རྒྱ་གར་སྐད་དུ།་ཨ་རྱ་མཉྫུ་ཤྲཱི་བི་ཀུ་རྦཱ་ཎ་པ་རི་བརྟ་ནཱ་མ་མ་ཧཱ་མཱན་སུ་ཏྲ།་བོད་སྐད་དུ།་འཕགས་པ་འཇམ་དཔལ་རྣམ་པར་འཕྲུལ་པའི་ལེའུ་ཞེས་བྱ་བ་ཐེག་པ་ཆེན་པོའི་མདོ།་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན།་བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ།་བྱང་ཆུབ་སེམས་དཔའི་དགེ་འདུན་ཆེན་པོ་དང་།་འདོད་པ་ན་སྤྱོད་པ་དང་།་གཟུགས་ན་སྤྱོད་པ་དང་།་གནས་གཙང་མའི་རིས་ཀྱི་ལྷའི་བུ་དུ་མ་དག་དང་ཡང་ཐབས་ཅིག་གོ་།དེ་ན་བཅོམ་ལྡན་འདས་འཁོར་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏོ། །དེའི་ཚེ་ལྷའི་བུ་འོད་མང་པོ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་གོ་།འཇམ་དཔལ་གཞོན་ནུར་གྱུར་པའང་འཁོར་དེ་ཉིད་དུ་འདུས་པར་གྱུར་ཏེ་འདུག་གོ།་དེ་ནས་ལྷའི་བུ་འོད་མང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ།་བྱང་ཆུབ་སེམས་དཔའ་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་བདུད་བར་ཆད་བྱེད་ན།་འཇམ་དཔལ།་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་གང་ཡིན།་དེ་སྐད་ 391b ཅེས་སྨྲས་པ་དང་།་འཇམ་དཔལ་གཞོན་ནུར་གྱུར་པས་ལྷའི་བུ་འོད་མང་པོ་ལ་འདི་སྐད་ཅེས་སྨྲས་སོ། །ལྷའི་བུ་ཇི་ཙམ་དུ་ལས་རྣམས་འབྱུང་བ་དེ་ཙམ་དུ་བདུད་ཀྱི་ལས་སོ། །ཇི་ཙམ་དུ་སྨོན་པ་དང་།་ཇི་ཙམ་དུ་ལོག་པར་འཛིན་པ་དང་།་ཇི་ཙམ་དུ་མཆོག་ཏུ་འཛིན་པ་དེ་ཙམ་དུ་བདུད་ཀྱི་སྨྲས་སོ། །ཇི་ཙམ་དུ་འདོད་པ་དང་།་ཇི་ཙམ་དུ་འདུ་ཤེས་པ་དང་།་ཇི་ཙམ་དུ་རློམ་སེམས་པ་དང་།་ཇི་ཙམ་དུ་ཡོངས་སུ་རྟོག་པ་དེ་ཙམ་དུ་བདུད་ཀྱི་ལས་སོ། །ལྷའི་བུ།་གཞན་ཡང་བྱང་ཆུབ་ཀྱི་སེམས་ལ་མངོན་པར་ཞེན་པའང་བདུད་ཀྱི་ལས་སོ། །སྦྱིན་པའི་སེམས་ལ་མངོན་པར་ཞེན་པའང་བདུད་ཀྱི་ལས་སོ། །ཚུལ་ཁྲིམས་དང་།་བཟོད་པ་དང་།་བརྩོན་འགྲུས་དང་།་བསམ་གཏན་དང་།་ཤེས་རབ་ཀྱི་སེམས་ལ་མངོན་པར་ཞེན་པའང་བདུད་ཀྱི་ལས་སོ། །སྦྱིན་པ་རློམ་སེམས་སུ་བྱེད་པ་དང་།་ཚུལ་ཁྲིམས་མཆོག་ཏུ་འཛིན་པ་དང་།་བཟོད་པ་འཛིན་པ་དང་།་བརྩོན་འགྲུས་ལེན་པ་དང་།་བསམ་གཏན་ལ་མཚན་མ་དང་།་ཤེས་རབ་རྒྱུ་བའང་བདུད་ཀྱི་ལས་སོ། །དགོན་པ་ལ་དགའ་ཞིང་མོས་པའི་སེམས་དང་།་བཏང་སྙོམས་སུ་ལྷུང་བའང་བདུད་ཀྱི་ལས་སོ། །འདོད་པ་ཉུང་བ་དང་།་ཆོག་ཤེས་པ་དང་།་སྦྱངས་པའི་ཡོན་ཏན་དང་།་ཡོ་བྱད་བསྙུངས་པ་ལ་རློམ་སེམས་སུ་བྱེད་པའང་བདུད་ཀྱི་ལས་སོ། །བདག་ནི་སྟོང་པ་ཉིད་ལ་གནས་པ།་བདག་ནི་མཚན་མ་མེད་པ་ལ་གནས་པ།་བདག་ནི་སྨོན་པ་མེད་པ་ལ་གནས་པ།་བདག་ནི་སྤྲོས་པ་མེད་པ་ལ་གནས་པ།་བདག་ནི།་དེ་ 392a ༄#། །བཞིན་གཤེགས་པའི་བཀའ་སྒྲུབ་ཅིང་གནས་པའོ་སྙམ་དུ་རློམ་སེམས་སུ་བྱེད་ཅིང་རྣམ་པར་རྟོག་པའང་བདུད་ཀྱི་ལས་སོ། །ལྷའི་བུ།་རྟོག་པ་དང་།་རྣམས་པར་རྟོག་པ་དང་།་ཡོངས་སུ་རྟོག་པ་དང་།་མཐོང་བ་དང་།་ཐོས་པ་དང་།་བྱེ་བྲག་ཕྱེད་པ་དང་།་རྣམ་པར་ཤེས་པའི་གནས་ཇི་ཙམ་པ་དེ་ཙམ་དུ་བདུད་ཀྱི་ལས་སོ། །ལྷའི་བུས་སྨྲས་པ།་འཇམ་དཔལ།་བདུད་ཀྱི་ལས་ག་ལས་འབྱུང་།་འཇམ་དཔལ་གྱིས་སྨྲས་པ།་ལྷའི་བུ།་བདུད་ཀྱི་ལས་ནི་བརྩོན་པ་ལས་འབྱུང་པོ། །དེ་ཅིའི་ཕྱིར་ཞེ་ན།་ལྷའི་བུ།་བརྩོན་པ་ལ་བདུད་ཀྱིས་གླགས་ཚོལ་གྱི།་མི་བརྩོན་པ་ལ་བདུད་ཀྱིས་ཅི་ཞིག་བྱ་བར་འགྱུར་དེ།་དེ་ཉིད་བདུད་ཀྱི་ལས་ཡིན་ནོ། །ལྷའི་བུས་སྨྲས་པ།་འཇམ་དཔལ།་བྱང་ཆུབ་སེམས་དཔའ་ཇི་ལྟར་ན་བརྩོན་པ་ཡིན།་ཇི་ལྟར་ན་མི་བརྩོན་པ་ཡིན།་འཇམ་དཔལ་གྱིས་སྨྲས་པ།་ལྷའི་བུ།་ཇི་ཙམ་དུ་གཉིས་ལ་སྦྱོར་བ་དེ་ཙམ་དུ་བརྩོན་པ་མ་ཡིན་ནོ། །དེ་ཅིའི་ཕྱིར་ཞེ་ན།་འཇིག་རྟེན་གནས་པ་ནི་གཉིས་ལ་སྦྱོར་བ་དང་ལྡན་པའོ། །ལྷའི་བུ་བརྗོད་པ་ཞེས་པ་བ་འདི་ནི་སྦྱོར་བ་ཡང་དག་པའི་ཚིག་བླ་དགས་སོ། །སྦྱོར་བ་ཡང་དག་པ་ཞེས་བྱ་བ་འདི་ནི་སྦྱོར་བ་མེད་པའི་ཚིག་བླ་དྭགས་སོ། །སྦྱོར་བ་མེད་པ་ཞེས་བྱ་བ་འདི་ནི་སྤྲོས་པ་མེད་པའི་ཚིག་བླ་དགས་སོ། །སྤྲོས་པ་མེད་པ་ཞེས་བྱ་བ་འདི་ནི་སྦྱོར་བ་ཡང་དག་པའི་ཚིག་བླ་དགས་སོ། །ལྷའི་བུ།་གང་ན་མིག་ལ་མི་སྦྱོར་བ་དང་།་གཟུགས་ལ་མི་སྦྱོར་བ་འདི་ནི་བྱང་ཆུབ་སེམས་ 392b དཔའི་སྦྱོར་བ་ཡང་དག་པ་ཞེས་བྱའོ། །གང་ན་རྣ་བ་ལ་མི་སྦྱོར་བ་དང་།་སྒྲ་ལ་མི་སྦྱོར་བ་དང་།་སྣ་ལ་མི་སྦྱོར་བ་དང་།་དྲི་ལ་མི་སྦྱོར་བ་དང་།་ལྕེ་ལ་མི་སྦྱོར་བ་དང་།་རོ་ལ་མི་སྦྱོར་བ་དང་།་ལུས་ལ་མི་སྦྱོར་བ་དང་།་རེག་བྱ་ལ་མི་སྦྱོར་བ་དང་།་ཡིད་ལ་མི་སྦྱོར་བ་དང་།་ཆོས་ལ་མི་སྦྱོར་བ་འདི་ནི་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །ལྷའི་བུ།་གཞན་ཡང་ཉོན་མོངས་པ་ཐམས་ཅད་ལའང་མི་སྦྱོར་ལ།་སེམས་ཅན་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་ཡང་བརྩོན་པ་འདི་ནི་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །ལྷའི་བུ།་གཞན་ཡང་ཁམས་གསུམ་པ་ཐམས་ཅད་ལའང་མི་སྦྱོར་ལ།་ཁམས་གསུམ་དུ་གཏོགས་པའི་སེམས་ཅན་རྣམས་ཀྱང་འབྱུང་བར་སྦྱོར་བ་འདི་ནི་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །གཞན་ཡང་སྦྱིན་པ་ལ་རློམ་སེམས་མེད་པར་ཡང་སྦྱོར་ལ།་སེམས་ཅན་སེར་སྣ་ཅན་སྡུད་པར་ཡང་སྦྱོར་བ་དང་།་ཚུལ་ཁྲིམས་ལ་རློམ་སེམས་མེད་པར་ཡང་སྦྱོར་ལ།་སེམས་ཅན་ཚུལ་ཁྲིམས་འཆལ་བ་སྡུད་པར་སྦྱོར་བ་དང་།་བཟོད་པ་ལ་རློམ་སེམས་མེད་པར་ཡང་སྦྱོར་ལ།་སེམས་ཅན་གནོད་སེམས་ཅན་སྡུད་པར་ཡང་སྦྱོར་བ་དང་།་བརྩོན་འགྲུས་ལ་རློམ་སེམས་མེད་པར་ཡང་སྦྱོར་ལ།་སེམས་ཅན་ལེ་ལོ་ཅན་སྡུད་པར་ཡང་སྦྱོར་བ་དང་།་བསམ་གཏན་ལ་རློམ་སེམས་མེད་པར་ཡང་སྦྱོར་ལ།་སེམས་ཅན་སེམས་རྣམ་པར་གཡེང་བ་སྡུད་པར་ཡང་སྦྱོར་བ་དང་།་ཤེས་རབ་ལ་རློམ་སེམས་མེད་པར་ཡང་སྦྱོར་ལ།་ 393a ༄#། །སེམས་ཅན་ཤེས་རབ་འཆལ་པ་ཅན་སྡུད་པར་ཡང་སྦྱོར་བ་འདིའང་བྱང་ཆུབ་སེམས་དཔའི་སྦྱོར་བ་ཡང་དག་པ་ཞེས་བྱའོ། །གཞན་ཡང་སྟོང་པ་ཉིད་ལ་རློམ་སེམས་མེད་པར་ཡང་སྦྱོར་ལ།་ལྟ་བར་སོང་བ་ཐམས་ཅད་དང་ཡང་བྲལ་ཞིང་ལྟ་བར་སོང་བ་ལས་རྣམ་པར་གྲོལ་བའང་མ་ཡིན་པ་ནི་སྟོང་པ་ཉིད་ལ་སྦྱོར་བ་སྟེ།་སྟོང་པ་ཉིད་གང་གིས་སྟོང་པ་ཉིད་སྟོང་པའི་སྟོང་པ་ཉིད་དེས་ལྟ་བར་གྱུར་པ་རྣམས་སྟོང་པ་དང་།་སྟོང་པ་ཉིད་གང་གིས་ལྟ་བར་གྱུར་པ་རྣམས་སྟོང་པའི་སྟོང་པ་ཉིད་དེས་ཆོས་ཐམས་ཅད་སྟོང་པར་འདི་ཤེས་ཤིང་ཤེས་པ་ལ་ལྷག་པའི་ང་རྒྱལ་ཡང་མེད་པ་གང་ཡིན་པ་འདིའང་བྱང་ཆུབ་སེམས་དཔའི་སྦྱོར་བ་ཡང་དག་པའོ། །ལྷའི་བུ།་གཞན་ཡང་མཚན་མ་མེད་པ་ལ་རློམ་སེམས་མེད་པར་ཡང་སྦྱོར་ལ་རྣམ་པར་རྟོག་པ་ཐམས་ཅད་དང་བྲལ་ཞིང་རྣམ་པར་རྟོག་པ་ལས་གྲོལ་བའང་མ་ཡིན་པ་ནི་མཚན་མ་མེད་པ་ལ་སྦྱོར་བ་སྟེ།་རྣམ་པར་རྟོག་པ་གང་གིས་མཚན་མ་མེད་པ་ལ་རྣམ་པར་རྟོག་པའི་རྣམ་པར་རྟོག་པ་དེའང་མཚན་མ་མེད་པ་དང་མཉམ་ཞིང་།་རྣམ་པར་རྟོག་པ་དེ་དང་མཚན་མ་མེད་པའང་མཚན་མ་མེད་པར་རྣམ་པར་རྟོག་པས་མཉམ་པར་ཤེས་ཏེ།་འདི་ཤེས་ཤིང་ཤེས་པ་ལ་ལྷག་པའི་ང་རྒྱལ་ཡང་མེད་པ་གང་ཡིན་པ་འདིའང་བྱང་ཆུབ་སེམས་དཔའི་སྦྱོར་བ་ཡང་དག་པའོ། །གཞན་ཡང་སྨོན་པ་མེད་པ་ལ་རློམ་སེམས་མེད་པར་ཡང་སྦྱོར་ལ།་བསམ་བཞིན་དུ་སྐྱེ་བ་ཡོངས་སུ་འཛིན་པར་ཡང་སྦྱོར་ཏེ།་དེ་ 393b སྨོན་ལམ་འདེབས་ཀྱང་སེམས་ཀྱི་བག་ལ་ཉལ་བར་མི་བྱེད་ཅིང་།་སྨོན་ལམ་འདེབས་ཀྱང་སྨོན་ལམ་གྱིས་རྒྱུ་བའང་མེད་ལ།་སྐྱེའང་སྐྱེ་ཞིང་མཐའ་གཉིས་ཀར་ལྟ་བ་དང་བྲལ་བ་འདི་ལྟ་སྟེ།་ངར་འཛིན་པ་དང་།་ང་ཡིར་འཛིན་པའི་ལྟ་བ་དང་བྲལ་བར་གྱུར་ཅིང་།་སྐྱེའང་སྐྱེ་ལ་འཆི་འཕོ་དང་སྐྱེ་པ་དང་ཡང་བྲལ་བ་ཡིན་ཏེ།་འདི་ཤེས་ཤིང་ཤེས་པ་ལ་ལྷག་པའི་ང་རྒྱལ་ཡང་མེད་པ་གང་ཡིན་པ་འདིའང་བྱང་ཆུབ་སེམས་དཔའི་སྦྱོར་བ་ཡང་དག་པའོ། །ལྷའི་བུ།་གཞན་ཡང་བྱང་ཆུབ་སེམས་དཔའ་རྣམས་ཀྱི་སྦྱོར་བ་ཡང་དག་པ་ཡང་དག་ཕུལ་ནི་གང་ཤེས་རབ་ཀྱི་ཤེས་པས་བརྩོན་པའང་མེད་ལ།་ཐབས་ཀྱི་ཤེས་པས་དགེ་བའི་ཆོས་ཐམས་ཅད་སྡུད་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་བདག་མེད་པ་དང་།་སེམས་ཅན་མེད་པ་དང་།་སྲོག་མེད་པ་དང་།་གསོ་བ་མེད་པ་དང་།་གང་ཟག་མེད་པར་ཡང་སྦྱོར་ལ།་ཐབས་ཀྱི་ཤེས་པས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་ཆོས་ཐམས་ཅད་བླང་བ་མེད་པ་དང་།་དོར་བ་མེད་པར་ཡང་སྦྱོར་ལ།་ཐབས་ཀྱི་ཤེས་པས་ཆོས་ཐམས་ཅད་ཡོངས་སུ་འཛིན་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་སངས་རྒྱས་ཐམས་ཅད་དང་ཆོས་ཀྱི་དབྱངས་དབྱེར་མེད་པར་ཡང་སྦྱོར་ལ།་ཐབས་ཀྱི་ཤེས་པས་སངས་རྒྱས་ཐམས་ཅད་ལ་བླ་མར་བྱ་བ་དང་།་གུས་པར་བྱ་བ་དང་།་མཆོད་པ་དང་།་རིམ་གྲོ་བྱེད་པར་ཡང་སྦྱོར་བ་དང་།་ཤེས་རབ་ཀྱི་ 394a ༄#། །ཤེས་པས་སངས་རྒྱས་ཀྱི་ཞིང་ཐམས་ཅད་ནམ་མཁའི་ཞིང་དུའང་སྦྱོར་ལ།་ཐབས་ཀྱི་ཤེས་པས་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་སྦྱོང་བའི་རྒྱན་ལ་སྦྱོར་བ་དང་།་ཤེས་རབ་ཀྱི་ཤེས་པས་འཕགས་པ་ཐམས་ཅད་འདུས་མ་བྱས་ཀྱིས་རབ་ཏུ་ཕྱེ་བར་ཡང་སྦྱོར་ལ།་ཐབས་ཀྱི་ཤེས་པས་འཕགས་པ་ཐམས་ཅད་ལ་བླ་མ་དང་།་གུས་པ་དང་།་རིམ་གྲོ་བྱེད་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་སངས་རྒྱས་ཀྱི་སྐུ་ཟག་པ་མེད་པར་སོ་སོར་རྟོག་པར་ཡང་སྦྱོར་ལ།་ཐབས་ཀྱི་ཤེས་པས་མཚན་དང་དཔེ་བྱད་བཟང་པོ་དང་།་རྒྱན་ལའང་སྦྱོར་བ་དང་།་ཤེས་རབ་ཀྱི་ཤེས་པས་འདུ་བྱེད་ཐམས་ཅད་མ་སྐྱེས་པ་དང་།་མ་བྱུང་བར་སོ་སོར་རྟོག་པར་ཡང་སྦྱོར་ལ།་ཐབས་ཀྱི་ཤེས་པས་བསམ་བཞིན་དུ་སྲིད་པར་སྐྱེ་བ་ཡོངས་སུ་འཛིན་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་སྟོང་པ་ཉིད་དང་།་མཚན་མ་མེད་པ་དང་།་སྨོན་པ་མེད་པར་ཡང་སྦྱོར་ལ།་ཐབས་ཀྱི་ཤེས་པས་ལྟ་བ་དང་།་རྣམ་པར་རྟོག་པ་དང་།་སྨོན་ལམ་སྤང་བ་སྟོན་པ་ཡང་སྦྱོར་བ་དང་།་ཤེས་རབ་ཀྱི་ཤེས་པས་མངོན་པར་ཤེས་པ་སྐྱེ་བ་མེད་པར་ཡང་སྦྱོར་ལ།་ཐབས་ཀྱི་ཤེས་པས་མངོན་པར་ཤེས་པ་ཐམས་ཅད་ཀྱིས་རྣམ་པར་འཕྲུལ་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་ཕུང་པོ་དང་།་ཁམས་དང་།་སྐྱེ་མཆེད་མ་སྐྱེས་པ་དང་མི་གསོག་པར་ཡང་སྦྱོར་ལ།་ཐབས་ཀྱི་ཤེས་པས་ཕུང་པོ་དང་།་ཁམས་ 394b དང་།་སྐྱེ་མཆེད་ཡོངས་སུ་འདོར་བར་ཡང་སྦྱོར་བ་དང་།་ཤེས་རབ་ཀྱི་ཤེས་པས་སྲིད་པ་མྱ་ངན་ལས་འདས་པའི་རང་བཞིན་དུ་རྟོག་པར་བྱེད་པར་ཡང་སྦྱོར་ལ།་ཐབས་ཀྱི་ཤེས་པས་འཁོར་བ་ན་སེམས་ཅན་ཡོངས་སུ་སྨིན་པར་བྱེད་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་ཤེས་རབ་ཀྱི་མིག་ལའང་སྦྱོར་ལ།་ཐབས་ཀྱི་ཤེས་པས་ལྷའི་མིག་ལ་མངོན་པར་སྒྲུབ་པ་ལའང་སྦྱོར་བ་དང་།་ཤེས་རབ་ཀྱི་ཤེས་པས་ཆོས་བརྗོད་དུ་མེད་པར་ཁོང་དུ་ཆུད་པར་ཡང་སྦྱོར་ལ།་ཐབས་ཀྱི་ཤེས་པས་ཡི་གེ་དང་ངེས་པའི་ཚིག་གིས་ཆོས་སྟོན་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་དོན་དང་ཆོས་སོ་སོ་ཡང་དག་པར་རིག་པ་ལ་ཡང་སྦྱོར་ལ།་ཐབས་ཀྱི་ཤེས་པས་ངེས་པའི་ཚིག་དང་སྤོབས་པ་སོ་སོ་ཡང་དག་པར་རིག་པ་ལའང་སྦྱོར་བ་དང་།་ཤེས་རབ་ཀྱི་ཤེས་པས་སེམས་ཅན་གྱི་དབང་པོ་མཆོག་དང་།་མཆོག་མ་ཡིན་པ་ཐམས་ཅད་ཤེས་པ་ལའང་སྦྱོར་ལ།་ཐབས་ཀྱི་ཤེས་པས་སོ་སོ་ཅི་རིགས་པར་ཆོས་སྟོན་པར་ཡང་སྦྱོར་བ་དང་།་ཤེས་རབ་ཀྱི་ཤེས་པས་སེམས་ཅན་གྱི་སྤྱོད་པ་བརྒྱད་ཁྲི་བཞི་སྟོང་ཁོང་དུ་ཆུད་པར་བྱེད་པར་ཡང་སྦྱོར་ལ།་ཐབས་ཀྱི་ཤེས་པས་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ཡང་དག་པར་སྟོན་པར་ཡང་སྦྱོར་བ་འདི་ནི་ལྷའི་བུ་བྱང་ཆུབ་སེམས་དཔའ་རྣམས་ཀྱི་སྦྱོར་བ་ཡང་དག་པ་ཡང་དག་ཕུལ་ལོ། །འཇམ་དཔལ་གཞོན་ནུར་གྱུར་པས་སྦྱོར་བ་ཡང་དག་པ་འདི་བསྟན་པ་ན་འཁོར་དེ་ལས་ལྷའི་བུ་བརྒྱད་སྟོང་ནི་བླ་ན་ 395a ༄#། །མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །བྱང་ཆུབ་སེམས་དཔའ་ལྔ་སྟོང་ནི་མི་སྐྱེ་བའི་ཆོས་ལ་བཟོད་པ་སྐྱེས་སོ། །བཅོམ་ལྡན་འདས་ཀྱིས་ཀྱང་འཇམ་དཔལ་གཞོན་ནུར་གྱུར་པ་ལ་འཇམ་དཔལ།་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་སྦྱོར་བ་ཡང་དག་པ་འདི་ལེགས་པར་བཤད་པ་ལགས་སོ། །ལེགས་སོ། །ཞེས་བྱ་བ་བྱིན་ནོ། །དེ་ནས་ལྷའི་བུ་འོང་མང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ།་ཁྱོད་ལ་དེ་བཞིན་གཤེགས་པས་གང་གི་ཕྱིར་ལེགས་སོ། །ཞེས་བྱ་བ་བྱིན་པས་ཅི་ཁྱོད་དགའ་བར་འགྱུར་རམ།་འཇམ་དཔལ་གྱིས་སྨྲས་པ།་ལྷའི་བུ།་འདི་ཇི་སྙམ་དུ་སེམས།་གང་སྤྲུལ་པའི་སྤྲུལ་པ་ལ་ལེགས་སོ། །ཞེས་བྱ་བ་བྱིན་ན།་སྤྲུལ་པ་དེ་ལ་ཅི་དགའ་བར་འགྱུར་བ་ལྟ་ཡོད་དམ།་ལྷའི་བུས་སྨྲས་པ།་འཇམ་དཔལ།་སྤྲུལ་པ་ལ་རྗེས་སུ་ཆགས་པའང་མེད།་ཁོང་ཁྲོ་བའང་མེད་ན།་དེ་ལ་དགའ་བར་འགྱུར་བ་ཅི་ཞིག་ཡོད།་འཇམ་དཔལ་གྱིས་སྨྲས་པ།་ལྷའི་བུ།་དེ་བཞིན་དུ་ཆོས་ཐམས་ཅད་ཀྱང་སྤྲུལ་པའི་ངོ་བོ་ཉིད་ཀྱི་མཚན་ཉིད་དེ།་དེ་བཞིན་གཤེགས་པའང་དེའི་མཚན་ཉིད་ལ།་འཇམ་དཔལ་ཡང་དེའི་མཚན་ཉིད་ཡིན་ན།་དེ་ལ་ལེགས་སོ། །ཞེས་བྱ་བས་ཁོ་བོ་དགའ་བར་འགྱུར་དུ་ཅི་ཞིག་ཡོད།་ལྷའི་བུ།་འདི་ལྟ་སྟེ།་དཔེར་ན།་བྲག་ཅ་ནི་སྒྲ་སྙན་པ་དང་།་མི་སྙན་པ་རྣམས་ལ་རྗེས་སུ་ཆགས་པར་ཡང་མི་འགྱུར།་ཁོང་ཁྲོ་བར་ཡང་མི་འགྱུར་རོ། །ལྷའི་བུ།་དེ་བཞིན་དུ་ཆོས་ཐམས་ཅད་ནི་བྲག་ཅའི་ངོ་བོ་ཉིད་ཀྱི་རང་བཞིན་ཏེ།་དེ་བཞིན་གཤེགས་པའང་དེའི་རང་བཞིན།་ 395b འཇམ་དཔལ་ཡང་དེའི་རང་བཞིན་ཡིན་ན།་དེ་ལ་ལེགས་སོ་ཞེས་བྱ་བས་ཁོ་བོ་དགའ་བར་འགྱུར་དུ་ཅི་ཡོད།་ལྷའི་བུས་སྨྲས་པ།་འཇམ་དཔལ།་དེ་བཞིན་གཤེགས་པས་སུ་ལ་ལེགས་སོ་ཞེས་བྱ་བ་གནང་།་འཇམ་དཔལ་གྱིས་སྨྲས་པ།་ལྷའི་བུ།་རྣམ་པར་ཤེས་པ་མི་གནས་པར་སྟོན་པ་དང་།་བསྟན་པ་ཐམས་ཅད་ལ་སུའི་བློ་ཐོགས་པར་མི་འགྱུར་བ་དང་།་སུ་སེམས་ཅན་ཐམས་ཅད་ལ་སེམས་ཅན་དུ་འདུ་ཤེས་མི་འཇུག་པ་དང་།་སུ་ཆོས་ཐམས་ཅད་ལ་ཆོས་སུ་འདུ་ཤེས་མི་འཇུག་པ་དང་།་སུ་བསམ་པ་མྱ་ངན་ལས་འདས་པ་ལའང་གནས་ལ།་སྦྱོར་བ་འཁོར་བ་ལའང་གནས་པ་དང་།་སུ་བདུད་ཀྱི་ལས་ཁོང་དུ་ཆུད་ནས་བདུད་ཀྱི་ལས་ཀྱང་སངས་རྒྱས་ཀྱི་འཕྲིན་ལས་སུ་ཤེས་ཤིང་སངས་རྒྱས་ཀྱི་འཕྲིན་ལས་ལ་མངོན་པར་ཞེན་ན།་སངས་རྒྱས་ཀྱི་འཕྲིན་ལས་ཀྱང་བདུད་ཀྱི་ལས་སུ་ཤེས་པ་དེ་ལྟ་བུའི་ཆོས་དང་ལྡན་པའི་བྱང་ཆུབ་སེམས་དཔའ་ལ།་ལྷའི་བུ།་དེ་བཞིན་གཤེགས་པས་ལེགས་སོ་ཞེས་བྱ་བ་གནང་ངོ་། །ལྷའི་བུས་སྨྲས་པ།་འཇམ་དཔལ།་ཅི་དེ་ལྟ་བུའི་ཆོས་དང་ལྡན་པས་དེ་བཞིན་གཤེགས་པས་ཁྱོད་ལ་ལེགས་སོ་ཞེས་བྱ་བ་གནང་ངམ།་འཇམ་དཔལ་གྱིས་སྨྲས་པ།་ལྷའི་བུ།་འདི་ཇི་སྙམ་དུ་སེམས།་གང་མཉམ་པ་ཉིད་དེ་ལ་མི་མཉམ་པ་གང་ཡང་ཡོད་དམ།་ལྷའི་བུས་སྨྲས་པ།་འཇམ་དཔལ།་མཉམ་པ་ཉིད་ལ་མི་མཉམ་པ་གང་ཡང་མེད་དོ། །འཇམ་དཔལ་གྱིས་སྨྲས་པ།་ལྷའི་བུ།་མཉམ་པ་ཉིད་གང་དང་མཉམ་པ་དེ་དང་མཚམས་མེད་པ་མཉམ་མོ། །མཚམས་མེད་པ་གང་དང་མཉམ་ 396a ༄#། །པ་དེ་དང་ཁོ་བོ་མཉམ་མོ། །མཉམ་པ་ཉིད་གང་དང་མཉམ་པ་དེ་དང་ལྟ་བར་གྱུར་པ་རྣམས་མཉམ་མོ། །ལྟ་བར་གྱུར་པ་རྣམས་གང་དང་མཉམ་པ་དེ་དང་ཁོ་བོ་མཉམ་མོ། །མཉམ་པ་ཉིད་གང་དང་མཉམ་པ་དེ་དང་ཕྱིན་ཅི་ལོག་རྣམས་མཉམ་མོ། །ཕྱིན་ཅི་ལོག་རྣམས་གང་དང་མཉམ་པ་དེ་དང་ཁོ་བོ་མཉམ་མོ། །མཉམ་པ་ཉིད་གང་དང་མཉམ་པ་དེ་དང་དམིགས་པ་མཉམ་མོ། །དམིགས་པ་གང་དང་མཉམ་པ་དེ་དང་ཁོ་བོ་མཉམ་མོ། །མཉམ་པ་ཉིད་གང་དང་མཉམ་པ་དེ་དང་འཁོར་བའི་མཐའ་མཉམ་མོ། །འཁོར་བའི་མཐའ་གང་དང་མཉམ་པ་དེ་དང་མྱ་ངན་ལས་འདས་པའི་མཐའ་མཉམ་མོ། །མྱ་ངན་ལས་འདས་པའི་མཐའ་གང་དང་མཉམ་པ་དེ་དང་བདག་གི་མཐའ་མཉམ་མོ། །བདག་གི་མཐའ་གང་དང་མཉམ་པ་དེ་དང་ཡང་དག་པའི་མཐའ་མཉམ་མོ། །ཡང་དག་པའི་མཐའ་གང་དང་མཉམ་པ་དེ་དང་མ་རིག་པ་དང་།་སྲིད་པ་དང་།་སྲེད་པའི་མཐའ་མཉམ་མོ། །མ་རིག་པ་དང་།་སྲིད་པ་དང་།་སྲེད་པའི་མཐའ་གང་དང་མཉམ་པ་དེ་དང་རིག་པ་དང་།་རྣམ་པར་གྲོལ་བའི་མཐའ་མཉམ་མོ། །རིག་པ་དང་།་རྣམ་པར་གྲོལ་བའི་མཐའ་གང་དང་མཉམ་པ་དེ་དང་འདོད་ཆགས་དང་།་ཞེ་སྡང་དང་།་གཏི་མུག་གི་མཐའ་མཉམ་མོ། །འདོད་ཆགས་དང་།་ཞེ་སྡང་དང་།་གཏི་མུག་གི་མཐའ་གང་དང་མཉམ་པ་དེ་དང་སྟོང་པ་ཉིད་དང་།་མཚན་མ་མེད་པ་དང་།་སྨོན་པ་མེད་པའི་མཐའ་མཉམ་མོ། །སྟོང་པ་ཉིད་དང་།་མཚན་མ་མེད་པ་དང་།་སྨོན་པ་མེད་པའི་མཐའ་གང་དང་མཉམ་པ་དེ་དང་འདུས་བྱས་ཀྱི་མཐའ་མཉམ་མོ། །འདུས་བྱས་ཀྱི་མཐའ་གང་དང་མཉམ་པ་དེ་དང་འདུས་མ་བྱས་ཀྱི་མཐའ་མཉམ་མོ། །འདུས་མ་བྱས་ཀྱི་ 396b མཐའ་གང་དང་མཉམ་པ་དེ་དང་འཇམ་དཔལ་གཞོན་ནུར་གྱུར་པ་མཉམ་སྟེ།་ལྷའི་བུ།་མཉམ་པ་ཉིད་དེས་ཆོས་ཐམས་ཅད་མཉམ་མོ། །དེ་ལ་སུ་འཆད་པ་དང་།་གང་བཤད་པ་དང་།་གང་ལ་བཤད་པ་དང་།་སུ་ལ་ལེགས་སོ་ཞེས་བྱ་བ་སྦྱིན་པའི་ཆོས་དེ་དག་ཐམས་ཅད་ནམ་མཁའ་དང་མཉམ་པ་ཉིད་ཀྱིས་མཉམ་སྟེ།་ནམ་མཁའ་ཡང་འདུས་མ་བྱས་ཡིན་པས་ནམ་མཁའ་ནི་མཉམ་པའང་མེད།་མི་མཉམ་པའང་མེད་དེ།་སུ་རྗེས་སུ་མི་འགྲོ་བའི་ཚུལ་གྱིས་མཉམ་པ་ཉིད་འདི་དག་གི་རྗེས་སུ་སོང་བ་དེ་ལ་དེ་བཞིན་གཤེགས་པས་ལེགས་སོ་ཞེས་བྱ་བ་གནང་ངོ་། །ལྷའི་བུས་སྨྲས་པ།་འཇམ་དཔལ།་ཁྱོད་ལེགས་སོ། །ཞེས་བྱ་བ་དང་།་ལེགས་སོ་ཞེས་བྱ་བ་མ་ཡིན་པ་ལས་བརྩམས་ཏེ་ཆོས་བསྟན་པ་ལ་སྤོབས་པར་གྱིས་ཤིག་།འཇམ་དཔལ་གྱིས་སྨྲས་པ།་ལྷའི་བུ།་ལྷག་པའི་བསམ་པས་བྱང་ཆུབ་ཀྱི་ཕྱིར་འཇུག་པ་ནི་ལེགས་པའོ། །གཡོ་དང་སྒྱུས་ཉེ་བར་སྤྱོད་པ་ནི་ལེགས་པ་མ་ཡིན་པའོ། །སྙིང་རྗེ་ཆེན་པོས་སེམས་ཅན་ཐམས་ཅད་མི་གཏོང་བ་ནི་ལེགས་པའོ། །སེམས་ཅན་རྣམས་ལ་རྣམ་པར་འཚེ་བ་ནི་ལེགས་པ་མ་ཡིན་པའོ། །སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་ནི་ལེགས་པའོ། །གནོད་སེམས་ཀྱི་བསམ་པ་ནི་ལེགས་པ་མ་ཡིན་པའོ། །ཉེས་པ་བྱུང་བ་མི་འཆབ་ཅིང་འཆགས་ཏེ་རྣམ་པར་འབྱེད་ལ་ཀུན་ནས་བསྐོར་བ་མེད་པར་གནས་པ་ནི་ལེགས་པའོ། །ཉེས་པ་བྱུང་བ་འཆབ་པ་ནི་ལེགས་པ་མ་ 