D145

<head>
<link rel="stylesheet" type="text/css" href="../sub/style.css">
<link rel="stylesheet" type="text/css" href="../sub/cssstyles.css" />
<link rel="stylesheet" type="text/css" href="../sub/w3.css" />

<style>
.button {
  display: inline-block;
  border-radius: 4px;
  background-color: #08088a;
  border: none;
  color: #FFFFFF;
  text-align: center;
  font-size: 12px;
  padding: 10px;
  width: 130px;
  transition: all 0.5s;
  cursor: pointer;
  margin: 5px;
  border-radius: 12px;
}

.button span {
  cursor: pointer;
  display: inline-block;
  position: relative;
  transition: 0.5s;
}

.button span:after {
  content: '\00bb';
  position: absolute;
  opacity: 0;
  top: 0;
  right: -20px;
  transition: 0.5s;
}

.button:hover span {
  padding-right: 25px;
}

.button:hover span:after {
  opacity: 1;
  right: 0;
}
</style>
</head>
<div style="position: fixed; top: 0px; left: 0px; width: 150px; height: 60px; background-color: white">
<img src="../sub/logo.png" alt="rKTs" style="width:135px;height:60px;">
</div>

﻿
<table>
<tr height=50>
<tr>
<td width=150 valign=top>

<button  class="button" style="vertical-align:middle"  onclick="window.close();">Close window</button>
<td>


<table><tr><td><h1>D145</h1><td>(<a href="https://adarsha.dharma-treasure.org/kdbs/degekangyur" target="new2">e-text produced by ADARSHA</a>)<br><br><a href="verif3.php?id=D145&coll=derge">see text in transliteration</a></table>57-1-34a<br><font size=+2>
༄#། །རྒྱ་གར་སྐད་དུ། ཨཱརྱ་རཏྣོ་ལྐ་ནཱ་མ་དྷཱ་ར་ཎཱི་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དཀོན་མཆོག་ཏ་ལ་ལའི་གཟུངས་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་
པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཀྱི་ཕུང་པོའི་རི་ལ་དགེ་སློང་སྟོང་དུ་ཚང་བ་ཐམས་ཅད་ཀྱང་དཀར་པོའི་ཆོས་ཡོངས་སུ་རྫོགས་པ། སེང་གེའི་སྒྲ་ཆེན་པོ་སྒྲོག་པ། ཡེ་ཤེས་ཀྱི་ཚོགས་དཔག་ཏུ་མེད་པ་ཚོལ་བ་ལ་མཁས་པ་ཤ་སྟག་གི་དགེ་སློང་གི་དགེ་འདུན་ཆེན་
པོ་དང་ཐབས་ཅིག་ཏུ་བཞུགས་སོ། །བྱང་ཆུབ་སེམས་དཔའི་དགེ་འདུན་ཆེན་པོ་འདི་ལྟ་སྟེ། བྱང་ཆུབ་སེསམ་དཔའ་སེམས་དཔའ་ཆེན་པོ་ཀུན་ཏུ་བཟང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་ཕྱག་རྒྱ་རིན་པོ་ཆེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་
བརྩོན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཡོན་ཏན་གྱིས་བརྒྱན་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བསོད་ནམས་མངོན་བསྒྲགས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོ་དང ། བྱང་ཆུབ་སེསམ་དཔའ་སེམས་དཔའ་ཆེན་པོ་

</font><hr>57-1-34b<br><font size=+2>

ཡོན་ཏན་བཀོད་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་གློ་གྲོས་དང ། བྱང་ཆུབ་སེསམ་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་འོད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་མཚོན་
ཆ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེ་སྲ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ས་འཛིན་དང ། བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ཀྱི་བློ་གྲོས་དང ། བྱང་ཆུབ་སེསམ་དཔའ་སེམས་དཔའ་ཆེན་པོ་དོན་ཀུན་མཐོང་དང ། བྱང་
ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་ཐོབ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་བརྟན་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་དང ། 
བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ངན་སོང་སྤོང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མྱ་ངན་དང་མུན་པ་ཐམས་ཅད་འཇོམས་པ་དང ། བྱང་ཆུབ་སེམས་དཔའ་སེམས་
དཔའ་ཆེན་པོ་རབ་ཀྱི་རྩལ་གྱིས་རྣམ་པར་གནོན་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་མི་ལེན་མི་འདོར་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཙན་དན་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་རྒྱ་མཚོ་དང ། བྱང་ཆུབ་སེམས་
དཔའ་སེམས་དཔའ་ཆེན་པོ་འབྱུང་དཀའ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་འབྱུང་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པའི་བློ་གྲོས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་བརྩེགས་དང ། བྱང་ཆུབ་སེམས་དཔའ་སེམས་
དཔའ་ཆེན་པོ་མགྱོགས་པའི་སྙིང་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་ཐར་པ་བསམ་གྱིས་མི་ཁྱབ་པ་ལ་གནས་པ། དཔའ་བར་འགྲོ་བའི་ཏིང་ངེ་འཛིན་གྱིས་ངེས་པར་བྱུང་

</font><hr>57-1-35a<br><font size=+2>

པ་དབྱངས་སྒྲ་ཐོགས་པ་མེད་པ། སངས་རྒྱས་ཀྱི་ཞིང་དཔག་ཏུ་མེད་པ་ཟིལ་གྱིས་གནོན་པ་ལ་མཁས་པ། མི་འཇིགས་པ་ལ་གནས་པ། རྗེས་སུ་ཆགས་པ་དང་ཁོང་ཁྲོ་བ་དང་བྲལ་བ། ཡིད་དུ་འོང་བའི་དབྱངས་དང་ལྡན་པ། ཁམས་གསུམ་ལ་མ་ཆགས་པ། གཡོག་
འཁོར་མི་ཕྱེད་པ་དང་ལྡན་པ། ཐམས་ཅད་མཁྱེན་པ་ཉིད་ལས་ངེས་པར་སྐྱེས་པ། ཏིང་ངེ་འཛིན་དང་སྙོམས་པར་འཇུག་པ་ཚད་མེད་པ་དང་ལྡན་པ། རེ་བ་ཐམས་ཅད་ཡོངས་སུ་སྐོང་བ། ཤེས་རབ་ཀྱི་ཕ་རོལ་ཏུ་ཕྱིན་པ་རྟོགས་པར་ཁོང་དུ་ཆུད་པ། ལུས་དང་ངག་དང་ཡིད་ཀྱི་ལས་ཀྱི་མཐའ་
དོན་ཡོད་པ་ལ་མོས་པ། ཐམས་ཅད་མཁྱེན་པ་ཉིད་ལ་མངོན་པར་བརྩོན་པ། ཏིང་ངེ་འཛིན་དང་སྤྱོད་པ་ཚད་མེད་པར་བྱིན་གྱིས་བརླབས་པ། མི་འཇིགས་པ་ཐོབ་པ། སྟོང་པ་ཉིད་སྤྱོད་ཡུལ་བ། མཚན་མ་མེད་པ་ལ་གནས་པ་ཤ་སྟག་དང་ཡང་ཐབས་ཅིག་གོ། །དེ་ནས་བྱང་ཆུབ་སེམས་དཔའ་
སེམས་དཔའ་ཆེན་པོ་ཀུན་ཏུ་བཟང་པོ་ཞེས་བྱ་བ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་དབྱིངས་ཇི་ལྟར་རྟོགས་པར་བགྱི། བཅོམ་ལྡན་འདས་ཀྱིས་
བཀའ་སྩལ་པ། རིགས་ཀྱི་བུ་ཆོས་ཀྱི་དབྱིངས་ནི་དངོས་པོ་མེད་པར་རྟོགས་པར་བྱའོ། །རིགས་ཀྱི་བུ་ཆོས་ཀྱི་དབྱིངས་ནི་ནམ་མཁའ་དང་མཚུངས་པ་དང ། སྤྲོས་པ་མེད་པ་དང་མ་སྤྲོས་པ་དང་བླང་བ་མེད་པ་དང་དོར་བ་མེད་པ་དང་དངོས་པོ་མེད་པ་དང ། གནས་པ་མེད་པ་སྟེ་དེ་ལྟར་རྟོགས་པར་བྱའོ། །
བྱང་ཆུབ་སེམས་དཔའ་ཀུན་ཏུ་བཟང་པོས་གསོལ་པ། བཅོམ་ལྡན་འདས་ཅི་ལགས། ཆོས་ཀྱི་དབྱིངས་འབྱུང་བ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་ཀྱི་དབྱིངས་ནི་འབྱུང་བ་མེད་པའོ། །རིགས་ཀྱི་བུ་ཆོས་ཀྱི་དབྱིངས་ནི་བསམ་གྱིས་མི་ཁྱབ་པའོ། །
རིགས་ཀྱི་བུ་ཆོས་ཀྱི་དབྱིངས་ནི་དངོས་པོ་མེད་པར་རྟོགས་པ་སྟེ། དངོས་པོ་གང་དུ་ཡང་བརྗོད་པར་བྱ་བ་མ་ཡིན་ཞིང་བསྟན་པར་བྱ་བ་མ་ཡིན་པའོ། །བྱང་ཆུབ་སེམས་དཔའ་ཀུན་ཏུ་བཟང་པོས་གསོལ་པ། བཅོམ་ལྡན་འདས་བྱང་ཆུབ་ལ་རྣམ་པ་དུ་མཆིས། བཅོམ་ལྡན་འདས་

</font><hr>57-1-35b<br><font size=+2>

ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་ཀྱི་རྣམ་པ་ནི་ཚད་མེད་དེ་དེ་ནི་ཚད་དང་ལྡན་པར་བསྟན་པར་མི་ནུས་སོ། །བྱང་ཆུབ་སེམས་དཔའ་ཀུན་ཏུ་བཟང་པོས་གསོལ་པ། བཅོམ་ལྡན་འདས་ཅི་ལགས། ཆོས་ཀྱི་དབྱིངས་རྣམ་པར་རྟོག་པར་བགྱིད་དམ། བཅོམ་ལྡན་འདས་ཀྱིས་བཀའ་
སྩལ་པ། རིགས་ཀྱི་བུ་ཆོས་ཀྱི་དབྱིངས་ནི་རྣམ་པར་མི་རྟོག་གོ། །བྱང་ཆུབ་སེམས་དཔའ་ཀུན་ཏུ་བཟང་པོས་གསོལ་པ། བཅོམ་ལྡན་འདས་གལ་ཏེ་ཆོས་ཀྱི་དབྱིངས་རྣམ་པར་མི་རྟོག་པ་ལགས་ན། བྱིས་པ་སོ་སོའི་སྐྱེ་བོ་རྣམས་ཅིའི་སླད་དུ་རྟོག་པར་བགྱིད། བཅོམ་ལྡན་འདས་ཀྱིས་བཀའ་
སྩལ་པ། རིགས་ཀྱི་བུ་བྱིས་པ་སོ་སོའི་སྐྱེ་བོ་ཐམས་ཅད་ནི་རྟོག་པ་དང ། རྣམ་པར་རྟོག་པ་དང ། ཡོངས་སུ་རྟོག་པ་ལས་བྱུང་བའོ། །བྱང་ཆུབ་སེམས་དཔའ་ཀུན་ཏུ་བཟང་པོས་གསོལ་པ། བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་བྱང་ཆུབ་འདི་ནི་ཟབ་ལགས་སོ། །བཅོམ་ལྡན་
འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ཏེ། ཅི་སྐད་སྨྲས་པ་བཞིན་ནོ། །རིགས་ཀྱི་བུ་གཞན་ཡང་ཆོས་ཐམས་ཅད་སྤྲོས་པ་མེད་པ་ནི་བྱང་ཆུབ་ཅེས་བྱའོ། །དེ་ནས་འཇམ་དཔལ་གཞོན་ནུར་གྱུར་པ་འཁོར་དེ་ཉིད་དུ་འདུས་པར་གྱུར་ཏེ་འདུག་པ་དེས་བཅོམ་ལྡན་འདས་ཀྱི་ཞབས་
ལ་མགོ་བོས་ཕྱག་འཚལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དཀོན་མཆོག་ཏ་ལ་ལ་ཞེས་བགྱི་བའི་གཟུངས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་ཀུན་ཏུ་བཟང་པོ་ཆོས་ཐམས་ཅད་ལ་
ཐོགས་པ་མེད་པའི་སྤོབས་པ་ལ་གནས་པ་འདི་ལ་དྲིས་ཤིག་དང ། འདིས་ཁྱོད་ལ་སྟོན་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་མངོན་དུ་ཕྱོགས་ཏེ་འདུག་ནས་སོར་མོ་བཅུའི་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཐམས་
ཅད་མཁྱེན་ཅིང་ཐམས་ཅད་གཟིགས་པ་བཅོམ་ལྡན་འདས་ཉིད་ཀྱིས་ཅིའི་སླད་དུ་མི་བཤད། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་གང་ན་བྱང་ཆུབ་སེམས་དཔའ་ཡོན་ཏན་འདི་ལྟ་བུ་དང་ལྡན་པ་དག་འཁོད་པ་དེ་ན་དེ་བཞིན་གཤེགས་པ་རྣམས་བཏང་སྙོམས་སུ་བཞུགས་

</font><hr>57-1-36a<br><font size=+2>

སོ། །འཇམ་དཔལ་གྱིས་གསོལ་པ། བཅོམ་ལྡན་འདས་དེ་བཞིན་གཤེགས་པ་རྣམས་ནི་བཏང་སྙོམས་སུ་བཞུགས་པ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ང་ནི་སེམས་ཅན་གྱི་ཁམས་ཡལ་བར་འདོར་བ་མ་ཡིན་ཏེ། རིགས་ཀྱི་བུ་འོན་ཀྱང་བྱང་ཆུབ་
སེམས་དཔའ་རྣམས་ཀྱི་བསྟན་པ་ནི་བསྟན་པ་ཚད་མེད་ཅིང་བསྟན་པ་བསམ་གྱིས་མི་ཁྱབ་བོ། །དེ་ནས་འཇམ་དཔལ་གཞོན་ནུར་གྱུར་པས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དཀོན་མཆོག་ཏ་ལ་ལ་ཞེས་བགྱི་བའི་གཟུངས་བཤད་དུ་གསོལ། 
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་ཀུན་ཏུ་བཟང་པོ་འདི་ལ་དྲིས་ཤིག་དང ། འདིས་ཁྱོད་ལ་སྟོན་པར་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་སྐྱེས་བུ་དམ་པ་འདི་ནི་ཡེ་ཤེས་ཀྱི་ཚོགས་ལ་གནས་པའོ། །འཇམ་དཔལ་གྱིས་གསོལ་པ། གལ་ཏེ་དེ་
བཞིན་གཤེགས་པས་བདག་ལ་དགོངས་ན་བདག་གིས་སྐྱེས་བུ་དམ་པ་འདི་ལ་དྲི་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་ཀྱིས་ཏིང་ངེ་འཛིན་རྡུལ་ཕྲ་རབ་ཀྱི་རྡུལ་སྙེད་ཐོབ་པ་ཡིན་ན་དེ་བཞིན་གཤེགས་པ་ལ་གསོལ་བ་གདབ་ཅི་དགོས། རིགས་ཀྱི་བུ་
ཁྱོད་ནི་སངས་རྒྱས་ཀྱི་ཆོས་ཐམས་ཅད་ལ་སྐལ་པ་དང་ལྡན་པ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས་བདག་གིས་སངས་རྒྱས་ཀྱི་ཆོས་གང་དག་ཀུན་ཏུ་བསྟེན་པ་དང ། བསྒོམས་པ་དང་མང་དུ་བགྱིས་པ་དེ་ཐམས་ཅད་ནི་དེ་བཞིན་གཤེགས་པའི་སྐྱེས་བུའི་མཐུར་
རིག་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་སོ་ལེགས་སོ། །ཁྱོད་ཀྱིས་ཚིག་འདི་ལེགས་པར་སྨྲས་ཏེ། འོན་ཀྱང་འཇམ་དཔལ་ང་ཁྱོད་ལ་གསོལ་བ་འདེབས་ཀྱིས་ཁྱོད་བྱང་ཆུབ་སེམས་དཔའ་ཀུན་ཏུ་བཟང་པོ་ལ་དྲིས་ཤིག་།དེ་ནས་བཅོམ་ལྡན་
འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཀུན་ཏུ་བཟང་པོ་འདི་ནི་ཤིན་ཏུ་ཟབ་མོ་སྟོན་པ་སྟེ། ཐེག་པ་ཆེན་པོ་རྟོགས་པར་ཁོང་དུ་ཆུད་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་

</font><hr>57-1-36b<br><font size=+2>

ཁྱོད་ཀྱང་ཆོས་ཐམས་ཅད་ཀྱི་དབང་ཕྱུག་གི་རྒྱལ་པོ་ཡིན་གྱིས་བདག་ལ་མ་གསུང་ཤིག་།ཡང་རིགས་ཀྱི་བུ་ཁྱོད་ནི་སྟོང་པ་ཉིད་ལ་གནས་པའི་ཏིང་ངེ་འཛིན་བསམ་གྱིས་མི་ཁྱབ་པ་དང་ལྡན་པའོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་
སོར་མོ་བཅུའི་ཐལ་མོ་སྦྱར་ཏེ་ཕྱག་འཚལ་ནས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་ཁྱོད་ཀྱིས་བདག་ལ་སྐབས་ཕྱེ་ན་ཁྱོད་ལ་བདག་ཡི་གེ་འབྲུ་གཉིས་ཤིག་འདྲིའོ། །བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། རིགས་ཀྱི་བུ་དེའི་
དུས་ལ་དབབ་པར་ཤེས་ན་དྲིས་ཤིག་།དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་སངས་རྒྱས་སངས་རྒྱས་ཞེས་བྱ་བའི་གཞིའི་དོན་གང་ཡིན། བྱང་ཆུབ་སེམས་དཔའ་ཀུན་ཏུ་བཟང་
པོས་སྨྲས་པ། ཀྱེ་རྒྱལ་བའི་སྲས་སངས་རྒྱས་ཀྱི་གཞིའི་དོན་ནི་གཞི་མེད་པའི་དོན་ཏོ། །སངས་རྒྱས་ཀྱི་གཞིའི་དོན་ནི་དངོས་པོ་མེད་པའི་དོན་ཏོ། །སངས་རྒྱས་ཀྱི་གཞིའི་དོན་ནི་བསམ་གྱིས་མི་ཁྱབ་པའི་དོན་ཏོ། །སངས་རྒྱས་ཀྱི་གཞིའི་དོན་ནི་མི་མཉམ་པ་དང་མཉམ་པའི་དོན་ཏོ། །སངས་
རྒྱས་ཀྱི་གཞིའི་དོན་ནི་སྤྲོས་པ་མེད་པའི་དོན་ཏོ། །སངས་རྒྱས་ཀྱི་གཞིའི་དོན་ནི་མ་སྤྲོས་པའི་དོན་ཏོ། །སངས་རྒྱས་ཀྱི་གཞིའི་དོན་ནི་བླང་བ་མེད་པའི་དོན་ཏོ། །སངས་རྒྱས་ཀྱི་གཞིའི་དོན་ནི་དོར་བ་མེད་པའི་དོན་ཏོ། །སངས་རྒྱས་ཀྱི་གཞིའི་དོན་ནི་ནམ་མཁའ་དང་མཚུངས་པའི་དོན་ཏོ། །
སངས་རྒྱས་ཀྱི་གཞིའི་དོན་ནི་བསྙད་དུ་མེད་པའི་དོན་ཏེ། རིགས་ཀྱི་བུ་སངས་རྒྱས་ཀྱི་ཆོས་རྣམས་ཀྱི་རང་བཞིན་ནི་དེ་ལྟ་བུ་ཡིན་ནོ། །འཇམ་དཔལ་གྱིས་སྨྲས་པ། ཀྱེ་རྒྱལ་བའི་སྲས་གལ་ཏེ་ཆོས་ཐམས་ཅད་སྤྲོས་པ་མེད་པ་ཡིན་ན། འོ་ན་སངས་རྒྱས་ཀྱི་ཆོས་རྣམས་ཤེས་ཇི་སྐད་
བསྟན། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། ཀྱེ་རྒྱལ་བའི་སྲས་བསྟན་པ་འདི་ནི་བསྟན་དུ་མེད་པའོ། །འཇམ་དཔལ་གྱིས་སྨྲས་པ། ཀྱེ་རྒྱལ་བའི་སྲས་བསྟན་དུ་མེད་ན་ཅི་ཞིག་བསྟན། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། འཇམ་དཔལ་

</font><hr>57-1-37a<br><font size=+2>

བསྟན་དུ་མེད་པ་ནི་བཏགས་ཏེ་བསྟན་ཏོ། །འཇམ་དཔལ་གྱིས་སྨྲས་པ། ཀྱེ་རྒྱལ་བའི་སྲས་བཏགས་པས་ཅི་ཞིག་འདོགས་པར་བྱེད། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། འཇམ་དཔལ་བཏགས་པས་ནི་དངོས་པོ་ཡང་མི་འདོགས། དངོས་པོ་མེད་པ་ཡང་མི་འདོགས་
སོ། །འཇམ་དཔལ་གྱིས་སྨྲས་པ། ཀྱེ་རྒྱལ་བའི་སྲས་གལ་ཏེ་བཏགས་པས་དངོས་པོ་ཡང་མི་འདོགས་དངོས་པོ་མེད་པ་ཡང་མི་འདོགས་ན་ཐེག་པ་གསུམ་པོ་དག་ཇི་ལྟར་བསྟན། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། འཇམ་དཔལ་ཁྱོད་ཆོས་ཀྱི་དབྱིངས་ཆགས་བ་མེད་
པ་ལ་ཆགས་པར་མ་བྱེད། དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པས་ཆོས་ཐམས་ནི་དངོས་པོ་མེད་པའོ་ཞེས་བསྟན་པའི་ཕྱིར་ཏེ། གང་དངོས་པོ་མེད་པའི་ཕྱིར་ཞེ་ན། ཕུང་པོ་ལྔ་དམིགས་པ་མེད་པའི་ཕྱིར་རོ། །འཇམ་དཔལ་གྱིས་སྨྲས་པ། བྱང་ཆུབ་སྤྲོས་པ་དང་
བཅས་པ་ཡིན་ནམ། འོན་ཏེ་སྤྲོས་པ་མེད་པ་ཡིན། བྱང་ཆུབ་སེམས་དཔའ་ཀུན་ཏུ་བཟང་པོས་སྨྲས་པ། རིགས་ཀྱི་བུ་བྱང་ཆུབ་ནི་སྤྲོས་པ་དང་བཅས་པ་ཡང་མ་ཡིན། སྤྲོས་པ་མེད་པ་ཡང་མ་ཡིན་ཏེ། འདི་ལྟར་བྱང་ཆུབ་དང ། སྤྲོས་པ་དང་བཅས་པ་དང ། སྤྲོས་པ་མེད་པ་དེ་ནི་གཉིས་སུ་
མེད་དེ་གཉིས་སུ་དབྱེར་མེད་དོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་རིགས་ཀྱི་བུ་བསམ་གྱིས་མི་ཁྱབ་པ་བསྟན་པ་འདི་ལེགས་སོ་ལེགས་སོ་ཞེས་བྱ་བ་བྱིན་ནོ། །གཏམ་འདི་བརྗོད་པས་ལྷ་དང་བཅས་པའི་འཇིག་རྟེན་འདི་ལ་རྨོངས་
པར་འགྱུར་རོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཆོས་བསྟན་པ་འདི་ལྟ་བུ་ནི་རྣམ་པ་འཚལ་བར་མི་རུང་ངོ ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་
གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་བཏགས་པ་འདིས་བཏགས་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཀུན་ཏུ་བཟང་

</font><hr>57-1-37b<br><font size=+2>

པོས་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམ་པར་དག་པའི་སྒོ་འདི་ནི་མོས་པར་བགྱི་དཀའ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བློ་གྲོས་རྒྱ་མཚོས་
འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་ཀུན་ཏུ་བཟང་པོས་རྣམ་པར་དག་པའི་སྒོ་བསྟན་པ་འདི་ལེགས་པར་སྨྲས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །རིགས་ཀྱི་བུ་གཞན་ཡང་འདི་
ནི་ཆོས་ཐམས་ཅད་ཀྱི་རྒྱུ་འཐུན་པ་ཡིན་ནོ། །འདི་ནི་ཆོས་ཀྱི་ཆར་ཆེན་པོ་ཡིན་ནོ། །དེ་ནས་ཤིང་སཱ་ལ་ཆེན་པོ་ལྟ་བུའི་བྲམ་ཟེ་མཉམ་པ་ཉིད་དུ་གནས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་ནི་མཉམ་པ་ཉིད་བསམ་གྱིས་མི་ཁྱབ་པ་ལགས་ཏེ། །
དེ་ལ་ཡི་གེ་མི་དམིགས། ཚིག་འབྲུ་མི་དམིགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ཏེ། ཆོས་ཀྱི་དབྱིངས་ལ་ཚིག་འབྲུ་མི་སྣང ། དོན་ཀྱང་མི་སྣང་ངོ ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །
བཅོམ་ལྡན་འདས་སྟོང་པ་ཉིད་ཀྱི་རྒྱུ་འཐུན་པ་གང་ལགས། རྣམ་པ་གང་ལགས། རྟགས་གང་ལགས། མཚན་མ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སྟོང་པ་ཉིད་ནི་བརྗོད་དུ་མེད་པ། བསྙད་དུ་མེད་པ་སྟེ། བརྗོད་དུ་མེད་པའི་ཆོས་ཉིད་འདི་ལ་མོས་པ་
གང་ཡིན་པ་དེ་སྟོང་པ་ཉིད་ཅེས་བྱའོ། །སྟོང་པ་ཉིད་དེ་ནི་ཡི་གེ་མེད་པ་སྟེ། དེའི་ཕྱིར་སྟོང་པ་ཉིད་ཅེས་བྱའོ། །སྟོང་པ་ཉིད་དེ་ནི་བསྙད་དུ་མེད་པ་སྟེ། དེའི་ཕྱིར་སྟོང་པ་ཉིད་ཅེས་བྱའོ། །རིགས་ཀྱི་བུ་ཆོས་ཐམས་ཅད་ནི་ཆོས་ཀྱི་ངོ་བོ་ཉིད་ཀྱིས་སྟོང་ངོ ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་
ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་བསམ་གྱིས་མི་ཁྱབ་པའི་ཆོས་ལ་གནས་པ་རྣམས་ཀྱི་རྣམ་པར་འཕྲུལ་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། ཚེ་དང་ལྡན་པ་ཤ་ར་དྭ་ཏིའི་བུ་སེམས་དང་པོ་བསྐྱེད་པའི་བྱང་

</font><hr>57-1-38a<br><font size=+2>

ཆུབ་སེམས་དཔའི་ཤེས་པ་ནི་མཆོག་ཡིན་གྱི་དགྲ་བཅོམ་པའི་ཤེས་པ་ནི་དེ་ལྟ་མ་ཡིན་ནོ། །དེ་ཅིའི་ཕྱིར་ཞེ་ན། དགྲ་བཅོམ་པ་ནི་སངས་རྒྱས་ཀྱི་ཆོས་རྣམས་ལས་རིང་དུ་གནས་ལ། བྱང་ཆུབ་སེམས་དཔའ་དེ་ནི་སངས་རྒྱས་བཅོམ་ལྡན་འདས་སུ་འགྱུར་བའི་ཕྱིར་རོ། །དེ་ནས་
བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་དབང་ཕྱུག་གི་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཇི་ལྟར་བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན་ཉན་ཐོས་ཀྱིས་ནི་ཉན་ཐོས་ཀྱི་ཆོས་རྣམས་མ་
ཐོབ་པ་ཉིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཉན་ཐོས་ཀྱིས་ཉན་ཐོས་ཀྱི་ཆོས་རྣམས་མ་ཐོབ་པ་ནི་མ་ཡིན་ཏེ། འོན་ཀྱང་ཉན་ཐོས་ལ་བྱང་ཆུབ་སེམས་དཔའ་དང་ལྷན་ཅིག་ཏུ་དྲིས་པ་ལ་ལན་གདབ་པའམ། སྤྱོད་པའི་བྱིན་གྱིས་བརླབ་པར་བྱ་
བའི་ནུས་པ་དང་མཐུ་ག་ལ་ཡོད། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཤ་ར་དྭ་ཏིའི་བུ་འདི་ནི་དེ་བཞིན་གཤེགས་པས་ཤེས་རབ་དང་ལྡན་པ་རྣམས་ཀྱི་མཆོག་ཏུ་བསྟན་པ་ལགས་ན་བསྟན་པ་འདི་གང་ལ་བསྟན་
པ་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ངས་གང་བསྟན་པ་འདི་ནི་བསྟན་པ་མེད་པའོ། །དེ་ནས་འཇམ་དཔལ་གཞོན་ནུར་གྱུར་པས་གནས་བརྟན་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །གནས་བརྟན་གྱིས་ཉན་ཐོས་ཀྱི་ཆོས་རྣམས་ཐོབ་བམ། སྨྲས་
པ་དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། འོ་ན་ཅི་ཁྱོད་སོ་སོའི་སྐྱེ་བོའམ། སྨྲས་པ་དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། འོ་ན་ཅི་ཁྱོད་སློབ་བའམ། སྨྲས་པ་དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། འོ་ན་ཁྱོད་ཅི་ཤེས་རབ་དང་ལྡན་པའི་མཆོག་ཡིན་ནམ། སྨྲས་པ་དེ་ནི་མ་
ཡིན་ནོ། །འཇམ་དཔལ་གྱིས་སྨྲས་པ། གལ་ཏེ་བཙུན་པ་ཤ་ར་དྭ་ཏིའི་བུ་སོ་སོའི་སྐྱེ་བོ་ཡང་མ་ཡིན། སློབ་པ་ཡང་མ་ཡིན། ཤེས་རབ་དང་ལྡན་པའི་མཆོག་ཀྱང་མ་ཡིན་ན་དེ་ཉིད་ཁྱོད་དམིགས་པ་ཅན་དུ་འགྱུར་རོ། །ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་ཁོ་བོ་ནི་སྐྱེས་བུ་དམ་པ་རྒྱ་མཚོ་ལྟར་

</font><hr>57-1-38b<br><font size=+2>

གཏིང་དཔག་དཀའ་བ་ཁྱོད་དང་འགྱེད་པར་མི་བྱེད་དོ། །འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་ཁྱོད་ནི་རྒན་རབས་ཐུ་བོ་མཆོག་ཡིན་གྱིས་བཙུན་པ་ཤ་ར་དྭ་ཏིའི་བུ་དེ་སྐད་མ་ཟེར་ཅིག་།གནས་བརྟན་གྱིས་སྨྲས་པ། རིགས་ཀྱི་བུ་རྒས་པའི་དངོས་པོས་ནི་ཅི་ཡང་འཐོབ་པར་མི་
འགྱུར། མངོན་པར་རྟོགས་པར་མི་འགྱུར་རོ། །རིགས་ཀྱི་བུ་དོན་དེ་ཉིད་ཤེས་པར་བྱ་བའི་ཕྱིར་ཁྱོད་ལ་དཔེ་བྱའོ། །རིགས་ཀྱི་བུ་འདི་ལྟ་སྟེ་དཔེར་ན་རྡོ་རྗེ་ངན་ངོན་གྱིས་ཀྱང་རི་བྲག་ཆེན་པོ་རྣམ་པར་འཇིག་གོ། །རིགས་ཀྱི་བུ་དེ་བཞིན་དུ་ཁྱོད་ཀྱི་སྤུའི་ཁུང་བུ་གཅིག་ན་ཤེས་རབ་འདུག་པ་གང་
ཡིན་པ་དེ་ནི་ཁོ་བོ་ལྟ་བུའི་སེམས་ཅན་རྡུལ་ཕྲ་རབ་ཀྱི་རྡུལ་སྙེད་རྣམས་ལ་མེད་དོ། །རིགས་ཀྱི་བུ་དོན་དེ་ཉིད་ཤེས་པར་བྱ་བའི་ཕྱིར་ཡང་ཁྱོད་ལ་དཔེ་བྱའོ། །རིགས་ཀྱི་བུ་འདི་ལྟ་སྟེ་དཔེར་ན། བ་ལང་གླང་པོ་ཆེ་ཤིན་ཏུ་མི་བཟད་པ་ཆེན་པོ་དེ་ཡང་མི་སྟོབས་དང་ལྡན་པས་ལྕགས་ཀྱུ་
ཆུང་དུས་དུལ་བར་བྱེད་དོ། །རིགས་ཀྱི་བུ་དེ་བཞིན་དུ་ཁྱོད་ནི་སྟོབས་དང་ལྡན་པ། ཁོ་བོ་ནི་ཉམ་ཆུང་བ་སྟེ། གླང་པོ་ཆེ་ཆེན་པོ་འདི་ལྟ་བུ་དང་ཁོ་བོ་འགྱེད་ག་ལ་ནུས། དེ་ནས་བཅོམ་ལྡན་འདས་ལ་གནས་བརྟན་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་སྟེ། 
དཔེར་ན་མི་དམུས་ལོང་གིས་ཤུལ་དུ་མཆི་བའམ། གྲོང་ཁྱེར་མཐོང་བར་ཡང་རྔོ་མི་ཐོགས་ན་ཁྱིམ་ནས་ཁྱིམ་དུ་མཆི་བའི་རྔོ་ལྟ་ག་ལ་ཐོགས་ཏེ། དེ་ནི་གནས་མ་མཆིས་སོ། །དེ་བཞིན་དུ་གླང་པོ་ཆེ་ཆེན་པོ་ལྟ་བུ་འདི་དག་གི་མདུན་ན་བདག་ནི་དམུས་ལོང་དང་མཚུངས་པར་མཐོང་སྟེ། སངས་རྒྱས་ཀྱི་
ཆོས་འདི་དག་ནི་དེ་ཙམ་དུ་རྒྱ་ཆེ་བ་ལགས་སོ། །བདག་ནི་སངས་རྒྱས་ཀྱི་ཆོས་རྣམས་ཀྱི་སྣོད་དུ་མ་གྱུར་ཏེ། ད་ཅི་བགྱིར་ཡང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་དེ་སྐད་མ་ཟེར་ཅིག་།ཤ་ར་དྭ་ཏིའི་བུ་འདི་ལྟ་སྟེ། དཔེར་ན་དེ་བཞིན་གཤེགས་པའི་འོད་
ཀྱིས་སེམས་ཅན་ཇི་སྙེད་ཅིག་ལ་རེག་པ་དེ་དག་ཐམས་ཅད་སངས་རྒྱས་ཀྱི་ཆོས་རྣམས་ཐོབ་པ་ཡིན་ནོ། །ཤ་ར་དྭ་ཏིའི་བུ་དེ་བཞིན་དུ་ཁྱོད་ནི་ཏིང་ངེ་འཛིན་མཐའ་ཡས་ཤིང་བསམ་གྱིས་མི་ཁྱབ་པ་ཐོབ་པ་ཡིན་ནོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན། ལྷ་

</font><hr>57-1-39a<br><font size=+2>

དང་མིའི་སྐྱེ་དགུ་ལས་སེམས་ཅན་དགུ་ཁྲི་ཉིས་སྟོང་གིས་ཆོས་མངོན་པར་རྟོགས་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཆོས་ཀྱི་བློ་གྲོས་བྱང་ཆུབ་སེམས་དཔའི་ཏིང་ངེ་འཛིན་དཀོན་མཆོག་ཏ་ལ་ལ་སྦྱོར་བ་མཐའ་ཡས་པ་ཞེས་བྱ་བ་དེ་ལ་སྙོམས་པར་ཞུགས་སོ། །
བྱང་ཆུབ་སེམས་དཔའ་ཆོས་ཀྱི་བློ་གྲོས་སྙོམས་པར་ཞུགས་མ་ཐག་ཏུ་ཕྱོགས་བཅུའི་ཕྱོགས་རེ་རེའི་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་ཕ་རོལ་ནས་སངས་རྒྱས་བཅོམ་ལྡན་འདས་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཕྲ་
རབ་ཀྱི་རྡུལ་སྙེད་ཀྱིས་ཞལ་མངོན་པར་བསྟན་ཏེ། སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱང་མཚན་རྡོ་རྗེའི་སྙིང་པོ་ཞེས་བྱ་བར་འཐུན་པ་ཤ་སྟག་གོ། །ཕྱོགས་གཅིག་ཇི་ལྟ་བར་ཕྱོགས་བཅུ་རྣམས་ནས་ཀྱང་དེ་བཞིན་ཏེ། སངས་རྒྱས་བཅོམ་ལྡན་འདས་དེ་དག་གིས་དེ་ལ་
འདི་སྐད་ཅེས་བཀའ་སྩལ་ཏོ། །ཆོས་ཀྱི་བློ་གྲོས་ཁྱོད་དེ་ལྟར་བྱང་ཆུབ་སེམས་དཔའི་ཏིང་ངེ་འཛིན་སྦྱོར་བ་མཐའ་ཡས་པ་ལ་སྙོམས་པར་ཞུགས་པ་ལེགས་སོ་ལེགས་སོ། །རིགས་ཀྱི་བུ་འདི་ལྟ་སྟེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་འདི་ཉིད་ཀྱི་སྔོན་གྱི་སྨོན་
ལམ་དང ། སྔོན་གྱི་བྱིན་གྱི་རླབས་དང ། ཁྱོད་ཉིད་ཀྱི་དགེ་བའི་རྩ་བས་ཉེ་བར་བརྟན་པས་འདི་ལྟ་སྟེ་ཆོས་ཐམས་ཅད་བསྟན་པར་བྱ་བ་དང ། སངས་རྒྱས་ཀྱི་ཡེ་ཤེས་རྣམ་པར་སྦྱང་བ་དང ། སངས་རྒྱས་ཀྱི་ཡེ་ཤེས་རྣམ་པར་འཕེལ་བར་བྱ་བ་དང ། ཆོས་ཀྱི་དབྱིངས་སུ་འཇུག་པར་བྱ་བ་
དང ། སེམས་ཅན་གྱི་ཁམས་རྣམ་པར་དགྲོལ་བ་དང ། ཆགས་པ་མེད་པའི་ཡེ་ཤེས་ལ་འཇུག་ཅིང་ཆུད་པར་བྱ་བ་དང ། ཀུན་དུ་སྦྱོར་བར་བྱ་བ་དང ། སྐད་ཐམས་ཅད་བརྗོད་པར་བྱ་བ་དང ། ཐམས་ཅད་མཁྱེན་པའི་ཡེ་ཤེས་ལ་འཇུག་པར་བྱ་བ་དང ། ཆོས་ཐམས་ཅད་ལ་སྒྲིབ་པ་མེད་
པར་བྱ་བ་དང ། དུས་གསུམ་ཐམས་ཅད་ཡོངས་སུ་ཤེས་པའི་ཆོས་བསྟན་པ་ལ་འཇུག་པར་བྱ་བའི་ཕྱིར་ཕྱོགས་བཅུ་ནས་དེ་བཞིན་གཤེགས་པ་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཐམས་ཅད་ཀྱང་མཚན་འཐུན་པར་འདི་དག་ཐམས་ཅད་ཁྱོད་ལ་བྱིན་གྱིས་རློབ་

</font><hr>57-1-39b<br><font size=+2>

ཀྱིས་རིགས་ཀྱི་བུ་འདི་ལྟ་སྟེ། བྱང་ཆུབ་སེམས་དཔའ་རྣམ་པར་གཞག་པ་བཅུ་ལས་བརྩམས་ཏེ། སངས་རྒྱས་ཀྱི་མཐུ་དང་སངས་རྒྱས་ཀྱི་བྱིན་གྱི་རླབས་ཀྱིས་ཆོས་བསྟན་པ་འདི་ལ་སྤོབས་པ་སྐྱེད་ཅིག་།དེ་ནས་སངས་རྒྱས་བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་ཆོས་ཀྱི་
བློ་གྲོས་ལ་ཐོགས་པ་མེད་པའི་ཡེ་ཤེས་ཀྱི་སྣང་བ་དང ། སྒྲིབ་པ་མེད་པ་དང ། ཆོད་པ་མེད་པ་དང ། བརྗེད་པ་མེད་པའི་ཆོས་ཉིད་དང ། ཐ་དད་པ་མེད་པའི་ཡེ་ཤེས་དང ། ཁ་ན་མ་ཐོ་བ་མེད་པ་དང་ཟིལ་གྱིས་མི་ནོན་པ་དང ། ཞུམ་པ་མེད་པ་དང ། འཕྲོགས་པ་མེད་པའི་ཆོས་ཉིད་དང ། བརྗོད་
པ་བཟང་པོ་ཉེ་བར་སྒྲུབ་པ་མཛད་དོ། །དེ་ཅིའི་ཕྱིར་ཞེ་ན། འདི་ལྟར་ཏིང་ངེ་འཛིན་འདི་ཉིད་ཀྱི་ཆོས་ཉིད་ཐོབ་པའི་ཕྱིར་རོ། །དེ་ནས་སངས་རྒྱས་བཅོམ་ལྡན་འདས་དེ་དག་གིས་ཕྱག་གཡས་པ་བརྐྱང་སྟེ། བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱི་མགོ་ལ་ཉུག་པ་མཛད་དེ། སངས་རྒྱས་
བཅོམ་ལྡན་འདས་དེ་དག་གིས་བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་རེག་མ་ཐག་ཏུ། དེ་ནས་ཏིང་ངེ་འཛིན་དེ་ལས་ལངས་ནས་བྱང་ཆུབ་སེམས་དཔའ་དེ་དག་ལ་སྨྲས་པ། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་རྣམས་ཀྱི་རིགས་འདི་ནི་འདི་ལྟ་སྟེ། ཆོས་ཀྱི་དབྱིངས་ཀྱིས་ཀླས་
པ་དང ། ནམ་མཁའི་ཁམས་ཀྱི་མཐས་གཏུགས་པས་རྒྱ་ཆེ་བའོ། །ཀྱེ་རྒྱལ་བའི་སྲས་དག་འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་རིགས་སུ་སྐྱེ་བ་ཡིན། མ་བྱོན་པའི་སངས་རྒྱས་བཅོམ་ལྡན་འདས་
རྣམས་ཀྱི་རིགས་སུ་སྐྱེ་བ་ཡིན། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་རིགས་སུ་སྐྱེ་བ་ཡིན་ནོ། །དེ་ནས་བྱང་ཆུབ་སེམས་དཔའ་དེ་དག་གིས་བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་གང་དག་འདས་པ་དང ། མ་བྱོན་
པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་རིགས་སུ་སྐྱེ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ནི་གང་ཡིན། གང་ལས་བསམས་ཏེ་དེ་སྐད་སྨྲ། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་རྣམ་པར་གཞག་

</font><hr>57-1-40a<br><font size=+2>

པ་བཅུ་པོ་དེ་དག་གང་ཡིན་པ་དེ་ཤོད་ཅིག་།དེ་སྐད་ཅེས་སྨྲས་པ་དང ། བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དག་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་རྣམ་པར་གཞག་
པ་ནི་བཅུ་པོ་འདི་དག་སྟེ། དེ་དག་ནི་འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །གསུང་ངོ ། །གསུང་བར་འགྱུར་རོ། །བཅུ་གང་ཞེ་ན། འདི་ལྟ་སྟེ། སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམ་པར་གཞག་པ་དང ། ལས་དང་
པོ་པ་དང ། རྣལ་འབྱོར་སྤྱོད་པ་དང ། སྐྱེ་བར་སྐྱེས་པ་དང ། སྦྱོར་བ་ཕུན་སུམ་ཚོགས་པ་དང ། བསམ་པ་ཕུན་སུམ་ཚོགས་པ་དང ། ཕྱིར་མི་ལྡོག་པ་དང་གཞོན་ནུར་གྱུར་པ་དང་རྒྱལ་ཚབ་དང ། དབང་བསྒྱུར་བ་ཐོབ་པའི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་
དག་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའ་རྣམ་པར་གཞག་པ་ནི་བཅུ་པོ་དེ་དག་སྟེ། དེ་དག་ནི་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱིས་གསུངས་སོ། །གསུང་ངོ ། །གསུང་པར་འགྱུར་རོ། །ཀྱེ་རྒྱལ་བའི་སྲས་དག་
དེ་ལ་སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་སེམས་དང་པོ་བསྐྱེད་པའི་བྱང་ཆུབ་སེམས་དཔའ་ནི་སངས་རྒྱས་བཅོམ་ལྡན་འདས་རྣམས་མཐོང་མ་ཐག་ཏུ་གཟུགས་བཟང་བའམ། མཛེས་པའམ། ཁ་དོག་བཟང་པོ་
རྒྱས་པའམ། རྒྱ་ཆེ་བའམ། གཟི་བརྗིད་ཆེ་བའམ། རྫུ་འཕྲུལ་གྱི་རྣམ་པར་འཕྲུལ་པའམ། ཀུན་རྗོད་པའི་རྣམ་པར་འཕྲུལ་པའམ། རྗེས་སུ་བསྟན་པའི་རྣམ་པར་འཕྲུལ་པ་མཐོང་ངམ། སེམས་ཅན་སྡུག་བསྔལ་བ་དག་མཐོང་ངམ། དེ་བཞིན་གཤེགས་པའི་བསྔགས་པ་རྒྱ་ཆེར་
ཐོས་ན་འདི་ལྟ་སྟེ། རྣམ་པ་ཐམས་ཅད་མཁྱེན་པའི་ཡེ་ཤེས་འདོད་ཅིང་ཐོག་མ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །སེམས་བསྐྱེད་མ་ཐག་པ་དེ་ཉིད་ཀྱིས་བསྙེན་པར་དཀའ་བའི་གནས་བཅུ་ཡོངས་སུ་བཟུང་བར་འགྱུར་ཏེ། བཅུ་གང་ཞེ་ན། འདི་

</font><hr>57-1-40b<br><font size=+2>

ལྟ་སྟེང་གནས་དང་གནས་མ་ཡིན་པ་ཤེས་པ་དང ། འདས་པ་དང ། མ་འོངས་པ་དང་ད་ལྟར་བྱུང་བའི་ལས་དང་ཆོས་ཡང་དག་པར་བླངས་པ་ཤེས་པ་དང ། ཐམས་ཅད་དུ་འགྲོ་བའི་ལམ་ཤེས་པ་དང ། ཁམས་དུ་མ་སྣ་ཚོགས་ཤེས་པ་དང ། མོས་པ་དང་རྣམ་པར་གྲོལ་བ་དུ་མ་ཤེས་པ་དང ། དབང་
པོ་མཆོག་དང་མཆོག་མ་ཡིན་པ་ཤེས་པ་དང ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་ཀུན་ནས་ཉོན་མོངས་པ་དང ། རྣམ་པར་བྱང་བ་དང་ལྡང་བ་ཐམས་ཅད་ཤེས་པ་དང ། སྔོན་གྱི་གནས་རྗེས་སུ་དྲན་པའི་ཤེས་པ་དང ། ལྷའི་མིག་གི་
ཤེས་པ་དང ། ཟག་པ་ཟད་པ་ཤེས་པ་སྟེ། བསྙེན་པར་དཀའ་བའི་གནས་བཅུ་པོ་དེ་དག་ཡོངས་སུ་བཟུང་བར་འགྱུར་རོ། །ཀྱེ་རྒྱལ་བའི་སྲས་དག་འདི་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་སེམས་དང་པོ་བསྐྱེད་པའི་བྱང་
ཆུབ་སེམས་དཔའ་སེམས་དཔའ་ཆེན་པོ་དེ་སངས་རྒྱས་མཆོད་པ་དང ། བྱང་ཆུབ་སེམས་དཔའི་བདེ་བའི་ཡོ་བྱད་ལ་སྦྱར་བར་བྱའོ། །དེ་ལ་འཇིག་རྟེན་གྱི་བདག་པོར་འགྱུར་བ་དང ། མཆོག་ཏུ་བྱ་བ་དང་ཟིལ་གྱིས་མི་གནོན་པ་དང ། སངས་རྒྱས་དཔག་ཏུ་མེད་པ་དང་ཕྲད་པ་དང ། 
རབ་ཏུ་ཞི་བའི་ཏིང་ངེ་འཛིན་ལ་རྣལ་འབྱོར་དུ་བྱ་བ་དང ། འཁོར་བའི་འཁོར་ལོ་རྣམ་པར་བཟློག་པ་དང ། དམ་པའི་ཆོས་ཀྱི་འཁོར་ལོ་རབ་ཏུ་བསྐོར་བ་དང ། སེམས་ཅན་སྡུག་བསྔལ་བ་ཡོངས་སུ་བསྐྱབ་པ་ཡང་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་སེམས་བསྐྱེད་མ་ཐག་པ་
དེ་ཉིད་ཀྱིས་ཤས་ཆེར་སངས་རྒྱས་ཀྱི་ཆོས་ཐམས་ཅད་ལ་སྦྱོར་ཞིང་གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྦྱོར་གྱི། གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་སེམས་དང་པོ་བསྐྱེད་པའི་བྱང་ཆུབ་སེམས་དཔའ་རྣམ་པར་
གཞག་པའོ། །ཀྱེ་རྒྱལ་བའི་སྲས་དག་དེ་ལ་ལས་དང་པོ་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་ལས་དང་པོ་པའི་བྱང་ཆུབ་སེམས་དཔའ་ནི་སེམས་ཅན་རྣམས་ལ་ཐོག་མ་ཉིད་དུ་སེམས་རྣམ་པ་བཅུ་བསྐྱེད་དེ། རྣམ་པ་བཅུ་གང་

