D60

<head>
<link rel="stylesheet" type="text/css" href="../sub/style.css">
<link rel="stylesheet" type="text/css" href="../sub/cssstyles.css" />
<link rel="stylesheet" type="text/css" href="../sub/w3.css" />

<style>
.button {
  display: inline-block;
  border-radius: 4px;
  background-color: #08088a;
  border: none;
  color: #FFFFFF;
  text-align: center;
  font-size: 12px;
  padding: 10px;
  width: 130px;
  transition: all 0.5s;
  cursor: pointer;
  margin: 5px;
  border-radius: 12px;
}

.button span {
  cursor: pointer;
  display: inline-block;
  position: relative;
  transition: 0.5s;
}

.button span:after {
  content: '\00bb';
  position: absolute;
  opacity: 0;
  top: 0;
  right: -20px;
  transition: 0.5s;
}

.button:hover span {
  padding-right: 25px;
}

.button:hover span:after {
  opacity: 1;
  right: 0;
}
</style>
</head>
<div style="position: fixed; top: 0px; left: 0px; width: 150px; height: 60px; background-color: white">
<img src="../sub/logo.png" alt="rKTs" style="width:135px;height:60px;">
</div>

﻿
<table>
<tr height=50>
<tr>
<td width=150 valign=top>

<button  class="button" style="vertical-align:middle"  onclick="window.close();">Close window</button>
<td>


<table><tr><td><h1>D60</h1><td>(<a href="https://adarsha.dharma-treasure.org/kdbs/degekangyur" target="new2">e-text produced by ADARSHA</a>)<br><br><a href="verif3.php?id=D60&coll=derge">see text in transliteration</a></table>42-1-1b<br><font size=+2>
༄##། །འཕགས་པ་དཀོན་མཆོག་བརྩེགས་པ་ཆེན་པོ་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་དྲུག་པ་སྟེ། འཕགས་པ་ཡབ་དང་སྲས་མཇལ་བ་ཞེས་བྱ་བ་དེ་ཁོ་ན་ངེས་པར་བསྟན་པ།བམ་
པོ་དང་པོ། །རྒྱ་གར་སྐད་དུ། ཨཱརྱ་པི་ཏཱ་པུ་ཏྲ་ས་མཱ་ག་མན་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཡབ་དང་སྲས་མཇལ་བ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་དང་
འཕགས་པ་ཉན་ཐོས་དང་རང་སངས་རྒྱས་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོལ་བ་གྲོལ་བའི་འཁོར་དང་ལྡན་པ།དུལ་བ་དུལ་བའི་འཁོར་དང་ལྡན་པ། 
ཞི་བ་ཞི་བའི་འཁོར་དང་ལྡན་པ། རྒལ་བ་རྒལ་བའི་འཁོར་དང་ལྡན་པ། ཕ་རོལ་དུ་ཕྱིན་པ་ཕ་རོལ་དུ་ཕྱིན་པའི་འཁོར་དང་ལྡན་པ། ཐང་ལ་ཕྱིན་པ་ཐང་ལ་ཕྱིན་པའི་འཁོར་དང་ལྡན་པ། དབུགས་ཕྱིན་པ་དབུགས་ཕྱིན་པའི་
འཁོར་དང་ལྡན་པ། དགེ་སློང་དགེ་སློང་གི་འཁོར་དང་ལྡན་པ། ཉོན་མོངས་པ་བཅོམ་པ་ཉོན་མོངས་པ་བཅོམ་པའི་འཁོར་དང་ལྡན་པ། དགེ་སྦྱོང་དགེ་སྦྱོང་གི་འཁོར་དང་ལྡན་པ། སྡིག་པ་བསལ་བ་སྡིག་པ་བསལ་བའི་འཁོར</font><hr>42-1-2a<br><font size=+2>
དང་ལྡན་པ། ཚངས་པ་ཚངས་པའི་འཁོར་དང་ལྡན་པ། སྡིག་བསལ་བའི་ཆོས་ཅན་སྡིག་བསལ་བའི་ཆོས་ཅན་གྱི་འཁོར་དང་ལྡན་པ། རིག་པ་ཅན་རིག་པ་ཅན་གྱི་འཁོར་དང་ལྡན་པ། ཁྲུས་བྱས་པ་ཁྲུས་བྱས་པའི་འཁོར་དང་ལྡན་པ། སྒྲོགས་པ་པོ་སྒྲོགས་པ་
པོའི་འཁོར་དང་ལྡན་པ། ཉོན་མོངས་པ་བྱང་བ་ཉོན་མོངས་པ་བྱང་བའི་འཁོར་དང་ལྡན་པ། ཡན་ལག་ལྔ་རྣམ་པར་བསལ་བ་ཡན་ལག་ལྔ་རྣམ་པར་བསལ་བའི་འཁོར་དང་ལྡན་པ། སྒྲིབ་པ་དང་རྣམ་པར་བྲལ་བ་སྒྲིབ་པ་དང་རྣམ་པར་བྲལ་བའི་འཁོར་དང་ལྡན་པ། ཡིད་རྣམ་པར་
དང་བ་ཡིད་རྣམ་པར་དང་བའི་འཁོར་དང་ལྡན་པ། ཡན་ལག་དྲུག་དང་ལྡན་པ་ཡན་ལག་དྲུག་དང་ལྡན་པའི་འཁོར་དང་ལྡན་པ། བསྙེན་བསྲིང་དང་བྲལ་བ་བསྙེན་བསྲིང་དང་བྲལ་བའི་འཁོར་དང་ལྡན་པ། བསྲུང་བ་གཅིག་པ་བསྲུང་བ་གཅིག་པའི་འཁོར་དང་ལྡན་པ། དྲན་པའི་
སྒོ་སྲུངས་ཕུན་སུམ་ཚོགས་པ་དྲན་པའི་སྒོ་སྲུངས་ཕུན་སུམ་ཚོགས་པའི་འཁོར་དང་ལྡན་པ། རྟོན་པ་བཞི་དང་ལྡན་པ་རྟོན་པ་བཞི་དང་ལྡན་པའི་འཁོར་དང་ལྡན་པ། ཉི་ཚེ་བའི་བདེན་པ་བསལ་བ་ཉི་ཚེ་བའི་བདེན་པ་བསལ་བའི་འཁོར་དང་ལྡན་པ། བཙལ་བ་སྤངས་པ་བཙལ་བ་སྤངས་
པའི་འཁོར་དང་ལྡན་པ། མཐར་ཕྱིན་པ་མཐར་ཕྱིན་པའི་འཁོར་དང་ལྡན་པ། དོན་གྱི་མཐར་ཐུག་པ་དོན་གྱི་མཐར་ཐུག་པའི་འཁོར་དང་ལྡན་པ། བདག་ཉིད་བསྒོམས་པ་བདག་ཉིད་བསྒོམས་པའི་འཁོར་དང་ལྡན་པ། ཀུན་ཏུ་རྟོག་པའི་རྙོག་པ་མེད་པ་ཀུན་ཏུ་རྟོག་པའི་རྙོག་པ་
མེད་པའི་འཁོར་དང་ལྡན་པ། རྣམ་པར་རྟོག་པ་ཡོངས་སུ་ཆད་པ་རྣམ་པར་རྟོག་པ་ཡོངས་སུ་ཆད་པའི་འཁོར་དང་ལྡན་པ། ལུས་ཀྱི་འདུ་བྱེད་རབ་ཏུ་བསལ་བ་ལུས་ཀྱི་འདུ་བྱེད་རབ་ཏུ་བསལ་བའི་འཁོར་དང་ལྡན་པ། མི་གཡོ་བ་ལ་མངོན་པར་མོས་པ་མི་གཡོ་བ་ལ་མངོན</font><hr>42-1-2b<br><font size=+2>
པར་མོས་པའི་འཁོར་དང་ལྡན་པ། སེམས་ཤིན་ཏུ་རྣམ་པར་གྲོལ་བ་སེམས་ཤིན་ཏུ་རྣམ་པར་གྲོལ་བའི་འཁོར་དང་ལྡན་པ། ཤེས་རབ་ཤིན་ཏུ་རྣམ་པར་གྲོལ་བ་ཤེས་རབ་ཤིན་ཏུ་རྣམ་པར་གྲོལ་བའི་འཁོར་དང་ལྡན་པ། འཕགས་པ་འཕགས་པའི་འཁོར་དང་ལྡན་པ། ཡལ་ག་
དང ། ལོ་མ་དང ། འདབ་མ་དང ། ལྕུག་མ་དང ། ཤུན་ཕྲགས་ཀྱི་སྐྱོན་དང་བྲལ་བ། དག་པ། སྙིང་པོ་ལ་གནས་པ། ཤཱཀྱའི་ཡུལ་ན་སེར་སྐྱའི་གནས། ཤིང་ནྱ་གྲོ་དྷའི་ཀུན་དགའ་ར་བ་ན་ལྔ་སྡེ་དང ། གྲགས་བྱིན་དང ། འཆར་ཀ་དང ། ལྟེང་རྒྱས་འོད་སྲུང་དང ། ག་ཡ་འོད་སྲུང་དང ། 
ཆུ་ཀླུང་འོད་སྲུང་དང ། འོད་སྲུང་ཆེན་པོ་དང ། ཤཱ་རིའི་བུ་དང ། མོོད་གལ་གྱི་བུ་ལ་སོགས་པ། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་
གྱུར་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ། ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། 
སེམས་ཐམས་ཅད་ཀྱི་དབང་གི་དམ་པའི་ཕ་རོལ་ཏུ་ཕྱིན་པ་ཤ་སྟག་དང་ཐབས་ཅིག་སྟེ། དེའི་ཚེ་ནམ་གྱི་ཐོ་རངས་ཀྱི་རེས་ལ་བཅོམ་ལྡན་འདས་དགེ་སློང་གི་དགེ་འདུན་གྱིས་ཡོངས་སུ་བསྐོར་ཅིང་དགེ་སློང་གི་དགེ་འདུན་གྱིས་མདུན་གྱིས་བལྟས་ཏེ། བླ་གབ་མེད་པ་ན་བཞུགས་སོ། །དེའི་ཚེ་
བཅོམ་ལྡན་འདས་ཅང་མི་གསུང་བར་ཐམས་ཅད་དང་ལྡན་པའི་དགེ་སློང་གི་དགེ་འདུན་ཅང་མི་སྨྲ་བ་ལ་གཟིགས་སོ། །ཐམས་ཅད་དང་ལྡན་པའི་དགེ་སློང་གི་དགེ་འདུན་ལ་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་སློང་གང་གིས་རྒྱལ་པོ་ཟས་གཙང་མ་མངོན་པར་དད་
པར་འགྱུར་བ་དེ་ལྟ་བུ་འགའ་ཞིག་ཚོལ་ཅིག། དེ་ནས་ཚེ་དང་ལྡན་པ་ཀུན་ཤེས་ཀཽ་ཌི་ནྱ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས</font><hr>42-1-3a<br><font size=+2>
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་ཟས་གཙང་མ་མངོན་པར་དད་པར་བགྱིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་ཤེས་ཀོོ་ཌི་ནྱ་ལ་འདི་སྐད་ཅེས་བཀའ་སྩལ་ཏོ། །ཀཽ་ཌི་ནྱ་ཁྱོད་ནི་བླ་མ་བླ་
མར་བྱ་བའི་ཆོས་དང་ལྡན་པར་བྱ་བ་ཡིན་གྱིས་འདུག་ཤིག། དེ་བཞིན་དུ་ཚེ་དང་ལྡན་པ་རླངས་པ་དང ། མིང་ཆེན་དང ། གྲགས་བྱིན་དང ། ལྟེང་རྒྱས་འོད་སྲུང་དང ། ཆུ་ཀླུང་འོད་སྲུང་དང ། ག་ཡ་འོད་སྲུང་དང ། འོད་སྲུང་ཆེན་པོ་དང ། ཚེ་དང་ལྡན་པ་ཤཱ་རིའི་བུ་དང ། མོོད་གལ་གྱི་བུ་ཆེན་
པོས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་རྒྱལ་པོ་ཟས་གཙང་མ་མངོན་པར་དད་པར་བགྱིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་བཀའ་སྩལ་པ། མོོད་
གལ་གྱི་བུ་ཁྱོད་ཀྱང་བླ་མ་བླ་མར་བྱ་བའི་ཆོས་དང་ལྡན་པར་བྱ་བ་ཡིན་གྱིས་འདུག་ཤིག། དེ་ནས་ཚེ་དང་ལྡན་པ་མོོད་གལ་གྱི་བུ་ཆེན་པོ་འདི་སྙམ་དུ་སེམས་ཏེ། རྒྱལ་པོ་ཟས་གཙང་མ་མངོན་པར་དད་པར་བྱེད་པའི་དགེ་སློང་གང་ཞིག་བཅོམ་ལྡན་འདས་བཞེད་སྙམ་སྟེ། དེ་ནས་ཚེ་དང་ལྡན་
པ་མོོད་གལ་གྱི་བུ་ཆེན་པོས་ཏིང་ངེ་འཛིན་གྱི་རྣམ་པ་དེ་ལྟ་བུ་ལ་མཉམ་པར་བཞག་སྟེ། དེ་ལྟར་མཉམ་པར་བཞག་པའི་སེམས་ཀྱིས་བཅོམ་ལྡན་འདས་ཀྱིས་དགོངས་པ་ཚེ་དང་ལྡན་པ་འཆར་ཀ་ལ་གནས་ཤིང་དགེ་སློང་འཆར་ཀ་འདི་རྒྱལ་པོ་ཟས་གཙང་མ་མངོན་པར་དད་པར་བྱེད་དོ་ཞེས་
དགོངས་པ་མཐོང་སྟེ་འདི་ལྟ་སྟེ། དཔེར་ན་ཁང་པ་བརྩེགས་པའམ། ཁང་པ་བརྩེགས་པའི་ཁྱམས་སྒོ་བྱང་ཕྱོགས་སུ་ལྟ་བའི་ཤར་ཕྱོགས་ཀྱི་སྐར་ཁུང་ནས་ཉི་མའི་འོད་ཟེར་བྱུང་སྟེ། ནུབ་ཕྱོགས་ཀྱི་རྩིག་ངོས་ལ་ཤར་བ་དེ་བཞིན་དུ་དེའི་ཚེ་ཚེ་དང་ལྡན་པ་མཽད་གལ་གྱི་བུ་ཆེན་པོས་
བཅོམ་ལྡན་འདས་ཀྱི་དགོངས་པ་ཚེ་དང་ལྡན་པ་འཆར་ཀ་ལ་ཤར་ཅིང་དགེ་སློང་འཆར་ཀ་འདི་རྒྱལ་པོ་ཟས་གཙང་མ་མངོན་པར་དད་པར་བྱེད་དོ་ཞེས་དགོངས་པ་མཐོང་ངོ ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོ་ཏིང་ངེ་འཛིན་དེ་ལས་ལངས་ཏེ། ཚེ་དང་ལྡན་པ་འཆར་ཀ་ག</font><hr>42-1-3b<br><font size=+2>
ལ་བ་དེར་སོང་ནས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འཆར་ཀ་བཅོམ་ལྡན་འདས་ནི་ཁྱོད་ལ་དགེ་སློང་འཆར་ཀས་རྒྱལ་པོ་ཟས་གཙང་མ་མངོན་པར་དད་པར་བྱ་བར་ནུས་སོ་ཞེས་དགོངས་ཤིང་བཞེད་དོ། །ཚེ་དང་ལྡན་པ་འཆར་ཀ་དེ་ལྟ་ཡིན་གྱིས། 
ཁྱོད་ཀྱིས་རྒྱལ་པོ་ཟས་གཙང་མ་མངོན་པར་དད་པར་བྱ་བར་དད་པ་སྐྱེད་ཅིག་།དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །ཚེ་དང་ལྡན་མཽད་གལ་གྱི་བུ་ཆེན་པོ་རིགས་རྣམས་ནི་དད་པར་བྱ་བར་ཤིན་ཏུ་དཀའ་
སྟེ། རྒྱལ་པོའི་རིགས་ནི་ལྷག་པར་དཀའོ། །དེ་ཅིའི་ཕྱིར་ཞེ་ན། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ནི་མགུ་བར་དཀའ་བ་སྟེ། ཚེ་དང་ལྡན་པ་མཽད་གལ་གྱི་བུ་ཆེན་པོ་འདི་ལྟ་སྟེ། དཔེར་ན་ཤིང་ཁུར་བཅུ་འམ། ཉི་ཤུའམ། སུམ་ཅུ་འམ། བཞི་བཅུ་འམ། 
ལྔ་བཅུ་འམ། ཤིང་ཁུར་བརྒྱ་ཡང་རུང་སྟེ། གཤེར་བག་མེད་ཅིང་སྐམ་ལ་ལོ་མང་དུ་ལོན་པ་ཞིག་ཡོད་ལ་དེ་ལ་མི་ལ་ལ་ཞིག་གིས་མེ་བཏང་ན་མེའི་ཕུང་པོ་ཆེན་པོ་འབར་བར་འགྱུར་རོ། །དེ་ལ་ཡང་ལ་ལ་ཞིག་གིས་མར་རམ། འབྲུ་མར་ཞིག་གིས་གཏོར་ན་མེའི་ཕུང་པོ་དེ་བས་ཆེས་
ཆེ་བར་འབར་ཏེ། དེའི་སྟེང་ངམ་དྲུང་གི་འཁོར་དུ་འགྲོ་བ་ནི་ཤིན་ཏུ་དཀའོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་དེ་བཞིན་དུ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ནི་མགུ་བར་དཀའ་བའོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་འདི་ལྟ་སྟེ། དཔེར་ན་གླང་པོ་ཆེ་
མཆེ་བ་ཅན་ཁ་གདངས་པའི་སོ་ཕྲག་ཏུ་འགྲོ་བ་ནི་ཤིན་ཏུ་དཀའོ། །ཚེ་དང་ལྡན་པ་མཽད་གལ་གྱི་བུ་ཆེན་པོ་དེ་བཞིན་དུ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་རྣམས་ཀྱང་མགུ་བར་དཀའོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་
འཆར་ཀ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་འཆར་ཀ་དེ་ནི་དེ་ལྟ་མོད་ཀྱི། འོན་ཀྱང་ཁྱོད་ནི་དགེ་སློང་འཆར་ཀ་འདིས་རྒྱལ་པོ་ཟས་གཙང་མ་མངོན་པར་དད་པར་བྱ་བར་ནུས་སོ་ཞེས་བཅོམ་ལྡན་འདས་ཀྱིས་དགོངས་ཤིང་བཞེད་པ་ཡིན་ནོ། །སྨྲས་པ། ཚེ་དང་ལྡན་པ</font><hr>42-1-4a<br><font size=+2>
མཽད་གལ་གྱི་བུ་ཆེན་པོ་བཅོམ་ལྡན་འདས་ཀྱིས་བདག་ལ་རྒྱལ་པོ་ཟས་གཙང་མ་དད་པར་བྱེད་པར་དགོངས་སམ། སྨྲས་པ། ཚེ་དང་ལྡན་པ་འཆར་ཀ་དེ་དེ་བཞིན་ཏེ། བཅོམ་ལྡན་འདས་ཀྱིས་དགེ་སློང་འཆར་ཀ་ནི་རྒྱལ་པོ་ཟས་གཙང་མ་དད་པར་བྱེད་དོ་ཞེས་དགོངས་སོ། །
དེ་ནས་བཅོམ་ལྡན་འདས་ཉིད་ཀྱིས་ཚེ་དང་ལྡན་པ་འཆར་ཀ་ལ་བཀའ་སྩལ་པ། འཆར་ཀ་རྒྱལ་པོ་ཟས་གཙང་མ་དད་པར་གྱིས་ཤིག། དེ་ཅིའི་ཕྱིར་ཞེ་ན། འཆར་ཀ་རྒྱལ་པོ་ཟས་གཙང་མ་ནི་ཡང་ན་ངས་དད་པར་བྱ་ཡི། ཡང་ན་ཁྱོད་ཀྱིས་དད་པར་བྱའོ། །འཆར་ཀ་ངའི་ཉན་
ཐོས་ཇི་སྙེད་ཅིག་ཡོད་པ་དེ་དག་གི་ནང་ན་ཁྱོད་ནི་འདི་ལྟར་རིགས་དད་པར་བྱེད་པའི་མཆོག་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚེ་དང་ལྡན་པ་འཆར་ཀ་ལ་ཚིགས་སུ་བཅད་དེ་བཀའ་སྩལ་པ། འཆར་ཀ་བཟང་པོ་ང་ལས་མཉན་པར་བྱོས། །ཁྱོད་ནི་རིགས་དང་བྱེད་མཆོག་རབ་ཡིན་
གྱིས། །ཤཱཀྱའི་རིགས་རྣམས་དགའ་བ་སྐྱེད་པ་ཡི། །རྒྱལ་པོའི་དམ་པ་མྱུར་དུ་དད་པར་བྱོས། །རྒྱལ་པོའི་རབ་དེ་དད་པར་བྱས་ན་ནི། །རིགས་བུ་ལྷ་དག་དང་ནི་མི་རྣམས་ལ། །མཐའ་དབུས་མེད་པའི་ལེགས་པ་འབྱུང་འགྱུར་གྱིས། །མི་ཡི་དམ་པ་མྱུར་དུ་དད་པར་བྱོས། །ད་ལྟ་ན་ནི་
ཤཱཀྱའི་བདག་པོ་དེ། །མངོན་པའི་ང་རྒྱལ་རྟོག་པས་དཀྲུགས་ཤིང་ཉམས། །རི་ཡི་ངོས་ནས་རྦབ་འདྲིལ་ཇི་བཞིན་དུ། །བརྩོན་འགྲུས་རྩོལ་བ་ཐམས་ཅད་བཏང་སྟེ་གནས། །དབང་ཕྱུག་ཉམས་པ་རྗེས་སུ་དྲན་བྱེད་པས། །ཡིད་ལ་གནོད་གྱུར་སེམས་དང་ཡིད་ཀྱང་སྟོར། །
དཔེར་ན་ཚོང་པ་ནོར་དང་བྲལ་བ་དག་།རྗེས་སུ་དྲན་ཞིང་ཉོན་མོངས་གནས་པ་བཞིན། །ལྷ་ཡི་གནས་ནས་ལྷ་དག་ཤི་འཕོས་ཤིང ། །ལྷ་རྫས་འདོད་པ་རྗེས་སུ་དྲན་པ་བཞིན། །རྒྱལ་བའི་བསྟན་པ་མངོན་པར་མི་ཤེས་ཤིང ། །རྒྱལ་པོ་བདེ་ཉམས་སྙིང་རྗེ་སྨྲེ་
སྔགས་འདོན། །ང་ཡི་རིན་པོ་ཆེ་ནི་སྣ་བདུན་དང ། །མི་ཡི་ཕུན་སུམ་ཚོགས་པ་བཞི་པོ་དང ། །ལོངས་སྤྱོད་དག་ནི་རྗེས་སུ་དྲན་བྱེད་ཅིང ། །ས་བདག་དེ་ནི་སྙིང་རྗེར་སྨྲེ་སྔགས་འདོན། །མདངས་འཕྲོག་བྱེད་པའི་སྲིན་པོ་སྟོབས་ཅན་གྱིས། །ཇི་ལྟར་མི་ཞིག་ཡོངས་སུ</font><hr>42-1-4b<br><font size=+2>
ནོན་གྱུར་ན། །བདག་ཀྱང་མི་ཤེས་གཞན་ཡང་མི་ཤེས་ལྟར། །ས་ཡི་བདག་པོ་དེ་ཡང་དེ་བཞིན་ནོ། །ཏི་སེའི་གངས་ཀྱི་རི་བོས་བསྒྲིབས་གྱུར་ན། །ཇི་ལྟར་མི་དག་བལྟ་བྱ་མི་མཐོང་བ། །དེ་བཞིན་ང་རྒྱལ་ཆེན་པོས་བསྒྲིབས་པས་ན། །རྒྱལ་པོས་བལྟ་བར་བྱ་བ་མི་མཐོང་ངོ ། །གཉིད་ཀྱིས་
ལོག་གམ་ཤི་བས་མྱོས་འགྱུར་པའི། །མིས་ནི་རང་གི་སེམས་ཀྱང་མི་ཤེས་ཏེ། །དེ་བཞིན་ང་རྒྱལ་ཆེན་པོས་མྱོས་གྱུར་པས། །རྒྱལ་པོ་དེས་ཀྱང་དགེ་བ་མི་ཤེས་སོ། །དཔེར་ན་ཁྱིམ་ཐབ་ཤི་བས་མྱོས་པ་ཡི། །བུད་མེད་སྙིང་རྗེར་སྨྲེ་སྔགས་འདོན་བྱེད་པ། །དེ་བཞིན་ང་རྒྱལ་ཆེན་པོས་
མྱོས་གྱུར་པས། །རྒྱལ་པོ་དེ་ཡང་སྙིང་རྗེར་སྨྲེ་སྔགས་འདོན། །དེ་ལྟ་བས་ན་འཆར་ཀ་ཐབས་མཁས་པ། །ཁྱོད་ཀྱིས་འདིར་ནི་རྒྱལ་པོ་དད་པར་གྱིས། །ང་རྒྱལ་རྒྱལ་མཚན་རབ་ཏུ་བསྙལ་བར་བྱོས། །ཆོས་ཀྱི་རྒྱལ་མཚན་དམ་པ་བསླང་བར་གྱིས། །འཆར་ཀ་ཁྱོད་མ་གཏོགས་པར་
སྲིད་པ་ཡི། །འགྲོ་བ་དག་ན་སྐལ་འཐུན་སྤྱད་མེད་པས། །རྒྱལ་པོའི་སེམས་ནི་རབ་ཏུ་དད་བྱ་བར། །གང་གིས་ནུས་པའི་དགེ་སློང་གང་ཡང་མེད། །འཆར་ཀ་སྔོན་གྱི་དུས་ན་བྱུང་བ་ནི། །འདས་པའི་དུས་ན་ས་ཡི་བདག་པོ་ཞིག་།མིང་ནི་བདེན་པ་འཕེལ་ཞེས་བྱ་བ་སྟེ། །ས་སྐྱོང་བྱེད་པ་
རྣམ་པར་གྲགས་པ་བྱུང ། །དེ་ནི་ཆོས་ཀྱི་རྒྱལ་པོ་ཆོས་དང་ལྡན། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །རྒྱ་མཚོའི་མཐའ་མར་ཐུག་པའི་ས་འདི་ནི། །ཆོས་དང་ལྡན་པའི་རྒྱལ་པོ་དེས་ཀྱང་བསྐྱངས། །གྲོང་དང་གྲོང་ཁྱེར་དག་ཀྱང་འདབ་ཉེ་ཞིང ། །བཟའ་ཤིང་འབྲས་བུ་མེ་
ཏོག་རྒྱས་པས་གང ། །འཕགས་པའི་སྐྱེ་བོ་དག་དང་ཤེད་ལས་སྐྱེས། །སྡིག་དང་བྲལ་བ་རྣམས་ཀྱིས་རབ་ཏུ་གང ། །དྲི་ཟ་བརྒྱ་མང་དག་གིས་གང་བ་སྟེ། །སྡོང་དུ་མཚེར་མ་རྩཝ་ཤིང་ངན་པ་མེད། །འཇམ་ཞིང་དགེ་སྦྱོང་གནས་ཀྱི་ཚོགས་ཀྱིས་སྤྲས། །ཆུ་ཀླུང་འབབ་སྟེགས་བདེ་
བས་རབ་ཏུ་བརྒྱན། །དྲང་སྲོང་ཚོགས་བརྒྱ་རྗེས་སུ་རྒྱུ་བ་སྟེ། །སྐྱེ་བོའི་དཀར་ཆོས་རྣམས་ཀྱིས་ཀུན་ཏུ་བསྒྲུབས། །ངན་སོང་ལམ་ངན་རྣམས་ནི་རབ་ཏུ་བཅད། །དེ་ནས་སེམས་ཅན་ཐམས་ཅད་ལྷ་གནས་འདོད། །རྒྱལ་པོ་དེ་ལ་བུ་དག་ཡོད་པ་ནི། །སྔོན་གྱི་སངས་རྒྱས་བྱུང་བ་མཐོང</font><hr>42-1-5a<br><font size=+2>
བ་སྟེ། །དགེ་བའི་རྩ་བ་དག་ནི་བསྐྱེད་པ་ཅན། །ཡོན་ཏན་མང་པོས་བསྒོས་པའི་བློ་གྲོས་ལྡན། །མིང་ནི་བློ་གྲོས་སྙིང་པོ་ཞེས་བྱ་སྟེ། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །འདོད་པ་རྣམས་ལ་སྐྱོན་དུ་ལྟ་བ་ཅན། །མི་བདག་ཁྱིམ་ན་གནས་
ཀྱང་དབེན་ལ་དགའ། །རྒྱལ་པོ་བདེན་པ་འཕེལ་ཞེས་བྱ་བ་དེས། །ལྷ་ཡི་ཕོ་བྲང་འདྲ་བའི་ཁྱིམ་མཆོག་འདིར། །ན་ཆུང་ཚོགས་ཀྱིས་ཀུན་ནས་མདུན་བདར་ཏེ། །འདོད་པའི་ཡོན་ཏན་བཟང་ལ་སྤྱོད་ཅེས་སྨྲས། །བུ་ཡི་དམ་པ་ཁྱོད་ལ་ང་ཡིས་ནི། །ཇི་ལྟར་འདོད་པའི་བྱ་བ་གང་
མ་བྱས། །འདོད་པ་རྣམས་ལ་ཁྱོད་ཡིད་ཅི་ཡི་ཕྱིར། །མ་མོས་ང་ལ་བུ་ཁྱོད་མྱུར་དུ་སྨྲོས། །སྲིད་པའི་འགྲོ་བའི་ཡོན་ཏན་མཁས་གྱིས་ཏེ། བུ་ཁྱོད་རིན་ཆེན་ཁྱིམ་ལ་དགའ་བ་སྐྱེད། །བུད་མེད་རིན་ཆེན་འཁོར་དང་འགྲོགས་གྱིས་ཏེ། །ཡུལ་ལ་དགའ་ཞིང་མོས་པ་བསྐྱེད་
པར་གྱིས། །དཀའ་ཐུབ་ནགས་ན་འཁོད་པའི་དྲང་སྲོང་དག་།དེ་བཏང་ནས་ནི་ཕྱིར་ཡང་འདི་དག་ན། །དཀའ་ཐུབ་བཏང་ཞིང་འདོད་པའི་དགའ་ལ་སྤྱོད། །འདོད་པ་དེ་དག་བུ་གཅིག་ཁྱོད་ལ་བསྟབས། དེ་ལྟ་བས་ན་འདོད་པའི་དགའ་ལ་སྤྱོད། །ང་དང་རྒྱལ་སྲིད་ཐམས་ཅད་ཁྱོད་དང་འཐུན། །
རྣམ་ཐོས་བུ་ཡི་གནས་དང་འདྲ་བ་ཡི། །གཞལ་མེད་ཁང་གི་རྒྱན་ཅན་ཁྱིམ་འདིར་སྤྱོད། །འདི་དག་རྣམས་ཀྱང་མཆོག་གི་གཟུགས་ལྡན་ཞིང ། །ལྷ་མོ་འདྲ་ལ་སྒྱུ་རྩལ་ཚར་ཕྱིན་པ། །རོལ་མོའི་སྒྲ་ཡི་ཚུལ་དང་གླུ་ལ་མཁས། །བསྙེན་བཀུར་སྙོམས་ཤིང་ཡོན་ཏན་ཡིད་ཀྱང་འཕྲོག་།
མིག་ནི་པད་མའི་ལོ་མ་འདྲ་བ་སྟེ། །བིམ་པའི་མདོག་འདྲ་མཆུ་མཛེས་ཡིད་དུ་འོང ། །སོ་དང་བཞིན་མདོག་དྲི་མ་མེད་ཅིང་བཟང ། །དཔྲལ་བ་སྨིན་མ་ལེགས་ཤིང་མགུལ་པ་སྡུག་།བརླ་ནི་གླང་པོ་ཆེ་ཡི་སྣ་ཡང་འདྲ། །ཕྲག་སོ་ཤས་རྒྱས་ཐལ་གོང་ལེགས་དང་ལྡན། །ལག་དང་
རྐང་བའི་མཐིལ་ན་ཟངས་ཀྱི་མདོག་།སོར་མོ་བྱིན་པ་ཕྲ་བར་ལེགས་དང་ལྡན། །ལྕེ་ནི་ཟངས་མདོག་འདྲ་བ་སྲབ་ཅིང་དག་།ཚིག་རན་འཇམ་པར་སྨྲ་བའི་ཚུལ་དང་ལྡན། །སོ་ནི་ཐགས་བཟང་སོ་རྣམས་རད་རོད་མེད། །མཆེ་བ་རབ་དཀར་མཆོག་གི་རྒྱན་དང་ལྡན། །ལྟོ་བ་ཕྱང་ངེར</font><hr>42-1-5b<br><font size=+2>
འདུག་ཅིང་ལྟེ་བ་སྡུག་།སྟ་ཟུར་ཡངས་ཤིང་རྐེད་པ་རྡོ་རྗེ་འདྲ། །བྱིན་པ་གླང་པོ་ཆེ་ཡི་སོ་འདྲ་ཞིང ། །མདའ་རྒྱུ་སྙིང་པོ་ལེགས་པར་སྐྱེས་པ་བཞིན་།དྲེགས་བཅས་གླང་ཆེན་འདྲ་བའི་འགྲོས་དང་ལྡན། །གཞན་དུ་མི་སེམས་ཡིད་ཀྱིས་ཁྱོད་ལ་ལྟ། །རྩེ་བ་འདོད་
ཅིང་དར་ལ་བབ་དང་ལྡན། །གཞོན་ནུ་སྙིང་རྗེ་ལྟོས་ལ་བརྩེ་བར་བྱོས། །བུ་ཅིག་ཁྱོད་དང་བུད་མེད་འདི་དག་གི་།མདོག་བཟང་བ་དང་དར་ལ་བབ་པ་ཡང ། །ཤིང་གི་རྩེ་མོའི་མེ་ཏོག་བཞིན་ལྟུང་གིས། །ང་རྒྱལ་ཐོང་ལ་འདོད་པ་བསྟེན་པར་གྱིས། །བློ་གྲོས་སྙིང་པོ་ལྡན་
དེས་སྨྲེ་བ་ཡི། །ཕ་དང་འཁོར་རྣམས་ཀུན་ལ་འདི་སྐད་སྨྲས། །ཡབ་ཅིག་ཁྱོད་ནི་མད་པར་གསུང་བ་ལགས། །གང་དག་ཚིག་གིས་གྲགས་པ་མ་སྨད་མད། །ཡོན་ཏན་རྣམས་ལ་མོས་པ་བདག་གི་ཚིག་།བསམས་ཏེ་གཏན་ལ་བབ་ལ་རྒྱལ་པོ་གསོན། །ཇི་ལྟར་རྨི་ལམ་
ན་ཡང་འདོད་ལ་བདག་།སེམས་མི་དགའ་ཞིང་མ་མོས་དེ་འདྲ་གསོན། །ས་ཡི་བདག་པོས་བཀའ་སྩལ་འདི་དག་ནི། །མཁས་པ་རྣམས་ལ་མཛེས་པ་མ་ལགས་ཏེ། །མི་མཁས་སྐྱེ་བོ་དག་གིས་ཡང་དག་བསམས། །མཁས་པ་རྣམས་ཀྱིས་དེ་དག་རྟག་ཏུ་སྨད། །ལོང་བ་
མ་ལགས་ཅི་ཡི་རྒྱུ་ཞིག་གིས། །ལོང་བའི་ཚིག་གིས་ལམ་གོལ་འཛིན་པར་བགྱིད། །ཐང་ལ་གནས་པ་སུ་ཞིག་ཇི་ལྟར་ན། །མགོན་མེད་ཆུས་ཁྱེར་བ་ལ་འདོད་པ་སྐྱེད། །གྲོལ་བ་ཇི་ལྟ་བུར་ན་བཅིངས་པ་ཡི། །ཚིག་གིས་བཙོན་ར་དེར་ནི་འཇུག་པར་བགྱིད། །ས་མཉམ་གནས་
ཤིང་མ་འཁྲུལ་ཇི་ལྟར་ན། །ཉམ་ངར་གནས་ལ་འདོད་པ་སྐྱེད་པར་བགྱིད། །ས་བདག་འདོད་པ་རྣམས་ལ་ཆགས་བཅས་ཤིང ། །འདོད་པའི་ལོངས་སྤྱོད་དག་གི་ཆུས་ཁྱེར་བ། །ལོང་བ་ཆུས་ཁྱེར་བཙོན་རར་གནས་པ་དང ། །ཉམ་ངར་གནས་འདྲར་བདག་ནི་དེ་སྙམ་
བགྱིད། །མི་ཡི་བདག་པོ་ཁྱོད་ནི་ལོང་བ་བཞིན། །བདག་ནི་མིག་ཅན་ཁྱད་པར་མཐོང་བ་ལགས། །ཁྱོད་ནི་འདོད་པའི་ཆུ་བོས་ཁྱེར་བ་ལགས། །བདག་ནི་འདོད་པ་རྣམས་ལས་རྣམ་པར་སྨོད། །འདོད་པ་དག་ནི་དུག་གི་ལོ་མ་བཞིན། །སྦྲུལ་གྱི་མགོ་འདྲ་སྡུག་བསྔལ་བགྱིད་པ</font><hr>42-1-6a<br><font size=+2>
སྟེ། །རྩེ་གསུམ་པ་དང་རལ་གྲི་མདུང་ཐུང་འདྲ། །མེ་ཡི་ཕུང་པོ་ཤིན་ཏུ་འབར་བ་བཞིན། །བློ་གྲོས་སྙིང་པོ་ལྡན་པས་དེ་སྐད་དུ། །སྨྲེ་སྔགས་འདོན་པའི་ཕ་དང་འཁོར་ལ་སྨྲས། །རིན་ཆེན་སྣ་བདུན་དག་ལ་མ་བལྟས་པར། །རྒྱལ་སྲིད་རྣམ་པར་སྤངས་ཏེ་རབ་ཏུ་
བྱུང ། །སྦྲུལ་གྱི་ལྤགས་རྙིང་རྗེས་པ་ཅི་འདྲ་དང ། །ངར་སྣབས་རྔུས་པའི་ཐལ་བ་བཞིན་སྤངས་ཏེ། །བློ་གྲོས་སྙིང་པོ་ལྡན་པ་ཆགས་མེད་པར། །སྡིག་དང་རྣམ་པར་བྲལ་ཏེ་རབ་ཏུ་བྱུང ། །གཞོན་ནུ་དེ་ལྟར་རབ་ཏུ་བྱུང་གྱུར་ནས། །བློན་པོའི་བུ་ཞིག་རྗེས་སུ་རབ་བྱུང་བ། །མིང་
ནི་ཟླ་བས་བྱིན་ཞེས་བྱ་བ་སྟེ། །བློ་གྲོས་སྙིང་པོའི་རྗེས་སུ་རབ་ཏུ་བྱུང ། །གཞོན་ནུ་དེ་ལྟར་རབ་ཏུ་བྱུང་གྱུར་ནས། །ཚངས་པའི་གནས་པ་བཞི་པོ་བསྐྱེད་ནས་ནི། །གྲོགས་དང་བཅས་པས་མངོན་པར་ཤེས་པ་ལྔ། །མ་ལུས་མཐའ་དག་བསྐྱེད་པར་བྱས་པར་གྱུར། །འདོད་པ་
རྣམས་ལ་སྐྱོན་དུ་ལྟ་བས་ན། །མི་ཡི་སེང་གེ་དེ་ནི་འདོད་ཁམས་འདས། །ཚངས་པ་ཡང་དག་ཉིད་ནི་ཐོབ་བྱའི་ཕྱིར། །ཚངས་པའི་འཁོར་ལོ་རབ་ཏུ་བསྐོར་བ་བྱས། །དེ་ལྟར་གཞོན་ནུ་རབ་ཏུ་བྱུང་བས་ན། །ཕ་དེ་བུ་ལ་མ་དད་གྱུར་པ་དང ། །ཟླ་བས་བྱིན་པ་དེ་ཡི་གན་སོང་ནས། །ལེགས་
པར་བཤད་པའི་ཚིག་གིས་དགའ་བར་བྱས། །འཆར་ཀ་ཁྱོད་ནི་དེ་ལ་ཇི་སྙམ་སེམས། །དེ་ཚེ་བློ་གྲོས་སྙིང་པོ་གཞན་སྙམ་འམ། །ང་ཉིད་དེ་ཡི་ཚེ་ན་དེར་གྱུར་ཏེ། །འདོད་པའི་ལོངས་སྤྱོད་དོན་དུ་གཉེར་བ་མེད། །འཆར་ཀ་ཁྱོད་ནི་དེ་ལ་ཇི་སྙམ་སེམས། །བདེན་པ་འཕེལ་བ་གཞན་
ཞིག་ཡིན་སྙམ་འམ། །མི་བདག་ཟས་གཙང་འདི་ཉིད་དེ་ཡི་ཚེ། །རྒྱལ་པོ་བདེན་པ་འཕེལ་ཞེས་བྱ་བར་གྱུར། །འཆར་ཀ་ཁྱོད་ནི་དེ་ལ་ཇི་སྙམ་སེམས། །རྗེས་སུ་རབ་བྱུང་ཟླས་བྱིན་གཞན་སྙམ་འམ། །ཁྱོད་ཉིད་དེ་ཚེ་དེ་ཡི་དུས་ན་ནི། །བདེན་པ་འཕེལ་བ་དད་པར་བྱེད་པ་ཡིན། །
དེ་ལྟ་བས་ན་འཆར་ཀ་ཁྱོད་ཀྱིས་འདིར། །རྒྱལ་པོ་ཟས་གཙང་དད་པ་མངོན་སྐྱེད་ཅིག་།ས་སྐྱོང་བྱེད་པ་འདི་ནི་དད་གྱུར་ན། །སྐྱིད་པ་ཆེན་པོ་ཕུན་སུམ་ཚོགས་པར་འགྱུར། །དེ་ནས་ཚེ་དང་ལྡན་པ་འཆར་ཀས་བཅོམ་ལྡན་འདས་ལ་མི་སྨྲ་བར་ཁས་བླངས་སོ། །དེ་ནས་ཚེ་དང་ལྡན་པ་འཆར་ཀ</font><hr>42-1-6b<br><font size=+2>
ཞག་དེ་འདས་ནས་སྔ་དྲོའི་དུས་ཀྱི་ཚེ་ཆོས་གོས་དང་ཤམ་ཐབས་བགོས། ལྷུང་བཟེད་ཐོགས་ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོར་སོང་ངོ ། །དེའི་ཚེ་རྒྱལ་པོ་ཟས་གཙང་མ་བཙུན་མོའི་འཁོར་གྱི་མདུན་ན་ཤཱཀྱ་སྟོང་ཙམ་ཞིག་དང ། དགོས་པ་ཞིག་གི་ཆེད་དུ་འདུས་ཤིང་འཁོད་དོ། །
རྒྱལ་པོ་ཟས་གཙང་མས་ཀྱང་བཅོམ་ལྡན་འདས་སེར་སྐྱའི་གནས་སུ་བྱོན་ཅིང ། །སེར་སྐྱའི་གནས་འདི་ཉིད་ན་ཤིང་ནྱ་གྲོ་དྷའི་ཀུན་དགའ་ར་བ་ན་བཞུགས་སོ་ཞེས་ཐོས་ནས་དེ་འདི་སྙམ་དུ་སེམས་ཏེ། གཞོན་ནུ་དེ་རབ་ཏུ་བྱུང་བས་བདག་ནི་དབང་ཕྱུག་གི་ལོངས་སྤྱོད་ཆེན་པོ་ལས་ཉམས་པར་བྱས་སོ། །
གལ་ཏེ་གཞོན་ནུ་དེ་ཁྱིམ་ན་གནས་ན་འཁོར་ལོས་སྒྱུར་བའི་རྒྱལ་པོ་མཐའ་བཞིར་རྣམ་པར་རྒྱལ་བ། ཆོས་དང་ལྡན་པ། ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པར་འགྱུར་ཏེ། དེའི་རིན་པོ་ཆེ་སྣ་བདུན་འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། 
རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་ཆེ་དང ། བློན་པོ་རིན་པོ་ཆེ་སྟེ་འདི་བདུན་ནོ། །དེ་ལ་བུ་དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་དང་ལྡན་པ། གཞན་གྱི་སྡེ་རབ་ཏུ་འཇོམས་པ་སྟོང་ཡང་ཚང་བར་འགྱུར་
བ་ཞིག། དེས་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་ཡང་ཆད་པ་མེད་ཅིང་མཚོན་གྱིས་བདའ་བ་མེད་ལ་མཉམ་སྟེ། མི་མཉམ་པ་མེད་ཅིང་ཆོས་དང་འཐུན་པས་ལེགས་པར་ཕབ་ནས་བསྐལ་པ་རྫོགས་པར་ལེགས་པར་བསྐྱངས་པར་འགྱུར་བ་ཞིག་སྟེ། དེ་ལྟར་གྱུར་ན་བདག་ཅག་ཀྱང་འཁོར་ལོས་སྒྱུར་བའི་རྒྱལ་སྲིད་ལ་དབང་ཕྱུག་གི་དབང་དང་ལྡན་ཞིང་རིམ་གྲོ་བྱས་པ་དང ། བཀུར་སྟི་བྱས་པ་དང ། བསྟི་སྟང་དུ་བྱས་པ་དང ། མཆོད་པར་བྱས་པ་དང ། དབང་ཕྱུག་གི་དབང་ཆེན་པོ་ཡང་རྙེད་པར་འགྱུར་བ་ཞིག་ན་ད་ལྟར་བདག་ཅག་ནི་གཞོན་ནུ་དེ་རབ་ཏུ་བྱུང་བས་དེ་ལྟ་བུའི་ལོངས་སྤྱོད་ཀྱི་
དབང་ཆེན་པོ་དང་བྲལ་བར་གྱུར་ཏོ་སྙམ་མོ། །དེས་དེ་སྙམ་དུ་བསམས་ནས་ཤཱཀྱ་རྣམས་ལ་བསྒོ་བ། ངའི་བུ་དེ་ལ་བལྟ་བའམ། བསྙེན་བཀུར་བྱེད་པར་སུ་ཡང་མ་འགྲོ་ཤིག་།ལ་ལ་ཞིག་ངའི་བུ་དེ་ལ་བལྟ་བའམ་བསྙེན་བཀུར་བྱ་བའི་ཕྱིར་འགྲོ་ན་དེའི་ལུས་ལ་གནོད་པའི་ཆད་པས་བཅད</font><hr>42-1-7a<br><font size=+2>
དོ། །དེའི་ཚེ་ཤཱཀྱའི་བུ་དགའ་བའི་བཞིན་ཞེས་བྱ་བ་ཞིག་འཁོར་དེ་ནས་བྱུང་ནས་སོང་བར་གྱུར་ཏེ། ཤཱཀྱའི་བུ་དགའ་བའི་བཞིན་གྱིས་ཚེ་དང་ལྡན་པ་འཆར་ཀ་རྒྱང་རིང་པོ་ནས་འོང་བ་མཐོང་ནས་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ། ཚེ་དང་ལྡན་པ་འཆར་ཀ་ལ་ཡང་དག
པར་མགུ་བར་བྱས་ནས། ཚེ་དང་ལྡན་པ་འཆར་ཀ་ཚུར་སྤྱོན། ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་ཀ་ཡུན་ཀྱང་རིང་ཞིག་ནས་བྱོན་ཏོ། །ཚེ་དང་ལྡན་པ་འཆར་ཀ་བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་
སམ། མི་བདེ་བ་མི་མངའ་འམ། དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས་བདེ་བར་བྱོན་ཏམ། ཤིན་ཏུ་མ་མཉེལ་ཏམ། བསོད་སྙོམས་ཀྱིས་འོ་མ་བརྒྱལ་ཏམ། དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་ཤཱཀྱའི་བུ་དགའ་བའི་བཞིན་ལ་འདི་སྐད་
ཅེས་སྨྲས་སོ། །དགའ་བའི་བཞིན་དེ་དེ་བཞིན་ཏེ། བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ། །བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་
མེད་དོ། །ཤཱཀྱའི་བུ་ཤིན་ཏུ་ལེགས་པར་སད་ཀྱིས་ཀྱང་ཤཱཀྱའི་བུ་དགའ་བའི་བཞིན་ཚེ་དང་ལྡན་པ་འཆར་ཀ་དང་ལྷན་ཅིག་དབེན་པ་ན་འཁོད་པ་མཐོང་ནས་འཁོར་དེ་ནས་བྱུང་སྟེ། ཚེ་དང་ལྡན་པ་འཆར་ཀ་ག་ལ་བ་དེར་སོང་ནས་ཚེ་དང་ལྡན་པ་འཆར་ཀ་ལ་ཡང་དག་པར་མགུ་བར་བྱས་ཏེ། ཚེ་དང་
ལྡན་པ་འཆར་ཀ་ཚུར་སྤྱོན། ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་ཀ་ཡུན་ཀྱང་རིང་ཞིག་ནས་བྱོན་ཏོ། །ཚེ་དང་ལྡན་པ་འཆར་ཀ་བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་སམ། མི་བདེ་བ་མི་མངའ་འམ། 
དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས་བདེ་བར་བྱོན་ཏམ། ཤིན་ཏུ་མ་མཉེལ་ཏམ། བསོད་སྙོམས་ཀྱིས་འོ་མ་བརྒྱལ་ཏམ། དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་ཤཱཀྱའི་བུ་ཤིན་ཏུ་ལེགས་པར་སད་ལ་འདི་སྐད་ཅེས་སྨྲས་སོ། །ཤིན་ཏུ་ལེགས་པར</font><hr>42-1-7b<br><font size=+2>
སད་དེ་དེ་བཞིན་ཏེ། བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ། །བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་མེད་དོ། །ཤཱཀྱའི་བུ་མྱ་ངན་མེད་
དང ། མྱ་ངན་བྲལ་གྱིས་ཀྱང་ཚེ་དང་ལྡན་པ་འཆར་ཀ་དང ། ཤཱཀྱའི་བུ་དགའ་བའི་བཞིན་དང ། ཤཱཀྱའི་བུ་ཤིན་ཏུ་ལེགས་པར་སད་གནས་དབེན་པ་ན་འཁོད་པ་མཐོང་ནས་ཚེ་དང་ལྡན་པ་འཆར་ཀ་ག་ལ་བ་དེར་སོང་སྟེ། ཚེ་དང་ལྡན་པ་འཆར་ཀ་ལ་ཡང་དག་པར་མགུ་བར་བྱས་ནས། 
ཚེ་དང་ལྡན་པ་འཆར་ཀ་ཚུར་སྤྱོན། ཚེ་དང་ལྡན་པ་འཆར་ཀ་བྱོན་པ་ལེགས་སོ། །ཚེ་དང་ལྡན་པ་འཆར་ཀ་ཡུན་ཀྱང་རིང་ཞིག་ནས་བྱོན་ཏོ། །ཚེ་དང་ལྡན་པ་འཆར་ཀ་བཅོམ་ལྡན་འདས་ལ་སྙུན་མི་མངའ་འམ། སྟོབས་དང་ལྡན་ནམ། བདེ་བར་བཞུགས་སམ། མི་བདེ་བ་མི་
མངའ་འམ། དེ་ལ་ཉམ་ང་བ་ཅི་ཡང་མི་མངའ་འམ། བཅོམ་ལྡན་འདས་བདེ་བར་བྱོན་ཏམ། ཤིན་ཏུ་མ་མཉེལ་ཏམ། བསོད་སྙོམས་ཀྱིས་འོ་མ་བརྒྱལ་ཏམ། དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་ཤཱཀྱའི་བུ་མྱ་ངན་མེད་དང ། མྱ་ངན་བྲལ་ལ་འདི་སྐད་ཅེས་
སྨྲས་སོ། །མྱ་ངན་མེད་དང ། མྱ་ངན་བྲལ་བཅོམ་ལྡན་འདས་ལ་སྙུན་མི་མངའོ། །སྟོབས་དང་ལྡན་ནོ། །བདེ་བར་བཞུགས་སོ། །མི་བདེ་བ་མི་མངའོ། །དེ་ལ་ཉམ་ང་བ་ཅི་ཡང་མི་མངའོ། །བདེ་བར་བྱོན་ཏོ། །མཉེལ་བ་མེད་དོ། །བསོད་སྙོམས་ཀྱིས་འོ་བརྒྱལ་བ་མེད་
དོ། །དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དག་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་བྱེད་དོ། །དེ་སྐད་ཅེས་སྨྲས་པ་དང ། ཤཱཀྱའི་བུ་དེ་དག་གིས་ཚེ་དང་ལྡན་པ་འཆར་ཀ་ལ་འདི་
སྐད་ཅེས་སྨྲས་སོ། །བཙུན་པ་འཆར་ཀ་བདག་ཅག་ནི་བཅོམ་ལྡན་འདས་ལ་བལྟ་བ་དང ། བསྙེན་བཀུར་བྱ་བར་འདོད་ན་བདག་ཅག་གིས་དེ་ལྟར་མི་ནུས་སོ། །དེ་ཅིའི་ཕྱིར་ཞེ་ན། འདི་ལྟར་རྒྱལ་པོ་ཟས་གཙང་མས་ངའི་བུ་ལ་བལྟ་བའམ་བསྙེན་བཀུར་བྱ་བའི་ཕྱིར་སུ་ཡང་མ</font><hr>42-1-8a<br><font size=+2>
འགྲོ་ཤིག་།ལ་ལ་ཞིག་དེ་ལ་བལྟ་བའམ། བསྙེན་བཀུར་བྱ་བའི་ཕྱིར་སོང་ན་ལུས་ལ་གནོད་པའི་ཆད་པས་གཅད་དོ་ཞེས་བཀའ་སྩལ་ཏོ། །དེ་བས་ན་འཕགས་པ་འཆར་ཀ་དེ་ལྟར་བདག་ཅག་རྒྱལ་པོས་འཇིགས་པའི་ཕྱིར་བཅོམ་ལྡན་འདས་ལ་བལྟ་བའམ་བསྙེན་
བཀུར་བྱེད་དུ་འདོང་བར་མི་ནུས་སོ། །དེ་ནས་ཚེ་དང་ལྡན་པ་འཆར་ཀ་འདི་སྙམ་དུ་སེམས་ཏེ། ཀྱེ་མ་རྒྱལ་པོ་ཟས་གཙང་མ་འདི་ནི་ཤིན་ཏུ་ཡང་ང་རྒྱལ་གྱིས་ནོན་པར་གྱུར་ན་ཇི་ལྟར་བདག་གིས་དེའི་དྲུང་དུ་འགྲོ་བར་བྱ་སྙམ་ནས་དེས་འདི་སྙམ་དུ་བསམས་སོ། །འོན་ཏང་བདག་གིས་ནམ་
མཁའ་ལ་རྫུ་འཕྲུལ་གྱིས་ཤིང་ཏ་ལ་བདུན་སྲིད་དུ་འཕགས་ལ་སྟེང་གི་བར་སྣང་ལ་སྐྱིལ་མོ་ཀྲུང་བཅས་ཏེ་རྒྱལ་པོ་ཟས་གཙང་མའི་གན་དུ་འགྲོ་བར་བྱའོ་སྙམ་ནས། དེ་ནས་ཚེ་དང་ལྡན་པ་འཆར་ཀས་ཏིང་ངེ་འཛིན་གྱི་རྣམ་པ་དེ་ལྟ་བུ་ལ་མཉམ་པར་བཞག་སྟེ། སེམས་མཉམ་པར་བཞག་པ་
དེས་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ནས་བར་སྣང་ལ་སྐྱིལ་མོ་ཀྲུང་བཅས་ཏེ། རྒྱལ་པོ་ཟས་གཙང་མ་ག་ལ་བ་དེར་སོང་ངོ ། །རྒྱལ་པོ་ཟས་གཙང་མས་ཀྱང་ཚེ་དང་ལྡན་པ་འཆར་ཀ་རྒྱང་རིང་པོ་ནས་ནམ་མཁའ་ལ་ཤིང་ཏ་ལ་བདུན་སྲིད་དུ་འཕགས་ཏེ་རྫུ་འཕྲུལ་གྱིས་བར་སྣང་ལ་སྐྱིལ་མོ་
ཀྲུང་བཅས་ཤིང་འོང་བ་མཐོང་ནས་དེ་ལ་ཐལ་མོ་སྦྱར་ཏེ་ཚིགས་སུ་བཅད་ནས་སྨྲས་པ། ཚོན་བསྒྱུར་གོས་ཅན་ཁྱོད་ནི་གང་ནས་འོངས། །ཁྱོད་ལ་ཅི་དགོས་མྱུར་དུ་སྨྲ་བར་བྱོས། །ཁྱོད་ལ་གང་དགོས་དེ་ཡང་མྱུར་དུ་སྦྱིན། །བརྟུལ་ཞུགས་གྲུབ་པ་མཐོང་བར་ཤིན་ཏུ་དཀའ། །དེ་སྐད་ཅེས་
སྨྲས་པ་དང ། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སླར་སྨྲས་པ། རྒྱལ་པོ་བདག་ནི་ཁྱོད་ཀྱི་སྲས་ཀྱི་བུ། །བདག་ལ་ཆོས་དགོས་རྒྱལ་པོ་གང་ན་བཞུགས། །བདག་ནི་དེ་བཞིན་གཤེགས་པའི་བཤོས་སྐྱེལ་ཏེ། །བདེ་བར་གཤེགས་པ་སྐྱོབ་
པའི་བཤོས་བསྐུར་རོ། །ཡུལ་འཁོར་བདག་པོ་ཆེ་བའི་དཔལ་མངའ་བ། །ཁྱོད་ལ་མི་མཆོག་སྲས་མངའ་གྲགས་པ་ཐོབ། །གཟི་བརྗིད་ཀྱིས་ནི་ཕྱོགས་རྣམས་ཀུན་ཏུ་འབར། །སྟོན་གྱི་ཉི་མའི་གུང་གི་འོད་དང་འདྲ། །ཇི་ལྟར་སྤྲིན་མེད་ནམ་མཁའི་ཉི་མ་ནི། །ཕྱོགས་རྣམས་ཀུན་ཏུ་འོད</font><hr>42-1-8b<br><font size=+2>
བྱེད་མངོན་པར་འབར། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །ཡེ་ཤེས་མངའ་བས་ཕྱོགས་རྣམས་ཀུན་ཏུ་སྣང ། །ཇི་ལྟར་སྟོན་གྱི་ཉི་མ་ཤར་བ་ན། །སྲིན་བུ་མེ་ཁྱེར་ཟིལ་གྱིས་མནན་ཅིང་སྣང ། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །མུ་སྟེགས་གཞན་རྣམས་ཀུན་བཅོམ་
ལམ་མེར་བཞུགས། །ཇི་ལྟར་ཉི་མས་ཟིལ་ནོན་སྐར་མ་རྣམས། །ཉིན་པར་འོད་སྟོང་ལམ་མེར་མི་རུང་བ། །དེ་བཞིན་རྒྱལ་པོ་གླང་པོ་ཁྱོད་སྲས་ཀྱིས། །ཟིལ་གྱིས་མནན་པས་མུ་སྟེགས་གཞན་མི་སྣང ། །ཇི་ལྟར་ཉི་མས་ཟིལ་ནོན་ཟླ་བ་ནི། །ནམ་མཁའི་དབྱིངས་ནས་འོད་སྟོང་ཉིད་མི་
སྣང ། །དེ་བཞིན་ཁྱོད་སྲས་ཟིལ་མནན་མུ་སྟེགས་རྣམས། །ཉི་མས་ཟིལ་ནོན་ཟླ་བཞིན་གསལ་བ་མེད། །སེང་གེའི་ང་རོ་ཐོས་ནས་ཕྲ་མོ་རྣམས། །ཤུགས་ཀྱིས་རྨོངས་ནས་བསམ་པ་ཇི་བཞིན་དུ། །རི་སུལ་གསེབ་ཏུ་བྱེར་ནས་འཁྲ་ཞིང་གནས། །སྟག་གི་ང་རོ་གཞན་གྱིས་བཟོད་པར་
དཀའ། །དེ་བཞིན་རྒྱལ་པོ་དྲང་སྲོང་ཆེན་པོའི་གསུང ། །བདག་མེད་ང་རོ་མུ་སྟེགས་གཞན་ཐོས་ནས། །ཤེས་རབ་དམན་པ་སྲིད་པའི་རྩེར་ཕྱིན་ཀྱང ། །གསུང་ཐོས་པས་ནི་ཐམས་ཅད་འཇིགས་པར་འགྱུར། །ལྷ་དང་བཅས་པའི་འཇིག་རྟེན་ལོང་བ་ལ། །སྤྱན་དང་ལྡན་པ་དེས་ནི་
མིག་ཀྱང་སྩལ། །སྣང་བ་མཛད་ཅིང་རྡུལ་ཀྱང་རྣམ་པར་སྦྱངས། །ཡེ་ཤེས་སྣང་བའི་དཀྱིལ་འཁོར་མངོན་པར་ཤར། །བདེ་དང་མི་བདེའི་ལམ་གཉིས་རབ་ཏུ་བསྟན། །ལམ་དང་གོལ་བའི་ལམ་ཡང་རྒྱལ་བས་བསྟན། །ལམ་སྟོར་སྐྱེ་བོ་རྣམས་ནི་ལམ་དུ་བཙུད། །འདམ་དུ་བྱིང་
བ་རྣམས་ཀྱང་ཐང་ལ་བཏོན། །ཇི་ལྟར་སྐོམ་པའི་ས་ལ་སྤྲིན་གྱིས་ནི། །སྒང་དང་གཤོང་བཅས་ཆར་གྱིས་ངོམས་པར་བྱེད། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །འགྲོ་བ་ལྷར་བཅས་ཆོས་ཀྱིས་ངོམས་པར་མཛད། །ཇི་ལྟར་ཆར་གྱིས་ངོམས་པའི་རི་སུལ་ནགས། །རྩཝ་དང་
གེལ་པ་ནགས་ཚལ་ཤིང་རྣམས་དང ། །འཁྲི་ཤིང་སྡོང་པོ་སྨན་གྱི་རྣམ་པ་དང ། །མེ་ཏོག་སྣ་ཚོགས་རྣམས་ཀྱིས་ས་མཛེས་པ། །དེ་བཞིན་སྟོབས་བཅུ་མི་འཇིགས་མངའ་བ་དང ། །མ་འདྲེས་བཅཝ་བརྒྱད་ཆོས་མངའི་སྡོང་པོ་ལ། །ཐམས་ཅད་མཁྱེན་པའི་ཡེ་ཤེས་མེ་ཏོག་དང ། །


</font><hr>42-1-9a<br><font size=+2>
འབྲས་བུས་སྤྲས་པས་རྒྱལ་པོའི་སྲས་མཛེས་སོ། །ཇི་ལྟར་རྒྱ་མཚོའི་དབུས་ན་ལྷུན་པོའི་རི། །ལྷ་ཡི་གནས་གྱུར་མི་སྒུལ་རྣམ་པར་མཛེས། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །དགེ་སྦྱོང་རྒྱ་མཚོའི་ནང་ན་རྣམ་པར་མཛེས། བདེ་སོགས་ཁྱིམ་ཐབ་བརྒྱ་བྱིན་
ལྷ་དབང་པོ། །ལྷ་ཡི་སྟན་ལ་འདུག་ན་མཛེས་པ་ལྟར། །དེ་བཞིན་རྒྱལ་པོ་གླང་པོ་ཁྱོད་ཀྱི་སྲས། །དགེ་སྦྱོང་ཚོགས་ཀྱི་དབུས་ན་རྣམ་པར་མཛེས། བྱམས་པའི་སྟོབས་ཅན་ཟབ་མོའི་འབྲུག་བསྒྲགས་ཏེ། །ཐུགས་རྗེ་ཆེན་པོའི་གློག་ཕྲེང་རིར་ལྡན་པས། །དྲན་པ་ཉེར་གཞག་ཆར་
རྒྱུན་འདབ་འཁྲིགས་ཏེ། །རྒྱལ་བ་ཀླུ་མཆོག་དེ་ནི་ཆོས་ཆར་འབེབས། །ཡོངས་དག་དཀྱིལ་འཁོར་ཚུལ་ཁྲིམས་རབ་ཀྱི་གཟེར། ཏིང་འཛིན་ཉོན་མོངས་ལྷ་མིན་རབ་འཇོམས་ཤིང ། །ཡེ་ཤེས་ཉི་ཟེར་སྲིད་པའི་སྲེད་པ་སྐེམས། །རྒྱལ་བའི་ཉི་ཆེན་འགྲོ་བར་རྣམ་པར་མཛེས། །
ཏིང་ངེ་འཛིན་དང་ཚུལ་ཁྲིམས་གཟིངས་དང་གྲུ་ཆེན་ཏེ། །དྲན་པ་ཉེ་བར་གཞག་པའི་ནོར་བུ་རིན་ཆེན་ཚོགས། །བྱང་ཆུབ་ཡན་ལག་རིན་ཆེན་འབྱུང་གནས་བསམ་གཏན་རླབས། །ཐར་པ་འདོད་པས་སངས་རྒྱས་རྒྱ་མཚོ་བསྟེན་པར་བྱ། །ཚུལ་ཁྲིམས་རྣམ་དག་རྩ་བ་བརྟན་
བར་ཟུག་།ཏིང་འཛིན་ལོ་མ་དྲན་པ་ཡལ་ག་འདབ། །བྱང་ཆུབ་ཡན་ལག་མེ་ཏོག་སྟོང་པའི་སྡོང ། །བདག་མེད་གྲིབ་ལྡན་རྒྱལ་བའི་སྡོང་པོ་སྟེན། །ཚུལ་ཁྲིམས་ནགས་མཐའ་སྟེན་པའི་སྟོབས་ཆེན་པོ། །ཏིང་འཛིན་ཞི་བའི་རི་ཁྲོད་ཕུག་ན་གནས། །སྟོང་པ་མཚན་མེད་སྨོན་
མེད་སྤྱོད་ཡུལ་ཅན། །རྒྱལ་བ་སྟོབས་ཅན་སེང་གེ་ཁྱོད་ཀྱི་སྲས། །ཐུབ་པ་མི་གནས་གནས་པ་རྣམ་པར་སྟོན། །རྒྱལ་བ་ཁྱུ་མཆོག་བརྗིད་པའི་སྟབསབཞུདཔས། །བྱིས་པ་སོ་སོ་མུ་སྟེགས་གཞན་བསྔགས་ཏེ། །ཁྱོད་ཀྱི་སྲས་ནི་ཁྱུ་མཆོག་སྒྲ་ཡང་འབྱིན། །ཚུལ་
ཁྲིམས་གཏེར་དང་ཡོན་ཏན་དབྱིག་གིས་བརྒྱན། །བསམ་གཏན་དང་བའི་ཞི་གནས་ཉེ་བར་བསྐྱབས། །ཡེ་ཤེས་ཀྱིས་བསྲུངས་ཐར་པའི་སྤྱོད་ཡུལ་ཅན། །རྒྱལ་བ་ཚོང་དཔོན་གཙོ་བོ་ནོར་གཏོང་མཛད། །དགེ་བ་ཡོངས་སུ་བཟུང་བས་སྡིག་བཅོམ་སྟེ། །ཉོན་མོངས་ཞི་མཛད</font><hr>42-1-9b<br><font size=+2>
དགེ་བསྟེན་བཀའ་སྩོལ་པས། །ལྷ་དང་ལྷ་མིན་བཅས་པའི་འཇིག་རྟེན་ན། །རྒྱལ་པོ་ཁྱོད་ཀྱི་སྲས་མཆོག་རྣམ་པར་མཛེས། ཚུལ་ཁྲིམས་མཆོག་སྤྲིན་བློ་གྲོས་གློག་འབྱིན་ཅིང ། །ཡན་ལག་བརྒྱད་ལམ་ཆར་ཆེན་རླན་གྱིས་སྦེངས། །ཐུབ་པ་གཅེས་པའི་ལོ་ཏོག་འབྲས་བུ་སྩོལ། །
ཁྱོད་ཀྱི་སྲས་ནི་ཀླུ་ཆེན་འབྲུག་སྒྲ་སྒྲོགས། །རྒྱལ་པོས་སྨྲས་པ། གང་ཟག་མཆོག་དེ་བདེ་བར་འོངས་སམ་ཅི། །བསོད་སྙོམས་རྒྱུ་བས་འདྲེན་པ་མ་ངལ་ལམ། །དེ་ཡི་ལུས་ལ་ངལ་བས་དུབ་མེད་དམ། །ཐང་གནས་ཨུད་པ་ལ་བཞིན་མ་རྙིས་སམ། །འཆར་ཀས་སྨྲས་པ། 
རྫུ་འཕྲུལ་སྟོབས་མངའ་བསམ་གཏན་སྤྱོད་ཡུལ་ཅན། །དགྱེས་ཤིང་བདེ་བས་ཡན་ལག་ཡོངས་རྒྱས་ཏེ། །ཐུབ་པ་ཞི་བའི་སྙོམས་འཇུག་གནས་བཅས་པས། །གསེར་གྱི་པད་མ་ལྟ་བུར་རྒྱལ་མི་རྙིས། །རྒྱལ་པོས་སྨྲས་པ། སྔན་ཆད་རྫ་རྔ་རྔ་བྲན་སྒྲས་བསྐུལ་ཞིང ། །གླིང་
བུའི་སྒྲ་སྙན་ང་རོས་བསྐུལ་བྱས་ཏེ། །བུད་མེད་གླུ་ཡི་དབྱངས་ཀྱིས་བསླང་བསླང་ནས། །ད་ལྟར་སད་ན་སྡུག་བསྔལ་མི་མྱོང་ངམ། །འཆར་ཀས་སྨྲས་པ། །བསམ་གཏན་དགོངས་པས་ཏིང་འཛིན་ཞི་ཡུལ་ཅན། །ཏིང་འཛིན་བསྒྲུབ་པའི་ཚུལ་ལ་མཁས་པ་སྟེ། །མནལ་ཏམ་
བཞེངས་སམ་བཞུད་དམ་བཞུགས་པ་ན། །སྡུག་བསྔལ་མི་མངའ་རྒྱལ་བ་རྟག་ཏུ་དགྱེས། །རྒྱལ་པོས་སྨྲས་པ། ཆེ་བའི་རྐྱེན་འོས་མལ་མཆོག་བཤམས་པ་ལ། །མེ་མར་སྡོང་པོས་ཀུན་ནས་མཐའ་བསྐོར་ཏེ། །བུད་མེད་ཚོགས་ཀྱིས་བསྐོར་ཅིང་ཉལ་ཉལ་ན། །ད་ལྟར་
མུན་པར་ཉལ་ན་ཅིས་མི་རྨོངས། །འཆར་ཀས་སྨྲས་པ། ཐུབ་ཆེན་འཕགས་པ་གཟིམས་མལ་གཟིམས་པ་ནི། །བྱམས་པའི་གདན་བཏིང་ཐུགས་རྗེས་བདེ་བར་བཞེངས། །དགའ་བའི་གནས་པས་དགྱེས་དང་ལྡན་པས་ན། །སྲིད་མེད་བཏང་སྙོམས་ཅན་ལ་རྨོངས་མི་མངའ། །རྒྱལ་
པོས་སྨྲས་པ། ཤཱཀྱ་དཔའ་བོས་དེ་རྟག་མདུན་དུ་བདར། །བསྟན་བཅོས་མཁས་དང་རྩེ་ཞིང་དགའ་བྱས་ཏེ། །གཞལ་མེད་ཁང་འདྲའི་ཁྱིམ་དུ་དགའ་བྱས་ན། །ང་ཡི་བུ་དེ་ནགས་མཐར་ཇི་ལྟར་དགའ། །འཆར་ཀས་སྨྲས་པ། །ཆོས་ཀྱིས་བྱུང་བ་ཞི་སེམས་ལྡན་རྣམས་ཀྱིས། །


</font><hr>42-1-10a<br><font size=+2>
ཞི་བའི་ཐུགས་མངའ་དེ་རྟག་མདུན་དུ་བདར། །ཞི་བའི་དགོན་པར་ཞི་བ་བསྟེན་མཛད་པས། །སྟོན་པ་འཇིགས་བྲལ་དེ་ནི་དེར་དགྱེས་སོ། །རྒྱལ་པོས་སྨྲས་པ། །སྔན་ཆད་གཞོན་ནུ་ཁྱིམ་ན་གནས་པའི་ཚེ། །ཡན་ལག་སྤོས་ཀྱི་འབྲུ་མར་ཞིམ་བྱུགས་ཏེ། །
རྒྱལ་པོའི་རྐྱེན་དུ་འོས་པས་ཁྲུས་བྱས་ན། །ནགས་ཀྱི་མཐའ་ན་ཐུབ་པ་སུ་ཡིས་བཀྲུ། །འཆར་ཀས་སྨྲས་པ། ཁྲིམས་གཙང་འབབ་སྟེགས་ཆོས་ཆུ་རྫིང་བུ་སྟེ། །ཐུབ་པ་དེས་བཀྲུས་གཞན་ཡང་བཀྲུ་བ་མཛད། །སྐུ་ལ་མི་གཤེར་སྲས་དང་བཅས་སུ་འབོག་།རང་ཡང་
རྒལ་ལ་སྐྱེ་བོ་ཕལ་ཆེར་སྒྲོལ། །རྒྱལ་པོས་སྨྲས་པ། གསེར་གྱི་སྐུད་པ་ནོར་བུའི་ཕྲེང་བས་བརྒྱན། །རྒྱལ་པོའི་རྐྱེན་འོས་གོས་མཆོག་བཟང་པོ་གྱོན། །ཙན་དན་ཞིམ་པོས་ཤིང་འདབ་ལེགས་པར་བྲིས། །ནགས་ཆེན་དེ་གསེབ་ཐུབ་པ་སུ་ཡིས་བརྒྱན། །འཆར་ཀས་སྨྲས་
པ། ཚུལ་ཁྲིམས་སྤོས་བྱུགས་ཡོན་ཏན་ཕྲེང་བས་བརྒྱན། །ཁྲེལ་ཡོད་ན་བཟའ་ཏིང་འཛིན་བསམ་གཏན་རྒྱན། །མངོན་ཤེས་རིག་པ་རྣམ་ཐར་བརྒྱན་པའི་སྐུ། །རྣམ་གྲོལ་གཟི་མངའ་ཐུབ་པ་ནགས་ན་མཛེས། །རྒྱལ་པོས་སྨྲས་པ། རྩེ་གཉིས་མཚོན་དང་རལ་གྲི་
མཚོན་ཐོགས་པའི། །དཔའ་བོ་གཡུལ་དུ་འོངས་པས་ལུས་བསྲུངས་ཏེ། །བླ་རེ་གདུགས་ཀྱིས་རྟག་ཏུ་དགབ་དགབ་པ། །གཅིག་པུ་ནགས་ན་འདུག་ན་སུ་ཡིས་བསྲུང ། །འཆར་ཀས་སྨྲས་པ། བྱམས་པའི་སྟོབས་ཀྱིས་ཐུབ་པ་ཡོངས་བསྲུངས་ཏེ། །དེ་དཔུང་ཡེ་ཤེས་
ཉན་ཐོས་ཞབས་འབྲིང་གཡོག་།ཡོན་ཏན་ཚོགས་ལ་ངེས་པས་འཇིགས་མི་མངའ། །སྟོབས་བཅུ་དགྱེས་པ་མངའ་ཞིང་མི་འཇིགས་བརྙེས། །རྒྱལ་པོས་སྨྲས་པ། ང་ཡི་བུ་ཡི་ཡོན་ཏན་ཁྱོད་ཀྱིས་སྨྲས། །ཆོས་ལེགས་སྤྱོད་ཅིང་དུབ་མེད་བརྗོད་པ་ཐོས། །ཁྱོད་ཀྱང་
ཟན་ཟོ་བསོད་སྙོམས་བཀུར་བར་གྱིས། །བདག་ཀྱང་མི་ཡི་དབང་པོ་ལྟར་འགྲོ་འོ། །དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ་བཅོམ་ལྡན་འདས་དེ་ནི་ཚོགས་ཀྱི་སློབ་དཔོན། ཚོགས་ཀྱི</font><hr>42-1-10b<br><font size=+2>
མཆོག་།དགེ་སྦྱོང་གི་ཚོགས་ཡོངས་སུ་སྡུད་པ། དྲང་སྲོང་ཆེན་པོ་སྟེ། དགེ་སྦྱོང་གི་ཚོགས་ཀྱི་ནང་ན་བཞུགས་ན་དགེ་སྦྱོང་གི་རྒྱལ་པོ་ལམ་མེ་ལྷན་ནེ་ལྷང་ངེའོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན། ཟླ་བ་ཡར་གྱི་ངོ་ཚེས་བཅཝ་ལྔ་ལ་ཟླ་བ་ཉ་སྟེ་ཡོངས་སུ་རྒྱས་པའི་ཚེ་
སྐར་མའི་ཚོགས་ཀྱིས་ཀུན་ནས་བསྐོར་བ་ནི་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་ཉི་མ་ནི་སྟོན་ཀའི་དུས་ན་ཤིན་ཏུ་ལམ་མེ་ལྷན་ནེ་
ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ཤིན་ཏུ་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ། དཔེར་ན་རིའི་རྒྱལ་པོ་རི་རབ་རྒྱ་མཚོའི་ནང་ན་འདུག་པ་ནི་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་
གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ། དཔེར་ན་ལྷའི་དབང་པོ་བརྒྱ་བྱིན་ནི་ཆོས་བཟང་ལྷའི་མདུན་ས་ན་གནས་ན་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །འདི་ལྟ་
སྟེ། དཔེར་ན་ལྷའི་བུ་རབ་འཐབ་བྲལ་དང ། ལྷའི་བུ་ཡོངས་སུ་དགའ་ལྡན་དང ། ལྷའི་བུ་རབ་འཕྲུལ་དགའ་དང ། ལྷའི་བུ་གཞན་འཕྲུལ་དབང་བྱེད་ལྷའི་ཚོགས་ཀྱི་ནང་ན་གནས་ན་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་ཀྱང་དགེ་སྦྱོང་གི་ཚོགས་ཀྱི་ནང་ན་བཞུགས་
ན་ལམ་མེ་ལྷན་ནེ་ལྷང་ངེའོ། །འདི་ལྟ་སྟེ། དཔེར་ན་མི་མཇེད་ཀྱི་བདག་པོ་ཚངས་པ་ནི་ཚངས་པ་བྱེ་བ་ཕྲག་སྟོང་གིས་བསྐོར་ན་ལམ་མེ་ལྷན་ནེ་ལྷང་ངེའོ། །དེ་བཞིན་དུ་བཅོམ་ལྡན་འདས་དེ་ཡང་དགེ་སྦྱོང་གི་ཚོགས་ཀྱི་ནང་ན་བཞུགས་ན་ལམ་མེ་ལྷན་ནེ་ལྷང་ངེའོ། །དེ་ནས་རྒྱལ་པོ་ཟས་གཙང་
མས་བཅོམ་ལྡན་འདས་ཀྱི་ཡོན་ཏན་དེ་ལྟ་བུ་བརྗོད་པ་འདི་ཐོས་ནས་འདི་སྙམ་དུ་སེམས་ཏེ། འདི་ནི་བཅོམ་ལྡན་འདས་དེའི་ཉན་ཐོས་སུ་ཟད་ན་འདི་ལྟར་རྫུ་འཕྲུལ་ཆེ་ཞིང་འདི་ལྟར་མཐུ་ཆེ་ལ་འདི་ལྟར་དབང་ཆེ་བར་གྲགས་ན། བཅོམ་ལྡན་འདས་ཐོག་མ་བཙས་པ་ཉིད་ཀྱི་ཚེ་ས་ཆེན་པོ་འདི་རྣམ་པ་དྲུག</font><hr>42-1-11a<br><font size=+2>
ཏུ་གཡོས། རབ་ཏུ་གཡོས། ཀུན་ཏུ་རབ་ཏུ་གཡོས། འགུལ་རབ་ཏུ་འགུལ། ཀུན་ཏུ་རབ་ཏུ་འགུལ། ལྡེག་རབ་ཏུ་ལྡེག། ཀུན་ཏུ་རབ་ཏུ་ལྡེག། ཆེམ་ཆེམ་རབ་ཏུ་ཆེམ་ཆེམ། ཀུན་ཏུ་རབ་ཏུ་ཆེམ་ཆེམ། འུར་འུར་རབ་ཏུ་འུར་འུར། ཀུན་ཏུ་རབ་ཏུ་འུར་འུར། 
འཁྲུགས་རབ་ཏུ་འཁྲུགས། ཀུན་ཏུ་རབ་ཏུ་འཁྲུགས་ཤིང་སྣང་བ་དཔག་ཏུ་མེད་པ་བྱུང་བ་ལྟ་ཅི་སྨོས། བཙས་མ་ཐག་ཏུ་སུས་ཀྱང་མ་བརྟེན་པར་ས་ལ་གོམ་པ་བདུན་བོར་བ་དང ། སྟེང་གི་བར་སྣང་ལས་ཆུའི་རྒྱུན་གྲང་དྲོ་རྣམ་པ་གཉིས་བྱུང་སྟེ། དེ་གཉིས་ཀྱིས་ཁྲུས་བྱས་པ་དང ། 
དེའི་ལྷའི་ཁྲི་བཟང་པོ་དབུས་གསེར་ལས་བྱས་པ་བྱུང་བ་དང ། སྟེང་གི་བར་སྣང་ལས་ལྷའི་གདུགས་རྔ་ཡབ་དང་བཅས་པ་བྱུང་བ་ལྟ་ཅི་སྨོས། བཙས་མ་ཐག་ཏུ་ལྷ་ཐམས་ཅད་ཕྱག་འཚལ་བར་གྱུར་པ་དང ། གང་གི་ཚེ་བཙས་ནས་གང་གི་ཚེ་མངོན་པར་བྱུང་བ་དེའི་བར་དུ་ནམ་ཡང་འཁྲུལ་
པ་མེད་པ། རྟག་ཏུ་དམ་བཅས་པ་ལ་བརྟན་པ། ཇི་སྐད་སྨྲས་པ་དེ་ལྟར་བྱེད་པ། རྟག་ཏུ་རྒྱུན་མི་གཅོད་པར་བརྩོན་འགྲུས་བརྟན་པ། ཡང་དག་པར་སྨྲ་བ། སླུ་བ་མེད་པ་ལྟ་ཅི་སྨོས། གང་གི་ཚེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། རྒལ་
ནས་བསྒྲལ་བར་བྱའོ་ཞེས་སྨྲས་པ་ལྟ་ཅི་སྨོས་སྙམ་སྟེ། དེས་དེ་ལྟར་བཅོམ་ལྡན་འདས་བྱང་ཆུབ་སེམས་དཔར་གྱུར་པའི་དམ་བཅས་པ་དེ་དྲན་ནས་ཚིགས་སུ་བཅད་པ་འདི་དག་སྨྲས་སོ། །བློ་མཆོག་ལྡན་པ་གང་ཞིག་བལྟམ་མ་ཐག་།ནོར་བ་མེད་པའི་གསུང་ནི་བརྗོད་མཛད་དེ། །གང་ཞིག་ལ་ནི་
བདེན་པའི་གསུང་མངའ་བ། །དེ་ལ་མཁས་པ་སུ་ཞིག་ཡིད་མི་ཆེས། །གང་ཞིག་བལྟམ་པར་གྱུར་མ་ཐག་ཉིད་དུ། །འཇིག་རྟེན་གཙོ་བོར་འགྱུར་བར་བྱའོ་ཞེས། །མགོན་པོས་མཉམ་པ་མེད་པའི་གསུང་བརྗོད་པ། །དེ་ལ་མཁས་པ་སུ་ཞིག་ཡིད་མི་ཆེས། །སུ་ཞིག་རྨང་ལམ་རྨི་
བའི་དུས་ན་ཡང ། །བརྫུན་གྱི་ཚིག་ནི་ནམ་ཡང་མ་གསུངས་ཏེ། །ཇི་སྐད་གསུངས་པ་དེ་ལྟར་མཛད་མཛད་པ། །དེ་ལ་མཁས་པ་སུ་ཞིག་ཡིད་མི་ཆེས། །གསེར་གྱི་ཕུང་པོ་གངས་རི་མཉམ་པ་ཡིས། །གང་ཞིག་ཆགས་པར་བྱ་བར་མ་ནུས་ཤིང ། །གང་ཞིག་ཆགས་ལས་རྣམ་པར</font><hr>42-1-11b<br><font size=+2>
འདས་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །མཚོན་རྣོན་འདྲ་བའི་ངག་རྩུབ་ཚིག་རྣམས་ཀྱིས། །གང་ཞིག་ཁྲོ་བར་བྱ་བར་མ་ནུས་ཤིང ། །ཞེ་སྡང་དངོས་པོ་ལས་ནི་རབ་འདས་པ། །དེ་ལ་མཁས་པ་སུ་ཞིག་ཡིད་མི་ཆེས། །ཆགས་པར་འགྱུར་དང་ཞེ་སྡང་
རྨོངས་འགྱུར་བས། །གང་ཞིག་ཐུལ་བར་ནུས་པར་མ་གྱུར་ཏེ། །ཤེས་རབ་རྒྱལ་པོ་དང་ནི་ལྡན་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །འདོད་པའི་དགའ་དང་བདེ་རྣམས་དུ་མ་དང ། །ལོངས་སྤྱོད་དག་ལ་རྟོག་པའི་རྣམ་པ་ཡིས། །གང་ཞིག་བཅིང་བར་ནུས་
པར་མ་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །རྨད་དུ་བྱུང་བ་རྣམ་པ་བརྒྱད་དག་གིས། །ངོ་མཚར་འཛིན་གཞུག་ནམ་ཡང་མ་ནུས་ཏེ། །དཔལ་སྟུག་ལྡན་ཞིང་རྟག་ཏུ་མི་ངམ་པ། །དེ་ལ་མཁས་པ་སུ་ཞིག་ཡིད་མི་ཆེས། །མཁས་པ་དག་གིས་བརྗོད་པའི་
ཚིག་སྙན་པ། །རྣམ་པ་སྣ་ཚོགས་དུ་མའི་ཚིག་གིས་ཀྱང ། །གང་ཞིག་བཅིང་བར་ནུས་པར་མ་གྱུར་པ། །དེ་ལ་མཁས་པ་སུ་ཞིག་ཡིད་མི་ཆེས། །དོན་གྱི་ཚུལ་ལ་བརྩོན་དང་ལྡན་པ་དང ། །ཆོས་དད་འདོད་ལ་ངེས་པའི་ཚིག་རྣམས་ཀྱིས། །གང་ཞིག་བཅིང་བར་ནུས་པར་
མ་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །དྲི་མ་མེད་སྟོབས་མཐའ་ཡས་ལྡན་གྱུར་པ། །གང་ཞིག་གྲོང་ཁྱེར་མཆོག་ནས་འབྱུང་བའི་ཚེ། །དཔུང་རྣམས་ཀྱིས་ནི་ཐུབ་པར་མ་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །བྱང་ཆུབ་དམ་པ་མངོན་པར་བཞེད་
པའི་ཕྱིར། །གང་ཞིག་འདོད་པའི་བདེ་བ་སྤངས་ནས་སུ། །འཆི་མེད་རྒྱུ་ཕྱིར་རི་དགས་སྤྱོད་མཛད་པ། །དེ་ཡི་གསུང་ལ་སུ་ཞིག་ཡིད་མི་ཆེས། །བྱང་ཆུབ་དམ་པ་མངོན་པར་བཞེད་པའི་ཕྱིར། །ཞེན་པ་མ་ཡིན་སེམས་ཅན་གང་ཞིག་གིས། །ལོ་དྲུག་བར་དུ་དཀའ་ཐུབ་དྲག་སྤྱད་པ། །དེ་ཡི་
གསུང་ལ་སུ་ཞིག་ཡིད་མི་ཆེས། །འཇིག་རྟེན་ལ་ནི་ཕན་དང་བདེ་བའི་ཕྱིར། །བྱང་ཆུབ་དམ་པ་དོན་དུ་གཉེར་བ་ན། །ལོ་དྲུག་ལོན་པའི་ཐ་མར་ཚོད་ཁུ་གསོལ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ལ་ལོ་དྲུག་བར་དུ་བདུད་ཀྱིས་ནི། །རྟག་ཏུ་ཕྱི་བཞིན་འབྲོངས་ཏེ་གླགས་བཙལ་ཀྱང ། །


</font><hr>42-1-12a<br><font size=+2>
དེ་ལ་གླགས་ནི་རྙེད་པར་མ་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་འདོད་ཆགས་ཞེ་སྡང་བྲལ་གྱུར་ཅིང ། །སུ་ལ་ཅུང་ཟད་ཙམ་ཡང་མི་སློང་ལ། །འཇིག་རྟེན་དག་གི་དོན་ནི་མཛད་གྱུར་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་
གཞན་ལ་གསན་པ་མ་མཛད་པར། །རྟོགས་པར་དཀའ་བ་རབ་ཏུ་ཞི་བ་ཡི། །བྱང་ཆུབ་བླ་མེད་མངོན་རྫོགས་སངས་རྒྱས་པ། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་ཚངས་པ་ཉིད་ཀྱིས་གསོལ་བཏབ་པས། །བཅོམ་ལྡན་འདས་ཀྱིས་དེ་ཡི་ཚིག་གསན་ཏེ། །ཉིད་ཀྱིས་
ཆོས་ནི་རབ་ཏུ་བཤད་པ་ན། །དེ་ཡི་གསུང་ལ་སུ་ཞིག་ཡིད་མི་ཆེས། །གང་ཞིག་བདག་ལ་ཐུགས་བརྩེ་དོན་གྱི་ཕྱིར། །ཤཱཀྱའི་གྲོང་ཁྱེར་ཁྱིམ་དུ་བྱོན་གྱུར་ཏེ། །ཤཱཀྱའི་ཚོགས་རྣམས་གྲོལ་བར་མཛད་པ་ན། །དེ་ཡི་གསུང་ལ་སུ་ཞིག་ཡིད་མི་ཆེས། །རྒལ་བར་གྱུར་པའི་བཅོམ་ལྡན་འདས་གང་
གིས། །སྔོན་གྱི་ཐུགས་དམ་བཅས་པ་དགོངས་མཛད་དེ། །བདག་ཅག་སྲིད་པའི་རྒྱུན་ལས་སྒྲོལ་མཛད་ན། །དེ་ཡི་གསུང་ལ་སུ་ཞིག་ཡིད་མི་ཆེས། །དེ་དུས་ད་བབ་དེ་ལྟར་དུས་མཁྱེན་པས། །བཅོམ་ལྡན་འདས་ཀྱིས་དེ་ཡི་དུས་མཁྱེན་ཏེ། །འདྲེན་པ་དུས་སུ་ཐུགས་བརྩེ་མཛད་པ་པོ། །དེ་ཡི་
གསུང་ལ་སུ་ཞིག་ཡིད་མི་ཆེས། །མི་ཡི་འདྲེན་པ་ཡི་ནི་སྐུ་མཆོག་ལ། །བལྟ་བའི་དོན་དུ་བདག་ནི་འགྲོ་བྱ་ཞེས། །རྒྱལ་པོ་དེས་ནི་རང་གི་སེམས་ཀྱིས་སུ། །དེ་སྙམ་དུ་ནི་རྗེས་སུ་བསམ་པ་བྱས། །དེ་ནས་རྒྱལ་པོ་ཟས་གཙང་མས་དེ་ལྟར་རིང་ཞིག་ཏུ་རྗེས་སུ་བསམས་ནས། ཚེ་དང་ལྡན་པ་
འཆར་ཀ་ལ་སྨྲས་པ། དགེ་སློང་ཁྱོད་ལ་ཅི་ཞིག་དགོས། དེ་སྐད་ཅེས་སྨྲས་པ་དང ། ཚེ་དང་ལྡན་པ་འཆར་ཀས་རྒྱལ་པོ་ཟས་གཙང་མ་ལ་ཚིགས་སུ་བཅད་དེ་སླར་སྨྲས་པ། རྒྱལ་པོ་ཁྱོད་ཀྱི་དོན་དུ་བསམ་བྱས་ཏེ། །ཁྱོད་ཉིད་དད་པར་བྱ་ཕྱིར་བདག་འདིར་འོངས། །སྟོབས་བཅུ་མངའ་ལ་དད་པའི་
སེམས་བསྐྱེད་ན། །སྐྱེས་པ་བུད་མེད་དག་ཀྱང་མཐོ་རིས་འདོང ། །སྟོབས་བཅུ་མངའ་ཞིང་ཡོན་ཏན་ཚད་མེད་ལྡན། །དྲང་སྲོང་ཆེན་པོ་ཤཱཀྱ་དགའ་མཛད་པ། །འདིར་བྱོན་རྒྱལ་པོ་ཐུགས་དད་སྐྱེད་ཅིག་དང ། །ཁྱོད་ཀྱི་གྲགས་པ་ཚད་མེད་འཇིག་རྟེན་འབྱུང ། །ཁྱོད་ཀྱི་སྲས་ནི་མི་དབང་དམ</font><hr>42-1-12b<br><font size=+2>
པ་སྟེ། །སྟོབས་བཅུ་ཐུགས་རྗེ་ཐུགས་བརྩེ་ཆེ་མངའ་བ། །ཆུ་ཁྲོད་པད་མ་ཇི་བཞིན་ཆགས་མེད་པར། །སྟོབས་བཅུ་ཆགས་མེད་ཐུགས་མངའ་སྤྱོད་པ་མཛད། །སྲིད་པའི་ཆུ་བོ་བཞི་ལས་རྒལ་གྱུར་ནས། །འགྲོ་བ་མང་པོ་ཆུ་བོ་ཆེ་ལས་སྒྲོལ། །རྐང་གཉིས་གཙོ་བོ་མི་འཇིགས་ཐང་
འདོན་གྱིས། །འདྲེན་པ་མི་མཆོག་ལ་ནི་དད་པ་སྐྱེད། །སྲིད་པའི་ཟུག་རྔུ་བཞི་པོ་ཀུན་བཏོན་ཏེ། །སྨན་པའི་གཙོ་བོ་སྐྱེ་དགུའི་ཟུག་རྔུ་འབྱིན། །གསོ་བ་བྱེད་པ་མཁས་པ་དམ་པའི་མཆོག་།འདྲེན་པ་མི་མཆོག་ལ་ནི་དད་པ་སྐྱེད། །བདུད་ཀྱི་སྡེ་ཆེན་དཔག་མེད་ཕམ་མཛད་དེ། །ནག་
པོའི་ཕྱོགས་རྣམས་སྡེར་བཅས་ཡོངས་མནན་ནས། །མཆོག་ཏུ་ཞི་བའི་བྱང་ཆུབ་བརྙེས་གྱུར་གྱིས། །འདྲེན་པ་མི་མཆོག་ལ་ནི་དད་པ་སྐྱེད། །འགྲོ་བ་དགྲོལ་ཞིང་ཆོས་ཀྱང་བསྟན་པ་དང ། །འཆི་མེད་ཞི་བ་མི་ལ་བཤད་གསོལ་ཞེས། །མི་དབང་ལ་ནི་ལྷ་དབང་གསོལ་འདེབས་ཀྱིས། །འདྲེན་པ་
མི་མཆོག་ལ་ནི་དད་པ་སྐྱེད། །ཕས་ཀྱི་རྒོལ་བའི་ཚོགས་རྣམས་ཟིལ་མནན་ཏེ། །སྟོན་པ་དཔག་ཡས་འཁོར་ལོ་རབ་བསྐོར་ནས། །སེམས་ཅན་བྱེ་བ་ཚད་མེད་འདུལ་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །རྣམ་དག་སྤྱན་མངའ་དེ་ནི་འགྲོ་བ་དག་།མུན་པ་རབ་
རིབ་སྟུག་པོས་བསྒྲིབས་པ་ཡི། །མིག་སྦྱོང་རབ་རིབ་སེལ་ཅིང་གསལ་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །རྒ་དང་འཆི་བའི་འཇིགས་པས་ཉོན་མོངས་ལ། །རྒ་ཤི་མེད་མཆོག་མི་ལ་སྟོན་མཛད་ཅིང ། །འཆི་མེད་གནས་སུ་སེམས་ཅན་འདོན་མཛད་ཀྱིས། །འདྲེན་
པ་མི་མཆོག་ལ་ནི་དད་པ་སྐྱེད། །མེ་ཆེན་གསུམ་གྱིས་བསྲེགས་པའི་འཇིག་རྟེན་འདི། །མེས་ཚིག་ས་ལ་སྤྲིན་ཆེན་ཆར་པ་བཞིན། །བཞི་གཉིས་དམ་པའི་སྤྲིན་གྱི་ཆར་འབེབས་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །དྲི་གསུམ་དྲི་མ་སྤངས་ཤིང་སྐྱོན་བསལ་ཏེ། །དྲི་
མ་གསུམ་ལས་སྐྱེ་བོ་འགྲོལ་མཛད་ཅིང ། །སྟོབས་བཅུ་རྣམ་པར་སྣང་བ་སྐྱེད་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །སྐྱེ་དགུ་ཀུན་ལ་ཕ་བཞིན་ཐུགས་བརྩེ་བས། །སྟོབས་བཅུ་ཐུགས་རྗེ་མངའ་བ་བྱམས་པར་དགོངས། །ཐུགས་རྗེ་ཐུགས་བརྩེས་སེམས་ཅན་འགྲོལ</font><hr>42-1-13a<br><font size=+2>
མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །བཅོམ་ལྡན་དེ་ནི་མ་དུལ་སེམས་ཅན་འདུལ། །ཐུགས་རྗེ་མངའ་བ་མ་ཞི་ཞི་མཛད་ཅིང ། །རྒོད་པ་རྣམས་ཀྱང་ཉོན་མོངས་ཞི་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །སྐྱེ་བོ་རྣམས་ཀྱི་སྲིད་
པའི་རྒྱ་མཚོ་སྐེམས། །རྒྱ་མཚོ་ལས་ནི་ལྷ་བུས་ཇི་ལྟ་བར། །སྟོབས་བཅུ་ཐུགས་རྗེ་ཆེ་མངའ་སྒྲོལ་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །ཚད་མེད་ཡོན་ཏན་ཚོགས་ཀྱིས་མཛེས་གྱུར་པ། །ཐུགས་རྗེ་ཆེན་པོ་དད་པའི་ཐུགས་ཀྱིས་སྤྱོད། །ཡུན་རིང་འཁྲུགས་
པའི་སྐྱེ་བོ་དད་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །ནོར་བུ་རིན་ཆེན་ཆུ་དང་བྱེད་པ་བཞིན། །རྒྱལ་བ་སྐྱེ་བོ་དང་བར་སྤྱོད་མཛད་ཅིང ། །མི་ཡི་འཐབ་རྙོག་རབ་ཏུ་དང་མཛད་ཀྱིས། །འདྲེན་པ་མི་མཆོག་ལ་ནི་དད་པ་སྐྱེད། །ནོར་བུ་རིན་ཆེན་རང་བཞིན་ཡོངས་
དག་པ། །མཁས་པའི་སྐྱེ་བོ་དགའ་བ་ཡོངས་སུ་སྐྱེད། །རྒྱལ་བ་དེ་བཞིན་སྐྱོན་བསལ་དག་པའི་ཐུགས། །མཁས་པའི་སྐྱེ་བོ་དགའ་བ་ཡོངས་སུ་སྐྱེད། །འཇིག་རྟེན་གཙོ་ལ་དད་པ་ཐོབ་གྱུར་ན། །ལྷ་དང་མི་དག་སྡུག་བསྔལ་ཁུར་ཡང་འདོར། །སྲིད་པའི་རྒྱུད་སྤངས་ཞི་བ་མཆོག་
ཏུ་འདོད། །འདྲེན་པ་མི་མཆོག་ལ་ནི་དད་པ་སྐྱེད། །བདག་གིས་ཡོན་ཏན་ཕྱོགས་གཅིག་བརྗོད་པ་ནི། །ནམ་མཁའི་དབྱིངས་ལ་མཁའ་ལྡིང་རྗེས་བཞིན་ཏེ། །བདག་ནི་རྒྱལ་བའི་ཡོན་ཏན་མཐར་ཕྱིན་མིན། །འདྲེན་པ་མི་མཆོག་ལ་ནི་དད་པ་སྐྱེད། །དེ་ནས་རྒྱལ་པོ་ཟས་གཙང་
མས་ཚེ་དང་ལྡན་པ་འཆར་ཀ་ལས་ལེགས་པར་བཤད་པ་ཡང་ཐོས། བཅོམ་ལྡན་འདས་བྱང་ཆུབ་སེམས་དཔའ་མཛད་པའི་ཡོན་ཏན་དེ་ལྟ་བུ་ཡང་ཉིད་ཀྱིས་མངོན་དུ་མཐོང ། སྔོན་བདག་རྒལ་ནས་སྐྱེས་བུ་ཁྱུ་མཆོག་ཁྱོད་ཀྱང་བསྒྲལ་བར་བགྱིའོ། །ཞེས་དམ་བཅས་པ་ཡང་རྗེས་
སུ་དྲན་ནས་དེའི་ཚེ་བཅོམ་ལྡན་འདས་ལ་དད་པ་ཐོབ་པར་གྱུར་ཏོ། །དེ་ལྟར་དད་པ་ཐོབ་པའི་སེམས་ཀྱིས་ཚེ་དང་ལྡན་པ་འཆར་ཀ་ལ་འདི་སྐད་ཅེས་སྨྲས་སོ། །དགེ་སློང་ཁྱོད་ནི་ངའི་བུའི་ཆོས་ལས་སྐྱེས་པའི་བུ་ཡིན་ན། ཁྱོད་བདག་ཟན་ཟོ་ལ་བཅོམ་ལྡན་འདས་ཀྱི་བཤོས་ཁྱེར་ཏེ་སོང་ཤིག་།


</font><hr>42-1-13b<br><font size=+2>
ང་ཡང་བཅོམ་ལྡན་འདས་ལ་བལྟ་བའི་ཕྱིར་ཕྱི་བཞིན་འོང་ངོ ། །དེ་ནས་ཚེ་དང་ལྡན་པ་འཆར་ཀས་དེ་ལྟར་རྒྱལ་པོ་ཟས་གཙང་མ་མངོན་པར་དད་པར་བྱས་ནས་ཟན་ཟོས་ཏེ་བཅོམ་ལྡན་འདས་ཀྱི་བཤོས་ཁྱེར་ནས་སོང་ངོ ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། 
དགེ་སློང་དག་རྒྱལ་པོ་ཟས་གཙང་མ་ནི་དགེ་སློང་འཆར་ཀས་དད་པར་བྱས་ཏེ། དེང་སྐྱེ་བོ་ཕལ་པོ་ཆེའི་དོན་དུ་འགྱུར་རོ། །དེ་ནས་ཚེ་དང་ལྡན་པ་འཆར་ཀ་བཅོམ་ལྡན་འདས་ཀྱི་བཤོས་ཁྱེར་ཏེ། བཅོམ་ལྡན་འདས་ག་ལ་བ་དེར་སོང་ནས་བདག་གིས་བྱས་པ་རྣམས་བཅོམ་ལྡན་འདས་ལ་གསོལ་
ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འཆར་ཀ་ལ་ལེགས་སོ་ཞེས་བྱ་བ་གནང་སྟེ། འཆར་ཀ་ལེགས་སོ་ལེགས་སོ། །དེ་རིང་རྒྱལ་པོ་ཟས་གཙང་མ་དད་པར་བྱས་པས་ཁྱོད་ཀྱིས་བསོད་ནམས་མང་དུ་བསྐྱེད་དོ། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། 
དགེ་སློང་དག་དེ་རིང་དགེ་སློང་འཆར་ཀས་རྒྱལ་པོ་ཟས་གཙང་མ་མངོན་པར་དད་པར་བྱས་པའི་བསོད་ནམས་ཀྱི་ཕུང་པོ་བསྐྱེད་པ་དེ་ལ། གལ་ཏེ་གཟུགས་ཤིག་ཡོད་ན་ནི་ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་སུ་ཡང་བསོད་ནམས་ཀྱི་ཕུང་པོ་དེ་
མི་ཤོང་སྟེ། བསོད་ནམས་ཀྱི་ཕུང་པོ་དེ་ནི་དེ་ཙམ་དུ་དཔག་ཏུ་མེད་དོ།། །།བམ་པོ་གཉིས་པ། དེ་ནས་བཅོམ་ལྡན་འདས་བཤོས་གསོལ་ནས་ཕྱག་བཅབས་ལྷུང་བཟེད་བཀྲུས་ཏེ། མཚན་མའི་རྣམ་པ་འདི་ལྟ་བུ་མཛད་དོ། །མཚན་མའི་རྣམ་པ་དེ་ལྟ་བུ་
མཛད་པས་རྒྱལ་པོ་ཆེན་པོ་རྣམ་ཐོས་ཀྱི་བུ་གནོད་སྦྱིན་བྱེ་བ་ཁྲག་ཁྲིག་བརྒྱ་སྟོང་གིས་ཡོངས་སུ་བསྐོར་ཅིང་མདུན་དུ་བདར་ནས་འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པས་ལག་པ་བསྐུམ་པ་ལས་བརྐྱང་བའམ།བརྐྱང་པ་ལས་བསྐུམ་པ་ཙམ་གྱིས་རྒྱལ་པོ་ཆེན་པོ་རྣམ་ཐོས་ཀྱི་
བུ་རང་གི་གནས་ནས་མི་སྣང་བར་གྱུར་ནས་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བྱང་ཕྱོགས་སུ་བརྟེན་ཏེ། སྟེང་གི་བར་སྣང་ལ་གནོད་སྦྱིན་གྱི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ</font><hr>42-1-14a<br><font size=+2>
ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་ཡུལ་འཁོར་སྲུང་ཡང་དྲི་ཟ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ། དེས་
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཤར་ཕྱོགས་ལོགས་སུ་བརྟེན་ཏེ། སྟེང་གི་བར་སྣང་ལ་དྲི་ཟའི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་འཕགས་སྐྱེས་པོ་ཡང་
གྲུལ་བུམ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ཏེ།དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ལྷོ་ཕྱོགས་ལོགས་སུ་བརྟེན་ཏེ།སྟེང་གི་བར་སྣང་ལ་གྲུལ་བུམ་
གྱི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །རྒྱལ་པོ་ཆེན་པོ་མིག་མི་བཟང་ཡང་ཀླུ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང ། མདུན་དུ་བདར་ནས་སྔ་མ་བཞིན་དུ་བཅོམ་ལྡན་འདས་
ཀྱི་སྤྱན་སྔར་འདུག་པར་གྱུར་ཏེ། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ནུབ་ཕྱོགས་ལོགས་སུ་བརྟེན་ཏེ། སྟེང་གི་བར་སྣང་ལ་ཀླུའི་ཚོགས་ཀྱིས་བསྐོར་ནས་ཐལ་མོ་སྦྱར་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །ལྷའི་
དབང་པོ་བརྒྱ་བྱིན་ཡང་སུམ་ཅུ་རྩ་གསུམ་རིས་ཀྱི་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མས་ཡོངས་སུ་བསྐོར་ཅིང་མདུན་དུ་བདར་ནས་སྔ་མ་བཞིན་དུ་སྟེང་གི་བར་སྣང་ལ་ཐལ་མོ་སྦྱར་ཏེ། བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །དེ་བཞིན་དུ་
ལྷའི་རྒྱལ་པོ་རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དགའ་དང ། ལྷའི་རྒྱལ་པོ་གཞན་འཕྲུལ་དབང་བྱེད་དང ། མི་མཇེད་ཀྱི་བདག་པོ་ཚངས་པ་དང ། ལྷའི་རྒྱལ་པོ་འོད་གསལ་དང ། དགེ་རྒྱས་དང ། འབྲས་བུ་ཆེ་དང ། གནས་གཙང་མའི་རིས་ཀྱི</font><hr>42-1-14b<br><font size=+2>
ལྷའི་བུ་རྣམས་ཀྱང་གནས་གཙང་མའི་ལྷའི་རིས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། སྟེང་གི་བར་སྣང་ལ་རེ་རེ་ཞིང་ཡང་གཡོག་ལྷའི་བུ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ལྷན་ཅིག་ཏུ་
བཅོམ་ལྡན་འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །ལྷ་མ་ཡིན་གྱི་དབང་པོ་ཐགས་ཟངས་རིས་ཀྱང་ལྷ་མ་ཡིན་ཁྲག་ཁྲིག་ཕྲག་དྲུག་ཅུ་དང་ལྷན་ཅིག་ཏུ་འདི་ལྟ་སྟེ། དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་
བ་ལས་བསྐུམ་པ་ཙམ་གྱིས་ལྷ་མ་ཡིན་གྱི་དབང་པོ་ཐགས་ཟངས་རིས་ལྷ་མ་ཡིན་གྱི་གནས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འདུག་པར་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ།བཅོམ་ལྡན་འདས་དང་དགེ་སློང་གི་དགེ་
འདུན་ལ་མཆོད་ཅིང་འདུག་པར་གྱུར་ཏོ། །བྱའི་རྒྱལ་པོ་འདབ་བཟངས་བརྒྱད་ཁྲི་དྲུག་སྟོང་ཡང་རང་རང་གི་གནས་ནས་མི་སྣང་བར་གྱུར་ཏེ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་
འདས་དང་དགེ་སློང་གི་དགེ་འདུན་ལ་མཆོད་ཅིང་འདུག་པར་གྱུར་ཏོ། །གཞན་མུ་སྟེགས་ཅན་ཀུན་ཏུ་རྒྱུ་རྒྱལ་པོའི་ཁམས་ཐ་དད་པ་ནས་ལྷགས་པ་བྱེ་བ་ཕྲག་བརྒྱད་ཅུ་ཡང་འདུས་པར་གྱུར་ཏོ། །དེ་ལ་འདི་སྐད་ཅེས་བྱ་སྟེ། ནམ་མཁའ་ཡོངས་སུ་དག་པའི་དབྱིངས་དཀྱིལ་དུ། །མ་
ལུས་རྫོགས་གྱུར་ཟླ་བ་ཉ་བ་ཡིས། །སྐར་མའི་ཚོགས་རྣམས་ཟིལ་གྱིས་མནན་ནས་ནི། །ནམ་མཁར་ཟླ་བ་བཞིན་དུ་རྣམ་པར་མཛེས། །ཟླ་བ་དྲི་མེད་དཀྱིལ་འཁོར་ཞལ་མངའ་བ། །མུན་པ་རབ་རིབ་སེལ་ཅིང་དྲི་གསུམ་འཇོམས། །རྟོག་གེ་ཅན་ཚོགས་ཟིལ་གྱིས་མནན་ནས་
ནི། །མཁའ་ལ་སྐར་མའི་བདག་པོ་བཞིན་དུ་མཛེས། །ཉི་མ་འོད་ཟེར་བརྒྱ་ཡི་ལུས་འཛིན་པ། །སྟོན་གྱི་དུས་ན་མུན་སེལ་རྣམ་མཛེས་ཤིང ། །ལྷ་མིན་ཚོགས་རྣམས་ཟིལ་གྱིས་མནན་ནས་ནི། །ཉི་མ་དེ་ནི་པད་མའི་ཁ་ཡང་འབྱེད། །ཉི་མའི་འོད་ཟེར་བརྒྱ་འདྲའི་སྐུ་མངའ་བས། །


</font><hr>42-1-15a<br><font size=+2>
སྟོང་གསུམ་པོ་དག་ཟིལ་གྱིས་མནན་ནས་ནི། །མི་ཡི་ཉི་མ་རྣམ་པར་མཛེས་གྱུར་ཅིང ། །ཉན་ཐོས་པད་མའི་ཚལ་མཆོག་ཁ་ཡང་འབྱེད། །ལྷ་ཡི་རྒྱལ་པོ་དབང་པོ་བརྒྱ་བྱིན་ནི། །མདུན་སར་ལྷ་ཡི་ཚོགས་ཀྱིས་ཡོངས་བསྐོར་བ། །ལྷ་ཡི་འཁོར་
རྣམས་ཟིལ་གྱིས་མནན་ནས་ནི། །བདེ་སོགས་ཁྱིམ་ཐབ་སྦྱིན་ལྡན་རྣམ་པར་མཛེས། །རྐང་གཉིས་དབང་པོ་དཔལ་སྟུག་སྟོབས་བཅུ་ཡང ། །དགེ་སྦྱོང་ཚོགས་ཀྱིས་མདུན་བདར་སྟོང་གསུམ་ན། །རྟོག་གེའི་ཚོགས་རྣམས་ཟིལ་གྱིས་མནན་ནས་ནི། །དགེ་སྦྱོང་ཚོགས་ཀྱི་
དབུས་ན་རྣམ་པར་མཛེས། །ལྷ་ཡི་དབང་པོ་འཐབ་བྲལ་དབང་བྱེད་པ། །འཐབ་བྲལ་བཟང་པོ་ལྷས་མཆོད་བཙུན་བྱས་པ། །འཐབ་བྲལ་བཟང་པོ་ལྷ་ཚོགས་ནང་ཞུགས་ཏེ། །འཐབ་བྲལ་རྣམས་ཀྱི་ནང་ན་འདུག་པ་མཛེས། །གཟི་བརྗིད་མཐའ་ཡས་སྟོབས་བཅུ་མངའ་བ་
ཡང ། །ལམ་ངན་ངན་འགྲོར་འདོང་པ་ཟིལ་མནན་ནས། །ཡན་ལག་བརྒྱད་པ་རབ་ཏུ་སྟོན་མཛད་ཅིང ། །སྟོབས་བཅུ་ཡོན་ཏན་རྣམས་ཀྱིས་རབ་ཏུ་མཛེས། །ལྷ་ཡི་རྒྱལ་པོ་ཡོངས་སུ་དགའ་ལྡན་དེ། །དགའ་ལྡན་གནས་ན་ལྷ་ཡི་ཚོགས་ཀྱིས་བསྐོར། །ལྷ་
ཚོགས་མང་པོ་ཟིལ་གྱིས་མནན་ནས་ནི། །སྔོན་གྱི་དགེ་བའི་རྩ་བས་རབ་ཏུ་མཛེས། །དེ་བཞིན་ལྷ་དང་ལྷ་མིན་བླ་མ་ཡང ། །ལྷ་དང་ལྷ་མིན་ཚོགས་ཀྱིས་བླ་མར་བྱས། །འཁོར་བརྒྱད་པོ་དག་ཟིལ་གྱིས་མནན་ནས་ནི། །སྐྱེས་བུ་སེང་གེ་དམ་པ་འཇིག་རྟེན་མཛེས། །ལྷ་
ཡི་དབང་པོ་བདག་པོ་རབ་འཕྲུལ་ནི། །ལྷ་ཚོགས་མང་པོ་ཟིལ་གྱིས་མནན་ནས་སུ། །རང་གི་བསོད་ནམས་མཐུ་ཡིས་ལྷ་གནས་ན། །གནས་ཤིང་དེ་ནི་རབ་ཏུ་རྣམ་པར་མཛེས། །དེ་བཞིན་ཉོན་མོངས་རྣམས་ལས་རྣམ་གྲོལ་ཞིང ། །སྟོབས་བཅུ་མངའ་བ་ཉོན་མོངས་བྲལ་བ་པོ། །
མ་དུལ་འདུལ་མཛད་འདུལ་བའི་རྒྱལ་པོ་ཡང ། །སྐྱེ་བོ་ཟིལ་གྱིས་མནན་ནས་རྣམ་པར་མཛེས། །ལྷ་ཡི་རྒྱལ་པོ་དབང་སྒྱུར་བྱེད་པ་ནི། །ལྷ་གནས་འདུག་ཅིང་ལྷ་ཚོགས་ཟིལ་མནན་ཏེ། །སྔོན་གྱི་དགེ་བའི་རྩ་བའི་གཟི་བརྗིད་ཀྱིས། །རྣམ་པར་མཛེས་པར་གྱུར་པ་ཇི་བཞིན་དུ། །


</font><hr>42-1-15b<br><font size=+2>
དེ་ལྟར་རྒྱལ་བ་སྟོབས་བཅུའི་སྤྱོད་པ་དག་།སྔོན་ཆད་སྤྱད་པས་ལྷ་མི་ཟིལ་མནན་ཏེ། །སྔོན་གྱི་དགེ་བའི་རྩ་བའི་གཟི་བརྗིད་ཀྱིས། །རྒྱལ་པོ་དེ་ནི་རབ་ཏུ་རྣམ་པར་མཛེས། །ཚངས་པའི་འཇིག་རྟེན་ན་ནི་ཚངས་པ་ཡང ། །ཚངས་པའི་འཁོར་རྣམས་རང་གིས་ཟིལ་མནན་ཏེ། །
ཤིན་ཏུ་སྙན་པ་ཡན་ལག་བརྒྱད་ལྡན་དག་།ཡོངས་སུ་རྗོད་པར་བྱེད་ཅིང་མངོན་དུ་མཛེས། །དེ་ལྟར་རྒྱལ་བ་ཚངས་པ་འདྲར་གྱུར་པ། །དགེ་སྦྱོང་རྒྱལ་པོ་དགེ་སྦྱོང་ཚོགས་རྣམས་ཀྱིས། །མདུན་དུ་བདར་ཏེ་བདེན་པའི་གཏམ་གསུང་ཞིང ། །འཇིག་རྟེན་གསུམ་པོ་དག་ན་མངོན་
པར་མཛེས། །ཉན་པར་འདོད་པ་ལྷ་དང་མི་རྣམས་དང ། །ལྟོ་འཕྱེ་ཆེན་པོ་དག་ནི་འདུས་མཁྱེན་ནས། །སྐྱེས་བུ་ཁྱུ་མཆོག་ཡན་ལག་བརྒྱད་ལྡན་གྱི། །གསུང་རྣམས་ཀྱིས་ནི་རབ་ཏུ་སྟོན་པར་མཛད། །བྱ་ལམ་ནམ་མཁའ་དཔག་པར་ནུས་ཀྱང་སྲིད། །རྒྱ་མཚོ་བུམ་པས་
གཞལ་དུ་རུང་ཡང་སྲིད། །རི་རབ་སྲང་བརྒྱར་གཞལ་དུ་རུང་ཡང་སྲིད། །སངས་རྒྱས་ཡོན་ཏན་མཐའ་རྟོགས་མི་ནུས་སོ། །རྒྱལ་པོ་མངོན་པར་དད་པར་བྱས་པའི་ལེའུ་སྟེ་དང་པོའོ།། །།དེ་ནས་ཚེ་དང་ལྡན་པ་འཆར་ཀ་སོང་ནས་རིང་པོ་མ་ལོན་པར་
རྒྱལ་པོ་ཟས་གཙང་མས་ཤཱཀྱ་རྣམས་ལ་བསྒོ་བ། གྲོགས་པོ་དག་འདི་ལྟ་སྟེ། དཔེར་ན་ཉི་མ་འཆར་བའི་སྔ་ལྟས་ནི་གང་འདི་དམར་རིང་འཆར་བའོ། །དམར་རིང་ཤར་ན་ཉི་མ་འཆར་བར་ཤེས་སོ། །གྲོགས་པོ་དག་དེ་བཞིན་དུ་དགེ་སློང་འཆར་ཀ་ཡང་བཅོམ་ལྡན་འདས་
ཐམས་ཅད་མཁྱེན་པའི་སྔ་ལྟས་ཡིན་ཏེ། དགེ་སློང་འཆར་ཀས་ཡོན་ཏན་གང་བརྗོད་པ་དེ་དག་ནི་ངེས་པར་ཐམས་ཅད་མཁྱེན་པའི་ཡོན་ཏན་ཡིན་ནོ། །གྲོགས་པ་དག་དེ་ལྟ་བས་ན་བཞོན་པའི་མཆོག་རྣམས་སྟོང་དེ་སྟ་གོན་གྱིས་ཤིག་།དེ་ཅིའི་ཕྱིར་ཞེ་ན། དེ་རིང་ཁོ་ན་བདག་ཅག་བཅོམ་
ལྡན་འདས་མཆོག་ཏུ་བལྟ་ན་སྡུག་པ་དེ་ལྟ་ཞིང་འདོང་ངོ ། །ལྷ་ལེགས་སོ་ཞེས་གསོལ་ནས་ཤཱཀྱ་རྣམས་ཀྱིས་རྒྱལ་པོ་ཟས་གཙང་མའི་ལྟར་མཉན་ཏེ། ཐེག་པའི་མཆོག་རྣམས་མྱུར་དུ་བསྟད་དོ། །དེའི་ཚེ་རྒྱལ་པོ་ཟས་གཙང་མས་སེར་སྐྱའི་གནས་དང ། ནྱ་གྲོ་དྷའི་ཀུན་དགའ་ར་བའི</font><hr>42-1-16a<br><font size=+2>
བར་དེ་དག་ཐམས་ཅད་རྒྱལ་པོའི་གཤེགས་ཤུལ་དུ་མཉམ་པར་བྱེད་དུ་བཅུག་ཅིང་བྱེ་མ་གཙང་མ་བདལ་དུ་བཅུགསྟེ། ཉམས་དགའ་བ་དང ། མེ་ཏོག་སིལ་མས་གང་བ་དང ། དར་གྱི་ལྡ་ལྡི་དང ། ཕྲེང་བ་མང་པོས་བརྒྱན་ཏེ། སྐབས་སྐབས་སུ་གར་མཁན་དང་།
གླུ་མཁན་དང ། གྱད་དང ། བུམ་རྔ་ཐོགས་པ་དང ། སིལ་སྙན་དང ། རོལ་མོ་དང ། གླུའི་ཆ་སྤྱད་དང ། ཡོ་བྱད་ཐམས་ཅད་ཐོགས་པ་དག་བཀོད་པར་གྱུར་ཏོ། །དེ་ནས་རྒྱལ་པོ་ཟས་གཙང་མ་བཞོན་པའི་མཆོག་དང་ཆས་པ་རྣམས་དང ། བདག་ཉིད་ཀྱང་བཞོན་པའི་མཆོག་ལ་ཞོན་
ཏེ། སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་བྱུང་ནས་ནྱ་གྲོ་དྷའིཀུན་དགའ་ར་བ་ག་ལ་བ་དེར་སོང་ངོ ། །དེའི་ཚེ་ཤཱཀྱ་ལ་ལའི་བཞོན་པའི་མཆོག་ནི་རྣམ་པ་འདི་ལྟ་བུ་སྟེ། འདི་ལྟར་ཤིང་རྟ་དག་ཀྱང་ཐམས་ཅད་སྔོ་ལ་རྟ་སྔོན་པོ་རྣམས་ཀྱིས་དྲངས་ཤིང ། རྒྱན་རྣམས་ཀྱང་སྔོ་ལ་དྲིལ་
བུ་གཡེར་ཀའི་དྲ་བས་བརྒྱན་པ། འཁོར་རྒྱན་སྔོན་པོ་ཅན་གྱིས་བསྐོར་བ། གདུགས་དང ། རལ་གྲི་དང ། ཐོད་དང ། ནོར་བུ་ཅན་གྱི་རྔ་ཡབ་དང ། ལྷམ་རྒྱན་ཅན་སྔོན་པོ་དང་ལྡན་པ། ཁ་ཚར་མ་བཅད་པའི་རས་སྔོན་པོ་གྱོན་ཞིང་རྒྱན་སྔོན་པོ་ཐོགས་པའི་ཞལ་ཏ་བ་
རྣམས་ཞལ་ཏ་བྱེད་པ། རྒྱན་སྔོན་པོ་ཅན་གྱི་ལྕག་ཐོགས་པ་དང ། ཁྲིད་པ་དུ་མ་དང་ལྡན་པ། རྒྱལ་མཚན་སྔོན་པོ་བསྒྲེང་བ་ཤ་སྟག་སྟེ། ཤིང་རྟ་རེ་རེ་ཞིང་ཡང་རྒྱན་སྔོན་པོ་ཅན་གྱི་མི་བརྒྱ་ཕྲག་རེ་རེས་བསྐོར་བར་གྱུར་ཏོ། །ཤཱཀྱ་ལ་ལའི་བཞོན་པ་རྣམ་པ་འདི་ལྟ་བུ་སྟེ། འདི་
ལྟར་ཤིང་རྟ་དག་ཀྱང་ཐམས་ཅད་དུ་སེར་བ་ནས་ཐམས་ཅད་དུ་དམར་བ་དང་།ཐམས་ཅད་དུ་དཀར་བ་དང ། ཐམས་ཅད་དུ་བཀྲ་བ་དང ། ཤིང་རྟ་རེ་རེ་ཞིང་ཡང་རྒྱན་ཁྲ་བོ་ཅན་གྱི་མི་བརྒྱ་ཕྲག་རེ་རེས་བསྐོར་བའི་བར་དུ་སྔ་མ་བཞིན་ནོ། །ཤིང་རྟ་དེ་དག་རེ་རེའི་ཕྱི་བཞིན་དུ་ཡང་
གླང་པོ་ཆེ་བརྒྱད་ཁྲི་གསེར་གྱི་རྒྱན་གྱིས་བརྒྱན་པ། གསེར་གྱི་རྒྱལ་མཚན་ཅན། གསེར་གྱི་དྲ་བས་གཡོགས་པ་ཤ་སྟག་བཤམས་ཏེ། གླང་པོ་ཆེ་བརྒྱད་ཁྲི་པོ་དེ་དག་གི་སྟེང་དུ་རིན་པོ་ཆེ་སྣ་བདུན་གྱི་ཁང་བ་བརྩེགས་པ་བཀྲ་བ། བལྟ་ན་སྡུག་པ་བརྒྱད་ཁྲི་བཞག་ནས་འདོང</font><hr>42-1-16b<br><font size=+2>
བར་གྱུར་ཏོ། །གླང་པོ་ཆེ་བརྒྱད་ཁྲི་པོ་དེ་དག་གི་ཕྱི་བཞིན་རྟ་གསེར་གྱི་རྒྱན་གྱིས་བརྒྱན་པ། གསེར་གྱི་དྲིལ་བུ་གཡེར་ཀ་བརྒྱུས་པ། རིན་པོ་ཆེ་སྣ་བདུན་གྱི་རྒྱན་དང་ལྡན་པ་བརྒྱད་ཁྲི་བཤམས་ཏེ་འདོང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་མ་དང ། 
ཤཱཀྱ་རྣམས་རྒྱང་རིང་པོ་ནས་འོང་བ་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་གང་དག་གིས་སུམ་ཅུ་རྩ་གསུམ་གྱི་ལྷ་སྐྱེད་མོས་ཚལ་དུ་འདོང་བ་མ་མཐོང་བ་དེ་དག་གིས་ཤཱཀྱ་སེར་སྐྱའི་གནས་ནས་འོང་བ་འདི་དག་ལ་ལྟོས་ཤིག་།དེ་ཅིའི་ཕྱིར་ཞེ་ན། དགེ་
སློང་དག་ཤཱཀྱ་རྣམས་སེར་སྐྱའི་གནས་ནས་བྱུང་བ་དེ་དག་ནི་སུམ་ཅུ་རྩ་གསུམ་གྱི་ལྷ་སྐྱེད་མོས་ཚལ་དུ་འདོང་བ་དང་རྗེས་སུ་འཐུན་པའོ། །དེ་ལ་འདི་སྐད་ཅེས་བྱ་སྟེ། སེར་སྐྱ་ཞེས་བྱའི་གྲོང་ཁྱེར་དམ་པ་ནས། །རྒྱལ་པོ་ཟས་གཙང་མི་ཡི་ཁྱུ་མཆོག་དེ། །འཁོར་དང་བཅས་ཏེ་
ཇི་ལྟར་འོང་གྱུར་པ། །དེ་ལྟར་བསྟན་གྱིས་ཁྱེད་རྣམས་དེ་ཉོན་ཅིག་།ཤིང་རྟ་བརྒྱ་སྟོང་མཆོག་དང་བཅས་པ་དག་།ལེགས་པར་བརྒྱན་ཅིང་མཛེས་པར་སྤྲས་ནས་ནི། །སེར་སྐྱའི་གནས་ཀྱི་གྲོང་ཁྱེར་དམ་པ་ནས། །མི་ཡི་དབང་པོ་དམ་པ་བྱུང་བར་གྱུར། །ཤིང་རྟ་སྔོ་
ཞིང་རྒྱན་ཀྱང་སྔོ་བ་དང ། །རྟ་ཡང་སྔོ་ཞིང་སྔོ་བའི་འཁོར་དང་བཅས། །མཚན་མ་ལྔ་པོ་དག་ཀྱང་སྔོ་བ་སྟེ། །དེ་བཞིན་གོས་ཀྱི་དམ་པ་དག་ཀྱང་སྔོ། །ལྕག་ཀྱང་སྔོ་ཞིང་ཐག་སྲད་རྣམས་ཀྱང་སྔོ། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་སྔོན་
པོའི་གོས་ཅན་ཏེ། །རྒྱལ་མཚན་སྔོན་པོ་བསྒྲེང་བས་མཛེས་པར་བྱས། །ཤིང་རྟ་སེར་ཞིང་རྒྱན་ཀྱང་སེར་བ་དང ། །རྟ་ཡང་སེར་ཞིང་སེར་པོའི་འཁོར་དང་བཅས། །མཚན་མ་ལྔ་པོ་དག་ཀྱང་སེར་པོ་སྟེ། །དེ་བཞིན་གོས་ཀྱི་དམ་པ་དག་ཀྱང་སེར། །ལྕག་ཀྱང་སེར་
ཞིང་ཐག་སྲད་རྣམས་ཀྱང་སེར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་སེར་པོའི་གོས་ཅན་ཏེ། །རྒྱལ་མཚན་སེར་པོ་བསྒྲེང་བས་མཛེས་པར་བྱས། །ཤིང་རྟ་དམར་ཞིང་རྒྱན་ཀྱང་དམར་བ་དང ། །རྟ་ཡང་དམར་ཞིང་དམར་པོའི་འཁོར་དང</font><hr>42-1-17a<br><font size=+2>
བཅས། །མཚན་མ་ལྔ་པོ་དག་ཀྱང་དམར་པོ་སྟེ། །དེ་བཞིན་གོས་ཀྱི་དམ་པ་དག་ཀྱང་དམར། །ལྕག་ཀྱང་དམར་ཞིང་ཐག་སྲད་རྣམས་ཀྱང་དམར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་དམར་པོའི་གོས་ཅན་ཏེ། །རྒྱལ་
མཚན་དམར་པོ་བསྒྲེང་བས་མཛེས་པར་བྱས། །ཤིང་རྟ་དཀར་ཞིང་རྒྱན་ཀྱང་དཀར་བ་དང ། །རྟ་ཡང་དཀར་ཞིང་དཀར་པོའི་འཁོར་དང་བཅས། །མཚན་མ་ལྔ་པོ་དག་ཀྱང་དཀར་པོ་སྟེ། །དེ་བཞིན་གོས་ཀྱི་དམ་པ་དག་ཀྱང་དཀར། །ལྕག་ཀྱང་དཀར་ཞིང་ཐག་
སྲད་རྣམས་ཀྱང་དཀར། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་དཀར་པོའི་གོས་ཅན་ཏེ། །རྒྱལ་མཚན་དཀར་པོ་བསྒྲེང་བས་མཛེས་པར་བྱས། །ཤིང་རྟ་བཀྲ་ཞིང་རྒྱན་ཀྱང་བཀྲ་བ་དང ། །རྟ་ཡང་བཀྲ་ཞིང་བཀྲ་བའི་འཁོར་དང་
བཅས། །མཚན་མ་ལྔ་པོ་དག་ཀྱང་བཀྲ་བ་སྟེ། །དེ་བཞིན་གོས་ཀྱི་དམ་པ་དག་ཀྱང་བཀྲ། །ལྕག་ཀྱང་བཀྲ་ཞིང་ཐག་སྲད་རྣམས་ཀྱང་བཀྲ། །དྲིལ་བུ་གཡེར་ཀའི་དྲ་བ་རྣམས་དང་བཅས། །མི་རྣམས་ཀྱང་ནི་བཀྲ་བའི་གོས་ཅན་ཏེ། །རྒྱལ་མཚན་ཁྲ་བོ་བསྒྲེང་བས་མཛེས་
པར་བྱས། །ཤིང་རྟ་དེ་དག་རྣམས་ཀྱི་ཕྱི་བཞིན་དུ། །གླང་པོ་བརྒྱད་ཁྲི་ཚང་བར་བཤམས་པ་ནི། །གསེར་གྱི་རྒྱལ་མཚན་རྣམས་ཀྱིས་ལེགས་པར་བརྒྱན། །གླང་ཆེན་རྣམས་ནི་གསེར་གྱིས་ཚལ་པར་བརྒྱན། །དེ་དག་སྟེང་དུ་རིན་ཆེན་སྣ་བདུན་གྱི། །ཁང་པ་
བརྩེགས་པ་དག་ནི་བཞག་ནས་སུ། །རྣམ་པ་སྣ་ཚོགས་རྒྱན་གྱིས་བརྒྱན་པ་ཡི། །ཤིང་རྟ་རྣམས་ཀྱི་ཕྱི་བཞིན་འབྲང་བར་བཤམས། །དེ་བཞིན་རྟ་མཆོག་སྟོང་ཕྲག་བརྒྱད་ཅུ་ཡང ། །རིན་ཆེན་སྣ་བདུན་རྒྱན་གྱིས་དགའ་བར་བརྒྱན། །རྒྱལ་པོའི་ཆས་གོས་རྒྱལ་པོ་
འཆམ་སྟབས་ཅན། །གླང་པོ་དེ་དག་རྣམས་ནི་ཕྱི་བཞིན་འབྲང ། །རབ་ཏུ་དྲི་ཞིམ་ཁ་དོག་ལྔ་པ་ཡི། །མེ་ཏོག་སིལ་མ་རྒྱལ་པོའི་ལམ་དུ་བཀྲམ། །དར་གྱི་ལྡ་ལྡི་དག་ཀྱང་རབ་ཏུ་བྲེས། །བདུག་སྤོས་སྣོད་རྣམས་ཀྱིས་ནི་ལེགས་པར་བརྒྱན། །གླུ་མཁན་གར་མཁན</font><hr>42-1-17b<br><font size=+2>
རྣམས་དང་གྱད་རྣམས་དང ། །བུམ་རྔ་ཐོགས་པ་རྣམས་ཀྱིས་མཛེས་པར་བྱས། །རོལ་མོ་རྣམ་པ་སྣ་ཚོགས་བྱེད་པ་ཡང ། །རབ་ཏུ་དགའ་ཞིང་རྒྱལ་པོའི་ཕྱི་བཞིན་འབྲང ། །རྒྱལ་པོ་གཤེགས་པའི་ལེའུ་སྟེ་གཉིས་པའོ།། །།དེ་ནས་རྒྱལ་པོ་ཟས་
གཙང་མ་དང ། ཤཱཀྱ་རྣམས་རྟ་བབས་སའི་བར་དུ་བཞོན་པ་དང་དོང་སྟེ་ཕྱིན་ནས་བཞོན་པ་ལས་བབས་ཏེ། རྐང་ཐང་གི་འཁོར་གྱིས་ཡོངས་སུ་བསྐོར་ཅིང་མདུན་དུ་བདར་ཏེ་ནྱ་གྲོ་དྷའི་ཀུན་དགའ་ར་བར་དོང་ངོ ། །དེའི་ཚེ་བཅོམ་ལྡན་འདས་ཀྱིས་རྒྱལ་པོ་ཟས་གཙང་མ་ང་
རྒྱལ་ཆེ་བར་མཁྱེན་ནས་མི་གང་ལྷག་ཙམ་གྱི་སྟེང་གི་བར་སྣང་གི་ནམ་མཁའ་ལ་རྒྱལ་པོ་ཟས་གཙང་མ་མངོན་པར་དད་པར་བྱ་བའི་ཕྱིར་འཆག་ཅིང་བཞུགས་པར་གྱུར་ཏོ། །དེའི་ཚེ་བཅོམ་ལྡན་འདས་དེ་ལྟར་འཆག་པའི་གཡས་ཕྱོགས་ནས་མི་མཇེད་ཀྱི་བདག་པོ་ཚངས་
པ་ཞབས་འབྲིང་དུ་འཆག་ཅིང་འགྲོའོ། །གཡོན་ཕྱོགས་ནས་ལྷའི་དབང་པོ་བརྒྱ་བྱིན་ཞབས་འབྲིང་དུ་འཆག་ཅིང་འགྲོའོ། །དེ་ལྟར་བཅོམ་ལྡན་འདས་འཆག་པའི་ཞབས་འབྲིང་དུ་ལྷའི་རྒྱལ་པོ་རབ་འཐབ་བྲལ་དང ། ཡོངས་སུ་དགའ་ལྡན་དང ། རབ་འཕྲུལ་དགའ་དང ། 
གཞན་འཕྲུལ་དབང་བྱེད་རྣམས་བཅོམ་ལྡན་འདས་ལ་མཆོད་པ་བྱ་བའི་ཕྱིར་གདུགས་འཛིན་ཅིང་བསིལ་ཡབ་ཀྱིས་གཡོབ་པར་གྱུར་ཏོ། །རྒྱལ་པོ་ཆེན་པོ་རྣམ་ཐོས་ཀྱི་བུ་དང ། ཡུལ་འཁོར་སྲུང་གཉིས་ཀྱང་བཅོམ་ལྡན་འདས་འཆག་པའི་ཤར་ཕྱོགས་ལོགས་ཀྱི་ཐོག་མ་
ལ་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་སྨད་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཕྱག་འཚལ་ཞིང་འཁོད་པར་གྱུར་ཏོ། །རྒྱལ་པོ་ཆེན་པོ་འཕགས་སྐྱེས་པོ་དང ། མིག་མི་
བཟང་གཉིས་ཀྱང་བཅོམ་ལྡན་འདས་འཆག་པའི་ནུབ་ཕྱོགས་ལོགས་ཀྱི་ཐོག་མ་ལ་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་སྨད་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཕྱག་འཚལ་ཞིང་འཁོད</font><hr>42-1-18a<br><font size=+2>
པར་གྱུར་ཏོ། །དེའི་ཚེ་རྒྱལ་ཆེན་བཞིའི་རིས་ཀྱི་ལྷའི་བུ་རྣམས་དང ། སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷའི་བུ་རྣམས་ཀྱང་བཅོམ་ལྡན་འདས་ལ་མཆོད་པ་བྱ་བའི་ཕྱིར་སྟེང་གི་
བར་སྣང་ལ་གནས་ཏེ། ལྷའི་མེ་ཏོག་ཨུད་པ་ལ་དང ། པད་མ་དང ། ཀུ་མུད་དང ། པད་མ་དཀར་པོ་དང ། ལྷའི་མན་དཱ་ར་བ་དང ། མན་དཱ་ར་བ་ཆེན་པོ་དང ། ལྷའི་སྤོས་ཀྱི་ཕྱེ་མ་རབ་ཏུ་འཐོར་བར་གྱུར་ཏོ། །བཅོམ་ལྡན་འདས་ལ་མཆོད་པ་བྱ་བའི་ཕྱིར་ལྷའི་རོལ་མོ་སིལ་
སྙན་དང ། གླུ་དབྱངས་དག་ཀྱང་སྟེང་གི་བར་སྣང་ལས་སྒྲ་འབྱིན་པར་གྱུར་ཏོ། །མིའི་ལས་འདས་པའི་གླུའི་ང་རོ་ཡང་སྟེང་གི་བར་སྣང་ལས་བྱུང་བར་གྱུར་ཏོ། །སྤྲིན་ལས་སྤོས་ཀྱི་ཆར་ཟམ་ཟིམ་ཡང་འབབ་པར་གྱུར་ཏོ། །ལྷའི་མེ་ཏོག་ཨུད་པ་ལ་དང ། ལྷའི་ཙན་དན་གྱི་ཕྱེ་མའི་ཆར་ཡང་
བབ་པར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་ཀྱིས་རྫུ་འཕྲུལ་གྱི་རྣམ་པ་གང་མངོན་པར་མཛད་པས་ལྷ་དང་མི་རྣམས་ཀྱང་གཅིག་གིས་གཅིག་མཐོང་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་མཛད་དོ། །དེ་ནས་རྒྱལ་པོ་ཟས་གཙང་མས་ལྷ་དེ་དག་བཅོམ་ལྡན་འདས་ལ་མཆོད་པ་བྱེད་པ་ཡང་མཐོང ། 
ལྷའི་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པའི་ཁང་བ་བརྩེགས་པས་ཀྱང་བར་སྣང་གང་བར་མཐོང་ནས་དེ་འདི་སྙམ་དུ་སེམས་ཏེ། ཇི་ཙམ་དུ་བཅོམ་ལྡན་འདས་ཀྱིས་ལེགས་པར་གསུངས་པ་དེ་ནི་ངོ་མཚར་ཆེ་སྟེ། སྔོན་བཅོམ་ལྡན་འདས་གཞོན་ནུར་གྱུར་པའི་ཚེ་འདི་སྐད་དུ་ང་ལ་ནི་གླིང་ཆེན་པོ་
བཞིའི་དབང་ཕྱུག་ལ་དབང་བར་འགྱུར་བ་ངོ་མཚར་མི་ཆེ་སྟེ། ངས་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་ལྷ་དང་མིའི་ནང་དུ་ཆོས་ཀྱི་དབང་ཕྱུག་ལ་དབང་བར་བྱའོ་ཞེས་གསུངས་ན། བཅོམ་ལྡན་འདས་ཀྱི་ཆོས་ཀྱི་དབང་ཕྱུག་ལ་དབང་བ་དེ་ནི་འདི་ཡིན་པ་ལྟ་སྟེ། བདག་ནི་མིའི་
འཁོར་ཅན་དུ་ཟད། བཅོམ་ལྡན་འདས་ནི་ལྷ་དང་མིའི་འཁོར་ཅན་དུ་གྱུར་ཏོ་སྙམ་མོ། །དེ་ནས་རྒྱལ་པོ་ཟས་གཙང་མས་བླ་གོས་ཕྱོགས་གཅིག་ཏུ་བགོས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཚིག་འདི་སྐད་ཅེས་སྨྲས</font><hr>42-1-18b<br><font size=+2>
སོ། །བཅོམ་ལྡན་འདས་བལྟམ་མ་ཐག་ཏུ་སུས་ཀྱང་མ་བརྟེན་པར་ས་ཆེན་པོ་ལ་གོམ་པ་བདུན་བཞུད་དེ། ཕྱོགས་བཞིར་གཟིགས་ནས་གསུང་བརྗོད་པ། ང་ནི་འཇིག་རྟེན་ན་མཆོག། ང་ནི་འཇིག་རྟེན་ན་གཙོ་བོ། ང་ནི་འཇིག་རྟེན་ན་རབ་སྟེ། ངས་སྐྱེ་བ་དང ། རྒ་བ་དང ། ན་བ་དང ། འཆི་
བ་མཐར་དབྱུང་ངོ་ཞེས་གསུངས་པ་དེའི་ཚེ་ཡང་བདག་གིས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་གཏུགས་ཏེ་ཕྱག་བགྱིས་སོ། །གང་གི་ཚེ་བཅོམ་ལྡན་འདས་ཞིང་པའི་གྲོང་དུ་བཞུད་ནས་འཛམ་བུའི་གྲིབ་མ་བསིལ་བ་ལ་བཞུགས་པའི་ཚེ་ཉི་མ་ཡོལ་ཡང་འཛམ་བུའི་གྲིབ་
མས་བཅོམ་ལྡན་འདས་ཀྱི་སྐུ་མ་བཏང་སྟེ། ལྷའི་བུ་གཞོན་ནུ་དྲུག་ཐལ་མོ་སྦྱར་ནས་ཕྱག་འཚལ་ཞིང་འཁོད་པར་གྱུར་པ་དེའི་ཚེ་ཡང་བདག་གིས་བཅོམ་ལྡན་འདས་ལ་ཕྱག་བགྱིས་སོ། །ད་ཡང་བཅོམ་ལྡན་འདས་ལ་འདི་དང་ལན་གསུམ་དུ་ཕྱག་འཚལ་ལོ་ཞེས་སྨྲས་ནས་དེའི་ཚེ་ཚིགས་
སུ་བཅད་པ་འདི་དག་ཀྱང་སྨྲས་སོ། །གང་ཚེ་རྐང་གཉིས་གཙོ་བོ་ཁྱོད་བལྟམས་ནས། །ས་ཆེན་འདི་ལ་གོམ་པ་བདུན་བཞུད་དེ། །ང་ནི་འཇིག་རྟེན་ན་ནི་མཆོག་ཅེས་གསུངས། །དེ་ཚེ་མཁས་པ་ཁྱོད་ལ་བདག་ཕྱག་འཚལ། །གང་ཚེ་ཐུབ་ཆེན་ཞིང་པའི་གྲོང་བཞུད་ཚེ། །འཛམ་བུའི་གྲིབ་
མས་བཞུགས་པ་མ་བཏང་ཞིང ། །ལྷ་བུ་གཞོན་ནུ་དྲུག་གིས་བཏུད་གྱུར་པ། །དེ་ཚེ་མཆོད་འོས་ཁྱོད་ལ་བདག་ཕྱག་འཚལ། །ང་ཡང་འདི་དང་ཁྱོད་ལ་ལན་གསུམ་དུ། །ཐུབ་པ་ཁྱོད་ཀྱི་ཞབས་ལ་ཕྱག་འཚལ་ལོ། །ཐུགས་རྗེ་ཆེ་མངའ་ལྷ་མིས་མཆོད་པ་གཙོ། །ཁྱོད་འདྲ་
འཇིག་རྟེན་མ་མཆིས་ལྷག་ཅི་སྨོས། །མཚན་ནི་དོན་གྲུབ་ལགས་ཞེས་སྔོན་བརྗོད་པ། །ཕ་དང་མ་ཡིས་བསམས་ཏེ་བཏགས་པ་ལགས། །ཁྱོད་ཀྱི་བསམ་རྫོགས་བདུད་རྩི་བརྙེས་པས་ན། །དོན་གྲུབ་ལགས་པར་བདག་གིས་ད་གདོད་འཚལ། །དེ་ནས་འདོད་པ་ན་སྤྱོད་
པའི་ལྷ་རྣམས་ཀྱིས་དེའི་ཚེ་བཅོམ་ལྡན་འདས་ཀྱི་སེང་གེའི་ཁྲི་ལྷའི་ཡིད་བཞིན་གྱི་རས་བཅོས་བུ་བཏིང་བ་རྣམ་པ་སྣ་ཚོགས་སུ་སྤེལ་བ་བཤམས་སོ། །ཐམས་ཅད་དང་ལྡན་པའི་ནྱ་གྲོ་དྷའི་ཀུན་དགའ་ར་བར་ཡང་ལྷའི་ཡིད་བཞིན་གྱི་རས་བཅོས་བུས་ཡོག་པར་བཏིང་ངོ ། །སྟེང་དུ་ཡང</font><hr>42-1-19a<br><font size=+2>
ལྷའི་ཡིད་བཞིན་གྱི་རས་བཅོས་བུའི་བླ་རེས་བྲེས་སོ། །དེ་ནས་བཅོམ་ལྡན་འདས་བར་སྣང་གི་འཆགས་དེ་ནས་བབས་ཏེ། གང་ན་ཁྲི་བཤམས་པ་ལ་བཞུགས་སོ། །རྒྱལ་པོ་ཟས་གཙང་མ་ཡང་འཁོར་དང་བཅས་པས་བཅོམ་ལྡན་འདས་ཀྱི་ཞབས་ལ་མགོ་
བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་།འདོད་པ་ན་སྤྱོད་པའི་ལྷ་རྣམས་དང་གཟུགས་ན་སྤྱོད་པའི་ལྷ་རྣམས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་བར་སྣང་ལ་འཁོད་པར་གྱུར་ཏོ། །འདི་ལ་འདི་ནི་ཆོས་ཉིད་ཡིན་ཏེ་དེ་ལ་འདི་སྐད་ཅེས་བྱའོ། །སེར་སྐྱ་ཞེས་
བྱ་གྲོང་ཁྱེར་དམ་པ་ཡི། །ནྱ་གྲོ་དྷ་ཡི་ར་བ་ཉམས་དགའ་བར། །རྒྱལ་པོ་ཟས་གཙང་དེ་དང་གང་གི་ཚེ། །འཇིག་རྟེན་མགོན་པོ་ཕྲད་པ་དེ་ཡི་ཚེ། །སྐྱེ་བོ་མང་པོ་དག་ནི་འདུས་གྱུར་ཏེ། །ལྷ་མ་ཡིན་དང་མཁའ་ལྡིང་དབང་པོ་དང ། །ཀླུ་ཚོགས་རྣམས་དང་དེ་བཞིན་གྲུལ་བུམ་
དང ། །དྲི་ཟའི་རྒྱལ་པོ་རྣམས་ཀྱང་འདུས་པར་གྱུར། །དེ་བཞིན་གསང་བའི་བདག་པོ་རྣམས་འདུས་ཏེ། །མིའམ་ཅིའི་ཚོགས་དང་མི་རྣམས་དང ། །དེ་བཞིན་འདོད་པ་དག་ན་སྤྱོད་པའི་ལྷ། །རབ་ཏུ་དགའ་བ་རྣམས་ཀྱང་འདུས་པར་གྱུར། །དེ་བཞིན་གཟུགས་ཀྱི་ཁམས་སུ་གཏོགས་
པ་ཡི། །ཚངས་པ་རྣམས་དང་ཚངས་པའི་རིས་རྣམས་དང ། །འོད་གསལ་བ་དང་དགེ་རྒྱས་པ་དག་དང ། །འབྲས་བུ་ཆེ་བར་གཏོགས་དང་གནས་གཙང་འདུས། །དགེ་སྦྱོང་དག་དང་དེ་བཞིན་བྲམ་ཟེ་དང ། །སྤྱོད་པ་ཅན་དང་ཀུན་ཏུ་རྒྱུ་དག་དང ། །གཅེར་བུ་པ་དང་མུ་སྟེགས་གཞན་མང་
པོ། །ལོག་ལམ་རྗེས་སུ་འབྲང་བ་རྣམས་ཀྱང་འདུས། །སངས་རྒྱས་ཉིད་ཀྱི་གཟི་བརྗིད་དམ་པ་ཡིས། །རྒྱལ་པོ་ཆེན་པོ་ཟས་གཙང་དེ་ཡི་སེམས། །ཡོངས་སུ་སྨིན་པར་བྱ་བའི་དོན་གྱི་ཕྱིར། །དེ་ཡི་ཚེ་ན་འདུས་པ་ཆེན་པོར་གྱུར། །སྔོན་ཆད་བཅོམ་ལྡན་འདས་ཀྱིས་ལེགས་བཤད་
པའི། །ཚིག་གིས་འཁོར་རྣམས་ཡོངས་སུ་ཚིམ་པར་མཛད། །ད་ནི་རྒྱལ་བ་རྒྱལ་པོ་ཟས་གཙང་ལ། །རྒྱལ་བའི་མཐུ་ནི་རབ་ཏུ་བསྟན་པར་བཞེད། །བཅོམ་ལྡན་འདས་ལ་རྒྱལ་པོ་ཟས་གཙང་གིས། །གཞོན་ནུ་ཁྱོད་ནི་ས་བདག་ཆེན་པོ་ཡི། །རྒྱལ་པོར་འགྱུར་ཞེས་མཁས་པས</font><hr>42-1-19b<br><font size=+2>
ལུང་བསྟན་གྱིས། །ཁབ་ནས་མ་བྱུང་ཤིག་ཅེས་སྔོན་གསོལ་པ། །གླིང་བཞིར་དབང་བའི་འཁོར་ལོས་སྒྱུར་བ་སྟེ། །སྲོག་ཆགས་བྱེ་བ་ཁྲག་ཁྲིག་རྣམས་ཀྱིས་མཆོད། །རིན་ཆེན་སྣ་བདུན་དག་དང་ལྡན་པར་འགྱུར། །འབྱོར་པ་བཞི་པོ་དང་ཡང་ལྡན་པར་འགྱུར། །ཆོས་ལ་གནས་ཤིང་
ས་ཡང་སྐྱོང་བ་སྟེ། །གླིང་བཞི་དབང་བར་རྒྱལ་རིགས་རྒྱལ་ཆེན་འགྱུར། །མི་ཡི་བདག་དང་མི་ཡི་མཆོད་པར་འོང ། །ལྟོ་འཕྱེ་ཆེས་མཆོད་འགྱུར་ཞེས་གསོལ་བ་བཏབ། །དེ་ནས་དེ་ཚེ་བྱང་ཆུབ་སེམས་དཔའ་དེས། །བསྐལ་པ་བྱེ་བ་ཁྲག་ཁྲིག་དཔག་མེད་ནས། །བདག་ནི་
རྟག་ཏུ་བདེན་པའི་ཚིག་སྨྲས་ཀྱིས། །རྒྱལ་པོ་བདག་གི་ཚིག་ལ་གསོན་ཅེས་གསུངས། །འདི་ལྟར་གླིང་བཞི་པ་ཡི་རྒྱལ་སྲིད་ཀྱིས། །བདག་ལ་སླུ་བ་མཛད་པར་བཞེད་པས་ན། །དེ་ལྟའི་ཚུལ་ལས་རྒྱལ་པོ་ཆེན་པོ་ཁྱོད། །བདག་ལ་ཅུང་ཟད་ཙམ་ཡང་ཐུགས་མི་རེ། །རྒྱལ་པོ་
ཆེན་པོ་སྔོན་ཚེ་བྱུང་བ་ནི། །རྒྱ་མཚོའི་རླབས་ཀྱིས་རུ་སྦལ་གཅིག་ཅིག་འཕངས། །རྒྱ་མཚོའི་རླབས་ནི་ཕྱིར་ལོག་གྱུར་པ་དང ། །རུ་སྦལ་དེ་ནི་ཁྲོན་པའི་ནང་དུ་ལྟུང ། །དེ་ལ་ཁྲོན་པའི་ནང་གི་རུ་སྦལ་གྱིས། །རྒྱ་མཚོའི་རུ་སྦལ་གང་ནས་འདིར་འོངས་ཀཝའེ། །ང་ཡི་ཐེ་ཚོམ་སྐྱེས་
པ་བཅད་པའི་ཕྱིར། །མྱུར་དུ་ང་ལ་སྨྲོས་ཞེས་དེ་སྐད་སྨྲས། །ཁྲོན་པའི་ནང་གི་རུ་སྦལ་དེ་ཉིད་ལ། །རྒྱ་མཚོའི་རུ་སྦལ་བློ་ཆེན་དེས་སྨྲས་པ། །ང་ནི་རྒྱ་མཚོའི་རླབས་ཀྱིས་བཀུར་བཀུར་ཏེ། །ཁྲོན་པ་འདིར་ནི་དེ་རིང་བོར་བར་གྱུར། །རྒྱ་མཚོའི་རླབས་ཆེན་དེ་ནི་ཕྱིར་ལོག་སོང ། །
ང་ནི་སླར་ལོག་འགྲོ་བར་མ་ནུས་ཏེ། །ང་ནི་རླབས་དང་བྲལ་བར་གྱུར་པས་ན། །རུ་སྦལ་ཁྱོད་ཀྱི་ཁྲོན་པར་གནས་འཆའོ། །དེ་ལ་ཁྲོན་པའི་ནང་གི་རུ་སྦལ་གྱིས། །རྒྱ་མཚོ་དེ་ནི་ཁྲོན་པ་འདི་ཙམ་འམ། །འོན་ཏེ་ཁྲོན་པ་འདི་བས་ཆེ་བ་ཞིག་།དྲིས་ལན་ང་ལ་མྱུར་དུ་སྨྲོས་ཞེས་སྨྲས། །
རྒྱ་མཚོའི་རུ་སྦལ་བློ་རྒྱ་ཆེན་པོ་དེས། །ཁྲོན་པའི་རུ་སྦལ་དེ་ལ་ཚིག་སྨྲས་པ། །ཁྲོན་པའི་རུ་སྦལ་ཁྱོད་ནི་བྱིས་པ་སྟེ། །བློ་རྒྱ་ཆུང་ཞིང་ཤེས་པ་རབ་ཏུ་ཞན། །ང་ནི་ལན་ཚཝ་ཅན་གྱི་ཆུ་དེར་བཙས། །ཡུན་རིང་དུས་ན་དེ་ན་སྐྱེ་སྐྱེ་ཡང ། །རྒྱ་མཚོའི་མཐའ་མ་ཤེས་པར་མ་ནུས་ན། །དབུས</font><hr>42-1-20a<br><font size=+2>
ལྟ་ཤེས་པ་ག་ལ་ནུས་ཞེས་སྨྲས། །དེ་ལྟར་མི་ཡི་བདག་པོ་ཁྱོད་ཀྱིས་ཀྱང ། །བདག་གི་མཐུ་ནི་ཐུགས་སུ་མ་ཆུད་དེ། །གླིང་བཞི་པ་ཡི་མཆོད་པ་རྣམས་ཀྱིས་ནི། །ཁྱོད་ཀྱིས་བདག་ལ་སླུ་བ་མཛད་པར་བཞེད། །བདག་ནི་ཆོས་ཅན་ཆོས་ཀྱི་རྒྱལ་པོར་འགྱུར། །ཆད་
པས་མི་གཅད་མཚོན་ཆས་བདའ་མེད་པར། །སྟོང་གསུམ་འཇིག་རྟེན་ཁམས་འདི་བསྐྱང་བར་བྱ། །འཇིག་རྟེན་འདས་པའི་མཆོད་པ་ཐོབ་པར་འགྱུར། །རྫུ་འཕྲུལ་སྟོབས་བསྒོམས་པ་ཡི་བདག་ཉིད་ཅན། །བཅོམ་ལྡན་འདས་ཀྱིས་སྔོན་ཚིག་སྦྱང་བཞེད་ནས། །དེ་ཕྱིར་
འཁོར་ཆེན་པོ་ནི་དེ་དག་དང ། །སེམས་ཅན་རྣམས་ལ་ཐུགས་ཀྱིས་དགོངས་པ་མཛད། །རྒྱལ་པོ་ཟས་གཙང་སེམས་ནི་མགུ་བྱའི་ཕྱིར། །ཐུགས་ཀྱིས་ཡོངས་སུ་བསྐུལ་བ་མཛད་པ་དང ། །འཇིག་རྟེན་གསུམ་པོ་མཐའ་དག་མ་ལུས་པར། །དེ་ཡི་ཚེ་ན་དེར་ནི་འདུས་པར་གྱུར། །རྒྱལ་
པོ་འདུན་པར་བྱས་པའི་ལེའུ་སྟེ་གསུམ་པའོ།། །།དེ་ནས་བཅོམ་ལྡན་འདས་ཀྱིས་དེའི་ཚེ་ལྷ་མ་ཡིན་གྱི་དབང་པོ་ཐགས་ཟངས་རིས་བཅོམ་ལྡན་འདས་ལ་མཆོད་པར་བྱ་བའི་སེམས་ཐོག་མར་སྐྱེ་བར་འགྱུར་བ་དེ་ལྟ་བུའི་མཚན་མ་མཛད་དོ། །དེ་ནས་ལྷ་མ་ཡིན་གྱི་དབང་པོ་ཐགས་ཟངས་རིས་ལྷ་
མ་ཡིན་ཁྲག་ཁྲིག་ཕྲག་དྲུག་ཅུ་དང ། ལྷ་མ་ཡིན་གྱི་བུ་མོ་ཁྲག་ཁྲིག་ཕྲག་དྲུག་ཅུ་དང་བཅས་པས་བཅོམ་ལྡན་འདས་ལ་མཆོད་པ་ཐོག་མར་བྱས་ཏེ། དེ་ནས་རྒྱ་མཚོ་ཆེན་པོའི་ནང་ན་རིན་པོ་ཆེའི་རིན་ཐང་ཡོད་པ་དང ། རིན་ཐང་མེད་པ་ཇི་སྙེད་ཅིག་ཡོད་པ་དེ་དག་ཐམས་ཅད་བཅོམ་ལྡན་འདས་ལ་མཆོད་པར་
བྱ་བའི་ཕྱིར་ཕུལ་ལོ། །རིན་པོ་ཆེ་གཞན་རྒྱ་མཚོ་ཆེན་པོ་དེ་ན་མེད་པ་དག་ཀྱང་མངོན་པར་སྤྲུལ་པ་བྱས་ཏེ་མཆོད་པར་ཕུལ་ལོ། །རིན་པོ་ཆེ་སྣ་བདུན་གྱི་རང་བཞིན་ཅན་གྱི་ཤིང་རྟ་ཁྲག་ཁྲིག་ཕྲག་དྲུག་ཅུ་ཡང་མངོན་པར་སྤྲུལ་ཏོ། །ཤིང་རྟ་དེ་དག་རེ་རེ་ཞིང་ཡང་རྟ་ཅང་ཤེས་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་
པར་སྤྲུལ་ཏེ། རྟ་དེ་དག་ཀྱང་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་ཅན་ལ་རྐང་ལག་གི་རྒྱན་གསེར་ལས་བྱས་པ། རིན་པོ་ཆེ་སྣ་བདུན་གྱིས་སྤྲས་པ་དང་ལྡན་པ། རིན་པོ་ཆེ་སྣ་བདུན་ལས་བྱས་པའི་འཕྱར་འདབ་ཅན། གསེར་གྱི་རྒྱན་གྱིས་བརྒྱན་པ་ཤ་སྟག་གོ་།རྟ་ཅང་ཤེས་དེ་དག་གི་རྒྱན་དུ་བྱ</font><hr>42-1-20b<br><font size=+2>
བའི་ཕྱིར་རིན་པོ་ཆེ་སྣ་བདུན་གྱི་བླ་རེ་དག་ཀྱང་མངོན་པར་སྤྲུལ་ཏོ། །ཤིང་རྟ་དེ་དག་ཀྱང་གསེར་གྱི་རྒྱལ་མཚན་ཅན་གསེར་གྱི་རྒྱན་གྱིས་བརྒྱན་པ་ཤ་སྟག་གོ་།ཡིད་བཞིན་གྱི་ནོར་བུའི་བླ་རེ་དེ་དག་ཀྱང་སྟེང་གི་བར་སྣང་ལས་ཤིང་རྟ་དེ་དག་གི་ཕྱི་བཞིན་དུ་འབྲང་བར་གྱུར་ཏེ། ཤིང་རྟ་དེ་དག་འདོང་ན་
ནི་རྗེས་སུ་འདོང ། ཤིང་རྟ་དེ་དག་སྡོད་ན་ནི་སྡོད་པ་ཤ་སྟག་གོ་།ཡིད་བཞིན་གྱི་ནོར་བུའི་བླ་རེ་དེ་དག་ལ་ཡང་མཛེས་པར་བྱ་བའི་ཕྱིར་རིན་པོ་ཆེ་སྣ་བདུན་གྱི་ཕྲེང་བའི་ལྡ་ལྡི་མངོན་པར་སྦྱངས་སོ། །ཡིད་བཞིན་གྱི་ནོར་བུའི་བླ་རེ་དེ་དག་ཀྱང་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་དང་ལྡན་
པར་མངོན་པར་སྤྲུལ་ཏོ། །ཤིང་རྟའི་རྒྱན་དང ། རྟའི་རྒྱན་དང ། ཡིད་བཞིན་གྱི་ནོར་བུའི་བླ་རེའི་རྒྱན་དེ་དག་རླུང་གིས་བསྐྱོད་ན་སྒྲ་སྙན་ཅིང་ཡིད་དུ་འོང་ལ་མཉན་ན་བདེ་བ་ཤ་སྟག་འབྱུང་བར་གྱུར་ཏེ། འདི་ལྟ་སྟེ། དཔེར་ན་རོལ་མོ་སིལ་སྙན་ཡན་ལག་བརྒྱད་དང་ལྡན་པ་མཁས་པས་སྒྲ་ཕྱུང་
ན་སྒྲ་སྙན་ཅིང་ཡིད་དུ་འོང་བ་དང ། མཉན་ན་བདེ་བར་འབྱུང་བ་དེ་བཞིན་དུ་ཤིང་རྟའི་རྒྱན་དེ་དག་དང ། རྟའི་རྒྱན་དེ་དག་དང ། ཡིད་བཞིན་གྱི་ནོར་བུའི་བླ་རེའི་རྒྱན་དེ་དག་རླུང་གིས་བསྐྱོད་ན་སྒྲ་སྙན་ཅིང་ཡིད་དུ་འོང་ལ་མཉན་ན་བདེ་བ་ཤ་སྟག་འབྱུང་བར་གྱུར་ཏོ། །ཤིང་རྟ་དེ་དག་གི་འཕང་གིས་ཀྱང་སྟེང་གི་བར་སྣང་
ལ་དཔག་ཚད་དྲུག་ཅུ་བསྒྲིབས་ཏེ་འཁོད་པར་གྱུར་ཏོ། །ཤིང་རྟ་དེ་དག་གི་ཕྱི་བཞིན་ཡང་རོལ་མོ་སིལ་སྙན་སྣ་ཚོགས་རྗེས་སུ་འབྲང་བར་གྱུར་ཏོ། །ཤིང་རྟ་དེ་དག་ཐམས་ཅད་ལ་ཡང་ལྷ་མ་ཡིན་གྱི་བུ་མོ་རྒྱན་ཐམས་ཅད་ཀྱིས་བརྒྱན་པ་དག་འཁོད་དོ། །བཅོམ་ལྡན་འདས་ལ་མཆོད་པ་བྱ་བའི་
ཕྱིར་ལ་ལ་ནི་རོལ་མོ་བྱེད། ལ་ལ་ནི་སིལ་སྙན་དཀྲོལ། ལ་ལ་ནི་གླུ་ལེན། ལ་ལ་ནི་གར་བྱེད། ལ་ལ་ནི་ཙན་དན་དང་ཨུད་པ་ལའི་ཕྱེ་མས་འཐོར། ལ་ལ་ནི་ཨ་ག་རུ་དང་ཏ་མ་ལའི་ལོ་མའི་ཕྱེ་མས་འཐོར། ལ་ལ་ནི་ལྷ་མ་ཡིན་གྱི་ལྷ་རྫས་ཀྱི་ཕྱེ་མས་འཐོར། ལ་ལ་ནི་གསེར་དངུལ་གྱི་ཕྱེ་
མས་འཐོར། ལ་ལ་ནི་མན་དཱ་ར་བ་དང ། མན་དཱ་ར་བ་ཆེན་པོ་དང ། མན་ཇུ་ཥ་ཀ་དང ། མན་ཛུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྐྱ་སྣར་དང ། སྐྱ་སྣར་ཆེན་པོ་དང ། སྐྱ་སྣར་ཁྲ་བོ་དང ། སྐྱ་སྣར་བཀྲ་ཆེན་གྱི་མེ</font><hr>42-1-21a<br><font size=+2>
ཏོག་མངོན་པར་སྤྲུལ་ཅིང་བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི་གསེར་གྱི་མེ་ཏོག་དང ། དངུལ་གྱི་མེ་ཏོག་དང ། ཤེལ་གྱི་མེ་ཏོག་དང ། བཻ་དཱུརྱའི་མེ་ཏོག་དང ། སྦུག་གི་མེ་ཏོག་དང ། མུ་ཏིག་དམར་པོའི་མེ་ཏོག་དང ། རྡོའི་སྙིང་པོའི་མེ་ཏོག་གིས་མངོན་
པར་འཐོར་རོ། །ལ་ལ་ནི་རིན་པོ་ཆེ་སྣ་བདུན་དང་དབྱིག་གིས་སྙིམ་པ་བཀང་ཞིང་བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི་ན་བཟའ་དང ། རྒྱན་འབུལ་ལོ། །ལ་ལ་ནི་སྐུ་རགས་དང ། ཞབས་ཀྱི་རྒྱན་དང ། ཕྱག་གི་རྒྱན་དང ། སོར་གདུབ་དང ། གདུ་བུ་དང ། གདུ་བུ་ཐམ་པ་དང་།དབུ་རྒྱན་རྩེ་གསུམ་པ་དང ། དཔུང་རྒྱན་དང ། ཅོད་པན་དང ། གསེར་སྐུད་དང ། མུ་ཏིག་གི་དོ་ཤལ་དང ། ནོར་བུའི་དོ་ཤལ་དང ། སེ་མོ་དོ་དང ། གྱ་དོ་དང ། མགུལ་རྒྱན་སྣ་ཚོགས་འཐོར་བར་གྱུར་ཏོ། །ལ་ལ་ནི་ཙོང་ཙོང་གཤིབས་པ། ལ་ལ་ནི་མགོ་རྒྱན། ལ་ལ་ནི་རྣ་ཆ་གདུབ་ཀོར། 
ལ་ལ་ནི་གསེར་གྱི་ཕྲེང་བ་རིན་པོ་ཆེས་སྤྲས་པ། ལ་ལ་ནི་རིན་པོ་ཆེའི་ཕྲེང་བ་གསེར་གྱིས་སྤྲས་པ། ལ་ལ་ནི་གསེར་གྱི་དྲ་བ། ལ་ལ་ནི་གསེར་གྱི་ཕྲེང་བ་དང ། ནོར་བུའི་ཕྲེང་བ་དང ། མུ་ཏིག་གི་ཕྲེང་བ་ཐོགས་སོ། །ལ་ལ་ནི་གསེར་གྱི་གདུགས་དང ། དངུལ་གྱི་གདུགས་དང ། བཻ་དཱུརྱའི་གདུགས་དང ། 
ཤེལ་གྱི་གདུགས་དང ། སྤུག་གི་གདུགས་དང ། རྡོའི་སྙིང་པོའི་གདུགས་དང ། མུ་ཏིག་དམར་པོའི་གདུགས་དང ། རིན་པོ་ཆེ་སྣ་བདུན་གྱི་གདུགས་དང ། རིན་པོ་ཆེའི་རྒྱལ་མཚན་སྣ་ཚོགས་ཐ་དད་པ་དང ། རིན་པོ་ཆེ་ཐམས་ཅད་ཀྱི་བ་དན་ཁ་དོག་སྣ་ཚོགས་དང ། ཚོན་སྣ་ཚོགས་ཅན་མང་པོ་
ཐོགས་སོ། །ལ་ལ་ནི་སྤོས་ཆུའི་ཆར་འབེབས་ཤིང་འཁོད་པར་གྱུར་ཏོ། །ལ་ལ་ནི་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་པར་གྱུར་ཏོ། །མི་མཆོག་ཁྱོད་ལ་ཕྱག་འཚལ་ལོ། །མི་ཕུལ་ཁྱོད་ལ་ཕྱག་འཚལ་ལོ། །རྐང་གཉིས་གཙོ་ལ་ཕྱག་འཚལ་ལོ། །ཁྱོད་ལ་དོ་ཟླ་
ཡོང་མ་མཆིས། །འཇིག་རྟེན་གསལ་ལ་ཕྱག་འཚལ་ལོ། །ཡེ་ཤེས་མཚོ་ལ་ཕྱག་འཚལ་ལོ། །དཔལ་དང་ལྡན་ལ་ཕྱག་འཚལ་ལོ། །རྒྱལ་བའི་འོད་ལ་ཕྱག་འཚལ་ལོ། །ཡོན་ཏན་རྫོགས་ལ་ཕྱག་འཚལ་ལོ། །ཉོན་མོངས་སེལ་ལ་ཕྱག་འཚལ་ལོ། །སྤྱོད་དག་ཁྱོད་ལ་ཕྱག་འཚལ་ལོ། །


