rKTs


D184

(e-text produced by ADARSHA)

see text in transliteration
61-1-96b
༄##། །རྒྱ་གར་སྐད་དུ། ཨཱརྱ་བོ་དྷི་ས་ཏྭ་ཙརྱ་ནིར་དེ་ཤ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བྱང་ཆུབ་སེམས་ དཔའི་སྤྱོད་པ་བསྟན་པ་ཞེས་བྱ་བ་ཐེག་པ་ཆེན་པོའི་མདོ།སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡངས་པ་ཅན་ན་ཚལ་ཆེན་པོའི་ཁང་པ་བརྩེགས་པའི་གནས་ན་དགེ་སློང་སྟོང་
61-1-97a
ཐམ་པའི་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་སོན་པ། སྤྱོད་ལམ་ཞི་བ་དང ། དུལ་བ་ དང ། རྣམ་པར་གྲོལ་བ་དང ། མ་བརྟགས་པ་དང་ལྡན་པ་ཤ་སྟག་ལ་འདི་ལྟ་སྟེ། ཚེ་དང་ལྡན་པ་ཀུན་དགའ་བོ་གང་ཟག་གཅིག་ནི་མ་གཏོགས་ཏེ། དེ་ཡང་བཅོམ་ལྡན་འདས་ཀྱིས་ཉམས་སུ་ལེན་པར་བཀའ་སྩལ་ཏེ། ཚེ་འདི་ཉིད་ལ་ལུང་བསྟན་པ་དང ། བྱང་ཆུབ་སེམས་ དཔའ་སྟོང་ཐམ་པ་ཐམས་ཅད་ཀྱང་ཕྱིར་མི་ལྡོག་པ། ཐམས་ཅད་ཀྱང་གཟུངས་ཐོབ་པ། ཐམས་ཅད་ཀྱང་མཉམ་པ་ཉིད་ཀྱི་བཟོད་པ་དང་ལྡན་པ། ཐམས་ཅད་ཀྱང་ཇི་སྐད་སྨྲས་པ་དེ་བཞིན་དུ་བྱེད་པའི་ས་ཐོབ་པ། མཁས་པ། དྲང་པོ། དད་པ་དང་ལྡན་པ། རྟོག་པ་མང་བ། དང་བ་གཙོ་ བོར་བྱེད་པ། བཞིན་འཛུམ་པ། ཁྲོ་གཉེར་མེད་པ། གཡོ་མེད་པ། བསྒྲུབ་པ་དང་ལྡན་པ། ཆོས་ཐམས་ཅད་ཀྱི་རང་བཞིན་རྗེས་སུ་རྟོགས་པ། ཆོས་བསྟན་པས་ཡོངས་སུ་མི་སྐྱོ་བ། སངས་རྒྱས་ཀྱི་ཡེ་ཤེས་ཡང་དག་པར་སྐྱེས་པ་ཡོངས་སུ་སྨིན་པར་བྱེད་པ། ལྡེམ་པོ་དག་ལ་ཕྱིན་ཅི་མ་ལོག་པའི་བཟོད་པ་དང་ལྡན་པ། ཡུལ་ཐམས་ཅད་ཕྱིན་ཅི་མ་ལོག་པའི་ས་དང་ལྡན་པ། དུས་ཤེས་པ། ཚོད་ཤེས་པ། སྐབས་ཤེས་པ། རན་པ་ཤེས་པ། རྒོད་པ་མེད་པ། ཁེངས་པ་མེད་པ། སྤྱོད་ལམ་ཐ་མལ་པ་ཕུན་སུམ་ཚོགས་པ། སྟོང་པ་ཉིད་ཀྱི་ཏིང་ངེ་འཛིན་ལ་མཁས་པ། འབྱུང་བ་དང་འཇིག་པ་ཡོངས་སུ་སྤངས་པ། སྨོན་པ་མེད་པའི་ཏིང་ངེ་འཛིན་དང་ལྡན་པ། འཁོར་བ་ལ་ཡུན་རིང་དུ་སྤྱོད་པ་ལ་ཞུགས་པ། མཚན་མ་མེད་པའི་ཏིང་ངེ་འཛིན་དང་ལྡན་པ། སྤྲོས་པའི་རྣམ་པ་ཐམས་ཅད་ཀྱི་
61-1-97b
མཚན་མ་ལེགས་པར་བཟུང་བ། སེམས་ཅན་ཡོངས་སུ་སྨིན་པར་བྱ་བ་ལ་མཁས་པ། འདུ་ཤེས་ཐམས་ཅད་དང་བྲལ་བ། ཉན་ཐོས་ཀྱི་ཐེག་པ་རྣམ་པར་གཞག་པ་ལ་མཁས་པ། ཆོས་བསྟན་པ་ཡང་དག་པར་དབྱེ་བར་འཇུག་པར་བྱེད་པ། རང་སངས་རྒྱས་ཀྱི་ཐེག་པ་སྟོན་ པ། ཉེ་བར་ཞི་བའི་བསྔགས་པ་བརྗོད་པ། བྱང་ཆུབ་སེམས་དཔའ་ཡང་དག་པར་སློང་བ། སྤྱོད་པ་ཇི་ལྟ་བ་བཞིན་དུ་ཞེ་འགྲས་པ་མེད་པར་ཆོས་སྟོན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། འཇམ་དཔལ་གཞོན་ནུར་གྱུར་པ་དང ། སྤོབས་པ་བརྩེགས་པ་དང ། ལག་ན་རིན་ཆེན་ལྡན་དང ། སྤོས་འོད་དང ། མཐའ་ཡས་སྣང་བའི་བློ་གྲོས་དང ། ངན་སོང་སྤོང་དང ། དོན་གྲུབ་སེམས་པ་དང ། ཡོན་ཏན་རྒྱལ་པོ་སྣང་དང ། མྱ་ངན་གྱི་མུན་པ་ཐམས་ཅད་སེལ་བའི་བློ་གྲོས་དང ། མི་མཉམ་པ་ཐམས་ ཅད་སྟོན་པ་དང ། དེའི་རང་བཞིན་དུ་མི་གནས་པ་དང ། བློ་མཐའ་ཡས་དང ། བརྩོན་འགྲུས་དང ། རྩལ་བརྟན་པོར་སེམས་པ་དང ། རིན་ཆེན་འབྱུང་གནས་དང ། བཀོད་པའི་རྒྱལ་པོ་དང ། རྣམ་པར་འཕྲུལ་པའི་རྒྱལ་པོ་དང ། འཁྲུལ་པ་མེད་པའི་མཐུ་རྩལ་དང ། ཁྱད་པར་བློ་གྲོས་དང ། ཀུན་ནས་མཛེས་དང ། སྒྲིབ་མེད་སྟོན་དང ། རྣམ་པར་རྩེ་དང ། གསེར་མཆོག་འོད་དཔལ་དང ། ཆོས་ཐམས་ཅད་ལ་རྟག་ཏུ་ལྟ་བའི་བློ་ལྡན་དང ། སྤོས་དྲི་མྱུར་སྦྱིན་མེ་ཏོག་ཀུན་ཏུ་རྒྱས་དང ། གཙོ་བོ་བརྩེགས་དང ། མྱ་ངན་མེད་པའི་ དཔལ་དང ། ལྷུན་པོའི་ལྟོ་དང ། སྤྱན་རས་གཟིགས་དབང་ཕྱུག་དང ། སྤོས་ཀྱི་དབང་ཕྱུག་རྒྱལ་པོ་དང ། མཆོག་ཏུ་དགའ་བའི་རྒྱལ་པོ་དང ། བློ་མཐའ་ཡས་སྒྲུབ་པ་དང ། དམ་པའི་ཆོས་ཐམས་ཅད་མི་བརྗེད་པར་གནས་པ་དང ། བྱང་ཆུབ་སེམས་དཔའ་ སེམས་དཔའ་ཆེན་པོ་སེང་གེ་ལྟར་སྒྲ་མངོན་པར་སྒྲོགས་པ་དང ། དེ་དག་དང་བྱང་ཆུབ་སེམས་དཔའ་སྟོང་ཕྲག་མང་པོ་གཞན་དག་དང་ཡང་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་གསོལ་ཏེ། ལྷུང་བཟེད་བསྣམས་
61-1-98a
