rKTs


D77

(e-text produced by ADARSHA)

see text in transliteration
43-1-241a
༄#། །འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་ལེའུ་སུམ་ཅུ་རྩ་གསུམ་པ་སྟེ་འཕགས་པ་དྲི་མ་མེད་ཀྱིས་བྱིན་པས་ཞུས་པ་ལུང་བསྟན་པ།བམ་པོ་དང་པོ། རྒྱ་གར་སྐད་དུ། ཨཱརྱ་བི་མ་ལ་ད་ཏ་ཏ་པ་རི་པྲྀཙྪཱ་ནཱ་ མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་དྲི་མ་མེད་ཀྱིས་བྱིན་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་ རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ། ཟག་པ་ཟད་པ། ཉོན་མོངས་པ་མེད་པ། དབང་དང་ལྡན་པར་གྱུར་པ། སེམས་ཤིན་ཏུ་རྣམ་པར་ གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཅང་ཤེས་པ། གླང་པོ་ཆེན་པོ། བྱ་བ་བྱས་པ། བྱེད་པ་བྱས་པ། ཁུར་བོར་བ། བདག་གི་དོན་རྗེས་སུ་ཐོབ་པ། སྲིད་པར་ཀུན་ཏུ་སྦྱོར་བ་ཡོངས་སུ་ཟད་པ། ཡང་དག་པའི་ཤེས་པས་སེམས་ཤིན་ཏུ་རྣམ་པར་གྲོལ་བ། སེམས་ཀྱི་དབང་ཐམས་ཅད་ ཀྱི་དམ་པའི་ཕ་རོལ་ཏུ་སོན་པ་ཤ་སྟག་སྟེ། གང་ཟག་གཅིག་མ་གཏོགས་པ་ནི་འདི་ལྟ་སྟེ། ཚེ་དང་ལྡན་པ་ཀུན་དགའ་བོའོ། །བྱང་ཆུབ་སེམས་དཔའ་སྟོང་ཕྲག་བཅུ་ཕལ་ཆེར་ཐམས་ཅད་ཀྱང་ཕྱིར་མི་ལྡོག་པ། སྐྱེ་བ་གཅིག་གིས་ཐོགས་པ་ཤ་སྟག་ལ་འདི་ལྟ་སྟེ།བྱང་ཆུབ་སེམས་དཔའ་རིན་ཆེན་ འོད་དང ། བྱང་ཆུབ་སེམས་དཔའ་ཤེས་རབ་བརྩེགས་དང ། བྱང་ཆུབ་སེམས་དཔའ་དཔལ་གྱི་སྙིང་པོ་དང ། བྱང་ཆུབ་སེམས་དཔའ་གྲགས་པའི་བློ་གྲོས་དང ། སྤོབས་པ་བརྩེགས་དང ། སྤྱན་རས་གཟིགས་དབང་ཕྱུག་དང ། མཐུ་ཆེན་ཐོབ་དང ། བྱམས་པ་དང ། མྱ་ངན་མེད་ཀྱིས་བྱིན་དང ། འཇམ་དཔལ་གཞོན་ནུར་གྱུར་པ་དང ། གོམ་པ་འདོར་བ་དོན་ཡོད་དང ། མཐོང་བ་དོན་ཡོད་དང ། ངན་སོང་སྤོང་དང ། མྱ་ངན་གྱི་མུན་པ་ཐམས་ཅད་འཇོམས་པ་དང ། ཡོན་ཏན་རིན་པོ་ཆེའི་མེ་ཏོག་གིས་རྟག་ཏུ་བརྒྱན་དང ། གསེར་གྱི་ཕྲེང་བའི་འོད་ཀྱི་དཔལ་ཅན་དང ། སྒྲིབ་པ་ཐམས
43-1-241b
ཅད་རྣམ་པར་སེལ་བ་དང ། བྱང་ཆུབ་སེམས་དཔའ་སེམས་ཐོགས་པ་མེད་པ་དང ། དེ་དག་ལ་སོགས་པ་བྱང་ཆུབ་སེམས་དཔའ་ཁྲི་དང་ཡང་ཐབས་ཅིག་གོ་།དེ་ནས་ཚེ་དང་ལྡན་པ་ཤཱ་རིའི་བུ་དང ། ཚེ་དང་ལྡན་པ་མཽད་གལ་གྱི་བུ་ཆེན་པོ་དང ། ཚེ་དང་ལྡན་པ་བྱམས་མའི་བུ་གང་པོ་དང ། ཚེ་ དང་ལྡན་པ་འོད་སྲུང་ཆེན་པོ་དང ། ཚེ་དང་ལྡན་པ་རབ་འབྱོར་དང ། ཚེ་དང་ལྡན་པ་ནམ་གྲུ་དང ། ཚེ་དང་ལྡན་པ་མ་འགགས་པ་དང ། ཚེ་དང་ལྡན་པ་ཀུན་དགའ་བོ་དང ། ཉན་ཐོས་ཆེན་པོ་བརྒྱད་པོ་དེ་དག་དང ། བྱང་ཆུབ་སེམས་དཔའ་འཇམ་དཔལ་དང ། བྱང་ཆུབ་སེམས་དཔའ་ངན་སོང་སྤོང་ དང ། རིན་པོ་ཆེའི་ཏོག་དང ། མཐོང་བ་དོན་ཡོད་དང ། སྒྲིབ་པ་ཐམས་ཅད་རྣམ་པར་སེལ་བ་དང ། འཕགས་པ་སྤྱན་རས་གཟིགས་དབང་ཕྱུག་དང ། སྤོབས་པ་བརྩེགས་དང ། བྱང་ཆུབ་སེམས་དཔའ་གོམ་པ་འདོར་བ་དོན་ཡོད་དང ། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་ པོ་དེ་དག་སྔ་དྲོའི་དུས་ཀྱི་ཚེ་ཤམ་ཐབས་དང་ཆོས་གོས་བགོས་ནས་ལྷུང་བཟེད་ཐོགས་ཏེ།བསོད་སྙོམས་ཀྱི་ཕྱིར་གྲོང་ཁྱེར་ཆེན་པོ་མཉན་ཡོད་དུ་ཞུགས་ནས། དེ་དག་ལམ་གྱི་བར་སྐབས་སུ་གཏམ་འདི་སྐད་ཅེས། གང་གིས་གྲོང་ཁྱེར་དུ་སྐྱེ་བོའི་ཚོགས་ཐམས་ཅད་ཀྱིས་འཕགས་པའི་ བདེན་པའི་གཏམ་ཐོས་པར་འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ་གྲོང་ཁྱེར་དུ་འཇུག་པར་བྱའོ་ཞེས་བརྗོད་པར་གྱུར་ཏོ། །ཚེ་དང་ལྡན་པ་ཤཱ་རིའི་བུས་སྨྲས་པ། གང་གིས་གྲོང་ཁྱེར་དུ་འཕགས་པའི་བདེན་པ་རྣམས་ལ་སྐྱེ་བོའི་ཚོགས་ཐམས་ཅད་ཀྱི་ཤེས་རབ་ ཐོགས་པ་མེད་དེ། དེ་དག་གི་ཤེས་རབ་ལ་མུན་པ་མུན་ནག་མེད་པར་འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ། ཁོ་བོ་སྙོམས་པར་ཞུགས་ཏེ་གྲོང་ཁྱེར་དུ་འཇུག་པར་བྱའོ། །ཚེ་དང་ལྡན་པ་མཽད་གལ་གྱི་བུ་ཆེན་པོས་སྨྲས་པ། གང་གིས་གྲོང་ཁྱེར་དུ་སྐྱེ་བོའི་ཚོགས་ཐམས་ཅད་ལ་བདུད་ཀྱི་ལས་ རྣམས་འབྱུང་བར་མི་འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ་ཁོ་བོ་སྙོམས་པར་ཞུགས་ཏེ་གྲོང་ཁྱེར་དུ་འཇུག་པར་བྱའོ། །ཚེ་དང་ལྡན་པ་བྱམས་མའི་བུ་གང་པོས་སྨྲས་པ། ཅི་ནས་ཀྱང་གཞན་མུ་སྟེགས་ཅན་སྤྱོད་པ་པ་དང ། ཀུན་ཏུ་རྒྱུ་བ་དང ། གཅེར་བུ་པ་དང ། འཚོ་བ་པ་དང ། བྲམ་ཟེ་དང་།
43-1-242a
ཁྱིམ་བདག་གང་དག་གྲོང་ཁྱེར་ན་འཁོད་པ་དེ་དག་སྡིག་པ་ཅན་གྱི་ལྟ་བ་དང་ལྡན་པར་མི་འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ་ཁོ་བོ་སྙོམས་པར་ཞུགས་ཏེ་གྲོང་ཁྱེར་དུ་འཇུག་པར་བྱའོ། །ཚེ་དང་ལྡན་པ་འོད་སྲུང་ཆེན་པོས་སྨྲས་པ། ཅི་ནས་ཀྱང་གྲོང་ཁྱེར་ན་སྐྱེས་པ་དང ། བུད་མེད་དང ། ཁྱེའུ་དང ། བུ་མོ་གང་དག་བདག་ཅག་ལ་བསོད་སྙོམས་སྦྱིན་པར་བྱེད་པ་འཁོད་པ་དེ་དག་ཐམས་ཅད་ཡོངས་སུ་མྱ་ངན་ལས་འདས་པ་ལ་ཐུག་གི་བར་དུ་ལོངས་སྤྱོད་ཟད་མི་ཤེས་པ་རྙེད་པར་འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ་ཁོ་བོ་སྙོམས་པར་ཞུགས་ཏེ་གྲོང་ཁྱེར་དུ་འཇུག་ པར་བྱའོ། །ཚེ་དང་ལྡན་པ་རབ་འབྱོར་གྱིས་སྨྲས་པ། གང་གིས་གྲོང་ཁྱེར་དུ་སྐྱེ་བོའི་ཚོགས་ཐམས་ཅད་ཉོན་མོངས་པ་མེད་པ་ཐོབ་པར་འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ་ཁོ་བོ་སྙོམས་པར་ཞུགས་ཏེ་གྲོང་ཁྱེར་དུ་འཇུག་པར་བྱའོ། །ཚེ་དང་ལྡན་པ་ནམ་གྲུས་སྨྲས་པ། གང་གིས་གྲོང་ ཁྱེར་དུ་སྐྱེ་བོའི་ཚོགས་ཐམས་ཅད་ཀྱིས་ཏིང་ངེ་འཛིན་ཐོབ་པར་འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ་ཁོ་བོ་སྙོམས་པར་ཞུགས་ཏེ་གྲོང་ཁྱེར་དུ་འཇུག་པར་བྱའོ། །ཚེ་དང་ལྡན་པ་མ་འགགས་པས་སྨྲས་པ། གང་གིས་གྲོང་ཁྱེར་དུ་སྐྱེ་བོའི་ཚོགས་ཐམས་ཅད་ནད་མེད་པའི་བདེ་བ་ཐོབ་པར་ འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ་ཁོ་བོ་སྙོམས་པར་ཞུགས་ཏེ་གྲོང་ཁྱེར་དུ་འཇུག་པར་བྱའོ། །ཚེ་དང་ལྡན་པ་ཀུན་དགའ་བོས་སྨྲས་པ། གང་གིས་གྲོང་ཁྱེར་དུ་སྐྱེ་བོའི་ཚོགས་ཐམས་ཅད་ལ་སྔོན་མ་ཐོས་པའི་ཆོས་རྣམས་མངོན་དུ་འགྱུར་བ་རྣམ་པ་དེ་ལྟ་བུའི་ཏིང་ངེ་འཛིན་ལ་ཁོ་བོ་ སྙོམས་པར་ཞུགས་ཏེ་གྲོང་ཁྱེར་དུ་འཇུག་པར་བྱའོ། །འཇམ་དཔལ་གཞོན་ནུར་གྱུར་པས་སྨྲས་པ། ཅི་ནས་ཀྱང་གང་གིས་གྲོང་ཁྱེར་ན་སྒོ་དང ། སྐར་ཁུང་དང ། རྩིག་པ་དང ། སྣོད་དང ། རྒྱན་དང ། ཤིང་དང ། ལོ་མ་དང ། མེ་ཏོག་དང ། འབྲས་བུ་དང ། གོས་རྣམས་ལས་ སྟོང་པ་ཉིད་ཀྱི་སྒྲ་འབྱུང་བར་འགྱུར་བ་དང ། མཚན་མ་མེད་པའི་སྒྲ་དང ། སྨོན་པ་མེད་པའི་སྒྲ་དང ། སྐྱེ་བ་མེད་པའི་སྒྲ་དང ། དངོས་པོ་མེད་པའི་སྒྲ་དང ། བདག་མེད་པའི་སྒྲ་འབྱུང་བར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །བྱང་ཆུབ་སེམས་དཔའ་ངན
43-1-242b
སོང་སྤོང་གིས་སྨྲས་པ། གང་གིས་གྲོང་ཁྱེར་ན་སེམས་ཅན་རྣམས་ཀྱི་ལས་ངན་སོང་མྱོང་བར་འགྱུར་བ་གང་ཡོད་པ་དེ་ཚེ་འདི་ཉིད་ལ་ཡང་ཞིང་ཆུང་ངུ་མྱོང་བར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་སྨྲས་པ། ཅི་ནས་ ཀྱང་གྲོང་ཁྱེར་ན་སེམས་ཅན་གང་དག་ཁོ་བོའི་མིག་ལམ་ན་སྣང་བར་འགྱུར་བ་དེ་དག་ཐམས་ཅད་ཀྱིས་དེ་བཞིན་གཤེགས་པའི་གཟུགས་མཐོང་བར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །བྱང་ཆུབ་སེམས་དཔའ་རིན་པོ་ཆེའི་ཏོག་གིས་སྨྲས་པ། གང་གིས་གྲོང་ ཁྱེར་ན་ཁྱིམ་ཐམས་ཅད་དུ་རིན་པོ་ཆེས་གང་བའི་གཏེར་རྣམས་འབྱུང་བར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་སྨྲས་པ། གང་གིས་མཉན་ཡོད་ཀྱི་གྲོང་ཁྱེར་ཆེན་པོར་སྐྱེ་བོའི་ཚོགས་ཐམས་ཅད་ཀྱི་ སྒྲིབ་པ་ལྔ་པོ་དག་རྣམ་པར་སེལ་བར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་སྨྲས་པ། ཅི་ནས་ཀྱང་གྲོང་ཁྱེར་ན་སེམས་ཅན་གང་དག་བཅིངས་པ་དང ། གསད་པར་བཀྲི་བ་དེ་དག་ཐམས་ཅད་ ཐར་པ་དང་འཇིགས་པས་ཉེན་པ་རྣམས་ཀྱང་འཇིག་པ་མེད་པ་ཐོབ་པར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །བྱང་ཆུབ་སེམས་དཔའ་སྤོབས་པ་བརྩེགས་ཀྱིས་སྨྲས་པ། གང་གིས་གྲོང་ཁྱེར་ན་སྐྱེ་བོའི་ཚོགས་ཐམས་ཅད་ཕན་ཚུན་དུ་ཚིགས་སུ་བཅད་པའི་ དབྱངས་དང ། བྱམས་པའི་སེམས་ཀྱིས་སྨྲ་བར་འགྱུར་བ་དང ། སྤོབས་པ་ཡང་ཐོབ་པར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །བྱང་ཆུབ་སེམས་དཔའ་གོམ་པ་འདོར་བ་དོན་ཡོད་ཀྱིས་སྨྲས་པ། ཅི་ནས་ཀྱང་གྲོང་ཁྱེར་ན་སེམས་ཅན་གང་དག་ཁོ་བོའི་ མིག་ལམ་ན་སྣང་བར་འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །དེ་ནས་ཉན་ཐོས་ཆེན་པོ་དེ་དག་དང ། བྱང་ཆུབ་སེམས་དཔའ་དེ་དག་རྣམ་པ་དེ་ལྟ་བུའི་གཏམ་འདི་བརྗོད
43-1-243a
ཅིང་མཉན་ཡོད་ཀྱི་གྲོང་ཁྱེར་ཆེན་པོར་ཕྱིན་ཏོ། །ཡང་དེའི་ཚེ་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱི་བུ་མོ་དྲི་མ་མེད་ཀྱིས་བྱིན་པ་ཞེས་བྱ་བ་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ། དགེ་བའི་རྩ་བ་བསྐྱེད་པ། སངས་རྒྱས་མང་པོ་ལ་བསྙེན་བཀུར་བྱས་པ། ཆོས་ཟབ་མོ་ལ་བཟོད་པ་དང་ལྡན་པ། མངོན་པར་ཤེས་པ་ལྔ་པོ་ཐོབ་པ་ཞིག་ཡོད་དེ་བུ་མོ་དེས་ལྷའི་མིག་རྣམ་པར་དག་པ་མིའི་ལས་འདས་པས་བྱང་ཆུབ་སེམས་དཔའ་དེ་དག་དང ། ཉན་ཐོས་ཆེན་པོ་དེ་དག་མཐོང་ཞིང་དེ་དག་ལམ་གྱི་བར་སྐབས་སུ་གཏམ་ཅི་བརྗོད་པ་དེ་དག་ཐམས་ཅད་ ཀྱང་ཐོས་སོ། །བུ་མོ་དེ་ཡང་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། ཕ་མ་དང་ནང་མི་ལ་བྱམས་པ། བཙས་ནས་ལོ་བཅུ་གཉིས་ལོན་པ་སྟེ། དེ་དཔྱིད་ཟླ་ཐ་ཆུངས་ཚེས་བརྒྱད་སྐར་མ་རྒྱལ་གྱི་ཉིན་པར་ཕ་མས་དགེ་མཚན་ དང། བཀྲ་ཤིས་བྱེད་དུ་གནང་ནས་བྲམ་ཟེ་ཞོ་དང ། རྩཝ་ཀུ་ཤ་དང ། མེ་ཏོག་དང ། ཡམ་སྲེག་ཤིང་དང ། མར་དང ། བུམ་པ་ཐོགས་པ་ལྔ་བརྒྱས་ཡོངས་སུ་བསྐོར་ཏེ་ཁྲུས་བྱ་བར་ཁྲིད་པ་ལས་བྲམ་ཟེ་དེ་དག་གིས་བྱང་ཆུབ་སེམས་དཔའ་དེ་དག་དང་ཉན་ཐོས་ཆེན་པོ་དེ་དག་མཐོང་ངོ ། ། མཐོང་ནས་ཀྱང་བཀྲ་མི་ཤིས་སོ་སྙམ་པའི་འདུ་ཤེས་ཀྱིས་གནས་པར་གྱུར་ཏོ། །དེ་ནས་བྲམ་ཟེ་དེ་དག་གི་ནང་ནས་བྲམ་ཟེ་ཆེས་བགྲེས་ཚངས་པའི་ལྷ་ཞེས་བྱ་བ་དེས་བུ་མོ་དྲི་མ་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ་མོ་དགེ་སློང་དག་མདུན་ན་འཁོད་པ་ནི་བཀྲ་མི་ཤིས་ཏེ། དེ་ དག་མཐོང་ན་དགོས་པའམ། ནོར་རམ། བརྟུལ་ཞུགས་སམ། མཆོད་སྦྱིན་ནམ། བཀྲ་ཤིས་ཀྱང་རུང་སྟེ་མི་འགྲུབ་ཀྱིས་གྲོང་ཁྱེར་དུ་སླར་བཞུད་དོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྲམ་ཟེ་ཚངས་པའི་ལྷ་དེ་ལ་ཚིགས་སུ་བཅད་དེ་སྨྲས་པ། འདི་དག་ཆགས་མེད་མཆོག་ ཏུ་དགེ་ཤིས་པ། །སྐྱེ་བོ་མང་པོའི་སྡིག་པ་འཇིག་པར་བྱེད། །འདི་དག་རྣམ་པར་དག་ཅིང་བདེན་བཞི་མཐོང ། །དུལ་ལ་གྲོལ་བར་གྱུར་ཅིང་མཉམ་པར་བཞག་།འདི་དག་རྐང་གཉིས་དམ་པ་བསོད་ནམས་ཞིང ། །འདི་ལ་ཡོན་ཕུལ་མཐོ་རིས་འགྲོ་བར་འགྱུར། །འདི་ལ་ཡོན
43-1-243b