</font><hr>42-1-21b<br><font size=+2>
སེམས་དག་ཁྱོད་ལ་ཕྱག་འཚལ་ལོ། །གནས་པ་མི་མངའ་ཞུམ་མི་མངའ། །ལེ་ལོ་མི་མངའ་རྒོད་མི་མངའ། །བརྩོན་འགྲུས་བརྩམས་ཤིང་རྟུལ་བ་ཉིད།།ངེས་པར་རྟོགས་ལ་ཕྱག་འཚལ་ལོ། །རིན་པོ་ཆེའི་ཕོ་བྲང་གི་རྡལ་བལྟ་ན་སྡུག་པ། མཛེས་པ། རིན་པོ་ཆེ་སྣ་བདུན་གྱི་རང་བཞིན་ཅན་ཁྲག་
ཁྲིག་ཕྲག་དྲུག་ཅུ་དྲུག་ཅུ་ཡང་མངོན་པར་སྤྲུལ་ཏེ། རིན་པོ་ཆེའི་ཕོ་བྲང་གི་རྡལ་དེ་དག་རེ་རེ་ཞིང་ཡང་བཞུགས་ས་ཁྲག་ཁྲིག་ཕྲག་དྲུག་ཅུ་དྲུག་ཅུ་ཡང་མངོན་པར་སྤྲུལ་ཏོ། །བཞུགས་ས་དེ་དག་རེ་རེ་ཞིང་ཡང་བ་གམ་བཀྲ་བ། བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་བརྒྱ་ཕྲག་དྲུག་ཅུ་དྲུག་ཅུ་
མངོན་པར་སྤྲུལ་ཏོ། །བ་གམ་དེ་དག་རེ་རེ་ལ་ཡང་ཁང་པ་བརྩེགས་པ་བཀྲ་བ་བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །ཁང་པ་བརྩེགས་པ་དེ་དག་རེ་རེ་ཞིང་ཡང་ཁྱམས་བཀྲ་བ་བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན་ཁྲག་
ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །དེ་ལ་གསེར་གྱི་ཁྱམས་རྣམས་ཀྱི་གདུང་ཕྱམ་ནི་དངུལ། གྲལ་བུ་དང་སྒོ་འཕར་ནི་བཻ་དཱུརྱ། ཐེམ་པ་དང་ཁ་ཁྱེར་ནི་ཤེལ། ཀ་བ་ནི་སྤུག་།ཀ་ཞུ་ནི་མུ་ཏིག་དམར་པོ། ས་གཞི་ནི་རྡོའི་སྙིང་པོའི་རང་བཞིན་ཅན་ཤ་སྟག་གོ་།དངུལ་གྱི་ཁྱམས་
རྣམས་ཀྱི་གདུང་ཕྱམ་ནི་གསེར། གྲལ་བུ་དང་སྒོ་འཕར་ནི་བཻ་དཱུརྱ། ཐེམ་པ་དང་ཁ་ཁྱེར་ནི་ཤེལ། ཀ་བ་ནི་སྤུག་།ཀ་ཞུ་ནི་མུ་ཏིག་དམར་པོ། ས་གཞི་ནི་རྡོའི་སྙིང་པོའི་རང་བཞིན་ཅན་ཤ་སྟག་གོ་།བཻ་དཱུརྱའི་ཁྱམས་རྣམས་ཀྱི་གདུང་ཕྱམ་ནི་ཤེལ། གྲལ་བུ་དང་སྒོ་འཕར་ནི་གསེར། 
ཐེམ་པ་དང་ཁ་ཁྱེར་ནི་དངུལ། ཀ་བ་ནི་སྤུག་།ཀ་ཞུ་ནི་མུ་ཏིག་དམར་པོ། ས་གཞི་ནི་རྡོའི་སྙིང་པོའི་རང་བཞིན་ཅན་ཤ་སྟག་གོ་།ཤེལ་གྱི་ཁྱམས་རྣམས་ཀྱི་གདུང་ཕྱམ་ནི་བཻ་དཱུརྱ། གྲལ་བུ་དང་སྒོ་འཕར་ནི་སྦུག་།ཐེམ་པ་དང་ཁ་ཁྱེར་ནི་རྡོའི་སྙིང་པོ། ཀ་བ་ནི་གསེར། ཀ་ཞུ་ནི་དངུལ།ས་གཞི་ནི་མུ་ཏིག་དམར་པོའི་རང་བཞིན་ཅན་ཤ་སྟག་གོ་།སྤུག་གི་ཁྱམས་རྣམས་ཀྱི་གདུང་ཕྱམ་ནི་རྡོའི་སྙིང་པོ། གྲལ་བུ་དང་སྒོ་འཕར་ནི་མུ་ཏིག་དམར་པོ། ཐེམ་པ་དང་ཁ་ཁྱེར་ནི་གསེར། ཀ་བ་ནི་དངུལ། ཀ་ཞུ་ནི་ཤེལ། ས་གཞི་ནི་བཻ་དཱུརྱའི་རང་བཞིན་ཅན་ཤ་སྟག་གོ་།མུ་ཏིག་དམར</font><hr>42-1-22a<br><font size=+2>
པོའི་ཁྱམས་རྣམས་ཀྱི་གདུང་ཕྱམ་ནི་སྤུག། གྲལ་བུ་དང་སྒོ་འཕར་ནི་རྡོའི་སྙིང་པོ། ཐེམ་པ་དང་ཁ་ཁྱེར་ནི་དངུལ། ཀ་བ་ནི་གསེར། ཀ་ཞུ་ནི་བཻ་དཱུརྱ། ས་གཞི་ནི་ཀེ་ཀེ་རུའི་རང་བཞིན་ཅན་ཤ་སྟག་གོ་།རྡོའི་སྙིང་པོའི་ཁྱམས་རྣམས་ཀྱི་གདུང་ཕྱམ་ནི་མུ་ཏིག་དམར་པོ། །
གྲལ་བུ་དང་སྒོ་འཕར་ནི་གསེར། ཐེམ་པ་དང་ཁ་ཁྱེར་ནི་དངུལ། ཀ་བ་ནི་བཻ་དཱུརྱ། ཀ་ཞུ་ནི་ཀེ་ཀེ་རུ། ས་གཞི་ནི་ཤེལ་གྱི་རང་བཞིན་ཅན་ཤ་སྟག་གོ་།ཁྱམས་དེ་དག་ཏུ་ཡང་སེང་གེའི་ཁྲི་རིན་པོ་ཆེ་སྣ་བདུན་གྱི་རང་བཞིན་ཅན་ལྷ་མ་ཡིན་གྱི་ལྷ་རྫས་ཀྱི་གོས་སྣ་ཚོགས་བཏིང་བ། ཀ་ཙ་ལིན་དིའི་
སྟེང་གཡོགས་ཅན། མཐའ་གཉིས་སུ་རྟེན་མ་བཟང་པོ་བཀོད་པ་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །སེང་གེའི་ཁྲི་དེ་དག་གི་རྐང་རྟེན་རིན་པོ་ཆེ་སྣ་བདུན་གྱི་རང་བཞིན་ཅན་དག་ལ་རས་བཅོས་བུ་སྣ་ཚོགས་འདི་ལྟ་སྟེ། ཤིང་བལ་ལས་བྱས་པ་ཤིན་ཏུ་ཕྲ་བ་དང ། སྲིན་བལ་ལས་
བྱས་པ་ཤིན་ཏུ་ཕྲ་བ་དང ། ཟར་མའི་ཤུན་པ་ལས་བྱས་པ་ཤིན་ཏུ་ཕྲ་བ་དང ། ཤུན་ཕྲགས་ལས་བྱས་པ་ཤིན་ཏུ་ཕྲ་བ་དང ། ཀ་ཤི་ཀ་ལས་བྱས་པ་ཤིན་ཏུ་ཕྲ་བ་བྱེ་བ་ཕྲག་དྲུག་ཅུ་དྲུག་ཅུ་བཏིང་བར་གྱུར་ཏོ། །སེང་གེའི་ཁྲི་དེ་དག་རེ་རེའི་ངོས་གཉིས་སུ་ཡང་ལྷ་མ་ཡིན་གྱི་བུ་མོ་རྒྱན་ཐམས་
ཅད་ཀྱིས་བརྒྱན་པ། རིན་པོ་ཆེ་སྣ་བདུན་ལས་བྱས་པའི་བསིལ་ཡབ་ཐོགས་པ་གཉིས་གཉིས་མངོན་པར་སྤྲུལ་ཏེ། སེང་གེའི་ཁྲི་དེ་དག་ལ་ལྷ་མ་ཡིན་གྱི་བུ་མོ་གཞོན་ནུ་འཁོད་པ་དག་ལ་གཡོབ་བོ། །ཁྱམས་དེ་དག་རེ་རེ་ཞིང་ཡང་རིན་པོ་ཆེ་སྣ་བདུན་ལས་བྱས་པའི་གདུགས་ཁྲག་ཁྲིག་ཕྲག་
དྲུག་ཅུ་དྲུག་ཅུ་མངོན་པར་སྤྲུལ་ཏོ། །ཁྱམས་དེ་དག་རེ་རེ་ཞིང་ཡང་རིན་པོ་ཆེ་སྣ་བདུན་གྱི་རྒྱལ་མཚན་ཁྲག་ཁྲིག་ཕྲག་དྲུག་ཅུ་དྲུག་ཅུ་མངོན་པར་སྤྲུལ་ཏོ། །དེ་ལ་གསེར་གྱི་ཁྱམས་རྣམས་སུ་ནི་རྒྱལ་མཚན་སྔོན་པོ་ལ་ཡུ་བ་སེར་པོ་ཤེལ་གྱིས་སྤྲས་པ་དག་བཙུགས། དངུལ་གྱི་ཁྱམས་རྣམས་སུ་
ནི་རྒྱལ་མཚན་སེར་པོ་ཡུ་བ་དམར་པོ་གསེར་གྱིས་སྤྲས་པ་དག་བཙུགས། བཻ་དཱུརྱའི་ཁྱམས་རྣམས་སུ་ནི་རྒྱལ་མཚན་དམར་པོ་ཡུ་བ་སེར་པོ་ཤེལ་གྱིས་སྤྲས་པ་དག་བཙུགས། ཤེལ་གྱི་ཁྱམས་རྣམས་སུ་ནི་རྒྱལ་མཚན་དཀར་པོ་ཡུ་བ་བཻ་དཱུརྱ་གསེར་གྱིས་སྤྲས་པ་དག་བཙུགས།


</font><hr>42-1-22b<br><font size=+2>
རིན་པོ་ཆེ་སྣ་ཚོགས་ཀྱི་ཁྱམས་རྣམས་སུ་ནི་རྒྱལ་མཚན་ཁྲ་བོ་གསེར་གྱི་ཡུ་བ་བཻ་དཱུརྱས་སྤྲས་པ་དག་བཙུགས་སོ། །དེ་ལ་རྒྱལ་མཚན་སྔོན་པོ་རྣམས་ནི་ཏོག་སེར་པོ་རྒྱལ་མཚན་སེར་པོ་རྣམས་ནི་ཏོག་སྔོན་པོ། རྒྱལ་མཚན་དམར་པོ་རྣམས་ནི་ཏོག་དཀར་པོ། རྒྱལ་མཚན་དཀར་པོ་
རྣམས་ནི་ཏོག་དམར་པོ། རིན་པོ་ཆེ་སྣ་ཚོགས་ཀྱི་རྒྱལ་མཚན་རྣམས་ནི་ཏོག་རིན་པོ་ཆེ་སྣ་བདུན་པ་ཤ་སྟག་གོ་།རིན་པོ་ཆེའི་ཕོ་བྲང་གི་རྡལ་དེ་དག་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་གསུམ་སྐོར་བ་བྱེད་པར་གྱུར་ཏོ། །དེ་འདི་ལྟ་སྟེ། དཔེར་ན་སུམ་ཅུ་རྩ་གསུམ་
གྱི་ལྷ་རྣམས་ཀྱི་གླང་པོ་ཆེ་ས་སྲུང་གི་བུ་ནི་བར་སྣང་གི་ནམ་མཁའ་ལས་འགྲོ་ཞིང་སུམ་ཅུ་རྩ་གསུམ་པའི་ལྷ་རྣམས་སྐྱེད་མོས་ཚལ་ཡོངས་འདུས་བརྟོལ་དུ་ཉེ་བར་འཇོག་གོ་།དེ་བཞིན་དུ་ཕོ་བྲང་གི་རྡལ་དེ་དག་ཀྱང་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་གསུམ་སྐོར་བ་བྱེད་དོ། །རིན་པོ་ཆེའི་ཕོ་བྲང་གི་རྡལ་དེ་དག་དང ། བ་གམ་དེ་དག་དང ། བཞུགས་ས་དེ་དག་དང ། ཁང་པ་བརྩེགས་པ་དེ་དག་དང ། ཁྱམས་དེ་དག་དང ། སེང་གེའི་ཁྲི་དེ་དག་དང ། གདུགས་དེ་དག་དང ། རྒྱལ་མཚན་དེ་དག་དང ། བ་དན་དེ་དག་ལས་ལྷའི་ཙན་དན་དང ། ུད་པ་ལ་དང ། ་
ག་རུའི་ཕྱེ་མའི་ཆར་བབ་པར་གྱུར་ཏོ། །མེ་ཏོག་མན་དཱ་ར་བ་དང ། མན་དཱ་ར་བ་ཆེན་པོ་དང ། མཉྫུ་ཥ་ཀ་དང ། མཉྫུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྐྱ་སྣར་དང ། སྐྱ་སྣར་ཆེན་པོ་དང ། སྐྱ་སྣར་ཁྲ་བོ་དང ། 
སྐྱ་སྣར་བཀྲ་ཆེན་གྱི་ཆར་ཡང་མངོན་པར་བབ་པར་གྱུར་ཏོ། །གསེར་དང ། དངུལ་དང ། བཻ་དཱུརྱ་དང ། ཤེལ་དང ། སྤུག་དང ། རྡོའི་སྙིང་པོ་དང ། མུ་ཏིག་དམར་པོ་དང ། རིན་པོ་ཆེ་ཐམས་ཅད་ཀྱི་མེ་ཏོག་དང ། དབྱིག་དང ། གསེར་དང ། ཡིད་བཞིན་གྱི་རས་བཅོས་བུའི་ཆར་ཡང་མངོན་པར་བབ་
པར་གྱུར་ཏོ། །ཡིད་བཞིན་གྱི་ནོར་བུའི་བླ་རེ་དེ་དག་གི་མཐུས་ལྷ་མ་ཡིན་གྱི་བུ་དེ་དག་རིན་པོ་ཆེ་གང་དང་གང་གི་ཆར་འབབ་པར་འདོད་པ་དེ་དང་དེ་དག་ལས་མངོན་བར་བབ་པར་གྱུར་ཏོ། །དེའི་ཚེ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་ཁོར་ཡུག་ཏུ་ནི་དཔག་ཚད་དྲུག་ཁྲི་འཕང་དུ་ཡང་དཔག་ཚད་དྲུག</font><hr>42-1-23a<br><font size=+2>
ཁྲིར་ལྷ་མ་ཡིན་གྱི་མཆོད་པ་དེ་ལྟ་བུས་རྒྱས་པར་གང་བར་གྱུར་ཏོ། །རིན་པོ་ཆེའི་ཕོ་བྲང་གི་རྡལ་དེ་དག་གིས་ཀྱང་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ཏོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་
ཡང་མི་འགྲེང་བདུན་ཙམ་དུ་མེ་ཏོག་མན་དཱ་ར་བས་རྒྱས་པར་གང་བར་གྱུར་ཏོ། །སྤོས་ཆུས་ཀྱང་རྫབ་ཏུ་གྱུར་ཏོ། །སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་སྤོས་ཆུའི་རྫབ་ཀྱི་དྲི་དེས་ཁྱབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་
འདིའི་སེམས་ཅན་གང་དག་གིས་སྤོས་ཆུའི་རྫབ་ཀྱི་དྲི་དེ་ཚོར་བ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏེ། བྱང་ཆུབ་ཏུ་སེམས་དང་པོ་བསྐྱེད་པ་དག་ནི་སྨོས་ཀྱང་མི་དགོས་སོ། །དེ་ནས་ལྷ་མ་ཡིན་གྱི་དབང་པོ་ཐགས་ཟངས་
རིས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ་ལན་གསུམ་བསྐོར་བ་བྱས་ནས། བཅོམ་ལྡན་འདས་ལ་ཙན་དན་གྱི་ཕྱེ་མས་མངོན་པར་གཏོར་ཏེ། ཚིགས་སུ་བཅད་པ་དག་གིས་མངོན་པར་བསྟོད་པ། བྱང་ཆུབ་དམ་པ་དོན་དུ་གཉེར་སླད་དུ། །སྐྱབས་ཀྱི་དམ་པ་རབ་ཏུ་མི་སྒུལ་བ། །ལྷར་
བཅས་འཇིག་རྟེན་མི་འཇིགས་སྩོལ་བ་པོ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །གང་ལ་དགའ་བའི་ཡིད་ཀྱིས་སྐྱབས་སོང་ན། །ལོག་ལྟུང་དག་ཏུ་ལྟུང་བར་མི་འགྱུར་བ། །དེ་ལ་བདག་ནི་སྐྱབས་སུ་ཉེ་བར་མཆི། །དཔེ་མེད་བྱང་ཆུབ་འཚལ་བའི་སླད་དུའོ། །འཁོར་བའི་
སྡུག་བསྔལ་དག་ནི་བཤིག་བཅོམ་ཞིང ། །མྱ་ངན་ལས་རྒལ་ཉོན་མོངས་དག་གྱུར་ལ། །འདྲེན་པ་གཞན་གྱི་དྲིང་ལ་མི་འཇོག་པ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །རྒ་དང་འཆི་བས་ཉེན་པར་གྱུར་པ་ཡི། །ལྷ་དང་མི་རྣམས་འདྲེན་པ་བཅོམ་ལྡན་འདས། །གང་ལ་སྐྱབས་
སོང་ཕྱིས་ཀྱང་མི་སྐྱེ་བ། །ཁྱོད་ལ་བདག་ནི་སྐྱབས་སུ་ཉེ་བར་མཆི། །དེ་ནས་ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་རྟའི་རྒྱན་དེ་དག་དང ། ཤིང་རྟའི་རྒྱན་དེ་དག་དང ། ལྷ་མ་ཡིན་གྱི་རྒྱན་དེ་དག་དང ། གདུགས་དང་།


</font><hr>42-1-23b<br><font size=+2>
རྒྱལ་མཚན་དང ། བ་དན་གྱི་རྒྱན་དེ་དག་དང ། བླ་རེ་དང་དྲིལ་བུ་གཡེར་ཀའི་རྒྱན་དེ་དག་རླུང་གིས་བསྐྱོད་པ་ལས་སྒྲ་སྙན་ཅིང་ཡིད་དུ་འོང་ལ་མཉན་ན་དགའ་བ་འདི་ལྟ་བུ་དག་བྱུང་བར་གྱུར་ཏེ། འདི་ལྟར་དཔེར་ན་རོལ་མོ་སིལ་སྙན་ཡན་ལག་བརྒྱད་པ་མཁས་པས་སྒྲ་ཕྱུང་བ་བཞིན་ནོ། །དེ་ལྟར་
ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་སྟེང་གི་བར་སྣང་ལས་ལྷའི་ཙན་དན་དང ། ུད་པ་ལ་དང ། ་ག་རུ་དང ། ཏ་མ་ལའི་ལོ་མའི་ཕྱེ་མའི་ཆར་མངོན་པར་བབ་པར་གྱུར་ཏོ། །ལྷ་མ་ཡིན་གྱི་སྤོས་ཀྱི་ཕྱེ་མ་རྣམ་པ་སྣ་ཚོགས་
དུ་མའི་ཆར་མངོན་པར་བབ་པར་གྱུར་ཏོ། །ལྷའི་མེ་ཏོག་མན་དཱ་ར་བ་དང ། མན་དཱ་ར་བ་ཆེན་པོ་དང ། མཉྫུ་ཥ་ཀ་དང ། མཉྫུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྐྱ་སྣར་དང ། སྐྱ་སྣར་ཆེན་པོ་དང ། 
སྐྱ་སྣར་ཁྲ་བོ་དང ། སྐྱ་སྣར་བཀྲ་ཆེན་གྱི་མེ་ཏོག་རྣམས་དང ། སྤྲུལ་པའི་མེ་ཏོག་སྣ་ཚོགས་ཀྱི་ཆར་མངོན་པར་བབ་བོ། །སྟེང་གི་བར་སྣང་ལས་གསེར་དང ། དངུལ་དང ། བཻ་དཱུརྱ་དང ། ཤེལ་དང ། སྤུག་དང ། རྡོའི་སྙིང་པོ་དང ། མུ་ཏིག་དམར་པོ་དང ། རིན་པོ་ཆེ་ཐམས་ཅད་
ཀྱི་མེ་ཏོག་གི་ཆར་ཡང་མངོན་པར་བབ་བོ། །ལྷ་དང་ལྷ་མ་ཡིན་གྱི་སྤོས་ཆུའི་ཆར་ཡང་མངོན་པར་བབ་བོ། །སྤོས་ཆུའི་ཆར་དེ་བབ་པས་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་སྤོས་ཆུའི་རྫབ་ཏུ་གྱུར་ཏོ། །སྤོས་ཆུའི་རྫབ་ཀྱི་དྲི་དེས་ཀྱང་སྟོང་གསུམ་
གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་ཏོ། །སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ལྟར་ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་བཅོམ་
ལྡན་འདས་ལ་ལན་གསུམ་སྐོར་བ་བྱེད་པའི་ཚེ། བར་སྣང་ལས་ལྷ་མ་ཡིན་གྱི་ལྷ་རྫས་ཀྱི་སིལ་སྙན་གྱི་སྒྲ་དག་བྱུང་ངོ ། །སིལ་སྙན་དེ་དག་གི་སྒྲས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་གྲག་པར་གྱུར་ཏོ། །ཐེག་པ་ཆེན་པོ་ལ་ཡང་དག་པར་ཞུགས་པའི་སེམས་ཅན་གང</font><hr>42-1-24a<br><font size=+2>
དག་གིས་སྒྲ་ཐོས་པར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ལྟར་ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་བཅོམ་ལྡན་འདས་ལ་ལན་གསུམ་བསྐོར་བ་བྱས་པའི་ཚེ་ལྷ་མ་ཡིན་གྱི་བུ་མོ་བརྒྱ་
སྟོང་དག་བཅོམ་ལྡན་འདས་ལ་མཆོད་པ་བྱ་བ་དང ། ལྷ་མ་ཡིན་གྱི་དབང་པོ་ཐགས་ཟངས་རིས་ཀྱི་འཁོར་བྱ་བའི་ཕྱིར་ལ་ལ་ནི་གླུ་ལེན། ལ་ལ་ནི་སིལ་སྙན་བྱེད། ལ་ལ་ནི་གར་བྱེད། ལ་ལ་ནི་ལུས་ཀྱི་ཚུལ་སྒྱུར། ལ་ལ་ནི་ཙན་དན་དང ། ུད་པ་ལ་དང ། ་ག་རུ་
དང ། ཏ་མ་ལའི་ལོ་མའི་ཕྱེ་མ་འཐོར། ལ་ལ་ནི་ལྷའི་མེ་ཏོག་མན་དཱ་ར་བ་དང ། མན་དཱ་ར་བ་ཆེན་པོ་དང ། མན་ཛུ་ཥ་ཀ་དང ། མན་ཛུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྐྱ་སྣར་དང ། སྐྱ་སྣར་
ཆེན་པོ་དང ། སྐྱ་སྣར་ཁྲ་བོ་དང ། སྐྱ་སྣར་བཀྲ་ཆེན་དང ། སྤྲུལ་པའི་མེ་ཏོག་རྣམས་དང ། གསེར་དང ། དངུལ་དང ། བེེ་དཱུརྱ་དང ། ཤེལ་དང ། སྦུག་དང ། རྡོའི་སྙིང་པོ་དང ། མུ་ཏིག་དམར་པོ་དང་རིན་པོ་ཆེ་ཐམས་ཅད་ཀྱི་མེ་ཏོག་རྣམས་འཐོར་ཞིང་བཅོམ་ལྡན་འདས་ལ་མངོན་པར་
འཐོར་རོ། །ལ་ལ་ནི་ན་བཟའ་དང ། རྐང་གདུབ་དང ། སྐུ་རགས་དང ། ཕྱག་གི་རྒྱན་དང ། སོར་གདུབ་དང་།གདུ་བུ་དང ། གདུ་བུ་ཐམ་པ་དང ། དབུ་རྒྱན་རྩེ་གསུམ་པ་དང ། དཔུང་རྒྱན་དང ། ཅོད་པན་དང ། གསེར་སྐུད་དང ། མུ་ཏིག་གི་ཕྲེང་བ་དང ། ནོར་བུའི་དོ་ཤལ་དང ། སེ་མོ་དོ་དང ། 
གྱ་དོ་དང ། མགུལ་རྒྱན་སྣ་ཚོགས་དང ། རྣ་ཆ་དང ། རྣ་ཆ་གདུབ་ཀོར་དང ། ཚོང་ཚོང་གཤིབས་པ་དང ། མགོ་རྒྱན་དང ། ཕྲེང་བའི་ལྡ་ལྡི་དང ། སྤོས་ཀྱི་ལྡ་ལྡི་དང ། ནོར་བུའི་ལྡ་ལྡི་དག་འཐོར་ཞིང་མེ་ཏོག་གི་བླ་རེ་དང ། སྤོས་ཀྱི་བླ་རེ་དང ། ནོར་བུའི་བླ་རེ་དག་ཐོགས་སོ། །ལ་ལ་ནི་སྤོས་
ཆུའི་ཆར་འབེབས་སོ། །ལ་ལ་ནི་ཕྱེ་མའི་ཆར་འབེབས་སོ། །ལ་ལ་ནི་མུ་ཏིག་དམར་པོས་སྙིམ་པ་བཀང་སྟེ། བཅོམ་ལྡན་འདས་ལ་མངོན་པར་འཐོར་རོ། །ལ་ལ་ནི་རིན་པོ་ཆེས་སྙིམ་པ་བཀང ། ལ་ལ་ནི་གསེར་གྱིས་སྙིམ་པ་བཀང་སྟེ། བཅོམ་ལྡན་འདས་ལ་མངོན་པར་འཐོར་རོ། །ཚིགས་སུ</font><hr>42-1-24b<br><font size=+2>
བཅད་པ་འདི་ཡང་སྨྲས་སོ། །གང་བརྟེན་གང་ལ་གནས་བཅས་ནས། །གང་ཟག་མཆོག་ལ་མཆོད་འགྱུར་བ། །དེ་འདྲ་བ་ཡི་གྲོགས་པོ་དང ། །རྟག་པར་རྒྱུན་དུ་ཕྲད་པར་ཤོག་།ལྷ་མ་ཡིན་གྱི་དབང་པོ་ཐགས་ཟངས་རིས་ཀྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་རབ་སིམ་
གྱིས་ཀྱང་བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་པ། སྟོབས་བཅུ་བརྩོན་བདེན་ཁྱོད་ལ་ཕྱག་འཚལ་ལོ། །མི་འཇིགས་
འཇིགས་བྲལ་ཁྱོད་ལ་ཕྱག་འཚལ་ལོ། །ཆོས་ལ་མ་འདྲེས་ངེས་པར་གྱུར་པ་པོ། །འགྲོ་བའི་འདྲེན་པ་ཁྱོད་ལ་ཕྱག་འཚལ་ལོ། །ཀུན་སྦྱོར་འཆིང་བ་གཅོད་ལ་ཕྱག་འཚལ་ལོ། །འཁོར་རྒྱུད་མི་གནས་པ་ལ་ཕྱག་འཚལ་ལོ། །མཐར་ཕྱིན་ཐང་གནས་ཁྱོད་ལ་ཕྱག་འཚལ་ལོ། །འགྲོ་བ་བྱིང་
བ་སྒྲོལ་ལ་ཕྱག་འཚལ་ལོ། །སེམས་ཅན་འགྲོགས་ཀྱང་རྒོད་པ་མི་མངའ་ཞིང ། །འགྲོ་བ་ཀུན་ལ་ཐུགས་ནི་རྣམ་གྲོལ་ཏེ། །པད་མ་ཆུ་ཡིས་མི་གོས་འདྲ་བ་བོ། །བློ་ཟབ་བསམ་མི་ཁྱབ་ལ་ཕྱག་འཚལ་ལོ། །སངས་རྒྱས་ཐུབ་པ་ཁྱོད་ཀྱིས་སྟོང་ཉིད་མཁྱེན། །རྣམ་པ་ཀུན་ཏུ་མཚན་མ་ཐམས་
ཅད་བཤིག་།ཁྱོད་ནི་གང་དུའང་སྨོན་པ་ཡོང་མི་མངའ། །མི་གནས་ནམ་མཁའ་མཉམ་ལ་ཕྱག་འཚལ་ལོ། །ལྷ་མ་ཡིན་གྱི་དབང་པོ་རབ་སིམ་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་ཤིང་རྟ་བཟང་གིས་ཀྱང ། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་
གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་གསེར་ཕྱེ་དག་གིས་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། ས་དང་བར་སྣང་དང་ནི་ལྷའི་ཡུལ་ནའང ། །བདེ་གཤེགས་ཁྱོད་མཉམ་མ་མཆིས་ལྷག་མ་མཆིས། །
མཚན་མར་གཟུང་ནས་ཕྱིན་ཅི་ལོག་ཞུགས་པའི། །འགྲོ་བ་སྨིག་རྒྱུ་འདྲ་བར་ཁྱོད་ཀྱིས་མཁྱེན། །འདི་ན་བྱེད་པ་ཚོར་བ་སེམས་ཅན་མེད། །གང་ཟག་མེད་ཅིང་བདག་གིར་བྱ་བ་མེད། །ཆོས་ཀུན་སྟོང་ཞིང་བྱེད་པ་ཀུན་ལས་དབེན། །རང་བཞིན་མེད་ཅིང་གཡོ་མེད་ཞི་ཞེས་བསྟན། །སུ་ཞིག</font><hr>42-1-25a<br><font size=+2>
བདེ་གཤེགས་བསྟན་པ་འདིར་མོས་ཏེ། །ཆོས་ཀུན་བྱས་པ་མེད་པའི་རྗེས་འབྲང་བ། །དེ་འདིར་འདྲེན་པའི་སྲས་སུ་གྱུར་པ་སྟེ། །ཇི་ལྟར་བསྟན་པ་དེ་བཞིན་ཡབ་ལྟར་སྤྱོད། །རྣམ་འདྲེན་ཁྱོད་ལ་བདག་བསྟོད་བསོད་ནམས་གང་སྐྱེས་དེ། །ཇི་ལྟར་རྒྱལ་བ་མཁྱེན་
པ་ཡིས་ནི་མཁྱེན་གྱུར་པ། །དགེ་བའི་རྩ་བ་དེ་ཀུན་མ་ལུས་མཐའ་དག་འདིར། །འགྲོ་ལ་སྩལ་གྱིས་ཐམས་ཅད་སངས་རྒྱས་གྲུབ་པར་ཤོག། །།བམ་པོ་གསུམ་པ། ལྷ་མ་ཡིན་གྱི་དབང་པོ་ཤིང་རྟ་བཟང་གིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་སྟོབས་
ལྡན་གྱིས་ཀྱང ། བཅོམ་ལྡན་འདས་ལ་མཆོད་པ་བྱས་ཏེ་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ནས་བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་དངུལ་གྱི་མེ་ཏོག་རྣམས་ཀྱིས་གཏོར་ཏེ། ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། འཁོར་བའི་རྒྱ་མཚོ་ཆུ་ལས་ཕ་
རོལ་རྣམས་རྒལ་བ། །རྒལ་ནས་སྐྱེ་བོ་རྒྱུན་གྱི་རྗེས་འགྲོ་སྒྲོལ་མཛད་ཅིང ། །བདེ་གཤེགས་ཕ་རོལ་ཐང་བདེ་འཇིགས་པ་མེད་འཇོག་པ། །སྤྱན་མཛེས་བདེ་བར་གཤེགས་པ་ཁྱོད་ཀྱི་ཞབས་ལ་གཏུགས། །བློ་མཆོག་ཁྱོད་ཀྱིས་འགྲོ་བ་ཐམས་ཅད་ཀུན་ཏུ་མཁྱེན། །ཕྱིན་ཅི་ལོག་ལྟ་ཐིབས་པོར་རབ་ཞེན་
བློ་ལྡན་ཏེ། །འཁྲུལ་པ་སྨིག་རྒྱུ་ལྟ་བུར་མ་ཤེས་གྱུར་རྣམས་ལ། །མཚུངས་པ་མེད་པའི་ཐུགས་རྗེ་བསྐྱེད་ནས་རྟོགས་པར་མཛད། །མི་མཆོག་ཁྱོད་ཀྱིས་ཆོས་རྣམས་ཐམས་ཅད་སྒྱུ་མ་དང ། །སྨིག་རྒྱུ་འདྲ་ཞིང་མིག་ཡོར་མཚུངས་ཞེས་རབ་ཏུ་བསྟན། །ཐུབ་པ་དམ་པ་ཁྱོད་ཀྱིས་ཆོས་ཀྱི་
སྲས་མཆོག་བསྐྱེད། །སྲིད་པ་གསུམ་པོ་དག་ནི་མི་ཆགས་སྤྱད་པ་སྤྱོད། །དངོས་པོ་ལོག་པའི་དོན་གྱུར་རང་བཞིན་བྲལ་བ་དང ། །གཞན་གྱི་དངོས་པོས་སྟོང་པར་མི་དབང་ཁྱོད་ཀྱིས་མཁྱེན། །བྱིས་པ་རྨོངས་པའི་བློ་གྲོས་རྨི་ལམ་དགའ་ལྟ་བུར། །མི་དབང་ཁྱོད་ཀྱིས་སྲས་ཀྱིས་ཚལ་ན་སྤྱད་པ་སྤྱོད། །
ལྷ་མ་ཡིན་གྱི་དབང་པོ་སྟོབས་ལྡན་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་སྒྲ་གཅན་གྱིས་ཀྱང ། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་མེ་ཏོག་སྐྱ་སྣར་ཁྲ་བོ་རྣམས་ཀྱིས་གཏོར་ཏེ་ཚིགས་སུ་བཅད་པ</font><hr>42-1-25b<br><font size=+2>
དག་གིས་བཅོམ་ལྡན་འདས་ལ་མངོན་པར་བསྟོད་པ། མི་མཆོག་ཁྱོད་ཀྱི་སྐུ་ཡིས་ནི། །ལྷར་བཅས་འཇིག་རྟེན་འདི་ཟིལ་མནན། །རི་རབ་ཀྱིས་ནི་ཡུངས་འབྲུ་དང ། །རྒྱ་མཚོས་བ་རྗེས་ཆུ་བཞིན་ནོ། །གཟུགས་མཛེས་མཚན་གྱིས་རབ་ཏུ་བརྒྱན། །གཟུགས་ཀྱིས་
གཟུགས་ཀྱི་དམ་པ་དང ། །གཟུགས་རྣམས་ཐམས་ཅད་ཟིལ་གྱིས་མནན། །དཔེར་ན་ཉི་མས་མེ་ཁྱེར་བཞིན། །གཟི་བརྗིད་ཕུང་པོ་གཟི་བརྗིད་ཀྱིས། །སེམས་ཅན་གཟི་ལྡན་ཟིལ་གྱིས་མནན། །ཟིལ་མནན་དེ་དག་ལམ་མེ་མིན། །ཉི་མས་མེ་ཁྱེར་ཟིལ་བརླག་
བཞིན། །ཡེ་ཤེས་རྒྱ་མཚོ་ཡེ་ཤེས་ཀྱིས། །འཇིག་རྟེན་གསུམ་ཀུན་ཟིལ་གྱིས་མནན། །ཟིལ་མནན་དེ་དག་ལམ་མེ་མིན། །ཉི་མས་ཟླ་འོད་ཟིལ་བརླག་བཞིན། །ལྷ་མ་ཡིན་གྱི་དབང་པོ་སྒྲ་གཅན་གྱིས་ཇི་ལྟར་བྱས་པ་དེ་བཞིན་དུ། ལྷ་མ་ཡིན་གྱི་དབང་པོ་བདེ་མཆོག་གིས་
ཀྱང ། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་མེ་ཏོག་སྐྱ་སྣར་ཁྲ་བོས་མངོན་པར་གཏོར་ཏེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །འདྲེན་པ་བློ་གྲོས་
ཞི་བ་བོ། །ཞི་གནས་དགྱེས་པས་འགྲོ་བ་ཡི། །འདོད་སྡང་གཏི་མུག་རྡུལ་ཞི་མཛད། །ཆར་པས་རྡུལ་རྣམས་ཞི་བགྱིད་བཞིན། །འབར་ཞིང་ཆོས་ཚུལ་འབར་བར་མཛད། །བླུགས་སྦྱིན་གྱིས་ནི་མེ་བཞིན་ནོ། །ནགས་བཏང་ནགས་མེས་ཤིང་སྲེག་ལྟར། །དེ་བཞིན་ཉོན་
མོངས་དྲ་བ་སྲེག་།བསྐལ་པ་བྱེ་བ་ཁྲག་ཁྲིག་ནི། །དཔག་ཏུ་མེད་པར་དགེ་རྩ་འཛིན། །ཉོན་མོངས་ཐམས་ཅད་འཇོམས་མཛད་དེ། །བདུད་རྩིས་ལུས་བྱུགས་དུག་བཞིན་ནོ། །མུན་པ་མུན་ནག་སེལ་མཛད་དེ། །མུན་ཁུང་སྒྲོན་མ་འབར་བ་བཞིན། །ཆོས་ཀྱི་ཚུལ་ཡང་སྟོན་
མཛད་དེ། །ནོར་མཁན་རིན་ཆེན་ཡོན་ཏན་བཞིན། །ལྷ་མ་ཡིན་གྱི་དབང་པོ་བདེ་མཆོག་གིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་གཡུལ་ལ་མངོན་པར་དགའ་བས་ཀྱང ། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས</font><hr>42-1-26a<br><font size=+2>
ལ་ལན་གསུམ་སྐོར་བ་བྱེད་ཅིང་རིན་པོ་ཆེའི་མེ་ཏོག་རྣམས་ཀྱིས་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། གདུལ་དཀའ་མི་བཟད་སེམས་ནི་ཁྱོད་ཀྱིས་བཏུལ། །གཡུལ་ལ་དཔའ་བས་གཡུལ་ངོར་དཔའ་བོ་
བཞིན། །ཤིན་ཏུ་ཚར་བཅད་རང་གིས་དབང་དུ་མཛད། །ཐུགས་དུལ་མི་བསྙེངས་ཁྱོད་ལ་ཕྱག་འཚལ་ལོ། །ཁྱོད་ཀྱིས་དབང་པོ་ཐུལ་ཅིང་དགྲ་ཡང་བཅོམ། །གང་དུའང་མི་བསྙེངས་མི་བསྐྱོད་བདེ་བ་བརྙེས། །ཁྱོད་ནི་ཉོན་མོངས་རྣམས་ཀྱིས་ཡང་མི་འཁྲུགས། །རྣམ་
པ་ཀུན་ཏུ་དུག་ནི་མ་ལུས་བཅོམ། །མཐུ་ཆེན་ཁྱོད་ཀྱིས་བྱམས་པ་ལེགས་བསྒོམས་ཏེ། །ཁྱོད་ཀྱི་ཐུགས་ནི་དགྲ་དང་བྱམས་ལ་མཉམ། །ཐུབ་པ་ཁྱོད་ཀྱིས་སེམས་ཅན་བློ་གྲོས་བཤིག་།འགྲོ་བ་ཀུན་དུ་ཁྱོད་ནི་བཞུད་མི་མངའ། །ཤེས་རབ་རྣམ་གྲོལ་སྲིད་པའི་སྲེད་པ་
བསྐམས། །ཤེས་རབ་རྣམ་དག་ཁྱོད་ཀྱི་ཐུགས་ཀྱང་དག་།ཆོས་རྣམས་ཀུན་ལ་ཐུགས་ནི་ཆགས་མི་མངའ། །ཐམས་ཅད་ཟིལ་མནན་ཐུབ་མཆོག་ཁྱོད་འདྲ་མེད། །ལྷ་མ་ཡིན་གྱི་དབང་པོ་གཡུལ་ལ་མངོན་པར་དགའ་བས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་
མིག་བཟངས་ཀྱིས་ཀྱང ། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་བཅོམ་ལྡན་འདས་ལ་གཏེར་ཆེན་པོ་ཡང་ཕུལ་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་
པ། དཔའ་བོ་ཆེན་པོ་ཁྱོད་ཀྱིས་ནི། །ཆོས་རྣམས་ཡང་དག་མཚན་ཉིད་མཁྱེན། །གང་འདི་ཆོས་ཞེས་བརྗོད་པ་ཡང ། །དེ་ནི་བརྡར་བཏགས་ཚིག་ཏུ་ཟད། ཆོས་རྣམས་ཆོས་ཀྱི་ངོ་བོ་ཡིས། །རྣམ་པ་ཀུན་ཏུ་མི་དམིགས་སོ། །གང་འདི་ཆོས་ཤེས་བརྗོད་པ་ཡང ། །
དེ་ནི་མིང་ཙམ་ཟད་ཅེས་གསུངས། །མིང་ནི་མིང་གིས་དབེན་པ་སྟེ། །མཚན་ཉིད་ཀྱང་ནི་དེ་བཞིན་ནོ། །ཆོས་རྣམས་མཚན་ཉིད་མེད་པ་སྟེ། །མིང་ཡང་མེད་ཅེས་ཁྱོད་ཀྱིས་བཤད། །རབ་ཏུ་བཤད་ཅེས་བགྱི་བ་ཡང ། །བཤད་པ་ཅི་ཡང་མ་མཆིས་ཏེ། །གང་གིས་ཀྱང་ནི</font><hr>42-1-26b<br><font size=+2>
མ་བཤད་ཅིང ། །སུ་ལའང་བཤད་པ་མ་མཆིས་སོ། །ཁྱོད་ཀྱི་སྲས་པོ་མི་མཆོག་རྣམས། །ཆོས་རྣམས་དེ་ལྟར་འཚལ་ནས་ནི། །ཆོས་རྣམས་ལ་ཡང་མི་ཆགས་པར། །རྣམ་པར་སྤྱད་དོ་ཐུབ་པ་ཆེ། །ལྷ་མ་ཡིན་གྱི་དབང་པོ་མིག་བཟངས་ཀྱིས་ཇི་ལྟར་བྱས་པ་དེ་
བཞིན་དུ་ལྷ་མ་ཡིན་གྱི་དབང་པོ་འཇིག་རྟེན་གསུམ་རྣམ་པར་གནོན་པས་ཀྱང ། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་བཅོམ་ལྡན་འདས་ལ་མུ་ཏིག་གི་དོ་ཤལ་ཡང་ཕུལ་ནས་ཚིགས་
སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། དགྲ་ཟླ་མ་མཆིས་ཁྱོད་ལ་བདག་བསྟོད་དོ། །ཚུལ་ཁྲིམས་དང་ནི་གཟུགས་དང་ཡེ་ཤེས་སྟོབས། །དེ་ནི་འཇིག་རྟེན་གསུམ་ན་མཚུངས་མ་མཆིས། །དེ་ཕྱིར་ཁྱོད་ནི་དགྲ་ཐུལ་མཚུངས་མ་མཆིས། །ཁྱོད་
ཀྱི་གཟུགས་ནི་ཆོས་ཀྱིས་བསྐྱེད་པས་ན། །གཟུགས་ཀྱི་སྟོབས་ཀྱིས་ཁམས་གསུམ་ཟིལ་གྱིས་མནན། །སྦྱིན་པའི་སྟོབས་ཀྱིས་མཚན་ནི་ཕུན་སུམ་ཚོགས། །དཔེ་བྱད་ཕུན་སུམ་ཚོགས་ཤིང་གཟུགས་ཀྱང་དག་།ཚུལ་ཁྲིམས་སྟོབས་ཀྱིས་ཁྱོད་ནི་མི་བསྐྱོད་དོ། །སྐྱེ་བོ་
མཁས་པས་སོ་སོར་བསམ་མི་ལང ། །ཁྱོད་ནི་ཚུལ་ཁྲིམས་ལྡན་ཞིང་ཐུགས་ཀྱང་དག་།མི་ཡི་སེང་གེ་མཛད་པ་ཐམས་ཅད་འབྱོར། །ཤེས་རབ་སྟོབས་ཀྱིས་ཁྱོད་མཚུངས་འགའ་མ་མཆིས། །དེ་ན་མི་བསྙེངས་འཇིག་རྟེན་གསུམ་བཏུལ་ནས། །འཁོར་དུ་སེང་གེ་ལྟ་བུར་སྒྲ་
བསྒྲགས་ཏེ། །རྟོག་གེ་ཚོགས་ཀྱི་བློ་གྲོས་ཟིལ་གྱིས་མནན། །ལྷ་མ་ཡིན་གྱི་དབང་པོ་འཇིག་རྟེན་གསུམ་རྣམ་པར་གནོན་གྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་རྣམ་པར་སྣང་བྱེད་ཀྱིས་ཀྱང ། བཅོམ་ལྡན་འདས་ལ་མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་
ཞོན་ཏེ། བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་རིན་པོ་ཆེས་སྙིམ་པ་བཀང་སྟེ་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། ཐུབ་པ་ཆེན་པོ་སྐྱེ་བོའི་ཚོགས་པ་འདི། །དང་བའི་ཡིད་ཀྱིས་ཁྱོད་ཀྱི་ཞལ་དུ་ལྟ། །ཀུན་གྱིས་རྒྱལ་བ</font><hr>42-1-27a<br><font size=+2>
མདུན་ན་བཞུགས་པར་མཐོང ། །དེ་ནི་རྒྱལ་བའི་སངས་རྒྱས་མ་འདྲེས་མཚན། །བཅོམ་ལྡན་འདས་ཀྱིས་གསུང་གཅིག་བརྗོད་པ་ལ། །སྐྱེ་བོ་བསམ་པ་ཇི་བཞིན་སོ་སོར་འཚལ། །ཐུབ་པ་ཁྱོད་ཀྱི་གསུང་དེ་དེ་ལྟར་འབྱུང ། །དེ་ནི་རྒྱལ་བའི་སངས་རྒྱས་མ་
འདྲེས་མཚན། །བཅོམ་ལྡན་འདས་ཀྱིས་གསུང་གཅིག་བརྗོད་པ་ལ། །འཁོར་གྱིས་ཐ་དད་གསུང་དུ་རྣམ་འཚལ་ཅིང ། །འགྲོ་བས་རང་དོན་ཅི་ལྟ་བཞིན་དུའང་འཚལ། །དེ་ནི་རྒྱལ་བའི་སངས་རྒྱས་མ་འདྲེས་མཚན། །གསུང་གཅིག་རབ་ཏུ་བརྗོད་པ་མཛད་པས་ནི། །གཅིག་ལ་
འཇོག་གི་གཞན་ནི་དགག་པར་མཛད། །འདྲེན་པ་སུ་དག་མ་བསླབས་རྟོག་པར་མཛད། །དེ་ནི་རྒྱལ་བའི་སངས་རྒྱས་མ་འདྲེས་མཚན། །ལྷ་མ་ཡིན་གྱི་དབང་པོ་རྣམ་པར་སྣང་བྱེད་ཀྱིས་ཇི་ལྟར་བྱས་པ་དེ་བཞིན་དུ་ལྷ་མ་ཡིན་གྱི་དབང་པོ་བཏང་བཟུང་གིས་ཀྱང ། བཅོམ་ལྡན་འདས་ལ་
མཆོད་པ་བྱས་ནས་རིན་པོ་ཆེ་སྣ་བདུན་གྱི་ཤིང་རྟ་ལ་ཞོན་ཏེ། བཅོམ་ལྡན་འདས་ལ་ལན་གསུམ་སྐོར་བ་བྱེད་ཅིང་མུ་ཏིག་དམར་པོས་སྙིམ་པ་བཀང་སྟེ་གཏོར་ནས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། རྒྱགས་དང་ང་རྒྱལ་སྡིག་པའི་ལྟ་བ་སྤྱོད་པ་གང ། །
ཡིད་དགའ་རབ་ཏུ་དང་བས་མི་དབང་བདེ་གཤེགས་ཀྱི། །བློ་ལ་མངོན་པར་དགའ་བ་དེ་དག་བག་མཆིས་ཏེ། །མཚུངས་མེད་བསྙེན་བཀུར་བགྱིད་པ་དེ་དག་སྟོན་པའི་སྲས། །ཆོས་རྣམས་འདི་དག་ངོ་བོ་ཉིད་ཀྱིས་མ་མཆིས་ཏེ། །རྨི་ལམ་དགའ་བ་ཐམས་ཅད་ཚད་མ་མ་ལགས་འདྲ། །
རྨི་ལམ་དགའ་སྤྱོད་མ་མཆིས་ཀྱང་ནི་འདུ་ཤེས་མཆིས། །དེ་ལྟར་རྒྱལ་བས་ཆོས་རྣམས་ཐམས་ཅད་རབ་ཏུ་གཟིགས། །སྟོན་ཀའི་སྤྲིན་དང་མཚུངས་ཤིང་ཆུ་ཡི་ཟླ་བ་འདྲ། །བྱིས་པའི་བློ་ལྡན་རྣམས་ཀྱི་ཡིད་ནི་རྨོངས་པར་བགྱི། །གང་དག་རྟག་ཏུ་བག་མཆིས་བདེ་གཤེགས་བློ་
མངའ་བ། །མཁས་པའི་སྐྱེ་བོ་དག་ལ་འདི་ནི་རྨོངས་མི་བགྱིད། །རྒྱལ་བ་ཁྱོད་ཀྱི་བསྟན་ལ་རྟག་ཏུ་བག་མཆིས་གང ། །མི་མཆོག་དམ་པ་དེ་དག་མི་དལ་ཡོད་མི་མཆི། །ཆོས་རྣམས་ཐམས་ཅད་རྨི་ལམ་འདྲ་བར་རྣམ་བརྟགས་ནས། །ཡང་དག་མཐོང་བ་དེ་དག་ཏིང་འཛིན</font><hr>42-1-27b<br><font size=+2>
ཐོབ་པར་གྱུར། །དེ་ནས་ཐགས་ཟངས་རིས་ལ་སོགས་པ་ལྷ་མ་ཡིན་གྱི་དབང་པོ་བྱེ་བ་ཕྲག་དྲུག་ཅུ་པོ་དེ་དག་གིས་མཆོད་པ་འདི་ལྟ་བུ་བྱས་ནས་བྱང་ཆུབ་ལ་གཞོལ་བའི་སེམས་ཀྱིས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས། དགའ་བ་དང ། ཡིད་བདེ་བ་སྐྱེས་ཏེ་ཐལ་མོ་
སྦྱར་ནས་བཅོམ་ལྡན་འདས་ཉིད་ལ་ཕྱག་འཚལ་ཞིང ། བཅོམ་ལྡན་འདས་ཀྱི་སྤྱན་སྔར་འཁོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷ་མ་ཡིན་གྱི་དབང་པོའི་མཆོད་པ་དེ་དག་ཀྱང་གཟིགས། ལྷ་མ་ཡིན་དེ་དག་གི་ལྷག་པའི་བསམ་པ་ཡང་ཐུགས་སུ་ཆུད་ནས་དེའི་ཚེ་འཛུམ་པ་
མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ་གང་གི་ཚེ་འཛུམ་པ་མཛད་པ་དེའི་ཚེ། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་སྣ་ཚོགས་ཁ་དོག་དུ་མ་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེ་བརྒན་དང ། 
ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ནས་དེ་དག་གིས་ཐམས་ཅད་དང་ལྡན་པའི་འཇིག་རྟེན་སྣང་བས་རྒྱས་པར་བཀང་སྟེ་ཕྱིར་ལོག་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་སྟན་ལས་
ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འཛུམ་པ་མཛད་པའི་དོན་ཚིགས་སུ་བཅད་དེ་ཞུས་པ། འཇིག་རྟེན་ཕན་བཞེད་རྒྱུ་ཞིག་མ་མཆིས་པར། །
མི་ཡི་སེང་གེ་འཛུམ་པ་མི་མཛད་ན། །དྲང་སྲོང་ཆེན་པོ་ཅི་སླད་འཛུམ་པ་མཛད། །སྐྱེས་བུ་མཆོག་གིས་འཛུམ་པའི་རྒྱུ་ཡང་གསུངས། །ལྷ་མིན་མཆོད་པ་རྒྱ་ཆེན་གཟིགས་གྱུར་ནས། །འཇིག་རྟེན་ཕན་བཞེད་ཁྱོད་ནི་འཛུམ་མཛད་ན། །ལྷ་མིན་རྣམས་ལ་ལུང་བསྟན་བཀའ་སྩལ་
གསོལ། །དེ་ཐོས་བདག་ཅག་རྣམས་ནི་དགའ་བར་འགྱུར། །དེ་རིང་སུ་ཡིས་དོགས་མེད་རྒྱ་ཆེན་སེམས། །འཁོར་འདིར་ཡང་དག་བསྐྱེད་པར་གྱུར་ཅིག་གུ། །དེ་བཞིན་གཤེགས་པས་གང་གི་བསམ་མཁྱེན་ནས། །མི་ཡི་སེང་གེ་འཛུམ་པ་མཛད་པར་གྱུར། །དེ་རིང་ཡོངས་སུ་དག་པའི</font><hr>42-1-28a<br><font size=+2>
ཡིད་ཀྱིས་སུ། །མི་ཡི་མཆོག་ལ་དད་པ་གང་གིས་བསྐྱེད། །དེ་བཞིན་གཤེགས་པས་གང་གི་བསམ་མཁྱེན་ཏེ། །ཡིད་དུ་འོང་བའི་འཛུམ་པ་མཛད་པར་གྱུར། །བདེ་གཤེགས་ཞལ་ནས་འཛུམ་པ་དེ་མཐོང་ནས། །འདི་ལྟར་བདེ་གཤེགས་འཛུམ་པ་མཛད་པ་
འདི། །སུ་ཡི་དཔུང་བཅས་བདུད་ནི་དེང་བཅོམ་ཞེས། །འཁོར་འདི་དེ་རིང་ཐེ་ཚོམ་འཚལ་བར་གྱུར། །དྲང་སྲོང་ཆེན་པོ་རྒྱལ་བ་དགྲ་ལས་རྒྱལ། །ཐེ་ཚོམ་འཚལ་བའི་སོམ་ཉི་བཅད་དུ་གསོལ། །མི་མཆོག་ཁྱོད་ཀྱིས་དེ་རིང་འགྲོ་བ་ཡི། །ཐེ་ཚོམ་སྨྱུར་ཏེ་ལེགས་པར་བཅད་དུ་གསོལ། །དེ་
ནས་ཚེ་དང་ལྡན་པ་རྟ་ཐུལ་གྱིས་ཞུ་བ་ཞུས་པའི་ལན་བཅོམ་ལྡན་འདས་ཀྱིས་ཚིགས་སུ་བཅད་དེ་ཚེ་དང་ལྡན་པ་རྟ་ཐུལ་ལ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །འཇིག་རྟེན་ཕན་ཕྱིར་འཛུམ་པ་ངས་བྱས་པ། །དེ་ཡིས་འབྲས་བུ་མ་ལུས་བསྟན་པར་བྱ། །བསྟན་པ་དེ་ནི་རྩེ་
གཅིག་ཡིད་ཀྱིས་ཉོན། །བླ་ན་མེད་པའི་བྱང་ཆུབ་འདོད་པའི་ཕྱིར། །ལྷ་མིན་རྣམས་ཀྱིས་ང་མཆོད་འདི་བྱས་ཏེ། །དེ་དག་སེམས་ནི་ཅི་ལའང་ཆགས་མེད་པས། །ནམ་མཁའི་ངོས་ལ་ལག་མཐིལ་ཆགས་མེད་བཞིན། །ལྷ་མིན་ཚོགས་ཀྱིས་དད་པའི་ཡིད་བྱས་ཏེ། །དེ་དག་ང་ལ་མཆོད་པ་འདི་
བྱས་པས། །བློ་ཅན་དེ་དག་ལྷ་མིན་རིས་བོར་ཏེ། །མཐོ་རིས་དོང་ནས་ཡུན་རིང་དགའ་བར་འགྱུར། །དེ་དག་ཕྱི་དུས་རྒྱལ་བ་མིའི་སེང་གེ་།གང་གཱའི་ཀླུང་གི་བྱེ་མ་བྱེ་བ་སྙེད། །བསྙེན་བཀུར་བྱས་ནས་ཡིད་འོང་བསྐལ་པ་ལ། །དེ་དག་ཐམས་ཅད་མཚན་འཐུན་རྒྱལ་བར་འགྱུར། །དེ་ཚེ་བདེ་
གཤེགས་ཁྲག་ཁྲིག་དྲུག་ཅུའི་རྣམས། །འཇིག་རྟེན་སྒྲོན་མ་ཕྱོགས་སུ་གྲགས་པ་སྟེ། །དེ་དག་མི་གནས་ཆོས་ནི་སྟོན་མཛད་ཅིང ། །ལྷ་དང་བཅས་པའི་འཇིག་རྟེན་འགྲེལ་པར་འགྱུར། །འཇིག་རྟེན་མཁས་པ་དེ་དག་རྣམས་ཀྱི་ཞིང ། །ཤིན་ཏུ་ཡངས་ཤིང་སྙིགས་མ་མེད་པར་འགྱུར། །དེ་ཚེ་
ཁྲག་ཁྲིག་དྲུག་ཅུར་ཚངས་པ་ཡི། །རྒྱལ་བ་རྣམས་ཀྱིས་སྟོང་གསུམ་སྦྱོང་བར་འགྱུར། །དེ་དག་ངན་སོང་ཐམས་ཅད་སེལ་བར་མཛད། །དེ་དག་ཞིང་དེར་དགའ་བར་སྤྱོད་པར་འགྱུར། །བརྟན་པ་དེ་དག་མི་ཁོམ་ཐམས་ཅད་སྦྱོང ། །བླ་ན་མེད་པའི་ཐེག་པ་སྟོན་པར་འགྱུར། །དེ་དག་ཚེ་ཡི</font><hr>42-1-28b<br><font size=+2>
ཚད་དུ་གྱུར་པ་ནི། །བསྐལ་པ་ཁྲག་ཁྲིག་དྲུག་ཅུ་ཚང་བར་ཡང ། །རྣམ་པར་འདྲེན་པ་དེ་དག་འཚོ་བར་འགྱུར། །ཆགས་པ་མེད་པའི་ཆོས་ཀྱང་སྟོན་པར་མཛད། །ཐུབ་པ་དེ་དག་མྱ་ངན་འདས་གྱུར་ཏེ། །འཇིག་རྟེན་མཁས་པ་རབ་ཏུ་ཞི་གྱུར་ནས། །བསྐལ་པ་ཁྲག་ཁྲིག་དྲུག་ཅུ་ཚང་བར་ནི། །
རང་བྱུང་རྣམས་ཀྱི་དམ་ཆོས་གནས་པར་འགྱུར། །བདེ་བར་གཤེགས་པ་དེ་དག་འགྲོ་བའི་ཚོགས། །གང་གཱའི་བྱེ་མ་སྙེད་ཀྱི་སྐྱེ་བོ་འདུལ། །དགྲ་ལས་རྒྱལ་བའི་རྒྱལ་བར་མཚན་འཐུན་འགྱུར། །ཞིང་དང་ཚེ་དང་ཆོས་གནས་འགྱུར་བའང་འཐུན། །བདེ་གཤེགས་དེ་དག་ཁྲག་ཁྲིག་དྲུག་ཅུ་ཡི། །
སྐྱེས་པ་བུད་མེད་ཡོངས་སུ་སྨིན་མཛད་དེ། །བླ་ན་མེད་པའི་ཐེག་པས་འདེམས་པར་འགྱུར། །མཁས་པ་དེ་དག་རྒྱལ་བའི་གདུང་ཡང་འཛིན། །རྒྱལ་བས་ལྷ་མིན་དེ་དག་ལུང་བསྟན་པ། །འཇིག་རྟེན་ཕན་ཕྱིར་དྲང་སྲོང་ཆེན་པོས་གསུངས། །ལྷ་དང་བཅས་པའི་འཇིག་རྟེན་དེ་ཐོས་ནས། །ཡི་
རངས་གྱུར་ཅིང་སྟོབས་ཀྱང་སྐྱེ་བར་གྱུར། །ལྷ་མ་ཡིན་ལུང་བསྟན་པའི་ལེའུ་སྟེ་བཞི་པའོ།། །།དེ་ནས་ཚེ་དང་ལྡན་པ་འོད་སྲུང་ཆེན་པོས་ལྷ་མ་ཡིན་གྱི་མཆོད་པ་རྣམ་པ་དེ་ལྟ་བུ་འདི་མཐོང་ནས་ངོ་མཚར་དུ་གྱུར་ཏེ། འདི་སྙམ་དུ་དེ་བཞིན་གཤེགས་པས་སྔོན་བྱང་ཆུབ་སེམས་དཔའི་སྤྱད་པ་
སྤྱོད་པའི་ཚེ་དགེ་བའི་རྩ་བ་ཅི་ལྟ་བུ་ཞིག་མངོན་པར་འདུ་མཛད་ན་འདི་ལྟ་བུའི་རྣམ་པར་སྨིན་པ་གྲུབ་སྙམ་ནས། དེའི་ཚེ་སེམས་ཇི་ལྟར་མཉམ་པར་བཞག་པས་བསྐལ་པ་གྲངས་མེད་པ་ཡང་རྗེས་སུ་དྲན་ཞིང ། བཅོམ་ལྡན་འདས་ཀྱིས་སྲིད་པའི་རྒྱུད་དེ་དང་དེར་འཆི་འཕོ་དང་སྐྱེ་བ་ན་དགེ་བའི་རྩ་བ་གང་
དག་མངོན་པར་འདུ་མཛད་པ་དང ། དགེ་བའི་རྩ་བ་གང་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་བསྒྲུབས་པ་དང ། དགེ་བའི་རྩ་བ་གང་གིས་ཕྱིར་མི་ལྡོག་པ་བརྙེས་པར་གྱུར་པ་དེ་དག་ཐམས་ཅད་རྗེས་སུ་དྲན་པར་འགྱུར་བ་དེ་ལྟ་བུའི་ཏིང་ངེ་འཛིན་ལ་མཉམ་པར་བཞག་
གོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་བཅོམ་ལྡན་འདས་ཀྱི་དགེ་བའི་རྩ་བ་བདག་ཉིད་ཆེན་པོ་རྗེས་སུ་དྲན་པར་གྱུར་ནས་འདི་སྙམ་དུ་སེམས་ཏེ། བཅོམ་ལྡན་འདས་ཀྱི་དགེ་བའི་རྩ་བ་བདག་ཉིད་ཆེན་པོ་དེ་ལྟ་བུ་མཛད་ན་དེའི་ཐུགས་བསྐྱེད་པ་གཅིག་ལ་ཡང་འཇིག་རྟེན་གྱི་ཁམས་གང་གཱའི་ཀླུང་གི</font><hr>42-1-29a<br><font size=+2>
བྱེ་མ་སྙེད་ན་སེམས་ཅན་གང་ཇི་སྙེད་ཅིག་འཁོད་པ་དེ་དག་ཐམས་ཅད་མིའི་ལུས་ཐོབ་པར་གྱུར་ཏེ། ལྷ་མ་ཡིན་གྱི་མཆོད་པ་ཇི་སྙེད་པ་དེ་སྙེད་དུ་སེམས་ཅན་རེ་རེས་བསྐལ་པ་གང་གཱའི་ཀླུང་གི་བྱེ་མ་སྙེད་དུ་མཆོད་པ་བྱས་ཀྱང་དེ་དག་གི་ཐུགས་བསྐྱེད་པ་གཅིག་ལ་ཡང་ལན་ལོན་པར་མི་
ནུས་སོ་སྙམ་མོ། །དེ་ནས་ཚེ་དང་ལྡན་པ་འོད་སྲུང་ཆེན་པོ་ཏིང་ངེ་འཛིན་དེ་ལས་ལངས་ཏེ། ངོ་མཚར་དང་དད་པ་ཐོབ་པར་གྱུར་ནས་དེའི་ཚེ་བཅོམ་ལྡན་འདས་ལ་ཚིགས་སུ་བཅད་དེ་མངོན་པར་བསྟོད་པ། ཐུབ་པ་བྱང་ཆུབ་གཞོལ་བ་ཡི། །ཐུགས་བསྐྱེད་པ་ནི་རེ་རེ་ལའང ། །ལྷ་མ་ཡིན་གྱི་མཆོད་པ་
འདིས། །ཆ་ཙམ་མི་སྤྱོད་མིའི་སེང་གེ་།དེ་ལྟའི་ཡོན་ཏན་མཐར་ཕྱིན་ཏེ། །ལྷ་དང་མི་ཡིས་མཆོད་གྱུར་པ། །ཙན་དན་ཕུར་མ་རི་རབ་ཙམ། །མི་མཆོག་ཁྱོད་ལ་མཆོད་པར་འོས། །མི་ཡི་སེང་གེ་ཁྱོད་ལ་ནི། །གང་གཱའི་བྱེ་མ་ཆེས་མང་བའི། །རྒྱ་མཚོ་རབ་ཏུ་བཀང་བ་ཡི། །སྤོས་ཆུ་དག་གི་
མཆོད་པར་འོས། །ཡོན་ཏན་ཆེན་པོ་མངའ་བ་ལ། །གང་གཱའི་བྱེ་མ་ཆེས་མང་བའི། །མེ་ཏོག་ཚོགས་ནི་རི་བོ་མཆོག་།ཁོར་ཡུག་ཆེན་པོ་མཉམ་མཆོད་འོས། །རྒྱལ་བ་སྒྲོན་མ་རང་བྱུང་བ། །མར་མེའི་སྙིང་པོ་རི་རབ་ཙམ། །འབྲུ་མར་རྒྱ་མཚོའི་ཆུ་སྙེད་ཀྱི། །མར་མེ་རྣམས་ཀྱིས་མཆོད་པར་
འོས། །མཐུ་ཆེན་མངའ་བ་དེ་ལྟ་བུར། །ཡོན་ཏན་ཕ་རོལ་ཕྱིན་གྱུར་བ། །གང་གཱའི་བྱེ་མ་ཆེས་མང་བའི། །མེ་ཏོག་མཆོད་རྟེན་མཆོད་པར་འོས། །མི་དབང་མཆོད་པས་ཐུགས་བརྩེ་བ། །རིན་ཆེན་གདུགས་ནི་ཆེ་རྣམས་ཀྱིས། །བསྐལ་པ་ཁྲག་ཁྲིག་རྣམས་སུ་ཡང ། །སེམས་ཅན་མཆོག་
ལ་མཆོད་པར་འོས། །ཡོན་ཏན་མཐའ་ཡས་མངའ་བ་ཁྱོད། །རིན་པོ་ཆེ་ཡི་རྒྱལ་མཚན་གྱིས། །ཕྱོགས་བཅུའི་འཇིག་རྟེན་ཁམས་བཀང་སྟེ། །བསྐལ་པ་བསམ་ཡས་མཆོད་པར་འོས། །མི་ཡི་སེང་གེ་ཁྱོད་ལ་ནི། །བསྐལ་པ་ཁྲག་ཁྲིག་དཔག་མེད་པར། །གང་གཱའི་བྱེ་མ་ཆེས་མང་བའི། །
བ་དན་ཚོགས་ཀྱིས་མཆོད་པར་འོས། །དྲང་སྲོང་ཆེན་པོ་སྨྲ་བའི་སྟག་།ལྷ་རྣམས་དང་ནི་མི་དག་དང ། །གཞན་ཡང་སེམས་ཅན་གང་ཚོགས་པ། །བརྟག་བཟུང་དཔེ་ལ་གསན་དུ་གསོལ། །གལ་ཏེ་གང་གཱའི་བྱེ་སྙེད་ཀྱི། །ཕྱོགས་བཅུའི་འཇིག་རྟེན་ཁམས་རྣམས་ཀྱི། །སེམས་ཅན་ཐམས</font><hr>42-1-29b<br><font size=+2>
ཅད་སངས་རྒྱས་སུ། །མི་མཆོག་སྟོབས་བཅུའི་སྟོབས་ལྡན་ལ། །དེ་དག་རེ་རེའི་མགོ་བོ་ཡང ། །གང་གཱའི་བྱེ་མ་སྙེད་གྱུར་ཏེ། །མགོ་བོ་དེ་དག་རེ་རེ་ཞིང ། །དེ་སྙེད་ཁ་དང་ལྡན་གྱུར་ལ། །ཁ་རྣམས་དེ་དག་རེ་རེ་ཞིང ། །ལྕེ་དང་ཁ་ཡི་གྲངས་མཉམ་ལ། །གང་གཱའི་ཀླུང་གི་བྱེ་སྙེད་ཀྱི། །
བསྐལ་པར་བསྟོད་པར་བགྱིས་ཀྱང་ནི། །རྒྱལ་བ་དེ་དག་སྤོབས་མི་བས། །ཁྱོད་ཀྱི་ཡོན་ཏན་མཐར་མི་ཕྱིན། །རྒྱལ་བ་དེ་ལྟའི་ཡོན་ཏན་གྱི། །ཕ་རོལ་ཏུ་ནི་ཕྱིན་པར་གྱུར། །དེའི་ཚེ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་ལེགས་སོ་ལེགས་སོ། །ངའི་
ཉན་ཐོས་རྣམས་ནི་དྲང་པོར་གྱུར་པ། ཡེ་ཤེས་དང་ལྡན་པར་གྱུར་པ། ཆོས་སུ་གྱུར་པ།དབང་དུ་གྱུར་པ། ཚད་མར་གྱུར་པ་ཤ་སྟག་གནས་ཏེ། དེ་དག་ནི་ངའི་ཡོན་ཏན་གྱི་ཚོགས་ལ་འཇུག་པ་ཤ་སྟག་གོ་།དེ་ཅིའི་ཕྱིར་ཞེ་ན། དགེ་སློང་དག་དེ་བཞིན་གཤེགས་པ་ནི་ཡོན་ཏན་དཔག་ཏུ་མེད་པ་དང་
ལྡན་པ་སྟེ། ཡོན་ཏན་བསམ་གྱིས་མི་ཁྱབ་པ་དང་ལྡན་པའོ། །དགེ་སློང་དག་དེ་བཞིན་གཤེགས་པའི་ཡོན་ཏན་རྣམས་དང ། དེ་བཞིན་གཤེགས་པའི་ཡོན་ཏན་གྱི་ཕ་རོལ་ཏུ་ཕྱིན་པ་དང ། དེ་བཞིན་གཤེགས་པའི་ཡོན་ཏན་གྱི་ཚོགས་ནི་བསམ་གྱིས་མི་ཁྱབ་པའོ། །དགེ་སློང་དག་དེ་བཞིན་
གཤེགས་པའི་ཡོན་ཏན་རྣམས་གཟུགས་ཅན་ཞིག་ཡིན་ན་ནི་སེམས་བསྐྱེད་པ་རེ་རེའི་ཡོན་ཏན་གྱི་ཚོགས་ཀྱང་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དུ་ཤོང་བར་མི་འགྱུར་ཏེ། སེམས་བསྐྱེད་པ་རེ་རེའི་ཡོན་ཏན་གྱི་ཚོགས་ཀྱང་དེ་བཞིན་གཤེགས་པ་གང་གཱའི་ཀླུང་གི་བྱེ་མ་སྙེད་ཀྱིས་བསྐལ་པ་གང་གཱའི་
ཀླུང་གི་བྱེ་མ་སྙེད་དུ་གང་འདི་གྲངས་ཀྱི་ཚད་གཟུང་བར་བརྗོད་ཀྱང་བརྗོད་པར་མི་ནུས། བསམས་ཀྱང་བསམ་པར་མི་ནུས་སོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་བསྐྱེད་པ་གང་ཡང་སེམས་ཅན་དུ་བསྡུ་བར་བསྡུས་པ་སེམས་ཅན་གང་ཇི་
སྙེད་ཅིག་ཡོད་པའི་སེམས་ཅན་དེ་དག་ཐམས་ཅད་ལ་ཕན་པ་དང་བདེ་བའི་དོན་དུ་མ་བསྐྱེད་པ་གཅིག་ཀྱང་མེད་དེ། སེམས་ཅན་གྱི་ཁམས་ནི་ཚད་མེད་པས་སེམས་ཅན་གྱི་ཁམས་ཇི་སྙེད་པ་དེ་སྙེད་ཀྱི་བསོད་ནམས་དེ་བཞིན་གཤེགས་པའི་སེམས་བསྐྱེད་པ་རེ་རེ་ལས་འབྱུང་ངོ ། །སེམས་ཅན་གྱི་ཁམས</font><hr>42-1-30a<br><font size=+2>
ནི་མི་ཟད་པ་སྟེ། སེམས་ཅན་གྱི་ཁམས་ཇི་ལྟར་མི་ཟད་པ་དེ་ལྟར་མི་ཟད་པའི་བསོད་ནམས་དེ་བཞིན་གཤེགས་པའི་སེམས་བསྐྱེད་པ་རེ་རེ་ལས་འབྱུང་ངོ ། །སེམས་དེ་ནི་སེམས་ཅན་ཐམས་ཅད་ལ་ཕན་པའི་དོན་དུ་སྐྱེས་པས་སེམས་ཅན་ཐམས་ཅད་ཀྱིས་མཆོད་ཀྱང་ལན་
ལོན་པར་མི་ནུས་སོ། །དེ་ཅིའི་ཕྱིར་ཞེ་ན། འཇིག་རྟེན་པའི་མཆོད་པ་ནི་ཟང་ཟིང་དང་བཅས་པ་ཡིན་ལ། བྱང་ཆུབ་སེམས་དཔའ་སེམས་དཔའ་ཆེན་པོའི་སེམས་སེམས་ཅན་ཐམས་ཅད་ལ་ཕན་པའི་དོན་དུ་འབྱུང་བ་ནི་སེམས་ཅན་འཁོར་བ་ལ་གཞོལ་བ་འདི་དག་མྱ་ངན་ལས་འདས་པ་ལ་ཇི་ལྟར་གཞོལ་
བར་འགྱུར་ཞེས་ཏེ་ཟང་ཟིང་མེད་པའི་ཕྱིར་རོ། །དེ་བཞིན་གཤེགས་པ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ་སེམས་ཅན་རྣམས་ཀྱི་དོན་དུ་ཟང་ཟིང་མེད་པའི་སེམས་དཔག་ཏུ་མེད་པ་བསྐྱེད་པར་གྱུར་ཏོ། །དགེ་སློང་དག་སྔོན་བྱུང་བ་འདས་པའི་དུས་བསྐལ་པ་དཔག་ཏུ་མེད་པ། བགྲང་དུ་
མེད་པ། བསམ་གྱིས་མི་ཁྱབ་པ། མཚུངས་པ་མེད་པ། གཞལ་དུ་མེད་པ། བརྗོད་དུ་མེད་པ་འདས་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་
བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་དབང་པོའི་ཏོག་ཅེས་བྱ་བ་འཇིག་རྟེན་དུ་བྱུང་སྟེ། དགེ་སློང་དག་དེ་བཞིན་གཤེགས་པ་དབང་པོའི་ཏོག་དེས་སེམས་བསྐྱེད་པ་རེ་རེ་ཞིང་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སེམས་ཅན་
རྣམས་ལ་ཕན་པར་དགོངས་པར་གྱུར་ཏེ་དོན་ཀྱང་མཛད་དོ། །དེ་བཞིན་གཤེགས་པ་དབང་པོའི་ཏོག་གི་སངས་རྒྱས་ཀྱི་ཞིང་ཡང་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ལ་སངས་རྒྱས་ཀྱི་ཞིང་གཅིག་ཏུ་གྱུར་ཏེ། ཡོངས་སུ་དག་ཅིང་ངན་སོང་དང་མི་ཁོམ་པ་ཐམས་ཅད་ཡོངས་སུ་ཆད་པ་སྟེ། 
དེ་བཞིན་གཤེགས་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་ལོག་པར་ངེས་པའི་སེམས་ཅན་གྱི་སྐྱེ་བ་ཡོང་མེད་པར་གྱུར་ཏོ། ལྟ་བའི་རྣམ་པ་ཡོང་མེད་པར་གྱུར་ཏོ། །མངོན་པའི་ང་རྒྱལ་ཅན་ཡོང་མེད་པར་གྱུར་ཏོ། །ལུས་དང་ངག་དང ། ཡིད་ཀྱི་ལས་ཀྱི་མཐའ་ཡོངས་སུ་དག་པ་དང</font><hr>42-1-30b<br><font size=+2>
ལྡན་པའི་སེམས་ཅན་ཡོང་མེད་པར་གྱུར་ཏོ། །ངན་སོང་གི་རྒྱུར་འགྱུར་བའི་ཉོན་མོངས་པ་དང་ལས་འབྱུང་བ་ཡོང་མེད་པར་གྱུར་ཏོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་དེས་ཡུན་རིང་པོ་ནས་སེམས་ཅན་རྣམས་དགེ་བའི་ཆོས་རྣམས་ལ་བཙུད་ཅིང་བཏམས་ཏེ་རྗེས་སུ་བསྟན་ཅིང་བསླབས་
པའི་ཕྱིར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་ཏོག་གིས་སངས་རྒྱས་ཀྱི་ཞིང་དེ་ན་འཁོད་པའི་སེམས་ཅན་རྣམས་ཀྱང་བདེ་བ་ལྔ་ཐོབ་པར་གྱུར་ཏེ། འདི་ལྟར་ལ་ལ་ནི་འདོད་པའི་བདེ་བ་དང་ལྡན་པར་གྱུར་ཏོ། །ལ་ལ་ནི་ཁྱིམ་ནས་འབྱུང་བའི་བདེ་
བ་དང་ལྡན་པར་གྱུར་ཏོ། །ལ་ལ་ནི་བསམ་གཏན་གྱི་བདེ་བ་དང་ལྡན་པར་གྱུར་ཏོ། །ལ་ལ་ནི་སྙོམས་པར་འཇུག་པའི་བདེ་བ་དང་ལྡན་པར་གྱུར་ཏོ། །ལ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བདེ་བ་དང་ལྡན་པར་གྱུར་ཏེ། དེ་དག་བདེ་བ་དེ་ལ་ཡང་སྤྱོད་ལ། བདེ་བ་དེ་དག་ལ་ཡང་
མངོན་པར་ཞེན་པ་མེད་པར་གྱུར་ཏོ། །འདི་ལྟ་སྟེ། དཔེར་ན་བུང་བ་མེ་ཏོག་གི་ཁུ་བས་ཉེ་བར་འཚོ་ཡང་དེ་ལ་མངོན་པར་ཞེན་པ་མེད་དོ། །དེ་བཞིན་དུ་སེམས་ཅན་དེ་དག་ཀྱང་བདེ་བ་དེ་ལ་ཡོངས་སུ་སྤྱོད་ཀྱང་དེ་ལ་མངོན་པར་ཞེན་པ་མེད་དོ། །འདི་ལྟ་སྟེ། དཔེར་ན་བར་སྣང་ལ་རྒྱུ་བའི་བྱ་ནི་བར་སྣང་ལ་
ཡང་རྒྱུ་ལ་དེ་ལ་མངོན་པར་ཆགས་པ་ཡང་མེད་དོ། །དེ་བཞིན་དུ་སེམས་ཅན་དེ་དག་ཀྱང་བདེ་བ་དེ་ལ་ཡོངས་སུ་སྤྱོད་ཀྱང་དེ་ལ་མངོན་པར་ཞེན་པ་མེད་དོ། །དེ་བཞིན་གཤེགས་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་འཁོད་པའི་སེམས་ཅན་རྣམས་ལ་ཡིད་མི་བདེ་བར་འགྱུར་བའི་མི་དགའ་བ་མེད་
རྨོངས་པར་འགྱུར་བ་མེད་དེ། གཞན་དུ་ན་ཡིད་བདེ་བར་འགྱུར་བའི་དགའ་བ་ཤ་སྟག་ལ་ཡོངས་སུ་སྤྱོད་དེ། དེ་ནི་འདི་ལྟར་སྔོན་དགེ་བའི་རྩ་བ་དེ་ལྟ་བུ་བསྐྱེད་པའི་ཕྱིར་རོ། །དེ་ཅིའི་ཕྱིར་ཞེ་ན། སེམས་ཅན་དེ་དག་ནི་དེ་བཞིན་གཤེགས་པ་དབང་པོའི་ཏོག་དེས་སྔོན་བྱང་ཆུབ་སེམས་དཔའི་སྤྱད་པ་
སྤྱོད་པའི་ཚེ། མི་དགེ་བ་ལས་ཡོངས་སུ་བཟློག་སྟེ། དགེ་བ་ལ་བཙུད་པས་དེ་དག་ལ་ལས་གང་གིས་སྡུག་བསྔལ་གྱི་ཚོར་བ་མྱོང་བར་འགྱུར་བའི་རྣམ་པར་སྨིན་པ་དབང་མེད་པར་འབྱུང་བ་མི་དགེ་བའི་ལས་དེ་ལྟ་བུ་ཡོང་མེད་དེ།དེ་མ་བསགས་པའི་ཕྱིར་སྡུག་བསྔལ་ཚོར་བར་འགྱུར་བའི་རྣམ་པར་སྨིན་པ་མི</font><hr>42-1-31a<br><font size=+2>
འབྱུང་ངོ ། །དེ་དག་གིས་རྨོངས་པའི་སེམས་ཙམ་གྱིས་ཀྱང་ལས་གང་གིས་རྨོངས་པ་རྣམས་ལ་སྡུག་བསྔལ་ཡང་མ་ཡིན། བདེ་བ་ཡང་མ་ཡིན་པའི་ཚོར་བ་འབྱུང་བར་འགྱུར་བ་དེ་ལྟ་བུ་མངོན་པར་འདུ་མ་བྱས་ཏེ། དེ་མ་བསགས་པའི་ཕྱིར་རྨོངས་པར་འགྱུར་བའི་ཚོར་བ་སྡུག་བསྔལ་
ཡང་མ་ཡིན། བདེ་བ་ཡང་མ་ཡིན་པ་དེ་མི་འབྱུང་ངོ ། །དེ་བཞིན་གཤེགས་པ་དབང་པོའི་ཏོག་དེའི་སངས་རྒྱས་ཀྱི་ཞིང་དེ་ན་རྒྱུ་གང་གིས་སེམས་ཅན་དེ་དག་དུས་གྱུར་པ་ལས་བྱུང་བའི་སྡུག་བསྔལ་མི་འབྱུང་བས་ཉམས་སུ་མི་བདེ་བའི་ཉི་མ་མི་འཆར་རོ། །རླུང་ཉམས་སུ་མི་བདེ་བ་མི་ལྡང་ངོ ། །ཆར་
ཉམས་སུ་མི་བདེ་བ་མི་འབབ་བོ། །དེ་བཞིན་གཤེགས་པ་དབང་པོའི་ཏོག་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པའི་ཚེ། སེམས་ཅན་དེ་དག་ལ་ལུས་དང ། ངག་དང ། ཡིད་ཀྱི་ལས་ཐམས་ཅད་ཤེས་པ་སྔོན་དུ་འགྲོ་ཞིང་ཤེས་པའི་རྗེས་སུ་འབྲང་བ་བསྟན་ཅིང་བཤད་པས་སེམས་ཅན་དེ་དག་གིས་
ཀྱང་བྱང་ཆུབ་སེམས་དཔའ་དེ་ལས་བསྟན་པ་དེ་ཐོས་ནས་ལུས་དང ། ངག་དང ། ཡིད་ཀྱི་ལས་ཐམས་ཅད་ཤེས་པ་སྔོན་དུ་འགྲོ་ཞིང་ཤེས་པའི་རྗེས་སུ་འབྲང་བར་ཡོངས་སུ་བསྒྲུབས་པས་ལས་དེའི་རྣམ་པར་སྨིན་པས་དེ་དག་ལ་རྨོངས་པར་འགྱུར་བའམ་ཡིད་མི་དགའ་བར་འགྱུར་བ་མེད་དོ། རྨོངས་
པ་རྣམས་ལ་རྒྱུ་གང་གིས་བདེ་བ་ཡང་མ་ཡིན། སྡུག་བསྔལ་ཡང་མ་ཡིན་པའི་ཚོར་བ་འབྱུང་བ་མེད་དོ། །དེ་ལྟར་སངས་རྒྱས་ཀྱི་ཞིང་དེ་ན་སེམས་ཅན་དེ་དག་ལ་སྡུག་བསྔལ་གྱི་ཚོར་བ་མེད་ཅིང་བདེ་བ་ཡང་མ་ཡིན། སྡུག་བསྔལ་ཡང་མ་ཡིན་པ་ཡང་མེད་དོ། །སངས་རྒྱས་ཀྱི་ཞིང་དེར་སྐྱེས་པའི་
སེམས་ཅན་དེ་བཞིན་གཤེགས་པ་དེས་བཏམས་པ་དེ་དག་ནི་ཆོས་ལ་རིམ་གྲོ་བྱ་བ་ཆེན་པོས་ཉེ་བར་གནས་པར་གྱུར་ཏོ། །དེ་དག་འཆག་ན་ཡང་ཆོས་ཉིད་ལ་སེམས་ཤིང་ཆོས་ལ་མོས་པས་ཞེན་པའི་ཡིད་ཀྱིས་འཆག་སྟེ། ཆོས་ལ་མོས་ཤིང་ཞེན་པའི་ཡིད་ཀྱིས་འཆག་པ་དེ་དག་ལ་སྡུག་བསྔལ་གྱི་ཚོར་བ་
མི་འབྱུང་ངོ ། །དེ་བཞིན་དུ་འགྲེང་པ་དང ། འདུག་པ་དང ། ཉལ་བ་དང ། སད་པ་དང ། སྤྱོད་ལམ་ཐམས་ཅད་དུ་ཡང་སྡུག་བསྔལ་མི་འབྱུང་ངོ ། །སངས་རྒྱས་ཀྱི་ཞིང་དེའི་སེམས་ཅན་དེ་དག་ལ་ཡ་ང་བ་མ་སྤངས་པ་མེད་དེ། དེའི་ཕྱིར་ཡ་ང་བ་མ་སྤངས་པའི་སྡུག་བསྔལ་གྱི་ཚོར་བ་མི་འབྱུང</font><hr>42-1-31b<br><font size=+2>
ངོ ། །ཡང་དག་པའི་སྤང་བ་ཡོད་པས་དེ་དག་ལ་སྐྱོ་བ་མེད་དེ། དེའི་ཕྱིར་དེ་དག་ལ་ཡང་དག་པར་སྤང་བར་བྱ་བའི་སྡུག་བསྔལ་ཡང་མེད་དོ། །སེམས་ཅན་དེ་དག་ལ་འགྱུར་བའི་སྡུག་བསྔལ་ཡང་མེད་དེ། དེ་ནི་འདི་ལྟར་སེམས་ཅན་དེ་དག་ཆོས་ཐམས་ཅད་ལ་མངོན་པར་ཞེན་པ་མེད་པའི་ཕྱིར་རོ། །
དེ་དག་ལ་མི་སྡུག་པ་དང་ཕྲད་པའི་སྡུག་བསྔལ་ཡང་མེད་དེ། དེ་ནི་འདི་ལྟར་སེམས་ཅན་དེ་དག་སེམས་ཅན་ཐམས་ཅད་ལ་མཉམ་པ་ཉིད་ཀྱི་སེམས་ཉེ་བར་གནས་པའི་ཕྱིར་རོ། །དེ་དག་ལ་སྡུག་པ་དང་བྲལ་བའི་སྡུག་བསྔལ་ཡང་མེད་དེ། དེ་ཅིའི་ཕྱིར་ཞེ་ན། འདི་ལྟར་དེ་དག་ཆོས་ཐམས་
ཅད་ལ་མངོན་པར་ཞེན་པ་མེད་པའི་ཕྱིར་རོ། །སྡུག་པ་དང་བྲལ་བའི་སྡུག་བསྔལ་ནི་སྡུག་པ་ལས་འབྱུང་སྟེ། དེའི་ཕྱིར་དེ་དག་ལ་སྡུག་པ་དང་བྲལ་བའི་སྡུག་བསྔལ་ཡང་མེད་དོ། །སེམས་ཅན་དེ་དག་ལ་སྡུག་བསྔལ་བའི་སྡུག་བསྔལ་ཡང་མི་འབྱུང་སྟེ། འདི་ལྟར་དེ་ན་སྡུག་བསྔལ་གྱི་ཚོར་བ་རྒྱུ་བ་
མེད་པའི་ཕྱིར་རོ། །གཞན་དུ་ན་འདུ་བྱེད་ཀྱི་སྡུག་བསྔལ་གཅིག་པུ་ཡོད་དེ། འདི་ལྟ་སྟེ། མི་རྟག་པའི་སྡུག་བསྔལ་ཉིད་དོ། །དེ་བཞིན་གཤེགས་པ་དེ་ནི་དོན་དམ་པའི་ཆོས་སྟོན་ཏེ། དེ་བཞིན་གཤེགས་པ་དབང་པོའི་ཏོག་དེ་བསྐལ་པ་གང་གཱའི་ཀླུང་གི་བྱེ་མ་སྙེད་དུ་བཞུགས་པའི་ཚེ་དེས་
གསུངས་པ་ལ་ཕྱིར་སྨྲ་བའི་སེམས་ཅན་གང་ཡང་སངས་རྒྱས་ཀྱི་ཞིང་དེར་མ་བྱུང་སྟེ། དེ་ནི་འདི་ལྟར་སྔོན་སེམས་ཅན་དེ་དག་ལེགས་པར་ཡོངས་སུ་སྨིན་པར་བྱས་པའི་ཕྱིར་རོ། །དགེ་སློང་དག་དེ་ལ་ཇི་སྙམ་དུ་སེམས། དགེ་བའི་རྩ་བ་ཞན་པ་དང ། དམའ་བ་དང ། ཞུམ་པ་དང ། ཆུང་
བ་དང ། སྡུག་བསྔལ་གྱིས་ཡོངས་སུ་བསྒྲུབས་པ་དང ། སྡུག་བསྔལ་དང་འདྲེས་པ་དང ། སྡུག་བསྔལ་དང་ལྡན་པ་དང ། སྡུག་བསྔལ་གྱིས་ཡོངས་སུ་བཟུང་བ་དང ། ཉེས་པར་བསམས་པ་དང ། ཉེས་པར་བསྒྲུབས་པའི་དགེ་བའི་རྩ་བས་སེམས་ཅན་དེ་སྙེད་ཅིག་དོན་བྱ་བའམ། དེ་
དག་ལ་ཕན་པར་བསམས་པའམ། བདེ་བ་བསྒྲུབ་པའམ། སྡུག་བསྔལ་བསལ་བའམ། དེ་ལྟར་ཐ་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་འམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ</font><hr>42-1-32a<br><font size=+2>
སྩལ་པ། དགེ་སློང་དག་དེ་ལ་ཇི་སྙམ་དུ་སེམས། སེམས་ཞན་པ་དང ། སེམས་དམའ་བ་ནས་ཉེས་པར་བསྒྲུབས་པའི་བར་གྱི་སེམས་ཀྱིས་སེམས་ཅན་དེ་སྙེད་ཅིག་གི་དོན་བྱ་བ་འམ། དེ་དག་ལ་ཕན་པར་བསམ་པའམ། བདེ་བར་བསྒྲུབ་པའམ། སྡུག་བསྔལ་
བསལབའམ། དེ་ལྟར་ཐ་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། དགེ་སློང་དག་དེ་ལ་ཇི་སྙམ་དུ་སེམས། དད་པ་ཞན་པ་ནས་
ཉེས་པར་བསྒྲུབས་པའི་དད་པའི་བར་དང ། ཚུལ་ཁྲིམས་ཞན་པ་ནས་ཉེས་པར་བསྒྲུབས་པའི་ཚུལ་ཁྲིམས་ཀྱི་བར་དང ། ཐོས་པ་ཞན་པ་ནས་ཉེས་པར་བསྒྲུབས་པའི་ཐོས་པའི་བར་དང ། བརྩོན་འགྲུས་ཞན་པ་ནས་ཉེས་པར་བསྒྲུབས་པའི་བརྩོན་འགྲུས་ཀྱི་བར་དང ། དྲན་པ་ཞན་པ་ནས་ཉེས་
བར་བསྒྲུབས་པའི་དྲན་པའི་བར་དང ། ཏིང་ངེ་འཛིན་ཞན་པ་ནས་ཉེས་པར་བསྒྲུབས་པའི་ཏིང་ངེ་འཛིན་གྱི་བར་དང ། ཤེས་རབ་ཞན་པ་ནས་ཉེས་པར་བསྒྲུབས་པའི་ཤེས་རབ་ཀྱི་བར་གྱིས་སེམས་ཅན་དེ་སྙེད་ཅིག་གི་དོན་བྱ་བའམ། དེ་དག་ལ་ཕན་པར་བསམ་པའམ། བདེ་བསྒྲུབ་པའམ། 
སྡུག་བསྔལ་བསལ་བའམ། དེ་ལྟར་ཐ་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བ་འམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་ནུས་སམ། གསོལ་བ་བཅོམ་ལྡན་འདས་དེ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལེགས་སོ་ལེགས་
སོ། །དེ་ནི་དགེ་བའི་རྩ་བ་ཞན་པ་དང ། སེམས་ཞན་པ་དང ། དད་པ་དང ། ཚུལ་ཁྲིམས་དང ། ཐོས་པ་དང ། བརྩོན་འགྲུས་དང ། དྲན་པ་དང ། ཏིང་ངེ་འཛིན་དང ། ཤེས་རབ་ཞན་པ་དང ། དམའ་བ་དང ། ཞུམ་པ་དང ། ཆུང་བ་དང ། སྡུག་བསྔལ་གྱིས་ཡོངས་སུ་
བསྒྲུབས་པ་དང ། སྡུག་བསྔལ་དང་འདྲེས་པ་དང ། སྡུག་བསྔལ་དང་ལྡན་པ་དང ། སྡུག་བསྔལ་གྱིས་ཡོངས་སུ་བཟུང་བ་དང ། ཉེས་པར་བསམས་པ་དང ། ཉེས་པར་བསྒྲུབས་པའི་ཤེས་རབ་ཀྱིས་སེམས་ཅན་དེ་སྙེད་ཀྱི་དོན་བྱ་བའམ། དེ་དག་ལ་ཕན་པར་བསམ་པའམ། བདེ་བར</font><hr>42-1-32b<br><font size=+2>
བསྒྲུབས་པའམ། སྡུག་བསྔལ་བསལ་བའམ། དེ་ལྟར་ཐ་གྲུ་ཆེ་བའི་སངས་རྒྱས་ཀྱི་ཞིང་ཡོངས་སུ་དག་པར་བྱ་བའམ། སེམས་ཅན་དེ་སྙེད་ཡོངས་སུ་སྨིན་པར་བྱ་བར་མི་ནུས་སོ། །དགེ་སློང་དག་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་དེ་བཞིན་གཤེགས་པ་དབང་པོའི་ཏོག་ཅེས་བྱ་བ་
བྱུང་བ་དེ་གང་ཞིག་ཡིན་སྙམ། དེ་སྐད་ཅེས་བཀའ་སྩལ་པ་དང ། དགེ་སློང་དེ་དག་ཅང་མི་ཟེར་བར་འཁོད་དོ། །དེའི་ཚེ་ཤར་ཕྱོགས་ལོགས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཟླ་བའི་འོད་ཟེར་གྱིས་རབ་ཏུ་བརྒྱན་པ་ཞེས་བྱ་བ་ཡོད་དོ། དེ་ན་དེ་
བཞིན་གཤེགས་པ་གཟི་བརྗིད་འཕགས་པའི་རྒྱལ་པོ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏེ། དེར་འཇམ་དཔལ་གཞོན་ནུར་གྱུར་པ་འདུས་ཤིང་འདུག་པར་གྱུར་པ་དེས་བཅོམ་ལྡན་འདས་ཀྱི་དགོངས་པ་སེམས་ཀྱིས་ཤེས་ནས། བཅོམ་ལྡན་འདས་དེ་བཞིན་གཤེགས་པ་
གཟི་བརྗིད་འཕགས་པའི་རྒྱལ་པོ་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་མི་མཇེད་ཀྱི་འཇིག་རྟེན་གྱི་ཁམས་ན་དེ་བཞིན་གཤེགས་པ་ཤཱཀྱ་ཐུབ་པ་ཆོས་སྟོན་གྱིས། བཅོམ་ལྡན་འདས་ཤཱཀྱ་ཐུབ་པ་དེ་ལ་བསྙེན་བཀུར་བགྱི་བའི་སླད་དུ་བདག་ཀྱང་མཆིའོ། །དེ་སྐད་ཅེས་གསོལ་པ་
དང ། བཅོམ་ལྡན་འདས་དེ་བཞིན་གཤེགས་པ་གཟི་བརྗིད་འཕགས་པའི་རྒྱལ་པོས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་དེའི་དུས་ལ་བབ་པར་ཤེས་ན་སོང་ཤིག་།དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་བཅོམ་ལྡན་འདས་དེ་
བཞིན་གཤེགས་པ་གཟི་བརྗིད་འཕགས་པའི་རྒྱལ་པོའི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས། འདི་ལྟ་སྟེ་དཔེར་ན་སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་བའམ། བརྐྱང་བ་ལས་བསྐུམ་པ་ཙམ་གྱིས་འཇམ་དཔལ་གཞོན་ནུར་གྱུར་པ་འཇིག་རྟེན་གྱི་
ཁམས་ཟླ་བའི་འོད་ཟེར་གྱིས་རབ་ཏུ་བརྒྱན་པ་དེ་ནས་མི་སྣང་བར་གྱུར་ཏེ། བཅོམ་ལྡན་འདས་ཤཱཀྱ་ཐུབ་པའི་སྤྱན་སྔ་འདིར་གནས་པར་གྱུར་ཏོ། །དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ་།ཕྱོགས་གཅིག་ཏུ་འདུག་ནས་འཇམ་དཔལ་གཞོན་ནུར</font><hr>42-1-33a<br><font size=+2>
གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གང་འདི་སྐད་དུ་དགེ་སློང་དག་དེ་ལ་ཇི་སྙམ་དུ་སེམས། དེའི་ཚེ་དེའི་དུས་ན་དེ་བཞིན་གཤེགས་པ་དབང་པོའི་ཏོག་ཅེས་བྱ་བ་བྱུང་བ་དེ་གང་ཞིག་ཡིན་སྙམ་ཞེས་བཀའ་སྩལ་པ་ནི་བཅོམ་ལྡན་
འདས་བཅོམ་ལྡན་འདས་ཉིད་ནི་དེའི་ཚེ་དེའི་དུས་ན་དབང་པོའི་ཏོག་ཅེས་བགྱི་བའི་དེ་བཞིན་གཤེགས་པར་གྱུར་ཏོ། །དེ་ཅིའི་སླད་དུ་ཞེ་ན། འདི་ལྟར་བཅོམ་ལྡན་འདས་ནི་བསམ་གྱིས་མི་ཁྱབ་པའི་ཐབས་མཁས་པ་དང་ལྡན་པ་སྟེ། སེམས་ཅན་ཡོངས་སུ་སྨིན་པར་བགྱི་བ་ལ་ཆོག་པ་མི་
མངའ། སངས་རྒྱས་ཀྱི་ཞིང་ཡོངས་སུ་དག་པར་བགྱི་བ་ལ་རྒྱུན་ཆད་པར་བགྱི་བ་མ་མཆིས། སེམས་ཅན་རྣམས་བྱང་ཆུབ་སེམས་དཔའི་ཆོས་རྣམས་ལ་དགོད་པས་ཆོག་པ་མི་མངའ་སྟེ། ལ་ལ་ཞིག་ཡང་དག་པར་སྨྲ་བས་ཡང་དག་པར་སྨྲ་ན། རྒྱལ་བ་གཙོ་བོ། རྒྱལ་བ་དམ་པ། 
རྒྱལ་བ་མཆོག་རྒྱལ་བ་རབ་ཅེས་བརྗོད་པ་དེ་ནི་བཅོམ་ལྡན་འདས་ཉིད་ལགས་པར་ཡང་དག་པར་བརྗོད་པས་ཡང་དག་པར་བརྗོད་དོ། །དེ་སྐད་ཅེས་སྨྲས་ནས། འཇམ་དཔལ་གཞོན་ནུར་གྱུར་པས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །དཔའ་བོ་རྣམས་ནི་ཐབས་མཁས་ཏེ། །
སེམས་ཅན་རྣམས་ལ་ཐུགས་བརྩེ་ཞིང ། །སེམས་ཅན་ཡོངས་སུ་སྨིན་མཛད་ཕྱིར། །དཔའ་བོ་ཆེན་པོ་རྣམ་པར་འཕྲུལ། །བྱེ་བ་བརྒྱད་ཅུར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང ། །ད་དུང་ཆོག་པའི་འདུ་ཤེས་བསལ། །བྱང་ཆུབ་མཆོག་ཏུ་ཐུགས་ཀྱང་འཇུག་།སྟོང་
གསུམ་དྲུག་ཅུ་རྩ་གཅིག་གི་།སངས་རྒྱས་ཞིང་རྣམས་དག་མཛད་པས། །ཇི་ལྟར་ཐུབ་པ་ཐབས་མཁས་པ། །རྒྱལ་བ་ཁྱོད་ནི་ཀུན་གྱིས་འཚལ། །ད་དུང་དང་པོ་ཐུགས་བསྐྱེད་པར། །དེ་དང་དེར་ནི་ཡོངས་བསྟན་ཏེ། །ད་དུང་དུ་ཡང་འདྲེན་པ་ཁྱོད། །སངས་རྒྱས་མང་པོ་སྟོན་པ་མཛད། །
རྣམ་པ་སྣ་ཚོགས་གཟུགས་རྣམས་ཀྱིས། །གང་ཟག་མཆོག་ནི་སྤྱོད་པ་མཛད། །ཆོས་ཀྱི་དབྱིངས་ལ་ཆགས་མི་མངའ། །ཁྱོད་ཀྱི་གང་ཡང་མཁྱེན་མཛད་དེ། །བརྒྱ་བྱིན་ཚངས་པའི་ཆ་བྱད་དང ། །ལ་ལར་བདུད་ཀྱི་ཆ་བྱད་ཀྱིས། །སེམས་ཅན་རྣམས་ཀྱི་དོན་མཛད་དེ། །འཇིག་རྟེན</font><hr>42-1-33b<br><font size=+2>
རྣམས་ཀྱིས་རྟོགས་མི་ནུས། །བུད་མེད་ཆ་བྱད་སྤྱོད་པ་མཛད། །དུད་འགྲོའི་སྐྱེ་གནས་རྣམས་ནའང་གདའ། །འཇིག་རྟེན་ཆོས་ཀྱིས་མི་གོས་ཏེ། །པད་མ་ཆུས་མི་ཆགས་པ་བཞིན། །འདྲེན་པ་སྣ་ཚོགས་ཁམས་ཅན་གྱི། །འཇིག་རྟེན་འདི་ཡི་རྗེས་འཇུག་མཛད། །དེས་ན་སྐྱེ་དགུ་འདི་
དག་རྣམས། །གདུགས་མཚན་ཁྱོད་ཀྱི་ཡོན་ཏན་བརྗོད། །ལ་ལར་བལྟམ་པ་ཡོངས་སུ་བསྟན། །ལ་ལར་མྱ་ངན་འདས་པ་བསྟན། །ལ་ལ་ན་ནི་འཁོར་ལོ་སྐོར། །ལ་ལར་སྤྱད་པ་སྤྱོད་པ་མཛད། །སེམས་ཅན་འདུལ་བའི་དོན་སླད་དུ། །དགྱེས་ཤིང་མགུར་ལེན་རོལ་པ་མཛད། །
བཤུམས་མོ་དག་ཀྱང་འབྱིན་པར་མཛད། །སེམས་ཅན་སུས་ཀྱང་ཡོང་མ་འཚལ། །འདོད་ཆགས་མི་མངའ་ཆགས་པའི་ཚུལ། །འཇིགས་པ་མི་མངའ་འཇིགས་པ་ལྟར། །སེམས་ཅན་རྣམ་པར་གདུལ་དོན་དུ། །འདྲེན་པ་རྣམ་པར་འཕྲུལ་པ་མཛད། །རྨོངས་མེད་རྨོངས་པའི་ཚུལ་བསྟན་
ཏེ། །བྱིས་པ་མ་ལགས་བྱིས་ཚུལ་གྱིས། །སེམས་ཅན་རྣམ་པར་གདུལ་སླད་དུ། །འདྲེན་པ་རྣམ་པར་འཕྲུལ་པ་མཛད། །སྨྱོས་པ་མ་ལགས་སྨྱོས་པའི་ཚུལ། །ཞ་བ་མ་ལགས་ཞ་བ་ལྟར། །རྣམ་པར་འཕྲུལ་པ་སྣ་ཚོགས་ཀྱིས། །སེམས་ཅན་རྣམས་ནི་འདུལ་བ་མཛད། །དེ་ལྟར་
བསམ་ཡས་མགོན་པོ་ཁྱོད། །དམ་པའི་ཆོས་ཀྱང་བསམ་མི་ཁྱབ། །དཔའ་ཆེན་ཁྱོད་ལ་ཕྱག་ཀྱང་འཚལ། །སེམས་ཅན་ཐུབ་ཆེན་འདྲར་གྱུར་ཅིག་།སྔོན་བྱུང་བ་འོད་སྲུང་ཆེན་པོས་ཞུས་པའི་ལེའུ་སྟེ་ལྔ་པའོ།། །།དེ་ནས་བྱའི་རྒྱལ་པོ་འདབ་བཟངས་བརྒྱད་ཁྲི་དྲུག་སྟོང་གིས་ལྷ་མ་
ཡིན་གྱི་དབང་པོ་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས། བཅོམ་ལྡན་འདས་ལ་གཞལ་དུ་མེད་པའི་དད་པ་སྐྱེས་ཏེ། བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ནས། བཅོམ་ལྡན་འདས་ལ་མཆོད་པའི་དོན་དུ་རིན་པོ་ཆེ་སྣ་བདུན་གྱི་ཁང་པ་བརྩེགས་པ་ཤིན་ཏུ་བཀྲ་བ་
བལྟ་ན་སྡུག་པ་བརྒྱད་ཁྲི་དྲུག་སྟོང་མངོན་པར་སྤྲུལ་ཏོ། །ལྷའི་རིན་པོ་ཆེ་སྣ་བདུན་ནི་འདི་ལྟ་སྟེ། གསེར་དང ། དངུལ་དང ། བཻ་དཱུརྱ་དང ། ཤེལ་དང ། སྤུག་དང ། མུ་ཏིག་དམར་པོ་དང ། རྡོའི་སྙིང་པོ་དང་བདུན་ནོ། །ཁང་པ་བརྩེགས་པ་དེ་དག་ཀྱང་རིན་པོ་ཆེ་སྣ་བཞིའི་ལན་ཀན་གྱི་དྲ་བ</font><hr>42-1-34a<br><font size=+2>
རིས་བཀྲ་བ། བལྟ་ན་སྡུག་པ་རིམ་པ་བདུན་གྱིས་ཀུན་ནས་བསྐོར་ཏོ། །རིན་པོ་ཆེ་སྣ་བཞི་ནི་འདི་ལྟ་སྟེ། གསེར་དང ། དངུལ་དང ། བཻ་དཱུརྱ་དང ། ཤེལ་ལོ། གསེར་གྱི་ལན་ཀན་རྣམས་ཀྱི་ཀ་བ་དང ། གདང་བུ་རྣམས་ནི་གསེར། ཤར་བ་རྣམས་ནི་དངུལ། དངུལ་
གྱི་ལན་ཀན་རྣམས་ཀྱི་ཀ་བ་དང་གདང་བུ་རྣམས་ནི་དངུལ། ཤར་བ་རྣམས་ནི་གསེར། བཻ་དཱུརྱའི་ལན་ཀན་རྣམས་ཀྱི་ཀ་བ་དང་གདང་བུ་ནི་བཻ་དཱུརྱ། ཤར་བ་རྣམས་ནི་ཤེལ། ཤེལ་གྱི་ལན་ཀན་རྣམས་ཀྱི་ཀ་བ་དང་གདང་བུ་རྣམས་ནི་ཤེལ། ཤར་བ་རྣམས་ནི་དངུལ་ལས་བྱས་པའོ། །ཁང་པ་བརྩེགས་
པ་དེ་དག་དྲིལ་བུ་གཡེར་ཁའི་དྲ་བ་བཀྲ་བ་བལྟ་ན་སྡུག་པ་རིམ་པ་བདུན་གྱིས་ཀུན་ནས་བསྐོར་ཏོ། །དེ་དག་ཀྱང་རིན་པོ་ཆེ་སྣ་བདུན་ལས་བྱས་པ་ཤ་སྟག་སྟེ། འདི་ལྟར་གསེར་དང ། དངུལ་དང ། བཻ་དཱུརྱ་དང ། ཤེལ་དང ། སྤུག་དང ། མུ་ཏིག་དམར་པོ་དང ། རྡོའི་སྙིང་པོ་དང་བདུན་ནོ། །ཁང་པ་
བརྩེགས་པ་དེ་དག་རིན་པོ་ཆེ་སྣ་བདུན་གྱི་དྲ་བ་བཀྲ་བ། བལྟ་ན་སྡུག་པ་འདི་ལྟ་སྟེ། གསེར་གྱི་དྲ་བ་དང ། དངུལ་གྱི་དྲ་བ་དང ། བཻ་དཱུརྱའི་དྲ་བ་དང ། ཤེལ་གྱི་དྲ་བ་དང ། མུ་ཏིག་དམར་པོའི་དྲ་བ་དང ། སྤུག་གི་དྲ་བ་དང ། རྡོའི་སྙིང་པོའི་དྲ་བས་ཀུན་ནས་བཀབ་པར་གྱུར་ཏོ། །གདུགས་བཀྲ་བ། བལྟ་ན་
སྡུག་པ་བརྒྱད་ཁྲི་དྲུག་སྟོང་མངོན་པར་སྤྲུལ་ཏེ། དེ་དག་ཀྱང་འདི་ལྟར་གསེར་ནས་རྡོའི་སྙིང་པོའི་བར་གྱི་རིན་པོ་ཆེ་སྣ་བདུན་ལས་བསྒྲུབས་པ་ཤ་སྟག་གོ་།རྒྱལ་མཚན་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་ཏེ། རྒྱལ་མཚན་དེ་དག་ཀྱང་གསེར་དང ། དངུལ་དང ། 
བཻ་དཱུརྱ་དང ། ཤེལ་དང ། རིན་པོ་ཆེ་སྣ་བཞིའི་རྒྱུ་ལས་བསྒྲུབས་པ་ཤ་སྟག་སྟེ། རྒྱལ་མཚན་སྔོན་པོ་རྣམས་ནི་ཏོག་སེར་པོ་ཅན། རྒྱལ་མཚན་སེར་པོ་རྣམས་ནི་ཏོག་སྔོན་པོ་ཅན།རྒྱལ་མཚན་དམར་པོ་རྣམས་ནི་ཏོག་དཀར་པོ་ཅན་ཤ་སྟག་མངོན་པར་སྤྲུལ་ཏོ། །བ་དན་ཁ་དོག་སྣ་ཚོགས་
ཅན་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་པར་གྱུར་ཏོ། །བླ་རེ་བཀྲ་བ། བལྟ་ན་སྡུག་པ་བརྒྱད་ཁྲི་དྲུག་སྟོང་ཡང་མངོན་པར་སྤྲུལ་པར་གྱུར་ཏེ། བླ་རེ་དེ་དག་ཀྱང་གསེར་སྐུད་ཀྱི་བླ་རེ་དང ། དངུལ་སྐུད་ཀྱི་བླ་རེ་དང ། བཻ་དཱུརྱའི་བླ་རེ་དང ། ཤེལ་གྱི་བླ་རེ་དང ། མུ་ཏིག</font><hr>42-1-34b<br><font size=+2>
དམར་པོའི་བླ་རེ་དང ། སྤུག་གི་བླ་རེ་དང ། རྡོའི་སྙིང་པོའི་བླ་རེ་སྟེ། རིན་པོ་ཆེ་སྣ་བདུན་ལས་བསྒྲུབས་པ་ཤ་སྟག་གོ་།དེ་ནས་བྱའི་རྒྱལ་པོ་འདབ་བཟངས་དེ་དག་གིས་ཁང་པ་བརྩེགས་པ་བརྒྱད་ཁྲི་དྲུག་སྟོང་པོ་དེ་དག་དང ། གདུགས་བརྒྱད་ཁྲི་དྲུག་སྟོང་པོ་དེ་དག་དང ། རྒྱལ་མཚན་བརྒྱད་ཁྲི་དྲུག་སྟོང་
པོ་དེ་དག་དང ། བ་དན་བརྒྱད་ཁྲི་དྲུག་སྟོང་པོ་དེ་དག་དང ། བླ་རེ་བརྒྱད་ཁྲི་དྲུག་སྟོང་པོ་དེ་དག་བཅོམ་ལྡན་འདས་ལ་ཕུལ་བ་དང ། དེ་དག་ཐམས་ཅད་སྟེང་གི་བར་སྣང་ལ་ལྡིང་ཞིང་བཅོམ་ལྡན་འདས་ལ་ལན་གསུམ་བསྐོར་བ་བྱས་སོ། །འདི་ལྟ་སྟེ། དཔེར་ན་གླང་པོ་ཆེའི་རྒྱལ་པོ་ས་སྲུང་གི་བུ་ནི་སུམ་
ཅུ་རྩ་གསུམ་གྱི་ལྷ་རྣམས་མགོ་ལ་ཁྱེར་ཞིང་ནམ་མཁའ་ལས་སོང་སྟེ། ཡོངས་འདུས་བརྟོལ་དུ་གཞོག་གོ་།དེ་བཞིན་དུ་ཁང་པ་བརྩེགས་པ་དེ་དག་དང ། གདུགས་དེ་དག་དང ། རྒྱལ་མཚན་དེ་དག་དང ། བ་དན་དེ་དག་དང ། བླ་རེ་དེ་དག་བར་སྣང་གི་ནམ་མཁའ་ལ་ལྡིང་ཞིང་བཅོམ་ལྡན་འདས་ལ་ལན་
གསུམ་སྐོར་བ་བྱེད་པར་གྱུར་ཏོ། །དེ་ནས་འདབ་བཟངས་བརྒྱད་ཁྲི་དྲུག་སྟོང་པོ་དེ་དག་གིས་བཅོམ་ལྡན་འདས་ལ་མཆོད་པ་བྱས་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དེ་ཐལ་མོ་སྦྱར་ནས་ཕྱག་འཚལ་ཞིང་ཚིགས་སུ་བཅད་པ་དག་གིས་བཅོམ་ལྡན་འདས་ལ་
མངོན་པར་བསྟོད་པ། རྒ་དང་འཆི་ལས་རྣམ་བྲལ་ཁྱོད་ལ་ཕྱག་འཚལ་ལོ། །རྒ་དང་འཆི་ལས་རྣམ་འགྲོལ་ཁྱོད་ལ་ཕྱག་འཚལ་ལོ། །སེམས་ཅན་གཞལ་ཡས་ཁ་ལོ་སྒྱུར་ལ་ཕྱག་འཚལ་ལོ། །ཁྱོད་དང་མཚུངས་པ་མ་མཆིས་ལྷག་པའང་མ་མཆིས་སོ། །བདག་ཅག་རྣམས་ཀྱང་སྲེད་མེད་བུ་ཡི་ལུས་
ལྡན་ཞིང ། །སུམ་ཅུ་རྩ་གཉིས་མཚན་གྱིས་ཡན་ལག་བརྒྱན་པ་དང ། །དཔེ་བྱད་བཟང་པོ་བརྒྱད་ཅུས་ཤིན་ཏུ་མཛེས་བྱས་པའི། །སངས་རྒྱས་རྣམ་པར་འདྲེན་པ་ཁྱོད་འདྲར་གྱུར་པར་ཤོག་།བདག་ཅག་འདོམ་གང་འོད་ཀྱི་གཟི་ལྡན་ཞིང ། །མངོན་འཕགས་གཟུགས་ཀྱི་དམ་པས་མཛེས་གྱུར་ཏེ། །སྤྱོད་
ལམ་མཆོག་དང་བདག་ཅག་ལྡན་གྱུར་ཅིང ། །འགྲོ་བ་རྣམས་སྦྱོང་མྱ་ངན་ཟློ་བར་ཤོག་།བདག་ཅག་ཚུལ་ཁྲིམས་ཏིང་འཛིན་རབ་ལྡན་ཞིང ། །ཤེས་རབ་ལྡན་པས་མཆོག་ཏུ་གྱུར་པར་ཤོག་།དེ་ལྟར་རྣམ་པར་འདྲེན་པ་ཁྱོད་ལྟ་བུར། །སྐྱེ་བོ་རབ་འགྲེལ་སངས་རྒྱས་གྲུབ་པར་ཤོག་།འདྲེན་པ་འཇིག་རྟེན་མཁས་པ</font><hr>42-1-35a<br><font size=+2>
ཁྱོད་ལྟ་བུར། །བདག་ཅག་འདྲེན་པ་སྟོབས་བཅུ་ལྡན་པ་དང ། །མ་འདྲེས་བཅོ་བརྒྱད་ཆོས་ཀྱི་མཐར་ཕྱིན་ཅིང ། །འཇིག་རྟེན་མཁས་པ་ཐམས་ཅད་མཁྱེན་དུ་ཤོག་།བདག་ཅག་ཀུན་ཀྱང་འགྲོ་བ་དངོས་མེད་དང ། །རྨི་འདྲ་སྒྱུ་འདྲ་གནས་པ་མེད་པ་དང ། །བྲག་ཅ་ནམ་མཁའ་འདྲ་བར་སྟོན་བྱེད་ཅིང ། །
ཇི་ལྟར་རྣམ་འདྲེན་ཁྱོད་སྟོན་བཞིན་དུ་ཤོག་།དེ་ནས་བཅོམ་ལྡན་འདས་ཀྱིས་བྱའི་རྒྱལ་པོ་འདབ་བཟངས་དེ་དག་གི་ལྷག་པའི་བསམ་པ་མཁྱེན་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། རྒྱལ་བ་རྣམ་འདྲེན་གཙོ་བོ་སངས་རྒྱས་རྣམས། །
རྒྱུ་མ་མཆིས་པར་བཞད་པ་མི་མཛད་ན། །འཛུམ་མཛད་འདི་ལ་རྒྱུ་རྐྱེན་གང་ལགས་པ། །འཇིག་རྟེན་ཕན་མཛད་ཐུགས་རྗེ་མངའ་བས་གསུངས། །འདབ་བཟངས་རྣམས་ཀྱིས་རྒྱལ་བ་མཆོད་བགྱིས་ཏེ། །བླ་རེ་ནམ་མཁའ་རྒྱས་པར་གང་བ་བསྟན། །ལྷར་བཅས་འཇིག་རྟེན་འདི་ལ་ངོ་མཚར་སྐྱེད། །རྐང་གཉིས་
དམ་པས་དེ་དག་ལུང་བསྟན་གསོལ། །འགྲོ་བ་ཐམས་ཅད་ཐལ་མོ་རབ་སྦྱར་ཅིང ། །དགའ་བའི་སེམས་དང་མགུ་བའི་སེམས་ཀྱིས་འཁོད། །མཁའ་ལྡིང་འགྲོ་བ་ཅིར་འགྱུར་ཉན་པར་འཚལ། །རྐང་གཉིས་དམ་པས་དེ་དག་ལུང་བསྟན་གསོལ། །མི་མཆོག་ཁྱོད་ལ་ཁོང་དག་མཆི་བ་ནི། །འགྲོ་བ་ཐམས་ཅད་ཐེ་
ཚོམ་མེད་འགྱུར་ཞིང ། །ཐེ་ཚོམ་མེད་པས་འཁོར་དུ་འཇིགས་མེད་འགྱུར། །འདིས་ནི་སངས་རྒྱས་མཉེས་པར་བགྱིས་ཤེས་མཆི། །འཁོར་འདིར་འཇིགས་མེད་རབ་ཏུ་དགའ་བར་འགྱུར། །ཡོངས་སུ་སྦྱངས་ཤིང་ཤིན་ཏུ་སྐྱོན་བསལ་ནས། །རྒྱལ་བས་ལུང་བསྟན་དེ་དག་མངོན་དགའ་སྟེ། །སློབ་མ་མཆོག་ལ་བླ་
མས་བསྟན་པ་བཞིན། །ཐེ་ཚོམ་འཚལ་བའི་ཐེ་ཚོམ་གཅད་དུ་གསོལ། །རབ་ཏུ་དགའ་མཛད་རྗེས་སུ་སྨོན་པ་མཛོད། །དགའ་བའི་སེམས་ཀྱིས་འཁོར་འདི་འདུས་གྱུར་གྱིས། །རང་བྱུང་མཁའ་ལྡིང་འགྲོ་བ་ཅིར་འགྱུར་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་
སྩལ་པ། ཐམས་ཅད་ཟིལ་གནོན་སྟོབས་བཅུ་བརྩོན་འགྲུས་བདེན། །རྒྱལ་བ་དབང་པོ་ཐུབ་པ་དེ་བཞིན་གཤེགས། །འདྲེན་པས་ཡན་ལག་བརྒྱད་ལྡན་གསུང་དབྱངས་ཀྱིས། །འདབ་བཟངས་འགྲོ་བ་རྟ་ཐུལ་བཀའ་སྩལ་པ། །རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །འཇིག་རྟེན་ཕན་ཕྱིར་འཛུམ་གང་ངས་བསྟན་པ། །དེ་ཡི</font><hr>42-1-35b<br><font size=+2>
འབྲས་བུ་དགའ་བའི་ཡིད་ཀྱིས་ཉོན། །ཐེ་ཚོམ་སོལ་ལ་རབ་ཏུ་དགའ་བ་སྐྱེད། །བླ་ན་མེད་པའི་བྱང་ཆུབ་ཞི་ཚོལ་ཞིང ། །སྟོབས་དང་མི་འཇིགས་བཞི་པོ་གང་རྣམས་ཀྱིས། །འདྲེན་པ་འཇིགས་མེད་འགྱུར་བ་བཙལ་བའི་ཕྱིར། །འདབ་ཆགས་དབང་པོས་ང་ལ་མཆོད་ལེགས་བྱས། །མ་འདྲེས་བཅོ་བརྒྱད་ཆོས་ནི་སྨྲ་བ་ཡི། །
སྲེད་མེད་བུ་ལུས་ཤིན་ཏུ་མཁྲེགས་པ་དང ། །སུམ་ཅུ་གཉིས་མཚན་དཔེ་བྱད་བཟང་པོ་རྣམས། །ཡོངས་སུ་བཙལ་ཕྱིར་ང་ལ་མཆོད་པ་བྱས། །རྒྱལ་བའི་ཚུལ་ཁྲིམས་ཏིང་འཛིན་བཙལ་བ་དང ། །གཞན་ཡང་སངས་རྒྱས་སྤྱོད་ཡུལ་ཤེས་རབ་དང ། །ཕུན་སུམ་ཞིང་དང་འགྲོ་བ་རྣམ་དགྲོལ་བ། །འདི་དག་ཀུན་བཙལ་དོན་
དུ་མཆོད་པ་བྱས། །དེ་དག་ང་ལ་དགའ་བས་མཆོད་བྱས་པས། །དུད་འགྲོའི་གནས་ནས་དེ་དག་ཤི་འཕོས་ནས། །ལྷ་དང་བརྟུལ་ཞུགས་འཐུན་པར་དེ་དག་འདོང ། །འདི་ནི་ངན་སོང་སྲིད་པའི་ཐ་མ་ཡིན། །བསྐལ་པ་བྱེ་བ་གང་གཱའི་བྱེ་སྙེད་དུ། །དེ་དག་ལྷ་མིའི་ནང་ན་གནས་གྱུར་ཅིང ། །རྣམ་འདྲེན་ཁྲག་ཁྲིག་མཐའ་
ཡས་མཆོད་བྱས་ནས། །དེ་དག་དབང་པོ་ཐུལ་བའི་རྒྱལ་བར་འགྱུར། །དེ་དག་ཞིང་དུ་ངན་སོང་མི་འབྱུང་སྟེ། །མི་ཁོམ་མི་འབྱུང་མཚན་དང་མི་ལྡན་མེད། །རྒྱལ་བ་དེ་དག་མཚན་ནི་ཀུན་ཏུ་མཛེས། །རི་རབ་རྒྱལ་མཚན་བསྐལ་ལ་རང་བྱུང་འགྱུར། །ལོ་ནི་བྱེ་བ་བརྒྱད་ཅུ་བཞི་བགྲངས་པར། །འཇིག་རྟེན་ཕན་ཕྱིར་
འདྲེན་པ་དེ་དག་བཞུགས། །འཇིག་རྟེན་ཕན་ཕྱིར་རྣམ་འདྲེན་མཉམ་བཞག་པས། །ལུས་ཅན་རྣམས་ལ་མཉམ་པའི་དོན་མཛད་འགྱུར། །སྐྱོབ་པ་རྡུལ་མེད་གྱུར་པ་དེ་དག་གི་།འདུས་པ་ང་རྒྱལ་སྤངས་པ་བརྒྱད་ཅུར་འགྱུར། །དེ་ཚེ་སྐྱོབ་པ་རྡུལ་དང་བྲལ་རྣམས་ཀྱི། །ཤིན་ཏུ་སེམས་དུལ་བྱེ་བ་བརྒྱད་ཅུ་འབྱུང ། །འདྲེན་པ་
དེ་དག་འགྲོ་བའི་ང་བསལ་ཕྱིར། ཆོས་ཀྱི་འཁོར་ལོ་རབ་ཏུ་སྐོར་བར་འགྱུར། །མི་དག་དེ་ལྟར་འདི་རྣམས་ང་རྒྱལ་ཆེ། །འདབབཟངས་ལུས་སུ་གྱུར་ནས་སྟོབས་པོ་ཆེ། །འདི་དག་སྔོན་ཚེ་འདས་པའི་དུས་ཤིག་ན། །དྲང་སྲོང་དཀའ་ཐུབ་དྲག་པོའི་ཚོགས་ཅན་གྱུར། །སྟོང་ཕྲག་བརྒྱད་ཅུ་རྩ་དྲུག་ཚང་བ་སྟེ། །དཀའ་ཐུབ་སྤྱོད་
དེ་རྫུ་འཕྲུལ་ཕུན་སུམ་བཙལ། །དེ་དག་རྫུ་འཕྲུལ་ཐོབ་ནས་ང་རྒྱལ་གྱིས། །དགའ་བས་དཀའ་ཐུབ་དྲག་དང་ལྡན་པར་གྱུར། །ཚུལ་ཁྲིམས་མ་ཞིག་དེ་དག་ནགས་འདབ་ཏུ། །ཚེ་ཟད་ཤི་འཕོས་གྱུར་ཏེ་ལུས་ཀྱང་ཞིག་།ང་རྒྱལ་དེས་ནི་མཁའ་ལྡིང་མཁའ་འགྲོར་གྱུར། །རྫུ་འཕྲུལ་སེམས་ཀྱིས་རྫུ་འཕྲུལ་ལྡན་པར་སྐྱེས། །ཚུལ</font><hr>42-1-36a<br><font size=+2>
ཁྲིམས་དག་པས་རྒྱལ་བའི་བསྟན་ལ་དད། །ང་རྒྱལ་གྱིས་ནི་བྱང་ཆུབ་སེམས་ཀྱང་བསྐྱེད། །ནམ་མཁའ་ལྡིང་ལུང་བསྟན་པའི་ལེའུ་སྟེ་དྲུག་པའོ།། །།བམ་པོ་བཞི་པ། དེ་ནས་ཀླུའི་བུ་མོ་བྱེ་བ་ཕྲག་དགུ་བཅུ་རྩ་དྲུག་གིས་ལྷ་མ་ཡིན་གྱི་དབང་པོ་དེ་དག་དང ། ནམ་མཁའ་ལྡིང་གི་དབང་པོ་དེ་
དག་གི་མཆོད་པ་ཡང་མཐོང་།ལུང་བསྟན་པ་ཡང་ཐོས་ནས་མཆོག་ཏུ་དགའ་བ་ཆེན་པོ་སྐྱེས་ཏེ། དེ་དག་དགའ་མགུ་ཡི་རངས་ནས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏོ། །དེ་དག་གིས་རིན་པོ་ཆེ་སྣ་བདུན་གྱི་གདུགས་བཻ་དཱུརྱའི་དྲ་བ་ལྡ་ལྡིར་
བཀྱེ་བ་མུ་ཏིག་དམར་པོའི་དྲ་བས་བསྐོར་བ། གསེར་གྱི་ཡུ་བ་ཅན། བཻ་དཱུརྱའི་ཐུར་མ་བརྒྱ་སྟོང་བཀྱེ་བ། རིན་པོ་ཆེ་ཆུན་པོ་སྦྱངས་པ་བྱེ་བ་ཕྲག་དགུ་བཅུ་རྩ་དྲུག་མངོན་པར་སྤྲུལ་ཏོ། །རྟ་སྔོན་པོ་ཁ་དོག་སྔོན་པོ། སྔོན་པོ་ལྟ་བུར་སྟོན་པ། འོད་སྔོན་པོ་འབྱུང་བ། རྒྱན་སྔོན་པོས་བརྒྱན་པ། བཻ་དཱུརྱའི་སྲབ་ཀྱིས་བསྲབས་
པ། བྱེ་བ་ཕྲག་དགུ་བཅུ་རྩ་དྲུག་མངོན་པར་སྤྲུལ་ཏོ། །ནོར་བུ་སྐར་མདོག་གི་བླ་རེ་ཁོ་ར་ཁོར་ཡུག་ཏུ་དཔག་ཚད་དྲུག་ཅུ་ཡོད་ལ། དེས་འཁོར་དེ་དག་ཐམས་ཅད་ཡོག་པ་ཅིག་ཀྱང་སྟེང་གི་བར་སྣང་ལ་མངོན་པར་སྤྲུལ་ཏོ། །དེ་ལ་རིན་པོ་ཆེ་སྣ་བདུན་གྱི་ལྡ་ལྡི་བཀྲ་བ་མིག་ཏུ་མཛེས་པ་བལྟ་ན་སྡུག་པ་བྱེ་བ་ཕྲག་དགུ་བཅུ་རྩ་དྲུག་
བྲེས་པར་མངོན་པར་སྤྲུལ་ཏོ། །བླ་རེ་དེའི་ཁོ་ར་ཁོར་ཡུག་ཏུ་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་མངོན་པར་སྤྲུལ་ཏེ་བྲེས་སོ། །རིན་པོ་ཆེ་སྣ་བདུན་གྱི་ཁྲུང་ཁྲུང་རྐང་དག་མངོན་པར་སྤྲུལ་ཏོ། །ཀླུའི་རོལ་མོ་སིལ་སྙན་བྱེ་བ་ཕྲག་དགུ་བཅུ་རྩ་དྲུག་མངོན་པར་སྤྲུལ་ཏོ། །དེ་ནས་ཀླུའི་བུ་མོ་དེ་དག་རྟ་སྔོན་པོ་དེ་དག་ལ་ཞོན་ནས་
རིན་པོ་ཆེ་སྣ་བདུན་གྱི་གདུགས་སྟེང་གི་བར་སྣང་ལ་བྲེས་ཏེ། ནམ་མཁའ་ལས་འདོང་ཞིང་རོལ་མོའི་སྒྲ་བྱེ་བ་ཕྲག་དགུ་བཅུ་རྩ་དྲུག་པོ་དེ་དག་དཀྲོལ་ཅིང ། བཅོམ་ལྡན་འདས་ལ་ལན་གསུམ་སྐོར་བ་བྱེད་པ་ལྷའི་ཙན་དན་གྱི་ཕྱེ་མ་དག་ཀྱང་བཅོམ་ལྡན་འདས་ལ་མངོན་པར་འཐོར། ལྷའི་ཨ་ག་རུ་དང ། ཏ་མ་ལའི་ལོ་མ་དང ། 
ུད་པ་ལའི་ཕྱེ་མ་དང ། མེ་ཏོག་སྣ་ཚོགས་ཀྱང་བཅོམ་ལྡན་འདས་ལ་མངོན་པར་འཐོར། མེ་ཏོག་ཨུད་པ་ལ་དང ། ཙམ་པ་ཀའི་ཕྲེང་བ་དག་ཀྱང་འཐོར།མེ་ཏོག་རྣམ་པ་སྣ་ཚོགས་ཀྱི་ཕྲེང་བ་དག་ཀྱང་འཐོར། སྤོས་སྣ་ཚོགས་ཀྱི་ཕྲེང་བ་དང ། ན་བཟའ་དང ། རྒྱན་དག་ཀྱང་འབུལ་ཏེ། ལྷ་མ་ཡིན་གྱིས་ཇི</font><hr>42-1-36b<br><font size=+2>
ལྟར་བྱས་པ་དེ་བཞིན་དུ་མཆོད་པ་རྒྱ་ཆེར་བྱས་སོ། །དེ་ནས་དེ་དག་གིས་རོལ་མོ་སིལ་སྙན་བྱེ་བ་ཕྲག་དགུ་བཅུ་རྩ་དྲུག་པོ་དེ་དག་བྱས་པའི་སྒྲས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་གང་བར་གྱུར་ཏེ། སེམས་ཅན་གང་དག་གིས་རོལ་མོའི་སྒྲ་དེ་ཐོས་པ་དེ་དག་ཐམས་ཅད་ཀྱང་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། ནོར་བུ་སྐར་མདོག་གི་བླ་རེ་དག་དང ། རིན་པོ་ཆེ་སྣ་བདུན་གྱི་ལྡ་ལྡི་དེ་དག་དང ། དྲིལ་བུ་གཡེར་ཀའི་དྲ་བ་དེ་དག་དང ། ཁྲུང་ཁྲུང་རྐང་དེ་དག་རླུང་གིས་བསྐྱོད་པ་ལས་འདི་ལྟ་སྟེ། དཔེར་ན་རོལ་མོ་སིལ་སྙན་ཡན་ལག་བརྒྱད་དང་ལྡན་པ
མཁས་པས་དཀྲོལ་བ་དེ་ལྟ་བུར་སྙན་ལ་དེ་ལྟ་བུར་ཡིད་དུ་འོང་ཞིང་མཉན་ན་བདེ་བའི་སྒྲ་བྱུང་བར་གྱུར་ཏོ། །སྒྲ་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་གང་བར་གྱུར་ཏེ། སེམས་ཅན་གང་གིས་རྒྱན་གྱི་སྒྲ་དེ་དག་ཐོས་པར་གྱུར་པ་དེ་དག་ཐམས་ཅད་ཀྱང ། བླ་ན་མེད་པ་ཡང་
དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་ཀླུའི་བུ་མོ་དེ་དག་གིས་མེ་ཏོག་རྣམ་པ་སྣ་ཚོགས་ཀྱི་ཆར་དང ། སྤོས་ཆུ་རྣམ་པ་སྣ་ཚོགས་ཀྱི་ཆར་མངོན་པར་ཕབ་པར་གྱུར་ཏེ། མེ་ཏོག་གི་ཆར་དེ་བབ་པའི་ཚེ་སྤོས་ཀྱི་དྲི་ཞིམ་པོའི་ངད་བྱུང་སྟེ། འགྲོ་ཞིང་ལྡོག་གོ་།སྤོས་ཆུའི་ཆར་དེ་བབ་པས་
ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོའི་ཁོ་ར་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་སྤོས་ཆུའི་རྫབ་ཏུ་གྱུར་ཏེ། སྤོས་ཀྱི་དྲི་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྒྱས་པར་གང་བར་གྱུར་ཏོ། །སེམས་ཅན་གང་གིས་སྤོས་ཀྱི་དྲི་དེ་ཚོར་བར་གྱུར་པ་དེ་དག་ཐམས་ཅད་ཀྱང་བླ་ན་མེད་པ་
ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ནས་ཀླུའི་བུ་མོ་དེ་དག་གིས་གདུགས་བྱེ་བ་ཕྲག་དགུ་བཅུ་རྩ་དྲུག་དང ། རྟ་བྱེ་བ་ཕྲག་དགུ་བཅུ་རྩ་དྲུག་དང ། རོལ་མོ་སིལ་སྙན་བྱེ་བ་ཕྲག་དགུ་བཅུ་རྩ་དྲུག་པོ་དེ་དག་གིས་བཅོམ་ལྡན་འདས་ལ་མཆོད་པ་བྱས་ནས་རྒྱན་ཐམས་
ཅད་དང་ལྡན་པ་དེ་དག་བར་སྣང་གི་ནམ་མཁའ་ལ་འཁོད་དེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ཐལ་མོ་སྦྱར་ནས་བཅོམ་ལྡན་འདས་ལ་ཕྱག་འཚལ་ཞིང་ཕྱོགས་གཅིག་ཏུ་འཁོད་པར་གྱུར་ཏོ། །དེའི་ཚེ་ཚིགས་སུ་བཅད་པ་འདི་དག་ཀྱང་སྨྲས་སོ། །


</font><hr>42-1-37a<br><font size=+2>
ཀླུ་ཡི་བུ་མོ་མཁས་པ་དེ་དག་ཡི་རངས་དགའ་མགུ་ཡིད་ཀྱིས་སུ། །བྱང་ཆུབ་ཞི་བ་ཚོལ་ཞིང་ཤཱཀྱ་ཐུབ་ལ་དེར་ནི་མཆོད་པ་ཆེན་པོ་བྱས། །རྒྱན་གྱིས་ལེགས་བརྒྱན་བྱེ་བ་དགུ་བཅུ་དྲུག་གི་གདུགས་རྣམས་མངོན་སྤྲུལ་ཏེ། །བདེ་བར་གཤེགས་པ་མཆོད་ཅིང་རབ་ཏུ་
དུལ་བའི་ཡིད་ཀྱིས་ཆགས་དང་བྲལ། །རྒྱན་གྱིས་ལེགས་བརྒྱན་བྱེ་བ་དགུ་བཅུ་དྲུག་གི་རྟ་རྣམས་མངོན་སྤྲུལ་ཏེ། །ཁ་དོག་སྔོ་ཞིང་རྒྱན་ཡང་སྔོ་བའི་རྟ་ལ་རྒྱལ་མཚན་སྔོན་པོས་བརྒྱན། །དེ་དག་ཐམས་ཅད་བར་སྣང་དོང་ནས་ཐུབ་ལ་རྟ་ཡིས་མཆོད་པ་བྱེད། །ཀླུ་ཡི་བུ་མོ་
དེ་དག་དང་བའི་ཡིད་ཀྱིས་ཐུབ་ལ་མགོས་ཕྱག་འཚལ། །མཆོག་ལ་མཆོད་པའི་དོན་དུ་ཀླུ་ཡི་གནས་ནས་ཀླུ་ཡི་སིལ་སྙན་གྱིས། །མཆོད་པའི་འོས་གྱུར་འདྲེན་པ་ཤཱཀྱ་ཐུབ་ལ་དེར་ནི་མཆོད་པ་བྱས། །སིལ་སྙན་དེ་དག་བདེ་བར་གཤེགས་ལ་མཆོད་པའི་སྒྲ་དེ་ཁམས་གསུམ་
གྲག་།སྒྲ་དེ་ཐོས་པའི་སེམས་ཅན་ཁྲག་ཁྲིག་དག་ནི་བྱང་ཆུབ་ཡང་དག་ཞུགས། །དེ་དག་རྣམས་ཀྱིས་དེར་སྤྲུལ་མཁའ་ལ་བླ་རེ་ཆེན་པོ་གཅིག་ཏུ་གྱུར། །ཕྱོགས་བཅུའི་དཔག་ཚད་དྲུག་ཅུར་རྒྱས་ཤིང་འགྲོ་བ་ཐམས་ཅད་ཁེབས་པར་གྱུར། །ནོར་བུ་རིན་ཆེན་སྐར་མའི་
མདོག་གི་གཟི་བརྗིད་ཕྱོགས་སུ་འབར་ཞིང་གསལ། །ཀླུ་ཡི་བུ་མོ་དགའ་ནས་འགྲོ་བའི་དོན་དུ་རྒྱལ་ལ་མཆོད་པ་བྱས། །གཞལ་དུ་མེད་པའི་སེམས་བསྐྱེད་དགའ་ནས་བྱང་ཆུབ་ཞི་བ་ཚོལ་བྱེད་ཅིང ། །འཇིག་རྟེན་དོན་བྱེད་བདེ་གཤེགས་སངས་རྒྱས་འཇིག་རྟེན་མཁས་པ་
གྲུབ་པར་ཤོག་།ཇི་ལྟར་སྟོབས་བཅུ་མངའ་བ་ཁྱོད་ནི་སེམས་ཅན་སྡུག་བསྔལ་འགྲོལ་བ་ལྟར། །ཆོས་ཀྱང་བསྟན་ཏེ་སེམས་ཅན་ཉོན་མོངས་སྡུག་བསྔལ་བསྒྲིབས་པ་ཁྲག་ཁྲིག་དགྲོལ། །ཆོས་རྣམས་སྒྱུ་མ་སྨིག་རྒྱུ་འདྲ་ཞིང་དབུ་བ་ལྟ་བུར་ཉམ་ཆུང་ལ། །ཆར་རྒྱུན་ཆུ་
ལ་ཕོག་པའི་ཆུ་བུར་ལྟ་བུར་འཇིག་ཅིང་བདག་པོ་མེད། །མེ་ལོང་ནང་གི་གཟུགས་བརྙན་འདྲ་བར་འགྲོ་བ་ཐམས་ཅད་བརྟགས་ནས་ནི། །འགྲོ་བ་དག་ལ་ཆོས་ཀྱི་རང་བཞིན་ཡང་དག་དེ་ཉིད་བསྟན་པར་བགྱི་།སྒྱུ་མ་བཀོད་པ་ལྟ་བུར་མ་མཆིས་བརྫུན་པ་བྱིས་པ་རྨོངས་བགྱིད་པ། །


</font><hr>42-1-37b<br><font size=+2>
སྐྱེ་བོ་མི་མཁས་ཇི་བཞིན་མ་འཚལ་བ་དག་མ་རུང་རབ་བགྱིད་པ། །བྱིས་པ་རྨོངས་བགྱིད་ཆོས་རྣམས་སྡིག་མེད་ཁྱོད་ཀྱིས་དེ་ལྟར་ལེགས་པར་གཟིགས། །དེ་དག་ཇི་ལྟར་གཟིགས་པ་དེ་བཞིན་དེ་དག་སེམས་ཅན་རྣམས་ལ་བསྟན། །ཇི་ལྟར་ས་ཆེན་འདི་ལ་སྤྲིན་འཁྲིགས་གྱུར་ན་རི་
ལྟར་གདའ་བ་ཡང ། །ཡང་དག་ཏུ་ན་རི་ལྟར་ངོ་བོ་ཉིད་ཀྱིས་དེ་ལ་གནས་མ་མཆིས། །དེ་ལྟར་འགྲོ་བ་ཐམས་ཅད་རང་བཞིན་མ་མཆིས་དབང་པོ་རྨོངས་པར་བགྱིད། །ཤེས་པས་བརྟགས་ནས་སྐྱེ་བོ་མཁས་པ་དག་ནི་རྨོངས་པར་འགྱུར་མ་མཆིས། །ཡང་དག་ཏུ་ན་འགྲོ་བ་
ཐམས་ཅད་རང་བཞིན་མ་མཆིས་ཁྱོད་སྟོན་པས། །དེས་ན་འདྲེན་པ་རྒྱལ་བ་ཁྱོད་ལ་སྐྱེ་བོ་མཁས་པ་མི་ཕྱེད་འགྱུར། །ཁྱོད་ཀྱི་སྲས་རྣམས་ཆོས་ཀྱིས་ཡོངས་སུ་ཚིམ་ནས་རྫབ་ལ་ཟམ་པ་འདྲ། །འདི་ནི་བྱིས་པའི་སྐྱེ་བོའི་ཡུལ་མིན་འགྲོ་བ་འདི་ནི་སྒྲ་ཕྱིར་འབྲང ། །དེ་ལྟ་
ལགས་པས་སྡིག་མེད་ཡང་དག་སྟོན་པ་བྱིས་པའི་སྐྱེ་བོའི་མགོན། །སྐྱབས་དང་དཔུང་གཉེན་གནས་དང་རྟེན་དང་རྩ་ལག་ཁྱོད་ལ་སྐྱབས་སུ་མཆི། །གཞལ་ཡས་བྱང་ཆུབ་དེ་བཙལ་སླད་དུ་རྣམ་པར་འདྲེན་པ་ཁྱོད་ལ་མཆོད། །སངས་རྒྱས་གྱུར་ནས་རྟོགས་བགྱིད་སྡིག་བྲལ་
འཇིག་རྟེན་དོན་རྣམས་བགྱིད་པར་ཤོག་།དེ་ནས་བཅོམ་ལྡན་འདས་ཀྱིས་ཀླུའི་བུ་མོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། །འཇིག་རྟེན་ན་ནི་འཇིག་རྟེན་
མཁས་པ་རྣམ་པར་འདྲེན་མཆོག་ཁྱོད་འཛུམ་མཛད། །དཔལ་སྟུག་འཛུམ་པ་མཛད་ལ་རྒྱུ་མ་མཆིས་པ་བདག་གིས་ཡོངས་མ་མཐོང ། །མི་ཡི་དབང་པོ་དམ་པ་འཛུམ་པ་མཛད་པའི་རྒྱུ་ནི་ཡང་དག་གསུངས། །དེ་ཐོས་ལྷ་མི་ལྷ་མིན་ཚོགས་དང་ཀླུ་ཡི་བུ་མོ་གསང་བ་པ། །དྲི་
ཟ་རྣམས་ཀྱང་སྐྱོབ་པའི་དགོངས་པ་ཐོས་ནས་ཡིད་ནི་དགའ་བར་འགྱུར། །འཇིག་རྟེན་དག་ན་འཇིག་རྟེན་རྣམ་འདྲེན་ཁྱོད་ཀྱིས་རྒྱུ་རྣམས་ཐམས་ཅད་མཁྱེན། །རྒྱལ་བས་ཆོས་གང་རྒྱུ་དང་རྣམ་པས་མཁྱེན་པར་མ་གྱུར་ཡོང་མ་མཆིས། །དེ་ལྟས་བདེ་གཤེགས་རྒྱལ་བ་ཁྱོད་ཀྱིས</font><hr>42-1-38a<br><font size=+2>
ཇི་ལྟར་ཐུགས་ཆུད་འཛུམ་རྒྱུ་གསུངས། །དེ་ཐོས་ནས་ནི་འགྲོ་བ་ཐམས་ཅད་ཡི་རངས་དོགས་པ་ཆད་པར་འགྱུར། །ཐུབ་པ་བདེ་བར་གཤེགས་ཀྱི་བསྟན་པ་མཆོག་ལ་དོན་ཀྱང་ཐོབ་པར་མཆི། །འཁོར་རྣམས་འདི་དག་དོན་མྱོང་གྱུར་ནས་ཡིད་ནི་རབ་ཏུ་ཞི་བར་འགྱུར། །ཀུན་རྟོག་དབང་དུ་མི་འགྱུར་བྱང་ཆུབ་ཡིད་ཀྱིས་རྒྱལ་བའི་སྤྱོད་ཉན་འགྱུར། །བདེ་གཤེགས་ཁྱོད་ཀྱི་འཛུམ་མཛད་དོན་ཐོས་རང་འབྱུང་ཉིད་དུ་ངེས་པར་འབྱུང ། །འཁོར་འདི་རྒྱལ་བ་ཁྱོད་ཀྱི་ཞལ་ནས་འཛུམ་མཐོང་ཐེ་ཚོམ་འཚལ་གྱུར་ཏེ། །སྡུག་བསྔལ་དོགས་བཅས་ཡིད་མི་བདེ་ཞིང་ཆོས་
ལ་སོམ་ཉི་གང་འཚལ་བ། །དེ་དག་ལ་ནི་ཐུབ་པ་སྟོན་པས་དོགས་བསལ་ཐེ་ཚོམ་དགུམ་དུ་གསོལ། །དྲང་སྲོང་ཁྱོད་ཀྱིས་གང་སླད་འཛུམ་བསྟན་མྱུར་དུ་བཀའ་སྩལ་ཐེ་ཚོམ་ཁུམ། །རྒྱལ་བ་གང་གིས་དེ་རིང་ཡིད་ནི་རྣམ་པར་སྦྱངས་ཤིང་བདུད་བཅོམ་ཐུལ། །སུ་ཞིག་ཡིད་རབ་ཚིམ་ནས་
བཅོམ་ལྡན་འདས་ལ་མཆོད་པ་དམ་པ་བགྱིས། །འདི་ནི་སུ་ཡི་མཐུ་ལགས་སྟོན་པ་འགྲོ་བའི་མདུན་དུ་འདི་བཀའ་སྩོལ། །ཐོས་ནས་བདག་ཅག་ཡི་རངས་མཆོག་ཏུ་དགའ་བ་སྐྱེས་ནས་བདེ་བར་འགྱུར། །ཁྱོད་ཀྱི་ཞབས་ཀྱི་དྲུང་དུ་འདུས་པའི་འགྲོ་བ་འདི་དག་ཐེ་ཚོམ་འཚལ། །འཛུམ་
རྒྱུ་དགའ་བ་སྐྱེད་པ་བཀའ་སྩོལ་ཐུབ་པ་ཐེ་ཚོམ་བསལ་དུ་གསོལ། །དེ་ཐོས་ལྷ་དང་བཅས་པའི་འགྲོ་བ་འདི་དག་ཐེ་ཚོམ་མ་མཆིས་འགྱུར། །རྒྱལ་བའི་གསུང་སྒྲ་ཡང་དག་ཐོས་ནས་དེ་དག་ཡིད་དགའ་འགྱུར། །དེ་ནས་བཅོམ་ལྡན་འདས་ཀྱིས། ཚེ་དང་ལྡན་པ་རྟ་ཐུལ་ལ་ཚིགས་
སུ་བཅད་དེ་སླར་བཀའ་སྩལ་པ། རྟ་ཐུལ་ལེགས་སོ་རྒྱལ་བའི་དགོངས་པ་འཛུམ་པ་འདི་ནི་ལེགས་པར་དྲིས། །ཀླུ་ཡི་བུ་མོས་མཆོད་ཚེ་འཇིག་རྟེན་ཕན་ཕྱིར་ངས་ནི་འཛུམ་པ་བསྟན། །དེ་ཡི་འབྲས་བུ་བསྟན་གྱིས་ཡིད་གཉིས་ཐ་བ་སྤངས་པའི་སེམས་ཀྱིས་ཉོན། །གང་གི་
དོན་དུ་ངས་ནི་འཛུམ་པ་འདིར་མཛད་ང་ཡི་ཚིག་ལ་ཉོན། །ཀླུ་ཡི་བུ་མོ་འདི་དག་ཆགས་མེད་ཡིད་ཀྱིས་བྱང་ཆུབ་ཡང་དག་ཞུགས། །འགྲོ་བ་ཐམས་ཅད་སྟོང་པར་རྣམ་བཤིག་བློ་ལྡན་དོགས་མེད་ལེགས་པར་གནས། །འདི་ན་བྱེད་མེད་ཚོར་མེད་གང་ཟག་མེད་ཅིང་སྐྱེ་བ་པོ་ཡང་མེད། །


</font><hr>42-1-38b<br><font size=+2>
ཆོས་རྣམས་འདི་དག་བརྫུན་ཞིང་སྨིག་རྒྱུ་མཚུངས་ལ་མེ་ལོང་གཟུགས་བརྙན་འདྲ། །འདི་དག་རྣམས་ཀྱིས་མཆོད་བྱས་བྱས་གཟོ་བློ་གྲོས་ཡང་དག་ངས་ཤེས་ཏེ། །རྒྱལ་བའི་ཆོས་ཉིད་དང་ནི་འགྲོ་བ་སྟོང་ཞིང་བདག་པོ་མེད་མཐོང་ལེགས། །མཆོད་པ་རྣམ་པར་ཕྱེ་ཞིང་ལེགས་པར་བཀོད་
པ་འདི་དག་སྒྱུ་མ་འདྲ། །བྱང་ཆུབ་གཞལ་ཡས་གང་དུ་སྨོན་ལམ་བཏབ་པ་དེ་ཡང་འདི་འདྲར་སྟོང ། །ང་ལ་གཞལ་ཡས་མཆོད་པ་དེ་བྱས་པ་དང་འགྲོ་བ་སྟོང་ཤེས་པས། །ཀླུ་ལས་ཤི་འཕོས་ནས་ནི་ལྷ་གནས་བརྒྱ་བྱིན་གནས་སུ་འགྲོ་བར་འགྱུར། །སུམ་ཅུ་རྩ་གསུམ་སོང་སྟེ་ལྷ་
ཡི་ནང་དུ་དགའ་བར་ཚེ་རྫོགས་ནས། །མ་སྨད་གྲགས་དང་ལྡན་པའི་ལྷ་གནས་འཐབ་བྲལ་གནས་སུ་འགྲོ་བར་འགྱུར། །འཐབ་བྲལ་ལྷ་ནང་གནས་ཏེ་ལྷ་ཡི་གནས་སུ་ལྷ་ཡི་དགའ་བ་སྤྱོད། །ལྷར་གྱུར་བདེ་གཤེགས་སྲས་རྣམས་དེ་ནི་ཚེ་ཡི་ཚད་དུ་གནས་པར་འགྱུར། །རྒྱལ་བའི་སྲས་རྣམས་འཐབ་བྲལ་དགའ་བ་སྤྱད་ནས་ཚེ་ཚད་ཟད་པ་དང ། །དགའ་ལྡན་གནས་སུ་ལྷ་ཡི་གྲོང་ཁྱེར་ལྷ་དང་བརྟུལ་ཞུགས་འདྲ་བར་འགྱུར། །དེ་དག་དེ་ན་ལྷ་ཡི་བུ་མོས་བསྐོར་ནས་ལྷ་ཡི་དགའ་བ་སྤྱོད། །པད་མ་ཆུས་མི་ཆགས་པ་བཞིན་དུ་བདེ་གཤེགས་མི་གནས་བློ་ཅན་གནས། །
འགྲོ་བ་ཐམས་ཅད་སྟོང་པར་རྟོགས་རིག་བློ་ལས་ཉམས་པར་ཡོང་མི་འགྱུར། །སྐྱོབ་པ་རྣམས་ཀྱི་དྲན་པ་རྡོ་ལ་བརྐོས་པ་བཞིན་དུ་ཡོང་མི་ཉམས། །དེ་དག་དགའ་ལྡན་གནས་དེར་གནས་ཏེ་ལྷ་ཡི་དགའ་བ་སྤྱོད་ནས་ནི། །ཚེ་ཚད་ཡོངས་སུ་ཟད་ནས་དེ་ཚེ་རབ་འཕྲུལ་དག་ཏུ་འགྲོ་བར་
འགྱུར། །བདེ་གཤེགས་མ་སྨད་གྲགས་ལྡན་དེར་ཡང་ལྷ་མོའི་ཚོགས་ཀྱིས་མཆོད་འགྱུར་ཏེ། །མི་གནས་བློ་གྲོས་ལྡན་པ་ཚེ་ཚད་བར་ཏུ་གནས་ན་གནས་པར་འགྱུར། །དེ་དག་གནས་དེར་རབ་འཕྲུལ་གྱུར་ཏེ་ལྷ་ཡི་དགའ་བ་སྤྱད་ནས་ནི། །མཁས་པ་ཚེ་ཟད་བློ་གྲོས་ལྡན་པ་ཆོས་
ཀྱི་མཐར་ནི་ཕྱིན་གྱུར་ནས། །འདྲེན་པ་བསམ་པ་དག་པ་ཆགས་མེད་ཡིད་ལྡན་ཆོས་ཀྱི་བསམ་པ་ཅན། །ཆོས་དང་ལྡན་རྣམས་གཞན་འཕྲུལ་གནས་སུ་ལྷ་འདུ་བར་ནི་འགྲོ་བར་འགྱུར། །དེ་དག་ལྷ་གནས་དེ་ན་གནས་ཤིང་ལྷ་ཡི་དགའ་བ་སྤྱོད་པར་འགྱུར། །བདེ་གཤེགས</font><hr>42-1-39a<br><font size=+2>
མ་རྨོངས་བློ་ལྡན་དེ་དག་རང་གི་ཚེ་ཚད་གནས་པར་འགྱུར། །མྱ་ངན་འདས་ལྟར་ལྷ་ཡི་འདོད་པའི་ཡོན་ཏན་མཉམ་ཉིད་ཞི་བར་རྟོགས། །བསམ་གཏན་བསམ་པས་ཚངས་གནས་མ་སྨད་གྲགས་དང་ལྡན་པར་འགྲོ་བར་འགྱུར། །ཚངས་པའི་གནས་སུ་བསམ་གཏན་མཁས་ཤིང་བསམ་གཏན་
འབྲས་བུ་སྤྱད་གྱུར་ནས། །དེར་གནས་དཔེ་མེད་གྱུར་ཅིང་བྱང་ཆུབ་ཡིད་ཀྱིས་བསྐལ་པར་གནས་པར་འགྱུར། །དེ་དག་བསྐལ་པར་ཚངས་གནས་འཐུན་པར་ཡེ་ཤེས་དོན་གཉེར་བརྟུལ་ཞུགས་བཟང ། །ཐུབ་པ་མཁས་པ་ཐབས་མཁས་དེ་དག་འཇིག་རྟེན་དོན་ནི་མཐའ་ཡས་བྱེད། །མཁས་ཐུབ་དེ་དག་དེ་ན་བསམ་
གཏན་སྤྱོད་ཡུལ་བསམ་གཏན་ཆགས་པ་མེད། །བསམ་གཏན་བདེ་བ་མཉམ་ཉིད་འདྲར་རིག་བྱང་ཆུབ་ཕྱིར་ནི་དབང་པོ་ཞི། །ཀུན་ཏུ་གྲོལ་ཡིད་དྲང་སྲོང་བྱང་ཆུབ་ཕྱིར་ནི་བྱང་ཆུབ་བློ་དང་ལྡན། །མྱ་ངན་འདས་པ་ལྟ་བུར་བསམ་གཏན་བློ་གཅིག་ཞི་བའི་མཚན་ཉིད་འགྱུར། །བདེ་བར་གཤེགས་དང་བཅོམ་ལྡན་སྲས་པོ་
བྱང་ཆུབ་ཞི་བ་ཡོངས་ཚོལ་བ། །ཚངས་པའི་ཡིད་ལྡན་འཇིག་རྟེན་དོན་བྱེད་དེ་དག་ཚངས་གནས་དེ་ན་གནས། །ཀུན་ཀྱང་ཚངས་པའི་བློ་ལྡན་མཐར་ཕྱིན་ཤ་སྟག་བྱང་ཆུབ་དོན་གྱི་ཕྱིར། །རང་འབྱུང་དགོངས་པ་ཁམས་གསུམ་ལམ་ལས་འདས་པའི་ངེས་པར་འབྱུང་བ་སྟོན། །ཚངས་པ་ལ་ནི་གུས་པ་བསྐྱེད་ནས་འགྲོ་
བ་བྱང་ཆུབ་ཚོལ་བར་འགྱུར། །ཚངས་པའི་བསམ་པ་རང་བྱུང་བསམ་པ་ངེས་འབྱུང་མཐར་ཐུག་ཤེས་ནས་ནི། །བདེ་བར་གཤེགས་ཀྱི་བསྟན་པ་མཆོག་ལ་བརྩོན་པ་དེ་དག་འགྲོ་བ་ལ། །ཅི་ནས་ཆོས་ཚུལ་འབྲས་བུ་མྱུར་དུ་ཤེས་འགྱུར་དེ་ལྟར་ཆོས་ཀྱང་སྟོན། །དེ་དག་ཚངས་གནས་དེ་ན་གནས་ཤིང་འཇིག་རྟེན་
དག་ལ་བྱང་ཆུབ་ཕྱིར། །ཕན་པ་བྱས་ནས་སྲོག་ཆགས་བྱེ་བ་ཁྲག་ཁྲིག་མང་པོ་བྱང་ཆུབ་བཀོད། །རྒྱལ་བ་ཀུན་ལ་མཆོད་ཕྱིར་འཇིག་རྟེན་ཁམས་མང་ཁྲག་ཁྲིག་འགྲོ་བར་འགྱུར། །དབང་པོ་ཞི་བ་དེ་དག་བསྐལ་པ་སྐར་མ་འདྲ་ལ་རྒྱལ་བར་འགྱུར། །ལྷ་དང་མི་དང་ཀླུ་དང་འདབ་བཟངས་དག་དང་ལྷ་མིན་བཅས་པ་
དང ། །དྲི་ཟ་གྲུལ་བུམ་མིའམ་ཅི་ཚོགས་གནོད་སྦྱིན་འགྲོར་བཅས་དགའ་ཞིང་མགུ། །བཅོམ་ལྡན་འདས་ཀྱིས་བྱང་ཆུབ་ཏུ་ནི་ཡོངས་སྦྱངས་ཆོས་ཀྱིས་སྟོབས་རྙེད་པ། །དེ་དག་ཐམས་ཅད་ཡི་རངས་ཐལ་སྦྱར་བདེ་བར་གཤེགས་ལ་མགོས་ཕྱག་འཚལ། །ཀླུའི་བུ་མོ་ལུང་བསྟན་པའི་ལེའུ་སྟེ་བདུན་པའོ།། །།


