rKTs


D63

(e-text produced by ADARSHA)

see text in transliteration
42-1-257a
།།རྒྱ་གར་གྱི་ མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། མུ་ནི་ཝརྨ་དང ། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །།འཕགས་པ
42-1-257b
དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་བཅུ་དགུ་པ་སྟེ་ཁྱིམ་བདག་དྲག་ཤུལ་ཅན་གྱིས་ཞུས་པ།བམ་པོ་དང་པོ། །རྒྱ་གར་སྐད་དུ། ཨཱརྱགྲྀ་ཧ་པ་ཏི་ཨུ་གྲ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཁྱིམ་བདག་དྲག་ཤུལ་ ཅན་གྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་ དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང ། འཇམ་དཔལ་དང ། ངན་སོང་སྤོང་དང ། སྤྱན་རས་གཟིགས་དབང་ཕྱུག་དང ། མཐུ་ཆེན་ཐོབ་ལ་སོགས་པ་བྱང་ཆུབ་སེམས་དཔའ་ལྔ་སྟོང་དང་ཐབས་ཅིག་ཏུ་བཞུགས་ཏེ། དེའི་ཚེ་བཅོམ་ལྡན་འདས་འཁོར་ བརྒྱ་སྟོང་དུ་མ་ཡོངས་སུ་བསྐོར་ཅིང་མདུན་གྱིས་བལྟས་ནས་ཆོས་སྟོན་ཏེ། ཚངས་པར་སྤྱོད་པ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ་ཡང་དག་པར་རབ་ཏུ་སྟོན་ཏོ། །དེ་ནས་ཁྱིམ་བདག་དྲག་ཤུལ་ཅན་ གཡོག་ལྔ་བརྒྱ་དང་མཉན་ཡོད་ཀྱི་གྲོང་ཁྱེར་ཆེན་པོ་ནས་བྱུང་སྟེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་ གཅིག་ཏུ་འཁོད་དོ། །དེ་བཞིན་དུ་ཁྱིམ་བདག་གཞན་རྣམས་ཀྱང་འདི་ལྟ་སྟེ། ཁྱིམ་བདག་དགའ་འདོད་དང ། ཁྱིམ་བདག་གྲགས་འདོད་དང ། ཁྱིམ་བདག་ལེགས་བྱིན་དང ། ཁྱིམ་བདག་དགའ་བྱེད་དང ། ཁྱིམ་བདག་གྲགས་བྱིན་དང ། ཁྱིམ་བདག་ནོར་བཟངས་དང ། ཁྱིམ་བདག་ཚུལ་དགའ་དང ། ཁྱིམ་ བདག་མགོན་མེད་ཟས་སྦྱིན་དང ། ཁྱིམ་བདག་ཀླུ་དཔལ་དང ། ཁྱིམ་བདག་བདེན་དགའ་དང ། དེ་དག་དང་གཞན་ཡང་ཁྱིམ་བདག་རབ་ཏུ་མང་པོ་རྣམས་གཡོག་ལྔ་བརྒྱ་ལྔ་བརྒྱ་དང ། མཉན་ཡོད་ཀྱི་གྲོང་ཁྱེར་ཆེན་པོ་ནས་བྱུང་སྟེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ག་ལ་བ
42-1-258a
དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །ཁྱིམ་བདག་དེ་དག་ཐམས་ཅད་ཕལ་ཆེར་ནི་གཡོག་དང་བཅས་ཏེ་ཐེག་པ་ཆེན་པོ་ལ་ཡང་ དག་པར་ཞུགས་པ་དང ། དགེ་བའི་རྩ་བ་བསྐྱེད་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་བྱས་པ་ཤ་སྟག་གོ། །དེ་ནས་ཁྱིམ་བདག་དྲག་ཤུལ་ཅན་གྱིས་ཁྱིམ་བདག་གི་འཁོར་ཆེན་པོ་དེ་འདུས་པར་ཤེས་ནས་བཅོམ་ལྡན་འདས་ཀྱི་མཐུས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་ བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཁྱོད་ལ་དེ་བཞིན་གཤེགས་པས་རྟག་ཏུ་སྐབས་ཕྱེས། ཁྱིམ་བདག་ཁྱོད་ཅི་དང་ཅི་འདོད་པ་དེ་བཞིན་ གཤེགས་པ་ལ་དྲིས་ཤིག་དང ། དེ་ལྟར་དྲིས་པ་དེ་དང་དེའི་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཁྱིམ་བདག་དྲག་ཤུལ་ཅན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་དག་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་དང ། ཐེག་པ་ཆེན་པོ་ལ་མོས་པ་དང ། ཐེག་པ་ཆེན་པོ་ལ་རབ་ཏུ་གནས་པ་དང ། ཐེག་པ་ཆེན་པོ་ལ་ཡང་དག་པར་སྒྲུབ་པར་འཚལ་བ་དང ། ཐེག་པ་ཆེན་པོ་ལ་འཇུག་པར་འཚལ་བ་དང ། ཐེག་པ་ཆེན་པོ་ལ་དམ་བཅའ་བ་དང ། སེམས་ཅན་ ཐམས་ཅད་གཉེར་བ་དང ། སེམས་ཅན་ཐམས་ཅད་དབུགས་འབྱིན་པ་དང ། སེམས་ཅན་ཐམས་ཅད་བསྐྱབ་པའི་སླད་དུ་གོ་ཆ་འཚལ་བ་དང ། མ་རྒལ་བ་རྣམས་སྒྲོལ་བ་དང ། མ་གྲོལ་བ་རྣམས་དགྲོལ་བ་དང ། དབུགས་མ་ཕྱིན་པ་རྣམས་དབུགས་དབྱུང་བ་དང ། ཡོངས་སུ་མྱ་ངན་ལས་མ་འདས་པ་རྣམས
42-1-258b
ཡོངས་སུ་མྱ་ངན་ལས་བཟླའོ་ཞེས་སེམས་ཅན་ཐམས་ཅད་ཀྱི་དོན་དུ་ཁུར་ཆེན་པོ་ལེན་པ་དང ། འཇུག་པ་རླབས་པོ་ཆེ་ཆེན་པོ་ལ་རབ་ཏུ་གནས་པ་དང ། སངས་རྒྱས་ཀྱི་ཡེ་ཤེས་དཔག་ཏུ་མ་མཆིས་པ་ཐོས་ནས་ཡེ་ཤེས་དེ་ཡང་དག་པར་བསྒྲུབ་པའི་སླད་དུ་གོ་ཆ་འཚལ་བ་དང ། འཁོར་བའི་སྡུག་བསྔལ་གྱི་སྐྱོན་ མང་པོ་དུ་མ་འཚལ་ཀྱང་ཡིད་ཡོངས་སུ་མི་སྐྱོ་ཞིང་བསྐལ་པ་གྲངས་མ་མཆིས་པར་འཁོར་ཡང་སེམས་ཞུམ་པར་མི་འགྱུར་བ་དེ་དག་དང ། བཅོམ་ལྡན་འདས་དེ་ལ་རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་བ་གང་དག་ཁྱིམ་གྱི་གནས་ནས་མངོན་པར་བྱུང་སྟེ། བྱང་ཆུབ་ཀྱི་ཕྱོགས་ཀྱི་ཆོས་ རྣམས་ཡང་དག་པར་སྒྲུབ་ཅིང་ཁྱིམ་ན་མི་གནས་པ་དག་དང ། གང་ཡང་ཁྱིམ་ན་གནས་ཤིང་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་སྒྲུབ་སྟེ། ཁྱིམ་གྱི་གནས་ནས་མངོན་པར་མི་འབྱུང་བ་དག་ཀྱང་མཆིས་ན། བཅོམ་ལྡན་འདས་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ལ་ཐུགས་བརྩེ་བ་དང་། ་ཐེག་པ་ཆེན་པོ་ལ་འདི་རྗེས་སུ་གཟུང་བ་དང ། དཀོན་མཆོག་གསུམ་གྱི་རིགས་མི་འཆད་པར་བགྱི་བ་དང ། ཐམས་ཅད་མཁྱེན་པའི་ཡེ་ཤེས་ཡུན་རིང་དུ་གནས་པར་བགྱི་བའི་སླད་དུ་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཁྱིམ་པ་རྣམས་ཀྱི་བསླབ་པའི་ཡོན་ཏན་རྣམ་པར་གཞག་པ་དེ་ལེགས་པར་བཤད་དུ་གསོལ། བྱང་ཆུབ་སེམས་དཔའ་ཁྱིམ་པ་ཁྱིམ་གྱི་ས་ལ་གནས་ནས་ཇི་ལྟར་དེ་བཞིན་གཤེགས་པ་རྣམས་ཀྱི་བཀའ་བཞིན་བགྱིད་ཅིང་བྱང་ཆུབ་ཀྱི་ཕྱོགས་ཀྱི་ཆོས་རྣམས་ལས་མི་ཉམས། ཡོངས་སུ་མི་ཉམས་ཏེ། ཚེ་འདི་ལ་ཡང་ལས་ཁ་ན་མ་ཐོ་བ་མ་མཆིས་ཤིང་ཚེ་གཞན་དུ་ཡང་བྱེ་བྲག་ཏུ་མཆི་བར་འགྱུར་བ་དང ། བཅོམ་ལྡན་ འདས་གང་ཡང་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་བྱུང་སྟེ། སྡུག་པ་དང ། མི་སྡུག་པ་སྤངས་ནས་སྐྲ་དང་ཁ་སྤུ་བྲེགས་ཏེ། གོས་ངུར་སྨྲིག་བགོས་ཏེ། ཡང་དག་པར་དད་པས་ཁྱིམ་ནས་ཁྱིམ་མ་ལགས་པར་རབ་ཏུ་བྱུང་བ་དེ་དག་ཇི་ཙམ་དུ་གདམས་པ་དང ། རྗེས་སུ་བསྟན་པ་གཉིས་ཀྱིས་ ཆོས་སྤྱོད་པ་དང ། དགེ་བ་སྤྱོད་པ་ཡང་དག་པར་རབ་ཏུ་བཤད་དུ་གསོལ། བྱང་ཆུབ་སེམས་དཔའ་ཁྱིམ་པ་དང ། རབ་ཏུ་བྱུང་བས་ཇི་ལྟར་གནས་པར་བགྱི། ཇི་ལྟར་བསྒྲུབ་པར་བགྱི། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་བཀའ་སྩལ་ཏོ། །
42-1-259a
ཁྱིམ་བདག་ལེགས་སོ་ལེགས་སོ། །ཁྱོད་ང་ལ་དོན་འདི་འདྲི་བར་སེམས་པ་ནི་ཁྱོད་ཀྱི་ཚུལ་དང་འཐུན་པའོ། །དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང ། བྱང་ཆུབ་སེམས་དཔའ་ཁྱིམ་པ་དང ། རབ་ཏུ་བྱུང་བས་ཇི་ལྟར་བསླབ་པའི་ཡོན་ཏན་ཡང་དག་པར་གཟུང་ཞིང་སྤྱོད་པ་མཆོག་ལ་ གནས་པར་བྱ་བ་དང ། ཇི་ལྟར་བསྒྲུབ་པར་བྱ་བ་ངས་ཁྱོད་ལ་བཤད་དོ། །བཅོམ་ལྡན་འདས་དེ་བཞིན་ནོ་ཞེས་གསོལ་ནས་ཁྱིམ་བདག་དྲག་ཤུལ་ཅན་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་ པས་སངས་རྒྱས་ལ་སྐྱབས་སུ་འགྲོ་བར་བྱའོ། །ཆོས་ལ་སྐྱབས་སུ་འགྲོ་བར་བྱའོ། །དགེ་འདུན་ལ་སྐྱབས་སུ་འགྲོ་བར་བྱའོ། །དེ་གསུམ་ལ་སྐྱབས་སུ་སོང་བའི་དགེ་བའི་རྩ་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་ཁྱིམ་པ་སངས་རྒྱས་ལ་ སྐྱབས་སུ་སོང་བ་ཡིན་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་སངས་རྒྱས་ཀྱི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ་ཡོངས་སུ་བསྒྲུབ་པར་བྱའོ་སྙམ་དུ་སེམས་མངོན་པར་འདུ་བྱེད་དེ། དགེ་བའི་རྩ་བ་གང་དག་གིས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ ཡང་དག་པར་འགྲུབ་པར་འགྱུར་བའི་དགེ་བའི་རྩ་བ་དེ་དག་ཡང་དག་པར་བསྒྲུབ་པའི་ཕྱིར་བརྩོན་འགྲུས་རྩོམ་པ་དེ་ལྟ་བུ་ནི་ཁྱིམ་བདག་བྱང་ཆུབ་སེམས་དཔའ་སངས་རྒྱས་ལ་སྐྱབས་སུ་སོང་བ་ཡིན་ནོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་ཁྱིམ་པ་ཆོས་ལ་སྐྱབས་སུ་སོང་བ་ཡིན་ཞེ་ན། ཁྱིམ་བདག་འདི་ ལ་བྱང་ཆུབ་སེམས་དཔའ་ཁྱིམ་པ་ཆོས་ལ་གུས་པ་དང་བཅས་ཤིང་རི་མོ་བྱེད་པ་དང་བཅས་པ། ཆོས་དོན་དུ་གཉེར་བ། ཆོས་འདོད་པ།ཆོས་ཀྱི་ཀུན་དགའ་ལ་དགའ་ཞིང་མོས་པ། ཆོས་ལ་གཞོལ་བ། ཆོས་ལ་འབབ་པ། ཆོས་ལ་བབ་པ། ཆོས་སྲུང་བ། ཆོས་སྦེད་ཅིང་གནས་པ། ཆོས་ཀྱི་གྲགས་པ་དང ། ཆོས་ཀྱི་སྤྱོད་པ་ལ་གནས་པ། ཆོས་ཀྱི་དབང་དུ་གྱུར་པ། ཆོས་ཡོངས་སུ་ཚོལ་བ། ཆོས་ཀྱི་སྟོབས་དང་ལྡན་པ། ཆོས་ཀྱི་སྦྱིན་པའི་མཚོན་ཆ་དང་ལྡན་པ། ཆོས་ཀྱི་བྱ་བ་བྱེད་པ་དེ་འདི་ལྟ་བུའི་ཆོས་དང་ལྡན་པས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་ལྷ
42-1-259b
དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ལ་ཆོས་ཀྱིས་ཆོས་ཀྱི་བགོ་བཤའ་བྱའོ་སྙམ་དུ་དྲན་པ་རབ་ཏུ་འཐོབ་སྟེ། ཁྱིམ་བདག་དེ་ལྟར་ན་བྱང་ཆུབ་སེམས་དཔའ་ཁྱིམ་པ་ཆོས་ལ་སྐྱབས་སུ་སོང་བ་ཡིན་ནོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་ཁྱིམ་པ་དགེ་འདུན་ལ་སྐྱབས་སུ་ སོང་བ་ཡིན་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་དགེ་འདུན་ལ་སྐྱབས་སུ་སོང་བ་ནི་གལ་ཏེ་དགེ་སློང་རྒྱུན་ཏུ་ཞུགས་པའམ། ལན་ཅིག་ཕྱིར་འོང་བའམ། ཕྱིར་མི་འོང་བའམ། དགྲ་བཅོམ་པའམ། སོ་སོའི་སྐྱེ་བོའམ། ཉན་ཐོས་ཀྱི་ཐེག་པ་པའམ། རང་སངས་རྒྱས་ཀྱི་ཐེག་པ་པའམ། ་ཐེག་པ་ཆེན་པོ་བ་དག་མཐོང་ན་དེ་དེ་ལ་གུས་པ་དང་བཅས། ཞེ་ས་དང་བཅས་ཤིང་ལྡང་བར་བརྩོན་པ། བཀའ་བློ་བདེ་ཞིང་འཐུན་པར་འཛིན་པ་ཡིན་ཏེ། དེ་ཡང་དག་པར་སོང་བ་དང ། ཡང་དག་པར་ཞུགས་པ་དེ་དག་ལ་བསྙེན་བཀུར་བྱས་པས་འདི་ལྟར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་ རྫོགས་པར་སངས་རྒྱས་ནས་ཀྱང་ཉན་ཐོས་ཀྱི་ཡོན་ཏན་ཡོངས་སུ་བསྒྲུབ་པ་དང ། རང་སངས་རྒྱས་ཀྱི་ཡོན་ཏན་ཡོངས་སུ་བསྒྲུབ་པའི་ཕྱིར་ཆོས་བསྟན་ཏོ་སྙམ་དུ་དྲན་པ་རབ་ཏུ་འཐོབ་སྟེ། དེ་དེ་དག་ལ་གུས་པ་དང་བཅས་ཤིང་ཞེ་ས་དང་བཅས་པ་ཡིན་གྱི་དེ་དག་ལ་མི་དགའ་བར་ནི་མི་བྱེད་དེ། དེ་ལྟར་ན་ཁྱིམ་བདག་བྱང་ཆུབ་ སེམས་དཔའ་ཁྱིམ་པ་དགེ་འདུན་ལ་སྐྱབས་སུ་སོང་བ་ཡིན་ནོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཆོས་བཞི་དང་ལྡན་ན་སངས་རྒྱས་ལ་སྐྱབས་སུ་སོང་བ་ཡིན་ཏེ། བཞི་གང་ཞེ་ན། བྱང་ཆུབ་ཀྱི་སེམས་མི་འདོར་བ་དང ། དམ་བཅས་པ་མི་འཇིག་པ་དང ། སྙིང་རྗེ་ཆེན་པོ་ཡོངས་སུ་མི་གཏོང་བ་ དང ། ཐེག་པ་གཞན་ལ་མི་དམིགས་པ་སྟེ། ཁྱིམ་བདག་བྱང་ཆུབ་སེམས་དཔའ་ཁྱིམ་པ་ཆོས་བཞི་པོ་དེ་དག་དང་ལྡན་ན་སངས་རྒྱས་ལ་སྐྱབས་སུ་སོང་བ་ཡིན་ནོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཆོས་བཞི་དང་ལྡན་ན་ཆོས་ལ་སྐྱབས་སུ་སོང་བ་ཡིན་ཏེ། བཞི་གང་ཞེ་ན། ཆོས་སྨྲ་བའི་གང་ ཟག་རྣམས་ལ་བརྟེན་ཅིང་བསྙེན་ཏེ་བསྙེན་བཀུར་བྱེད་ཅིང་བསྟི་སྟང་དུ་བྱས་ནས་ཆོས་ཉན་པ་དང ། ཆོས་ཐོས་པ་དང ། ཚུལ་བཞིན་དུ་སོ་སོར་རྟོག་པ་དང ། ཇི་ལྟར་ཐོས་པའི་ཆོས་རྣམས་དང་ཇི་ལྟར་ཁོང་དུ་ཆུད་པ་རྣམས་གཞན་དག་ལ་ཡང་སྟོན་ཅིང་ཡང་དག་པར་རབ་ཏུ་འཆད་པ་དང ། ཆོས་ཀྱི་སྦྱིན་པ་ལས་བྱུང་བའི་དགེ
42-1-260a
བའི་རྩ་བ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་སྟེ། ཁྱིམ་བདག་བྱང་ཆུབ་སེམས་དཔའ་ཁྱིམ་པ་ཆོས་བཞི་པོ་དེ་དག་དང་ལྡན་ན་ཆོས་ལ་སྐྱབས་སུ་སོང་བ་ཡིན་ནོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཆོས་བཞི་དང་ལྡན་ན་དགེ་འདུན་ལ་སྐྱབས་སུ་སོང་ བ་ཡིན་ཏེ། བཞི་གང་ཞེ་ན། ཉན་ཐོས་ཀྱི་ཐེག་པ་བ་ཡང་དག་པར་སྐྱོན་མེད་པ་ལ་ཞུགས་པ་རྣམས་ཐམས་ཅད་མཁྱེན་པ་ཉིད་ཀྱི་སེམས་ལ་འཛུད་པ་དང ། གང་ཟང་ཟིང་གིས་སྡུད་པར་བྱེད་པ་དེ་དག་ཆོས་ཀྱིས་བསྡུ་བ་ལ་སྦྱོར་བ་དང ། བྱང་ཆུབ་སེམས་དཔའ་ཕྱིར་མི་ལྡོག་པའི་དགེ་འདུན་ལ་རྟོན་གྱི་ཉན་ ཐོས་ཀྱི་དགེ་འདུན་ལ་རྟོན་པ་མ་ཡིན་པ་དང ། ཉན་ཐོས་ཀྱི་ཡོན་ཏན་ཡང་ཡོངས་སུ་ཚོལ་ལ། དེའི་རྣམ་པར་གྲོལ་བ་ལ་མོས་པ་ཡང་མ་ཡིན་པ་སྟེ། ཁྱིམ་བདག་བྱང་ཆུབ་སེམས་དཔའ་ཁྱིམ་པ་ཆོས་བཞི་པོ་དེ་དག་དང་ལྡན་ན་དགེ་འདུན་ལ་སྐྱབས་སུ་སོང་བ་ཡིན་ནོ། །ཁྱིམ་བདག་གཞན་ཡང་བྱང་ཆུབ་ སེམས་དཔའ་ཁྱིམ་པ་དེ་བཞིན་གཤེགས་པའི་སྐུ་གཟུགས་མཐོང་ནས་སངས་རྒྱས་རྗེས་སུ་དྲན་པ་རབ་ཏུ་ཐོབ་པ་ནི་སངས་རྒྱས་ལ་སྐྱབས་སུ་སོང་བ་ཡིན་ནོ། །ཆོས་ཐོས་ནས་ཆོས་རྗེས་སུ་དྲན་པ་རབ་ཏུ་ཐོབ་པ་ནི་ཆོས་ལ་སྐྱབས་སུ་སོང་བ་ཡིན་ནོ། །དེ་བཞིན་གཤེགས་པའི་ཉན་ཐོས་ཀྱི་དགེ་འདུན་མཐོང་ནས་བྱང་ཆུབ་ཀྱི་སེམས་རྗེས་སུ་ དྲན་པ་ནི་དགེ་འདུན་ལ་སྐྱབས་སུ་སོང་བ་ཡིན་ནོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་སངས་རྒྱས་དང་འགྲོགས་པར་སྨོན་ཅིང་སྦྱིན་པ་སྦྱིན་པ་ནི་སངས་རྒྱས་ལ་སྐྱབས་སུ་སོང་བ་ཡིན་ནོ། །དམ་པའི་ཆོས་ཡང་དག་པར་བསྲུང་བའི་ཕྱིར་སྦྱིན་པ་སྦྱིན་པ་ནི་ཆོས་ལ་སྐྱབས་སུ་སོང་བ་ཡིན་ནོ། །སྦྱིན་པ་དེ་བླ་ན་མེད་ པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་ནི་དགེ་འདུན་ལ་སྐྱབས་སུ་སོང་བ་ཡིན་ནོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ནི་སྐྱེས་བུ་དམ་པའི་ལས་རྣམས་བྱེད་ཅིང་སྐྱེས་བུ་ངན་པའི་ལས་རྣམས་མི་བྱེད་དོ། །ཁྱིམ་བདག་སྐྱེས་བུ་དམ་པའི་ལས་ཡིན་ གྱི་སྐྱེས་བུ་ངན་པའི་ལས་མ་ཡིན་པ་རྣམས་གང་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་ཆོས་ཀྱིས་ལོངས་སྤྱོད་ཚོལ་གྱི་ཆོས་མ་ཡིན་པས་མི་ཚོལ་ལོ། །འཐུན་པས་ཚོལ་གྱི་མི་འཐུན་པས་མ་ཡིན་ནོ། །ཡང་དག་པས་འཚོ་བ་ཡིན་གྱི་ལོག་པས་འཚོ་བ་མ་ཡིན་ཏེ། དེ་ཆོས་ཀྱིས་ལོངས
42-1-260b
སྤྱོད་ཐོབ་པ་དེ་དག་གིས་གཞན་ལ་འཚེ་བར་མི་བྱེད་དེ། མི་རྟག་པའི་འདུ་ཤེས་སྒོམ་པ་མང་ཞིང་སྙིང་པོ་ལེན་ཏོ། །འདི་ལྟ་སྟེ། ཕ་མ་ལ་བསྙེན་བཀུར་བྱེད་པ་དང ། བུ་དང ། ཆུང་མ་དང ། བྲན་ཕོ་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་རྣམས་ཡང་དག་པར་ལོངས་སྤྱོད་དང་མཛའ་ བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་རྣམས་ལ་བཀུར་སྟི་དང ། གང་དུ་ཡང་ཆོས་ལ་འཛུད་པས་གཏོང་བ་འཕེལ་བར་བྱེད་དོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ནི་འདི་ལྟ་སྟེ། སེམས་ཅན་ཐམས་ཅད་ཀྱི་ཕུང་པོ་ལྔའི་ཁུར་ཁྱེར་བས་ཁུར་བླངས་པ་ བཀུར་བའི་ཕྱིར་བརྩོན་འགྲུས་རྩོམ་མོ། །འདི་ལྟ་སྟེ། ཉན་ཐོས་དང ། ་རང་སངས་རྒྱས་ཀྱི་ཐེག་པ་མི་འདོར་བས་ཁུར་བླངས་པ་བཀུར་བའི་ཕྱིར་བརྩོན་འགྲུས་རྩོམ་མོ། །སེམས་ཅན་ཡོངས་སུ་སྨིན་པར་བྱ་བས་ཡོངས་སུ་མི་སྐྱོ་བ། བདག་བདེ་བ་ལ་མི་ཆགས་པ། སེམས་ཅན་ཐམས་ཅད་བདེ་བ་ཐོབ་པར་ བྱེད་པ། རྙེད་པ་དང ། མ་རྙེད་པ་དང ། གྲགས་པ་དང ། མ་གྲགས་པ་དང ། བསྟོད་པ་དང ། སྨད་པ་དང ། བདེ་བ་དང ། སྡུག་བསྔལ་གྱིས་མི་བསྐྱོད་པས་དེ་འཇིག་རྟེན་གྱི་ཆོས་ལས་ཡང་དག་པར་འདའ་བ་དང ། རྙེད་པ་དང ། ལོངས་སྤྱོད་ཕུན་སུམ་ཚོགས་པས་མི་སྙེམས་པ་དང ། རྙེད་པ་དང ། གྲགས་པ་དང་། བརྗོད་པའི་སྒྲའི་སྙན་པ་མེད་པ་ལ་ཡི་མི་ཆད་པ་དང ། ཤིན་དུ་བརྟགས་ཏེ་ལས་བྱེད་པ་དང ། ཡང་དག་པར་སྒྲུབ་པ་ཀུན་ཏུ་སྲུང་བ་དང ། ལོག་པར་སྒྲུབ་པ་ལ་ཡིད་མི་མོས་པ་དང ། མི་གནས་པའི་བློས་འབྱུང་བ་མཐོང་བ་དང ། ཤིང་བལ་གྱི་འདའ་བ་ལྟ་བུའི་སེམས་མེད་དེ། ཇི་ལྟར་དམ་བཅས་པ་ཡོངས་སུ་རྫོགས་པར་ བྱེད་པ་དང ། གཞན་གྱི་བྱ་བ་བྱེད་པ་དང ། རང་གི་བྱ་བ་ཡོངས་སུ་འདོར་བ་དང ། གཞན་ལ་བྱས་པ་ལ་ལན་ཏུ་ཕན་འདོགས་པར་མི་རེ་བ་དང ། གནོད་པ་བྱས་པ་ལ་ཤ་མི་ལྡོན་པ་དང ། བྱས་པ་གཟོ་བ་དང ། བྱས་པ་ཚོར་བ་དང ། ལེགས་པར་བྱ་བའི་ལས་བྱེད་པ་དང ། དབུལ་པོ་རྣམས་ལ་ལོངས་སྤྱོད་ཡང་ དག་པར་བགེད་པ་དང ། སྟོབས་དང་ལྡན་པ་རྣམས་ལ་ང་རྒྱལ་བཅག་པ་དང ། འཇིགས་པ་རྣམས་མི་འཇིགས་པར་དབུགས་འབྱིན་པ་དང ། མྱ་ངན་གྱིས་ཉམ་ཐག་པ་རྣམས་ལ་མྱ་ངན་གྱི་ཟུག་རྔུ་སེལ་བ་དང ། མཐུ་ཆུང་བ་རྣམས་ལ་བཟོད་ཅིང་དང་དུ་ལེན་པ་དང ། ང་རྒྱལ་ལས་ཀྱང་ང་རྒྱལ་རྣམ་པར་སྤོང་བ་དང་།
42-1-261a
