rKTs


D855

(e-text produced by ADARSHA)

see text in transliteration
101-1-74b
༄#། །རྒྱ་གར་སྐད་དུ། ཨཱརྱ་བུདྡྷ་ཧྲྀ་ད་ཡཾ་ནཱ་མ་དྷཱ་ར་ཎཱི། བོད་སྐད་དུ། འཕགས་པ་སངས་རྒྱས་ཀྱི་སྙིང་པོ་ཞེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ ལྡན་འདས་རྒྱ་མཚོའི་འགྲམ་གྱི་སྐྱེད་མོས་ཚལ་ན་སངས་རྒྱས་ཀྱི་སྤྱོད་ཡུལ་གྱི་ཤིང་ལྗོན་པ་ཀུན་ནས་སེང་གེའི་ཁྲི་ལ་བཞུགས་ཏེ། ལྷའི་འཁོར་གྱིས་ཀུན་ནས་བསྐོར་ཅིང་མདུན་གྱིས་བལྟས་ཏེ་ཆོས་སྟོན་ཏོ། །དེ་ནས་བཅོམ་ལྡན་འདས་ཀྱིས་དབང་ཕྱུག་ཆེན་པོ་དཀའ་ཐུབ་
101-1-75a
བཟང་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་རྣམས་ལ་བཀའ་སྩལ་པ། ལྷའི་བུ་དག་དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུང་ཤིག་དང་བཤད་དོ། །དེ་བཞིན་གཤེགས་པ་ཕྱི་མའི་དུས་ན་འཁོར་བཞི་བསྡུ་བ་དང་རྗེས་སུ་གཟུང་བ་དང་ ཀུན་དུ་རྗེས་སུ་གཟུང་བ་དང་ཁྱད་པར་དུ་འགྲོ་བར་བྱ་བ་དང ། དོན་ཐམས་ཅད་དང་ཆོས་ཐམས་ཅད་དང་ལྡན་པ་ཡོངས་སུ་རྫོགས་པར་བྱ་བ་དང ། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་རྣམ་པ་ཐམས་ཅད་དུ་ཁྱད་པར་ཐོབ་པར་བྱ་བའི་ཕྱིར་སངས་རྒྱས་ཀྱི་སྙིང་པོ་ཞེས་བྱ་ བའི་གཟུངས་ཀྱི་ཆོས་ཀྱི་རྣམ་གྲངས་སྟོན་ཏོ། །འཆད་དོ། །དེ་ཁྱེད་ཀྱིས་ཟུང་ལ་ད་ལྟར་དང་ང་ཡོངས་སུ་མྱ་ངན་ལས་འདས་ནས་ཕྱི་མའི་དུས་ནི་ཐེག་པ་ཆེན་པོ་ལ་ཡང་དག་པར་ཞུགས་པའི་འཁོར་རྣམ་བཞི་རྣམས་ལ་སྟོན་ཅིག་།ཤོད་ཅིག་།ཡལ་བར་མི་དོར་བར་ངེས་ པར་བསྟན་པར་བྱ། བསྒྲག་པར་བྱའོ། །ཇི་ཙམ་དུ་ཕོངས་བར་གྱུར་པ་རྣམས་དང ། སྒྲིབ་པ་དང་ལྡན་པ་རྣམས་ལ་དེ་བཞིན་གཤེགས་པའི་གསུང་བསྐྱང་ཞིང་ངེས་པར་བསྟན་པར་བྱ། བསྒྲག་པར་བྱའོ། །གསོལ་བ། བཅོམ་ལྡན་འདས་དེ་བཞིན་དུ་བགྱི་སྟེ། དེ་ བཞིན་གཤེགས་པས་ཇི་སྐད་བཀའ་སྩལ་པ་དེ་བཞིན་དུ་འཚལ་ལོ། །དེ་བཞིན་གཤེགས་པའི་བཀའ་འདི་ནན་ཏན་གྱིས་ཡོངས་སུ་རྫོགས་པར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག་སངས་རྒྱས་ཀྱི་སྙིང་པོ་ཞེས་བྱ་བའི་ཆོས་ཀྱི་རྣམ་གྲངས་ གང་ཞེ་ན། ཏདྱ་ཐཱ། ཨ་མ་ལེ། ནིརྨ་ལེ། སརྦ་ཨཱ་ཀཱ་ར་ཨརྠ་པ་རི་པྲཱ་པྟེ། ཨ་ས་མནྟ་སརྦ་ཀུན་ཨཱ་ཀཱ་རེ་ཏྲྱ་དྷྭ། ཨ་སཾ་ག་ཨ་ནཱ་བྲྀ་ཏེ། ས་མནྟ། ད་ཤ་དི་ཤ། པ་རི་པཱུརྞ་ཛྙཱ་ནེ། སརྦ་ཨ་སཾ་ག་དཪྴ་ན་པྲཱཔྟེ། སརྦ་དྷརྨ་མ་བི་ཤ་ཏ་པ་རི་པཱུརྞེ། སརྦ་ ་ཀཱ་ར། ཨ་སཾ་ག་ས་མ་ནྭི་ཏེ། ས་མནྟ་ཨ་པྲ་ཏི་ཧ་ཏ་ཏེ་ཛེ་ཏྲྱ་དྷྭ་ད་ཤ་སུ། དིཀྵུ་པ་རི་པྲཱཔྟ། ཨརྠེ། ཤཱནྟ། པྲཱ་ཤཱནྟ། ཨུ་པེ་ཤཱནྟ། ས་མ་ཤཱནྟ། བི་མོཀྵ་ཨ་ནུ་པྲཱ་པྟེ། སུ་པྲ་ཏི་བུདྡྷ་དྷརྨ་དྷཱ་ཏུ།ཏྱནྟ་སུ་ནི་སྲི་ཏེ། སརྦ་ཨཱ་ཀཱ་ར་ནི་ས་ས་ར་ཎ།
101-1-75b
་ན་བ་ཤེ་ཥ་བཱར་ངྒ་ཧེ། བི་པྲ་མུཀྟ། ཨ་སཾ་ཡོ་ག། བི་པྲ་ཡོ་ག། སྠི་ཏེ་དྷརྨ་ཏེ། ག་གན་ས་མ་པྲ་ཀྲྀ་ཏི་པ་རི་ཤུདྡྷ། ནིརྨ་ལེ། ཨ་ས་མནྟ། ཏྲྱ་དྷྭ་ཨ་ནུ་ག་ཏ། སུ་པྲཱ་བྟེ་པཱུརྦཱནྟ། ཨ་པ་རནྟ། མ་དྷྱ་ཏྲྱ་དྷཱ་ས་མནྟ་ཨ་ནུ་པྲཱ་པྟེ། ཨ་ན་པ་ཤེ་ཥ། པ་རི་ ཛྙཱ་པྲ་ཧ་ན། བྷ་བ་ན། ས་ཀྴད་ཀྲི་ཡ་པ་ར་མ་བར་དྒ་ཏེ། ཡ་ཐཱ་བཱ་དི་ཏ་ཐཱ་ཀཱ་རི། སརྦ་ཨཱ་ཀཱ་ར་སཾ་པནྣེ། སརྦ་ཨཱ་ཀཱ་ར་མ་ཧཱ་མེེ་ཏྲི། མ་ཧཱ་ཀ་རུ་ཎཱ། སརྦ་ཨཱ་ཀཱ་ར་ས་མ་ས་གྲ་ཧ་ཨ་ནུ་པྲཱ་པྟེ། ལྷའི་བུ་དག་འདི་ནི་སངས་རྒྱས་ཀྱི་སྙིང་པོ་ཞེས་བྱ་བའི་གཟུངས་ཀྱི་ ཆོས་ཀྱི་རྣམ་གྲངས་ཏེ། ཐེག་པ་ཆེན་པོ་ལ་ཡང་དག་པར་ཞུགས་པའི་འཁོར་བཞི་པོ་ལས་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ལུས་ལ་ཐོགས་སམ། ལེགས་པར་ཁ་ཏོན་དུ་བྱས་ཏེ་འཛིན་པ་དེས་དམན་པའི་སེམས་སུ་མི་བྱ་སྟེ། དེ་བཞིན་གཤེགས་པ་ ཇི་ལྟ་བ་བཞིན་དུ་དེ་དག་གི་སྤྱི་གཙུག་གི་སྟེང་གི་མཚམས་སུ་གནས་པར་འགྱུར་རོ། །ཁ་ཅིག་ནི་ངེས་པར་སངས་རྒྱས་མཐོང་བར་འགྱུར་རོ། །ཁ་ཅིག་ནི་ཐོས་པར་འགྱུར། ཁ་ཅིག་ནི་ཆོས་སྟོན་པར་འགྱུར། ཁ་ཅིག་ནི་གཟུངས་མི་བརྗེད་པར་འགྱུར། སློབ་པ་ལམ་ལ་ གནས་པ་རྣམས་ནི་ལམ་གྱི་རྒྱུན་མི་འཆད་ཅིང་ཆོས་སྟོན་པ་རྒྱུན་མི་འཆད་པར་འགྱུར། ཀུན་དུ་འཛིན་པ་མི་བརྗེད་པར་ཡང་འགྱུར། སྐྱེ་བ་གཅིག་གིས་ཐོགས་པ་གྲུབ་པར་འགྱུར། དེ་དག་དང་ལྡན་ན་ཐོས་པ་རྒྱ་མཚོ་ཐམས་ཅད་ཀྱི་གཟུངས་ཐོབ་པར་འགྱུར། མི་སྐྱེ་ བའི་ཆོས་ལ་བཟོད་པ་ཐོབ་པར་འགྱུར་བ་ནས་སངས་རྒྱས་ཀྱི་རྣམ་པར་ཐར་པ་སྒྲིབ་པ་མེད་པ་དང ། ཡོངས་སུ་རྫོགས་པའི་བར་དུ་རྗེས་སུ་ཐོབ་པར་འགྱུར་རོ། །ཁྱེད་ཀྱིས་ཚེ་འདི་ལ་ངའི་བསྟན་པའི་དགོངས་པ་ཁོང་དུ་ཆུད་པར་བྱའོ། །རིགས་ཀྱི་བུའམ་རིགས་ཀྱི་བུ་མོ་ དེ་དག་ལ་ཡང་ངེས་པར་བསྟན་པར་བྱ་ཞིང་བསྒྲག་པར་བྱའོ། །ཡལ་བར་མི་འདོར། ཕྱི་བཤོལ་མི་བྱ། བརྗེད་པར་མི་བྱའོ། །གསོལ་པ། བཅོམ་ལྡན་འདས་དེ་བཞིན་དུ་བསྒྲུབ་པར་བགྱིའོ། །བཅོམ་ལྡན་འདས་སངས་རྒྱས་ཀྱི་སྙིང་པོ་ཞེས་བགྱི་བའི་གཟུངས་
101-1-76a
ཀྱི་ཆོས་ཀྱི་རྣམ་གྲངས་འདི་སླད་མའི་དུས་ན་འཁོར་བཞི་རྣམས་ལ་ཕྱི་བཤོལ་མ་མཆིས་པ་དང ། མི་བསྐྱུད་པར་བསྟན་པར་བགྱི། བཤད་པར་བགྱིའོ། །རིགས་ཀྱི་བུའམ་རིགས་ཀྱི་བུ་མོ་དེ་དག་ལ་ཡང་ངེས་པར་བསྟན་པར་བགྱི་ཞིང་བསྒྲག་པར་ བགྱིའོ། །དེས་ན་དེ་བཞིན་གཤེགས་པའི་བཀའ་ལུང་དང་མཐུན་པར་འགྱུར། བདག་ཅག་གིས་དེ་བཞིན་གཤེགས་པའི་དམ་པའི་ཆོས་ཡོངས་སུ་གཟུང་བར་འགྱུར། རིགས་ཀྱི་བུའམ། རིགས་ཀྱི་བུ་མོ་དེ་དག་ལ་ཡང་དོན་ཆེན་པོ་དང ། ཕན་པའི་ དངོས་པོ་ཆེན་པོར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ་དག་དེའི་ཕྱིར་ཇི་སྐད་སྨྲས་པ་དེ་བཞིན་དུ་གྱིས་ཤིག་།འདི་ནི་ཁྱེད་ལ་རྗེས་སུ་བསྟན་པའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དབང་ཕྱུག་ཆེན་ པོ་དཀའ་ཐུབ་བཟང་པོ་ལ་སོགས་པ་གནས་གཙང་མའི་རིས་ཀྱི་ལྷའི་བུ་རྣམས་དང ། ཐམས་ཅད་དང་ལྡན་པའི་འཁོར་དེ་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སངས་རྒྱས་ཀྱི་སྙིང་པོ་ཞེས་བྱ་བའི་གཟུངས་རྫོགས་ སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །། ་་