ནས་དགེ་སློང་ཉིས་སྟོང་གིས་བསྐོར་ཅིང་མདུན་དུ་བདར་ཏེ་ཡངས་པའི་གྲོང་ཁྱེར་ཆེན་པོར་བསོད་སྙོམས་ལ་གཤེགས་ནས། བཅོམ་ལྡན་འདས་ཀྱིས་ཞབས་སྒོའི་ཐེམ་པ་ལ་བཞག་མ་ཐག་ཏུ་སངས་རྒྱས་བཅོམ་ལྡན་འདས་རྣམས་གྲོང་ཁྱེར་དུ་གཤེགས་ པ་ན་ངོ་མཚར་རྨད་དུ་བྱུང་བའི་ཆོས་རྣམས་འབྱུང་བར་འགྱུར་བ་གང་དག་ཡིན་པ་དེ་དག་བྱུང་སྟེ། ལོང་བ་རྣམས་ནི་མཐོང་བར་གྱུར། འོན་པ་རྣམས་ནི་ཐོས་པར་གྱུར། སྨྱོན་པ་རྣམས་ནི་དྲན་པ་རྙེད་པར་གྱུར་ཏོ། །ལྷའི་མེ་ཏོག་གི་ཆར་ཡང་བབ་བོ། །སྣང་བ་ ཆེན་པོ་ཡང་བྱུང་ངོ ། །སྲང་ཡང་དྲི་མ་མེད་པར་གྱུར་ཏོ། །ལྷའི་སིལ་སྙན་ཡིད་དུ་འོང་བ་དག་ཀྱང་མ་བརྡུངས་པར་གྲག་གོ། །མནར་མེད་པའི་སེམས་ཅན་དམྱལ་བ་ལ་ཐུག་པ་ནས་འོག་མིན་གྱི་གནས་མན་ཆད་ཀྱི་སེམས་ཅན་ཐམས་ཅད་ཀྱང་གཅིག་ཏུ་ངེས་པར་བདེ་བ་དང་ལྡན་ པར་གྱུར་ཏོ། །དེའི་ཚེ་ཡངས་པའི་གྲོང་ཁྱེར་ཆེན་པོ་ན་ལིཙྪ་བཱི་སེང་གེའི་བུ་རིན་ཆེན་བྱིན་ཞེས་བྱ་བ་སྐྱེས་ནས་ལོ་གསུམ་ལོན་པ་མ་མའི་པང་པ་ན་འདུག་པ་ཁང་བཟངས་ཀྱིས་བརྒྱན་པའི་ཁང་བཟངས་ཀྱི་སྟེང་ན་འདུག་སྟེ། ཁྱེའུ་རིན་ཆེན་བྱིན་གྱིས་རྨད་དུ་བྱུང་བའི་མཚན་མ་དག་མཐོང་ ངོ ། །དེ་ནས་ཁྱེའུ་རིན་ཆེན་བྱིན་གྱིས་རང་གི་མ་མ་ལ་ཚིགས་སུ་བཅད་དེ་སྨྲས་པ། མ་མ་གང་གི་མཐུ་སྟོབས་ཀྱིས། །ཤིན་ཏུ་ཡ་མཚན་བྱུང་བ་སྣང ། །ཉི་མ་བྱེ་བ་རྣམས་ཀྱི་འོད། །ཟིལ་གནོན་སྣང་འདི་སུ་ཞིག་ཡིན། །སྟོང་གསུམ་ས་གཞི་ཁྱབ་གྱུར་ནས། ངན་འགྲོ་སྐེམས་ པར་བྱེད་པ་ཡི། །རྫུ་འཕྲུལ་སྣང་བ་གང་ཡིན་འདི། །མ་མ་བདག་ལ་མྱུར་དུ་སྨྲོས། །དུས་མིན་མེ་ཏོག་ཆར་པ་ཡིས། །སངས་རྒྱས་ཞིང་མཚམས་མེད་པར་མཛེས། །ཕྱོགས་རྣམས་བྱ་ཡི་ཚོགས་རྣམས་ཀྱིས། །སྐད་སྙན་པས་ནི་ཁྱབ་པར་གྱུར། །སྲང་ཡང་མེ་ཏོག་རྣམས་ཀྱིས་ ཁེབས། །མེ་ཏོག་གདུགས་ཀྱང་རྣམ་པར་བྲེས། །སྐྱེས་པ་བུད་མེད་དགའ་རྣམས་ཀྱིས། །ཀུན་ནས་རབ་ཏུ་མཛེས་པར་འདུག་།ལོང་བ་རྣམས་ཀྱིས་མིག་ཀྱང་ཐོབ། །སྐྱེ་བོ་འོན་རྣམས་སྒྲ་ཡང་ཐོས། །བྱད་ངན་བྱད་གཟུགས་ཕུན་སུམ་ཚོགས། །མདོག་ངན་ཁ་དོག་ཕུན་སུམ་ཚོགས། །
61-1-98b
གཡེངས་པ་རྣམས་ཀྱང་དྲན་པ་རྙེད། །ལྕེ་མེད་ཚིག་ནི་རྣམ་པར་དག་།སེམས་ཅན་བྱམས་པའི་སེམས་མེད་པ། །བྱམས་པའི་སེམས་དང་ལྡན་པར་གྱུར། །མ་མ་སེམས་ཅན་ཁྱད་པར་ཅན། །རྫུ་འཕྲུལ་གྲུབ་པ་མཐུ་ལྡན་པ། །འཇིག་རྟེན་དག་ན་རྒྱུ་བ་འདི། །སུ་ཡིན་བདག་ ལ་མྱུར་དུ་སྨྲོས། །དེ་ནས་ཁྱེའུ་རིན་ཆེན་བྱིན་གྱི་མ་མས་ཁྱེའུ་རིན་ཆེན་བྱིན་ལ་ཚིགས་སུ་བཅད་དེ་སྨྲས་པ། རྣམ་པར་དག་པ་སྤྱོད་མཆོག་ལྡན། །རྒྱལ་བ་དྲི་མེད་བློ་མི་དམན། །བསམ་ཡས་མ་ལུས་ཡོངས་སུ་དག་།དབང་ལྡན་ཡོན་ཏན་རིན་ཆེན་འཕགས། །འཇིག་རྟེན་ མགོན་པོ་འཁྲ་ས་མིག་།དེ་བཞིན་གཤེགས་པ་རྩ་ལག་འདི། །བློ་ལྡན་བསོད་སྙོམས་དོན་དུ་གཤེགས། །འཇིག་རྟེན་ཆོས་ལ་རྟེན་པ་མེད། །འདི་ལ་སྡུག་དང་མི་སྡུག་སོགས། །འཇིག་རྟེན་པ་ཡི་རྟོག་མི་མངའ། །པད་མ་ཆུ་ལས་སྐྱེས་པ་ལྟར། །མངའ་བདག་མི་གོས་ སྤྱོད་པར་མཛད། །བློ་གྲོས་ལྡན་པ་ཐེ་ཙོམ་གཅོད། །ཕན་མཛད་ཐུགས་རྗེར་ལྡན་པ་སྟེ། །འགྲོ་བའི་སྡུག་བསྔལ་བསལ་བའི་ཕྱིར། །རྣམ་པར་འདྲེན་པ་འདིར་གཤེགས་སོ། །བསྟོད་ཀྱང་དགྱེས་པར་མི་འགྱུར་ལ། །སྨད་ཀྱང་འཁྲུག་པར་མི་འགྱུར་ཏེ། །ཁོང་ཁྲོ་རྗེས་སུ་ ཆགས་པ་སྤངས། །ཆགས་མེད་རྒྱུ་བ་རླུང་དང་འདྲ། །འདི་ནི་ཆོས་རྒྱལ་དམ་པ་སྟེ། །ཡེ་ཤེས་ཟབ་མོ་ཕུན་སུམ་ཚོགས། །དོན་དམ་དོན་ལ་མཁས་པ་པོ། །འགྲོ་བའི་སློབ་དཔོན་གཤེགས་པ་ཡིན། །དེ་ནི་དབུ་མ་སྟོན་པ་སྟེ། །ཡོད་མེད་འཛིན་ལས་རྣམ་པར་གྲོལ། ། ཆོས་ལམ་ལྡན་ཞིང་ཞི་བ་སྟེ། །བརྟེན་པ་ཐམས་ཅད་ཡོངས་སུ་སྤངས། །ཡེ་ཤེས་ཕུང་པོ་བདག་མེད་བདག་།བསོད་ནམས་ཚོགས་རྣམས་བསྩགས་པ་ཡི། །བདེ་གཤེགས་འཇིག་རྟེན་འདྲེན་པ་པོ། །མཐའ་ཡས་གཟུགས་ཅན་དེང་གཤེགས་སོ། །དབུ་སྐྲ་གཡས་སུ་ འཁྱིལ་པར་གནས། །འཇམ་ཞིང་མདོག་སྣུམ་ལྕང་ལོ་ཅན། །གནག་ཅིང་འཛིངས་པ་མེད་རྣམས་ཀྱིས། །དེ་ཡི་དབུ་ནི་རྣམ་པར་མཛེས། །གཙུག་ཏོར་གཡས་སུ་འཁྱིལ་པ་སྟེ། །དབུ་སྐྲ་འཁྱིལ་ཞིང་ལེགས་པར་གནས། །རི་རབ་རྩེ་མོ་འདྲ་བར་ནི། །དེ་ཡི་དབྱིབས་ནི་མཛེས་
61-1-99a
པ་ཡིན། །དེ་ཡི་སྨིན་མཚམས་མཛོད་སྤུ་མཛེས། །འཇམ་ཞིང་གཡས་སུ་འཁྱིལ་བ་སྟེ། །འོད་ནི་ཤེལ་དང་ཟླ་བ་ཡི། །འོད་ཟེར་དྲ་བ་མང་བས་ལྷག་།དེ་ཡི་ཞལ་ནས་སྤྱན་མཛེས་པ། །མེ་ཏོག་ཨུཏ་པལ་སྔོན་པོ་འདྲ། །བ་ཡི་རྫི་མ་ཡོངས་སུ་དག་།མི་དམར་ མ་འཛིངས་ཞི་བར་གཟིགས། །དཔལ་ལྡན་སེང་གེའི་འགྲམ་པ་འདྲ། །དེ་ནི་རྟག་ཏུ་ཞལ་ཡང་འཛུམ། །སྒྲོས་ནི་བིམ་པ་བཞིན་དུ་དམར། །ཞལ་མཛེས་ལུས་ཅན་ཀུན་འདྲེན་པ། །མཐུ་སྟོབས་ཆེན་པོ་ཕུན་སུམ་ཚོགས། །བསོད་ནམས་བརྒྱ་ཡི་སྟོབས་མངའ་བ། ། ཚེམས་ཀྱི་ཕྲེང་བ་སྤ་བའི་འོད། །སྙོམས་ཤིང་ཐགས་བཟང་ཡོངས་སུ་དག་།དེ་ཡི་ཚེམས་ནི་ཤིན་ཏུ་དཀར། །ལྗགས་ནི་ཤིན་ཏུ་རིང་ཞིང་སྲབ། །བདག་ཉིད་ཀྱི་ནི་ཞལ་གྱི་ངོས། །དེ་ཡིས་ཀུན་ཏུ་ཁྱབ་པར་གནས། །དཔལ་ལྡན་དབུ་ནི་གདུགས་དང་འདྲ། །དེ་བཞིན་དེ་ ནི་ཤངས་ཀྱང་མཐོ། །མདོག་ནི་བཙོ་མའི་གསེར་དང་འདྲ། །དེ་ཡི་ཞལ་གྱི་འཕྲལ་བ་མཛེས། །དེ་ཡི་ཞལ་གྱི་སྨིན་ཚུགས་ནི། །ཁ་དོག་མཐོན་མཐིང་ཤིན་ཏུ་སྡུག་།ཞི་བའི་སྤྱན་ནི་མཛེས་པ་སྟེ། །སྙན་གྱི་དྲུང་དུ་ཐུག་པར་གནས། །སྙན་ཤལ་རིང་ལ་རབ་ཏུ་འཕྱང ། །ཞལ་ མཛེས་སྟོན་གྱི་ཟླ་བས་ལྷག་།ཞལ་རས་པད་མ་རྣམ་དག་འདྲ། །ཞལ་མདངས་དཀར་ལ་དང་ཞིང་གསལ། །བརྟན་པོ་ཚངས་པའི་སྒྲ་སྐད་ལྡན། །དེ་གསུང་ཀ་ལ་པིང་ཀའི་འདྲ། །དེ་ཡི་གསུང་བཟང་ཡིད་དུ་འོང ། །འཇམ་ཞིང་སེམས་ཅན་ཚིམ་པར་བྱེད། །རྨ་བྱ་ངང་ པ་མིའམ་ཅི། །ནེ་ཙོ་རི་སྐེགས་ཁུ་བྱུག་དང ། །འབྲུག་སྒྲ་ཁྲུང་ཁྲུང་ཀུ་ན་ལ། །ཤང་ཤང་ཏེའུ་དང་གླིང་བུ་དང ། །རྫ་རྔའི་སྒྲ་དང་གཞན་དག་ཀྱང ། །སྒྲ་སྐད་སྙན་པ་ཅི་ཡང་རུང ། །དེ་དག་དེ་བཞིན་གཤེགས་པ་ཡི། །གསུང་གི་བཅུ་དྲུག་ཆར་མི་ཕོད། །སྐུལ་མཛད་ དེ་བཞིན་མཉེན་པ་སྟེ། །དེ་ནི་སྙན་ཅིང་འཇམ་པ་དང ། །ཡིད་འོང་དགའ་བྱེད་གསལ་བ་སྟེ། །སྐྱོན་དང་བྲལ་ཞིང་འཇིགས་པ་མེད། །རེ་བ་རྣམས་ལ་ཆར་རྒྱུན་ལྟར། །སེམས་རྒྱུན་ཚིམ་པར་བྱེད་ལ་ཞི། །མ་ཉམས་མ་འཁྲུལ་རབ་ཏུ་ཞི། །དེ་བཞིན་དག་ཅིང་བརྡ་ཕྲད་སླ། །
61-1-99b
སྐལ་དང་ལྡན་ཞིང་སྙན་པར་ལྡན། །དོན་དང་ཡོན་ཏན་ཐམས་ཅད་ཚོགས། །གསུང་གི་རྒྱན་རྣམས་ཕུན་སུམ་ཚོགས། །དེ་ཡི་གསུང་ནི་དགེ་སྐྱེད་པ། །སེམས་ཅན་མོས་པ་ཐ་དད་དང ། །དེ་བཞིན་ངེས་ཚིག་ཐ་དད་རྣམས། །དེ་ཡི་གསུང་ལ་ངེས་པར་དད། །ཡིད་ཀྱང་ རབ་ཏུ་དགའ་བར་འགྱུར། །དེས་ནི་ཕྱོགས་བཅུའི་འཇིག་རྟེན་ཁམས། །གནས་པའི་སེམས་ཅན་གསུང་གིས་ཁྱབ། །མགོན་པོ་དེ་ཡི་གསུང་ཚིག་ནི། །སེམས་ཅན་རྣམས་ལ་དོན་ཡོད་འཇུག་།ཐུབ་པ་སྐྱེས་མཆོག་དེ་ཡི་ནི། །མགུར་ཡང་དུང་འདྲ་དཔུང་མགོ་ཟླུམ། ། དེ་ཡི་ཐལ་གོང་རྒྱས་པ་སྟེ། །དེ་ནི་བདུན་པོ་མཐོ་བ་མངའ། །དེ་ཡི་ཕྱག་ཀྱང་རབ་ཏུ་རིང ། །པགས་པ་གསེར་མདོག་འདྲ་བ་སྟེ། །གསེར་གྱི་སྡོང་པོ་བཞིན་དུ་མཐོ། །ནྱ་གྲོ་ད་ལྟར་ཆུ་ཞེང་གབ། །ཐུགས་ཀ་དཔལ་གྱི་བེའུས་བརྒྱན། །འཁོར་ལོའི་མཚན་ཅན་ པད་མའི་ཕྱག་།ཤིང་བལ་འདབ་ལྟར་རེག་ན་འཇམ། །དེ་ཡི་ཕྱག་གི་སོར་མོ་རིང ། །སྤུ་རྣམས་རེ་རེར་སྐྱེས་ཤིང་ཡར་ཕྱོགས་སྟུག་ལ་འཇམ། །བྲང་གི་ཕེལ་ཀ་ཆེ་ལ་རབ་རྒྱས་ལྟེ་བ་ཟབ། །ཕྱལ་དབྱིབས་གཞུ་འདྲ་གླང་ཆེན་བཞིན་དུ་སྦུབས་སུ་ནུབ། །རྗེ་ངར་ཨེ་ནེ་ཡ་ འདྲ་མདངས་དཀར་འདམ་བུའི་སྦུབས། །ལོང་བུ་མི་མངོན་དེ་ཡི་རྟིང་པ་ལེགས་པར་གྲུབ། །དེ་བཞིན་དྲང་སྲོང་སོར་མོ་རིང་ཞིང་སེན་མོ་དམར། །བདེ་བར་གཤེགས་ཀྱི་ཞབས་ཀྱི་ལོང་བུ་མི་མངོན་ཏེ། །འཁོར་ལོ་ལྕགས་ཀྱུ་བཀྲ་ཤིས་ལྡན་དང་དུང་གིས་སྤྲས། །མགོན་པོ་ དེ་ཡི་ཞབས་གཉིས་མཉམ་ཞིང་ལེགས་གནས་དང ། །ཤིང་བལ་བཞིན་དུ་རེག་ན་འཇམ་ཞིང་བཟང་བ་དང ། །མེ་ཏོག་ཨུཏ་པལ་དམར་པོ་ལེགས་པར་སྐྱེས་པ་ཡི། །ཁ་དོག་འདྲ་བས་ས་གཞི་དག་ལ་གཤེགས་པར་མཛད། །དེ་བཞིན་གཤེགས་པ་སེང་གེའི་སྒྲ་སྒྲོགས་ བདེ་སྦྱིན་པ། །འགྲོ་བ་རྣམས་ཀྱི་གཙོ་བོ་དེ་ནི་འདིར་གཤེགས་ཏེ། །ཡོང་གིས་འཇིགས་པ་མེད་པར་སེང་གེའི་སྒྲ་སྐད་ཀྱིས། །གཉིས་སུ་མེད་ཅིང་སྤྲོས་པ་མེད་པའི་ཆོས་ཀྱང་སྟོན། །དེ་ནས་ཁྱེའུ་རིན་ཆེན་བྱིན་གྱིས་བདག་གི་མ་མ་ལ་འདི་སྐད་ཅེས་སྨྲས་སོ། །མ་མ་བདག་
61-1-100a
སྐར་ཁུང་འདིར་ཞོག་ཤིག་དང ། དེ་བཞིན་གཤེགས་པ་བལྟའོ། །དེ་ནས་མ་མ་དེས་ཁྱེའུ་རིན་ཆེན་བྱིན་སྐར་ཁུང་དུ་བཞག་གོ། །དེ་ནས་བཅོམ་ལྡན་འདས་ཀྱིས་ཁྱེའུ་རིན་ཆེན་བྱིན་གྱི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་སྲང་དེ་ཁོ་ ནར་གཤེགས་སོ། །ཁྱེའུ་རིན་ཆེན་བྱིན་གྱིས་ཀྱང་བཅོམ་ལྡན་འདས་གཤེགས་པ་མཐོང་ངོ ། །མཐོང་ནས་ཀྱང་དེ་འདི་སྙམ་དུ་སེམས་ཏེ། །གང་དག་དེ་བཞིན་གཤེགས་པ་ཡོན་ཏན་ཐམས་ཅད་དང་ལྡན་པ་འདི་ལྟ་བུ་མཐོང་ནས་བྱང་ཆུབ་ཀྱི་སེམས་སྐྱེད་པར་མི་བྱེད་པ་དེ་ དག་ནི་རྙེད་པ་ཉེས་པར་རྙེད་པའོ་སྙམ་མོ། །དེ་ནས་བཅོམ་ལྡན་འདས་ཁྱེའུ་རིན་ཆེན་བྱིན་གྱི་སྒོ་དྲུང་དུ་གཤེགས་སོ། །དེ་ནས་ཁྱེའུ་རིན་ཆེན་བྱིན་འདི་སྙམ་དུ་སེམས་ཏེ། སེམས་ཅན་ཁྱད་པར་ཅན་འདི་ལྟ་བུ་ནི་བསྐལ་པ་བྱེ་བ་ཕྲག་འབུམ་དུ་ཡང་རྙེད་པར་དཀའ་བས། ཁང་བཟངས་ འདི་ལས་བདག་གིས་མཆོང་བར་བྱའོ་སྙམ་མོ། །དེ་ནས་དེའི་ཚེ་ཁྱེའུ་རིན་ཆེན་བྱིན་གྱིས་རིལ་གྱིས་གསེར་ལས་བྱས་པའི་པད་མ་འདབ་མ་འབུམ་དང་ལྡན་པ་བརྩེན་པ་ལག་མཐིལ་དུ་ཁྱེར་རོ། །དེ་ནས་ཁྱེའུ་རིན་ཆེན་བྱིན་གྱིས་ཁང་བཟངས་དེ་ལས་བདག་ཉིད་ཀྱིས་མཆོངས་སོ། ། དེ་སངས་རྒྱས་ཀྱི་མཐུས་ནམ་མཁའ་བར་སྣང་ལ་འདུག་གོ། །དེ་ནས་ཁྱེའུ་རིན་ཆེན་བྱིན་གྱིས་རིལ་གྱིས་གསེར་ལས་བྱས་པའི་པད་མ་འདབ་མ་འབུམ་དང་ལྡན་པ་དེ་བཅོམ་ལྡན་འདས་ལ་ཕུལ་ལོ། །དེ་ཁྱེའུ་རིན་ཆེན་བྱིན་གྱི་ལག་ནས་བཏང་ནས་བཅོམ་ལྡན་འདས་ཀྱིས་དབུའི་དྲང་ཐད་ ཀྱི་སྟེང་གི་ནམ་མཁའ་བར་སྣང་ལ་པད་མའི་གདུགས་སུ་བྱས་ཏེ་རིན་པོ་ཆེའི་དྲ་བ་ཡང་བྲེས་སོ། །དེ་ནས་དེའི་ཚེ་ཁྱེའུ་རིན་ཆེན་བྱིན་གྱིས་ཚིགས་སུ་བཅད་པ་འདི་དག་སྨྲས་སོ། །སངས་རྒྱས་པད་མ་འདི་ཕུལ་བ། །བདག་ནི་ཅི་ཡང་མི་འཚལ་ཏེ། །དོན་རྣམས་ཐམས་ཅད་བཅད་སླད་དུ། ། བདག་ནི་བྱང་ཆུབ་མཆོག་འཚལ་ལོ། །ཇི་ལྟར་བྱང་ཆུབ་མ་སྐྱེས་ལ། །ཐོབ་པ་མ་མཆིས་བཤིག་མ་མཆིས། །བླང་དུ་མ་མཆིས་དོར་མ་མཆིས། །དེ་ལྟར་བདག་གིས་མེ་ཏོག་དབུལ། །བྱིས་པ་རྣམས་ཀྱིས་དོན་གང་བརྟགས། །བརྟགས་པ་དེ་ནི་དོན་མ་མཆིས། །རྟོག་པ་