བླ་མ་རྣམས་ལ་གུས་པ་དང ། མང་དུ་ཐོས་པ་རྣམས་ལ་སྟེན་པ་དང ། མཁས་པ་རྣམས་ལ་ཀུན་འདྲི་བ་དང ། ལྟ་བ་དྲང་བ་དང ། གཡོ་མེད་པར་སྤྱོད་པ་དང ། སྒྱུ་མེད་པ་དང ། བཅོས་མ་མེད་པར་སེམས་ཅན་ཐམས་ཅད་ལ་བྱམས་པ་དང ། དགེ་བ་གང་ཡིན་ཞེས་ཚོལ་བས་མི་ངོམས་པ་དང ། མང་དུ་ཐོས་པ་ལ་ཆོག་མི་ཤེས་པར་བྱེད་པ་དང ། བརྩམས་པ་རྣམས་ལ་ཡི་དམ་བརྟན་པ་དང ། འཕགས་པའི་སྐྱེ་བོ་དག་འགྲོགས་པ་དང ། འཕགས་པ་མ་ཡིན་པའི་སྐྱེ་བོ་རྣམས་ལ་ཆེར་སྙིང་རྗེ་བ་དང ། མཛའ་བ་བརྟན་པ་དང ། མཛའ་བ་དང ། མི་མཛའ་བ་ལ་སེམས་སྙོམས་པ་དང ། སངས་རྒྱས་ཀྱི་ ཆོས་ཐམས་ཅད་ལ་སློབ་དཔོན་གྱི་དཔེ་མཁྱུད་མེད་པ་དང ། ཇི་ལྟར་ཐོས་པའི་ཆོས་རྣམས་རབ་ཏུ་སྟོན་པ་དང ། ཐོས་པའི་དོན་རྗེས་སུ་སྒོམ་པ་དང ། འདོད་པ་ལ་དགའ་ཞིང་རྩེ་བ་ཐམས་ཅད་ལ་མི་རྟག་པར་འདུ་ཤེས་པ་དང ། ལུས་ལ་མི་གཙང་བར་འདུ་ཤེས་པ་དང ། སྲོག་ལ་ཟིལ་པའི་ཐིགས་པ་ལྟར་འདུ་ཤེས་ པ་དང ། ལོངས་སྤྱོད་ལ་སྒྱུ་མ་དང ། སྨིག་རྒྱུ་ལྟ་བུར་འདུ་ཤེས་པ་དང ། བུ་དང་ཆུང་མ་ལ་སེམས་ཅན་དམྱལ་བ་མནར་མེད་པར་འདུ་ཤེས་པ་དང ། ཞིང་དང་ཁྱིམ་གྱི་ལས་ཀྱི་མཐའ་དང་གོས་རྣམ་པ་སྣ་ཚོགས་ཡོངས་སུ་འཛིན་པ་ལ་ཕོངས་པའི་སྡུག་པར་འདུ་ཤེས་པ་དང ། ཡོངས་སུ་ཚོལ་བ་ལ་དགེ་བའི་རྩ་བ་ རྣམ་པར་འཇིག་པར་འདུ་ཤེས་པ་དང ། ཁྱིམ་གྱི་གནས་ལ་གཤེད་མ་ལྟ་བུར་འདུ་ཤེས་པ་དང ། མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་རྣམས་ལ་སེམས་ཅན་དམྱལ་བའི་སྲུངས་མར་འདུ་ཤེས་པ་དང ། ཉིན་དང་མཚན་དུ་བྱེ་བྲག་ཏུ་གྱུར་པ་ཅི་ཡོད་ཅེས་ཡོངས་སུ་འཇལ་བར་འདུ་ཤེས་ པ་དང་།སྙིང་པོ་མེད་པའི་ལུས་ལས་སྙིང་པོ་བླང་བར་འདུ་ཤེས་པ་དང ། སྙིང་པོ་མེད་པའི་སྲོག་ལས་སྙིང་པོ་བླང་བར་འདུ་ཤེས་པ་དང ། སྙིང་པོ་མེད་པའི་ལོངས་སྤྱོད་རྣམས་ལས་སྙིང་པོ་བླང་བར་འདུ་ཤེས་པ་ཡིན་ནོ། །དེ་ལ་སྙིང་པོ་མེད་པའི་ལུས་ལས་སྙིང་པོ་བླང་བར་འདུ་ཤེས་པ་གང་ཞེ་ན། གང་གཞན་གྱི་ བྱའོ་ཅོག་བྱ་བར་སྤྲོ་བ་དང ། བླ་མ་རྣམས་ལ་གུས་པར་སྨྲ་བ་དང ། ཕྱག་འཚལ་བ་དང ། ལྡང་བ་དང ། ཐལ་མོ་སྦྱོར་བ་དང ། འདུད་པའི་ལས་བྱེད་པ་སྟེ། འདི་ནི་སྙིང་པོ་མེད་པའི་ལུས་ལས་སྙིང་པོ་བླང་བར་འདུ་ཤེས་པ་ཞེས་བྱའོ། །དེ་ལ་སྙིང་པོ་མེད་པའི་སྲོག་ལས་སྙིང་པོ་བླང་བར་འདུ་ཤེས
42-1-261b
པ་གང་ཞེ་ན། གང་སྔོན་བྱས་པའི་དགེ་བའི་རྩ་བ་རྣམས་ཡོངས་སུ་མི་ཉམས་ལ་གོང་དུ་ཡང་རྣམ་པར་འཕེལ་བར་བྱེད་པ་སྟེ། འདི་ནི་སྙིང་པོ་མེད་པའི་སྲོག་ལས་སྙིང་པོ་བླང་བར་འདུ་ཤེས་པ་ཞེས་བྱའོ། །དེ་ལ་སྙིང་པོ་མེད་པའི་ལོངས་སྤྱོད་རྣམས་ལས་སྙིང་པོ་བླང་བར་འདུ་ཤེས་པ་གང་ཞེ་ན། གང་སེར་: སྣའི་སེམས་ཚར་གཅོད་ཅིང་གཏོང་བ་ཆེན་པོའི་སེམས་འཕེལ་བར་བྱེད་ཅིང་སྦྱིན་པ་ཡང་དག་པར་འགེད་པ་སྟེ། འདི་ནི་སྙིང་པོ་མེད་པའི་ལོངས་སྤྱོད་རྣམས་ལས་སྙིང་པོ་བླང་བར་འདུ་ཤེས་པ་ཞེས་བྱའོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་ཁྱིམ་པ་གང་འདི་ལྟ་བུའི་སྐྱེས་བུ་དམ་པའི་ལས་འདི་དག་ བྱེད་ཀྱི། སྐྱེས་བུ་ངན་པའི་ལས་ནི་མ་ཡིན་ནོ། །དེ་ལྟར་བྱེད་ན་དེ་བཞིན་གཤེགས་པ་རྣམས་ཀྱིས་ཉེས་པར་བརྗོད་པ་མ་ཡིན་ཏེ། རིགས་པར་སྨྲ་བ་ཡིན། ཆོས་སྨྲ་བ་ཡིན་ནོ། །འདི་ལྟ་སྟེ། སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དམ་བཅས་པ་ཡང་མི་ཉམས་ཡོངས་སུ་མི་ ཉམས་པ་ཡིན་ནོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ནི་བསླབ་པའི་གཞི་ཐམས་ཅད་ཡོངས་སུ་བཟུང་བ་ཡིན་ཏེ། འདི་ལྟ་སྟེ། བསླབ་པའི་གཞི་ལྔ་ཡོངས་སུ་བཟུང་ནས་དེས་སྲོག་གཅོད་པ་སྤང་བར་བྱ་སྟེ། དབྱུག་པ་དོར་བ་དང ། མཚོན་ཆ་དོར་བ་དང ། ངོ་ཚ་ཤེས་པ་དང ། སྙིང་རྗེ་དང་ལྡན་པ་དང ། སྲོག་ཆགས་འབྱུང་པོ་ཐམས་ཅད་ལ་མི་འཚེ་བའི་རང་བཞིན་ཅན་དང ། སེམས་ཅན་ཐམས་ཅད་ལ་སེམས་སྙོམས་པ་དང ། རྟག་ཏུ་བྱམས་པ་ལ་གནས་པར་བྱའོ། །དེས་མ་བྱིན་པར་ལེན་པ་སྤང་བར་བྱ་སྟེ། བདག་གི་ལོངས་སྤྱོད་ཀྱིས་ཆོག་ཤེས་པ་དང ། གཞན་གྱི་ ལོངས་སྤྱོད་ལ་མངོན་པར་དགའ་བ་མེད་པ་དང ། ཆགས་སེམས་དང་བརྣབ་སེམས་མེད་པ་དང ། གཞན་གྱི་ནོར་ལ་འདོད་པ་མེད་པ་དང ། ཐ་ན་རྩཝ་དང་ལོ་མ་ཙམ་ཡང་མ་བྱིན་པར་མི་བླང་བར་བྱའོ། །དེས་འདོད་པ་ལ་ལོག་པར་གཡེམ་པ་སྤང་བར་བྱ་སྟེ། རང་གི་ཆུང་མས་ཆོག་པར་འཛིན་པ་དང ། གཞན་གྱི་ཆུང་མ་ལ་འདོད་པ་མེད་པ་དང ། མ་ཆགས་པའི་མིག་གིས་བལྟ་བ་དང ། ཡིད་བྱུང་བའི་ཡིད་དང ། འདོད་པ་དག་ནི་ཤིན་ཏུ་སྡུག་བསྔལ་བའོ་སྙམ་དུ་མ་ཆགས་པ་ཡིད་ལ་བྱེད་པ་ལ་བརྩོན་པར་བྱའོ། །དེ་གང་གི་ཚེ་རང་གི་ཆུང་མ་ལ་འདོད་པའི་རྣམ་པར་རྟོག་པ་བྱུང་བ་དེའི་ཚེ་ཡང་ཉོན
42-1-262a
མོངས་པའི་དབང་དུ་གྱུར་པས་ན་དེས་རང་གི་ཆུང་མ་ལ་མི་སྡུག་པར་རྗེས་སུ་བལྟ་བ་དང ། སྐྲག་པའི་ཡིད་ཀྱིས་འདོད་པ་བསྟེན་པར་བྱའི། ཞེན་པས་ཟིན་བཞིན་དུ་ནི་མ་ཡིན་པ་དང ། མི་རྟག་པ་དང ། སྡུག་བསྔལ་བ་དང ། བདག་མེད་པ་དང ། མི་གཙང་བར་འདུ་ཤེས་པས་ དེས་ཅི་ནས་བདག་གིས་ཡིད་ཀྱིས་དགུ་ལ་ཡང་འདོད་པ་ལ་སྤྱོད་པར་མི་བྱ་ན། མཚན་གཉིས་སྤྲད་པ་འམ། ཡན་ལག་མ་ཡིན་པར་འཇུག་པ་ལྟ་ཅི་སྨོས་ཏེ། བདག་གིས་དེ་ལྟར་མི་བྱའོ་སྙམ་མོ། །དེས་བརྫུན་དུ་སྨྲ་བ་སྤང་བར་བྱ་སྟེ། བདེན་པར་སྨྲ་བ་དང ། ཡང་དག་པར་སྨྲ་བ་དང ། ཇི་སྐད་སྨྲས་ པ་དེ་བཞིན་དུ་བྱེད་པ་དང ། མི་སླུ་བ་དང ། བསམ་པ་ཕུན་སུམ་ཚོགས་པ་དང ། དྲན་པ་དང་ཤེས་བཞིན་དང་ལྡན་པར་བྱ་སྟེ། ཇི་ལྟར་མཐོང་པ་དང ། ཐོས་པ་སྨྲ་བ་དང ། ཆོས་རྗེས་སུ་སྲུང་བར་གྱུར་པ་དེས་ལུས་དང་སྲོག་གི་ཕྱིར་ཡང་ཤེས་བཞིན་དུ་བརྫུན་སྨྲ་བར་མི་བྱའོ། །དེས་འབྲུའི་ཆང་དང་སྦྱར་ བའི་ཆང་མྱོས་པར་འགྱུར་བའི་བཏུང་བ་སྤང་བར་བྱ་སྟེ། དེ་ར་རོ་བ་མེད་པ་དང ། མྱོས་པ་མེད་པ་དང ། འཁྲུལ་པ་མེད་པ་དང ། ཚིག་མ་འཆལ་པ་དང ། མི་འཕྱར་བ་དང ། མི་རྒོད་པ་དང ། མི་གཡེང་བ་དང ། དྲན་པ་ཉེ་བར་གནས་པ་དང ། ཤེས་བཞིན་དང་ལྡན་པར་བྱ་སྟེ། དེ་ནམ་བདོག་པ་ ཐམས་ཅད་ཡོངས་སུ་གཏོང་བའི་བློ་འཇུག་ཅིང་ཟས་འདོད་པ་རྣམས་ལ་ཟས། སྐོམ་འདོད་པ་རྣམས་ལ་སྐོམ་སྦྱིན་པ་སྦྱིན་པར་བྱའོ་སྙམ་ན་དེས་གཞན་དག་ལ་ཆང་ཡང་སྦྱིན་ཏེ། འདི་སྙམ་དུ་འདི་ནི་སྦྱིན་པའི་ཕ་རོལ་ཏུ་ན་པའི་དུས་ཡིན་ཏེ། གང་ཅི་འདོད་པ་དེ་ལ་དེ་སྦྱིན་པའི་དུས་ལ་བབ་ཀྱིས་བདག་ གིས་འདི་ལྟར་བྱ་སྟེ། གང་དང་གང་ལ་འདི་ལྟར་ཆང་ཡང་བྱིན་ནས་གང་འདི་འཁྲུལ་པ་མེད་པའི་སྤྱོད་པ་ལ་དེ་དང་དེ་དག་དྲན་པ་དང་ཤེས་བཞིན་ཡང་དག་པར་འཛིན་དུ་གཞུག་གོ་སྙམ་པའི་འདུ་ཤེས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ནི་བྱང་ཆུབ་ སེམས་དཔའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་སྤྱོད་པ་ཡིན་ནོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་ཁྱིམ་པ་གཞན་དག་ལ་ཆང་བྱིན་ཡང་དེ་བཞིན་གཤེགས་པ་རྣམས་ཀྱིས་ཉེས་པར་བརྗོད་པ་མ་ཡིན་ནོ། །ཁྱིམ་བདག་བྱང་ཆུབ་སེམས་དཔའ་ཁྱིམ་པ་དེས་བསླབ་པའི་གཞི་ལྔ་བཟུང་བའི
42-1-262b
དགེ་བའི་རྩ་བ་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །དེས་བསླབ་པའི་གཞི་ལྔ་པོ་དེ་དག་ཀྱང་ཤིན་ཏུ་བསྲུང་བར་བྱའོ། །གང་དུ་ཡང་དེས་ཕྲ་མ་མི་བྱ་ཞིང་བྱེ་བ་རྣམས་ཀྱི་བསྡུམས་བྱའོ། །དེས་ངག་རྩུབ་པོ་ཡང་མི་སྨྲ་བར་བྱ་ཞིང་དེས་ངག་འཇམ་པོར་སྨྲ་བ་དང ། ཚིག་ མཉེན་པ་དང ། གསོང་པོར་སྨྲ་བར་བྱའོ། །ཚིག་ཀྱལ་པ་ཡང་སྨྲ་བར་མི་བྱ་ཞིང ། དུས་སུ་སྨྲ་བ་དང ། ཡང་དག་པར་སྨྲ་བ་དང ། དོན་སྨྲ་བ་དང ། ཆོས་སྨྲ་བ་དང ། རིགས་པ་སྨྲ་བ་དང ། འདུལ་བ་ས་བ་དང ། ལན་ལེགས་པར་འདེབས་པ་དང ། ཇི་སྐད་སྨྲས་པ་དེ་བཞིན་བྱེད་པར་བྱའོ། །ངེས་བརྣབ་སེམས་སུ་ མི་བྱ་ཞིང་སེམས་ཅན་ཐམས་ཅད་ལ་ཕན་པ་དང་བདེ་བ་བསམ་པར་བྱའོ། །གནོད་སེམས་སུ་མི་བྱ་ཞིང་རྟག་ཏུ་བཟོད་པའི་སྟོབས་ཀྱི་གོ་ཆ་བགོ་བར་བྱའོ། །དེས་ཡང་དག་པར་བལྟ་བར་བྱ་ཞིང་ལོག་པ་ཕྱིན་ཅི་ལོག་ཏུ་ལྟ་བ་ཐམས་ཅད་དང་བྲལ་བར་བྱའོ། །ལྷར་སངས་རྒྱས་ལ་བསམ་པ་རྗེས་སུ་སོང་ཞིང་ལྷ་གཞན་མི་ འཛིན་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ལྗོངས་ཀྱི་ཕྱོགས་གང་ན་གནས་པ་དེར་དེས་སེམས་ཅན་རྣམས་ལ་ཆོས་ཀྱི་གཏམ་བརྗོད་པར་བྱ་སྟེ། གང་དག་མ་དད་པ་དེ་དག་ནི་དད་པ་ལ་གཟུད་པར་བྱ། སེམས་ཅན་གང་ དག་མི་གུས་ཤིང་ཕར་མི་འཛིན་པ། མར་མི་འཛིན་པ། དགེ་སྦྱོང་དུ་མི་འཛིན་པ། བྲམ་ཟེར་མི་འཛིན་པ། རིགས་ཀྱི་གཙོ་བོ་ལ་རིམ་གྲོ་མི་བྱེད་པ། ཚུལ་དང་མི་ལྡན་ཞིང་མཚམས་ལས་འདས་པ་དེ་དག་བླ་མ་ལ་གུས་པ་དང ། ཆོས་སྤྱོད་པ་ལ་གཟུད་པར་བྱའོ། །སེམས་ཅན་གང་དག་ཐོས་པ་ཉུང་བ་དེ་དག་ མང་དུ་ཐོས་པ་ལ་སྦྱར་བར་བྱའོ། །སེར་སྣ་ཅན་རྣམས་ནི་གཏོང་བ་ལ། ཚུལ་ཁྲིམས་འཆལ་པ་རྣམས་ནི་ཚུལ་ཁྲིམས་ལ། གནོད་སེམས་ཅན་རྣམས་ནི་བཟོད་པ་དང་དེས་པ་ལ། ལེ་ལོ་ཅན་རྣམས་ནི་བརྩོན་འགྲུས་རྩོམ་པ་ལ། བརྗེད་ངེས་པ་རྣམས་ནི་དྲན་པ་དང་ཤེས་བཞིན་ལ། འཆལ་བའི་ཤེས་རབ་ ཅན་རྣམས་ནི་ཤེས་རབ་ལ་གཟུད་པར་བྱའོ། །སེམས་ཅན་དབུལ་པོ་རྣམས་ལ་ལོངས་སྤྱོད་ཡང་དག་པར་བགོ་བར་བྱའོ། །སེམས་ཅན་ནད་པ་རྣམས་ལ་སྨན་སྦྱིན་པར་བྱའོ། །སེམས་ཅན་མགོན་མེད་པ་རྣམས་ཀྱི་མགོན་བྱའོ། །སྐྱབས་མེད་པ་རྣམས་ཀྱི་སྐྱབས་དང ། དཔུང་གཉེན་མེད་པ་རྣམས་ཀྱི
42-1-263a
དཔུང་གཉེན་བྱའོ། །དེས་ལྗོངས་དང་ལྗོངས་ཀྱི་ཕྱོགས་དེ་དག་ཐམས་ཅད་དང་ཇི་ལྟར་འཐུན་པར་སེམས་ཅན་འགའ་ཡང་ལོག་པར་ལྟུང་བར་མི་འགྲོ་བ་དེ་ལྟར་ཆོས་ཀྱིས་བསྲུང་བར་བྱའོ། །ཁྱིམ་བདག་གལ་ཏེ་བྱང་ཆུབ་སེམས་དཔའ་ཁྱིམ་པས་ལན་གཅིག་ལན་གཉིས་ལན་གསུམ་ ནས་ལན་བདུན་གྱི་བར་དུ་རྗེས་སུ་བསྟན་པས་སེམས་ཅན་རྣམས་ཡོན་ཏན་དག་ལ་བཀོད་པ་ལས་ཡོན་ཏན་གང་ཡང་རུང་བ་ལ་གནས་པར་མ་གྱུར་ན་ཁྱིམ་བདག་དེའི་ཚེ་བྱང་ཆུབ་སེམས་དཔའ་ཁྱིམ་པ་དེས་སེམས་ཅན་དེ་དག་ལ་སྙིང་རྗེ་ཆེན་པོ་བསྐྱེད་དེ།དེས་ཐམས་ཅད་མཁྱེན་པ་ཉིད་ཀྱི་གོ་ཆ་སྲ་བ་ཡང་ བགོ་ཞིང་ཚིག་འདི་སྐད་ཅེས་ཇི་སྲིད་དུ་སེམས་ཅན་གདུལ་དཀའ་བ་དམུ་རྒོད་དེ་དག་ཡོངས་སུ་སྨིན་པར་མ་གྱུར་པ་དེ་སྲིད་དུ་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་མི་རྒྱའོ་ཞེས་བརྗོད་པར་བྱའོ། །དེ་ཅིའི་ཕྱིར་ཞེ་ན། བདག་གིས་ནི་དེ་དག་གི་ཕྱིར་གོ་ཆ་བགོས་ཏེ། སེམས་ཅན་དྲང་པོ་རྣམས་ཀྱི་ཕྱིར་མ་ཡིན། གཡོ་མེད་པ་རྣམས་ཀྱི་ཕྱིར་མ་ཡིན། སྒྱུ་མེད་པ་རྣམས་ཀྱི་ཕྱིར་མ་ཡིན་ཚུལ་ཁྲིམས་དང་ལྡན་པ་རྣམས་ཀྱི་ཕྱིར་མ་ཡིན་ཏེ། ཡོན་ཏན་དང་ལྡན་པ་རྣམས་ཀྱི་ཕྱིར་བདག་གིས་གོ་ཆ་མ་བགོས་ཀྱིས། ཅི་ནས་བདག་གི་རྩོལ་བ་དོན་ཡོད་པར་འགྱུར་བ་དང ། སེམས་ཅན་གྱིས་ བདག་མཐོང་མ་ཐག་ཏུ་དགའ་བ་དང ། དད་པ་ཐོབ་པར་འགྱུར་བ་དེ་ལྟར་བྱའོ། །དེ་ལྟར་བསྒྲུབ་བོ། །དེ་ལྟར་བརྩོན་འགྲུས་བརྩམ་པར་བྱའོ་སྙམ་མོ། །ཁྱིམ་བདག་གལ་ཏེ་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ལྗོངས་ཀྱི་ཕྱོགས་གང་ན་གནས་པའི་བྱང་ཆུབ་སེམས་དཔའ་དེས་ཕྱོགས་དེར་ མ་བསྐུལ་ཏམ། དྲན་པར་མ་བྱས་ཏེ་སེམས་ཅན་རྣམས་ངན་འགྲོ་གང་ཡང་རུང་བ་ཞིག་ཏུ་སྐྱེས་པར་གྱུར་ན་བྱང་ཆུབ་སེམས་དཔའ་དེ་ནི་དེ་བཞིན་གཤེགས་པ་རྣམས་ཀྱིས་སྨད་པ་ཡིན་ནོ། །ཁྱིམ་བདག་འདི་ལྟ་སྟེ་དཔེར་ན་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ལྗོངས་ཀྱི་ཕྱོགས་གང་ན་ སྨན་པ་མཁས་པ་ཞིག་གནས་པ་དེས་ཐ་ན་སེམས་ཅན་འགའ་ཞིག་གི་དུག་ཞི་བར་མ་ནུས་ཏེ་འཆི་བའི་དུས་བྱེད་པར་གྱུར་ན་སྨན་པ་དེ་སྐྱེ་བོ་མང་པོས་སྨད་པར་འགྱུར་རོ། །ཁྱིམ་བདག་དེ་བཞིན་དུ་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། ལྗོངས་ཀྱི་ཕྱོགས་གང་ན་བྱང་ཆུབ་སེམས་དཔའ་གནས་པ
42-1-263b
དེས་དེའི་ཕྱོགས་སུ་ཐ་ན་སེམས་ཅན་འགའ་ཙམ་ལ་ཡང་མ་བསྐུལ་ཏམ་དྲན་པར་མ་བྱས་ཏེ་ངན་འགྲོ་གང་ཡང་རུང་བ་ཞིག་ཏུ་སྐྱེས་པར་གྱུར་ན་བྱང་ཆུབ་སེམས་དཔའ་དེ་དེ་བཞིན་གཤེགས་པ་རྣམས་ཀྱིས་སྨད་པ་ཡིན་ནོ། །ཁྱིམ་བདག་དེ་བས་ན་འདི་ལ་བྱང་ཆུབ་སེམས་དཔའ་ཁྱིམ་པ་ཅི་ནས་གྲོང་ངམ། གྲོང་ཁྱེར་ རམ། གྲོང་རྡལ་ལམ། ལྗོངས་སམ། ལྗོངས་ཀྱི་ཕྱོགས་གང་ན་གནས་པ་དེས་བདག་གིས་སེམས་ཅན་འགའ་ཡང་ལོག་པར་ལྟུང་བར་འགྲོ་བར་མི་འགྱུར་བ་དེ་ལྟར་བྱའོ། །དེ་ལྟར་བསྒྲུབ་བོ། །དེ་ལྟར་བརྩོན་འགྲུས་བརྩམ་མོ་སྙམ་པའི་གོ་ཆ་དེ་ལྟ་བུ་བགོ་བར་བྱའོ། །ཁྱིམ་བདག་གཞན་ཡང་བྱང་ཆུབ་ སེམས་དཔའ་ཁྱིམ་པ་ཁྱིམ་ན་གནས་པས་ཁྱིམ་ན་གནས་པའི་ཉེས་པ་ལ་མཁས་པར་བྱའོ། །དེས་འདི་ལྟར་སོ་སོར་བསླབ་པར་བྱ་སྟེ། ཁྱིམ་ཞེས་བྱ་བ་འདི་ནི་དགེ་བའི་རྩ་བ་རྣམས་འཇོམས་པར་བྱེད་པ། འབྱུང་བ་སུན་འབྱིན་པ། དགེ་བའི་སྡོང་པོ་འགྱེལ་བར་བྱེད་པ་སྟེ། དེའི་ཕྱིར་ཁྱིམ་ཞེས་བྱའོ། །ཁྱིམ་ ན་གནས་པ་ཞེས་བྱ་བ་འདི་ནི་ཉོན་མོངས་པ་ཐམས་ཅད་ཀྱི་གནས། མི་དགེ་བའི་རྩ་བ་ལ་རྣམ་པར་རྟོག་པ་རྣམས་ཀྱི་གནས། བྱིས་པ་སོ་སོའི་སྐྱེ་བོ་མ་དུལ་བ་མ་སྦས་པ་རྣམས་ཀྱི་གནས། མི་དགེ་བ་སྤྱོད་པ་རྣམས་ཀྱི་གནས། སྐྱེ་བོ་ངན་པ་འདུས་པ་ཡིན་ཏེ། དེའི་ཕྱིར་ཁྱིམ་ན་གནས་པ་ཞེས་བྱའོ། །ཁྱིམ་ན་ གནས་པ་ཞེས་བྱ་བ་འདི་ནི་སྡུག་བསྔལ་གྱི་ཆོས་ཐམས་ཅད་ཀྱི་གནས་ཞེས་བརྗོད་པའོ། །འདི་ནི་སྔོན་གོམས་པར་བྱས་པའི་དགེ་བའི་རྩ་བ་རྣམས་ཉམས་པར་བྱེད་པ་སྟེ། དེའི་ཕྱིར་ཁྱིམ་ན་གནས་པ་ཞེས་བྱའོ། །ཁྱིམ་ཞེས་བྱ་བ་འདི་ནི་དེར་གནས་ནས་བྱ་བའི་མི་རིགས་པ་བྱེད་པའོ། །དེར་གནས་ནས་ཕ་མ་ དང ། དགེ་སྦྱོང་དང ། བྲམ་ཟེ་ལ་གུས་པར་མི་འགྱུར་བ་ཡིན་ཏེ། དེའི་ཕྱིར་ཁྱིམ་ཞེས་བྱའོ། །ཁྱིམ་ཞེས་བྱ་བ་འདི་ནི་སྲིད་པའི་འཁྲི་ཤིང་ལ་མངོན་པར་དགའ་བའི་ཕྱིར་མྱ་ངན་དང ། སྨྲེ་སྔགས་འདོན་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་པ་རྣམས་འབྱུང་སྟེ། དེའི་ཕྱིར་ཁྱིམ་ཞེས་བྱའོ། ། ཁྱིམ་ཞེས་བྱ་བ་འདི་ནི་གསད་པ་དང ། བཅིང་བ་དང ། བརྡེག་པ་དང ། བསྡིགས་པ་དང ། འཚེ་བ་དང ། མི་སྙན་པ་དང ། གཤེ་བ་དང་།ངན་དུ་བརྗོད་པ་དང ། ངན་དུ་བྱ་བའི་ཚིག་གི་ལམ་རྣམས་འདུ་བ་སྟེ། དེའི་ཕྱིར་ཁྱིམ་ཞེས་བྱའོ། །ཁྱིམ་ཞེས་བྱ་བ་འདི་ནི་དགེ་བའི་རྩ་བ་མ་བྱས་པ་མི་འཛུགས་པའོ། །དགེ་བའི
42-1-264a
རྩ་བ་བྱས་པ་རྣམས་རྣམ་པར་འཇིག་པའོ། །མཁས་པ་རྣམས་དང ། སངས་རྒྱས་དང ། སངས་རྒྱས་ཀྱི་ཉན་ཐོས་ཐམས་ཅད་ཀྱིས་སྨད་པའོ། །འདི་ལ་གནས་པ་ནི་ངན་འགྲོར་འགྲོ་བར་འགྱུར་རོ། །འདི་ལ་གནས་པ་ནི་འདོད་ཆགས་ཀྱིས་འགྲོ་བ་མ་ཡིན་པར་འགྲོ་བའོ། །ཞེ་སྡང་དང ། འཇིགས་པ་དང ། གཏི་མུག་གིས་འགྲོ་བ་མ་ཡིན་པར་འགྲོ་བ་སྟེ། དེའི་ཕྱིར་ཁྱིམ་ཞེས་བྱའོ། །འདི་ནི་ཚུལ་ཁྲིམས་ཀྱི་ཕུང་པོ་ཀུན་མི་སྲུང་བའོ། །ཏིང་ངེ་འཛིན་གྱི་ཕུང་པོ་འདོར་བའོ། །ཤེས་རབ་ཀྱི་ཕུང་པོ་ལ་མི་འཇུག་པའོ། །རྣམ་པར་གྲོལ་བའི་ཕུང་པོ་མི་འཐོབ་པའོ། །རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་མི་སྐྱེད་པ་སྟེ། དེའི་ ཕྱིར་ཁྱིམ་ཞེས་བྱའོ། །ཁྱིམ་ན་གནས་པ་ནི་ཕ་དང ། མ་དང ། བུ་དང ། ཆུང་མ་དང ། བྲན་ཕོ་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་དང ། གཡོག་ཡོངས་སུ་འཛིན་པ་ལ་སྲེད་པ་ཡིན་ནོ། །ཁྱིམ་ན་གནས་པ་འདི་ནི་རྒྱ་ མཚོ་ལ་ཆུ་བྲན་ལྟར་དགང་དཀའ་བའོ། །ཁྱིམ་ན་གནས་པ་ནི་མེ་ལ་ཤིང་ལྟར་ཆོག་མི་ཤེས་པའོ། །ཁྱིམ་ན་གནས་པ་ནི་ཐུག་པ་མེད་པའི་ཚུལ་གྱིས་རླུང་མར་ལྟར་ཐུག་པ་མེད་པར་རྣམ་པར་རྟོག་པའོ། །ཁྱིམ་ན་གནས་པ་ནི་འཇིག་པས་བྱེ་མའི་གྲོང་ཁྱེར་ལྟར་འཇིག་པའོ། ཁྱིམ་ན་གནས་པ་ནི་ཁ་ཟས་བཟང་པོ་དུག་དང་ འདྲེས་པ་ལྟར་འདྲེས་པའོ། །ཁྱིམ་ན་གནས་པ་ནི་མི་མཛའ་བ་བཞིན་དུ་འཐུན་པ་མ་ཡིན་པས་རྟག་ཏུ་སྡུག་བསྔལ་བའོ། །ཁྱིམ་ན་གནས་པ་ནི་འཕགས་པའི་ཆོས་སྒྲུབ་པ་ལ་བར་ཆད་བྱེད་པའོ། །ཁྱིམ་ན་གནས་པ་ནི་ཕན་ཚུན་རྐྱེན་གྱིས་འཐབ་པའོ། །ཁྱིམ་ན་གནས་པ་ནི་གཅིག་ལ་གཅིག་གནོད་པར་སེམས་ པས་རྟག་ཏུ་མི་འཐུན་པའོ། །ཁྱིམ་ན་གནས་པ་ནི་ལེགས་པར་བྱས་པ་དང ། ཉེས་པར་བྱས་པའི་ལས་ཀྱི་མཐའ་ལ་སྦྱོར་བས་གནོད་པ་མང་བའོ། །ཁྱིམ་ན་གནས་པ་ནི་ལས་ཀྱི་མཐའ་ཐུག་པ་མེད་པས་རྟག་ཏུ་བརྩོན་པའོ། །ཁྱིམ་ན་གནས་པ་ནི་ཡུན་རིང་པོ་ནས་བསགས་པ་རྣམ་པར་འཇིག་པའི་ཆོས་ཅན་གྱི་ ཕྱིར་མི་རྟག་པའོ། །ཁྱིམ་ན་གནས་པ་ནི་དངོས་པོ་ཀུན་དུ་ཚོལ་ཞིང་ཡོངས་སུ་སྲུང་བས་སྡུག་བསྔལ་བའོ། །ཁྱིམ་ན་གནས་པ་ནི་དགྲ་ལྟར་མི་མཛའ་བས་རྟག་ཏུ་བག་ཚ་བའོ། །ཁྱིམ་ན་གནས་པ་ནི་ཕྱིན་ཅི་ལོག་གིས་ཟིན་པས་བག་མེད་པའོ། །ཁྱིམ་ན་གནས་པ་ནི་རང་གི་དཔྱོད་པས་རྣམ་པར་བསྒྲུབས་ཏེ།
42-1-264b
