rKTs


D413

(e-text produced by ADARSHA)

see text in transliteration
79-1-254b
༄##། །རྒྱ་གར་སྐད་དུ། ཤྲཱི་ཙཀྲ་སཾ་བ་ར་ཏནྟྲ་རཱ་ཛ་ཨདྦྷུ་ཏ་ཤྨཱ་སཱ་ན་ཨ་ལཾ་ཀཱ་ར་ནཱ་མ། བོད་སྐད་དུ།དཔལ་འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་ཞེས་བྱ་བ། དཔལ་ཧེ་རུ་ཀ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་ འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང ། གསུང་དང ། ཐུགས་རྡོ་རྗེ་བཙུན་མོའི་བྷ་ག་རྣམས་ལ་བཞུགས་སོ། །དེ་ནས་རྡོ་རྗེ་སྙིང་པོ་ལ་སོགས་པའི་དཔའ་བོ་དང་དཔའ་མོ་རྣམས་ཀྱིས་ཕྱིའི་མཆོད་པ་དང ། ནང་དང ། གསང་བ་དང ། དེ་ཁོ་ན་ཉིད་ཀྱི་མཆོད་པས་མཆོད་ནས་འདི་སྐད་ ཅེས་གསོལ་ཏོ། །ཀྱེ་ཧོ་བཅོམ་ལྡན་རྡོ་རྗེ་འཛིན། །དཔལ་ཞེས་བགྱི་བ་ཇི་ལྟར་ལགས། །འཁོར་ལོ་ཞེས་པ་གང་ལ་བགྱི། །སྡོམ་པ་ཉིད་ཀྱང་ཇི་ལྟ་བུ། །རྒྱུད་ཀྱི་དོན་ནི་ཇི་ལྟར་ལགས། །དེ་བཞིན་རྒྱུད་ཀྱི་རྒྱལ་པོ་ཅི། །བཅོམ་ལྡན་འདས་ཀྱིས་བཀའ་སྩལ་པ། །དཔལ་ནི་གཉིས་མེད་ཡེ་ཤེས་ཏེ། །
79-1-255a
འཁོར་ལོ་རྣམ་པ་བཞི་རུ་བརྗོད། །ཕྱི་ནང་གསང་བ་དེ་ཉིད་དོ། །དང་པོ་ཕྱི་ཡི་འཁོར་ལོ་ནི། །སྐུ་མདོག་ཕྱག་མཚན་ལྷ་ཡི་སྐུ། །དྲུག་ཅུ་རྩ་གཉིས་རིམ་པ་སྟེ། །ཡེ་ཤེས་དམ་ཚིག་སྐུ་གསུང་ཐུགས། །དཀྱིལ་འཁོར་ཕྱོགས་མཚམས་རིམ་པ་བཞིན། །ལུགས་འབྱུང་ལུགས་ ལས་བཟློག་པ་ནི། །ཐ་མལ་གཅོད་པས་ཕྱི་རུ་བཤད། །གཉིས་པ་ནང་གི་འཁོར་ལོ་ནི། །གནས་སོགས་ས་བཅུའི་རིམ་པ་རྣམས། །མཐོ་རིས་ས་སྟེངས་ས་འོག་དང ། །འཁོར་ལོ་སྒོ་ལ་དགོད་པ་ནི། །ཕྱི་རོལ་སྤྲོས་པ་གཅོད་པའོ། །གསུམ་པ་གསང་བའི་འཁོར་ལོ་ནི། །སྤྲུལ་པ་ཆོས་ དང་ལོངས་སྤྱོད་དང ། །དེ་བཞིན་བདེ་བ་ཆེན་པོ་སྟེ། །རྩ་ཆེན་སུམ་ཅུ་རྩ་གཉིས་ཀྱི། །གནས་སུ་གྱུར་པས་སྡུག་བསྔལ་གཅོད། །དགའ་བ་དང་ནི་མཆོག་དགའ་དང ། །རྣམ་པར་དགའ་བའི་གཉེན་པོ་ནི། །བདེ་བ་སྟོང་པ་མི་རྟོག་གསུམ། །དབྱེར་མེད་རྟོགས་པས་ལྷན་སྐྱེས་ལ། །དེ་ཁོ་ན་ཡི་ འཁོར་ལོར་བརྗོད། །སྡོམ་པ་ཕྱི་ནང་གསང་བ་ཉིད། །འདོད་ཆགས་ཞེ་སྡང་གཏི་མུག་དང ། །ང་རྒྱལ་ལ་སོགས་ཉོན་མོངས་པ། །གཉེན་པོས་ཡེ་ཤེས་ངང་དུ་སྡོམ། །བདག་དང་དངོས་པོར་ལྟ་བ་དང ། །ཐ་མལ་པ་ཡི་རྣམ་རྟོག་ཀྱང ། །དག་པ་ལྷ་ཡི་འཁོར་ལོར་སྡོམ། །གཟོད་ནས་ལུས་ལ་ གྲུབ་པ་ཡི། །རྩ་དང་རླུང་དང་བྱང་སེམས་དང ། ། བ་དྷཱུ་ཏཱིའི་ནང་དུ་སྡོམ། །བདེ་བ་སྟོང་པ་མི་རྟོག་དང ། །དངོས་དང་དངོས་མེད་ཡེ་ཤེས་ཀྱང ། །དབྱེར་མེད་གཉུག་མའི་ངང་དུ་སྡོམ། །རྒྱུད་ཅེས་བྱ་བ་རྒྱུན་ཡིན་ཏེ། །གནས་སྐབས་གསུམ་གྱི་དྲི་མ་དང ། །འཇུག་དང་ཞུགས་དང་ངེས་པ་ཡིས། ། རྒྱུ་དང་ཐབས་དང་འབྲས་བུ་སྟེ། །དང་པོ་འཁོར་བའི་རང་བཞིན་ལ། །གཉིས་པ་ཐུན་མོང་མྱ་ངན་འདས། །རྒྱལ་པོ་ཞེས་པ་རྣམ་པ་བཞི། །འོག་མའི་ཡོན་ཏན་ལྡན་པ་དང ། །ངེས་པའི་དོན་ལ་དབང་བྱེད་དང ། །གཉེན་པོ་ཡེ་ཤེས་ཆེ་བ་དང ། །གཞན་ལ་ཁྱབ་པས་རྒྱལ་པོ་ཡིན། །རྡོ་རྗེ་སྙིང་པོས་ ཡང་གསོལ་པ། །དུར་ཁྲོད་བརྒྱད་ནི་ཇི་ལྟར་ལགས། །དེ་ཡི་དགོངས་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཕྱི་ནང་གསང་བ་དེ་ཉིད་ཀྱིས། །དུར་ཁྲོད་རྣམ་པ་བཞི་རུ་འགྱུར། །དང་པོ་ཕྱི་ཡི་དུར་ཁྲོད་ནི། །རྡོ་རྗེ་ར་བའི་ནང་རོལ་ལམ། །ཡང་ན་ཕྱི་རོལ་གྲཝ་རྣམས་སུ། །
79-1-255b
ལུགས་འབྱུང་ལུགས་ལས་བཟློག་པ་ནི། །གཏུམ་དྲག་དང་ནི་ཚང་ཚིང་དང ། །འབར་བས་འཁྲུགས་པའི་ཀེང་རུས་དང ། །འཇིགས་སྡེ་རྣམས་ནི་ཤར་སོགས་ཀྱི། །ཕྱོགས་སུ་གཡོན་ནས་བསྐོར་ཏེ་གནས། །ཧ་ཧར་རྒོད་པ་དབང་ལྡན་ཏེ། །དཔལ་གྱི་ནགས་ཚལ་བྱིན་ཟར་རོ། །འཇིགས་ པའི་མུན་པ་བདེན་བྲལ་དུ། །རླུང་མཚམས་ཀི་ལི་ཀི་ལིར་སྒྲོགས། །ཤར་དུ་ཧ་རི་བ་སྱེ་ལ། །གཏུམ་དྲག་དཀར་པོ་གླང་པོའི་གདོང ། །བྱང་དུ་བྱང་ཆུབ་ཤིང་བུ་ལ། །གྷ་ར་སེར་པོ་མི་ཡི་གདོང ། །ནུབ་དུ་མྱ་ངན་མེད་ཤིང་ལ། །འབར་འཁྲུགས་དམར་པོ་ཆུ་སྲིན་གདོང ། །ལྷོ་རུ་ཙཱུ་ཏིའི་ ཤིང་བུ་ལ། །འཇིགས་སྡེ་ནག་པོ་མ་ཧེའི་གདོང ། །མེ་རུ་ཀ་རན་ཙ་ན་སྟེ། །དཔལ་གྱི་ནགས་ཚལ་ར་གདོང་དམར། །བདེན་བྲལ་ཨ་རྫུའི་ཤིང་བུ་ལ། །འཇིགས་པའི་མུན་པ་མ་ཧེའི་གདོང ། །རླུང་དུ་སྲིད་གྲུབ་ཤིང་བུ་ལ། །ཀི་ལི་སྒྲ་སྒྲོགས་རི་དགས་གདོང ། །དབང་ལྡན་ནྱ་གྲོ་དྷ་ཤིང་ལ། ། ཧ་ཧར་རྒོད་པ་བ་གླང་གདོང ། །གཡས་ན་གྲི་གུག་ཐོད་པ་གཡོན། །ཤིང་ལོའི་སྟེང་ན་སྟོད་ཕྱུང་ངོ ། །ཤར་དུ་བརྒྱ་བྱིན་དཀར་པོ་ལ། །རྡོ་རྗེ་སྡིགས་མཛུབ་གླང་པོ་ཞོན། །བྱང་དུ་ལུས་ངན་སེར་པོ་ལ། །དབྱུག་པ་འཛིན་ཅིང་གཏེར་ལ་ཞོན། །ནུབ་ཏུ་ཆུ་བདག་དམར་པོ་ནི། །ཆུ་སྲིན་ཞོན་ནས་ ཞགས་པ་ཐོགས། །ལྷོ་རུ་གཤིན་རྗེ་ནག་པོ་ལ། །མ་ཧེ་ཞོན་ནས་བེ་ཅོན་ཐོགས། །ཤར་ལྷོ་མེ་ལྷ་དམར་སེར་ལ། །ར་ལ་ཞོན་ནས་མེ་ཐབ་འཛིན། །ལྷོ་ནུབ་སྲིན་པོ་སྨུག་ནག་ལ། །རལ་གྲི་ཐོགས་ནས་མི་ལ་ཞོན། །ནུབ་བྱང་རླུང་ལྷ་མདོག་སྔོན་པོ། །རི་དགས་ཞོན་ནས་འཕན་ནི་འཕྱར། ། བྱང་ཤར་དབང་ལྡན་དཀར་པོ་ནི། །ཁྱུ་མཆོག་ཞོན་ནས་རྩེ་གསུམ་ཐོགས། །ཐམས་ཅད་རང་རང་རིག་མས་འཁྱུད། །ནོར་རྒྱས་དང་ནི་འཇོག་པོ་དང ། །སྟོབས་ཀྱིས་རྒྱུ་དང་པདྨ་དག་།ཤར་ནས་བརྩམས་ཏེ་གཡོན་དུ་དགོད། །པདྨ་ཆེ་དང་མཐའ་ཡས་དང ། །རིགས་ལྡན་དང་ནི་དུང་སྐྱོང་ནི། ། གཡས་ཀྱི་ཕྱོགས་ནས་དགོད་པའོ། །སྒྲ་སྒྲོགས་པ་དང་རྨུགས་པ་དང ། །མུན་པ་ཅན་དང་ཀུན་ཏུ་འཁྱིལ། །ཤར་ནས་བྱང་གི་ཕྱོགས་སུ་དགོད། །འཁྲིགས་པ་གང་བ་འབབ་པ་དང ། །དྲག་པོ་སྤྲིན་ཚོགས་མཚམས་ལ་དགོད། །རྡོ་རྗེ་རིན་ཆེན་པདྨ་དང ། །ལས་དང་དམ་ཚིག་རྣལ་འབྱོར་མ། །
