༄##། །རྒྱ་གར་སྐད་དུ། ཨཱརྱ་ཨཱ་ཀཱ་ཤ་གརྦྷ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ནམ་མཁའི་སྙིང་པོ་ཞེས་བྱ་བ་ཐེག་པ་ཆེན་པོའི་མདོ།སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་ཁ་ལ་ཏི་ཀ་ན་གནས་ཐུབ་པའི་དྲང་སྲོང་རྣམས་ ཀྱི་གནས་ན། ཉན་ཐོས་ཆེན་པོ་བགྲང་བ་ལས་འདས་པའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་གོ། །འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་གང་གཱའི་ཀླུང་གི་བྱེ་མ་སྙེད་དཔག་ཏུ་མེད། གྲངས་མེད་པའི་བྱང་ཆུབ་སེམས་དཔའི་དགེ་འདུན་ ཆེན་པོ་དང་ཡང་ཐབས་ཅིག་ཏུ་བཞུགས་ཏེ། དེ་བཞིན་གཤེགས་པའི་དཔལ་གྱི་དམ་ཚིག་ལུང་བསྟན་པའི་མཐར་ཕྱིན་མ་ཐག་ཏུ་ཡང་དེའི་ཚེ་ན་ནུབ་ཕྱོགས་ན་བརྒྱ་བྱིན་ཐོགས་པའི་ནོར་བུ་རིན་པོ་ཆེ་འབུམ་ཕྲག་དུ་མས་བསྐོར་ཅིང་མདུན་དུ་བདར་བའི་ཡིད་བཞིན་གྱི་ནོར་བུ་ 66-1-264b རིན་པོ་ཆེ་སྣང་སྟེ། ཡང་ནོར་བུ་རིན་པོ་ཆེ་དེའི་འོད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གཟུགས་སུ་སྣང་བ་ཐམས་ཅད་མ་ལུས་པར་མི་སྣང་བར་གྱུར་ཏེ། དེ་བཞིན་གཤེགས་པ་མ་གཏོགས་པར་གང་ལྷ་དང ། མི་རྣམས་དང ། ཉན་ཐོས་རྣམས་དང ། གང་བྱང་ཆུབ་སེམས་དཔའ་རྣམས་དང ། གང་ས་དང ། ཆུ་དང ། མེ་དང ། རླུང་རྣམས་ཀྱི་གཟུགས་སུ་སྣང་བའི་འབྱུང་བ་ཆེན་པོ་ཇི་སྙེད་པའི་འབྱུང་བ་ཆེན་པོ་སྣང་བ་དེ་དག་ཐམས་ཅད་མ་ལུས་པར་སྤངས་པར་གྱུར་ཅིང་ནོར་བུ་རིན་པོ་ཆེ་སྣང་ངོ ། །ལྷག་མ་དག་ཀྱང་མཐའ་ ཡས་མུ་མེད་པ་བརྗོད་དུ་མེད་པ་ནམ་མཁའ་བཞིན་དུ་སྣང་ངོ ། །བཅོམ་ལྡན་འདས་ཀྱང་ཤིན་ཏུ་ལྷམ་མེ། ལྷན་ནེ། ལྷང་ངེར་གྱུར་ཏོ། །སེམས་ཅན་གང་དག་དེར་འདུས་པ་དེ་དག་ཀྱང་བདག་ཀྱང་མི་མཐོང་ངོ ། །གཅིག་གིས་གཅིག་ཀྱང་མི་མཐོང་ངོ ། །དེ་དག་ལ་ འབྱུང་བ་ཆེན་པོའི་གཟུགས་སུ་སྣང་བ་ཐམས་ཅད་འགགས་ནས་ཡང་མིག་ཏུ་སྣང་བར་མ་གྱུར་ཏོ། །བདག་བདག་གི་ལུས་ཀྱི་གཟུགས་དང ། མཚན་དང ། དབྱིབས་དང ། རིག་པ་ཡང་མི་དམིགས་པར་གྱུར་ཏེ། གང་དང་གང་གིས་བརྟགས་པ་དེ་དང་དེ་དག་སྟོང་པར་ མཐོང་ངོ ། །ཉི་མ་དང་ཟླ་བའི་དཀྱིལ་འཁོར་ཡང་མི་མཐོང ། སྐར་མའི་གཟུགས་དང ། སའི་ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་ཀྱང་མིག་ལམ་དུ་སྣང་བར་མ་གྱུར་ཏོ། །སྒྲ་དག་ཀྱང་རྣ་ལམ་དུ་གྲག་པར་མ་གྱུར་ཏོ། །དྲི་དག་ ཀྱང་སྣ་ལ་བྲོ་བར་མ་གྱུར་ཏོ། །སེམས་དང་སེམས་ལས་བྱུང་བ་རྣམས་ལ་ཡང་ངར་འཛིན་པ་དང ། ང་ཡིར་འཛིན་པ་དང ། སྐྱེ་མཆེད་དྲུག་གི་འདུ་ཤེས་མི་འབྱུང་བར་གྱུར་ཏོ། །ཡང་འབྱུང་བ་ཆེན་པོ་དག་ཀྱང་མི་དམིགས་པར་གྱུར་ཏེ། ཕྱོགས་གང་དང་གང་དུ་བརྟགས་ པ་དེ་དང ། དེའི་ཕྱོགས་ཐམས་ཅད་དུ་དེ་བཞིན་གཤེགས་པའི་སྐུ་མཚན་དང ། ཁ་དོག་དང ། དབྱིབས་དང ། གཟུགས་སུ་མཐོང་བར་གྱུར་ཏོ། །རྒྱང་མ་ནས་ཀྱང་བརྒྱ་བྱིན་ཐོགས་པའི་ནོར་བུ་རིན་པོ་ཆེས་བསྐོར་བའི་ཡིད་བཞིན་གྱི་ནོར་བུ་རིན་པོ་ཆེ་སྣང་བ་ལས་གཞན་ 66-1-265a ཆུང་ཟད་ཀྱང་མི་སྣང་བར་གྱུར་ཏོ། །གང་དེ་ན་བྱང་ཆུབ་སེམས་དཔའ་ས་བཅུ་ལ་གནས་པ་དཔའ་བར་འགྲོ་བའི་ཏིང་ངེ་འཛིན་ཐོབ་པ། སྐྱེ་བ་གཅིག་གིས་ཐོགས་པ། སྲིད་པ་ཐ་མ་པ་དེ་དག་གིས་ལྟས་དེ་མཐོང་ནས་འཇིགས་པར་མི་བྱེད། དངངས་པར་མི་ བྱེད། སྐྲག་པར་མི་བྱེད་དེ། ཆོས་ཐམས་ཅད་རང་བཞིན་གྱིས་ཡང་དག་པའི་མཐའ་དང ། དེ་བཞིན་ཉིད་དང ། སྟོང་པ་ཉིད་དང་ལྡན་པར་རྟོགས་པས་དེའི་ཕྱིར་དེ་དག་འཇིགས་པར་མི་བྱེད། དངངས་པར་མི་བྱེད། སྐྲག་པར་མི་བྱེད་དོ། །གང་ལྷག་མ་བྱང་ཆུབ་སེམས་ དཔའ་སེམས་དཔའ་ཆེན་པོ་དག་དང ། ཉན་ཐོས་དག་དང ། ལྷ་དག་དང ། ཀླུ་དག་དང ། གནོད་སྦྱིན་དག་དང ། དྲི་ཟ་དག་དང ། ལྷ་མ་ཡིན་དག་དང ། ནམ་མཁའ་ལྡིང་དག་དང ། མི་འམ་ཅི་དག་དང ། ལྟོ་འཕྱེ་ཆེན་པོ་དག་དང ། གྲུལ་བུམ་དང ། ཡི་དགས་ དང ། ཤ་ཟ་དང ། སྲུལ་པོ་དང ། ལུས་སྲུལ་པོ་དང ། མི་དང་མི་མ་ཡིན་པ་འདུས་པ་དེ་དག་མ་ལུས་པར་འཇིགས་པར་གྱུར། དངངས་པར་གྱུར། སྐྱོ་བར་གྱུར་ནས། ཚུ་རོལ་དང་ཕ་རོལ་ལ་རྨོངས་ཤིང་སེམས་འཁྲུགས་ནས་དེ་དག་གཅིག་གིས་གཅིག་ཀྱང་ མི་མཐོང ། དེ་ན་འདི་ཅི་ཞིག་།འདི་ཇི་ལྟ་བུ་ཞིག་།འདི་ཅིའི་རང་བཞིན་ཞེས་དྲི་བ་ཡང་གང་ཡང་མི་སྣང་ངོ ། །ཡང་དེའི་ཚེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པའི་གཟེར་བུ་ཆེན་པོ་ཞེས་བྱ་བས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་ སྦྱར་བ་བཏུད་དེ་གསོལ་པ། ཆོས་ཀུན་གྱི་ནི་རང་བཞིན་ལ། །གང་ཟག་གང་དག་མ་འཚལ་བ། །གཟུགས་ཕུང་ལ་ནི་གནས་གྱུར་ནས། །དབང་པོ་དྲུག་ལ་རྨོངས་པར་གྱུར། །ཕུང་པོ་གཅིག་ནི་མི་མཐོང་ཞིང ། །གཟུགས་ཀྱི་ཕུང་ལ་རྟོག་བགྱིད་དེ། ། འདི་ལ་གང་ཟག་ཁ་ཅིག་ནི། །སངས་རྒྱས་ཆོས་ལ་ཐེ་ཚོམ་འཚལ། །བཅོམ་ལྡན་འདས་ཀྱིས་འདི་དག་ལ། །ཆོས་ཀྱི་དེ་བཞིན་མཚན་ཉིད་གསུངས། །དེ་དག་ཚུ་རོལ་ཕ་རོལ་ལ། །བཟོད་པའི་ནམ་མཁའི་མཚན་འཚལ་ཏོ། །འདི་ནི་མཉམ་བཞག་དཔའ་བ་ 66-1-265b སྟེ། །བརྗོད་དུ་མེད་པའི་གནས་ལགས་སོ། །ཡིད་བཞིན་ནོར་བུ་རིན་ཆེན་ཆེ། །སྤྱི་བོ་ལ་ནི་མཆིས་པར་གདའ། །ནོར་བུ་རིན་ཆེན་བརྒྱ་བྱིན་ཐོགས། །གང་དག་ལ་ནི་རྒྱང་ནས་གདའ། །སེམས་ཅན་དེ་དག་སྐལ་བ་ཆེ། །དཔའ་འགྲོའི་ཕ་རོལ་ཤིན་ཏུ་ཕྱིན། ། སྟོན་པ་ལྟ་བར་མཆིས་པ་རྣམས། །དེ་དག་ཐམས་ཅད་ཤེས་རབ་ཆེ། །དེ་རིང་འདིར་ནི་ཟབ་མོའི་གཏམ། །མཆི་བར་འགྱུར་བ་གདོན་མི་འཚལ། །བཅོམ་ལྡན་གང་དག་འདིར་ཕྱིན་པའི། །སེམས་ཅན་དག་ལ་དབུགས་དབྱུང་མཛོད། །སེམས་ཅན་ཡོངས་ སྨིན་བགྱི་སླད་དུ། །འདི་ནི་དཔའ་བོའི་སྤྱོད་ཡུལ་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཇི་སྐད་སྨྲས་པ་དེ་བཞིན་ཏེ། །གང་ན་ཀུན་གཞི་ཐོས་གྱུར་ཅིང ། །ཤེས་རབ་ཀྱིས་ནི་སེམས་ཅན་གནས། །དེ་ནི་ཏིང་འཛིན་སྤྱོད་ཡུལ་ལོ། །དེ་ནི་ནམ་ མཁའི་སྙིང་པོ་ཡི། །བྱང་ཆུབ་སེམས་དཔའི་སྤྱོད་ཡུལ་ཏེ། །སྣང་བ་མེད་ཅིང་སྤྲོས་མེད་པའི། །ཏིང་ངེ་འཛིན་ནི་དེ་ཡིས་བསྟན། །ལྟ་བ་གཉིས་ལ་གང་ཆགས་པ། །ཕྱི་ཕྱིར་ཞིང་ནི་རྨོངས་པར་འགྱུར། །རྟག་དང་ཆད་ལ་ཆགས་པ་ནི། །ཕ་རོལ་ཚུ་རོལ་ཤིན་ ཏུ་རྨོངས། །ལྟ་བ་གཉིས་པོ་འདི་དག་ལས། །རབ་ཏུ་གྲོལ་བར་སུ་འདོད་པ། །བརྗོད་དུ་མེད་པ་བསྒོམ་པར་གྱིས། །དེ་ནི་མྱུར་དུ་ས་འཐོབ་འགྱུར། །ཀྱེ་གྲོགས་པོ་དག་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ལས་ཐོག་མ་པ་ལ་དེ་ཉིད་བརྗོད་དུ་ཡོད་པའི་ འདུ་ཤེས་ཀྱི་ཚུལ་གྱིས་དམིགས་པ་དང་བཅས་པའི་ཕ་རོལ་ཏུ་ཕྱིན་པ་དྲུག་བརྗོད་པར་བྱ་སྟེ། འདི་ལྟ་སྟེ། ཅི་ནས་ཀྱང་འབྱུང་བ་ཆེན་པོ་རྣམས་ཀྱི་རང་བཞིན་སྐྱེ་ཞིང་འཇིག་པ་ཤེས་པར་བྱས་ནས། དེའི་འོག་ཏུ་གཟོད་ཆོས་ཐམས་ཅད་བརྗོད་དུ་མེད་པའི་ངོ་བོ་ཉིད་མི་སྐྱེ་མི་ འགག་པ། མི་དམིགས་པ་ཅུང་ཟད་ཀྱང་མེད་པའི་འདུ་བྱེད་ཐམས་ཅད་བསྒོམ་པར་བྱ་སྟེ། ཅི་ནས་ཀྱང་རྟག་པ་དང་ཆད་པ་སྤངས་པར་འགྱུར་བ་དང ། མི་འཇིགས། མི་དངངས། མི་སྐྲག་པར་འགྱུར་བ་དང ། ཆོས་ཐམས་ཅད་ལ་ཆགས་པར་དམིགས་པའི་སེམས་ 66-1-266a སུ་མ་གྱུར་པར་བྱས་ན་དེ་མྱུར་དུ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ཤིང ། ཕྱིན་ཅད་ཀྱང་ཆད་པ་དང་རྟག་པ་ལ་མི་གནས་པར་འགྱུར་རོ་ཞེས་བཅོམ་ལྡན་འདས་ཀྱིས་བཀའ་སྩལ་ནས། འཁོར་དེར་ལྷགས་པ་ཐམས་ཅད་ཀྱང་སྔོན་གཟུགས་ཀྱི་སྣང་ བ་ཇི་ལྟར་མཐོང་བ་དང ། ཐོས་པ་དང ། རྟོགས་པ་དང ། ཤེས་པ་དེ་བཞིན་དུ་འཁོར་དེར་མཐོང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་ཕྱག་གཡས་པ་བརྐྱང་སྟེ་འདི་སྐད་ཅེས་བཀའ་སྩལ་ཏོ། །ནམ་མཁའི་སྙིང་པོ་ཞེས་བྱ་བའི་བྱང་ཆུབ་སེམས་དཔའ་སེམས་དཔའ་ ཆེན་པོ་ཏིང་ངེ་འཛིན་རྒྱ་མཚོ་དང་མཚུངས་པ། བྱང་ཆུབ་སེམས་དཔའ་བསླབ་པ་རི་རབ་དང་མཚུངས་པ། ཡེ་ཤེས་ནམ་མཁའ་དང་མཚུངས་པ། བརྩོན་འགྲུས་རླུང་དང་མཚུངས་པ། བཟོད་པ་རྡོ་རྗེ་དང་མཚུངས་པ། བྱང་ཆུབ་སེམས་དཔའ་ཐམས་ཅད་ ཀྱི་ནི་རྒྱལ་མཚན་གྱི་མཆོག་ལྟ་བུ་མྱ་ངན་ལས་འདའ་བའི་གནས་སུ་འགྲོ་བ་རྣམས་ཀྱི་ནི་དེད་དཔོན་ལྟ་བུ། དགེ་བའི་རྩ་བ་ཐམས་ཅད་ཀྱི་ནི་གཏེར་ལྟ་བུ། སྡུག་བསྔལ་བ་ཐམས་ཅད་ཀྱི་ནི་བུམ་པ་བཟང་པོ་ལྟ་བུ། མུན་པར་བཅུག་པ་རྣམས་ཀྱི་ནི་ཉི་མ་ལྟ་བུ། ལམ་སྟོར་བ་ རྣམས་ཀྱི་ནི་ཟླ་བ་ལྟ་བུ། འཇིགས་པ་རྣམས་ཀྱི་ནི་རི་རབ་ལྟ་བུ། ཉོན་མོངས་པའི་ནད་ཀྱིས་ཡོངས་སུ་གདུངས་པ་རྣམས་ཀྱི་ནི་སྨན་བཅུད་ཀྱིས་ལེན་པ་ལྟ་བུ། དགེ་བའི་རྩ་བ་ཆད་དེ་ལྷུང་བ་རྣམས་ཀྱི་ནི་འཁར་བ་ལྟ་བུ། ཕྲེང་བས་འཚོ་བ་རྣམས་ཀྱི་ནི་མེ་ཏོག་ལྟ་བུ། སྡོམ་ པ་སྤྱོད་པ་རྣམས་ཀྱི་ནི་མེ་ལོང་ལྟ་བུ། ངོ་ཚ་ཤེས་པ་དང་ཁྲེལ་ཡོད་པ་རྣམས་ཀྱི་ནི་གོས་ལྟ་བུ། མྱ་ངན་ལས་འདའ་བར་འགྲོ་བ་རྣམས་ཀྱི་ནི་སྟེགས་ལྟ་བུ། ཕ་རོལ་དུ་འགྲོ་བ་རྣམས་ཀྱི་ནི་གྲུ་ལྟ་བུ། མཐོ་རིས་སུ་འགྲོ་བ་རྣམས་ཀྱི་ནི་ཐེམ་སྐས་ལྟ་བུ། ཚིག་ངན་པ་དང་ སྐུར་པས་གདུངས་པ་རྣམས་ཀྱི་ནི་གདུགས་ལྟ་བུ། ཕ་རོལ་གྱི་རྒོལ་བ་རྣམས་ཀྱི་ནི་སེང་གེ་ལྟ་བུ། ཆར་པ་རྣམས་ཀྱི་ནི་ཆུ་ལྟ་བུ། བདུད་ཀྱི་དགྲ་རྣམས་ཀྱི་ནི་གོ་ཆ་ལྟ་བུ། བསླབ་པ་འཁྲུལ་པ་རྣམས་ཀྱི་ནི་མིག་འབྱེད་པ་ལྟ་བུ། དགེ་བའི་རྩ་བའི་ལོ་ཏོག་ཐམས་ཅད་ཀྱི་ 66-1-266b ནི་ས་ལྟ་བུ། ནད་པ་རྣམས་ཀྱི་ནི་སྨན་པ་ལྟ་བུ། བཀྲེས་པ་རྣམས་ཀྱི་ནི་འབྲུ་ལྟ་བུ། སྐོམ་པ་རྣམས་ཀྱི་ནི་ཆུ་ཤེལ་ལྟ་བུ། ངལ་བ་རྣམས་ཀྱི་ནི་མལ་ལྟ་བུ། ཏིང་ངེ་འཛིན་དང་ལྡན་པ་རྣམས་ཀྱི་ནི་མེ་ཤེལ་ལྟ་བུ། བྱང་ཆུབ་ཀྱི་ལམ་དུ་ཞུགས་པ་རྣམས་ཀྱི་ནི་ཤིང་རྟ་ལྟ་བུ། སྐྱེད་ མོས་ཚལ་ན་རྩེ་བ་རྣམས་ཀྱི་ནི་རྫིང་བུ་ལྟ་བུ། བྱང་ཆུབ་ཀྱི་ཕྱོགས་ལ་བརྩོན་པ་རྣམས་ཀྱི་ནི་ཕྲེང་བ་ལྟ་བུ་དེ་ཚུར་འོང་སྟེ། རིགས་ཀྱི་བུ་དེ་ཕ་རོལ་ཏུ་ཕྱིན་པ་རྣམས་ཀྱི་ནི་འབྲས་བུ་ལྟ་བུ། རིགས་ཀྱི་བུ་དེ་ས་བཅུ་དང་ལྡན་པ་རྣམས་ཀྱི་ནི་ནོར་བུ་ཡིད་བཞིན་ལྟ་བུ། རིགས་ཀྱི་བུ་དེ་ དཔའ་བར་འགྲོ་བའི་ཏིང་ངེ་འཛིན་དང་ལྡན་པ་རྣམས་ཀྱི་ནི་ཤིང་ཡོངས་འདུ་དང་འདྲ་བ། གཅོད་པའི་ཕྱིར་ལྟ་བ་ངན་པའི་སྦྱོར་བ་ཐམས་ཅད་ཀྱི་ནི་མཚོན་ལྟ་བུ། འཇོམས་པའི་ཕྱིར་བག་ཆགས་ཀྱི་མཚམས་སྦྱོར་བའི་ཉོན་མོངས་པ་ཐམས་ཅད་ཀྱི་ནི་རྡོ་རྗེ་ལྟ་བུ། བདུད་རྣམས་ཀྱིས་ ནི་ཐུབ་པར་དཀའ་བ། ཐབས་དང་ལྡན་པ་རྣམས་ལ་ནི་ཚེས་གྲངས། ཡེ་ཤེས་ཀྱི་ནི་འབྱེད་པ། སངས་རྒྱས་ཀྱི་ཆོས་ཐམས་ཅད་ཀྱི་ནི་གནས། རང་རྒྱལ་བ་རྣམས་ཀྱི་ནི་ཕྲེང་བ་དང་མཚུངས་པ། ཉན་ཐོས་ཐམས་ཅད་ཀྱི་ནི་གོས་དང་མཚུངས་པ། ལྷ་རྣམས་ཀྱི་ནི་མིག་ལྟ་བུ། མི་རྣམས་ཀྱི་ནི་ལམ་ལྟ་བུ། དུད་འགྲོའི་སྐྱེ་གནས་སུ་སྐྱེས་པ་རྣམས་ཀྱི་ནི་སྐྱབས།ཡི་དགས་རྣམས་ཀྱི་ནི་རྟེན། སེམས་ཅན་དམྱལ་བ་པ་རྣམས་ཀྱི་ནི་མགོན། སྦྱིན་གནས་ཀྱི་སེམས་ཅན་ཐམས་ཅད་ཀྱི་ནི་སྣོད་དུ་གྱུར་པ། བྱང་ཆུབ་སེམས་དཔའ་ཐམས་ཅད་ཀྱི་ནི་ཤིང་རྟ་ལྟ་བུ། རིགས་ ཀྱི་བུ་དེ་དུས་གསུམ་དུ་གཤེགས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐམས་ཅད་ཀྱི་ནི་བློན་པོ་ལྟ་བུ། ཆོས་ཀྱི་གྲོང་ཁྱེར་གྱི་ནི་སྒོ་སྲུངས་ཡིན་ཏེ། རིགས་ཀྱི་བུ་དེ་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་ཀྱི་བར་གྱིས་ནི་བརྒྱན་ པ་ཐམས་ཅད་རྫོགས་པའི་སངས་རྒྱས་ཀྱི་ཡེ་ཤེས་དང་ནི་ལྡན། རིགས་ཀྱི་བུ་དེ་དེ་བཞིན་གཤེགས་པ་མ་གཏོགས་པར་སེམས་ཅན་ཐམས་ཅད་ཀྱིས་མཆོད་པའི་དམ་པ་ཐམས་ཅད་ཀྱིས་མཆོད་པར་བྱ་བ་ཡིན་གྱིས། ད་ཁྱེད་འདིར་ལྷགས་པ་ཐམས་ཅད་ཀྱིས་བསུ་བར་གྱིས་ 66-1-267a ཤིག་།མཆོད་པ་དང་བཀུར་སྟི་ཐམས་ཅད་ཀྱིས་དེ་ལ་ཅི་ནུས་པར་རིན་པོ་ཆེའི་གདུགས་དང ། རྒྱལ་མཚན་དང ། བ་དན་དང ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། ལྷའི་གོས་དང ། རྒྱན་དང ། སྣོད་སྣ་ཚོགས་ཀྱིས་བཀུར་ སྟིར་གྱིས་ཤིག་།རིམ་གྲོར་གྱིས་ཤིག་།བསྟི་སྟང་གྱིས་ཤིག་།མཆོད་པར་གྱིས་ཤིག་།ལམ་བྱི་དོར་གྱིས་ཤིག་།བརྒྱན་པར་གྱིས་ཤིག་།བསྟོད་པ་སྣ་ཚོགས་ཀྱིས་བསྟོད་པར་གྱིས་ཤིག་།ཁྱེད་ཐམས་ཅད་ཀྱང་དེ་ལྟ་བུའི་ཡོན་ཏན་ཐོབ་པ་དང ། སྣོད་དུ་གྱུར་ པར་རིང་པོར་མི་ཐོགས་པར་འགྱུར་རོ། །དེ་ནས་འཁོར་ལྷགས་པ་མ་ལུས་པ་མཐའ་དག་སྟན་ལས་ལངས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཕྱོགས་གང་ལོགས་ན་སྣང་བའི་ཕྱོགས་དེ་ལོགས་སུ་མངོན་དུ་ཕྱོགས་ནས་ཐལ་མོ་སྦྱར་ཏེ། སྙིང་ ནི་རབ་ཏུ་དགའ། བཞིན་ནི་རབ་ཏུ་འཛུམ། མིག་ཀྱང་རབ་ཏུ་དང་བས་ལྟ་ཞིང་འདུག་པར་གྱུར་པ་དང ། འཁོར་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་དང ། ཉན་ཐོས་ཆེན་པོ་དང ། ལྷའི་དབང་པོ་དང ། ཀླུའི་དབང་པོ་དང ། གནོད་སྦྱིན་གྱི་དབང་པོ་དང་།དྲི་ཟའི་དབང་པོ་དང ། ལྷ་མ་ཡིན་གྱི་དབང་པོ་དང ། ནམ་མཁའ་ལྡིང་གི་དབང་པོ་དང ། མི་འམ་ཅིའི་དབང་པོ་དང ། ལྟོ་འཕྱེ་ཆེན་པོའི་དབང་པོ་དང ། དྲང་སྲོང་མངོན་པར་ཤེས་པ་ལྔ་དང་ལྡན་པ་དེ་དག་ཐམས་ཅད་འདི་སྙམ་དུ་སེམས་པར་གྱུར་ཏེ། བདག་ཅག་ གིས་རིགས་ཀྱི་བུ་འདི་ལ་བཀོད་པའི་མཆོག་ཇི་ལྟ་བུ་ཞིག་གིས་བཀུར་སྟི་བྱ་སྙམ་མོ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་སངས་རྒྱས་ཀྱི་ཞིང་མི་མཇེད་འདི་ཐམས་ཅད་མ་ལུས་པར་རིན་པོ་ཆེ་སྣ་བདུན་ལས་བྱས་ཤིང ། རི་ དང ། འབྲོག་དང ། རི་སྐམ་དང ། ཕུག་དང ། གྲོག་པོ་དང ། གཡང་ས་དང ། རྩཝ་དང ། རྩིག་པ་དང ། བོང་བ་དང ། གསེག་མ་དང ། དྲི་ང་བ་ལ་སོགས་པ་མེད་ལ་ལག་མཐིལ་ལྟ་བུར་མཉམ་པར་སྤྲུལ་ཏོ། །དེས་དཔལ་དྲི་ཟའི་སྐད་དུ་བརྗོད་པའི་གླུ་དབྱངས་ 66-1-267b དང ། ཤིང་ཐམས་ཅད་ཀྱང་རིན་པོ་ཆེ་སྣ་བདུན་ལས་བྱས་ཏེ། དྲི་ཞིམ་པ་དང ། འདབ་མ་དང ། མེ་ཏོག་དང ། འབྲས་བུར་ལྡན་པར་སྤྲུལ་ཏོ། །ཤིང་ལྗོན་པ་དང ། རྩཝ་དང ། སྐམ་ཤིང་དང ། འདབ་མ་ས་ལ་རྟེན་པ་ཐམས་ཅད་ཀྱང་རིན་པོ་ཆེ་སྣ་བདུན་ལས་བྱས་ པ་སྤྲུལ་ཏོ། །མི་མཇེད་ཀྱི་འཇིག་རྟེན་གྱི་ཁམས་འདི་ཐམས་ཅད་ན་ཡང་ནད་ནི་རབ་ཏུ་ཞི། སེམས་ཅན་དམྱལ་བ་པ་དང ། དུད་འགྲོའི་སྐྱེ་གནས་པ་དང ། གཤིན་རྗེའི་འཇིག་རྟེན་པ་རྣམས་ཀྱི་སྡུག་བསྔལ་ཐམས་ཅད་ཀྱང་རབ་ཏུ་ཞི། སེམས་ཅན་དག་གིས་ཀྱང་ ཟས་དང ། སྐོམ་དང ། གོས་དང ། ཆོས་གོས་དང ། རྒྱན་དག་ཐོབ་པར་གྱུར་ཏོ། །དེའི་ཚེ་གང་དག་མི་མཇེད་ཀྱི་འཇིག་རྟེན་གྱི་ཁམས་སུ་གཏོགས་པའི་སེམས་ཅན་དེ་དག་ཐམས་ཅད་ཀྱང་བསམ་པ་ཡོངས་སུ་རྫོགས་པར་གྱུར་ཏེ། གཟུགས་བཟང་བ། མཛེས་ པ་བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་ཞིང་ཡན་ལག་ཐམས་ཅད་ནི་ཡོངས་སུ་རྫོགས། རྡུལ་མེད་པ་རབ་རིབ་དང་བྲལ་བའི་སྣང་བའི་དཀྱིལ་འཁོར་གྱི་འོད་ཀྱིས་ནི་མཛེས་པར་བྱས། ཉོན་མོངས་པ་རྣམས་དང་ནི་བྲལ། སེམས་ནི་རབ་ཏུ་ཞི། དགེ་ བ་ཐམས་ཅད་ལ་ནི་སེམས་མོས། དཀོན་མཆོག་གསུམ་ལ་ནི་སེམས་རབ་ཏུ་དད་པར་གྱུར་ནས་འཁོར་དེར་ལྷགས་པའི་སེམས་ཅན་རེ་རེའི་ལག་པ་གཉིས་ཀ་ན་ཡང་ནོར་བུ་རིན་པོ་ཆེ་ཐོགས་པར་མཐོང་བར་སྤྲུལ་ནས་ནོར་བུ་རིན་པོ་ཆེ་དེ་རེ་རེ་ལས་ཀྱང་སོ་སོ་དང་འཚམ་པའི་འོད་ ཟེར་གྱི་སྣང་བ་བྱུང་བར་གྱུར་ཏེ། མི་མཇེད་ཀྱི་འཇིག་རྟེན་གྱི་ཁམས་འདི་ཐམས་ཅད་མ་ལུས་པར་སྣང་བ་ཆེན་པོ་དེས་ཁྱབ་པར་གྱུར་ཏོ། །ནོར་བུ་རིན་པོ་ཆེ་དེ་དག་ལས་ཀྱང་རོལ་མོའི་སྒྲ་སྣ་ཚོགས་བྱུང་བར་གྱུར་ཏོ། །ནོར་བུ་རིན་པོ་ཆེ་སྣ་ཚོགས་ཀྱི་ཆར་ཡང་མངོན་པར་བབ་ པར་གྱུར་ཏོ། །གོས་བཟང་པོ་སྣ་ཚོགས་ཀྱི་ཆར་དང ། རྒྱན་སྣ་ཚོགས་ཀྱི་ཆར་དང ། མེ་ཏོག་སྣ་ཚོགས་ཀྱི་ཆར་དང ། སྤོས་སྣ་ཚོགས་ཀྱི་ཆར་དང ། ཕྲེང་བ་སྣ་ཚོགས་ཀྱི་ཆར་དང ། གདུགས་སྣ་ཚོགས་ཀྱི་ཆར་དང ། སྣོད་སྣ་ཚོགས་ཀྱི་ཆར་དང ། འབྲས་བུ་སྣ་ 66-1-268a ཚོགས་ཀྱི་ཆར་ཡང་བབ་པར་གྱུར་ཏོ། །ལྷའི་གོས་དང ། ཆོས་གོས་དང ། གསེར་གྱི་སྐུད་པ་དང ། མུ་ཏིག་གི་སེ་མོ་དོ་དང ། མེ་ཏོག་པད་མ་དང ། ུད་པ་ལ་དང ། ཀུ་མུ་ད་དང ། པད་མ་དཀར་པོ་དང ། ུ་ར་ག་ས་ལ་དང ། ཙན་དན་སྦྲུལ་གྱི་སྙིང་ པོ་དང ། ཤིང་ཏ་མ་ལའི་འདབ་མ་དང ། ཙན་དན་ས་མཆོག་པའི་བྱེ་མས་ལམ་དེར་བཀྲམ་པར་མངོན་པར་སྤྲུལ་ཏོ། །ལམ་དེའི་གཡས་གཡོན་གཉི་གར་རྣམ་པར་རྒྱལ་བྱེད་ཀྱི་ཁང་པ་དང་འདྲ་བ། རིན་པོ་ཆེ་སྣ་བདུན་གྱི་ཁང་བཟངས་ཀྱང་མངོན་པར་སྤྲུལ་ཏེ། ཁང་པ་དེ་ན་ འདོད་པའི་དབང་ཕྱུག་གི་ཆུང་མ་དམ་པ་དང ། སླས་དང་འདྲ་བ་དང ། ཡན་ལག་ལྔ་དང་ལྡན་པའི་སིལ་སྙན་སྒྲོགས་ཤིང་རྩེ་དགའ་ཞིང་དགའ་དགུར་སྤྱོད་པ་དེ་འདྲ་བ་དག་དེར་སྤྲུལ་ཏོ། །བཅོམ་ལྡན་འདས་ཀྱི་དབུའི་སྟེང་གི་ནམ་མཁའ་ལ་ལྷའི་ནོར་བུ་རིན་པོ་ཆེ་ལས་བྱས་ པའི་ཚངས་པ་ཆེན་པོའི་གདུགས་ལྟ་བུའི་དཔག་ཚད་བརྒྱ་ཙམ་ལ་རིན་པོ་ཆེའི་དྲ་བའི་སྐུད་པ་དང ། མུ་ཏིག་གི་རྒྱན་ཕྲེང་གིས་ལེགས་པར་བརྒྱན་པ་མངོན་པར་སྤྲུལ་ཏེ། རྒྱན་དེ་དག་ལས་ཀྱང་ལྷ་ལས་འདས་པའི་སིལ་སྙན་ཡན་ལག་ལྔ་དང་ལྡན་པའི་གླུའི་དབྱངས་ཀྱི་སྒྲ་ འབྱུང་ངོ ། །རྩཝ་དང ། ཤིང་དང ། འདབ་མ་དང ། མེ་ཏོག་དང ། འབྲས་བུ་ལ་སོགས་པ་གང་ཅི་ཡང་རུང་སྟེ་ས་ལ་རྟེན་པ་དེ་དག་ཐམས་ཅད་ལས་ཀྱང་ལྷ་ལས་འདས་པའི་ཡན་ལག་ལྔ་དང་ལྡན་པའི་སིལ་སྙན་ལས་བསྟོད་པའི་སྒྲ་འབྱུང་བར་གྲག་སྟེ། སྒྲ་དེ་གང་གི་ རྣར་ཐོས་པའི་སེམས་ཅན་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་འཁོར་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོའི་བཀོད་པ་ཆེན་པོ་དེ་མཐོང་སྟེ། ཤིན་ཏུ་ངོ་མཚར་དང་ རྨད་དུ་བྱུང་བའི་ཆོས་ཐོབ་ནས་དེ་དག་འདི་སྙམ་དུ་སེམས་ཏེ། བཅོམ་ལྡན་འདས་ཀྱི་སྤྱན་སྔར་སྐྱེས་བུ་དམ་པ་དེའི་སྟན་ཇི་ལྟ་བུར་བཤམ་སྙམ་མོ། །དེ་ནས་དེའི་ཚེ་བཅོམ་ལྡན་འདས་ཀྱི་སྤྱན་སྔར་རིན་པོ་ཆེ་ལས་བྱས་པའི་མེ་ཏོག་པད་མ་སྡོང་བུ་ནི་དངུལ། ལོ་མ་ནི་གསེར། 66-1-268b སྙིང་པོ་ནི་རིན་པོ་ཆེ་རྡོའི་སྙིང་པོ། ཟེ་བ་ནི་ནོར་བུ་རིན་པོ་ཆེ་ཚངས་པའི་འོད་ཟེར་ལས་བྱས་པ། རྒྱར་ནི་རྒྱང་གྲགས་གཅིག་ཙམ་ཡོད་པ། མེ་ཏོག་པད་མའི་ཟེ་བའི་སྟན་རྣམ་པ་འབུམ་ཕྲག་དུ་མས་ཡོངས་སུ་བསྐོར་ཅིང་མདུན་དུ་བདར་བའི་པད་མ་བྱུང་ནས་པད་མའི་སྟེང་དེ་ ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་སྐྱིལ་མོ་ཀྲུང་བཅས་ཏེ་འདུག་པར་སྣང་ངོ ། །དེའི་སྤྱི་བོ་ལ་ཡང་ནོར་བུ་རིན་པོ་ཆེ་འདུག་པར་སྣང་ངོ ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོའི་གཡོག་བྱང་ཆུབ་སེམས་ དཔའ་སེམས་དཔའ་ཆེན་པོ་དཔའ་བར་འགྲོ་བའི་ཏིང་ངེ་འཛིན་ཐོབ་པ་བརྒྱ་བྱིན་ཐོགས་པའི་ནོར་བུ་རིན་པོ་ཆེས་བརྒྱན་པ་འབུམ་ཕྲག་མང་པོ་རྣམས་ཀྱང་རང་རང་གི་པད་མའི་ཟེ་བའི་སྟན་ལ་འཁོད་པར་སྣང་ངོ ། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ ཆེན་པོ་བྱམས་པས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་ལ་འདི་སྐད་ཅེས་སྨྲས་སོ། །བྱང་ཆུབ་སེམས་དཔའ་གྲགས་ཆེན་རྣམས། །གང་དག་སྔོན་དུ་འོངས་པ་ནི། །གུས་དང་ལྡན་པས་ཕྱག་བྱས་ཏེ། །ཕྱི་ནས་སྟན་ལ་འདུག་བྱེད་ན། །སྐྱེས་བུ་ དམ་པ་འདི་འོངས་ན། །བཀོད་ཆེན་དག་ཀྱང་བསྟན་གྱུར་ན། །སྟོན་ལ་ཕྱག་ཀྱང་མ་བཙལ་བར། །སྟན་ལ་འདུག་པ་ལྟ་བུར་སྣང ། །སྨན་གྱི་རྒྱལ་པོས་སྨྲས་པ། སྐྱེས་བུ་དམ་པ་འདི་ཉིད་ནི། །སངས་རྒྱས་ཆོས་ལ་རབ་གནས་མཐོང ། །རྟོག་པ་ཀུན་ལ་མི་ གནས་པས། །སེམས་ཅན་དུ་ནི་མི་མཐོང་ངོ ། །བྱང་ཆུབ་སེམས་དཔའ་བྱམས་པས་སྨྲས་པ། ཡང་དག་མཐའ་ལ་གནས་པའི་ཕྱིར། །དེ་ལྟར་སེམས་ཅན་མི་མཐོང་ན། །བཀོད་པ་ཆེ་འདི་ཅི་ཕྱིར་བསྟན། །ཐེ་ཙོམ་གྱུར་པ་བཤད་པར་མཛོད། །སྨན་ གྱི་རྒྱལ་པོས་སྨྲས་པ། ཀུན་ཏུ་རྟོག་པའི་སྤྱོད་ཡུལ་ཅན། །བྱིས་པས་དོན་དམ་མི་ཤེས་ཏེ། །སེམས་ཅན་ཡོངས་སྨིན་བྱ་བའི་ཕྱིར། །འདི་ནི་དཔའ་བོའི་ཐབས་ཡིན་ནོ། །དོན་དམ་གྱིས་ནི་སྡུག་བསྔལ་བ། །དེ་དག་རབ་ཏུ་དགྲོལ་བའི་ཕྱིར། །མཁས་ 66-1-269a པས་ཀུན་རྫོབ་བདེན་པ་ཡིས། །འདི་འདྲ་བ་ཡི་བཀོད་པ་བསྟན། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སྨན་གྱི་རྒྱལ་པོ་ལ་ལེགས་སོ་ཞེས་བྱ་བ་བྱིན་ཏེ་ལེགས་སོ་ལེགས་སོ། །སྐྱེས་བུ་དམ་པ་ཁྱོད་ཀྱིས་ ཇི་སྐད་སྨྲས་པ་དེ་བཞིན་ཏེ། བྱིས་པ་སོ་སོའི་སྐྱེ་བོ་སེམས་ཅན་ཐམས་ཅད་ཇི་སྙེད་པ་དེ་དག་ཐམས་ཅད་ཀྱིས་ཀྱང་རྒྱུན་དུ་ཞུགས་པ་གཅིག་གི་སྤྱོད་ཡུལ་དང ། སྦྱོར་བ་དང ། རྣམ་པར་གྲོལ་བ་མི་ཤེས་སོ། །ཡོངས་སུ་བརྟག་པ་བཟུང་ན་གལ་ཏེ་སེམས་ཅན་ ཐམས་ཅད་རྒྱུན་དུ་ཞུགས་པར་གྱུར་ན་ཡང་དེ་དག་གིས་ལན་ཅིག་ཕྱིར་འོང་བ་གཅིག་གི་སྤྱོད་ཡུལ་དང ། སྦྱོར་བ་དང ། རྣམ་པར་གྲོལ་བ་མི་ཤེས་སོ། །དེ་བཞིན་དུ་ལན་ཅིག་ཕྱིར་འོང་བ་རྣམས་ཀྱིས་ཀྱང་ཕྱིར་མི་འོང་བ་དང ། ཕྱིར་མི་འོང་བ་རྣམས་ཀྱིས་ཀྱང་ དགྲ་བཅོམ་པ་དང ། དགྲ་བཅོམ་པ་རྣམས་ཀྱིས་ཀྱང་རང་སངས་རྒྱས་ཀྱི་མི་ཤེས་ཏེ། གལ་ཏེ་སེམས་ཅན་ཐམས་ཅད་བསེ་རུ་ལྟ་བུའི་རང་སངས་རྒྱས་སུ་གྱུར་ཀྱང་དེ་དག་ཐམས་ཅད་ཀྱིས་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་ཐོབ་པ་གཅིག་གི་སྤྱོད་ ཡུལ་དང ། རྣམ་པར་གྲོལ་བ་དང ། དོན་དམ་པ་ལ་བརྟག་པ་དང ། སེམས་ཅན་ཡོངས་སུ་སྨིན་པར་བྱ་བའི་སྦྱོར་བ་མི་ཤེས་སོ། །ཡོངས་སུ་བརྟག་པ་བཟུང་ན་གལ་ཏེ་སེམས་ཅན་ཐམས་ཅད་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཀྱང་དེ་དག་གིས་བྱང་ ཆུབ་སེམས་དཔའ་སོ་སོ་རིག་པ་ཐོབ་པ། དཔའ་བར་འགྲོ་བའི་ཏིང་ངེ་འཛིན་ཐོབ་པ་གཅིག་གི་སྤྱོད་ཡུལ་དང ། མོས་པ་དང ། དོན་དམ་པའི་བདེན་པ་ལ་བརྟག་པའི་བྱིན་གྱིས་བརླབས་མི་ཤེས་སོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ ནམ་མཁའི་སྙིང་པོ་འདི་ཡང་མི་སྐྱེ་བའི་ཆོས་ལ་བཟོད་པ་ཐོབ། སོ་སོར་རིག་པ་ཐོབ། དཔའ་བར་འགྲོ་བའི་ཏིང་ངེ་འཛིན་ཐོབ་ནས་བསྐལ་པ་དཔག་ཏུ་མེད་པ་ལས་འདས་ཏེ། ཇི་ལྟར་ད་ལྟར་ངའི་འདུས་པ་ཆེན་པོ་ན་འཁོད་པའི་སེམས་ཅན་རྣམས་ཀྱི་བསམ་པ་དང ། བག་ 66-1-269b ལ་ཉལ་ཤེས་ནས་ཇི་ལྟར་འདི་ན་སེམས་ཅན་ཁ་ཅིག་བཀོད་པ་ཆེན་པོ་འདིའི་ཕྱིར་འོང་ཞིང་ཏིང་ངེ་འཛིན་དང ། བཀོད་པ་ཆེན་པོ་བལྟ་བའི་ཕྱིར་འདོད་ཆགས་དང་བྲལ་བའི་ས་ལ་གནས་པར་འགྱུར་བ་དང ། ཇི་ལྟར་རིགས་ཀྱི་བུ་དེ་འདི་ཉིད་དུ་མི་སྣང་བར་གྱུར་ནས་ནུབ་ཕྱོགས་ ནས་འདིར་འོང་ཞིང ། ཉན་ཐོས་དང ། རང་སངས་རྒྱས་རྣམས་དང་ཐུན་མོང་མ་ཡིན་པ། མཐའ་ཡས་པའི་ནམ་མཁའ་མཐའ་ཡས་སྐྱེ་མཆེད་ཀྱི་མངོན་པར་ཤེས་པ་དང ། ཏིང་ངེ་འཛིན་ཀྱང་བསྟན། སེམས་ཅན་ཐམས་ཅད་ཀྱང་སྐྱོ་བར་བྱས་ནས་དེའི་འོག་ཏུ་སེམས་ཅན་དཔག་ ཏུ་མེད་པ་ཡོངས་སུ་སྨིན་པར་བྱ་བའི་ཕྱིར་ཀུན་རྫོབ་ཀྱི་བདེན་པས་བསྒྲུབ་པའི་བཀོད་པ་ཆེན་པོ་ཡང་བསྟན། ཏིང་ངེ་འཛིན་གྱི་བཀོད་པ་ཆེན་པོ་ཡང་བསྟན་པ་བཞིན་ནོ། །གལ་ཏེ་རིགས་ཀྱི་བུ་དེ་དོན་དམ་པའི་བདེན་པ་མི་སྐྱེ་བའི་བཀོད་པ་སྟོན་དུ་ཟིན་ན་ལྷ་དང་བཅས་པའི་འཇིག་ རྟེན་རྨོངས་པར་འགྱུར། བསླད་པར་འགྱུར་རོ། །བྱང་ཆུབ་སེམས་དཔའ་ས་བརྒྱད་པ་ལ་གནས་པའི་བར་དུ་ཡང་བསླད་པར་འགྱུར་བས་འདིའི་སྤྱོད་ཡུལ་དང ། སྦྱོར་བའི་མཚན་མ་སྟོན་པར་མི་ནུས་ཏེ། དེ་ལྟར་ཆོས་ཟབ་མོའི་ཡོན་ཏན་ལ་གནས་སོ། །རིགས་ཀྱི་བུ་དེ་ནི་ཐབས་ ཤེས་པ་ལ་གནས་སོ། །སངས་རྒྱས་ཀྱི་ཆོས་རྒྱ་མཚོ་ཐམས་ཅད་ལ་གནས་སོ། །ཐེ་ཚོམ་མེད་དོ། །ཡེ་ཤེས་གཞན་ལ་རག་མ་ལས་པ་ལ་མཁས་སོ། །བྱང་ཆུབ་སེམས་དཔའ་ཐམས་ཅད་ཀྱི་རྒྱལ་མཚན་གྱི་མཆོག་རྒྱལ་པོ་ལ་འོས་པ་དང་འདྲའོ། །རིགས་ཀྱི་བུ་ བྱང་ཆུབ་སེམས་དཔའ་ནམ་མཁའི་སྙིང་པོ་དེ་ནི་སེམས་ཅན་ཐམས་ཅད་མཐོ་རིས་དང་ཐར་པར་སྐྱེ་བར་སྟོན་པའོ། །སེམས་ཅན་ཐམས་ཅད་ཀྱི་སེམས་ཀྱི་ཉོན་མོངས་པའི་ནད་ལས་ཡོངས་སུ་ཐར་བར་བྱེད་པའོ། །ལུས་ཀྱི་དུག་འབྱུང་བ་ཆེན་པོའི་ནད་གསོ་བར་བྱེད་ པའོ། །སེམས་ཅན་གང་དག་ལྟ་བ་ངན་པས་སྡུག་བསྔལ་བར་གྱུར་པའི་འཁོར་བའི་འབྲོག་བསླད་ནས་མཐོ་རིས་དང་ཐར་པར་གནས་པའི་ཐབས་མི་ཤེས་པ་དེ་དག་ཀྱང་གལ་ཏེ་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་རྗོད་པར་བྱེད། ཕྱག་འཚལ་བར་བྱེད། དྲི་ 66-1-270a འབུལ། ཨ་ག་རུའི་བདུག་པས་བདུག་པར་བྱེད་ན། རིགས་ཀྱི་བུ་དེ་ནི་དེ་དག་གི་བསམ་པ་དང ། བག་ལ་ཉལ་བ་དང ། དེ་དག་གི་ཉོན་མོངས་པ་དང་ལྡན་པའི་ལྟ་བ་སེམས་དང་འབྲེལ་པ་ཅི་འདྲ་བ་དང ། སྔོན་གྱི་དགེ་བའི་རྩ་བ་ བསྐྱེད་པ་ཅི་འདྲ་བ་ལ་ཡང་རྟོག་ཅིང་སེམས་སྦྱོང་བ་ཇི་ལྟ་བུར་བྱ་བའི་རིགས་པ་དགེ་བའི་རྩ་བ་སངས་རྒྱས་ལ་བསྐྱེད་པའམ། ཆོས་ལ་བསྐྱེད་པའམ། དགེ་འདུན་ལ་བསྐྱེད་པའམ། བསོད་ནམས་བྱ་བའི་དངོས་པོ་སྦྱིན་པའི་རང་བཞིན་ནམ། ཚུལ་ཁྲིམས་ཀྱི་རང་ བཞིན་ནམ། བསྒོམ་པའི་རང་བཞིན་ཡང་རུང་སྟེ། དེ་དག་ཐམས་ཅད་རྨི་ལམ་ན་ཡང་རུང ། སད་པའི་ཚེ་ཡང་རུང་སྟེ། དེ་བཞིན་དུ་ཐབས་མཁས་པས་མངོན་སུམ་དུ་ལམ་དྲང་པོའི་ཐབས་ཀྱིས་སྟོན་ཏེ། ཐབས་དེས་ལྟ་བ་ངན་པ་དང ། བྱེད་པ་དང ། སྨོན་ལམ་ ངན་པའི་བསམ་པ་དང ། སྐྱབས་ངན་པ་དང ། ངན་པར་འཇུག་པའི་སེམས་ལས་མྱུར་དུ་ཐར་བར་བྱེད་དོ།ཅི་ནས་ཀྱང་དེའི་ལུས་དང ། ངག་དང ། ཡིད་ཀྱི་སྦྱོར་བ་དྲང་པོར་འགྱུར་བ་དང ། སྨོན་ལམ་དྲང་པོ་དང ། དགེ་བའི་བཤེས་གཉེན་དྲང་པོ་དང ། བསྟན་ པར་འགྱུར་བ་དང ། མྱུར་དུ་དྲི་མི་ཞིམ་པ་དང ། ཉོན་མོངས་པ་དང ། སྡིག་པའི་ལྟ་བ་ལས་ཡོངས་སུ་ཐར་བར་འགྱུར་བ་དང ། དེ་དག་གི་ངན་སོང་དུ་འགྲོ་བའི་སྡིག་པའི་ལམ་ཐམས་ཅད་སྨོན་ལམ་གྱི་དབང་དང ། ལེགས་པར་སྤྱད་པའི་ལས་ཀྱིས་མྱུར་དུ་བྱང་བར་ འགྱུར་བ་དང ། དེ་དག་མྱུར་དུ་བདག་གི་སེམས་ལ་དབང་ཐོབ་པར་འགྱུར་བ་དང ། ཟབ་མོའི་བཟོད་པ་ལ་གནས་པར་འགྱུར་བའི་ཐབས་སྟོན་ཏོ། །གང་ཡང་སེམས་ཅན་ལུས་ལ་ནད་སྣ་ཚོགས་ཀྱིས་གཟིར་བ་དང ། གང་ཡང་སེམས་གཡེངས་པ་དང ། གང་དག་ གི་མིག་གི་བར་ཆད་བྱས་པ་དང ། ལྕེ་བཅིངས་པ་དང ། གང་དག་གི་ཡན་ལག་གང་ཡང་རུང་བ་ཞིག་ཉམས་པར་གྱུར་ན། གལ་ཏེ་དེ་དག་གི་ནད་རབ་ཏུ་ཞི་བར་བྱ་བ་དང ། ནད་མེད་པ་ཐོབ་པར་བྱ་བའི་ཕྱིར་སྙིང་ཐག་པ་ནས། བྱང་ཆུབ་སེམས་དཔའ་སེམས་དཔའ་ 66-1-270b ཆེན་པོ་ནམ་མཁའི་སྙིང་པོའི་མིང་ནས་རྗོད་པར་བྱེད་ཅིང་ཨ་ག་རུ་དང ། རྒྱ་སྤོས་ཀྱིས་བདུགས་ནས། སྐྱེས་བུ་དམ་པ་ནམ་མཁའི་སྙིང་པོ་ལ་ཕྱག་འཚལ་ནས། རིགས་ཀྱི་བུ་དེ་ནི་དེ་དག་གི་རྨི་ལམ་ན་བྲམ་ཟེའི་གཟུགས་ཀྱིས་མདུན་དུ་འདུག་གམ། བརྒྱ་བྱིན་གྱི་གཟུགས་ སམ། དཔལ་གྱི་གཟུགས་སམ། དབྱངས་ཅན་གྱི་གཟུགས་སམ། རྒྱལ་རིགས་ཀྱི་གཟུགས་སམ། བློན་པོའི་གཟུགས་སམ། དཔའ་བོའི་གཟུགས་སམ། སྨན་པའི་གཟུགས་སམ། ཕའི་གཟུགས་སམ། མའི་གཟུགས་སམ། ཁྱེའུའི་གཟུགས་ སམ། བུ་མོའི་གཟུགས་ཀྱིས་རྨི་ལམ་ན་ནད་པའི་མདུན་དུ་འདུག་སྟེ་དེའི་ནད་ཞི་བར་བྱ་བའི་ཕྱིར་སྨན་དང་ཡོ་བྱད་དུ་གྱུར་པ་ཐམས་ཅད་དེ་བཞིན་དུ་སྟོན་ཅིང་ནད་པའི་སྦྱོར་བ་གཅིག་གིས་ནད་ཐམས་ཅད་ཞི་བར་འགྱུར་རོ། །དེ་བཞིན་དུ་གང་ཞལ་ཏ་དང ། ལོངས་སྤྱོད་འདོད་པ་ དང ། གང་ཁ་ཏོན་དང ། ཐོས་པར་འདོད་པ་དང ། གང་དབེན་པར་འདོད་པ་དང ། གང་བསམ་གཏན་ལ་བསམ་གཏན་བྱེད་པ་དང ། ཤེས་རབ་འདོད་པ་དང ། གང་ཡང་གྲགས་པར་འདོད་པ་དང ། གང་བཟོ་སྦྱོང་བར་འདོད་པ་དང ། གང་དབང་ཕྱུག་འདོད་པ་དང ། གང་གཟུགས་འདོད་པ་དང ། གང་ནོར་འདོད་པ་དང ། གང་དམ་པ་འདོད་པ་དང ། གང་རིགས་འདོད་པ་དང ། གང་བུ་འདོད་པ་དང ། གང་གཡོག་འདོད་པ་དང ། གང་ཡོན་ཏན་འདོད་པ་དང ། གང་སྦྱིན་པ་འདོད་པ་དང ། གང་ཚུལ་ཁྲིམས་འདོད་པ་ནས། གང་ ཤེས་རབ་ཀྱི་བར་དུ་འདོད་པ་དང ། གང་ཚིག་འཇམ་པོ་འདོད་པ་དང ། གང་སེམས་ཅན་རྣམས་དང་འཐུན་པར་འདོད་པ་དང ། གང་སྡིག་པ་ལས་ཐར་བར་བྱ་བར་འདོད་པ་དང ། གང་སྦྱིན་པ་ལ་གཞོག་པར་འདོད་པ་ནས། ཤེས་རབ་ལ་གཞོག་པའི་བར་དུ་འདོད་པ་དང ། ཚེ་རིང་བར་འདོད་པ་དང ། ལོངས་སྤྱོད་འདོད་པ་དང་མི་འབྲལ་བར་འདོད་པ་དང ། སེམས་ཅན་སེར་སྣ་ཅན་རྣམས་གཏོང་བ་ལ་གཞོག་པར་འདོད་པ་དང ། ཚུལ་ཁྲིམས་འཆལ་པ་དག་ཚུལ་ཁྲིམས་ལ་གཞོག་པར་འདོད་པ་དང ། ལེ་ལོ་ཅན་དག་བརྩོན་འགྲུས་ལ་གཞོག་ 66-1-271a པར་འདོད་ན། དེ་དག་ལ་རིགས་ཀྱི་བུ་འདི་ནི་ཐབས་སྟོན་པར་བྱེད་དོ། །གང་སྙིང་རྗེ་ཆེན་པོ་དང་མ་བྲལ་ཞིང་བདག་ལ་ལྟ་ཞིང་སེམས་ཅན་ཐམས་ཅད་ལ་བཏང་སྙོམས་སུ་བྱེད་ལ། བདག་གིས་ཐབས་གང་གིས་སེམས་ཅན་འདི་དག་བླ་ན་མེད་ པ་ཡང་དག་པར་རྫོགས་པའི་བྱང་ཆུབ་ལ་སེམས་བཞག་པ་དང ། ཐབས་མཁས་པ་ལ་དགོད་པ་དང ། ཚངས་པའི་གནས་བཞི་ནས་སྙིང་རྗེ་ཆེན་པོའི་བར་ལ་དགོད་པར་བྱ་སྙམ་དུ་སེམས་པ་དེས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་བྱའོ། །དགོན་ པའམ། དབྱེའམ། བླ་གབ་མེད་པར་ཨ་ག་རུ་དང ། རྒྱ་སྤོས་དང ། དུས་ཀྱི་རྗེས་སུ་འབྲང་བས་བདུག་པར་བྱའོ། །ཐལ་མོ་སྦྱར་ཏེ་ཕྱོགས་མཚམས་ཀུན་ཏུ་ཡན་ལག་ལྔས་ཕྱག་འཚལ་ནས་སྔགས་ཀྱི་ཚིག་འདི་བཟླས་པར་བྱའོ། །ཏདྱ་ཐཱ། སུ་མྲི་ཤ་། སུ་མྲི་ཤ་།ཀཱ་རུ་ཎི་ཀ། ཙ་ར་ཙ་ར། བི་ཙ་ར། སཾ་ཙ་ར། ཀཱ་རུ་ཎི་ཀ་།མུར་མུར། བེ་ག་དྷ་རི། མ་ཙ་མེ། བྷུ་ཛ་བཱ་ད། མ་ཧཱ་ཀཱ་རུ་ཎི་ཀཱ། ཙི་ན་ཏ་མ་ཎི་པཱུ་རཱ་ཡ། ཀཱ་རུ་ཎི་ཀ་སརྦ་ཤ་མེསྠ་པཱ་ཡ། ཨ་ཛྙཱ་དྷཱ་རི། སྥུ་གུང་སྥུ་གུང ། རུ་ཏི་བི་བེ་ཀ་གུང་དྲིཥྚི་བི་ བེ་ཀ་གུང ། པཱུ་ར་ཡ་ཀཱ་རུ་ཎི་ཀ་།པཱུ་རཱ་ཡན་ཏུ་མ་མ། ཨ་ཤ་སརྦ་པན་ཐ་ཙ། ཨ་ཤོ་ཀ་ག་ཏི་སཝཱ་ཧཱ། སྔགས་འདི་ལན་དུ་མར་བཟླས་ཏེ་ཉལ་བར་བྱའོ། །རིགས་ཀྱི་བུ་དེ་ནི་དེ་ལ་མིའི་གཟུགས་སམ། རི་དགས་ཀྱི་གཟུགས་སམ། བྱའི་གཟུགས་སམ། བདག་ཉིད་དུ་སྟོན་ པའམ། དེའི་བསོད་ནམས་ཀྱི་སྐལ་པ་ཇི་ལྟ་བུ་དེ་འདྲ་བའི་གཟུགས་སམ། ཚིག་གིས་དེ་ལ་ཚུལ་གཅིག་པ་དེ་འདྲ་བའི་ཐབས་སྟོན་པར་བྱེད་དེ། ཐབས་གཅིག་པོ་དེས་སེམས་ཅན་ཁྲག་ཁྲིག་བརྒྱ་ཕྲག་སྟོང་དུ་མ་དག་ཡོངས་སུ་སྨིན་པར་བྱེད་ནུས་སོ། །གང་ཐེག་པ་ ལ་མི་གནས་པ་དང ། གང་ཉན་ཐོས་ཀྱི་ཐེག་པ་ལ་གནས་པ་དང ། རང་སངས་རྒྱས་ཀྱི་ཐེག་པ་ལ་གནས་པའི་སེམས་ཅན་དག་དེས་ཐང་ཅིག་ཡུད་ཙམ་དང་ལྡན་པའི་ཤེས་རབ་དང ། ཐབས་ཆུང་ཟད་ཀྱིས་ཀྱང་བླ་ན་མེད་པའི་ཐེག་པ་ཆེན་པོ་ལ་ཕྱིར་མི་ལྡོག་པར་གཞོག་ 66-1-271b པ་ནས། ཏིང་ངེ་འཛིན་དང ། གཟུངས་དང ། བཟོད་པ་སྣ་ཚོགས་དང ། ས་བཅུ་ལ་གཞོག་པའི་བར་དུ་ནུས་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དེ་ནི་ཐབས་དང ། ཡེ་ཤེས་དང ། སྙིང་རྗེ་ཆེན་པོ་བསམ་གྱིས་མི་ཁྱབ་ པ་དང་ལྡན་ནོ། །རིགས་ཀྱི་བུ་ནམ་མཁའི་ཚད་ནི་ལ་ལས་གཟུང་ནུས་ཀྱི། རིགས་ཀྱི་བུ་དེའི་ཐབས་དང ། ཡེ་ཤེས་དང ། བྱམས་པ་ཆེན་པོ་དང ། སྙིང་རྗེ་ཆེན་པོ་དང་།ཏིང་ངེ་འཛིན་གྱི་སྟོབས་བསྐྱེད་པ་དང ། སེམས་ཅན་ཡོངས་སུ་སྨིན་པར་བྱེད་པའི་ཚད་གཟུང་ བར་ནི་མི་ནུས་ཏེ། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དེ་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །རིགས་ཀྱི་བུ་སེམས་ཅན་གང་གཡོ་མེད་པ། སྒྱུ་མེད་པ། ཡང་དག་པའི་ནན་ཏན་དང་ལྡན་པ། ལྟ་བ་དྲང་པོ་དང་ལྡན་ པ། གཞན་མི་སྨོད་པ། བདག་མི་སྟོད་པ། ཕྲག་དོག་དང་སེར་སྣ་སྤངས་པ། ཚུལ་འཆོས་པ་མེད་པ། ལྷག་པའི་བསམ་པ་དང་ལྡན་པ་དེ་དག་ལ་ནི་རིགས་ཀྱི་བུ་འདི་སྙིང་བརྩེ་བར་བྱེད་དེ། ཐབས་དང ། ཡེ་ཤེས་དང ། བརྩོན་འགྲུས་དང ། རྟུལ་བའི་ཐབས་ ཀྱང་སྟོན་ཅིང་སེམས་ཅན་དེ་ཐབས་དང ། ཡེ་ཤེས་དང ། བརྩོན་འགྲུས་དང ། རྟུལ་བ་དེས་དེ་འདྲ་བའི་སྡུག་བསྔལ་ལས་ཡོངས་སུ་ཐར་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེ་བར་བྱེད་དོ། །དགེ་བའི་རྩ་བ་ཐམས་ཅད་ཀྱང་བྱང་ཆུབ་ཏུ་ སྔོ་བར་བྱེད་དེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་འགྱུར་རོ། །མཐུ་དང ། བརྩོན་འགྲུས་དང ། རྟུལ་བ་ཆེན་པོ་དེས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱ་བའི་ཕྱིར་སྤྲོ་བ་དང ། རྟུལ་བ་ཆེན་པོར་འགྱུར། མྱུར་ དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། ད་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དེ་ནི་ཡོན་ཏན་གྱི་ཆོས་དང་རྟུལ་བ་བསམ་གྱིས་མི་ཁྱབ་པ་དང་ལྡན་པ་སེམས་ཅན་ཐམས་ 66-1-272a ཅད་ཡོངས་སུ་སྨིན་པར་བྱེད་པའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་འདི་ཅིའི་སླད་དུ་ཡན་ལག་གི་དམ་པ་མགོ་བོ་ལ་ཡིད་བཞིན་གྱི་ནོར་བུ་རིན་པོ་ཆེ་འཆང་ ཞིང་དེ་ཤིན་ཏུ་ལྷམ་མེ། ལྷང་ངེར་གདའ་ལ། བྱང་ཆུབ་སེམས་དཔའ་གཞན་དག་ལ་དེ་ལྟར་མ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་འདི་ནི་སྙིང་རྗེ་ཆེན་པོ་དང་ལྡན་པ། སེམས་ཅན་ལ་ཕན་པའི་ཕྱིར་ཞུགས་པ། སྡུག་བསྔལ་ཆེན་པོ་ལས་ཐར་བར་བྱེད་པ་སྟེ། སེམས་ཅན་གང་དག་ལྟུང་བའི་རྩ་བ་བྱུང་བ། ངན་སོང་དུ་འགྲོ་བ། དགེ་བའི་རྩ་བ་ཐམས་ཅད་སྤྲུག་པར་བྱེད་པ། འཇིག་པར་བྱེད་པའི་སེམས་ཅན་དེ་དག་ལ་རིགས་ཀྱི་བུ་ འདི་ནི་སྨན་དུ་གྱུར་པའོ། །མ་རིག་པའི་མུན་པ་མུན་ནག་དང ། ལྟ་བ་ངན་པའི་སྡུག་བསྔལ་བར་གྱུར་པ་རྣམས་ལ་ནི་འདི་ཉི་མ་དང་མཚུངས་པའོ། །ལྟུང་བའི་རྩ་བ་འཆགས་སུ་འཇུག་པའོ། །དེ་དག་གི་སྙིང་ལ་ཐེ་ཚོམ་ཡོད་པ་དང་འབྲལ་བར་བྱེད་པའོ། །གང་ དག་གི་སྙིང་གི་སྣོད་ཆག་པར་གྱུར་པ། ལྟུང་བར་གྱུར་པ་ཕས་ཕམ་པའི་སེམས་ཅན་དགེ་བའི་ཆོས་ཐམས་ཅད་ཞིག་པར་གྱུར་པ། ངན་སོང་དུ་འགྲོ་བ། མགོན་མེད་པ། རྟེན་མེད་པ། མཁས་པ་ཐམས་ཅད་ཀྱིས་སྤངས་པ་རྣམས་ལ་ནི་རིགས་ཀྱི་བུ་འདི་ཁར་བ་དང་ མཚུངས་པའོ། །ལམ་སྟོན་པའོ། །སྡིག་པ་ཐམས་ཅད་དང ། དྲི་མི་ཞིམ་པ་ཐམས་ཅད་སྟོན་པར་བྱེད་པ་འཁྲུ་བར་བྱེད་པའོ། །འགྲོ་བ་ངན་པའི་ལམ་ལས་ཟློག་པར་བྱེད་པའོ། །ཤིང་རྟ་དང་མཚུངས་པའོ། །མཐོ་རིས་དང་ཐར་པ་ལ་འཇོག་པར་བྱེད་པའོ། ། རིགས་ཀྱི་བུ་འདི་ནི་སེམས་ཅན་གང་དག་སེམས་ཤིན་ཏུ་འདོད་པར་འཇུག་པ་དང ། གང་དག་ཤིན་ཏུ་ཁྲོ་བ་དང ། གནོད་སེམས་དང ། གནོང་བ་འཆབ་པ་དང ། སེར་སྣས་སེམས་འཁྲུགས་པར་གྱུར་པ་དང ། གང་དག་ཤིན་ཏུ་གཏི་མུག་གིས་མུན་པར་སོང་བ་དང་། 66-1-272b རྒྱུ་མེད་པར་སྨྲ་བ་དང ། འཇིག་རྟེན་ཕ་རོལ་གྱིས་མི་འཇིགས་པར་ལྟ་བ་དང ། གང་དག་ནོར་སོགས་པས་ཆོག་མི་ཤེས་པ་དང ། གང་དག་མི་དགེ་བའི་ཆོས་བཅུའི་བར་དང་རྟག་ཏུ་ཤིན་ཏུ་ལྡན་པའི་སེམས་ཅན་དེ་དག་གི་ངན་སོང་གི་སྒོ་གཅོད་པར་བྱེད་པ་ནས་ ཤིང་རྟ་དང་མཚུངས་པའི་བར་དུ་ཡིན་ཏེ། སེམས་ཅན་རྣམས་མཐོ་རིས་དང་ཐར་པ་ལ་གཞོག་པར་བྱེད་པའོ། །དེ་བས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་མ་གཏོགས་པར་རིགས་ཀྱི་བུ་འདི་ནི་ལྷ་དང་བཅས་པའི་འཇིག་ རྟེན་གྱིས་མཆོད་པར་བྱ་བ་ཡིན་ནོ། །བྱང་ཆུབ་སེམས་དཔའ་བྱམས་པས་གསོལ་པ། བཅོམ་ལྡན་འདས་ལྟུང་བའི་རྩ་བ་གང་དང་ལྡན་ན་སེམས་ཅན་རྣམས་དགེ་བའི་རྩ་བ་སྤྲུག་པར་བགྱིད་ཅིང་ངན་སོང་དུ་མཆི་བར་འགྱུར་བ་དང ། ལྟུང་བའི་དངོས་པོར་འགྱུར་ཞིང་ལྷ་ དང་མིའི་བདེ་བ་ཐམས་ཅད་ལས་ཕས་ཕམ་པ་དེ་ལ་རིགས་ཀྱི་བུ་འདི་མཐོ་རིས་དང་ཐར་པའི་བདེ་བས་ཚིམ་པར་བགྱིད་པའི་ལྟུང་བའི་རྩ་བ་དེ་དག་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་ ལྟུང་བའི་རྩ་བ་ནི་ལྔ་སྟེ། ལྟུང་བའི་རྩ་བ་དེ་དང་ལྡན་ན་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་སྔོན་གྱི་དགེ་བའི་རྩ་བ་ཐམས་ཅད་སྤྲུག་པར་འགྱུར། ལྟུང་བའི་དངོས་པོར་འགྱུར། ལྷ་དང་མིའི་བདེ་བ་ཐམས་ཅད་ལས་ཕས་ཕམ་པར་འགྱུར། ངན་སོང་དུ་འགྲོ་ བར་འགྱུར་རོ། །ལྔ་གང་ཞེ་ན། རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བ་མཆོད་རྟེན་གྱི་རྫས་འཕྲོག་པར་བྱེད། དགེ་འདུན་གྱིའམ། ཕྱོགས་བཞིའི་དགེ་འདུན་ལ་ཕུལ་བ་འཕྲོག་པར་བྱེད་དམ། འཕྲོག་ཏུ་འཇུག་པར་བྱེད་པ་འདི་ནི་ལྟུང་བའི་ རྩ་བ་དང་པོའོ། །གང་ཡང་ཆོས་སྤོང་བར་བྱེད་དེ། ཉན་ཐོས་ཀྱི་ངེས་པར་འབྱུང་བ་བཤད་པའམ། རང་སངས་རྒྱས་ཀྱི་ངེས་པར་འབྱུང་བ་བཤད་པའམ། ཐེག་པ་ཆེན་པོའི་ངེས་པར་འབྱུང་བ་བཤད་པ་སྤོང་བར་བྱེད། འགོག་པར་བྱེད། སྦེད་པར་བྱེད་པ་འདི་ 66-1-273a ནི་ལྟུང་བའི་རྩ་བ་གཉིས་པའོ། །གང་ཡང་ངའི་ཕྱིར་སྐྲ་དང་ཁ་སྤུ་བྲེགས་ནས། གོས་ངུར་སྨྲིག་བགོས་པ་བསླབ་པ་འཛིན་ཀྱང་རུང ། བསླབ་པ་མི་འཛིན་ཀྱང་རུང ། ཚུལ་ཁྲིམས་འཆལ་ཀྱང་རུང ། ཚུལ་ཁྲིམས་དང་ལྡན་ཡང་རུང་སྟེ་དེའི་གོས་ངུར་སྨྲིག་ དག་འཕྲོག་ཅིང་ཁྱིམ་པར་བྱེད་དམ། ལུས་ལ་ཆད་པས་གཅོད་པར་བྱེད་དམ། བཙོན་རར་འཇུག་པར་བྱེད། སྲོག་དང་འབྲལ་བར་བྱེད་པ་འདི་ནི་ལྟུང་བའི་རྩ་བ་གསུམ་པའོ། །ཡང་རྒྱལ་རིགས་གང་གིས་ཆེད་དུ་བསམས་ཏེ་མའི་སྲོག་གཅོད། ཕ་དང་བཅོམ་ལྡན་འདས་ཀྱི་ ཉན་ཐོས་དགྲ་བཅོམ་པའི་སྲོག་གཅོད་པར་བྱེད། དགེ་འདུན་འདུས་པ་འབྱེད་པར་བྱེད། ཆེད་དུ་བསམས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ངན་སེམས་ཀྱིས་ཁྲག་འབྱིན་པར་བྱེད་ན། མཚམས་མེད་པའི་ལས་ལྔ་པོ་ འདི་དག་ལས་ལས་གང་ཡང་རུང་བ་ཞིག་འབྱུང་བར་བྱེད་པ་འདི་ནི་ལྟུང་བའི་རྩ་བ་བཞི་པའོ། །ཡང་རྒྱལ་རིགས་གང་རྒྱུ་མེད་པར་སྨྲ་བར་འགྱུར། འཇིག་རྟེན་ཕ་རོལ་ཡལ་བར་འདོར་བར་བྱེད། མི་དགེ་བའི་ལས་ཀྱི་ལམ་བཅུ་བླངས་ཞིང་འཇུག་པར་བྱེད། སེམས་ ཅན་མང་པོ་གཞན་དག་ཀྱང་མི་དགེ་བའི་ལས་ཀྱི་ལམ་བཅུ་ཡང་དག་པར་འཛིན་དུ་འཇུག་།འདུལ་བར་བྱེད། འཇུག་པར་བྱེད། འཇོག་པར་བྱེད་པ་འདི་ནི་ལྟུང་བའི་རྩ་བ་ལྔ་པ་སྟེ། རིགས་ཀྱི་བུ་གང་ཡང་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བ་ལ་ ལྟུང་བའི་རྩ་བ་འདི་ལྔ་ལས་ལྟུང་བའི་རྩ་བ་གང་ཡང་རུང་བ་ཞིག་བྱུང་ན། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བ་དེ་སྔོན་དགེ་བའི་རྩ་བ་བསྐྱེད་པ་དེ་ཐམས་ཅད་སྤྲུགས་པར་འགྱུར། ལྟུང་བའི་དངོས་པོར་འགྱུར་ཞིང ། ལྷ་དང་མིའི་བདེ་བ་ཐམས་ཅད་ལས་ ཕས་ཕམ་པར་འགྱུར། ངན་སོང་དུ་འགྲོ་བར་འགྱུར་ཏེ། བྱང་ཆུབ་སེམས་དཔའ་ནམ་མཁའི་སྙིང་པོ་ཀླ་ཀློའི་ཡུལ་དེ་ལྟ་བུ་གཞན་དག་ཏུ་སྐྱེ་ཞིང་འབྱུང་བར་སྟོན་ཏེ། ལ་ལར་ནི་དགེ་སྦྱོང་གི་གཟུགས་དང ། ཆ་ལུགས་དང ། སྤྱོད་ལམ་དང ། ལ་ལར་ནི་བྲམ་ཟེའི་ 66-1-273b གཟུགས་དང ། ཆ་ལུགས་དང ། སྤྱོད་ལམ་སྟོན་ཏོ། །གང་དང་གང་གིས་བདག་གི་སྐྱེ་བ་འབྱུང་བར་སྟོན་པ་དེ་དང་དེ་དག་ཏུ་རྒྱལ་རིགས་དེ་འདྲ་བ་དག་ལ་ཆོས་འཆད་པར་བྱེད་དེ། སྔོན་མ་བྱུང་བ། སྔན་ཆད་མ་བྱུང་བ། ཐམས་ཅད་མཁྱེན་པའི་བཤད་པ་ཟབ་མོ་ཟབ་པའི་ མདོ་སྡེ་དང ། གཟུངས་དང ། བཟོད་པ་དང ། ས་དག་འཆད་པར་བྱེད། སྟོན་པར་བྱེད་དེ། དེའི་ཕྱིར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བ་དེ་སྔོན་གྱི་སྡིག་པ་མི་དགེ་བའི་ལས་ལ་ངོ་ཚ་བར་བྱེད། དམོད་པར་བྱེད། འཆགས་པར་བྱེད། གཏོང་བར་ བྱེད། སྤོང་བར་བྱེད་ཅིང ། དེ་སྦྱིན་པ་དང ། དུལ་བ་དང ། སྡོམ་པ་དང ། རྟུལ་བའི་སྤྲོ་བ་ཆེན་པོ་ལ་གནས་ཤིང་མཐོ་རིས་ལ་གཞོལ་བར་འགྱུར་རོ། །བྱམས་པ་བློན་པོའི་ལྟུང་བའི་རྩ་བ་ཡང་ལྔ་སྟེ། ལྔ་གང་ཞེ་ན། གང་ཡང་བློན་པོ་མཆོད་རྟེན་གྱི་རྫས་ འཕྲོག་པར་བྱེད་དམ། ཕྱོགས་བཞིའི་དགེ་འདུན་གྱི་རྫས་འཕྲོག་པར་བྱེད་པ་འདི་ནི་ལྟུང་བའི་རྩ་བ་དང་པོའོ། །གང་ཡང་གྲོང་འཇོམས་པར་བྱེད་པ་དང ། ལྗོངས་འཇོམས་པ་དང ། གྲོང་ཁྱེར་འཇོམས་པར་བྱེད་པ་འདི་ནི་ལྟུང་བའི་རྩ་བ་གཉིས་པའོ། །ཡང་བློན་ པོ་གང་ཆོས་སྤོང་བར་བྱེད་དེ། ཉན་ཐོས་ཀྱི་ངེས་པར་འབྱུང་བ་བཤད་པའམ། རང་སངས་རྒྱས་ཀྱི་ངེས་པར་འབྱུང་བ་བཤད་པའམ། ཐམས་ཅད་མཁྱེན་པའི་ངེས་པར་འབྱུང་བ་བཤད་པ་སྤོང་བར་བྱེད། འགོག་པར་བྱེད། སྦེད་པར་བྱེད་པ་འདི་ནི་ལྟུང་བའི་རྩ་བ་ གསུམ་པའོ། །ཡང་བློན་པོ་གང་བཅོམ་ལྡན་འདས་ཀྱི་ཕྱིར་རབ་ཏུ་བྱུང་བ་ལ་གཙེ་བར་བྱེད་ན། བསླབ་པ་འཛིན་ཀྱང་རུང ། མི་འཛིན་ཀྱང་རུང ། ཚུལ་ཁྲིམས་དང་ལྡན་ཡང་རུང ། མི་ལྡན་ཡང་རུང་སྟེ། དེ་དག་གི་གོས་ངུར་སྨྲིག་དག་འཕྲོག་པར་བྱེད། ཁྱིམ་པར་ བྱེད་དམ། ལུས་ལ་ཆད་པས་གཅོད་དམ། བཙོན་རར་འཇུག་པར་བྱེད་དམ། སྲོག་གཅོད་པར་བྱེད་པ་འདི་ནི་བློན་པོའི་ལྟུང་བའི་རྩ་བ་བཞི་པའོ། །ཡང་བློན་པོ་གང་མཚམས་མེད་པ་ལྔ་ལས་མཚམས་མེད་པ་གང་ཡང་རུང་བའི་ལས་བྱེད་ཅིང་སོགས་པ་འདི་ནི་ལྟུང་ 66-1-274a བའི་རྩ་བ་ལྔ་པ་སྟེ། རིགས་ཀྱི་བུ་བློན་པོ་གང་ལ་ལྟུང་བའི་རྩ་བ་ལྔ་པོ་འདི་དག་ལས་ལྟུང་བའི་རྩ་བ་གང་ཡང་རུང་བ་ཞིག་བྱུང་ན། བློན་པོ་དེ་སྔོན་དགེ་བའི་རྩ་བ་བསྐྱེད་པ་ཐམས་ཅད་སྤྲུགས་པར་འགྱུར། ལྟུང་བའི་དངོས་པོར་འགྱུར། ལྷ་དང་མིའི་ བདེ་བ་ཐམས་ཅད་ལས་ཕས་ཕམ་པར་འགྱུར། སེམས་ཅན་དམྱལ་བ་ལ་གཞོལ་བར་འགྱུར་ཏེ། དེ་དག་གི་དོན་གྱི་ཕྱིར་བྱང་ཆུབ་སེམས་དཔའ་ནམ་མཁའི་སྙིང་པོ་ཀླ་ཀློའི་ཡུལ་དེ་ལྟ་བུ་གཞན་དག་ཏུ་གནས་ཤིང་སྐྱེ་བ་འབྱུང་བ་ཡང་སྟོན་ཏེ། ལ་ལར་ནི་དགེ་སྦྱོང་ གི་གཟུགས་དང ། ཆ་ལུགས་དང ། སྤྱོད་ལམ་གྱིས་སེམས་ཅན་རྣམས་ལ་ཆོས་འཆད། ལ་ལར་ནི་བུ་མོའི་བར་གྱི་གཟུགས་ཀྱིས་ཆོས་འཆད་དེ། གང་དང་གང་དག་ཏུ་སྐྱེ་བར་འབྱུང་བར་སྟོན་པ་དེ་དང་དེ་དག་ཏུ་ཡང་བློན་པོ་དེ་དག་ལ་ཆོས་འཆད་དེ་སྔོན་མ་བྱུང་བ། སྔན་ཆད་མ་བྱུང་བ། ཐམས་ཅད་མཁྱེན་པས་བཤད་པ། ཟབ་མོ་ཟབ་པའི་མདོ་སྡེ་དང ། གཟུངས་དང ། བཟོད་པ་དང ། ས་དག་འཆད་པར་བྱེད། སྟོན་པར་བྱེད་དེ། དེའི་ཕྱིར་བློན་པོ་དེ་སྔོན་བྱས་པའི་མི་དགེ་བའི་སྡིག་པའི་ལས་ལ་ངོ་ཚ་བར་བྱེད། སྨོད་པར་ བྱེད། ལས་ཀྱི་སྒྲིབ་པ་དེ་ཡང་འཆགས་པར་བྱེད། གཏོང་བར་བྱེད། སྤོང་བར་བྱེད་དོ། །དེ་སྦྱིན་པ་དང ། དུལ་བ་དང ། སྡོམ་པ་ལ་རྟུལ་བའི་ནན་ཏན་ལ་གནས་ཤིང་མཐོ་རིས་ལ་གཞོལ་བར་འགྱུར་རོ། །རིགས་ཀྱི་བུ་ཉན་ཐོས་རྣམས་ཀྱི་ལྟུང་བའི་རྩ་བ་ནི་ལྔའོ། ། ལྔ་གང་ཞེ་ན། སྲོག་གཅོད་པ་དང ། མ་བྱིན་པར་ལེན་པ་དང ། མི་ཚངས་པར་སྤྱོད་པ་དང ། བརྫུན་དུ་སྨྲ་བ་དང ། གང་དེ་བཞིན་གཤེགས་པའི་སྐུ་འཇོམས་ཤིང་ཁྲག་འབྱིན་པར་བྱེད་པ་སྟེ། ལྔ་པོ་དེ་དག་གོ། །གང་ངའི་ཉན་ཐོས་ལྟུང་བའི་རྩ་བ་ལྔ་པོ་དེ་དག་ལས་ལྟུང་བའི་ རྩ་བ་གང་ཡང་རུང་བ་ཞིག་བྱུང་ན། རྟག་ཏུ་ཇི་ལྟར་བཤད་པ་བཞིན་དུ་དེ་དག་གི་དོན་གྱི་ཕྱིར་བྱང་ཆུབ་སེམས་དཔའ་ནམ་མཁའི་སྙིང་པོ་དེ་ལྟ་བུའི་ཡུལ་གཞན་དག་ཏུ་སྐྱེ་བ་འབྱུང་བར་སྟོན་ཅིང་ལ་ལར་ནི་དགེ་སྦྱོང་གི་གཟུགས་དང ། ཆ་ལུགས་དང ། སྤྱོད་ལམ་གྱིས་འཆད་ 66-1-274b དེ། སྔ་མ་བཞིན་གྱི་བར་དུ་མཐོ་རིས་ལ་གཞོལ་བར་འགྱུར་རོ། །ཐེག་པ་ཆེན་པོ་ལ་ཡང་དག་པར་ཞུགས་པའི་རིགས་ཀྱི་བུ་ལས་དང་པོ་པ་དག་གི་ལྟུང་བའི་རྩ་བ་ནི་བརྒྱད་དེ། ལྟུང་བའི་རྩ་བ་དེ་དག་གིས་འཁྲུལ་པར་གྱུར་པ་ཐེག་པ་ཆེན་པོ་ལ་ཡང་དག་པར་ཞུགས་པ་ལས་ དང་པོ་པ་དག་ནི་སྔོན་དགེ་བའི་རྩ་བ་བསྐྱེད་པ་ཐམས་ཅད་སྤྲུགས་པར་འགྱུར། ལྟུང་བའི་དངོས་པོར་འགྱུར་ཞིང་ལྷ་དང ། མི་དང་ཐེག་པ་ཆེན་པོའི་བདེ་བ་ལས་ཕས་ཕམ་པར་འགྱུར། ངན་སོང་དུ་འགྲོ་བར་འགྱུར། དགེ་བའི་བཤེས་གཉེན་དང་བྲལ་ཞིང་འཁོར་བ་ན་ཡུན་རིང་ དུ་གནས་པར་འགྱུར་རོ། །བརྒྱད་གང་ཞེ་ན། སེམས་ཅན་གང་དག་སྔོན་ངན་པར་སྤྱད་པའི་རྒྱུས་ཉོན་མོངས་པ་སྙིགས་མ་ལྔ་དང་ལྡན་པའི་འཇིག་རྟེན་གྱི་ཁམས་འདིར་སྐྱེས་ནས་དེ་དག་དགེ་བའི་རྩ་བ་ཆུང་ངུ་དང་ལྡན་པ་ལས་དགེ་བའི་བཤེས་གཉེན་ལ་བརྟེན་ཏེ། ཐེག་པ་ཆེན་པོ་ཤིན་ཏུ་ཟབ་པ་འདི་ཉན་ཅིང་རིགས་ཀྱི་བུ་དེ་དག་བློ་ཆུང་ངུ་ཟིན་གྱིས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་དག་གི་ནང་ནས་བྱང་ཆུབ་སེམས་དཔའ་ལས་དང་པོ་པ་དེ་ཤིན་ཏུ་ཟབ་པའི་སྟོང་པ་དང་ལྡན་པའི་མདོ་སྡེ་འདི་ཉན་ པར་བྱེད། ལུང་སྦྱིན་པར་བྱེད། ཀློག་པར་བྱེད་དེ། དེ་དག་ཇི་ལྟར་ཐོས་པ་དང ། དེ་དག་ཇི་ལྟར་ཀུན་ཆུབ་པར་བྱེད་པ་དེ་བཞིན་དུ་སེམས་ཅན་གཞན་སྔོན་གྱི་བློ་དང་འདྲ་བ་དག་གི་མདུན་དུ་དོན་དང་བཅས། ཚིག་འབྲུ་དང་བཅས་པར་རྒྱ་ཆེར་དྲན་པར་བྱེད། སྟོན་པར་བྱེད་ པ་དང ། དཀའ་བ་མ་བྱས་པའི་བྱིས་པ་སོ་སོའི་སྐྱེ་བོ་དེ་དག་ཐོས་ནས་འཇིགས་པར་འགྱུར། དངངས་པར་འགྱུར། སྐྲག་པར་འགྱུར་ཏེ། སྐྲག་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ལྡོག་ཅིང་ཉན་ཐོས་ཀྱི་ཐེག་པ་ལ་སེམས་སྨོན་པར་འགྱུར་ བ་དེ་ནི་བྱང་ཆུབ་སེམས་དཔའ་ལས་དང་པོ་པའི་ལྟུང་བའི་རྩ་བ་དང་པོ་སྟེ། རིགས་ཀྱི་བུ་ལྟུང་བའི་རྩ་བ་དེས་དགེ་བའི་རྩ་བ་སྔོན་བསྐྱེད་པ་ཐམས་ཅད་སྤྲུགས་པར་འགྱུར། ལྟུང་བའི་དངོས་པོར་འགྱུར། མཐོ་རིས་དང་ཐར་པའི་བདེ་བ་ལས་ཕས་ཕམ་པར་འགྱུར། 66-1-275a དེའི་བྱང་ཆུབ་ཀྱི་སེམས་བསླུས་ཤིང་ངན་སོང་དུ་འགྲོ་བར་འགྱུར་རོ། །དེ་བས་ན་འདི་ལྟ་སྟེ། དཔེར་ན་རྒྱ་མཚོ་ཆེན་པོ་བགས་ཀྱིས་གཞོལ་བ་དེ་བཞིན་དུ་བྱང་ཆུབ་སེམས་དཔའ་སེམས་ཅན་ཕ་རོལ་དང ། གང་ཟག་ཕ་རོལ་གྱི་བསམ་པ་དང ། བག་ ལ་ཉལ་ཐོག་མར་ཤེས་པར་བྱ་སྟེ། བྱང་ཆུབ་སེམས་དཔའ་རྣམས་ཀྱི་བསམ་པ་ཇི་ལྟ་བ་བཞིན་དུ་རིམ་གྱིས་ཆོས་བཤད་པར་བྱའོ། །བྱང་ཆུབ་སེམས་དཔའ་ནམ་མཁའི་སྙིང་པོ་ཡང་དེ་དག་གི་ཕྱིར་དེ་ལྟ་བུའི་ཡུལ་གཞན་དག་ཏུ་སྐྱེ་ཞིང་འབྱུང་བར་སྟོན་ཏེ། དེའི་ ཕྱིར་བྱང་ཆུབ་སེམས་དཔའ་ལས་དང་པོ་པ་དེ་ལྟ་བུའི་ལྟུང་བའི་རྩ་བ་བྱུང་བར་གྱུར་ལ་ངན་སོང་གིས་འཇིགས་སྐྲག་ནས། དེ་དག་གལ་ཏེ་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་ཐོས་ནས་ལྟུང་བ་དེ་དག་བཤགས་པའི་ཕྱིར་མཐོང་བར་འདོད་ན། དེས་ཐོ་རངས་ ཀྱི་ཐུན་ལ་ཨ་ག་རུའམ། རྒྱ་སྤོས་སམ། བདུག་པས་བདུགས་ནས་ཐལ་མོ་སྦྱར་ཏེ་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་བརྗོད་པར་བྱའོ། །དེའི་སྐལ་བ་ཇི་ལྟ་བ་བཞིན་དུ་རིགས་ཀྱི་བུ་དེས་སེམས་ཅན་དེ་མཐོང་ནས་དེ་ལྟར་འདི་ལྟ་བུའི་གཟུགས་སུ་སྟོན་ཏེ། ལ་ལའི་མདུན་དུ་ནི་ཐ་མལ་པར་འདུག་སྟེ་ཆོས་འཆད་དོ། །ལ་ལའི་མདུན་དུ་ནི་བྲམ་ཟེའི་གཟུགས་ཀྱིས། ལ་ལའི་མདུན་དུ་ནི་བུ་མོའི་གཟུགས་ཀྱི་བར་དུ་འདུག་སྟེ། བྱང་ཆུབ་སེམས་དཔའ་ལས་དང་པོ་པ་དེའི་ལྟུང་བའི་རྩ་བ་ཇི་ལྟར་བྱུང་བ་དེ་དག་འཆགས་སུ་འཇུག་ གོ། །བླ་ན་མེད་པ་ཐེག་པ་ཆེན་པོའི་སྤྱོད་པ་ཟབ་པ་ཐབས་མཁས་པ་ཡང་དེ་ལ་སྟོན་པར་བྱེད་དོ། །ཏིང་ངེ་འཛིན་དང ། བཟོད་པ་དང ། གཟུངས་དང ། སའི་བར་དུ་ཡང་འཇོག་པར་བྱེད་དོ། །དེའི་ཕྱིར་ངན་སོང་ཐམས་ཅད་ལས་ཡོངས་སུ་ཐར་ཅིང་བླ་ན་མེད་པ་ཡང་ དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་འགྱུར་ཏེ། དེ་ཕ་རོལ་ཏུ་ཕྱིན་པ་དྲུག་ལ་རྡོ་རྗེ་བཞིན་དུ་མཐུ་ཆེ་ཞིང་རྟུལ་བ་བརྟན་པར་འགྱུར། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་ཡང་འགྱུར་རོ། །གལ་ཏེ་ 66-1-275b དེས་བདག་ཉིད་མདུན་དུ་མངོན་སུམ་དུ་མ་བསྟན་ན་བྱང་ཆུབ་སེམས་དཔའ་དེས་སྐྱ་རེངས་འབྱུང་བའི་དུས་ཀྱི་ཚེ་ལངས་ཏེ། སྐྱ་རེངས་ལ་གསོལ་བ་གདབ་པར་བྱ་སྟེ། འདི་སྐད་དུ་བརྗོད་པར་བྱའོ། །སྐྱ་རེངས་སྐྱ་རེངས་ཐུགས་རྗེ་ཆེན་པོ་དང་ལྡན་པ། སྐྱ་རེངས་ཁྱོད་འཛམ་བུའི་ གླིང་འདིར་ཤར་མ་ཐག་ཏུ་བདག་ལ་ཐུགས་རྗེས་དགབ་པར་མཛོད་ཅིག་།ནམ་མཁའི་སྙིང་པོ་ཐུགས་རྗེ་ཆེན་པོ་ལ་བདག་གི་ཚིག་གིས་གསུངས་ཏེ། ཅི་ནས་ཀྱང་དེ་དག་གི་རྨི་ལམ་དུ་སྟོན་ཅིང་དེའི་སླད་དུ་བདག་ལྟུང་བའི་རྩ་བ་འཆགས་པར་འགྱུར་བ་དང ། འཕགས་ པའི་ཐེག་པ་ཆེན་པོ་ལས་ཐབས་དང་ལྡན་པའི་ཡེ་ཤེས་ཀྱི་མིག་ཆེན་པོ་ཐོབ་པར་འགྱུར་བར་མཛོད་ཅེས་བྱས་ཏེ། དེས་དེའི་ཚེ་མལ་དུ་གཉིད་ལོག་པར་བྱའོ། །སྐྱ་རེངས་ཤར་མ་ཐག་ཏུ་ཡང་བྱང་ཆུབ་སེམས་དཔའ་ནམ་མཁའི་སྙིང་པོ་བྱང་ཆུབ་སེམས་དཔའ་ལས་ དང་པོ་པ་ལྟུང་བ་བྱུང་བ་དེའི་རྨི་ལམ་དུ་སྟོན་པར་བྱེད་དེ། ཡེ་ཤེས་ཀྱི་ཐབས་ཆེན་པོས་དེའི་ལྟུང་བའི་རྩ་བ་ཡང་འཆགས་སུ་འཇུག་གོ། །ཐབས་དང་ལྡན་པའི་ཡེ་ཤེས་ཀྱང་སྟོན་པར་བྱེད་དེ། དེའི་ཕྱིར་བྱང་ཆུབ་སེམས་དཔའ་ལས་དང་པོ་པ་དེ་དེ་ཉིད་དུ་བྱང་ཆུབ་ཀྱི་སེམས་ མི་བརྗེད་པ་ཞེས་བྱ་བའི་ཏིང་ངེ་འཛིན་འཐོབ་པར་འགྱུར་རོ། །ཐེག་པ་ཆེན་པོ་ལ་ཡང་ཤིན་ཏུ་གནས་པར་འགྱུར། ཕ་རོལ་ཏུ་ཕྱིན་པ་དྲུག་ཀྱང་མྱུར་དུ་ཡོངས་སུ་རྫོགས་པར་འགྱུར་རོ། །གཞན་ཡང་བྱང་ཆུབ་སེམས་དཔའ་ལས་དང་པོ་པ་དག་ལ་ལ་ཞིག་ལ་ཁྱོད་ཀྱིས་ ཕ་རོལ་ཏུ་ཕྱིན་པ་དྲུག་ལ་སྤྱོད་མི་ནུས། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་ཀྱིས། ཁྱོད་མྱུར་དུ་ཉན་ཐོས་ཀྱི་ཐེག་པའམ། རང་སངས་རྒྱས་ཀྱི་ཐེག་པ་ལ་སེམས་བསྐྱེད་ཅིག་དང ། དེའི་ཕྱིར་ཁྱོད་མྱུར་དུ་འཁོར་ བ་ལས་ངེས་པར་འབྱུང་བར་འགྱུར་རོ་ཞེས་ཇི་ལྟར་སྔར་བཤད་པའི་བར་དུ་དེ་སྐད་ཟེར་ན་དེ་ནི་བྱང་ཆུབ་སེམས་དཔའ་ལས་དང་པོ་པའི་ལྟུང་བའི་རྩ་བ་གཉིས་པའོ། །གཞན་ཡང་བྱང་ཆུབ་སེམས་དཔའ་ལས་དང་པོ་པ་ལ་ལ་ཞིག་ལ་ཀྱེ་ཁྱོད་ཀྱི་སོ་སོར་ཐར་པའི་འདུལ་བ་དང་། 66-1-276a ཚུལ་ཁྲིམས་དང ། ལེགས་པར་སྤྱད་པས་ཅི་ཞིག་བྱ། ཁྱོད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང ། ཐེག་པ་ཆེན་པོ་ལྷོགས་ཤིག་།དེའི་ཕྱིར་ཉོན་མོངས་པའི་རྐྱེན་གྱིས་ཁྱོད་ཀྱི་ལུས་དང ། ངག་དང ། ཡིད་ ཀྱིས་མི་དགེ་བའི་ལས་གང་ཆུང་ཟད་བསྒྲུབས་པ་དེ་དག་དེའི་ཕྱིར་དག་ཅིང་རྣམ་པར་སྨིན་པར་འགྱུར་བ་མེད་དོ་ཞེས་ཇི་ལྟར་སྔར་བཤད་པ་བཞིན་གྱི་བར་དུ་དེ་སྐད་ཟེར་ན། དེ་ནི་བྱང་ཆུབ་སེམས་དཔའ་ལས་དང་པོ་པའི་ལྟུང་བའི་རྩ་བ་གསུམ་པའོ། །གཞན་ཡང་རིགས་ཀྱི་བུ་ བྱང་ཆུབ་སེམས་དཔའ་ལས་དང་པོ་པ་ལ་ལ་ཞིག་ལ། རིགས་ཀྱི་བུ་ཁྱོད་ཀྱིས་ཉན་ཐོས་ཀྱི་ཐེག་པའི་གཏམ་སྤོངས་ཤིག་མ་ཉན་ཅིག་།མ་ཀློག་ཅིག་།གཞན་ལ་མ་སྟོན་ཅིག་།རིགས་ཀྱི་བུ་ཁྱོད་ཀྱིས་ཉན་ཐོས་ཀྱི་ཐེག་པའི་གཏམ་སྤོང་བར་གྱིས་ཤིག་།ཁྱོད་ནི་དེའི་ ཕྱིར་འབྲས་བུ་ཆེན་པོ་འཐོབ་པར་མི་འགྱུར་རོ། །ཁྱོད་ནི་དེའི་ཕྱིར་ཉོན་མོངས་པ་རྣམས་མཐར་འབྱིན་པར་བྱེད་མི་ནུས་ཀྱིས། ཁྱོད་ཐེག་པ་ཆེན་པོའི་གཏམ་ལ་དད་པར་གྱིས་ཤིག་།ཐེག་པ་ཆེན་པོ་ཉོན་ཅིག་།ཁྱོད་ཐེག་པ་ཆེན་པོ་ལྷོགས་ཤིག་།གཞན་ལ་སྟོན་ཅིག་དང་ དེའི་ཕྱིར་ཁྱོད་ངན་འགྲོ་དང ། ངན་སོང་གི་ལམ་ཐམས་ཅད་དུ་འགྲོ་བར་མི་འགྱུར་ཞིང ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་དེ་སྐད་སྨྲས་ནས། གལ་ཏེ་དེ་དེའི་ཚིག་བཞིན་དུ་བྱེད་ཅིང་ལྟ་བའི་རྣམ་པ་དེ་ ལྟ་བུ་ལེན་པར་བྱེད་ན་གཉི་ག་ཡང་ལྟུང་བའི་རྩ་བར་འགྱུར་ཏེ། འདི་ནི་བྱང་ཆུབ་སེམས་དཔའ་ལས་དང་པོ་པའི་ལྟུང་བའི་རྩ་བ་བཞི་པའོ། །གཞན་ཡང་བྱང་ཆུབ་སེམས་དཔའ་ལས་དང་པོ་བ་དག་ལྕེ་གཉིས་པར་འགྱུར་ཏེ། གཞན་དུ་སེམས་ལ་གཞན་དུ་སྟོན་ཅིང་ཐེག་ པ་ཆེན་པོ་འདི་ཡང་སྒྲ་གྲགས་པ་དང ། ཚིགས་སུ་བཅད་པ་དང ། རྙེད་པ་དང ། བཀུར་སྟིའི་ཕྱིར་འདོན་པར་བྱེད། ཁ་ཏོན་བྱེད།འཛིན་པར་བྱེད། ཀློག་པར་བྱེད། འཆད་པར་བྱེད། ཕ་རོལ་ལ་ཡང་ཐོས་པ་ཙམ་སྟོན་པར་བྱེད་ཅིང་བདག་ནི་ཐེག་པ་ཆེན་པོ་པ་ཡིན་གྱི། 66-1-276b གཞན་ནི་མ་ཡིན་ནོ་ཞེས་དེ་སྐད་ཟེར་ཞིང་རྙེད་པ་དང་བཀུར་སྟིའི་ཕྱིར་གཞན་ལ་ཕྲག་དོག་ཏུ་བྱེད་ལ། ཕ་རོལ་གང་ལས་ཉེ་བར་སྤྱོད་པ་དང་ཡོངས་སུ་སྤྱོད་པ་ཐོབ་པར་འགྱུར་བ་ལ་དེའི་རྐྱེན་གྱིས་དེ་དག་འཁྲུག་པར་འགྱུར། དེ་དག་གི་མིང་བརྗོད་པར་བྱས་ཏེ་སྨོད་པར་བྱེད། བརྙས་པར་བྱེད། ངན་དུ་རྗོད་པར་བྱེད། བདག་སྟོད་པར་བྱེད་ཅིང་དེ་དག་ཕྲག་དོག་གི་རྒྱུས་བདག་མིའི་ཆོས་བླ་མ་དང་ལྡན་པར་འཆད་པར་བྱེད་དེ། དེའི་ཕྱིར་དངོས་པོ་དེས་ལྷུང་བར་འགྱུར། ཐེག་པ་ཆེན་པོའི་བདེ་བ་ལས་ཕས་ཕམ་པར་གྱུར་ནས་དེའི་ཕྱིར་ཡང་ཐེག་ པ་ཆེན་པོ་ལས་ལྕི་བ་ཆེན་པོའི་ལྟུང་བ་འབྱུང་བར་འགྱུར་ཏེ། དེའི་ཕྱིར་ངན་སོང་དུ་འགྲོ་བར་འགྱུར་རོ། །དཔེར་ན་མི་ལ་ལ་ཞིག་རིན་པོ་ཆེའི་གླིང་དུ་འགྲོ་འདོད་དེ། རྒྱ་མཚོ་ཆེན་པོར་གྲུ་ལས་སོང་བ་ལས་རྒྱ་མཚོ་ཆེན་པོར་གྲུ་ཉིད་ཞིག་པར་གྱུར་པ་དེ་བཞིན་དུ། བྱང་ཆུབ་ སེམས་དཔའ་ལས་དང་པོ་ཡང་ཐེག་པ་ཆེན་པོའི་རྒྱ་མཚོ་རྒལ་བར་འདོད་པ་ལས་ཕྲག་དོག་གི་ཕྱིར་བརྫུན་དུ་སྨྲས་ནས་དེའི་རྐྱེན་གྱིས་དེ་དག་དད་པའི་གྲུ་ཞིག་ཅིང་ཤེས་རབ་ཀྱི་སྲོག་དང་བྲལ་བ་འཐོབ་པར་འགྱུར་རོ། །དེ་ལྟ་བས་ན་བྱང་ཆུབ་སེམས་དཔའ་ལས་དང་པོ་པ་ཕྲག་ དོག་གི་ཕྱིར་བརྫུན་དུ་སྨྲས་པའི་རྐྱེན་གྱིས་ལྟུང་བ་ལྕི་བ་ཆེན་པོ་འབྱུང་བར་འགྱུར་ཏེ། དེ་ནི་བྱང་ཆུབ་སེམས་དཔའ་ལས་དང་པོ་པའི་ལྟུང་བའི་རྩ་བ་ལྔ་པའོ། །གཞན་ཡང་རིགས་ཀྱི་བུ་མ་འོངས་པའི་དུས་ན་ལས་དང་པོ་པའི་བྱང་ཆུབ་སེམས་དཔའ་ཁྱིམ་པའམ། རབ་ཏུ་ བྱུང་བ་དག་ཟབ་པ་ཉིད་ལ་སྟོང་པ་ཉིད་དང་ལྡན་པའི་མདོ་སྡེ་གཟུངས་དང ། བཟོད་པ་དང ། ཏིང་ངེ་འཛིན་དང ། སས་བརྒྱན་པའི་སྐྱེས་བུ་རིག་པ་ཆེན་པོ་དང་ལྡན་པ། ཚེགས་ཆུང་བའི་བྱང་ཆུབ་སེམས་དཔའ་རྣམས་ཀྱི་སྤྱོད་ཡུལ་གྱི་ཐེག་པ་ཆེན་པོའི་མདོ་སྡེ་དེ་ཀློག་པར་བྱེད། འདོན་པར་བྱེད། ཁ་ཏོན་བྱེད། བཀླགས་ནས་གཞན་ལ་རྒྱ་ཆེར་སྟོན་པར་བྱེད། དེ་བདག་གིས་ཆོས་འདི་དག་རང་གིས་བློས་རྟོགས་ནས་ང་སྙིང་རྗེ་བའི་ཕྱིར་དེ་ལྟར་ཁྱོད་ལ་སྟོན་གྱིས། ཁྱོད་ཀྱིས་ཅི་ནས་ཀྱང་ཆོས་ཟབ་མོ་འདི་ལ་མངོན་སུམ་དུ་འགྱུར་བ་དེ་ལྟར་སྒོམས་ 66-1-277a ཤིག་དང ། ད་ལྟར་གྱི་ང་བཞིན་དུ་ཁྱེད་ཀྱང་ཡེ་ཤེས་མཐོང་བར་འགྱུར་རོ་ཞེས་སྨྲ་ཞིང ། ཆོས་འདི་ལྟ་བུ་ཟབ་མོ་ཟབ་པ་དག་མངོན་པར་ནི་མ་བྱས་ཀྱི། བཀླགས་པ་ཙམ་གྱིས་བསྟན་ཏོ་ཞེས་ནི་མི་ཟེར་བར་རྙེད་པ་དང་བཀུར་སྟིའི་ཕྱིར་བདག་འཚོང་བར་བྱེད་དེ། དེའི་རྐྱེན་གྱིས་དུས་ གསུམ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང ། འཕགས་པའི་གང་ཟག་དག་གི་སྤྱན་སྔར་ཉེས་པ་དང་བཅས་པར་འགྱུར། ལྟུང་བ་ལྕི་བ་འབྱུང་བར་འགྱུར། ལྷ་དང་མི་རྣམས་ཐེག་པ་ ཆེན་པོས་བསླུས་པར་འགྱུར་ཏེ། དེ་ནི་དེའི་ཉན་ཐོས་ཀྱི་ཐེག་པར་ཡང་མི་འགྱུར་ན་ཐེག་པ་ཆེན་པོ་ལྟ་ཅི་སྨོས། ཐེག་པ་ཆེན་པོ་ལ་འཇུག་པའི་རྟོགས་པའི་ཁྱད་པར་ལྟ་ཅི་སྨོས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྟ་ཅི་སྨོས། འདི་ལྟ་སྟེ། དཔེར་ན་མི་ཞིག་འབྲོག་དགོན་པ་ ཆེན་པོར་སོང་བ་ལས་བཀྲེས་པ་དང་སྐོམ་པས་ཉེན་ཅིང་ངལ་བར་གྱུར་ནས་དེ་འབྲས་བུ་ཆེན་པོ་དང་ལྡན་པའི་ཤིང་གི་དྲུང་དུ་ཟས་ཀྱི་ཕྱིར་འདུག་ནས། དེས་ཤིང་འབྲས་བུ་ཆེན་པོ་དང་ལྡན་པ་དྲི་དང་ལྡན་པ་རོ་དང་ལྡན་པ་བོར་ཏེ་དུག་གི་ཤིང་རོ་མེད་པ་ལ་འཇོགས་ནས་དུག་གི་འབྲས་བུ་ཟའོ། །ཟོས་ནས་འཆི་ བའི་དུས་བྱེད་དེ། གང་ཟག་དེ་ཡང་དཔེ་དེ་དང་འདྲ་བར་བརྗོད་དོ། །དེ་བས་ན་མིར་རྙེད་པ་ཤིན་ཏུ་དཀོན་པ་རྙེད་ནས་དགེ་བའི་བཤེས་གཉེན་ལ་གནས་ཏེ་ཐེག་པ་ཆེན་པོ་ལ་འཇུག་པར་འདོད་པ་ལས་རྙེད་པ་དང ། བཀུར་སྟི་དང ། གྲགས་པའི་ཕྱིར་བདག་ལ་བསྟོད། གཞན་ལ་སྨོད་པར་བྱེད་པས་ལྟུང་ བའི་ལྕི་བ་དེ་འདྲ་བ་བྱུང་བར་གྱུར་ནས་ལྟུང་བའི་རྩ་བ་དེའི་ཕྱིར་ཤེས་པ་ཐམས་ཅད་ཀྱིས་ཤིན་ཏུ་སྨད་ཅིང་ངན་སོང་དུ་འགྲོ་བར་འགྱུར་ཏེ། གང་ཟག་དེ་འདྲ་བ་ནི་རྒྱལ་རིགས་དང ། བྲམ་ཟེ་དང ། རྗེའུ་རིགས་དང ། དམངས་རིགས་ཐམས་ཅད་ཀྱིས་མི་བསྟེན་པར་བྱའོ། །གང་དེ་སྟེན་པར་བྱེད་པ་དེ་ནི་ཤེས་པ་ ཐམས་ཅད་ཀྱི་འདས་པ་དང་བཅས་པ་ཡིན་ཏེ། དེ་ཡང་བྱང་ཆུབ་སེམས་དཔའ་ལས་དང་པོ་པའི་ལྟུང་བའི་རྩ་བ་དྲུག་པའོ། །གཞན་ཡང་རིགས་ཀྱི་བུ་མ་འོངས་པའི་དུས་ན་རྒྱལ་རིགས་རྣམས་ཀྱི་མདུན་ན་འདོན་གྱི་ཕྱག་དར་བའམ། བློན་པོའི་ཕྱག་དར་བའམ། དཔའ་བོའི་ཕྱག་དར་བའམ། 66-1-277b སྨན་པའི་ཕྱག་དར་བ། བླུན་པ་མཁས་པས་སྙེམས་པ། ནོར་ཆེ་བ། ལོངས་སྤྱོད་ཆེ་བ་དག་འབྱུང་སྟེ། དེ་དག་སྦྱིན་པའི་བསོད་ནམས་ཀྱི་དངོས་པོ་རྣམ་པ་མང་པོ་དག་བྱེད་པར་སྣང་སྟེ། དེ་དག་གཏོང་བས་རྒྱགས་ཤིང་དྲེགས་ནས་སྙེམས་པ་དང་རྒྱགས་པས་རྒྱལ་རིགས་དག་ཀྱང་འབྱེད་པར་ བྱེད། དགེ་སྦྱོང་དག་ཀྱང་རྒྱལ་རིགས་དང་འབྱེད་པར་བྱེད་ཅིང ། དེ་དག་རྒྱལ་རིགས་ལ་བརྟེན་ནས་དགེ་སྦྱོང་དག་ཀྱང་ཆད་པས་གཅོད་པར་བྱེད་དེ། ནོར་གྱི་ཆད་པས་འཕྲོག་པར་བྱེད་པས་གནོད་པ་དེའི་ཕྱིར་དགེ་སློང་དེ་དག་གིས་གང་ཟག་གི་ཡང་རུང ། དགེ་འདུན་གྱི་ཡང་རུང ། ཕྱོགས་བཞིའི་དགེ་ འདུན་གྱི་ཡང་རུང ། མཆོད་རྟེན་གྱི་ཡང་རུང་སྟེ། ཕྲོགས་ནས་དེ་དག་ལ་སྐྱེས་སུ་འབུལ་བར་བྱེད། ཕྱག་དར་བ་དེ་དག་ཀྱང་རྒྱལ་རིགས་ལ་འབུལ་བར་བྱེད་དེ། དེ་གཉི་ག་ལྟུང་བའི་རྩ་བར་འགྱུར་རོ། །འདི་ནི་ལྟུང་བའི་རྩ་བ་བདུན་པའོ། །གཞན་ཡང་རྒྱལ་རིགས་ཀྱི་ཕྱག་དར་བ་དེ་དགེ་སྦྱོང་དང་བཅས་ ཏེ་ཉེས་པར་འགྱུར། ཆོས་དེ་ལྟ་བུ་དག་ཀྱང་ཆོས་མ་ཡིན་པར་འདོགས། ཆོས་མ་ཡིན་པར་ནི་ཆོས་སུ་འདོགས་ཏེ་ཆོས་སྤངས། མདོ་སྡེ་དང་འདུལ་བའི་བསླབ་པ་ལ་མི་བལྟ། ནག་པོ་བསྟན་པ་ལ་མི་བལྟ། ཆེན་པོ་བསྟན་པ་ལ་མི་བལྟ། བྱམས་པ་དང ། སྙིང་རྗེ་ཆེན་པོ་དང ། ཤེས་རབ་ཀྱི་ཕ་ རོལ་ཏུ་ཕྱིན་པའི་བསླབ་པ་དང ། ཐབས་ཀྱི་བསླབ་པ་དང ། གང་ཡང་མདོ་སྡེ་གཞན་དག་ལས་བསླབ་པ་བཤད་པ་དེ་ཡང་སྤངས་ནས་དགེ་སློང་དག་གཙེ་བའི་ཕྱིར་དེ་འདྲ་བའི་ཆོས་དང་མི་ལྡན་པའི་བྱ་བ་འཆའ་བར་བྱེད་དེ། བྱ་བ་འཆའ་བ་དེ་དག་གིས་དགེ་སློང་དག་གཙེ་བར་འགྱུར། ཞི་གནས་དང་ལྷག་ མཐོང་ལ་སྦྱོར་བའི་ཡིད་ལ་བྱེད་པ་གཏོང་བར་འགྱུར། བསམ་གཏན་པ་དེ་དག་གནོད་སེམས་མང་བར་འགྱུར་བས་དེའི་ཕྱིར་དགེ་སློང་དག་གི་ཉོན་མོངས་པ་མ་ཞི་བ་ཞི་བར་མི་བྱེད། སྲབ་མོར་མི་འགྱུར་ཏེ། དེའི་ཚེ་དགེ་སློང་དག་བསམ་པ་ཉམས་པར་འགྱུར། ཚུལ་ཁྲིམས་ཉམས་པར་འགྱུར། སྤྱོད་པ་ཉམས་པ་དང ། ལྟ་བ་ཉམས་པར་འགྱུར་ཏེ། དེའི་ཕྱིར་ལྷོད་པར་འགྱུར། ཕལ་ཆེར་ལྷོད་པར་འགྱུར། ཚུལ་ཁྲིམས་ཉམས་པར་འགྱུར། དགེ་སྦྱོང་མ་ཡིན་ན་དགེ་སྦྱོང་དུ་ཁས་འཆེ། ཚངས་པར་སྤྱོད་པ་མ་ཡིན་ན་ཚངས་པར་སྤྱོད་པར་ཁས་འཆེ་ཞིང་བོང་བུ་དང་མཚུངས་པ་དང་ 66-1-278a ཆོས་ཤིན་ཏུ་གསལ་བར་འཆད་པར་འགྱུར་ཏེ། དེ་དག་ལ་རྒྱལ་རིགས་འཁོར་དང་བཅས་པས་ཤིན་ཏུ་བཀུར་སྟི་བྱས་པ་དང ། རིམ་གྲོ་བྱས་པ་དང ། མཆོད་པ་བྱས་པར་འགྱུར། དེ་དག་གིས་དགེ་སློང་སྤོང་བ་ལ་བརྩོན་པ་རྣམས་ཀྱི་བསྔགས་པ་མ་ཡིན་པ་ཁྱིམ་པ་ལ་བརྗོད་པ་ དང ། རྒྱལ་རིགས་འཁོར་དང་བཅས་པ་དེ་ཡང་དགེ་སློང་སྤོང་བ་ལ་བརྩོན་པ་དེ་དག་ལ་ཞེ་སྡང་ཞིང་འཕྱ་བར་འགྱུར་ཏེ། གང་དེ་ན་དགེ་སློང་སྤོང་བ་ལ་བརྩོན་པ་རྣམས་ཀྱི་ཕན་པ་དང་ལོངས་སྤྱོད་དུ་བྱ་བ་དེ་ཁ་ཏོན་ལ་བརྩོན་པའི་དགེ་སློང་ལ་འབུལ་བར་བྱེད་པས་དེ་གཉི་ག་ལྟུང་བའི་རྩ་བར་འགྱུར་རོ། ། དེ་ཅིའི་ཕྱིར་ཞེ་ན། དགེ་སློང་བསམ་གཏན་པ་ནི་ཞིང་དམ་པ་ཡིན་གྱི། ཁ་ཏོན་པ་དང་ཞལ་ཏ་ལ་གནས་པ་ནི་མ་ཡིན་པའི་ཕྱིར་ཏེ། དགེ་སློང་བསམ་གཏན་པ་དག་ནི་ཏིང་ངེ་འཛིན་དང ། གཟུངས་དང ། བཟོད་པ་དང ། ས་དག་ལ་སྣོད་དུ་གྱུར་པ། སྦྱིན་གནས་དམ་པ་སྣོད་དམ་པར་གྱུར་པ། འཇིག་རྟེན་གྱི་སྣང་བར་བྱེད་པ། ལམ་སྟོན་པར་བྱེད་པ། ལས་ཀྱི་ཞིང་དང་ཉོན་མོངས་པའི་ཞིང་ལས་སེམས་ཅན་རྣམས་སྒྲོལ་བར་བྱེད་པ། མྱ་ངན་ལས་འདའ་བར་འགྲོ་བའི་ལམ་ལ་གཞོག་པར་བྱེད་པའོ། །རིགས་ཀྱི་བུ་དེ་ནི་ཚེགས་མ་བྱུང་བ། འཇིགས་པ་དང་བྲལ་བའི་ཕྱིར་བྱང་ཆུབ་སེམས་ དཔའ་ལས་དང་པོ་པ་རྣམས་ཀྱི་ལྟུང་བའི་རྩ་བ་བརྒྱད་པ་སྟེ། ལྟུང་བའི་རྩ་བ་དེ་དག་དང་ལྡན་ན་བྱང་ཆུབ་སེམས་དཔའ་ལས་དང་པོ་པ་སྔོན་དགེ་བའི་རྩ་བ་བསྐྱེད་པ་ཐམས་ཅད་སྤྲུགས་པར་འགྱུར། ངན་སོང་དུ་འགྲོ་བར་འགྱུར། ལྟུང་བའི་དངོས་པོར་འགྱུར། ལྷ་དང་མིའི་བདེ་བ་ཐམས་ཅད་ལས་ ཕས་ཕམ་པར་འགྱུར། བྱང་ཆུབ་སེམས་དཔའ་བསླུས་པར་འགྱུར་ཏེ། རིགས་ཀྱི་བུ་དེ་འདྲ་བ་དག་གི་ཕྱིར་བྱང་ཆུབ་སེམས་དཔའ་ནམ་མཁའི་སྙིང་པོ་ནི་དེ་ལྟ་བུ་དག་གི་ཡུལ་དུ་སྐྱེ་ཞིང་འབྱུང་བར་འགྱུར་ཏེ། ལ་ལར་ནི་དགེ་སྦྱོང་གི་གཟུགས་དང ། ཆ་ལུགས་དང ། སྤྱོད་ལམ་གྱིས་ལ་ལར་ ནི་བྲམ་ཟེའི་གཟུགས་དང ། ཆ་ལུགས་དང་སྤྱོད་ལམ་ནས་དུད་འགྲོའི་མཚན་མ་དང ། སྤྱོད་ལམ་གྱི་བར་དུ་གཟུགས་སྣ་ཚོགས་སྟོན་ཏེ། རྒྱ་ཆེར་ཇི་ལྟར་དཔའ་བར་འགྲོ་བའི་ཏིང་ངེ་འཛིན་ལས་འབྱུང་བ་བཞིན་དུ་བཀླག་པར་བྱ་སྟེ། དེ་དང་དེ་དག་ཏུ་སེམས་ཅན་དེ་དང་དེ་དག་ལ་ཇི་ལྟར་འཐུན་པ་ 66-1-278b བཞིན་དུ་ཆོས་འཆད་པར་བྱེད་དེ། སྔོན་མ་བྱུང་བ། སྔན་ཆད་མ་བྱུང་བ་ཐམས་ཅད་མཁྱེན་པས་བཤད་པའི་མདོ་སྡེ་དང ། ཏིང་ངེ་འཛིན་དང ། བཟོད་པ་དང་ས་འཆད་དེ། དེའི་ཕྱིར་བྱང་ཆུབ་སེམས་དཔའ་ལས་དང་པོ་པ་ཐབས་མི་ཤེས་པ་ལྟུང་བ་བྱུང་བ་དག་ངོ་ཚ་བར་བྱེད། ལྟུང་བ་དེས་འཇིགས་ པར་བྱེད། དངངས་པར་བྱེད། སྐྲག་པར་བྱེད། ལྟུང་བ་དེ་དག་འཆགས་པར་བྱེད། གཏོང་བར་བྱེད། སྤོང་བར་བྱེད་དོ། །གལ་ཏེ་སེམས་ཅན་དེ་དག་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་ཐོས་ནས་མཐོང་བར་འདོད་ཅིང་ངན་སོང་དུ་ལྟུང་བས་འཇིགས་ཏེ། ལྟུང་བའི་རྩ་བ་ བཤགས་པར་འདོད་ན། གལ་ཏེ་དེ་དག་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་འཚལ་ཞིང་དེའི་མིང་ནས་བརྗོད་ན་རིགས་ཀྱི་བུ་དེ་དག་གི་སྐལ་བ་ཇི་ལྟ་བ་བཞིན་དུ་སེམས་ཅན་དེའི་མདུན་དུ་ཐ་མལ་པའི་ཚུལ་དུ་འདུག་པའམ། བྲམ་ཟེའི་གཟུགས་ནས་བུ་མོའི་གཟུགས་ཀྱི་ བར་གྱིས་བྱང་ཆུབ་སེམས་དཔའ་ལས་དང་པོ་པ་དེའི་མདུན་དུ་འདུག་སྟེ། ལྟུང་བའི་རྩ་བ་དེ་ཇི་ལྟར་བྱུང་བ་དེ་འཆགས་སུ་འཇུག་གོ། །དེའི་ཐབས་མཁས་པ་ཟབ་མོ་དང ། བླ་ན་མེད་པའི་ཐེག་པ་ཆེན་པོ་ལ་སྤྱོད་པ་ཡང་སྟོན། ས་དང་ས་དག་ཏུ་ཡང་ཏིང་ངེ་འཛིན་དང ། གཟུངས་དང་བཟོད་པ་ ལ་གཞོག་པར་བྱེད་དེ། རིམ་གྱིས་ལམ་ཡན་ལག་བརྒྱད་པའི་བར་གྱིས་གཞོག་པར་བྱེད་དོ། །དེ་ནས་དེ་དག་ངན་སོང་གི་འཇིགས་པ་ཆེན་པོ་ལས་ཤིན་ཏུ་ཐར་བར་བྱེད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་ས་ལ་འཇོག་པར་བྱེད་དོ། །དེ་ལྟར་དེ་གློག་ དང་མཚུངས་པ་དང ། ཕ་རོལ་ཏུ་ཕྱིན་པ་དྲུག་གི་སྤྱོད་པ་ལ་མཐུ་ཆེ་ཞིང་རྟུལ་བར་འགྱུར་རོ། །དེ་བས་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །གལ་ཏེ་དེ་དག་ལ་མངོན་སུམ་དུ་བདག་སྟོན་པར་མི་བྱེད་ན། གང་དེ་ལ་གསོལ་ བར་བྱེད་པའི་བྱང་ཆུབ་སེམས་དཔའ་ལས་དང་པོ་པ་ཉེས་པ་དང་བཅས་པ་ཐོ་རངས་ཀྱི་ཐུན་ལ་ལངས་ཏེ་ཁ་ཤར་ཕྱོགས་སུ་བསྟན་ཏེ་འདུག་ལ། ལྷའི་བུ་སྐྱ་རེངས་ལ་གསོལ་བ་གདབ་པར་བྱ་བ་འདི་སྐད་དུ་བརྗོད་དོ། །སྐྱ་རེངས་སྐྱ་རེངས་ཐུགས་རྗེ་ཆེན་པོ་ཅན། བསྐལ་པ་ཆེན་པོ་ཅན་ཁྱོད་འཛམ་ 66-1-279a བུའི་གླིང་དུ་ཤར་མ་ཐག་ཏུ་བདག་ལ་ཐུགས་རྗེ་དགབ་པར་མཛོད་ཅིག་།བྱང་ཆུབ་སེམས་དཔའ་ནམ་མཁའི་སྙིང་པོ་ཐུགས་རྗེ་ཆེན་པོ་ཅན་ལ་བདག་གི་ཚིག་གིས་སྦྲོན་ཏེ། བདག་གི་རྨི་ལམ་དུ་ཡང་དེ་སྟོན་པར་འགྱུར་ཞིང་བདག་གིས་ཐབས་དེས་ལྟུང་བ་བཤགས་ པར་འགྱུར་བ་དང ། འཕགས་པའི་ཐེག་པ་ཆེན་པོ་ལ་ཐབས་དང་ཡེ་ཤེས་ཐོབ་པར་མཛོད་ཅིག་ཅེས་སྨྲས་ནས་དེས་དེའི་ཚེ་མལ་དུ་གཉིད་ལོག་པར་བྱ་སྟེ། སྐྱ་རེངས་འཛམ་བུའི་གླིང་འདིར་ཤར་མ་ཐག་ཏུ་བྱང་ཆུབ་སེམས་དཔའ་ནམ་མཁའི་སྙིང་པོ་འདིར་འོང་བར་འགྱུར་ཏེ། བྱང་ཆུབ་སེམས་ དཔའ་ལས་དང་པོ་པ་དེའི་རྨི་ལམ་ན་ཐ་མལ་པར་མདུན་དུ་འདུག་སྟེ། ལྟུང་བའི་རྩ་བ་དེ་ཡང་འཆགས་སུ་འཇུག་།ཡེ་ཤེས་དང་ཐབས་ཆེན་པོས་ཐབས་དང་ཡེ་ཤེས་ལ་མཁས་པ་གང་དག་གིས་བྱང་ཆུབ་སེམས་དཔའ་ལས་དང་པོ་པ་དེ་དེ་ཉིད་དུ་བྱང་ཆུབ་ཀྱི་སེམས་མི་བརྗེད་པ་ཞེས་བྱ་བའི་ཏིང་ངེ་ འཛིན་འཐོབ་པར་འགྱུར་བ་དང ། ཐེག་པ་ཆེན་པོ་ལ་ཤིན་ཏུ་བརྟན་པོར་གནས་པར་འགྱུར་བ་དང ། དེ་མྱུར་དུ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་བ་དང ། རིང་པོ་མི་ཐོགས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ ལྟ་བུའི་ཐབས་དང་ཤེས་རབ་ཀྱང་དེ་ལ་སྟོན་ཏོ། །དེ་བས་ན་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་འདི་ནི་ཤིན་ཏུ་དཔའ་བ་ལས་བྱུང་བའི་ཡིད་བཞིན་གྱི་ནོར་བུ་རིན་པོ་ཆེ་ཡན་ལག་གི་དམ་པ་མགོ་བོ་ལ་འདུག་པར་སྣང་ངོ ། །དེ་ལྟ་བས་ན་བྱང་ཆུབ་སེམས་ དཔའ་སེམས་དཔའ་ཆེན་པོ་ནམ་མཁའི་སྙིང་པོ་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་ནོ། །རིགས་ཀྱི་བུ་གཞན་ཡང་སེམས་ཅན་གང་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་ཐོས་སམ། གཟུགས་འདྲིར་འཇུག་གམ། དེ་ལ་མཆོད་པ་བྱེད་དམ། རིམ་གྲོ་བྱེད། བསྟི་ སྟང་བྱེད། བཀུར་སྟི་བྱེད། མཆོད་པ་བྱེད་ཅིང ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་རྣམ་པ་དུ་མ་དག་གིས་བཀུར་སྟིར་བྱེད། ཕྱག་འཚལ་བར་བྱེད། བདག་གི་སྲོག་ཀྱང་དེ་ལ་འབུལ་བར་བྱེད་ན་སེམས་ཅན་དེ་ 66-1-279b དག་ནི་མེས་འཆི་བའི་དུས་བྱེད་པར་མི་འགྱུར། ཆུས་མ་ཡིན། མཚོན་གྱིས་མ་ཡིན། དུག་གིས་འཆི་བར་མི་བྱེད་དེ། དེ་དག་ཚེ་ཟད་པ་མ་གཏོགས་པར་མི་འམ་མི་མ་ཡིན་པ་སུས་ཀྱང་དེ་དག་གི་སྲོག་དབྲོག་པར་མི་ནུས། དུས་མ་ཡིན་པར་མི་འཆི། ནད་བུ་ཅན་དུ་མི་འགྱུར། བཀྲེས་ པ་དང་སྐོམ་པས་འཆི་བའི་དུས་བྱེད་པར་མི་འགྱུར། རྒྱལ་པོའི་ཆད་པས་ཆོད་པར་མི་འགྱུར། འཆི་བའི་དུས་ལ་བབ་ཀྱི་བར་དུ་ལྟུང་བའི་རྩ་བ་འབྱུང་བར་མི་འགྱུར་ཏེ། དེ་དག་མིག་གིས་གཟུགས་མི་མཐོང ། རྣ་བས་སྒྲ་མི་ཐོས། སྣས་དྲི་མི་ཚོར། ལྕེས་རོ་མི་མྱོང ། ལུས་ཀྱིས་རེག་ བྱ་མི་ཤེས་ཤིང ། ད་དུང་དུ་དབུགས་ཕྲ་མོ་འབྱུང་བ་དང་འཇུག་པར་བྱེད། ད་དུང་དུ་དེའི་ལུས་ལ་ཚེ་དང ། དྲོད་དང ། རྣམ་པར་ཤེས་པ་འཇུག་པར་འགྱུར་བ་དེའི་ཚེ། དེ་དག་ལ་བྱང་ཆུབ་སེམས་དཔའ་ནམ་མཁའི་སྙིང་པོ་ཐ་མལ་པར་སྟོན་པར་བྱེད་དེ། སེམས་ཅན་གང་སྔོན་བྲམ་ཟེ་ ལ་གུས་པར་གྱུར་པ་དེ་དག་གི་རྣམ་པར་ཤེས་པ་ལ་ནི་རིགས་ཀྱི་བུ་དེ་བྲམ་ཟེའི་གཟུགས་སུ་སྟོན་ཏོ། །གང་འདོད་པའི་དབང་ཕྱུག་ལ་གུས་པ་དེ་དག་ལ་ནི་འདོད་པའི་དབང་ཕྱུག་གི་བར་དུ་སྟོན་པ་ནས། གང་སྲེད་མེད་ཀྱི་བུ་ལ་གུས་པ་དང ། གང་དབང་ཕྱུག་ཆེན་པོ་ལ་གུས་པ་དང ། བརྒྱ་བྱིན་ ལ་གུས་པ་དང ། འཁོར་ལོས་སྒྱུར་བ་ལ་གུས་པ་དང ། ཉི་མ་དང ། ཟླ་བ་དང ། ཡུལ་འཁོར་སྲུང་དང ། འཕགས་སྐྱེས་པོ་དང ། མིག་མི་བཟང་དང་རྣམ་ཐོས་ཀྱི་བུ་ལ་གུས་པ་དང ། གང་དག་ལྷ་དང ། རི་དང ། ཤིང་དང ། ཆུ་མིག་དང ། མཚེའུ་དང ། ལྟེང་ཀ་སྣ་ཚོགས་ལ་ གུས་པའི་བར་དུ་གང་དང་གང་གི་སྐྱབས་སུ་སོང་བའི་སེམས་ཅན་དེ་དག་ལ་དེ་ལྟ་དེ་ལྟར་སེམས་ཅན་དེ་དག་གི་མདུན་དུ་བསྟན་ནས། གང་གི་བསམ་པ་ཅི་འདྲ་བ་བཞིན་དུ་དེའི་གཟུགས་ཀྱིས་འདི་སྐད་ཅེས་སྨྲའོ། །འཕགས་པའི་བདེན་པ་བཞི་དག་ལ། །གང་དག་ཤེས་རབ་ཀྱིས་མཐོང་བ། ། འཁོར་བའི་སྲིད་པ་སྒྲོལ་བའི་ཕྱིར། །འཁོར་བ་ན་ནི་དེ་ཀུན་ཤེས། །སེམས་ཅན་དེ་དག་གིས་ཆོས་འདི་དག་རྣམ་པར་ཤེས་པས་ཤེས་པར་བྱས་ནས་མཐོ་རིས་ལ་གཞོལ་བར་འགྱུར་རོ། །སེམས་ཅན་གང་དག་སངས་རྒྱས་ལ་མངོན་པར་དད་པ་དེ་དག་གི་མདུན་དུ་འདུག་སྟེ། སངས་རྒྱས་ 66-1-280a ཀྱི་གཟུགས་བསྟན་ནས་འདི་སྐད་ཅེས་སྨྲའོ། །སངས་རྒྱས་ཡེ་ཤེས་བདེན་པ་ཡིས། །སྲིད་པའི་རྒྱ་མཚོ་གང་སྒྲོལ་བ། །ཡེ་ཤེས་དེ་ལ་མྱུར་དུ་རེག་།སྡུག་བསྔལ་ཀུན་ལས་འགྲོལ་བར་འགྱུར། །དེའི་ཚེ་སེམས་ཅན་དེ་དག་སངས་རྒྱས་ཡིད་ལ་བྱེད་པའི་སྒྲས་དགའ་ ཞིང་རངས་ནས་འཆི་བའི་དུས་བྱས་ཏེ། སངས་རྒྱས་ཀྱི་ཞིང་རྙོག་པ་མེད་པ་ཡོངས་སུ་དག་པ། གང་ན་སངས་རྒྱས་བཅོམ་ལྡན་འདས་བཞུགས་པ། འཚོ་བ། གཞེས་པ། ཆོས་ཀྱང་སྟོན་པ་དེར་སྐྱེ་བར་འགྱུར་རོ། །དེ་བཞིན་དུ་ཆོས་དང ། དགེ་འདུན་ལ་བརྗོད་པར་བྱའོ། །དེ་ལྟ་བས་ན་བྱང་ ཆུབ་སེམས་དཔའ་ནམ་མཁའི་སྙིང་པོ་ནི་ཡོན་ཏན་གྱི་ཆོས་བསམ་གྱིས་མི་ཁྱབ་པ་དང་ལྡན་ནོ། །གང་ཡང་ཏིང་ངེ་འཛིན་རྣམ་པ་སྣ་ཚོགས་ལ་སེམས་ཀྱིས་ཤིན་ཏུ་དབང་བྱ་བར་འདོད་ན། དེས་ཐོ་རངས་ཀྱི་ཐུན་ལ་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་འཚལ་ཏེ་མཆོད་པ་ཅི་ནུས་ཀྱིས་ བྱའོ། །སེམས་ཅན་ཐམས་ཅད་ལ་བྱམས་པའི་སེམས་ཉེ་བར་གཞག་སྟེ་འདི་སྐད་ཅེས་བརྗོད་དོ། །དགོངས་ཤིག་དགོངས་ཤིག་།ནམ་མཁའི་སྙིང་པོ་ཐུགས་རྗེ་ཆེན་པོ་བརྙེས་པ། བདག་ལ་དྲན་པ་དང ། ཏིང་ངེ་འཛིན་གྱི་རྣལ་འབྱོར་སྩོལ་ཅིག་།འདི་ལྟ་སྟེ། ཨུ་མུ་ར་ཎ་ཁེ། བཀྵ་མ་ནི་ལེ། ས་མུ་དྲ། ཨ་བ་ད་རེ་ན། ན་ཡ་ན་ཡ། མ་ཧཱ་ཀཱ་རུ་ཎི་ཀཱ། ཨ་ནུ་པ་མ་ཛམ་བྷ་སྨྲྀ་ཏི། ཨ་ཀྲ་ཛམ་བྷ་སྨྲྀ་ཏི། བཛྲ་ཛམ་བྷ་སྨྲྀ་ཏི། ཀོ་ཥསྨྲྀ་ཏི། ཨ་ནུ་པ་མ་སྨྲྀཏི། བྷུཏ་ཀོ་ཊི་ཏི་སཝཱ་ཧཱ། དེ་ལ་དྲན་པ་དང་ཏིང་ངེ་འཛིན་ལ་འཇུག་པ་སྦྱིན་པར་བྱེད་དོ། །གང་ཡང་སངས་ རྒྱས་ཀྱི་བཀའ་ཡང་རུང ། ཉན་ཐོས་ཀྱིས་བཤད་པ་ཡང་རུང་སྟེ། བསྟན་བཅོས་སྣ་ཚོགས་ཀློག་པར་འདོད་ན། དེས་ཁྲུས་བྱས་ཏེ་སྐྱ་རེངས་འབྱུང་བའི་ཚེ་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་བྱའོ། །མཆོད་པ་ཅི་ནུས་ཀྱིས་བྱའོ། །སེམས་ཅན་ཐམས་ཅད་ལ་བྱམས་པའི་ སེམས་སུ་བྱའོ། །འདི་སྐད་ཀྱང་བརྗོད་པར་བྱའོ། །དགོངས་ཤིག་དགོངས་ཤིག་།མཁས་པ་ཆེན་པོ་སེམས་ཅན་ཐམས་ཅད་ཀྱི་ནང་ན་བསམ་གྱིས་མི་ཁྱབ་པའི་རིགས་ཀྱི་བུ་ནམ་མཁའི་སྙིང་པོ་གང་ཟག་གི་མཆོག་།དྲན་པ་དང་ཏིང་ངེ་འཛིན་གྱི་རྣལ་འབྱོར་བདག་ལ་སྩོལ་ཅིག་།འདི་ལྟ་ 66-1-280b སྟེ། ཨི་ནཱི་ལ་ཛ། བི་ཥན་དུ་ཥ་ཛ། བི་ཡ་བ་ན་ཛ། བི་བཀྵི་སམེ། པཱ་ཤ་ལ་ཛ་སི། སྠཱ་ན་ཤ་ར་བེ། ཤསྟྲ་ཀརྞྞེ། ཧུ་མ་ཧུ་མ། མ་ཧཱ་ཀཱ་རུ་ཎི་ཀ་སཝཱ་ཧཱ། གང་རྒྱ་མཚོ་ཆེན་པོར་འཇུག་འདོད་པ་དང ། གང་ཁུང་དུ་འཇུག་འདོད་པ་དང ། གང་བཅུད་དམ་པ་སྤྱོད་པར་འདོད་པར་གྱུར་པ་དང ། གང་བཙོན་རར་བཅུག་པ་དང ། གང་མཛའ་བ་དང་བྲལ་བ་དང ། གང་མི་མཛའ་བ་དང་ཕྲད་པ་དང ། གང་དག་མེས་འཇིགས་པ་དང ། ཆུ་དང ། མཚོན་དང ། དུག་དང ། བྱད་སྟེམས་དང ། སྟག་དང ། སེང་གེ་དང ། དུག་དྲག་པོ་དང ། རྐུན་པོ་དང ། གཡོན་ཅན་གྱིས་འཇིགས་པར་འགྱུར་ བ་དང ། གང་དམ་དུ་བཅིངས་པ་དང ། གང་ཆད་པས་བཅད་པ་དང ། གང་གསད་པ་ལ་ཐུག་པ་དང ། གང་ནད་ཀྱིས་བཏབ་པ་དང ། ནད་ཀྱིས་འཇིགས་པ་དང ། གང་དག་ཆོས་གོས་དང ། བསོད་སྙོམས་དང ། མལ་ཆ་དང ། སྟན་དང ། ན་བའི་གསོས་སྨན་དང ། ཡོ་བྱད་ཀྱིས་ ཕོངས་པ་དེ་དག་གལ་ཏེ་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་ནས་བརྗོད་ཅིང ། མཆོད་པ་ཅི་ནུས་ཀྱིས་བྱེད་ལ་སེམས་ཅན་ཐམས་ཅད་ལ་བྱམས་པའི་སེམས་ཀྱིས་གཞོག་ཅིང་འདི་སྐད་དུ་ཡང་སྨྲ་སྟེ། དགོངས་ཤིག་དགོངས་ཤིག་།ཐུགས་རྗེ་ཆེན་པོ་དང་ལྡན་པ་གྲགས་པ་ ཆེན་པོ་ནམ་མཁའི་སྙིང་པོ་འགྲོ་བའི་དོན་བཞེད་པ། ཐུགས་རྗེ་ཆེན་པོ་དང་ལྡན་པ་བདག་ལ་གཟིགས་ཤིག་།བདག་འདི་ལྟ་བུ་ལས་རབ་ཏུ་ཐར་པར་མཛོད་ཅིག་།སྐལ་བ་སྩོལ་ཅིག་།མཐུ་ཆེན་པོ་བདག་ནི་སྡུག་བསྔལ་གྱིས་ཉམ་ཐག་གོ། །ཤིན་ཏུ་དབུལ་ལོ། །བདག་ནི་ཁྱོད་ལ་ བརྟེན་ནས་ཞི་བ་དང་བདེ་བ། ཚེ་འདི་དང་ཚེ་རབས་གཞན་དུ་ཐོབ་པར་འགྱུར་རོ། །ཞེས་སྨྲས་པ་དང ། བྱང་ཆུབ་སེམས་དཔའ་ནམ་མཁའི་སྙིང་པོ་གཟུགས་ཐ་མལ་པ་ནས་བུ་མོའི་གཟུགས་ཀྱི་བར་གྱིས་སེམས་ཅན་དེ་དག་གི་མདུན་དུ་འདུག་སྟེ། དབུགས་འབྱིན་པར་བྱེད་དོ། །གང་དག་ ཅི་ལས་འཇིགས་པ་དེ་དག་དེ་ལས་རབ་ཏུ་ཐར་བར་བྱེད་དོ། །གང་དག་དབུལ་བ་གོས་མེད་པ་ནས་གང་དག་ཡོ་བྱད་ཀྱིས་བྲེལ་བ་དག་གི་བར་དུ་དེ་དག་ལ་དེ་ལྟ་དེ་ལྟར་བསམ་པ་ཡོངས་སུ་རྫོགས་པར་བྱེད་དོ། །ཡོ་བྱད་ཐམས་ཅད་ཕུན་སུམ་ཚོགས་པའི་བར་དུ་འགྱུར་རོ། །རྒྱལ་པོའི་བུ་ལ་ལ་ 66-1-281a ཞིག་གནས་ཆེན་པོའི་དབང་བསྐུར་བ་ཐོབ་པར་སེམས་པ་དེ་གལ་ཏེ་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་བརྗོད་ཅིང་ཕྱག་འཚལ་ལ། མཆོད་པ་དང་རིམ་གྲོ་བྱེད་པ་ལ་སོགས་ཏེ། བྲམ་ཟེའི་གནས་ཆེན་པོ་དང ། ཁྱིམ་བདག་གི་གནས་ཆེན་པོ་དང ། བཟོའི་གནས་ཆེན་པོ་དང ། ཐོས་པའི་གནས་ཆེན་པོ་དང ། སྒོམ་པའི་གནས་ཆེན་པོ་དང ། གང་མོས་པའི་གནས་ཆེན་པོའི་བར་དུ་འདོད་པ་དེ་དག་གལ་ཏེ་བྱང་ཆུབ་སེམས་དཔའ་ནམ་མཁའི་སྙིང་པོའི་མིང་ཐོས་ནས་ཕྱག་འཚལ་བར་བྱེད། ཁྲུས་བྱས་ཏེ་གོས་གཙང་མ་བགོས་ནས་ཐོ་ རངས་ཀྱི་ཐུན་ལ་བྱང་ཆུབ་སེམས་དཔའ་ནམ་མཁའི་སྙིང་པོ་ལ་སྐྱབས་སུ་སོང་ནས་གསོལ་བ་གདབ་པ་འདི་སྐད་དུ་རྗོད་པར་བྱེད་དེ། ནམ་མཁའི་སྙིང་པོ་ཐུགས་རྗེ་ཆེན་པོ་དང་ལྡན་པ་བདག་ལ་སྐལ་བ་སྩོལ་ཅིག་།བསམ་པ་དང ། སེམས་པ་ཐམས་ཅད་དང ། བསམ་པ་ཡིད་བཞིན་དུ་རབ་ཏུ་རྫོགས་ པར་མཛོད་ཅིག་།གང་སེམས་ཤིང་གང་གསོལ་བ་ཐུགས་རྗེ་ཆེན་པོ་དང་ལྡན་པ་ཁྱོད་ཀྱིས་མཛོད་ཅིག་ཅེས་བརྗོད་ན། དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་ལྷའི་རྣ་བའི་ཁམས་རྣམ་པར་དག་པ། མིའི་ལས་འདས་པས་སྒྲ་དེ་ཐོས་ནས་སེམས་ཅན་དེ་དག་ལ་བདག་ཅི་རིགས་པར་ སྟོན་ཏེ། དེ་དག་ལ་དེ་ལྟར་ཐབས་ཀྱང་སྟོན་ཏོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་དེ་ནི་དེ་ལྟ་བུའི་ཐབས་ཀྱི་ཡོན་ཏན་གྱི་ཆོས་དང་ལྡན་ནོ། །བློ་རྒྱ་མཚོ་ཆེན་པོ་དང་ལྡན་ནོ། །རིགས་ཀྱི་བུ་རྒྱ་མཚོ་ཆེན་པོའི་ཆུའི་ཐིགས་པ་ནི་ལ་ལ་ཞིག་གིས་ཚད་བཟུང་བར་ནུས་སྲིད་ ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ཐབས་དང་ཡེ་ཤེས་ལ་མཁས་པ་དང ། ཐབས་ཀྱིས་སེམས་ཅན་ཡོངས་སུ་སྨིན་པར་བྱ་བའི་ཚད་ནི་གཟུང་མི་ནུས་སོ། །རིགས་ཀྱི་བུ་ཕྱོགས་བཅུའི་ནམ་མཁའ་མཐའ་ཡས་མུ་མེད་པ་ཐམས་ཅད་ཀྱི་ཚད་ནི་ལ་ལས་གཟུང་ བར་ནུས་སྲིད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་སེམས་ཅན་ཡོངས་སུ་སྨིན་པར་བྱ་བའི་ཕྱིར་རྣམ་པ་སྣ་ཚོགས་སུ་སྤྲུལ་པར་བྱེད་པ་ནི་ཚད་གཟུང་མི་ནུས་ཏེ། ལ་ལར་ནི་སེམས་ཅན་ཡོངས་སུ་སྨིན་པར་བྱ་བའི་ཕྱིར་སངས་རྒྱས་ཀྱི་གཟུགས་སུ་སྤྲུལ་པར་ 66-1-281b བྱེད་དོ། །ལ་ལར་ནི་བྲམ་ཟེའི་གཟུགས་སུ་བྱེད་ཅིང ། སེམས་ཅན་ཇི་ལྟ་བུས་འདུལ་བ་དེ་ལྟ་བུའི་གཟུགས་ཀྱི་བར་དུ་སྤྲུལ་པར་བྱེད་དེ། དེ་དུད་འགྲོའི་སྐྱེ་གནས་སུ་སྐྱེས་པ་རྣམས་ཀྱི་ནང་དུ་ནི་དུད་འགྲོའི་གཟུགས་སུ་སྤྲུལ་པར་བྱེད་དོ། །སེམས་ཅན་དམྱལ་བ་པ་རྣམས་ཀྱི་ནང་དུ་ནི་སེམས་ ཅན་དམྱལ་བ་པའི་གཟུགས་སུ་སྤྲུལ་པར་བྱེད་པ་ནས་གཤིན་རྗེའི་འཇིག་རྟེན་པ་རྣམས་ལ་གཤིན་རྗེའི་འཇིག་རྟེན་གྱི་གཟུགས་ཀྱི་བར་དུ་སྤྲུལ་པར་བྱེད་དོ། །ཁ་ཅིག་ལ་ནི་མངོན་སུམ་དུ་སྤྲུལ་པ་སྤྲུལ་པར་བྱེད། ཁ་ཅིག་ལ་ནི་རྨི་ལམ་དུ་སྤྲུལ་པར་བྱེད། ཁ་ཅིག་ལ་ནི་སྡིག་པའི་ལས་སྤྲུག་ པའི་ཕྱིར། ངན་སོང་ལས་བསྒྲལ་བའི་ཕྱིར། མཐོ་རིས་ལ་དགོད་པའི་ཕྱིར། སེམས་ཅན་རྣམས་ཀྱི་དོན་གྱི་ཕྱིར། འཆི་འཕོའི་དུས་ཀྱི་ཚེ་རྣམ་པར་ཤེས་པ་ཐ་མ་རྒྱུ་བའི་ཚེ། གཟུགས་སྣ་ཚོགས་སུ་སྤྲུལ་པར་བྱེད་དེ། དེ་དག་ལ་ཐོག་མར་སྐྱབས་སུ་སོང་ཞིང་མཐོང་སྟེ། བདེ་བ་ཐོབ་ནས་ མཐོ་རིས་ཀྱི་འཇིག་རྟེན་དུ་གནས་པའི་བདེ་བ་ཐོབ་པའི་བར་དུ་འགྱུར་བས་དེའི་ཕྱིར་སུས་ཀྱང་དེའི་སྤྲུལ་པ་ཐམས་ཅད་ཀྱི་ཚད་གཟུང་བར་མི་ནུས་སོ། །དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་འདི་ནི་ཐབས་དང་ཡེ་ཤེས་ཀྱི་ཡོན་ཏན་གྱི་ཆོས་བསམ་གྱིས་མི་ཁྱབ་པ་ དང་ལྡན་ནོ། །སངས་རྒྱས་ཀྱི་ཡོན་ཏན་ཆེན་པོ་དང་ལྡན་ནོ། །དེ་བས་ན་རིགས་ཀྱི་བུ་དེའི་ཡན་ལག་གི་མཆོག་མགོ་བོ་ལ་ཡིད་བཞིན་གྱི་ནོར་བུ་རིན་པོ་ཆེ་འདུག་པར་སྣང་ངོ ། །དེ་ནས་དེའི་ཚེ་འཁོར་འདུས་པ་ཐམས་ཅད་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་ པོ་ལ་ངོ་མཚར་ཐོབ། རྨད་དུ་བྱུང་བ་ཐོབ། བླ་མ་ལ་བཀུར་སྟི་དང ། བསྟི་སྟང་དུ་བྱ་བ་ཐོབ་པར་གྱུར་ནས་ཐམས་ཅད་ཀྱིས་ཐལ་མོ་སྦྱར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་མཆོད་པ་དང ། བཀུར་སྟི་སྣ་ཚོགས་ཀྱིས་བཀུར་སྟིར་བྱེད། མེ་ཏོག་དང ། སྤོས་ དང ། ཕྲེང་བ་དང ། བྱུག་པ་དང ། མར་མེ་དང ། བདུག་པ་དང ། གདུགས་དང ། རྒྱལ་མཚན་དང ། བ་དན་དང ། ཆོས་གོས་དང ། རྒྱན་དང ། གོས་དང ། བསྟོད་པ་དང ། གླུ་དང ། སིལ་སྙན་དག་གིས་མཆོད་པ་བྱེད་དོ། །བྱང་ཆུབ་སེམས་དཔའ་ནམ་མཁའི་སྙིང་པོ་དེས་ཀྱང་དེ་དག་ 66-1-282a ཐམས་ཅད་བཅོམ་ལྡན་འདས་ལ་ཕུལ་ལོ། །ཕུལ་ནས་བཅོམ་ལྡན་འདས་ཀྱི་ཞབས་ལ་ཕྱག་འཚལ་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་ཉོན་མོངས་པ་ཅན་སྙིགས་མ་ལྔ་དང་ལྡན་པའི་སངས་རྒྱས་ཀྱི་ཞིང་འདིར་སེམས་ཅན་མ་རིག་པའི་མུན་པ་ ཆེན་པོས་རྨོངས་པ་རྣམས་ལ་སངས་རྒྱས་ཀྱི་དོན་བགྱི་བར་ཇི་ལྟར་རྔོ་ཐོགས་ལགས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་སྟེ། རིགས་ཀྱི་བུ་ནམ་མཁའ་ནི་མ་བཅིངས་པ་མ་གྲོལ་བ། ཉོན་མོངས་པ་ཅན་མ་ཡིན་པ། མ་རྨོངས་པ། རང་བཞིན་གྱིས་དག་པའོ། །ནམ་མཁའ་ ལ་རླུང་གི་རྐྱེན་གྱིས་རྡུལ་འཐུལ་ཞིང་རླུང་གིས་དཀྲུགས་པས་ཡོངས་སུ་མ་དག་པའི་མཚན་དུ་སྣང་སྟེ། ཆུས་ནི་ཞི་བར་བྱེད་ཅིང་དྲི་མ་མེད་ལ་ཡོངས་སུ་དག་པར་འགྱུར་རོ། །དེ་ལ་སྐར་མ་དང ། གཟའ་དང ། ཉི་མ་དང ། ཟླ་བའི་བྱེ་བྲག་མི་མངོན་ནི་སྐད་ཅིག་དང ། ཐང་ཅིག་དང ། ཡུད་ཙམ་དང ། ཉིན་མོ་དང ། མཚན་མོ་དང ། དུས་དང ། ལོ་རྣམས་ཀྱི་བགྲང་བ་ཡང་མི་མངོན་ནོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པའི་དོན་དམ་པ་སྟོང་པ་ཉིད་ཀྱི་དབང་དུ་སོང་བའི་སེམས་ནི་རང་བཞིན་གྱིས་དང་བའི་ཡོངས་སུ་དག་པ་ཡིན་མོད་ཀྱི། སེམས་ཅན་རྣམས་ཀྱི་བློ་བུར་དུ་བྱུང་བའི་ཉེ་ བའི་ཉོན་མོངས་པ་རྣམས་ཀྱིས་སེམས་ཉེ་བར་ཉོན་མོངས་པར་བྱས་ཏེ། དེ་དག་གི་ཕྱིར་དེ་བཞིན་གཤེགས་པའི་ཐུགས་རྗེ་ཆེན་པོ་ཆུ་དང་མཚུངས་པས་ཆོས་འཆད་པར་མཛད་དོ། །སེམས་ཉོན་མོངས་པ་ཅན་དུ་གྱུར་པའི་སེམས་ཅན་རྣམས་ཀྱི་སེམས་ཡོངས་སུ་སྦྱོང་བར་མཛད་པས་ཡོངས་སུ་དག་ པ་དང ། དེ་དག་གི་སེམས་དྲི་མ་མེད་པར་འགྱུར་ཏེ། དེའི་ཕྱིར་སེམས་ཅན་དེ་དག་དེ་བཞིན་གཤེགས་པའི་ཉི་མ་ཤར་ནས་ཡེ་ཤེས་ཀྱི་འོད་ཟེར་གྱིས་ཚིམ་པར་འགྱུར་རོ། །སངས་རྒྱས་ཀྱི་ཡོན་ཏན་བསམ་གྱིས་མི་ཁྱབ་པ་ལ་མངོན་དུ་འགྱུར་ཏེ། འདི་ལྟ་སྟེ། དྲན་པ་ཉེ་བར་གཞག་པ་བཞི་ནས་ འཕགས་པའི་ལམ་ཡན་ལག་བརྒྱད་པའི་བར་ལ་གནས་པར་འགྱུར་རོ། །སངས་རྒྱས་ཀྱི་ཆོས་མ་འདྲེས་པ་བཅཝ་བརྒྱད་ཀྱི་བར་ལ་གནས་པར་འགྱུར་རོ། །སེམས་ཅན་ཐམས་ཅད་སྙིང་རྗེ་ཉིད་ལ་ཤིན་ཏུ་གནས་པར་འགྱུར་རོ། །དེ་དག་ལས་ཀྱང་འཇིག་རྟེན་དུ་དགྲ་བཅོམ་པ་རྣམས་འབྱུང་བར་འགྱུར་ 66-1-282b རོ། །རང་སངས་རྒྱས་རྣམས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཇིག་རྟེན་དུ་འབྱུང་བར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བར་འགྱུར་རོ། །རིགས་ཀྱི་བུ་འདི་ཇི་སྙམ་དུ་སེམས། ནམ་མཁའ་ མིག་ལ་གནས་སམ། གསོལ་པ། བཅོམ་ལྡན་འདས་དེ་མ་ལགས་སོ། །ཅི་མིག་གི་རྣམ་པར་ཤེས་པ་ལ་གནས་སམ། བཅོམ་ལྡན་འདས་དེ་མ་ལགས་སོ། །ཅི་མིག་གིས་ཀུན་དུ་རེག་པ་ལ་གནས་སམ། བཅོམ་ལྡན་འདས་དེ་མ་ལགས་སོ། །གང་ཡང་ནང་དུ་མིག་གིས་ཀུན་དུ་རེག་ པའི་རྐྱེན་གྱིས་ཚོར་བ་གསུམ་འབྱུང་བ་དེ་ལ་ནམ་མཁའ་གནས་སམ། གསོལ་པ་བཅོམ་ལྡན་འདས་དེ་མ་ལགས་སོ། །དེ་བཞིན་དུ་རྣ་བ་དང ། སྣ་དང ། ལྕེ་དང ། ལུས་ལ་ཡང་བརྗོད་པར་བྱའོ། །རིགས་ཀྱི་བུ་འདི་ཇི་སྙམ་དུ་སེམས། ནམ་མཁའ་ཡིད་ལ་གནས་པ་ནས་ཡིད་ཀྱིས་ཀུན་དུ་ རེག་པའི་རྐྱེན་གྱིས་ཚོར་བ་གསུམ་འབྱུང་བ་དེ་ལ་ནམ་མཁའ་གནས་སམ། གསོལ་པ། བཅོམ་ལྡན་འདས་དེ་མ་ལགས་སོ། །རིགས་ཀྱི་བུ་འདི་ཇི་སྙམ་དུ་སེམས། སེམས་ཅན་ནམ་མཁའ་ལ་གནས་སམ། གསོལ་པ། བཅོམ་ལྡན་འདས་དེ་མ་ལགས་སོ། །རིགས་ཀྱི་བུ་འདི་ཇི་སྙམ་དུ་ སེམས། ནམ་མཁའ་སེམས་ཅན་ལ་གནས་སམ། གསོལ་པ། བཅོམ་ལྡན་འདས་དེ་མ་ལགས་སོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གཅིག་ལ་ གཅིག་མི་རྟེན་ཏོ། །གཅིག་ལ་གཅིག་སྤྱོད་ཡུལ་མ་ལགས་སོ། །བཅོམ་ལྡན་འདས་ཆོས་ཐམས་ཅད་ནི་རྟོག་པ་མ་མཆིས་པ། སྟོང་པ་ཉིད་དང ། སྒྲོ་མ་བཏགས་པ། ཡང་དག་པའི་མཐའ་དེ་བཞིན་ཉིད་དུ་རྟོགས་པར་བགྱིའོ། །བཅོམ་ལྡན་འདས་ནམ་མཁའི་སྙིང་པོ་ནི་འདི་ལྟ་སྟེ། རང་ གི་མཚན་ཉིད་ཐ་མི་དད་པ། མི་རྟོག་པ། རྣམ་པར་མི་རྟོག་པ། མི་གཡོ་བ། གསོབ་ལགས་ཏེ། མྱུ་གུ་མ་མཆིས་པ། ས་བོན་མ་མཆིས་པ། འབྲས་བུ་མ་མཆིས་པ། རྣམ་པར་སྨིན་པ་མ་མཆིས་པ། ཡི་གེ་མ་མཆིས་པ། རློམ་སེམས་མ་མཆིས་པ་ལགས་སོ། །བཅོམ་ལྡན་ 66-1-283a འདས་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ལ་དེ་ལྟར་རྟོགས་ན་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །འདི་ལྟ་སྟེ། བཅོམ་ལྡན་འདས། བྱ་བ་རཱ་ཛ། མན་ཏ་ཀྵཱ་ཡ། ཛི་ན་ཛ་ཡ། ཛ་ན་ནི་མ་མུ་ནི་ཧ་ར། ཨ་ན་ཡ་ ཕ་ལ། གུ་ཎ་གརྦྷ། ནི་ཡ་མ་སུ་རི་ནཱ་ཡ། བུ་པ་ཤ། ཤ་ཏ་ཤ་པ། ཤ་མ་ཤ་ན། ཏ་ཐ་ཀ་མ། ཤ་མཾ་གུ། མཱ་ཏུ་ཤི་ཥ། ཤ་མ་ཙེ་ཏ་ནཱ་ཡ། ཀླེ་ཤཱན་ཏ་སཾ་ཤོ་ཥ་ཎེ་སཝཱ་ཧཱ། བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱིས་མིག་ལས་རྒྱལ་བར་ བྱེད་པ་སེང་གེའི་འགྲོས་ཀྱི་ཕྱིར་བསྒྱིངས་པའི་གཟུངས་འདིས་སེམས་ཅན་དག་འཆི་བའི་ཚེ། ཐ་མའི་རྣམ་པར་ཤེས་པ་ལ་ཉོན་མོངས་པའི་སྒྲིབ་པ་དང ། ལས་ཀྱི་སྒྲིབ་པ་དང ། ཆོས་ཀྱི་སྒྲིབ་པ་ཡོད་པ་སྤྲུག་པ་དང ། སངས་རྒྱས་ཀྱི་ཞིང་ཡོངས་སུ་དག་པར་གཏོང་ནུས་སོ། །ཁྱོད་ནི་འཇིག་རྟེན་གྱི་ ཁམས་དཔག་ཏུ་མེད། གྲངས་མེད་པར་འགྲོ་བ་དང ། སེམས་ཅན་རྣམས་ལ་སྙིང་རྗེའི་དབང་གིས་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་དུ་གཟུགས་དང ། ཆ་ལུགས་དང ། སྤྱོད་ལམ་སྣ་ཚོགས་ཀྱིས་ཐེག་པ་ཆེན་པོའི་མདོ་ སྡེ་སྣ་ཚོགས་འཆད་པ་དང ། སེམས་ཅན་ཡོངས་སུ་སྨིན་པར་བྱ་བ་དང ། རྒྱལ་རིགས་གདོལ་པ་ནས་དགེ་སྦྱོང་གདོལ་པའི་བར་དུ་སྡིག་པའི་ཆོས་ལས་སྤང་བ་དང ། ཐམས་ཅད་དགེ་བའི་ཆོས་ལ་གཞག་པར་ནུས་སོ། །བཅོམ་ལྡན་འདས་ཀྱིས་འདི་བསྟན་པའི་ཚེ་ལྷ་དང་མིའི་སྐྱེ་ དགུ་དཔག་ཏུ་མེད། གྲངས་མེད་པ་དག་གིས་ཏིང་ངེ་འཛིན་དང ། གཟུངས་དང ། བཟོད་པ་སྣ་ཚོགས་ཐོབ་པར་གྱུར་ཏོ། །གཞན་དག་ཀྱང་ས་བཅུ་ལ་ཡེ་ཤེས་སྐྱེས་པར་གྱུར་ཏོ། །སྲོག་ཆགས་ཁྲི་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སེམས་ཅན་རྣམས་ཀྱི་རྩོད་པ་གང ། །ཅི་ཡང་ རུང་སྟེ་དེ་དག་གི། །གཞི་རྩ་སྤངས་ནས་ལྟ་ཀུན་གྱི། །གཞི་རྩ་མྱུར་དུ་འགྱུར་བ་ཡིན། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་ 66-1-283b རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་ནམ་མཁའི་སྙིང་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་པྲ་བྷ་དང ། བན་དེ་རཏྣ་རཀྵི་ཏས་ཞུས་ཤིང་ བསྒྱུར་ཏེ་གཏན་ལ་ཕབ་པ།། ་་་་་་ |