༄##། །རྒྱ་གར་སྐད་དུ། ཨཱརྱ་མ་ཧ་ལ་ལི་ཀཱ་པ་རི་པྲྀཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བགྲེས་མོས་ཞུས་པ་ཞེས་བྱ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ ཡུལ་བི་ཛི་ན་ཡུལ་རྒྱུ་བ་རྒྱུ་ཞིང་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་ཅིག་ཏུ་གྲོང་ཁྱེར་ཆེན་པོ་ཡངས་པ་ཅན་ག་ལ་བ་དེར་གཤེགས་པ་དང ། དེའི་ཚེ་གྲོང་གི་བུད་མེད་རྒན་མོ་གཏུགས་པ། འཁོགས་པ། ན་ཚོད་ལས་འདས་པར་གྱུར་པ། སྐྱེས་ནས་ལོ་བརྒྱ་ཉི་ཤུ་ལོན་པ་ཞིག་དགོན་པ་ན་རྩཝ་སྡུད་ཅིང་འདུག་སྟེ། བུད་མེད་དེས་བཅོམ་ལྡན་འདས་མཛེས་པ། དང་བར་བྱེད་པ་དབང་པོ་དུལ་བ། ཐུགས་དུལ་བ། དུལ་བ་དང་ཞི་གནས་མཆོག་བརྙེས་པ། སྦས་པ། སྐྱོན་མེད་པ། དབང་པོ་དུལ་བ། མཚོ་ལྟར་དང་ཞིང་ གསལ་ལ་རྙོག་པ་མེད་པ། གསེར་གྱི་མཆོད་སྡོང་ལྟར་མངོན་པར་འཕགས་པ། དཔལ་གྱིས་ལྷམ་མེ། ལྷན་ནེ། ལྷང་ངེ་བ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ་ཐག་རིང་པོ་ནས་བྱོན་པ་མཐོང་ངོ ། །མཐོང་ནས་ཀྱང་སེམས་དད་པར་གྱུར་ནས་བཅོམ་ལྡན་འདས་ལ་དད་པའི་ 59-1-311a སེམས་ཀྱིས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་སྟེ། བུད་མེད་དེས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེ་བ་གང་ནས་མཆིས། རྒ་བ་གང་ནས་མཆིས། གང་དུ་མཆི། བཅོམ་ལྡན་འདས་ན་བ་གང་ནས་མཆིས། འཆི་བ་གང་ནས་མཆིས། གང་དུ་མཆི། བཅོམ་ལྡན་འདས་གཟུགས་གང་ནས་མཆིས། ཚོར་བ་དང ། འདུ་ཤེས་དང་འདུ་བྱེད་ རྣམས་དང ། རྣམ་པར་ཤེས་པ་གང་ནས་མཆིས། གང་དུ་མཆི། བཅོམ་ལྡན་འདས་སའི་ཁམས་གང་ནས་མཆིས། ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་གང་ནས་མཆིས། གང་དུ་མཆི། བཅོམ་ལྡན་འདས་མིག་གང་ནས་ མཆིས། རྣ་བ་དང ། སྣ་དང ། ལྕེ་དང ། ལུས་དང ། ཡིད་གང་ནས་མཆིས། གང་དུ་མཆི། བཅོམ་ལྡན་འདས་ཀྱིས་བཀའ་སྩལ་པ། སྲིང་མོ་སྐྱེ་བ་གང་ནས་ཀྱང་མི་འོང ། རྒ་བ་གང་ནས་ཀྱང་མི་འོང ། གང་དུ་ཡང་མི་འགྲོའོ། །སྲིང་མོ་ན་བ་གང་ནས་ཀྱང་མི་འོང ། འཆི་བ་གང་ནས་ཀྱང་མི་འོང ། གང་དུ་ཡང་མི་འགྲོའོ། །སྲིང་མོ་གཟུགས་གང་ ནས་ཀྱང་མི་འོང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་གང་ནས་ཀྱང་མི་འོང ། གང་དུའང་མི་འགྲོའོ། །སྲིང་མོ་སའི་ཁམས་གང་ནས་ཀྱང་མི་འོང ། ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་གང་ནས་ཀྱང་མི་ འོང ། གང་དུ་ཡང་མི་འགྲོའོ། །སྲིང་མོ་མིག་གང་ནས་ཀྱང་མི་འོང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་གང་ནས་ཀྱང་མི་འོང ། གང་དུ་ཡང་མི་འགྲོའོ། །སྲིང་མོ་འདི་ལྟ་སྟེ། དཔེར་ན་གཙུབ་ཤིང་དང ། གཙུབ་སྟན་ལ་ཡང་བརྟེན་ལ། དེ་བསྐྱེད་པའི་མིའི་རྩོལ་བ་ལ་ཡང་བརྟེན་ན་མེ་འབྱུང་སྟེ། མེ་དེ་ཡང་ རྩཝ་དང་ཤིང་དེ་བསྲེགས་ནས་རྒྱུ་མེད་པ་དང་ཤི་བར་འགྱུར་རོ། །སྲིང་མོ་འདི་ཅི་སྙམ་དུ་སེམས། མེ་དེ་གང་ནས་འོང ། གང་དུ་སོང ། གསོལ་པ། བཅོམ་ལྡན་འདས་ཞུགས་དེ་ནི་ཚོགས་པའི་དབང་གིས་བྱུང ། ཚོགས་པ་དང་བྲལ་བས་འགགས་ཏེ་འགུམ་མོ། །བཀའ་སྩལ་པ། སྲིང་མོ་དེ་བཞིན་དུ་ཆོས་ཐམས་ 59-1-311b ཅད་ཀྱང་ཚོགས་པའི་དབང་གིས་འབྱུང ། ཚོགས་པ་དང་བྲལ་བས་འགགས་ཏེ། འདི་ལ་ཆོས་གང་ཡང་གང་ནས་ཀྱང་འོང་བའམ། གང་དུ་ཡང་འགྲོ་བ་མེད་དོ། །སྲིང་མོ་འདི་ལྟ་སྟེ། མིག་དང་གཟུགས་ལ་བརྟེན་ནས། མིག་གི་རྣམ་པར་ཤེས་པ་བྱུང་ཡང་མིག་གི་རྣམ་པར་ཤེས་པ་དེ་ལ་སྐྱེད་པར་བྱེད་པ་ཡང་ མེད། འགགས་པར་བྱེད་པ་ཡང་མེད། གང་དུ་ཡང་སོགས་པ་མེད། ཕུང་པོ་གང་ལས་ཀྱང་འོང་བའམ། འགྲོ་བ་ཡང་མེད་ལ། གང་གི་རྣམ་པར་ཤེས་པའི་རྐྱེན་གྱིས་ལས་མངོན་པར་འདུས་བྱས་ནས་ཁམས་གསུམ་དུ་འབྲས་བུ་རྣམ་པ་གསུམ་གྱིས་འབྲས་བུ་ཉེ་བར་སྟོན་ཏེ། འབྲས་བུ་དེ་ཡང་སྟོང་པ། འོང་བ་ མེད་པ། འགྲོ་བ་མེད་པ། སུས་ཀྱང་མ་བསྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །དེ་བཞིན་དུ་རྣ་བ་དང ། སྒྲ་དང ། སྣ་དང ། དྲི་དང ། ལྕེ་དང ། རོ་དང ། ལུས་དང ། རེག་བྱ་དང ། ཡིད་དང ། ཆོས་རྣམས་ལ་རྟེན་ནས་ཡིད་ཀྱི་རྣམ་པར་ཤེས་པ་བྱུང་ཡང་ཡིད་ཀྱི་རྣམ་པར་ཤེས་པ་ དེ་ལ་སྐྱེད་པར་བྱེད་པ་ཡང་མེད། འགགས་པར་བྱེད་པ་ཡང་མེད། གང་ཡང་སོགས་པ་ཡང ། ཕུང་པོ་གང་ལས་ཀྱང་འོང་བའམ། འགྲོ་བ་ཡང་མེད་ལ། ཡིད་ཀྱི་རྣམ་པར་ཤེས་པའི་རྐྱེན་གྱིས་ལས་མངོན་པར་འདུ་བྱས་ནས་ཁམས་གསུམ་དུ་འབྲས་བུ་རྣམ་པ་གསུམ་གྱིས་འབྲས་བུ་ཉེ་བར་སྟོན་ཏེ། འབྲས་ བུ་དེ་ཡང་སྟོང་པ་འོང་བ་མེད་པ་འགྲོ་བ་མེད་པ། སུས་ཀྱང་མ་བསྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །སྲིང་མོ་འདི་ལྟ་སྟེ་དཔེར་ན། ཤིང་དང ། པགས་པ་དང ། དབྱུག་གུ་ལ་ཡང་བརྟེན། དེ་སྐྱེད་པའི་མིའི་རྩོལ་བ་ལ་ཡང་བརྟེན་ནས་རྔའི་སྒྲ་འབྱུང་སྟེ། རྔའི་སྒྲ་དེ་ འདས་པ་ཡང་སྟོང ། མ་འོངས་པ་ཡང་སྟོང ། ད་ལྟར་བྱུང་བ་ཡང་སྟོང་སྟེ། སྒྲ་ནི་ཤིང་ལ་ཡང་མི་གནས། པགས་པ་ལ་ཡང་མི་གནས། དབྱུག་གུ་ལ་ཡང་མི་གནས། མིའི་ལག་པ་ལ་ཡང་མི་གནས་མོད་ཀྱི། འོན་ཀྱང་དེའི་རྐྱེན་གྱིས་སྒྲ་འདོགས་ཏེ། གང་སྒྲ་དེ་འདོགས་པ་དེ་ཡང་སྟོང་པ། འོང་བ་མེད་པ། འགྲོ་བ་མེད་པ། སུས་ཀྱང་མ་བསྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །སྲིང་མོ་དེ་བཞིན་དུ་ཆོས་ཐམས་ཅད་ནི་རྐྱེན་གྱི་ཁོ་ན་ལ་རག་ལས་པ་སྟེ། འདི་ལྟར་མ་རིག་པ་དང ། སྲེད་པ་དང ། ལས་དང ། རྣམ་པར་ཤེས་པའོ། །ཆོས་དེ་དག་ཡོད་ན་འཆི་འཕོ་དང ། སྐྱེ་བ་འདོགས་ཏེ། 59-1-312a གང་འཆི་འཕོ་དང་སྐྱེ་བ་འདོགས་པ་དེ་ཡང་སྟོང་པ། འོང་བ་མེད་པ། འགྲོ་བ་མེད་པ། སུས་ཀྱང་མ་བསྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །སྲིང་མོ་དེ་ལྟར་སུས་རྔ་སྒྲའི་ཚུལ་རབ་ཏུ་ཤེས་པ་དེས་སྟོང་པ་ཉིད་རབ་ཏུ་ཤེས་སོ། །སུས་སྟོང་པ་ཉིད་ རབ་ཏུ་ཤེས་པ་དེས་མྱ་ངན་ལས་འདས་པ་རབ་ཏུ་ཤེས་སོ། །སུས་མྱ་ངན་ལས་འདས་པ་རབ་ཏུ་ཤེས་པ་དེ། ཐ་སྙད་རྣམ་པ་སྣ་ཚོགས་ཀྱིས་ཐ་སྙད་འདོགས་ཀྱང་དངོས་པོ་གང་ལ་ཡང་མངོན་པར་ཞེན་པ་མེད་དེ། བདག་གི་འདི་དང ། དེ་ནི་བདག་གོ་ཞེའམ། སེམས་ཅན་ནོ་ཞེའམ། སྲོག་གོ་ཞེའམ། གསོ་ བའོ་ཞེའམ། སྐྱེས་བུའོ་ཞེའམ། གང་ཟག་གོ་ཞེའམ། ཤེད་ལས་སྐྱེས་སོ་ཞེའམ། ཤེད་བུའོ་ཞེའམ། བྱེད་པ་པོ་ཞེའམ། བྱེད་དུ་འཇུག་པ་པོ་ཞེའམ། ལེན་པ་པོ་ཞེའམ། འདོར་བ་པོ་ཞེས་དེ་མངོན་པར་ཞེན་པ་མེད་པར་ཆོས་སྟོན། ཆོས་རབ་ཏུ་སྟོན། ཡང་དག་པའི་མཐའ་སྟོན། ཡང་དག་པའི་མཐའ་རབ་ཏུ་ སྟོན་ཏོ། །སྲིང་མོ་འདི་ལྟ་སྟེ་དཔེར་ན་རི་མོ་མཁན་ནམ། རི་མོ་མཁན་གྱི་སློབ་མ་ཞིག་གིས་རས་བཅོས་མ་ཤིན་ཏུ་ཕྱི་བདར་བྱས་པའམ། ཤིང་ལེབ་བམ། རྩིག་ངོས་ཤིན་ཏུ་ཕྱི་བདར་བྱས་པ་ཞིག་ལ་ཚོན་སྣ་ཚོགས་འགྱེད་ཅིང་གཟུགས་ཀྱི་རྣམ་པ་གང་དང་གང་འདོད་པ་འདི་ལྟ་སྟེ། སྐྱེས་པའི་གཟུགས་ཀྱི་རྣམ་པའམ། བུད་མེད་ཀྱི་གཟུགས་ཀྱི་རྣམ་པའམ། གླང་པོ་ཆེའི་གཟུགས་ཀྱི་རྣམ་པའམ། རྟའི་གཟུགས་ཀྱི་རྣམ་པའམ། བོང་བུའི་གཟུགས་ཀྱི་རྣམ་པའམ། དེ་དག་ཡན་ལག་དང ། ཉིང་ལག་དང ། དབང་པོ་ཐམས་ཅད་མ་ཚང་བ་མེད་པར་ཚེགས་ཆུང་ངུས་མངོན་པར་སྒྲུབ་ཅིང་འདྲི་སྟེ། མངོན་པར་སྒྲུབ་པར་བྱེད་ཀྱང ། དེ་ལ་ཆོས་ གང་ཡང་རི་མོ་མཁན་གྱི་ལག་པའམ། སེམས་ལས་གཟུགས་སུ་འཕོས་པ་མེད་མོད་ཀྱི། འོན་ཀྱང་དེའི་རྐྱེན་གྱིས་གཟུགས་འདོགས་ཏེ། གང་གཟུགས་འདོགས་པ་དེ་ཡང་སྟོང་པ། འོང་བ་མེད་པ། འགྲོ་བ་མེད་པ། སུས་ཀྱང་མ་བསྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་ པའོ། །སྲིང་མོ་དེ་བཞིན་དུ་བསོད་ནམས་སུ་ཉེ་བར་འགྲོ་བའི་མངོན་པར་འདུ་བྱེད་པ་རྣམས་ཡོད་ན་འདི་ལྟ་སྟེ་ལྷའམ་མིའི་ནང་དུ་བསོད་ནམས་སུ་ཉེ་བར་འགྲོ་བའི་ལུས་མངོན་པར་གྲུབ་ཀྱང་དེ་ལ་གང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ནི་རྡུལ་ཙམ་ཡང་མེད་མོད་ཀྱི་འོན་ཀྱང་མངོན་པར་འདུ་བྱེད་པའི་རྐྱེན་ 59-1-312b གྱིས་སྐྱེ་བ་སྣ་ཚོགས་ཡོད་དེ། སྐྱེ་མཆེད་ཡོད་པའི་ལུས་སུ་རྣམ་པར་རིག་གོ། །དེ་བཞིན་དུ་བསོད་ནམས་མ་ཡིན་པར་ཉེ་བར་འགྲོ་བའི་འདུ་བྱེད་རྣམས་ཡོད་ན་འདི་ལྟ་སྟེ། སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་ནམ། ལྷ་མ་ཡིན་རྣམས་སུ་བསོད་ནམས་མ་ཡིན་པའི་ ལུས་མངོན་པར་འགྲུབ་ཀྱང་དེ་ལ་གང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ནི་རྡུལ་ཙམ་ཡང་མེད་མོད་ཀྱི། འོན་ཀྱང་མངོན་པར་འདུ་བྱེད་པའི་རྐྱེན་གྱིས་སྐྱེ་བ་སྣ་ཚོགས་ཡོད་དེ། སྐྱེ་མཆེད་ཡོད་པས་ལུས་སུ་རྣམ་པར་རིག་གོ། །སྲིང་མོ་འདི་ལྟ་སྟེ་དཔེར་ན་ཀླུ་རྣམས་ཀྱི་ཀླུའི་མཐུས་སྤྲིན་གྱི་ཚོགས་ རྒྱ་ཆེན་པོ་འབྱུང་སྟེ། སྤྲིན་གྱི་དྲ་བ་དེ་དག་གིས་ས་ཁེབས་པར་བྱས་ནས་ཆར་ཆེན་པོ་རྒྱ་ཆེར་འབེབས་ཏེ། ཆར་ཆེན་པོ་རྒྱ་ཆེར་ཕབ་ནས་ཀྱང་སྒང་དང་གཤོངས་ངོམས་པར་བྱེད་དེ། སྒང་དང་གཤོངས་ངོམས་པར་བྱས་ནས། སླར་འགྲོ་ཡང་དེ་དག་ཀླུའི་ལུས་སམ་སེམས་ལས་བྱུང་བ་ཡང་མེད་མོད་ཀྱི། ཀླུ་རྣམས་ ཀྱིས་ཀླུའི་མཐུ་ཉིད་ཀྱིས་སྤྲིན་གྱི་ཚོགས་རྒྱ་ཆེན་པོ་འབྱུང་ངོ ། །སྲིང་མོ་དེ་བཞིན་དུ་བསོད་ནམས་སུ་ཉེ་བར་འགྲོ་བའི་མངོན་པར་འདུ་བྱེད་པ་ཡོད་ན་འདི་ལྟ་སྟེ། ལྷའམ་མིའི་ནང་དུ་བསོད་ནམས་སུ་ཉེ་བར་འགྲོ་བའི་ལུས་རྣམས་མངོན་པར་འགྲུབ་བོ། །དེ་བཞིན་དུ་བསོད་ནམས་མ་ཡིན་པར་ཉེ་བར་འགྲོ་བའི་མངོན་པར་ འདུ་བྱེད་པ་རྣམས་ཡོད་ན་འདི་ལྟ་སྟེ་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ།གཤིན་རྗེའི་འཇིག་རྟེན་ནམ། ལྷ་མ་ཡིན་རྣམས་སུ་བསོད་ནམས་མ་ཡིན་པར་ཉེ་བར་འགྲོ་བའི་ལུས་མངོན་པར་འགྲུབ་ཀྱང་དེ་ལ་མངོན་པར་འདུ་བྱ་བ་ཡང་སྟོང་པ། མངོན་པར་འདུ་བྱེད་པ་པོ་ཡང་སྟོང་པ། མངོན་པར་ འདུ་བྱེད་པའི་འབྲས་བུ་ཡང་སྟོང་པའོ། །སྲིང་མོ་མི་གཡོ་བར་ཉེ་བར་འགྲོ་བའི་མངོན་པར་འདུ་བྱེད་པ་རྣམས་ཡོད་ན་གཟུགས་མེད་པ་རྣམས་སུ་རྣམ་པར་ཤེས་པ་མཚམས་སྦྱོར་ཏེ། གང་གིས་རྣམ་པར་ཤེས་པ་དེ་གཟུགས་མེད་པ་རྣམས་སུ་མཚམས་སྦྱོར་བ་དེ་ཡང་སྟོང་པ། གང་རྣམ་པར་ཤེས་པ་དེ་གཟུགས་མེད་པ་རྣམས་ སུ་མཚམས་སྦྱོར་བ་དེ་ཡང་སྟོང་པའོ། །དེ་ཅིའི་ཕྱིར་ཞེ་ན། སྲིང་མོ་ཆོས་ཐམས་ཅད་ནི་ངོ་བོ་ཉིད་ཀྱིས་སྟོང་པའི་ཕྱིར་ཏེ། འོན་ཀྱང་ཆོས་རྣམས་འདོགས་སོ། །མཁས་པ་རྣམས་ནི་དེ་ལ་མངོན་པར་མི་ཞེན་ཏེ། མངོན་པར་ཞེན་པ་མེད་པས་མི་རྩོད་དོ། །རྩོད་པ་མེད་པ་ནི་དགེ་སྦྱོང་གི་ཆོས་ཀྱི་མཆོག་གོ། །གསོལ་པ། འདི་ལྟར་བཅོམ་ 59-1-313a