ངོ་བོ་ཉིད་ཀྱིས་སྟོང་པས་གར་མཁན་གྱི་ཚོན་དང་འདྲའོ། །ཁྱིམ་ན་གནས་པ་ནི་མྱུར་དུ་ཕན་ཚུན་འགྱེས་པས་མཐར་རྒུད་ཅིང་འགྱུར་བའོ། །ཁྱིམ་ན་གནས་པ་ནི་སྐྱེ་བོ་གློ་བུར་དུ་འདུས་པས་རྟག་ཏུ་ངོ་བོ་ཉིད་མེད་པའི་ཕྱིར་སྒྱུ་མ་ལ་ལྟ་བ་དང་མཚུངས་སོ། །ཁྱིམ་ན་གནས་པ་ནི་ཕུན་སུམ་ཚོགས་པ་ཐམས་ཅད་ ཀྱང་མཐར་རྒུད་པར་འགྱུར་བས་རྨི་ལམ་དང་མཚུངས་སོ། །ཁྱིམ་ན་གནས་པ་ནི་མྱུར་དུ་འབྲལ་བས་ཟིལ་པའི་ཐིགས་པ་དང་མཚུངས་སོ། །ཁྱིམ་ན་གནས་པ་ནི་རོ་བྲོ་བ་ཆུང་ངུ་ཡོངས་སུ་འཇལ་བས་སྦྲང་རྩིའི་ཐིགས་པ་དང་མཚུངས་སོ། །ཁྱིམ་ན་གནས་པ་ནི་གཟུགས་དང ། སྒྲ་དང ། དྲི་དང ། རོ་དང ། རེག་དང ། ཆོས་ཀྱིས་ཡོངས་སུ་གཟིར་བས་ཚེར་མའི་དྲ་བ་དང་མཚུངས་སོ། །ཁྱིམ་ན་གནས་པ་ནི་མི་དགེ་བ་ལ་རྣམ་པར་རྟོག་པས་ཡོངས་སུ་མི་སྐྱོ་བའི་ཕྱིར་ཁ་ཁབ་ཙམ་གྱི་སྲོག་ཆགས་དང་མཚུངས་སོ། །ཁྱིམ་ན་གནས་པ་ནི་གཅིག་ལ་གཅིག་འདྲིད་པས་སྲོག་རྣམ་པར་འཇིག་པའོ། །ཁྱིམ་ན་གནས་པ་ནི་ སེམས་རྙོག་པ་ཅན་དུ་བྱེད་པས་རྟག་ཏུ་འཁྲུག་པའོ། །ཁྱིམ་ན་གནས་པ་ནི་རྒྱལ་པོ་དང ། ཆོམ་རྐུན་དང ། མེ་དང ། ཆུ་དང ། བགོ་སྐལ་ལ་སྤྱོད་པས་རྣམ་པར་འཇོམས་པའི་ཕྱིར་ཐུན་མོང་བའོ། ཁྱིམ་ན་གནས་པ་ནི་ཉེས་དམིགས་མང་བས་རོ་བྲོ་བ་ཆུང་བའོ། །ཁྱིམ་བདག་དེ་ལྟར་བྱང་ཆུབ་སེམས་དཔའ་ ཁྱིམ་པ་ཁྱིམ་ན་གནས་པས་ཁྱིམ་ན་གནས་པའི་ཉེས་པ་ལ་མཁས་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པས་སྦྱིན་པ་དང ། དུལ་བ་དང ། ཡང་དག་པར་སྡོམ་པ་དང ། ངེས་པ་མང་དུ་བྱའོ། །དེས་ཡང་འདི་ལྟར་བརྟག་པར་བྱ་སྟེ། གང་བྱིན་པ་དེ་ནི་བདག་གི་ཡིན་ ནོ། །ཁྱིམ་ན་བཞག་པ་དེ་ནི་བདག་གི་མ་ཡིན་ནོ། །གང་བྱིན་པ་དེ་ནི་སྙིང་པོ་ཅན་ནོ། །གང་ཁྱིམ་ན་བཞག་པ་དེ་ནི་སྙིང་པོ་མེད་པའོ། །གང་བྱིན་པ་དེ་ནི་གཞན་དུ་བདེ་བའོ། །གང་ཁྱིམ་ན་བཞག་པ་དེ་ནི་ད་ལྟར་བྱུང་བ་ན་བདེ་བའོ། །གང་བྱིན་པ་དེ་ནི་ཡང་བསྲུང་བར་བྱ་བ་མ་ཡིན་པའོ། །གང་ཁྱིམ་ན་ བཞག་པ་དེ་ནི་བསྲུང་བར་བྱ་བའོ། །གང་བྱིན་པ་དེ་ནི་སྲེད་པ་ཟད་པར་འགྱུར་བའོ། །གང་ཁྱིམ་ན་བཞག་པ་དེ་ནི་སྲེད་པ་རྣམ་པར་འཕེལ་བའོ། །གང་བྱིན་པ་དེ་ནི་བདག་གི་བ་མེད་པའོ། །གང་ཁྱིམ་ན་བཞག་པ་དེ་ནི་བདག་གི་བ་དང་བཅས་པའོ། །གང་བྱིན་པ་དེ་ནི་ཡོངས་སུ་མི་འཛིན་པའོ། །གང
42-1-265a
ཁྱིམ་ན་བཞག་པ་དེ་ནི་འཛིན་པ་དང་བཅས་པའོ། །གང་བྱིན་པ་དེ་ནི་འཇིགས་པ་མེད་པའོ། །གང་ཁྱིམ་ན་བཞག་པ་དེ་ནི་འཇིགས་པ་དང་བཅས་པའོ། །གང་བྱིན་པ་དེ་ནི་བྱང་ཆུབ་ཀྱི་ལམ་ཉེ་བར་སྟོན་པའོ། །གང་ཁྱིམ་ན་བཞག་པ་དེ་ནི་བདུད་ཀྱི་ཕྱོགས་ཉེ་བར་སྟོན་ པའོ། །གང་བྱིན་པ་དེ་ནི་ཟད་མི་ཤེས་པའོ། །གང་ཁྱིམ་ན་བཞག་པ་དེ་ནི་ཟད་པར་འགྱུར་བའོ། །གང་བྱིན་པ་དེ་ནི་བདེ་བའོ། །གང་ཁྱིམ་ན་བཞག་པ་དེ་ནི་ཀུན་ཏུ་བསྲུང་དགོས་པས་སྡུག་བསྔལ་བའོ། །གང་བྱིན་པ་དེ་ནི་ཉོན་མོངས་པ་སྤོང་བར་འགྱུར་བའོ། །གང་ཁྱིམ་ན་ཡོད་པ་དེ་ནི་ཉོན་ མོངས་པ་འཕེལ་བར་བྱེད་པའོ། །གང་བྱིན་པ་དེ་ནི་ལོངས་སྤྱོད་ཆེན་པོར་འགྱུར་བའོ། །གང་ཁྱིམ་ན་བཞག་པ་དེ་ནི་ལོངས་སྤྱོད་ཆེན་པོར་མི་འགྱུར་བའོ། །གང་བྱིན་པ་དེ་ནི་སྐྱེས་བུ་དམ་པའི་ལས་སོ། །གང་ཁྱིམ་ན་བཞག་པ་དེ་ནི་སྐྱེས་བུ་ངན་པའི་ལས་སོ། །གང་བྱིན་པ་དེ་ནི་སངས་རྒྱས་ཐམས་ཅད་ ཀྱིས་བསྔགས་པའོ། །གང་ཁྱིམ་ན་བཞག་པ་དེ་ནི་བྱིས་པའི་སྐྱེ་བོས་བསྔགས་པའོ་སྙམ་དུ་བརྟག་པར་བྱའོ། །ཁྱིམ་བདག་དེ་ལྟར་བྱང་ཆུབ་སེམས་དཔའ་ཁྱིམ་པས་སྙིང་པོ་བླང་བར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་བསྐྱེད་པར་ བྱ་སྟེ། གསུམ་གང་ཞེ་ན། དགེ་བའི་བཤེས་གཉེན་དུ་འདུ་ཤེས་པ་དང ། ཚེ་རྗེས་ནས་ལོངས་སྤྱོད་ཆེན་པོར་འགྱུར་བར་འདུ་ཤེས་པ་དང ། བྱང་ཆུབ་ཀྱི་ལམ་ཉེ་བར་སྟོན་པར་འདུ་ཤེས་པ་སྟེ། ཁྱིམ་བདག་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་པོ་དེ་དག་བསྐྱེད་པར་བྱའོ། ། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། སེར་སྣ་ཚར་གཅད་པའི་འདུ་ཤེས་དང ། བདོག་པ་ཐམས་ཅད་ཡོངས་སུ་གཏོང་བའི་འདུ་ཤེས་དང ། ཐམས་ཅད་མཁྱེན་པའི་ཡེ་ཤེས་ལ་ལྟ་བའི་འདུ་ཤེས་ཏེ། ཁྱིམ་ བདག་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་པོ་དེ་དག་བསྐྱེད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། དེ་བཞིན་གཤེགས་པའི་བཀའ་བཞིན་དུ་བྱ་བའི་འདུ་ཤེས་དང་།
42-1-265b
བདུད་ཚར་གཅད་པའི་འདུ་ཤེས་དང ། རྣམ་པར་སྨིན་པ་ལ་རེ་བ་མེད་པའི་འདུ་ཤེས་ཏེ། ཁྱིམ་བདག་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་པོ་དེ་དག་བསྐྱེད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་ བསྐྱེད་པར་བྱ་སྟེ། གསུམ་གང་ཞེ་ན། སློང་བ་ལ་གཡོག་ཏུ་འདུ་ཤེས་པ་དང ། བསྡུ་བའི་དངོས་པོས་མི་གཏང་བར་འདུ་ཤེས་པ་དང ། དམ་པ་མ་ཡིན་པ་ཡོངས་སུ་འཛིན་པ་ལས་འབྱུང་བར་འདུ་ཤེས་པ་སྟེ། ཁྱིམ་བདག་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་ པོ་དེ་དག་བསྐྱེད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། འདོད་ཆགས་དང་བྲལ་བའི་འདུ་ཤེས་དང ། བྱམས་པ་བསྒོམ་པའི་འདུ་ཤེས་དང ། གཏི་མུག་ལ་མི་འཇུག་པའི་འདུ་ཤེས་ཏེ། ཁྱིམ་ བདག་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདུ་ཤེས་གསུམ་པོ་དེ་དག་བསྐྱེད་པར་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་འདི་ལྟར་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདོད་ཆགས་དང ། ཞེ་སྡང་དང ། གཏི་མུག་སྲབ་མོར་འགྱུར་རོ། །ཁྱིམ་བདག་ཇི་ལྟར་བྱང་ཆུབ་ སེམས་དཔའ་ཁྱིམ་པས་སློང་བ་མཐོང་ན་འདོད་ཆགས་དང ། ཞེ་སྡང་དང ། གཏི་མུག་སྲབ་མོར་འགྱུར་ཞེ་ན། གང་དེའི་དངོས་པོ་ལ་བཏང་སྙོམས་ཤིང་ཡོངས་སུ་གཏོད་བ་འདི་ནི་དེའི་འདོད་ཆགས་སྲབ་པའོ། །གང་སློང་བ་དེ་དག་ལ་བྱམས་པ་ཉེ་བར་སྒྲུབ་པ་འདི་ནི་དེའི་ཞེ་སྡང་སྲབ་པའོ། །གང་དངོས་པོ་ བྱིན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་འདི་ནི་དེའི་གཏི་མུག་སྲབ་པའོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་འདོད་ཆགས་དང ། ཞེ་སྡང་དང ། གཏི་མུག་སྲབ་མོར་འགྱུར་རོ། །ཁྱིམ་བདག་གཞན་ཡང་བྱང་ཆུབ་སེམས་ དཔའ་ཁྱིམ་པས་སློང་བ་མཐོང་ན་ཕ་རོལ་ཏུ་ཕྱིན་པ་དྲུག་བསྒོམ་པ་ཡོངས་སུ་རྫོགས་པར་འགྱུར་ཏེ། ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པས་དངོས་པོ་གང་ཡང་རུང་བ་ཞིག་བསླངས་མ་ཐག་ཏུ་དངོས་པོ་དེ་ལ་སེམས་ཀྱིས་འཛིན་པར་མི་བྱེད་དེ། དེ་ལྟར་ན་དེའི་སྦྱིན་པའི་ཕ་རོལ་ཏུ་ཕྱིན་པ་བསྒོམ
42-1-266a
པ་ཡོངས་སུ་རྫོགས་པར་འགྱུར་རོ། །གང་བྱང་ཆུབ་ཀྱི་སེམས་ལ་བརྟེན་ནས་ཡོངས་སུ་གཏོང་སྟེ། དེ་ལྟར་ན་དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །གང་སློང་བ་དེ་དག་ལ་བྱམས་པ་ཉེ་བར་སྒྲུབ་སྟེ་མི་ཁྲོ་ཞིང་གནོད་སེམས་མི་བྱེད་དེ། དེ་ལྟར་ ན་དེའི་བཟོད་པའི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །གལ་ཏེ་བྱིན་ན་ཅི་སྤྱད་སྙམ་དུ་འདི་ལྟར་སེམས་གཡོ་བས་ཞུམ་པ་མེད་དེ་དེ་ལྟར་ན་དེའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །གང་སློང་བ་ལ་བྱིན་ཏེ་བྱིན་ནས་ཀྱང་གདུང་བ་མེད་ ཅིང་འགྱོད་པ་མེད་པ་ཡིན། གང་དུ་ཡང་དགའ་ཞིང་རབ་ཏུ་མགུ་སྟེ་བདེ་བ་དང་ཡིད་བདེ་བ་སྐྱེད་ཅིང་གང་བྱང་ཆུབ་ཀྱི་སེམས་ལ་གནས་ནས་གཏོང་སྟེ། དེ་ལྟར་ན་དེའི་བསམ་གཏན་གྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །བྱིན་ནས་ཀྱང་གང་ཆོས་ཐམས་ཅད་མི་དམིགས་ཤིང་ རྣམ་པར་སྨིན་པ་ལ་མི་རེ་སྟེ། ཇི་ལྟར་མཁས་པ་དེ་དག་ཆོས་གང་ལ་ཡང་མངོན་པར་མ་ཞེན་པ་དེ་ལྟར་མངོན་པར་ཞེན་པ་མེད་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་སྟེ། དེ་ལྟར་ན་དེའི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་ བདག་དེ་ལྟར་ན་བྱང་ཆུབ་སེམས་དཔའ་ཁྱིམ་པས་སློང་བ་མཐོང་ན་ཕ་རོལ་ཏུ་ཕྱིན་པ་དྲུག་བསྒོམ་པ་ཡོངས་སུ་རྫོགས་པར་འགྱུར་རོ།། །།བམ་པོ་གཉིས་པ། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པས་རྗེས་སུ་ཆགས་པ་དང་ཁོང་ཁྲོ་བ་མེད་ པས་འཇིག་རྟེན་གྱི་ཆོས་བརྒྱད་ལ་མཉམ་པ་ཉིད་ཐོབ་པར་བྱའོ། །དེས་ལོངས་སྤྱོད་རྙེད་དམ། ཆུང་མ་རྙེད་དམ། བུ་རྙེད་དམ། ནོར་རྙེད་དམ། འབྲུ་རྙེད་ཀྱང་ཁེངས་པར་ཡང་མི་བྱ། དགའ་བར་ཡང་མི་བྱ། ཐམས་ཅད་མ་འབྱོར་ཀྱང་དེས་ཞུམ་པར་ཡང་མི་བྱ། ཡི་མུག་པར་ཡང་མི་བྱའི། དེས་འདི་ལྟར་བརྟག་ པར་བྱ་སྟེ། འདུས་བྱས་ཐམས་ཅད་ནི་སྒྱུ་མ་བྱས་པ། རྣམ་པར་བསྒྲུབས་པས་སོ་སོར་ཉེ་བར་གནས་པའི་མཚན་ཉིད་དོ། །འདི་ལྟ་སྟེ།ཕ་མ་དང ། བུ་དང ། ཆུང་མ་དང ། བྲན་ཕོ་དང ། བྲན་མོ་དང ། ལས་བྱེད་པ་དང ། ཞོ་ཤས་འཚོ་བ་དང ། མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན
42-1-266b
མཚམས་དེ་དག་ནི་ལས་ཀྱི་རྣམ་པར་སྨིན་པས་གྲུབ་པ་ཡིན་ཏེ། དེ་དག་ཀྱང་བདག་གི་མ་ཡིན། བདག་ཀྱང་དེ་དག་གི་མ་ཡིན་ནོ། །དེ་ཅིའི་ཕྱིར་ཞེ་ན། ཕ་མ་ལ་སོགས་པ་དེ་དག་ནི་བདག་གི་མགོན་ནམ། སྐྱབས་སམ། དཔུང་གཉེན་ནམ། གནས་སམ། གླིང་ངམ། བདག་གམ། བདག་གི་བ་མ་ཡིན་ནོ། །གང་ བདག་གི་ཟིན་པའི་ཕུང་པོ་དང ། ཁམས་དང ། སྐྱེ་མཆེད་དེ་དག་ཀྱང་བདག་མ་ཡིན། བདག་གི་མ་ཡིན་ན། གང་བདག་གི་ཕ་མ་ལ་སོགས་པ་དེ་དག་བདག་དང་བདག་གིར་འགྱུར་བ་དང ། བདག་ཀྱང་དེ་དག་གི་ཡིན་པ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། བདག་ཀྱང་ལས་བདག་གིར་ བྱ་བ། ལས་ཀྱི་བགོ་སྐལ་ལ་སྤྱོད་པ་ཡིན་ཏེ། ལས་དགེ་བའམ། སྡིག་པའམ། གང་དང་གང་བྱས་པ་དེ་དང་དེ་ཉིད་ཀྱིས་བགོ་སྐལ་ལ་སྤྱོད་པར་འགྱུར་རོ། །དེ་དང་དེ་ཉིད་ཀྱི་འབྲས་བུ་སོ་སོར་མྱོང་ངོ ། །དེ་དང་དེ་ཉིད་ཀྱི་རྣམ་པར་སྨིན་པ་ལ་སྤྱོད་དོ། །འདི་དག་ཀྱང་ལས་བདག་གིར་བྱ་བ། ལས་ཀྱི་བགོ་སྐལ་ལ་སྤྱོད་པ་ཡིན་ཏེ། ལས་དགེ་བའམ། སྡིག་པའམ། གང་དང་གང་བྱས་པ་དེ་དང་དེ་ཉིད་ཀྱི་བགོ་སྐལ་ལ་སྤྱོད་པར་འགྱུར། དེ་དང་དེ་ཉིད་ཀྱི་རྣམ་པར་སྨིན་པ་སོ་སོར་མྱོང་པར་འགྱུར། དེ་དང་དེ་ཉིད་ཀྱི་འབྲས་བུ་སོ་སོར་མྱོང་བར་འགྱུར་རོ། །དེ་དག་གི་ཕྱིར་བདག་གི་མི་དགེ་ བའི་ལས་མངོན་པར་འདུ་བྱ་བ་ནི་བདག་གི་ཆ་མ་ཡིན་ཏེ། འདི་དག་ནི་ཚེ་འདི་ལ་བདེ་བའི་བདག་གིར་བྱ་བ་ཡིན་གྱི། ཚེ་གཞན་ལ་བདེ་བའི་བདག་གིར་བྱ་བ་མ་ཡིན་ནོ། །བདག་གི་གང་ཡིན་པ་དེ་ལ་བདག་འཇུག་པར་བྱ་སྟེ། འདི་ལྟ་སྟེ། སྦྱིན་པ་དང ། དུལ་བ་དང ། ཡང་དག་པར་སྡོམ་པ་དང ། བཟོད་པ་དང ། དེས་པ་དང ། བརྩོན་འགྲུས་དང ། བག་ཡོད་པ་དང ། བྱང་ཆུབ་ཀྱི་ཡན་ལག་སྡུད་ཅིང་མངོན་པར་སྒྲུབ་པའི་དགེ་བ་དེ་ནི་བདག་གི་ཡིན་ཏེ། གང་དུ་བདག་འགྲོ་བར་འགྱུར་བའི་ལམ་དེར་འདི་དག་ཀྱང་འགྲོ་བར་འགྱུར་རོ་སྙམ་སྟེ། དེ་སྲོག་གི་ཕྱིར་རམ། བུ་དང་ཆུང་མའི་ཕྱིར་ཡང་ སྡིག་པའི་ལས་མངོན་པར་འདུ་མི་བྱེད་དོ། །ཁྱིམ་བདག་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་དེས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། མི་རྟག་པའི་འདུ་ཤེས་དང ། མི་བརྟན་པའི་འདུ་ཤེས་དང ། འགྱུར་བའི་འདུ་ཤེས་ཏེ། ཁྱིམ་བདག་བྱང་ཆུབ
42-1-267a
སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་པོ་དེ་དག་བསྐྱེད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། འདི་ནི་དགའ་ཞིང་རྩེ་བའི་གྲོགས་ཡིན་གྱི། འདི་འཇིག་ རྟེན་ཕ་རོལ་གྱི་གྲོགས་ནི་མ་ཡིན་ནོ། །འདི་ནི་བཟའ་བ་དང་བཏུང་བའི་གྲོགས་ཡིན་གྱི། འདི་ལས་ཀྱི་རྣམ་པར་སྨིན་པ་མྱོང་བའི་གྲོགས་ནི་མ་ཡིན་ནོ། །འདི་ནི་བདེ་བའི་གྲོགས་ཡིན་གྱི། འདི་སྡུག་བསྔལ་གྱི་གྲོགས་ནི་མ་ཡིན་ནོ་སྙམ་པ་སྟེ། ཁྱིམ་བདག་བྱང་ཆུབ་སེམས་དཔའ་ཁྱིམ་པས་རང་ གི་ཆུང་མ་ལ་འདུ་ཤེས་གསུམ་པོ་དེ་དག་བསྐྱེད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། མི་གཙང་བར་འདུ་ཤེས་པ་དང ། དྲི་ང་བར་འདུ་ཤེས་པ་དང ། མི་འཐུན་པར་འདུ་ཤེས་པའོ། ། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། དགྲར་འདུ་ཤེས་པ་དང ། གཤེད་མར་འདུ་ཤེས་པ་དང ། ཕྱིར་རྒོལ་བར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་ པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཤ་ཟ་མོར་འདུ་ཤེས་པ་དང ། སྲིན་མོར་འདུ་ཤེས་པ་དང ། གཟུགས་མི་སྡུག་པར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་ བསྐྱེད་པར་བྱ་སྟེ། གསུམ་གང་ཞེ་ན། དགང་དཀའ་བར་འདུ་ཤེས་པ་དང ། གཏིང་དུ་འདུ་ཤེས་པ་དང ། བྱས་པ་མི་གཟོ་བར་འདུ་ཤེས་པའོ། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། སེམས་ ཅན་དམྱལ་བར་འགྲོ་བར་འདུ་ཤེས་པ་དང ། དུད་འགྲོའི་སྐྱེ་གནས་སུ་འགྲོ་བར་འདུ་ཤེས་པ་དང ། གཤིན་རྗེའི་འཇིག་རྟེན་དུ་འགྲོ་བར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན།
42-1-267b
ཁུར་དུ་འདུ་ཤེས་པ་དང ། སྲིད་པར་འདུ་ཤེས་པ་དང ། སྲིད་པ་ཡོངས་སུ་འཛིན་པར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། བདག་གི་བ་མ་ཡིན་པར་འདུ་ཤེས་པ་དང ། ཡོངས་སུ་ འཛིན་པ་མེད་པར་འདུ་ཤེས་པ་དང ། བརྙན་མར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ལུས་ཀྱིས་ཉེས་པར་སྤྱོད་པའི་གནས་སུ་འདུ་ཤེས་པ་དང ། ངག་གིས་ཉེས་པར་སྤྱོད་པའི་ གནས་སུ་འདུ་ཤེས་པ་དང ། ཡིད་ཀྱིས་ཉེས་པར་སྤྱོད་པའི་གནས་སུ་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། འདོད་པའི་རྣམ་པར་རྟོག་པའི་གནས་སུ་འདུ་ཤེས་པ་དང ། གནོད་སེམས་ ཀྱི་རྣམ་པར་རྟོག་པའི་གནས་སུ་འདུ་ཤེས་པ་དང ། རྣམ་པར་འཚེ་བའི་རྣམ་པར་རྟོག་པའི་གནས་སུ་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཁྲི་མོན་དུ་འདུ་ཤེས་པ་དང ། གསོད་པར་ འདུ་ཤེས་པ་དང ། འཆིང་བར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཚུལ་ཁྲིམས་ཀྱི་བར་དུ་གཅོད་པར་འདུ་ཤེས་པ་དང ། ཏིང་ངེ་འཛིན་གྱི་བར་དུ་གཅོད་པར་འདུ་ཤེས་པ་དང ། ཤེས་ རབ་ཀྱི་བར་དུ་གཅོད་པར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཁོག་ཙེར་འདུ་ཤེས་པ་དང ། སྙིར་འདུ་ཤེས་པ་དང ། རྒྱར་འདུ་ཤེས་པའོ། །ཁྱིམ་བདག་གཞན་ཡང་བྱང་ ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཡམས་ཀྱི་ནད་དུ་འདུ་ཤེས་པ་དང ། གནོད་པར་འདུ་ཤེས་པ་དང ། ནད་འགོ་བར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ
42-1-268a
འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། འཐབ་པར་འདུ་ཤེས་པ་དང ། བྱུར་དུ་འདུ་ཤེས་པ་དང ། སེར་བར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ ཞེ་ན། ནད་དུ་འདུ་ཤེས་པ་དང ། རྒ་བར་འདུ་ཤེས་པ་དང ། འཆི་བར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། །གསུམ་གང་ཞེ་ན། བདུད་དུ་འདུ་ཤེས་པ་དང ། བདུད་ལ་རྟེན་པར་འདུ་ཤེས་པ་དང ། འཇིགས་པར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། མྱ་ངན་དུ་འདུ་ཤེས་པ་དང ། སྨྲེ་སྔགས་འདོན་པར་འདུ་ཤེས་པ་དང ། སྡུག་བསྔལ་བ་དང ། ཡིད་མི་བདེ་བ་དང ། འཁྲུག་ པར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། སྤྱང་མོ་ཆེན་མོར་འདུ་ཤེས་པ་དང ། ཆུ་སྲིན་ཆེན་མོར་འདུ་ཤེས་པ་དང ། བྱི་ལ་ཆེན་མོར་འདུ་ཤེས་པའོ། །ཁྱིམ་བདག་གཞན་ཡང་ བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། སྦྲུལ་ནག་མོར་འདུ་ཤེས་པ་དང ། ཆུ་སྲིན་བྱིས་པ་གསོད་དུ་འདུ་ཤེས་པ་དང ། མདངས་འཕྲོག་མར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་ རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། མགོན་མེད་པར་འདུ་ཤེས་པ་དང ། སྐྱབས་མེད་པར་འདུ་ཤེས་པ་དང ། གནས་མེད་པར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་ བསྐྱེད་པར་བྱ་སྟེ། གསུམ་གང་ཞེ་ན། གང་བར་འདུ་ཤེས་པ་དང ། བྲི་བར་འདུ་ཤེས་པ་དང ། ན་བར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཆོམ་རྐུན་དུ་འདུ་ཤེས་པ་དང་།
42-1-268b
བཙོན་སྲུངས་སུ་འདུ་ཤེས་པ་དང ། སེམས་ཅན་དམྱལ་བའི་སྲུངས་མར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཆུ་བོར་འདུ་ཤེས་པ་དང ། སྦྱོར་བར་འདུ་ཤེས་པ་དང ། མདུད་པར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། འདམ་དུ་འདུ་ཤེས་པ་དང ། ཆགས་པར་འདུ་ཤེས་པ་དང ། ཀློང་དུ་འདུ་ཤེས་པའོ། ཁྱིམ་བདག་གཞན་ཡང་བྱང་ ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཐག་པར་འདུ་ཤེས་པ་དང ། ཁོང་སྒྲིལ་དུ་འདུ་ཤེས་པ་དང ། རྙོང་དུ་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་ གསུམ་བསྐྱེད་པར་བྱ་སྟེ། གསུམ་གང་ཞེ་ན། མེ་མ་མུར་དུ་འདུ་ཤེས་པ་དང ། རྩཝ་མེའི་སྒྲོན་མ་ལྟ་བུར་འདུ་ཤེས་པ་དང ། ཆུ་གྲི་ལྟ་བུར་འདུ་ཤེས་པའོ། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། དོན་མེད་པར་འདུ་ཤེས་པ་དང ། ཚེར་མར་འདུ་ཤེས་པ་དང ། དུག་ཏུ་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ལྷག་པར་སྒྲོ་འདོགས་པར་འདུ་ཤེས་པ་དང ། ལྷག་པར་ཀུན་དུ་གོས་ པར་བྱེད་པར་འདུ་ཤེས་པ་དང ། ལྷག་པར་ཆགས་པར་འདུ་ཤེས་པའོ། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། ཤར་གཉེར་བར་འདུ་ཤེས་པ་དང ། །ཆད་པས་གཅོད་པར་འདུ་ཤེས་པ་དང ། མཚོན་ཆ་འཛིན་པར་འདུ་ཤེས་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། འགྱེད་པར་འདུ་ཤེས་པ་དང ། རྩོད་པར་འདུ་ཤེས་པ་དང ། མཚང་འདྲུ་བར་འདུ་ཤེས་པའོ། །ཁྱིམ་བདག