</font><hr>57-1-41a<br><font size=+2>

ཞེ་ན། འདི་ལྟ་སྟེ། ཕན་པར་བྱ་བའི་སེམས་དང་བདེ་བར་བྱ་བའི་སེམས་དང ། སྙིང་བརྩེ་བའི་སེམས་དང ། མཉེན་པའི་སེམས་དང ། སྡུག་པའི་སེམས་དང ། ཕན་གདགས་པའི་སེམས་དང ། ཀུན་དུ་བསྲུང་བའི་སེམས་དང ། སྙོམས་པའི་སེམས་དང ། སློབ་དཔོན་གྱི་
སེམས་དང ། སྟོན་པའི་སེམས་ཏེ། སེམས་རྣམ་པ་བཅུ་པོ་འདི་དག་བསྐྱེད་དོ། །ཀྱེ་རྒྱལ་བའི་སྲས་དག་འདི་ནི་ལས་དང་པོ་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་ལས་དང་པོ་པའི་བྱང་ཆུབ་སེམས་དཔའ་དེ་ལུང་མནོད་པ་དང ། ཁ་ཏོན་ལ་སྦྱར་བར་བྱའོ། །མང་དུ་ཐོས་ནས་རབ་ཏུ་
དབེན་པ་ལ་སྦྱར་བར་བྱའོ། །རབ་ཏུ་དབེན་པར་གྱུར་ནས་དགེ་བའི་བཤེས་གཉེན་ལ་མངོན་པར་དགའ་བ་ལ་སྦྱར་བར་བྱའོ། །དགེ་བའི་བཤེས་གཉེན་ལ་མངོན་པར་དགའ་ནས་བཀའ་བློ་བདེ་བ་ལ་སྦྱར་བར་བྱའོ། །བཀའ་བློ་བདེ་བར་གྱུར་ནས་དུས་ཤེས་པ་ལ་སྦྱར་བར་བྱའོ། །དུས་ཤེས་པར་གྱུར་
ནས་མི་འཇིགས་པ་ལ་སྦྱར་བར་བྱའོ། །མི་འཇིགས་པར་གྱུར་ནས་དོན་ཤེས་པ་ལ་སྦྱར་བར་བྱའོ། །དོན་ཤེས་པར་གྱུར་ནས་ཆོས་ཀྱི་རྗེས་སུ་འབྲང་བ་ལ་སྦྱར་བར་བྱའོ། །ཆོས་ཀྱི་རྗེས་སུ་འབྲང་བར་གྱུར་ནས་བརྗེད་པ་མེད་པའི་ཆོས་ཉིད་ལ་སྦྱར་བར་བྱའོ། །རྨོངས་པ་མེད་པར་གྱུར་ནས་
ཆོས་རྣམ་པར་དགོད་པ་ལ་སྦྱར་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་སེམས་བསྐྱེད་མ་ཐག་པ་དེ་ཉིད་ཀྱིས་ཤས་ཆེར་སངས་རྒྱས་ཀྱི་ཆོས་ཐམས་ཅད་ལ་མངོན་པར་བརྩོན་པར་བྱེད་ཅིང་གོང་དུ་གནས་གང་དག་ཐོབ་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་
ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་ལས་དང་པོ་པའི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་དེ་ལ་རྣལ་འབྱོར་སྤྱོད་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་རྣལ་འབྱོར་སྤྱོད་པའི་བྱང་ཆུབ་སེམས་
དཔའ་ནི་དམིགས་པ་རྣམ་པ་བཅུས་ཆོས་རྣམས་རྟོགས་པར་བྱེད་དེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་ལ་མི་རྟག་པ་ཉིད་དུ་རྟོགས་པར་བྱེད་པ་དང ། ཆོས་ཐམས་ཅད་ལ་སྡུག་བསྔལ་བ་ཉིད་དང ། བདག་མེད་པ་ཉིད་དང ། སྟོང་པ་ཉིད་དང ། གཡོ་བ་མེད་པ་ཉིད་དང ། དབུགས་

</font><hr>57-1-41b<br><font size=+2>

འབྱིན་པ་མེད་པ་ཉིད་དང ། གནས་མེད་པ་ཉིད་དང ། རྣམ་པར་རྟོག་པ་མེད་པ་ཉིད་དང ། རྩོལ་བ་མེད་པ་ཉིད་དང ། མངོན་བར་འདུ་བྱེད་པ་མེད་པ་ཉིད་དུ་རྟོགས་པར་བྱེད་དེ། ཆོས་ཀྱི་རྗེས་སུ་འབྲང་བར་གྱུར་བའི་ཕྱིར་སྦྱོར་བར་མི་བྱེད། མི་སྦྱོར་བར་ཡང་མི་བྱེད་དེ། ཀྱེ་རྒྱལ་བའི་སྲས་དག་འདི་ནི་རྣལ་འབྱོར་
སྤྱོད་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་རྣལ་འབྱོར་སྤྱོད་པའི་བྱང་ཆུབ་སེམས་དཔའ་དེ་ནི་སེམས་ཅན་གྱི་ཁམས་བརྟག་པ་ལ་སྦྱར་བར་བྱའོ། །ཆོས་ཀྱི་དབྱིངས་བརྟག་པ་ལ་སྦྱར་བར་བྱའོ། །འཇིག་རྟེན་གྱི་ཁམས་བརྟག་པ་ལ་སྦྱར་བར་བྱའོ། །སའི་ཁམས་བརྟག་
པ་ལ་སྦྱར་བར་བྱའོ། །ཆུའི་ཁམས་དང་མེའི་ཁམས་དང་རླུང་གི་ཁམས་དང་ནམ་མཁའི་ཁམས་དང ། གཟུགས་ཀྱི་ཁམས་དང་གཟུགས་མེད་པའི་ཁམས་བརྟག་པ་ལ་སྦྱར་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་ཤས་ཆེར་ཆོས་རྣམས་ལ་སྣང་བ་འཇུག་ཅིང་གོང་དུ་གནས་གང་དག་
ཐོས་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་རྣལ་འབྱོར་སྤྱོད་པའི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་སྐྱེ་བར་སྐྱེས་པའི་བྱང་ཆུབ་སེམས་དཔའ་རྣམ་པར་གཞག་
པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་སྐྱེ་བར་སྐྱེས་པའི་བྱང་ཆུབ་སེམས་དཔའ་ནི་ཡོངས་སུ་སྤྱོད་པ་བྱེད་པ་བཅུས་གསུང་རབ་འཕགས་པར་སྐྱེས་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། ཆོས་ཉིད་ལས་ཕྱིར་མི་ཟློགས་པ་དང ། སངས་རྒྱས་ལ་མི་ཕྱེད་པའི་དད་པ་མཐར་ཐུག་པར་འགྱུར་
བ་ཡོངས་སུ་གྲུབ་པ་དང ། ཆོས་ངེས་པར་སེམས་པ་དང ། སེམས་ཅན་ལ་རྣམ་པར་དཔྱོད་པ་དང ། ཞིང་ལ་རྣམ་པར་དཔྱོད་པ་དང ། འཇིག་རྟེན་ལ་རྣམ་པར་དཔྱོད་པ་དང ། ལས་ལ་རྣམ་པར་དཔྱོད་པ་དང ། རྣམ་པར་སྨིན་པ་ལ་རྣམ་པར་དཔྱོད་པ་དང ། འཁོར་བ་ལ་རྣམ་པར་དཔྱོད་པ་དང ། 
མྱ་ངན་ལས་འདས་པ་ལ་རྣམ་པར་དཔྱོད་པ་སྟེ། ཡོངས་སུ་སྦྱོང་བ་བྱེད་པ་བཅུ་པོ་དེ་དག་གིས་གསུང་རབ་འཕགས་པར་སྐྱེས་པ་ཡིན་ཏེ། ཀྱེ་རྒྱལ་བའི་སྲས་དག་འདི་ནི་སྐྱེ་བར་སྐྱེས་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་སྐྱེ་བར་སྐྱེས་པའི་བྱང་ཆུབ་སེམས་དཔའ་དེ་ནི་འདས་

</font><hr>57-1-42a<br><font size=+2>

པའི་སངས་རྒྱས་ཀྱི་ཆོས་མཉམ་པ་ཉིད་རྣམ་པར་དཔྱད་པ་ལ་སྦྱར་བར་བྱའོ། །མ་བྱོན་པའི་སངས་རྒྱས་ཀྱི་ཆོས་མཉམ་པ་ཉིད་རྣམ་པར་དཔྱད་པ་ལ་སྦྱར་བར་བྱའོ། །ད་ལྟར་བྱུང་བའི་སངས་རྒྱས་ཀྱི་ཆོས་མཉམ་པ་ཉིད་རྣམ་པར་དཔྱད་པ་ལ་སྦྱར་བར་བྱའོ། །སངས་རྒྱས་ཐམས་
ཅད་ཀྱི་ཆོས་མཉམ་པ་ཉིད་རྣམ་པར་དཔྱད་པ་ལ་སྦྱར་བར་བྱའོ། །འདས་པའི་སངས་རྒྱས་ཀྱི་ཆོས་ཡང་དག་པར་འགྲུབ་པ་རྣམ་པར་དཔྱད་པ་ལ་སྦྱར་བར་བྱའོ། །མ་བྱོན་པའི་སངས་རྒྱས་ཀྱི་ཆོས་ཡང་དག་པར་འགྲུབ་པ་རྣམ་པར་དཔྱད་པ་ལ་སྦྱར་བར་བྱའོ། །ད་ལྟར་བྱུང་བའི་སངས་
རྒྱས་ཀྱི་ཆོས་ཡང་དག་པར་འགྲུབ་པ་རྣམ་པར་དཔྱད་པ་ལ་སྦྱར་བར་བྱའོ། །སངས་རྒྱས་ཐམས་ཅད་ཀྱི་ཆོས་ཡང་དག་པར་འགྲུབ་པ་རྣམ་པར་དཔྱད་པ་ལ་སྦྱར་བར་བྱའོ། །འདས་པའི་སངས་རྒྱས་ཀྱི་ཆོས་ཡོངས་སུ་འགྲུབ་པ་མཉམ་པ་ཉིད་རྣམ་པར་དཔྱད་པ་ལ་སྦྱར་བར་བྱའོ། །མ་བྱོན་
པའི་སངས་རྒྱས་ཀྱི་ཆོས་ཡོངས་སུ་འགྲུབ་པ་མཉམ་པ་ཉིད་རྣམ་པར་དཔྱད་པ་ལ་སྦྱར་བར་བྱའོ། །ད་ལྟར་བྱུང་བའི་སངས་རྒྱས་ཀྱི་ཆོས་ཡོངས་སུ་འགྲུབ་པ་མཉམ་པ་ཉིད་རྣམ་པར་དཔྱད་པ་ལ་སྦྱར་བར་བྱའོ། །སངས་རྒྱས་ཐམས་ཅད་ཀྱི་ཆོས་ཡོངས་སུ་འགྲུབ་པ་མཉམ་པ་ཉིད་རྣམ་
པར་དཔྱད་པ་ལ་སྦྱར་བར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་ཤས་ཆེར་དུས་གསུམ་མཉམ་པ་ཉིད་དུ་རྟོགས་པར་བྱེད་ཅིང ། གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་སྐྱེ་བར་
སྐྱེས་པའི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་དེ་ལ་སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའ་ནི་དགེ་བའི་ལས་གང་ཅི་རྩོམ་
ཡང་དེ་དག་ཐམས་ཅད་སེམས་ཅན་ཐམས་ཅད་ཡོངས་སུ་བསྐྱབ་པ་དང ། སེམས་ཅན་ཐམས་ཅད་ལ་ཕན་པར་འདོད་པར་བྱ་བ་དང ། སེམས་ཅན་ཐམས་ཅད་ལ་བདེ་བར་སྦྱར་བ་དང ། སེམས་ཅན་ཐམས་ཅད་ལ་སྙིང་བརྩེ་བར་བྱ་བ་དང ། སེམས་ཅན་ཐམས་ཅད་རབ་ཏུ་ཐར་བར་བྱ་བ་དང་།

</font><hr>57-1-42b<br><font size=+2>

སེམས་ཅན་ཐམས་ཅད་ལ་གནོད་པ་མེད་པར་བྱ་བ་དང ། སེམས་ཅན་ཐམས་ཅད་དྲང་བར་བྱ་བ་དང ། སེམས་ཅན་ཐམས་ཅད་དད་པར་བྱ་བ་དང ། སེམས་ཅན་ཐམས་ཅད་གདུལ་བར་བྱ་བ་དང ། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླ་བའི་ཕྱིར་རྩོམ་སྟེ། ཀྱེ་རྒྱལ་བའི་སྲས་དག་
འདི་ནི་སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་དཔའ་དེ་ལ་གནས་བཅུ་ཡང་དག་པར་བརྗོད་པར་བྱ་སྟེ། བཅུ་གང་ཞེ་ན། འདི་ལྟ་སྟེ། སེམས་ཅན་མཐའ་ཡས་པ་དང ། སེམས་ཅན་དཔག་ཏུ་མེད་པ་དང ། 
སེམས་ཅན་གྲངས་མེད་པ་དང ། སེམས་ཅན་བསམ་གྱིས་མི་ཁྱབ་པ་དང ། སེམས་ཅན་མཚུངས་པ་མེད་པ་དང ། སེམས་ཅན་གཞལ་དུ་མེད་པ་དང ། སེམས་ཅན་སྟོང་པ་ཉིད་དང ། སེམས་ཅན་གཡོ་བ་མེད་པ་ཉིད་དང ། སེམས་ཅན་མེད་པ་ཉིད་དང ། སེམས་ཅན་རང་བཞིན་མེད་པ་ཉིད་དོ། །
དེ་ཅིའི་ཕྱིར་ཞེ་ན། འདི་ལྟར་དེ་ཤས་ཆེར་མངོན་པར་ཞེན་པ་མེད་པ་ལ་སེམས་འཇོག་ཅིང་གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་སྦྱོར་བ་ཕུན་སུམ་ཚོགས་པའི་བྱང་ཆུབ་སེམས་
དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་དེ་ལ་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་ནི་ཆོས་བཅུ་ཐོས་ན་སངས་རྒྱས་ཀྱི་ཆོས་རྣམས་ལ་
བསམ་པ་ངེས་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། སངས་རྒྱས་ཀྱི་བསྔགས་པའམ། བསྔགས་པ་མ་ཡིན་པ་འཆད་ཀྱང་རུང་སངས་རྒྱས་ཀྱི་ཆོས་རྣམས་ལ་བསམ་པ་ངེས་པ་ཡིན། ཆོས་ཀྱི་བསྔགས་པའམ། བསྔགས་པ་མ་ཡིན་པ་འཆད་ཀྱང་རུང ། བྱང་ཆུབ་སེམས་དཔའ་རྣམས་
ཀྱི་བསྔགས་པའམ། བསྔགས་པ་མ་ཡིན་པ་འཆད་ཀྱང་རུང་སྟེ། སངས་རྒྱས་ཀྱི་ཆོས་རྣམས་ལ་བསམ་པ་ངེས་པ་ཡིན། བྱང་ཆུབ་སེམས་དཔའི་སྦྱོད་པའི་བསྔགས་པའམ། བསྔགས་པ་མ་ཡིན་པ་འཆད་ཀྱང་རུང་སྟེ། སངས་རྒྱས་ཀྱི་ཆོས་རྣམས་ལ་བསམ་པ་ངེས་པ་ཡིན། སེམས་

</font><hr>57-1-43a<br><font size=+2>

ཅན་གྱི་ཁམས་རྒྱ་ཆུང་ཞེས་འཆད་པའམ། སེམས་ཅན་གྱི་ཁམས་རྒྱ་ཆེ་ཞེའམ། སེམས་ཅན་གྱི་ཁམས་ཀུན་ནས་ཉོན་མོངས་པ་ཅན་ཞེའམ། སེམས་ཅན་གྱི་ཁམས་ཀུན་ནས་ཉོན་མོངས་པ་ཅན་མ་ཡིན་ཞེའམ། སེམས་ཅན་གྱི་ཁམས་གདུལ་སླ་ཞེའམ། སེམས་ཅན་
གྱི་ཁམས་གདུལ་དཀའ་ཞེའམ། ཆོས་ཀྱི་དབྱིངས་རྒྱ་ཆུང་ཞེའམ། ཆོས་ཀྱི་དབྱིངས་རྒྱ་ཆེ་ཞེའམ། འཇིག་རྟེན་གྱི་ཁམས་དག་འཇིག་ཅེའམ་མི་འཇིག་ཅེའམ་ཆོས་ཀྱི་དབྱིངས་ཡོད་ཅེའམ་ཆོས་ཀྱི་དབྱིངས་མེད་ཅེས་འཆད་ཀྱང་རུང་སྟེ། སངས་རྒྱས་ཀྱི་ཆོས་རྣམས་ལ་བསམ་པ་ངེས་པ་ཡིན་ཏེ། 
ཀྱེ་རྒྱལ་བའི་སྲས་དག་འདི་ནི་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་དེ་ལ་ཆོས་ཀྱི་རྗེས་སུ་འཇུག་པ་བཅུ་ཡང་དག་པར་བརྗོད་པར་བྱ་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་མཚན་
མ་མེད་པ་ཉིད་དུ་ཡང་དག་པར་བརྗོད་པར་བྱ་བ་དང ། ཆོས་ཐམས་ཅད་མཚན་ཉིད་མེད་པ་ཉིད་དང ། དངོས་པོ་མེད་པ་ཉིད་དང ། མེད་པ་ཉིད་དང ། བརྫུན་པ་ཉིད་དང ། དབེན་པ་ཉིད་དང ། ངོ་བོ་ཉིད་མེད་པ་ཉིད་དང ། སྒྱུ་མ་ལྟ་བུ་ཉིད་དང ། རྨི་ལམ་ལྟ་བུ་ཉིད་དང ། རྣམ་པར་རྟོག་པ་མེད་པ་ཉིད་
དུ་ཡང་དག་པར་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་མི་འཕྲོགས་པའི་ཕྱིར་ཤས་ཆེར་ལྷག་པའི་བསམ་པ་རྣམ་པར་འཕེལ་བའི་ཆོས་ཅན་དུ་གྱུར་ཅིང ། གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། 
ཀྱེ་རྒྱལ་བའི་སྲས་དག་འདི་ནི་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་དེ་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་ནི་
དམིགས་པ་བཅུ་ཐོས་ན། སངས་རྒྱས་ཀྱི་ཆོས་རྣམས་ལས་ཕྱིར་མི་ལྡོག་སྟེ། བཅུ་གང་ཞེ་ན། འདི་ལྟ་སྟེ། སངས་རྒྱས་ཡོད་དོ་ཞེའམ་མེད་དོ་ཞེས་ཐོས་ཀྱང་སངས་རྒྱས་ཀྱི་ཆོས་རྣམས་ལས་ཕྱིར་མི་ལྡོག་པ་དང ། ཆོས་ཡོད་དོ་ཞེའམ་མེད་དོ་ཞེས་བྱ་བ་དང ། བྱང་ཆུབ་སེམས་དཔའ་ཡོད་དོ་ཞེ་

</font><hr>57-1-43b<br><font size=+2>

འམ་མེད་དོ་ཞེས་བྱ་བ་དང ། བྱང་ཆུབ་སེམས་དཔའི་སྤྱོད་པ་ཡོད་དོ་ཞེའམ་མེད་དོ་ཞེས་བྱ་བ་དང ། བྱང་ཆུབ་སེམས་དཔའ་བྱང་ཆུབ་སེམས་དཔའི་སྤྱོད་པ་ལ་ངེས་པར་འབྱུང་ངོ་ཞེའམ་ངེས་པར་མི་འབྱུང་ངོ་ཞེས་བྱ་བ་དང ། དེ་བཞིན་གཤེགས་པ་དག་འདས་སོ་ཞེའམ་མ་འདས་སོ་ཞེས་བྱ་བ་དང ། 
དེ་བཞིན་གཤེགས་པ་དག་བྱོན་ཏོ་ཞེའམ་བྱོན་པ་མ་ཡིན་ནོ་ཞེས་བྱ་བ་དང ། དེ་བཞིན་གཤེགས་པ་དག་ད་ལྟར་བྱུང་བའོ་ཞེའམ། ད་ལྟར་བྱུང་བ་མ་ཡིན་ནོ་ཞེས་བྱ་བ་དང ། སངས་རྒྱས་ཀྱི་ཡེ་ཤེས་ཟད་དོ་ཞེའམ། མི་ཟད་དོ་ཞེས་བྱ་བ་དང ། དུས་གསུམ་པོ་དག་མཚན་ཉིད་གཅིག་ཅེའམ། 
མཚན་ཉིད་གཅིག་པ་མ་ཡིན་ནོ་ཞེས་ཐོས་ཀྱང་སངས་རྒྱས་ཀྱི་ཆོས་རྣམས་ལས་ཕྱིར་མི་ལྡོག་པ་སྟེ། ཀྱེ་རྒྱལ་བའི་སྲས་དག་འདི་ནི་ཕྱིར་མི་ལྡོག་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་ཕྱིར་མི་ལྡོག་པའི་བྱང་ཆུབ་སེམས་དཔའ་དེ་ལ་ཆོས་ཀྱི་རྒྱུན་བཅུ་ཡང་དག་པར་
བརྗོད་པར་བྱ་སྟེ། བཅུ་གང་ཞེ་ན། འདི་ལྟ་སྟེ། ཆོས་ཐམས་ཅད་གཅིག་པ་ཉིད་དང ། ཐ་དད་པ་ཉིད་དུ་ཡང་དག་པར་བརྗོད་པར་བྱའོ། །མང་བ་དང་གཅིག་པ་ཉིད་དང ། ཡི་གེ་ལ་དོན་སྒྲོ་བཏགས་པ་དང ། དོན་ལ་ཡི་གེ་སྒྲོ་བཏགས་པ་དང ། དངོས་པོས་དངོས་པོ་མེད་པ་སྒྲོ་བཏགས་པ་
དང ། དངོས་པོ་མེད་པས་དངོས་པོ་སྒྲོ་བཏགས་པ་དང ། མཚན་མས་མཚན་མ་མེད་པ་སྒྲོ་བཏགས་པ་དང ། མཚན་མ་མེད་པས་མཚན་མ་སྒྲོ་བཏགས་པ་དང ། མཚན་ཉིད་ཀྱིས་མཚན་ཉིད་མེད་པ་སྒྲོ་བཏགས་པ་དང ། མཚན་ཉིད་མེད་པས་མཚན་ཉིད་སྒྲོ་བཏགས་པ་ཡང་དག་པར་
བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་ཤས་ཆེར་ཆོས་ཐམས་ཅད་ལ་མཁས་པ་ཡོངས་སུ་སྨིན་པའི་ཚུལ་ལ་ངེས་པར་འབྱུང་ཞིང་གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་
འདི་ནི་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་དེ་ལ་གཞོན་ནུར་གྱུར་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་གཞོན་ནུར་གྱུར་བའི་བྱང་ཆུབ་སེམས་དཔའ་ནི་ཆོས་རྟོགས་པ་བཅུ་དང་ལྡན་པ་ཡིན་

</font><hr>57-1-44a<br><font size=+2>

ཏེ། བཅུ་གང་ཞེ་ན། འདི་ལྟ་སྟེ། ལུས་ཀྱི་ལས་འབྲས་བུ་ཡོད་པ་དང་ལྡན་པ་ཡིན། ངག་གི་ལས་འབྲས་བུ་ཡོད་པ་དང་ལྡན་པ་ཡིན། ཡིད་ཀྱི་ལས་འབྲས་བུ་ཡོད་པ་དང་ལྡན་པ་ཡིན། སེམས་བསྐྱེད་པ་ཙམ་གྱིས་སྐྱེ་བ་མངོན་པར་སྒྲུབ་པ་ཡིན། སེམས་ཅན་གཞན་དག་དང ། གང་
ཟག་གཞན་རྣམས་ཀྱི་བསམ་བ་ཤེས་པར་བྱེད་ཅིང་མོས་པ་ལ་རྟོག་པ་ཡིན། སེམས་ཅན་གྱི་ཁམས་ཐ་དད་པ་རབ་ཏུ་ཤེས་པ་ཡིན། འདོད་པའི་ཁམས་ཐ་དད་པ་རབ་ཏུ་ཤེས་པ་ཡིན། གཟུགས་ཀྱི་ཁམས་ཐ་དད་པ་རབ་ཏུ་ཤེས་པ་ཡིན། གཟུགས་མེད་པའི་ཁམས་ཐ་དད་པ་རབ་ཏུ་ཤེས་པ་
ཡིན། དུས་ཇི་ལྟ་བ་བཞིན་དུ་འགྲོ་བའི་ཕྱིར་མངོན་པར་ཤེས་པ་མྱུར་བ་ཡིན་ཏེ། ཀྱེ་རྒྱལ་བའི་སྲས་དག་འདི་ནི་གཞོན་ནུར་གྱུར་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་གཞོན་ནུར་གྱུར་པའི་བྱང་ཆུབ་སེམས་དཔའ་དེ་ལ་ཆོས་མངོན་པར་སྒྲུབ་པ་བཅུ་ཡང་དག་པར་བརྗོད་
པར་བྱ་སྟེ། བཅུ་གང་ཞེ་ན། འདི་ལྟ་སྟེ། སངས་རྒྱས་ཀྱི་ཞིང་ཡོངས་སུ་ཤེས་པ་དང ། སངས་རྒྱས་ཀྱི་ཞིང་རབ་ཏུ་གཡོ་བར་བྱ་བ་དང ། སངས་རྒྱས་ཀྱི་ཞིང་བྱིན་གྱིས་བརླབ་པ་དང ། སངས་རྒྱས་ཀྱི་ཞིང་རྣམ་པར་དཔྱད་པ་དང ། སངས་རྒྱས་ཀྱི་ཞིང་དུ་འགྲོ་བ་དང ། འཇིག་རྟེན་གྱི་ཁམས་གྲངས་
མེད་པར་འགྲོ་བ་དང ། དྲི་བ་གྲངས་མེད་པ་དྲི་བ་དང ། ཡིད་ཀྱི་ལུས་མངོན་པར་སྒྲུབ་པ་དང ། སྒྲ་སྐད་ལ་སྦྱོར་བ་ཚད་མེད་པ་དང ། སེམས་བསྐྱེད་པས་སངས་རྒྱས་ཀྱི་ཞིང་གྲངས་མེད་པ་ཡོངས་སུ་འགྲུབ་པ་ཡང་དག་པར་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེ་ཤས་ཆེར་མངོན་པར་སྒྲུབ་
པ་མཁས་པ་ལ་སྦྱོར་ཞིང ། གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྦྱོར་གྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་གཞོན་ནུར་གྱུར་པའི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་དེ་ལ་རྒྱལ་
ཚབ་ཀྱི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་རྒྱལ་ཚབ་ཀྱི་བྱང་ཆུབ་སེམས་དཔའ་ནི་ཆོས་རྟོགས་པར་བྱ་བ་བཅུ་ལ་མཁས་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། སེམས་ཅན་གྱི་སྐྱེ་བ་རྟོགས་པར་བྱ་བ་ལ་མཁས་པ་ཡིན། ཉོན་མོངས་

</font><hr>57-1-44b<br><font size=+2>

པ་རྒྱུ་བ་རྟོགས་པར་བྱ་བ་ལ་མཁས་པ་ཡིན། བག་ཆགས་ཀྱི་མཚམས་སྦྱོར་བ་རྟོགས་པར་བྱ་བ་ལ་མཁས་པ་ཡིན། སྤྱོད་ཡུལ་ལ་སྦྱོར་བ་རྟོགས་པར་བྱ་བ་ལ་མཁས་པ་ཡིན། ཆོས་ཉིད་རྟོགས་པར་བྱ་བ་ལ་མཁས་པ་ཡིན། ཉེ་བར་སྤྱད་པ་རྟོགས་པར་བྱ་བ་ལ་མཁས་པ་ཡིན།
འཇིག་རྟེན་གྱི་ཁམས་རྣམ་པར་དབྱེ་བ་རྟོགས་པར་བྱ་བ་ལ་མཁས་པ་ཡིན། སྔོན་གྱི་མཐའ་དང་ཕྱི་མའི་མཐའ་དང ། ད་ལྟར་བྱུང་བ་ཤེས་པ་རྟོགས་པར་བྱ་བ་ལ་མཁས་པ་ཡིན། ཀུན་རྫོབ་ཀྱི་བདེན་པ་ལ་ངེས་པར་རྟོགས་པ་རྟོགས་པར་བྱ་བ་ལ་མཁས་པ་ཡིན་ཏེ། ཀྱེ་རྒྱལ་བའི་སྲས་
དག་འདི་ནི་རྒྱལ་ཚབ་ཀྱི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་རྒྱལ་ཚབ་ཀྱི་བྱང་ཆུབ་སེམས་དཔའ་དེ་ལ་གནས་བཅུ་ཡང་དག་པར་བརྗོད་པར་བྱ་སྟེ། བཅུ་གང་ཞེ་ན། འདི་ལྟ་སྟེ། རྒྱལ་པོའི་ཕོ་བྲང་འཁོར་ལ་མཁས་པ་ཡང་དག་པར་བརྗོད་པར་བྱའོ། །རྒྱལ་པོའི་ཕོ་བྲང་འཁོར་
ཀུན་དུ་སྤྱད་པ་དང ། རྒྱལ་པོའི་ཕོ་བྲང་འཁོར་དུ་འཇུག་པ་དང ། རྒྱལ་པོའི་ཕོ་བྲང་འཁོར་དུ་རྣམ་པར་དཔྱད་པ་དང ། ཆོས་ཀྱི་རྒྱལ་པོའི་དབང་བསྐུར་བ་དང ། ཆོས་ཀྱི་རྒྱལ་པོའི་བྱིན་གྱི་རླབས་དང ། ཆོས་ཀྱི་རྒྱལ་པོའི་ཕ་རོལ་གནོན་པ་དང ། ཆོས་ཀྱི་རྒྱལ་པོའི་གནས་དང ། ཆོས་ཀྱི་རྒྱལ་
པོའི་བཀའ་ལུང་ཡང་དག་པར་བརྗོད་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་དེའི་སེམས་ཤས་ཆེར་ཆོས་ཐམས་ཅད་ལ་སྒྲིབ་པ་མེད་པར་བསྒྲུབ་པ་ལ་འཇུག་ཅིང་གོང་དུ་གནས་གང་དག་ཐོས་པའི་གནས་དེ་དག་ལ་ཡང་བདག་ཉིད་སྒྲུབ་ཀྱི་གཞན་གྱི་དྲིང་ལ་མི་འཇོག་པ་ཐོབ་པའི་ཕྱིར་
ཏེ། ཀྱེ་རྒྱལ་བའི་སྲས་དག་འདི་ནི་རྒྱལ་ཚབ་ཀྱི་བྱང་ཆུབ་སེམས་དཔའ་རྣམ་པར་གཞག་པའོ། །ཀྱེ་རྒྱལ་བའི་སྲས་དག་དེ་ལ་དབང་བསྐུར་བ་ཐོབ་པའི་བྱང་ཆུབ་སེམས་དཔའ་རྣམ་པར་གཞག་པ་གང་ཞེ་ན། ཀྱེ་རྒྱལ་བའི་སྲས་དག་འདི་ལ་དབང་བསྐུར་བ་ཐོབ་པའི་བྱང་ཆུབ་
སེམས་དཔའ་ནི་ཤེས་པ་མངོན་པར་སྒྲུབ་པ་བཅུ་དང་ལྡན་པ་ཡིན་ཏེ། བཅུ་གང་ཞེ་ན། འདི་ལྟ་སྟེ། འཇིག་རྟེན་གྱི་ཁམས་གྲངས་མེད་པ་རབ་ཏུ་གཡོ་བར་བྱེད་པ་མང་བ་ཡིན། འཇིག་རྟེན་གྱི་ཁམས་གྲངས་མེད་པ་བྱིན་གྱིས་རློབ་པ་མང་བ་ཡིན། འཇིག་རྟེན་གྱི་ཁམས་གྲངས་

</font><hr>57-1-45a<br><font size=+2>

མེད་པ་སེམས་གཅིག་གིས་འདའ་བར་བྱེད་པ་མང་བ་ཡིན། འཇིག་རྟེན་གྱི་ཁམས་གྲངས་མེད་པ་ཡོངས་སུ་སྦྱོང་བ་བྱེད་པ་མང་བ་ཡིན། སེམས་ཅན་གྲངས་མེད་པའི་སེམས་གཅིག་གིས་རྣམ་པར་རིག་པར་བྱེད་པ་མང་བ་ཡིན། འཇིག་རྟེན་གྱི་ཁམས་གྲངས་མེད་པ་
ལ་རྣམ་པར་ལྟ་བ་མང་བ་ཡིན། སེམས་ཅན་གྲངས་མེད་པའི་སེམས་ཀྱི་སྤྱོད་པ་ལ་སེམས་གཅིག་གིས་རྣམ་པར་དཔྱོད་པ་ལ་མཁས་པ་ཡིན། སེམས་ཅན་གྲངས་མེད་པའི་དབང་པོ་སེམས་གཅིག་གིས་རྟོགས་པར་བྱེད་པ་ལ་མཁས་པ་ཡིན། སེམས་ཅན་གྲངས་མེད་པ་
འདུལ་བ་ལ་མཁས་པ་ཡིན། སེམས་ཅན་གྲངས་མེད་པ་ཐམས་ཅད་མཁྱེན་པ་ཉིད་ཀྱི་སེམས་ལ་འཛུད་པ་ལ་མཁས་པ་ཡིན་ནོ། །ཀྱེ་རྒྱལ་བའི་སྲས་དག་རྒྱལ་ཚབ་ཀྱི་ས་ལ་གནས་པའི་བྱང་ཆུབ་སེམས་དཔའ་མན་ཆད་གང་གིས་ཀྱང་དབང་བསྐུར་བ་ཐོབ་པའི་བྱང་ཆུབ་སེམས་
དཔའ་དེའི་ལུས་ཀྱི་ལས་ཤེས་པར་མི་ནུས། ངག་གི་ལས་ཤེས་པར་མི་ནུས། ཡིད་ཀྱི་ལས་ཤེས་པར་མི་ནུས། རྫུ་འཕྲུལ་ཤེས་པར་མི་ནུས། རྫུ་འཕྲུལ་རྣམ་པར་ལྟ་བ་ཤེས་པར་མི་ནུས། འདས་པའི་དུས་ལ་རྣམ་པར་ལྟ་བ་ཤེས་པར་མི་ནུས་ཤིང་མངོན་པར་འདུ་བྱེད་པ་ཤེས་
པར་མི་ནུས། བློས་རྣམ་པར་ལྟ་བ་ཤེས་པར་མི་ནུས། སེམས་ཀྱི་ཡུལ་ཤེས་པར་མི་ནུས། ཡེ་ཤེས་ཀྱི་སྤྱོད་ཡུལ་ཤེས་པར་མི་ནུས་ཏེ། ཀྱེ་རྒྱལ་བའི་སྲས་དག་འདི་ནི་དབང་བསྐུར་བ་ཐོབ་པའི་བྱང་ཆུབ་སེམས་དཔའོ། །ཀྱེ་རྒྱལ་བའི་སྲས་དག་དབང་བསྐུར་བ་ཐོབ་པའི་
བྱང་ཆུབ་སེམས་དཔའ་དེ་ལ་སངས་རྒྱས་བཅོམ་ལྡན་འདས་དག་གནས་བཅུ་ཡང་དག་པར་བརྗོད་པ་མཛད་དེ། བཅུ་གང་ཞེ་ན། འདི་ལྟ་སྟེ། དུས་གསུམ་ཤེས་པ་དང ། སངས་རྒྱས་ཀྱི་ཆོས་ཤེས་པ་དང ། ཆོས་ཀྱི་དབྱིངས་དབྱེར་མེད་པ་ཤེས་པ་དང ། ཆོས་ཀྱི་དབྱིངས་
མཐའ་དང་དབུང་མེད་པ་དང ། འཇིག་རྟེན་གྱི་ཁམས་ཐམས་ཅད་རྒྱས་པར་དགང་བ་དང ། འཇིག་རྟེན་གྱི་ཁམས་ཐམས་ཅད་སྣང་བར་བྱེད་པ་དང ། འཇིག་རྟེན་གྱི་ཁམས་ཐམས་ཅད་བྱིན་གྱིས་བརླབ་པ་དང ། སེམས་ཅན་ཐམས་ཅད་ཡོངས་སུ་ཤེས་པ་དང ། ཆོས་ཐམས་ཅད་

</font><hr>57-1-45b<br><font size=+2>

མངོན་པར་ཤེས་པ་དང ། སངས་རྒྱས་ཀྱི་ཡེ་ཤེས་མཐའ་ཡས་པ་བརྗོད་པ་མཛད་དོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་ཤས་ཆེར་ཐམས་ཅད་མཁྱེན་པ་ཉིད་ལ་སེམས་འཇུག་པའི་ཕྱིར་ཏེ། ཀྱེ་རྒྱལ་བའི་སྲས་དག་འདི་ནི་དབང་བསྐུར་བ་ཐོབ་པའི་བྱང་ཆུབ་སེམས་དཔའ་རྣམ་པར་
གཞག་པའོ། །བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བྱང་ཆུབ་སེམས་དཔའ་རྣམ་པར་གཞག་པ་བཅུ་བཤད་མ་ཐག་ཏུ་དེ་ནས་དེའི་ཚེ་སངས་རྒྱས་ཀྱི་མཐུས་ཕྱོགས་བཅུའི་ཕྱོགས་རེ་རེར་ཡང་སངས་རྒྱས་ཀྱི་
ཞིང་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་དུ་རབ་ཏུ་གཡོས་སོ། །འགུལ། རབ་ཏུ་འགུལ། ཀུན་དུ་རབ་ཏུ་འགུལ་ཏོ། །ལྡེག་།རབ་ཏུ་ལྡེག་།ཀུན་དུ་རབ་ཏུ་ལྡེག་གོ། །འུར་འུར་རབ་ཏུ་འུར་འུར། ཀུན་དུ་རབ་ཏུ་
འུར་འུར་རོ། །ཆེམ་ཆེམ། རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ་མོ། །འཁྲུགས། རབ་ཏུ་འཁྲུགས། ཀུན་དུ་རབ་ཏུ་འཁྲུགས་སོ། །སངས་རྒྱས་ཀྱི་མཐུ་དང ། ཆོས་ཉིད་ཐོབ་པས་ལྷའི་མེ་ཏོག་གི་སྤྲིན་གྱི་ཆར་ཡང་མངོན་པར་བབ་བོ། །ལྷའི་བདུག་པའི་སྤྲིན་གྱི་ཆར་ཡང་མངོན་
པར་བབ་པོ། །ལྷའི་སྤོས་ཀྱི་སྤྲིན་གྱི་ཆར་ཡང་མངོན་པར་བབ་པོ། །ལྷའི་ཕྱེ་མའི་སྤྲིན་གྱི་ཆར་དང ། ལྷའི་ཕྲེང་བའི་སྤྲིན་གྱི་ཆར་དང ། ལྷའི་གོས་ཀྱི་སྤྲིན་གྱི་ཆར་དང ། ལྷའི་རིན་པོ་ཆེའི་སྤྲིན་གྱི་ཆར་དང ། ལྷའི་པད་མའི་སྤྲིན་གྱི་ཆར་དང ། ལྷའི་རྒྱན་ཕྲེང་གི་སྤྲིན་གྱི་ཆར་དང ། ལྷའི་རྒྱན་
གྱི་སྤྲིན་གྱི་ཆར་ཡང་མངོན་བར་བབ་པོ། །ལྷའི་སིལ་སྙན་རྣམས་ཀྱང་མ་དཀྲོལ་བར་སྒྲ་བྱུང་ངོ ། །ལྷའི་སྣང་བ་ཡང་རབ་ཏུ་བྱུང་ངོ ། །ལྷའི་ང་རོ་ཡང་གྲག་གོ། །གླིང་བཞི་པ་འདིར་རི་རབ་ཀྱི་རྩེ་མོར་ལྷའི་དབང་པོའི་ཁང་པར་ཇི་ལྟ་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་དུ་
ཡང་ཆོས་བསྟན་པ་འདི་ཁྱབ་པར་གྱུར་ནས་བྱུང་སྟེ་ལྷག་ཆད་མེད་དོ། །ཚིག་འབྲུ་འདི་དག་ཉིད་ཀྱིས་དོན་འདི་ཉིད་སྟོན་ཏོ། །སངས་རྒྱས་ཀྱི་མཐུས་སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཕྲ་རབ་ཀྱི་རྡུལ་སྙེད་ཀྱི་འཇིག་རྟེན་གྱི་ཁམས་རྣམས་ཀྱི་ཕ་རོལ་ནས་བྱང་ཆུབ་སེམས་དཔའ་

</font><hr>57-1-46a<br><font size=+2>

སངས་རྒྱས་ཀྱི་ཞིང་སྟོང་ཕྲག་བཅུའི་རྡུལ་ཕྲ་རབ་སྙེད་ལྷགས་ཏེ། ཕྱོགས་བཅུ་རྒྱས་པར་བཀང་ནས་འདི་སྐད་ཅེས་འཛེར་ཏོ། །ཀྱེ་རྒྱལ་བའི་སྲས་དེ་ལྟར་ཁྱོད་བྱང་ཆུབ་སེམས་དཔའི་ཆོས་ཉིད་འདི་སྟོན་པ་ལེགས་སོ་ལེགས་སོ། །ཀྱེ་རྒྱལ་བའི་སྲས་བདག་ཅག་
ཀྱང་མིང་ཆོས་ཀྱི་བློ་གྲོས་ཞེས་བྱ་བ་ཤ་སྟག་སྟེ། འཇིག་རྟེན་གྱི་ཁམས་ཆོས་ཀྱི་སྤྲིན་ཅེས་བྱ་བ་དག་ནས་དེ་བཞིན་གཤེགས་པའི་མཚན་ཆོས་ཀྱི་བློ་གྲོས་བཟང་པོ་ཞེས་བྱ་བ་ཤ་སྟག་གི་ཐད་ནས་འདིར་ཕྱིན་ཏོ། །སངས་རྒྱས་ཀྱི་བྱིན་གྱི་རླབས་ཀྱིས་དེ་དག་ཐམས་ཅད་དུ་ཆོས་
བསྟན་པ་འདི་བྱུང་སྟེ། འཁོར་འདི་ལྟ་བུ་དག་གི་ནང་དུ་ཚིག་འབྲུ་འདི་དག་གིས་དོན་འདི་ཉིད་སྟོན་ཏེ། ལྷག་ཆད་མེད་དོ། །ཀྱེ་རྒྱལ་བའི་སྲས་བདག་ཅག་ནི་ཁྱོད་ཀྱི་དབང་དུ་གྱུར་ཏེ། སངས་རྒྱས་ཀྱི་མཐུས་འཇིག་རྟེན་གྱི་ཁམས་འདིར་ཕྱིན་ཏོ། །བདག་ཅག་ཇི་ལྟར་འཇིག་རྟེན་
གྱི་ཁམས་འདིར་ཕྱིན་པ་དེ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཀྱི་གླིང་བཞི་པ་ཐམས་ཅད་དུ་རི་རབ་ཀྱི་རྩེ་མོར་ལྷའི་དབང་པོའི་ཁང་པ་རྣམས་སུ་ཡང་བྱང་ཆུབ་སེམས་དཔའ་སངས་རྒྱས་ཀྱི་ཞིང་བཅུའི་རྡུལ་ཕྲ་རབ་ཀྱི་རྡུལ་སྙེད་ཕྱིན་པར་གྱུར་ཏོ།། །།
བམ་པོ་གཉིས་པ། དེ་ནས་སངས་རྒྱས་ཀྱི་མཐུས་བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱིས་ཕྱོགས་བཅུར་རྣམ་པར་བལྟས་ཏེ། ཐམས་ཅད་དང་ལྡན་པའི་འཁོར་དང ། ཆོས་ཀྱི་དབྱིངས་ལ་ཡང་རྣམ་པར་བལྟས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རང་བྱུང་
ཤིན་ཏུ་རྣམ་དག་བློ་མངའ་བ། །མཛེས་ཤིང་གཟུགས་ཀྱི་སྟོབས་དང་ལྡན་གྱུར་པ། །བསྙེན་དཀའ་མཚན་གྱིས་བརྒྱན་པ་མཐོང་གྱུར་ནས། །བྱང་ཆུབ་དོན་དུ་བརྟན་པ་སེམས་འཇོག་བྱེད། །དོ་ཟླ་མེད་པའི་རྫུ་འཕྲུལ་སྟོབས་རྣམས་དང ། །ཀུན་བརྗོད་བཟང་དང་རྗེས་སུ་བསྟན་པ་དང ། །
སྡུག་བསྔལ་བཟོད་རླག་འཇིག་རྟེན་འགྲོ་མཐོང་ནས། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཡོན་ཏན་ཀུན་གྱི་འབྱུང་གནས་དེ་བཞིན་གཤེགས། །ཀུན་དུ་བཟང་པོའི་ཡོན་ཏན་ཐོས་གྱུར་ནས། །ནམ་མཁའི་དབྱིངས་འདྲ་འགྱུར་བ་མེད་པ་ཡི། །བྱང་ཆུབ་དོན་དུ་བརྟན་པ་སེམས་

</font><hr>57-1-46b<br><font size=+2>

འཇོག་བྱེད། །གནས་རྣམས་ཇི་སྙེད་གང་དག་ཡོད་གྱུར་དང ། །རང་བཞིན་གནས་པའི་གནས་རྣམས་གཞན་དག་ཀྱང ། །གཞན་མིན་དངོས་པོར་རྣམ་པར་རྟོགས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །འདས་དང་མ་འོངས་ད་ལྟར་དུས་དག་ན། །དགེ་དང་མི་དགེའི་
ལས་རྣམས་གང་ཡོད་པ། །དེ་དག་རྒྱུ་རྣམས་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཏིང་འཛིན་བསམ་གཏན་རྣམ་ཐར་སྤྱོད་པ་དང ། །དེ་བཞིན་སྙོམས་འཇུག་རྣམ་དག་མཐར་ཐུག་པ། །དེ་དག་གནས་སྐབས་རྟོགས་པར་བྱ་བའི་ཕྱིར། །བྱང་
ཆུབ་དོན་དུ་བརྟན་པ་སེམས་འདི་འཇོག་།འཇིག་རྟེན་བརྩོན་འགྲུས་སྟོབས་དང་དབང་པོ་རྣམས། །ཅི་འདྲ་ཅི་འདྲ་དེ་ཡི་དེ་དང་དེར། །རིམ་པ་དེ་དག་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །འཇིག་རྟེན་ཀུན་གྱི་མོས་པ་ཅི་འདྲ་དང ། །ལྷག་པའི་བསམ་
བ་ཐ་དད་རྣམ་གསུམ་ནས། །བསྟན་བཅོས་དུ་མ་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །རྣམ་པ་སྣ་ཚོགས་རྣམ་པ་དུ་མའི་ཁམས། །གང་དག་འཇིག་རྟེན་གསུམ་འདིར་ཡོད་ཀུན་གྱི། །ཁམས་ཀྱི་རང་བཞིན་རྟོགས་པར་བྱ་བའི་ཕྱིར། །བྱང་ཆུབ་
དོན་དུ་བརྟན་པ་སེམས་དེ་འཇོག་།ཆོས་འདིར་ཀུན་དུ་འགྲོ་བར་གང་གྱུར་ཅིང ། །དགེ་བའི་འཇུག་པ་གང་ཡང་རབ་འཇུག་པ། །ཡང་དག་རང་བཞིན་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཞིང་རྣམས་ཐམས་ཅད་ཇི་ལྟར་འབྱུང་བ་དང ། །སེམས་
ཅན་ཇི་ལྟར་ས་ལས་འབྱུང་འགྱུར་ཞེས། །ཆགས་མེད་མིག་ནི་རབ་ཏུ་དབྱེ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།འདས་པའི་དུས་དང་ད་ལྟར་བྱུང་དུས་ན། །སེམས་ཅན་རིས་དངོས་མཚན་ཉིད་གང་ཡོད་དང ། །སྔོན་གྱི་གནས་རྣམས་རྟོགས་པར་བྱ་
བའི་ཕྱིར། །བྱང་ཆུབ་དོན་དུ་བརྟན་བ་སེམས་འདི་འཇོག་།ཇི་ལྟར་འགྲོ་བར་སེམས་ཅན་འཆིང་བྱེད་པ། །ཀུན་དུ་སྦྱོར་བ་འཇིག་རྟེན་གང་ཡོད་པའི། །ཉོན་མོངས་ཟད་པ་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།འཇིག་རྟེན་གསུམ་ན་ཐ་

</font><hr>57-1-47a<br><font size=+2>

སྙད་གང་བཏགས་དང ། །ངག་ལམ་སྔགས་ཚུལ་སྤྱོད་པ་གང་ཡོད་པ། །བརྡ་ཡི་བདེན་པ་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།ཆོས་རྣམས་ཐམས་ཅད་བརྗོད་དུ་མེད་པ་སྟེ། །སྟོང་པ་མི་གཡོ་རང་བཞིན་ངོ་བོ་ཉིད། །དོན་དམ་
བདེན་པ་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཞིང་རྣམས་དག་ཏུ་ས་གཡོ་བསྟན་པ་དང ། །རྒྱ་མཚོ་དག་ཀྱང་རྣམ་པར་འཁྲུགས་པ་དང ། །དེ་བཞིན་གཤེགས་ཀྱི་རྫུ་འཕྲུལ་བསྟན་པའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་
བྱེད། །འོད་ཟེར་རྩེ་མོ་རེ་ལས་འོད་ཟེར་རྣམས། །དེ་བཞིན་ཕྱོགས་བཅུ་ཀུན་དུ་རབ་ཏུ་འགྱེད། །དེ་དག་འོད་གཅིག་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཞིང་མང་བསམ་གྱིས་མི་ཁྱབ་གང་ཡོད་པ། །དེ་དག་རང་གི་ལག་ཏུ་མངོན་སྤྲུལ་
ཏེ། །སྒྱུ་མའི་ཚུལ་དེ་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཞིང་རྣམས་ཇི་ལྟར་དེ་བཞིན་སེམས་ཅན་ཀུན། །གནོད་པ་མེད་པར་ལག་པའི་མཐིལ་བཞག་ནས། །ཆོས་རྣམས་སྲོག་མེད་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་
སེམས་འདི་འཇོག་།རྒྱ་མཚོ་རྣམས་ན་ཇི་སྙེད་ཆུ་ཡོད་པ། །སྐྲ་རྩེའི་ཐིགས་པའི་ནང་དུ་འཇུག་པར་བྱེད། །མ་ལུས་མཐར་ཐུག་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།ཞིང་རྣམས་ཀུན་ན་ཕྲ་རབ་རྡུལ་གྱི་བག་།གང་ཡོད་དེ་དག་མ་ལུས་བགྲང་བྱེད་
ཅིང ། །ཕྲ་རབ་རྡུལ་གྲངས་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །འཇིག་རྟེན་འདི་ན་འདས་དང་དེ་བཞིན་དུ། །མ་འོངས་སྲེག་པའི་བསྐལ་པས་འཇིགས་པ་རྣམས། །བསྐལ་པ་ཟད་པ་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་
སེམས་འདི་འཇོག་།དུས་གསུམ་དག་གི་དེ་བཞིན་གཤེགས་རྣམས་དང ། །སྟོན་པ་རང་རྒྱལ་ཐོས་ལས་བྱུང་རྣམས་ཀྱི། །ཆོས་ཀྱི་རང་བཞིན་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།བརྗོད་དུ་མེད་པའི་འཇིག་རྟེན་ཁམས་ཀྱི་རྣམས། །སྐྲ་ཡིས་