ལྡན་འདས་ཀྱིས་ཆོས་ཟབ་མོ་བཀའ་སྩལ་པས་བཅོམ་ལྡན་འདས་བདག་ཀྱང་ཆོས་འདི་དག་ལ་ཤེས་རབ་ཀྱི་མིག་འཇུག་སྟེ་སླར་ཞིང་ཡིད་གཉིས་མ་མཆིས། ཐེ་ཚོམ་མ་མཆིས་སོ། །བཅོམ་ལྡན་འདས་བདག་སྔོན་ནི་ཆོས་འདི་དག་མ་ཐོས་པས་ཐེ་ཚོམ་མཆིས་སོ། །ད་ནི་བདག་རྒས། །བདག་འཁོགས། བདག་སྡུག་བསྔལ། བདག་དབུལ། བདག་མགོན་མ་མཆིས་ཏེ། བདག་མི་འཚོ་ཞིང་འགུམ་མི་མངའོ། །བཅོམ་ལྡན་འདས་བདག་གིས་ཆོས་འདི་ཐོས་པས་འདི་ན་རྒས་པའམ། དབུལ་བའམ། བདེ་བའམ། ནད་མ་མཆིས་པའམ། ན་བའམ། ཕྱུག་པའམ། དབུལ་བ་གང་ཡང་མ་མཆིས་སོ། །ཞེས་བདག་ཏུ་འདུ་ཤེས་པ་ དང་བྲལ་བར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་ཟབ་མོ་འདི་ལྟ་བུ་བཀའ་སྩལ་པ། དེས་ཀྱང་འདི་ལྟར་རབ་ཏུ་བཙལ་བས་བུད་མེད་འདི་ནི་བསོད་ནམས་དང་ལྡན་པ་མཁས་པ། ཤེས་རབ་ཅན་ གྱི་རང་བཞིན་ཅན་ལགས་པ་སྙམ་བདག་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །ཀུན་དགའ་བོ་ཇི་སྐད་སྨྲས་པ་དེ་དེ་བཞིན་ཏེ། བུད་མེད་འདི་ནི་བསོད་ནམས་དང་ལྡན་པ་མཁས་པ། ཤེས་རབ་ཀྱི་རང་བཞིན་ཅན་ནོ། །ཀུན་དགའ་བོ་བུད་མེད་འདི་ཚེ་རབས་ལྔ་བརྒྱའི་བར་དུ་ངའི་ མར་གྱུར་ཏེ། ཀུན་དགའ་བོ་ངས་ཚེ་རབས་དེ་དང་དེ་དག་ཏུ་ཡང་བུད་མེད་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བ་བསྐྱེད་དོ། །ཀུན་དགའ་བོ་ང་བུད་མེད་འདི་ལ་ཤིན་ཏུ་ཕངས་པར་བྱ་བ་དང ། དང་བ་དང་གུས་པར་གྱུར་ཏོ། །འདི་ཡང་བདག་གི་བུ་སྤྱད་པ་གང་ལ་སྤྱོད་པའི་སྤྱད་པ་དེ་ལ་བདག་གིས་ཀྱང་སྤྱད་དེ། ཐེག་ པ་བདེ་བའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་སྙམ་མོ། །གསོལ་པ། བཅོམ་ལྡན་འདས་འདི་ཅིའི་སླད་དུ་འདི་ལྟར་དབུལ་བར་གྱུར། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ང་བྱང་ཆུབ་སེམས་དཔའི་སྤྱད་པ་སྤྱོད་པ་ན་གང་གི་ཚེ་བཅོམ་ལྡན་འདས་དེ་བཞིན་ གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་བསྟན་པ་ལ་ང་རབ་ཏུ་བྱུང་བར་གྱུར་པ་དེའི་ཚེ་ཀུན་དགའ་བོ་བུད་མེད་འདི་ངའི་མར་གྱུར་ཏེ། དེས་འདོད་པས་ང་མ་བཏང་ནས་དེའི་ཕྱིར་ང་ཟ་མ་གཅིག་ཟན་བཅད་པ་དང ། དེའི་འོག་ཏུ་འདིས་འདོད་པས་ང་བཏང་བར་གྱུར་ཏེ། ཀུན་ 59-1-313b