397a ༄#། །ཡིན་པའོ། །བདག་གི་འཁྲུལ་པ་ལ་སོ་སོར་རྟོག་པ་ནི་ལེགས་པའོ། །གཞན་གྱི་འཁྲུལ་པའི་སྐྱོན་ཚོལ་བ་ནི་ལེགས་པ་མ་ཡིན་པའོ། །བྱས་པ་གཟོ་བ་དང་།་བྱས་པ་ཤེས་པ་དང་།་བྱས་པ་ཆུད་མི་གཟོན་པ་དང་།་བྱས་པ་ལ་ལན་དུ་ཕན་འདོགས་པ་ནི་ལེགས་པའོ། །བྱས་པ་མི་གཟོ་བ་དང་།་བྱས་པ་མི་ཤེས་པ་དང་།་བྱས་པ་ཆུད་གཟོན་པ་དང་།་བྱས་པ་ལན་དུ་ཕན་མི་འདོགས་པ་ནི་ལེགས་པ་མ་ཡིན་པའོ། །ཐོས་པ་ཡང་དག་པར་སྒྲུབ་པ་ནི་ལེགས་པའོ། །ཐོས་པ་ལོག་པར་སྒྲུབ་པ་ནི་ལེགས་པ་མ་ཡིན་པའོ། །བསླབ་པ་ཡང་དག་པར་བླངས་ནས་མ་ཉམས་པ་ནི་ལེགས་པའོ། །བསླབ་པ་ཡང་དག་པར་བླངས་པ་ལས་འདའ་བ་ནི་ལེགས་པ་མ་ཡིན་པའོ། །དབེན་པ་ལ་སེམས་གཞོལ་ཞིང་དབེན་པ་ལ་དགའ་བ་ནི་ལེགས་པའོ། །འདུ་འཛི་ལ་དགའ་བ་ནི་ལེགས་པ་མ་ཡིན་པའོ། །དགོན་པ་ལ་གནས་པར་ལུས་དང་སྲོག་འདོར་བ་ནི་ལེགས་པའོ། །་ལུས་དང་སྲོག་ལ་ལྟ་བ་ནི་ལེགས་པ་མ་ཡིན་པའོ། །འཕགས་པའི་རིགས་ལ་ཡང་དག་པར་དགའ་བ་དང་།་རུང་བ་རྣམས་ལ་ཚོད་རིག་པ་ནི་ལེགས་པའོ། །ཆོག་མི་ཤེས་ཤིང་འདོད་པ་ཆེ་ལ་སྡིག་པ་འདོད་པ་ནི་ལེགས་པ་མ་ཡིན་པའོ། །ཉམ་ཆུང་བ་རྣམས་ལ་བཟོད་ཅིང་དང་དུ་ལེན་པ་ནི་ལེགས་པའོ། །སེམས་ཅན་རྣམས་ལ་སྨ་འབེབས་པ་ནི་ 397b ལེགས་པ་མ་ཡིན་པའོ། །འཚོ་བ་དག་པ་ནི་ལེགས་པའོ། །སྙོམ་ལས་ཅན་ནི་ལེགས་པ་མ་ཡིན་པའོ། །སྐྱབས་སུ་སོད་པ་རྣམས་མི་གཏོང་བ་ནི་ལེགས་པའོ། །སྐྱབས་སུ་སོང་བ་རྣམས་ལ་འཁུ་བ་ནི་ལེགས་པ་མ་ཡིན་པའོ། །དམ་བཅས་པ་ལས་མི་ཉམས་པའི་ཚིག་བདེན་པ་དང་།་ཇི་སྐད་སྨྲས་པ་དེ་བཞིན་བྱེད་པ་ནི་ལེགས་པའོ། །འཇིག་རྟེན་ཐམས་ཅད་ལ་བསླུ་བ་ནི་ལེགས་པ་མ་ཡིན་པའོ། །དམ་པའི་ཆོས་ཡོངས་སུ་འཛིན་པ་ནི་ལེགས་པའོ། །དམ་པའི་ཆོས་ཡོངས་སུ་སྤོང་བ་ནི་ལེགས་པ་མ་ཡིན་པའོ། །ཐོས་པ་ལ་སེར་སྣ་མེད་ཅིང་ཆོས་ལ་སློབ་དཔོན་གྱིས་དཔེ་མཁྱུད་མེད་དེ་ཟང་ཟིང་མེད་པར་ཆོས་སྟོན་པ་ནི་ལེགས་པའོ། །ཆོས་ལ་སེར་སྣ་བྱེད་ཅིང་ཆོས་ལ་སློབ་དཔོན་གྱི་དཔེ་མཁྱུད་བྱེད་དེ་ཟང་ཟིང་དང་འབྲེལ་བའི་སེམས་ཀྱིས་ཆོས་སྟོན་པ་ནི་ལེགས་པ་མ་ཡིན་པའོ། །སེམས་ཅན་ཡོངས་སུ་སྨིན་པར་བྱེད་པའི་ཐབས་དང་ལྡན་པའི་བསྡུ་བ་ནི་ལེགས་པའོ། །སེམས་ཅན་ལ་མི་ལྟ་ཞིང་ཐབས་དང་མི་ལྡན་པར་བསྡུ་བའི་དངོས་པོ་སྟོན་པ་ནི་ལེགས་པ་མ་ཡིན་པའོ། །ཕ་རོལ་ཏུ་ཕྱིན་པ་དྲུག་ཚོལ་བ་ནི་ལེགས་པའོ། །ཕ་རོལ་ཏུ་ཕྱིན་པ་དྲུག་གི་མི་མཐུན་པའི་ཕྱོགས་ནི་ལེགས་པ་མ་ཡིན་པའོ། །ཤེས་པས་བྱས་པའི་ལས་རྣམས་ནི་ལེགས་པའོ། །ང་རྒྱལ་གྱིས་བྱས་པའི་ལས་རྣམས་ནི་ལེགས་པ་མ་ཡིན་པའོ། །མཛའ་བ་བརྟན་པ་ནི་ལེགས་པའོ། །ངན་པ་དང་ 398a ༄#། །བཤེས་པ་ནི་ལེགས་པ་མ་ཡིན་པའོ། །དགེ་བ་བཅུའི་ལས་ཀྱི་ལམ་ལ་བརྟན་པ་ནི་ལེགས་པའོ། །མི་དགེ་བ་བཅུའི་ལས་ཀྱི་ལམ་དུ་ཞུགས་པ་ནི་ལེགས་པ་མ་ཡིན་པའོ། །སྡིག་པའི་ལས་ཐམས་ཅད་མི་སྤྱོད་པ་ནི་ལེགས་པའོ། །སྡིག་པའི་ལས་ཐམས་ཅད་ལ་ཞུགས་པ་ནི་ལེགས་པ་མ་ཡིན་པའོ། །ལྷའི་བུ།་དམིགས་པ་ཅན་གྱི་རབ་ཏུ་འབྱུང་བ་ནི་ལེགས་པ་མ་ཡིན་པའོ། །སྟོང་པ་ཉིད་སྨྲ་བའི་མངོན་པར་འབྱུང་བ་ནི་ལེགས་པའོ། །འཇིག་རྟེན་རྒྱང་ཕན་པའི་གཏམ་སྨྲ་བའི་སེངྒེའི་ཁྲི་ནི་ལེགས་པ་མ་ཡིན་པའོ།།་བྱང་ཆུབ་སེམས་དཔའི་སྡེ་སྣོད་རབ་ཏུ་ཐོབ་པའི་དམ་པའི་ཆོས་ཀྱི་གཏམ་སྨྲ་བའི་སེངྒེའི་ཁྲི་ནི་ལེགས་པའོ། །ཚུལ་ཁྲིམས་འཆལ་པས་དད་པས་བྱིན་པ་སྤྱད་པ་ནི་ལེགས་པ་མ་ཡིན་པའོ། །ཚུལ་ཁྲིམས་དང་ལྡན་པའི་ཐོབ་པ་དང་།་བཀུར་སྟི་དང་།་ཚིགས་སུ་བཅད་པ་ཐམས་ཅད་ནི་ལེགས་པའོ། །ལྷག་པའི་ང་རྒྱལ་ཅན་གྱི་བྱང་ཆུབ་ནི་ལེགས་པ་མ་ཡིན་པའོ། །ལྷག་པའི་ང་རྒྱལ་མེད་པར་ཤེས་པའི་བརྡ་སྤྲོད་པ་ནི་ལེགས་པའོ། །བྱང་ཆུབ་སེམས་དཔའ་རྣམས་ལ་གནོད་པར་སེམས་པ་ནི་ལེགས་པ་མ་ཡིན་པའོ། །བྱང་ཆུབ་སེམས་དཔའ་རྣམས་ལ་སྟོན་པ་ཙམ་དུ་ཕངས་པར་འཛིན་པ་ནི་ལེགས་པའོ། །བྱང་ཆུབ་སེམས་དཔའི་མིང་གིས་རྙེད་པས་འཚོ་བ་ནི་ལེགས་པ་མ་ཡིན་པའོ། །བྱང་ཆུབ་སེམས་ 398b དཔའ་ཆོས་སྨྲ་བ་ཡང་དག་པར་སྒྲུབ་པ་ལ་གནས་པའི་རྙེད་པ་ནི་ལེགས་པའོ། །ལྷའི་བུ།་དེ་ལྟར་ན་ཇི་ཙམ་དུ་དེ་བཞིན་གཤེགས་པའི་བཀའ་དང་འགལ་བ་དེ་ཙམ་དུ་ཐམས་ཅད་ལེགས་པ་མ་ཡིན་པའོ། །ཇི་ཙམ་དུ་དེ་བཞིན་གཤེགས་པའི་བཀའ་དང་མཐུན་པ་དེ་ཙམ་དུ་ཐམས་ཅད་ལེགས་པའོ། །ལྷའི་བུས་སྨྲས་པ།་འཇམ་དཔལ།་ཁྱོད་ཅི་ལེགས་སོ་ཞེས་བྱ་བའི་ཆོས་ལ་བརྩོན་ནམ།་འོན་ཏེ་ལེགས་པ་མ་ཡིན་ཞེས་བྱ་བའི་ཆོས་ལ་བརྩོན།་འཇམ་དཔལ་གྱིས་སྨྲས་པ།་ལྷའི་བུ།་ཁོ་བོ་ནི་ལེགས་སོ་ཞེས་བྱ་བའི་ཆོས་ལ་བརྩོན་པའང་མ་ཡིན།་ལེགས་པ་མ་ཡིན་པ་ཞེས་བྱ་བའི་ཆོས་ལ་བརྩོན་པའང་མ་ཡིན་ནོ། །དེ་ཅིའི་ཕྱིར་ཞེ་ན།་ལྷའི་བུ།་ཁོ་བོ་ནི་ཆོས་ཐམས་ཅད་ལ་བརྩོན་པ་མ་ཡིན་ནོ། །ལྷའི་བུས་སྨྲས་པ།་འཇམ་དཔལ།་ཁྱོད་ཅི་དགེ་བའི་ཆོས་ལ་མི་བརྩོན་ནམ།་འཇམ་དཔལ་གྱིས་སྨྲས་པ།་ལྷའི་བུ།་ཁོ་བོ་ནི་དགེ་བའི་ཆོས་ལ་བརྩོན་པའང་མ་ཡིན།་མི་དགེ་བའི་ཆོས་ལ་བརྩོན་པའང་མ་ཡིན་ནོ། །དེ་ཅིའི་ཕྱིར་ཞེ་ན།་ལྷའི་བུ།་དགེ་བ་ཞེས་བྱ་བ་འདིའང་འདུས་བྱས་སོ། །མི་དགེ་བ་ཞེས་བྱ་བ་འདིའང་འདུས་བྱས་སོ། །མི་གཡོ་བ་ཞེས་བྱ་བ་འདིའང་འདུས་བྱས་སོ། །ལྷའི་བུས་སྨྲས་པ།་འཇམ་དཔལ།་ཁྱོད་ཅི་འདུས་མ་བྱས་པའམ།་འཇམ་དཔལ་གྱིས་སྨྲས་པ།་ལྷའི་བུ།་གལ་ཏེ་འདུས་བྱས་ཀྱིས་སྐྲག་པ་ལྟ་ན་ནི་ཁོ་བོ་འདུས་མ་བྱས་སུ་འགྱུར་རོ། །ལྷའི་བུས་སྨྲས་པ།་ 399a ༄#། །འཇམ་དཔལ།་ཁྱོད་ཅི་འདུས་བྱས་ཀྱིས་མི་སྐྲག་གམ།་འཇམ་དཔལ་གྱིས་སྨྲས་པ།་ལྷའི་བུ།་གལ་ཏེ་ཡང་དག་པར་འདུས་བྱས་ཀྱིས་ཡོངས་སུ་གྲུབ་པ་ཞིག་མཐོང་ན་ནི་ཁོ་བོ་འདུས་བྱས་ཀྱིས་སྐྲག་པར་འགྱུར་རོ། །ལྷའི་བུས་སྨྲས་པ།་འཇམ་དཔལ།་ཅི་ཁྱོད་ཀྱིས་ཡང་དག་པར་འདུས་བྱས་ཀྱིས་ཡོངས་སུ་གྲུབ་པ་མ་མཐོང་ངམ།་འཇམ་དཔལ་གྱིས་སྨྲས་པ།་ལྷའི་བུ།་ཁོ་བོས་ནི་ཡང་དག་པར་འདུས་བྱས་ཀྱིས་ཡོངས་སུ་གྲུབ་པ་མ་མཐོང་སྟེ།་འདུས་མ་བྱས་ཀྱིའང་མ་ཡིན་ནོ། །ལྷའི་བུས་སྨྲས་པ།་འཇམ་དཔལ།་ཁྱོད་ཅི་འདུས་བྱས་སུ་གཏོགས་སམ།་འོན་ཏེ་འདུས་མ་བྱས་སུ་གཏོགས།་འཇམ་དཔལ་གྱིས་སྨྲས་པ།་ལྷའི་བུ།་ཁོ་བོ་ནི་འདུས་བྱས་སུ་གཏོགས་པའང་མ་ཡིན།་འདུས་མ་བྱས་སུ་གཏོགས་པའང་མ་ཡིན་ནོ། །དེ་ཅིའི་ཕྱིར་ཞེ་ན།་གལ་ཏེ་འདུས་བྱས་སུ་གཏོགས་པར་གྱུར་ན་ནི་བྱིས་པ་སོ་སོའི་སྐྱེ་བོ་ཐམས་ཅད་དང་འདྲ་བར་འགྱུར་རོ། །གལ་ཏེ་འདུས་མ་བྱས་སུ་གཏོགས་པར་གྱུར་ན་ནི་ཉན་ཐོས་དང་རང་སངས་རྒྱས་ཐམས་ཅད་དང་འདྲ་བར་འགྱུར་རོ། །ལྷའི་བུས་སྨྲས་པ།་འཇམ་དཔལ།་གལ་ཏེ་ཁྱོད་འདུས་བྱས་སུ་གཏོགས་པའང་མ་ཡིན།་འདུས་མ་བྱས་སུ་གཏོགས་པའང་མ་ཡིན།་ཁྱོད་ཇི་ལྟར་ཤེས་པར་བྱ།་འཇམ་དཔལ་གྱིས་སྨྲས་པ།་ལྷའི་བུ།་འདི་ཇི་སྙམ་དུ་སེམས།་གང་དེ་ 399b བཞིན་གཤེགས་པས་སྤྲུལ་པ་འདུས་བྱས་སུ་གཏོགས་སམ།་འོན་ཏེ་འདུས་མ་བྱས་སུ་གཏོགས།་ལྷའི་བུས་སྨྲས་པ།་འཇམ་དཔལ།་དེ་བཞིན་གཤེགས་པས་སྤྲུལ་པ་ནི་འདུས་བྱས་སུ་གཏོགས་པའང་མ་ཡིན།་འདུས་མ་བྱས་སུ་གཏོགས་པའང་མ་ཡིན་ནོ། །འཇམ་དཔལ་གྱིས་སྨྲས་པ།་ལྷའི་བུ།་དེ་བཞིན་གཤེགས་པས་སྤྲུལ་པའི་ཆོས་ཀྱི་དེ་བཞིན་ཉིད་ཅི་འདྲ་བ་དེ་འདྲ་བ་ཁོ་བོ་ཤེས་པར་གྱིས་ཤིག་།ལྷའི་བུ།་དེ་ཇི་སྙམ་དུ་སེམས།་དེ་བཞིན་གཤེགས་པའི་རྣམ་པར་ཤེས་པ་གང་ལ་གནས།་གཟུགས་ལ་གནས་སམ།་སྨྲས་པ།་མ་ཡིན་ནོ། །སྨྲས་པ།་དེ་ཅི་ཚོར་བ་དང་།་འདུ་ཤེས་དང་།་འདུ་བྱེད་རྣམས་ལ་གནས་སམ།་སྨྲས་པ།་མ་ཡིན་ནོ། །སྨྲས་པ།་དེ་ཅི་འདུས་བྱས་ལ་གནས་སམ།་སྨྲས་པ།་མ་ཡིན་ནོ། །སྨྲས་པ།་དེ་ཅི་འདུས་མ་བྱས་ལ་གནས་སམ།་སྨྲས་པ།་མ་ཡིན་ནོ། །སྨྲས་པ།་དེ་བཞིན་གཤེགས་པའི་རྣམ་པར་ཤེས་པ་གང་ལ་གནས།་སྨྲས་པ།་འཇམ་དཔལ།་དེ་བཞིན་གཤེགས་པའི་རྣམ་པར་ཤེས་པ་ནི་གང་ལའང་མི་གནས་སོ། །འཇམ་དཔལ་གྱིས་སྨྲས་པ།་ལྷའི་བུ།་དེ་བཞིན་གཤེགས་པའི་རྣམ་པར་ཤེས་པ་གང་ལ་གནས་པ་དེ་ལ་ཁོ་བོ་གནས་པར་ཤེས་པར་བྱའོ། །ལྷའི་བུས་སྨྲས་པ།་འཇམ་དཔལ།་ཁྱོད་ཅི་དེ་བཞིན་གཤེགས་པ་ཡིན་ནམ།་འཇམ་དཔལ་གྱིས་སྨྲས་པ།་ལྷའི་བུ།་དེ་བཞིན་ཉིད་ཀྱི་འོང་བ་མེད་པ་དང་།་འགྲོ་བ་མེད་ 400a ༄#། །པ་གང་ཡིན་པ་དེ་ཉིད་ཁོ་བོའི་འགྲོ་བ་དེ་ཉིད་དེ་བཞིན་གཤེགས་པའི་འགྲོ་བ་སྟེ།་དེས་ན་ཁོ་བོ་དེ་བཞིན་གཤེགས་པའོ། །དེ་བཞིན་ཉིད་ཇི་ལྟ་བར་ཁོ་བོའང་དེ་ལྟར་འོང་བས་དེས་ན་ཁོ་བོ་དེ་བཞིན་གཤེགས་པའོ། །དེ་བཞིན་ཉིད་ཇི་ལྟ་བར་ཁོ་བོའང་དེ་ལྟར་གནས་ཏེ།་དེས་ན་ཁོ་བོ་དེ་བཞིན་གཤེགས་པའོ། །ལྷའི་བུ།་འཇམ་དཔལ་ཞེས་བྱ་བ་འདི་ནི་དེ་བཞིན་ཉིད་ཅི་འདྲ་བ་དེ་འདྲ་སྟེ།་དེས་ན་ཁོ་བོ་དེ་བཞིན་གཤེགས་པའོ། །དེ་བཞིན་ཉིད་སེམས་མེད་ཅིང་ཞི་བའི་ཕྱིར་འཇམ་དཔལ་ཡང་སེམས་མེད་ཅིང་ཞི་བ་སྟེ།་དེས་ན་ཁོ་བོ་དེ་བཞིན་གཤེགས་པའོ། །ལྷའི་བུས་སྨྲས་པ།་འཇམ་དཔལ།་དེ་བཞིན་ཉིད་གང་དུ་བཙལ་བར་བྱ།་འཇམ་དཔལ་གྱིས་སྨྲས་པ།་ལྷའི་བུ།་དེ་བཞིན་ཉིད་ནི་ལྟ་བར་སོང་བ་དྲུག་ཅུ་རྩ་གཉིས་རྣམས་སུ་བཙལ་བར་བྱའོ། །ལྷའི་བུས་སྨྲས་པ།་ལྟ་བར་སོང་བ་དྲུག་ཅུ་རྩ་གཉིས་པོ་རྣམས་གང་དུ་བཙལ་བར་བྱ།་འཇམ་དཔལ་གྱིས་སྨྲས་པ།་ལྷའི་བུ།་ལྟ་བར་སོང་བ་དྲུག་ཅུ་རྩ་གཉིས་པོ་དག་ནི་དེ་བཞིན་གཤེགས་པ་མི་འཁྲུགས་པའི་ཆོས་ཅན་གྱི་རྣམ་པར་གྲོལ་བ་ལས་བཙལ་བར་བྱའོ། །ལྷའི་བུས་སྨྲས་པ།་འཇམ་དཔལ།་དེ་བཞིན་གཤེགས་པའི་རྣམ་པར་གྲོལ་བ་གང་དུ་བཙལ་བར་བྱ།་འཇམ་དཔལ་གྱིས་སྨྲས་པ།་ལྷའི་བུ།་དེ་བཞིན་གཤེགས་པའི་རྣམ་པར་གྲོལ་བ་ནི་སེམས་ 400b ཅན་ཐམས་ཅད་ཀྱི་སེམས་ཀྱི་སྤྱོད་པ་དང་།་བསམ་པ་རྣམས་སུ་བཙལ་བར་བྱའོ། །ལྷའི་བུས་སྨྲས་པ།་འཇམ་དཔལ།་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང་།་བསམ་པ་གང་དུ་བཙལ་བར་བྱ།་འཇམ་དཔལ་གྱིས་སྨྲས་པ།་ལྷའི་བུ།་སངས་རྒྱས་ཀྱི་སྤྱོད་ཡུལ་དུའོ། །ལྷའི་བུས་སྨྲས་པ།་འཇམ་དཔལ།་སངས་རྒྱས་ཀྱི་སྤྱོད་ཡུལ་གང་དུ་བཙལ་བར་བྱ་འཇམ་དཔལ་གྱིས་སྨྲས་པ།་ལྷའི་བུ།་སེམས་ཅན་གྱི་དབང་པོ་མཆོག་དང་།་མཆོག་མ་ཡིན་པ་ཐམས་ཅད་ཤེས་པ་ལས་བཙལ་བར་བྱའོ། །ལྷའི་བུས་སྨྲས་པ།་འཇམ་དཔལ།་ཁྱོད་ཇི་ལྟར་འདིར་ཤེས་པ་ཉུང་བར་འགྱུར་བ་དེ་ལྟ་བུར་སྟོན་ཏམ།་འཇམ་དཔལ་གྱིས་སྨྲས་པ།་ལྷའི་བུ།་སངས་རྒྱས་ཀྱི་ཡེ་ཤེས་ནི་སུས་ཀྱང་ཀུན་ཤེས་པའམ།་རྣམ་པར་ཤེས་པར་མ་ནུས་སོ། །དེ་ཅིའི་ཕྱིར་ཞེ་ན།་ལྷའི་བུ།་སངས་རྒྱས་ཀྱི་ཡེ་ཤེས་ནི་ཆགས་པ་མེད་པ།་རྣམ་པར་རྟོག་པ་མེད་པ།་བརྗོད་དུ་མེད་པ།་བསྙད་དུ་མེད་པ།་སྦྱོར་བ་མེད་པ།་ཚིག་མེད་པ།་སེམས་དང་།་ཡིད་དང་།་རྣམ་པར་ཤེས་པ་དང་བྲལ་བ་སྟེ།་དེ་སུས་ཀྱང་ཀུན་ཤེས་པར་རམ།་རྣམ་པར་ཤེས་པར་མི་ནུས་པའི་ཕྱིར་རོ། །ལྷའི་བུས་སྨྲས་པ།་འཇམ་དཔལ།་གལ་ཏེ་སངས་རྒྱས་ཀྱི་ཡེ་ཤེས་ཀུན་ཤེས་པར་བྱ་བ་མ་ཡིན་ན།་ཉན་ཐོས་འདི་དག་གིས་ཀུན་ཤེས་པར་ག་ལ་འགྱུར།་བྱང་ཆུབ་སེམས་དཔའ་རྣམས་ཀྱང་ཕྱིར་མི་ལྡོག་པ་ལ་གནས་པར་ག་ 401a ༄#། །ལ་འགྱུར།་འཇམ་དཔལ་གྱིས་སྨྲས་པ།་ལྷའི་བུ།་གང་ཡི་གེ་རྣམས་ཀྱི་ཡེ་ཤེས་དེ་བསྟན་པ་འདི་ནི་དེ་བཞིན་གཤེགས་པ་རྣམས་ཀྱི་ཐབས་ཏེ།་ཡེ་ཤེས་དེ་ནི་ཡི་གེ་མེད་པའོ། །ལྷའི་བུ།་འདི་ལྟ་སྟེ།་དཔེར་ན།་མེ་གཙུབས་པ་ལས་མེ་མི་འབྱུང་གི་།གཙུབ་ཤིང་གཙུབས་པ་ལས་མེ་འབྱུང་བ་དེ་བཞིན་དུ།་ལྷའི་བུ།་དེ་བཞིན་གཤེགས་པས་གལ་ཏེ་ཐོག་མ་ཁོ་ནར་སངས་རྒྱས་ཀྱི་ཡེ་ཤེས་རྒྱ་ཆེར་ཡང་དག་པར་རབ་ཏུ་བསྟན་ན།་སེམས་ཅན་གང་གིས་ཀྱང་དེ་བཞིན་གཤེགས་པའི་ཡེ་ཤེས་དེ་ཀུན་ཤེས་པར་མི་འགྱུར་བས།་དེ་བཞིན་གཤེགས་པས་གཙུབས་ཤིང་གི་གཏམ་གྱིས་ཡེ་ཤེས་དེ་བསྟན་ཏེ།་ཡེ་ཤེས་དེ་ནི་ཡི་གེ་མེད་པའོ། །ལྷའི་བུས་སྨྲས་པ།་འཇམ་དཔལ།་གཙུབ་ཤིང་གི་གཏམ་གང་།་འཇམ་དཔལ་གྱིས་སྨྲས་པ།་ལྷའི་བུ།་གང་ཅིའང་རུང་སྟེ།་སྡོམ་པ་དང་ཡོ་བྱད་བསྙུངས་པའི་གཏམ་དང་།་ཕ་རོལ་ཏུ་ཕྱིན་པ་ལ་སྦྱོར་བའི་གཏམ་དང་།་བྱང་ཆུབ་ཀྱི་ཕྱོགས་ཀྱི་ཆོས་ལ་འཇུག་པའི་གཏམ་འདི་ནི་གཙུབ་ཤིང་གི་གཏམ་ཞེས་བྱའོ། །ལྷའི་བུས་སྨྲས་པ།་འཇམ་དཔལ།་གཙུབ་ཤིང་གི་གཏམ་མ་ཡིན་པའི་གཏམ་གང་།་འཇམ་དཔལ་གྱིས་སྨྲས་པ།་ལྷའི་བུ།་གཏམ་གང་སྐྱེ་བ་དང་།་འཇིག་པ་དང་།་གནས་པའི་གཏམ་མ་ཡིན་པ་དང་།་འདྲེན་པ་དང་།་སེལ་བའི་གཏམ་མ་ཡིན་པ་དང་།་ 401b གཏམ་གང་ཀུན་ནས་ཉོན་མོངས་པ་ཡོངས་སུ་བརྗོད་པའི་གཏམ་མ་ཡིན་པ་དང་།་རྣམ་པར་བྱང་བའི་ཕན་ཡོན་གྱི་གཏམ་མ་ཡིན་པ་དང་།་གཏམ་གང་འཁོར་བ་ལ་ཡིད་འབྱུང་བར་བྱ་བའི་གཏམ་མ་ཡིན་པ་དང་།་མྱ་ངན་ལས་འདས་པ་ལ་མངོན་པར་དགའ་བར་བྱ་བ་མ་ཡིན་པའི་གཏམ་དང་།་གཏམ་གང་ཡོངས་སུ་ཤེས་པར་བྱ་བའི་ཕྱིར་མ་ཡིན།་སྤང་པར་བྱ་བའི་ཕྱིར་མ་ཡིན།་བསྒོམ་པར་བྱ་བའི་ཕྱིར་མ་ཡིན།་མངོན་སུམ་དུ་བྱ་བའི་ཕྱིར་མ་ཡིན་པ་དང་།་གཏམ་གང་ཐོབ་པར་བྱ་བའི་ཕྱིར་མ་ཡིན།་མངོན་པར་རྟོགས་པར་བྱ་བའི་ཕྱིར་མ་ཡིན་པ་འདི་ནི་ལྷའི་བུ་དག་།སྙིང་པོ་ཡོད་པའི་གཏམ་མོ། །ལྷའི་བུས་སྨྲས་པ།་འཇམ་དཔལ།་གཏམ་འདི་ལྟ་བུ་རྗོད་པའི་ཚེ་མིག་གིས་མི་རྩོལ་བར་བྱ་བའི་ཕྱིར་བདུད་སྡིག་ཅན་འདིར་མི་འོང་བ་ནི་ངོ་མཚར་ཏོ། །ཚིག་དེ་སྨྲས་ནས་རིང་པོར་མ་ལོན་པར་དེའི་མོད་ལ་བདུད་སྡིག་ཅན་སྟེང་གི་བར་སྣང་ལ་སྤྲིན་ཆེན་པོ་འཁྲུགས་པར་མངོན་པར་སྤྲུལ་ནས་སྒྲ་ཆེན་པོའི་ང་རོ་ཕྱུང་བ་དང་།་དེས་ཐམས་ཅད་དང་ལྡན་པའི་འཁོར་དེ་དངངས་སྐྲག་ནས་སྒྲ་སྐད་ཀྱི་ང་རོ་འདི་ལྟ་བུ་སུ་ཞིག་གི་སྙམ་མོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ།་འཇམ་དཔལ།་ཁྱོད་ཀྱིས་བདུད་སྡིག་ཅན་གྱི་འགྱུར་བ་མཐོང་ངམ།་འཇམ་དཔལ་གྱིས་གསོལ་པ།་བཅོམ་ལྡན་འདས།་མཐོང་ལགས་སོ། །་ 402a ༄#། །བདེ་བར་གཤེགས་པ།་མཐོང་ལགས་སོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་བདུད་སྡིག་ཅན་བཅིང་བ་དམ་པོས་བཅིངས་ཏེ་སའི་སྟེང་དུ་ལྷུང་བ་དེ་ལྟ་བུའི་བསམ་པ་བསམས་པ་དང་།་བདག་ནི་བཅིང་བ་དམ་པོས་བཅིངས་སོ། །བདག་ནི་བཅིང་བ་དམ་པོས་བཅིངས་སོ་ཞེས་སྒྲ་བྱིན་ཏོ། །འཇམ་དཔལ་གྱིས་སྨྲས་པ།་སྡིག་ཅན།་བཅིང་བ་འདི་བས་ཆེས་དམ་པའི་འཆིང་བ་གཞན་ཡོད་དེ།་དེས་ཁྱོད་རྟག་ཏུ་བཅིངས་ཀྱང་ཁྱོད་ཀྱིས་ཁོང་དུ་མ་ཆུད་དོ། །དེའང་གང་ཞེ་ན།་འདི་ལྟ་སྟེ།་ངའོ་སྙམ་པའི་ང་རྒྱལ་གྱི་འཆིང་བ་དང་།་ཕྱིན་ཅི་ལོག་གི་འཆིང་བ་དང་།་སྲེད་པ་དང་ལྟ་བའི་འཆིང་བ་སྟེ།་སྡིག་ཅན།་འདི་ནི་འཆིང་བ་འདི་བས་ཆེས་དམ་པའི་འཆིང་བ་དམ་པོ་གཞན་ཡིན་ཏེ།་དེས་ཁྱོད་རྟག་ཏུ་བཅིངས་ཀྱང་ཁོང་དུ་མ་ཆུད་དོ། །བདུད་ཀྱིས་སྨྲས་པ།་འཇམ་དཔལ།་ཐོང་ཞིག་དང་བདག་གི་གནས་སུ་འགྲོའོ། །ཡང་བདུད་ཀྱི་ལས་མི་བྱའོ། །འཇམ་དཔལ་གྱིས་སྨྲས་པ།་སྡིག་ཅན།་སངས་རྒྱས་ཀྱི་མཛད་པ་ཁྱོད་ཀྱིས་བྱ་དགོས་ན།་ཁྱོད་ཅིའི་ཕྱིར་གཏང་།་བདུད་ཀྱིས་སྨྲས་པ།་འཇམ་དཔལ།་བདག་ནི་སངས་རྒྱས་ཀྱི་ཆོས་རྣམས་ལ་བར་ཆད་བྱ་བའི་ཕྱིར་ཞུགས་པ་ཡིན་ན།་བདག་གིས་སངས་རྒྱས་ཀྱི་མཛད་པ་ཇི་ལྟར་བྱ།་འཇམ་དཔལ་གྱིས་སྨྲས་པ།་སྡིག་ཅན།་གང་སངས་རྒྱས་ཀྱི་མཛད་པ་བདུད་ 402b བྱེད་དུ་གཞུག་པ་འདི་ནི་བྱང་ཆུབ་སེམས་དཔའ་རྣམས་ཀྱི་ཐབས་དང་།་ཤེས་རབ་ཀྱི་ཤེས་པ་རྣམ་པར་སྤྲུལ་པའོ། །གང་སངས་རྒྱས་ཀྱིས་སངས་རྒྱས་ཀྱི་མཛད་པ་མཛད་པ་འདི་ནི་ངོ་མཚར་མ་ཡིན་ཏེ།་གང་བདུད་སངས་རྒྱས་ཀྱི་མཛད་པ་བྱེད་པ་འདི་རབ་ཏུ་ངོ་མཚར་ཏོ། །དེ་ནས་འཇམ་དཔལ་གཞོན་ནུར་གྱུར་པས་དེའི་ཚེ་གང་སྡིག་ཅན་སངས་རྒྱས་ཀྱི་གཟུགས་དང་ལྡན་པ་དང་།་སངས་རྒྱས་ཀྱི་སེངྒེའི་ཁྲི་ལ་འདུག་པ་དང་།་སངས་རྒྱས་ཀྱི་སྤོབས་པ་དང་ལྡན་པར་འགྱུར་བའི་བྱིན་གྱི་རླབས་དེ་ལྟ་བུའི་བྱིན་གྱིས་བརླབས་སོ། །དེ་ནས་བདུད་སྡིག་ཅན་གྱིས་ཚེ་དང་ལྡན་པ་དག་།ཅི་དང་ཅི་འདོད་པ་ཁོ་བོ་ལ་དྲིས་ཤིག་དང་།་ཁོ་བོས་དྲིས་པ་ལུང་བསྟན་པས་ཁྱེད་ཀྱི་སེམས་རངས་པར་བྱའོ་ཞེས་ཚིག་དེ་སྐད་སྨྲས་སོ། །དེ་ནས་གནས་བརྟན་འོད་སྲུང་ཆེན་པོས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན།་དགེ་སློང་རྣལ་འབྱོར་སྤྱོད་པའི་འཆིང་བ་གང་ཡིན།་བདུད་ཀྱིས་སྨྲས་པ།་བཙུན་པ་འོད་སྲུང་ཆེན་པོ།་བསམ་གཏན་གྱི་རོ་མྱང་བར་བྱེད་པ་ནི་དགེ་སློང་རྣལ་འབྱོར་སྤྱོད་པའི་འཆིང་བའོ། །ཞི་གནས་དེ་ལ་ཆགས་པ་དང་།་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་པ་དང་།་སྟོང་པ་ཉིད་ལ་སྙིང་པོར་འདུ་ཤེས་པ་དང་།་ལྟ་བར་སོང་བ་རྣམས་བསལ་བར་འདུ་ཤེས་པ་དང་།་མཚན་མ་མེད་པ་ལ་སྙིང་པོར་འདུ་ཤེས་པ་དང་།་ 403a ༄#། །མཚན་མ་རྣམས་ལ་བསལ་བར་འདུ་ཤེས་པ་དང་།་སྨོན་པ་མེད་པ་ལ་སྙིང་པོར་འདུ་ཤེས་པ་དང་།་སྨོན་ལམ་ལ་བསལ་བར་འདུ་ཤེས་པ་དང་།་མྱ་ངན་ལས་འདས་པ་ལ་སྙིང་པོར་འདུ་ཤེས་པ་དང་།་འཁོར་བ་ལ་བསལ་བར་འདུ་ཤེས་པ་འདི་དག་ནི་བཙུན་པ་འོད་སྲུང་ཆེན་པོ།་དགེ་སློང་རྣལ་འབྱོར་སྤྱོད་པའི་འཆིང་བའོ། །དེ་ཅིའི་ཕྱིར་ཞེ་ན།་བཙུན་པ་འོད་སྲུང་ཆེན་པོ།་ལྟ་བར་སོང་བ་བསལ་ནས་སྟོང་པ་ཉིད་བསྒོམ་པར་བྱ་བ་མ་ཡིན་གྱི།་ལྟ་བར་སོང་བ་ཉིད་སྟོང་པ་ཉིད་དོ། །མཚན་མ་བསལ་ནས་མཚན་མ་མེད་པ་བསྒོམ་པར་བྱ་བ་མ་ཡིན་གྱི།་མཚན་མའི་ངོ་བོ་ཉིད་མཚན་མ་མེད་པའོ། །སྨོན་ལམ་བསལ་ནས་སྨོན་པ་མེད་པ་བསྒོམ་པར་བྱ་བ་མ་ཡིན་གྱི།་སྨོན་ལམ་གྱི་ངོ་བོ་ཉིད་སྨོན་པ་མེད་པའོ། །འཁོར་བ་བསལ་ནས་མྱ་ངན་ལས་འདས་པ་བསྒོམ་པར་བྱ་བ་མ་ཡིན་གྱི།་འཁོར་བར་དམིགས་པ་ཉིད་མྱ་ངན་ལས་འདས་པའོ། །བཙུན་པ་འོད་སྲུང་ཆེན་པོ།་མྱ་ངན་ལས་འདས་པ་ཞེས་བྱ་བ་ནི་འདུ་ཤེས་པ་དང་།་རློམ་སེམས་དང་།་མཚན་མ་ལ་དམིགས་པ་ཐམས་ཅད་ལ་མི་སྤྱོད་པ་སྟེ།་མྱ་ངན་ལས་འདས་པ་ནི་སྐྱེ་བ་དང་།་འཇིག་པ་དང་།་ཟད་པ་ལས་མ་ཡིན་གྱི།་རང་བཞིན་གྱིས་སྐྱེ་བ་མེད་པ་ཉིད་མྱ་ངན་ལས་འདས་པའོ། །བསྟན་པ་འདི་བཤད་པ་ན་དགེ་སློང་ལྔ་བརྒྱ་ཉེ་བར་ལེན་པ་མེད་ 