</font><hr>42-1-39b<br><font size=+2>
དེ་ནས་ཀླུའི་བུ་མོ་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས། ཡོངས་སུ་རྫོགས་པར་ཡང་རིག་ནས་ཀླུའི་རྒྱལ་པོ་དགའ་བོ་དང ། ཉེ་དགའ་ལ་སོགས་པ་ཀླུ་བྱེ་བ་ཕྲག་དགུ་བཅུ་ངོ་མཚར་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པ་དེ་སེམས་ཅན་ཐམས་ཅད་ཀྱི་བསམ་པ་མཁྱེན་ཅིང་བཅོམ་
ལྡན་འདས་དེ་ལ་མི་མཁྱེན་པ་འམ། མ་གཟིགས་པའམ། མ་གསན་པའམ། མངོན་དུ་མ་མཛད་པ་གང་ཡང་མེད་ཅིང་བཅོམ་ལྡན་འདས་ཀྱི་ཆོས་ནི་ལེགས་པར་གསུངས་པ། ཡང་དག་པར་མཐོང་བ། རིམས་ནད་མེད་པ། དུས་ཆད་པ་མེད་པ། ཉེ་བར་གཏོད་པ། འདི་མཐོང་བ་ལ་དོན་ཡོད་པ། མཁས་པ་རྣམས་
ཀྱིས་རང་གིས་རིག་པར་བྱ་བ་ནི་ངོ་མཚར་རྨད་དུ་བྱུང་བ་སྟེ། དེ་བཞིན་གཤེགས་པ་དེ་ནི་རྫུ་འཕྲུལ་ཆེ་ཞིང་མཐུ་ཆེ་བ་མངའ་བའོ། །འདི་ལྟར་བུད་མེད་དུ་གྱུར་པ། རྒོད་པ། མི་བརྟེན་པ། མི་གནས་པ་རྣམས་ཀྱིས་ཀྱང་བཅོམ་ལྡན་འདས་ཀྱིས་ཆོས་བསྟན་པ་ཡོངས་སུ་ཤེས་པ་དང ། དེ་ལྟར་བཅོམ་ལྡན་འདས་ཀྱི་
སློབ་མ་དགེ་འདུན་ཡང་ལེགས་པར་ཞུགས་པ། དྲང་པོར་ཞུགས་པ། རིགས་པར་ཞུགས་པ། འཐུན་པར་ཞུགས་པ། འདི་ལྟར་བུད་མེད་དུ་གྱུར་པ་འདོད་ཆགས་དང ། ཞེ་སྡང་དང ། གཏི་མུག་མི་བཟད་པ་དང་ལྡན་པ་རྣམས་ཀྱང ། བཅོམ་ལྡན་འདས་ཀྱི་གསུང་རབ་ལ་འཇུག་པ་ནི་ངོ་མཚར་ཆེའོ་སྙམ་སྟེ། ངོ་མཚར་ཐོབ་པ་དེ་དག་གིས་
བཅོམ་ལྡན་འདས་ལ་མཆོད་པའི་ཕྱིར་འཛམ་བུའི་གླིང་རྒྱ་མཚོའི་རིའི་མཐས་གཏུགས་པ་ཐམས་ཅད་སྤོས་ཀྱི་སྤྲིན་ཆེན་པོས་ཀུན་ནས་ཡོག་པར་བྱས་ཏེ། ཐམས་ཅད་དང་ལྡན་པའི་འཇིག་རྟེན་འདི་སྤོས་ཀྱི་ངད་ཀྱིས་ཁྱབ་པར་བྱས་སོ། །སྤོས་ཀྱི་དྲིའི་ངད་དེས་ཀྱང་སངས་རྒྱས་ཀྱི་ཞིང་ཐམས་ཅད་རྒྱས་པར་གང་བར་གྱུར་ནས།
་སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །བཅོམ་ལྡན་འདས་ལ་མཆོད་པ་བྱ་བའི་ཕྱིར་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་ཀྱང་དཔག་ཚད་དྲུག་ཅུ་ཚུན་ཆད་མུ་ཏིག་དམར་པོས་པུས་མོ་ནུབ་
ཙམ་དུ་རྒྱས་པར་གང་བར་བྱས་སོ། །ནྱ་གྲོ་དྷའི་ཀུན་དགའ་ར་བ་དེ་ཡང་རིན་ཐང་མེད་པའི་ནོར་བུ་རིན་པོ་ཆེས་ཆལ་པར་བཀང་ངོ ། །ཀླུའི་མེ་ཏོག་གི་འདུན་ཁང་རྒྱར་དཔག་ཚད་དྲུག་ཅུ་ཡོད་པ། རིན་པོ་ཆེ་སྣ་བདུན་གྱི་ཀ་བ་དང་ལྡན་པ་དག་མངོན་པར་སྤྲུལ་ཏོ། །ཀླུའི་རོལ་མོ་སིལ་སྙན་དཔག་ཏུ་མེད་པ་དག་ཀྱང</font><hr>42-1-40a<br><font size=+2>
མངོན་པར་སྤྲུལ་ཏེ་སྒྲ་ཕྱུང་ངོ ། །ཀླུའི་མེ་ཏོག་གི་འདུན་ཁང་དེ་ལ་ཡང་མེ་ཏོག་རྣམ་པ་སྣ་ཚོགས་ཀྱི་ལྡ་ལྡི་ཕྱེ་བ་ཕྲག་དགུ་བཅུ་བྲེས་སོ། །རིན་པོ་ཆེ་སྣ་བདུན་གྱི་ཀ་བ་དེ་དག་ཀྱང་བཻ་དཱུརྱའི་དྲ་བས་ལེགས་པར་བརྒྱན་ཏོ། །འདུན་ཁང་དེའི་གཞི་ཡང་རིན་ཐང་མེད་པའི་ནོར་བུ་རིན་པོ་ཆེས་ཡོག་པར་བྱས་པར་གྱུར་
ཏོ། །འདུན་ཁང་དེའི་གཞི་ནི་འཇམ་པ་བསྒྱུར་དུ་རུང་བ་སྟེ། འདི་ལྟ་སྟེ། དཔེར་ན་སུམ་ཅུ་རྩ་གསུམ་པའི་ལྷ་རྣམས་ཀྱི་རྡོ་ལེབ་ཨར་མོ་ནིག་ལྟར་འཇམ་པ་ཁ་དོག་བཻ་དཱུརྱ་ལྟར་འདུག་པ། ཀ་ཙ་ལིན་དི་ཀ་ལྟར་རེག་ན་བདེ་བ། ཉམས་དགའ་བ། སེམས་ཅན་མཐོང་བ་རྣམས་ཀྱི་མིག་མྱ་ངན་ལས་འདའ་བར་འགྱུར་བ། མི་
དང་ལྷ་རྣམས་ཀྱི་ཡིད་དུ་འོང་བ་ལྟ་བུའོ། །ནོར་བུ་རིན་པོ་ཆེ་སྣ་ཚོགས་དེ་དག་གི་ནང་ནས་ནོར་བུ་ལ་ལ་ལས་ནི་མེ་འབྱུང ། ལ་ལ་ལས་ནི་ཆུ་འབྱུང་བ་ཤ་སྟག་སྟེ། དེ་ལའང་ལ་ལ་ལས་ནི་ཆུ་ཁ་དོག་སྔོན་པོ་འབྱུང ། ལ་ལ་ལས་ནི་ཆུ་ཁ་དོག་སེར་པོ་འབྱུང ། ལ་ལ་ལས་ནི་ཆུ་ཁ་དོག་དམར་པོ་འབྱུང ། ལ་ལ་ལས་ནི་ཆུ་ཁ་དོག་དཀར་
པོ་འབྱུང ། ལ་ལ་ལས་ནི་ཆུ་ཁ་དོག་སྣ་ཚོགས་འབྱུང་ངོ ། ནོར་བུ་ལ་ལ་ལས་ནི་བདེ་བར་བསིལ་བའི་རླུང་འབྱུང ། ནོར་བུ་ལ་ལ་ལས་ནི་དེ་མ་ཡིན་པའི་ཡོ་བྱད་གཞན་དག་བསམ་པ་བཞིན་དུ་འབྱུང ། ལ་ལ་ནི་སྣུམ་གྱི་བྱ་བ་བྱེད། ལ་ལ་ནི་མེ་ལོང་གི་བྱ་བ་བྱེད་དེ་འཁོར་དེ་དག་ཐམས་ཅད་ཀྱང་ནོར་བུ་རིན་པོ་ཆེ་དེའི་
ནང་དུ་སྣང་བར་གྱུར་ཏོ། །སེར་སྐྱའི་གནས་ན་སེམས་ཅན་གང་ཇི་སྙེད་ཅིག་རྒྱུ་བ་དེ་དག་ཐམས་ཅད་ཀྱང་ནོར་བུ་རིན་པོ་ཆེ་དེ་དག་གི་ནང་དུ་སྣང་བར་གྱུར་ཏེ། ཐམས་ཅད་དང་ལྡན་པའི་འཁོར་གྱིས་བཅོམ་ལྡན་འདས་རྣམ་པར་སྤྲུལ་པའི་ཆོ་འཕྲུལ་དེ་དག་རྣམ་པར་སྤྲུལ་པ་མཛད་པ། ཉན་ཐོས་ཀྱི་དགེ་འདུན་དང་བཅས་པ་
ཡང་ནོར་བུ་རིན་པོ་ཆེ་དེ་དག་གི་ནང་ན་བཞུགས་པར་མཐོང་བར་གྱུར་ཏོ། །འདུན་ཁང་གི་གཞི་དེའི་འོག་ནས་ཀྱང་ཀླུའི་མཐུས་གདུགས་རྣམ་པ་སྣ་ཚོགས་མངོན་པར་འཐོན་པར་གྱུར་ཏོ། །རྒྱལ་མཚན་རྣམ་པ་སྣ་ཚོགས་དང ། བ་དན་རྣམ་པ་སྣ་ཚོགས་དང ། མེ་ཏོག་གི་ལྡ་ལྡི་རྣམ་པ་སྣ་ཚོགས་དང ། སྤོས་ཀྱི་ལྡ་ལྡི་རྣམ་པ་སྣ་
ཚོགས་དང ། རིན་པོ་ཆེའི་ལྡ་ལྡི་རྣམ་པ་སྣ་ཚོགས་དང ། མུ་ཏིག་གི་ཕྲེང་བ་རྣམ་པ་སྣ་ཚོགས་དང ། མེ་ཏོག་བརྩེགས་མའི་ལྡ་ལྡི་རྣམ་པ་སྣ་ཚོགས་དང ། རྟ་རྣམ་པ་སྣ་ཚོགས་དང ། དྲིལ་བུ་གཡེར་ཀའི་དྲ་བ་རྣམ་པ་སྣ་ཚོགས་ཀྱང་འཐོན་པར་གྱུར་ཏོ། །དེ་ནས་ཀླུའི་རྒྱལ་པོ་དགའ་བོ་དང ། ཉེ་དགའ་ལ་སོགས་པ་ཀླུ</font><hr>42-1-40b<br><font size=+2>
བྱེ་བ་ཕྲག་དགུ་བཅུས་རྟ་དེ་རྣམས་སྔོན་དུ་དཀྲི་སྟེ་རྐང་གིས་དོང་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ནོར་བུ་རིན་པོ་ཆེ་ཀ་ཙ་ལིན་དི་ཀ་ལྟར་རེག་ན་བདེ་བ་དག་གིས་བཅོམ་ལྡན་འདས་ལ་གཏོར་མངོན་པར་གཏོར། མངོན་པར་རབ་ཏུ་གཏོར་ཏོ། །འདུན་ཁང་གི་གཞི་དེ་ནས་རིན་པོ་ཆེ་གང་དག་མངོན་པར་
འཐོན་པ་དེ་དག་ཐམས་ཅད་ཀྱང ། བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པའི་སྟེང་དུ་ཆར་བཞིན་དུ་བབ་པར་གྱུར་ཏོ། །ཀླུའི་རོལ་མོ་སིལ་སྙན་དཔག་ཏུ་མེད་པ་དེ་དག་ཀྱང་སྟེང་གི་བར་སྣང་ལས་སྒྲ་འབྱིན་པར་གྱུར་ཏོ། །དེ་ནས་ཀླུ་བྱེ་བ་ཕྲག་དགུ་བཅུ་བོ་དེ་དག་གིས་བཅོམ་ལྡན་འདས་ལ་ལན་གསུམ་
བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ། ཅང་མི་ཟེར་བར་བཅོམ་ལྡན་འདས་རྣམ་པས་རྗེས་སུ་དྲན་པར་བྱེད་ཅིང་མིག་མི་འཛུམས་པར་ལྟ་ལ། འདི་ལྟར་སངས་རྒྱས་ཀྱི་ཡོན་ཏན་འདོད་པའི་ཕྱིར་ལྷག་པའི་བསམ་པས་བྱང་ཆུབ་ཏུ་ཡང་དག་པར་ཞུགས་པར་
གྱུར་ཏོ། །དེ་ནས་དེ་དག་གིས་ཅུང་ཟད་ཅིག་ཏུ་མི་སྨྲ་བར་བཅོམ་ལྡན་འདས་ཀྱི་ཡོན་ཏན་རྗེས་སུ་དྲན་པར་བྱས་ནས་སོ་སོ་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཡན་
ལག་ལྔས་ཕྱག་འཚལ་ནས་ཚིགས་སུ་བཅད་པ་དག་གིས་མངོན་པར་བསྟོད་པ། །མཚན་བརྒྱ་རྫོགས་པ་བརྟུལ་ཞུགས་ལེགས་སྤྱད་པ། །དཀའ་ཐུབ་དགྱེས་པ་དྲི་མེད་ཐུགས་རྗེ་ཅན། །རིན་ཆེན་འབྱུང་གནས་བཅས་པའི་ས་སྤངས་ཏེ། བདེ་གཤེགས་ཁྱོད་ནི་གྲོང་ཁྱེར་མངོན་པར་བྱུང ། །ལོ་དྲུག་བར་དུ་
དཀའ་ཐུབ་དཀའ་མཛད་དེ། །རྒྱལ་བ་ཁྱོད་ཀྱིས་བདུད་རྩི་མ་བརྙེས་ཀྱང ། །བདེ་གཤེགས་ཁྱོད་ཀྱི་ཐུགས་ནི་ཞུམ་མ་གྱུར། །ཐུབ་པ་ཁྱོད་ཀྱིས་བྱང་ཆུབ་ཐུགས་ཀྱིས་སྤྱད། །ཇི་ལྟར་འདྲེན་པ་ལྷ་མིའི་བླ་མ་ཁྱོད། །འགྲོ་ལ་ཕན་བཞེད་དཀའ་ཐུབ་སྤྱད་མཛད་དེ། །འཇིག་རྟེན་མགོན་པོ་སྡུག་བསྔལ་བཏང་གྱུར་པ། །
དེ་ཐོས་པས་ཀྱང་བདག་ཅག་ཡིད་མི་དགའ། །ཐུབ་པ་དབུ་དང་སྤྱན་ནི་བཏང་བ་དང ། །བྱང་ཆུབ་སེམས་ནི་ཇི་ལྟར་སྒྲུབ་མཛད་པ། །བདེ་བར་གཤེགས་ཀྱི་དཀའ་སྤྱད་ཐོས་གྱུར་ན། །དེ་ཐོས་པས་ཀྱང་བདག་ཅག་བདེ་མི་འགྱུར། །གང་ཚེ་ཀ་ལིང་རྒྱལ་པོས་བཟོད་སྨྲ་བའི། །ཞབས་དང་ཕྱག་དང་སྙན་རྣམས་གཏུབས</font><hr>42-1-41a<br><font size=+2>
གྱུར་ཏེ། །དེ་བཞིན་ཤངས་བཅད་རྒྱལ་བ་མི་འཁྲུགས་པ། །དེ་ཐོས་པས་ཀྱང་བདག་ཅག་ཡིད་མི་དགའ། །ཕུག་རོན་སྐྱབས་སུ་མཆིས་པ་མ་བཏང་སྟེ། །གང་ཚེ་འདྲེན་ཁྱོད་སྲང་ལ་གཅལ་གྱུར་པ། །རྒྱལ་བའི་དེ་ཐོས་པས་ཀྱང་མི་བདེ་སྟེ། །བདེ་གཤེགས་བྱང་ཆུབ་སྤྱོད་པ་སྡུག་བསྔལ་ཆེ། །བདག་ཅག་མི་འཚལ་
མ་ལགས་ཅི་ཞེ་ན། །བདེ་བར་གཤེགས་ལ་འགྲོ་བ་གནོད་བགྱིད་པ། །ངན་སོང་མུན་པར་ལྷུང་བས་བདེ་གཤེགས་ཀྱི། །སྡུག་བསྔལ་སྤྱོད་པ་དྲན་ནས་མི་དགའ་ལགས། །ཇི་ལྟར་འཇིག་རྟེན་འདྲེན་པ་བློ་འཕགས་དང ། །བདེ་གཤེགས་སྤྱོད་པ་མི་འཚེ་བློར་གྱུར་དང ། །སྒྲུབ་པའི་ཚེ་ན་དེ་ལ་མི་གནོད་པ། །འཇིག་རྟེན་འདྲེན་པ་སྤྱོད་
བདེ་བཀའ་སྩལ་གསོལ། །མཐའ་ཡས་བློ་མངའ་བདེ་གཤེགས་སྤྱོད་པ་ལ། །ཐུབ་པ་ཀླུ་ཚོགས་འདི་དག་རབ་ཏུ་བརྩོན། །ཇི་ལྟར་ཁྱོད་ཀྱི་བཀའ་བཞིན་སྤྱོད་འགྱུར་བ། །དེ་ལྟར་བདེ་གཤེགས་བྱང་ཆུབ་ལམ་བསྟན་གསོལ། །རྒ་ཤི་མ་མཆིས་གོ་འཕང་འཐོབའཚལ་ཞིང ། །ཀླུ་ཚོགས་འདི་རྣམས་ཐུབ་པ་སྐོམ་པར་གནས། །
འགྲོ་བ་འདི་དག་བདེ་བར་འདུལ་འགྱུར་བའི། །བརྟུལ་ཞུགས་སྤྱོད་བདེ་བདེ་གཤེགས་བཀའ་སྩལ་གསོལ། །དེ་ནས་བཅོམ་ལྡན་འདས་ཀྱིས་ཀླུའི་མཆོད་པ་དེ་དག་ཀྱང་གཟིགས། ལྷག་པའི་བསམ་པས་སྨོན་ལམ་བཏབ་པ་དེ་དག་ཀྱང་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །འདི་ནི་ཆོས་ཉིད་དེ་སངས་
རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པ་དེའི་ཚེ་ཁ་དོག་སྣ་ཚོགས་དང ། ཁ་དོག་དུ་མའི་འོད་ཟེར་བཅོམ་ལྡན་འདས་ཀྱི་ཞལ་གྱི་སྒོ་ནས་བྱུང་སྟེ་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ནས་ཕྱིར་ལོག་སྟེ། བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་གྱིས་དེའི་
ཚེ་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བརྟུལ་ཞུགས་བཟང་པོ་དགེ་སྦྱོང་ཐུབ་པའི་རྣམས། །རྒྱུ་མེད་རྒྱལ་བ་འཛུམ་པ་མི་མཛད་ན། །འདྲེན་པ་བདེ་གཤེགས་ཐུགས་རྗེ་ཆེ་མངའ་བ། །མཚུངས་མེད་བཅོམ་ལྡན་འཛུམ་རྒྱུ་བཀའ་སྩལ་གསོལ། །ཚོགས་ཀྱི་སློབ་དཔོན་སྐྱེ་བོ་འདི་དག་ནི། །འཛུམ་རྒྱུ་ཉན་
འཚལ་ཁྱོད་ཀྱི་ཞལ་དུ་ལྟ། །ཡིད་ནི་ཞུམ་གྱུར་ཐེ་ཚོམ་འཚལ་ཞིང་མཆིས། །མཁས་པ་ཐེ་ཚོམ་རྣམ་པར་བསལ་དུ་གསོལ། །འཇིག་རྟེན་མཁས་པ་སྟོན་པ་ཤཱཀྱ་ཐུབ། །དེ་རིང་སུ་ཞིག་ཡིད་ནི་ཡོངས་སུ་དགའ། །གང་གིས་བདུད་ཀྱི་དབང་པོ་མཐོང་གྱུར་ཏེ། །རྨོངས་པར་བགྱིས་ནས་ཡིད་མི་དགའ་བར་བགྱིས། །ཚོགས་ཀྱི</font><hr>42-1-41b<br><font size=+2>
སློབ་དཔོན་འདྲེན་པ་སུ་ཞིག་གིས། །བདེ་གཤེགས་ཆོས་ཉིད་ཡབ་ལ་བསྙེན་བཀུར་བགྱིས། །བདེ་བར་གཤེགས་ལ་མཆོད་པ་དམ་པ་བགྱིས། །ཤཱཀྱ་སེང་གེ་བཀའ་སྩོལ་ཐེ་ཚོམ་ཁུམ། །སོར་བཅུ་ཐལ་མོ་སྦྱར་བ་མགོར་བཞག་ཅིང ། །འགྲོ་བ་འདི་དག་ཐུབ་པའི་ཞལ་དུ་ལྟ། །ཚོགས་ཀྱི་སློབ་དཔོན་ཐེ་ཚོམ་བསལ་
དུ་གསོལ། །འདྲེན་པ་འཛུམ་པ་མཛད་པའི་རྒྱུ་ཡང་གསུངས། །དེ་ཐོས་སྐྱེ་བོ་འདི་དག་དགར་གྱུར་ཏེ། །རྒྱལ་བས་དགོངས་པའི་ཚུལ་ཡང་རྟོགས་པར་འགྱུར། །བདེ་བར་གཤེགས་པའི་འཁོར་རྣམས་ཚིམ་བགྱིས་ན། །གཞན་དུ་མི་སེམས་ནན་ཏན་གནས་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་
ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ཐུབ་མཁས་འདྲེན་པ་ཚོགས་ཀྱི་སློབ་དཔོན་གྱིས། །ཚངས་འདྲ་ཡན་ལག་བརྒྱད་ལྡན་གསུང་བརྗོད་ཀྱིས། །རྟ་ཐུལ་སྐྱོན་མེད་སེམས་ཀྱིས་དད་བྱོས་ལ། །འཛུམ་པ་མཛད་པའི་རྒྱུ་དེ་མཉན་པར་གྱིས། །ཀླུ་ཡི་བདག་པོ་འདི་དག་དད་གྱུར་ཏེ། །འགྲོ་བ་ཟིལ་གྱིས་མནན་ནས་
མཆོད་པ་བྱས། །སྐྱེ་བོ་བདེ་བར་ཡོངས་སྨིན་བྱ་བའི་ཕྱིར། །སངས་རྒྱས་བྱང་ཆུབ་འདི་ནི་ཡོངས་སུ་ཚོལ། །སྙིང་རྗེ་ཆེན་པོས་རྣམ་འདྲེན་མེད་པ་ཡི། །འགྲོ་བ་བལྟས་ནས་སྡུག་བསྔལ་ཅིས་མི་བསྟེན། །འགྲོ་བས་བྱང་ཆུབ་རྒྱ་ཆེན་ཐོབ་བྱ་ལ། །འདྲེན་པ་དག་ནི་སྐྱོ་བར་ཡོང་མི་འགྱུར། །ཞི་གནས་དགའ་བ་ཡེ་ཤེས་
སྟོབས་ལྡན་སྟོབས། །མཚན་མེད་སྟོང་པ་དེ་བཞིན་སྨོན་མེད་པ། །རྣམ་ཐར་སྒོ་གསུམ་ཡོངས་སུ་བསྒོམས་ནས་སུ། །ཤིན་ཏུ་ཡོངས་དག་ཡིད་ཅན་བདེ་བར་འགྲོ། །འགྲོ་བ་མཐའ་དག་མཉམ་པ་ཉིད་རྟོགས་ཏེ། །གང་ཚེ་རྒྱལ་བས་ཤེས་རབ་མཚན་ཐོས་ནས། །མཉམ་པའི་སེམས་དང་བྱམས་དང་
སྙིང་རྗེ་ཐོབ། །འགྲོ་ལ་སྙིང་རྗེ་ཆེན་པོ་རབ་བསྐྱེད་ནས། །སྙིང་བརྩེ་ལྡན་པ་མཆོག་ཏུ་སྙིང་རྗེ་ཅན། །འཇིག་རྟེན་མཁས་པ་བླ་ན་མེད་པར་འགྱུར། །རྒྱལ་བ་དེ་དག་འགྲོ་འདི་མཚུངས་བསྒྲལ་ནས། །དེ་དག་དགྲ་བཅོམ་རྣམ་པར་འདྲེན་པར་འགྱུར། །རྟག་ཏུ་བདག་མེད་ཚིག་ནི་ཉན་བྱེད་ཅིང ། །འཇིག་རྟེན་གཏམ་གྱི་རྒྱུད་ལ་མི་འཇུག་སྟེ། །དེ་
དག་བདེ་བར་གཤེགས་ཀྱི་འཆི་མེད་ཐོབ། །དེ་ན་བདུད་མེད་མུ་སྟེགས་ཚོགས་ཀྱང་མེད། །འདྲེན་པ་བདེ་གཤེགས་སྙིང་རྗེ་ལྡན་པ་ཡི། །རྒྱལ་བ་དེ་དག་འགྲོ་བ་ཀུན་མོས་བྱེད། །བདེ་གཤེགས་བཀའ་དང་ཚིག་རྣམས་ཐམས་ཅད་དང ། །བདེ་བར་གཤེགས་ཀྱི་དགོངས་ལ་མོས་བྱེད་འགྱུར། །སྲིད་པར་བདེ་གཤེགས་རྣམས་ཀྱི་སྤྱད</font><hr>42-1-42a<br><font size=+2>
སྤྱོད་ཅིང ། །རབ་བདེར་འགྲོ་བ་ཡོངས་སྨིན་བྱེད་པར་འགྱུར། །མཚུངས་མེད་ཐོབ་པ་བདེ་བར་མྱུར་དུ་ཡང ། །ཡོངས་སུ་འཚང་རྒྱ་འཆི་མེད་ཐོབ་པར་འགྱུར། །ཐོབ་ནས་འགྲོ་བ་དག་ཀྱང་མོས་པར་འགྱུར། །སྐྱེ་བོ་ཀུན་ཀྱང་གཟུགས་ཀྱི་མཆོག་དང་ལྡན། །འགྲོ་བ་ཐམས་ཅད་བདེ་གཤེགས་དེ་དག་གི་།དགོངས་པའི་ཚིག་ནི་མངོན་དུ་ཤེས་པར་འགྱུར། །
ཕྱུགས་དང་བྱ་དང་གནོད་སྦྱིན་མི་དེ་དག་།རང་བྱུང་དགོངས་མིན་ཅུང་ཟད་བྱེད་མི་འགྱུར། །དེ་དག་ཀུན་དུ་ཆོས་རྟོགས་དྲན་དང་ལྡན། །བདེ་བར་གཤེགས་རྣམས་འཆི་མེད་འཐོབ་པར་འགྱུར། །དེ་དག་ཚིག་ཐོས་སེམས་ཅན་གང་ཡང་ནི། །བསྟན་པ་དེ་ལ་མི་དགར་འགྱུར་བ་མེད། །བདེ་གཤེགས་དེ་དག་གསུང་ལ་དགའ་བ་ཡི། །འགྲོ་བ་འཆི་མེད་ཡང་དག་
ཐོབ་པར་འགྱུར། །དེ་ཚེ་འགྲོ་བས་རྒྱལ་བའི་དགོངས་ལེགས་རྟོགས། །རྒ་བ་དང་ནི་ན་དང་འཆི་བ་དང ། །མྱ་ངན་སྨྲེ་སྔགས་འདོན་ལས་ཡོངས་སུ་འགྲོལ། །ཚིག་དེ་ཐོས་ནས་ངར་འཛིན་མེད་པར་འགྱུར། །ཀླུ་ཡི་བསམ་པ་ཤཱཀྱ་སེང་གེ་ལ། །ཡོངས་སུ་ཞུས་ནས་ཇི་ལྟར་དེ་དག་རྣམས། །གཞལ་ཡས་བྱང་ཆུབ་ཐོབ་ནས་ཐུབ་རྣམས་ཀྱི། །ཡེ་ཤེས་འཇུག་
འགྱུར་དེ་སྐད་སྲས་ལ་བསྟན། །ཀླུ་རྣམས་ལུང་བསྟན་ཡིད་དུ་འོང་བ་ཡི། །རྒྱལ་བའི་གསུང་ཐོས་འཁོར་རྣམས་ཡིད་དགའ་སྟེ། །དེ་ལ་ཡིད་ནི་རབ་ཏུ་ཞི་གྱུར་ནས། །དགའ་བའི་ཡིད་ཀྱིས་རྒྱལ་བའི་སྐྱབས་སུ་སོང ། །ཀླུ་ལུང་བསྟན་པའི་ལེའུ་སྟེབརྒྱད་པའོ།། །།དེ་ནས་གྲུལ་བུམ་བྱེ་བ་ཕྲག་བཅཝ་བརྒྱད་ཀྱི་ལྷ་མ་ཡིན་རྣམས་དང ། ནམ་
མཁའ་ལྡིང་རྣམས་དང ། ཀླུའི་བུ་མོ་རྣམས་དང ། ཀླུ་རྣམས་ཀྱི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་ངོ་མཚར་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པ་ལ་ཤེས་རབ་ཀྱི་མངའ་ཆེན་པོ་མངའ་ཞིང ། འདི་ལྟར་བཅོམ་ལྡན་འདས་ལ་
མཆོད་པ་རྒྱ་ཆེན་པོ་འདི་ལྟ་བུ་བྱས་པས་ཀྱང་ངོ་མཚར་དུ་མི་དགོངས་ཏེ། འདི་ལྟ་སྟེ། དཔེར་ན་རྒྱ་མཚོ་ཆེན་པོ་ནི་རྒྱ་ཆེ་ཞིང་ཡོངས་སུ་རྒྱས་པ་ཡིན་པས་མཐོ་བའམ་དམའ་བར་མི་འགྱུར་རོ། །དེ་བཞིན་དུ་བཅོམ་ལྡན་འདས་ཀྱང་ཆོས་ཐམས་ཅད་ལ་ཐེ་ཚོམ་མི་མངའ་ཞིང་ཡོན་ཏན་ཐམས་ཅད་ཡོངས་སུ་རྫོགས་ལ། ཐམས་ཅད་མཁྱེན་པའི་ཡེ་
ཤེས་ཡངས་པ་མངའ་བས་མཆོད་པ་འདི་ལྟ་བུ་དག་བཞེས་ཀྱང་མཐོ་བའམ་དམའ་བར་མི་འགྱུར་ཞིང་ངོ་མཚར་དུ་མི་དགོངས་པ་ནི་ངོ་མཚར་ཤིན་དུ་ཆེའོ་སྙམ་མོ། །དེ་ནས་གྲུལ་བུམ་བྱེ་བ་ཕྲག་བཅཝ་བརྒྱད་པོ་དེ་དག་གིས་བདག་ཅག་ཉིད་ཀྱི་མཆོད་པས་བཅོམ་ལྡན་འདས་ལ་མཆོད་པའི་ཕྱིར་རིན་པོ་ཆེ་སྣ་བདུན་གྱི་བླ་རེ་བྱེ་བ་ཕྲག་བཅཝ་བརྒྱད་མངོན</font><hr>42-1-42b<br><font size=+2>
པར་སྤྲུལ་ཏེ། འདི་ལྟ་སྟེ། གསེར་གྱི་སྐུད་པའི་བླ་རེ་དང ། དངུལ་གྱི་སྐུད་པའི་བླ་རེ་དང ། བཻ་དཱུརྱའི་བླ་རེ་དང ། ཤེལ་གྱི་བླ་རེ་དང ། མུ་ཏིག་དམར་པོའི་བླ་རེ་དང ། སྤུག་གི་བླ་རེ་དང ། རྡོའི་སྙིང་པོའི་བླ་རེ་ཤ་སྟག་གོ་།རིན་པོ་ཆེའི་བླ་རེ་དེ་དག་ལ་ཡང་མེ་ཏོག་སྣ་ཚོགས་ཀྱི་ཕྲེང་བའི་ལྡ་ལྡི་མངོན་པར་སྤྲུལ་ཏེ། གསེར་གྱི་སྐུད་པའི་བླ་རེ་རྣམས་ལ་ནི་དངུལ་གྱི་མེ་
ཏོག་གི་ཕྲེང་བའི་ལྡ་ལྡི་བཀྱེ། །དངུལ་གྱི་སྐུད་པའི་བླ་རེ་རྣམས་ལ་ནི་གསེར་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ། བཻ་དཱུརྱའི་བླ་རེ་རྣམས་ལ་ནི་ཤེལ་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ། ཤེལ་གྱི་བླ་རེ་རྣམས་ལ་ནི་བཻ་དཱུརྱའི་མེ་ཏོག་གི་ཕྲེང་བའི་ལྡ་ལྡི་བཀྱེ། མུ་ཏིག་དམར་པོའི་བླ་རེ་རྣམས་ལ་ནི་སྤུག་གི་མེ་ཏོག་གི་ཕྲེང་བའི་ལྡ་ལྡི་བཀྱེ། སྤུག་གི་བླ་རེ་རྣམས་
ལ་ནི་མུ་ཏིག་དམར་པོའི་མེ་ཏོག་གི་ཕྲེང་བའི་ལྡ་ལྡི་བཀྱེ། རྡོའི་སྙིང་པོའི་བླ་རེ་རྣམས་ལ་ནི་ཤེལ་གྱི་མེ་ཏོག་གི་ཕྲེང་བའི་ལྡ་ལྡི་བཀྱེ་བ་ཤ་སྟག་མངོན་པར་སྤྲུལ་ཏོ། །ཤིང་རྟ་བཀྲ་བ། བལྟ་ན་སྡུག་པ་བྱེ་བ་ཕྲག་བཅཝ་བརྒྱད་ཀྱང་མངོན་པར་སྤྲུལ་ཏེ། དེ་དག་ཀྱང་གསེར་ནས་རྡོའི་སྙིང་པོའི་བར་དུའོ། །ཤིང་རྟ་དེ་དག་གི་སྟེང་དུ་རིན་པོ་ཆེ་སྣ་བདུན་གྱི་གདུགས་
ཐུར་མ་བརྒྱ་པ་གསེར་གྱི་ཡུ་བ་ཅན་དང ། བཻ་དཱུརྱའི་ཡུ་བ་ཅན་དང ། ཤེལ་གྱི་ཡུ་བ་ཅན་བྱེ་བ་ཕྲག་བཅཝ་བརྒྱད་མངོན་པར་སྤྲུལ་ཏོ། །གདུགས་དེ་དག་ལ་ཡང་རིན་པོ་ཆེ་རྣམ་པ་སྣ་ཚོགས་ཀྱི་མེ་ཏོག་གི་ལྡ་ལྡི་མངོན་པར་སྤྲུལ་ཏེ། འདི་ལྟ་སྟེ། གསེར་གྱི་མེ་ཏོག་གི་ལྡ་ལྡི་དང ། དངུལ་གྱི་མེ་ཏོག་གི་ལྡ་ལྡི་དང ། བཻ་དཱུརྱའི་མེ་ཏོག་གི་ལྡ་ལྡི་དང ། ཤེལ་
གྱི་མེ་ཏོག་གི་ལྡ་ལྡི་དང ། མུ་ཏིག་དམར་པོའི་མེ་ཏོག་གི་ལྡ་ལྡི་དང ། ཀླུའི་ནོར་བུའི་མེ་ཏོག་གི་ལྡ་ལྡི་ཤ་སྟག་གོ་།མུ་ཏིག་དམར་པོའི་དྲ་བ་དག་ཀྱང་མངོན་པར་སྤྲུལ་ཏེ། དེ་དག་གིས་གདུགས་དེ་དག་དང ། མེ་ཏོག་གི་ཕྲེང་བ་དེ་དག་གི་གཟུངས་བྱས་སོ། །གྲུལ་བུམ་གྱི་རོལ་མོའི་སིལ་སྙན་དག་ཀྱང་མངོན་པར་སྤྲུལ་ཏོ། །ཤིང་རྟ་དེ་དག་རེ་
རེ་ཞིང་ཡང་བླ་རེ་དེ་དག་རེ་རེ་རྗེས་སུ་འབྲང་བར་གྱུར་ཏོ། །དེ་ནས་གྲུལ་བུམ་དེ་དག་རིན་པོ་ཆེ་སྣ་བདུན་གྱི་ཤིང་རྟ་དེ་དག་ལ་ཞོན་ཏེ། རིན་པོ་ཆེ་སྣ་བདུན་གྱི་གདུགས་དང ། བླ་རེ་དང ། མེ་ཏོག་དེ་དག་གིས་བཅོམ་ལྡན་འདས་ལ་མངོན་པར་གཏོར་ཏེ་མཆོད་པ་བྱེད་ཅིང ། བཅོམ་ལྡན་འདས་ལ་སྟེང་གི་བར་སྣང་ལས་ལན་གསུམ་བསྐོར་ཏོ། །
བསྐོར་ནས་ཤིང་རྟ་དེ་དག་ལས་བབས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། ཕྱོགས་གཅིག་ཏུ་འཁོད་དེ། བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། ཐམས་ཅད་དུ་ཡང་མི་བསྙེངས་མངའ་དབང་ཅན། །ཐུབ་པ་ཆེན་པོ་མི་མཐོ་མི་དམའ་སྟེ། །རི་ཡི་རྒྱལ་པོ་ལྷུན་པོའི</font><hr>42-1-43a<br><font size=+2>
རི་འདྲ་བ། །མཆོད་པ་རྒྱ་ཆེན་འདི་དག་བཞེས་སུ་གསོལ། །འགྲོ་བ་ཐམས་ཅད་མིང་དང་མཚན་མ་དང ། །ཐ་སྙད་ཙམ་མཁྱེན་ཐུབ་པ་ཆགས་མི་མངའ། །འདྲེན་པ་ཁྱོད་ཀྱི་ཏིང་འཛིན་ཞི་བསྒྲུབས་པས། །ཤེས་རབ་ལྡན་ལ་དྲེགས་པ་ཡོང་མི་མངའ། །རྒྱལ་བ་ཁྱོད་ཀྱིས་འགྲོ་བ་སྒྱུ་འདྲར་མཁྱེན། །རང་བཞིན་
སྟོང་སྟེ་རྨི་ལམ་དགའ་འདྲ་དང ། །ཆུ་ཟླ་ནམ་མཁའི་སྨིག་རྒྱུ་ལྟ་བུར་ནི། །བདེ་བར་གཤེགས་པས་འགྲོ་བ་འདི་དག་གཟིགས། །དྲི་ཟའི་གྲོང་ཁྱེར་ཇི་ལྟར་སྣང་གྱུར་ཀྱང ། །གྲོང་ཁྱེར་དེ་ནི་ཕྱོགས་བཅུ་ཀུན་ན་མེད། །གཞན་དུ་གྲོང་ཁྱེར་དེ་ནི་མིང་ཙམ་སྟེ། །དེ་བཞིན་བདེ་བར་གཤེགས་པས་འགྲོ་འདི་གཟིགས། །མཆོད་པ་འདི་ཀུན་བྲག་
ཅ་ཇི་བཞིན་ཏེ། །ཤིང་རྟ་གདུགས་དང་བླ་རེ་སིལ་སྙན་དང ། །མེ་ཏོག་རྒྱལ་མཚན་ཐལ་མོ་སྦྱར་བགྱིས་པ། །བྲག་ཅ་ཇི་བཞིན་དེ་དག་དེ་ལྟར་གདའ། །འདྲེན་པ་མཆོད་པ་འདི་བགྱིས་བདག་ཅག་ཀྱང ། །སངས་རྒྱས་རྐང་གཉིས་མཆོག་ཏུ་མྱུར་འགྱུར་ཤོག་།རྨི་ལམ་འདྲ་བར་འགྲོ་བ་བདག་ཅག་གིས། །རྟོགས་བགྱིས་རྒྱལ་བ་ཁྱོད་བཞིན་
བསྟན་པར་བགྱི། །ན་དང་རྒ་ཤིས་ཡོངས་སུ་གཙེས་གྱུར་པའི། །སྐྱེ་བོ་མཐོང་ནས་བདག་ཅག་རྣམས་ཀྱིས་ཀྱང ། །བྱང་ཆུབ་མྱུར་ཐོབ་རྒ་ཤི་མེད་པའི་གནས། །གང་ཐོས་གྲོལ་འགྱུར་འགྲོ་ལ་བསྟན་པར་བགྱི། །བདག་ཅག་བྱང་ཆུབ་ལམ་མཆོག་སངས་རྒྱས་ནས། །སེམས་ཅན་བློ་སྟོར་རྣམས་ལ་བསྟན་པར་བགྱི། །ཐུབ་པ་འཁྲུགས་མེད་
ཆོས་རྣམས་རབ་སྟོན་པ། །མྱ་ངན་འདས་མཆོག་སེམས་ཅན་བསྟན་པར་བགྱི། །དེ་ནས་བཅོམ་ལྡན་འདས་ཀྱིས་གྲུལ་བུམ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། སྟོན་པ་རྒྱུ་མེད་འཛུམ་པ་མི་མཛད་དེ། །རྣམ་འདྲེན་
འཇིག་རྟེན་མཁས་ལ་མཚར་མི་མངའ། །ངོ་མཚར་འགྱུར་མེད་རྒྱལ་བས་འཛུམ་མཛད་ན། །འཛུམ་རྒྱུ་ལེགས་པར་བཀའ་སྩོལ་ཉན་པར་འཚལ། །རྒྱལ་བའི་ཞལ་ནས་འཛུམ་པ་མཛད་མཐོང་ནས། །འགྲོ་བ་འདི་དག་ཐེ་ཚོམ་སོམ་ཉི་འཚལ། །ཐེ་ཚོམ་འཚལ་བ་རྣམས་ཀྱི་ཐེ་ཚོམ་ཁུམ། །མི་ཡི་དབང་པོ་འཛུམ་པའི་རྒྱུ་ཡང་གསུངས། །
གང་གིས་དེ་རིང་ཆོས་ལ་ཡིད་བཞག་གྱུར། །དེ་རིང་གང་གིས་ཆོས་ཀྱི་རྒྱལ་ཡང་མཐོང ། །དེང་དུས་སངས་རྒྱས་བསྔགས་པའི་མཆོད་པ་བགྱིས། །མི་ཡི་དམ་པ་བདག་ནི་ཉན་པར་འཚལ། །དེ་རིང་འདུས་བྱས་སྡུག་བསྔལ་ཤེས་གྱུར་ནས། །གང་གིས་འདུ་བྱེད་གྱུར་པའི་ཡིད་གཅིག་བཅོམ། །གང་ཞིག་ཡང་དག་མཐའ་ལ་མི</font><hr>42-1-43b<br><font size=+2>
གཡོ་གནས། །རྣམ་དག་ཐུགས་མངའ་བདག་ནི་ཉན་པར་འཚལ། །དེ་རིང་སུ་ཡིས་འཁོར་བཅས་བདུད་རྣམས་བཅོམ། །ཐུབ་པ་སྟོན་པ་དེང་སུས་མཉེས་བར་བགྱིས། །འདྲེན་པ་སུ་ཞིག་དེ་རིང་གཏིང་རྙེད་གྱུར། །ཐེ་ཚོམ་མཆིས་ཏེ་དེང་བདག་དེ་ཉན་འཚལ། །འཛུམ་མཛད་དེ་ཡི་དོན་ནི་མཉན་སླད་དུ། །འགྲོ་བ་ཀུན་ཀྱང་ཐལ་
མོ་སྦྱར་ཅིང་གནས། །འདྲེན་པ་ཐེ་ཚོམ་འཚལ་བའི་ཐེ་ཚོམ་སོལ། །རྐང་གཉིས་དམ་པས་ལུང་ཡང་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། འཛུམ་པའི་རྒྱུ་འདི་ཡོངས་སུ་དྲིས་པས་ན། །འགྲོ་བའི་དོན་ཡང་ཁྱོད་ཀྱིས་
བྱས་པར་གྱུར། །དེ་དོན་བསྟན་བྱས་རྟ་ཐུལ་མཉན་པར་གྱིས། །གྲུལ་བུམ་ཚོགས་ཀྱིས་ང་ལ་མཆོད་བྱས་ཏེ། །ཞི་བའི་ཆོས་ལ་དེ་དག་ཡིད་ཀྱང་བཞག་།མཚར་མེད་ང་མཐོང་ནས་ནི་ངོམ་གྱུར་ཏེ། །ཞི་བའི་ཆོས་ལ་དེ་དག་ཡིད་ཀྱང་བཞག་།དེ་དག་རྣམས་ཀྱིས་དེ་རིང་ང་མཆོད་དེ། །ཞི་བའི་ཆོས་ལ་བློ་གྲོས་རྣམ་པར་བཏང ། །ལམ་སྟོར་སྐྱེ་བོ་
རྣམས་ལ་སྙིང་བརྩེ་ཞིང ། །བསམ་པ་ཐག་པས་སྙིང་རྗེ་ཆེན་པོ་བསྐྱེད། །སྙིང་རྗེ་བས་ན་ང་ལ་མཆོད་པ་བྱས། །རབ་ཏུ་ལམ་སྟོར་རྣམས་ལ་བྱམས་པར་བསམས། །མཁས་པ་དེ་དག་ལས་དེ་བྱས་པས་ན། །གྲུལ་བུམ་སྐྱེ་གནས་ཤི་འཕོས་བརྟུལ་ཞུགས་བཟང། །བརྒྱ་བྱིན་ལྷ་ཡི་དྲུང་དུ་འདོང་བར་འགྱུར། །ཐུགས་རྗེ་བྱམས་དོན་མཛད་སྐྱོབ་
དྲུང་དུའང་འདོང ། །དེ་ནི་ཅུང་ཟད་ཡང་དང་ཡང་བསྟན་ཏེ། །ཕྱིར་ཞིང་ཆོས་ལ་ཐེ་ཚོམ་མེད་པར་འགྱུར། །དེ་དག་བསྐལ་པ་གང་གཱའི་བྱེ་སྙེད་དུ། །ཞིང་ནས་ཞིང་དུ་རྣམ་པར་རྒྱུ་བྱེད་ཅིང ། །བདག་ཉིད་ཆེན་པོའི་ཆོས་ལ་མཆོད་པ་བྱེད། གོ་ཆ་ཆེན་པོ་རབ་ཏུ་བགོས་ཡིད་ཀྱིས། །དེ་དག་སྐྱོ་བ་མེད་པར་འཇིག་རྟེན་ཁམས། །ཁྲག་ཁྲིག་མཐའ་ཡས་རྣམ་
པར་སྤྱོད་པར་འགྱུར། །སྐྱེ་བོ་མང་པོའི་དོན་བྱེད་འདྲེན་འགྱུར་ཏེ། །ངོ་མཚར་མེད་ཅེས་བྱ་བའི་རྒྱལ་བར་འགྱུར། །དེ་དག་ཞིང་རྣམས་གང་དུ་འགྲོ་རྒྱུ་བ། །དེར་ནི་འགྲོ་བས་རྒྱལ་བ་བྱུང་བར་ཤེས། །དེ་དག་ཐབས་ཀྱིས་མ་འོངས་དུས་དག་ན། །ངོ་མཚར་མེད་པར་སྐྱོ་བོ་རྣམ་གྲོལ་བྱེད། རྒྱལ་བ་ངོ་མཚར་མེད་པར་ཞིང་སྦྱོང་ཞིང ། །རྫོགས་པའི་བྱང་ཆུབ་བླ་མེད་ཞི་བ་ཚོལ། །དེ་དག་ཚོལ་བ་ལ་ཡང་མི་གནས་ཏེ། །འདི་ལྟར་བླ་མེད་བྱང་ཆུབ་གནས་ཕྱིར་རོ། །དེ་ལྟར་འཛུམ་རྒྱུ་རྒྱལ་བས་ལུང་བསྟན་ཅིང ། །བདེ་བར་གཤེགས་པས་འཇིག་རྟེན་དོགས་བསལ་ཏེ། །གྲུལ་བུམ་མཆོད་པའི་འབྲས་བུ་དེས་ཐོས་ནས། །འགྲོ་བ་ཐེ་ཚོམ་བསལ་ཏེ་དགའ་བར་གྱུར། །གྲུལ་བུམ</font><hr>42-1-44a<br><font size=+2>
ལུང་བསྟན་པའི་ལེའུ་སྟེ་དགུ་པའོ།། །།དེ་ནས་དེའི་ཚེ་དྲི་ཟ་བྱེ་བ་ཕྲག་སུམ་ཅུ་རྩ་དྲུག་གིས་ལྷ་མ་ཡིན་རྣམས་དང ། ནམ་མཁའ་ལྡིང་རྣམས་དང ། ཀླུའི་བུ་མོ་རྣམས་དང ། ཀླུ་རྣམས་དང ། གྲུལ་བུམ་རྣམས་ཀྱིས་མཆོད་
པ་ཡང་མཐོང་ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ནས་རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་ངོ་མཚར་ཐོབ་པར་གྱུར་ཏེ། འདི་ལྟར་དེ་བཞིན་གཤེགས་པས་ཆོས་ཀྱི་དབྱིངས་འགྱུར་བ་མེད་པར་ཡང་ཡང་དག་པར་བཀའ་སྩལ། བྱ་བ་རྣམས་ཀྱང་ཡང་དག་པར་བསྟན་ཏེ། 
དགེ་བའི་རྩ་བ་འཕེལ་བ་ཡང་བསྟན་ལ། ཆོས་གང་ལ་ཡང་ལུང་བསྟན་པ་མེད་པར་ཡང་ཡང་དག་པར་བསྟན་པ་འདི་ནི་ངོ་མཚར་རྨད་དོ་སྙམ་ནས་དེ་དག་གིས་ཆོས་དེ་ལྟ་བུ་ཁོང་དུ་ཆུད་དེ། དེ་བཞིན་གཤེགས་པ་ལ་རིམ་གྲོ་བྱ་བའི་སེམས་རྒྱ་ཆེན་པོ་སྐྱེས་ནས་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ཏུ་མོས་པར་གྱུར་ཏེ། རབ་ཏུ་དགའ་བའི་ཡིད་དང་ལྡན་པ་དེ་དག་བཅོམ་ལྡན་འདས་ལ་མཆོད་པ་བྱ་བའི་ཕྱིར་བརྩོན་པར་གྱུར་ཏེ། གླང་པོ་ཆེའི་རྒྱལ་པོ་ས་སྲུང་གི་བུ་བྱེ་བ་ཕྲག་སུམ་ཅུ་རྩ་དྲུག་མངོན་པར་སྤྲུལ་ཏོ། །གླང་པོ་ཆེ་ས་སྲུང་གི་བུ་དེ་དག་རེ་རེ་ཞིང་མགོ་བོ་བྱེ་བ་ཕྲག་སུམ་ཅུ་རྩ་
དྲུག་དྲུག་མགོ་བོ་རེ་རེ་ཞིང་སོ་བྱེ་བ་ཕྲག་སུམ་ཅུ་རྩ་དྲུག་དྲུག། སོ་རེ་རེ་ལ་ཡང་རྫིང་བུ་བདུན་བདུན། རྫིང་བུ་རེ་རེ་ཞིང་ཡང་པད་མ་བདུན་བདུན། པད་མ་རེ་རེ་ཞིང་འདབ་མ་བྱེ་བ་ཕྲག་སྟོང་སྟོང ། འདབ་མ་རེ་རེ་ཞིང་ཡང་ལྷའི་བུ་མོ་བདུན་བདུན། ལྷའི་བུ་མོ་རེ་རེ་ཞིང་ཡང་འཁོར་རྒྱན་ཐམས་ཅད་ཀྱིས་
བརྒྱན་པ་ལྷའི་བདུག་སྤོས་ཐོགས་པ་བདུན་བདུན་ཞིང་པད་མའི་ལོ་མའི་མཐའ་མཐའ་ན་འཁོད་པས་བསྐོར་བ་མངོན་པར་སྤྲུལ་ཏོ། །གླང་པོ་ཆེ་ས་སྲུང་གི་བུ་དེ་དག་གི་མགོ་བོ་རེ་རེ་ལ་ཡང་རིན་པོ་ཆེ་སྣ་བདུན་གྱི་གདུགས་ནས་རིན་པོ་ཆེ་སྣ་བདུན་གྱི་དྲ་བ་དག་གིས་གཟུངས་བྱས་པ་དང ། རིན་པོ་ཆེ་སྣ་བདུན་
གྱི་ལྡ་ལྡི་བྲེས་པའི་བར་དང་ལྡན་པ་བྱེ་བ་ཕྲག་སུམ་ཅུ་རྩ་དྲུག་དྲུག་མངོན་པར་སྤྲུལ་ཏོ། །གླང་པོ་ཆེའི་མགོ་ཐམས་ཅད་ལ་ཡང་ལྷའི་སྤོས་ཀྱི་བླ་རེ་སྣ་ཚོགས་ཀྱི་ལྡ་ལྡི་བྲེས་པ་ཤ་སྟག་མངོན་པར་སྤྲུལ་ཏེ། དེ་ནས་དྲི་ཟ་དེ་དག་གླང་པོ་ཆེ་ས་སྲུང་གི་བུ་བྱེ་བ་ཕྲག་སུམ་ཅུ་རྩ་དྲུག་པོ་དེ་དག་ལ</font><hr>42-1-44b<br><font size=+2>
ཞོན་ཏེ། ལྷའི་རོལ་མོ་སིལ་སྙན་ལེན་ཅིང་ནམ་མཁའ་ལས་རྒྱུ་སྟེ། བཅོམ་ལྡན་འདས་ལ་ལན་སུམ་ཅུ་རྩ་དྲུག་ཏུ་བསྐོར་བ་བྱས་ནས་ལྷའི་ཙན་དན་གྱི་ཕྱེ་མས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །ལྷའི་ཨ་ག་རུའི་ཕྱེ་མ་དང ། ལྷའི་ཏ་མ་ལའི་ལོ་མ་
དང ། ུད་པ་ལའི་ཕྱེ་མ་དང ། ལྷའི་གསེར་ཕྱེ་དང ། ལྷའི་མེ་ཏོག་མཱན་དཱ་ར་བ་དང ། མཱན་དཱ་ར་བ་ཆེན་པོ་དང ། མན་ཛུ་ཥ་ཀ་དང ། མན་ཛུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དག་གིས་བཅོམ་ལྡན་འདས་
ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། གསེར་དང ། དངུལ་དང ། བཻ་དཱུརྱ་དང ། ཤེལ་དང ། སྤུག་དང ། མུ་ཏིག་དམར་པོ་དང ། རྡོའི་སྙིང་པོའི་མེ་ཏོག་རྣམས་དང ། སྤྲུལ་པའི་མེ་ཏོག་རྣམས་ཀྱིས་བཅོམ་ལྡན་འདས་ལ་གཏོར། མངོན་པར་གཏོར། 
མངོན་པར་རབ་ཏུ་གཏོར་ཏོ། །སྤོས་ཀྱི་བླ་རེ་དེ་དག་ལས་སྤོས་ཀྱི་ངད་འབྱུང་སྟེ་འགྲོ་ཞིང་ལྡོག་གོ་།ལྷའི་སྤོས་ཆུ་རྣམ་པ་སྣ་ཚོགས་ཀྱི་ཆར་ཡང་སྟེང་གི་བར་སྣང་ལས་མངོན་པར་བབ་བོ། །སྤོས་ཆུའི་ཆར་དེ་མངོན་པར་བབ་པས་ཀྱང་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཁོ་ར་ཁོར་ཡུག་ཏུ་དཔག་ཚད་དྲུག་
ཅུ་ཚུན་ཆད་སྤོས་ཆུས་རྫབ་ཏུ་གྱུར་ཏེ། སྤོས་ཆུའི་རྫབ་དེའི་དྲིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རྒྱས་པར་གང་བར་གྱུར་ནས་སེམས་ཅན་གང་དག་གིས་སྤོས་ཀྱི་དྲི་དེ་ཚོར་བར་གྱུར་པ་དང ། རོལ་མོ་སིལ་སྙན་དེ་དག་གི་སྒྲ་ཐོས་པར་གྱུར་པ་དེ་དག་ཐམས་ཅད་ཀྱང་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏོ། །དེ་ལྟར་དྲི་ཟ་རེ་རེས་ཀྱང་བཅོམ་ལྡན་འདས་ལ་མཆོད་པའི་ཕྱིར་གླང་པོ་ཆེ་ས་སྲུང་གི་བུ་མགོ་བྱེ་བ་ཕྲག་སུམ་ཅུ་རྩ་དྲུག་ལ་ལྷའི་བུ་མོ་གླུ་ལེན་པ་དང ། གར་བྱེད་པ་འཁོད་པ་དག་གིས་མཆོད་དེ་སྐྱེ་བོ་ཐམས་ཅད་ཀྱང་འདུན་
པར་བྱས་སོ། །ལྷའི་བུ་མོ་དེ་དག་ལས་ལ་ལ་ནི་ལུས་ཀྱི་ཚུལ་སྒྱུར། ལ་ལ་ནི་ཙན་དན་དང ། ་ག་རུ་དང ། ཏ་མ་ལའི་ལོ་མའི་ཕྱེ་མ་འཐོར་ལ་ལ་ནི་ལྷ་མ་ཡིན་གྱི་ལྷ་རྫས་ཀྱི་ཕྱེ་མ་དང ། སྤོས་རྣམ་པ་སྣ་ཚོགས་ཀྱི་ཕྱེ་མ་འཐོར། ལ་ལ་ནི་མེ་ཏོག་མན་དཱ་ར་བ་དང ། མན་དཱ་ར་བ</font><hr>42-1-45a<br><font size=+2>
ཆེན་པོ་ནས། སྐྱ་སྣར་ཁྲ་བོ་དང་།སྐྱ་སྣར་བཀྲ་ཆེན་གྱི་བར་གྱི་མེ་ཏོག་དང ། སྤྲུལ་པའི་མེ་ཏོག་རྣམས་འཐོར། ལ་ལ་ནི་གསེར་གྱི་མེ་ཏོག་ནས་རྡོའི་སྙིང་པོའི་བར་གྱི་མེ་ཏོག་དང ། དབྱིག་དང ། གསེར་དང ། རིན་པོ་ཆེ་སྙིམ་པས་བླངས་ཏེ། བཅོམ་ལྡན་
འདས་ལ་མངོན་པར་འཐོར། ལ་ལ་ནི་ན་བཟའ་དག་འཐོར། ལ་ལ་ནི་ཞབས་ཀྱི་རྒྱན་དང ། སྐུ་རགས་དང ། གསེར་གྱི་ཕྲེང་བ་རིན་པོ་ཆེས་སྤྲས་པའི་བར་དག་འབུལ་ལོ། །ལ་ལ་ནི་གསེར་གྱི་དྲ་བ་དག་འཛིན། ལ་ལ་ནི་རིན་པོ་ཆེ་ཐམས་ཅད་ཀྱི་རྒྱལ་མཚན་དང ། རིན་པོ་ཆེའི་བ་
དན་ཁ་དོག་སྣ་ཚོགས་དང ། ཚོན་སྣ་ཚོགས་ཅན་འཛིན། ལ་ལ་ནི་ལྷའི་སྤོས་ཆུའི་ཆར་འབེབས་ཏེ། ལྷ་མ་ཡིན་གྱི་བུ་མོས་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པའི་བར་དུ་སྔ་མ་བཞིན་ནོ། །དེ་ནས་དྲི་ཟ་དེ་དག་གླང་པོ་ཆེའི་རྒྱལ་པོ་ས་སྲུང་གི་བུ་དེ་དག་
ལ་ཞོན་ནས། བཅོམ་ལྡན་འདས་ལ་བསྐོར་བ་བྱེད་བྱེད་པ་ལས་གླང་པོ་ཆེ་ས་སྲུང་གི་བུ་དེ་དག་ལས་བབས་ཏེ། ཡང་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཞབས་ལ་མགོ་བོས་ཕྱག་འཚལ་ཏེ་ཐལ་མོ་སྦྱར་ནས་ཕྱོགས་གཅིག་ཏུ་འཁོད་དེ། བཅོམ་ལྡན་འདས་ལ་ཚིགས་སུ་བཅད་
པ་དག་གིས་མངོན་པར་བསྟོད་པ། བཅོམ་ལྡན་བདེ་གཤེགས་སྲིད་པ་མཐར་འབྱིན་པ། །སྲིད་པའི་བཅིངས་ལས་འགྲོ་བ་རྣམ་གྲོལ་མཛད། །ཁྱོད་འདྲ་སྲིད་གསུམ་གང་ནའང་མ་མཆིས་ཏེ། །ཁྱུ་མཆོག་ཁྱོད་ནི་གཟུགས་དང་མཚན་མཆོག་མངའ། །མི་མཆོག་ཁྱོད་ཀྱིས་ས་ཆེན་འདི་སྟེང་དུ། །
གྲགས་པ་མཐའ་ཡས་མངའ་བས་ངོ་མཚར་བསྟན། །འགྱུར་བགྱིད་ཆོས་ནི་གང་ཡང་མ་མཆིས་ལ། །དགེ་བའི་ཚོགས་ལ་འགྲོ་བ་རབ་ཏུ་བཀོད། །བདེ་གཤེགས་འགྱུར་བ་མེད་པའི་དེ་བཞིན་ཉིད། །བརྗེད་པ་ཙམ་སྟེ་གཞན་ནི་ཅི་མ་མཆིས། །ཐ་སྙད་གདགས་དང་ཐ་སྙད་འདོགས་མ་
མཆིས། །འོན་ཀྱང་བདེ་གཤེགས་ཁྱོད་ནི་འགྲོ་བ་སྦྱང ། །བདེ་བར་གཤེགས་པས་སོང་མེད་འོང་མེད་དང ། །གནས་མེད་རང་བཞིན་གྱིས་ནི་སྟོང་པ་དང ། །ཆོས་རྣམས་འདི་དག་རང་བཞིན་མེད་ཅེས་བསྟན། །རྒྱལ་བ་མཆོག་གིས་བྱ་བ་རྣམས་ཀྱང་བསྟན། །ཆོས་རྣམས་གང་ཡང་བྱ་བ</font><hr>42-1-45b<br><font size=+2>
བྱེད་མ་མཆིས། །འཇིག་རྟེན་གཙོ་བོས་བྱ་བའང་ཡོངས་སུ་བསྟན། །བདག་དང་གཞན་གྱི་ཡོན་ཏན་མི་དགོངས་ལ། །བཅོམ་ལྡན་འདས་ཀྱིས་བགྱི་བ་ཀུན་ཀྱང་བསྟན། །ཤིང་རྟའི་ཡན་ལག་རྣམ་པ་སྣ་ཚོགས་དག་།བདག་དང་གཞན་གྱི་ཡོན་ཏན་མི་སེམས་ཀྱང ། །ཤིང་རྟའི་བགྱི་
བ་དག་ཀྱང་བགྱིད་པར་འགྱུར། །དེ་བཞིན་ཆོས་ཀུན་བདེ་བར་གཤེགས་པས་གསུངས། །ཆོས་ནི་ཆོས་ལ་ཡོངས་སུ་སྐུལ་མི་བགྱིད། །ཆོས་ནི་ཆོས་ལ་དྲན་པར་བགྱིད་མ་མཆིས། །ཆོས་རྣམས་ཆོས་ལ་ཉེ་བར་མི་རྟེན་ཏེ། །ཆོས་རྣམས་གང་ཡང་མ་སྐྱེས་འཆི་མ་མཆིས། །འགྲོ་
བ་འདི་དག་ཀུན་རྫོབ་མངོན་པར་གསུངས། །ཀུན་རྫོབ་དེ་ཡང་དེ་ན་མ་མཆིས་ཏེ། །འགྲོ་བ་འདི་ཀུན་ཀུན་རྫོབ་ཇི་བཞིན་ཞེས། །ཚོགས་ཀྱི་སློབ་དཔོན་ཁྱོད་ཀྱིས་ཡོངས་དག་གསུངས། །མིག་གི་རང་བཞིན་གང་ནའང་མ་མཆིས་ལ། །བདེ་བར་གཤེགས་པས་བྱ་བ་རྣམ་པར་
གཞག་།ཆོས་ཚུལ་འདི་འདྲ་ཡོངས་སུ་བསྟན་པས་ན། །འཇིག་རྟེན་མཁས་པས་ཤིན་ཏུ་ངོ་མཚར་མཛད། །དེ་བཞིན་བདག་ཅག་བདེ་གཤེགས་ཉིད་གྱུར་ཏེ། །ནོར་བའི་འགྲོ་བ་བློ་གྲོས་སྟོར་བ་རྣམས། །ཆོས་ཀྱིས་ཆོས་ཀྱི་ཚུལ་ལ་གཟུང་བགྱིས་ཏེ། །ཞི་བའི་གོ་འཕང་འཆི་
མེད་ཐོབ་པར་བགྱི། །རྣམ་པར་འདྲེན་པ་ཁྱེད་ནི་ཅི་འདྲ་བར། །འདྲེན་པ་བདེ་གཤེགས་གྲགས་པ་མཐའ་ཡས་པ། །ཐུགས་རྗེ་ལྡན་པ་ཕན་བཞེད་འཇིག་རྟེན་མཁས། །བསོད་ནམས་བརྒྱ་ཡི་མཚན་དང་ལྡན་པར་ཤོག་།ཇི་ལྟར་བདེ་གཤེགས་ཁྱོད་བཞིན་བདག་ཅག་གིས། །
ང་རྒྱལ་བསྒྲིབས་པའི་འགྲོ་བ་སྡུག་བསྔལ་བ། །འདོད་པའི་ཡོན་ཏན་རྒྱུན་གྱི་རྗེས་འགྲོ་བ། །མངོན་དགའ་སྡུག་བསྔལ་བརྒྱད་ལྡན་ཡོངས་སུ་དགྲོལ། །ཇི་ལྟར་བདེ་གཤེགས་ཁྱོད་བཞིན་བདག་ཅག་གིས། །འགྲོ་བ་སྡུག་བསྔལ་གནོད་པ་མྱོང་འགྱུར་ལ། །གཡོ་ཡི་ཞགས་པས་ཟིན་
ཅིང་མུ་མ་མཐོང ། །ཡོངས་འཐོམ་སྤྲེའུ་ལྟར་རྒོད་པ་ཡོངས་སུ་དགྲོལ། །ཇི་ལྟར་བདེ་གཤེགས་ཁྱོད་བཞིན་བདག་ཅག་གིས། །འགྲོ་བ་མི་མཁས་མིག་དང་བྲལ་བ་ཡི། །ལྷ་ཚོགས་ཡོངས་སྐྱོ་གཉིད་ཀྱིས་ལོག་གྱུར་ཅིང ། །བདག་ཉིད་ལས་ཀྱི་འབྲས་བུ་ཆུད་གཟོན་དགྲོལ། །དེ་ནས</font><hr>42-1-46a<br><font size=+2>
བཅོམ་ལྡན་འདས་ཀྱིས་དྲི་ཟ་བྱེ་བ་ཕྲག་སུམ་ཅུ་རྩ་དྲུག་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བདེ་གཤེགས་མཐའ་ཡས་གཟིགས་པས་འཛུམ་
པ་མཛད། །འདྲེན་པ་རྒྱུ་མ་མཆིས་པར་མི་འཛུམ་ན། །བདེ་གཤེགས་འཛུམ་པའི་རྒྱུ་ནི་མྱུར་དུ་གསུངས། །ནེམ་ནུར་གནོད་གྱུར་རྣམས་ཀྱི་ཐེ་ཚོམ་སོལ། །བདེ་གཤེགས་ཁྱོད་ཀྱི་ཞལ་གྱི་འཛུམ་མཐོང་ནས། །སྐྱེ་བོ་འདི་དག་ཐེ་ཚོམ་རྙེད་པར་འགྱུར། །འཛུམ་པའི་དོན་ནི་དེ་དག་ཉན་
པར་འཚལ། །ཐུབ་ཆེན་འགྲོ་བའི་ཐེ་ཚོམ་བསལ་དུ་གསོལ། །བདེ་བར་གཤེགས་ཀྱི་བསྟན་ལ་སུ་ཞིག་ཞུགས། །ཐེ་ཚོམ་བྲལ་ཞིང་སོམ་ཉི་བསལ་བར་གྱུར། །བཅོམ་ལྡན་འདས་ཀྱིས་གང་གི་བསམ་མཁྱེན་ནས། །མི་ཡི་མཆོག་གིས་འཛུམ་པ་བསྟན་པ་མཛད། །སུ་ཞིག་
བདེ་གཤེགས་བཀའ་སྩལ་ཚུལ་བཞིན་དུ། །བློ་གྲོས་རྟོགས་པ་ཆོས་བཞིན་གནས་པར་གྱུར། །གང་གིས་བློ་གྲོས་དྲན་རྟོགས་བློ་མཁྱེན་ནས། །བདེ་གཤེགས་འགྲོ་བའི་ནང་དུ་འཛུམ་པ་མཛད། །འགྲོ་བ་འདི་དག་བློ་གཞན་ཡོངས་བཏང་སྟེ། །བདེ་གཤེགས་འཛུམ་དོན་ཞལ་ནས་
ཐོས་པར་དགའ། །སོར་བཅུ་ཐལ་སྦྱར་མགོ་ལ་བཞག་བགྱིས་ཤིང ། །དགའ་བའི་ཡིད་ཀྱིས་སྟོན་པའི་ཞལ་དུ་ལྟ། །ཉོན་མོངས་བྲལ་ཞིང་མྱ་ངན་རབ་སྤངས་པ། །དགྱེས་པའི་ཐུགས་མངའ་ཐུབ་ཆེན་འཇིག་རྟེན་མིག་།འགྲོ་བའི་ཡིད་གཉིས་སོམ་ཉི་བསལ་དུ་གསོལ། །རྒྱལ་བ་
ཐུགས་རྗེ་ལྡན་པས་འཛུམ་རྒྱུ་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། འགྲོ་བའི་དོན་དུ་འཛུམ་པ་ངས་མཛད་པ། །ཁྱོད་ཀྱིས་དོན་དྲིས་འཐུན་ཞིང་ལེགས་པ་སྟེ། །འཛུམ་པ་དེ་ཡི་དོན་ནི་ལུང་བསྟན་པས། །སྐྱེ་
བོའི་ཚོགས་ཆེན་དོན་ནི་དེ་རིང་འཕེལ། །འཛུམ་མཛད་རྒྱུ་དེ་རྟ་ཐུལ་མཉན་པར་གྱིས། །རྣམ་པར་འདྲེན་པས་འཛུམ་པ་འདི་མཛད་པ། །དེ་ནི་མ་ལོག་པར་ཡང་ངས་བསྟན་གྱིས། །བསྟན་པ་དེ་ལ་དགའ་བའི་སེམས་ཀྱིས་ཉོན། །དྲི་ཟ་འདི་རྣམས་ཆོས་ཀྱི་རྗེས་སྙེགསཤིང ། །བདེ</font><hr>42-1-46b<br><font size=+2>
བར་གཤེགས་ལ་མཆོད་པ་འདི་དག་བྱས། །ཆོས་ཉིད་བྱུང་བར་གྱུར་པ་མེད་པ་སྟེ། །ཆོས་ཉིད་ཟད་པར་འགྱུར་བའང་མེད་པ་ཡིན། །རྒྱལ་བ་རྣམ་རྟོག་སྒྱུ་མ་ལྟ་བུར་གནས། །རྟོག་པར་མི་བྱེད་དེ་དག་རྨོངས་པར་འགྱུར། །གང་གིས་ཆོས་གང་རྗེས་སུ་བརྗོད་བྱ་བ། །དེས་ནི་དེ་ཉིད་སྟོང་
ཞེས་བདེ་གཤེགས་གསུངས། །དེ་དག་ང་ཡི་ཚིག་དེ་རྟོགས་གྱུར་ནས། །རྟ་མེད་གླང་པོ་མཆོག་གིས་མཆོད་པ་བྱས། །བྱང་ཆུབ་རྒ་མེད་འཆི་མེད་ཚོལ་བྱེད་ཅིང ། །དྲི་ཟའི་རྒྱལ་པོ་རྣམས་ཀྱིས་ང་མཆོད་དོ། །ནོར་བའི་འགྲོ་ལ་སྙིང་རྗེ་བསྐྱེད་ནས་ནི། །ཐམས་ཅད་མཁྱེན་པ་ཉིད་དུ་འདི་དག་
མོས། །འདི་དག་ང་ལ་མཆོད་པ་འདི་བྱས་པས། །དྲི་ཟའི་རིས་བོར་དགའ་བའི་ཡིད་གྱུར་ཏེ། །བློ་གྲོས་བཟང་རྣམས་ལྷ་གནས་ལྷ་ཡུལ་བ། །བརྒྱ་བྱིན་ལྷ་འདུས་པར་ནི་འགྲོ་བར་འགྱུར། །དེ་དག་སངས་རྒྱས་བདེ་གཤེགས་རྡུལ་མེད་པ། །བྱེ་བ་ཁྲག་ཁྲིག་མང་ལ་མཆོདབྱེད་འགྱུར། །
ཞིང་ནས་ཞིང་དུ་རྗེས་སུ་རྒྱུ་བྱེད་ཅིང ། །དེ་དག་ལ་ནི་མཁས་པ་ཆོས་ཀྱང་ཉན། །དེ་དག་བདེ་གཤེགས་སྤྱོད་པ་ཡོངས་སུ་སྦྱོང ། །དེ་དག་ཞིང་ཡང་རྟག་པར་ཡོངས་དག་འགྱུར། །རྒྱལ་བའི་གདུང་འཛིན་དེ་དག་སེམས་ཅན་ནི། །ཁྲག་ཁྲིག་མང་པོ་དག་ལ་བྱང་ཆུབ་སྟོན། །འགྲོ་བ་འདི་
དག་རང་བཞིན་སྟོང་རིག་ནས། །བདེ་གཤེགས་འགྲོ་བ་དག་ལ་སྟོན་པར་འགྱུར། །རྒྱལ་བ་ཐམས་ཅད་མཁྱེན་ཅིང་ཀུན་གཟིགས་པ། །རྡུལ་མེད་བསྐལ་པ་ཁྲག་ཁྲིག་བཞུགས་པར་འགྱུར། །སངས་རྒྱས་མཚན་ནི་མཐའ་ཡས་རྟོགས་པ་སྟེ། །སངས་རྒྱས་རེ་རེ་ཁྲག་ཁྲིག་ཕྲག་མང་བའི། །
བསྐལ་པ་རྣམས་སུ་རྡུལ་མེད་གནས་པར་འགྱུར། །ཐམས་ཅད་མཁྱེན་པའི་ལམ་འདི་རྗེས་སུ་སྟོན། །རྒྱལ་བ་ཐུབ་པ་ཉོན་མོངས་བཅོམ་པ་ཡིས། །དེ་ལྟར་དེ་ཚེ་དྲི་ཟས་མཆོད་ལུང་བསྟན། །རྟ་ཐུལ་གྱིས་ནི་འཛུམ་པའི་དོན་ཞུས་པ། །དྲི་ཟ་ལུང་བསྟན་པ་ནི་བཤད་པ་མཛད། །དྲི་ཟ་
ལུང་བསྟན་ཡིད་དུ་འཐད་འགྱུར་བ། །དེ་ཐོས་ནས་ནི་འགྲོ་བ་ཐམས་ཅད་དགའ། །དེར་ནི་བདེ་བར་གཤེགས་ཀྱི་གསུང་ཐོས་ནས། །ཤཱཀྱ་ཐུབ་ལ་ཐམས་ཅད་སྐྱབས་སུ་དོང ། །དྲི་ཟ་ལུང་བསྟན་པའི་ལེའུ་སྟེ་བཅུ་པའོ།། །།འཕགས་པ་ཡབ་དང་སྲས</font><hr>42-1-47a<br><font size=+2>
མཇལ་བ་ཞེས་བྱ་བ་ཐེག་པ་ཆེན་པོའི་མདོ།བམ་པོ་ལྔ་པ། །དེ་ནས་གནོད་སྦྱིན་བྱེ་བ་ཕྲག་བརྒྱད་ཅུས་ལྷ་མ་ཡིན་རྣམས་ནས་དྲི་ཟའི་བར་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་
དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཤེས་རབ་ཀྱི་རྣམ་པ་ལ་རིམ་གྲོ་ཆེན་པོ་བསྐྱེད་དེ་ཆོས་ཉིད་ལ་འཇུག་པ་ཡང་ཐོས་པས་སྟོན་པའི་འདུ་ཤེས་སྐྱེས་པར་གྱུར་ཏོ། །བཅོམ་ལྡན་འདས་ཀྱང་བློ་ཟད་མི་ཤེས་པའི་འདུ་ཤེས་སྐྱེས་པར་གྱུར་ཏེ། དེ་དག་གི་བཅོམ་
ལྡན་འདས་བློ་ཟད་མི་ཤེས་པ་ཞེས་བྱ་བར་རིག་ནས་སངས་རྒྱས་ཀྱི་ཆོས་རྣམས་ལ་འདོད་པ་སྐྱེས་པར་གྱུར་ཏོ། །སངས་རྒྱས་ཀྱི་ཆོས་རྣམས་ལ་འདོད་པ་སྐྱེས་པར་གྱུར་ནས་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། ཚིགས་སུ་བཅད་པ་དག་གིས་བཅོམ་ལྡན་འདས་ལ་
མངོན་པར་བསྟོད་པ། མངོན་ཤེས་སྟོབས་ནི་ཀུན་དུ་མཐའ་ཡས་ཏེ། །རྒྱ་མཚོ་ཆུ་འཛིན་བས་མ་འཚལ་དང་འདྲ། །དེ་བས་མཚུངས་མེད་འཇིག་རྟེན་ཕན་མཛད་པ། །མི་ཡི་སེང་གེ་ཁྱོད་ལ་འདི་ལྟར་བསྟོད། །རི་རབ་སྲང་ལ་གཞལ་བར་ནུས་ཀྱང་གདའ། །གཟི་བརྗིད་ཆེན་པོ་
ནམ་མཁའ་གཞལ་རུང་གདའ། །ཤེས་རབ་མཆོག་མངའ་བདེ་གཤེགས་ཡེ་ཤེས་སྟོབས། །ཚད་གཟུང་དཔག་པར་ནུས་པ་ཡོང་མ་མཆིས། །འགྲོ་བ་ཀུན་གྱི་བསམ་པ་ཐུགས་སུ་ཆུད། །སྐྱེ་བོ་དྲང་རུང་མི་རུང་གདུལ་མིན་པ། །དེ་དག་ལས་ཀྱི་རྣམ་པ་མངོན་པར་མཁྱེན། །དེ་
བས་མཚུངས་མེད་ཀུན་ཏུ་མཐའ་ཡང་ཡས། །དེ་དག་ཅི་འདྲའི་ཁམས་ལ་བསྟེན་པ་དང ། །དེ་དག་སེམས་རྒྱུད་ཅི་འདྲར་འབྱུང་བ་དང ། །དེ་དག་མོས་པ་ཅི་འདྲ་མ་ལུས་མཁྱེན། །དེ་བས་མཚུངས་མེད་ཀུན་ཏུ་མཐའ་ཡང་ཡས། །འདོད་ཆགས་སྤྱོད་དང་དེ་བཞིན་ཞེ་ལྡངསྤྱོད། །
མི་ཡི་གཏི་མུག་སྤྱོད་པ་དེ་བཞིན་མཁྱེན། །ཕྲག་དོག་རྣམ་པའང་དེ་བཞིན་མཁྱེན་པ་སྟེ། །དེ་བས་མཚུངས་མེད་ཀུན་ཏུ་མཐའ་ཡང་ཡས། །འགྲོ་བ་འདི་དག་ལམ་རྒྱུད་གར་འཁྱམས་པ། །དེ་དག་མཚུངས་མེད་ཁྱོད་ཀྱིས་རབ་ཏུ་མཁྱེན། །དེ་ལ་ཡེ་ཤེས་རྒྱུན་ཏུ་རབ་འབྱུང་བས། །དེ</font><hr>42-1-47b<br><font size=+2>
བས་མཚུངས་མེད་ཀུན་ཏུ་མཐའ་ཡང་ཡས། །བདེ་བར་གཤེགས་པས་འགྲོ་ཀུན་རབ་ཏུ་གཟིགས། །ཆུད་ཟའི་ལམ་རྒྱུད་གང་དུ་འཁྱམས་གྱུར་ཅིང ། །བྱམས་པའི་སྟོབས་ལས་རབ་ཏུ་ཉམས་གྱུར་པ། །དེ་དག་མ་ལུས་ཁྱོད་ཀྱིས་རབ་ཏུ་གཟིགས། །འགྲོ་བ་རྣམས་ནི་ཇི་སྲིད་དུས་གནས་
ཤིང ། །ཅི་འདྲའི་སྡུག་བསྔལ་དེ་དག་རེག་འགྱུར་དང ། །ལུས་ཀྱི་རྣམ་པ་ཅི་འདྲ་འཆང་བ་རྣམས། །དེ་དག་འདྲེན་པ་ཁྱོད་ཀྱིས་རབ་ཏུ་གཟིགས། །མི་ཡི་སེང་གེས་ལྟ་བ་ཅི་འདྲ་དང ། །གང་གིས་སྡུག་བསྔལ་རྣམ་པ་འཐོབ་འགྱུར་བར། །གང་ལ་རྟེན་ཅིང་ལས་རྣམས་བགྱིད་འགྱུར་བ། །དེ་དག་རྣམས་ཀྱང་འདྲེན་པས་
རབ་ཏུ་གཟིགས། །དེ་དག་རྒྱལ་བའི་བསྟན་ལ་རབ་བྱུང་སྟེ། །རྣམ་པར་ཐར་པའི་སྒོ་ནི་གང་ཞིག་གིས། །ཅི་འདྲའི་ལམ་ལ་དེ་དག་བསྟེན་བགྱིས་ཤིང ། །ཅི་འདྲའི་ཞི་བ་འཐོབ་འགྱུར་ཁྱོད་ཀྱིས་མཁྱེན། །བྱིས་པ་གང་རྣམས་བདེ་གཤེགས་བསྟན་པ་ལ། །རབ་ཏུ་བྱུང་ཞིང་འཇིག་
རྟེན་མཁས་པ་ཡིས། །བསྟན་པ་རབ་ཕྲ་ཇི་ལྟར་སྤོང་འགྱུར་བ། །དེ་དག་རྣམས་ཀྱང་འདྲེན་པས་རབ་ཏུ་གཟིགས། །འཇིག་རྟེན་ཕན་པའི་བསྟན་ལ་བརྙས་བགྱིས་པས། །དམྱལ་བ་ཆེན་པོར་ཇི་སྲིད་གནས་པ་དང ། །ཅི་འདྲའི་སྡུག་བསྔལ་དེ་དག་མྱོང་འགྱུར་བ། །དེ་དག་རྣམས་
ཀྱང་འདྲེན་པས་རབ་ཏུ་གཟིགས། །གང་དག་རྒྱལ་བ་རྣམས་ལ་དད་བསྐྱེད་དེ། །རབ་ཏུ་བྱུང་ནས་རྒྱལ་བའི་བསྟན་འཛིན་ཅིང ། །ཆོས་ཀུན་སྟོང་པ་ཉིད་དུ་རབ་བརྟགས་ནས། །མཚན་མ་ཐམས་ཅད་རྣམ་པར་གཞིག་བགྱིས་ཤིང ། །འགྲོ་རྒྱུད་ཀུན་ཏུ་སྨོན་པ་རྣམ་སྤངས་ཏེ། །ལུས་
འདི་སྒྱུ་མ་འདྲ་བར་རབ་བརྟགས་ནས། །ཕུང་པོ་བྲག་ཅ་འདྲ་བར་རྟོགས་གྱུར་ཏེ། །བྱང་ཆུབ་སེམས་ལྡན་དེ་དག་རབ་ཏུ་གཟིགས། །མགོན་པོ་ཁྱོད་ལ་བསྟོད་པའི་བསོད་ནམས་གང ། །མཚུངས་མེད་ཁྱོད་ཀྱིས་ཇི་ལྟར་ཐུགས་ཆུད་པ། །དེ་ཡིས་བླ་མེད་སངས་རྒྱས་འགྲུབ་པར་
ཤོག་།འགྲོ་བ་ཀུན་ཀྱང་རང་བྱུང་ཐོབ་གྱུར་ཅིག་།དེ་ནས་བཅོམ་ལྡན་འདས་ཀྱིས་དེའི་ཚེ་གནོད་སྦྱིན་བྱེ་བ་ཕྲག་བརྒྱད་ཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ།


</font><hr>42-1-48a<br><font size=+2>
མི་ཡི་སེང་གེས་འཛུམ་པ་འདི་མཛད་པ། །མི་ཡི་ཟླ་བ་རང་བྱུང་གྱུར་པ་ནི། །རྒྱུ་མ་མཆིས་པར་འཛུམ་པ་མི་མཛད་ན། །འཛུམ་པ་དེ་ཡི་རྒྱུ་ནི་བཀའ་སྩལ་གསོལ། །སྟོན་པའི་ཞལ་ནས་འཛུམ་པ་དེ་མཐོང་ནས། །བཅོམ་ལྡན་འཇིག་རྟེན་འདི་དག་ཐེ་ཚོམ་འཚལ། །མགོན་པོས་དེ་དག་ཐེ་ཚོམ་བསལ་དུ་གསོལ། །འཇིག་རྟེན་འདི་དག་དགའ་བའི་ཡིད་དུ་འགྱུར། །དེ་རིང་སུ་ཞིག་རྒྱལ་ལ་དད་པ་སྐྱེད། །གང་གིས་ཆོས་རྒྱ་ཆེན་པོ་རྣམ་པར་རྟོགས། །གང་གི་སེམས་ནི་མི་སྒུལ་གནས་པར་གྱུར། །དེ་དག་རྒྱལ་བས་འགྲོ་བ་བསྟན་དུ་གསོལ། །
དེ་རིང་འཁོར་རྣམས་ཐེ་ཚོམ་ཆེ་འཚལ་ཞིང ། །ཀུན་ཀྱང་རྒྱལ་བའི་ཞལ་དུ་ལྟ་ཞིང་སྡོད། །ཅི་ནས་ཐེ་ཚོམ་མ་མཆིས་ཀུན་འགྱུར་བ། །དེ་ལྟར་དཔའ་བོས་ཐེ་ཚོམ་བསལ་དུ་གསོལ། །དེ་རིང་འདི་ནི་གང་གི་རྣམ་འཕྲུལ་ལགས། །གང་གིས་བརྩོན་འགྲུས་བཟང་པོ་འདིར་བསྟན་ལགས། །
གང་ཞིག་ཁྱོད་དང་འདིར་མཇལ་དོན་མཆིས་གྱུར། །དེ་ནི་ལེགས་པར་འགྲོ་ལ་བཀའ་སྩལ་གསོལ། །རྒྱལ་བ་འགྲོ་བ་དག་ལ་ཕན་བཞེད་པ། །ཐེ་ཚོམ་འཚལ་བའི་ཡིད་གཉིས་ལེགས་བསལ་གསོལ། །དེ་ཐོས་ལྷ་དང་བཅས་པའི་འཇིག་རྟེན་རྣམས། །དགའ་ཞིང་མགུ་བ་དག་ཀྱང་འཐོབ་པར་
འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དྲི་བ་ལེགས་པར་དྲིས། །དེ་རིང་འགྲོ་བ་དག་གི་དོན་ཆེན་བྱས། །རང་བྱུང་འཛུམ་མཛད་རྒྱུ་ནི་དྲིས་པས་ན། །སྟོན་པའི་དགོངས་པའང་ཁྱོད་ཀྱིས་ལེགས་
པར་མཐོང ། །དེ་དག་ལུང་བསྟན་མ་ལུས་བསྟན་པར་བྱས། །གནོད་སྦྱིན་ཚོགས་ཀྱི་ཡིད་ནི་གཟིགས་གྱུར་ནས། །འགྲོ་ལ་ཕན་པའི་དོན་དུ་འཛུམ་མཛད་པ། །དད་པའི་ཡིད་ཀྱིས་རྟ་ཐུལ་མཉན་པར་གྱིས། །རྒྱལ་བའི་བྱང་ཆུབ་ཞི་བ་ཤེས་གྱུར་ནས། །གནོད་སྦྱིན་ཚོགས་ཀྱིས་མོས་
པའི་སེམས་བསྐྱེད་དེ། །འབྱུང་པོའི་ཚོགས་དབུས་སངས་རྒྱས་བསྟོད་བྱས་ནས། །རང་བྱུང་དམ་པ་མཆོག་ཏུ་ཡིད་ཀྱང་བཏང ། །ཆོས་རྣམས་སྟོང་པ་ཉིད་དུ་ཤེས་བྱ་དང ། །མཚན་མ་ཐམས་ཅད་རྣམ་པར་གཞིག་པའི་ཕྱིར། །འགྲོ་བ་ཀུན་ཏུ་སྨོན་པ་རྣམས་སྤངས་ཤིང ། །བྱང་ཆུབ་མཆོག་ཏུ་དེ</font><hr>42-1-48b<br><font size=+2>
དག་ཡིད་ཀྱང་བཏང ། །རྣལ་འབྱོར་སྟོབས་ཀྱིས་ཕུང་པོརྣམ་བཤིག་ཅིང ། །ཀུན་རྫོབ་ཙམ་དུ་རིག་ནས་མི་ཆགས་ཏེ། །སྲིད་པ་ཀུན་ཏུ་ཆུ་ལ་པད་མོ་བཞིན། །བྱང་ཆུབ་མཆོག་ཏུ་དེ་དག་ཡིད་ཀྱང་བཏང ། །དེ་དག་སྲིད་པ་གང་དུ་ཆགས་འགྱུརབ། །སྟོང་པར་བཤིག་སྟེ་ཐམས་ཅད་
ལེགས་རྟོགས་པ། །དེ་ཉིད་རྒྱལ་བའི་བླ་མེད་བྱང་ཆུབ་སྟེ། །བྱང་ཆུབ་ཕྱིར་ནི་དབེན་པའི་བརྟུལ་ཞུགས་ཤེས། །སྐྱེ་དང་རྒ་ཤི་ཡོང་གིས་སྟོང་པ་སྟེ། །དེ་ནི་རྒྱལ་བའི་བླ་མེད་བྱང་ཆུབ་ཡིན། །དངོས་པོའི་རང་བཞིན་སྟོང་པར་ཤེས་གྱུར་ནས། །ཞི་བ་བླ་མེད་བྱང་ཆུབ་འཐོབ་པར་
འགྱུར། །ཕུང་པོའི་རང་བཞིན་དབེན་ཞིང་སྟོང་པ་ཉིད། །བྱང་ཆུབ་རང་བཞིན་དབེན་ཞིང་སྟོང་པ་ཉིད། །གང་སྤྱོད་དེ་ཡང་རང་བཞིན་སྟོང་པ་སྟེ། །ཡེ་ཤེས་ལྡན་པས་ཤེས་ཀྱི་བྱིས་པས་མིན། །ཡེ་ཤེས་རང་བཞིན་སྟོང་པར་རིག་གྱུར་ཏེ། །ཤེས་བྱའི་རང་བཞིན་སྟོང་པར་
རིག་གྱུར་ནས། །ཤེས་པ་པོ་དང་འདྲ་བར་རྟོགས་གྱུར་ན། །བྱང་ཆུབ་ལམ་ལ་དེ་དག་སྤྱོད་ཅེས་བྱ། །སྟོང་པའི་རང་བཞིན་སྟོང་པར་ཤེས་པར་བྱ། །མཚན་མ་མེད་པའང་རང་བཞིན་ཉིད་ཀྱིས་སྟོན། །སྨོན་པ་མེད་པའང་རང་བཞིན་སྟོང་པ་སྟེ། །དེ་ལྟར་སྤྱོད་ན་གཞན་མིན་
སྤྱོད་པ་ཡིན། །དེ་ཐོས་ལྷ་དང་བཅས་པའི་འཇིག་རྟེན་རྣམས། །དགའ་ཞིང་དེ་དག་སྟོབས་དང་ལྡན་པར་གྱུར། །རང་བྱུང་ཆོས་ལ་དེ་དག་ཡིད་ཆེས་ཏེ། །ཞི་བའི་གནས་ཤེས་བྱང་ཆུབ་ཡིད་ལྡན་གྱུར། །གནོད་སྦྱིན་ཚོགས་རྣམས་དེང་མོས་ཡིད་གྱུར་ཏེ། །འདི་ལྟར་ང་ལ་མཆོད་
པ་རབ་བྱས་པས། །གནོད་སྦྱིན་རྒྱུད་ནས་ཤི་འཕོས་བློ་ཆེན་རྣམས། །མཐོ་རིས་དོང་ཞིང་ཡུན་རིང་དགའ་བར་འགྱུར། །དེ་དག་མ་འོངས་དུས་ན་རྫུ་འཕྲུལ་གྱིས། །ཞིང་དུ་དོང་ཞིང་སྐད་ཅིག་གཅིག་ལ་ཡང ། །བློ་ཆེན་དེ་དག་རྒྱལ་བ་བྱེ་བ་མཆོད། །དེ་དག་བཟོད་མཁྱེན་རྒྱལ་
བ་གདམས་ངག་སྟོན། །དེ་དག་འཇིག་རྟེན་ཕྱོགས་བཅུར་རྫུ་འཕྲུལ་གྱིས། །མཚན་མ་མེད་པར་སྤྱོད་ཅིང་འདོང་འགྱུར་ཏེ། །འཇིག་རྟེན་འདི་དག་སྤྲུལ་པ་འདྲར་ཤེས་ནས། །འཇིག་རྟེན་ཆགས་མེད་མཁས་པ་སྤྱད་པ་སྤྱོད། །དེ་ལྟར་བརྟེན་པས་རྒྱལ་བ་རབ་མཆོད་ནས། །བྱང་ཆུབ་བླ་མེད</font><hr>42-1-49a<br><font size=+2>
དེ་ཡང་ཐོབ་འགྱུར་ཏེ། །དེ་དག་རྣམས་ཀྱི་ཞིང་ནི་མཐའ་ཡས་འགྱུར། །སེམས་ཅན་མཐའ་ཡས་པ་དག་རྣམ་པར་འགྲེལ། །སངས་རྒྱས་མཁྱེན་པ་མཐའ་ཡས་གྲགས་པ་ཅན། །དེ་དག་མིང་ནི་འཇིག་རྟེན་མཁས་ཤེས་བྱ། །ཞི་བའི་བློ་ལྡན་རྒྱལ་བ་དེ་དག་གི་།ཚེ་
ཚད་བསྐལ་པ་སྟོང་ནི་ཚང་བར་འགྱུར། །དེ་དག་ཉན་ཐོས་དགེ་འདུན་འབྱུང་བ་ནི། །རྒྱལ་སྲས་མང་པོ་སྐར་མའི་ཚོགས་སྙེད་དེ། །ཀུན་ཀྱང་བདེ་བས་བསམ་པ་ཐོབ་པར་འགྱུར། །འཇིག་རྟེན་མཁས་པ་རྣམས་ལ་སྡུག་བསྔལ་མེད། །དེ་སྐད་ཐོས་ནས་ལྷར་བཅས་འཇིག་རྟེན་
དག་།རབ་ཏུ་དགའ་བའི་སེམས་ཀྱིས་བྱང་ཆུབ་ཚོལ། །ངོམས་པར་གྱུར་ནས་བརྩོན་འགྲུས་བརྟན་བརྩམས་ཏེ། །ཀུན་ཀྱང་བརྩོན་འགྲུས་སྟོབས་ཀྱིས་བརྟན་པར་གྱུར། །གནོད་སྦྱིན་ལུང་བསྟན་པའི་ལེའུ་སྟེ། བཅུ་གཅིག་པའོ།། །།དེ་ནས་མིའམ་
ཅིའི་རྒྱལ་པོ་ལྗོན་པ་ལ་སོགས་པ་མིའམ་ཅི་བྱེ་བ་ཕྲག་བརྒྱད་ཀྱིས་ལྷ་མ་ཡིན་གྱི་མཆོད་པ་དེ་དག་དང ། །གནོད་སྦྱིན་གྱིས་མཆོད་པའི་བར་དག་ཀྱང་མཐོང ། ལུང་བསྟན་པ་ཡང་ཐོས་ནས་ཤིན་ཏུ་ངོ་མཚར་ཐོབ་པར་གྱུར་ཏེ། ཁྱོད་འདི་ལྟར་སེམས་ཅན་ཡང་མི་དམིགས་ལ་སྲོག་དང ། 
སྐྱེ་བ་པོ་དང ། ཤེད་ལས་སྐྱེས་དང ། ཤེད་བུ་དང ། གང་ཟག་དང ། བདག་དང ། བདག་གི་ཡང་གང་ཡང་མེད་ལ་ཕུང་པོ་དང ། ཁམས་དང ། སྐྱེ་མཆེད་གང་ལ་སེམས་ཅན་ཞེས་གདགས་པའི་ཕུང་པོ་དང ། ཁམས་དང ། སྐྱེ་མཆེད་དེ་དག་ཀྱང་མི་དམིགས། ལས་གང་
ཡོད་པས་རྣམ་པར་སྨིན་པ་གདགས་པར་བྱ་བའི་ལས་དེ་ཡང་མི་དམིགས། བྱང་ཆུབ་ཀྱང་མི་དམིགས། བྱང་ཆུབ་སེམས་དཔའ་ཡང་མི་དམིགས། སངས་རྒྱས་ཀྱང་མི་དམིགས་ལ། འོན་ཀྱང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལུང་བསྟན་པ་མཛད་པ་འདི་ནི་ངོ་མཚར་
རྨད་དོ། །ཅི་ཞིག་ལས་དགོངས་ཏེ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་སངས་རྒྱས་སུ་འགྱུར་རོ་ཞེས་ལུང་བསྟན་པ་མཛད། ཅི་ཞིག་ལས་དགོངས་ཏེ་བྱང་ཆུབ་སེམས་དཔས་ཡང་དག་པར་བསྒྲུབ་པ་དང ། སངས་རྒྱས་ཀྱི་ཆེ་བ་ཉིད་དང ། སེམས་ཅན་ཡོངས་སུ་སྨིན་པ་དང་།


</font><hr>42-1-49b<br><font size=+2>
ཞིང་གི་བཀོད་པ་དང ། དེར་སྐྱེ་ཞིང་ཡོངས་སུ་དག་པ་དང ། བྱང་ཆུབ་སེམས་དཔའ་རྣམས་ཞིང་ནས་ཞིང་དུ་འདོང་བ་དང ། དེ་བཞིན་གཤེགས་པ་མཆོད་པ་དང ། མཆོད་པ་དེའི་མཐུ་དང ། སེམས་ཅན་རྣམ་པར་དགོད་པ་དང ། བསྐལ་པ་འདི་སྙེད་ཅིག་གིས་སངས་རྒྱས་སུ་འགྱུར་
རོ་ཞེས་བྱ་བ་དང ། བསྐལ་པ་འདི་སྙེད་ཅིག་ཏུ་སངས་རྒྱས་བཅོམ་ལྡན་འདས་རྣམས་བཞུགས་པར་འགྱུར་རོ་ཞེས་བྱ་བ་དང ། སངས་རྒྱས་བཅོམ་ལྡན་འདས་དེ་དག་གི་ཉན་ཐོས་འདུས་པ་ནི་འདི་སྙེད་ཅིག་ཏུ་འགྱུར་རོ་ཞེས་བྱ་བ་དང ། དེ་དག་ཡོངས་སུ་མྱ་ངན་ལས་འདས་ནས་དམ་པའི་ཆོས་
བསྐལ་པ་འདི་སྙེད་ཅིག་ཏུ་གནས་པར་འགྱུར་རོ་ཞེས་དེ་བཞིན་གཤེགས་པས་ལུང་བསྟན་པ་མཛད། ཅི་ཞིག་ལས་དགོངས་ཏེ་སེམས་ཅན་རྣམས་ཉེ་བར་ལེན་པ་མེད་པས་མྱ་ངན་ལས་འདའ་བར་འགྱུར་རོ་ཞེས་བཅོམ་ལྡན་འདས་ཀྱིས་དགོངས་པ་མཛད་སྙམ་སྟེ། དེ་ནས་མིའམ་ཅིའི་
རྒྱལ་པོ་ལྗོན་པ་དེ་ལྟ་བུའི་ཐེ་ཚོམ་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། རྒྱལ་བའི་གསུང་ནི་ཐོས་གྱུར་ནས། །ཤེས་རབ་ཆེ་མངའ་བདག་དོགས་སྐྱེས། །སྟོང་པ་ཉིད་དང་ལུང་
བསྟན་པ། །བདེ་གཤེགས་བདག་གིས་དེ་མ་འཚལ། །གསུང་བའི་ཟླ་བ་ཆོས་ཀྱི་དབྱིངས། །འགྱུར་མ་མཆིས་ལ་སྟོང་པ་དང ། །རང་བཞིན་མེད་གསུང་ཇི་ལྟ་བུ། །མཆོད་པ་འདི་ཅི་གང་ཟག་མཆོག་།སྐྱེ་བའང་མ་མཆིས་བྱང་ཆུབ་ཏུ། །སེམས་བསྐྱེད་པ་ནི་ཇི་ལྟ་བུ། །
སྐྱེས་བུ་མཆོག་གིས་བཀའ་སྩལ་པའི། །ལྡེམ་པོ་ངག་དེ་བདག་མ་འཚལ། །མི་དབང་བདག་པོ་ཇི་ལྟར་ན། །འགག་པ་མ་མཆིས་འཆི་འཕོ་གསུང ། །དེ་ནི་ཡང་དག་ལུང་བསྟན་པས། །ཐུབ་པ་བདག་གི་ཐེ་ཚོམ་ཁུམ། །སྒྱུ་མ་འདྲ་ལ་ལྷར་སྐྱེ་ཞེས། །གསུངས་པ་དེ་ནི་ཇི་
ལྟ་བུ། །ལྡེམ་པོར་གསུངས་པ་འདི་དག་ཀྱང ། །ཤཱཀྱ་སེང་གེ་བདག་མ་འཚལ། །གནས་པའང་མཆིས་པ་མ་ལགས་ལ། །དགེ་བཤེས་བསྟེན་གསུང་ཇི་ལྟ་བུ། །ལྡེམ་པོར་གསུངས་པ་འདི་དག་ཀྱང ། །སྐྱེས་བུ་ཁྱུ་མཆོག་བདག་མ་འཚལ། །གཡོ་བའང་མ་མཆིས</font><hr>42-1-50a<br><font size=+2>
བགྱི་བ་རྣམས། །རྐང་གཉིས་མཆོག་གསུང་ཇི་ལྟ་བུ། །ལྡེམ་པོར་གསུངས་པ་འདི་དག་ཀྱང ། །དགྲ་བསལ་བཅོམ་ལྡན་བདག་མ་འཚལ། །རང་བཞིན་སྟོང་སྟེ་སྟོང་པ་ཡང ། །རྟོགས་ཞེས་མགོན་གསུང་ཇི་ལྟ་བུ། །ཐེ་ཚོམ་རྣམ་པ་འདི་འདྲ་སྐྱེས། །
ཤེས་རབ་དཔེ་མེད་བདག་མ་འཚལ། །ཞི་བ་ཡོད་ཅེས་བཀའ་སྩལ་པ། །ཆོས་ཀུན་ཞི་གསུངས་ཇི་ལྟ་བུ། །མཚུངས་མེད་འདི་འདྲའི་ལྡེམ་པོ་དག་།བདག་ལ་རྣམ་པར་བསྟན་དུ་གསོལ། །སྐུ་མཛེས་གྱུར་ཀྱང་ཆོས་ཀྱི་རྣམས། །ནམ་མཁའ་འདྲར་གསུངས་ཇི་ལྟ་བུ། །ཆོས་
ནི་རབ་ཏུ་སྤང་བགྱིས་ན། །མི་མཁས་དམྱལ་ལྟུང་ཇི་ལྟ་བུ། །བརྟན་པ་མཐོ་རིས་འཇིག་རྟེན་དང ། །འགྲོ་བ་གཞན་ཡང་གསུངས་པ་དང ། །ལས་དེ་བགྱིད་པ་མ་མཆིས་ལ། །རང་ལས་ཅན་གསུང་ཇི་ལྟ་བུ། །བཀའ་སྩལ་ཚུལ་འདི་རྣམ་པ་ཡང ། །ཟིལ་གྱིས་མི་ནོན་
བདག་མ་འཚལ། །མགོན་པོ་དེ་ལ་བདག་དོགས་ན། །བདེ་གཤེགས་བདག་གི་ཐེ་ཚོམ་སོལ། །དགེ་བའི་ཚོགས་གྱུར་མ་མཆིས་ལ། །བྱང་ཆུབ་ཡང་དག་བསྒྲུབ་པའང་གསུངས། །དགེ་སྦྱོང་རྒྱལ་པོའི་གསུང་གི་ཚུལ། །དེ་སྐད་བཀའ་སྩལ་བདག་མ་འཚལ། །ཆོས་རྣམས་
ཟད་པ་མེད་གསུངས་ལ། །སྤོང་བྱེད་ལས་ནི་ཟད་བསྟན་པ། །ཚད་མེད་བློ་མངའ་འདི་ལ་ཡང ། །བདག་ནི་ཡིད་གཉིས་ཐེ་ཚོམ་འཚལ། །ཡང་དག་མཐའ་ཡང་བཀའ་སྩལ་ལ། །མ་ནོར་སྦྱིན་པའང་བསྟན་མཛད་པ། །འདི་ཡང་རབ་རིབ་བྲལ་བ་ཡི། །སྤྱན་མངའ་སྡིག་
སྤངས་བསྟན་དུ་གསོལ། །ཐམས་ཅད་གཟིགས་པ་མ་གཏོགས་པར། །གཞན་གྱིས་བདག་གི་ཐེ་ཚོམ་འདི། །སེལ་ནུས་མ་མཆིས་དེ་ལྟ་བས། །བདག་ནི་རྒྱལ་བ་མཆོག་ལ་དད། །དེ་ནས་བཅོམ་ལྡན་འདས་ཀྱིས་མིའམ་ཅིའི་རྒྱལ་པོ་ལྗོན་པས་ཐེ་ཚོམ་དྲིས་པ་འདི་དག་གསན་
ནས་དེ་ལ་ལན་གདབ་པའི་ཕྱིར་མིའམ་ཅིའི་རྒྱལ་པོ་ལྗོན་པ་ལ་ཚིགས་སུ་བཅད་དེ་སླར་བཀའ་སྩལ་པ། སྟོང་པ་ཉིད་དང་ལུང་བསྟན་པ། །བདག་གིས་མ་འཚལ་ཅེས་སྨྲས་པ། །གལ་ཏེ་འགའ་ཞིག་མི་སྟོང་ན། །རྒྱལ་བས་དེ་ལུང་བསྟན་མི་གསུང ། །ཅི་ཕྱིར་ཞེ་ན་འདི་ལྟ</font><hr>42-1-50b<br><font size=+2>
བུར། །རང་གི་རང་བཞིན་གནས་གྱུར་ན། །འགྱུར་བ་མེད་ཅིང་ཐེར་ཟུག་སྟེ། །དེ་ལ་འཕེལ་མེད་འགྲིབ་པ་མེད། །མེ་ལོང་ཤིན་ཏུ་ཡོངས་དག་ལ། །ཇི་ལྟར་རང་བཞིན་མེད་པ་ཡི། །གཟུགས་བརྙན་སྣང་བ་དེ་བཞིན་དུ། །ལྗོན་པ་ཆོས་རྣམས་ཤེས་པར་གྱིས། །ཆོས་ཀྱི་
དབྱིངས་ནི་འགྱུར་མེད་ན། །མཆོད་པའི་ཡན་ལག་འགྱུར་གང་ཞེས། །ཡན་ལག་རྣམས་ལ་བརྟག་བྱོས་ལ། །ལྗོན་པ་མཆོད་པ་འདི་ལ་དཔྱོད། །ཆོས་དབྱིངས་རྣམ་པ་ཐམས་ཅད་དུ། །འགྱུར་མེད་སྐྱེ་བོ་མཁས་པས་རྟོགས། །བྱིས་པ་རྣམས་ནི་འདི་ལ་འཁྲུལ། །བློ་སྦྱངས་
པས་ནི་མེད་པར་ཤེས། །སྐྱེ་བའང་མ་མཆིས་སེམས་ཀྱང་བསྐྱེད། །དེ་ནི་མ་འཚལ་ཅེས་སྨྲས་པ། །སྟོབས་བཅུ་མངའ་བའི་ལྡེམ་པོ་ངག་།གཞན་དུ་མ་སེམས་མཉན་པར་གྱིས། །བྱིས་པ་འཁོར་བར་དགའ་བའི་རྣམས། །འཁོར་བར་མངོན་དགའ་སེམས་ཞེན་པ། །
ལོག་པའི་སེམས་དང་འདུ་ཤེས་ཅན། །འཁོར་བའི་སྡུག་བསྔལ་མྱོང་བར་གྱུར། །དེ་དག་སྔོན་ཅད་མ་ཐོས་པའི། །སེམས་མེད་ཆོས་ནི་ངས་བཤད་ན། །བྱིས་པའི་བློ་དང་ལྡན་པ་རྣམས། །འདི་ལ་ཀུན་ཏུ་རྨོངས་པར་འགྱུར། །བྱང་ཆུབ་གཞོལ་བའི་སེམས་ཉིད་དང ། །
བྱང་ཆུབ་ཕན་ཡོན་ཐོས་གྱུར་ནས། །ཟིལ་གྱིས་མ་ནོན་རང་བྱུང་སེམས། །རྒྱ་ཆེན་དེ་ནི་ཐོབ་པར་འགྱུར། །འགག་པ་མ་མཆིས་འཆི་འཕོ་བ། །དེ་ཡང་མ་འཚལ་ཅེས་སྨྲས་པ། །འཆི་འཕོ་ཡང་དག་ལུང་བསྟན་གྱིས། །གཞན་དུ་མ་སེམས་མཉན་པར་གྱིས། །གང་དག་
རྟག་འཛིན་དེ་དག་ལ། །འདི་ལ་མི་འགྱུར་ཐེར་ཟུག་མེད། །དངོས་པོ་འདི་དག་མི་རྟག་ཅེས། །བདེ་གཤེགས་འཆི་འཕོ་རྣམ་པར་སྟོན། །སྒྱུ་མ་འདྲ་ལ་ལྷར་སྐྱེ་བ། །ཇི་ལྟ་བུ་ཞེས་དོགས་གྱུར་པ། །མཐར་ཕྱིན་མ་གྱུར་སློབ་པ་དང ། །སྐྱེ་བོ་རྣམས་ལ་མཐོ་རིས་བཤད། །
གནས་པའང་ཡོད་པ་མ་ཡིན་ལ། །དགེ་བཤེས་བསྟེན་ཅེས་གང་སྨྲས་པ། །གནས་དང་བྲལ་བར་བྱ་བའི་ཕྱིར། །གནས་པ་མེད་པའི་དགེ་བཤེས་བསྟེན། །གཡོ་བ་མ་མཆིས་བགྱི་བ་རྣམས། །བསྟན་པ་མ་འཚལ་ཞེས་སྨྲས་པ། །ཤིང་རྟའི་ཡན་ལག་འདུས</font><hr>42-1-51a<br><font size=+2>
པ་དང ། །ཤིང་རྟའི་བྱ་བ་གཞན་དུ་རྟོགས། །མི་གང་བདག་ཡོད་ཁས་ལེན་ཅིང ། །བྱ་བའང་བདག་གིས་བྱས་ཟིན་པ། །དེ་དག་ལ་ནི་བྱ་བ་དང ། །གཡོ་བ་མེད་པར་བདེ་གཤེགས་བཤད། །རང་བཞིན་སྟོང་སྟེ་སྟོང་པ་ཡང ། །རྟོགས་ཞེས་ང་ཡིས་གང་
སྨྲས་པ། །བྱིས་པ་ལོག་པའི་བློ་ཅན་རྣམས། །རང་བཞིན་སྟོང་པར་མི་ཤེས་པ། །དེ་དག་རྣམས་ལ་བསྟན་པའི་ཕྱིར། །རང་བཞིན་སྟོང་ཞེས་བདེ་གཤེགས་སྟོན། །ཀུན་ཏུ་རྟོག་པའི་རྟོག་པས་བསྐྱེད། །ཡང་དག་མ་ཡིན་རྟོག་པས་བཅིངས། །ཞི་བ་ཡོད་ཅིང་ཆོས་ཀུན་
ཀྱང ། །ཞི་བར་མཐོང་ཞེས་སྨྲས་པ་ནི། །མི་ཤེས་རྨོངས་པར་གྱུར་རྣམས་ཀྱིས། །ཀུན་ཏུ་རྟོག་ལས་སྲེད་པ་སྐྱེ། །སྐོམ་པས་ཇི་ལྟར་སྨིག་རྒྱུ་ལ། །ཀུན་ཏུ་རྟོག་པས་སྐོམ་པ་སྐྱེ། །མི་མཁས་དེས་ནི་རྟོག་པའི་རྒྱུ། །ཡོད་པ་མིན་ལ་ལོག་པར་བརྟགས། །ཆུ་ཡིན་པར་
ནི་མཐོང་གྱུར་ཀྱང ། །སྨིག་རྒྱུ་ལ་ནི་ཆུ་མེད་དོ། །དེ་བཞིན་ཡོངས་སུ་རྟོག་པས་དཀྲུགས། །སྡུག་པ་མིན་ལ་སྡུག་པར་རྟོག་།བྱིས་པ་འདོད་ཆགས་ལྡན་པ་དག་།སྡུག་དང་ལྡན་པ་རང་བཞིན་གྱིས། །སྡུག་མེད་སྨིག་རྒྱུ་ཆུ་བཞིན་ཏེ། །སྨིག་རྒྱུ་ལ་ནི་ཆུ་མེད་དོ། །དེ་བཞིན་
གཟུགས་ལ་སྡུག་པ་མེད། །གཟུགས་དེ་སྡུག་པ་མ་ཡིན་ན། །བྱིས་པ་ལོག་པའི་འདུ་ཤེས་ཅན། །སྡུག་པར་རྟོག་པས་བཅིངས་པར་གྱུར། །ཆོས་རྣམས་ནམ་མཁའ་འདྲ་བ་དང ། །སྤོང་བ་དམྱལ་ལྟུང་ཞེས་སྨྲས་པ། །མེད་པ་མཐོང་བར་མ་གྱུར་པ། །མི་མཁས་རྣམས་
ནི་སྐྲག་པར་འགྱུར། །རང་བཞིན་ངོ་བོ་ཉིད་སྟོང་ན། །བདག་ཞེན་དུས་ནི་མི་ཤེས་པ། །དེ་དག་སྟོང་ཞེས་ཐོས་གྱུར་ན། །བདག་མེད་འགྱུར་ཞེས་སྐྲག་པ་སྐྱེ། །དེ་དག་བདག་ཏུ་མངོན་ཞེན་ཏེ། །ནམ་མཁའ་ལ་ནི་མདུད་བོར་ནས། །སྟོང་པ་གྱ་ནོམ་སྤོང་བྱེད་དེ། །མི་མཁས་
སེམས་དམྱལ་ཆེན་པོར་ལྟུང ། །མཐོ་རིས་འཇིག་རྟེན་ངས་བསྟན་དང ། །སྐྱེ་བོའི་འགྲོ་རྒྱུད་གཞན་དག་དང ། །ལས་ཀྱང་ངས་ནི་བསྟན་བྱས་ཏེ། །བྱེད་པ་པོ་ནི་རབ་ཏུ་བཀག་།ཡང་དག་ཏུ་ནི་འགྲོ་བ་དག་།རྨི་འདྲར་བཤད་པར་ཤེས་པར་གྱིས། །རྨི་ལམ་གང་ལའང་དངོས</font><hr>42-1-51b<br><font size=+2>
པོ་མེད། །ལོག་པའི་བློ་ལྡན་མངོན་པར་ཞེན། །ངས་ནི་ལས་ཀྱི་རྣམ་པ་བསྟན། །བྱེད་པོ་ཕྱོགས་བཅུ་རྣམས་ན་མེད། །ཤིང་རྣམས་རླུང་གིས་བསྒུལ་བ་ལས། །མེ་འབྱུང་འགྱུར་བ་ཇི་བཞིན་ནོ། །བདག་ཅག་མེ་འདི་བསྐྱེད་བྱ་ཞེས། །རླུང་དང་ཤིང་ལ་སེམས་པ་མེད། །
འོན་ཀྱང་མེ་ནི་འབྱུང་བ་ལྟར། །ལས་ཀྱི་བྱེད་པོ་དེ་བཞིན་ནོ། །བསོད་ནམས་ཚོགས་ནི་ཡོད་མིན་ལ། །བྱང་ཆུབ་ཡང་དག་བསྒྲུབ་པ་དང ། །ལེགས་སྤྱད་ཡོད་ཅེས་ཟེར་བ་ནི། །དེ་ཚུལ་ཡང་དག་མཉན་པར་བྱོས། །མི་ཡི་ཚེ་ཚད་ལོ་བརྒྱ་སྟེ། །དེ་སྲིད་འཚོ་ཞེས་
བརྗོད་མོད་ཀྱི། །ལོ་ལ་ཕུང་པོར་སྤུངས་པ་མེད། །སྒྲུབ་པ་དེ་ཡང་དེ་དང་མཚུངས། །ཟད་པ་མེད་ཅེས་གང་སྨྲས་དང ། །ལས་ཟད་ཅེས་ནི་ངས་སྨྲས་པ། །སྟོང་པའི་ཚུལ་དུ་ཟད་པ་མེད། །ཐ་སྙད་ཚུལ་དུ་ཟད་པར་བསྟན། །ཡང་དག་མཐའ་ནི་ངས་བཤད་པ། །
ཕྱིན་ཅི་ལོག་དེའང་ཡང་དག་མཐའ། །ལོག་པའི་བློ་ཅན་བྱིས་པ་རྣམས། །ཡང་དག་མཐའ་ནི་མི་ཤེས་སོ། །མཚན་ཉིད་ཐམས་ཅད་གཅིག་ཉིད་དེ། །མཚན་ཉིད་མེད་པར་ཤེས་པ་ཡི། །ཡེ་ཤེས་ལམ་དུ་ཞུགས་རྣམས་ཀྱི། །ངེས་པ་ལྗོན་པ་ཁྱོད་ཉོན་ཅིག་།ཡི་གེ་
གཅིག་གིས་འཇུག་པ་ཡི། །བྱང་ཆུབ་བློ་ལྡན་རྣམས་ལ་བསྟན། །ཆོས་རྣམས་ཐམས་ཅད་མ་བྱས་པ། ། ཡི་སྒོ་ཡི་གཟུངས་སུ་བསྟན། །དེ་ལྟར་སྤྱོད་པ་བྱེད་རྣམས་ལ། །མཚན་ཉིད་མཐའ་ཡས་ངས་བསྟན་ཏེ། །འདི་འདྲའི་ཚུལ་ལ་འཇུག་པ་ནི། ། ཡི་སྒོ་ཡི་གཟུངས་
སུ་བསྟན། །ཆོས་རྣམས་ཐམས་ཅད་འགག་མེད་པ། ། ཡིས་ཆོས་ལ་འཇུག་པར་བསྟན། ། ཡི་སྒོ་ཡི་གཟུངས་བསྟན་པ། །དེ་ཡང་ལྗོན་པས་ཤེས་པར་གྱིས། །ཆོས་རྣམས་རྣམ་པར་རྟོག་མེད་པ། །དེ་ཡང་ཆོས་ལ་འཇུག་པར་གསུངས། །ཆོས་ཀུན་འགྱུར་བ་མེད་
པ་ཡང ། ། ནི་ཆོས་ཀུན་སྒོ་མོར་བསྟན། ། ཡི་སྒོ་ཡི་གཟུངས་འདི་དག་།ལྗོན་པ་འདི་ལྟར་ཤེས་པར་གྱིས། །མི་ཟད་པ་དང་ཟད་སྨྲས་པ། །ཆོས་ཀུན་མི་ཟད་བརྗོད་བྱ་སྟེ། །སྟོབས་བཅུ་མངའ་བ་ཐམས་ཅད་ཀྱིས། །མི་ཟད་སྒོ་ཡི་གཟུངས་སུ་བསྟན། །


</font><hr>42-1-52a<br><font size=+2>
ཆོས་རྣམས་ཀུན་ལ་སྒོ་མེད་དེ། །དེ་དག་མེད་པས་སྒོ་མི་འབྱུང ། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་འཇུག་པར་བྱ། །ཆོས་ཀུན་བསམ་གྱིས་མི་ཁྱབ་ཅེས། །ཡང་དག་ཇི་བཞིན་བདེ་གཤེགས་བསྟན། ། ཡི་སྒོ་ཡི་གཟུངས་
བསྟན་པ། །འདི་ཡང་ལྗོན་པས་ཤེས་པར་གྱིས། །ཆོས་ཀུན་ལུས་མེད་བྱང་ཆུབ་ཅེས། །བློ་ལྡན་རྣམས་ལ་ངས་བསྟན་པ། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་འཇུག་པར་བྱ། །ཆོས་རྣམས་འོང་བ་མེད་པ་སྟེ། །མེད་པས་དེ་དག་འོང་བའང་
མེད། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་འཇུག་པར་བྱ། །ཆོས་རྣམས་གདགས་པ་མེད་པ་སྟེ། །མེད་པས་དེ་དག་གདགས་པ་མེད། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་འཇུག་པར་བྱ། །ཆོས་རྣམས་རང་བཞིན་མེད་པ་སྟེ། །
མེད་པས་དེ་དག་རང་བཞིན་མེད། །འདི་ཡང་གཟུངས་ཀྱི་སྒོ་ཡིན་ཏེ། །བདེ་བར་གཤེགས་པས་གཟུངས་སུ་བསྟན། །གཟུངས་ཀྱི་སྒོ་མོ་ང་ལས་ཉོན། །ཆོས་ཀུན་ཡིད་ལ་བྱ་བ་མེད། །འདི་ཡང་གཟུངས་ཀྱི་སྒོ་ཡིན་སྟེ། །བདེ་བར་གཤེགས་པས་གཟུངས་སུ་
བསྟན། །མེད་ཕྱིར་ཆོས་ཀུན་སྒྲིབ་མེད་ཅེས། །དེ་བཞིན་གཤེགས་པས་བསྟན་མཛད་པ། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་ཤེས་པར་བྱ། །ཆོས་ཀུན་ཐོགས་པ་མེད་པ་སྟེ། །ཐོགས་པར་བྱ་བ་དེ་མི་དམིགས། །འདི་ཡང་གཟུངས་ཀྱི་
སྒོ་ཡིན་ཏེ། ། ལ་བརྟེན་ནས་འཇུག་པར་བྱ། །ཆོས་རྣམས་ཐམས་ཅད་མ་སྐྱེས་པར། །མཁས་པས་མཚན་ཉིད་གཅིག་ཤེས་བྱ། །ཆོས་རྣམས་གང་དག་མ་སྐྱེས་པ། །དེ་དག་མིང་མེད་ཤེས་པར་བྱ། །ཆོས་རྣམས་ཡང་དག་མ་ཡིན་ཏེ། །དེ་དག་མ་ལུས་རང་
བཞིན་མེད། །འདི་ཡང་གཟུངས་ཀྱི་སྒོ་ཡིན་ཏེ། ། ལ་བརྟེན་ནས་ཤེས་པར་བྱ། །གང་དག་མ་སྐྱེས་མ་བྱུང་བ། །དེ་དག་མཐོང་མེད་བསྟན་པར་བྱ། །ལྟ་བ་པོ་ནི་མེད་པ་དང ། །དེ་དག་རྣམས་ཀྱང་མེད་ཕྱིར་རོ། །ཆོས་ཀུན་མཉམ་མེད་དེ་བས་ན། །མཚན་ཉིད་གཅིག་ཅིང</font><hr>42-1-52b<br><font size=+2>
མཚན་གཞི་མེད། །ནམ་མཁའ་དང་ནི་འདྲ་བ་སྟེ། །ཆོས་ཀུན་ཡོད་པ་མ་ཡིན་ནོ། །དེ་ལྟར་ལྷག་མེད་ཆད་པ་མེད། །མཉམ་གཞག་མེད་ཅིང་གཉིས་སུ་མེད། །གདུང་མེད་བསིལ་མེད་ཚ་བའང་མེད། །བལྟ་བའི་ལམ་མིན་མེད་ཕྱིར་རོ། །དྲང་པོ་མ་ཡིན་ཡོན་པོ་མིན། །མུན་པ་མ་ཡིན་སྣང་བ་མིན། །
མཐོང་བ་མེད་ཅིང་ཐོས་མེད་དེ། །མེད་པས་གཟུངས་སུ་ཤེས་པར་གྱིས། །གཡོ་མེད་དྲང་པོའང་མེད་པ་སྟེ། །ཆོས་རྣམས་གསལ་མེད་གཡོ་བ་འང་མེད། །འཁྲུག་པ་མེད་ཅིང་ཁྲོ་བ་མེད། །ཅི་ཡང་མི་བྱེད་ཉེར་ཞི་མེད། །སྒྱེལ་བ་མེད་ཅིང་གནས་ཀྱང་མེད། །འགྲོ་མེད་ལྡོག་
མེད་འགྲོ་སེམས་མེད། །ཉལ་བ་མེད་ཅིང་མི་ཉལ་མེད། །སད་པ་མེད་པར་ཤེས་པར་གྱིས། །མིག་ཅན་མ་ཡིན་ལོང་བ་མིན། །ལྟ་བ་མ་ཡིན་མུན་བསྒྲིབས་མིན། །སྦས་པ་མ་ཡིན་བཞག་པ་མིན། །དུལ་བ་མ་ཡིན་མ་དུལ་མིན། །རྒོད་པ་མ་ཡིན་ཞི་བ་མིན། །
འཁོར་མིན་མྱ་ངན་འདས་པ་མིན། །བདེན་མིན་བརྫུན་མིན་དེ་ལྟ་བུར། །རྒྱལ་བའི་སྤྱོད་ཡུལ་ཤེས་པར་གྱིས། །འཇིག་རྟེན་གདུལ་བའི་དོན་ཕྱིར་གྱི། །འདི་ལ་ཐེ་ཚོམ་གང་ཡང་མེད། །གང་གཅད་བྱ་བའི་ཐེ་ཚོམ་དེ། །དམ་པའི་དོན་དུ་བྱུང་བ་མེད། །དེ་ནས་མིའམ་ཅིའི་རྒྱལ་
པོ་ལྗོན་པས་བཅོམ་ལྡན་འདས་ལ་ཞུས་པ་ལུང་བསྟན་པ་དང ། གཟུངས་ངེས་པར་བསྟན་པས་ཡོངས་སུ་ཚིམ་པར་གྱུར་ནས། །བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། །ཁང་པ་བརྩེགས་པ་ཤིང་ལ་རྟེན་པ་དང ། པད་མ་ལ་རྟེན་པ་དང ། རི་ལ་རྟེན་པ་རིན་
པོ་ཆེ་སྣ་བདུན་གྱི་རང་བཞིན་ཅན། རིན་པོ་ཆེའི་གདུགས་ཀྱིས་མཛེས་པར་བྱས་པ། གདུགས་ཀྱི་ལྡ་ལྡིས་མཛེས་པར་བྱས་པ། རྒྱལ་མཚན་དང་བ་དན་གྱིས་བརྒྱན་པ། བླ་རེ་དང་ལྡ་ལྡིས་བརྒྱན་པ་བྱེ་བ་ཕྲག་བརྒྱད་མངོན་པར་སྤྲུལ་ཏེ། མིའམ་ཅིའི་རོལ་མོ་སིལ་སྙན་བྱེ་བ་
ཕྲག་བརྒྱད་ཀྱང་མངོན་པར་སྤྲུལ་ནས་རི་སྤོས་ཀྱི་ངད་ལྡང་ལས་སྐྱེས་པ་དང ། ཐང་ལས་སྐྱེས་པ་དང ། ཆུ་ལས་སྐྱེས་པའི་མེ་ཏོག་ཐམས་ཅད་ཀྱིས་ཀྱང་བཅོམ་ལྡན་འདས་ལ་མཆོད་པ་བྱས་ནས། དེ་མིའམ་ཅིའི་ཚོགས་དང་ལྷན་ཅིག་ཏུ་ཁང་པ་བརྩེགས་པ་བྱེ་བ་ཕྲག་བརྒྱད་པོ་དེ་དག་ཏུ་འཁོད</font><hr>42-1-53a<br><font size=+2>
ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ཐང་ལས་སྐྱེས་པ་དང ། ཆུ་ལས་སྐྱེས་པའི་མེ་ཏོག་དེ་དག་གིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །དེ་ནས་ཁང་པ་བརྩེགས་པ་དེ་དག་ལས་བབས་ཏེ་རྐང་པས་དོང་ནས་
བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཐལ་མོ་སྦྱར་ཏེ། བཅོམ་ལྡན་འདས་ལ་མིག་མི་འཛུམས་པར་ལྟ་ཞིང་རྣམ་པས་སངས་རྒྱས་ཀྱི་ཡོན་ཏན་རྗེས་སུ་དྲན་པར་བྱེད་ཅིང་ཕྱོགས་གཅིག་ཏུ་འཁོད་པར་གྱུར་ཏོ། །དེ་ནས་བཅོམ་
ལྡན་འདས་ཀྱིས་མིའམ་ཅིའི་རྒྱལ་པོ་ལྗོན་པ་འཁོར་དང་བཅས་པའི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས། བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བདེ་གཤེགས་དྲི་བྲལ་སྤྱན་མངའ་བ། །རྒྱུ་མ་མཆིས་པར་
འཛུམ་མི་མཛད། །ལྷ་མིས་མཆོད་པ་ཡང་དག་ཏུ། །འཛུམ་མཛད་རྒྱུ་དེ་བཀའ་སྩལ་གསོལ། །ཐམས་ཅད་མཁྱེན་པ་འཛུམ་མཛད་པ། །འཁོར་གྱིས་མཐོང་ནས་ཐེ་ཚོམ་འཚལ། །ཟླ་བ་ཚེས་ལ་མི་བཞིན་དུ། །སྨྲ་བའི་ཟླ་བའི་ཞལ་དུ་ལྟ། །བདེ་གཤེགས་མཛེས་པ་དེང་སུ་ཞིག་།
གཉིས་མེད་ཆོས་ལ་ཤེས་མཆོག་སྐྱེས། །བདག་ནི་ཐེ་ཚོམ་འཚལ་བར་གྱུར། །མི་མཆོག་དམ་པ་ཐེ་ཚོམ་སོལ། །བདེ་གཤེགས་གང་གིས་ཆོས་ཉིད་ལ། །དད་པ་ཐོབ་ནས་བཅོམ་ལྡན་འདས། །ཇི་ལྟར་འཛུམ་པ་མཛད་པར་གྱུར། །སྨྲ་མཆོག་བདག་གི་ཐེ་ཚོམ་ཁུམ། །
ཐམས་ཅད་ལྡན་པའི་འཁོར་འདི་ཡིས། །བཅོམ་ལྡན་བསྟན་ཐོས་ཡིད་དགའ་ཞིང ། །ཐེ་ཚོམ་མ་མཆིས་སོམ་ཉི་ཆད། །ཇི་ལྟར་བསྟན་བཞིན་གནས་པར་འགྱུར། །དེ་ལྟར་རྐང་གཉིས་རྣམས་ཀྱི་མཆོག་།འགྲོ་ལ་ཐུགས་བརྩེ་མཛད་པ་དང ། །ཐེ་ཚོམ་བཅད་སླད་ལྗོན་པ་དང ། །
མི་ཅི་རྣམས་ཀྱི་ལུང་བསྟན་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། སྐྱེ་བོ་ཚོགས་ཆེན་རྣམས་ནང་དུ། །སངས་རྒྱས་ཡོན་ཏན་སྟེན་འགྱུར་བ། །ལྗོན་པའི་ལུང་བསྟན་གང་དྲིས་པ། །རྟ་ཐུལ་ཁྱོད་ཀྱིས་ལེགས་པར་དྲིས། །


</font><hr>42-1-53b<br><font size=+2>
ཡེ་ཤེས་མཐོང་བ་སྒྲིབ་མེད་པ། །བདེ་གཤེགས་ཡེ་ཤེས་ངོ་མཚར་ཅན། །དེ་ཁྱོད་དང་བའི་ཡིད་བྱོས་ལ། །སྐྱོ་མེད་ཡིད་ཀྱིས་ང་ལ་ཉོན། །འཇིག་རྟེན་ཕན་དང་བདེ་བའི་ཕྱིར། །ལྗོན་པས་ཐེ་ཚོམ་གང་དྲིས་པ། །དེ་ཡི་འབྲས་བུ་བརྗོད་པར་བྱས། །ཐེ་ཚོམ་གཅད་པ་ང་ལས་
ཉོན། །ལྗོན་པ་ལ་སོགས་མིའམ་ཅི། །བྱེ་བ་ཕྲག་བརྒྱད་འདིར་ལྷགས་པ། །དེ་དག་ང་ལ་མཆོད་བྱས་ནས། །འདི་ནས་ཤི་འཕོས་མཐོ་རིས་འདོང ། །བསྐལ་པ་བྱེ་བ་དགུ་བཅུ་དེར། །ལྷ་མིའི་ནང་དུ་འཁོར་བར་འགྱུར། །མངོན་པར་ཤེས་པ་ལྔ་བསྒོམས་ནས། །སེམས་
ལ་དབང་སྒྱུར་དབང་ལྡན་འགྱུར། །མི་ཡི་སེང་གེ་དེ་དག་གིས། །སངས་རྒྱས་ཞིང་ཕྲག་ཁྲག་ཁྲིག་ཏུ། །སྤྲུལ་བཀྱེ་རང་ནི་ལྷ་གནས་ན། །བསམ་གཏན་དགའ་བའི་བདེ་བ་མྱོང ། །བསྐལ་པ་བྱེ་བ་དགུ་བཅུར་ཡང ། །དེ་དག་ལྷ་མིར་འཁོར་འཁོར་ནས། །རང་རང་ཞིང་རྣམས་
སྣ་ཚོགས་སུ། །བྱང་ཆུབ་རྣམ་པར་འཚང་རྒྱར་འགྱུར། །རྟག་ཏུ་སྣང་བའི་བསྐལ་པ་ལ། །མི་ཡི་སེང་གེ་འཇིག་རྟེན་མགོན། །ཆགས་མེད་ཡེ་ཤེས་མཐོང་དཔག་ཡས། །སྟོབས་བཅུ་གཟི་བརྗིད་མཐའ་ཡས་འགྱུར། །དེ་དག་ཞིང་དུ་སེམས་ཅན་གང ། །ཡོངས་སུ་མ་སྨིན་འགའ་
མི་སྐྱེ། །ཉན་ཐོས་ཐེག་པས་གང་བྱུང་བ། །ཀུན་ཀྱང་སྲིད་པ་ཐ་མ་པ། །མི་ཡི་སེང་གེའི་ཞིང་དེར་ནི། །བྱང་ཆུབ་སེམས་དཔའ་གང་སྐྱེ་བ། །དེ་དག་ཚེ་གཅིག་ཐོགས་པ་སྟེ། །མི་མཆོག་བྱང་ཆུབ་ཐོབ་པར་འགྱུར། །གང་དག་གཙོ་བོར་གྱུར་པ་རྣམས། །བདག་ཅག་དཔག་
མེད་སངས་རྒྱས་ཞིང ། །ཡོངས་སུ་སྦྱང་བར་བྱའོ་ཞེས། །དེ་འདྲའི་བསམ་པས་རབ་ཏུ་ཞུགས། །སེམས་ཅན་རླབས་ཆེན་དེ་དག་ནི། །སྨོན་ལམ་རྒྱ་ཆེན་ཡུན་རིང་བཏབ། །དེ་དག་འདི་ནས་ཤི་འཕོས་ནས། །བསམ་པས་རང་ཞིང་རྣམ་པར་སྦྱོང ། །ཉོན་མོངས་འཇོམས་པ་དེ་
དག་གི་།ཞིང་གི་བཀོད་པར་འགྱུར་བ་ནི། །དགའ་ལྡན་གནས་ཀྱི་ལོངས་སྤྱོད་རྣམས། །ངན་སོང་ཀུན་ཀྱང་ཡོངས་སུ་དག་།དེ་དག་ཞིང་དུ་རྣམ་ཀུན་ཏུ། །མི་ཁོམ་གང་ཡང་འབྱུང་མི་འགྱུར། །ཞིང་རྣམས་ཡོངས་སྦྱངས་དེ་དག་ནི། །སེམས་ཅན་རྣམས་ཀྱང་བདེ་བར་འདྲེན། །


</font><hr>42-1-54a<br><font size=+2>
དེ་ལྟར་འཇིག་རྟེན་མགོན་པོ་ཡིས། །མི་ཅི་རྣམས་ཀྱི་ལུང་བསྟན་བཤད། །ལུང་བསྟན་དེ་ཐོས་འཁོར་གྱི་རྣམས། །ཀུན་ཀྱང་ཡི་ནི་རངས་པར་གྱུར། །མིའམ་ཅི་ལུང་བསྟན་པའི་ལེའུ་སྟེ་བཅུ་གཉིས་པའོ།། །།དེ་ནས་ལྷ་ཕྲེང་ལྡན་
གླང་པོ་ཅན་བརྒྱད་ཁྲིས་ལྷ་མ་ཡིན་རྣམས་ནས་མིའམ་ཅིའི་བར་དག་གིས་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་སངས་རྒྱས་ཀྱི་ཆོས་རྣམས་ལ་མོས་ཤིང་བཅོམ་ལྡན་འདས་
ལ་མཆོད་པའི་ཕྱིར་བརྩོན་པར་གྱུར་ཏེ། དེ་དག་གིས་སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་ཀྱི་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་མེ་ཏོག་མན་དཱ་ར་བས་པུས་ནུབ་ཙམ་དུ་གང་བར་བྱས་སོ། །དེ་ནས་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཚིགས་
སུ་བཅད་པ་དག་གིས་མངོན་པར་བསྟོད་པ། ཞི་བའི་དབང་པོ་འཛུམ་པའི་ཞལ། །སྲོག་ཆགས་ཀུན་ལ་ཐུགས་བརྩེ་བ། །བདེ་བར་གཤེགས་པ་ཐུགས་རྗེ་ཅན། །འཇིག་རྟེན་བདག་པོ་མི་ཡི་སྟག་།སངས་རྒྱས་ཆོས་ལ་མོས་པ་ཡི། །འཁོར་འདི་ཇི་སྲིད་འདིར་གནས་པར། །
ཞབས་མཆོག་མཛེས་ཤིང་དགའ་ལྡན་པ། །ཐུགས་རྗེ་ཅན་ལ་མགོས་ཕྱག་འཚལ། །ཇི་ལྟར་དགུང་ཟླ་ཉ་བའི་ཚེ། །མི་རྣམས་ཟླ་བ་ཕྱག་འཚལ་བ། །དེ་བཞིན་ལྷ་ཚོགས་འདི་རྣམས་ཀྱང ། །བཅོམ་ལྡན་འདས་ཀྱི་ཞལ་དུ་ལྟ། །དཔག་ཏུ་མེད་པའི་དགེ་སྤྱད་པ། །དཔག་
ཡས་ཡེ་ཤེས་ཕུང་པོ་ལྡན། །གཟི་བརྗིད་དཔག་ཡས་ཕུང་པོ་ཅན། །བློ་མཆོག་ཁྱོད་ལ་མགོས་ཕྱག་འཚལ། །སྟོབས་བཅུ་མངའ་ཞིང་དཔལ་སྟུག་པ། །བདེན་བཞི་མི་བསྙེངས་དྲི་གསུམ་སེལ། །རྒྱལ་བའི་བཅཝ་བརྒྱད་ཆོས་དང་ལྡན། །ཐེ་ཚོམ་མི་མངའ་སྨྲ་བའི་མཆོག་།སུམ་
ཅུ་རྩ་གཉིས་མཚན་མངའ་ཞིང ། །དཔེ་བྱད་བཟང་པོ་བརྒྱད་ཅུ་ལྡན། །དབང་པོའི་རྒྱལ་མཚན་མཚུངས་མེད་ཐུགས། །བདེ་གཤེགས་ཁྱོད་ལ་ཕྱག་འཚལ་ལོ། །ཚུལ་ཁྲིམས་སྟོབས་ཀྱི་མཐར་ཕྱིན་པ། །ཏིང་འཛིན་སྟོབས་གནས་མི་བསྐྱོད་པ། །ཡེ་ཤེས་སྟོབས་ཀྱི་མཚོན་ཆ</font><hr>42-1-54b<br><font size=+2>
ཅན། །བདུད་སྟོབས་བཅོམ་ཐུབ་རྒྱལ་བ་ལགས། །ཡེ་ཤེས་སྟོབས་མཆོག་རྒྱས་གྱུར་པ། །སེར་སྣ་མི་མངའ་ཉན་ཐོས་བཏུལ། །ཞི་བའི་ཐུགས་ཀྱིས་སྤྱོད་མཛད་ཅིང ། །ལྷ་དང་བཅས་པའི་འཇིག་རྟེན་འདུལ། །སྐྱེས་བུ་སེང་གེ་བདེ་གཤེགས་ཁྱོད། །གཏི་མུག་ཞི་
བགྱིད་ཆོས་བརྙེས་པ། །བདག་ཅག་རྣམས་ཀྱང་སྟོབས་བཅུ་ཡི། །ཆོས་རྣམས་འདིར་ནི་ཐོབ་པར་ཤོག་།ཇི་ལྟར་ཐུབ་ཁྱོད་སེམས་ཅན་གྱི། །བསམ་མཁྱེན་དང་མཛད་དེ་བཞིན་དུ། །འཇིག་རྟེན་སྣང་མཛད་བདག་ཅག་ཀྱང ། །ལྷ་མིར་བཅས་པའི་འགྲོ་དང་བགྱི། །དེ་
ལྟར་འགྲོ་བའི་དོན་སླད་དུ། །སྙིང་བརྩེར་ཉེ་བར་བཟུང་ནས་ནི། །འགྲོ་བ་འཁོར་བའི་མཚོར་བྱིང་བ། །སྲིད་པའི་རྒྱུད་ལས་བསྒྲལ་བར་བགྱི། །བདག་ཅག་ལྷར་བཅས་འཇིག་རྟེན་གྱི། །འདྲེན་དང་རབ་ཏུ་འདྲེན་གྱུར་ཅིག་།འགྲོ་བ་སྡུག་བསྔལ་བརྒྱས་ཉེན་པ། །སྲིད་པའི་
རྒྱུད་ལས་དགྲོལ་བར་བགྱི། །དེ་ནས་བཅོམ་ལྡན་འདས་ཀྱིས་ལྷ་ཕྲེང་ལྡན་གླང་པོ་ཅན་རྣམས་ཀྱི་བསམ་པ་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བདེ་གཤེགས་རྣམ་པར་འདྲེན་
པ་པོ། །རྒྱུ་མ་མཆིས་པར་འཛུམ་མི་མཛད། །སྟོབས་བཅུ་ཁྱོད་ནི་འཛུམ་མཛད་པའི། །རྒྱུ་གང་ལགས་པ་བཀའ་སྩལ་གསོལ། །རྒྱལ་བའི་ཞལ་ནས་འཛུམ་མཛད་པ། །འགྲོ་བ་དང་བགྱིས་བྱུང་མཐོང་ནས། །འཁོར་ཀུན་ཐེ་ཚོམ་འཚལ་གྱུར་ཏེ། །འཛུམ་པའི་དོན་ནི་
ཉན་པར་འཚལ། །དོན་ཆེན་འཛུམ་པ་མཛད་པའི་དོན། །བཀའ་སྩོལ་བཀའ་སྩོལ་འདྲེན་པའི་མཆོག་།དགེ་སྦྱོང་རྣམས་ཀྱི་རྒྱལ་པོ་ཁྱོད། །ཐེ་ཚོམ་ཆད་འགྱུར་བཀའ་སྩལ་གསོལ། །གང་གིས་རྒྱལ་བ་མཉེས་པར་བགྱིས། །གང་གིས་དེང་མཆོག་བླ་མེད་བགྱིས། །སུ་
ཞིག་དེ་རིང་གཏིང་ཐོབ་གྱུར། །བདེ་གཤེགས་བདག་གི་ཐེ་ཚོམ་ཁུམ། །དེ་རིང་གང་གིས་བདུད་ཀྱི་གནས། །དཀྲུགས་གཡེངས་ཀུན་ཏུ་འཁྲུགས་པར་བགྱིས། །དེང་སུས་ལྷ་གནས་ཐམས་ཅད་ཀྱང ། །རབ་ཏུ་དགའ་ཡིད་ལྡན་པར་བགྱིས། །རྒྱལ་བ་ཐུབ་པ་དེ་ལུང་སྟོན། །འགྲོ་བའི་ཐེ</font><hr>42-1-55a<br><font size=+2>
ཚོམ་མྱུར་དུ་ཁུམ། །དེ་ཐོས་བདེ་གཤེགས་འཁོར་གྱི་རྣམས། །ཀུན་ཀྱང་རབ་ཏུ་ཡིད་དགའ་འགྱུར། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་ཚེ་དང་ལྡན་པ་རྟ་ཐུལ་ལ་སླར་བཀའ་སྩལ་པ། ཕྲེང་ལྡན་གླང་པོ་ཅན་ལྷ་ཡི། །ལུང་བསྟན་རྟ་ཐུལ་ཁྱོད་
དྲིས་པས། །དེས་ན་འགྲོ་བ་མང་པོ་ཡི། །དོན་ཆེན་ཤིན་ཏུ་དེང་བྱས་འགྱུར། །སྟོབས་བཅུ་རྒྱལ་བ་མ་དྲིས་པར། །སྲས་མཆོག་བྱང་ཆུབ་ལུང་མི་སྟོན། །དེ་ནི་འགྲོ་བ་མང་དོན་དུ། །དེ་རིང་ཁྱོད་ཀྱིས་རྒྱལ་ལ་ཞུས། །ཕྲེང་ལྡན་གླང་པོ་ལྷ་ཚོགས་ཀྱིས། །ང་ལ་སེམས་
དང་ང་མཆོད་པས། །བསྐལ་པ་གྲངས་མེད་འདས་འོག་ཏུ། །ཉོན་མོངས་ཕམ་བྱས་རྒྱལ་བར་འགྱུར། །དེ་དག་འདི་ནས་ཤི་འཕོས་ནས། །འཐུན་པར་མི་ཡི་ནང་སྐྱེས་ཏེ། །རྒྱལ་བ་བྱེ་བ་དཔག་མེད་ལ། །མེ་ཏོག་མཆོག་གིས་མཆོད་པར་འགྱུར། །ཀུན་ཏུ་བདེ་བར་གཤེགས་
ཀྱི་སེམས། །སྐྱེད་པར་འགྱུར་ཞིང་འཕེལ་བྱེད་འགྱུར། །རང་བྱུང་མི་ཡི་སེང་གེ་ལ། །ཚིགས་སུ་བཅད་པས་བསྟོད་པར་འགྱུར། །མ་འོངས་དུས་ན་འདི་ཀུན་གྱིས། །རྒྱལ་བ་ཁྲག་ཁྲིག་དཔག་ཡས་མང ། །མེ་ཏོག་གིས་མཆོད་ཚིགས་བཅད་ཀྱིས། །མི་མཆོག་རྣམས་ལ་
བསྟོད་བྱས་ཏེ། །དེ་དག་བདེ་གཤེགས་རྣམས་མཆོད་ཅིང ། །མཐུ་བོ་ཆེ་ཡི་སྐུ་བསྟོད་ནས། །རབ་ཏུ་དགའ་བའི་བསྐལ་པ་ལ། །རྣམ་པར་འདྲེན་པར་འཇིག་རྟེན་འབྱུང ། །གྲགས་པ་མ་སྨད་ནགས་རྒྱུ་བ། །བརྒྱད་ཁྲི་པོ་རྣམས་དེ་དག་ཀུན། །བསྐལ་པ་གཅིག་ལ་བདེ་
གཤེགས་འགྱུར། །མེ་ཏོག་རྒྱལ་མཚན་ལྡན་ཞེས་བྱ། །དེ་ན་དམྱལ་དང་དུད་འགྲོ་དང ། །ངན་སོང་གཤིན་རྗེའི་འཇིག་རྟེན་མེད། །ཞིང་དེ་ན་ནི་ལྷ་མིན་མེད། །མི་ཁོམ་ཐམས་ཅད་རབ་ཏུ་བཅོམ། །ཕྲེང་ལྡན་གླང་པོ་ཅན་ལྷ་ཡི། །ལོངས་སྤྱོད་སུམ་ཅུ་རྩ་གསུམ་གྱི། །
ཅི་འདྲ་བ་ནི་དེ་འདྲར་འགྱུར། །འགྲོ་བའི་ཚེ་ཚད་དཔག་ཏུ་མེད། །དེ་ཚེ་མི་དགེ་སྒྲ་མི་གྲག་།མི་དགེ་བྱེད་པ་སྨོས་ཅི་དགོས། །དེ་ན་རྣམ་འདྲེན་མཆོག་རྣམས་ཀྱི། །སྐྱེ་བོ་རྣམས་ཀྱང་ཆོས་ཅན་འགྱུར། །སྲོག་ཆགས་བྱེ་བ་ཁྲག་ཁྲིག་ཕྲག་།གང་གཱའི་བྱེ་མ་རབ</font><hr>42-1-55b<br><font size=+2>
མང་སྙེད། །གྲོལ་བར་བྱེད་འགྱུར་སྟོབས་བཅུ་རྣམས། །གནས་པ་མེད་པའི་ཆོས་ཀྱང་སྟོན། །གྲགས་པ་མ་སྨད་དེ་དག་གི་།རིང་བསྲེལ་དག་ཀྱང་རྒྱས་པར་འགྱུར། །དེ་དག་རྣམས་ཀྱི་རིང་བསྲེལ་ལའང ། །རྒྱལ་བའི་སྐུ་མང་འབྱུང་བར་འགྱུར། །གྲགས་པ་མཐའ་
ཡས་ལྡན་རྣམས་ཀྱི། །རིང་བསྲེལ་ཆོ་འཕྲུལ་སྐུ་མཐོང་ནས། །སྲོག་ཆགས་བྱེ་བ་ཁྲག་ཁྲིག་མང ། །བྱང་ཆུབ་ཏུ་ནི་སེམས་བསྐྱེད་འགྱུར། །ཕྲེང་ལྡན་གླང་པོ་ཅན་རྣམས་ཀྱི། །ལུང་བསྟན་འདྲེན་པས་བཀའ་སྩལ་པ། །ཐོས་ཤིང་ཤེས་ནས་འཁོར་ཀུན་ཀྱང ། །དེ་ཚེ་
སེམས་ནི་རབ་ཏུ་དགའ། །ཕྲེང་ལྡན་གླང་པོ་ཅན་ལུང་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་རྒྱལ་ཆེན་བཞིའི་རིས་ཀྱི་ལྷ་དགུ་ཁྲིས་ལྷ་མ་ཡིན་རྣམས་ནས་ཕྲེང་ལྡན་གླང་པོ་ཅན་གྱི་ལྷའི་བར་དེ་དག་གི་མཆོད་པ་ཡང་མཐོང ། ལུང་བསྟན་པ་
ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་སངས་རྒྱས་ཀྱི་ཆོས་རྣམས་ཐོབ་པར་བྱ་བའི་ཕྱིར་མོས་པ་དྲག་པོ་བསྐྱེད་དེ་འདི་ལྟ་སྟེ། དཔེར་ན་ཁམ་པའི་གྲུ་ལ་ཞོན་པའི་མི་ཞིག་ཆུའི་དབུས་སུ་ཕྱིན་ན་གྲུ་ཆག་ཏུ་འོང་ཞེས་ཚུ་རོལ་
ནས་ཕ་རོལ་དུ་འགྲོ་བར་བྱ་བའི་ཕྱིར་མོས་པ་དྲག་པོ་སྐྱེས་པ་དེ་བཞིན་དུ་རྒྱལ་ཆེན་བཞིའི་རིས་ཀྱི་ལྷ་དགུ་ཁྲི་པོ་དེ་དག་ཀྱང་སངས་རྒྱས་ཀྱི་ཆོས་ཀྱི་ཆེ་བ་ཉིད་ལ་དད་པ་སྐྱེས་ནས་སངས་རྒྱས་ཀྱི་ཆོས་རྣམས་ཐོབ་པར་བྱ་བའི་ཕྱིར་མོས་པ་དྲག་པོ་སྐྱེས་པར་གྱུར་ནས་དེ་དག་སངས་རྒྱས་ཀྱི་ཆོས་ཚོལ་
ཞིང་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏེ། དེ་དག་རྒྱལ་པོ་ཆེན་པོ་བཞི་དང་ལྷན་ཅིག་ཏུ་རིན་པོ་ཆེའི་བླ་རེ་བཀྲ་བ་བལྟ་ན་སྡུག་པ་དགུ་ཁྲི་མངོན་པར་སྤྲུལ་ཏོ། །དེ་དག་ཀྱང་ཕལ་ཆེར་མུ་ཏིག་དམར་པོ་དང ། སྐར་མདོག་དང ། བཻ་དཱུརྱ་དང ། གསེར་དང ། 
རྡོ་རྗེའི་རང་བཞིན་ཅན་ཤ་སྟག་གོ་།ལྷའི་རོལ་མོ་སིལ་སྙན་དགུ་ཁྲི་ཡང་མངོན་པར་སྤྲུལ་ཏེ། དེ་དག་ནོར་བུ་རིན་པོ་ཆེ་སྣ་ཚོགས་ཀྱི་བླ་རེ་དགུ་ཁྲི་པོ་དེ་དག་ཐོགས་ནས་རོལ་མོ་སིལ་སྙན་དགུ་ཁྲི་པོ་དེ་དག་བྱེད་ཅིང་སྟེང་གི་བར་སྣང་ལས་དོང་སྟེ། བཅོམ་ལྡན་འདས་ལ་ལན་གསུམ</font><hr>42-1-56a<br><font size=+2>
སྐོར་བ་བྱེད་ཅིང་མེ་ཏོག་མན་དཱ་ར་བ་དང ། མན་དཱ་ར་བ་ཆེན་པོ་དང ། མན་ཛུ་ཤ་ཀ་དང ། མན་ཛུ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། སྤྲུལ་པའི་མེ་ཏོག་རྣམས་ཀྱིས་བཅོམ་ལྡན་འདས་ལ་གཏོར། མངོན་པར་གཏོར། མངོན་པར་རབ་
ཏུ་གཏོར་ཏེ། དེ་དག་གིས་མཆོད་པ་བྱས་ནས་ཡང་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། ཚིགས་སུ་བཅད་པ་དག་གིས་མངོན་པར་བསྟོད་པ། རྒྱལ་བའི་ཡོན་ཏན་མཐོང་བ་ཡི། །ལྷ་ནི་དགུ་ཁྲི་ཐམ་པ་དག་།འདྲེན་པ་ཁྱོད་ཀྱི་སྤྱན་སྔ་ན། །ཐལ་མོ་རབ་ཏུ་སྦྱར་
ནས་མཆིས། །རྒོད་པ་མ་མཆིས་ཞུམ་མ་མཆིས། །འདོད་པ་མ་མཆིས་འགྱོད་མ་མཆིས། །མི་བླུན་ངོ་མཚར་མ་མཆིས་པ། །རྐང་གཉིས་མཆོག་ལ་ཕྱག་ཀྱང་འཚལ། །ཁྱོད་ནི་སྲིད་པའི་རྒྱུད་རྣམས་བཀུམ། །མི་ཤེས་པ་ནི་རྣམ་པར་སྦྱངས། །སྲེད་པའི་ཕུར་པ་རབ་ཏུ་
ཕྱུང ། །ང་རྒྱལ་རྒྱལ་མཚན་ཁྱོད་ཀྱིས་བསྙལ། །ཁྱོད་ནི་ཟུག་རྔུ་ཕྱུང་བ་སྟེ། །རྨ་ལ་གདུག་པ་ཁྱོད་ཀྱིས་སྤངས། །ཁྱོད་ནི་མཁྱེན་བཞིན་སྤྱོད་པ་སྟེ། །འདྲེན་པ་ཁྱོད་ཀྱིས་རྨ་རྣམས་སོས། །ཁྱོད་ཀྱིས་ཉོན་མོངས་ཐམས་ཅད་སྤངས། །འཆིང་བ་དག་ནི་ཐམས་ཅད་བཅད། །སྦྱོར་
བ་ཀུན་དང་བྲལ་བ་སྟེ། །ཐུབ་པ་ཆགས་པ་ཀུན་ལས་འདས། །རྒྱལ་བ་ཁྱོད་ཀྱི་སྤྱོད་ཡུལ་ནི། །སྟོང་པ་ཉིད་དང་མཚན་མ་མེད། །བཅོམ་ལྡན་ཁྱོད་ལ་སྨོན་པ་ཡང ། །རྣམ་པ་ཀུན་ཏུ་མི་མངའོ། །ཁྱོད་ཀྱིས་སྲེད་པ་དྲུངས་ནས་ཕྱུང ། །མ་རིག་པས་ནི་ཐུགས་ཀྱང་ཕྱུང ། །རྣམ་པ་
བཞི་པོའི་ཕྱིན་ཅི་ལོག་།རྣམ་པ་ཀུན་ཏུ་ཡོངས་སུ་སྤངས། །གང་དུ་འཇིག་རྟེན་མི་ཆུད་དེ། །རི་དགས་རྔོན་པས་ཇི་བཞིན་དུ། །འཇིགས་ཤིང་སྐྲག་པར་འགྱུར་བ་ཡི། །ཡང་དག་མཐའ་ནི་ཁྱོད་ཀྱིས་གཟིགས། །སེམས་ཅན་འཇིག་ཚོགས་ལྟར་ལྷུང་སྟེ། །སྟོང་པ་ཉིད་ནི་མ་
འཚལ་བས། །མ་རིག་པ་ཡི་མུན་པས་གཏིབས། །འཁོར་བའི་བཙོན་རར་དགའ་བར་བགྱིད། །ཁྱོད་ཀྱིས་ཡང་དག་ཇི་བཞིན་དུ། །འགྲོ་དེ་ཆང་བ་སྟོང་འདྲར་གཟིགས། །གང་གིས་རྣམ་དག་མིག་འགྱུར་བའི། །ཡེ་ཤེས་སྣང་བ་རབ་ཏུ་བསྟན། །ཕུང་པོ་སྟོང་པར་རྣམ་པར</font><hr>42-1-56b<br><font size=+2>
བཤིག་།མིང་དང་གཟུགས་ཀྱང་གསོག་འདྲ་ཞིང ། །ཁམས་རྣམས་དང་ནི་སྐྱེ་མཆེད་དག་།བདག་མེད་སྟོང་པར་རྣམ་པར་བཤིག་།ཆོས་གང་དང་ནི་མིང་གང་གིས། །ཆོས་གང་མངོན་པར་བརྗོད་བགྱི་བ། །ཆོས་དེ་ཆོས་དེས་སྟོང་པ་སྟེ། །ཐུབ་པ་ཁྱོད་ཀྱིས་སྟོང་པར་
བསྟན། །སྒྱུ་མའི་མཁན་པོས་མེད་པ་ལ། །སྐྱེ་བོའི་ཚོགས་ཆེན་མངོན་སྤྲུལ་ན། །དེ་ལ་སེམས་ཅན་གདགས་མ་མཆིས། །སྲོག་དང་གང་ཟག་མ་མཆིས་ལྟར། །དེ་བཞིན་ཕུང་པོ་ཁམས་རྣམས་དང ། །དབང་པོ་དག་དང་སྐྱེ་མཆེད་ཀྱང ། །ཡང་དག་མ་ཡིན་སྒྱུ་མ་ཞེས། །
སྐྱེས་བུ་དམ་པས་བསྟན་པ་མཛད། །ཇི་ལྟར་རི་མོ་མཁན་ཞིག་གིས། །བུད་མེད་གཟུགས་ནི་རྣམ་བྲིས་ཤིང ། །མཉམ་པ་དང་ནི་མི་མཉམ་དང ། །ལྕི་དང་ཡང་བ་བསྟན་བགྱིས་ཀྱང ། །བྱིས་པའི་མིག་ནི་བསླུས་པ་སྟེ། །དེ་ལ་མི་མཉམ་ཅི་མ་མཆིས། །དེ་བཞིན་ཆོས་དབྱིངས་
མཉམ་ལགས་ན། །བྱིས་པ་རྣམས་ནི་དེ་ལ་རྨོངས། །གང་ཤེས་ཁྱོད་ཀྱི་བསླབ་པ་ལ། །ལེགས་བསླབས་རྨོངས་པར་མི་འགྱུར་བ། །ལག་མཐིལ་སྐྱུ་རུ་ར་བཞིན་དུ། །དེ་ནི་ཀུན་མཁྱེན་ཁྱོད་ཀྱིས་བསྟན། །ཤེས་རབ་ཆེན་པོ་ཁྱོད་ཀྱིས་ནི། །ཡེ་ཤེས་སྒྲོན་མ་རབ་བུས་ཏེ། །ཆོས་ཀྱི་
འཁོར་ལོ་རབ་བསྐོར་ནས། །སེམས་ཅན་རྣམས་ལ་ཆོས་བསྟན་པ། །དེ་ལྟར་བདག་ཅག་མྱུར་དུ་ནི། །བླ་མེད་བྱང་ཆུབ་ཞི་ཐོབ་སྟེ། །ཇི་ལྟར་འདྲེན་པ་ཁྱོད་བཞིན་དུ། །ཆོས་ཀྱི་འཁོར་ལོ་བསྐོར་བར་བགྱི། །འཁོར་བའི་ལམ་ལོག་འདི་དག་ཏུ། །འཁྱམས་པར་གྱུར་པའི་
སེམས་ཅན་ལ། །ཇི་ལྟར་འདྲེན་པས་བསྟན་པ་བཞིན། །བདག་ཅག་གིས་ཀྱང་ཆོས་མྱུར་བསྟན། །དེ་ནས་བཅོམ་ལྡན་འདས་ཀྱིས་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས། བཅོམ་
ལྡན་འདས་ལ་ཚིགས་སུ་བཅད་དེ་གསོལ་པ། རྒྱུ་མ་མཆིས་པར་རྫོགས་སངས་རྒྱས། །འདྲེན་པ་འཛུམ་པ་མི་མཛད་ན། །འཛུམ་པ་མཛད་པའི་འཛུམ་གྱི་རྒྱུ། །དཔའ་བོ་ཆེན་པོས་ལུང་བསྟན་གསོལ། །སྐྱེས་བུ་དམ་པ་འཁོར་འདི་དག་།བདེ་གཤེགས་དེང་བཞད་མཐོང་ནས</font><hr>42-1-57a<br><font size=+2>
ནི། །ཡིད་གཉིས་ཆེན་པོ་འཚལ་གྱུར་ཏེ། །ཀུན་ཀྱང་ཐེ་ཚོམ་འཚལ་བར་གྱུར། །དེ་རིང་སུ་ཡིས་བདུད་ཕམ་བགྱིས། །ནེམ་ནུར་གང་གིས་བཅད་པར་གྱུར། །སུ་ཞིག་དེ་རིང་ཆོས་རྟོགས་གྱུར། །སྐྱེས་བུ་མཆོག་གིས་ལུང་བསྟན་གསོལ། །དེ་རིང་ཁྱོད་ལ་སུ་
ཡིས་མཆོད། །སྟོན་པ་གང་གིས་བསྙེན་བཀུར་བགྱིས། །འགྲོ་ཀུན་ནེམ་ནུར་འཚལ་གྱུར་ན། །རྣམ་པར་འདྲེན་པས་ལུང་བསྟན་གསོལ། །ཇི་ལྟར་རྐང་གཉིས་མཆོག་ཁྱོད་ཀྱིས། །ལུང་བསྟན་འདི་དག་ཐོས་གྱུར་ན། །འགྲོ་བ་ཐེ་ཚོམ་འཆད་འགྱུར་བ། །འདྲེན་པས་དེ་
ལྟར་ལུང་བསྟན་གསོལ། །ཅི་ནས་རྣམ་པ་ཐམས་ཅད་དུ། །ཀུན་མཁྱེན་ལམ་ལ་གནས་པ་རྣམས། །མྱུར་དུ་བྱང་ཆུབ་ཐོབ་འགྱུར་བ། །དེ་ལྟར་འདྲེན་པས་བསྟན་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་
པ། འགྲོ་བ་རྣམས་ལ་ཕན་པའི་ཕྱིར། །རྫོགས་པའི་སངས་རྒྱས་མགོན་པོ་ལ། །འཛུམ་པའི་རྒྱུ་རྣམས་དྲི་བྱ་ཞེས། །རྟ་ཐུལ་ཁྱོད་ཀྱིས་དྲིས་པ་ལེགས། །འཇིག་རྟེན་ཀུན་ལ་ཕན་པའི་ཕྱིར། །བསྟན་པ་ཡིད་དུ་འོང་འགྱུར་ཞིང ། །ཉམས་དགའ་བྱེད་པ་དེ་བཤད་ཀྱིས། །
དྲན་པ་མངོན་བྱོས་མཉན་པར་གྱིས། །དགུ་ཁྲི་ཐམ་པའི་ལྷ་རྣམས་ཀྱིས། །མཆོད་པའི་རྣམ་པ་འདི་ལྟ་བུ། །དེ་རིང་དེ་བཞིན་གཤེགས་པ་ལ། །ཤིན་ཏུ་དང་བའི་ཡིད་ཀྱིས་བྱས། །སངས་རྒྱས་མངོན་པར་བསྟོད་པ་བྱས། །སྟོང་པ་ཉིད་ཀྱང་ཤེས་པར་གྱུར། །ཆོས་རྣམས་
ལ་ནི་ངེས་པ་རྙེད། །ང་ཡི་བསྟན་ལ་རབ་ཏུ་གནས། །སྔོན་ཡང་སངས་རྒྱས་བྱེ་བ་ཕྲག་།བརྒྱད་ཅུ་དག་ལ་འདི་དག་མཆོད། །མ་འོངས་དུས་ནའང་སངས་རྒྱས་ནི། །བྱེ་བ་མཐའ་ཡས་མཆོད་པར་འགྱུར། །འདྲེན་པ་དེ་དག་ཇི་སྲིད་དུ། །སངས་རྒྱས་བྱེ་བ་མ་མཆོད་ཅིང ། །བསྙེན་
བཀུར་བྱས་པར་མ་གྱུར་པ། །དེ་སྲིད་བྱང་ཆུབ་འཚང་མི་རྒྱ། །དེ་བས་ཤིན་ཏུ་འཕྱི་བ་ན། །ཀུན་ཀྱང་གང་ཟག་མཆོག་ཏུ་འགྱུར། །མཚན་ནི་འོད་ཟེར་འཆང་བ་སྟེ། །འཇིག་རྟེན་ཀུན་མཁྱེན་ཐུབ་པར་འགྱུར། །འཇིག་རྟེན་སྒྲོན་མ་དེ་དག་གི་།ཉན་ཐོས་འདུས་པར་འགྱུར་བ་ནི། །བློ</font><hr>42-1-57b<br><font size=+2>
ཡི་མཆོག་དང་ལྡན་པ་དག་།འདུས་པ་བརྒྱད་ཅུ་འབྱུང་བར་འགྱུར། །སྒྲིབ་མེད་གཟིགས་པ་དེ་དག་གི་།མི་རྣམས་དེ་ཡི་དུས་ཀྱི་ཚེ། །ལོ་གྲངས་བྱེ་བ་བརྒྱད་ཅུ་ཐམ། །སྲོག་གི་དབང་པོ་གནས་པར་འགྱུར། །ཤེས་རབ་མཐའ་ཡས་དེ་དག་གི་།ཉན་ཐོས་འདོད་ཆགས་བྲལ་བ་
རྣམས། །ལུས་ཀྱི་ཐ་མ་འཛིན་པ་དག་།བྱེ་བ་ཚད་མེད་འབྱུང་བར་འགྱུར། །སེམས་ཅན་རྣམས་ལ་ཐུགས་བརྩེ་བའི། །འཇིག་རྟེན་མགོན་པོ་དཔལ་ལྡན་རྣམས། །མྱ་ངན་འདས་པའི་རིང་བསྲེལ་ཡང ། །ཤིན་ཏུ་རྒྱ་ཆེར་འབྱུང་བར་འགྱུར། །མི་དབང་མྱ་ངན་འདས་གྱུར་
ནས། །རྣམ་པར་འདྲེན་པ་དཔལ་ལྡན་པ། །རྒྱལ་བའི་མཆོད་རྟེན་རྣམས་ཀྱིས་ནི། །སངས་རྒྱས་ཞིང་རྣམས་ལེགས་བརྒྱན་འགྱུར། །འཇིག་རྟེན་མགོན་པོ་སྐྱོབ་རྣམས་ཀྱི། །མཆོད་རྟེན་དེ་དག་ཐམས་ཅད་ལ། །སྲོག་ཆགས་བརྒྱ་དང་སྟོང་རྣམས་དང ། །ཁྲག་ཁྲིག་
རྣམས་ཀྱིས་མཆོད་བྱས་ནས། །བྱང་ཆུབ་མཆོག་ཏུ་སེམས་བསྐྱེད་དེ། །མྱ་ངན་འདས་པ་ཐོབ་པར་འགྱུར། །རང་བྱུང་མྱ་ངན་འདས་ནས་ཀྱང ། །དེ་དག་དམ་ཆོས་གནས་འགྱུར་བ། །ལོ་གྲངས་བྱེ་བ་ཁྲག་ཁྲིག་ཕྲག་།བརྒྱད་ཅུ་ཚང་བར་གནས་པར་འགྱུར། །ཆོས་ཀྱི་
རྒྱལ་པོའི་སྲས་རྣམས་ཀྱིས། །བཟུང་ཞིང་ཡོངས་སུ་བསྲུངས་པར་གནས། །འཇིག་རྟེན་ཐུགས་བརྩེ་མཛད་པ་དང ། །ཤཱཀྱ་ཡོངས་སུ་སྨིན་མཛད་ཕྱིར། །རྒྱལ་ཆེན་བཞི་ཡི་རིས་རྣམས་ལ། །འཇིག་རྟེན་སྒྲོན་མས་ལུང་བསྟན་མཛད། །དེ་ཐོས་ནས་ནི་སྐྱེ་བོ་ཀུན། །ཀུན་ཏུ་དགའ་
ཞིང་རབ་དགའ་སྟེ། །སེམས་མགུ་ཡིད་ཀྱང་རངས་གྱུར་ནས། །སྟོན་པ་ལ་ནི་མངོན་པར་བསྟོད། །རྒྱལ་ཆེན་བཞིའི་རིས་ལུང་བསྟན་པའི་ལེའུ་སྟེ་བཅུ་བཞི་པའོ།། །།བམ་པོ་དྲུག་པ། དེ་ནས་ལྷའི་དབང་པོ་བརྒྱ་བྱིན་ལ་སོགས་པ་སུམ་ཅུ་རྩ་གསུམ་རིས་ཀྱི་
ལྷ་བྱེ་བ་ཕྲག་བརྒྱད་ཅུས་ལྷ་མ་ཡིན་དག་དང ། ནམ་མཁའ་ལྡིང་དང ། ཀླུའི་བུ་མོ་དག་དང ། ཀླུ་དག་དང ། གྲུལ་བུམ་དག་དང ། དྲི་ཟ་དག་དང ། གནོད་སྦྱིན་དག་དང ། མིའམ་ཅི་དག་དང ། ཕྲེང་ལྡན་གླང་པོ་ཅན་དག་དང ། རྒྱལ་ཆེན་བཞིའི་རིས་ཀྱི་ལྷ་དག་གི་མཆོད་པ་ཡང་མཐོང་།