42-1-269a
གཞན་ཡང་བྱང་ཆུབ་སེམས་དཔའ་ཁྱིམ་པས་རང་གི་ཆུང་མ་ལ་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། མི་སྡུག་པ་དང་ཕྲད་པར་འདུ་ཤེས་པ་དང ། སྡུག་པ་དང་བྲལ་བར་འདུ་ཤེས་པ་དང ། ཉམ་ང་བར་འདུ་ཤེས་པའོ། །མདོར་ན་ཐབ་མོའི་དྲི་མར་འདུ་ཤེས་པ་ དང ། ཐབ་མོ་རྙོག་པ་ཐམས་ཅད་དུ་འདུ་ཤེས་པ་དང ། གནོད་པ་ཐམས་ཅད་ཀྱི་རྒྱུར་གྱུར་པར་འདུ་ཤེས་པ་དང ། མི་དགེ་བ་ཐམས་ཅད་ཀྱི་རྩ་བར་འདུ་ཤེས་བསྐྱེད་པར་བྱའོ། །ཁྱིམ་བདག་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པས་འདི་ལྟ་བུའི་འདུ་ཤེས་ཡིད་ལ་བྱེད་པས་རང་ གི་ཆུང་མ་ལ་བརྟག་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པས་བུ་ལ་ལྷག་པར་སྡུག་པའི་སེམས་བསྐྱེད་པར་མི་བྱའོ། །ཁྱིམ་བདག་གལ་ཏེ་དེས་བུ་ལ་ལྷག་པར་སྡུག་པའི་སེམས་བསྐྱེད་ལ་དེ་བཞིན་དུ་སེམས་ཅན་གཞན་ལ་མ་ཡིན་ན་དེས་སྤྱོ་བ་གསུམ་གྱིས་རང་གི་ སེམས་ལ་སྤྱོ་བར་བྱ་སྟེ། གསུམ་གང་ཞེ་ན། བྱང་ཆུབ་ནི་སེམས་སྙོམས་པའི་བྱང་ཆུབ་སེམས་དཔའི་ཡིན་གྱི་།སེམས་མི་སྙོམས་པའི་མ་ཡིན་ནོ། །བྱང་ཆུབ་ནི་ཡང་དག་པར་སྦྱོར་བའི་བྱང་ཆུབ་སེམས་དཔའི་ཡིན་གྱི། ལོག་པའི་སྦྱོར་བའི་ནི་མ་ཡིན་ནོ། །བྱང་ཆུབ་ནི་ཐ་དད་པ་མེད་པར་སྤྱོད་པའི་ བྱང་ཆུབ་སེམས་དཔའི་ཡིན་གྱི་།ཐ་དད་དུ་སྤྱོད་པའི་ནི་མ་ཡིན་པ་སྟེ། སྤྱོ་བ་གསུམ་པོ་དེ་དག་གིས་རང་གི་སེམས་ལ་སྤྱོས་ནས་བུ་དེ་ལ་མི་སྡུག་པའི་འདུ་ཤེས་བསྐྱེད་པར་བྱའོ། །འདི་ནི་མི་སྡུག་པ་སྟེ། བདག་གི་སྙིང་དུ་སྡུག་པ་མ་ཡིན་ན། གང་བདག་གིས་དེའི་དོན་དུ་བུ་དེ་ལ་ནི་ལྷག་ པར་སྡུག་པ་སྐྱེད་ལ། སེམས་ཅན་གཞན་ལ་ནི་དེ་ལྟ་མ་ཡིན་ན། སངས་རྒྱས་ཀྱིས་བཀའ་སྩལ་པའི་བསླབ་པ་དང་འགལ་བར་འགྱུར་རོ། །བདག་གིས་དེའི་ཕྱིར་དགེ་བའི་རྩ་བ་ལ་ཡང་གནོད་པར་བྱས། སྲོག་ལ་ཡང་བག་མེད་དེ་གནོད་པར་གྱུར་པས་འདི་ནི་བདག་ལ་གནོད་པ་བྱེད་པའོ། ། བདག་དེའི་ཕྱིར་བྱང་ཆུབ་ཀྱི་ལམ་དང་མི་འཐུན་པའི་ལམ་ལ་སྤྱོད་པས་འདི་ནི་བདག་ལ་ཕྱིར་རྒོལ་བའོ་སྙམ་དུ་འདུ་ཤེས་གསུམ་པོ་དེ་དག་བསྐྱེད་པར་བྱའོ། །དེས་བུ་དེ་རྒྱུར་བྱས་ཏེ། ཇི་ལྟ་ཇི་ལྟ་བུར་བུ་དེ་ལ་སྡུག་པར་སེམས་པ་དང་ལྡན་པ་བཞིན་དུ་སེམས་ཅན་ཐམས་ཅད་ལ་བྱམས་པ་བསྐྱེད
42-1-269b
པ་དང ། བདག་ཕངས་པར་སེམས་པ་དང་ལྡན་པ་བཞིན་དུ་བྱམས་པ་བསྐྱེད་པ་དེ་ལྟ་དེ་ལྟ་བུར་དེས་སེམས་བསྐྱེད་པར་བྱའོ། །དེས་ཡང་འདི་ལྟར་འདི་ཡང་གུད་ནས་འོངས་ལ་བདག་ཀྱང་གུད་ནས་འོངས་མོད་ཀྱི། སེམས་ཅན་ཐམས་ཅད་ཀྱང་སྔོན་བདག་གི་བུར་གྱུར་ལ་བདག་ཀྱང་སེམས་ཅན་ ཐམས་ཅད་ཀྱི་བུར་གྱུར་ཏེ། འདི་ལ་ནི་བདག་གིའམ། གཞན་གྱིའམ། སུའི་སེམས་ཅན་གང་ཡང་མེད་དོ་སྙམ་དུ་ཚུལ་བཞིན་བརྟག་པར་བྱའོ། །དེ་ཅིའི་ཕྱིར་ཞེ་ན། མི་འཐུན་པའི་ཕྱིར་ཏེ། འགྲོ་བ་ལྔ་རྣམས་སུ་མཛའ་བ་ལས་ཀྱང་མི་མཛའ་བར་འགྱུར་བས་བདག་ནི་ཇི་ལྟར་སུ་དང་ཡང་མཛའ་བའམ་ མི་མཛའ་བར་མི་འགྱུར་བ་དེ་ལྟར་བྱའོ། །དེ་ཅིའི་ཕྱིར་ཞེ་ན། མི་མཛའ་བ་བཟུང་ན་ནི་ཐམས་ཅད་ཀྱི་ཐམས་ཅད་དུ་བྱེད་མི་འདོད་པར་འགྱུར། མཛའ་བ་བཟུང་ན་ནི་ཧ་ཅང་བྱེད་འདོད་པར་འགྱུར་ཏེ། རྗེས་སུ་ཆགས་པ་དང ། ཁོང་ཁྲོ་བའི་སེམས་གཉིས་ཀྱིས་ནི་ཆོས་མཉམ་པ་ཉིད་ཁོང་དུ་ཆུད་པར་བྱེད་མི་ ནུས་སོ། །དེ་ཅིའི་ཕྱིར་ཞེ་ན། མི་མཉམ་པར་སྤྱོད་པ་ནི་མི་མཉམ་པར་འགྲོ་བར་འགྱུར། མཉམ་པར་སྤྱོད་པ་ནི་མཉམ་པར་འགྱུར་བའོ། །དེ་ལ་བདག་གིས་ནི་མི་མཉམ་པར་སྤྱོད་པ་མི་བྱའི་སེམས་ཅན་ཐམས་ཅད་ལ་མཉམ་པར་སྤྱོད་ན་ཐམས་ཅད་མཁྱེན་པ་ཉིད་ཁོང་དུ་ཆུད་པར་འགྱུར་རོ། །ཁྱིམ་ བདག་དེ་ལྟར་བྱང་ཆུབ་སེམས་དཔའ་ཁྱིམ་པས་དངོས་པོ་གང་ལ་ཡང་བདག་གི་སྙམ་དུ་ཡོངས་སུ་གཟུང་བར་མི་བྱ། ཆགས་པར་མི་བྱའོ། །གཡོ་དང་སྲེད་པའི་བག་ལ་ཉལ་མི་བྱའོ། །ཁྱིམ་བདག་གལ་ཏེ་བྱང་ཆུབ་སེམས་དཔའ་ཁྱིམ་པའི་དྲུང་དུ་སློངས་མོ་པ་འོངས་ལ་དངོས་པོ་ཞིག་བསླངས་པ་ ལས་གལ་ཏེ་དེས་དངོས་པོ་མ་བཏང་ན་དེས་འདི་ལྟར་དངོས་པོ་འདི་བཏང་ཡང་རུང ། མ་བཏང་ཡང་རུང་སྟེ། བདག་ནི་དངོས་པོ་འདི་དང་གདོན་མི་ཟ་བར་འབྲལ་བར་ཡང་འགྱུར། མི་འདོད་བཞིན་དུ་འཆི་བར་ཡང་འགྱུར་ཞིང་དངོས་པོ་འདིས་ཀྱང་བདག་འདོར། བདག་གིས་ཀྱང་དངོས་པོ་འདི་ འདོར་གྱི། དངོས་པོ་འདི་བཏང་ལ་ཡིད་དགའ་བ་དང ། སྙིང་པོ་བླངས་ཏེ་འཆི་བའི་དུས་བྱའོ། །འདི་ཡོངས་སུ་བཏང་ན་བདག་འཆི་བའི་དུས་ཀྱི་ཚེ་སེམས་ཀུན་ནས་ཟིན་ཏེ་གནས་པར་མི་འགྱུར། འདིས་ནི་བདག་འཆི་བའི་དུས་ཀྱི་ཚེ་དགའ་བ་དང ། མཆོག་ཏུ་དགའ་བ་དང་རངས་པ་དང ། འགྱོད
42-1-270a
པ་མེད་པ་སྐྱེ་བར་འགྱུར་སྙམ་དུ་སེམས་ངེས་པར་བསམ་པར་བྱའོ། །གལ་ཏེ་དེ་ལྟར་བསམས་ཀྱང་དངོས་པོ་དེ་གཏོང་མ་ནུས་ན། དེས་སློང་བ་ལ་ཀུན་གོ་བར་བྱ་བ་གསུམ་གྱིས་གོ་བར་བྱ་སྟེ། བདག་ནི་ད་དུང་དུ་མཐུ་ཆུང་ཞིང་དགེ་བའི་རྩ་བ་ཡོངས་སུ་མ་སྨིན་ཏེ། ཐེག་པ་ཆེན་པོ་ལ་ལས་དང་པོ་ བ་དང ། བདག་ནི་མི་གཏོང་བ་ལ་སེམས་ཀྱི་དབང་དུ་གྱུར་པ་དང ། བདག་ནི་ཉེ་བར་ལེན་པའི་ལྟ་བ་དང་བཅས་པ་དང ། བདག་ཏུ་འཛིན་པ་དང ། བདག་གིར་འཛིན་པ་ལ་གནས་པ་ལགས་ཀྱིས། སྐྱེས་བུ་དམ་པ་བཟོད་པར་མཛད་ཅིང་ཡོངས་སུ་གདུང་བར་མི་མཛད་དུ་གསོལ། ཇི་ལྟར་ཁྱོད་དང་སེམས་ཅན་ ཐམས་ཅད་ཀྱི་བསམ་པ་ཡོངས་སུ་རྫོགས་པར་འགྱུར་བ་དེ་ལྟར་བདག་གིས་བགྱིའོ། །དེ་ལྟར་བསྒྲུབ་པོ། །དེ་ལྟར་བརྩོན་འགྲུས་བརྩམ་མོ་ཞེས་ཁྱིམ་བདག་དེ་ལྟར་བྱང་ཆུབ་སེམས་དཔའ་ཁྱིམ་པས་སློང་བ་ལ་ཀུན་གོ་བར་བྱ་བ་གསུམ་གྱིས་གོ་བར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་ པ་ཁྱིམ་ན་གནས་པས་རྟག་ཏུ་རྒྱུན་མི་འཆད་པར་ཡོངས་སུ་བསྔོ་བ་ལ་མཁས་པར་བྱ་སྟེ། གལ་ཏེ་དེ་སྟོན་པ་འདས་པའི་གསུང་རབ་ཡོད་ལ་སངས་རྒྱས་འབྱུང་བ་ཡང་མེད། ཆོས་སྟོན་པ་ཡང་མེད། འཕགས་པའི་དགེ་འདུན་དང་ཕྲད་པ་ཡང་མེད་པར་གྱུར་ན། དེས་ཕྱོགས་བཅུའི་སངས་རྒྱས་ ཐམས་ཅད་ལ་ཕྱག་བྱས་ཏེ། གང་དེ་དག་གི་སྔོན་གྱི་སྤྱོད་པ་དང་མཚུངས་པར་སྤྱོད་པ་དང ། དགེ་བ་སྤྱོད་པ་དང ། བསམ་པ་དང ། ལྷག་པའི་བསམ་པ་ཕུན་སུམ་ཚོགས་པ་དང ། བྱང་ཆུབ་ཐོབ་པ་རྣམས་ཀྱི་སངས་རྒྱས་ཀྱི་ཆོས་ཐམས་ཅད་ཡོངས་སུ་གྲུབ་པ་དེ་དེས་རྗེས་སུ་དྲན་པར་བྱ། རྗེས་སུ་ ཡི་རང་བར་བྱའོ། །དེས་ཡང་འདི་ལྟར་ཉིན་ལན་གསུམ་མཚན་ལན་གསུམ་དུ་ལུས་ཀྱི་ལས་ཡོངས་སུ་དག་པ་དང ། ངག་གི་ལས་ཡོངས་སུ་དག་པ་དང ། ཡིད་ཀྱི་ལས་ཡོངས་སུ་དག་པ་དང ། གཙང་བ་དང ། བསམ་པ་དག་པ་དང ། བྱམས་པ་བསྒོམ་པ་ལ་མཁས་པ་དང ། གོས་གཙང་མ་དང ། ངོ་ཚ་ཤེས་ཤིང་ཁྲེལ་ཡོད་པས་ལེགས་པར་བརྒྱན་པ་དང ། བསོད་ནམས་ཀྱི་ཚོགས་དགེ་བའི་རྩ་བ་བསགས་པ་དང ། མཛེས་པ་དང ། བྱང་ཆུབ་ཀྱི་སེམས་ལ་རབ་ཏུ་དགའ་བ་དང ། དེས་པ་དང ། འགྲོགས་ན་བདེ་བ་དང ། ལེགས་པར་བྱ་བའི་ལས་བྱེད་པ་དང ། གུས་པ་དང་བཅས་པ་དང ། བཀའ་བློ་བདེ་བ་དང་།
42-1-270b
ང་རྒྱལ་དང ། རྒྱགས་པ་དང ། དྲེགས་པ་ཡང་དག་པར་ཆད་པས་མི་དགེ་བའི་ལས་ཀྱི་ཉེས་པ་ཐམས་ཅད་བཤགས་པ་དང ། ཕྱིན་ཅད་ཀྱང་བསྡམ་པ་དང ། བསོད་ནམས་ཐམས་ཅད་ཀྱི་རྗེས་སུ་ཡི་རང་བ་དང ། མཚན་བསགས་པ་རབ་ཏུ་རྫོགས་པར་བྱ་བ་དང ། སངས་རྒྱས་ཐམས་ཅད་ལ་ཆོས་ཀྱི་འཁོར་ ལོ་རབ་ཏུ་བསྐོར་བར་གསོལ་བ་གདབ་པ་དང ། ཆོས་ཐམས་ཅད་གཟུང་བ་དང ། སངས་རྒྱས་ཀྱི་ཞིང་དཔག་ཏུ་མེད་པ་རྣམས་སུ་ཚེ་ཡོངས་སུ་བསྲུང་བའི་ཕྱིར་ཕུང་པོ་གསུམ་པའི་ཆོས་ཀྱི་རྣམ་གྲངས་ཁ་ཏོན་དུ་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པས་ཡན་ལག་བརྒྱད་ དང་ལྡན་པའི་བསྙེན་པར་གནས་པ་བླང་བར་བྱའོ། །དེས་དགེ་སྦྱོང་དང་བྲམ་ཟེ་ཚུལ་ཁྲིམས་དང་ལྡན་པ། ཡོན་ཏན་དང་ལྡན་པ། དགེ་བའི་ཆོས་དང་ལྡན་པ་རྣམས་ལ་བསྙེན་པར་བྱ། བསྟེན་པར་བྱ། བསྙེན་བཀུར་བྱའོ། །དེ་དག་ལ་བསྙེན་ཅིང་བསྟེན་ཏེ། བསྙེན་བཀུར་བྱེད་ཅིང ། སྤྱོད་པ་འཁྲུལ་པ་མེད་ པར་རང་གི་ཉེས་པ་མཐོང་བར་བྱའོ། །དེས་དགེ་སྦྱོང་གི་སྤྱོད་པ་ལས་ཉམས་པའི་དགེ་སློང་མཐོང་ན་ཡང་མི་གུས་པའི་བག་ཅུང་ཟད་ཀྱང་མི་བྱ་སྟེ། འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྙོག་པ་མེད་པ། ཉོན་མོངས་པའི་རྙོག་པ་ཐམས་ ཅད་དང་བྲལ་བ་དེའི་ངུར་སྨྲིག་ནི་ཚུལ་ཁྲིམས་ཀྱིས་ཡོངས་སུ་བསྒོས་པ། ཏིང་ངེ་འཛིན་དང ། ཤེས་རབ་དང ། རྣམ་པར་གྲོལ་བ་དང ། རྣམ་པར་གྲོལ་བའི་ཡེ་ཤེས་མཐོང་བས་ཡོངས་སུ་བསྒོས་པ་འདི་དག་ཡིན་ཏེ། འདི་ནི་འཕགས་པ་རྣམས་ཀྱི་དྲང་སྲོང་གི་རྒྱལ་མཚན་ཡིན་ནོ་སྙམ་དུ་སེམས་བསྐྱེད་ པར་བྱའོ། །དེས་དེ་དག་ལ་རབ་ཏུ་གུས་པ་བསྐྱེད་ནས་དགེ་སློང་དེ་ལ་སྙིང་རྗེ་ཆེན་པོ་བསྐྱེད་པར་བྱའོ། །སྡིག་པའི་སྤྱོད་པ་འདི་ནི་མ་ལེགས་སོ། །ཀུན་ནས་ཉོན་མོངས་པའི་སྤྱོད་པ་འདི་ནི་མ་ལེགས་སོ། །འདི་ལྟར་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ རྒྱས་དུལ་བ། ཞི་བ། སྦས་པ། ཅང་ཤེས་པ་དེའི་དྲང་སྲོང་གི་རྒྱལ་མཚན་བགོས་ཀྱང་འདི་ནི་མ་བྱང ། མ་ཞི། མ་སྦས། མ་དུལ་བ་སྟེ། ཅང་ཤེས་པ་མ་ཡིན་པའི་སྤྱོད་པ་སྤྱོད་དོ། །བཅོམ་ལྡན་འདས་དེས་མ་བསླབས་པ་ལ་མ་བརྙས་ཤིག་ཅེས་གསུངས་པས་ན་འདིས་ཉེས་པ་མ་ཡིན། ཉོན
42-1-271a
མོངས་པ་གང་གིས་མི་དགེ་བ་འདི་དག་སྟོན་པའི་ཉོན་མོངས་པས་ཉེས་པའོ། །སངས་རྒྱས་བཅོམ་ལྡན་འདས་རྣམས་ཀྱི་བསྟན་པ་ནི་འབྱུང་བ་དང་བཅས་པ་ཡིན་པས་གང་ཉོན་མོངས་པ་འདི་དག་ཁོང་དུ་ཆུད་ནས་ཚུལ་བཞིན་སོ་སོར་རྟོག་ན་དང་པོའི་འབྲས་བུ་ཐོབ་པར་འགྱུར་ཏེ། དེ་བླ་ན་ མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བའི་གནས་ཡོད་དོ། །དེ་ཅིའི་ཕྱིར་ཞེ་ན། འདི་ལྟར་ཉོན་མོངས་པ་རྣམས་ནི་ཡེ་ཤེས་ཀྱིས་གསལ་བར་བྱ་བ་ཡིན་པས་ན་བཅོམ་ལྡན་འདས་ཀྱིས་ཀྱང་གང་ཟག་གིས་གང་ཟག་ལ་ཚོད་གཟུང་བར་མི་བྱ་སྟེ། གང་ཟག་གིས་གང་ཟག་ལ་ཚོད་བཟུང་ན་ ཉམས་པར་འགྱུར་རོ་ཞེས་གསུངས་པས་དེ་བཞིན་གཤེགས་པ་ནི་རབ་ཏུ་མཁྱེན་པ། བདག་ནི་རབ་ཏུ་ཤེས་པ་མ་ཡིན་ནོ་སྙམ་ནས་དེས་དགེ་སློང་དེ་ལ་གནོད་སེམས་མེད་པ་དང ། ཞེ་སྡང་མེད་པ་དང ། ཁོང་ཁྲོ་བ་མེད་པ་དང ། ཁྲོ་བ་མེད་པ་ཡང་བསྐྱེད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་ དཔའ་ཁྱིམ་པ་དེ་གཙུག་ལག་ཁང་དུ་འཇུག་པར་འདོད་ན་ཅང་ཤེས་ཀྱི་སེམས་དང ། ལས་སུ་རུང་བའི་སེམས་དང ། གུས་པ་དང་བཅས་པ་དང ། ཞེ་ས་དང་བཅས་པ་དང ། དད་པ་དང་བཅས་པ་དང ། རི་མོ་དང་བཅས་པས་གཙུག་ལག་ཁང་གི་སྒོར་འདུག་སྟེ། གཙུག་ལག་ཁང་ལ་ཡན་ལག་ལྔས་ཕྱག་ བྱས་ལ། དེ་ནས་གདོད་བདག་གཙུག་ལག་ཁང་གི་ནང་དུ་འགྲོ་བར་བྱའོ། །དེས་ཡང་འདི་ལྟར་བརྟག་པར་བྱ་སྟེ། འདི་ནི་སྟོང་པ་ཉིད་ལ་གནས་པའི་གནས་སོ། །མཚན་མ་མེད་པ་ལ་གནས་པ་དང ། སྨོན་པ་མེད་པ་ལ་གནས་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ལ་ གནས་པའི་གནས་སོ། །འདི་ནི་བསམ་གཏན་པ་རྣམས་ཀྱི་གནས་ཏེ། གནས་ཐམས་ཅད་ཡང་དག་པར་ཆད་པ་རྣམས་ཀྱི་གནས་སོ། །འདི་ནི་ཡང་དག་པར་སོང་བ་རྣམས་དང ། ཡང་དག་པར་ཞུགས་པ་རྣམས་ཀྱི་གནས་སོ། །བདག་ཀྱང་རྡུལ་གྱི་གནས། ཁྱིམ་གྱི་གནས་ནས་མངོན་པར་བྱུང་སྟེ། ནམ་ ཞིག་ན་འདི་ལྟ་བུ་སྤྱོད་པར་འགྱུར། བདག་ཀྱང་ནམ་ཞིག་ན་གང་དགེ་འདུན་གྱི་ལས་དང ། གསོ་སྦྱོང་གི་ལས་དང ། དགག་དབྱེའི་ལས་དང ། འདུད་པའི་ལས་དེ་ལ་གནས་པར་འགྱུར་སྙམ་ནས་དེས་འདི་ལྟར་རབ་ཏུ་འབྱུང་བའི་སེམས་ལ་དགའ་བར་བྱའོ། །བྱང་ཆུབ་སེམས་དཔའ་ཁྱིམ་ན་གནས
42-1-271b
ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ནི་གང་ཡང་མེད་དེ། དེ་དག་ཐམས་ཅད་ཀྱང་ཁྱིམ་གྱི་གནས་ནས་མངོན་པར་བྱུང་ནས་དགོན་པ་ལ་སེམས། དགོན་པ་ལ་གཞོལ། དགོན་པར་སོང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་ རྫོགས་པར་སངས་རྒྱས་སོ། །ཚོགས་དེ་ཡང་ཡང་དག་པར་བསྒྲུབས་སོ། །ཁྱིམ་ན་གནས་པ་ནི་ཀུན་དུ་གནོད་པ་སྟེ་རྡུལ་འབབ་པའོ། །རབ་ཏུ་བྱུང་བ་ནི་སངས་རྒྱས་དང ། དེའི་ཉན་ཐོས་རྣམས་ཀྱིས་བསྔགས་པའོ། །ཁྱིམ་ན་གནས་པ་ནི་ཉེས་པའི་སྐྱོན་ཆགས་པ་མང་བའོ། །རབ་ཏུ་བྱུང་བ་ནི་ཡོན་ཏན་ཕུན་ སུམ་ཚོགས་པ་མང་བའོ། །ཁྱིམ་ན་གནས་པ་ནི་ཉམ་ང་བའོ། །རབ་ཏུ་བྱུང་བ་ནི་བག་ཡངས་པའོ། །ཁྱིམ་ན་གནས་པ་ནི་ཡོངས་སུ་འཛིན་པའི་དྲི་མ་ཅན་ནོ། །རབ་ཏུ་བྱུང་བ་ནི་ཡོངས་སུ་འཛིན་པ་ལས་རྣམ་པར་གྲོལ་བའོ། །ཁྱིམ་ན་གནས་པ་ནི་ཉེས་པར་སྤྱོད་པའི་གཞིའོ། །རབ་ཏུ་བྱུང་བ་ནི་ལེགས་པར་ སྤྱོད་པའི་གཞིའོ། །ཁྱིམ་ན་གནས་པ་ནི་རྡུལ་གྱི་ནང་ན་གནས་པའོ། །རབ་ཏུ་བྱུང་བ་ནི་རྡུལ་གྱི་ནང་ན་མི་གནས་པའོ། །ཁྱིམ་ན་གནས་པ་ནི་འདོད་པའི་འདམ་དུ་བྱིང་བའོ། །རབ་ཏུ་བྱུང་བ་ནི་འདོད་པའི་འདམ་ནས་འབྱིན་པའོ། །ཁྱིམ་ན་གནས་པ་ནི་བྱིས་པའི་སྐྱེ་བོའི་ཞུགས་པའོ། །རབ་ཏུ་བྱུང་བ་ནི་སྐྱེ་ བོ་མཁས་པའི་ཞུགས་པའོ། །ཁྱིམ་ན་གནས་པ་ནི་འཚོ་བ་སྦྱང་བར་དཀའ་བའོ། །རབ་ཏུ་བྱུང་བ་ནི་འཚོ་བ་སྦྱང་བར་སླ་བའོ། །ཁྱིམ་ན་གནས་པ་ནི་འགྲན་ཟླ་མང་བའོ། །རབ་ཏུ་བྱུང་བ་ནི་འགྲན་ཟླ་མེད་པའོ། །ཁྱིམ་ན་གནས་པ་ནི་ཕོངས་པ་མང་བའོ། །རབ་ཏུ་བྱུང་བ་ནི་ཕོངས་པ་མེད་པའོ། །ཁྱིམ་ ན་གནས་པ་ནི་མྱ་ངན་གྱི་གནས་སོ། །རབ་ཏུ་བྱུང་བ་ནི་དགའ་བའོ། །ཁྱིམ་ན་གནས་པ་ནི་ངན་སོང་གི་ཐེམ་སྐས་སོ། །རབ་ཏུ་བྱུང་བ་ནི་མངོན་པར་མཐོ་བའི་ཐེམ་སྐས་སོ། ཁྱིམ་ན་གནས་པ་ནི་བཅིངས་པའོ། །རབ་ཏུ་བྱུང་བ་ནི་ཐར་པའོ། །ཁྱིམ་ན་གནས་པ་ནི་འཇིགས་པ་དང་བཅས་པའོ། །རབ་ཏུ་ བྱུང་བ་ནི་འཇིགས་པ་མེད་པའོ། །ཁྱིམ་ན་གནས་པ་ནི་ཆད་པ་དང་བཅས་པར་སྤྱོད་པའོ། །རབ་ཏུ་བྱུང་བ་ནི་ཆད་པ་མེད་པར་སྤྱོད་པའོ། །ཁྱིམ་ན་གནས་པ་ནི་མཚོན་ཆ་སྤྱོད་པ་དང་བཅས་པའོ། །རབ་ཏུ་བྱུང་བ་ནི་མཚོན་ཆ་མི་སྤྱོད་པའོ། །ཁྱིམ་ན་གནས་པ་ནི་ཡོངས་སུ་གདུང་བ་དང་བཅས་པའོ། །
42-1-272a
རབ་ཏུ་བྱུང་བ་ནི་ཡོངས་སུ་གདུང་བ་མེད་པའོ། །ཁྱིམ་ན་གནས་པ་ནི་ཀུན་དུ་ཚོལ་བས་སྡུག་བསྔལ་བའོ། །རབ་ཏུ་བྱུང་བ་ནི་ཀུན་དུ་ཚོལ་བ་མེད་པས་བདེ་བའོ། །ཁྱིམ་ན་གནས་པ་ནི་རྒོད་པའོ། །རབ་ཏུ་བྱུང་བ་ནི་ཉེ་བར་ཞི་བའོ། །ཁྱིམ་ན་གནས་པ་ནི་འཇུངས་པའོ། །རབ་ཏུ་བྱུང་བ་ ནི་མ་འཇུངས་པའོ། །ཁྱིམ་ན་གནས་པ་ནི་ཞན་པའོ། །རབ་ཏུ་བྱུང་བ་ནི་མི་ཞན་པའོ། །ཁྱིམ་ན་གནས་པ་ནི་མ་རབས་སོ། །རབ་ཏུ་བྱུང་བ་ནི་ཡ་རབས་སོ། །ཁྱིམ་ན་གནས་པ་ནི་ཀུན་དུ་འབར་བའོ། །རབ་ཏུ་བྱུང་བ་ནི་འབར་བ་ཞི་བའོ། །ཁྱིམ་ན་གནས་པ་ནི་གཞན་གྱི་དོན་ཏོ། །རབ་ཏུ་བྱུང་བ་ནི་གཉི་གའི་དོན་ ཏོ། །ཁྱིམ་ན་གནས་པ་ནི་དོན་ཆུང་བའོ། །རབ་ཏུ་བྱུང་བ་ནི་དོན་ཆེ་བའོ། །ཁྱིམ་ན་གནས་པ་ནི་གཟི་ཆུང་བའོ། །རབ་ཏུ་བྱུང་བ་ནི་གཟི་ཆེ་བའོ། །ཁྱིམ་ན་གནས་པ་ནི་ཀུན་ནས་ཉོན་མོངས་པས་སྡུག་བསྔལ་བའོ། །རབ་ཏུ་བྱུང་བ་ནི་མངོན་པར་བྱུང་བས་བདེ་བའོ། །ཁྱིམ་ན་གནས་པ་ནི་ཚེར་མ་སྐྱེད་པའོ། ། རབ་ཏུ་བྱུང་བ་ནི་ཚེར་མ་བསལ་བའོ། །ཁྱིམ་ན་གནས་པ་ནི་ཆོས་ཆུང་ངུ་དང་ལྡན་པའོ། །རབ་ཏུ་བྱུང་བ་ནི་ཆོས་ཆེན་པོ་དང་ལྡན་པའོ། །ཁྱིམ་ན་གནས་པ་ནི་འདུལ་བ་མ་ཡིན་པ་བྱེད་པའོ། །རབ་ཏུ་བྱུང་བ་ནི་འདུལ་བ་བྱེད་པའོ། །ཁྱིམ་ན་གནས་པ་ནི་འགྱོད་པའོ། །རབ་ཏུ་བྱུང་བ་ནི་མི་འགྱོད་པའོ། ། ཁྱིམ་ན་གནས་པ་ནི་མཆི་མ་དང་ནུ་ཞོ་དང་ཁྲག་གི་རྒྱ་མཚོ་འཕེལ་བའོ། །རབ་ཏུ་བྱུང་བ་ནི་མཆི་མ་དང་ནུ་ཞོ་དང་ཁྲག་གི་རྒྱ་མཚོ་སྐེམས་པའོ། །ཁྱིམ་ན་གནས་པ་ནི་སངས་རྒྱས་དང ། རང་སངས་རྒྱས་དང ། ཉན་ཐོས་ཀྱིས་སྨད་པའོ། །རབ་ཏུ་བྱུང་བ་ནི་སངས་རྒྱས་དང ། རང་སངས་རྒྱས་དང ། ཉན་ཐོས་ཀྱིས་བསྔགས་པའོ། །ཁྱིམ་ན་གནས་པ་ནི་ཆོག་མི་ཤེས་པའོ། །རབ་ཏུ་བྱུང་བ་ནི་ཆོག་ཤེས་པའོ། །ཁྱིམ་ན་གནས་པ་ནི་བདུད་དགའ་བའོ། །རབ་ཏུ་བྱུང་བ་ནི་བདུད་མྱ་ངན་བྱེད་པའོ། །ཁྱིམ་ན་གནས་པ་ནི་རྙོག་པ་ཆེན་པོའི་མཐར་ཐུག་པར་འགྱུར་རོ། །རབ་ཏུ་བྱུང་བ་ནི་རྙོག་པ་ཐམས་ ཅད་ཉེ་བར་ཞི་བའི་མཐར་ཐུག་པའོ། །ཁྱིམ་ན་གནས་པ་ནི་ཀུན་དུ་མི་ཐུལ་བའོ། །རབ་ཏུ་བྱུང་བ་ནི་ཀུན་དུ་ཐུལ་བའོ། །ཁྱིམ་ན་གནས་པ་ནི་བྲན་གྱི་ལས་བྱེད་པའོ། །རབ་ཏུ་བྱུང་བ་ནི་རྗེ་བོ་བྱེད་པའོ། །ཁྱིམ་ན་གནས་པ་ནི་འཁོར་བའི་མཐར་འགྱུར་བའོ། །རབ་ཏུ་བྱུང་བ་ནི་མྱ་ངན་ལས
42-1-272b