ཕུལ་འབྲས་བུ་འཆི་མེད་འཐོབ། །བྱིན་ནས་སེམས་ཅན་ངན་འགྲོར་འགྲོ་མི་འགྱུར། །ཚུལ་ཁྲིམས་དང་ནི་དུལ་བར་ལྡན་པ་ཡིན། །འདོད་ལས་རྒལ་ཅིང་སྡིག་མེད་རེ་བ་མེད། །འདི་དག་སྨན་པ་མཆོག་སྟེ་འཇིག་རྟེན་རྒྱུ། །སྡུག་བསྔལ་གཟིར་བའི་སྲོག་ཆགས་ཐར་བར་བྱེད། ། སངས་རྒྱས་འཇིག་རྟེན་དག་ན་ཆོས་ཀྱི་རྗེ། །དེ་སྲས་འདི་དག་རྡུལ་མེད་ཉོན་མོངས་མེད། །འདི་དག་བྱང་ཆུབ་སེམས་དཔའ་གཞན་ཡང་མང ། །ཤེས་རབ་ལྡན་མིས་འདི་དག་ཇི་ལྟར་སྤང ། །འདི་དག་བརྟུལ་ཞུགས་སྤྱད་ཅིང་འདོད་ཆགས་ཞི། །བཀྲ་ཤིས་གྱུར་ཅིང་ མཁས་པ་སྦྱིན་ཆར་ཕབ། །འདི་དག་རྣམས་ལ་བཀུར་སྟི་ཆུང་བྱས་ཀྱང ། །མི་རྣམས་ཆོས་དང་དེ་བཞིན་ནོར་ཡང་འགྲུབ། །འདི་དག་མཚན་རྣམས་ཡོངས་རྫོགས་དགེ་ཤིས་ལྡན། །འདི་དག་ཞིང་མཆོག་རྣམ་དག་སེམས་དང་ལྡན། །བྲམ་ཟེ་འདི་ལ་སུ་ཞིག་དད་བྱེད་པ། །དེ་ནི་ བསོད་ནམས་མང་པོ་སྐྱེད་པར་འགྱུར། །དེ་ནས་བྲམ་ཟེ་ཚངས་པའི་ལྷས་བུ་མོ་དྲི་མ་མེད་ཀྱིས་བྱིན་པ་ལ་ཚིགས་སུ་བཅད་དེ་སླར་སྨྲས་པ། བྱིས་པའི་སེམས་ཀྱིས་དབང་དུ་མ་བཞུད་ཅིག་།མཆོད་སྦྱིན་དུས་འདིར་དགེ་སློང་མ་གཟིགས་ཤིག་།ངུར་སྨྲིག་གོས་ཅན་དེ་བཞིན་མགོ་བྲེགས་ པ། །དེ་དག་དོན་འདོད་པས་ནི་བལྟ་མི་བགྱི། །ཡབ་དང་ཡུམ་ཡང་དགྱེས་པར་མི་འགྱུར་ཞིང ། །བདག་ཀྱང་མཁས་པ་རྣམས་ཀྱིས་སྨད་པར་འགྱུར། །ཁྱོད་ཀྱང་མཆོད་སྦྱིན་འགྲུབ་པར་མི་འགྱུར་གྱིས། །དེ་བས་དགེ་སློང་རྣམས་ནི་ཤིན་ཏུ་སྤོངས། །དེ་ནས་བུ་མོ་དྲི་མ་མེད་ཀྱིས་ བྱིན་པས་བྲམ་ཟེ་ཚངས་པའི་ལྷ་དེ་ལ་ཚིགས་སུ་བཅད་དེ་སླར་སྨྲས་པ། ཡོན་ཏན་ལྡན་པ་འདི་དག་མ་གཏོགས་པར། །ཕ་དང་མ་ཡང་ཁོ་མོའི་སྐྱབས་མ་ཡིན། །གཉེན་གྱི་ཚོགས་དང་ནོར་དང་ལང་ཚོ་མིན། །འདི་དག་འཁོར་བར་བྱིང་བ་རྣམས་ཀྱི་སྐྱབས། །བདག་ནི་སངས་རྒྱས་དགའ་ བས་ལུས་བཏང་ཞིང ། །དེ་བཞིན་སྲོག་དང་ལོངས་སྤྱོད་རྣམས་ཀྱང་བཏང ། །དཀོན་མཆོག་གསུམ་ཉིད་སྐྱབས་ཡིན་མ་གཏོགས་པར། །ཁོ་མོའི་སྐྱབས་རྟེན་སེམས་ཅན་འདི་ན་མེད། །དེ་ནས་བྲམ་ཟེ་ཚངས་པའི་ལྷས་བུ་མོ་དྲི་མ་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ
43-1-244a
མོ་བཙས་ནས་ཁྱོད་ཀྱིས་སྔོན་སངས་རྒྱས་ཀྱང་མ་གཟིགས། སྔོན་ཆོས་ཀྱང་མ་གསན། སྔོན་དགེ་འདུན་ལ་བསྙེན་བཀུར་ཀྱང་མ་མཛད་ན་ཁྱོད་ཅིའི་སླད་དུ་སངས་རྒྱས་ལ་དད་པར་གྱུར། །བུ་མོ་དྲི་མ་མེད་ཀྱིས་བྱིན་པས་སྨྲས་པ། བྲམ་ཟེ་ཁོ་མོ་བཙས་ནས་ ཞག་བདུན་ལོན་པ་ན་ཙན་དན་གྱི་ཁང་བཟངས་ཀྱི་ནང་ན་གསེར་གྱི་ཁྲི་ལ་བཞག་པའི་ཚེ་ལྷའི་བུ་ལྔ་བརྒྱ་སྟེང་གི་བར་སྣང་ལ་འདོང་བ་ཁོ་མོས་མཐོང་སྟེ། དེ་དག་རྣམ་གྲངས་དུ་མས་སངས་རྒྱས་ཀྱི་བསྔགས་པ་རྗོད། །ཆོས་དང་དགེ་འདུན་གྱི་བསྔགས་པ་རྗོད་པ་ཁོ་མོས་ཐོས་སོ། ། དེ་ནས་ལྷའི་བུ་དེ་དག་གི་ནང་ནས་གང་གིས་སྔོན་དེ་བཞིན་གཤེགས་པ་མཐོང་བ་གཅིག་པོ་དེ་ལ་ལྷའི་བུ་རྣམས་ཀྱིས་དྲིས་པ། གྲོགས་པོ་དེ་བཞིན་གཤེགས་པ་ནི་ཅི་འདྲ་བ་ཞིག་དེ་ནི་ཇི་ལྟར་ཤེས་པར་བྱ། དེ་ནས་ལྷའི་བུ་དེས་ཁོ་མོའི་བསམ་པ་ཤེས་ནས་ལྷའི་བུ་དེ་དག་ཀྱང་དད་པ་ བསྐྱེད་པའི་ཕྱིར་ཚིགས་སུ་བཅད་པ་འདི་དག་སྨྲས་སོ། །དེ་ཡི་དབུ་སྐྲ་དྲི་མེད་སྣུམ་ཞིང་མཛེས། །གཙང་འཇམ་གཡས་སུ་འཁྱིལ་བའི་ལྕང་ལོ་ཅན། །ཞལ་མདོག་པད་མ་འདབ་མ་རྒྱས་པ་འདྲ། །ཟླ་ཉ་མཚན་མོ་ནམ་མཁར་མཛེས་པ་བཞིན། །དེ་ཡི་མཛོད་སྤུ་ཁ་བ་ཤེལ་ མདོག་བཟང ། །སྨིན་མཚམས་བར་ནས་འཁྱིལ་ཅིང་ཤིན་ཏུ་མཛེས། །དེ་ཡིས་འཁོར་རྣམས་ཟིལ་གྱིས་མནན་ཏེ་འདུག་།རྒྱལ་བའི་ཞལ་ཡང་ཤིན་ཏུ་མཛེས་པར་བྱེད། །མི་དབང་སྤྱན་མཛེས་འགྲམ་པ་སེང་གེའི་འདྲ། །སེམས་སྟོབས་མི་ཞུམ་ཚེམས་མཉམ་ཐགས་ཀྱང་ བཟང ། །དེ་ཡི་ལྗགས་ཆེ་ཞལ་གྱི་དཀྱིལ་འཁོར་ཁེབས། །དེ་ཡི་ཞལ་ནི་དྲི་མེད་རྣམ་པར་མཛེས། །དེ་ཡི་གསུང་ནི་ཕན་ཞིང་སྙན་ལ་རན། །ཚིག་རྩུབ་སྤངས་ཤིང་མི་འབྱེད་སྡིག་པ་མེད། །སྐྱེ་བོ་དཔག་ཏུ་མེད་པ་དང་མཛད་ཅིང ། །འགྲོ་ལ་ཕན་ཕྱིར་རྒྱལ་བའི་གསུང་ཡང་ སྒྲོགས། །དེ་ཡི་མགུར་ནི་དུང་དང་མཚུངས་ཤིང་འདྲ། །དེ་བཞིན་མི་དབང་ཕྱག་གི་སོར་མོ་རིང ། །དེ་ཡི་ཕྱག་ནི་གླང་ཆེན་སྣ་དང་འདྲ། །བྲང་ཡངས་དྲི་མེད་ལྟེ་བ་གཞོལ་ཞིང་ཟབ། །རྟ་མཆོག་ལྟ་བུར་མདོམས་ཀྱི་སྦ་བ་ནུབ། །དེ་བཞིན་སྤུ་ཡི་ཁུང་བུ་གསེར་དང་འདྲ། །བརླ་ཡི་དབྱིབས
43-1-244b
ནི་གླང་པོའི་ལག་དང་མཚུངས། །ཞབས་ནི་ལེགས་གནས་བྱིན་པ་ཨེ་ནའི་འདྲ། །ཐུབ་པའི་དབང་པོ་བདེན་གསུང་རྒྱགས་པའི་སྐྱོན་དང་བྲལ། །ངན་ལྟས་བཅོམ་པ་རྣམས་ཀྱི་སྡིག་པའི་ལྟ་བ་འཇིག་།འཁོར་གྱི་ནང་དུ་དྲི་བ་བྱེ་བ་དྲིས་བྱས་ཀྱང ། །འཁྲུལ་མེད་སྐྱོན་དང་བྲལ་ བས་སེམས་ཅན་ཀུན་ཚིམ་མཛད། །གྱ་གྱུ་མེད་དྲང་ཚིག་གིས་ལུས་ནི་ཚིམ་མཛད་ཅིང ། །མྱ་ངན་འདས་པ་བདེ་མཆོག་ཡིད་འོང་ཡང་དག་ཞི། །སྐྱེ་བོ་ཀུན་གྱི་ཡིད་འོང་མྱ་ངན་འདས་སྟོན་ཅིང ། །མཐའ་གཉིས་དག་དང་བྲལ་བའི་དབུ་མའི་ལམ་ཡང་སྟོན། །དེ་ནི་རང་ གིས་སངས་རྒྱས་གྱུར་པ་སྟེ། །བདག་ཉིད་རྒལ་ཅིང་ཕ་རོལ་རྣམས་ཀྱང་སྒྲོལ། །འགྲོ་བའི་སྐྱོབ་དང་སྐྱབས་དང་དགེ་ཤིས་ཤིང ། །འཇིག་རྟེན་ཀུན་ལ་ཐུགས་བརྩེ་ཕན་པ་མཛད། །སྟོན་པ་དེ་ཡི་ཡོན་ཏན་འདི་དག་དང ། །གཞན་ཡང་མཐའ་ཡས་ཁོ་བོས་དེ་མ་བརྗོད། ། ཐོས་ནས་ལྷ་རྣམས་ཡིད་དགའ་དད་གྱུར་ནས། །རྒྱལ་བ་ལ་ནི་དང་བའི་ཡིད་ཀྱང་སྒོམ། །དེ་ནས་བུ་མོ་དྲི་མ་མེད་ཀྱིས་བྱིན་པས་ཚིགས་སུ་བཅད་པ་འདི་དག་སྨྲས་ནས་བྲམ་ཟེ་ཚངས་པའི་ལྷ་ལ་འདི་སྐད་ཅེས་སྨྲས་སོ། །བྲམ་ཟེ་ཁོ་མོ་བཙས་ནས་ཞག་བདུན་ལོན་ནས་སངས་རྒྱས་ཀྱི་ ཡོན་ཏན་རྣམ་པ་འདི་ལྟ་བུ་དག་ཐོས་སོ། །མངོན་པར་དྲན་ཏེ་དེ་ཚུན་ཆད་ནམ་ཡང་རྨུགས་པ་དང་གཉིད་ཀྱིས་ནོན་པར་མ་གྱུར་ཏོ། །ནམ་ཡང་འདོད་པ་ལ་རྣམ་པར་རྟོག་པའི་རྣམ་པར་རྟོག་པ་དང ། གནོད་སེམས་ཀྱི་རྣམ་པར་རྟོག་པའི་རྣམ་པར་རྟོག་པ་དང ། འཚེ་བའི་རྣམ་པར་ རྟོག་པའི་རྣམ་པར་རྟོག་པ་མ་བྱས་སོ། །མངོན་པར་དྲན་ཏེ་དེ་ཚུན་ཆད་ནམ་ཡང་ཕ་ལ་དགའ་བ་འམ། མ་ལ་དགའ་བ་འམ། མིང་པོ་ལ་དགའ་བ་འམ། སྤུན་ལ་དགའ་བ་འམ། ཉེ་དུ་ལ་དགའ་བ་འམ། ནོར་ལ་དགའ་བ་འམ། རྒྱན་ལ་དགའ་བ་འམ། གོས་ལ་དགའ་བ་འམ། ལུས་ལ་དགའ་བ་འམ། སྲོག་ལ་དགའ་བ་འམ། གྲོང་ཁྱེར་ལ་དགའ་བ་འམ། སྐྱེ་མཆེད་ལ་དགའ་བ་མ་བསྐྱེད་ཀྱི། བྲམ་ཟེ་གཞན་དུ་ན་སངས་རྒྱས་ཉིད་རྣམ་པས་རྗེས་སུ་དྲན་ནོ། །བྲམ་ཟེ་ཁོ་མོས་ནི་གསུམ་སེམས་ལ་ཡིད་ལ་བྱ་བ་ཡིད་ལ་བྱས་ཏེ། དེ་བཞིན་གཤེགས
43-1-245a
པ་ཕྱོགས་གང་ན་བཞུགས་པ་དང ། དེ་བཞིན་གཤེགས་པས་ཆོས་གང་བཤད་པ་དེ་ཐམས་ཅད་ཁོ་མོས་ལེགས་པར་ཡོངས་སུ་བཟུང་ཞིང་ཁོ་མོས་དོན་ཏམ་ཚིག་འབྲུ་ལས་ཡི་གེ་དང་ཚིག་གཅིག་ཀྱང་ཆུད་མ་ཟོས་པར་བྱས་སོ། །དེ་བཞིན་གཤེགས་པ་དགེ་ སློང་གི་དགེ་འདུན་གྱིས་ཡོངས་སུ་བསྐོར་བ་ཁོ་མོས་ནམ་ཡང་ཡིད་ལ་མ་བྱས་པར་མ་གྱུར་ཏོ། །ཁོ་མོས་ཉིན་མཚན་གང་དུ་ཡང་སངས་རྒྱས་མ་མཐོང་བ་དང ། ཆོས་མ་ཐོས་པ་དང ། དགེ་འདུན་ལ་བསྙེན་བཀུར་མ་བྱས་པར་མ་གྱུར་ཏོ། །བྲམ་ཟེ་ཁོ་མོ་ནི་སངས་རྒྱས་ལ་ བལྟ་བ་དང ། ཆོས་མཉན་པ་དང ། དགེ་འདུན་ལ་བསྙེན་བཀུར་བྱ་བས་ཆོག་པ་མེད་དོ། །དེ་ནས་བྲམ་ཟེ་ཚངས་པའི་ལྷས་བྲམ་ཟེའི་ཁྱེའུ་ཞིག་ལ་སྨྲས་པ། བྲམ་ཟེའི་ཁྱེའུ་ཁྱོད་སོང་ལ་ལོ་རྒྱུས་འདི་རྒྱལ་པོ་དང་བཙུན་མོ་ལ་གསོལ་ཅིག་།དེ་ནས་བྲམ་ཟེའི་ཁྱེའུ་དེ་རིངས་ པའི་ཚུལ་དུ་སོང་སྟེ་ཇི་ལྟར་མཐོང་བའི་ལོ་རྒྱུས་ཐམས་ཅད་རྒྱལ་པོ་དང་བཙུན་མོ་ལ་གསོལ་ཏོ། །བུ་མོ་དྲི་མ་མེད་ཀྱིས་བྱིན་པས་ཀྱང་ཇི་ལྟར་བྲམ་ཟེ་ཚངས་པའི་ལྷ་ལ་སོགས་པ་བྲམ་ཟེ་ལྔ་བརྒྱ་པོ་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ དེ་ལྟར་སངས་རྒྱས་ཀྱི་བསྔགས་པ་བརྗོད། ཆོས་དང་དགེ་འདུན་གྱི་བསྔགས་པ་བརྗོད་དོ། །དེ་ནས་བུ་མོ་དྲི་མ་མེད་ཀྱིས་བྱིན་པ་ཤིང་རྟ་ལས་བབས་ནས་བྲམ་ཟེ་དེ་དག་དང་ལྷན་ཅིག་ཏུ་བྱང་ཆུབ་སེམས་དཔའ་དེ་དག་དང ། ཉན་ཐོས་ཆེན་པོ་དེ་དག་ག་ལ་བ་ དེར་སོང་སྟེ་ཕྱིན་ནས་དེ་དག་གི་རྐང་པ་ལ་མགོ་བོས་ཕྱག་འཚལ་ཏེ། གུས་པ་དང་བཅས། རྗེ་ས་དང་བཅས་པར་ཚེ་དང་ལྡན་པ་ཤཱ་རིའི་བུའི་མདུན་དུ་འདུག་ནས་ཚེ་དང་ལྡན་པ་ཤཱ་རིའི་བུ་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་ སོ། །བཙུན་པ་ཤཱ་རིའི་བུ་བུད་མེད་ནི་ཤེས་རབ་སོར་གཉིས་པ། ཉོན་མོངས་པ་དྲག་པ། བག་མེད་པ་མང་བ། དམན་པ་ལ་མོས་པ། ཚུལ་བཞིན་མ་ལགས་པ་ཡིད་ལ་བགྱིད་པའི་དབང་དུ་མཆིས་པ་ལགས་ན། བདག་ལ་ཐུགས་བརྩེ་བ་ཉེ་བར་བཟུང་སྟེ་ཅི་ནས་བདག་གི་ཡུན
43-1-245b
པོའི་དོན་དང་སྨན་པ་དང་བདེ་བར་འགྱུར་བའི་སླད་དུ་བཙུན་པས་དེ་ལྟར་བདག་ལ་ཆོས་ལེགས་པར་བསྟན་དུ་གསོལ། ཀོ་ས་ལའི་རྒྱལ་པོ་གསལ་རྒྱལ་གྱིས་གཏམ་བྱུང་བ་འདི་དང ། བྲམ་ཟེའི་ཚིག་ཐོས་ནས་མྱུར་བའི་ཚུལ་གྱིས་ཕྱོགས་དེར་ཕྱིན་ཏེ། དེས་ཉན་ཐོས་དེ་དག་དང་ བྱང་ཆུབ་སེམས་དཔའ་དེ་དག་ལ་ཕྱག་བྱས་ནས་རང་གི་བུ་མོ་ལ་འདི་སྐད་ཅེས་སྨྲས་སོ། །བུ་མོ་ཁྱོད་ན་རེ་ཁོ་མོ་ནམ་ཡང་རྨུགས་པ་དང་གཉིད་ཀྱིས་ནོན་པར་མ་གྱུར་ཏོ། །ནམ་ཡང་དགའ་བ་དང་རྩེ་བ་དང་ལྡན་པའི་སེམས་མ་བསྐྱེད་དོ་ཞེས་ཟེར་བ་དེ་ལྟར་ཁྱོད་བདེ་བ་དང་ཡིད་བདེ་ བ་ལ་བརྩོན་ནམ། འོན་ཏེ་འདི་ལྟར་ཡིད་བྱུང་བའི་ཚུལ་གྱིས་སྨྲ། དེ་ནས་རྒྱལ་པོ་གསལ་རྒྱལ་གྱིས་རང་གི་བུ་མོ་ལ་ཚིགས་སུ་བཅད་དེ་སྨྲས་པ། ཁྱོད་ཀྱི་གཟུགས་བྱང་ལྷ་ཡི་བུ་མོ་མཚུངས་ཤིང་འདྲ། །རྒྱན་རྣམས་ཀྱིས་ནི་དེ་ཉིད་ཆས་པའི་ཆ་བྱད་འཛིན། །ཇི་ལྟར་ཁྱོད་ནི་ ནམ་ཡང་གཉིད་ཀྱིས་མ་ནོན་པ། །ཅི་ཕྱིར་བུ་མོ་ཁྱོད་ནི་འདི་འདྲའི་ཡིད་བྱུང་གྱུར། །ཁྱེད་ཀྱི་རྒྱལ་སྲིད་རྒྱས་ཤིང་ཤིན་ཏུ་ལེགས་པར་འབྱོར། །མ་ནི་རྟག་ཏུ་ཁྱོད་ཀྱིས་དབང་དུ་གྱུར་པ་ཡིན། །བུ་མོ་དགའ་བ་དེ་ལས་ཅི་འདྲ་གཞན་ཡོད་ན། །དེ་ཡིས་ཁྱོད་ཀྱི་ལུས་ནི་དགའ་བ་ རྙེད་མ་གྱུར། །སྡུག་ཅིང་ཕངས་ལ་ཡིད་དུ་འོང་བ་སྟེ། །སྐྱེ་བོ་ཀུན་ལ་དགའ་བ་སྐྱེད་ཡིན་ན། །ཡོན་ཏན་བརྒྱ་ཕྲག་དུ་མས་བརྒྱན་པ་ཁྱོད། །ཅི་ཡི་ཕྱིར་ན་ཁྱིམ་འདིར་དགའ་བ་མེད། །བུ་མོ་ཁྱོད་ཀྱིས་ཅི་ཞིག་ཐོས་གྱུར་ཅིང ། །ཅི་ཞིག་མཐོང་ན་འདི་ལྟར་ཡིད་མི་བདེ། །ཡོངས་ སུ་ཉམས་ཤིང་ཡིད་བྱུང་སེམས་སུ་གྱུར། །ཁྱོད་ཀྱི་འདོད་པ་ཅི་འདྲ་ང་ལ་སྨྲོས། །དེ་ནས་བུ་མོ་དྲི་མ་མེད་ཀྱིས་བྱིན་པས་རང་གི་ཕ་རྒྱལ་པོ་གསལ་རྒྱལ་ལ་ཚིགས་སུ་བཅད་དེ་སྨྲས་པ། ཡབ་ཅིག་ཕུང་པོ་ཉེས་དམིགས་སྣོད་རྣམས་དང ། །ཁྱིམ་གྱི་སྐྱོན་རྣམས་ཐུགས་སུ་མ་ཆུད་དམ། ། འཁོར་བའི་གནས་ནི་གར་ལ་ལྟ་དང་མཚུངས། །འཚོ་བའི་འཇིག་རྟེན་མི་གནས་འཇིག་པ་ཅན། །སྦྲུལ་གདུག་ནང་ན་གནས་པའི་ཁྱིམ་འདི་ལ། །གཉིད་དང་འདོད་པའི་འདུན་པ་ག་ལ་མཆིས། །ཁམས་འདི་དག་ནི་གདུག་པའི་སྦྲུལ་བཞི་སྟེ། །སྲིད་པ་སེམས་པ་བདེ་བ་ག་ལ
43-1-246a
