༄#། །རྒྱ་གར་སྐད་དུ། མ་ཧཱ་ཀཱ་རུ་ཎི་ཀ་ནཱ་མ་ཨཱརྱ་ཨ་བ་ལོ་ཀི་ཏེ་ཤཝ་ར་དྷཱ་ར་ཎཱི་ཨ་ནུ་ཤཾ་ས་ས་ཧི་ཏ་སཱུ་ཏྲཱཏ་སཾ་གྲ་ཧི་ཧ། བོད་སྐད་དུ། འཕགས་པ་སྤྱན་ རས་གཟིགས་དབང་ཕྱུག་ཐུགས་རྗེ་ཆེན་པོའི་གཟུངས་ཕན་ཡོན་མདོར་བསྡུས་པ་ཞེས་བྱ་བ། འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་བོ་པོ་ཊ་ལ་སྤྱན་རས་གཟིགས་དབང་ཕྱུག་གི་ གནས་ན་བྱང་ཆུབ་སེམས་དཔའ་གྲངས་མེད་དཔག་ཏུ་མེད་པའི་འཁོར་གྱིས་བསྐོར་ནས། དེའི་ཚེ་འཕགས་པ་སྤྱན་རས་གཟིགས་དབང་ཕྱུག་སྟན་ལས་ལངས་ནས་ཐལ་མོ་སྦྱར་ཞིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ང་ལ་འདི་ལྟ་བུའི་གཟུངས་ཡོད་མིང་ནི་ཐུགས་རྗེ་ཆེན་པོ་ཞེས་ཟེར་ སེམས་ཅན་ཀུན་གྱི་མི་དགེ་བའི་སྡིག་པ་ཤིན་ཏུ་ལྕི་བའི་སྒྲིབ་པ་བདུད་དང་འཇིགས་པ་ཐམས་ཅད་ཞི་བར་བྱེད་པ་འདོད་པ་ཐམས་ཅད་རབ་ཏུ་ཚིམ་པར་བྱེད་པའི་ཕྱིར་ངས་བཤད་དོ། །བཅོམ་ལྡན་འདས་ལ་བཤད་པའི་གནང་བ་ཞུས་ནས། དེ་ནས་བཅོམ་ལྡན་འདས་ཀྱིས་རིགས་ཀྱི་བུ་ཁྱོད་ཀྱིས་ཐུགས་རྗེ་ ཆེན་པོའི་སྒོ་ནས་གཟུངས་བཤད་པར་འདོད་པའི་དུས་ལ་བབ་བོ། །མྱུར་བར་བཤད་དུ་གསོལ། ང་དང་སངས་རྒྱས་ཐམས་ཅད་ཀྱིས་ཀྱང་རྗེས་སུ་ཡི་རང་ངོ ། །བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་དགེ་སློང་ངམ། དགེ་སློང་ 93-1-202a མའམ། དགེ་བསྙེན་ནམ་དགེ་བསྙེན་མའམ། ཁྱེའུའམ། བུ་མོས་འདོན་པ་དང་འཆང་བར་འདོད་པས་སེམས་ཅན་ཐམས་ཅད་ཀྱི་ཆེད་དུ་ཐུགས་རྗེ་ཆེན་པོའི་སྒོ་ནས་ཐོག་མར་འདི་ལྟ་བུའི་སེམས་བསྐྱེད་པར་བྱའོ། །སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོ་ལ་ཕྱག་འཚལ་ལོ། །བདག་གིས་ཆོས་ རྣམས་ཐམས་ཅད་མྱུར་དུ་རྟོགས་པར་ཤོག་།སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་ཡེ་ཤེས་མིག་ནི་མྱུར་དུ་ཐོབ་པར་ཤོག་།སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་གིས་སེམས་ཅན་ཐམས་ཅད་མྱུར་དུ་སྒྲོལ་བར་ཤོག་།སྤྱན་རས་གཟིགས་དབང་ཐུགས་རྗེ་ ཆེན་ལ་ཕྱག་འཚལ་ལོ། །བདག་གིས་ཐབས་མཁས་པ་དག་མྱུར་དུ་ཐོབ་པར་ཤོག་།སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་ཤེས་རབ་གྲུ་ཡིས་སྒྲོལ་བར་ཤོག་།སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་སྡུག་བསྔལ་མཚོ་ལས་འདའ་བར་ཤོག་། སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་ཚུལ་ཁྲིམས་རྐང་གི་ལམ་ཐོབ་ཤོག་།སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་མྱ་ངན་འདའ་བའི་རི་འཛེག་ཤོག་།སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་འདུས་མ་ བྱས་ཀྱི་ཁྱིམ་ཕྱིན་ཤོག་།སྤྱན་རས་གཟིགས་དབང་ཐུགས་རྗེ་ཆེ་ལ་ཕྱག་འཚལ་ལོ། །བདག་ནི་མྱུར་དུ་ཆོས་ཉིད་སྐུ་དང་མཚུངས་པར་ཤོག་།བདག་ནི་རལ་གྲིའི་རི་འཛེག་ན། །རལ་གྲིའི་རི་ནི་རང་སྙིལ་ཤོག་།བདག་ནི་ཆུ་ཚན་འཕྲད་གྱུར་ན། །ཆུ་ཚན་མེ་མུར་རང་ཞིར་ཤོག་།སེམས་ཅན་དམྱལ་བར་བདག་སོང་ན། །སེམས་ ཅན་དམྱལ་བ་རང་སྐམས་ཤོག་།བདག་ནི་ཡི་དགས་གནས་སོང་ན། །བཀྲེས་སྐོམ་དག་ནི་འགྲངས་པར་ཤོག་།བདག་ནི་ལྷ་མིན་གནས་སོང་ན། །ངན་སེམས་རང་ཉིད་དུལ་བར་ཤོག་།བདག་ནི་དུད་འགྲོ་གནས་སོང་ན། །རང་ཉིད་ཤེས་རབ་ཆེ་ཐོབ་ཤོག་།དེ་སྐད་དུ་སྨོན་ལམ་བཏབ་ནས་སེམས་རྩེ་གཅིག་ཏུ་བདག་གི་མིང་ ནས་འདོན་ཅིང་རྗེས་སུ་དྲན་པར་བགྱིའོ། །གཞན་ཡང་བདག་གི་སྟོན་པ་དེ་བཞིན་གཤེགས་པ་འོད་དཔག་མེད་ཀྱི་མཚན་འདོན་ཅིང ། དེ་ནས་གཟུངས་འདི་ལན་ཅིག་གམ་ལན་བདུན་གྱི་བར་དུ་བཏོན་ན། བསྐལ་པ་འབུམ་ཕྲག་བརྒྱ་སྟོང་ཇི་སྙེད་འཁོར་བར་འགྱུར་བའི་ཁ་ན་མ་ཐོ་བའི་ལྕི་བ་རྣམས་བསལ་ཅིང་འབྱང་བར་འགྱུར་ 93-1-202b ལགས་སོ། །གལ་ཏེ་ཐུགས་རྗེ་ཆེན་པོ་འདི་འདོན་ཅིང་འཆང་ན་འཆི་བའི་དུས་ཀྱི་ཚེ། ཕྱོགས་བཅུའི་དེ་བཞིན་གཤེགས་པ་རྣམས་དེར་གཤེགས་ནས་ཕྱག་རྐྱོང་བར་འགྱུར་བས་བསམས་པ་བཞིན་དུ་སངས་རྒྱས་ཀྱི་ཞིང་གང་དང་གང་དུ་སྐྱེ་བར་འདོད་པ་དེ་དང་དེར་སྐྱེ་བར་འགྱུར་ལགས་སོ། །བཅོམ་ལྡན་འདས་ ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་གང་ལ་ལ་ཞིག་ཐུགས་རྗེ་ཆེན་པོའི་རིག་སྔགས་འདི་འདོན་ཅིང་ཡོངས་སུ་འཛིན་པ་དག་གལ་ཏེ་ངན་སོང་གསུམ་པོ་དག་ཏུ་ལྟུང་བར་གྱུར་ན་བདག་ནམ་ཡང་མངོན་པར་རྫོགས་པར་སངས་རྒྱ་བར་མི་བགྱིའོ། །ཐུགས་རྗེ་ཆེན་པོའི་རིག་སྔགས་འདི་འདོན་ཅིང་ ཡོངས་སུ་འཛིན་པ་དག་གལ་ཏེ་ཏིང་ངེ་འཛིན་དང་སྤོབས་པ་ཚད་མེད་པ་ཇི་སྙེད་ཐོབ་པར་མ་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐུགས་རྗེ་ཆེན་པོའི་རིག་སྔགས་འདི་འདོན་ཅིང་ཡོངས་སུ་འཛིན་པ་དག་གལ་ཏེ་ཚེ་འདི་ཉིད་ལ་སྨོན་པ་ཐམས་ཅད་ཅི་ལྟར་སྨོན་པ་བཞིན་དུ་གྲུབ་པར་མ་གྱུར་ན་ཐུགས་ རྗེ་ཆེན་པོའི་སེམས་ཀྱི་གཟུངས་ཞེས་མི་བགྱི་ལགས་ཏེ། མི་དགེ་བ་རྣམས་དང་སེམས་རྩེ་གཅིག་ཏུ་མ་བགྱིས་པ་ནི་མ་གཏོགས་ལགས་སོ། །བུད་མེད་གང་ལ་ལ་ཞིག་བུད་མེད་ཀྱི་ལུས་ལས་ཡོངས་སུ་སྐྱོ་ནས་སྐྱེས་པའི་ལུས་ཐོབ་པར་འཚལ་བ་གང་ལགས་པ་དེས་ཐུགས་རྗེ་ཆེན་པོའི་སེམས་ཀྱི་གཟུངས་ཀྱི་ཚིག་འདི་འདོན་ ཅིང་ཡོངས་སུ་གཟུང་བས་གལ་ཏེ་བུད་མེད་ཀྱི་ལུས་ལས་ཡོངས་སུ་གྱུར་ཏེ་སྐྱེས་པའི་ལུས་ཐོབ་པར་མ་གྱུར་ན་བདག་ནམ་ཡང་མངོན་པར་རྫོགས་པར་འཚང་རྒྱ་བར་མི་བགྱིའོ། །ཐེ་ཙོམ་གྱི་བསམ་པ་ཅུང་ཟད་ཅིག་བསྐྱེད་པར་གྱུར་ན་གདོན་མི་ཟ་བར་གང་སྨོན་པའི་འབྲས་བུ་དེ་མངོན་པར་འགྲུབ་པར་མི་འགྱུར་ལགས་སོ། །དེ་སྐད་ ཅེས་སྨྲས་ནས་འཁོར་འདུས་པའི་མདུན་དུ་ཐལ་མོ་སྦྱར་ཏེ། དྲང་པོར་འདུག་ནས་སེམས་ཅན་རྣམས་ལ་ཐུགས་རྗེ་ཆེན་པོའི་སེམས་བསྐྱེད་དེ་འཛུམ་པའི་མདངས་ཀྱིས་ཐོགས་པ་མི་མངའ་བའི་ཐུགས་རྗེ་ཆེན་པོའི་སེམས་རྒྱ་ཆེར་ཡོངས་སུ་རྫོགས་པ་ཞེས་བྱ་བའི་གཟུངས་གྱ་ནོམ་པ་འདི་དག་སྨྲས་སོ། །སྙིང་པོ་ནི། ཨོཾ་ མ་ཎི་པདྨེ་ཧཱུཾ། གཟུངས་ནི། ན་མོ་རཏྣ་ཏྲ་ཡཱ་ཡ། ན་མ་ཨཱརྱ་ཨ་བ་ལོ་ཀི་ཏེ་ཤཝ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། ཨོཾ་སརྦ་བནྡྷ་ན། ཙྪེ་ད་ན་ཀ་རཱ་ཡ། སརྦ་པཱ་པ་ས་མུ་དྲ་ཨུཙྪོ་ཤ་ཎ་ཀ་རཱ་ཡ། སརྦ་བྱཱ་དྷི་པྲ་ཤ་མ་ན་ཀ་རཱ་ཡ། སརྦ་ཨི་ཏྱུ་པ་དྲ་བ་བི་ནཱ་ཤ་ན་ཀ་ར་ཡ། སརྦ་བྷ་ཡེ་ཥུ་ཏྲ་ཎཱ་ཡ། 93-1-203a ཏསྱ་ན་མ་སྐྲྀཏྭཱ་ཨི་དཾ་ཨཱརྱ་ཨ་བ་ལོ་ཀི་ཏེ་ཤཝ་ར་ཏ་བ་ནཱི་ལ་ཀཎྜ་ནཱ་མ་ཧྲྀ་ད་ཡཾ། ཨཱ་བརྟ་ཡིཥྱཱ་མི་སརྦ་ཨརྠ་སཱ་དྷ་ན། ཤུ་བྷ་ཙེ་ཏ་ན། སརྦ་སཏྭཱ་ནཱཾ། པཱ་པ་མཱརྒ་བི་ཤོ་དྷ་ཀ་།ཏདྱ་ཐཱ། ཨ་བ་ལོ་ཀི་ལོ་ཀ་མ་ཏི། ལོ་ཀ་ག་ཏི། ཨེ་ཧྱེ་ཧི། མ་ཧཱ་བོ་དྷི་ས་ཏྭ། ཧེ་བོ་དྷི་སཏྭ། ཧེ་མ་ཧཱ་བོ་དྷི་སཏྭ། ཧེ་པྲི་ཡ་བོ་དྷི་སཏྭ། ཧེ་ཀཱ་རུ་ཎི་ཀཱ་སྨ་ར་ཧྲྀ་ ད་ཡཾ། ཨེ་ཧྱེ་ཧི། ཨཱརྱ་ཨ་བ་ལོ་ཀི་ཏེ་ཤཝ་ར་པ་ར་མ་མེེ་ཏྲི་ཙིཏྟ་ཀཱ་རུ་ཎི་ཀ་།ཀུ་རུ་ཀུ་རུ། ཀརྨཾ་སཱ་དྷ་ཡ་སཱ་དྷ་ཡ། བིདྱཱཾ་དེ་ཧི་དེ་ཧི་མེ། ཨ་རཾ་ག་མཾ་ག་མ། བི་ཧཾ་ག་མ་ཧཱ་སིདྡྷ་ཡོ་གཱི་ཤཝ་ར། དུ་ཧུ་དུ་ཧུ། བཱིར་ཡནྟེ། མ་ཧཱ་བཱི་ར་ཡནྟེ། དྷ་ར་དྷ་ར། དྷཱ་ར་ཎཱི་ཤཝ་ར། ཛྭ་ལ་ཛྭ་ལ། བི་མ་ལ་ཨ་མ་ལ། མཱཪྟི་ཨཱརྱ་ཨ་བ་ལོ་ཀི་ཏེ་ཤཝ་རཀྲྀཥྞ་ ་ཛི་ན། ཛ་ཊཱ་མ་ཀུ་ཊ། ཨ་ལཾ་ཀྲྀ་ཏ་ཤ་རཱི་ར། ཨ་ལཾ་བ། པྲ་ལཾ་བ། བི་ལཾ་བ། མ་ཧཱ་སིདྡྷ། ཤུདྡྷ་དྷ་ར། བ་ལ་བ་ལ། མ་ཧཱ་བ་ལ། མ་ཧཱ་མ་ལ་མ་ཧཱ་མ་ལ། ཛྭ་ལ་ཛྭ་ལ།མ་ཧཱ་ཛྭ་ལ། ཀྲྀཥྞ་པཀྵ་ཀྲྀཥྞ་བརྞ། ཀྲིཥྞ་པཱ་ཤ་།ནིརྒྷཱ་ཏ་ན། ཧེ་པདྨ་ཧསྟ། ཛ་ཡ་ཀ་ར་ནི་ཤཱ་ཙ་རེ་ཤཝ་ར། ཀྲྀཥྞ་སརྦ་ཀྲྀ་ཏ་ཡཛྙོ་པ་བཱི་ཏ། ེ་ཧྱེ་ཧི་བཱ་རཱ་ཧ་མུ་ཁ་ཏྲི་པུ་ར་ད་ཧ་ནཱི་ཤཝ་ར་ནཱ་རཱ་ཡ་ཎ་པ་ལ་རཱུ་པ་པེ་ཥ་དྷ་རི། ཧེ་ནཱི་ལ་ཀཎྛ། ཧེ་མ་ཧཱ་ཧ་ལཱ་ཧ་ར། བི་ཥ་ནི་ར་ཛཱི་ཏ་ལོ་ཀ་སྱ། རཱ་ག་བི་ཥ་ནཱ་ཤ་ན། དྭེ་ཥ་བི་ཥ་ནཱ་ཤ་ན། མོ་ཧ་བི་ཥ་ནཱ་ཤ་ན། ནི་ར་མོ་ཀྵ་ཎ། ཧུ་ལུ་ཧུ་ལུ། མུཉྩ་མུཉྩ། མུ་ཧུ་ལུ་མུ་ཧུ་ལུ། ཧཱ་ལ་ཧཱ་ལ། མ་ཧཱ་པདྨ་ནཱ་བྷི། ས་ར་ས་ར། སི་རི་སི་རི། སུ་རུ་ སུ་རུ། བུདྡྷྱ་བུདྡྷྱ། བོ་དྷ་ཡ་བོ་དྷ་ཡ། བོ་དྷ་ཡཱ་མི། ཏ་བ་ནཱི་ལ་ཀཎྛ། ཨེ་ཧྱེ་ཧི་ནཱི་ལ་ཀཎྛ། ཨེ་ཧྱེ་ཧི་བཱ་མ་སྠི་ཏ། སིདྷ་མུ་ཁ། ཧ་ས་ཧ་ས། མུཉྩ་མུཉྩ། མ་ཧཱ་ཨཊྚཱཊྚ་ཧ་ས་ནིར་ནཱ་དི་ནི། ཨེ་ཧྱེ་ཧི། བྷོ་བྷོ་མ་ཧཱ་སིདྡྷ་ཡོ་གཱི་ཤཝ་ར། བན་དྷ་བན་དྷ་ཝ་ཙཾ་སཱ་དྷ་ཡ་སཱ་དྷ་ཡ། བི་དྱཱཾ་སྨ་ར་སྨ་ར་ཏྭཱཾ། ཧེ་བྷ་ག་བཱན། ལོ་ཀ་བི་ལོ་ཀ་སྟྭཾ། ཏ་ཐཱ་ ག་ཏཱ་དཱ་དཱ་ཧི་མེ་དརྴ་ནཾ། པྲ་སཱ་དྷ་ཡཱ་མི་སཝཱ་ཧཱ། སིདྡྷཱ་ཡ་སཝཱ་ཧཱ། མ་ཧཱ་སིདྡྷ་ཡ་སཝཱ་ཧཱ། སིདྡྷ་ཡོ་གཱི་ཤཝ་རཱ་ཡ་སཝཱ་ཧཱ། ནཱི་ལ་ཀཎྛཱ་ཡ་སཝཱ་ཧཱ། བཱ་རཱ་ཧ་མུ་ཁཱ་ཡ་སཝཱ་ཧཱ། སིདྷ་མུ་ཁཱ་ཡ་སཝཱ་ཧཱ། མ་ཧཱ་ན་ར་སིདྷ་མུ་ཁཱ་ཡ་སཝཱ་ཧཱ། སིདྡྷ་བིདྱཱ་དྷ་རཱ་ཡ་སཝཱ་ཧཱ། པདྨ་ཧ་སྟཱ་ཡ་སཝཱ་ཧཱ། མ་ཧཱ་པདྨ་ཧ་སྟཱ་ཡ་སཝཱ་ཧཱ། བཛྲ་ཧ་སྟཱ་ཡ་སཝཱ་ཧཱ། མ་ཧཱ་བཛྲ་ ཧ་སྟཱ་ཡ་སཝཱ་ཧཱ། ཀྲྀཥྞ་ས་ར་པ་ཀྲྀ་ཏ་ཡཛྙོ་པ་བཱི་ཏཱ་ཡ་སཝཱ་ཧཱ། མ་ཧཱ་ཀཱ་ལ་མུ་ཀུ་ཊེ་དྷ་རཱ་ཡ་སཝཱ་ཧཱ། ཙཀྲ་ཨུ་ཡུ་དྷ་དྷ་རཱ་ཡ་སཝཱ་ཧཱ། ཤཾ་ཁེ་ཤབྡ་ནིར་ནཱ་ད་ན་ཀ་རཱ་ཡ་སཝཱ་ཧཱ། བོ་དྷ་ན་ཀ་རཱ་ཡ་སཝཱ་ཧཱ། བཱ་མ་སྐནྡྷ་དེ་ཤསྠི་ཏ་ཀྲྀཥྞ་ཨ་ཛི་ནཱ་ཡ་སཝཱ་ཧཱ། བཱ་མ་ཧ་སྟེ་བྱཱ་གྷྲ་ཙར་མ་ནི་བཱ་ས་ནཱ་ཡ་སཝཱ་ཧཱ། ལོ་ཀེ་ཤཝ་རཱ་ཡ་སཝཱ་ཧཱ། མ་ཧཱ་ལོ་ཀེ་ 93-1-203b ཤཝ་རཱ་ཡ་སཝཱ་ཧཱ། སརྦ་སིདྡྷེ་ཤཝ་རཱ་སཝཱ་ཧཱ། རཀྵ་རཀྵ་མཱཾ་སཝཱ་ཧཱ། ཀུ་རུ་རཀྵ་མཱུརྟཱི་ནཱཾ་སཝཱ་ཧཱ། ན་མོ་བྷ་ག་ཝ་ཏེ་ཨཱརྱ་ཨ་བ་ལོ་ཀི་ཏེ་ཤཝ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། སིདྡྷྱ་ནྟུ་མེ་མནྟྲ་པ་དཱ་ནི་སཝཱ་ཧཱ། དེ་ནས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་ གཟུངས་འདི་བསྟན་ཟིན་ནས། གཟུངས་འདི་འདོན་ཅིང་ཡོངས་སུ་འཛིན་པ་དག་གི་ཆེད་དུ། གནོད་པ་དང་བགེགས་ཡོངས་སུ་བསལ་བའི་ཕྱིར། ཤིན་ཏུ་དང་བའི་ཚིགས་སུ་བཅད་པ་འདི་དག་སྨྲས་སོ། །གང་ཞིག་རི་དང་འབྲོག་དགོན་སོང་བ་ལས། །སྟག་དང་སྤྱང་ཀི་གཅན་གཟན་ གཏུམ་པོ་དང ། །རྩངས་པ་སྦྲུལ་དང་འདྲེ་སྲིན་ཕྲད་གྱུར་ཀྱང ། །གཟུངས་འདི་འདོན་པ་ཐོས་ནས་གནོད་མི་ནུས། །གང་ཞིག་ཆུ་བོ་རྒྱ་མཚོར་ཞུགས་པ་ལས། །གདུག་པའི་ཀླུ་དང་ཆུ་སྲིན་མ་རུངས་དང ། །གནོད་སྦྱིན་སྲིན་པོ་ཉ་དང་རུ་སྦལ་དག་།གཟུངས་འདི་ཐོས་ ནས་སོ་སོར་འབྱེར་བར་འགྱུར། །གང་ཞིག་གཡུལ་སྤྲད་དགྲ་ཡིས་བསྐོར་བའམ། །ཆོམ་རྐུན་མ་རུངས་ནོར་ནི་འཕྲོག་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །དེ་དག་བརྩེ་སེམས་སྐྱེས་ནས་ལྡོག་པར་འགྱུར། །གང་ཞིག་རྒྱལ་པོའི་གྱོད་ལ་ཐོགས་པ་དང ། ། ལྕགས་སྒྲོག་ཁོང་སྒྲིལ་བཙོན་རར་ཆུད་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །རྒྱལ་པོ་བརྩེ་སེམས་ཀྱིས་ནི་གཏོང་བར་འགྱུར། །གང་ཞིག་བྱད་སྟེམས་དུག་མའི་ཁྱིམ་ཞུགས་ཏེ། །ཟས་སྐོམ་དུག་ཅན་གྱིས་ནི་གསོད་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་ བཟླས་ན། །དུག་ནི་ཟིལ་དངར་ཟས་སྐོམ་ཉིད་དུ་འགྱུར། །བུད་མེད་སྦྲུམ་མ་བུ་ནི་བཙའ་བའི་ཚེ། །བདུད་ཀྱིས་བགེགས་བྱས་སྡུག་བསྔལ་མི་བཟོད་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །འདྲེ་གདོན་བྱེར་ནས་བདེ་བར་བཙའ་བར་འགྱུར། །ཀླུ་གདོན་གཏུམ་པོས་གདུག་པའི་ དབུགས་བཏང་བས། །ཚ་བའི་ནད་ཀྱིས་ཉེན་ནས་འཆིར་ཉེ་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །རིམས་ནད་བསལ་ནས་ཚེ་ནི་རིང་བར་འགྱུར། །ཀླུ་གདོན་རྒྱུ་བས་གཙེས་ཏེ་སྐྲངས་པ་དང ། །ཤུ་འབྲས་མི་བཟད་རྣག་ཁྲག་འཛག་པའི་ཚེ། །རྩེ་གཅིག་ཐུགས་རྗེ་ཆེན་ 93-1-204a པོའི་གཟུངས་བཟླས་ན། །མཆིལ་མ་ལན་གསུམ་བྱུགས་པས་སྐྲངས་པ་ཞི། །སེམས་ཅན་རྙོག་པ་མི་དགེ་སྤྱོད་པས་ན། །བྱད་སྟེམས་སྔགས་དང་དགྲས་ནི་གཙེས་པའི་ཚེ། །རྩེ་གཅིག་ཐུགས་རྗེ་ཆེན་པོའི་གཟུངས་བཟླས་ན། །བྱད་སྟེམས་གདོན་དེ་གཏོང་བའི་མི་ ལ་འདུད། །སྡིག་འཕེལ་སྙིགས་མ་དམ་ཆོས་འཇིག་པའི་ཚེ། །འདོད་པའི་མེ་མཆེད་སེམས་ནི་རྨོངས་ལོག་པས། །ཁྱོ་ཤུག་སོ་སོར་གཞན་ལ་འདོད་ཞེན་ནས། །ཉིན་མཚན་ལོག་བསམ་རྒྱུན་ནི་མི་འཆད་ཚེ། །གང་ཞིག་ཐུགས་རྗེ་ཆེན་པོའི་གཟུངས་བཟླས་ན། ། འདོད་པའི་མེ་ཞི་ལོག་པའི་སེམས་བསལ་འགྱུར། །བདག་གིས་གཟུངས་འདི་མཐུ་སྟོབས་རྒྱས་བརྗོད་ན། །བསྐལ་པར་བརྗོད་ཀྱང་མཐར་ཐུག་ཡིད་མི་འགྱུར། །གལ་ཏེ་ཐུགས་རྗེ་ཆེན་པོའི་གཟུངས་འདི་འདོན་ཅིང་ཡོངས་སུ་འཛིན་པ་དེ་དག་ཆུ་ཀླུང་ངམ་རྒྱ་མཚོར་ཞུགས་ཏེ་ཁྲུས་བྱས་ པ་ལས། དེ་ན་གནས་པའི་སེམས་ཅན་དེ་དང་དེ་དག་གི་ལུས་བཀྲུས་པའི་ཆུས་ལུས་ལ་རེག་པར་གྱུར་ན་སྡིག་པའི་ལས་དང ། ཁ་ན་མ་ཐོ་བའི་ལྕི་བ་ཐམས་ཅད་ཡོངས་སུ་བྱང་ནས། ཞིང་ཡོངས་སུ་དག་པ་གཞན་དག་ཏུ་པདྨ་ལ་རྫུས་ཏེ་སྐྱེ་བར་འགྱུར་བས་མངལ་དང ། དྲོད་གཤེར་དང ། སྒོ་ང་ལས་སྐྱེས་པའི་ ལུས་ལེན་པར་མི་འགྱུར་ན། ཁ་ཏོན་དུ་འདོན་པ་དང་འཆང་བ་ལ་ལྟ་སྨོས་ཀྱང་ཅི་དགོས། གཟུངས་འདི་འདོན་ཅིང་ཡོངས་སུ་འཛིན་པ་དེ་དག་ལམ་དུ་ཞུགས་ནས་འགྲོ་བའི་ཚེ་རླུང་ཆེན་པོ་ལངས་ཏེ་གང་ཟག་དེའི་ལུས་དང ། སྤུ་དང་སྐྲ་དང ། གོས་ལ་བུས་པའི་རླུང་གང་ཡིན་པ་དེའི་ཕྱོགས་སུ་སོང་བའི་སེམས་ཅན་ གཞན་གྱི་ལུས་ལ་རེག་པར་གྱུར་ན། དེ་དག་གི་སྒྲིབ་པ་དང ། སྡིག་པའི་ལས་ལྕི་བ་ཐམས་ཅད་མ་ལུས་པར་ཡོངས་སུ་འབྱང་བར་འགྱུར་བས་ཡང་ངན་འགྲོ་གསུམ་པོ་དག་གི་རྣམ་པར་སྨིན་པ་མྱོང་བར་མི་འགྱུར་ཞིང་རྟག་པར་སངས་རྒྱས་ཀྱི་སྤྱན་སྔར་སྐྱེ་བར་འགྱུར་བས་ན་འདོན་པ་དང ། ཡོངས་སུ་འཛིན་པ་དེ་ དག་གིས་ཐོས་པའི་ཕན་ཡོན་ནི་བསམ་གྱིས་མི་ཁྱབ་པར་རིག་པར་བྱའོ། །འཕགས་པ་སྤྱན་རས་གཟིགས་དབང་ཕྱུག་ཐུགས་རྗེ་ཆེན་པོའི་གཟུངས་ཕན་ཡོན་དང་བཅས་པ་ཞེས་བྱ་བ་མདོ་ལས་བཏུས་པ་རྫོགས་སོ།། །།དགེ་སློང་ཤཱཀྱ་ཡེ་ཤེས་ཀྱིས་བསྒྱུར་བའོ།། །། |