་འཚོལ་གནས་པ་དེ་དག་ཀྱང་ཚེ་རང་ཞིང་ལོངས་སྤྱོད་ཆེ་ལ་གཡོག་འཁོར་མང་བར་གྱུར་ཅིག་།གང་དག་ 355a ༄#། །འདས་ཤིང་ཚེ་འཕོས་པ་དེ་དག་ཀྱང་འགྲོ་བ་དང ། སྐྱེ་བའི་གནས་དང ། གནས་ཐ་དད་པའི་ཁྱད་པར་ཐོབ་པ་འགྱུར་ཏེ་ལྷའི་གནས་སུ་སྐྱེས་པར་གྱུར་ནས་འཕགས་པ་བྱམས་པའི་ཞལ་སྔ་ནས་མཉེས་པར་བྱེད་པར་གྱུར་ཅིག་།དེ་བཞིན་དུ་རྒྱལ་པོའི་མཆོག་རྒྱལ་པོ་ཆེན་པོ་མངའ་བདག་དམ་པ་དཔལ་ལྷ་བཙན་པོས་མ་ཕེབས་པ་རྣམས་ནི་ཕེབས་པར་གྱུར་ཅིག་།ཕེབས་ཟིན་པ་རྣམས་ནི་ཆམ་དུ་ཕེབས་པར་གྱུར་ཅིག་།སྟོབས་ཀྱི་འཁོར་ལོས་བསྒྱུར་བའི་རྒྱལ་སྲིད་ཀྱང་བརྙེས་པར་གྱུར་ཅིག་།དེ་བཞིན་དུ་ཉེ་འཁོར་གྱི་གྲོང་ན་གནས་པའི་རིགས་བཞི་སྟེ་བྲམ་ཟེ་དང ། རྒྱལ་རིགས་དང ། རྗེའུ་རིགས་དང ། དམངས་རིགས་ལ་སོགས་པ་ཡུལ་གྱི་མི་རྣམས་ལ་ནད་མེད་ཅིང་གནོད་པ་མེད་པར་གྱུར་ཅིག། དེ་བཞིན་དུ་མི་མཛེད་ཀྱི་བདག་པོ་ཚངས་པ་དང ། ལྷའི་དབང་པོ་བརྒྱ་བྱིན་དང ། འཇིག་རྟེན་སྐྱོང་བ་བཞི་དང ། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང ། ཀླུའི་རྒྱལ་པོ་དགའ་བོ་དང ། བསྙེན་དགའ་བོ་དང ། གནོད་སྦྱིན་གྱི་སྡེ་དཔོན་བདེ་བའི་རི་བོ་དང ། གངས་ཅན་དང ། ལྔས་རྩེན་དང ། ལྔ་ལེན་ལ་སོགས་པ་དང ། ནོར་བུ་བཟང་དང ། རྫོགས་བཟང་གཉིས་དང ། འཕྲོག་མ་བུ་ལྔ་བརྒྱའི་འཁོར་དང་བཅས་པར། གཞན་ཡང ། བཅོམ་ལྡན་འདས་ཀྱི་བསྟན་པ་ལ་མངོན་པར་དགའ་བའི་ལྷ་དང ། ཀླུ་དང ། གནོད་སྦྱིན་དང ། 355b ལྷ་མ་ཡིན་དང ། ནམ་མཁའ་ལྡིང་དང ། དྲི་ཟ་དང ། མིའམ་ཅི་དང ། ལྟོ་འཕྱེ་ཆེན་པོ་དང ། སྦྱིན་བདག་གི་ཁྱིམ་འདི་ན་གནས་པའི་ལྷ་རྣམས་དང ། སྦྱིན་བདག་གིས་བསྟེན་པའི་ལྷའི་ཁྱད་པར་གྱིས་དེ་དག་གཟི་སྦྱིན་དང ། སྟོབས་དང ། གཞལ་མེད་ཁང་རྣམས་རྒྱས་པར་གྱུར་ཅིག་།དེ་དག་གཟི་བྱིན་དང་ལྡན་པར་གྱུར། སྟོབས་དང་ལྡན་པར་གྱུར། གཞན་གྱིས་མི་ཚུགས་པར་གྱུར། ཆེ་བར་གྲགས་པར་གྱུར་ནས། སྦྱིན་བདག་བདག་ཉིད་ཆེན་པོ་འདི་ཉིད་ཀྱི་མཛོད་དང ། བང་བ་དང ། བ་ལང་གི་ཁྱུ་དང ། ཕྱུགས་གདགས་སྣ་ཚོགས་ཀྱི་ཁྱུ་དང ། ཞིང་གི་རྨོ་རྐོ་དང ། ལམ་གྱི་སྒོ་རྣམས་དང ། བླ་འོག་གི་བྱ་བ་ཐམས་ཅད་ལ་ཆོས་བཞིན་དུ་བསྲུང་བ་དང ། བསྐྱབ་པ་དང ། སྦ་བ་བྱེད་པར་གྱུར་ཅིག་།གནོད་པ་རྣམས་ནི་ཟློག་པར་གྱུར་ཅིག་།དོན་དུ་བསྒྲུབས་པ་རྣམས་ནི་སྣང་བར་གྱུར་ཅིག་།དེ་བཞིན་དུ་སྦྱིན་བདག་གི་དད་པ་དང་སྦྱར་ཏེ་དམྱལ་བར་སྐྱེས་པ་རྣམས་ཀྱིས་གནོད་པའི་སྡུག་བསྔལ་ཐམས་ཅད་ཞི་བར་གྱུར་ཅིག་།དུད་འགྲོ་རྣམས་གཅིག་ལ་གཅིག་ཟ་བ་རྣམས་ཟློག་པར་གྱུར་ཅིག་།ཡི་དྭགས་ཀྱི་བཀྲེས་ཤིང་སྐོམས་པའི་སྡུག་བསྔལ་ཐམས་ཅད་ཞི་བར་གྱུར་ཅིག་།མི་རྣམས་ཚོལ་འགྲོས་གཡེན་སྦྱོར་བའི་སྡུག་བསྔལ་ཐམས་ཅད་ཞི་བར་གྱུར་ཅིག་།ལྷ་རྣམས་ཀྱི་འཆི་འཕོབ་དང ། ལྟུང་བ་དང ། རྣམ་པར་འཐོར་བ་དང ། རྣམ་པར་འཇིག་པའི་སྡུག་བསྔལ་ཐམས་ཅད་ཞི་བར་གྱུར་ཅིག་།མདོར་ན་ཁམས་གསུམ་དུ་སྐྱེས་པའི་སེམས་ 356a ༄#། །ཅན་ཐམས་ཅད་དང ། སྲོག་ཆགས་ཐམས་ཅད་ཀྱིས་ཀྱང་མྱ་ངན་ལས་འདས་པ་མ་སྐྱེས་མ་བྱུང་བ། མ་བྱས་མ་བཅོས་པ། འཆི་འཕོ་མེད་པ། མི་གནས་པ། དམིགས་སུ་མེད་པ། བདེ་བ། ཞི་བ། གྱ་ནོམ་པ། བདེ་ལེགས་ཅན། གནས་དང ། གླིང་དང ། སྐྱོབ་པ་དང ། སྐྱབས་དང ། དཔུང་གཉེན་དང ། མི་གཡོ་བ་གང་ཡིན་པའི་མྱ་ངན་ལས་འདས་པའི་ཆོས་ཀྱི་མཆོག་དེ་རེག་ཅིང་ཐོབ་པར་གྱུར་ཅིག་།གནོད་སྦྱིན་གང་དག་བཞོན་པ་མི་ཟད་དཔུང་ཅན་ལྷ་རྫས་གོས་གྱོན་ཕྲེང་བ་ཐོགས། གང་དག་འཇིག་རྟེན་གསུམ་མཆོག་མཁས་པ་རྣམས་ཀྱིས་བརྗོད་པའི་སངས་རྒྱས་སྐྱབས་སོང་བ། །ལྔས་རྩེན་ལག་ན་རྡོ་རྗེ་ནོར་སྦྱིན་དཔལ་ཅན་ནོར་བུ་བཟང་སྲས་ལས་སོགས་པ། །དེ་དག་ཐམས་ཅད་ལྷན་ཅིག་རྟག་ཏུ་ཁྱོད་ཀྱིས་ཁྱིམ་དུ་ཆོས་བཞིན་སྲུང་བར་ཤོག་།ལྔས་རྩེན་དང་ནི་འཕྲོག་མ་བུ་སྡུག་འཁོར་བཅས་ནོར་བུ་བཟང་སྲས་དབུང་དང་བཅས་རྣམས་དང ། །གནོད་སྦྱིན་དབང་པོ་ལག་ན་རྡོ་རྗེ་རང་གི་སྡེ་ཚན་བཅས་དང་རང་གི་སྡེར་བཅས་དང ། །གཞན་ཡང་གནོད་སྦྱིན་དབང་པོ་གང་དག་སྡེ་ཆེན་གྲགས་ལྡན་བསྟན་པ་དག་ལ་དགའ་བ་རྣམས། །ཐམས་ཅད་མཐུན་པར་ཁྱོད་ཀྱི་ཕ་ཚན་དང་ནི་གཉེན་སྡུག་བཅས་ལ་རྟག་ཏུ་སྐྱོང་གྱུར་ཅིག་།མཚན་མོ་དང་ནི་ཉི་མ་འཆར་ཀ་ཉི་མའི་གུང་རྣམས་དང ། །ཉི་མ་ནུབ་ཀར་རྟག་ཏུ་ཁྱོད་ལ་བཀྲ་ 356b ཤིས་ལྡན་པར་ཤོག་།དཔལ་ཆེན་ལག་ན་རྡོ་རྗེ་ནོར་བུ་བཟང་དང་འཕགས་སྐྱེས་སོགས། །ཁྱོད་དང་གཉེན་འདུན་རྣམས་དང་བཅས་ལ་ཡོངས་སུ་སྐྱོང་གྱུར་ཅིག་གཏོང་ལ་དཔའ་བ་རྣམས་ཀྱང་ཁྱིམ་འཁོར་སྟོབས་དང་འབྱོར་པ་གྲུབ་ཅིང་མི་ནད་མེད་པར་ཤོག་།ཡོན་གནས་རྣམས་ཀྱང་ཡོན་ཏན་ཚོགས་པས་འཕེལ་བར་འགྱུར་ཞིང་འབྲུ་རྣམས་རབ་ཏུ་རྒྱས་པར་ཤོག་།མཆོད་རྟེན་རྣམས་ཀྱང་མཆོད་པར་འགྱུར་ཞིང་བཅོམ་ལྡན་འདས་ཀྱི་བསྟན་པ་ཡུན་རིང་འབར་བར་ཤོག་།རྒྱལ་པོ་ཆོས་བཞིན་བྱེད་པས་སྐྱོང་གྱུར་སེམས་ཅན་མཐའ་དག་རབ་ཞི་བདེ་བ་མྱོང་གྱུར་ཅིག་།སྦྱིན་པའི་རབས་ལས་བྱུང་བའི་སྨོན་ལམ་རྫོགས་སོ།། །། |