མཆིས། །མི་མཛའ་ཚོགས་ཀྱིས་རབ་ཏུ་གཙེས་གྱུར་ཅིང ། །དགོན་པར་ཕྱིན་ལ་དགའ་བ་ག་ལ་མཆིས། །ཀུན་ནས་ཉོན་མོངས་དགྲ་ཡིས་ཡོངས་བསྐོར་བ། །ཇི་ལྟར་བདེ་འཐོབ་རྒྱལ་པོ་བཀའ་སྩོལ་ཅིག་།དུག་འཐུངས་པ་ལ་བདེ་བ་ག་ལ་མཆིས། །གསད་ པར་བཀྲི་ལ་དགའ་བ་ག་ལ་མཆིས། ། གཡངས་ཆེན་འདིར་སུ་ཞིག་ཡིད་རྟོན་བགྱིད། །རྒྱལ་པོ་འཚོ་བའི་འཇིག་རྟེན་དེ་དང་མཚུངས། །བློ་ངན་དག་གིས་ལུས་རྣམས་བོར་བ་ནི། །རི་རབ་ཙམ་གྱི་ཕུང་པོར་གྱུར་ཏོ་ཞེས། །དེ་བཞིན་གཤེགས་པས་དཔེ་ནི་བཀའ་སྩལ་ན། ། འདུས་བྱས་སླུ་བའི་ཆོས་ལ་སུ་ཡིད་རྟོན། །ཕ་དང་མ་དང་སྡུག་དང་མིང་པོ་དང ། །བུ་དང་རྩ་ལག་གཉེན་ཚོགས་འགྲོ་བ་ཀུན། །འདུས་བྱས་ཐམས་ཅད་མེ་ལོང་གཟུགས་བརྙན་འདྲ། །འདི་འདྲའི་མི་སྡུག་གང་ལ་སུ་ཡིད་རྟོན། །གང་ཚེ་བདག་གིས་རང་བྱུང་རྒྱལ་བ་མཐོང ། ། དེ་ཚེ་སངས་རྒྱས་འགྱུར་སྙམ་སེམས་ཀྱང་སྐྱེ། །བྱང་ཆུབ་སེམས་དཔའ་བག་མེད་འགྱུར་བ་ནི། །ཡབ་ཅིག་བདག་གིས་མ་ཐོས་མ་མཐོང་ངོ ། །བདག་ནི་མཚན་རྫོགས་རྒྱལ་བ་བལྟ་འཚལ་གྱུར། །བདེ་བར་གཤེགས་པས་གསུངས་པའི་ཆོས་ཀྱང་ཐོས། །རྒྱལ་བ་རྒྱལ་ བའི་སྲས་པོ་འདི་དག་མཐོང ། །ཡབ་ཅིག་ཇི་ལྟར་འདོད་པ་བསྟེན་པར་བགྱི། །དེ་ནས་རྒྱལ་པོ་གསལ་རྒྱལ་བུ་མོའི་ཚིག་འདི་ཐོས་ནས་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་རང་གི་ཕ་ཅང་མི་སྨྲ་བར་གྱུར་པར་རིག་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ ཅེས་སྨྲས་སོ། །བཙུན་པ་ཤཱ་རིའི་བུ་ཁྱོད་ལ་ཞུ་བ་ཞུས་ཐུགས་བརྩེ་བར་དགོངས་ཏེ་ལན་གདབ་ཏུ་གསོལ། འདི་ལྟར་བཙུན་པ་ཤཱ་རིའི་བུ་ནི་བཅོམ་ལྡན་འདས་ཀྱིས་ཤེས་རབ་དང་ལྡན་པ་རྣམས་ཀྱི་མཆོག་ཏུ་བསྟན་པ་ལགས་ན། ཅི་ཤེས་རབ་དེ་འདུས་བྱས་ལགས་སམ་ འོན་ཏེ་འདུས་མ་བྱས་ལགས། དེ་གལ་ཏེ་འདུས་བྱས་ལགས་ན་དེ་བཞིན་གཤེགས་པས་འདུས་བྱས་ཐམས་ཅད་ནི་བརྫུན་པ་སླུ་བའི་ཆོས་ཅན་ཡིན་ནོ་ཞེས་བཀའ་སྩལ་ཏོ། །ཅི་སྟེ་འདུས་མ་བྱས་ལགས་ན། འདུས་མ་བྱས་ལ་ནི་སྐྱེ་བ་མ་མཆིས་སོ། །གང་ལ་སྐྱེ་བ་མ
43-1-246b
མཆིས་པ་དེ་ལ་ནི་ཕྲད་པ་མ་མཆིས་ན། ཕྲད་པ་མ་མཆིས་པའི་ཤེས་རབ་ཀྱིས་ཇི་ལྟར་བཙུན་པ་ཤཱ་རིའི་བུ་ཤེས་རབ་ཆེན་པོ་ཞེས་བགྱི། དེ་ནས་ཚེ་དང་ལྡན་པ་ཤཱ་རིའི་བུ་ཅང་མི་སྨྲ་བར་གྱུར་ཏོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་ཚེ་དང་ལྡན་པ་ཤཱ་རིའི་བུ་ལ་འདི་ སྐད་ཅེས་སྨྲས་སོ། །ཤཱ་རིའི་བུ་བུ་མོས་དྲིས་པའི་ལན་ཐོབ་ཅིག་།ཤཱ་རིའི་བུས་སྨྲས་པ། བུ་མོ་ནི་འདུས་བྱས་མི་འདྲིའི། བུ་མོས་ནི་སྐྱེ་བ་མེད་པ་དྲིས་ཏེ། དེ་ནི་ལན་གདབ་པར་མི་ནུས་སོ། །དེ་ནས་བུ་མོ་དྲི་མ་མེད་ཀྱིས་བྱིན་པས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ ཅེས་སྨྲས་སོ། །འདི་ལྟར་བཙུན་པ་མཽད་གལ་གྱི་བུ་ཆེན་པོ་ཁྱོད་ནི་བཅོམ་ལྡན་འདས་ཀྱིས་རྫུ་འཕྲུལ་དང་ལྡན་པ་རྣམས་ཀྱི་མཆོག་ཏུ་བསྟན་པ་ལགས་ན། ཅི་ཚེ་དང་ལྡན་པ་སེམས་ཅན་དུ་འདུ་ཤེས་པ་ལ་གནས་ཏེ་རྫུ་འཕྲུལ་སྟོན་ཏམ། འོན་ཏེ་ཆོས་སུ་འདུ་ཤེས་པ་ལ་གནས་ཏེ་རྫུ་ འཕྲུལ་སྟོན། །གལ་ཏེ་སེམས་ཅན་དུ་འདུ་ཤེས་པ་ལ་གནས་ཏེ་སྟོན་ན་སེམས་ཅན་ནི་མ་མཆིས་པ་སྟེ། དེ་ལྟ་བས་ན་རྫུ་འཕྲུལ་དེ་ཡང་མ་མཆིས་པར་འགྱུར་རོ། །ཅི་སྟེ་ཆོས་སུ་འདུ་ཤེས་པ་ལ་གནས་ཏེ་སྟོན་ན་ཆོས་ཉིད་ནི་འགྱུར་བ་མ་མཆིས་པའོ། །འགྱུར་བ་མ་མཆིས་པ་ གང་ལགས་པ་དེ་ལ་ནི་རྣམ་པར་རྟོག་པ་མ་མཆིས་ན་རྣམ་པར་མི་རྟོག་པས་ཇི་ལྟར་ཚེ་དང་ལྡན་པའི་རྫུ་འཕྲུལ་འབྱོར་པར་གྱུར། ཚེ་དང་ལྡན་པ་མཽད་གལ་གྱི་བུ་ཆེན་པོ་ཡང་ཅང་མི་སྨྲ་བར་གྱུར་ཏོ། །དེ་ནས་བྱམས་མའི་བུ་གང་པོས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་འདི་སྐད་ཅེས་ སྨྲས་སོ། །མཽད་གལ་གྱི་བུ་ཆེན་པོ་བུ་མོས་དྲིས་པའི་ལན་ཐོབ་ཅིག་།མཽད་གལ་གྱི་བུས་སྨྲས་པ། བུ་མོ་ནི་འགྱུར་བ་མི་འདྲིའི། །བུ་མོས་ནི་འགྱུར་བ་མེད་པ་དྲིས་ཏེ། འགྱུར་བ་མེད་པ་དང་རྣམ་པར་མི་རྟོག་པ་ནི་དེ་བཞིན་གཤེགས་པ་རྣམས་ཀྱི་བྱང་ཆུབ་ཡིན་པས་དེ་ནི་ལན་ གདབ་པར་མི་ནུས་སོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྱམས་མའི་བུ་གང་པོ་ལ་འདི་སྐད་ཅེས་སྨྲས་སོ། །འདི་ལྟར་ཚེ་དང་ལྡན་པ་གང་པོ་ནི་བཅོམ་ལྡན་འདས་ཀྱིས་ཆོས་སྨྲ་བ་རྣམས་ཀྱི་མཆོག་ཏུ་བསྟན་པ་ལགས་ན། ཅི་ཚེ་དང་ལྡན་པ་དམིགས་པ་དང་བཅས་པའི་ཆོས
43-1-247a
སྟོན་ཏམ། འོན་ཏེ་དམིགས་པ་མ་མཆིས་པའི་ཆོས་སྟོན། གལ་ཏེ་དམིགས་པ་དང་བཅས་པའི་ཆོས་སྟོན་ན་ནི་ཁྱོད་བྱིས་པ་སོ་སོའི་སྐྱེ་བོ་རྣམས་དང་མཚུངས་སོ། །དེ་ཅིའི་སླད་དུ་ཞེ་ན། བྱིས་པ་སོ་སོའི་སྐྱེ་བོ་ཐམས་ཅད་ནི་དམིགས་པ་དང་བཅས་པའི་སླད་དུ་ སྟེ། དེ་ལྟ་བས་ན་བཙུན་པ་ཡང་བྱིས་པ་སོ་སོའི་སྐྱེ་བོ་ཐམས་ཅད་ཀྱི་ཆོས་རྣམས་དང་མ་བྲལ་བ་ལགས་སོ། །ཅི་སྟེ་དམིགས་པ་མ་མཆིས་པའི་ཆོས་སྟོན་ན་ནི་ཆོས་སྨྲ་བ་ཉིད་དངོས་པོ་མ་མཆིས་པར་འགྱུར་ཏེ་མི་འཐད་དོ། །དེ་ནས་ཚེ་དང་ལྡན་པ་གང་པོ་ཡང་ཅང་མི་སྨྲ་བར་ གྱུར་ཏོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་གང་པོ་ལ་འདི་སྐད་ཅེས་སྨྲས་སོ། །གང་པོ་བུ་མོས་དྲིས་པའི་ལན་ཐོབ་ཅིག་།ཚེ་དང་ལྡན་པ་གང་པོས་སྨྲས་པ། བུ་མོ་ནི་ཀུན་རྫོབ་མི་འདྲིའི། བུ་མོ་ནི་དོན་དམ་པ་དྲིས་ཏེ། དེ་ནི་ལན་གདབ་པར་མི་ནུས་སོ། །དེ་ནས་བུ་མོ་དྲི་ མ་མེད་ཀྱིས་བྱིན་པས་ཚེ་དང་ལྡན་པ་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །འདི་ལྟར་བཙུན་པ་འོད་སྲུང་ཆེན་པོ་ནི་རྣམ་པར་ཐར་པ་བརྒྱད་ལ་སྙོམས་པར་ཞུགས་ནས་ལངས་ཏེ་གཞན་དག་ལ་ཆོས་སྟོན་ཅིང་གང་དག་ལས་ཐ་ན་གཟར་བུ་གང་ཙམ་གྱི་བསོད་སྙོམས་ཡོངས་སུ་ བླངས་པ་དེ་དག་ཐམས་ཅད་མཐོ་རིས་སུ་འགྲོ་བར་འགྱུར་རོ་ཞེ་ན། དེ་ཅི་བཙུན་པས་ལུས་ཀྱིས་སྦྱིན་པ་སྦྱོང་ངམ། འོན་ཏེ་སེམས་ཀྱིས་སྦྱིན་པ་སྦྱོང ། གལ་ཏེ་ལུས་ཀྱིས་སྦྱོང་ན་ལུས་ནི་བེམས་པོ་གཡོ་བ་མ་མཆིས་པ་བྱེད་པ་མ་མཆིས་པ་སྟེ། རྩཝ་དང ། ཤིང་དང ། རྩིག་ པའི་ཆོས་ལྟ་བུ་མིག་ཡོར་དང་མཚུངས་པས་དེས་ཀྱང་སྦྱོང་བར་མི་ནུས་སོ། །ཅི་སྟེ་སེམས་ཀྱིས་སྦྱོང་ན་སེམས་ནི་སྒྱུ་མ་ལྟ་བུ་གནས་པ་མ་མཆིས་པ་སྟེ། དེས་ཀྱང་སྦྱོང་བར་མི་ནུས་སོ། །ཅི་སྟེ་ལུས་དང་སེམས་ཀྱི་ཕྱི་རོལ་གྱིས་སྦྱོང་ན་དེ་ནི་མ་མཆིས་པ་སྟེ། མ་མཆིས་པས་ཇི་ ལྟར་སྦྱོང་བར་བགྱིད། དེ་ནས་ཚེ་དང་ལྡན་པ་འོད་སྲུང་ཆེན་པོ་ཡང་ཅང་མི་སྨྲ་བར་གྱུར་ཏོ། །རབ་འབྱོར་གྱིས་སྨྲས་པ། ཚེ་དང་ལྡན་པ་འོད་སྲུང་ཆེན་པོ་བུ་མོས་དྲིས་པའི་ལན་ཐོབ་ཤིག་།འོད་སྲུང་ཆེན་པོས་སྨྲས་པ། བུ་མོ་ནི་ལེན་པ་མི་འདྲིའི། བུ་མོས་ནི་ལེན་པ་མེད་པ་དྲིས
43-1-247b
ཤིང་ཡང་དག་པའི་མཐའ་འདྲི་བས་དེ་ནི་ལན་གདབ་པར་མི་ནུས་སོ། །དེ་ནས་བུ་མོ་དྲི་མ་མེད་ཀྱིས་བྱིན་པས་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །འདི་ལྟར་བཙུན་པ་རབ་འབྱོར་ནི་བཅོམ་ལྡན་འདས་ཀྱིས་ཉོན་མོངས་པ་མེད་པར་གནས་པ་རྣམས་ཀྱི་མཆོག་ཏུ་བསྟན་ པ་ལགས་ན། ཅི་ཉོན་མོངས་པ་མེད་པ་དེ་དངོས་པོས་རབ་ཏུ་ཕྱེ་བ་ལགས་སམ། འོན་ཏེ་ཆོས་ཉིད་ཀྱིས་རབ་ཏུ་ཕྱེ་བ་ལགས། གལ་ཏེ་དངོས་པོས་རབ་ཏུ་ཕྱེ་བ་ལགས་ན་ནི་འདུས་བྱས་སུ་འགྱུར་རོ། །ཅི་སྟེ་ཆོས་ཉིད་ཀྱིས་རབ་ཏུ་ཕྱེ་བ་ལགས་ན་ནི་ཆོས་ཉིད་ནི་སྐྱེ་བ་མ་མཆིས་ པའི་མཚན་ཉིད་དང ། འགག་པ་མ་མཆིས་པའི་མཚན་ཉིད་དེ། སྐྱེ་བ་མ་མཆིས་པ་དང་འགག་པ་མ་མཆིས་པའི་མཚན་ཉིད་གང་ལགས་པ་དེ་ནི་མཉམ་པ་ཉིད་དོ། །མཉམ་པ་ཉིད་གང་ལགས་པ་དེ་ནི་དེ་བཞིན་ཉིད་དོ། །དེ་བཞིན་ཉིད་གང་ལགས་པ་དེ་ནི་འགྱུར་བ་མ་ མཆིས་པའོ། །འགྱུར་བ་མ་མཆིས་པ་གང་ལགས་པ་དེ་ནི་ཐ་སྙད་མ་མཆིས་པའོ། །ཐ་སྙད་མ་མཆིས་པ་གང་ལགས་པ་དེ་ནི་བསམ་གྱིས་མི་ཁྱབ་པའོ། །བསམ་གྱིས་མི་ཁྱབ་པ་གང་ལགས་པ་དེ་ནི་བསྟན་དུ་མ་མཆིས་པའོ། །བསྟན་དུ་མ་མཆིས་པ་གང་ལགས་པ་ དེ་ནི་དངོས་པོ་མ་མཆིས་པའོ། །དངོས་པོ་མ་མཆིས་པ་གང་ལགས་པ་དེ་ནི་མ་བྱུང་བའོ། །མ་བྱུང་བ་གང་ལགས་པ་དེ་ནི་འཕགས་པ་རྣམས་མི་སྟོན་ཏོ། །དེ་ནས་ཚེ་དང་ལྡན་པ་རབ་འབྱོར་ཀྱང་ཅང་མི་སྨྲ་བར་གྱུར་ཏོ། །དེ་ནས་ཚེ་དང་ལྡན་པ་ནམ་གྲུས་ཚེ་དང་ལྡན་པ་རབ་འབྱོར་ ལ་འདི་སྐད་ཅེས་སྨྲས་སོ། །ཚེ་དང་ལྡན་པ་རབ་འབྱོར་བུ་མོས་དྲིས་པའི་ལན་ཐོབ་ཤིག་།རབ་འབྱོར་གྱིས་སྨྲས་པ། འདི་ལ་བརྗོད་དུ་ཅི་ཡང་མེད། །ཅང་མི་སྨྲ་བ་དེ་འཐོབ་བྱེད། །སྤྲོས་པ་མེད་པའི་ཆོས་འདི་དག་།བུ་མོ་ཡོངས་སུ་འདྲི་བར་བྱེད། །ཇི་སྲིད་དངོས་པོ་སྐྱེ་ ཡོད་པ། །དེ་སྲིད་སྐྱོན་གྱིས་གོས་པར་འགྱུར། །ཆོས་ཀྱི་དབྱིངས་ནི་ཐ་སྙད་མེད། །འདི་ནི་ཉོན་མོངས་མེད་པའི་ཚུལ། །དེ་ནས་བུ་མོ་དྲི་མ་མེད་ཀྱིས་བྱིན་པས་ཚེ་དང་ལྡན་པ་ནམ་གྲུ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ནམ་གྲུ་ནི་བཅོམ་ལྡན་འདས་ཀྱིས་བསམ་གཏན
43-1-248a
པ་རྣམས་ཀྱི་མཆོག་ཏུ་བསྟན་པ་ལགས་ན། ཅི་སེམས་ལ་གནས་ཏེ་བསམ་གཏན་མཛད་དམ། འོན་ཏེ་སེམས་མ་མཆིས་པ་ལ་གནས་ཏེ་བསམ་གཏན་མཛད། གལ་ཏེ་སེམས་ལ་གནས་ཏེ་བསམ་གཏན་མཛད་ན་སེམས་ནི་བརྗོད་དུ་མ་མཆིས་ཤིང་སྒྱུ་ མ་ལྟ་བུ་སྟེ། ཡང་དག་པ་མ་ཡིན་པ་ཀུན་བརྟགས་པ་ལགས་ན། ཅི་ཡང་དག་པ་མ་ཡིན་པ་ཀུན་བརྟགས་པ་མ་མཆིས་པ་ལ་གནས་ཏེ་བསམ་གཏན་མཛད་དམ། ཅི་སྟེ་སེམས་མ་མཆིས་པ་ལ་གནས་ཏེ་བསམ་གཏན་མཛད་ན་ནི་རྩཝ་དང ། ཤིང་དང ། རྩིག་པ་དང ། རྡོ་ལ་སོགས་པ་བྱུང་བ་དང་ཞིག་པ་དེ་དག་ཐམས་ཅད་ཀྱང་ཏིང་ངེ་འཛིན་དུ་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་དེ་དག་ནི་སེམས་མ་མཆིས་པའི་སླད་དུའོ། །ཚེ་དང་ལྡན་པ་ནམ་གྲུ་ཡང་ཅང་མི་སྨྲ་བར་གྱུར་ཏོ། །དེ་ནས་ཚེ་དང་ལྡན་པ་མ་འགགས་པས་ཚེ་དང་ལྡན་པ་ནམ་གྲུ་ ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ནམ་གྲུ་བུ་མོས་དྲིས་པའི་ལན་ཐོབ་ཤིག་།ནམ་གྲུས་སྨྲས་པ། བུ་མོ་ནི་དེ་བཞིན་གཤེགས་པའི་ཡུལ་ཡོངས་སུ་འདྲི་སྟེ། དེ་ནི་ཉན་ཐོས་རྣམས་ཀྱིས་བསྟན་པར་མི་ནུས་སོ། །བུ་མོས་སྨྲས་པ། ཚེ་དང་ལྡན་པ་ནམ་གྲུ་ཆོས་ ཀྱི་དབྱིངས་དེ་བཞིན་གཤེགས་པ་རྣམས་ཀྱི་ཡང་གཞན་ལ། ཉན་ཐོས་རྣམས་ཀྱི་ཡང་གཞན་ལགས་སམ། གལ་ཏེ་ཆོས་ཀྱི་དབྱིངས་གཞན་ལགས་ན་ནི་ཐ་དད་དུ་འགྱུར་རོ། །དེ་བཞིན་ཉིད་ནི་གཉིས་སུ་མ་མཆིས་ཏེ། དེ་བས་ན་དེ་བཞིན་ཉིད་དང་གཉིས་ནི་བྱེ་བྲག་མ་ མཆིས་ན་ཅིའི་སླད་དུ་ཚེ་དང་ལྡན་པ་ནམ་གྲུ་དེ་སྐད་གསུང་ནམ་གྲུ་ཡང་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་ཚེ་དང་ལྡན་པ་མ་འགགས་པ་ལ་འདི་སྐད་ཅེས་སྨྲས་སོ། །འདི་ལྟར་ཚེ་དང་ལྡན་པ་མ་འགགས་པ་ནི་བཅོམ་ལྡན་འདས་ཀྱིས་ལྷའི་མིག་ཅན་རྣམས་ ཀྱི་མཆོག་ཏུ་བསྟན་པ་ལགས་ན་ལྷའི་མིག་གིས་དངོས་པོ་གཟིགས་སམ། འོན་ཏེ་དངོས་པོ་མ་མཆིས་པ་གཟིགས། གལ་ཏེ་དངོས་པོ་གཟིགས་ན་ནི་རྟག་པར་ལྟ་བར་འགྱུར་རོ། །ཅི་སྟེ་དངོས་པོ་མ་མཆིས་པ་གཟིགས་ན་ནི་ཆད་པར་ལྟ་བར་འགྱུར་ཏེ། དེ་ཡང་མི་རིགས
43-1-248b