403b པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་གནས་བརྟན་རབ་འབྱོར་གྱིས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་སུས་བཏུལ།་དགེ་སློང་དེ་དག་གིས་སྨྲས་པ།་གང་ཐོབ་པའང་མེད་ལ།་མངོན་པར་རྫོགས་པར་སངས་རྒྱས་པའང་མེད་པས་སོ། །རབ་འབྱོར་གྱིས་སྨྲས་པ།་བཏུལ་བ་དེ་ཇི་ལྟ་བུ།་སྨྲས་པ།་ཇི་ལྟར་གནས་པ་ཉིད་ཀྱི་ཕྱིར་ཅུང་ཟད་ཀྱང་ཁྲིད་པའང་མེད།་མ་ཁྲིད་པའང་མེད་དེ།་ཇི་ལྟར་གནས་པ་བཞིན་དུ་ཤེས་པ་དང་།་བསྐྱེད་པའང་མེད།་བཀག་པའང་མེད་དེ།་མཉན་པ་ཉིད་དུ་ཤེས་པ་དེ་ལྟར་བདག་ཅག་བཏུལ་ཏོ། །དགེ་སློང་དེ་དག་གིས་བསྟན་པ་འདི་བཤད་པ་ན་ལྷའི་བུ་སྟོང་ཉིས་བརྒྱ་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།གནས་བརྟན་རབ་འབྱོར་གྱིས་གཞན་ཡང་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན།་ཇི་ལྟར་ན་དགེ་སློང་སྦྱིན་གནས་ཡིན།་བདུད་ཀྱིས་སྨྲས་པ།་བཙུན་པ་རབ་འབྱོར།་ནམ་དགེ་སློང་ལེན་པའང་མེད།་ནོད་པའང་མེད་ལ་དད་ཅིང་དང་བ་ཐམས་ཅད་ལས་ཀྱང་ཡོངས་སུ་སྤྱོད་པ་ནའོ། །བཙུན་པ་རབ་འབྱོར།་གང་དགེ་སློང་གང་ལ་བྱིན་པ་དེ་ལ་སྒྱུ་མའི་བློ་དང་།་གང་ལེན་པ་དེ་ལ་མིག་ཡོར་གྱི་བློ་དང་།་ཉེ་བར་ལེན་པའི་སེམས་དང་།་ཉེ་བར་ལེན་པ་མེད་པའི་སེམས་ཀྱིས་ཀྱང་ཡོངས་སུ་མི་སྤྱོད་པའི་དགེ་སློང་དེ་ལྟ་བུ་ནི་སྦྱིན་པའི་ 404a ༄#། །གནས་ཡིན་ནོ། །ཤཱ་རདྭ་ཏིའི་བུས་སྨྲས་པ།་སྡིག་ཅན།་བཅོམ་ལྡན་འདས་ཀྱིས་ཏིང་ངེ་འཛིན་འཁྲུགས་པ་མེད་པར་གསུངས་པ་གང་ཡིན།་བདུད་ཀྱིས་སྨྲས་པ།་བྱང་ཆུབ་སེམས་དཔའ་ཏིང་ངེ་འཛིན་གང་ལ་བརྟེན་ནས་ཤིན་ཏུ་ཟད་པའི་ཕྱིར་ཟད་པའང་ཟད་པར་མི་བྱེད།་རང་བཞིན་གྱིས་མ་སྐྱེས་པའི་ཕྱིར་མ་སྐྱེས་པའང་མི་སྐྱེད།་མྱོང་བ་མེད་པའང་མྱོང་བར་མི་བྱེད་དེ།་ཆོས་ཐམས་ཅད་ཀྱང་རང་བཞིན་གྱིས་སྙོམས་པར་ཞུགས་པར་ཤེས་ལ།་ཤེས་ནས་ཀྱང་ཚོར་བ་ཐམས་ཅད་འགོག་པའི་སྙོམས་པར་འཇུག་པ་ལ་སྙོམས་པར་འཇུག་ཅིང་མཉམ་པར་ཡང་མཐོང་ལ།་ཅུང་ཟད་ཀྱང་མཐོང་བའང་མེད།་མི་མཐོང་བའང་མེད་པ་འདི་ནི་བཅོམ་ལྡན་འདས་ཀྱིས་ཏིང་ངེ་འཛིན་འཁྲུགས་པ་མེད་པར་གསུངས་པའོ། །མཽངྒལ་གྱི་བུས་སྨྲས་པ།་སྡིག་ཅན།་ཇི་ལྟར་ན་དགེ་སློང་སེམས་ཐམས་ཅད་ལ་དབང་ཐོབ་པ་ཡིན།་བདུད་ཀྱིས་སྨྲས་པ།་བཙུན་པ་མཽངྒལ་གྱི་བུ་ཆེན་པོ།་ནམ་དགེ་སློང་ཆོས་ཐམས་ཅད་ལ་སེམས་རྣམ་པར་གྲོལ་བའི་མཚན་ཉིད་དུ་ཤེས་ལ།་རྣམ་པར་གྲོལ་བའི་མཚན་ཉིད་ལ་མངོན་པར་ཞེན་པའང་མེད་ཅིང་སེམས་གཟོད་མ་ནས་རྣམ་པར་གྲོལ་བའི་སེམས་ལ་འཆིང་བར་ཡང་མི་བྱེད།་གྲོལ་བར་ཡང་མི་བྱེད།་སེམས་གཟུགས་མེད་པས་ཆོས་ཐམས་ཅད་གཟུགས་མེད་ 404b པར་ཤེས།་སེམས་གནས་པ་མེད་པས་ཆོས་ཐམས་ཅད་གནས་པ་མེད་པར་མཐོང་།་སེམས་འཛིན་པ་མེད་པས་ཆོས་ཐམས་ཅད་འཛིན་པ་མེད་པར་ཤེས་ཀྱང་སེམས་ཀྱིས་སེམས་ཤེས་པའང་མེད་ལ།་སེམས་ཀྱིས་ངོ་བོ་ཉིད་ཀྱི་རང་བཞིན་གྱིས་ཆོས་ཐམས་ཅད་ཀྱི་ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་རང་བཞིན་ཡང་ཤེས་ཤིང་།་ཆོས་ཀྱི་དབྱིངས་ཀྱི་ངོ་བོ་ཉིད་ཀྱི་རང་བཞིན་གྱིས་གཞན་གྱི་དྲིང་ལ་མི་འཇོག་པར་དབང་ཐོབ་པ་ནི་མོས་པའི་རྫུ་འཕྲུལ་དང་ལྡན་པ་ཡིན་ཏེ།་བཙུན་པ་མཽངྒལ་གྱི་བུ་ཆེན་པོ།་དགེ་སློང་དེ་ལྟ་བུ་ནི་སེམས་ཐམས་ཅད་ལ་དབང་ཐོབ་པ་ཡིན་ནོ། །གང་པོས་སྨྲས་པ།་སྡིག་ཅན།་ཇི་ལྟར་ན་དགེ་སློང་ཡོངས་སུ་དག་པར་ཆོས་སྟོན་པ་ཡིན།་བདུད་ཀྱིས་སྨྲས་པ།་བཙུན་པ་གང་པོ།་ནམ་དགེ་སློང་གིས་གཞན་ལས་ཆོས་ཐམས་ཅད་ཤེས་ཀྱང་གཞན་དང་གཞན་མ་ཡིན་པའི་སེམས་ལ་མངོན་པར་ཞེན་པའང་མེད།་ཆོས་ཐམས་ཅད་ཀྱང་སྒྲོ་བཏགས་པར་སྟོན།་ཡི་གེ་དང་།་སྐད་དང་།་དབྱངས་དང་།་ཚིག་གི་ལམ་ཐམས་ཅད་ཀྱང་བྲག་ཅ་ལྟ་བུར་ཤེས།་ཆོས་ཉན་པ་ཐམས་ཅད་ཀྱང་སྒྱུ་མའི་སྐྱེས་བུ་ལྟར་མཐོང་།་གང་གི་ལུས་ཀྱི་རྣམ་པར་རིག་བྱེད་ཀྱང་ཆུ་ཟླ་དང་འདྲ་བར་མཐོང་།་ཉོན་མོངས་པ་ཐམས་ཅད་ཀྱང་ཡོངས་སུ་རྟོག་པ་ལས་བྱུང་བར་ཤེས།་ཆོས་འགའ་ཞིག་གཟུང་བའི་ཕྱིར་རམ།་དོར་བའི་ཕྱིར་རམ།་ཤིན་ཏུ་ 405a ༄#། །བཟླ་བའི་ཕྱིར་རམ།་ཐོབ་པར་བྱ་བའི་ཕྱིར་ཡང་ཆོས་མི་སྟོན།་སོ་སོ་ཡང་དག་པར་རིག་པ་བཞི་པོ་རྣམས་ལའང་དབང་ཐོབ་ཅིང་ལེགས་སོ་ཞེས་བྱ་བ་ལའང་རེ་བ་མེད་ལ།་ཟང་ཟིང་མེད་པར་ཆོས་སྟོན་ཅིང་རང་གི་སེམས་རང་བཞིན་གྱིས་ཡོངས་སུ་དག་པས་སེམས་ཅན་ཐམས་ཅད་ཀྱི་སེམས་རང་བཞིན་གྱིས་ཡོངས་སུ་དག་བར་ཤེས་ཏེ།་སེམས་རང་བཞིན་གྱིས་ཡོངས་སུ་དག་པར་ཤེས་ནས་ཕུང་པོའི་བདུད་ལ་དབེན་པར་མཐོང་བ་དང་།་ཉོན་མོངས་པའི་བདུད་ལ་བཅོས་མར་འདུ་ཤེས་པ་དང་།་འཆི་བདག་གི་བདུད་ལ་མ་སྐྱེས་པ་དང་མི་སྐྱེ་བར་གནས་པ་དང་།་ལྷའི་བུའི་བདུད་ལ་གཡོ་བ་དང་རློམ་སེམས་ཐམས་ཅད་དང་བྲལ་བར་གྱུར་པ་ཡིན་ཏེ།་དགེ་སློང་དེ་ལྟ་བུ་ནི་ཡོངས་སུ་དག་པར་ཆོས་སྟོན་པ་ཡིན་ནོ། །ཉེ་བར་འཁོར་གྱིས་སྨྲས་པ།་སྡིག་ཅན།་ཇི་ལྟར་ན་དགེ་སློང་འདུལ་བ་འཛིན་པ་ཡིན།་བདུད་ཀྱིས་སྨྲས་པ།་བཙུན་པ་ཉེ་བར་འཁོར།་དགེ་སློང་གིས་ནམ་ཆོས་ཐམས་ཅད་ཤིན་ཏུ་དུལ་བར་ཤེས་ཏེ།་ཉེས་པ་རྣམས་ཀྱི་ཐོག་མའི་སྔོན་གྱི་མཐའ་ཡང་དབེན་པའི་མཐར་ཤེས་ལ།་ཉེས་པ་བྱུང་བ་རྣམས་ཀྱི་འགྱོད་པའང་སེལ་ཅིང་དམ་པོར་མི་བྱེད་དེ།་དེ་དག་གང་གིས་མཚམས་མེད་པ་རྣམས་ཀྱང་རྣམ་པར་གནོན་ན།་ཆོ་ག་དང་ཚུལ་ཁྲིམས་ལ་ལོག་པར་ཞུགས་པ་ཕྲན་ཚེགས་ལྟ་སྨོས་ཀྱང་ཅི་དགོས་པ་དེ་ལྟ་ 405b བུའི་ཆོས་ཀྱི་ཚུལ་གྱི་རྣམ་པའང་ཉེ་བར་སྒྲུབ།་ཉོན་མོངས་པ་འདུལ་བ་ལའང་མཁས།་གློ་བུར་གྱི་ཉོན་མོངས་པ་རྣམས་ལའང་ཀུན་ནས་ཉོན་མོངས་པར་གྱུར་པ་མ་ཡིན་པ་དང་།་འབྱུང་བར་འདུ་ཤེས།་ཉོན་མོངས་པ་ནང་དུའང་མི་སྟོན།་ཕྱི་རོལ་དུའང་མ་ཡིན།་གཉིས་ཀ་མེད་པར་ཡང་མ་ཡིན་ཏེ།་ཉོན་མོངས་པ་ཁོང་དུ་ཆུད་པ་ཉིད་ཉོན་མོངས་པ་མེད་པར་ཤེས་ཤིང་ཉོན་མོངས་པའང་མི་སེལ།་ཉོན་མོངས་པ་མེད་པའང་མི་སྒྲུབ།་ཉོན་མོངས་པ་ཐམས་ཅད་ཀྱང་སྤྲིན་འདྲ་བར་ཤེས་ཏེ།་ཡེ་ཤེས་དང་ལྷག་མཐོང་གི་རླུང་གིས་གཏོར་ནས་ཕྱོགས་དང་ཡུལ་དུ་འགྲོ་བའང་མེད།་གནས་པའང་མེད་པ་དང་།་ཉོན་མོངས་པ་རྣམས་ནི་ཆུ་ཟླ་དང་འདྲ་སྟེ།་ཡོངས་སུ་རྟོག་པའི་གཟུགས་བརྙན་གྱིས་བཞིན་ཉེ་བར་སྟོན་པ་དང་།་ཉོན་མོངས་པ་རྣམས་ན།་མུན་པའི་སྤྱོད་ཡུལ་ཏེ།་ཤེས་རབ་ཀྱི་སྒྲོན་མས་མི་སྣང་བ་སྣང་བར་བྱེད་པ་དང་།་ཉོན་མོངས་པ་རྣམས་ནི་ཆོམ་རྐུན་དང་།་མཁའ་འགྲོ་མ་དང་།་གནོད་སྦྱིན་དང་།་སྲིན་པོ་དང་འདྲ་སྟེ།་ཚུལ་བཞིན་ཡིད་ལ་བྱེད་པས་བརྟགས་ན་གནས་པ་མ་ཡིན་པ་དང་།་ཉོན་མོངས་པ་རྣམས་ནི་གླགས་ཚོལ་བ་སྟེ།་ཚུལ་བཞིན་མ་ཡིན་པ་ཡིད་ལ་བྱེད་པས་འཕེལ་བ་དང་།་སྟོང་པ་ཉིད་དང་།་མཚན་མ་མེད་པ་དང་།་སྨོན་པ་མེད་པའི་ཤེས་པས་ཡིད་ལ་འཇུག་པར་མི་བྱེད་པས་སུས་ཉོན་མོངས་པ་རྣམས་འདི་འདྲ་བར་ཤེས་ཏེ།་སེམས་ཅན་ཉོན་ 406a ༄#། །མོངས་པས་ཀུན་ནས་ཉོན་མོངས་པར་གྱུར་པ་རྣམས་ལ་སྙིང་རྗེ་ཞིང་བདག་མེད་པ་དང་།་སེམས་ཅན་མེད་པ་མངོན་སུམ་དུ་གྱུར་པ་ན་འདུལ་བ་འཛིན་པ་ཡང་དག་པ་ཞེས་བྱའོ། །དེ་ལྟར་ཉན་ཐོས་ཆེན་པོ་དེ་དག་ཐམས་ཅད་ཀྱིས་རང་རང་གི་འདོད་པ་བདུད་སྡིག་ཅན་དེ་ལ་ཀུན་དྲིས་ནས་བདུད་སྡིག་ཅན་གྱིས་ཀྱང་དེ་དག་ཐམས་ཅད་ཀྱི་དོན་གཏན་ལ་བབ་པར་བསྟན་པས་སེམས་རངས་པར་གྱུར་ཏོ། །དེ་ནས་ལྷའི་བུ་མཚམས་བཟང་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན།་འཇམ་དཔལ་གཞོན་ནུར་གྱུར་པས་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་བཤད་ཟིན་གྱི།་ཁྱོད་ཀྱང་སྤོབས་པར་གྱིས་ཤིག་།སྡིག་ཅན།་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་གང་།་དེ་སྐད་ཅེས་སྨྲས་པ་དང་།་སྡིག་ཅན་གྱིས་ལྷའི་བུ་མཚམས་བཟང་ལ་འདི་སྐད་ཅེས་སྨྲས་སོ། །ལྷའི་བུ།་ཉི་ཤུ་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ཡང་དག་ཕུལ་ཡིན་ནོ། །ཉི་ཤུ་གང་ཞེ་ན།་འདི་ལྟ་སྟེ།་རྣལ་འབྱོར་སྤྱོད་པ་རྣམ་པར་གྲོལ་བ་འདོད་ཅིང་འཁོར་བས་སྐྲག་པ་རྣམས་ལ་བསྙེན་པ་དང་།་བསྟེན་པ་དང་།་བསྙེན་བཀུར་བྱེད་པ་ནི་བདུད་ཀྱི་ལས་སོ། །སྟོང་པ་ཉིད་ལ་སོ་སོར་རྟོག་ཅིང་སེམས་ཅན་ཡལ་བར་འདོར་བའང་བདུད་ 406b