འདས་པའི་མཐར་འགྱུར་བའོ། །ཁྱིམ་ན་གནས་པ་ནི་གཡང་ས་པའོ། །རབ་ཏུ་བྱུང་བ་ནི་གཡང་ས་ལས་འདས་པའོ། །ཁྱིམ་ན་གནས་པ་ནི་མུན་ནག་གོ། །རབ་ཏུ་བྱུང་བ་ནི་སྣང་བའོ། །ཁྱིམ་ན་གནས་པ་ནི་དབང་པོ་ལ་དབང་མི་བྱེད་པའོ། །རབ་ཏུ་བྱུང་བ་ནི་དབང་པོ་ལ་དབང་བྱེད་པའོ། ། ཁྱིམ་ན་གནས་པ་ནི་དྲེགས་པ་སྐྱེད་པའོ། །རབ་ཏུ་བྱུང་བ་ནི་དྲེགས་པ་འདུལ་བའོ། །ཁྱིམ་ན་གནས་པ་ནི་དམ་པ་མ་ཡིན་པ་སྐྱེད་པའོ། །རབ་ཏུ་བྱུང་བ་ནི་དམ་པ་སྐྱེད་པའོ། །ཁྱིམ་ན་གནས་པ་ནི་ངན་སོང་སྐྱེད་པའོ། །རབ་ཏུ་བྱུང་བ་ནི་བདེ་འགྲོ་སྐྱེད་པའོ། །ཁྱིམ་ན་གནས་པ་ནི་བལྟ་བར་མི་ འོས་པའོ། །རབ་ཏུ་བྱུང་བ་ནི་བལྟ་བར་འོས་པའོ། །ཁྱིམ་ན་གནས་པ་ནི་རྩོམ་པ་ཆེན་པོའོ། །རབ་ཏུ་བྱུང་བ་ནི་རྩོམ་པ་ཆུང་བའོ། །ཁྱིམ་ན་གནས་པ་ནི་འབྲས་བུ་ཆུང་བའོ། །རབ་ཏུ་བྱུང་བ་ནི་འབྲས་བུ་ཆེ་བའོ། ཁྱིམ་ན་གནས་པ་ནི་གྱ་གྱུ་ཅན་ནོ། །རབ་ཏུ་བྱུང་བ་ནི་དྲང་བའོ། །ཁྱིམ་ན་གནས་ པ་ནི་ཡིད་མི་བདེ་བ་མང་བའོ། །རབ་ཏུ་བྱུང་བ་ནི་ཡིད་བདེ་བ་དང་ལྡན་པའོ། །ཁྱིམ་ན་གནས་པ་ནི་ཟུག་རྔུ་དང་བཅས་པའོ། །རབ་ཏུ་བྱུང་བ་ནི་ཟུག་རྔུ་ཕྱུང་བའོ། །ཁྱིམ་ན་གནས་པ་ནི་ན་བའོ། །རབ་ཏུ་བྱུང་བ་ནི་ནད་མེད་པར་བྱེད་པའོ། །ཁྱིམ་ན་གནས་པ་ནི་ཆོས་རྒས་པར་བྱེད་པའོ། །རབ་ཏུ་བྱུང་ བ་ནི་ཆོས་དར་བར་བྱེད་པའོ། །ཁྱིམ་ན་གནས་པ་ནི་བག་མེད་པར་བྱེད་པའོ། །རབ་ཏུ་བྱུང་བ་ནི་བག་ཡོད་པར་བྱེད་པའོ། །ཁྱིམ་ན་གནས་པ་ནི་འཆལ་པའི་ཤེས་རབ་ཀྱི་འབྱུང་གནས་སོ། །རབ་ཏུ་བྱུང་བ་ནི་ཤེས་རབ་འཕེལ་བའོ། །ཁྱིམ་ན་གནས་པ་ནི་ཤེས་རབ་ཀྱི་བར་ཆད་བྱེད་པའོ། །རབ་ཏུ་ བྱུང་བ་ནི་ཤེས་རབ་ཀྱི་སྲོག་བྱེད་པའོ། །ཁྱིམ་ན་གནས་པ་ནི་སླུ་བར་སོ་སོར་ཉེ་བར་གནས་པའོ། །རབ་ཏུ་བྱུང་བ་ནི་མི་སླུ་བར་སོ་སོར་ཉེ་བར་གནས་པའོ། །ཁྱིམ་ན་གནས་པ་ནི་བྱེད་པ་མང་བའོ། །རབ་ཏུ་བྱུང་བ་ནི་བྱེད་པ་ཉུང་བའོ། །ཁྱིམ་ན་གནས་པ་ནི་དུག་དང་བཅས་པའི་བཏུང་བ་ལྟ་བུའོ། ། རབ་ཏུ་བྱུང་བ་ནི་བདུད་རྩི་དང་བཅས་པའི་བཏུང་བ་ལྟ་བུའོ། །ཁྱིམ་ན་གནས་པ་ནི་གནོད་པ་ཅན་ནོ། །རབ་ཏུ་བྱུང་བ་ནི་གནོད་པ་མེད་པའོ། །ཁྱིམ་ན་གནས་པ་ནི་འདྲེས་པའོ། །རབ་ཏུ་བྱུང་བ་ནི་མ་འདྲེས་པའོ། །ཁྱིམ་ན་གནས་པ་ནི་ཀིམ་པ་ཀའི་འབྲས་བུ་ལྟ་བུའོ། །རབ་ཏུ་བྱུང་བ་ནི་བདུད་རྩིའི
42-1-273a
འབྲས་བུ་ལྟ་བུའོ། །ཁྱིམ་ན་གནས་པ་ནི་མི་སྡུག་པ་དང་ཕྲད་པར་བྱེད་པའོ། །རབ་ཏུ་བྱུང་བ་ནི་མི་སྡུག་པ་དང་འབྲལ་བར་བྱེད་པའོ། །ཁྱིམ་ན་གནས་པ་ནི་སྡུག་པ་དང་འབྲལ་བར་བྱེད་པའོ། །རབ་ཏུ་བྱུང་བ་ནི་སྡུག་པ་དང་ཕྲད་པར་བྱེད་པའོ། །ཁྱིམ་ན་གནས་པ་ནི་གཏི་ མུག་གིས་ལྕི་བའོ། །རབ་ཏུ་བྱུང་བ་ནི་ཡེ་ཤེས་ཀྱིས་ཡང་བའོ། །ཁྱིམ་ན་གནས་པ་ནི་སྦྱོར་བ་རྣམ་པར་འཇིག་པའོ། །རབ་ཏུ་བྱུང་བ་ནི་སྦྱོར་བ་རྣམ་པར་སྦྱོང་བའོ། །ཁྱིམ་ན་གནས་པ་ནི་བསམ་པ་རྣམ་པར་འཇིག་པའོ། །རབ་ཏུ་བྱུང་བ་ནི་བསམ་པ་རྣམ་པར་སྦྱོང་བའོ། །ཁྱིམ་ན་གནས་པ་ ནི་ལྷག་པའི་བསམ་པ་རྣམ་པར་འཇིག་པའོ། །རབ་ཏུ་བྱུང་བ་ནི་ལྷག་པའི་བསམ་པ་རྣམ་པར་སྦྱོང་བའོ། །ཁྱིམ་ན་གནས་པ་ནི་དཔུང་གཉེན་མེད་པར་བྱེད་པའོ། །རབ་ཏུ་བྱུང་བ་ནི་དཔུང་གཉེན་བྱེད་པའོ། །ཁྱིམ་ན་གནས་པ་ནི་མགོན་མེད་པར་བྱེད་པའོ། །རབ་ཏུ་བྱུང་བ་ནི་མགོན་བྱེད་པའོ། །ཁྱིམ་ ན་གནས་པ་ནི་གནས་མེད་པར་བྱེད་པའོ། །རབ་ཏུ་བྱུང་བ་ནི་གནས་བྱེད་པའོ། །ཁྱིམ་ན་གནས་པ་ནི་སྐྱབས་མེད་པར་བྱེད་པའོ། །རབ་ཏུ་བྱུང་བ་ནི་སྐྱབས་བྱེད་པའོ། །ཁྱིམ་ན་གནས་པ་ནི་གནོད་སེམས་མང་བའོ། །རབ་ཏུ་བྱུང་བ་ནི་བྱམས་པ་མང་བའོ། །ཁྱིམ་ན་གནས་པ་ནི་ཁུར་ཁྱེར་བའོ། །རབ་ཏུ་བྱུང་ བ་ནི་ཁུར་བོར་བའོ། །ཁྱིམ་ན་གནས་པ་ནི་ཐུག་པ་མེད་པར་སྤྱོད་པའོ། །རབ་ཏུ་བྱུང་བ་ནི་སྤྱོད་པ་ཐམས་ཅད་མཐར་འབྱིན་པའོ། །ཁྱིམ་ན་གནས་པ་ནི་ཁ་ན་མ་ཐོ་བ་དང་བཅས་པའོ། །རབ་ཏུ་བྱུང་བ་ནི་ཁ་ན་མ་ཐོ་བ་མེད་པའོ། །ཁྱིམ་ན་གནས་པ་ནི་གདུང་བར་འགྱུར་བའོ། །རབ་ཏུ་བྱུང་བ་ནི་གདུང་བར་ མི་འགྱུར་བའོ། ཁྱིམ་ན་གནས་པ་ནི་ཉོན་མོངས་པ་དང་བཅས་པའོ། །རབ་ཏུ་བྱུང་བ་ནི་ཉོན་མོངས་པ་མེད་པའོ། །ཁྱིམ་ན་གནས་པ་ནི་ཟང་ཟིང་དང་བཅས་པའོ། །རབ་ཏུ་བྱུང་བ་ནི་ཟང་ཟིང་མེད་པའོ། །ཁྱིམ་ན་གནས་པ་ནི་མངོན་པའི་ང་རྒྱལ་དང་བཅས་པའོ། །རབ་ཏུ་བྱུང་བ་ནི་མངོན་པའི་ང་རྒྱལ་ མེད་པའོ། །ཁྱིམ་ན་གནས་པ་ནི་ནོར་སྙིང་པོར་བྱེད་པའོ། །རབ་ཏུ་བྱུང་བ་ནི་ཡོན་ཏན་སྙིང་པོར་བྱེད་པའོ། །ཁྱིམ་ན་གནས་པ་ནི་ཡམས་ཀྱི་ནད་དོ། །རབ་ཏུ་བྱུང་བ་ནི་ཡམས་ཀྱི་ནད་ཞི་བར་བྱེད་པའོ། །ཁྱིམ་ན་གནས་པ་ནི་འབྲི་བའོ། །རབ་ཏུ་བྱུང་བ་ནི་འཕེལ་བའོ། །ཁྱིམ་ན་གནས་པ་ནི་རྙེད་པར
42-1-273b
སླ་བའོ། །རབ་ཏུ་བྱུང་བ་ནི་བསྐལ་པ་བརྒྱ་སྟོང་དུ་ཡང་རྙེད་པར་དཀའ་བའོ། །ཁྱིམ་ན་གནས་པ་ནི་བྱ་སླ་བའོ། །རབ་ཏུ་བྱུང་བ་ནི་བྱ་དཀའ་བའོ། །ཁྱིམ་ན་གནས་པ་ནི་རྒྱུན་ཕྱོགས་སུ་འགྲོ་བའོ། །རབ་ཏུ་བྱུང་བ་ནི་རྒྱུན་ལས་བཟློག་སྟེ་འགྲོ་བའོ། །ཁྱིམ་ན་གནས་པ་ནི་ཆུ་བོའོ། །རབ་ཏུ་བྱུང་བ་ནི་གཟིངས་ སོ། ཁྱིམ་ན་གནས་པ་ནི་ཉོན་མོངས་པའི་ཆུ་བོའོ། །རབ་ཏུ་བྱུང་བ་ནི་ཟམ་པའོ། །ཁྱིམ་ན་གནས་པ་ནི་ཚུ་རོལ་གྱི་ངོགས་སོ། །རབ་ཏུ་བྱུང་བ་ནི་ཕ་རོལ་གྱི་ངོགས་སོ། །ཁྱིམ་ན་གནས་པ་ནི་གླགས་པའོ། །རབ་ཏུ་བྱུང་བ་ནི་མ་གླགས་པའོ། །ཁྱིམ་ན་གནས་པ་ནི་ཤར་གཉེར་བའོ། །རབ་ཏུ་བྱུང་བ་ ནི་ཤར་གཉེར་བ་ཞིའོ། །ཁྱིམ་ན་གནས་པ་ནི་རྒྱལ་པོའི་ནན་ཏུར་བཞིན་བྱེད་པའོ། །རབ་ཏུ་བྱུང་བ་ནི་སངས་རྒྱས་ཀྱི་བསྟན་པ་བཞིན་བྱེད་པའོ། །ཁྱིམ་ན་གནས་པ་ནི་ཉམ་ཐག་པའོ། །རབ་ཏུ་བྱུང་བ་ནི་ཉམ་ཐག་པ་མེད་པའོ། །ཁྱིམ་ན་གནས་པ་ནི་སྡུག་བསྔལ་འབྱུང་བའོ། །རབ་ཏུ་བྱུང་བ་ནི་ བདེ་བ་འབྱུང་བའོ། ཁྱིམ་ན་གནས་པ་ནི་སྒང་བུའོ། །རབ་ཏུ་བྱུང་བ་ནི་ཟབ་མོའོ། ཁྱིམ་ན་གནས་པ་ནི་གྲོགས་མོད་པའོ། །རབ་ཏུ་བྱུང་བ་ནི་གྲོགས་དཀོན་པའོ། ཁྱིམ་ན་གནས་པ་ནི་ཆུང་མ་དང་འགྲོགས་པའོ། །རབ་ཏུ་བྱུང་བ་ནི་མོས་པ་དང་འགྲོགས་པའོ། །ཁྱིམ་ན་གནས་པ་ནི་རྒྱ་དང་འདྲ་ བའོ། །རབ་ཏུ་བྱུང་བ་ནི་རྒྱ་དྲལ་བའོ། །ཁྱིམ་ན་གནས་པ་ནི་གཞན་ལ་གནོད་པ་བྱེད་པ་གཅེས་སུ་རྩི་བའོ། །རབ་ཏུ་བྱུང་བ་ནི་གཞན་ལ་ཕན་འདོགས་པ་གཅེས་སུ་རྩི་བའོ། །ཁྱིམ་ན་གནས་པ་ནི་ཟང་ཟིང་གི་སྦྱིན་པ་ཆེད་ཆེར་འཛིན་པའོ། །རབ་ཏུ་བྱུང་བ་ནི་ཆོས་ཀྱི་སྦྱིན་པ་ཆེད་ཆེར་འཛིན་པའོ། །ཁྱིམ་ན་ གནས་པ་ནི་བདུད་ཀྱི་རྒྱལ་མཚན་འཛིན་པའོ། །རབ་ཏུ་བྱུང་བ་ནི་སངས་རྒྱས་ཀྱི་རྒྱལ་མཚན་འཛིན་པའོ། ཁྱིམ་ན་གནས་པ་ནི་སྡུག་བསྔལ་གྱི་གཞིའོ། །རབ་ཏུ་བྱུང་བ་ནི་སྡུག་བསྔལ་གྱི་གཞི་ཡང་དག་པར་འཇོམས་པའོ། ཁྱིམ་ན་གནས་པ་ནི་ཕུང་པོ་རྣམ་པར་འཕེལ་བའོ། །རབ་ཏུ་བྱུང་བ་ནི་ཕུང་ པོ་ཐམས་ཅད་ངེས་པར་འདོར་བའོ། ཁྱིམ་ན་གནས་པ་ནི་ཐིབས་པོའོ། །རབ་ཏུ་བྱུང་བ་ནི་ཐིབས་པོ་ལས་ཐར་པ་ཡིན་ཏེ། ཁྱིམ་བདག་དེ་ལྟར་བྱང་ཆུབ་སེམས་དཔའ་ཁྱིམ་པས་རབ་ཏུ་བྱུང་བ་ལ་གཞོལ་བར་བྱའོ། །དེས་ཡང་འདི་ལྟར་གལ་ཏེ་བདག་གིས་ཉི་མ་དུ་མར་གང་གཱའི་ཀླུང་གི་བྱེ་མ་སྙེད
42-1-274a
ཀྱི་མཆོད་སྦྱིན་བྱས་ཏེ་བདོག་པ་ཐམས་ཅད་ཡོངས་སུ་བཏང་བ་བྱས་པ་དེ་དག་ཐམས་ཅད་ནི་ལེགས་པར་བཤད་པའི་ཆོས་འདུལ་བ་ལ་རབ་ཏུ་འབྱུང་བའི་སེམས་ཀྱིས་ཟིལ་གྱིས་ནོན་ཏོ་སྙམ་དུ་སེམས་བསྐྱེད་པར་བྱའོ། །དེ་ཅིའི་ཕྱིར་ཞེ་ན། ཁྱིམ་བདག་མ་དད་པ་དང ། བྱས་པ་མི་གཟོ་ བ་དང ། ཆོམ་རྐུན་དང ། གདོལ་པ་དང ། རྒྱལ་པོའི་བཀྲབས་པ་དང ། བློན་པོ་ཡང་སྦྱིན་པ་སྦྱིན་པར་བྱེད་དེ། ཟང་ཟིང་གི་སྦྱིན་པ་ནི་དམན་པ་ཡིན་ནོ། ཁྱིམ་བདག་བྱང་ཆུབ་སེམས་དཔའ་ཁྱིམ་པས་འདི་ལྟར་བདག་གིས་སྦྱིན་པའི་སྙིང་པོས་ཆོག་པར་མི་བྱའི་བདག་གིས་ནི་ཚུལ་ཁྲིམས་ དང ། ཐོས་པ་དང ། ཚངས་པར་སྤྱོད་པ་ཡང་སྙིང་པོར་བྱའོ་སྙམ་དུ་སེམས་བསྐྱེད་པར་བྱའོ། །དེ་གཙུག་ལག་ཁང་དུ་འོངས་ན་དེ་བཞིན་གཤེགས་པའི་མཚན་མ་ལ་ཕྱག་བྱའོ། །དེ་དག་ལ་ཕྱག་བྱས་ནས་འདུ་ཤེས་གསུམ་བསྐྱེད་པར་བྱ་སྟེ། གསུམ་གང་ཞེ་ན། བདག་ཀྱང་འདི་འདྲ་བར་ མཆོད་པའི་འོས་སུ་འགྱུར་བར་བྱ་བ་དང ། སེམས་ཅན་ལ་སྙིང་བརྩེ་བའི་ཕྱིར་བདག་གི་ལུས་ཀྱང་བྱིན་གྱིས་བརླབ་པ་དང ། བདག་ཀྱང་ཇི་ལྟར་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སངས་རྒྱས་ཀྱི་བྱ་བ་བྱས་ཏེ་དེ་བཞིན་གཤེགས་པ་ཡོངས་སུ་མྱ་ ངན་ལས་འདས་པས་ཡོངས་སུ་མྱ་ངན་ལས་འདའ་བར་བྱ་བ་དེ་ལྟར་བསླབ་ཅིང་དེ་ལྟར་ནན་ཏན་བྱའོ་སྙམ་པའོ། །དེ་གཙུག་ལག་ཁང་དུ་ཞུགས་ན་དེས་དགེ་སློང་མང་དུ་ཐོས་པ་ནི་གང ། དགེ་སློང་ཆོས་བརྗོད་པ་ནི་གང ། དགེ་སློང་འདུལ་བ་འཛིན་པ་ནི་གང ། དགེ་སློང་མ་མོ་འཛིན་པ་ནི་གང ། དགེ་སློང་ བྱང་ཆུབ་སེམས་དཔའི་སྡེ་སྣོད་འཛིན་པ་ནི་གང ། དགེ་སློང་དགོན་པ་བ་ནི་གང ། བསོད་སྙོམས་པ་ནི་གང ། ཕྱག་དར་ཁྲོད་པ་དང ། འདོད་པ་ཆུང་བ་དང ། ཆོག་ཤེས་པ་དང ། རབ་ཏུ་དབེན་པ་ནི་གང ། དགེ་སློང་རྣལ་འབྱོར་སྤྱོད་པ་ནི་གང ། དགེ་སློང་བསམ་གཏན་པ་ནི་གང ། དགེ་སློང་བྱང་ཆུབ་སེམས་ དཔའི་ཐེག་པ་བ་ནི་གང ། དགེ་སློང་ལག་གི་བླ་ནི་གང ། དགེ་སློང་ཞལ་ཏ་བྱེད་པ་ནི་གང ། དགེ་སློང་དཔོན་སྣ་བྱེད་པ་ནི་གང་ཡིན་ཞེས་དགེ་སློང་གི་དགེ་འདུན་གྱི་སྤྱོད་པ་ཐམས་ཅད་ལ་རྣམ་པར་བརྟག་པར་བྱའོ། །དེས་དེ་དག་གི་སྤྱོད་པ་ལ་རྣམ་པར་བརྟགས་ནས་ཐམས་ཅད་དང་འཐུན་པར་འཇུག་པའི
42-1-274b
ཕྱིར་ཅི་རིགས་པར་འཐུན་པར་གནས་པར་བྱའོ། །དེས་གཞན་གྱི་མདུན་དུ་སྤྱོད་པ་གཞན་བསྟན་པར་མི་བྱའོ། །དེ་ཅིའི་ཕྱིར་ཞེ་ན། གཙུག་ལག་ཁང་དུ་ནི་གྲོང་གི་གསང་ངོ ། །གྲོང་དུ་ནི་གཙུག་ལག་ཁང་གི་གསང་ངོ ། །ངག་གི་ལས་ཤིན་དུ་བསྡམས་པ་དེས་གྲོང་དུ་གཙུག་ལག་ཁང་གི་གསང་དང ། གཙུག་ལག་ཁང་དུ་གྲོང་གི་གསང་བསྙད་པར་མི་བྱའོ། །དགེ་སློང་གང་ཆོས་གོས་མ་ཚང་བའམ། ལྷུང་བཟེད་མ་ཚང་བའམ། ན་བའི་གསོས་སྨན་དང་ཡོ་བྱད་མ་ཚང་བ་དེ་ལ་དེས་ཇི་ལྟར་གཞན་དག་གཤེ་བའམ། ཁྲོ་བསྐྱེད་པར་མི་འགྱུར་བ་དེ་ལྟར་སྦྱིན་པར་བྱའོ། །དེ་ཅིའི་ཕྱིར་ཞེ་ན། ལྷ་དང་ མི་རྣམས་ཀྱི་ཀུན་དུ་སྦྱོར་བ་ནི་ཕྲག་དོག་དང་སེར་སྣ་ཡིན་ཏེ། དེ་བས་ན་སོ་སོའི་སྐྱེ་བོ་རྣམས་ལ་ནི་རབ་ཏུ་བསྲུང་བར་བྱའི་དགྲ་བཅོམ་པ་ལ་ནི་མ་ཡིན་ནོ། །དེ་ཅིའི་ཕྱིར་ཞེ་ན། སོ་སོའི་སྐྱེ་བོ་རྣམས་ལས་ནི་ཉེས་པ་སྐྱེའི་དགྲ་བཅོམ་པ་རྣམས་ལས་ནི་མ་ཡིན་ནོ། །དེ་བས་ན་མང་དུ་ཐོས་པ་ལ་བསྟེན་ཏེ་ཐོས་པ་ཡོངས་སུ་བཙལ་བ་ལ་བརྩོན་པར་བྱའོ། །ཆོས་བརྗོད་པ་ལ་བསྟེན་ཏེ་རྣམ་པར་ངེས་པའི་གཏམ་ལ་བརྩོན་པར་བྱའོ། །འདུལ་བ་འཛིན་པ་ལ་བསྟེན་ཏེ་ཉེས་པ་འདུལ་བ་དང ། ཉོན་མོངས་པ་འདུལ་བ་ལ་བརྩོན་པར་བྱའོ། །མ་མོ་འཛིན་པ་ལ་བསྟེན་ཏེ་ལུས་དང་ངག་དང་ཡིད་སྡོམ་པ་ལ་བརྩོན་པར་བྱའོ། ། བྱང་ཆུབ་སེམས་དཔའི་སྡེ་སྣོད་འཛིན་པ་ལ་བསྟེན་ཏེ་ཕ་རོལ་དུ་ཕྱིན་པ་དྲུག་དང ། ཐབས་ལ་མཁས་པ་ལ་བརྩོན་པར་བྱའོ། །དགོན་པ་བ་ལ་བསྟེན་ཏེ་རབ་ཏུ་དབེན་པ་ལ་བརྩོན་པར་བྱའོ། །བསོད་སྙོམས་པ་ལ་བསྟེན་ཏེ་རྙེད་པ་དང ། མ་རྙེད་པ་དང ། གྲགས་པ་དང ། མ་གྲགས་པ་དང ། བསྟོད་པ་ དང ། སྨད་པ་དང ། བདེ་བ་དང ། སྡུག་བསྔལ་གྱིས་མི་སྒུལ་བ་ལ་བརྩོན་པར་བྱའོ། །ཕྱག་དར་ཁྲོད་པ་ལ་བསྟེན་ཏེ་ཆོས་གོས་ཀྱིས་ཚ་བ་དང ། རྒྱན་ལ་མངོན་པར་མི་དགའ་བ་ལ་བརྩོན་པར་བྱའོ། །འདོད་པ་ཆུང་བ་ལ་བསྟེན་ཏེ་འདོད་པ་ཆུང་བ་ལ་བརྩོན་པར་བྱའོ། །ཆོག་ཤེས་པ་ལ་བསྟེན་ཏེ་ཆོག་ ཤེས་པ་ལ་བརྩོན་པར་བྱའོ། །རབ་ཏུ་དབེན་པ་ལ་བསྟེན་ཏེ་རབ་ཏུ་དབེན་པ་ལ་བརྩོན་པར་བྱའོ། །རྣལ་འབྱོར་སྤྱོད་པ་ལ་བསྟེན་ཏེ་ནང་གི་སེམས་ཀྱི་ཞི་གནས་དང་ལྷག་མཐོང་ཚུལ་བཞིན་ཡིད་ལ་བྱེད་པ་ནང་དུ་ཡང་དག་འཇོག་པ་ལ་བརྩོན་པར་བྱའོ། །བསམ་གཏན་པ་ལ་བསྟེན་ཏེ་ཉོན་མོངས་པ
42-1-275a
བསལ་བ་ལ་བརྩོན་པར་བྱའོ། །བྱང་ཆུབ་སེམས་དཔའི་ཐེག་པ་པ་ལ་བསྟེན་ཏེ་སྦྱིན་པ་དང ། སྙན་པར་སྨྲ་བ་དང ། དོན་སྤྱོད་པ་དང ། དོན་འཐུན་པ་སྟེ་བསྡུ་བའི་དངོས་པོ་བཞི་པོ་རྣམས་ལ་བརྩོན་པར་བྱའོ། །ལག་གི་བླ་ལ་བསྟེན་དེ་ཇི་ལྟར་དངོས་པོ་ཡོངས་སུ་གཏོང་བར་སྤྲོ་བ་ལ་ བརྩོན་པར་བྱའོ། །ཞལ་ཏ་བྱེད་པ་ལ་བསྟེན་ཏེ་བྱའོ་ཅོག་བྱེད་པ་ལ་བརྩོན་པར་བྱའོ། །དཔོན་སྣ་བྱེད་པ་ལ་བསྟེན་ཏེ་ཡིད་ཡོངས་སུ་མི་སྐྱོ་བར་བྱའོ། །ཁྱིམ་བདག་དེ་ལྟར་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པས་སྤྱོད་པ་ཇི་ལྟ་བ་བཞིན་དུ་རྗེས་སུ་འཇུག་པ་ལ་བརྩོན་པར་བྱའོ། །དགེ་སློང་གང་ཡང་ དག་པར་སྐྱོན་མེད་པ་ལ་མ་ཞུགས་པ་ཆོས་གོས་ཀྱིས་སྡུད་པའམ། ལྷུང་བཟེད་ཀྱིས་སྡུད་པ་བྱེད་པ་ན། དགེ་སློང་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་གཞུག་གོ་།དེ་ཅིའི་ཕྱིར་ཞེ་ན། གང་ཟང་ཟིང་གི་སྡུད་པས་ཆོས་ཀྱི་བསྡུ་བ་བསྐྱེད་པའི་གནས་ཡོད་པའི་ཕྱིར་རོ། །ཁྱིམ་བདག་ དེ་ལྟར་བྱང་ཆུབ་སེམས་དཔའ་ཁྱིམ་པས་དགེ་སྦྱོང་གི་སྤྱོད་པ་ལ་མཁས་པར་བྱའོ། །དེས་ཡང་དགེ་སློང་མི་འདུམ་པ་རྣམས་ཀྱི་བསྡུམས་ཀྱང་བྱའོ། །དམ་པའི་ཆོས་རབ་ཏུ་རྣམ་པར་འཇིག་པ་ན་དེས་སྲོག་ཀྱང་ཡོངས་སུ་གཏང་ཞིང་དམ་པའི་ཆོས་ཀུན་དུ་གཟུང་བར་བྱའོ། ཁྱིམ་བདག་གང་བྱང་ཆུབ་ སེམས་དཔའ་ཁྱིམ་པས་དགེ་སློང་ན་བ་ཞིག་མཐོང་ན་དེས་རང་གི་ཤ་དང་ཁྲག་གིས་ཀྱང་དགེ་སློང་དེ་ནད་དེ་ལས་གསོ་བར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་གཏོང་ཞིང་སྦྱིན་པས་གཞན་དག་འགྲོན་དུ་གཉེར་བར་བྱ་སྟེ། བྱིན་ནས་ཀྱང་འགྱོད་པའི་སེམས་མི་བསྐྱེད་དོ། །དེ་དགེ་ བའི་རྩ་བ་ཐམས་ཅད་ཀྱི་སྔོན་དུ་ཡང་བྱང་ཆུབ་ཀྱི་སེམས་འགྲོ་བར་བྱའོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་ཁྱིམ་པ་ཁྱིམ་གྱི་ས་ལ་གནས་པ་དེ་བཞིན་གཤེགས་པ་རྣམས་ཀྱི་བཀའ་བཞིན་བྱེད་པ་ཡིན་ཏེ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ལས་མི་ཉམས། ཡོངས་སུ་མི་ཉམས་སོ། ། འདི་ལ་ཡང་ཁ་ན་མ་ཐོ་བའི་ལས་མེད་ཅིང་གཞན་དུ་ཡང་བྱེ་བྲག་ཏུ་འགྲོ་བར་འགྱུར་རོ། །དེ་ནས་ཁྱིམ་བདག་དྲག་ཤུལ་ཅན་དང ། ཁྱིམ་བདག་གཞན་དེ་དག་གིས་མགྲིན་གཅིག་ཏུ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཇི་ཙམ་དུ
42-1-275b
བཅོམ་ལྡན་འདས་ཀྱིས་ཁྱིམ་ན་གནས་པའི་ཉེས་པ་དང ། སྡོམ་པ་དང ། སྤྱོད་པ་དང་རབ་ཏུ་བྱུང་བའི་ཡོན་ཏན་གྱི་ཕན་ཡོན་འདི་དག་ལེགས་པར་གསུངས་པ་ནི་ངོ་མཚར་ཏོ། །བཅོམ་ལྡན་འདས་བདག་ཅག་ཀྱང་འདིར་ཁྱིམ་ན་གནས་པ་ལ་ཉེས་པའི་སྐྱོན་ཆགས་པ་ཇི་སྙེད་པ་དང ། རབ་ཏུ་བྱུང་བའི་ཡོན་ ཏན་དང་ཕན་ཡོན་མཐའ་ཡས་པ་མངོན་སུམ་དུ་གྱུར་ན། བཅོམ་ལྡན་འདས་བདག་ཅག་རྣམས་རབ་ཏུ་ཕྱུང་སྟེ། བདེ་བར་གཤེགས་པས་ལེགས་པར་བཤད་པའི་ཆོས་འདུལ་བ་ལ་བསྙེན་པར་རྫོགས་པར་མཛད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཁྱིམ་བདག་དེ་ དག་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་རྣམས་རབ་ཏུ་བྱུང་བ་ནི་འབྱུང་བར་དཀའ་སྟེ། སྤྱོད་པ་ནི་ཤིན་དུ་རྣམ་པར་དག་པར་བསྒྲུབ་པར་དཀའོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་ཁྱིམ་བདག་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་རབ་ཏུ་ བྱུང་བ་ཡང་འབྱུང་བར་དཀའ་བ་ལགས་མོད་ཀྱི། འོན་ཀྱང་བཅོམ་ལྡན་འདས་ཀྱིས་བདག་ཅག་རབ་ཏུ་འབྱུང་བའི་སླད་དུ་སྐབས་དབྱེ་བར་གསོལ། བདག་ཅག་བཅོམ་ལྡན་འདས་ཀྱི་བསྟན་པ་ལ་ནན་ཏན་གྱིས་བསྒྲུབ་པར་འཚལ་ལོ། །བཅོམ་ལྡན་འདས་ཀྱིས་ཁྱིམ་བདག་དེ་དག་ལ་རབ་ཏུ་འབྱུང་བའི་ སྐབས་ཕྱེ་སྟེ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་སྤྱོད་པ་ཐམས་ཅད་རྣམ་པར་དག་པ་ལ་འདི་སྐད་ཅེས་བཀའ་སྩལ་ཏོ། །སྐྱེས་བུ་དམ་པ་ཁྱེད་གཉིས་ཀྱིས་ཁྱིམ་བདག་འདི་རྣམས་རབ་ཏུ་བྱུང་ལ་བསྙེན་པར་རྫོགས་པར་གྱིས་ཤིག་ཅེས་བཅོམ་ ལྡན་འདས་ཀྱིས་གནང་ནས་བྱང་ཆུབ་སེམས་དཔའ་བྱམས་པས་ཁྱིམ་བདག་དགུ་སྟོང་རབ་ཏུ་ཕྱུང་ངོ ། །བྱང་ཆུབ་སེམས་དཔའ་སྤྱོད་པ་ཐམས་ཅད་རྣམ་པར་དག་པས་ནི་ཁྱིམ་བདག་བདུན་སྟོང་རབ་ཏུ་ཕྱུང་ངོ ། །བྱང་ཆུབ་སེམས་དཔའ་ཁྱིམ་པ་རྣམས་ཀྱི་བསླབ་པའི་རྒྱུན་བསྟན་པའི་ཆོས་ཀྱི་རྣམ་གྲངས་འདི་བཤད་པ་ ན་སྲོག་ཆགས་སྟོང་དུ་ཚང་བ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ།། །།བམ་པོ་གསུམ་པ་སྟེ་ཐ་མ།དེ་ནས་བཅོམ་ལྡན་འདས་ལ་ཁྱིམ་བདག་དྲག་ཤུལ་ཅན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བྱང་ཆུབ
42-1-276a