སོ། །མ་འགགས་པ་ཡང་ཅང་མི་སྨྲ་བར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཚེ་དང་ལྡན་པ་མ་འགགས་པ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་མ་འགགས་པ་བུ་མོས་དྲིས་པའི་ལན་ཐོབ་ཤིག་།ཚེ་དང་ལྡན་པ་མ་འགགས་པས་སྨྲས་པ། བུ་མོས་ ནི་ཤེས་རབ་ཀུན་ཏུ་འཇོམ་པ་དྲིས་པས་དེ་ནི་ལན་གདབ་པར་མི་ནུས་སོ། །དེ་ནས་བུ་མོ་དྲི་མ་མེད་ཀྱིས་བྱིན་པས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །འདི་ལྟར་ཚེ་དང་ལྡན་པ་ཀུན་དགའ་བོ་ཁྱོད་ནི་བཅོམ་ལྡན་འདས་ཀྱིས་མང་དུ་ཐོས་པ་རྣམས་ཀྱི་མཆོག་ཏུ་ བསྟན་པ་ལགས་ན། ཅི་མང་དུ་ཐོས་པ་ཉིད་དེ་དོན་དུ་བལྟ་འམ། འོན་ཏེ་ཚིག་འབྲུར་བལྟ། གལ་ཏེ་དོན་དུ་བལྟ་ན་དོན་ནི་བརྗོད་དུ་མ་མཆིས་ཤིང་བསྙད་དུ་མ་མཆིས་པ་སྟེ། དེ་ནི་རྣ་བའི་རྣམ་པར་ཤེས་པས་ཤེས་པར་བགྱི་བ་མ་ལགས་པ་ནས་ཡིད་ཀྱི་རྣམ་པར་ཤེས་པའི་ བར་གྱིས་ཤེས་པར་བགྱི་བ་མ་ལགས་པ་སྟེ། རྣམ་པ་དེ་ལྟ་བུ་གང་ལགས་པ་དེ་ནི་བསྟན་དུ་མ་མཆིས་པའོ། །ཅི་སྟེ་ཚིག་འབྲུར་བལྟ་ན་ནི་བཅོམ་ལྡན་འདས་ཀྱིས་དོན་ལ་རྟོན་པ་ཡིན་གྱི་ཚིག་འབྲུར་རྟོན་པ་མ་ཡིན་ནོ་ཞེས་གསུངས་པས་དེ་བས་ན་ཚེ་དང་ལྡན་པ་ཀུན་དགའ་ བོའི་མང་དུ་ཐོས་པ་ཉིད་ནི་རྟོན་པ་མ་ལགས་སོ། །དེ་ནས་ཚེ་དང་ལྡན་པ་ཀུན་དགའ་བོ་ཡང་ཅང་མི་སྨྲ་བར་གྱུར་ཏོ། །དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཀུན་དགའ་བོ་བུ་མོས་དྲིས་པའི་ལན་ཐོབ་ ཤིག་།ཀུན་དགའ་བོས་སྨྲས་པ། བུ་མོ་ནི་ཡི་གེ་དང་བྲལ་བ་འདྲི་སྟེ། དེ་ནི་སྒྲས་ཚིམ་པར་བྱེད་པར་མི་ནུས་སོ། །བུ་མོ་ནི་སེམས་དང་བྲལ་བའི་མཉམ་པ་ཉིད་འདྲི་སྟེ། སློབ་པ་རྣམས་ཀྱི་ས་མ་ཡིན་ན་དེ་ཇི་ལྟར་བསྟན་པར་བྱ་སྟེ། ཆོས་ཀྱི་མངའ་བདག་དེ་བཞིན་གཤེགས་ པ་ལ་ཞུ་དགོས་པའོ། །དེ་ནས་བུ་མོ་དྲི་མ་མེད་ཀྱིས་བྱིན་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ་ཁྱོད་ནི་དེ་བཞིན་གཤེགས་པས་ཟབ་མོ་ལ་མོས་པའི་བྱང་ཆུབ་སེམས་དཔའ་རྣམས་ཀྱི་མཆོག་ཏུ་བསྟན་པ་ལགས་ན། ཅི་རྟེན་ཅིང་འབྲེལ
43-1-249a
བར་འབྱུང་བ་ཟབ་པས་ཁྱོད་ཟབ་བམ། འོན་ཏེ་ངོ་བོ་ཉིད་ཟབ་པས་ཟབ། གལ་ཏེ་རྟེན་ཅིང་འབྲེལ་པར་འབྱུང་བ་ཟབ་པས་ཁྱོད་ཟབ་ན་ནི་རྟེན་ཅིང་འབྲེལ་བར་འབྱུང་བ་དང་ལྡན་པའི་ཆོས་གང་ཡང་མ་མཆིས་སོ། །དེ་ཅིའི་སླད་དུ་ཞེ་ན། འདི་ལྟར་རྟེན་ཅིང་ འབྲེལ་བར་འབྱུང་བ་ནི་སོང་བ་མ་ལགས། འོང་བ་མ་ལགས་ཏེ། རྟེན་ཅིང་འབྲེལ་བར་འབྱུང་བ་ནི་མིག་གི་རྣམ་པར་ཤེས་པས་ཤེས་པར་བགྱི་བ་མ་ལགས་པ་ནས་ཡིད་ཀྱི་རྣམ་པར་ཤེས་པའི་བར་གྱིས་ཤེས་པར་བགྱི་བ་མ་ལགས་ཤིང་གཉིས་སུ་མ་མཆིས་ལ་ཀུན་ཏུ་འབྱུང་ བ་མ་མཆིས་པའི་སླད་དུའོ། །ཅི་སྟེ་ངོ་བོ་ཉིད་ཟབ་པས་ཟབ་ན་ནི་ངོ་བོ་ཉིད་གང་ཡང་སུས་ཀྱང་བརྟག་པར་མི་ནུས་སོ། །འཇམ་དཔལ་གྱིས་སྨྲས་པ། བུ་མོ་ཡང་དག་པའི་མཐའ་ཟབ་པས་ཁོ་བོ་ཟབ་བོ། །བུ་མོ་དྲི་མ་མེད་ཀྱིས་བྱིན་པས་སྨྲས་པ། འཇམ་དཔལ་ཡང་ དག་པའི་མཐའ་ནི་མཐའ་མ་ལགས་ཏེ། དེའི་སླད་དུ་རྣམ་པར་ཤེས་པས་འཚལ་བ་མ་ལགས་སོ། །འཇམ་དཔལ་གྱིས་སྨྲས་པ། བུ་མོ་ཡང་དག་པའི་མཐའ་ཞེས་བྱ་བ་འདི་ནི་དམིགས་སུ་མེད་པའི་ཚིག་བླ་དགས་སོ། །བུ་མོ་དྲི་མ་མེད་ཀྱིས་བྱིན་པས་སྨྲས་པ། འཇམ་དཔལ་དམིགས་སུ་མ་མཆིས་པ་ནི་གང་གི་ཚིག་བླ་དགས་ཀྱང་མ་ལགས་ཏེ། དམིགས་སུ་མ་མཆིས་པ་ནི་ཚིག་བླ་དགས་ལས་ཡང་དག་པར་འདས་པ་ལགས་སོ། །འཇམ་དཔལ་གྱིས་སྨྲས་པ། བུ་མོ་འདི་ཇི་ལྟར་གཞན་དག་ལ་བསྟན་པར་བྱ། བུ་མོས་སྨྲས་ པ། འཇམ་དཔལ་དེ་བཞིན་གཤེགས་པ་རྣམས་ཀྱི་བྱང་ཆུབ་ནི་བསྟན་པ་ལས་ཡང་དག་པར་འདས་པ་ལགས་ཏེ། དེ་ནི་བརྗོད་པས་བསྟན་པར་མི་ནུས་སོ། །འཇམ་དཔལ་ཡང་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྱང་ཆུབ་སེམས་དཔའ་ མཐོང་བ་དོན་ཡོད་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་འདི་སྐད་དུ་ཅི་ནས་ཀྱང་གྲོང་ཁྱེར་ན་སྐྱེས་པ་འམ། བུད་མེད་དམ། ཁྱེའུ་འམ། བུ་མོ་གང་དག་ཁོ་བོའི་མིག་ལམ་ན་སྣང་བར་འགྱུར་བ་དེ་དག་ཐམས་ཅད་ཀྱིས་དེ་བཞིན་གཤེགས་པའི་གཟུགས་མཐོང་བར
43-1-249b
འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །ཞེས་གསུངས་པ་དེ་ཅི་དེ་བཞིན་གཤེགས་པ་གཟུགས་ཀྱི་སྐུར་མཐོང་བར་མཛད་དམ། འོན་ཏེ་ཆོས་ཀྱི་སྐུར་མཐོང་བར་མཛད། གལ་ཏེ་གཟུགས་ཀྱི་སྐུར་མཐོང་བར་མཛད་ན་དེ་ནི་སངས་རྒྱས་ཀྱི་བཀའ་མ་ལགས་ཏེ། བཅོམ་ལྡན་འདས་ཀྱིས་ནི་འདི་སྐད་དུ། གང་དག་ང་ལ་གཟུགས་སུ་མཐོང ། །གང་དག་ང་ལ་སྒྲར་ཤེས་པ། །འདུན་པ་འདོད་ཆགས་ལྡན་པ་སྟེ། །སྐྱེ་བོ་དེ་དག་ང་མི་མཐོང་ཞེས་གསུངས་སོ། །ཅི་སྟེ་དེ་བཞིན་གཤེགས་པ་ཆོས་ཀྱི་སྐུར་མཐོང་བར་མཛད་ན་ཆོས་ཀྱི་སྐུ་ནི་བསྟན་ དུ་མི་ནུས་པའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པ་རྣམས་ཀྱི་ཆོས་ཀྱི་སྐུ་ནི་མིག་གི་རྣམ་པར་ཤེས་པ་ལས་ཡང་དག་པར་འདས་པ་སྟེ་བལྟ་བར་མི་ནུས་པའི་སླད་དུའོ། །མཐོང་བ་དོན་ཡོད་ཀྱང་ཅང་མི་སྨྲ་བར་གྱུར་ཏོ། །བྱང་ཆུབ་སེམས་དཔའ་རིན་པོ་ཆེ་ཏོག་གིས་ སྨྲས་པ། མཐོང་བ་དོན་ཡོད་བུ་མོས་དྲིས་པའི་ལན་ཐོབ་ཤིག་།མཐོང་བ་དོན་ཡོད་ཀྱིས་སྨྲས་པ། བུ་མོ་ནི་དངོས་པོ་མེད་པ་འདྲི་སྟེ་དེ་ནི་བསྟན་པར་མི་ནུས་སོ། །བུ་མོ་དྲི་མ་མེད་ཀྱིས་བྱིན་པས་སྨྲས་པ། བདག་ནི་དངོས་པོ་འམ་དངོས་པོ་མ་མཆིས་པ་མི་འདྲིའོ། །བསྟན་པ་སློབས་ ལ་དེ་ནས་སྟོན་ཅིག་།མཐོང་བ་དོན་ཡོད་ཀྱང་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྱང་ཆུབ་སེམས་དཔའ་རིན་པོ་ཆེ་ཏོག་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་འདི་སྐད་དུ་གང་གིས་གྲོང་ཁྱེར་ན་ཁྱིམ་ཐམས་ཅད་དུ་རིན་པོ་ཆེས་གང་བའི་གཏེར་ རྣམས་འབྱུང་བར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །ཞེས་གསུངས་པ་དེ་ཅི་ཟང་ཟིང་དང་བཅས་པའི་ཕན་འདོགས་པར་མཛད་དམ། འོན་ཏེ་ཟང་ཟིང་མ་མཆིས་པས་ཕན་འདོགས་པར་མཛད། གལ་ཏེ་ཟང་ཟིང་དང་བཅས་པས་ཕན་འདོགས་ན་ནི་བྱིས་ པ་སོ་སོའི་སྐྱེ་བོའི་ཕན་འདོགས་པ་དང་བྱེ་བྲག་མ་མཆིས་པར་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་བྱིས་པ་སོ་སོའི་སྐྱེ་བོ་རྣམས་ཀྱི་དགའ་བ་ནི་ཟང་ཟིང་དང་བཅས་པའི་སླད་དུའོ། །ཅི་སྟེ་ཟང་ཟིང་མ་མཆིས་པས་ཕན་འདོགས་པར་མཛད་ན་ཟང་ཟིང་མ་མཆིས་པ་ནི་བསྒྲུབ་ཏུ་མ
43-1-250a
མཆིས་པ་ལགས་སོ། །རིན་པོ་ཆེ་ཏོག་ཀྱང་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྱང་ཆུབ་སེམས་དཔའ་ངན་སོང་སྤོང་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་འདི་སྐད་དུ་གང་གིས་གྲོང་ཁྱེར་འདི་ན་སེམས་ཅན་རྣམས་ ཀྱི་ལས་ངན་སོང་མྱོང་བར་འགྱུར་བ་གང་ཡོང་པ་དེ་ཚེ་འདི་ཉིད་ལ་ཡང་ཞིང་ཆུང་ངུ་མྱོང་བར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །ཞེས་གསུངས་པ་དེ། དེ་བཞིན་གཤེགས་པས་ལས་ནི་བསམ་གྱིས་མི་ཁྱབ་པ་ཉིད་དུ་བསྟན་པ་དེ་ནི་ཁྱོད་ཀྱིས་བསམ་པར་ མི་སྤྱོད་དོ། །གལ་ཏེ་སྤྱོད་ན་དེ་བཞིན་གཤེགས་པའི་བཀའ་དང་འགལ་བར་འགྱུར་རོ། །ཅི་སྟེ་བསམ་པར་མི་སྤྱོད་ན་མི་མཁྱེན་བཞིན་དུ་མང་པོ་མྱོང་བར་འགྱུར་བའི་ལས་ཚེ་འདི་ཉིད་ལ་ཡང་ཞིང་ཆུང་ངུ་མྱོང་བར་ཇི་ལྟར་མཛད་དེ། བདག་པོ་མ་མཆིས་པའི་ཆོས་རྣམས་ལ་བདག་ པོ་རྙེད་པར་འགྱུར་རོ། །གལ་ཏེ་དེ་ལྟར་མཛད་ན་དེ་བཞིན་གཤེགས་པའི་བཀའ་དང་འགལ་བར་འགྱུར་རོ། །ངན་སོང་སྤོང་གིས་སྨྲས་པ། ཁོ་བོས་ནི་སྨོན་ལམ་གྱི་དབང་གིས་མང་དུ་མྱོང་བར་འགྱུར་བའི་ལས་ཉུང་ངུ་མྱོང་བར་འགྱུར་བར་བྱེད་དོ། །བུ་མོས་སྨྲས་པ། རིགས་ཀྱི་ བུ་ཆོས་རྣམས་ཀྱི་ཆོས་ཉིད་ནི་སྨོན་ལམ་གྱི་དབང་གིས་བསྒྱུར་དུ་མི་ནུས་ལགས་སོ། །གལ་ཏེ་ནུས་པར་གྱུར་ན་སེམས་ཅན་ཐམས་ཅད་ཡོངས་སུ་མྱ་ངན་ལས་བཟླའོ་ཞེས་དེ་བཞིན་གཤེགས་པ་རེ་རེའི་དགོངས་པ་དེ་སྨོན་ལམ་གྱི་དབང་གིས་ཇི་ལྟར་མི་འགྲུབ་སྟེ། རྣམ་གྲངས་འདིས་ན་ སྨོན་ལམ་གྱི་དབང་གིས་བསྒྱུར་བར་མི་ནུས་པར་རིག་པར་བགྱིའོ། །ངན་སོང་སྤོང་ཡང་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་འདི་སྐད་དུ་གང་གིས་ མཉན་ཡོད་ཀྱི་གྲོང་ཁྱེར་ཆེན་པོར་སྐྱེ་བོའི་ཚོགས་ཐམས་ཅད་ཀྱི་སྒྲིབ་པ་ལྔ་པོ་དག་རྣམ་པར་སེལ་བར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ་ཞེས་གསུངས་པ་དེ་ཅི་ཏིང་ངེ་འཛིན་དེ་བདག་ལ་རག་ལས་པ་ལགས་སམ། འོན་ཏེ་གཞན་ལ་རག་ལས་པ་ལགས།
43-1-250b
གལ་ཏེ་བདག་ལ་རག་ལས་པ་ལགས་ན་ནི་མི་འཕོ་བའི་ཆོས་ཅན་ལགས་ཏེ། ཇི་ལྟར་ཁྱོད་སྙོམས་པར་ཞུགས་པས་གཞན་དག་གི་སྒྲིབ་པ་རྣམས་རབ་ཏུ་ཞི་བར་མཛད། ཅི་སྟེ་གཞན་ལ་རག་ལས་པ་ལགས་ན་ནི་ཏིང་ངེ་འཛིན་དེ་ཁྱོད་ཀྱི་མ་ལགས་སོ། །གང་ཁྱོད་ཀྱི་མ་ལགས་པ་ དེས་ནི་གཞན་ལ་ཕན་པར་མཛད་པར་མི་སྤྱོད་དོ། །བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བས་སྨྲས་པ། བུ་མོ་ཁོ་བོའི་སྦྱོར་བ་འདི་ནི་བྱམས་པ་སྔོན་དུ་འགྲོ་བའོ། །བུ་མོ་དྲི་མ་མེད་ཀྱིས་བྱིན་པས་སྨྲས་པ། རིགས་ཀྱི་བུ་སངས་རྒྱས་བཅོམ་ལྡན་འདས་ཐམས་ ཅད་ཀྱང་བྱམས་པ་ལ་གནས་ལགས་ན་སངས་རྒྱས་ཀྱི་ཞིང་རྣམས་ན་སེམས་ཅན་དག་ལ་སྒྲིབ་པ་རྣམས་ཀྱིས་གནོད་པ་ཡང་མ་མཆིས་སོ། །བྱང་ཆུབ་སེམས་དཔའ་སྒྲིབ་པ་ཐམས་ཅད་རྣམ་པར་སེལ་བ་ཡང་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྱང་ཆུབ་ སེམས་དཔའ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་འདི་སྐད་དུ་ཅི་ནས་ཀྱང་གྲོང་ཁྱེར་ན་སེམས་ཅན་གང་དག་བཅིངས་པ་དང ། གསད་པར་བཀྲི་བ་དེ་དག་ཐར་པ་དང ། འཇིགས་པས་ཉེན་པ་རྣམས་ཀྱང་འཇིགས་པ་མེད་པ་ཐོབ་པར་ འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །ཞེས་གསུངས་པ་དེ་ཅི་ཁྱོད་ཀྱི་སྦྱོར་བ་འདི་ལེན་པ་དང་བཅས་པ་ལགས་སམ། འོན་ཏེ་ལེན་པ་མ་མཆིས་པ་ལགས། གལ་ཏེ་སྦྱོར་བ་དེ་ལེན་པ་དང་བཅས་པ་ལགས་ན་ནི་བྱིས་པ་སོ་སོའི་སྐྱེ་བོ་རྣམས་ཀྱང་ལེན་པ་དང་ བཅས་པ་ལགས་ཏེ། བྱིས་པ་སོ་སོའི་སྐྱེ་བོ་རྣམས་དང་མཚུངས་པར་འགྱུར་རོ། །དེ་ལྟ་བས་ན་དེ་ཡང་མི་རིགས་སོ། །ཅི་སྟེ་སྦྱོར་བ་དེ་ལེན་པ་མ་མཆིས་པ་ལགས་ན་ནི་མངོན་པར་འདུས་མ་བྱས་པ་ལགས་ཏེ། མངོན་པར་འདུས་མ་བྱས་པ་ལ་ནི་ཉེ་བར་སྒྲུབ་པ་མ་མཆིས་སོ། །བྱང་ ཆུབ་སེམས་དཔའ་སྤྱན་རས་གཟིགས་དབང་ཕྱུག་ཀྱང་ཅང་མི་སྨྲ་བར་གྱུར་ཏོ། །དེ་ནས་བྱང་ཆུབ་སེམས་དཔའ་སྤོབས་པ་བརྩེགས་ཀྱིས་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ལ་འདི་སྐད་ཅེས་སྨྲས་སོ། །སྤྱན་རས་གཟིགས་དབང་ཕྱུག་བུ་མོས་དྲིས་པའི་ལན
43-1-251a
ཐོབ་ཤིག་།བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་སྨྲས་པ། བུ་མོ་ནི་སྐྱེ་བ་དང་འགག་པ་མི་འདྲི་སྟེ། དེ་ནི་ལན་གདབ་པར་མི་ནུས་སོ། །བུ་མོ་དྲི་མ་མེད་ཀྱིས་བྱིན་པས་སྨྲས་པ། སྤྱན་རས་གཟིགས་དབང་ཕྱུག་གང་ན་སྐྱེ་བ་མ་མཆིས་ པ་དང་འགག་པ་མ་མཆིས་པ་དེ་ནི་དྲི་བ་མ་མཆིས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གིས་སྨྲས་པ། བུ་མོ་གང་ན་སྐྱེ་བ་མེད་ཅིང་འགག་པ་མེད་པ་དེ་ནི་ཡི་གེ་འཇུག་པ་མེད་དོ། །བུ་མོས་སྨྲས་པ། འཇུག་པ་མ་མཆིས་པ་དང ། ཡི་གེ་མ་མཆིས་ པའི་ཆོས་ཐམས་ཅད་ལ་ནི་མཁས་པ་དག་ཡི་གེ་དང་འཇུག་པ་མི་སྟོན་ཏེ། ཡི་གེ་རྣམས་ལ་མི་ཆགས་སོ། །ཆགས་པ་མ་མཆིས་པ་ནི་ཆོས་ཀྱི་དབྱིངས་ཏེ། དེ་ལ་ནི་རྟོགས་པར་བགྱི་བའི་སླད་དུ་ཆགས་པ་མ་མཆིས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ ཕྱུག་ཀྱང་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྱང་ཆུབ་སེམས་དཔའ་སྤོབས་པ་བརྩེགས་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་འདི་སྐད་དུ་གང་གིས་གྲོང་ཁྱེར་ན་སྐྱེ་བོའི་ཚོགས་ཐམས་ཅད་ཕན་ཚུན་ཚིགས་སུ་བཅད་པའི་དབྱངས་དང ། བྱམས་པའི་སེམས་ཀྱིས་སྨྲ་བར་འགྱུར་བ་དང ། སྤོབས་པ་ཡང་ཐོབ་པར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ། །ཞེས་གསུངས་པའི་ཁྱོད་ཀྱི་སྤོབས་པ་ཉེ་བར་སྒྲུབ་པ་གང་ལགས་པ་དེ་ཅི་རྣམ་པར་རྟོག་པས་བསྐྱེད་པ་ལགས་སམ། འོན་ཏེ་རྒྱུ་མ་མཆིས་ པ་ལས་བྱུང་བ་ལགས།གལ་ཏེ་རྣམ་པར་རྟོག་པས་བསྐྱེད་པ་ལགས་ན་ནི་འདུས་བྱས་ཐམས་ཅད་ཀྱང་རྣམ་པར་རྟོག་པས་བསྐྱེད་པ་ལགས་ཏེ། དེ་ལྟ་བས་ན་རྣམ་པར་ཞི་བར་མི་འགྱུར་རོ། །ཅི་སྟེ་རྒྱུ་མ་མཆིས་པ་ལས་བྱུང་བ་ལགས་ན་ནི་མ་བྱུང་བ་ལ་སྒྲོ་འདོགས་པར་འགྱུར་ རོ། །བྱང་ཆུབ་སེམས་དཔའ་སྤོབས་པ་བརྩེགས་ཀྱིས་སྨྲས་པ། བུ་མོ་སེམས་ཅན་གང་དག་ཁོ་བོའི་མིག་ལམ་ན་སྣང་བར་འགྱུར་བ་དེ་དག་ཐམས་ཅད་སྤོབས་པ་ཐོབ་པར་གྱུར་ཅིག་ཅེས་བྱ་བའི་ཁོ་བོའི་སྨོན་ལམ་འདི་ནི་དང་པོ་སེམས་བསྐྱེད་པ་ནས་བཟུང་སྟེ་བཏབ་བོ། །བུ་མོ་དྲི་མ