61-1-100b
ཐམས་ཅད་བཅད་སླད་དུ། །གང་ཟག་མཆོག་ལ་བདག་མཆོད་བགྱིད། །དེ་ཕྱིར་མེ་ཏོག་ཕུལ་བ་འདི། །བདག་ལ་རྣམ་སྨིན་འབྲས་མ་གྱུར། །དངོས་པོ་ཐམས་ཅད་བཅད་སླད་དུ། །པད་མ་འདི་ནི་བདག་གིས་ཕུལ། །བདག་གི་སངས་རྒྱས་ཞིང་དུ་ནི། །རྒྱལ་མཆོག་ ཐེག་པས་འགྲོ་མ་གཏོགས། །ཉན་ཐོས་ཀྱི་ནི་མིང་ཡང་རུང ། །རང་རྒྱལ་མིང་ཡང་འབྱུང་མ་གྱུར། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཁྱེའུ་རིན་ཆེན་བྱིན་ལ་ཚིགས་སུ་བཅད་དེ་སྨྲས་པ། ཁྱོད་ནི་སྟོན་པ་འདི་འདྲ་ལ། །དད་པས་མཆོད་པ་བྱེད་མོད་ཀྱི། །བློ་ གྲོས་ཕྱིན་ཅི་ལོག་གྱུར་ན། །སངས་རྒྱས་སུ་ནི་ཇི་ལྟར་འགྱུར། །དེ་ནས་ཁྱེའུ་རིན་ཆེན་བྱིན་གྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་ཚིགས་སུ་བཅད་དེ་སྨྲས་པ། འདི་དག་ཐམས་ཅད་མ་སྐྱེས་ཏེ། །འདུས་བྱས་དག་ནི་གསོབ་དང་གསོག་།དེ་འདྲ་བ་ཡི་ཆོས་རྣམས་ལ། ། དངོས་པོར་འགྱུར་བ་ག་ལ་ཡོད། །ཁྱོད་ནི་ཆོས་གོས་ངུར་སྨྲིག་བགོས། །དགྲ་བཅོམ་ཉིད་དུ་འཛིན་པར་བྱེད། །རྣམ་ཤེས་འདི་དག་སྤྱོད་ཡུལ་ཡང ། །སྟོང་པ་ཁོ་ན་མ་ཡིན་ནམ། །དམིགས་པ་ལ་ནི་གནས་བཅས་པས། །སངས་རྒྱས་བྱེ་བ་མ་མཉེས་བྱས། །བྱེ་བ་དེ་ཡང་ ཞི་བར་མཐོང ། །སུ་ཡང་མ་མཉེས་བྱས་པ་མེད། །མཽད་གལ་བུ་ལ་ད་དུང་ཡང ། །དམིགས་པ་འཇུག་པ་ཡོད་དམ་ཅི། །ཁྱོད་ཀྱི་སེམས་ནི་གང་ཞིག་གིས། །ཡོན་ཡང་ཡོངས་སུ་སྦྱོང་བར་བྱེད། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཁྱེའུ་རིན་ཆེན་བྱིན་ལ་འདི་སྐད་ ཅེས་སྨྲས་སོ། །ཁྱེའུ་ཅི་དེ་བཞིན་གཤེགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་སམ། ཆོས་ཀྱང་མ་བསྟན་ཏམ། ཁྱེའུ་རིན་ཆེན་བྱིན་གྱིས་སྨྲས་པ། མཽད་གལ་གྱི་བུ་མཁས་པས་ནི་བྱང་ཆུབ་སྤྲོས་པར་མི་བྱའོ། །དེ་བཞིན་ གཤེགས་པ་ཡང་རློམ་སེམས་སུ་མི་བྱའོ། །ཆོས་མི་སྐྱེའོ་སྙམ་དུ་བརྟག་པར་མི་བྱའོ། །ཆོས་ཐམས་ཅད་འདུས་བྱས་སོ་སྙམ་དུ་བརྟག་པར་མི་བྱའོ། །ཆོས་ཐམས་ཅད་འདུས་མ་བྱས་སོ་སྙམ་དུ་བརྟག་པར་མི་བྱའོ། །དེ་བཞིན་དུ་སྦྱར་ཏེ་ཆོས་ཐམས་ཅད་སྐྱེ་བ་དང ། མི་སྐྱེ་བ་དང་།
61-1-101a
དངོས་པོ་དང ། དངོས་པོ་མེད་པ་ཞེས་བྱ་བ་དང ། འཛིན་པ་དང ། གཏོང་བ་ཞེས་བྱ་བ་དང་།ཕྲད་པ་དང་བྲལ་བ་ཞེས་བྱ་བ་དང ། འགྲོ་བ་དང ། འོང་བ་དང ། གནས་པ་དང ། འཕོ་བ་དང ། འདོད་ཆགས་ཀྱི་ཆོས་དང ། ཞེ་སྡང་གི་ཆོས་དང ། གཏི་མུག་གི་ ཆོས་དང ། ཆོས་དང ། ཆོས་མ་ཡིན་པ་ཞེས་བརྟག་པར་མི་བྱའོ། །མ་རིག་པ་ལ་སོགས་པ་ནས་སོ་སོའི་སྐྱེ་བོའི་ཆོས་རྣམས་དང ། ཉན་ཐོས་ཀྱི་ཆོས་རྣམས་དང ། རང་སངས་རྒྱས་ཀྱི་ཆོས་རྣམས་དང ། སངས་རྒྱས་ཀྱི་ཆོས་རྣམས་དང ། ཀུན་ནས་ཉོན་མོངས་པའི་ཆོས་ རྣམས་དང ། རྣམ་པར་བྱང་བའི་ཆོས་རྣམས་དང ། གཟུགས་ཅན་དང ། གཟུགས་ཅན་མ་ཡིན་པ་དང ། འདུ་ཤེས་དང ། འདུ་ཤེས་མེད་པ་དང ། མཚན་ཉིད་དང ། མཚན་ཉིད་མེད་པ་དང ། སྤྱོད་པ་ཡོངས་སུ་དག་པ་དང ། མཉམ་པ་ཉིད་དང ། མི་མཉམ་པ་ཉིད་ དང ། ལུས་དང ། སེམས་དང ། ཆོས་ཐམས་ཅད་ཚུལ་བཞིན་དང ། ཚུལ་བཞིན་མ་ཡིན་པ་ཞེས་བྱ་བའི་བར་དུ་སྐྱེ་བར་འགྱུར་རོ། །ཞེས་བརྟག་པར་མི་བྱའོ། །མཽད་གལ་གྱི་བུ་འདི་ཇི་སྙམ་དུ་སེམས། དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ ཆུབ་མངོན་པར་རྫོགས་པར་འཚང་རྒྱའམ། སྨྲས་པ། དེ་ནི་མ་ཡིན་ནོ། །སྨྲས་པ། ཅི་དེ་བཞིན་གཤེགས་པ་དེ་བཞིན་ཉིད་ལ་མ་གཏོགས་པ་དང ། བྱང་ཆུབ་དེ་བཞིན་ཉིད་ལ་མ་གཏོགས་པ་དང ། སོ་སོའི་སྐྱེ་བོ་དེ་བཞིན་ཉིད་ལ་མ་གཏོགས་པར་འདོད་མ། མཽད་ གལ་གྱི་བུས་སྨྲས་པ། དེ་ནི་མ་ཡིན་ནོ། །ཁྱེའུས་སྨྲས་པ། མཽད་གལ་གྱི་བུ་ཁྱོད་སྤྲོས་པ་མེད་པ་ལ་སྤྲོས་པར་བྱེད་མ། མཽད་གལ་གྱི་བུས་སྨྲས་པ། ཁོ་བོ་ནི་འཇིག་རྟེན་གྱི་ཀུན་རྫོབ་ཀྱི་སྒོ་ནས་སྟོན་ཏོ། །ཁྱེའུས་སྨྲས་པ། མཽད་གལ་གྱི་བུ་འཇིག་རྟེན་ནི་བརྫུན་པ། སླུ་བ་སྒྱུ་མའི་ རྣམ་པ། བྱིས་པ་འདྲིད་པར་བྱེད་པའོ། །མཽད་གལ་གྱི་བུས་སྨྲས་པ། གལ་ཏེ་འཇིག་རྟེན་འདི་བརྫུན་པ་སླུ་བའི་ཆོས་ཅན་ཡིན་པ་དང་བསྟན་པ་འདི་ཡང་བརྫུན་པ། སླུ་བའི་ཆོས་ཅན་ཡིན་ན་ཁྱོད་ཅིའི་ཕྱིར་སྟོན་པར་བྱེད། སྨྲས་པ། མཽད་གལ་གྱི་བུ་ཆོས་ཐམས་ཅད་ནི་བསྟན་དུ་མེད་པ་སྟེ།