79-1-256a
སྣ་ཚོགས་འཇིག་རྟེན་མཁའ་འགྲོ་རྣམས། །ཤིན་ཏུ་འཇིགས་པའི་གཟུགས་ཀྱིས་ནི། །རོ་ལ་སྤྱོད་ཅིང་མཁའ་ལ་རྒྱུ། །གཞན་ཡང་རྣལ་འབྱོར་མཆོད་རྟེན་དང ། །ཆུ་དང་མེ་སོགས་རིམ་པ་སྟེ། །གཟའ་དང་བར་ཏ་གྲུབ་པ་རྣམས། །རོལ་པ་ཆེན་པོའི་ཚུལ་དུ་གནས། ། འབྱུང་པོའི་གདོན་དང་རོ་ལངས་དང ། །སྟག་དང་ཁྱི་དང་ཅེ་སྤྱང་དང ། །ཝ་དང་འུག་པ་བྱ་རྒོད་དང ། །ཕྱེད་ཚིག་པ་དང་རྣམ་པར་དབྱངས། །མགོ་བོ་ལུས་པོ་ཀེང་རུས་རྣམས། ། ལ་ཕཻཾ་གྱི་སྒྲ་སྒྲོགས་པ། །དེ་ནས་ནང་གི་དུར་ཁྲོད་ནི། །ལུས་ཀྱི་སྐྲ་སེན་སྤུ་ལ་སོགས། །སྐྱེ་ཞིང་འཇིག་པར་བྱེད་ པས་ན། །དུར་ཁྲོད་ཆེན་པོ་ལུས་ལ་དགོད། །དེ་ནས་གསང་བའི་དུར་ཁྲོད་ནི། །རྩ་ཆེན་སུམ་ཅུ་རྩ་གཉིས་ནས། །འབྱུང་འཇུག་གནས་པའི་རླུང་རྣམས་ནི། །དབུགས་རྒྱུ་ཞེས་པ་དུར་ཁྲོད་དོ། །རྣམ་པར་ཤེས་པའི་ཚོགས་བརྒྱད་དང ། །དངོས་པོའི་རྟོག་པ་སྣ་ཚོགས་པ། །ཆོས་ཀྱི་དབྱིངས་ཀྱི་དུར་ དུ་མཆི། །གསང་བ་རིག་པའི་ཡེ་ཤེས་ཁྲོད། །དེ་ནས་དུར་ཁྲོད་དགོངས་པ་ནི། །རྣམ་ཤེས་དག་པས་དུར་ཁྲོད་ལ། །ཕྱོགས་སྐྱོང་མི་དགེ་བཅུ་པོ་སྤོང ། །སངས་རྒྱས་བརྒྱད་ཀྱི་མཚན་མ་ཤིང ། །ཐུགས་རྗེའི་རྟགས་སུ་ཤིང་བརྒྱད་ལ། །ཞིང་སྐྱོང་སྔགས་ཀྱི་ཐེག་པ་བསྲུང ། །གདུག་པ་འཇོམས་ ཕྱིར་ཀླུ་བརྒྱད་དགོད། །མཆོད་རྟེན་རང་སངས་རྒྱས་ཀྱི་གནས། །རྣལ་འབྱོར་བརྟུལ་ཞུགས་སྤྱོད་པ་བྱེད། །ཆུ་ནི་བརྗོད་བྱ་ཟབ་པ་ལ། །མེ་སོགས་རྟོག་པ་བྲལ་བའོ། །རྡོ་རྗེ་སྙིང་པོས་ཡང་གསོལ་པ། །བཅོམ་ལྡན་འདས་ནི་ཇི་ལྟར་ལགས། །དེ་བཞིན་གཤེགས་པ་ཐམས་ཅད་ཀྱི། །སྐུ་ དང་གསུང་ཐུགས་ཇི་ལྟར་ལགས། །བཙུན་མོའི་བྷ་ག་ཇི་ལྟ་བུ། །བཞུགས་པའི་དོན་ནི་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །ཉོན་མོངས་བདུད་དང་འཆི་བདག་བདུད། །ལྷ་ཡི་བུ་དང་ཕུང་པོའི་བདུད། །བདུད་བཞི་བཅོམ་པས་བཅོམ་པ་ལ། །ལྡན་པ་ཡོན་ཏན་དྲུག་ཉིད་དེ། ། དབང་ཕྱུག་དང་ནི་གཟུགས་བཟང་དང ། །དཔལ་དང་གྲགས་དང་སྐལ་བ་བཟང། །ཡེ་ཤེས་ཕུན་སུམ་ཚོགས་པ་ནི། །དྲུག་པོ་དེ་ལ་ལྡན་ཞེས་གསུངས། །འཁོར་བའི་ཆོས་ནི་མྱ་ངན་ཏེ། །དེ་དང་བྲལ་ཕྱིར་འདས་པའོ། །འདས་པའི་དེ་བཞིན་གཤེགས་པ་ཀུན། །འགྲོ་བའི་དོན་མཛད་དེ་བཞིན་
79-1-256b