43-1-251b
མེད་ཀྱིས་བྱིན་པས་སྨྲས་པ། རིགས་ཀྱི་བུ་སེམས་བསྐྱེད་པ་གང་གིས་སྨོན་ལམ་བཏབ་པའི་སེམས་བསྐྱེད་པ་དེ་མཆིས་སམ། འོན་ཏེ་མ་མཆིས། གལ་ཏེ་མཆིས་ན་ནི་རྟག་པར་ལྟ་བ་ལགས་སོ། །ཅི་སྟེ་མ་མཆིས་ན་ནི་ཆད་པར་ལྟ་བ་ལགས་ཏེ། དེ་གསུང་ན་ནི་ཁྱོད་ཀྱི་ གསུང་བ་ལོག་པ་ལགས་སོ། །བྱང་ཆུབ་སེམས་དཔའ་སྤོབས་པ་བརྩེགས་ཀྱང་ཅང་མི་སྨྲ་བར་གྱུར་ཏོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བྱང་ཆུབ་སེམས་དཔའ་གོམ་པ་འདོར་བ་དོན་ཡོད་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་ཀྱིས་འདི་སྐད་དུ་ཅི་ནས་ཀྱང་གྲོང་ཁྱེར་ ན་སེམས་ཅན་གང་དག་ཁོ་བོའི་མིག་ལམ་ན་སྣང་བར་འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་རྣམ་པ་དེ་ལྟ་བུའི་བསམ་པ་ཁོ་བོས་བསམ་པར་བྱའོ་ཞེས་གསུངས་པ་དེ་ཅི་བྱང་ཆུབ་དེ་མཆིས་པ་ཞེས་བརྗོད་པར་བགྱི་འམ། འོན་ཏེ་མ་མཆིས་པ་ཞེས་བརྗོད་པར་བགྱི། གལ་ཏེ་མཆིས་ན་ནི་རྟག་པ་སྟེ་ཡོད་པའི་མཐར་འཛིན་པ་ལགས་སོ། །ཅི་སྟེ་མ་མཆིས་ན་ནི་ཆད་པ་སྟེ་མེད་པའི་མཐར་འཛིན་པ་ལགས་སོ། །བྱང་ཆུབ་སེམས་དཔའ་གོམ་པ་འདོར་བ་དོན་ཡོད་ཀྱིས་སྨྲས་པ། བུ་མོ་བྱང་ཆུབ་ ཅེས་བྱ་བ་འདི་ནི་ཡེ་ཤེས་ཀྱི་ཚིག་བླ་དགས་སོ། །བུ་མོ་དྲི་མ་མེད་ཀྱིས་བྱིན་པས་སྨྲས་པ། ཅི་ཡེ་ཤེས་དེ་སྐྱེ་བས་རབ་ཏུ་ཕྱེ་བ་ལགས་སམ། འོན་ཏེ་ཞི་བས་རབ་ཏུ་ཕྱེ་བ་ལགས། འོན་ཏེ་སྐྱེ་བས་རབ་ཏུ་ཕྱེ་བ་ལགས་ན་ནི་ཚུལ་བཞིན་མ་ལགས་པ་ཡིད་ལ་བགྱིད་པ་ལས་བྱུང་བ་འདུས་ བྱས་སུ་འགྱུར་ཏེ། ཤེས་པ་དེ་ནི་བྱིས་པ་རྣམས་ཀྱི་ལགས་སོ། །ཅི་སྟེ་ཞི་བས་རབ་ཏུ་ཕྱེ་བ་ལགས་ན་ནི་དེ་ལ་དམིགས་པ་མ་མཆིས་སོ། །གང་ལ་དམིགས་པ་མ་མཆིས་པ་དེ་ལ་འདི་ནི་སོ་སོའི་སྐྱེ་བོའོ་ཞེ་འམ། ཉན་ཐོས་སོ་ཞེ་འམ། རང་སངས་རྒྱས་སོ་ཞེ་འམ། བྱང་ཆུབ་ སེམས་དཔའོ་ཞེ་འམ། སངས་རྒྱས་སོ་ཞེས་རྣམ་པར་རྟོག་པ་མི་སྐྱེའོ། །དེ་ཅིའི་སླད་དུ་ཞེ་ན། བྱང་ཆུབ་ནི་རྣམ་པར་མི་རྟོག་པ་ལགས་ན་བྱིས་པ་སོ་སོའི་སྐྱེ་བོ་རྣམས་ནི་བྱང་ཆུབ་ལ་རྣམ་པར་རྟོག་སྟེ། མཁས་པ་རྣམས་ནི་མི་རྟོག་པའི་སླད་དུའོ། །བྱང་ཆུབ་སེམས་དཔའ་གོམ
43-1-252a
པ་འདོར་བ་དོན་ཡོད་ཀྱང་ཅང་མི་སྨྲ་བར་གྱུར་ཏོ། །དེ་ནས་ཚེ་དང་ལྡན་པ་རབ་འབྱོར་གྱིས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། །བསོད་སྙོམས་ཀྱི་ཕྱིར་གྲོང་ཁྱེར་དུ་འཇུག་པར་མི་བྱའི་སླར་འདོང་ངོ ། །དེ་ཅིའི་ཕྱིར་ཞེ་ན། དེང་བུ་མོ་དྲི་མ་མེད་ཀྱིས་ བྱིན་པ་ལས་ཆོས་ཐོས་པ་གང་ཡིན་པ་འདི་ནི་མཁས་པའི་ཟས་ཡིན་པས་ཆོག་པར་འགྱུར་བའི་ཕྱིར་ཏེ། ཆོས་ཀྱི་ཟས་བཟའ་བར་བྱའོ། །དེ་ནས་བུ་མོ་དྲི་མ་མེད་ཀྱིས་བྱིན་པས་གནས་བརྟན་རབ་འབྱོར་ལ་འདི་སྐད་ཅེས་སྨྲས་སོ། །བཙུན་པ་རབ་འབྱོར་གང་ན་གདེག་པ་མེད་པ་དང ། གཞག་པ་མེད་པ་དེ་ལ་ཅི་ཞིག་ཁྱོད་ཀྱིས་བཙལ་བར་སེམས། བཙུན་པ་རབ་འབྱོར་དགེ་སྦྱོང་གི་ཚུལ་ནི་སྤྲོས་པ་མ་མཆིས་པ་ལགས་ཀྱི་སྤྲོས་པ་ལ་དགའ་བའི་ནི་མ་ལགས་སོ། །བཙུན་པ་རབ་འབྱོར་དགེ་སྦྱོང་གི་ཆོས་ནི་གནས་པ་མ་མཆིས་པ། གནས་པར་མི་བགྱི་བ་ལགས་ཏེ། འཕགས་པ་རྣམས་ཀྱི་སྤྱོད་ཡུལ་ནི་མི་འཁྲུགས་པ་ལགས་སོ།། །།བམ་པོ་གཉིས་པ་སྟེ་ཐ་མ། དེ་ནས་ཉན་ཐོས་ཆེན་པོ་བརྒྱད་པོ་དེ་དག་དང ། བྱང་ཆུབ་སེམས་དཔའ་བརྒྱད་པོ་དེ་དག་དང ། བྲམ་ཟེ་ལྔ་བརྒྱ་ཙམ་པོ་དེ་དག་དང ། བུ་མོ་དྲི་མ་མེད་ཀྱིས་བྱིན་པ་དང ། རྒྱལ་ པོ་གསལ་རྒྱལ་དང ། དེ་ལས་གཞན་པ་སྐྱེ་བོ་ཕལ་པོ་ཆེ་རྣམས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་བུ་མོ་དྲི་མ་མེད་ཀྱིས་བྱིན་པས་བཅོམ་ ལྡན་འདས་ལ་ལན་སྟོང་བསྐོར་བ་བྱས་ཏེ་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། ཏིང་འཛིན་སྟོབས་ལྡན་གྲགས་པ་ མཐའ་ཡས་མངའ། །འཇིག་རྟེན་མགོན་པོ་བདུད་རྩི་དགའ་སྩོལ་བ། །མཚུངས་མེད་ཡེ་ཤེས་བདེ་གཤེགས་ཁྱོད་ལ་ཞུ། །བྱང་ཆུབ་སེམས་དཔའ་ཇི་ལྟར་སྤྱད་པ་སྤྱོད། །ཇི་ལྟར་ཤིང་དབང་དྲུང་མཆིས་བདུད་རྣམས་འཇོམས། །ཇི་ལྟར་རི་རབ་བཅས་ས་རྣམས་གཡོ་བར་བགྱིད། །
43-1-252b
གྲགས་པ་མཐའ་ཡས་ཇི་ལྟར་འོད་ཟེར་གཏོང ། །བྱང་ཆུབ་སྤྱོད་ཚུལ་ལེགས་པར་བཤད་དུ་གསོལ། །སངས་རྒྱས་ནོར་གྱི་གཟུངས་ནི་ཇི་ལྟར་འཐོབ། །ཏིང་འཛིན་ཞི་བ་དམ་པ་ཇི་ལྟར་བསྒོམ། །མི་ཡིས་རྫུ་འཕྲུལ་སྟོབས་ནི་ཇི་ལྟར་འཐོབ། །སེམས་ཅན་རིན་ཆེན་རྣམས་ཀྱི་ སྤྱོད་པ་གསུངས། །གང་གིས་དྲན་དང་རྟོགས་དང་བློ་གྲོས་འགྱུར། །སྤོབས་པ་མཛེས་དང་ལྡན་པར་གང་གིས་འགྱུར། །གང་དང་རབ་ཏུ་ལྡན་ན་འཁོར་ནང་དུ། །སྙན་ཅིང་ཤིན་ཏུ་མཛེས་པ་སྨྲ་བར་བགྱིད། །གང་གིས་མི་ནི་ཚེ་རབས་དྲན་པར་འགྱུར། །དྲི་མ་མ་ མཆིས་ལྷ་ཡི་མིག་ཀྱང་འཐོབ། །ལྷ་རྣ་འཐོབ་ཅིང་ཕ་རོལ་སེམས་ཚུལ་རིག་།རྫུ་འཕྲུལ་གྱིས་ནི་ཞིང་རྣམས་བརྒྱར་ཡང་མཆི། །ཇི་ལྟར་སྦྱིན་པ་གཏོང་ལ་བརྩོན་པར་འགྱུར། །རྟག་ཏུ་ཚུལ་ཁྲིམས་དག་ཅིང་བཟོད་ལ་དགའ། །ཇི་ལྟར་བརྩོན་འགྲུས་བསམ་གཏན་ མཁས་པར་འགྱུར། །ཤེས་རབ་ལ་ཡང་ཇི་ལྟར་ཤིན་ཏུ་བརྩོན། །མངལ་གྱི་གནས་ནི་ཇི་ལྟར་རྣམ་སྤངས་ནས། །པད་མ་ལས་ནི་རྟག་ཏུ་རྫུས་ཏེ་སྐྱེ། །སངས་རྒྱས་རྣམས་ཀྱི་སྤྱན་སྔར་མཆིས་པར་བགྱིད། །བདག་མེད་སྟོང་པ་ཉིད་ཀྱི་སྒྲ་ཡང་བརྗོད། །ཇི་ལྟར་ དེ་ཡིད་དགའ་དང་མི་དགའ་མཚུངས། །སྲེད་པ་སྤངས་ཤིང་ཐ་བ་ཞེ་སྡང་སྤོང ། །མཐོ་བར་མི་སེམས་དམའ་བར་སེམས་མ་མཆིས། །སེམས་བརྟན་གཡོ་བ་མ་མཆིས་རི་རབ་མཚུངས། །རྙེད་དང་མ་རྙེད་གྲགས་དང་མ་གྲགས་དང ། །བསྟོད་དང་སྨད་དང་བདེ་ དང་སྡུག་བསྔལ་དང ། །ཇི་ལྟར་འཇིག་རྟེན་ཆོས་རྣམས་ཟིལ་མནན་གནས། །འཇིག་རྟེན་ཀུན་ན་ཟླ་བ་ལྟ་བུར་སྤྱོད། །ང་ཡི་མ་མཆིས་ཚུལ་འཆོས་གཡོ་མ་མཆིས། །ཇི་ལྟར་རྡུལ་བྲལ་ང་རྒྱལ་རྒྱགས་པ་སྤོང ། །ཞི་དང་རབ་ཏུ་ཞི་དང་ཞི་གནས་བརྩོན། །བློ་ ལྡན་ཇི་ལྟར་ཡེ་ཤེས་མཆོག་ཏུ་འགྱུར། །ཆུང་མ་བུ་ནོར་མཛའ་ལ་དགའ་མ་མཆིས། །ཇི་ལྟར་བས་མཐའི་མལ་ལ་མངོན་པར་དགའ། །རྟག་ཏུ་བྱ་དང་མཚུངས་ཤིང་ཟླ་བ་འདྲ། །ཇི་ལྟར་ཆོས་ཀྱི་ནོར་ལ་དགའ་ཞིང་མོས། །ཆུ་དང་མཚུངས་ཤིང་ས་འདྲ་རླུང་དང
43-1-253a
མཚུངས། །མཁས་པ་ཇི་ལྟར་མེ་དང་འདྲ་བར་འགྱུར། །རྟག་ཏུ་ཅི་ཡང་མ་མཆིས་མི་རྟོག་ལགས། །མཉམ་པ་ཉིད་ལ་དགའ་ཞིང་ནམ་མཁའ་མཚུངས། །ཇི་ལྟར་རྟག་ཏུ་ཆོས་ནི་སྤོང་མི་བགྱིད། །བདག་འདོར་བགྱིད་ཀྱི་ཆོས་མཆོག་ཡོངས་མི་ གཏོང ། །འཇིག་རྟེན་དག་ཏུ་སྟོན་པའི་སེམས་བསྐྱེད་ནས། །ཇི་ལྟར་གནས་ཏེ་བྱང་ཆུབ་འཇུག་པར་བགྱིད། །ཞིང་གི་བཀོད་པ་ཇི་ལྟར་གནས་པར་འགྱུར། །དགེ་འདུན་དག་པར་ཇི་ལྟར་འགྱུར་བ་ལགས། །ཇི་ལྟར་དུས་གསུམ་དུ་ཡང་ཆོས་ཐོས་ཤིང ། །ཇི་ལྟར་ཚེ་ རིང་སེམས་ཅན་བདེ་བར་འགྱུར། །རྟག་ཏུ་སྲེད་པ་འགོག་པའི་ཕ་རོལ་སོན། །དགྲ་བཅོམ་དུལ་བར་བདེན་བཞི་ཇི་ལྟར་མཐོང ། །སེམས་ཅན་བརྒྱ་དག་བྱང་ཆུབ་འཇོག་པར་བགྱིད། །སྤྱོད་ཅིང་རྟག་ཏུ་དགའ་མོས་ཇི་ལྟར་འགྱུར། །གང་གིས་ཤིན་ཏུ་མཛེས་པར་འགྱུར། ། བརྫུས་ཏེ་སྐྱེ་བར་གང་གིས་འགྱུར། །ལོངས་སྤྱོད་ཆེ་དང་ཤེས་རབ་ཆེ། །ཀུན་མཁྱེན་རྟོགས་པར་ཁོང་དུ་ཆུད། །གང་གིས་སུམ་ཅུ་རྩ་གཉིས་མཚན། །དཔེ་བྱད་བཟང་པོ་བརྒྱད་ཅུ་འཐོབ། །བསོད་ནམས་ཀུན་ལ་མཁས་པ་ལགས། །སྤོབས་པ་གང་གིས་སྐྱེ་བར་ འགྱུར། །ཞིང་ནི་ཇི་ལྟར་དགའ་གྱུར་ལགས། །དགེ་སློང་དགེ་འདུན་ཕུན་སུམ་ཚོགས། །གང་དུ་དེ་ཡིས་སྨོན་བཏབ་པ། །དེར་ནི་ཇི་ལྟར་སྐྱེ་འགྱུར་ལགས། །ཚེ་རབས་དྲན་པར་ཇི་ལྟར་འགྱུར། །ཇི་ལྟར་སངས་རྒྱས་རྣམས་དང་མཇལ། །བསྐལ་པ་བྱེ་བ་སྟོང་རྣམས་ སུ། །ངན་འགྲོར་མཆི་བར་མི་འགྱུར་ལགས། །རྣམ་པར་འདྲེན་པ་ཇི་ལྟར་ན། །མདོག་དང་གཟི་བརྗིད་སྙན་གྲགས་འཐོབ། །སྟོབས་དང་མཐུ་དང་བརྩོན་འགྲུས་རྣམས། །ཇི་ལྟར་ཐུབ་པར་མི་འགྱུར་ལགས། །ཇི་ལྟར་སངས་རྒྱས་ཆོས་དང་ཡང ། །དགེ་འདུན་ལ་ནི་ སྐྱབས་སུ་མཆི། །ལུས་དང་སྲོག་ནི་གཏོང་བགྱིད་ཀྱི། །དེ་དག་ཆོས་ནི་འདོར་མི་བགྱིད། །བྱང་ཆུབ་སྤྱད་པ་སྤྱོད་བགྱིད་ཅིང ། །ཐེ་ཚོམ་མ་མཆིས་ཇི་ལྟར་འགྱུར། །འགྱོད་པ་ཐམས་ཅད་སྤངས་ནས་སུ། །སྲོག་ཆགས་རྣམས་ལ་ཆོས་ཀྱང་སྟོན། །ཁྱོད་ལ་མི་མཁྱེན་ཅང
43-1-253b
མི་མངའ། །ཐུབ་ཆེན་ཁྱོད་ནི་ཐམས་ཅད་མཁྱེན། །བྱང་ཆུབ་སེམས་དཔའི་སྤྱོད་གང་ལགས། །གོ་རིམས་བཞིན་དུ་བསྟན་དུ་གསོལ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བུ་མོ་དྲི་མ་མེད་ཀྱིས་བྱིན་པ་ལ་འདི་སྐད་ཅེས་བཀའ་སྩལ་ཏོ། །བུ་མོ་ལེགས་ སོ་ལེགས་སོ། །བུ་མོ་དེ་བཞིན་གཤེགས་པ་ལ་དོན་འདི་ལྟ་བུ་འདི་འདྲི་བར་སེམས་པ་ནི་ཁྱོད་ཡང་ལེགས་སོ། །བུ་མོ་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །བུ་མོ་དྲི་མ་མེད་ཀྱིས་བྱིན་པས་བཅོམ་ལྡན་འདས་ལ་ལེགས་སོ་ཞེས་གསོལ་ཏེ་བཅོམ་ ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་བདུད་འདུལ་བར་བྱེད་དེ། བཞི་གང་ཞེ་ན། གཞན་གྱི་རྙེད་པ་ལ་ཕྲག་དོག་མེད་པ་དང ། །ཕྲ་མའི་ཚིག་ཡོངས་སུ་སྤོང་བ་དང ། སྐྱེ་བོ་མང་པོ་དགེ་བའི་རྩ་བ་འཛིན་དུ་འཇུག་པ་དང ། སྒྲིབ་པ་མེད་པའི་བྱམས་པ་སྒོམ་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་བདུད་འདུལ་བར་བྱེད་དོ། །དེ་ལ་འདི་སྐད་ཅེས་བྱ་སྟེ། ཕྲག་དོག་མི་བྱ་ཕྲ་མ་སྨྲ་མི་བྱ། །སྐྱེ་བོ་མང་པོ་དགེ་བ་རྣམས་ ལ་སྦྱར། །ཕྱོགས་བཅུ་རྣམས་སུ་བྱམས་པ་བསྒོམས་བྱས་ན། །བདུད་འདིར་བཏུལ་ནས་བྱང་ཆུབ་རེག་པར་འགྱུར། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་ཀྱི་ཞིང་མཐའ་ཡས་པ་དག་གཡོ་བར་བྱེད་དེ། བཞི་གང་ཞེ་ན། ཇི་སྐད་སྨྲས་པ་ དེ་བཞིན་བྱེད་པ་དང ། ཆོས་ཟབ་མོ་ལ་མོས་པ་དང ། ཡི་དམ་ལ་བརྟན་པ་དང ། སྐྱེ་བོ་མང་པོ་བྱང་ཆུབ་ཡང་དག་པར་འཛིན་དུ་འཇུག་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སངས་རྒྱས་ཀྱི་ཞིང་མཐའ་ཡས་པ་དག་གཡོ་བར་བྱེད་དོ། ། དེ་ལ་འདི་སྐད་ཅེས་བྱ་སྟེ། ཇི་སྐད་སྨྲས་པ་དེ་བཞིན་བྱེད། །མཁས་པ་ཟབ་མོའི་ཆོས་ལ་བཟོད། །ཡི་དམ་ལ་ཡང་ཤིན་ཏུ་བརྟན། །དཀར་པོའི་ཆོས་ལ་འཛུད་པར་བྱེད། །རྫོགས་པའི་བྱང་ཆུབ་བླ་མེད་ལ། །སྐྱེ་བོ་མང་པོ་དགའ་བར་བྱེད། །དེ་ལྟར་ཆོས་བཞི