ཀྱི་ལས་སོ། །འདུས་མ་བྱས་ལ་སོ་སོར་རྟོག་ཅིང་འདུས་བྱས་ཀྱི་དགེ་བའི་རྩ་བས་ཡོངས་སུ་སྐྱོ་བའང་བདུད་ཀྱི་ལས་སོ། །བསམ་གཏན་སྐྱེད་ཅིང་བསམ་གཏན་ལས་རྣམ་པར་ལྡོག་པ་ཚོལ་བའང་བདུད་ཀྱི་ལས་སོ། །ཆོས་སྟོན་ཀྱང་ཆོས་ཉན་པ་རྣམས་ལ་སྙིང་རྗེ་ཆེན་པོ་མི་སྐྱེད་པའང་བདུད་ཀྱི་ལས་སོ། །ཡོན་ཏན་དང་ལྡན་པ་དང་།་སྦྱིན་གནས་ཚོལ་ཞིང་ཚུལ་ཁྲིམས་འཆལ་པ་རྣམས་ལ་ཁྲོ་བའང་བདུད་ཀྱི་ལས་སོ། །ཉན་ཐོས་དང་།་རང་སངས་རྒྱས་ཀྱི་གཏམ་སྟོན་ཅིང་ཐེག་པ་ཆེན་པོའི་གཏམ་འཆབ་པའང་བདུད་ཀྱི་ལས་སོ། །ཟབ་མོའི་གཏམ་འཆབ་ཅིང་གཏམ་སྣ་ཚོགས་སྟོན་པའང་བདུད་ཀྱི་ལས་སོ། །བྱང་ཆུབ་སེམས་དཔའི་ལམ་ཤེས་ཀྱང་ཕ་རོལ་ཏུ་ཕྱིན་པའི་ལམ་ཡོངས་སུ་མི་ཚོལ་བའང་བདུད་ཀྱི་ལས་སོ། །རབ་ཏུ་བརྩོན་པའི་བསྔགས་པ་བརྗོད་ཀྱང་སེམས་ཅན་མི་བརྩོན་པ་རྣམས་མངོན་པར་མི་སྦྱོར་བའང་བདུད་ཀྱི་ལས་སོ། །དགེ་བའི་རྩ་བ་གསོག་ཀྱང་བྱང་ཆུབ་ཀྱི་སེམས་མངོན་དུ་མི་བྱེད་པའང་བདུད་ཀྱི་ལས་སོ། །ལྷག་མཐོང་གི་རྣལ་འབྱོར་དང་ལྡན་པར་གནས་ཀྱང་སེམས་ཅན་རྣམས་ལྷག་མཐོང་ཡང་དག་པར་འཛིན་དུ་མི་འཇུག་པའང་བདུད་ཀྱི་ལས་སོ། །ཉོན་མོངས་པ་མ་ལུས་པར་ཟད་པར་ཚོལ་ཞིང་འཁོར་བའི་རྒྱུན་གྱི་ཉོན་མོངས་པ་རྣམས་ལ་སྨོན་པའང་བདུད་ཀྱི་ལས་སོ། །ཤེས་རབ་ཀྱིས་རྣམ་པར་དཔྱོད་ཅིང་སྙིང་རྗེ་ཆེན་པོ་ལ་དམིགས་པ་མི་འཛིན་པའང་བདུད་ 407a ༄#། །ཀྱི་ལས་སོ། །ཐབས་དང་མི་ལྡན་པར་དགེ་བ་སྤྱོད་པ་ཐམས་ཅད་ཀྱང་བདུད་ཀྱི་ལས་སོ། །བྱང་ཆུབ་སེམས་དཔའི་སྡེ་སྣོད་མི་ཚོལ་གྱི།་འཇིག་རྟེན་རྒྱང་ཕན་པའི་གསང་ཚིག་འཛིན་པའང་བདུད་ཀྱི་ལས་སོ། །མང་དུ་ཐོས་ཀྱང་གཞན་གྱིས་ཤེས་ཀྱིས་དོགས་ཏེ་ཆོས་ལ་སློབ་དཔོན་གྱི་དཔེ་མཁྱུད་བྱེད་པའང་བདུད་ཀྱི་ལས་སོ། །འཇིག་རྟེན་པའི་དགོས་པའི་ཞལ་ཏ་བྱེད་ཅིང་མང་དུ་ཐོས་པ་མི་ཚོལ་བའང་བདུད་ཀྱི་ལས་སོ། །བྱང་ཆུབ་སེམས་དཔའ་ཆོས་སྨྲ་བ་ཐེག་པ་ཆེན་པོ་ལ་ཡང་དག་པར་ཞུགས་པ་སྐལ་པ་མཉམ་པ་རྣམས་ལ་མི་བསྟེན།་མི་བསྙེན།་བསྙེན་བཀུར་མི་བྱེད།་ཉན་ཐོས་དང་།་རང་སངས་རྒྱས་ཀྱི་ཐེག་པ་ལ་ཡང་དག་པར་ཞུགས་པ་སྐལ་བ་མི་མཉམ་པར་དགའ་བའང་བདུད་ཀྱི་ལས་སོ། །གང་གི་ཚེ་བརྒྱ་བྱིན་ནམ།་ཚངས་པའམ།་འཇིག་རྟེན་སྐྱོང་བའམ།་རྒྱལ་པོའམ།་ཚོང་དཔོན་ནམ།་ཁྱིམ་བདག་གི་ལོངས་སྤྱོད་དང་།་ནོར་དང་།་རིན་པོ་ཆེ་དང་།་དབང་ཕྱུག་གི་ཆེ་བ་ཉིད་དུ་གྱུར་པ་དེའི་ཚེ་ཆོས་ཀྱི་ཆེ་བ་ཉིད་དང་ལྡན་པ་རྣམས་ལ་མི་བསྟེན།་མི་བསྙེན།་བསྙེན་བཀུར་མི་བྱེད་པ་འདི་དག་ནི་ལྷའི་བུ་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ཡང་དག་ཕུལ་ཉི་ཤུའོ། །དེ་ནས་བཅོམ་ལྡན་འདས་ཀྱིས་བདུད་སྡིག་ཅན་ལ་སྡིག་ཅན།་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ 407b ལས་འདི་དག་ལེགས་པར་བཤད་པ་ནི་ལེགས་སོ། །ལེགས་སོ་ཞེས་བྱ་བ་བྱིན་ནོ། །བྱང་ཆུབ་སེམས་དཔའ་གང་དག་བདུད་ཀྱི་ལས་འདི་རྣམས་ཐོས་ཤིང་ཐོས་ནས་ཀྱང་རྣམ་པར་སྤོང་བ་དེ་དག་བྱང་ཆུབ་ཡོངས་སུ་སྨིན་པར་བྱེད་པའི་ཆོས་ཉི་ཤུ་ཐོབ་པར་འགྱུར་རོ། །ཉི་ཤུ་གང་ཞེ་ན།་འདི་ལྟ་སྟེ།་བྱམས་པ་ཆེན་པོ་དང་།་སྙིང་རྗེ་ཆེན་པོ་དང་།་འཁོར་བ་ན་ཡོངས་སུ་མི་སྐྱོ་བ་དང་།་དགེ་བའི་བཤེས་གཉེན་གྱིས་ཡོངས་སུ་ཟིན་པ་དང་།་སངས་རྒྱས་འབྱུང་བ་མཉེས་པར་བྱེད་པ་དང་།་ཕ་རོལ་ཏུ་ཕྱིན་པ་རྣམས་ཉན་པ་དང་།་བྱང་ཆུབ་སེམས་དཔའི་ཁོར་དང་སྐལ་བ་མཉམ་པ་དང་།་གཟུངས་རབ་ཏུ་ཐོབ་པ་དང་།་སྤོབས་པ་ཕུན་སུམ་ཚོགས་པ་དང་།་མངོན་པར་ཤེས་པ་ཤེས་པ་དང་།་ཆོས་མ་ཐོས་པ་ཉན་པ་དང་།་ཚེ་རབས་ཚེ་རབས་སུ་བྱང་ཆུབ་ཀྱི་སེམས་མངོན་དུ་འགྱུར་བ་དང་།་རྟག་ཏུ་རྒྱུན་མི་ཆད་པར་རབ་ཏུ་འབྱུང་བ་རྙེད་པ་དང་།་དལ་བ་ཕུན་སུམ་ཚོགས་པ་དང་།་ཇི་ལྟར་ཐོས་པའི་ཆོས་རྣམས་སྒྲུབ་པ་དང་།་ཐབས་དང་ཤེས་རབ་ཀྱི་ཤེས་པས་སེམས་ཅན་སྡུད་ཅིང་ཡོངས་སུ་འཛིན་པ་དང་།་དམ་པའི་ཆོས་ཡོངས་སུ་འཛིན་པ་དང་།་གཡོ་མེད་ཅིང་སྒྱུ་མེད་པ་དང་།་ཕངས་པའི་དངོས་པོ་ཐམས་ཅད་ཡོངས་སུ་གཏོང་བ་དང་།་སེམས་ཅན་ཐམས་ཅད་ལ་ཁོང་ཁྲོ་བ་མེད་པ་སྟེ།་བྱང་ཆུབ་ཡོངས་སུ་སྨིན་པར་བྱེད་པའི་ཆོས་ཉི་ཤུ་པོ་འདི་དག་ཐོབ་པར་འགྱུར་རོ། །དེ་ནས་ལྷའི་ 408a ༄#། །བུ་མཚམས་བཟང་གིས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན།་ཁྱོད་ལ་བཅོམ་ལྡན་འདས་ཀྱིས་ལེགས་སོ་ཞེས་བྱ་བ་གནང་བ་ནི་སྡིག་ཅན།་ཁྱོད་ཀྱིས་རྙེད་པ་ལེགས་པར་རྙེད་དོ། །བདུད་ཀྱིས་སྨྲས་པ།་ལྷའི་བུ།་འདི་ལ་ཁོ་བོས་རྙེད་པ་ཅི་ཞིག་ལེགས་པར་རྙེད།་དེ་ཅིའི་ཕྱིར་ཞེ་ན།་ལྷའི་བུ།་འདི་ལྟ་སྟེ།་དཔེར་ན།་མི་གང་འབྱུང་པོ་བབས་པ་དེ་ནི་མི་དེའི་འགྱུར་བ་མ་ཡིན་གྱི།་དེ་ནི་འབྱུང་པོ་དེའི་འགྱུར་བར་བལྟའོ། །ལྷའི་བུ།་དེ་བཞིན་དུ་ཁོ་བོའང་འཇམ་དཔལ་གྱིས་བྱིན་གྱིས་བརླབས་ནས་སྟོན་གྱི།་འདི་ཁོ་བོའི་སྐྱེས་བུའི་རྩལ་དུ་ནི་མི་བལྟའོ། །ལྷའི་བུས་སྨྲས་པ།་སྡིག་ཅན།་ཁྱོད་སངས་རྒྱས་ཀྱི་གཟུགས་ཀྱི་མཚན་དང་ལྡན་ཞིང་སངས་རྒྱས་ཀྱི་སེངྒེའི་ཁྲི་ལ་འདུག་སྟེ།་སངས་རྒྱས་ཀྱི་སྤོབས་པ་དང་ལྡན་ཞིང་ཆོས་སྟོན་པས་དགའ་བར་མ་གྱུར་ཏམ།་བདུད་ཀྱིས་སྨྲས་པ།་ཁྱོད་ཀྱིས་ནི་ཁོ་བོ་བརྒྱན་པར་མཐོང་བ་ལྟ་ན།་ཁོ་བོས་ནི་བཅིང་བ་དམ་པོས་བདག་བཅིངས་པར་ཤེས་སོ། །ལྷའི་བུས་སྨྲས་པ།་སྡིག་ཅན།་འཇམ་དཔལ་གཞོན་ནུར་གྱུར་པ་ལ་བཟོད་པར་གསོལ་ཅིག་དང་།་དེ་ནས་གཏོང་བར་འགྱུར་རོ། །དེ་ནས་འཇམ་དཔལ་གྱི་བྱིན་གྱི་རླབས་ཀྱིས་བདུད་ཀྱིས་ལྷའི་བུ་མཚམས་བཟང་ལ་འདི་སྐད་ཅེས་སྨྲས་སོ། །ལྷའི་བུ།་བྱང་ཆུབ་སེམས་དཔའ་སེམས་དཔའ་ཆེན་ 408b པོ་ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་བཟོད་པ་གསོལ་མི་དགོས་སོ། །དེ་ཅིའི་ཕྱིར་ཞེ་ན།་དེ་དག་ལ་འཁྲུག་པ་མེད་ཅིང་ཁྲོ་བ་མེད་པའི་ཕྱིར་རོ། །གང་དག་འཁྲུག་ཅིང་ཁྲོ་བ་དེ་དག་ལ་ནི་བཟོད་པ་གསོལ་དགོས་སོ། །ལྷའི་བུས་སྨྲས་པ།་སྡིག་ཅན།་བྱང་ཆུབ་སེམས་དཔའ་རྣམས་ཀྱི་བཟོད་པ་ཅི་འདྲ།་བདུད་ཀྱིས་སྨྲས་པ།་ལྷའི་བུ།་བྱང་ཆུབ་སེམས་དཔའ་རྣམས་ཀྱི་བཟོད་པ་ནི་རྣམ་པ་བཅུ་གཉིས་ཏེ།་རྣམ་པ་བཅུ་གཉིས་གང་ཞེ་ན།་འདི་ལྟ་སྟེ།་བཅོས་མ་མ་ཡིན་པས་བསམ་པའི་བཟོད་པ་དང་།་ཁོང་ཁྲོ་བ་མེད་པའི་སེམས་ཀྱིས་ལྷག་པའི་བསམ་པའི་བཟོད་པ་དང་།་སེམས་ཅན་ཐམས་ཅད་ལ་མི་སླུ་བས་གཡོ་མེད་པའི་བཟོད་པ་དང་།་དབུལ་ཞིང་ཕོངས་པ་ཡོངས་སུ་སྐྱོབ་པས་སྙིང་བརྩེ་ཞིང་སྙིང་རྗེ་བའི་བཟོད་པ་དང་།་ལྡོག་པ་མེད་པས་ཇི་སྐད་སྨྲ་བ་དེ་བཞིན་དུ་བྱེད་པའི་བཟོད་པ་དང་།་ལྟ་བར་སོང་བ་དང་བྲལ་བས་སྟོང་པ་ཉིད་ཀྱི་བཟོད་པ་དང་།་ཆོས་ཉིད་ལ་རྟོན་པས་ཆོས་ངེས་པར་སེམས་པའི་བཟོད་པ་དང་།་བདག་མེད་པས་ཟབ་མོའི་བཟོད་པ་དང་།་འཕགས་པའི་སྐྱེ་བོའི་རྗེས་སུ་འཇུག་པས་མཐུན་པའི་བཟོད་པ་དང་།་རྟེན་ཅིང་འབྲེལ་བར་འབྱུང་བ་དང་མཐུན་པས་ཡང་དག་པའི་བཟོད་པ་དང་།་སེམས་ཅན་ཐམས་ཅད་རྗེས་སུ་སྲུང་བས་ངོ་བྱེད་པའང་མེད་ལ་མི་མཐུན་པའང་མེད་པའི་བཟོད་པ་དང་།་མི་སྐྱེ་བའི་ 409a ༄#། །ཆོས་ལ་བཟོད་པ་རབ་ཏུ་ཐོབ་པའི་ཕྱིར་སྐྱེ་བ་མེད་ཅིང་འབྱུང་བ་མེད་པའི་བཟོད་པ་སྟེ།་ལྷའི་བུ།་འདི་དག་ནི་བྱང་ཆུབ་སེམས་དཔའ་རྣམས་ཀྱི་བཟོད་པ་རྣམ་པ་བཅུ་གཉིས་སོ། །ལྷའི་བུས་སྨྲས་པ།་སྡིག་ཅན།་ཁྱོད་གལ་ཏེ་བཀྲོལ་ན།་དགའ་བར་འགྱུར་རམ།་བདུད་ཀྱིས་སྨྲས་པ།་ལྷའི་བུ།་ཁོ་བོ་དགའ་སྟེ།་མཆོག་ཏུ་དགའོ།།་དེ་ནས་ལྷའི་བུ་མཚམས་བཟང་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ།་བདུད་སྡིག་ཅན་ཐོང་ཞིག་དང་།་རང་གི་གནས་སུ་འགྲོའོ།།་དེ་ནས་འཇམ་དཔལ་གཞོན་ནུར་གྱུར་པས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན།་ཁྱོད་སུ་ཞིག་གིས་བཅིངས།་གང་ལས་དགྲོལ།་བདུད་ཀྱིས་སྨྲས་པ།་འཇམ་དཔལ།་བདག་ནི་སུས་བཅིངས་མི་ཤེས་སོ། །འཇམ་དཔལ་གྱིས་སྨྲས་པ།་སྡིག་ཅན།་ཁྱོད་ཇི་ལྟར་བཅིངས་པ་མེད་པ་ལ་བཅིངས་པར་འདུ་ཤེས་པ་དེ་བཞིན་དུ་བྱིས་པ་སོ་སོའི་སྐྱེ་བོ་ཐམས་ཅད་ཀྱང་མི་རྟག་པ་ལ་རྟག་པར་འདུ་ཤེས།་སྡུག་བསྔལ་བ་ལ་བདེ་བར་འདུ་ཤེས།་བདག་མེད་པ་ལ་བདག་ཏུ་འདུ་ཤེས།་མི་སྡུག་པ་ལ་སྡུག་པར་འདུ་ཤེས།་གཟུགས་མེད་པ་ལ་གཟུགས་སུ་འདུ་ཤེས།་ཚོར་བ་མེད་པ་དང་།་འདུ་ཤེས་མེད་པ་དང་།་འདུ་བྱེད་རྣམས་མེད་པ་དང་།་རྣམ་པར་ཤེས་པ་མེད་པ་ 409b