</font><hr>57-1-47b<br><font size=+2>

བཅིངས་ནས་མ་ལུས་སྲང་ལ་འདེབས། །དངོས་པོའི་རང་བཞིན་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།ཁོར་ཡུག་རི་བོ་བསམ་གྱིས་མི་ཁྱབ་པ། །སྐྲ་ཡིས་བཅིངས་ནས་མ་ལུས་སྲང་ལ་འདེབས། །རགས་དང་ཕྲ་བ་རྟོགས་པར་བྱ་བའི་ཕྱིར། །བྱང་
ཆུབ་དོན་དུ་བརྟན་པ་སེམས་འདི་འཇོག་།ལུས་པ་མེད་པའི་འཇིག་རྟེན་ཁམས་རྣམས་སུ། །སྐད་ཅིག་གཅིག་ལ་དབྱངས་ཀྱིས་གོ་བར་བྱེད། །དབྱངས་ཀྱི་ཡན་ལག་དག་པ་བསྟན་པའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།འཇིག་རྟེན་ཀུན་གྱི་སྒྲ་རྣམས་ཅི་
འདྲ་བ། །སྐད་ཅིག་གཅིག་ལ་སྐད་ཅིག་རྗོད་བྱེད་ཅིང ། །ཞི་བའི་རང་བཞིན་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།འཇིག་རྟེན་གསུམ་པོ་མ་ལུས་རྟོགས་པར་བྱེད། །སེམས་ཅན་ཀུན་གྱིས་རབ་ཏུ་རྣམ་པར་ཤེས། །ལྕེ་ཡངས་རྒྱ་ཆེན་རྟོགས་པར་
བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཞིང་རྣམས་ཀུན་དུ་བརྗོད་དང་འདྲ་བར་ཡང ། །སྐད་ཅིག་གཅིག་ལ་ལྟ་གྱུར་སེལ་བར་བྱེད། །རྣམ་རྟོག་ཆོས་རྣམས་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །འདིར་ནི་ཞིང་རྣམས་
ཐམས་ཅད་མ་ལུས་པར། །དེ་བཞིན་གཤེགས་པས་གང་ཞིང་རང་བྱུང་གི། །ཆོས་རྣམས་སྐད་ཅིག་གཅིག་ལ་རྟོགས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།རྡུལ་ཕྲན་ཐ་དད་ལྟ་བུར་འཇིག་རྟེན་ཁམས། །རྣམ་པ་ཀུན་དུ་མངོན་པར་སྤྲུལ་བྱེད་ཅིང ། །ཡིད་ལས་བྱུང་
བདེ་དག་རྟོགས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །འདས་དང་དེ་བཞིན་མ་བྱོན་སངས་རྒྱས་རྣམས། །ཇི་སྙེད་གང་དག་འཇིག་རྟེན་བཞུགས་སོ་ཅོག་།སེམས་ཀྱི་སྐད་ཅིག་གཅིག་ལ་རྟོགས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཚིག་གཅིག་
བརྗོད་ཀྱང་བསམ་གྱིས་མི་ཁྱབ་པའི། །བསྐལ་པ་ཟད་ཀྱི་དེ་ལ་ཉམས་པ་མེད། །ཚིག་རབ་དབྱེ་བ་རྟོགས་པར་བྱ་བའི་ཕྱིར། །བྱང་ཆུབ་དོན་དུ་བརྟན་པ་སེམས་འདི་འཇོག་།ཕྱོགས་བཅུ་རྣམས་ཀྱི་འཇིག་རྟེན་ཐམས་ཅད་ཀྱི། །འགྲོ་བ་ཅི་འདྲ་ལྡོག་པ་ཅི་འདྲ་བ། །སེམས་ཀྱི་སྐད་ཅིག་

</font><hr>57-1-48a<br><font size=+2>

གཅིག་ལ་རྟོགས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་འཇོག་བྱེད། །ཕྱོགས་རྣམས་ཀུན་དུ་འགྲོ་ཡང་ལུས་ཀྱིས་སམ། །ངག་གམ་ཡིད་ཀྱིས་གང་དུའང་ཆགས་པ་མེད། །དུས་གསུམ་སྟོང་པ་ཉིད་དུ་རྟོགས་བྱའི་ཕྱིར། །བྱང་ཆུབ་དོན་དུ་བརྟན་པ་སེམས་
འདི་འཇོག་།བྱང་ཆུབ་སེམས་ནི་ཇི་ལྟར་བསྐྱེད་པ་བཞིན། །གཞལ་ཡས་བསྐལ་པར་ཕྱོགས་སུ་རྒྱུ་བྱེད་ཅིང ། །སངས་རྒྱས་སྤྱན་སྔར་མཆོད་པར་བྱའོ་ཞེས། །འདི་ནི་མི་ལྡོག་རྣམས་ཀྱི་བསྟན་པ་ཡིན། །ཕྱོགས་བཅུ་དག་གི་འཇིག་རྟེན་ཐ་དད་པར། །འཇིག་རྟེན་བདག་པོར་རྒྱལ་
བའི་སྲས་འགྱུར་བ། །གང་ཡང་རུང་བ་དམ་པ་སྒྲོག་པར་བྱེད། །འདི་ནི་མི་ལྡོག་རྣམས་ཀྱི་བསྟན་པ་ཡིན། །བྱང་ཆུབ་དོན་དུ་སྲིད་པར་སྤྱད་སྤྱོད་ཚེ། །བྱང་ཆུབ་སེམས་དཔའི་བདེ་སྦྱོར་གང་ཡིན་པ། །དེ་ཡི་བསྔགས་པ་རྟག་ཏུ་རྗོད་པར་བྱེད། །འདི་ནི་མི་ལྡོག་རྣམས་ཀྱི་བསྟན་པ་ཡིན། །
ཆོས་མཆོག་ཆོས་རབ་ཕུལ་དུ་ཕྱིན་པ་དང ། །ཁྱད་པར་འཕགས་ཆོས་བླ་མེད་གང་ཡོད་པ། །དེ་དག་བྱང་ཆུབ་སེམས་དཔའ་རྣམས་ལ་སྟོན། །འདི་ནི་མི་ལྡོག་རྣམས་ཀྱི་བསྟན་པ་ཡིན། །ཡོན་ཏན་ཀུན་ལྡན་དེ་བཞིན་གཤེགས་པ་ཡི། །ཚེ་ཉིད་འདི་ན་ཡོད་ཀྱི་གཞན་མེད་པ། །
དེ་ལ་བྱང་ཆུབ་སེམས་དཔའ་སྦྱོར་བར་བྱེད། །འདི་ནི་མི་ལྡོག་རྣམས་ཀྱི་བསྟན་པ་ཡིན། །ཚད་མེད་གཞལ་ཡས་བསམ་གྱིས་མི་ཁྱབ་པའི། །སངས་རྒྱས་རྣམས་དང་ཕྲད་གྱུར་ཅི་འདྲ་བ། །བྱང་ཆུབ་སེམས་དཔའ་དེ་ལ་སྟོན་པར་བྱེད། །འདི་ནི་མི་ལྡོག་རྣམས་ཀྱི་བསྟན་པ་
ཡིན། །ཏིང་འཛིན་གང་དག་ཇི་སྙེད་ཡོད་པ་དང ། །དེ་བཞིན་ཏིང་འཛིན་རྒྱུད་ཀྱི་རྣམ་པ་དག་།དེ་དག་བདེ་གཤེགས་སྲས་ལ་རྗོད་པར་བྱེད། །འདི་ནི་མི་ལྡོག་རྣམས་ཀྱི་བསྟན་པ་ཡིན། །འཁོར་བའི་འཁོར་ལོ་རྣམ་པར་ཟློག་པ་དང ། །དམ་པའི་ཆོས་ཀྱི་འཁོར་ལོ་རབ་བསྐོར་བ། །
འཇིག་རྟེན་ཀུན་གྱིས་རྟག་ཏུ་མ་བསྐོར་བ། ། བྱང་ཆུབ་སེམས་དཔའ་རྣམས་ལ་དེ་བསྟན་བྱ། །ཤིན་ཏུ་སྡུག་བསྔལ་འཇིག་རྟེན་ཐམས་ཅད་དང ། །ངན་སོང་ས་རྣམས་དག་ཏུ་གནོད་གྱུར་པའི། །གནས་དང་སྐྱབས་དང་དཔུང་གཉེན་གྱུར་པ་དེ། །བྱང་ཆུབ་སེམས་དཔའ་རྣམས་

</font><hr>57-1-48b<br><font size=+2>

ལ་བསྟན་པར་བྱ། །གང་ཞིག་བྱང་ཆུབ་དོན་དུ་སེམས་འཇོག་པ། །དེ་ནི་དང་པོའི་བྱང་ཆུབ་སེམས་དཔར་བསྟན། །བསླབ་པའི་གདམས་ངག་ཇི་བཞིན་ངེས་བྱས་པ། །ཇི་བཞིན་རྣམ་པར་གཞག་འདི་དེ་ཡི་ཡིན། །ནད་བྲལ་རྣམས་ཀྱི་བསྟན་པ་ཇི་བཞིན་དུ། །འཇིག་རྟེན་ཀུན་ལ་
ཕན་པ་བྱ་བའི་ཕྱིར། །དེ་ལྟར་ཐོག་མ་སུ་ཞིག་སེམས་བསྐྱེད་པ། །འདི་ནི་གཉིས་ཏེ་དང་པོའི་ལས་ཅན་ནོ། །ཕན་པ་ཐོབ་བྱེད་སེམས་དང་རབ་དང་བདེ། །གཉེན་དང་སྡུག་དང་དེ་བཞིན་སྡུད་སེམས་དང ། །ཀུན་དུ་བསྲུང་བའི་སེམས་དང་སྙོམས་པའི་སེམས། །སློབ་དཔོན་སེམས་
དང་སྙོམས་པར་སྟོན་པའི་སེམས། །དེ་འདྲ་དག་ལ་སེམས་གནས་གྱུར་པ་དེ། །ལུང་ནོད་ཁ་ཏོན་བྱེད་པར་སྦྱར་བར་བྱ། །མང་དུ་ཐོས་ནས་དགོན་པར་གནས་སུ་གཞུག་།དབེན་པར་གྱུར་ནས་དགེ་བཤེས་སྟེན་དུ་གཞུག་།དགེ་བཤེས་རྣམས་ལ་བཀའ་བློ་བདེ་བར་བྱ། །དུས་
ཚོད་ཤེས་ལ་ཤེས་བཞིན་ལྡན་པར་བྱ། །དུས་ཤེས་གྱུར་ནས་ཤིན་ཏུ་འཇིགས་མེད་བྱ། །འཇིགས་པ་མེད་ནས་དོན་ལ་བརྩོན་པར་བྱ། །དོན་ཤེས་གྱུར་ནས་དེ་བཞིན་ཆོས་བརྗོད་བྱ། །ཆོས་རྣམས་ཀུན་ལ་རྨོངས་གྱུར་མེད་པར་བྱ། །རྨོངས་པ་མེད་པར་གྱུར་ནས་རྒྱལ་བའི་སྲས། །
ལེགས་པར་གསུངས་པའི་ཆོས་ལ་གནས་པར་བྱ། །འདི་ནི་དང་པོའི་ལས་ཅན་བརྗོད་པ་སྟེ། །བྱང་ཆུབ་ཞུགས་པའི་བྱང་ཆུབ་སེམས་དཔའ་ཡིན། །འདི་ནི་གདམས་པ་འདི་ནི་བསྟན་པ་སྟེ། །འདི་ལ་སུ་སློབ་དེ་ནི་སངས་རྒྱས་སྲས། །བྱང་ཆུབ་སེམས་དཔའ་གསུམ་པ་གང་ཡིན་
པ། །ཆོས་ཀྱི་རྒྱལ་པོའི་བསྟན་ལ་རབ་ཏུ་སྦྱོར། །མི་རྟག་ཉིད་དང་སྡུག་བསྔལ་སྟོང་ཉིད་དང ། །བདག་མེད་པ་དང་གཡོ་བ་མེད་པ་དང ། །དེ་བཞིན་ཆོས་འདི་ཐམས་ཅད་བདག་མིན་དང ། །མངོན་པར་འདུ་བྱེད་མེད་དང་དབེན་པ་དང ། །འདི་དག་ཐམས་ཅད་རྟོག་པ་མེད་ཡིན་པར། །
བྱང་ཆུབ་སེམས་དཔའ་དེ་ལྟར་རྟོག་པར་བྱེད། །སེམས་ཅན་ཁམས་དང་ཆོས་ཀྱི་དབྱིངས་ལ་ཡང ། །བརྟག་པར་བྱ་ཕྱིར་དེ་ནི་གཟེངས་ཡང་བསྟོད། །འཇིག་རྟེན་ཁམས་ནི་མཐའ་ཡས་མུ་མེད་ཅེས། །དེ་ལྟར་དེ་ནི་དཔྱོད་དུ་གཞུག་པར་བྱ། །འདི་ན་ས་དང་ཆུ་དང་དེ་བཞིན་མེ། །

</font><hr>57-1-49a<br><font size=+2>

རླུང་དང་ནམ་མཁའ་ཇི་སྙེད་ཡོད་པ་དང ། །ཕྱོགས་ན་འདོད་དང་གཟུགས་དང་གཟུགས་མེད་པ། །དེ་དག་རྣམས་ལ་དེ་ནི་དཔྱོད་དུ་གཞུག་།རྒྱ་ཆེན་ཆོས་རྣམས་ཀུན་དང་ཁམས་རྣམས་ཀྱི། །རང་བཞིན་མ་ལུས་མཐར་ཐུག་བརྟག་བྱ་བ། །དེ་ནི་སངས་རྒྱས་སྲས་
པོ་སྦྱོར་བྱེད་ལ། །ཕན་པར་བྱ་ཕྱིར་རྗེས་སུ་བསྟན་པ་ཡིན། །བྱང་ཆུབ་སེམས་དཔའ་སྐྱེ་བར་གང་སྐྱེས་པ། །བསྟན་ལ་སྐྱེས་ཤིང་རབ་ཏུ་འབྱུང་བར་བྱེད། །བློ་ལྡན་དེ་ནི་དངོས་མེད་དངོས་པོ་རྟོགས། །དམ་ཆོས་གནས་སུ་སྐྱེས་ཏེ་ལེགས་པར་སྐྱེས། །དེ་ནི་རང་གི་ས་ལས་ཡོངས་
མི་ལྡོག་།སངས་རྒྱས་མཐར་ཐུག་ཡིན་པར་འཛིན་པ་སྐྱེ། །རྟག་ཏུ་ཆོས་ལ་ངེས་པར་སེམས་དང་ལྡན། །སེམས་ཅན་རང་བཞིན་ཅི་འདྲར་རྣམ་པར་དཔྱོད། །ལས་དང་འཇིག་རྟེན་དག་དང་ཞིང་རྣམས་དང ། །རྣམ་པར་སྨིན་དང་འཁོར་དང་མྱ་ངན་འདས། །རྣམ་པར་དབྱེ་བ་རྒྱལ་
བའི་སྲས་ཀྱིས་ཤེས། །དེ་ཐུགས་སྐྱེས་པའི་བྱང་ཆུབ་སེམས་དཔར་བརྗོད། །ཐམས་ཅད་མཁྱེན་པ་འདས་དང་བྱུང་རྣམས་དང ། །མ་བྱོན་དག་ཀྱང་ཆོས་རྣམས་རྣམ་དཔྱད་ནས། །གྲུབ་དང་གང་ཡང་ལེགས་སྐྱེས་མཐར་ཐུག་དང ། །རང་བྱུང་རྣམས་ཀྱི་གྲུབ་པ་ཅི་འདྲ་བ། །
སངས་རྒྱས་དམ་པ་དེ་དག་ཐམས་ཅད་ནི། །དུས་གསུམ་མཉམ་ཉིད་རྗེས་སུ་ཞུགས་པ་ཤེས། །ནམ་ཡང་མཉམ་ཉིད་བྱེ་བྲག་འབྱེད་མི་བྱེད། །དེ་ནི་དུས་གསུམ་ཐ་དད་མེད་པར་འཇུག་།གང་གི་ཕན་ཡོན་རྣམ་པ་འདི་འདྲ་བ། །དེ་ནི་བྱང་ཆུབ་སེམས་དཔའ་བཞི་པ་སྟེ། །
འདི་དག་རབ་བསྒྲུབས་བྱང་ཆུབ་སེམས་དཔའ་དེ། །བྱང་ཆུབ་དོན་དུ་ངེས་པར་འབྱུང་བར་འགྱུར། །དེ་ལྟར་བྱང་ཆུབ་སེམས་དཔའ་ལྔ་པ་སྟེ། །སྦྱོར་བ་ཕུན་སུམ་ཚོགས་པར་བརྗོད་པ་ཡིན། །ཐབས་ལ་མཁས་པའི་རྗེས་སུ་ཞུགས་པ་སྟེ། །བསོད་ནམས་ལས་དག་
བརྩམས་པས་མཐར་ཕྱིན་བྱེད། །དེ་ལྟར་བསོད་ནམས་རབ་ཏུ་ཅི་བྱེད་ཀྱང ། །འཇིག་རྟེན་ཀུན་གྱི་རྟེན་དུ་འགྱུར་བ་དང ། །ཕན་པར་འདོད་དང་བདེ་བ་ཐོབ་བྱེད་དང ། །སྙིང་བརྩེ་བ་དང་སྐྱེ་དགུ་དགྲོལ་འགྱུར་བྱེད། །འཇིག་རྟེན་གནོད་གྱུར་གདུལ་བར་བྱ་བའི་ཕྱིར། །འདྲེན་པར་བྱེད་

</font><hr>57-1-49b<br><font size=+2>

ཅིང་རབ་ཏུ་དང་བར་བྱེད། །སེམས་ཅན་མང་པོ་ཐམས་ཅད་གདུལ་འདོད་དང ། །མྱ་ངན་འདས་པའི་སེམས་ཀྱིས་མཐུ་ཡང་ཆེ། །འཇིག་རྟེན་ཐམས་ཅད་མཐའ་མ་མེད་པ་དང ། །དེ་བཞིན་དཔག་ཏུ་མེད་ཅིང་གྲངས་མེད་དང ། །མཚུངས་མེད་བསམ་ཡས་མཉམ་མེད་གཞལ་
ཡས་དང ། །སྟོང་པ་མི་གཡོ་མེད་པའི་རང་བཞིན་ཤེས། །དེ་ནི་བྱང་ཆུབ་སེམས་དཔའ་ལྔ་པ་སྟེ། །སྦྱོར་བ་ཀུན་ཚོགས་ཕན་དང་སྙིང་བརྩེ་ལྡན། །དེ་ལ་རྗེས་སུ་བསྟན་པ་འདི་འདྲ་སྟེ། །ཡོན་ཏན་ཀུན་དང་ལྡན་པ་རྣམས་ཀྱིས་བསྟན། །དེ་ནི་སེམས་ཅན་མཐའ་ཡས་
ཐམས་ཅད་དང ། །ཆོས་ཀྱི་ངོ་བོ་ཉིད་ལ་རྨོངས་པ་མེད། །ཤིན་ཏུ་བློ་ལྡན་རྟོག་བྲལ་རྣམ་རྟོག་མེད། །འཇིག་རྟེན་ལྷ་དང་བཅས་པས་དབྱེར་མི་ཕྱེད། །སངས་རྒྱས་ཆོས་དང་བྱང་ཆུབ་སེམས་དཔའ་དང ། །སྤྱོད་པའི་བསྔགས་དང་བསྔགས་པ་མ་ཡིན་དང ། །སེམས་ཅན་ཆུང་
ངམ་ཡང་ན་ཆེའོ་ཞེས། །ཐོས་པར་གྱུར་ཀྱང་བསམ་ལས་ནུར་བ་མེད། །སེམས་ཅན་ཉོན་མོངས་ཅན་ནམ་རྣམ་དག་གམ། །གདུལ་སླ་ཞེའམ་གདུལ་བར་དཀའ་ཞེའམ། །ཆོས་དབྱིངས་ཆུང་ཞེའམ་ཡང་ན་རྒྱ་ཆེ་ཞེའམ། །འཇིག་པར་འགྱུར་ཞེའམ་འཆགས་པར་འགྱུར་ཞེ་
འམ། །ཆོས་དབྱིངས་ཡོད་ཅེའམ་མེད་ཅེས་ཐོས་གྱུར་ཀྱང ། །དུས་གསུམ་རྟོགས་པའི་བྱང་ཆུབ་སེམས་དཔའ་དེ། །ངེས་པར་སེམས་ཤིང་ཐམས་ཅད་རྣམ་དཔྱོད་དེ། །སངས་རྒྱས་ཆོས་འདིར་བསམ་པ་ཤིན་ཏུ་ངེས། །མཚན་མ་མེད་དང་མཚན་ཉིད་མེད་པ་དང ། །དངོས་
མེད་རང་བཞིན་བརྫུན་ཞིང་དབེན་པ་དང ། །སྒྱུ་མའི་རང་བཞིན་མི་གཡོར་འདྲ་བ་ཡི། །ཆོས་མཆོག་ཞི་བ་འདི་འདྲ་ཉན་པར་བྱེད། །དེ་ལྟར་མི་ལྡོག་བྱང་ཆུབ་སེམས་དཔའ་ནི། །སངས་རྒྱས་ཆོས་དང་བྱང་ཆུབ་སེམས་དཔའ་དང ། །སྤྱོད་པ་ཡོད་དམ་མེད་ཅེས་ངེས་པར་དཔྱོད། །
འབྱུང་ངམ་མི་འབྱུང་ཞེ་ནའང་ཕྱིར་མི་ལྡོག་།དེ་བཞིན་གཤེགས་པ་འདས་ཤེའམ་མ་འདས་ཤེའམ། །མ་བྱོན་ཅེའམ་མ་བྱོན་མ་ཡིན་ཞེའམ། །བྱུང་ངམ་མ་བྱུང་ཟད་དམ་མི་ཟད་དམ། །དེ་བཞིན་མཚན་ཉིད་གཅིག་གམ་མཚན་ཉིད་མེད། །གཅིག་དང་ཐ་དད་རྣམ་པ་མང་

</font><hr>57-1-50a<br><font size=+2>

པོ་དང ། །དོན་དམ་ཚིག་འབྲུ་དངོས་དང་དངོས་མེད་པ། །ཐམས་ཅད་སྒྲོ་བཏགས་རྣམ་པ་གཞན་ཉིད་དུ། །མི་ལྡོག་བྱང་ཆུབ་སེམས་དཔའ་ཡིད་ཆེས་བྱེད། །མཚན་མ་མེད་དང་མཚན་མ་ཡོད་པ་དང ། །མཚན་ཉིད་མེད་དང་མཚན་གྱིས་མཚོན་པ་དང ། །རྣམ་པར་
ཕྱེ་བ་ཕན་ཚུན་སྦྱར་བ་རྣམས། །ཐོས་ནས་འདི་ལ་མཐར་ཐུག་འཇུག་པར་བྱེད། །གཞོན་ནུར་གྱུར་པའི་བྱང་ཆུབ་སེམས་དཔའ་ནི། །ལུས་དང་ངག་དང་དེ་བཞིན་ཡིད་ཀྱིས་ཀྱང ། །འབྲས་བུ་ཡོད་པའི་ལས་རྣམས་བྱད་འགྱུར་ཞིང ། །ཇི་ལྟར་འདོད་བཞིན་འདིར་ནི་སྐྱེ་བ་
སྟོན། །ཕ་རོལ་རྣམས་ཀྱི་བསམ་པ་རྟོག་བྱེད་ཅིང ། །དེ་དག་རྣམས་ཀྱི་མོས་པ་སྤྱོད་པར་བྱེད། །སེམས་ཅན་སྤྱོད་དང་རྗེས་སུ་འཐུན་ཆོས་དང ། །ཞིང་རྣམས་འཇིག་དང་ཆགས་པ་རྣམས་ཀྱང་ཤེས། །ཇི་ལྟར་འདོད་སྦྱིན་མྱུར་དུ་མངོན་ཤེས་ཐོབ། །ཕྱོགས་རྣམས་
ཀུན་དུ་ཡིད་ནི་འཇུག་པར་བྱེད། །བདེ་གཤེགས་བསྔགས་པའི་ཆོས་རྣམས་ཐོས་ནས་ཀྱང ། །དེ་ལ་དེ་ནི་ནུར་བར་འགྱུར་བ་མེད། །ཡོངས་སུ་ཤེས་དང་ཞིང་གཡོ་བྱེད་པ་དང ། །དེ་བཞིན་བྱིན་གྱིས་བརླབ་དང་རྣམ་དཔྱོད་དང ། །ཇི་ལྟར་སྐད་ཅིག་གྲངས་མེད་འགྲོ་འགྱུར་བ། །
ཞིང་དུ་འགྲོ་བར་བྱ་བ་བརྗོད་པར་བྱ། །དེ་ནི་དྲི་བ་གྲངས་མེད་འདྲི་བར་བྱེད། །ལུས་རྣམས་ཅི་འདྲར་ཡིད་ཀྱི་ལུས་ཀྱང་སྟོན། །དེ་ལ་སྒྲ་སྐད་སྦྱོར་བ་འབྱམ་ཀླས་དང ། །སྐད་ཅིག་ལ་ཡང་སངས་རྒྱས་གྲངས་མེད་བརྗོད། །བྱང་ཆུབ་སེམས་དཔའ་རྒྱལ་ཚབ་གང་ཡིན་པ། །སེམས་ཅན་
རྣམས་ཀྱི་འཇུག་པ་ཇི་བཞིན་ཤེས། །དེ་དག་ཉོན་མོངས་རྒྱུད་དང་བག་ཆགས་དང ། །སྤྱོད་ཡུལ་གང་ཡིན་སྦྱོར་བ་གང་ཡིན་དང ། །ཐ་དད་ཆོས་དང་རྒྱུ་བ་ཅི་འདྲ་དང ། །འཇིག་རྟེན་རྣམ་པར་ཕྱེ་དང་སྔོན་མཐའ་དང ། །བརྡ་ཡི་བདེན་དང་དོན་དམ་བདེན་པ་དག་།མ་ལུས་རྟོགས་པར་བྱ་ལ་
མཁས་པ་ཡིན། །ཕོ་བྲང་འཁོར་ལ་མཁས་པ་ཚང་འབྱིན་ཏེ། །དེར་ཡང་ཇི་ལྟར་ཀུན་དུ་སྤྱད་པ་དང ། །གནས་དང་དེ་བཞིན་འཇུག་པར་བྱ་བ་དང ། །ཕོ་བྲང་འཁོར་ནི་ཅི་འདྲ་དཔྱད་པ་དང ། །དམ་ཆོས་རྒྱལ་པོའི་དབང་བསྐུར་ཅི་འདྲ་དང ། །བྱིན་གྱི་རླབས་དང་གཞན་གནོན་ཅི་འདྲ་དང ། །

</font><hr>57-1-50b<br><font size=+2>

ཆོས་ལ་འཇུག་དང་བཀའ་ལུང་བརྗོད་བྱ་སྟེ། །འདི་ནི་རྒྱལ་ཚབ་ས་ལ་འཇུག་པ་ཡིན། །དེ་ཙམ་གྱིས་ན་དེ་ཡི་མཐར་ཐུག་སྟེ། །ཇི་སྐད་བསྟན་བཞིན་གཞན་དུ་འགྱུར་བ་མེད། །ཚེ་ཡི་འདུ་བྱེད་ནམ་ཞིག་འདོར་བ་ན། །ཚུལ་ལྡན་རྒྱལ་ཚབ་རྒྱལ་བར་མངོན་དུ་ཕྱོགས། །དབང་བསྐུར་
གང་ཡིན་བདེ་གཤེགས་སྲས་གཅིག་སྟེ། །ཐུ་བོ་ཁྱད་འཕགས་མཐར་ཕྱིན་བདག་ཉིད་ཅན། །སྐྲ་ཐིགས་གཅིག་གིས་ཆུ་ཚད་གཟུང་དུ་རུང ། །འདིར་ནི་བསམ་པ་བགྲང་བས་རྟོགས་མ་ཡིན། །རྒྱལ་སྲས་རྣམས་ཀྱི་སྤྱོད་པ་འདི་འདྲ་སྟེ། །འདི་ན་སེམས་ཅན་ལ་ལས་ཞིང་རྣམས་ཀུན། །
ཕྲ་རབ་རྡུལ་དུ་རླགས་ནས་མ་ལུས་འགྲང ། །གྲངས་མེད་འདི་སྙེད་ཅིག་ཅེས་གཅོད་བྱེད་པ། །དེ་ཀུན་འདིར་ནི་བྱང་ཆུབ་སེམས་དཔས་ཤེས། །འདས་དང་དེ་བཞིན་མ་བྱོན་སངས་རྒྱས་དང ། །གང་དག་ཕྱོགས་བཅུ་དག་ན་བཞུགས་པ་དང ། །རང་སངས་རྒྱས་དང་དེ་བཞིན་ཉན་ཐོས་
ཀྱི། །ས་བོན་གྱུར་པ་བྱང་ཆུབ་སེམས་དེ་སྐྱེ། །ཐོག་མར་བྱང་ཆུབ་སེམས་ཞེས་གང་བརྗོད་པ། །དེ་ནི་ཇི་ལྟའི་ཚུལ་དུའང་གྲངས་མེད་དེ། །འཇིག་རྟེན་ཁམས་འདི་ཀུན་ཀྱང་ཁྱབ་གྱུར་ན། །དེ་ལས་གོང་དུ་བརྗོད་དུ་ཅི་ཞིག་ཡོད། །དེ་ནས་བྱང་ཆུབ་སེམས་དཔའ་ཀུན་དུ་བཟང་
པོས་བྱང་ཆུབ་སེམས་དཔའ་ཆོས་ཀྱི་བློ་གྲོས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་དཀོན་མཆོག་ཏ་ལ་ལའི་གཟུངས་བཤད་པ་ལེགས་པར་སྨྲས་སོ། །རིགས་ཀྱི་བུ་སངས་རྒྱས་ཀྱི་ཡོན་ཏན་རྣམས་ནི་བསམ་གྱིས་མི་ཁྱབ་སྟེ། གང་དག་ཆོས་ཀྱི་རྣམ་གྲངས་
འདིའི་མིང་ཐོས་པའི་སེམས་ཅན་དེ་དག་ཀྱང་ཐམས་ཅད་མཁྱེན་པ་ཉིད་དུ་ཉེ་བར་གྱུར་བ་ཡིན་ན། གང་དག་ཆོས་ཀྱི་རྣམ་གྲངས་འདི་འཛིན་པ་དང ། ཀློག་པ་དང་ཀུན་ཆུབ་པར་བྱེད་པ་དང ། དེ་བཞིན་ཉིད་དུ་སྒྲུབ་པར་བྱེད་པ་ལྟ་སྨོས་ཀྱང་ཅི་དགོས་ཏེ། དེ་དག་ནི་ངེས་པར་
སངས་རྒྱས་སུ་འགྱུར་རོ། །ཆོས་ཀྱི་བློ་གྲོས་ཀྱིས་སྨྲས་པ། ཀྱེ་རྒྱལ་བའི་སྲས་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། ཤེས་རབ་ཟབ་མོ་དང་ལྡན་པ་དེ་དག་ནི་དེ་བཞིན་གཤེགས་པས་དབང་བསྐུར་བ་ཡིན་པར་རིག་པར་བྱའོ། །བྱང་ཆུབ་སེམས་དཔའ་ཀུན་དུ་

</font><hr>57-1-51a<br><font size=+2>

བཟང་པོས་སྨྲས་པ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གི་རྣ་ལམ་དུ་འདི་ལྟ་བུའི་ཆོས་འདི་དག་གྲག་པར་གྱུར་བའི་སྐྱེས་བུ་དམ་པ་དེ་དག་ཀྱང་སངས་རྒྱས་ཀྱི་ཆོས་རྣམས་ལ་ལུང་བསྟན་པར་རིག་པར་བྱ་བ་ཡིན་ན། ཆོས་ཀྱི་རྣམ་གྲངས་
འདི་གང་དག་གིས་ལག་ཏུ་ཐོབ་པ་ལྟ་སྨོས་ཀྱང་ཅི་དགོས། དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་གཟིགས་སུ་གསོལ། བདག་གིས་འདི་ལྟ་བུའི་ཆོས་འདི་དག་མ་
འཚལ་བས་བདག་ནི་དམུས་ལོང་དང་འདྲ་ལགས་སོ། །བཅོམ་ལྡན་འདས་བདག་གཅིག་པུ་དམུས་ལོང་ལྟ་བུར་གྱུར་པར་ཡང་མ་བས་ཀྱི། བཅོམ་ལྡན་འདས་སེམས་ཅན་གང་དག་གིས་ཆོས་ཀྱི་རྣམ་གྲངས་འདི་མ་ཐོས་པ་དེ་དག་ཐམས་ཅད་ཀྱང་དམུས་ལོང་ལྟ་
བུར་གྱུར་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གནས་བརྟན་དེ་དེ་བཞིན་ཏེ། ཇི་སྐད་སྨྲས་པ་བཞིན་ནོ། །ཤ་ར་དྭ་ཏིའི་བུས་གསོལ་པ། བཅོམ་ལྡན་འདས་ཀྱིས་བསམ་གྱིས་མི་ཁྱབ་པ་ཉིད་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། 
ཤ་ར་དྭ་ཏིའི་བུ་སོང་ལ་བརྒྱ་བྱིན་དང ། ཚངས་པ་དང་འཇིག་རྟེན་སྐྱོང་བ་ཐམས་ཅད་སྐུལ་ཅིག་།དེ་བཞིན་གཤེགས་པའི་བཀའ་ཡང་སྒྲོགས་ཤིག་།ཆོས་ཀྱི་ཕྱག་རྒྱ་དམ་པ་དཀོན་མཆོག་ཏ་ལ་ལ་ཞེས་བྱ་བའི་གཟུངས་འདི་ཡང་འཁོར་དེར་སྒྲོགས་ཤིག་།དེ་ནས་ཚེ་དང་
ལྡན་པ་ཤ་ར་དྭ་ཏིའི་བུས་དེ་བཞིན་གཤེགས་པའི་བཀའ་ཐོས་ནས་དཀོན་མཆོག་ཏ་ལ་ལའི་གཟུངས་འདིའི་དོན་གྱི་ཕྱིར་ཡོངས་སུ་སྐོམ་པས་བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་དེ་དག་ལ་དོན་འདིའི་སྐབས་བརྗོད་དེ་ཆོས་ཉན་པ་ཐམས་ཅད་འདུ་བར་གྱིས་ཤིག་།དེ་བཞིན་
གཤེགས་པ་དཀོན་མཆོག་ཏ་ལ་ལའི་གཟུངས་འཆད་ཅིང་བསམ་གྱིས་མི་ཁྱབ་པ་ཉིད་ཀྱང་སྟོན་པར་འགྱུར་གྱིས་འདུ་བར་གྱིས་ཤིག་།ཁྱེད་ཕྱིས་འགྱོད་པར་གྱུར་ཏ་རེ། ཀྱེ་གྲོགས་པོ་དག་མདོ་སྡེ་རིན་པོ་ཆེ་འདི་ལྟ་བུ་དག་འཇིག་རྟེན་དུ་འབྱུང་བ་ནི་ཤིན་ཏུ་རྙེད་པར་དཀའོ། །

</font><hr>57-1-51b<br><font size=+2>

དེ་ནས་སྐད་ཅིག་དེ་ཉིད་ལ་བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་ཐམས་ཅད་འདུས་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་འཁོད་ནས་ཐལ་མོ་སྦྱར་ཏེ། བཅོམ་ལྡན་འདས་ལ་གསོལ་བ་བཏབ་པ། བཅོམ་ལྡན་འདས་
ཀྱིས་དཀོན་མཆོག་ཏ་ལ་ལའི་གཟུངས་བཤད་དུ་གསོལ། དེ་ནས་བཅོམ་ལྡན་འདས་ཅང་མི་གསུང་བར་གྱུར་པས་གནང་བ་མཛད་དོ། །བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་ཐམས་ཅད་ཀྱིས་ལན་གཉིས་ལན་གསུམ་དུ་གསོལ་བ་བཏབ་ན་ཡང་བཅོམ་ལྡན་འདས་ཅང་
མི་གསུང་བར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དཀོན་མཆོག་ཏ་ལ་ལ་ཞེས་བགྱི་བའི་གཟུངས་བཤད་དུ་གསོལ། བདེ་བར་གཤེགས་པས་བཤད་དུ་གསོལ། དེ་ནས་བཅོམ་ལྡན་འདས་
ཀྱིས་དེའི་ཚེ་ཞལ་ནས་ལྗགས་ཀྱི་དབང་པོ་ཕྱུང་སྟེ། རིགས་ཀྱི་བུ་གང་ལ་ལ་དག་དཀོན་མཆོག་ཏ་ལ་ལའི་གཟུངས་འདིའི་དོན་གྱི་ཕྱིར་དེ་བཞིན་གཤེགས་པ་ལ་གསོལ་བ་འདེབས་པ་དེ་དག་ཐམས་ཅད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ་
ཞེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་དབྱངས་ཀྱིས་གོ་བར་མཛད་དོ། །དེ་ནས་བཅོམ་ལྡན་འདས་ཀྱིས་ཡང་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་ཁྱོད་སོང་ལ་འཇམ་དཔལ་གཞོན་ནུར་གྱུར་པ་ལ་ཆོས་བཤད་
པར་གསོལ་བ་ཐོབ་ཤིག་།དེའི་ཚེ་འཇམ་དཔལ་གཞོན་ནུར་གྱུར་པ་ཤིང་བླག་ཤ་དང་སཱ་ལའི་དྲུང་གཞན་ཞིག་ན་སྐྱིལ་མོ་ཀྲུང་བཅས་ཤིང་ལུས་མི་གཡོ་བར་འདུག་སྟེ། ཉི་མ་བྱེ་བ་ཁྲག་ཁྲིག་བརྒྱ་སྟོང་པས་ལྷག་པའི་ཁ་དོག་བཀོད་པ་ཆེན་པོ་དང་ལྡན་པའི་ཁང་པ་བརྩེགས་
པ་ན་བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་རྣམས་ཀྱིས་ཡོངས་སུ་བསྐོར་ཅིང་མདུན་གྱིས་བལྟས་ནས་འདུག་པར་གྱུར་ཏེ། གསེར་གྱི་ཁ་དོག་ལྟ་བུའི་ལུས་དང་དཔལ་གྱིས་ལྷམ་མེ་ལྷན་ནེ་ལྷང་ངེར་འདུག་གོ། །དེ་ནས་ཚེ་དང་ལྡན་པ་ཤཱ་ར་དྭ་ཏིའི་བུས་འཇམ་དཔལ་

</font><hr>57-1-52a<br><font size=+2>

གཞོན་ནུར་གྱུར་པ་ག་ལ་བ་དེར་སོང་སྟེ་ཕྱིན་ནས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེ་བཞིན་གཤེགས་པ་ནི་ཁྱོད་ལ་ཆོས་བཤད་པར་གསོལ་བ་འདེབས་སོ། །དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཤ་ར་དྭ་ཏིའི་
བུ་ལ་འདི་སྐད་ཅེས་སྨྲས་སོ། །བཙུན་པ་ཤ་ར་དྭ་ཏིའི་བུ་དེ་བཞིན་གཤེགས་པ་ཞེས་བྱ་བའི་གཞིའི་དོན་འདི་གང་ཡིན། ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་ཁྱོད་ནི་ཤེས་རབ་ཟབ་པ་སྟེ། ཁོ་བོས་ནི་ཁྱོད་དང་འགྱེད་མི་ནུས་སོ། །འཇམ་དཔལ་གྱིས་སྨྲས་པ། ཁྱོད་སྙིང་ལས་ཆུང་
ངུར་འདུག་ཤིག་དང་ཁྱོད་ཀྱིས་ཇི་ལྟར་བཟོད་པ་དེ་བཞིན་དུ་བསྟན་པར་བྱའོ། །ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་ཁོ་བོ་ཉན་གྱིས་ཁྱོད་ཀྱིས་ཤོད་ཅིག་།དེ་ནས་འཇམ་དཔལ་གཞོན་ནུར་གྱུར་པས་ཏིང་ངེ་འཛིན་དེ་ལས་ལངས་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་དབྱངས་ཀྱིས་གོ་བར་བྱས་སོ། །དེ་ནས་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་གནས་གཙང་མའི་རིས་ཀྱི་ལྷའི་བུ་ནས་འོག་མིན་གྱི་བར་གྱི་ལྷའི་བུ་ཇི་སྙེད་འཁོད་པ་དེ་དག་ཐམས་ཅད་འདུས་པར་གྱུར་ཏོ། །རྒྱལ་པོ་ཆེན་པོ་བཞི་དཔུང་དང་གཡོག་
ཏུ་བཅས་པ་ཡང་གནོད་སྦྱིན་བྱེ་བ་དུ་མ་དང་ལྷན་ཅིག་འདུས་པར་གྱུར་ཏོ། །བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་རྣམས་ཀྱང་འདུས་པར་གྱུར་ཏོ། །ཆོས་འདོད་པ་རྣམས་དང ། །ཆོས་འདོད་པ་མ་ཡིན་པའི་གང་ཟག་རྣམས་ཀྱང་འདུས་པར་གྱུར་ཏོ། །ལྷའི་བུ་མོ་མང་པོ་
ཡང་འདུས་པར་གྱུར་ཏོ། །དགེ་སློང་གི་འཁོར་དང ། དགེ་སློང་མའི་འཁོར་དང ། དགེ་བསྙེན་གྱི་འཁོར་དང ། དགེ་བསྙེན་མའི་འཁོར་དང ། དེ་བཞིན་དུ་སུམ་ཅུ་རྩ་གསུམ་པའི་བར་གྱི་འཁོར་དང ། འཐབ་བྲལ་གྱི་འཁོར་དང ། དགའ་ལྡན་གྱི་འཁོར་དང ། འཕྲུལ་དགའི་འཁོར་
དང ། གཞན་འཕྲུལ་དབང་བྱེད་ཀྱི་ལྷའི་འཁོར་དང ། ཚངས་པའི་འཁོར་དང ། དེ་བཞིན་དུ་འོག་མིན་གྱི་བར་གྱི་ལྷའི་འཁོར་རྣམས་འདུས་པར་གྱུར་ཏོ། །དེ་བཞིན་དུ་ཉན་ཐོས་ཀྱི་ཚོགས་ཀྱང་འདུས་པར་གྱུར་ཏེ། འདི་ལྟ་སྟེ། ཚེ་དང་ལྡན་པ་རབ་འབྱོར་དང ། ཚེ་དང་ལྡན་པ་འོད་སྲུང་

</font><hr>57-1-52b<br><font size=+2>

ཆེན་པོ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་དང ། ཚེ་དང་ལྡན་པ་ཤ་ར་དྭ་ཏིའི་བུ་དང ། ཚེ་དང་ལྡན་པ་ཀཱ་ཏྱཱའི་བུ་ཆེན་པོ་དང ། ཚེ་དང་ལྡན་པ་མ་འགགས་པ་དང ། ཚེ་དང་ལྡན་པ་ག་ཡཱ་འོད་སྲུང་དང ། ཚེ་དང་ལྡན་པ་གསུམ་པོ་ཆེ་དང ། ཚེ་དང་ལྡན་པ་ལམ་ཕྲན་བསྟན་དང ། ཚེ་དང་ལྡན་
པ་ནམ་གྲུ་དང ། ཚེ་དང་ལྡན་པ་ཆུ་ཀླུང་འོད་སྲུང་དང ། ཚེ་དང་ལྡན་པ་ལྟེང་རྒྱས་འོད་སྲུང་དང ། ཚེ་དང་ལྡན་པ་བྱམས་མའི་བུ་གང་པོ་དང ། ཚེ་དང་ལྡན་པ་སྒྲ་གཅན་ཟིན་དང ། ཚེ་དང་ལྡན་པ་བཟང་སྐྱོང་དང ། ཚེ་དང་ལྡན་པ་རླངས་པ་དང ། ཚེ་དང་ལྡན་པ་ཀུན་དགའ་བོ་དང ། དེ་དག་དང་ཉན་ཐོས་
ཆེན་པོ་གཞན་དག་དང ། གྲགས་འཛིན་ལ་སོགས་པ་དགེ་སློང་མ་ལྔ་བརྒྱ་ཡང་འདུས་པར་གྱུར་ཏོ། །ཁམས་ཀྱི་རྒྱལ་པོ་དང ། སྟོབས་ཀྱི་འཁོར་ལོས་སྒྱུར་བ་དག་ཀྱང་འདུས་པར་གྱུར་ཏོ། །རྒྱལ་རིགས་དང་བྲམ་ཟེ་དང་ཁྱིམ་བདག་གི་འཁོར་དག་ཀྱང་འདུས་པར་གྱུར་ཏོ། །དེ་ནས་
ཚེ་དང་ལྡན་པ་ཤ་ར་དྭ་ཏིའི་བུས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་དེང་འདི་ལྟར་འཁོར་ཆེན་པོ་འདུས་པ་འདི་སུའི་མཐུ་ལགས། དེ་ཇི་ལྟར་འཚལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཚེ་དང་ལྡན་པ་ཤ་
ར་དྭ་ཏིའི་བུ་འདི་ནི་དཀོན་མཆོག་ཏ་ལ་ལའི་གཟུངས་ཀྱི་མཐུ་ཡིན་ནོ། །ཤ་ར་དྭ་ཏིའི་བུས་གསོལ་པ། བཅོམ་ལྡན་འདས་དཀོན་མཆོག་ཏ་ལ་ལའི་གཟུངས་མཉན་པར་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་སོང་ལ་འཇམ་དཔལ་གཞོན་ནུར་གྱུར་
པ་དང ། བྱང་ཆུབ་སེམས་དཔའ་ཀུན་དུ་བཟང་པོ་ལ་གསོལ་བ་ཐོབ་ཤིག་།དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་ཏིང་ངེ་འཛིན་རིན་པོ་ཆེ་བསྟན་པ་དཀོན་མཆོག་ཏ་ལ་ལ་འདི་ཤོད་ཅིག་།འཇམ་
དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་དཀོན་མཆོག་ཏ་ལ་ལའི་གཟུངས་ཉན་པར་འགྱུར་བ་སུ་ཡིན། ཤ་ར་དྭ་ཏིའི་བུས་སྨྲས་པ། འཁོར་བཞི་འདུས་པ་འདི་དག་དང་བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་རྣམས་འདུས་པ་འདི་དག་སྟེ། ཁོ་བོ་ཡང་ཉན་པའི་ཕྱིར་

</font><hr>57-1-53a<br><font size=+2>

འོངས་སོ། །དེ་ནས་འཇམ་དཔལ་གཞོན་ནུར་གྱུར་པས་གནས་བརྟན་ཤ་ར་དྭ་ཏིའི་བུ་ལ་འདི་སྐད་ཅེས་སྨྲས་སོ། །གནས་བརྟན་ཤ་ར་དྭ་ཏིའི་བུ་ཆོས་ཉན་པ་འདི་དག་ནི་སྒྱུ་མས་བྱུང་བ་ཤ་སྟག་ན་ཁོ་བོས་སུ་ལ་ཆོས་བཤད། ཉན་པ་ནི་སུ་ཡིན། འཆད་པ་ནི་སུ་ཡིན། གནས་
བརྟན་གྱིས་སྨྲས་པ། སྐྱེས་བུ་དམ་པ་ཁྱོད་ཀྱིས་ཤོད་ཅིག་།ཁོ་བོས་མཉན་ཏོ། །འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་བཤད་ཅེས་བྱ་བ་དེ་གང་གི་ཚིག་བླ་དགས་ཡིན། སྨྲས་པ། འཇམ་དཔལ་བཤད་པ་ཞེས་བྱ་བ་དེ་ནི་སྟོང་པ་ཉིད་ཀྱི་ཚིག་བླ་དགས་སོ། །སྨྲས་པ། ཤ་
ར་དྭ་ཏིའི་བུ་སྟོང་པ་ཉིད་གང་གི་ཚིག་བླ་དགས་ཡིན། སྨྲས་པ། འཇམ་དཔལ་སྟོང་པ་ཉིད་ནི་ཚིག་མེད་པ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་ཤ་ར་དྭ་ཏིའི་བུ་གལ་ཏེ་སྟོང་པ་ཉིད་ཚིག་མེད་པ་ཡིན་ན། ཅི་ཞིག་བཤད་པར་བྱ། བཙུན་པ་ཤ་ར་དྭ་ཏིའི་བུ་ཆོས་ཐམས་ཅད་ནི་བསྟན་དུ་
མེད་པ་ཡིན་ཏེ། དེ་དག་ནི་བསྟན་དུ་མེད་ཅིང་མཉན་དུ་མེད་དོ། །གནས་བརྟན་གྱིས་སྨྲས་པ། རིགས་ཀྱི་བུ་ཁྱོད་ཀྱིས་ཇི་ལྟ་བུ་བསྟན་པ་དེ་དག་ཐམས་ཅད་ནི་སྟོང་པ་ཉིད་བསྟན་པ། མཚན་མ་མེད་པ་བསྟན་པ། སྨོན་པ་མེད་པ་བསྟན་པ། བླང་བ་མེད་པ་བསྟན་པ། དོར་བ་མེད་པ་བསྟན་པ། 
སྤྲོས་པ་མེད་པ་བསྟན་པ་སྟེ། མ་སྤྲོས་པ་བསྟན་པ་ཡིན་ནོ། །དེ་ནས་ཐམས་ཅད་དང་ལྡན་པའི་བྱང་ཆུབ་སེམས་དཔའི་འཁོར་དེ་དང ། བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་དེ་དག་ཀྱང་རབ་ཏུ་དགའ་ནས་མགྲིན་གཅིག་ཏུ་འཇམ་དཔལ་གཞོན་ནུར་གྱུར་པ་དང ། ཚེ་དང་ལྡན་པ་ཤ་ར་
དྭ་ཏིའི་བུས་དཀོན་མཆོག་ཏ་ལ་ལའི་གཟུངས་འདི་ལེགས་པར་བཤད་དོ་ཞེས་ལེགས་སོ་ཞེས་བྱ་བ་བྱིན་ནོ། །དེ་ནས་ཚེ་དང་ལྡན་པ་རབ་འབྱོར་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བྱང་ཆུབ་སེམས་དཔས་དཀོན་མཆོག་ཏ་ལ་ལའི་
གཟུངས་འདི་ཇི་ལྟར་གཟུང་བར་བྱ། བཀླག་པར་བྱ། ཀུན་ཆུབ་པར་བྱ། གཞན་དག་ལ་ཡང་རྒྱ་ཆེར་ཡང་དག་པར་བཤད་པར་བྱ། འཇམ་དཔལ་གྱིས་སྨྲས་པ། རབ་འབྱོར་གཟུངས་འདི་ནི་སྐྱེ་བ་མེད་པར་ཡིད་ལ་བྱའོ། །དངོས་པོ་མེད་པ་དང ། མཚན་ཉིད་མེད་པ་དང ། སྤྲོས་