སེམས་དཔའ་ཁྱིམ་པ་རྣམས་ཀྱི་ཁྱིམ་གྱིས་དང ། ཁྱིམ་ན་གནས་པའི་ནོངས་པ་དག་ནི་བཤད་ལགས་ན། བཅོམ་ལྡན་འདས་ཀྱིས་བྱང་ཆུབ་སེམས་དཔའ་རབ་ཏུ་བྱུང་བར་གཏོགས་པ་རྣམས་ཀྱི་རབ་ཏུ་བྱུང་བའི་སྒྲུབ་པ་དང ། ཚུལ་ཁྲིམས་དང ། ཐོས་པ་དང ། སྦྱངས་པའི་ ཡོན་ཏན་དང ། ཡོ་བྱད་བསྙུངས་པ་དང ། སྤྱོད་པ་དང ། ཆོ་ག་ཕུན་སུམ་ཚོགས་པ་དེ་ལེགས་པར་བཤད་དུ་གསོལ། བཅོམ་ལྡན་འདས་ཇི་ལྟར་ན་ལེགས་པར་བཤད་པའི་ཆོས་འདུལ་བ་ལ་བྱང་ཆུབ་སེམས་དཔའ་རབ་ཏུ་བྱུང་ནས་གུས་པར་སྨྲ་བ་དང ། ཕྱག་འཚལ་བ་དང ། ལྡང་བ་དང ། ཐལ་མོ་ སྦྱོར་བ་དང ། འདུད་པའི་ལས་དོན་མ་མཆིས་པར་མི་བགྱིད་པ་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་ཁྱོད་གང་དེ་བཞིན་གཤེགས་པ་ལ་རབ་ཏུ་བྱུང་བའི་སྒྲུབ་པ་དང ། ཚུལ་ཁྲིམས་དང ། ཐོས་པ་དང ། སྦྱངས་པའི་ཡོན་ཏན་དང ། ཡོ་བྱད་བསྙུངས་པ་དང ། སྤྱོད་པ་དང ། ཆོ་ག་ཕུན་སུམ་ཚོགས་པ་འདི་ཀུན་འདྲི་བ་ནི་ལེགས་སོ་ལེགས་སོ། །ཁྱིམ་བདག་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང ། བྱང་ཆུབ་སེམས་དཔའ་རབ་ཏུ་བྱུང་བར་གཏོགས་པས་ཇི་ལྟར་ གནས་པར་བྱ་བ་དང ། ཇི་ལྟར་བསྒྲུབ་པར་བྱ་བ་ངས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས་ཁྱིམ་བདག་དྲག་ཤུལ་ཅན་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་འདི་ལ་བྱང་ཆུབ་སེམས་ དཔའ་རབ་ཏུ་བྱུང་བས་འདི་ལྟར་བདག་སུའི་ཆེད་ལ་ཁྱིམ་ནས་ཁྱིམ་མ་ཡིན་པར་རབ་ཏུ་བྱུང་སྙམ་དུ་གཞལ་བར་བྱ་སྟེ། དེས་མགོ་དང་གོས་ལ་མེ་འབར་བ་བཞིན་དུ་ཡེ་ཤེས་ཡོངས་སུ་བཙལ་བས་བརྩོན་འགྲུས་བརྩམ་པར་བྱའོ། །དེ་དེ་ལྟར་ཡོངས་སུ་འཇལ་བས་ཐོག་མ་ཉིད་དུ་འཕགས་པའི་རིགས་བཞི་ པོ་དག་ལ་རབ་ཏུ་གནས་ཤིང་སྦྱངས་པའི་ཡོན་ཏན་དང ། ཡོ་བྱད་བསྙུངས་པ་ལ་མངོན་པར་དགའ་བར་བྱའོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་འཕགས་པའི་རིགས་བཞི་པོ་དག་ལ་རབ་ཏུ་གནས་པ་ཡིན་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་ནི
42-1-276b
ཆོས་གོས་ངན་ངོན་གྱིས་ཆོག་པར་འཛིན་པ་ཡིན། ཆོས་གོས་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་བརྗོད་པ་ཡིན་ཏེ། དེ་ཆོས་གོས་ཀྱི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །ཆོས་གོས་མ་རྙེད་ན་ཡང་ཡི་མི་འཆད་ཅིང་ཡོངས་སུ་གདུང་བ་མེད་དོ། །ཆོས་གོས་རྙེད་ན་ཡང་ ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མི་འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། ཆོས་གོས་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་གཞན་ལ་མི་སྨོད་དོ། ཁྱིམ་བདག་གཞན་ཡང་བྱང་ཆུབ་ སེམས་དཔའ་རབ་ཏུ་བྱུང་བ་ནི་བསོད་སྙོམས་ངན་ངོན་གྱིས་ཆོག་པར་འཛིན་པ་ཡིན། བསོད་སྙོམས་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་རྗོད་པ་ཡིན་ཏེ། དེ་བསོད་སྙོམས་ཀྱི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །བསོད་སྙོམས་མ་རྙེད་ན་ཡང་ཡི་མི་འཆད་ཅིང་ཡོངས་སུ་ གདུང་བ་མེད་དོ། །བསོད་སྙོམས་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མི་འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། བསོད་སྙོམས་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་གཞན་ ལ་མི་སྨོད་དོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ནི་མལ་ཆ་ངན་ངོན་གྱིས་ཆོག་པར་འཛིན་པ་ཡིན། མལ་ཆ་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་བརྗོད་པ་ཡིན་ཏེ། དེ་མལ་ཆའི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། མལ་ཆ་མ་རྙེད་ན་ཡང་ཡི་མི་ འཆད་ཅིང་ཡོངས་སུ་གདུང་བ་མེད་དོ། །མལ་ཆ་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མ་འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། མལ་ཆ་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་ གཞན་ལ་མི་སྨོད་དོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ནི་ན་བའི་གསོས་སྨན་དང ། ཡོ་བྱད་ངན་ངོན་གྱིས་ཆོག་པར་འཛིན་པ་ཡིན། ན་བའི་གསོས་སྨན་དང ། ཡོ་བྱད་ངན་ངོན་གྱིས་ཆོག་པར་འཛིན་པའི་བསྔགས་པ་ཡང་རྗོད་པ་ཡིན་ཏེ། དེ་ན་བའི་གསོས་སྨན་དང་།
42-1-277a
ཡོ་བྱད་ཀྱི་ཕྱིར་ཚུལ་དང་མི་འདྲ་བས་ཚོལ་བར་མི་བྱེད་དོ། །ན་བའི་གསོས་སྨན་དང ། ཡོ་བྱད་མ་རྙེད་ན་ཡང་ཡི་མི་འཆད་ཅིང་ཡོངས་སུ་གདུང་བ་མེད་དོ། །ན་བའི་གསོས་སྨན་དང ། ཡོ་བྱད་རྙེད་ན་ཡང་ཆགས་པ་མེད། རྨོངས་པ་མེད། དགའ་བ་མེད། ཞེན་པ་མེད་ཅིང་ཞེན་པར་མི་ འགྱུར་ཏེ། ཉེས་དམིགས་མཐོང་ལ་འབྱུང་བ་རབ་ཏུ་ཤེས་ནས་ཆགས་པ་མེད་པར་སྤྱོད་དེ། ན་བའི་གསོས་སྨན་དང ། ཡོ་བྱད་ངན་ངོན་གྱིས་ཆོག་པར་འཛིན་པ་དེ་བདག་ལ་མི་སྟོད་ཅིང་གཞན་ལ་མི་སྨོད་དོ། །སྤོང་བ་ལ་དགའ་བ་ཡང་ཡིན་ཏེ། སྤོང་བ་ལ་མོས་ཤིང་སྤོང་བ་ལ་དགའ་བའི་སྦྱོར་བ་ལ་བརྩོན་ ནོ། །དེ་སྡིག་པ་མི་དགེ་བའི་ཆོས་རྣམས་སྤངས་པས་དགའ་བར་འགྱུར་ཏེ། མ་སྤངས་པས་ནི་མ་ཡིན་ནོ། །དེ་བསྒོམ་པ་ལ་དགའ་བ་ཡིན་ཏེ། བསྒོམ་པ་ལ་དགའ་བའི་སྦྱོར་བ་ལ་བརྩོན་ནོ། །དགེ་བའི་ཆོས་བསྒོམས་པས་དགའ་བར་འགྱུར་ཏེ། མ་བསྒོམས་པས་ནི་མ་ཡིན་ཏེ། སྤོང་བ་ལ་དགའ་བ་སྤོང་ བ་ལ་མོས་པ། སྤོང་བ་ལ་དགའ་བའི་སྦྱོར་བ་ལ་བརྩོན་པ། བསྒོམ་པ་ལ་དགའ་བ། བསྒོམ་པ་ལ་མོས་པ། བསྒོམ་པ་ལ་དགའ་བའི་སྦྱོར་བ་ལ་བརྩོན་པ་དེ་བདག་ལ་མི་སྟོད་ཅིང་གཞན་ལ་མི་སྨོད་དོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་འཕགས་པའི་རིགས་བཞི་པོ་དག་ལ་གནས་ པ་ཡིན་ནོ། །ཅིའི་ཕྱིར་འཕགས་པའི་རིགས་ཞེས་བྱ་ཞེ་ན། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་འདི་ལ་གནས་པས་དེའི་ཕྱིར་འཕགས་པའི་རིགས་ཞེས་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའི་རབ་ཏུ་བྱུང་བས་ཕན་ཡོན་ལ། དགའ་བ་བཅུས་ཆོས་གོས་ལུས་ལ་བཅང་བར་བྱ་སྟེ། བཅུ་གང་ཞེ་ན། འདི་ལྟ་སྟེ། ངོ་ཚ་ཞིང་འཛེམ་པས་དཀྲི་བ་དང ། ཤ་སྦྲང་དང ། སྦྲང་བུ་དང ། རླུང་དང ། ཉི་མ་དང ། སྡིག་སྦྲུལ་གྱིས་རེག་པར་འགྱུར་བ་གཡོགས་པ་དང ། དགེ་སྦྱོང་གི་ཁ་དོག་དང ། རྟགས་བསྟན་པ་དང ། ངུར་སྨྲིག་དེ་དག་ནི་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་ རྟེན་གྱི་མཆོད་རྟེན་ཡིན་ནོ་སྙམ་ནས་མཆོད་རྟེན་གྱི་ཕྱིར་ཡང་དག་པར་གཟུང་བར་བྱ་བ་དང ། དེ་དག་ནི་ཡིད་འབྱུང་བ་དང ། འདོད་ཆགས་དང་བྲལ་བས་ཁ་དོག་བསྒྱུར་བ་ཡིན་ཏེ། འདི་དག་ནི་འདོད་ཆགས་ཀྱིས་ཁ་དོག་བསྒྱུར་བ་མ་ཡིན་པ་དང ། འདི་དག་ནི་ཉེ་བར་ཞི་བ་དང་འཐུན་པ་ཡིན་གྱི། འདི་དག
42-1-277b
ནི་ཉོན་མོངས་པ་འབར་བ་དང་འཐུན་པ་མ་ཡིན་པ་དང ། ངུར་སྨྲིག་འདི་དག་གིས་དཀྲིས་ཤིང་གཡོགས་ནས་སྡིག་པ་ལས་ལྡོག་པར་བྱ་བ་དང ། ལེགས་པར་བྱ་བའི་ལས་བྱ་བ་དང ། ཆོས་གོས་ཀྱིས་ཆ་བར་སྦྱོར་བ་ལ་བརྩོན་པ་མ་ཡིན་པ་དང ། ངུར་སྨྲིག་འདི་དག་འཕགས་པའི་ལམ་གྱི་ཚོགས་ དང་འཐུན་པ་ཡིན་པར་ཤེས་ནས་ཅི་ནས་སྐད་ཅིག་གཅིག་ལ་ཡང་རྙོག་པ་དང ། འགྲོགས་པར་མི་བྱ་བར་ངུར་སྨྲིག་རྣམས་བཅང་བར་བྱ་སྟེ། ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་ལ་དགའ་བ་བཅུ་པོ་དེ་དག་གིས་ཆོས་གོས་ལུས་ལ་བཅང་བར་བྱའོ། །ཁྱིམ་བདག་གཞན་ཡང་ བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་བཅུ་མཐོང་ནས་ཇི་སྲིད་འཚོའི་བར་དུ་བསོད་སྙོམས་སྤྱོད་པ་གཏང་བར་མི་བྱ་སྟེ། བཅུ་གང་ཞེ་ན། རང་དབང་དུ་གྱུར་པའི་ཚུལ་གྱིས་འཚོ་བར་བྱའི་གཞན་ལ་རག་ལུས་པས་མ་ཡིན་པ་དང ། སེམས་ཅན་གང་དག་བདག་བསོད་སྙོམས་འདོད་པ་ལ་བསོད་ སྙོམས་བྱིན་པ་དེ་དག་ཀྱང་དཀོན་མཆོག་གསུམ་ལ་བཀོད་དེ་ཕྱིས་བསོད་སྙོམས་བླང་བར་བྱ་བ་དང ། སེམས་ཅན་གང་དག་བདག་བསོད་སྙོམས་འདོད་པ་ལ་བསོད་སྙོམས་མི་སྟེར་བ་དེ་དག་ལ་སྙིང་རྗེ་ཆེན་པོ་བསྐྱེད་ནས། སེམས་ཅན་དེ་དག་གཏོང་བ་ལ་གཟུང་བའི་ཕྱིར་བརྩོན་འགྲུས་བརྩམ་པར་བྱ་བ་དང ། བྱ་བ་བྱས་ཏེ་བསོད་སྙོམས་བཟའ་བ་དང་།བདག་གིས་དེ་བཞིན་གཤེགས་པའི་བཀའ་དང་འཐུན་པར་བྱས་པར་འགྱུར་བ་དང ། དགང་སླ་ཞིང་གསོ་སླ་བར་བྱ་བའི་ཕྱིར་བདག་གིས་རྒྱུ་བསྐྱེད་པར་འགྱུར་བ་དང ། བདག་གིས་ང་རྒྱལ་བཅག་པ་བསྟན་པར་འགྱུར་བ་དང ། བདག་གི་སྤྱི་གཙུག་བལྟར་མི་མཐོང་ བའི་དགེ་བའི་རྩ་བ་བསགས་པར་འགྱུར་བ་དང ། བདག་མཐོང་ནས་དེ་བཞིན་དུ་སློབ་པར་འགྱུར་ཞིང་བདག་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་ལ་བསྟེན་པར་མི་འགྱུར་བ་དང ། བསོད་སྙོམས་ཡང་དག་པར་བླང་བའི་སྤྱོད་པ་ཡང་བདག་སེམས་ཅན་ཐམས་ཅད་ལ་སེམས་སྙོམས་པས་ཐམས་ཅད་མཁྱེན་ པའི་ཡེ་ཤེས་ཀྱི་ཚོགས་སུ་འགྱུར་བ་སྟེ། ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་བཅུ་པོ་དེ་དག་མཐོང་ནས་ཇི་སྲིད་འཚོ་བའི་མཐའི་བར་དུ་བསོད་སྙོམས་སྤྱོད་པ་མི་གཏང་བར་བྱའོ། །གལ་ཏེ་དེ་ལ་ལ་ཞིག་གིས་འགྲོན་དུ་བོས་ན་དེས་ལྷག་པའི་བསམ་པ་དང ། དད་པ་དང ། དང་བ་བསྐྱེད་པའི
42-1-278a
ཕྱིར་འགྲོ་བར་བྱ་སྟེ། འདྲིད་པ་དང ། འཆོས་པས་ནི་མ་ཡིན་ནོ། །གང་ལ་ལ་བསོད་སྙོམས་བླངས་ཏེ་བདག་དང་གཞན་གྱི་དོན་རྫོགས་པར་བྱེད་ནུས་ན། ངས་བྱང་ཆུབ་སེམས་དཔའ་དེ་འགྲོན་དུ་འགྲོ་བར་གནང་ངོ ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བས་ ཕན་ཡོན་བཅུ་མཐོང་ནས་ཇི་སྲིད་འཚོ་བའི་བར་དུ་སྨན་བསྐུས་པས་ཆོག་ཤེས་པར་བྱ་སྟེ་བཅུ་གང་ཞེ་ན། དེ་བཞིན་གཤེགས་པའི་བསྟན་པ་ལ་ཞུགས་པར་འགྱུར་བ་དང ། གཞན་གྱི་ངོར་ལྟ་བར་མི་འགྱུར་བ་དང ། བདག་གིས་ནི་མི་སྡུག་པའི་འདུ་ཤེས་བསྟེན་པར་འགྱུར་བ་དང ། བདག་མི་འཐུན་པའི་ འདུ་ཤེས་སོ་སོར་ཉེ་བར་གནས་པར་འགྱུར་བ་དང ། རོ་བྲོ་བ་ལ་ཆགས་པ་ཡང་བདག་གིས་ཚེགས་ཆུང་ངུས་སྤངས་པར་འགྱུར་བ་དང ། བྱིས་པ་སོ་སོའི་སྐྱེ་བོ་ཐམས་ཅད་བདག་ལ་ཡིད་རྟོན་པར་འགྱུར་བ་དང ། བདག་ཁ་ཟས་བསྙུངས་པ་མངོན་དུ་གྱུར་པར་འགྱུར་བ་དང ། བདག་ལ་སྨན་ཡོངས་སུ་ཚོལ་ བའི་ཕོངས་པ་མེད་པར་འགྱུར་བ་དང ། བདག་གིས་སེམས་ལ་ཉོན་མོངས་པའི་ནད་ཀྱི་གནོད་པ་མེད་པར་བྱས་པར་འགྱུར་བ་དང་དེ་ལྟར་ཞུགས་ན་མྱུར་དུ་ཉོན་མོངས་པའི་ནད་དང་འབྲལ་བ་ཐོབ་པར་འགྱུར་བ་སྟེ། ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་བཅུ་པོ་དེ་དག་ མཐོང་ནས་ཇི་སྲིད་འཚོའི་བར་དུ་སྨན་བསྐུས་པས་ཆོག་ཤེས་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བས་ཕན་ཡོན་བཅུ་མཐོང་ནས་ཇི་སྲིད་འཚོ་བའི་མཐའི་བར་དུ་དགོན་པ་ལ་གནས་པ་ཡོངས་སུ་མི་གཏང་བར་བྱ་སྟེ། བཅུ་གང་ཞེ་ན། བདག་གི་ཉམ་ རངས་དང ། བདག་གི་དབང་དུ་འགྲོ་བ་དང ། ངའི་བ་མེད་ཅིང་ཡོངས་སུ་འཛིན་པ་མེད་པ་དང ། མལ་ཆ་ལྷུག་པར་གཏོང་བ་དང ། དགོན་པའི་གནས་ལ་དགའ་བ་དང་མ་བྲལ་བ་དང ། གནས་རྣམས་སུ་དོན་ཉུང་ཞིང་བྱེད་པ་ཉུང་བ་དང ། གཡོག་གི་ཚོགས་འདོར་ཞིང་ལུས་དང་སྲོག་ལ་མི་ ལྟ་བ་དང ། དབེན་པར་དགའ་ཞིང་འདུ་འཛི་ཡོངས་སུ་སྤོང་བ་དང ། ལས་བྱས་པའི་ཡོན་ཏན་གྱི་ཕན་ཡོན་ཡོངས་སུ་གཏོང་བ་དང་།ཏིང་ངེ་འཛིན་དང་འཐུན་པའི་སེམས་རྩེ་གཅིག་པ་དང ། ཡིད་ལ་བྱེད་པ་བླ་གབ་མེད་པ་ཡིད་ལ་བྱེད་པའི་སྒྲིབ་པ་མེད་པ་སྟེ། ཁྱིམ་བདག་གཞན་ཡང་བྱང་ཆུབ
42-1-278b
སེམས་དཔའ་རབ་ཏུ་བྱུང་བས་ཕན་ཡོན་བཅུ་པོ་དེ་དག་མཐོང་ནས་ཇི་སྲིད་འཚོ་བའི་མཐའི་བར་དུ་དགོན་པ་ལ་གནས་པ་ཡོངས་སུ་མི་གཏོང་བར་བྱའོ། །ཁྱིམ་བདག་གལ་ཏེ་བྱང་ཆུབ་སེམས་དཔའ་དགོན་པ་ལ་གནས་པ་ཆོས་ཉན་པར་འདོད་དམ། སློབ་དཔོན་དང ། མཁན་པོ་བལྟ་བར་འདོད་ དམ། ན་བ་དྲི་བའི་ཕྱིར་གྲོང་གི་གནས་སུ་འོངས་ན། དེས་དགོངས་སུ་སླར་ལྡོག་པར་བྱ་བའི་ཕྱིར་འགྲོ་བའི་སེམས་བསྐྱེད་པར་བྱའོ། །དེ་གལ་ཏེ་ལུང་མནོད་པ་དང ། ཁ་ཏོན་བྱ་བ་གཞན་ལ་རག་ལས་ཏེ། གཙུག་ལག་ཁང་ན་གནས་ན་ཡང་དེས་དགོན་པ་ལ་གཞོལ་བའི་སེམས་ཀྱིས་གང་དངོས་པོ་ ཐམས་ཅད་ལ་དགོན་པར་འདུ་ཤེས་པ་དང ། ཆོས་ཚོལ་བས་མི་ངོམས་པ་དེ་ཉིད་དགོན་པ་ལ་གནས་པ་ཡིན་ནོ་སྙམ་དུ་བསམ་མོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པས་འདི་ལྟར་བདག་ཅིའི་ཕྱིར་དགོན་པ་ལ་གནས། དགོན་པ་ལ་གནས་པ་འབའ་ ཞིག་ནི་དགེ་སྦྱོང་མ་ཡིན་ཏེ། འདི་ན་ནི་མ་བྱང་བ། མ་སྦས་པ། མ་ཞི་བ། མ་དུལ་བ། མི་འགྲུས་པ། རབ་ཏུ་མི་བརྩོན་པ་འདི་ལྟ་སྟེ། རི་དགས་དང ། སྤྲེའུ་དང ། བྱ་མང་པོ་དང ། ཆོམ་རྐུན་དང ། གདོལ་པ་དག་ཀྱང་མང་དུ་གནས་ཏེ། དེ་དག་ཀྱང་དགེ་སྦྱོང་གི་ཡོན་ཏན་དང་ལྡན་པ་མ་ཡིན་ པས་གང་གི་ཕྱིར་བདག་དགོན་པ་ལ་གནས་པ་འདི་ལྟ་སྟེ། དགེ་སྦྱོང་གི་དོན་དེ་ཡོངས་སུ་རྫོགས་པར་བྱའོ་སྙམ་དུ་བརྟག་པར་བྱའོ། །ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བའི་དགེ་སྦྱོང་གི་དོན་གང་ཞེ་ན། འདི་ལྟ་སྟེ་དྲན་པ་དང ། ཤེས་བཞིན་དང ། མི་གཡེང་བ་དང ། གཟུངས་རབ་ ཏུ་ཐོབ་པ་དང ། བྱམས་པ་བསྟེན་པ་དང ། སྙིང་རྗེ་བསྟེན་པ་དང ། མངོན་པར་ཤེས་པ་རྣམས་ལ་དབང་བསྒྱུར་བ་དང ། ཕ་རོལ་དུ་ཕྱིན་པ་དྲུག་བསྒོམ་པ་ཡོངས་སུ་རྫོགས་པར་བྱ་བ་དང ། ཐམས་ཅད་མཁྱེན་པ་ཉིད་ཀྱི་སེམས་ཡོངས་སུ་མི་གཏོང་བ་དང ། ཐབས་མཁས་པའི་ཡེ་ཤེས་བསྒོམ་ པ་དང ། སེམས་ཅན་བསྡུ་བ་དང ། སེམས་ཅན་ཡོངས་སུ་སྨིན་པར་བྱ་བ་དང ། བསྡུ་བའི་དངོས་པོ་བཞི་ཡོངས་སུ་མི་གཏང་བ་དང ། རྗེས་སུ་དྲན་པ་དྲུག་རྗེས་སུ་དྲན་པ་དང ། ཐོས་པ་དང ། བརྩོན་འགྲུས་མི་འདོར་བ་དང ། ཚུལ་བཞིན་དུ་ཆོས་རབ་ཏུ་རྣམ་པར་འབྱེད་པ་དང ། ཡང་དག་པར
42-1-279a
རྣམ་པར་གྲོལ་བའི་ཕྱིར་བརྩོན་པ་དང ། འབྲས་བུ་ཐོབ་པ་རྣམས་ཤེས་པ་དང ། སྐྱོན་མེད་པ་ལ་འཇུག་པར་གནས་པ་དང ། དམ་པའི་ཆོས་བསྲུང་བ་དང ། ལས་ཀྱི་རྣམ་པར་སྨིན་པ་ལ་ཡིད་ཆེས་པས་ཡང་དག་པར་ལྟ་བ་དང ། རྟོག་པ་དང ། རྣམ་པར་རྟོག་པ་ཐམས་ཅད་རབ་ཏུ་ ཆད་པས་ཡང་དག་པའི་རྟོག་པ་དང ། མོས་པ་ཇི་ལྟ་བ་བཞིན་དུ་ཆོས་སྟོན་པས་ཡང་དག་པའི་ངག་དང ། ལས་ཟད་པ་ཡོངས་སུ་རྫོགས་པས་ཡང་དག་པའི་ལས་ཀྱི་མཐའ་དང ། བག་ཆགས་ཀྱི་མཚམས་སྦྱོར་ཡང་དག་པར་བཅོམ་པས་ཡང་དག་པའི་འཚོ་བ་དང ། རྫོགས་པའི་བྱང་ཆུབ་ཁོང་དུ་ཆུད་ པས་ཡང་དག་པའི་རྩོལ་བ་དང ། བརྗེད་པ་མེད་པའི་ཆོས་ཉིད་ཀྱིས་ཡང་དག་པའི་དྲན་པ་དང ། ཐམས་ཅད་མཁྱེན་པའི་ཡེ་ཤེས་ཡོངས་སུ་ཐོབ་པས་ཡང་དག་པའི་ཏིང་ངེ་འཛིན་དང ། སྟོང་པ་ཉིད་ཀྱིས་མི་སྐྲག་པ་དང ། མཚན་མ་མེད་པ་ལ་མི་ཞུམ་པ་དང ། སྨོན་པ་མེད་པ་ལ་མི་འགོང་བ་ དང ། བསམས་བཞིན་དུ་ཡེ་ཤེས་ཀྱིས་སྲིད་པ་ཡོངས་སུ་འཛིན་པ་དང ། དོན་ལ་རྟོན་གྱི་ཡི་གེ་ལ་མི་རྟོན་པ་དང ། ཡེ་ཤེས་ལ་རྟོན་གྱི་རྣམ་པར་ཤེས་པ་ལ་མི་རྟོན་པ་དང ། ཆོས་ལ་རྟོན་གྱི་གང་ཟག་ལ་མི་རྟོན་པ་དང ། ངེས་པའི་དོན་གྱི་མདོ་སྡེ་ལ་རྟོན་གྱི་དྲང་བའི་མདོ་སྡེ་ལ་མི་རྟོན་པ་དང ། ཐོག་ མ་ནས་མ་བྱུང་ཞིང་མི་འཇིག་པའི་ཚུལ་གྱིས་ཆོས་ཀྱི་ངོ་བོ་ཉིད་ལ་མི་རྟོག་པ་དེ་ནི་ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བའི་དགེ་སྦྱོང་གི་དོན་ཅེས་བྱའོ། །ཁྱིམ་བདག་ཡང་བྱང་ཆུབ་སེམས་དཔའ་རབ་ཏུ་བྱུང་བས་འགྲོགས་པ་མེད་པ་མང་དུ་བྱའོ། །དེས་འདི་ལྟར་ཡང་བདག་ནི་སེམས་ཅན་དང་ འདྲེ་བར་མི་བྱ་སྟེ། བདག་གིས་སེམས་ཅན་གཅིག་གི་དགེ་བའི་རྩ་བ་བསྐྱེད་པར་མི་བྱའི། བདག་གིས་སེམས་ཅན་ཐམས་ཅད་ཀྱི་དགེ་བའི་རྩ་བ་བསྐྱེད་པར་བྱའོ་སྙམ་དུ་བརྟག་པར་བྱའོ། །དེ་ལྟ་མོད་ཀྱི་ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བའི་འགྲོགས་པ་བཞི་པོ་འདི་དག་ནི་དེ་ བཞིན་གཤེགས་པས་གནང་སྟེ། བཞི་གང་ཞེ་ན། ཆོས་མཉན་པའི་ཕྱིར་འགྲོགས་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་འགྲོགས་པ་དང ། དེ་བཞིན་གཤེགས་པ་ལ་མཆོད་པ་དང ། རིམ་གྲོ་བྱ་བའི་ཕྱིར་འགྲོགས་པ་དང ། ཐམས་ཅད་མཁྱེན་པ་ཉིད་ཀྱི་སེམས
42-1-279b
འདྲེས་པ་མེད་པ་དང་འགྲོགས་པ་སྟེ། ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བའི་འགྲོགས་པ་བཞི་པོ་དེ་དག་ནི་དེ་བཞིན་གཤེགས་པས་གནང་བའོ། །ཁྱིམ་བདག་དེ་བས་ན་བྱང་ཆུབ་སེམས་དཔའ་རབ་ཏུ་བྱུང་བས་འགྲོགས་པ་ལས་རྣམ་པར་གྲོལ་བར་བྱའོ། །ཁྱིམ་བདག་ གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ན་གནས་པས་བདག་ཅིའི་ཕྱིར་དགོན་པར་འོངས་སྙམ་དུ་བརྟག་པར་བྱ་སྟེ། དེས་ཡང་འདི་ལྟར་བདག་ནི་འཇིགས་ཤིང་སྐྲག་པའི་ཕྱིར་དགོན་པར་འོངས་སོ། །ཅི་ཞིག་གིས་འཇིགས་ཤིང་སྐྲག་ཅེ་ན། འདུ་འཛིས་འཇིགས་ཤིང་སྐྲག་གོ་། འགྲོགས་པས་འཇིགས་ཤིང་སྐྲག་གོ་།འདོད་ཆགས་དང ། ཞེ་སྡང་དང ། གཏི་མུག་གིས་འཇིགས་ཤིང་སྐྲག་གོ་།ང་རྒྱལ་དང ། རྒྱགས་པ་དང ། འཆབ་པས་འཇིགས་ཤིང་སྐྲག་གོ་།ཆགས་པ་དང ། ཕྲག་དོག་དང ། སེར་སྣས་འཇིགས་ཤིང་སྐྲག་གོ་།གཟུགས་དང ། སྒྲ་དང ། དྲི་དང ། རོ་དང ། རེག་བྱས་འཇིགས་ཤིང་སྐྲག་གོ་།ཕུང་པོའི་བདུད་ཀྱིས་འཇིགས་ཤིང་སྐྲག་གོ་།ཉོན་མོངས་པའི་བདུད་ཀྱིས་འཇིགས་ཤིང་སྐྲག་གོ་།འཆི་བདག་གི་བདུད་ཀྱིས་འཇིགས་ཤིང་སྐྲག་གོ་།ལྷའི་བུའི་བདུད་ཀྱིས་འཇིགས་ཤིང་སྐྲག་གོ་།མི་རྟག་པ་ལ་རྟག་པར་ཅི་ལོག་པས་འཇིགས་ ཤིང་སྐྲག་གོ། །སྡུག་བསྔལ་ལ་བདེ་བར་ཕྱིན་ཅི་ལོག་པས་འཇིགས་ཤིང་སྐྲག་གོ། །བདག་མེད་པ་ལ་བདག་ཏུ་ཕྱིན་ཅི་ལོག་པས་འཇིགས་ཤིང་སྐྲག་གོ། །མི་གཙང་བ་ལ་གཙང་བར་ཕྱིན་ཅི་ལོག་པས་འཇིགས་ཤིང་སྐྲག་གོ། །སེམས་དང་ཡིད་དང་རྣམ་པར་ཤེས་པས་འཇིགས་ཤིང་སྐྲག་གོ་། སྲེད་པས་འཇིགས་ཤིང་སྐྲག་གོ་།འཁོར་བས་འཇིགས་ཤིང་སྐྲག་གོ་།སྒྲིབ་པ་དང་ཆོད་པ་དང་ཀུན་ནས་ལྡང་བས་འཇིགས་ཤིང་སྐྲག་གོ་།འཇིག་ཚོགས་ལ་ལྟ་བས་འཇིགས་ཤིང་སྐྲག་གོ་།བདག་ཏུ་འཛིན་པ་དང ། བདག་གིར་འཛིན་པས་འཇིགས་ཤིང་སྐྲག་གོ་།རྒོད་པས་འཇིགས་ཤིང་ སྐྲག་གོ་།འགྱོད་པ་དང་ཐེ་ཚོམ་གྱིས་འཇིགས་ཤིང་སྐྲག་གོ་།སྡིག་པའི་གྲོགས་པོས་འཇིགས་ཤིང་སྐྲག་གོ་།རྙེད་པ་དང་བཀུར་སྟིས་འཇིགས་ཤིང་སྐྲག་གོ་།མི་དགེ་བའི་བཤེས་གཉེན་གྱིས་འཇིགས་ཤིང་སྐྲག་གོ་།མ་མཐོང་བར་མཐོང་ངོ་སྙམ་དུ་འཛིན་པས་འཇིགས་ཤིང་སྐྲག་གོ་།