གཤེགས། །ཐམས་ཅད་དུས་གསུམ་སངས་རྒྱས་ཀྱི། །སྐུ་གསུང་ཐུགས་ཀྱི་ངོ་བོར་གནས། །བཙུན་མོ་ཞེས་པ་ཆོས་ཀྱི་དབྱིངས། །དེ་ལ་ཡོད་ཕྱིར་བྷ་ག་སྟེ། །མི་ཕྱེད་པས་ན་བཞུགས་ཞེས་བྱ། །རྡོ་རྗེ་སྙིང་པོས་ཡང་གསོལ་པ། །དཔའ་བོ་ཞེས་པ་གང་ལ་བགྱི། །དེ་བཞིན་དཔའ་མོ་ཉིད་ ཀྱང་ཅི། །དེ་ཡི་མཆོད་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་པ། །དཔའ་བོ་ལ་ཡང་རྣམ་བཞི་སྟེ། །བུམ་པའི་དབང་དང་འབྲེལ་པ་ཡི། །ལྷ་ཡི་རྣལ་འབྱོར་བསྒོམས་པ་ཡིས། །ཐ་མལ་པ་ཡི་རྣམ་རྟོག་སྤོང ། །དེས་ན་ཕྱི་ཡི་དཔའ་བོར་བཤད། །གསང་བའི་ དབང་དང་འབྲེལ་བ་ཡི། །རྩ་རླུང་ཐིག་ལེ་བསྒོམས་པ་ཡིས། །མཚན་མའི་རྣམ་རྟོག་འཇོམས་པ་ནི། །ནང་གི་དཔའ་བོར་བཤད་པ་ཡིན། །གསུམ་པའི་དབང་དང་འབྲེལ་པ་ཡི། །དགའ་བ་བཞི་ཡི་དོན་བསྒོམས་པས། །གཟུང་དང་འཛིན་པའི་རྟོག་པ་འཇོམས། །དེ་ནི་གསང་བའི་ དཔའ་བོ་ཡིན། །བཞི་པའི་དབང་དང་འབྲེལ་བའི་ཡི། །གཉིས་སུ་མེད་པ་གང་བསྒོམས་པས། །ཐ་དད་རྟོག་པ་འཇོམས་པའི་ཕྱིར། །དེ་ཁོ་ན་ཡི་དཔའ་བོར་བཤད། །དཔའ་མོ་ལ་ཡང་རྣམ་པ་བཞི། །མ་ནི་ཤེས་རབ་ཕ་རོལ་ཕྱིན། །གདོད་ནས་སྤྲོས་བྲལ་ལྷུན་གྲུབ་ལ། །ལྟ་བའི་ཞེན་པ་ སྤོང་བ་ནི། །དེ་ནི་ཕྱི་ཡི་དཔའ་མོར་བཤད། །ནང་དུ་རྩ་དང་ཐིག་ལེ་སོགས། །རང་བཞིན་མེད་པར་བྱེད་པས་མ། །གསང་བར་དགའ་བ་བཞི་རྣམས་ལ། །རང་བཞིན་ལྷན་ཅིག་སྐྱེས་བསམ། །Rང་རིག་སེམས་ཀྱིས་ངོ་བོ་ནི། །ནམ་མཁའ་ལྟ་བུར་གང་བསྒོམ་པ། །དེ་ཁོ་ན་ཡི་དཔའ་ མོའོ། །མཆོད་པ་ཡང་ནི་རྣམ་པ་བཞི། །ཕྱི་ནང་གསང་བ་དེ་ཁོ་ན། །དང་པོ་ཕྱི་ཡི་མཆོད་པ་ནི། །མེ་ཏོག་བདུག་སྤོས་མར་མེ་དང ། །དྲི་དང་ལྷ་བཤོས་བཏུང་བ་དང ། །རོལ་མོ་སིལ་སྙན་དབྱངས་ཉིད་དང ། །གཟུགས་དང་སྒྲ་དང་དྲི་དང་ནི། །རོ་དང་རེག་བྱ་འཇམ་པ་དང ། །འཁོར་ ལོ་རིན་ཆེན་གླང་པོ་རྟ། །བཙུན་མོ་དམག་དཔོན་བློན་པོ་རྣམས། །ཕྱི་ཡི་མཆོད་པ་ཐུན་མོང་ངོ ། །རང་གི་ལུས་ལས་བྱུང་བ་ཡི། །བདུད་རྩི་ལྔ་དང་བཏུང་བ་དང ། །ཤ་ལྔ་ལྷག་པའི་རྫས་རྣམས་ནི། །ཕུང་པོ་ཁམས་དང་སྐྱེ་མཆེད་ཀྱི། །འཁོར་ལོ་རྣམས་ལ་མཆོད་པ་ནང ། །དེ་ནས་
79-1-257a
གསང་བའི་མཆོད་པ་ནི། །རང་སྣང་ཐབས་ཀྱི་རིག་མ་ཡིས། །སྐྲ་གཟུང་བྷ་ག་ཀུ་ཙ་བཙིར། །རྩ་དང་རླུང་དང་ཐིག་ལེ་སོགས། །དགའ་བ་མཆོག་དགའ་དགའ་བྲལ་དང ། །ལྷན་ཅིག་སྐྱེས་པའི་བདེ་བ་མཆོད། །རང་རིག་སྟོང་པར་རྟོགས་པ་ཡི། །འོད་གསལ་དེ་ ཉིད་ཆོས་སྐུ་ལ། །ཞེན་པ་རྣམས་དང་བྲལ་བ་ནི། །བླ་ན་མེད་པའི་མཆོད་པའོ། །རྡོ་རྗེ་སྙིང་པོས་ཡང་གསོལ་པ། །གཏོར་མ་ཞེས་པ་གང་ལ་བགྱི། །དེ་ཡི་ཕན་ཡོན་ཇི་ལྟར་འབྱུང ། །བཅོམ་ལྡན་འདས་ཀྱིས་བཀའ་སྩལ་པ། །གཏོར་མ་རྣམ་པ་བཞི་རུ་གསུངས། །ཕྱི་ནང་གསང་བ་དེ་ ཁོ་ན། །དང་པོ་ཕྱི་ཡི་གཏོར་མ་ནི། །ཐུན་མཚམས་ལྷ་ཡི་མདུན་ཉིད་དུ། །རཾ་ལས་མེ་དང་ཡཾ་ལས་རླུང ། །སྒྱེད་གསུམ་ཨ་ལས་དུམ་གཅིག་པའི། །ནང་དུ་བདུད་རྩི་ཤ་ལྔ་ལ། །སྐུ་གསུང་ཐུགས་ཀྱི་སྦྱོར་བ་ཡིས། །ལྷ་རྣམས་མཉེས་པར་བྱེད་པ་དང ། །མཁའ་འགྲོ་དགྱེས་པར་བྱེད་ པའོ། །གཉིས་པ་ནང་གི་གཏོར་མ་ནི། །ཕུང་པོ་ཁམས་དང་སྐྱེ་མཆེད་རྣམས། །ལུས་ནི་ལྷ་ཡི་འཁོར་ལོ་ལ། །རྩ་ནི་ཡེ་ཤེས་མཁའ་འགྲོ་མ། །སྲིན་བུ་ལས་ཀྱི་མཁའ་འགྲོ་མཆོད། །གསུམ་པ་གསང་བའི་གཏོར་མ་ནི། །འཁོར་ལོ་བཞི་ཡི་ཀ་ཕཱ་ལར། །རླུང་དང་ཐིག་ལེ་བདུད་རྩི་ ལ། །དགའ་བ་གསུམ་གྱིས་བྱིན་བརླབས་ཏེ། །ལྷན་ཅིག་སྐྱེས་པ་མཆོད་པར་བྱ། །དེ་ཉིད་བཞི་པའི་གཏོར་མ་ནི། །ཕྱི་ནང་དངོས་པོའི་གཏོར་མ་ཀུན། །ཆོས་ཀྱི་དབྱིངས་ཀྱི་པད་སྣོད་དུ། །དོན་དམ་སེམས་ཀྱི་གསུམ་སྔགས་ཀྱིས། །བདེ་བ་ཆེན་པོའི་ངང་ལ་མཆོད། །ཕན་ཡོན་དངོས་ གྲུབ་སྟེར་བ་དང ། །ཕྱི་ནང་བར་ཆད་སེལ་བ་དང ། །ཟས་ཀྱི་རྟོག་པ་ཆོམས་པ་དང ། །ཁམས་དང་སྐྱེ་མཆེད་རྟས་པ་དང ། །རྒས་སྲ་ལུས་ཀྱི་མདངས་ལྡན་ཞིང ། །སྐྲ་དཀར་གཉེར་མ་སྤོང་བ་དང ། །དངོས་པོའི་གདོན་ལས་གྲོལ་བ་དང ། །འཁོར་བའི་ཕ་རོལ་སོན་པའོ། །ལྷ་མོས་གསོལ་ པ་བཅོམ་ལྡན་འདས། །སེམས་ཀྱི་རང་བཞིན་ཇི་ལྟ་བུ། །དེ་ལས་འཁྲུལ་ནས་ཇི་ལྟར་འཁོར། །མ་འཁྲུལ་དོན་ལ་ཇི་ལྟར་གཞག་།དེ་ལས་ཡོན་ཏན་ཇི་ལྟར་འབྱུང ། །བཅོམ་ལྡན་འདས་ཀྱིས་བཀའ་སྩལ་པ། །སེམས་ལས་མ་གཏོགས་སངས་རྒྱས་དང ། །སེམས་ལས་མ་གཏོགས་ཆོས་
79-1-257b
གཞན་དག་།སངས་རྒྱས་ཀྱིས་ཀྱང་མ་གཟིགས་ཤིང ། །མ་གསུངས་གསུང་བར་མི་འགྱུར་ཏེ། །དེས་ན་སངས་རྒྱས་ཐམས་ཅད་ཀྱི། །སེམས་ཀྱི་གསང་འདི་གསང་བའི་མཆོག་།ཁམས་གསུམ་བརྟན་དང་གཡོར་བཅས་པ། །སྣང་པ་མྱོང་ཞིང་གྲུབ་པ་མེད། །དེ་ཕྱིར་འཁོར་བའི་མིང་ ཡང་མེད། །ཐོག་མར་མ་སྐྱེས་རང་བཞིན་དག་།གློ་བུར་སངས་རྒྱས་མིང་ཡང་མེད། །སངས་རྒྱས་སེམས་ཅན་གཉིས་མ་ཡིན། །ཀུན་རྫོབ་དོན་དམ་གཉིས་མ་ཡིན། །རང་བཞིན་རིག་པ་འོད་གསལ་སོགས། །སྨྲར་མེད་བརྗོད་དུ་མེད་པ་སྟེ། །དཔེར་ན་ལྐུགས་པས་རོ་མྱོང་འདྲ། །རས་ དང་ཤེལ་འདྲའི་རང་བཞིན་ལ། །ལོག་རྟོག་རྩི་སོགས་རྣམ་པར་འཁྲུལ། །ཁམས་གསུམ་བརྟན་དང་གཡོར་སྣང་ཞིང ། །འདོད་པའི་བྱང་ཆུབ་སྣ་ཚོགས་དང ། །དེ་དག་སྤྱོད་པ་སྣ་ཚོགས་དག་།དེ་ཉིད་གཡེང་དང་རྣམ་རྟོག་སྟེ། །རང་གིས་འཁྲུལ་ནས་རང་གིས་འཆིང ། །རང་གིས་ གསོད་ཅིང་རང་གིས་ཟ། །རང་གིས་ལྟུང་ཞིང་རང་སྡུག་བསྔལ། །རང་རིག་ཡེ་ནས་སྤྲོས་བྲལ་ལ། །སྒྲ་དང་ཐ་སྙད་འཇུག་ན་འཁྲུལ། །རང་རིག་ངང་གིས་འོད་གསལ་ལ། །མ་རིག་མུན་པས་བསྒྲིབས་ན་འཁྲུལ། །དངོས་པོ་སྟོང་པར་རོ་མཉམ་ལ། །བླང་དང་དོར་བར་བྱེད་ན་འཁྲུལ། །འདོད་ ཡོན་ངང་གིས་འགག་པ་ལ། །དེ་དག་དཀའ་བས་སྤོང་ན་འཁྲུལ། །རང་རིག་ཡེ་ནས་སྟོང་པ་ལ། །འདོད་ཡོན་ལྔ་ལ་བརྟེན་ན་འཁྲུལ། །དམན་དང་གྱ་ནོམ་མེད་པ་ལ། །སྒྲོ་དང་སྐུར་པ་འདེབས་ན་འཁྲུལ། །གདོད་ནས་སྤྲོས་བྲལ་ལྷུན་གྲུབ་ལ། །སྒོམ་དང་མི་སྒོམ་བྱེད་ན་འཁྲུལ། །སངས་ རྒྱས་སེམས་ཅན་གཉིས་མེད་ལ། །དེ་དག་གཉིས་སུ་འཛིན་ན་འཁྲུལ། །དོན་དམ་ཀུན་རྫོབ་གཉིས་མེད་ལ། །བདེན་པ་གཉིས་སུ་འབྱེད་ན་འཁྲུལ། །སངས་རྒྱས་འཁོར་བའི་ཆུ་བོ་རྒལ། །སྐྱེ་འགག་གང་ལྟར་འདོད་ཀྱང་འཁྲུལ། །སྟོང་ཉིད་རོ་ལ་མི་གནས་པར། །དངོས་པོ་མཚན་མར་ བཟུང་ན་འཁྲུལ། །སེམས་ཀྱི་གླང་ཆེན་མི་འདུལ་བར། །གཡེང་བའི་སེམས་སུ་འདུག་ན་འཁྲུལ། །རྣམ་རྟོག་རླུང་གིས་བསྐྱོད་པ་ལ། །རང་རིག་ཡེ་ཤེས་འདོད་ན་འཁྲུལ། །རང་སེམས་རང་གིས་མ་མཐོང་བར། །ཆེ་བའི་ང་རྒྱལ་སྨྲ་ན་འཁྲུལ། །རང་རིག་ཉམས་སུ་མ་མྱོང་བར། །དཀར་
79-1-258a
པོའི་ཆོས་རྣམས་སྤོང་ན་འཁྲུལ། །སངས་རྒྱས་མ་འཁྲུལ་སེམས་ཅན་འཁྲུལ། །རང་བཞིན་མ་འཁྲུལ་རང་རིག་འཁྲུལ། །སེམས་ཉིད་མ་འཁྲུལ་བག་ཆགས་འཁྲུལ། །སངས་རྒྱས་ལས་འཁྲུལ་སེམས་ཅན་དེ། །རང་རིག་ལས་འཁྲུལ་གཞན་རིག་སྣང ། །སེམས་ ཉིད་ལས་འཁྲུལ་བག་ཆགས་འབྱུང ། །དེས་ན་རང་སེམས་འཁྲུལ་པ་དག་།དོན་དུ་སྣང་བ་རབ་ཏུ་སྐྱེ། །སྐྱེ་བ་མེད་བཞིན་སྐྱེ་བས་འཁྲུལ། །ལྕགས་བསྲེགས་ས་གཞི་རང་གི་སེམས། །མེ་སོགས་བྱེད་པ་གཞན་ན་མེད། །བཀྲེས་སྐོམ་སྡུག་བསྔལ་རང་གི་སེམས། །ཟས་སྐོམ་བཀྲེས་ པ་གཞན་ན་མེད། །བརྡེག་བཙོག་ལྕག་བཞུས་རང་གི་སེམས། །སྲོག་གཅོད་ཤན་པ་གཞན་ན་མེད། །འགྲོ་བ་ཐམས་ཅད་རང་སེམས་ཀུན། །རང་གི་སེམས་སུ་མ་ཤེས་ན། །དེ་ཡིས་སངས་རྒྱས་སྤངས་པ་ཡིན། །བླ་མ་དམ་པ་རྟག་ཏུ་བསྟེན། །ཐེག་ཆེན་ཟབ་མོའི་མདོ་རྒྱུད་བལྟ། ། བསྒོམ་དུ་མེད་པའི་དོན་བསྒོམས་ན། །མ་བསྒོམས་ན་ཡང་བསྒོམ་པའི་མཆོག་།དེ་ལྟར་གྱུར་པའི་མཁས་པ་ལ། །སྟོང་པར་མི་འགྱུར་གང་ཡང་མེད། །དེ་ལས་མྱ་ངན་འདས་པ་འབྱུང ། །སྐུ་དང་སྟོབས་ལ་སོགས་པ་ཀུན། །ནོར་བུའི་ཚུལ་དུ་རང་བཞིན་འབྱུང ། །དེ་དག་སེམས་ཀྱི་རང་ བཞིན་ནོ། །ལྷ་མོས་གསོལ་པ་བཅོམ་ལྡན་འདས། །རྟེན་གྱི་གང་ཟག་རྣམ་པ་དུ། །རྒྱུད་ཀྱི་རྣམ་གྲངས་དུ་ཞིག་མཆིས། །གདུལ་བྱ་གང་ལ་རྒྱུད་རྣམས་བཤད། །བཅོམ་ལྡན་འདས་ཀྱིས་བཀའ་སྩལ་པ། །སེམས་ཅན་སངས་རྒྱས་རང་བཞིན་པས། །གདོལ་པ་ཀོ་ལྤགས་མཁན་ ལ་སོགས། །གཟུགས་ངན་གསོད་པའི་དོན་གཉེར་བ། །ཐེག་པ་འདི་ལས་འགྲུབ་པར་འགྱུར། །དཀྱིལ་འཁོར་རྫོགས་པར་བསྒོམ་པ་དང ། །གཙོ་བོ་ཡབ་ཡུམ་བསྒོམ་པ་དང ། །དབུ་མའི་སྤྱན་ལ་སེམས་འཛིན་པ། །བསྐྱེད་རིམ་སྤྲོས་དང་བཅས་པའི་ལམ། །རིགས་ལ་གནས་པའི་ རྣལ་འབྱོར་གྱིས། །ལྷ་སོགས་བུ་མོ་མཚན་ལྡན་ལ། །ཆགས་པས་ཆགས་པ་སྤོང་བ་ནི། །ལས་ཀྱི་ཕྱག་རྒྱ་ཆགས་པའི་ལམ། །གནས་པ་རྩ་དང་གཡོ་བ་རླུང ། །བཀོད་པ་བྱང་སེམས་དམན་པ་དབྱིབས། །ཟབ་པ་སྔགས་དང་ཐིག་ལེ་དང ། །མཐར་ཐུག་ཡན་ལག་བདུན་བསྒོམས་པ། །