</font><hr>42-1-58a<br><font size=+2>
ལུང་བསྟན་པ་ཡང་ཐོས་ནས་སངས་རྒྱས་ཀྱི་ཆོས་རྣམས་ལ་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་ཡིད་བྱུང་བ་ཆེན་པོ་སྐྱེས་ཏེ། འདོད་པའི་ཚུལ་གྱིས་ལྷའི་དབང་པོ་བརྒྱ་བྱིན་ལ་སོགས་པ་བཅོམ་ལྡན་འདས་ལ་མཆོད་པའི་
ཕྱིར་བརྩོན་པར་གྱུར་ཏེ། དེ་དག་གིས་རིན་པོ་ཆེའི་ཁང་པ་བཀྲ་བ། བལྟ་ན་སྡུག་པ། རིན་པོ་ཆེ་སྣ་བདུན་གྱི་རང་བཞིན་ཅན། མུ་ཏིག་དམར་པོའི་ཕྲེང་བ་དང ། བེེ་དཱུརྱའི་ཕྲེང་བས་བརྒྱན་པ། གསེར་གྱི་ཕྲེང་བ་སྣ་ཚོགས་དང ། ནོར་བུ་རིན་པོ་ཆེ་སྐར་མདོག་གི་ཕྲེང་བས་བརྒྱན་པ། 
ས་གནས་རིམ་པ་བརྒྱད་དང ། བ་གམ་དང ། ཁང་པ་བརྩེགས་པ་དང ། སྐར་ཁུང་གིས་བརྒྱན་པ། གདུགས་དང ། རྒྱལ་མཚན་དང ། བ་དན་དག་གིས་བརྒྱན་པ། ལྷ་རྫས་ཀྱི་སེང་གེའི་ཁྲིས་བརྒྱན་པ། བླ་རེ་ཆེན་པོ་དང ། དྲིལ་བུ་གཡེར་ཀའི་དྲ་བས་བརྒྱན་པ། ལྷའི་བུ་མོའི་
ཚོགས་ཀྱིས་མཛེས་པར་བྱས་པ། ལྷའི་རོལ་མོ་སིལ་སྙན་སྒྲ་རབ་ཏུ་འབྱུང་བ་བྱེ་བ་ཕྲག་བརྒྱད་ཅུ་མངོན་པར་སྤྲུལ་ཏོ། །རྟ་ཅང་ཤེས་ཀྱིས་དྲངས་པའི་ཤིང་རྟ་ལྷ་རྫས་ཀྱི་རྣམ་པས་ལེགས་པར་བརྒྱན་པ། གདུགས་དང ། རྒྱལ་མཚན་དང ། བ་དན་དག་གིས་མཛེས་པར་བྱས་པ་བྱེ་བ་
ཕྲག་བརྒྱད་ཅུ་ཡང་མངོན་པར་སྤྲུལ་ཏོ། །སེར་སྐྱའི་གནས་ཀྱི་གྲོང་ཁྱེར་ཆེན་པོ་ཐམས་ཅད་དང་ལྡན་པའི་ཁོ་ར་ཁོར་ཡུག་ཏུ་དཔག་ཚད་དྲུག་ཅུ་ཚུན་ཆད་མེ་ཏོག་མན་དཱ་ར་བ་དང ། ལྷའི་མཆོད་པ་དེ་དག་གིས་རྒྱས་པར་གང་བར་བྱས་སོ། །གླང་པོ་ཆེ་ས་སྲུང་གི་བུ་བྱེ་བ་ཕྲག་བརྒྱད་ཅུ་ཡང་
མངོན་པར་སྤྲུལ་ཏེ། གླང་པོ་ཆེ་ས་སྲུང་གི་བུ་དེ་དག་རེ་རེ་ཞིང་ཡང་མགོ་བྱེ་བ་ཕྲག་བརྒྱད་ཅུ་བརྒྱད་ཅུ། གླང་པོ་ཆེ་ས་སྲུང་གི་བུའི་མགོ་དེ་དག་རེ་རེ་ཞིང་ཡང་སོ་དྲུག་དྲུག། སོ་དེ་དག་རེ་རེ་ཞིང་ཡང་རྫིང་བུ་བདུན་བདུན། རྫིང་བུ་དེ་དག་རེ་རེ་ཞིང་ཡང་པད་མ་སྟོང་ཕྲག་བདུན་བདུན། པད་མ་
དེ་དག་རེ་རེ་ཞིང་ཡང་འདབ་མ་བརྒྱད་ཁྲི་བརྒྱད་ཁྲི། འདབ་མ་རེ་རེ་ཞིང་ཡང་ལྷའི་བུ་མོ་བདུན་བདུན། ལྷའི་བུ་མོ་དེ་དག་རེ་རེ་ཞིང་ཡང་འཁོར་བདུན་བདུན་ཡོད་པ། རྒྱན་ཐམས་ཅད་ཀྱིས་བརྒྱན་པ་ཤ་སྟག་མངོན་པར་སྤྲུལ་ནས་རིན་པོ་ཆེའི་ཁང་པ་དེ་དག་མདུན་དུ་བྱས་ཏེ། དབུས་སུ་གླང་པོ</font><hr>42-1-58b<br><font size=+2>
ཆེ་ས་སྲུང་གི་བུ་དག་བཙུད་ནས་ཕྱི་བཞིན་ཤིང་རྟ་དེ་ལྟར་བཤམས་པ་དེ་དག་བཀྱེ་ནས་བཅོམ་ལྡན་འདས་ལ་མཆོད་པ་བྱས་སོ། །རིན་པོ་ཆེའི་ཁང་པ་དེ་དག་ལས་ཀྱང་ལྷའི་ཙན་དན་དང ། ་ག་རུ་དང ། ུད་པ་ལ་དང ། ཏ་མ་ལའི་ལོ་མའི་ཕྱེ་མ་དང ། གསེར་ཕྱེའི་ཆར་མངོན་
པར་བབ་པར་གྱུར་ཏོ། །ལྷའི་མེ་ཏོག་མན་དཱ་ར་བ་དང ། མན་དཱ་ར་བ་ཆེན་པོ་དང ། མཉྫ་ཥ་ཀ་དང ། མཉྫ་ཥ་ཀ་ཆེན་པོ་དང ། པ་རུ་ཥ་ཀ་དང ། པ་རུ་ཥ་ཀ་ཆེན་པོ་དང ། མདོག་དཀར་དང ། མདོག་དཀར་ཆེན་པོ་དང ། སྤྲུལ་པའི་མེ་ཏོག་དག་གི་ཆར་ཡང་མངོན་
པར་བབ་པར་གྱུར་ཏོ། །གསེར་དང ། དངུལ་དང ། བཻ་དཱུརྱ་དང ། ཤེལ་དང ། མུ་ཏིག་དམར་པོ་དང ། སྤུག་དང ། རྡོའི་སྙིང་པོ་དང ། རིན་པོ་ཆེ་སྣ་བདུན་གྱི་མེ་ཏོག་གི་ཆར་ཡང་མངོན་པར་བབ་པར་གྱུར་ཏོ། །ལྷའི་བུ་མོ་དེ་དག་ལས་ལ་ལ་ནི་གླུ་ལེན། ལ་ལ་ནི་གར་བྱེད། 
ལ་ལ་ནི་རོལ་མོ་བྱེད། ལ་ལ་ནི་ལུས་ཀྱི་ཚུལ་སྒྱུར་ཞིང་ལྷ་མ་ཡིན་གྱི་མཆོད་པ་ལྟ་བུ་དང ། གླང་པོ་ཆེ་ས་སྲུང་གི་བུ་དེ་དག་དང ། རིན་པོ་ཆེའི་ཁང་པ་རྣམས་ཀྱིས་མཆོད་པ་བྱས་ནས་དེའི་འོག་ཏུ་རྟ་ཅང་ཤེས་ཀྱིས་དྲངས་པའི་ཤིང་རྟ་བྱེ་བ་ཕྲག་བརྒྱད་ཅུ་ལ་ཞོན་ཏེ། བཅོམ་
ལྡན་འདས་ལ་ལན་གསུམ་བསྐོར་བ་བྱས་ནས་ལྷའི་ཡོ་བྱད་རྣམ་པ་སྣ་ཚོགས་མང་པོ་ཡང་ཕུལ་བར་གྱུར་ཏོ། །ལྷའི་རོལ་མོ་སིལ་སྙན་བྱེ་བ་ཕྲག་བརྒྱད་ཅུ་ཡང་བར་སྣང་ལས་སྒྲ་འབྱིན་པར་གྱུར་ཏོ། །ཤིང་རྟ་བྱེ་བ་ཕྲག་བརྒྱད་ཅུ་པོ་དེ་དག་ལ་ཡང་ལྷའི་བུ་མོ་གཞན་བྱེ་བ་ཕྲག་བརྒྱད་ཅུ་
བརྒྱད་ཅུ་མངོན་པར་སྤྲུལ་ཏེ། ལྷའི་བུ་མོ་དེ་དག་ཀྱང་ལ་ལ་ནི་གླུ་ལེན། ལ་ལ་ནི་གར་བྱེད། ལ་ལ་ནི་རོལ་མོ་བྱེད། ལ་ལ་ནི་ལུས་ཀྱི་ཚུལ་སྒྱུར་ཞིང་ལྷ་མ་ཡིན་གྱི་མཆོད་པ་ཇི་ལྟ་བ་བཞིན་དུ་བྱས་སོ། །དེ་ནས་སུམ་ཅུ་རྩ་གསུམ་རིས་ཀྱི་ལྷ་བྱེ་བ་ཕྲག་བརྒྱད་ཅུ་པོ་དེ་དག་འདི་སྙམ་དུ་སེམས་
ཏེ། ཇི་ལྟར་སྤྲུལ་པའི་ལྷའི་བུ་མོ་འདི་དག་བཅོམ་ལྡན་འདས་ལ་མཆོད་པ་བྱེད་པ་ལས་ན་ཆོས་ཐམས་ཅད་ཀྱང་སྤྲུལ་པ་དང་འདྲ་བ་ཡིན་དུ་ངེས་སོ་སྙམ་ནས་དེ་དག་འདི་སྙམ་དུ་ཆོས་འདི་དག་ཐམས་ཅད་ནི་ཇི་ལྟར་དེ་བཞིན་གཤེགས་པས་བསྟན་པ་དེ་བཞིན་ཏེ། སྤྲུལ་པ་དང་འདྲ་བ་ཡིན་ནོ</font><hr>42-1-59a<br><font size=+2>
སྙམ་དུ་སེམས་པར་གྱུར་ཅིང་དེ་དག་གིས་ཆོས་ཐམས་ཅད་སྤྲུལ་པ་དང་འདྲ་བར་ཤེས་ནས་ཆོས་ལ་ཐེ་ཚོམ་མེད་པ་ཐོབ་པར་གྱུར་ཏོ། །དེདག་དེ་ལྟར་ཐེ་ཚོམ་མེད་ཅིང་ནེམ་ནུར་མེད་པར་གྱུར་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ། བཅོམ་ལྡན་
འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ། །དེ་དག་ཆོས་ཐམས་ཅད་སྤྲུལ་པ་དང་འདྲ་བར་རྟོག་ཅིང་བདག་ཅག་ཀྱང་སྤྲུལ་པ་དང་འདྲ་བར་མཐོང ། མཆོད་པ་དེ་དག་ཀྱང་སྤྲུལ་པ་དང་འདྲ་བར་མཐོང ། བཅོམ་ལྡན་འདས་ཀྱང་སྤྲུལ་པ་དང་འདྲ་བར་
མཐོང་ནས་བཅོམ་ལྡན་འདས་ཀྱིས་ཆོས་གང་བསྟན་པ་དེ་དག་ཀྱང་སྤྲུལ་པ་དང་འདྲ་བར་ཡང་དག་པར་ཤེས་ཏེ། དེ་དག་གིས་ཆོས་ཐམས་ཅད་སྤྲུལ་པ་ལྟ་བུའོ་ཞེས་བྱ་བར་ཤེས་ནས་ཐེ་ཚོམ་མེད་ཅིང་ནེམ་ནུར་མེད་པར་གྱུར་ཏེ། དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་དག་གིས་
མངོན་པར་བསྟོད་དོ། །འགྲོ་བ་ཀུན་གྱིས་མཆོད་པ་གང་བགྱིས་དང ། །སྤྲུལ་པའི་མཆོད་པ་འདི་དག་གང་བགྱིས་དང ། །ལྷ་རྣམས་ཀྱིས་ནི་སངས་རྒྱས་མཆོད་བྱས་པ། །དེ་ལྟར་ཆོས་འདི་ཐམས་ཅད་སྤྲུལ་པ་ཉིད། །འདྲེན་པས་ཆོས་ཀུན་གསུངས་པ་གང་ལགས་དང ། །དེ་བཞིན་
གཤེགས་པས་ལུང་བསྟན་མཐའ་དག་ཀྱང ། །འདི་དག་ཐམས་ཅད་སྤྲུལ་པ་འདྲའོ་ཞེས། །དེ་ལྟར་ལྷ་ཚོགས་དེ་དག་བློ་གྲོས་སྐྱེས། །བཅོམ་ལྡན་སྤྲུལ་པ་འདི་དག་ཇི་བཞིན་དུ། །སྟོན་པའང་དེ་བཞིན་སྤྲུལ་དང་འདྲ་བ་སྟེ། །རྒྱལ་བས་ལུང་བསྟན་བདག་ཅག་འཚལ་གྱུར་པས། །འདི་
ལ་བདག་ཅག་ཐེ་ཚོམ་མ་མཆིས་སོ། །རྒྱལ་བས་སོ་སོའི་སྐྱེ་བོ་རྣམས་མཁྱེན་ནས། །བྱིས་པའི་ས་ཐོབ་ཐ་སྙད་གང་བཏགས་པ། །དེ་དག་ཀུན་ཀྱང་སྤྲུལ་པ་ཇི་བཞིན་ཏེ། །བདེ་གཤེགས་འགྲོ་བ་ལུང་བསྟན་དེ་བཞིན་ནོ། །སློབ་པ་རྣམས་དང་གང་དག་མི་སློབ་དང ། །བཅོམ་ལྡན་
ཉན་ཐོས་དུལ་བའི་ས་ཐོབ་པ། །དེ་དག་ཀུན་ཀྱང་བཅོམ་ལྡན་སྤྲུལ་དང་འདྲ། །བཅོམ་ལྡན་བསྟན་ལ་ཐེ་ཚོམ་མ་མཆིས་སོ། །བཅོམ་ལྡན་གང་རྣམས་མི་སྨྲ་ལྷུར་ལེན་ཅིང ། །བསེ་རུ་ལྟ་བུར་གཉིས་མེད་ཉོན་མོངས་སྤངས། །དེ་དག་རྣམས་ཀྱང་སྤྲུལ་འདྲ་བཅོམ་ལྡན་འདས། །བདེ</font><hr>42-1-59b<br><font size=+2>
གཤེགས་བསྟན་ལ་ཐེ་ཚོམ་མ་མཆིས་སོ། །གང་རྣམས་འགྲོ་བ་ཀུན་ལ་བདེ་ཕན་ཕྱིར། །རྒྱལ་བའི་བྱང་ཆུབ་སྤྱད་སྤྱོད་བག་ཡོད་པའི། །བྱང་ཆུབ་སེམས་དཔའ་བདེ་གཤེགས་སྲས་དག་ཀྱང ། །ཁྱད་པར་མ་མཆིས་སྤྲུལ་པ་འདི་དང་འདྲ། །བདེ་གཤེགས་རང་བྱུང་རྣམ་པར་འདྲེན་
པ་མཆོག་།སྟོབས་བཅུ་ཤེས་རབ་མཐའ་ཡས་ཐུགས་རྗེ་ཅན། །ཡེ་ཤེས་སྟོབས་འཕགས་འཇིག་རྟེན་གཙོ་བོ་དག་།སྤྲུལ་པ་འདི་འདྲ་དེ་དག་རང་བཞིན་མཚུངས། །འདྲེན་པས་འདི་ལ་ཆོས་རྣམས་གང་གསུངས་པ། །གནས་མེད་ཞི་བསིལ་ཉོན་མོངས་མེད་གྱུར་ཅིང ། །སྡུག་
བསྔལ་ཞི་བྱེད་མཐར་ཐུག་གྲངས་མེད་པ། །དེ་ཡང་སྤྲུལ་པ་འདི་དག་ཇི་བཞིན་ནོ། །བཅོམ་ལྡན་འདི་ལ་ཆོས་རྣམས་གང་དག་ཀྱང ། །སྤྲུལ་པའི་རང་བཞིན་མ་ལགས་དེ་མ་མཆིས། །གང་ཚེ་གཽ་ཏ་མའི་བསྟན་པ་འདི། །བདག་ཅག་རྟོགས་ནས་ཐེ་ཚོམ་ཐམས་ཅད་
སྤངས། །སྤྲུལ་པ་འདི་འདྲར་ཆོས་རྣམས་ཀུན་མཐོང་ནས། །བདག་ཅག་རྣམས་ཀྱང་འཇིག་རྟེན་མགོན་པོར་འགྱུར། །བདེ་གཤེགས་སྤྱོད་ཡུལ་འདི་ལ་སྤྱོད་པའི་རྣམས། །ཐེ་ཚོམ་མ་མཆིས་རང་བྱུང་འདྲེན་པར་འགྱུར། །དེ་ནས་བཅོམ་ལྡན་འདས་ཀྱིས་དེའི་ཚེ་སུམ་ཅུ་རྩ་
གསུམ་རིས་ཀྱི་ལྷའི་བུ་བྱེ་བ་ཕྲག་བརྒྱད་ཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། གཞལ་ཡས་གྲགས་མངའ་མཐའ་ཡས་གཟི་བརྗིད་ཅན། །བདེ་གཤེགས་
རྣམས་ནི་རྒྱུ་མེད་འཛུམ་མི་མཛད། །རྣམ་པར་འདྲེན་པས་འདིར་ནི་འཛུམ་མཛད་ན། །རྒྱལ་བས་འཛུམ་པའི་ཚིག་གསུངས་ཐེ་ཚོམ་ཁུམ། །རང་བྱུང་བདེ་གཤེགས་ཞལ་ནས་འཛུམ་པ་འདི། །བྱུང་བར་རིག་ནས་འཇིག་རྟེན་ཐེ་ཚོམ་འཚལ། །འགྲོ་བའི་ཐེ་ཚོམ་ཐུབ་པས་བསལ་དུ་
གསོལ། །འགྲོ་བ་འདི་དག་ཐེ་ཚོམ་མ་མཆིས་མཛོད། །ལྷ་ཚོགས་འདི་དག་རབ་ཏུ་ཡིད་དགའ་བས། །རྒྱལ་བ་བསྟོད་དེ་ལྷ་རྫས་རྣམས་ཀྱིས་མཆོད། །བདེ་གཤེགས་དེ་དག་དོན་དུ་འཛུམ་པ་མཛད། །རྒྱལ་བ་འཁོར་འདི་དགའ་མཛད་བཀའ་སྩལ་གསོལ། །ཟླ་ལྟར་དྲི་མེད་འོད</font><hr>42-1-60a<br><font size=+2>
མངའ་མཐའ་ཡས་གཟི། །ཅི་ནས་བདེ་གཤེགས་བཀའ་ནི་འདི་ཐོས་པས། །མགོན་པོ་འགྲོ་བ་ཐམས་ཅད་དགའ་འགྱུར་བར། །རྒྱལ་བ་ལྷ་ཚོགས་མཆོད་མཁྱེན་བཀའ་སྩལ་གསོལ། །བདེ་གཤེགས་ལྷ་ཚོགས་འདི་ཡིས་ཆོས་རྣམས་ཀུན། །སྤྲུལ་པ་ལྟ་བུར་
རྣམ་པར་རྟོགས་གྱུར་ནས། །སྟོབས་བཅུ་མངའ་བས་དོན་འདི་བཀའ་སྩོལ་ཏེ། །རབ་རིབ་བྲལ་བ་ལྷ་ཡི་བསླབ་པ་གསུངས། །སྐྱེ་བོ་འདི་དག་ཐེ་ཚོམ་བྲལ་གྱུར་ནས། །ཐུབ་པ་དེ་ལྟར་བྱང་ཆུབ་སྤྱོད་རྩོམ་འགྱུར། །རབ་ཏུ་དཔའ་བ་འཁོར་འདིས་ཐོས་གྱུར་ཏེ། །དགོངས་པ་རིག་ནས་རྒྱ་
ཆེན་རྩོམ་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ལྷ་ཚོགས་འདི་དག་རབ་ཏུ་དགའ་ཤེས་ནས། །རྟ་ཐུལ་ཁྱོད་ཀྱིས་དུས་དང་ལྡན་པའི་ཚིག་།སྨྲས་པ་དེ་ནི་དུས་ལ་བབ་པ་སྟེ། །འཛུམ་པ་དྲིས་པ་དེ་ནི་ལུང་བསྟན་ཏོ། །
ལྷ་རྣམས་བསམ་ཤེས་འཛུམ་པ་དེ་དྲིས་པ། །དེས་ནི་ཁྱོད་ཀྱིས་འགྲོ་བའི་དོན་ཆེན་བྱས། །འཛུམ་མཛད་པ་ཡི་རྒྱུ་དེ་ངས་བསྟན་གྱིས། །དགའ་ཞིང་དང་བའི་སེམས་ཀྱིས་ང་ལ་ཉོན། །ལྷ་ཚོགས་རྣམས་ཀྱིས་ཆོས་རྣམས་འདི་དག་ནི། །མ་ལུས་སྤྲུལ་པ་ལྟ་བུར་ཤེས་གྱུར་ནས། །ཆགས་མེད་ཡེ་
ཤེས་མཐོང་བ་དཔག་མེད་ཅིང ། །རབ་རིབ་བྲལ་བའི་འཇིག་རྟེན་མགོན་པོར་འགྱུར། །སྲིད་པའི་རྒྱུད་ན་སྔོན་ཡང་འཁོར་བའི་ཚེ། །མི་ཡི་གཙོ་བོ་གང་གཱའི་བྱེ་སྙེད་མཆོད། །སྲིད་རྒྱུན་དེ་ན་འདི་དག་ཐུབ་པ་ལས། །ཆོས་རྣམས་སྤྲུལ་པ་ལྟ་བུར་མ་མཐོང་ངོ ། །འདི་དག་ང་ལ་མཆོད་མཆོག་འདིར་
བྱས་པས། །ཆོས་རྣམས་སྤྲུལ་པ་འདྲ་བར་མངོན་དུ་མཐོང ། །བདེ་གཤེགས་བསྟན་པ་འདི་ལ་བྱས་པ་ནི། །ཆུད་ཟོས་མི་འགྱུར་བར་ཆད་ཡོད་མི་འགྱུར། །ལྷ་ཚོགས་འདི་ཡིས་ང་ལ་མཆོད་བྱས་ཏེ། །ཆོས་རྣམས་ཐམས་ཅད་སྤྲུལ་པ་འདྲར་ཤེས་པས། །བསྐལ་པ་པད་མ་ཞེས་བྱ་
བྱུང་བའི་ཚེ། །སྨྲ་བའི་ཟླ་བ་མི་ཡི་མཆོག་ཏུ་འགྱུར། །ཁྱུ་མཆོག་ལྡན་པའི་མིང་མཆོག་འགྱུར་བ་ནི། །བདེ་གཤེགས་རབ་མཁས་དབང་པོའི་ཏོག་རྒྱལ་པོ། །ཆོས་རྣམས་ཐམས་ཅད་སྤྲུལ་པ་འདྲར་སྟོན་ཅིང ། །འགྲོ་བ་ཁྲག་ཁྲིག་དཔག་མེད་འགྲེལ་བར་འགྱུར། །བདེ་གཤེགས</font><hr>42-1-60b<br><font size=+2>
དེ་དག་བསྟན་ལ་བག་ཡོད་པ། །ཆོས་རྣམས་འདི་དག་སྤྲུལ་པ་འདྲ་བར་སེམས། །ཞི་གནས་དེ་ལ་སུ་སྟེན་བག་ཡོད་པ། །མྱུར་དུ་བླ་མེད་བྱང་ཆུབ་མཆོག་ཞི་འཐོབ། །སུམ་ཅུ་རྩ་གསུམ་པ་ལུང་བསྟན་པའི་ལེའུ་སྟེ་བཅཝ་ལྔ་པའོ།། །།དེ་ནས་དེའི་ཚེ་འཐབ་
བྲལ་གྱི་ལྷ་བྱེ་བ་ཕྲག་བཞི་བཅུས་ལྷ་མ་ཡིན་རྣམས་ནས་སུམ་ཅུ་རྩ་གསུམ་རིས་ཀྱི་ལྷའི་བར་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ།རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ཀྱང་ལུང་བསྟན་པ་ལ་
ཐོགས་པ་མི་མངའ་བར་ཤེས་ཤིང་སངས་རྒྱས་ཀྱི་ཆོས་རྣམས་ནི་ཉམས་དགའ་བ་སྟེ། དེ་དག་ཐོབ་ན་མ་ཤེས་པའམ། མ་མཐོང་བའམ། མ་རྟོགས་པའམ། མངོན་དུ་མ་བྱས་པའམ། སྐྱེ་བའམ། འགག་པའམ། ལས་སམ། ལས་ཀྱི་རྣམ་པར་སྨིན་པ་གང་ཡང་མེད་དོ་ཞེས་སངས་
རྒྱས་ཀྱི་ཆོས་རྣམས་ལ་འདོད་པ་བསྐྱེད་དོ། །འདི་ལྟར་དེ་བཞིན་གཤེགས་པས་ཀུན་རྫོབ་དང་དོན་དམ་པ་གཉིས་ཐུགས་སུ་ཆུད་དེ། ཤེས་པར་བྱ་བ་ཡང་ཀུན་རྫོབ་དང་དོན་དམ་པ་འདིར་ཟད་དོ། །དེ་ཡང་བཅོམ་ལྡན་འདས་ཀྱིས་སྟོང་པ་ཉིད་རབ་ཏུ་གཟིགས། རབ་ཏུ་མཁྱེན། ལེགས་པར་
མངོན་དུ་མཛད་པས་དེའི་ཕྱིར་ཐམས་ཅད་མཁྱེན་པ་ཞེས་བྱའོ། །དེ་ལ་ཀུན་རྫོབ་ནི་འཇིག་རྟེན་གྱི་སྤྱོད་པར་དེ་བཞིན་གཤེགས་པས་གཟིགས་སོ། །དོན་དམ་པ་གང་ཡིན་པ་དེ་ནི་བརྗོད་དུ་མེད་པ་སྟེ། ཤེས་པར་བྱ་བ་མ་ཡིན་པ། རྣམ་པར་ཤེས་པར་བྱ་བ་མ་ཡིན་པ། ཡོངས་སུ་ཤེས་
པར་བྱ་བ་མ་ཡིན་པ། མ་བསྟན་པ། རབ་ཏུ་མ་བསྟན་པ། མ་ཐོས་པ། ཐོས་པར་མ་བྱས་པ། མ་ཤེས་པ། རྣམ་པར་མ་ཤེས་པ། མ་བསྟན་པ། མ་མཐོང་བ། མ་བརྟགས་པ། འཛིན་དུ་མ་བཅུག་པ། རྟོགས་པར་མ་བྱས་པ། ཐོབ་པར་མ་བྱས་པ། མ་ཐོབ་པ། ཉེ་བར་མ་བསྙེན་པ། 
མ་བོར་བ། མ་བཞག་པ། མ་སྤངས་པ། བྱ་བ་མེད་པ། བྱེད་པ་མེད་པ། རབ་ཏུ་ཞི་བ་མེད་པ། མ་སྨད་པ། མ་བསྟོད་པ། ཐོབ་པ་མ་ཡིན་པ། མ་ཐོབ་པ་མ་ཡིན་པ། བདེ་བ་མ་ཡིན་པ། སྡུག་བསྔལ་བ་མ་ཡིན་པ། སྙན་པ་མ་ཡིན་པ། མི་སྙན་པ་མ་ཡིན་པ། གཟུགས་མ་ཡིན་པ། གཟུགས</font><hr>42-1-61a<br><font size=+2>
མེད་པ་མ་ཡིན་པ། གྲངས་མེད་པ། བགྲང་བ་མེད་པ། འཇིག་རྟེན་མེད་པ། འཇིག་རྟེན་དང་བྲལ་བ་མེད་པ། ཀུན་ནས་ཉོན་མོངས་པ་མེད་པ། རྣམ་པར་བྱང་བ་མེད་པ། འགྲོ་བ་མེད་པ། ལྡོག་པ་མེད་པ། མ་བརྟགས་པ། རྣམ་པར་མ་བརྟགས་པ། མ་གཡོས་པ། 
མ་བསམས་པ། མ་བསྐྱོད་པ། མངོན་པར་འདུས་མ་བྱས་པ། མ་སྤྲོས་པ། སྤྲོས་པ་དང་བྲལ་བ་སྟེ། འདི་ལྟར་གཟུགས་ཀྱི་མཚན་མ་མི་དམིགས་པ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་མཚན་མ་མི་དམིགས་པ། མིག་དང ། རྣ་བ་དང ། སྣ་དང ། 
ལྕེ་དང ། ལུས་དང ། ཡིད་ཀྱི་མཚན་མ་མི་དམིགས་པ། གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ཆོས་ཀྱི་མཚན་མ་མི་དམིགས་པ། མིག་གི་རྣམ་པར་ཤེས་པ་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་རྣམ་པར་ཤེས་པའི་མཚན་མ་མི་
དམིགས་པ། མིག་གི་འདུས་ཏེ་རེག་པ་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་འདུས་ཏེ་རེག་པའི་མཚན་མ་མི་དམིགས་པ། མིག་གི་འདུས་ཏེ་རེག་པ་ལས་བྱུང་བའི་ཚོར་བའི་མཚན་མ་མི་དམིགས་པ། ཡིད་ཀྱི་འདུས་ཏེ་རེག་པ་ལས་བྱུང་བའི་ཚོར་བའི་བར་གྱི་
མཚན་མ་མི་དམིགས་པ། གཟུགས་ཀྱི་འདུ་ཤེས་ཀྱི་མཚན་མ་མི་དམིགས་པ། ཆོས་ཀྱི་བར་གྱི་འདུ་ཤེས་ཀྱི་མཚན་མ་མི་དམིགས་པ། གཟུགས་སུ་སེམས་པའི་མཚན་མ་མི་དམིགས་པ། ཆོས་ཀྱི་བར་དུ་སེམས་པའི་མཚན་མ་མི་དམིགས་པ། ཡིད་ལ་བྱ་བའི་མཚན་མ་
མི་དམིགས་པ། ས་དང ། ཆུ་དང ། མེ་དང ། རླུང་དང ། ནམ་མཁའ་དང ། རྣམ་པར་ཤེས་པའི་ཁམས་ཀྱི་མཚན་མ་མི་དམིགས་པ། འདོད་པ་དང ། གཟུགས་དང ། གཟུགས་མེད་པའི་ཁམས་ཀྱི་མཚན་མ་མི་དམིགས་པ། འདུས་བྱས་དང ། འདུས་མ་བྱས་ཀྱི་མཚན་མ་མི་
དམིགས་པ་སྟེ། འདི་ལྟར་ཆོས་གང་དང་གང་བརྗོད་པའི་རང་བཞིན་གང་དང་གང་གིས་བརྗོད་པའི་ཆོས་དེ་དང ། དེ་བརྗོད་པའི་རང་བཞིན་དེ་དང་དེས་མི་བརྗོད་པ་སྟེ། སངས་རྒྱས་ཀྱི་ཆོས་རྣམས་ནི་དེ་ལྟར་ཉམས་དགའ་བ་ཡིན་ན་དེ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་མི་ཤེས</font><hr>42-1-61b<br><font size=+2>
པ་རྣམས་ཀྱིས་ཐོས་ན་འཇིགས་ཤིང་དངང་བ་དང ། སྐྲག་པར་འགྱུར་ཏེ། དེས་འཇིགས་པར་གྱུར་པས་ཐམས་ཅད་མཁྱེན་པའི་ཡེ་ཤེས་ལས་ཉམས་པར་འགྱུར་ཏེ། དེ་དག་ནི་ལྷ་དང་བཅས་པའི་འཇིག་རྟེན་གྱིས་མྱ་ངན་དུ་བྱ་བ་སྟེ། འཁོར་བ་ན་ཡོད་པའི་སྡུག་བསྔལ་གྱི་རྒྱུན་ཏོ་ཞེས་ཏེ། 
དེ་དག་གིས་འདི་ལྟར་སངས་རྒྱས་ཀྱི་ཆོས་རྣམས་ལ་འདོད་པ་བསྐྱེད་ནས་སངས་རྒྱས་ཀྱི་ཆོས་རྣམས་ཀྱི་དོན་དུ་བཅོམ་ལྡན་འདས་ལ་མཆོད་པའི་ཕྱིར་བརྩོན་པར་གྱུར་ཏོ། །དེ་དག་གིས་སུམ་ཅུ་རྩ་གསུམ་པའི་མཆོད་པ་ལས་ཁྱད་པར་འཕགས་པས་བཅོམ་ལྡན་འདས་ལ་མཆོད་དེ། 
བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་འཐབ་བྲལ་གྱི་ལྷ་དེ་དག་གིས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། 
རྒྱལ་བ་ཁྱོད་ཀྱིས་ཕུང་པོ་དབེན་པར་གཟིགས། །ཁམས་དང་སྐྱེ་མཆེད་རྣམས་ཀྱང་དེ་བཞིན་ཏེ། །དབང་པོའི་གྲོང་ནི་མཚན་མས་དབེན་པ་དག་།ཀུན་ཀྱང་ཐུབ་པ་ཁྱོད་ཀྱིས་ཇི་བཞིན་གཟིགས། །འཇིག་རྟེན་མཁས་པའི་བདེན་པ་གཉིས་ཡིན་ཏེ། །ཁྱོད་ཀྱིས་གཞན་ལས་མ་
གསན་རང་གིས་གཟིགས། །དེ་ནི་ཀུན་རྫོབ་བདེན་དང་དོན་དམ་སྟེ། །བདེན་པ་གསུམ་པ་གང་ཡང་མ་མཆིས་སོ། །གང་གིས་བདེ་བར་གཤེགས་ལ་འགྲོ་བ་རྣམས། །བདེ་བའི་དོན་དུ་དད་པ་སྐྱེད་འགྱུར་བ། །རྒྱལ་བས་འགྲོ་བ་རྣམས་ཀྱི་དོན་སླད་དུ། །འཇིག་རྟེན་ཕན་ཕྱིར་ཀུན་
རྫོབ་དེ་བསྟན་ཏོ། །སེམས་ཅན་ཚོགས་ཀྱི་འགྲོ་དྲུག་གང་བསྟན་པ། །སེམས་ཅན་དམྱལ་དང་དུད་འགྲོ་ཡི་དགས་དང ། །ལྷ་མིན་རིས་དང་མི་དང་ལྷ་ཡི་རྣམས། །མི་ཡི་སེང་གེས་ཀུན་རྫོབ་བཏགས་པ་མཛད། །རིགས་དམའ་དེ་བཞིན་མཐོ་བའི་རིགས་རྣམས་དང ། །ཕྱུག་པོའི་ཁྱིམ་
དང་དབུལ་པོའི་ཁྱིམ་དག་དང ། །བྲན་གྱི་ཚོགས་དང་དེ་བཞིན་གཡོག་གི་ཚོགས། །བུད་མེད་ཚོགས་དང་སྐྱེས་པ་མ་ནིང་དང ། །འགྲོ་བའི་ཁྱད་པར་ཇི་སྙེད་གང་ཡང་རུང ། །མཚུངས་མེད་ཁྱོད་ཀྱིས་འཇིག་རྟེན་བསྟན་མཛད་པ། །ཀུན་རྫོབ་བདེན་པར་མཁས་པས་ཐུགས་ཆུད་ནས། །


</font><hr>42-1-62a<br><font size=+2>
འཇིག་རྟེན་ཕན་པས་མི་ལ་དེ་བསྟན་ཏོ། །དེ་ལ་དགའ་བའི་འགྲོ་བ་འཁོར་བ་ན། །འགྲོ་བའི་ཆོས་བརྒྱད་དེ་ལ་མི་འབྱུང་སྟེ། །ཐོབ་དང་མ་ཐོབ་སྙན་དང་མི་སྙན་དང ། །བསྟོད་དང་སྨད་དང་བདེ་དང་སྡུག་བསྔལ་ལོ། །ཐོབ་པ་རྙེད་ན་དེ་ལ་ཆགས་པ་སྐྱེད། །མ་ཐོབ་
གྱུར་ན་དེས་ཀྱང་འཁྲུག་པར་འགྱུར། །གང་གཞན་མ་བསྟན་ཚུལ་འདིས་ཤེས་པར་བྱ། །ནད་རྣམས་བརྒྱད་ཀྱིས་དེ་རྒྱུད་གནོད་པར་འགྱུར། །ཀུན་རྫོབ་དེ་ལ་དོན་དམ་སུ་སྨྲ་བ། །དེ་དག་ནོར་བའི་བློ་ལྡན་ཤེས་པར་བྱ། །མི་སྡུག་སྡུག་དང་སྡུག་བསྔལ་བདེ་བ་དང ། །བདག་མེད་
རང་བཞིན་བདག་ཏུ་སྨྲ་བ་དང ། །མི་རྟག་ཆོས་ལ་རྟག་ཅེས་སྨྲ་བགྱིད་ཅིང ། །དེ་ལ་དགའ་སྟེ་མཚན་མར་གང་གནས་པ། །དེ་དག་བདེ་གཤེགས་གསུང་ནི་ཐོས་གྱུར་ན། །འཇིགས་ཤིང་ཇི་བཞིན་མི་རྟོགས་སྤོང་བར་འགྱུར། །དེ་དག་བདེ་གཤེགས་གསུང་ནི་སྤངས་གྱུར་པས། །
སེམས་ཅན་དམྱལ་བར་སྡུག་བསྔལ་མི་བཟད་མྱོང ། །དེ་དག་ཚུལ་མིན་བདེ་བ་ཚོལ་བགྱིད་ཀྱང ། །སྡུག་བསྔལ་བརྒྱད་དག་བྱིས་པས་མྱོང་བར་འགྱུར། །འཇིག་རྟེན་ཕན་པའི་བསྟན་པ་སུ་ཞིག་གིས། །མ་ལོག་བློས་ནི་རྣམ་པར་རྟོགས་གྱུར་ན། །སྦྲུལ་གྱི་པགས་པ་རྙིང་ལྟར་རབ་
སྤངས་ཏེ། །སྲིད་པ་ཀུན་ལས་འདས་ནས་ཞི་བར་འགྱུར། །ཆོས་འདི་ཐམས་ཅད་རང་བཞིན་དབེན་པ་སྟེ། །སྟོང་པ་མཚན་མ་མེད་པ་དོན་དམ་ཞེས། །གང་གིས་ཐོས་ནས་དགའ་བ་བསྐྱེད་འགྱུར་བ། །དེ་དག་བླ་མེད་བྱང་ཆུབ་ཐོབ་པར་འགྱུར། །ཇི་ལྟར་བདེ་བར་གཤེགས་པས་གསུངས་
པའི་ཆོས། །དེ་ལ་ལྷ་རྣམས་ཐེ་ཚོམ་མ་མཆིས་ཏེ། །འགྲོ་བ་ཐམས་ཅད་ཡོངས་སུ་དགྲོལ་བའི་ཕྱིར། །དེ་དག་བླ་ན་མེད་པའི་བྱང་ཆུབ་ཚོལ། །བྱང་ཆུབ་བློ་ཅན་རྣམ་དག་བློ་ཅན་རྣམས། །སྐྱེས་བུ་མཆོག་གིས་དགའ་བ་བསྐྱེད་དུ་གསོལ། །དེ་ཐོས་འགྲོ་བ་ཀུན་ལ་སྨན་སླད་དུ། །བླ་
ན་མེད་པའི་བྱང་ཆུབ་ཐོབ་པར་འགྱུར། །དེ་ནས་དེའི་ཚེ་བཅོམ་ལྡན་འདས་ཀྱིས་འཐབ་བྲལ་རིས་ཀྱི་ལྷ་བྱེ་བ་ཕྲག་བཞི་བཅུ་པོ་དག་གི་ལྷག་པའི་བསམ་པ་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ།


</font><hr>42-1-62b<br><font size=+2>
འཇིག་རྟེན་ཕན་པས་འཛུམ་པ་གང་མཛད་དེས། །ཁྱོད་ཀྱི་འཁོར་ནི་ཐེ་ཚོམ་འཚལ་བར་གྱུར། །མི་མཆོག་འཛུམ་པའི་རྒྱུ་དེ་བཀའ་སྩལ་གསོལ། །དེས་ནི་འཁོར་འདི་རབ་ཏུ་དགའ་བར་འགྱུར། །ལྷ་རྣམས་ལུང་བསྟན་དེ་ནི་ཐོས་གྱུར་ན། །འཁོར་འདི་ཤིན་ཏུ་དགའ་ཞིང་མགུ་བར་
འགྱུར། །རིགས་པ་ལྡན་པ་བསྟན་པ་འདི་ཉིད་ལ། །བདེ་བར་ནན་ཏན་བགྱིད་ཅིང་རྩོམ་པར་འགྱུར། །རྒྱལ་བ་ཁྱོད་འཁོར་འདི་ནི་མཆོག་ལྡན་ཏེ། །དྲང་སྲོང་ཆེན་པོ་སངས་རྒྱས་ཡོན་ཏན་སྣོད། །འགྲོ་བ་འདི་རྣམས་བསྡུ་བར་མཛད་སླད་དུ། །སྙན་པའི་གསུང་ནི་ལེགས་པར་བརྗོད་
དུ་གསོལ། །སངས་རྒྱས་ཡོན་ཏན་མཐུ་དག་ཐོས་གྱུར་ན། །སྐྱེ་དགུ་ཀུན་ལ་རབ་ཏུ་སྨན་པར་འགྱུར། །བདེ་བར་གཤེགས་པས་ལུང་བསྟན་དེ་ཐོས་ན། །མཁས་པ་རྣམས་ནི་ཚུལ་བཞིན་རྩོམ་པར་འགྱུར། །མི་ཡི་དམ་པ་སྨྲ་བའི་མཆོག་གིས་འདིར། །ཐེ་ཚོམ་འཚལ་བའི་ནེམ་ནུར་
ལེགས་པར་སོལ། །འཁོར་རྣམས་ཐམས་ཅད་ཐོས་པར་དགའ་ཞིང་སྡོད། །ལྷ་རྣམས་ལུང་བསྟན་པ་ནི་བཀའ་སྩལ་གསོལ། །ཀུན་ཀྱང་རིམ་གྲོར་གུས་པར་རྣ་བླགས་ཏེ། །ཁྱོད་ཀྱིས་ལུང་བསྟན་རབ་ཏུ་དགའ་བ་ལ། །སྒྲིབ་པ་རབ་ཏུ་སྤངས་ཤིང་དེ་དག་ཉན། །འཇིག་རྟེན་ཕན་
ཕྱིར་སྐྱེས་བུ་མཆོག་གིས་གསུངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། །འཇིག་རྟེན་ཕན་ཕྱིར་མཁས་པས་འཛུམ་མཛད་པ། །རྟ་ཐུལ་ཁྱོད་ཀྱིས་དྲིས་པ་དུས་དང་ལྡན། །སངས་རྒྱས་ཡོན་ཏན་མཐུ་ནི་ཐོས་གྱུར་ན། །
སྐྱེ་བོ་ཚོགས་ཆེན་རྣམས་ཀྱི་དོན་དུ་འགྱུར། །སངས་རྒྱས་ཡོན་ཏན་ཚོགས་ལ་བློ་ཞན་ཅིང ། །འདོད་ཆགས་བློ་དང་ཞེ་སྡང་བློ་ལྡན་དང ། །ཚེ་རབས་བརྒྱར་ནི་རྩོད་པའི་བློ་ཅན་དང ། །གཏི་མུག་བློ་ཅན་དགའ་བ་སྐྱེར་མི་འགྱུར། །གང་རྣམས་རྒྱལ་བས་བསྟན་ལ་དགའ་བ་དང ། །
གང་གིས་རྒྱལ་བ་རྣམས་ལ་སྔོན་དྲིས་དང ། །གང་རྣམས་སྙིང་རྗེ་ཆེ་དང་ལྡན་པ་དག་།དེ་ཀུན་སངས་རྒྱས་ཡོན་ཏན་ལྡན་པར་འགྱུར། །གང་གིས་འགྲོ་བ་གདོན་ཟིན་མཐོང་གྱུར་ཏེ། །མི་ཡི་སེང་གེ་སྙིང་རྗེ་སྐྱེད་བྱེད་པ། །དེ་དག་སངས་རྒྱས་ཡོན་ཏན་འདི་ཐོས་ནས། །ུད་པལ་ཕྲེང</font><hr>42-1-63a<br><font size=+2>
བཞིན་མགོ་ལ་ཁྱེར་བར་འགྱུར། །ང་ཡི་འཁོར་འདི་རབ་ཏུ་དགའ་འགྱུར་བ། །སྔོན་གྱི་རྒྱལ་ལ་བསྙེན་བཀུར་སྔོན་བྱས་ཏེ། །དེ་དག་སངས་རྒྱས་ཡོན་ཏན་ཡིད་འོང་འདི། །མེ་ཏོག་ཕྲེང་བཞིན་དེ་དག་ཡང་དག་ལྟ། །འཐབ་བྲལ་ལྷ་རྣམས་སྔོན་གྱི་རྒྱལ་ཀུན་ལ། །
བསྙེན་བཀུར་བྱས་ཤིང་ཆགས་པ་སྤངས་པ་སྟེ། །ཉོན་མོངས་དམད་ཅིང་སངས་རྒྱས་བློ་ལྡན་འགྱུར། །སྙིང་རྗེ་ལྡན་ཞིང་ཉོན་མོངས་མེད་བློ་ལྡན། །རྒྱལ་བ་མི་ཡི་སེང་གེ་གང་གཱ་ཡི། །བྱེ་སྙེད་ཀུན་ལ་སྔོན་ཆད་བསྙེན་བཀུར་བྱས། །བྱང་ཆུབ་བླ་ན་མེད་པར་སྨོན་བྱེད་ཅིང ། །
དགེ་བ་མཐའ་ཡས་འདི་དག་ཀུན་གྱིས་བྱས། །སེམས་ཅན་ཉོན་མོངས་འདམ་བྱིང་རིག་གྱུར་ནས། །སྡུག་བསྔལ་གྱུར་པ་རྣམས་ལ་སྙིང་རྗེ་སྐྱེད། །དེ་དག་མི་མཆོག་སེམས་ཅན་ཕན་མཛད་ལ། །ཆོས་ཚུལ་མཐའ་ཡས་ཡོངས་སུ་དྲིས་པར་གྱུར། །གང་ཐོས་ནས་ནི་རྣམ་པར་འདྲེན་
འགྱུར་བ། །རྣམ་འདྲེན་ཆོས་ལ་འཇུག་པ་འཆད་པར་འགྱུར། །མི་ཡི་ཉོན་མོངས་སྤྱོད་པ་རབ་མཁྱེན་ནས། །དེ་དག་རྣམས་ལ་རྒྱ་ཆེན་ཆོས་ཀྱང་འཆད། །རྣམ་འདྲེན་སྐྱེས་བུ་དམ་པའི་མཆོག་དེ་དག་།རང་བཞིན་མེད་པ་སྟོང་པ་ཉིད་ཀྱང་འཆད། །དེ་དག་རྒྱལ་བའི་གསུང་
དེ་ཐོས་གྱུར་ནས། །འགྲོ་བ་ཐམས་ཅད་སྟོང་པར་རབ་ཏུ་རྟོགས། །ཅིས་སྟོང་ཞེ་ན་མཚན་མའི་རྣམ་པས་སྟོང ། །རང་བཞིན་མེད་ཅིང་མཚན་མ་མེད་པ་སྨྲ། །རྒྱལ་བའི་ཆོས་རྣམས་དེ་ལྟར་ཤེས་གྱུར་ནས། །ཀུན་ཀྱང་སངས་རྒྱས་ཡོན་ཏན་རྣམས་ལ་གནས། །དེ་དག་ང་ལ་
མཆོད་པ་རྒྱ་ཆེན་བྱས། །བདག་གིས་ཆོས་བཞིན་དུ་ནི་ལུང་བསྟན་ནས། །སྐར་ཚོགས་མཉམ་པའི་བསྐལ་པ་དམ་པ་ལ། །བླ་ན་མེད་པའི་བྱང་ཆུབ་ཐོབ་པར་འགྱུར། །བདེ་གཤེགས་མཉམ་པ་མེད་པ་བྱེ་བ་ཕྲག་།ཉི་ཤུ་ཉི་ཤུས་ཡོངས་སུ་གང་བར་འགྱུར། །བློ་གྲོས་དག་
ཅེས་བྱ་བའི་གྲངས་སུ་འགྲོ། །སེམས་ཅན་བསམ་ཡས་ཡོངས་སུ་སྦྱོང་པར་འགྱུར། །འཐབ་བྲལ་འཁོད་པའི་ལྷ་ཡི་བསམ་པ་རྣམས། །རྟ་ཐུལ་གྱིས་ནི་ཡོངས་སུ་ཞུས་བྱས་པ། །རྒྱལ་བ་དགྲ་རྒྱལ་དྲང་སྲོང་ཆེན་པོ་ཡི། །ལུང་བསྟན་ལྷ་དང་བཅས་པའི་འཇིག་རྟེན་དགའ། །


</font><hr>42-1-63b<br><font size=+2>
འཐབ་བྲལ་བ་ལུང་བསྟན་པའི་ལེའུ་སྟེ་བཅུ་དྲུག་པའོ།། །།དེ་ནས་དགའ་ལྡན་རིས་ཀྱི་ལྷ་བྱེ་བ་ཕྲག་བརྒྱད་ཅུས་ལྷ་མ་ཡིན་རྣམས་ནས་འཐབ་བྲལ་གྱི་རིས་ཀྱི་ལྷའི་བར་དེ་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་འདི་སྙམ་དུ་སེམས་ཏེ། 
གང་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པའི་ཆོས་དེ་གང་ཞིག་ཅི་གཟུགས་སམ། འོན་ཏེ་ཚོར་བའམ། འོན་ཏེ་འདུ་ཤེས་སམ། འོན་ཏེ་འདུ་བྱེད་དམ།འོན་ཏེ་རྣམ་པར་ཤེས་པ་ཞིག་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་ཏུ་ལུང་བསྟན་སྙམ་ནས་དེ་དག་འདི་སྙམ་དུ་སེམས་ཏེ། གཟུགས་ནི་བཅོམ་ལྡན་འདས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ནི་བཅོམ་ལྡན་འདས་ཀྱིས་
བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། གཟུགས་ཀྱང་མ་སྐྱེས་པ། བྱང་ཆུབ་ཀྱང་མ་སྐྱེས་པ་ན་ཇི་ལྟར་མ་སྐྱེས་པས་མ་སྐྱེས་པ་མངོན་པར་རྫོགས་པར་འཚང་རྒྱ་བར་བྱ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་
པར་ཤེས་པ་ཡང་མ་སྐྱེས་པ། བྱང་ཆུབ་ཀྱང་མ་སྐྱེས་པ་ན་དེ་ལ་ཇི་ལྟར་མ་སྐྱེས་པས་མ་སྐྱེས་པ་མངོན་པར་རྫོགས་པར་འཚང་རྒྱ་བར་བྱ། གཟུགས་ཀྱང་འགག་པ་མེད་པ། བྱང་ཆུབ་ཀྱང་འགག་པ་མེད་པ། རྣམ་པར་ཤེས་པའི་བར་ཡང་འགག་པ་མེད་པ། བྱང་ཆུབ་ཀྱང་
འགག་པ་མེད་པ། གཟུགས་ཀྱང་སྤྲོས་པ་མེད་པ། བྱང་ཆུབ་ཀྱང་སྤྲོས་པ་མེད་པ། རྣམ་པར་ཤེས་པའི་བར་ཡང་སྤྲོས་པ་མེད་པ། བྱང་ཆུབ་ཀྱང་སྤྲོས་པ་མེད་པ། གཟུགས་ཀྱང་གཉིས་སུ་མེད་པ། བྱང་ཆུབ་ཀྱང་གཉིས་སུ་མེད་པ། རྣམ་པར་ཤེས་པའི་བར་ཡང་
གཉིས་སུ་མེད་པ། བྱང་ཆུབ་ཀྱང་གཉིས་སུ་མེད་པ།གཟུགས་ཀྱང་གཡོ་བ་མེད་པ། བྱང་ཆུབ་ཀྱང་གཡོ་བ་མེད་པ་རྣམ་པར་ཤེས་པའི་བར་ཡང་གཡོ་བ་མེད་པ། བྱང་ཆུབ་ཀྱང་གཡོ་བ་མེད་པ། གཟུགས་ཀྱང་དམིགས་སུ་མེད་པ། བྱང་ཆུབ་ཀྱང་དམིགས་སུ་མེད་པ</font><hr>42-1-64a<br><font size=+2>
རྣམ་པར་ཤེས་པའི་བར་ཡང་དམིགས་སུ་མེད་པ། བྱང་ཆུབ་ཀྱང་དམིགས་སུ་མེད་པ་ན་ཇི་ལྟར་འགག་པ་མེད་པ་དང ། སྤྲོས་པ་མེད་པ་དང ། གཉིས་སུ་མེད་པ་དང ། གཡོ་བ་མེད་པ་དང་དམིགས་སུ་མེད་པས་འགག་པ་མེད་པ་དང ། དམིགས་སུ་མེད་པའི་བར་
དུ་མངོན་པར་རྫོགས་པར་འཚང་རྒྱ་བར་བྱ། དེ་ལྟར་ཆོས་ཐམས་ཅད་མི་དམིགས་ན་འདི་ལ་སངས་རྒྱས་ནི་གང ། བྱང་ཆུབ་སེམས་དཔའ་ནི་གང ། བྱང་ཆུབ་ནི་གང ། ལུང་བསྟན་པ་ནི་གང ། གཟུགས་ནི་གཟུགས་ཀྱིས་སྟོང ། ཚོར་བ་དང ། འདུ་ཤེས་དང ། འདུ་བྱེད་དང ། 
རྣམ་པར་ཤེས་པ་ནི་རྣམ་པར་ཤེས་པས་སྟོང ། སངས་རྒྱས་ནི་སངས་རྒྱས་ཀྱི་ངོ་བོ་ཉིད་ཀྱིས་སྟོང ། བྱང་ཆུབ་སེམས་དཔའ་ནི་བྱང་ཆུབ་སེམས་དཔའི་ངོ་བོ་ཉིད་ཀྱིས་སྟོང ། བྱང་ཆུབ་ནི་བྱང་ཆུབ་ཀྱི་ངོ་བོ་ཉིད་ཀྱིས་སྟོང ། ལུང་བསྟན་པ་ནི་ལུང་བསྟན་པའི་ངོ་བོ་ཉིད་ཀྱིས་སྟོང་སྟེ། 
དེ་ལྟར་ཆོས་ཐམས་ཅད་རང་བཞིན་གྱིས་སྟོང་པ་ལ་གཟུགས་ཞེས་བྱ་བ་དང ། རྣམ་པར་ཤེས་པའི་བར་ཞེས་བྱ་བ་དང ། སངས་རྒྱས་ཞེས་བྱ་བ་དང ། ལུང་བསྟན་པའི་བར་ཞེས་བྱ་བ་དེ་དག་ནི་ཐ་སྙད་ཙམ། མིང་ཙམ། བརྡ་ཙམ། ཀུན་རྫོབ་ཙམ། བརྗོད་པ་ཙམ། གདགས་པ་ཙམ་
སྟེ། དེ་ལ་མཁས་པ་རྣམས་ཀྱིས་མངོན་པར་ཞེན་པར་བྱ་བའི་མི་ཆའོ། །འདི་ལྟ་སྟེ། དཔེར་ན་མི་ཞིག་ཉལ་བའི་རྨི་ལམ་ན་འདོད་པའི་ཡོན་ཏན་ལྔ་དང་ལྡན་ཞིང་རྩེ་རྩེ་བ་ལས་དེ་ཉལ་བ་ལས་སང་ན། འདོད་པའི་ཡོན་ཏན་དེ་དག་མི་མཐོང་སྟེ། དེ་རྗེས་སུ་དྲན་ན་ཡང་མི་རྙེད་ཅིང་དེ་ལྟར་
མི་རྙེད་པའི་ཕྱིར་སྡུག་བསྔལ་དུ་འགྱུར་བ་དེ་བཞིན་དུ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་རྣམས་ཀྱང་བྱང་ཆུབ་ཚོལ་ན་དེ་དག་བྱང་ཆུབ་དང་ཕྲད་པར་མི་འགྱུར་ཏེ། བྱང་ཆུབ་མ་རྙེད་ཅིང་རོ་མ་མྱོང་བས་སྡུག་བསྔལ་དུ་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཆོས་
ཐམས་ཅད་ནི་རྨི་ལམ་ལྟ་བུ་ནོར་བ་སྟེ། ཆོས་དེ་དག་གི་དོན་ནི་རྣམ་པ་གཞན་ལ་སོ་སོའི་སྐྱེ་བོ་དེ་དག་ཀྱང་རྣམ་པ་གཞན་དུ་ཞན་ཏོ། །ཆོས་དེ་དག་ནི་དེ་ལྟར་ཤེས་པར་བྱ་བ་ཡིན་ན་དེ་ལ་ཆོས་གང་ཞིག་སངས་རྒྱས་ཡིན། གང་ཞིག་བྱང་ཆུབ་སེམས་དཔའ་ཡིན། གང་ཞིག་བྱང་ཆུབ་ཡིན།


</font><hr>42-1-64b<br><font size=+2>
གང་ཞིག་ལུང་བསྟན་པ་ཡིན། དེ་ལྟར་ཆོས་ཐམས་ཅད་དམིགས་སུ་མེད་དེ། སོ་སོའི་སྐྱེ་བོ་ཡང་དམིགས་སུ་མེད། སོ་སོའི་སྐྱེ་བོའི་ཆོས་ཀྱང་དམིགས་སུ་མེད། ཉན་ཐོས་ཀྱང་དམིགས་སུ་མེད། ཉན་ཐོས་ཀྱི་ཆོས་ཀྱང་དམིགས་སུ་མེད། རང་སངས་རྒྱས་ཀྱང་དམིགས་སུ་མེད། 
རང་སངས་རྒྱས་ཀྱི་ཆོས་ཀྱང་དམིགས་སུ་མེད། བྱང་ཆུབ་སེམས་དཔའ་ཡང་དམིགས་སུ་མེད། བྱང་ཆུབ་སེམས་དཔའི་ཆོས་ཀྱང་དམིགས་སུ་མེད། སངས་རྒྱས་ཀྱང་དམིགས་སུ་མེད། སངས་རྒྱས་ཀྱི་ཆོས་ཀྱང་དམིགས་སུ་མེད། བྱང་ཆུབ་ཀྱང་དམིགས་སུ་མེད། མྱ་ངན་
ལས་འདས་པ་ཡང་དམིགས་སུ་མེད་དོ། །བཅོམ་ལྡན་འདས་དེ་ལ་ནི་བདག་ཅག་ཐེ་ཚོམ་མ་མཆིས། ཡིད་གཉིས་མ་མཆིས་སོ་ཞེས་གསོལ་ནས་དགའ་ལྡན་རིས་ཀྱི་ལྷའི་བུ་དེ་དག་ཆོས་དེ་དག་ལ་ཐེ་ཚོམ་མེད་ཅིང་ནེམ་ནུར་མེད་པར་གྱུར་ཏེ། བཅོམ་ལྡན་འདས་ལ་མཆོད་པ་བྱ་བའི་
ཕྱིར་བརྩོན་པར་གྱུར་ནས་དེ་དག་གིས་འཐབ་བྲལ་གྱི་མཆོད་པ་ལས་ཁྱད་པར་དུ་འཕགས་པས་བཅོམ་ལྡན་འདས་ལ་མཆོད་པ་བྱས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །ཕྱོགས་
གཅིག་ཏུ་འཁོད་ནས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། གང་དག་སངས་རྒྱས་ཡོན་ཏན་རབ་གནས་པ། །དེ་དག་འཇུག་པ་དེ་བཞིན་གཤེགས་པས་གསུངས། །རྣམ་ཐར་སྒོ་གསུམ་པོ་ནི་རྙེད་གྱུར་པས། །མཚུངས་པ་མེད་པའི་སྤྱོད་ཡུལ་སྤྱོད་པར་
འགྱུར། །གཟུགས་དང་ཚོར་བ་འདུ་ཤེས་མ་མཆིས་ཏེ། །སེམས་དང་བསམ་པ་དེ་བཞིན་མ་མཆིས་པ། །ཆགས་མེད་བློ་མངའ་རྣམས་ཀྱི་སྤྱོད་ཡུལ་ལགས། །མི་ཡི་སེང་གེ་ཕུང་པོ་དབེན་ལ་དགྱེས། །སྐྱེས་བུ་དམ་པ་མཁས་པ་དེ་དག་གི་།བྱང་ཆུབ་སེམས་ཀྱང་ནམ་ཡང་འབྱུང་མ་
མཆིས། །ཕུང་པོ་དབེན་པའི་ཡོན་ཏན་མྱོང་གྱུར་ནས། །སངས་རྒྱས་དགོངས་ལ་ནེམ་ནུར་སྤངས་བློ་ལྡན། །དེ་དག་བྱང་ཆུབ་སྨོན་པ་མ་མཆིས་ཤིང ། །བྱང་ཆུབ་སེམས་ལ་འང་དེ་དག་མི་སྨོད་དེ། །དགའ་དང་ཞུམ་པར་འགྱུར་བ་མ་མཆིས་པར། །བདེ་གཤེགས་སྲས་རྣམས་སྤྱད་པ་སྤྱོད</font><hr>42-1-65a<br><font size=+2>
པ་བགྱིད། །བདེ་གཤེགས་རྣམས་ཀྱིས་ཆོས་རྣམས་མཉམ་པར་གཟིགས། །དེ་ལ་རྒྱལ་སྲས་འཇིགས་དང་བྲལ་བ་རྣམས། །ཡང་དག་ཉིད་དུ་སངས་རྒྱས་ལེགས་སྤྱོད་ཅིང ། །མཁས་པ་དེ་དག་འཇིག་རྟེན་འདི་ན་སྤྱོད། །གཟུགས་ཀྱི་མཚན་མ་རྣམ་པར་གཞིག་བགྱིས་ཤིང ། །
མཚན་མའི་རྣམ་པ་ཐམས་ཅད་རབ་སྤངས་ཏེ། །སྲིད་པ་གསུམ་ལ་དེ་དག་ཡོང་མི་སྨོན། །དངོས་པོ་སྟོང་པར་སྨོན་ལམ་དེ་དག་བགྱིད། །ཕུང་པོ་འདི་དག་མ་སྐྱེས་རྟོགས་གྱུར་ཅིང ། །ལུང་བསྟན་བདེ་གཤེགས་ཉིད་ཀྱང་མ་སྐྱེས་ལ། །བྱང་ཆུབ་སེམས་དཔའ་བྱང་ཆུབ་ཀྱང་མ་སྐྱེས། །དེ་
ལྟར་གང་འཚལ་དེ་ལ་རྨོངས་མ་མཆིས། །སྐྱེ་བོའི་ཆོས་དང་སངས་རྒྱས་ཡོན་ཏན་རྣམས། །དེ་དག་ཀུན་དང་བདེ་གཤེགས་མ་སྐྱེས་ཏེ། །མི་ཡི་སེང་གེ་དེ་ལྟར་གང་འཚལ་བ། །དེ་ནི་ཁྱོད་སྲས་ཁྱོད་ནི་དེ་ཡི་ཡབ། །གང་ཞིག་ཕུང་པོ་འགག་པ་མ་མཆིས་ཤིང ། །ཁམས་དང་སྐྱེ་མཆེད་དེ་བཞིན་
རྒྱལ་བའི་ཆོས། །བྱང་ཆུབ་རྒྱལ་བ་དེ་བཞིན་ལུང་བསྟན་པ། །བཅོམ་ལྡན་འདི་ཀུན་འགག་མེད་འཚལ་བ་དང ། །གང་རྣམས་བྱང་ཆུབ་འཚལ་ཞིང་སྤྱོད་བགྱིད་པ། །འཇིག་རྟེན་མཁས་པ་དེ་དག་འགག་མ་མཆིས། །འགྲོ་བ་ཐམས་ཅད་འགག་མེད་བློར་གྱུར་ན། །དེ་འདྲའི་བློ་ལྡན་བྱང་ཆུབ་རྙེད་མི་
དཀའ། །ཕུང་པོ་སྐྱེ་མཆེད་དག་དང་ཁམས་རྣམས་དང ། །བྱང་ཆུབ་རྒྱལ་བ་རྒྱལ་སྲས་མི་གཡོ་བར། །གང་གིས་འཚལ་བ་དེ་དག་རྒྱལ་སྲས་ཏེ། །དེ་དག་རྒྱལ་བའི་ཆོས་འདི་འཛིན་པ་ལགས། །ཕུང་པོ་སེམས་མེད་དེ་བཞིན་སྐྱེ་མཆེད་དང ། །ཁམས་དང་བྱང་ཆུབ་རྒྱལ་བ་རྒྱལ་སྲས་དང ། །
ལུང་བསྟན་དེ་བཞིན་སེམས་པ་མ་མཆིས་པར། །གང་གིས་འཚལ་བ་དེ་དག་རྒྱལ་བའི་སྲས། །རང་བྱུང་ཕུང་པོ་དངོས་ཉིད་སྟོང་པ་སྟེ། །ཁམས་དང་སྐྱེ་མཆེད་དག་དང་རྒྱལ་བ་དང ། །བྱང་ཆུབ་དང་ནི་ལུང་བསྟན་རྒྱལ་སྲས་རྣམས། །ངོ་བོ་ཉིད་ཀྱིས་སྟོང་པར་གང་སྤྱོད་དང ། །ཕུང་པོ་སྤྲོས་
འདྲ་དེ་བཞིན་ཁམས་རྣམས་དང ། །སྐྱེ་མཆེད་རྐང་གཉིས་མཆོག་དང་བྱང་ཆུབ་དང ། །ལུང་བསྟན་སྤྲོས་པ་མེད་པར་གང་སྤྱོད་ཅིང ། །དེ་ལྟར་གང་འཚལ་དེ་དག་རྒྱལ་བའི་སྲས། །གནས་པ་མ་མཆིས་མི་གནས་མ་ལགས་ཏེ། །མཆིས་པ་མ་ལགས་མ་མཆིས་ཡོང་མ་ལགས། །


</font><hr>42-1-65b<br><font size=+2>
འདུས་བྱས་མ་ལགས་འདུས་མ་བྱས་མ་ལགས། །དེ་ལྟར་གང་འཚལ་དེ་དག་རྒྱལ་བའི་སྲས། །རྒྱལ་དང་འགྲོ་འདི་དེ་ལྟར་ཡོངས་མཐོང་ཞིང ། །སྟོན་པའི་དགོངས་པ་དེ་ལྟར་འཚལ་གྱུར་ལ། །དེ་ལྟར་བགྱིས་ན་གང་ཟག་མཆོག་མཆོད་ཅིང ། །འདྲེན་པ་འཁོར་དང་བཅས་ལ་བསྙེན་
བཀུར་ལགས། །རྣམ་པར་འདྲེན་ལ་བསྟོད་པའི་བསོད་ནམས་གང ། །ཇི་སྙེད་འཇིག་རྟེན་ཕན་མཛད་མཁྱེན་པ་ཡི། །དགེ་བ་དེ་ཡིས་འགྲོ་བ་རང་བྱུང་བ། །རྒྱལ་བ་མཚན་མཆོག་ལྡན་པ་གྲུབ་པར་ཤོག་།དེ་ནས་བཅོམ་ལྡན་འདས་ཀྱིས་དགའ་ལྡན་རིས་ཀྱི་ལྷ་དེ་དག་གི་ལྷག་པའི་
བསམ་པ་ཐུགས་སུ་ཆུད་ནས་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འདྲེན་པ་རྒྱུ་ཡི་སྟོབས་ནི་གང་ཞིག་གིས། །སྟོབས་བཅུ་བརྙེས་པ་འདི་ལྟར་འཛུམ་མཛད་པ། །འཛུམ་པའི་རྒྱུ་དེ་འདྲེན་པས་བཀའ་སྩལ་
གསོལ། །དེས་ནི་འཇིག་རྟེན་འདི་དག་དགའ་བར་འགྱུར། །ཤཱཀྱ་ཐུབ་པའི་ཞལ་ནས་འཛུམ་མཛད་པ། །འགྲོ་བ་འདིས་མཐོང་ཐེ་ཚོམ་འཚལ་འགྱུར་ཏེ། །ཉན་པར་འཚལ་ཞིང་གཞན་དུ་མི་སེམས་པར། །ཀུན་ཀྱང་འཇིག་རྟེན་ཕན་པའི་ཞལ་དུ་ལྟ། །འདི་ལྟར་དཔེར་ན་ནད་པ་ནད་སྐྱོ་བ། །
སྨན་པས་བསྒོ་བ་བཞིན་དུ་འཛིན་བགྱིད་པ། །དེ་བཞིན་འཁོར་འདི་ལུང་བསྟན་ཐོས་འཚལ་ཞིང ། །རྐང་གཉིས་དབང་པོ་བདེ་གཤེགས་ཞལ་དུ་ལྟ། །འཁོར་འདི་ཐམས་ཅད་རྒྱ་ཆེན་ལྡན་པ་སྟེ། །སངས་རྒྱས་དགོངས་ལ་ཞེན་པའི་ཡིད་དང་ལྡན། །རྒྱལ་བས་ལུང་བསྟན་དེ་དག་ཐོས་འཚལ་ཏེ། །
ཀུན་ཀྱང་བདེ་གཤེགས་ཞལ་དུ་ལྟ་ཞིང་སྡོད། །དེ་ལ་རྒྱལ་བས་ཐུགས་རྗེ་ཆེ་བསྐྱེད་ཅིང ། །ཅི་ནས་འཁོར་འདི་རབ་ཏུ་དགར་འགྱུར་དང ། །སངས་རྒྱས་དགོངས་ལ་བསམ་པ་གཞོག་འགྱུར་བར། །ཡེ་ཤེས་སྟོབས་ཀྱིས་ཐེ་ཚོམ་གཅད་དུ་གསོལ། །མི་ཡི་ཁྱུ་མཆོག་ལུང་བསྟན་དུས་ལ་བབ། །
ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །སངས་རྒྱས་སླར་སྡོའི་དགྲ་ནི་མི་མངའ་ན། །རྟོག་གེའི་ཚོགས་ཀྱི་སྡེ་ནི་གཞིག་ཏུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་འཇིག་རྟེན་སྒྲོན་མཛད་ལ། །འཛུམ</font><hr>42-1-66a<br><font size=+2>
པའི་དོན་དྲིས་དེ་ནི་དུས་དང་ལྡན། །དེ་ལྟར་འཇིག་རྟེན་མཁས་ལ་དྲིས་པས་ན། །དེ་རིང་འགྲོ་བ་འདི་ཡི་དོན་ཆེན་བྱས། །འཇིག་རྟེན་ཕན་ཕྱིར་འཛུམ་པ་འདི་མཛད་པ། །གང་གིས་ཆོས་རབ་འདི་དག་ཤེས་གྱུར་ཏེ། །ང་ལ་མཆོད་པ་རྒྱ་ཆེན་འདི་བྱས་པའི། །དགའ་ལྡན་
ལྷ་ཡི་བསམ་པ་མཁྱེན་ནས་མཛད། །འགྲོ་བ་ཡང་དག་རྟོགས་པ་བཞིན་དུ་མཐོང ། །རྒྱལ་བའི་དགོངས་པས་ཆོས་ཉིད་བརྙེས་པར་གྱུར། །གང་ལ་འགྲོ་བ་ཐམས་ཅད་རྨོངས་གྱུར་པའི། །རྣམ་པར་ཐར་པའི་སྒོ་གསུམ་རབ་ཏུ་རྟོགས། །སྔོན་གྱི་རྒྱལ་བ་རྣམས་ལ་ལྷག་བྱ་བྱས། །བསམ་
པ་གཅིག་གིས་ཞུ་བ་ལེགས་པར་ཞུས། །དེ་ཉིད་དུ་ནི་སྟོང་ཉིད་ལེགས་པར་བསྒོམས། །སྔོན་ཆད་བྱས་པ་དེ་ནི་འདིར་ཡང་བསྟན། །དེ་དག་དེ་བཞིན་གཤེགས་དང་དེང་ཕྲད་ཅིང ། །སྐྱེས་བུ་མཆོག་དང་འགྲོགས་པ་ཐོབ་གྱུར་ནས། །སྟོང་པ་ཉིད་ཀྱིས་འདྲེན་པ་བསྟོད་བྱས་པས། །དེ་རིང་
འགྲོ་བའི་དོན་ཆེན་ཤིན་ཏུ་བྱས། །འགྲོ་བ་ཐམས་ཅད་སྐྱེ་མེད་ཇི་བཞིན་དུ། །བྱང་ཆུབ་རྒྱལ་བ་དེ་བཞིན་ལུང་བསྟན་དང ། །གང་དག་ཞི་བ་ཐོབ་ནས་སྤྱོད་པ་དང ། །བྱང་ཆུབ་དེ་བཞིན་དེ་དག་སྐྱེ་བ་མེད། །འགྲོ་བ་ཀུན་གྱི་ཆོས་ཉིད་འདི་འདྲ་བ། །དེ་ཤེས་བྱང་ཆུབ་ཐོབ་པར་འགྱུར་རོ་ཞེས། །ལྷ་
རྣམས་གང་ཡང་དེ་ལ་ཐེ་ཚོམ་མེད། །བྱང་ཆུབ་སེམས་ཀྱིས་རྟག་པར་དེ་ལྟར་སྤྱོད། །དེ་བཞིན་འགྲོ་བ་འགག་མེད་ཇི་བཞིན་དུ། །ལྷ་ཚོགས་འདི་དག་རྟོགས་པའི་བློ་ལྡན་ཏེ། །མཁས་པ་འདི་དག་ནེམ་ནུར་མེད་པས་ན། །དེ་ཕྱིར་འདི་དག་རྒྱལ་བ་རང་བྱུང་འགྱུར། །གནས་པ་མེད་པ་
ལ་ནི་ངེས་གྱུར་ནས། །གཡོ་བ་མེད་པ་དེ་ལ་ནེམ་ནུར་མེད། །འགྲོ་བ་ཀུན་ལ་སེམས་པ་ཡོད་མིན་པ། །དེ་ལའང་ལྷ་རྣམས་ཐེ་ཚོམ་ཡོད་མེད་དོ། །ཆོས་རྣམས་ངོ་བོ་ཉིད་ཀྱིས་རང་བཞིན་མེད། །བྱང་ཆུབ་སེམས་དང་དེ་བཞིན་བྱང་ཆུབ་ཀྱང ། །ཐམས་ཅད་ངོ་བོ་ཉིད་ཀྱིས་རང་བཞིན་
མེད། །དེ་ལའང་ལྷ་རྣམས་ཐེ་ཚོམ་རྣམ་པར་དག་།བློ་མཆོག་ལྡན་པའི་དགའ་ལྡན་ལྷ་འདི་རྣམས། །ཀུན་ཀྱང་གནས་མེད་དེ་ལ་རབ་གནས་ཏེ། །དེ་ཕྱིར་ལྷ་རྣམས་བྱང་ཆུབ་རྙེད་མི་དཀའ། །རང་བྱུང་ཉིད་ནི་མྱུར་དུ་ཐོབ་པར་འགྱུར། །འདྲེན་པས་སྐར་མ་འདྲ་བའི་བསྐལ་པ་ལ། །འགྲོ</font><hr>42-1-66b<br><font size=+2>
བ་མཐའ་ཡས་རྣམ་པར་འགྲེལ་པར་འགྱུར། །རྒྱལ་བ་དེ་དག་མཚན་དུ་འགྱུར་བ་ནི། །རང་བྱུང་ཆོས་ལ་རྣམ་དེས་རྒྱལ་པོའོ། །དེ་ལྟར་རྒྱལ་བས་དགའ་ལྡན་ལྷ་རྣམས་ཀྱི། །བསམ་པ་མཁྱེན་ཏེ་འགྲོ་ལ་བསྟན་མཛད་པ། །དེ་ཐོས་ནས་ནི་ལྷར་བཅས་འཇིག་རྟེན་ཡང ། །ཡི་རངས་གྱུར་
ཅིང་སྟོབས་ཀྱང་ཐོབ་པར་འགྱུར། །དགའ་ལྡན་པ་ལུང་བསྟན་པའི་ལེའུ་སྟེ་བཅུ་བདུན་པའོ།། །།དེ་ནས་དེའི་ཚེ་རབ་འཕྲུལ་ལ་སོགས་པ་འཕྲུལ་དགའ་བ་བྱེ་བ་ཕྲག་བདུན་ཅུས་ལྷ་མ་ཡིན་རྣམས་ནས་དགའ་ལྡན་རིས་ཀྱི་བར་གྱི་ལྷ་དེ་དག་གི་མཆོད་པ་ཡང་མཐོང ། 
ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ནས་ཡང་དག་པའི་མཐའ་ལ་གནས་ཤིང་དེ་བཞིན་ཉིད་ལ་ཐེ་ཚོམ་མེད་པར་གྱུར་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། བཅོམ་ལྡན་
འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་གསུངས་པའི་དོན་བདག་གིས་འཚལ་བ་ལྟར་ན། ཆོས་ཐམས་ཅད་ནི་ཡང་དག་པའི་མཐའ་དང ། སྒྲིབ་པ་མ་མཆིས་པའི་མཐའ་དང ། མཐའ་ཡས་པའི་མཐའ་དང ། 
མི་གནས་པའི་མཐའ་དང ། མི་ཟད་པའི་མཐའ་དང ། མི་གཉིས་པའི་མཐའ་སྟེ། མཐའ་མ་མཆིས་པའོ། །བཅོམ་ལྡན་འདས་དེ་ལ་མ་ནོར་བའི་སླད་དུ་ཡང་དག་པའི་མཐའ་ཞེས་བགྱིའོ། །ཚད་མ་མཆིས་པའི་སླད་དུ་མཐའ་ཡས་པའི་མཐའ་ཞེས་བགྱིའོ། །ཆགས་པ་མ་མཆིས་པའི་སླད་དུ་
སྒྲིབ་པ་མ་མཆིས་པའི་མཐའ་ཞེས་བགྱིའོ། །ངོ་བོ་ཉིད་མ་མཆིས་པའི་སླད་དུ་མི་གནས་པའི་མཐའ་ཞེས་བགྱིའོ། །འབྱུང་བ་མཆིས་པའི་སླད་དུ་མི་ཟད་པའི་མཐའ་ཞེས་བགྱིའོ། །རོ་གཅིག་པའི་སླད་དུ་མི་གཉིས་པའི་མཐའ་ཞེས་བགྱིའོ། །མཐའ་མ་མཆིས་པའི་སླད་དུ་མཐའ་མ་མཆིས་པ་ཞེས་
བགྱིའོ། །བཅོམ་ལྡན་འདས་ཡང་དག་པའི་མཐའ་འདི་ནི་ཐམས་ཅད་ཀྱི་རྗེས་སུ་སོང་བ་ལགས་ཏེ། ཆོས་གང་ཡང་དག་པའི་མཐའ་མ་ལགས་པའི་ཆོས་དེ་གང་ཡང་མ་མཆིས་སོ། །བཅོམ་ལྡན་འདས་བྱང་ཆུབ་ཅེས་བགྱི་བ་འདི་ནི་ཡང་དག་པའི་མཐའ་སྟེ། བྱང་ཆུབ་གང་ཞེ་ན། བཅོམ་ལྡན</font><hr>42-1-67a<br><font size=+2>
འདས་ཆོས་ཐམས་ཅད་རང་བཞིན་མ་མཆིས་པ་ནི་བྱང་ཆུབ་ལགས་པར་རིག་པར་བགྱིའོ། །ཐ་ན་མཚམས་མེད་པ་རྣམས་ཀྱང་བྱང་ཆུབ་བོ། དེ་ཅིའི་སླད་དུ་ཞེ་ན། བཅོམ་ལྡན་འདས་བྱང་ཆུབ་ནི་རང་བཞིན་མ་མཆིས་པ་སྟེ། མཚམས་མེད་པ་རྣམས་ཀྱང་རང་བཞིན་མ་མཆིས་
པ་ལགས་པས་དེའི་སླད་དུ་མཚམས་མེད་པ་རྣམས་ཀྱང་བྱང་ཆུབ་ཅེས་བགྱིའོ། །བཅོམ་ལྡན་འདས་ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ནི་རང་བཞིན་མ་མཆིས་པ་སྟེ། མཚམས་མེད་པ་རྣམས་ཀྱང་དེའི་རང་བཞིན་ནོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་
ནི་ཕུང་པོ་མ་ལུས་པའི་མྱ་ངན་ལས་འདས་པའི་དབྱིངས་ཏེ། མཚམས་མེད་པ་རྣམས་ཀྱང་དེའི་རང་བཞིན་ནོ། །བཅོམ་ལྡན་འདས་གང་སུ་དག་ཡོངས་སུ་མྱ་ངན་ལས་འདའ་བར་འཚལ་བ་དེ་དག་ནི་གནོད་པར་འགྱུར་བའི་ཆོས་ཅན་ཏེ། དེ་ཅིའི་སླད་དུ་ཞེ་ན། གལ་ཏེ་འཁོར་བར་ཞུགས་པ་ཞིག་
མཆིས་ན་ནི་མྱ་ངན་ལས་འདའ་བ་ཡང་བཙལ་བར་འགྱུར་ན། ཡང་དག་པའི་མཐའ་ལ་ནི་འཁོར་བར་ཞུགས་པ་གང་ཡང་མ་མཆིས་ན་དེ་མྱ་ངན་ལས་འདས་པ་ཅི་ཞིག་ཚོལ་བར་འགྱུར། བཅོམ་ལྡན་འདས་ཡང་དག་པའི་མཐའ་ནི་གཉིས་སུ་མ་མཆིས་པ་སྟེ། བཅོམ་ལྡན་འདས་དེ་ལ་
བདག་ཅག་སོམ་ཉི་མ་མཆིས་ཐེ་ཚོམ་མ་མཆིས་སོ། །བཅོམ་ལྡན་འདས་གང་ལ་ལ་ཞིག་ཆོས་འདི་ལ་ནེམ་ནུར་དང་ཐེ་ཚོམ་མ་མཆིས་ན་དེ་ནི་སྔོན་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཏུ་ལུང་བསྟན་པར་འཚལ་བར་བགྱིའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ལྷའི་རྒྱལ་པོ་རབ་འཕྲུལ་ལ་སོགས་པ། འཕྲུལ་དགའ་རིས་ཀྱི་ལྷ་བྱེ་བ་ཕྲག་བདུན་ཅུ་པོ་དེ་དག་རང་གིས་རང་ལུང་བསྟན་པ་གསན་ནས་འགྲོ་བ་ཐམས་ཅད་རབ་ཏུ་དགའ་བར་བྱ་བའི་ཕྱིར་དེའི་ཚེ་འཛུམ་པ་
མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་ཕན་པར་བཞེད་པས་འཛུམ་པ་མཛད། །འཛུམ་པའི་རྒྱུ་ནི་ཁྱོད་ཀྱིས་མ་བསྟན་ཏེ། །རང་བྱུང་སྐྱེས་བུ་དམ་པ་གང་དག་ཀྱང ། །རྒྱུ་མ་མཆིས་པར་འཛུམ་པ་མི་མཛད་པས། །


</font><hr>42-1-67b<br><font size=+2>
ཁྱོད་ཀྱི་ཞལ་ནས་འཛུམ་པ་དེ་མཛད་པ། །མཐོང་ནས་ལྷར་བཅས་འཇིག་རྟེན་ཐེ་ཚོམ་འཚལ། །འཛུམ་པའི་རྒྱུ་དེ་གང་ལགས་རང་བྱུང་གསུངས། །ཐེ་ཚོམ་འཚལ་བའི་ཐེ་ཚོམ་བསལ་དུ་གསོལ། །ཁྱོད་ཀྱིས་འཛུམ་མཛད་རྒྱུ་དེ་ཐོས་གྱུར་ན། །འཁོར་འདི་ཐམས་ཅད་ངོ་མཚར་ཐོབ་པར་འགྱུར། །
བྱང་ཆུབ་མཆོག་ནི་ཡོངས་སུ་བསྒྲུབ་སླད་དུ། །དེ་དག་ལམ་མཆོག་ཤིན་ཏུ་རྣམ་དག་འགྱུར། །ཐེ་ཚོམ་འཚལ་བ་དག་ནི་ནམ་དུ་ཡང ། །བྱང་ཆུབ་ཡིད་བཞིན་བདེ་བར་མི་འགྲུབ་སྟེ། །ཐེ་ཚོམ་སོམ་ཉི་བསལ་ནས་མཁས་པ་རྣམས། །བྱང་ཆུབ་མཆོག་གི་རྒྱུ་དང་སྐལ་ལྡན་འགྱུར། །རྐང་
གཉིས་དབང་པོ་ཁྱོད་ཀྱི་འཁོར་འདི་དག་།སྡིག་པ་ཡོངས་སྤངས་བྱང་ཆུབ་སེམས་དང་ལྡན། །ལྷ་རྣམས་ལུང་བསྟན་དེ་དག་ཐོས་གྱུར་ན། །རྒྱལ་བའི་གོ་འཕང་རྒྱ་ཆེན་ཐོབ་པར་འགྱུར། །དེ་བས་རྒྱལ་བས་ཐུགས་རྗེ་ཆེ་བསྐྱེད་ཅིང ། །ཐེ་ཚོམ་འཚལ་བ་རྣམས་ལ་ཐུགས་བརྩེ་བས། །
ལྷ་ཚོགས་འདི་དག་ཐམས་ཅད་ལུང་བསྟན་ཅིང ། །འགྲོ་བ་འདི་དག་ཐམས་ཅད་དགའ་བར་མཛོད། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ངས་ནི་འཇིག་རྟེན་ཕན་ཕྱིར་འཛུམ་པ་མཛད། །རྟ་ཐུལ་ཁྱོད་ཀྱིས་ཞུ་བ་དེ་ཞུས་པ། །
ལུང་བསྟན་དེ་ནི་ཁྱོད་ལ་མ་ལུས་པར། །བསྟན་པར་ངས་བྱས་དང་བས་ཀུན་ཀྱང་ཉོན། །འཕྲུལ་དགའི་རིས་ཀྱི་ལྷ་ཚོགས་འདི་རྣམས་ཀྱིས། །ཐམས་ཅད་མཁྱེན་པར་བདག་ཅག་ལུང་བསྟན་ཏེ། །མུ་སྟེགས་ཚོགས་ཀྱིས་བསམ་པ་ཟིལ་མནན་ནས། །འཁོར་འདིར་སེང་གེའི་ང་རོ་ཆེན་པོ་
བསྒྲགས། །གནམ་དུ་རྡོ་འཕངས་ས་ལ་ལྟུང་བ་ལྟར། །དེ་ལ་ཐེ་ཚོམ་ཟ་བར་མི་འགྱུར་ཏེ། །དེ་ལྟར་ཐེ་ཚོམ་མེད་པའི་ཚུལ་ཐོབ་པ། །བདག་ཅག་ཉིད་ནི་སྟོབས་བཅུར་འགྱུར་བར་ཤེས། །ཉི་མ་ནུབ་གྱུར་ནམ་སྲོས་གྱུར་པའི་ཚེ། །མི་རྣམས་ཟླ་བ་མྱུར་དུ་འཆར་བར་ཤེས། །དེ་བཞིན་རྒྱལ་
བའི་སྲས་པོ་ཚུལ་ཐོབ་དག་།བདག་ཅག་ཉིད་ནི་སྟོབས་བཅུར་འགྱུར་བར་ཤེས། །སྐར་ཚོགས་དབུས་ན་ཟླ་བ་གནས་པ་ནི། །སེམས་ཅན་མཚུངས་པར་འདི་ལ་ཐེ་ཚོམ་མེད། །དེ་བཞིན་རྒྱལ་བའི་སྲས་པོ་ཚུལ་ཐོབ་དག་།བདག་ཅག་ཐམས་ཅད་མཁྱེན་དུ་འགྱུར་བར་ཤེས། །ཇི</font><hr>42-1-68a<br><font size=+2>
ལྟར་ཉི་མ་ནུབ་པར་གྱུར་པའི་ཚེ། །ཉི་མ་མི་མཐོང་སེམས་ཅན་དེ་དག་ཤེས། །དེ་བཞིན་བདེ་གཤེགས་སྲས་པོ་ཚུལ་ཤེས་པ། །ཡེ་ཤེས་དམ་པ་ཐོབ་པར་འགྱུར་དུ་ཤེས། །ཆུ་ཀླུང་ཇི་ལྟར་གཞོལ་བར་འབབ་འགྱུར་ཞིང ། །རྒྱ་མཚོར་འབབ་པར་མཁས་པ་རྣམས་
ཀྱིས་ཤེས། །དེ་བཞིན་བདེ་གཤེགས་སྲས་པོ་ཚུལ་ཤེས་པ། །བྱང་ཆུབ་རྒྱ་ཆེན་ཐོབ་པར་འགྱུར་བར་ཤེས། །ཇི་ལྟར་གནམ་དུ་བོང་བ་འཕངས་པ་ནི། །ས་ལ་ལྟུང་བར་འགྱུར་དུ་ཐེ་ཚོམ་མེད། །དེ་བཞིན་རྒྱལ་སྲས་མཁས་པ་དེ་དག་ཀྱང ། །འཇིག་རྟེན་མཁས་པ་མྱུར་འགྱུར་ཡེ་ཤེས་
འཇུག་།གང་ཐོས་ནས་ནི་ཐེ་ཚོམ་མེད་འགྱུར་ཞིང ། །སངས་རྒྱས་ཡོན་ཏན་གནས་པར་བདག་ཤེས་ལ། །རང་གི་སར་ཉེ་ལག་སྟོང་མ་ཡིན་པར། །མཁས་པ་རྣམས་ཀྱི་ཆོས་ཉིད་རབ་ཏུ་མཐོང ། །གལ་ཏེ་བདུད་ཀྱི་ཚོགས་ནི་བྱེ་བ་དག་།སངས་རྒྱས་གཟུགས་བསྒྱུར་བར་ཆད་སྨྲས་བྱས་
ཀྱང ། །ཆོས་ལ་མཁས་པ་ཆོས་ཉིད་རབ་མཐོང་བ། །དེ་དག་བྱང་ཆུབ་ལས་ནི་བཟློག་མི་ནུས། །དེ་ལྟར་སངས་རྒྱས་ཡོན་ཏན་རབ་གནས་ཤིང ། །བདག་གིས་བདག་ཉིད་ལུང་བསྟན་རྗོད་བྱེད་པ། །དེ་ལ་འདྲེན་པ་ཆོ་ག་ཚུལ་མཁྱེན་པ། །མི་དབང་ལུང་བསྟན་དེ་ལ་ཡི་རང་མཛོད། །དེ་
ལྟར་ལྷ་ཚོགས་འདི་དག་ཚུལ་འདི་ལ། །གཞན་གྱི་དྲིང་ལ་མི་འཇོག་མངོན་ཤེས་ཤིང ། །དེ་དག་བདེ་གཤེགས་འགྱུར་ཞེས་རང་སྨྲ་ལ། །འཇིག་རྟེན་མཁས་པ་རྗེས་སུ་ཡི་རང་མཛད། །རྟ་ཐུལ་དེ་བས་མཁས་པ་གང་གི་རྣམས། །བླ་མེད་བྱང་ཆུབ་ཐོབ་པར་བྱར་སེམས་པ། །དེ་དག་
ཚུལ་འདི་ཤེས་པར་གང་གྱུར་པའི། །འཕགས་པའི་སྐྱེ་བོ་མཁས་ལ་བསྟེན་པར་བྱ། །གང་དག་ཚུལ་ལ་འཇུག་པ་རབ་མཐོང་ཞིང ། །མཁས་པ་གང་དག་བདེ་གཤེགས་བསྙེན་བཀུར་བ། །དེ་དག་བྱང་ཆུབ་ལག་མཐིལ་འདྲ་བར་གསལ། །ཚུལ་ཤེས་དེ་དག་རང་གིས་རང་འབྱུང་འགྱུར། །
གང་གིས་བསྐལ་པ་སྟོང་དུ་དཀའ་ཐུབ་སྤྱད། །ཤ་ཁྲག་པགས་ལ་མི་ལྟ་བྱས་པ་བས། །གང་གིས་ཚུལ་འདི་སྐད་ཅིག་རྟོགས་གྱུར་ན། །དེ་ནི་ཁྱད་འཕགས་དཀའ་ཐུབ་ད་ལྟར་མིན། །འདས་པའི་རང་བྱུང་གང་རྣམས་བྱུང་བ་དང ། །མ་འོངས་སེམས་ཅན་ཕན་བཞེད་གང་འབྱུང་དང ། །


</font><hr>42-1-68b<br><font size=+2>
ད་ལྟར་དུས་ན་འདྲེན་པ་གང་བཞུགས་པ། །ཀུན་ཀྱང་ཚུལ་གྱིས་བདེ་བར་གཤེགས་པ་ཐོབ། །རབ་འཕྲུལ་ལྷ་ཚོགས་ཐུབ་པའི་ཚུལ་ཤེས་པ། །འདི་དག་ང་ལ་མཆོད་པ་མཆོག་བྱས་ཤིང ། །འདྲེན་པ་ཐམས་ཅད་བསྙེན་བཀུར་རབ་བྱས་ན། །ཚུལ་གྱིས་སུ་ནི་རང་འབྱུང་ཐོབ་པར་འགྱུར། །
འཇིག་རྟེན་མཁས་པའི་ཏིང་འཛིན་གང་ཡིན་པ། །དེ་ཡིས་རྒྱལ་བ་རང་བྱུང་གནས་པའི་རྣམས། །དེ་དག་ཐམས་ཅད་རྒྱལ་བའི་སྤྱོད་ཡུལ་ལོ། །ཚུལ་ཐོབ་རྣམས་ཀྱིས་མངོན་བསྟེན་མྱུར་དུ་འཐོབ། །དེ་ལ་རྟ་ཐུལ་སངས་རྒྱས་སྲས་རྣམས་ནི། །སངས་རྒྱས་གནས་པ་དེ་ལ་ནེམ་ནུར་མེད། །
སངས་རྒྱས་ཚུལ་ལ་སེམས་ཅན་རྣམ་རྩེ་བ། །ཚུལ་ཤེས་པ་དག་སྟོན་པའི་ལམ་ལ་སྤྱོད། །དེ་ལྟས་ཚུལ་ལ་དད་པའི་ཡིད་བྱས་ཏེ། །བརྩམ་པར་བྱ་ཡི་སྡུག་བསྔལ་སྤྱོད་ལ་མིན། །རྟག་ཏུ་དགེ་བཤེས་མཁས་པ་བསྟེན་བྱས་ན། །བླ་མེད་བྱང་ཆུབ་མྱུར་དུ་ཐོབ་པར་འགྱུར། །བདེ་བར་
གཤེགས་པའི་གསུང་མཆོག་ཐོས་ནས་ནི། །འཁོར་ཀུན་རྒྱལ་བའི་བྱང་ཆུབ་ཡི་རངས་ཏེ། །རྗེས་སུ་ཡི་རང་ཐེ་ཚོམ་མེད་གྱུར་ནས། །མཐར་ཕྱིན་བློ་གྲོས་ལ་ནི་ཞུགས་པར་གྱུར། །འཕྲུལ་དགའ་བ་ལུང་བསྟན་པའི་ལེའུ་སྟེ་བཅཝ་བརྒྱད་པའོ།། །།བམ་པོ་
བདུན་པ། དེ་ནས་དེའི་ཚེ་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་རིས་ཀྱི་ལྷ་ཁྲག་ཁྲིག་ཕྲག་བརྒྱད་ཅུས་ལྷ་མ་ཡིན་རྣམས་ནས་འཕྲུལ་དགའི་ལྷའི་བར་དག་གིས་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་
དགའ་ཞིང་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཕྲུལ་དགའི་ལྷ་རྣམས་ཀྱིས་ཡང་དག་པའི་མཐའ་ཞེས་གང་སྨྲས་པ་དེ་ལ་བདག་ཅག་གིས་ནི་ཡང་དག་པ་ཡང་མི་དམིགས་ན་དེའི་མཐའ་ལྟ་སྨོས་ཀྱང་ཅི་འཚལ། 
དེ་ཅིའི་སླད་དུ་ཞེ་ན། བཅོམ་ལྡན་འདས་གང་ལ་ལ་ཞིག་གིས་ཡང་དག་པ་དམིགས་ན་ནི་མཐའ་ཡང་དེས་དམིགས་པར་འགྱུར་ཏེ་དེ་ནི་གཉིས་ཀྱིས་སྤྱོད་པའོ། །དེ་ལྟ་བུ་དེ་ནི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུ་དང ། རིགས་ཀྱི་བུ་མོ་རྣམས་ཀྱི་སྤྱོད་ཡུལ་མ་ལགས་སོ། །


</font><hr>42-1-69a<br><font size=+2>
བཅོམ་ལྡན་འདས་གང་ལ་ལ་ཞིག་གཉིས་སུ་མ་མཆིས་པའི་ཆོས་རྣམས་ནི་གཉིས་སུ་མེད་དོ་ཞེས་མི་སྤྱོད་མ་མོས་ན་དེ་འདི་སྙམ་དུ་བདག་གིས་བྱང་ཆུབ་མངོན་པར་རྫོགས་པར་འཚང་རྒྱ་བར་བྱའོ་སྙམ་དུ་སེམས་སུ་ལགས་ཀྱང ། དེ་ནི་ལམ་ལོག་པར་ཞུགས་
པར་འཚལ་བར་བགྱི་བའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གང་འདི་བྱང་ཆུབ་ཏུ་སྨོན་པ་དེ་ནི་ལམ་ལོག་པར་ཞུགས་པ་ལགས་ཏེ། བཅོམ་ལྡན་འདས་གང་མངོན་པར་རྫོགས་པར་འཚང་རྒྱ་བར་བགྱི་བའི་ཆོས་དེ་གང་ཡང་མ་མཆིས་སོ། །དེ་ཅིའི་སླད་དུ་ཞེ་ན། 
བཅོམ་ལྡན་འདས་ཆོས་འགའ་ཞིག་དམིགས་པར་གྱུར་ན་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་སོ། །བཅོམ་ལྡན་འདས་ཆོས་ནི་འདས་པ་མ་ལགས། མ་འོངས་པ་མ་ལགས། ད་ལྟར་བྱུང་བ་མ་ལགས། འདུས་བྱས་མ་ལགས། འདུས་མ་བྱས་མ་ལགས། 
དངོས་པོ་མ་ལགས། དངོས་པོ་མ་མཆིས་པ་མ་ལགས། མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས། སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་སོ། །བཅོམ་ལྡན་འདས་བྱང་ཆུབ་ཅེས་བགྱི་
བ་དེ་ཡང་ཆོས་གང་གི་གཉེན་པོ་ཡང་མ་ལགས་ལ་ཆོས་གང་ཡང་ཆོས་དེའི་གཉེན་པོ་མ་ལགས་སོ། །དེ་ཅིའི་སླད་དུ་ཞེ་ན། ཆོས་དེ་ནི་ཀུན་ནས་ཉོན་མོངས་པ་མ་ལགས། རྣམ་པར་བྱང་བ་མ་ལགས་ཏེ། གང་གིས་ཆོས་གཞན་གྱི་གཉེན་པོར་གྱུར་པའི་ཆོས་དེ་ཡང་རང་བཞིན་གྱིས་
མི་དམིགས་ལ་གང་ཆོས་དེའི་གཉེན་པོར་གྱུར་པའི་ཆོས་གཞན་དེ་གང་ཡང་རང་བཞིན་གྱིས་མི་དམིགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་མཚན་མ་དང་བྲལ་བ་སྟེ། དེ་དག་ནི་མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་
ལགས། སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་ཏེ། བཅོམ་ལྡན་འདས་གཟུགས་ནི་གཟུགས་ཀྱི་མཚན་མ་དང་བྲལ་བའོ། །ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པ་ནི་རྣམ་པར་ཤེས་པའི་མཚན</font><hr>42-1-69b<br><font size=+2>
མ་དང་བྲལ་བའོ། །གཟུགས་ཀྱི་སྐྱེ་བའི་མཚན་མ་ནས་རྣམ་པར་ཤེས་པའི་བར་གྱི་སྐྱེ་བ་གང་ལགས་པ་དེ་ཡང་སྐྱེ་བའི་མཚན་མ་དང་བྲལ་བའོ། །གཟུགས་ཀྱི་འགག་པ་ནས་རྣམ་པར་ཤེས་པའི་བར་གྱི་འགག་པ་གང་ལགས་པ་དེ་ཡང་འགག་པའི་མཚན་མ་དང་བྲལ་བའོ། །བཅོམ་
ལྡན་འདས་འདས་པ་དང ། མ་འོངས་པ་དང ། ད་ལྟར་བྱུང་བ་ཡང་འདས་པ་དང ། མ་འོངས་པ་དང ། ད་ལྟར་བྱུང་བ་དང་བྲལ་བའོ། །འདུས་བྱས་ཀྱང་འདུས་བྱས་ཀྱི་མཚན་མ་དང་བྲལ་བའོ། །འདུས་མ་བྱས་ཀྱང་འདུས་མ་བྱས་ཀྱི་མཚན་མ་དང་བྲལ་བའོ། །བཅོམ་ལྡན་
འདས་དེ་ལྟར་ཇི་ཙམ་དུ་ཕུང་པོས་བཟུང་བའམ། སྐྱེ་བ་དང ། འགག་པས་བཟུང་བའམ། འདས་པས་བཟུང་བའམ། མ་འོངས་པས་བཟུང་བའམ། ད་ལྟར་བྱུང་བས་བཟུང་བའམ། འདུས་བྱས་ཀྱིས་བཟུང་བའམ། འདུས་མ་བྱས་ཀྱིས་བཟུང་བ་དེ་དག་ནི་རྣམ་པ་ཐམས་
ཅད་དུ་མི་དམིགས་ཏེ། དེ་ལྟར་མི་དམིགས་པ་དེ་ནི་མངོན་པར་ཤེས་པར་བགྱི་བ་མ་ལགས། ཡོངས་སུ་ཤེས་པར་བགྱི་བ་མ་ལགས། སྤང་བར་བགྱི་བ་མ་ལགས། བསྒོམ་པར་བགྱི་བ་མ་ལགས། མངོན་དུ་བགྱི་བ་མ་ལགས་ཏེ། བཅོམ་ལྡན་འདས་གང་དག་དེ་ལྟར་ཞུགས་
པའི་རིགས་ཀྱི་བུ་དང ། རིགས་ཀྱི་བུ་མོ་དེ་དག་ནི་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་ཞེས་བགྱིའོ། །དེ་ནས་གཞན་འཕྲུལ་དབང་བྱེད་རིས་ཀྱི་ལྷ་དེ་དག་གིས་ཇི་ལྟར་ཤེས་པའི་ཆོས་དེ་ལྟར་ལུང་བསྟན་ནས་དེའི་ཚེ། བཅོམ་ལྡན་འདས་ལ་ཚིགས་སུ་བཅད་པ་
དག་གིས་མངོན་པར་བསྟོད་པ། བཅོམ་ལྡན་སྲིད་པ་མཐར་འབྱིན་ལེགས་པར་གསུངས། །འདྲེན་པས་སྲིད་པའི་སྙིང་པོ་མ་བརྙེས་ན། །སྐྱེ་བོ་མི་མཁས་དེ་དག་འཇིགས་པ་ཡིས། །འཁོར་བའི་ཕ་རོལ་བགྲོད་ཕྱིར་རབ་ཏུ་ཞུགས། །ཕུང་པོ་རྣམས་ནི་ཀུན་ཏུ་མི་དམིགས་ཏེ། །
ཕུང་པོའི་མཚན་མས་ཕུང་པོ་སྟོང་པ་ཉིད། །ཆོས་གང་གང་གི་གཉེན་པོར་འགྱུར་བ་ནི། །མཚན་མས་སྟོང་སྟེ་གང་ཡང་མ་མཆིས་སོ། །ངོ་བོ་ཉིད་ཀྱིས་སྟོང་ཕྱིར་དངོས་པོ་གང ། །ཡོངས་ཤེས་བྱ་དང་སྤང་བསྒོམ་མངོན་བྱ་བ། །གང་ཡང་མ་མཆིས་གང་དུའང་མི་དམིགས་ཏེ། །


</font><hr>42-1-70a<br><font size=+2>
དངོས་པོ་རྣམས་ནི་དངོས་མེད་རང་བྱུང་གསུང ། །བྱང་ཆུབ་གང་ཡང་མཚན་མར་མི་དམིགས་ཏེ། །བྱང་ཆུབ་ཕྱོགས་ཀྱི་ཆོས་རྣམས་དེ་བཞིན་ནོ། །སངས་རྒྱས་གང་ཡང་མཚན་མར་མི་དམིགས་ཏེ། །བྱང་ཆུབ་སེམས་དཔའ་མཚན་མས་རྟོགས་མི་འགྱུར། །
མི་མཁས་གང་དག་མཚན་མར་མངོན་ཞེན་པ། །དེ་དག་བྱང་ཆུབ་འཚང་རྒྱར་སེམས་བསྐྱེད་ཀྱང ། །མཚན་མར་སྤྱོད་ཅིང་སྤྱོད་ཡུལ་ལོག་པ་སྟེ། །བློ་གྲོས་ངན་པས་བྱང་ཆུབ་ལམ་མི་སྤྱོད། །མཚན་མ་སུས་སྤངས་སངས་རྒྱས་སྤྱོད་ཡུལ་ལ། །སྤྱོད་པ་དེ་དག་སངས་རྒྱས་
བསྟན་ལ་མཁས། །མཚན་མ་དེ་བཞིན་མཚན་མ་མེད་སྤངས་ཏེ། །སྟོང་དང་མི་སྟོང་དེ་བཞིན་དམིགས་མེད་པ། །མཁས་པ་དེ་དག་བྱང་ཆུབ་ལམ་ལ་སྤྱོད། །དེ་དག་བྱང་ཆུབ་དམ་པ་ཞི་བ་འཐོབ། །ཕས་ཀྱི་རྒོལ་བ་ཀུན་གྱི་སྤྱོད་ཡུལ་མིན། །གནས་དེ་ཉན་ཐོས་རྣམས་
ཀྱིས་བགྲོད་བྱ་མིན། །རང་རྒྱལ་རྣམས་ཀྱང་དེ་ལ་མི་འགྲོ་སྟེ། །རྣམ་གྲོལ་སེམས་ལྡན་ཟག་མེད་ཐ་བ་མེད། །དགྲ་བཅོམ་བསྟན་པ་འདི་ལ་གང་བརྩོན་དང ། །དེ་བཞིན་རང་རྒྱལ་སྐྱོབ་པར་གྱུར་པ་དག་།མཁས་པའི་སྤྱོད་ཡུལ་དེ་ལ་སྤྱོད་ཡུལ་མེད། །གོ་འཕང་དེ་ནི་མཚན་
མ་སྤྱོད་པ་དང ། །ཉི་ཚེའི་སྟོང་པ་ཉིད་ལ་སྒོམ་པ་དང ། །གང་རྣམས་སྟོང་པས་སྟོང་ཞེས་སྟོང་སྨྲ་དང ། །ཆོས་ཀུན་རང་བཞིན་ཡོད་སྨྲས་འཐོབ་མི་ནུས། །སངས་རྒྱས་མ་སྨད་རྣམས་ཀྱི་བསླབ་པ་ལ། །སློབ་དང་རྣམ་བྲལ་སློབ་པ་སློབ་པའི་རྣམས། །མཁས་དེ་རྟོགས་པ་མེད་
པས་བྱང་ཆུབ་རྟོགས། །སྟོན་པས་བསྟན་པ་བཞིན་དུ་དགྱེས་བྱེད་ལགས། །སངས་རྒྱས་རྐང་གཉིས་གཙོ་བོ་བསྟོད་པས་ན། །བདག་ཅག་བསོད་ནམས་མི་ཆུང་གང་ཐོབ་དེས། །འགྲོ་བ་བྱང་ཆུབ་དམ་པ་འཚང་རྒྱ་ཞིང ། །མི་ཤེས་སྟོན་མཛད་སངས་རྒྱས་འགྲུབ་པར་ཤོག་།དེ་
ནས་བཅོམ་ལྡན་འདས་ཀྱིས་དེའི་ཚེ་ལྷའི་རྒྱལ་པོ་དབང་སྒྱུར་ལ་སོགས་པ་གཞན་འཕྲུལ་དབང་བྱེད་རིས་ཀྱི་ལྷ་ཁྲག་ཁྲིག་ཕྲག་བརྒྱད་ཅུ་པོ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་སྐྱེ་བོ་ཕལ་པོ་ཆེ་དེ་དག་གི་དགེ་བའི་རྩ་བ་བསྐྱེད་པའི་ཕྱིར་དེའི་ཚེ་འཛུམ་པ་མཛད་དོ། །དེ་ནས</font><hr>42-1-70b<br><font size=+2>
ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། གཞན་འཕྲུལ་དབང་བྱེད་ལྷ་ཡི་བསམ་མཁྱེན་ནས། །རྐང་གཉིས་གཙོ་བོ་ཁྱོད་ཀྱིས་འཛུམ་མཛད་ལ། །ཐུབ་པས་འཛུམ་པའི་རྒྱུ་དེ་མ་གསུངས་ན། །རྒྱལ་བ་འཛུམ་པའི་རྒྱུ་ནི་བསྟན་དུ་གསོལ། །
འདྲེན་པ་རྒྱུ་མེད་འཛུམ་པ་མི་མཛད་ཅེས། །རྒྱལ་བ་ཁྱུ་མཆོག་དམ་པས་དེ་སྐད་གསུངས། །འཇིག་རྟེན་དོན་སླད་འཛུམ་པ་མཛད་པའི་རྒྱུ། །འདྲེན་པས་བཀའ་སྩོལ་ཐེ་ཚོམ་བསལ་དུ་གསོལ། །དྲང་སྲོང་ཆེན་པོའི་ཞལ་ནས་འཛུམ་རིག་ནས། །ཐུབ་ཆེན་ཁྱོད་ཀྱི་འཁོར་རྣམས་
ཐེ་ཚོམ་འཚལ། །གཽ་ཏམ་རྒྱལ་བ་འདྲེན་པས་དེ་དག་ལ། །འཇིག་རྟེན་སྨན་སླད་འཛུམ་རྒྱུ་ལུང་བསྟན་གསོལ། །འདི་དག་འཁོར་བའི་རྒྱུད་ལས་རྒྱབ་ཕྱོགས་ཏེ། །མྱ་ངན་འདས་པའི་སེམས་ཀྱིས་ཐལ་སྦྱར་སྡོད། །འཁོར་འདི་ཡངས་པའི་སེམས་ལྡན་ཐེ་ཚོམ་འཚལ། །
དོན་ཡོང་གྲགས་མངའ་སོམ་ཉི་བསལ་དུ་གསོལ། །བདེ་གཤེགས་བསྟན་ལ་ཐེ་ཚོམ་མ་མཆིས་ཏེ། །ཕྱིར་ཞིང་དད་བསྐྱེད་རིམ་གྲོ་ཆེར་བགྱིད་དེ། །ཐེ་ཚོམ་མི་འཚལ་སེམས་ནི་གྲོལ་འགྱུར་བར། །རྒྱལ་བས་སྐྱེ་བོའི་ཐེ་ཚོམ་ལེགས་པར་ཁུམ། །བདེ་གཤེགས་བསྟན་
ལ་འདི་དག་བདེར་གནས་ཤིང ། །གང་ལམ་རང་བྱུང་རྒྱལ་བ་གཤེགས་གྱུར་པ། །ལམ་དེ་ནས་ནི་ཐེ་ཚོམ་མ་མཆིས་མཆི། །དེ་བས་སྐྱེ་བོའི་ཐེ་ཚོམ་གཅོད་དུ་གསོལ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། སྐྱེ་བོ་
ཚོགས་ཆེན་དོན་དབང་བརྟེན་བྱས་ནས། །ཚིགས་སུ་བཅད་དེ་དུས་སུ་གང་སྨྲས་ཤིང ། །འཛུམ་པའི་དོན་གྱི་རྒྱུ་ནི་ཡོངས་ཞུས་པ། །ཁྱོད་ཀྱི་ཚིག་ནི་དུས་དང་ལྡན་པ་ཡིན། །རྟ་ཐུལ་དྲི་བ་དེ་ཡི་དོན་དྲིས་པས། །སྐྱེ་བོ་ཚོགས་ཆེན་འདི་ཡི་དོན་བྱས་གྱུར། །ཁྱོད་ཀྱིས་དེ་དྲིས་སྐྱེ་བོ་
ཚོགས་ཆེན་དག་།བྱང་ཆུབ་མཆོག་ཏུ་ཡང་དག་ཞུགས་པར་འགྱུར། །གཞན་འཕྲུལ་དབང་བྱེད་བསམ་པ་ངས་མཁྱེན་ཏེ། །རྟ་ཐུལ་འཛུམ་པ་འདི་ནི་ངས་བསྟན་ཏོ། །འཇིག་རྟེན་མཁྱེན་པའི་བསྟན་པའི་ལམ་དེ་ནས། །དོན་དུ་གཉེར་བ་དེ་དག་དེ་བཞིན་འདོད། གང་གིས</font><hr>42-1-71a<br><font size=+2>
འགྲོ་བ་འདི་དག་མཚན་མེད་པར། །སྨིག་རྒྱུ་ལ་ནི་ཇི་ལྟར་ཆུ་བཞིན་མཐོང ། །བྱིས་པའི་རྨོངས་པ་མཁས་པའི་ཚུལ་བཞིན་ཏེ། །དེ་དག་རྗེས་སུ་བྱང་ཆུབ་འདོད་པས་བསླབ། །མཚན་མའི་འདུ་ཤེས་སྤང་ཕྱིར་མི་རྣམས་གང ། །རྟག་ཏུ་མཚན་མ་མངོན་དགའ་
འཇིག་འགྱུར་ཞིང ། །མཚན་མའི་འདུ་ཤེས་ལོག་པའི་ལམ་དུ་འདོང ། །མཚན་མ་མེད་པས་བྱང་ཆུབ་མཆོག་ཐོབ་འགྱུར། །མེད་པའི་རྟོག་ལྡན་མཚན་མར་རྣམ་བརྟགས་ནས། །ཇི་ལྟར་བརྟགས་པས་དེ་ལྟར་འཆིང་བ་ཡིན། །མཚན་མ་སྟོང་པར་རྣམ་མཐོང་མཁས་པ་ཡི། །ཞི་བ་
དག་ནི་གྲགས་པ་དམ་པ་ཐོབ། །འདུ་ཤེས་མཚན་ཅན་མི་མཉམ་སེམས་རྒྱུད་ཀྱིས། །སྡིག་པ་བརྒྱ་དག་མི་མཁས་དེ་དག་བྱེད། །འགྲོ་བ་ཀུན་ཏུ་སྡུག་བསྔལ་མི་ཆུང་མྱོང ། །དེ་ལྟར་མི་མཁས་མཚན་མ་བརྟག་པ་བྱས། །མཚན་མར་འདུ་ཤེས་པ་ནི་ཕུང་པོ་དང ། །སངས་རྒྱས་
བྱང་ཆུབ་བྱང་ཆུབ་སེམས་དཔའ་མཐོང ། །དེ་ལྟར་མཚན་མ་མེད་ཅིང་སྟོང་མཐོང་ན། །བྱང་ཆུབ་གཞལ་མེད་བླ་ན་མེད་པ་འཐོབ། །འདུ་ཤེས་མཚན་མ་ཅན་ལ་ཉོན་མོངས་འཕེལ། །མཚན་མ་མེད་པ་ཀུན་ཏུ་སྦྱོར་བ་སྤོང ། །མཚན་མ་ལས་ནི་ཀུན་སྦྱོར་གཞན་མེད་དེ། །ཀུན་ཏུ་
སྦྱོར་བ་དེ་ཉིད་མཚན་མེད་ཡིན། །གང་རྣམས་བྱང་ཆུབ་ཐོབ་པར་བྱ་རྟོག་པ། །རྟོག་པ་དེ་ཉིད་མི་མཁས་བར་ཆད་ཡིན། །མཁས་པའི་ལོངས་སྤྱོད་རྣམ་པ་ཐོབ་བྱེད་ན། །ལོངས་སྤྱོད་དེ་ཉིད་མཚན་མ་མེད་པར་འགྱུར། །ཆོས་རྣམས་གང་ཡང་རང་བཞིན་ཉིད་ཀྱིས་མེད། །རྣམ་པར་རྟོག་
པས་ཆོས་བྱུང་ཀུན་ཀྱང་སྟོང ། །རྟོག་པ་མེད་པས་མཚན་མ་མེད་པར་འགྱུར། །དེ་ཉིད་བྱང་ཆུབ་གཞན་དུ་མཁས་མི་སྨྲ། །རྒྱལ་བས་གསུངས་པ་དེ་དག་ཐོས་གྱུར་ནས། །མི་འཇིགས་ལྡན་པའི་འཁོར་ནི་ཐེ་ཚོམ་བསལ། །དཔེར་ན་ཙམ་པའི་ཕྲེང་བ་འཛིན་པ་ལྟར། །མཁས་རྣམས་
ཐུབ་པས་གསུངས་ལ་ལེགས་ཞེས་འཛིན། །འཇིགས་པ་མེད་པའི་ལྷ་ཚོགས་འདི་དག་གིས། །མཆོད་པ་འཕགས་པ་བླ་ན་མེད་བྱས་ཤིང ། །རྒྱལ་བའི་སྤྱོད་ཡུལ་ཆོས་རྣམས་ཡོངས་ཤེས་ནས། །འགྲོ་བ་རྣམ་པར་འདྲེན་པ་ཀུན་མཁྱེན་འགྱུར། །གཞན་འཕྲུལ་དབང་བྱེད་པ་ལུང</font><hr>42-1-71b<br><font size=+2>
བསྟན་པའི་ལེའུ་སྟེ་བཅུ་དགུ་པའོ།། །།དེ་ནས་ཚངས་རིས་ཀྱི་ལྷ་བྱེ་བ་ཕྲག་དྲུག་ཅུས་ལྷ་མ་ཡིན་རྣམས་ནས་གཞན་འཕྲུལ་དབང་བྱེད་རིས་ཀྱི་ལྷའི་བར་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་
དགའ་ཞིང་དགའ་བ་དང་ཡིད་བདེ་བ་སྐྱེས་ནས་སྔོན་དགེ་བའི་རྩ་བ་བསགས་པ་དང ། སྔོན་གྱི་རྒྱལ་བ་ལ་བསྙེན་བཀུར་བྱས་པ་དང ། བསམ་པ་ཡོངས་སུ་དག་པའི་ཕྱིར་འཇིག་རྟེན་པའི་བསམ་གཏན་ལ་མི་འདོད་པ་སྐྱེས་ཤིང་དེ་བཞིན་གཤེགས་པའི་བསྟན་པ་འདི་ལ་ནི་སྣང་བ་ཐོབ་
སྟེ། ཆོས་ཟབ་མོ་ལ་བཟོད་པ་ཐོབ་པར་གྱུར་ནས་དེ་དག་གིས་ཆོས་ཐམས་ཅད་བྱས་པ་ཡང་མ་ཡིན། མ་བྱས་པ་ཡང་མ་ཡིན་ཞེས་བྱ་བར་ཤེས་པར་གྱུར་ཏོ། །དེ་བཞིན་དུ་སྐྱེས་པ་ཡང་མ་ཡིན། མ་སྐྱེས་པ་ཡང་མ་ཡིན། བྱུང་བ་ཡང་མ་ཡིན། མ་བྱུང་བ་ཡང་མ་ཡིན། 
གྲུབ་པ་ཡང་མ་ཡིན། མ་གྲུབ་པ་ཡང་མ་ཡིན། འགགས་པ་ཡང་མ་ཡིན། མ་འགགས་པ་ཡང་མ་ཡིན། གནས་པ་ཡང་མ་ཡིན། མི་གནས་པ་ཡང་མ་ཡིན། ཀུན་ནས་ཉོན་མོངས་པ་ཡང་མ་ཡིན། རྣམ་པར་བྱང་བ་ཡང་མ་ཡིན། རྗེས་སུ་ཆགས་པ་ཡང་མ་ཡིན། 
ཁོང་ཁྲོ་བ་ཡང་མ་ཡིན། རྨོངས་པ་ཡང་མ་ཡིན། མ་རྨོངས་པ་ཡང་མ་ཡིན། ཤེས་པ་པོ་ཡང་མ་ཡིན། ཤེས་པ་པོ་མེད་པ་ཡང་མ་ཡིན། མཐོང་བ་པོ་ཡང་མ་ཡིན། མཐོང་བ་པོ་མེད་པ་ཡང་མ་ཡིན། ཚོར་བ་པོ་ཡང་མ་ཡིན། ཚོར་བ་པོ་མེད་པ་ཡང་མ་ཡིན། སྟོན་
པ་པོ་ཡང་མ་ཡིན། སྟོན་པ་པོ་མེད་པ་ཡང་མ་ཡིན། ཡོད་པ་ཡང་མ་ཡིན། མེད་པ་ཡང་མ་ཡིན། དངོས་པོ་ཡང་མ་ཡིན། དངོས་པོ་མེད་པ་ཡང་མ་ཡིན། དམིགས་པ་ཡང་མ་ཡིན། མི་དམིགས་པ་ཡང་མ་ཡིན། འགྲོ་བ་ཡང་མ་ཡིན། འོང་བ་ཡང་མ་ཡིན། སོང་བ་
ཡང་མ་ཡིན། འོང་བ་ཡང་མ་ཡིན། སྟོང་པ་ཡང་མ་ཡིན། མི་སྟོང་པ་ཡང་མ་ཡིན། མཚན་མ་ཡོད་པ་ཡང་མ་ཡིན། མཚན་མ་མེད་པ་ཡང་མ་ཡིན། སྨོན་པ་ཡོད་པ་ཡང་མ་ཡིན། སྨོན་པ་མེད་པ་ཡང་མ་ཡིན་ནོ་ཞེས་བྱ་བར་ཤེས་པར་གྱུར་ཏོ། །དེ་དག་དེ་ལྟར་ཆོས་ཐམས་ཅད</font><hr>42-1-72a<br><font size=+2>
ལ་ཡོང་མི་གནས་པའི་ཡིད་ཀྱིས་དེ་དག་མིང་ལ་ཡང་མི་གནས། ཐ་སྙད་ལ་ཡང་མི་གནས། བརྗོད་པ་ལ་ཡང་མི་གནས། དེ་དག་ནི་བརྗོད་པའི་འདུ་ཤེས་ཅན་ཡང་མ་ཡིན་བརྗོད་དུ་མེད་པའི་འདུ་ཤེས་ཅན་ཡང་མ་ཡིན། བྱ་བའི་འདུ་ཤེས་ཅན་ཡང་མ་ཡིན། བྱ་བ་མེད་
པའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོ་མ་ཡིན་པའི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོའི་ཆོས་ཀྱི་འདུ་ཤེས་ཅན་ཡང་མ་ཡིན། སོ་སོའི་སྐྱེ་བོ་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་ཀྱི་འདུ་ཤེས་
ཅན་ཡང་མ་ཡིན། ཉན་ཐོས་མ་ཡིན་པའི་འདུ་ཤེས་ཅན་ཡང་མ་ཡིན། ཉན་ཐོས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། ཉན་ཐོས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་མ་ཡིན་པའི་འདུ་ཤེས་ཅན་
ཡང་མ་ཡིན། རང་སངས་རྒྱས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། རང་སངས་རྒྱས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའ་མ་ཡིན་པའི་འདུ་ཤེས་ཅན་ཡང་མ་ཡིན། བྱང་ཆུབ་
སེམས་དཔའི་ཆོས་ཀྱི་འདུ་ཤེས་ཅན་ཡང་མ་ཡིན། བྱང་ཆུབ་སེམས་དཔའ་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་ཀྱི་འདུ་ཤེས་ཅན་ཡང་མ་ཡིན། སངས་རྒྱས་མ་ཡིན་པའི་འདུ་ཤེས་ཅན་ཡང་མ་ཡིན། སངས་རྒྱས་ཀྱི་ཆོས་ཀྱི་འདུ་ཤེས་ཅན་ཡང་མ་ཡིན། 
སངས་རྒྱས་མ་ཡིན་པའི་ཆོས་ཀྱི་འདུ་ཤེས་ཅན་ཡང་མ་ཡིན། མྱ་ངན་ལས་འདས་པའི་འདུ་ཤེས་ཅན་ཡང་མ་ཡིན། མྱ་ངན་ལས་འདས་པ་མ་ཡིན་པའི་འདུ་ཤེས་ཅན་ཡང་མ་ཡིན། འཁོར་བའི་འདུ་ཤེས་ཅན་ཡང་མ་ཡིན། འཁོར་བ་མེད་པའི་འདུ་ཤེས་ཅན་ཡང་མ་ཡིན་ཏེ། དེ་
ལྟར་ཐམས་ཅད་ཀྱི་ཐམས་ཅད་དུ་རྟོག་པ་མེད་པའི་བློ་ཅན་ནམ་མཁའ་བཞིན་དུ་དག་ཅིང་གོས་པ་མེད་པར་གྱུར་ནས་དེ་རྣམས་དག་པ་དང་གོས་པ་མེད་པའི་ཕྱིར་དེའི་ཚེ་དེ་དག་ཞི་བས། བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། ཞི་ལ་ཞི་བའི་ཐུགས་མངའ་ཞི</font><hr>42-1-72b<br><font size=+2>
བ་སྤྱད་ཅིང་ཞི་བའི་ཕ་རོལ་བྱོན། །ཞི་བ་བསྟེན་པར་མཛད་ཅིང་འགྲོ་ལ་ཞི་བ་བསྟེན་པ་རྗེས་སུ་སྟོན། །ཞི་བའི་སྤྱོད་ཡུལ་དགྱེས་ཤིང་བྱང་ཆུབ་ཞི་ལ་དྲི་བྲལ་འཁྲུགས་མ་མཆིས། ཁྱོད་ཀྱིས་འཆི་མེད་ཞི་བ་འགྲོ་རྒྱུད་ཐམས་ཅད་ཟད་པ་མྱུར་དུ་བརྙེས། །ཞི་བ་ཐོབ་པར་བགྱིད་པའི་ཞི་
བའི་ལམ་མཆོག་ཞི་བ་ཡང་དག་བསྟེན། །ཡན་ལག་བརྒྱད་པས་ཉོན་མོངས་ཀློང་རྣམས་ཞི་མཛད་འགྲོ་བ་ཐམས་ཅད་བཏོན། །སྔོན་གྱི་རྒྱལ་བས་བསྟེན་པའི་བྱང་ཆུབ་གཞལ་ཡས་ཞི་བ་དེ་ལ་འགོད། །དེ་བསྟེན་སངས་རྒྱས་འཕགས་པས་བསྟེན་པའི་གྲོང་ཁྱེར་ཞི་བར་དེང་ཞེས་གསུང ། །
འདྲེན་པ་དེ་ལྟར་འགྲོ་བ་འདི་ལ་རྒྱལ་བས་བསྟེན་པའི་བསླབ་པ་བསྟན། །གལ་ཏེ་བསླབ་པ་དེ་སློབ་འགྲོ་བ་འདི་དག་བྱང་ཆུབ་གཞལ་ཡས་འཐོབ། །བསླབས་ནས་ཞི་ཞིང་ཡིད་ཞི་ཞི་བའི་ལམ་དོང་དབང་པོ་ཞི་བ་དག་།འཇིག་རྟེན་མཁས་པ་འགྲོ་བ་ཞི་བྱེད་མཐུ་ཆེན་ཞི་བ་ཤེས་པར་
འགྱུར། །འདྲེན་པ་ཁྱོད་ཀྱི་སྲས་མཆོག་ཞི་བ་འགྲོ་བ་ཞི་བགྱིད་གང་དག་གིས། །འཆི་མེད་ཞི་བ་མཚན་མ་ཐམས་ཅད་ཟད་པ་རྣམ་པར་རྟོག་གྱུར་པ། །དེ་དག་འདྲེན་པ་ཚུལ་ལ་མཁས་པ་མཆོད་པ་མཆོག་གིས་མཆོད་པར་འགྱུར། །ཉོན་མོངས་ཞི་ཞིང་མཚན་མ་ཀུན་སྤངས་ཞི་བ་
རྟག་ཏུ་སྟོན་པར་འགྱུར། །འགྲོ་བ་ཐམས་ཅད་ཞི་ཞིང་མཚན་མ་བྲལ་བ་དེ་ཉིད་མྱ་ངན་འདས། །ཐུབ་པ་གང་དག་ཞི་ལས་ཞི་འདོད་སེམས་པ་དེ་དག་ཉོན་མོངས་འགྱུར། །རྒྱལ་བ་ཁྱོད་ཀྱི་བྱང་ཆུབ་དང་ནི་འགྲོ་ཀུན་ཆོས་ཀུན་བསམ་མི་ཁྱབ། །ཐུབ་པ་བློ་ལྡན་འདམ་ལས་རྒལ་
བ་དེ་ལ་བདག་ཅག་དོགས་མ་མཆིས། །གང་དག་ཕུང་པོ་བོར་ཏེ་བྱང་ཆུབ་ཞི་ཚོལ་དེ་ལ་ཞི་བར་རྟོགས། །ཕུང་པོ་འཇིག་པ་དེ་དག་ཤཱཀྱ་ཐུབ་པའི་བསྟན་ལ་དགའ་མ་ལགས། །དབེན་པའི་བློ་གྲོས་ལྡན་པ་ཞི་ཚོལ་དེ་དག་བློ་འཁྲུགས་གྱུར་པ་སྟེ། །ཆོས་ཀྱི་མཚན་མ་སྤྱོད་ཡུལ་
འདི་དག་བྱིས་པ་ཞེས་ནི་སྟོན་པས་གསུངས། །ཐམས་ཅད་མཁྱེན་པས་ཞི་དང་མཚན་མའི་འཆིང་བ་འདི་དག་གསུངས། །ཐུབ་པ་གང་དག་ཕུང་པོ་རྣམས་ལ་རྣམ་པ་ཀུན་ཏུ་མཚན་མི་རྙེད། །དེ་དག་ཤཱཀྱ་ཐུབ་པའི་བསྟན་པ་མཛེས་བྱེད་གང་དག་མཚན་མེད་དགའ། །དེ་དག་བྱང་ཆུབ་སྐྱོན་བྲལ</font><hr>42-1-73a<br><font size=+2>
ཞི་བ་མཁས་པའི་སྤྱོད་ཡུལ་ཐོབ་པར་འགྱུར། །བདུད་ཀྱི་རྩོད་ལས་རྒྱལ་ནས་ཉོན་མོངས་ཞི་བའི་ཐམས་ཅད་མཁྱེན་པ་འཐོབ། །རྣམ་འདྲེན་ཞི་བ་མཛད་ལ་བསྟོད་པས་བདག་ཅག་བསོད་ནམས་གང་རྙེད་པ། །ཆགས་མེད་ཐུགས་མངའ་བདེ་བར་གཤེགས་པས་
འདི་ཙམ་ཞེས་ནི་མཁྱེན་གྱུར་པ། །དེས་ནི་འགྲོ་བ་ཐམས་ཅད་ལམ་མཆོག་ཐམས་ཅད་མཁྱེན་པས་བསྟེན་གྱུར་པ། །ཞི་བྱེད་ཞི་བ་བསྟེན་ནས་མཁས་པས་མཆོད་པའི་རང་འབྱུང་སྡིག་མེད་ཤོག་།དེ་ནས་མི་མཇེད་ཀྱི་བདག་པོ་ཚངས་པས་ཚངས་པ་རྣམས་དང ། ལྷ་རྣམས་ཀྱིས་བཅོམ་
ལྡན་འདས་ལ་བསྟོད་པར་རིག་ནས་བདག་ཉིད་ཀྱིས་ཚུལ་དང་འདྲ་བའི་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། མི་དབང་ཁྱོད་ཀྱིས་ཆོས་རྣམས་ཐམས་ཅད་ནི། །ལོག་པ་རྨོངས་བྱེད་ཆང་བ་སྟོང་འདྲ་ཞིང ། །སྟོན་གྱི་སྤྲིན་འདྲ་མིག་འཕྲུལ་འདྲ་བར་
མཁྱེན། །རྒྱལ་བས་འདོད་པའི་ཡོན་ཏན་མེད་པར་མཁྱེན། །ཇི་ལྟར་མི་ཞིག་རྨི་ལམ་བཀྲེས་གྱུར་པས། །ཁ་ཟས་རོ་བརྒྱ་ཟོས་ཀྱང་མ་འདྲངས་པ། །དེ་ལ་བཀྲེས་མེད་ཟས་མེད་སེམས་ཅན་མེད། །རྨི་ལམ་དེ་འདྲར་ཆོས་རྣམས་ཐམས་ཅད་གཟིགས། །སྐོམ་པའི་མི་ཞིག་ཉལ་
བའི་རྨི་ལམ་ན། །ཆུ་བསིལ་དྭངས་ཞིང་རྙོག་མེད་འཐུངས་གྱུར་ཀྱང ། །ངོམས་མེད་ཚ་བ་ཞི་བར་མི་འགྱུར་ཏེ། །དེ་བཞིན་ཁྱོད་ཀྱིས་ཆོས་རྣམས་ཐམས་ཅད་གཟིགས། །འདི་ལ་བྱེད་མེད་ཚོར་མེད་སེམས་ཅན་མེད། །བྱས་པ་དེ་བཞིན་མེད་ཅིང་རྣམ་སྨིན་མེད། །འབྲས་བུ་མྱོང་བར་
འགྱུར་བ་དེ་མེད་ཅེས། །འདི་འདྲའི་ཆོས་མཁྱེན་ཐེ་ཚོམ་ཡོང་མི་མངའ། །མི་ཞིག་ཡིད་དུ་འོང་བའི་ཚིག་སྨྲ་ན། །དགའ་བར་འགྱུར་ཡང་ཚིག་ལ་འཕོ་བ་མེད། ཚིག་ཉིད་མེད་ཅིང་དགར་འགྱུར་དངོས་ཀྱང་མེད། །དེ་མཁྱེན་དེ་ལ་ཐེ་ཚོམ་ཡོང་མི་མངའ། །པི་བང་སྒྲ་སྙན་མཉན་ན་རྣར་
སྙན་ཏེ། །སྒྲ་དེ་རང་བཞིན་གང་ཡང་ཡོད་པ་མིན། །དེ་ལྟར་མཁས་པས་ཕུང་པོ་འདི་གཟིགས་ན། །ཕུང་པོའི་རང་བཞིན་གང་ཡང་དམིགས་མི་མངའ། །ནོར་བུ་རིན་ཆེན་རང་བཞིན་གསལ་དག་པ། །གོས་ཀྱི་དྲུང་བཞག་སྣ་ཚོགས་ཚོན་དུ་འགྱུར། །དེ་ལྟར་རང་བཞིན་ཡོངས་དག</font><hr>42-1-73b<br><font size=+2>
ཆོས་རྣམས་ཀྱང ། །ལོག་པའི་རྣམ་པར་རྟོག་པས་དེ་ལྟར་གྱུར། །ཙན་དན་དྲི་མེད་སྐྱོན་དང་བྲལ་བ་ཡང ། །རྐྱེན་དང་སྦྱར་ན་དྲི་ཞིམ་གཞན་དུ་འགྱུར། །དེ་ལྟར་རང་བཞིན་ཡོངས་དག་ཆོས་རྣམས་ཀྱང ། །སོ་སོ་རང་གིས་བརྟགས་པའི་རྣམ་པ་བཞིན། །ཇི་ལྟར་མི་ཡིས་
དུང་གི་སྒྲ་ཐོས་ཏེ། །སྒྲ་འདི་ག་ལས་བྱུང་ཞེས་བརྟག་བྱས་ཀྱང ། །རང་བཞིན་གྱིས་སྟོང་དངོས་པོ་དེ་མི་དམིགས། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །ཇི་ལྟར་མི་ཞིག་བསོད་པའི་ཁ་ཟས་ལ། །ཡན་ལག་སྲོག་ཕན་ཇི་ལྟར་འགྱུར་བརྟགས་ན། །དངོས་མེད་
ཡན་ལག་སྲོག་ཀྱང་དེ་བཞིན་ཏེ། །དྲང་སྲོང་ཆེན་པོས་དེ་བཞིན་ཆོས་ཀུན་གཟིགས། །ཇི་ལྟར་མི་ཞིག་ནམ་མཁའི་འཇའ་མཐོང་ན། །ཡན་ལག་གཞིགས་བརྟགས་རང་བཞིན་མེད་ཅིང་སྟོང ། །ནམ་མཁའི་འཇའ་བཞིན་ཁྱོད་ཀྱིས་ཡན་ལག་སྟོང ། །དྲང་སྲོང་ཆེན་པོསདེ་བཞིན་
ཆོས་ཀུན་གཟིགས། །གྲོང་ཁྱེར་མཆོག་ཀྱང་ཡན་ལག་རྣམ་གཞིགས་ན། །གྲོང་ཁྱེར་རང་བཞིན་དེ་བཞིན་མིང་མི་དམིགས། །གྲོང་ཁྱེར་ཇི་བཞིན་དེ་ལྟར་ཡན་ལག་སྟོང ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུ་དགའ་བར་རྔ་ཞིག་བརྡུངས་བགྱིས་ན། །
དགའ་བ་སྐྱེད་ཀྱང་སྒྲ་ཡི་རང་བཞིན་སྟོང ། །ཇི་ལྟར་སྒྲ་བཞིན་དེ་ལྟར་ཡན་ལག་སྟོང ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་ནི་ཕྱོགས་སུ་མི་འགྲོ་འབྱུང་བ་མེད། །ཕྱོགས་སུ་དེ་བཞིན་འགག་པར་མི་འགྱུར་ཏེ། །མི་དབང་
ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །ཐོགས་པ་མེད་ཅིང་སྙན་པའི་རང་བཞིན་ཏེ། ཁྱོད་ཀྱི་ཡན་ལག་རྔ་སྒྲ་དེ་དང་འདྲ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་དེ་འཇིག་རྟེན་
དགའ་བྱར་རྟོག་པ་མེད། །ཇི་ལྟར་སྒྲ་བཞིན་ཁྱོད་ཀྱི་ཡན་ལག་སྟོང ། །མི་དབང་ཁྱོད་ཀྱིས་ཆོས་ཀུན་དེ་ལྟར་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །གཡོ་བ་མེད་ཅིང་ཞི་བའི་དངོས་ཀྱང་མེད། །ཇི་ལྟར་རྔ་བཞིན་ཁྱོད་ཀྱི་ཡན་ལག་སྟོང ། །མི་དབང་ཁྱོད་ཀྱིས་དེ་བཞིན</font><hr>42-1-74a<br><font size=+2>
ཆོས་ཀུན་གཟིགས། །སྐྱེས་བུས་ཇི་ལྟར་རྔ་དེ་བརྡུངས་པའི་ཚེ། །སྒྲ་དེ་ཡན་ལག་མ་བྱུང་རང་དབང་མིན། །ཇི་ལྟར་སྒྲ་བཞིན་ཁྱོད་ཀྱི་ཡན་ལག་སྟོང ། །མི་དབང་ཁྱོད་ཀྱིས་དེ་བཞིན་ཆོས་ཀུན་གཟིགས། །དེ་ནས་བཅོམ་ལྡན་འདས་ཀྱིས་ཚངས་རིས་ཀྱི་ལྷ་དེ་དག་
དང ། མི་མཇེད་ཀྱི་བདག་པོ་ཚངས་པ་དེའི་ལྷག་པའི་བསམ་པ་ཐུགས་སུ་ཆུད་ཅིང་ཞི་གནས་དང་ཡེ་ཤེས་མཐོང་བའི་བསྟོད་པ་དེས་དེ་ལྟར་བསྟོད་པས་འཁོར་དེ་ཡང་དགེ་བའི་རྩ་བ་བསགས་པར་གྱུར་པར་གཟིགས་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་
གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། ཤཱཀྱ་ཐུབ་པའི་ཞལ་ནས་འཛུམ་མཛད་དྲི་མེད་དག་མཐོང་ནས། །ལྷར་བཅས་མིར་བཅས་ཀླུ་དང་གནོད་སྦྱིན་བཅས་པའི་འཇིག་རྟེན་ཀུན། །སྐྱོབ་པའི་འཛུམ་མཐོང་ཐམས་ཅད་ལྡན་པའི་འགྲོ་བ་ཐེ་ཚོམ་འཚལ། །
བདེ་གཤེགས་ཞལ་བཟངས་དེ་ལ་ལྟ་ཞིང་ཐོས་པར་དགའ་སྟེ་སྡོད། །རྒྱལ་བ་འཛུམ་མཛད་ལེགས་པར་བཀའ་སྩོལ་ཐེ་ཚོམ་དགུམ་དུ་གསོལ། །རྣམ་པར་འདྲེན་པ་ཐུབ་མཆོག་ཀུན་མཁྱེན་སངས་རྒྱས་འདྲེན་པ་རྣམས། །རྒྱུ་མ་མཆིས་པར་འཇིག་རྟེན་དོན་བྱེད་འཛུམ་མཛད་མ་
མཐོང་ན། །བདེ་གཤེགས་ཁྱོད་ཀྱིས་གང་སླད་འཛུམ་མཛད་ཐེ་ཚོམ་རྒྱུ་དེ་གསུངས། །རྒྱལ་བ་འཛུམ་མཛད་རྒྱུ་ཐོས་འགྲོ་བ་རྣམས་ནི་དགའ་བར་འགྱུར། །འཁོར་འདི་ཐེ་ཚོམ་འཚལ་ནས་ཐལ་མོ་སྦྱར་ཏེ་ཁྱོད་ལ་སེམས། །བདེ་གཤེགས་ཐུབ་པའི་གསུང་མཆོག་ཐེ་ཚོམ་
གཅོད་པ་ཉན་འཚལ་ན། །རྣམ་འདྲེན་ཐུབ་པ་འཛུམ་མཛད་རྒྱུ་དེ་དེ་དག་རྣམས་ལ་གསུངས། །ཐོས་ནས་འགྲོ་བ་དགའ་ཞིང་ཐེ་ཚོམ་མ་མཆིས་འཕེལ་བར་འགྱུར། །འཁོར་འདི་སྙིང་བོ་ལྡན་ཞིང་རྙོག་མེད་སངས་རྒྱས་ཡོན་ཏན་འཚལ། །སྟོན་པ་ཁྱོད་ཀྱི་ཞལ་མཛེས་ཟླ་བ་མཛེས་
པ་འདྲ་ལ་ལྟ། །འདྲེན་པ་ཆགས་མེད་རྫོགས་པ་ཚངས་པ་འདྲ་བའི་གསུང་བསྒྲགས་གསོལ། །དེ་ཐོས་འཁོར་རྣམས་ཐེ་ཚོམ་ཆད་ཅིང་ཆོས་ལ་གནས་པར་འགྱུར། །ཁྱོད་ཀྱི་ཚངས་པའི་གསུང་མཆོག་དོན་ལྡན་འཇིག་རྟེན་འདས་རིག་ནས། །སྐྱེ་བོ་དགའ་ཞིང་མགུ་བའི་ཡིད</font><hr>42-1-74b<br><font size=+2>
ལྡན་ཐམས་ཅད་མཁྱེན་པས་ཚིམ། །དེ་དག་དོགས་བསལ་སྦྱངས་པའི་ཡིད་ཀྱིས་ཐམས་ཅད་མཁྱེན་དུ་སྒྲུབ། །བརྩོན་འགྲུས་སྟོབས་ཆེན་བསྐྱེད་ནས་འདུན་པ་སྟོབས་ལྡན་རྩོམ་པར་བགྱིད། དེ་ལྟ་ལགས་པས་འཇིག་རྟེན་འདྲེན་པ་ཕན་མཛད་གསུང་བསྒྲགས་གསོལ། །རྐང་
གཉིས་དམ་པའི་གསུང་མཆོག་མི་གཡོ་ཐོས་ནས་དེ་ཡིས་ནི། །དགེ་བ་ཐོབ་པའི་འཁོར་འདི་ཐམས་ཅད་མཁྱེན་དུ་སེམས་འགྱུར་བར། །སྟོབས་བཅུ་མངའ་བ་འགྲོ་བ་ཀུན་ལ་ཕན་པ་ལེགས་པར་དགོངས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་
བཅད་དེ་སླར་བཀའ་སྩལ་པ། རྟ་ཐུལ་ང་ཡིས་ཕན་བྱེད་འཛུམ་པ་འགྲོ་བ་ཀུན་ལ་གང་བསྟན་པ། །རྩེ་གཅིག་ཡིད་ཀྱིས་སྙེན་ཅིང་བསྔགས་པ་མཛེས་པ་དེ་ནི་མཉན་པར་བྱོས། །དེ་ཐོས་འགྲོ་བ་ཡོན་ཏན་བསགས་པ་མྱུར་དུ་འཇིག་རྟེན་དོན་བྱེད་པ། །ཕན་དང་ལྡན་པའི་བྱ་བ་སངས་
རྒྱས་བཀའ་སྩལ་དེ་ལ་བརྩོན་འགྲུས་རྩོམ། །ཚངས་པ་ཀུན་འཁོར་འདི་དག་དགའ་ཞིང་ཆོས་རྣམས་ལ་ནི་ཐེ་ཚོམ་མེད། །བསྐལ་པ་ཁྲག་ཁྲིག་གང་གཱའི་བྱེ་མ་སྙེད་དུ་དགེ་བ་ལེགས་པར་སྤྱད། །ཀུན་ཏུ་རྣམ་པ་དག་ལ་མ་ཆགས་ཡིད་གྱུར་འདུ་ཤེས་མཁའ་འདྲ་སྟེ། །དེ་ལྟར་གྱུར་
ཀྱང་བདེ་གཤེགས་བྱང་ཆུབ་རྫོགས་པར་འཚང་རྒྱ་སེམས་མ་བསྐྱེད། །འདི་དག་མ་འོངས་དུས་ན་བསྐལ་པ་བྱེ་བ་བརྒྱ་ཕྲག་གཞལ་ཡས་པ། །གང་གཱའི་བྱེ་མ་སྙེད་ན་རྡུལ་བསལ་ཐམས་ཅད་མཁྱེན་པའི་སྟོབས་ལ་གནས། །དེ་དག་ཕྱི་ནས་བདེ་བར་གཤེགས་པ་ཆེ་ལྡན་སངས་རྒྱས་འདྲེན་
ཆེ་བ། །སྲིད་པ་སེལ་ཅིང་འགྲོ་བ་སྟོང་པར་སྟོན་པའི་བཅོམ་ལྡན་འདས་སུ་འགྱུར། །སྐྱོབ་པ་དེ་དག་ཇི་ལྟར་སྤྱོད་པ་སྐུ་ཚེའི་ཚད་ཀྱང་དེ་ལྟར་འགྱུར། །བདེ་གཤེགས་མཐའ་ཡས་གྲགས་ལྡན་འཇིག་རྟེན་སྡུག་བསྔལ་འགྲེལ་ཅིང་གནས་པར་འགྱུར། །དེ་དག་རྣམས་ཀྱི་སངས་རྒྱས་
ཞིང་ནི་ཞིང་གི་འབྱོར་པ་གཞལ་ཡས་ཏེ། །འདྲེན་པ་ཆེན་པོ་རྣམས་ཀྱིས་བསྐལ་པ་ཁྲག་ཁྲིག་རྣམ་པ་དུ་མར་ནི། །སངས་རྒྱས་མཐའ་ཡས་རྣམས་ཀྱིས་གསུངས་ཀྱང་དེ་དག་བཀོད་པ་ཟད་མི་ནུས། །དེ་ཚེ་དེ་དག་ཡེ་ཤེས་སྟོབས་ལྡན་ཞེས་བྱའི་རྒྱལ་བར་འཐུན་པར་འགྱུར། །གཡོ་བ</font><hr>42-1-75a<br><font size=+2>
མེད་ཅིང་སེམས་མེད་མི་གནས་ཆོས་ནི་འགྲོ་ལ་སྟོན་པར་འགྱུར། །དེ་དག་ཞིང་མཆོག་རྣམས་སུ་སྐྱོབ་པའི་ཐམས་ཅད་མཁྱེན་ལམ་མ་སྦྱངས་པའི། །སེམས་ཅན་གཅིག་ཀྱང་མི་འབྱུང་སྲིད་པ་དེ་ལ་ཕལ་ཆེར་མྱ་ངན་འདའ། །དེ་དག་ན་ནི་དེ་ཚེ་འགྲོ་བ་དེ་དག་སྡུག་
བསྔལ་གཅིག་ཤེས་ཏེ། །མི་རྟག་འདུ་བྱེད་སྡུག་བསྔལ་རབ་ཏུ་འཇིགས་པས་སེམས་ཅན་ཡིད་འབྱུང་བའོ། །དེ་ན་འགྱུར་བའི་སྡུག་བསྔལ་དང་ནི་སྡུག་བསྔལ་སྡུག་བསྔལ་ཡོད་མི་འགྱུར། །དེ་དག་ཐམས་ཅད་བློ་འཐུན་འགྱུར་ཞིང་སླ་བའི་ལམ་ལ་མྱུར་བར་འགྱུར། །དེ་ན་
མི་རྣམས་དག་གི་སྒྲ་སྐད་རང་བཞིན་གཞན་ནི་འབྱུང་མི་འགྱུར། །མི་སྡུག་མི་རྟག་དེ་བཞིན་ཉིད་དང་སྡུག་བསྔལ་དེ་བཞིན་བདག་མེད་དང ། །ཞི་བ་སྟོང་ཉིད་མཚན་མེད་འཆི་མེད་མྱ་ངན་འདས་དང་བྱང་ཆུབ་ཞི། །སྒྲ་སྐད་དེ་དག་ཡང་དང་ཡང་འབྱུང་དེ་དག་རྣ་ལ་གནས་པར་འགྱུར། །
སྒྲ་གང་ཐོས་ནས་དེ་དག་འཁོར་བ་གྲོལ་གནས་ཐོབ་པར་མི་འགྱུར་བ། །དེ་འདྲའི་སྒྲ་དེ་ཤིང་ངམ་རྩིག་པ་དག་དང་གང་ནའང་ཡོད་མི་འགྱུར། །བླ་གབ་མེད་དང་མཁའ་དང་གཙུག་ལག་ཁང་དང་གནས་ཁང་རྣམས་ན་མེད། །དེ་ཚེ་སངས་རྒྱས་མཐུ་ཡིས་ཡན་ལག་བརྒྱད་དང་ལྡན་
པའི་སྒྲ་དབྱངས་འབྱུང ། །དེ་ཚེ་འདྲེས་པའི་ཉེས་པ་མེད་ཅིང་འདོད་ཆགས་དང་ནི་ཞེ་སྡང་དང ། །གཏི་མུག་དག་གིས་གཟིར་བ་རྣམས་ཀྱི་རྣར་ནི་དགེ་བའི་སྒྲ་གྲག་འགྱུར། །འགྲོ་བ་ཐམས་ཅད་འཁོར་བ་ལས་ནི་འབྱུང་ཞིང་མྱ་ངན་འདས་འགྲོར་འགྱུར། །དེ་ཚེ་ཞིང་མཆོག་སྟོང་པ་ཐམས་
ཅད་དགའ་བའི་སྐྱེ་བོས་གང་བར་འགྱུར། །སྐྱེས་བུ་དམ་པ་དེ་དག་བསྐལ་པ་ཁྲག་ཁྲིག་བྱང་ཆུབ་བརྩོན་བྱས་ནས། །དྲང་སྲོང་ཆེན་པོ་དེ་དག་སྨོན་ལམ་གྱིས་ནི་འབྱོར་པ་འདི་བརྩམས་ཏེ། །ཞིང་མཆོག་དེ་ན་སེམས་ཅན་ཚོགས་གང་ཡོད་པ་དེ་ཀུན་བདེ་གཤེགས་འགྱུར། །ཚངས་
པའི་སྨོན་ལམ་ཡངས་པ་རྒྱ་ཆེན་ཞི་བ་འགྲོ་བས་མཐོང་གྱུར་ན། །ཇི་ལྟར་སངས་རྒྱས་བཀའ་སྩལ་བཞིན་དུ་ཚངས་པའི་ཚོགས་ཀྱིས་བསྟེན་གྱུར་པ། །དེ་ལ་བསླབས་ནས་འགྲོ་བ་ཐམས་ཅད་ཐོགས་པ་མེད་པའི་འདྲེན་པར་འགྱུར། །དེ་དག་རྒྱལ་བ་ཐོབ་ནས་འགྲོ་བ་འདི་ཀུན་དངོས་པོ་མེད་ཅེས་སྟོན། །


</font><hr>42-1-75b<br><font size=+2>
དེ་ལྟ་བས་ན་ཚུལ་ཀུན་འཇུག་ལ་མཁས་པའི་སྤྱོད་པ་བསྟན་པར་གྱིས། །ཚངས་པ་ལུང་བསྟན་པའི་ལེའུ་སྟེ་ཉི་ཤུ་པའོ།། །།དེ་ནས་འོད་གསལ་གྱི་ལྷ་བྱེ་བ་ཕྲག་ལྔ་བཅུ་རྩ་བརྒྱད་ཀྱིས་ལྷ་མ་ཡིན་རྣམས་ནས་ཚངས་པའི་བར་གྱི་ལྷ་དེ་དག་གི་མཆོད་པ་
ཡང་མཐོང ། །ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་
སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཚུལ་ལ་འཇུག་པའི་སླད་དུ་གང་ལ་བསླབས་ནས་ཆོས་ཐམས་ཅད་སྣང་བར་འགྱུར་བའི་ཏིང་ངེ་འཛིན་ཆོས་ཐམས་ཅད་སྣང་བ་ཞེས་བགྱི་བ་མཆིས་ཏེ། དེས་ཆོས་
ཐམས་ཅད་ཀྱི་ཚུལ་ལ་འཇུག་པ་རྟོགས་པར་བགྱིད་དོ། །དེ་རྟོགས་པས་བསམ་གྱིས་མི་ཁྱབ་པའི་སྤོབས་པ་དང ། ཐོགས་པ་མ་མཆིས་པའི་སྤོབས་པ་དང ། བྱིན་གྱིས་བརླབས་པའི་སྤོབས་པ་དང ། སྣ་ཚོགས་ཀྱི་སྤོབས་པ་དང ། འཇམ་པའི་སྤོབས་པ་དང ། དགེ་བའི་སྤོབས་
པ་དང ། རིགས་པའི་སྤོབས་པ་དང ། གྲོལ་བའི་སྤོབས་པ་དང ། ཉེ་བར་གྱུར་བའི་སྤོབས་པ་དང ། ཟབ་པའི་སྤོབས་པ་དང ། ཕྲ་བའི་སྤོབས་པ་དང ། ཐུན་མོང་མ་ཡིན་པའི་སྤོབས་པ་ཅན་དུ་འགྱུར་ཏེ། སངས་རྒྱས་ཀྱི་སྤོབས་པ་ཡང་ཐོབ་པར་འགྱུར་རོ། །ཆོས་ཐམས་ཅད་
སྣང་བ་ཞེས་བགྱི་བའི་ཏིང་ངེ་འཛིན་དེ་གང་ཞེ་ན། བཅོམ་ལྡན་འདས་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཐམས་ཅད་ཀྱི་ཚུལ་ལ་འཇུག་པའི་སླད་དུ་རྣམ་པར་རྟོག་པ་དང ། རྣམ་པར་དཔྱོད་པ་ཐམས་ཅད་ཡིད་ལ་མི་བགྱིད་དེ། དེ་འདི་སྙམ་དུ་ཆོས་ཐམས་ཅད་
ནི་རྣམ་པར་རྟོག་པ་མེད་དེ་རྣམ་པར་རྟོག་པ་ཡོངས་སུ་ཆད་པའོ། །གང་རྣམ་པར་མི་རྟོག་པ་དེ་ནི་ཐམས་ཅད་དུ་སོང་བ་སྟེ། ཆོས་གང་ཡང་རྣམ་པར་རྟོག་པར་ནུས་པ་མ་མཆིས་ཏེ། དེ་ཅིའི་སླད་དུ་ཞེ་ན། རང་བཞིན་མ་མཆིས་པའི་སླད་དུ་སྟེ། ཆོས་གང་ལ་རང་བཞིན་མ་མཆིས་པ</font><hr>42-1-76a<br><font size=+2>
དེ་ལ་ཇི་ལྟར་རྣམ་པར་རྟོག་པར་འགྱུར་ཞེས་ཆོས་ཐམས་ཅད་ལ་རྣམ་པར་མི་རྟོག་པར་ཨ་ལ་འཇུག་པའི་སྤོབས་པ་རབ་ཏུ་ཐོབ་ཅིང ། དེ་དག་ཨའི་སྒོ་ལ་ཞུགས་པས་སྤོབས་པ་མཐའ་ཡས་པར་འགྱུར་ཏེ། ཨ་ཞེས་བགྱི་བ་ནི་མཐའ་ཡས་པ། ཀུན་ཏུ་མཐའ་ཡས་
པ། མ་བགྱིས་པ། མངོན་པར་འདུས་མ་བགྱིས་པ། ཡོངས་སུ་མ་གྲུབ་པ། དངོས་པོ་མ་མཆིས་པ། མི་གནས་པ། མི་གཡོ་བ། འདུ་བ་མ་མཆིས་པ། འཕྲོ་བ་མ་མཆིས་པ། རྟོག་པ་མ་མཆིས་པ། རྣམ་པར་རྟོག་པ་མ་མཆིས་པ། མ་བསྒྲུབས་པ། ཡོངས་སུ་ཐུག་
པ་མ་མཆིས་པ། མ་བརྟགས་པ། གཟུགས་མ་མཆིས་པ། བསྟན་དུ་མ་མཆིས་པ། བལྟར་མ་མཆིས་པ། མ་མཐོང་བ། བསམ་དུ་མ་མཆིས་པ། རྣམ་པར་མི་གནས་པ། མ་ཤེས་པ། རྣམ་པར་མ་ཤེས་པ། མ་སྨོས་བ། མ་བསྟན་པ། བསམ་གྱིས་མི་ཁྱབ་པ། 
བསམ་དུ་མ་མཆིས་པ། སོང་བ་མ་མཆིས་པ། འོངས་པ་མ་མཆིས་པ། ཉེ་བ་མ་ལགས་པ། རིང་བ་མ་ལགས་པ། མ་བརྟགས་པ། གདགས་པ་མ་མཆིས་པའི་ཆོས་ཅན། མིང་མ་མཆིས་པ། ཐ་སྙད་མ་མཆིས་པ། གཉེན་པོ་མ་མཆིས་པ། སྒྲིབ་པ་མ་མཆིས་པ། 
འཕོ་བ་མ་མཆིས་པ། འཁྲུག་པ་མ་མཆིས་པ། བརྟག་ཏུ་མ་མཆིས་པ། མི་ཟད་པ། གཉིས་སུ་མ་མཆིས་པ། མ་བྱུང་བ། བརྫུན་པ་མ་ལགས་པ། བདེན་པ་མ་ལགས་པ། ཤོ་བེ་མ་ལགས་པ། མ་སྐྱེས་པ། མ་འགགས་པ། སྦྱངས་པ་མ་ལགས་པ། སྦྱང་བར་
འོས་པ་མ་ལགས་པ། གདགས་སུ་མ་མཆིས་པ། མཚན་མས་མ་བསྐྱོད་པ། མ་བཟུང་བ། མ་བོར་བ། འཛིན་པ་མ་མཆིས་པ། ཡོངས་སུ་འཛིན་པ་མ་མཆིས་པ། གཏད་དུ་མ་མཆིས་པ། ཡོངས་སུ་གཏད་དུ་མ་མཆིས་པ། མ་བཏང་བ། ཡོངས་སུ་མ་བཏང་བ་སྟེ། ཨ་
ཞེས་བགྱི་བ་ནི་སུས་ཀྱང་མ་བགྱིས་པ། ཆོས་གང་གི་བྱེད་པ་པོ་ཡང་མ་ལགས་སོ། ། ནི་མ་སྐྱེས་པ་སྟེ། ཆོས་གང་ཡང་སྐྱེ་བར་བགྱིད་པ་མ་ལགས་སོ། ། ནི་མ་སྐྱེས་པ་སྟེ། ཆོས་གང་གི་སྐྱེ་བའི་རྒྱུར་འགྱུར་བའང་མ་ལགས་སོ། ། ནི་མ་འགགས་པ་སྟེ། ཆོས</font><hr>42-1-76b<br><font size=+2>
གང་གི་འགག་པའི་རྒྱུར་འགྱུར་བའང་མ་ལགས་སོ། ། ནི་མ་འགགས་པ་ཡང་མ་ལགས་པ་སྟེ། །ཆོས་གང་གི་མི་འགག་པའི་རྐྱེན་དུ་འགྱུར་བའང་མ་ལགས་སོ། ། ནི་གནས་པ་ཡང་མ་ལགས། མི་གནས་པ་ཡང་མ་ལགས། ཨ་ནི་བཏགས་པ་ཡང་མ་ལགས།
མ་བཏགས་པ་ཡང་མ་ལགས། ཨ་ནི་སྤངས་པ་ཡང་མ་ལགས། མ་སྤངས་པ་ཡང་མ་ལགས། ཨ་ནི་ཤེས་པ་ཡང་མ་ལགས། མ་ཤེས་པ་ཡང་མ་ལགས། ཨ་ནི་དམིགས་པ་ཡང་མ་ལགས། མ་དམིགས་པ་ཡང་མ་ལགས། ཨ་ནི་སྟོང་པ་ཡང་མ་ལགས། མི་སྟོང་
པ་ཡང་མ་ལགས། ཨ་ནི་དམིགས་སུ་མཆིས་པ་ཡང་མ་ལགས། དམིགས་སུ་མ་མཆིས་པ་ཡང་མ་ལགས། ཨ་ནི་མཚན་མ་ཡང་མ་ལགས། མཚན་མ་མ་མཆིས་པ་ཡང་མ་ལགས། ཨ་ནི་སྨོན་པ་ཡང་མ་ལགས། སྨོན་པ་མ་མཆིས་པ་ཡང་མ་ལགས་ཏེ། བཅོམ་ལྡན་
འདས་དེ་ལྟར་ན་ཆོས་ཐམས་ཅད་ཀྱི་མཚན་ཉིད་ནི་ཨའི་ཚུལ་ལོ། །ཆོས་ཐམས་ཅད་ནི་ཚུལ་གཅིག་པ་སྟེ་ཨའི་ཚུལ་ལོ། །ཆོས་ཐམས་ཅད་ནི་འགྲོ་བ་གཅིག་པ་སྟེ། ཨའི་འགྲོ་བའོ། །ཆོས་ཐམས་ཅད་ནི་འཇུག་པ་གཅིག་པ་སྟེ་ཨ་ལ་འཇུག་པའོ། །ཆོས་ཐམས་ཅད་ནི་
གདགས་པ་གཅིག་པ་སྟེ་ཨས་གདགས་པའོ། །ཆོས་ཐམས་ཅད་ནི་ཐ་སྙད་གཅིག་པ་སྟེ་ཨའི་ཐ་སྙད་དོ། །ཆོས་ཐམས་ཅད་ནི་བརྗོད་པ་གཅིག་པ་སྟེ་ཨས་བརྗོད་པའོ། །བཅོམ་ལྡན་འདས་ཆོས་གང་མ་སྐྱེས་པ་དེ་དག་ནི་རྟོགས་པར་བགྱི་བ་མ་ལགས་པའི་ཚུལ་གྱིས་རྟོགས་
པར་བགྱིའོ། །ཆོས་གང་མ་བྱུང་བ་དེ་དག་ནི་དངོས་པོ་མ་མཆིས་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་གྲུབ་པ་དེ་དག་ནི་མ་གྲུབ་པའི་ཚུལ་གྱིས་རྟོགས་པར་བགྱིའོ། །ཆོས་གང་མ་འགགས་པ་དེ་དག་ནི་འགག་པ་མ་མཆིས་པའི་ཚུལ་གྱིས་རྟོགས་པར་བགྱིའོ། །
བཅོམ་ལྡན་འདས་ཆོས་གང་མངོན་པར་འདུ་མ་བགྱིས་པ་དེ་དག་ནི། འདུས་མ་བགྱིས་པའི་ཚུལ་གྱིས་རྟོགས་པར་བགྱི་སྟེ། དེ་ནི་ཆོས་ཐམས་ཅད་ཀྱི་ཚུལ་ལོ། །བཅོམ་ལྡན་འདས་ཆོས་གང་མ་སྐྱེས་པ་དེ་དག་ནི་ཐ་སྙད་ཇི་ལྟར་རྟོགས་པར་བགྱི་ཞེ་ན། འདི་ལྟ་སྟེ། དཔེར་ན་རྨི་ལམ་ན</font><hr>42-1-77a<br><font size=+2>
བྱ་བ་སྣ་ཚོགས་འབྱུང་བ་དེ་བཞིན་དུ་ཆོས་ཐམས་ཅད་བལྟ་བར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་བྱ་བ་ནི་མ་སྐྱེས་པ། མ་བྱུང་བ། དངོས་པོ་མ་མཆིས་པ་སྟེ། འོན་ཀྱང་དེ་དག་ལ་གདགས་པར་གསུངས་སོ། །དེ་བཞིན་དུ་ཆོས་ཐམས་ཅད་ཀྱི་
བྱེད་པ་ཡང་འཚལ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་བྲག་ཅ་ལ་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་ཀྱང་བལྟ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་སྒྱུ་མའི་སྐྱེས་བུ་ལ་གདགས་པ་མཆིས་པ་དེ་བཞིན་དུ་ཆོས་ཐམས་ཅད་
ཀྱི་གདགས་པར་བལྟའོ། །བཅོམ་ལྡན་འདས་འདི་ལྟ་སྟེ། དཔེར་ན་སྨིག་རྒྱུ་ལ་ཆབ་ཏུ་གདགས་པའི་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་བལྟ་བར་བགྱིའོ། །བཅོམ་ལྡན་འདས་འདི་ལྟ་སྟེ། དཔེར་ན་མེ་ལོང་གི་དཀྱིལ་འཁོར་ལ་བུད་མེད་ཀྱི་གཟུགས་སམ། 
སྐྱེས་པའི་གཟུགས་ཀྱི་ཐ་སྙད་མཆིས་པ་དེ་བཞིན་དུ་ཆོས་ཐམས་ཅད་ཀྱི་ཐ་སྙད་བལྟ་བར་བགྱི་སྟེ། བཅོམ་ལྡན་འདས་བྱིས་པ་རྣམས་དགའ་བར་བགྱི་བའི་སླད་དུ་རྨི་ལམ་གྱི་བྱ་བ་ཐ་སྙད་དུ་བགྱིའི་རྨི་ལམ་གྱི་བྱ་བ་དེ་དག་ནི་མ་མཆིས་སོ། །བཅོམ་ལྡན་འདས་དེ་བཞིན་དུ་བྱིས་པ་
དགའ་བར་བགྱི་བའི་སླད་དུ་མིག་ཡོར་དང ། སྨིག་རྒྱུ་དང ། བྲག་ཅའི་བྱ་བ་དག་ཀྱང་ཐ་སྙད་དུ་བགྱི་སྟེ། བྲག་ཅ་ལ་བྱ་བ་མ་མཆིས་སོ། །བཅོམ་ལྡན་འདས་དེ་ལྟར་བདག་ཅག་གིས་བཅོམ་ལྡན་འདས་ཀྱིས་གསུངས་པའི་དོན་འཚལ་ཏེ། བཅོམ་ལྡན་འདས་འདི་ནི་ཆོས་ཐམས་ཅད་
སྣང་བ་ཞེས་བགྱི་བའི་ཏིང་ངེ་འཛིན་ཏོ། །དེ་སྐད་ཅེས་གསོལ་ནས་འོད་གསལ་གྱི་ལྷ་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བདེ་གཤེགས་ཁྱོད་ཀྱིས་ཚུལ་གཅིག་མཁྱེན་ཏེ་འོན་ཀྱང་གཞན་དང་གཞན་དུ་གསུངས། །ཐུབ་པ་
འཇིག་རྟེན་མཁས་པའི་སྲས་རྣམས་རྣམ་པར་རོལ་པའང་དེ་བཞིན་ནོ། །དེ་ལ་འཇིག་རྟེན་བློ་མེད་བདག་ཏུ་ལྟ་བ་རྣམས་ཀྱིས་ཁོང་མི་ཆུད། །བདག་གི་དོན་དེ་ཕྱོགས་བཅུར་མ་མཆིས་བདག་ཉིད་ཀྱིས་ནི་འགྲོ་བ་སྟོང ། །སྒྱུ་མ་གསོག་དང་སྨིག་རྒྱུ་ཆུ་མ་མཆིས་ལ་ཆབ་ཀྱི་འདུ་ཤེས</font><hr>42-1-77b<br><font size=+2>
ཅན། །བྱིས་པ་དེ་དག་བློ་ལོག་དེ་བཞིན་འཁྲུལ་ཏེ་བདག་ཏུ་སྦྱོར་བར་བགྱིད། །དེ་དག་ཡང་དག་མ་འཚལ་མི་མཁས་གནས་མིན་དངོས་ལ་རྟེན་ཀྱང་འཆའ། །དེ་བཞིན་བྱིས་པའི་སྐྱེ་བོ་སྨིག་རྒྱུ་འདྲ་བའི་ཕུང་པོ་ཡོང་མ་འཚལ། །འཁོར་བར་དགའ་བ་ཟུག་རྔུས་ཟུག་ཅིང་སྡུག་བསྔལ་
དེ་ཡིས་དབང་པོ་བདས། །གང་ལ་མི་མཁས་ངེས་པར་སྡུག་བསྔལ་མྱོང་བ་དེ་ལ་དངོས་མ་མཆིས། །བློ་སྟོར་ཡིད་ནོར་སྡུག་བསྔལ་རྣམས་ལ་བདེ་བར་འདུ་ཤེས་ནོར་བ་ལ། །ཉོན་མོངས་འཇིགས་པ་ཆེ་དང་དུག་གསུམ་རྣམས་ཀྱང་རྗེས་སུ་འགྲོ་ཞིང་འབྲང ། །འདོད་ཆགས་ཞེ་སྡང་གཏི་
མུག་དུག་ཆེན་ཉོན་མོངས་མཚུངས་མེད་རྗེས་སུ་འབྲང ། །བློ་སྟོར་དེ་དག་སྡུག་བསྔལ་གང་གིས་སྡུག་བསྔལ་གྱུར་པའི་སྡུག་བསྔལ་བ། །དེ་རྣམས་དེ་དག་རྗེས་འབྲང་བྱིས་པ་མི་མཁས་གནོད་པའི་ཁུར་ཡང་ཁྱེར། །དེ་དག་རྒྱལ་བའི་ཚུལ་སྒོ་ཐར་པ་བགྱིད་པ་སྟོང་པ་འདི་ཐོས་ནས། །སྐྱེས་
བུ་ངན་པ་བློ་ཞན་དེ་དག་བསྟན་ངག་བདེན་པ་ཉིད་ཀྱིས་འཇིགས། །བདེ་གཤེགས་ཁྱོད་ཀྱིས་ཨ་ཡི་ཡི་གེ་ཚུལ་ཆེན་སྒོ་གཅིག་དེ་ལྟར་བསྟན། །དེ་ལ་ཡང་དག་བློ་ཅན་ས་ལས་ཤིང་སྐྱེ་བཞིན་དུ་ཡིད་བསྐྱེད་ཅིང ། །བདུད་རྣམས་བྱེ་བ་དཔུང་དང་བཅས་བཏུལ་བྱང་ཆུབ་ཞི་བ་མངོན་འཚང་རྒྱ། །
ཡན་ལག་བརྒྱད་པའི་གྲུ་བཅས་སྐྱེ་བོ་ཉོན་མོངས་རྒྱ་མཚོ་ཆེ་ལས་སྒྲོལ། །བདེ་བར་གཤེགས་པ་ཅང་མཁྱེན་དེས་པ་རྣམས་ནི་ཚུལ་གྱི་དམ་པ་དེས། །མྱུར་དུ་ཉོན་མོངས་དུག་བསལ་བྱང་ཆུབ་དཔག་ཡས་ཞི་བ་འཐོབ་འགྱུར་ཞིང ། །གྲོལ་ནས་དུག་མེད་གྱུར་པ་སྐྱེ་བོ་གཞན་མཐོང་ངེས་
པའི་མཁྱེན་བརྙེས་ནས། །ཕ་རོལ་མྱུར་ཕྱིན་དུག་མེད་བདེ་ཞིང་གདུག་པ་ཐམས་ཅད་འཇོམས་པར་མཛད། །བདེ་གཤེགས་ཐམས་ཅད་སྟོང་ཡང་བདག་ཏུ་རྟོག་རྣམས་ཚུལ་དང་ཚུལ་མིན་རྟོག་།འགྲོ་བ་ཀུན་གྱི་ནང་ནས་མཁས་པ་ཚུལ་དང་ཚུལ་མིན་བསླབས་པ་དག་།གྲོལ་ནས་
འགྲོ་བ་ཀུན་ལ་ཆགས་མེད་ཡིད་ཀྱིས་ངོ་བོ་ཉིད་ཀྱི་ཆོས། །དེ་ཡི་ཚུལ་མཐོང་ཚུལ་ལ་མཁས་པ་དེ་དག་མཐུ་ཆེན་མགོན་པོར་འགྱུར། །འཆིང་དང་བཅིངས་པ་མེད་ཅིང་བདེ་བར་གཤེགས་པ་ཆོས་རྣམས་ཆོས་ཉིད་མེད། །དེ་བཞིན་ཉིད་དང་མ་ནོར་དེ་བཞིན་ཉིད་ཞི་མི་འདག་ཉོན་མི་མོངས། །


</font><hr>42-1-78a<br><font size=+2>
ཉོན་མོངས་མཚན་མ་མེད་ཅིང་ཞི་བྱེད་མེད་ལ་ཉོན་མོངས་རྣམས་ཀྱང་མེད། །གང་གིས་ཚུལ་ཆེན་དམ་པ་འདི་མཐོང་དེ་དག་ཐམས་ཅད་མཁྱེན་དུ་འགྱུར། །གྲོལ་ཞིང་འགྲོལ་མཛད་ཞི་བའི་ཆོས་ཅན་ཞི་མཛད་ངོ་མཚར་འགྱུར་མི་མངའ། །བཅོམ་ལྡན་ལྷར་བཅས་འཇིག་རྟེན་
དཔྱིད་ཀྱི་སྨིག་རྒྱུ་བཞིན་དུ་འཁྲུལ་པ་སྟེ། །ཀུན་རྟོག་བདག་ཉིད་ཟིལ་གནོན་བདག་དང་གཞན་མེད་སྐྱེས་པ་བུད་མེད་རྟོག་།འགྲོ་བ་སྡུག་བསྔལ་དེ་ན་སྣ་ཚོགས་ཀྱིས་བསྐྱེད་སེམས་ཀྱིས་སེམས་ཀྱང་ནི། །ལས་དང་འབྲས་བུ་མེད་ཅིང་དེ་མྱོང་གང་གྱུར་དེ་ཡང་མེད། །བདེ་གཤེགས་
དེ་ལྟར་སངས་རྒྱས་རྣམས་ཀྱི་སྤྱོད་ཡུལ་ཚུལ་ནི་བདག་ཅག་འཚལ། །དེས་ན་ད་ལྟར་བདེ་གཤེགས་ཞི་ཐུགས་དབང་པོ་ཞི་ཞིང་དེས་པ་སྟེ། །དགེ་བའི་བློ་མངའ་དག་གཙང་དྲི་མེད་ཆོས་ཀྱིས་རབ་ཏུ་མཆོད་པར་འགྱུར། །སངས་རྒྱས་འཇིག་རྟེན་འཕགས་པའི་གཙོ་བོ་བསྟོད་པས་
བསོད་ནམས་གང་བྱུང་བ། །ཇི་སྙེད་དཔལ་སྟུག་རྐང་གཉིས་གཙོ་བོས་རྣམ་སྨིན་ཡོངས་སུ་མཁྱེན་གྱུར་པའི། །བདག་ཅག་དགེ་རྩ་དེ་ཡིས་འགྲོ་བ་འདི་ཀུན་ཀུན་མཁྱེན་ཉིད་ཐོབ་ཤོག་།བསོད་ནམས་འདི་ཀུན་འགྲོ་བ་ཀུན་གྱི་དོན་བསྔོ་ཀུན་ཀྱང་རྒྱལ་བར་ཤོག་།དེ་ནས་
བཅོམ་ལྡན་འདས་ཀྱིས་འོད་གསལ་གྱི་ལྷ་དེ་དག་གི་ལྷག་པའི་བསམ་པ་ཡོངས་སུ་དག་པ་དང ། ཚུལ་གྱི་རྗེས་སུ་འགྲོ་བའི་སྤོབས་པ་ཕུན་སུམ་ཚོགས་པ་ཡང་ཐུགས་སུ་ཆུད་ལ་འཁོར་དེ་དག་གིས་ཀྱང་ཁྱད་པར་ཐོབ་པར་འགྱུར་བར་མཁྱེན་ནས་དེའི་ཚེ་འཛུམ་པ་མཛད་དོ། །
དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག་རྟེན་དོན་མཛད་རྣམ་པར་འདྲེན་མཆོག་ཀུན་མཁྱེན་ཐམས་ཅད་ཟིལ་གནོན་པ། །བདེ་གཤེགས་ཐུགས་རྗེ་ལྡན་རྣམས་རྒྱུ་མ་མཆིས་པར་བཞད་པ་མི་མཛད་ན། །རྒྱལ་བ་དཔལ་སྟུག་
རྐང་གཉིས་མཆོག་གིས་འཇིག་རྟེན་ཐུགས་བརྩེས་བཀའ་སྩལ་གསོལ། །འཇིག་རྟེན་འདས་ཁྱོད་ཅི་སླད་འཛུམ་མཛད་དེ་རྒྱུ་བདག་ཅག་རྣམས་ལ་གསུངས། །གཙོ་བོ་དེ་ཐོས་འགྲོ་བ་མཐའ་དག་ཡིད་ནི་རབ་ཏུ་དང་འགྱུར་ཞིང ། །རྣམ་པར་འདྲེན་པ་ངེས་འབྱུང་ལས་དང་འབྲས་བུ</font><hr>42-1-78b<br><font size=+2>
གཞལ་ཡས་བགྱིད་པར་འགྱུར། །དེས་ནི་ལྷ་མིར་བཅས་པའི་འཇིག་རྟེན་འཁོར་བར་སྡུག་བསྔལ་ཉམ་ཐག་འདི། །འཕགས་ལམ་ཡན་ལག་བརྒྱད་བསྟན་སྲིད་པའི་རྒྱ་མཚོ་འདི་ནས་སྒྲོལ་བར་འགྱུར། །དྲང་སྲོང་ཆེན་པོའི་གསུང་མཆོག་ཡན་ལག་བརྒྱད་ལྡན་བཟང་པོ་འདི་ཐོས་ནས། །
འགྲོ་བ་ཐམས་ཅད་སངས་རྒྱས་ཉིད་འཚལ་དགེ་ལ་བརྩོན་ཞིང་དགའ་བར་འགྱུར། །ཐེ་ཚོམ་བྲལ་གྱུར་རྣམ་དག་ཡིད་ཀྱིས་བརྩོན་འགྲུས་དྲག་པོའི་སྟོབས་བསྐྱེད་ཅིང ། །བདེ་བར་གཤེགས་པའི་བསྟན་པ་བཞིན་བགྱིད་ཁྱོད་དང་འཐུན་བྱུང་སྲས་སུ་འགྱུར། །འཁོར་རྣམས་འདི་དག་
བརྟེན་པ་གཞན་མ་མཆིས་པར་འདྲེན་པ་ཁྱོད་ཀྱི་ཞལ་དུ་ལྟ། །འགྲོ་བའི་རྩ་ལག་རྟོག་པ་ཡིད་གཉིས་བསལ་ཞིང་བཀའ་ལུང་སྩལ་དུ་གསོལ། །བཅོམ་ལྡན་འཇིག་རྟེན་འདི་དག་ཁྱོད་ཀྱི་ཞབས་འབྲིང་གནས་ཤིང་ཉན་པར་འཚལ། །གསུང་རབ་ལེགས་བརྗོད་བདུད་རྩིའི་ཆར་ཕོབ་
གང་དག་སྐོམ་པ་འཚལ་བར་འགྱུར། །འདྲེན་པ་ཆེན་པོ་ཁྱོད་ཀྱི་འཁོར་འདི་དག་ཅིང་སངས་རྒྱས་ཡོན་ཏན་འཚལ། །རིང་དུ་སོང་བའི་མ་ལ་བུ་ལྟ་བཞིན་དུ་ཁྱོད་ཀྱི་ཞལ་དུ་ལྟ། །བདེ་གཤེགས་ལྷ་རྣམས་ལུང་བསྟན་བཀའ་སྩོལ་བཞད་པའི་དོན་ཀྱང་བསྟན་དུ་གསོལ། །སྐྱོབ་པའི་
གསུང་མཆོག་ཐོས་ན་འཇིག་རྟེན་དོན་ཆེན་ཤིན་ཏུ་ཐོབ་པར་འགྱུར། །ཐུབ་པ་དེ་རིང་སུ་ཞིག་དགེ་བ་འཕེལ་ཞིང་གྲགས་པ་དོན་དུ་གཉེར། །སུ་ཞིག་འདྲེན་པའི་ཡོན་ཏན་གཏེར་རྙེད་འགྱུར་བ་བདག་ཅག་དེ་ཉན་འཚལ། །རྒྱལ་བའི་འཁོར་རྣམས་ཁྱོད་ཀྱིས་གསུངས་པ་དེ་དག་ཐོས་
ཤིང་དགར་གྱུར་ནས། །ཚུལ་འདི་སྟོན་ཅིང་ཏིང་འཛིན་སྟོབས་ལྡན་ཤེས་རབ་ལ་ཡང་སྒོམ་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱི་སྤོབས་པ་ལེགས་པར་དུས་ལྡན་སྐྱེས་པ་ཤིན་ཏུ་
ལེགས། །བདེ་གཤེགས་རྣམ་པར་སྤྲུལ་བཞིན་དེ་ལྟར་ཁྱོད་ཀྱི་བློ་གྲོས་འབྱུང་འགྱུར་ཞིང ། །སྤོབས་པ་ཆེ་འབྱུང་དེ་ཕྱིར་གང་དང་གང་དག་ཁྱོད་ཀྱིས་དྲིས་གྱུར་པ། །དེ་དག་ལུང་བསྟན་ངས་བཤད་ཀུན་ཀྱང་དབང་པོ་ཞི་བས་མཉན་པར་གྱིས། །འོད་གསལ་བ་ཡི་ལྷ་རྣམས་བློ་དག</font><hr>42-1-79a<br><font size=+2>
སྔོན་གྱི་རྒྱལ་བ་མཐོང་བ་སྟེ། །འཇིག་རྟེན་མགོན་མེད་ཡིད་ཅན་འདི་དག་མཐོང་ནས་བྱང་ཆུབ་ཡང་དག་ཞུགས། །བྱང་ཆུབ་ངེས་འབྱུང་ལམ་མཆོག་ཡང་དག་རྒྱལ་བས་སྤྱད་སྤྱོད་པ། །བྱང་ཆུབ་འགྲོ་འདོད་གང་ཚེ་སྟོན་མེད་ལམ་སྟོར་རྣམས་ལ་སྟོན་པར་འགྱུར། །
ཚུལ་གྱི་དམ་པ་ཤིན་ཏུ་གསལ་སྒྲ་ཐུན་མོང་མ་ཡིན་འདི་ཐོས་ན། །སངས་རྒྱས་ཡོན་ཏན་དོན་གཉེར་བློ་སྦྱངས་དེ་དག་བྱང་ཆུབ་ཞི་འཐོབ་འགྱུར། །དེ་དག་སྟོབས་སྐྱེས་ཚུལ་དང་ཚུལ་མིན་མཁས་ཤིང་བྱང་ཆུབ་ཡིད་ངེས་གྱུར། །བུ་སྐྱེས་མ་བཞིན་དགའ་བས་བྱང་ཆུབ་མཆོག་ཏུ་དེ་དག་
སྨོན་ལམ་བཏབ། །འོད་གསལ་ལྷ་རྣམས་འདི་དག་བྱང་ཆུབ་འདོད་ལ་ཚུལ་གྱི་སྒོ་བསྟན་ཏེ། །བསྐལ་པ་ཁྲག་ཁྲིག་བརྗོད་དུ་མེད་པར་ཕྲ་བའི་ཚུལ་འདི་བསྟན་བྱས་ནས། །སེམས་ཅན་སྐར་མའི་གྲངས་པས་ཆེས་མང་བ་དག་བྱང་ཆུབ་དགའ་བྱས་ཏེ། །དེ་ཡི་འོག་ཏུ་འཇིག་རྟེན་མཁས་
པ་རང་བྱུང་སྐྱོན་བྲལ་ཀུན་མཁྱེན་འགྱུར། །དེ་དག་ཞིང་མཆོག་བརྗོད་དུ་མེད་པ་ཞིང་རྣམས་བྱེ་བ་བརྒྱ་འགྲངས་པར། །ཡངས་ཤིང་ཤིན་ཏུ་དགའ་ལ་མཐའ་དག་བཀོད་པ་རྣམས་ཀྱིས་བརྒྱན་པ་སྟེ། །ཀུན་གྱི་ཞིང་དུ་ངན་སོང་རྣམས་དང་དེ་བཞིན་མི་ཁོམ་ཡོང་མི་འབྱུང ། །བདེ་
བར་གཤེགས་རྣམས་ཐུགས་བརྩེས་སེམས་ཅན་ཐམས་ཅད་རང་འབྱུང་མཛད་པར་འགྱུར། །ཞིང་རྣམས་དེ་དག་གང་ནའང་ཉན་ཐོས་ཐེག་པ་སྟོན་པར་མི་འགྱུར་ཏེ། །སེམས་ཅན་ཐམས་ཅད་རང་བྱུང་ཉིད་དུ་མངོན་ཕྱོགས་འཕྲོགས་པ་མེད་པར་འགྱུར། །དེ་ན་རང་བྱུང་
སངས་རྒྱས་ཉིད་སྟོན་མཛད་པ་འཇིག་རྟེན་མཁས་རྣམས་ཀྱི། །སྐུ་ཚེའི་ཚད་ནི་བསྐལ་པ་བྱེ་བ་བརྒྱ་འགྲངས་གང་གཱའི་བྱེ་སྙེད་འགྱུར། །རྟ་ཐུལ་འཇིག་རྟེན་ཁྲག་ཁྲིག་ཁམས་ཀྱི་ཉན་ཐོས་མྱ་ངན་བཟླས་པ་བས། །གང་ཡང་སྐྱེས་པའམ་བུད་མེད་གཅིག་ཅིག་བྱང་ཆུབ་ཡང་
དག་དགའ་བྱས་ན། །བསོད་ནམས་དེ་ལ་སྔ་མས་གྲངས་སམ་དཔེར་ཡང་བྱ་བར་མི་ནུས་སོ། །དེ་བས་བྱང་ཆུབ་ཞུགས་པའི་སྐྱེས་བུ་དམ་པ་བྱང་ཆུབ་དགའ་བར་གྱིས། །རྟ་ཐུལ་འདི་ལ་འདྲེན་པ་ཐམས་ཅད་མཁྱེན་པ་འབྱུང་བ་རྙེད་སླ་མིན། །དེ་ནི་ཨུ་དུམ་བ་རའི་མེ་ཏོག་འདྲ་ཞེས</font><hr>42-1-79b<br><font size=+2>
སངས་རྒྱས་མཐའ་ཡས་བློ་མངའས་གསུངས། །དེ་ཕྱིར་བླ་ན་མེད་པའི་ཞི་བདེ་བྱང་ཆུབ་མི་གང་འདོད་པ་ཡིས། །ཤིན་ཏུ་བློ་ཕྲ་སྟེན་བཟང་མཁྱེན་པ་ཚུལ་མཁས་འདྲེན་ལ་བསྟེན་པར་བྱ། །དེ་བཞིན་གཤེགས་ཀྱི་ཞལ་ནས་དོན་བྱེད་གསུང་དག་དེ་འདྲ་ཐོས་གྱུར་ནས། །འཁོར་རྣམས་ཐམས་
ཅད་ཡི་རངས་མཆོག་ཏུ་དགའ་ཞིང་ཡང་དག་དགའ་བར་འགྱུར། །ཁྲག་ཁྲིག་ལྷ་རྣམས་ནམ་མཁར་འཁོད་ནས་གོས་ཀྱི་གཡབ་མོ་འདོར་བར་བྱེད། །དགའ་ནས་སངས་རྒྱས་དབང་ཕྱུག་ཁྱོད་ལ་ཕྱག་འཚལ་ལོ་ཞེས་སྒྲ་ཡང་ཕྱུང ། །ཞི་བ་ཐུགས་ཞི་སྐྱེ་བོ་ཉོན་མོངས་རྒོད་པས་རྒོད་གྱུར་ཞི་
བར་མཛད། །བདུད་རྩི་སྟོན་ཅིང་དུག་གསུམ་ཞི་མཛད་སེམས་ཅན་དུག་ནི་བསྐྱུག་ཏུ་གསོལ། །ཁྱོད་ཀྱི་ཡེ་ཤེས་ཐོས་ནས་སྐྱེ་དགུའི་དུག་མེད་འགྱུར་ཞིང་དགྲ་མེད་འགྱུར། །སྡུག་བསྔལ་རྣམས་ཀྱིས་འདྲེན་ལས་ཚུལ་ཐོས་མི་བཟད་སྲིད་པའི་རྒྱུད་ལས་གྲོལ། །འོད་གསལ་བ་ལུང་བསྟན་
པའི་ལེའུ་སྟེ་ཉི་ཤུ་རྩ་གཅིག་པའོ།། །།བམ་པོ་བརྒྱད་པ། དེ་ནས་དགེ་རྒྱས་རིས་ཀྱི་ལྷ་ཁྲག་ཁྲིག་ཕྲག་བཅུ་གཉིས་ཀྱིས་ལྷ་མ་ཡིན་རྣམས་ནས་འོད་གསལ་བའི་ལྷའི་བར་དག་གི་མཆོད་པ་ཡང་མཐོང ། ལུང་བསྟན་པ་ཡང་ཐོས་ནས་ཚིམ་ཞིང་མགུ་ལ་
ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བདག་ཅག་ཚུལ་ཕུན་སུམ་ཚོགས་པར་གྱུར་པ་ཡང་བརྗོད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་ལ་བདེ་བར་འགྲོ་བ་ཞེས་བགྱི་བའི་ཏིང་ངེ་འཛིན་མཆིས་ཏེ། ཏིང་ངེ་
འཛིན་དེ་ཐོབ་པས་བྱང་ཆུབ་སེམས་དཔའ་སེམས་དཔའ་ཆེན་པོ་དམིགས་པའི་དངོས་པོ་ཐམས་ཅད་ལ་བདེ་བའི་ཚོར་བ་ཤ་སྟག་མྱོང་བར་འགྱུར་ཞིང་སྡུག་བསྔལ་གྱི་ཚོར་བ་མི་མྱོང་ལ། སྡུག་བསྔལ་ཡང་མ་ལགས་བདེ་བ་ཡང་མ་ལགས་པ་ཡང་མི་མྱོང་སྟེ། སེམས་ཅན་དམྱལ་བའི་གནོད་
པས་གནོད་པར་བགྱིས་ཀྱང་བདེ་བའི་འདུ་ཤེས་ཉེ་བར་གནས་པ་དང ། མིའི་གནོད་པས་གནོད་པར་བགྱིས་ཀྱང་བདེ་བའི་འདུ་ཤེས་ཉེ་བར་གནས་པ་དང ། ལག་པ་བཅད་དམ། རྐང་པ་བཅད་དམ། རྐ་ལག་བཅད་དམ། རྣ་བ་འམ། སྣ་འམ། རྣ་བ་དང་སྣ་གཏུབས་ཀྱང་བདེ་བའི་འདུ</font><hr>42-1-80a<br><font size=+2>
ཤེས་ཉེ་བར་གནས་པར་འགྱུར་བ་དང ། སྦ་ལྕག་གིས་གཞུས་སམ། སྤ་ལྕག་བྱེད་ཚལ་ལམ། ལྕག་གིས་གཞུས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང་།བཙོན་རར་བཅུག་གམ། ལྕགས་སྒྲོག་དང ། ཤིང་སྒྲོག་ཏུ་བཅུག་གམ། 
བཙོན་ཆ་དམ་པོ་ལ་རྒྱས་བཏབ་བམ། བྱིས་པའི་གཙུག་ཕུད་ལྟར་བཅིངས་སམ། དུགས་ཀྱི་སྣོད་ལྟར་བདུགས་སམ། བུ་རམ་ཤིང་བརྡུངས་པ་ལྟར་བརྡུངས་སམ། འདམ་བུ་གཞོམ་པ་ལྟར་བཅོམ་འམ། འབྲུ་མར་གྱི་མར་མེ་ལྟར་འབར་བར་བྱས་སམ། མར་གྱི་མར་མེ་
དང་ཞོ་བསྐོལ་བ་ལྟར་འབར་བར་བྱས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང ། མེའི་ནང་དུ་བོར་རམ། སེང་གེའི་ཁར་བསྟབས་སམ། སྟག་གི་ཁར་བསྟབས་སམ། སྐམ་རིལ་བྱ་བ་ལྟར་གྲིལ་ཏམ། བྱི་བོའི་ཆད་པ་ལྟ་བུས་བཅད་དམ། ཉེས་བྱུང་བ་
བསྒྲགས་པ་ལྟར་བསྒྲགས་སམ། ཀར་ཥ་པ་ཎ་ཙམ་དུ་གཏུབས་སམ། འབྲས་ཕྱེ་བཙོ་བ་ལྟར་བཙོས་སམ། གླང་པོ་ཆེ་རྣམས་ཀྱིས་བཅོམ་ཡང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང ། མིག་ཕྱུང་ངམ། གསལ་ཤིང་གི་རྩེ་མོ་ལ་བཞག་གམ། གསད་པའི་གནས་
སུ་ཁྲིད་དེ་རྣམ་པ་ཐམས་ཅད་དུ་མོག་གཅོད་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་ཏེ། བདེ་བ་ཡང་མ་ལགས། མི་བདེ་བ་ཡང་མ་ལགས་པའི་འདུ་ཤེས་རྣམ་པ་ཐམས་ཅད་དུ་མི་འབྱུང་ངོ ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་
ཆེན་པོ་དེས་ཡུན་རིང་པོ་ནས་སྤྱད་པ་སྤྱོད་པའི་ཚེ་སྨོན་ལམ་འདི་ལྟར་བཏབ་སྟེ། གང་གིས་བདག་ལ་ཁ་ཟས་བྱིན་པ་དེ་དག་ཉེ་བར་ཞི་བའི་བདེ་བ་ཐོབ་པར་གྱུར་ཅིག། གང་གིས་བདག་ལ་སྐོམ་བླུད་པ་དང ། གང་གིས་བདག་ལ་རིམ་གྲོ་བྱས་པ་དང ། བཀུར་སྟི་བྱས་པ་དང ། 
བསྟི་སྟང་བྱས་པ་དང ། མཆོད་པ་བྱས་པ་དེ་དག་ཐམས་ཅད་ཀྱང་ཉེ་བར་ཞི་བའི་བདེ་བ་ཐོབ་པར་གྱུར་ཅིག།གང་ཡང་བདག་ལ་གཤེ་བ་དང ། མི་བདེ་བར་བྱེད་པ་དང ། བརྡེག་པ་དང ། མཚོན་གྱིས་འདེབས་པ་དང ། རྣམ་པ་ཐམས་ཅད་དུ་སྲོག་གཅོད་པའི་བར་དུ་བྱེད་པ་དེ་དག་ཐམས</font><hr>42-1-80b<br><font size=+2>
ཅད་ཀྱང་བྱང་ཆུབ་ཀྱི་བདེ་བ་ཐོབ་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་གྱུར་ཅིག་ཅེས་སྨོན་ལམ་བཏབ་སྟེ། དེ་ཡིད་ལ་བྱ་བ་དེ་དག་དང་ལྡན་ཞིང་དེ་དེ་ལྟ་བུའི་ལས་དང ། དེ་ལྟ་བུའི་སྨོན་ལམ་དང་ལྡན་པས་སེམས་ཅན་ཐམས་ཅད་ཀྱི་
རྗེས་སུ་སོང་བའི་བདེ་བའི་འདུ་ཤེས་ལ་སྟེན་ཅིང་སྙེན་ལ་སྒོམ་ཞིང་མང་དུ་བྱེད་དེ། དེ་ལས་དེའི་རྣམ་པར་སྨིན་པས་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་རབ་ཏུ་འཐོབ་བོ། །གང་གི་ཚེ་བྱང་ཆུབ་སེམས་དཔས་ཆོས་ཐམས་ཅད་ལ་བདེ་བར་འགྲོ་བའི་ཏིང་ངེ་འཛིན་ཐོབ་པར་
གྱུར་པ་དེའི་ཚེ། བདུད་ཀྱི་ལས་ཐམས་ཅད་ཀྱིས་མི་འཕྲོགས་ཤིང་མི་འཁྲུགས་པར་འགྱུར་ཏེ། དེའི་ཚེ་འདི་ལྟར་ཚེ་ལ་དབང་བ་དང ། སྐྱེ་བ་ལ་དབང་བ་དང ། ལས་ལ་དབང་བ་དང ། རྣམ་པར་རྟོག་པ་ལ་དབང་བ་དང ། ཡོ་བྱད་ལ་དབང་བ་སྟེ། དབང་ལྔ་ཐོབ་པར་རིག་པར་
བགྱིའོ། །དེ་འཚལ་ན་ཚེ་རྗེས་མ་ཐག་ཏུ་བྱང་ཆུབ་མངོན་པར་རྫོགས་པར་འཚང་རྒྱའོ། །དེ་འཚལ་ན་བསྐལ་པ་གྲངས་མ་མཆིས་པར་གནས་སོ། །དེ་ཅིའི་སླད་དུ་ཞེ་ན། འདི་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐེག་པ་ཆེན་པོ་ལ་ཡང་དག་པར་ཞུགས་ཤིང་
བྱང་ཆུབ་སེམས་དཔའ་སྒྲུབ་པ་དང ། བྱང་ཆུབ་སེམས་དཔའ་ཡོངས་སུ་འཛིན་པ་དང ། ངན་འགྲོ་ཐམས་ཅད་རབ་ཏུ་བསལ་བ་དང ། འགྲོ་བ་དྲུག་པོ་ཀུན་ཏུ་སྐྱེས་པ་དང ། བྱང་ཆུབ་སེམས་དཔའི་བསླབ་པ་ཐམས་ཅད་ལ་བསླབས་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པས་
ཡོངས་སུ་བཟུང་བ་དང ། ཐབས་མཁས་པ་དང་ལྡན་པ་དང ། བདུད་ཀྱི་ལས་ལས་རྣམ་པར་རྒྱལ་བ་དང ། ཆོས་ཐམས་ཅད་ཁོང་དུ་ཆུད་པར་རིག་པར་བགྱི་བའི་སླད་དུ་སྟེ། བཅོམ་ལྡན་འདས་གང་གིས་བྱང་ཆུབ་སེམས་དཔའ་ཆོས་ཐམས་ཅད་ལ་ངེས་པའི་རྟོགས་པ་ཐོབ་པར་
འགྱུར་བ་ཐམས་ཅད་ནི་དེ་བཞིན་གཤེགས་པའི་མཐུའོ། །དེ་ནས་དགེ་རྒྱས་ཀྱི་ལྷ་རྣམས་ཀྱིས་ཏིང་ངེ་འཛིན་འདི་བརྗོད་ནས་དེའི་ཚེ་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། དགེ་རྒྱས་ལྷ་ཚོགས་འདི་དག་ཐམས་ཅད་ཆོས་ལ་མཐར་ཐུག་གྱུར་པ་སྟེ། །