དགའ་བོ་འདི་ལས་དེའི་རྣམ་པར་སྨིན་པས་དེ་ལྟར་དབུལ་བར་གྱུར་ཏོ། །ཀུན་དགའ་བོ་འདི་ནི་འདིའི་དབུལ་བའི་ཐ་མ་ཡིན་ཏེ། ཀུན་དགའ་བོ་བུད་མེད་འདི་ནི་འདི་ནས་ཤི་འཕོས་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་བུད་མེད་ཀྱི་ དབང་པོ་ལ་འདོད་ཆགས་དང་བྲལ་ནས་སྐྱེས་པའི་དབང་པོ་ཐོབ་པར་གྱུར་ཏེ། དེར་སྐྱེས་ནས་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་ལ་མཆོད་པ་བྱེད་པར་འགྱུར། སེམས་ཅན་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་དག་བྱང་ཆུབ་ལ་འཛུད་པར་འགྱུར། སེམས་ཅན་ གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་དག་བྱང་ཆུབ་ལ་ཡོངས་སུ་སྨིན་པར་བྱེད་པར་འགྱུར། སེམས་ཅན་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་དག་བྱང་ཆུབ་ལ་འགོད་པར་འགྱུར། སེམས་ཅན་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་དག་བྱང་ཆུབ་ལ་བཀོད་ནས་ད་ སྟེ་བསྐལ་པ་བརྒྱ་སྟོང་ཕྲག་དྲུག་ཅུ་རྩ་བརྒྱད་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཉིད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་ཀྱི་ཡན་ལག་གི་མེ་ཏོག་བྱེད་ཅེས་བྱ་བར་འགྱུར་ཏེ། ཀུན་དགའ་བོ་སུམ་ཅུ་རྩ་གསུམ་པའི་ལྷ་རྣམས་ཀྱི་ལོངས་སྤྱོད་དང ། ཡོངས་སུ་སྤྱོད་པ་ཇི་ལྟ་བ་བཞིན་དུ་སངས་རྒྱས་ཀྱི་ཞིང་དེའི་སེམས་ཅན་རྣམས་ཀྱི་ལོངས་སྤྱོད་པ་དང་ཀུན་སྤྱོད་པ། དེ་ཡང་དེ་དང་འདྲ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་བཀའ་སྩལ་ཏོ། །ང་ཡི་མདུན་ན་ ཐལ་སྦྱར་གང་འདུག་པ། །རྒན་མོ་འདི་ལ་ཀུན་དགའ་ཁྱོད་ལྟོས་ཤིག་།འདི་ནི་མི་ཡི་དམ་པ་སངས་རྒྱས་འགྱུར། །བྱང་ཆུབ་ཡན་ལག་མེ་ཏོག་བྱེད་ཅེས་བྱ། །འདི་ནི་བུད་མེད་དངོས་པོ་འདི་སྤངས་ནས། །བདེ་བ་ཅན་གྱི་འཇིག་རྟེན་ཁམས་སུ་འགྲོ། །རྒྱལ་བ་ཚེ་དཔག་མེད་དེ་བསྙེན་བཀུར་ནས། །ཁམས་གསུམ་རྒྱལ་བ་ མཚུངས་མེད་སངས་རྒྱས་འགྱུར། །འཇིག་རྟེན་ཁམས་གཞན་དག་ན་གང་བཞུགས་པ། །དྲང་སྲོང་ཆེན་པོ་འཇིག་རྟེན་དོན་མཛད་པ། །རྣམ་འདྲེན་དེ་དག་ལ་ཡང་བསྙེན་བཀུར་ནས། །འདི་ནི་མཚུངས་མེད་མི་མཆོག་སངས་རྒྱས་འགྱུར། །དེ་དག་ཀུན་ལས་ཆོས་ཀྱང་ཐོས་གྱུར་ནས། །བསམ་པ་དག་པས་དེ་བཞིན་ 