79-1-258b
ཆོས་ཀྱི་ཕྱག་རྒྱ་གྲོལ་བའི་ལམ། །རྟེན་ཡོད་མ་ཡིན་བརྟེན་པ་མེད། །དམིགས་པ་ཐམས་ཅད་རྣམ་བསལ་ཏེ། །ལྷན་ཅིག་སྐྱེས་པའི་དོན་བསྒོམ་པ། །ཕྱག་རྒྱ་ཆེན་པོར་རང་བྱིན་བརླབ། །དེ་རྣམས་གཉིས་སུ་བསྡུ་བ་སྟེ། །གང་ཟག་མཆོག་དང་ལས་དང་པོ། །ལས་དང་པོ་ལ་ཕྱི་ནང་གཉིས། ། མཆོག་ལ་ཡང་ནི་ཕྱི་ནང་གཉིས། །དབང་བཞི་བགྲོད་པའི་རྣལ་འབྱོར་གྱིས། །བསྙེན་གནས་དགེ་བསྙེན་དགེ་ཚུལ་དང ། །དགེ་སློང་ཆེན་པོ་གསུངས་པ་སྟེ། །འདི་ཡིས་རྒྱུད་རྣམས་འགྲུབ་པར་འགྱུར། །རྩ་བའི་རྒྱུད་ནི་རྣམ་པ་གསུམ། །བཤད་རྒྱུད་སུམ་ཅུ་རྩ་གཉིས་ཏེ། །ཡན་ལག་རྒྱུད་ ནི་གྲངས་ལས་འདས། །རྩ་བ་ཆེན་པོ་ཕྱི་མ་དང ། །ཕྱི་མའི་ཕྱི་མར་བསྡུས་པ་ཡིན། །བྲམ་ཟེ་རྒྱལ་རིགས་རྗེ་རིགས་དང ། །དམངས་རིགས་གདོལ་པ་གདུལ་དོན་དུ། །རྒྱུད་ཀྱང་རྣམ་པ་བཞིར་གསུངས་ཏེ། །བྱ་སྤྱོད་རྣལ་འབྱོར་བླ་མེད་དོ། །ལྷ་མོས་གསོལ་པ་བཅོམ་ལྡན་འདས། ། གནས་གང་དུ་ནི་གཙོ་བོ་བསྒོམ། །ཐབས་ནི་རྣམ་པ་དུ་ཞིག་མཆིས། །དེ་བཞིན་ཐབས་ལས་བྱུང་བ་ཅི། །བཅོམ་ལྡན་འདས་ཀྱིས་བཀའ་སྩལ་པ། །རི་རྩེ་དུར་ཁྲོད་རོ་སྟེང་དུ། །གཅེར་བུ་སྐྲ་བཤིག་ལྷོར་བལྟས་ཏེ། །ཱ་ལི་ཀཱ་ལིས་ལུས་བསྲུངས་ལ། །དཔའ་བོའི་འཁོར་ལོ་བསྒོམ་པར་བྱ། ། སྨིན་པར་བྱེད་པ་དབང་བཞི་ལ། །གྲོལ་བ་བསྐྱེད་རྫོགས་གཉིས་ཀྱི་ལམ། །ལམ་གཉིས་ལ་ནི་བརྟེན་ནས་སུ། །སྔགས་པས་བྱང་ཆུབ་བསྒྲུབ་པར་བྱ། །བུམ་པས་ལུས་ཀྱི་དྲི་མ་འཁྲུད། །གསང་བས་ངག་གི་དྲི་མ་འཁྲུད། །གསུམ་པས་སེམས་ཀྱི་དྲི་མ་སྟེ། །དེ་ནི་ཀུན་ཏུ་བརྟགས་པ་ལ། ། ལྷན་ཅིག་སྐྱེས་པའི་མ་རིག་པ། །བཀྲུ་བའི་ཕྱིར་ན་བཞི་པ་བཤད། །གནས་དང་ལྡང་བ་ཉིད་དང་ནི། །འཇུག་དང་ཡོངས་སུ་རྫོགས་པ་དང ། །བྱིན་གྱིས་བརླབ་དང་དབང་བསྐུར་དང ། །ཏིང་འཛིན་མཆོད་པ་བསྐྱེད་རིམ་ལ། །ཉེ་བར་བསྡུ་བ་རྫོགས་པའི་རིམ། །རིམ་གཉིས་མཉམ་པར་གནས་ ནས་སུ། །རྡོ་རྗེ་ཅན་གྱིས་ཆོས་འཆད་དོ། །སྟོང་པ་མངོན་གྱུར་ཆོས་སྐུ་ལ། །མཚན་དཔེ་བདེ་བ་ལོངས་སྤྱོད་སྐུ། །རོལ་པའི་མཛད་པ་སྤྲུལ་སྐུ་ལ། །སྐུ་གསུམ་དབྱེར་མེད་བདེ་ཆེན་ངང ། །ལྷ་མོས་གསོལ་པ་བཅོམ་ལྡན་འདས། །གང་གིས་བསྒྲུབས་ན་འགྲུབ་པར་འགྱུར། །གང་ལ་བར་
79-1-259a