</font><hr>42-1-81a<br><font size=+2>
སྟོན་པ་དབང་པོ་ཞི་ཞིང་ཞི་བ་མཁྱེན་ལ་མགོ་བོས་སྐྱབས་སུ་མཆིས། །དེ་དག་མཁས་པས་མཆོད་པའི་སངས་རྒྱས་དོན་མཁྱེན་འཁོར་བ་རྒལ་གྱུར་པ། །ཐུབ་པ་མི་ཡི་འདྲེན་པའི་ཚུལ་མཁས་རྒྱལ་བ་འདྲེན་པ་འདྲེན་ལ་བསྟོད། །འདི་ན་རང་བཞིན་ངེས་པའི་
ཐུབ་ཆོས་གནས་པ་གང་ནའང་མ་མཆིས་ཏེ། །སྒྱུ་མའི་མཁན་པོས་སྒྱུ་མ་ཇི་བཞིན་ཁྱོད་ཀྱིས་ཐུབ་པ་ལེགས་པར་མཁྱེན། །ཡན་ལག་སྣ་ཚོགས་སྒྲ་བརྙན་རི་ཁྲོད་འབྱུང་བ་མཁས་པས་རྟོགས་པ་ལྟར། །དེ་བཞིན་བདེ་གཤེགས་དྲང་སྲོང་ཁྱོད་ཀྱིས་ལྷ་མིར་བཅས་པའི་འཇིག་རྟེན་
གཟིགས། །འདི་ན་སེམས་ཅན་སྲོག་དང་ཤེད་བུ་གསོ་བ་གང་ཟག་མ་མཆིས་ཏེ། །མི་མཆོག་ཁྱོད་ཀྱིས་འདུ་ཤེས་རྣམ་པར་བཤིག་ཅིང་སྟོང་པར་རྣམ་གཞག་ལ། །རྐང་གཉིས་དམ་པ་སེམས་ཅན་གཙོ་བོ་བྱམས་པ་གཞལ་ཡས་སྒོམ་པའང་མཛད། །རྒྱལ་བ་སངས་རྒྱས་དགོངས་
པ་འདི་ནི་འགྲོ་བ་ཀུན་གྱིས་རྟོགས་པར་དཀའ། །བྱམས་པ་དགེ་སྒོམ་སེམས་ཅན་དམིགས་པ་ཡིན་ཞེས་འདྲེན་པས་བཀའ་སྩལ་ལ། །སེམས་ཅན་རྣམ་པར་བཤིག་ཅིང་འགྲོ་བ་ཐམས་ཅད་སེམས་ཅན་མེད་པར་མཁྱེན། །དེ་ལྟར་རྐང་གཉིས་དམ་པ་རྙོག་པ་མི་མངའ་ཐེ་ཚོམ་བྲལ་
ཐུགས་ལྡན། །དེས་ན་བདེ་གཤེགས་རྣམ་བརྟགས་བློ་མངའ་མཆོད་འོས་ཁྱོད་ལ་མཆོད་པ་འཚལ། །བདེ་བར་གཤེགས་པ་སྡུག་བསྔལ་ཕྱོགས་བཅུར་གནས་པ་ཀུན་ཏུ་མི་དམིགས་ཀྱང ། །ལྷ་ཡི་ལྷར་གྱུར་ཁྱོད་ཀྱིས་སེམས་ཅན་རྣམས་ལ་སྙིང་རྗེ་བགྱི་བ་གསུངས། །དེ་ལྟར་
རྒྱལ་མཆོག་བདག་ཅག་རྒྱལ་བའི་དགོངས་པ་ཇི་བཞིན་ཀུན་ཏུ་འཚལ། །དེས་ན་རྐང་གཉིས་གཙོ་བོ་མི་མཆོག་མཆོད་འོས་ཁྱོད་ལ་མཆོད་པ་འཚལ། །ཐུབ་པ་ཁྱོད་ཀྱིས་སེམས་ཅན་དང་ནི་བསལ་བགྱི་སྡུག་བསྔལ་མི་གཟིགས་ལ། །དགྱེས་པ་སྐྱེས་ནས་རབ་ཏུ་དགྱེས་པའི་ཐུགས་ཀྱིས་
མི་དགྱེས་རྣམ་པར་བསལ། །དེ་ལྟར་སངས་རྒྱས་ཚུལ་ནི་བསམ་གྱིས་མི་ཁྱབ་ཚུལ་འདི་ཇི་བཞིན་འཚལ། །དེས་ན་མི་མཆོག་ཁྱོད་ལ་མཆོད་ནས་བརྙེས་པའི་འབྲས་བུ་ཐོབ་པར་བགྱི། །སྐྱོན་བྲལ་ཁྱོད་ཀྱིས་འགྲོ་བ་ཀུན་ཏུ་སྡུག་བསྔལ་མྱ་ངན་འདས་མ་དམིགས། །འོན་ཀྱང་འཁོར་བར</font><hr>42-1-81b<br><font size=+2>
སེམས་ཅན་གཟིགས་ཤིང་དོན་མཛད་སྟོབས་དང་ལྡན་པ་བསྐྱེད། །སེམས་ཅན་སྡུག་བསྔལ་འགྲོ་དང་ཐུབ་དང་མྱ་ངན་འདས་དང་གནས་མ་མཆིས། །སངས་རྒྱས་ཚུལ་འདི་རྟོགས་ནས་ཐུབ་པ་མཆོད་འོས་ཁྱོད་ལ་མཆོད་པ་འཚལ། །འདྲེན་པ་ཚད་མེད་བཞི་པོ་གཟིགས་ཤིང་དེ་ཡང་
གཉིས་སུ་མེད་པར་བསྟན། །གང་ཞིག་དེར་དུལ་མ་གཟིགས་གང་ཡང་ཚད་མེད་གནས་པ་དེ་མ་གཟིགས། །ཐུབ་པས་བག་མེད་གང་ཡང་མ་གཟིགས་བག་ཡོད་མི་ཡང་མ་གཟིགས་ཏེ། །སངས་རྒྱས་ཚུལ་འདི་འཚལ་ནས་ཐུབ་པ་སྟོན་པ་ཁྱོད་ལ་མཆོད་པ་བགྱིས། །ཐུབ་
པ་སྐུ་ནི་རྣམ་པར་སྤངས་པས་སྐུ་བཙལ་མཛད་ན་མ་བརྙེས་ཀྱང ། །དེ་ལྟར་འདྲེན་པ་དྲན་པ་མ་གསུངས་མ་ལགས་བསྙེལ་བ་ཡང་མི་མངའ། །བདེ་བར་གཤེགས་པ་ལུས་ལ་སོང་བའི་བསྒོམ་པ་བསྒོམ་པར་གྱིས་ཤེས་གསུངས། །སངས་རྒྱས་ཚུལ་འདི་རིག་ནས་བདེ་བར་
གཤེགས་པ་སྐྱོབ་ལ་མཆོད་པ་བགྱིས། །འདྲེན་པས་ཚོར་བའི་རང་བཞིན་བཙལ་བ་མཛད་ན་བརྙེས་པར་མ་གྱུར་ལ། །ཚོར་བ་ཚོར་བར་བགྱིད་པའང་ཐུབ་པས་ཡོངས་སུ་བཙལ་ན་མ་བརྙེས་ཏེ། །དེ་ལྟར་གང་ཞིག་དྲན་སྒོམ་དེ་ནི་སངས་རྒྱས་ཀྱིས་ཀྱང་ཡོང་མ་གཟིགས། །སངས་
རྒྱས་ཚུལ་འདི་འཚལ་ནས་སྟོན་པ་ལ་ནི་བདག་ཅག་མཆོད་པ་བགྱིས། །ཐུབ་པས་སེམས་དང་སེམས་ལས་བྱུང་བ་དགོངས་ཏེ་བཙལ་ན་མ་བརྙེས་ལ། །གང་གི་ཉེ་བར་གཞག་པ་དེ་ཡང་དྲན་པ་མེད་པར་རབ་མཁྱེན་ཀྱང ། །ཐར་པ་འདོད་པ་རྣམས་ཀྱིས་སེམས་འདུས་དྲན་པ་
བསྒོམ་པར་གྱིས་ཤེས་གསུངས། །བདེ་བར་གཤེགས་པའི་དགོངས་པ་འདི་འཚལ་ནས་ནི་སྟོན་ལ་མཆོད་པ་བགྱིས། །འཇིག་རྟེན་ཕན་པར་བཞེད་པས་ཆོས་དང་ཆོས་ལ་གང་སྤྱོད་དེ་མ་གཟིགས། །བསྒོམ་པར་གང་གསུངས་དྲན་པ་དེ་ཡང་འདི་ན་རང་བཞིན་མ་མཆིས་ལ། །ཐར་པ་
འདོད་པ་རྣམས་ཀྱིས་ཆོས་འདུས་དྲན་པ་བསྒོམ་པར་གྱིས་ཤེས་གསུངས། །སངས་རྒྱས་ཚུལ་བཞི་པོ་འདི་རབ་ཏུ་འཚལ་ནས་སྐྱོབ་ལ་མཆོད་པ་བགྱིས། །གནས་གཅིག་མཆིས་པ་མ་ལགས་གཉིས་སམ་གསུམ་མམ་བཞི་ལྟ་ག་ལ་མཆིས། །གང་གིས་གནས་སུ་བརྗོད་པའི་དྲན་པ</font><hr>42-1-82a<br><font size=+2>
དེ་ཡང་གང་ནའང་མ་མཆིས་ཏེ། །དེ་བས་གང་གི་བདེ་བའམ་སྡུག་བསྔལ་ཡང་དག་གང་ནའང་དེ་མ་མཆིས། །སྟོན་པའི་ཚུལ་འདི་འཚལ་ནས་དེས་ན་བདག་ཅག་ཁྱོད་ལ་མཆོད་པ་འཚལ། །སྟོན་པའི་ཚུལ་མཆོག་བཞི་པོ་འདི་རྣམས་དགེ་སློང་གང་དག་
འཛིན་བགྱིད་ན། །འདི་དག་ཐར་པ་ཉིད་ཀྱི་ལམ་སྟེ་འཁོར་བ་ལས་ནི་འབྱུང་བར་འགྱུར། །དེ་ལྟར་དེ་ནི་ཚུལ་འདིར་མ་བཅིང་མ་གྲོལ་བྱང་ཆུབ་འདྲེན་པ་མིན། །བཅོམ་ལྡན་འདས་ཀྱིས་བརྟགས་པ་མ་བཤིག་དེས་ན་ཁྱོད་ལ་མཆོད་པ་འཚལ། །ཐར་མཛད་སླད་དུ་བཅོམ་ལྡན་
འདས་ཀྱིས་ལམ་ཞི་རྫུ་འཕྲུལ་རྐང་པ་གསུངས། །འདི་དག་བསྒོམས་ན་མི་རྣམས་དཔའ་བོ་དུལ་ཞིང་མྱ་ངན་འདའ་བར་འགྱུར། །ཡང་དག་དུ་ན་རྫུ་འཕྲུལ་དང་ནི་རྐང་པ་སྒོམ་པ་མི་དམིགས་ཏེ། །ཆད་པར་མི་འགྱུར་བྱ་བའང་སྟོན་ཅིང་བྱེད་པ་པོ་ཡང་ཡོང་མི་དམིགས། །ཐམས་
ཅད་མཁྱེན་གྱི་བསྟན་འདིར་ལྷ་ཚོགས་ཐེ་ཚོམ་གང་ནའང་མ་མཆིས་ཏེ། །དེ་དག་དེ་ལ་ནེམ་ནུར་མ་མཆིས་དེ་བཞིན་སོམ་ཉི་མ་མཆིས་འགྱུར། །འདི་ནི་མཆོད་པ་བཟང་པོ་མཆོག་ཅེས་མཆོད་འོས་སངས་རྒྱས་རྣམས་ཀྱིས་གསུངས། །དེས་ན་བདེ་གཤེགས་དཔེ་མེད་སྤྱོད་མངའ་
མཆོད་འོས་ཁྱོད་ལ་མཆོད་པར་འཚལ། །ཐར་པར་མཛད་སླད་འཇིག་རྟེན་མཁས་པས་ངེས་འབྱུང་དབང་པོ་ལྔ་ཡང་གསུངས། །རྟག་ཏུ་བག་ཡོད་བྱོས་ལ་མྱ་ངན་འདས་འགྲོའི་ལམ་འདི་སྒོམ་ཞེས་བསྟན། །ཐུབ་པ་དབང་པོ་དང་ནི་སྒོམ་པ་པོ་དང་ཐར་པའང་མི་དམིགས་ཏེ། །
འདི་ལ་ལྷ་འཁོར་ཐེ་ཚོམ་མ་མཆིས་དེ་སླད་ཁྱོད་ལ་མཆོད་པ་འཚལ། །སངས་རྒྱས་རྣམས་ཀྱི་མྱ་ངན་འདས་པར་འགྲོ་བའི་དྲང་ལམ་སྟོབས་ལྔ་པོ། །དེ་དག་ཉོན་མོངས་ཟད་བགྱིད་ཐར་པར་བགྱིད་ཅེས་སྟོན་པ་ཐུབ་པས་གསུངས། །དེ་དག་རང་བཞིན་མ་མཆིས་ཉོན་མོངས་མ་མཆིས་
རྒྱལ་བ་མ་མཆིས་ཏེ། །ཐུབ་པ་བདག་ཅག་གང་ལའང་ཐེ་ཚོམ་མ་མཆིས་དེ་སླད་ཁྱོད་ལ་མཆོད། །བྱང་ཆུབ་ཡན་ལག་བདུན་པོ་འདི་དག་དགེ་བ་ལམ་གྱི་དམ་པ་སྟེ། །སངས་རྒྱས་རྣམས་ཀྱི་མྱ་ངན་འདས་འགྲོའི་དྲང་ལམ་མཆོག་ཅེས་ཐུབ་པས་གསུངས། །འཆིང་བ་མཆིས་པ་མ་ལགས</font><hr>42-1-82b<br><font size=+2>
གྲོལ་བ་མ་མཆིས་བཅིངས་པའང་མ་མཆིས་ཏེ། །སེམས་ཅན་དཀོན་མཆོག་འདི་ལ་བདག་ཅག་ཐེ་ཚོམ་མ་མཆིས་ཁྱོད་ལ་མཆོད། །རྐང་གཉིས་གཙོ་བོ་ཁྱོད་ཀྱིས་བཞི་ཕྲག་གཉིས་ལམ་སེམས་ཅན་རྣམས་ལ་བསྟན། །བརྩོན་འགྲུས་ལྡན་པར་འཕགས་ལམ་སྡུག་བསྔལ་མཐའ་
མར་འབྱིན་པ་སྒོམས་ཞེས་གསུངས། །མི་མཆོག་ལམ་དང་དེ་བཞིན་ཉོན་མོངས་འདི་གཉིས་གཡོ་བ་མ་མཆིས་ཏེ། །འདི་ལ་ལྷ་ཚོགས་ཐེ་ཚོམ་མ་མཆིས་གྱུར་པས་མཆོད་འོས་ཁྱོད་ལ་མཆོད། །འདོད་ཆགས་གཉེན་པོར་ཞི་གནས་བཀའ་སྩལ་ཞེ་སྡང་གཉེན་པོར་བྱམས་པ་གསུངས། །
གཏི་མུག་གཉེན་པོར་ལྷག་མཐོང་ཐུབ་པ་མཆོག་གིས་སེམས་ཅན་རྣམས་ལ་བསྟན། །འདི་དག་ཐམས་ཅད་གཡོ་བ་མ་མཆིས་སྐད་ཅིག་དག་མིན་ཉོན་མོངས་མིན། །འདི་ལ་ལྷ་ཚོགས་ཐེ་ཚོམ་མ་མཆིས་ཐུབ་པ་མཆོད་སླད་རྟག་ཏུ་བརྩོན། །སྡུག་བསྔལ་ཞི་བྱ་ཕྱིར་ནི་ཞི་གནས་ལྷག་
མཐོང་ལམ་ཡང་སྒོམས་ཞེས་གསུངས། །བཅོམ་ལྡན་གང་གིས་འགྲོ་བ་ཉོན་མོངས་བག་ཆགས་བཅས་དྲི་དེ་དག་ཞི། །ཐུབ་པ་ཞི་གནས་ལྷག་མཐོང་དེ་བཞིན་དྲི་མ་ཐམས་ཅད་སྟོང་པ་སྟེ། །འདི་ལ་ལྷ་ཚོགས་གང་དུའང་ཐེ་ཚོམ་མ་མཆིས་སྐྱོན་བྲལ་ཁྱོད་ལ་མཆོད། །སྟོབས་བཅུ་
སེམས་ཅན་རྣམས་ལ་དགེ་བ་བཅུ་ཡི་ལས་ལམ་བསྟན་མཛད་དེ། །གསོད་དང་འཁྲིག་དང་མ་བྱིན་ཕྲ་མ་བརྫུན་དང་ཞེ་གཅོད་ཀྱལ་ཚིག་དང ། །གནོད་སེམས་དང་ནི་མི་རིགས་འདོད་དང་དེ་བཞིན་ལོག་པར་རྟོག་པ་རྣམས། །མི་དགེའི་ལས་ལམ་འདི་ཡང་བཅོམ་ལྡན་འདས་ཀྱིས་
སེམས་ཅན་རྣམས་ལ་བསྟན། །སེམས་ཅན་མི་དམིགས་གསོད་པ་ག་ལ་མཆིས་ཏེ་ལྷག་མ་དེ་དང་འདྲ། །གཉེན་པོ་དགེ་བ་མ་མཆིས་དེ་ནི་ངོ་བོ་ཉིད་ཀྱིས་སྟོང་པ་སྟེ། །བདེ་གཤེགས་ཐུབ་པ་ཟག་པ་མི་མངའ་རྣམས་ཀྱང་ངོ་བོ་ཉིད་ཀྱིས་སྟོང ། །རྣམ་འདྲེན་ཐེ་ཚོམ་སོམ་ཉི་མ་
མཆིས་དེ་སླད་ཁྱོད་ལ་མཆོད་པར་འཚལ། །སངས་རྒྱས་སྲས་པོ་དགེ་བའི་བློ་ཅན་གང་ཞིག་སྤྱོད་པ་འདི་སྟེན་པ། །མཁས་པ་ཀུན་ཏུ་དགེ་བ་ཉིད་མྱོང་སྡུག་བསྔལ་མྱོང་བར་ཡོང་མི་འགྱུར། །བཅོམ་ལྡན་བདེ་གཤེགས་ཡེ་ཤེས་དེས་ནི་ཚུལ་འདི་བདེ་བར་ཐོབ་པར་བགྱིས། །འདི</font><hr>42-1-83a<br><font size=+2>
ལ་ལྷ་ཚོགས་ཐེ་ཚོམ་མ་མཆིས་མཆོད་འོས་ཁྱོད་ལ་མཆོད་པར་འཚལ། །དེ་ལྟར་དགེ་རྒྱས་ཀྱི་ལྷ་རྣམས་ཀྱིས་བཅོམ་ལྡན་འདས་ལ་མངོན་པར་བསྟོད་ནས་ཅང་མི་ཟེར་བར་འཁོད་དོ། །དེ་ནས་བཅོམ་ལྡན་འདས་ཀྱིས་དགེ་རྒྱས་ཀྱི་ལྷ་རྣམས་ཅང་མི་ཟེར་བར་
འཁོད་པ་ཡང་མཁྱེན། དེ་དག་གི་ལྷག་པའི་བསམ་པས་སྒྲུབ་པ་ཡང་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་བ། །སྐྱེ་བོ་འདི་ཀུན་བཅོམ་ལྡན་ཁྱོད་ཀྱི་མཁྱེན་པའི་ཟིལ་གྱིས་ཟིལ་
མནན་ནས། །བདེ་གཤེགས་རྒྱལ་བ་མཆོག་ཁྱོད་ཀྱིས་ནི་འཛུམ་མཛད་པ་འདི་འཇིག་རྟེན་བསྟན། །རྒྱུ་མ་མཆིས་པར་ཆོས་ཀུན་མཁས་པ་རྣམས་ནི་འཛུམ་པ་མི་མཛད་ན། །འཛུམ་རྒྱུ་དོན་གཉེར་མིག་མེད་རྣམས་ལ་འཇིག་རྟེན་མཁས་པས་བཀའ་སྩལ་གསོལ། །མ་ལུས་
འདི་དག་ཐམས་ཅད་གཞན་དུ་མི་སེམས་ཁྱོད་འཛུམ་རེ་ཞིང་འཁོད། །དཔལ་སྟུག་ཁྱོད་ལ་བསྟོད་པ་བགྱིད་ཅིང་ཉན་པར་འཚལ་བའི་ཡིད་ཀྱིས་གནས། །སངས་རྒྱས་གསུང་གི་དབང་ཕྱུག་ཐོས་ནས་ཡིད་ནི་རབ་ཏུ་རངས་གྱུར་ཏེ། །ཆོས་རྣམས་ཀུན་ལ་ངེས་པའི་བློ་དགེ་ལྡན་པའི་
སྟོན་པར་སྐྱེ་བར་འགྱུར། །བདེ་གཤེགས་མི་མཆོག་དགེ་བའི་ཐུགས་ཅན་དེ་རིང་སུ་ཞིག་བློ་གྲོས་བསྐྱེད། །དེ་རིང་གང་གིས་འཆི་མེད་ཞི་བ་རྟོགས་ཤིང་ཕྱོགས་རྣམས་སྣང་བར་བགྱིས། །སུ་ཞིག་འཇིག་རྟེན་ཐུགས་བརྩེ་རྒྱལ་བ་འདྲེན་པ་དཔག་ཏུ་མེད་འགྱུར་བ། །དེ་དག་
བཀའ་སྩོལ་དྲང་སྲོང་འཁོར་འདི་ལེགས་པར་གསུངས་པས་ཚིམ་པར་མཛོད། །རྒྱལ་བ་ཁྱུ་མཆོག་དགེ་སྦྱོང་དམ་པ་དེང་སུ་བཙུན་ལ་དད་པ་སྐྱེས། །བདུད་ཀྱི་མི་ཕྲོགས་བློ་ལྡན་གང་ཞིག་ཆོས་ལ་ཡང་དག་ཡོངས་སུ་གནས། །སངས་རྒྱས་སྲས་པོ་ཚུལ་མཁས་གང་ཞིག་དེ་རིང་
ངེས་པ་ཐོབ་པར་འགྱུར། །རྐང་གཉིས་གཙོ་བོ་དེ་དག་བཀའ་སྩོལ་འགྲོ་འདི་ཐེ་ཚོམ་མ་མཆིས་མཛོད། །བདེ་གཤེགས་དེང་སུ་འགྲོ་ལ་དང་བསྐྱེད་སྐྱེ་དགུ་རྣམས་ལ་བྱམས་གྱུར་ཅིང ། །བྱང་ཆུབ་མཐར་ཕྱིན་བློ་གྲོས་བརྟན་ཞིང་ཐམས་ཅད་མཁྱེན་པ་ཉིད་ལ་གནས། །གང་ལ་འཛུམ</font><hr>42-1-83b<br><font size=+2>
པ་དེང་བསྟན་བདེ་གཤེགས་བསྟན་པ་འཛིན་པ་དེ་གང་ལགས། །བསོད་ནམས་བརྒྱ་ཡི་མཚན་མངའ་དེ་དག་བཀའ་སྩོལ་བདག་གི་ཐེ་ཚོམ་ཁུམ། །འདྲེན་པ་ཁྱོད་གསུང་ཡན་ལག་བརྒྱད་ལྡན་ལེགས་པར་བཀའ་སྩལ་ཐོས་གྱུར་ན། །བདེ་གཤེགས་གསུང་གིས་ཐོག་མར་
བདག་ཅག་འདོང་ཞིང་འགྲོ་བ་གཞན་ཡང་འདྲེན། །དེ་ལྟར་གྱུར་ན་བདེ་གཤེགས་བསྟན་རབ་འདི་ནི་སྲས་ལ་གནས་པར་འགྱུར། །འཇིག་རྟེན་འདི་དག་ཡིད་ནི་མྱུར་དུ་བདེ་གཤེགས་རྣམས་ལ་གནས་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་
ཚིགས་སུ་བཅད་དེ་སླར་བཀའ་སྩལ་པ། །ང་ཡིས་འཇིག་རྟེན་དོན་བྱེད་འཛུམ་མཛད་རྟ་ཐུལ་ཁྱོད་ཀྱིས་མཐོང་གྱུར་ཅིང ། །སྐྱེས་བུ་དམ་པ་ཁྱོད་ཀྱིས་དུས་སུ་དྲིས་ཏེ་འགྲོ་བའི་དོན་བྱས་པ། །ཁྱོད་ཀྱིས་བསོད་ནམས་འཕེལ་བ་བརྗོད་དུ་མེད་དེ་དེ་ནི་ཟད་མི་འགྱུར། །དེ་ནི་ཁྱོད་ལ་
བསྟན་གྱིས་ཁྱོད་དང་འགྲོ་བ་འདི་དག་དགའ་བས་ཉོན། །དགེ་རྒྱས་ལྷ་ཚོགས་འདི་དག་ང་ཡི་ཆོས་ཉིད་ལ་ནི་ཐེ་ཚོམ་མེད། །ཀུན་ཀྱང་ཡི་རངས་རབ་ཞི་ཡིད་ཀྱིས་ཚིགས་བཅད་དག་གིས་ང་ལ་བསྔགས། །སྔོན་གྱི་སངས་རྒྱས་བྱེ་བ་ཁྲག་ཁྲིག་སྟོང་བགྲངས་མཆོད་འོས་མཆོད་བྱས་ཏེ། །
ཐེ་ཚོམ་མེད་པའི་ཡིད་ཀྱིས་ཚུལ་དྲིས་ཀུན་ཏུ་སོམ་ཉི་མེད་པར་གྱུར། །དེ་ལྟར་སྔོན་གྱི་རྒྱུ་དེས་འདིར་ཡང་ཚིགས་སུ་བཅད་པས་ང་ལ་བསྟོད། །བསྐལ་པ་བཟང་པོའི་རྒྱལ་བ་བསྟོད་འོས་ཀུན་ལའང་འདི་དག་བསྟོད་པར་འགྱུར། །འདི་དག་བསྐལ་པ་ཨུད་པ་ལ་ལ་རྒྱལ་བ་དགྲ་
རྒྱལ་མཐུ་ཆེན་འགྱུར། །འདི་དག་སེམས་ཅན་ཁྲག་ཁྲིག་བསམ་ཡས་ཡོངས་སུ་མྱ་ངན་འདའ་བར་བྱེད། །སངས་རྒྱས་དྲང་སྲོང་ཆེན་པོ་དེ་དག་ཡིད་འོང་མཚན་དུ་གང་འགྱུར་བ། །དེ་ཡང་བསྟན་གྱིས་དང་བའི་ཡིད་ཀྱིས་སེམས་ཀྱི་ཐ་བ་སྤོངས་ཏེ་ཉོན། །རྒྱལ་བ་དེ་ཀུན་
ཆོས་ཀྱི་ཏོག་ཅེས་བྱ་བ་འདྲེན་པ་གཞལ་ཡས་འགྱུར། །འདི་དག་རེ་རེས་ཀྱང་ནི་ཁྲག་ཁྲིག་བསམ་ཡས་མྱ་ངན་བཟླ་བར་འགྱུར། །དེ་ཡི་ཚེ་ན་བདེ་གཤེགས་ཀུན་གྱི་རིང་བསྲེལ་ཤིན་ཏུ་རྒྱས་འགྱུར་ཏེ། །དེ་ཚེ་ཞིང་རྣམས་ཀུན་ཏུ་རྒྱལ་བའི་མཆོད་རྟེན་མེ་ཏོག་རྒྱས་པར</font><hr>42-1-84a<br><font size=+2>
འགྱུར། །ཐུབ་པ་གྲགས་ཆེན་དེ་དག་ཡོངས་སུ་མྱ་ངན་འདས་པར་གྱུར་པ་ན། །ཐུབ་པ་སྐྱོབ་པ་དེ་དག་ཀུན་གྱི་རིང་བསྲེལ་རྒྱས་པས་དོན་ཆེན་འགྱུར། །སེམས་ཅན་ཁྲག་ཁྲིག་བསམ་ཡས་རྣམས་ཀྱིས་དེ་ཚེ་རིང་བསྲེལ་མཆོད་བྱས་ཏེ། །
རིང་བསྲེལ་དེ་དག་མཆོད་ནས་མྱ་ངན་འདས་པ་ཞི་བ་འཆི་མེད་འཐོབ། །ཐུབ་པ་རྐང་གཉིས་གཙོ་བོ་དེ་དག་གྲགས་པ་རྒྱུན་འཆད་མི་འགྱུར་ཏེ། །སློབ་པ་ཁྲག་ཁྲིག་བསམ་ཡས་རྣམས་ཀྱང་དེ་ཚེ་རྒྱལ་བའི་དྲུང་དུ་འདུ། །ཇི་ལྟར་བྱེ་བ་བརྒྱ་བགྲངས་ང་ལ་
ལེགས་པར་སྤྱད་པ་བྱས་ནས་སུ། །བྱམས་པ་བལྟ་ཕྱིར་རྒྱ་ཆེན་ཡིད་ཀྱིས་བྱམས་པའི་འཁོར་དུ་འདོང་འགྱུར་བ། །དེ་ལྟར་རྒྱལ་བའི་ཉན་ཐོས་སློབ་ཚོགས་དེ་དག་རྒྱལ་ནས་རྒྱལ་འཁོར་དུ། །རྐང་གཉིས་གཙོ་བོ་དེ་དག་ཀུན་གྱི་རིང་བསྲེལ་མཆོད་པ་བྱ་ཕྱིར་འདོང ། །
བདེ་གཤེགས་གསུང་སྙན་འགྲོ་བ་ཐམས་ཅད་ངོ་མཚར་གྱུར་པ་དེ་ཐོས་ཤིང ། །དགེ་རྒྱས་རིས་ཀྱི་ལྷ་ཡི་བདག་ཉིད་ཆེན་པོ་དེ་ཚེ་ཐོས་གྱུར་ནས། །འཁོར་རྣམས་ཐམས་ཅད་རབ་ཏུ་དགའ་སྟེ་ཕལ་ཆེར་བྱང་ཆུབ་སེམས་ཀྱང་བསྐྱེད། །བདག་ཉིད་ཆེན་པོ་ཤེས་ནས་ཐུབ་པའི་
ཞབས་ལ་མགོ་བོས་རབ་ཏུ་གཏུགས། །དགེ་རྒྱས་རིས་ལུང་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་དེའི་ཚེ་འབྲས་བུ་ཆེ་བའི་རིས་ཀྱི་ལྷ་བྱེ་བ་ཕྲག་བརྒྱད་ཅུས་ལྷ་མ་ཡིན་རྣམས་ནས་དགེ་རྒྱས་ཀྱི་ལྷའི་བར་དག་གི་མཆོད་པ་ཡང་མཐོང་ལུང་
བསྟན་པ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་བ་དང ། མགུ་བ་དང ། ཡིད་བདེ་བ་སྐྱེས་ནས། ཚུལ་གཅིག་ལ་ཞུགས་པ་དང ། ཆོས་རེ་རེ་ལས་ཀྱང་ཆོས་ཀྱི་སྒོ་མཐའ་ཡས་པ་འབྱུང་བར་ཡང་དག་པར་མཐོང་ཞིང ། ཚུལ་ལ་འཇུག་པ་
ཐམས་ཅད་ལས་ཀྱང་མཐའ་ཡས་པའི་སྤོབས་པ་དང ། མི་ཆོད་པའི་སྤོབས་པ་དང ། རིགས་པའི་སྤོབས་པ་དང ། གྲོལ་བའི་སྤོབས་པ་དང ། ཐོགས་པ་མེད་པའི་སྤོབས་པ་དང ། ཉེ་བའི་སྤོབས་པ་དང ། ཕྲ་བའི་སྤོབས་པ་དང ། ཟབ་པའི་སྤོབས་པ་དང ། སྣ</font><hr>42-1-84b<br><font size=+2>
ཚོགས་ཀྱི་སྤོབས་པ་དང ། འཇམ་པའི་སྤོབས་པ་དང ། འབྲེལ་བའི་སྤོབས་པ་དག་ཀྱང་འབྱུང་བར་ཤེས་ནས་བཅོམ་ལྡན་འདས་ལ་དགའ་བ་སྐྱེས་ཏེ། ཆོས་ཉིད་བརྗོད་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྒོའི་ཚུལ་མཐའ་
ཡས་པ་ཞེས་བགྱི་བའི་ཏིང་ངེ་འཛིན་མཆིས་ཏེ། དེ་ལ་བརྩོན་པར་བགྱིས་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤོབས་པ་འཐོབ་ཅིང་མི་ཆོད་པའི་སྤོབས་པ་ཐོབ་པར་འགྱུར་བ་དང ། དམིགས་པ་དང་སྙོམས་པར་འཇུག་པ་ཐམས་ཅད་ལ་རྨོངས་པ་མ་
མཆིས་པར་འགྱུར་རོ། །དེ་ལ་དམིགས་པ་གང་ཡང་གཟུགས་ལགས་པར་མ་འཚལ་བའི་ཚུལ་གྱིས་སྒྲིབ་པར་མི་འགྱུར་རོ། །དེ་ནི་ཕུང་པོ་ལ་འཇུག་པས་ཀྱང་སྒོའི་ཚུལ་མཐའ་ཡས་པའི་གཟུངས་ཐོབ་པར་འགྱུར། ཁམས་ལ་འཇུག་པ་དང ། སྐྱེ་མཆེད་ལ་འཇུག་
པ་དང ། དབང་པོ་ལ་འཇུག་པ་དང ། བདེན་པ་ལ་འཇུག་པ་དང ། རྟེན་ཅིང་འབྲེལ་པར་འབྱུང་བ་ལ་འཇུག་པ་དང ། སེམས་ཅན་ལ་འཇུག་པ་དང ། སེམས་ཅན་མ་མཆིས་པ་ལ་འཇུག་པ་དང ། དངོས་པོ་ལ་འཇུག་པ་དང ། དངོས་པོ་མ་མཆིས་པ་ལ་འཇུག་པ་དང ། 
དམིགས་པ་ལ་འཇུག་པ་དང ། དམིགས་པ་མ་མཆིས་པ་ལ་འཇུག་པ་དང ། བདག་ལ་འཇུག་པ་དང ། སྟོང་པ་ལ་འཇུག་པ་དང ། མཚན་མ་ལ་འཇུག་པ་དང ། མཚན་མ་མ་མཆིས་པ་ལ་འཇུག་པ་དང ། སྨོན་པ་ལ་འཇུག་པ་དང ། སྨོན་པ་མ་མཆིས་པ་ལ་འཇུག་
པ་དང ། གནས་པ་ལ་འཇུག་པ་དང་།གནས་པ་མ་མཆིས་པ་ལ་འཇུག་པ་དང ། འདུས་བྱས་ལ་འཇུག་པ་དང ། འདུས་མ་བྱས་ལ་འཇུག་པས་ཀྱང་སྒོའི་ཚུལ་མཐའ་ཡས་པའི་གཟུངས་ཐོབ་པར་འགྱུར་ཏེ། ཐམས་ཅད་ལ་ཐོགས་པ་མ་མཆིས་པའི་
སྤོབས་པ་དང་ལྡན་པར་འགྱུར་རོ། །དེ་ནི་ཕུང་པོ་ལ་འཇུག་པས་ཀྱང་འདི་ལྟ་སྟེ། ཕུང་པོ་ཞེས་བྱ་བའི་ཆོས་འདི་ནི་ཡོངས་སུ་མ་གྲུབ་པའོ་ཞེས་གཟུངས་རབ་ཏུ་འཐོབ་བོ། །དེ་ཅིའི་སླད་དུ་ཞེ་ན། གཟུགས་ནི་གང་ཡང་ཡོངས་སུ་གྲུབ་པ་མ་མཆིས་ཏེ། ས</font><hr>42-1-85a<br><font size=+2>
ནི་སར་ཡོངས་སུ་མ་གྲུབ། དེ་བཞིན་དུ་ཆུ་དང ། མེ་དང ། རླུང་ནི་རླུང་དུ་ཡོངས་སུ་མ་གྲུབ་པའོ། །དེ་ཅིའི་སླད་དུ་ཞེ་ན། ས་ནི་རང་བཞིན་མ་མཆིས་པ་སྟེ། ཆོས་གང་ལ་ཡང་རང་བཞིན་མ་མཆིས་པ་དེ་ནི་ཡོངས་སུ་མ་གྲུབ་པའོ། །ཆུ་དང ། མེ་དང ། རླུང་ནི་རང་བཞིན་མ་མཆིས་
པ་སྟེ། ཆོས་གང་ལ་ཡང་རང་བཞིན་མ་མཆིས་པ་དེ་ནི་ཡོངས་སུ་མ་གྲུབ་པའོ། །དེ་ལྟར་ཡོངས་སུ་མ་གྲུབ་པའི་གཟུགས་ནི་འདས་པ་ཞེས་གདགས་པར་མི་བགྱི། མ་འོངས་པ་ཞེས་གདགས་པར་མི་བགྱི། ད་ལྟར་བྱུང་བ་ཞེས་གདགས་པར་མི་བགྱིའོ། །དེ་ཅིའི་སླད་དུ་ཞེ་ན། འདི་ལྟར་
གཟུགས་ནི་དངོས་པོ་མ་མཆིས་པ་སྟེ། དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་ཏེ་གང་མ་སྐྱེས་མ་འགགས་པ་དེ་ནི་གདགས་སུ་མ་མཆིས་སོ། །དེ་བཞིན་གཤེགས་པས་ཀྱང་འདས་པ་དང ། མ་འོངས་པ་དང ། 
ད་ལྟར་བྱུང་བའི་གཟུགས་གང་ཅི་ཡང་རུང་སྟེ། དེ་དག་ཐམས་ཅད་གཅིག་ཏུ་བསྡུས་ནས་གཟུགས་ཀྱི་ཕུང་པོའོ་ཞེས་བཀའ་སྩལ་ཏེ། གཟུགས་ཀྱི་རང་བཞིན་ནི་དམིགས་སུ་མ་མཆིས་ན་འདས་པར་ལྟ་ག་ལ་འགྱུར། མ་འོངས་པར་ཡང་ག་ལ་འགྱུར། ད་ལྟར་བྱུང་བར་ཡང་ག་ལ་འགྱུར་ཏེ། དེ་བས་ན་གཟུགས་ཀྱི་ཕུང་པོ་ནི་གདགས་སུ་མ་མཆིས་པའོ། །ཚོར་བ་དང ། འདུ་ཤེས་དང་།འདུ་བྱེད་དང ། རྣམ་པར་ཤེས་པའི་ཕུང་པོ་རྣམས་ཀྱང་དེ་བཞིན་ཏེ། དེའི་སླད་དུ་ཕུང་པོ་རྣམས་ནི་དམིགས་སུ་མ་མཆིས་སོ། །ཕུང་པོ་དམིགས་སུ་མ་མཆིས་པས་གཟུངས་དམིགས་སུ་མ་
མཆིས་ཏེ། དེ་ལྟར་ཕུང་པོ་ལ་འཇུག་པས་གཟུངས་ལ་འཇུག་པར་འགྱུར་རོ། །གཟུངས་དེ་ཡང་མིང་ཙམ་དང ། ཐ་སྙད་ཙམ་དང ། བརྡ་ཙམ་དང ། ཀུན་རྫོབ་ཙམ་དང ། བརྗོད་པ་ཙམ་དང ། གདགས་པ་ཙམ་མ་གཏོགས་པར་གཟུངས་ལ་འཇུག་པ་མི་དམིགས་ཏེ། འདི་ལ་ཕུང་པོ་ཡང་མི་
དམིགས། གཟུངས་ཀྱང་མི་དམིགས། འཇུག་པ་ཡང་མི་དམིགས། གཟུངས་ཀྱང་རང་བཞིན་གྱིས་མི་དམིགས་སོ། །དེ་ཅིའི་སླད་དུ་ཞེ་ན། གང་འདི་ཕུང་པོ་ཞེས་བགྱི་བ་དེ་ནི་མ་བགྱིས་པའི་ཆོས་ཏེ། ཆོས་གང་མ་བགྱིས་པ་དེ་ལ་སྤུངས་པ་ཡང་ག་ལ་མཆིས་ཏེ། ཕུང་པོ་ནི་སྤུངས་པའི</font><hr>42-1-85b<br><font size=+2>
སླད་དུ་ཕུང་པོ་ཞེས་བགྱིའོ། །དཔེར་ན་ཁྱིམ་དང ། ཁང་བཟངས་དང ། བསིལ་ཁང་དང ། ཁང་པ་བརྩེགས་པ་དང ། སྐར་ཁུང་ཁོལ་མ་དང ། བ་གམ་དང ། དྲ་བ་དང ། སྟེགས་བུ་དང ། ཁ་ཁྱེར་དང ། སྐར་ཁུང་དང ། རྟ་བབས་དང ། ར་བ་དང ། ཤིང་ཐགས་དང ། འོབས་དང ། ཆོས་མང་པོ་བསགས་པ་ལ། 
གྲོང་ཁྱེར་ཞེས་བགྱི་བ་བཞིན་དུ་ཕུང་པོ་ཞེས་བགྱི་བ་ཡང་དེ་བཞིན་ཏེ། གཟུགས་དེ་ཡང་ངོ་བོ་ཉིད་ཀྱིས་མི་དམིགས་ན་དེ་ལ་སྤུངས་པ་ལྟ་ག་ལ་མཆིས། སྤུངས་པ་མ་མཆིས་པས་ན་གཟུགས་ཀྱང་མ་མཆིས། གཟུགས་ཀྱི་ཕུང་པོ་ཡང་མ་མཆིས་སོ། །དེ་བཞིན་དུ་ཚོར་བ་དང ། འདུ་ཤེས་དང ། 
འདུ་བྱེད་དང ། རྣམ་པར་ཤེས་པ་ཡང་རང་བཞིན་གྱིས་དམིགས་སུ་མ་མཆིས་ན་དེ་ལ་སྤུངས་པ་ལྟ་ག་ལ་མཆིས་ཏེ། སྤུངས་པ་མ་མཆིས་པའི་སླད་དུ་རྣམ་པར་ཤེས་པ་ཡང་མ་མཆིས། རྣམ་པར་ཤེས་པའི་ཕུང་པོ་ཡང་མ་མཆིས་སོ། །དེ་ལྟར་ཕུང་པོ་ལ་འཇུག་པས་གཟུངས་ཐོབ་པར་འགྱུར། 
གཟུངས་ཐོབ་པས་སྤོབས་པ་ཐོབ་པར་འགྱུར་རོ། །དེ་ལ་སྐྱེ་མཆེད་ལ་འཇུག་པས་གཟུངས་ཐོབ་པར་འགྱུར་བ་ནི་མིག་གི་སྐྱེ་མཆེད་ཅེས་བགྱི་བ་ནི་ཅིའི་སྐྱེ་མཆེད་ཅེས་བགྱི་ན། སྡུག་བསྔལ་གྱི་སྐྱེ་མཆེད་དོ། །དེ་ལ་མིག་གང་ཞེ་ན། འབྱུང་བ་ཆེན་པོ་བཞི་དང་བ་སྟེ། སའི་ཁམས་དང ། ཆུའི་ཁམས་དང ། 
མེའི་ཁམས་དང ། རླུང་གི་ཁམས་དང་བའོ། །དེ་ལ་སའི་ཁམས་དང་བ་ནི་རང་བཞིན་མ་མཆིས་པ་སྟེ། ཆོས་གང་གི་རང་བཞིན་མི་དམིགས་པ་དེ་ནི་ཡོངས་སུ་མ་གྲུབ་པའོ། །དེ་བཞིན་དུ་ཆུའི་ཁམས་དང་བ་དང ། མེའི་ཁམས་དང་བ་དང ། རླུང་གི་ཁམས་དང་བ་ནི་རང་བཞིན་མ་མཆིས་པ་སྟེ། 
ཆོས་གང་གི་རང་བཞིན་མི་དམིགས་པ་དེ་ནི་ཡོངས་སུ་མ་གྲུབ་པའོ། །དེ་ལྟར་ཡོངས་སུ་མ་གྲུབ་པའི་མིག་གི་སྐྱེ་མཆེད་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་མིག་གི་སྐྱེ་
མཆེད་ནི་དངོས་པོ་མ་མཆིས་པ་སྟེ། དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་ཏེ། གང་མ་སྐྱེས་མ་འགགས་པ་དེ་ནི་གདགས་སུ་མ་མཆིས་པའོ། །དེ་ལྟར་མིག་ཀྱང་མ་སྐྱེས་མ་འགགས། སྐྱེ་མཆེད་དང་སྡུག་བསྔལ་ཡང་མ་སྐྱེས</font><hr>42-1-86a<br><font size=+2>
མ་འགགས་པའོ། །གང་མ་སྐྱེས་མ་འགགས་པ་དེ་ནི་མིང་ཙམ་དང ། ཐ་སྙད་ཙམ་དང ། བརྡ་ཙམ་དང ། ཀུན་རྫོབ་ཙམ་དང ། བརྗོད་པ་ཙམ་མ་གཏོགས་པར་གདགས་སུ་མ་མཆིས་པ་སྟེ། མིང་དེ་ཡང་མིང་གིས་མ་མཆིས་པའོ། །དེ་ཅིའི་སླད་དུ་ཞེ་ན། ཆོས་གང་ལ་མིག་ཅེ་
འམ། སྐྱེ་མཆེད་ཅེ་འམ། སྡུག་བསྔལ་ཞེས་གདགས་པར་བགྱི་བའི་ཆོས་དེ་གང་ཡང་དམིགས་སུ་མ་མཆིས་ཏེ། མིང་ཡང་མིང་དུ་བརྗོད་དུ་མ་མཆིས་སོ། །རྣ་བ་དང ། སྣ་དང ། ལྕེ་དང ། ལུས་དང ། ཡིད་དང ། གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ཆོས་རྣམས་ཀྱང་དེ་བཞིན་ཏེ། དེའི་
སླད་དུ་སྐྱེ་མཆེད་ལ་འཇུག་པས་གཟུངས་འཐོབ། གཟུངས་ལ་འཇུག་པས་སྤོབས་པ་འཐོབ་བོ། །དེ་ལ་ཁམས་ལ་འཇུག་པས་གཟུངས་འཐོབ་པ་ནི་མིག་ནི་མིག་གིས་མ་མཆིས་པ། ཁམས་ནི་ཁམས་ཀྱིས་མ་མཆིས་པ་སྟེ། དེ་ཅིའི་སླད་དུ་ཞེ་ན། མིག་ནི་མིག་གི་རང་བཞིན་དང་བྲལ་བ། ཁམས་ནི་ཁམས་
ཀྱི་རང་བཞིན་དང་བྲལ་བའི་སླད་དུ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ལ་ནི་སྐྱེ་བ་མ་མཆིས་སོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་སོ། །གང་མ་སྐྱེས་
མ་འགགས་པ་དེ་ནི་མིང་ཙམ་དང ། ཐ་སྙད་ཙམ་དང ། བརྡ་ཙམ་དང ། ཀུན་རྫོབ་ཙམ་དང ། བརྗོད་པ་ཙམ་མ་གཏོགས་པར་འདས་པ་ཞེས་གདགས་པར་བགྱི་བ་མ་ལགས་སོ། །མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །མིང་དེ་ཡང་མིང་གིས་མ་མཆིས། བརྗོད་པའི་བར་
དེ་ཡང་བརྗོད་པས་མ་མཆིས་པ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པ་སྟེ། ཡོངས་སུ་མ་གྲུབ་པའི་སླད་དུ་སྐྱེ་བ་མ་མཆིས་པའོ། །གང་ལ་སྐྱེ་བ་མ་མཆིས་པ་དེ་ལ་འགག་པ་མ་མཆིས་སོ། །གང་མ་སྐྱེས་མ་
འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་གདགས་པར་བགྱི་བ་མ་ལགས་པ་དེ་ནི་མིང་མ་མཆིས་པ། མཚན་ཉིད་མ་མཆིས་པ། མཚན་མ་མ་མཆིས་པ། ཐ་སྙད་མ་མཆིས་པ།


</font><hr>42-1-86b<br><font size=+2>
བརྡ་མ་མཆིས་པ། དངོས་པོ་མ་མཆིས་པ། འདྲིས་པ་མ་མཆིས་པ། བརྗོད་དུ་མ་མཆིས་པ། འོང་བ་མ་མཆིས་པ། འགྲོ་བ་མ་མཆིས་པ། མ་བསྟན་པ། རབ་ཏུ་མ་བསྟན་པ། མངོན་པར་ཤེས་པར་བགྱི་བ་མ་ལགས་པ། ཡོངས་སུ་ཤེས་པར་བགྱི་བ་མ་ལགས་པ། དཀར་པོ་མ་ལགས་པ། ནག་པོ་མ་ལགས་པ། 
གནས་མ་ལགས་པ། རྟེན་མ་ལགས་པ། ཐོབ་པ་མ་ལགས་པ། ཐོབ་པར་བགྱི་བ་མ་ལགས་པ། རྟོགས་པ་མ་ལགས་པ། རྟོགས་པར་བགྱི་བ་མ་ལགས་པ། མངོན་དུ་བགྱིས་པ་མ་ལགས་པ། མངོན་དུ་བགྱི་བ་མ་ལགས་པ། སོ་སོའི་སྐྱེ་བོའི་ས་མ་ལགས་པ། ཉན་ཐོས་ཀྱི་ས་མ་ལགས་པ། རང་
སངས་རྒྱས་ཀྱི་ས་མ་ལགས་པ། བྱང་ཆུབ་སེམས་དཔའི་ས་མ་ལགས་པ། སངས་རྒྱས་ཀྱི་ས་མ་ལགས་པ་སྟེ། ས་ཡང་མ་ལགས། ས་མ་ལགས་པ་ཡང་མ་ལགས་སོ། །དེ་ནི་དེ་བཞིན་ཉིད་དང ། མ་ནོར་བ་དེ་བཞིན་ཉིད་དང ། གཞན་མ་ལགས་པ་དེ་བཞིན་ཉིད་དང ། ཞི་བ་དང ། མཚན་ཉིད་མ་མཆིས་
པ་སྟེ། ཐ་སྙད་ཙམ་དུ་བཏགས་པའོ། །དེས་ཐ་སྙད་དུ་དེ་བཞིན་གཤེགས་པ་ཞེས་བགྱི་སྟེ་དོན་དམ་པར་ནི་མ་ལགས་སོ། །དེ་ཅིའི་སླད་དུ་ཞེ་ན། གང་ལ་དེ་བཞིན་གཤེགས་པ་ཞེས་བགྱི་བའི་ཆོས་དེ་མི་དམིགས་སོ། །དེ་བཞིན་དུ་གཟུགས་ཀྱི་ཁམས་དང ། མིག་གི་རྣམ་པར་ཤེས་པའི་ཁམས་དང ། ཡིད་ཀྱི་
ཁམས་དང ། ཆོས་ཀྱི་ཁམས་དང ། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་རྒྱ་ཆེར་ཁམས་ཐམས་ཅད་ཀྱིས་ཆོས་ཀྱི་དབྱིངས་ལ་འཇུག་པར་བགྱིའོ། །བཅོམ་ལྡན་འདས་ཆོས་ཀྱི་དབྱིངས་ནི་ཕུང་པོར་བཏགས་ཀྱང་ཆོས་ཀྱི་དབྱིངས་ཉིད་མི་འདོར། ཁམས་དང ། སྐྱེ་མཆེད་དང ། དབང་པོ་དང ། 
བདེན་པ་དང ། རྟེན་ཅིང་འབྲེལ་པར་འབྱུང་བར་བཏགས་ཀྱང་ཆོས་ཀྱི་དབྱིངས་ཉིད་མི་འདོར་ཏེ། ཆོས་ཀྱི་དབྱིངས་ཏེ་མིང་གང་དང་གང་གིས་བཏགས་ཀྱང་དེ་དང་དེས་ཆོས་ཀྱི་དབྱིངས་ཉིད་མི་འདོར་རོ། །བཅོམ་ལྡན་འདས་འདི་ལྟ་སྟེ། དཔེར་ན་སའི་ཁམས་ནི་མིང་གང་དང་གང་གིས་ཐ་སྙད་དུ་བགྱིས་
ཀྱང་དེ་དང་དེས་སའི་ཁམས་ཉིད་མི་འདོར་རོ། །བཅོམ་ལྡན་འདས་དེ་བཞིན་དུ་ཆོས་ཀྱི་དབྱིངས་ཀྱང་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆོས་ཀྱི་དབྱིངས་ཉིད་མི་འདོར་རོ། །བཅོམ་ལྡན་འདས་འདི་ལྟ་སྟེ། དཔེར་ན་ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས</font><hr>42-1-87a<br><font size=+2>
ནི་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆུ་དང ། མེ་དང ། རླུང་དང ། ནམ་མཁའི་ཁམས་ཉིད་མི་འདོར་རོ། །བཅོམ་ལྡན་འདས་དེ་བཞིན་དུ་ཆོས་ཀྱི་དབྱིངས་ཀྱང་མིང་གང་དང་གང་གིས་ཐ་སྙད་དུ་བགྱི་བ་དེ་དང་དེས་ཆོས་ཀྱི་དབྱིངས་ཉིད་མི་འདོར་ཏེ། དེ་ལྟར་
ན་ཁམས་ལ་འཇུག་པས་གཟུངས་འཐོབ། གཟུངས་ལ་འཇུག་པས་སྤོབས་པ་འཐོབ་བོ། །བཅོམ་ལྡན་འདས་དེ་ལ་དབང་པོ་ལ་འཇུག་པས་ཆོས་ཀྱི་དབྱིངས་ལ་འཇུག་པ་ནི་དབང་པོ་ཉི་ཤུ་གཉིས་ཏེ། འདི་ལྟ་སྟེ། མིག་གི་དབང་པོ་དང ། རྣ་བའི་དབང་པོ་དང ། སྣའི་དབང་པོ་དང ། 
ལྕེའི་དབང་པོ་དང ། ལུས་ཀྱི་དབང་པོ་དང ། ཡིད་ཀྱི་དབང་པོ་དང ། མོའི་དབང་པོ་དང ། ཕོའི་དབང་པོ་དང ། སྲོག་གི་དབང་པོ་དང ། བདེ་བའི་དབང་པོ་དང ། སྡུག་བསྔལ་གྱི་དབང་པོ་དང ། ཡིད་བདེ་བའི་དབང་པོ་དང ། ཡིད་མི་བདེ་བའི་དབང་པོ་དང ། བཏང་སྙོམས་ཀྱི་དབང་པོ་
དང ། དད་པའི་དབང་པོ་དང ། བརྩོན་འགྲུས་ཀྱི་དབང་པོ་དང ། དྲན་པའི་དབང་པོ་དང ། ཏིང་ངེ་འཛིན་གྱི་དབང་པོ་དང ། ཤེས་རབ་ཀྱི་དབང་པོ་དང ། མི་ཤེས་པ་ཀུན་ཤེས་པར་བྱེད་པའི་དབང་པོ་དང ། ཀུན་ཤེས་པའི་དབང་པོ་དང ། ཀུན་ཤེས་པ་དང་ལྡན་པའི་དབང་པོ་སྟེ། དེ་ལ་
མིག་ནི་མིག་གིས་མ་མཆིས། དབང་པོ་ནི་དབང་པོས་མ་མཆིས་པའོ། །དེ་ཅིའི་སླད་དུ་ཞེ་ན། མིག་ནི་མིག་གི་རང་བཞིན་དང་བྲལ་བ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་
གྲུབ་པ་དེ་ནི་མི་སྐྱེ་བ། གང་མ་སྐྱེ་བ་ནི་མི་འགག་པ། གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མི་དམིགས་པ་དེ་ནི་མིག་མ་ལགས། དབང་པོ་མ་
ལགས་སོ། །གང་མིག་མ་ལགས་ཤིང་དབང་པོ་མ་ལགས་པ་དེའི་ཐ་སྙད་ཇི་ལྟར་འཚལ་བར་བགྱི། འདི་ལྟ་སྟེ། དཔེར་ན་ཆང་པ་སྟོང་པ་ནི་བརྫུན་པ། ཡང་དག་པ་མ་ལགས་པ། མ་མཆིས་པ་སྟེ།འདི་ལྟར་མིང་དུ་གདགས་པར་བས་ཀྱི། དོན་དམ་པར་ནི་སྟོང་པ་ཡང་མི་དམིགས།


</font><hr>42-1-87b<br><font size=+2>
ཆང་བ་ཡང་མི་དམིགས་སོ། །དེ་བཞིན་དུ་མིག་དང་དབང་པོ་ཡང་ཆང་པ་སྟོང་པ་ལྟར་བརྫུན་ཞིང་མ་མཆིས་ལ། ཡང་དག་པ་མ་ལགས་པ་སྟེ། གསོ་བ། གསོག་།ལོག་པ། སླུ་བའི་ཆོས་ཅན། བྱིས་པ་འདྲིད་པ། གླེན་པ་རྨོངས་པར་བགྱིད་པ་སྟེ། འདི་ལྟར་མིང་དུ་གདགས་པར་
བས་ཀྱི། དོན་དམ་པར་ནི་མིག་ཀྱང་མི་དམིགས་དབང་པོ་ཡང་མི་དམིགས་ན་དེ་ནི་བཅོམ་ལྡན་འདས་ཀྱིས་ཐམས་ཅད་མཁྱེན་པའི་ཡེ་ཤེས་བརྙེས་ནས་ཇི་ཙམ་དུ་ཕྱིན་ཅི་ལོག་ལ་གནས་པའི་སེམས་ཅན་རྣམས་གཟུང་པའི་སླད་དུ་དབང་པོ་ཞེས་བཏགས་ཀྱི། དོན་དམ་པར་ནི་མ་ལགས་སོ། །
དབང་པོ་ནི་རང་བཞིན་དང་བྲལ་ཞིང་དབང་པོའི་ངོ་བོ་ཉིད་ཀྱིས་སྟོང་པ་སྟེ། ཆོས་གང་ཆོས་གང་གིས་སྟོང་པ་དེ་ལ་དེས་ཐ་སྙད་དུ་བགྱི་བ་ནི། བརྫུན་པ། མ་མཆིས་པ། གསོ་བ་།གསོག་།ལོག་པ། སླུ་བའི་ཆོས་ཅན་བྱིས་པ་འདྲིད་པ། གླེན་པ་རྨོངས་པར་བགྱིད་པ། རང་བཞིན་དང་བྲལ་བ་
སྟེ། དེ་ནི་མི་སྐྱེ་མི་འགག་གོ་།གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་མ་མཆིས་པ་དེ་ནི་མིང་མ་མཆིས་པ། མཚན་མ་མ་མཆིས་པ། 
བརྫུན་པ། མཚན་ཉིད་མ་མཆིས་པ། གདགས་སུ་མ་མཆིས་པ། གདགས་པ་མ་ལགས་པ། མ་ཤེས་པ། ཤེས་པར་བགྱི་བ་མ་ལགས་པ། རྣམ་པར་ཤེས་པ། རྣམ་པར་ཤེས་པར་བགྱི་བ་མ་ལགས་པ། མ་ཐོས་པ། ཐོས་པར་བགྱི་བ་མ་ལགས་པ། རྣམ་པར་མ་རིག་པ། 
རྣམ་པར་རིག་པར་བགྱི་བ་མ་ལགས་པ། མ་རྟོགས་པ། རྟོགས་པར་བགྱི་བ་མ་ལགས་པ། མ་ཐོབ་པ། ཐོབ་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་རྙེད་པ། རྙེད་པར་བགྱི་བ་མ་ལགས་པའོ། །དེ་ཅིའི་སླད་དུ་ཞེ་ན། མ་མཆིས་ཤིང་
མཆིས་པ་མ་ལགས་པའི་སླད་དུའོ། །འདི་ལྟ་སྟེ། དཔེར་ན་མི་ཞིག་རྨི་ལམ་ན་རྒོད་པ་དང ། དགའ་བ་དང ། རྩེས་པ་དང ། དགའ་མགུར་སྤྱད་པ་དག་ཉལ་ཉལ་བ་ལས་སད་དེ་རྗེས་སུ་དྲན་ལ་དེ་དྲན་ཡང་རྙེད་པར་མི་འགྱུར། འཐོབ་པར་མི་འགྱུར་རོ། །དེ་ཅིའི་སླད་དུ་ཞེ་ན། རྨི་ལམ</font><hr>42-1-88a<br><font size=+2>
ན་ཡང་མི་དེས་རྒོད་པ་དང ། དགའ་བ་དང ། རྩེས་པ་དང ། དགའ་མགུར་སྤྱད་པ་དེ་དག་མ་ཐོབ་མ་རྙེད་ན། ཉལ་བ་ལས་སད་པའི་ཚེ་ལྟ་སྨོས་ཀྱང་ཅི་འཚལ་ཏེ། ཐོབ་པ་དང ། རྙེད་པར་བགྱི་བ་དེའི་གནས་མ་མཆིས་སོ། །བཅོམ་ལྡན་འདས་དེ་བཞིན་དུ་དབང་པོ་རྣམས་ནི་རྨི་
ལམ་ལྟ་བུ་སྟེ། ཇི་ལྟར་རྨི་ལམ་ན་རྒོད་པ་དང ། དགའ་བ་དང ། རྩེས་པ་དང ། དགའ་མགུར་སྤྱད་པ་དེ་དག་དམིགས་སུ་མ་མཆིས་པ་དེ་བཞིན་དུ་ཆོས་ཐམས་ཅད་ཀྱང་ངོ་བོ་ཉིད་ཀྱིས་དམིགས་སུ་མ་མཆིས་པ་སྟེ། དེ་དག་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་
ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་དུ་དམིགས་སུ་མ་མཆིས་པ་དེ་དག་ནི་བརྗོད་དུ་མ་མཆིས་པ་ཞེས་བགྱི་སྟེ། དབང་པོ་ཐམས་ཅད་ཀྱང་དེ་བཞིན་དུ་རིག་པར་བགྱིའོ། །དེ་ལྟར་ན་ཆོས་ཀྱི་དབྱིངས་ལ་འཇུག་པས་ཆོས་ཐམས་ཅད་ལ་འཇུག་པར་བགྱི། ཆོས་ཐམས་
ཅད་ལ་འཇུག་པས་ཀྱང་ཆོས་ཀྱི་དབྱིངས་ལ་འཇུག་པར་བགྱིའོ། །དེ་ལ་ཇི་ལྟར་ན་བདེན་པ་ལ་འཇུག་པས་ཆོས་ཀྱི་དབྱིངས་ལ་འཇུག་པར་བགྱི་ཞེ་ན། བཞི་པོ་འདི་དག་ནི་བདེན་པ་སྟེ།སྡུག་བསྔལ་དང་།ཀུན་འབྱུང་དང ། འགོག་པ་དང ། ལམ་མོ། །བཅོམ་ལྡན་འདས་ཀྱིས་ཀྱང་ཆོས་ཐམས་
ཅད་ནི་སྟོང་པ་སྟེ། སེམས་ཅན་མེད་པ། སྲོག་མེད་པ། གང་ཟག་མེད་པ། མཚན་མ་མེད་པ། མཚན་ཉིད་མེད་པའོ་ཞེས་བཀའ་སྩལ་ཏེ། དེ་ལ་བདག་ཅག་ཐེ་ཚོམ་མ་མཆིས། སོམ་ཉི་མ་མཆིས་སོ། །བཅོམ་ལྡན་འདས་དེ་ལ་སེམས་ཅན་མ་མཆིས་པའི་སླད་དུ་སྡུག་བསྔལ་མ་མཆིས་པར་རིག་
པར་བགྱིའོ། །དེ་ཅིའི་སླད་དུ་ཞེ་ན། གང་ལ་སེམས་ཅན་མ་མཆིས་པ་དེ་ལ་སྡུག་བསྔལ་ཡང་མ་མཆིས་སོ། །བཅོམ་ལྡན་འདས་སྡུག་བསྔལ་མ་མཆིས་པའི་སླད་དུ་ཀུན་འབྱུང་བ་ཡང་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། གང་ལ་འབྲས་བུ་མ་མཆིས་པ་དེ་ནི་རྒྱུ་མ་ལགས་པའི་
སླད་དུའོ། །བཅོམ་ལྡན་འདས་ཀུན་འབྱུང་བ་མ་མཆིས་པའི་སླད་དུ། འགོག་པ་མ་མཆིས་པར་རིག་པར་བགྱིའོ། །དེ་ཅིའི་སླད་དུ་ཞེ་ན། ཀུན་འབྱུང་བ་མ་མཆིས་པ་ལ་སྤང་པ་མ་མཆིས་པའི་སླད་དུའོ། །བཅོམ་ལྡན་འདས་འགོག་པ་མ་མཆིས་པའི་སླད་དུ་ལམ་མ་མཆིས་པར་རིག་པར་བགྱིའོ། །


</font><hr>42-1-88b<br><font size=+2>
དེ་ཅིའི་སླད་དུ་ཞེ་ན། གང་སྤོང་བར་མི་བགྱིད་པ་དེ་ནི་ལམ་མ་ལགས་ཏེ། ལམ་གྱི་འབྲས་བུ་ནི་འགོག་པ་མ་ལགས་ལ། གང་སྤང་བའི་འགོག་པའི་ཉོན་མོངས་པ་དེ་ནི་མི་དམིགས་ཏེ། འགོག་པ་དམིགས་སུ་མ་མཆིས་ན་ལམ་དུ་འཐད་པ་མ་ལགས་ཏེ། འབྲས་བུ་མ་མཆིས་པའི་ལམ་ཡང་མ་མཆིས་པས་དེ་ལྟར་ན་
འཕགས་པའི་བདེན་པ་བཞི་པོ་དེ་དག་ནི་བརྟགས་པ་རྣམ་པར་བསྒྲུབས་པ་སྟེ། གང་བརྟགས་ཤིང་རྣམ་པར་བསྒྲུབས་པ་དེ་ནི་མ་མཆིས་པའོ། །གང་མ་མཆིས་པ་དེ་ལ་ནི་འདས་པ་ཞེས་ཐ་སྙད་དུ་བགྱི་བ་མ་མཆིས་སོ། །མ་འོངས་པ་དང ། ད་ལྟར་བྱུང་བ་ཞེས་ཐ་སྙད་དུ་བགྱི་བ་མ་མཆིས་སོ། །གང་
དུས་གསུམ་དུ་མི་དམིགས་པ་དེ་ནི་མ་སྐྱེས་པ་མ་འགགས་པ། མཚན་ཉིད་མ་མཆིས་པ་མཚན་མ་མ་མཆིས་པ། མ་བཏགས་པ་གདགས་པར་མི་བགྱི་བ། མ་བསྟན་པ། རབ་ཏུ་མ་བསྟན་པ། བསྟན་པར་བགྱི་བ་མ་ལགས་པ།རབ་ཏུ་བསྟན་པར་བགྱི་བ་མ་ལགས་པ། མ་བརྗོད་པ། བརྗོད་པར་བགྱི་བ་མ་ལགས་
པ། མངོན་པར་མ་བརྗོད་པ། མངོན་པར་བརྗོད་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་ཤེས་པ། ཤེས་པར་བགྱི་བ་མ་ལགས་པ། ཁོང་དུ་མ་ཆུད་པ། ཁོང་དུ་ཆུད་པར་བགྱི་བ་མ་ལགས་པ། མ་རྟོགས་པ། རྟོགས་པར་བགྱི་བ་མ་ལགས་པ། མ་རྙེད་པ། རྙེད་པར་བགྱི་
བ་མ་ལགས་པ། མ་ཐོབ་པ། ཐོབ་པར་བགྱི་བ་མ་ལགས་པ། མ་ཐོས་པ། ཐོས་པར་བགྱི་བ་མ་ལགས་པ། མ་མཐོང་བ། མཐོང་བར་བགྱི་བ་མ་ལགས་པ། མ་བསྒྲུབས་པ། བསྒྲུབ་པར་བགྱི་བ་མ་ལགས་པ། མངོན་དུ་མ་བགྱིས་པ། མངོན་དུ་བགྱི་བ་མ་ལགས་པ། དཀར་པོ་མ་ལགས་པ། ནག་པོ་མ་
ལགས་པ། སྣང་བ་མ་ལགས་པ། མུན་པ་མ་ལགས་པ། འགྲོ་བ་མ་ལགས་པ། འོང་བ་མ་ལགས་པ། གསལ་བ་མ་ལགས་པ། ཟབ་པ་མ་ལགས་པ། འཁྲུགས་པ་མ་ལགས་པ། དང་བ་མ་ལགས་པ། འཇིག་པ་མ་ལགས་པ། བདེ་བ་མ་ལགས་པ། འཆིང་བ་མ་ལགས་པ། གྲོལ་བ་མ་ལགས་པ། 
རྗེས་སུ་ཆགས་པ་མ་ལགས་པ། ཁོང་ཁྲོ་བ་མ་ལགས་པ། ཀུན་ནས་ཉོན་མོངས་པ་མ་ལགས་པ། རྣམ་པར་བྱང་བ་མ་ལགས་པ། ཡེ་ཤེས་མ་ལགས་པ། རྣམ་པར་ཤེས་པ་མ་ལགས་པ། ལམ་མ་ལགས་པ། ལམ་གོལ་བ་མ་ལགས་པ། འཇིག་པ་མ་ལགས་པ། རྣམ་པར་འཇིག་པ་མ་ལགས་པ།


</font><hr>42-1-89a<br><font size=+2>
གཟུང་བ་མ་ལགས་པ། མི་གཟུང་བ་མ་ལགས་པ། དོར་བ་མ་ལགས་པ། རབ་ཏུ་དོར་བ་མ་ལགས་པ། དམིགས་པ་མ་ལགས་པ། དམིགས་སུ་མ་མཆིས་པ་མ་ལགས་པ། སེམས་ཅན་མ་ལགས་པ། སེམས་ཅན་མ་མཆིས་པ་མ་ལགས་པ། སྲོག་མ་ལགས་པ། སྲོག་མ་མཆིས་པ་མ་ལགས་
པ། གང་ཟག་མ་ལགས་པ། གང་ཟག་མ་མཆིས་པ་མ་ལགས་པ། བདག་མ་ལགས་པ། བདག་མ་མཆིས་པ་མ་ལགས་པ། དངོས་པོ་མ་ལགས་པ། དངོས་པོ་མ་མཆིས་པ་མ་ལགས་པ། སྟོང་པ་མ་ལགས་པ། མི་སྟོང་པ་མ་ལགས་པ། མཚན་མ་མ་ལགས་པ། མཚན་མ་མ་མཆིས་པ་མ་ལགས་པ། སྨོན་པ་
མ་ལགས་པ། སྨོན་པ་མ་མཆིས་པ་མ་ལགས་པ། གནས་པ་མ་ལགས་པ། གནས་མ་མཆིས་པ་མ་ལགས་པ། འདུས་བྱས་མ་ལགས་པ། འདུས་མ་བྱས་མ་ལགས་པ། ཆད་པ་མ་ལགས་པ། རྟག་པ་མ་ལགས་པ། ལོག་པ་མ་ལགས་པ། ཡང་དག་པ་མ་ལགས་པ། བདེན་པ་མ་ལགས་པ། བརྫུན་པ་མ་
ལགས་པ། མངོན་པར་ཞེན་པ་མ་ལགས་པ། མངོན་པར་ཞེན་པ་མ་མཆིས་པ་མ་ལགས་པ། རྟེན་མ་ལགས་པ། རྟེན་མ་མཆིས་པ་མ་ལགས་པ། གཞི་མ་ལགས་པ། གཞི་མ་མཆིས་པ་མ་ལགས་པ། མངོན་པར་ཤེས་པར་བགྱི་བ་མ་ལགས་པ། ཡོངས་སུ་ཤེས་པར་བགྱི་བ་མ་ལགས་པ། སྤང་བ་མ་
ལགས་པ། བསྒོམ་པ་མ་ལགས་པ། མངོན་དུ་བགྱི་བ་མ་ལགས་པ། རྙེད་པ་མ་ལགས་པ། རྙེད་པར་བགྱི་བ་མ་ལགས་པ། འཁོར་བ་མ་ལགས་པ། མྱ་ངན་ལས་འདས་པ་མ་ལགས་པ། སངས་རྒྱས་མ་ལགས་པ། འཚང་རྒྱ་བར་བགྱི་བ་མ་ལགས་པ། སོ་སོའི་སྐྱེ་བོའི་སྤྱོད་ཡུལ་མ་ལགས་པ། འཕགས་པའི་
སྤྱོད་ཡུལ་མ་ལགས་པ། ཉན་ཐོས་ཀྱི་སྤྱོད་ཡུལ་མ་ལགས་པ། རང་སངས་རྒྱས་ཀྱི་སྤྱོད་ཡུལ་མ་ལགས་པ། བྱང་ཆུབ་སེམས་དཔའི་སྤྱོད་ཡུལ་མ་ལགས་པ། སངས་རྒྱས་ཀྱི་སྤྱོད་ཡུལ་མ་ལགས་པ། སྤྱོད་ཡུལ་ཡང་མ་ལགས་པ། སྤྱོད་ཡུལ་མ་ལགས་པ་ཡང་མ་ལགས་པ། བགྱིས་པ་མ་ལགས་པ། མ་བགྱིས་པ་
མ་ལགས་པ། དག་པ་མ་ལགས་པ། དག་པར་བགྱི་བ་མ་ལགས་པ་སྟེ། དེ་ལྟར་བདེན་པ་ལ་འཇུག་པས་ཆོས་ཀྱི་དབྱིངས་ལ་འཇུག་པར་འགྱུར། ཆོས་ཀྱི་དབྱིངས་ལ་འཇུག་པས་གཟུངས་ཐོབ་པར་འགྱུར། གཟུངས་ཐོབ་པས་སྤོབས་པ་འཐོབ་པར་འགྱུར་རོ། །དེ་ལ་ཇི་ལྟར་ན་རྟེན་ཅིང་འབྲེལ་བར་འབྱུང་བ་ལ་འཇུག</font><hr>42-1-89b<br><font size=+2>
པས་ཆོས་ཀྱི་དབྱིངས་ལ་འཇུག་ཅེ་ན། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་རྐྱེན་གྱིས་རྣམ་པར་ཤེས་པ་ནས་དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ་ཞེས་བགྱི་བའི་བར་དུ་སྟེ། འདི་ནི་རྟེན་ཅིང་འབྲེལ་བར་འབྱུང་བའོ། །བཅོམ་ལྡན་འདས་དེ་ལ་མ་རིག་པ་ནི་མ་རིག་
པས་མ་མཆིས་སོ། །དེ་ཅིའི་སླད་དུ་ཞེ་ན། འདི་ལྟར་མ་རིག་པ་ནི་རང་བཞིན་དང་བྲལ་བ་སྟེ། ཆོས་གང་ལ་རང་བཞིན་མ་མཆིས་པ་དེ་ནི་དངོས་པོ་མ་མཆིས་པའོ། །གང་ལ་དངོས་པོ་མ་མཆིས་པ་དེ་ནི་ཡོངས་སུ་མ་གྲུབ་པའོ། །གང་ཡོངས་སུ་མ་གྲུབ་པ་དེ་ནི་མི་སྐྱེ་བའོ། །གང་མི་སྐྱེ་བ་དེ་ནི་མི་འགག་པའོ། །
གང་མ་སྐྱེས་མ་འགགས་པ་དེ་ནི་འདས་པ་ཞེས་གདགས་པར་བགྱི་བ་མ་ལགས། མ་འོངས་པ་དང ། ད་ལྟར་བྱུང་བ་ཞེས་གདགས་པར་བགྱི་བ་མ་ལགས་སོ། །གང་དུས་གསུམ་མི་དམིགས་པ་དེ་ནི་མིང་མ་མཆིས་པ། མཚན་ཉིད་མ་མཆིས་པ། མཚན་མ་མ་མཆིས་པ། གདགས་སུ་མ་མཆིས་
པ་སྟེ། གཞན་དུ་ན་མིང་ཙམ་དང ། བརྡ་ཙམ་དང ། ཐ་སྙད་ཙམ་དང ། བརྗོད་པ་ཙམ་དང ། གདགས་པ་ཙམ་དུ་སེམས་ཅན་རྣམས་གཟུང་བའི་དོན་དུ་བགྱི་བ་མ་གཏོགས་པར་མ་རིག་པ་དེ་ནི་དོན་དམ་པར་དམིགས་སུ་མ་མཆིས་སོ། །ཆོས་གང་དོན་དམ་པར་དམིགས་སུ་མ་
མཆིས་པ་དེ་ནི་གདགས་སུ་མ་མཆིས་པ། ཐ་སྙད་དུ་བགྱིར་མ་མཆིས་པ། བརྗོད་དུ་མ་མཆིས་པ་སྟེ། བཅོམ་ལྡན་འདས་གང་མིང་ཙམ་ཞེས་བགྱི་བ་ནས། གདགས་པ་ཙམ་གྱི་བར་དེ་དག་ཀྱང་ཡང་དག་པ་མ་ལགས་པ། བརྫུན་པ། ལོག་པ། བརྟགས་པ། རྣམ་པར་བསྒྲུབས་པ། ཡོངས་སུ་བརྟགས་པ། རྣམ་པར་བརྟགས་
པ། རྣམ་པར་དཔྱད་པ། མ་ཞི་བ་དང ། རབ་ཏུ་སྤྲོས་པའོ། །མ་རིག་པའི་རྐྱེན་གྱིས་འདུ་བྱེད་རྣམས་ཞེས་བགྱི་བ་ཡང་ཆོས་གང་ངོ་བོ་ཉིད་ཀྱིས་མ་མཆིས་པ་དེ་འདུ་བྱེད་སྐྱེད་པར་ཡང་ཇི་ལྟར་འགྱུར་ཏེ། དེ་བས་ན་མ་རིག་པ་ནི་མ་རིག་པ་མ་མཆིས་པའོ། །དེ་ལྟར་མ་རིག་པ་མ་མཆིས་པས་འདུ་བྱེད་རྣམས་ཀྱང་
མ་སྐྱེས་པའོ། །གང་མ་སྐྱེས་པ་དེ་དག་ནི་རྒ་བར་མི་འགྱུར། ན་བར་མི་འགྱུར། འཆི་བར་མི་འགྱུར། ཤི་འཕོ་བར་མི་འགྱུར། སྐྱེ་བར་མི་འགྱུར་རོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་གང་མ་སྐྱེས་པ་དེ་ལ་རྒ་བ་ག་ལ་མཆིས་ཏེ། གང་ལ་རྒ་བ་མ་མཆིས་པ་དེ་ནི་ན་བར་མི་འགྱུར། འཆི་བར</font><hr>42-1-90a<br><font size=+2>
མི་འགྱུར། ཤི་འཕོ་བར་མི་འགྱུར། སྐྱེ་བར་མི་འགྱུར་རོ། །འདི་ནི་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་སྟེ་མིང་ཙམ་དུ་བས་ཀྱི། དོན་དམ་པར་ནི་མ་ལགས་སོ། །མ་རིག་པ་གང་ལགས་པ་དེ་ཉིད་
བྱང་ཆུབ་བོ། །དེ་བཞིན་དུ་སྲིད་པའི་ཡན་ལག་ཐམས་ཅད་ཀྱང་ཤེས་པར་བགྱི་སྟེ། དེ་ལྟར་ན་རྟེན་ཅིང་འབྲེལ་བར་འབྱུང་བ་ལ་འཇུག་པས་ཆོས་ཀྱི་དབྱིངས་ལ་འཇུག་པར་འགྱུར་རོ། །བཅོམ་ལྡན་འདས་དེ་བཞིན་གཤེགས་པ་ནི་མ་སྐྱེས་པ་སྟེ། ཆོས་ཐམས་ཅད་ཀྱང་མ་སྐྱེས་པའོ། །དེ་བས་ན་
ཆོས་ཐམས་ཅད་ནི་དེ་བཞིན་གཤེགས་པའོ། །བཅོམ་ལྡན་འདས་དེ་བཞིན་གཤེགས་པ་ནི་མ་འགགས་པ་སྟེ་ཆོས་ཐམས་ཅད་ཀྱང་མ་འགགས་པའོ། །བཅོམ་ལྡན་འདས་དེ་བཞིན་དུ་དེ་བཞིན་གཤེགས་པ་ནི་མཚན་ཉིད་མ་མཆིས་པ། མཚན་མ་མ་མཆིས་པ། དམིགས་སུ་མ་མཆིས་པ། 
ཀུན་ནས་ཉོན་མོངས་པ་མ་མཆིས་པ། རྣམ་པར་བྱང་བ་མ་མཆིས་པ། རྗེས་སུ་ཆགས་པ་མ་མཆིས་པ། ཁོང་ཁྲོ་བ་མ་མཆིས་པ་སྟེ། ཆོས་ཀྱི་དབྱིངས་དང ། དེ་བཞིན་ཉིད་དང ། ཡང་དག་པའི་མཐའ་སྟེ། ཆོས་ཐམས་ཅད་ཀྱང་ཡང་དག་པའི་མཐའོ། །དེའི་སླད་དུ་ཆོས་ཐམས་
ཅད་ནི་དེ་བཞིན་གཤེགས་པ་སྟེ། བཅོམ་ལྡན་འདས་དེ་ལྟར་ན་ཆོས་གང་དང་གང་དག་གིས་དེ་བཞིན་གཤེགས་པ་མཆིས་པའི་ཆོས་དེ་དང་དེ་དག་གིས་ཆོས་ཐམས་ཅད་མཆིས་པ་སྟེ། དེའི་སླད་དུ་ཆོས་ཐམས་ཅད་ནི་དེ་བཞིན་གཤེགས་པའོ། །བཅོམ་ལྡན་འདས་གང་ལ་
ལ་ཞིག་འདི་སྐད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་
པ་ནི་གཉིས་སུ་མ་མཆིས་པ་སྟེ། བྱང་ཆུབ་ཀྱང་གཉིས་སུ་མ་མཆིས་པ་ལགས་པས་གཉིས་སུ་མ་མཆིས་པས་ནི་གཉིས་སུ་མ་མཆིས་པ་མངོན་པར་རྫོགས་པར་འཚང་མི་རྒྱའོ། །བཅོམ་ལྡན་འདས་དེ་བཞིན་དུ་གང་ལ་ལ་ཞིག་འདི་སྐད་དུ་དེ་བཞིན་གཤེགས</font><hr>42-1-90b<br><font size=+2>
པས་བླ་ན་མེད་པའི་ཆོས་ཀྱི་འཁོར་ལོ་བསྐོར་ཏོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་ནི་ཟློག་པ་འམ་སྐོར་བར་མཛད་པ་མ་ལགས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་
པས་སེམས་ཅན་ཚད་མེད་པ་ཡོངས་སུ་མྱ་ངན་ལས་བཟླས་སོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཐམས་ཅད་ནི་སེམས་ཅན་མ་མཆིས་པ་སྟེ། དེ་ལ་ཡོངས་སུ་མྱ་ངན་ལས་འདས་པ་གང་ཡང་མ་མཆིས་སོ། །
བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་སེམས་ཅན་ཚད་མེད་པའི་དོན་མཛད་དོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་བཞིན་གཤེགས་པ་ནི་ཆོས་གང་ལ་ཡང་ཕན་པའམ། 
གནོད་པའི་རྣམ་པར་ཉེ་བར་གནས་པ་མ་ལགས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པས་ཚེའི་འདུ་བྱེད་བོར་རོ་ཞེས་མཆི་ན་དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཀྱི་དབྱིངས་ནི་
ཅིའང་འདོར་བའམ། ལེན་པ་མ་མཆིས་སོ། །བཅོམ་ལྡན་འདས་གང་ལ་ལ་ཞིག་འདི་སྐད་དུ་དེ་བཞིན་གཤེགས་པ་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདས་སོ་ཞེས་མཆི་ན། དེ་དག་ཐམས་ཅད་ནི་ལྟ་བའི་རྣམ་པ་ལ་མངོན་
པར་ཞེན་པའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་ཆོས་ཀྱི་དབྱིངས་ནི་འཁོར་བའམ། ཡོངས་སུ་མྱ་ངན་ལས་འདའ་བ་མ་ལགས་སོ། །བཅོམ་ལྡན་འདས་གང་ལ་ལ་ཞིག་འདི་ལྟ་བུའི་ཆོས་ལ་ངེས་པར་གྱུར་ན་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་
བྱང་ཆུབ་ལས་ཕྱིར་མི་ལྡོག་པ་སྟེ། བཅོམ་ལྡན་འདས་ཆོས་ཀྱི་དབྱིངས་ལ་ནི་འགྱུར་བ་མ་མཆིས་ཀྱང་གདའོ། རིགས་ཀྱི་བུའམ། རིགས་ཀྱི་བུ་མོ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་བ་མི་གདའོ།། །།


</font><hr>42-1-91a<br><font size=+2>
བམ་པོ་དགུ་པ། དེ་ནས་འབྲས་བུ་ཆེ་བའི་ལྷ་བྱེ་བ་ཕྲག་བརྒྱད་ཅུས་བཅོམ་ལྡན་འདས་ཀྱི་སྤྱན་སྔར་ཆོས་ཉིད་ལ་ངེས་པར་འགྲོ་བ་བརྗོད་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཐལ་མོ་
སྦྱར་ཏེ། ཕྱོགས་གཅིག་ཏུ་འཁོད་དོ། ཕྱོགས་གཅིག་ཏུ་འཁོད་ནས་ཀྱང་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། བདེ་གཤེགས་མཐུ་ཆེན་འདྲེན་པ་ཚུལ་དང་ཚུལ་མིན་མཁྱེན་ལ་ཕྱག་འཚལ་ལོ། །འགྲོ་བ་ཀུན་ལ་ཐུགས་བརྩེ་ཐུབ་
པ་ཡང་དག་ཇི་བཞིན་སྟོན་མཛད་པ། །འདྲེན་པ་ཚུལ་མཁས་ཁྱོད་ཀྱིས་ཚུལ་ནི་ཡང་དག་ཉིད་དུ་ཡང་དག་བསྟན། །མཐའ་ཡས་ཡོན་ཏན་མངའ་ཞིང་ཡེ་ཤེས་མངོན་པར་འཕགས་ལ་མགོས་ཕྱག་འཚལ། །ཁྱོད་ཀྱིས་བྱང་ཆུབ་ངེས་པར་འབྱུང་བའི་དྲང་ལམ་གཅིག་པུ་བགྲོད་
པ་བསྟན། །ཁྱོད་ཀྱིས་བྱང་ཆུབ་དམ་པ་གཞལ་ཡས་ཞི་བ་ཤིས་པ་མི་གཡོ་བརྙེས། །སྲོག་ཆགས་བྱེ་བ་ཁྲག་ཁྲིག་འཁོར་བའི་སྡུག་བསྔལ་ཉམ་ཐག་འགྲོལ་མཛད་པ། །མཐའ་ཡས་ཡོན་ཏན་མངའ་ཞིང་ཡེ་ཤེས་མངོན་པར་འཕགས་ལ་མགོས་ཕྱག་འཚལ། །ཕུང་པོ་རྣམས་ནི་
ངོ་བོ་ཉིད་སྟོང་ཤིན་ཏུ་ཕུང་པོ་རྣམས་དང་བྲལ། །བྱིས་པ་རྨོངས་བྱེད་རྣམས་ནི་རབ་ཏུ་བྲལ་བར་ཁྱོད་ཀྱིས་ཡོངས་སུ་བརྟགས། །ཤེས་པ་མི་ལྡན་སྐྱེ་བོ་ཕལ་ཆེན་འདིར་བཅིངས་རྙོང་ལ་སྤྲེའུ་ཐོགས་པ་བཞིན། །གྲོལ་བ་མཁས་པ་རྣམས་ནི་མཁའ་ལ་རླུང་བཞིན་ཆགས་པ་མེད་པར་
འདོད། །ཁམས་རྣམས་ཁམས་ཀྱིས་རྣམ་པ་ཀུན་ཏུ་སྟོང་པར་ཐམས་ཅད་མཁྱེན་པས་གསུངས། །དཔེར་ན་བྲག་ཅ་རྣམ་པ་ཀུན་ཏུ་ཤིན་ཏུ་སྒྲ་དང་བྲལ་བ་འདྲ། །དེས་ནི་མི་མཁས་སྐྱེ་བོ་ཡང་དག་ཇི་བཞིན་མི་ཤེས་མང་པོ་བཅིངས། །གྲོལ་བ་མཁས་པ་ཡང་དག་རྟོགས་པ་རྣམས་
ནི་ཁམས་གསུམ་ཆགས་མ་མཆིས། །སྐྱེ་མཆེད་ངོ་བོ་ཉིད་ཀྱིས་རྟག་ཏུ་སྟོང་ཞེས་ཐམས་ཅད་མཁྱེན་པས་བསྟན། །ཡང་དག་མ་ལགས་བརྫུན་ཞིང་བྱིས་པ་སླུ་བ་ཆང་པ་སྟོང་པ་འདྲ། །མི་མཁས་སྐྱེ་བོ་ལམ་ལ་གཅིག་ཏུ་མ་ངེས་མང་པོ་དེ་ལ་ཆགས། །དཔེར་ན་འགྲོན་པ་རྒྱ་མཚོ་ཆེན</font><hr>42-1-91b<br><font size=+2>
པོར་འཁྱམས་པ་བཞིན་དུ་འཁོར་བར་ལྷུང ། །འདྲེན་པ་དབང་པོ་འདི་དག་དབང་པོ་ཉིད་ཀྱིས་ཤིན་ཏུ་སྟོང་པ་སྟེ། །ཐུབ་པ་མེ་ལོང་ནང་གི་བཞིན་གྱི་དཀྱིལ་འཁོར་ལྟ་བུར་ཤིན་ཏུ་སྟོང ། །མི་མཁས་སྐྱེ་བོ་ཡང་དག་མ་འཚལ་མང་པོ་དག་ནི་དེ་ལ་ཆགས། །བྱ་དང་མཚོ་ཡི་ཉ་དང་སྲོག་
ཆགས་དག་ནི་རྒྱ་ལ་ཐོགས་པ་བཞིན། །སེམས་ཅན་སེམས་ཅན་ཉིད་སྟོང་སེམས་ཅན་བྲལ་ཞིང་ངོ་བོ་ཉིད་ཀྱིས་སྟོང ། །ཐུབ་པ་སེམས་ཅན་རི་མོ་མཁན་གྱིས་གཟུགས་བྲིས་བཞིན་དུ་མ་མཆིས་ན། །མི་མཁས་སྐྱེ་བོ་ཡང་དག་ཇི་བཞིན་མ་འཚལ་མང་པོ་དེ་ལ་ཆགས། །མཁས་
པ་ཡང་དག་རྟོགས་རྣམས་སྒོ་ངའི་སྦུབས་ནས་བྱུང་བའི་བྱ་བཞིན་གྲོལ། །རྟེན་ཅིང་ཆོས་རྣམས་དེ་དག་སྐད་ཅིག་པ་སྟེ་སྟོང་ཞིང་དམིགས་མ་མཆིས། །རྨི་ལམ་དགའ་བ་བཞིན་དུ་གཟུང་དུ་མ་མཆིས་བྱིས་པ་རྨོངས་བགྱིད་པ། །མི་ཤེས་རྟོག་པའི་སླད་དུ་དེས་ཀྱང་མི་མཁས་སྐྱེ་
བོ་མང་པོ་བཅིངས། །མཁས་པ་ཡང་དག་རབ་ཏུ་རྟོགས་རྣམས་གཟེབ་ནས་ཐར་བའི་བྱ་བཞིན་གྲོལ། །ཐུབ་པས་ཆོས་ཉིད་བསམ་ཡས་ཇི་བཞིན་ཆོས་རྣམས་ཐམས་ཅད་བསམ་མི་ཁྱབ། །ཐུབ་པ་ཞི་བ་མྱ་ངན་འདས་པ་ཇི་བཞིན་ཆོས་ཀུན་མཚན་ཉིད་བྲལ། །ཐུབ་པ་ཁམས་གསུམ་མི་
ཆགས་བཞིན་དུ་ཆོས་ཀུན་གནས་པ་མ་མཆིས་ཏེ། །དེ་སླད་ཚུལ་གཅིག་འདི་འཚལ་གྱུར་ན་འགྲོ་ཀུན་བདེ་བར་གཤེགས་པར་འགྱུར། །ཐུབ་པ་བདག་དང་གཞན་དུ་མི་མཁྱེན་ལྟ་བུར་ཆོས་ཀུན་གཡོ་བ་མེད། །ཐུབ་པའི་ཡེ་ཤེས་རྒྱལ་བའི་བསྟན་པ་ཇི་བཞིན་ཆོས་ཀུན་བསམ་མི་
ཁྱབ། །ཐུབ་པ་བྱིས་པའི་སྤྱོད་ཡུལ་མ་ལགས་ཇི་བཞིན་ཆོས་ཀུན་བརྟགས་མ་ལགས། །སངས་རྒྱས་རྣམས་ཀྱི་སྤྱོད་ཡུལ་འདི་ནི་རབ་གསལ་དེ་བཞིན་ཤེས་པར་བགྱི། །མི་མཁས་གང་དག་རྒྱལ་བས་བྱང་ཆུབ་གཞལ་ཡས་བརྙེས་ཤེས་སྨྲ་བ་དང ། །གང་དག་རྒྱལ་བས་
འཁོར་ལོ་དམ་པ་གཞལ་ཡས་མཆོག་བསྐོར་སྨྲ་བ་དང ། །གང་དག་བདེ་གཤེགས་སྐྱོབ་པས་སྲོག་ཆགས་ཁྲག་ཁྲིག་མྱ་ངན་བཟླས་སྨྲ་བ། །དེ་དག་ཐམས་ཅད་ཡང་དག་མ་འཚལ་ལྟ་བ་ཐིབས་པོར་ཡོངས་སུ་དཀྲིས། །གང་དག་བདེ་བར་གཤེགས་པས་ཚེ་ཡི་འདུ་བྱེད་བཏང་བཟུང་སྨྲ་བ</font><hr>42-1-92a<br><font size=+2>
དང ། །གང་དག་སྟོབས་བཅུ་འགྲོ་བའི་དོན་མཛད་ཡོངས་སུ་མྱ་ངན་འདས་སྨྲ་བ། །དེ་དག་ཐམས་ཅད་ལྟ་བར་སོང་ལ་ཡིད་ཆགས་བདུད་ཀྱི་ལག་ཏུ་མཆིས། །ཆོས་ཀྱིས་དེ་བཞིན་ཉིད་མ་འཚལ་ཏེ་འདྲེན་པས་མཁྱེན་བཞིན་འཚལ་བར་བགྱི། །གང་དག་ཚུལ་དང་
ཚུལ་མིན་འདི་ལ་མཁས་པ་དེ་དག་འདྲེན་པ་འཚལ། །དེ་དག་རྐང་གཉིས་གཙོ་བོ་དཔལ་སྟུག་འཇིག་རྟེན་ཐུགས་བརྩེ་རྒྱལ་བར་འགྱུར། །དེ་བཞིན་ཉིད་འདི་འགྱུར་བའི་དབང་དང་ལྡན་ཏེ་དེ་ཉིད་ཆོས་ཉིད་ལགས། །དེ་ལྟར་འདི་འཚལ་གྱུར་ནས་ཚུལ་ལ་མཁས་པ་མི་ཡི་
མཆོག་ཏུ་འགྱུར། །དེ་ལྟར་འབྲས་བུ་ཆེ་བའི་ལྷ་ཚོགས་ཆོས་རྣམས་ངེས་པར་རྟོགས་གྱུར་པ། །སྟོན་པའི་སྤྱན་སྔར་བརྗོད་དེ་ལྷག་པའི་བསམ་པ་དེ་ཡང་བསྟན་བྱས་ནས། །ཁ་ཅིག་ཡི་རངས་དོགས་མེད་ཡིད་ཀྱིས་སངས་རྒྱས་ཉིད་དུ་བདག་མཐོང་ནས། །འདྲེན་སྲས་དེ་དག་ཚུལ་
འདི་ཉིད་ཀྱིས་བདག་གིས་བདག་ལུང་བསྟན་པར་གྱུར། །དེ་ནས་བཅོམ་ལྡན་འདས་ཀྱིས་འབྲས་བུ་ཆེ་བའི་ལྷ་དེ་དག་གི་ལྷག་པའི་བསམ་པ་ཕུན་སུམ་ཚོགས་པ་དང ། ཆོས་རྣམས་ངེས་པར་རྟོགས་པར་ཐུགས་སུ་ཆུད་ནས་སེམས་ཅན་རྣམས་ཀྱི་དགེ་བའི་རྩ་བ་བསྐྱེད་པའི་ཕྱིར་
དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། དཔལ་སྟུག་འདྲེན་པ་རྣམས་ནི་རྒྱུ་ཞིག་གཟིགས་ནས་འཛུམ་པ་མཛད་ལགས་ཏེ། །རྒྱུ་མེད་མི་མཛད་བཀའ་སྩལ་བདག་གིས་བདེ་གཤེགས་མངོན་སུམ་
དེ་སྐད་ཐོས། །འདི་ལྟར་འདྲེན་པ་ཁྱོད་ཀྱིས་ཞི་བ་བདེ་བ་བསིལ་བའི་འཛུམ་མཛད་ན། །རྒྱལ་བ་ལྷ་མི་ལྷ་མིན་བླ་མ་འཛུམ་པ་མཛད་པའི་རྒྱུ་དེ་གསུངས། །དེ་རིང་འདི་ལྟར་འདྲེན་པ་ཁྱོད་ཀྱི་ཞལ་ནས་འཛུམ་མཛད་བསིལ་མཐོང་ནས། །འགྲོ་བ་འདི་ཀུན་ཐེ་ཚོམ་འཚལ་ཏེ་བདེ་
གཤེགས་ཁྱོད་ཀྱི་ཞལ་དུ་ལྟ། །མི་མཆོག་ཐུགས་རྗེ་ལྡན་པ་ཁྱོད་ཀྱིས་འཛུམ་རྒྱུ་དེ་ནི་མྱུར་དུ་གསུངས། །དེ་ཐོས་གྱུར་ནས་རྒྱལ་མཆོག་འགྲོ་བ་འདི་དག་ཐེ་ཚོམ་མ་མཆིས་འགྱུར། །འདྲེན་པ་དམ་པ་ལྷ་ཚོགས་གང་དག་རང་གིས་རང་ལ་ལུང་བསྟན་པ། །དེ་དག་སུ་ཞིག་གང</font><hr>42-1-92b<br><font size=+2>
གིས་ཅི་འཐོབ་མཐའ་བཅས་རྣམ་པར་འཕྲུལ་བ་གསུངས། །མི་མཆོག་ཚངས་པའི་གསུང་དབྱངས་སྒྲོག་སྟེ་ཐེ་ཚོམ་ཀུན་ཏུ་བསལ་དུ་གསོལ། །དེ་ཐོས་རྒྱལ་བའི་འཁོར་འདི་རབ་ཏུ་དགའ་ཞིང་མཆོག་ཏུ་མགུ་བ་འཐོབ། །བདེ་གཤེགས་རྒྱལ་མཚན་མཐོན་པོ་དེ་དག་ཐམས་ཅད་
གཞན་དུ་མི་སེམས་པར། །འདྲེན་པའི་སྲས་རྣམས་བྱང་ཆུབ་གཞལ་ཡས་ཞི་བ་དམ་པ་སེམས་ཤིང་མཆིས། །ཐུབ་པ་འདྲེན་མཆོག་ཐེ་ཚོམ་འཚལ་བ་དེ་དག་རྣམས་ཀྱི་ཐེ་ཚོམ་ཁུམ། །དེས་ནི་ཡེ་ཤེས་སྟོབས་ལྡན་ཚུལ་དང་ཚུལ་མིན་མཁས་ཀུན་རྒྱལ་བར་འགྱུར། །རྐང་གཉིས་
གཙོ་བོའི་ཡན་ལག་བརྒྱད་ལྡན་གསུང་ཐོས་གྱུར་ནས་རབ་དགའ་སྟེ། །བདེ་གཤེགས་བསྟན་པ་བཞིན་དུ་བགྱིད་ཅིང་གསུངས་པའི་རྗེས་འཇུག་མཁས་པར་འགྱུར། །དེ་དག་དོན་གྱི་དབང་ལ་བརྟེན་ནས་བདེ་གཤེགས་འདྲེན་པ་བཀའ་སྩལ་གསོལ། །དེས་ནི་ཡི་རངས་གྱུར་ཏེ་
འགྲོ་བ་ཆོས་ཀྱི་མཐའ་མར་ཕྱིན་པར་འགྱུར། །འདྲེན་པ་ཆེན་པོ་ལྷ་དེ་དག་གི་སྔོན་གྱི་སྤྱོད་པ་ཐོས་གྱུར་ཅིང ། །རྒྱལ་བའི་གསུང་ཐོས་གྱུར་ནས་བརྣག་པ་ཡོངས་རྫོགས་ཞི་ཞིང་རབ་དགའ་སྟེ། །ཚུལ་ལ་ཞུགས་ཤིང་ཚུལ་ལ་མཁས་རྣམས་མྱུར་དུ་ཐམས་ཅད་མཁྱེན་པར་
འགྱུར། །འགྲོ་བ་རབ་ཏུ་འགྲོལ་མཛད་ཇི་བཞིན་ཡང་དག་སྟོན་པར་མཛད་པར་འགྱུར། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ལྷ་ཚོགས་རྣམས་ཀྱི་ཆེད་དུ་ང་ཡིས་འཛུམ་པ་འཇིག་རྟེན་བསྟན་མཛད་པ། །རྟ་
ཐུལ་ཁྱོད་ཀྱིས་དུས་དང་ཚོད་ཤེས་ང་ལ་དྲིས་པ་ཤིན་ཏུ་ལེགས། །གང་ཕྱིར་ང་ཡིས་འཛུམ་པ་མཛད་པ་འདི་ཡི་ཚུལ་དང་རྒྱུ། །དེ་ཁྱོད་བསྟན་གྱིས་ཁྱོད་དང་འགྲོ་བ་རྩེ་གཅིག་ཡིད་ཀྱིས་ཉོན། །ཐམས་ཅད་མཁྱེན་པ་རྣམས་ནི་རྒྱུ་ཡི་འབྲས་བུ་རྣམ་པ་གསུམ་གཟིགས་ཤིང ། །
རྒྱུ་ལས་གཟིགས་ནས་རྐང་གཉིས་དམ་པ་དཔལ་སྟུག་རྣམས་ནི་འཛུམ་པ་མཛད། །ཁ་ཅིག་བློ་ཞན་བདག་ཅག་ཉན་ཐོས་འགྱུར་ཞེས་མྱ་ངན་འདས་ཞུགས་དང ། །ཁ་ཅིག་ཁ་རོག་འདུག་ལ་དགའ་ཞིང་རང་རྒྱལ་བྱང་ཆུབ་འདོད་ཞུགས་དང ། །ཁ་ཅིག་བདག་ཅག་འཇིག་རྟེན</font><hr>42-1-93a<br><font size=+2>
འདྲེན་པ་མཐུ་བོ་ཆེར་ནི་འགྱུར་བྱ་སྟེ། །སྐྱེ་བོ་སྡུག་བསྔལ་ལྷུང་བ་དགྲོལ་ཞེས་ཞུགས་པའི་བསམ་པ་མཁྱེན་གྱུར་ནས། །འཛུམ་པ་ཆུང་མཛད་གང་བྱུང་ཉན་ཐོས་དོན་དུ་མཛད་པར་ཤེས་པར་བྱ།འཛུམ་པ་འབྲིང་མཛད་གང་བྱུང་རང་རྒྱལ་དོན་དུ་མཛད་པར་
རིག་པར་བྱ། །འཛུམ་མཆོག་ངས་གང་མཛད་པ་འདི་ནི་འདྲེན་པའི་དོན་དུ་ཤེས་པར་བྱ། །རབ་འབྲིང་ཐ་མ་རྣམ་པ་འདི་གསུམ་འཛུམ་པ་མཛད་པའི་རྒྱུར་གསུངས་ཏེ། །ཁ་ཅིག་ཐར་པའི་དོན་གཉེར་ལམ་གསུམ་ཞུགས་པའི་འཇིག་རྟེན་འདི་མཁྱེན་ནས། །དེས་ན་འཇིག་
རྟེན་མཁས་པ་རྣམ་པར་འདྲེན་པ་དམ་པ་འཛུམ་པ་མཛད། །རྟ་ཐུལ་དེ་ལ་ཉན་ཐོས་དོན་དུ་འཛུམ་མཛད་ཞབས་འོག་ནུབ་པར་འགྱུར། །རང་རྒྱལ་དོན་དུ་འཛུམ་པ་གང་མཛད་སྐུ་ཡི་དབུས་སུ་ནུབ་པར་འགྱུར། །འདྲེན་པ་སྟོབས་བཅུའི་དོན་དུ་འཛུམ་པ་མཛད་པ་གཙུག་ཏུ་ནུབ་
པར་འགྱུར། །དེ་ལྟར་རྟ་ཐུལ་ཁྱོད་ཀྱིས་འཛུམ་པའི་རྒྱུ་ནི་རྣམ་གསུམ་ཤེས་པར་གྱིས། །རྒྱལ་བ་མཆོག་རྣམས་དོན་དུ་གང་འཛུམ་དེ་ཀུན་ང་ཡི་གཙུག་ཏུ་ནུབ། །སྡིག་པ་གཞོམ་པའི་ཚུལ་དུ་དེ་ལྟར་འཛུམ་པ་ངས་བསྟན་ཤེས་པར་གྱིས། །འདྲེན་པ་རྣམས་ཀྱི་འཛུམ་པ་གང་
ཡིན་དེ་རྒྱུ་རྣམ་གསུམ་ཡང་བཤད་ཀྱིས། །ཀུན་ཀྱང་རྩེ་གཅིག་ཡིད་བྱོས་དེ་ནི་ང་ལས་ལེགས་པར་མཉན་པར་གྱིས། །དང་པོའི་དོན་དུ་འདྲེན་པ་འཛུམ་པ་ངས་མཛད་མྱུར་དུ་ཐོག་མར་ནུབ། །འབྲིང་གི་དོན་ནི་དུས་ཚོད་ཅུང་ཟད་བསྡད་ཅིང་ཕྱི་ནས་ནུབ་པར་འགྱུར། །བློ་མཆོག་ལྡན་ཕྱིར་
འཛུམ་པ་རྒྱལ་བ་ངས་མཛད་ཤིན་ཏུ་རིང་དུ་གནས། །རྟ་ཐུལ་ཉན་ཐོས་དོན་དུ་གང་གནས་འཛུམ་དེ་ཐེག་པའི་དབང་གིས་མཛད། །གཞན་ཡང་འཛུམ་རྒྱུ་རྣམ་གསུམ་བཤད་ཀྱིས་རྟ་ཐུལ་ཁྱོད་ཀྱིས་མཉན་པར་གྱིས། །གང་དག་རྒྱལ་བ་དྲང་པོ་སྟོབས་བཅུ་པོ་ལ་སྐོར་བ་བྱེད་པ་ནི། །
དེ་དག་ང་ལ་སྐྱེན་པར་བསྐོར་ནས་མྱུར་དུ་ཤིན་ཏུ་མཁས་པར་འགྱུར། །འབྲིང་དོན་ཕྱིར་ནི་སྲབ་ཅིང་ཆེ་ལ་དལ་གྱིས་སྐོར་བ་བྱེད་པར་འགྱུར། །དལ་གྱིས་གཡས་ཕྱོགས་བསྐོར་བ་བྱས་ནས་རྒྱ་ཆེར་འགྱུར་ཞིང་མནན་པར་འགྱུར། །གང་དག་གསེར་རྒྱན་ལ་དཀར་སྟེང་བཞག་འདྲ</font><hr>42-1-93b<br><font size=+2>
བའི་བདེ་གཤེགས་མཐོང་གྱུར་ན། །དེ་ནི་རྐང་གཉིས་དམ་པ་ཐུབ་པའི་སྐུ་ཀུན་ཁྱབ་པར་གནས་པར་འགྱུར། །ཐམས་ཅད་མཁྱེན་པས་འཛུམ་བསྟན་འདི་ནི་ཞིང་གི་དབང་དུ་ཤེས་པར་བྱ། །གང་ཚེ་གདུགས་འདྲ་མཐའ་ཡས་མིག་ལྡན་པས་ནི་འདྲེན་དེ་འགེབས་པ་དང ། །གང་
ཚེ་མེ་ཏོག་འདྲ་ལ་འདྲེན་པའི་སྟེང་གི་མཁའ་ལ་ལྡིང་བ་དང ། །གང་ཚེ་སྒོ་མོ་འདྲ་ཞིང་བདེ་བར་གཤེགས་ལ་ལན་གསུམ་སྐོར་བྱེད་པ། །དེ་ནི་འཇིག་རྟེན་འདས་པ་ཚེ་ཡི་དབང་དུ་འཛུམ་མཛད་ཤེས་པར་བྱ། །བདེ་གཤེགས་རྒྱལ་བ་རྣམས་ཀྱིས་འཛུམ་མཛད་རྒྱུ་ནི་རྣམ་གསུམ་
དེ་ཙམ་བསྟན། །རྟ་ཐུལ་ཁྱོད་ཀྱིས་འཛུམ་མཛད་རྒྱུ་རྣམས་གསུམ་པོ་དེ་དག་ཤེས་པར་གྱིས། །དེས་ན་འཇིག་རྟེན་དོན་བསྟན་བཞེད་ནས་འཇིག་རྟེན་རྣམ་འདྲེན་འཛུམ་པ་མཛད། །དེ་ཐོས་གྱུར་ནས་ཐམས་ཅད་མཁྱེན་གྱི་བསྟན་ལ་ཐེ་ཚོམ་མེད་པར་གྱིས། །འབྲས་བུ་ཆེ་རིས་ལྷ་
ཚོགས་བྱེ་བ་བརྒྱད་ཅུ་ཐམ་པ་འདི་དག་ནི། །ཞིང་རྣམས་དག་ཏུ་ཆོས་ཚུལ་ཤིན་ཏུ་རྒྱ་ཆེན་སྨྲ་བའི་རྒྱལ་བར་འགྱུར། །མཁས་པ་དེ་དག་དཔག་མེད་ཚེ་ལྡན་བསྐལ་པ་མང་པོར་གནས་པར་འགྱུར། །དེ་ཕྱིར་བདེ་བར་གཤེགས་པས་འཛུམ་པ་རྒྱ་ཆེན་མཆོག་གི་ཆ་འདི་བསྟན། །དེ་
དག་སྔོན་གྱི་བསྐལ་པ་སུམ་ཅུ་དྲུག་གི་རྒྱལ་བ་རྣམས་ཀྱང་མཐོང ། །བསྐལ་པ་སུམ་ཅུ་དྲུག་ཏུ་ཐམས་ཅད་མཁྱེན་པ་བསྙེན་བཀུར་སྤྱད་པ་སྤྱོད། །ད་དུང་ཚུལ་མཁས་འདི་དག་བསྐལ་པ་གྲངས་མེད་སུམ་ཅུ་རྩ་དྲུག་ཏུ། །གང་ཟག་ཆེན་པོ་འདི་དག་རྒྱལ་བ་ཁྱུ་མཆོག་མཆོད་
པ་བྱེད་ཅིང་གནས། །ཐམས་ཅད་དུ་ཡང་ཕུན་སུམ་ཚུལ་རྟོགས་རྒྱལ་བའི་མཆོག་ལ་མཆོད་པ་བྱེད། །རྐང་གཉིས་གཙོ་བོ་མཆོད་དེ་བྱང་ཆུབ་ཞི་བ་ཡོངས་སུ་བཙལ་བྱས་ནས། །དེ་དག་དེའི་འོག་ཏུ་དཔལ་སྟུག་རྐང་གཉིས་དམ་པ་སྐྱེས་བུ་མཆོག་།འདྲེན་པ་མཐུ་ཆེན་ཡོན་
ཏན་ལྡན་པར་གསེར་གྱི་རྒྱལ་མཚན་བསྐལ་ལ་འབྱུང ། །རྒྱལ་བ་དེ་དག་སྣ་ཚོགས་ཞིང་ན་གནས་ཤིང་རང་རང་ཞིང་སྦྱངས་ཏེ། །སེམས་ཅན་དམ་པ་དེ་ཀུན་ཉི་མའི་འོད་ཀྱི་དཀྱིལ་འཁོར་དཔལ་ཞེས་བྱ། །དེ་ཚེ་ཡོན་ཏན་ལྡན་པ་དེ་དག་རྣམས་ཀྱི་འདུས་པ་གྲངས་མེད་དེ། །


</font><hr>42-1-94a<br><font size=+2>
དེ་ཚེ་ཐུབ་པ་རེ་རེའི་ཉན་ཐོས་འདུས་པར་འགྱུར་བ་དེ་དག་ནི། །གལ་ཏེ་བསྐལ་པ་ཁྲག་ཁྲིག་དག་ཏུ་སྟོབས་བཅུས་ཉན་ཐོས་དེ་བགྲངས་ཀྱང ། །ལེགས་མཛད་རྣམས་ཀྱི་ཉན་ཐོས་འདུས་པ་དག་ནི་མཐར་ཕྱིན་བགྲངས་མི་འགྱུར། །འདུས་པ་དེ་དག་ཐམས་ཅད་
གྲངས་མེད་འདུས་པ་དེ་ནི་ཅི་འདྲ་བ། །དེ་ལས་ཉིས་གྱུར་དེ་ཚེ་བྱང་ཆུབ་ཏུ་ནི་ཡང་དག་ཞུགས་པར་འགྱུར། །དེ་ཚེ་རྒྱལ་བར་ཞུགས་ཀྱི་རྒྱལ་བ་ཐམས་ཅད་མཁྱེན་པ་ཉིད་མ་ཡིན། །དེ་དག་ཐམས་ཅད་ཡོངས་དག་ཞིང་དུ་སྤྱད་ནས་ཀུན་ཀྱང་རྒྱལ་བར་འགྱུར། །བདེ་གཤེགས་
དེ་དག་སྤྱོད་པ་གང་ཡིན་དེ་དག་རྣམས་ཀྱི་འང་དེ་ཉིད་འགྱུར། །འཇིག་རྟེན་མཁས་པ་དེ་དག་མྱ་ངན་འདས་པར་གྱུར་ནས་དམ་པའི་ཆོས། །དེ་ཚེ་སྲས་ཀྱིས་གཟུང་ཞིང་བསྐལ་པ་བྱེ་བ་བརྒྱད་ཅུར་གནས་པར་འགྱུར། །དེ་དག་འདས་ནས་སྟོན་པའི་གསུང་རབ་དེ་ལ་བྱང་ཆུབ་
སེམས་བསྐྱེད་པ། །གང་གཱའི་ཀླུང་གི་བྱེ་མ་བས་ཀྱང་ཤིན་ཏུ་མང་བ་འབྱུང་བར་འགྱུར། །དེ་དག་འདས་ནས་སྟོན་པ་སྐྱོབ་པ་རྣམས་ཀྱི་གསུང་རབ་དེ་ལ་ནི། །ཉན་ཐོས་རྒྱ་མཚོ་ཀུན་གྱི་བྱེ་སྙེད་དཔག་ཡས་མྱ་ངན་འདའ་བར་འགྱུར། །དེ་ལྟར་འཇིག་རྟེན་དོན་རྣམས་མཛད་
པ་རང་བྱུང་དེ་དག་ཐམས་ཅད་ཀྱི། །བསྟན་པ་གང་ཡིན་དེ་ནི་ཆོས་དང་ཡོངས་སུ་ལེགས་པར་ལྡན་གྱུར་ཅིང ། །ཡང་དག་ཤར་བར་འགྱུར་ཏེ་དེ་ནི་བསྟན་པ་རྣམས་ཀྱི་ཆོས་ཉིད་ཡིན། །མི་མཆོག་དེ་ཡི་གསུང་རབ་དེ་ཐོས་འགྲོ་བ་མ་ལུས་དད་གྱུར་ནས། །རྐང་གཉིས་དམ་པ་
གཞལ་ཡས་འཇིག་རྟེན་དོན་བྱེད་བདག་ཅག་འགྱུར་ཞེས་ཏེ། །ཐམས་ཅད་དགའ་ནས་རྒྱལ་བའི་ཞབས་ལ་ཕྱག་འཚལ་སྐྱེ་བོ་རབ་ཏུ་དགའ། །བདེ་བར་གཤེགས་ལ་དགའ་བ་གཞལ་ཡས་བསྐྱེད་ནས་ཆོས་ཀྱིས་བསྙེན་བཀུར་བྱས། །དེ་ལྟ་བས་ན་དགའ་བར་བྱོས་ལ་མགོ་
ལ་འབར་བཞིན་སྤྱད་སྤྱོད་དེ། །རྟག་ཏུ་ཤེས་རབ་ཕ་རོལ་ཕྱིན་དང་དགེ་བའི་བཤེས་གཉེན་བསྟེན་བྱོས་ལ། །ཡང་དག་མཐོང་བའི་སྤྱད་པ་དགེ་བ་འདི་ལ་ཀུན་ཏུ་བསྟེན་བྱོས་ཏེ། །དགེ་སློང་ཁྱེད་ཅག་རྐང་གཉིས་གཙོ་བོ་འཇིག་རྟེན་ཐུགས་བརྩེར་འགྱུར་བར་གྱིས། །འབྲས་བུ</font><hr>42-1-94b<br><font size=+2>
ཆེ་བ་ལུང་བསྟན་པའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གནས་གཙང་མའི་རིས་ཀྱི་ལྷ་རྣམས་ཀྱིས་དེའི་ཚེ་སེམས་ཅན་དཔག་ཏུ་མེད་པ་བྱང་ཆུབ་ཏུ་ཡང་དག་པར་ཞུགས་པར་རིག་ཅིང་སངས་རྒྱས་ཀྱི་ཆོས་རྣམས་ལ་ཐེ་ཚོམ་མེད་པར་གྱུར་པར་རིག་ནས་ཚིམ་
ཞིང་མགུ་ལ་ཡི་རངས་ཏེ་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་སོ་སོ་ནས་མངོན་པར་བསྟོད་དོ། །དེ་ལ་ལྷའི་བུ་སྦྱིན་པ་ལ་མོས་པས་གསོལ་པ། ཁྱོད་ཀྱིས་སྡུག་པའི་སྲས་རྣམས་དང ། །
བཙུན་མོ་དང་ནི་སྲོག་ཕངས་བཏང ། །རྒྱལ་སྲིད་བཏང་བར་ཅི་སྨོས་ཏེ། །སྦྱིན་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་ཚུལ་ཁྲིམས་ལ་མོས་པས་གསོལ་པ། ཁྱོད་ཀྱིས་ཚུལ་ཁྲིམས་རྣམ་སྦྱངས་པ། །རྣམ་པ་ཀུན་ཏུ་བསྙེངས་མི་མངའ། །ཤིན་ཏུ་བསླབས་པས་
མཐར་ཕྱིན་པ། །ཁྲིམས་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བཟོད་པ་ལ་མོས་པས་གསོལ་པ། །ཁྱོད་ཀྱིས་བཟོད་པ་བསྟེན་མཛད་པས། །ཡན་ལག་གཏུབས་པའང་བཟོད་པར་མཛད། །ཟབ་མོར་སྒྱིད་ལུག་མ་ལགས་ཏེ། །བཟོད་མཐར་ཕྱིན་ལ་ཕྱག་ཀྱང་འཚལ། །
ལྷའི་བུ་བརྩོན་འགྲུས་ལ་མོས་པས་གསོལ་པ། བརྩོན་པ་མ་བཏང་བརྩོན་འགྲུས་ཏེ། །སྟོབས་ཆེན་བརྩོན་འགྲུས་ལྡན་གྱུར་པས། །རྫོགས་པའི་བྱང་ཆུབ་མཆོག་བརྙེས་པ། །བརྩོན་མཐར་ཕྱིན་ལ་ཕྱག་ཀྱང་འཚལ། །ལྷའི་བུ་བསམ་གཏན་ལ་མོས་པས་གསོལ་པ། །ཁྱོད་
ཀྱིས་བསམ་གཏན་བསྟེན་མཛད་པ། །དེ་ལ་འཇིག་རྟེན་གཏིང་མི་རྙེད། །དུས་གསུམ་མཉམ་པ་ཉིད་བརྙེས་པ། །བསམ་གཏན་མཐར་ཕྱིན་ཕྱག་ཀྱང་འཚལ། །ལྷའི་བུ་གཟི་བརྗིད་དང་ལྡན་པས་གསོལ་པ། །དཔའ་བོས་ཤེས་རབ་ཕ་རོལ་ཕྱིན། །ཡང་དང་ཡང་ནི་
བསྒོམས་པས་ན། །ཐམས་ཅད་མཁྱེན་པ་ཉིད་བརྙེས་པ། །ཤེས་རབ་མཐར་ཕྱིན་ཕྱག་ཀྱང་འཚལ། །ལྷའི་བུ་ཁམས་ཀྱི་བློ་གྲོས་ཀྱིས་གསོལ་པ། སྦྱིན་པ་དག་དང་ངག་སྙན་དང ། །དོན་སྤྱད་འཐུན་པའི་དོན་དག་གིས། །འཇིག་རྟེན་འདི་དག་ཁྱོད་ཀྱིས་བཏུལ། །


</font><hr>42-1-95a<br><font size=+2>
འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་དགེ་བའི་བློ་གྲོས་ཀྱིས་གསོལ་པ། བྱམས་ཆེན་ཐུགས་རྗེ་ཆེན་པོ་དག་།ཡུན་རིང་དུས་ནས་བསྒོམས་མཛད་དེ། །སེམས་ཅན་དཔག་ཡས་ཡོངས་སུ་བསྒྲལ། །གདོས་འཛིན་ཁྱོད་ལ་ཕྱག་ཀྱང་འཚལ། །ལྷའི་བུ་
དག་པའི་སེམས་ཀྱིས་གསོལ་པ། ཉོན་མོངས་མེད་པའི་མཐར་ཕྱིན་ཅིང ། །ཐུབ་ཆེན་དུལ་བའི་སེམས་མངའ་བས། །མ་དུལ་ཐམས་ཅད་དུལ་མཛད་པ། །ཁ་ལོ་སྒྱུར་ལ་ཕྱག་ཀྱང་འཚལ། །ལྷའི་བུ་བློ་གྲོས་དྲི་མ་མེད་ཀྱིས་གསོལ་པ། སེམས་དག་མཉེན་པའི་སེམས་
མངའ་བ། །སེམས་དུལ་དབང་པོ་ཞི་མངའ་བ། །སེམས་ཅན་ཀུན་གྱི་སེམས་མཁྱེན་པ། །སེམས་མཁྱེན་ཁྱོད་ལ་ཕྱག་ཀྱང་འཚལ། །ལྷའི་བུ་བློ་གྲོས་རྣམ་པར་དག་པས་གསོལ་པ། ཤེས་རབ་ལྡན་པའི་བློ་གྲོས་ཅན། །བློ་གྲོས་མཆོག་ལ་རབ་ཏུ་ཞུགས། །ཐུགས་གསལ་
ཕུན་སུམ་ཚོགས་པའི་བློ། །མི་མཁས་རྟོགས་མཛད་ཕྱག་ཀྱང་འཚལ། །ལྷའི་བུ་སེམས་བརྒྱན་གྱིས་གསོལ་པ། ཁྱོད་ཀྱི་སེམས་ནི་རྣམ་པར་སྦྱངས། །སངས་རྒྱས་ཞིང་ཡང་རྣམ་དག་མཛད། །སེམས་ཅན་བློ་ཡང་རྣམ་སྦྱངས་པ། །ཀུན་དགའ་ཁྱོད་ལ་ཕྱག་ཀྱང་འཚལ། །
ལྷའི་བུ་ཕམ་པ་མེད་པས་གསོལ་པ། དགོངས་པ་ཕམ་པ་མི་མངའ་བ། །ཁྱོད་ཀྱིས་བདུད་ཀྱི་དཔུང་ཡང་བཅོམ། །ཁྱོད་ཀྱིས་ལྷ་ཚོགས་ཐམས་ཅད་ཀྱང ། །རབ་ཏུ་དགའ་བའི་ཡིད་དུ་བསྒྱུར། །ལྷའི་བུ་མྱུར་དུ་བྱེད་པས་གསོལ་པ། ཁྱོད་ཀྱིས་ཆོས་རྣམས་མྱུར་བར་
མཁྱེན། །སེམས་ཅན་མྱུར་བར་རྣམ་པར་སྦྱངས། །ཟབ་ཅིང་བལྟ་དཀའི་ཆོས་དག་ལ། །མྱུར་དུ་མཛད་ལ་ཕྱག་ཀྱང་འཚལ། །ལྷའི་བུ་བརྩོན་འགྲུས་བརྟན་པས་གསོལ་པ། བྲལ་གྱུར་ཡོངས་སུ་བྲལ་གྱུར་པ། །ཆུ་བོ་རྒལ་ཏེ་ཟག་པ་སྤངས། །ཕ་རོལ་ཕྱིན་ཅིང་ཐང་
ལ་བཞུགས། །བརྩོན་འགྲུས་བརྟན་ལ་ཕྱག་ཀྱང་འཚལ། །ལྷའི་བུ་སྤྱོད་ལམ་དང་ལྡན་པས་གསོལ་པ། འདོད་ཆགས་སྤངས་ཤིང་ཞེ་སྡང་སྤངས། །གཏི་མུག་སྤངས་པ་ཟག་མེད་པ། །སྦྱིན་གནས་བསོད་ནམས་ཞིང་གྱུར་པ། །འཇིག་རྟེན་མཆོད་འོས་ཕྱག་ཀྱང་འཚལ། །ལྷའི</font><hr>42-1-95b<br><font size=+2>
བུ་ཤིན་ཏུ་བརྟན་པས་གསོལ་པ། ཁྱོད་ཀྱི་དམ་ཆོས་ཤིན་ཏུ་བརྟན། །འཇིག་རྟེན་གསུམ་དུ་རབ་ཏུ་མཆོད། །གཅིག་པུ་བགྲོད་པས་བདེ་བ་བརྙེས། །དེ་ཕྱིར་ཁྱོད་ལ་ཕྱག་ཀྱང་འཚལ། །ལྷའི་བུ་མི་འཁྲུགས་པས་གསོལ་པ། ལྷུན་སྟུག་གཅིག་ཏུ་གྱུར་པའི་རི། །རླུང་གིས་
བསྐྱོད་པར་མི་ནུས་ཏེ། །དེ་བཞིན་བསྟོད་དང་སྨད་པ་ཡིས། །བདེ་གཤེགས་བསྐྱོད་པར་མི་ནུས་སོ། །ལྷའི་བུ་མཉམ་པ་ཉིད་ཐོབ་པས་གསོལ་པ། དཔའ་བོ་ཆེན་པོ་ཟབ་ཅིང་མཉམ། །མཚན་རབ་སུམ་ཅུ་རྩ་གཉིས་ཅན། །ཤེས་རབ་ཟབ་མོ་བློ་ལྡན་པ། །རྒྱལ་བ་མཛེས་
ལ་ཕྱག་ཀྱང་འཚལ། །ལྷའི་བུ་ཟབ་པའི་བློ་གྲོས་ཀྱིས་གསོལ་པ། སྐུ་ཆེན་ཁྱོད་ལ་སྐུ་མི་མངའ། །དེ་བཞིན་ཉིད་ལ་རབ་ཏུ་བཞུགས། །ཡང་དག་མཐའ་ཡང་རབ་ཏུ་སྟོན། །ཁྱོད་མཚུངས་གང་ཟག་ཡོང་མ་མཆིས། །ལྷའི་བུ་བློ་གྲོས་དང་བས་གསོལ་པ། གཉིས་སུ་
མེད་པས་ཡང་དག་སྟོན། །དཔའ་བོ་དཔའ་བས་རྣམ་པར་གནོན། །གང་དག་ཟབ་ལ་ཞུམ་མ་མཆིས། །དེ་དག་ཁྱོད་ཆོས་ཕ་རོལ་ཕྱིན། །ལྷའི་བུ་རབ་ཏུ་དགའ་བས་གསོལ་པ། མཆོག་ཏུ་དགའ་ཡིད་བརྟན་པ་དག་།ཁྱོད་ཀྱི་སློབ་ལ་བསླབས་པའི་རྣམས། །སྦྲུལ་
རྣམས་པགས་པ་རྙིང་འདོར་བཞིན། །སྲིད་པ་གསུམ་པོ་འདི་དག་འདོར། །ལྷའི་བུ་ཞི་བའི་ཡིད་ཀྱིས་གསོལ་པ། ཇི་ལྟར་མར་མེ་མར་ཟད་ཅིང ། །སྙིང་པོ་ཟད་པས་ཞིར་འགྱུར་བཞིན། །ཁྱོད་ཀྱིས་བསྟན་པ་མྱུར་ཐོས་ནས། །ཤེས་རབ་ཆེན་པོ་མྱ་ངན་འདའ། །ལྷའི་
བུ་ཞི་གནས་ལ་གནས་པས་གསོལ་པ། གང་གིས་ཀུན་མཁྱེན་ཁྱོད་མཐོང་བའི། །མི་རྣམས་འདོད་ཆགས་བཅིངས་པ་ཡང ། །ཤེས་རབ་མཚོན་གྱིས་མཁས་པ་དག་།འདོད་ཆགས་ཞགས་པ་གཅོད་པར་འགྱུར། །ལྷའི་བུ་ཞི་གནས་མང་གིས་གསོལ་པ། ཞི་བའི་
སེམས་མངའ་ཞི་ལ་སྤྱོད། །ཆོ་ག་སྤྱོད་ཡུལ་རབ་ཏུ་ཞི། །ཉོན་མོངས་ཐམས་ཅད་ཞི་གྱུར་པ། །དགྲ་རྣམས་ཞི་ལ་ཕྱག་ཀྱང་འཚལ། །ལྷའི་བུ་ཞི་གནས་འཇིགས་མེད་ཀྱིས་གསོལ་པ། ཁྱོད་ཀྱི་ཞི་གནས་བསླབས་པ་ཡི། །བྱང་ཆུབ་སེམས་དཔའ་གྲགས་ཆེན་དག་།


</font><hr>42-1-96a<br><font size=+2>
ཞི་གནས་ཉིད་ཀྱིས་འབྱུང་འགྱུར་ཞིང ། །སེམས་ཞི་དེ་བཞིན་གཤེགས་པར་འགྱུར། །ལྷའི་བུ་ཞི་གནས་ཟས་ཀྱིས་གསོལ་པ། ཆོས་རྣམས་ཀུན་གྱི་ཞི་བ་ནི། །དཔའ་བོ་ཁྱོད་ཀྱིས་རབ་ཏུ་བསྟན། །ཤེས་རབ་ཆེན་པོས་དེ་འཚལ་ན། །དེ་དག་དེ་བཞིན་
གཤེགས་པར་འགྱུར། །ལྷའི་བུ་རྟག་ཏུ་རྣམ་པར་ལྟ་བས་གསོལ་པ། ཁྱོད་ཀྱིས་སེམས་ཅན་རྟག་ཏུ་གཟིགས། །མཁས་པ་ཁྱོད་ལྟར་སློབ་པ་རྣམས། །ཡེ་ཤེས་མཆོག་གིས་མཉམ་གཞག་ཅིང ། །བྱང་ཆུབ་མཆོག་ཀྱང་ཐོབ་པར་འགྱུར། །ལྷའི་བུ་སྣང་འཛིན་གྱིས་
གསོལ་པ། ཤེས་རབ་ཕ་རོལ་ཕྱིན་གྱུར་པ། །ཐུབ་ཆེན་ཁྱོད་ལས་གང་སློབ་པ། །དེ་དག་འཇིག་རྟེན་སྣང་མཛད་ཅིང ། །སྒྲིབ་པ་མེད་པར་གཟིགས་པར་འགྱུར། །ལྷའི་བུ་འོད་བྱེད་ཀྱིས་གསོལ་པ། འཇིག་རྟེན་སྒྲོན་མ་ཁྱོད་ཀྱི་གསུངས། །ཡེ་ཤེས་རྒྱ་མཚོ་དེ་ཐོས་
ནས། །དེ་དག་དྲི་མེད་བདེ་བ་འཐོབ། །བསམ་གྱིས་མི་ཁྱབ་འོད་ཀྱང་འབྱུང ། །ལྷའི་བུ་དྲི་མ་མེད་པའི་འོད་ཀྱིས་གསོལ་པ། ཆོས་རྣམས་ཐམས་ཅད་རྣམ་མི་རྟོག་།ཐབས་ལ་མཁས་པས་དེ་དག་གསུངས། །དེ་འདྲའི་ཡེ་ཤེས་སྟོན་བགྱིད་པ། །དེ་དག་གང་ཟག་མཆོག་ཏུ་
འགྱུར། །ལྷའི་བུ་རབ་ཏུ་མི་གནས་ཀྱིས་གསོལ་པ། གནས་མ་མཆིས་ཤིང་བླང་མ་མཆིས། །ཆོས་རྣམས་ཐམས་ཅད་སེམས་མ་མཆིས། །བདག་དང་གཞན་གྱི་རྣམ་འགྱུར་བ། །དེ་དག་ཁྱོད་ཀྱིས་དེ་བཞིན་མཁྱེན། །ལྷའི་བུ་གནས་མེད་བློ་གྲོས་ཀྱིས་གསོལ་པ། 
ཆོས་རྣམས་ཐམས་ཅད་གཞི་མེད་པར། །རྣམ་པར་འདྲེན་པ་ཁྱོད་ཀྱིས་གཟིགས། །དེ་དག་ཁྱོད་ཀྱིས་ལུགས་བཟློག་སྟེ། །སེམས་ཅན་རྣམས་ལ་བསྟན་པ་མཛད། །ལྷའི་བུ་མི་རྟེན་བློ་གྲོས་ཀྱིས་གསོལ་པ། ཆོས་རྣམས་ཐམས་ཅད་རྟེན་མ་མཆིས། །སེམས་ཅན་
མ་མཆིས་ཕན་ཚུན་མིན། །ལག་མཐིལ་སྐྱུ་རུ་ར་བཞག་བཞིན། །ཡང་དག་ཇི་བཞིན་ཁྱོད་ཀྱིས་བསྟན། །ལྷའི་བུ་བར་སྣང་རྒྱུ་བས་གསོལ་པ། བདེ་གཤེགས་ཁྱོད་ཀྱིས་ཆོས་ཀྱི་རྣམས། །བར་སྣང་ལྟ་བུར་སྣང་བ་སྟེ། །སྐྱེ་དང་འགོག་པ་མེད་པར་གཟིགས། །དེ་སླད</font><hr>42-1-96b<br><font size=+2>
འཇིག་རྟེན་ཆགས་མི་མངའ། །ལྷའི་བུ་ངར་འཛིན་པ་མེད་པས་གསོལ་པ། ཁྱོད་ཀྱིས་འགྲོ་བ་འདི་དག་ཀུན། །ལུས་ཀྱི་ངོ་བོ་ཉིད་ཀྱིས་ནི། །གཡོ་བ་མེད་ཅིང་ངར་འཛིན་མེད། །སྤྱོད་མེད་རྩོལ་བ་མེད་པར་གཟིགས། །ལྷའི་བུ་བློ་གྲོས་རྣམ་པར་བསྒོམས་ཀྱིས་གསོལ་
པ། སྒྱུ་མ་སྣ་ཚོགས་ལེགས་བགྱིས་པ། །སྒྱུ་མའི་མཁན་པོས་བསྟན་གྱུར་ན། །དེ་བཞིན་མ་ལགས་དེ་བཞིན་གདའ། །ཐུབ་པ་དེ་ལྟར་མཉམ་མ་མཆིས། །ལྷའི་བུ་རབ་ཏུ་སད་པའི་ངང་ཚུལ་གྱིས་གསོལ་པ། གཟུགས་བརྙན་ཇི་ལྟར་མེ་ལོང་ལ། །གདའ་ཡང་
དེ་ལྟར་མ་མཆིས་པ། །དེ་བཞིན་ཆོས་རྣམས་ཁྱོད་ཀྱིས་གཟིགས། །དེ་བས་འཇིག་རྟེན་རྨོངས་མི་མངའ། །ལྷའི་བུ་ཡིད་གཉིས་རྣམ་པར་འཇིག་གིས་གསོལ་པ། སངས་རྒྱས་གཟུགས་བརྙན་ལྟ་བུ་སྟེ། །དེ་བཞིན་སངས་རྒྱས་ཆོས་ཀྱི་རྣམས། །དེ་བཞིན་ཁྱོད་ཀྱིས་
བསྟན་པ་མཛད། །དེ་ལྟར་འགྲོ་བ་ཀུན་ཀྱང་མཁྱེན། །ལྷའི་བུ་སྤོབས་པ་ཐོགས་མེད་ཀྱིས་གསོལ་པ། ཆོས་ཉིད་ལ་ནི་ཁོར་ཟུག་ཏུ། །སྤོབས་པ་རབ་ཏུ་འབྱུང་འགྱུར་ཞིང ། །ཆོས་ཉིད་དེ་ནི་བརྙེས་པས་ན། །དེ་སླད་ཁྱོད་ནི་སྤོབས་པ་ལྡན། །ལྷའི་བུ་ཆགས་མེད་བློ་
གྲོས་ཀྱིས་གསོལ་པ། ཁྱོད་ཀྱི་ཆོས་འདི་ཐམས་ཅད་ནི། །རང་བཞིན་མཚན་ཉིད་མ་མཆིས་པར། །ཡང་དག་ཇི་བཞིན་རབ་ཏུ་མཁྱེན། །དེ་བས་ཐུབ་པས་རབ་རིབ་བསལ། །ལྷའི་བུ་མྱ་ངན་བྲལ་གྱིས་གསོལ་པ། མྱ་ངན་མེད་ཅིང་ཉེར་ལེན་མེད། །སྤྲོས་པ་མེད་ཅིང་
རྙོག་པ་མེད། །ཆོས་རྣམས་ཀུན་ཏུ་ཉོན་མ་མོངས། །དེ་དག་རང་བཞིན་ཁྱོད་ཀྱིས་མཁྱེན། །ལྷའི་བུ་རྟོགས་པ་ཕུན་སུམ་ཚོགས་པས་གསོལ་པ། ཆོས་རྣམས་ཡང་དག་མ་ལགས་དེ། །འགྲོ་དང་འོང་བ་མ་མཆིས་པ། །དེ་དག་ཁྱོད་ཀྱིས་ཡང་དག་མཁྱེན། །དེ་བཞིན་
རབ་ཏུ་བསྟན་པར་མཛད། །ལྷའི་བུ་བློ་གྲོས་མཆོག་གིས་གསོལ་པ། ལྷུན་གྱིས་གྲུབ་ཅིང་བླང་མེད་པ། །རྨོངས་པ་མེད་ཅིང་ཤེས་པ་མེད། །ཆོས་རྣམས་ཅི་ཡང་མི་བགྱིད་པ། །ཁྱོད་ཀྱིས་རང་བཞིན་ཐུགས་སུ་ཆུད། །ལྷའི་བུ་སྒྲིབ་མེད་ཐོབ་ཀྱིས་གསོལ་པ། སྣང་བ</font><hr>42-1-97a<br><font size=+2>
མ་མཆིས་མུན་མ་མཆིས། །གཟུགས་མེད་མ་ལགས་གཟུགས་ཅན་མིན། །གཟུང་བ་མ་མཆིས་གྲོལ་མ་མཆིས། །ཁྱོད་ཀྱིས་རང་བཞིན་ཐུགས་སུ་ཆུད། །ལྷའི་བུ་མིག་དཔས་ཀྱིས་གསོལ་པ། ཡུལ་དང་ཕྱོགས་ན་མི་གནས་པ། །ཡོད་དང་མེད་པ་མ་
ལགས་པར། །རྨི་ལམ་འདོད་པ་ཇི་བཞིན་དུ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མིག་མི་འཛུམས་ཀྱིས་གསོལ་པ། བྱིས་པ་རྣམས་ཀྱི་བློ་རྨོངས་པ། །མ་སྐྱེས་པ་དང་མ་འགགས་པ། །བར་ནའང་གནས་པ་མ་མཆིས་པ། །དེ་དག་རང་བཞིན་ཁྱོད་ཀྱིས་
གཟིགས། །ལྷའི་བུ་སྟོང་པ་ཉིད་ལ་གནས་པས་གསོལ་པ། གང་ཟག་སེམས་ཅན་མ་མཆིས་པ། །མ་མཆིས་ཐ་སྙད་མ་མཆིས་པ། །བསྟན་པའི་སླད་དུ་བརྗོད་བགྱི་བ། །དེ་དག་རང་བཞིན་ཁྱོད་ཀྱིས་གཟིགས། །ལྷའི་བུ་མཚན་མ་མེད་པ་ལ་གནས་པས་གསོལ་པ། གང་
གིས་ཐ་སྙད་གདགས་པ་ཡི། །མཚན་མ་དེ་དག་མ་མཆིས་ཏེ། །ཆོས་ཀུན་མཚན་མ་མ་མཆིས་པར། །རྣམ་པར་འདྲེན་པ་ཁྱོད་ཀྱིས་གཟིགས། །ལྷའི་བུ་སྨོན་པ་མེད་པ་ལ་གནས་པས་གསོལ་པ། ཇི་ལྟར་མཚན་མ་སྟོང་གྱུར་ཅིང ། །སྨོན་པ་དམིགས་སུ་མ་མཆིས་དང ། །
སུ་ལ་སྨོན་ལམ་མཆིས་གྱུར་པ། །དེ་ཡང་དེ་ལྟའི་ཚུལ་དུ་མཁྱེན། །ལྷའི་བུ་ཏིང་ངེ་འཛིན་ལ་གཞོལ་བས་གསོལ་པ། རྣམ་ཐར་སྒོ་ལ་བརྟེན་བགྱིས་ཤིང ། །གང་ཞིག་གྲོལ་འགྱུར་དེ་མ་མཆིས། །དེ་བཞིན་ཀུན་ནས་ཉོན་མོངས་པ། །དེ་དག་རང་བཞིན་ཁྱོད་ཀྱིས་གཟིགས། །
ལྷའི་བུ་མ་སྨད་པས་གསོལ་པ། ཁྱོད་ནི་སྡིག་པ་ཀུན་སྤངས་ཤིང ། །བསོད་ནམས་ཐམས་ཅད་བསགས་གྱུར་ཏེ། །བདེ་གཤེགས་ཁྱོད་ལ་སྨད་མི་མངའ། །སུ་སྨོད་དེ་དག་མཁས་མ་ལགས། །ལྷའི་བུ་གློག་གི་སྤྲིན་གྱིས་གསོལ་པ། ཇི་ལྟར་གློག་བཅས་སྤྲིན་གྱི་ཚོགས། །
ཆར་གྱིས་ས་ཆེན་ངོམས་པར་བགྱིད། །དེ་བཞིན་འདྲེན་པས་ཆོས་ཆར་གྱིས། །འཇིག་རྟེན་རྣམས་ནི་ངོམས་པར་མཛད། །ལྷའི་བུ་བསམ་པ་དོན་ཡོད་ཀྱིས་གསོལ་པ། ཐུབ་ཁྱོད་གསུང་ནི་དོན་མཆིས་ཏེ། །ཆོས་ཀྱི་འཁོར་ལོ་རབ་ཏུ་བསྐོར། །ཤིན་ཏུ་བརྟགས་ཏེ་མཛད</font><hr>42-1-97b<br><font size=+2>
པས་ན། །དེ་ནི་ཐམས་ཅད་མཁྱེན་པའི་མཚན། །ལྷའི་བུ་བློ་གྲོས་ཕུན་སུམ་ཚོགས་པས་གསོལ་པ། ཆོས་རྣམས་ཐམས་ཅད་དངོས་ཉིད་ཀྱིས། །མ་སྐྱེས་འགགས་པ་མ་ལགས་ཏེ། །དེ་དག་བདེ་གཤེགས་ཁྱོད་ཀྱིས་མཁྱེན། །གཞན་ཡང་དེ་བཞིན་རྟོགས་པར་མཛད། །
ལྷའི་བུ་སེང་གེའི་ང་རོས་གསོལ་པ། ཁྱོད་ཀྱིས་སྟོང་པ་ཉིད་བསྟན་ཏེ། །སེང་གེའི་ང་རོ་བསྒྲགས་མཛད་པས། །མུ་སྟེགས་ཅན་ཀུན་རབ་འཇིགས་པ། །སེང་གེས་རིདགས་ཕྲ་མོ་བཞིན། །ལྷའི་བུ་བག་ཡོད་ལས་ཀྱིས་གསོལ་པ། བག་ཡོད་སྔོན་དུ་བཏང་མཛད་དེ། །ཁྱོད་ཀྱིས་
སྤྱོད་པ་སྤྱད་བགྱིས་པས། །སངས་རྒྱས་ཆོས་ལ་འདྲེན་པ་ཁྱོད། །བག་ཡོད་པས་ནི་ངེས་པར་འབྱུང ། །ལྷའི་བུ་བག་ཡོད་རབ་གནས་ཀྱིས་གསོལ་པ། བག་ཡོད་པ་ལ་རབ་གནས་ཏེ། །ཁྱོད་ཀྱིས་ཉིད་ཀྱི་ཆོས་ཀྱང་སྤེལ། །སྟོབས་བཅུ་གཞན་ཡང་སངས་རྒྱས་ཆོས། །བསམ་
གྱིས་མི་ཁྱབ་རབ་ཏུ་སྤེལ། །ལྷའི་བུ་བག་ཡོད་སྐྱེས་ཀྱིས་གསོལ་པ། བག་ཡོད་པ་ལ་བརྩོན་པས་ན། །བྱང་ཆུབ་ཕྱོགས་རྣམས་ཡང་དག་སྐྱེས། །ཐུབ་ཆེན་རང་ཡང་གྲོལ་གྱུར་ནས། །དེ་དག་རྣམས་ནི་འཇིག་རྟེན་འགྲེལ། །ལྷའི་བུ་བག་ཡོད་ངེས་པར་བྱུང་གིས་གསོལ་པ། 
བྱང་ཆུབ་སེམས་དཔའ་ཉན་ཐོས་དག་།ཇི་སྙེད་ཐར་ལ་རྟེན་པའི་རྣམས། །ཀུན་ཀྱང་ཁྱོད་ལ་བསླབས་པ་སྟེ། །བག་ཡོད་པས་ནི་ངེས་པར་འབྱུང ། །ལྷའི་བུ་བག་ཡོད་གནས་པས་གསོལ་པ། བག་ཡོད་ཡོངས་སུ་མ་བཏང་བས། །རྣམ་པར་འདྲེན་པ་ཁྱོད་ཀྱི་སྲས། །འགྲོ་བ་
འདི་ལ་མ་ཆགས་པར། །ཐམས་ཅད་མཁྱེན་དུ་ངེས་པར་བྱུང ། །ལྷའི་བུ་བག་ཡོད་བསྲུངས་ཀྱིས་གསོལ་པ། བྱང་ཆུབ་ལམ་ལ་བསྟེན་མཛད་ཅིང ། །ཁྱོད་ནི་བག་གིས་བསྲུངས་པས་ན། །ཐུགས་རྗེ་ཆེན་པོ་མཁས་པ་ཡིས། །བྱང་ཆུབ་དམ་པ་བརྙེས་པར་གྱུར། །ལྷའི་བུ་
བག་ཡོད་བརྩོན་གྱིས་གསོལ་པ། བག་ཡོད་པ་ལ་རབ་བརྩོན་ཞིང ། །མཚན་ཉིད་གཅིག་པོ་རྟོགས་བགྱིས་པ། །དཔའ་བོ་ཆེན་པོ་ཁྱོད་ཀྱི་སྲས། །ཡབ་ཀྱི་དཀོར་ཡང་ཐོབ་པར་འགྱུར། །ལྷའི་བུ་བག་ཡོད་མངོན་པར་དགའ་བས་གསོལ་པ། བག་ཡོད་དགའ་བའི་བརྟན་པ</font><hr>42-1-98a<br><font size=+2>
རྣམས། །དེ་དག་སངས་རྒྱས་ཡེ་ཤེས་ཀྱིས། །དཔའ་བོ་ཉོན་མོངས་རི་འཇིག་པས། །ང་རྒྱལ་རི་ཡང་དེ་བཞིན་བསྙིལ། །ལྷའི་བུ་བག་ཡོད་འཛིན་གྱིས་གསོལ་པ། སངས་རྒྱས་ཡེ་ཤེས་ཚོལ་མཛད་ཚེ། །ཁྱོད་ནི་བག་གིས་བཟུང་བས་ན། །བསྐལ་པ་བྱེ་བ་
གྲངས་མེད་དུ། །ཁྱོད་ཀྱི་ཐུགས་ནི་སྐྱོར་མ་གྱུར། །ལྷའི་བུ་ཞི་གནས་བརྩོན་གྱིས་གསོལ་པ། ཆོས་རྣམས་དེ་དག་རང་བཞིན་ཞི། །དེ་ནི་སངས་རྒྱས་སྤྱོད་ཡུལ་ལགས། །བྱང་ཆུབ་ཡང་དག་གང་ཞུགས་དང ། །ཐམས་ཅད་མཁྱེན་པ་དེར་མི་འཇིགས། །ལྷའི་བུ་ཞི་གནས་ལ་ཡང་
དག་པར་གནས་པས་གསོལ་པ། སངས་རྒྱས་ཞི་གནས་བཞུགས་པ་སྟེ། །འོན་ཀྱང་དེ་ལ་ཆགས་མི་མངའ། །སེམས་ཅན་ཉོན་མོངས་ཞི་བར་མཛད། །རྡུལ་འཐུལ་བ་ལ་ཆར་པ་བཞིན། །ལྷའི་བུ་ཞི་གནས་རབ་ཏུ་གནས་ཀྱིས་གསོལ་པ། སངས་རྒྱས་ཞི་ལ་རབ་ཏུ་བཞུགས། །
སུས་ཀྱང་མི་བསྐྱོད་རི་བོ་བཞིན། །ཁྱེད་ལ་གནོད་བགྱིར་མི་ནུས་ཏེ། །སེམས་ཞི་ཁྱོད་ལ་ཕྱག་ཀྱང་འཚལ། །ལྷའི་བུ་ཞི་གནས་དུལ་གྱིས་གསོལ་པ། །ཁྱོད་ཀྱི་སྲས་རྣམས་མ་སྨད་པ། །ཞི་གནས་ཀྱིས་ནི་ཡོངས་སུ་དུལ། །བདུད་རྣམས་བྱེ་བས་མི་ཚུགས་ཏེ། །འདོད་ཆགས་
ཀྱིས་ནི་གནོད་མི་འགྱུར། །ལྷའི་བུ་ཞི་གནས་ངེས་པར་བྱུང་གིས་གསོལ་པ། ཞི་བའི་ཡིད་མངའ་ཞི་གནས་ལ། །དཔའ་བོ་ཆེན་པོ་བསྒོམ་མཛད་པས། །ཅི་ལ་གནས་ཏེ་བསམ་གཏན་མཛད། །སུས་ཀྱང་ཁྱོད་ཀྱི་ཚུལ་མ་འཚལ། །ལྷའི་བུ་ཞི་གནས་སྔོན་དུ་འགྲོས་གསོལ་
པ། སྟོན་པས་སངས་རྒྱས་ཆོས་རྣམས་ཀྱི། །སྔོན་དུ་ཞི་གནས་འགྲོ་ཞེས་གསུངས། །གང་གིས་བྱང་ཆུབ་འགྲུབ་འགྱུར་བའི། །ཆོས་གཞན་དེ་ཡི་རྗེས་སུ་འབྲང ། །ལྷའི་བུ་ཞི་གནས་རྗེས་སུ་འབྲང་གིས་གསོལ་པ། འཇིག་རྟེན་སྒྲོན་མའི་ཞི་གནས་ནི། །སེམས་ཀྱི་
རྙོག་པ་འདང་བར་བགྱིད། །ཞི་བའི་སེམས་ལྡན་རྣམས་ཀྱིས་འཆིང ། །དེ་ཁྱོད་མཐའ་ཡས་དབང་དུ་མཛད། །ལྷའི་བུ་ཞི་གནས་སྤྱོད་ཡུལ་གྱིས་གསོལ་པ། ཆོས་རྣམས་ཀུན་གྱི་སྤྱོད་ཡུལ་ནི། །ཞི་གནས་ཡིན་ཞེས་འདྲེན་པས་གསུངས། །དེ་ལ་ཆགས་མེད་སྤྱོད</font><hr>42-1-98b<br><font size=+2>
པ་ནི། །རྣམ་པར་འདྲེན་པ་སངས་རྒྱས་འགྱུར། །ལྷའི་བུ་ཞི་གནས་བརླན་གྱིས་གསོལ་པ། བསམ་གཏན་གྱིས་ནི་སྔོན་བརླན་ཏེ། །ཤེས་རབ་ཀྱིས་ནི་སེམས་བསྒོམས་པས། །དེ་ཕྱིར་རྫོགས་པའི་བྱང་ཆུབ་བརྙེས། །དེ་བཞིན་སྐྱེ་བོ་རྣམས་ཀྱང་འདྲེན། །ལྷའི་བུ་ཞི་
གནས་ལྷུར་ལེན་གྱིས་གསོལ་པ། སངས་རྒྱས་ཆོས་རྣམས་གང་ལ་ཡང ། །ལམ་གཞན་བདག་གིས་མ་མཐོང་སྟེ། །ཞི་གནས་ཡེ་ཤེས་ཆེ་ཐོབ་ན། །རང་བྱུང་ཉིད་དུ་ངེས་པར་འབྱུང ། །ལྷའི་བུ་ལྷག་མཐོང་མངོན་དགས་གསོལ་བ། དཔའ་བོ་ཆེན་པོ་ལྷག་
མཐོང་ནི། །ཆོས་རྣམས་ཐམས་ཅད་སྟོན་པ་སྟེ། །དེ་ལ་ཁྱོད་ཀྱིས་སྲས་སྤྱོད་ཅིང ། །རང་བྱུང་ཉིད་ནི་ཐོབ་པར་འགྱུར། །ལྷའི་བུ་ལྷག་མཐོང་བྱུང་གིས་གསོལ་པ། ཤེས་རབ་ཕ་རོལ་ཕྱིན་གནས་ཤིང ། །རྣམ་པར་འདྲེན་པ་འབྱུང་བར་འགྱུར། །སྨན་པའི་རྒྱལ་པོ་
སྟོན་པ་སྟེ། །དེ་བས་ལྷག་མཐོང་དགེ་བ་ལགས། །ལྷའི་བུ་ལྷག་མཐོང་རབ་གནས་ཀྱིས་གསོལ་པ། ཆོས་རྣམས་ཐམས་ཅད་བཙལ་བགྱིས་ཏེ། །ཡང་དག་ཇི་བཞིན་མཐོང་གྱུར་ན། །བརྟན་པ་རྫོགས་པའི་བྱང་ཆུབ་འཐོབ། །བྱང་ཆུབ་ཉིད་ལ་གནས་པར་འདོད། །
ལྷའི་བུ་ལྷག་མཐོང་ངེས་འབྱུང་གིས་གསོལ་པ། གང་ཟག་མཆོག་རྣམས་ཡེ་ཤེས་ཀྱིས། །བྱང་ཆུབ་མཆོག་ཏུ་ངེས་པར་བྱུང ། །རྫོགས་པའི་བྱང་ཆུབ་ཡེ་ཤེས་ཀྱིས། །བརྙེས་པའི་དྲན་པ་སྐྱེ་མི་འགྱུར། །ལྷའི་བུ་ལྷག་མཐོང་མངོན་དགས་གསོལ་པ། ཡང་དག་ཇི་
བཞིན་ཡང་དག་ཏུ། །ཆོས་རྣམས་རྣམ་པར་གཟིགས་པས་ན། །བྱང་ཆུབ་གཞལ་ཡས་བརྙེས་གྱུར་ཏེ། །དེ་བས་རྣམ་འདྲེན་སངས་རྒྱས་ལགས། །ལྷའི་བུ་ལྷག་མཐོང་ལ་མངོན་པར་བརྩོན་པས་གསོལ་པ། མཁས་པ་ཡེ་ཤེས་གང་བརྩོན་ཞིང ། །དཀའ་བ་མང་པོ་སྤྱོད་
བགྱིད་པ། །དེ་དག་རྒོལ་ཚོགས་ཐམས་ཅད་ཀྱིས། །ཕམ་པར་བགྱི་བར་ཡོང་མི་ནུས། །ལྷའི་བུ་ལྷག་མཐོང་བྱུང་གིས་གསོལ་པ། ཆོས་རྣམས་རྣམ་མཐོང་བགྱི་སླད་དུ། །རྒྱལ་སྲས་གང་དག་ཞུགས་པའི་རྣམས། །ཆོས་རྣམས་ངོ་བོ་ཉིད་འཚལ་ཅིང ། །རང་བྱུང་ཉིད</font><hr>42-1-99a<br><font size=+2>
ནི་ཐོབ་པར་འགྱུར། །ལྷའི་བུ་ལྷག་མཐོང་ལ་བསྟེན་པས་གསོལ་པ།རྣམ་འདྲེན་ཁྱོད་ཀྱིས་ཡུན་རིང་དུ། །ཡེ་ཤེས་ལ་ནི་བསྟེན་མཛད་པས། །ཐམས་ཅད་མཁྱེན་པ་བརྙེས་ནས་ནི། །སྲོག་ཆགས་བྱེ་བ་གྲོལ་བར་མཛད། །ལྷའི་བུ་ཁྱད་པར་ལྡན་གྱིས་
གསོལ་པ། སངས་རྒྱས་མཁྱེན་པས་ཐམས་ཅད་མཁྱེན། །འདྲེན་པ་དམ་པ་མངོན་པར་འཕགས། །སྲིད་པའི་རྒྱ་མཚོས་ཁྱེར་བ་ཡི། །འཇིག་རྟེན་དེ་ཡིས་སྒྲོལ་བར་མཛད། །ལྷའི་བུ་ལྷག་མཐོང་གནས་ཀྱིས་གསོལ་པ། ལྷག་མཐོང་ལ་ནི་གནས་མཛད་ཅིང ། །ཆོས་
ཀུན་རྣམ་པར་གཟིགས་པས་ན། །སངས་རྒྱས་ཆོས་རྣམས་འཕེལ་འགྱུར་ཏེ། །ས་བཟང་ནྱ་གྲོ་དྷ་སྐྱེས་འདྲ། །ལྷའི་བུ་ལྷག་མཐོང་དང་མ་བྲལ་བས་གསོལ་པ། རྣམ་པར་འདྲེན་པ་ཁྱོད་ཀྱི་སྲས། །ཡེ་ཤེས་ཀྱིས་ནི་ཡོངས་བཟུང་སྟེ། །བྱང་ཆུབ་མཆོག་ནི་ཐོབ་བགྱིས་ཤིང ། །
སྐྱེ་བོ་མང་པོ་འགྲེལ་པར་བགྱིད། །ལྷའི་བུ་ལྷག་མཐོང་ལ་རྣམ་པར་རྩེ་བས་གསོལ་པ། །སངས་རྒྱས་མཁྱེན་ལ་རྣམ་པར་རོལ། །ཆོས་རྣམས་ཀུན་ལ་འཇིགས་མི་མངའ། །ཞུམ་པ་མ་མཆིས་དངང་མི་མངའ། །ཐུབ་པ་འཇིག་རྟེན་ཐམས་ཅད་མཁྱེན། །ལྷའི་བུ་ལྷག་མཐོང་
ལ་ཡང་དག་པར་འཇུག་གིས་གསོལ་པ། དཔའ་བོ་ཆེན་པོ་ཆོས་ཀུན་ནི། །ལྷག་མཐོང་ཉིད་ཏུ་ཡང་དག་འདུ། །རང་བཞིན་མེད་པར་རྣམ་མཐོང་ན། །དེ་ནི་རང་བྱུང་བྱང་ཆུབ་ལགས། །ལྷའི་བུ་ལྷག་མཐོང་སྙིང་པོས་གསོལ་པ། སངས་རྒྱས་ལྷག་མཐོང་སྙིང་པོ་སྟེ། །ཆོས་
རྣམས་ཀུན་ལ་འཇིགས་མི་མངའ། །འཇིག་རྟེན་སྡུག་བསྔལ་འདི་གཟིགས་ཤིང ། །ཐུགས་རྗེ་ཆེན་པོ་ཤིན་ཏུ་སྐྱེད། །ལྷའི་བུ་ལྷག་མཐོང་འགྲོས་ཀྱིས་གསོལ་པ། བྱང་ཆུབ་ཕྱིར་ནི་ཤེས་འགྲོ་བའི། །འཇིག་རྟེན་མཁས་པ་ངེས་པར་བྱུང ། །དེ་དག་བྱང་ཆུབ་མཆོག་ཀྱང་
འཐོབ། །གྲོལ་ནས་སྐྱེ་དགུ་འདི་དག་འགྲེལ། །ལྷའི་བུ་སྟོང་པ་ཉིད་ལ་བསྟེན་གྱིས་གསོལ་པ། སྟོང་པ་ཉིད་ཀྱི་ཆོས་སྟེན་པའི། །མཁས་པ་བྱང་ཆུབ་འཚང་རྒྱ་སྟེ། །སེམས་ཅན་བཅིངས་ལས་འགྲོལ་བགྱིད་ཅིང ། །བཅིངས་པ་ཐམས་ཅད་རྣམ་པར་གཅོད། །