61-1-101b
དེ་དག་ནི་བསྟན་པར་བྱ་བ་མ་ཡིན། ཐོབ་པར་བྱ་བ་མ་ཡིན། མངོན་སུམ་དུ་བྱ་བ་མ་ཡིན། སྤང་བར་བྱ་བ་མ་ཡིན། ཡོངས་སུ་ཤེས་པར་བྱ་བ་མ་ཡིན། བསྒོམ་པར་བྱ་བ་མ་ཡིན་ནོ། །མཽད་གལ་གྱི་བུས་སྨྲས་པ། འོ་ན་ཁྱོད་ཀྱིས་གང་གི་དོན་དུ་དེ་བཞིན་གཤེགས་པ་མཆོད། ཁྱེའུས་སྨྲས་པ། མཽད་གལ་གྱི་བུ་ཁྱོད་དེ་བཞིན་གཤེགས་པའམ། སྦྱིན་པ་པོའམ། སྦྱིན་པར་དམིགས་སམ། དེ་ནས་ཚེ་དང་ལྡན་པ་མཽད་གལ་གྱི་བུ་ཅང་མི་སྨྲ་བར་གྱུར་ཏོ། །ཁྱེའུ་རིན་ཆེན་བྱིན་གྱིས་སྨྲས་པ། མཽད་གལ་གྱི་བུ་བདག་གིས་དེ་ལས་བསམས་ནས་དེ་བཞིན་ གཤེགས་པར་འགྱུར་བ་ཡོངས་སུ་སྤངས་ཏེ། ཉན་ཐོས་ཀྱི་ཐེག་པ་ལ་སེམས་སྐྱེད་པར་བྱེད་པ་གང་དག་ཡིན་པ་དེ་དག་ནི་རྙེད་པ་ཉེས་པར་རྙེད་པའོ་ཞེས་དེ་སྐད་ཀྱི་ཚིག་སྨྲས་སོ། །མཽད་གལ་གྱི་བུས་སྨྲས་པ། ཁྱོད་ནི་ན་ཚོད་ཤིན་ཏུ་གཞོན། །ཤེས་རབ་ཀྱིས་ནི་རྒྱ་མཚོ་བཞིན། ། ཁྱོད་ཀྱིས་ཇི་སྲིད་ཙམ་ཞིག་ནས། །ཆོས་འདི་དག་ལ་བསླབས་པར་གྱུར། །ཁྱེའུ་རིན་ཆེན་བྱིན་གྱིས་སྨྲས་པ། བསླབ་པ་ཐམས་ཅད་རྣམ་འཇིག་པ། །བསླབ་པ་གང་ཡིན་དེ་བསླབ་མིན། །གང་ལ་བསླབ་པ་མེད་པ་དེ། །མཁས་པ་རྣམས་ཀྱི་བསླབ་པ་ཡིན། །དོན་གང་ ཁྱོད་ཀྱིས་བདག་དྲིས་པ། །སེམས་ཅན་འདུ་ཤེས་གནས་པ་སྟེ། །འདིར་ནི་ཆོས་རྣམས་ཐམས་ཅད་ལ། །གང་ལའང་སྐྱེ་བ་མི་རྙེད་དོ། །བྱིས་པ་རྣམས་ནི་བྱང་ཆུབ་དང ། །འཁོར་བ་ཉིད་དུ་རྟོག་པར་བྱེད། །འདིར་ནི་ད་དུང་བཙུན་པ་ཁྱོད། །བྱིས་པའི་ཆོས་ལ་འབྲང་ངམ་ཅི། ། རིང་པོའམ་ཡང་ན་ཐུང་ངུ་ཞེས། །མཁས་པ་དག་ནི་རྟོག་མི་བྱེད། །ཆོས་ཀུན་སྙིང་པོ་མེད་པར་ནི། །དེ་བཞིན་དེ་དག་ཁོང་དུ་ཆུད། །བྱིས་པའམ་བྱིས་པའི་ཆོས་རྣམས་སམ། །སངས་རྒྱས་ཆོས་སམ་རྒྱལ་བའང་རུང ། །བློ་ལྡན་ཐ་དད་མི་འབྱེད་ཀྱིས། །སྟོང་པ་ཉིད་ ལ་དེ་ལྟར་ལྟོས། །དྲང་སྲོང་ཆེན་པོས་བྱང་ཆུབ་ཐོབ། །དེ་ནི་མི་རིགས་བརྟགས་པ་ཡིན། །ཆོས་འདི་ལ་ནི་སྐྱེ་མེད་ན། །མྱ་ངན་འདས་པ་ཇི་ལྟར་ཐོབ། །ཆོས་རྣམས་མཐའ་ཡས་རབ་ཏུ་གསུངས། །སེམས་ཅན་གྲོལ་བའང་དངོས་པོ་མེད། །མྱ་ངན་འདས་དང་འཁོར་བ་ལ།
61-1-102a
ཐ་དད་དབྱེར་མེད་གཟུང་བར་གྱིས། །འདི་ལ་རྣམ་པ་ཐམས་ཅད་དུ། །བསྣན་དང་དབྲི་བ་ཅི་ཡང་མེད། །ཐ་དད་མེད་པའི་ཆོས་རྣམས་ལ། །མཁས་པ་རྣམས་ནི་རྨོངས་མི་འགྱུར། །བྱིས་པ་རྣམས་ཀྱིས་ཐོབ་ཅིང་རྙེད། །བྱིས་པས་མྱ་ངན་འདས་པ་ཐོབ། ། འཁོར་བ་ལ་ནི་དེ་ཀུན་ཆགས། །རློམ་སེམས་བདུད་ཀྱི་འཆིང་བ་ཡིན། །གང་གིས་བློ་ལ་ངས་ཐོབ་སྙམ། །དེས་ནི་ཅི་ཡང་ཐོབ་པ་མེད། །དེ་ཡི་ཡང་སྲིད་འགྲོ་བ་ཡི། །མ་རིག་པ་ཡང་འཇུག་པར་འགྱུར། །བྱང་ཆུབ་སྙིང་པོར་འདུག་ནས་ནི། །མཐོང་བ་མེད་ཅིང་སྤངས་པའང་ མེད། །སངས་རྒྱས་རྣམས་ཀྱི་བྱང་ཆུབ་འདི། །ཐ་སྙད་ཡིན་ཏེ་དོན་དུ་མིན། །བྱང་ཆུབ་དང་ནི་མྱ་ངན་འདས། །ཐ་སྙད་དག་གིས་བརྗོད་མི་ནུས། །གང་དག་དེ་ལྟར་ཡང་དག་མཐོང ། །དེ་དག་ཆོས་ཉིད་རྣམ་པར་ཤེས། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་ སྐད་ཅེས་གསོལ་ཏོ། །བཅོམ་ལྡན་འདས་ཁྱེའུ་རིན་ཆེན་བྱིན་གྱིས་ཡུན་ཇི་སྲིད་ཅིག་ནས་ཆོས་འདི་ལ་སྤྱད་ལགས། བཅོམ་ལྡན་འདས་ཀྱིས་བཀའ་སྩལ་པ། གང་གི་ཚེ་དེ་བཞིན་གཤེགས་པ་མར་མེ་མཛད་ཀྱིས་ང་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་བ་ལུང་བསྟན་པ་དེའི་ཚེ། འདི་མར་མེ་མཛད་ཀྱི་གསུང་རབ་ལ་སྟོང་པ་ཉིད་ལ་གནས་པའི་བྱང་ཆུབ་སེམས་དཔའ་རྣམས་ཀྱི་མཆོག་ཏུ་གྱུར་ཏོ། །གང་གི་ཚེ་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དང་པོ་སེམས་བསྐྱེད་པ་དེའི་ཚེ་འདིས་བཟོད་པ་ཐོབ་ནས་བསྐལ་པ་སུམ་འབུམ་ལོན་ནོ། །ཤཱ་རིའི་བུས་ གསོལ་པ། བཅོམ་ལྡན་འདས་ཁྱེའུ་རིན་ཆེན་བྱིན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་ཁྱེའུ་རིན་ཆེན་བྱིན་འདི་ཉིད་ལ་དྲིས་ཤིག་ དང་འདི་ཉིད་ཀྱིས་ཁྱོད་ལ་སྟོན་པར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུས་ཁྱེའུ་རིན་ཆེན་བྱིན་ལ་འདི་སྐད་ཅེས་སྨྲས་སོ། །ཅིའི་ཕྱིར་ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་མ་རྒྱས། རིན་ཆེན་བྱིན་གྱིས་སྨྲས་པ། བླ་ན་མེད་པ་ཡང་དག་པར་
61-1-102b