</font><hr>57-1-53b<br><font size=+2>

པ་མེད་པ་དང ། དོར་བ་མེད་པར་ཡིད་ལ་བྱའོ། །འཇམ་དཔལ་གཞོན་ནུར་གྱུར་པས་ཆོས་ཀྱི་རྣམ་གྲངས་འདི་བཤད་པ་ན་འཁོར་དེའི་ནང་ནས་བྱང་ཆུབ་སེམས་དཔའ་དགུ་བཅུ་རྩ་གཉིས་ཀྱིས་དཔའ་བར་འགྲོ་བའི་ཏིང་ངེ་འཛིན་ཐོབ་པར་གྱུར་ཏོ། །ལྷ་དང་མི་དྲུག་ཅུ་རྩ་གཉིས་ནི་མི་སྐྱེ་
བའི་ཆོས་ལ་བཟོད་པ་ཐོབ་པར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་དུ་བཟང་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་
ཀྱི་སྙིང་རྗེ་ཆེན་པོ་ཅི་འདྲ་བ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྙིང་རྗེ་ཆེན་པོ་ནི་གང་ཁམས་གསུམ་པ་ཡོངས་སུ་མི་གཏོང་བ་སྟེ། འདི་ནི་སྙིང་རྗེ་ཆེན་པོ་ཡིན་ནོ། །གང་སེམས་ཅན་ཐམས་
ཅད་ལ་སངས་རྒྱས་ཀྱི་ཞིང་ཀུན་དུ་སྟོན་པ་འདི་ནི་སྙིང་རྗེ་ཆེན་པོ་ཡིན་ནོ། །གང་སེམས་ཅན་ཚུལ་ཁྲིམས་འཆལ་པ་ཡོངས་སུ་འཛིན་པ་འདི་ནི་སྙིང་རྗེ་ཆེན་པོ་ཡིན་ནོ། །གང་ཤེས་རབ་ཀྱི་ཕ་རོལ་ཏུ་ཕྱིན་པ་མི་འདོར་བ་འདི་ནི་སྙིང་རྗེ་ཆེན་པོ་ཡིན་ནོ། །གང་སེམས་ཅན་ཐམས་ཅད་
ཀྱི་དོན་གྱི་ཕྱིར་ལུས་དང་སྲོག་ཡོངས་སུ་གཏོང་བ་འདི་ནི་སྙིང་རྗེ་ཆེན་པོ་ཡིན་ནོ། །གང་འདོད་ཆགས་སྤྱོད་པའི་སེམས་ཅན་རྣམས་ལ་བྱམས་པ་ཡང་དག་པར་བརྗོད་པ་འདི་ནི་སྙིང་རྗེ་ཆེན་པོ་ཡིན་ནོ། །གང་སེམས་ཅན་སྟོབས་དང་ལྡན་རྣམས་ལ་བྱམས་པ་འདི་ནི་བྱང་ཆུབ་སེམས་དཔའ་
སེམས་དཔའ་ཆེན་པོ་རྣམས་ཀྱི་སྙིང་རྗེ་ཆེན་པོ་ཡིན་ནོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་སུ་བྱའོ། །འདྲེ་བ་མེད་པ་མང་དུ་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཀུན་དུ་
བཟང་པོས་འདི་སྐད་ཅེས་གསོལ་ཏོ། །སྐྱེ་བོ་མང་པོ་ལ་སྨན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་དང ། ལྷ་དང་མི་རྣམས་ཀྱི་རྣམས་ཀྱི་དོན་དང་སྨན་པ་དང ། བདེ་བར་འགྱུར་བའི་སླད་དུ་བཅོམ་ལྡན་འདས་ཀྱིས་དཀོན་མཆོག་ཏ་ལ་

</font><hr>57-1-54a<br><font size=+2>

ལ་ཞེས་བགྱི་བའི་གཟུངས་བཤད་དུ་གསོལ། སེམས་ཅན་ཐམས་ཅད་ལ་སྨན་པ་དང ། ཐུགས་བརྩེ་བ་མངའ་བ་བཅོམ་ལྡན་འདས་ཀྱིས་བཤད་དུ་གསོལ། དེ་ནས་བཅོམ་ལྡན་འདས་ཀྱིས་ཚངས་པའི་དབྱངས་ཀྱིས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་
སྩལ་ཏོ། །ཁྱེད་ཀྱི་ནང་ན་ཕྱི་མའི་ཚེ་ཕྱི་མའི་དུས་ལྔ་བརྒྱ་པ་ཐ་མ་ལ་དམ་པའི་ཆོས་ནུབ་པའི་དུས་ཀྱི་ཚེ་ཆོས་ཀྱི་རྣམ་གྲངས་འདི་ཡང་དག་པར་རབ་ཏུ་སྟོན་པར་སྤྲོ་བ་སུ་ཡོད། དེ་ནས་བྱང་ཆུབ་སེམས་དཔའ་ཀུན་དུ་བཟང་པོ་དང ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་དང ། བྱང་ཆུབ་
སེམས་དཔའ་སྤྱན་རས་གཟིགས་དབང་ཕྱུག་དང ། བྱང་ཆུབ་སེམས་དཔའ་མཐུ་ཆེན་ཐོབ་དང ། བྱང་ཆུབ་སེམས་དཔའ་ངན་སོང་སྤོང་དང ། བྱང་ཆུབ་སེམས་དཔའ་སྨན་གྱི་རྒྱལ་པོ་དང ། བྱང་ཆུབ་སེམས་དཔའ་སྤོབས་པ་བརྩེགས་པ་དང ། བྱང་ཆུབ་སེམས་དཔའ་ཆོས་ཐམས་ཅད་ཀྱིས་
མངོན་འཕགས་རྒྱལ་པོ་དང ། བྱང་ཆུབ་སེམས་དཔའ་བློ་གྲོས་མི་ཟད་པ་དང ། བྱང་ཆུབ་སེམས་དཔའ་བློ་གྲོས་རྒྱ་མཚོ་དང ། བྱང་ཆུབ་སེམས་དཔའ་རིན་ཆེན་ཟེ་བ་ལྡན་དང ། བྱང་ཆུབ་སེམས་དཔའ་ནོར་བུ་འོད་དང ། བྱང་ཆུབ་སེམས་དཔའ་གཙུག་ན་ནོར་བུ་ཅན་དང ། བྱང་ཆུབ་
སེམས་དཔའ་རྣམ་པར་ལྟ་དང ། བྱང་ཆུབ་སེམས་དཔའ་བལྟར་མི་མཐོང་དང ། བྱང་ཆུབ་སེམས་དཔའ་རྟག་ཏུ་ལྟ་དང ། བྱང་ཆུབ་སེམས་དཔའ་ལག་ན་རྡོ་རྗེ་དང ། བྱང་ཆུབ་སེམས་དཔའ་རིན་ཆེན་ཕུང་པོ་དང ། བྱང་ཆུབ་སེམས་དཔའ་དཀོན་མཆོག་འབྱུང་གནས་དང ། བྱང་ཆུབ་སེམས་
དཔའ་ཆོས་དཔལ་དང ། བྱང་ཆུབ་སེམས་དཔའ་རྟོག་དཔལ་དང ། བྱང་ཆུབ་སེམས་དཔའ་ནོར་དཔལ་དང ། བྱང་ཆུབ་སེམས་དཔའ་བསོད་ནམས་དཔལ་དང ། བྱང་ཆུབ་སེམས་དཔའ་ཙན་དན་དཔལ་དང ། བྱང་ཆུབ་སེམས་དཔའ་ཆོས་ཀྱི་བློ་གྲོས་དང ། བྱང་ཆུབ་སེམས་དཔའ་
བདུད་རྩི་བློ་གྲོས་དང ། བྱང་ཆུབ་སེམས་དཔའ་བསམ་ཡས་བློ་གྲོས་དང ། བྱང་ཆུབ་སེམས་དཔའ་བསོད་ནམས་ཀྱིས་བརྒྱན་དང ། བྱང་ཆུབ་སེམས་དཔའ་ཡོན་ཏན་གྱིས་བརྒྱན་དང ། བྱང་ཆུབ་སེམས་དཔའ་མཚན་གྱིས་བརྒྱན་དང ། བྱང་ཆུབ་སེམས་དཔའ་རྟག་ཏུ་

</font><hr>57-1-54b<br><font size=+2>

དགོད་ཅིང་དབང་པོ་ཐམས་ཅད་རབ་ཏུ་དགའ་བ་དང ། བྱང་ཆུབ་སེམས་དཔའ་རིའི་རྩེ་མོ་རྡོབ་པའི་རྒྱལ་པོ་དང ། བྱང་ཆུབ་སེམས་དཔའ་སྤོབས་པ་མཁས་དང ། བྱང་ཆུབ་སེམས་དཔའ་རྟག་ཏུ་ལག་བརྐྱང་དང ། བྱང་ཆུབ་སེམས་དཔའ་ས་འཛིན་དང ། བྱང་ཆུབ་སེམས་དཔའ་སྤོབས་པ་
མྱུར་དང ། བྱང་ཆུབ་སེམས་དཔའ་ནམ་མཁའི་སྙིང་པོ་དང ། བྱང་ཆུབ་སེམས་དཔའ་ཟླ་བའི་སྙིང་པོ་དང ། བྱང་ཆུབ་སེམས་དཔའ་ཉི་མའི་སྙིང་པོ་དང ། བྱང་ཆུབ་སེམས་དཔའ་ཟླ་བ་དྲི་མ་མེད་པའི་སྙིང་པོ་དང ། བྱང་ཆུབ་སེམས་དཔའ་ཉི་གདུགས་སྙིང་པོ་དང ། བྱང་ཆུབ་སེམས་དཔའ་
མངོན་འཕགས་རྒྱལ་པོ་དང ། བྱང་ཆུབ་སེམས་དཔའ་ལྷུན་པོ་ཆེན་པོ་དང ། བྱང་ཆུབ་སེམས་དཔའ་བློ་གྲོས་བརྟན་པ་དང ། བྱང་ཆུབ་སེམས་དཔའ་སྤོབས་པ་དཔའ་བ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། དེ་དག་ལ་སོགས་པ་བྱང་ཆུབ་སེམས་
དཔའ་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་གཉིས་ཀྱིས་མགྲིན་གཅིག་ཏུ་ཚིག་ཏུ་སྨྲས་པ། བཅོམ་ལྡན་འདས་སླད་མའི་ཚེ་སླད་མའི་དུས་ལྔ་བརྒྱ་ཐ་མ་ལ་དམ་པའི་ཆོས་ནུབ་པའི་དུས་ཀྱི་ཚེ་བདག་ཅག་ཐམས་ཅད་འདུས་ཤིང་ཚོགས་ཏེ་དཀོན་མཆོག་ཏ་ལ་ལ་ཞེས་
བགྱི་བའི་གཟུངས་ཡང་དག་པར་བཤད་པར་སྤྲོ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་ལེགས་སོ་ལེགས་སོ། །རིགས་ཀྱི་བུ་དག་འདི་ནི་བྱ་དཀའ་བ་སྟེ། ཆོས་འདི་འདྲ་བ་འདི་ནི་ཤིན་ཏུ་བྱ་དཀའ་བའོ། །དེ་ནས་བཅོམ་ལྡན་འདས་
ཀྱིས་བྱང་ཆུབ་སེམས་དཔའ་ཀུན་དུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བར་འགྱུར་བ་དཀོན་མཆོག་ཏ་ལ་ལའི་གཟུངས་ཉོན་ཅིག་།དེ་ནས་བཅོམ་ལྡན་འདས་ཀྱིས་བཀོད་པ་ཆེན་པོའི་སེང་གེའི་
ཁྲི་ལ་བཞུགས་ཏེ་སྔགས་བཀའ་སྩལ་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ལ་ཕྱག་འཚལ་ལོ། །ཏདྱ་ཐཱ། ཨོཾ་མཾ། བྷ་ར་ཏེ། བྷ་ར་ཏེ། བྷ་ར་བྷ་ར་ན་ཏེ་སཝཱ་ཧཱ། དེ་ནས་བཅོམ་ལྡན་འདས་ཀྱིས་ཨ་ལ་ལ་ཆོས། ཨ་ལ་ལ་

</font><hr>57-1-55a<br><font size=+2>

ཆོས། ཨ་ལ་ལ་ཆོས་ཞེས་ལན་གཉིས་ལན་གསུམ་དུ་ཆེད་དུ་བརྗོད་པ་ཆེད་དུ་བརྗོད་པ་མཛད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཀུན་དུ་བཟང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཆོས་ཞེས་བགྱི་བ་འདིའི་གཞིའི་དོན་གང་ལགས། 
བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་ཐམས་ཅད་ཀྱི་གཞིའི་དོན་ནི་གཞི་མེད་པའི་དོན་ཏོ། །ཆོས་ཐམས་ཅད་ཀྱི་གཞིའི་དོན་ནི་དངོས་པོ་མེད་པའི་གཞིའི་དོན་ཏོ། །ཆོས་ཐམས་ཅད་ཀྱི་གཞིའི་དོན་ནི་ནམ་མཁའི་གཞིའི་དོན་ཏོ། །ཆོས་ཐམས་ཅད་ཀྱི་གཞིའི་དོན་ནི་བླང་
བ་མེད་པའི་གཞིའི་དོན་ཏོ། །ཆོས་ཐམས་ཅད་ཀྱི་གཞིའི་དོན་ནི་དོར་བ་མེད་པའི་གཞིའི་དོན་ཏོ། །དེ་ནས་བྱང་ཆུབ་སེམས་དཔའ་ཀུན་དུ་བཟང་པོས་གསོལ་པ། བཅོམ་ལྡན་འདས་འོ་ན་ཅིའི་སླད་དུ་ཆོས་ཐམས་ཅད་ཅེས་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་
ཆོས་ཐམས་ཅད་ཅེས་བྱ་བ་ནི་མིག་དང ། རྣ་བ་དང་སྣ་དང་ལྕེ་དང་ལུས་དང་ཡིད་དང་དེ་བཞིན་དུ་ཁམས་རྣམས་དང ། སྐྱེ་མཆེད་རྣམས་དང་རྟེན་ཅིང་འབྲེལ་བར་འབྱུང་བ་སྟེ། རིགས་ཀྱི་བུ་འདི་ནི་ཆོས་ཐམས་ཅད་ཅེས་བྱའོ། །རིགས་ཀྱི་བུ་གཞན་ཡང་ཆོས་ཐམས་ཅད་ནི་གཟོད་མ་ནས་
མ་སྐྱེས་པའི་ཕྱིར་སྟོང་པའོ། །དེ་ནས་ཡང་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་ཀུན་དུ་བཟང་པོ་ལ་འདི་སྐད་ཅེས་སྨྲས་སོ། །ཀྱེ་རྒྱལ་བའི་སྲས་དཀོན་མཆོག་ཏ་ལ་ལའི་གཟུངས་འདི་ཇི་ལྟར་གཟུང་བར་བྱ། དེ་སྐད་ཅེས་སྨྲས་པ་དང ། བྱང་ཆུབ་སེམས་
དཔའ་ཀུན་ཏུ་བཟང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །དེ་བཞིན་ཉིད་བསྟན་པ་དང ། སྐྱེ་བ་མེད་པའི་དེ་བཞིན་ཉིད་དང ། འབྱུང་བ་མེད་པའི་དེ་བཞིན་ཉིད་དང ། མཚན་ཉིད་མེད་པའི་དེ་བཞིན་ཉིད་དང ། ནམ་མཁའི་དེ་བཞིན་ཉིད་དང ། དངོས་པོ་མེད་
པའི་དེ་བཞིན་ཉིད་དང ། ངོ་བོ་ཉིད་ཀྱི་དེ་བཞིན་ཉིད་དང ། དངོས་པོ་མེད་པའི་ངོ་བོ་ཉིད་ཀྱི་དེ་བཞིན་ཉིད་དུ་གཟུངས་འདི་གཟུང་བར་བྱ་སྟེ། རིགས་ཀྱི་བུ་དཀོན་མཆོག་ཏ་ལ་ལའི་གཟུངས་འདི་གཟུང་བ་དང ། ཀུན་དུ་གཟུང་བ་དང ། བསྒོམ་པ་དང ། རྣམ་པར་དཔྱད་པ་དང ། གདགས་པ་

</font><hr>57-1-55b<br><font size=+2>

དང ། རབ་ཏུ་གཞག་པ་དང ། རྣམ་པར་དགྲོལ་བ་དང ། རྣམ་པར་དབྱེ་བ་དང་གསལ་བར་བྱ་བ་ནི་འདི་འདྲ་སྟེ། རིགས་ཀྱི་བུ་འདི་ནི་དཀོན་མཆོག་ཏ་ལ་ལའི་གཟུངས་བསྒོམ་པ་དང ། རྣམ་པར་བརྟག་པའི་དོན་ཏོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་
པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཆོས་ཀྱི་རྣམ་གྲངས་འདི་ལ་ཡང་དག་པར་ཞུགས་ནས་ཡུན་ཇི་སྲིད་ཅིག་ལོན། འཇམ་དཔལ་གྱིས་སྨྲས་པ། ཤ་ར་དྭ་ཏིའི་བུ་འདོད་ཆགས་དང ། ཞེ་སྡང་དང་གཏི་མུག་རྣམས་ཡུན་ཇི་སྲིད་ཅིག་ནས་ཞུགས་པ་སྲིད་དོ། །ཤ་ར་དྭ་
ཏིའི་བུས་སྨྲས་པ། རིགས་ཀྱི་བུ་འདོད་ཆགས་དང་ཞེ་སྡང་དང་གཏི་མུག་རྣམས་ཡུན་ཇི་སྲིད་ཅིག་ནས་ཞུགས། འཇམ་དཔལ་གྱིས་སྨྲས་པ། ཤ་ར་དྭ་ཏིའི་བུ་སའི་ཁམས་ཡུན་ཇི་སྲིད་ཅིག་ནས་ཞུགས་པ་སྲིད་དོ། །ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་སའི་ཁམས་ཡུན་
ཇི་སྲིད་ཅིག་ནས་ཞུགས། འཇམ་དཔལ་གྱིས་སྨྲས་པ། ཤ་ར་དྭ་ཏིའི་བུ་རིག་པ་དང ། མ་རིག་པ་ཡུན་ཇི་སྲིད་ཅིག་ནས་ཞུགས་པ་སྲིད་དོ། །ཤ་ར་དྭ་ཏིའི་བུས་སྨྲས་པ། རིགས་ཀྱི་བུ་རིག་པ་དང ། མ་རིག་པ་ཡུན་ཅི་སྲིད་ཅིག་ནས་ཞུགས། འཇམ་དཔལ་གྱིས་སྨྲས་པ། ཤ་
ར་དྭ་ཏིའི་བུ་ནམ་མཁའི་ཁམས་ཡུན་ཇི་སྲིད་ཅིག་ནས་ཞུགས་པ་སྲིད་དོ། །ཤ་ར་དྭ་ཏིའི་བུས་སྨྲས་པ། འཇམ་དཔལ་ནམ་མཁའི་ཁམས་ཡུན་ཇི་སྲིད་ཅིག་ནས་ཞུགས། འཇམ་དཔལ་གྱིས་སྨྲས་པ། ཤ་ར་དྭ་ཏིའི་བུ་དངོས་པོ་མེད་པའི་ངོ་བོ་ཉིད་ཀྱི་ཆོས་ཐམས་ཅད་ཡུན་ཇི་སྲིད་ཅིག་ནས་
ཞུགས་པ་སྲིད་དོ། །དེ་ནས་ཚེ་དང་ལྡན་པ་ཤ་ར་དྭ་ཏིའི་བུས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །ཁོ་བོ་སྐྱེས་བུ་དམ་པ་འདི་ལྟ་བུ་དག་དང་གཏམ་བྱ་བའི་ནུས་པ་ག་ལ་ཡོད། རིགས་ཀྱི་བུ་འདི་ལྟ་སྟེ་དཔེར་ན། ཁྱི་དང་བྱི་ལ་ཐམས་ཅད་དམ། ཝ་ཐམས་
ཅད་ཀྱིས་ཀྱང་རིའི་རྒྱལ་པོ་རི་རབ་གཞིག་པར་མི་ནུས་སོ། །རིགས་ཀྱི་བུ་དེ་བཞིན་དུ་ཤ་ར་དྭ་ཏིའི་བུ་འདི་འདྲ་བའི་ཉན་ཐོས་ཐམས་ཅད་ཀྱིས་ཀྱང་བྱང་ཆུབ་སེམས་དཔའི་བསྟན་པ་གཅིག་གི་མཐའ་ཡང་རྟོགས་པར་མི་ནུས་ན་འཇམ་དཔལ་གཞོན་ནུར་གྱུར་པའི་བསྟན་པ་ལྟ་ཅི་སྨོས། དེ་ནས་

</font><hr>57-1-56a<br><font size=+2>

བྱང་ཆུབ་སེམས་དཔའ་ཀུན་དུ་བཟང་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་བཞུད་ལ་ཕྱི་མའི་ཚེ་ཕྱི་མའི་དུས་ན་མདོ་སྡེའི་རྒྱལ་པོ་འཛིན་པ་ཆོས་སྨྲ་བ་དེ་དག་ལ་ཀུན་དུ་བསྲུང་བ་དང ། ཡོངས་སུ་བསྐྱང་བ་མཛད་པར་དེ་བཞིན་གཤེགས་
པ་ལ་གསོལ་བ་ཐོབ་ཤིག་།དེ་ནས་འཇམ་དཔལ་གཞོན་ནུར་གྱུར་པས་རང་གི་ཆོས་ཀྱི་སྟན་ལས་ལངས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གང་དག་ཆོས་ཀྱི་རྣམ་གྲངས་འདི་འཛིན་པ་དང ། ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལ་ཡང་རྒྱ་ཆེར་
ཡང་དག་པར་སྟོན་པར་བགྱིད་པ། ཆོས་སྨྲ་བ་དེ་དག་གི་ཡོན་ཏན་གྱི་ཁྱད་པར་རྣམས་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དགེ་སློང་མདོ་སྡེའི་རྒྱལ་པོ་འཛིན་པ་ཆོས་སྨྲ་བ་དེ་དག་ནི་ངའི་ཆོས་ཀྱི་སྐུ་ལ་ངེས་པར་འབྱུང་བར་
འགྱུར་རོ། །དེ་དག་ནི་སངས་རྒྱས་ཀྱི་བྱང་ཆུབ་ཐོབ་པར་འགྱུར་རོ། །དེ་དག་ནི་སངས་རྒྱས་ཀྱི་ཆོས་རྣམས་ལ་ཉེ་བར་འགྱུར་རོ། །དེ་དག་ལ་བདུད་དང་བདུད་ཀྱི་རིས་ཀྱི་ལྷའི་བུ་གླགས་ལྟ་བ་རྣམས་ཀྱིས་གླགས་མི་རྙེད་པར་འགྱུར་རོ། །རིགས་ཀྱི་བུ་གང་སུ་དག་ཆོས་སྨྲ་བའི་དགེ་སློང་དེ་ལ་སེ་
གོལ་གཏོགས་པ་གཅིག་ཙམ་སྲིད་ཅིག་མི་བྱམས་པའི་སེམས་སྐྱེད་པ་དེ་དག་ནི་མིར་འགྱུར་བ་ལས་ཀྱང་རིང་དུ་གྱུར་པ་ཡིན་ན་སངས་རྒྱས་ཀྱི་བྱང་ཆུབ་ལས་ལྟ་སྨོས་ཀྱང་ཅི་དགོས། འཇམ་དཔལ་གཞན་ཡང་གང་དག་མདོ་སྡེའི་རྒྱལ་པོ་འདི་འཛིན་པའི་དགེ་སློང་རྣམས་ལ་མ་དད་པའི་སེམས་
སྐྱེད་པ་དེ་དག་ནི་སོ་ཐགས་ངན་པར་འགྱུར། ལྕེ་དང་སྣ་མེད་པར་འགྱུར། རྐ་ལག་ཕྱི་ཕྱོགས་སུ་འགྱུར། ལུས་ནད་བུ་ཅན་དུ་འགྱུར། མིག་མེད་པར་འགྱུར། ཤེས་རབ་འཆལ་པའི་རང་བཞིན་ཅན་དུ་འགྱུར། བརྩོན་འགྲུས་ཆུང་བར་འགྱུར་ཏེ། འཇམ་དཔལ་འདི་དག་ནི་མི་གཏི་མུག་པ་
དེ་དག་གི་སྐྱོན་དུ་གྱུར་པའོ། །འཇམ་དཔལ་མདོར་བཤད་ན་དེ་དག་འཆི་བའི་དུས་ཀྱི་ཚེ་དེ་དག་གི་སྤུའི་ཁུང་བུ་རེ་རེར་ཡང་སེམས་ཅན་དམྱལ་བའི་སྡུག་བསྔལ་དཔག་ཏུ་མེད་པར་འཇུག་གོ། །གལ་ཏེ་མིར་སྐྱེས་ན་ཡང་རྟག་ཏུ་དམུས་ལོང་དུ་འགྱུར། ལྕེ་མེད་པར་འགྱུར་རོ། །འཇམ་

</font><hr>57-1-56b<br><font size=+2>

དཔལ་གཞན་ཡང་གང་དག་ཆོས་ཀྱི་རྣམ་གྲངས་འདི་སྤོང་བ་དེ་དག་ནི་ཚེ་འདི་ཉིད་ལ་ལུས་མཛེ་ཅན་དུ་འགྱུར། མཆུ་འཇིགས་འཇིགས་ལྟར་འདུག་པར་འགྱུར། ལུས་ཞོམ་པར་འགྱུར། ལུས་གཅེར་བུར་འགྱུར། ལུས་སྐམ་པོར་འགྱུར། ཡི་དགས་འདྲ་བར་འགྱུར་རོ། །འཇམ་དཔལ་
གཞན་ཡང་མི་གཏི་མུག་པ་དེ་དག་གང་དུ་སྐྱེ་བར་འགྱུར་བ་དེ་དག་གི་གནས་ནི་ངས་སངས་རྒྱས་ཀྱི་ཡེ་ཤེས་བསམ་གྱིས་མི་ཁྱབ་པས་མཁྱེན་ཏོ། །འཇམ་དཔལ་གཞོན་ནུར་གྱུར་པས་གསོལ་པ། བཅོམ་ལྡན་འདས་ཀྱིས་ལུང་བསྟན་དུ་གསོལ། བདེ་བར་གཤེགས་པས་ལུང་བསྟན་
དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁ་རོག་དེ་སྐད་མ་འདྲི་ཤིག་།འདི་ལ་ལྷ་དང་བཅས་པའི་འཇིག་རྟེན་མྱོས་པར་འགྱུར་ཏེ་སྐྲག་པར་འགྱུར། དངང་བར་འགྱུར། རབ་ཏུ་དངང་བར་འགྱུར་རོ། །འཇམ་དཔལ་གྱིས་གསོལ་པ། སེམས་ཅན་འདི་དག་
གིས་འདི་ལྟ་བུ་ཐོས་ནས་སླན་ཆད་ནམ་ཡང་དམ་པའི་ཆོས་སྤོང་བར་མི་འགྱུར་བར་བགྱི་བའི་སླད་དུ་ཐུགས་བརྩེ་བར་དགོངས་ཏེ། བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་སའི་འོག་ན་སེམས་ཅན་དམྱལ་བ་ཡོད་པའི་
མིང་ལ་འདི་ལྟ་སྟེ། ཚ་བ་དང ། རབ་ཏུ་ཚ་བ་དང ། ཐིག་ནག་དང ། ཀུན་དུ་འབར་བ་དང ། རབ་ཏུ་འབར་བ་དང ། རེག་དཀའ་བ་དང ། དྲག་པོ་དང ། མཆུ་རྣོན་དང ། ལྕགས་ཀྱི་ཐུ་ལུམ་དང ། ལྕགས་ཀྱི་བེ་ཅོན་དང ། མུན་ཁུང་དང ། མགོ་བསྟོད་དང ། སྤྱིའུ་ཚུགས་དང ། སྤྲིའུ་གདོང་དང ། 
རྟག་ཏུ་རབ་འབར་དང ། རུལ་པ་དང ། རྟག་ཏུ་དྲི་ང་དང ། རབ་འཇོམས་དང ། དེས་འཇོམས་དང ། ཤིན་ཏུ་གནོད་འཇོམས་རྣམས་ཏེ་འཇམ་དཔལ་མི་གཏི་མུག་པ་དེ་དག་གང་དུ་སྐྱེ་བར་འགྱུར་བའི་སེམས་ཅན་དམྱལ་བ་ནི་འདི་དག་གོ། །དེ་ནས་བཅོམ་ལྡན་འདས་ལ་བྱང་ཆུབ་
སེམས་དཔའ་ཀུན་དུ་བཟང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་སྨྲ་བ་དེ་དག་འདི་ནས་ཤི་འཕོས་ནས་གང་དུ་སྐྱེ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀུན་དུ་བཟང་པོ་ཁྱོད་ཀྱིས་ཞུས་པ་དེ་ལེགས་པར་ཞུས་སོ། །ཀུན་དུ་བཟང་པོ་རིགས་ཀྱི་

</font><hr>57-1-57a<br><font size=+2>

བུའམ། རིགས་ཀྱི་བུ་མོ་ཆོས་སྨྲ་བ་དེ་འདི་ནས་ཤི་འཕོས་ནས་བཅོམ་ལྡན་འདས་དེ་བཞིན་གཤེགས་པ་སྤོབས་པ་བསམ་གྱིས་མི་ཁྱབ་པའི་སངས་རྒྱས་ཀྱི་ཞིང་འཇིག་རྟེན་གྱི་ཁམས་རབ་ཏུ་བརྒྱན་པར་སྐྱེ་བར་འགྱུར་ཏེ། འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་
ཀུན་ནས་མཛེས་པ་ཤ་སྟག་གོ། །འཆི་བའི་དུས་ཀྱི་ཚེ་རིགས་ཀྱི་བུ་དེ་ལ་སངས་རྒྱས་བྱེ་བ་ཕྲག་བཅུ་གཉིས་མངོན་དུ་འགྱུར་རོ། །རིགས་ཀྱི་བུ་མདོར་ན་རིགས་ཀྱི་བུ་དེའི་ཕན་ཡོན་ནི་གྲངས་མེད་དཔག་ཏུ་མེད་དེ། དེ་དག་ནི་བསྐལ་པ་སྟོང་དག་གིས་ཀྱང་བརྗོད་པར་མི་ནུས་སོ། །བྱང་ཆུབ་
སེམས་དཔའ་ཀུན་དུ་བཟང་པོས་གསོལ་པ། བཅོམ་ལྡན་འདས་སླད་མའི་ཚེ་སླད་མའི་དུས་ན་གང་དག་ཆོས་ཀྱི་རྣམ་གྲངས་འདི་སྤོང་བར་འགྱུར་བའི་སེམས་ཅན་ཇི་ལྟ་བུ་དག་འབྱུང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀུན་དུ་བཟང་པོ་འདི་ལྟ་བུའི་ཆོས་འདི་དག་
སྤོང་བར་འགྱུར་བའི་སེམས་ཅན་དེ་དག་ནི་ཕལ་ཆེར་རབ་ཏུ་བྱུང་བ་དག་འབྱུང་སྟེ། འདི་སྐད་དུ་འདི་དག་ནི་སྙན་དངགས་སྦྱར་བ་ཡིན་གྱི། འདི་དག་ནི་དེ་བཞིན་གཤེགས་པས་གསུངས་པ་མ་ཡིན་ནོ། །འདི་དག་ནི་རང་བཟོར་བྱས་པ་ཡིན་ཏེ། མདོ་སྡེ་འདི་དག་ནི་སྔོན་ནམ་ཡང་མ་ཐོས་
སོ་ཞེས་འཛེར་ཅིང་དེ་དག་ཆོས་ཀྱི་རྣམ་གྲངས་འདི་སྤོང་བར་འགྱུར་རོ། །སྤངས་ནས་ཀྱང་མཐོལ་ཞིང་འཆགས་པར་མི་འགྱུར་ཏེ། དེ་དག་ཆོས་སྤངས་པས་འཆི་བའི་ཚེ་སེམས་ཅན་དམྱལ་བ་ཀུན་དུ་འབར་བ་མི་བཟད་པར་སྐྱེ་བར་འགྱུར་རོ། །སྐྱེས་མ་ཐག་ཏུ་ལྕགས་ཀྱི་འཁོར་
ལོས་མི་གཏི་མུག་པ་དེ་དག་གི་མགོ་གཅད་ནས་ས་ལ་ལྟུང་བར་འགྱུར་རོ། །དེ་ལྟར་གྱུར་ནས་ཀྱང་བསྐལ་པ་མང་པོ་བསྐལ་པ་བརྒྱ་ཕྲག་མང་པོ་དང ། བསྐལ་པ་སྟོང་ཕྲག་མང་པོར་དམུས་ལོང་དུ་འགྱུར་རོ། །གལ་ཏེ་བསྐལ་པ་བརྒྱ་དག་འདས་ནས་མིར་སྐྱེ་བར་གྱུར་ན་ཡང་ཚེ་རབས་
ཐམས་ཅད་དུ་དམུས་ལོང་དུ་སྐྱེ་བར་འགྱུར་ཞིང་ལྕེ་མེད་པ་དང ། གདོང་ཕྱིན་ཕྱོགས་སུ་འདུག་པ་དང ། ལྟག་སྒུར་དང ། མཇིང་པ་ནུབ་པ་དང ། རྐང་གྱོལ་དང ། ང་རོ་ཁྱི་སྐད་ལྟ་བུ་དང ། རྟག་ཏུ་བཀྲེས་ཤིང་སྐོམ་པས་ཉེན་པ་དང ། ལུས་སྐམས་པ་དང ། ཁ་མནམ་པ་དང་།

</font><hr>57-1-57b<br><font size=+2>

སེམས་ཅན་ཐམས་ཅད་ཀྱིས་མཐོང་ངམ་ཐོས་ན་ཡིད་དུ་མི་འོང་བར་སྐྱེ་བར་འགྱུར་རོ། །དེ་ནས་ཐམས་ཅད་དང་ལྡན་པའི་འཁོར་དེས་མགྲིན་གཅིག་ཏུ་ཚིག་སྨྲས་པ། བཅོམ་ལྡན་འདས་མ་འཚལ་བ་བདག་ཅག་གིས་མདོ་སྡེ་འདི་ལྟ་བུ་དག་སྤངས་པ་དང ། ཆོས་སྨྲ་བ་དེ་དག་ལ་ཁྲོས་
པའི་སེམས་ཀྱིས་བལྟས་པར་གྱུར་པ་རྣམས་ནོངས་པ་ལ་ནོངས་པར་འཆགས་སོ། །བཅོམ་ལྡན་འདས་བདག་ཅག་ཇི་ལྟར་བྱིས་པར་གྱུར་པ་དང ། ཇི་ལྟར་རྨོངས་པར་གྱུར་པ་དང ། ཇི་ལྟར་ཤེས་རབ་འཆལ་པར་གྱུར་པ་དང ། ཇི་ལྟར་བློ་ཆུང་བར་གྱུར་པ་རྣམས་འཆགས་ཤིང་
མཆིས་ན་སངས་རྒྱས་བཅོམ་ལྡན་འདས་རྣམས་དགོངས་སུ་གསོལ། དེ་ནས་ཉན་ཐོས་ཆེན་པོ་དེ་དག་དང་བརྒྱ་བྱིན་དང་ཚངས་པ་དང ། འཇིག་རྟེན་སྐྱོང་བ་དེ་དག་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དེ་དག་དངངས་ནས་བཅོམ་ལྡན་འདས་
བདག་ཅག་ནི་བསྟན་པ་འདི་ལྟ་བུ་འདི་ཐོས་ནས་རབ་ཏུ་དངངས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། གྲོགས་པོ་དག་དེ་དེ་བཞིན་ནོ། །ཇི་སྐད་སྨྲས་པ་བཞིན་ཏེ། ཁྱེད་ཀྱིས་སྐྲག་པར་བྱ་བའི་རིགས་སོ། །གྲོགས་པོ་དག་ང་ཐམས་ཅད་མཁྱེན་པའི་ཡེ་ཤེས་བརྙེས་
པ་ཡིན་ན་ང་ཉིད་ཀྱང་སྐྲག་ན་གང་དག་ངའི་སློབ་མ་རྣམས་ལྟ་ཅི་སྨོས། རིགས་ཀྱི་བུ་དག་ཆོས་འདི་ནི་ཟབ་པ་སྟེ། དེ་ནི་མིའམ། མི་མ་ཡིན་པའམ། ལྷའམ། ཀླུའམ། གནོད་སྦྱིན་ནམ། དྲི་ཟའམ་སུས་ཀྱང་རྣམ་པར་དཀྲུག་པར་མི་ནུས་ན་དགེ་སྦྱོང་ངམ་བྲམ་ཟེ་གཞན་དག་གིས་ལྟ་
ག་ལ་ནུས་ཏེ་ཅི་སྨོས། རིགས་ཀྱི་བུ་དག་ཆོས་ཀྱི་རྣམས་གྲངས་འདི་ནི་ལྷ་དང་བཅས་པའི་འཇིག་རྟེན་གྱི་མཆོད་རྟེན་དུ་གྱུར་པ་སྟེ། རིགས་ཀྱི་བུ་དག་དཔེར་ན་དཀོན་མཆོག་ཟ་མ་ཏོག་ཇི་ལྟ་བར་མདོ་སྡེའི་རྒྱལ་པོ་འདི་ཡང་དེ་བཞིན་དུ་བལྟ་བར་བྱའོ། །དེ་ནས་བཅོམ་ལྡན་འདས་
ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ནི་ལེགས་པར་གསུངས་པ་ལགས་སོ། །བཅོམ་ལྡན་འདས་དགེ་སློང་དེ་ལྟ་བུ་དེ་དག་གིས་དད་པས་སྩལ་པ་ཇི་ལྟར་ཡོངས་སུ་འཇུ་བར་འགྱུར། བཅོམ་ལྡན་འདས་ཀྱིས་བཀའ་

</font><hr>57-1-58a<br><font size=+2>

སྩལ་པ། འཇམ་དཔལ་གང་དག་ཆོས་ཀྱི་རྣམ་གྲངས་འདི་སྤོང་བ་དང ། ཆོས་སྨྲ་བ་དེ་དག་ལ་མི་བྱམས་པའི་སེམས་སྐྱེད་པ་དེ་དག་ནི་ཉི་མ་གཅིག་གམ། སེ་གོལ་གཏོགས་པ་གཅིག་སྲིད་ཙམ་ཞིག་དད་པས་བྱིན་པ་ཡོངས་སུ་སྤྱད་པའམ། ཐ་ན་དགེ་འདུན་
ལ་ཕུལ་བའི་ས་ལ་མཆིལ་མ་ཐལ་གཅིག་འདོར་དུ་ཡང་ངས་མ་གནང་ངོ ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་མཚམས་མ་མཆིས་པ་ལྔ་པོ་དག་འདི་དང་ཉེ་བ་ལགས་སམ། འོན་ཏེ་རིང་བ་ལགས། 
བཅོམ་ལྡན་འདས་ཀྱིས་བཀའ་སྩལ་པ། གནས་བརྟན་ཤ་ར་དྭ་ཏིའི་བུ་ཁ་རོག་དེ་སྐད་མ་འདྲི་ཤིག་།དེ་ཅིའི་ཕྱིར་ཞེ་ན། ཤ་ར་དྭ་ཏིའི་བུ་མཚམས་མེད་པ་ལྔ་པོ་དག་ནི་བླའི་ཆོས་ཀྱི་རྣམ་གྲངས་འདི་སྤངས་པ་ནི་ནམ་ཡང་དེ་ལྟ་མ་ཡིན་ནོ། །ཤ་ར་དྭ་ཏིའི་བུ་མཚམས་མེད་པ་
ལྔ་བྱེད་པ་ནི་མཚམས་མེད་པ་ལྔ་པོ་དག་མྱུར་དུ་ཟད་པར་བྱས་ནས་མིར་སྐྱེ་བར་འགྱུར་རོ། །དམ་པའི་ཆོས་སྤོང་བའི་གང་ཟག་དེ་ནི་ནམ་ཡང་སངས་རྒྱས་ཀྱི་ཆོས་རྣམས་ཐོབ་བར་མི་འགྱུར་ཏེ། དེ་ནི་བདག་ཀྱང་ཕུང་ལ་གཞན་ཡང་ཕུང་བར་བྱེད་པར་འགྱུར་རོ། །དེ་ནས་ཚེ་དང་
ལྡན་པ་ཤ་ར་དྭ་ཏིིའི་བུ་བཅོམ་ལྡན་འདས་ཀྱི་སྤྱན་སྔ་ན་དུ་ཞིང་འདི་སྐད་ཅེས་གསོལ་ཏོ། །ེ་མའོ་དམ་པའི་ཆོས་སྤོང་བའི་སེམས་ཅན་རྣམས་ནི་སྡུག་བསྔལ་ལོ། །ལས་ཀྱི་སྒྲིབ་པ་འདི་ལྟ་བུ་དག་ནི་བདག་གིས་རྨི་ལམ་ན་ཡང་མཐོང་བར་མ་གྱུར་ཅིག། ་་་།།
བམ་པོ་གསུམ་པ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་དེ་སྙམ་མ་སེམས་ཤིག་ངས་ཆོས་བསྟན་པ་ནི་འབྱུང་བ་དང་བཅས་པ་ཡིན་ན་འཇིག་རྟེན་ནི་ལས་བདག་གིར་བྱ་བ། རང་གི་ལས་ཀྱི་བགོ་
སྐལ་ལ་སྤྱོད་པ། རང་གི་ལས་བརྟན་པར་བྱ་བ་སྟེ། སེམས་ཅན་དག་རང་རང་གི་ལས་རྣམས་ཀྱིས་སྡུག་བསྔལ་གྱི་ཚོར་བ་མྱོང་གི་དེ་ལ་དེ་བཞིན་གཤེགས་པས་ནི་མ་ལན་ནོ། །ཤ་ར་དྭ་ཏིའི་བུ་ངས་ནི་དགེ་ལེགས་སུ་འགྲོ་བའི་ལམ་བཤད་དེ། བདེ་བར་འགྲོ་བ་དང་།

</font><hr>57-1-58b<br><font size=+2>

འཇིགས་པ་མེད་པར་འགྲོ་བ་དང ། མྱ་ངན་ལས་འདའ་བར་འགྲོ་བ་དང ། འཆི་བ་མེད་པར་འགྲོ་བའི་ལམ་བཤད་ན། འོན་ཀྱང་སེམས་ཅན་འདི་དག་ནི་ལུས་ཀྱིས་ཉེས་པར་སྤྱོད་པ་དང་ལྡན། ངག་གིས་ཉེས་པར་སྤྱོད་པ་དང་ལྡན། ཡིད་ཀྱིས་ཉེས་པར་སྤྱོད་པ་དང་ལྡན་ཞིང་
འཕགས་པ་རྣམས་ལ་སྐུར་པ་འདེབས་པ་དང ། ལོག་པར་ལྟ་བ་དག་སྟེ། ལོག་པར་ལྟ་བའི་ལས་དང ། ཆོས་ཡང་དག་པར་སྤངས་པའི་རྒྱུས་ལུས་ཞིག་ནས་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བའི་སེམས་ཅན་དམྱལ་བ་རྣམས་སུ་སྐྱེ་སྟེ། དེ་ལ་དེ་བཞིན་
གཤེགས་པས་ནི་མ་ལན་ནོ། །ཤ་ར་དྭ་ཏིའི་བུ་སེམས་ཅན་ཐམས་ཅད་ལ་ངའི་སྙིང་རྗེ་འདི་ལྟ་བུ་སྐྱེ་སྟེ། ངས་སེམས་ཅན་གཅིག་གི་དོན་དུ་ཡང་བསྐལ་པའམ། བསྐལ་པ་ལས་ལྷག་པར་སེམས་ཅན་དམྱལ་བའི་སྡུག་བསྔལ་རྣམས་མྱོང་བར་བྱའི་སེམས་ཅན་གཅིག་
པོ་ནི་ཡོངས་སུ་གཏང་བར་མི་བྱའོ་སྙམ་སྟེ། ཤ་ར་དྭ་ཏིའི་བུ་དེ་བཞིན་གཤེགས་པའི་སྙིང་རྗེ་ཆེན་པོ་ནི་དེ་འདྲའོ། །ཤ་ར་དྭ་ཏིའི་བུ་འདི་ལྟ་སྟེ་དཔེར་ན། མི་ཞིག་ལ་བུ་གཅིག་པ་གཟུགས་བཟང་པ་མཛེས་པ། བལྟ་ན་སྡུག་པ་ཁ་དོག་བཟང་པོ་རྒྱས་པ་མཆོག་དང་ལྡན་
པ་ཞིག་ཡོད་ལ། དེ་རྐྱེན་འགའ་ཞིག་དང་ཕྲད་ནས་འཆི་བའི་དུས་བྱས་པར་གྱུར་ན། མི་དེ་བུ་ལ་སེམས་པས་སྡུག་བསྔལ་ཞིང་ཡིད་མི་བདེ་བར་གྱུར་ཏེ། ངུ་ཞིང་སྨྲེ་སྔགས་འདོན་ཏོ། །ཤ་ར་དྭ་ཏིའི་བུ་དེ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་
པར་རྫོགས་པའི་སངས་རྒྱས་ཀྱང་སེམས་ཅན་སྡུག་བསྔལ་བ་དག་ལ་བུ་གཅིག་པ་བཞིན་དུ་དགོངས་པ་མཛད་དེ། དེ་བཞིན་གཤེགས་པ་དག་ཉོན་མོངས་པ་རྣམས་དང་ལྷན་ཅིག་གནས་པ་ནི་མ་ཡིན་ནོ། །ཤ་ར་དྭ་ཏིའི་བུ་འདི་ལྟ་སྟེ་དཔེར་ན་རྒྱ་མཚོ་ཆེན་པོ་ནི་ཤི་
བའི་རོ་དང་ལྷན་ཅིག་མི་གནས་སོ། །ཤ་ར་དྭ་ཏིའི་བུ་དེ་བཞིན་དུ་དེ་བཞིན་གཤེགས་པ་དག་ཀྱང་ཉོན་མོངས་པ་རྣམས་དང་ལྷན་ཅིག་མི་གནས་སོ། །ཤ་ར་དྭ་ཏིའི་བུ་འདི་ལྟ་སྟེ་དཔེར་ན་སྒྱུ་མ་མཁན་ནམ། སྒྱུ་མ་མཁན་གྱི་སློབ་མ་མཁས་པས་ལམ་པོ་ཆེའི་བཞི་

</font><hr>57-1-59a<br><font size=+2>

མདོར་སྐྱེ་བོའི་ཚོགས་ཆེན་པོ་མངོན་པར་སྤྲུལ་ཏེ། བྱ་བ་དག་སྟོན་ཀྱང་བྱ་བ་དེ་དག་ནི་ཡུལ་ན་མི་གནས་ཕྱོགས་ན་མི་གནས་ཏེ། མ་སྐྱེས་མ་འགགས་ཤིང་འགག་པར་མི་འགྱུར་རོ། །ཤ་ར་དྭ་ཏིའི་བུ་དེ་བཞིན་དུ་དེ་བཞིན་གཤེགས་པ་རྣམས་ཀྱང་སེམས་ཅན་རྣམས་
ཡོངས་སུ་སྨིན་པར་མཛད་ཅིང་འདོད་ཆགས་ཀྱི་སྤྱོད་པ་ཡང་སྟོན་ཏེ། མཛད་པ་སྟོན་ཀྱང་སྤྱོད་པ་དེ་དག་ནི་ཡོད་པ་མ་ཡིན་ནོ། །དཔེར་ན་ནམ་མཁའི་ཁམས་ནི་རྣམ་པར་རྟོག་པ་མེད་ཅིང་སྤྲོས་པ་མེད་པའོ། །དེ་བཞིན་དུ་དེ་བཞིན་གཤེགས་པའི་སྐུ་ལ་ཡང་རྣམ་པར་རྟོག་པ་མེད་ཅིང་
སྤྲོས་པ་མེད་དོ། །འོན་ཀྱང་སེམས་ཅན་རྣམས་དང་འཐུན་པར་དེ་བཞིན་གཤེགས་པ་རྣམས་འཐུན་པར་མཛད་དེ། སེམས་ཅན་རྣམས་ཇི་ལྟར་འདུལ་བར་འགྱུར་བ་དེ་བཞིན་དུ་དེ་བཞིན་གཤེགས་པ་རྣམས་འཐུན་པར་འཇུག་གོ། །ཤ་ར་དྭ་ཏིའི་བུ་དེ་བཞིན་གཤེགས་པ་ལ་འཁྲུལ་
པ་མི་མངའོ། །དེ་བཞིན་གཤེགས་པ་ལ་མི་མཁྱེན་པ་མི་མངའོ། །དེ་བཞིན་གཤེགས་པ་ལ་བསྙེལ་བ་མི་མངའོ། །ཤ་ར་དྭ་ཏིའི་བུ་ང་ནི་ལྷ་དང་བཅས་པའི་འཇིག་རྟེན་གྱི་ཐུ་བོ་དང ། གཙོ་བོ་དང ། རབ་དང ། མཆོག་དང ། ཕུལ་དང ། བླ་མ་དང ། བླ་ན་མེད་པ་དང ། གོང་ན་
མེད་པ་དང ། མི་མཉམ་པ་དང་མཉམ་པ་ཡིན་ཏེ། ཤ་ར་དྭ་ཏིའི་བུ་ཚིག་སྨྲས་པ་འདི་ནི་བདེན་པའི་རྗེས་སུ་འཐུན་པའོ། །རབ་ཏུ་བྱུང་བའམ། ཁྱིམ་པ་ཡང་རུང་སྟེ། སེམས་ཅན་གང་དག་ཆོས་ཀྱི་རྣམ་གྲངས་འདི་སྤོང་བ་དེ་དག་ཐམས་ཅད་ནི་སེམས་ཅན་དམྱལ་བའི་སྡུག་བསྔལ་
འདི་ལྟ་བུ་དག་རྙེད་པར་འགྱུར་རོ། །དེ་ནས་ཚེ་དང་ལྡན་པ་རབ་འབྱོར་གྱིས་བཅོམ་ལྡན་འདས་ཀྱིས་བསྟན་པ་འདི་ཐོས་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་དེ་དག་གིས་ནི་རྙེད་པ་ནོངས་པར་རྙེད་དོ། །གང་དག་
ཆོས་ཀྱི་རྣམ་གྲངས་འདི་སྤོང་བར་འགྱུར་བ་དེ་དག་ལྕེ་ཅི་འདྲ་བ་ཞིག་ཏུ་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་དག་གི་ལྕེ་ནི་དཔག་ཚད་འབུམ་པར་འགྱུར་ཏེ། དེ་ལ་ལྕགས་ཀྱི་ཐོང་གཤོལ་འབར་བ་རབ་ཏུ་འབར་བ་ཀུན་དུ་རབ་ཏུ་འབར། ཀུན་དུ་