</font><hr>42-1-99b<br><font size=+2>
ལྷའི་བུ་སྟོང་པ་ཉིད་ལ་མོས་ཀྱིས་གསོལ་པ། སྟོང་པ་ཉིད་ལ་མོས་གྱུར་པ། །འགྲོ་བ་འདི་དག་སྲོག་མེད་གཟིགས། །དམིགས་མེད་ངོ་བོ་ཉིད་མེད་པ། །དེ་ལྟར་སྲོག་ཆགས་རྣམས་ལ་སྟོན། །ལྷའི་བུ་སྟོང་པ་ཉིད་ཀྱི་སྤྱོད་ཡུལ་གྱིས་གསོལ་པ། སངས་རྒྱས་ཀུན་གྱི་སྤྱོད་
ཡུལ་ནི། །ཆོས་རྣམས་རང་བཞིན་སྟོང་པ་སྟེ། །སྲོག་ཆགས་རྣམས་ལ་ཐུགས་བརྩེ་བས། །དཔའ་བོས་དེ་ལ་སྤྱད་པར་མཛད། །ལྷའི་བུ་སྟོང་པ་ཉིད་ཀྱི་བསམ་པས་གསོལ་པ། སྐྱོན་དང་བྲལ་ཞིང་བཅིངས་མེད་ལ། །འཇིགས་སྐྲག་ཐམས་ཅད་རབ་ཏུ་སྤངས། །ཆོས་རྣམས་
ཀུན་ལ་མི་གནས་ཤིང ། །ནམ་མཁའི་རླུང་བཞིན་སྤྱོད་པ་མཛད། །ལྷའི་བུ་སྟོང་པ་ཉིད་ལ་མངོན་པར་དགའ་བས་གསོལ་པ། སྟོང་ཉིད་ཆོས་ལ་སྟེན་བགྱིད་ཅིང ། །སངས་རྒྱས་སྤྱོད་ཡུལ་གང་མོས་པ། །དེ་དག་སྟོན་པ་མཆོད་པ་སྟེ། །མཆོད་པ་དེ་ནི་བླ་ན་མེད། །ལྷའི་
བུ་སྟོང་པ་ཉིད་ཀྱིས་ཡང་དག་པར་འཕགས་ཀྱིས་གསོལ་པ། གང་གིས་འདྲེན་པ་འཕགས་གྱུར་པ། །དེ་ནི་ཡང་དག་འཕགས་ཞེས་གསུངས། །སྟོང་ཉིད་ཆོས་ལ་སྟེན་བགྱིད་པ། །མ་སྨད་དེ་དག་སངས་རྒྱས་འགྱུར། །ལྷའི་བུ་སྟོང་པ་ཉིད་ཀྱིས་འདྲེན་གྱིས་གསོལ་པ། དཔའ་
བོ་ཆེན་པོ་ཆོས་རྣམས་གང ། །མྱ་ངན་འདས་མིན་སྟོན་མ་མཆིས། །ཀུན་ཀྱང་མྱ་ངན་འདས་པར་འདྲེན། །དྲང་སྲོང་ཆེན་པོའི་བྱང་ཆུབ་ལགས། །ལྷའི་བུ་སྟོང་པ་ཉིད་ཀྱིས་ཡང་དག་ཤར་གྱིས་གསོལ་པ། སྟོང་ཉིད་ཞི་ལ་བརྟེན་ནས་ནི། །ཁྱོད་ཀྱི་སློབ་མ་ཡང་དག་ཤར། །
སྟོང་པ་ཉིད་ལ་གང་སྟེན་པ། །དེ་དག་རིམ་གྲོ་བགྱིད་པ་ལགས། །ལྷའི་བུ་སྟོང་པ་ཉིད་ལ་སྟེན་གྱིས་གསོལ་པ། གང་རྣམས་སྟོང་པ་ཉིད་སྟེན་པ། །མཁས་པ་དེ་དག་རྨོངས་མི་འགྱུར། །ཉོན་མོངས་མེད་ཅིང་ལྟ་མེད་རྣམས། །བྱང་ཆུབ་རྡུལ་མེད་ཐོབ་པར་འགྱུར། །ལྷའི་
བུ་སྟོང་པ་ཉིད་ཕུན་སུམ་ཚོགས་པས་གསོལ་པ། གང་རྣམས་སྟོང་ཉིད་སྟེན་བགྱིད་པ། །སངས་རྒྱས་ཆོས་རྣམས་ཕུན་སུམ་ཚོགས། །རང་བྱུང་ཕམ་པ་མེད་པར་འགྱུར། །འཇིག་རྟེན་དོན་ཀྱང་བགྱིད་པར་འགྱུར། །ལྷའི་བུ་སྟོང་པ་ཉིད་ལ་ཡང་དག་པར་ཞུགས་པས</font><hr>42-1-100a<br><font size=+2>
གསོལ་པ། སངས་རྒྱས་ཆོས་ལ་ཞུགས་གྱུར་ཏེ། །སྟོང་པ་ཉིད་ལ་གང་སྟེན་པ། །དེ་ལ་བདུད་རྣམས་བྱེ་བ་ཕྲག་།སྟོང་གིས་དཀྲུག་པར་མི་ནུས་སོ། །ལྷའི་བུ་མཚན་མ་མེད་ལ་དགའ་བས་གསོལ་པ། མཚན་མ་མེད་ལ་མངོན་དགྱེས་ཏེ། །
དངོས་པོ་ཐམས་ཅད་རྣམ་བཤིག་ནས། །སངས་རྒྱས་འཇིག་རྟེན་རྣམས་ནས་བྱུང ། །མཚན་མ་རྣམས་ལ་ཆགས་མི་མངའ། །ལྷའི་བུ་མཚན་མ་མེད་ལ་གནས་པས་གསོལ་པ། མཚན་མ་མེད་ལ་སྤྱོད་གྱུར་ཅིང ། །ཞི་བ་ཞི་ལ་སྤྱོད་པ་རྣམས། །མཚན་མ་
རྣམ་པར་བཤིག་རྣམས་ཀྱིས། །ཚུལ་ནི་བདུད་ཀྱིས་ཤེས་མི་ནུས། །ལྷའི་བུ་མཚན་མ་མེད་པའི་སྤྱོད་ཡུལ་གྱིས་གསོལ་པ། སངས་རྒྱས་ཀུན་གྱི་སྤྱོད་ཡུལ་ལ། །འདྲེན་པ་ཁྱོད་ནི་སྤྱོད་མཛད་དེ། །མཚན་མ་མི་མངའ་རྟོགས་དཀའ་ཞིང ། །ཞི་སྤྱོད་ཁྱོད་
ལ་ཕྱག་ཀྱང་འཚལ། །ལྷའི་བུ་མཚན་མ་མེད་པས་སྐོམ་གྱིས་གསོལ་པ། ཐུབ་པའི་འཁོར་འདི་ཐམས་ཅད་ནི། །མཚན་མ་མེད་པས་སྐོམ་གྱུར་ཏེ། །ཡབ་ཀྱི་དཀོར་ནི་འཚལ་གྱུར་ནས། །དེ་བཞིན་གཤེགས་ལ་བཀུར་སྟི་བགྱིད། །ལྷའི་བུ་མཚན་མ་མེད་པ་ལ་སྤྱོད་
པས་གསོལ་པ། མཚན་མ་མེད་ལ་ཉིན་མཚན་དུ། །གང་ཟག་མཆོག་ནི་སྤྱོད་མཛད་པས། །ལྷ་དང་དྲི་ཟ་མི་དག་ཀྱང ། །ཁྱོད་ཀྱི་ཚུལ་ནི་མ་འཚལ་ཏོ། །ལྷའི་བུ་མཚན་མ་མེད་པས་རྣམ་པར་གྲོལ་གྱིས་གསོལ་པ། ཆོས་རྣམས་ཐམས་ཅད་རྣམ་བཤིག་ཅིང ། །
དཔའ་ཆེན་འཇིག་རྟེན་སྒྲོན་མ་ཁྱོད། །མཚན་མ་མེད་ལ་གནས་པར་མཛད། །དེ་བས་ཁྱོད་ལ་ཕྱག་ཀྱང་འཚལ། །ལྷའི་བུ་མཚན་མ་མེད་པ་ལ་རྣམ་པར་རྩེ་བས་གསོལ་པ། ཐུབ་ཆེན་དཔའ་བོ་ཆེན་པོ་ཁྱོད། །མཚན་མ་མེད་ལ་རྣམ་པར་རོལ། །མི་རྣམས་ཡོངས་སུ་སྨིན་
མཛད་ཅིང ། །སངས་རྒྱས་ཡེ་ཤེས་མཆོག་ལ་ཞུགས། །ལྷའི་བུ་མཚན་མ་མེད་པས་ཡོངས་སུ་གྲུབ་ཀྱིས་གསོལ་པ། གང་གིས་མཚན་མ་སྤངས་གྱུར་པ། །དེ་དག་བྱང་ཆུབ་གྲུབ་པ་སྟེ། །ཡབ་ཀྱི་ཆོས་ཀྱི་བརྟུལ་ཞུགས་ཅན། །དེ་དག་རྫོགས་པའི་སངས་རྒྱས་མཆོད། །


</font><hr>42-1-100b<br><font size=+2>
ལྷའི་བུ་མཚན་མ་མེད་པ་ལ་དགའ་བས་གསོལ་པ། །གང་གིས་མཚན་མ་རྣམ་བཤིག་པ། །དེ་དག་སངས་རྒྱས་ཆོས་ལ་དགའ། །བླ་མའི་གནས་ལ་གནས་པ་སྟེ། །སེམས་ཅན་ཀུན་གྱི་མཆོད་རྟེན་ལགས། །ལྷའི་བུ་མཚན་མ་མེད་པ་ལ་རྟེན་པས་གསོལ་པ། ཞི་
ལ་སྤྱོད་ཅིང་རྣམ་གྲོལ་བ། །སངས་རྒྱས་འཇིག་རྟེན་བླ་ན་མེད། །འབྱུང་པོ་ཀུན་གྱི་སྐྱབས་དང་རྟེན། །དཔུང་གཉེན་དེ་བཞིན་གནས་ཀྱང་ལགས། །ལྷའི་བུ་མཚན་མ་མེད་པ་ལ་མོས་པས་གསོལ་པ། མཚན་མ་མེད་ལ་མོས་གྱུར་ཅིང ། །ཞི་བ་དགྲ་ལས་རྒྱལ་གྱུར་
པ། །སངས་རྒྱས་རྒལ་བ་འགྲོ་སྒྲོལ་བ། །དེ་དག་ཚད་ནི་ག་ལ་མཆིས། །ལྷའི་བུ་སྨོན་པ་མེད་པ་རྟོགས་ཀྱིས་གསོལ་པ། མགོན་པོ་གང་དག་སྨོན་ལམ་ནི། །རྣམ་པ་ཀུན་ཏུ་མི་དམིགས་པ། །དེ་དག་འཇིག་རྟེན་བྲལ་བ་སྟེ། །སངས་རྒྱས་འཇིག་རྟེན་ནང་ནས་བྱུང ། །
ལྷའི་བུ་སྨོན་པ་མེད་པ་ལ་སྟེན་པས་གསོལ་པ། ཞི་བའི་ཐུགས་དང་ལྡན་པ་ཁྱོད། །སྲིད་པ་རྣམས་སུ་སྨོན་མི་མཛད། །སྲེད་པ་ཡོངས་སུ་ཆད་པས་ན། །སངས་རྒྱས་འཇིག་རྟེན་ཡོང་མི་གོས། །ལྷའི་བུ་སྨོན་པ་མེད་པས་སྐྱེས་ཀྱིས་གསོལ་པ། གང་གིས་སྲིད་པ་ཡོངས་
བཅོམ་པ། །དེ་དག་གཟི་མཆོག་སྐྱེས་པ་སྟེ། །དེ་དག་འཇིག་རྟེན་མགོན་པོའི་སྲས། །རང་གི་ཡབ་ལ་ཕྱག་ཀྱང་འཚལ། །ལྷའི་བུ་སྨོན་པ་མེད་པས་བསྐྱེད་ཀྱིས་གསོལ་པ། ཁྱོད་ཀྱི་སྲས་རྣམས་མ་སྨད་པ། །སྲེད་པ་ཡོངས་སུ་བཅད་པས་ན། །སྲིད་པ་འཇིག་
བགྱིད་སྲིད་པ་ལ། །དེ་དག་སྨོན་པ་མི་བགྱིད་དོ། །ལྷའི་བུ་སྨོན་པ་མེད་པས་ཡོངས་སུ་གྲོལ་བས་གསོལ་པ། གང་དག་སྨོན་པ་མི་བགྱིད་པ། །གཟི་ལྡན་ཁྱོད་ཀྱི་སྲས་ཀྱི་རྣམས། །རེ་བ་བཏང་ཞིང་བཅིངས་གྲོལ་བ། །དེ་དག་ཡོངས་སུ་གྲོལ་བར་འགྱུར། །ལྷའི་བུ་སྨོན་
པ་མེད་པས་བྱུང་གིས་གསོལ་པ། གང་གིས་སྲེད་པ་རབ་བཅོམ་པ། །དེ་དག་མྱ་ངན་དགོན་པ་རྒལ། །དེ་དག་མི་སྐོམ་ཟང་ཟིང་མེད། །དཔའ་ཆེན་ཁྱོད་ལ་དེང་ཕྱག་འཚལ། །ལྷའི་བུ་སྨོན་པ་མེད་ལ་ངེས་པས་གསོལ་པ། གང་གིས་སྲིད་དང་སྡུག་བསྔལ་དང ། །བདེ</font><hr>42-1-101a<br><font size=+2>
བ་དངོས་པོ་མེད་བསྒོམས་པ། །མགོན་ཁྱོད་དེ་དག་རྣམས་ཀྱི་ཡབ། །དེ་དག་ཁྱོད་ཀྱི་སྲས་ཀྱང་ལགས། །ལྷའི་བུ་སྨོན་པ་མེད་པའི་འཁོར་གྱིས་གསོལ་པ། སྲིད་པའི་སྡུག་བསྔལ་སུས་མཐོང་བ། །དེ་དག་ཁྱོད་ཀྱི་བསྟན་ལ་དུལ། །ཁ་ལོ་སྒྱུར་ཞིང་སྲིད་སེལ་
བ། །སེམས་དུལ་ཁྱོད་ལ་ཕྱག་ཀྱང་འཚལ། །ལྷའི་བུ་སྨོན་པ་མེད་པས་བྱུང་གིས་གསོལ་པ། སྲིད་པའི་དགོན་ལས་བྱུང་བ་རྣམས། །བདེ་བ་ཐོབ་ཅིང་ཞི་གནས་ཏེ། །ཉོན་མོངས་དགྲ་རྣམས་ཕམ་མཛད་པ། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་སྨོན་པ་མེད་
པས་ཡ་མཚན་དུ་གྱུར་པས་གསོལ་པ། གཡུལ་ལས་རྒྱལ་བར་གྱུར་པ་སྟེ། །ཁྱོད་ནི་རྣམ་རྒྱལ་ཕམ་མི་མངའ། །བདུད་ཀྱི་དཔུང་རྣམས་ཕམ་མཛད་ཅིང ། །སྲིད་པ་ཀུན་ཏུ་སྨོན་མི་མཛད། །ལྷའི་བུ་སྨོན་པ་མེད་པ་སྟོབས་ལྡན་གྱིས་གསོལ་པ། ཐར་པའི་ཆོས་ལ་སྟོབས་
ལྡན་པས། །བདུད་ཀྱི་ཞགས་པ་ཡོངས་བཅད་ཅིང ། །ཁྱོད་ཀྱི་སྲས་རྣམས་བདུད་དག་ལ། །བསྐྱབ་པའི་འདུ་ཤེས་མི་བགྱིད་དོ། །ལྷའི་བུ་ལུས་རྣམ་པར་བརྟགས་ཀྱིས་གསོལ་པ། ལུས་མེད་འཆི་བ་མེད་ཚུལ་དུ། །ལུས་འདི་གང་གིས་མཐོང་གྱུར་པ། །དེ་དག་སངས་
རྒྱས་སྤྱོད་ཡུལ་དགའ། །འདྲེན་པ་ཁྱོད་ཀྱི་རྗེས་སུ་ཞུགས། །ལྷའི་བུ་ལུས་ངེས་པར་སེམས་པས་གསོལ་པ། མི་གཙང་རུལ་བ་རྣག་ཟག་པ། །ལུས་འདི་མི་བཟད་ངེས་བསམས་ཏེ། །ཡང་དག་ཇི་བཞིན་འཚལ་གྱུར་ནས། །རྣམ་འདྲེན་ཁྱོད་ལ་ཕྱག་ཀྱང་འཚལ། །
ལྷའི་བུ་ལུས་རྟོགས་ཀྱིས་གསོལ་པ། ལུས་ལ་མི་གཙང་བརྟགས་བགྱིས་ཏེ། །ལུས་ལ་དྲན་པ་རྣམ་དཔྱད་ཅིང ། །ལུས་ཀྱི་སྡུག་བསྔལ་རྣམས་གྲོལ་ནས། །དེས་པ་ཁྱོད་ལ་ཕྱག་ཀྱང་འཚལ། །ལྷའི་བུ་ལུས་ཡོངས་སུ་གཏོང་གིས་གསོལ་པ། །སྦྲུལ་གྱི་པགས་པ་རྙིང་
བཞིན་དུ། །རྣག་ཅན་ལུས་འདི་སྤངས་ནས་ནི། །དེ་བཞིན་གཤེགས་པ་སྐུ་བོ་ཆེ། །སྐུ་མི་མངའ་ལ་ཕྱག་ཀྱང་འཚལ། །ལྷའི་བུ་ལུས་ལ་སྨོད་པས་གསོལ་པ། མི་གཙང་དྲི་ང་རྣག་ཟག་ཅིང ། །རུལབའི་ལུས་ལ་རྟག་སྨད་དེ། །མི་གཙང་གང་བ་རྣམ་སྤངས་ནས། །


</font><hr>42-1-101b<br><font size=+2>
འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་ལུས་ཀྱིས་ཡོངས་སུ་སྐྱོ་བས་གསོལ་པ། གང་དག་རུལ་བའི་ལུས་སྐྱོ་ཞིང ། །རྒྱལ་སྲས་གཙང་བ་འཚལ་བ་རྣམས། །ཆོས་ཀྱིས་རབ་ཏུ་བསྐྱེད་པའི་སྲས། །དེ་དག་སངས་རྒྱས་ཕྱག་འཚལ་འགྱུར། །ལྷའི་བུ་ལུས་ཀྱིས་
སྐྲག་པས་གསོལ་པ། འབྱུང་བ་ཆེན་པོ་སྦྲུལ་གདུག་འདྲར། །གང་གིས་ཤིན་ཏུ་རྟོགས་གྱུར་པ། །དེ་དག་ལུས་ལས་འདས་པ་སྟེ། །རྐང་གཉིས་གཙོ་ལ་ཕྱག་ཀྱང་འཚལ། །ལྷའི་བུ་ལུས་ཀྱི་སྐྱོན་མཐོང་བས་གསོལ་པ། ལུས་ཀྱི་སྐྱོན་ལ་མངོན་སུམ་སྟེ། །ཡེ་ཤེས་
གཟིགས་པའི་སྤྱན་མངའ་བས། །སངས་རྒྱས་མཁྱེན་པས་མཁས་པ་དག་།སྲིད་གསུམ་ཐམས་ཅད་ཡོངས་སུ་གཟིགས། །ལྷའི་བུ་ལུས་ལ་འདོད་ཆགས་དང་བྲལ་བས་གསོལ་པ། ལུས་ཀྱི་འདུ་ཤེས་འདོད་ཆགས་བྲལ། །ཆོས་ཀྱི་འདུ་ཤེས་མི་གནས་པས། །ཀུན་
སྦྱོར་ཀུན་ལས་འདས་པ་སྟེ། །རྣམ་འགྲེལ་སངས་རྒྱས་ཕྱག་ཀྱང་འཚལ། །ལྷའི་བུ་སྲིད་པའི་དགྲའི་བློ་གྲོས་ཀྱིས་གསོལ་པ། སྲིད་པར་སྲིད་པ་འཇོམས་མཛད་པ། །ཁྱོད་ཀྱིས་དགྲ་ཡི་འདུ་ཤེས་མཁྱེན། །ཁྱོད་ཀྱི་སྲས་རྣམས་སྒོམ་བགྱིད་ཅིང ། །མཁས་པ་བྱང་
ཆུབ་མངོན་འཚང་རྒྱ། །ལྷའི་བུ་སྲིད་པ་སེལ་བས་གསོལ་པ། སྲིད་པ་རྣམས་ཀྱི་ཉེས་དམིགས་མཐོང ། །མྱ་ངན་འདས་པ་འཇིགས་མེད་མཐོང ། །ཁྱོད་ཀྱི་སྲས་རྣམས་འགྲོ་ཕན་ཕྱིར། །བྱང་ཆུབ་སྤྱད་པ་སྤྱོད་པ་བགྱིད། །ལྷའི་བུ་སྲིད་པ་རྣམ་པར་སྤངས་ཀྱིས་གསོལ་པ། 
གང་གིས་སྲིད་པ་རྣམ་སྤངས་ཤིང ། །འཇིག་ལ་མངོན་པར་མི་དགའ་བ། །བྲལ་བར་གྱུར་ཅིང་སེམས་དག་པ། །མཁས་ཁྱོད་ཞབས་ལ་ཕྱག་ཀྱང་འཚལ། །ལྷའི་བུ་སྲིད་པ་བསལ་གྱིས་གསོལ་པ། །མི་ཡི་དམ་པ་ཁྱོད་ཀྱི་སྲས། །སྲིད་པར་ཁྲིད་པ་རབ་བསལ་ཏེ། །ཁྱོད་ཀྱི་
བསླབ་ལ་བསླབས་པ་དག་།སྟོང་གསུམ་འདི་ན་རྣམ་པར་མཛེས། །ལྷའི་བུ་སྲིད་པ་ལས་རྒལ་བས་གསོལ་པ། །སྲིད་པའི་མཚོ་ལས་རྒལ་བ་ཡི། །འཇིག་རྟེན་མགོན་མཆོག་སྐྱོབ་རྣམས་ལ། །གྲངས་ཀྱིས་རྒྱུན་ཏུ་བགྲང་བ་ཡི། །གྲངས་ནི་འཇིག་རྟེན་འདི་ན་མེད། །ལྷའི་བུ་སྲིད</font><hr>42-1-102a<br><font size=+2>
པ་འཇོམས་ཀྱིས་གསོལ་པ། སྲིད་པ་ཐམས་ཅད་ཡོངས་བཅོམ་སྟེ། །གང་དག་རྟག་ཏུ་དྲན་སྤྱོད་པ། །དེ་དག་རྫོགས་པའི་སངས་རྒྱས་མཆོད། །སྲོག་ཆགས་རྣམས་ལ་ཆོས་ཀྱང་སྟོན། །ལྷའི་བུ་སྲིད་པ་ལས་རབ་ཏུ་གྲོལ་བས་གསོལ་པ། སྲིད་པའི་རྒྱུན་ལས་རབ་ཏུ་
གྲོལ། །རྣམ་པར་འདྲེན་པ་སྲིད་པ་རྒལ། །སྲིད་པ་མཐར་འབྱིན་སངས་རྒྱས་ཏེ། །སྲིད་པ་སེལ་ལ་ཕྱག་ཀྱང་འཚལ། །ལྷའི་བུ་སྲིད་པ་རབ་ཏུ་ཞི་བྱེད་ཀྱིས་གསོལ་པ། སྲིད་པར་ཁྲིད་པ་རབ་ཞི་ཞིང ། །སྲིད་པ་ཕམ་པར་མཛད་ནས་གཤེགས། །བརྟེན་པ་སྲིད་པ་མཐར་འབྱིན་
པ། །ཁྱོད་ལ་དོ་ཟླ་མ་མཆིས་སོ། །ལྷའི་བུ་སྲིད་པའི་མཐར་འགྲོ་བས་གསོལ་པ། སྲིད་པའི་མཐར་ཕྱིན་རབ་ཞི་བ། །མགོན་པོ་ཁྱོད་ཀྱི་སྲིད་པའི་མཐའ། །སྲིད་པ་ཕྱིར་འབྱིན་ཐམས་ཅད་མཁྱེན། །སངས་རྒྱས་འཇིག་རྟེན་རྟོགས་པར་མཛད། །ལྷའི་བུ་སྲིད་པའི་ཐ་མའི་
ལུས་འཛིན་གྱིས་གསོལ་པ། སྲིད་པའི་རྒྱུ་ནི་རྣམ་སྤངས་ནས། །སྲིད་པ་ཐ་མ་འཛིན་མཛད་པ། །གང་གིས་སྲིད་པ་ལེན་འགྱུར་བའི། །ཁྱོད་ཀྱིས་ཀུན་ཏུ་སྦྱོར་བ་མཐོང ། །ལྷའི་བུ་སྲིད་པ་རབ་ཏུ་ཞི་བ་ཐོབ་ཀྱིས་གསོལ་པ། ཁྱོད་ཀྱིས་སྲིད་པ་སྟོང་མཁྱེན་ཏེ། །སྲིད་པའི་
རྒྱུ་ཡང་དེ་བཞིན་ནོ། །ཞུམ་དང་རབ་ཏུ་ཞུམ་མི་མངའ། །མཉམ་ཉིད་གྱུར་ལ་ཕྱག་ཀྱང་འཚལ། །ལྷའི་བུ་སྲིད་པའི་ཕ་རོལ་དུ་འགྲོ་བས་གསོལ་པ། སྲིད་པའི་ཕ་རོལ་རྒལ་བ་སྟེ། །སྲིད་པར་ཁྲིད་པ་ཡང་དག་བསལ། །རྣམ་པར་འདྲེན་པ་ཐུགས་བརྩེ་བས། །སྐྱེ་བོ་གཞན་ནི་
སྒྲོལ་བ་མཛད།། །།བམ་པོ་བཅུ་པ། ལྷའི་བུ་ཚོར་བས་མནར་གྱིས་གསོལ་པ།ཚོར་བ་བདག་ཏུ་བགྱི་མ་མཆིས། །སེམས་མ་མཆིས་ཤིང་རྩོལ་མ་མཆིས། །བསམ་གཏན་མཛད་པ་ཆེ་ཁྱོད་ཀྱིས། །ཚོར་བ་ཆུ་བུར་ལྟ་བུར་མཁྱེན། །ལྷའི་བུ་
ཚོར་བ་སྟོན་པས་གསོལ་པ། ངོ་བོ་ཉིད་ཀྱིས་དངོས་མེད་པར། །ཚོར་བ་ཁྱོད་ཀྱིས་རབ་ཏུ་མཁྱེན། །རྨི་ལམ་སྡུག་གུའི་དགའ་འདྲ་བ། །དེ་ལ་སོ་སོའི་སྐྱེ་བོ་ཆགས། །ལྷའི་བུ་ཚོར་བ་ལ་ཡོངས་སུ་རྟོགས་པས་གསོལ་པ། ཤེས་རབ་བཅས་པས་ཡོངས་བརྟགས་ན། །ཚོར་བ</font><hr>42-1-102b<br><font size=+2>
འགྲོ་བར་མ་སོང་ཞིང ། །འོང་བ་མེད་ལ་དངོས་མེད་པར། །དེ་ནི་ཐུབ་ཆེན་ཁྱོད་ཀྱིས་གཟིགས། །ལྷའི་བུ་ཚོར་བ་དང་བྲལ་བས་གསོལ་པ། ཚོར་བ་དང་ནི་ཚོར་བ་པོ། །རང་བཞིན་མེད་པར་ཁྱོད་ཀྱིས་གཟིགས། །ཟབ་མོ་བལྟ་དཀའི་ཚིག་དེ་ཡང ། །ཁྱོད་ཀྱིས་སེམས་ཅན་
རྣམས་ལ་བསྟན། །ལྷའི་བུ་ཚོར་བའི་རྒྱུད་ལ་ངེས་པས་གསོལ་པ། ཚོར་བ་དེ་ནི་ཀུན་རྫོབ་ཙམ། །དོན་དམ་ཉིད་དུ་མི་དམིགས་ཏེ། །ཁྱོད་ཀྱིས་སེམས་ཅན་དེར་བཏུལ་བས། །འགྲོ་བ་ཐེ་ཚོམ་མ་མཆིས་གྱུར། །ལྷའི་བུ་ཚོར་བ་ལ་མཁས་པས་གསོལ་པ། ཚོར་བའི་ཕུང་
པོ་མཁས་པ་པོ། །མཁའ་ལ་རླུང་གི་དཀྱིལ་འཁོར་བཞིན། །བྱིས་པའི་བློ་ཅན་རྨོངས་བགྱིད་པ། །དེ་ནི་ཁྱོད་ཀྱིས་ཡང་དག་གཟིགས། །ལྷའི་བུ་ཚོར་བ་མངོན་པར་ཤེས་པས་གསོལ་པ། ཚོར་བའི་ཕུང་པོ་མངོན་མཁྱེན་པ། །རིག་ཅིང་རིག་པའི་མཐར་བྱོན་པའི། །
མཁས་པ་རྣམས་ཀྱི་མཆོག་ཁྱོད་ཀྱིས། །ཚོར་བ་བདག་མེད་རབ་ཏུ་གཟིགས། །ལྷའི་བུ་ཚོར་བ་ལས་རྒལ་བས་གསོལ་པ། རྐང་གཉིས་གཙོ་བོ་དམ་པ་ཁྱོད། །རྒལ་དཀའ་ཚོར་བའི་མཚོ་ལས་རྒལ། །འདམ་ལ་རྒལ་ཅིང་སྡིག་མེད་པ། །བྱང་ཆུབ་མཆོག་འདི་སངས་
རྒྱས་གྱུར། །ལྷའི་བུ་ཚོར་བ་ལས་བྱུང་གིས་གསོལ་པ། རྣམ་པར་འདྲེན་པས་འཇིག་རྟེན་དུ། །ཚོར་བ་རྣམས་ནི་འབྱུང་མཁྱེན་ནས། །ཚོར་བའི་ཕུང་པོ་རབ་རྒལ་ཏེ། །སངས་རྒྱས་འཇིག་རྟེན་ཆགས་མི་མངའ། །ལྷའི་བུ་ཚོར་བ་རིག་པས་གསོལ་པ། མི་རྣམས་
དག་ལ་གང་འཆིང་བའི། །ཚོར་བ་ཐམས་ཅད་ཁྱོད་ཀྱིས་མཁྱེན། །ཉོན་མོངས་ཞགས་པས་འཆིང་འགྱུར་བ། །དེ་ཡི་རང་བཞིན་ཁྱོད་ཀྱིས་གཟིགས། །ལྷའི་བུ་སེམས་ལ་མཁས་པས་གསོལ་པ། ཁྱོད་ཀྱི་སེམས་ཀྱིས་ཉོན་མོངས་ཕམ། །བདུད་རྣམས་ཀྱང་ནི་སྤ་བཀོང་སྟེ། །
སེམས་དེ་རང་བཞིན་མ་མཆིས་པར། །ཐུབ་པ་ཆེན་པོ་ཁྱོད་ཀྱིས་གཟིགས། །ལྷའི་བུ་སེམས་ཡོངས་སུ་ཤེས་པས་གསོལ་པ། ཇི་ལྟར་སྒྱུ་མའི་མཁན་པོ་ཡིས། །སྒྱུ་མ་སྣ་ཚོགས་སྤྲུལ་པ་བཞིན། །སེམས་ནི་བདེ་གཤེགས་ཁྱོད་ཀྱིས་མཁྱེན། །དེ་ཕྱིར་ཁྱོད་ལ་འཇིག་རྟེན</font><hr>42-1-103a<br><font size=+2>
མཆོད། །ལྷའི་བུ་སེམས་ལ་ཡང་དག་པར་རྟོགས་པས་གསོལ་པ། །སྒྱུ་མའི་མཁན་ནམ་སློབ་མ་བཞིན། །གང་གིས་འགྲོ་བ་འདི་བཅིངས་པའི། །སེམས་དེ་ཁྱོད་ཀྱིས་ཡང་དག་བརྟགས། །དེ་ནི་ཁྱོད་ཀྱིས་ཇི་བཞིན་མཁྱེན། །ལྷའི་བུ་སེམས་ཀྱི་སྤྱོད་ཡུལ་
ལ་སྤྱོད་པས་གསོལ་པ། སེམས་ཀྱི་སྤྱོད་ཡུལ་ཁྱོད་ཀྱིས་མཁྱེན། །རྣམ་པར་འདྲེན་པ་རྨི་ལམ་ན། །ཇི་ལྟར་ཚོགས་ཀྱི་གྲངས་བཞིན་དུ། །བྱིས་པའི་སེམས་རྨོངས་བགྱིད་པར་གཟིགས། །ལྷའི་བུ་སེམས་ཀྱི་དབང་ཕྱུག་གིས་གསོལ་པ། །དུལ་གྱུར་ལས་སུ་རུང་བ་ཡི། །སེམས་
ཀྱི་རང་བཞིན་རྟོག་མེད་པ། །གང་ལ་འཇིག་རྟེན་གཏིང་མི་རྙེད། །མཚན་ཉིད་བརྟན་པ་ཁྱོད་ཀྱིས་གཟིགས། །ལྷའི་བུ་སེམས་ལ་དཔའ་བས་གསོལ་པ། གང་གིས་སེམས་ལ་སེམས་མེད་ཤེས། །མཁས་པ་སྒྱིད་ལུག་མི་འགྱུར་ཞིང ། །བདུད་སྡེ་རབ་ཏུ་འདུལ་བགྱིད་པ། །དེ་དག་འདིར་
ནི་དཔའ་ཞེས་བགྱི། །ལྷའི་བུ་སེམས་ཀྱིས་ཡང་དག་འཕགས་ཀྱིས་གསོལ་པ། གང་དག་སེམས་ལ་སེམས་མེད་ཤེས། །དེ་དག་སངས་རྒྱས་སྲས་ལགས་ཏེ། །དཔའ་ཆེན་སངས་རྒྱས་ཆོས་རྣམས་ལ། །སྐྱེས་བུ་དེ་དག་ཡང་དག་འཕགས། །ལྷའི་བུ་ཞི་བའི་སེམས་ཀྱིས་གསོལ་པ། 
གང་གིས་སེམས་ལ་དབང་བགྱིས་པ། །སེམས་ཅན་དེ་དག་ཞི་རབ་ཞི། །བདུད་ཀྱི་ཞགས་ལས་རབ་གྲོལ་བས། །དེ་དག་བདུད་ཀྱི་དབང་མི་མཆི། །ལྷའི་བུ་སེམས་མཉེན་པས་གསོལ་པ། མི་རྣམས་གང་དག་སེམས་མཉེན་ཞིང ། །བསྙེན་པར་དཀའ་དང་དཔའ་བ་དང ། །ཁྱོད་ཀྱི་བསྟན་
ལ་གང་མོས་པ། །དེ་དག་འདོད་པར་ཞུམ་མི་འགྱུར། །ལྷའི་བུ་སེམས་དག་པས་གསོལ་པ། སེམས་དག་ལས་རྣམས་གཙང་གྱུར་ཅིང ། །ཡང་དག་རྟོགས་པས་སྤྱོད་བགྱིད་པ། །དེ་དག་རྒྱལ་བའི་བསྟན་ཐོས་ནས། །ཟབ་མོ་རྣམས་ལ་ཞུམ་མི་འགྱུར། །ལྷའི་བུ་ཆོས་ཉིད་ལ་གནས་
པས་གསོལ་པ། གང་གི་ཡིད་ནི་ཆོས་ཉིད་ལ། །རབ་ཏུ་དགའ་ཞིང་ཐོགས་མེད་པ། །དེ་དག་མི་དབང་སྲས་པོ་སྟེ། །ཞི་བའི་སར་ནི་ཕྱིན་པ་ལགས། །ལྷའི་བུ་ཆོས་ལ་སེམས་པས་གསོལ་པ། ཆོས་རྣམས་ཐམས་ཅད་ཆོས་དབྱིངས་སུ། །འདྲེན་པ་དེ་ལ་བསླབས་པ་རྣམས། །ཆོས</font><hr>42-1-103b<br><font size=+2>
ཉིད་ལ་ནི་གང་སེམས་པ། །དེ་དག་སྤྱོད་ཡུལ་མ་ཡིན་མེད། །ལྷའི་བུ་ཆོས་ཀྱི་དབྱིངས་ལ་ངེས་པར་བྱུང་གིས་གསོལ་པ། མི་མཆོག་ཁྱོད་ཀྱི་སྲས་ཀྱི་རྣམས། །ཆོས་ཀྱི་དབྱིངས་ལ་ངེས་བྱུང་སྟེ། །འདྲེན་པ་ཁྱོད་ཀྱི་སྲས་དེ་དག་།མཚན་ཉིད་གཅིག་གིས་ངེས་བྱུང་ལགས། །ལྷའི་
བུ་ཆོས་ཀྱི་དབྱིངས་ཀྱི་སྤྱོད་ཡུལ་གྱིས་གསོལ་པ། །ཆོས་རྣམས་ཀུན་གྱི་སྤྱོད་ཡུལ་ནི། །ཆོས་ཀྱི་དབྱིངས་ཞེས་རྒྱལ་བས་གསུངས། །དཔའ་བོ་ཁྱོད་ནི་གང་སྤྱོད་པའི། །ཡེ་ཤེས་དེ་ནི་བསམ་མི་ཁྱབ། །ལྷའི་བུ་ཆོས་ཀྱི་དབྱིངས་ལ་ཞུགས་པས་གསོལ་པ། །ཆོས་ཀྱི་དབྱིངས་ལ་
གང་ཞུགས་པ། །དེ་དག་ཡེ་ཤེས་བསམ་ཡས་ཏེ། །སངས་རྒྱས་ཆོས་ལ་ཐེ་ཚོམ་མེད། །སེམས་ཅན་བསམ་ལ་དེ་དག་མཁས། །ལྷའི་བུ་ཆོས་ཀྱི་དབྱིངས་ལ་བབ་ཀྱིས་གསོལ་པ། གང་དག་ཆོས་ཀྱི་མཚན་ཉིད་གཅིག་།ཆོས་ཀྱི་དབྱིངས་ལ་བབ་པ་རྣམས། །དེ་དག་སྤོབས་
པའི་སྟོབས་བསྐྱེད་པ། །བསམ་གྱིས་མི་ཁྱབ་ཐོབ་པར་འགྱུར། །ལྷའི་བུ་ཆོས་ཀྱི་དབྱིངས་ལ་འཇིགས་པ་མེད་པས་གསོལ་པ། གང་དག་དེ་དག་གནས་པ་ཡི། །འཇིགས་པ་མེད་པ་ཐོབ་མེད་པས། །དེ་དག་རྣམས་ཀྱི་སྤོབས་དང་སྟོབས། །དེ་ལ་མཚུངས་པ་མེད་པ་འབྱུང ། །ལྷའི་
བུ་ཆོས་ཀྱི་དབྱིངས་ལ་མཁས་པས་གསོལ་པ། ཁྱོད་ནི་ཆོས་དབྱིངས་མཁས་པ་སྟེ། །ཆོས་རྣམས་ཀུན་ལ་ཤིན་ཏུ་མཁས། །ལག་མཐིལ་སྐྱུ་ར་ར་བཞག་བཞིན། །ཆོས་ཀྱི་དབྱིངས་ཀྱང་རྣམ་པར་སྟོན། །ལྷའི་བུ་ཆོས་ཀྱི་དབྱིངས་ལ་གནས་པས་གསོལ་པ། ཆོས་རྣམས་རང་བཞིན་
མེད་གཟིགས་པས། །ཁྱོད་ནི་ཆོས་ཀྱི་དབྱིངས་ལ་བཞུགས། །མི་གནས་ཞུམ་པ་མ་མཆིས་ཏེ། །བཟུང་བ་མ་མཆིས་བཏང་མ་མཆིས། །ལྷའི་བུ་ཆོས་ཀྱི་དབྱིངས་ལ་སྤྱོད་པས་གསོལ་པ། སངས་རྒྱས་སྤྱོད་ཡུལ་གང་ལགས་པའི། །ཆོས་ཀྱི་དབྱིངས་ལ་ཁྱོད་སྤྱོད་དེ། །བར་
སྣང་མཁའ་དང་འདྲ་བ་ཡི། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་དབྱིངས་ལ་རྟོན་པས་གསོལ་པ། གང་དང་གང་གི་སྒོ་དག་ནས། །སྐྱེས་བུ་དམ་པ་སྟོན་མཛད་པ། །དེ་ཡི་སྒོ་ནས་ཆོས་དབྱིངས་སྟོན། །དེ་ཕྱིར་རྟགས་དང་གཟུགས་མ་མཆིས། །ལྷའི་བུ་ཆོས</font><hr>42-1-104a<br><font size=+2>
ཀྱི་དབྱིངས་ལ་བརྩོན་པས་གསོལ་པ། མངོན་པར་བརྩོན་པས་ཆོས་ཀྱི་དབྱིངས། །སྐྱེས་བུ་དམ་པ་ཁྱོད་ཀྱིས་མཁྱེན། །བརྩོན་པས་རྫོགས་པའི་སངས་རྒྱས་རྣམས། །ཡེ་ཤེས་ཕ་རོལ་ཕྱིན་པར་གྱུར། །ལྷའི་བུ་ཆོས་ཀྱིས་ཚིམ་གྱིས་གསོལ་པ། དཔའ་བོ་ཁྱོད་
ཀྱིས་སྐྱེ་བོ་འདི། །ཆོས་ཀྱིས་རབ་ཏུ་ཚིམ་པར་མཛད། །ཆོས་ཀྱི་དབྱིངས་ནི་རྣམ་མཁྱེན་པས། །འདྲེན་པ་བྱང་ཆུབ་མཆོག་ལ་བཞུགས། །ལྷའི་བུ་ཆོས་ཉིད་ཀྱི་གཏིང་རྙེད་པས་གསོལ་པ། གཏིང་རྙེད་གྱུར་པའི་འགྲོ་བ་ཀུན། །འདྲེན་པ་ཁྱོད་ཀྱི་ཞལ་དུ་ལྟ། །ཆོས་དབྱིངས་རྣམ་
པར་མཁྱེན་པ་ཡི། །འདྲེན་པ་ཁྱོད་ལ་ཕྱག་ཀྱང་འཚལ། །ལྷའི་བུ་གནས་ཤེས་པ་ལ་རབ་ཏུ་གནས་པས་གསོལ་པ། མི་མཆོག་འདྲེན་པ་སངས་རྒྱས་ཀྱི། །ཡེ་ཤེས་གནས་འདི་ཆོས་དབྱིངས་ཏེ། །རྣམ་པར་འདྲེན་པ་སྟོབས་བཅུ་པོ། །གང་ལ་སྤྱོད་པ་དེ་ལགས་སོ། །ལྷའི་བུ་
གནས་ལ་གནས་པས་གསོལ་པ། ཆོས་ཀྱི་དབྱིངས་ནི་གནས་ཆེན་ཏེ། །ཐམས་ཅད་མཁྱེན་པ་བཞུད་པའི་ལམ། །དེ་ནི་ཆོས་རྣམས་ཐམས་ཅད་ཀྱང ། །མཚན་ཉིད་གཅིག་པར་ཤེས་པ་ལགས། །ལྷའི་བུ་གནས་མངོན་པར་ཤེས་པས་གསོལ་པ། ཁྱོད་ནི་ཆོས་དབྱིངས་
མངོན་པར་མཁྱེན། །མཚན་ཉིད་གཅིག་ལ་མཁས་པ་སྟེ། །སེམས་ཅན་ཀུན་གྱི་བསམ་པ་ཡང ། །རྐང་གཉིས་གཙོ་བོ་ཁྱོད་ཀྱིས་མཁྱེན། །ལྷའི་བུ་གནས་ནས་ངེས་པར་བྱུང་གིས་གསོལ་པ། རྣམ་པར་འདྲེན་པ་ཁྱོད་ཀྱི་སྲས། །གནས་སུ་བྱ་བ་ཆོས་དབྱིངས་ཤེས། །གསལ་
བར་འཚལ་བའི་མཁས་པ་རྣམས། །རང་བྱུང་ཉིད་དུ་ངེས་པར་བྱུང ། །ལྷའི་བུ་གནས་ལ་བསླབས་པས་གསོལ་པ། ཆོས་ཀྱི་དབྱིངས་ལ་གང་བསླབས་པའི། །སྐྱེས་བུ་དེ་དག་བྱང་ཆུབ་ཞུགས། །རང་བྱུང་ཉིད་དུ་གནས་རྙེད་པས། །དེ་དག་རྐང་གཉིས་མཆོག་ཏུ་འགྱུར། །ལྷའི་བུ་གནས་
མེད་པ་ལ་མཁས་པས་གསོལ་པ། གནས་མེད་པ་ནི་གང་འཚལ་བ། །དེ་དག་བདེ་གཤེགས་དགོངས་ལ་མོས། །བདུད་རྣམས་བྱེ་བ་སྟོང་གིས་ཀྱང ། །དེ་དག་རྨོངས་པར་ཡོད་མི་ནུས། །ལྷའི་བུ་གནས་མེད་པ་མངོན་པར་ཤེས་པས་གསོལ་པ། གནས་མེད་གང་གིས་རིག་གྱུར་པ། །


</font><hr>42-1-104b<br><font size=+2>
དེ་དག་བདག་ཅག་བདུད་ཀྱི་ཚོགས། །བྱེ་བས་བྱང་ཆུབ་མི་སྐྱོད་ཅེས། །མཁས་པ་དེ་དག་ཤིན་ཏུ་དགའ། །ལྷའི་བུ་གནས་མེད་པའི་དགོངས་པ་ལ་མཁས་པས་གསོལ་པ། གནས་མེད་འདུ་ཤེས་མཁས་པ་ནི། །ཆོས་ཉིད་ལ་ནི་རབ་གནས་ཏེ། །སྡིག་ཅན་བདུད་རྣམས་བཤལ་བ་ནི། །
ཇི་ལྟར་རྟ་ཡིས་ཤིང་རྟ་བཞིན། །ལྷའི་བུ་གནས་མེད་པ་ལ་མཁས་པས་གསོལ་པ། མཚན་ཉིད་གཅིག་ལ་མཁས་པ་པོ། །ཆོས་ཀྱི་དབྱིངས་ལ་བགེགས་བགྱིད་པའི། །བདུད་ཀྱི་ལས་ནི་གནས་མེད་དེ། །གནས་མེད་དོ་ཞེས་རྒྱལ་བས་གསུངས། །ལྷའི་བུ་གནས་དང་གནས་མ་
ཡིན་པ་རྟོགས་པས་གསོལ་པ། གནས་དང་དེ་བཞིན་གནས་མིན་པ། །བྱིས་པའི་བློ་ཅན་རྣམས་ལ་བསྟན། །རང་གིས་དེ་ནི་ཐུགས་ཆུད་ནས། །སེམས་ཅན་རྣམས་ལ་ཁྱོད་ཀྱིས་བསྟན། །ལྷའི་བུ་སྦྱིན་པ་ལ་མཁས་པས་གསོལ་པ། སྔོན་ཆད་རྒྱུ་ནི་གང་དག་དང ། །ལས་འདྲ་
འབྱུང་བ་མ་འཚལ་བའི། །རྒྱུ་དེ་ཁྱོད་ཀྱིས་ཐུགས་སུ་ཆུད། །ལས་ཀྱི་གནས་ཀྱང་རབ་ཏུ་མཁྱེན། །ལྷའི་བུ་ལས་ལ་མཁས་པས་གསོལ་པ། ཆགས་དང་ཞེ་སྡང་གཏི་མུག་ནི། །ལས་ཀྱི་རྒྱུ་ཞེས་ཁྱོད་ཀྱིས་མཁྱེན། །གང་གིས་རྒྱུ་ཡིས་བགྱིས་དེ་ཡང ། །གང་ཟག་མཆོག་གིས་
ཐུགས་སུ་ཆུད། །ལྷའི་བུ་མ་འོངས་པ་ལ་མཁས་པས་གསོལ་པ། མ་འོངས་པ་ཡི་དུས་དག་ན། །མི་རྣམས་ལས་གང་བགྱིད་འགྱུར་བ། །དེ་ཡི་རྒྱུ་དང་ལེན་པ་དང ། །གནས་དང་ལས་ཀྱང་ཁྱོད་ཀྱིས་མཁྱེན། །ལྷའི་བུ་ད་ལྟར་བྱུང་བ་ལ་ལྟ་བས་གསོལ་པ། ཕྱོགས་བཅུའི་
འཇིག་རྟེན་འདི་དག་གི་།སེམས་ཅན་རྣམས་དང་རྒྱུ་དང་ལས། །གནས་དང་ལས་ཀྱི་ལེན་པ་རྣམས། །ཀུན་ཀྱང་འདྲེན་པ་ཁྱོད་ཀྱིས་མཁྱེན། །ལྷའི་བུ་སྟོབས་ཀྱི་སྤྱོད་ཡུལ་གྱིས་གསོལ་པ། མི་དབང་ཁྱོད་ཀྱིས་མ་གཟིགས་པའི། །ལས་དང་རྒྱུ་དག་མ་མཆིས་ཏེ། །གནས་དང་
སྐྱེ་བའང་མ་མཆིས་སོ། །དེ་བས་ཁྱོད་ནི་གང་ཟག་མཆོག་།ལྷའི་བུ་སྟོབས་ལ་མངོན་པར་དགའ་བས་གསོལ་པ། ལས་དང་རྒྱུ་དང་དེ་བཞིན་གནས། །དུས་ལ་རྣམ་སྨིན་རྣམ་གསུམ་དང ། །ཇི་ལྟར་དེ་ཡི་ལེན་པ་ཡང ། །ཁྱོད་ཀྱིས་མཁྱེན་པས་དེ་སླད་མཆོད། །ལྷའི་བུ་སྟོབས</font><hr>42-1-105a<br><font size=+2>
ཀྱི་བློ་གྲོས་ཀྱིས་གསོལ་པ། རྒྱུ་དང་ལས་དང་ལེན་པ་དང ། །རྣམ་པར་སྨིན་དང་རྐྱེན་དང་གནས། །རང་བཞིན་བྲལ་བར་ཁྱོད་ཀྱིས་མཁྱེན། །དེ་ཕྱིར་རྒྱལ་བ་མཉམ་པ་མེད། །ལྷའི་བུ་སྟོབས་ཀྱིས་བྱུང་གིས་གསོལ་པ། རྒྱུ་དང་ལས་དང་ལེན་པ་དང ། །གནས་དང་རྐྱེན་
དང་རྒྱུ་རྣམས་དང ། །རྣམ་སྨིན་སོ་སོ་ཡང་དག་རིག་།ཐམས་ཅད་སྟོང་པར་རབ་ཏུ་མཁྱེན། །ལྷའི་བུ་སྟོབས་ལ་དགའ་བས་གསོལ་པ། རྒྱུ་དང་ལས་དང་ལེན་པ་དང ། །གནས་དང་རྐྱེན་དང་རྒྱུད་ཀྱི་རྣམས། །ཁྱོད་ཉིད་རང་གིས་མངོན་མཁྱེན་ཏེ། །རང་བཞིན་མེད་པར་བསྟན་པར་
མཛད། །ལྷའི་བུ་སྟོབས་ཀྱིས་རྣམ་པར་རྩེ་བས་གསོལ་པ། རྒྱུ་དང་ལས་དང་ལེན་པ་དང ། །གནས་དང་རྐྱེན་དང་རྒྱུད་ཀྱི་རྣམས། །འཕོ་མེད་དབང་ཕྱུག་མེད་པ་སྟེ། །རྟེན་ཅིང་འབྱུང་བར་ཁྱོད་ཀྱིས་མཁྱེན། །ལྷའི་བུ་སྟོབས་ཀྱིས་འཕགས་ཀྱིས་གསོལ་པ། རྒྱུ་དང་རྐྱེན་དང་ལས་
རྣམས་དང ། །རྣམ་པར་སྨིན་པ་སྟེན་པ་རྣམས། །དེ་ཀུན་རང་བཞིན་སྟོང་ངོ་ཞེས། །སེང་གེའི་ང་རོར་ཁྱོད་ཀྱིས་གསུངས། །ལྷའི་བུ་སྟོབས་ཀྱི་རྗེས་སུ་འབྲང་བས་གསོལ་པ། འཇིག་རྟེན་ལས་ནི་གང་ཞིག་གིས། །ཁམས་ནི་གང་ཞིག་སྤེལ་གྱུར་པ། །དེ་དག་རྐང་གཉིས་གཙོ་
བོས་མཁྱེན། །དེ་བས་ཁྱོད་ནི་དོ་ཟླ་མེད། །ལྷའི་བུ་སྟོབས་དང་ལྡན་གྱིས་གསོལ་པ། ཁམས་གང་ལ་ནི་བསྟེན་བགྱིས་ཤིང ། །གང་གིས་མངོན་པར་ལས་བགྱིས་དང ། །དེ་ཡི་རྣམ་སྨིན་ཅི་འདྲ་བ། །དེ་ཀུན་སྤྱན་དང་ལྡན་པས་མཁྱེན། །ལྷའི་བུ་སྟོབས་ཡང་དག་འཕགས་ཀྱིས་
གསོལ་པ། ཁམས་གང་ལ་ནི་བསྟེན་བགྱིས་ཤིང ། །ཅི་འདྲའི་རང་བཞིན་གྱུར་པ་ཡི། །སེམས་ཅན་ཐམས་ཅད་ཁྱོད་ཀྱིས་མཁྱེན། །ཕྱག་གི་སོར་མོ་ལྔ་དང་འདྲ། །ལྷའི་བུ་སྟོབས་ལ་སྤྱོད་པས་གསོལ་པ། ཁམས་གང་ལ་ནི་བསྟེན་བགྱིས་ཤིང ། །བཤེས་གཉེན་ཅི་འདྲ་རྙེད་
གྱུར་ནས། །འདུ་འཛི་ཅི་འདྲ་བགྱིད་གྱུར་པ། །དེ་དག་བླ་ན་མེད་པས་མཁྱེན། །ལྷའི་བུ་སྟོབས་ཀྱི་བྱིན་གྱིས་བརླབས་པས་གསོལ་པ། སྟོབས་ཀྱི་བྱིན་གྱིས་བརླབས་མཁྱེན་ཅིང ། །འདྲེན་པ་དེ་ནི་ཁམས་དང་ནི། །འདུ་འཛི་བཤེས་གཉེན་ཚོགས་ཀྱི་རྣམས། །དེ་དག་མི་མཆོག་ཁྱོད་ཀྱིས</font><hr>42-1-105b<br><font size=+2>
མཁྱེན། །ལྷའི་བུ་ཁམས་ངེས་པས་གསོལ་པ། ཁམས་དེ་དང་ནི་ལེན་པ་དང ། །བཤེས་གཉེན་དེ་དང་དེ་འགྲོགས་པ། །དེ་ལ་ཁྱོད་ཀྱི་མཁྱེན་པ་དེས། །དེ་ཕྱིར་ཐེ་ཚོམ་ཡོང་མི་མངའ། །ལྷའི་བུ་ཁམས་ལ་རྟེན་པས་གསོལ་པ། སེམས་ཅན་གང་ན་གནས་གནས་པའི། །
འཁོར་བ་དེ་དང་ཁམས་དེ་དང ། །སྤྱོད་དང་སྐད་དང་འགྲོ་བ་རྣམས། །མི་མཆོག་ཁྱོད་ཀྱིས་རབ་ཏུ་མཁྱེན། །ལྷའི་བུ་ཁམས་ལ་མཁས་པས་གསོལ་པ། ཡེ་ཤེས་གང་གིས་ཁམས་དེ་ནི། །འདྲེན་པས་མངོན་པར་མཁྱེན་པ་ཡི། །མཁྱེན་དེ་མཁྱེན་པས་སྟོང་ངོ་ཞེས། །བླ་མཆོག་
མངའ་བས་ཡང་དག་བསྟན། །ལྷའི་བུ་ཁམས་ནས་ངེས་པར་འབྱུང་གིས་གསོལ་པ། ཁམས་གང་ལ་ནི་བསྟེན་བགྱིས་ན། །འདུས་བྱས་དག་ལ་ཇི་སྲིད་གནས། །དེ་ནི་ཁྱོད་ཀྱིས་ཇི་བཞིན་མཁྱེན། །ཁྱོད་ལ་དོ་ཟླ་མ་མཆིས་སོ། །ལྷའི་བུ་ཁམས་ཀྱི་རྗེས་སུ་སོང་བས་གསོལ་པ། 
ཁམས་གང་ལ་ནི་བསྟེན་བགྱིས་པས། །ཡོན་ཏན་ཇི་སྙེད་བསྐྱེད་པ་དང ། །རྣམ་པར་སྨིན་དང་འབྲས་བུ་དག་།དེ་དག་མ་ལུས་ཁྱོད་ཀྱིས་མཁྱེན། །ལྷའི་བུ་ཁམས་ལ་ཡང་དག་ཞུགས་པས་གསོལ་པ། ཁམས་གང་ལ་ནི་བསྟེན་བགྱིད་ཅིང ། །འགྲོ་བ་ཅི་འདྲ་འདོད་བགྱིད་པ། །
དེ་ཡང་ཁྱོད་ཀྱིས་ཐོགས་མེད་མཁྱེན། །དེ་ཕྱིར་ཁྱོད་ནི་མཁས་པས་མཆོད། །ལྷའི་བུ་ལམ་མངོན་པར་ཤེས་པས་གསོལ་པ། ཁམས་གང་ལ་ནི་བསྟེན་བགྱིས་པས། །འགྲོ་བ་ཅི་འདྲ་མཆི་བ་ཡི། །སེམས་ཅན་རྣམས་ཀྱི་ལམ་དག་ཀྱང ། །ཡེ་ཤེས་མཁས་པ་ཁྱོད་ཀྱིས་མཁྱེན། །
ལྷའི་བུ་ལམ་ལ་མི་འཇིགས་པས་གསོལ་པ། སེམས་ཅན་ལོག་པ་ཉིད་ངེས་ཤིང ། །མྱ་ངན་འདས་འགྲོ་སྐལ་མེད་པ། །ཕུང་པོ་གསུམ་པོ་དེ་དག་ལ། །ཁྱོད་ཀྱི་ཡེ་ཤེས་ངེས་པར་འཇུག་།ལྷའི་བུ་ལམ་གྱིས་ངེས་པར་བྱུང་གིས་གསོལ་པ། སེམས་ཅན་ཡང་དག་ཉིད་ངེས་ཏེ། །
ངན་འགྲོར་འགྲོ་བའི་སྐལ་མེད་པ། །དེ་ལ་འཇིག་རྟེན་སྒྲོན་མ་ཁྱོད། །རྟོགས་པ་ཐོགས་པ་མེད་པར་འཇུག་།ལྷའི་བུ་ལམ་ལ་མོས་པས་གསོལ་པ། མ་ངེས་ཕུང་པོར་གྱུར་པ་ལ། །གང་ཟག་གང་རྣམས་གནས་པ་རྣམས། །དེ་ལ་ངན་སོང་ངན་འགྲོ་དང ། །མྱ་ངན་འདས་པའང་ཁྱོད</font><hr>42-1-106a<br><font size=+2>
ཀྱིས་བསྟན། །ལྷའི་བུ་སྟོབས་ཀྱི་བརྡས་གསོལ་པ། སངས་རྒྱས་བརྡ་ཙམ་ཉིད་ལགས་ཏེ། །དེ་བཞིན་སྟོབས་དང་ཡེ་ཤེས་དང ། །མི་འཇིགས་བཞི་ཡང་དེ་བཞིན་དུ། །ཀུན་རྫོབ་ཅེས་ནི་ཐུབ་པས་གསུངས། །ལྷའི་བུ་ཡང་དག་པ་མཐོང་བས་གསོལ་པ། སངས་
རྒྱས་སངས་རྒྱས་ཆོས་རྣམས་མེད། །ཡེ་ཤེས་གནས་པ་གཞན་ཡང་མེད། །དོན་དམ་ཉིད་དུ་བསྟན་ཏོ་ཞེས། །དེ་བཞིན་གཤེགས་པ་ཁྱོད་ཀྱིས་མཁྱེན། །ལྷའི་བུ་སྟོབས་ལ་གནས་ཀྱིས་གསོལ་པ། སངས་རྒྱས་ཆོས་ལ་སྟོབས་གནས་པས། །དེས་ན་དེ་ལ་འཇིགས་
མེད་དེ། །རྒྱལ་བ་དེ་བཞིན་གཤེགས་ཀྱི་སྲས། །ཇི་ལྟར་འདོད་དགུར་རྣམ་པར་འཕྲུལ། །ལྷའི་བུ་ཆོས་ལ་འཇིགས་མེད་ཀྱིས་གསོལ་པ། ཀུན་རྫོབ་དང་ནི་དོན་དམ་དང ། །དེ་དག་རབ་ཏུ་བསྟན་མཆིས་ཀྱང ། །ཀུན་རྫོབ་དང་ནི་དོན་དམ་དང ། །བརྡ་ཡང་དམིགས་སུ་
མ་མཆིས་སོ། །ལྷའི་བུ་ཡེ་ཤེས་ལྷུར་ལེན་གྱིས་གསོལ་པ། བརྗོད་པ་ཐམས་ཅད་རྣམ་པ་གཞན། །ཆོས་ཀྱི་མཚན་ཉིད་རྣམ་པ་གཞན། །མཚན་ཉིད་མ་མཆིས་བརྗོད་མ་མཆིས། །ཁྱོད་ཀྱིས་ཆོས་ཀྱི་མཚན་ཉིད་གཟིགས། །ལྷའི་བུ་ལམ་ལ་བརྩོན་པས་གསོལ་པ། 
ངེས་པར་གྱུར་པའི་སེམས་ཅན་རྣམས། །གཞན་གྱི་རྒྱུད་མཆིའི་གནས་མ་མཆིས། །ལོག་པར་ངེས་རྣམས་ཀུན་ཏུ་འགྲོར། །དྲང་སྲོང་ཆེན་པོ་ཁྱོད་ཀྱིས་གཟིགས། །ལྷའི་བུ་མོས་པའི་སྟོབས་ཀྱིས་གསོལ་པ། ཁམས་གང་ལ་ནི་བསྟེན་བགྱིས་ཏེ། །གང་རྣམས་ཅི་འདྲར་མོས་
འགྱུར་ཞིང ། །འདོད་ཆགས་ཁམས་ལ་སྡུག་བསྔལ་བ། །དེ་དག་ཐུབ་ཆེན་ཁྱོད་ཀྱིས་གཟིགས། །ལྷའི་བུ་མི་སྡུག་པ་ལས་ངེས་པར་བྱུང་གིས་གསོལ་པ། མ་མཆིས་ཡོངས་སུ་བརྟགས་པས་ན། །འདོད་ཆགས་ཁམས་ནི་རབ་ཏུ་བྱུང ། །དེ་ལ་མོས་པ་ངེས་འབྱུང་བ། །
དེ་དག་ཁྱོད་ཀྱིས་ཇི་བཞིན་གཟིགས། །ལྷའི་བུ་བྱམས་པས་ངེས་པར་བྱུང་གིས་གསོལ་པ། མ་མཆིས་ཡོངས་སུ་བརྟགས་པས་ན། །ཞེ་སྡང་ཁམས་ནི་རབ་ཏུ་བྱུང ། །དེ་ལ་མོས་པ་ངེས་འབྱུང་བ། །དེ་དག་ཁྱོད་ཀྱིས་ཇི་བཞིན་གཟིགས། །ལྷའི་བུ་རྐྱེན་འདིས་ངེས་པར་བྱུང</font><hr>42-1-106b<br><font size=+2>
གིས་གསོལ་པ། མ་མཆིས་ཡོངས་སུ་བརྟགས་པས་ན། །གཏི་མུག་ཁམས་ནི་རབ་ཏུ་བྱུང ། །དེ་ལ་མོས་པ་ངེས་འབྱུང་བ། །དེ་དག་ཁྱོད་ཀྱིས་ཇི་བཞིན་གཟིགས། །ལྷའི་བུ་གཏོང་བས་ངེས་པར་བྱུང་གིས་གསོལ་པ། འཚོ་མེད་འཇིགས་པ་རྙེད་པ་དག་།སེར་སྣ་
མངོན་པར་འཕེལ་འགྱུར་ཏེ། །དེ་ལ་མོས་པ་ངེས་འབྱུང་བ། །དེ་དག་ཐུབ་ཆེན་ཁྱོད་ཀྱིས་གཟིགས། །ལྷའི་བུ་དགེ་བའི་བཤེས་གཉེན་གྱིས་ངེས་པར་བྱུང་གིས་གསོལ་པ།སྡིག་པའི་གྲོགས་དང་འགྲོགས་པས་ན། །འཐུན་པའི་ཁམས་ནི་རབ་ཏུ་འབྱུང ། །དེ་ལ་
མོས་པ་འཐོབ་འགྱུར་བ། །དེ་དག་འདྲེན་པས་རྣམ་པར་མཁྱེན། །ལྷའི་བུ་རྣམ་པར་ཤེས་པ་སྙིང་པོར་འཛིན་པས་གསོལ་པ། །འཁོར་བ་ན་ནི་འཁོར་རྣམས་ཀྱིས། །ཅི་འདྲའི་ཁམས་ལ་བསྟེན་པ་དང ། །མོས་པ་དེ་མཐར་ཕྱིན་པ་དག་།ཁྱོད་ཀྱིས་མ་ལུས་རབ་ཏུ་
མཁྱེན། །ལྷའི་བུ་ནན་ཏན་སྙིང་པོར་བྱེད་པས་གསོལ་པ། འཁོར་བ་ན་ནི་འཁོར་རྣམས་ཀྱིས། །གང་གི་རྒྱུས་བྱུང་ནན་ཏན་དང ། །མོས་པ་དེ་ལས་གྱུར་པ་ཡང ། །སྨད་པ་མེད་པ་ཁྱོད་ཀྱིས་གཟིགས། །ལྷའི་བུ་དབང་པོ་ལ་མོས་པས་གསོལ་པ། སེམས་
ཅན་གང་གིས་ཁམས་གང་ལ། །བསྟེན་ན་ཇི་ལྟར་འགྱུར་བ་ཡི། །རྒྱུ་དེ་ཁྱོད་ཀྱིས་རབ་ཏུ་མཁྱེན། །དེས་ན་ཁྱོད་ནི་དགའ་བར་མཛད། །ལྷའི་བུ་དབང་པོ་ལ་སྤྱོད་པས་གསོལ་པ། སྦྱོར་བ་གང་གིས་སྐྱེ་བ་དང ། །གང་གིས་རྒྱ་ཆེན་སྐྱེ་བ་དང ། །དམིགས་པ་དང་ནི་
ཞིང་རྣམས་དང ། །དབང་པོ་ཁྱོད་ཀྱིས་རབ་ཏུ་མཁྱེན། །ལྷའི་བུ་དབང་པོས་ངེས་པར་བྱུང་གིས་གསོལ་པ། འདོད་པའི་སྡུག་བསྔལ་གནོད་གྱུར་དང ། །སྲེད་པ་མངོན་པར་འཇུག་པ་དང ། །སྲིད་པ་ཞི་བར་བགྱི་བའི་དོན། །དེ་དག་སྨྲ་བའི་མཆོག་གིས་མཁྱེན། །ལྷའི་བུ་དབང་པོའི་སྤྱོད་ཡུལ་གྱིས་གསོལ་པ། དབང་པོ་ཉམ་ཆུང་རྣམ་དག་ནི། །གཟུགས་ཀྱི་འདོད་ཆགས་དབེན་པར་འཚལ། །སྲིད་པ་རྣམ་པར་གཞིག་པ་ཡང ། །རྐང་གཉིས་དམ་པས་བསྟེན་པ་མཛད། །ལྷའི་བུ་དབང་པོ་རྣམ་པར་རྒྱལ་བས་གསོལ་པ། དབང་པོ</font><hr>42-1-107a<br><font size=+2>
རྟུལ་པོ་དུར་ཁྲོད་བསྟེན། །རང་གི་འདོད་ཆགས་ཞི་བར་བགྱིད། །རྐང་གཉིས་གཙོ་བོའི་ཞལ་མཐོང་ནས། །སྲེད་དང་བཅས་པ་ཁྱོད་ལ་ལྟ། །ལྷའི་བུ་དབང་པོ་རྟོགས་ཀྱིས་གསོལ་པ། འདོད་ཆགས་ཅན་དང་འདོད་ཆགས་དང ། །ཞི་དང་ཤེས་དང་མི་ཤེས་
དང ། །སྲིད་པ་ཞི་དང་དབང་པོ་རྣམས། །རྣམ་པར་གཟིགས་ན་སྔོན་མ་དམིགས། །ལྷའི་བུ་དབང་པོ་ལ་གནས་པས་གསོལ་པ། ཞེ་སྡང་གཉེན་པོར་གྱུར་པ་ཡི། །གནོད་སེམས་མེད་དང་དབེན་པ་དག་།དབང་པོ་རྟུལ་པོ་སྟེན་པའི་ཚེ། །ཁྱོད་ཀྱིས་འགྲོ་བའི་བསམ་པ་
གཟིགས། །ལྷའི་བུ་དབང་པོ་ལ་བརྩོན་པས་གསོལ་པ། ཞེ་སྡང་གཉེན་པོར་བྱམས་པ་གསུང ། །སེམས་ཅན་ཤེས་པ་རྗེས་སུ་སྐྱེ། །ཞེ་སྡང་ཁམས་ནི་ཞི་བར་བགྱིད། །དེ་དག་མི་མཆོག་ཁྱོད་ཀྱིས་མཁྱེན། །ལྷའི་བུ་དབང་པོ་ཚོལ་བས་གསོལ་པ། གནོད་སེམས་
མེད་དང་བྱམས་པ་དང ། །ཞི་བའི་ངོ་བོ་ཉིད་མ་གཟིགས། །དག་དང་ཉོན་མོངས་མ་དམིགས་ཏེ། །དེས་ན་འཇིག་རྟེན་ཁྱད་པར་འཕགས། །ལྷའི་བུ་དབང་པོ་རྗེས་སུ་འབྲང་གིས་གསོལ་པ། ལོག་པར་རྣམ་པར་རྟོག་པ་དང ། །ལོག་པར་ཉེ་བར་སྟོན་པ་ཡང ། །ཉོན་མོངས་དམ་
ཕྱིར་ཀུན་སྦྱོར་ཏེ། །བཟློག་པས་ཐར་པར་འགྱུར་བ་གཟིགས། །ལྷའི་བུ་ཡེ་ཤེས་ཡང་དག་ཤར་གྱིས་གསོལ་པ། འདོད་ཆགས་ཞེ་སྡང་གཏི་མུག་དང ། །དངོས་ལ་འཛིན་པ་མུན་པ་སྟེ། །བཟློག་པས་སྣང་བ་ཆེན་པོར་འགྱུར། །དེ་ནི་གྲགས་ཆེན་ཁྱོད་ཀྱིས་མཁྱེན། །ལྷའི་བུ་
ཡེ་ཤེས་འདོད་ཆགས་ཆད་པས་གསོལ་པ། འདོད་ཆགས་ཞེ་སྡང་གཏི་མུག་དང ། །མུན་པ་སྣང་བ་དངོས་པོ་རྣམས། །རང་བཞིན་ཉིད་ཀྱིས་མ་མཆིས་ཏེ། །དེ་ནི་རྐང་གཉིས་གཙོ་བོས་གཟིགས། །ལྷའི་བུ་སྣང་བ་འཛིན་གྱིས་གསོལ་པ། སེམས་ཅན་གང་གི་ཤེས་པ་གང ། །
ཇི་ཙམ་ཡོངས་སུ་བསྒྲུབ་བགྱིས་དང ། །སྣོད་དུ་གང་རུང་ཇི་སྙེད་པ། །དེ་དག་མི་མཆོག་ཁྱོད་ཀྱིས་མཁྱེན། །ལྷའི་བུ་དབང་པོ་དང་ཞེ་འགྲས་པས་གསོལ་པ། །ཉོན་མོངས་སྤང་ཕྱིར་ཤེས་གང་གིས། །ཤེས་པ་དེ་ལ་རྟོག་བགྱིད་པ། །དེ་ཡང་སྟོན་པ་ཁྱོད་ཀྱིས་མཁྱེན། །དེ</font><hr>42-1-107b<br><font size=+2>
བས་ཁྱོད་ལ་མངོན་པར་དགའ། །ལྷའི་བུ་དབང་པོ་ལ་དགའ་བས་གསོལ་པ། ཡུལ་དང་དུས་དང་གནས་དག་དང ། །སྤྱོད་པ་རྣམ་པར་བསྒོམ་པ་དང ། །ཉོན་མོངས་སྙོན་མོངས་རྣམ་དག་པ། །ཐུབ་པ་ཁྱོད་ཀྱིས་སྟོང་པར་གཟིགས། །ལྷའི་བུ་ཡེ་ཤེས་རྒྱལ་མཚན་གྱིས་
གསོལ་པ། དབང་པོ་རྣོ་རྟུལ་འབྲིང་དག་དང ། །གང་ཟག་དག་གི་བསམ་པ་དང ། །བཅིངས་དང་ཐར་དང་ཟད་དང་ཤེས། །གཡོ་བ་མེད་པར་ཁྱོད་ཀྱིས་མཁྱེན། །ལྷའི་བུ་དབང་པོའི་རྒྱལ་མཚན་གྱིས་གསོལ་པ། དབང་པོ་རབ་འབྲིང་རྟུལ་བོ་དང ། །ཉོན་མོངས་ཡེ་ཤེས་
ཚོར་བ་དང ། །གདུལ་དང་གདུལ་བར་བགྱིད་པ་དག་།ཁྱོད་ཀྱིས་མཚན་ཉིད་མེད་པར་གསུངས། །ལྷའི་བུ་དབང་པོ་རྣམ་པར་བརྟགས་ཀྱིས་གསོལ་པ། སེམས་ཅན་རྣམས་ཀྱི་བསམ་གཏན་དང ། །རྣམ་ཐར་ཀུན་ནས་ཉོན་མོངས་དང ། །སྙོམས་འཇུག་ཏིང་འཛིན་ལྡང་བ་
དང ། །རྣམ་བྱང་ཐུབ་པ་ཁྱོད་ཀྱིས་མཁྱེན། །ལྷའི་བུ་སྟོབས་ཀྱི་ཤུགས་ཀྱིས་གསོལ་པ། ཞི་བའི་ཏིང་ངེ་འཛིན་བསྟེན་ཏེ། །ཆོས་ཀུན་ངོ་བོ་ཉིད་ཀྱིས་ནི། །རང་བཞིན་མེད་པར་ཁྱོད་ཀྱིས་མཁྱེན། །དེས་ན་ཐམས་ཅད་མཁྱེན་ཅེས་བགྱི། །ལྷའི་བུ་སྟོབས་ཀྱི་གོ་ཅས་
གསོལ་པ། ཆོས་རྣམས་གང་དང་རང་བཞིན་གང ། །ཆོས་གང་གིས་ནི་བརྗོད་བགྱིས་པ། །ཡང་དག་ཇི་བཞིན་ཐུགས་སུ་ཆུད། །དེས་ན་དུས་གསུམ་ཆགས་མི་མངའ། །ལྷའི་བུ་སྟོབས་འདོད་ཀྱིས་གསོལ་པ། ལོག་པར་བརྟགས་པས་ཀུན་ཉོན་མོངས། །རྣམ་པ་བཞི་
ནི་སྐྱེ་བར་འགྱུར། །ལས་ལས་སྐྱེས་པར་དེ་དག་མཁྱེན། །དེས་ན་ཁྱོད་ལ་དོ་ཟླ་མེད། །ལྷའི་བུ་སྟོབས་ཤེས་ཀྱིས་གསོལ་པ། ཉོན་མོངས་རྣམས་དང་ལས་རྣམས་ཀྱི། །གཉེན་པོ་རྣམ་པར་བྱང་བ་དང ། །བསྟན་པའང་ཁྱོད་ཀྱིས་རབ་ཏུ་མཁྱེན། །དེས་ན་ཁྱོད་
ལ་དོ་ཟླ་མེད། །ལྷའི་བུ་སྟོབས་ཀྱི་འོད་ཀྱིས་གསོལ་པ། བསམ་གཏན་རྣམ་ཐར་ལྡང་བ་དང ། །སྙོམས་པར་འཇུག་དང་ཏིང་འཛིན་དང ། །ཀུན་ནས་ཉོན་མོངས་རྣམ་བྱང་དག་།མིང་ཙམ་མོ་ཞེས་ཁྱོད་ཀྱིས་བསྟན། །ལྷའི་བུ་སྟོབས་ལས་བྱུང་གིས་གསོལ་པ།


</font><hr>42-1-108a<br><font size=+2>
བསམ་གཏན་རྣམ་ཐར་རྣམ་བྱང་དང ། །སྙོམས་པར་འཇུག་དང་ཏིང་ངེ་འཛིན། །བག་ཡོད་པ་ལས་བྱུང་བ་སྟེ། །དེ་ལ་ཁྱོད་ཀྱིས་ཡེ་ཤེས་འཇུག་།ལྷའི་བུ་སྟོབས་རྣམ་པར་སྤེལ་གྱིས་གསོལ་པ། དཔའ་བོ་ཁྱོད་ཀྱི་མཁྱེན་པ་ནི། །བསམ་གཏན་ལ་
སོགས་དེ་དག་དང ། །ལྡང་དང་རྣམ་པར་བྱང་ལ་འཇུག་།དེ་ནི་རླུང་ལྟར་ཆགས་པ་མེད། །ལྷའི་བུ་སྔོན་གྱི་མཐའ་ལ་མཁས་པས་གསོལ་པ། བསྐལ་པ་བྱེ་བ་གྲངས་མེད་དུ། །སྲིད་པ་འདི་ན་སྔོན་བཞུགས་ཚེ། །སྲིད་པའི་སྐྱོན་དང་ཡོང་མ་འདྲེས། །དེས་ན་
ཁྱོད་ལ་དོ་ཟླ་མེད། །ལྷའི་བུ་སྔོན་གྱི་མཐའ་ལ་གནས་པས་གསོལ་པ། བསྐལ་པ་བྱེ་བ་གྲངས་མེད་དུ། །བྱང་ཆུབ་གཞལ་ཡས་ཚོལ་མཛད་ཅིང ། །འདྲེན་པས་ཡོངས་སུ་སྤྱད་པས་ན། །དེས་ན་ཁྱོད་ནི་དཔའ་བོ་ལགས། །ལྷའི་བུ་སྔོན་གྱི་མཐའ་ལ་རྟོགས་པས་
གསོལ་པ། སྔོན་མཐར་སྦྱིན་པ་སྣ་ཚོགས་དག་།བློ་མཆོག་གསུངས་ཚེ་གསོལ་པས་ན། །སྤོབས་པ་སྣ་ཚོགས་རབ་མངའ་བར། །རྣམ་པར་འདྲེན་པ་དེས་ངེས་བྱུང ། །ལྷའི་བུ་སྔོན་གྱི་མཐའ་ལ་བྱང་བས་གསོལ་པ། སྔོན་ཆད་འཁོར་བར་སྤྱོད་པའི་ཚེ། །ཚུལ་
རྣམས་ལ་ནི་ཚུལ་མཁས་པ། །འཇིག་རྟེན་སྒྲོན་རྣམས་ཁྱོད་ཀྱིས་གཟིགས། །དེས་ན་ཁྱོད་ནི་ཚུལ་ལ་མཁས། །ལྷའི་བུ་སྔོན་གྱི་མཐའ་ཚར་ཕྱིན་པས་གསོལ་པ། སྔོན་མཐར་ཆོས་རྒྱལ་མང་པོ་ལ། །དཔའ་བོས་སྔན་ཆད་སྤྱོད་མཛད་པས། །ཐམས་ཅད་མཁྱེན་
དུ་ངེས་པར་ཡང ། །སེམས་ཅན་མཁས་ལ་ཕྱག་ཀྱང་འཚལ། །ལྷའི་བུ་སྔོན་གྱི་ཚུལ་ཕུན་སུམ་ཚོགས་པས་གསོལ་པ། བྱང་ཆུབ་མཆོག་ནི་བཙལ་བའི་ཕྱིར། །བསྐལ་པ་བྱེ་བ་གྲངས་མེད་དུ། །སངས་རྒྱས་བྱེ་བ་མཐའ་ཡས་པ། །དེ་ལ་ཁྱོད་ཀྱིས་ས་བོན་བཏབ། །
ལྷའི་བུ་སྔོན་གྱི་ཚུལ་ལ་ངེས་པས་གསོལ་པ། བསྐལ་པ་བྱེ་བར་བརྟག་མཛད་པས། །ཆོས་ཀུན་སེམས་ཅན་མེད་པ་ཞེས། །ཆོས་རྣམས་ཐམས་ཅད་ངེས་པར་མཁྱེན། །འདུ་འཕྲོད་ཙམ་དུ་རྒྱལ་བས་གསུང ། །ལྷའི་བུ་སྔོན་གྱི་མཐའ་ལ་སེམས་པས་གསོལ་པ།


</font><hr>42-1-108b<br><font size=+2>
བསྐལ་པ་བྱེ་བ་གྲངས་མེད་དུ། །གནས་དང་གནས་མིན་རབ་མཁྱེན་པར། །རྣམ་པར་འདྲེན་པ་སྤྱོད་མཛད་པས། །དེས་ན་འཇིག་རྟེན་རྨོངས་མི་མངའ། །ལྷའི་བུ་སྔོན་གྱི་མཐའ་ལ་དཔྱད་པས་གསོལ་པ། གནས་དང་གནས་མིན་བརྟེན་བགྱིས་ནས། །ལས་དང་རྒྱུ་རྣམས་དཔྱད་
པས་ན། །ཁམས་དང་དབང་པོ་མོས་པ་དང ། །བསམ་གཏན་སྔོན་གྱི་མཐའ་ཡང་མཁྱེན། །ལྷའི་བུ་སྔོན་གྱི་མཐའ་ལ་ཡོངས་སུ་རྟོག་པས་གསོལ་པ། ཁྱོད་ཀྱི་སྔོན་མཐའ་ཡོངས་བརྟགས་པས། །སྟོབས་ཀྱི་ཡེ་ཤེས་རྣམ་བཅུ་པོ། །དཔའ་བོ་ཆེན་པོས་རྣམ་པར་སྤེལ། །
དེས་ནི་འཇིག་རྟེན་འདི་ལ་གཟིགས། །ལྷའི་བུ་སྔོན་གྱི་མཐའི་སྤྱོད་ཡུལ་གྱིས་གསོལ་པ། དཔའ་བོ་སེམས་ཅན་ཐམས་ཅད་ཀྱི། །སྔོན་གྱི་མཐའ་ཡི་སྤྱོད་པ་དང ། །དགེ་དང་མི་དགེའི་རྒྱུ་བ་རྣམས། །མཁྱེན་པས་འཇིག་རྟེན་གསོ་བ་མཛད། །ལྷའི་བུ་སྔོན་གྱི་མཐའི་སྤྱོད་
པ་ལ་སོ་སོར་རྟོག་པས་གསོལ་པ། ཐུབ་པས་སྔོན་གྱི་སེམས་ཅན་གྱི། །སྔོན་མཐའི་སྤྱོད་པ་རབ་མཁྱེན་ཅིང ། །ཁམས་དང་མོས་པ་མཁྱེན་པས་ན། །དེ་ཕྱིར་སེམས་ཅན་གསོ་བ་མཛད། །ལྷའི་བུ་མོས་པའི་སྟོབས་ཅན་གྱིས་གསོལ་པ། བསྐལ་པ་བྱེ་བ་མཐའ་ཡས་སུ། །
སྔོན་གྱི་མཐའ་ལ་བརྟག་བགྱིས་ཀྱང ། །ཁྱོད་ཀྱི་དགོངས་པ་ཆགས་མི་མངའ། །དེས་ན་མགོན་ལ་བདག་མོས་ལགས། །ལྷའི་བུ་ཡེ་ཤེས་ལ་མོས་པས་གསོལ་པ། བསྐལ་པ་བྱེ་བ་གྲངས་མེད་དུ། །སྔོན་མཐའི་སྲིད་པ་བསམ་བགྱིས་ཀྱང ། །རྐང་གཉིས་གཙོ་བོའི་
ཡོན་ཏན་གྱི། །ཕ་རོལ་ཕྱིན་ནུས་འགའ་མ་མཆིས། །ལྷའི་བུ་ཕྱི་མའི་མཐའ་ལ་མཁས་པས་གསོལ་པ། །ཕྱོགས་བཅུའི་འཇིག་རྟེན་འདི་དག་གི་།སྐྱེ་དགུ་སྣ་ཚོགས་ལས་ལྡན་པ། །ཤི་འཕོ་སྐྱེ་བར་འགྱུར་བ་དག་།ཁྱོད་ཀྱིས་སངས་རྒྱས་སྤྱན་གྱིས་གཟིགས། །
ལྷའི་བུ་ཕྱི་མའི་མཐའ་ལས་ངེས་པར་བྱུང་གིས་གསོལ་པ། རྒྱུ་གང་གིས་ནི་ལས་གང་ཞིག་།བགྱིས་ཤིང་རྒྱུད་དྲུག་མཆིར་འགྱུར་བ། །དེ་དག་ཐམས་ཅད་རྒྱལ་བས་མཁྱེན། །དེས་ན་ཐམས་ཅད་མཁྱེན་ཅེས་བགྱི། །ལྷའི་བུ་ཤི་འཕོ་དང་སྐྱེ་བ་མངོན་པར་ཤེས</font><hr>42-1-109a<br><font size=+2>
པས་གསོལ་པ། ཁམས་གང་གིས་ནི་སེམས་ཅན་གང ། །བསྒོས་པར་གྱུར་ཅིང་ལས་བགྱིད་པའི། །བག་ཆགས་ལས་དང་སེམས་ཅན་དག་།ཁྱོད་ཀྱིས་གཡོ་བ་མེད་པར་མཁྱེན། །ལྷའི་བུ་འཆི་འཕོ་དང་སྐྱེ་བ་རིག་པས་གསོལ་པ། བཤེས་གཉེན་
ཅི་འདྲ་བསྟེན་བགྱི་ཤིང ། །ལས་གང་མངོན་པར་འདུས་བགྱིས་པས། །འགྲོ་བ་གང་དུ་མཆི་འགྱུར་བ། །ཐུབ་པ་ཁྱོད་ཀྱིས་དེ་ཡང་མཁྱེན། །ལྷའི་བུ་དགོས་པ་ལ་མཁས་པས་གསོལ་པ། ལས་དེ་ཡི་ནི་བགྱི་བ་གང ། །དགོས་པ་ཁྱོད་ཀྱིས་རབ་ཏུ་མཁྱེན། །གང་
གི་སླད་དུ་ལས་བགྱིས་པ། །དེ་ཡང་མ་ལུས་རབ་ཏུ་མཁྱེན། །ལྷའི་བུ་དངོས་པོ་ལ་མཁས་པས་གསོལ་པ། དངོས་པོ་གང་དག་དམིགས་པ་དང ། །ལས་གང་མངོན་པར་འདུས་བགྱིས་པ། །ཐམས་ཅད་མཁྱེན་པས་དེ་མཁྱེན་ཏེ། །དེ་ནི་སངས་རྒྱས་སྤྱོད་ཡུལ་ལགས། །
ལྷའི་བུ་དངོས་པོ་རིག་པས་གསོལ་པ། སེམས་ཅན་རྣམས་ཀྱིས་བསམ་མཁས་པ། །དངོས་དེ་ཇི་ལྟར་གནས་པ་དང ། །དེ་ནི་ཇི་ལྟར་གྲུབ་པ་ཡི། །ལས་དེ་ཁྱོད་ཀྱིས་མངོན་པར་མཁྱེན། །ལྷའི་བུ་ཤེས་པ་ལ་མཁས་པས་གསོལ་པ། ཤེས་པ་གང་གིས་དངོས་པོ་དེ། །
བརྟགས་པར་གྱུར་པ་རབ་ཏུ་མཁྱེན། །དེ་ལ་ཇི་ལྟར་ཆགས་གྱུར་པའང ། །ཐུབ་པ་ཁྱོད་ཀྱིས་ཤིན་ཏུ་མཁྱེན། །ལྷའི་བུ་མངོན་པར་འདུ་བྱེད་པ་ལ་མཁས་ཀྱིས་གསོལ་པ། ཆགས་པ་གང་གིས་ལས་དེ་རྣམས། །ཉོན་མོངས་གང་གིས་འདུ་བགྱིས་པའི། །ཉོན་མོངས་དེ་དག་
ཡང་དག་མཁྱེན། །དེ་བས་ཁྱོད་ནི་བདག་གི་མགོན། །ལྷའི་བུ་འགྲོ་བ་ལ་མཁས་པས་གསོལ་པ། འགྲོ་བ་གང་དུ་ལས་གང་གིས། །མཆིས་ཤིང་སྒྲིབ་པ་གང་རྙེད་ནས། །འབྲས་བུ་ཐོབ་པར་མི་འགྱུར་བ། །དེ་ཀུན་སྤྱན་ལྡན་ཁྱོད་ཀྱིས་མཁྱེན། །ལྷའི་བུ་དམིགས་པ་ལ་
མཁས་པས་གསོལ་པ། འགྲོ་བ་དག་ཏུ་སྐྱེས་རྣམས་ཀྱི། །གང་གིས་ལས་རྣམས་སྨིན་འགྱུར་བའི། །དམིགས་པ་ཁྱོད་ཀྱིས་རབ་མཁྱེན་ཏེ། །དེ་ལ་ཁྱོད་ཀྱི་བློ་གྲོས་འཇུག་།ལྷའི་བུ་བག་ཆགས་ལ་མཁས་ཀྱིས་གསོལ་པ། འགྲོ་དང་འགྲོ་བར་མི་རྣམས་ཀྱིས། །སྔན</font><hr>42-1-109b<br><font size=+2>
ཆད་བགྱིས་པའི་སྡིག་ལས་དང ། །དེ་བཞིན་དགེ་བའི་ལས་རྣམས་ཀྱི། །བག་ཆགས་ཁྱོད་ཀྱིས་རབ་ཏུ་མཁྱེན། །ལྷའི་བུ་ལས་ལ་མཁས་ཀྱིས་གསོལ་པ། འགྲོ་བར་འབྱུང་པོ་ཐམས་ཅད་ཀྱི། །རྙིང་དང་གསར་དང་སླད་མ་དང ། །ལས་རྣམས་གསུམ་པོ་ཁྱོད་ཀྱིས་
མཁྱེན། །དེ་ལ་སོ་སོའི་སྐྱེ་བོ་འཁྲུལ། །ལྷའི་བུ་རྣམ་པར་སྨིན་པ་ལ་མཁས་ཀྱིས་གསོལ་པ། ཆུང་ཞིང་རྣམ་སྨིན་ཆེ་བ་དང ། །ཆེ་ཞིང་རྣམ་སྨིན་ཆུང་བ་དང ། །ཆུང་ངམ་ཆེ་འམ་མཉམ་པའང་རུང ། །དེ་ལ་མུ་སྟེགས་ཅན་རྣམས་རྨོངས། །ལྷའི་བུ་ལས་ལ་མཁས་ཀྱིས་གསོལ་པ། ཚེ་
འདིའི་ལས་རྣམས་གང་ལགས་དང ། །སྐྱེ་བའི་ལས་རྣམས་གང་ལགས་དང ། །ལན་གྲངས་གཞན་གྱི་གང་ལགས་པ། །དེ་དག་སྤྱན་ལྡན་ཁྱོད་ཀྱིས་མཁྱེན། །ལྷའི་བུ་ཚེ་འདི་ལ་མྱོང་བར་འགྱུར་བ་ལ་མཁས་ཀྱིས་གསོལ་པ། ཚེ་འདི་ལ་ནི་བགྱིས་པ་ཡི། །ལས་ཀྱི་རྣམ་སྨིན་མི་
གང་དག་།མྱོང་བར་འགྱུར་བ་གང་དག་ལ། །སོ་སོའི་སྐྱེ་བོ་རྨོངས་པ་མཁྱེན། །ལྷའི་བུ་སྐྱེས་ནས་མྱོང་བར་འགྱུར་བ་ལ་མཁས་ཀྱིས་གསོལ་པ། གང་གིས་ལས་གང་བསགས་གྱུར་ཏེ། །སྐྱེས་ནས་རྣམ་པར་སྨིན་གྱུར་པ། །གང་ལ་འཇིག་རྟེན་གཏིང་མི་རྙེད། །ཤེས་
རབ་ཆེན་པོས་དེ་ཉིད་མཁྱེན། །ལྷའི་བུ་ལན་གྲངས་གཞན་ན་མྱོང་བར་འགྱུར་བ་ལ་མཁས་ཀྱིས་གསོལ་པ། ལས་གང་བསྐལ་པ་བྱེ་བ་ཡི། །ཕྱི་དུས་རྣམ་པར་སྨིན་འགྱུར་ཞིང ། །དུས་གཞན་དག་ན་ཡང་འབྱུང་བ། །དེ་དག་ཡང་དག་ཉིད་དུ་མཁྱེན། །ལྷའི་བུ་ཡོངས་
སུ་མ་སྨིན་པ་མྱོང་བར་འགྱུར་བ་ལ་མཁས་ཀྱིས་གསོལ་པ། ལས་རྣམས་གང་ཞིག་བགྱིས་གྱུར་པ། །ཡོངས་སུ་སྨིན་པར་མ་གྱུར་ན། །དེ་སྲིད་འབྲས་བུ་མི་འབྱིན་པ། །རྐང་གཉིས་མཆོག་གིས་དེ་ཡང་མཁྱེན། །ལྷའི་བུ་ཡོངས་སུ་མ་སྨིན་པ་མྱོང་བར་འགྱུར་བ་
ལ་རྟོག་པས་གསོལ་པ། ལས་གང་དང་ནི་ལྡན་པས་ན། །སེམས་ཅན་འདི་ནི་སྐྱེར་འགྱུར་བ། །ཕམ་པ་མེད་པས་དེ་མཁྱེན་ཏེ། །ཡོངས་སུ་བརྟགས་ནས་རབ་ཏུ་མཁྱེན། །ལྷའི་བུ་ཡོངས་སུ་སྨིན་པ་མྱོང་བར་འགྱུར་བ་ལ་མཁས་པས་གསོལ་པ། ལས་ནི་ཇི་ལྟར</font><hr>42-1-110a<br><font size=+2>
ཡོངས་སྨིན་ན། །འབྲས་བུ་དཀར་བར་འགྱུར་བ་མཁྱེན། །དེ་ལ་ཁྱོད་ཀྱི་ཡེ་ཤེས་འཇུག་།དེ་དག་སྟོང་པར་རྣམ་པར་མཁྱེན། །ལྷའི་བུ་ཡོངས་སུ་སྨིན་པ་མྱོང་བར་འགྱུར་བ་ལ་ངེས་པས་གསོལ་པ། ཐམས་ཅད་མཁྱེན་པས་ལས་ཀྱི་རྣམས། ལྕི་དང་
ཡང་བ་རབ་ཏུ་མཁྱེན། །སེམས་ཅན་བསམ་པ་ཐུགས་སུ་ཆུད། །དེ་སླད་བཅོམ་ལྡན་བདག་གི་བླ། །ལྷའི་བུ་ལྕི་ཡང་ལ་མཁས་ཀྱིས་གསོལ་པ། ལས་གང་གིས་ནི་སེམས་ཅན་རྣམས། །ངན་སོང་མཆི་བར་འགྱུར་བ་དང ། །ལྕི་བ་དང་ནི་ཡང་བ་གཟིགས། །དེ་ཤེས་
མཁྱེན་པས་རབ་ཏུ་མཁྱེན། །ལྷའི་བུ་སེམས་ཅན་གྱི་སྤྱོད་པ་ལ་མཁས་ཀྱིས་གསོལ་པ། སེམས་ཅན་སྤྱོད་པ་ཉེར་བཟུང་ཞིང ། །ལས་ཀྱི་ལྕི་དང་ཡང་བ་དག་།དཔའ་བོ་ཁྱོད་ཀྱིས་རབ་ཏུ་མཁྱེན། །མུ་སྟེགས་ཅན་རྣམས་དེ་ལ་རྨོངས། །ལྷའི་བུ་སེམས་ཅན་གྱི་སྤྱོད་པ་
ལ་དཔྱོད་པས་གསོལ་བ། སེམས་ཅན་སྤྱོད་པ་དཔྱད་མཛད་ཅིང ། །ལས་ཀྱི་རྣམ་པར་སྨིན་པ་བསྟན། །ཕོར་བུའི་ཆུ་དང་གང་གཱའི་ཆུ། །ལན་ཚཝས་རྣམ་པར་བསྟན་པ་བཞིན། །ལྷའི་བུ་ལས་ལ་མཁས་ཀྱིས་གསོལ་པ། སློབ་དང་མི་སློབ་རྣམ་པར་སྨིན། །རྐང་
གཉིས་དམ་པ་སྟོན་མཛད་ཅིང ། །ཀུན་ནས་ཉོན་མོངས་ལས་མྱོང་ནས། །ལས་ནི་ཟད་པར་འགྱུར་བ་བསྟན། །ལྷའི་བུ་སངས་རྒྱས་ཀྱི་ཡེ་ཤེས་ལ་རེག་པར་བྱེད་པས་གསོལ་པ། སངས་རྒྱས་སྤྱན་གྱིས་ཁམས་གསུམ་ན། །ལས་ཀྱི་འབྲས་བུ་རྟེན་པ་ཡི། །བྱིས་པ་
དག་དང་མཁས་པ་གཟིགས། །ཕྲ་གཟིགས་ཁྱོད་ལ་ཕྱག་འཚལ་ལོ། །ལྷའི་བུ་ལས་ཟད་པར་བྱེད་པས་གསོལ་པ། འཇིག་རྟེན་དག་ན་རྣམ་འདྲེན་ཁྱོད། །སེམས་ཅན་རྣམས་ཀྱི་ཤི་འཕོ་དང ། །སྐྱེ་བ་ཀུན་ལ་ཡེ་ཤེས་འཇུག་།མཁྱེན་པས་འཇིགས་མེད་ཕྱག་ཀྱང་
འཚལ། །ལྷའི་བུ་དམིགས་པ་མེད་པ་ལ་སྤྱོད་པས་གསོལ་པ། འཆི་འཕོ་བ་དང་སྐྱེ་དང་ལས། །འགྲོ་དང་དེ་བཞིན་སེམས་ཅན་དང ། །རྣམ་སྨིན་རྨི་ལམ་འདྲར་བསྟན་པ། །འདྲེན་པ་རྐང་གཉིས་མཆོག་གིས་མཁྱེན། །ལྷའི་བུ་ཉོན་མོངས་པ་ལ་རྟོག་པས་གསོལ</font><hr>42-1-110b<br><font size=+2>
པ། ཇི་ལྟར་རྨི་ལམ་སྐོམ་པ་ཞིག་།ཤིན་ཏུ་བསིལ་བའི་ཆུ་འཐུངས་བཞིན། །རྐང་གཉིས་མཆོག་ཁྱོད་འདོད་ཆགས་དང ། །ཞེ་སྡང་གཏི་མུག་རྣམས་ཀྱང་ཟད། །ལྷའི་བུ་ཡོངས་སུ་རྟོག་པ་དང་བྲལ་བས་གསོལ་པ། འདོད་ཆགས་ཞེ་སྡང་གཏི་མུག་རྣམས། །ཡོངས་
སུ་རྟོག་ལས་སྐྱེས་པ་སྟེ། །རྨི་ལམ་དགའ་བར་རྩེ་བ་བཞིན། །སྨྲ་མཆོག་ཁྱོད་ལ་ཕྱག་ཀྱང་འཚལ། །ལྷའི་བུ་ཡོངས་སུ་རྟོག་པ་ཞི་བར་བྱེད་པས་གསོལ་པ། །ཡོངས་སུ་རྟོག་པ་རབ་ཞི་བས། །ཉོན་མོངས་ཟད་པར་རབ་བསྟན་ཏེ། །རྨི་ལམ་ན་ནི་སྤྲིན་མེད་ལྟར། །མི་
མཆོག་ཁྱོད་ཀྱིས་རབ་ཏུ་མཁྱེན། །ལྷའི་བུ་ཟག་པ་ལ་རྟོག་པས་གསོལ་པ། །རྨི་ལམ་ཆར་ཆེན་འབབ་པ་ལྟར། །དེ་བཞིན་ཟག་པ་རྣམ་འབྱུང་བར། །ཟག་པ་འབྱུང་ལ་མཁས་པ་པོ། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་རྨི་ལམ་རྟོག་གིས་གསོལ་པ། 
རྨི་ལམ་ཆར་ཆེན་འབབ་པ་ལྟར། །དེ་བཞིན་ཟག་པ་རྣམས་འབྱུང་སྟེ། །ནོར་པ་རྣམས་ལ་ཟག་འབྱུང་བར། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་ཇི་ལྟ་བ་བཞིན་དུ་རྟོག་པས་གསོལ་པ། ཇི་ལྟར་བུ་མོའི་རྨི་ལམ་ན། །བུ་ཞིག་བྱུང་ལ་ཤི་འཕོས་ན། །དགའ་དང་
སྡུག་བསྔལ་ཚོར་འགྱུར་བ། །དེ་བཞིན་འགྲོ་བ་ཁྱོད་ཀྱིས་གཟིགས། །ལྷའི་བུ་རྨི་ལམ་རྟོགས་པས་གསོལ་པ། རྨི་ལམ་དག་ན་མགོ་བཅད་བཞིན། །ཁྱོད་ཀྱིས་ཟག་པ་ཟད་པ་གཟིགས། །དེ་ནི་མཁས་པ་རྣམས་ལ་བསྟན། །ཐམས་ཅད་གཟིགས་ལ་ཕྱག་ཀྱང་འཚལ། །
ལྷའི་བུ་བློ་གྲོས་ངེས་པར་བརྟགས་ཀྱིས་གསོལ་པ། ཆོས་ཀུན་མཁྱེན་པ་ཁྱོད་ཀྱིས་ནི། །ཇི་ལྟར་རྨི་ལམ་མཛའ་ཕྲད་དང ། །བྲལ་བ་ཡང་དག་མ་མཆིས་གཟིགས། །འགྲོ་བ་ཇི་བཞིན་ཚིམ་པར་མཛད། །ལྷའི་བུ་ཡེ་ཤེས་ཡིད་ཀྱིས་གསོལ་པ། ཁྱོད་ཀྱི་དམ་པའི་ཆོས་
སྟོན་པ། །ཐོས་ན་ཡིད་ནི་དགར་འགྱུར་ཏེ། །རྨི་ལམ་དག་ན་རྨི་བསྟན་བཞིན། །དེ་ལྟར་རྒྱལ་བས་བསྟན་པ་མཛད། །ལྷའི་བུ་ཡོངས་སུ་དགའ་བའི་ཡིད་ཀྱིས་གསོལ་པ། མེ་ལོང་གཟུགས་བརྙན་སྣང་བ་བཞིན། །འགྲོ་བ་མཐའ་དག་གཟིགས་པས་ན། །བསམ</font><hr>42-1-111a<br><font size=+2>
གཏན་མངའ་བ་ཁྱོད་ལ་ནི། །ལྷར་བཅས་འཇིག་རྟེན་ཡིད་ཀྱང་དགའ། །ལྷའི་བུ་བློ་གྲོས་ངེས་པས་གསོལ་པ། ཐུབ་པ་པི་བང་སྒྲ་འདྲ་བའི། །ཁྱོད་ཀྱི་དམ་ཆོས་ཐོས་གྱུར་ན། །ལྷ་བུ་རྣམས་ཀྱང་ཐེ་ཚོམ་བོར། །རྒྱལ་བ་མཆོག་ལ་ཕྱག་ཀྱང་འཚལ། །ལྷའི་བུ་
སྒྱུ་མས་ཚིམ་གྱིས་གསོལ་པ། སྒྱུ་མའི་མཁན་པོས་སྒྱུ་མ་དག་།བྱིས་པ་རྨོངས་བྱེད་ཡོངས་བསྟན་ན། །མི་མཁས་དེ་ལ་རྨོངས་པར་འགྱུར། །སྒྱུ་མ་བཞིན་དུ་ཁྱོད་ཀྱིས་བསྟན། །ལྷའི་བུ་སྤྲུལ་པ་ལ་སེམས་པས་གསོལ་པ། ཇི་ལྟར་རྨི་ལམ་སྒྱུ་མཐོང་བ། །དེ་ལྟར་ཁྱོད་ཀྱིས་
འགྲོ་བ་གཟིགས། །མགོན་པོའི་བསྟན་པ་དེ་ཐོས་ན། །བདག་ཅག་ཐེ་ཚོམ་མ་མཆིས་སོ། །ལྷའི་བུ་སྒྱུ་མ་ལས་ངེས་པར་བྱུང་གིས་གསོལ་པ། སྒྱུ་མའི་མཁན་པོས་སྒྱུ་སྤྲུལ་ཀྱང ། །སྒྱུ་མ་ལགས་པར་འཚལ་བས་ན། །དེ་ལ་རྨོངས་པར་འགྱུར་མ་མཆིས། །དེ་བཞིན་ཁྱོད་ཀྱིས་
འགྲོ་བ་གཟིགས། །ལྷའི་བུ་རྟོག་པའི་རྗེས་སུ་རྟོག་པས་གསོལ་པ། ཇི་ལྟར་བརྩོན་པས་རྨི་ལམ་ན། །སངས་རྒྱས་སྐུ་གཟུགས་བརྟགས་པ་བཞིན། །དེ་ལྟར་རྟོག་པས་འཇིག་རྟེན་བསྐྱེད། །རྣམ་པར་འདྲེན་པ་ཁྱོད་ཀྱིས་གཟིགས། །ལྷའི་བུ་ཀུན་ཏུ་རྟོག་པ་འཇོམས་ཀྱིས་
གསོལ་པ། ཀུན་རྟོག་འདོད་ཆགས་རྒྱུ་ལགས་ཏེ། །འདོད་ཆགས་དངོས་པོས་བསྐྱེད་མ་ལགས། །རྟོག་པ་ངན་ལས་འདོད་ཆགས་བྱུང ། །དེ་ནི་རྣམ་འདྲེན་ཁྱོད་ཀྱིས་གཟིགས། །ལྷའི་བུ་ཡོངས་སུ་ཤེས་པ་དང་ལྡན་པས་གསོལ་པ། རི་སུལ་དག་ན་སྒྲ་བྱུང་བ། །བྲག་ཅ་སེམས་
ཅན་སྒྲ་མ་ལགས། །དེ་བཞིན་འཇིག་རྟེན་ཁྱོད་ཀྱིས་གཟིགས། །དེ་སླད་འཇིག་རྟེན་ཆགས་མི་མངའ། །ལྷའི་བུ་སྟོན་པ་ལ་མཁས་པས་གསོལ་པ། སྒྲ་ནི་གང་ཡང་མ་མཆིས་ཏེ། །སྒྲ་ནི་བྲག་ཅ་འདྲ་བ་ལགས། །འོན་ཀྱང་མི་དབང་ཁྱོད་ཀྱིས་བསྟན། །བྱིས་པ་མང་པོ་རབ་ཏུ་
བཙུད། །ལྷའི་བུ་ནན་ཏན་ལ་མཁས་པས་གསོལ་པ། །ཆོས་རྣམས་དོན་ནི་གཞན་ལགས་ཀྱང ། །བྱིས་པ་རྣམས་ཀྱིས་གཞན་དུ་བརྟགས། །ནན་ཏན་ཆོས་ལས་ཤེས་པར་བགྱི། །དེ་ལ་བདག་ནི་ཐེ་ཚོམ་ཆད། །ལྷའི་བུ་དོན་གྱི་རྗེས་སུ་འབྲང་བས་གསོལ་པ། ཆོས་དོན་ཡང་དག</font><hr>42-1-111b<br><font size=+2>
གང་ལགས་པ། །དེ་ནི་སུས་ཀྱང་མ་རྟོགས་ཤིང ། །སུས་ཀྱང་མ་བསྟན་འཚལ་མ་གྱུར། །དེ་སྐད་ཐུབ་པའི་མཆོག་གིས་གསུངས། །ལྷའི་བུ་ཆོས་ཀྱི་བརྡ་རྟོགས་པས་གསོལ་པ། ཟག་དང་དྲི་མ་ཉོན་མོངས་དང ། །བག་ཆགས་དང་ནི་རྟོག་དང་རྟོག་།ཀུན་ནས་ཉོན་མོངས་རྣམ་དག་པ། །ཐུབ་
པ་བརྡ་ཡི་ཚིག་ཀྱང་ལགས། །ལྷའི་བུ་ཀུན་ཏུ་རྟོག་པ་ལ་མཁས་པས་གསོལ་པ། ཀུན་ནས་ཉོན་མོངས་རྣམ་དག་དང ། །ཟག་པ་དག་དང་ཉོན་མོངས་དང ། །དག་དང་བཤད་དང་ཉེ་དུ་དང ། །སྟོན་པ་འདི་ཀུན་མིང་ཙམ་ལགས། །ལྷའི་བུ་མི་གནས་པའི་བློ་གྲོས་ཀྱིས་གསོལ་པ། ཁམས་གསུམ་
རྣམས་ལ་མ་ཆགས་ཏེ། །ནམ་མཁའ་འདྲ་བའི་ཐུགས་མངའ་བ། །བྲལ་བར་གྱུར་ཅིང་སྦྱིན་པའི་གནས། །ཞི་བའི་སེམས་ལ་ཕྱག་ཀྱང་འཚལ། །ལྷའི་བུ་མ་གོས་པས་གསོལ་པ།ཐུབ་པ་ཁྱོད་ཀྱི་ཐུགས་ཡིད་ནི། །གཟུགས་དང་གཟུགས་མེད་མི་གནས་ཤིང ། །འདོད་དང་
མྱ་ངན་འདས་པ་ལ། །གནས་པ་མ་མཆིས་བར་སྣང་འདྲ། །ལྷའི་བུ་རེ་བ་མེད་པས་གསོལ་པ། འདོད་པའི་ཁམས་ལ་རེ་བ་སྤངས། །གཟུགས་དང་གཟུགས་མེད་གཉི་གར་མིན། །འདུ་འཛི་དག་དང་བྲལ་གྱུར་པ། །སྲེད་ཟད་ཁྱོད་ལ་ཕྱག་ཀྱང་འཚལ། །ལྷའི་བུ་སྲེད་པ་
ཕྱུང་བས་གསོལ་པ། འབྱུང་བ་དག་དང་འཇིག་པ་ལ། །ཁྱོད་ཀྱི་སྲེད་པ་ཡང་དག་ཆད། །ཁམས་གསུམ་ཀུན་ལ་ཆགས་མི་མངའ། །རྣམ་པར་འདྲེན་ལ་ཕྱག་ཀྱང་འཚལ། །ལྷའི་བུ་སྲེད་པ་ཟིལ་གྱིས་གནོན་གྱིས་གསོལ་པ། འཇིག་རྟེན་འདི་དག་ཟིལ་མནན་ནས། །ཁྱུ་མཆོག་
དམ་པ་སྤྱོད་མཛད་ཅིང ། །སེམས་ཅན་འཇིག་རྟེན་སྒྲོལ་མཛད་པ། །ཐུགས་བརྩེ་ཁྱོད་ལ་ཕྱག་ཀྱང་འཚལ། །ལྷའི་བུ་སྲེད་པ་དང་བྲལ་བས་གསོལ་པ། ཀུན་ཏུ་སྦྱོར་དང་བྲལ་བ་སྟེ། །ཡང་སྲིད་བས་པས་ཞི་གྱུར་པ། །དག་པའི་བདག་ཉིད་དག་པའི་སེམས། །དུས་དང་བྲལ་
ལ་ཕྱག་ཀྱང་འཚལ། །ལྷའི་བུ་ཇི་ལྟ་བ་བཞིན་དུ་རིག་པས་གསོལ་པ། ཆོས་རྣམས་ཐམས་ཅད་དངོས་མེད་པ། །ཇི་བཞིན་དཔའ་བོ་ཁྱོད་ཀྱིས་མཁྱེན། །བཅིངས་པ་མ་མཆིས་གྲོལ་མ་མཆིས། །ཡང་དག་གཟིགས་ལ་ཕྱག་ཀྱང་འཚལ། །ལྷའི་བུ་ང་དམ་ལས་རྒལ་བས</font><hr>42-1-112a<br><font size=+2>
གསོལ་པ། འདོད་པའི་འདམ་ལས་རྒལ་བ་སྟེ། །སྲིད་པའི་འདམ་ལས་དེ་བཞིན་རྒལ། །གཟིགས་པ་མི་མངའ་ལེན་མི་མངའ། །ཡང་སྲིད་ཟད་ལ་ཕྱག་ཀྱང་འཚལ། །ལྷའི་བུ་ཟང་ཟིང་སྤངས་ཀྱིས་གསོལ་པ། ཟང་ཟིང་སྤངས་ཤིང་དྲི་མ་སྤངས། །རེ་བ་
སྤངས་ཤིང་སྡིག་པའང་སྤངས། །སངས་རྒྱས་སྒྲིབ་པ་རྣམ་སྤངས་པ། །དོན་རྟོགས་ཁྱོད་ལ་ཕྱག་ཀྱང་འཚལ། །ལྷའི་བུ་རེ་བ་སྤངས་པས་གསོལ་པ། དོན་དང་དོན་མ་ལགས་པ་སྤངས། །ཆགས་པ་མི་མངའ་ངེས་རྟོགས་པ། །བདུད་ཀྱི་ཞགས་ལས་རྣམ་འདས་པ། །ལེན་
མེད་ཁྱོད་ལ་ཕྱག་ཀྱང་འཚལ། །ལྷའི་བུ་ཕན་པར་འདོད་པས་གསོལ་པ། བདག་ཉིད་དང་ནི་གཞན་རྣམས་ཀྱི། །ལམ་གང་ཉོན་མོངས་རིམས་མེད་པ། །སྒྲིབ་པ་མེད་པར་གཟིགས་པ་པོ། །དཔའ་ཆེན་ཁྱོད་ཀྱིས་དེ་ཡང་གཟིགས། །ལྷའི་བུ་གྲགས་པ་ཐོབ་པས་གསོལ་པ། 
འདྲེན་པ་འཇིག་རྟེན་རྣམ་གྲགས་པ། །ཁྱོད་ཀྱི་མཁྱེན་ལ་བརྩོན་པ་རྣམས། །ཇི་སྐད་བསྟན་བཞིན་རབ་རྟོག་ན། །ཉོན་མོངས་རྣམས་ནི་ནུབ་པར་འགྱུར། །ལྷའི་བུ་འཇིགས་པ་མེད་པས་གསོལ་པ། ཆོས་རྣམས་ཀུན་ལ་ངེས་པས་ན། །སྔོ་བ་གང་ཡང་ཡོང་མ་གཟིགས། །ཡེ་
ཤེས་རྒྱ་མཚོ་མི་བསྙེངས་པར། །སེང་གེའི་སྒྲ་ནི་སྒྲོག་པ་མཛད། །ལྷའི་བུ་གང་ནས་ཀྱང་འཇིགས་པ་མེད་པས་གསོལ་པ། འཇིགས་པ་ཀུན་ལས་ཡང་དག་རྒལ། །ཟུག་རྔུ་ཐམས་ཅད་ཀུན་ཏུ་བཏོན། །བསྙེངས་པ་མི་མངའ་ཞུམ་མི་མངའ། །ཐམས་ཅད་ཟིལ་གནོན་ཕྱག་
ཀྱང་འཚལ། །ལྷའི་བུ་གནས་མེད་ཀྱིས་གསོལ་པ། །ལྷ་རྣམས་དང་ནི་དྲི་ཟ་དང ། །བདུད་དང་ཚངས་པར་བཅས་པ་ཡིས། །ཁྱོད་ཀྱི་ཆོས་ལ་རྒལ་མི་ནུས། །དེ་བས་ཁྱོད་ལ་བསྙེངས་མི་མངའ། །ལྷའི་བུ་སེང་གེའི་རྩལ་གྱིས་གསོལ་པ། ཆོས་རྣམས་ཐམས་ཅད་ཡོངས་
མཁྱེན་པས། །སངས་རྒྱས་གྱུར་ལ་འཇིགས་མི་མངའ། །བདག་ལ་ཆོས་ཀྱིས་སུ་རྒོལ་ཞེས། །བདེ་གཤེགས་ཁྱོད་ལ་དོགས་མི་མངའ། །ལྷའི་བུ་སྐྲག་མེད་ཀྱིས་གསོལ་པ། སེང་གེ་རི་སུལ་གནས་པ་ནི། །འཇིགས་པ་མ་མཆིས་སྐྲག་མ་མཆིས། །རི་དགས་ཕྲ་མོ</font><hr>42-1-112b<br><font size=+2>
ཡོངས་བཏུལ་ཏེ། །སྤ་བཀོང་ནགས་ན་ང་རོ་སྒྲོག་།དེ་བཞིན་ཐམས་ཅད་མཁྱེན་པ་ཡང ། མུ་སྟེགས་ཅན་རྣམས་ཡོངས་སྐྲག་སྟེ། །ལྷ་ཀླུ་དྲི་ཟའི་འཇིག་རྟེན་ན། །མཚུངས་མེད་གཟིགས་ནས་གསུང་ཡང་སྒྲོག་།ལྷའི་བུ་ཐམས་ཅད་ཟིལ་གནོན་གྱིས་གསོལ་པ། འཇིག་རྟེན་
རྣམ་འདྲེན་འཇིག་རྟེན་ན། །སངས་རྒྱས་ཉིད་ལ་སྔོ་བགྱིད་པ། །འཇིག་རྟེན་གསུམ་ན་མ་མཆིས་ཏེ། །དེས་ན་རྒྱལ་བ་བདག་གི་སྐྱབས། །ལྷའི་བུ་སེང་གེ་བློ་གྲོས་ཀྱིས་གསོལ་པ། ཐམས་ཅད་མཁྱེན་པ་ཐམས་ཅད་གཟིགས། །ཆོས་རྣམས་ཀུན་ལ་འཇིགས་མི་མངའ། །ཁྱོད་འདྲ་
འཇིག་རྟེན་མ་མཆིས་ཏེ། །ཅིས་མི་བསྙེངས་ལ་ཕྱག་ཀྱང་འཚལ། །ལྷའི་བུ་རྗེས་སུ་འཐུན་པར་སྐྱེས་ཀྱིས་གསོལ་པ། སངས་རྒྱས་ཉིད་དུ་དམ་བཅས་ན། །འདི་ན་ཁྱོད་ལ་རྒོལ་མ་མཆིས། །འཇིག་རྟེན་འདྲེན་པ་ཆོས་ཀྱིས་ནི། །ཁྱོད་ལ་གང་རྒོལ་དེ་མ་མཆིས། །ལྷའི་བུ་མཛོད་
འཛིན་གྱིས་གསོལ་པ། །སེང་གེའི་ང་རོ་གསུང་བསྒྲགས་ཏེ། །ཁྱོད་ཀྱི་ཆོས་ཀྱི་མཛོད་བཟུང་བས། །སྲོག་ཆགས་བྱེ་བ་སྟོང་དག་གིས། །བྱང་ཆུབ་མཆོག་ཏུ་སེམས་ཀྱང་བསྐྱེད། །ལྷའི་བུ་བརྟུལ་ཞུགས་རྗེས་སུ་འཐུན་གྱིས་གསོལ་པ། སངས་རྒྱས་རྗེས་འཐུན་བརྟུལ་ཞུགས་ཅན། །དཔའ་
ཆེན་དེ་དག་ཐོབ་ཆེན་ཐོབ། །བྱང་ཆུབ་མཆོག་ཏུ་སེམས་བཏུད་ཅིང ། །གང་ཟག་མཆོག་ཏུ་དེ་དག་འགྱུར། །ལྷའི་བུ་རྗེས་སུ་འཐུན་པའི་ཆོས་ལ་དགའ་བས་གསོལ་པ། ཁྱོད་ཀྱི་བསྟན་པ་སུས་ཐོས་ཏེ། །བྱང་ཆུབ་མཆོག་ཏུ་སེམས་བཏུད་པ། །དེ་དག་འཇིག་རྟེན་སེམས་ཅན་ཆེ། །གང་
ཟག་མཆོག་ཏུ་དེ་དག་འགྱུར། །ལྷའི་བུ་སེམས་དག་པས་གསོལ་པ། འཇིག་རྟེན་དག་ན་རྒོལ་མེད་པའི། །རྫོགས་པའི་སངས་རྒྱས་གསུང་ཐོས་ནས། །སྲོག་ཆགས་བྱེ་བ་སྟོང་དག་གིས། །བྱང་ཆུབ་མཆོག་ཏུ་སེམས་ཀྱང་བསྐྱེད། །ལྷའི་བུ་སེམས་རྒྱུད་ཡོངས་སུ་དག་པས་གསོལ་པ། 
ཡུན་རིང་དུས་ནས་མི་དབང་གིས། །སངས་རྒྱས་བསླབ་ལ་ལེགས་བསླབས་པས། །དེ་སླད་ཁྱོད་ནི་ཐུགས་རྒྱུད་དག་།མཚན་རབ་སུམ་ཅུ་གཉིས་དང་ལྡན། །ལྷའི་བུ་ཟག་པ་མེད་པའི་ཡིད་ཀྱིས་གསོལ་པ། ཟག་པ་ཟད་པའི་སངས་རྒྱས་ཀྱིས། །སེང་གེའི་ང་རོ་བསྒྲགས་མཛད་དེ། །དམ་བཅས་པ</font><hr>42-1-113a<br><font size=+2>
ལ་མངོན་བཞུགས་ན། །རྒོལ་བ་འདི་ནི་ཡོང་མ་མཆིས། །ལྷའི་བུ་དེ་ཁོ་ནའི་རྗེས་སུ་སོང་བས་གསོལ་པ། ཁྱོད་ཀྱི་གསུང་ལ་སྨྲ་འགྱུར་བའི། །ལྷ་དང་ལྷ་བུ་མི་དག་ནི། །འཇིག་རྟེན་གསུམ་ན་མ་མཆིས་ཏེ། །དེས་ན་ཐུབ་པ་སྟོབས་དང་ལྡན། །ལྷའི་བུ་ཟག་པ་ཟད་པ་
ལ་མཁས་པས་གསོལ་པ། དགེ་སྦྱོང་དམ་པའི་ཟག་པ་ནི། །མ་ལུས་ཡོངས་སུ་བས་པ་སྟེ། །འདི་ན་ཁྱོད་ལ་རྒོལ་མ་མཆིས། །དེས་ན་སངས་རྒྱས་བདག་གི་ཕ། །ལྷའི་བུ་རྟག་ཏུ་བརྩོན་པས་གསོལ་པ། ཁྱོད་ལ་ཉོན་མོངས་ལུས་སོ་ཞེས། །མི་དབང་ཁྱོད་ལ་གང་རྒོལ་བ། །རྣམ་པ་
ཀུན་ཏུ་མི་དམིགས་ཏེ། །དེས་ན་སངས་རྒྱས་བསྙེངས་མི་མངའ། །ལྷའི་བུ་སེམས་ཞི་བས་གསོལ་པ། འདོད་ཆགས་ཞེ་སྡང་ཞི་བ་སྟེ། །གཏི་མུག་བག་ཆགས་བཅས་པ་ཞི། །ཉེས་སྤྱོད་ལས་ཀྱང་ཞི་བས་ན། །སེམས་ཞི་ཁྱོད་ལ་ཕྱག་འཚལ་ལོ། །ལྷའི་བུ་རྣལ་འབྱོར་སྤྱོད་པས་གསོལ་
པ། རྣལ་འབྱོར་གང་གིས་ཉོན་མོངས་གང ། །བས་པར་འགྱུར་བར་ལྟ་བའི་ཚེ། །དེ་ལ་ཁྱོད་ཀྱི་མཁྱེན་ཀུན་འཇུག་།དེས་ན་ཁྱོད་ལ་ཕྱག་ཀྱང་འཚལ། །ལྷའི་བུ་རྣལ་འབྱོར་ལ་མཁས་པས་གསོལ་པ། འདྲེན་པ་གང་ལ་བསླབས་པ་ཡི། །རྣལ་འབྱོར་ཚོགས་ནི་མཐའ་ཡས་ཏེ། །ཐམས་ཅད་
མཁྱེན་པ་དེ་སླད་དུ། །ཉོན་མོངས་ཐམས་ཅད་མ་ལུས་པས། །ལྷའི་བུ་རྣལ་འབྱོར་བློ་གྲོས་ཀྱིས་གསོལ་པ། འཇིག་རྟེན་སྒྲོན་མ་ཁྱོད་ཀྱི་བློ། །རྣལ་འབྱོར་ལས་ནི་ཉམས་མ་མཆིས། །དེས་ན་ཁྱོད་ཀྱི་ཉོན་མོངས་ཀུན། །བག་ཆགས་བཅས་པར་ཡོངས་སུ་བསལ། །ལྷའི་བུ་ཞི་བ་རིག་པས་གསོལ་པ། 
ཉོན་མོངས་ཐམས་ཅད་ཞི་གྱུར་ནས། །བག་ཆགས་མ་ལུས་ཡོངས་སུ་བསལ། །བསྙེངས་པ་མི་མངའ་རྒྱལ་སྲས་དང ། །ཅིས་ཀྱང་མི་བསྙེངས་སྤྱོད་པ་མཛད། །ལྷའི་བུ་ཟད་པ་ལ་རྟོག་པས་གསོལ་པ། ཐུབ་པ་ཐམས་ཅད་མཁྱེན་པ་ཁྱོད། །ཉོན་མོངས་བག་ཆགས་བཅས་པར་བས། །འཇིག་རྟེན་
སྒྲོན་མ་ཁྱོད་ལ་ནི། །མཚུངས་པ་གང་ཡང་མི་དམིགས་སོ། །ལྷའི་བུ་བག་ལ་ཉལ་ཕྱུང་གིས་གསོལ་པ། ཁྱོད་ཀྱིས་བག་ཆགས་མ་ལུས་བསལ། །ཁྱོད་ལ་སྐྱོན་དྲི་ཡོང་མ་མཆིས། །དེ་སླད་སངས་རྒྱས་ཐམས་ཅད་མཁྱེན། །ལྷ་རྣམས་ཀུན་གྱི་ཐུབ་པའི་ཐུབ། །ལྷའི་བུ་མཐའ་ན་གནས་པས</font><hr>42-1-113b<br><font size=+2>
གསོལ་པ། ཟག་པ་རྣམས་ནི་སྤངས་པས་ན། །སྐྱེ་བའང་སྐྱེ་བ་མ་ལགས་ཏེ། །ཐུབ་པ་ཁྱོད་སྐྱེ་ཐ་མ་པ། །དེས་ན་མགོན་པོ་བསྙེངས་མི་མངའ། །ལྷའི་བུ་ཚད་སྲུང་གིས་གསོལ་པ།དཔའ་བོ་ཁྱོད་ཀྱིས་ས་བོན་སྤངས། །སྡུག་བསྔལ་མྱུ་གུ་ཚིག་པར་གྱུར། །མྱ་ངན་འཁྲི་ཤིང་རྣམ་པར་བསྐམས། །གདུང་བ་
མེད་ལ་ཕྱག་ཀྱང་འཚལ། །ལྷའི་བུ་ཤིང་བཏགས་བཏོན་གྱིས་གསོལ་པ། ཐུབ་པ་ཐམས་ཅད་མཁྱེན་པ་ཁྱོད། །མ་རིག་ཤིང་བཏགས་རྣམས་ཀྱང་བསལ། །སངས་རྒྱས་སྤྱོད་པ་རྣམ་པར་སྦྱངས། །དེ་བས་སྟོན་པ་བསྙེངས་མི་མངའ། །ལྷའི་བུ་སྲིད་པའི་ཕ་རོལ་ཏུ་སོང་བས་གསོལ་པ། སྲིད་པའི་
མཚོ་ལས་ཡང་དག་རྒལ། །རྣམ་པར་འདྲེན་པ་བྱ་བ་བྱས། །ཁྱོད་ཀྱིས་སྣང་བ་ཡང་དག་ཕྱུང ། །འཇིགས་མེད་ཁྱོད་ནི་དོན་ཀྱང་གྲུབ། །ལྷའི་བུ་མྱ་ངན་ལས་འདའ་བར་འགྲོ་བས་གསོལ་པ། ཐམས་ཅད་མཁྱེན་པ་ཞིར་གྱུར་པ། །ཉོན་མོངས་ཐམས་ཅད་རབ་ཏུ་བཤིག་།བག་ཆགས་རྡུལ་ཙམ་
ཡོང་མི་མངའ། །མགོན་པོ་ཁྱོད་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་རྒྱལ་མཚན་གྱིས་གསོལ་པ། ཁྱོད་ཀྱིས་ཆོས་ཀྱི་རྒྱལ་མཚན་བསྒྲེང ། །ང་རྒྱལ་རྒྱལ་མཚན་རབ་ཏུ་བསྙལ། །ཆོས་ཀྱི་ལམ་སྲང་མཐའ་ཡས་པ། །དཔའ་བོ་ཆེན་པོ་ཁྱོད་ཀྱིས་བསྟན། །ལྷའི་བུ་ཆོས་ཀྱི་འབྱུང་གནས་ཀྱིས་
གསོལ་པ། སངས་རྒྱས་ཆོས་ཀྱི་འབྱུང་གནས་སོ། །ཐུབ་པ་ཆོས་རྣམས་ཀུན་མཁྱེན་པ། །སེམས་ཅན་ཀུན་གྱི་དགེ་བཤེས་གཉེན། །ཡེ་ཤེས་མཚོ་ལ་ཕྱག་ཀྱང་འཚལ། །ལྷའི་བུ་ཆོས་ཀྱི་གོས་ཅན་གྱིས་གསོལ་པ། ཁྱོད་ཀྱི་སྲས་པོ་འཇིགས་མེད་པ། །སེང་གེ་ང་རོ་རྣམ་སྒྲོག་
ཀྱང ། །རྒྱལ་སྲས་དེ་དག་ཆོག་མེད་ཅིང ། །སངས་རྒྱས་ཆོས་ཀྱི་དོན་གྱིས་སྐོམ། །ལྷའི་བུ་ཆོས་དོན་དུ་གཉེར་བས་གསོལ་པ། སངས་རྒྱས་ཆོས་རྣམས་དོན་གཉེར་བར། །ཁྱོད་ཀྱི་སྲས་རྣམས་སེམས་བསྐྱེད་ཅིང ། །ཁྱོད་ཀྱི་མི་འཇིགས་ཐོསགྱུར་ནས། །མཁས་པ་དེ་
དག་བྱང་ཆུབ་ཚོལ། །ལྷའི་བུ་ཆོས་ཀྱི་སྐོམ་གྱིས་གསོལ་པ། ཁྱོད་ཀྱིས་མི་འཇིགས་ཐོས་གྱུར་ནས། །སངས་རྒྱས་ཆོས་རྣམས་བཙལ་བའི་ཕྱིར། །སྲོག་ཆགས་བྱེ་བ་སྐོམ་གྱུར་ཏེ། །བརྩོན་འགྲུས་བརྟན་པ་རབ་ཏུ་རྩོམ།། །།


</font><hr>42-1-114a<br><font size=+2>
བམ་པོ་བཅུ་གཅིག་པ།ལྷའི་བུ་ཆོས་ཀྱིས་འཕགས་ཀྱིས་གསོལ་པ། སངས་རྒྱས་ཆོས་ཀྱིས་མངོན་འཕགས་ཤིང ། །འཇིགས་པ་མེད་པར་འདུལ་མཛད་པའི། །གསུང་པའི་མཆོག་གྱུར་ཁྱོད་མཐོང་ནས། །བརྟུལཞུགས་མཆོག་ཅན་བྱང་ཆུབ་ཚོལ། །ལྷའི་བུ་
ཆོས་འཛིན་གྱིས་གསོལ་པ། ཐུབ་པ་ཟབ་ཅིང་བལྟ་དཀའ་བའི། །ཆོས་ནི་ཁྱོད་ཀྱིས་རབ་བསྟན་པ། །ཁྱོད་ཀྱི་སྲས་ཀྱིས་ཐོས་གྱུར་ནས། །དེ་དག་བླ་མེད་བྱང་ཆུབ་ཚོལ། །ལྷའི་བུ་ལྟ་བ་མེད་པས་གསོལ་པ། ཁྱོད་ཀྱི་སེང་གེའི་གསུང་ཐོས་ནས། །ཁྱོད་ཀྱི་སྲས་པོ་དཔའ་དེས་པ། །
ལུས་དང་སྲོག་ལ་མི་ལྟ་བར། །བྱང་ཆུབ་དོན་དུ་གཉེར་བ་བགྱིད། །ལྷའི་བུ་གཞན་དུ་མི་སེམས་པའི་བློ་གྲོས་ཀྱིས་གསོལ་པ། ཐུབ་པ་བསྙེངས་པ་མི་མངའ་བ། །ཁྱོད་ཀྱི་དམ་ཆོས་འདི་ཐོས་ནས། །གཞན་དུ་སེམས་པ་མ་མཆིས་པར། །བརྟུལ་ཞུགས་མཆོག་ཅན་བྱང་ཆུབ་
ཚོལ། །ལྷའི་བུ་གཞན་དུ་མི་འགྲོ་བས་གསོལ་པ། མི་དབང་ཁྱོད་ཀྱི་གསུང་ཐོས་ནས། །ཐེག་པ་གཉིས་པོ་སྤང་བགྱིས་ཤིང ། །ལམ་གཞན་དུ་ནི་མི་མཆི་བར། །བླ་ན་མེད་པའི་བྱང་ཆུབ་ཚོལ། །ལྷའི་བུ་ཉེ་བར་གནས་ཀྱིས་གསོལ་པ། །སེང་གེའི་ང་རོ་འདི་བསྒྲགས་པ། །རྒྱལ་
བའི་སྲས་ཀྱིས་ཐོས་གྱུར་ན། །བྱང་ཆུབ་མཆོག་ལ་ཉེར་གྱུར་ཅིང ། །དེ་དག་རྐང་གཉིས་དམ་པར་འགྱུར། །ལྷའི་བུ་སྤོབས་པ་ཉེ་བར་གྱུར་པས་གསོལ་པ། གྲགས་ཆེན་ཁྱོད་ཀྱིས་གསུང་བརྗོད་པའི། །སྤོབས་པ་དེ་ནི་ཐོས་གྱུར་ནས། །སངས་རྒྱས་ཆོས་ལ་ཁྱོད་ཀྱི་སྲས། །ཀུན་ཀྱང་
དགའ་བ་རབ་ཏུ་བསྐྱེད། །ལྷའི་བུ་སྤོབས་པ་ཐོབ་པས་གསོལ་པ། འཇིགས་མེད་ཁྱོད་ཀྱིས་གསུང་བསྒྲགས་པ། །མ་སྨད་སྲས་ཀྱིས་ཐོས་གྱུར་ན། །དེ་དག་སྤོབས་པ་ནམ་དུ་ཡང ། །སངས་རྒྱས་ཉིད་ལས་ཕྱིར་མི་ལྡོག་།ལྷའི་བུ་རྟག་ཏུ་རབ་དགས་གསོལ་པ། འཇིགས་མེད་
ཁྱོད་ཀྱིས་གསུང་བསྒྲགས་པས། །སྟོབས་ཆེན་ཁྱོད་ཀྱི་སྲས་ཀྱི་རྣམས། །རྟག་ཏུ་རབ་ཏུ་དགའ་འགྱུར་ཅིང ། །མ་སྨད་དེ་དག་བྱང་ཆུབ་ཚོལ། །ལྷའི་བུ་ཡིད་ཞུམ་པ་མེད་པས་གསོལ་པ། ཁྱོད་ཀྱིས་གསུང་བསྒྲགས་ཐོས་གྱུར་ནས། །རྐང་གཉིས་དམ་པ་ཁྱོད་ཀྱི་སྲས། །དགའ་ཞིང</font><hr>42-1-114b<br><font size=+2>
ཞུམ་པ་མ་མཆིས་པར། །བྱང་ཆུབ་མཆོག་ནི་ཚོལ་བར་བགྱིད། །ལྷའི་བུ་ཐོགས་མེད་ཡིད་ཀྱིས་གསོལ་པ། ཁྱོད་ཀྱིས་གསུང་བསྒྲགས་ཐོས་པས་ན། །སེམས་རངས་གྱུར་ཅིང་ཡིད་དགའ་སྟེ། །དེ་དག་ཡིད་ནི་ནམ་དུ་ཡང ། །བྱང་ཆུབ་ཉིད་དུ་ཐོགས་མ་མཆིས། །ལྷའི་བུ་ཆོས་ལ་བར་
ཆད་མེད་ལ་མཁས་པས་གསོལ་པ། ཆོས་རྣམས་གང་ལ་བསྟེན་བགྱིས་ཀྱང ། །དཀར་པོའི་ཕྱོགས་དག་མི་འགྲིབ་ཅིང ། །དེ་ཡི་བར་ཆད་མི་འགྱུར་བའི། །གནས་ནི་ཐུབ་པ་ཁྱོད་ཀྱིས་མཁྱེན། །ལྷའི་བུ་ཆོས་ངེས་པར་བསྟན་པ་ལ་མཁས་པས་གསོལ་པ། དཀར་པོའི་ཕྱོགས་ལ་སྤྱོད་
པ་ལ། །བར་ཆད་འབྱུང་བར་མི་འགྱུར་ཞིང ། །གནས་ཀྱང་མེད་པར་ཐུབ་པས་མཁྱེན། །དེས་ན་སྟོན་པ་བསྙེངས་མི་མངའ། །ལྷའི་བུ་ཆོས་ཀྱི་ངོ་བོ་ཉིད་ལ་མཁས་པས་གསོལ་པ། དགེ་བ་ཀུན་ནས་ཉོན་མོངས་པ། །ནག་པོའི་ཕྱོགས་ཀྱི་རང་བཞིན་ཏེ། །ཁྱོད་ཀྱི་ཐུགས་ནི་དེས་མི་
གོས། །གནས་ཀྱང་མེད་པར་ཐུབ་པས་མཁྱེན། །ལྷའི་བུ་རིག་པ་ལ་མཁས་པས་གསོལ་པ། ནག་པོའི་ཆོས་ནི་ནམ་དུ་ཡང ། །དཀར་པོའི་ཆོས་དང་མི་འགྲོགས་པར། །རིགས་པར་བཅོམ་ལྡན་ཁྱོད་ཀྱིས་གསུངས། །དེས་ན་བཅོམ་ལྡན་བདག་གི་བླ། །ལྷའི་བུ་དགེ་བ་དང་མི་དགེ་
བ་རིག་པས་གསོལ་པ། ཆོས་རྣམས་ཐམས་ཅད་མ་འདྲེས་པར། །དཔའ་བོ་ཆེན་པོ་ཁྱོད་ཀྱིས་མཁྱེན། །ཀུན་ནས་ཉོན་མོངས་བརྟགས་པས་ན། །དཀར་པོའི་ཕྱོགས་ལས་འགྲིབ་པར་འགྱུར། །ལྷའི་བུ་ལམ་ལ་མཁས་པས་གསོལ་པ། ཀུན་ནས་ཉོན་མོངས་སྤྱོད་པ་ལ། །དཀར་
པོའི་ཕྱོགས་ནི་མི་འབྱུང་སྟེ། །དེ་ལྟར་འཚལ་བར་མ་གྱུར་ལ། །བར་ཆད་དུ་ནི་འགྱུར་བར་གསུངས། །ལྷའི་བུ་ཐར་པ་འདོད་ཀྱིས་གསོལ་པ།ནག་པོའི་ཕྱོགས་ལ་སྟེན་བགྱིད་ན། །ཐར་པར་འདོད་པ་མང་པོ་ཡི། །བར་དུ་གཅོད་པར་འགྱུར་ཞེས་གསུངས། །དེས་ན་རྒྱལ་ཁྱོད་
ཐམས་ཅད་མཁྱེན། །ལྷའི་བུ་དག་པའི་སེམས་ཀྱིས་གསོལ་པ། སེམས་གྲོལ་བགྱི་བར་གང་འཚལ་བས། །ཀུན་ནས་ཉོན་མོངས་ཤེས་བྱ་ཞེས། །དཔའ་བོ་ཆེན་པོ་ཁྱོད་ཀྱིས་གསུངས། །དེ་ཁྱོད་འཇིག་རྟེན་མཆོད་རྟེན་ལགས། །ལྷའི་བུ་ཉོན་མོངས་མཐོང་གིས་གསོལ་པ།


</font><hr>42-1-115a<br><font size=+2>
ཀུན་ནས་ཉོན་མོངས་སྤྱོད་བགྱིད་ཅིང ། །ཀུན་ནས་ཉོན་མོངས་མ་འཚལ་ན། །དམ་པའི་ཆོས་ནི་ཤེས་མི་ནུས། །དེ་སྐད་བདེ་བར་གཤེགས་པས་གསུངས། །ལྷའི་བུ་སྡིག་མཐོང་གིས་གསོལ་པ། སྡིག་པ་རྣམས་ལ་བསྟེན་བྱས་ཀྱང ། །དགེ་བ་མི་འགྲིབ་གང་སྨྲ་བ། །
དེ་ནི་ཐར་ཆོས་སྐལ་མེད་ཅེས། །རྐང་གཉིས་དམ་པ་ཁྱོད་ཀྱིས་གསུངས། །ལྷའི་བུ་གདུལ་བར་བྱ་བས་གསོལ་པ། ཆགས་པ་གདུལ་བར་གང་འདོད་དང ། །ཞེ་སྡང་གཏི་མུག་འདུལ་འདོད་པས། །ཐུབ་པའི་སྤོབས་པ་ཅི་འདྲ་བ། །དེ་ལྟ་བུར་ནི་ནན་ཏན་བགྱི། །ལྷའི་བུ་ཀུན་ནས་ཉོན་མོངས་པ་དག་
པས་གསོལ་པ། དག་དང་ཀུན་ནས་ཉོན་མོངས་པ། །མི་མཁས་གང་རྣམས་མི་ཤེས་པ། །དེ་དག་སྟོན་པ་སངས་རྒྱས་མིན། །དེ་སྐད་དྲང་སྲོང་མཆོག་གིས་གསུངས། །ལྷའི་བུ་ཐར་པ་ལ་བརྩོན་གྱིས་གསོལ་པ། །ཉོན་མོངས་འགྲིབ་པར་འགྱུར་བའི་ཆོས། །རྒྱལ་བ་ཡིས་ནི་གང་
བསྟན་པ། །དེ་བསྟེན་ཉོན་མོངས་མི་ཟད་ཅེས། །ཁྱོད་ལ་རྒོལ་བ་ཡོང་མ་མཆིས། །ལྷའི་བུ་ཐར་པ་ལ་མངོན་པར་ཕྱོགས་པས་གསོལ་པ། ཆོས་གང་ཉོན་མོངས་གང་གི་རྣམས། །ཟད་འགྱུར་ཐུབ་པས་བསྟན་པ་ལ། །ཡང་དག་བརྩོན་བྱས་མི་ཟད་ཅེས། །རྒོལ་བ་འདི་ནི་ཡོང་མི་
དམིགས། །ལྷའི་བུ་རྣལ་འབྱོར་ལ་མངོན་པར་བརྩོན་པས་གསོལ་པ། རྒྱལ་བ་ཁྱོད་ཀྱིས་ཉན་ཐོས་ལ། །གང་གི་དོན་དུ་ཆོས་བསྟན་པ། །དེ་བརྩོན་བགྱིས་པས་མི་འཐོབ་ཅེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་མི་འཇིགས་དཔལ་གྱིས་གསོལ་པ། འདོད་ཆགས་སྤང་ཕྱིར་
མི་སྡུག་པ། །བསྟན་ལ་ཡང་དག་བརྩོན་བགྱིས་ན། །འདོད་ཆགས་ཟད་པར་མི་འགྱུར་ཞེས། །ཁྱོད་ལ་རྒོལ་བ་ཡོང་མ་མཆིས། །ལྷའི་བུ་འགྲོ་བ་མེད་པ་རབ་ཏུ་ཤེས་ཀྱིས་གསོལ་པ། ཤིན་ཏུ་བསྙེངས་པ་མི་མངའ་བས། །ཞེ་སྡང་སྤང་ཕྱིར་བྱམས་གསུངས་པ། །དེ་བསྒྲུབས་སེལ་
བར་མི་འགྱུར་ཞེས། །དགྲ་འཇོམས་ཁྱོད་ལ་རྒོལ་མ་མཆིས། །ལྷའི་བུ་མིག་རྣམ་པར་དག་གིས་གསོལ་པ། ཤེས་རབ་གཏི་མུག་སྤང་བའི་ཕྱིར། །གསུངས་པ་དེ་ལ་བསྟེན་བགྱིས་ཀྱང ། །གཏི་མུག་སེལ་བར་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་རྣམ་པར</font><hr>42-1-115b<br><font size=+2>
རྟོག་པ་འཇོམས་ཀྱིས་གསོལ་པ། རྣམ་པར་རྟོག་པའི་གཉེན་པོར་ནི། །དབུགས་དབྱུང་རྔུབ་པ་དྲན་གསུངས་པ། །དེ་ལ་བརྩོན་བགྱིས་མ་ཞི་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་མཚན་མ་མེད་པ་ལྷུར་ལེན་པས་གསོལ་པ། ངའོ་སྙམ་པ་སྤང་སླད་དུ། །སྟོང་ཉིད་ཁྱོད་
ཀྱིས་བཀའ་སྩལ་ཏེ། །དེས་ནི་དེ་ཞི་མི་འགྱུར་ཞེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་ངའོ་སྙམ་པའི་ང་རྒྱལ་སྤངས་ཀྱིས་གསོལ་པ། ང་སྙམ་ང་རྒྱལ་སྤང་སླད་དུ། །མཚན་མ་མེད་པ་ཁྱོད་ཀྱིས་གསུངས། །བསྟེན་ཀྱང་ཞི་བར་མི་འགྱུར་ཞེས། །འདི་ན་ཁྱོད་ལ་རྒོལ་མ་
མཆིས། །ལྷའི་བུ་སེམས་རྒྱུན་རྣམ་པར་དག་པས་གསོལ་པ། ལྷག་པའི་བསམ་པ་དག་པ་ཡིས། །ཉོན་མོངས་ཐམས་ཅད་འཇིག་པར་འགྱུར། །དེས་ནི་ཉོན་མོངས་མི་ཟད་ཅེས། །འདི་ན་ཁྱོད་ལ་རྒོལ་མ་མཆིས། །ལྷའི་བུ་འདུ་ཤེས་རྣམ་པར་བཤིག་གིས་གསོལ་པ། ཕྱོགས་གང་
གཉེན་པོའི་རྣམ་པ་དང ། །ཉོན་མོངས་ལམ་དང་ལམ་འཇུག་ལ། །འཇིགས་པ་མེད་པར་རྒོལ་བ་ནི། །ཐུབ་པ་ཆེན་པོ་མ་མཐོང་ངོ ། །ལྷའི་བུ་ཐ་སྙད་ཤིན་ཏུ་ཤེས་པས་གསོལ་པ། བཅོམ་ལྡན་ཕྱོགས་དང་ཕྱོགས་མིན་དང ། །ཟད་དང་མ་ཟད་ཐ་སྙད་ཙམ། །འཇིགས་པ་མ་མཆིས་རྒོལ་
བགྱིད་པ། །ཐུབ་པ་དེ་ནི་མིང་ཙམ་མོ། །ལྷའི་བུ་ལུས་ཀྱི་ལས་དུལ་བས་གསོལ་པ། མཁྱེན་པས་ཡོངས་སུ་མཁྱེན་གྱུར་ནས། །ཁྱོད་ཀྱི་སྐུ་ཡི་ཕྲིན་ལས་འཇུག་།ཐམས་ཅད་མ་ལུས་མཁྱེན་པས་ན། །དེས་ན་འདྲེན་པ་ཐམས་ཅད་མཁྱེན། །ལྷའི་བུ་ལུས་ཀྱི་ལས་ཡོངས་སུ་ཤེས་
པས་གསོལ་པ། སེམས་ཅན་རྣམས་ལ་ཐུགས་བརྩེ་བས། །དཔའ་བོ་ཁྱོད་སྐུའི་ཕྲིན་ལས་ནི། །མཐའ་དག་ཤིན་ཏུ་ངེས་པ་ལགས། །འཇིག་རྟེན་མགོན་ལ་ཕྱག་ཀྱང་འཚལ། །ལྷའི་བུ་ལུས་ཀྱི་ལས་ཤིན་ཏུ་ངེས་པས་གསོལ་པ། སྐུ་ཡི་ཕྲིན་ལས་རབ་ངེས་པར། །ལུས་ཅན་ཀུན་ལ་
སྨན་སླད་དུ། །འཇིག་རྟེན་སྒྲོན་མ་ཁྱོད་མཛད་དེ། །དེས་ན་ཁྱོད་ནི་གང་ཟག་མཆོག་།ལྷའི་བུ་ལུས་ཀྱི་ལས་ཀྱི་མཐའ་ཤིན་ཏུ་མཐོང་བས་གསོལ་པ། སེམས་ཅན་ཀུན་ལ་སྨན་སླད་དུ། །འདྲེན་པ་ཐམས་ཅད་མཁྱེན་པ་ནི། །སྐུ་ཡི་ཕྲིན་ལས་དག་པ་དང ། །ལེགས་པར་ཡོངས</font><hr>42-1-116a<br><font size=+2>
སུ་བརྟགས་དང་ལྡན། །ལྷའི་བུ་ལུས་ཀྱི་ལས་ཀྱི་མཐའ་ཤིན་ཏུ་མཉམ་པར་བཞག་པས་གསོལ་པ། ཤིན་ཏུ་མཉམ་པར་བཞག་སྐུ་དང ། །སྐུ་ཡི་ཕྲིན་ལས་རྣམ་དག་དང ། །ལྡན་པར་སེམས་ཅན་བདེ་དོན་དུ། །གང་ཟག་མཆོག་ནི་སྤྱོད་པར་མཛད། །ལྷའི་བུ་ཚིག་གྲུབ་
ཀྱིས་གསོལ་པ། སྙན་ཅིང་ཡོན་ཏན་ལྡན་པ་དང ། །རྩུབ་པ་ཡོངས་སུ་སྤངས་པའི་གསུང ། །མཁྱེན་པས་ཤིན་ཏུ་ཡོངས་བརྟགས་ཤིང ། །མགོན་པོ་ཁྱོད་ནི་གསུང་བ་མཛད། །ལྷའི་བུ་དུས་སུ་སྨྲ་པས་གསོལ་པ། དུས་སུ་དོན་དང་ལྡན་པ་དང ། །དོན་མེད་ཡོངས་སུ་སྤངས་པའི་
གསུང ། །གསུང་བར་འོས་དང་བླང་འོས་པ། །འདྲེན་པ་ཁྱོད་ནི་གསུང་བ་མཛད། །ལྷའི་བུ་སྡུམས་བྱེད་བློ་གྲོས་ཀྱིས་གསོལ་པ། དབྱེན་དུ་འགྱུར་བ་ཡོངས་སྤངས་ཏེ། །འདུམ་པར་གྱུར་དང་ཡིད་འོང་བ། །དབྱེན་མེད་འབྲས་བུ་རྣམ་པར་སྨིན། །སྔོན་ཆད་ཁྱོད་ཀྱིས་གསུང་དུ་བརྗོད། །
ལྷའི་བུ་མི་སླུ་བས་གསོལ་པ། སྲོག་གི་དོན་དུའང་ཁྱོད་ཀྱིས་ནི། །སྲིད་པ་རྣམས་སུ་བརྫུན་མ་གསུངས། །དེ་བས་ཁྱོད་ཀྱི་གྲགས་པ་ཀུན། །འཇིག་རྟེན་དག་ན་ཐོགས་མ་མཆིས། །ལྷའི་བུ་ཡང་དག་པར་སྨྲ་བས་གསོལ་པ། འདི་ལྟར་འགྲོ་བ་ཐམས་ཅད་ཀྱང ། །སངས་རྒྱས་ཆོས་
རྣམས་བཙལ་སླད་དུ། །ཐུབ་པའི་གསུང་ལ་བསྟོད་པ་ནི། །ཡང་དག་གསུངས་པའི་རྒྱུ་འཐུན་ལགས། །ལྷའི་བུ་ཡང་དག་པའི་མཐའ་ལས་ངེས་པར་བྱུང་གིས་གསོལ་པ། མི་མཆོག་ཁྱོད་ཀྱིས་བདེན་པ་ཡིས། །རྫོགས་པའི་བྱང་ཆུབ་འདི་བསྒྲུབས་ཏེ། །ཆོས་ཀྱི་ཡང་དག་རང་
བཞིན་ཡང ། །རྐང་གཉིས་དམ་པ་ཁྱོད་ཀྱིས་མཁྱེན། །ལྷའི་བུ་ཡང་དག་པ་ལ་རྟུལ་བས་གསོལ་པ། འདུས་བྱས་དག་གི་ཆོས་ཀྱི་རྣམས། །ཡང་དག་ཇི་བཞིན་བལྟ་བ་དང ། །ཆོས་རྣམས་ཡང་དག་མཚན་ཉིད་ཀྱང ། །མི་ཡི་དབང་པོས་རབ་ཏུ་མཁྱེན། །ལྷའི་བུ་ལས་ལ་རྟོག་པས་གསོལ་
པ། ཡེ་ཤེས་ཡོངས་སུ་དག་པ་ཡིས། །བདག་ཉིད་དང་ནི་གཞན་དག་གི་།ཚིག་གི་ལས་ཀྱང་རབ་ཏུ་མཁྱེན། །དེས་ན་རྒྱལ་བ་མཉམ་མ་མཆིས། །ལྷའི་བུ་ཡིད་ལ་རྟོག་པས་གསོལ་པ། མི་ཡི་དབང་པོའི་ཐུགས་ཀྱི་ལས། །ཇི་སྙེད་གང་དག་འཇུག་པ་ནི། །དེ་དག་འགྲོ་ལ</font><hr>42-1-116b<br><font size=+2>
ཐུགས་རྗེས་འཇུག་།འགྲོ་ཕན་ཁྱོད་ལ་ཕྱག་ཀྱང་འཚལ། །ལྷའི་བུ་ཡིད་ཀྱི་རྣམ་པར་རྟོག་པ་ལ་མཁས་པས་གསོལ་པ། འགྲོ་ལ་ཐུགས་རྗེ་བསྐྱེད་ནས་ནི། །གང་ལ་ཁྱོད་ནི་སྤྱོད་མཛད་པ། །དེ་ལ་ཐུགས་ནི་དུལ་བར་བྱུང ། །འགྲོ་ཕན་ཁྱོད་ལ་ཕྱག་ཀྱང་འཚལ། །ལྷའི་བུ་ཐབས་ལ་མཁས་པས་
གསོལ་པ། འགྲོ་བའི་བསམ་པ་རྣམ་དཔྱད་ནས། །རྣམ་འདྲེན་ཐུགས་ཀྱི་ཕྲིན་ལས་འཇུག་།ཐུབ་པ་ཡེ་ཤེས་སྣ་ཚོགས་ནི། །མཁྱེན་བཞིན་ཀུན་ཏུ་རབ་ཏུ་འཇུག་།ལྷའི་བུ་ཡིད་རྣམ་པར་བཤིག་གིས་གསོལ་པ། སངས་རྒྱས་ས་དང་ཡིད་ཀྱི་ལས། །སེམས་ཅན་ཐུགས་རྗེས་གཟིགས་
པས་འབྱུང ། །སངས་རྒྱས་ཉིད་ལ་ཡེ་ཤེས་ཐབས། །རང་བཞིན་མེད་པར་རབ་ཏུ་མཁྱེན། །ལྷའི་བུ་འདས་པ་ལ་མཁས་པས་གསོལ་པ། སྦྱིན་དང་ཚུལ་ཁྲིམས་བཟོད་པ་དང ། །བརྩོན་འགྲུས་བསམ་གཏན་དག་ལ་ཡང ། །གང་གིས་གང་ལ་སྔོན་སྤྱད་པ། །སྔོན་གྱི་དུས་ཀྱང་རབ་ཏུ་མཁྱེན། །
ལྷའི་བུ་འདས་པ་ལ་རྟོག་པས་གསོལ་པ། བྱང་ཆུབ་མཆོག་ནི་ཚོལ་མཛད་ཅིང ། །གང་དུ་ཁྱོད་ཀྱིས་སྔོན་སྤྱད་པ། །སྔོན་གྱི་སྤྱོད་པ་ཡོངས་བརྟགས་ནས། །སངས་རྒྱས་བྱེ་བ་རབ་ཏུ་མཁྱེན། །ལྷའི་བུ་སྔོན་གྱི་ཚུལ་ཕུན་སུམ་ཚོགས་པས་གསོལ་པ། བསྐལ་པ་བྱེ་བ་གྲངས་མེད་དུ། །གང་དུ་
ཁྱོད་ཀྱིས་སྔོན་སྤྱད་པ། །སྔོན་གྱི་ཚུལ་ནི་དགོངས་མཛད་ཀྱང ། །ཁྱོད་ཀྱི་ཐུགས་ཡིད་ཐོགས་མི་མངའ། །ལྷའི་བུ་སྔོན་གྱི་ཚུལ་ལ་ཡོངས་སུ་རྟོག་པས་གསོལ་པ། སངས་རྒྱས་མང་ལས་བྱུང་བ་ཡི། །ཏིང་འཛིན་མངོན་པར་བསྒྲུབ་བྱ་བ། །སངས་རྒྱས་བྱེ་བ་གྲངས་མེད་ལ། །རྣམ་
པར་འདྲེན་པ་ཁྱོད་ཀྱིས་ཞུས། །ལྷའི་བུ་སྔོན་གྱི་སྦྱོར་བ་ལས་ངེས་པར་བྱུང་གིས་གསོལ་པ། སྔོན་གྱི་སངས་རྒྱས་དྲུང་དག་ཏུ། །གྲངས་མེད་དཔག་ཏུ་མེད་པ་ཡི། །ཏིང་འཛིན་སྒོ་དག་འདྲེན་པ་ཡིས། །ཞུས་ཤིང་བསྒོམ་པ་མཛད་པར་གྱུར། །ལྷའི་བུ་སྔོན་གྱི་གནས་ལ་རྟོག་པས་
གསོལ་པ། འཁོར་བའི་ཉེས་པ་རབ་མང་དང ། །བཀུར་སྟི་རྣམ་པ་སྣ་ཚོགས་དག་།གཟིགས་པས་སེམས་ཅན་རྣམས་ལ་སྟོན། །སེམས་ཅན་ལོང་བ་རྣམས་ཀྱང་འགྲེལ། །ལྷའི་བུ་སྔོན་གྱི་དུས་ན་འཕྲུལ་པས་གསོལ་པ། གཞན་དང་གཞན་དག་ཟོས་ཤིང་འཚལ། །རྩེ་ཞིང་རབ་ཏུ</font><hr>42-1-117a<br><font size=+2>
དགའ་བ་བགྱིས། །གནོད་པ་མི་བཟད་བགྱིས་པ་དག་།གཞན་དང་གཞན་ཡང་ཁྱོད་ཀྱིས་གཟིགས། །ལྷའི་བུ་སྔོན་གྱི་སྤྱོད་པས་ཡང་དག་པར་བྱུང་བས་གསོལ་པ། ཐམས་ཅད་མཁྱེན་པ་འགྲོ་རྟོགས་པ། །ཁྱོད་ཀྱི་ཡེ་ཤེས་འདས་དུས་ཀྱི། །ལས་དང་བསམ་
གཏན་སྙོམས་འཇུག་དང ། །འགྲོ་བ་རྣམས་ལ་ཐོགས་མ་མཆིས། །ལྷའི་བུ་ཕྱི་མའི་མཐའ་ལ་མཁས་པས་གསོལ་པ། འདྲེན་པ་ཁྱོད་ཀྱི་མཁྱེན་པ་ནི། །མ་འོངས་དུས་ཀྱི་འཆི་འཕོ་དང ། །སྐྱེ་དང་ལས་ཀྱི་རྣམ་སྨིན་ལ། །ཐོགས་པར་འགྱུར་བ་མ་མཆིས་སོ། །ལྷའི་བུ་མ་འོངས་པའི་སྤྱོད་
ཡུལ་གྱིས་གསོལ་པ། བརྟེན་པ་འགྲོ་བ་མཁས་ཁྱོད་ཀྱི། །མཁྱེན་པ་ཕྱི་དུས་སེམས་ཅན་གྱི། །བསམ་དང་ལས་ཀྱི་འབྲས་བུ་དང ། །འགྲོ་བ་རྣམས་ལ་ཐོགས་མ་མཆིས། །ལྷའི་བུ་སྲིད་པ་ལས་བསྐྱོད་ཀྱིས་གསོལ་པ། ཁམས་རྣམས་གསུམ་པོ་འདི་དག་དང ། །དུས་གསུམ་ཀུན་ལ་
མཁས་ཁྱོད་ཀྱི། །ཡེ་ཤེས་མཆོག་ནི་མི་ཆགས་ཏེ། །སྲིད་པའི་སྤྱོད་ཡུལ་ཁྱོད་ཀྱིས་མཁྱེན། །ལྷའི་བུ་ཐ་སྙད་ལ་སྤྱོད་པས་གསོལ་པ། ལས་དང་སེམས་ཅན་འགྲོ་བ་དང ། །རྣམ་པར་སྨིན་པ་མྱོང་བ་དག་།དེ་དག་ཐམས་ཅད་མིང་ཙམ་དུ། །རྐང་གཉིས་དམ་པ་བསྟན་པ་མཛད། །ལྷའི་བུ་ད་ལྟར་བྱུང་བ་ལ་
ཡང་དག་པར་རྟོག་པས་གསོལ་པ། དཔའ་བོ་ཁྱོད་ཀྱི་མཁྱེན་པ་ནི། །ད་ལྟར་བྱུང་ལ་ཐོགས་མ་མཆིས། །གྲངས་མེད་སངས་རྒྱས་ཞིང་རྣམས་ནི། །འཇིག་རྟེན་མགོན་པོས་རབ་ཏུ་མཁྱེན། །ལྷའི་བུ་ད་ལྟར་བྱུང་བ་ལ་རྣམ་པར་དཔྱོད་པས་གསོལ་པ། མི་ཡི་དབང་པོས་རྣམ་དཔྱད་ནས། །བྱིས་པའི་བློ་གྲོས་
རྨོངས་བགྱིད་པ། །དུས་གསུམ་དངོས་པོ་མ་མཆིས་པར། །ངེས་པར་མཉམ་པ་ཉིད་དུ་གཟིགས། །ལྷའི་བུ་མི་གནས་པའི་བློ་གྲོས་ཀྱིས་གསོལ་པ། དུས་གསུམ་གནས་པ་མ་མཆིས་ཤིང ། །ངོ་བོ་ཉིད་ལ་མི་གནས་ཏེ། །དངོས་པོ་ཐམས་ཅད་དངོས་མེད་པར། །རྣམ་པར་འདྲེན་པ་ཁྱོད་ཀྱིས་གཟིགས། །
ལྷའི་བུ་དུས་གསུམ་མངོན་པར་བསྐུལ་བས་གསོལ་པ། འདས་པ་དག་དང་མ་འོངས་དང ། །ད་ལྟར་བྱུང་བའི་ཕུང་པོ་རྣམས། །མ་མཆིས་དངོས་པོ་མ་མཆིས་པར། །སྐྱེས་བུ་དམ་པས་བསྟན་པ་མཛད། །ལྷའི་བུ་ཆགས་མེད་ཡིད་ཀྱིས་གསོལ་པ། དུས་གསུམ་སེམས་ཅན་ཐམས་ཅད་ལ། །སྙིང་པོ་མཆིས་པར</font><hr>42-1-117b<br><font size=+2>
མ་བསྟན་ཏེ། །སྒྱུ་མ་སྨིག་རྒྱུ་མིག་ཡོར་དང ། །བྲག་ཅ་ལྟ་བུར་ཁྱོད་ཀྱིས་བསྟན། །ལྷའི་བུ་དུས་གསུམ་དཔོག་གིས་གསོལ་པ། འདྲེན་པ་ཁྱོད་ཀྱི་མཁྱེན་པ་ནི། །དུས་གསུམ་པོ་དག་ཀུན་དུ་ཡང ། །སྒྱུ་མ་ལྟ་བུར་མཁྱེན་པས་ན། །ཁྱོད་ཀྱི་དབང་པོ་ཆགས་མི་མངའ། །ལྷའི་བུ་མོས་པ་ཡོངས་སུ་རིག་པར་
བྱེད་ཀྱིས་གསོལ་པ། གང་གི་ནུབ་མོ་དཔའ་ཁྱོད་ཀྱིས། །བྱང་ཆུབ་མངོན་དུ་བགྱིས་གྱུར་པ། །དེ་དུས་ཚུན་ཆད་མོས་པ་ལ། །བྲི་བར་གྱུར་པར་ཡོང་མི་གདའ། །ལྷའི་བུ་མོས་པ་ཡང་དག་ཐོབ་ཀྱིས་གསོལ་པ། འཇིག་རྟེན་སྒྲོལ་མའི་མོས་པ་ནི། །བར་དུ་རྒྱུན་ཆད་མི་འགྱུར་ཏེ། །རྟག་པར་ཁྱོད་ཀྱི་མོས་པ་
དེས། །ཁྱོད་ཀྱི་སྲས་རྣམས་མོས་པ་ཆེ། །ལྷའི་བུ་མོས་པས་མངོན་འཕགས་ཀྱིས་གསོལ་པ། ཆབ་ལས་པད་མ་ཇི་བཞིན་དུ། །ཁྱོད་ནི་མོས་པས་མངོན་དུ་འཕགས། །འཇིག་རྟེན་དག་གིས་མི་གོས་ཏེ། །པད་མ་ཆབ་ཀྱིས་ཇི་བཞིན་ནོ། །ལྷའི་བུ་མོས་པས་ཡོངས་སུ་གྲོལ་གྱིས་གསོལ་པ། 
འཇིག་རྟེན་མགོན་དང་མོས་པ་ནི། །ཆོས་ཀྱི་དབྱིངས་ཞེས་བརྗོད་པ་སྟེ། །གཉིས་མེད་གཉིས་སུ་བགྱིད་མ་མཆིས། །སྨད་པ་མེད་པ་ཁྱོད་ཀྱིས་གཟིགས། །ལྷའི་བུ་བརྩོན་འགྲུས་ཡང་དག་ཐོབ་ཀྱིས་གསོལ་པ། གཟི་བརྗིད་ཆེན་པོ་བརྩོན་འགྲུས་ཀྱིས། །བྱང་ཆུབ་ཡང་དག་བརྙེས་པར་གྱུར། །མཛད་
པ་མཛད་ཀྱང་མགོན་པོ་ཁྱོད། །བརྩོན་འགྲུས་བཏང་བ་ཡོང་མ་མཛད། །ལྷའི་བུ་དྲན་པ་ཕུན་སུམ་ཚོགས་པས་གསོལ་པ། དཔའ་བོ་ཆེན་པོའི་དགོངས་པ་ནི། །ཐམས་ཅད་ཀུན་གྱི་རྗེས་སུ་འཇུག་།མཛད་པ་མཛད་ཀྱང་མགོན་པོ་ཁྱོད། །དགོངས་པ་བྲི་བ་ཡོང་མ་མཆིས། །ལྷའི་བུ་སེམས་མཉམ་པར་
བཞག་པས་གསོལ་པ། མགོན་པོ་རྟག་ཏུ་མཉམ་བཞག་སྟེ། །སེམས་ཅན་རྣམས་ཀྱི་སྤྱོད་པ་མཁྱེན། །འདྲེན་པ་སྤྱོད་པའི་དབང་གིས་ནི། །སེམས་ཅན་རྣམས་ལ་ཆོས་ཀྱང་སྟོན། །ལྷའི་བུ་ཤེས་རབ་ལྷུར་ལེན་གྱིས་གསོལ་པ། འཇིག་རྟེན་སྒྲོན་མར་གྱུར་ཁྱོད་ཀྱི། །ཡེ་ཤེས་རྒྱ་མཚོའི་མཐའ་
མ་ནི། །བསྐལ་པ་བྱེ་བར་བརྗོད་བགྱིས་ཀྱང ། །སངས་རྒྱས་རྣམས་ཀྱིས་བཤད་མི་སྤྱོད། །ལྷའི་བུ་རྣམ་པར་གྲོལ་བ་ལ་མཁས་པས་གསོལ་པ། རྣམ་པར་གྲོལ་དང་མ་གྲོལ་བ། །གང་སླད་ཁྱོད་ཀྱིས་མ་བརྙེས་པས། །མཚུངས་པ་མེད་པ་ཁྱོད་ལ་ནི། །རྣམ་གྲོལ་ཡོངས་སུ་ཉམས་མི་མངའ། །