ཆད་འབྱུང་བར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། །འཁོར་བས་སྐྱོ་ནས་སྡོམ་གསུམ་ལྡན། །ཐོས་ཆེ་དང་ལྡན་མཚན་ཉིད་བཟང ། །དབེན་པར་དཀྱིལ་འཁོར་བྲིས་སྨྲ་བཅད། །ཆོས་གོས་གྱོན་ལ་བདུད་རྩི་སྤྱད། །ཐུན་བཞིར་བསྒྲུབས་ན་འགྲུབ་ པར་འགྱུར། །ཞེན་པ་ཆེ་བའི་རྣལ་འབྱོར་ལ། །ལྟ་བའི་བར་ཆད་འབྱུང་བར་འགྱུར། །གཡེང་བ་ཆེ་བའི་རྣལ་འབྱོར་ལ། །བསྒོམ་པའི་བར་ཆད་འབྱུང་བར་འགྱུར། །དམ་ཚིག་ཉམས་པའི་རྣལ་འབྱོར་ལ། །སྤྱོད་པའི་བར་ཆད་འབྱུང་བར་འགྱུར། །ལེ་ལོ་ཆེ་བའི་རྣལ་འབྱོར་ལ། །འབྲས་ བུའི་བར་ཆད་འབྱུང་བར་འགྱུར། །ལྷ་མོས་གསོལ་པ་བཅོམ་ལྡན་འདས། །རྒྱུད་ཀྱི་ངོ་བོ་ཇི་ལྟ་བུ། །རྩ་བའི་རྒྱུད་ཅེས་གང་ལ་བགྱི། །བཤད་པའི་རྒྱུད་ཅེས་གང་ལ་བགྱི། །འབྱུང་བའི་དུས་ནི་ཇི་ལྟ་བུ། །བཅོམ་ལྡན་འདས་ཀྱིས་བཀའ་སྩལ་པ། །ལྷན་ཅིག་སྐྱེས་པའི་རང་བཞིན་ལ། །རྒྱུད་ རྣམས་ཀུན་གྱི་ངོ་བོ་འདུས། །ཡོད་པ་རྒྱུ་ལ་བསྒྲུབ་པ་ལམ། །མངོན་འགྱུར་འབྲས་བུའི་ངོ་བོ་ཡིན། །ཐོག་མར་གསུངས་པ་རྩ་བའི་རྒྱུད། །ཕྱི་ནས་གསུངས་པ་བཤད་པའི་རྒྱུད། །དོན་རྣམས་སྟོན་པས་རྩ་བ་ལ། །གསལ་བར་བྱེད་པ་བཤད་པའི་རྒྱུད། །བསྐལ་པ་རྫོགས་ལྡན་སུམ་ གཉིས་དང ། །རྩོད་ལྡན་དུས་བཞིའི་རིམ་པ་ཡིས། །རྒྱུད་ཀྱང་རྣམ་པ་བཞིར་གསུངས་ཏེ། །བྱ་སྤྱོད་རྣལ་འབྱོར་བླ་མེད་དོ། །ལྷ་མོས་གསོལ་པ་བཅོམ་ལྡན་འདས། །ཟབ་མོའི་རྒྱུད་འདི་གང་ལ་སྦ། །ཇི་ལྟ་བུ་ལ་སྦྱིན་པར་བྱ། །སྟེར་ན་ལུང་ནོད་ཇི་ལྟར་བྱ། །བཀའ་འདི་རྒྱ་ཡིས་ཇི་ ལྟར་གདབ། །བཅོམ་ལྡན་འདས་ཀྱིས་བཀའ་སྩལ་པ། །སྙིང་རྗེ་མེད་ཅིང་ཁྲོ་ལ་གདུག་།ཁེངས་ཤིང་ཆགས་པ་ཚུལ་ཁྲིམས་མེད། །དད་མེད་རིགས་ངན་བླ་མས་སྐྱོ། །ཐོས་ཆུང་སྙིང་རིང་རྣམས་ལ་སྦ། །དཔའ་ཞིང་དུལ་ལ་བློ་གྲོས་ལྡན། །བཟོད་ལྡན་དྲང་ལ་གཡོ་སྒྱུ་མེད། །དད་ ལྡན་རིགས་བཟང་གཏོང་ཕོད་ཆེ། །ཐོས་མང་དམ་ཚིག་ལྡན་ལ་སྦྱིན། །དབང་བཞི་བགྲོད་པའི་སྔགས་པ་ཡིས། །སྔོན་དུ་བླ་མ་མཉེས་བྱས་ལ། །ཡར་ངོ་མར་ངོའི་ཚེས་བཅུ་ལ། །དཔའ་བོ་རྣལ་འབྱོར་ཚོགས་ཀྱིས་མཆོད། །ཇི་ལྟར་རྡོ་རྗེ་འཛིན་པ་ཡིས། །ལྷ་མོ་རྣམས་ལ་རྒྱུད་
79-1-259b
གཏད་ལྟར། །དེ་བཞིན་གསང་བའི་རྒྱུད་སྡེ་རྣམས། །ཟུང་ལ་སྒྲུབ་པ་ཆེད་དུ་གྱིས། །ལན་གསུམ་བརྗོད་ལ་རྒྱུད་རྣམས་སྦྱིན། །ཕྱི་རབས་དུས་ཀྱི་སྙིགས་མ་ལ། །ཆགས་སེམས་གྱོང་བའི་སློབ་མ་ནི། །གུས་པས་མི་ཞུ་གཡོ་སྒྱུས་འདོད། །ཐོས་ནས་ཁུངས་སུབ་རང་ཆེ་འབྱིན། །དེ་ལ་ བསྟན་ན་དམ་ཚིག་ཉམས། །ངེས་པར་དད་ནས་ཞུ་བ་ཡི། །གཅིག་ནས་གཉིས་ལ་མ་སྤེལ་ན། །རྡོ་རྗེ་འཛིན་པའི་རིགས་རྒྱུན་འཆད། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། །ཡེ་ཤེས་མཁའ་འགྲོ་མ་ལ་སོགས་པའི་འཁོར་ཐམས་ཅད་ཀྱིས་རྒྱུད་ཀྱི་དོན་རྟོགས་ནས་རྗེས་སུ་ ཡི་རང་ངོ ། །དཔལ་འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་དུ་བྱུང་བ་རྫོགས་སོ།། །།པཎྜི་ཏ་ག་ཡ་དྷ་ར་དང ། ལོཙྪ་བ་དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། ་་