</font><hr>57-1-59b<br><font size=+2>

རབ་ཏུ་མཆེད་ཅིང་འབར་བ། མེ་ལྕེ་གཅིག་ཏུ་གྱུར་བ་བྱེ་བ་ཕྲག་ལྔ་བརྒྱས་རྨོ་བར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེས་ངག་མ་བསྲུངས་པའི་ཕྱིར་ཏེ། རབ་འབྱོར་མི་གཏི་མུག་པ་དེ་དག་གི་ལས་ཀྱི་སྒྲིབ་པ་ནི་དེ་ལྟ་བུར་འགྱུར་རོ། །དེ་ནས་སངས་རྒྱས་ཀྱི་མཐུས་ཐམས་ཅད་
དང་ལྡན་པའི་འཁོར་དེས་དེ་བཞིན་གཤེགས་པས་བསྟན་པ་ནི་རྨད་དུ་བྱུང་བ་ཆེན་པོ་ལགས་སོ་ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཆོས་སྨྲ་བའི་དགེ་
སློང་དེ་དག་ཕྲག་པ་ལ་བཀུར་བར་བགྱིའོ། །མེ་ཏོག་དང་བདུག་པ་དང་སྤོས་དང་ཕྲེང་བ་དང་བྱུག་པ་རྣམས་ཀྱིས་མཆོད་པར་བགྱིའོ། །གདུགས་ལན་གསུམ་མཚན་ལན་གསུམ་དུ་ཕྱག་བགྱིའོ། །བསྙེན་བཀུར་བགྱིའོ། །བསྟི་སྟང་བགྱིའོ། །བླ་མར་བགྱིའོ། །རི་མོར་བགྱིའོ། །
མཆོད་པར་བགྱིའོ། །རྗེད་པར་བགྱིའོ། །གསོལ་བར་བགྱིའོ། །བསྟི་སྟང་བགྱི་བ་དང ། བླ་མར་བགྱི་བ་དང ། གུས་པས་བསྲུང་བར་བགྱིའོ། །དེ་ཅིའི་སླད་དུ་ཞེ་ན། དེ་དག་ནི་བཅོམ་ལྡན་འདས་ཀྱི་སྲས་ཏེ་ཆོས་ཀྱི་སྐུ་ལས་ངེས་པར་བྱུང་བའི་སླད་དུའོ། །བཅོམ་ལྡན་འདས་འདི་ལྟ་
སྟེ་དཔེར་ན་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བའི་བུར་གྱུར་པ། གཟུགས་བཟང་བ། མཛེས་པ། བལྟ་ན་སྡུག་པ་དེ་ནི་འོག་མ་ཐམས་ཅད་ཀྱི་མཆོད་པའི་འོས་དང ། ཕྱག་བགྱི་བའི་འོས་ལགས་སོ། །དེ་བཞིན་དུ་ཆོས་སྨྲ་བ་དེ་དག་ཀྱང་ལྷ་དང་བཅས་པའི་འཇིག་རྟེན་
གྱི་མཆོད་པའི་འོས་དང་ཕྱག་བགྱི་བའི་འོས་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་དུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ལྷའི་དབང་པོ་བརྒྱ་བྱིན་གྱིས་ཆོས་སྨྲ་བའི་དགེ་སློང་དེ་དག་སྙིང་ལས་ཆུང་ངུར་བྱ་བ་དང ། 
ཡོངས་སུ་བསྐྱང་བ་དང ། ཀུན་དུ་བསྲུང་བ་དང ། བསྐྱབ་པའི་ཕྱིར་ཚིག་འདི་ལེགས་པར་སྨྲས་སོ། །བྱང་ཆུབ་སེམས་དཔའ་ཀུན་དུ་བཟང་པོས་གསོལ་པ། བཅོམ་ལྡན་འདས་བདག་གིས་ཀྱང་རིགས་ཀྱི་བུའམ། རིགས་ཀྱི་བུ་མོ་དེ་དག་ཀུན་དུ་བསྲུང་བར་བགྱིའོ།

</font><hr>57-1-60a<br><font size=+2>

ཡོངས་སུ་བསྐྱབ་པ་དང ། ཡོངས་སུ་གཟུང་བ་དང ། ཞི་བ་དང་བདེ་ལེགས་སུ་འགྱུར་བར་བགྱིའོ། །དཔག་ཚད་བརྒྱ་ཁོ་ར་ཁོར་ཡུག་ཏུ་ཡོངས་སུ་བསྐྱང་བར་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་དུ་བཟང་པོ་ལ་རིགས་ཀྱི་བུ་ཚིག་འདི་
ལེགས་པར་སྨྲས་པ་ལེགས་སོ་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ཀྱིས་ཚངས་པའི་དབྱངས་ཀྱིས་ཚིགས་སུ་བཅད་པ་འདི་བཀའ་སྩལ་ཏོ། །གཞན་ལ་ཕན་དང་བདེ་བ་བྱེད་པ་བསགས་པ་པོ། །རྣམ་པ་སྣ་ཚོགས་རབ་མཛེས་མཆོག་རབ་ཚིག་ལྡན་པ། 
ཤིན་ཏུ་དྲི་མེད་བཞིན་ལྡན་ཁྱོད་ཀྱི་བསམ་པ་མཆོག་།ཡོན་ཏན་རིན་ཆེན་མི་མཉམ་མཉམ་པའི་ཚིགས་ལེགས་སྨྲས། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ཀུན་དུ་བཟང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་
ཆེན་པོ་དག་ཆོས་དུ་དང་ལྡན་ན་དཀོན་མཆོག་ཏ་ལ་ལའི་གཟུངས་འཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དག་ཆོས་གཅིག་དང་ལྡན་ན་དཀོན་མཆོག་ཏ་ལ་ལའི་གཟུངས་འཐོབ་བོ། །ཆོས་གཅིག་
པོ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་ཁོང་ཁྲོ་བ་མེད་པའོ། །ཀུན་དུ་བཟང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་ཆོས་གཉིས་ཏེ། གཉིས་གང་ཞེ་ན། འདི་ལྟ་སྟེ། ཕྲག་དོག་མེད་པ་དང ། རློམ་སེམས་མེད་པ་སྟེ། ཀུན་དུ་བཟང་པོ་འདི་དག་ནི་
བྱང་ཆུབ་སེམས་དཔའ་སེམས་དཔའ་ཆེན་པོ་དག་གི་ཆོས་གཉིས་སོ། །ཀུན་དུ་བཟང་པོ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ནི་སེམས་ཅན་ཐམས་ཅད་ལ་དབང་པོ་གནོད་པར་མི་འགྱུར་རོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་ཅན་
ཐམས་ཅད་ལ་ཐམས་ཅད་ཀྱི་ཐམས་ཅད་དུ་རྣམ་པར་འཚེ་བ་བསྐྱེད་པར་མི་བྱའོ། །བྱང་ཆུབ་སེམས་དཔའི་ཡོན་ཏན་བརྗོད་པ་འདི་བཤད་པ་དང ། དཀོན་མཆོག་ཏ་ལ་ལའི་གཟུངས་ཀྱི་ཁྱད་པར་གྱི་ཡོན་ཏན་ཡོངས་སུ་བརྗོད་པ་བཤད་པ་ན་ལྷ་དང ། མིའི་སྐྱེ་དགུ་ལས་སེམས་ཅན་དཔག་

</font><hr>57-1-60b<br><font size=+2>

ཏུ་མེད་པས་གཟུངས་ཐོབ་པར་གྱུར་ཏོ། །དཀོན་མཆོག་ཏ་ལ་ལའི་གཟུངས་ཀྱི་ཁྱད་པར་གྱི་ཡོན་ཏན་ཡོངས་སུ་བརྗོད་པའི་ལེའུའོ།། །།དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་
ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདི་ནི་ཟབ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ཏེ། 
གཟུགས་ཟབ་པའི་ཕྱིར་ཟབ་བོ། །ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ཟབ་པའི་ཕྱིར་ཟབ་བོ། །སྟོང་པ་ཉིད་ཟབ་པའི་ཕྱིར་ཟབ་བོ། །ནམ་མཁའ་ཟབ་པའི་ཕྱིར་ཟབ་བོ། །ཀུན་དགའ་བོས་གསོལ་པ། བཅོམ་ལྡན་འདས་བདག་གིས་ཆོས་ཀྱི་ཕུང་པོ་བརྒྱད་
ཁྲི་བཞི་སྟོང་དེ་བཞིན་གཤེགས་པ་ལས་མངོན་དུ་ཐོས་ན་ཆོས་ཀྱི་རྣམ་གྲངས་འདི་ལྟ་བུ་ནི་ནམ་ཡང་མ་ཐོས་སོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་ཀྱི་རྣམ་གྲངས་འདི་ནི་ཤིན་ཏུ་ཐོས་པར་བྱ་དཀའ་བ་ཡིན་ནོ། །ཀུན་དགའ་བོས་གསོལ་པ། སླད་མའི་ཚེ་སླད་མའི་
དུས་ལྔ་བརྒྱ་པ་ཐ་མ་ལ་དམ་པའི་ཆོས་ནུབ་པའི་དུས་ཀྱི་ཚེ་སེམས་ཅན་མང་པོ་དག་ལ་སངས་རྒྱས་ཀྱི་མཛད་པ་བགྱིད་པར་འགྱུར་བར་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ངས་
ཆོས་ཀྱི་རྣམ་གྲངས་འདི་བྱིན་གྱིས་བརླབས་ཟིན་ཏེ། དེ་བཞིན་གཤེགས་པ་ཤཱཀྱ་ཐུབ་པ་ངས་ཆོས་སྨྲ་བ་དེ་དག་ཀྱང་བྱིན་གྱིས་བརླབས་སོ། །ཀུན་དགའ་བོ་གང་ལ་ལ་ཞིག་ཆོས་ཀྱི་རྣམ་གྲངས་འདི་ཡི་གེར་འདྲི་བ་དེ་ནི་མིག་ན་བར་མི་འགྱུར། ལྕེ་ན་བར་མི་འགྱུར། སྣ་ན་བར་མི་
འགྱུར། སོ་ན་བར་མི་འགྱུར། ལག་པ་དང་རྐང་པ་ན་བར་མི་འགྱུར། ཀླད་པ་ན་བར་མི་འགྱུར། རྣ་བ་ན་བར་མི་འགྱུར། ལུས་དམན་པར་མི་འགྱུར། ལུས་དྲི་མི་ཞིམ་པར་མི་འགྱུར། ཕ་རོལ་གྱི་གནོད་པས་འཆི་བའི་དུས་བྱེད་པར་མི་འགྱུར་རོ། །དེ་ལ་མི་དང་མི་མ་ཡིན་

</font><hr>57-1-61a<br><font size=+2>

པ་ཐམས་ཅད་སྲུང་བར་འགྱུར་རོ། །འདི་ནས་ཤི་འཕོས་ནས་ཀྱང་དེ་སྤྲོས་པ་ཐམས་ཅད་ཡོངས་སུ་སྤངས་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཀུན་དགའ་བོས་གསོལ་པ། བཅོམ་ལྡན་འདས་ཆོས་འདི་བཤད་པའི་ཚེ་བདུད་བར་
ཆད་མི་བགྱིད་པའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བདུད་ཐམས་ཅད་ཆོས་ཀྱི་རྣམ་གྲངས་འདི་ལ་བར་ཆད་བྱེད་མི་ནུས་ཏེ། ཀུན་དགའ་བོ་གང་གི་ཚེ་བདུད་སྡིག་ཅན་འདི་སྙམ་དུ་བདག་དཀོན་མཆོག་ཏ་ལ་ལའི་
གཟུངས་འཆད་པ་ལ་བར་ཆད་བྱེད་དུ་འགྲོའོ་སྙམ་པའི་སེམས་བསྐྱེད་པ་དེའི་ཚེ། བདུད་སྡིག་ཅན་གྱི་རང་གི་ཁྱིམ་ཀུན་དུ་འབར་བ་མཐོང་སྟེ། ཀུན་དགའ་བོ་ཆོས་ཀྱི་རྣམ་གྲངས་འདི་དེ་ལྟར་ཟབ་བོ། །ཀུན་དགའ་བོ་ས་ཕྱོགས་གང་ན་ཆོས་ཀྱི་རྣམ་གྲངས་འདི་སྤྱོད་པའི་ས་ཕྱོགས་
དེ་མཆོད་རྟེན་དུ་འགྱུར། ཕྱག་བྱ་བའི་འོས་སུ་ཡང་འགྱུར་རོ། །ཀུན་དགའ་བོས་གསོལ་པ། གལ་ཏེ་དེ་བཞིན་གཤེགས་པ་ས་ཕྱོགས་གང་ན་བཞུགས་པའི་ས་ཕྱོགས་དེ་ཉིད་ན་ཆོས་ཀྱི་རྣམ་གྲངས་འདི་ཡང་གནས་པར་གྱུར་ལ། བདག་དེ་བཞིན་གཤེགས་པ་ལ་བལྟ་བའི་སླད་
དུ་མཆིས་ཤིང ། མཆིས་ནས་ཀྱང་སྔར་དེ་བཞིན་གཤེགས་པ་ལ་ཕྱག་བགྱིས་ནས་སླད་ཀྱིས་ཆོས་ཀྱི་རྣམ་གྲངས་འདི་ལ་ཕྱག་བགྱིས་ན་ནོངས་པ་ཅི་མཆིས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་གང་གི་ཚེ་ཁྱོད་ཀྱིས་ཆོས་ཀྱི་རྣམ་གྲངས་འདི་ལྟ་བུ་བཀོལ་ཏེ། ང་
ལ་ཕྱག་འཚལ་བ་དེའི་ཚེ་ཁྱོད་ཉེས་པ་དང་བཅས་པར་འགྱུར་རོ། །ཀུན་དགའ་བོ་གཞན་ཡང་ང་ལྷ་དང་བཅས་པའི་འཇིག་རྟེན་གྱི་ཐུ་བོ་དང ། གཙོ་བོ་དང ། མཆོག་དང ། དམ་པ་ཡིན་མོད་ཀྱི། ཀུན་དགའ་བོ་ངས་སྔར་ཆོས་ཀྱི་རྣམ་གྲངས་འདི་ཐོས་ནས་ཕྱིས་བྱང་ཆུབ་མངོན་
བར་རྫོགས་པར་སངས་རྒྱས་སོ། །ཀུན་དགའ་བོས་གསོལ་པ། བཅོམ་ལྡན་འདས་དེ་བཞིན་གཤེགས་པས་གང་ལས་ཏིང་ངེ་འཛིན་རིན་པོ་ཆེ་དཀོན་མཆོག་ཏ་ལ་ལ་བསྟན་པ་འདི་གསན་པ་དེ་བཞིན་གཤེགས་པའི་གོང་ན་སུ་མཆིས། བཅོམ་ལྡན་འདས་ཀྱིས་བཀའ་

</font><hr>57-1-61b<br><font size=+2>

སྩལ་པ། ཀུན་དགའ་བོ་མིའི་འཇིག་རྟེན་དང་ལྷའི་འཇིག་རྟེན་དང་དྲི་ཟའི་འཇིག་རྟེན་ན་ངའི་གོང་ན་སུ་ཡང་མེད་དེ། འོན་ཀྱང་བྱང་ཆུབ་སེམས་དཔའི་སྤྱད་པ་སྤྱོད་པ་ན་ངས་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་ཐོགས་པ་མེད་པ་བརྩེགས་པའི་སྙིང་པོ་འོད་ཟེར་བཟང་པོ་
བསམ་གྱིས་མི་ཁྱབ་པའི་འོད་ཟེར་དུ་མའི་ལྟེ་བ་རྒྱས་པ་ལས་མངོན་དུ་ཐོས་ཏེ་ཀུན་དགའ་བོ་བྱ་དཀའ་བ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་དུ་མ་མྱོང་ནས་ངས་ཆོས་ཀྱི་རྣམ་གྲངས་འདི་ཐོས་ཏེ། དེའི་ཚེ་དེ་བཞིན་གཤེགས་པ་དེས་ང་ལུང་བསྟན་ཏོ། །ཀུན་དགའ་བོ་དེ་ལྟ་བས་ན་ཁྱོད་ཀྱིས་
སྔར་ཆོས་ཀྱི་རྣམ་གྲངས་འདི་ལ་ཕྱག་གྱིས་ལ་ཕྱིས་ང་ལ་ཕྱག་འཚོལ་ཅིག་།དེ་ནས་བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་དེ་དག་ཐམས་ཅད་ཀྱིས་མགྲིན་གཅིག་ཏུ་ཚིག་འདི་སྐད་ཅེས་སྨྲས་སོ། ། ལ་ལ་ཆོས། ཨ་ལ་ལ་ཆོས། ཆོས་རྣམས་ཀྱི་རྣམ་པར་འཕྲུལ་བ་ཨ་ལ་
ལའོ། །སེམས་ཅན་གང་དག་ཆོས་ཀྱི་རྣམ་གྲངས་འདིའི་མིང་ཐོས་པ་དེ་དག་ཀྱང་ཕྱག་བྱ་བའི་འོས་ཡིན་ན། གང་དག་འཛིན་པ་དང ། ཀློག་པ་དང ། ཀུན་ཆུབ་པར་བྱེད་པ་དང ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་ལྟ་སྨོས་ཀྱང་ཅི་དགོས་ཏེ། དེ་དག་ནི་དེ་
བཞིན་གཤེགས་པ་ཞེས་བརྗོད་པར་བྱའོ། །དེ་ནས་བཅོམ་ལྡན་འདས་ཀྱིས་བརྒྱ་བྱིན་དང་ཚངས་པ་དང ། འཇིག་རྟེན་སྐྱོང་བ་དེ་དག་ལ་ཀྱེ་གྲོགས་པོ་དག་ཁྱོད་ཀྱིས་ཚིག་འདི་ལེགས་པར་སྨྲས་པ་ལེགས་སོ་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ཀྱི་ཞལ་ནས་
ལྗགས་ཀྱི་དབང་པོ་ཕྱུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལྗགས་ཀྱི་དབང་པོས་སྣང་བར་བྱས་ནས་བྱང་ཆུབ་སེམས་དཔའ་ཀུན་དུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །སེམས་ཅན་གང་དག་ཆོས་ཀྱི་རྣམ་གྲངས་འདི་མི་ཐོས་པ་དེ་དག་ནི་ཇི་ལྟར་མི་དམུས་
ལོང་གིས་ཉི་མའི་སྣང་བ་མི་མཐོང་བ་དང ། ཇི་ལྟར་ཚོང་བ་ཐབས་མི་ཤེས་པ་དང ། ཇི་ལྟར་མི་དབུལ་པོ་གཞན་གྱི་ངོར་ལྟ་བ་དང་འདྲ་སྟེ། དེ་དག་གི་དོན་དུ་ངས་དཔེ་འདི་བྱས་ན་ཅི་ནས་སེམས་ཅན་རྣམས་ཆོས་རིན་པོ་ཆེའི་ཕུང་པོ་འདི་འདྲ་བ་ལས་རིང་དུ་མི་འགྱུར་བར་བྱ་བའི་ཕྱིར་ཆོས་ཀྱི་

</font><hr>57-1-62a<br><font size=+2>

རྣམ་གྲངས་འདིའི་ཆེད་དང་སེམས་ཅན་ཐམས་ཅད་ཀྱི་དོན་དུ་ང་ཁྱོད་ལ་གསོལ་བ་འདེབས་ན་རིགས་ཀྱི་བུ་ཁྱོད་སྤྲོའམ། དེ་ནས་བྱང་ཆུབ་སེམས་དཔའ་ཀུན་དུ་བཟང་པོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་བུས་མོ་གཡས་པའི་ལྷ་ང་ས་ལ་བཙུགས་ཏེ། 
བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ངུ་ཞིང་བྱང་ཆུབ་སེམས་དཔའ་ཀུན་དུ་བཟང་པོ་རང་གི་ཆོས་ཀྱི་སྟན་ལས་ལངས་མ་ཐག་ཏུ་དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས། རབ་ཏུ་གཡོས། ཀུན་དུ་
རབ་ཏུ་གཡོས་སོ། །འགུལ། རབ་ཏུ་འགུལ། ཀུན་དུ་རབ་ཏུ་འགུལ་ཏོ། །ལྡེག་།རབ་ཏུ་ལྡེག་།ཀུན་དུ་རབ་ཏུ་ལྡེག་གོ། །འུར་འུར། རབ་ཏུ་འུར་འུར། ཀུན་དུ་རབ་ཏུ་འུར་འུར་རོ། །ཆེམ་ཆེམ། རབ་ཏུ་ཆེམ་ཆེམ། ཀུན་དུ་རབ་ཏུ་ཆེམ་ཆེམ་མོ། །འཁྲུགས། རབ་ཏུ་འཁྲུགས། ཀུན་དུ་
རབ་ཏུ་འཁྲུགས་སོ། །འཇིག་རྟེན་དུ་སྣང་བ་ཆེན་པོ་ཡང་བྱུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་ཀུན་དུ་བཟང་པོས་སོར་མོ་བཅུ་ཐལ་མོ་སྦྱར་ཏེ་ངུ་ཞིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་སྤྲོ་ལགས་སོ། །བདེ་བར་གཤེགས་
པ་བདག་སྤྲོ་ལགས་སོ། །བཅོམ་ལྡན་འདས་ཁྱོད་ནི་ཐམས་ཅད་མཁྱེན་པ། སེམས་ཅན་ཐམས་ཅད་ལ་ཕན་པར་བཞེད་པ། ཐུགས་རྗེ་ཆེན་པོ་དང་ལྡན་བ་ལགས་ཀྱི་སྟེང་དུ་བདག་ནི་དེ་བཞིན་གཤེགས་པ་ལས་སྐྱེས་པ་ལགས་ན། ཅིའི་སླད་དུ་དེ་བཞིན་གཤེགས་པའི་བཀའ་ལྟར་
མི་བགྱིད། བཅོམ་ལྡན་འདས་དེ་བཞིན་གཤེགས་པའི་བཀའ་ནི་བདུད་རྩིའི་བཀའ་ལགས་ན། བདག་དེ་བཞིན་གཤེགས་པའི་བཀའ་དང་འགལ་བར་བགྱིད་པའི་མཐུ་བདག་ལ་ག་ལ་མཆིས། བཅོམ་ལྡན་འདས་བདག་གིས་ནི་བྱས་པ་གཟོ་བར་བགྱི་བ་ལགས་ཀྱི། བྱས་པ་
མི་གཟོ་བར་བགྱི་བ་མ་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་དུ་བཟང་པོ་ལ་ལེགས་སོ་ཞེས་བྱ་བ་བྱིན་ཏེ། ཀྱེ་རྒྱལ་བའི་སྲས་ལེགས་སོ་ལེགས་སོ། །ཁྱོད་ནི་དེ་བཞིན་གཤེགས་པ་རྣམས་ཀྱི་སྲས་ཀྱི་ཐུ་བོ་དང ། གཙོ་བོ་དང་མཆོག་

</font><hr>57-1-62b<br><font size=+2>

དང་དམ་པ་དང་ཕུལ་ཡིན་ཏེ། ཆོས་ཀྱི་རྣམ་གྲངས་འདི་ཁྱོད་ལ་ཡོངས་སུ་གཏད་དོ། །འདི་ནི་ངའི་སྟོན་པ་ཡིན་ཏེ། དེའི་ཕྱིར་ཁྱོད་ཀྱིས་བསྲུང་བར་བྱའོ། །དུས་དུས་སུ་བསྟི་སྟང་གྱིས་ཤིག་།རིན་པོ་ཆེའི་སྣོད་དུ་ཆུག་ལ་ཕྲག་པ་ལ་ཐོགས་ཤིག་།ཕྱི་མའི་ཚེ་ཕྱི་མའི་དུས་ན་དགེ་སློང་སྡིག་
པ་ཅན་དེ་དག་ལ་ཡིད་མ་རྟོན་ཅིག་།རིགས་ཀྱི་བུ་འདི་ནི་ཁྱོད་ལ་རྗེས་སུ་བསྟན་པའོ། །བྱང་ཆུབ་སེམས་དཔའ་ཀུན་དུ་བཟང་པོས་གསོལ་པ། བཅོམ་ལྡན་འདས་རབ་ཏུ་བྱུང་བ་ཅི་འདྲ་བ་དེ་དག་འབྱུང་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཁ་རོག་དེ་སྐད་མ་འདྲི་
ཤིག་།བྱང་ཆུབ་སེམས་དཔའ་ཀུན་དུ་བཟང་པོས་གསོལ་པ། སེམས་ཅན་མང་པོ་ལ་སྨན་པར་བགྱིད་པར་འགྱུར་ལགས་ན། བཅོམ་ལྡན་འདས་ཀྱིས་བཤད་དུ་གསོལ། བདེ་བར་གཤེགས་པས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དུ་བཟང་པོ་བཤད་
ཀྱིས་ཉོན་ཅིག་།འཁོར་རྒྱ་མཚོ་ལྟ་བུ་འདི་དང་འཇམ་དཔལ་དང་སྤྱན་རས་གཟིགས་དབང་ཕྱུག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་གྲངས་མེད་དཔག་ཏུ་མེད་པ་ཐམས་ཅད་ཡིད་ལ་བྱེད་པ་གཞན་ཐོང་ལ། ཕྱི་མའི་ཚེ་ཕྱི་མའི་དུས་ན་རབ་ཏུ་བྱུང་བ་ཅི་འདྲ་བ་དག་འབྱུང་
བར་འགྱུར་བ་དེ་དག་ཉོན་ཅིག་།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཀུན་དུ་བཟང་པོ་ལ་འདི་སྐད་ཅེས་བཀའ་སྩལ་ཏོ། །ཀུན་དུ་བཟང་པོ་རབ་ཏུ་བྱུང་བ་དམ་པའི་ཆོས་སུན་འབྱིན་པ། ཁྱིམ་ལ་ཆགས་པ། རྙེད་པ་ལ་ཆགས་པ། གཙུག་ལག་ཁང་ལ་ཆགས་
པ། གནས་ལ་ཆགས་པ། ལྷུང་བཟེད་དང་ཆོས་གོས་ལ་ཆགས་པ། ཁྱིམ་སུན་པར་བྱེད་པ། སྡིག་པའི་ཆོས་ཀུན་དུ་སྤྱོད་པ་དེ་དག་འབྱུང་སྟེ། ཀུན་དུ་བཟང་པོ་མི་གཏི་མུག་པ་དེ་དག་གི་དོན་དུ་ངས་མདོ་འདི་ཡོངས་སུ་གཏད་ཀྱིས་མདོ་འདི་ནུབ་པར་གྱུར་ཏ་རེ། དེ་ནས་ཕྱོགས་བཅུ་
ནས་ལྷ་དང་ཀླུ་དང ། གནོད་སྦྱིན་དང ། དྲི་ཟ་ཐམས་ཅད་ལྷགས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་ཐམས་ཅད་འདུས་ཤིང་ཚོགས་ཏེ། ཇི་སྲིད་འཚོའི་བར་དང ། དམ་པའི་ཆོས་ཇི་སྲིད་གནས་ཀྱི་བར་དུ་ཆོས་ཀྱི་རྣམ་གྲངས་

</font><hr>57-1-63a<br><font size=+2>

འདི་ཡོངས་སུ་བསྐྱང་བར་བགྱིའོ། །ཆོས་སྨྲ་བའི་དགེ་སློང་དེ་དག་ལ་ཡང་ཡོངས་སུ་བསྐྱང་བར་བགྱིའོ། །བསྟི་སྟང་དུ་བགྱིའོ། །བཙུན་པར་བགྱིའོ། །རིམ་གྲོར་བགྱིའོ། །མཆོད་པར་བགྱིའོ། །རྗེད་པར་བགྱིའོ། །གསོལ་བར་བགྱིའོ། །དེ་ནས་བཅོམ་ལྡན་འདས་
ཀྱིས་བྱང་ཆུབ་སེམས་དཔའ་ཀུན་ཏུ་བཟང་པོ་ལ་སོགས་པ་བྱང་ཆུབ་སེམས་དཔའ་བྱེ་བ་ཕྲག་དགུ་བཅུ་རྩ་གཉིས་པོ་དེ་དག་ལ་ཡང་དག་པར་སྐུལ་བའི་ཚིགས་སུ་བཅད་པ་འདི་དག་གསུངས་སོ། །ཡོན་ཏན་ཕ་རོལ་ཕྱིན་པ་དེ་དག་གི། །ཡོན་ཏན་ཀུན་བཤད་ཐམས་ཅད་ང་ལས་ཉོན། །ང་རྒྱལ་
རྒྱགས་དང་བག་མེད་སྤང་བྱོས་ལ། །དགའ་ཞིང་མགུ་བའི་ཡིད་ཀྱིས་མཉན་པར་གྱིས། །མ་ག་དྷཱ་འདིར་ཤིང་དབང་བྱང་ཆུབ་དྲུང ། །རང་བྱུང་མི་ཡི་སེང་གེ་བཞུགས་ཞེས་གྲག་།ཏིང་འཛིན་རྣམ་པར་ཐར་བ་མཆོག་ལ་གནས། །ཤིང་རྒྱལ་ཆེན་པོ་དེ་ཡི་དྲུང་ན་བཞུགས། །ཕྱོགས་
བཅུའི་ཞིང་རྡུལ་སྙེད་དང་དེ་ཐབས་ཅིག་།སྐྱེས་བུ་དམ་པ་རྣམས་ཀྱིས་དཔའ་བོ་བསྐོར། །སངས་རྒྱས་ཕལ་ཆེན་ཞེས་བྱའི་ཏིང་ངེ་འཛིན། །ཏིང་འཛིན་དེ་ལ་མི་ཡི་དབང་པོ་གནས། །མི་དབང་དེ་ནི་སྙོམས་པར་ཞུགས་རྟོགས་ནས། །འཇམ་དཔལ་གཞོན་ནུ་ཤར་གྱི་ཕྱོགས་
ལོགས་ནས། །སངས་རྒྱས་ཞིང་བཅུ་རྡུལ་སྙེད་ལྷན་ཅིག་ཏུ། །སྐྱེས་བུ་དམ་པ་རྣམས་དང་རྒྱལ་དྲུང་འོངས། །དེ་བཞིན་སྦྱར་ཏེ་ཕྱོགས་བཅུའི་ཞིང་ཀུན་ནས། །སངས་རྒྱས་སྲས་པོ་དཔལ་ཞེས་བྱ་བ་ཀུན། །ཕྱོགས་བཅུའི་ཞིང་རྡུལ་སྙེད་དང་ལྷན་ཅིག་ཏུ། །སྐྱེས་བུ་དམ་པ་རྣམས་དང་
ལྷགས་པར་གྱུར། །དེར་འདུས་གྱུར་ནས་འཇིག་རྟེན་ཕན་འདོད་པ། །འཇམ་དཔལ་གྲགས་པ་མཐའ་ཡས་ལྡན་རྣམས་ལ། །སེམས་ཅན་དམ་པ་བཟང་པོའི་དཔལ་གྱིས་དྲིས། །སངས་རྒྱས་སྲས་ཀྱི་སྤྱོད་གང་ཡོན་ཏན་ཅི། །དེ་ནས་སེམས་དཔའ་འཇམ་དཔལ་ཞེས་བྱ་བ། །རྙོག་
པ་མེད་པས་བྱང་ཆུབ་ཡོན་ཏན་དང ། །བདེ་ཡངས་ཡོན་ཏན་ལྡན་གྱི་སྤྱོད་ཡུལ་གཙང ། །སེམས་ཅན་དམ་པ་བཟང་པོའི་དཔལ་ལ་དྲིས། །སངས་རྒྱས་སྲས་པོ་རྣམས་ཀྱི་སྤྱོད་ཡུལ་གཙང ། །རྒྱལ་བས་བསྟེན་པ་བདག་གིས་འདིར་སྨྲས་ཀྱིས། །ཁྱོད་ཀྱང་སངས་རྒྱས་སྲས་ཀྱི་ཡོན་ཏན་

</font><hr>57-1-63b<br><font size=+2>

དང ། །སྤྱོད་པ་གང་དག་ཡིན་པ་བརྗོད་པར་གྱིས། །བཟང་པོའི་དཔལ་གྱིས་སྨྲས་པ་རྒྱལ་སྲས་ཉོན། །ཡོན་ཏན་མཐའ་ཡས་ལྡན་དེའི་ཡོན་ཏན་ལས། །དཔེ་ཚུལ་ཅུང་ཟད་ཙམ་ཞིག་བརྗོད་པར་བྱ། །རྒྱ་མཚོའི་ཐིག་པ་བཞིན་དུ་ཤིན་ཏུ་ཆུང ། །བྱང་ཆུབ་གཞིར་གྱུར་པ་ཡི་རང་བྱུང་སེམས། །
ཐོག་མ་ཉིད་དུ་བསྐྱེད་པ་གང་ཡིན་པ། །དེ་ཡི་ཡོན་ཏན་བསྔགས་པ་མཐའ་ཡས་ཏེ། །མཚུངས་མེད་ཀྱིས་ཀྱང་ཡོངས་སུ་བརྗོད་མི་སྤྱོད། །ཕ་རོལ་ཕྱིན་དང་ས་ཡི་ཡོན་ཏན་རྣམས། །བསྐལ་པ་མང་པོར་སྤྱད་པ་ཅི་སྨོས་ཏེ། །ཕྱོགས་བཅུའི་རྒྱལ་བ་ཀུན་གྱིས་དེ་དག་གི། །ཡོན་ཏན་
ཆུ་བོ་ཟད་པར་མཛད་མི་སྤྱོད། །ཡོན་ཏན་མཐའ་ཡས་རྣམས་ཀྱི་ཡོན་ཏན་ལས། །དཔེ་ཚུལ་ཅུང་ཟད་ཙམ་ཞིག་བརྗོད་བྱ་སྟེ། །མཁའ་ལ་བྱ་རྗེས་འདྲ་བར་ཆུང་བ་དང ། །ས་ཆེན་རྣམས་ལས་རྡུལ་ཕྲན་གཅིག་དང་མཚུངས། །བྱང་ཆུབ་ཡོན་ཏན་གནས་ཀྱི་སེམས་སྐྱེ་བ། །རྒྱུ་མེད་མ་
ཡིན་གྱི་ན་མ་ཡིན་གྱི། །རྒྱལ་དང་རྒྱལ་བའི་ཆོས་དང་དགེ་འདུན་ལ། །དད་དང་དང་བ་བསྐྱེད་ནས་སེམས་སྐྱེ་སྟེ། །དེ་ནི་འདོད་དང་ལོངས་སྤྱོད་རྒྱལ་སྲིད་དང ། །བདག་ལ་བདེ་དང་སྙན་དང་གྲགས་ཕྱིར་མིན། །འགྲོ་བའི་སྡུག་བསྔལ་མ་ལུས་ཞི་བྱའི་ཕྱིར། །འཇིག་རྟེན་ཕན་
པ་བྱེད་པའི་སེམས་སྐྱེའོ། །རྟག་ཏུ་སེམས་ཅན་ཕན་པར་བྱ་ཕྱིར་དང ། །ཞིང་རྣམས་སྦྱང་དང་སངས་རྒྱས་མཆོད་པ་དང ། །ཆོས་ཡོངས་གཟུང་དང་སངས་རྒྱས་བྱང་ཆུབ་དང ། །ཡེ་ཤེས་རྣམ་པར་སྦྱང་ཕྱིར་སེམས་དེ་སྐྱེ། །རྒྱལ་བ་ཀུན་དང་ཆོས་དང་དེ་བཞིན་དུ། །འཕགས་པའི་
ཚོགས་ལ་རྟག་ཏུ་དད་པ་དང ། །དང་ཞིང་མོས་དང་གུས་པ་རབ་བསྐྱེད་ནས། །བླ་མ་གུས་པར་མཆོད་ཕྱིར་སེམས་དེ་སྐྱེ། །རྒྱལ་དང་རྒྱལ་བའི་ཆོས་ལ་དད་གྱུར་ཅིང ། །སངས་རྒྱས་སྲས་ཀྱི་སྤྱོད་ལ་དད་བྱེད་ལ། །བྱང་ཆུབ་བླ་ན་མེད་ལ་དད་གྱུར་ནས། །སྐྱེས་བུ་ཆེན་པོ་རྣམས་ཀྱི་
སེམས་སྐྱེའོ། །དད་པའི་སྟོབས་ཀྱིས་མི་བདག་གྱུར་པ་རྣམས། །བསམ་ཡས་རྒྱ་ཆེན་མཆོད་པས་མཆོད་བྱས་ཤིང ། །ཆོས་དང་དེ་བཞིན་མི་ཕྱེད་དགེ་འདུན་ལ། །བསམ་ཡས་མཆོད་པས་མཆོད་ནས་སེམས་སྐྱེའོ། །དད་པ་སྔོན་འདྲེན་མ་ལྟར་སྐྱེད་པ་སྟེ། །ཡོན་ཏན་ཐམས་ཅད་སྲུང་

</font><hr>57-1-64a<br><font size=+2>

ཞིང་འཕེལ་བར་བྱེད། །དོགས་པ་སེལ་ཅིང་ཆུ་བོ་རྣམས་ལས་སྒྲོལ། །དད་པ་བདེ་བའི་གྲོང་ཁྱེར་མཚོན་པ་ཡིན། །དད་པ་རྙོག་པ་མེད་ཅིང་སེམས་དང་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་གཏེར་དང་ནོར་དང་རྐང་པའི་མཆོག་།ལག་པ་བཞིན་དུ་དགེ་སྡུད་
རྩ་བ་ཡིན། །དད་པ་ཡོངས་སུ་གཏོང་ལ་དགའ་བར་བྱེད། །དད་པ་རྒྱལ་བའི་ཆོས་ལ་རབ་དགའ་སྐྱེད། །དད་པ་ཡོན་ཏན་ཡེ་ཤེས་ཁྱད་པར་བྱེད། །སངས་རྒྱས་གོ་འཕང་སྟོན་ཅིང་ཐོབ་པར་བྱེད། །དབང་པོ་རྣོ་ཞིང་རབ་ཏུ་གསལ་བར་བྱེད། །དད་པའི་སྟོབས་ལ་གཞན་གྱིས་མི་རྫི་ཞིང ། །ཉོན་
མོངས་རྣམ་པར་སེལ་བའི་གཞི་རྟེན་ཡིན། །དད་པ་རང་འབྱུང་ཡོན་ཏན་རྣམས་བྱང་ཚོལ། །དད་པ་ཆགས་པའི་སྒོ་ལ་ཆགས་པ་མེད། །མི་དལ་སྤངས་ཤིང་དལ་བའི་མཆོག་གཅིག་ཡིན། །དད་པ་བདུད་ཀྱི་ལམ་ལས་འདའ་བྱེད་ཅིང ། །ཐར་པའི་ལམ་མཆོག་སྟོན་པར་བྱེད་པ་ཡིན། །ཡོན་
ཏན་ཞིང་གི་ས་བོན་མ་རུལ་པ། །དད་པ་བྱང་ཆུབ་ཞིང་ནི་རྣམ་པར་སྐྱེད། །ཡེ་ཤེས་ཁྱད་པར་ཡོན་ཏན་འཕེལ་བར་བྱེད། །དད་པ་རྒྱལ་བ་ཐམས་ཅད་སྟོན་པ་ཡིན། །དད་པས་མོས་པའི་ཁྱད་པར་དགའ་རྣམས་ཀྱི། །དེ་ལ་སྤྱོད་པ་རིམ་གྱིས་བརྗོད་པར་བྱ། །འདི་འདྲའི་ཆོས་ནི་འཇིག་རྟེན་རབ་
དཀོན་ཏེ། །རྒྱ་མཚོའི་ནང་ན་རིན་ཆེན་རྒྱལ་པོ་བཞིན། །གང་དག་རྟག་ཏུ་སངས་རྒྱས་དད་གུས་པ། །དེ་དག་ཚུལ་ཁྲིམས་བསླབ་པ་ཡོངས་མི་འདོར། །གང་དག་ཚུལ་ཁྲིམས་བསླབ་པ་མི་འདོར་བ། །ཡོན་ཏན་ལྡན་དེ་ཡོན་ཏན་ལྡན་པས་བསྟོད། །ཚུལ་ཁྲིམས་བྱང་ཆུབ་སེམས་སྟོན་
བྱེད་པ་སྟེ། །སློབ་པའི་ས་ཡི་ཡོན་ཏན་རྣམས་ལ་སྦྱོར། །ཚུལ་ཁྲིམས་བསླབ་པ་འདོར་བར་མི་བྱེད་པ། །དེ་དག་རྒྱལ་བས་བསྔགས་པའི་འོས་སུ་འགྱུར། །གང་དག་རྟག་ཏུ་སངས་རྒྱས་དད་གུས་པ། །དེ་དག་རྒྱལ་ལ་མཆོད་པ་རྒྱ་ཆེན་བྱེད། །གང་དག་རྒྱལ་ལ་མཆོད་པ་ཆེ་བྱེད་པ། །དེ་དག་
སངས་རྒྱས་དད་པ་བསམ་མི་ཁྱབ། །གང་དག་རྟག་ཏུ་ཆོས་ལ་དད་གུས་པ། །དེ་དག་རྒྱལ་བར་ཆོས་ཉན་ངོམས་པ་མེད། །གང་དག་རྒྱལ་བའི་ཆོས་ཉན་མི་ངོམས་པ། །དེ་དག་ཆོས་ལ་མོས་པ་བསམ་མི་ཁྱབ། །གང་དག་རྟག་ཏུ་དགེ་འདུན་དད་གུས་པ། །དེ་དག་མི་ལྡོག་དགེ་

</font><hr>57-1-64b<br><font size=+2>

འདུན་དད་པ་ཡིན། །གང་དག་མི་ལྡོག་དགེ་འདུན་རབ་དད་པ། །དེ་དག་དད་པའི་སྟོབས་ཀྱིས་མི་ལྡོག་འགྱུར། །གང་དག་དད་པའི་སྟོབས་ཀྱིས་མི་ལྡོག་པ། །དེ་དག་དབང་པོ་རྣོ་ཞིང་རབ་ཏུ་གསལ། །གང་དག་དབང་པོ་རྣོ་ཞིང་རབ་གསལ་བ། །དེ་དག་སྡིག་པའི་གྲོགས་པོ་རྣམ་པར་
སྤངས། །གང་དག་སྡིག་པའི་གྲོགས་པོ་རྣམ་སྤངས་པ། །དེ་དག་ཆོས་ལྡན་གྲོགས་ཀྱིས་ཡོངས་སུ་བཟུང ། །གང་དག་ཆོས་ལྡན་གྲོགས་ཀྱིས་ཡོངས་བཟུང་བ། །དེ་དག་དགེ་བ་རྒྱ་ཆེན་སོགས་པར་བྱེད། །གང་དག་དགེ་བ་རྒྱ་ཆེན་སོགས་བྱེད་པ། །བདག་ཉིད་ཆེན་པོ་དེ་དག་རྒྱུ་སྟོབས་
ལྡན། །བདག་ཉིད་ཆེན་པོ་རྒྱུ་སྟོབས་གང་ལྡན་པ། །དེ་དག་མོས་པའི་ཁྱད་པར་རྒྱ་ཆེན་འགྱུར། །གང་དག་མོས་པའི་ཁྱད་པར་རྒྱ་ཆེ་བ། །དེ་དག་རྒྱལ་བ་ཀུན་གྱིས་རྟག་བྱིན་བརླབས། །གང་དག་རྒྱལ་བ་ཀུན་གྱིས་བྱིན་བརླབས་པ། །དེ་དག་བྱང་ཆུབ་དོན་དུ་སེམས་ཀྱང་སྐྱེ། །གང་དག་
བྱང་ཆུབ་དོན་དུ་སེམས་སྐྱེ་བ། །དེ་དག་དྲང་སྲོང་ཆེན་པོའི་ཡོན་ཏན་བརྩོན། །དྲང་སྲོང་ཆེན་པོའི་ཡོན་ཏན་གང་བརྩོན་པ། །དེ་དག་རིགས་མཐོ་སངས་རྒྱས་རིགས་སུ་སྐྱེ། །གང་དག་རིགས་མཐོ་སངས་རྒྱས་རིགས་སྐྱེས་པ། །དེ་དག་མཉམ་ཞིང་སྦྱོར་དང་མི་སྦྱོར་སྤངས། །མཉམ་ཞིང་
སྦྱོར་དང་མི་སྦྱོར་གང་སྤངས་པ། །དེ་དག་དད་དང་བསམ་པ་རྣམ་པར་དག་།གང་དག་དད་དང་བསམ་པ་རྣམ་དག་པ། །དེ་དག་ལྷག་པའི་བསམ་པ་དམ་པ་མཆོག་།གང་དག་ལྷག་བསམ་དམ་པ་མཆོག་ལྡན་པ། །དེ་དག་རྟག་ཏུ་ཕ་རོལ་ཕྱིན་པ་སྤྱོད། །གང་དག་རྟག་ཏུ་ཕ་རོལ་
ཕྱིན་སྤྱོད་པ། །དེ་དག་ཐེག་པ་ཆེན་པོ་འདི་ལ་ཞུགས། །གང་དག་ཐེག་པ་ཆེན་པོ་འདིར་ཞུགས་པ། །དེ་དག་སངས་རྒྱས་རྣམས་ལ་སྒྲུབ་པས་མཆོད། །གང་དག་སྒྲུབ་པས་སངས་རྒྱས་མཆོད་བྱེད་པ། །དེ་དག་སངས་རྒྱས་རྗེས་སུ་དྲན་མི་ཕྱེད། །གང་དག་སངས་རྒྱས་རྗེས་དྲན་
མི་ཕྱེད་པ། །དེ་དག་རྟག་ཏུ་སངས་རྒྱས་བསམ་ཡས་མཐོང ། །གང་དག་སངས་རྒྱས་བསམ་ཡས་རྟག་མཐོང་བ། །དེ་ལ་ནམ་ཡང་སངས་རྒྱས་མི་བཞུགས་མིན། །གང་དག་ནམ་ཡང་སངས་རྒྱས་མི་བཞུགས་མིན། །དེ་དག་བར་སྐབས་ཆོས་ལས་ཉམས་མི་འགྱུར། །གང་དག་བར་

</font><hr>57-1-65a<br><font size=+2>

སྐབས་ཆོས་ལས་མི་ཉམས་པ། །དེ་དག་སྤོབས་པ་སྒྲིབ་པ་མེད་པར་འགྱུར། །གང་དག་སྤོབས་པ་སྒྲིབ་པ་མེད་གྱུར་པ། །དེ་དག་ཆོས་རབ་སྟོན་པ་མཐའ་ཡས་འགྱུར། །གང་དག་ཆོས་རབ་སྟོན་པ་མཐའ་ཡས་པ། །དེ་དག་འགྲོ་ལ་བྱམས་ཤིང་ཕན་པར་འདོད། །གང་དག་
འགྲོ་ལ་བྱམས་ཤིང་ཕན་འདོད་པ། །དེ་དག་སྙིང་རྗེ་ཆེན་པོའི་རྩ་བ་བརྟན། །གང་དག་སྙིང་རྗེ་ཆེན་པོའི་རྩ་བརྟན་པ། །དེ་དག་ཆོས་དགའ་དགའ་བའི་དབང་པོར་འགྱུར། །གང་དག་ཆོས་དགའ་དགའ་བའི་དབང་པོ་ཅན། །དེ་དག་འདུས་བྱས་སྐྱོན་གྱིས་ཡལ་བར་བོར། །གང་དག་འདུས་བྱས་
སྐྱོན་གྱིས་ཡལ་བོར་བ། །དེ་དག་ང་རྒྱལ་རྒྱགས་མེད་བག་མེད་མིན། །གང་དག་ང་རྒྱལ་རྒྱགས་མེད་བག་མེད་མིན། །དེ་དག་རྟག་ཏུ་བདག་དང་གཞན་དོན་བརྩོན། །གང་དག་རྟག་ཏུ་བདག་གཞན་དོན་བརྩོན་པ། །དེ་དག་འཁོར་བར་ཡོངས་སུ་སྐྱོ་བ་མེད། །གང་དག་འཁོར་བར་ཡོངས་སུ་
མི་སྐྱོ་བ། །དེ་དག་རྟུན་པ་དམ་པ་མཆོག་དང་ལྡན། །གང་དག་རྟུན་པ་དམ་པ་མཆོག་ལྡན་པ། །དེ་དག་མངོན་ཤེས་རྣམ་པར་དག་པ་སྐྱེས། །གང་དག་མངོན་ཤེས་རྣམ་པར་དག་སྐྱེས་པ། །དེ་དག་འགྲོ་བའི་སྤྱོད་པ་མང་པོ་རྟོགས། །གང་དག་འགྲོ་བའི་སྤྱོད་པ་མང་རྟོགས་པ། །དེ་དག་འགྲོ་
བ་ཡོངས་སུ་སྨིན་བྱེད་མཁས། །འགྲོ་བ་ཡོངས་སུ་སྨིན་བྱེད་གང་མཁས་པ། །དེ་དག་འགྲོ་བ་སྡུད་ཤེས་ཆོ་ག་མཁས། །འགྲོ་བ་སྡུད་ཤེས་ཆོ་ག་སུ་མཁས་པ། །དེ་དག་བསྡུ་བའི་དངོས་པོ་བཞི་ལ་བརྩོན། །གང་དག་བསྡུ་བའི་དངོས་པོ་བཞིར་བརྩོན་པ། །དེ་དག་འགྲོ་བའི་དོན་ནི་
མཐའ་ཡས་བྱེད། །གང་དག་འགྲོ་དོན་མཐའ་ཡས་བྱེད་གྱུར་པ། །དེ་དག་ཤེས་རབ་ཐབས་ལ་རྟེན་པ་ཡིན། །གང་དག་ཤེས་རབ་ཐབས་ལ་རྟེན་གྱུར་པ། །དཔའ་བོ་དེ་དག་བླ་མེད་ལམ་ལ་གནས། །དཔའ་བོ་གང་དག་བླ་མེད་ལམ་གནས་པ། །དེ་དག་བདུད་དཔུང་རྣམས་ཀྱིས་
ཡོངས་མི་ཚུགས། །གང་དག་བདུད་དཔུང་རྣམས་ཀྱིས་མི་ཚུགས་པ། །དེ་དག་བདུད་ཀྱི་ལམ་ལས་རབ་ཏུ་འདས། །གང་དག་བདུད་ཀྱི་ལམ་ལས་རབ་འདས་པ། །དེ་དག་མི་ལྡོག་ས་ནི་རྗེས་སུ་འཐོབ། །གང་དག་མི་ལྡོགས་ནི་ཐོབ་གྱུར་པ། །དེ་དག་མི་སྐྱེ་བཟོད་པ་ཐོབ་པ་ཡིན། །གང་