</font><hr>42-1-118a<br><font size=+2>
ལྷའི་བུ་རྣམ་པར་གྲོལ་བའི་ཡེ་ཤེས་ལ་བརྩོན་པས་གསོལ་པ། ཐུབ་པ་ཁྱོད་ནི་རྣམ་གྲོལ་ནས། །ངོ་བོ་ཉིད་མེད་མཁྱེན་པས་ན། །རྣམ་གྲོལ་ཡེ་ཤེས་གཟིགས་པ་ནི། །ཡང་དག་མཁྱེན་པ་ཉམས་མི་མངའ། །ལྷའི་བུ་སྔོན་གྱི་སྲིད་པ་རྣམ་པར་དཔྱོད་ཀྱིས་གསོལ་པ། མར་མེ་མཛད་པ་
ཚུན་ཆད་དུ། །དཔའ་བོ་ཡང་དག་གཟིགས་ཁྱོད་ཀྱི། །སྤྱོད་ལ་འཁྲུལ་པ་མི་མངའ་སྟེ། །དེས་ན་སངས་རྒྱས་ལེགས་ཞེས་བསྟོད། །ལྷའི་བུ་ཟབ་མོ་ལ་སྤྱོད་པས་གསོལ་པ། སྲོག་ཆགས་གཞན་དག་ཇི་བཞིན་དུ། །བདེ་གཤེགས་ཁྱོད་ལ་ཆགས་མི་མངའ། །ཆོས་ཀྱི་རང་བཞིན་མཁྱེན་པས་
ན། །རང་བཞིན་དེ་ལ་རྨོངས་མི་མངའ། །ལྷའི་བུ་བློ་གྲོས་ཡངས་པས་གསོལ་པ། ཐམས་ཅད་མཁྱེན་པ་ཁྱོད་ལ་ནི། །རྣམ་པ་ཀུན་དུ་བསྙེལ་མི་མངའ། །མགོན་པོའི་དགོངས་པ་ཉེར་གཞག་པས། །ཐུབ་པ་འབྲུ་མར་སྣོད་དང་འདྲ། །ལྷའི་བུ་སེམས་གཡེང་བ་མེད་ཀྱིས་གསོལ་པ། འཇིག་
རྟེན་སྒྲོན་མ་ཁྱོད་ལ་ནི། །མཉམ་པར་མ་བཞག་སེམས་མི་མངའ། །མ་འདྲེས་སངས་རྒྱས་ཆོས་ཀྱི་རྣམས། །སྲོག་ཆགས་ཀུན་གྱིས་ཤེས་པར་དཀའ། །ལྷའི་བུ་ཡེ་ཤེས་ལ་རབ་ཏུ་གནས་ཀྱིས་གསོལ་པ། བདེ་བར་གཤེགས་པ་ཁྱོད་ལ་ནི། །མ་བརྟགས་བཏང་སྙོམས་མི་མངའ་སྟེ། །མི་
ཡི་དབང་པོའི་སངས་རྒྱས་ཆོས། །མ་འདྲེས་པ་ནི་བསམ་མི་ཁྱབ། །ལྷའི་བུ་ཐམས་ཅད་ཟིལ་གནོན་གྱིས་གསོལ་པ། སྐྱེས་བུ་ཁྱུ་མཆོག་ཁྱོད་ལ་ནི། །འཇིག་རྟེན་གསུམ་ན་མཚུངས་མ་མཆིས། །ཐམས་ཅད་མཁྱེན་པ་མ་ཕམ་པ། །ཁྱོད་ཀྱིས་ཆོས་རྣམས་ཐམས་ཅད་མཁྱེན། །ལྷའི་བུ་སྙིང་པོ་
བླངས་པས་གསོལ་པ། སེམས་ཅན་སྙིང་པོ་བླ་ན་མེད། །ཆོས་རྣམས་ཀུན་ལ་འཇིགས་མི་མངའ། །སངས་རྒྱས་ཀུན་དང་མཉམ་བརྙེས་པ། །སངས་རྒྱས་བྱང་ཆུབ་ཕྱག་འཚལ་ལོ། །གནས་གཙང་མ་པའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་དེའི་ཚེ་གཞན་
མུ་སྟེགས་ཅན་སྤྱོད་པ་ཅན་དང ། ཀུན་ཏུ་རྒྱུ་དྲུག་ཁྲིས་ལྷ་མ་ཡིན་དང ། ནམ་མཁའ་ལྡིང་དང ། ཀླུའི་བུ་མོ་དང ། ཀླུ་དང ། གྲུལ་བུམ་དང ། དྲི་ཟ་དང ། གནོད་སྦྱིན་དང ། མིའམ་ཅི་དང ། ཕྲེང་ལྡན་གླང་པོ་ཅན་དང ། རྒྱལ་ཆེན་བཞིའི་རིས་དང་།སུམ་ཅུ་རྩ་གསུམ་དང ། འཐབ</font><hr>42-1-118b<br><font size=+2>
བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་དང ། ཚངས་པ་དང ། འོད་གསལ་དང ། དགེ་རྒྱས་དང ། འབྲས་བུ་ཆེ་བའི་ལྷ་དག་གིས་མཆོད་པ་ཡང་མཐོང ། ལུང་བསྟན་པ་ཡང་ཐོས། གནས་གཙང་མའི་རིས་ཀྱི་ལྷ་དག་གིས་བསྟོད་པ་བརྗོད་པ་ཡང་ཐོས་ནས་
ངོ་མཚར་ཐོབ་པར་གྱུར་ཏེ་ཆོས་ཀྱི་ཚུལ་ལ་འཇུག་པ་འདི་ཐོས་ནས་འདི་ལྟར་སྔོན་ཆད་མ་ཐོས་པའི་ཆོས་ཀྱི་ཚུལ་ཐོས་པས་ཡིད་གཉིས་སུ་གྱུར། ནེམ་ནུར་དང ། ཐེ་ཚོམ་ཟ་བར་གྱུར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་སྔན་ཆད་མ་ཐོས་པའི་ཆོས་བསྟན་པ་འདི་ཐོས་ནས་
བདག་ཅག་ནི་ཀུན་དུ་རྒྱུའི་གནས་ཀྱང་མི་འཚལ། ཁྱིམ་གྱི་གནས་ཀྱང་མི་འཚལ་བར་གྱུར་ཅིང་འདི་ལྟར་སྔོན་ཆད་མ་ཐོས་པའི་ཆོས་ཀྱི་ཚུལ་འདི་ཐོས་ནས་ཆོས་འདི་ལ་ནེམ་ནུར་དང་ཐེ་ཚོམ་དུ་གྱུར་ཏེ། སེམས་དང་བར་ཡང་མ་གྱུར་མོད་ཀྱི། འོན་ཀྱང་དགེ་སྦྱོང་གཽ་ཏ་མ་ཁྱོད་ལ་བདག་ཅག་ཡིད་ཆེས་པ་
མཆིས་སོ། །དེ་ཅིའི་སླད་དུ་ཞེ་ན། འདི་ལྟར་དགེ་སྦྱོང་གཽ་ཏ་མ་ཁྱོད་ཀྱིས་རྫུ་འཕྲུལ་མངོན་པར་འདུ་བྱ་བ་འདི་ལྟ་བུ་མངོན་པར་མཛད་དེ། རྫུ་འཕྲུལ་མངོན་པར་འདུ་བྱ་བ་ཇི་ལྟ་བུ་མངོན་པར་མཛད་པས་བདག་ཅག་གིས་ལྷའི་འཁོར་རྒྱ་ཆེན་པོ་འདི་དག་དང ། ཐམས་ཅད་དང་ལྡན་པའི་འཁོར་ཕལ་ཆེར་གཽ་ཏ་
མ་ཁྱོད་ཀྱི་ལེགས་པར་གསུངས་པ་འཚལ་ཞིང་ཡི་རངས་བར་གྱུར་བ་མཐོང་སྟེ། དེས་ན་བདག་ཅག་དགེ་སྦྱོང་གཽ་ཏ་མ་ཁྱོད་ལ་དད་པ་མཆིས་པར་གྱུར་ཏོ། །ཀྱེ་གཽ་ཏ་མ་གང་འབྲས་བུ་ཆེ་བའི་ལྷ་རྣམས་ཀྱིས་ཆོས་ཐམས་ཅད་ནི་དེ་བཞིན་གཤེགས་པའོ་ཞེས་སྨྲས་པ་དེ་ལ་ཇི་ལྟར་ཆོས་ཐམས་ཅད་དེ་བཞིན་
གཤེགས་པ་སྙམ་དུ་བདག་ཅག་ཐེ་ཚོམ་ཆེར་འཚལ་ལོ། །དགེ་སྦྱོང་གཽ་ཏ་མ་ཁྱོད་ནི་ཅི་ནས་བདག་ཅག་ལེགས་པར་བཤད་པའི་དོན་དེ་རྟོགས་ནས་མུན་པ་མེད་པར་གྱུར་ཏེ། སྟན་འདི་ལས་ལྡང་བར་འགྱུར་བ་དེ་ལྟར་བདག་ཅག་ལ་ཆོས་སྟོན་སྤྱོད་དོ་སྙམ་སྟེ། བདག་ཅག་དགེ་སྦྱོང་གཽ་ཏ་མ་ཁྱོད་
ལ་དེ་ལྟར་མངོན་པར་དད་པར་གྱུར་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་གཞན་མུ་སྟེགས་ཅན་སྤྱོད་པ་ཅན་དང ། ཀུན་ཏུ་རྒྱུ་རྣམས་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་རྒྱུ་དག་དེའི་ཕྱིར་ཁྱེད་ཉིད་ལ་དྲིས། ཁྱེད་ཀྱིས་ཇི་ལྟར་བཟོད་པ་དེ་ལྟར་ལན་ཐོབ་ཤིག་།དགེ</font><hr>42-1-119a<br><font size=+2>
སྦྱོང་གཽ་ཏ་མ་ལེགས་སོ་ཞེས་གསོལ་ཏེ། ཀུན་ཏུ་རྒྱུ་དེ་དག་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །ཀུན་ཏུ་རྒྱུ་དག་ཁྱེད་ཀྱིས་ཇི་ལྟར་མངལ་དུ་འཇུག་པ་ཤེས་སམ། དེ་དག་གིས་གསོལ་པ། ཀྱེ་གཽ་ཏ་
མ་བདག་ཅག་གིས་བསྟན་བཅོས་ལས་ཐོས་ན་གསུམ་འདུས་ནས་མངལ་དུ་འཇུག་པར་འགྱུར་ཏེ། གང་འདི་ཕ་དང་མ་གཉིས་ཀྱང་ཚོགས་པ་དང ། ཆགས་པར་ཡང་གྱུར་པ་དང ། ཆགས་ནས་ཀྱང་འདོད་པའི་རྣམ་པར་རྟོག་པ་རྣམས་ཀྱིས་རྣམ་པར་བརྟགས་པས་འདོད་ཆགས་ཀྱང་བྱུང་བ་དེའི་ཚེ་
མངལ་དུ་འཇུག་པར་འགྱུར་རོ་ཞེའོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། ཕ་དང་མ་གཉིས་རྣམ་པར་རྟོག་པའི་ཚེ་འདོད་ཆགས་དེ་མའི་སེམས་ལས་བྱུང་ངམ་གསོལ་པ། ཀྱེ་གཽ་ཏ་མ་མ་ལགས་སོ། །མའི་རྣམ་པར་རྟོག་པ་ལས་བྱུང་ངམ། 
ཀྱེ་གཽ་ཏ་མ་མ་ལགས་སོ། །དེ་ཕའི་སེམས་ལས་བྱུང་ངམ། །ཀྱེ་གཽ་ཏ་མ་མ་ལགས་སོ། །ཕའི་རྣམ་པར་རྟོག་པ་ལས་བྱུང་ངམ། ཀྱེ་གཽ་ཏ་མ་མ་ལགས་སོ། །ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། ཕའི་འདོད་ཆགས་གང་ཡིན་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ་
དེ་ནི་མ་ལགས་སོ། །ཀུན་ཏུ་རྒྱུ་དག་འདི་ཇི་སྙམ་དུ་སེམས། ཕའི་སེམས་གང་ཡིན་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ་དེ་ནི་མ་ལགས་སོ། །ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། ཕའི་ཀུན་ཏུ་རྟོག་པ་དེ་མའི་མངལ་དུ་ཞུགས་སམ། ཀྱེ་གཽ་ཏ་མ་དེ་ནི་མ་ལགས་སོ། །ཀུན་
ཏུ་རྒྱུ་དག་འདི་ལ་ཇི་སྙམ་དུ་སེམས། མངལ་ན་གནས་པ་དེ་ལྷ་ལས་ཤི་འཕོས་ཏེ་མའི་མངལ་དུ་ཞུགས་སམ། ཀྱེ་གཽ་ཏ་མ་མ་འཚལ་ཏོ། །ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། མངལ་ན་གནས་པ་དེ་མི་དང ། ལྷ་མ་ཡིན་དང ། སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང་།གཤིན་རྗེའི་འཇིག་རྟེན་ནས་ཤི་འཕོས་ཏེ་མའི་མངལ་དུ་ཞུགས་སམ། ཀྱེ་གཽ་ཏ་མ་མ་འཚལ་ཏོ། །ཀུན་ཏུ་རྒྱུ་དག་འདི་ལ་ཇི་སྙམ་དུ་སེམས། མངལ་ན་གནས་པ་དེ་གཟུགས་ཡོད་པའམ། གཟུགས་མེད་པ་ཞིག་མའི་མངལ་དུ་ཞུགས་སམ། ཀྱེ་གཽ་ཏ་མ་མ་འཚལ་ཏོ། །ཀུན་ཏུ་རྒྱུ་དག་འདི་ལ</font><hr>42-1-119b<br><font size=+2>
ཇི་སྙམ་དུ་སེམས། གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་རྣམས་དང ། རྣམ་པར་ཤེས་པ་མའི་མངལ་དུ་ཞུགས་སམ། ཀྱེ་གཽ་ཏ་མ་མ་འཚལ་ཏོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་གཞན་མུ་སྟེགས་ཅན་ཀུན་ཏུ་རྒྱུ་དེ་དག་ལ་འདི་སྐད་ཅེས་བཀའ་
སྩལ་ཏོ། །ཀུན་ཏུ་རྒྱུ་དག་ཆོས་འདི་ནི་ཟབ་ཅིང་ཕྲ་སྟེ། མཁས་པ་ཤེས་པ་བློ་དང་ལྡན་པས་རིག་པར་བྱ་བ་ཡིན་ཏེ། བརྟག་ཏུ་མེད་ཅིང་བརྟག་པའི་ཡུལ་མ་ཡིན་ལ། བལྟ་དཀའ་ཞིང་ཤེས་པར་དཀའ་བས་དེ་ནི་ཁྱེད་ཡུན་རིང་པོར་གཞན་དུ་བལྟས་པ། གཞན་དུ་མོས་པ། གཞན་
དུ་དད་པ། གཞན་དུ་བརྩོན་པ། གཞན་དུ་ལྟ་བའི་གནས་ལ་གནས་པ་རྣམས་ཀྱིས་ཤེས་པར་མི་ནུས་མོད་ཀྱི། ཀུན་ཏུ་རྒྱུ་དག་འོན་ཀྱང་རིགས་ཀྱི་བུའམ། རིགས་ཀྱི་བུ་མོ་དག་ཚུལ་དང་འདྲ་བའི་དགེ་བའི་བཤེས་གཉེན་ལ་བརྟེན་ནས་ཆོས་ཟབ་མོ་རྣམས་ལ་མིག་སྐྱེ་བར་འགྱུར་ཏེ། ཀུན་ཏུ་རྒྱུ་དག་
འདི་ལྟ་སྟེ། དཔེར་ན་མི་མིག་གི་དབང་པོ་ཉམས་པ་ནི་དེའི་ཚུལ་དང་འདྲ་བའི་གསོ་བ་བྱེད་པ་དགེ་བའི་བཤེས་གཉེན་ལ་བརྟེན་ན་ཚེ་འདི་ཉིད་ལ་མིག་ཡོངས་སུ་དག་པར་འགྱུར་ཏེ། མིག་དེས་ཀྱང་ཚེ་འདི་ཉིད་ལ་གཟུགས་རྣམས་མཐོང་བར་འགྱུར་རོ། །ཀུན་ཏུ་རྒྱུ་དག་དེ་བཞིན་དུ་རིགས་ཀྱི་བུའམ། རིགས་
ཀྱི་བུ་མོ་ཤེས་རབ་ཀྱི་མིག་ཉམས་པར་གྱུར་པས་ཀྱང་ཚུལ་དང་འདྲ་བའི་དགེ་བའི་བཤེས་གཉེན་ལ་བརྟེན་ན་ཤེས་རབ་ཀྱི་མིག་རྣམ་པར་དག་པར་འགྱུར་ཏེ། དེས་ཀྱང་ཆོས་ཟབ་མོ་རྣམས་མཐོང་བར་འགྱུར་རོ། །ཀུན་ཏུ་རྒྱུ་དག་ཁྱེད་ཀྱང་ཡུན་རིང་པོ་ནས་གཞན་དུ་བལྟས་པ། སྔོན་ལོག་པའི་གདམས་
ངག་གིས་བསླུས་པ། ཆོས་མ་ཡིན་པ་ལ་ཆོས་སུ་འདུ་ཤེས་པ། ཐར་པ་མ་ཡིན་པ་ལ་ཐར་པར་འདུ་ཤེས་པ། འབྱུང་བ་མ་ཡིན་པ་ལ་འབྱུང་བར་འདུ་ཤེས་པ། ཆུད་ཟོས་པ་རྣམས་ཀྱིས་ཆུད་གཟན་པ་ཡིན་ཏེ། ཀུན་ཏུ་རྒྱུ་དག་འདི་ལྟ་སྟེ། དཔེར་ན་ལོང་བའི་དམིགས་བུ་ལོང་བས་བྱས་ན། 
གང་འདི་བཀྲི་བ་དང ། ཁྲིད་པ་དེ་གཉི་ག་ཡང་ཚུལ་མ་ཡིན་པར་སྡུག་བསྔལ་ཐོབ་པར་འགྱུར་བར་ཤེས་པར་བྱའོ། །ཀུན་ཏུ་རྒྱུ་དག་དེ་བཞིན་དུ་དགེ་སློང་ངམ། བྲམ་ཟེ་གང་ལ་ལ་སྟོན་པ་མ་ཡིན་པར་བདག་ཅག་ནི་སྟོན་པ་ཡིན་ནོ་ཞེས་ཁས་འཆེ་བ་དང ། ཡང་དག་པར་རྫོགས་པའི་སངས་རྒྱས་མ</font><hr>42-1-120a<br><font size=+2>
ཡིན་པར་བདག་ཅག་ནི་ཡང་དག་པར་རྫོགས་པའི་སངས་རྒྱས་ཡིན་ནོ་ཞེས་ཁས་འཆེ་བ་དང ། འབྱུང་བ་ལ་མཁས་པ་མ་ཡིན་པར་བདག་ཅག་ནི་འབྱུང་བ་ལ་མཁས་པའོ་ཞེས་ཁས་འཆེ་བ་དང ། འབྱུང་བ་མཐོང་བ་མ་ཡིན་པར་བདག་ཅག་ནི་འབྱུང་བ་མཐོང་བ་ཡིན་ནོ་ཞེས་ཁས་འཆེ་བ་དང ། མུ་
སྟེགས་བྱེད་པ་མ་ཡིན་པར་བདག་ཅག་ནི་མུ་སྟེགས་བྱེད་པ་ཡིན་ནོ་ཞེས་ཁས་འཆེ་བ་ཡིན་ཏེ། དེ་དག་སྟོན་པ་མ་ཡིན་པར་སྟོན་པའོ་ཞེས་ཁས་འཆེ་ཞིང་གང་རྗེས་སུ་སྟོན་པ་དེ་ནི་ལོག་པར་རྗེས་སུ་སྟོན་པར་འགྱུར། ཡང་དག་པར་རྫོགས་པའི་སངས་རྒྱས་མ་ཡིན་པར་གང་ཁོང་དུ་ཆུད་པར་བྱེད་པ་དེ་ནི་
ལོག་པར་ཁོང་དུ་ཆུད་པར་བྱེད་པར་འགྱུར། གང་འབྱུང་བ་ལ་མཁས་པ་མ་ཡིན་པར་གང་འབྱིན་པ་དེ་ནི་ལོག་པར་འབྱིན་པར་འགྱུར། འབྱུང་བ་མཐོང་བ་མ་ཡིན་པར་གང་འབྱུང་བ་སྟོན་པ་དེ་ནི་ལོག་པར་སྟོན་པར་འགྱུར། མུ་སྟེགས་བྱེད་པ་མ་ཡིན་པར་གང་སྒྲོལ་བ་དེ་ནི་ལོག་པར་སྒྲོལ་བར་
འགྱུར་ཏེ། དེ་དག་ནི་ཚུལ་མ་ཡིན་པར་སྡུག་བསྔལ་ཐོབ་པར་འགྱུར་རོ། །ཀུན་ཏུ་རྒྱུ་དག་འདི་ལྟ་སྟེ། དཔེར་ན་བ་ལང་རྫི་རབ་ཀ་ལ་མཁས་པ་མ་ཡིན་པས་རབ་ཀ་མ་ཡིན་པར་བ་ལང་བསྒྲལ་ན། དེའི་བ་ལང་དེ་དག་གིས་ཕ་རོལ་དང་ཚུ་རོལ་གྱི་འགྲམ་མ་རྙེད་ནས་འཁྱིལ་ཏེ། དེ་ཉིད་དུ་ཚུལ་མ་ཡིན་པར་
སྡུག་བསྔལ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་བ་ལང་རྫི་དེ་རབ་ཀ་ལ་མི་མཁས་པའི་ཕྱིར་རོ། །ཀུན་ཏུ་རྒྱུ་དག་དེ་བཞིན་དུ་གང་ལ་ལ་མུ་སྟེགས་བྱེད་པ་མ་ཡིན་པར་མུ་སྟེགས་བྱེད་པར་ཁས་འཆེ་ཞིང་གང་སྒྲོལ་བ་དེ་ནི་ཚུལ་མ་ཡིན་པར་སྡུག་བསྔལ་ཐོབ་པར་འགྱུར་རོ། །ཀུན་ཏུ་རྒྱུ་དག་
ང་ནི་སྟོན་པ་ཉིད་ཡིན་ལ་སྟོན་པར་ཁས་འཆེ་བས་ང་གང་རྗེས་སུ་སྟོན་པ་དེ་ཡང་དག་པར་རྗེས་སུ་སྟོན་པ་ཡིན། ཡང་དག་པར་རྫོགས་པའི་སངས་རྒྱས་ཉིད་ཡིན་ལ་ཡང་དག་པར་རྫོགས་པའི་སངས་རྒྱས་སུ་ཁས་འཆེ་བས། ང་གང་ཁོང་དུ་ཆུད་པར་བྱེད་པ་དེ་ཡང་དག་པར་ཁོང་དུ་ཆུད་པར་བྱེད་པ་
ཡིན། འབྱུང་བ་ལ་མཁས་པ་ཉིད་ཡིན་ལ་འབྱུང་བ་ལ་མཁས་པར་ཁས་འཆེ་བས་ང་གང་འབྱིན་པ་དེ་དག་ཡང་དག་པར་འབྱིན་པ་ཡིན། འབྱུང་བ་མཐོང་བ་ཉིད་ཡིན་ལ་འབྱུང་བ་སྟོན་པར་ཁས་འཆེ་བས་ང་གང་འབྱུང་བ་སྟོན་པ་དེ་ཡང་དག་པར་སྟོན་པ་ཡིན། མུ་སྟེགས་བྱེད་པ་ཡིན་ལ་མུ</font><hr>42-1-120b<br><font size=+2>
སྟེགས་བྱེད་པར་ཁས་འཆེ་བས་ང་གང་སྒྲོལ་བ་དེ་ཡང་དག་པར་སྒྲོལ་བ་ཡིན་ཏེ། སྟོན་པའི་ཆོས་རབ་ཏུ་ཤེས་ནས་ནི་རྗེས་སུ་སྟོན། སངས་རྒྱས་ཀྱི་ཆོས་རབ་ཏུ་ཤེས་ནས་ནི་ཁོང་དུ་ཆུད་པར་བྱེད། འབྱུང་བ་རབ་ཏུ་ཤེས་ནས་ནི་འབྱིན། ཡང་དག་པར་མཐོང་ནས་ནི་སྟོན། མུ་སྟེགས་
རབ་ཏུ་ཤེས་ནས་ནི་སྒྲོལ་ཏེ། གང་སྒྲོལ་བ་དེ་ཡང་མུ་སྟེགས་བདེ་བས་རབ་ཏུ་སྒྲོལ་བ་ཡིན་ནོ། །འདི་ལྟ་སྟེ། ཀུན་ཏུ་རྒྱུ་དག་ཁྱེད་ཀྱང་ཐར་པར་འདོད་པ་ཡིན་ལ། ང་ཡང་སྟོན་པ་མངོན་དུ་བཞུགས་པ་ཡིན་ཏེ། ཡང་དག་པར་སྟོན་པ། ཡང་དག་པར་ཁོང་དུ་ཆུད་པར་བྱེད་པ། འབྱུང་བ་ཕུན་སུམ་
ཚོགས་པ་འབྱུང་བ་མཐོང་བ། ཡང་དག་པའི་མུ་སྟེགས་བྱེད་པ་ཡིན་གྱིས་དེའི་ཕྱིར་རྣ་བ་ལྷོགས་ཏེ་མོས་པ་སྐྱེད་ལ་དྲན་པ་ཉེ་བར་ཞོག་སྟེ། ཡིད་འདུན་པར་གྱིས་ལ་མ་ཐོབ་པའི་ཆོས་རྣམས་ཐོབ་པར་བྱ་བ་དང ། སྔོན་མ་ཕྱིན་པའི་ལམ་དུ་འགྲོ་བར་བྱ་བ་དང ། སྔོན་མ་སོང་བའི་ཕྱོགས་སུ་
འགྲོ་བར་བྱ་བ་དང ། སྔོན་མ་འགྲོགས་པའི་ལམ་གྲོགས་དང་འགྲོགས་པར་བྱ་བ་དང ། སྔོན་མ་བཙལ་བའི་ལམ་བཙལ་བར་བྱ་བ་དང་།སྔོན་མ་ཐོབ་པའི་ཆོས་ཀྱི་མཛོད་ཐོབ་པར་བྱ་བའི་ཕྱིར། བརྩོན་འགྲུས་ཡང་དག་པར་རྩོམས་ཤིག་།ཀུན་ཏུ་རྒྱུ་དག་ཆོས་གསུམ་མངོན་དུ་གྱུར་པས་མངལ་དུ་འཇུག་
ཅེས་གང་སྨྲས་པ་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང ། མངལ་དུ་འཇུག་པ་ཞེས་བྱ་བའི་ཆོས་ཀྱི་རྣམ་གྲངས་འདི་ཁྱེད་ལ་ངས་བཤད་དོ། ཀུན་ཏུ་རྒྱུ་དག་དེ་ལ་མ་ཞེས་གང་སྨྲས་པ་དེ་ནི་སྔོན་གྱི་ལས་བསགས་པའི་རྐྱེན་དུ་གསུངས་སོ། །ཕ་ཞེས་བྱ་བ་དེ་ནི་སྔོན་གྱི་ལས་བསགས་
པའི་རྒྱུར་གསུངས་སོ། །དྲི་ཟ་ཞེས་བྱ་བ་དེ་ནི་རྣམ་པར་ཤེས་པ་ལས་ཀྱིས་འཕངས་པའི་ཚིག་བླ་དགས་སོ། མེར་མེར་པོ་ཞེས་བྱ་བ་དེ་ནི་ལས་ཀྱིས་འཕངས་པའི་རྣམ་པར་ཤེས་པའི་གནས་དང་གཞིའོ། །མའི་མངལ་ཞེས་བྱ་བ་དེ་ནི་རྣམ་པར་ཤེས་པ་ལས་ཀྱིས་འཕངས་པའི་གཞི་སྟེ། འདི་ལྟར་
མའི་མངལ་ན་གནས་པའི་རྣམ་པར་ཤེས་པ་ནི་སྐྱེ་བ་དང ། འཕེལ་བ་དང ། རྒྱས་པར་འགྱུར་རོ། །ཀུན་ཏུ་རྒྱུ་དག་འདི་ལྟ་སྟེ་དཔེར་ན། ས་ཆེན་པོ་ལ་གནས་ན་རྩཝ་དང ། ཤིང་གེལ་བ་དང ། སྨན་དང ། ནགས་ཚལ་དག་སྐྱེ་ཞིང་འཕེལ་བ་དང་རྒྱས་པར་འགྱུར་རོ། །དེ་བཞིན་དུ་མའི་མངལ་ན</font><hr>42-1-121a<br><font size=+2>
གནས་པའི་རྣམ་པར་ཤེས་པ་ཡང་སྐྱེ་བ་དང ། འཕེལ་བ་དང ། རྒྱས་པར་འགྱུར་ཏེ། འཕེལ་ནས་སྐྱེ་བར་འགྱུར་རོ། །བཙས་ནས་རྣམ་པར་འཕེལ་ལོ། །འཕེལ་ནས་སྤྱོད་པ་སྣང་བར་འགྱུར་ཏེ། འགྲོ་བ་གང་དང་གང་ནས་ཤི་འཕོས་ནས་དེ་དང་དེར་སྐྱེས་ནས་དེ་དང་འདྲ་བའི་
སྤྱོད་པ་དེ་དག་དེ་སྤྱོད་པར་འགྱུར་ཏེ། དེ་དག་ཀྱང་མཁས་པས་ཤེས་པར་བྱ་བ་ཡིན་གྱི། གླེན་པས་ནི་མ་ཡིན་ནོ། །ཡུན་རིང་པོ་ནས་འགྲོགས་འགྲོགས་པས་ཤེས་པར་བྱ་བ་ཡིན་གྱིས་ཡུན་ཐུང་དུས་མ་ཡིན་ནོ། །ཡང་དག་པར་སེམས་པས་ཤེས་པར་བྱ་བ་ཡིན་གྱི། མི་བརྩོན་པས་མ་ཡིན་ནོ། །
ཀུན་ཏུ་རྒྱུ་དག་དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གི་རྟགས་མཁས་པས་ཤེས་པར་བྱ་བ་ནི་འདི་དག་ཡིན་ཏེ། འདི་ལྟ་སྟེ། སྐད་ཤ་ཤ་པོ་ཡིན། སྐད་གྱོ་དུམ་གྱི་སྒྲ་ལྟ་བུ་ཡིན། སྐད་བརྟག་དགོས་པ་ཡིན། སྐད་ཆེ་བ་ཡིན། སྐད་ལྷང་ལྷང་པོ་ཡིན། རྟག་ཏུ་དངངས་པ་
ཡིན། རྟག་ཏུ་འདར་བ་ཡིན། རྟག་ཏུ་སྤུ་ཟིང་ཞེས་བྱེད་པ་ཡིན། རྨི་ལམ་ན་མེའི་ཕུང་པོ་འབར་བ་མཐོང་བ་ཡིན། རི་རྒྱུག་པར་མཐོང་བ་ཡིན། མེ་མདག་འབར་བར་མཐོང་བ་ཡིན། ལྕགས་ཟངས་ཀྱི་ནང་དུ་བཙོ་བ་མཐོང་བ་ཡིན་ལག་ན་དབྱུག་པ་ཐོགས་པའི་མི་དག་མཐོང་བ་ཡིན། སྲིན་པོ་
དག་གིས་བདག་འཕང་བར་མཐོང་བ་ཡིན། བདག་ཉིད་གསོན་པོར་གསལ་ཤིང་གིས་གཟུགས་པར་མཐོང་བ་ཡིན། ཁྱི་དག་གིས་བདག་དབང་བར་མཐོང་བ་ཡིན། ཁྱི་དག་གིས་བདག་བསྐོར་བར་མཐོང་བ་ཡིན། བདག་ཉིད་གླང་པོ་ཆེ་དང་སྦྲུལ་གྱིས་གཙེས་པར་མཐོང་བ་ཡིན། ཕྱོགས་བཞིར་
བྲོས་ནས་ཕྱོགས་མི་ཤེས་པ་ཡིན། སེམས་ཅན་ཀུན་ལ་ཡིད་མི་རྟོན་པ་ཡིན་ནོ། །ཀུན་ཏུ་རྒྱུ་དག་རྣམ་པ་ཉི་ཤུ་པོ་དེ་དག་གིས་སེམས་ཅན་དམྱལ་བ་ནས་ཤི་འཕོས་པའི་གང་ཟག་ཏུ་རིག་པར་བྱའོ། །ཀུན་ཏུ་རྒྱུ་དག་དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གི་མཚན་མ་ནི་འདི་
དག་ཡིན་ཏེ། འདི་ལྟ་སྟེ། རྨུགས་ཤིང་གཉིད་ཆེ་བ་ཡིན། ལེ་ལོ་ཆེ་བ་ཡིན། མང་དུ་ཟ་བ་ཡིན། ས་ལ་འདྲུད་པ་ཡིན། མི་འཇིགས་པ་མེད་པ་ཡིན། མི་གསལ་བར་སྨྲ་བ་ཡིན། གླེན་པ་ལ་དགའ་བ་ཡིན། མུན་པ་ལ་དགའ་བ་ཡིན། འདམ་རྫབ་ལ་དགའ་བ་ཡིན།


</font><hr>42-1-121b<br><font size=+2>
ཡང་དང་ཡང་སོས་རྩ་གཅོད་པ་ཡིན། རྒྱུན་དུ་རྐང་པའི་མཐེ་བོས་ས་རྐོ་བ་ཡིན། ཡང་དང་ཡང་མགོ་ལ་སྦྲང་མ་འདུ་བ་ཡིན། ཡང་དང་ཡང་ནམ་མཁའ་ལ་སོས་འདེབས་པ་ཡིན། ཀུན་ཏུ་བསྐུམས་ཏེ་ཉལ་བ་ཡིན། ས་ལ་ཉལ་བ་ཡིན། མི་གཙང་བས་མི་འདོག་པ་ཡིན། ཡང་
དང་ཡང་ནམ་མཁའ་ལ་མནོམ་པ་ཡིན། ཡང་དང་ཡང་མ་སྨིན་པར་ཟ་བ་ཡིན། གཞན་དུ་སྨྲ་ཞིང་གཞན་དུ་བྱེད་དེ་གཡོ་བྱེད་པ་ཡིན། བབ་བབ་ཏུ་སྤྱོད་པ་ཡིན། རྨི་ལམ་ན་བདག་རྫབ་ཀྱིས་གོས་པར་རྨི་བ་ཡིན། རྨི་ལམ་ན་བདག་ནགས་སུ་སོང་སྟེ་རྩཝ་ཟ་བར་རྨི་བ་ཡིན། སྦྲུལ་གདུག་
པས་བདག་བསྐོར་བར་མཐོང་བ་ཡིན། བདག་ཉིད་རི་ཁྲོད་དུ་ཞུགས་པར་མཐོང་བ་ཡིན་ཏེ། ཀུན་ཏུ་རྒྱུ་དག་དེ་དག་ལ་སོགས་པ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གི་མཚན་མ་རྣམ་པ་དུ་མར་ཤེས་པར་བྱ་སྟེ། དེ་དག་ནི་བསྐལ་པའམ། བསྐལ་པ་ལས་ལྷག་པར་བརྗོད་ཀྱང་
ཟད་པར་མི་ནུས་སོ། །ཀུན་ཏུ་རྒྱུ་དག་དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གི་མཚན་མ་ནི་འདི་དག་ཡིན་ཏེ། འདི་ལྟ་སྟེ། སྐྲ་སེར་བ་ཡིན། མིག་ཝའི་མིག་ལྟ་བུ་ཡིན། རྟག་པར་བཀྲེས་པ་ཡིན། རྟག་ཏུ་སྐོམ་པ་ཡིན། སེར་སྣ་ཆེ་བ་ཡིན། འདོད་ཆེན་ཆེ་བ་དང ། 
འཐོབ་པ་མི་རྙེད་པ་ཡིན། གཞན་གྱི་ལ་རེ་བ་ཡིན། ཁྲོ་བ་ཡིན། མིག་དམར་བ་ཡིན། བཟའ་བ་ཐམས་ཅད་ལ་སྲེད་པ་ཡིན། བདོག་པ་ཐམས་ཅད་ལ་ཆགས་པ་ཡིན་སྦྱིན་པའི་གནས་དག་མཐོང་བར་མི་འདོད་པ་ཡིན། དངོས་པོ་ཀུན་ལ་ཡང་དེ་བརྐུ་བའི་སེམས་ཡོད་པ་ཡིན། དངོས་པོ་
ངན་པ་རྣམས་ལ་ཡང་དགའ་བ་ཡིན། འཐོབ་པ་ལ་མོས་པ་ཡིན། ཟས་སྐོམ་མི་གཙང་བ་ལ་དགའ་བ་ཡིན། གཞན་གྱི་ཕུན་སུམ་ཚོགས་པ་ལ་ཕྲག་དོག་བྱེད་པ་ཡིན། གཞན་གྱི་ལོངས་སྤྱོད་ལ་སྲེད་པ་སྐྱེད་པ་ཡིན། གཞན་གྱི་ལོངས་སྤྱོད་གང་ཡིན་པ་དེ་དག་ལ་བདག་གི་སྙམ་དུ་
སེམས་པ་ཡིན། ཟས་གཏོར་ན་སེམས་མི་དགའ་བ་ཡིན། ཚོང་འདུས་ཀྱི་སྲང་དག་ནས་ཀྱང་ཤིང་ཐོག་ལེན་པ་ཡིན་ཏེ། ཀུན་ཏུ་རྒྱུ་དག་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གི་རྟགས་ཀྱི་བྱེ་བྲག་ནི་དེ་དག་ལ་སོགས་པ་མཐའ་ཡས་པར་ཤེས་པར་བྱའོ། །ཀུན་ཏུ་རྒྱུ་དག</font><hr>42-1-122a<br><font size=+2>
དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གི་མཚན་མ་ནི་འདི་དག་ཡིན་ཏེ། འདི་ལྟ་སྟེ། ཁེངས་པ་ཡིན། འཐབ་ཀྲོལ་ཆེ་བ་ཡིན། འཁོན་དུ་འཛིན་པ་ཡིན། ང་རྒྱལ་ཆེ་བ་ཡིན། ལུས་ཆེ་བ་ཡིན། མིག་ཆེ་བ་ཡིན། མིག་དཀར་བ་ཡིན། མཆེ་
བ་སྣང་བ་ཡིན། མཐུ་དང་ལྡན་པ་ཡིན། ཐབ་མོའི་བློ་ཅན་ཡིན། དབྱེན་ལ་དགའ་བ་ཡིན། བྱ་བ་ཐམས་ཅད་ལ་ང་རྒྱལ་ཆེ་བ་ཡིན། སོ་སྣང་བ་ཡིན། འཇིག་རྟེན་ཐམས་ཅད་ལ་བརྙས་པའི་འདུ་ཤེས་ཅན་ཡིན། མཚོན་ཆ་རྣོ་བ་ཡིན། ཚིག་ན་བ་ཡིན། བད་ག་གཟེངས་སྟོད་
པ་ཅན་ཡིན། མི་ཤེས་པའི་སྟོབས་ཅན་ཡིན། ཉོན་མོངས་པའི་སྟོབས་ཅན་ཡིན་ཏེ། ཀུན་ཏུ་རྒྱུ་དག་དེ་དག་ལ་སོགས་པ་ནི་ལྷ་མ་ཡིན་ལས་ཤི་འཕོས་པའི་གང་ཟག་གི་མཚན་མར་ཤེས་པར་བྱའོ། །ཀུན་ཏུ་རྒྱུ་དག་དེ་ལ་མི་ལས་ཤི་འཕོས་པའི་གང་ཟག་གི་མཚན་མ་ནི་འདི་དག་ཡིན་ཏེ། 
འདི་ལྟ་སྟེ། ངོ་མཚར་དུ་འཛིན་པ་ཅན་ཡིན། འཕགས་པ་དང་སྟེན་པ་ཡིན། འཕགས་པ་མ་ཡིན་པ་ལ་སྨོད་པ་ཡིན། དགེ་བ་བྱེད་པ་ཡིན། མངོན་རྟགས་འདོད་པ་ཡིན། གྲགས་པ་འདོད་པ་ཡིན། སྙན་པ་འདོད་པ་ཡིན། བཟོ་ལ་དགའ་བ་ཡིན། ཤེས་པ་ལ་དགའ་བ་ཡིན། ཉོན་
མོངས་པ་ཆུང་བ་ཡིན། ཁྲེལ་ཡོད་ཅིང་ངོ་ཚ་ཤེས་པ་ཡིན། རིགས་ཀྱི་བུའི་ཚུལ་ཕུན་སུམ་ཚོགས་པ་ཡིན། བྱས་པ་གཟོ་བ་ཡིན། མཛའ་བོ་ལ་གདུང་བ་ཡིན། ཡོངས་སུ་གཏོང་བ་དང་ལྡན་པ་ཡིན། བྱེ་བྲག་ཤེས་པ་ཡིན། བྱས་པ་དང་མ་བྱས་པ་ལ་རྟོག་པ་ཡིན། ཚིག་གི་མཐུ་
ཡོད་པ་ཡིན། གྲོས་གཟུང་བར་བྱ་བའི་མཐུ་ཡོད་པ་ཡིན། འདུམ་པར་བྱ་བ་དང ། འཐབ་མོ་བྱ་བ་ལ་མངོན་པར་མཁས་པ་ཡིན། ཕོ་ཉ་ནུས་པ་ཡིན། སྐད་ཐམས་ཅད་འཛིན་པའི་མཐུ་ཡོད་པ་ཡིན། གནས་དང་གནས་མ་ཡིན་པ་མངོན་པར་ཤེས་པ་ཡིན་ཏེ། ཀུན་ཏུ་རྒྱུ་དག་དེ་དག་ལ་
སོགས་པ་ནི་མི་ལས་ཤི་འཕོས་པའི་གང་ཟག་གི་རྟགས་ཡིན་ནོ། །ཀུན་ཏུ་རྒྱུ་དག་དེ་ལ་ལྷ་ལས་ཤི་འཕོས་པའི་གང་ཟག་གི་རྟགས་ནི་འདི་དག་ཡིན་ཏེ། འདི་ལྟ་སྟེ། མཛེས་པ་ཡིན། གཙང་སྦྲ་ཆེ་བ་ཡིན། ཕྲེང་བ་ལ་དགའ་བ་ཡིན། སྤོས་ལ་དགའ་བ་ཡིན། བདུག་པ་ལ་དགའ་བ་ཡིན། གླུ</font><hr>42-1-122b<br><font size=+2>
ལེན་པའི་ངང་ཚུལ་ཅན་ཡིན། བྱུག་པ་ལ་དགའ་བ་ཡིན། འདོད་པའི་ཡོན་ཏན་ངན་ངོན་གྱིས་མི་མགུ་ཞིང་རྒྱ་ཆེན་པོ་ལ་དགའ་བ་ཡིན། རོལ་མོའི་སྒྲ་ཐམས་ཅད་ལ་དགའ་བ་ཡིན། གླུ་ཐམས་ཅད་ལ་དགའ་བ་ཡིན། སྐྱེ་བོ་རྒྱ་ཆེན་པོ་དང་འགྲོགས་པར་དགའ་བ་ཡིན། ཁང་པ་དང ། ཁང་པ་
བརྩེགས་པ་དང ། ཁྱིམ་དང ། ལོངས་སྤྱོད་རྒྱ་ཆེན་པོ་ལ་དགའ་བ་ཡིན། དེའི་སེམས་བྱམས་པ་སྔོན་དུ་འགྲོ་བ་ཡིན། རྒོད་པའི་ངང་ཚུལ་ཅན་ཡིན། འཇམ་པར་སྨྲ་བ་ཡིན། དགའ་བ་ལ་མཁས་པ་ཡིན། རྒྱན་ལ་དགའ་བ་ཡིན། ཆེ་བའི་ངང་ཚུལ་ཅན་ཡིན། འགྲོ་བའི་ངང་
ཚུལ་ཅན་ཡིན། ལུས་ཀྱི་ཤུགས་འབྱིན་པའི་ངང་ཚུལ་ཅན་ཡིན། ཆགས་པའི་མཚན་མ་དང་མི་ཆགས་པའི་མཚན་མ་ཤེས་པ་ཡིན། ཕན་པར་བྱ་བ་ལ་མཁས་པ་ཡིན་ཏེ། ཀུན་ཏུ་རྒྱུ་དག་མཚན་མ་དེ་དག་ལ་སོགས་པས། མཐོ་རིས་ནས་ཤི་འཕོས་པའི་གང་ཟག་ཏུ་ཤེས་པར་བྱའོ། །
ཀུན་ཏུ་རྒྱུ་དག་དེ་ལ་མཚན་མ་དེ་དག་ལས་ཡང་དག་པར་འདའ་བར་བྱ་བའི་ཕྱིར་རིགས་ཀྱི་བུའམ། རིགས་ཀྱི་བུ་མོ་དག་གིས་དགེ་བའི་བཤེས་གཉེན་གང་དག་མཚན་མ་དེ་དག་ལས་ཡང་དག་པར་འདའ་བར་བྱ་བའི་ཕྱིར་ཆོས་སྟོན་པར་བྱེད་པ་དེ་ལྟ་བུའི་དགེ་བའི་བཤེས་གཉེན་རྣམས་བསྟེན་པར་བྱ། 
བསྙེན་པར་བྱ། བསྙེན་བཀུར་བར་བྱའོ། །དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གིས་ནི་སྔོན་མིར་གྱུར་པའི་ཚེ་ཞེ་སྡང་ལ་ཡོངས་སུ་བསྟེན་པས་དེས་ཞེ་སྡང་ལས་བྱུང་བའི་ལས་མངོན་པར་འདུ་བྱས་པས་དེ་ལས་དེས་སེམས་ཅན་དམྱལ་བར་སྐྱེས་ཏེ། དེའི་ཕྱིར་སེམས་ཅན་དམྱལ་
བར་གནས་པ་རྙེད་ནས་སེམས་ཅན་དམྱལ་བའི་སྤྱོད་པ་ཅན་དུ་གྱུར་པས་དེ་མིའི་ནང་དུ་སྐྱེས་ཏེ། སྤྱོད་པའི་རྟགས་འདི་དག་ཐོས་ནས་བདག་ནི་སེམས་ཅན་དམྱལ་བ་ནས་ཤི་འཕོས་པའོ་ཞེས་བདག་ཉིད་ཀྱིས་ཤེས་པར་བྱ་ཞིང ། དེས་སེམས་ཅན་དམྱལ་བའི་ལས་ཀྱི་རྒྱུ་སྤང་བའི་ཕྱིར་དགེ་བའི་
བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ཞེ་སྡང་གི་གཉེན་པོར་བྱམས་པ་སྟོན་ཏོ། །བྱམས་པ་དང་ལྡན་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་དང ། བྱམས་པ་དང་ལྡན་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟོན་ཏོ། །དེས་ཀྱང་དེའི་ཞེ་སྡང་གི་བག་ལ་ཉལ</font><hr>42-1-123a<br><font size=+2>
སྤོང་བར་འགྱུར་ཏེ། དེ་བྱམས་པ་ཆེན་པོ་བསྒོམས་པས་ཕ་རོལ་ཏུ་ཕྱིན་པ་དྲུག་པོ་ཐམས་ཅད་ཡོངས་སུ་རྫོགས་པར་འགྱུར་རོ། །ཀུན་ཏུ་རྒྱུ་དག་དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གིས་ནི་སྔོན་མིར་གྱུར་པའི་ཚེ། གཏི་མུག་ལ་ཡོངས་སུ་བསྟེན་པས་དེས་གཏི་
མུག་ལས་བྱུང་བའི་ལས་མངོན་པར་འདུ་བྱས་པས། དེ་ལས་དེས་དུད་འགྲོའི་སྐྱེས་གནས་སུ་སྐྱེས་ཏེ། དེའི་ཕྱིར་དེ་དུད་འགྲོའི་སྐྱེ་གནས་ན་གནས་པ་རྙེད་ནས་དུད་འགྲོའི་སྐྱེ་གནས་ཀྱི་སྤྱོད་པ་ཅན་དུ་གྱུར་པས་དེ་དུད་འགྲོའི་སྐྱེ་གནས་ནས་ཤི་འཕོས་ཏེ། མིའི་ནང་དུ་སྐྱེས་ཀྱང་དུད་འགྲོའི་སྐྱེ་གནས་
ཀྱི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི་དུད་འགྲོའི་གནས་ནས་ཤི་འཕོས་ནས་མིའི་ནང་དུ་སྐྱེས་སོ་ཞེས་བདག་ཉིད་ཀྱིས་ཤེས་པར་བྱ་ཞིང ། དེས་དུད་འགྲོའི་སྐྱེ་གནས་ཀྱི་ལས་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་
བར་བྱ་སྟེ། །དེ་ལ་དགེ་བའི་བཤེས་གཉེན་དེ་དག་གཏི་མུག་སྤང་བའི་ཕྱིར་རྟེན་ཅིང་འབྲེལ་བར་འབྱུང་བ་སྟོན་ཏོ། །དེས་ཀྱང་དེའི་གཏི་མུག་གི་བག་ལ་ཉལ་སྤོང་བར་འགྱུར་རོ། །ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དུས་གསུམ་མཉམ་པ་ཉིད་སྟོན་ཏེ། དེས་དེ་གཏི་མུག་དེ་ནི་རང་བཞིན་མེད་པའོ་ཞེས་བྱ་
བར་ཤེས་པ་སྐྱེ་བར་འགྱུར་རོ། །ཡང་ན་དེ་ལ་ཆོས་ཐམས་ཅད་མཉམ་པ་ཉིད་སྟོན་ཏེ། དེས་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་ཤིང་ཐམས་ཅད་མཁྱེན་པ་ཉིད་ཐོབ་པར་འགྱུར་རོ། །ཀུན་ཏུ་རྒྱུ་དག་དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གིས་ནི་སྔོན་མིར་
གྱུར་བའི་ཚེ་སེར་སྣ་ལ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་དེས་དེར་སེར་སྣ་དང་ལྡན་པ་ཆགས་པ་ལས་བྱུང་བའི་ལས་མངོན་པར་འདུ་བྱས་པས་དེ་ལས་བྱས་པ་དང ། བསགས་པ་དང ། ཟིན་པར་བྱས་པ་དང ། རྫོགས་པར་བྱས་པ་དང ། བླངས་པ་དེས་གཤིན་རྗེའི་འཇིག་
རྟེན་དུ་སྐྱེས་ཏེ། དེ་གཤིན་རྗེའི་འཇིག་རྟེན་ན་གནས་པ་དེས་གཤིན་རྗེའི་འཇིག་རྟེན་པའི་སྤྱོད་པ་ཅན་དུ་གྱུར་བས་དེ་གཤིན་རྗེའི་འཇིག་རྟེན་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་གཤིན་རྗེའི་འཇིག་རྟེན་པའི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི་གཤིན་རྗེའི</font><hr>42-1-123b<br><font size=+2>
འཇིག་རྟེན་ནས་ཤི་འཕོས་པའོ་ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང ། དེས་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལས་དགེ་བའི་བཤེས་གཉེན་དེ་དག་སེར་སྣ་སྤང་བའི་ཕྱིར་གཏོང་བ་སྟོན་ཏོ། །དེས་ཀྱང་དེའི་སེར་སྣའི་
བག་ལ་ཉལ་སྤོང་བར་འགྱུར་རོ། །ཡང་ན་དེ་ལ་གཏོང་བ་དང་ལྡན་པའི་བྱང་ཆུབ་ཀྱི་ཕྱོགས་ཀྱི་ཆོས་རྣམས་སྟོན། སྦྱིན་པའི་ཕ་རོལ་ཏུ་ཕྱིན་པ་སྟོན་ཏེ། དེ་བསྒོམས་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། ཀུན་ཏུ་རྒྱུ་དག་དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གིས་
སྔོན་མིར་གྱུར་པའི་ཚེ་དགེ་བའི་རྩ་བ་རྒྱ་ཆེན་པོ་དག་ཀྱང་མངོན་པར་འདུ་བྱས་ལ་ང་རྒྱལ་ལ་ཡང་ཡོངས་སུ་བསྟེན་པས་དེ་ང་རྒྱལ་དང་ལྡན་པའི་ལས་བྱས་པ་དང ། བསགས་པ་དང ། ཟིན་པར་བྱས་པ་དང ། རྫོགས་པར་བྱས་པ་དང ། བླངས་པ་དེས་ལྷ་མ་ཡིན་དུ་སྐྱེས་ཏེ། ལྷ་མ་ཡིན་གྱི་ནང་ན་
གནས་པ་དེས་ལྷ་མ་ཡིན་གྱི་སྤྱོད་པ་ཅན་དུ་གྱུར་པས་དེ་ལྷ་མ་ཡིན་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་ལྷ་མ་ཡིན་གྱི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི་ལྷ་མ་ཡིན་ལས་ཤི་འཕོས་པའོ་ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང ། དེས་སྤྱོད་པ་དེ་དག་
ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ང་རྒྱལ་སྤང་བ་དང ། ངའོ་སྙམ་པའི་ང་རྒྱལ་གཞོམ་པའི་ཕྱིར་སྐྱེ་མཆེད་རྣམས་སྟོན་ཏོ། །དེས་ཀྱང་དེའི་ང་རྒྱལ་སྤོང་བར་འགྱུར་རོ། །ཡང་ན་དེ་ལ་སྟོང་པ་ཉིད་
སྟོན་ཏེ། དེས་དེའི་ང་རྒྱལ་གྱི་བག་ལ་ཉལ་སྤོང་བ་དང ། བདག་རྣམ་པར་འཇིག་པར་འགྱུར་རོ། །ཡང་ན་ཇི་ལྟར་བྱ་བ་འབྱུང་བ་རྣམས་ཚོགས་པ་ལས་བྱུང་བའི་ཚུལ་སྟོན་ཏེ། དེས་དེའི་ང་རྒྱལ་གྱི་བག་ལ་ཉལ་སྤོང་བར་འགྱུར་རོ། །ཡང་ན་དེ་ལ་ཆོས་རྣམས་ཀྱི་
མཚན་ཉིད་གཅིག་པ་སྟོན་ཏེ། དེས་དེའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་འགྱུར་ཞིང་དེ་བསྒོམས་པས་ཐམས་ཅད་མཁྱེན་པ་ཉིད་དུ་འགྲུབ་པར་འགྱུར་རོ། །ཀུན་ཏུ་རྒྱུ་དག་དེ་ལ་མི་ལས་ཤི་འཕོས་པའི་གང་ཟག་གིས་ནི་སྔོན་མིར་གྱུར་པའི་ཚེ་ཡང་དགེ་བ་བཅུའི་ལས་ཀྱི་ལམ</font><hr>42-1-124a<br><font size=+2>
ལ་ཀུན་ཏུ་བསྟེན་ཅིང་བསྒོམས་ཏེ་མང་དུ་བྱས་པས་དེ་ལས་དེ་བྱས་པ་དང ། བསགས་པ་དང ། ཟིན་པར་བྱས་པ་དང ། རྫོགས་པར་བྱས་པ་དང ། བླངས་པས་མིར་སྐྱེས་ཏེ། དེ་མིའི་ནང་ན་གནས་པ་དེས་མིའི་སྤྱོད་པ་ཅན་དུ་གྱུར་པས་དེ་མིའི་ནང་ནས་ཤི་འཕོས་ཏེ་མིའི་ནང་དུ་སྐྱེས་ཀྱང་མིའི་སྤྱོད་པ་
དེ་དག་ཉིད་སྤྱོད་པར་འགྱུར་ཏེ། དེ་སྤྱོད་པ་དེ་དག་གིས་བདག་ནི་མིའི་ནང་ནས་ཤི་འཕོས་པའོ་ཞེས་བྱ་བར་བདག་ཉིད་ཀྱིས་ཤེས་པར་བྱ་ཞིང་དེས་མིའི་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་མི་རྟག་
པའི་འདུ་ཤེས་སྟོན་ཏོ། །དེས་ཀྱང་དེའི་སྤྱོད་པ་བག་ལ་ཉལ་དང་བཅས་པར་སྤོང་བར་འགྱུར་རོ། །ཡང་ན་དེ་ལ་འཁོར་བའི་མི་བསྔགས་པ་དང ། མྱ་ངན་ལས་འདས་པའི་བསྔགས་པ་སྟོན་ཏེ། དེས་དེ་འཁོར་བ་ལ་མི་དགའ་ཞིང་མྱ་ངན་ལས་འདས་པ་དོན་དུ་གཉེར་བར་འགྱུར་རོ། །ཡང་ན་དེ་
ལ་ཕ་རོལ་ཏུ་ཕྱིན་པ་དྲུག་སྟོན་ཏེ། དེ་ཐོས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་རོ། །དེ་ལ་ཐབས་མཁས་པ་ཡང་སྟོན་ཏོ། །དེས་དེའི་ཕ་རོལ་ཏུ་ཕྱིན་པ་དྲུག་པོ་དེ་དག་ཤིན་ཏུ་བཟུང་བ་དང ། ཐམས་ཅད་མཁྱེན་པ་ཉིད་ཀྱང་མྱུར་དུ་ཐོབ་པར་འགྱུར་
རོ། །ཀུན་ཏུ་རྒྱུ་དག་དེ་ལ་མཐོ་རིས་ནས་ཤི་འཕོས་པའི་གང་ཟག་གིས་ནི་སྔོན་མིར་གྱུར་པའི་ཚེ་ཚངས་པར་སྤྱོད་པ་མཆོག་ཏུ་བཟུང་སྟེ་སྤྱད་པ་དང ། སྦྱིན་པ་མཆོག་ཏུ་བཟུང་སྟེ་བྱིན་པ་དང ། ཚུལ་ཁྲིམས་མཆོག་ཏུ་བཟུང་སྟེ་བསྲུངས་པས་དེ་ལས་དེ་བྱས་པ་དང ། བསགས་པ་དང ། ཟིན་པར་
བྱས་པ་དང ། རྫོགས་པར་བྱས་བ་དང ། བླངས་པས་ལྷའི་ནང་དུ་སྐྱེས་ཏེ། དེ་ལྷའི་ནང་ན་གནས་པ་དེ་ལྷའི་སྤྱོད་པ་ཅན་དུ་གྱུར་པས་དེ་ལྷ་ལས་ཤི་འཕོས་ཏེ། མིའི་ནང་དུ་སྐྱེས་ཀྱང་ལྷའི་སྤྱོད་པ་དེ་དག་ཉིད་སྤྱོད་པར་འགྱུར་ཏེ། དེས་སྤྱོད་པ་དེ་དག་གིས་བདག་ནི་ལྷའི་ནང་ནས་ཤི་འཕོས་པའོ་
ཞེས་བདག་ཉིད་ཀྱིས་ཤེས་པར་བྱ་ཞིང་དེས་སྤྱོད་པ་དེ་དག་ལས་ཡང་དག་པར་འདའ་བར་བྱ་བའི་ཕྱིར་དགེ་བའི་བཤེས་གཉེན་བཙལ་བར་བྱ་སྟེ། དེ་ལ་དགེ་བའི་བཤེས་གཉེན་དེ་དག་ཚངས་པར་སྤྱོད་པ་མཆོག་ཏུ་འཛིན་པའི་ཉེས་པ་སྟོན་ཅིང་མི་གནས་པའི་ཚངས་པར་སྤྱོད་པའི་ཡོན་ཏན་བརྗོད</font><hr>42-1-124b<br><font size=+2>
དོ། །མཆོག་ཏུ་འཛིན་པའི་སྦྱིན་པ་སྨོད་ཅིང་མཆོག་ཏུ་འཛིན་པ་མེད་པའི་སྦྱིན་པ་བསྔགས་པར་འགྱུར་རོ། །མཆོག་ཏུ་འཛིན་པའི་ཚུལ་ཁྲིམས་ལ་དམོད་ཅིང་མཆོག་ཏུ་འཛིན་པ་མེད་པའི་ཚུལ་ཁྲིམས་བསྔགས་པར་འགྱུར་རོ། །དེས་དེའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་བག་ལ་
ཉལ་དང་བཅས་པར་སྤོང་བར་འགྱུར་རོ། །ཡང་ན་དེ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་སྟོན་ཏེ། དེ་བསྒོམས་པས་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་འགྱུར་རོ། །དེ་ལ་ཐབས་ལ་མཁས་པ་ཡང་སྟོན་ཏོ། །དེ་དང་ལྡན་པས་མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་
བར་འགྱུར་རོ། །ཀུན་ཏུ་རྒྱུ་དག་དེ་ལ་སེམས་ཅན་དམྱལ་བ་ནས་ཤི་འཕོས་པའི་གང་ཟག་གིས་ནི་དགེ་བའི་བཤེས་གཉེན་ལ་བརྟེན་ཏེ། དུས་གསུམ་མཉམ་པ་ཉིད་མཉན་པར་བྱའོ། །ཐོས་ནས་ཀྱང་ཤས་ཆེར་གནས་པར་བྱ་སྟེ། གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་
དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་དག་ན་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། འཁོར་བཞི་བོ་མང་པོ་ཡོད་པ་དག་ཏུ་གནས་པར་བྱ་ཞིང་དེ་དག་དང་འགྲོགས་པར་བྱའོ། །དེས་འགྲོ་བ་བྱས་ཏེ་གོམས་པའི་རྗེས་སུ་འགྲོ་བས་ཆོས་
ཐམས་ཅད་ནི་དངོས་པོ་མེད་པའི་ངོ་བོ་ཉིད་དོ་ཞེས་དུས་གསུམ་མཉམ་པ་ཉིད་མངོན་དུ་འགྱུར་རོ། །ཀུན་ཏུ་རྒྱུ་དག་དེ་ལ་དུད་འགྲོའི་སྐྱེ་གནས་ནས་ཤི་འཕོས་པའི་གང་ཟག་གིས་ནི་དགེ་བའི་བཤེས་གཉེན་ལ་བརྟེན་ཏེ། གཏི་མུག་གི་གཉེན་པོར་བསྟན་བཅོས་ལ་མཁས་པའི་སྐྱེ་བོ་དང་ལྷན་ཅིག་
དགའ་བར་གནས་པར་བྱའོ། །དེས་དེའི་གཏི་མུག་སྤོང་བར་འགྱུར་ཏེ། དེས་བསྟན་བཅོས་དེ་དང་བསྟན་བཅོས་ཤེས་པ་དེ་དག་རང་བཞིན་གྱིས་ཡང་དག་པར་བརྟག་པར་བྱའོ། །དེའི་ཕྱིར་དེ་ལ་བསྟན་བཅོས་དང་བསྟན་བཅོས་ཤེས་པ་རྣམས་ཀྱང་རང་བཞིན་མེད་དོ། །རང་བཞིན་མེད་
དོ་ཞེས་བྱ་བར་སྣང་བར་གྱུར་ཏེ། དེས་དེ་ལ་དུས་གསུམ་མཉམ་པ་ཉིད་མངོན་དུ་འགྱུར་ཞིང་མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་རོ། ཀུན་ཏུ་རྒྱུ་དག་དེ་ལ་གཤིན་རྗེའི་འཇིག་རྟེན་ནས་ཤི་འཕོས་པའི་གང་ཟག་གིས་ནི་གང་ལ་རྟེན་ན་དེའི་སྦྱིན་པའི་བློ་སྐྱེ་བར་འགྱུར་བ་དང་།


</font><hr>42-1-125a<br><font size=+2>
གང་གིས་དེ་ལ་དུས་གསུམ་མཉམ་པ་ཉིད་དང ། གང་འདི་མཚན་ཉིད་མེད་པར་མཚན་ཉིད་གཅིག་པ་མངོན་དུ་འགྱུར་བ་དང ། དེ་བསྒོམས་པས་མྱུར་དུ་ཐམས་ཅད་མཁྱེན་པ་ཉིད་དུ་ངེས་པར་འབྱུང་བར་འགྱུར་བའི་དགེ་བའི་བཤེས་གཉེན་ལ་བསྟེན་པར་བྱ། ཡོན་ཏན་ལ་བསྟེན་པར་བྱའོ།། །།
བམ་པོ་བཅུ་གཉིས་པ། ཀུན་ཏུ་རྒྱུ་དག་དེ་ལ་ལྷ་མ་ཡིན་ལས་ཤི་འཕོས་པའི་གང་ཟག་གིས་ནི་དགེ་བའི་བཤེས་གཉེན་ལ་བསྟེན་ཏེ། ཉོན་མོངས་པའི་བདུད་དང་འཐབ་པར་བྱའོ། །འདི་ལྟ་སྟེ། ང་རྒྱལ་ཞེས་བྱ་བའི་ཆོས་དེ་ནི་གང་ཞིག་།དེ་ནི་ཅི་ཞིག་གིས་ཡོངས་སུ་བཟུང ། དེ་ནི་སུ་ལ་
ཀུན་ནས་ལངས། སུ་ཞིག་དེ་སྤོང་བར་བྱེད་ཅེས་ཡང་དག་པར་བཙལ་ན་ང་རྒྱལ་དེ་མི་དམིགས་སོ། །གང་གིས་དེ་ཡོངས་སུ་བཟུང་བ་དང ། གང་ལ་དེ་ཀུན་ནས་ལངས་པ་དང ། གང་དེ་སྤང་བའི་ཕྱིར་རྩོལ་བ་དེ་ཡང་མི་དམིགས་ཏེ། དེ་ནི་ཡང་དག་པ་མ་ཡིན་པར་ཡོངས་སུ་བཟུང་བས་བདག་
དང་འཇིག་རྟེན་བསླུས་པར་ཡང་དག་པར་རྗེས་སུ་མཐོང་ངོ ། །དེས་ཆོས་ཐམས་ཅད་རང་བཞིན་མེད་པར་ཡང་དག་པར་རྗེས་སུ་མཐོང་ཞིང་ཆོས་གང་ལ་རང་བཞིན་མེད་པ་དེ་ནི་དངོས་པོ་མེད་པའོ་ཞེས་བྱ་བར་རབ་ཏུ་ཤེས་སོ། །དངོས་པོ་མེད་པས་ཡོངས་སུ་མ་གྲུབ་བོ་ཞེས་བྱ་བར་རབ་ཏུ་ཤེས་སོ། །ཡོངས་སུ་མ་གྲུབ་
པས་མི་སྐྱེ་བ་སྟེ། གང་མི་སྐྱེ་བ་དེ་ནི་མི་འགག་གོ་།གང་མི་སྐྱེ་མི་འགག་པ་དེ་ནི་གདགས་སུ་མེད་པའོ་ཞེས་བྱ་བར་རབ་ཏུ་ཤེས་སོ། །གང་གདགས་སུ་མེད་པ་དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ནོ། །གང་དུས་གསུམ་དུ་མི་དམིགས་
པ་དེ་ནི་ཐོབ་པ་ཡང་མ་ཡིན། ཆུད་ཟོས་པ་ཡང་མ་ཡིན་ནོ་ཞེས་བྱ་བར་རབ་ཏུ་ཤེས་སོ། །ཀུན་ཏུ་རྒྱུ་དག་དེ་ལྟར་ན་དེ་ནི་ཆོས་ཐམས་ཅད་ཀྱི་ཆོས་ཉིད་དོ། །ཆོས་ཉིད་གང་གིས་ཆོས་ཐམས་ཅད་དེ་བཞིན་ཉིད་མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིདདེ་།དེ་བཞིན་
གཤེགས་པ་ཡང་དེ་བཞིན་ཉིད། མ་ནོར་བ་དེ་བཞིན་ཉིད། གཞན་མ་ཡིན་པ་དེ་བཞིན་ཉིད་པས་དེའི་ཕྱིར་ཆོས་ཐམས་ཅད་ནི་དེ་བཞིན་གཤེགས་པའོ། །ཀུན་ཏུ་རྒྱུ་དག་ངས་ནི་སྔོན་ཆད་དང་ད་ལྟར་ཡང་འཇིག་རྟེན་བཏགས་པ་ནི་ང་རྒྱལ་གྱི་རང་བཞིན་ནོ་ཞེས་བཤད་དོ། །ང་རྒྱལ་གྱིས</font><hr>42-1-125b<br><font size=+2>
ནི་མི་ལས་ཤི་འཕོས་པ་གདགས་པར་འགྱུར་རོ། །ང་རྒྱལ་གྱིས་ནི་མཐོ་རིས་ནས་ཤི་འཕོས་པ་གདགས་པར་འགྱུར་རོ། །ང་རྒྱལ་གྱིས་ནི་སེམས་ཅན་དམྱལ་བའི་བར་དུ་ཤི་འཕོས་པ་གདགས་པར་འགྱུར་རོ། །ང་རྒྱལ་མེད་ན་གདགས་པ་མེད་དོ། །ཀུན་ཏུ་རྒྱུ་དག་དེ་ནི་ང་རྒྱལ་མེད་པའི་ཡེ་ཤེས་
ཤེས་བྱའོ། །དེ་ཡང་ཐབས་མཁས་པ་དང་ལྡན་ཞིང་ཤེས་རབ་ཀྱི་ཕ་རོལ་ཏུ་ཕྱིན་པ་དང ། དགེ་བའི་བཤེས་གཉེན་གྱིས་ཡོངས་སུ་ཟིན་པས་ཤེས་པར་ནུས་སོ། །དེ་ནས་ཀུན་ཏུ་རྒྱུ་དྲུག་ཁྲི་པོ་དེ་དག་གིས་བསྟན་པ་འདི་ཐོས་ནས་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏེ། དེ་དག་
མི་སྐྱེ་བའི་ཆོས་ལ་བཟོད་པ་ཐོབ་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འཁོད་དོ་ཕྱོགས་གཅིག་ཏུ་འཁོད་ནས་ཀྱང་དེའི་ཚེ་བཅོམ་ལྡན་འདས་ལ་ཚིགས་སུ་བཅད་པ་དག་གིས་མངོན་པར་བསྟོད་པ། མགོན་པོ་ཡེ་ཤེས་
སྟོབས་ཀྱིས་ཡང་དག་འཕགས། །འགྲོ་བ་ཀུན་ལ་གཞན་གྱི་དྲིང་མི་འཇོག་།འགྲོ་བ་ཀུན་ན་སྤྱོད་པ་རྣམ་གཟིགས་ཏེ། །ལག་པའི་མཐིལ་དུ་སྐྱུ་རུ་ར་བཞག་བཞིན། །འཇིག་རྟེན་ལྟ་བའི་རྣམ་པས་ཀུན་ཏུ་དཀྲུགས། །སྤྲིན་སྟུག་དག་གིས་ནམ་མཁའ་ཡོག་པ་བཞིན། །དེ་དག་གིས་ནི་
བྱིས་པ་རྨོངས་ནས་སྤྱོད། །ལོང་བའི་ཚོགས་རྣམས་རབ་ཏུ་ལམ་སྟོར་བཞིན། །འཇིག་རྟེན་རྟག་དང་འཇིག་རྟེན་མི་རྟག་དང ། །རྟག་ཀྱང་རྟག་ལ་མི་རྟག་ཁ་ཅིག་མཆི། །རྟག་པ་མ་ཡིན་མི་རྟག་མིན་ཞེས་ཏེ། །གླང་པོའི་དབང་པོ་ཁྱིམ་དུ་བཏགས་ལྟར་བརླག་།འཇིག་རྟེན་མཐའ་ཡོད་
འཇིག་རྟེན་མཐའ་མེད་དང ། །མཐའ་ཡང་ཡོད་ལ་མཐའ་མེད་ཁ་ཅིག་མཆི། །མཐའ་ཡོད་མ་ཡིན་མཐའ་མེད་མིན་ཞེས་ཏེ། །དཔེར་ན་བྱ་ནི་གཟེབ་ཏུ་བཅུག་པ་བཞིན། །ལ་ལ་དག་ནི་ལུས་འདི་བདག་ཅེས་མཆི། །ལ་ལ་དག་ནི་ལུས་འདི་གཞན་ཞེས་མཆི། །རྟོག་པས་ཡོངས་སུ་
དཀྲིས་ནས་ཉལ་བགྱིད་དེ། །བྱ་ནི་བྱ་རྒྱར་ཚུད་ནས་ཐོགས་པ་བཞིན། །ལ་ལ་དག་ནི་དབང་ཕྱུག་སྤྲུལ་ཅེས་མཆི། །ལ་ལ་རྒྱུ་མེད་བྱུང་ཞེས་འདོགས་པར་བགྱིད། །ལྟ་བའི་རྣམ་པ་དག་གིས་ཀུན་ནས་དཀྲིས། །མཁའ་ལ་གནས་པའི་ཟླ་ལྟར་རྒྱལ་བས་གཟིགས། །ཇི</font><hr>42-1-126a<br><font size=+2>
ལྟར་གཟེབ་ཏུ་བཅུག་པའི་བྱ་རྨོངས་པ། །བུ་ག་བུ་གར་ཐར་བར་རེ་བ་ལྟར། །མི་མཁས་ལྟ་བའི་རྣམ་པས་བཏགས་པར་གྱུར། །ཐར་པ་མི་འཐོབ་རྐང་གཉིས་བཏགས་པ་བཞིན། །ཚངས་དང་སྐྱེ་དགུའི་བདག་དང་སྐེམ་བྱེད་དང ། །གཞན་ཡང་འཁོར་ལོ་འཛིན་དང་
རྣམ་ཐོས་བུ། །ཕྱོགས་དང་རྒྱ་མཚོ་ཀུན་ལ་ཕྱག་འཚལ་ཏེ། །རྒྱལ་པོས་མཚན་མོ་རྐུན་པོ་བཟུང་བ་བཞིན། །དབུལ་བོ་བུ་ལོན་ཆགས་པ་བུ་ལོན་པས། །བཟུང་ན་གཉར་སྦྲོན་གསོལ་བ་འདེབས་པ་བཞིན། །ལྟ་བའི་རྣམ་པར་གནས་པའི་བྱིས་པ་རྣམས། །དབང་ཕྱུག་ལས་ནི་བདེ་
བ་ཚོལ་བགྱིད་དེ། །རྐུན་པོའི་ཚོགས་རྣམས་བཙོན་རར་སྩལ་བ་བཞིན། །འགྲོ་བ་རྣམས་སུ་སྡུག་བསྔལ་བརྒྱ་མྱོང་བ། །དེ་དག་དེ་བཞིན་གཤེགས་པ་ཁྱོད་ཀྱིས་གཟིགས། །ཕྱག་གི་མཐིལ་ན་སོར་མོ་ལྔ་དང་མཚུངས། །དེ་ལ་མི་དབང་ཐུགས་རྗེ་བསྐྱེད་ནས་ནི། །འགྲོ་བ་མཁྱེན་པ་འགྲོ་
བར་སྤྱོད་མཛད་དེ། །བློ་མཆོག་ཚེ་རབས་འགྲོ་བ་བཀྲོལ་བ་ནི། །དཔེར་ན་རྒྱལ་པོས་བཙོན་རྣམས་བཀྱེ་བ་བཞིན། །འཇིག་རྟེན་སྨན་སླད་བསྐལ་པ་བསམ་ཡས་སུ། །དཀའ་བ་མཛད་ནས་བྱང་ཆུབ་མཆོག་བརྙེས་ཏེ། །ལྟ་བའི་རྣམ་པར་སེམས་ཅན་འཁྱམས་མཁྱེན་ནས། །དེ་དག་
བཅིངས་ལས་ཁྱོད་ཀྱིས་གྲོལ་བར་མཛད། །བདེ་གཤེགས་མི་ཡི་སེང་གེ་རྐང་གཉིས་གཙོ། །ཆོས་ཚོགས་གང་ལ་མདའ་དབང་ཁྱོད་མཛད་པ། །ལྟ་བའི་རྣམ་པ་སྒྱུ་འདྲར་རྨོངས་མི་མངའ། །བདེ་གཤེགས་ཁྱོད་ནི་དེ་འདྲར་བདག་ཅག་འཚལ། །སྟོབས་རྣམས་གང་གིས་རྒྱལ་བ་སྟོབས་
བརྙེས་ཤིང ། །མི་འཇིགས་གང་གིས་སྔོ་བའི་དགྲ་བསལ་ཏེ། །འཁོར་གྱི་ནང་དུ་སེང་གེའི་སྒྲ་སྒྲོགས་པ། །ཁྱུ་མཆོག་དེ་ནི་བདག་ཅག་ཐོབ་པར་ཤོག་།གང་གིས་རྒྱལ་བ་འཇིག་རྟེན་གསུམ་བསྐྱོད་དང ། །གང་གིས་མཐའ་ཡས་འོད་ནི་འགྱེད་པ་དང ། །གང་གིས་མི་མཆོག་སེམས་ཅན་
ལུང་སྟོན་པ། །དེ་རིང་ཡུད་ཀྱིས་བདག་ཅག་དེ་ཐོབ་ཤོག་།དེ་ནས་དེའི་ཚེ་བཅོམ་ལྡན་འདས་ཀྱིས་ཀུན་ཏུ་རྒྱུ་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་དེའི་ཚེ་འཛུམ་པ་མཛད་དོ། །དེ་ནས་ཚེ་དང་ལྡན་པ་རྟ་ཐུལ་གྱིས། བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། འཇིག</font><hr>42-1-126b<br><font size=+2>
རྟེན་ཕན་བཞེད་འཛུམ་པ་གང་མཛད་པ། །མུ་སྟེགས་ཚོགས་འདི་ཤིན་ཏུ་འཕགས་གྱུར་ཏམ། །མི་མཆོག་རང་བྱུང་ཅི་སླད་འཛུམ་མཛད་པ། །འཛུམ་རྒྱུ་དེ་ནི་ཁྱོད་ཀྱིས་བཀའ་སྩལ་གསོལ། །བདེ་བར་གཤེགས་པས་འཛུམ་པ་མཛད་མཐོང་ནས། །འཇིག་རྟེན་ཕན་བཞེད་འགྲོ་འདི་ཐེ་ཚོམ་འཚལ། །
ཟླ་བ་ཉ་ལ་འགྲོ་བ་ལྟ་བ་བཞིན། །ལྟ་ཞིང་མཆིས་ན་རྒྱལ་བ་འཛུམ་རྒྱུ་གསུངས། །སུ་ཞིག་རྒྱལ་ལ་མཆོད་པ་དམ་པ་བགྱིས། །གང་གིས་དེ་རིང་ཡབ་ནི་མཉེས་པར་བགྱིས། །རྒྱལ་བའི་ཡོན་ཏན་དེ་རིང་གང་གིས་མཐོང ། །མཁས་པ་མྱུར་དུ་ལེགས་པར་བཀའ་སྩལ་གསོལ། །མུ་སྟེགས་
ཅན་རྣམས་ལུང་བསྟན་དེ་ཐོས་ནས། །འཇིག་རྟེན་ཐམས་ཅད་རབ་ཏུ་དགའ་བར་འགྱུར། །འདི་ལྟར་འདི་དག་བདེ་བར་གཤེགས་པས་བཏུལ། །དེས་ན་འགྲོ་བ་ཀུན་གྱི་རྣམ་འདྲེན་ལགས། །རྒྱལ་བས་ཐེ་ཚོམ་ལེགས་པར་བསལ་དུ་གསོལ། །སོམ་ཉི་འཚལ་བའི་སོམ་ཉི་དགུམ་དུ་
གསོལ། །དེས་ནི་འཁོར་རྣམས་འདི་དག་ཡི་རངས་ཤིང ། །སངས་རྒྱས་ཁྱོད་ཀྱི་དགོངས་ལ་དད་པར་མཆི། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། རྟ་ཐུལ་ཁྱོད་ཀྱིས་དུས་འདི་ཤེས་གྱུར་ནས། །རྒྱལ་བ་དགྲ་ལས་རྒྱལ་ལ་དྲིས་
པ་ལེགས། །འདྲེན་པ་རང་བྱུང་ཉིད་ལ་དེ་དྲིས་པས། །འཇིག་རྟེན་ཕན་པའི་ཚིག་ཀྱང་བརྗོད་པར་གྱུར། །འཛུམ་པ་འདི་ནི་ཇི་ལྟར་ངས་མཛད་པ། །འཛུམ་རྒྱུ་ངས་དེང་ཁྱོད་ལ་བསྟན་པར་བྱས། །ཡང་དག་ཇི་བཞིན་ང་ཡིས་བསྟན་པ་ལ། །དགའ་བའི་ཡིད་དུ་བྱོས་ཏེ་དེང་ཉོན་ཅིག་།མུ་སྟེགས་ཚོགས་
འདི་རབ་ཏུ་དུལ་གྱུར་ཏེ། །ལྟ་བའི་རྣམ་སྤངས་ལྟ་བ་བཟང་པོར་འགྱུར། །ལྟ་བའི་རྣམ་པར་འཇིག་རྟེན་འཁྱམས་མཐོང་ནས། །སྙིང་རྗེ་ཅན་གྱུར་བྱང་ཆུབ་རབ་ཏུ་ཞུགས། །ལྟ་བའི་རྣམ་པ་དག་ནི་རབ་སྤངས་ཏེ། །ལྟ་བ་དྲང་པོ་རྙོག་མེད་རྟོགས་གྱུར་ཅིང ། །ང་ཡིས་ལུང་བསྟན་ཐོགས་མེད་
ཐོས་གྱུར་ནས། །དེ་དག་ཀུན་གྱིས་ཐམས་ཅད་མཁྱེན་སེམས་བསྐྱེད། །སྔོན་གྱི་རྒྱལ་བ་དག་ལ་དད་བསྐྱེད་དེ། །ཐུགས་རྗེ་ལྡན་པ་རྐང་གཉིས་དམ་པ་པོ། །རྒྱལ་བ་བྱེ་བ་ཉི་ཤུར་ཚང་བ་ལ། །བླ་མེད་བྱང་ཆུབ་ཚོལ་ཞིང་བསྙེན་བཀུར་བྱས། །རྒྱལ་བ་རྣམས་ལ་སྦྱིན་པ་མི་ཉུང་ཕུལ། །ཁྲིམས་དང</font><hr>42-1-127a<br><font size=+2>
ཞི་བའི་ཏིང་འཛིན་རྣམ་པར་སྦྱངས། །ཤེས་རབ་བརྩོན་འགྲུས་སྟོབས་ཀྱང་འབར་བར་བྱས། །ཐུགས་རྗེ་ལྡན་རྣམས་དྲུང་དུ་བཟོད་པ་བསྟེན། །བྱང་ཆུབ་དམ་པ་བཙལ་ནས་ཡུན་རིང་དུ། །ཕ་རོལ་ཕྱིན་པ་དྲུག་ལ་བློ་ཡང་ཞུགས། །རྒྱལ་བ་དགྲ་ལས་རྒྱལ་ལ་ཞུ་བ་
ཞུས། །སངས་རྒྱས་བརྒྱ་འགྲངས་དག་ལ་ཡིད་དགའ་བྱས། །དེ་དག་སྡིག་པའི་གྲོགས་ཀྱི་དབང་གིས་ནི། །ལྟ་བའི་རྣམ་པ་སྡུག་ལ་གནས་གྱུར་པ། །དེ་དག་བདེ་གཤེགས་རང་བྱུང་མཐོང་གྱུར་ནས། །ཆགས་པ་མེད་པས་ལྟ་བའི་རྣམ་པ་སྤངས། །སྟོན་པའི་དགོངས་པ་ཡང་དག་རྣམ་
པར་རྟོགས། །སྟོན་པའི་དགོངས་པ་རྣམས་ལ་དད་པ་གནས། །མ་འོངས་དུས་ན་བྱང་ཆུབ་ཚོལ་བྱེད་ཅིང ། །རྒྱལ་བ་བྱེ་བ་བསྙེན་བཀུར་བྱེད་པར་འགྱུར། །མ་འོངས་བསྐལ་པ་སྐར་མ་འདྲ་བ་ལ། །རྒྱལ་བ་ང་རྒྱལ་བཅོམ་པར་མཚན་འཐུན་པར། །གྲགས་པ་ཆེན་པོར་ཕྱོགས་སུ་རྣམ་པར་
གྲགས། །འཇིག་རྟེན་མཁས་པ་འགྲོ་བ་འགྲེལ་པར་འགྱུར། །དེ་དག་སངས་རྒྱས་ཞིང་ཡང་དག་འགྱུར་ཏེ། །དེ་དག་བཀོད་པ་སྣ་ཚོགས་མཚུངས་པ་མེད། །སངས་རྒྱས་ཞིང་དེར་སྡིག་པའི་བློ་ཅན་མེད། །བློ་གྲོས་དག་པར་འཐུན་པ་ཤ་སྟག་གནས། །དེ་ནི་ངན་སོང་ཐམས་ཅད་རྣམ་པར་སྦྱངས། །
མི་ཁོམ་བསལ་ཏེ་དུས་དེའི་ཐ་མ་ལ། །རྒྱལ་བ་དེ་དག་སྐུ་ཚེའི་སྟོབས་ལྡན་ཏེ། །ལོ་ནི་སྟོང་ཕྲག་བརྒྱད་ཅུ་ཐུབ་པར་འགྱུར། །མི་དེ་དག་གིས་བྱང་ཆུབ་འདི་ཐོས་ནས། །དེ་ཚེ་མི་མཉེས་པར་ནི་བྱེད་མི་འགྱུར། །ཆགས་མེད་བློ་མངའ་རྣམས་ཀྱི་མཚན་ཐོས་ན། །བུད་མེད་རྣམས་ཀྱང་སྐྱེས་
པའི་ལུས་ཐོབ་འགྱུར། །དེ་ལྟར་ང་བཅོམ་རྒྱལ་བ་དྲང་སྲོང་ཆེ། །སྟོན་པས་མུ་སྟེགས་ལུང་བསྟན་བཀའ་སྩལ་པ། །དེ་ཐོས་གྱུར་ནས་ལྷར་བཅས་འཇིག་རྟེན་རྣམས། །ཡི་རངས་གྱུར་ཅིང་སྟོབས་ཀྱང་སྐྱེས་པར་གྱུར། །མུ་སྟེགས་ཅན་ལུང་བསྟན་པའི་ལེའུ་སྟེ་ཉི་ཤུ་ལྔ་པའོ།། །།དེ་ནས་རྒྱལ་པོ་ཟས་གཙང་མ་འཁོར་དང་བཅས་པས་ལྷ་མ་ཡིན་རྣམས་དང ། ནམ་མཁའ་ལྡིང་རྣམས་ནས་ཀུན་ཏུ་རྒྱུ་རྣམས་ཀྱི་བར་གྱི་ལུང་བསྟན་པ་ཐོས་ནས་འདི་སྙམ་དུ་སེམས་པར་གྱུར་ཏེ། འདི་ལྟར་བཅོམ་ལྡན་འདས་ཀྱིས་ལེགས་པར་གསུངས་པས་འགྲོ་བ་ཐམས་ཅད་ཚིམ་པར་བྱས་པ་ནི</font><hr>42-1-127b<br><font size=+2>
ངོ་མཚར་ཏོ་སྙམ་ནས་དེ་ཡང་བུ་ལ་ཆགས་པས་ཀུན་ཏུ་དཀྲིས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཟས་གཙང་མའི་སེམས་ཐུགས་སུ་ཆུད་ནས་རྒྱལ་པོ་ཟས་གཙང་མ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ལ་ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་
དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ།ཡོངས་སུ་བྱང་བའི་ཆོས་འདི་ལྟ་སྟེ། ཁམས་དྲུག་རྣམ་པར་དབྱེ་བ་ཞེས་བྱ་བའི་ཆོས་ཀྱི་རྣམ་གྲངས་བཤད་ཀྱིས་དེ་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་ངས་བཤད་
དོ། །བཅོམ་ལྡན་འདས་ལེགས་སོ་ཞེས་གསོལ་ནས། རྒྱལ་པོ་ཟས་གཙང་མ་བཅོམ་ལྡན་འདས་ཀྱི་ལྟར་ཉན་པ་དང ། དེ་ལ་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ་ཁམས་དྲུག་རྣམ་པར་དབྱེ་བ་ཞེས་བྱ་བའི་ཆོས་ཀྱི་རྣམ་གྲངས་དེ་གང་ཞེ་ན། རྒྱལ་པོ་ཆེན་
པོ་སྐྱེས་བུ་གང་ཟག་འདི་ནི་ཁམས་དྲུག་པ། རེག་པའི་སྐྱེ་མཆེད་དྲུག་པ། ཡིད་ཀྱི་ཉེ་བར་སྤྱོད་པ་བཅོ་བརྒྱད་པ་སྟེ། སྐྱེས་བུ་འདི་ནི་ཁམས་དྲུག་པ་ཞེས་གང་སྨྲས་པ་དེ་ཅི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་ཁམས་དྲུག་ནི་འདི་དག་གོ་།དྲུག་གང་ཞེ་ན། འདི་ལྟ་སྟེ། སའི་
ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་དང ། ནམ་མཁའི་ཁམས་དང ། རྣམ་པར་ཤེས་པའི་ཁམས་སོ། །རྒྱལ་པོ་ཆེན་པོ་དེ་དག་ནི་ཁམས་དྲུག་སྟེ། སྐྱེས་བུ་འདི་ནི་ཁམས་དྲུག་པའོ་ཞེས་གང་ངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །སྐྱེས་བུ་འདི་ནི་
རེག་པའི་སྐྱེ་མཆེད་དྲུག་པའོ་ཞེས་གང་སྨྲས་པ་དེ་ཅི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་རེག་པའི་སྐྱེ་མཆེད་དྲུག་ནི་འདི་དག་སྟེ། དྲུག་གང་ཞེ་ན། གཟུགས་རྣམས་ལ་ལྟ་བའི་ཕྱིར་མིག་རེག་པའི་སྐྱེ་མཆེད་དང ། སྒྲ་རྣམས་ལ་ཉན་པའི་ཕྱིར་རྣ་བ་རེག་པའི་སྐྱེ་མཆེད་དང ། དྲི་རྣམས་ལ་
མནོམ་པའི་ཕྱིར་སྣ་རེག་པའི་སྐྱེ་མཆེད་དང ། རོ་རྣམས་ལ་མྱང་བའི་ཕྱིར་ལྕེ་རེག་པའི་སྐྱེ་མཆེད་དང ། རེག་བྱ་རྣམས་ལ་རེག་པའི་ཕྱིར་ལུས་རེག་པའི་སྐྱེ་མཆེད་དང ། ཆོས་རྣམས་རྣམ་པར་ཤེས་པའི་ཕྱིར་ཡིད་རེག་པའི་སྐྱེ་མཆེད་དོ། །རྒྱལ་པོ་ཆེན་པོ་དེ་དག་ནི་རེག་པའི་སྐྱེ་མཆེད་དྲུག་སྟེ།


</font><hr>42-1-128a<br><font size=+2>
སྐྱེས་བུ་འདི་ནི་རེག་པའི་སྐྱེ་མཆེད་དྲུག་པའོ་ཞེས་གང་ངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །རྒྱལ་པོ་ཆེན་པོ་སྐྱེས་བུ་འདི་ནི་ཡིད་ཀྱི་ཉེ་བར་སྤྱོད་པ་བཅོ་བརྒྱད་པའོ་ཞེས་གང་སྨྲས་པ་དེ་ཅི་ལས་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་ཡིད་ཀྱི་ཉེ་བར་སྤྱོད་པ་བཅོ་བརྒྱད་ནི་
འདི་དག་སྟེ། བཅོ་བརྒྱད་གང་ཞེ་ན། འདི་ལ་མིས་མིག་གིས་གཟུགས་མཐོང་ན་ཡིད་བདེ་བ་དང ། ཡིད་མི་བདེ་བ་དང་།བཏང་སྙོམས་སུ་འགྱུར་བར་གཟུགས་ལ་ཉེ་བར་སྤྱོད་དོ། །རྣ་བས་སྒྲ་ཐོས་ན་ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་སྒྲ་ལ་ཉེ་བར་
སྤྱོད་དོ། །སྣས་དྲི་ཚོར་ན་ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་དྲི་ལ་ཉེ་བར་སྤྱོད་དོ། །ལྕེས་རོ་མྱོང་ན་ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་རོ་ལ་ཉེ་བར་སྤྱོད་དོ། །ལུས་ཀྱིས་རེག་བྱ་ལ་རེག་ན་ཡིད་བདེ་བ་དང ། ཡིད་
མི་བདེ་བ་དང ། བཏང་སྙོམས་སུ་འགྱུར་བར་རེག་བྱ་ལ་ཉེ་བར་སྤྱོད་དོ། །ཡིད་ཀྱིས་ཆོས་རིག་ན་ཡིད་བདེ་བ་དང ། ཡིད་མི་བདེ་བ་དང ། བཏང་སྙོམས་སུ་འགྱུར་བར་ཆོས་ལ་ཉེ་བར་སྤྱོད་དོ། །རྒྱལ་པོ་ཆེན་པོ་དེ་ལ་གང་དག་ཡིད་བདེ་བར་ཉེ་བར་སྤྱོད་པ་དྲུག་དང ། གང་དག་ཡིད་མི་བདེ་
བར་ཉེ་བར་སྤྱོད་པ་དྲུག་དང ། གང་དག་བཏང་སྙོམས་སུ་འགྱུར་བར་ཉེ་བར་སྤྱོད་པ་དྲུག་པོ་དེ་དག་གཅིག་ཏུ་བསྡུས་ན་ཡིད་ཀྱི་ཉེ་བར་སྤྱོད་པ་བཅོ་བརྒྱད་དུ་འགྱུར་རོ། །རྒྱལ་པོ་ཆེན་པོ་བཅོ་བརྒྱད་པོ་དེ་དག་ནི་ཡིད་ཀྱི་ཉེ་བར་སྤྱོད་པ་སྟེ། རྒྱལ་པོ་ཆེན་པོ་སྐྱེས་བུ་འདི་ནི་ཡིད་ཀྱི་ཉེ་བར་སྤྱོད་
པ་བཅོ་བརྒྱད་པའོ་ཞེས་གང་ངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །རྒྱལ་བོ་ཆེན་པོ་དེ་ལ་སའི་ཁམས་ནི་རྣམ་པ་གཉིས་ཏེ་ནང་གི་ཡང་ཡོད། ཕྱི་རོལ་གྱི་ཡང་ཡོད་དོ། །རྒྱལ་པོ་ཆེན་པོ་ནང་གི་སའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་སྲ་བ་དང ། 
མཁྲང་བའི་རྣམ་པ་དང ། ཉེ་བར་གྱུར་པ་དང་ཟིན་པའོ། །དེ་ཡང་གང་ཞེ་ན། འདི་ལྟ་སྟེ་སྐྲ་དང ། སྤུ་དང ། སེན་མོ་དང ། སོ་དང ། རྡུལ་དང ། དྲི་མ་དང ། པགས་པ་དང ། ཤ་དང ། རྩ་དང ། ཆུ་རྒྱུས་དང ། རུས་པ་དང ། རྐང་དང ། སྙིང་དང ། མཆིན་པ་དང་།


</font><hr>42-1-128b<br><font size=+2>
གློ་བ་དང ། མཁལ་མ་དང ། སུལ་མངས་དང ། མཆིན་དྲི་དང ། རྒྱུ་མ་དང ། གཉེ་མ་དང ། ལྒང་བ་དང ། མཆེར་པ་དང ། ཕྱི་ས་དང ། གཞང་དང ། ཀླད་པ་དང ། ཀླད་རྒྱས་དང ། གཞན་གང་ཡང་ལུས་འདི་ལ་ནང་གི་ཁོང་ནས་སྲ་བ་དང ། མཁྲང་བའི་རྣམ་པ་དང ། ལུས་སུ་
གཏོགས་པར་གྱུར་པ་དང ། ཟིན་པ་འདི་ནི་ནང་གི་སའི་ཁམས་ཞེས་བྱའོ། །རྒྱལ་པོ་ཆེན་པོ་ཕྱི་རོལ་གྱི་སའི་ཁམས་གང་ཞེ་ན། གང་ཅི་ཡང་རུང་སྟེ། ཕྱི་རོལ་གྱི་སྲ་བ་དང ། མཁྲང་བའི་རྣམ་པ་དང ། ལུས་སུ་མ་གཏོགས་པ་དང ། མ་ཟིན་པ་འདི་ནི་ཕྱི་རོལ་གྱི་སའི་ཁམས་ཤེས་བྱའོ། །
རྒྱལ་པོ་ཆེན་པོ་དེ་ལ་ནང་གི་སའི་ཁམས་འབྱུང་བའི་ཚེ་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་སོགས་པར་མི་འགྲོའོ། །རྒྱལ་པོ་ཆེན་པོ་བུད་མེད་ནང་དུ་བདག་ནི་བུད་མེད་དོ་ཞེས་རྟོག་ཅིང་དེ་ནང་དུ་བུད་མེད་ཅེས་བརྟགས་ནས། ཕྱི་རོལ་དུ་སྐྱེས་པ་ལ་སྐྱེས་པའོ་ཞེས་རྟོག་གོ་།
དེ་ཕྱི་རོལ་དུ་སྐྱེས་པ་ལ་སྐྱེས་པ་ཞེས་བརྟགས་ནས་ཆགས་པར་གྱུར་ཏེ། ཕྱི་རོལ་གྱི་སྐྱེས་པ་དང་ཕྲད་པར་འདོད་དོ། །སྐྱེས་པ་དེ་ཡང་ནང་དུ་བདག་སྐྱེས་པ་ཞེས་རྟོག་སྟེ། ནང་དུ་བདག་ནི་སྐྱེས་པ་ཞེས་བརྟགས་ནས་ཕྱི་རོལ་དུ་བུད་མེད་ལ་བུད་མེད་ཅེས་རྟོག་གོ། །ཕྱི་རོལ་དུ་བུད་མེད་ལ་བུད་
མེད་ཅེས་བརྟགས་ནས་ཆགས་པར་འགྱུར་ཏེ། ཕྱི་རོལ་གྱི་བུད་མེད་དང་ཕྲད་པར་འདོད་དོ། །ཕྲད་པར་འདོད་པས་ཕྲད་པར་འགྱུར་རོ། །ཕྲད་པའི་རྐྱེན་གྱིས་མེར་མེར་པོ་སྐྱེ་བར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ་གང་ལ་ཀུན་ཏུ་བརྟག་པ་དང ། གང་ཀུན་ཏུ་རྟོག་པ་དེ་གཉི་ག་ཡང་མེད་
དེ། བུད་མེད་ལ་ནི་བུད་མེད་མེད་དོ། །སྐྱེས་པ་ལ་ནི་སྐྱེས་པ་མེད་དོ། །དེ་ལྟར་མེད་ཅིང་ཡང་དག་པ་མ་ཡིན་པར་ཀུན་ཏུ་རྟོག་པ་སྐྱེས་ཏེ། ཀུན་ཏུ་རྟོག་པ་དེ་ཡང་ངོ་བོ་ཉིད་ཀྱིས་མེད་དོ། །ཀུན་ཏུ་རྟོག་པ་ཇི་ལྟ་བ་དེ་བཞིན་དུ་ཕྲད་པ་དང ། མེར་མེར་པོ་ཡང་ངོ་བོ་ཉིད་ཀྱིས་མེད་དོ། །
གང་ངོ་བོ་ཉིད་མེད་པ་དེ་ཇི་ལྟར་སྲ་བ་སྐྱེད་པར་འགྱུར། རྒྱལ་པོ་ཆེན་པོ་དེ་ལྟར་ཀུན་ཏུ་རྟོག་པ་ཤེས་པར་བྱས་ནས་སྲ་བ་ཉིད་རྟོགས་པར་བྱ་སྟེ། ཅི་ནས་སྲ་བ་ནི་སྐྱེ་བའི་ཚེ་གང་ནས་ཀྱང་མི་འོང་བར་ཤེས་པར་བྱའོ། །རྒྱལ་པོ་ཆེན་པོ་འདི་ལྟར་གང་ལུས་འདི་དུར་ཁྲོད་ཀྱི་མཐར་འགྱུར་བའི་དུས</font><hr>42-1-129a<br><font size=+2>
དེ་ཡོད་དེ། དེའི་སྲ་བ་དེ་འཇིག་ཅིང་འགག་པར་འགྱུར་བའི་ཚེ་ཤར་ཕྱོགས་སུ་མི་འགྲོ། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། སྟེང་དང ། འོག་དང ། ཕྱོགས་མཚམས་རྣམས་སུ་ཡང་མི་འགྲོ་སྟེ། རྒྱལ་པོ་ཆེན་པོ་ནང་གི་སའི་ཁམས་ནི་དེ་ལྟར་བལྟའོ། །
རྒྱལ་པོ་ཆེན་པོ་འཇིག་རྟེན་གནས་པ་འདི་ནམ་མཁར་གྱུར་པ་ལ་ཚངས་པའི་གཞལ་མེད་ཁང་རིན་པོ་ཆེ་སྣ་བདུན་གྱི་རྒྱུ་ལས་གྲུབ་པ་གནས་པའི་དུས་དེ་ཡོད་དེ། རྒྱལ་པོ་ཆེན་པོ་དེའི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གཞལ་མེད་ཁང་རིན་པོ་ཆེ་སྣ་བདུན་གྱི་
རྒྱུ་ལས་གྲུབ་པ་བྱུང་ཡང ། རྒྱལ་པོ་ཆེན་པོ་དེའི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ ། །ཁོར་ཡུག་དང་ཁོར་ཡུག་ཆེན་པོའི་རི་རྡོ་རྗེའི་རྒྱུ་ལས་གྲུབ་པ་སྲ་ཞིང་བརྟན་ལ་ལྷུན་སྟུག་པ་རྣམས་གནས་པར་གྱུར་ཀྱང་དེ་དག་གི་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ། །རིའི་རྒྱལ་པོ་
རི་རབ་དག་དང ། གཉའ་ཤིང་འཛིན་དག་དང ། མུ་ཁྱུད་འཛིན་དག་དང ། གཤོལ་མདའ་འཛིན་དག་དང ། རྡོ་རྗེ་འཛིན་དག་དང ། སེང་ལྡེང་ཅན་དག་དང ། རྣམ་པར་འདུད་དག་དང ། རི་རྟ་རྣ་དག་དང ། བལྟ་ན་སྡུག་དག་དང ། བལྟ་ན་སྡུག་ཆེན་པོ་དག་དང ། ཐེར་སྒྲེ་དག་དང ། སྤོས་
ཀྱི་ངད་ལྡང་དག་དང ། གངས་རི་དག་དང ། དེ་མ་ཡིན་པའི་རི་ནག་པོ་དག་གནས་པ་དང ། ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གནས་པ་དང ། རྔམས་སུ་དཔག་ཚད་བརྒྱད་ཁྲི་བཞི་སྟོང་ཡོད་ལ། རྒྱར་དཔག་ཚད་དྲུག་ཁྲི་ཡོད་པའི་ས་ཆེན་པོ་
གནས་པར་གྱུར་ཀྱང ། རྒྱལ་པོ་ཆེན་པོ་སྲ་བ་དེ་འབྱུང་བའི་ཚེ་གང་ནས་ཀྱང་མི་འོང་ངོ ། །རྒྱལ་པོ་ཆེན་པོ་འཇིག་རྟེན་འདི་འཇིག་པར་འགྱུར་བའི་ཚེ་ས་ཆེན་པོ་འདི་མེས་ཚིག་པའམ། ཆུས་བཤིག་པའམ། རླུང་གིས་གཏོར་བར་འགྱུར་བའི་དུས་དེ་ཡོད་དེ། དེ་མེས་ཚིག་ན་ནི་དུ་
བ་ཡང་མི་མངོན། ཐལ་བའི་ལྷག་མ་ཡང་མི་མངོན་པར་འགྱུར་རོ། །འདི་ལྟ་སྟེ། དཔེར་ན་ནམ་མཁའ་ལ་མར་རམ། འབྲུ་མར་གྱི་མེས་བསྲེགས་ན་དུ་བ་ཡང་མི་མངོན་ཞིང་ཐལ་བའི་ལྷག་མ་ཡང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི</font><hr>42-1-129b<br><font size=+2>
ཁམས་འདི་མེས་ཚིག་པའི་ཚེ་དུ་བ་ཡང་མི་མངོན་ཞིང་ཐལ་བའི་ལྷག་མ་ཡང་མི་མངོན་པར་འགྱུར་རོ། །ཆུས་བཤིག་པའི་ཚེ་ཡང་ལྷག་མ་ཅི་ཡང་མི་མངོན་པར་འགྱུར་ཏེ། འདི་ལྟ་སྟེ། དཔེར་ན་ལན་ཚཝ་ཆུའི་ནང་དུ་ཞུ་བ་ནི་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །དེ་བཞིན་དུ་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་ཆུས་བཤིག་པའི་ཚེ་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །རླུང་གིས་གཏོར་བའི་ཚེ་ཡང་ལྷག་མ་ཅུང་ཟད་ཀྱང་མི་མངོན་པར་འགྱུར་ཏེ། འདི་ལྟ་སྟེ། དཔེར་ན་རྣམ་པར་འཐོར་རླུང་གིས་འདས་པའི་བྱེའུ་ནི་ལྷག་མ་
ཅུང་ཟད་ཀྱང་མི་མངོན་པར་འགྱུར་རོ། །དེ་བཞིན་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རླུང་གིས་གཏོར་བའི་ཚེ་ལྷག་མ་ཅུང་ཟད་ཀྱང་མི་མངོན་པར་འགྱུར་རོ། །རྒྱལ་པོ་ཆེན་པོ་དེ་ལྟར་སའི་ཁམས་དེ་འབྱུང་བ་ཡང་སྟོང ། སའི་ཁམས་འཇིག་པ་དང་འབྱུང་བ་
ཡང་ངོ་བོ་ཉིད་ཀྱིས་སྟོང་ངོ ། །རྒྱལ་པོ་ཆེན་པོ་སའི་ཁམས་ནི་ཐ་སྙད་ཙམ་མ་གཏོགས་པར་སའི་ཁམས་ཉིད་དུ་མི་དམིགས་ཏེ། ཐ་སྙད་དེ་ཡང་བུད་མེད་མ་ཡིན། སྐྱེས་པ་མ་ཡིན་གྱི། རྒྱལ་པོ་ཆེན་པོ་དེ་ལྟར་དེ་ཡང་དག་པ་ཇི་ལྟ་བ་བཞིན་གྱི་ཤེས་རབ་ཀྱིས་རྟོགས་ཤིག་།རྒྱལ་པོ་
ཆེན་པོ་དེ་ལ་ཆུའི་ཁམས་ནི་རྣམ་པ་གཉིས་ཏེ། ནང་གི་དང ། ཕྱི་རོལ་གྱིའོ། །ནང་གི་ཆུའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་ཆུ་དང ། ཆུའི་རྣམ་པ་དང ། ཆུ་ཉིད་དང ། བརླན་པ་དང ། བརླན་པའི་རྣམ་པ་དང ། བརླན་པ་ཉིད་དང ། གཤེར་བ་
ཉིད་དང ། ལུས་སུ་གཏོགས་པ་དང ། ཟིན་པའོ། །དེ་ཡང་གང་ཞེ་ན། འདི་ལྟ་སྟེ། མཆི་མ་དང ། རྡུལ་དང ། མཆིལ་མ་དང ། སྣབས་དང ། ཆུ་སེར་དང ། ཚིལ་དང ། མཁྲིས་པ་དང ། ངར་སྣབས་དང ། རྣག་དང ། ཁྲག་དང ། འོ་མ་དང ། གཅིན་དང ། གཞན་
ཡང་གང་ལུས་འདི་ལ་ནང་གི་ཁོང་ན་ཆུ་དང ། ཆུའི་རྣམ་པ་དང ། ཆུ་ཉིད་དང ། བརླན་པ་དང ། བརླན་པའི་རྣམ་པ་དང ། བརླན་པ་ཉིད་དང ། གཤེར་བ་ཉིད་དང ། ལུས་སུ་གཏོགས་པ་དང ། ཟིན་པ་འདི་ནི་ནང་གི་ཆུའི་ཁམས་ཞེས་བྱའོ། །ཕྱི་རོལ་གྱི་ཆུའི་ཁམས</font><hr>42-1-130a<br><font size=+2>
གང་ཞེ་ན། གང་ཕྱི་རོལ་གྱི་ཆུ་དང ། ཆུའི་རྣམ་པ་དང ། ཆུ་ཉིད་དང ། བརླན་པ་དང ། བརླན་པའི་རྣམ་པ་དང ། བརླན་པ་ཉིད་དང ། གཤེར་བ་དང ། ལུས་སུ་མ་གཏོགས་པ་དང་།མ་ཟིན་པ་འདི་ནི་ཕྱི་རོལ་གྱི་ཆུའི་ཁམས་ཞེས་བྱའོ། །རྒྱལ་པོ་
ཆེན་པོ་དེ་ལ་ནང་གི་ཆུའི་ཁམས་འབྱུང་བའི་ཚེ་གང་ནས་ཀྱང་མི་འོང་ངོ ། །རྒྱལ་པོ་ཆེན་པོ་སྡུག་པ་མཐོང་ན་མཆི་མ་འབྱུང་བ་དང ། སྡུག་བསྔལ་གྱིས་ཉེན་པ་དང ། ཆོས་ཀྱི་ཤུགས་ཀྱིས་མཆི་མ་འབྱུང་བ་དང ། རླུང་གིས་བཏབ་བམ། རྣམ་པ་གཞན་དག་གིས་ཀྱང་མཆི་མ་འབྱུང་སྟེ། 
དཔྱད་བྱས་པས་ཀྱང་ནང་གི་ཆུའི་ཁམས་དེ་འཕེལ་བར་འགྱུར་བའི་དུས་དེ་ཡོད་དེ། རྒྱལ་པོ་ཆེན་པོ་ཆུའི་ཁམས་དེ་འབྱུང་བའི་ཚེ་གང་ནས་ཀྱང་མི་འོང་ངོ ། །རྒྱལ་པོ་ཆེན་པོ་གང་ནང་གི་ཆུའི་ཁམས་ཡོངས་སུ་སྐམ་པར་འགྱུར་བའི་དུས་དེ་ཡོད་དེ། དེ་ཡོངས་སུ་སྐམ་ཞིང་འགག་པའི་
ཚེ་གང་དུ་ཡང་མི་འགྲོའོ། །རྒྱལ་པོ་ཆེན་པོ་གང་ནང་གི་མེའི་ཁམས་ཤས་ཆེ་བར་གྱུར་ན་དེས་ནང་གི་ཆུའི་ཁམས་ཡོངས་སུ་གདུང་བར་འགྱུར་བའི་དུས་དེ་ཡོད་དེ། གདུངས་པའི་ཚེ་གང་དུ་ཡང་མི་འགྲོའོ། །རྒྱལ་པོ་ཆེན་པོ་དེ་བཞིན་དུ་ནང་གི་ཆུའི་ཁམས་འབྱུང་བའི་ཚེ་གང་ནས་ཀྱང་
མི་འོང ། འགག་པའི་ཚེ་གང་དུ་ཡང་མི་འགྲོའོ། །རྒྱལ་པོ་ཆེན་པོ་གང་འཇིག་རྟེན་འདི་འཆགས་པར་འགྱུར་བའི་དུས་དེ་ཡོད་དེ། འཇིག་རྟེན་གྱི་ཁམས་འདི་འཆགས་པར་འགྱུར་བའི་ཚེ་ནམ་མཁའ་འདི་ལ་ཀུན་ཏུ་སྤྲིན་ཤིན་ཏུ་སྟུག་པོའི་ཚོགས་སུམ་ཅུ་རྩ་གཉིས་འཁྲིགས་པར་འགྱུར་ཏེ། 
དེ་དག་འཁྲིགས་པས་ཐམས་ཅད་དང་ལྡན་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་ཡོག་པར་འགྱུར་ཏེ། དེ་ལ་བསྐལ་པ་བར་མ་ལྔའི་བར་དུ་གཤོལ་མདའ་ཙམ་གྱི་ཆར་གྱི་རྒྱུན་འབབ་པོ། །བསྐལ་པ་བར་མ་ལྔའི་བར་དུ་གླང་པོ་ཆེའི་ཕོ་མཚན་ཙམ་གྱི་ཆར་
འབབ་བོ། །བསྐལ་པ་བར་མ་ལྔའི་བར་དུ་རྒྱུན་མི་འཆད་པའི་ཆར་འབབ་བོ། །བསྐལ་པ་བར་མ་ལྔའི་བར་དུ་ཐིགས་པ་ཆེན་པོའི་ཆར་འབབ་བོ། །དེས་ས་ཆེན་པོ་འདི་ནས་ཚངས་པའི་འཇིག་རྟེན་གྱི་བར་དུ་ཆུས་ཁྱབ་པར་གང་བར་འགྱུར་ཏེ། རྒྱལ་པོ་ཆེན་པོ་ཆུའི་ཕུང་པོ་ཆེན་པོ་དེ་འབྱུང་བའི་ཚེའང</font><hr>42-1-130b<br><font size=+2>
གང་ནས་ཀྱང་མི་འོང་ངོ ། །རྒྱལ་པོ་ཆེན་པོ་གང་འཇིག་རྟེན་འདི་འཇིག་པར་འགྱུར་བའི་དུས་དེ་ཡོད་དེ། འཇིག་རྟེན་གྱི་ཁམས་འདི་འཇིག་པར་འགྱུར་བའི་ཚེ་ཉི་མ་གཉིས་འཇིག་རྟེན་དུ་འབྱུང་བར་འགྱུར་ཏེ། ཉི་མ་གཉིས་འཇིག་རྟེན་དུ་བྱུང་བས་ཆུ་མིག་དང ། ཆུ་བྲན་རྣམས་སྐམ་པར་འགྱུར་རོ། །དེ་ནས་ཉི་མ་གསུམ་འཇིག་རྟེན་དུ་
འབྱུང་སྟེ། ཉི་མ་གསུམ་འཇིག་རྟེན་དུ་བྱུང་བས་ཆུ་མིག་ཆེན་པོ་དང ། ཆུ་ཀླུང་ཆེན་པོ་རྣམས་སྐམ་པར་འགྱུར་རོ། །དེ་ནས་ཉི་མ་བཞི་འཇིག་རྟེན་དུ་འབྱུང་སྟེ། ཉི་མ་བཞི་འཇིག་རྟེན་དུ་བྱུང་བས་གང་ན་ཆུ་ཀླུང་ཆེན་པོ་བཞི་པོ་འདི་དག་འབབ་པའི་མཚོ་ཆེན་པོ་མ་དྲོས་པ་དེ་ཡང་
ཡོངས་སུ་སྐམ་པར་འགྱུར། ཐིམ་པར་འགྱུར་ཏེ་མེད་པར་འགྱུར་རོ། །དེ་ནས་ཉི་མ་ལྔ་འཇིག་རྟེན་དུ་འབྱུང་སྟེ། ཉི་མ་ལྔ་འཇིག་རྟེན་དུ་བྱུང་བས་རྒྱ་མཚོ་ཆེན་པོ་ཡང་དཔག་ཚད་གཅིག་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་གཉིས་དང ། 
གསུམ་དང ། བཞི་དང ། ལྔ་དང ། བཅུ་དང ། ཉི་ཤུ་དང ། སུམ་ཅུ་དང ། བཞི་བཅུ་དང ། དཔག་ཚད་ལྔ་བཅུ་ཙམ་གྱི་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །དཔག་ཚད་བརྒྱ་དང ། ཉིས་བརྒྱ་དང ། སུམ་བརྒྱ་དང ། བཞི་བརྒྱ་དང ། དཔག་ཚད་ལྔ་
བརྒྱ་དང ། དཔག་ཚད་སྟོང་དང ། ཉིས་སྟོང་དང ། སུམ་སྟོང་དང ། དཔག་ཚད་བཞི་སྟོང་ཙམ་དུ་རྒྱ་མཚོ་ཆེན་པོ་ལས་ཆུ་ཡོངས་སུ་ཟད་ཅིང་ཡོངས་སུ་འགྲིབ་པར་འགྱུར་རོ། །རྒྱལ་པོ་ཆེན་པོ་རྒྱ་མཚོ་ཆེན་པོ་ལ་དཔག་ཚད་བཞི་ཁྲིའི་ཆུ་ལས་པར་འགྱུར་བ་དང ། དཔག་
ཚད་སུམ་ཁྲི་དང ། ཉི་ཁྲི་དང ། དགུ་སྟོང་དང ། བརྒྱད་སྟོང་དང ། བདུན་སྟོང་དང ། དྲུག་སྟོང་དང ། ལྔ་སྟོང་དང ། བཞི་སྟོང་དང ། སུམ་སྟོང་དང ། ཉིས་སྟོང་དང ། སྟོང་གི་ཆུ་ལས་པར་འགྱུར་བ་དང ། དཔག་ཚད་དགུ་བརྒྱའི་ཆུ་ལས་པར་འགྱུར་བ་དང ། དཔག་
ཚད་བརྒྱད་བརྒྱ་དང ། བདུན་བརྒྱ་དང ། དྲུག་བརྒྱ་དང ། ལྔ་བརྒྱ་དང ། བཞི་བརྒྱ་དང ། སུམ་བརྒྱ་དང ། ཉིས་བརྒྱ་དང ། བརྒྱའི་ཆུ་ལས་པར་འགྱུར་བ་དང ། དཔག་ཚད་ལྔ་བཅུ་དང ། བཞི་བཅུ་དང ། སུམ་ཅུ་དང ། ཉི་ཤུ་དང ། བཅུ་དང ། དགུ་དང ། བརྒྱད་དང་།


</font><hr>42-1-131a<br><font size=+2>
བདུན་དང ། དྲུག་དང ། ལྔ་དང ། བཞི་དང ། གསུམ་དང ། གཉིས་དང ། དཔག་ཚད་གཅིག་གི་ཆུ་ལས་པར་འགྱུར་བ་དང ། ཤིང་ཏ་ལ་བཅུ་དང ། དགུ་དང ། བརྒྱད་དང ། བདུན་དང ། དྲུག་དང ། ལྔ་དང ། བཞི་དང ། གསུམ་དང ། ཤིང་ཏ་ལ་
གཉིས་ཙམ་གྱི་ཆུ་ལས་པར་འགྱུར་བ་དང ། མི་འགྲེང་བཅུ་དང ། དགུ་དང ། བརྒྱད་དང ། བདུན་དང ། དྲུག་དང ། ལྔ་དང ། བཞི་དང ། གསུམ་དང ། མི་འགྲེང་གཉིས་ཙམ་གྱི་ཆུ་ལས་པར་འགྱུར་བ་དང ། ལྐོག་མ་ནུབ་ཙམ་དང ། མཆན་ཁུང་ནུབ་ཙམ་དང ། 
ལྟེ་བ་ནུབ་ཙམ་དང ། པུས་མོ་ནུབ་ཙམ་གྱི་ཆུ་ལས་པར་འགྱུར་བ་ནས། བ་ལང་གི་རྨིག་རྗེས་ཀྱི་ཆུ་ཙམ་གྱི་བར་དུ་ལས་པར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ་གང་རྒྱ་མཚོ་ཆེན་པོ་ལས་ཟིལ་པ་ཕྲམ་ཕྲུམ་ཙམ་ལས་པར་འགྱུར་བའི་དུས་དེ་ཡོད་དོ། །འདི་ལྟ་སྟེ། དཔེར་ན་
ཆར་བའི་ཐིགས་པ་ཆེན་པོ་བབ་ནས་ཆེན་པོ་ལ་ཐོག་མར་ཟིལ་པ་ཕྲམ་ཕྲུམ་ཙམ་དུ་འགྱུར་རོ། །རྒྱལ་པོ་ཆེན་པོ་དེ་བཞིན་དུ་རྒྱ་མཚོ་ཆེན་པོ་དེ་ཡང་ཟིལ་པ་ཕྲམ་ཕྲུམ་ཙམ་ལས་པར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ་གང་རྒྱ་མཚོ་ཆེན་པོ་དེ་མཛུབ་མོ་སྨྱུགས་པ་ཙམ་གྱི་ཆུ་ཡང་
མ་ལས་པར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ་དེ་ཙམ་དུ་ཆུའི་ཁམས་དེ་འགག་པའི་ཚེ་ཡང་གང་དུ་ཡང་མི་འགྲོ་སྟེ། ཤར་ཕྱོགས་དང ། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། སྟེང་དང ། འོག་དང ། ཕྱོགས་མཚམས་རྣམས་སུ་
ཡང་མི་འགྲོའོ། །རྒྱལ་པོ་ཆེན་པོ་ཆུའི་ཁམས་དེ་ནི་སྐྱེ་བ་ཡང་སྟོང ། འཇིག་པ་ཡང་སྟོང ། གནས་པའི་ཚེ་ཡང་ཆུའི་ཁམས་དེ་རང་བཞིན་གྱིས་སྟོང་སྟེ། རྒྱལ་པོ་ཆེན་པོ་ཆུའི་ཁམས་དེ་ནི་ཐ་སྙད་ཙམ་མ་གཏོགས་པར་ཆུའི་ཁམས་ཀྱིས་སྟོང་ཞིང་མི་དམིགས་ཏེ། ཐ་སྙད་དེ་ཡང་བུད་མེད་མ་ཡིན། སྐྱེས་པ་མ་ཡིན་
ནོ། །དེ་ལྟར་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་ཤིག་།རྒྱལ་པོ་ཆེན་པོ་དེ་ལ་མེའི་ཁམས་ནི་རྣམ་པ་གཉིས་ཏེ། ནང་གི་དང ། ཕྱི་རོལ་གྱིའོ། །ནང་གི་མེའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་མེ་དང ། མེའི་རྣམ་པ་དང ། དྲོ་བ</font><hr>42-1-131b<br><font size=+2>
དང ། དྲོ་བའི་རྣམ་པ་དང ། ལུས་སུ་གཏོགས་པ་དང ། ཟིན་པའོ། །དེ་ཡང་གང་ཞེ་ན། གང་གིས་ལུས་འདི་གདུང་བ་དང ། ཀུན་ཏུ་གདུང་བ་དང ། ཡོངས་སུ་གདུང་བ་དང ། གང་གིས་ཟོས་པ་དང ། འཐུངས་པ་དང ། འཆོས་པ་དང ། མྱངས་པ་རྣམས་
བདེ་ཞིང་ལེགས་པར་ཞུ་བར་འགྱུར་བ་དང ། གང་གི་ཤས་ཆེ་ན་རིམས་སོ་རིམས་སོ་ཞེས་བྱ་བའི་གྲངས་སུ་འགྲོ་བ་དང ། གཞན་ཡང་གང་ལུས་འདི་ལ་ནང་གི་ཁོང་ན་མེ་དང ། མེའི་རྣམ་པ་དང ། དྲོ་བ་དང ། དྲོ་བའི་རྣམ་པ་དང ། ལུས་སུ་གཏོགས་པ་དང ། ཟིན་པ་
འདི་ནི་ནང་གི་མེའི་ཁམས་ཞེས་བྱའོ། །ཕྱི་རོལ་གྱི་མེའི་ཁམས་གང་ཞེ་ན། གང་ཕྱི་རོལ་གྱི་མེ་དང ། མེའི་རྣམ་པ་དང ། དྲོ་བ་དང ། དྲོ་བའི་རྣམ་པ་དང ། ལུས་སུ་མ་གཏོགས་པ་དང ། མ་ཟིན་པ་སྟེ། དེ་ནི་མི་དག་གཙུབ་ཤིང་དང་ལྡན་པའམ། རྩཝ་དང་ལྡན་
པའམ། བ་ལང་གི་ལྕི་བའི་བུ་རམ་འམ། ཤིང་བལ་གྱི་སྒོ་ང་དང་ལྡན་པར་བྱས་ཤིང་མེ་འབྱིན་ཏེ། དེ་བྱུང་ནས་གྲོང་ཡང་ཚིག་།གྲོང་གི་ཕྱོགས་ཀྱང་ཚིག་།གྲོང་ཁྱེར་རམ། གྲོང་ཁྱེར་གྱི་ཕྱོགས་སམ། ཡུལ་ལམ། ཡུལ་གྱི་ཕྱོགས་སམ། གླིང་ངམ། རྩཝའི་
གཏོས་སམ། ནགས་སམ། ཤིང་ངམ། རྩཝའམ། བ་ལང་གི་ལྕི་བ་དག་སྲེག་ཅིང་འགྲོ་བ་དང ། གཞན་ཡང་གང་ཚུལ་འདི་དང་འདྲ་བ་འདི་ནི་ཕྱི་རོལ་གྱི་མེའི་ཁམས་ཞེས་བྱའོ། །རྒྱལ་པོ་ཆེན་པོ་དེ་ལ་ཕྱི་རོལ་གྱི་མེའི་ཁམས་ནི་འབྱུང་བའི་ཚེ་ཡང་གང་ནས་ཀྱང་མི་འོང་ངོ ། །
འགག་པའི་ཚེ་ཡང་གང་དུ་ཡང་སོགས་པར་མི་འགྲོ་སྟེ། དེ་ནི་རང་བཞིན་དང་བྲལ་བའི་ཕྱིར་མེད་པ་ལས་ཡོད་པར་འགྱུར་ཞིང ། ཡོད་པར་གྱུར་ནས་ཀྱང་མེད་པར་འགྱུར་རོ། །རྒྱལ་པོ་ཆེན་པོ་དེ་ལ་རླུང་གི་ཁམས་ཀྱང་རྣམ་པ་གཉིས་ཏེ། ནང་གི་དང ། ཕྱི་རོལ་གྱིའོ། །དེ་ལ་ནང་
གི་རླུང་གི་ཁམས་གང་ཞེ་ན། གང་ལུས་འདི་ལ་རླུང་དང ། རླུང་གི་རྣམ་པ་དང ། ཡང་བ་ཉིད་དང ། གཡོ་བ་ཉིད་དང ། ལུས་སུ་གཏོགས་པ་དང་།ཟིན་པའོ། །དེ་ཡང་གང་ཞེ་ན། འདི་ལྟ་སྟེ། གྱེན་དུ་འགྲོ་བའི་རླུང་དང་ཐུར་དུ་འགྲོ་བ་དང ། ཐད་ཀར་འགྲོ་བ་དང་།


</font><hr>42-1-132a<br><font size=+2>
རྒྱབ་ཏུ་འགྲོ་བ་དང ། རྒྱབ་ན་གནས་པ་དང ། ལྟོ་ན་གནས་པ་དང ། འཆད་པར་བྱེད་པ་དང ། འགས་པར་བྱེད་པ་དང ། གཟེར་བ་དང ། འདར་བུ་དང ། སྣ་སྐད་དང ། རླུང་སྐྲན་དང ། དབུགས་འབྱུང་བ་དང་རྔུབ་པ་དང་ལྡན་པ་དང ། ཡན་
ལག་དང་ཉིང་ལག་ལ་གནས་པའི་རླུང་དག་དང ། གཞན་ཡང་གང་དག་ལུས་འདི་ལ་ནང་གི་ཁོང་ན་རླུང་དང ། རླུང་གི་རྣམ་པ་དང ། ཡང་བ་ཉིད་དང ། གཡོ་བ་ཉིད་དང ། ལུས་སུ་གཏོགས་པ་དང ། ཟིན་པ་འདི་ནི་ནང་གི་རླུང་གི་ཁམས་ཞེས་བྱའོ། །ཕྱི་རོལ་གྱི་རླུང་
གི་ཁམས་གང་ཞེ་ན། གང་ཕྱི་རོལ་གྱི་རླུང་དང ། རླུང་གི་རྣམ་པ་དང ། ཡང་པ་ཉིད་དང ། གཡོ་བ་ཉིད་དང ། ལུས་སུ་མ་གཏོགས་པ་དང ། མ་ཟིན་པ་དག་སྟེ། ཕྱི་རོལ་གྱི་རླུང་དེ་ཡང་ཤར་ཕྱོགས་ཀྱི་རླུང་ཡོད་དོ། །ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་
ཀྱི་རླུང་ཡོད་དོ། །རྡུལ་དང་བཅས་པ་དང ། རྡུལ་མེད་པ་དང ། ཆུང་བ་དང ། ཆེ་བའི་རླུང་ཡོད་དོ། ཀུན་ཏུ་ཁྱབ་པའི་རླུང་དང ། རྣམ་པར་འཐོར་བའི་རླུང་དང ། ཚུབ་མའི་རླུང་དག་ཀྱང་ཡོད་དོ། །རྒྱལ་པོ་ཆེན་པོ་རླུང་གི་ཕུང་པོ་ཆེན་པོ་ལངས་ན་ཤིང་དག་ཀྱང་གཅོག། 
རྩིག་པའི་ཁ་དག་དང ། རིའི་རྩེ་མོ་དག་ཀྱང་སྙིལ་ཞིང་བསྙིལ་ནས་རྨེག་མེད་པར་འགྱུར་བ་དག་དང ། ཡང་སེམས་ཅན་དག་གོས་ཀྱི་མཐའ་མ་འམ། སྦུད་པའམ། རླུང་ཡབ་དག་གིས་རླུང་གཡོབ་པའི་དུས་དེ་ཡོད་དེ་གཞན་ཡང་གང་ཚུལ་འདི་དང་འདྲ་བ་དེ་ནི་ཕྱི་རོལ་གྱི་
རླུང་གི་ཁམས་ཞེས་བྱའོ། །རྒྱལ་པོ་ཆེན་པོ་དེ་ལ་ནང་དང་ཕྱིའི་རླུང་གི་ཁམས་ནི་འབྱུང་བའི་ཚེ་ཡང་གང་ནས་ཀྱང་མི་འོང་ངོ ། །འགག་པའི་ཚེ་ཡང་གང་དུ་ཡང་སོགས་པར་མི་འགྲོ་སྟེ། རང་བཞིན་དང་བྲལ་བའི་ཕྱིར་མེད་པ་ལས་ཡོད་པར་འགྱུར་ཞིང ། ཡོད་
པར་གྱུར་ནས་ཀྱང་མེད་པར་འགྱུར་རོ། །རྒྱལ་པོ་ཆེན་པོ་དེ་ལ་ནམ་མཁའི་ཁམས་ཀྱང་རྣམ་པ་གཉིས་ཏེ། ནང་གི་དང ། ཕྱི་རོལ་གྱིའོ། །ནང་གི་ནམ་མཁའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁོང་ན་ལུས་ལ་ཡོད་པ་དང ། ཟིན་པ་དང་།


</font><hr>42-1-132b<br><font size=+2>
ནམ་མཁའ་དང ། ནམ་མཁའི་རྣམ་པ་ནང་ཞེས་བྱ་བའི་གྲངས་སུ་འགྲོ་བ། མ་གང་བ་དང ། པགས་པ་དང ། ཤ་དང་ཁྲག་གིས་དགང་བར་བྱ་བ་མ་ཡིན་པའོ། །དེ་ཡང་གང་ཞེ་ན། ལུས་འདི་ལ་མིག་གི་ནང་ཞེའམ། རྣ་བ་དང་སྣའི་ནང་ཞེའམ། ཁ་ཞེའམ། 
ཁའི་ནང་ཞེའམ། ཁའི་སྒོ་ཞེའམ། ལྐོག་མ་ཞེའམ། མིད་པ་ཞེའམ། གང་ན་མིད་པ་དང་གང་དུ་གནས་པ་དང ། གང་གིས་ཟོས་པ་དང ། འཐུངས་པ་དང ། འཆོས་པ་དང ། མྱངས་པ་རྣམས་ཐུར་དུ་རྒྱུ་བར་བྱེད་པ་དང ། གཞན་ཡང་གང་ལུས་འདི་ལ་ནང་གི་ཁོང་ན་ལུས་
ལ་ཡོད་པ་དང ། ཟིན་པ་ཕུང་པོར་གྱུར་པའམ། ཁམས་སུ་གྱུར་པའམ། སྐྱེ་མཆེད་དུ་གྱུར་པ་དག་གི་ནམ་མཁའ་དང ། ནམ་མཁའི་རྣམ་པ་དང ། མ་གང་བ་དང ། པགས་པ་དང ། ཤ་དང ། ཁྲག་གིས་དགང་བར་བྱ་བ་མ་ཡིན་པ་ནང་གི་གྲངས་སུ་འགྲོ་བ་ཁོང་སྟོད་དང ། 
བུ་ག་ཞེས་བྱ་བ་དག་སྟེ། དེ་ནི་ནང་གི་ནམ་མཁའི་ཁམས་སོ། །ཕྱི་རོལ་གྱི་ནམ་མཁའི་ཁམས་གང་ཞེ་ན། གང་ཅི་ཡང་རུང་སྟེ། ཕྱི་རོལ་གྱི་ནམ་མཁའ་དང ། ནམ་མཁའི་རྣམ་པ་དང ། མ་གང་བ་དང ། གཟུགས་སུ་གྱུར་པས་དགང་བར་བྱ་བ་མ་ཡིན་པ་མ་འདྲེས་པ་ཁོང་སྟོང་
དང ། བུ་གར་གྱུར་བ་འདི་ནི་ཕྱི་རོལ་གྱི་ནམ་མཁའི་ཁམས་ཞེས་བྱའོ། །རྒྱལ་པོ་ཆེན་པོ་གང་ལས་ཀྱི་རྐྱེན་གྱི་སྐྱེ་མཆེད་རྣམས་འབྱུང་བའི་དུས་དེ་ཡོད་དེ། དེ་དག་ནམ་མཁའི་ཁམས་ལ་སྒྲིབ་པར་འགྱུར་ཏེ། དེ་ནང་གི་ནམ་མཁའི་ཁམས་ཞེས་བྱ་བའི་གྲངས་སུ་འགྲོ་ཡང་དེ་
ནི་ག་ལས་ཀྱང་མ་འོངས་སོ། །རྒྱལ་པོ་ཆེན་པོ་གཟུགས་ཞིག་ན་ཐམས་ཅད་ནམ་མཁར་འགྱུར་བའི་དུས་དེ་ཡོད་དོ། །དེ་ཅིའི་ཕྱིར་ཞེ་ན། ནམ་མཁའི་ཁམས་ནི་ཟད་མི་ཤེས་པའི་ཕྱིར་རོ། །དེ་ནི་ནང་གི་ནམ་མཁའི་ཁམས་ཞེས་བྱ་བར་ཤེས་པར་བྱ་སྟེ། གནས་ཤིང་
མི་གཡོ་བའོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་འདུས་མ་བྱས་ནི་མྱ་ངན་ལས་འདས་པའི་དབྱིངས་ཏེ། དེ་བཞིན་དུ་ནམ་མཁའི་ཁམས་ཀྱང་ཐམས་ཅད་དུ་སོང་བར་བལྟ་བར་བྱའོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་ཞིག་གིས་ཐང་ལ་ཁྲོན་པའམ། རྫིང་བུ</font><hr>42-1-133a<br><font size=+2>
འམ། ཁྲོན་རིངས་སམ། རྫིང་ཞིག་བརྐོས་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། དེའི་ནམ་མཁའ་དེ་ག་ལས་འོངས། གསོལ་པ། བཅོམ་ལྡན་འདས་དེ་ནི་ག་ལས་ཀྱང་མ་མཆིས་སོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་དེས་ཁྲོན་
པ་ནས་རྫིང་གི་བར་དེ་དག་ཕྱིར་བཀང་ན། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། དེའི་ནམ་མཁའ་དེ་གང་དུ་སོང ། གསོལ་པ། བཅོམ་ལྡན་འདས་དེ་ནི་གང་དུ་ཡང་མ་མཆིས་ཏེ། དེ་ཅིའི་སླད་དུ་ཞེ་ན། ནམ་མཁའི་ཁམས་ནི་འགྲོ་བའམ་འོང་བར་ཉེ་བར་གནས་
པ་མ་ལགས། བུད་མེད་ཀྱི་དངོས་པོ་དང ། སྐྱེས་པའི་དངོས་པོར་ཉེ་བར་གནས་པ་མ་ལགས་པའི་སླད་དུའོ། །བཀའ་སྩལ་པ། རྒྱལ་པོ་ཆེན་པོ་དེ་ལྟར་ན་ཕྱི་རོལ་གྱི་ནམ་མཁའི་ཁམས་ནི་མི་གཡོ་མི་འགྱུར་བའོ། །དེ་ཅིའི་ཕྱིར་ཞེ་ན། ནམ་མཁའི་ཁམས་ནི་ནམ་
མཁའི་ཁམས་ཀྱིས་སྟོང་ཞིང ། ནམ་མཁའི་ཁམས་ནི་ནམ་མཁའི་ཁམས་དང་བྲལ་བ་སྟེ། ནམ་མཁའི་ཁམས་ནི་བུད་མེད་ཀྱི་དངོས་པོར་ཉེ་བར་མི་གནས། སྐྱེས་པའི་དངོས་པོར་ཉེ་བར་མི་གནས་ཀྱིས། དེ་ལྟར་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་
ཤིག་།རྒྱལ་པོ་ཆེན་པོ་དེ་ལ་རྣམ་པར་ཤེས་པའི་ཁམས་གང་ཞེ་ན། མིག་གི་དབང་པོ་ནི་བདག་པོ། །གཟུགས་ནི་དམིགས་པ། གཟུགས་སོ་སོར་རྣམ་པར་རིག་པ་སྟེ། སྔོན་པོ་རྣམ་པར་རིག་པའམ། སེར་པོ་དང ། དམར་པོ་དང ། ཁྲ་བོ་རྣམ་པར་རིག་པའམ། 
རིང་པོ་དང ། ཐུང་ངུ་དང ། སྦོམ་པོ་དང ། ཕྲ་མོ་རྣམ་པར་རིག་པ་སྟེ། རྒྱལ་པོ་ཆེན་པོ་དེ་ལྟར་གང་ཅི་ཡང་རུང ། ཁ་དོག་དང ། དབྱིབས་རྣམ་པར་རིག་པ་འདི་ནི་མིག་གི་རྣམ་པར་ཤེས་པའི་ཁམས་ཞེས་བྱའོ། །དེ་བཞིན་དུ་གང་ཅི་ཡང་རུང་རྣ་བའི་དབང་པོ་ནི་
བདག་པོ་ནས།ཡིད་ཀྱི་དབང་པོ་ནི་བདག་པོ། ཆོས་ནི་དམིགས་པ་སྟེ། སྒྲ་རྣམ་པར་རིག་པའམ། དྲི་རྣམ་པར་རིག་པའམ། རོ་རྣམ་པར་རིག་པའམ། རེག་རྣམ་པར་རིག་པའམ། ཆོས་རྣམ་པར་རིག་པ་འདི་ནི་རྣ་བའི་རྣམ་པར་ཤེས་པའི་ཁམས་ནས</font><hr>42-1-133b<br><font size=+2>
ཡིད་ཀྱི་རྣམ་པར་ཤེས་པའི་བར་གྱི་ཁམས་ཏེ། དེ་ལྟར་དབང་པོ་དྲུག་ནི་བདག་པོ། ཡུལ་དྲུག་ནི་དམིགས་པ་ཡིན་ལ། ཡུལ་རྣམ་པར་རིག་པ་འདི་ནི་རྣམ་པར་ཤེས་པའི་ཁམས་ཞེས་བྱའོ། །རྒྱལ་པོ་ཆེན་པོ་རྣམ་པར་ཤེས་པའི་ཁམས་དེ་ནི་དབང་པོ་ལ་མི་རྟེན། 
ཡུལ་རྣམས་ལས་མ་འོངས། བར་གྱི་དབུས་ན་མི་གནས་ཏེ། དེ་ནི་ནང་ན་མ་ཡིན། ཕྱི་རོལ་ན་མ་ཡིན། གཉི་ག་མེད་པ་ལ་ཡང་མ་ཡིན་ནོ། །རྣམ་པར་ཤེས་པའི་ཁམས་དེ་ནི་དངོས་པོ་སོ་སོར་རྣམ་པར་རིག་ནས་འགག་སྟེ། དེ་འབྱུང་བའི་ཚེ་གང་
ནས་ཀྱང་མ་འོངས། འགག་པའི་ཚེ་གང་དུ་ཡང་མི་འགྲོའོ། །རྣམ་པར་ཤེས་པའི་ཁམས་དེ་འབྱུང་བ་ཡང་སྟོང ། འཇིག་པ་ཡང་སྟོང་སྟེ། རྣམ་པར་ཤེས་པའི་ཁམས་དེ་བྱུང་ཡང་རང་བཞིན་གྱིས་སྟོང་ངོ ། །རྒྱལ་པོ་ཆེན་པོ་དེ་ལྟར་ན་ཐ་སྙད་མ་གཏོགས་པར་
རྣམ་པར་ཤེས་པའི་ཁམས་དེ་ནི་རྣམ་པར་ཤེས་པའི་ཁམས་ཉིད་ཀྱིས་སྟོང་སྟེ། ཐ་སྙད་དེ་ཡང་སྐྱེས་པ་མ་ཡིན། བུད་མེད་མ་ཡིན་གྱིས། དེ་ནི་དེ་ལྟར་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་རྟོགས་ཤིག་།རྒྱལ་པོ་ཆེན་པོ་དེ་ལ་མིག་
གི་སྐྱེ་མཆེད་གང་ཞེ་ན། དེ་ནི་འབྱུང་བ་ཆེན་པོ་བཞི་དང་བ་སྟེ། འདི་ལྟར་སའི་ཁམས་དང ། ཆུའི་ཁམས་དང ། མེའི་ཁམས་དང ། རླུང་གི་ཁམས་སོ། །དེ་ལ་སའི་ཁམས་དང་བ་ནི་མིག་གི་སྐྱེ་མཆེད་མ་ཡིན་ནོ། །ཆུའི་ཁམས་དང་བ་ཡང་
མ་ཡིན་ནོ། །མེའི་ཁམས་དང་བ་ཡང་མ་ཡིན་ནོ། །རླུང་གི་ཁམས་དང་བ་ཡང་མིག་གི་སྐྱེ་མཆེད་མ་ཡིན་ནོ། །དེ་ཅིའི་ཕྱིར་ཞེ་ན། སའི་ཁམས་དང་བ་ནི་ཆོས་གང་ལ་ཡང་སྐྱེ་མཆེད་དམ། སྐྱེ་མཆེད་ཐོབ་པར་བྱ་བར་ཉེ་བར་མི་གནས་སོ། །དེ་
བཞིན་དུ་རླུང་གི་བར་གྱི་ཁམས་དང་བ་ནི་ཆོས་གང་ལ་ཡང་སྐྱེ་མཆེད་དམ། སྐྱེ་མཆེད་ཐོབ་པར་བྱ་བར་ཉེ་བར་མི་གནས་སོ། །དེ་ཅིའི་ཕྱིར་ཞེ་ན། ཆོས་དེ་དག་ནི་སེམས་པ་མེད་ཅིང་བྱེད་པ་མེད་ལ་ཅི་ཡང་མི་ནུས་པ་སྟེ། རྒྱལ་པོ་ཆེན་པོ་ཆོས་རྣམས</font><hr>42-1-134a<br><font size=+2>
ནི་རེ་རེ་ནས་བཙལ་ན་ཐ་སྙད་ཙམ་མ་གཏོགས་པར་མིག་གི་སྐྱེ་མཆེད་མི་དམིགས་སོ། །དེ་ཅིའི་ཕྱིར་ཞེ་ན། སའི་ཁམས་དང་བ་ནི་སའི་ཁམས་དང་བས་སྟོང ། རླུང་གི་ཁམས་དང་བའི་བར་ནི་རླུང་གི་ཁམས་དང་བས་སྟོང་སྟེ། ཆོས་
གང་དག་རང་བཞིན་གྱིས་སྟོང་པ་དེ་དག་ལ་དང་བའམ། འཁྲུགས་པར་འགྱུར་བ་ཡང་ག་ལ་ཡོད་དེ། གང་ལ་དང་བའམ། འཁྲུགས་པ་མི་དམིགས་པ་དེ་དག་ཇི་ལྟར་གཟུགས་ལ་ལྟ་བར་འགྱུར། དེ་ལྟར་མིག་གི་སྐྱེ་མཆེད་ནི་མིག་གི་སྐྱེ་མཆེད་ཀྱི་རང་
བཞིན་གྱིས་ཤིན་ཏུ་སྟོང་སྟེ། དེ་ནི་འོང་བ་དང ། འགྲོ་བ་མེད་པའི་ཕྱིར་སྔོན་གྱི་མཐར་ཡང་མི་དམིགས་སོ། ཕྱི་མའི་མཐར་ཡང་མི་དམིགས་སོ། །རང་བཞིན་མེད་པའི་ཕྱིར་དེ་ལ་གནས་པ་ཡང་མི་དམིགས་སོ། །གང་རང་བཞིན་གྱིས་མེད་པ་
དེ་ནི་བུད་མེད་ཀྱང་མ་ཡིན། སྐྱེས་པ་ཡང་མ་ཡིན་ནོ། །གང་བུད་མེད་ཀྱང་མ་ཡིན། སྐྱེས་པ་ཡང་མ་ཡིན་པ་ནི་དེས་རློམ་སེམས་སུ་ག་ལ་འགྱུར་ཏེ། རྒྱལ་པོ་ཆེན་པོ་རློམ་སེམས་ནི་བདུད་ཀྱི་སྤྱོད་ཡུལ་ལོ། །རློམ་སེམས་མེད་པ་ནི་སངས་རྒྱས་ཀྱི་སྤྱོད་
ཡུལ་ལོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་རློམ་སེམས་དང་བྲལ་བའོ། །རྒྱལ་པོ་ཆེན་པོ་ཡང་དག་པ་ཇི་ལྟ་བ་བཞིན་དུ་རྟོགས་ན་མིག་གི་སྐྱེ་མཆེད་ནི་མིག་གི་སྐྱེ་མཆེད་ཀྱིས་སྟོང་ངོ ། །དེ་ཅིའི་ཕྱིར་ཞེ་ན། མིག་གི་སྐྱེ་མཆེད་འདི་ལ་ནི་མཚན་
མ་མེད་དེ། དེའི་ཕྱིར་མིག་གི་སྐྱེ་མཆེད་ཀྱི་མཚན་མ་འདི་ནི་མིག་གི་སྐྱེ་མཆེད་ཀྱིས་སྟོང་སྟེ། འདི་ནི་སྟོང་པ་ཉིད་དོ། །མིག་གི་སྐྱེ་མཆེད་ནི་མཚན་མ་དང་བྲལ་བ་སྟེ། འདི་ནི་མཚན་མ་མེད་པའོ། །དེ་ནི་སྨོན་པར་མི་བྱེད་པས་འདི་ནི་སྨོན་པ་
མེད་པའོ། །རྒྱལ་པོ་ཆེན་པོ་དེ་ལྟར་ན་མིག་གི་སྐྱེ་མཆེད་ནི་རྣམ་པར་ཐར་པའི་སྒོ་གསུམ་སྟེ། མིག་གི་སྐྱེ་མཆེད་ནི་རྣམ་པར་ཐར་པ་ལ་མངོན་པར་ཕྱོགས་པའོ། །རྒྱལ་པོ་ཆེན་པོ་དེ་ལ་རྣ་བའི་སྐྱེ་མཆེད་ནས་ལུས་ཀྱི་སྐྱེ་མཆེད་ཀྱི་བར་གང་ཞེ་ན།


</font><hr>42-1-134b<br><font size=+2>
གང་འབྱུང་བ་ཆེན་པོ་བཞི་དང་བའོ། །རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་ཀྱི་བར་ནི་རྣམ་པར་ཐར་པ་ལ་མངོན་པར་ཕྱོགས་པ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་ཀླས་པ། གདགས་སུ་མེད་པ། ཐ་སྙད་མེད་པ། བརྗོད་
དུ་མེད་པ། བརྗོད་པར་བྱ་བ་མ་ཡིན་པའོ། །རྒྱལ་པོ་ཆེན་པོ་གང་ལ་དབང་པོ་རྣམས་ཐོགས་པར་འགྱུར་བ་དེ་ནི་ཡུལ་རྣམས་ཞེས་བྱ་སྟེ། མིག་ནི་གཟུགས་རྣམས་ལ་ཐོགས་པར་འགྱུར་བས་དེའི་ཕྱིར་གཟུགས་རྣམས་ནི་མིག་གི་ཡུལ་ཞེས་བྱའོ། །
དེ་བཞིན་དུ་རྣ་བ་ནི་སྒྲ་རྣམས་ལ། སྣ་ནི་དྲི་རྣམས་ལ། ལྕེ་ནི་རོ་རྣམས་ལ། ལུས་ནི་རེག་བྱ་རྣམས་ལ། ཡིད་ནི་ཆོས་རྣམས་ལ་ཐོགས་པར་འགྱུར་བས་དེའི་ཕྱིར་ཆོས་རྣམས་ནི་ཡིད་ཀྱི་ཡུལ་ཞེས་བྱའོ། །དེ་ལ་མིག་གཟུགས་རྣམས་ལ་
ཐོགས་སོ་ཞེས་བྱ་བ་འདི་ནི་འབབ་པའི་ཐོགས་པར་འགྱུར་བར་བསྟན་ཏེ། འདི་ལྟར་མིག་ནི་གཟུགས་རྣམས་ལ་རྣམ་པ་གསུམ་དུ་འབབ་སྟེ། འཐུན་པ་རྣམས་ལ་སྡུག་པའི་འདུ་ཤེས་ཀྱིས་འབབ་པ་དང ། མི་འཐུན་པ་རྣམས་ལ་ཁོང་ཁྲོ་བའི་འདུ་ཤེས་
ཀྱིས་འབབ་པ་དང ། འཐུན་པ་ཡང་མ་ཡིན་མི་འཐུན་པ་ཡང་མ་ཡིན་པ་རྣམས་ལ་བཏང་སྙོམས་ཀྱི་འདུ་ཤེས་ཀྱིས་འབབ་པའོ། །དེ་བཞིན་དུ་ཡིད་ནི་ཆོས་རྣམས་ལ་ཐོགས་པར་འགྱུར་རོ། །ཞེས་བྱ་བ་འདི་ནི་འབབ་པའི་ཐོགས་པར་འགྱུར་བར་བསྟན་ཏེ། 
འདི་ལྟར་ཡིད་ནི་ཆོས་རྣམས་ལ་རྣམ་པ་གསུམ་དུ་འབབ་སྟེ། འཐུན་པ་རྣམས་ལ་རྗེས་སུ་ཆགས་པས་འབབ་པ་དང ། མི་འཐུན་པ་རྣམས་ལ་ཁོང་ཁྲོ་བས་འབབ་པ་དང ། འཐུན་པ་ཡང་མ་ཡིན་མི་འཐུན་པ་ཡང་མ་ཡིན་པ་རྣམས་ལ་རྨོངས་པས་འབབ་
པའི་ཡུལ་དེ་དག་ནི་ཡིད་ཀྱི་སྤྱོད་ཡུལ་ཞེས་བྱ་སྟེ། དེ་ལ་ཡིད་སྤྱོད་ཅིང་རྣམ་པར་སྤྱོད་པས་དེའི་ཕྱིར་ཡིད་ཀྱི་སྤྱོད་ཡུལ་ཞེས་བྱའོ། །རྒྱལ་པོ་ཆེན་པོ་ཡིད་དེ་འཐུན་པའི་གཟུགས་རྣམས་ལ་རྗེས་སུ་ཆགས་པར་སྤྱོད་པ་དེས་ནི་དེའི་འདོད་ཆགས་སྐྱེ་བར་འགྱུར།


</font><hr>42-1-135a<br><font size=+2>
མི་མཐུན་པའི་གཟུགས་རྣམས་ལ་ཁོང་ཁྲོ་བར་སྤྱོད་པ་དེས་ནི་དེའི་ཞེ་སྡང་སྐྱེ་བར་འགྱུར། འཐུན་པ་ཡང་མ་ཡིན་མི་འཐུན་པ་ཡང་མ་ཡིན་པ་རྣམས་ལ་རྨོངས་པར་སྤྱོད་པ་དེས་ནི་དེའི་གཏི་མུག་སྐྱེ་བར་འགྱུར་ཏེ། དེ་བཞིན་དུ་སྒྲ་དང ། དྲི་
དང ། རོ་དང ། རེག་བྱ་རྣམས་ལ་ཡང་ཆོས་རྣམ་པ་གསུམ་ལ་དམིགས་པ་མྱོང་བར་འགྱུར་ཏེ། རྗེས་སུ་ཆགས་པ་དང ། ཁོང་ཁྲོ་བ་དང ། རྨོངས་པར་འགྱུར་བའོ། །ཡིད་ཀྱི་ཤེས་བྱ་འཐུན་པའི་ཆོས་རྣམས་ལ་རྗེས་སུ་ཆགས་པར་སྤྱོད་པ་དེས་ནི་དེའི་
འདོད་ཆགས་སྐྱེ་བར་འགྱུར། མི་འཐུན་པའི་ཆོས་རྣམས་ལ་ཁོང་ཁྲོ་བར་སྤྱོད་པ་དེས་ན་དེའི་ཞེ་སྡང་སྐྱེ་བར་འགྱུར། འཐུན་པ་ཡང་མ་ཡིན་མི་འཐུན་པ་ཡང་མ་ཡིན་པའི་ཆོས་རྣམས་ལ་རྨོངས་པར་སྤྱོད་པ་དེས་ནི་དེའི་གཏི་མུག་སྐྱེ་བར་འགྱུར་རོ། །རྒྱལ་པོ་
ཆེན་པོ་དེ་ལ་དབང་པོ་རྣམས་ནི་སྒྱུ་མ་ལྟ་བུ། ཡུལ་རྣམས་ནི་རྨི་ལམ་ལྟ་བུར་ཤེས་པར་བྱ་སྟེ། རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་ཞིག་ཉལ་བའི་རྨི་ལམ་ན་ཡུལ་གྱི་བཟང་མོ་དང་ལྷན་ཅིག་ཏུ་ཡོངས་སུ་སྤྱོད་པ་རྨིས་ལ། དེ་ཉལ་བ་ལས་སད་ན་བུད་མེད་
ཡུལ་གྱི་བཟང་མོ་དེ་རྗེས་སུ་དྲན་པར་གྱུར་ན་རྒྱལ་པོ་ཆེན་པོ་དེ་ལ་ཇི་སྙམ་དུ་སེམས་རྨི་ལམ་ན་མཐོང་བའི་ཡུལ་གྱི་བཟང་མོ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ལ་ཇི་སྙམ་དུ་སེམས། 
སྐྱེས་བུ་གང་རྨི་ལམ་ན་ཡུལ་གྱི་བཟང་མོ་རྨི་བའི་བུད་མེད་དེ་དང་ལྷན་ཅིག་རྩེ་བ་དང ། དགའ་བ་དང ། མངོན་པར་ཞེན་པར་འགྱུར་བ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་
ལྡན་འདས་རྨི་ལམ་ན་མཐོང་བའི་ཡུལ་གྱི་བཟང་མོ་དེ་ནི་ཤིན་ཏུ་མ་མཆིས་ཤིང་མི་དམིགས་ན་དེ་དང་ལྷན་ཅིག་ཏུ་ཡོངས་སུ་སྤྱོད་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན</font><hr>42-1-135b<br><font size=+2>
འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་མཐོང་ན་ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །
རྗེས་སུ་ཆགས་པར་གྱུར་ནས་ཡོངས་སུ་འཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་
མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་
སུ་བརྟེན་ཏེ་གནས་པ་མ་ཡིན། འདི་ནི་མ་ཡིན། ཕ་བི་ན་མ་ཡིན། བར་མ་དོན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ། ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་
རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་ཡུལ་གྱི་བཟང་མོ་དང་འདྲ་བར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དགདང ། རྐྱེན་གཉིས་
ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། ཡང་ན་ནི་སེམས་ཅན་དམྱལ་བར། ཡང་ན་ནི་དུད་འགྲོའི་སྐྱེ་གནས་སུ། ཡང་ན་ནི་གཤིན་རྗེའི་འཇིག་རྟེན་དུ། ཡང་ན་ནི་ལྷ་མ་ཡིན་གྱི་རིས་སུ། ཡང་ན་ནི་མིའི་ནང་དུ། ཡང་ན་ནི་ལྷའི་ནང་དུ་འབྱུང་བར་
འགྱུར་ཏེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས</font><hr>42-1-136a<br><font size=+2>
སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་
མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །རྣམ་པར་ཤེས་པ་དང་པོ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་
ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང ། ལས་ནི་ལས་ཀྱིས་སྟོང ། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོས་སྟོང ། འཆི་འཕོ་ནི་འཆི་འཕོས་སྟོང ། སྐྱེ་བ་ནི་སྐྱེ་བས་སྟོང་ལ། ལས་རྣམས་འབྲས་བུ་མེད་པར་མི་འགྱུར་ཞིང་རྣམ་པར་
སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་དགྲ་དང་འཐབ་པ་ཞིག་རྨིས་ལ། ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ལ་ཇི་
སྙམ་དུ་སེམས། རྨི་ལམ་དུ་རྨིས་པའི་དགྲ་དེའམ། དགྲ་དེ་དང་འཐབ་པ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་འདི་ལ་ཇི་སྙམ་དུ་སེམས། འོ་ན་སྐྱེས་བུ་གང་རྨི་ལམ་གྱི་དགྲ་ལ་མངོན་པར་ཞེན་པའམ། དགྲ་དང་འཐབ་པར་གྱུར་པ་
དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་དགྲ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེ་དང་འཐབ་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ན་ཕོངས་ཤིང་དུབ་
པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་མཐོང་ན་ཡིད་མི་བདེ་བར་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་པར་གྱུར་ནས་ཁོང་ཁྲོ་བར་འགྱུར། ཁོང་ཁྲོ</font><hr>42-1-136b<br><font size=+2>
བར་གྱུར་ནས་ཞེ་སྡང་བར་འགྱུར། ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་
པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་
ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་དགྲ་དང་འཐབ་པ་དང་འདྲ་བར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པ་རྣམ་པར་ཤེས་པ་དང་པོ་འབྱུང་
སྟེ་སྐྱེས་སོ་ཞེས་བྱ་བའི་གྲངས་སུ་འགྲོའོ། །རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ལ་ནི་
སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ་འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དེ་དང ། སྐྱེ་བ་དེ་དང ། 
རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང་།འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐམས་ཅད་སྟོང ། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོས་སྟོང ། 
ལས་ནི་ལས་ཀྱིས་སྟོང ། འཆི་འཕོ་ནི་འཆི་འཕོས་སྟོང ། སྐྱེ་བ་ནི་སྐྱེ་བས་སྟོང་ལ། ལས་རྣམས་འབྲས་བུ་མེད་པར་མི་འགྱུར་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ་དེ་ལ་མིང་གི་བརྡར་བྱ་བ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ།། །།


</font><hr>42-1-137a<br><font size=+2>
བམ་པོ་བཅུ་གསུམ་པ། རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་འདྲེས་ནོན་པ་རྨིས་ཏེ། འཇིགས་པས་ཤིན་ཏུ་རྨོངས་པར་གྱུར་ལ། ཉལ་བ་ལས་སད་ནས་འདྲེ་དེ་དང་ཤིན་ཏུ་རྨོངས་པར་གྱུར་པ་དེ་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་
དུ་སེམས། རྨི་ལམ་ན་མཐོང་བའི་འདྲེ་དང་ཤིན་ཏུ་རྨོངས་པར་གྱུར་པ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་དེ་ལྟར་རྨི་ལམ་ན་མཐོང་བའི་འདྲེ་ལ་མངོན་པར་ཞེན་ཅིང་ཤིན་ཏུ་རྨོངས་
པར་གྱུར་པའི་མི་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་འདྲེ་ནི་ཤིན་ཏུ་མ་མཆིས་ན་ཤིན་ཏུ་རྨོངས་པ་ལྟ་ག་ལ་མཆིས་ཏེ། གཞན་དུ་གང་དེ་ལ་མངོན་པར་ཞེན་པའི་མི་དེ་
ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་མཐོང་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་
པར་ཞེན་པས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་ཀུན་ནས་ཉོན་མོངས་པར་འགྱུར་རོ། །ཀུན་ནས་ཉོན་མོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་
མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་
པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ</font><hr>42-1-137b<br><font size=+2>
འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་འདྲེ་དང་ཤིན་ཏུ་རྨོངས་པ་དང་འདྲ་བར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་
པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་
རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་
མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་
འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང ། ལས་ནི་ལས་ཀྱིས་སྟོང ། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོས་སྟོང ། འཆི་འཕོ་ནི་འཆི་འཕོསསྟོང ། སྐྱེ་བ་ནི་སྐྱེ་བས་
སྟོང་ལ། ལས་འབྲས་བུ་མེད་པར་མི་འགྱུར་བར་ཡང་མངོན་ཞིང་རྣམ་པར་སྨིན་པ་མྱོང་བར་མངོན་པར་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་ཞིག་ཉལ་བའི་རྨི་ལམ་ན་
ཡུལ་གྱི་བུད་མེད་བཟང་མོ་གླུ་ལེན་པའི་གླུ་སྙན་པ་དང ། པི་བང་ལེན་པའི་སྒྲ་སྙན་པ་ཉན་ཅིང ། དེ་གླུ་དང་རོལ་མོའི་སྒྲ་དེ་ཡོངས་སུ་སྤྱོད་པ་རྨིས་ལ། ཉལ་བ་ལས་སད་ནས་གླུ་དང་རོལ་མོ་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི</font><hr>42-1-138a<br><font size=+2>
ཡུལ་གྱི་བུད་མེད་བཟང་མོ་དང ། གླུ་དང ། རོལ་མོའི་སྒྲ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འོ་ན་དེ་ལྟར་རྨི་ལམ་ན་མཐོང་བའི་ཡུལ་གྱི་བུད་མེད་བཟང་མོ་དང ། 
གླུ་དང ། རོལ་མོའི་སྒྲ་ལ་མངོན་པར་ཞེན་པའི་མི་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། རྨི་ལམ་ན་མཐོང་བའི་ཡུལ་གྱི་བུད་མེད་བཟང་མོ་དེ་ནི་ཤིན་ཏུ་མ་མཆིས་ཤིང་མི་དམིགས་ན་དེའི་གླུ་དང་རོལ་མོའི་
སྒྲ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་རྣ་བས་སྒྲ་ཐོས་ན་ཡིད་དུ་འོང་བ་རྣམས་
ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནསའདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་
པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་དེ་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་
དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ། ཚེ་ཡང་ཡོངས་སུ་ཟད་ཅིང་དེ་དང་
སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་ཡུལ་གྱི་བཟང་མོའི་གླུ་དང་རོལ་མོའི་སྒྲ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་།


</font><hr>42-1-138b<br><font size=+2>
ལས་ཀྱི་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་འགགས་མ་ཐག་ཏུ་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །
དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་
བར་མངོན་པར་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །རྣམ་པར་ཤེས་པ་དང་པོ་དེ་
ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང ། ལས་ནི་ལས་ཀྱིས་སྟོང ། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་
པོས་སྟོང ། འཆི་འཕོ་བ་ནི་འཆི་འཕོས་སྟོང ། སྐྱེ་བ་ནི་སྐྱེ་བས་སྟོང་ལ། ལས་རྣམས་འབྲས་བུ་མེད་པར་མི་འགྱུར་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ། 
དཔེར་ན་མི་ཞིག་ཉལ་བའི་རྨི་ལམ་ན་མ་ཤི་བའམ། ཕ་ཤི་བའམ། སྡུག་པ་གང་ཡང་རུང་བ་དག་དང་བྲལ་ཏེ། སྡུག་པ་དང་བྲལ་བས་མྱ་ངན་དུ་གྱུར་ནས་ཉམ་ཐག་པར་ངུ་བ་ཞིག་རྨིས་ལ། དེ་ཉལ་བ་ལས་སད་ནས་སྡུག་པ་དང་བྲལ་བ་དེ་དང ། སྡུག་བསྔལ་ཞིང་དུ་ངུ་བ་དེ་དྲན་ན། 
རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་སྡུག་པ་དང་བྲལ་བ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་འོ་ན་སྐྱེས་བུ་གང་རྨི་ལམ་གྱི་སྡུག་པ་དང་བྲལ་བ་དང ། སྡུག་བསྔལ་བར་ངུ་བ་ལ་མངོན་པར་ཞེན་པ་དེ</font><hr>42-1-139a<br><font size=+2>
མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་སྡུག་པ་ཉིད་ཀྱང་ཤིན་ཏུ་མ་མཆིས་ན། དེ་དང་བྲལ་བ་དང ། མྱ་ངན་བགྱིས་པ་དང ། ངུས་པ་དང ། 
སྨྲེ་སྔགས་བཏོན་པ་ལྟ་ག་ལ་མཆིས་ཏེ། གཞན་དུ་ན་གང་རྨི་ལམ་ན་མཐོང་བའི་སྡུག་པ་དང་བྲལ་བ་དང ། སྡུག་བསྔལ་དང ། ངུས་པ་ལས་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་
དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་རྣ་བས་སྒྲ་ཐོས་ན་ཡིད་དུ་མི་འོང་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར། ཁོང་ཁྲོ་བར་གྱུར་ནས་ཞེ་སྡང་བར་འགྱུར། ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་
གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་
ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་
བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་སྡུག་པ་དང་བྲལ་བ་དང ། སྡུག་བསྔལ་བར་ངུ་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། 
ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ</font><hr>42-1-139b<br><font size=+2>
པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་
བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་
ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང ། ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོའི་རང་བཞིན་གྱིས་སྟོང ། 
འཆི་འཕོ་ནི་འཆི་འཕོའི་རང་བཞིན་གྱིས་སྟོང ། སྐྱེ་བ་ནི་སྐྱེ་བའི་རང་བཞིན་གྱིས་སྟོང ། འཁོར་བ་ཡང་འཁོར་བའི་རང་བཞིན་གྱིས་སྟོང་སྟེ། རྒྱལ་པོ་ཆེན་པོ་དེ་ལྟར་ཆོས་ཐམས་ཅད་སྟོང་པ་འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་
པ་འདི་ནི་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་
པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཚིག་གི་དོན་མ་ཤེས་པའི་སྒྲ་ཞིག་ཐོས་ལ། ཉལ་བ་ལས་སད་ནས་སྒྲ་དེ་དྲན་པར་གྱུར་ན་རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་
ན་ཐོས་པའི་སྒྲ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་དོན་མ་ཤེས་པའི་སྒྲ་ཐོས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ</font><hr>42-1-140a<br><font size=+2>
ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་ཐོས་པའི་སྒྲ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། ཚིག་དེའི་དོན་ཤེས་པའམ། ཚིག་གི་དོན་མ་ཤེས་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་
པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་རྣ་བས་སྒྲ་ཐོས་ན་བཏང་སྙོམས་སུ་གྱུར་པ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །
ཤིན་ཏུ་རྨོངས་པས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་
སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་
པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ཚིག་གི་དོན་མ་ཤེས་པའི་སྒྲ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་
ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་
རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག</font><hr>42-1-140b<br><font size=+2>
རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ཡང་
སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང ། ལས་ནི་ལས་ཀྱི་རང་བཞིན་གྱིས་སྟོང ། རྣམ་པར་སྨིན་པ་ནི་རྣམ་
པར་སྨིན་པའི་རང་བཞིན་གྱིས་སྟོང ། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོའི་རང་བཞིན་གྱིས་སྟོང ། འཆི་འཕོ་དང་སྐྱེ་བ་ནི་འཆི་འཕོ་དང་སྐྱེ་བའི་རང་བཞིན་གྱིས་སྟོང ། འཁོར་བ་ནི་འཁོར་བའི་རང་བཞིན་གྱིས་སྟོང་ལ།ལས་རྣམས་ཆུད་མ་ཟ་ཞིང་རྣམ་པར་སྨིན་
པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་ཡང་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཙན་དན་ནམ། ཏ་མ་ལའི་ལོ་མ་འམ། སྤོས་ཀྱི་རྣམ་པ་གཞན་གང་ཡང་རུང་བས་
བདག་གི་ལུས་བསྐུས་པར་རྨིས་ལ། ཉལ་བ་ལས་སད་ནས་ཙན་དན་ནམ། ཏ་མ་ལའི་ལོ་མ་འམ། སྤོས་ཀྱི་རྣམ་པ་གཞན་གང་ཡང་རུང་བ་དེ་དག་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ཙན་དན་ནམ། ཏ་མ་ལའི་ལོ་མ་འམ། སྤོས་ཀྱི་རྣམ་
པ་གཞན་གང་ཡང་རུང་བ་དེ་དག་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་དེ་ལྟར་ན་རྨི་ལམ་ན་མཐོང་བའི་ཙན་དན་ནམ། ཏ་མ་ལའི་ལོ་མ་འམ། སྤོས་ཀྱི་རྣམ་པ་གང་ཡང་རུང་བ་དེ་དག་ལ་
མངོན་པར་ཞེན་ཅིང་དེས་བདག་གི་ལུས་སྐུད་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་གྱི་ཙན་དན་ནམ། ཏ་མ་ལའི་ལོ་མ་འམ། སྤོས་ཀྱི་རྣམ་པ་གང་ཡང་རུང་བ་དེ</font><hr>42-1-141a<br><font size=+2>
དག་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེས་སྐུད་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་
པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་སྣས་དྲི་ཚོར་ན་ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་འཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་
འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི།ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་
པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་
དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ཙན་དན་ནམ། ཏ་མ་ལའི་ལོ་མ་འམ། སྤོས་ཀྱི་རྣམ་པ་གང་ཡང་རུང་བ་དེ་ལྟ་བུར་ཡིད་ཀྱིས་དམིགས་པར་
འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་
བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི</font><hr>42-1-141b<br><font size=+2>
ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་
པོ་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང ། ལས་ནི་ལས་ཀྱི་རང་བཞིན་གྱིས་སྟོང ། རྣམ་པར་སྨིན་པ་ནི་
རྣམ་པར་སྨིན་པའི་རང་བཞིན་གྱིས་སྟོང ། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོའི་རང་བཞིན་གྱིས་སྟོང ། འཆི་འཕོ་དང་སྐྱེ་བ་ནི་འཆི་འཕོ་དང་སྐྱེ་བའི་རང་བཞིན་གྱིས་སྟོང ། འཁོར་བ་ནི་འཁོར་བའི་རང་བཞིན་གྱིས་སྟོང་ལ། ལས་རྣམས་ཆུད་ཟ་ཞིང་རྣམ་པར་སྨིན་པ་
མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་མི་ཞིག་ཉལ་བའི་རྨི་ལམ་ན་ཁྱི་རོའམ། མི་རོའམ། སྦྲུལ་གྱི་རོ་མགུལ་དུ་བཏགས་པ་ཞིག་རྨིས་ལ། དེ་ཉལ་བ་ལས་སད་ནས་
དེ་ཉིད་དྲན་པར་གྱུར་ན་རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་ཁྱི་རོ་དང ། མི་རོ་དང ། སྦྲུལ་གྱི་རོ་དེ་དག་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་འོ་ན་སྐྱེས་བུ་གང་རྨི་ལམ་གྱི་ཁྱི་རོ་དང ། མི་རོ་དང ། སྦྲུལ་གྱི་རོ་མགུལ་
དུ་བཏགས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ཁྱི་རོའམ། མི་རོ་འམ། སྦྲུལ་གྱི་རོ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་
ན། དེ་མགུལ་དུ་བཏགས་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་སྣས་དྲི་ཚོར་བ</font><hr>42-1-142a<br><font size=+2>
ན་ཡིད་དུ་མི་འོང་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་
ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན། ལྷོ་ཕྱོགས་དང ། ནུབ་ཕྱོགས་དང ། བྱང་ཕྱོགས་དང ། འོག་དང ། སྟེང་དང ། 
ཕྱོགས་མཚམས་རྣམས་སུ་བརྟེན་ཏེ་གནས་པ་མ་ཡིན། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་ཏེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ། ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་
རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་ཁྱི་རོ་དང ། མི་རོ་དང ། སྦྲུལ་གྱི་རོ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་
བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་
བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་
པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན།


</font><hr>42-1-142b<br><font size=+2>
རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། དེ་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་རང་བཞིན་གྱིས་སྟོང་ཞིང་མེད་པ་དེ་ནི་མཚན་མ་མེད་པའོ། །
གང་མཚན་མ་མེད་པ་དེ་ནི་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་
ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་བདག་ཉིད་སྣའི་དབང་པོ་ཉམས་པར་རྨིས་ལ་ཉལ་བ་ལས་སད་ནས་སྣའི་དབང་པོ་ཉམས་པར་གྱུར་པ་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་སྣའི་དབང་བོ་ཉམས་པ་དེ་ཡོད་དམ། གསོལ་
པ། བཅོམ་ལྡན་འདས་དེ་ནི་མ་མཆིས་སོ། །བཅོམ་ལྡན་འདས་ཀྱིས་བཀའ་སྕལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་དེ་ལྟར་རྨི་ལམ་ན་སྣའི་དབང་པོ་ཉམས་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་
ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་སྣའི་དབང་པོ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེའི་ཉམས་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་
བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་སྣས་དྲི་ཚོར་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་གཏི་མུག་ལས་བྱུང་བའི་
ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱེད་པ་དེ་ཡང་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན།


</font><hr>42-1-143a<br><font size=+2>
ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ་དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་
ཉལ་བ་ལས་སད་པའི་སྣའི་དབང་པོ་ཉམས་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་
པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་
གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་
མི་འགྲོའོ། །ལས་དང ། རྣམ་པར་སྨིན་པ་དང་རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་པ་ནས་
འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན། མི་ཞིག་ཉལ་བའི་
རྨི་ལམ་ན་བཀྲེས་པ་ལས་རོ་སྣ་བརྒྱ་དང་ལྡན་པའི་ཁ་ཟས་ལ་ཚིམ་ཚིམ་དུ་ཟོས་པ་ཞིག་རྨིས་ལ། ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ཁ་ཟས་རོ་བརྒྱ་དང་ལྡན་པ་དེ་ཡོད་དམ།གསོལ་པ། བཅོམ་ལྡན་འདས་དེ་ནི་མ་མཆིས་སོ། །