59-1-314a འགྲུབ་པར་འགྱུར། །བྱང་ཆུབ་སེམས་མཆོག་མི་བསྐྱོད་གནས་ནས་ནི། །སེམས་ཅན་དཔག་མེད་ཆོས་ལ་སྤྱོད་པར་བྱེད། །དེ་ཡི་ཚེ་ན་གང་དག་དམན་པ་དང ། །སྣ་ཚོགས་ལུས་དང་ཁ་དོག་ངན་པ་དང ། །རྨོངས་དང་འཐེང་པོ་དེ་བཞིན་ཞར་བ་དང ། །ལག་རྡུམ་མཛེ་ཅན་དེ་དག་འབྱུང་མི་ འགྱུར། །ཉི་ཟླ་མེ་དང་གློག་དང་ནོར་བུ་རྣམས། །དེ་དག་འོད་ནི་དེ་ཚེ་འབྱུང་མི་འགྱུར། །རྣམ་འདྲེན་བྱང་ཆུབ་ཡན་ལག་མེ་ཏོག་གི། །ཐུབ་པའི་འོད་ཀྱིས་ཀུན་དུ་གསལ་བར་ཁྱབ། །སུམ་ཅུ་རྩ་གསུམ་ལྷ་མཆོག་རྣམས་ཀྱི་ནི། །ཆུ་ཞེང་རྟགས་དང་ཁ་དོག་ཅི་འདྲ་བ། །དེ་འདྲའི་རང་བཞིན་ཅན་གྱི་སྐྱེ་བོ་ཡིས། །དེ་ཚེ་མ་སྨད་ ཞིང་ནི་གང་བར་འགྱུར། །དེ་ན་བུད་མེད་བདུད་ཀྱི་རིས་ཀྱང་མེད། །བདུད་ཀྱི་བུད་མེད་བདུད་ཀྱི་ཕྱག་བརྙན་མེད། །བདེ་བར་གཤེགས་པ་དེ་ན་ཆོས་སྟོན་ཚེ། །དེ་ན་མུ་སྟེགས་ཅན་གྱི་མིང་མི་གྲགས། །བདེ་བར་གཤེགས་པ་དེ་ན་ཆོས་སྟོན་ཚེ། །དེ་དུས་ཡི་དགས་དུད་འགྲོའི་སྐྱེས་གནས་དང ། །སེམས་ དམྱལ་ངན་སོང་རྣམས་ཀྱི་མིང་མི་གྲགས། །དེ་ན་བུད་མེད་མིང་ཡང་གྲགས་མི་འགྱུར། །འདི་ན་ཉན་ཐོས་རྐྱེན་གྱི་ཐེག་པ་ལྟར། །དེ་ཚེ་ཐེག་པ་རྣམ་པར་གཞག་པ་མེད། །ཀུན་ཀྱང་རྫོགས་པའི་བྱང་ཆུབ་སེམས་དང་ལྡན། །དེ་དག་བྱམས་ལ་གནས་ཤིང་སྙིང་རྗེ་ཅན། །ཞིང་དེར་མི་རྣམས་ཐམས་ ཅད་རྟག་པར་ཡང ། །བརྫུས་ཤིང་སྐྱེས་ཏེ་མངལ་ལས་རྣམ་པར་ཐར། །སྐྱེ་དྲན་བློ་མཆོག་ལྡན་ཤིང་མཁས་པ་སྟེ། །ལེགས་པར་གསུངས་པ་ཐོས་ནས་ཐོས་པ་འཛིན། །ཞིང་གི་བཀོད་ཚུལ་ཅི་འདྲ་འབྱུང་འགྱུར་བ། །ཡོན་ཏན་བསྐལ་པར་འདིར་ནི་བརྗོད་བྱས་ཀྱང ། །རྒྱ་མཚོ་ལས་ནི་ཆུ་ཐིགས་གཅིག་ ལྟ་བུར། །དཔེ་ཙམ་དུ་ཡང་བརྗོད་པར་མི་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང ། རྒན་མོ་དེ་དང ། བྱང་ཆུབ་སེམས་དཔའ་དེ་དག་དང ། དགེ་སློང་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་ འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་བགྲེས་མོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། |