ལ་ཚོར་བ་དང་།་འདུ་ཤེས་དང་།་འདུ་བྱེད་རྣམས་དང་།་རྣམ་པར་ཤེས་པར་འདུ་ཤེས་སོ། །སྡིག་ཅན།་ཁྱོད་དགྲོལ་ན།་གང་ནས་དགྲོལ།་བདུད་ཀྱིས་སྨྲས་པ།་བདག་ནི་གང་ལས་ཀྱང་མི་དགྲོལ་ལོ། །སྨྲས་པ།་སྡིག་ཅན།་དེ་བཞིན་དུ་གང་དག་རྣམ་པར་དགྲོལ་བའང་ཡང་དག་པ་མ་ཡིན་པའི་འདུ་ཤེས་ཡོངས་སུ་ཤེས་པ་མེ་གཏོགས་པར་གང་ལས་ཀྱང་རྣམ་པར་གྲོལ་བར་འགྱུར་བ་མེད་དེ།་དེ་དག་ཡོངས་སུ་ཤེས་པས་རྣམ་པར་གྲོལ་བ་ཞེས་བྱའོ། །དེ་ནས་འཇམ་དཔལ་གཞོན་ནུར་གྱུར་པས་བྱིན་གྱི་རླབས་དེ་བསྡུས་པ་དང་།་སྡིག་ཅན་དེའང་རང་གི་གཟུགས་དང་ལྡན་པར་བདག་གིས་ཤེས་སོ། །དེ་ནས་གནས་བརྟན་འོད་སྲུང་ཆེན་པོས་བདུད་སྡིག་ཅན་ལ་འདི་སྐད་ཅེས་སྨྲས་སོ། །སྡིག་ཅན།་ཁྱོད་ཀྱིས་སངས་རྒྱས་ཀྱི་མཛད་པ་བྱས་པ་ལེགས་སོ། །ལེགས་སོ། །བདུད་ཀྱིས་སྨྲས་པ།་བཙུན་པ་འོད་སྲུང་ཆེན་པོ།་འདི་ནི་ཁོ་བོའི་ཡུལ་མ་ཡིན་གྱི།་འདི་ནི་འཇམ་དཔལ་གཞོན་ནུར་གྱུར་པའི་ཡུལ་དུ་བལྟའོ། །དེ་ནས་ལྷའི་བུ་མཚམས་བཟང་གིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ།་སངས་རྒྱས་ཀྱི་མཛད་པ་གང་དུ་བཙལ་བར་བྱ།་འཇམ་དཔལ་གྱིས་སྨྲས་པ།་ལྷའི་བུ་སངས་རྒྱས་ཀྱི་མཛད་པ་ནི་སེམས་ཅན་ཐམས་ཅད་ཀྱི་ཉོན་མོངས་པ་རྣམས་སུ་བཙལ་བར་བྱའོ། །དེ་ཅིའི་ཕྱིར་ཞེ་ན།་གལ་ཏེ་སེམས་ཅན་ 410a ༄#། །རྣམས་ཉོན་མོངས་པས་གཟིར་བ་མེད་ན།་སངས་རྒྱས་ཀྱིས་ཀྱང་མཛད་པར་མི་འགྱུར་བའི་ཕྱིར་རོ། །ལྷའི་བུ།་འདི་ལྟ་སྟེ།་དཔེར་ན།་གལ་ཏེ་སེམས་ཅན་རྣམས་ན་བར་མ་གྱུར་ན།་སྨན་པས་ཀྱང་བྱ་བར་མི་འགྱུར་བ་དེ་བཞིན་དུ།་ལྷའི་བུ།་གལ་ཏེ་སེམས་ཅན་རྣམས་ཉོན་མོངས་པས་གཟིར་བར་མ་གྱུར་ན།་སངས་རྒྱས་ཀྱིས་ཀྱང་མཛད་པར་མི་འགྱུར་རོ། །ལྷའི་བུས་སྨྲས་པ།་འཇམ་དཔལ།་གང་བྱུང་ན།་སངས་རྒྱས་འབྱུང་།་འཇམ་དཔལ་གྱིས་སྨྲས་པ།་ལྷའི་བུ།་སྐྱེ་བ་དང་།་རྒ་བ་དང་།་ན་བ་དང་།་འཆི་བ་བྱུང་ན་།་སངས་རྒྱས་འབྱུང་ངོ་། །དེ་ཅིའི་ཕྱིར་ཞེ་ན།་ཆོས་དེ་དག་སྤང་བའི་དོན་དུ་སངས་རྒྱས་བཅོམ་ལྡན་འདས་རྣམས་འབྱུང་བའི་ཕྱིར་རོ། །ལྷའི་བུས་སྨྲས་པ།་འཇམ་དཔལ།་གང་དེ་བཞིན་གཤེགས་པས་བྱང་ཆུབ་བརྙེས་ནས་ཆོས་བསྐྱེད་པ་དེ་གང་།་ཆོས་བཀག་པ་གང་།་འཇམ་དཔལ་གྱིས་སྨྲས་པ།་ལྷའི་བུ།་དེ་བཞིན་གཤེགས་པས་བྱང་ཆུབ་བརྙེས་ནས་ཆོས་གང་ཡང་བསྐྱེད་པའང་མེད།་བཀག་པའང་མེད་དོ། །དེ་ཅིའི་ཕྱིར་ཞེ་ན།་ལྷའི་བུ།་ཆོས་ཐམས་ཅད་ནི་སྐྱེ་བ་མ་ཡིན།་འགག་པ་མ་ཡིན་པའི་ཕྱིར་རོ། །ལྷའི་བུ།་སངས་རྒྱས་འབྱུང་བ་སངས་རྒྱས་འབྱུང་བ་ཞེས་བྱ་བ་འདི་ནི་རང་བཞིན་གྱི་ངོ་བོ་ཉིད་ཀྱིས་སྐྱེ་བ་མེད་པའི་ཚིག་བླ་དྭགས་སོ། །ལྷའི་བུས་སྨྲས་པ།་འཇམ་དཔལ།་ཇི་ལྟར་ན།་བྱང་ཆུབ་ 410b སེམས་དཔའ་བསམ་པ་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་གང་དམིགས་པའི་ལྟ་བས་ཆོས་གང་ལའང་ཀུན་ཏུ་མི་སྤྱོད་པའོ། །ལྷའི་བུས་སྨྲས་པ།་ཇི་ལྟར་ན་ལྷག་པའི་བསམ་པ་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་གང་ནང་དང་ཕྱིའི་ཆོས་རྣམས་ལ་ཆགས་པ་མེད་པའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་སྦྱིན་པ་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་གང་ཉོན་མོངས་པ་ཐམས་ཅད་ཀྱང་འདོར་ལ་སེམས་ཅན་ཐམས་ཅད་ཀྱང་ཡོངས་སུ་མི་གཏོང་བའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་ཚུལ་ཁྲིམས་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་ཇི་ལྟར་སྟོན་པས་བསྟན་པ་བཞིན་དུ་སྒྲུབ་ཅིང་སེམས་ཅན་ཐམས་ཅད་ཀྱང་ཚུལ་ཁྲིམས་ལ་འགོད་ལ།་ལྷག་པའི་བསམ་པས་བྱང་ཆུབ་ཀྱི་སེམས་ཀྱང་མི་འདོར་བའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་བཟོད་པ་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་གང་ཆོས་ཐམས་ཅད་ཤིན་ཏུ་ཟད་པའི་མཚན་ཉིད་དུ་ཤེས་ནས་སེམས་ཅན་ཐམས་ཅད་ཀྱི་གནོད་སེམས་དང་།་ཁྲོ་བ་དང་།་ཐ་བ་སྤང་བའི་ཕྱིར་ཐམས་ཅད་མཁྱེན་པ་ཉིད་ཀྱི་ཆོ་ག་མི་འདོར་བའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་བརྩོན་འགྲུས་ཕུན་སུམ་ཚོགས་པ་ཡིན།་ 411a ༄#། །འཇམ་དཔལ་གྱིས་སྨྲས་པ།་ནམ་བྱང་ཆུབ་སེམས་དཔའ་ཆོས་གང་གི་ཕྱིར་བརྩོན་འགྲུས་བརྩམས་པའི་ཆོས་དེ་ནི་འདི་ལྟ་སྟེ།་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟེ།་དེ་ཉིད་ཤིན་ཏུ་ཡང་དག་པར་རྗེས་སུ་མི་མཐོང་ལ།་སེམས་ཅན་ཐམས་ཅད་ཀྱི་ལེ་ལོ་སྤང་བའི་ཕྱིར་བརྩོན་འགྲུས་གཅེས་པའང་མི་འདོར་བ་ནའོ། །་ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་བསམ་གཏན་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་ནམ་ཆོས་ཐམས་ཅད་རང་བཞིན་གྱིས་སྙོམས་པར་ཞུགས་པར་ཤེས་ཀྱང་སེམས་ཅན་ཐམས་ཅད་ཀྱི་ཉོན་མོངས་པ་འདུལ་བའི་ཕྱིར་ཡང་བསམ་གཏན་བྱེད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་ཤེས་རབ་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་ནམ་རྒྱུ་བ་མེད་པ་ཐོབ་པར་གྱུར་ཏེ།་སྤྲོས་པ་ཐམས་ཅད་དང་བྲལ་ཞིང་སེམས་ཅན་ཐམས་ཅད་ཀྱི་ལྟ་བ་སྤང་བའི་ཕྱིར་ཤེས་རབ་ཀྱི་རྣམ་པར་དཔྱོད་པ་ན་སྟེ།་དེ་ལྟར་ན།་བྱང་ཆུབ་སེམས་དཔའ་ཤེས་རབ་ཕུན་སུམ་ཚོགས་པ་ཡིན་ནོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་བྱམས་པ་ལ་གནས་པ་ཡིན།་འཇམ་དཔལ་གྱིས་སྨྲས་པ།་ནམ་ཆོས་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་མཐོང་བ་ནའོ། །ལྷའི་བུས་སྨྲས་པ།་ 411b ཇི་ལྟར་ན།་བྱང་ཆུབ་སེམས་དཔའ་སྙིང་རྗེ་ལ་གནས་པ་ཡིན།་འཇམ་དཔལ་གྱིས་སྨྲས་པ།་ནམ་ཆོས་ཐམས་ཅད་ལ་ལས་ཀྱི་རྣམ་པར་སྨིན་པ་མེད་པར་ཤེས་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་དགའ་བ་ལ་གནས་པ་ཡིན།་འཇམ་དཔལ་གྱིས་སྨྲས་པ།་ནམ་ཆོས་ཐམས་ཅད་ལ་དགའ་བའང་མི་སྐྱེད་ལ།་མི་དགའ་བའང་མ་ཡིན་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་བཏང་སྙོམས་ལ་གནས་པ་ཡིན།་འཇམ་དཔལ་གྱིས་སྨྲས་པ།་ནམ་ཆོས་ཐམས་ཅད་ལ་གཉིས་དང་བྲལ་བར་གྱུར་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་ལ་བྱང་ཆུབ་སེམས་དཔའ་ཡང་དག་པ་ཞེས་བྱ།་འཇམ་དཔལ་གྱིས་སྨྲས་པ།་ནམ་ཆོས་ཐམས་ཅད་སྒྱུ་མ་ལྟ་བུར་བྱུང་བ་མེད་པར་ཤེས་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་སེམས་དཔའ་ཆེན་པོ་ཡིན།་འཇམ་དཔལ་གྱིས་སྨྲས་པ།་ནམ་བྱང་ཆུབ་སེམས་དཔས་ཆོས་ཐམས་ཅད་བདག་མེད་པར་མཐོང་བ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་སེམས་ཅན་གྱི་མཆོག་ཡིན།་འཇམ་དཔལ་གྱིས་སྨྲས་པ།་ནམ་ཆོས་ཐམས་ཅད་གཟུང་བ་མེད་པ་དང་།་གཞི་མེད་པར་ཤེས་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་གོ་ཆ་ཆེན་པོ་བགོས་པ་ཡིན།་འཇམ་དཔལ་གྱིས་སྨྲས་ 412a ༄#། །པ།་ནམ་བྱང་ཆུབ་སེམས་དཔས་ཆོས་ཐམས་ཅད་ནམ་མཁའ་དང་མཉམ་པར་ཐོས་ན་མི་དངངས།་མི་སྐྲག་།སྐྲག་པར་མི་འགྱུར་ཞིང་གོ་ཆ་ཆེན་པོ་མི་འདོར་བ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་དེས་པ་ཡིན།་འཇམ་དཔལ་གྱིས་སྨྲས་པ།་ནམ་སྙིང་རྗེ་ཆེན་པོས་སེམས་ཅན་ཐམས་ཅད་རིང་དུ་བསྲིངས་པའང་མ་ཡིན་ལ་སྲེད་པའི་བག་ལ་ཉལ་གྱིས་ཉེ་བར་བསྙེན་པའང་མ་ཡིན་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་འགྲོགས་ན་བདེ་བ་ཡིན།་འཇམ་དཔལ་གྱིས་སྨྲས་པ།་ནམ་བདག་དང་གཞན་མི་དམིགས་པས་ལུས་དང་།་ངག་དང་།་ཡིད་ཀྱིས་གཞན་ལ་གནོད་པ་མི་བྱེད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་བཀའ་བློ་བདེ་བ་ཡིན།་འཇམ་དཔལ་གྱིས་སྨྲས་པ།་ནམ་ཇི་ལྟར་ཐོས་པའི་ཆོས་རྣམས་སྒྲུབ་ཅིང་ཚིག་ཇི་སྐད་སྨྲས་པ་དེ་བཞིན་བྱེད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་མཐུན་པར་འཛིན་པ་ཡིན།་འཇམ་དཔལ་གྱིས་སྨྲས་པ།་ནམ་རང་གི་སེམས་དང་མཐུན་པའི་ཕྱིར་སེམས་ཅན་ཐམས་ཅད་ཀྱིས་བསྒོ་བ་ལས་མི་འགྱུར་ཞིང་།་སེམས་ཅན་ཐམས་ཅད་དང་མཐུན་པར་གནས་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་ངོ་ཚ་ཤེས་ 412b ཤེང་ཁྲེལ་ཡོད་པ་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་ནམ་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་ནང་ཡང་ཉེ་བར་ཞི་ལ་ཕྱི་རོལ་ཏུ་རྒྱུ་བ་ལའང་རྒྱུ་བ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་དད་པ་དང་ལྡན་པ་ཡིན།་འཇམ་དཔལ་གྱིས་སྨྲས་པ།་ནམ་ཆགས་པ་ཐམས་ཅད་ལའང་སྤྱོད་ལ།་ཆགས་པ་ཐམས་ཅད་ལ་ཞེན་པའང་མེད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་མཛའ་བ་བསྟེན་པ་ཡིན།་འཇམ་དཔལ་གྱིས་སྨྲས་པ།་ནམ་སངས་རྒྱས་ཀྱི་རིགས་མི་གཅོད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་བྱས་པ་གཟོ་བ་ཡིན།་འཇམ་དཔལ་གྱིས་སྨྲས་པ།་ནམ་ཇི་ལྟར་བྱས་པའི་དགེ་བའི་རྩ་བ་ཆུད་མི་གཟན་པ་ནའོ། །་ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་བྱས་པ་ཤེས་པ་ཡིན།་འཇམ་དཔལ་གྱིས་སྨྲས་པ།་ནམ་ཐེག་པ་གཞན་ལ་འདོད་པ་མི་བྱེད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་འདོད་པ་ཉུང་བ་ཡིན།་འཇམ་དཔལ་གྱིས་སྨྲས་པ།་ནམ་རང་གི་ཉོན་མོངས་པ་རྣམས་ཀྱང་མི་འདོད་ལ་སེམས་ཅན་ཐམས་ཅད་ཀྱི་ཉོན་མོངས་པ་རྣམས་སྤང་བར་ཡང་འདོད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་ཆོག་ཤེས་པ་ཡིན།་འཇམ་དཔལ་གྱིས་སྨྲས་པ།་ནམ་འཕགས་པའི་ཤེས་རབ་ཀྱི་ཤེས་ 