42-1-280a
མ་ཐོས་པར་ཐོས་སོ་སྙམ་དུ་འཛིན་པས་འཇིགས་ཤིང་སྐྲག་གོ་།མ་དྲན་པར་དྲན་ནོ་སྙམ་དུ་འཛིན་པས་འཇིགས་ཤིང་སྐྲག་གོ་།བྱེ་བྲག་མ་ཕྱེད་པར་བྱེ་བྲག་ཕྱེད་དོ་སྙམ་དུ་འཛིན་པས་འཇིགས་ཤིང་སྐྲག་གོ་།མི་ཤེས་པར་ཤེས་སོ་སྙམ་དུ་འཛིན་པས་འཇིགས་ཤིང་སྐྲག་ གོ་།དགེ་སྦྱོང་གི་དྲི་མས་འཇིགས་ཤིང་སྐྲག་གོ་།གཅིག་ལ་གཅིག་གནོད་པར་སེམས་པས་འཇིགས་ཤིང་སྐྲག་གོ་།འདོད་པའི་ཁམས་དང ། གཟུགས་ཀྱི་ཁམས་དང ། གཟུགས་མེད་པའི་ཁམས་ཀྱིས་འཇིགས་ཤིང་སྐྲག་གོ་།སྲིད་པའི་འགྲོ་བ་ཐམས་ཅད་དུ་འཆི་འཕོ་བ་དང་ སྐྱེ་བས་འཇིགས་ཤིང་སྐྲག་གོ་།སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། ཡི་དགས་ཀྱི་ཡུལ་དུ་འགྲོ་བས་འཇིགས་ཤིང་སྐྲག་གོ་།མི་ཁོམ་པས་འཇིགས་ཤིང་སྐྲག་གོ་།མདོར་ན་མི་དགེ་བའི་ཆོས་ཐམས་ཅད་ཡིད་ལ་བྱེད་པས་འཇིགས་ཤིང་སྐྲག་སྟེ། བདག་ དེ་ལྟ་བུས་འཇིགས་ཤིང་སྐྲག་པ་དེ་དག་གིས་འཇིགས་ནས་དགོན་པར་འོངས་ཏེ། ཁྱིམ་ན་གནས་པ་དང ། འདུ་འཛི་ལ་གནས་པ་དང ། མི་འགྲུས་ཤིང་རྣལ་འབྱོར་ལ་མི་བརྩོན་པ་དང ། ཚུལ་བཞིན་མ་ཡིན་པའི་ཡིད་ལ་བྱེད་པས་གནས་པ་ནི་འདི་ལྟ་བུའི་འཇིགས་སྐྲག་པ་དེ་དག་ལས་ ཡོངས་སུ་ཐར་བར་མི་ནུས་ཏེ། གང་དག་འདས་པའི་དུས་ན་བྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་དགོན་པ་ལ་གནས་ནས་འཇིགས་པ་ཐམས་ཅད་ལས་རྣམ་པར་གྲོལ་ཏེ། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཇིགས་པ་ མེད་པ་ཐོབ་བོ། གང་དག་མ་འོངས་པའི་དུས་ན་འབྱུང་བའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཐམས་ཅད་ཀྱང་དགོན་པ་ལ་གནས་ནས་འཇིགས་པ་ཐམས་ཅད་ལས་རྣམ་པར་གྲོལ་ཏེ། འདི་ལྟ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཇིགས་པ་མེད་པ་ ཐོབ་པར་འགྱུར་རོ། །གང་དག་ད་ལྟར་བྱུང་བའི་དུས་ཀྱི་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ། དེ་དག་ཐམས་ཅད་ཀྱང་དགོན་པ་ལ་གནས་ནས་འཇིགས་པ་ཐམས་ཅད་ལས་རྣམ་པར་གྲོལ་ཏེ། འདི་ལྟ་སྟེ། བླ་ན་མེད་པ་ཡང
42-1-280b
དག་པར་རྫོགས་པའི་བྱང་ཆུབ་འཇིགས་པ་མེད་པ་ཐོབ་བོ། །དེ་བས་ན་བདག་ཀྱང་འདི་ལ་འཇིགས་ཤིང་སྐྲག་སྟེ། འཇིགས་པ་ཐམས་ཅད་ལས་ནི་ཤིན་ཏུ་འདའ་བར་འདོད། མི་འཇིགས་པ་ནི་རྗེས་སུ་ཐོབ་པར་འདོད་པས་དགོན་པ་ལ་གནས་པར་བྱའོ་སྙམ་དུ་ཡོངས་སུ་དཔྱད་པར་བྱའོ། ། ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་འཇིགས་ཤིང་སྐྲག་ནས་དགོན་པའི་གནས་ལ་གནས་པས་འདི་ལ་ཅུང་ཟད་འཇིགས་པ་སྐྱེས་པ་དེ་དག་ཐམས་ཅད་ནི་བདག་ཏུ་འཛིན་པ་ལས་སྐྱེས་སོ། །བདག་ཏུ་མངོན་པར་ཆགས་པ་དང ། བདག་ཏུ་ཡོངས་སུ་འཛིན་པ་དང ། བདག་ གི་གཞི་དང ། བདག་སྲེད་པ་དང ། བདག་འདུ་ཤེས་པ་དང ། བདག་ཏུ་སྨྲ་བ་ཉེ་བར་ལེན་པ་དང ། བདག་ཏུ་ལྟ་བ་དང ། བདག་གི་གནས་དང ། བདག་ཏུ་ཡོངས་སུ་རྟོག་པ་དང ། བདག་བསྲུང་བ་ལས་སྐྱེས་ཏེ། གལ་ཏེ་བདག་དགོན་པ་ལ་གནས་ལ་བདག་ཏུ་འཛིན་པ་ཡོངས་སུ་མ་ སྤངས། བདག་ཏུ་མངོན་པར་ཆགས་པ་དང ། བདག་ཏུ་ཡོངས་སུ་འཛིན་པ་དང ། བདག་གི་གཞི་དང ། བདག་ལ་སྲེད་པ་དང ། བདག་ཏུ་འདུ་ཤེས་པ་དང ། བདག་ཏུ་སྨྲ་བ་ཉེ་བར་ལེན་པ་དང ། བདག་ཏུ་ལྟ་བ་དང ། བདག་གི་གནས་དང ། བདག་ཏུ་ཡོངས་སུ་རྟོག་པ་དང ། བདག་ སྲུང་བ་ཡོངས་སུ་མ་སྤངས་ན་ནི་བདག་དགོན་པ་ལ་གནས་པ་དོན་མེད་པར་འགྱུར་རོ་སྙམ་དུ་བསླབ་པར་བྱ་སྟེ། བདག་ཏུ་འདུ་ཤེས་པ་ལ་ནི་དགོན་པ་ལ་གནས་པ་མེད་དོ། །གཞན་དུ་འདུ་ཤེས་པ་ལ་ཡང་མེད་དོ། །ངར་འཛིན་པ་དང ། ང་ཡིར་འཛིན་པ་ལ་མངོན་པར་ཞེན་པ་ལ་ནི་དགོན་པ་ལ་གནས་ པ་མེད་དོ། །དམིགས་པར་ལྟ་བ་ལ་ནི་དགོན་པ་ལ་གནས་པ་མེད་དོ། །ཕྱིན་ཅི་ལོག་ཏུ་ལྟ་བ་ལ་ནི་དགོན་པ་ལ་གནས་པ་མེད་དོ། །ཁྱིམ་བདག་མྱ་ངན་ལས་འདས་པར་འདུ་ཤེས་པ་ལ་ཡང་དགོན་པ་ལ་གནས་པ་མེད་ན་ཉོན་མོངས་པ་ཐམས་ཅད་ཀྱི་འདུ་ཤེས་ཅན་ལ་ལྟ་ཅི་སྨོས། ཁྱིམ་ བདག་དགོན་པ་ལ་གནས་པ་ཞེས་བྱ་བ་ནི་ཆོས་ཐམས་ཅད་ལ་མི་རྟེན་པར་གནས་པའོ། །ཆོས་ཐམས་ཅད་ལ་མི་འཛིན་པར་གནས་པའོ། །མཚན་མ་ཐམས་ཅད་ལ་མི་ཆགས་པར་གནས་པའོ། །གཟུགས་ཐམས་ཅད་ལ་མི་རྟེན་པར་གནས་པའོ། །སྒྲ་དང ། དྲི་དང ། རོ་དང་།
42-1-281a
རེག་བྱ་ཐམས་ཅད་ལ་མི་རྟེན་པར་གནས་པའོ། །ཆོས་ཐམས་ཅད་མཉམ་པ་ཉིད་དང་མི་འགལ་བར་གནས་པའོ། །སེམས་ཤིན་ཏུ་ཞི་བས་ཤིན་ཏུ་སྦྱངས་པར་གནས་པའོ། །འཇིགས་པ་ཐམས་ཅད་སྤངས་པས་མི་འཇིགས་པར་གནས་པའོ། །ཉོན་ མོངས་པ་ཐམས་ཅད་ལས་རྣམ་པར་གྲོལ་བས་ཆུ་བོ་ལས་རྒལ་བར་གནས་པའོ། །བརྟན་པར་གནས་པའོ། ངན་ངོན་གྱིས་ཆོག་ཤེས་པར་འཛིན་ཅིང་འདོད་པ་ཆུང་བས་འཕགས་པའི་རིགས་རྣམས་ལ་རབ་ཏུ་དགའ་བར་གནས་པའོ། །དགང་སླ་ཞིང་གསོ་སླ་བས་ཆོག་པར་འཛིན་པར་གནས་ པའོ། །ཤེས་རབ་ཀྱི་ཕྱིར་ཚུལ་བཞིན་ལ་སྦྱོར་བས་ཐོས་པ་ལ་གནས་པའོ། །རྣམ་པར་ཐར་པའི་སྒོ་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ལ་སོ་སོར་རྟོག་པས་ཐར་པ་གནས་པའོ། བཅིངས་པ་བཅད་པས་རྣམ་པར་གྲོལ་བར་གནས་པའོ། །རྟེན་ཅིང་འབྲེལ་བར་འབྱུང་ བ་དང་འཐུན་པས་མ་དུལ་བ་རྣམས་ཉེ་བར་ཞི་བར་གནས་པའོ། །ཤིན་ཏུ་རྣམ་པར་དག་པས་བྱ་བ་བྱས་པར་གནས་པའོ། །ཁྱིམ་བདག་འདི་ལྟ་སྟེ་དཔེར་ན་དགོན་པ་ལ་རྩཝ་དང ། ཤིང་གེལ་པ་དང ། ནགས་ཚལ་གནས་ཀྱང་འཇིགས་པ་མེད་ཅིང་སྐྲག་པར་མི་འགྱུར་རོ། །ཁྱིམ་བདག་དེ་བཞིན་དུ་བྱང་ ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་ཀྱང་ལུས་ལ་རྩཝ་དང ། ཤིང་གེལ་པ་དང ། སྨན་དང ། རྩིག་པ་དང ། ཤིང་དང ། མིག་ཡོར་ལྟ་བུ་དང ། སྒྱུ་མ་དང་མཚུངས་པའི་འདུ་ཤེས་བསྐྱེད་པར་བྱ་སྟེ། འདི་ལ་སུ་ཞིག་འཇིགས་པར་འགྱུར། འདི་ལ་སུ་ཞིག་སྐྲག་པར་འགྱུར་སྙམ་པའི་ སེམས་བསྐྱེད་པར་བྱའོ། །དེ་འཇིགས་ཤིང་སྐྲག་པ་ལྟ་ན། འདི་ལྟར་ལུས་འདི་ལ་ནི་བདག་གམ། སེམས་ཅན་ནམ། སྲོག་གམ། སྐྱེ་བ་པོའམ། གསོ་བའམ། སྐྱེས་བུ་འམ། གང་ཟག་གམ། ཤེད་ལས་སྐྱེས་སམ། ཤེད་བུ་མེད་དེ། འདི་ལྟར་འཇིགས་པ་ཞེས་བྱ་བ་འདི་ནི་ཡང་དག་ པ་མ་ཡིན་པ་ཀུན་བརྟགས་པ་ཡིན་གྱིས་བདག་གིས་ནི་ཡང་དག་པ་མ་ཡིན་པ་ཀུན་བརྟགས་པར་དེ་ལ་བརྟག་པར་མི་བྱའོ་སྙམ་དུ་ལུས་ལ་ཚུལ་བཞིན་བརྟག་པར་བྱའོ། །དེས་ཇི་ལྟར་དགོན་པ་ལ་རྩཝ་དང ། ཤིང་གེལ་པ་དང ། སྨན་དང ། ནགས་ཚལ་གནས་པ་རྣམས་ངའི་བ་མེད་པ། ཡོངས་སུ
42-1-281b
འཛིན་པ་མེད་པ་དེ་བཞིན་དུ་བྱང་ཆུབ་སེམས་དཔའ་ཡང་ངའི་བ་མེད་པ། ཡོངས་སུ་འཛིན་པ་མེད་པས་ཆོས་ཐམས་ཅད་དགོན་པ་ཉིད་དོ་སྙམ་དུ་ཤེས་ནས་ཉེ་བར་བསྒྲུབས་ཏེ་གནས་པར་བྱའོ། །དེ་ཅིའི་ཕྱིར་ཞེ་ན། དགོན་པ་ལ་གནས་པ་ནི་ཉོན་མོངས་པ་གཅོད་པ་སྟེ། ངའི་བ་མེད་པ། ཡོངས་སུ་ འཛིན་པ་མེད་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པས་འདི་ལ་དགོན་པ་ལ་གནས་པ་ནི་ཚུལ་ཁྲིམས་ཀྱི་ཕུང་པོ་དང་འཐུན་པའོ། །དགོན་པ་ལ་གནས་པ་ནི་ཏིང་ངེ་འཛིན་གྱི་ཕུང་པོ་ལ་གཞོལ་བའོ། །དགོན་པ་ལ་གནས་པ་ནི་ཤེས་རབ་ཀྱི་ ཕུང་པོ་ཚོགས་པའོ། །དགོན་པ་ལ་གནས་པ་ནི་རྣམ་པར་གྲོལ་བའི་ཕུང་པོ་འགྲུབ་པའོ། །དགོན་པ་ལ་གནས་པ་ནི་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་སྐྱེ་བའོ། །དགོན་པ་ལ་གནས་པ་ནི་བྱང་ཆུབ་ཀྱི་ཕྱོགས་ཀྱི་ཆོས་རྣམས་རབ་ཏུ་སྟེན་པའོ། །དགོན་པ་ལ་གནས་པ་ནི་སྦྱངས་པའི་ ཡོན་ཏན་བཅུ་གཉིས་པོ་དག་སྡུད་པའོ། །དགོན་པ་ལ་གནས་པ་ནི་བདེན་པ་རྣམས་རྟོགས་པའོ། །དགོན་པ་ལ་གནས་པ་ནི་ཕུང་པོ་རྣམས་ཡོངས་སུ་ཤེས་པའོ། །དགོན་པ་ལ་གནས་པ་ནི་ཁམས་རྣམས་ཆོས་ཀྱི་དབྱིངས་དང་མཉམ་པར་འཇལ་བའོ། །དགོན་པ་ལ་གནས་པ་ ནི་སྐྱེ་མཆེད་རྣམས་སེལ་བའོ། །དགོན་པ་ལ་གནས་པ་ནི་བྱང་ཆུབ་ཀྱི་སེམས་མི་བརྗེད་པའོ། །དགོན་པ་ལ་གནས་པ་ནི་སྟོང་པ་ཉིད་ལ་སོ་སོར་རྟོག་པས་སྐྲག་པ་མེད་པའོ། །དགོན་པ་ལ་གནས་པ་ནི་ཆོས་ཀུན་ཏུ་འཛིན་པའོ། །དགོན་པ་ལ་གནས་པ་ནི་དགེ་བའི་རྩ་བ་ཐམས་ཅད་ ཆུད་མི་གཟོན་པའོ། །དགོན་པ་ལ་གནས་པ་ནི་སངས་རྒྱས་རྣམས་ཀྱིས་བསྔགས་པའོ། །དགོན་པ་ལ་གནས་པ་ནི་བྱང་ཆུབ་སེམས་དཔའ་རྣམས་ཀྱིས་བསྟོད་པའོ། །དགོན་པ་ལ་གནས་པ་ནི་འཕགས་པ་རྣམས་ཀྱིས་བཀུར་བའོ། །དགོན་པ་ལ་གནས་པ་ནི་ཐར་པ་འདོད་པ་ རྣམས་ཀྱིས་བསྟེན་པའོ། །དགོན་པ་ལ་གནས་པ་ནི་ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པར་བྱ་བའི་ཕྱིར་བསྙེན་པའོ་སྙམ་དུ་བསླབ་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ནི་ཚེགས་ཆུང་ངུས་ཕ་རོལ་ཏུ་ཕྱིན་པ་དྲུག་བསྒོམ་པ
42-1-282a
ཡོངས་སུ་རྫོགས་པར་འགྱུར་རོ། །དེ་ཅིའི་ཕྱིར་ཞེ་ན། གང་དགོན་པ་ལ་གནས་པའི་བྱང་ཆུབ་སེམས་དཔའ་ནི་ལུས་དང་སྲོག་ལ་ཡང་མི་ལྟ་བ་ཡིན་ཏེ། དེ་ལྟར་དགོན་པ་ལ་གནས་པ་དེའི་སྦྱིན་པའི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་ བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་གང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ནི་སྦྱངས་པའི་ཡོན་ཏན་དང ། ཡོ་བྱད་བསྙུངས་པ་ལ་རབ་ཏུ་ གནས་ནས་སྡོམ་པ་གསུམ་གྱིས་ཡང་དག་པ་སྒྲུབ་སྟེ། དེ་ལྟར་དགོན་པ་ལ་གནས་པ་དེའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པའི་བཟོད་པའི་ཕ་རོལ་ཏུ་ཕྱིན་པ་བསྒོམ་པ་ ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་གང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ནི་སེམས་ལ་གནོད་སེམས་མེད་ཅིང་སེམས་ཅན་ཐམས་ཅད་ལ་བྱམས་པར་བྱེད། དེ་ཐམས་ཅད་མཁྱེན་པ་ཉིད་ལ་ཡང་བཟོད་པ་ཡིན་ཏེ། དེ་ལྟར་དགོན་པ་ལ་གནས་པ་དེའི་བཟོད་ པའི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་ ནི་མི་སྐྱེ་བ་ལ་བཟོད་པ་རབ་ཏུ་ཐོབ་པར་བྱ་བའི་ཕྱིར་བདག་དགོན་པ་འདི་ལས་ལྡོག་པར་མི་བྱའོ་སྙམ་དུ་སློབ་སྟེ། དེ་ལྟར་དགོན་པ་ལ་གནས་པ་དེའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་ དགོན་པ་ལ་གནས་པའི་བསམ་གཏན་གྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་གང་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ནི་བསམ་གཏན་གྱི་ཕ་རོལ་ཏུ་ཕྱིན་པ་རབ་ཏུ་འཐོབ་སྟེ། སེམས་ཅན་ཡོངས་སུ་སྨིན་པར་བྱེད་པ
42-1-282b
ཡང་ཡལ་བར་མི་འདོར་ལ། འདི་ལྟར་དགེ་བའི་རྩ་བ་ཡང་སོགས་པར་འདོད་པ་ཡིན་ཏེ། དེ་ལྟར་དགོན་པ་ལ་གནས་པ་དེའི་བསམ་གཏན་གྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་ གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་ཞེ་ན། ཁྱིམ་བདག་གང་བྱང་ཆུབ་སེམས་དཔའ་རབ་ཏུ་བྱུང་བ་ནི་འདི་ལ་ལུས་ཇི་ལྟ་བ་དགོན་པ་ཡང་དེ་བཞིན་ནོ། །ལུས་ཇི་ལྟ་བ་བྱང་ཆུབ་ཀྱང་དེ་བཞིན་ནོ་སྙམ་དུ་སློབ་ཅིང་དེ་བཞིན་ཉིད་ཀྱིས་མི་རྟོག་རྣམ་ པར་མི་རྟོག་སྟེ། དེ་ལྟར་དགོན་པ་ལ་གནས་པ་དེའི་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་ཡོངས་སུ་རྫོགས་པར་འགྱུར་རོ། །ཁྱིམ་བདག་དེ་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་དགོན་པ་ལ་གནས་པ་ཚེགས་ཆུང་ངུས་ཕ་རོལ་ཏུ་ཕྱིན་པ་དྲུག་བསྒོམ་པ་ཡོངས་སུ་རྫོགས་ པར་འགྱུར་རོ། །ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བ་ཆོས་བཞི་དང་ལྡན་ན་དགོན་པ་ལ་གནས་པར་གནང་བ་ཡིན་ནོ། །བཞི་གང་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་མང་དུ་ཐོས་པ་ཡིན་ཏེ། ཐོས་པ་འཛིན་པ། ཆོས་རྣམ་པར་ངེས་པ་ལ་ མཁས་པ། ཚུལ་བཞིན་ཡིད་ལ་བྱེད་པ་ལ་བརྩོན་ཞིང ། ཆོས་དང་ཆོས་ཀྱི་རྗེས་སུ་འཐུན་པ་སྒྲུབ་པ་དེས་དགོན་པ་ལ་གནས་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ཉོན་མོངས་པའི་ཤས་ཆེ་ན་དེས་ཉོན་མོངས་པ་རྣམས་ཞི་བར་བྱ་བའི་ཕྱིར་འགྲོགས་པ་ མེད་པར་དགོན་པ་ལ་གནས་པར་བྱ་སྟེ། དེས་ཉོན་མོངས་པ་ཚར་གཅད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ནི་མངོན་པར་ཤེས་པ་ལྔ་པོ་དག་ཐོབ་པ་ཡིན་ཏེ། དེས་ལྷ་དང ། ཀླུ་དང ། གནོད་སྦྱིན་དང ། དྲི་ཟ་རྣམས་ཡོངས་སུ་སྨིན་པར་བྱ་བའི་ཕྱིར་དགོན་ པ་ལ་གནས་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བས་སངས་རྒྱས་ཀྱིས་དགོན་པ་ལ་གནང་བར་བཀའ་སྩལ་བར་ཤེས་ནས་དགོན་པ་ལ་གནས་པར་བྱ་སྟེ། དེར་དགེ་བའི་ཆོས་ཐམས་ཅད་ཡོངས་སུ་རྫོགས་པར་འགྱུར་རོ། །དགེ་བའི་རྩ་བས་ཉེ་བར
42-1-283a
བརྟན་ནས་ཕྱིར་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། ཕོ་བྲང་འཁོར་དག་ཏུ་ཞུགས་ཏེ་ཆོས་བསྟན་པར་བྱའོ། །ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བ་ཆོས་བཞི་པོ་དེ་དག་དང་ལྡན་ན་དགོན་པ་ལ་ གནས་པར་གནང་ངོ ། །ཁྱིམ་བདག་གལ་ཏེ་བྱང་ཆུབ་སེམས་དཔའ་རབ་ཏུ་བྱུང་བ་ལུང་དང་ཁ་ཏོན་མནོད་པའི་ཕྱིར་ཚོགས་ཀྱི་ནང་དུ་འཇུག་ན་ཡང་དེས་དེར་གུས་པ་དང་བཅས་པར་བྱ་སྟེ། སློབ་དཔོན་དང ། མཁན་པོ་རྣམས་དང ། གནས་བརྟན་དང ། བར་མ་དང ། དགེ་སློང་གསར་བུ་རྣམས་ལ་ཞེ་ས་དང་བཅས་པར་བྱ། ཚུལ་མཁས་པར་བྱའོ། །སྙོམ་ལས་མེད་པར་རང་གིས་བྱ་བ་དང ། གཞན་ལ་གདུང་བ་མེད་པར་བྱའོ། །དེས་བསྙེན་བཀུར་ལ་གདུ་བར་མི་བྱའོ། །དེས་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ པའི་སངས་རྒྱས་ལྷ་དང་བཅས་པའི་འཇིག་རྟེན་དང ། བདུད་དང་བཅས་པ་དང་།ཚངས་པ་དང་བཅས་པ་དང ། དགེ་སྦྱོང་དང ། བྲམ་ཟེའི་སྐྱེ་དགུ་དང་བཅས་པ་དང ། ལྷ་དང ། མི་དང ། ལྷ་མ་ཡིན་དུ་བཅས་པས་མཆོད་པ་སྦྱིན་གནས་སུ་གྱུར་པ་དེ་ཡང་སེམས་ཅན་ཐམས་ཅད་ ལ་གང་ལས་ཀྱང་རིམ་གྲོར་བྱ་བ་བདག་གིར་མི་མཛད་ན། བདག་ཅག་མ་བསླབས་པ་སློབ་འདོད་པ་རྣམས་ལྟ་ཅི་སྨོས་ཏེ། བདག་གིས་ནི་སེམས་ཅན་ཐམས་ཅད་ལ་བསྙེན་བཀུར་བྱའི། གང་ལས་ཀྱང་བསྙེན་བཀུར་བྱ་བ་བདག་གིར་མི་བྱའོ་སྙམ་དུ་བརྟག་པར་བྱའོ། །དེ་ཅིའི་ཕྱིར་ཞེ་ན། ཁྱིམ་ བདག་དགེ་སློང་བསྙེན་བཀུར་ལ་གདུ་བ་ནི་ཡོན་ཏན་གྱི་ཆོས་རྗེས་སུ་བཟུང་བ་ཆུད་གཟོན་པ་ཡིན་ཏེ། དེས་གང་དག་སྡུད་པ་དེ་དག་ཀྱང་འདི་སྙམ་དུ་སེམས་ཏེ། བདག་ཅག་ནི་བསྙེན་བཀུར་གྱི་ཕྱིར་སྡུད་ཀྱི། ཆོས་ཀྱི་ཕྱིར་ནི་མ་ཡིན་ནོ་སྙམ་སྟེ། དེ་བདག་ཉིད་ཀྱི་དད་པ་ཆུད་གསོན་ཏོ། །གང་ དག་དེ་ལ་བསྙེན་བཀུར་བྱེད་པ་འཇིག་རྟེན་གྱི་ཟང་ཟིང་དང་ལྡན་པ་དེ་དག་གི་ཡང་དོན་ཆེན་པོར་མི་འགྱུར་རོ། །འབྲས་བུ་ཆེན་པོར་མི་འགྱུར་རོ། །དེ་སློབ་དཔོན་དང ། མཁན་པོའི་གན་དུ་འགྲོ་ན་ཡང་སློབ་དཔོན་དང ། མཁན་པོས་མ་དད་པའི་བག་གང་ཡང་རུང་བ་ཞིག་ལས་བརྟགས་ནས
42-1-283b
བདག་ལ་ལུང་འབོག་པ་དང ། ཁ་ཏོན་བྱ་བ་དང ། རྗེས་སུ་བསྟན་པས་ཕན་འདོགས་པར་མི་འགྱུར་དུ་འོང་ཞེས་ལུས་དང་སེམས་ལས་སུ་རུང་བ་དང ། སེམས་ཅང་ཤེས་པས་འགྲོ་བར་བྱའོ། །དེ་ལུང་མནོད་པ་དང ། ཁ་ཏོན་གྱི་ཕྱིར་ལུས་དང་སྲོག་ལ་ཡང་མི་བལྟ་བར་བྱའོ། །ཆོས་ འདོད་པས་སློབ་དཔོན་དང ། མཁན་པོ་རྣམས་ཀྱི་བསམ་པ་ཡོངས་སུ་རྫོགས་པར་བྱའོ། །ཡོན་ཏན་དོན་དུ་གཉེར་བས་རྙེད་པ་དང ། བཀུར་སྟི་དང ། ཚིགས་སུ་བཅད་པ་ཐམས་ཅད་དོན་དུ་མི་གཉེར་བར་བྱའོ། །ཁྱིམ་བདག་གལ་ཏེ་བྱང་ཆུབ་སེམས་དཔའ་ལུང་མནོད་པ་དང ། ཁ་ཏོན་དུ་བྱ་བ་དོན་དུ་གཉེར་བས་གཞན་དག་ལས་ཚིག་བཞི་པའི་ཚིགས་སུ་བཅད་པ་ཙམ་འམ། སྦྱིན་པ་དང ། ཚུལ་ཁྲིམས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་དང་ལྡན་པའམ། བྱང་ཆུབ་སེམས་དཔའི་ལམ་གྱི་ཚོགས་སོགས་ པ་དང་ལྡན་པའི་ཚིག་བཞི་པའི་ཚིགས་སུ་བཅད་པ་སུ་ལས་མཉན་ཏམ། ལུང་མནོས་སམ། བཟུང་ན་དེས་སློབ་དཔོན་དེ་ལ་ཆོས་ཀྱི་ཕྱིར་གུས་པར་བྱའོ། །མིང་དང ། ཚིག་དང ། ཡི་གེ་ཇི་སྙེད་ཀྱིས་ཚིགས་སུ་བཅད་པ་བསྟན་པ་དེ་སྙེད་ཀྱི་བསྐལ་པར་གལ་ཏེ་སློབ་དཔོན་ དེ་ལ་གཡོ་མེད་པས་བསྙེན་བཀུར་དང ། གཡོག་བྱས་ཤིང་རྙེད་པ་དང ། བཀུར་སྟི་ཐམས་ཅད་ཀྱིས་མཆོད་པ་བྱས་སུ་ཟིན་ཀྱང ། ཁྱིམ་བདག་ད་དུང་དུ་དེས་སློབ་དཔོན་ལ་སློབ་དཔོན་དུ་རི་མོ་བྱ་བ་རྫོགས་པར་མི་འགྱུར་ན་ཆོས་མ་ཡིན་པའི་གུས་པས་ལྟ་ཅི་སྨོས། ཁྱིམ་ བདག་དད་པས་མཉན་ཅིང་བསྒོམ་པ་དང ། ཁ་ཏོན་ལ་འཇུག་པ་དེའི་སེམས་དང ། སེམས་ལས་བྱུང་བ་དགེ་བ་དང་ལྡན་པའམ། སངས་རྒྱས་དང་ལྡན་པའམ། ཆོས་དང་ལྡན་པའམ། དགེ་འདུན་དང་ལྡན་པའམ། སྐྱོ་ཞིང་འདོད་ཆགས་དང་བྲལ་བ་དང་ལྡན་པའམ། བྱང་བ་དང ། དུལ་བ་དང ། ཞི་བ་དང་ལྡན་པའི་འཇུག་པ་ཇི་སྙེད་པ་གལ་ཏེ་དེ་སྙེད་ཀྱི་བསྐལ་པར་སློབ་དཔོན་ལ་བསྙེན་བཀུར་བྱས་སུ་ཟིན་ཀྱང ། ཁྱིམ་བདག་ད་དུང་དུ་སློབ་དཔོན་ལ་སློབ་དཔོན་དུ་རི་མོ་བྱ་བ་རྫོགས་པ་མ་ཡིན་ནོ། །ཁྱིམ་བདག་རྣམ་གྲངས་འདིས་ཀྱང་ཇི