</font><hr>57-1-65b<br><font size=+2>

དག་མི་སྐྱེ་བཟོད་པ་ཐོབ་གྱུར་པ། །འཇིག་རྟེན་སྒྲོན་ཏེ་རྒྱལ་བས་ལུང་བསྟན་ཏོ། །འཇིག་རྟེན་སྒྲོན་གང་རྒྱལ་བས་ལུང་བསྟན་པ། །དེ་དག་རྒྱལ་བ་ཀུན་དང་མངོན་སུམ་གནས། །རྒྱལ་བ་ཀུན་དང་མངོན་སུམ་སུ་གནས་པ། །དེ་དག་རྒྱལ་གསང་རྣམ་འཕྲུལ་ཆོ་ག་མཁས། །རྒྱལ་གསང་རྣམ་
འཕྲུལ་ཆོ་ག་སུ་མཁས་པ། །དེ་དག་རྒྱལ་བ་ཀུན་གྱིས་དགོངས་པ་ཡིན། །གང་དག་རྒྱལ་བ་ཀུན་གྱིས་དགོངས་གྱུར་པ། །དེ་དག་ཡོན་ཏན་ཀུན་གྱིས་ལེགས་པར་བརྒྱན། །གང་དག་ཡོན་ཏན་ཀུན་གྱིས་ལེགས་བརྒྱན་པ། །དེ་དག་བསོད་ནམས་དམ་པས་ལུས་ཀྱང་སྦྱངས། །བསོད་
ནམས་མཆོག་གིས་གང་ལུས་རྣམ་སྦྱངས་པ། །དེ་དག་གསེར་གྱི་རི་བོ་འདྲ་བར་འབར། །གསེར་གྱི་རི་བོ་འདྲ་བར་སུ་འབར་བ། །དེ་དག་སུམ་ཅུ་རྩ་གཉིས་མཚན་རྣམས་རྫོགས། །གང་དག་སུམ་ཅུ་རྩ་གཉིས་མཚན་རྫོགས་པ། །དེ་དག་ལུས་རྣམས་དཔེ་བྱད་བཟང་པོས་སྤྲས། །
གང་དག་ལུས་རྣམས་དཔེ་བྱད་བཟང་སྤྲས་པ། །དེ་དག་ལུས་ཀྱི་འོད་ནི་མཐའ་ཡས་སོ། །གང་དག་ལུས་ཀྱི་འོད་ནི་མཐའ་ཡས་པ། །དེ་དག་འོད་ཟེར་བཀོད་པ་བསམ་མི་ཁྱབ། །གང་དག་འོད་བཀོད་བསམ་གྱིས་མི་ཁྱབ་པ། །དེ་དག་འོད་ལས་པད་མ་རྣམས་ཀྱང་འབྱུང ། །གང་དག་
འོད་ལས་པད་མ་རྣམས་བྱུང་བ། །དེ་དག་རྒྱལ་གཟུགས་པད་མའི་གདན་འཁོད་པར། །ཕྱོགས་བཅུའི་འཇིག་རྟེན་དག་ཏུ་སྟོན་བྱེད་ཅིང ། །དོན་ཡོད་གནས་པ་སེམས་ཅན་འདུལ་བར་བྱེད། །གང་དག་རྒྱལ་གཟུགས་པད་མའི་གདན་འཁོད་པར། །ཕྱོགས་བཅུའི་འཇིག་རྟེན་དག་ཏུ་
སྟོན་བྱེད་ཅིང ། །དོན་ཡོད་གནས་པ་སེམས་ཅན་འདུལ་བྱེད་པ། །དེ་དག་མངོན་ཤེས་རྣམ་འཕྲུལ་མཐའ་ཡས་སོ། །གང་དག་མངོན་ཤེས་རྣམ་འཕྲུལ་མཐའ་ཡས་པ། །དེ་དག་བསམ་གྱིས་མི་ཁྱབ་ཞིང་རྒྱུ་ཞིང ། །བསམ་གྱིས་མི་ཁྱབ་ཆོས་རྣམས་སྟོན་པར་བྱེད། །སེམས་ཅན་
བསམ་གྱིས་མི་ཁྱབ་ཚིམ་པར་བྱེད། །གང་དག་བསམ་གྱིས་མི་ཁྱབ་ཆོས་སྟོན་ཅིང ། །སེམས་ཅན་བསམ་གྱིས་མི་ཁྱབ་ཚིམ་བྱེད་པ། །དེ་དག་སོ་སོ་རིག་ཤེས་སྟོབས་རྣམས་ཀྱིས། །བསམ་པ་ཇི་བཞིན་འཇིག་རྟེན་སེམས་ཅན་འདུལ། །གང་དག་སོ་སོར་རིག་ཤེས་སྟོབས་

</font><hr>57-1-66a<br><font size=+2>

རྣམས་ཀྱིས། །བསམ་པ་ཇི་བཞིན་འཇིག་རྟེན་སེམས་ཅན་འདུལ། །དེ་དག་རྟག་ཏུ་ལུས་དང་ངག་དང་ཡིད། །ཡེ་ཤེས་སྔོན་དུ་འགྲོ་ཞིང་རྗེས་སུ་འབྲང ། །གང་དག་རྟག་ཏུ་ལུས་དང་ངག་དང་ཡིད། །ཡེ་ཤེས་སྔོན་དུ་འགྲོ་ཞིང་རྗེས་འབྲང་བ། །དེ་དག་སྨོན་ལམ་སྟོབས་ཀྱིས་ཅི་
འདོད་པར། །སེམས་ཅན་རྒྱུད་ན་གཟུགས་ནི་སྟོན་པར་བྱེད། །གང་དག་སྨོན་ལམ་སྟོབས་ཀྱིས་ཅི་འདོད་པར། །སེམས་ཅན་རྒྱུད་ན་གཟུགས་ནི་སྟོན་བྱེད་པ། །དེ་དག་ཚིག་རྣམས་རྗོད་པར་བྱེད་པའི་ཚེ། །དབྱངས་ཀྱི་ཡན་ལག་བསམ་ཡས་སྒྲ་འབྱུང་ངོ ། །གང་དག་ཚིག་རྣམས་རྗོད་པར་
བྱེད་པའི་ཚེ། །དབྱངས་ཀྱི་ཡན་ལག་བསམ་ཡས་སྒྲ་འབྱུང་བ། །དེ་དག་འགྲོ་བ་མ་ལུས་ཀུན་གྱི་སེམས། །སྐད་ཅིག་གཅིག་ལ་སེམས་ཀྱིས་རྣམ་པར་ཤེས། །གང་དག་འགྲོ་བ་མ་ལུས་ཀུན་གྱི་སེམས། །སྐད་ཅིག་གཅིག་ལ་སེམས་ཀྱིས་རྣམ་ཤེས་པ། །དེ་དག་ནམ་ཡང་
མི་འཆི་སྐྱེ་མི་འགྱུར། །ཉོན་མོངས་རྒྱུ་བའང་འབྱུང་བར་འགྱུར་མ་ཡིན། །གང་དག་ནམ་ཡང་མི་འཆི་མི་སྐྱེ་ཞིང ། །ཉོན་མོངས་རྒྱུ་བའང་འབྱུང་བར་མི་འགྱུར་བ། །དེ་དག་ཡོན་ཏན་ཆོས་ཉིད་ཡེ་ཤེས་ལུས། །ཆོས་ཀྱིས་རབ་ཏུ་ཕྱེ་བས་འཇིག་རྟེན་རྒྱུ། །གང་དག་ཡོན་ཏན་ཆོས་ཉིད་ཡེ་
ཤེས་ལུས། །ཆོས་ཀྱིས་རབ་ཕྱེ་འཇིག་རྟེན་རྒྱུ་བྱེད་པ། །དེ་དག་ས་བཅུ་རྣམས་དང་དབང་བཅུ་དང ། །ཕ་རོལ་ཕྱིན་དང་རྣམ་ཐར་མཆོག་ལ་གནས། །གང་དག་ས་བཅུ་རྣམས་དང་དབང་བཅུ་དང ། །ཕ་རོལ་ཕྱིན་དང་རྣམ་ཐར་མཆོག་གནས་པ། །དེ་དག་དབང་བསྐུར་བཀོད་དང་རྣམ་འཕྲུལ་
དང ། །ཏིང་འཛིན་མཆོག་ལ་གནས་པ་རྗེས་སུ་འཐོབ། །གང་དག་དབང་བསྐུར་བཀོད་དང་རྣམ་འཕྲུལ་དང ། །ཏིང་འཛིན་མཆོག་ལ་གནས་པ་རྗེས་ཐོབ་པ། །དེ་དག་ཕྱོགས་བཅུའི་རྒྱལ་བ་ཐམས་ཅད་ལས། །དབང་བསྐུར་ཐམས་ཅད་མ་ལུས་ནོད་པར་བྱེད། །གང་དག་ཕྱོགས་བཅུའི་
རྒྱལ་བ་ཐམས་ཅད་ལས། །དབང་བསྐུར་ཐམས་ཅད་མ་ལུས་ནོད་བྱེད་པ། །དེ་དག་སྤྱི་བོར་ཕྱོགས་བཅུའི་སངས་རྒྱས་ཀྱིས། །ཕྱག་མཐིལ་བདུད་རྩི་ཅན་གྱིས་དབང་བསྐུར་ཏོ། །གང་དག་སྤྱི་བོར་ཕྱོགས་བཅུའི་སངས་རྒྱས་ཀྱིས། །ཕྱག་མཐིལ་བདུད་རྩི་ཅན་གྱིས་དབང་བསྐུར་བ།

</font><hr>57-1-66b<br><font size=+2>

མཐུ་བརྟན་དེ་དག་ནམ་མཁའ་ལྟ་བུར་ནི། །མ་ལུས་ཁྱབ་བྱས་ཕྱོགས་རྣམས་ཀུན་ན་གནས། །མཐུ་བརྟན་གང་དག་ནམ་མཁའ་ལྟ་བུར་ནི། །མ་ལུས་ཁྱབ་བྱས་ཕྱོགས་རྣམས་ཀུན་གནས་པ། །མཚུངས་མེད་དེ་དག་སྤྱོད་ཡུལ་ལྷར་བཅས་ཀྱི། །འཇིག་རྟེན་རྣམས་ཀྱིས་ཤེས་པར་ཡོང་མི་ནུས། །
མཚུངས་མེད་གང་དག་སྤྱོད་ཡུལ་ལྷར་བཅས་ཀྱི། །འཇིག་རྟེན་རྣམས་ཀྱིས་ཤེས་པར་མི་ནུས་པ། །དེ་དག་རྟུན་པ་ཀུན་དང་མཐོང་བ་དང ། །མིང་ཐོས་པ་དང་སྤོབས་པ་དོན་ཡོད་དོ། །གང་དག་རྟུན་པ་ཀུན་དང་མཐོང་བ་དང ། །མིང་ཐོས་པ་དང་སྤོབས་པ་དོན་ཡོད་པ། །སྐྱེས་ཆེན་དེ་དག་སྦྱིན་པ་སྦྱིན་
བྱེད་ཀྱི། །སྦྱིན་པ་ཐམས་ཅད་དོན་ཡོད་འགྱུར་བ་ཡིན། །སྐྱེས་བུ་དམ་པ་དེ་དག་རྣམས་ཀྱི་མཐུས། །ཆོས་ཀྱང་གནས་ཤིང་བྱམས་པ་ཉམས་མི་འགྱུར། །དགེ་བའི་ལས་རྣམས་རབ་ཏུ་སྤྱོད་འགྱུར་ཏེ། །དཀོན་མཆོག་མཐུ་ཡང་དམ་པ་མཆོག་ཏུ་འགྱུར། །རྡོ་རྗེ་མཁྲེགས་པའི་རིན་ཆེན་མཆོག་ཡོད་
པ། །དེ་ཡི་མཐུ་ཡིས་རྒྱ་མཚོར་རིན་ཆེན་རྣམས། །མི་ཟད་མི་འགྲིབ་འཕེལ་བར་མི་འགྱུར་ཏེ། །དེ་བཞིན་ཡོན་ཏན་མཐའ་ཡས་ཡོན་ཏན་ཆུ། །གང་ན་སངས་རྒྱས་མེད་པའི་ཞིང་གྱུར་པ། །དེ་ནི་བྱང་ཆུབ་རྣམ་པར་སངས་རྒྱས་སྟོན། །ཕྱོགས་རྣམས་གང་ན་ཆོས་ཀྱང་མེད་གྱུར་པ། །ཕྱོགས་དེར་ཆོས་
ཀྱི་གཏེར་ནི་སྟོན་པར་བྱེད། །དེ་དག་རྟོག་མེད་རྣམ་པར་མི་རྟོག་ཅིང ། །དེ་དག་ལྷུན་གྱིས་གྲུབ་པར་ཕྱོགས་ཀུན་དུ། །ཟླ་བ་ལྟ་བུར་སྣང་བར་རབ་སྟོན་ཅིང ། །ཐབས་སྟོང་དག་གིས་སེམས་ཅན་འདུལ་བར་བྱེད། །དེ་དག་སྐད་ཅིག་རེ་ལ་ཕྱོགས་བཅུ་ཡི། །འཇིག་རྟེན་ཀུན་དུ་བྱང་ཆུབ་སངས་རྒྱས་སྟོན། །
འཁོར་ལོ་བསྐོར་དང་མྱ་ངན་འདས་ཞི་དང ། །Rིང་བསྲེལ་རབ་ཏུ་རྒྱས་པའང་དཔའ་བོ་སྟོན། །མཁས་པ་དེ་དག་ཉན་ཐོས་རང་རྒྱལ་ས། །སངས་རྒྱས་བཀོད་པ་རྣམ་འཕྲུལ་མཐའ་ཡས་པ། །བསྐལ་པ་བསམ་མི་ཁྱབ་པར་སྟོན་བྱེད་ཅིང ། །ཐེག་གསུམ་སྒོ་ནས་སེམས་ཅན་འདུལ་བར་བྱེད། །མོས་པ་
ཀུན་གྱི་བསྒྲུབ་པ་ཤེས་པ་རྣམས། །ཁྱེའུ་དང་བུ་མོ་བུད་མེད་ལུས་རྣམས་དང ། །ལྷ་མི་ལྷ་མིན་ཀླུ་དང་གནོད་སྦྱིན་དང ། །གྲུལ་བུམ་ལྟོ་འཕྱེ་ཆེན་པོའི་གཟུགས་རྣམས་སྟོན། །རྒྱ་མཚོའི་ཕྱག་རྒྱའི་ཏིང་ངེ་འཛིན་གྱི་སྒོས། །དཔའ་པོ་དེ་དག་འགྲོ་བའི་གཟུགས་སྤྱོད་དང ། །རྟགས་དང་སྤྱོད་

</font><hr>57-1-67a<br><font size=+2>

དང་སྒྲ་སྐད་འཇུག་པ་དག་།ཇི་སྙེད་ཐམས་ཅད་མ་ལུས་སྟོན་པར་བྱེད། །དེ་དག་ཞིང་བཀོད་བསམ་གྱིས་མི་ཁྱབ་པས། །ཕྱོགས་བཅུའི་རྒྱལ་བ་ཀུན་ལ་མཆོད་པར་བྱེད། །གང་དག་ཞིང་བཀོད་བསམ་གྱིས་མི་ཁྱབ་པས། །ཕྱོགས་བཅུའི་རྒྱལ་བ་ཀུན་ལ་མཆོད་བྱེད་པ། །
དེ་དག་འོད་ཟེར་བཀོད་པ་བསམ་ཡས་ཤིང ། །སེམས་ཅན་འགྲེལ་པའི་ཡེ་ཤེས་མཐའ་ཡས་སོ། །གང་དག་འོད་ཟེར་བཀོད་པ་བསམ་ཡས་ཤིང ། །སེམས་ཅན་འགྲེལ་པའི་ཡེ་ཤེས་བསམ་ཡས་པ། །དེ་དག་ལུས་དང་ངག་གི་རྣམ་འཕྲུལ་དང ། །ཡིད་ཀྱི་རྣམ་པར་འཕྲུལ་པ་
བསམ་མི་ཁྱབ། །གང་དག་ལུས་དང་ངག་གི་རྣམ་འཕྲུལ་དང ། །ཡིད་ཀྱི་རྣམ་འཕྲུལ་བསམ་གྱིས་མི་ཁྱབ་པ། །དེ་དག་སྦྱིན་དང་ཚུལ་ཁྲིམས་རྣམ་འཕྲུལ་དང ། །བཟོད་དང་བརྩོན་འགྲུས་རྣམ་འཕྲུལ་བསམ་མི་ཁྱབ། །གང་དག་སྦྱིན་དང་ཚུལ་ཁྲིམས་རྣམ་འཕྲུལ་དང ། །བཟོད་བརྩོན་
རྣམ་འཕྲུལ་བསམ་གྱིས་མི་ཁྱབ་པ། །དེ་དག་སངས་རྒྱས་ཕལ་ཆེན་ཏིང་འཛིན་སྒོས། །བསམ་གཏན་རྣམ་པར་འཕྲུལ་དང་ཤེས་རབ་དང ། །ཐབས་དང་མངོན་ཤེས་རྣམ་འཕྲུལ་བསམ་མི་ཁྱབ། །ཡོན་ཏན་ཀུན་གྱི་རྣམ་འཕྲུལ་མཐའ་ཡང་ཡས། །དེ་དག་ཕྲ་རབ་རྡུལ་འཇུག་ཏིང་ངེ་
འཛིན། །རྡུལ་རྣམས་ཀུན་ལ་མངོན་པར་སྒྲུབ་བྱེད་ཅིང ། །རྡུལ་གཅིག་སྟེང་ན་ཞིང་རྣམས་བསམ་མི་ཁྱབ། །སྟོན་པར་བྱེད་ཀྱང་རྡུལ་ལ་འཕེལ་བ་མེད། །རྡུལ་དེའི་སྟེང་ན་སངས་རྒྱས་བཅས་ཞིང་དང ། །སངས་རྒྱས་མེད་པའི་ཞིང་ཡང་ཁ་ཅིག་སྟོན། །ཉོན་མོངས་རྣམ་དག་དོག་
པ་ཁ་ཅིག་དང ། །ཡངས་ཤིང་ཕྲ་དང་ཆེ་བའི་ཞིང་ཡང་སྟོན། །ཞིང་རྣམས་ལ་ལ་འཇིག་དང་འཆགས་པ་དང ། །ལ་ལ་སྤྱིའུ་ཚུགས་གྱུར་དང་འཐུན་པ་དང ། །ལ་ལ་སྣརེལ་ཞི་སྨིག་རྒྱུ་ལྟ་བུ་དང ། །ལ་ལ་མིག་འཕྲུལ་ལྟ་བུར་གྱུར་པ་རྣམས། །ཇི་ལྟར་རྡུལ་གཅིག་སྟེང་དུ་སྟོན་བྱེད་པ། །
དེ་བཞིན་རྡུལ་རྣམས་མ་ལུས་ཀུན་ལ་སྟོན། །དྲང་སྲོང་ཏིང་འཛིན་རྣམ་འཕྲུལ་འདི་འདྲ་སྟེ། །གྲགས་པ་མཐའ་ཡས་རྣམ་ཐར་འདི་འདྲའོ། །དེ་དག་རྒྱལ་མཆོད་རྣམ་འཕྲུལ་ཏིང་ངེ་འཛིན། །རྒྱལ་བ་ཀུན་ལ་མངོན་པར་སྒྲུབ་བྱེད་ཅིང ། །ལག་པའི་མཐིལ་དུ་སྟོང་གསུམ་རྒྱས་

</font><hr>57-1-67b<br><font size=+2>

བཀང་སྟེ། །སྐྱེས་བུ་ཆེན་པོ་རྣམས་ལ་མཆོད་པ་བྱེད། །ཕྱོགས་བཅུ་དག་ན་མེ་ཏོག་ཕྲེང་བ་དང ། །སྤོས་བྱུག་རིན་ཆེན་རིན་ཆེ་ཇི་སྙེད་པ། །དེ་དག་བྱང་ཆུབ་ཤིང་དྲུང་བཞུགས་པ་ཡི། །རྒྱལ་རྣམས་མཆོད་ཕྱིར་ལག་པའི་མཐིལ་ནས་འབྱིན། །གོས་དང་ཕྱེ་མ་རིན་ཆེན་ཇི་སྙེད་དང ། །རྒྱལ་
མཚན་བ་དན་གདུགས་མཆོག་སྣ་ཚོགས་དང ། །གསེར་གྱིས་བརྒྱན་པའི་རིན་ཆེན་བླ་རེ་རྣམས། །དེ་དག་ལག་པའི་མཐིལ་ནས་ཆར་དུ་འབེབས། །ཕྱོགས་བཅུ་དག་ན་ཡོ་བྱད་མཐའ་ཡས་གང ། །དྲང་སྲོང་ཆེན་པོ་རྣམས་ལ་མཆོད་འོས་པ། །དེ་དག་ལག་པའི་མཐིལ་ནས་ཆར་འབེབས་
ཤིང ། །བྱང་ཆུབ་ཤིང་དྲུང་བཞུགས་པའི་རྒྱལ་བ་མཆོད། །ཕྱོགས་རྣམས་དག་ན་རོལ་མོ་ཇི་སྙེད་པ། །རྔ་དང་རྫ་རྔ་སྒྲ་སྙན་པི་བང་དང ། །སིལ་སྙན་སྒྲ་དང་སྒྲ་ཆེན་གླིང་བུ་རྣམས། །དེ་དག་ལག་པའི་མཐིལ་ནས་རབ་ཏུ་སྒྲོགས། །ཕྱོགས་བཅུ་ཀུན་གྱི་དཔེ་ཟླ་མེད་རྣམས་ཀྱི། །ཡང་
དག་ཡོན་ཏན་བསྔགས་པ་སྣ་ཚོགས་དང ། །བསྟོད་པའི་ཚིགས་བཅད་སྒྲུབ་པ་སྣ་ཚོགས་པ། །དེ་དག་ལག་པའི་མཐིལ་ནས་རབ་ཏུ་སྒྲོགས། །འོད་ཟེར་གང་དག་ལས་དགེས་ཡོངས་བསགས་པ། །ལག་པ་གཡས་ནས་ཡོངས་སུ་འགྱེད་བྱེད་ཅིང ། །སྤོས་ཆུས་རྒྱལ་བའི་ཞིང་
རྣམས་ཐམས་ཅད་དུ། །འབེབས་ཤིང་འཇིག་རྟེན་སྒྲོན་མ་རྣམས་ལ་མཆོད། །འོད་ཟེར་བཀོད་དང་ལྡན་པ་མཛེས་པའི་འོད། །པད་མའི་རྒྱན་ཕྲེང་བསམ་ཡས་རབ་འཕྱང་བ། །པད་མ་མཚན་རབ་གཟུགས་ཅན་དུ་མ་དག་།ལག་ནས་རྒྱལ་བ་རྣམས་ལ་མཆོད་པར་བྱེད། །མེ་ཏོག་
ཕལ་ཆེན་མེ་ཏོག་བླ་རེ་དང ། །མེ་ཏོག་བཀོད་པའི་འོད་ཟེར་རབ་བཀྱེ་སྟེ། །མེ་ཏོག་སྣ་ཚོགས་ཀུན་དུ་བཀྲམ་བྱས་ཤིང ། །བདག་ཉིད་ཆེན་པོ་དེ་དག་རྒྱལ་བ་མཆོད། །བདུག་པ་ཕལ་ཆེན་བདུག་པའི་བླ་རེ་དང ། །བདུག་པ་བཀོད་པའི་འོད་ཟེར་རབ་བཀྱེ་སྟེ། །བདུག་པ་སྣ་ཚོགས་ཀུན་དུ་བཀྲམ་
བྱས་ཤིང ། །བདག་ཉིད་ཆེན་པོ་དེ་དག་རྒྱལ་བ་མཆོད། །ཕལ་ཆེན་སྤོས་དང་སྤོས་ཀྱི་བླ་རེ་དང ། །སྤོས་ཀྱིས་བཀོད་པའི་འོད་ཟེར་རབ་བཀྱེ་སྟེ། །སྣ་ཚོགས་སྤོས་རྣམས་ཀུན་དུ་བཀྲམ་བྱས་ཤིང ། །བདག་ཉིད་ཆེན་པོ་དེ་དག་རྒྱལ་བ་མཆོད། །ཕྲེང་བ་ཕལ་ཆེན་ཕྲེང་བའི་བླ་རེ་དང ། །ཕྲེང་

</font><hr>57-1-68a<br><font size=+2>

བ་བཀོད་པའི་འོད་ཟེར་རབ་བཀྱེ་སྟེ། །ཕྲེང་བ་སྣ་ཚོགས་ཀུན་དུ་བཀྲམ་བྱས་ཤིང ། །བདག་ཉིད་ཆེན་པོ་དེ་དག་རྒྱལ་བ་མཆོད། །ཕྱེ་མ་ཕལ་ཆེན་ཕྱེ་མའི་བླ་རེ་དང ། །ཕྱེ་མ་བཀོད་པའི་འོད་ཟེར་རབ་བཀྱེ་སྟེ། །ཕྱེ་མ་སྣ་ཚོགས་ཀུན་དུ་བཀྲམ་བྱས་ཤིང ། །བདག་ཉིད་
ཆེན་པོ་དེ་དག་རྒྱལ་བ་མཆོད། །ན་བཟའ་ཕལ་ཆེན་ན་བཟའི་བླ་རེ་དང ། །ན་བཟའ་བཀོད་པའི་འོད་ཟེར་རབ་བཀྱེ་སྟེ། །ན་བཟའ་སྣ་ཚོགས་ཀུན་དུ་བཀྲམ་བྱས་ཤིང ། །བདག་ཉིད་ཆེན་པོ་དེ་དག་རྒྱལ་བ་མཆོད། །ཕལ་ཆེན་གདུགས་དང་གདུགས་ཀྱི་བླ་རེ་དང ། །གདུགས་ཀྱི་
བཀོད་པའི་འོད་ཟེར་རབ་བཀྱེ་སྟེ། །སྣ་ཚོགས་གདུགས་རྣམས་ཀུན་དུ་བཀྲམ་བྱས་ཤིང ། །བདག་ཉིད་ཆེན་པོ་དེ་དག་རྒྱལ་བ་མཆོད། །རིན་ཆེན་ཕལ་ཆེན་རིན་ཆེན་བླ་རེ་དང ། །རིན་ཆེན་བཀོད་པའི་འོད་ཟེར་རབ་བཀྱེ་སྟེ། །རིན་ཆེན་སྣ་ཚོགས་ཀུན་དུ་བཀྲམ་བྱས་ཤིང ། །བདག་ཉིད་
ཆེན་པོ་དེ་དག་རྒྱལ་བ་མཆོད། །པད་མ་ཕལ་ཆེན་པད་མའི་བླ་རེ་དང ། །པད་མ་བཀོད་པའི་འོད་ཟེར་རབ་བཀྱེ་སྟེ། །པད་མ་སྣ་ཚོགས་ཀུན་དུ་བཀྲམ་བྱས་ཤིང ། །བདག་ཉིད་ཆེན་པོ་དེ་དག་རྒྱལ་བ་མཆོད། །རྒྱན་ཕྲེང་ཕལ་ཆེན་རྒྱན་ཕྲེང་བླ་རེ་དང ། །རྒྱན་ཕྲེང་བཀོད་པའི་འོད་ཟེར་
རབ་བཀྱེ་སྟེ། །རྒྱན་ཕྲེང་སྣ་ཚོགས་ཀུན་དུ་བཀྲམ་བྱས་ཤིང ། །བདག་ཉིད་ཆེན་པོ་དེ་དག་རྒྱལ་བ་མཆོད། །རྒྱལ་མཚན་མཆོག་བཀོད་འོད་ཟེར་རབ་བཀྱེ་ཞིང ། །དེ་དག་རྒྱལ་མཚན་དཀར་དམར་སེར་པོ་དང ། །སྔོ་དང་རྒྱལ་མཚན་བཀོད་པ་སྣ་ཚོགས་པ། །དུ་མས་རྒྱལ་བའི་ཞིང་
རྣམས་བརྒྱན་པར་བྱེད། །ནོར་བུ་འདྲ་བ་སྣ་ཚོགས་བཀོད་པའི་གདུགས། །དར་གྱི་ལྡ་ལྡི་བ་དན་རབ་སྤྱངས་ཤིང ། །དྲིལ་གཡེར་དྲ་བ་རྒྱལ་བའི་གསུང་སྒྲོགས་པ། །དེ་བཞིན་གཤེགས་པའི་དབུ་ལ་དེ་དག་འཛིན། །ལག་པའི་མཐིལ་ནས་མཆོད་པ་མཐའ་ཡས་རྣམས། །རྒྱལ་བ་གཅིག་
ལ་དེ་དག་བྱེད་པ་ལྟར། །རྒྱལ་བ་མ་ལུས་ཀུན་ལའང་དེ་བཞིན་ཏེ། །དྲང་སྲོང་ཏིང་འཛིན་རྣམ་འཕྲུལ་དེ་འདྲའོ། །དེ་དག་འགྲོ་བ་སྡུད་པའི་ཡེ་ཤེས་ཀྱིས། །རྣམ་པར་འཕྲུལ་དང་ཏིང་འཛིན་མཆོག་བསྒྲུབས་ཤིང ། །བྱ་བ་དག་དང་བསྙེན་བཀུར་ཀུན་གྱི་སྒོ། །ཐབས་སྟོང་དག་གིས་སེམས་

</font><hr>57-1-68b<br><font size=+2>

ཅན་འདུལ་བར་བྱེད། །ཁ་ཅིག་དེ་བཞིན་གཤེགས་པ་མཆོད་སྒོ་དང ། །སྦྱིན་པ་བསམ་གྱིས་མི་ཁྱབ་གཏོང་སྒོ་དང ། །སྦྱངས་པའི་ཡོན་ཏན་ཚུལ་ཁྲིམས་ཀུན་སྒོ་དང ། །བཟོད་པ་མི་ཟད་མི་འཁྲུགས་སྒོ་དག་དང ། །ཁ་ཅིག་བརྟུལ་ཞུགས་དཀའ་ཐུབ་བརྩོན་སྒོ་དང ། །བསམ་གཏན་རབ་
ཏུ་ཞི་བར་གནས་སྒོ་དང ། །དོན་ལ་རྣམ་ངེས་ཤེས་རབ་སྒོ་རྣམས་དང ། །སྤྱད་པ་ཀུན་ལྡན་ཐབས་ཀྱི་སྒོ་དག་དང ། །ཚངས་པའི་གནས་པ་དག་དང་མངོན་ཤེས་སྒོ། །བསྡུ་བའི་དངོས་པོས་ཕན་པར་འདོད་སྒོ་དང ། །བསོད་ནམས་བསགས་དང་ཡེ་ཤེས་སྒོ་དག་དང ། །བདེན་དང་བརྟེན་དང་
རྣམ་པར་ཐར་སྒོ་དང ། །ཁ་ཅིག་སྟོབས་དང་དབང་པོ་ལམ་སྒོ་དང ། ། ཉན་ཐོས་ཐེག་པས་རྣམ་པར་གྲོལ་སྒོ་དང ། །རྐྱེན་གྱི་ཐེག་པས་རྣམ་པར་དག་སྒོ་དང ། །ཐེག་པ་མཆོག་གི་རྣམ་པར་འཕྲུལ་སྒོ་དང ། །ཁ་ཅིག་མི་རྟག་ཉིད་དང་སྡུག་བསྔལ་སྒོ། །ཁ་ཅིག་བདག་མེད་སྲོག་མེད་སྒོ་དག་
དང ། །མི་སྡུག་འདུ་ཤེས་འདོད་ཆགས་བྲལ་སྒོ་དང ། །ཞི་འགོག་ཏིང་ངེ་འཛིན་གྱི་སྒོ་ཡིས་འདུལ། །འགྲོ་བའི་སྤྱོད་པའི་སྒོ་རྣམས་ཇི་སྙེད་པ། །དེ་སྙེད་ཆོས་ཀྱི་སྒོ་ལ་རབ་ཞུགས་ཏེ། །དེ་དག་ཀུན་དུ་རྣམ་ཐར་སྒོ་དག་ནས། །བསམ་པ་ཇི་བཞིན་འཇིག་རྟེན་སེམས་ཅན་འདུལ། །གང་
དག་ཀུན་དུ་རྣམ་ཐར་སྒོ་དག་ནས། །བསམས་བཞིན་འཇིག་རྟེན་སེམས་ཅན་འདུལ་བྱེད་པ། །དེ་དག་སུས་ཀྱང་མཚན་མར་གཟུང་མི་ནུས། །ཏིང་འཛིན་རྣམ་པར་འཕྲུལ་བ་དེ་འདྲའོ། །དེ་དག་དགའ་བ་བཀོད་པའི་ཏིང་འཛིན་མཆོག་།འགྲོ་བ་ཐམས་ཅད་ཡོངས་སྨིན་འཐུན་བྱེད་པ། 
དགའ་བདེ་སྤྲོ་བ་རབ་དགའ་ཀུན་ལྡན་པས། །བསམས་པ་བརྟན་ནས་སེམས་ཅན་འདུལ་བར་བྱེད། །གང་དུ་ལོ་ཉེས་འཇིག་རྟེན་ཡོ་བྱད་གང ། །བདེ་བྱེད་ཐམས་ཅད་རབ་ཏུ་དཀོན་གྱུར་པ། །དེར་ནི་ཀུན་གྱིས་བསམས་བཞིན་བྱ་བ་ཡིན། །སྦྱིན་པ་སྦྱིན་ཞིང་འགྲོ་བའི་དོན་རྣམས་
བྱེད། །དེ་དག་ཟས་སྐོམ་མཆོག་དང་རོ་མཆོག་དང ། །གོས་དང་བགོ་བ་རིན་ཆེན་སྣ་ཚོགས་དང ། །རྒྱལ་སྲིད་ནོར་དང་བདག་ཕངས་ཡོངས་གཏོང་བས། །སྦྱིན་ལ་མོས་པའི་འགྲོ་བ་འདུལ་བར་བྱེད། །བརྟན་པ་དེ་དག་མཚན་མཆོག་ལུས་སྤྲས་ཤིང ། །གོས་དང་རྒྱན་མཆོག་བགོས་ཤིང་

</font><hr>57-1-69a<br><font size=+2>

བརྒྱན་བྱས་ཏེ། །ཕྲེང་བས་སྤུད་ཅིང་སྤོས་ཀྱིས་བསྐུས་པ་ཡི། །གཟུགས་རྣམས་བསྟན་པས་སེམས་ཅན་འདུལ་བར་བྱེད། །མཐོང་ན་དགའ་ཚིམ་རབ་ཏུ་དགའ་རྣམས་ལ། །བློ་མཆོག་དེ་དག་གཟུགས་མཆོག་གཟུགས་བཟང་བ། །གཟུགས་ཀྱི་དམ་པ་ཡོངས་སུ་སྟོན་བྱེད་
ཅིང ། །གཟུགས་ལ་མོས་པའི་སེམས་ཅན་འདུལ་བར་བྱེད། །དེ་དག་ཀ་ལ་པིང་ཀའི་སྒྲ་སྙན་དང ། །ཁུ་བྱུག་ཀུན་ལ་དང་པའི་སྒྲ་སྐད་དང ། །རྔ་དང་ཚངས་དང་མིའམ་ཅི་ཡི་སྒྲས། །མོས་པ་ཀུན་ལ་དེ་བཞིན་ཆོས་ཀྱང་སྟོན། །སྟོང་ཕྲག་བརྒྱད་ཅུ་རྩ་བཞི་གང་ཡིན་པས། །རྒྱལ་བ་གང་དག་
འགྲོ་བའི་དོན་མཛད་པའི། །ཆོས་ཀྱི་བྱེ་བྲག་སྒོ་མོ་དེ་དག་གིས། །བསམ་པ་ཇི་བཞིན་འཇིག་རྟེན་སེམས་ཅན་འདུལ། །དེ་དག་བདེ་དང་སྡུག་བསྔལ་གྲོགས་ཀྱང་བྱེད། །དོན་དང་གནོད་པའི་གྲོགས་ཀྱང་དེ་བཞིན་བྱེད། །བྱ་བ་ཀུན་ལ་གྲོགས་སུ་འགྱུར་བྱས་ཤིང ། །གྲོགས་ཀྱི་སྒོ་ནས་སེམས་
ཅན་འདུལ་བར་བྱེད། །སྡུག་བསྔལ་གནོད་པ་འདུས་བྱས་སྐྱོན་གྱི་རྣམས། །གྲོགས་ཀྱི་དོན་དུ་དེ་དག་བཟོད་བྱེད་ཅིང ། །འགྲོ་བ་ཀུན་ལ་ཕན་དོན་བདེ་དོན་དུ། །དེ་དག་གྲོགས་དོན་གནོད་པ་དང་དུ་ལེན། །གང་ན་མངོན་བྱུང་མེད་ཅིང་ཆོས་མེད་དེ། །དགོན་པར་འགྲོ་དང་ཐར་པ་མི་དམིགས་པ། །
དེར་ནི་རྒྱལ་སྲིད་འབྱོར་བ་རབ་སྤངས་ཏེ། །ཞི་བའི་ཡིད་ཀྱིས་གནས་མེད་མངོན་པར་འབྱུང ། །དེ་དག་ཁྱིམ་དང་འཆིང་དང་སྲིད་པའི་གནས། །འགྲོ་བ་ཐམས་ཅད་ཡོངས་སུ་དགྲོལ་བའི་ཕྱིར། །འདོད་པའི་དགའ་བ་ཀུན་ལ་མི་གནས་པར། །མངོན་པར་བྱུང་ཞིང་ཐར་པ་རབ་ཏུ་བརྗོད། །དེ་དག་
སྤྱོད་པ་བཅུ་རྣམས་རྗོད་བྱེད་ཅིང ། །སྐྱེས་ཆེན་རྣམས་ཀྱི་ཆོས་སྤྱོད་གང་ཡིན་དང ། །དྲང་སྲོང་རྣམས་ཀྱི་སྤྱོད་ཀུན་མ་ལུས་པར། ཡོངས་སུ་བརྗོད་ཅིང་འགྲོ་བའི་དོན་རྣམས་བྱེད། །གང་ན་སེམས་ཅན་དཔག་མེད་ཚེ་ལྡན་ཞིང ། །བདེ་དང་ལྡན་ལ་ཉོན་མོངས་ཆུང་ཡོད་པ། །དེར་ནི་རྒ་
བས་ཉེན་ཅིང་ནད་བུ་ཅན། །བདག་ལ་དབང་མེད་འཆི་བའི་དབང་གྱུར་སྟོན། །འདོད་ཆགས་འབར་ཞིང་ཞེ་སྡང་རབ་འབར་ལ། །འཇིག་རྟེན་གཏི་མུག་མེ་ཆེན་རབ་འབར་ཞིང ། །རྒ་དང་ན་དང་འཆི་བ་རབ་འབར་བའི། །འཇིག་རྟེན་བསྟན་ནས་སེམས་ཅན་འདུལ་བར་བྱེད། །དེ་དག་སངས་རྒྱས་

</font><hr>57-1-69b<br><font size=+2>

སྟོབས་བཅུ་བརྩོན་བཞི་དང ། །ཆོས་ཀྱི་ཁྱད་པར་བཅཝ་བརྒྱད་རྣམས་ཀྱིས་ཀྱང ། །སངས་རྒྱས་ཆེ་བའི་བདག་ཉིད་རྗོད་བྱེད་ཅིང ། །སངས་རྒྱས་ཡོན་ཏན་རྣམས་ཀྱིས་འགྲོ་དོན་བྱེད། །དེ་དག་ཀུན་བརྗོད་རྫུ་འཕྲུལ་རྗེས་བསྟན་པས། །གཟུགས་ཀྱི་བྱིན་རླབས་སྟོབས་ཀྱིས་ཐམས་ཅད་དུ། །དེ་བཞིན་
གཤེགས་པའི་རྫུ་འཕྲུལ་སྟོན་བྱེད་ཅིང ། །རྫུ་འཕྲུལ་རྣམ་པར་འཕྲུལ་པས་སེམས་ཅན་འདུལ། །དེ་དག་ཐབས་ཚུལ་རྣམ་པ་སྣ་ཚོགས་ཀྱིས། །འཇིག་རྟེན་རྒྱུ་ཞིང་འགྲོ་བའི་དོན་རྣམས་བྱེད། །འཇིག་རྟེན་མི་ཆགས་ཆུ་ལ་པད་མ་བཞིན། །དགའ་ཞིང་དད་པར་བྱེད་ལ་རྣམ་པར་རྒྱུ། །དེ་
དག་སྙན་དངགས་མཁན་རྒྱལ་སྙན་དངགས་སྦྱོར། །གར་མཁན་རྔ་མཁན་གྱད་དང་རོལ་མོ་མཁན། །བཞག་མཛེས་རྒྱན་ཕྲེང་ཐོགས་ཤིང་གར་བྱེད་དང ། །སྒྱུ་མ་མཁན་པོ་གཟུགས་མང་ཀུན་དུ་སྟོན། །གྲོང་པ་གྲོང་དཔོན་ཁ་ལོ་སྒྱུར་བར་འགྱུར། །དེ་བཞིན་དེད་དཔོན་ཚོང་དཔོན་ཁྱིམ་
བདག་འགྱུར། །རྒྱལ་པོ་བློན་པོ་མདུན་འདོན་ཕོ་ཉ་དང ། །སྨན་པ་འཇིག་རྟེན་བསྟན་བཅོས་ཆོ་ག་མཁན། །དེ་དག་དགོན་པར་ལྗོན་ཤིང་ཆེན་པོར་འགྱུར། །སྨན་དང་རིན་ཆེན་མི་ཟད་གཏེར་རྣམས་དང ། །ཡིད་བཞིན་ནོར་བུ་འདོད་འབྱིན་སྡོང་པོ་དང ། །ལམ་གོལ་དོང་བ་རྣམས་ལ་ལམ་
སྟོན་འགྱུར། །འཇིག་རྟེན་བྱུང་ནས་མི་རིང་ཤེས་གྱུར་ཅིང ། །སེམས་ཅན་ལས་ཀྱི་ཚུལ་རྣམས་མི་ཤེས་པ། །དེ་དག་ཀུན་ལ་རྨོས་ཆོས་ཚོང་ཐབས་དང ། །སྣ་ཚོགས་བཟོ་རྣམས་འཇིག་རྟེན་རྗོད་པར་བྱེད། །འཚེ་མེད་གནོད་པ་མེད་པའི་སྦྱོར་བ་གང ། །སེམས་ཅན་བདེ་བྱེད་མཁས་པས་
རབ་བསྔགས་པ། །རིགས་སྟོབས་སྨན་དང་བསྟན་བཅོས་སྣ་ཚོགས་ཀུན། །དྲང་སྲོང་དེ་དག་རྣམས་ཀྱིས་རབ་ཏུ་བརྗོད། །གང་ལ་ལྷར་བཅས་འཇིག་རྟེན་མོས་འགྱུར་བ། །དྲང་སྲོང་སྤྱོད་མཆོག་དམ་པ་གང་ཡིན་དང ། །བརྟུལ་ཞུགས་དཀའ་སྤྱད་དཀའ་ཐུབ་མཆོག་ཀུན་ཀྱང ། 
མཁས་པ་དེ་དག་རྣམས་ཀྱིས་རབ་ཏུ་བརྗོད། །དེ་དག་སྤྱོད་ཅན་ཀུན་རྒྱུ་མུ་སྟེགས་ཅན། །གདུང་བ་གཽ་ཏ་མ་དང་མི་སྨྲར་སྤྱོད། །གཅེར་བུ་གོས་མེད་ལྷུར་ལེན་དགེ་སྦྱོང་ལ། །མུ་སྟེགས་ཅན་གྱི་སློབ་དཔོན་མཁས་པར་སྟོན། །དེ་དག་ཀུན་དུ་འཚོ་བའི་ཆོས་འཛིན་དང ། །

</font><hr>57-1-70a<br><font size=+2>

བླ་ན་ཡོད་དང་བླ་ན་མེད་རྣམས་དང ། །རལ་པ་རིང་དང་གཞོན་ནུའི་བརྟུལ་ཞུགས་ཅན། །དེ་དག་ཏུ་ཡང་སློབ་དཔོན་འགྱུར་བ་ཡིན། །ཉི་མའི་རྗེས་ལྟ་དཀའ་ཐུབ་ལྔ་ལྡན་དང ། །ཁྱི་དང་བ་ལང་བརྟུལ་ཞུགས་རི་དགས་སྤྱོད། །གླེའུ་ཅན་དག་དང་མུ་སྟེགས་སུམ་
ཅུ་པ། དེ་དག་ཏུ་ཡང་དེ་དག་སློབ་དཔོན་འགྱུར། །ལྷ་ཡི་ཤེས་ལ་འཇུག་པ་དགའ་རྣམས་དང ། །མུ་སྟེགས་ཉེ་རེག་ཡུལ་དུ་རྒྱུ་རྣམས་སུ། །རྩ་བ་འབྲས་བུ་ཆུ་སྤྱོད་གྱུར་ནས་ཀྱང ། །བསམ་ཡས་ཆོས་ལ་དེ་དག་དམ་པ་མཆོག་།ཙོག་པུར་འདུག་དང་གཅིག་པུ་རྒྱུ་བ་
དང ། །ཚེར་མ་རྩཝ་དང་ཐལ་བར་ཉལ་བ་དང ། །གང་དག་གཏུན་ཤིང་མལ་ཅན་གནས་པ་དང ། །དེ་དག་ཏུ་ཡང་དེ་དག་སློབ་དཔོན་འགྱུར། །ཕྱི་རོལ་མུ་སྟེགས་ཅན་རྣམས་ཇི་སྙེད་པ། །དེ་དག་བསམ་པ་མོས་པ་རྟོགས་བྱས་ཤིང ། །བསྙེན་དཀའ་མི་བཟད་དྲག་ཤུལ་
དཀའ་ཐུབ་ཀྱིས། །མུ་སྟེགས་ཅན་གྱི་སྡུག་བསྔལ་སྤང་བར་འདུལ། །འཇིག་རྟེན་ལྟ་བས་འཁྲུགས་པ་ཤེས་བྱས་ནས། །ལྟ་བ་ངན་ལ་གནས་པའི་མུ་སྟེགས་ཅན། །ཀུན་ལ་ཕྲ་བའི་གཞི་དང་ཐབས་ཚུལ་གྱིས། །དེ་དག་རྣམས་ལ་བདེན་པ་སྟོན་པར་བྱེད། །ལ་ལར་
འགྲོ་ལྡིང་བ་ཡི་སྔགས་ཀྱི་གཞི། །ཤིན་ཏུ་གསང་བའི་གཞི་ཡིས་བདེན་པ་སྟོན། །ལ་ལ་དག་ལ་གསལ་ཞིང་དྲང་ཚིག་གིས། །ལ་ལ་དག་ལ་ལྷ་ཡི་གསང་ཚིག་གིས། །ལ་ལ་དག་ལ་ཡི་གེ་དབྱེ་ཚིག་དང ། །དོན་ལ་རྣམ་ངེས་རྡོ་རྗེའི་ཚིག་རྣམས་དང ། །རྒོལ་བ་འདུལ་བ་ཤེས་
བའི་ཚིག་རྣམས་དང ། །བསྟན་བཅོས་ཐུབ་མེད་ཐར་བའི་ཚིག་རྣམས་ཀྱིས། །ལ་ལ་དག་ལ་མི་སྐད་ཚིག་རྣམས་དང ། །ཀུན་ལ་འཇུག་པའི་ཚིག་ངེས་ཚིག་རྣམས་ཀྱིས། །ལ་ལ་དག་ལ་ལྷ་ཚིག་ངེས་ཚིག་དང ། །ཀླུ་ཡི་ངེས་ཚིག་གནོད་སྦྱིན་ངེས་ཚིག་གིས། །ལ་ལར་སྲིན་པོ་འབྱུང་
པོ་ཤ་ཟ་དང ། །དྲི་ཟ་གྲུལ་བུམ་ལྟོ་འཕྱེ་ཆེ་ཚིག་དང ། །མི་ཅི་ལྷ་མིན་མཁའ་ལྡིང་ཚིག་རྣམས་ཀྱིས། །བདེན་པ་བསྟན་ཅིང་ཐར་བར་འདྲེན་པར་བྱེད། །དེ་དག་བདེན་དང་ངེས་ཚིག་ཚུལ་ཤེས་ཏེ། །དེ་ལྟར་རྒྱལ་བའི་ཆོས་རྣམས་མ་ལུས་པའི། །ཆོས་ཉིད་བསམ་ཡས་ཚིག་ལམ་ཤེས་པས་

</font><hr>57-1-70b<br><font size=+2>

སྟོན། །དེ་དག་ཏིང་འཛིན་རྣམ་འཕྲུལ་དེ་འདྲའོ།། ་་།།བམ་པོ་བཞི་པ་སྟེ་ཐ་མ། དེ་དག་འགྲོ་བདེ་མཆོག་གི་ཏིང་ངེ་འཛིན། །འགྲོ་བ་ཀུན་ལ་མངོན་བར་སྒྲུབ་བྱེད་ཅིང ། །འོད་ཟེར་བསམ་གྱིས་མི་ཁྱབ་རབ་བཀྱེ་སྟེ། །འོད་ཟེར་བཀྱེ་ནས་སེམས་ཅན་འདུལ་བར་བྱེད། །མཐོང་ན་ལེགས་
པའི་འོད་ཟེར་རབ་གཏོང་ཞིང ། །སེམས་ཅན་ཇི་སྙེད་འོད་ཟེར་དེ་ཤེས་པ། །དེ་དག་མཐོང་ལེགས་དོན་མེད་མ་ཡིན་ཏེ། །བླ་ན་མེད་པའི་ཡེ་ཤེས་མཆོག་གི་རྒྱུ། །མི་རྣམས་ཀུན་ལ་སངས་རྒྱས་ཡོངས་བསྟན་ཅིང ། །ཆོས་ཀྱང་ཡོངས་བསྟན་དེ་ལམ་བསྟན་ཅིང ། །རྒྱལ་བའི་སྐུ་གཟུགས་
མཆོད་རྟེན་བསྟན་བྱས་པས། །དེས་ན་མཐོང་ལེགས་འོད་ཟེར་གྲུབ་པར་འགྱུར། །ལྷ་ཡི་འོད་ཟེར་ཟིལ་གྱིས་གནོན་པ་ཡི། །འོད་ཟེར་འོད་བྱེད་ཅེས་བྱ་རབ་གཏོང་ཞིང ། །རྡུལ་དང་མུན་པ་ཐམས་ཅད་བསལ་བྱས་ཏེ། །འཇིག་རྟེན་ཕན་པའི་འོད་དེས་རབ་ཏུ་སྣང ། །སེམས་ཅན་
གང་དག་འོད་དེས་བསྐུལ་བྱས་པ། །དེ་དག་རྒྱལ་བ་མཆོད་ཕྱིར་སྒྲོན་མ་འཛིན། །དེ་དག་རྒྱལ་བ་མཆོད་ཕྱིར་སྒྲོན་བཟུང་བས། །འཇིག་རྟེན་སྒྲོན་མ་མཛད་པའི་རྒྱལ་བར་འགྱུར། །འབྲུ་མར་མར་མེ་མར་གྱི་མར་མེ་དང ། །རྩཝ་ཤིང་འདམ་བུ་འོད་མའི་སྒྲོན་མ་དང ། །སྤོས་དང་
བཅུད་ལེན་རིན་ཆེན་སྒྲོན་མ་དག་།རྒྱལ་བ་རྣམས་ལ་ཕུལ་ནས་འོད་བྱེད་ཐོབ། །སྒྲོལ་ཞེས་བྱ་བའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །དེ་དག་སྲེད་ཡངས་སྲིད་པའི་རྒྱ་མཚོ་ལས། །སེམས་ཅན་བསྒྲལ་བའི་དོན་དུ་གོ་ཆ་གྱོན། །གང་དག་
སྲེད་ཡངས་སྲིད་པའི་རྒྱ་མཚོ་ལས། །སེམས་ཅན་བསྒྲལ་བའི་དོན་དུ་གོ་གྱོན་པ། །དེ་དག་ཆུ་བོ་བཞི་ལས་རབ་ཏུ་སྒྲོལ། །མྱ་ངན་མེད་པ་བདེ་བའི་གྲོང་ཁྱེར་སྟོན། །སྟེགས་དང་ཟམ་པ་དུ་མ་བྱས་པ་དང ། །ཆུ་ཀླུང་ལམ་ལ་སྒྲོལ་བའི་གྲུ་འབྱིན་ཏེ། །འདུས་བྱས་སུན་ཕྱུང་ཞི་བ་
བསྔགས་བྱས་པས། །དེས་ན་སྒྲོལ་བའི་འོད་ཟེར་གྲུབ་པར་འགྱུར། །སྐོམ་པ་སེལ་བའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །འདོད་པའི་ཡོན་ཏན་སྐོམ་པ་རབ་སྤངས་ཤིང ། །ཆོས་ལ་མོས་པའི་རོ་ནི་དོན་ཏུ་གཉེར། །འདོད་པའི་ཡོན་