</font><hr>42-1-143b<br><font size=+2>
བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་ཁ་ཟས་རོ་སྣ་བརྒྱ་དང་ལྡན་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་
འདས་རྨི་ལམ་གྱི་ཁ་ཟས་རོ་སྣ་བརྒྱ་དང་ལྡན་པ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེས་དོན་དེ་ལ་ཡོངས་སུ་སྤྱོད་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། 
རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལྕེས་རོ་མྱོང་ན་ཡིད་བདེ་བར་འགྱུར་བ་རྣམས་ལ་མངོན་པར་ཞེན་ཏེ། དེ་ལ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་
ཆགས་པར་གྱུར་ནས། འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་
པ་སྟེ། དེ་ནི་ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ། ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་
ཀྱང་ཟད་ནས་རྣམ་པར་ཤེས་པ་ཐ་མ་འགགས་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ཁ་ཟས་རོ་སྣ་བརྒྱ་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས</font><hr>42-1-144a<br><font size=+2>
སུ་འགྱུར། གང་ལ་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་བོ་ཆེན་པོ་རྣམ་
པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་པ་དང་པོ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང ། །འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་
ཉིད་ཀྱིས་སྟོང་བའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་ཀུན་རྫོབ་ཀྱི་བརྡ་ཙམ་མ་གཏོགས་པར་
བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན། མི་ཞིག་ཉལ་བའི་རྨི་ལམ་ན་ཤིན་ཏུ་བཀྲེས་པར་གྱུར་ཏེ། སྐུ་བ་ཁ་བོའི་ས་བོན་ནམ། ཀོ་ཤ་ཏ་ཀའི་ས་བོན་ནམ། བི་ཙུ་མར་དའི་ས་བོན་ཞིག་ཟོས་པར་རྨིས་ལ། ཉལ་བ་ལས་སད་ནས་དེ་ཉིད་དྲན་པར་གྱུར་ན། 
རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་སྐུ་བ་ཁ་བོ་དང ། པི་ཙུ་མར་དའི་ས་བོན་གྱི་བར་དུ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་འོ་ན་སྐྱེས་བུ་གང་རྨི་ལམ་གྱི་སྐུ་བ་ཁ་བོ་དང ། བི་ཙུ་མར་དའི་ས་བོན་གྱི་བར་དུ་ཟོས་པ་དེ་ལ་
མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་སྐུ་བ་ཁ་བོ་དང ། བི་ཙུ་མར་དའི་ས་བོན་གྱི་བར་དེ་དག་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེ་དག་ཟ་བ་ལྟ་
ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལྕེས་རོ་མྱོང་ན་ཡིད་དུ་མི་འོང་བ་རྣམས་ལ་ཡང</font><hr>42-1-144b<br><font size=+2>
མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། 
ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་
སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་སྐུ་བ་ཁ་བོ་དང ། བི་ཙུ་མར་དའི་ས་བོན་གྱི་བར་དུ་ཟ་བ་ལྟ་བུར་ཡིད་ཀྱིས་དམིགས་པར་འགྱུར་རོ། །
རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་
སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་
འཇིག་རྟེན་ཕ་རོལ་ཏུ་འཕོ་བ་ཡང་མེད་ལ་འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། རྣམ་པར་ཤེས་
པ་དང་པོ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང</font><hr>42-1-145a<br><font size=+2>
པའི་བར་དུ་སྟེ། རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་སྟོང་པ་འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་
པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་
ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་བདག་ཉིད་ལྕེའི་དབང་པོ་ཉམས་པར་རྨིས་ལ། ཉལ་བ་ལས་སད་ནས་ལྕེའི་དབང་པོ་ཉམས་པར་གྱུར་བ་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ལྕེའི་དབང་པོ་ཉམས་པ་དེ་ཡོད་དམ། 
གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་ལྕེའི་དབང་པོ་ཉམས་པར་གྱུར་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་
དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ལྕེའི་དབང་པོ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེའི་ཉམས་པ་ལྟ་མཆིས་པར་ག་ལ་འགྱུར་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལྕེས་རོ་མྱོང་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་
གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ</font><hr>42-1-145b<br><font size=+2>
གནས་པ་མ་ཡིན་པ་ནས་འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་
མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ལྕེའི་དབང་པོ་ཉམས་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་
པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་
ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ་འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མ་ནས་རྣམ་པར་ཤེས་པ་
དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་པ་ནས་འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་
དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་ཀུན་རྫོབ་ཀྱི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཡུལ་གྱི་བཟང་མོ་ཞིག་པང་དུ་འཁྱུད་
པར་རྨིས་ལ། དེ་དང་རེག་པ་ཉམས་སུ་མྱོང་ནས་ཉལ་བ་ལས་སད་དེ་ཡུལ་གྱི་བཟང་མོ་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ཡུལ་གྱི་བཟང་མོ་དང་རེག་པ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ</font><hr>42-1-146a<br><font size=+2>
སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་ཡུལ་གྱི་བཟང་མོ་དེ་དང་རེག་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་
རྨི་ལམ་གྱི་ཡུལ་གྱི་བཟང་མོ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེ་དང་རེག་པ་ལྟ་ག་ལ་མཆིས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན། ཡིད་བདེ་བར་
འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་
གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་བི་ན་མ་ཡིན། བར་མ་དོ་ན་
མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ཡུལ་གྱི་
བཟང་མོ་ལ་རེག་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་
པ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས</font><hr>42-1-146b<br><font size=+2>
བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་
ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་ཀུན་རྫོབ་ཀྱི་བརྡ་ཙམ་མ་གཏོགས་པར་བྱེད་པ་པོའམ། ཟ་བ་པོ་གང་ཡང་
མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཟངས་ཀྱི་སྤང་ལེབ་ཤིན་ཏུ་འབར་བ་ཞིག་པང་དུ་འཁྱུད་པ་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་ཟངས་ཀྱི་སྤང་ལེབ་ཤིན་ཏུ་འབར་བ་ལ་རེག་པ་
ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་འོ་ན་སྐྱེས་བུ་གང་རྨི་ལམ་གྱི་ཟངས་ཀྱི་སྤང་ལེབ་ཤིན་ཏུ་འབར་བ་པང་དུ་འཁྱུད་པ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་
འདས་དེ་ནི་མ་ལགས་ཏེ།དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ཟངས་ཀྱི་སྤང་ལེབ་ཤིན་ཏུ་འབར་བ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེ་ལ་རེག་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་
བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན་ཡིད་དུ་མི་འོང་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །
ཁོང་ཁྲོ་བར་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང</font><hr>42-1-147a<br><font size=+2>
འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་
ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ། དཔེར་ན་ཉལ་ཉལ་བ་ལས་སད་པའི་ཟངས་ཀྱི་སྤང་ལེབ་ཤིན་ཏུ་འབར་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང་
ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་
པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་
པ་ཡང་ཡོད་དེ། རྣམ་པར་ཤེས་པ་ཐ་མ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། རང་བཞིན་གྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་
གྱིས་སྟོང་པ་ནས་འཁོར་བ་ཡང་འཁོར་བའི་རང་བཞིན་གྱིས་སྟོང་པའི་བར་དུ་སྟེ། རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་སྟོང་པ་འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་
མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། མྱ་ངན་ལས་འདས་པ་ལ་གཞོལ་བ། སྟོང་པ་ཉིད་དུ་ཡང་དག་པར་འདུ་བ། ཆོས་ཀྱི་དབྱིངས་སུ་ངེས་པ། ནམ་མཁའི</font><hr>42-1-147b<br><font size=+2>
ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་བདག་ཉིད་ལུས་ཀྱིས་དབང་པོ་ཉམས་པར་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ལུས་ཀྱི་དབང་
པོ་ཉམས་པ་དེ་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་ལུས་ཀྱི་དབང་པོ་ཉམས་པར་གྱུར་པ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་
འདས་དེ་ནི་མ་ལགས་ཏེ། དེ་ཅིའི་ཕྱིར་ཞེ་ན། བཅོམ་ལྡན་འདས་རྨི་ལམ་ན་མཐོང་བའི་ལུས་ཀྱི་དབང་པོ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེ་ཉམས་པ་ལྟ་ག་ལ་མཆིས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་
མི་ལྡན་པ་ཡང་ལུས་ཀྱིས་རེག་བྱ་རྣམས་ལ་རེག་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། 
ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས་འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། 
དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ལུས་ཀྱི་དབང་པོ་ཉམས་པ་ལྟ་བུར་ཡིད་ཀྱིས་
དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ</font><hr>42-1-148a<br><font size=+2>
མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་
གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །
དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་པ་ནས། འཁོར་བ་ནི་འཁོར་བའི་རང་བཞིན་གྱིས་སྟོང་པའི་བར་དུ་སྟེ། ལས་རྣམས་ཆུད་མི་ཟ་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་མ་
གཏོགས་པར་བྱེད་པ་པོའམ། ཟ་བ་པོ་གང་ཡང་མེད་དོ།། །།བམ་པོ་བཅུ་བཞི་པ། རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་སྒྱུ་མ་མཁན་པོས་སྤྲུལ་པའི་འདོད་པའི་ཡོན་ཏན་ལྔ་དང་ལྡན་པར་གྱུར་ཏེ། ཤིན་ཏུ་ཚིམ་པར་ཡོངས་སུ་
སྤྱོད་པ་ཞིག་རྨིས་ལ། ཉལ་བ་ལས་སད་ནས་འདོད་པའི་ཡོན་ཏན་དེ་དག་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་འདོད་པའི་ཡོན་ཏན་ལྔ་སྒྱུ་མའི་མཁན་པོས་སྤྲུལ་པ་དེ་དག་ཡོད་དམ། གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་
སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་ན་མཐོང་བའི་འདོད་པའི་ཡོན་ཏན་ལྔ་པོ་སྒྱུ་མའི་མཁན་པོས་སྤྲུལ་པ་དེ་དག་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། 
བཅོམ་ལྡན་འདས་རྨི་ལམ་གྱི་སྒྱུ་མའི་མཁན་པོ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན། སྤྲུལ་པའི་འདོད་པའི་ཡོན་ཏན་ལྔ་པོ་དེ་དག་དང ། དེ་དག་ལ་ཡོངས་སུ་སྤྱོད་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ</font><hr>42-1-148b<br><font size=+2>
ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན་ཡིད་བདེ་བར་འགྱུར་བ་རྣམས་ལ་མངོན་པར་ཞེན་པར་འགྱུར་ཏེ། དེ་མངོན་པར་ཞེན་པས་རྗེས་སུ་
ཆགས་པར་འགྱུར་རོ། །རྗེས་སུ་ཆགས་པར་གྱུར་ནས་ཡོངས་སུ་ཆགས་པར་འགྱུར་རོ། །ཡོངས་སུ་ཆགས་པར་གྱུར་ནས་འདོད་ཆགས་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་
མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན། ཕ་བི་ན་མ་ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་
ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་འདོད་པའི་ཡོན་ཏན་ལྔ་པོ་སྒྱུ་མ་མཁན་གྱི་སྤྲུལ་པ་ལྟ་བུར་ཡིད་ཀྱིས་དམིགས་པར་འགྱུར་རོ། །
རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་ཡང་ན་ནི་སེམས་ཅན་དམྱལ་བ་རྣམས་སུ། ཡང་ན་ནི་དུད་འགྲོའི་སྐྱེ་གནས་སུ། ཡང་ན་ནི་གཤིན་རྗེའི་འཇིག་རྟེན་དུ། ཡང་
ན་ནི་ལྷ་མ་ཡིན་གྱི་རིས་སུ། ཡང་ན་ནི་མིའི་ནང་དུ། ཡང་ན་ནི་ལྷའི་ནང་དུ་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །རྒྱལ་པོ་ཆེན་པོ་དེ་ལྟར་ན་ལས་ཀྱང་དམིགས་ཤིང་
རྣམ་པར་སྨིན་པ་ཡང་དམིགས་ལ། དེ་ལ་མིང་གི་བརྡ་ཙམ་མ་གཏོགས་པར་ཚོར་བ་པོ་གང་ཡང་མེད་དོ། །རྒྱལ་པོ་ཆེན་པོ་དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ</font><hr>42-1-149a<br><font size=+2>
འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། 
འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མས་སྟོང་པ་ནས་འཁོར་བའི་བར་དུ་འཁོར་བའི་རང་བཞིན་གྱིས་སྟོང ། མྱ་ངན་ལས་འདས་པ་ཡང་མྱ་ངན་ལས་འདས་པའི་རང་བཞིན་གྱིས་
སྟོང ། ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱིས་སྟོང་སྟེ། རྒྱལ་པོ་ཆེན་པོ་དེ་ལྟར་ཆོས་ཐམས་ཅད་སྟོང་པ་འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་
ནི་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། སྟོང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། སྨོན་པ་དང་བྲལ་བ། མྱ་ངན་ལས་འདས་པ་ལ་གཞོལ་བ་ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་
གཏུགས་པའོ། །རྒྱལ་པ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་བདག་ཉིད་གཡོག་འཁོར་དང་བཅས་ཏེ་ཆུ་བོ་ཆེན་པོས་ཁྱེར་ནས་དེ་དེ་ན་སེམས་ལས་བྱུང་བའི་སྡུག་བསྔལ་དང་ཡིད་མི་བདེ་བ་རྣམ་པ་དུ་མ་མྱོང་བར་རྨིས་ལ། དེ་ཉལ་བ་ལས་སད་ནས་དེ་ཉིད་དྲན་པར་གྱུར་ན་
རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་གྱི་ཆུ་བོ་ཆེན་པོ་དེ་ཡོད་དམ། གསོལ་བ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་སྐྱེ་བུ་གང་རྨི་ལམ་ན་བདག་ཉིད་ཆུ་ཆེན་པོས་ཁྱེར་ཞིང་སྡུག་བསྔལ་དང་ཡིད་མི་བདེ་བ་མཐོང་བ་
ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་རྨི་ལམ་ན་ཆུ་གང་གིས་མི་དེ་ཁྱེར་བའི་ཆུ་ཆེན་པོ་དེ་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་དེའི་སྡུག་བསྔལ་དང་ཡིད་མི་བདེ་བ</font><hr>42-1-149b<br><font size=+2>
ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ནི་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན་ཡིད་མི་བདེ་བར་
འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཁོང་ཁྲོ་བར་འགྱུར་རོ། །ཁོང་ཁྲོ་བར་གྱུར་ནས་གནོད་སེམས་སུ་འགྱུར་རོ། །གནོད་སེམས་སུ་གྱུར་ནས་ཞེ་སྡང་བར་འགྱུར་རོ། །ཞེ་སྡང་བར་གྱུར་ནས་ཞེ་སྡང་ལས་བྱུང་བའི་ལས་ལུས་ཀྱིས་ནི་རྣམ་པ་
གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན། ཕ་བི་ན་མ་
ཡིན། བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་
སད་པའི་ཆུ་ཆེན་པོས་ཁྱེར་ཞིང་ཡིད་མི་བདེ་བ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་འབྱུང་སྟེ། རྣམ་པར་
ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །རྒྱལ་པོ་ཆེན་པོ་དེ་ལྟར་ན་ལས་ཀྱང་དམིགས་ལ། བྱེད་པ་པོ་ཡང་གང་ཡང་མེད། རྣམ་པར་སྨིན་པ་ཡང་དམིགས་ལ། མིང་གི་
བརྡ་ཙམ་མ་གཏོགས་པར་འདི་ལ་ཚོར་བ་པོ་གང་ཡང་མེད་དོ། །རྒྱལ་པོ་ཆེན་པོ་དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ</font><hr>42-1-150a<br><font size=+2>
ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད་ལ། འཆི་འཕོ་དང་སྐྱེ་བར་མངོན་པ་ཡང་ཡོད་དེ། །རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་ནས་རྣམ་པར་ཤེས་པ་དང་པོའི་བར་དུ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་
ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང་པ་ནས། འཁོར་བའི་བར་དུ་ནི་འཁོར་བའི་རང་བཞིན་གྱིས་སྟོང ། མྱ་ངན་ལས་འདས་པ་ཡང་མྱ་ངན་ལས་འདས་པའི་རང་བཞིན་གྱིས་སྟོང ། 
ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱིས་སྟོང་སྟེ། འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་འདི་ནི་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་
སྒོ་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། སྟོང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། སྨོན་པ་དང་བྲལ་བ། མྱ་ངན་ལས་འདས་པ་ལ་གཞོལ་བ་ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་
པའོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མི་ཞིག་ཉལ་བའི་རྨི་ལམ་ན་ཆང་གིས་ར་རོ་སྟེ་བདག་ཉིད་ཤིན་ཏུ་གཏི་མུག་པར་གྱུར་ནས་དེ་དེ་ན་དགེ་བ་ཡང་མི་ཤེས། མི་དགེ་བ་ཡང་མི་ཤེས། ཁ་ན་མ་ཐོ་བ་དང་བཅས་པ་ཡང་མི་ཤེས། ཁ་ན་མ་ཐོ་བ་མེད་པ་ཡང་མི་ཤེས། ཕན་པ་ཡང་མི་ཤེས། 
གནོད་པ་ཡང་མི་ཤེས། ཡོན་ཏན་དང་ཉེས་པ་ཡང་རྣམ་པ་ཐམས་ཅད་དུ་མི་ཤེས་པར་གྱུར་པ་ཞིག་རྨིས་ལ། དེ་ཉལ་བ་ལས་སད་ནས་ཆང་གིས་ར་རོ་བའི་གཏི་མུག་དེ་དྲན་པར་གྱུར་ན། རྒྱལ་པོ་ཆེན་པོ་དེ་ཇི་སྙམ་དུ་སེམས། རྨི་ལམ་ན་མཐོང་བའི་ཆང་གིས་ར་རོ་ཞིང་གཏི་མུག་པ་དེ་ཡོད་དམ། 
གསོལ་པ། བཅོམ་ལྡན་འདས་དེ་ནི་མ་མཆིས་སོ། །བཀའ་སྩལ་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། འོ་ན་རྨི་ལམ་གྱི་ཆང་གིས་ར་རོ་བ་ལ་མངོན་པར་ཞེན་པ་དེ་མཁས་པའི་རང་བཞིན་ཅན་ཡིན་ནམ། གསོལ་པ། བཅོམ་ལྡན་འདས་དེ་ནི་མ་ལགས་ཏེ། དེ་ཅིའི་སླད་དུ་ཞེ་ན།


</font><hr>42-1-150b<br><font size=+2>
བཅོམ་ལྡན་འདས་རྨི་ལམ་ན་མཐོང་བའི་ཆང་ཉིད་ཀྱང་ཤིན་ཏུ་མ་མཆིས་ཤིང་མི་དམིགས་ན་གཏི་མུག་པ་ལྟ་ག་ལ་མཆིས་ཏེ། གཞན་དུ་ན་གང་དེ་ལ་མངོན་པར་ཞེན་པའི་མི་དེ་ཕོངས་ཤིང་དུབ་པའི་སྐལ་བ་ཅན་དུ་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་
དུ་བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་ཡིད་ཀྱིས་ཆོས་རྣམས་རྣམ་པར་ཤེས་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་
པ་གསུམ། ངག་གིས་ནི་རྣམ་པ་བཞི། ཡིད་ཀྱིས་ནི་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་པ་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་གྱུར་པ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་པ་ནས། འདི་ན་མ་ཡིན། ཕ་བི་ན་མ་ཡིན། 
བར་མ་དོ་ན་མ་ཡིན་པའི་བར་དུ་སྟེ། དུས་གཞན་ན་འཆི་བའི་དུས་དང་ཚོད་ཉེ་བར་གནས་པའི་ཚེ་སྲོག་གི་དབང་པོ་འགགས་ཏེ་ཚེ་ཡང་ཡོངས་སུ་ཟད་ཅིང་དེ་དང་སྐལ་བ་འདྲ་བའི་ལས་རྣམས་ཀྱང་ཟད་ནས་རྣམ་པར་ཤེས་པ་ཐ་མ་འགག་པའི་ཚེ་འདི་ལྟ་སྟེ་དཔེར་ན་ཉལ་ཉལ་བ་ལས་སད་པའི་ཆང་གིས་ར་རོ་
སྟེ་གཏི་མུག་པ་ལྟ་བུར་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང ། ལས་དམིགས་པ་དེ་དང ། རྐྱེན་གཉིས་ཀྱིས་རྣམ་པར་ཤེས་པ་དང་པོ་འགྲོ་བ་རྣམས་སུ་འབྱུང་སྟེ། རྣམ་པར་ཤེས་པ་དང་པོ་དེ་འགགས་མ་ཐག་ཏུ་བར་མ་ཆད་པར་
གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་བ་འདྲ་བ་འབྱུང་ངོ ། །རྒྱལ་པོ་ཆེན་པོ་དེ་ལྟར་ན་ལས་ཀྱང་དམིགས་ལ། བྱེད་པ་པོ་ཡང་གང་ཡང་མེད། རྣམ་པར་སྨིན་པ་ཡང་དམིགས་ལ། མིང་གི་བརྡ་ཙམ་མ་གཏོགས་པར་འདི་ལ་ཚོར་བ་པོ་གང་ཡང་མེད་
དོ། །རྒྱལ་པོ་ཆེན་པོ་དེ་ལ་གང་རྣམ་པར་ཤེས་པ་ཐ་མ་འགག་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར་རོ། །གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་བའི་གྲངས་སུ་འགྱུར་ཏེ། རྒྱལ་པོ་ཆེན་པོ་དེ་ལྟར་ན་ཆོས་གང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བ་ཡང་མེད</font><hr>42-1-151a<br><font size=+2>
ལ། འཆི་འཕོ་དང་སྐྱེ་བར་མངོན་པ་ཡང་ཡོད་དོ། །རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །ལས་དང ། རྣམ་པར་སྨིན་པ་དང ། འཆི་འཕོ་དང ། སྐྱེ་བ་དང ། རྣམ་པར་ཤེས་པ་དང་པོ་སྐྱེ་
བའི་ཚེ་ཡང་གང་ནས་ཀྱང་མི་འོང ། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་ཀྱིས་སྟོང་པའི་ཕྱིར་ཏེ། རྣམ་པར་ཤེས་པ་ཐ་མ་ནི་རྣམ་པར་ཤེས་པ་ཐ་མའི་རང་བཞིན་གྱིས་སྟོང ། སྐྱེ་བ་དང ། འཇིག་པ་དང ། ལས་དང ། རྣམ་པར་སྨིན་པ་དང ། རྣམ་པར་ཤེས་
པ་དང་པོ་དང ། འཆི་འཕོ་དང ། སྐྱེ་བ་དང ། འཁོར་བ་དང ། མྱ་ངན་ལས་འདས་པ་ནི་མྱ་ངན་ལས་འདས་པའི་རང་བཞིན་གྱིས་སྟོང ། ཆོས་ཐམས་ཅད་ཀྱང་ཆོས་ཐམས་ཅད་ཀྱི་རང་བཞིན་གྱིས་སྟོང་སྟེ། འདི་ནི་རྣམ་པར་ཐར་པའི་སྒོ་སྟོང་པ་ཉིད་དོ། །གང་སྟོང་པ་ཉིད་ཀྱི་མཚན་མས་སྟོང་པ་
འདི་ནི་རྣམ་པར་ཐར་པའི་སྒོ་མཚན་མ་མེད་པའོ། །གང་ལ་མཚན་མ་མེད་པ་དེ་ལ་སྨོན་པ་མེད་དེ། འདི་ནི་རྣམ་པར་ཐར་པའི་སྒོ་སྨོན་པ་མེད་པའོ། །རྒྱལ་པོ་ཆེན་པོ་དེ་ལྟར་ན་ཆོས་ཐམས་ཅད་ནི་རྣམ་པར་ཐར་པའི་སྒོ་སྟེ། སྟོང་པ་ཉིད་དུ་ཡང་དག་པར་འདུ་བ། མཚན་མ་མེད་པའི་ངོ་བོ་ཉིད། 
སྨོན་ལམ་དང་བྲལ་བ། མྱ་ངན་ལས་འདས་པ་ལ་གཞོལ་བ། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པའོ། །རྒྱལ་པོ་ཆེན་པོ་ཁྱོད་ཀྱིས་འདི་ལ་སེམས་ངེས་པར་བཞག་པ་དང ། སེམས་ངེས་པར་བཞག་པ་ལ་བརྩོན་པར་བྱའོ། །གཞན་གྱི་དྲིང་ལ་མི་འཇོག་ཅིང་
བདག་ཉིད་ཀྱིས་ཤེས་པར་བྱ་སྟེ། འདི་ནི་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་སྟེ། དབང་ཕྱུག་ལ་མངོན་པར་ཞེན་པ་ཐམས་ཅད་རབ་ཏུ་འཇོམས་པ། སྲེད་པ་ཐམས་ཅད་ཡོངས་སུ་སྐེམས་པ། ང་རྒྱལ་ཐམས་ཅད་སྙིལ་བ། ལྟ་བའི་
རྣམ་པ་དང ། ཐེ་ཚོམ་ཐམས་ཅད་ཡང་དག་པར་གཅོད་པ། ཆོས་ཐམས་ཅད་ཀྱི་མཉམ་པ་ཉིད་དེ། བྱིས་པ་སོ་སོའི་སྐྱེ་བོ་རྣམས་ཀྱིས་མ་ཡིན་པ། ཉན་ཐོས་རྣམས་ཀྱིས་མ་ནོན་པ། རང་སངས་རྒྱས་རྣམས་ཀྱི་སྤྱོད་ཡུལ་མ་ཡིན་པ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ཡང་དག་པར</font><hr>42-1-151b<br><font size=+2>
རྫོགས་པའི་སངས་རྒྱས་རྣམས་ཀྱིས་ཐུགས་སུ་ཆུད་པ་ཡིན་གྱིས། རྒྱལ་པོ་ཆེན་པོ་ཁྱོད་ཀྱིས་ཇི་ལྟར་ན་བདག་ལྷ་དང་བཅས་པའི་འཇིག་རྟེན་གྱི་མིག་དང ། སྒྲོན་མ་དང ། མར་མེ་དང ། སྣང་བ་དང ། གྲུ་དང ། ངོགས་དང ། འབབ་སྟེགས་དང ། འདྲེན་པ་དང ། ཡོངས་སུ་འདྲེན་པ་དང ། 
སྟོན་པ་དང ། དེད་དཔོན་དང ། སྔོན་དུ་འགྲོ་བར་འགྱུར་སྙམ་པ་དང ། བདག་གྲོལ་ནས་དགྲོལ་བར་བྱའོ། །རྒལ་ནས་བསྒྲལ་བར་བྱའོ། །དབུགས་ཕྱིན་ནས་དབུགས་དབྱུང་བར་བྱའོ། །ཡོངས་སུ་མྱ་ངན་ལས་འདས་ནས་ཡོངས་སུ་མྱ་ངན་ལས་བཟླ་བར་བྱའོ་སྙམ་དུ་ཡིད་ལ་གཞག་པར་བྱའོ། །
རྒྱལ་པོ་ཆེན་པོ་དབང་ཕྱུག་ལྟ་ཞིག་ནི་སྔོན་མྱོང་བར་གྱུར་པའི་མཐའ་ཡང་མི་མངོན་ཏེ། རྒྱལ་པོ་ཆེན་པོ་དེ་ལྟར་དབང་པོ་རྣམས་ནི་སྒྱུ་མ་ལྟ་བུ་སྟེ། ཆོག་མི་ཤེས་པའོ། །ཚིམ་པར་མི་རུང་བའོ། །ཡུལ་རྣམས་ནི་རྨི་ལམ་ལྟ་བུ་སྟེ། ཚིམ་པར་མི་ནུས་པ། ངོམས་པར་མ་གྱུར་པའོ། །རྒྱལ་པོ་ཆེན་པོ་སྔོན་
བྱུང་བ་འདས་པའི་དུས་ན་རྒྱལ་པོ་གྲགས་པ་མཐའ་ཡས་ཞེས་བྱ་བ་བྱུང་སྟེ། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་དེ་ནི་ཁྱོགས་དང ། དཔུང་དང ། བཞོན་པ་མཐའ་ཡས་ཤིང་འཁོར་ལོ་ཐོགས་པ་མེད་པས་སྒྱུར་བ། མི་འཁྲུགས་པའི་ཐེག་པ་དང་ཚུལ་ཕུན་སུམ་ཚོགས་པ་དང་ལྡན་པ། སྔོན་
གྱི་སངས་རྒྱས་ལ་དགེ་བའི་རྩ་བ་བསྐྱེད་པ། ཡིད་བཞིན་དུ་འགྱུར་བའི་སྟོབས་དང་ལྡན་པ་སྟེ། དེ་གང་ཅི་སེམས་ཀྱང་རུང ། དེའི་དེ་ཐམས་ཅད་འགྲུབ་ཅིང་དེའི་བསམ་པ་དོན་མེད་པར་འགྱུར་བ་གང་ཡང་མེད་དོ། །དེ་ལྟར་རྒྱལ་པོ་དེ་ནི་རང་གི་དགེ་བའི་རྩ་བའི་གཟི་བརྗིད་ཀྱིས་བསམ་པ་ཡིད་
བཞིན་དུ་དོན་མེད་པ་མ་ཡིན་པར་གྱུར་ཏོ། །རྒྱལ་པ་ཆེན་པོ་དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་བདག་གི་བསོད་ནམས་ཀྱི་སྟོབས་ཉམས་པ་མེད་པ་ལ་བརྟག་པར་བྱའོ་སྙམ་ནས་དེ་འདི་སྙམ་དུ་སེམས་ཏེ་།ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་ཤིང་ལྗོན་
པ་ཇི་སྙེད་ཅིག་ཡོད་པ་དེ་དག་ཐམས་ཅད་ཡིད་བཞིན་དུ་འབྲས་བུ་ཆགས་པར་གྱུར་ཅིག་སྙམ་པ་དང ། རྒྱལ་པོ་གྲགས་པ་མཐའ་ཡས་དེའི་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་ཤིང་ལྗོན་པ་ཇི་སྙེད་ཅིག་ཡོད་པ་དེ་དག་ཐམས་ཅད་ཡིད་བཞིན་དུ་འབྲས་བུ་ཆགས་པར</font><hr>42-1-152a<br><font size=+2>
གྱུར་ཏོ། །རྒྱལ་པོ་ཆེན་པོ་གཞན་ཡང་རྒྱལ་པོ་གྲགས་པ་མཐའ་ཡས་དེས་ཡང་བདག་གི་དགེ་བའི་རྩ་བའི་སྟོབས་བསྐྱེད་པ་ལ་བརྟག་པར་འདོད་ནས་འདི་སྙམ་དུ་བསམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདི་ན་སེམས་ཅན་འཁོད་པ་འདི་དག་
ཐམས་ཅད་གནོད་པ་ཐམས་ཅད་རྒྱུན་ཆད་པར་གྱུར་ཏེ། ཡིད་ལ་བསམ་པ་དོན་ཡོད་པར་གྱུར་ཅིག་སྙམ་པ་དང ། རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ན་སེམས་ཅན་གང་ཇི་སྙེད་ཅིག་འཁོད་པ་དེ་དག་ཐམས་ཅད་གནོད་པ་ཐམས་ཅད་
རྒྱུན་ཆད་དེ་ཡིད་ལ་བསམ་པ་ཐམས་ཅད་དོན་ཡོད་པར་གྱུར་ཏོ། །རྒྱལ་པོ་ཆེན་པོ་གཞན་ཡང་རྒྱལ་པོ་གྲགས་པ་མཐའ་ཡས་ཀྱིས་བདག་གི་དགེ་བའི་རྩ་བའི་སྟོབས་བསྐྱེད་པ་ལ་བརྟག་པར་འདོད་ནས་འདི་སྙམ་དུ་བསམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་སྤོས་ཆུའི་
ཆར་རབ་ཏུ་འབབ་པར་གྱུར་ཅིག་སྙམ་པ་དང ། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་པའི་འཇིག་རྟེན་གྱི་ཁམས་ཐམས་ཅད་དུ་སྤོས་ཆུའི་ཆར་རབ་ཏུ་བབ་པར་གྱུར་ཏོ། །རྒྱལ་པོ་ཆེན་པོ་དེ་ནས་ཡང་རྒྱལ་པོ་གྲགས་པ་མཐའ་ཡས་ཀྱིས་བདག་གི་དགེ་བའི་རྩ་
བའི་སྟོབས་བསྐྱེད་པ་ལ་རྒྱ་ཆེར་བརྟག་པར་འདོད་ནས་འདི་སྙམ་དུ་བསམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་མེ་ཏོག་གི་ཆར་རབ་ཏུ་འབབ་པར་གྱུར་ཅིག་སྙམ་པ་དང ། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་གླིང་ཆེན་པོ་བཞི་
པའི་འཇིག་རྟེན་གྱི་ཁམས་ཐམས་ཅད་དུ་མེ་ཏོག་གི་ཆར་རབ་ཏུ་བབ་པར་གྱུར་ཏོ། །རྒྱལ་པོ་ཆེན་པོ་གཞན་ཡང་རྒྱལ་པོ་གྲགས་པ་མཐའ་ཡས་ཀྱིས་འདི་སྙམ་དུ་བསམས་ཏེ། ཀྱེ་མ་བདག་གི་གླིང་ཆེན་པོ་བཞི་པའི་འཇིག་རྟེན་གྱི་ཁམས་འདིར་ལྷའི་གོས་ཀྱི་ཆར་དང ། དབྱིག་གི་ཆར་དང ། གསེར་
གྱི་ཆར་དང ། རིན་པོ་ཆེ་སྣ་ཚོགས་ཀྱི་ཆར་དང ། ཡོ་བྱད་ཐམས་ཅད་ཀྱི་ཆར་རབ་ཏུ་འབབ་པར་གྱུར་ཅིག་སྙམ་པ་དང ། རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཀྱིས་སེམས་བསྐྱེད་མ་ཐག་ཏུ་འདི་ལྟར་སེམས་ཅན་ཐམས་ཅད་དང་ཐུན་མོང་དུ་བསགས་པའི་དགེ་བའི་རྩ་བ་ཡངས་པ་དང་ལྡན</font><hr>42-1-152b<br><font size=+2>
པའི་རྒྱུས་ལྷའི་གོས་ཀྱི་ཆར་དང ། དབྱིག་གི་ཆར་དང ། གསེར་གྱི་ཆར་དང ། རིན་པོ་ཆེ་སྣ་ཚོགས་ཀྱི་ཆར་དང ། ཡོ་བྱད་ཐམས་ཅད་ཀྱི་ཆར་རབ་ཏུ་བབ་བོ། །རྒྱལ་པོ་ཆེན་པོ་དེའི་ཚེ་འཛམ་བུའི་གླིང་འདི་ནི་རྒྱར་དཔག་ཚད་ཁྲི་བརྒྱད་སྟོང་ཡོད་པར་གྱུར་ཏེ། དེའི་ཚེ་འཛམ་བུའི་གླིང་དེ་ན་གྲོང་ཁྱེར་བྱེ་
བ་ཕྲག་དྲུག་ཅུ་ཡོད་པར་གྱུར་ནས་འཛམ་བུའི་གླིང་དེའི་དབུས་ན་རིན་པོ་ཆེས་རབ་ཏུ་བརྒྱན་པ་ཞེས་བྱ་བའི་གྲོང་ཁྱེར་རྒྱལ་པོའི་ཕོ་བྲང་འཁོར་དུ་གྱུར་པ་ཆུ་ཞེང་དུ་དཔག་ཚད་བཅུ་གཉིས་བཅུ་གཉིས་ཡོད་པ། གྲུ་བཞི་ལྷམ་པ། དྲི་མ་མེད་པ་ཤིན་ཏུ་འབྲེལ་བར་བྲེས་པ་ཞིག་ཡོད་པར་གྱུར་ཏེ། རྒྱལ་
པོ་ཆེན་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ནི་ཤིང་ཏ་ལའི་ཕྲེང་བ་རིམ་པ་བདུན་གྱིས་ཀུན་ནས་ཡོངས་སུ་བསྐོར་བ་སྟེ། ཏ་ལ་དེ་དག་ཀྱང་རིན་པོ་ཆེ་སྣ་བཞིའི་རྒྱུ་ལས་བྱུང་བ་སྟེ། གསེར་དང ། དངུལ་དང་།བཻ་དཱུརྱ་དང ། ཤེལ་གྱི་ཏ་ལ་ཤ་སྟག་གོ་།དེ་ལ་གསེར་གྱི་ཏ་ལ་རྣམས་ནི་དངུལ་གྱི་ལོ་མ་
དང ། མེ་ཏོག་དང ། འབྲས་བུ་དང་ལྡན་པར་གྱུར་ཏོ། །དངུལ་གྱི་ཏ་ལ་རྣམས་ནི་གསེར་གྱི་ལོ་མ་དང ། མེ་ཏོག་དང ། འབྲས་བུ་དང་ལྡན་པར་གྱུར་ཏོ། །བཻ་དཱུརྱའི་ཏ་ལ་རྣམས་ནི་ཤེལ་གྱི་ལོ་མ་དང ། མེ་ཏོག་དང ། འབྲས་བུ་དང་ལྡན་པར་གྱུར་ཏོ། །ཤེལ་གྱི་ཏ་ལ་རྣམས་ནི་བཻ་དཱུརྱའི་ལོ་
མ་དང ། མེ་ཏོག་དང ། འབྲས་བུ་དང་ལྡན་པར་གྱུར་ཏོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་རིན་པོ་ཆེ་སྣ་བདུན་གྱི་དྲིལ་བུ་གཡེར་ཀའི་དྲ་བ་བཀྲ་བ། བལྟ་ན་སྡུག་པ་རིམ་པ་བདུན་སྟེང་དུ་བྲེས་པར་གྱུར་ཏོ། །རིན་པོ་ཆེའི་དྲ་བ་ཆེན་པོའི་རིན་པོ་ཆེ་སྣ་བདུན་ནི་འདི་ལྟ་སྟེ། 
གསེར་དང ། དངུལ་དང ། བཻ་དཱུརྱ་དང ། ཤེལ་དང ། མུ་ཏིག་དམར་པོ་དང ། སྤུག་དང ། རྡོའི་སྙིང་པོ་དང་བདུན་ནོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ཀུན་ནས་འོབས་ཟབ་པ། ཆུ་འབྱུང་བ། ཟབས་སུ་དཔག་ཚད་ཕྱེད་ཡོད་པ། ཁ་ཚོན་དུ་དཔག་ཚད་གཅིག་
ཡོད་པ། ཡན་ལག་བརྒྱད་དང་ལྡན་པའི་ཆུས་བྱ་རོག་གིས་བཏུང་དུ་རུང་བ་ཙམ་དུ་ཁད་ཆད་དུ་ཡོངས་སུ་གང་བ། མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་དཀར་པོས་ཀུན་ཏུ་གང་བ། གསེར་གྱི་བྱེ་མ་བརྡལ་བ་རིམ་པ་བདུན་གྱིས་ཡོངས་སུ་བསྐོར་བར་གྱུར་ཏེ། འོབས</font><hr>42-1-153a<br><font size=+2>
དེ་དག་གི་ཁོར་ཡུག་ནས་འདི་ལྟ་སྟེ། གསེར་དང ། དངུལ་དང ། བཻ་དཱུརྱ་དང ། ཤེལ་དང ། རིན་པོ་ཆེ་དེ་བཞི་ལས་བྱས་པའི་ཐེམ་སྐས་བཀྲ་བ། བལྟ་ན་སྡུག་པ་ཤ་སྟག་བཀོད་པར་གྱུར་ཏོ། །དེ་ལ་གསེར་གྱི་གཞི་ལ་ནི་དངུལ་གྱི་ཐེམ་པ་བཀྱེ། དངུལ་གྱི་གཞི་ལ་ནི་
གསེར་གྱི་ཐེམ་པ་བཀྱེ། བཻ་དཱུརྱའི་གཞི་ལ་ནི་ཤེལ་གྱི་ཐེམ་པ་བཀྱེ། ཤེལ་གྱི་གཞི་ལ་ནི་བཻ་དཱུརྱའི་ཐེམ་པ་བཀྱེ་བ་ཤ་སྟག་སྟེ། ཐེམ་སྐས་དེ་དག་ཀྱང་རིན་པོ་ཆེ་སྣ་བདུན་གྱི་ཁ་ཁྱེར་བཀྲ་བ། བལྟ་ན་སྡུག་པ་རིམ་པ་བདུན་གྱིས་ཀུན་ནས་བསྐོར་བར་གྱུར་ཏོ། །རིན་པོ་ཆེའི་ཐེམ་སྐས་
དེ་དག་གི་སྟེང་སྟེང་དུ་རིན་པོ་ཆེ་སྣ་བདུན་གྱི་རྟ་བབས་བཀྲ་བ། བལྟ་ན་སྡུག་པ་ཤ་སྟག་བཙུགས་པར་གྱུར་ཏོ། །ཐེམ་སྐས་དེ་དག་སོ་སོའི་ཁར་འཛམ་བུ་ཆུ་བོའི་གསེར་གྱི་ཆུ་ཤིང་ལྗོན་པ་བཀྲ་བ། བལྟ་ན་སྡུག་པ་ཤ་སྟག་བཙུགས་པར་གྱུར་ཏེ། འོབས་ཀྱི་ཆུ་དེ་དག་རེ་རེ་ཞིང་ཡང་རིན་པོ་ཆེ་སྣ་
བདུན་གྱི་གྲུ་བཀྲ་བ་བལྟ་ན་སྡུག་པ་ཤ་སྟག་བཅས་པར་གྱུར་ཏོ། །རྒྱལ་པོ་ཆེན་པོ་རྒྱལ་པོ་གྲགས་པ་མཐའ་ཡས་ཀྱི་བསོད་ནམས་ཀྱི་གཟི་བརྗིད་ཀྱིས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་ཁོར་ཡུག་ཏུ་སྐྱེད་མོས་ཚལ་བཀྲ་བ་བལྟ་ན་སྡུག་པ། བདག་གིར་བྱ་བ་མེད་པ། ཡོངས་
སུ་བཟུང་བ་མེད་པ། བརྒྱད་ཁྲི་བྱས་པར་གྱུར་ཏོ། །དེ་དག་ཀྱང་རྒྱལ་པོ་གྲགས་པ་མཐའ་ཡས་ཀྱིས་སྐྱེ་བོ་ཐམས་ཅད་ཡོངས་སུ་ལོངས་སྤྱོད་པའི་ཕྱིར་བྱིན་ཏེ། མི་དེ་དག་སྐྱེད་མོས་ཚལ་དེ་དག་ཏུ་དོང་ནས་ཕུན་སུམ་ཚོགས་པའི་བདེ་བ་མཆོག་གིས་རྩེ་དགའ་ཞིང་ཡོངས་སུ་སྤྱོད་པར་གྱུར་ཏོ། །
སྐྱེད་མོས་ཚལ་དེ་དག་རེ་རེ་ཞིང་ཡང་རྫིང་བུ་བརྒྱད་བརྒྱད་བཤམས་པར་གྱུར་ཏེ། རྫིང་བུ་དེ་དག་ཀུན་ཀྱང་རྒྱར་རྒྱང་གྲགས་ཕྱེད་ཕྱེད་ཡོད་པ་ཤ་སྟག་གོ་།རྫིང་བུ་དེ་དག་རེ་རེ་ཞིང་ཡང་རིན་པོ་ཆེ་སྣ་བཞི་འདི་ལྟ་སྟེ། གསེར་དང ། དངུལ་དང ། བཻ་དཱུརྱ་དང ། ཤེལ་གྱི་ཐེམ་སྐས་བཀྲ་བ། བལྟ་ན་
སྡུག་པ་བརྒྱད་བརྒྱད་དང་ལྡན་པར་གྱུར་ཏོ། །ཐེམ་སྐས་དེ་དག་གི་སྟེང་དུ་ཡང་རིན་པོ་ཆེ་སྣ་བདུན་གྱི་རྟ་བབས་བཀྲ་བ། བལྟ་ན་སྡུག་པ་ཤ་སྟག་བཙུགས་པར་གྱུར་ཏོ། །ཐེམ་སྐས་དེ་དག་རེ་རེའི་ཁར་ཡང་འཛམ་བུ་ཆུ་བོའི་གསེར་གྱི་ཆུ་ཤིང་ལྗོན་པ་བཀྲ་བ ། བལྟ་ན་སྡུག་པ་ཤ་སྟག་བཙུགས་པར</font><hr>42-1-153b<br><font size=+2>
གྱུར་ཏོ། །རྫིང་བུ་དེ་དག་ཀྱང་ཆུ་ཡན་ལག་བརྒྱད་དང་ལྡན་པས་བྱ་རོག་གིས་བཏུང་དུ་རུང་བ་ཙམ་དུ་ཁད་ཆད་དུ་ཡོངས་སུ་གང་བར་གྱུར་ཏོ། །རྫིང་བུ་དེ་དག་ཏུ་མེ་ཏོག་ཆུ་ལས་སྐྱེས་པ་འདི་ལྟ་བུ་དག་བསྐྱེད་པར་གྱུར་ཏེ། འདི་ལྟར་མེ་ཏོག་ཨུད་པ་ལ་དང ། པད་མ་དང ། ཀུ་མུ་ད་དང ། པད་མ་
དཀར་པོ་དང ། དྲི་ཞིམ་ལྡན་རྣམས་སོ། །ཁོར་ཡུག་ཏུ་ཡང་ཐང་ལས་སྐྱེས་པའི་མེ་ཏོག་འདི་ལྟ་བུ་དག་བསྐྱེད་པར་གྱུར་ཏེ། འདི་ལྟར་ཨ་ཏི་མུག་ཏ་ཀ་དང ། ཙམ་པ་ཀ་དང ། བར་ཤ་ཀ་དང ། སྣ་མའི་མེ་ཏོག་དང ། མ་ཡུ་ཀ་དང ། ད་ནུ་སྐ་རི་དང ། དེ་མ་ཡིན་པའི་མེ་ཏོག་ཐང་ལས་སྐྱེས་པ་
མང་པོ་དག་ཀྱང་བསྐྱེད་པར་གྱུར་ཏོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེའི་སྟེང་གི་བར་སྣང་ལ་དྲིལ་བུ་གཡེར་ཀའི་དྲ་བ་ཆེན་པོ་བྲེས་པ་དང ། རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་ཤིང་ཏ་ལ་དེ་དག་དང ། རིན་པོ་ཆེའི་དྲ་བ་དེ་དག་དང ། དྲིལ་བུ་གཡེར་
ཀའི་དྲ་བ་དེ་དག་རླུང་གིས་བསྐྱོད་པ་ལས་འདི་ལྟ་བུའི་སྒྲ་སྙན་ཅིང་ཡིད་དུ་འོང་ལ་མཉན་ན་བདེ་བ་འདི་ལྟ་སྟེ་དཔེར་ན་ཡན་ལག་ལྔ་དང་ལྡན་པའི་རོལ་མོ་སིལ་སྙན་མཁས་པས་ལེགས་པར་བླངས་པའི་སྒྲ་ལྟ་བུ་བྱུང་བར་གྱུར་ཏོ། །དེའི་ཚེ་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ན་
མི་ཇི་སྙེད་ཅིག་འཁོད་པ་དེ་དག་ཐམས་ཅད་ཀྱང་སྒྲ་དེས་རྩེ་དགའ་ཞིང་ཡོངས་སུ་སྤྱོད་པར་གྱུར་ཏོ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ནི་འབྱོར་པ་རྒྱས་པ། བདེ་བ། ལོ་ལེགས་པ། སྐྱེ་བོ་མང་པོ་དང ། མིས་ཡོངས་སུ་གང་བ། མེ་ཏོག་ཨུད་པ་ལ་དང ། པད་མ་དང ། 
ཀུ་མུ་ད་དང ། པད་མ་དཀར་པོས་ཡོངས་སུ་གང་བར་གྱུར་ཏོ། །དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི་ཤར་གྱི་ལུས་འཕགས་གླིང་དུ་འགྲོའོ་སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས། ཡན་ལག་བཞི་པ་དང་ལྷན་ཅིག་ཏུ་ནམ་མཁའ་
ལ་མངོན་པར་འཕགས་ནས་ཤར་གྱི་ལུས་འཕགས་གླིང་ག་ལ་བ་དེར་སོང་སྟེ། དེས་དེར་ལོ་བརྒྱ་ཕྲག་མང་པོ་དང ། ལོ་སྟོང་ཕྲག་མང་པོར་རྒྱལ་པོ་བྱས་སོ། །དེ་ནས་རྒྱལ་པོ་གྲགས་པ་མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི་ནུབ་ཀྱི་བ་ལང་སྤྱོད་ཀྱི་གླིང་དུ་འགྲོའོ་སྙམ་པ</font><hr>42-1-154a<br><font size=+2>
དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ནུབ་ཀྱི་བ་ལང་སྤྱོད་ག་ལ་བ་དེར་སོང་སྟེ། དེས་དེར་ལོ་བརྒྱ་ཕྲག་མང་པོ་དང ། ལོ་སྟོང་ཕྲག་མང་པོར་རྒྱལ་བོ་བྱས་སོ། །དེ་ནས་རྒྱལ་པོ་གྲགས་པ་
མཐའ་ཡས་དེ་འདི་སྙམ་དུ་སེམས་ཏེ། འོ་ན་བདག་ནི་བྱང་གི་སྒྲ་མི་སྙན་གྱི་གླིང་དུ་འགྲོའོ་སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་བ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་བྱང་གི་སྒྲ་མི་སྙན་གྱི་གླིང་ཆེན་པོ་ག་ལ་བ་དེར་སོང་སྟེ། དེས་དེར་ལོ་བརྒྱ་ཕྲག་
མང་པོ་དང ། ལོ་སྟོང་ཕྲག་མང་པོར་རང་གི་དཔུང་གི་ཚོགས་ལ་རྗེས་སུ་བསྟན་ཏོ། དེ་ནས་རྒྱལ་པོ་གྲགས་པ་མཐའ་ཡས་ཡུན་རིང་པོ་འདས་པའི་དུས་ཤིག་ན་འདི་སྙམ་སེམས་ཏེ།སུམ་ཅུ་རྩ་གསུམ་ཞེས་བྱ་བའི་ལྷ་རི་རབ་ཀྱི་ཟོམ་ལ་གནས་པ་དག་ཡོད་ན་བདག་ནི་སུམ་ཅུ་རྩ་གསུམ་པའི་
ལྷ་ག་ལ་བ་དེར་འགྲོའོ་སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་གླང་པོ་རིན་པོ་ཆེའི་བྱ་ལ་ཁར་ཞོན་ཏེ་རིའི་རྒྱལ་པོ་རི་རབ་ཀྱི་སྟེང་དུ་སོང་ངོ ། །དེ་ནས་རྒྱལ་པོ་གྲགས་པ་མཐའ་ཡས་ཀྱིས་ཁ་ལོ་སྒྱུར་བ་ལ་
སྨྲས་པ། ཁ་ལོ་སྒྱུར་བ་གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་ཇི་ལྟར་མཐོང ། ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ་འདི་ལྟ་སྟེ་དཔེར་ན་རྫ་མཁན་གྱི་འཁོར་ལོ་དབྱིག་པས་འཕངས་ན་ཡོངས་སུ་འཁོར་བ་དེ་བཞིན་དུ་གླིང་ཆེན་པོ་བཞི་དང ། རིའི་རྒྱལ་པོ་རི་
རབ་དང ། རྒྱ་མཚོ་ཆེན་པོ་འདི་ཡང་ཡོངས་སུ་འཁོར་བར་མཐོང་ངོ ། །རྒྱལ་པོས་སྨྲས་པ། ཁ་ལོ་སྒྱུར་བ་འོ་ན་ད་དུང་གླང་པོ་རིན་པོ་ཆེས་འགྲོས་མ་ཕྱུང་ངོ ། །ཡང་རྒྱལ་པོ་གྲགས་པ་མཐའ་ཡས་ཀྱིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་གླིང་ཆེན་པོ་བཞི་དང ། རིའི་རྒྱལ་པོ་རི་རབ་
དང ། རྒྱ་མཚོ་ཆེན་པོ་འདི་ད་ཇི་ལྟར་མཐོང ། ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ་གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་དག་ད་ནི་འགུལ་ཞིང་རབ་ཏུ་འགུལ་བ་དང ། ཀུན་ཏུ་རབ་ཏུ་འགུལ་བར་མཐོང་ངོ ། །རྒྱལ་པོས་སྨྲས་པ། ཁ་ལོ་སྒྱུར་བ་འོ་ན་ད་དུང</font><hr>42-1-154b<br><font size=+2>
གླང་པོ་རིན་པོ་ཆེས་འགྲོས་མ་ཕྱུང་ངོ ། །ཡང་རྒྱལ་པོ་གྲགས་པ་མཐའ་ཡས་ཀྱིས་ཁ་ལོ་སྒྱུར་བ་ལ་སྨྲས་པ། ཁ་ལོ་སྒྱུར་བ་གླིང་ཆེན་པོ་བཞི་དང ། རིའི་རྒྱལ་པོ་རི་རབ་དང ། རྒྱ་མཚོ་ཆེན་པོ་འདི་ད་ཇི་ལྟར་མཐོང ། ཁ་ལོ་སྒྱུར་བས་སྨྲས་པ། རྒྱལ་པོ་ཆེན་པོ་ད་ནི་གླིང་ཆེན་པོ་བཞི་དང ། རིའི་རྒྱལ་
པོ་རི་རབ་དང ། རྒྱ་མཚོ་ཆེན་པོ་དག་ཀྱང་གཡོ་བའམ་འགུལ་བ་དང ། ལྡེག་པ་མ་མཆིས་པར་གནས་པར་མཐོང་ངོ ། །རྒྱལ་པོས་སྨྲས་པ། ཁ་ལོ་སྒྱུར་བ་ད་ནི་གླང་པོའི་རྒྱལ་པོས་འགྲོས་བསླང་བ་ལྟས་རིང་པོ་མི་ཐོགས་པར་རིའི་རྒྱལ་པོ་རི་རབ་ཀྱི་རྩེ་མོར་ཕྱིན་པར་འགྱུར་རོ། །དེ་ནས་རྒྱལ་
པོ་གྲགས་པ་མཐའ་ཡས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་རིང་པོ་མི་ཐོགས་པར་རིའི་རྒྱལ་པོ་རི་རབ་ཀྱི་རྩེ་མོར་ཕྱིན་པ་དང ། ལྷའི་དབང་པོ་བརྒྱ་བྱིན་གྱིས་རྒྱལ་པོ་གྲགས་པ་མཐའ་ཡས་རྒྱང་རིང་པོ་ནས་འོང་བ་མཐོང་ངོ ། །མཐོང་ནས་སྟན་གྱི་ཕྱེད་ལ་བདར་ཏེ་རྒྱལ་པོ་ཆེན་
པོ་ཚུར་སྤྱོན། རྒྱལ་པོ་ཆེན་པོ་བྱོན་པ་ལེགས་སོ། །རྒྱལ་པོ་ཆེན་པོ་སྟན་གྱི་ཕྱེད་ལ་བཞུགས་ཤིག་ཅེས་སྨྲས་པ་དང ། རྒྱལ་པོ་གྲགས་པ་མཐའ་ཡས་ལྷའི་དབང་པོ་བརྒྱ་བྱིན་གྱི་སྟན་གྱི་ཕྱེད་ལ་འདུག་སྟེ། དེས་དེར་ལོ་བརྒྱ་སྟོང་ཕྲག་མང་པོར་སུམ་ཅུ་རྩ་གསུམ་པའི་ལྷའི་རྒྱལ་སྲིད་ཕྱེད་ཀྱི་
དབང་ཕྱུག་ལ་དབང་བྱས་པར་གྱུར་ཏོ། །དེ་ནས་རྒྱལ་པོ་གྲགས་པ་མཐའ་ཡས་ཡུན་རིང་པོ་འདས་པའི་དུས་ཤིག་ན་འདི་སྙམ་དུ་སེམས་ཏེ། ཀྱེ་མ་བདག་གིས་བརྒྱ་བྱིན་གྱི་སྟན་ཐམས་ཅད་ལ་འདུག་པར་བྱའོ་སྙམ་པ་དང ། དེས་སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་
ལྷན་ཅིག་ཏུ་སྟན་ཕྱེད་པོ་དེ་ལས་ཉམས་ནས་འཛམ་བུའི་གླིང་དུ་གནས་པར་གྱུར་ཏེ། རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་སྐྱེད་མོས་ཚལ་གྱི་ར་བ་ན་འཁོད་པའི་མི་རྣམས་ཀྱིས་རྒྱལ་པོ་གྲགས་པ་མཐའ་ཡས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པའི་རིན་པོ་ཆེའི་སྐྱེད་མོས་
ཚལ་དུ་འོངས་ཤིང་དེ་ན་འདུག་པ་མཐོང་ནས་མཐོང་མ་ཐག་ཏུ་མྱུར་བ་མྱུར་བར་རིངས་པའི་གཟུགས་ཀྱིས་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་དེ་ན་རྒྱལ་པོ་དགའ་བྱེད་ཅེས་བྱ་བ་རྒྱལ་པོ་བྱེད་ཅིང་འདུག་པ་ལ་སྤྲན་ཏོ། །རྒྱལ་པོ་དགའ་བྱེད་དེས་རིན་པོ་ཆེའི་ཟ་མ་ཏོག་གི་སྐྱེད་མོས་ཚལ</font><hr>42-1-155a<br><font size=+2>
ན་ལྷའི་མི་ཞིག་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་གནས་ཞེས་ཐོས་ནས་མྱུར་བ་མྱུར་བར་རིངས་པའི་གཟུགས་སུ་བཞོན་པའི་མཆོག་ལ་ཞོན་ཏེ། ཡན་ལག་བཞི་པའི་དཔུང་གི་ཚོགས་དང་ལྷན་ཅིག་ཏུ་རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་
ནས་བྱུང་ནས་རིན་པོ་ཆེའི་ཟ་མ་ཏོག་གི་སྐྱེད་མོས་ཚལ་ག་ལ་བ་དེར་སོང་ངོ ། །རྒྱལ་པོའི་ཕོ་བྲང་འཁོར་རིན་པོ་ཆེས་རབ་ཏུ་བརྒྱན་པ་ན་འཁོད་པ་ཐམས་ཅད་ཀྱང་ངོ་མཚར་དུ་གྱུར་ནས་རྒྱུག་པར་གྱུར་ཏོ། །དེ་ནས་རྒྱལ་པོ་དགའ་བྱེད་བཞོན་པ་ལས་བབས་ཏེ། རྒྱལ་པོ་གྲགས་པ་མཐའ་
ཡས་ག་ལ་བ་དེར་དོང་ནས། དེས་སྤོས་དང ། མེ་ཏོག་དང ། ཕྲེང་བ་དང ། བྱུག་པ་དང ། བདུག་སྤོས་ཕུལ་ཏེ། གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་རྒྱལ་པོ་གྲགས་པ་མཐའ་ཡས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་རྒྱལ་པོ་གྲགས་
པ་མཐའ་ཡས་ལ་ཁྱོད་སུ་ཞིག་ལགས་ཤེས་དྲིས་སོ། །རྒྱལ་པོས་དེ་ལ་སྨྲས་པ། རྒྱལ་པོ་གྲགས་པ་མཐའ་ཡས་ཞེས་བྱ་བ་ཞིག་བྱུང་བ་དེ་ཁྱོད་ཀྱིས་ཐོས་སམ། རྒྱལ་པོ་དགའ་བྱེད་ཀྱིས་སྨྲས་པ། བདག་གིས་རབ་ཏུའང་ཐོས་ཏེ། རྒན་རབས་དག་མཆི་ན་རྒྱལ་པོ་གྲགས་པ་མཐའ་ཡས་
ཞེས་བགྱི་བ་འཁོར་ལོས་སྒྱུར་བ་ཁྱོགས་དང་དཔུང་དང་བཞོན་པ་དང་བཅས་ཏེ་མཐོ་རིས་སུ་བཞུད་དོ་ཞེས་ཐོས་སོ། །སྨྲས་པ། ང་ནི་རྒྱལ་པོ་གྲགས་པ་མཐའ་ཡས་ཞེས་བྱ་བ་དེ་ཡིན་ནོ། །དེ་ནས་རྒྱལ་པོ་གྲགས་པ་མཐའ་ཡས་དེ་མིའི་གཟི་བརྗིད་ཀྱིས་མིག་མ་གང་སྟེ། མིའི་ལོངས་སྤྱོད་
མི་བཟོད་པར་གྱུར་ནས་བྱིང་ཞིང་མི་གནས་པར་གྱུར་ཏེ། འདི་ལྟ་སྟེ་དཔེར་ན་མར་གྱི་གོང་བུའམ། མར་སར་གྱི་གོང་བུ་བྱེ་མ་ཚ་བ་ལ་བཞག་པ་ནི་འཇུ་ཞིང་མི་གནས་སོ། །དེ་བཞིན་དུ་རྒྱལ་པོ་གྲགས་པ་མཐའ་ཡས་ཀྱང་བྱིང་ཞིང་མི་གནས་པར་གྱུར་ཏོ། །དེ་ནས་རྒྱལ་པོ་དགའ་བྱེད་ཀྱི་རྒྱལ་པོ་གྲགས་
པ་མཐའ་ཡས་དེ་ལྟར་བྱིང་བ་དེ་ལ་འདི་སྐད་ཅེས་སྨྲས་སོ། །རྒྱལ་པོ་གྲགས་པ་མཐའ་ཡས་ཀྱིས་ལེགས་པར་བརྗོད་པ་ཇི་སྐད་ཅིག་གསུངས་ཤེས་མཆི་ན་བདག་གིས་འཇིག་རྟེན་རྣམས་ལ་ཇི་སྐད་ཅིག་ལུང་བསྟན་པར་བགྱི། དེས་སྨྲས་པ། རྒྱལ་པོ་ཆེན་པོ་གྲགས་པ་མཐའ་ཡས་ནི་གླིང་ཆེན</font><hr>42-1-155b<br><font size=+2>
པོ་བཞིར་རྒྱལ་སྲིད་ཀྱི་དབང་ཕྱུག་ལ་དབང་བྱས་ཤིང་བསམ་པ་ཡིད་བཞིན་དུ་གྲུབ་ལ་དོན་མེད་པར་མ་གྱུར་པ་ཡང་མྱོང ། །ཤིང་ཐམས་ཅད་ཡིད་བཞིན་དུ་འབྲས་བུ་ཆགས་པ་དང ། གནོད་པ་ཐམས་ཅད་རྒྱུན་ཆད་པ་དང ། སེམས་ཅན་ཐམས་ཅད་ཀྱི་ཡིད་ལ་བསམས་པ་དོན་ཡོད་པ་དང ། 
སྤོས་ཆུའི་ཆར་འབབ་པ་དང ། ལྷའི་ཡིད་བཞིན་གྱི་གོས་ཀྱི་ཆར་འབབ་པ་དང ། དབྱིག་གི་ཆར་འབབ་པ་དང ། གསེར་གྱི་ཆར་འབབ་པ་དང ། རིན་པོ་ཆེ་སྣ་ཚོགས་ཀྱི་ཆར་འབབ་པ་དང ། ཡོ་བྱད་ཐམས་ཅད་ཀྱི་ཆར་འབབ་པ་ཡང་མྱོང་བར་གྱུར་ནས་གླིང་ཆེན་པོ་བཞི་དག་ཏུ་གནས་ཏེ། 
གླིང་ཆེན་པོ་བཞིའི་རྒྱལ་སྲིད་ཀྱི་དབང་ཕྱུག་ལ་དབང་བྱས་ནས་བརྒྱ་བྱིན་གྱི་སྟན་ཕྱེད་མནན་པ་ལས་འདོད་པ་ཆེན་པོས་མ་བཏང་སྟེ། འདོད་པས་མ་ངོམས་བཞིན་དུ་འཆི་བའི་དུས་བྱས་སོ་ཞེས་རྒྱལ་པོ་ཆེན་པོ་ཁྱོད་ཀྱིས་ལུང་སྟོན་ཅིག་།དེ་སྐད་ཅེས་སྨྲས་ནས་རྒྱལ་པོ་གྲགས་པ་མཐའ་ཡས་དེ་
འཆི་བའི་དུས་བྱས་པར་གྱུར་ཏོ། །རྒྱལ་པོ་ཆེན་པོ་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་གྲགས་པ་མཐའ་ཡས་ཞེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟ་ན་དེ་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ང་ཉིད་དེའི་ཚེ་དེའི་དུས་ན་འཁོར་
ལོས་སྒྱུར་བའི་རྒྱལ་པོ་གྲགས་པ་མཐའ་ཡས་ཞེས་བྱ་བར་གྱུར་ཏོ། །དེ་བས་ན་རྒྱལ་པོ་ཆེན་པོ་ཁྱོད་ཀྱིས་དབང་པོ་རྣམས་ནི་སྒྱུ་མ་ལྟ་བུ། ཡུལ་རྣམས་ནི་རྨི་ལམ་ལྟ་བུའོ་ཞེས་དེ་ལྟར་རིག་པར་བྱས་ནས་སེམས་ངེས་པར་བཞག་པར་བྱ་སྟེ། གཞན་གྱི་དྲིང་མི་འཇོག་པར་བྱའོ། །དེ་ནས་བཅོམ་
ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འདོད་པའི་དབང་ཕྱུག་རྣམ་པ་ལས། །སེམས་ནི་མཁས་པས་བསྐྱོད་བྱས་ཏེ། །ཆོས་ཀྱི་དབང་ཕྱུག་དགའ་བ་ལ། །སེམས་ནི་ཡང་དག་ཉིད་དུ་གཏང ། །འདོད་བདེའི་དབང་ཕྱུག་སྤང་བྱས་ཤིང ། །ཆོས་ཀྱི་དབང་
ལ་ཡིད་བཞག་སྟེ། །སེམས་གདུལ་བ་ལ་རབ་བརྟེན་ན། །ཉོན་མོངས་རབ་ཏུ་ཚར་ཆོད་འགྱུར། །ཉོན་མོངས་ཚར་བཅད་བརྟེན་རྣམས་ནི། །ལས་ཀྱི་ལམ་ཡང་ཆད་པར་འགྱུར། །ལས་ཀྱི་ལམ་ནི་ཆད་གྱུར་ན། །འཇིག་རྟེན་གྱི་ནི་མཆོད་རྟེན་འགྱུར། །འདོད་ལ་ཀུན་ནས་ཉོན་མ་མོངས། །


</font><hr>42-1-156a<br><font size=+2>
འདོད་པའི་ཉེས་པ་རབ་བསྟེན་ཏེ། །སེམས་ཅན་རྣམས་ལ་ཕན་སེམས་པས། །དེ་ཕྱིར་མཆོད་པའི་རྟེན་ཅེས་བྱ། །འདོད་པའི་ཉེས་པ་ཐོས་གྱུར་ན། །མི་ནི་འདོད་པའི་འདོད་ཆགས་ལས། །སེམས་སྦྱོང་བྱེད་པ་ཐམས་ཅད་མཁྱེན། །དེ་ཕྱིར་མཆོད་པའི་རྟེན་ཅེས་བྱ། །
སེམས་ཅན་རྣམས་ཀྱི་སྡང་སྤང་པ། །གང་ཟག་མཆོག་གིས་རབ་ཏུ་མཁྱེན། །སྡང་ལས་སེམས་ནི་གྲོལ་མཛད་པས། །དེ་ཕྱིར་མཆོད་པའི་རྟེན་ཅེས་བྱ། །སེམས་ཅན་རྣམས་ཀྱི་རྨོངས་སྤངས་པ། །ཤཱཀྱའི་ཁྱུ་མཆོག་རབ་མཁྱེན་ཏེ། །རྨོངས་ལས་སེམས་ནི་སྦྱོང་མཛད་པས། །དེ་ཕྱིར་
མཆོད་པའི་རྟེན་ཅེས་བྱ། །སེམས་ཅན་ང་རྒྱལ་སྤང་བ་ཡང ། །སེམས་ཅན་ཁ་ལོ་སྒྱུར་བས་མཁྱེན། །ང་རྒྱལ་དག་ལས་སེམས་སྦྱོང་བས། །དེ་ཕྱིར་མཆོད་པའི་རྟེན་ཅེས་བྱ། །བཅོམ་ལྡན་འདས་ཀྱིས་གཞན་ཡང་རྒྱལ་པོ་ཟས་གཙང་མ་ལ་བཀའ་སྩལ་པ། རྒྱལ་པོ་ཆེན་པོ་སྔོན་བྱུང་བ་
འདས་པའི་དུས་ན་རྒྱལ་པོ་སའི་ལྷ་ཞེས་བྱ་བ་ཆོས་དང་ལྡན་པ་ཆོས་ཀྱི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་བྱུང་སྟེ། དེའི་རིན་པོ་ཆེ་སྣ་བདུན་ནི་འདི་དག་སྟེ། འདི་ལྟར་འཁོར་ལོ་རིན་པོ་ཆེ་དང ། གླང་པོ་རིན་པོ་ཆེ་དང ། རྟ་རིན་པོ་ཆེ་དང ། ནོར་བུ་རིན་པོ་ཆེ་དང ། བུད་མེད་རིན་པོ་ཆེ་དང ། ཁྱིམ་བདག་རིན་པོ་
ཆེ་དང ། བློན་པོ་རིན་པོ་ཆེ་དང་བདུན་ནོ། །རྒྱལ་པོ་སའི་ལྷ་དེའི་ཕ་ནི་རྒྱལ་པོས་འབྱུང་ཞེས་བྱ་བར་གྱུར་ཏོ། །རྒྱལ་པོ་ས་འབྱུང་དེའི་བུ་ཐུ་བོ་ནི་གཞོན་ནུ་སའི་ལྷ་སྟེ། དེ་ནས་རྒྱལ་པོས་འབྱུང་འཆི་བའི་དུས་བྱེད་པའི་ཚེ་རྒྱལ་བུ་གཞོན་ནུ་སའི་ལྷ་རྒྱལ་སྲིད་ལ་དབང་བསྐུར་རོ། །དེ་ནས་རྒྱལ་པོས་སའི་ལྷ་
དེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བར་གྱུར་ཏོ། །དེ་ནས་རྒྱལ་པོ་སའི་ལྷ་རྒྱལ་རིགས་སྤྱི་བོ་ནས་དབང་བསྐུར་བ་དེ་གསོ་སྦྱོང་གི་ཉི་མ་ཟླ་བ་ཉ་བའི་ཚེ་སྐྲ་བཀྲུས་ཏེ་རས་བཅོས་བུ་སར་པ་བགོས། སྐྲ་དང་ཁ་སྤུ་བཅོས། ཕྲེང་བ་དང་རྒྱན་བཏགས། ནོར་བུ་དང་རྣ་ཆ་གདུབ་ཀོར་བཏགས་ནས་ཁང་
སྟེང་ན་བུད་མེད་ཀྱི་འཁོར་གྱིས་བསྐོར་ཅིང་མདུན་དུ་བདར་ཏེ་འདུག་འདུག་པ་དང ། ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་རྩིབས་སྟོང་དང་ལྡན་པ། ལྟེ་བ་དང་བཅས་པ། མུ་ཁྱུད་དང་བཅས་པ། རྣམ་པ་ཐམས་ཅད་ཀྱི་མཆོག་དང་ལྡན་པ། འོད་ཟེར་དང་ལྡན་པ། འོད་གསལ་བ། འཕང་དུ་ཁྲུ</font><hr>42-1-156b<br><font size=+2>
བདུན་ཡོད་པ། ཐམས་ཅད་གསེར་ལས་བྱས་པ་བྱུང་བར་གྱུར་ཏོ། །རྒྱལ་པོས་སའི་ལྷ་དེས་སྔོན་ཡང་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གང་གསོ་སྦྱོང་གི་ཉི་མ་ཟླ་བ་ཉ་བའི་ཚེ་ཞེས་བྱ་བ་ནས་བུད་མེད་ཀྱི་ཚོགས་ཀྱིས་བསྐོར་ཅིང་མདུན་དུ་བདར་བའི་བར་དུ་སྔ་མ་བཞིན་ཏེ། ཤར་ཕྱོགས་ནས་
ལྷའི་འཁོར་ལོ་རིན་པོ་ཆེ་རྩིབས་སྟོང་དང་ལྡན་པ་ཞེས་བྱ་བ་ནས་ཐམས་ཅད་གསེར་ལས་བྱས་པའི་བར་དང་ལྡན་པ་བྱུང་བར་གྱུར་པ་དང ། དེ་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ཐོས་པས་དེ་འདི་སྙམ་དུ་སེམས་ཏེ། བདག་འཁོར་ལོས་སྒྱུར་བའི་རྒྱལ་པོ་ལྟ་ཡིན་ནམ་དེ་ལ་བདག་གིས་
སད་པར་བྱའོ་སྙམ་ནས་རྒྱལ་པོ་སའི་ལྷ་སྟན་ལས་ལངས་ཏེ། གོས་ཕྱོགས་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ལྷའི་འཁོར་ལོ་རིན་པོ་ཆེ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ལྷའི་འཁོར་ལོ་རིན་པོ་ཆེ་དེ་ལ་འདི་སྐད་ཅེས་སྨྲས་སོ། །ཀྱེ་འཁོར་
ལོ་རིན་པོ་ཆེ་བོབས་ཏེ་ས་ལ་གནོས་ཤིག་ཅེས་བྱས་པ་དང ། དེ་ནས་ལྷའི་འཁོར་ལོ་རིན་པོ་ཆེ་དེ་ནམ་མཁའ་ལས་བབས་ཏེ་ས་ལ་གནས་པར་གྱུར་ཏོ། །དེ་ནས་རྒྱལ་པོ་སའི་ལྷ་དེས་ལྷའི་འཁོར་ལོ་རིན་པོ་ཆེ་དེ་གོས་ཁྱེའུ་གཙང་གིས་ཕྱིས་ཏེ་ལག་པ་གཡས་པས་བསྐུལ་ནས་འདི་སྐད་ཅེས་
སྨྲས་སོ། །ཀྱེ་འཁོར་ལོ་རིན་པོ་ཆེ་ཤར་ཕྱོགས་ལས་རྣམ་པར་རྒྱལ་བར་གྱིས་ཤིག་།དེ་ནས་འཁོར་ལོ་རིན་པོ་ཆེ་དེ་ཤར་ཕྱོགས་ལོགས་སུ་གྱུར་པ་དང ། ཤར་ཕྱོགས་ཀྱི་གནས་རྣམས་སུ་དེ་ཉིད་ཀྱི་ཚེ་སྔོན་གྱི་འཁོར་ལོས་སྒྱུར་བ་རྣམས་ཀྱི་ལམ་མཉམ་ཞིང་ཤིན་ཏུ་བདེ་བ། ཉམས་
དགའ་བ། རིན་པོ་ཆེ་བདུན་གྱི་རྒྱུ་ལས་གྲུབ་པ། མེ་ཏོག་སིལ་མ་སྣ་ཚོགས་ཀྱིས་གང་བ་བྱུང་བར་གྱུར་ཏེ། དེའི་གཤོང་དུ་གྱུར་པའི་ཕྱོགས་རྣམས་ནི་མཐོ་བར་གྱུར་ཏོ། །སྒང་དུ་གྱུར་པ་རྣམས་ནི་དམའ་བར་གྱུར་ཏོ། །དེའི་ཁྲོན་པ་དང ། འབབ་ཆུའི་དོང་དང ། མཚོ་དང ། 
མཚེའུ་དང ། ཆུ་ཀླུང་སྐམས་པ་རྣམས་སུ་ནི་ཡན་ལག་བརྒྱད་དང་ལྡན་པའི་ཆུ་བྱུང་བར་གྱུར་ཏེ། འདི་ལྟ་སྟེ། བསིལ་བ་དང ། ཞིམ་པ་དང ། ཡང་བ་དང ། འཇམ་པ་དང ། དང་བ་དང ། དྲི་ང་བ་མེད་པ་དང ། འཐུངས་ན་ལྐོག་མར་མི་གནོད་པ་དང ། འཐུངས་ན་ལྟོ་བ་བདེ་བས</font><hr>42-1-157a<br><font size=+2>
ཡོངས་སུ་གང་བར་གྱུར་ཏོ། །མེ་ཏོག་གི་ཤིང་ལྗོན་པ་རྣམས་ལ་ཡང་མེ་ཏོག་ཆགས་པར་གྱུར་ཏོ། །འབྲས་བུའི་ཤིང་ལྗོན་པ་རྣམས་ལ་ཡང་འབྲས་བུ་ཆགས་པར་གྱུར་ཏོ། །མེ་ཏོག་རྒྱས་པའི་ཤིང་རྣམས་ཀྱང་རྟག་ཏུ་མེ་ཏོག་རྒྱས་པར་གྱུར་ཏོ། །འབྲས་བུ་ཆགས་པའི་ཤིང་
རྣམས་ཀྱང་རྟག་ཏུ་འབྲས་བུ་ཆགས་པར་གྱུར་ཏོ། །འཁོར་ལོས་སྒྱུར་བའི་རྒྱལ་པོ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་འཁོར་ལོ་རིན་པོ་ཆེ་དེའི་ཕྱི་བཞིན་སོང་སྟེ། ས་ཕྱོགས་གང་དུ་འཁོར་ལོ་རིན་པོ་ཆེ་དེ་འདུག་པར་གྱུར་པ་དེར་འཁོར་ལོས་སྒྱུར་བའི་རྒྱལ་པོ་ཡང་དཔུང་གི་
ཚོགས་ཡན་ལག་བཞི་པ་དང་ལྷན་ཅིག་ཏུ་འདུག་པར་གྱུར་ཏོ། །དེའི་ཚེ་ཤར་ཕྱོགས་ཀྱི་རྒྱལ་པོའམ། ཁམས་ཀྱི་རྒྱལ་པོའམ། གྲོང་རྡལ་གྱི་མིའམ། ཞིང་པ་དེ་དག་ཐམས་ཅད་གསེར་གྱི་གཞོང་པ་དངུལ་སིལ་མས་བཀང་བ་དང ། དངུལ་གྱི་གཞོང་པ་གསེར་ཕྱེས་བཀང་བ་དག་ཐོག་ཏེ། 
འཁོར་ལོས་སྒྱུར་བའི་རྒྱལ་པོ་དེ་བསུ་ཞིང་ལྷ་ཚུར་གཤེགས། ལྷ་གཤེགས་པ་ལེགས་སོ། །ལྷའི་ཆགས་འོག་ཏུ་མངའ་བ་འདི་དག་ནི་འབྱོར་ཅིང་རྒྱས་ལ་ལོ་ལེགས་ཤིང་སྐྱེ་བོ་མང་པོ་དང་མིས་གང་བ་སྟེ། འདི་དག་དང་བདག་ཅག་ལ་ལྷ་མངའ་མཛད་དུ་གསོལ། དེ་སྐད་ཅེས་སྨྲས་པ་དང ། འཁོར་
ལོས་སྒྱུར་བའི་རྒྱལ་པོ་དེས་དེ་དག་ལ་འདི་སྐད་ཅེས་སྨྲས་སོ། །ང་ལ་ལོངས་སྤྱོད་འདི་དག་མི་དགོས་ཀྱིས། འདི་དག་ཁྱེད་ཀྱི་ལོངས་སྤྱོད་དུ་གྱུར་ཏེ་ཉེ་བར་འཚོ་བར་གྱིས་ཤིག་།ཁྱེད་འདི་ལྟར་ངའི་རྗེས་སུ་འབྲང་བར་གྱིས་ཤིག་།གལ་ཏེ་ཁྱེད་ཀྱིས་སྲོག་གཅོད་པ་སྤངས་ཏེ། མ་བྱིན་པར་
ལེན་པ་སྤངས་ཤིང་ལོག་པར་ལྟ་བའི་བར་དུ་སྤངས་ན་ང་ཡང་བདག་གིས་ནི་ཡུལ་འདི་དག་ལས་རྒྱལ་ཏེ། མི་གང་དག་མར་འཛིན་པ་དང ། ཕར་འཛིན་པ་དང ། དགེ་སྦྱོང་དུ་འཛིན་པ་དང ། བྲམ་ཟེར་འཛིན་པ་དང ། རིགས་ཀྱི་གཙོ་བོ་ལ་རིམ་གྲོ་བྱེད་པ་དེ་དག་ནི་ངའི་རྗེས་སུ་འབྲང་བ་ཡིན་ནོ་སྙམ་
དུ་སེམས་སོ། །ད་ཕན་ཆད་ཁྱེད་ཡུལ་འཁོར་དུ་ཆོས་མ་ཡིན་པའི་སྤྱོད་པ་དང ། མི་རིག་པའི་སྤྱོད་པ་འདོད་པར་མ་བྱེད་ཅིག་།དེ་ལྟར་བྱས་ན་ང་ཡང་ཡུལ་འདི་རྣམས་ལས་རྒྱལ་ཞིང་མི་དེ་དག་ཀྱང་ངའི་རྗེས་སུ་འབྲང་བ་ཡིན་པར་སེམས་སོ། །དེ་དག་གིས་དེ་ལ་ལེགས་སོ་ཞེས་ནས་དེ་བཞིན་དུ་ནན་ཏན</font><hr>42-1-157b<br><font size=+2>
བྱེད་དོ། །དེའི་ལྷའི་འཁོར་ལོ་རིན་པོ་ཆེ་དེས་ཤར་ཕྱོགས་སུ་རྣམ་པར་རྒྱལ་བར་བྱས་ཏེ། ཤར་ཕྱོགས་ཀྱི་རྒྱ་མཚོ་ལས་རྒལ་ནས་མདུན་དུ་ཤིང་རྟའི་སྲོག་ཤིང་བཙུགས་པ་ལྟར་འདུག་པར་གྱུར་ཏོ། །དེ་བཞིན་དུ་ལྷོ་ཕྱོགས་དང ། ནུབ་ཕྱོགས་སུ་ཡང་རྒྱ་ཆེར་རྣམ་པར་རྒྱལ་བར་བྱས་ནས། བྱང་
ཕྱོགས་སུ་བྱང་གི་སྒྲ་མི་སྙན་གྱི་གླིང་ཆེན་པོའི་བར་ལས་རྣམ་པར་རྒྱལ་བར་བྱས་ཏེ། བྱང་ཕྱོགས་ཀྱི་རྒྱ་མཚོ་ལས་རྒལ་ནས་འཁོར་ལོས་སྒྱུར་བའི་རྒྱལ་པོའི་ཕོ་བྲང་གི་སྒོའི་སྟེང་དུ། ཤིང་རྟའི་སྲོག་ཤིང་བཙུགས་པ་བཞིན་དུ་འདུག་པར་གྱུར་ཏོ། །རྒྱལ་པོ་སའི་ལྷས་འཁོར་ལོ་རིན་པོ་ཆེ་
བསྐོར་མ་ཐག་ཏུ་དེ་ནས་དེའི་མོད་ལ་གླིང་ཆེན་པོ་བཞི་པ་ཐམས་ཅད་རིན་པོ་ཆེའི་རང་བཞིན་བཀྲ་བ་བལྟ་ན་སྡུག་པར་གནས་པར་གྱུར་ཏེ། རིན་པོ་ཆེ་སྣ་བདུན་ནི་འདི་ལྟ་སྟེ། གསེར་དང ། དངུལ་དང ། བཻ་དཱུརྱ་དང ། ཤེལ་དང ། མུ་ཏིག་དམར་པོ་དང ། སྤུག་དང ། རྡོའི་སྙིང་པོ་དང་བདུན་ནོ། །
རྒྱལ་པོ་སའི་ལྷས་འཁོར་ལོ་རིན་པོ་ཆེ་དེ་བསྐོར་མ་ཐག་ཏུ་སེམས་ཅན་དམྱལ་བ་ཐམས་ཅད་རྒྱུན་ཆད་པར་གྱུར། དུད་འགྲོའི་སྐྱེ་གནས་ཐམས་ཅད་དང ། གཤིན་རྗེའི་འཇིག་རྟེན་ཐམས་ཅད་དང ། ལྷ་མ་ཡིན་གྱི་རིས་ཐམས་ཅད་དང ། མི་ཁོམ་པ་ཐམས་ཅད་ཀྱང་རྒྱུན་ཆད་པར་གྱུར་ཏོ། །མི་
དགེ་བའི་སྒྲ་རྣམས་ཀྱང་ཡོངས་སུ་ནུབ་པར་གྱུར་ཏོ། །འདི་ལྟར་རྒྱལ་པོ་སའི་ལྷའི་སྔོན་གྱི་སྨོན་ལམ་གྱིས་གླིང་ཆེན་པོ་བཞི་པོ་ཐམས་ཅད་དུ་མ་རྨོས་མ་བཏབ་པའི་འབྲས་བུ་སཱ་ལུའི་འབྲུ་ཡང་བྱུང་བར་གྱུར། དཔག་བསམ་གྱི་ཤིང་རྣམ་པ་སྣ་ཚོགས་ཀྱང་བྱུང་བར་གྱུར་ཏོ། །སེམས་ཅན་དེ་དག་
གི་ནད་ཀྱི་རྣམ་པ་ཡང་འདི་ལྟ་སྟེ། འདོད་པ་དང ། ཁ་ཟས་མི་ཟ་བ་དང ། རྒ་བ་གསུམ་མ་གཏོགས་པར་ཐམས་ཅད་རྒྱུན་ཆད་པར་གྱུར་ཏོ། །སེམས་ཅན་དེ་དག་གི་ཚེའི་ཚད་ནི་ལོ་བྱེ་བ་ཚང་བར་གྱུར་ཏོ། །སེམས་ཅན་དེ་དག་ལ་སྡུག་བསྔལ་གྱི་སྡུག་བསྔལ་ཡང་ཐམས་ཅད་དུ་མི་མངོན་
ཞིང་མི་གནོད་པར་གྱུར་ཏེ། དེའི་ཚེ་འདི་དག་དང་གཞན་ཡང་ངོ་མཚར་རྨད་དུ་བྱུང་བ་མཐའ་ཡས་པ་བྱུང་བར་གྱུར་ཏོ། །རྒྱལ་པོ་ཆེན་པོ་དེ་ནས་རྒྱལ་པོ་སའི་ལྷ་དེ་འདི་སྙམ་དུ་སེམས་ཏེ། མིའི་འཇིག་རྟེན་ན་ལོངས་སྤྱོད་འདི་ལྟ་བུ་ཡོད་ན་ལོངས་སྤྱོད་འདི་བས་རྒྱ་ཆེ་བ་དང ། འདི་ལས</font><hr>42-1-158a<br><font size=+2>
ཁྱད་པར་དུ་འཕགས་པའི་ལོངས་སྤྱོད་གཞན་འགའ་ཞིག་ཡོད་དམ་མེད་སྙམ་ནས་དེ་འདི་སྙམ་དུ་སེམས་ཏེ། བདག་གིས་སུམ་ཅུ་རྩ་གསུམ་པའི་ལྷ་ཞེས་བྱ་བ་རི་རབ་ཀྱི་རྩེ་མོ་ལ་གནས་པ་དག་ཅིག་ཡོད་ཅེས་ཐོས་ན་དེ་དག་གི་ལོངས་སྤྱོད་དེ་ཅི་འདྲ་བ་ཞིག་ཡོད་སྙམ་མོ། །
དེ་ནས་རྒྱལ་པོ་སའི་ལྷ་དེ་འདོད་པ་དེ་མ་སྤངས་པའི་ཕྱིར་མིའི་ལོངས་སྤྱོད་ལ་ནི་སྨོད། ལྷའི་ལོངས་སྤྱོད་ལ་ནི་སྨོན་ཅིང་འདི་སྙམ་དུ་འོ་ན་བདག་སུམ་ཅུ་རྩ་གསུམ་པའི་གནས་སུ་འགྲོ་བར་བྱའོ་སྙམ་དུ་སེམས་བསྐྱེད་པར་གྱུར་ཏོ། །རྒྱལ་པོ་ཆེན་པོ་སའི་ལྷ་དེས་སེམས་བསྐྱེད་མ་ཐག་ཏུ་དཔུང་གི་
ཚོགས་ཡན་ལག་བཞི་པ་དང་ལྷན་ཅིག་ཏུ་རིའི་རྒྱལ་པོ་རི་རབ་ཀྱི་རྩེ་མོ་ལ་ཕྱིན་པར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་སའི་ལྷ་རྒྱང་རིང་པོ་ནས་འོང་བ་མཐོང་ནས་འདི་སྐད་ཅེས་སྨྲས་ཏེ། རྒྱལ་པོ་ཆེན་པོ་ཚུར་སྤྱོན། རྒྱལ་པོ་ཆེན་པོ་བྱོན་པ་ལེགས་སོ་ཞེས་སྟན་གྱི་ཕྱེད་ལ་
བདར་ཏེ། རྒྱལ་པོ་ཆེན་པོ་གང་གི་དུས་ལ་དབབ་པར་མཁྱེན་ན་སྟན་འདི་ལ་བཞུགས་ཤིག་ཅེས་སྨྲས་པ་དང ། རྒྱལ་པོ་སའི་ལྷ་ཡང་བརྒྱ་བྱིན་གྱི་སྟན་ཕྱེད་ལ་འདུག་སྟེ། དེས་དེར་ལོ་བརྒྱ་སྟོང་ཕྲག་མང་པོར་སུམ་ཅུ་རྩ་གསུམ་པའི་ལྷའི་ནང་དུ་རྒྱལ་སྲིད་ཀྱི་དབང་ཕྱུག་ཕྱེད་ལ་དབང་བྱས་
སོ། །དེ་ཡུན་རིང་པོ་འདས་པའི་དུས་ཤིག་ན་འདོད་པ་ཆེན་པོའི་དབང་གིས་འདི་སྙམ་དུ་སེམས་པར་གྱུར་ཏེ། ཀྱེ་མ་བདག་གིས་སུམ་ཅུ་རྩ་གསུམ་པའི་ལྷའི་ནང་དུ་རྒྱལ་སྲིད་ཀྱི་དབང་ཕྱུག་ཐམས་ཅད་ལ་དབང་བྱའོ་སྙམ་པ་དང ། སེམས་བསྐྱེད་མ་ཐག་ཏུ་ལྷའི་དབང་པོ་བརྒྱ་བྱིན་གྱི་
སྟན་ཕྱེད་ལས་ཉམས་ནས་ཕྱིར་འཛམ་བུའི་གླིང་གི་གྲོང་ཁྱེར་བདེ་བའི་ཁྱིམ་ཞེས་བྱ་བར་གནས་པར་གྱུར་ཏོ། །དེ་ལྟའི་གཟི་བརྗིད་དང་ལྡན་པ་ལས་འཛམ་བུའི་གླིང་དུ་གནས་པར་གྱུར་བས་མིའི་གཟི་བརྗིད་མི་བཟོད་པར་གྱུར་ནས་དེ་བྱིང་ཞིང་མི་གནས་པར་གྱུར་ཏོ། །དེ་ནས་རྒྱལ་པོ་སའི་
ལྷ་ས་ལ་འབྱིང་བ་ན་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །རྒྱལ་སྲིད་དབང་ཕྱུག་རྒྱ་ཆེན་གྱིས། །འདོད་ལ་སྲེད་པ་ཞི་མི་འགྱུར། །མེ་ལ་རྩཝ་ཤིང་ཇི་བཞིན་ཏེ། །དེ་བས་འདོད་པ་རྣམ་པར་སྤང ། །ཡུན་རིང་རྒྱུད་ཀྱི་འདོད་པ་ལ། །བསྟེན་ན་ངོམས་པར་མི་འགྱུར་ཏེ། །སྐོམ</font><hr>42-1-158b<br><font size=+2>
པས་ཉེན་པ་ཚཝ་ཆུ་ལ། །རབ་ཏུ་འཐུངས་ཀྱང་ཡོངས་གདུང་བཞིན། །ཆུ་བོ་རྣམས་ཀྱིས་ནམ་དུ་ཡང ། །རྒྱ་མཚོ་ངོམས་པར་མི་འགྱུར་ཏེ། །དེ་བཞིན་འདོད་པ་བསྟེན་བྱས་ན། །གཞན་ཡང་ངོམས་པར་མི་འགྱུར་རོ། །ཤིང་དང་རྩཝ་དག་རབ་བསྲེགས་ཀྱང ། །མེ་ནི་ངོམས་པར་མི་འགྱུར་རོ། །དེ་
བཞིན་འདོད་པ་བསྟེན་བྱས་ན། །འདོད་པའི་ལོངས་སྤྱོད་ངོམས་མི་མྱོང ། །མེ་ལོང་ཇི་ལྟར་གཟུགས་བརྙན་གྱིས། །ནམ་ཡང་ངོམས་པར་མི་འགྱུར་བ། །དེ་བཞིན་གཟུགས་རྣམས་བསྟེན་བྱས་ན། །འདོད་པའི་ལོངས་སྤྱོད་ངོམས་མི་མྱོང ། །བྲག་ཅ་ཇི་ལྟར་སྒྲ་རྣམས་ཀྱིས། །
ནམ་ཡང་ངོམས་པར་མི་འགྱུར་བ། །དེ་བཞིན་སྒྲ་རྣམས་བསྟེན་བྱས་ན། །འདོད་པའི་ལོངས་སྤྱོད་ངོམས་མི་མྱོང ། །ཇི་ལྟར་སྤོས་སྣོད་སྤོས་རྣམས་ཀྱིས། །ནམ་ཡང་ངོམས་པར་མི་འགྱུར་བ། །དེ་བཞིན་དྲི་རྣམས་བསྟེན་བྱས་ཀྱང ། །སྣ་ནི་དྲི་ཡིས་ངོམས་མི་མྱོང ། །ཇི་ལྟར་
གཟར་བུ་རོ་མཆོག་གིས། །ནམ་ཡང་ངོམས་པར་མི་འགྱུར་བ། །དེ་བཞིན་ལྕེ་ནི་རོ་མཆོག་གིས། །ནམ་ཡང་ངོམས་པར་མི་འགྱུར་རོ། །ཇི་ལྟར་ནམ་མཁའ་རླུང་རྣམས་ཀྱིས། །ནམ་ཡང་ངོམས་པར་མི་འགྱུར་བ། །དེ་བཞིན་ལུས་ནི་རེག་རྣམས་ཀྱིས། །ནམ་ཡང་ངོམས་པར་མི་
འགྱུར་རོ། །དཔེར་ན་རྨི་ལམ་རྨིས་པ་ཡི། །ཆུ་འཐུངས་ངོམས་པར་མི་འགྱུར་བ། །དེ་བཞིན་འདོད་ལ་ཆགས་པ་ཡི། །ཡིད་ཀྱང་ངོམས་པར་འགྱུར་བ་མེད། །སེམས་ཅན་འདོད་ལ་སྟེན་པ་ནི། །ཕྱིར་ཞིང་སྲེད་པ་འཕེལ་འགྱུར་ཏེ། །ཡུལ་ལ་ཉེ་བར་བསྟེན་བྱས་ན། །འདོད་པས་ནམ་
ཡང་ངོམས་པ་མེད། །སྐོམ་དང་མེ་འདྲའི་འདོད་པ་ལས། །སྡུག་བསྔལ་འབྱུང་བར་སུས་མཐོང་བ། །དེ་དག་སྲེད་པ་ཞིར་འགྱུར་ཏེ། །མེ་ལ་ཆུས་ནི་བླུགས་པ་བཞིན། །རྒྱལ་པོ་ཆེན་པོ་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་སའི་ལྷ་ཞེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་དོགས་
ཤིང་ཐེ་ཚོམ་ཟའམ་ཡིད་གཉིས་སུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ང་ཉིད་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་སའི་ལྷ་ཞེས་བྱ་བར་གྱུར་ཏོ། །དེ་ཙམ་དུ་ཆེ་ཞིང་དེ་ཙམ་དུ་ཡངས་པའི་དབང་ཕྱུག་ལ་དབང་བྱས་ཀྱང་དབང་ཕྱུག་གིས་མ་ངོམས</font><hr>42-1-159a<br><font size=+2>
བཞིན་དུ་འཆི་བའི་དུས་བྱས་པར་གྱུར་ཏོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་དབང་པོ་རྣམས་ནི་མ་ངོམས་ཤིང་ངོམས་པར་མི་རུང་བ། ཡུལ་རྣམས་ནི་ངོམས་པར་མི་བྱེད་པ་སྟེ། དབང་པོ་རྣམས་ནི་མེ་ལོང་དང་འདྲ། ཡུལ་རྣམས་ནི་གཟུགས་བརྙན་དང་འདྲ། དབང་
པོ་རྣམས་ནི་བྲག་ཅ་དང་འདྲ། ཡུལ་རྣམས་ནི་སྒྲ་བརྙན་དང་འདྲ། དབང་པོ་རྣམས་ནི་སྒྱུ་མ་དང་འདྲ། ཡུལ་རྣམས་ནི་རྨི་ལམ་དང་འདྲ་བ་ཡིན་གྱིས། རྒྱལ་པོ་ཆེན་པོ་ཁྱོད་དེ་ལ་ཡིད་གཞག་ཅིང་གཞན་གྱི་དྲིང་མི་འཇོག་པར་གྱིས་ཤིག། །།བམ་པོ་བཅཝ་ལྔ་པ་
སྟེ་ཐ་མ། རྒྱལ་པོ་ཆེན་པོ་གཞན་ཡང་སྔོན་བྱུང་བ་འདས་པའི་དུས་ན་རྒྱལ་པོ་ང་ལས་ནུ་ཞེས་བྱ་བ་རྫུ་འཕྲུལ་ཆེ་ཞིང་མཐུ་ཆེ་ལ་དབང་ཆེ་བར་གྲགས་པ། རྒྱལ་པོ་གསོ་སྦྱོང་འཕགས་ཀྱི་སྤྱི་བོ་ནས་བྱུང་བ། སྔོན་དགེ་བའི་རྩ་བ་བསགས་པ། སངས་རྒྱས་དཔག་ཏུ་མེད་པ་མཐོང་བ། 
དགེ་བའི་རྩ་བ་ཡང་དག་པར་བསྒྲུབས་པ། སངས་རྒྱས་བྱེ་བ་ཁྲག་ཁྲིག་མང་པོ་ལ་ཆོས་དཀར་པོ་ཡོངས་སུ་བསྒྲུབས་པ་ཞིག་བྱུང་སྟེ། དེས་གླིང་ཆེན་པོ་བཞིར་དབང་ཕྱུག་ལ་དབང་བྱས་སོ། །དེ་འཛམ་བུའི་གླིང་ན་གནས་པ་དེའི་ཚེ་འདོད་པའི་ཁམས་ཀྱི་སེམས་ཅན་མི་དང་ལྷ་ཇི་སྙེད་ཅིག་འདོད་
པ་ལ་སྤྱོད་པར་གྱུར་པ་དེ་དག་གི་ནང་ན་རྒྱལ་པོ་ང་ལས་ནུ་དེ་འདི་ལྟར་འདོད་པ་ལ་ལོངས་སྤྱོད་པས་མཆོག་ཏུ་བརྗོད་དོ། །དེའི་ཚེ་འཛམ་བུའི་གླིང་ནི་འབྱོར་ཅིང་རྒྱས་ལ་བདེ་ཞིང་ལོ་ལེགས་པ་དང ། སྐྱེ་བ་མང་པོ་དང་མིས་གང་བ་དང ། གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། 
ཡུལ་འཁོར་དང ། རྒྱལ་པོའི་ཕོ་བྲང་འཁོར་ཡང་འདབ་ཉེ་བར་གྱུར་པ། གྲོང་རྣམས་ཀྱང་བྱ་གག་གི་འཕུར་སྟབས་ཀྱིས་སོན་པ་ཙམ་དུ་ཉེ་བར་གྱུར་ཏོ། །འདི་ལྟར་ཆོས་ཀྱིས་གནས་པར་གྱུར་པས་ས་ཆེན་པོ་འདི་ཡང་གསེག་མ་དང ། གྱོ་མོ་མེད་ཅིང་གསེར་དངུལ་མང་པོ་དང ། ཀུན་
དགའ་ར་བ་དང ། སྐྱེད་མོས་ཚལ་དང ། རྫིང་བུ་དང ། མཚེའུ་དག་གིས་མཛེས་པར་བྱས་པར་གྱུར་ཏོ། །རྒྱལ་པོ་ང་ལས་ནུའི་རྒྱལ་པོའི་ཕོ་བྲང་འཁོར་ནི་གྲོང་ཁྱེར་མི་ཚུགས་པ་ཞེས་བྱ་བར་གྱུར་ཏེ། ཤར་ནུབ་ཏུ་ཆུར་ནི་དཔག་ཚད་བཅུ་གཉིས། ལྷོ་བྱང་གི་ཞེང་དུ་ནི་དཔག་ཚད་བདུན་ཡོད་པར</font><hr>42-1-159b<br><font size=+2>
གྱུར་ཏོ། །དེ་ནི་བསྐལ་པའི་དང་པོ་ལ་བྱུང་བའི་འཁོར་ལོས་སྒྱུར་བའི་རྒྱལ་པོ་རིགས་ཆེན་པོར་གྲགས་པར་སྐྱེས་པའི་རྒྱལ་པོ་རྣམས་ཀྱི་དང་པོའི་གྲོང་ཁྱེར་དུ་གྱུར་པ་སྟེ། འདི་ལྟ་སྟེ་དཔེར་ན་སུམ་ཅུ་རྩ་གསུམ་པའི་ལྷ་རྣམས་ཀྱི་གྲོང་ཁྱེར་ཆེན་པོ་བལྟ་ན་སྡུག་ཅེས་བྱ་བ་ནི་སྟེང་གི་ཕྱོགས་ནས་དྲིལ་བུ་
གཡེར་ཀའི་དྲ་བ་བྲེས་པའི་བར་དུ་རྒྱ་ཆེར་ཏེ། དེ་བཞིན་དུ་རྒྱལ་པོ་ང་ལས་ནུའི་དཔྱིད་གནས་པ་ནི་ཟླ་བ་འཆར་བ་ཞེས་བྱ་བའི་ཁང་བཟངས་བཤམས་པར་གྱུར་ཏོ། །དབྱར་གནས་པ་ནི་བཻ་དཱུརྱའི་སྙིང་པོ་ཞེས་བྱ་བའི་ཁང་བཟངས་བཤམས་པར་གྱུར་ཏེ། འདི་ལྟ་སྟེ་དཔེར་ན་ལྷའི་དབང་པོ་
བརྒྱ་བྱིན་གྱི་རྣམ་པར་རྒྱལ་བའི་ཁང་བཟངས་ལྟ་བུའོ། །རྒྱལ་པོ་ང་ལས་ནུའི་དགུན་གནས་པ་ནི་ཉི་མའི་འོད་ཟེར་ཡང་དག་འཕགས་ཞེས་བྱ་བའི་ཁང་བཟངས་བཤམས་པར་གྱུར་ཏེ། འདི་ལྟ་སྟེ་དཔེར་ན་ལྷའི་དབང་པོ་བརྒྱ་བྱིན་གྱི་རྣམ་པར་རྒྱལ་བའི་ཁང་བཟངས་ལྟ་བུའོ། །རྒྱལ་པོ་
ང་ལས་ནུ་ཁང་བཟངས་ཟླ་བ་འཆར་བར་གནས་པའི་ཚེ་ནི་བཙུན་མོ་དང་བཅས་པར་འདི་ལྟ་སྟེ་དཔེར་ན་ཙན་དན་གྱིས་བསྐུས་པ་བཞིན་དུ་ལུས་བསིལ་བར་གྱུར་ཏོ། །ཁང་བཟངས་བཻ་དཱུརྱའི་སྙིང་པོར་གནས་པའི་ཚེ་ནི་འདི་ལྟ་སྟེ་དཔེར་ན་ཏ་མ་ལའི་ལོ་མས་བསྐུས་པ་བཞིན་དུ་ལུས་དུས་དང་
ལྡན་པར་བདེ་བར་གྱུར་ཏོ། །ཁང་བཟངས་ཉི་མའི་འོད་ཟེར་ཡང་དག་འཕགས་སུ་གནས་པའི་ཚེ་ནི་འདི་ལྟ་སྟེ་དཔེར་ན་ཨ་ག་རུས་བསྐུས་པ་བཞིན་དུ་ལུས་དྲོ་བར་གྱུར་ཏོ། །རྒྱལ་པོ་ཆེན་པོ་རྒྱལ་པོ་ང་ལས་ནུའི་བསམ་པའི་དབང་གིས་ཁང་བཟངས་དེ་དག་ཀྱང་ཉམས་སུ་བདེ་བའི་རེག་པ་
འབྱིན་པར་གྱུར་ཏོ། །བསམ་པའི་དབང་གིས་རླུང་ལྡང་བར་འགྱུར། ཆར་འབབ་པར་འགྱུར། རོལ་མོའི་སྒྲ་འབྱུང་བར་འགྱུར་རོ། །བསམ་པའི་དབང་གིས་སྐྱིད་པ་དང ། ལོངས་སྤྱོད་དང ། ཡོངས་སུ་སྤྱད་པའི་རྣམ་པ་འབྱུང་ངོ ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུ་འདི
སྙམ་དུ་སེམས་ཏེ། ཀྱེ་མ་བདག་གི་ཕོ་བྲང་དུ་ཞག་བདུན་དུ་དབྱིག་གི་ཆར་འབབ་པར་གྱུར་ཅིག་སྙམ་པ་དང ། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུའི་ཕོ་བྲང་དུ་ཞག་བདུན་དུ་དབྱིག་གི་ཆར་བབ་པར་གྱུར་ཏོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུས་ཞག་བདུན་པོ་དེ</font><hr>42-1-160a<br><font size=+2>
འདས་ནས་དབྱིག་གི་ཆར་བབ་པ་དེ་ལ་འདི་སྙམ་དུ་སེམས་ཏེ། ཇི་ཙམ་དུ་ཡོངས་སུ་དག་པའི་ལས་ཀྱི་རྣམ་པར་སྨིན་པས་བསམ་པ་ཡིད་བཞིན་དུ་ཡོངས་སུ་རྫོགས་པ་དམིགས་ཤིང་བསོད་ནམས་དག་ཀྱང་མི་སླུ་བ་འདི་ནི་ངོ་མཚར་རྨད་དུ་བྱུང་ངོ་སྙམ་ནས་དེ་ཡང་འདི་སྙམ་
དུ་སེམས་ཏེ། བདག་གིས་གླིང་ཆེན་པོ་འཛམ་བུའི་གླིང་འབྱོར་ཅིང་རྒྱས་ལ། བདེ་ཞིང་ལོ་ལེགས་པ་དང ། སྐྱེ་བོ་མང་པོ་དང་མིས་གང་བ་ལ་ཡང་དབང་བྱས། བདག་གི་ཁྱིམ་དུ་ནི་ཞག་བདུན་དུ་དབྱིག་གི་ཆར་བབ་ན་ད་ནི་བདག་ནུབ་ཀྱི་བ་ལང་སྤྱོད་ཀྱི་གླིང་དུ་འགྲོའོ་སྙམ་པ་དང ། སེམས་
བསྐྱེད་མ་ཐག་ཏུ་རྒྱལ་པོ་ཆེན་པོ་རྒྱལ་པོ་ང་ལས་ནུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ཏེ། འཛམ་བུའི་གླིང་ནས་ནུབ་ཀྱི་བ་ལང་སྤྱོད་ཀྱི་གླིང་དུ་ཕྱིན་ནས། དེས་དེར་ལོ་བརྒྱ་སྟོང་ཕྲག་མང་པོར་མིའི་ལས་འདས་ཤིང་ལྷ་རྫས་སུ་
མ་གྱུར་པའི་ལོངས་སྤྱོད་དང་ལྡན་པའི་རྒྱལ་པོ་བྱས་སོ། །དེ་ནུབ་ཀྱི་བ་ལང་སྤྱོད་ཀྱི་གླིང་ཆེན་པོ་དེ་ན་གནས་པའི་ཚེ་ཡང་སེམས་བསྐྱེད་མ་ཐག་ཏུ་འཛམ་བུའི་གླིང་དུ་བབ་པ་བཞིན་དུ་ཞག་བདུན་གྱི་བར་དུ་དབྱིག་གི་ཆར་བབ་པར་གྱུར་ཏོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུ་དེ་འདི་སྙམ་དུ་
སེམས་ཏེ། བདག་གིས་འཛམ་བུའི་གླིང་འབྱོར་ཅིང་རྒྱས་པ་ནས་སྐྱེ་བོ་མང་པོ་དང་མིས་གང་བའི་བར་ལ་ནི་དབང་བྱས། བདག་གི་ཁྱིམ་དུ་ཞག་བདུན་དུ་དབྱིག་གི་ཆར་ནི་བབ། བདག་གིས་ནུབ་ཀྱི་བ་ལང་སྤྱོད་ཀྱི་གླིང་ཆེན་པོ་ལ་ཡང་དབང་བྱས་ཏེ། བདག་གི་ཁྱིམ་འདིར་ཡང་ཞག་བདུན་དུ་
དབྱིག་གི་ཆར་བབ་ན་ཤར་གྱི་ལུས་འཕགས་ཞེས་བྱ་བའི་གླིང་ཆེན་པོ་ཡོད་ཀྱིས། བདག་ནི་གླིང་ཆེན་པོ་ཤར་གྱི་ལུས་འཕགས་པོ་ག་ལ་བ་དེར་འགྲོའོ་སྙམ་པ་དང ། སེམས་བསྐྱེད་མ་ཐག་ཏུ་རྒྱལ་པོ་ཆེན་པོ་རྒྱལ་པོ་ང་ལས་ནུ་དེ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་
མངོན་པར་འཕགས་ནས་ཤར་གྱི་ལུས་འཕགས་པོའི་གླིང་ཆེན་པོར་ཕྱིན་པར་གྱུར་ཏེ། དེས་དེར་ཡང་ལོ་བརྒྱ་སྟོང་ཕྲག་མང་པོར་མིའི་ལས་འདས་ཤིང་ལྷ་རྫས་སུ་མ་གྱུར་པའི་ལོངས་སྤྱོད་པ་དང་ལྡན་པར་རྒྱལ་པོ་བྱས་སོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུས་དེར་ཡང་འདི་སྙམ་དུ</font><hr>42-1-160b<br><font size=+2>
བསམས་ཏེ། བདག་གིས་འཛམ་བུའི་གླིང་དང ། ནུབ་ཀྱི་བ་ལང་སྤྱོད་དང ། ཤར་གྱི་ལུས་འཕགས་པོ་ལ་ནི་དབང་བྱས་ན་ད་ནི་བདག་བྱང་གི་སྒྲ་མི་སྙན་གྱི་གླིང་ཆེན་པོར་འགྲོའོ། །དེའི་མི་རྣམས་ནི་ང་ཡིར་བྱ་བ་མེད་ཅིང་ཡོངས་སུ་འཛིན་པ་མེད་མོད་ཀྱི། འོན་ཀྱང་དེར་སོང་སྟེ་རང་གི་དཔུང་གི་
ཚོགས་ལ་རྗེས་སུ་བསྟན་པར་བྱའོ་སྙམ་པ་དང ། སེམས་བསྐྱེད་མ་ཐག་ཏུ་རྒྱལ་པོ་ང་ལས་ནུ་དེ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་འཕགས་ནས་ཤར་གྱི་ལུས་འཕགས་པོའི་གླིང་ཆེན་པོ་ནས་བྱང་གི་སྒྲ་མི་སྙན་གྱི་གླིང་ཆེན་པོར་ཕྱིན་པར་གྱུར་ཏེ། དེས་
དེར་ཡང་མི་རྣམས་ང་ཡིར་བྱ་བ་མེད་ཅིང་ཡོངས་སུ་འཛིན་པ་མེད་པའི་ནང་དུ་ལོ་བརྒྱ་སྟོང་ཕྲག་དུ་མར་བདག་གི་དཔུང་གི་ཚོགས་རྣམས་ལ་རྗེས་སུ་བསྟན་ཏོ། །རྒྱལ་པོ་ཆེན་པོ་དེ་ནས་ལོ་བརྒྱ་སྟོང་ཕྲག་མང་པོ་འདས་པ་ཞིག་ན་རྒྱལ་པོ་ང་ལས་ནུ་དེ་འདི་སྙམ་དུ་སེམས་ཏེ། བདག་གིས་འཛམ་བུའི་གླིང་ལ་ནི་
དབང་བྱས། ཞག་བདུན་དུ་ནི་ཁྱིམ་དུ་དབྱིག་གི་ཆར་བབ། བདག་གིས་ནུབ་ཀྱི་བ་ལང་སྤྱོད་ཀྱི་གླིང་ཆེན་པོ་ལ་ཡང་དབང་བྱས། བདག་གིས་ཤར་གྱི་ལུས་འཕགས་ཀྱི་གླིང་ཆེན་པོ་ལ་ཡང་དབང་བྱས། བདག་གིས་བྱང་གི་སྒྲ་མི་སྙན་གྱི་གླིང་ཆེན་པོ་ལ་ཡང་དབང་བྱས་ན། ད་ནི་སུམ་ཅུ་རྩ་
གསུམ་པ་ཞེས་བྱ་བའི་ལྷ་རི་རབ་ཀྱི་རྩེ་མོ་ལ་འཁོད་པ་ཞིག་ཡོད་ཅེས་གྲག་གིས་སུམ་ཅུ་རྩ་གསུམ་གྱི་གནས་སུ་འགྲོའོ་སྙམ་དུ་བསམས་སོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུས་སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་ནམ་མཁའ་ལ་མངོན་པར་
འཕགས་ནས་རི་རབ་ཀྱི་རྩེ་མོ་ལ་ཕྱིན་པར་གྱུར་ཏོ། །དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཆོས་བཟང་ལྷའི་མདུན་ས་ཞེས་བྱ་བ་ན་འདུས་ཤིང་འཁོད་འཁོད་པ་ལས་ལྷའི་དབང་པོ་བརྒྱ་བྱིན་གྱིས་རྒྱལ་པོ་ང་ལས་ནུ་རྒྱང་རིང་པོ་ནས་འོང་བ་མཐོང་སྟེ། མཐོང་ནས་སྟན་གྱི་ཕྱེད་ལ་བདར་ཏེ་རྒྱལ་པོ་ཆེན་པོ་ཚུར་
སྤྱོན་རྒྱལ་པོ་ཆེན་པོ་བྱོན་པ་ལེགས་སོ། །གང་གི་དུས་ལ་དབབ་པར་ཤེས་ན་སྟན་གྱི་ཕྱེད་ལ་བཞུགས་ཤིག་ཅེས་སྨྲས་པ་དང ། རྒྱལ་པོ་ང་ལས་ནུ་ལྷའི་དབང་པོ་བརྒྱ་བྱིན་གྱི་སྟན་གྱི་ཕྱེད་ལ་འདུག་གོ་།རྒྱལ་པོ་ང་ལས་ནུ་བརྒྱ་བྱིན་གྱི་སྟན་ཕྱེད་ལ་འདུག་མ་ཐག་ཏུ་སུམ་ཅུ་རྩ་གསུམ</font><hr>42-1-161a<br><font size=+2>
པའི་ལྷ་ཐམས་ཅད་ལྷའི་གནས་བཅུས་ཟིལ་གྱིས་གནོན་ཏོ། །བཅུ་གང་ཞེ་ན། ལྷའི་ཚེ་དང ། ལྷའི་གྲགས་པ་དང ། ལྷའི་ཁ་དོག་དང ། ལྷའི་བདེ་བ་དང ། ལྷའི་དབང་ཕྱུག་ལ་དབང་བ་དང ། ལྷའི་གཟུགས་དང ། ལྷའི་སྒྲ་དང ། ལྷའི་དྲི་དང ། ལྷའི་རོ་དང ། ལྷའི་
རེག་དང་།རྣམ་པ་བཅུ་སྟེ། དེ་དག་གིས་ལྷའི་དབང་པོ་བརྒྱ་བྱིན་མ་གཏོགས་པ་ཐམས་ཅད་ཟིལ་གྱིས་མནན་ཏོ། །དེ་ཅིའི་ཕྱིར་ཞེ་ན། མིག་འཛུམས་པ་དང ། མིག་མི་འཛུམས་པ་ཙམ་ལས་ལྷ་རྣམས་ཀྱིས་འདི་ནི་རྒྱལ་པོ་ང་ལས་ནུའོ། །འདི་ནི་ལྷའི་དབང་པོ་བརྒྱ་བྱིན་ནོ་ཞེས་བྱ་བར་ཤེས་པ་
མ་གཏོགས་པར་རྒྱལ་པོ་ང་ལས་ནུ་དེ་དང ། ལྷའི་དབང་པོ་བརྒྱ་བྱིན་གཉིས་ཀྱང་གཟུགས་མཉམ་པར་གྱུར་སྤྱོད་པ་མཉམ་པར་གྱུར། ལོངས་སྤྱོད་མཉམ་པར་གྱུར་ཏེ། རྒྱལ་པོ་ཆེན་པོ་མིར་གྱུར་པ་དང ། ལྷར་གྱུར་པ་གཉིས་ལུས་མཉམ་པར་གྲུབ་པ་དེ་ནི་ངོ་མཚར་ཆེའོ། །རྒྱལ་པོ་ཆེན་པོ་
རྒྱལ་པོ་ང་ལས་ནུས་དེར་ལོ་བརྒྱ་སྟོང་ཕྲག་མང་པོར་སུམ་ཅུ་རྩ་གསུམ་པའི་ལྷའི་ནང་དུ་རྒྱལ་སྲིད་ཀྱི་ཕྱེད་ལ་དབང་བྱས་སོ། །རྒྱལ་པོ་ཆེན་པོ་དེ་ནས་རྒྱལ་པོ་ང་ལས་ནུས་གླིང་ཆེན་པོ་བཞི་པའི་དབང་ཕྱུག་ལ་དབང་བྱས། སུམ་ཅུ་རྩ་གསུམ་པའི་ལྷའི་རྒྱལ་སྲིད་བྱེད་ལ་དབང་བྱས་ཀྱང་དབང་
ཕྱུག་གིས་མ་ངོམས་ནས་འདི་སྙམ་དུ་སེམས་བསྐྱེད་དེ། ཀྱེ་མ་བདག་གིས་སུམ་ཅུ་རྩ་གསུམ་པའི་ལྷའི་རྒྱལ་སྲིད་ཀྱི་དབང་ཕྱུག་ཐམས་ཅད་ལ་དབང་བྱའོ་སྙམ་པ་དང ། སེམས་བསྐྱེད་མ་ཐག་ཏུ་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་སུམ་ཅུ་རྩ་གསུམ་གྱི་གནས་ནས་ཉམས་ཏེ། འཛམ་
བུའི་གླིང་དུ་རྒྱལ་པོའི་སྐྱེད་མོས་ཚལ་མཆོག་ཏུ་ཕྱིན་པར་གྱུར་ཏོ། །དེ་འཛམ་བུའི་གླིང་དུ་གནས་པར་གྱུར་པའི་ཚེ་ཕྱོགས་ཐམས་ཅད་ཀྱང་སྣང་བར་གྱུར་ཏེ། ཉི་མའི་འོད་ཀྱང་ཟིལ་གྱིས་མནན་ནས་འདི་ལྟ་སྟེ་དཔེར་ན་ཟླ་བའི་འོད་ཉི་མས་ཟིལ་གྱིས་མནན་པ་ལྟ་བུའོ། །ཉི་མ་ནམ་མཁའ་ལ་
འདུག་པ་ཡང་ལྷམ་མེ་མ་ཡིན་ཏེ། འདི་ལྟ་སྟེ་དཔེར་ན་ཟླ་བའི་དཀྱིལ་འཁོར་སྟེང་གི་བར་སྣང་ལ་འདུག་པ་ཉི་མས་ཟིལ་གྱིས་ནོན་ན་མི་སྣང་བ་བཞིན་ནོ། །དེ་ནས་གྲོང་ཁྱེར་མི་ཚུགས་པའི་ཕོ་བྲང་དམ་པ་ན་མི་འཁོད་པ་རྣམས་ཀྱིས་རྒྱལ་པོ་དེ་སྐྱེད་མོས་ཚལ་དེར་ཕྱིན་པ་མཐོང་བར་གྱུར་ཏོ། །མཐོང</font><hr>42-1-161b<br><font size=+2>
ནས་ཀྱང་ངོ་མཚར་དུ་གྱུར་ཏེ། དེ་དག་གྲོང་དུ་དོང་ནས་ཀྱེ་གྲོགས་པོ་དག་འདི་ལྟར་ལྷའི་བུ་ཞིག་བར་སྣང་ལས་བབས་ཏེ། རྒྱལ་པོའི་སྐྱེད་མོས་ཚལ་འདིར་ཕྱིན་ཏོ་ཞེས་ཚིག་ཏུ་བརྗོད། སྒྲ་བསྒྲགས་སོ། །རྒྱལ་པོ་ཆེན་པོ་དེ་ནས་ཡུལ་འཁོར་གྱི་མི་དང་རྒྱལ་པོར་བཅས་པས་དེ་སྐད་ཐོས་ནས་
མྱུར་བ་མྱུར་བར་རིངས་པའི་གཟུགས་སུ་གླུ་དང ། རོལ་མོ་དང ། མེ་ཏོག་དང ། སྤོས་དང ། ཕྲེང་བ་དང ། བདུག་སྤོས་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་དང ། བླ་རེ་དག་ཐོགས་ནས་གཙང་སྦྲའི་སྤྱོད་པས་གྲོང་ཁྱེར་དེ་ནས་བྱུང་སྟེ། སྐྱེད་མོས་ཚལ་དེ་
ག་ལ་བ་དེར་དོང་ངོ ། །རྒྱལ་པོ་ཆེན་པོ་རྒྱལ་པོ་ང་ལས་ནུ་དེ་སྐྱེད་མོས་ཚལ་དེར་འདུག་མ་ཐག་ཏུ་ས་ཆེན་པོ་འདི་ཡང་རྣམ་པ་དྲུག་ཏུ་གཡོས་པར་གྱུར་ཏོ། །རྒྱལ་པོ་ཆེན་པོ་དེ་ནས་ཡུལ་འཁོར་གྱི་མི་དང་རྒྱལ་པོར་བཅས་པ་མིའི་དྲི་ཁྱད་པར་དུ་འཕགས་པས་རྒྱལ་པོ་ང་ལས་ནུའི་དྲུང་དུ་དོང་བ་
དང ། རྒྱལ་པོ་ང་ལས་ནུ་ལྷའི་ལོངས་སྤྱོད་ལ་གོམས་པས་མིའི་ལོངས་སྤྱོད་མི་བཟོད་པར་གྱུར་ནས་ས་ལ་བྱིང་ཞིང་མི་གནས་པར་གྱུར་ཏེ། འདི་ལྟ་སྟེ་དཔེར་ན་མར་གྱི་གོང་བུའམ། མར་སར་གྱི་གོང་བུ་བྱེ་མ་ཚ་བ་ལ་བཞག་ན་ཞུ་ཞིང་མི་གནས་པ་དེ་བཞིན་དུ་ཡུལ་འཁོར་གྱི་མི་དང་རྒྱལ་པོར་བཅས་
པས་དེ་བྱིང་བར་གྱུར་པ་མཐོང་ནས་ཁྱོད་སུ་ཞིག་ལགས་ཤེས་དྲིས་སོ། །དེ་ནས་རྒྱལ་པོ་ང་ལས་ནུས་རྒྱལ་པོ་དང ། ཡུལ་འཁོར་གྱི་མིར་བཅས་པ་དེ་དག་ལ་འདི་སྐད་ཅེས་སྨྲས་སོ། །ཁྱེད་ཀྱིས་རྒྱལ་པོ་ང་ལས་ནུ་ཞེས་བྱ་བ་ཞིག་བྱུང་བ་དེ་ཐོས་སམ། དེ་དག་གིས་སྨྲས་པ། བདག་ཅག་
གིས་རྒན་རབས་དག་ལས་རྒྱལ་པོ་ང་ལས་ནུ་ཞེས་བགྱི་བ་ཞིག་ལུས་དེ་ཉིད་ཀྱིས་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་མཐོ་རིས་སུ་བཞུད་དོ་ཞེས་ཐོས་སོ། །རྒྱལ་པོ་ང་ལས་ནུས་དེ་དག་ལ་སྨྲས་པ། གྲོགས་པོ་དག་རྒྱལ་པོ་ང་ལས་ནུ་ཞེས་བྱ་བ་དེ་ནི་ཁོ་བོ་ཡིན་ཏེ། མཐོ་རིས་
ནས་ཉམས་ནས་ལྷུང་བར་གྱུར་ཏོ་ཞེས་སྨྲས་ནས། རྒྱལ་པོ་དང་ཡུལ་འཁོར་གྱི་མིར་བཅས་པ་དེ་དག་གིས་གླུའི་དབྱངས་ཀྱི་ཚིགས་སུ་བཅད་པས་དེ་ལ་འདི་སྐད་ཅེས་སྨྲས་སོ། །བདག་ཅག་རྣམས་ཀྱིས་རྒན་རབས་ལས། །མི་ཡི་བདག་པོ་རྫུ་འཕྲུལ་ཆེ། །མྱ་ངན་བྲལ་ཞིང་གྲགས་ཆེན་ལྡན། །


</font><hr>42-1-162a<br><font size=+2>
ང་ལས་ནུ་ཞེས་བྱ་བ་བྱུང ། །དེ་ནི་ཁྱོགས་དཔུང་བཞོན་དང་བཅས། །གཡོག་བཅས་མཐོ་རིས་འཇིག་རྟེན་བཞུད། །མི་དབང་གཙོ་བོ་ལྷ་གནས་བཞུགས། །ཆོས་ཀྱིས་ས་ཡང་སྐྱོང་ཞེས་ཐོས། །དེ་སྨྲས་མི་ཡི་བདག་པོ་དེ། །མི་རྟག་ཉེན་ཏེ་ཕོངས་པར་གྱུར། །བདེ་བ་སྟོར་ཏེ་
སྡུག་བསྔལ་ཐོབ། །རྒྱལ་པོ་དེ་ནི་ཁོ་བོ་ཡིན། །དེསྨྲས་སྐྱེ་བོ་ཐམས་ཅད་ཀྱིས། །ཐལ་མོ་སྦྱར་ཏེ་རྐང་བར་གཏུགས། །རྒྱལ་པོ་བདག་ཅག་ཅི་བརྗོད་པ། །ཡ་མཚན་ངོ་མཚར་བཀའ་སྩལ་གསོལ། །དེ་སྨྲས་རྒྱལ་པོ་ལྷ་ལས་ཉམས། །སྡུག་བསྔལ་རྙེད་པའི་ངོ་མཚར་ཉོན། །ཡུན་
རིང་བདེ་བར་འདོད་པ་ཡི། །མིས་ནི་རྟག་ཏུ་བག་ཡོད་བྱ། །ང་ལས་ནུ་བ་རྒྱལ་པོའི་མཆོག་།རྒྱལ་པོས་གླིང་བཞི་རབ་བསྟེན་ནས། །འདོད་པའི་ལོངས་སྤྱོད་མཆོག་ལྡན་ཏེ། །འདོད་པས་མ་ངོམས་དེ་འདས་སོ། །དེ་ཡི་ཁྱིམ་དུ་ཞག་བདུན་དུ། །དབྱིག་གི་དྲ་བའི་ཆར་པ་བབ། །གླིང་བཞི་པ་
ལ་རབ་བསྟན་ནས། །འདོད་པས་མ་ངོམས་དེ་བྱིང་ངོ ། །ལྷ་ཡི་དབང་པོ་བརྒྱ་བྱིན་གྱི། །སྟན་ཕྱེད་ལ་ནི་རྒྱལ་པོ་འདུག་།ཀུན་ཏུ་རྟོག་པའི་རྟོག་པས་བརླག་།བདག་འདོད་ང་རྒྱལ་བཅོམ་ནས་རྒུད། །མི་མཁས་འཁོར་བའི་རྒྱ་མཚོ་འདིར། །འགྲོ་བ་དག་ཏུ་ཡང་ནུབ་སྟེ། །འདོད་པ་རབ་ཏུ་
བསྟེན་བྱས་ན། །རྒྱལ་བས་བསྔགས་པའི་ངོམས་མི་རྙེད། །རྨི་ལམ་རྨིས་པའི་ཆུ་ལྟ་བུར། །འཐུངས་ཀྱང་ངོམས་པར་མི་འགྱུར་བ། །དེ་ལྟར་འདོད་པའི་ལོངས་སྤྱོད་རྣམས། །བསྟེན་ན་ངོམས་པར་མི་འགྱུར་རོ། །བློ་གྲོས་ལྡན་པ་གང་དག་གིས། །ཤེས་པས་མུན་པ་རྣམ་བསལ་
ཏེ། །ངོམས་པར་བྱ་ཕྱིར་བཅོམ་ལྡན་གྱི། །འཕགས་པའི་ཤེས་རབ་ཡང་དག་རྟོག་།སྲིད་པ་རྣམ་བཤིག་བློ་གྲོས་ཅན། །རྒ་དང་ཤི་དང་སྐྱེ་ལ་རྟོག་།སྲེད་པ་རབ་ཏུ་སྤངས་ནས་སུ། །སྲིད་པ་སྤངས་ཏེ་ལེན་མི་བྱེད། །ཚོར་བའི་རྣམ་པ་མེ་འདྲར་རིག་།རེག་པའང་མེ་འདྲར་རིག་ནས་ནི། །
ཚོར་བ་འཕགས་པ་མ་ཡིན་དང ། །རེག་པ་དེ་ལ་སྲེད་མི་བྱེད། །རོལ་མོའི་སིལ་སྙན་བརྡུངས་པ་ལྟར། །ཡུལ་དང་དབང་པོ་མི་བྱེད་དེ། །རྒྱལ་བསྟན་བྱེད་པ་དབང་པོ་རྟོགས། །རང་བཞིན་མཐོང་བ་དབང་པོ་འདོར། །སྐྱེ་མཆེད་དྲུག་པོ་ཡོད་མིན་ཡང ། །གཟུགས་དང་འབྲེལ་པར</font><hr>42-1-162b<br><font size=+2>
ཡིད་བསྐྱོད་དོ། །རྣམ་པར་ཤེས་པར་བརྟགས་པའི་ཕྱིར། །ཚོར་བ་ཀུན་ཏུ་རྟོག་ཅེས་བརྗོད། །དེ་ལྟར་རིག་ནས་འཕགས་པ་རྣམས། །སྲིད་པའི་རྒྱུད་ལ་ཡིད་མི་རྟོན། །ཤེས་རབ་འཕགས་པས་ངོམས་གྱུར་ཏེ། །ཤིང་མེད་མེ་བཞིན་ཞི་བར་འགྱུར། །སྲིད་པ་མི་རྟག་བསྟན་བྱས་ཏེ། །
རྒྱལ་པོ་ཡུལ་འཁོར་མིར་བཅས་ལ། །ང་ནུས་དེ་སྐད་ལུང་བསྟན་ནས། །མི་ཡི་བདག་པོ་ནུབ་པར་གྱུར། །རྒྱལ་པོ་ཆེན་པོ་དེའི་ཚེ་དེའི་དུས་ན་རྒྱལ་པོ་ང་ལས་ནུ་ཞེས་བྱ་བ་བྱུང་བ་དེ་གཞན་ཞིག་ཡིན་སྙམ་དུ་དོགས་ཤིང་ཐེ་ཚོམ་ཟའམ། ནེམ་ནུར་དུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་
ཅིའི་ཕྱིར་ཞེ་ན། རྒྱལ་པོ་ཆེན་པོ་ང་ཉིད་དེའི་ཚེ་དེའི་དུས་ན་འཁོར་ལོས་སྒྱུར་བའི་རྒྱལ་པོ་ང་ལས་ནུ་ཞེས་བྱ་བར་གྱུར་ཏེ། རྒྱལ་སྲིད་ཀྱི་དབང་ཕྱུག་རྒྱ་ཆེན་པོ་ལ་དབང་བྱས་ཀྱང་འདོད་པས་མ་ངོམས་བཞིན་དུ་འཆི་བའི་དུས་བྱས་པར་གྱུར་པ་ཡིན་ནོ། །རྒྱལ་པོ་ཆེན་པོ་དེ་ལྟ་བས་ན་དེ་ལྟར་རིག་པར་བྱས་
ལ་དབང་ཕྱུག་གི་དྲེགས་པ་སྤངས་ཏེ་བག་ཡོད་པར་བྱའོ། །བག་ཡོད་པ་ལ་གནས་ཏེ་ཁྱོད་ཀྱིས་དགེ་བའི་རྩ་བ་རྣམས་ཡང་དག་པར་བསྒྲུབ་པར་བྱའོ། །རྒྱལ་པོ་ཆེན་པོ་བག་ཡོད་པ་ལ་མངོན་པར་དགའ་བ་ནི་དོན་འགྲུབ་པར་འགྱུར་གྱིས་རྒྱལ་པོ་ཆེན་པོ་བག་ཡོད་པར་ཁམས་མཉམ་པ་ཉིད་
ཡང་དག་པར་བསྒྲུབ་པར་བྱ་སྟེ། རྒྱལ་པོ་ཆེན་པོ་འདུས་བྱས་ཀྱི་ཁམས་དང ། འདུས་མ་བྱས་ཀྱི་ཁམས་ནི་བུད་མེད་མ་ཡིན། སྐྱེས་པ་མ་ཡིན། འདས་པ་མ་ཡིན། མ་འོངས་པ་མ་ཡིན། ད་ལྟར་བྱུང་བ་མ་ཡིན་གྱིས་རྒྱལ་པོ་ཆེན་པོ་འདི་ལ་ཁྱོད་ཀྱིས་སེམས་ངེས་པར་གཞག་ཅིང་གཞན་གྱི་
དྲིང་མི་འཇོག་པར་བྱའོ། །རྒྱལ་པོ་ཆེན་པོ་སྔོན་བྱུང་བ་འདས་པའི་དུས་ན་རྒྱལ་པོ་མུ་ཁྱུད་ཅེས་བྱ་བ་ཆོས་དང་ལྡན་པ་ཆོས་ཀྱི་རྒྱལ་པོ་བག་ཡོད་པ་ལྷུར་ལེན་པ་ཞིག་བྱུང་སྟེ། དེ་བྱ་བ་གང་དང་གང་རྩོམ་ཡང་དེ་དང་དེ་ཐམས་ཅད་ལ་བག་ཡོད་པར་སྤྱོད་ཅིང་བྱེད་དོ། །རྒྱལ་པོ་ཆེན་པོ་རྒྱལ་པོ་མུ་ཁྱུད་དེ་
ཆོས་འདི་དག་ཐམས་ཅད་ནི་དུས་གསུམ་མཉམ་པ་ཉིད་ཀྱིས་མཉམ་པ་སྟེ། འདས་པའི་དུས་ན་ཡང་ཆོས་ཐམས་ཅད་རང་བཞིན་དང་བྲལ་བའོ། །མ་འོངས་པ་དང ། ད་ལྟར་བྱུང་བའི་དུས་ན་ཡང་ཆོས་ཐམས་ཅད་རང་བཞིན་དང་བྲལ་བའོ་ཞེས་དུས་གསུམ་མཉམ་པ་ཉིད་ལ་བརྩོན་པར་གྱུར་ཏོ། །


</font><hr>42-1-163a<br><font size=+2>
དེས་ཆོས་ཐམས་ཅད་དུས་གསུམ་མཉམ་པ་ཉིད་དུ་མཐོང་བས་ཆོས་ཐམས་ཅད་ལ་མངོན་པར་ཞེན་པ་མེད་པར་གྱུར་ཏེ། དེས་སེམས་ཕྱིན་ཅི་ལོག་བཞིས་སེམས་ཕྱིན་ཅི་ལོག་ཏུ་གྱུར་ཅིང་མི་སྡུག་པ་ལ་སྡུག་པར་འདུ་ཤེས་པ་དང ། སྡུག་བསྔལ་བ་ལ་བདེ་བར་འདུ་ཤེས་
པ་དང ། མི་རྟག་པ་ལ་རྟག་པར་འདུ་ཤེས་པ་དང ། བདག་མེད་པ་ལ་བདག་ཏུ་འདུ་ཤེས་པ་དག་མཐོང་ནས་དེ་འདི་སྙམ་དུ་སེམས་ཏེ། འདི་ལྟར་སེམས་ཅན་འདི་དག་ནི་ཆོས་ཐམས་ཅད་སྟོང་པར་མ་མཐོང་བས། །ཀྱེ་མ་ཀྱི་ཧུད་འཇིག་རྟེན་གནས་པ་འདི་ནི་ཕུང་ངོ ། །ཀྱེ་མ་འཇིག་
རྟེན་གནས་པ་འདི་ནི་རྣམ་པར་ཕུང་ངོ་སྙམ་ནས་དེས་འདི་སྙམ་དུ་བསམས་ཏེ། བདག་གིས་སེམས་ཅན་འདི་དག་བསྡུ་བའི་དངོས་པོ་བཞིས་བསྡུ་བར་བྱའོ། །བདག་གིས་དེ་དག་བསྡུ་བའི་དངོས་པོ་བཞིས་བསྡུས་ན་ཆོས་ལ་སྦྱར་བ་ལ་དབང་དུ་འགྱུར་རོ་སྙམ་མོ། །རྒྱལ་པོ་ཆེན་པོ་དེ་ནས་རྒྱལ་
པོ་མུ་ཁྱུད་ཀྱིས་ཐབས་མཁས་པ་སྔོན་དུ་བཏང་སྟེ་སེམས་ཅན་རྣམས་བསྡུ་བའི་དངོས་པོ་བཞིས་བསྡུས་ནས་དུས་གསུམ་མཉམ་པ་ཉིད་དུ་གདམས་ངག་གིས་བསྟན་ཏེ། ཀྱེ་སེམས་ཅན་དག་ཆོས་ཐམས་ཅད་ནི་རང་བཞིན་གྱིས་སྟོང་པ་སྟེ། ཀྱེ་སེམས་ཅན་དག་ཆོས་གང་ལ་རང་བཞིན་མེད་པ་དེ་ནི་འདས་
པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། རང་བཞིན་མེད་པའི་ཕྱིར་ཏེ། འདས་པ་ཞེས་གདགས་པར་བྱ་བ་མ་ཡིན་མ་འོངས་པ་དང ། ད་ལྟར་བྱུང་བ་ཞེས་གདགས་པར་བྱ་བ་མ་ཡིན་ནོ། །རྒྱལ་པོ་ཆེན་པོ་དེ་ནས་སེམས་
ཅན་དེ་དག་རྒྱལ་པོ་མུ་ཁྱུད་དེས་དེ་ལྟར་དུས་གསུམ་མཉམ་པ་ཉིད་ལ་བསྐུལ་བས་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །དེའི་ཚེ་སུམ་ཅུ་རྩ་གསུམ་པའི་ལྷ་རྣམས་ཆོས་བཟང་ལྷའི་མདུན་ས་ན་འདུས་ཤིང་འཁོད་པའི་ནང་དུ་བར་སྐབས་སུ་འདི་
ལྟ་བུའི་གཏམ་བརྗོད་པ་བྱུང་སྟེ། འདི་ལྟར་ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ལ་ཐབས་མཁས་པས་ཕྱིན་ཅི་ལོག་མེད་པ་ཡང་དག་པར་སྟོན་པ་ཆོས་ཅན་ཆོས་ཀྱི་རྒྱལ་པོ་ཐབས་མཁས་པ་དང་ལྡན་པ་མུ་ཁྱུད་འདི་སུ་དག་གི་རྒྱལ་པོ་ཡིན་པའི་མི་རྣམས་ནི་ཀྱེ་མའོ་རྙེད་པ་དང་ལྡན་པ་སྟེ།


</font><hr>42-1-163b<br><font size=+2>
ཀྱེ་མ་མི་རྣམས་ནི་རྙེད་པ་ལེགས་པར་རྙེད་པའོ་ཞེས་ཟེར་བར་གྱུར་ཏོ། །དེ་ནས་ལྷའི་དབང་པོ་བརྒྱ་བྱིན་ཆོས་བཟང་ལྷའི་མདུན་ས་ག་ལ་བ་དེར་སོང་སྟེ་ཕྱིན་ནས་རང་གི་སྟན་ལ་འདུག་སྟེ་སུམ་ཅུ་རྩ་གསུམ་པའི་ལྷ་རྣམས་ལ་སྨྲས་པ། ཁྱེད་ད་ལྟར་འདི་ན་འཁོད་པ་རྣམས་གཏམ་ཅི་ཞིག་བྱེད་
བྱེད། དེ་སྐད་ཅེས་སྨྲས་པ་དང ། སུམ་ཅུ་རྩ་གསུམ་པའི་ལྷ་རྣམས་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ལྷའི་དབང་པོ་བདག་ཅག་ཆོས་བཟང་ལྷའི་མདུན་ས་འདི་ན་མཆིས་པའི་ཚེ་བར་སྐབས་སུ་འདི་ལྟ་བུའི་གཏམ་བརྗོད་པ་བྱུང་སྟེ། འདི་ལྟར་
ཕྱིན་ཅི་ལོག་ཏུ་གྱུར་པའི་སེམས་ཅན་རྣམས་ལ་ཐབས་མཁས་པས་གང་འདི་ཆོས་ཐམས་ཅད་རང་བཞིན་མེད་པའོ་ཞེས་ཕྱིན་ཅི་མ་ལོག་པར་སྟོན་པ་ཆོས་ཅན་ཆོས་ཀྱི་རྒྱལ་པོ་ཐབས་མཁས་པ་དང་ལྡན་པ་མུ་ཁྱུད་འདི་སུ་དག་གི་རྒྱལ་པོ་ཡིན་པའི་མི་རྣམས་ནི་ཀྱེ་མའོ་རྙེད་པ་དང་ལྡན་པ་སྟེ། 
ཀྱེ་མའོ་མི་རྣམས་ནི་རྙེད་པ་ལེགས་པར་རྙེད་པའོ་ཞེས་བགྱིས་སོ། །དེ་སྐད་ཅེས་སྨྲས་པ་དང ། ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་དེ་དག་ལ་འདི་སྐད་ཅེས་སྨྲས་སོ། །ཀྱེ་གྲོགས་པོ་དག་རྒྱལ་པོ་མུ་ཁྱུད་ཅེས་བྱ་བ་དེ་ནི་ཐབས་ལ་མཁས་པ་བསམ་གྱིས་མི་ཁྱབ་
པ་དང་ལྡན་པ་ཡིན་ན་རྒྱལ་པོ་མུ་ཁྱུད་དེ་འདིར་འོངས་ནས་མཐོང་བར་ཁྱེད་འདོད་དམ་མི་འདོད། སུམ་ཅུ་རྩ་གསུམ་པའི་ལྷ་རྣམས་ཀྱིས་སྨྲས་པ། ལྷའི་དབང་པོ་མུ་ཁྱུད་དེ་འདིར་མཆིས་ཏེ་མཐོང་བར་བདག་ཅག་ཀྱང་འཚལ་ལོ། །དེ་ནས་ལྷའི་དབང་པོ་བརྒྱ་བྱིན་གྱིས་ཁ་ལོ་
སྒྱུར་བ་མ་ཏ་ལི་ལ་སྨྲས་པ། མ་ཏ་ལི་ཚུར་ཤོག་།ཁྱོད་ལྷའི་ཤིང་རྟ་ཅང་ཤེས་རྩིབས་སྟོང་དང་ལྡན་པ་ཁྲིད་ལ་རྒྱལ་པོ་མུ་ཁྱུད་ག་ལ་བ་དེར་སོང་སྟེ། རྒྱལ་པོ་མུ་ཁྱུད་ལ་འདི་སྐད་གྱིས་ཤིག་།རྒྱལ་པོ་ཆེན་པོ་སུམ་ཅུ་རྩ་གསུམ་པའི་ལྷ་རྣམས་ཀྱི་ཤིང་རྟ་ཅང་ཤེས་རྩིབས་སྟོང་
དང་ལྡན་པ་འདི་བཀྲི་སྟེ་མཆིས་ན་རྒྱལ་པོ་ཆེན་པོ་ཐགས་ཐོགས་མ་མཆིས་པར་འདི་ལ་བཅིབས་སུ་གསོལ། སུམ་ཅུ་རྩ་གསུམ་པའི་ལྷ་རྣམས་ནི་ཁྱོད་མཐོང་བར་དགའོ་ཞེས་གྱིས་ལ་ཤིང་རྟ་ལ་ཞོན་པ་དང་འདི་སྐད་ཅེས་གྱིས་ཤིག་།རྒྱལ་པོ་ཆེན་པོ་ལམ་གང་ནས་གཤེགས</font><hr>42-1-164a<br><font size=+2>
པར་བགྱི། གང་གིས་ཕྱིན་ཅི་ལོག་ཏུ་གྱུར་པའི་ཕྱིན་ཅི་ལོག་གི་ས་ནས་བཞུད་དམ། ཕྱིན་ཅི་ལོག་མ་མཆིས་པ་རྣམས་ཀྱི་ཕྱིན་ཅི་ལོག་མ་མཆིས་པའི་ས་ནས་བཞུད་ཅེས་གྱིས་ཤིག་།ལེགས་སོ་ཞེས་སྨྲས་ནས། ཁ་ལོ་སྒྱུར་བ་མ་ཏ་ལིས་ལྷའི་དབང་པོ་བརྒྱ་བྱིན་གྱི་
ལྟར་མཉན་ནས་བབས་ཏེ་ཇི་སྐད་བསྒོ་བ་བཞིན་རྒྱལ་པོ་མུ་ཁྱུད་ལ་དེ་སྐད་ཅེས་སྨྲས་སོ། །དེ་སྐད་ཅེས་སྨྲས་པ་དང ། རྒྱལ་པོ་མུ་ཁྱུད་ཀྱིས་ཁ་ལོ་སྒྱུར་བ་མ་ཏ་ལི་ལ་འདི་སྐད་ཅེས་སྨྲས་སོ། །མ་ཏ་ལི་དེ་ལྟ་བས་ན་ལམ་དེ་གཉི་ག་ནས་འདོང་ངོ་ཞེས་བྱས་པ་དང ། ཁ་ལོ་སྒྱུར་བ་མ་ཏ་ལིས་རྒྱལ་པོ་མུ་
ཁྱུད་ཕྱིན་ཅི་ལོག་ཏུ་གྱུར་པ་རྣམས་ཀྱི་ཕྱིན་ཅི་ལོག་གི་ས་དང ། ཕྱིན་ཅི་ལོག་མེད་པ་རྣམས་ཀྱི་ཕྱིན་ཅི་ལོག་མེད་པའི་ས་དེ་གཉི་ག་ནས་དྲངས་ཏེ་དོང་ངོ ། །རྒྱལ་པོ་ཆེན་པོ་དེ་ནས་རྒྱལ་པོ་མུ་ཁྱུད་ཀྱིས་ཁ་ལོ་སྒྱུར་བ་མ་ཏ་ལི་ལ་སྨྲས་པ། མ་ཏ་ལི་དེ་བས་ན་ཕྱིན་ཅི་ལོག་ཏུ་གྱུར་པའི་ས་བལྟས་ཡུད་ཙམ་ཞིག་ཤིང་
རྟ་སྡོད་དུ་ཆུག་ཤིག་།དེ་ནས་ཁ་ལོ་སྒྱུར་བ་མ་ཏ་ལིས་ཤིང་རྟ་སྡོད་དུ་འཇུག་པའི་ཡུན་ཇི་སྲིད་པ་དེ་ཉིད་ཀྱི་བར་སྐབས་སུ་རྒྱལ་པོ་མུ་ཁྱུད་ཀྱིས་སྲོག་ཆགས་བྱེ་བ་ཕྲག་བརྒྱད་ཅུ་དེ་ཁོ་ན་ངེས་པར་བསྟན་པའི་ཏིང་ངེ་འཛིན་ལ་བཀོད་པར་གྱུར་ཏེ། འདི་ལྟར་བག་ཡོད་པ་དང ། མངོན་པར་ཤེས་པས་རྣམ་པར་རྩེ་
བའི་ཕྱིར་རོ། །དེ་དག་གིས་ཀྱང་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །ཁ་ལོ་སྒྱུར་བ་མ་ཏ་ལིས་ནི་རྒྱལ་པོ་མུ་ཁྱུད་ཀྱིས་ལས་ཅི་བྱས་པ་ཤེས་པར་མ་གྱུར་ཏོ། །དེ་ནས་ཁ་ལོ་སྒྱུར་བ་མ་ཏ་ལིས་དེ་བཞིན་དུ་དྲངས་ཏེ། རྒྱལ་པོ་མུ་ཁྱུད་དང་རི་རབ་ཀྱི་རྩེ་མོ་ལ་ཕྱིན་ཏོ། །དེ་ནས་རྒྱལ་པོ་མུ་ཁྱུད་ཀྱིས་
རྒྱང་རིང་པོ་ནས་ནགས་ཚལ་སྟུག་པོ་རྣམ་པ་ཐམས་ཅད་དུ་སྔོ་བ་མཐོང་སྟེ་མཐོང་ནས་ཁ་ལོ་སྒྱུར་བ་མ་ཏ་ལི་ལ་འདི་སྐད་ཅེས་སྨྲས་སོ། །མ་ཏ་ལི་ནགས་ཚལ་སྟུག་པོ་འདི་ནི་ཐེ་ཚོམ་མེད་པར་ཕྱིན་ཅི་ལོག་མེད་པའི་སེམས་ཅན་རྣམས་ཀྱི་གནས་ཡིན་ནོ། །མ་ཏ་ལིས་སྨྲས་པ། རྒྱལ་པོ་ཆེན་པོ་འདི་ནི་སུམ་ཅུ་རྩ་
གསུམ་པའི་ལྷ་རྣམས་ཀྱི་ཆོས་བཟང་ལྷའི་མདུན་ས་ལགས་ཏེ། སུམ་ཅུ་རྩ་གསུམ་པའི་ལྷ་རྣམས་ཀྱང་འདིར་འདུས་ཀྱིས་རྒྱལ་པོ་ཆེན་པོ་ཐགས་ཐོགས་མ་མཆིས་པར་བཞུད་ཅིག་།སུམ་ཅུ་རྩ་གསུམ་པའི་ལྷ་རྣམས་ནི་ཁྱོད་མཐོང་བར་འཚལ་ལོ། །རྒྱལ་པོ་ཆེན་པོ་དེ་ནས་རྒྱལ་པོ་མུ་ཁྱུད་དེ་ཐགས</font><hr>42-1-164b<br><font size=+2>
ཐོགས་མེད་པར་ནང་དུ་སོང་བ་དང ། ལྷའི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་རྒྱང་རིང་པོ་ནས་འོང་བ་མཐོང་ངོ ། །མཐོང་ནས་སྟན་གྱི་ཕྱེད་ལ་བདར་ཏོ། །དེ་ནས་རྒྱལ་པོ་མུ་ཁྱུད་ཀྱང་བརྒྱ་བྱིན་གྱི་སྟན་ཕྱེད་ལ་འདུག་གོ་།དེ་ནས་ལྷའི་དབང་པོ་བརྒྱ་བྱིན་གྱིས་རྒྱལ་པོ་མུ་ཁྱུད་སྟན་ལ་འདུག་པར་ཤེས་
ནས་ལེགས་པར་ཤིན་དུ་དགའ་བར་བྱས་ཏེ། རྒྱལ་པོ་ཆེན་པོ་ཁྱོད་ཀྱིས་དེ་ལྟར་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་འཇིག་རྟེན་དུ་བཞག་པ་ནི་ཁྱོད་ཀྱིས་རྙེད་པ་ལེགས་པར་རྙེད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པའི་ལྷ་རྣམས་ལ་སྨྲས་པ། ཀྱེ་གྲོགས་པོ་དག་།
རྒྱལ་པོ་མུ་ཁྱུད་འདི་ནི་ཐབས་མཁས་པ་བསམ་གྱིས་མི་ཁྱབ་པ་དང་ལྡན་པ་སྟེ། འདི་ལྟར་སྐད་ཅིག་ཙམ་ལ་སྲོག་ཆགས་བྱེ་བ་ཕྲག་བརྒྱད་ཅུ་སངས་རྒྱས་ཀྱི་ཆོས་ལ་བཏུལ་བར་གྱུར་ཏོ། །དེ་ནས་རྒྱལ་པོ་མུ་ཁྱུད་ཀྱིས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ལྷའི་དབང་པོ་བདག་ནི་ཕྱིར་འཛམ་བུའི་གླིང་
དུ་འགྲོ་བར་འདོད་དོ། །དེ་ཅིའི་ཕྱིར་ཞེ་ན། བདག་དེར་སོང་སྟེ། དེ་བཞིན་གཤེགས་པའི་བསྟན་པ་ཡོངས་སུ་གཟུང་བར་བྱའོ། །བརྒྱ་བྱིན་གྱིས་དེ་ལ་སྨྲས་པ། རྒྱལ་པོ་ཆེན་པོ་ཁྱོད་གང་གི་དུས་ལ་དབབ་པར་མཁྱེན་ན་བཞུད་ཅིག་།དེ་ནས་རྒྱལ་པོ་མུ་ཁྱུད་དེ་ཕྱིར་འཛམ་བུའི་གླིང་དུ་ཕྱིན་ནས་སྙིང་རྗེ་ཆེན་པོ་དང་
ལྡན་ཞིང་ཐབས་མཁས་པ་ལ་ཤིན་དུ་བསླབས་པས་སེམས་ཅན་བྱེ་བ་ཕྲག་དཔག་ཏུ་མེད་པ་དག་སངས་རྒྱས་ཀྱི་བསྟན་པ་ལ་བཏུལ་བར་གྱུར་ཏོ། །རྒྱལ་པོ་ཆེན་པོ་དེའི་ཚེ་དེའི་དུས་ན་རྒྱལ་པོ་མུ་ཁྱུད་ཅེས་བྱ་བ་བྱུང་བ་དེ་གཞན་ཞིག་ཡིན་པ་སྙམ་དུ་ཐེ་ཚོམ་འམ། ནེམ་ནུར་ཟ་ན། རྒྱལ་པོ་ཆེན་པོ་ཁྱོད་ཀྱིས་དེ་
ལྟར་མི་བལྟའོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ང་ཉིད་དེའི་ཚེ་དེའི་དུས་ན་རྒྱལ་པོ་མུ་ཁྱུད་ཅེས་བྱ་བར་གྱུར་ཏོ། །རྒྱལ་པོ་ཆེན་པོ་འདི་ལྟར་རྒྱལ་པོ་མུ་ཁྱུད་ལྷའི་དབང་པོ་བརྒྱ་བྱིན་གྱི་སྟན་ཕྱེད་ལ་དགའ་བ་མེད་པས་མུ་ཁྱུད་ཀྱི་བག་ཡོད་པའི་སྟོབས་བསྐྱེད་པ་ལ་ལྟོས། །རྒྱལ་པོ་ཆེན་པོ་དེ་ལྟ་བས་ན་ཁྱོད་ཀྱིས་
བག་ཡོད་པར་སངས་རྒྱས་ཀྱི་ཆོས་རྣམས་ལ་བརྩོན་པར་བྱའོ། །རྒྱལ་པོ་ཆེན་པོ་སངས་རྒྱས་ཀྱི་ཆོས་དེ་དག་ཀྱང་གང་ཞེ་ན། རྒྱལ་པོ་ཆེན་པོ་ཆོས་ཐམས་ཅད་ནི་སངས་རྒྱས་ཀྱི་ཆོས་སོ། །དེ་སྐད་ཅེས་བཀའ་སྩལ་པ་དང ། རྒྱལ་པོ་ཟས་གཙང་མས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ</font><hr>42-1-165a<br><font size=+2>
ལྡན་འདས་དེའི་སླད་དུ་གལ་ཏེ་ཆོས་ཐམས་ཅད་སངས་རྒྱས་ཀྱི་ཆོས་ལགས་ན་དེ་ལྟ་ན་ནི་སེམས་ཅན་ཐམས་ཅད་ཀྱང་སངས་རྒྱས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་གང་དག་ཕྱིན་ཅི་མ་ལོག་པ་དེ་དག་ནི་སངས་རྒྱས་སོ། །རྒྱལ་པོ་ཆེན་
པོ་སངས་རྒྱས་ཞེས་བྱ་བ་དེ་ནི་དེ་ཁོ་ན་མཐོང་བའི་ཚིག་བླ་དགས་སོ། །དེ་ཁོ་ན་མཐོང་བ་ཞེས་བྱ་བ་དེ་ནི་ཡང་དག་པའི་མཐའི་ཚིག་བླ་དགས་སོ། །ཡང་དག་པའི་མཐའ་ཞེས་བྱ་བ་དེ་ནི་ཆོས་ཀྱི་དབྱིངས་ཀྱི་ཚིག་བླ་དགས་སོ། །རྒྱལ་པོ་ཆེན་པོ་ཆོས་ཀྱི་དབྱིངས་ཞེས་བྱ་བ་དེ་ནི་གཞན་དུ་ན་མིང་ཙམ་འམ། བརྡ་
ཙམ་འམ། ཐ་སྙད་ཙམ་འམ། ཀུན་རྫོབ་ཙམ་འམ། བརྗོད་པ་ཙམ་འམ། གདགས་པ་ཙམ་མ་གཏོགས་པར་བསྟན་པར་མི་ནུས་སོ། །རྒྱལ་པོ་ཆེན་པོ་ཆོས་ཐམས་ཅད་སྐྱེ་བ་མེད་པ་འདི་ནི་གཟུངས་ཀྱི་སྒོ་སྟེ། དེ་ཅིའི་ཕྱིར་ཞེ་ན། དེ་ལ་ནི་ཆོས་ཐམས་ཅད་མི་གཡོ་མི་འགུལ་ཞིང་རློམ་སེམས་མེད་པས་དེའི་
ཕྱིར་དེ་ནི་གཟུངས་ཀྱི་སྒོའོ། །རྒྱལ་པོ་ཆེན་པོ་ཆོས་ཐམས་ཅད་འགག་པ་མེད་པ་དེ་ནི་གཟུངས་ཀྱི་སྒོ་སྟེ། དེ་ཅིའི་ཕྱིར་ཞེ་ན། དེ་ལ་ནི་ཆོས་ཐམས་ཅད་མི་གཡོ་མི་འགུལ་ཞིང་རློམ་སེམས་མེད་པས་དེའི་ཕྱིར་དེ་ནི་གཟུངས་ཀྱི་སྒོའོ། །དེ་བཞིན་དུ་ཆོས་ཐམས་ཅད་མཚན་ཉིད་མེད་པ་དང ། མཚན་མ་མེད་པ་དང ། 
མ་སྐྱེས་པ་དང ། རང་བཞིན་མེད་པ་དང ། རྣམ་པར་རིག་པ་མེད་པ་དང ། མ་བྱས་པ་དང ། མངོན་པར་འདུས་མ་བྱས་པ་དང ། འོང་བ་མེད་པ་དང ། འགྲོ་བ་མེད་པ་དང ། སེམས་ཅན་མེད་པ་དང ། སྲོག་མེད་པ་དང ། གསོ་བ་མེད་པ་དང ། གང་ཟག་མེད་པ་དང ། སྤྲོས་པ་མེད་པ་དང ། མཚན་མ་མེད་
པ་དང ། བཏགས་པ་མེད་པ་དང ། ཀུན་ནས་དཀྲིས་པ་མེད་པ་དང ། བག་ལ་ཉལ་མེད་པ་དང ། ཀུན་ནས་ཉོན་མོངས་པར་གྱུར་པ་མེད་པ་དང ། རྣམ་པར་བྱང་བ་མེད་པ་དང ། རྗེས་སུ་ཆགས་པ་མེད་པ་དང ། ཁོང་ཁྲོ་བ་མེད་པ་དང ། བཅིངས་པ་མེད་པ་དང ། གྲོལ་བ་མེད་པ་དང ། འགྲོ་བ་མེད་པ་དང ། 
རྒྱུག་པ་མེད་པ་དང ། ལྡོག་པ་མེད་པ་དང ། དམའ་བ་མེད་པ་དང ། གནས་པ་མེད་པ་དང ། འདུག་པ་མེད་པ་དང ། མཉམ་པར་བཞག་པ་མེད་པ་དང ། ནོར་བ་མེད་པ་དང ། ཤེས་པ་པོ་མེད་པ་དང ། རྣམ་པར་ཤེས་པ་པོ་མེད་པ་དང ། མཐོང་བ་པོ་མེད་པ་དང ། མི་མཐོང་བ་མེད་པ་དང ། ཚུལ་ཁྲིམས</font><hr>42-1-165b<br><font size=+2>
མེད་པ་དང ། ཚུལ་ཁྲིམས་མ་ཡིན་པ་མེད་པ་དང ། འགྱོད་པ་མེད་པ་དང ། མི་འགྱོད་པ་མེད་པ་དང ། མཆོག་ཏུ་དགའ་བ་མེད་པ་དང ། མཆོག་ཏུ་མི་དགའ་བ་མེད་པ་དང ། དགའ་བ་མེད་པ་དང ། མི་དགའ་བ་མེད་པ་དང ། ཤིན་ཏུ་སྦྱངས་པ་མེད་པ་དང ། ཤིན་ཏུ་མ་སྦྱངས་
པ་མེད་པ་དང ། བདེ་བ་མེད་པ་དང ། མི་བདེ་བ་མེད་པ་དང ། ཏིང་ངེ་འཛིན་མེད་པ་དང ། ཏིང་ངེ་འཛིན་མ་ཡིན་པ་མེད་པ་དང ། ཡང་དག་པ་ཇི་ལྟ་བ་བཞིན་མེད་པ་དང ། ལོག་པ་མེད་པ་དང ། ཡིད་བྱུང་བ་མེད་པ་དང ། ཡིད་མ་བྱུང་བ་མེད་པ་དང ། འདོད་ཆགས་དང་བྲལ་བ་མེད་པ་དང ། 
འདོད་ཆགས་དང་མ་བྲལ་བ་མེད་པ་དང ། ལྟ་བ་མེད་པ་དང ། ལྟ་བ་མ་ཡིན་པ་མེད་པ་དང ། རྣམ་པར་གྲོལ་བ་མེད་པ་དང ། རྣམ་པར་མ་གྲོལ་བ་མེད་པ་དང ། ཤེས་པ་མེད་པ་དང ། མི་ཤེས་པ་མེད་པ་དང ། མཐོང་བ་མེད་པ་དང ། མ་མཐོང་བ་མེད་པ་དང ། ལས་མེད་པ་དང ། རྣམ་
པར་སྨིན་པ་མེད་པ་དང ། ཚུལ་བཞིན་མེད་པ་དང ། ཚུལ་བཞིན་མ་ཡིན་པ་མེད་པ་དང ། རྣམ་པའི་སྒོ་བདུན་ཅུ་པོ་དེ་དག་གིས་རྒྱལ་པོ་ཆེན་པོ་ཆོས་ཐམས་ཅད་ལ་འཇུག་པར་བྱའོ། །རྒྱལ་པོ་ཆེན་པོ་གཟུགས་ཀྱི་རང་བཞིན་ནི་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་དེ་བཞིན་དུ་ཚོར
བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་རང་བཞིན་ནི་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་གཟུགས་བརྙན་གྱི་གཟུགས་ཀྱི་རང་བཞིན་ནི་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་དེ་བཞིན་དུ་གཟུགས་ཀྱི་རང་བཞིན་དང ། 
ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་རང་བཞིན་ཡང་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་བྲག་ཅའི་སྒྲའི་རང་བཞིན་ནི་མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་
པར་ཤེས་པའི་རང་བཞིན་ཡང་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་སྨིག་རྒྱུའི་ཆུའི་རང་བཞིན་ནི་མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་རང་བཞིན་ཡང་མ་བྱུང་མི་འབྱུང་ད</font><hr>42-1-166a<br><font size=+2>
ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་དབུ་བ་རྡོས་པ་ནི་སྙིང་པོ་མེད་དེ། མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་རྨི་ལམ་གྱི་
ཡུལ་གྱི་བཟང་མོ་ནི་མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་རྨི་ལམ་གྱི་མོ་ཤམ་གྱི་བུའི་སྐྱེ་བ་ནི་མ་བྱུང་མི་འབྱུང་ད་ལྟར་ཡང་མེད་དོ། །དེ་བཞིན་དུ་གཟུགས་
ཀྱི་རང་བཞིན་ནས་རྣམ་པར་ཤེས་པའི་རང་བཞིན་གྱི་བར་དུ་མ་བྱུང་མི་འབྱུང་ད་ལྟར་ཡང་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་ནམ་མཁའ་ལ་གནས་མེད་དོ། །དེ་བཞིན་དུ་གཟུགས་ནས་རྣམ་པར་ཤེས་པའི་བར་དུ་གནས་མེད་དོ། །རྒྱལ་པོ་ཆེན་པོ་གཟུགས་ལ་ནི་སྐྱེ་བ་མེད་དོ། །དེ་བཞིན་དུ་རྣམ་པར་
ཤེས་པའི་བར་དུ་སྐྱེ་བ་མེད་དོ། །རྒྱལ་པོ་ཆེན་པོ་གཟུགས་ལ་ནི་འགག་པ་མེད་དོ། །དེ་བཞིན་དུ་རྣམ་པར་ཤེས་པའི་བར་དུ་འགག་པ་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་མྱ་ངན་ལས་འདས་པའི་དབྱིངས་ལ་སྐྱེ་བའམ་འགག་པ་མེད་དོ། །དེ་བཞིན་དུ་གཟུགས་ནས་རྣམ་པར་ཤེས་པའི་བར་ལ་སྐྱེ་བ་
འམ་འགག་པ་མེད་དོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་ཆོས་ཀྱི་དབྱིངས་ལ་སྐྱེ་བའམ་འགག་པ་མེད་དེ། དེ་བཞིན་དུ་གཟུགས་ནས་རྣམ་པར་ཤེས་པའི་བར་ལ་སྐྱེ་བའམ་འགག་པ་མེད་དོ། །རྒྱལ་པོ་ཆེན་པོ་འདི་དག་ནི་དེ་བཞིན་གཤེགས་པའི་སྤྱོད་ཡུལ་ཏེ། བསམ་གྱིས་མི་ཁྱབ་པའི་སྤྱོད་ཡུལ་ལོ། །
བྱིས་པ་སོ་སོའི་སྐྱེ་བོ་ཐམས་ཅད་དང་ཐུན་མོང་མ་ཡིན་པའི་སྤྱོད་ཡུལ་ཏེ། ཉན་ཐོས་དང ། རང་སངས་རྒྱས་ཐམས་ཅད་དང་ཐུན་མོང་མ་ཡིན། ཕྲི་བ་མ་ཡིན། བསྣན་པ་མ་ཡིན། ཐོབ་པ་མ་ཡིན། སྟོར་བ་མ་ཡིན། མངོན་པར་རྫོགས་པར་སངས་རྒྱས་པ་མ་ཡིན། མངོན་པར་རྫོགས་པར་སངས་མ་རྒྱས་
པ་མ་ཡིན། མངོན་པར་ཤེས་པ་མ་ཡིན། མངོན་པར་མ་ཤེས་པ་མ་ཡིན། ཡོངས་སུ་ཤེས་པ་མ་ཡིན། ཡོངས་སུ་མ་ཤེས་པ་མ་ཡིན། སྤངས་པ་མ་ཡིན། མ་སྤངས་པ་མ་ཡིན། བསྒོམས་པ་མ་ཡིན། མ་བསྒོམས་པ་མ་ཡིན། མངོན་དུ་བྱས་པ་མ་ཡིན། མངོན་དུ་མ་བྱས་པ་མ་ཡིན། བསྟན་པ་མ་ཡིན།


</font><hr>42-1-166b<br><font size=+2>
མ་བསྟན་པ་མ་ཡིན། རབ་ཏུ་བསྟན་པ་མ་ཡིན། རབ་ཏུ་མ་བསྟན་པ་མ་ཡིན། བསྒྲགས་པ་མ་ཡིན། མ་བསྒྲགས་པ་མ་ཡིན། ཐོས་པར་བྱས་པ་མ་ཡིན། ཐོས་པར་མ་བྱས་པ་མ་ཡིན། ཐོས་པ་མ་ཡིན་མ་ཐོས་པ་མ་ཡིན་ནོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་གང་བསྣན་པར་བྱ་བའམ། དབྲི་བར་བྱ་
བའི་ཆོས་དེ་མི་དམིགས་ཏེ། རྒྱལ་པོ་ཆེན་པོ་ཆོས་ཐམས་ཅད་ནི་རང་བཞིན་གྱིས་མེད་པ་ཡིན་གྱིས། རྒྱལ་པོ་ཆེན་པོ་འདི་ལ་ཡིད་ཡོངས་སུ་དགའ་བར་བྱ་ཞིང་གཞན་གྱི་དྲིང་མི་འཇོག་པར་བྱའོ། །དེ་ནས་རྒྱལ་པོ་ཟས་གཙང་མས་འདི་སྙམ་དུ་སེམས་ཏེ། འདི་ལ་ནི་གང་རྟོགས་པས་སངས་རྒྱས་ཞེས་བྱ་བའི་ཆོས་དེ་གང་
ཡང་མི་དམིགས་མོད་ཀྱི། འོན་ཀྱང་དམིགས་སུ་མེད་པའི་ཆོས་རྣམས་ལ་དེ་བཞིན་གཤེགས་པས་གདགས་པ་བསྟན་ཏོ་སྙམ་ནས་དེའི་ཚེ་རྒྱལ་པོ་ཟས་གཙང་མ་ལ་སོགས་པ་ཤཱཀྱ་བདུན་ཁྲི་མི་སྐྱེ་བའི་ཆོས་རྣམས་ལ་བཟོད་པ་སྐྱེས་སོ། །དེ་ནས་བཅོམ་ལྡན་འདས་ཀྱིས་དེ་དག་གི་ལྷག་པའི་བསམ་པ་ཐུགས་སུ་ཆུད་ནས་
འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ་འོད་ཟེར་ཁ་དོག་སྣ་ཚོགས་ཅན། ཁ་དོག་དུ་མ་དང་ལྡན་པ་དག་བཅོམ་ལྡན་འདས་ཀྱི་ཞལ་གྱི་སྒོ་ནས་བྱུང་སྟེ། འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་རྒྱས་པར་བཀང་ནས་ཚངས་
པའི་འཇིག་རྟེན་གྱི་བར་དུ་མངོན་པར་འཕགས་ཏེ། ཕྱིར་ལོག་ནས་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་རྟ་ཐུལ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་
བཅོམ་ལྡན་འདས་ལ་ཚིགས་སུ་བཅད་དེ་ཞུས་པ། འཇིག་རྟེན་རྣམ་པར་འདྲེན་པ་པོ། །དཔའ་ཆེན་ཁྱོད་ཀྱིས་འཛུམ་མཛད་པ། །འཇིག་རྟེན་སྣང་བ་མཛད་པ་པོ། །འཛུམ་པའི་འཛུམ་རྒྱུ་བཀའ་སྩལ་གསོལ། །ཐམས་ཅད་མཁྱེན་པ་འདྲེན་པ་པོ། །རྒྱུ་གང་གིས་འཛུམ་བསྟན་པ། །ཁྱོད་ཀྱིས་འགྲོ་བ་རྣམས་ལ་སྟོན། །
བདག་གི་ཐེ་ཚོམ་མྱུར་དུ་ཁུམ། །ཤཱཀྱའི་ཚོགས་ཀྱི་དོན་སླད་དུ། །གོའུ་ཏ་མས་ནི་འཛུམ་པ་མཛད། །དཔའ་བོ་འགྲོ་བ་དགའ་མཛད་པ། །འགྲོ་བའི་ཐེ་ཚོམ་བསལ་དུ་གསོལ། །བསམ་གཏན་ཆེན་པོ་ཁྱོད་ཀྱི་གསུང ། །ཐོས་ན་འགྲོ་བའི་ཐེ་ཚོམ་འཆད། །མཆོག་ཏུ་དགའ་བའི་ཡིད་གྱུར་ཏེ། །ཀུན་ཀྱང་ཁྱོད་ཀྱི་བསྟན</font><hr>42-1-167a<br><font size=+2>
པ་འཐོབ། །རྒྱལ་བའི་འཛུམ་གྱི་ཕྲིན་ལས་འདི། །ཁྱོད་ཀྱི་སྲས་རྣམས་འཚལ་གྱུར་ན། །ནན་ཏན་གྱིས་ནི་རབ་ངེས་ཤིང ། །ཤེས་པས་རྗེས་སུ་མཆི་བར་འགྱུར། །རྒྱལ་བའི་ཁྱུ་མཆོག་ཁྱོད་ཀྱིས་ནི། །འགྲོ་བའི་ཐེ་ཚོམ་འདི་བསལ་གསོལ། །འཇིག་རྟེན་ཐེ་ཚོམ་ཆད་གྱུར་ན། །
བདེ་བ་རྒྱ་ཆེན་ཐོབ་པར་འགྱུར། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་རྟ་ཐུལ་ལ་ཚིགས་སུ་བཅད་དེ་སླར་བཀའ་སྩལ་པ། ངས་ནི་འཛུམ་ཞིང་གང་མཛད་པ། །རྟ་ཐུལ་དེ་ནི་ང་ལས་ཉོན། །ཤཱཀྱ་རྣམས་ཀྱི་བློ་ངེས་པ། །ཡང་དག་ཇི་བཞིན་ལུང་བསྟན་ཏོ། །ཆོས་རྣམས་དམིགས་སུ་
མེད་པར་ནི། །ཤཱཀྱ་རྣམས་ཀྱིས་ཡང་དག་ཤེས། །དེ་ཕྱིར་སངས་རྒྱས་ཆོས་རྣམས་ལ། །འདི་དག་ཡིད་ནི་ངེས་པར་བཞག་།དམིགས་སུ་མེད་ལ་བརྟེན་ནས་ནི། །ཤཱཀྱ་གྲགས་པ་ཆེན་པོ་པ། །ཆོས་རྣམས་ཀུན་ལ་ངེས་གྱུར་ནས། །བླ་མེད་བྱང་ཆུབ་ཐོབ་པར་འགྱུར། །ཤཱཀྱ་ངེས་པ་འདི་དག་ནི། །མི་ཡི་
ནང་ནས་ཤི་འཕོས་ནས། །བདེ་བ་ཅན་གྱི་འཇིག་རྟེན་དུ། །འོད་དཔག་མེད་ཀྱི་དྲུང་དུ་འགྲོ། །བྱང་ཆུབ་སེམས་དཔའ་འཇིགས་མེད་པ། །བདེ་བ་ཅན་ན་གནས་པའི་ཚེ། །སངས་རྒྱས་བྱེ་བ་གྲངས་མེད་ལ། །ཕྱོགས་བཅུ་དག་ཏུ་མཆོད་བྱེད་འགྱུར། །མཁས་པ་རྣམས་ནི་ཁམས་གཅིག་ན། །སངས་རྒྱས་
བཞུགས་རྣམས་བསྙེན་བཀུར་བྱེད། །སེམས་ཅན་ཀུན་ལ་ཕན་ཚོལ་ཞིང ། །བྱང་ཆུབ་མཆོག་ཏུ་སྨོན་ལམ་འདེབས། །དེ་བཞིན་གཤེགས་རྣམས་མཆོད་བྱེད་ཅིང ། །ཞིང་ནས་ཞིང་དུ་རྣམ་པར་རྒྱུ། །གང་དུ་སངས་རྒྱས་འབྱུང་བར་ཡང ། །རྫུ་འཕྲུལ་སྟོབས་ཀྱིས་འདོང་བར་འགྱུར། །བསྐལ་པ་བྱེ་བ་
གྲངས་མེད་དུ། །མེ་ཏོག་རྣམ་པ་སྣ་ཚོགས་ཀྱིས། །དེ་བཞིན་གཤེགས་པ་རྣམས་མཆོད་ནས། །དེ་ཡི་འོག་ཏུ་འདྲེན་པར་འགྱུར། །དེ་ཚེ་སངས་རྒྱས་རེ་རེ་ཞིང ། །སེམས་ཅན་ཁྲག་ཁྲིག་མང་པོ་དག་།བྱང་ཆུབ་ཕྱིར་ནི་སངས་རྒྱས་ཀྱིས། །སངས་རྒྱས་དགོངས་ལ་འགྲོ་བ་འདུལ། །སངས་
རྒྱས་ཀུན་གྱི་ཞིང་རྣམས་ན། །བྱང་ཆུབ་སེམས་དཔའ་རྣམས་ལ་སྟོན། །དེ་ན་སངས་རྒྱས་གང་ཡང་ནི། །ཉན་ཐོས་འདུལ་བར་ཡོང་མི་འགྱུར། །སངས་རྒྱས་དེ་དག་རེ་རེ་ཞིང ། །དེ་ན་ཚེ་ཚད་འགྱུར་བ་ནི། །བྱེ་བ་གྲངས་མེད་ལོ་རྣམས་སུ། །ཆོས་སྟོན་པ་དག་གནས་པར་འགྱུར། །དེ་དག་མྱ་ངན་ཡོངས</font><hr>42-1-167b<br><font size=+2>
འདས་ནས། །བྱང་ཆུབ་སེམས་དཔའ་འཇིགས་མེད་པ། །རྒྱལ་བའི་སྲས་དག་ལོ་གྲངས་ནི། །བྱེ་བ་སྟོང་དུ་དམ་ཆོས་འཛིན། །མི་དབང་སྲས་པོ་དེ་དག་ཀྱང ། །སྟོང་པ་ཉིད་ཀྱི་ཆོས་བསྟན་པས། །སེམས་ཅན་བྱེ་བ་བསམ་ཡས་དག་།བྱང་ཆུབ་ལ་ནི་འདུལ་
བར་འགྱུར། །བག་ཡོད་པ་ཡི་མི་རྣམས་ནི། །བག་ཡོད་པ་ལ་གནས་བཅས་ཏེ། །སྟོང་པ་ཉིད་ཀྱི་ཆོས་བསྟེན་ནས། །ཐམས་ཅད་མཁྱེན་དུ་ངེས་པར་འབྱུང ། །རྫོགས་སངས་རྒྱས་ཀྱིས་ཤཱཀྱ་ཡི། །བུ་ཡི་འགྲོ་བསྟན་འདི་ཐོས་ནས། །ལྷར་བཅས་འཇིག་རྟེན་དགར་
གྱུར་ཏེ། །བྱང་ཆུབ་ཕྱིར་ནི་ཡིད་ཀྱང་བཏང ། །ཤཱཀྱ་ལུང་བསྟན་པའི་ལེའུ་སྟེ་ཉི་ཤུ་རྩ་དྲུག་པའོ།། །།དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་
འདི་བྱང་ཆུབ་སེམས་དཔའ་མཐར་ཕྱིན་པ་རྣམས་ལ་བསྒྲག་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་ཏིང་ངེ་འཛིན་འདི་ནི་གང་ཟག་མེད་པ་སྟེ། དེ་ལ་དེ་བཞིན་གཤེགས་པས་ཆོས་གང་ཡང་མ་དམིགས་སོ། །གང་མ་དམིགས་པ་དེ་ནི་མངོན་པར་རྫོགས་པར་སངས་མ་
རྒྱས་སོ། །གང་མངོན་པར་རྫོགས་པར་སངས་མ་རྒྱས་པ་དེ་ནི་མ་བསྟན་པའོ། །གང་མ་བསྟན་པ་དེ་ནི་མ་ཤེས་པའོ། །གང་མ་ཤེས་པ་དེ་ནི་འདས་པ་དང ། མ་བྱོན་པ་དང ། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་སྟེ། དེ་ནི་དེ་བཞིན་གཤེགས་
པ་རྣམས་ཀྱི་ཆོས་ཀྱི་རྔ་ཆེན་པོ་ཡིན་གྱིས། ཅི་ནས་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་གཟུང་བ་དང ། བཀླག་པ་དང ། གཞན་དག་ལ་ཡང་རྒྱ་ཆེར་ཡང་དག་པར་བསྟན་པར་བྱ་བ་འདི་ཤཱ་རིའི་བུ་ཁྱོད་ལ་ཡོངས་སུ་གཏད་དོ། །ཤཱ་རིའི་བུ་བྱང་ཆུབ་སེམས་
དཔའི་ཐེག་པ་ལ་ཡང་དག་པར་ཞུགས་པའི་རིགས་ཀྱི་བུའམ། རིགས་ཀྱི་བུ་མོ་གང་གིས་བསྐལ་པ་བཅུའི་བར་དུ་ཕ་རོལ་ཏུ་ཕྱིན་པ་ལྔ་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་བར་སྦྱད་པ་བས། ཤཱ་རིའི་བུ་གང་གིས་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ</font><hr>42-1-168a<br><font size=+2>
འདི་ཐ་ན་ཐོས་པར་གྱུར་ཀྱང་དེ་ཉིད་དེ་བས་བསོད་ནམས་ཆེས་མང་དུ་འཕེལ་ལོ། །ཤཱ་རིའི་བུ་གང་གིས་བསྐལ་པ་བཅུའི་བར་དུ་མཉན་པ་བས་གང་གིས་སེམས་ཅན་གཅིག་ཅིག་ལ་འདི་བསྟན་ན་དེ་ཉིད་དེ་བས་བསོད་ནམས་ཆེས་མང་དུ་འཕེལ་ལོ། །གང་གིས་བསྐལ་
པ་བཅུའི་བར་དུ་མཉན་ཏེ་གཞན་ལ་བསྙད་པ་བས་གང་གིས་སེ་གོལ་གཏོགས་པ་ཙམ་དུ་འདི་བསྒོམས་ན་དེ་ཉིད་དེ་བས་ཆེས་བསོད་ནམས་མང་དུ་འཕེལ་ལོ། །ཤཱ་རིའི་བུ་དེ་བས་ན་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་ཉིད་ལ་བྱང་ཆུབ་སེམས་དཔའ་རྣམས་ནན་ཏན་ཐམས་
ཅད་ཀྱིས་གདམས་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་བསྒོམས་པས་ནི་མྱུར་དུ་མི་སྐྱེ་བའི་ཆོས་ལ་བཟོད་པ་འཐོབ་པར་འགྱུར་ཏེ། ཤཱ་རིའི་བུ་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངས་
ལུང་བསྟན་པའི་བྱང་ཆུབ་སེམས་དཔའི་ཚོགས་འདི་དག་ཐམས་ཅད་ཀྱང ། བྱང་ཆུབ་སེམས་དཔའི་ཏིང་ངེ་འཛིན་དེ་ཁོ་ན་ངེས་པར་བསྟན་པ་འདི་ལ་རབ་ཏུ་གནས་པ་ཤ་སྟག་གོ་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་
པ་ཤཱ་རིའི་བུ་དང ། དགེ་སློང་དེ་དག་དང ། རྒྱལ་པོ་ཟས་གཙང་མ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དེ་དག་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་
ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་དེ་ཁོ་ན་ངེས་པར་བསྟན་པ་ཡབ་དང་སྲས་མཇལ་བ་ཞེས་བྱ་བའི་ལེའུ་སྟེ་
བཅུ་དྲུག་པ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེན་དྲ་བོ་དྷི་དང ། ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།</font><hr>

</table>