43-1-254a
དེ་དག་གིས། །ཞིང་རྣམས་བྱེ་བ་གཡོ་བར་བྱེད། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་ཀྱི་ཞིང་མཐའ་ཡས་མུ་མེད་པ་རྣམས་སུ་འོད་ཟེར་དག་གཏོང་སྟེ། བཞི་གང་ཞེ་ན། མར་མེ་སྦྱིན་པ་དང ། དམ་པའི་ཆོས་ཡོངས་སུ་འཛིན་ པ་དང ། སེམས་ཅན་བག་མེད་པར་གྱུར་ཅིང་མི་ཁོམ་པར་གྱུར་པ་རྣམས་ཀྱི་གན་དུ་སོང་སྟེ་ཆོས་སྟོན་པ་དང ། དེ་བཞིན་གཤེགས་པའི་མཆོད་རྟེན་དག་ལ་རིན་པོ་ཆེའི་དྲ་བས་འགེབས་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སངས་རྒྱས་ཀྱི་ཞིང་མཐའ་ ཡས་མུ་མེད་པ་རྣམས་སུ་འོད་ཟེར་དག་གཏོང་ངོ ། །དེ་ལ་འདི་སྐད་ཅེས་བྱ་སྟེ། མར་མེ་བྱིན་པས་འོད་ནི་རྣམ་པར་དག་།ཟད་པའི་དུས་ན་དམ་ཆོས་ཡོངས་སུ་འཛིན། །བག་མེད་གྱུར་པ་རྣམས་ལ་ཆོས་སྦྱིན་བྱེད། །མཆོད་རྟེན་དག་ལ་རིན་ཆེན་དྲ་བ་འབུལ། །དེས་ན་བྱེ་བ་ བསམ་ཡས་ཞིང་འགྲོ་ཞིང ། །བྱང་ཆུབ་སེམས་དཔའ་འོད་ཟེར་གཏོང་བར་བྱེད། །རེག་ནས་སེམས་ཅན་བདེ་དང་ལྡན་པར་འགྱུར། །མཁས་པ་བྱང་ཆུབ་བླ་མེད་དོན་དུ་གཉེར། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་གཟུངས་འཐོབ་སྟེ། བཞི་གང་ཞེ་ན། རྒྱན་ སྣ་ཚོགས་གཙང་ཞིང་དག་པ་སྦྱིན་པ་དང ། བུ་མོ་རྒྱན་ཐམས་ཅད་ཀྱིས་བརྒྱན་ཏེ་འདོད་པ་རྣམས་ལ་སྦྱིན་པ་དང ། རྒྱུན་མི་འཆད་པར་དེ་བཞིན་གཤེགས་པའི་བསྔགས་པ་བརྗོད་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པ་ལ་མང་དུ་གནས་པ་སྟེ། བུ་མོ་བྱང་ཆུབ་སེམས་དཔའ་ ཆོས་བཞི་པོ་དེ་དག་དང་ལྡན་ན་གཟུངས་འཐོབ་བོ། །དེ་ལ་འདི་སྐད་ཅེས་བྱ་སྟེ། སྣ་ཚོགས་བྱིན་པས་གཟུངས་ནི་ཐོབ་པར་འགྱུར། །སློང་བ་རྣམས་ལ་བུ་མོ་བརྒྱན་ཏེ་སྦྱིན། །རྒྱུན་མི་འཆད་པར་སངས་རྒྱས་བསྔགས་པ་བརྗོད། །རྒྱལ་བའི་ཡེ་ཤེས་དོན་དུ་ཤེས་རབ་ བསྒོམས། །ཆོས་བཞི་འདི་དག་གིས་ནི་གཟུངས་འཐོབ་འགྱུར། །བསྐལ་པ་བརྒྱར་ཡང་ཐོས་པ་ཆུད་མི་ཟ། །ཕྱོགས་བཅུར་དེ་བཞིན་གཤེགས་པ་གང་འཆད་པ། །དེ་དག་ཐམས་ཅད་དྲན་པའི་སྟོབས་ཀྱིས་འཛིན། །བུ་མོ་བྱང་ཆུབ་སེམས་དཔའ་ཆོས་བཞི་དང
43-1-254b
ལྡན་ན་ཏིང་ངེ་འཛིན་འཐོབ་སྟེ། བཞི་གང་ཞེ་ན། འཁོར་བ་ལ་ཡིད་འབྱུང་བ་མང་བ་དང ། གཅིག་པུར་ཀུན་ཏུ་དགའ་ཞིང་མགུ་ལ་མོས་པ་དང ། བརྩོན་འགྲུས་བརྩམས་པ་དང ། ལས་ཀྱི་མཐའ་ཤིན་ཏུ་ཡོངས་སུ་མཐར་ཕྱིན་པ་ཡིན་ཏེ། བུ་མོ་བྱང་ཆུབ་སེམས་དཔའ་ཆོས་ བཞི་པོ་དེ་དག་དང་ལྡན་ན་ཏིང་ངེ་འཛིན་འཐོབ་བོ། །དེ་ལ་འདི་སྐད་ཅེས་བྱ་སྟེ། སྲིད་པའི་འགྲོ་བ་ཀུན་ལ་ཡིད་ཀྱང་འབྱུང ། །བསེ་རུ་ལྟ་བུར་གཅིག་པུར་སྤྱོད་ལ་དགའ། །རྟག་ཏུ་ཤིན་ཏུ་བརྩོན་འགྲུས་བརྩམས་པ་ཡིན། །དེ་ཡི་ལས་རྟག་ཤིན་ཏུ་མཐར་ཡང་ཕྱིན། །རྟག་ཏུ་ ཆོས་བཞི་དག་ལ་ཞུགས་ནས་སུ། །བྱང་ཆུབ་སྤྱོད་པ་ཞི་བ་མྱུར་ཚོལ་བྱེད། །བྱང་ཆུབ་སེམས་དཔའ་ཏིང་འཛིན་ལ་གོར་འཐོབ། །རྒྱལ་བ་རྣམས་ཀྱི་སྤྱོད་ཡུལ་བྱང་ཆུབ་རྟོགས། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་རྫུ་འཕྲུལ་འཐོབ་སྟེ། བཞི་གང་ཞེ་ན། ལུས་ ཡང་བ་དང ། སེམས་ཡང་བ་དང ། ཆོས་ཐམས་ཅད་ལ་མངོན་པར་ཞེན་པ་མེད་པ་དང ། ཁམས་བཞི་ནམ་མཁའི་ཁམས་དང་མཉམ་པ་ཉིད་དུ་བྱིན་གྱིས་རློབ་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་རྫུ་འཕྲུལ་འཐོབ་བོ། །དེ་ལ་འདི་སྐད་ཅེས་བྱ་སྟེ། ལུས་ཡང་བ་དང་དེ་བཞིན་སེམས་ཀྱང་ཡང ། །ཆོས་རྣམས་ཀུན་ལ་གནས་པ་མེད་པ་ཉིད། །ནམ་མཁའི་ཁམས་དང་མཚུངས་ཤིང་འདྲ་ཉིད་དུ། །ཁམས་བཞི་པོ་དག་བྱིན་གྱིས་རློབ་པར་བྱེད། །ཆོས་བཞི་འདི་དག་ངེས་པར་བསྟེན་བྱས་ན། །བློ་ལྡན་དེ་ཡིས་རྫུ་འཕྲུལ་མཐའ་ ཡས་འཐོབ། །སྐད་ཅིག་གཅིག་ལ་ཞིང་རྣམས་སྟོང་དུ་འགྲོ་།སངས་རྒྱས་སྟོང་ཕྲག་མང་པོ་རྣམས་ཀྱང་མཐོང ། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་མཛེས་པར་འགྱུར་ཏེ། བཞི་གང་ཞེ་ན། ཁྲོ་བ་མེད་དེ་རྩོད་པ་དང ། ཐ་བ་དང ། ཞེ་སྡང་དང་བྲལ་བ་དང ། དེ་བཞིན་གཤེགས་པའི་མཆོད་རྟེན་འཕྱག་པར་མངོན་པར་བརྩོན་པར་འགྱུར་བ་དང ། ཚུལ་ཁྲིམས་ཀྱི་སྡོམ་པས་བསྡམས་ཤིང་ཚུར་ཤོག་།ལེགས་པར་འོངས་སོ་ཞེས་རྟག་ཏུ་སྨྲ་བ་དང ། ཆོས་སྨྲ་བ་རྣམས་ལ་ཁྲོ་གཉེར་དང་བྲལ་ཞིང་ཞེ་འགྲས་པའི་སེམས་མེད་པ་ཡིན་ཏེ། བུ་མོ
43-1-255a
བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་མཛེས་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། གཞན་ལ་ཁྲོ་དང་ཁོན་དུ་འཛིན་མི་བྱེད། །ང་རྒྱལ་རྒྱགས་དང་ཐ་བ་ཞེ་སྡང་བྲལ། །རྩོད་པ་མེད་ལ་དགའ་ཞིང་སྙན་པར་སྨྲ། །གུས་པར་རྒྱལ་བའི་མཆོད་རྟེན་ འཕྱག་པར་བྱེད། །དེ་ནི་ཚུལ་ཁྲིམས་རྣམ་དག་རྟག་ཏུ་སྲུང ། །དེ་ནི་རྟག་ཏུ་ལེགས་པར་འོངས་ཞེས་སྨྲ། །ཆོས་སྨྲ་རྣམས་ལ་དེ་ནི་ཐ་བ་མེད། །དེ་ཡི་སེམས་ནི་རྡོ་རྗེ་རི་རབ་མཚུངས། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་རྫུས་ཏེ་སྐྱེ་བར་འགྱུར་ཏེ། བཞི་ གང་ཞེ་ན། དེ་བཞིན་གཤེགས་པའི་སྐུ་གཟུགས་པད་མའི་སྟེང་ན་བཞུགས་པ་བྱེད་དུ་འཇུག་ཅིང་མེ་ཏོག་ཨུད་པ་ལ་དང ། པད་མ་དང ། པད་མ་དཀར་པོ་དག་གིས་ལག་པ་བཀང་སྟེ། དེ་བཞིན་གཤེགས་པ་འམ། དེ་བཞིན་གཤེགས་པའི་མཆོད་རྟེན་ལ་མངོན་པར་འཐོར་ བ་དང ། ཕན་པའི་དངོས་པོ་མང་ཞིང་ཡང་དག་པར་དགའ་བར་བྱེད་པའི་ངང་ཚུལ་ཅན་དང ། གཞན་དག་གི་སྐྱོན་མི་འཛིན་པ་དང ། །དགེ་བའི་རྩ་བ་ཐམས་ཅད་སེམས་ཅན་ཐམས་ཅད་ལ་ཕན་པ་དང་བདེ་བར་བྱ་བའི་ཕྱིར་སངས་རྒྱས་ཀྱི་བྱང་ཆུབ་ཏུ་ཡོངས་སུ་སྔོ་བར་བྱེད་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་རྫུས་ཏེ་སྐྱེ་བར་འགྱུར་རོ། །དེ་ལ་འདི་སྐད་ཅེས་བྱ་སྟེ། སངས་རྒྱས་སྐུ་གཟུགས་པད་མ་མཆོག་བཞུགས་བྱེད་དུ་འཇུག་།ཆུ་སྐྱེས་མེ་ཏོག་ལག་པ་བཀང་སྟེ་འབུལ་བར་བྱེད། །ཕ་རོལ་དག་ལ་དགའ་བ་སྐྱེད་པའི་ ཚིག་ཀྱང་སྨྲ། །དགའ་བར་བྱེད་ལ་མངོན་པར་བརྩོན་གྱི་སྐྱོན་མི་འཛིན། །སེམས་ཅན་ཀུན་ལ་ཕན་ཕྱིར་བསོད་ནམས་ཡོངས་སུ་སྔོ། །ཐུབ་མཆོག་རྣམས་ཀྱི་སངས་རྒྱས་བྱང་ཆུབ་སྒྲུབ་པ་ཤེས། །སངས་རྒྱས་གསུངས་པའི་ཡོན་ཏན་འདི་བཞི་བསྟེན་ན་དེ། །རྒྱལ་བ་ མཆོག་རྣམས་དྲུང་དུ་རྫུས་ཏེ་སྐྱེ་བར་འགྱུར། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་ལོངས་སྤྱོད་ཆེན་པོར་འགྱུར་ཏེ། བཞི་གང་ཞེ་ན། བརྙས་པ་མེད་པར་སྦྱིན་པའི་ཚུལ་ཅན་དང ། ཆགས་པ་མེད་པར་དངོས་པོ་ཡོངས་སུ་གཏོང་བ་དང ། མོས་པ་མང་བ་དང་།
43-1-255b
ལྟ་བར་གྱུར་པ་ཐམས་ཅད་དང་བྲལ་བ་ཡིན་ཏེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ལོངས་སྤྱོད་ཆེན་པོར་འགྱུར་རོ། །དེ་ལ་འདི་སྐད་ཅེས་བྱ་སྟེ། དེས་པ་བརྙས་པ་མེད་པར་སྦྱིན་པ་སྦྱིན་པར་བྱེད། །དེ་ནི་དངོས་པོ་ཀུན་ལ་རྟག་ཏུ་འཛིན་པ་མེད། ། རྒྱལ་བའི་ཡེ་ཤེས་མཆོག་ལ་མོས་པ་བསྐྱེད་བྱས་ན། །དེ་ནི་ཕྱིར་ཞིང་ལོངས་སྤྱོད་ཆེན་པོ་ཐོབ་པར་འགྱུར། །དད་དང་ལྡན་པར་འགྱུར་ཞིང་གཡོ་མེད་སྒྱུ་ཡང་མེད། །ཕ་རོལ་དག་གི་སྐྱོན་ནི་འཛིན་པར་ཡོང་མི་བྱེད། །ལྷག་པའི་བསམ་པས་གང་གི་ལྟ་བ་དྲང་གྱུར་པ། །དེས་ ན་དེ་འདིར་ལོངས་སྤྱོད་བཟང་པོ་རྣམས་དང་ལྡན། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཤེས་རབ་ཆེན་པོར་འགྱུར་ཏེ། བཞི་གང་ཞེ་ན། ཆོས་ལ་སེར་སྣ་མི་བྱེད་པ་དང ། མི་འཐུན་པར་མི་འཇུག་པས་འགྱོད་པ་སེལ་བ་དང ། གསོལ་བ་འདེབས་པ་ལ་ ཡང་དག་པ་ཇི་ལྟ་བ་བཞིན་དུ་གདམས་ངག་སྟོན་པ་དང ། སྟོང་པ་ཉིད་བསྒོམ་པ་ལ་མང་དུ་གནས་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ཤེས་རབ་ཆེན་པོར་འགྱུར་རོ། །དེ་ལ་འདི་སྐད་ཅེས་བྱ་སྟེ། མཁས་པ་ནམ་ཡང་སེར་སྣ་ཡོང་མི་བྱེད། ། མི་འཐུན་འཇུག་པ་མེད་པས་འགྱོད་པ་སེལ། །ཡང་དག་རབ་ལྡན་གདམས་ངག་སྟོན་པར་བྱེད། །རྒྱལ་བའི་སྤྱོད་པ་གང་ཡིན་སྟོང་ཉིད་བསྒོམ། །ཆོས་བཞི་འདི་དག་ངེས་པར་བསྟེན་བྱས་ན། །རྒྱལ་བས་བཞེད་པའི་བྱང་ཆུབ་མྱུར་དུ་འཐོབ། །སངས་རྒྱས་རྗེས་སུ་ བསྟན་ནས་བསླབ་བྱས་ནས། །རྐང་གཉིས་དམ་པ་སངས་རྒྱས་དེ་འགྱུར་རོ། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་ཚེ་རབས་དྲན་པར་འགྱུར་ཏེ། བཞི་གང་ཞེ་ན། ལུང་ནོད་པ་དང ། ཁ་ཏོན་ལ་བརྩོན་པ་རྣམས་ལུང་མནོས་པ་དང་གདམས་ངག་བརྗེད་ནས་ ཡུན་རིང་དུ་ལོན་ཏེ་གསོལ་བ་འདེབས་པ་ལ་ལུང་འབོག་ཅིང་དྲན་པར་བྱེད་པ་དང ། འདི་ལྟར་ཀུན་དགའ་བའི་ཚིག་གིས་གཞན་དག་ལ་དང་བ་ཉེ་བར་སྒྲུབ་པ་དང ། འཁོར་བའི་སྡུག་བསྔལ་ལས་ངེས་པར་འབྱུང་བ་དང ། མྱ་ངན་ལས་འདས་པའི་བདེ་བ་ཐོབ་པར་བྱ་བའི་ཕྱིར
43-1-256a
གཞན་དག་ལ་ཆོས་སྟོན་པ་དང ། ཡོངས་སུ་བསྔོ་བ་ལ་མངོན་པར་བརྩོན་ཞིང་ཏིང་ངེ་འཛིན་གྱི་མཚན་མ་ལ་མཁས་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་ཚེ་རབས་དྲན་པར་འགྱུར་རོ། །དེ་ལ་འདི་སྐད་ཅེས་བྱ་སྟེ། ལུང་མནོས་ཁ་ཏོན་ བརྗེད་ལ་དྲན་པར་བྱེད། །གཞན་ལ་ཡིད་དུ་འོང་བའི་སྒྲ་ཡང་སྒྲོགས། །སྐྱོ་བ་མེད་པར་ཆོས་ཀྱང་རྗོད་པར་བྱེད། །ཏིང་འཛིན་བསྒོམ་པའི་མཚན་མ་ལེགས་པར་འཛིན། །ཆོས་བཞི་འདི་དག་ངེས་པར་བསྟེན་བྱས་ན། །མཐུ་ཆེན་ལྡན་པ་ཚེ་རབས་དྲན་པར་འགྱུར། །བསྐལ་ པ་སྟོང་ཕྲག་བསམ་ཡས་རྗེས་སུ་དྲན། །རྣམ་པར་འདྲེན་པའི་མཆོག་ཉིད་མྱུར་དུ་འཐོབ། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་རྣམས་དང་ཕྲད་པ་འཐོབ་སྟེ། བཞི་གང་ཞེ་ན། སྲོག་གི་ཕྱིར་ཡང་དམ་པའི་ཆོས་མི་སྤོང་བ་དང ། སྲོག་གི་ཕྱིར་ཡང་ སྡིག་པའི་གྲོགས་པོ་རྣམས་དང་མི་སྟེན་པ་དང ། སྲོག་གི་ཕྱིར་ཡང་ཆོས་སྨྲ་བ་ལ་སྐུར་པ་མི་འདེབས་པ་དང ། སངས་རྒྱས་རྗེས་སུ་དྲན་པའི་ཏིང་ངེ་འཛིན་སྒོམ་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སངས་རྒྱས་རྣམས་དང་ཕྲད་པར་འགྱུར་རོ། །དེ་ལ་ འདི་སྐད་ཅེས་བྱ་སྟེ། སངས་རྒྱས་བྱང་ཆུབ་ཀྱི་ཚོམ་སྤོང་མི་བྱེད། །ཆོས་སྨྲ་བ་ལ་སྐུར་པ་ཡོང་མི་འདེབས། །དེས་ན་སྡིག་པའི་གྲོགས་རྣམས་རྣམ་པར་སྤོང ། །གཡེལ་བ་མེད་པར་རྟག་ཏུ་སངས་རྒྱས་དྲན། །ཆོས་བཞི་འདི་དག་ངེས་པར་བསྟེན་བྱས་ན། །བདེ་གཤེགས་ རྣམས་དང་ཕྲད་པ་དེས་འཐོབ་པོ། །བླ་མེད་བྱང་ཆུབ་མ་ཐོབ་བར་དུ་ཡང ། །འདྲེན་པ་གང་ན་བཞུགས་པ་དེར་དེ་སྐྱེ། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དེ་དག་འཐོབ་སྟེ། བཞི་གང་ཞེ་ན། དེ་བཞིན་གཤེགས་ པ་དང ། དེ་བཞིན་གཤེགས་པའི་མཆོད་རྟེན་ལ་རིན་པོ་ཆེ་སྤར་གྱིས་འཐོར་བ་དང ། འབྲུ་མར་དྲི་ཞིམ་པོ་དག་གིས་དེ་བཞིན་གཤེགས་པའི་མཆོད་རྟེན་འཁྲུ་བར་བྱེད་པ་དང ། མེ་ཏོག་དང ། སྤོས་དང ། སིལ་སྙན་སྣ་ཚོགས་འབུལ་བ་དང ། ཡིད་དུ་འོང་བའི་གཡོག
43-1-256b