</font><hr>57-1-71a<br><font size=+2>

ཏན་སྐོམ་པ་རབ་སྤངས་ཏེ། །ཆོས་མོས་རོ་ལ་དོན་དུ་གཉེར་གྱུར་པས། །བདུད་རྩི་ཆར་པ་འབེབས་པའི་སངས་རྒྱས་འགྱུར། །འཇིག་རྟེན་སྐོམ་པའི་སྲེད་པ་རྣམ་པར་སེལ། །རྫིང་དང་ཆུ་ཀླུང་ཁྲོན་པ་ཆུ་དོང་དང ། །མཚོ་རྣམས་བྱང་ཆུབ་དོན་དུ་བྱེད་བཙུད་དེ། །འདོད་པ་
སྨད་ཅིང་བསམ་གཏན་བསྔགས་བྱས་པས། །དེས་ན་སྲེད་པ་སེལ་བ་གྲུབ་པར་གྱུར། །དགའ་བར་བྱེད་པའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །དགའ་བ་རྒྱས་ཤིང་བྱང་ཆུབ་མཆོག་དོན་དུ། །རང་བྱུང་འགྱུར་བར་བྱ་ཞེས་སེམས་བསྐྱེད་
དོ། །ཐུགས་རྗེ་ལྡན་པའི་སྐུ་གཟུགས་མཚན་བརྒྱན་པ། །པད་མའི་གདན་ལ་བཞུགས་པ་རྣམས་བྱས་ཤིང ། །རྟག་ཏུ་སངས་རྒྱས་ཡོན་ཏན་རྣམས་བརྗོད་པས། །དེས་ན་དགའ་བྱེད་འོད་ཟེར་གྲུབ་པར་གྱུར། །མགུ་བར་བྱེད་པའི་འོད་ཟེར་རབ་གཏོང་ཞིང ། །སེམས་ཅན་
གང་དག་འོད་དེས་བསྐུལ་བྱས་པ། །རྟག་ཏུ་སངས་རྒྱས་ལ་ནི་དགའ་མགུ་ཞིང ། །ཆོས་ལ་དགའ་མགུ་དགེ་འདུན་དགའ་མགུའོ། །དེ་དག་རྟག་ཏུ་སངས་རྒྱས་དགའ་མགུ་ཞིང ། །ཆོས་ལ་དགའ་མགུ་དགེ་འདུན་དགའ་མགུ་ནས། །སངས་རྒྱས་ཆོས་དང་འཕགས་པའི་
ཚོགས་རྣམས་དང ། །རྟག་ཏུ་འགྲོགས་ཐོབ་བཟོད་པ་བླ་མེད་ཐོབ། །སངས་རྒྱས་རྗེས་དྲན་ཆོས་དང་ཚོགས་མཆོག་ལ། །སེམས་ཅན་མང་པོ་བསྐུལ་ཅིང་དྲན་བྱས་ཏེ། །བྱང་ཆུབ་སེམས་ཀྱི་ཡོན་ཏན་རབ་བརྗོད་པས། །དེས་ན་མགུ་བྱེད་འོད་ཟེར་གྲུབ་པར་འགྱུར། །བསོད་
ནམས་བསགས་པའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །བླ་ན་མེད་པའི་བྱང་ཆུབ་དོན་གཉེར་ཞིང ། །སྦྱིན་པ་སྣ་ཚོགས་དུ་མ་སྦྱིན་པར་བྱེད། །གཏན་པ་མེད་པའི་མཆོད་སྦྱིན་དེ་བྱེད་ཚེ། །སློང་བ་རྣམས་ཀྱི་བསམ་པ་རྫོགས་བྱས་
ཏེ། །བསམ་པ་ཐམས་ཅད་སྦྱིན་པ་བྱིན་བྱས་པས། །བསོད་ནམས་བསགས་པའི་འོད་ཟེར་གྲུབ་པར་འགྱུར། །ཡེ་ཤེས་ལྡན་པའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །ཆོས་གཅིག་སྒོ་མོ་ནས་ནི་དུ་མ་ཡི། །ཆོས་ཀྱི་སྒོ་རྣམས་

</font><hr>57-1-71b<br><font size=+2>

ཡུད་ཀྱིས་ཁོང་དུ་ཆུད། །ཆོས་ཀྱི་དབྱེ་བ་སེམས་ཅན་འཛིན་བཙུད་དེ། །དོན་ལ་ངེས་པའི་ཡེ་ཤེས་རྣམ་ཕྱེ་ཞིང ། །ཆོས་ཀྱི་ཚིག་དོན་བརྗོད་པ་བྱས་པས་ན། །དེས་ན་ཡེ་ཤེས་ལྡན་པའི་འོད་ཟེར་གྲུབ། །ཤེས་རབ་སྒྲོན་མའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་
བསྐུལ་བྱས་པ། །སྟོང་པ་བདག་མེད་མ་སྐྱེས་མ་བྱུང་ཞིང ། །རང་བཞིན་མེད་པའི་ཆོས་ལ་རབ་ཏུ་འཇུག་།བདག་པོ་མེད་ཆོས་སྟོང་པ་བྱེད་མེད་པ། །སྒྱུ་མ་སྨིག་རྒྱུ་ཆུ་ཟླ་མཚུངས་འདྲ་ཞིང ། །རྨི་ལམ་མཚུངས་ལ་གཟུགས་བརྙན་འདྲ་བ་དག་།བསྟན་པས་ཤེས་རབ་སྒྲོན་མ་དེ་གྲུབ་
པོ། །ཆོས་ཀྱི་རྣམ་འཕྲུལ་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །མི་ཟད་བཟོད་ཀྱི་གཟུངས་ནི་ཐོབ་གྱུར་ནས། །དེ་བཞིན་གཤེགས་པ་ཀུན་གྱི་མཛོད་ཀྱང་འཛིན། །ཆོས་འཛིན་རྣམས་ལ་ཡོངས་སུ་ཕན་གདགས་ཏེ། །དྲང་སྲོང་
རྣམས་ལ་ཆོས་ཀྱིས་བསྲུང་བྱས་ཤིང ། །འགྲོ་བ་ཆོས་ཀྱིས་རྗེས་སུ་བསྲུང་བྱས་པས། །ཆོས་ཀྱི་རྣམ་འཕྲུལ་འོད་ཟེར་གྲུབ་པར་འགྱུར། །གཏོང་དང་ལྡན་པའི་འོད་ཟེར་རབ་གཏོང་ཞིང ། །སེམས་ཅན་འཇུངས་པ་གང་དག་དེས་བསྐུལ་བ། །ལོངས་སྤྱོད་མི་རྟག་མི་བརྟན་
ཤེས་གྱུར་ནས། །དེ་དག་རྟག་ཏུ་གཏོང་ལ་དགའ་མོས་འགྱུར། །མ་དུལ་གདུལ་དཀའི་སེམས་ཅན་སེར་སྣ་ཅན། །ནོར་རྣམས་རྨི་ལམ་སྤྲིན་དང་འདྲར་ཤེས་ནས། །དགའ་བའི་ཡིད་ཀྱིས་སྦྱིན་བ་སྤེལ་བྱས་པས། །དེས་ན་སྟོང་དང་ལྡན་པའི་འོད་གྲུབ་པོ། །ཡོངས་སུ་
གདུང་མེད་འོད་ཟེར་རབ་གཏོང་ཞིང ། །ཁྲིམས་འཆལ་སེམས་ཅན་གང་དག་དེས་བསྐུལ་བ། །ཚུལ་ཁྲིམས་རྣམ་པར་དག་ལ་གནས་གྱུར་ནས། །རང་བྱུང་འགྱུར་བར་བྱ་ཞེས་སེམས་བསྐྱེད་དོ། །དགེ་བའི་ལས་ལམ་ཡོངས་སུ་དག་པ་དང ། །ཚུལ་ཁྲིམས་ལ་ཡང་
སེམས་ཅན་མང་འཛུད་ཅིང ། །བྱང་ཆུབ་སེམས་ཀྱང་ཡང་དག་འཛིན་འཇུག་པས། །ཡོངས་གདུང་མེད་པའི་འོད་ཟེར་དེ་གྲུབ་པོ། །བཟོད་པ་བཀོད་པའི་འོད་ཟེར་རབ་གཏོང་ཞིང ། །མི་བཟོད་སེམས་ཅན་གང་དག་དེས་བསྐུལ་བ། །ཁྲོ་དང་ཐ་བ་ང་རྒྱལ་ཡོངས་སྤངས་ཤིང ། །

</font><hr>57-1-72a<br><font size=+2>

དེ་དག་རྟག་ཏུ་བཟོད་མོས་དགའ་བར་འགྱུར། །སྡིག་ལྡན་རྣམས་ཀྱི་ཉེས་བྱས་བཟོད་བྱས་ཏེ། །བྱང་ཆུབ་དོན་དུ་འཁྲུགས་པ་མ་བྱས་ཤིང ། །བཟོད་པའི་ཡོན་ཏན་རྟག་ཏུ་བསྔགས་བརྗོད་པས། །དེས་ན་བཟོད་པ་བཀོད་པ་དེ་གྲུབ་པོ། །སྦྱངས་དང་ལྡན་པའི་འོད་ཟེར་རབ་གཏོང་
ཞིང ། །ལེ་ལོའི་སེམས་ཅན་གང་དག་དེས་བསྐུལ་བ། །རིགས་པར་བརྩོན་པ་དཀོན་མཆོག་གསུམ་རྣམས་ལ། །སྦྱོར་བ་སྐྱོ་མེད་མཆོད་པ་བྱེད་པར་འགྱུར། །རིགས་པར་བརྩོན་པ་དཀོན་མཆོག་གསུམ་རྣམས་ལ། །སྦྱོར་བ་སྐྱོ་བ་མེད་པས་མཆོད་བྱས་ནས། །དེ་དག་བདུད་བཞིའི་ལམ་
ལས་རབ་འདས་ཏེ། །བྱང་ཆུབ་བླ་མེད་མྱུར་དུ་རེག་པར་འགྱུར། །སེམས་ཅན་མང་པོ་བརྩོན་འགྲུས་འཛིན་བཅུག་སྟེ། །དཀོན་མཆོག་གསུམ་ལ་མཆོད་པ་རབ་བྱས་ནས། །ཟད་པའི་དུས་ན་དམ་ཆོས་ཡོངས་བཟུང་བས། །དེས་ན་སྦྱངས་དང་ལྡན་བའི་འོད་ཐོབ་བོ། །ཞི་བར་བྱེད་པའི་འོད་ཟེར་རབ་
གཏོང་ཞིང ། །རྣམ་འཁྲུགས་སེམས་ཅན་གང་དག་དེས་བསྐུལ་བ། །དེ་དག་ཆགས་མེད་སྡང་མེད་རྨོངས་མེད་ཅིང ། །རྟོགས་པར་གྱུར་ནས་མཉམ་གཞག་སེམས་སུ་འགྱུར། །སྡིག་པའི་གྲོགས་པོ་སྐྱོན་ལྡན་སྤྱོད་ཅན་དང ། །འདྲེ་བ་ཡོངས་སུ་རྣམ་པར་སྤང་བྱས་ཏེ། །དགོན་པར་རབ་ཞི་བསམ་
གཏན་བསྔགས་བརྗོད་པས། །དེས་ན་ཞི་བར་བྱེད་པའི་འོད་གྲུབ་བོ། །ཤེས་རབ་བཀོད་པའི་འོད་ཟེར་རབ་གཏོང་ཞིང ། །ཤེས་འཆལ་སེམས་ཅན་ཇི་སྙེད་དེས་བསྐུལ་བ། །བདེན་དང་བརྟན་དང་རྣམ་ཐར་ཚུལ་རྣམས་དང ། །དབང་པོ་ཤེས་པ་རྟོགས་པར་ཁོང་ཆུད་འགྱུར། །བདེན་དང་བརྟན་
དང་རྣམ་ཐར་ཚུལ་རྣམས་དང ། །དབང་པོ་ཤེས་པ་རྟོགས་པར་ཁོང་ཆུད་ཅིང ། །ཉི་མ་སྒྲོན་མའི་ཏིང་འཛིན་ཐོབ་གྱུར་ནས། །ཤེས་རབ་སྣང་བར་མཛད་པའི་རྒྱལ་བར་འགྱུར། །རྒྱལ་སྲིད་ནོར་དང་བདག་ཕངས་ཡོངས་བཏང་སྟེ། །བྱང་ཆུབ་དོན་དུ་ཆོས་གང་བཙལ་བྱས་པ། །ཆོས་དེ་གུས་པར་
བྱས་ནས་རབ་བཤད་པས། །ཤེས་རབ་བཀོད་པའི་འོད་ཟེར་དེ་གྲུབ་བོ། །སངས་རྒྱས་ལྡན་པའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །སངས་རྒྱས་སྟོང་ཕྲག་དུ་མ་བསམ་ཡས་རྣམས། །པད་མ་དམ་པ་རྣམས་ལ་བཞུགས་པར་མཐོང ། །སངས་

</font><hr>57-1-72b<br><font size=+2>

རྒྱས་ཆེ་དང་སངས་རྒྱས་རྣམ་ཐར་དང ། །སངས་རྒྱས་རྣམ་འཕྲུལ་མཐའ་ཡས་བརྗོད་བྱས་ཤིང ། །སངས་རྒྱས་སྟོབས་དང་རྫུ་འཕྲུལ་རབ་བརྗོད་པས། །དེ་ནས་སངས་རྒྱས་ལྡན་པའི་འོད་གྲུབ་བོ། །མི་འཇིགས་སྦྱིན་པའི་འོད་ཟེར་རབ་གཏོང་ཞིང ། །འཇིགས་ཉེན་སེམས་ཅན་གང་
དག་དེས་རེག་པ། །འབྱུང་པོ་གཟའ་དང་གསད་བརྡེག་བཅིང་བ་དང ། །ནད་འགོ་འཇིགས་པ་ཀུན་ལས་ཐར་བར་འགྱུར། །མི་འཇིགས་སྦྱིན་པས་སེམས་ཅན་གང་བསྐྱབས་དང ། །སྲོག་ཆགས་གསོད་ལས་བཟློག་པ་བྱས་པ་དང ། །འཇིགས་པ་སྐྱབས་ཚོལ་རྣམས་ལ་སྐྱབས་བྱས་པས། །
མི་འཇིགས་སྦྱིན་པའི་འོད་ཟེར་དེས་གྲུབ་བོ། ། བདེ་བ་ཀུན་བྱེད་འོད་ཟེར་རབ་གཏོང་ཞིང ། །ནད་པ་ན་བ་གང་དག་དེས་རེག་པ། །རྣམ་པ་ཀུན་དུ་ནད་ཀྱི་སྡུག་བསྔལ་ཐར། །བསམ་གཏན་ཏིང་འཛིན་བདེ་བ་རྣམས་ཀྱང་ཐོབ། །ནད་གསོས་འབྲས་བུ་སྨན་དང་རྩ་བ་དང ། །རིན་ཆེན་བཅུད་ལེན་
སྤོས་དང་བྱུག་པ་དང ། །བུ་རམ་སྦྲང་རྩི་འོ་མ་མར་དག་དང ། །འབྲུ་མར་ཟས་སྐོམ་བྱིན་པས་དེ་ཐོབ་བོ། །སངས་རྒྱས་སྟོན་པའི་འོད་ཟེར་རབ་གཏོང་ཞིང ། །ཚེ་ཟད་ཐ་མར་གང་དག་དེས་བསྐུལ་བ། །སངས་རྒྱས་རྗེས་དྲན་སངས་རྒྱས་མཐོང་བར་འགྱུར། །དེ་དག་ཤི་འཕོས་སངས་
རྒྱས་བཞུགས་ཞིང་འགྲོ། །འཆི་བའི་དུས་སུ་སངས་རྒྱས་དྲན་བྱས་ཏེ། །དགའ་བྱེད་རྒྱལ་བའི་སྐུ་གཟུགས་བསྟན་བྱས་ཤིང ། །འཆི་ཀར་སངས་རྒྱས་སྐྱབས་སུ་གཏོང་བརྗོད་པས། །སངས་རྒྱས་སྟོན་པའི་འོད་ཟེར་དེ་ཐོབ་བོ། །ཆོས་རབ་རྗོད་པའི་འོད་ཟེར་རབ་གཏོང་ཞིང ། །
སེམས་ཅན་གང་དག་འོད་དེས་བསྐུལ་བྱས་པ། །ཆོས་ཉན་ཀློག་ཅིང་ཡི་གེར་འདྲི་བར་བྱེད། །དེ་དག་རྟག་ཏུ་ཆོས་ལ་དགའ་མོས་འགྱུར། །ཆོས་ཀྱི་མུ་གེ་བྱུང་ཚེ་ཆོས་བརྗོད་དེ། །ཆོས་ཚོལ་རྣམས་ཀྱི་བསམ་བ་རྫོགས་བྱས་ཤིང ། །འདུན་པ་བསྐྱེད་དེ་ཆོས་ལ་བརྩོན་གྱིས་ཞེས། །བརྗོད་
པས་ཆོས་རབ་བརྗོད་པ་དེ་ཐོབ་བོ། །སངས་རྒྱས་སྲས་རྣམས་ཡོངས་སུ་བསྐུལ་བའི་ཕྱིར། །དབྱངས་དང་ལྡན་པའི་འོད་ཟེར་རབ་གཏོང་ཞིང ། །འཇིག་རྟེན་གསུམ་ན་སྒྲ་རྒྱུད་ཇི་སྙེད་པ། །ཀུན་ཀྱང་དེ་བཞིན་གཤེགས་པའི་གསུང་དུ་ཐོས། །གསང་བསྟོད་སྒྲ་ཡིས་དྲང་སྲོང་ཆེ་བསྟོད་དེ། །རྒྱལ་

</font><hr>57-1-73a<br><font size=+2>

བའི་གསུང་སྒྲ་དོན་དུ་སིལ་སྙན་དང ། །སྒྲ་ཆེན་དྲིལ་བུ་སྦྱིན་རྣམས་འགྲོ་ཀུན་ལ། །རབ་ཏུ་བསྒྲགས་པས་དབྱངས་ལྡན་འོད་གྲུབ་བོ། །འཆི་མེད་སྦྱིན་པའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །བག་མེད་སྤྱོད་པ་ཐམས་ཅད་རབ་སྤངས་ཏེ། །
ཡོན་ཏན་ཀུན་ལ་བརྩོན་པ་ཉམས་སུ་ལེན། །འདུས་བྱས་རྟག་ཏུ་བདེ་བ་མེད་པ་སྟེ། །སྡུག་བསྔལ་འཚེ་བ་དུ་མས་ཡོངས་སུ་གང ། །འགོག་པ་རྟག་ཏུ་བདེ་ཞིང་ཞི་སྐྱིད་ཅེས། །བརྗོད་པས་འཆི་མེད་སྦྱིན་བ་དེ་ཐོབ་བོ། །ཁྱད་པར་ལྡན་བའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་
དེས་བསྐུལ་བྱས་པ། །རྒྱལ་བ་རྣམས་ཀྱི་ཚུལ་ཁྲིམས་ཁྱད་པར་དང ། །ཏིང་འཛིན་ཁྱད་པར་ཤེས་རབ་ཁྱད་པར་ཐོས། །ཐུབ་ཆེན་རྒྱལ་པོའི་ཁྲིམས་ཀྱིས་མཆོག་གྱུར་ཅིང ། །ཏིང་འཛིན་མཆོག་དང་ཤེས་རབ་མཆོག་གྱུར་ཅེས། །བྱང་ཆུབ་དོན་དུ་བསྟོད་ཅིང་བསྔགས་བརྗོད་པས། །
དེས་ན་ཁྱད་པར་ལྡན་པའི་འོད་གྲུབ་བོ། །རིན་ཆེན་བཀོད་པའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །རིན་ཆེན་མི་ཟད་གཏེར་རྣམས་ཐོབ་གྱུར་ནས། །དྲང་སྲོང་ཆེ་ལ་རིན་ཆེན་དམ་པས་མཆོད། །རྒྱལ་དང་རྒྱལ་བའི་མཆོད་རྟེན་རིན་ཆེན་ཕུལ། །སྐྱེ་
བོ་ཉོན་མོངས་རིན་ཆེན་རྣམས་ཀྱིས་བསྡུས། །རྒྱལ་བ་རྣམས་ལ་རིན་ཆེན་རབ་ཕུལ་བས། །རིན་ཆེན་བཀོད་པའི་འོད་ཟེར་གྲུབ་པར་འགྱུར། །སྤོས་རབ་སྣང་བའི་འོད་ཟེར་རབ་གཏོང་ཞིང ། །སེམས་ཅན་གང་དག་འོད་དེས་བསྐུལ་བྱས་པ། །མི་ལ་མེད་སྤོས་ཡིད་འོང་ཚོར་གྱུར་ནས། །
སངས་རྒྱས་ཡོན་ཏན་རྣམས་ལ་ངེས་པར་འགྱུར། །མི་དང་ལྷ་ཡི་སྤོས་དང་བྱུག་པ་ཡིས། །མི་ཡི་གཙོ་ལ་མཆོད་པར་རབ་བྱས་ཏེ། །སྤོས་ལས་རྒྱལ་བའི་གཟུགས་དང་མཆོད་རྟེན་དག་།བྱས་པས་སྤོས་རབ་སྣང་བ་དེ་གྲུབ་བོ། །སྣ་ཚོགས་བཀོད་པའི་འོད་ཟེར་རབ་གཏོང་ཞིང ། །རྒྱལ་མཚན་
བ་དན་གདུགས་མཆོག་སྣ་ཚོགས་དང ། །སིལ་སྙན་བསྒྲགས་ཤིང་སྤོས་ཀྱིས་བདུག་པ་ཡིས། །ཕོ་བྲང་དམ་པ་མཛེས་བྱས་མེ་ཏོག་བཀྲམ། །སིལ་སྙན་དག་གིས་རྒྱལ་བ་རྣམས་བསུ་ཞིང ། །མེ་ཏོག་བྱུག་པ་བདུག་སྤོས་ཕྱེ་མ་དང ། །རྒྱལ་མཚན་བ་དན་གདུགས་མཆོག་རྣམས་

</font><hr>57-1-73b<br><font size=+2>

ཀྱིས་མཆོད། །དེས་ན་སྣ་ཚོགས་བཀོད་པ་གྲུབ་པར་གྱུར། །ཤིན་ཏུ་དང་བྱེད་འོད་ཟེར་རབ་གཏོང་ཞིང ། །ས་རྣམས་ལག་མཐིལ་བཞིན་དུ་གནས་པར་བྱེད། །མཆོད་རྟེན་དྲང་སྲོང་གནས་རྣམས་སྦྱངས་བྱས་པས། །དེས་ན་ཤིན་ཏུ་དང་བའི་འོད་གྲུབ་བོ། །སྤྲིན་དང་ལྡན་པའི་འོད་ཟེར་རབ་གཏོང་
ཞིང ། །སྤོས་ཀྱི་ཆར་འབེབས་སྤྲིན་རྣམས་ཀུན་དུ་གནས། །མཆོད་རྟེན་འཁོར་སར་སྤོས་ཀྱི་ཆུས་བཏབ་པས། །སྤྲིན་དང་ལྡན་པའི་འོད་དེ་རབ་ཏུ་ཐོབ། །ལྷབ་ལྷུབ་བཀོད་པའི་འོད་ཟེར་རབ་གཏོང་ཞིང ། །གཅེར་བུ་གོས་ཡོད་རྒྱན་དང་ལྡན་པར་འགྱུར། །གོས་དང་བགོ་བ་རྒྱན་ཕྲེང་སྣ་ཚོགས་
དག་།སྦྱིན་པ་བྱས་པས་ལྷབ་ལྷུབ་བཀོད་པ་གྲུབ། །རོ་མཆོག་ལྡན་པའི་འོད་ཟེར་རབ་གཏོང་ཞིང ། །བཀྲེས་པ་ཁ་ཟས་རོ་མཆོག་ཐོབ་པར་འགྱུར། །ཟས་དང་སྐོམ་དང་རོ་མཆོག་སྣ་ཚོགས་རྣམས། །བྱིན་པས་རོ་མཆོག་ལྡན་བའི་འོད་གྲུབ་བོ། །ནོར་རྣམས་སྟོན་པའི་འོད་ཟེར་རབ་གཏོང་
ཞིང ། །དབུལ་པོ་དག་གིས་རིན་ཆེན་གཏེར་རྣམས་འཐོབ། །དཀོན་མཆོག་གསུམ་ལ་གཏེར་གཞི་མི་ཟད་པ། །དབུལ་བ་བྱས་པས་ནོར་སྟོན་འོད་ཐོབ་བོ། །མིག་རྣམ་སྦྱོང་བའི་འོད་ཟེར་རབ་གཏོང་ཞིང ། །དེ་ཚེ་ལོང་བས་སྣ་ཚོགས་གཟུགས་རྣམས་མཐོང ། །རྒྱལ་བ་དག་དང་རྒྱལ་བའི་
མཆོད་རྟེན་ལ། །མར་མེ་ཕུལ་བས་མིག་སྦྱོང་འོད་ཟེར་གྲུབ། །རྣ་བ་རྣམ་སྦྱོང་འོད་ཟེར་རབ་གཏོང་ཞིང ། །རྣ་བ་ཉམས་པས་སྒྲ་མང་ཐོས་པར་འགྱུར། །རྒྱལ་བ་རྣམས་དང་རྒྱལ་བའི་མཆོད་རྟེན་ལ། །སིལ་སྙན་ཕུལ་བས་རྣ་སྦྱོང་འོད་ཟེར་གྲུབ། །སྣ་རྣམ་སྦྱོང་བའི་འོད་ཟེར་རབ་གཏོང་
ཞིང ། །སྔོན་ཆད་མ་ཚོར་དྲི་ཞིམ་ཚོར་བར་འགྱུར། །རྒྱལ་བ་རྣམས་དང་རྒྱལ་བའི་མཆོད་རྟེན་ལ། །སྤོས་རབ་ཕུལ་བས་སྣ་སྦྱོང་འོད་ཟེར་གྲུབ། །ལྕེ་རྣམ་སྦྱོང་བའི་འོད་ཟེར་རབ་གཏོང་ཞིང ། །སྒྲ་སྙན་ཡིད་འོང་རྣམས་ཀྱིས་སངས་རྒྱས་བསྟོད། །མི་སྙན་བརླང་བར་སྨྲ་
བ་རྣམ་སྤངས་ཏེ། །འཇམ་པར་སྨྲས་པས་ལྕེ་སྦྱོང་འོད་ཟེར་གྲུབ། །ལུས་རྣམ་སྦྱོང་བའི་འོད་ཟེར་རབ་གཏོང་ཞིང ། །དབང་པོ་ཉམས་པ་དབང་པོ་ལྡན་པར་འགྱུར། །རྒྱལ་བ་རྣམས་དང་རྒྱལ་བའི་མཆོད་རྟེན་ལ། །ལུས་བཏུད་བྱས་པས་ལུས་རྣམ་སྦྱོང་བ་ཐོབ། །སེམས་

</font><hr>57-1-74a<br><font size=+2>

རྣམ་སྦྱོང་བའི་འོད་ཟེར་རབ་གཏོང་ཞིང ། །སྨྱོས་པ་ཐམས་ཅད་སེམས་དང་ལྡན་པར་འགྱུར། །ཏིང་འཛིན་དབང་རྗེས་སེམས་འགྲོ་བྱས་པས་ན། །སེམས་རྣམ་སྦྱོང་བའི་འོད་ཟེར་དེ་གྲུབ་བོ། །གཟུགས་རྣམ་སྦྱོང་བའི་འོད་ཟེར་རབ་གཏོང་ཞིང ། །མི་དབང་རྣམས་ཀྱི་
བསམ་ཡས་སྐུ་མཐོང་སྟེ། །སྐུ་གཟུགས་རི་མོ་སྣ་ཚོགས་མང་པོ་དང ། །མཆོད་རྟེན་བརྒྱན་བྱས་གཟུགས་སྦྱོང་འོད་གྲུབ་བོ། །སྒྲ་རྣམ་སྦྱོང་བའི་འོད་ཟེར་རབ་གཏོང་ཞིང ། །སྒྲ་ནི་སྒྲ་མི་སྟོང་པར་རབ་ཏུ་ཤེས། །རྐྱེན་ལས་བྱུང་བས་བྲག་ཅ་འདྲའོ་ཞེས། །སྒྲ་རྣམས་བསྟན་པས་འོད་
ཟེར་དེ་གྲུབ་བོ། །དྲི་རྣམ་སྦྱོང་བའི་འོད་ཟེར་རབ་གཏོང་ཞིང ། །དྲིང་ཐམས་ཅད་དྲི་ཞིམ་མཆོག་ཏུ་འགྱུར། །སྤོས་རབ་མཆོག་ཆུས་རྒྱལ་བའི་མཆོད་རྟེན་དག་།ཁྲུས་བྱས་བྱང་ཆུབ་ཞིང་གི་འོད་དེ་ཡིན། །རོ་བྲོ་སྦྱོང་བའི་འོད་ཟེར་རབ་གཏོང་ཞིང ། །དུག་ཅན་དུག་མེད་རོ་ཡི་
མཆོག་ཏུ་འགྱུར། །སངས་རྒྱས་ཉན་ཐོས་བཅས་དང་ཕ་མ་ལ། །རོ་མཆོག་ཐམས་ཅད་ཕུལ་བའི་འོད་དེ་ཡིན། །རེག་རྣམ་སྦྱོང་བའི་འོད་ཟེར་རབ་གཏོང་ཞིང ། །རེག་ན་རྩུབ་པ་འཇམ་ཞིང་བདེ་བར་འགྱུར། །མདུང་ཐུང་རྩེ་གསུམ་རལ་གྲི་མདའ་ཆེན་ཆར། །ཕྲེང་བ་
འཇམ་པ་པད་མ་ཨུད་པལ་འགྱུར། །བཅོས་བུའི་རས་མང་འཇམ་ཞིང་རེག་བདེ་རྣམས ། །རྒྱལ་བ་རྣམས་ཀྱི་གཤེགས་ཤུལ་བཏིང་བཀྲམ་སྟེ། །མེ་ཏོག་བྱུག་པ་ན་བཟའ་འཇམ་རྣམས་དང ། །ཕྲེང་བ་བླ་རེ་ཕུལ་བའི་འོད་དེ་ཡིན། །ཆོས་རྣམ་སྦྱོང་བའི་འོད་ཟེར་རབ་
གཏོང་ཞིང ། །འཇིག་རྟེན་ཕན་མཛད་རྒྱལ་བ་ཐམས་ཅད་ཀྱི། །སྤུ་རྣམས་ཀུན་ནས་ཆོས་རྣམས་བསམ་མི་ཁྱབ། །བྱུང་བ་ཐོས་ནས་མོས་པ་ཐམས་ཅད་ཚིམ། །རྐྱེན་ལས་བྱུང་བ་མ་སྐྱེས་ངོ་བོ་ཉིད། །རྒྱལ་བ་རྣམས་ཀྱི་སྐུ་ནི་ཆོས་སྐུ་སྟེ། །ཆོས་ཉིད་མཁའ་བཞིན་རྟག་ཏུ་
གནས་སོ་ཞེས། །བརྗོད་པས་ཆོས་རྣམས་སྦྱོང་བ་ཐོབ་པར་འགྱུར། །འོད་ཟེར་སྒོ་མོ་དེ་དག་ལ་སོགས་པ། །དྲང་སྲོང་རྣམས་ཀྱི་སྤུ་ཡི་སྒོ་གཅིག་ནས། ། འོད་ཟེར་གང་གཱའི་བྱེ་མ་སྙེད་འབྱུང་སྟེ། །ཀུན་ཀྱང་ལས་སྦྱོར་ཐ་དད་ཚུལ་ཅན་ནོ། །ཇི་ལྟར་དེ་དག་སྤུ་ཡི་སྒོ་གཅིག་ནས། །

</font><hr>57-1-74b<br><font size=+2>

འོད་ཟེར་གང་གཱའི་བྱེ་མ་སྙེད་འབྱུང་བ། །མ་ལུས་སྤུ་རྣམས་ཀུན་ནས་དེ་བཞིན་ཏེ། །དྲང་སྲོང་ཏིང་འཛིན་རྣམ་འཕྲུལ་འདི་འདྲའོ། །ཡོན་ཏན་གང་གིས་འོད་ཟེར་གང་གྲུབ་པའི། །ཡོན་ཏན་དེ་གྲོགས་སྔོན་ཆད་གང་གྱུར་པ། །དེ་དག་ཉིད་ལས་འོད་ཟེར་རབ་འབྱུང་སྟེ། །དྲང་སྲོང་ཡེ་
ཤེས་རྣམ་འཕྲུལ་འདི་འདྲའོ། །དེ་དག་བསོད་ནམས་སྔོན་གྲོགས་གང་ཡིན་ལ། །རྗེས་སུ་ཡི་རང་གསོལ་བ་སུས་བཏབ་དང ། །གང་གིས་མཐོང་སྟེ་དགེ་བ་བསགས་གྱུར་པ། །དེ་དག་ཀུན་གྱིས་འོད་ཟེར་དེ་དག་ཤེས། །གང་དག་བསོད་ནམས་བྱས་ཤིང་དགེ་བསགས་དང ། །
གང་དག་ཡང་ཡང་སངས་རྒྱས་རྣམས་མཆོད་ཅིང ། །སངས་རྒྱས་ཡོན་ཏན་འདུན་ཏེ་དོན་གཉེར་བ། །དེ་དག་ཀུན་ལ་འོད་ཟེར་དེ་དག་བསྐུལ། །དཔེར་ན་དམུས་ལོང་ཉི་མ་མི་མཐོང་ཡང ། །དེ་མེད་མ་ཡིན་འཇིག་རྟེན་དག་ཏུ་འཆར། །མིག་དང་ལྡན་པས་ཤར་བར་ཤེས་གྱུར་
ནས། །ཀུན་ཀྱང་རང་རང་སོ་སོའི་ལས་ལ་འཇུག་།དེ་བཞིན་སྐྱེས་ཆེན་འོད་ཟེར་དེ་དག་ཀུན། །རབ་ཏུ་འབྱུང་ཡང་ལོག་པས་ཉེན་གྱུར་ཅིང ། །མོས་ཉམས་ཕལ་པ་རྣམས་ཀྱིས་མི་མཐོང་སྟེ། །བློ་གྲོས་ཡངས་པ་རྣམས་ལ་དེ་དག་མོད། །དཔེར་རྒྱན་ནོར་བུ་བཞོན་པ་
གཞལ་མེད་ཁང ། །བཅུད་ཀྱིས་ལེན་དང་རིན་ཆེན་བྱུག་པ་སྤོས། །དེ་དག་སྐྱེ་བོ་ཆེ་ལ་ཡོད་མོད་ཀྱི། །ཕོངས་པར་གྱུར་པ་རྣམས་ལ་དེ་དག་མེད། །དེ་བཞིན་སྐྱེས་ཆེན་འོད་ཟེར་དེ་དག་མོད། །དེ་དག་ཡོད་ཀྱང་ལོག་པས་ཉེན་གྱུར་ཅིང ། །མོས་པ་ཉམས་པ་རྣམས་ཀྱིས་
མི་མཐོང་སྟེ། །བློ་གྲོས་ཡངས་པ་རྣམས་ལ་དེ་དག་མོད། །གང་དག་འོད་ཟེར་དབྱེ་བ་འདི་ཐོས་ནས། །དད་ཅིང་མོས་ལ་དང་བ་སྐྱེས་གྱུར་ན། །བདག་ནི་ཡོན་ཏན་ཆེར་འགྱུར་མི་འགྱུར་ཞེས། །དེ་དག་དོགས་དང་སོམ་ཉི་མི་སྐྱེད་དོ། །དེ་དག་གཡོག་འཁོར་བཀོད་པ་རྣམ་
འཕྲུལ་བ། །ཏིང་འཛིན་དམ་པ་མངོན་པར་གྲུབ་བྱེད་ཅིང ། །ཕྱོགས་བཅུ་ཀུན་དུ་དོ་ཟླ་མེད་རྣམས་ཀྱི། །ཞམ་རིང་སངས་རྒྱས་སྲས་རྣམས་སྟོན་པར་བྱེད། །འོད་བཀོད་དེ་དག་པད་མ་སྣ་ཚོགས་པ། །སྟོང་གསུམ་ཚད་ཙམ་བྱིན་གྱིས་བརླབས་བྱས་ནས། །སྐྱིལ་ཀྲུང་

</font><hr>57-1-75a<br><font size=+2>

བཅས་པའི་ལུས་ཀྱིས་ཀུན་ཁྱབ་སྟོན། །ཏིང་འཛིན་རྣམ་པར་འཕྲུལ་པ་འདི་འདྲའོ། །དེ་དག་ཞིང་བཅུའི་རྡུལ་སྙེད་པད་མ་གཞན། །འཁོར་དང་བཅས་པ་བྱིན་གྱིས་བརླབས་བྱས་ཤིང ། །སངས་རྒྱས་སྲས་ཀྱིས་ཐམས་ཅད་ཡོངས་སུ་བསྐོར། །དེ་དག་ཏིང་འཛིན་
ཏིང་འཛིན་མེད་པར་གནས། །དྲང་སྲོང་དེ་ཡིས་སེམས་ཅན་གང་དག་རྣམས། །ཡོངས་སུ་སྨིན་བྱས་སངས་རྒྱས་ལེགས་བསྒྲུབས་པ། །དེ་དག་པད་མ་ཆེན་པོ་དེ་བསྐོར་ཅིང ། །ཀུན་ཀྱང་ཐལ་མོ་སྦྱར་ནས་ལྟ་ཞིང་འཁོད། །གང་དག་ཏིང་འཛིན་གནས་པར་རབ་ཞུགས་པ། །སྐྱེས་
ཆེན་རྣམས་ཀྱི་ཆོས་ཉིད་འདི་ཡིན་ཏེ། །རང་གི་སློབ་མས་ཀུན་ཀྱང་ཡོངས་བསྐོར་ནས། །སྐར་མའི་ཚོགས་ཀྱིས་ཟླ་བ་བསྐོར་བ་བཞིན། །དེ་དག་ཇི་ལྟར་ཕྱོགས་གཅིག་རབ་འཇུག་ཅིང ། །ཞབས་འབྲིང་སངས་རྒྱས་སྲས་རྣམས་སྟོན་བྱེད་པ། །དེ་བཞིན་ཕྱོགས་རྣམས་མ་ལུས་
ཀུན་དུ་སྟོན། །ཏིང་འཛིན་རྣམ་པར་འཕྲུལ་པ་འདི་འདྲའོ། །དེ་དག་ཕྱོགས་ཀྱི་དྲ་བ་ཁྱབ་གནས་པའི། །ཏིང་འཛིན་དམ་པ་མངོན་པར་སྒྲུབ་བྱེད་ཅིང ། །ཁ་ཅིག་མཉམ་གཞག་ཁ་ཅིག་ལྡང་བར་ཡང ། །ཕྱོགས་བཅུ་ཀུན་དུ་རང་གི་ལུས་སྟོན་ཏོ། །དེ་དག་ཤར་གྱི་ཕྱོགས་
སུ་མཉམ་བཞག་ཅིང ། །ནུབ་ཀྱི་ཕྱོགས་ནས་དཔའ་བོ་རྣམ་པར་ལྡང ། །ནུབ་ཀྱི་ཕྱོགས་སུ་མཉམ་བར་བཞག་གྱུར་ཅིང ། །བདག་ཉིད་ཆེན་པོ་ཤར་གྱི་ཕྱོགས་ནས་ལྡང ། །དེ་བཞིན་ཕྱོགས་བཅུ་རྣམས་སུ་རབ་ཏུ་འཇུག་།གཞན་གྱི་ཕྱོགས་སུ་མཉམ་བར་བཞག་
གྱུར་ལ། །ཡེ་ཤེས་ཡོན་ཏན་ཕྱུག་པོ་གཞན་ནས་ལྡང ། །དྲང་སྲོང་ཏིང་འཛིན་རྣམ་འཕྲུལ་འདི་འདྲའོ། །ཤར་ཕྱོགས་སངས་རྒྱས་ཞིང་རྣམས་གང་ཡིན་པ། །གྲངས་མེད་མ་ལུས་དག་ན་རང་བྱུང་བ། །དེ་དག་སྤྱན་སྔར་ཞབས་དྲུང་དེ་དག་རྣམས། །ཞི་བའི་ཏིང་ངེ་འཛིན་ལ་
གནས་པར་སྣང ། །ཕྱོགས་དེར་མཉམ་པར་བཞག་པར་བསྟན་བྱས་ནས། །དཔའ་བོ་ནུབ་ཀྱི་ཞིང་རྣམས་མ་ལུས་པར། །རྣམ་པར་ལྡང་ཞིང་མངོན་སུམ་རྒྱལ་ཀུན་ལ། །མཆོད་པ་དུ་མ་རབ་ཏུ་བྱེད་པར་སྣང ། །ནུབ་ཕྱོགས་སངས་རྒྱས་ཞིང་རྣམས་གང་ཡིན་པ། །གྲངས་མེད་

</font><hr>57-1-75b<br><font size=+2>

མ་ལུས་དག་ན་བཞུགས་སངས་རྒྱས། །དེ་དག་སྤྱན་སྔར་ཞབས་དྲུང་དེ་དག་རྣམས། །ཞི་བའི་ཏིང་ངེ་འཛིན་ལ་གནས་པར་སྣང ། །ཕྱོགས་དེར་མཉམ་པར་བཞག་པར་བསྟན་བྱས་ནས། །དཔའ་བོ་ཤར་གྱི་ཞིང་རྣམས་མ་ལུས་པར། །རྣམ་པར་ལྡང་ཞིང་མངོན་སུམ་
རྒྱལ་ཀུན་ལ། །མཆོད་པ་དུ་མ་རབ་ཏུ་བྱེད་པར་སྣང ། །དེ་བཞིན་ཕྱོགས་བཅུ་དག་གི་ཞིང་རྣམས་སུ། །ཕྱོགས་རྣམས་མ་ལུས་ཀུན་དུ་བརྟན་པ་འཇུག་།ཁ་ཅིག་མཉམ་གཞག་ཁ་ཅིག་ལངས་གྱུར་ཅིང ། །འཇིག་རྟེན་སྒྲོན་མ་རྣམས་ལ་མཆོད་བྱེད་སྣང ། །དེ་དག་
མིག་གི་ལམ་ལ་མཉམ་བཞག་ཅིང ། །གཟུགས་ཀྱི་ལམ་ནས་བདག་ཉིད་ཆེན་པོ་ལྡང ། །གཟུགས་རྣམས་བསམ་གྱིས་མི་ཁྱབ་སྟོན་པ་ན། །དེ་ལ་ལྷར་བཅས་འཇིག་རྟེན་རྨོངས་པར་འགྱུར། །གཟུགས་ཀྱི་ལམ་ལ་མཉམ་པར་བཞག་གྱུར་ལ། །མིག་ནི་མ་སྐྱེས་མ་
བྱུང་རང་བཞིན་ཏེ། །སྟོང་པ་བྱེད་པ་མེད་པར་རབ་སྟོན་ཅིང ། །མིག་གི་ལམ་ནས་དྲན་ལྡན་རྣམ་པར་ལྡང ། །དེ་དག་རྣ་བའི་ལམ་ལ་མཉམ་བཞག་ཅིང ། །སྒྲ་ཡི་ལམ་ནས་བདག་ཉིད་ཆེན་པོ་ལྡང ། །གང་ལ་ལྷར་བཅས་འཇིག་རྟེན་རྨོངས་འགྱུར་བ། །སྒྲ་དང་སྐད་
རྣམས་ཀུན་ལ་རབ་ཏུ་ཞུགས། །སྒྲ་ཡི་ལམ་ལ་མཉམ་པར་བཞག་གྱུར་ཅིང ། །རྣ་བ་མ་སྐྱེས་མ་བྱུང་རང་བཞིན་ཏེ། །སྟོང་པ་བྱེད་པ་མེད་པར་རབ་སྟོན་ཅིང ། །རྣ་བའི་ལམ་ནས་དྲན་ལྡན་རྣམ་པར་ལྡང ། །དེ་དག་སྣ་ཡི་ལམ་ལ་མཉམ་བཞག་ཅིང ། །
དྲི་ཡི་ལམ་ནས་བདག་ཉིད་ཆེན་པོ་ལྡང ། །གང་དུ་ལྷར་བཅས་འཇིག་རྟེན་རྨོངས་འགྱུར་བ། །དྲི་མཆོག་དམ་པ་འཇུག་པར་རབ་ཏུ་ཞུགས། །དྲི་ཡི་ལམ་ལ་མཉམ་པར་བཞག་གྱུར་ཅིང ། །སྣ་ནི་མ་སྐྱེས་མ་བྱུང་རང་བཞིན་ཏེ། །སྟོང་པ་བྱེད་པ་མེད་པ་རབ་
སྟོན་ཅིང ། །སྣ་ཡི་ལམ་ནས་དྲན་ལྡན་རྣམ་པར་ལྡང ། །དེ་དག་ལྕེ་ཡི་ལམ་ལ་མཉམ་བཞག་ཅིང ། །རོ་མཆོག་ཀུན་གྱི་ལམ་ནས་རྣམ་པར་ལྡང ། །གང་དུ་ལྷར་བཅས་འཇིག་རྟེན་རྨོངས་འགྱུར་བ། །བདག་ཉིད་ཆེན་པོ་རོ་མཆོག་རྣམས་དང་ལྡན། །

</font><hr>57-1-76a<br><font size=+2>

རོ་མཆོག་རྣམས་ལ་མཉམ་པར་བཞག་གྱུར་ཅིང ། །ལྕེ་ནི་མ་སྐྱེས་མ་བྱུང་རང་བཞིན་ཏེ། །སྟོང་པ་བྱེད་པ་མེད་པར་རབ་སྟོན་ཅིང ། །ལྕེ་ཡི་ལམ་ནས་དྲན་ལྡན་རྣམ་པར་ལྡང ། །དེ་དག་ལུས་ཀྱི་ལམ་ལ་མཉམ་བཞག་ཅིང ། །རེག་པའི་ལམ་ནས་
བདག་ཉིད་ཆེན་པོ་ལྡང ། །གང་དུ་ལྷར་བཅས་འཇིག་རྟེན་རྨོངས་འགྱུར་བ། །འཇིག་རྟེན་བདེ་བ་སྐྱེད་པའི་རེག་ལ་ཞུགས། །རེག་པའི་ལམ་ལ་མཉམ་པར་བཞག་གྱུར་ཅིང ། །ལུས་ནི་མ་སྐྱེས་མ་བྱུང་རང་བཞིན་ཏེ། །སྟོང་པ་བྱེད་པ་མེད་པར་རབ་སྟོན་ཅིང ། །
ལུས་ཀྱི་ལམ་ནས་དྲན་ལྡན་རྣམ་པར་ལྡང ། །དེ་དག་སེམས་ཀྱི་ལམ་ལ་མཉམ་བཞག་ཅིང ། །ཆོས་ཀྱི་ལམ་ནས་བདག་ཉིད་ཆེན་པོ་ལྡང ། །གང་དུ་ལྷར་བཅས་འཇིག་རྟེན་རྨོངས་འགྱུར་བ། །ཆོས་ལ་གནས་པའི་འཇུག་པ་རབ་ཏུ་ཞུགས། །ཆོས་ལམ་
རྣམས་ལ་མཉམ་པར་བཞག་གྱུར་ཅིང ། །སེམས་ནི་མ་སྐྱེས་མ་བྱུང་རང་བཞིན་ཏེ། །སྟོང་པ་བྱེད་པ་མེད་པར་རབ་སྟོན་ཅིང ། །སེམས་ཀྱི་ལམ་ནས་དྲན་ལྡན་རྣམ་པར་ལྡང ། །དེ་དག་བྱིས་པའི་ལུས་ལ་མཉམ་བཞག་ཅིང ། །ལང་ཚོ་ཤུགས་ལ་གནས་པ་རྣམས་ལས་
ལྡང ། །ལང་ཚོ་ཤུགས་གནས་རྣམས་ལ་མཉམ་བཞག་ཅིང ། །རྒས་ཤིང་འཁོགས་པའི་ལུས་ལས་རྣམ་པར་ལྡང ། །རྒས་ཤིང་འཁོགས་པའི་ལུས་ལ་མཉམ་བཞག་ཅིང ། །དད་པའི་དགེ་བསྙེན་མ་ཡི་ལུས་ལས་ལྡང ། །དགེ་བསྙེན་དད་མའི་ལུས་ལ་མཉམ་བཞག་ཅིང ། །དད་པའི་དགེ་
བསྙེན་ལུས་ལས་རྣམ་པར་ལྡང ། །དད་པའི་དགེ་བསྙེན་ལུས་ལ་མཉམ་བཞག་ཅིང ། །དགེ་སློང་མ་ཡི་ལུས་ལས་རྣམ་པར་ལྡང ། །དགེ་སློང་མ་ཡི་ལུས་ལ་མཉམ་བཞག་ཅིང ། །དགེ་སློང་མང་དུ་ཐོས་པའི་ལུས་ལས་ལྡང ། །དགེ་སློང་མང་ཐོས་ལུས་ལ་མཉམ་བཞག་ཅིང ། །སློབ་
དངམི་སློབ་ལུས་ལས་རྣམ་པར་ལྡང ། །སློབ་དང་མི་སློབ་ལུས་ལ་མཉམ་བཞག་ཅིང ། །རྐྱེན་གྱི་སངས་རྒྱས་ལུས་ལས་རྣམ་པར་ལྡང ། །རྐྱེན་གྱི་སངས་རྒྱས་ལུས་ལ་མཉམ་བཞག་ཅིང ། །སངས་རྒྱས་སྐུ་མཆོག་རབ་ལས་རྣམ་པར་ལྡང ། །སངས་རྒྱས་སྐུ་