42-1-284a
ལྟར་རྣམ་པར་སྨིན་པའི་ཆོས་ཚད་མེད་ཅིང་ཡེ་ཤེས་ཁོང་དུ་ཆུད་པ་ཚད་མེད་པ་དེ་ལྟར་རིག་པར་བྱའོ། །ཁྱིམ་བདག་དེ་ལྟ་བས་ན་རྣམ་པར་སྨིན་པའི་ཆོས་ཚད་མེད་པ་དང ། ཡེ་ཤེས་ཁོང་དུ་ཆུད་པ་ཚད་མེད་པ་དྲིས་པས་བདག་གི་སློབ་དཔོན་ ཡང་ཚད་མེད་དོ་སྙམ་ནས་བྱང་ཆུབ་སེམས་དཔའ་ཆོས་ལ་རི་མོ་ཚད་མེད་པར་བྱའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བས། རབ་ཏུ་བྱུང་བའི་སྒྲུབ་པ་ལ་གནས་པར་བྱའོ། །ཁྱིམ་བདག་ཇི་ལྟར་ན་བྱང་ཆུབ་སེམས་དཔའ་རབ་ཏུ་བྱུང་བ་རབ་ཏུ་ བྱུང་བའི་སྒྲུབ་པ་ལ་གནས་པ་ཡིན་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་རབ་ཏུ་བྱུང་བ་ཚུལ་ཁྲིམས་ཡོངས་སུ་དག་པ་ཐོས་ན་དེ་ལ་སློབ་སྟེ། བཞི་པོ་འདི་དག་ནི་ཚུལ་ཁྲིམས་ཡོངས་སུ་དག་པའོ། །བཞི་གང་ཞེ་ན། འཕགས་པའི་རིགས་རྣམས་ལ་གནས་པ་དང ། སྦྱངས་པའི་ཡོན་ཏན་དང་ཡོ་བྱད་བསྙུངས་པ་ལ་མངོན་པར་དགའ་བ་དང ། ཁྱིམ་ན་གནས་པ་དང ། རབ་ཏུ་བྱུང་བ་རྣམས་དང་མི་འདྲེ་བ་དང ། ཚུལ་འཆོས་པ་མེད་པར་དགོན་པ་ལ་གནས་པ་སྟེ། བཞི་པོ་དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། ལུས་བསྡམས་པས་ལུས་མི་དམིགས་པ་དང ། ངག་བསྡམས་པས་ངག་མི་དམིགས་པ་དང ། ཡིད་བསྡམས་པས་ཡིད་མི་དམིགས་པ་དང ། ལྟ་བ་དང་བྲལ་བས་ཐམས་ཅད་མཁྱེན་པར་སེམས་བསྐྱེད་པ་སྟེ། བཞི་པོ་ དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། ངར་འཛིན་པ་སྤངས་པ་དང ། ང་ཡིར་འཛིན་པ་བོར་བ་དང ། ཆད་པ་དང ། རྟག་པ་དང་བྲལ་བ་དང ། རྟེན་པའི་ཆོས་ལ་འཇུག་པ་སྟེ། བཞི་པོ་ དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། ཕུང་པོ་རྣམས་ལ་འབྱུང་བ་དང་འཇིག་པར་རྟོག་པ་དང ། ཁམས་རྣམས་ལ་ཆོས་ཀྱི་དབྱིངས་སུ་ཡོངས་སུ་འཇལ་བ་དང ། སྐྱེ
42-1-284b
མཆེད་རྣམས་ལ་གྲོང་སྟོང་པར་འདུ་ཤེས་པ་དང ། ཐ་སྙད་བཏགས་པ་རྣམས་ལ་མངོན་པར་མ་ཞེན་པ་སྟེ། བཞི་པོ་དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། བདག་ ལ་བདག་མེད་པར་འདུ་ཤེས་པས་བདག་ལ་མི་སྟོད་པ་དང ། གཞན་མི་དམིགས་པས་གཞན་ལ་མི་སྨོད་པ་དང་།སེམས་ཤིན་ཏུ་སྦྱངས་པས་རློམ་སེམས་མེད་པ་དང ། ཆོས་ཐམས་ཅད་མཉམ་པ་ཉིད་པས་གཡོ་བ་མེད་པ་སྟེ། བཞི་པོ་དེ་དག་ནི་ཚུལ་ཁྲིམས་ ཡོངས་སུ་དག་པའོ། །ཁྱིམ་བདག་གཞན་ཡང་ཚུལ་ཁྲིམས་ཡོངས་སུ་དག་པ་བཞི་སྟེ། བཞི་གང་ཞེ་ན། སྟོང་པ་ཉིད་ལ་མོས་པ་དང ། མཚན་མ་མེད་པས་མི་སྐྲག་པ་དང ། སེམས་ཅན་ཐམས་ཅད་ལ་ཆེར་སྙིང་རྗེ་བ་དང ། བདག་མེད་པ་ལ་བཟོད་པ་སྟེ། བཞི་པོ་དེ་དག་ནི་ཚུལ་ཁྲིམས་ཡོངས་སུ་དག་པའོ། །ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ཏིང་ངེ་འཛིན་ཡོངས་སུ་དག་པ་ཐོས་ན་དེ་ལ་སློབ་སྟེ། ཏིང་ངེ་འཛིན་ཡོངས་སུ་དག་པ་གང་ཞེ་ན། གང་ཆོས་ཐམས་ཅད་ལ་རྩོལ་བ་མེད་པ་ དང ། ཆོས་ཐམས་ཅད་མཉམ་པ་ཉིད་པས་གཉིས་སུ་དབྱེར་མེད་པ་དང ། སེམས་ལས་སུ་རུང་བ་དང ། སེམས་རྩེ་གཅིག་པ་དང ། སེམས་ངེས་པར་བྱུང་བ་དང ། སེམས་མི་འཕྲོ་བ་དང ། སེམས་ཀུན་ཏུ་མི་རྒྱུག་པ་དང ། སེམས་མི་གནས་པ་དང ། སེམས་ངེས་པར་སེམས་པར་བྱིན་གྱིས་རློབ་པ་དང ། སེམས་ལ་དབང་སྒྱུར་བ་དང ། སེམས་འདོད་པའི་ཡོན་ཏན་རྣམས་ལ་མི་ཆགས་པ་དང ། སེམས་ཆོས་ལ་སྒྱུ་མར་སོ་སོར་རྟོག་པ་དང ། ཇི་ལྟར་ཆོས་ཀྱི་དབྱིངས་མངོན་པར་འདུ་མི་བྱེད་པ་དང ། ཇི་ལྟར་མི་སྐྱེ་ མི་འབྱུང་ཞིང་མཉམ་པ་ཉིད་པ་དེ་ལྟར་ཁྱིམ་བདག་བྱང་ཆུབ་སེམས་དཔའ་རབ་ཏུ་བྱུང་བ་ཏིང་ངེ་འཛིན་ཡོངས་སུ་དག་པ་ལ་སོ་སོར་རྟོག་གོ་།ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཐོས་ན་དེ་ལ་སློབ་སྟེ།
42-1-285a
ཤེས་རབ་ཡོངས་སུ་དག་པ་དེ་གང་ཞེ་ན། དེ་འདི་ལྟར་སོ་སོར་རྟོག་སྟེ། ཆོས་ཐམས་ཅད་མངོན་སུམ་དུ་ཤེས་པ་དང ། ཚིག་རབ་ཏུ་དབྱེ་བ་ཤེས་པ་དང ། སོ་སོ་ཡང་དག་པར་རིག་པ་འཇུག་པ་ཤེས་པ་དང ། སེམས་ཅན་གཞན་དག་ལ་ཆོས་གོ་ བར་བྱེད་པ་ཤེས་པ་སྟེ། ཁྱིམ་བདག་དེ་ལྟར་བྱང་ཆུབ་སེམས་དཔའ་རབ་ཏུ་བྱུང་བ་ཤེས་རབ་ཡོངས་སུ་དག་པ་ལ་སོ་སོར་རྟོག་གོ་།ཁྱིམ་བདག་གཞན་ཡང་བྱང་ཆུབ་སེམས་དཔའ་རབ་ཏུ་བྱུང་བ་འདི་ལ་ཤེས་རབ་འདི་ནི་ལུས་མེད་པས་ཐོགས་པ་མེད་པའི་མཚན་ཉིད་དོ། ། རྒྱུ་བ་མེད་པས་གཟུང་བ་མེད་པའི་མཚན་ཉིད་དོ། །སྐྱེ་བ་མེད་པས་གནས་པ་མེད་པའི་མཚན་ཉིད་དོ། །ནམ་མཁའ་ལྟར་ངོ་བོ་ཉིད་མེད་པས་མངོན་པར་འདུ་མི་བྱེད་པའི་མཚན་ཉིད་དོ་སྙམ་དུ་རབ་ཏུ་སློབ་བོ། །ཁྱིམ་བདག་དེ་ལྟར་ན་གང་འདི་ལྟར་ཆོས་ལ་སོ་སོར་རྟོག་པ་འདི་ ནི་བྱང་ཆུབ་སེམས་དཔའ་རབ་ཏུ་བྱུང་བའི་སྒྲུབ་པའོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་བརྒྱ་སྟོང་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །ཁྱིམ་བདག་དེ་དག་ཐམས་ཅད་ལས་ཕལ་ཆེར་ ནི་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །སྲོག་ཆགས་སུམ་ཁྲི་ཉིས་སྟོང་ནི་ཆོས་རྣམས་ལ་ཆོས་ཀྱི་མིག་རྡུལ་དང་བྲལ་ཞིང་དྲི་མ་མེད་པ་རྣམ་པར་དག་གོ་།དེ་ནས་ཁྱིམ་བདག་དྲག་ཤུལ་ཅན་དགའ་ལ་ཡི་རངས་ཏེ། རབ་ཏུ་དགའ་ནས་མགུ་བ་དང་ཡིད་བདེ་བ་སྐྱེས་ཏེ། བརྒྱ་ སྟོང་རི་བའི་རས་བཅོས་བུའི་ཟུང་བཅོམ་ལྡན་འདས་ཀྱི་སྐུ་ལ་གསོལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་དགེ་བའི་རྩ་བ་འདི་སེམས་ཅན་རྣམས་ལ་སྩལ་ཏོ། །བདག་གི་དགེ་བའི་རྩ་བ་འདིས་བྱང་ཆུབ་སེམས་དཔའ་ཁྱིམ་པ་རྣམས་ཀྱི་བསླབ་པ་ཇི་ལྟར་ བཅས་པ་དེ་ལྟར་བྱང་ཆུབ་སེམས་དཔའ་ཁྱིམ་པ་གང་ལགས་པ་དེ་དག་གི་ཆོས་ཡོངས་སུ་རྫོགས་པར་གྱུར་ཅིག་།བཅོམ་ལྡན་འདས་ཀྱིས་ཇི་ལྟར་བྱང་ཆུབ་སེམས་དཔའ་རབ་ཏུ་བྱུང་བ་རྣམས་ཀྱི་བསླབ་པ་བཅས་པ་ཡང་དེ་ལྟར་བྱང་ཆུབ་སེམས་དཔའ་རབ་ཏུ་བྱུང་བ
42-1-285b
གང་དག་ལགས་པ་དེ་དག་གི་ཆོས་ཡོངས་སུ་རྫོགས་པར་གྱུར་ཅིག་།བཅོམ་ལྡན་འདས་ལ་ཡང་ཞུ་བར་འཚལ་ཏེ། བཅོམ་ལྡན་འདས་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ཆོས་དུ་ཞིག་དང་ལྡན་ན་རབ་ཏུ་བྱུང་བའི་བསླབ་པ་ལ་སློབ་པ་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་བཀའ་སྩལ་ཏོ། །ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ཆོས་ལྔ་དང་ལྡན་ན་རབ་ཏུ་བྱུང་བའི་བསླབ་པ་ལ་སློབ་པ་ཡིན་ཏེ། ལྔ་ གང་ཞེ་ན། ཁྱིམ་བདག་འདི་ལ་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་མི་ལྟ་བར་དངོས་པོ་ཐམས་ཅད་ཡོངས་སུ་གཏོང་བ་ཡིན་ཏེ། ཐམས་ཅད་མཁྱེན་པ་ཉིད་ཀྱི་ཡེ་ཤེས་དང་ལྡན་པས་རྣམ་པར་སྨིན་པ་ལ་རེ་བ་མེད་པ་དང ། ཁྱིམ་བདག་གཞན་ ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ཚངས་པར་སྤྱོད་ཅིང་གཙང་མ་ཡིན་ཏེ། ཡིད་ཀྱི་དགུ་ལ་ཡང་འདོད་པ་མི་སྐྱེད་ན་མཚན་གཉིས་སྤྲོད་པའམ། ཡན་ལག་མ་ཡིན་པར་འཇུག་པ་ལྟ་ཅི་སྨོས་པ་དང ། ཁྱིམ་བདག་གཞན་ཡང་བྱང་ཆུབ་ སེམས་དཔའ་ཁྱིམ་པ་ཁྱིམ་ན་གནས་པ་ཡང་དག་པ་སྐྱོན་མེད་པ་ལ་མི་རེག་ཅིང་ཁྱིམ་སྟོང་པར་ཞུགས་ནས་ཐབས་ཀྱིས་མངོན་པར་བསྒྲུབས་པ་བསམ་གཏན་བཞི་པོ་དག་ལ་སྙོམས་པར་འཇུག་པ་དང ། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ ན་གནས་པ་སེམས་ཅན་ཐམས་ཅད་བདེ་བར་བྱེད་པ་ལ་བརྩོན་པ་ཤེས་རབ་ཀྱི་ཕ་རོལ་ཏུ་ཕྱིན་པས་ངེས་པར་འབྱུང་བར་བརྩོན་འགྲུས་རྩོམ་པ་དང ། ཁྱིམ་བདག་གཞན་ཡང་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་དག་ཀྱང་དམ་པའི་ཆོས་ཡོངས་སུ་འཛིན་ ཅིང་གཞན་ཡང་ཡང་དག་པའི་ཆོས་ལ་སྦྱོར་བར་བྱེད་པ་སྟེ། ཁྱིམ་བདག་བྱང་ཆུབ་སེམས་དཔའ་ཁྱིམ་པ་ཁྱིམ་ན་གནས་པ་ཆོས་ལྔ་པོ་དེ་དག་དང་ལྡན་ན་རབ་ཏུ་བྱུང་བའི་བསླབ་པ་ལ་སློབ་པ་ཡིན་ནོ། །དེ་ནས་བཅོམ་ལྡན་འདས་ལ་ཁྱིམ་བདག་དྲག་ཤུལ་ཅན
42-1-286a
གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རྣམས་ཀྱི་བཀའ་བཞིན་དུ་བགྱི་བར་འཚལ་ལོ། །རབ་ཏུ་བྱུང་བའི་བསླབ་པ་ལ་བསླབ་བོ། །ཆོས་མཉམ་པ་ཉིད་འདི་ལྟ་བུ་ལ་ཡང་འཇུག་པར་བགྱིའོ། །དེ་ནས་ དེའི་ཚེ་བཅོམ་ལྡན་འདས་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་གང་གི་ཚེ་འཛུམ་པ་མཛད་པའི་ཆོས་ཉིད་དེ། དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་འཕྲོ་བ་ཁ་དོག་དུ་མ་ཁ་དོག་སྣ་ཚོགས་བྱུང་བ་འདི་ལྟ་སྟེ། སྔོན་པོ་དང ། སེར་ པོ་དང ། དམར་པོ་དང ། དཀར་པོ་དང ། ལེ་བརྒན་དང ། ཤེལ་དང ། དངུལ་གྱི་ཁ་དོག་ལྟ་བུ་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་རྣམས་སུ་འོད་ཀྱིས་སྣང་བས་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ ཏེ། སླར་ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སངས་རྒྱས་ཀྱི་མཐུས་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་ པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་མ་མཆིས་རྐྱེན་མ་མཆིས་པར་ནི་དེ་བཞིན་གཤེགས་པ་འཛུམ་པ་མི་མཛད་ན་འཛུམ་པ་ མཛད་པའི་རྒྱུ་གང་ལགས། རྐྱེན་གང་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་ཁྱིམ་བདག་དྲག་ཤུལ་ཅན་འདིས་དེ་བཞིན་གཤེགས་པ་ལ་ མཆོད་པ་བྱས་ཏེ་ཆོས་བསྒྲུབ་པའི་ཕྱིར་སེང་གེའི་སྒྲ་བསྒྲགས་པ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བདེ་བར་གཤེགས་པ་མཐོང་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱིམ་བདག
42-1-286b
དྲག་ཤུལ་ཅན་འདི་ནི་གང་དག་བསྐལ་པ་བཟང་པོ་འདི་ལ་འབྱུང་བའི་དེ་བཞིན་གཤེགས་པ་དེ་དག་ཐམས་ཅད་ལ་རིམ་གྲོ་བྱེད་པར་འགྱུར་རོ། །བསྟི་སྟང་དང ། མཆོད་པ་ཐམས་ཅད་ཀྱིས་མཆོད་པར་འགྱུར་རོ། །དམ་པའི་ཆོས་ཀྱང་འཛིན་པར་འགྱུར་རོ། ། རྟག་ཏུ་ཡང་ཁྱིམ་བདག་ཏུ་གྱུར་ནས་རབ་ཏུ་བྱུང་བའི་བསླབ་པ་ལ་གནས་སོ། །དེ་བཞིན་གཤེགས་པའི་བྱང་ཆུབ་དེ་ཡང་རྒྱས་པར་བྱེད་པར་འགྱུར་རོ། །དེ་ནས་ཚེ་དང་ལྡན་པ་ཀུན་དགའ་བོས་ཁྱིམ་བདག་དྲག་ཤུལ་ཅན་ལ་འདི་སྐད་ཅེས་སྨྲས་སོ། །ཁྱིམ་བདག་རྒྱུ་ གང་དང་རྐྱེན་གང་གིས་གང་ཁྱིམ་ན་གནས་ཤིང་རྡུལ་ལ་གནས་པ་ལ་དགའ་བར་བྱེད། དྲག་ཤུལ་ཅན་གྱིས་སྨྲས་པ། །བཙུན་པ་ཀུན་དགའ་བོ་རྡུལ་ལ་ནི་རྡུལ་ཅུང་ཟད་ཀྱང་མེད་དོ། །སྙིང་རྗེ་ཆེན་པོ་དང་ལྡན་པས་བདག་བདེ་བ་ལ་མི་རེ་བ་ཡིན་ནོ། །བཙུན་པ་ཀུན་ དགའ་བོ་བྱང་ཆུབ་སེམས་དཔའ་ནི་སྡུག་བསྔལ་ཐམས་ཅད་ཀྱིས་གཟིར་ཀྱང་བཟོད་དེ། སེམས་ཅན་རྣམས་ཡོངས་སུ་མི་གཏོང་ངོ ། །དེ་སྐད་ཅེས་སྨྲས་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་ དགའ་བོ་ཁྱིམ་བདག་དྲག་ཤུལ་ཅན་འདི་ཁྱིམ་གྱི་ས་ལ་གནས་ནས་བསྐལ་པ་བཟང་པོ་འདི་ལ་སེམས་ཅན་རབ་ཏུ་མང་པོ་ཡོངས་སུ་སྨིན་པར་བྱེད་པར་འགྱུར་ཏེ། རབ་ཏུ་བྱུང་བའི་བྱང་ཆུབ་སེམས་དཔས་ནི་བསྐལ་པ་སྟོང་ངམ། བསྐལ་པ་བརྒྱ་སྟོང་དུ་མར་ཡང་དེ་ ལྟར་མི་ནུས་སོ། །དེ་ཅིའི་ཕྱིར་ཞེ་ན། ཀུན་དགའ་བོ་འདི་ལྟར་ཁྱིམ་བདག་འདི་ལ་ཡོད་པའི་ཡོན་ཏན་རྣམས་ནི་རབ་ཏུ་བྱུང་བའི་བྱང་ཆུབ་སེམས་དཔའ་སྟོང་ལ་ཡང་མེད་དོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེའི་ཕྱིར་ཆོས་ཀྱི་རྣམ་གྲངས་འདི་དྲག་ཤུལ
42-1-287a
ཅན་གྱིས་ཞུས་པ་ཞེས་བྱ་བར་ཟུང་ཤིག་།ཁྱིམ་པ་དང་རབ་ཏུ་བྱུང་བའི་བསླབ་པ་སྒྲུབ་པ་ཞེས་བྱ་བར་ཡང་ཟུང་ཤིག་།ལྷག་པའི་བསམ་པས་བླ་མ་ལ་བསྙེན་བཀུར་བྱ་བའི་ལེའུ་ཞེས་བྱ་བར་ཡང་ཟུང་ཤིག་།ཀུན་དགའ་བོ་ ཆོས་ཀྱི་རྣམ་གྲངས་འདི་ཐོས་མ་ཐག་ཏུ་བྱང་ཆུབ་སེམས་དཔའི་ཡོན་ཏན་དང ། བརྩོན་འགྲུས་དང ། ཆོས་མང་པོ་རབ་ཏུ་འཐོབ་སྟེ། བརྩོན་འགྲུས་ཞན་པས་བསྐལ་པ་བརྒྱར་ཚངས་པར་སྤྱད་པ་ལ་གནས་པས་ནི་དེ་ལྟ་མ་ཡིན་ནོ། །ཀུན་དགའ་བོ་དེ་ བས་ན་བདག་ཀྱང་འདི་ལ་བརྩོན་འགྲུས་བསྐྱེད་པར་འདོད་པ་དང ། གཞན་ཡང་བརྩོན་འགྲུས་ལ་གཟུད་པར་འདོད་པ་དང ། བདག་ཀྱང་ཡོན་ཏན་གྱི་ཆོས་མཉམ་པ་ཉིད་ཐམས་ཅད་ལ་གནས་པར་འདོད་པ་དང ། གཞན་ཡང་ཡོན་ཏན་གྱི་ཆོས་མཉམ་ པ་ཉིད་ཐམས་ཅད་ལ་དགོད་པར་འདོད་པས་ཆོས་ཀྱི་རྣམ་གྲངས་འདི་མཉན་པར་བྱ། ཀུན་ཆུབ་པར་བྱ། བཀླག་པར་བྱ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་བསྟན་པར་བྱའོ། །ཀུན་དགའ་བོ་ངས་ཆོས་ཀྱི་རྣམ་གྲངས་འདི་ཡང་དང་ཡང་རྒྱ་ཆེར་ ཡང་དག་པར་རབ་ཏུ་བསྟན་པར་བྱ་བའི་ཕྱིར་ཁྱོད་ལ་ཡོངས་སུ་གཏད་དོ། །དེ་ཅིའི་ཕྱིར་ཞེ་ན། ཆོས་ཀྱི་རྣམ་གྲངས་འདིའི་ནང་དུ་ཡོན་ཏན་ཐམས་ཅད་འདུས་པར་དེ་བཞིན་གཤེགས་པས་བཤད་པའི་ཕྱིར་རོ། །ཀུན་དགའ་བོ་བྱང་ཆུབ་སེམས་དཔའ་གང་ཆོས་ཀྱི་ རྣམ་གྲངས་འདི་དང་མི་འབྲལ་བར་གནས་པ་དེ་སངས་རྒྱས་འབྱུང་བ་དང་མི་འབྲལ་ལོ། །ཀུན་དགའ་བོ་བྱང་ཆུབ་སེམས་དཔའ་གང་ཆོས་ཀྱི་རྣམ་གྲངས་འདི་ཉན་ཏམ། འཛིན་ཏམ། ཀློག་པ་དང་མི་འབྲལ་བ་དེ་སངས་རྒྱས་འབྱུང་བ་དང ། སངས་རྒྱས་ ཐམས་ཅད་མཐོང་བ་དང་མི་འབྲལ་ལོ། །དེ་ཅིའི་ཕྱིར་ཞེ་ན། ཀུན་དགའ་བོ་ཆོས་ཀྱི་རྣམ་གྲངས་འདིའི་ནང་དུ་ཡོན་ཏན་ཐམས་ཅད་འདུས་ཤིང་ཆོས་ཀྱི་རྣམ་གྲངས་འདིའི་ནང་དུ་བསླབ་པ་བསྒྲུབ་པའི་ལམ་གྱི་ཡོན་ཏན་ཐམས་ཅད་འདུས་པར་དེ་བཞིན་གཤེགས
42-1-287b
པས་ཡང་དག་པར་རབ་ཏུ་བཤད་པའི་ཕྱིར་རོ། །ཀུན་དགའ་བོ་རིགས་ཀྱི་བུའམ་རིགས་ཀྱི་བུ་མོ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་དག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་མེས་རབ་ཏུ་གང་བ་ཡང་འབོགས་ཏེ། ཆོས་ ཀྱི་རྣམ་གྲངས་འདི་མཉན་པར་བྱ། ཀུན་ཆུབ་པར་བྱའོ། །ཀུན་དགའ་བོ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་རབ་ཏུ་གང་བ་ཙམ་ཡང་རི་མོར་བྱས་ཏེ་སློབ་དཔོན་ལ་ཕུལ་ནས་ཆོས་ཀྱི་རྣམ་གྲངས་འདི་མཉན་པར་ བྱའོ། །ཀུན་ཆུབ་པར་བྱའོ། །ཀུན་དགའ་བོ་བྱང་ཆུབ་སེམས་དཔའ་གང་གིས་འདས་པའི་སངས་རྒྱས་བཅོམ་ལྡན་འདས་རྣམས་ཀྱི་མཆོད་རྟེན་རིན་པོ་ཆེ་ལས་སོ་སོར་བྱས་ཏེ་མཆོད་པ་ཐམས་ཅད་ཀྱིས་མཆོད་ལ། དེ་བཞིན་དུ་ད་ལྟར་བྱུང་ བའི་སངས་རྒྱས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་རྣམས་ལ་ཇི་སྲིད་འཚོའི་བར་དུ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱེད་ཅིང ། གང་མ་འོངས་པའི་སངས་རྒྱས་བཅོམ་ལྡན་འདས་རྣམས་དང ། བྱང་ཆུབ་སེམས་ དཔའ་རྣམས་ཀྱི་བྲན་དང ། སློབ་མར་ཁས་བླངས་ཏེ་བསྙེན་བཀུར་བྱས་སུ་ཟིན་ཀྱང་ཆོས་ཀྱི་རྣམ་གྲངས་འདི་མི་འཛིན། མི་འཆང། མི་ཀློག་།ཀུན་ཆུབ་པར་མི་བྱེད། འཇུག་པར་མི་བྱེད་ཅིང་སྒྲུབ་པ་འདི་ལ་མི་གནས་ན། ཀུན་དགའ་བོ་བྱང་ཆུབ་ སེམས་དཔའ་དེས་འདས་པ་དང ། མ་འོངས་པ་དང ། ད་ལྟར་བྱུང་བའི་དེ་བཞིན་གཤེགས་པ་རྣམས་ལ་མཆོད་པ་བྱས་པར་མི་འགྱུར་རོ། །ཀུན་དགའ་བོ་བྱང་ཆུབ་སེམས་དཔའ་གང་ཆོས་ཀྱི་རྣམ་གྲངས་འདི་ཉན་ཅིང་ཀུན་ཆུབ་པར་བྱེད་ལ་དམ་པའི་ཆོས་ ཡུན་རིང་དུ་གནས་པར་བྱ་བ་དང ། སངས་རྒྱས་ཀྱི་རིགས་རྒྱུན་མི་འཆད་པར་བྱ་བའི་ཕྱིར་གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིང་སྒྲུབ་པ་འདི་ལ་ཡང་གནས་ན་ཀུན་དགའ་བོ་བྱང་ཆུབ་སེམས་དཔའ་དེས་འདས་པ་དང ། མ་འོངས་པ་དང ། ད་ལྟར
42-1-288a
བྱུང་བའི་སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱས་པར་འགྱུར་རོ། །གུས་པ་དང་བཅས་པས་བསྙེན་བཀུར་བྱས་པར་ཡང་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་ བོ་དང ། ཁྱིམ་བདག་དྲག་ཤུལ་ཅན་དང ། དགེ་སློང་དེ་དག་དང ། བྱང་ཆུབ་སེམས་དཔའ་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་ བསྟོད་དོ།། །།འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས། འཕགས་པ་དྲག་ཤུལ་ཅན་གྱིས་ཞུས་པ་ཞེས་བྱ་བ་སྟེ་ལེའུ་བཅུ་དགུ་པ་རྫོགས་སོ།། ་རྒྱ་གར་ གྱི་མཁན་པོ་སུ་རེན་དྲ་བོ་དྷི་དང ། ཞུ་ཆེན་གྱི་ལོ་ཙྪ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།