འཁོར་གྱིས་མཁན་པོ་དང ། སློབ་དཔོན་ལ་བསྙེན་བཀུར་བྱ་བས་རིམ་གྲོ་བྱེད་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དག་འཐོབ་བོ། །དེ་ལ་འདི་སྐད་ཅེས་བྱ་སྟེ། མཆོད་རྟེན་ལ་ནི་སྤར་གྱིས་དབྱིག་རྣམས་ འཐོར། །དྲི་ཞིམ་འབྲུ་མར་རྣམས་ཀྱིས་མཆོད་རྟེན་འཁྲུ། །སྤོས་དང་མེ་ཏོག་སིལ་སྙན་སྣ་ཚོགས་འབུལ། །ཡིད་དུ་འོང་བས་མཁན་པོ་སློབ་དཔོན་སྟེན། །དེའི་ལུས་སུམ་ཅུ་རྩ་གཉིས་མཚན་དང་ལྡན། །རབ་ཏུ་མཛེས་ཤིང་ཡོན་ཏན་ཀུན་དང་ལྡན། །གང་གིས་ཤེས་རབ་ མཆོག་ལྡན་རྒྱལ་མཛེས་པ། །ཆོས་དེ་དག་གིས་སྐྱེས་ཆེན་མཚན་དུ་འགྱུར། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་དཔེ་བྱད་བཟང་པོ་བརྒྱད་ཅུ་པོ་དག་འཐོབ་སྟེ། བཞི་གང་ཞེ་ན། སྟན་རྒྱུ་སྣ་ཚོགས་ཆོས་ཀྱི་སྟན་དུ་འབུལ་བ་དང ། གཞན་ལ་བསྟི་སྟང་བྱེད་ པས་མི་སྐྱོ་བ་དང ། །ཆོས་སྨྲ་བ་ལ་འཐབ་མོ་མི་རྒོལ་བ་དང ། སེམས་ཅན་རྣམས་བྱང་ཆུབ་ཡང་དག་པར་འཛིན་དུ་འཇུག་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་དཔེ་བྱད་བཟང་པོ་བརྒྱད་ཅུ་པོ་དག་འཐོབ་བོ། །དེ་ལ་འདི་སྐད་ཅེས་བྱ་སྟེ། སྟན་རྒྱུ་སྣ་ ཚོགས་ཆོས་ཀྱི་སྟན་དུ་འབུལ། །གཞན་ལ་བསྟི་སྟང་བྱེད་པས་སྐྱོ་བ་མེད། །ཆོས་སྨྲ་བ་ལ་འཐབ་མོ་ཡང་མི་རྒོལ། །སེམས་ཅན་རྣམས་ནི་བྱང་ཆུབ་འཛིན་དུ་འཇུག་།འདི་བཞིས་ལུས་ལ་དཔེ་བྱད་བཟང་པོ་རྣམས། །འདི་ན་དེ་ཡིས་རྙེད་པར་དཀའ་བ་མེད། །ཡོན་ཏན་ འདི་དག་རྟག་ཏུ་བསྟེན་བྱས་ན། །བྱང་ཆུབ་སེམས་དཔའ་འདི་ན་བརྒྱན་པར་འགྱུར། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སྤོབས་པ་འཐོབ་སྟེ། བཞི་གང་ཞེ་ན། བྱང་ཆུབ་སེམས་དཔའི་སྡེ་སྣོད་འཛིན་པ་དང ། ཉིན་མཚན་དུ་ཕུང་པོ་གསུམ་པའི་ཆོས་ཀྱི་རྣམ་ གྲངས་ཁ་ཏོན་བྱེད་པ་དང ། སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་འཇིག་རྟེན་ཐམས་ཅད་དང་མི་འཐུན་པ་སྐྱེ་བ་མེད་ཅིང་འགག་པ་མེད་པར་ངེས་པ་ལ་མཆོག་ཏུ་དགའ་བ་སྐྱེས་ནས་འཛིན་པ་དང ། ལུས་དང་སྲོག་དང་ཡོ་བྱད་རྣམས་ལ་མི་ལྟ་བ་སྟེ། བུ་མོ་བྱང་ཆུབ་སེམས
43-1-257a
དཔའ་ཆོས་བཞི་པོ་དེ་དག་དང་ལྡན་ན་སྤོབས་པ་འཐོབ་བོ། །དེ་ལ་འདི་སྐད་ཅེས་བྱ་སྟེ། བྱང་ཆུབ་སེམས་དཔའི་སྡེ་སྣོད་ནི། །ཉིན་མཚན་རབ་ཏུ་འདོན་པར་བྱེད། །འཇིག་རྟེན་ཀུན་དང་མི་འཐུན་པ། །སྐྱོ་བ་མེད་པར་རབ་ཏུ་སྒྲོགས། །མཆོག་ཏུ་དགའ་བ་ རྙེད་གྱུར་ནས། །སངས་རྒྱས་བསྟན་པ་འཛིན་པར་བྱེད། །ལུས་དང་སྲོག་ལ་མི་ལྟ་བར། །དེ་ནི་བྱང་ཆུབ་ལྟ་བར་བྱེད། །བཞི་པོ་འདི་དག་བསྟེན་བྱས་ན། །དེ་ཡི་སྤོབས་པ་འཕེལ་བར་འགྱུར། །ལྷ་དང་བཅས་པའི་འཇིག་རྟེན་ཀུན། །སྣ་ཚོགས་ཕྲེང་འདྲས་ཚིམ་པར་བྱེད། ། བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་ཀྱི་ཞིང་ཡོངས་སུ་དག་པ་འཐོབ་སྟེ། བཞི་གང་ཞེ་ན། ཕྲག་དོག་མེད་པ་དང ། སེར་སྣ་མེད་པ་དང ། སེམས་ཅན་ཐམས་ཅད་ལ་སེམས་སྙོམས་པ་དང ། འཁོར་དང་འདྲེ་བ་མེད་པ་སྟེ། བུ་མོ་བྱང་ཆུབ་སེམས་དཔའ་ ཆོས་བཞི་པོ་དེ་དག་དང་ལྡན་ན་སངས་རྒྱས་ཀྱི་ཞིང་ཡོངས་སུ་དག་པ་འཐོབ་བོ། །དེ་ལ་འདི་སྐད་ཅེས་བྱ་སྟེ། གཞན་གྱི་རྙེད་ལ་ནམ་ཡང་ཕྲག་དོག་མེད། །མཐོང་ནས་དགའ་བར་འགྱུར་ཏེ་སེར་སྣ་མེད། །སེམས་ཅན་ཀུན་ལ་དེ་ཡི་སེམས་ཀྱང་སྙོམས། །འཁོར་དང་འདྲེ་བར་དེ་ནི་ཡོང་ མི་བྱེད། །ཆོས་བཞི་འདིས་ནི་ཞིང་གི་བཀོད་འཐོབ་ཅིང ། །མྱུར་དུ་བྱང་ཆུབ་མཆོག་ཀྱང་ཐོབ་པར་འགྱུར། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་དགེ་འདུན་ཕུན་སུམ་ཚོགས་པ་འཐོབ་སྟེ། བཞི་གང་ཞེ་ན། གཞན་གྱི་འཁོར་མི་འབྱེད་པ་དང ། མི་འཐུན་པ་ རྣམས་ཀྱི་སྡུམས་བྱེད་པ་དང ། ལུང་ནོད་པ་དང་ཁ་ཏོན་བྱེད་དུ་འཇུག་པས་ཕན་འདོགས་པ་དང ། ཕྲ་མའི་ཚིག་ཡོངས་སུ་སྤོང་བ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་དགེ་འདུན་ཕུན་སུམ་ཚོགས་པ་འཐོབ་བོ། །དེ་ལ་འདི་སྐད་ཅེས་བྱ་སྟེ། གཞན་གྱི་ འཁོར་ནི་ནམ་ཡང་ཡོང་མི་འབྱེད། །སྐྱེ་བོ་མི་འཐུན་པ་དག་འདུན་པར་བྱེད། །ལུང་ནོད་ཁ་ཏོན་བྱེད་ལ་ཡང་དག་འཛུད། །ཕ་རོལ་དག་ལ་དབྱེན་གྱི་ཚིག་མི་སྨྲ། །ཆོས་བཞི་འདི་དག་ངེས་པར་བསྟེན་བྱས་ན། །དགེ་འདུན་རྒྱ་ཆེན་རྣམ་དག་ཐོབ་པར་འགྱུར། །དེ་བས་དགེ་འདུན
43-1-257b
རྣམ་པར་སྦྱང་བའི་ཕྱིར། །མཁས་པས་ཆོས་འདི་རྟག་ཏུ་བསྟེན་པར་བྱ། །བུ་མོ་བྱང་ཆུབ་སེམས་དཔའ་ཆོས་བཞི་དང་ལྡན་ན་སངས་རྒྱས་ཀྱི་ཞིང་གང་དུ་སེམས་བསྐྱེད་པ་དེར་སྐྱེ་སྟེ། བཞི་གང་ཞེ་ན། གཞན་དག་གི་ཤེས་ཀྱི་ཁེ་དང་རྙེད་པ་ལ་ཕྲག་དོག་མི་སྐྱེད་པ་དང ། ལྷག་པའི་ བསམ་པས་ཕ་རོལ་ཏུ་ཕྱིན་པ་དྲུག་པོ་ཡོངས་སུ་དག་པ་ཡོངས་སུ་ཚོལ་བ་དང ། བྱང་ཆུབ་སེམས་དཔའ་ཐམས་ཅད་ལ་སྟོན་པར་འདུ་ཤེས་བསྐྱེད་དེ་ཐ་ན་སེམས་དང་པོ་བསྐྱེད་པའི་བྱང་ཆུབ་སེམས་དཔའ་ལ་ཡང་བསྟི་སྟང་བྱེད་པ་དང ། ཤེས་ཀྱི་ཁེའི་ཕྱིར་ཚུལ་འཆོས་པ་མེད་པ་སྟེ། བུ་མོ་བྱང་ཆུབ་སེམས་དཔའ་ཆོས་བཞི་པོ་དེ་དག་དང་ལྡན་ན་སངས་རྒྱས་ཀྱི་ཞིང་གང་དུ་སེམས་བསྐྱེད་པ་དེར་སྐྱེའོ། །དེ་ལ་འདི་སྐད་ཅེས་བྱ་སྟེ། གཞན་ལ་མཆོད་པ་མཐོང་ན་ཕྲག་དོག་མེད། །ཕ་རོལ་ཕྱིན་པ་དག་པ་ཡོངས་སུ་འཚོལ། །བྱང་ཆུབ་སེམས་དཔའ་སྟོན་པར་རྟག་ཏུ་སེམས། ། ཤེས་ཁེ་བདེ་བའི་དོན་དུ་ཚུལ་འཆོས་མེད། །ཡོན་ཏན་འདི་དག་རྟག་ཏུ་བསྟེན་བྱས་ན། །དེ་བཞིན་གཤེགས་པ་རྣམས་དང་དེ་ཕྲད་འགྱུར། །ཞིང་གང་དག་ཏུ་སྨོན་ལམ་བཏབ་བྱས་པ། །འདོད་པ་བཞིན་དུ་ཞིང་དེར་སྐྱེ་བར་འགྱུར། །དེ་ནས་བཅོམ་ལྡན་འདས་ལ་བུ་མོ་དྲི་མ་མེད་ ཀྱིས་བྱིན་པས་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་བཅོམ་ལྡན་འདས་ཀྱིས་ཇི་ལྟར་ཆོས་བརྟགས་པ་འདི་དག་བདག་གིས་ཡང་དག་པར་བླངས་ཏེ་གནས་པར་མི་བགྱིས་ན་བདག་གིས་སངས་རྒྱས་བཅོམ་ལྡན་འདས་གང་དག་ཕྱོགས་བཅུའི་འཇིག་རྟེན་གྱི་ཁམས་ ན་འཚོ་ཞིང་གཞེས་ལ་ཆོས་ཀྱང་སྟོན་པ་དེ་དག་ཐམས་ཅད་བསླུས་པར་གྱུར་ཅིག་།དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་བུ་མོ་དྲི་མ་མེད་ཀྱིས་བྱིན་པ་ལ་འདི་སྐད་ཅེས་སྨྲས་སོ། །བུ་མོ་ཁྱོད་དེ་སྐད་སྨྲ་བ་ནི་ངོ་མཚར་ཏེ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་ སྤྱོད་པ་བསྒྲུབ་དཀའ་བར་མི་ཤེས་སམ། དེ་ནས་བུ་མོ་དྲི་མ་མེད་ཀྱིས་བྱིན་པས་གནས་བརྟན་མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཆེན་པོ་བདེན་པ་དང་བདེན་པའི་ཚིག་གང་གིས་བདག་མ་འོངས་པའི་དུས་ན་ཇི་ལྟར་ད་ལྟར་དེ་བཞིན་གཤེགས
43-1-258a
པ་མངོན་སུམ་དུ་བཞུགས་པ་བཞིན་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བ་དང ། ཇི་ལྟར་བརྟགས་པའི་ཆོས་འདི་དག་ཀྱང་ཡང་དག་པར་བླངས་ཏེ་གནས་པར་འགྱུར་ཞེ་ན། བདེན་པ་དང་བདེན་པའི་ཚིག་དེས་སྟོང་གསུམ་ གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་ཅིག་།སེམས་ཅན་གང་ལ་ཡང་གནོད་པ་མེད་པར་གྱུར་ཅིག་།བདེན་པ་དང་བདེན་པའི་ཚིག་གང་གིས་བཅོམ་ལྡན་འདས་ཀྱིས་ཇི་ལྟར་བརྟགས་པའི་ཆོས་འདི་དག་ཡང་དག་པར་བླངས་ཏེ་གནས་པར་ འགྱུར་ཞེ་ན། བདེན་པ་དང་བདེན་པའི་ཚིག་དེས་ལྷའི་མེ་ཏོག་གི་ཆར་མངོན་པར་འབབ་པར་གྱུར་ཅིག་།མ་དཀྲོལ་བར་སིལ་སྙན་བྱེ་བ་ཁྲག་ཁྲིག་བརྒྱ་སྟོང་སྒྲ་འབྱིན་པར་གྱུར་ཅིག་།བདག་ཀྱང་བུད་མེད་ཀྱི་ལུས་ལས་གྱུར་ཏེ་སྐྱེས་པའི་ལུས་སུ་རེད་ཅིང་ལོ་བཅུ་དྲུག་ལོན་པ་འདྲ་བར་གྱུར་ ཅིག་།སྨོན་ལམ་དེ་སྐད་བཏབ་ཅིང་བདེན་པའི་བྱིན་གྱི་རླབས་འདི་བྱས་མ་ཐག་ཏུ་དེ་ནས་དེའི་མོད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཡང་རྣམ་པ་དྲུག་ཏུ་གཡོས། །མ་དཀྲོལ་བར་སིལ་སྙན་བྱེ་བ་ཁྲག་ཁྲིག་བརྒྱ་སྟོང་གི་སྒྲ་ཡང་བྱུང ། ལྷའི་མེ་ཏོག་གི་ཆར་ཡང་ མངོན་པར་བབ་བོ། །བུ་མོ་དྲི་མ་མེད་ཀྱིས་བྱིན་པ་ཡང་བུད་མེད་ཀྱི་ལུས་མི་སྣང་བར་གྱུར་ཏེ་སྐྱེས་པའི་དབང་པོ་ཐོབ་ནས་ལོ་བཅུ་དྲུག་ལོན་པ་ཙམ་གྱི་གཞོན་ནུ་འདྲ་བར་སྣང་ངོ ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་མཽད་གལ་གྱི་བུ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་ འདས་བྱང་ཆུབ་སེམས་དཔའ་རྣམས་ནི་ངོ་མཚར་ཆེ་བ་ལགས་སོ། །བཅོམ་ལྡན་འདས་དང་པོ་སེམས་བསྐྱེད་པ་ནས་བཟུང་སྟེ་བྱང་ཆུབ་ཀྱི་སྙིང་པོ་ལ་གནས་པའི་བར་གྱི་བྱང་ཆུབ་སེམས་དཔའ་ལ་ཕྱག་འཚལ་ལོ། །དེ་ཅིའི་སླད་དུ་ཞེ་ན། འདི་ལྟར་འདིའི་བདེན་པའི་བྱིན་གྱི་རླབས་ ཀྱིས་རྒྱུ་འདི་དག་སོ་སོར་ཡོངས་སུ་རྫོགས་པས་བུ་མོ་དྲི་མ་མེད་ཀྱིས་བྱིན་པ་འདི་ནི་འདི་ལྟར་རྫུ་འཕྲུལ་ཆེ་བ་འདི་ལྟར་དབང་ཆེ་བར་གྲགས་པ། འདི་ལྟར་མཐུ་ཆེ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། མཽད་གལ་གྱི་བུ་དེ་དེ་བཞིན་ནོ། །ཇི་སྐད་སྨྲས་པ་དེ
43-1-258b
བཞིན་ཏེ། དང་པོ་སེམས་བསྐྱེད་པ་ནས་བཟུང་སྟེ་བྱང་ཆུབ་ཀྱི་སྙིང་པོའི་བར་གྱི་བྱང་ཆུབ་སེམས་དཔའ་རྣམས་ནི་ལྷ་དང་བཅས་པའི་འཇིག་རྟེན་གྱི་མཆོད་རྟེན་དང་སྦྱིན་གནས་ཡིན་ཏེ། ཉན་ཐོས་དང ། རང་སངས་རྒྱས་ཐམས་ཅད་ཀྱང་ཟིལ་གྱིས་གནོན་ཏོ། །དེ་ནས་བཅོམ་ལྡན་ འདས་ཀྱིས་དེའི་ཚེ་འཛུམ་པ་མཛད་དོ། །འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་དུ་མ་ཁ་དོག་སྣ་ཚོགས་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེ་བརྒན་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་སྟེ། འོད་དེས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་ཁྱབ་པར་མཛད་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ་སླར་ལོག་ནས་བཅོམ་ལྡན་འདས་ཀྱི་དབུའི་ གཙུག་ཏུ་ནུབ་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་དེ་ གསོལ་པ། ལྷ་དང་ཚངས་པའི་སྒྲ་དང་མི་མཇེད་བདག་པོའི་སྒྲ་དང་འབྲུག་སྒྲ་དབྱངས་ལྡན་པ། །མགོན་པོ་ལྷ་སྒྲ་ཡིད་འོང་ལྡན་ཞིང་འདོད་ཆགས་ཞེ་སྡང་ཞི་བར་མཛད་པ་པོ། །གཏི་མུག་སྤོང་བ་འཇིག་རྟེན་དག་ན་དགའ་བ་བཟང་པོ་གཞལ་ཡས་སྐྱེད་མཛད་པ། །སྟོབས་ བཅུ་ཡོན་ཏན་རྒྱ་མཚོ་མངའ་བ་གང་གི་དོན་དུ་འོད་བཏང་བསྟན་དུ་གསོལ། །རིར་བཅས་ནགས་ཚལ་བཅས་ཤིང་ཆབ་དང་བཅས་པའི་ས་རྣམས་རྣམ་པ་དྲུག་ཏུ་གཡོས། །ལྷ་རྣམས་ནམ་མཁར་གནས་ཤིང་ལྷ་ཡི་མེ་ཏོག་ཡིད་དུ་འོང་བའི་ཆར་པ་འབེབས། །སེང་གེས་ཝ་ཕམ་ བགྱིས་པ་བཞིན་དུ་ཁྱོད་ཀྱིས་མུ་སྟེགས་གཞན་ཀུན་ཕམ་པར་མཛད། །དཔའ་བོ་གང་གི་དོན་དུ་འོད་ཀྱི་ལྟས་འདི་བསྟན་པ་མཛད་པ་བཀའ་སྩལ་གསོལ། །ཉི་ཟླ་བྱེ་བ་སྟོང་གིས་འོད་བཀྱེ་བ་དང་གློག་དང་ནོར་བུ་རྣམས་འོད་དང ། །ལྷ་དང་ཀླུ་དང་དྲི་ཟ་གནོད་སྦྱིན་དག་གི་འོད
43-1-259a