རྫོགས་པའི་བྱང་ཆུབ་མ་དམིགས་པས་ན་དེའི་ཕྱིར་བདག་མངོན་པར་རྫོགས་པར་འཚང་མི་རྒྱའོ། །ཤཱ་རིའི་བུས་སྨྲས་པ། འོ་ན་ཅི་དེ་བཞིན་གཤེགས་པ་འདི་མངོན་པར་རྫོགས་པར་སངས་རྒྱས་པ་ལས་ན་དམིགས་པ་ལ་སྤྱོད་དམ། རིན་ཆེན་བྱིན་གྱིས་སྨྲས་པ། གལ་ཏེ་དེ་བཞིན་གཤེགས་ པ་མངོན་པར་རྫོགས་པར་སངས་རྒྱས་པར་འཛིན་ན་ནི། དེའི་དམིགས་པར་འགྱུར་བ་ཞིག་ན། ཆོས་གསུང་བ་ནི་མངོན་པར་རྫོགས་པར་འཚང་རྒྱ་བར་ཡང་མི་མཛད་ལ་སྤོང་བར་ཡང་མི་མཛད་དོ། །ཤཱ་རིའི་བུས་སྨྲས་པ། ཁྱོད་ཆོས་བཞི་སྒྲུབ་པ་དང་ཡོངས་སུ་སྨིན་པ་མཉམ་ པས་བཟོད་པ་གང་ལ་གནས། ཁྱེའུ་རིན་ཆེན་བྱིན་གྱིས་སྨྲས་པ། བདག་གིས་ནི་ཆོས་གཅིག་ཀྱང་ཡོངས་སུ་གྲུབ་པར་ཡང་དག་པར་མ་མཐོང་ན་བཞི་ལྟ་ཅི་སྨོས། འདི་ལ་ཡང་དག་པར་གྲུབ་པ་གང་ཞིག་ཡོད་དེ། ཆོས་རྣམ་པར་རིག་པ་ཞེས་བྱ་བ་འདི་ནི་དམིགས་པའོ། །བྱང་ ཆུབ་ཅེས་བྱ་བ་འདི་ནི་དམིགས་པའོ། །དེ་བཞིན་གཤེགས་པ་ཞེས་བྱ་བ་འདི་ནི་འཛིན་པའོ། །གྲོལ་བ་ཞེས་བྱ་བ་འདི་ནི་སྤྲོས་པའོ། །ཤཱ་རིའི་བུས་སྨྲས་པ། རིགས་ཀྱི་བུ་ཁྱོད་འདི་ལྟ་བུའི་ཆོས་རྣམས་ལ་སྤྱོད་ལ་རྫུས་ཏེ་སྐྱེ་བས་སངས་རྒྱས་རྣམས་མངོན་སུམ་དུ་གྱུར་པར་སྐྱེ་ཞིང་རྟག་ ཏུ་རབ་ཏུ་འབྱུང་བ་འདི་ནི་ངོ་མཚར་ཏོ། །དེ་ནས་དེའི་ཚེ་ཁྱེའུ་རིན་ཆེན་བྱིན་གྱིས་ཚིགས་སུ་བཅད་པ་འདི་དག་སྨྲས་སོ། །སྐྱེ་དང་དེ་བཞིན་སྐྱེ་མེད་གཉིས་ནི་སྤྲོས་པ་སྟེ། །ཀུན་ཏུ་རྟོགས་པའི་ས་དང་བདུད་ཀྱི་སྤྱོད་ཡུལ་ཡིན། །ལུས་ལ་སོགས་པའི་ཆོས་འཛིན་རློམ་སེམས་འདོད་པ་ཡི། ། ལྷ་དང་ལྷ་མིན་འགྲོ་བ་རྣམས་ནི་འདིར་བརླག་གོ། །རྒྱལ་བས་བདུད་རྩི་འདུས་མ་བྱས་པ་བརྙེས་སྙམ་དུ། །དེ་ལྟར་གང་དག་བསམ་པ་རབ་ཏུ་འཇུག་བྱེད་པ། །དེ་དག་སངས་རྒྱས་ལ་ནི་སྐུ་ངས་གསོལ་བར་བྱེད། །བརྙེས་ཀྱང་འདི་ལ་འདྲེན་པ་རྣམས་ཀྱིས་བརྙེས་པ་མེད། །འདིར་ནི་ སྐྱེ་བོ་མང་པོ་དག་།རབ་ཏུ་བྱུང་ནས་རང་བྱུང་རློམ། །སེམས་ཀྱི་དམིགས་པས་རྣམ་འཁྲུལ་ནས། །བསྟན་པ་ལ་ནི་སུན་འབྱིན་རྣམས། །བདུད་རྩི་བདག་གིས་ཐོབ་བོ་ཞེས། །ཐོབ་པའི་ང་རྒྱལ་ཅན་དག་སྨྲ། །སྐྱོབ་པ་ཤཱཀྱ་སེང་གེ་ཡི། །བསྟན་པ་ལ་ནི་སྤྲོས་མེད་པ། །སེམས་
61-1-103a
ཀྱིས་རྣམ་པ་ཐམས་ཅད་དུ། །སེམས་ཀྱིས་ངོ་བོ་ཉིད་མི་རྟོགས། །དེ་བཞིན་རྣམ་འདྲེན་གསུངས་པ་ཡི། །ལྟ་བ་དེ་ནི་རང་བཞིན་མེད། །སྤྱན་དག་རྒྱལ་བས་གསུངས་པ་ཡི། །ལྟ་བ་ལ་ནི་ལྟ་བ་མེད། །དེ་ཕྱིར་ཤེས་རབ་ལྡན་པ་ནི། །བདག་ཉིད་གྲོལ་ སྙམ་འཛིན་པ་མེད། །མཚན་མར་འཛིན་པ་སྒོམ་པ་རྣམས། །བདག་ཏུ་དམིགས་པས་རྨོངས་པར་འགྱུར། །མཁས་པ་མ་ཡིན་ཁ་ཅིག་ནི། །ཡང་དག་མ་ཡིན་སྟོང་པ་སྤོང ། །དངོས་པོ་རྨི་ལམ་སྒྱུ་མ་འདྲ། །རང་གི་བློས་ནི་བརྟགས་ནས་ཀྱང ། །མི་མཁས་དེ་དག་ དངོས་པོ་རྣམས། །གཞིག་ཕྱིར་མྱ་ངན་འདས་པ་སྨྲ། །ལུས་ལ་ཡང་ནི་རྟེན་བཅས་ནས། །ཚུལ་ཁྲིམས་འདུ་ཤེས་རྣམ་པར་འཇིག་།སེམས་ཀྱི་དམིགས་པ་དག་ལ་ཡང ། །བསམ་གཏན་འདུ་ཤེས་རྣམ་པར་འཇིག་།དེ་བཞིན་ཤེས་རབ་དམིགས་ནས་ཀྱང ། །ས་ བོན་འདུ་ཤེས་རྣམ་པར་རྨོངས། །འཇིག་རྟེན་འཇིག་རྟེན་མཁས་རྣམས་ཀྱིས། །དེ་དག་ཆོས་ཀྱི་རྐུན་པོར་བརྗོད། །འདི་འདྲ་བ་ཡི་ཆོས་རྣམས་ལ། །ཆོས་དབྱིངས་འོད་གསལ་ཉོན་མོངས་མེད། །འོ་ན་རབ་ཏུ་བྱུང་བའི་དོན། །ཁྱོད་ཀྱིས་བདག་ལ་ཇི་སྐད་བརྗོད། །ཆོས་ རྣམས་ཐམས་ཅད་ཐ་དད་མེད། །འདི་དག་བྲག་ཅ་འདྲ་བ་ཡིན། །མཁས་པ་དེ་དག་ནམ་དུ་ཡང ། །འཕགས་པའི་སྤྱོད་ཡུལ་རྟོག་མི་བྱེད། །གཞན་མིན་མཚན་ཉིད་དེ་བཞིན་ཉིད། །གཞན་དག་ཏུ་ནི་ཡོང་མི་འགྱུར། །ཆོས་རྣམས་འགྱུར་བ་མེད་པ་ལ། །རབ་བྱུང་བརྟགས་ པས་ཅི་ཞིག་བྱ། །དེ་ནས་འཇམ་དཔལ་གཞོན་ནུར་གྱུར་པས་ཁྱེའུ་རིན་ཆེན་བྱིན་ལ་འདི་སྐད་ཅེས་སྨྲས་སོ། །ཁྱེའུ་བྱང་ཆུབ་ཅེས་བྱ་བ་དེ་གང་གི་ཚིག་བླ་དགས་ཡིན། རིན་ཆེན་བྱིན་གྱིས་སྨྲས་པ། འཇམ་དཔལ་བྱང་ཆུབ་ནི་ཚིག་གི་བླ་དགས་མེད་པའོ། །འཇམ་དཔལ་ གྱིས་སྨྲས་པ། ཁྱོད་ཅི་ལས་བསམས་ཏེ་དེ་སྐད་སྨྲ། རིན་ཆེན་བྱིན་གྱིས་སྨྲས་པ། འཇམ་དཔལ་ཆོས་ཉིད་ནི་བསམ་དུ་མེད་པ་ཡིན་ན། དེ་བདག་གིས་འདི་ལྟར་བསམས་ཏེ་བསྟན་པར་བྱ། འཇམ་དཔལ་གྱིས་སྨྲས་པ། འདི་ལ་ལས་དང་པོ་པའི་བྱང་ཆུབ་སེམས་དཔའ་ལ་
61-1-103b