</font><hr>57-1-76b<br><font size=+2>

མཆོག་རབ་ལ་མཉམ་བཞག་ཅིང ། །ལྷ་ཡི་ལུས་གཟུགས་ལས་ནི་རྣམ་པར་ལྡང ། །ལྷ་ཡི་ལུས་གཟུགས་ལ་ནི་མཉམ་བཞག་ཅིང ། །རྫུ་འཕྲུལ་ཆེན་པོ་ཀླུ་ཡི་ལུས་ལས་ལྡང ། །རྫུ་འཕྲུལ་ཀླུ་ཡི་ལུས་ལ་མཉམ་བཞག་ཅིང ། །འཕྲུལ་ཆེན་གནོད་སྦྱིན་ལུས་ལས་རྣམ་པར་
ལྡང ། །འཕྲུལ་ཆེན་གནོད་སྦྱིན་ལུས་ལ་མཉམ་བཞག་ཅིང ། །འབྱུང་པོ་ཀུན་གྱི་ལུས་ལས་རྣམ་བར་ལྡང ། །འབྱུང་པོ་ཀུན་གྱི་ལུས་ལ་མཉམ་བཞག་ཅིང ། །སྤུ་ཡི་སྒོ་གཅིག་ནས་ནི་རྣམ་པར་ལྡང ། །སྤུ་སྒོ་གཅིག་ལ་མཉམ་པར་བཞག་གྱུར་ཅིང ། །སྤུ་སྒོ་ཐམས་
ཅད་ནས་ནི་རྣམ་པར་ལྡང ། །སྤུ་སྒོ་ཀུན་ལ་མཉམ་པར་བཞག་གྱུར་ཅིང ། །སྐྲ་རྩེ་གཅིག་གི་ཁྱོན་ལས་རྣམ་པར་ལྡང ། །སྐྲ་རྩེ་གཅིག་གི་ཁྱོན་ལ་མཉམ་བཞག་ཅིང ། །སྐྲ་རྩེ་ཀུན་གྱི་ཁྱོན་ལས་རྣམ་པར་ལྡང ། །སྐྲ་རྩེ་ཀུན་གྱི་ཁྱོན་ལ་མཉམ་བཞག་ཅིང ། །
ཕྲ་རབ་རྡུལ་གྱི་རྡུལ་ལས་དེ་དག་ལྡང ། །རྡུལ་གཅིག་ལ་ནི་མཉམ་བར་བཞག་གྱུར་ཅིང ། །མ་ལུས་རྡུལ་རྣམས་ཀུན་ལས་རྣམ་པར་ལྡང ། །རྡུལ་རྣམས་མ་ལུས་ཀུན་ལ་མཉམ་བཞག་ཅིང ། །རྒྱ་མཚོའི་རྡོ་རྗེའི་གཞི་ལས་རྣམ་པར་ལྡང ། །རྒྱ་མཚོའི་རྡོ་རྗེའི་
གཞི་ལ་མཉམ་བཞག་ཅིང ། །ནོར་བུའི་ཤིང་ཏོག་དག་ལས་རྣམ་པར་ལྡང ། །ཤིང་ཏོག་རྣམས་ལ་མཉམ་པར་བཞག་གྱུར་ནས། །རྒྱལ་བ་རྣམས་ཀྱི་འོད་ཟེར་སྒོ་ནས་ལྡང ། །རྒྱལ་བའི་འོད་ཟེར་སྒོ་ལ་མཉམ་བཞག་ཅིང ། །རྒྱ་མཚོའི་ཆུ་ཡི་ཆུ་ཀླུང་རྣམས་ལས་
ལྡང ། །རྒྱ་མཚོའི་ཆུ་ཀླུང་རྣམས་ལ་མཉམ་བཞག་ཅིང ། །བདག་ཉིད་ཆེན་པོ་མེ་ཡི་ལམ་ནས་ལྡང ། །མེ་ཡི་ལམ་ལ་མཉམ་པར་བཞག་གྱུར་ཅིང ། །རླུང་གི་ལམ་ལས་དྲན་ལྡན་རྣམ་པར་ལྡང ། །རླུང་གི་ལམ་ལ་མཉམ་པར་བཞག་གྱུར་ཅིང ། །བདག་ཉིད་ཆེན་
བོ་ས་ཡི་གཞི་ལས་ལྡང ། །ས་ཡི་གཞི་ལ་མཉམ་པར་བཞག་གྱུར་ཅིང ། །ལྷ་ཀུན་གཞལ་མེད་ཁང་ལས་རྣམ་པར་ལྡང ། །ལྷ་ཀུན་གཞལ་མེད་ཁང་ལ་མཉམ་བཞག་ཅིང ། །དྲན་ལྡན་དེ་དག་མཁའ་ལས་རྣམ་པར་ལྡང ། །ཡོན་ཏན་བསམ་ཡས་བསགས་པ་དེ་དག་

</font><hr>57-1-77a<br><font size=+2>

གི། །ཏིང་འཛིན་རྣམ་ཐར་དེ་དག་བསམ་མི་ཁྱབ། །རྒྱལ་བ་ཀུན་གྱིས་བསྐལ་པ་བསམ་ཡས་སུ། །བཤད་པ་མཛད་ཀྱང་ཟད་པར་མཛད་མི་སྤྱོད། །འགྲོ་ལས་རྣམ་སྨིན་བསམ་གྱིས་མི་ཁྱབ་སྟེ། །རྒྱལ་བ་ཀུན་གྱིས་དེ་དག་གསུངས་བ་ནི། །ཀླུ་ཡི་རྣམ་འཕྲུལ་
སངས་རྒྱས་རྣམ་འཕྲུལ་དང ། །བསམ་བྱེད་བསམ་གཏན་རྣམ་འཕྲུལ་བསམ་མི་ཁྱབ། །དེ་དག་ལ་ཡང་དཔེ་བསྟན་བརྗོད་པར་བྱ། །དེ་དག་འདྲ་བའི་དཔེ་ཟླ་ཅང་མེད་དེ། །མཁས་ཤིང་རིག་པའི་སྐྱེ་བོ་དཔེ་རྣམས་ཀྱིས། །བསྟན་ན་མྱུར་དུ་དོན་རྣམས་ཤེས་པར་འགྱུར། །རྣམ་
ཐར་བརྒྱད་ཀྱི་དབང་ལ་གནས་པ་ཡི། །ཉན་ཐོས་གཅིག་ཏུ་གྱུར་ནས་མང་པོར་འགྱུར། །མང་པོར་གྱུར་ནས་ཕྱིར་ཡང་གཅིག་གྱུར་ཏེ། །མཁའ་ལ་བསམ་གཏན་འཆའ་ཞིང་འབར་བར་བྱེད། །སྨད་ནས་མེ་འབར་སྟོད་ནས་ཆུ་ཡི་རྒྱུན། །སྟོད་ནས་མེ་འབར་སྨད་ནས་ཆུ་ཡི་
རྒྱུན། །འགྲོ་དང་འགྲེང་དང་ཉལ་དང་འདུག་པ་དང ། །ལུས་འཕྲུལ་སྐད་ཅིག་གཅིག་ལ་བསམ་མི་ཁྱབ། །དེ་ནི་སྙིང་རྗེ་ཆེ་དང་མི་ལྡན་ཞིང ། །བྱང་ཆུབ་མི་ཚོལ་འཇིག་རྟེན་ཡལ་འདོར་ཡང ། །ལུས་ཀྱི་རྣམ་འཕྲུལ་བསམ་ཡས་སྟོན་བྱེད་ན། །འཇིག་རྟེན་ཕན་འདོད་
ཅི་ཕྱིར་སྟོན་མི་བྱེད། །ཉི་ཟླ་མཁའ་ལ་རྣམ་པར་རྒྱུ་འདོད་ཞིང ། །ཕྱོགས་རྣམས་ཀུན་གྱི་ཆུ་ཡི་དངོ་དག་དང ། །མཚོ་མཚེའུ་མཚོ་བྲན་སྣོང་དང་རིན་ཆེན་དང ། །རྒྱ་མཚོ་ཆུ་ཀླུང་རྣམས་སུ་གཟུགས་བརྙན་སྟོན། །དེ་བཞིན་གཟུགས་རྣམས་བསམ་གྱིས་མི་ཁྱབ་པ། །
སྐྱེས་བུ་དཔའ་བོ་ཕྱོགས་བཅུ་ཀུན་དུ་སྟོན། །ཏིང་འཛིན་རྣམ་ཐར་ཀུན་གྱི་ཚུལ་ལ་མཁས། །དེ་ལ་དེ་བཞིན་གཤེགས་པ་རང་བྱུང་དབང ། །དང་བའི་མཚོ་ལ་ཡན་ལག་བཞི་པའི་དམག་།དེ་དག་སོ་སོར་རང་གི་གཟུགས་བརྙན་མཐོང ། །རལ་གྲི་མདའ་ཆེན་གཞུ་དང་
མདའ་རྣམས་དང ། །གོ་གྱོན་བཞོན་དང་ཐེག་པར་བཅས་སུ་མཐོང ། །གང་གི་གཟུགས་གང་གནས་གང་ཆ་བྱད་གང ། །དེ་དང་དེ་དག་དེ་ལྟར་ཆུ་ལས་མཐོང ། །འོན་ཀྱང་ཆུ་ལ་བྱམས་སྡང་རྣམ་རྟོག་མེད། །དྲང་སྲོང་ཏིང་འཛིན་རྣམ་འཕྲུལ་འདི་འདྲའོ། །

</font><hr>57-1-77b<br><font size=+2>

རྒྱ་མཚོའི་ལྷ་མོ་སྒྲ་ལྡན་ཞེས་བྱ་བ། །སེམས་ཅན་རྒྱ་མཚོར་ཇི་སྙེད་སྐྱེས་རྣམས་ཀྱི། །སྒྲ་ཡི་ཡན་ལག་དབྱངས་ཀྱི་ཚུལ་མཁས་ཏེ། །རང་གི་སྐད་ཀྱིས་སྐད་ཀུན་ཚིམ་པར་བྱེ།ད་།སྒྲ་ལྡན་ཆགས་སྡང་གཏི་མུག་ཅན་དེ་ཡང། །སྐད་རྣམས་ཀུན་གྱི་སྒྲ་ཡི་ཚུལ་མཁས་ན། །
གཟུངས་དང་ཆོས་ཀྱི་སྟོབས་ལ་དབང་ཐོབ་རྣམས། །ལྷར་བཅས་འཇིག་རྟེན་ཅི་ཕྱིར་མགུ་མི་བྱེད། །ཏུམ་བུ་རུ་ཡི་ཆུང་མ་དབྱངས་ལྡན་མ། །ཚངས་པའི་བུ་མོ་ཡིད་ལས་བྱུང་བ་དེ། །བདེན་དང་དམ་བཅས་མི་འཚེ་དགའ་རྣམས་ཀྱི། །སེམས་དང་ཡིད་དང་ཁ་ཡི་སྒོར་
འཇུག་སྟེ། །དབྱངས་ལྡན་ཆགས་ཅན་ཞེ་སྡང་ཅན་དེ་ཡང ། །བརྟུལ་ཞུགས་གྲུབ་འཐུན་དབྱངས་ཀྱི་ཡན་ལག་གི། །ཡིད་འོང་སྐད་ཀྱིས་འཇིག་རྟེན་མགུ་བྱེད་ན། །ཡེ་ཤེས་ཡོན་ཏན་ཕྱུག་རྣམས་ཅིས་མི་བྱེད། །རིག་སྔགས་ཚུལ་མཁས་སྒྱུ་མའི་མཁན་པོ་ནི། །
སྣ་ཚོགས་གཟུགས་མང་མཐའ་ཡས་སྟོན་པར་བྱེད། །ཉིན་མཚན་ཡུད་དང་ཟླ་བ་ལོ་བརྒྱ་དང ། །ཁྱིམ་བཟང་རྒྱས་པ་ཤིན་ཏུ་མཛེས་པ་སྟོན། །འདོད་ཆགས་སྡང་ལྡན་སྒྱུ་མའི་མཁན་པོ་ཡང ། །སྒྱུ་མའི་འཕྲུལ་གྱིས་འཇིག་རྟེན་མགུ་བྱེད་ན། །བསམ་གཏན་
མངོན་ཤེས་རྣམ་ཐར་རབ་བསླབས་པ། །སྤྱོད་ཚུལ་མཁས་རྣམས་ཅི་ཕྱིར་མགུ་མི་བྱེད། །ལྷ་དང་ལྷ་མིན་དབང་པོ་འཐབ་པའི་ཚེ། །རྒྱལ་ལྡན་ལྷ་ཡིས་ལྷ་མིན་ཕམ་བྱས་ན། །དེ་དག་འཇིགས་པས་གདུགས་བཅས་བཞིན་བཅས་ཤིང ། །ཐེག་བཅས་དམག་བཅས་
གོ་གྱོན་བཞིན་དུ་འབྱེར། །འདོད་ཆགས་སྡང་ལྡན་ལྷ་དབང་དེ་དག་ཀྱང ། །ལུས་ཀྱི་རྣམ་འཕྲུལ་བསམ་ཡས་སྟོན་བྱེད་ན། །དབང་ཕྱུག་རྫུ་འཕྲུལ་དབང་གནས་དཔའ་བོ་རྣམས། །ལུས་ཀྱི་རྣམ་འཕྲུལ་ཅི་ཕྱིར་སྟོན་མི་བྱེད། །རྡོ་རྗེ་འཆང་བའི་གླང་བོ་ས་སྲུང་བུ། །
དབང་པོའི་འཁོར་གྱུར་རྫུ་འཕྲུལ་ཆེན་པོ་དེ། །མགོ་བོ་སུམ་ཅུ་རྩ་གསུམ་མངོན་སྤྲུལ་ཅིང ། །མགོ་རྣམས་ཀུན་ལའང་མཆེ་བ་དྲུག་དྲུག་སྟེ། །མཆེ་བ་དེ་དག་སོ་སོ་རེ་རེ་ལའང ། །རྫིང་བུ་ཆུས་གང་བདུན་བདུན་སྤྲུལ་པ་བྱེད། །རྫིང་རེ་ལ་ཡང་པད་མ་

</font><hr>57-1-78a<br><font size=+2>

སྣ་ཚོགས་པ། །རྣམ་པར་བཀོད་པ་བདུན་བདུན་སྤྲུལ་པ་བྱེད། །པད་མ་རེ་རེའང་ལྷ་ཡི་བུ་མོ་དག་།སྒྱུ་རྩལ་ཀུན་ཤེས་བདུན་བདུན་སྤྲུལ་པ་བྱེད། །དེ་དག་རྩེད་མོ་གླུ་གར་ཚུལ་ལ་མཁས། །སུམ་ཅུ་རྩ་གསུམ་དབང་པོ་དེ་དང་རྩེ། །གླང་པོ་དེ་ཡང་
ལུས་ནི་བསྒྱུར་བྱས་ཏེ། །ལྷ་རྣམས་ཀུན་དང་འགྲོགས་ཤིང་འདྲེ་བར་བྱེད། །སྤྱོད་པའི་ཚུལ་དང་ལོངས་སྤྱོད་ཀུན་ཀྱང་འཐུན། །གླང་པོ་མཆོག་གི་རྣམ་འཕྲུལ་དེ་ལྟར་སྣང ། །གླང་པོ་ཆགས་སྡང་གཏི་མུག་ལྡན་དེ་ཡང ། །འདི་འདྲའི་རྫུ་འཕྲུལ་རབ་ཏུ་སྟོན་བྱེད་ན། །
ཤེས་རབ་ཐབས་ཀྱི་སྟོབས་ལ་སྦྱངས་པ་རྣམས། །ཏིང་འཛིན་བརྒྱ་ཡིས་རྣམ་འཕྲུལ་ཅིས་མི་བྱེད། །སྒྲ་གཅན་ཇི་ལྟར་འདོད་བཞིན་ལུས་འཕྲུལ་ཏེ། །རྡོ་རྗེའི་གཞི་ལ་རྐང་པ་འཇོག་བྱེད་ཅིང ། །རྒྱ་མཚོ་ལྟེ་བར་ཕྱིན་པ་ཙམ་དུ་སྟོན། །རི་རབ་རྩེ་དང་ཉིད་ཀྱི་
མགོ་ཡང་སྙོམས། །སྒྲ་གཅན་ཆགས་སྡང་གཏི་མུག་ལྡན་དེ་ཡང ། །འདི་འདྲའི་རྫུ་འཕྲུལ་རབ་ཏུ་སྟོན་བྱེད་ན། །འཇིག་རྟེན་སྒྲོན་མ་བདུད་རྣམས་རབ་འཇོམས་པ། །རྫུ་འཕྲུལ་མཐའ་ཡས་ཅི་ཕྱིར་སྟོན་མི་བྱེད། །བརྒྱ་བྱིན་རྣམ་འཕྲུལ་བསམ་ཡས་རབ་སྣང་སྟེ། །
ལྷ་དང་ལྷ་མིན་དབང་པོ་གཡུལ་འགྱེད་ཚེ། །ལྷ་མིན་བྱེ་བ་འཕྱེས་པ་ཇི་སྙེད་པ། །དེ་སྙེད་བརྒྱ་བྱིན་རང་གི་ལུས་ལས་སྤྲུལ། །ལྷ་མིན་དབང་དང་ལྷ་མིན་ཕལ་ཀུན་གྱིས། །བརྒྱ་བྱིན་རང་རང་མདུན་ན་འདུག་པར་ཤེས། །དེ་ནི་རྡོ་རྗེ་འཆང་བས་བཟུང་ངོ་ཞེས། །ལྷ་
མིན་དབང་པོ་ཀུན་ཀྱང་མགོ་མྱོས་གྱུར། །འཇིགས་པར་བྱེད་པའི་མིག་སྟོང་རབ་བསྟན་ཏེ། །རྡོ་རྗེ་མེ་ལྕེ་འབར་བ་ཐོགས་བྱེད་ཅིང ། །ལུས་ལ་གོ་བགོས་གཟི་བརྗིད་བསྙེན་དཀའ་བའི། །བརྒྱ་བྱིན་མཐོང་ནས་ལྷ་མིན་དབང་པོ་འབྱེར། །དེ་ཡང་བསོད་
ནམས་ཕལ་པའི་མཐུ་སྟོབས་ཀྱིས། །ལྷ་རྒྱལ་དོན་དུ་རྣམ་པར་འཕྲུལ་བྱེད་ན། །འགྲོ་བ་མ་ལུས་ཀུན་གྱི་སྐྱབས་གྱུར་པ། །བསོད་ནམས་མི་ཟད་རྣམས་ལྟ་ཅིས་མི་འཕྲུལ། །ལྷ་ལ་སྐུལ་མ་འདེབས་པའི་ལྷ་ཡི་རྔ། །ལྷ་ལས་རྣམ་པར་སྨིན་པས་གྲུབ་

</font><hr>57-1-78b<br><font size=+2>

གྱུར་པ། །ལྷ་རྣམས་བག་མེད་གནས་པར་ཤེས་གྱུར་ནས། །རྔ་དེ་ནམ་མཁའ་ལས་ནི་སྒྲ་སྒྲོགས་ཏེ། །འདོད་པ་ཐམས་ཅད་མི་རྟག་ཐེར་ཟུག་མིན། །ཐ་ཤལ་མི་བརྟན་དབུ་བའི་ངོ་བོ་ཉིད། །སྒྱུ་མ་སྨིག་རྒྱུ་ཆུ་ཟླ་མཚུངས་ཤིང་འདྲ། །སྲིད་པ་ཐམས་
ཅད་རྨི་ལམ་སྤྲིན་དང་མཚུངས། །བག་མེད་ཐམས་ཅད་དགྲར་བཅས་མྱ་ངན་ཅན། །འཆི་བའི་ལམ་ཡིན་མི་འཆི་ལམ་མ་ཡིན། །ཇི་སྙེད་སུ་དག་བག་མེད་གནས་གྱུར་པ། །དེ་དག་འཆི་བདག་ཆུ་སྲིན་ཆེན་པོས་ཟིན། །སྡུག་བསྔལ་རྩ་བ་ཡོངས་འཛིན་
ཐམས་ཅད་ཡིན། །སྐྱེ་བ་ཐམས་ཅད་འཕགས་པ་རྣམས་ཀྱིས་སྨད། །འདོད་པའི་ཡོན་ཏན་རྣམས་ཀྱི་ཡུལ་ལ་རྨོངས། །ཆོས་ཀྱི་སྟོབས་ལ་རྟག་དགའ་གྱིས་ཞེས་བསྐུལ། །རྔ་དེས་བསྐུལ་ནས་བརྒྱ་བྱིན་ལྷ་རྣམས་དང ། །ལྷ་ཡི་འདུན་ས་ཆོས་
བཟང་འདུག་ནས་སུ། །གཏམ་གང་ཞི་ཞིང་འདོད་ཆགས་བྲལ་འཐུན་པ། །ཆོས་ཀྱི་གཏམ་དེ་ལྷ་རྣམས་ཀུན་ལ་བརྗོད། །རྔ་དེ་གཟུགས་མེད་བསྟན་དུ་མི་རུང་ཡང ། །དེ་ལྟར་རྔ་སྒྲས་དོན་ཆེན་རབ་བྱེད་ན། །བསམ་པ་ཇི་བཞིན་གཟུགས་ནི་ཡོངས་སྟོན་
རྣམས། །འགྲོ་བ་ཀུན་གྱི་དོན་ཆེན་ཅིས་མི་བྱེད། །ལྷ་དང་ལྷ་མིན་དབང་པོ་གཡུལ་འགྱེད་ཚེ། །ལྷ་ཡི་བསོད་ནམས་ཁྱད་པར་མཐུ་སྟོབས་ཀྱིས། །ལྷ་ལ་སྐུལ་མ་འདེབས་པའི་རྔ་ཡི་སྒྲ། །ལྷ་རྣམས་མ་འཇིགས་ཤིག་ཅེས་སྒྲ་འབྱིན་ཏེ། །རྔ་ཡིས་
བསྐུལ་ནས་ལྷ་རྣམས་རབ་དགའ་ཞིང ། །སྐྲག་པ་མེད་དེ་སྟོབས་ཀྱང་སྐྱེས་པར་གྱུར། །ལྷ་མིན་དབང་པོ་སྐྲག་པས་ཉེན་པ་རྣམས། །འཇིགས་ནས་དམག་བཅས་དེ་ཡི་མོད་ལ་འབྱེར། །དེ་ལྟར་སྒྲ་སྐད་འབྱིན་པའི་རྔ་འདྲ་བ། །འགྲོ་བ་ཀུན་གྱི་སྐྱབས་དང་
དཔུང་གཉེན་པོ། །ཉོན་མོངས་བདུད་བཅོམ་སྙིང་རྗེ་ཆེ་ལྡན་རྣམས། །ཞི་བའི་སྒྲ་བསྒྲགས་ཉོན་མོངས་སེལ་བར་བྱེད། །དབང་པོའི་ལྷ་ཡི་བུ་མོ་དགུ་བཅུ་གཉིས། །དབང་པོའི་སྤྲུལ་པས་ཀུན་ཀྱང་དགའ་བར་འགྱུར། །གཅིག་ཀྱང་བདག་དང་བརྒྱ་བྱིན་

</font><hr>57-1-79a<br><font size=+2>

རྩེ་བར་ཤེས། །གཅིག་ལྟར་ལྷ་མོ་ཀུན་ཀྱང་དེ་བཞིན་ནོ། །ལྷ་མོ་ཀུན་དང་དཀའ་བར་གནས་སྣང་ཡང ། །ཆོས་བཟང་འདུན་ས་ན་ཡང་དེ་བཞིན་འདུག་།ལྷ་རྣམས་ཀུན་ལ་ཆོས་རབ་སྟོན་སྣང་ཞིང ། །བརྒྱ་བྱིན་སྐད་ཅིག་གཅིག་ལ་རྣམ་པར་འཕྲུལ། །
བརྒྱ་བྱིན་ཆགས་སྡང་གཏི་མུག་ལྡན་པ་ཡང ། །སྤྲུལ་པས་རང་གི་འཁོར་རྣམས་དགའ་བྱེད་ན། །འགྲོ་དོན་མི་སྐྱོ་སྦྱོར་རྣམས་ཅི་ཡི་ཕྱིར། །རྫུ་འཕྲུལ་སྟོབས་ཀྱིས་འཇིག་རྟེན་མགུ་མི་བྱེད། །བདུད་ཀྱི་དཀྲུགས་མ་འགྲོ་བའི་དབང་སྒྱུར་བ། །དེ་ཡི་དབང་དུ་
སེམས་ཅན་འདི་ཀུན་འདོད། །ལས་དང་ཉོན་མོངས་ཀུན་དུ་ཞུགས་པ་ཡིས། །སོ་སོའི་སྐྱེ་བོ་ཐམས་ཅད་བདུད་དེས་བཅིངས། །ཆགས་སྡང་གཏི་མུག་ལྡན་པའི་བདུད་དེ་ཡང ། །འགྲོ་བ་ཐམས་ཅད་དབང་དུ་འགྱུར་བྱེད་ན། །དབང་བཅུ་དབང་ཐོབ་རྣམས་ལྟ་ཅི་
སྨོས་ཏེ། །འགྲོ་བ་ཐམས་ཅད་རང་གི་ཕྱོགས་མི་འཇོག་།སྟོང་གསུམ་གནས་ཀྱི་བདག་པོ་ཚངས་པ་ཡང ། །སྟོང་གསུམ་ཚངས་གནས་ཇི་སྙེད་ཡོད་པ་ན། །དེ་དག་ཀུན་ན་འདུག་པར་རབ་སྣང་ཞིང ། །ཚངས་པའི་སྒྲ་དབྱངས་ཤིན་ཏུ་ཡིད་འོང་སྒྲོགས། །ཚངས་དེ་
འཇིག་རྟེན་པ་ཡི་ཚངས་ལམ་གྱི། །བསམ་གཏན་མངོན་ཤེས་རྣམ་པར་འཕྲུལ་བྱེད་ན། །འཇིག་རྟེན་རབ་འདས་བླ་ན་མེད་པ་ཡི། །བསམ་གཏན་རྣམ་ཐར་གནས་པ་ཅིས་མི་འཕྲུལ། །དབང་ཕྱུག་ཆེན་པོའི་ཤེས་པའི་རྣམ་འཕྲུལ་ལྟོས། །རྒྱ་མཚོའི་སྤྲིན་གྱིས་ཆར་ཐིགས་རབ་བཀྱེ་
བ། །སྐད་ཅིག་གཅིག་ལ་ཐམས་ཅད་འགྲང་བ་བྱེད། །ཐིགས་འགའི་ཟེར་ཀྱང་མ་ཤེས་དེ་མེད་ན། །བསླབ་པ་བསྐལ་པ་བསམ་ཡས་རབ་བསླབས་ཏེ། །བྱང་ཆུབ་བླ་མེད་ཡེ་ཤེས་ཐོབ་པ་རྣམས། །ཅི་ཕྱིར་སྐད་ཅིག་གཅིག་ལ་སེམས་ཀྱིས་ནི། །འགྲོ་བ་མ་ལུས་ཀུན་གྱི་སེམས་
མི་ཤེས། །སེམས་ཅན་ལས་སྨིན་བསམ་གྱིས་མི་ཁྱབ་པས། །འཇིག་རྟེན་འདི་ཀུན་རླུང་ལས་ཡོངས་སུ་བྱུང ། །རྒྱ་མཚོ་རི་དང་ལྷ་ཡི་གཞལ་མེད་ཁང ། །རིན་ཆེན་རྣམ་ཕྱེ་ས་བོན་བཀྲམ་པའང་བྱུང ། །རླུང་ལས་སྤྲིན་བྱུང་ཆར་པའང་ཀུན་དུ་འབབ། །རླུང་གིས་སྤྲིན་ཀྱང་རབ་ཏུ་ཞི་

</font><hr>57-1-79b<br><font size=+2>

བར་བྱེད། །འཇིག་རྟེན་ལོ་ཏོག་འཕེལ་བའང་རླུང་བྱེད་དེ། །རླུང་ནི་འགྲོ་བ་ཀུན་ལ་ཕན་པ་སྐྱེད། །རླུང་དེ་ཕ་རོལ་ཕྱིན་ལ་མ་བསླབས་ཤིང ། །སངས་རྒྱས་ཡོན་ཏན་རྣམས་ལ་མ་བསླབས་ཀྱང ། །འཇིག་རྟེན་རྣམ་སྨིན་བསམ་ཡས་སྟོན་བྱེད་ན། །དམ་པ་ཐོབ་རྣམས་ཅི་ཕྱིར་སྟོན་མི་བྱེད། །
རྒྱ་མཚོའི་འབྲུག་སྒྲའི་སྤྲིན་གྱི་ཆུ་ཚོགས་ནི། །བྱ་སྐད་རི་དགས་སྐད་དང་སྐྱེས་པ་དང ། །བུད་མེད་བུ་མོ་ཁྱེའུ་སྐད་ཅི་སྙེད་པ། །ཀུན་གྱི་སྒྲ་སྙན་སེམས་ཅན་རྣམས་ལ་སྒྲོགས། །དེ་ལྟར་སྒྲ་སྙན་རང་བཞིན་མེད་ཤེས་ནས། །སྒྲིབ་པ་མེད་པའི་སྤོབས་དང་ལྡན་འགྱུར་ཞིང ། །འགྲོ་བ་ཀུན་
ལ་སྒྲ་སྙན་བརྗོད་བྱས་ནས། །ཡིད་འོང་སྒྲ་ཡིས་འཇིག་རྟེན་མགུ་བར་བྱེད། །རྒྱ་མཚོ་འདི་ལ་ངོ་མཚར་རྨད་ཀྱི་ཆོས། །འགྲོ་ཀུན་རྒྱ་དང་མཚུངས་པས་རྒྱ་མཚོ་སྟེ། །ཆུ་དང་འབྱུང་པོ་རིན་ཆེན་ཡོང་མི་ཟད། །ཆུ་རྣམས་བཟུང་པས་ངོམས་པར་འགྱུར་བ་མེད། །དེ་བཞིན་དེ་དག་འགྲོ་ཀུན་རྒྱ་འདྲ་
སྟེ། །བསོད་ནམས་བསམ་གཏན་རྣམ་པར་ཐར་རྣམས་དང ། །ཤེས་རབ་ཡེ་ཤེས་ཡོན་ཏན་ཀུན་མི་ཟད། །བསོད་ནམས་ཡོན་ཏན་སོགས་པས་ངོམས་པ་མེད། །རྒྱ་མཚོའི་ཀླུ་ནི་རྣམ་པར་རྩེ་བ་ན། །ས་ཡི་གཞི་ནས་དབང་སྒྱུར་གནས་ཀྱི་བར། །གླིང་བཞི་བཅས་པར་སྤྲིན་ཆེན་རྒྱས་འགེངས་
ཏེ། །དེ་དག་ཀུན་ཀྱང་སྣ་ཚོགས་བཀོད་པ་མང ། །དེ་ནི་དབང་སྒྱུར་གནས་སུ་འཛམ་གླིང་གི། །གསེར་གྱི་མདོག་གི་སྤྲིན་རྣམས་རྣམ་པར་སྒྲུབ། །འཕྲུལ་དགར་མུ་ཏིག་དམར་པོའི་མདོག་ལྟ་བུ། །དགའ་ལྡན་གནས་སུ་ཁ་བ་བ་མོའི་མདོག་།འཐབ་བྲལ་གནས་སུ་མཐོན་མཐིང་བཻ་དཱུཪྱ། །སུམ་ཅུ་རྩ་གསུམ་རྡོ་ཡི་སྙིང་
པོ་འདྲ། །སྐྱོང་བའི་གནས་སུ་ཤེལ་གྱི་མདོག་ལྟ་བུ། །རྒྱ་མཚོར་རྡོ་རྗེ་མི་ཕྱེད་མཁྲེགས་འདྲ་བ། །མི་ཅི་གནས་སུ་སྤོས་མཆོག་འཁྲིགས་ལྟ་བུ། །ཀླུ་ཡི་གནས་སུ་པད་མའི་མདོག་འདྲ་བ། །གསང་བའི་གནས་སུ་ངང་པ་བྱ་གར་མདོག་།ལྷ་མིན་གནས་སུ་རི་བྲག་མདོག་འདྲ་བ། །བྱང་དུ་གསེར་གྱི་
འོད་ཟེར་མདོག་སྟོན་ཏེ། །གླིང་རྣམས་གཞན་དུ་སྣ་ཚོགས་བཀོད་པ་སྟོན། །འཛམ་བུའི་གླིང་དུ་རི་སྔོན་འདྲ་བ་སྟེ། །གང་ན་ཅི་མཐོ་སྤྲིན་རྣམས་དེ་བཞིན་ནོ། །དབང་སྒྱུར་གནས་སུ་གསེར་སྤྲིན་ངེས་བསྟན་ནས། །ཉི་མའི་མདོག་འདྲ་གློག་ཀྱང་རབ་ཏུ་འགྱེད། །འཕྲུལ་དགའི་གནས་སུ་ཟླ་འོད་བཟང་

</font><hr>57-1-80a<br><font size=+2>

འདྲ་དང ། །དགའ་ལྡན་གནས་སུ་འཛམ་བུའི་གསེར་མདོག་འདྲ། །འཐབ་བྲལ་གནས་སུ་ཁ་བ་བ་མོའི་མདོག་།སུམ་ཅུ་རྩ་གསུམ་གསེར་གྱི་འོད་ཟེར་འདྲ། །སྐྱོང་བའི་གནས་སུ་དཔལ་གྱི་སྙིང་པོའི་མདོག་།རྒྱ་མཚོར་མུ་ཏིག་དམར་པོའི་མདོག་འདྲ་བཀོད། །མི་ཅི་གནས་སུ་
མཐོན་མཐིང་བེེ་དཱུརྱ། །ཀླུ་ཡི་གནས་སུ་དཔལ་གྱི་སྙིང་པོའི་མདོག་།གསང་བའི་གནས་སུ་ཤེལ་གྱི་མདོག་འདྲ་བ། །ལྷ་མིན་གནས་སུ་རྡོ་ཡི་སྙིང་པོ་འདྲ། །བྱང་དུ་ནོར་བུ་སྐར་མདོག་ཁ་དོག་འདྲ། །གླིང་གཞན་རྣམས་སུའང་བཀོད་པ་གཞན་དང་གཞན། །འཛམ་བུའི་གླིང་དུ་ཟླ་བའི་ནོར་བུ་
འབར། །སྤྲིན་གྱི་མཚན་ཉིད་འཐུན་པའི་གློག་ཀྱང་འགྱེད། །དེ་ནི་དབང་སྒྱུར་གནས་སུ་ཚངས་སྒྲ་སྒྲོགས། །འཕྲུལ་དགའ་གནས་སུ་རྔ་སྒྲ་སྒྲོག་པར་བྱེད། །དགའ་ལྡན་གནས་སུ་སིལ་སྙན་རོལ་མོའི་སྒྲ། །འཐབ་བྲལ་གནས་སུ་ལྷ་ཡི་བུ་མོའི་སྒྲ། །སུམ་ཅུ་གསུམ་དུ་མི་ཅི་མང་པོའི་
སྐད། །སྐྱོང་བའི་གནས་སུ་དྲི་ཟའི་སྐད་དུ་སྟེ། །རྒྱ་མཚོར་རི་འཐབ་སྒྲ་སྐད་འདྲ་བའོ། །མི་ཅི་གནས་སུ་གླིང་བུ་ཀུ་ནལ་སྒྲ། །ཀླུ་ཡི་གནས་སུ་ཀ་ལ་པིང་ཀའི་སྒྲ། །གསང་བའི་གནས་སུ་ཀླུ་ཡི་བུ་མོའི་སྒྲ། །ལྷ་མིན་གནས་སུ་ལྷ་ཡི་རྫ་རྔའི་སྒྲ། །མི་ཡི་གནས་སུ་རྒྱ་མཚོ་གླིང་བུའི་སྒྲ། །
དེ་ནི་དབང་སྒྱུར་གནས་སུ་ལྷ་སྤོས་ཞིམ། །མེ་ཏོག་སྣ་ཚོགས་བཀོད་པའི་ཆར་ཡང་འབེབས། །འཕྲུལ་དགར་ཟླ་བ་ཟླ་བཟངས་འདྲ་བ་ཡི། །མེ་ཏོག་མན་དཱར་ཕྲེང་དང་བྱུག་པ་འབེབས། །དགའ་ལྡན་གནས་སུ་ནོར་བུ་ཆེན་པོའི་མདོག་།རྒྱན་གྱི་དམ་པ་རིན་ཆེན་སྣ་ཚོགས་དང ། །གཙུག་
གི་ནོར་བུ་ཟླ་བ་འདྲ་བ་དང ། །གསེར་མདོག་འདྲ་བའི་དར་ལའི་ཆར་ཡང་འབེབས། །རྒྱལ་མཚན་གདུགས་དང་བ་དན་སྣ་ཚོགས་དང ། །ཕྲེང་བ་རྣམས་དང་རྒྱན་དང་བྱུག་པ་དང ། །མུ་ཏིག་དམར་དང་གསེར་དང་དར་ལ་དང ། །སིལ་སྙན་ཡིད་འོང་འཐབ་བྲལ་གནས་སུ་འབེབས། །སུམ་ཅུ་
གསུམ་དུ་ཡིད་བཞིན་ནོར་བུ་མཆོག་།སྐྱོང་བའི་གནས་སུ་ཙན་དན་སྙིང་པོའི་མཆོག་།གུར་གུམ་སིལ་མ་ལྷ་ཤིང་ཏ་མ་ལ། །སྤོས་ཆུའི་རྒྱུན་དང་མེ་ཏོག་རབ་ཏུ་འབེབས། །སྐྱོང་བའི་གནས་སུ་ཀླུ་ཡི་དབང་པོ་དེ། །ཉམ་སྟོབས་སྐྱེ་བའི་ཁ་ཟས་སྐོམ་གྱི་རྣམས། །ཁ་དོག་དྲི་ཞིམ་རོ་དང་

</font><hr>57-1-80b<br><font size=+2>

ལྡན་པ་དང ། །དེ་མིན་རིན་ཆེན་བསམ་ཡས་ཆར་ཡང་འབེབས། །དེ་ནི་རྒྱ་མཚོ་ཆེན་པོར་རྒྱུན་དུ་ཡང ། །ཆར་རྒྱུན་མི་འཆད་གཉའ་ཤིང་ཙམ་དག་དང ། །རྣམ་རྒྱལ་ཆེན་པོ་མཛོད་རྣམས་མི་ཟད་པ། །རིན་ཆེན་བཀོད་པ་མཐའ་ཡས་ཆར་ཡང་འབེབས། །མི་ཅི་གནས་སུ་རྒྱན་ཕྲེང་སྣ་
ཚོགས་དང ། །པད་མ་ཨུད་པལ་རས་དང་རིན་ཆེན་དང ། །མེ་ཏོག་བར་ཤ་མ་ལི་ཕྱེ་མ་སྤོས། །པི་བང་གླིང་བུ་སྒྲ་སྙན་རྫ་རྔ་འབེབས། །ཀླུ་ཡི་གནས་སུ་མུ་ཏིག་དམར་པོ་སྟེ། །གསང་བར་ནོར་བུ་རིན་ཆེན་སྐར་མདོག་འདྲ། །ལྷ་མིན་གནས་སུ་རལ་གྲི་མདའ་ཆེན་དང ། །དགྲར་འདུལ་
གཞུ་དང་སྟེའུ་ཀའི་ཆར་པ་འབེབས། །བྱང་དུ་དེ་ནི་རྒྱལ་ཕྲེང་རིན་ཆེན་དང ། །མེ་ཏོག་བར་ཤ་མ་ལི་ཙམ་པའི་ཕྲེང ། །ཀུ་རན་གཙང་དང་ཨ་ཏི་མུག་ཏ་འབེབས། །གླིང་གཞན་རྣམས་སུའང་སྣ་ཚོགས་ཆར་པ་འབེབས། །འཛམ་བུའི་གླིང་དུ་ཆུ་གསལ་དང་བ་ཡི། །ཆར་རྣམས་ཆོས་བཞིན་
ཕྲ་བའི་རྒྱུན་དུ་འབེབས། །མེ་ཏོག་འབྲས་བུ་སྨན་དང་སྤོས་དང་ཤིང ། །ལོ་ཏོག་བདེ་བྱེད་འཇིག་རྟེན་རྣམས་སུ་སྐྱེད། །དེ་ལྟར་སྤྲིན་བཀོད་བསམ་གྱིས་མི་ཁྱབ་དང ། །གློག་འབྱིན་འབྲུག་སྒྲོགས་བཀོད་པའི་ཆར་འབེབས་ཀྱང ། །གནས་ནས་མི་གཡོ་རྣམ་པར་རྟོག་པ་མེད། །ཀླུ་ཡི་རྣམ་འཕྲུལ་
དེ་ལྟར་བསམ་མི་ཁྱབ། །རྒྱ་མཚོའི་ཆུ་ན་གནས་པ་དེ་ལྟར་ཡང ། །ཀླུ་ཡི་རྣམ་འཕྲུལ་བསམ་ཡས་སྟོན་བྱེད་ན། །ཆོས་ཀྱི་རྒྱ་མཚོར་ཞུགས་པའི་ཡོན་ཏན་ཕྱུག་།རྣམ་འཕྲུལ་བསམ་ཡས་ཅི་ཕྱིར་སྟོན་མི་བྱེད། །བག་ཙམ་སྨོས་པའི་དཔེ་ཚུལ་འདི་དག་གིས། །སྐྱེས་ཆེན་དེ་དག་རྣམས་ཀྱི་བརྗོད་
པ་བྱས། །དཔའ་བོ་དེ་དག་དཔེ་རྣམས་ཀུན་དང་བྲལ། །དེ་དག་དེ་འདྲའི་རྣམ་ཐར་དབང་བསྒྱུར་རོ། །བློ་གྲོས་དམ་པ་བློ་གྲོས་རྒྱ་ཆེན་ལྡན། །མ་ནོར་བློ་གྲོས་མཐའ་ཡས་བློ་གྲོས་ཅན། །ཡེ་ཤེས་མཆོག་ལྡན་ཁྱད་པར་བློ་ཅན་གྱི། །རྣམ་ཐར་མཆོག་རྣམས་འདི་ལྟ་རྣམས་ཀྱིས་བཤད། །རྣམ་
ཐར་དམ་པ་འདི་དག་སུས་ཐོས་ནས། །ཡིད་ཆེས་འཛིན་ཅིང་འཇིག་རྟེན་སྒྲོག་བྱེད་པ། །དེ་དག་ངོ་མཚར་རྨད་བྱུང་ཆོས་ལྡན་ཏེ། །དེ་དག་དགའ་བྱེད་མི་ཡི་འཇིག་རྟེན་ན། །འདི་འདྲའི་ཆོས་འདིར་གང་དག་དད་གྱུར་པ། །སེམས་ཅན་སོ་སོའི་སྐྱེ་བོའི་ཚོགས་ན་དཀོན། །གང་དག་དགེ་

</font><hr>57-1-81a<br><font size=+2>

བསགས་བསོད་ནམས་བྱས་གྱུར་པ། །དེ་དག་རྒྱུ་ཡི་སྟོབས་ཀྱིས་འདི་ལ་དད། །གང་དག་ཉན་ཐོས་ཐེག་པའང་ཡིད་ཆེས་པའི། །མི་དག་མི་ཡི་འཇིག་རྟེན་རྣམས་ན་ཉུང ། །དེ་བས་རྐྱེན་གྱི་ཐེག་པར་རབ་ཏུ་ཉུང ། །ཐེག་པ་ཆེན་པོར་དེ་དག་དེ་བས་ཉུང ། །ཐེག་པ་ཆེ་ལ་
ཞུགས་པ་དེ་དཀོན་ཏེ། །གང་དག་ཆོས་འདིར་དད་པའང་རབ་དཀོན་ན། །འཇུག་ཅིང་འཛིན་པ་སྨོས་ཀྱང་ཅི་དགོས་ཏེ། །གང་དག་དེ་བཞིན་སྒྲུབ་པ་སྨོས་ཅི་དགོས། །གང་དག་སྟོང་གསུམ་རི་དང་རྒྱ་མཚོར་བཅས། །ཕྱི་མའི་བསྐལ་པར་མགོ་བོས་འདེག་བྱེད་ཀྱང ། །ཆོས་འདིར་དད་པའི་བྱ་
དཀའ་ཅི་འདྲ་བ། །དེ་འདྲ་དེ་ནི་དེ་ལ་ཡོད་མ་ཡིན། །ལ་ལས་སྟོང་གསུམ་རྡུལ་སྙེད་སེམས་ཅན་ལ། །བདེ་བ་ཀུན་གྱིས་བསྐལ་པར་བསྙེན་བཀུར་ཀྱང ། །ཆོས་འདིར་དད་པའི་བསོད་ནམས་ཅི་འདྲ་བ། །བསོད་ནམས་ཁྱད་པར་དེ་འདྲ་དེ་ལ་མེད། །ལ་ལས་ཞིང་བཅུ་རི་དང་རྒྱ་མཚོར་བཅས། །
ལག་པའི་མཐིལ་དུ་བསྐལ་པར་མཁར་འཛིན་ཀྱང ། །ཆོས་འདིར་དད་པའི་བྱ་དཀའ་ཅི་འདྲ་བ། །དེ་འདྲ་དེ་ནི་དེ་ལ་ཡོད་མ་ཡིན། །ལ་ལས་ཞིང་བཅུའི་རྡུལ་སྙེད་སེམས་ཅན་ལ། །དགེ་བ་ཀུན་གྱིས་བསྐལ་པར་བསྙེན་བཀུར་ཀྱང ། །ཆོས་འདིར་དད་པའི་བསོད་ནམས་ཅི་འདྲ་བ། །
བསོད་ནམས་ཁྱད་པར་དེ་འདྲ་དེ་ལ་མེད། །ལ་ལས་ཞིང་བཅུའི་རྡུལ་སྙེད་སངས་རྒྱས་རྣམས། །བདེ་བ་ཀུན་གྱིས་བསྐལ་པར་བསྙེན་བཀུར་བས། །གང་གིས་ཆོས་ཀྱི་ལེའུ་འདི་གཟུང་བྱས་པ། །བསོད་ནམས་དེ་ནི་དེ་བས་ཁྱད་པར་འཕགས། །རྣམ་ཐར་དེ་དག་རབ་ཏུ་བསྟན་པའི་ཚེ། །
ཕྱོགས་བཅུའི་ཞིང་རྣམས་ཐམས་ཅད་གཡོས་པར་གྱུར། །བདུད་ཀྱི་གནས་རྣམས་མོག་མོག་བྱས་གྱུར་ཅིང ། །སྒྲ་རབ་ཕྱུང་བས་ངན་སོང་རབ་ཏུ་ཞི། །ཕྱོགས་བཅུ་ཀུན་གྱི་མི་ཡི་སེང་གེ་རྣམས། །དེ་དག་ཀུན་གྱིས་མངོན་པར་ཞལ་བསྟན་ཏེ། །ཕྱག་བརྐྱང་མཛད་ནས་ཡོན་ཏན་
མཐའ་ཡས་པ། །བཟང་པོ་དཔལ་གྱི་མགོ་ལ་བཞག་པར་གྱུར། །ཕྱག་གི་མཐིལ་གྱིས་མགོ་ལ་བྱུག་མཛད་དེ། །རྣམ་ཐར་འདི་དག་ལེགས་པར་བཤད་པ་ལེགས། །ཁྱོད་ཀྱིས་ལེགས་བསྟན་རྗེས་སུ་ངེད་དགྱེས་ཞེས། །སངས་རྒྱས་དེ་དག་ཀུན་གྱིས་

</font><hr>57-1-81b<br><font size=+2>

གསུང་བརྗོད་དོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་བསྟན་པ་འདི་དག་བཀའ་སྩལ་ནས་ཅང་མི་གསུང་བར་གྱུར་ཏོ། །དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གང་དག་འཁོད་པའི་ལྷ་ཐམས་ཅད་དང ། མི་དང་མི་མ་ཡིན་པ་དེ་
དག་ཐམས་ཅད་ཀྱིས་དེ་བཞིན་གཤེགས་པས་འདི་ལེགས་པར་བཀའ་སྩལ་ཏོ། །ཀྱེ་མ་དེ་བཞིན་གཤེགས་པས་ཆོས་ཀྱི་འཁོར་ལོ་བསྐོར་བ་གཉིས་པ་འདི་མཛད་དོ། །ཆོས་བསྟན་པ་འདི་སྔོན་མ་ཐོས་སོ། །སེམས་ཅན་གང་དག་ཆོས་ཀྱི་རྣམ་གྲངས་འདི་རྙེད་པར་འགྱུར་བ་
དེ་དག་ནི་ཤིན་ཏུ་དཀོན་ཏེ། །སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ཡིན་ནོ། །སེམས་ཅན་དེ་དག་ནི་སངས་རྒྱས་མང་པོ་ལ་བསྙེན་བཀུར་བྱས་པ་ཡིན་ནོ། །སེམས་ཅན་དེ་དག་ནི་ལྷ་དང་བཅས་པ་བདུད་དང་བཅས་པ་ཚངས་པ་དང་བཅས་པའི་འཇིག་རྟེན་ལ་
མཆོད་རྟེན་ལྟ་བུར་འགྱུར་ཏེ། དེ་དག་ནི་བདུད་དམ། བདུད་ཀྱི་རིས་ཀྱི་ལྷ་རྣམས་སམ། རབ་ཏུ་བྱུང་བ་རྣམས་སམ། ཁྱིམ་ན་གནས་པ་རྣམས་སམ། དེ་བཞིན་དུ་རྒྱལ་པོ་རྣམས་སམ། བློན་པོ་ཆེན་པོ་རྣམས་སམ། ཁྱིམ་བདག་རྣམས་ཀྱིས་གཙེ་བར་མི་ནུས་སོ་ཞེས་
ཅ་ཅོ་དང་གཞའི་སྒྲ་ཕྱུང་ངོ ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེ་དཀོན་མཆོག་འདི་ལྟ་བུ་དག་འཇིག་རྟེན་དུ་འབྱུང་བ་ནི་རྙེད་པར་དཀའ་བ་ལགས་ཏེ། འོན་ཀྱང་དེ་བཞིན་གཤེགས་པའི་མཐུས་ཆོས་འདི་ལྟ་
བུ་ནི་འཇིག་རྟེན་དུ་བྱུང་ཞིང་དེ་བཞིན་གཤེགས་པའི་མཐུ་ཉིད་ཀྱིས་སེམས་ཅན་དེ་དག་གིས་ཀྱང་ཐོས་ལགས་སོ། །དེ་ནས་བཅོམ་ལྡན་འདས་ཀྱིས་ལྗགས་ཀྱི་དབང་པོ་ཕྱུང་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ཟུང་ཤིག་།ཆོངས་
ཤིག་།ལྷོགས་ཤིག་།ཀུན་ཆུབ་པར་གྱིས་ཤིག་།དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་གཟུང་ལགས་ཏེ། སླན་ཆད་མི་བསྒྱུད་པར་བགྱིད་དོ། །བཅོམ་ལྡན་འདས་ཀྱིས་

</font><hr>57-1-82a<br><font size=+2>

དེ་སྐད་ཅེས་བཀའ་སྩལ་ནས། ཐམས་ཅད་དང་ལྡན་པའི་བྱང་ཆུབ་སེམས་དཔའི་འཁོར་དེ་དང ། བྱང་ཆུབ་སེམས་དཔའ་འཕགས་པ་ཀུན་དུ་བཟང་པོ་དང ། འཇམ་དཔལ་གཞོན་ནུར་གྱུར་པ་དང ། ཚེ་དང་ལྡན་པ་ཤ་ར་དྭ་ཏིའི་བུ་དང ། ཉན་ཐོས་
ཆེན་པོ་གཞན་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའིི་འཇིག་རྟེན་ཡི་རངས་ཏེ། ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དཀོན་མཆོག་ཏ་ལ་ལའི་གཟུངས་ཞེས་བྱ་བའི་ཆོས་ཀྱི་རྣམ་
གྲངས་རྫོགས་སོ།། ་་།།རྒྱ་གར་གྱི་མཁན་པོ་སུ་རེན་དྲ་བོ་དྷི་དང ། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།།</font><hr>

</table>