413a ༄#། །པས་ཆོས་གང་ཡང་མི་ལེན་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་ངོམས་པ་ཡིན།་འཇམ་དཔལ་གྱིས་སྨྲས་པ།་ནམ་འཇིག་རྟེན་ལས་འདས་པའི་ཤེས་རབ་ལའང་གནས་ལ།་འཇིག་རྟེན་པའི་རྒྱུ་བས་ཀྱང་སེམས་ཅན་རྣམས་ཡོངས་སུ་སྨིན་པར་བྱེད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་རབ་ཏུ་དབེན་པ་ཡིན།་འཇམ་དཔལ་གྱིས་སྨྲས་པ།་ནམ་ཉོན་མོངས་པ་ཐམས་ཅད་ཀྱིས་ཀྱང་ཀུན་ནས་ཉོན་མོངས་པར་མི་འགྱུར་ལ་སེམས་ཅན་ཐམས་ཅད་ཀྱི་ཉོན་མོངས་པ་སྤང་བའི་ཕྱིར་བརྩོན་པར་ཡང་སྣང་བ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་རང་དགར་རང་དབང་ཅན་ཡིན།་འཇམ་དཔལ་གྱིས་སྨྲས་པ།་ནམ་ཟག་པ་མེད་པའི་ལུས་ཀྱིས་སངས་རྒྱས་ཀྱི་ཞིང་ཐམས་ཅད་དུ་སྣང་སྟེ།་ཡེ་ཤེས་ཀྱིས་དབང་བྱེད་ཀྱི།་ཉོན་མོངས་པས་དབང་བྱེད་པ་མ་ཡིན་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་མང་དུ་ཐོས་པ་ཡིན།་འཇམ་དཔལ་གྱིས་སྨྲས་པ།་ནམ་བདག་ཉིད་ཀྱང་མ་ཐོས་པའི་ཆོས་ཉན་ཅིང་གཞན་ལའང་མ་ཐོས་པའི་ཆོས་ཐོས་པར་བྱེད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་ཚུལ་བཞིན་ལ་བརྩོན་པ་ཡིན།་འཇམ་དཔལ་གྱིས་སྨྲས་པ།་ནམ་དམིགས་པ་ཐམས་ཅད་ལས་འབྱུང་ 413b བ་རབ་ཏུ་ཤེས་ཀྱང་ཆོས་ཐམས་ཅད་འཕྲོ་བར་ཡང་མི་བྱེད།་མི་འཕྲོ་བར་ཡང་མི་བྱེད་པ་ནའོ། །ལྷའི་བུས་སྨྲས་པ།་ཇི་ལྟར་ན།་བྱང་ཆུབ་སེམས་དཔའ་སྒྲུབ་པ་སྙིང་པོར་བྱེད་པ་ཡིན།་འཇམ་དཔལ་གྱིས་སྨྲས་པ།་ནམ་གཞན་དང་འབྲེལ་བའི་རྣམ་པར་རིག་པ་མི་སྐྱེད་ཅིང་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དབེན་པར་ཡང་རྟོག་ལ།་རང་གི་སེམས་ཀྱི་སྤྱོད་པ་ལའང་མི་ལྟ་ཞིང་།་བདག་དང་གཞན་དུ་འདུ་ཤེས་པས་སྒྲུབ་པ་སྙིང་པོར་བྱེད་པ་མ་ཡིན་པ་ནའོ། །ལྷའི་བུས་སྨྲས་པ།་འཇམ་དཔལ།་ཇི་ལྟར་ན།་བྱང་ཆུབ་སེམས་དཔའ་གཟུངས་དང་སྤོབས་པ་ཕུན་སུམ་ཚོགས་པ་ཡིན།་འཇམ་དཔལ་གྱིས་སྨྲས་པ།་ལྷའི་བུ།་ནམ་བྱང་ཆུབ་སེམས་དཔའ་ཐོས་པ་ཐམས་ཅད་ཀྱང་འཛིན་ལ་སེམས་ཅན་ཐམས་ཅད་ཀྱི་དབང་པོ་རྣམས་ལའང་མཚུངས་པར་རབ་ཏུ་འབྱེད་ཅིང་།་སྒྲ་སྐད་བྲག་ཅ་དང་མཚུངས་པར་ཡང་ཤེས་ནས་མངོན་པར་ཞེན་པ་མེད་པ་ན་སྟེ།་དེ་ལྟར་ན།་བྱང་ཆུབ་སེམས་དཔའ་གཟུངས་དང་སྤོབས་པ་ཕུན་སུམ་ཚོགས་པ་ཡིན་ནོ། །དེ་ནས་ལྷའི་བུ་འོད་མང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ།་ཁྱོད་ཀྱིས་བཤད་པའི་དོན་འདི་སུས་ཀུན་ཤེས་པར་འགྱུར།་འཇམ་དཔལ་གྱི་སྨྲས་པ།་ལྷའི་བུ།་གང་དག་དགེ་བའི་བཤེས་གཉེན་གྱིས་ཡོངས་སུ་ཟིན་པར་གྱུར་པ།་སྔོན་གྱི་སྦྱོར་པ་ཕུན་སུམ་ཚོགས་ 414a ༄#། །པ།་དགེ་བའི་རྩ་བ་བསྐྱེད་པ།་དམིགས་པ་མེད་པར་སྤྱོད་པ་དེ་དག་གིས་ཁོ་བོས་བཤད་པའི་དོན་འདི་ཀུན་ཤེས་པར་འགྱུར་རོ། །ལྷའི་བུས་སྨྲས་པ།་དེ་དག་ཅི་ལ་མོས་པར་འགྱུར།་བསམ་པ་ནི་གང་།་འཇམ་དཔལ་གྱིས་སྨྲས་པ།་དེ་དག་ཟབ་མོ་ལ་མོས་པར་འགྱུར་ཏེ།་ལྷག་པའི་ང་རྒྱལ་མེད་པ་ནི་བསམ་པའོ། །ལྷའི་བུས་སྨྲས་པ།་འཇམ་དཔལ།་ཇི་ལྟར་ན།་དགེ་སློང་ལྷག་པའི་ང་རྒྱལ་མེད་པ་ཡིན།་འཇམ་དཔལ་གྱིས་སྨྲས་པ།་ལྷའི་བུ།་ནམ་དགེ་སློང་འཇིག་ཚོགས་ལ་ལྟ་བ་ངོ་བོ་ཉིད་ཀྱིས་བགྲོད་པ་གཅིག་པུའི་ལམ་དུ་སྒོམ་སྟེ།་གཉིས་སུ་མེད་པས་འཇིག་ཚོགས་ལ་ལྟ་བའི་ངོ་བོ་ཉིད་གང་ཡིན་པ་དེ་བགྲོད་པ་གཅིག་པུའི་ལམ་གྱི་ངོ་བོ་ཉིད་དུ་མཉམ་པར་ཤེས་ཤིང་།་མ་རིག་པ་དང་།་སྲིད་པ་དང་།་སྲེད་པ་ལས་འབྱུང་བའང་ཚོལ་ལ།་མ་རིག་པ་དང་།་སྲིད་པ་དང་།་སྲེད་པ་ལས་འབྱུང་བ་ལ་སོ་སོར་རྟོག་པ་ནི་མ་རིག་པ་དང་།་སྲིད་པ་དང་།་སྲེད་པའི་ངོ་བོ་ཉིད་ཀྱང་རིག་པ་དང་།་རྣམ་པར་གྲོལ་བར་ཤེས་པ་ན་སྟེ།་དེ་ལྟར་ན།་དགེ་སློང་ལྷག་པའི་ང་རྒྱལ་མེད་པ་ཡིན་ནོ། །ལྷའི་བུ།་གཞན་ཡང་ནམ་དགེ་སློང་འདོད་ཆགས་ཀྱི་མཐའ་ལ་འདོད་ཆགས་དང་བྲལ་བའི་མཐར་ཤེས་ཤིང་།་འདོད་ཆགས་དང་བྲལ་བའི་མཐའི་རང་བཞིན་ཡང་འདོད་ཆགས་སུ་ཤེས་པ་དང་།་ཞེ་སྡང་གི་མཐའ་ལ་ཞེ་ 414b སྡང་དང་བྲལ་བའི་མཐར་ཤེས་ཤིང་།་ཞེ་སྡང་དང་བྲལ་བའི་མཐའི་རང་བཞིན་ཡང་ཞེ་སྡང་དུ་ཤེས་པ་དང་།་གཏི་མུག་གི་མཐའ་ལ་གཏི་མུག་དང་བྲལ་བའི་མཐར་ཤེས་ཤིང་།་གཏི་མུག་དང་བྲལ་བའི་མཐའི་རང་བཞིན་ཡང་གཏི་མུག་ཏུ་ཤེས་པ་ན་སྟེ།་དེ་ལྟར་ན།་དགེ་སློང་ལྷག་པའི་ང་རྒྱལ་མེད་པ་ཡིན་ནོ། །ལྷའི་བུ།་གཞན་ཡང་ནམ་དགེ་སློང་སྡུག་བསྔལ་ཡོངས་སུ་ཤེས་པར་མི་བྱེད།་ཀུན་འབྱུང་བ་སྤོང་བར་མི་བྱེད།་འགོག་པ་མངོན་སུམ་དུ་མི་བྱེད།་ལམ་སྒོམ་པར་ཡང་མི་བྱེད་ལ།་སྡུག་བསྔལ་མི་སྐྱེ་བ་ཤེས་པས་འཕགས་པའི་བདེན་པ་བཞི་རྗེས་སུ་རྟོགས་ཏེ།་སྡུག་བསྔལ་མི་སྐྱེ་བ་ཤེས་པ་གང་ཡིན་པ་དེ་ལ་ཀུན་འབྱུང་བ་གང་ཡང་མེད།་སྡུག་བསྔལ་མི་སྐྱེ་བ་ཤེས་པ་གང་ཡིན་པ་དེ་ལ་འགོག་པ་གང་ཡང་མེད།་སྡུག་བསྔལ་མི་སྐྱེ་བ་ཤེས་པ་གང་ཡིན་པ་དེ་ལ་ལམ་གང་ཡང་མེད་པ་དེ་ལྟར་དགེ་སློང་ཚུལ་བཞིན་ལ་བརྩོན་པ་ནི་ཆོས་གང་ཡང་སྐྱེད་པར་མི་བྱེད།་འགག་པར་མི་བྱེད།་གནས་པར་མི་བྱེད་དོ། །གང་ལ་སྐྱེ་བ་མེད་པ་དང་།་འགག་པ་མེད་པ་དང་།་གནས་པ་མེད་པ་དེ་འདུས་མ་བྱས་པའོ། །འདུས་མ་བྱས་ཀྱི་རང་བཞིན་ཡང་འཕགས་པ་རྣམས་ཀྱི་བདེན་པ་སྒོམ་པ་སྟེ།་ལྷའི་བུ།་དེ་ལྟར་ན།་དགེ་སློང་ལྷག་པའི་ང་རྒྱལ་མེད་པ་ཡིན་ནོ། །དེ་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་སྟེ།་གདོང་མཆི་མས་གང་ཞིང་མཆི་མས་ 415a ༄#། །བརྣངས་བཞིན་དུ་ཚིག་འདི་སྐད་ཅེས་སྨྲས་སོ། །གང་ན་ཆོས་ཀྱི་རྣམ་གྲངས་འདི་སྤྱོད་པ་དེ་ན་བདུད་རྣམས་ཀྱི་སྐབས་མེད་དོ། །གང་དག་ཆོས་ཀྱི་རྣམ་གྲངས་འདི་འཛིན་པར་འགྱུར་བ་དེ་དག་གི་བདུད་ཀྱི་ལས་ཐམས་ཅད་བཀག་པར་འགྱུར་རོ་ཞེས་དེ་སྐད་སྨྲས་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་སྟེ།་ཡིད་ལ་གཅགས་བཞིན་དེ་ཉིད་དུ་མི་སྣང་བར་གྱུར་ཏོ། །དེ་ནས་ལྷའི་བུ་འོད་མང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ།་ཁྱོད་ཀྱིས་བཤད་པའི་དོན་ཇི་ལྟར་བདག་གིས་ཤེས་པ་ལྟར་ན།་གང་དག་ལྷག་པའི་ང་རྒྱལ་མེད་པའི་ཚུལ་ཟབ་མོ་འདི་ཐོས་ནས་སྤོང་བའི་དགེ་སློང་དེ་དག་གི་རབ་ཏུ་བྱུང་བ་མེད་དོ། །བསྙེན་པར་རྫོགས་པ་མེད་དོ། །ལྷག་པའི་ང་རྒྱལ་མེད་པའི་ཚུལ་མཆོག་ཏུ་ཟབ་པ་འདིས་སྐྲག་པར་འགྱུར་བའི་ཁྱིམ་དེ་དག་གི་སྟོན་པ་དེ་བཞིན་གཤེགས་པ་མ་ཡིན་ནོ། །དགེ་སློང་ངམ།་དགེ་སློང་མའམ།་དགེ་བསྙེན་ནམ།་དགེ་བསྙེན་མ་གང་དག་ལྷག་པའི་ང་རྒྱལ་མེད་པའི་ཚུལ་མཆོག་ཏུ་ཟབ་པ་འདི་ཐོས་ནས་མི་སྐྲག་མི་དངང་ལ་དངང་བར་མི་འགྱུར་ཞིང་མོས་པར་འགྱུར་བ་དེ་དག་རྣམ་པར་གྲོལ་བ་ཉིད་དུ་རིག་པར་བྱའོ། །དེ་ནས་བཅོམ་ལྡན་འདས་ཀྱིས་ལྷའི་བུ་འོད་མང་པོ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ།་དེ་དེ་བཞིན་ནོ། །ཇི་ 415b སྐད་སྨྲས་པ་བཞིན་ཏེ།་དགེ་སློང་ངམ།་དགེ་སློང་མའམ།་དགེ་བསྙེན་ནམ།་དགེ་བསྙེན་མ་གང་དག་ལྷག་པའི་ང་རྒྱལ་མེད་པའི་ཚུལ་མཆོག་ཏུ་ཟབ་པ་འདི་ཐོས་ནས་མི་སྐྲག་མི་དངང་ལ་དངང་བར་མི་འགྱུར་ཞིང་མོས་པར་འགྱུར་བ་དེ་དག་རྣམ་པར་གྲོལ་བ་ཉིད་དུ་རིག་པར་བྱའོ། །དེ་ཅིའི་ཕྱིར་ཞེ་ན།་བཟོད་པ་འདིས་བྱང་ཆུབ་སེམས་དཔའ་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པ་དང་།་བཟོད་པ་འདིས་ཉན་ཐོས་དང་།་རང་སངས་རྒྱས་ཐམས་ཅད་ངེས་པར་འབྱུང་བའི་ཕྱིར་རོ། །ལྷའི་བུ་འོད་མང་པོས་གསོལ་པ་བཅོམ་ལྡན་འདས།་ཆོས་ཀྱི་རྣམ་གྲངས་འདིའི་མིང་ཅི་ལགས།་འདི་ཇི་ལྟར་གཟུང་བར་བགྱི།་བཅོམ་ལྡན་འདས་ཀྱིས་བཀའ་སྩལ་པ། །ལྷའི་བུ།་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་འཇམ་དཔལ་རྣམ་པར་འཕྲུལ་པའི་ལེའུ་ཞེས་བྱ་བར་ཟུངས་ཤིག་།བདུད་འདུལ་བའི་ལེའུ་ཞེས་བྱ་བར་ཡང་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འཇམ་དཔལ་གཞོན་ནུར་གྱུར་པ་དང་།་ལྷའི་བུ་འོད་མང་པོ་དང་།་ཐམས་ཅད་དང་ལྡན་པའི་འཁོར་དེ་དང་།་ལྷ་དང་།་མི་དང་།་ལྷ་མ་ཡིན་དང་།་དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་འཇམ་དཔལ་རྣམ་པར་འཕྲུལ་པའི་ལེའུ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།་ 416a ༄#། །རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང་།་ཛི་ན་མི་ཏྲ་དང་།་ཞུ་ཆེན་གྱི་ལོ་ཙཱ་བ་བནྡྷེ་ཡེ་ཤེས་སྡེས་བསྒྱུར་ཅིང་ཞུས་ཏེ།་སྐད་གསར་བཅད་ཀྱིས་བཅོས་ནས་གཏན་ལ་ཕབ་པ།་ |