ཇི་ལྟར་གདམས་ངག་བསྟན་པར་བྱ། ཇི་ལྟར་རྗེས་སུ་བསྟན་པར་བྱ། རིན་ཆེན་བྱིན་གྱིས་སྨྲས་པ། འདི་སྐད་ཅེས་སྨྲ་བར་བྱ་སྟེ། འདོད་ཆགས་མ་སྤངས་ཤིག་ཞེ་སྡང་མ་གཞིལ་ཅིག་།གཏི་མུག་མ་བསལ་ཅིག་།རང་གི་ལུས་ལས་གྱེན་དུ་མ་བསྐྱོད་ཅིག་།མི་དགེ་བ་སྤྱོད་ཅིག་། ལྟ་བ་ཚར་མ་གཅོད་ཅིག་།ཀུན་ཏུ་སྦྱོར་བ་རྣམས་མ་སྟོན་ཅིག་།ཕུང་པོ་རྣམས་ཡོངས་སུ་ཟུང་ཤིག་།ཁམས་རྣམས་རིལ་པོར་གྱིས་ཤིག་།སྐྱེ་མཆེད་རྣམས་ལ་སྤྱོད་ཅིག་།བྱིས་པའི་ས་ལས་འདའ་བར་མ་བྱེད་ཅིག་།མི་དགེ་བ་ལ་རྟོགས་ཤིག་།དགེ་བ་སྤོངས་ཤིག་། སངས་རྒྱས་ཡིད་ལ་མ་བྱེད་ཅིག་།ཆོས་མ་སེམས་ཤིག་།དགེ་འདུན་ལ་ནི་མཆོད་པ་མ་བྱེད་ཅིག་།བསླབ་པ་དག་ཡང་དག་པར་མ་ལེན་ཅིག་།སྲིད་པ་ཉེ་བར་ཞི་བ་དོན་དུ་མ་གཉེར་ཅིག་།ཆུ་བོ་ལས་མ་རྒལ་ཅིག་།ཅེས་གདམས་ངག་འདི་ལྟ་བུས་ལས་དང་པོ་པའི་བྱང་ཆུབ་ སེམས་དཔའ་ལ་གདམས་པར་བྱའོ། །རྗེས་སུ་བསྟན་པར་བྱའོ། །དེ་ཅིའི་ཕྱིར་ཞེ་ན། ཆོས་རྣམས་ཀྱི་ཆོས་གནས་པ་འདི་ནི་གནས་པ་ཁོ་ན་ཡིན་པའི་ཕྱིར་རོ། །བྱིས་པ་དེ་དག་ནི་སྐྱེ་བའི་ཆོས་སུ་ལུང་སྟོན་པར་བྱེད་དོ། །འགག་པའི་ཆོས་སུ་ལུང་སྟོན་པར་བྱེད་དོ། ། ཆོས་ཀྱི་དབྱིངས་འདི་ནི་རྣམ་པར་མི་རྟོག་པས་རབ་ཏུ་ཕྱེ་བ་ཡིན་ཏེ། ཆོས་འདི་རྣམས་ཀྱི་རང་བཞིན་དེ་ལྟར་རྗེས་སུ་རྟོགས་པ་གང་ཡིན་པ་དེ་ནི་བྱང་ཆུབ་བོ་ཞེས་དེ་ལྟར་གདམས་ན། གལ་ཏེ་མི་སྐྲག་མི་དངང་ཞིང་དངང་བར་མི་འགྱུར་ན། ཀྱེ་མ་བྱང་ཆུབ་སེམས་དཔའ་འདི་ནི་ཕྱིར་ མི་ལྡོག་པ་སྟེ། ཕྱིར་མི་ལྡོག་པའི་སའི་སྐལ་བ་ཅན་ཡིན་ནོ་སྙམ་དུ་ཤེས་པར་བྱ་སྟེ། གདམས་ངག་འདིས་ཡང་དང་ཡང་དུ་ཡང་དག་པར་དགའ་བ་བསྐྱེད་པར་བྱའོ། །དེའི་ཚེ་དམིགས་པ་ཅན་གྱི་དགེ་སློང་བརྒྱད་ཀྱིས་ཆོས་ཀྱི་རྣམ་གྲངས་འདི་མ་བསྟེན་པར་སྤངས་ནས་འཁོར་ དེ་ནས་སོང་སྟེ། ཁ་ནས་ཁྲག་དྲོན་མོ་བྱུང་ནས་ཤིའོ། །ཤི་ནས་སེམས་ཅན་དམྱལ་བ་ཆེན་པོ་ངུ་འབོད་དུ་སྐྱེས་སོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་དེ་དག་གིས་ཆོས་ཀྱི་རྣམ་གྲངས་
61-1-104a
འདི་ཐོས་པས་གནོད་པ་ཆེན་པོ་ཇི་ཙམ་དུ་གྱུར་པ་ལ་གཟིགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་ཁྱོད་དེ་སྐད་མ་ཟེར་ཅིག་།གལ་ཏེ་དགེ་སློང་འདི་དག་གིས་ཆོས་ཀྱི་རྣམ་གྲངས་འདི་མ་ཐོས་སུ་ཟིན་ན། བསྐལ་པ་ས་ཡའི་བར་དུ་ ནམས་ཀྱང་བཟང་འགྲོར་སྐྱེ་བར་ཡང་མི་འགྱུར་ན་སངས་རྒྱས་དང་ཕྲད་ཅིང་མཉེས་པར་བྱེད་པ་ལྟ་ཅི་སྨོས། ད་ནི་དེ་དག་གིས་ཆོས་ཀྱི་རྣམ་གྲངས་འདི་སོམ་ཉི་དང་བཅས་པས་ཐོས་ནས་ད་གཟོད་ཁོ་ནར་སེམས་ཅན་དམྱལ་བ་ཆེན་པོ་ངུ་འབོད་ནས་ཤི་འཕོས་ཏེ་དགའ་ལྡན་གྱི་ལྷའི་རིས་སུ་ སྐྱེའོ། །དེ་དག་བསྐལ་པ་དྲུག་ཅུ་རྩ་བརྒྱད་ཀྱི་བར་དུ་དེ་བཞིན་གཤེགས་པ་ཁྲག་ཁྲིག་ཕྲག་བཅུ་མཉེས་པར་བྱེད་པར་འགྱུར་ཏེ། ཐམས་ཅད་དུ་རྫུས་ཏེ་སྐྱེ་ཞིང་འཁོར་ལོས་སྒྱུར་བའི་རྒྱལ་པོ་ཤ་སྟག་ཏུ་འགྱུར་ལ། བསྐལ་པ་གཅིག་ལ་དེ་བཞིན་གཤེགས་པ་དགྲ་བཅོམ་པ་ ཡང་དག་པར་རྫོགས་པའི་སངས་རྒྱས་དྲི་མ་མེད་པའི་འོད་ཅེས་བྱ་བ་དག་ཏུ་འགྱུར་རོ། །དེ་ནས་ལྷའི་བུ་དེ་དག་གིས་བདག་ཅག་ལུང་བསྟན་པ་ལྷའི་རྣ་བའི་ཁམས་ཀྱིས་ཐོས་ནས། དེ་དག་ལྷའི་བུ་བརྒྱད་ཁྲི་དང་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་ ལྷའི་མེ་ཏོག་གིས་ཡངས་པའི་གྲོང་ཁྱེར་ཐམས་ཅད་དུ་གཏོར་ཏོ། །ཆོས་ཀྱི་རྣམ་གྲངས་འདི་ལ་ཡང་རྗེས་སུ་ཡི་རང་སྟེ། བཅོམ་ལྡན་འདས་བདག་ཅག་རྗེས་སུ་ཡི་རང་ལགས་སོ། །དེ་བཞིན་གཤེགས་པ་རྣམས་ཀྱི་བྱང་ཆུབ་ཀྱི་ཚུལ་འཕེལ་བར་མཛད་དུ་གསོལ་ཞེས་ ཀྱང་གསོལ་ཏོ། །དེ་དག་རྗེས་སུ་ཡི་རང་བའི་མོད་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །ཡངས་པའི་གྲོང་ཁྱེར་ཆེན་པོའི་སྲོག་ཆགས་བརྒྱད་ཁྲི་བཞི་སྟོང་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ པར་གྱུར་ཏོ། །སྲོག་ཆགས་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་བྱང་ཆུབ་སེམས་དཔའ་གང་གིས་བསྐལ་པ་འབུམ་གྱི་
61-1-104b
བར་དུ་ཐབས་ལ་མཁས་པ་མེད་པར་ཕ་རོལ་ཏུ་ཕྱིན་པ་དྲུག་ལ་སྤྱད་པ་བས། གང་གིས་ཆོས་ཀྱི་རྣམ་གྲངས་འདི་སོམ་ཉི་དང་བཅས་པས་ཐོས་ན། འདི་ནི་དེ་བས་ཆེས་བསོད་ནམས་མང་དུ་སྐྱེད་ན་གང་གིས་སོམ་ཉི་མེད་པར་ཐོས་པ་ལྟ་ཅི་སྨོས། གང་གིས་ཡི་གེར་འདྲི་བ་ དང ། ལུང་ནོད་པ་དང ། འཆང་བ་དང ། གཞན་དག་ལ་ཡང་རྒྱ་ཆེར་ཡང་དག་པར་སྟོན་པ་ལྟ་ཅི་སྨོས། འཇམ་དཔལ་དེ་ལྟ་བས་ན་དགྲ་བཅོམ་པ་ཉིད་ཐོབ་པར་འདོད་པས་ཀྱང་ཆོས་འདི་ལ་བསླབ་པར་བྱའོ། །རང་བྱང་ཆུབ་ཐོབ་པར་འདོད་པས་ཀྱང་ཆོས་འདི་ལ་བསླབ་ པར་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་པས་ཀྱང་ཆོས་འདི་ལ་བསླབ་པར་བྱའོ། །དེ་ནས་ཁྱེའུ་རིན་ཆེན་བྱིན་གྱིས་རང་གི་མ་མ་ལ་འདི་སྐད་ཅེས་སྨྲས་སོ། །མ་མ་ཁོ་བོ་ལ་ཁ་ཟས་བྱིན་ཅིག་དང ། བཅོམ་ ལྡན་འདས་ཀྱི་ཞལ་ཟས་དབུལ་བར་བྱའོ། །དེ་ནས་ཁྱེའུ་རིན་ཆེན་བྱིན་གྱི་མ་མས་ཁར་བའི་སྣོད་ཟས་རོ་བརྒྱ་དང་ལྡན་པས་བཀང་སྟེ། ཁྱེའུ་རིན་ཆེན་བྱིན་ལ་བྱིན་ནོ། །དེ་ནས་ཁྱེའུ་རིན་ཆེན་བྱིན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ ཐམས་ཅད་མི་ཟད་པའི་བདེན་པ་གང་ལགས་པའི་བདེན་པ་དེས་ན་དགེ་སློང་གི་དགེ་འདུན་ཐམས་ཅད་ཚིམ་པར་མ་གྱུར་གྱི་བར་དུ་ཁར་བའི་སྣོད་འདི་ཡོངས་སུ་འགྲིབ་པར་མ་གྱུར་ཅིག་།དེ་ནས་ཁྱེའུ་རིན་ཆེན་བྱིན་གྱིས་བཅོམ་ལྡན་འདས་ཀྱི་ལྷུང་བཟེད་བཀང་ནས་དགེ་སློང་གི་དགེ་འདུན་ལ་ སྨྲས་པ། བཙུན་པ་རྣམས་བདག་ལ་ཐུགས་བརྩེ་བའི་སླད་དུ་གང་གིས་བདག་ལ་འབྲས་བུ་ཆེན་པོར་འགྱུར་བའི་བསོད་སྙོམས་འདི་བཞེས་ཏེ། གང་ལུས་ཀྱིས་ཡོན་སྦྱོང་བར་མི་བྱེད་པ་དང ། སེམས་ཀྱིས་སྦྱོང་བར་མི་བྱེད་པ་དང ། གང་ལ་ཕུལ་ན་བསོད་ནམས་སུ་མི་འགྱུར་བ་ དང ། རྣམ་པར་སྨིན་པར་མི་འགྱུར་བ་དང ། གང་ལུས་ཀྱི་ལས་དང ། ངག་གི་ལས་དང ། ཡིད་ཀྱི་ལས་དང་མི་ལྡན་པ་དང ། །གང་འདུས་བྱས་ལ་མི་གནས་པ་དང ། གང་འདུས་མ་བྱས་ལ་མི་གནས་པ་དང ། གང་སོ་སོའི་སྐྱེ་བོའི་ཆོས་རྣམས་ཀྱིས་མ་གོས་པ་དང་།
61-1-105a
ཉན་ཐོས་ཀྱི་ཆོས་རྣམས་ལ་མི་རྟེན་པ་དང ། སངས་རྒྱས་ཀྱི་ཐེག་པ་ལ་ངེས་པར་མི་འབྱུང་བ་དང ། ངེས་པར་འབྱུང་བར་མི་འདོད་པ་དེས་བཞེས་ཤིག་།དེ་ནས་དགེ་སློང་གི་དགེ་འདུན་དེ་དག་གི་ནང་ནས་སུས་ཀྱང་སྣོད་དེ་མ་བླངས་སོ། །ཁྱེའུ་རིན་ ཆེན་བྱིན་གྱིས་སྨྲས་པ། བཙུན་པ་དག་བདག་ཀྱང་སྦྱིན་པར་འདོད་པ་ལགས། ཁྱེད་ཀྱང་གསོལ་བར་བཞེད་པ་ལགས་ཏེ། བདག་བཙུན་པ་རྣམས་ལས་ཅི་ཡང་རེ་བ་མ་མཆིས་ཀྱི་བཞེས་ཤིག་།འཇམ་དཔལ་གྱི་ཚད་དང་མཉམ་པའི་བྱང་ཆུབ་སེམས་དཔའ་བྱེ་བ་ ཕྲག་འབུམ་གྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་དེ་བས་ཀྱང་ཆེས་བྱེ་བ་ཕྲག་འབུམ་ལས་ལྷག་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པ། བདག་གི་སངས་རྒྱས་ཀྱི་ཞིང་དུ་འགྱུར་བའི་བདེན་པ་དང་བདེན་པའི་ཚིག་གང་ཡིན་པའི་བདེན་པ་དང་བདེན་པའི་ཚིག་དེས་ན་ཁར་བའི་ སྣོད་འདི་ལས་ཁྱེད་ཐམས་ཅད་ཀྱི་ལྷུང་བཟེད་རྣམས་གང་བར་གྱུར་ཅིག་།ཁར་བའི་སྣོད་འདི་ཡང་ཡོངས་སུ་ཟད་པར་མ་གྱུར་ཅིག་ཅེས་བྱས་སོ། །དེ་ནས་དགེ་སློང་གི་དགེ་འདུན་ཐམས་ཅད་ཀྱི་ལྷུང་བཟེད་དེ་དག་གང་བར་གྱུར་ཏོ། །དེ་ནས་ཁྱེའུ་རིན་ཆེན་བྱིན་གྱིས་ཡངས་ པའི་གྲོང་ཁྱེར་གྱི་སྐྱེ་བོའི་ཚོགས་ཇི་སྙེད་ཡོད་པ་ཐམས་ཅད་ཁ་ཟས་རོ་བརྒྱ་དང་ལྡན་པ་དེས་ཚིམ་པར་བྱས་སོ། །བསོད་སྙོམས་དེ་ཡང་ཟད་པར་མ་གྱུར་ཏོ། །དེ་ནས་བཅོམ་ལྡན་འདས་ཀྱིས་ཁྱེའུ་རིན་ཆེན་བྱིན་ལ་འདི་སྐད་ཅེས་བཀའ་སྩལ་ཏོ། །རིན་ཆེན་བྱིན་ལྔ་པོ་འདི་དག་ནི་བྱང་ ཆུབ་སེམས་དཔའི་ཡོན་ཡོངས་སུ་སྦྱོང་བ་སྟེ། ལྔ་གང་ཞེ་ན། འདི་ལྟ་སྟེ། ལུས་མི་དམིགས་པ་དང ། སེམས་མི་དམིགས་པ་དང ། སྦྱིན་པ་ལ་མངོན་པར་ཞེན་པ་མེད་པ་དང ། རྣམ་པར་སྨིན་པ་མི་འདོད་པ་དང ། ལེན་པ་པོ་རྣམས་ལ་རྣམ་པར་སྨིན་པ་མེད་པའོ། །རིན་ ཆེན་བྱིན་བཞི་པོ་འདི་དག་ནི་བྱང་ཆུབ་སེམས་དཔས་རྟག་ཏུ་མངོན་དུ་བྱ་བ་སྟེ། བཞི་གང་ཞེ་ན། འདི་ལྟ་སྟེ། སྟོང་པ་ཉིད་ཀྱི་ཏིང་ངེ་འཛིན་དང ། སངས་རྒྱས་རྗེས་སུ་དྲན་པ་དང ། སྙིང་རྗེ་ཆེན་པོ་དང ། བདག་གི་ལས་ཀྱི་རྣམ་པར་སྨིན་པའོ། །དེ་ནས་བཅོམ་ལྡན་འདས་ཀྱིས་
61-1-105b
འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱེའུ་རིན་ཆེན་བྱིན་འདི་བསྐལ་པ་སུམ་ཅུ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སྟོབས་དང་གྲགས་པ་དོན་ཡོད་པ་ཞེས་བྱ་བར་འཇིག་རྟེན་དུ་ འབྱུང་བར་འགྱུར་རོ། །དེའི་འཁོར་དུ་འདུས་པ་ཡང་མཐའ་ཡས་པར་འགྱུར་ཏེ། ཐམས་ཅད་ཀྱང་ཕྱིར་མི་ལྡོག་པའི་བྱང་ཆུབ་སེམས་དཔའ་ཤ་སྟག་གོ། །དེ་དག་ཀྱང་འོད་མཐའ་ཡས་པ་དང ། ཚེ་དཔག་ཏུ་མེད་པར་འགྱུར་རོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་ གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའི་སྤྱོད་པ་བསྟན་པ་ཞེས་བྱ་བར་ཟུང་ཤིག་།ཆོས་ཉིད་ཀྱི་སྐྱེ་བོ་ཞེས་བྱ་བར་ ཡང་ཟུང་ཤིག་།དེ་ནས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་བསོད་སྙོམས་བཞེས་ནས་གཤེགས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་རིན་ཆེན་བྱིན་དང ། ཐམས་ཅད་དང་ལྡན་པའི་ འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་བྱང་ཆུབ་སེམས་དཔའི་སྤྱོད་པ་བསྟན་པ་ཞེས་བྱ་བ་ཐེག་པ་ཆེན་ པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། པྲཛྙཱ་ཝརྨ་དང ། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།