རྣམས་འབར་བ་གང་ལགས་པ། །ཤཱཀྱ་ཐུབ་པའི་ཞལ་ནས་དགེ་ཞིང་དག་པའི་འོད་བྱུང་བ་དང་མཇལ་གྱུར་ནས། །འོད་རྣམས་ཐམས་ཅད་མོག་མོག་བགྱིས་ན་སངས་རྒྱས་འོད་ནི་ཕྱོགས་བཅུ་རྣམས་སུ་མཛེས། །ཁྱོད་ཀྱི་སྨིན་མཚམས་བར་གྱི་མཛོད་ སྤུ་རབ་མཛེས་དཀར་ཞིང་དྲི་མ་མ་མཆིས་བཟང ། །འབར་ཞིང་པད་མའི་རྩ་དང་དུང་དང་མེ་ཏོག་ཀུན་ད་འདྲ་བས་ཕྱོགས་གསལ་བགྱིད། །ཐམས་ཅད་མོག་མོག་བགྱིས་ནས་གདུགས་ཀྱི་སྲིན་བུ་མེ་ཁྱེར་བཞིན་དུ་རྒྱལ་བ་མཛེས། །མི་ཡི་སེང་གེ་ཐུབ་འདི་གང་གི་དོན་ཆེན་བཟང་པོར་དེར་ འགྱུར་བསྟན་དུ་གསོལ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ་ཁྱོད་ཀྱིས་བུ་མོ་དྲི་མ་མེད་ཀྱིས་བྱིན་པ་འདི་བྱིན་གྱི་རླབས་གང་གིས་བུད་མེད་ཀྱི་དངོས་པོ་བསྒྱུར་ཏེ་སྐྱེས་པའི་དབང་ པོ་ཐོབ་པར་གྱུར་པ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བཀའ་སྩལ་པ། ཀུན་དགའ་བོ་བྱང་ཆུབ་སེམས་དཔའ་དྲི་མ་མེད་ཀྱིས་བྱིན་པ་འདི་བསྐལ་པ་གྲངས་མེད་པ་འབུམ་ཕྲག་བརྒྱད་ཅུར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་ སྤྱད་དེ། བསྐལ་པ་གྲངས་མེད་པ་འབུམ་ཕྲག་དྲུག་ཅུར་སྤྱད་ནས་ཕྱིས་བུ་མོ་འདི་འཇམ་དཔལ་གཞོན་ནུར་གྱུར་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །འཇམ་དཔལ་གཞོན་ནུར་གྱུར་པ་ཅི་འདྲ་བ་དེ་འདྲ་བའི་བྱང་ཆུབ་སེམས་དཔའ་བརྒྱད་ཁྲི་ དག་གི་སངས་རྒྱས་ཀྱི་ཞིང་གི་ཡོན་ཏན་བཀོད་པ་གང་དག་ཡོད་པ་དེ་འདྲ་བ་དག་ནི་བྱང་ཆུབ་སེམས་དཔའ་དྲི་མ་མེད་ཀྱིས་བྱིན་པའི་སངས་རྒྱས་ཀྱི་ཞིང་གི་ཡོན་ཏན་བཀོད་པ་གཅིག་ཏུ་འགྱུར་རོ། །དེ་ནས་ཚེ་དང་ལྡན་པ་མཽད་གལ་གྱི་བུ་ཆེན་པོས་བྱང་ཆུབ་སེམས་དཔའ་དྲི་མ་མེད་ཀྱིས་ བྱིན་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ་ཁྱོད་དེ་ལྟར་ཡུན་རིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ཕྱིར་སྤྱོད་སྤྱོད་ན། དེ་ཅིའི་ཕྱིར་ཁྱོད་ཀྱིས་དེའི་ཚེ་བུད་མེད་ཀྱི་དངོས་པོ་མ་བསྒྱུར་བྱང་ཆུབ་སེམས་དཔའ་དྲི་མ་མེད་ཀྱིས་བྱིན་པས་སྨྲས་པ། གནས་བརྟན་མཽད
43-1-259b
གལ་གྱི་བུ་ཆེན་པོ་ནི་རྫུ་འཕྲུལ་དང་ལྡན་པ་རྣམས་ཀྱི་མཆོག་ཏུ་བསྟན་པ་ཡིན་ན། བཙུན་པ་ཁྱོད་ཅིའི་ཕྱིར་སྐྱེས་པའི་ལུས་ལས་མ་བསྒྱུར། གནས་བརྟན་མཽད་གལ་གྱི་བུ་ཆེན་པོ་ཅང་མི་སྨྲ་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དྲི་མ་མེད་ཀྱིས་བྱིན་པས་ མཽད་གལ་གྱི་བུ་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་མཽད་གལ་གྱི་བུ་ཆེན་པོ་བུད་མེད་ཀྱི་ལུས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་བ་ཡང་མ་ཡིན། སྐྱེས་པའི་ལུས་ཀྱིས་བྱང་ཆུབ་མངོན་པར་རྫོགས་པར་འཚང་རྒྱ་བ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་ནི་མ་སྐྱེས་པ་སྟེ། དེ་ནི་ལུས་སམ་སེམས་ཀྱིས་མངོན་པར་རྫོགས་པར་འཚང་རྒྱ་བར་མི་ནུས་པའི་ཕྱིར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཇམ་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་བྱང་ཆུབ་སེམས་དཔའ་ དྲི་མ་མེད་ཀྱིས་བྱིན་པ་འདི་ཟབ་མོ་ལ་མོས་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་འདི་ལྟར་བྱང་ཆུབ་སེམས་དཔའ་དྲི་མ་མེད་ཀྱིས་བྱིན་པ་འདིས་སངས་རྒྱས་བྱེ་བ་ཕྲག་དྲུག་ཅུའི་ཐད་ན་ཚངས་པར་སྤྱོད་པ་སྤྱད་དོ། །སྟོང་པ་ཉིད་ཀྱི་ ཏིང་ངེ་འཛིན་བསྒོམས་སོ། །བསྐལ་པ་བརྒྱད་ཅུར་མི་སྐྱེ་བའི་ཆོས་ལ་བཟོད་པ་བསྒོམས་སོ། །སངས་རྒྱས་བྱེ་བ་ཕྲག་སུམ་ཅུ་དང ། བྱང་ཆུབ་སེམས་དཔའ་ཟབ་མོའི་ཚུལ་དང་ལྡན་པ་རྣམས་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དྲིས་སོ། །སངས་རྒྱས་བྱེ་བ་ཕྲག་ བརྒྱད་ཅུ་ལ་ན་བཟའ་དང ། ཞལ་ཟས་ཀྱིས་བཀུར་སྟི་བྱས་སོ། །སྤོབས་པ་རྣམ་པར་ངེས་པར་བསྟན་པའི་ཆོས་ཀྱི་རྣམ་གྲངས་འདི་ཡང་ཡོངས་སུ་དྲིས་སོ། །འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ གང་གཱའི་ཀླུང་གི་བྱེ་མ་སྙེད་དག་རིན་པོ་ཆེ་སྣ་བདུན་གྱིས་རབ་ཏུ་བཀང་སྟེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དབུལ་བ་ཕུལ་བ་བས་རིགས་ཀྱི་བུ་འམ་རིགས་ཀྱི་བུ་མོ་གང་གིས་ཆོས་ཀྱི་རྣམ་གྲངས་འདི་ཉན་ཏམ། ལེན་ཏམ།
43-1-260a
འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། གཞན་དག་ལ་ཡང་རྒྱ་ཆེར་རབ་ཏུ་སྟོན་ན་འདི་ནི་དེ་བས་ཆེས་བསོད་ནམས་མང་དུ་སྐྱེད་དོ། །དེ་ཅིའི་ཕྱིར་ཞེ་ན། སྒྲུབ་པ་འདིས་ནི་བྱང་ཆུབ་འཐོབ་པར་བྱེད་པའི་ཕྱིར་རོ། །དེ་ནས་ཡང་བཅོམ་ ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཁྱོད་ཀྱིས་ཆོས་ཀྱི་རྣམ་གྲངས་འདི་ཟུང་ཤིག་།ཆོངས་ཤིག་།ལྷོགས་ཤིག་།ཀུན་ཆུབ་པར་གྱིས་ཤིག་།གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཅིག་།དེ་ནས་བཅོམ་ལྡན་ འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ་དེའི་ཕྱིར་ཆོས་ཀྱི་རྣམ་གྲངས་འདི་སྤོབས་པ་རྣམ་པར་ ངེས་པར་བསྟན་པ་ཞེས་བྱ་བར་ཟུང་ཤིག་།གཟུངས་ཀྱི་རྡོ་རྗེའི་ཚིག་ཅེས་བྱ་བར་ཡང་ཟུང་ཤིག་།བྱང་ཆུབ་སེམས་དཔའི་སྡེ་སྣོད་ཅེས་བྱ་བར་ཡང་ཟུང་ཤིག་།དྲི་མ་མེད་ཀྱིས་བྱིན་པས་ཞུས་པ་ཞེས་བྱ་བར་ཡང་ཟུང་ཤིག་།བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བསྟན་ པ་ན་ལྷ་དང་མིའི་སྐྱེ་དགུ་ལས་སྲོག་ཆགས་ཁྲག་ཁྲིག་ཕྲག་བརྒྱད་ཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སྤོབས་པ་བརྩེགས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་ དཔའ་དྲི་མ་མེད་ཀྱིས་བྱིན་པ་འདི་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་དྲི་མ་མེད་ཀྱིས་བྱིན་པ་འདི་བསྐལ་པ་བརྒྱ་སྟོང་ཕྲག་གྲངས་ མེད་པ་བགྲང་བ་ལས་འདས་པ་ན་སངས་རྒྱས་ཀྱི་ཞིང་ཉན་ཐོས་དང་རང་སངས་རྒྱས་རྣམས་མེད་པ་ཚེའི་ཚད་དཔག་ཏུ་མེད་པ། བྱང་ཆུབ་སེམས་དཔའི་དགེ་འདུན་དཔག་ཏུ་མེད་པ་དང་ལྡན་པ། ལྷའི་ལོངས་སྤྱོད་པས་ཤིན་ཏུ་ལྷག་པ་དང་ལྡན་པ། ཡོན་ཏན་དཔག་ཏུ་མེད་པ་བཀོད་པ་ཞེས་བྱ་བར
43-1-260b
དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞད་ཅིང་འཛུམ་པ་དྲི་མ་མེད་པའི་ཏོག་གི་རྒྱལ་པོ་ཞེས་བྱ་བར་འགྱུར་རོ། །དེ་ནས་བྱང་ཆུབ་སེམས་དཔའ་དྲི་མ་མེད་ཀྱིས་བྱིན་པས་བཅོམ་ལྡན་འདས་ལས་མངོན་སུམ་དུ་ལུང་བསྟན་པ་ཐོས་ནས་དགའ་བ་དང ། མཆོག་ཏུ་དགའ་བ་དེས་ཏ་ལ་བྱེ་བ་ཕྲག་བརྒྱད་ཅུ་སྲིད་དུ་ནམ་མཁའ་ལ་མངོན་པར་འཕགས་ཏེ། སངས་རྒྱས་ཀྱི་ཞིང་སྟོང་འོད་ཀྱིས་ཁྱབ་པར་བྱས་ནས་བཅོམ་ལྡན་འདས་ཀྱི་དབུའི་གཙུག་གི་སྟེང་དུ་རིན་པོ་ཆེའི་གདུགས་ཚད་དཔག་ཚད་བརྒྱད་ཁྲི་བཞི་སྟོང་ཡོད་པ་བྱིན་གྱིས་བརླབས་ཏེ། རིན་པོ་ཆེའི་གདུགས་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཁེབས་སོ། །དེས་ཀྱང་ནམ་མཁའ་དེ་ཉིད་ན་རྫུ་འཕྲུལ་དཔག་ཏུ་མེད་པ་བྱས་ནས་ཕྱོགས་བཅུའི་སངས་རྒྱས་གང་གཱའི་ཀླུང་གི་བྱེ་མ་སྙེད་དག་ལ་བསྟོད་ཅིང་ཕྱག་འཚལ་ཏེ་བསྟི་སྟང་བྱས་ནས་ནམ་མཁའ་ དེ་ལས་བབས་ཏེ། བཅོམ་ལྡན་འདས་ལ་ལན་སྟོང་བསྐོར་བ་བྱས་ནས་ཕྱོགས་གཅིག་ཏུ་འདུག་གོ་།དེ་ནས་བྲམ་ཟེ་ཚངས་པའི་ལྷ་ལ་སོགས་པ་བྲམ་ཟེ་ལྔ་བརྒྱ་པོ་དེ་དག་གིས་བྱང་ཆུབ་སེམས་དཔའ་དྲི་མ་མེད་ཀྱིས་བྱིན་པའི་རྫུ་འཕྲུལ་གྱི་ཆོ་འཕྲུལ་ཡང་མཐོང ། ལུང་བསྟན་ པ་དེ་ཡང་ཐོས་ནས་ཚིམ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་བདེ་བ་དང ། ཡིད་བདེ་བ་སྐྱེས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་སྒྲ་སྐད་འཐུན་པར་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། གང་དག་སངས་རྒྱས་གུས་ མཆིས་དང ། །གང་དག་སངས་རྒྱས་ཆོས་སླད་དུ། །བློ་ནི་ཤིན་ཏུ་ངེས་གྱུར་པ། །དེ་དག་རྙེད་པ་ཆེན་པོ་རྙེད། །སྔོན་ཆད་སྡིག་པའི་ལས་བགྱིས་པས། །བདག་ཅག་བྲམ་ཟེའི་ཁྱིམ་དུ་སྐྱེས། །སྟོན་པའི་ཉན་ཐོས་མཐོང་གྱུར་ན། །བཀྲ་མི་ཤིས་ཞེས་ཚིག་ཏུ་ བརྗོད། །སངས་རྒྱས་སྲས་དག་མཐོང་གྱུར་ན། །བཀྲ་མི་ཤིས་ཞེས་བགྱིས་པ་ཡི། །ཚིག་ཏུ་བརྗོད་པ་གང་མཆིས་པ། །བཙུན་པ་ནོངས་པ་བཤགས་པར་བགྱིད། །ཚོགས་ཀྱི་རྒྱལ་པོ་མཆོག་གྱུར་པ། །སངས་རྒྱས་གང་དག་མ་མཐོང་བ། །མི་དེ
43-1-261a
དག་གིས་ནོངས་པ་རྙེད། །དེ་དག་ཁ་ཟས་ངན་པ་འཚལ། །དྲི་མེད་བྱིན་པས་མཆོད་སྦྱིན་སླད། །བདག་ཅག་འགྲོན་དུ་བོས་པར་གྱུར། །སྟོན་པའི་ཉན་ཐོས་རྣམས་མཐོང་ནས། །མ་གུས་པས་ནི་སྡོད་ཅིང་མཆིས། །དེ་ལ་བདག་ཅག་ རྣམས་ཀྱིས་དྲིས། །ཁྱོད་ཀྱིས་འདྲེན་པ་གང་ན་མཐོང ། །དེས་སྨྲས་བཙས་ནས་ཞག་བདུན་ན། །ཁོ་མོས་སངས་རྒྱས་མཚན་ཐོས་མཆི། །དེ་ཡིས་སངས་རྒྱས་བསྔགས་མང་བ། །དེ་བཞིན་གཞན་དུ་མི་འགྱུར་བརྗོད། །དེ་ཡི་ཚིག་ཐོས་བདག་ཅག་ཀུན། ། བྱང་ཆུབ་མཆོག་ཏུ་ཡང་དག་ཞུགས། །བདག་ཅག་སྔོན་གྱི་བསོད་ནམས་དང ། །སངས་རྒྱས་ཞེས་བགྱིའི་སྒྲས་བསྐུལ་བས། །ཤཱཀྱ་སེང་གེའི་ཞབས་ལ་ནི། །ཕྱག་བགྱིའི་སླད་དུ་ལྷགས་པ་ལགས། །རྫོགས་པའི་སངས་རྒྱས་མཐོང་ཕྱག་བགྱིས། །ཆོས་ ཀྱི་དམ་པ་ཐོས་པར་གྱུར། །རྐང་གཉིས་དམ་པ་འདི་མཐོང་བས། །བདག་ཅག་སྡུག་བསྔལ་ཀུན་ལས་གྲོལ། །སྐྱོབ་པ་ཤཱཀྱ་སེང་གེ་ཡིས། །ཆོས་གང་བཤད་པ་མཛད་པ་རྣམས། །སངས་རྒྱས་ཆོས་ཀྱི་དོན་སླད་དུ། །བདག་ཅག་དེ་ལ་སློབ་པར་བགྱིད། ། སངས་རྒྱས་ཆོས་ཐོབ་བགྱི་སླད་དུ། །བྱང་ཆུབ་སྤྱོད་པ་ཐོས་གྱུར་ནས། །བདག་ཅག་ཡང་དག་ནན་ཏན་གྱིས། །སྤྱོད་པ་དེ་ལ་བསླབ་པར་བགྱི། །བྱང་ཆུབ་སེམས་དཔའི་སྤྱོད་གང་དང ། །ལམ་དང་སྒོ་ཡང་བསྟན་པ་ལ། །ནན་ཏན་གྱིས་ནི་གནས་པར་བགྱི། །འཇིག་རྟེན་ རྣམས་ཀྱི་མཆོད་རྟེན་འགྱུར། །དེ་དག་ལྷག་པའི་བསམ་མཁྱེན་ནས། །ཐུབ་པས་དེ་ཚེ་འཛུམ་པ་མཛད། །ཐུབ་ཆེན་ལུང་བསྟན་མཛད་གསོལ་ཞེས། །སངས་རྒྱས་ལ་ནི་ཀུན་དགས་ཞུས། །བཅོམ་ལྡན་འདས་ཀྱིས་ཀུན་དགའ་ལ། །འདི་སྐད་ཅེས་ནི་བཀའ་སྩལ་ཏོ། ། བྲམ་ཟེ་ལྔ་བརྒྱ་འདི་དག་དང ། །བྲམ་ཟེ་ཚངས་པའི་ལྷ་དེ་དང ། །དེ་ཀུན་བསྐལ་པ་གཅིག་གི་ཚེ། །རྣམ་པར་འདྲེན་པ་སངས་རྒྱས་འགྱུར། །སངས་རྒྱས་ལྔ་བརྒྱ་ཐམ་པ་ལ། །ཚེ་རབས་སྔ་མར་མཆོད་བྱས་པ། །དེ་ནས་ཕྱིན་ཆད་སྤྱོད་ཚེ་ཡང ། །སངས་རྒྱས་བྱེ
43-1-261b
བ་མཐོང་བར་འགྱུར། །བསྐལ་པ་བྱེ་བ་བརྒྱད་ཅུར་ནི། །དེ་དག་ངན་འགྲོར་འགྲོ་མི་འགྱུར། །དེ་དག་བསྐལ་པ་རེ་རེ་ལའང ། །སངས་རྒྱས་བྱེ་བ་མཐོང་བར་འགྱུར། །དེ་དག་བསྐལ་པ་གཅིག་དེ་ལ། །རྐང་གཉིས་རྣམས་ཀྱི་མཆོག་འགྱུར་ཏེ། །འོད་བྱེད་ཅེས་ བྱའི་བསྐལ་གཅིག་ལ། །ཚངས་པའི་སྒྲ་ཞེས་བྱ་བར་འགྱུར། །དེ་དག་ཚེ་ཚད་མཚུངས་འགྱུར་ཏེ། །བསྐལ་པ་བྱེ་བ་བརྒྱད་ཅུ་ཐུབ། །ཞིང་མཚུངས་དགེ་འདུན་མཚུངས་འགྱུར་ཏེ། །དགེ་སློང་བྱེ་བ་བརྒྱད་ཅུ་ཡོད། །སེམས་ཅན་རྣམས་ཀྱི་དོན་སྤྱོད་ཅིང ། །ཆོས་ འདི་ལ་ཡང་སྤྱད་བྱས་ནས། །དེ་དག་ཐམས་ཅད་མཐར་གྱིས་སུ། །མྱ་ངན་འདས་པ་ཞི་བ་འཐོབ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སྤོབས་པ་བརྩེགས་དང ། བྱང་ཆུབ་སེམས་དཔའ་དྲི་མ་མེད་ཀྱིས་བྱིན་པ་དང ། འཇམ་ དཔལ་གཞོན་ནུར་གྱུར་པ་དང ། བྲམ་ཟེ་དེ་དག་དང ། རྒྱལ་པོ་གསལ་རྒྱལ་དང ། ཉན་ཐོས་ཆེན་པོ་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །། འཕགས་པ་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལེའུ་སྟོང་ཕྲག་བརྒྱ་པ་ལས་དྲི་མ་མེད་ཀྱིས་བྱིན་པས་ཞུས་པ་ཞེས་བྱ་སྟེ་ལེའུ་སུམ་ཅུ་རྩ་གསུམ་པ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། སུ་རེན་དྲ་བོ་དྷི་དང ། ཞུ་ཆེན་གྱི་ལོ་ ཙྪ་བ་བན་དེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།།