༄#། །རྒྱ་གར་སྐད་དུ། ཨཱརྱ་བཛྲ་ཨ་ཛི་ཏ་ཨ་ན་ལ་པྲ་མོ་ཧ་ནཱི་ནཱ་མ་དྷཱ་ར་ཎཱི། བོད་སྐད་དུ། འཕགས་པ་རྡོ་རྗེ་མི་ཕམ་པ་མེ་ལྟར་རབ་ཏུ་རྨོངས་བྱེད་ཅེས་བྱ་བའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་ 102-1-47a བདག་གིས་ཐོས་པ་དུས་གཅིག་ན། བཅོམ་ལྡན་འདས་རིན་པོ་ཆེའི་རྩེ་མོའི་ཁང་པ་བརྩེགས་པ་ཅན་གྱི་རི། གངས་རི་སུལ་གྱི་མཆོག་།རི་རབ་ཀྱིསྨད་དང་རྐེད་ལྟར་གསེར་གྱི་རྡོ་སྣ་ཚོགས་ཀྱིས་གང་ཞིང་རེའུར་བྲེས་པ་འབར་བ། རིན་པོ་ཆེའི་རྡོ་དུ་མའི་འོད་སྣ་ ཚོགས་འཇའ་ལྟ་བུ་བྱུང་བའི་རྡོ་ལེབ་ཡངས་པ། མེ་ཏོག་དྲི་ཞིམ་པོ་བཀྲམ་ཞིང་ཕྱེ་མ་དང ། བདུག་པ་དྲི་ཞིམ་པ་མང་པོས་ཕུག་གི་ནང་དང་ནགས་བསྒོས་པ། གདུགས་དང ། ་ག་རུ་དང ། ཕྱེ་མ་དང ། དྲིལ་བུ་དང ། བླ་རེས་མཛེས་པར་བྱས་པའི་རི་བོ་མཆོག་ལ་བཞུགས་ ཏེ། དེ་ནས་བཅོམ་ལྡན་འདས་ལྷ་རྣམས་དང ། ལྷའི་བུ་རྣམས་དང ། ལྷ་མ་ཡིན་རྣམས་དང ། རླུང་ལྷ་རྣམས་དང ། རླུང་ལྷའི་བུ་རྣམས་དང ། ནམ་མཁའ་ལྡིང་རྣམས་དང ། ཀླུ་རྣམས་དང ། གནོད་སྦྱིན་རྣམས་དང ། མིའམ་ཅི་རྣམས་ དང ། སྲིན་པོ་རྣམས་དང ། དྲི་ཟ་རྣམས་དང ། རིག་སྔགས་འཆང་གྲུབ་པ་རྣམས་དང ། འབྱུང་པོ་རྣམས་དང ། ལོག་འདྲེན་རྣམས་དང ། ཤ་ཟ་རྣམས་དང ། སྣང་བ་དང་མི་སྣང་བའི་མ་མོའི་ཚོགས་ཁྱབ་པར་བྱེད་པ་རྒྱ་ཆེན་པོ་དག་གིས་དཔག་ཚད་ལྔ་བརྒྱར་འཁོར་གྱི་དཀྱིལ་ འཁོར་དུ་གྱུར་པར་འདུས་ཏེ། དེ་ན་གནས་པའི་བྱང་ཆུབ་སེམས་དཔའ་བདུན་ཁྲི་ལྔ་སྟོང་དང ། དགེ་སློང་ཁྲི་ཉི་སྟོང་ལྔ་བརྒྱ་དང་ཐབས་ཅིག་གོ། །བཅོམ་ལྡན་འདས་ནི་ཆོས་སྟོན་ཏེ། གནས་པར་བདེ་བ། མཉན་ན་བདེ་བ། འཁོར་བ་ལས་ངེས་པར་འབྱུང་བའི་ཆོས་སྟོན་ཏོ། ། དེ་ན་ལྷ་རྣམས་དང ། ལྷའི་བུ་རྣམས་དང ། ལྷ་མ་ཡིན་རྣམས་དང ། ལྷ་མ་ཡིན་གྱི་བུ་རྣམས་དང ། རླུང་ལྷ་རྣམས་དང ། རླུང་ལྷའི་བུ་རྣམས་དང ། ནམ་མཁའ་ལྡིང་རྣམས་དང ། ཀླུ་རྣམས་དང ། གནོད་སྦྱིན་རྣམས་དང ། མི་འམ་ཅི་རྣམས་དང ། སྲིན་པོ་རྣམས་ དང ། སྲིན་པོའི་བུ་རྣམས་དང ། དྲི་ཟ་རྣམས་དང ། རིག་སྔགས་འཆང་གྲུབ་པ་རྣམས་དང ། འབྱུང་པོ་རྣམས་དང ། ལོག་འདྲེན་རྣམས་དང ། ཤ་ཟ་རྣམས་དང ། སྣང་བ་དང ། མི་སྣང་བའི་མ་མོའི་ཚོགས་རྣམས་དང ། འབྱུང་པོའི་ཚོགས་རྣམས་དང ། འབྱུང་ 102-1-47b པོའི་ཚོགས་རྣམས་རྣམ་པར་རྒྱུ་ཞིང་ཀུ་ཅོ་དང ། འཇིགས་པ་དང ། ཉམ་ཐག་པའི་སྒྲ་འབྱིན་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་སྒྲ་དེ་དག་གསན་ནས་འདི་སྐད་ཅེས་བཀའ་སྩལ་ཏོ། །ཀྱེ་བཞིན་ བཟངས་དག་ཅིའི་ཕྱིར་ཀུ་ཅོ་དང ། འཇིགས་པ་དང ། ཉམ་ཐག་པ་དང ། འཁྲུག་པའི་སྒྲ་འབྱིན། དེ་དག་གིས་གསོལ་བ། བཅོམ་ལྡན་འདས་བདག་ཅག་ནི་དབང་དུ་བགྱིས་ཏེ། གནོད་པ་དང་དྲང་བས་བཀུག་ཅིང་དྲངས་ཏེ་ཐོ་བཙམས་ན། བཅོམ་ལྡན་འདས་བསྐྱབ་ཏུ་ གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཐམས་ཅད་ཀྱི་སྟེང་གི་དཀྱིལ་འཁོར་ཡངས་པ་སྟོན་པའི་མཆོག་གི་བློ་གྲོས་དང ། བློ་དང ། ལས་དང ། ལས་ཀྱི་མཐའ་དང་ལྡན་པ། ས་ཆེན་པོ་ལས་ས་གཞན་ཐོབ་པ་རྒྱལ་ཚབ་ཏུ་ཉེ་སྟེ། ཆོས་ཀྱི་རྒྱལ་སྲིད་ལ་ དབང་བསྐུར་བའི་བྱང་ཆུབ་སེམས་དཔའ་སེམས་དཔའ་ཆེན་པོ་རྗེས་སུ་དགོངས་པར་མཛད་པ་ཙམ་གྱིས་འོངས་ཏེ། རྡོ་རྗེའི་ཟོམ་ལྟར་དཔུང་མགོ་ཡངས་པ། རྡོ་རྗེ་ལྟར་མཁྲེགས་པའི་ཅོད་པན་འོད་ཟེར་འཚེར་བ་ཅན། རྡོ་རྗེའི་དཔུང་རྒྱན་དང་ལྡན་པ། ལུས་མཁྲེགས་ཤིང་སྲ་བ། ལག་ན་རྡོ་རྗེ་དང ། ཞགས་པ་དང ། ལག་ཆ་བརྟན་པོ་འབར་བ་ཐོགས་པ། རྡོ་རྗེ་ཕུར་བུ་སྲ་བས་རབ་ཏུ་འཇོམས་པར་བྱེད་པ། མཐུ་ཆེན་པོ་གཡོག་བཞི་འབུམ་ལྔ་ཁྲི་དང་ལྡན་པ། འཇིག་རྟེན་གྱི་ཁམས་འདི་ཀུན་དུ་སྣང་བར་བྱེད་ཅིང་རྡོ་རྗེའི་རིགས་ཀྱི་གཞོན་ནུ་དང ། རྡོ་རྗེའི་སྡེ་ དང ། རྡོ་རྗེའི་བེ་ཅོན་དང ། རྡོ་རྗེའི་སྙིང་པོ་དང ། རྡོ་རྗེའི་ཏོག་དང ། རྡོ་རྗེའི་སྣང་བ་དང ། རྡོ་རྗེ་སྔོན་པོ་དང ། རིན་པོ་ཆེའི་རྡོ་རྗེ་དང ། གསང་བའི་རྡོ་རྗེ་དང ། འཁོར་ལོ་རྡོ་རྗེ་ལ་སོགས་པ་དང་།རྡོ་རྗེའི་དམག་དཔོན་ཆེན་པོ་རྣམས་དང ། དམག་སྐྱོང་རྣམས་དང ། ས་སྐྱོང་རྣམས་དང ། རྡོ་རྗེ་རིག་པའི་རྒྱལ་པོ་ཡང་དག་པ་དང ། ཡང་དག་པ་མ་ཡིན་པ་ཡང་དག་པར་རྟོགས་པ་རྣམས་དང ། རྡོ་རྗེའི་ཡུམ་རྣམས་དང ། རྡོ་རྗེ་རྣམ་པར་འདྲེན་རྣམས་དང་ལྷན་ཅིག་ཏུ་རྡོ་རྗེ་གཞོན་ནུའི་གདོན་རྣམས་དང ། རྡོ་རྗེ་གནོན་པོ་རྣམས་དང ། རྡོ་རྗེ་རྨི་ལམ་ངན་ 102-1-48a བྱེད་རྣམས་ཡང་དག་པར་སྐུལ། རྣམ་པར་སྐུལ་ཞིང་འཁོར་གྱི་ཁྱམས་ཆེན་པོར་འདུས་པ་ཐམས་ཅད་ལ་ཀུན་དུ་སྣང་བར་བྱེད། རྣམ་པར་སྣང་བར་བྱེད། གསལ་བར་བྱེད། རྣམ་པར་གསལ་བར་བྱེད། རབ་ཏུ་དགའ་བར་བྱེད། ཡང་དག་པར་སྐུལ། སོ་ སོར་སྐུལ་ཞིང་བཅོམ་ལྡན་འདས་ག་ལ་བ་དེར་སོང་སྟེ། བླ་གོས་ཕུད་ནས་ཞབས་ལ་ཅོད་པན་གྱིས་གཏུགས་ཏེ། ལན་གསུམ་དུ་བསྐོར་བ་བྱས་ནས་ཐལ་མོ་སྦྱར་ཏེ་ཕྱོགས་གཅིག་ཏུ་འདུག་གོ། །དེ་ནས་བཅོམ་ལྡན་འདས་ཀྱིས་རྗེས་སུ་ཡི་རང་བ་མཛད་དེ། རྡོ་རྗེ་འཆང་ཁྱོད་སོང་ལ་ལྷ་རྣམས་ དང ། ལྷའི་བུ་རྣམས་དང ། ལྷ་མ་ཡིན་རྣམས་དང ། ལྷ་མ་ཡིན་གྱི་བུ་རྣམས་དང ། རླུང་ལྷ་རྣམས་དང ། རླུང་ལྷའི་བུ་རྣམས་དང ། ནམ་མཁའ་ལྡིང་རྣམས་དང ། ནམ་མཁའ་ལྡིང་གི་བུ་རྣམས་དང ། འདུས་པ་ཆེན་པོའི་བར་དག་སྒྲ་འབྱིན་ཅིང་ཉམ་ཐག་པ་མྱོང་བ་རྣམས་ཀྱི་ བསམ་པ་རྫོགས་པར་གྱིས་ཤིག་།དེ་ནས་རྡོ་རྗེ་འཆང་སྟན་ལས་ལངས་ཏེ། ལྷ་དང ། ལྷ་མ་ཡིན་དང ། རླུང་ལྷ་དང ། ནམ་མཁའ་ལྡིང་དང ། འབྱུང་པོའི་ཚོགས་ཀྱི་ནང་དུ་སོང་ནས་རྗེས་སུ་སྟོན་ཅིང་རྡོ་རྗེ་མཚོན་ཆའི་མེ་སྒྲོན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། རྫུ་འཕྲུལ་གྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་མེ་ལྕེ་འབར་བའི་འོད་འཕྲོ་བ་དང ། མེ་སྟག་རྣམ་པར་འཕྲོ་བ་དང ། ལྕེ་འབེབས་པའི་གློག་རྣམས་ཀྱིས་འཇིག་རྟེན་གྱི་ཁམས་རྣམས་གཟིར་ཏོ། །དེ་ནས་བསྐལ་པ་ཆེན་པོ་ལྔར་རྨི་ལམ་དང ། ཆུ་དང ། གང་གཱའི་ཀླུང་ གི་བྱེ་མའི་གྲངས་ཀྱི་ཚད་ཙམ་དག་གིས་མདངས་དང ། གཟི་བརྗིད་དང ། ཚངས་པར་སྤྱོད་པ་དང ། གཙང་མ་དང ། བཟོད་པ་དང ། ཚུལ་ཁྲིམས་དང ། བརྟུལ་ཞུགས་དང ། དཀའ་ཐུབ་དང ། རང་གི་ལོངས་སྤྱོད་ཐམས་ཅད་ལས་བྱུང་བའི་ལས་གྲུབ་པའི་རྡོ་རྗེ་དེ་བྱང་ཆུབ་ སེམས་དཔའ་ལག་ན་རྡོ་རྗེ་དེའི་ལག་ཏུ་བྱིན་ནོ། །དེ་ནི་སངས་རྒྱས་བཅོམ་ལྡན་འདས་རྣམས་ཀྱི་གསུང་རབ་ཀྱི་ཆོས་སྟོན་པར་གྱུར་པ་དགྲ་བཅོམ་པ་རྣམས་ཀྱི་ཆོས་དང ། ཚུལ་ཁྲིམས་དང ། ཏིང་ངེ་འཛིན་བྱེད་པ། བྱང་ཆུབ་སེམས་དཔའ་རྣམས་ཀྱི་ཕ་རོལ་ཏུ་ཕྱིན་པ་དང ། ཚུལ་ཁྲིམས་དང་། 102-1-48b བཟོད་པ་དང ། སྙིང་རྗེ་བྱེད་པ། རང་གི་རྡོ་རྗེ་དང ། རིགས་ཀྱི་རིག་པ་དང ། དཀྱིལ་འཁོར་དང ། བཀླགས་པའི་ཚུལ་དུ་གྱུར་པ་དྲག་པོ་དང ། དབང་པོ་དང ། གཤིན་རྗེ་དང ། ཆུ་ལྷ་དང ། ལུས་ངན་དང ། རླུང་ལྷ་དང ། ནམ་མཁའ་ལྡིང་གདུལ་དཀའ་བ་རྣམས་འདུལ་བ་ སྟེ། དེ་ལྟར་དེ་ལས་བྱུང་བའི་བཅོམ་ལྡན་འདས་ཁྲོ་བོ་དྲག་པོ་རྣམས་རྨོངས་པར་བྱེད་པ། སྒྱུ་དང་ལྡན་པ་རྣམས་རྨུགས་པར་བྱེད་པ། སྡང་བ་རྣམས་སྐྱོད་པ། རྨོངས་པ་རྣམས་འཇིག་པ། དམ་པོ་རྣམས་རྩད་ནས་འདོན་པ། རྒྱས་པ་རྣམས་སྤུར་མར་རློག་པ། ཡོན་པོ་རྣམས་ སྲོང་བ། གཅོད་པ་རྣམས་སྙིང་རྗེས་བྱེད་པ། འབྱུང་པོ་རྣམས་སྐྲག་པར་བྱེད་པ། སྲིན་པོ་རྣམས་དངངས་པར་བྱེད་པ། རང་གི་གསང་སྔགས་རྣམས་རྫོགས་པར་བྱེད་པ། གཞན་གྱི་གསང་སྔགས་རྣམས་ཕུར་བུས་འདེབས་པ། ནུབ་པ་རྣམས་སྟོན་པར་བྱེད་པ། གསོད་པར་ བྱེད་པ། གསོད་པ། གནོད་པར་བྱེད་པ། ཕུང་བར་བྱེད་པ་དེ་དེར་སོང་ནས་ལྷ་རྣམས་དང ། ལྷའི་བུ་རྣམས་དབང་དུ་བྱེད་དེ། དེ་ལྟར་དྲག་པོ་པ་དྲག་པོ་གྲུབ་པ་དང ། ཁྱབ་འཇུག་པ་ཁྱབ་འཇུག་གྲུབ་པ་དང ། ལྷ་མ་ཡིན་པ་ལྷ་མ་ཡིན་གྲུབ་པ་དང ། དེ་དག་སྤྱིར་སྐུལ་ཞིང་ དཀྱིལ་འཁོར་དུ་འཇུག་།སྐྱོད་པར་བྱེད། མཐུ་སྟོན་པར་བྱེད། རྗེད་པར་བྱེད། རྣམ་པར་སྐྲག་པར་བྱེད་དོ། །སྟོབས་བཅུས་དགོངས་པ་བཀའ་སྩལ་པའི་རྡོ་རྗེ་འཆང་གིས་རྡོ་རྗེ་མི་ཕམ་པ་མེ་ལྟར་རབ་ཏུ་རྨོངས་བྱེད་ཅེས་བྱ་བའི་གཟུངས་གསུང་བ་དང ། གཟུངས་འདིའི་སྟོབས་ དང ། བདེན་པའི་བྱིན་གྱི་བརླབས་ཀྱིས་འོད་ཀྱི་འོད་ཟེར་གྱི་དཀྱིལ་འཁོར་ཆེན་པོ་ལས་བྱུང་བའི་འོད་ཟེར་རྣམས་ཀྱིས་རྡོ་རྗེ་དང་བཅས་པའི་ལག་ན་རྡོ་རྗེ་བསྐུལ་ནས། འོད་དེས་དེ་རབ་ཏུ་དགའ་སྟེ་རྡོ་རྗེ་ལས་སྣང་བ་བཀྱེ་བ་རྣམས་ཀྱིས་ས་གསུམ་གྱི་སྟོན་གྱི་སྐར་མ་དང ། ཟླ་བའི་འོད་ཟིལ་དུ་ བརླག་པར་བྱས་ནས་སྣང་བ་གཅིག་བུར་བྱེད་ཅིང་རྒྱ་མཚོ་ཆེན་པོ་ནི་སྐེམས། རིའི་རྒྱལ་པོ་རི་རབ་ནི་གཡོ་བར་བྱེད། གློག་གི་འཁོར་ལོ་དང་།ལྕེ་འབེབས་པའི་འབྲུག་ནི་བསྒྲགས། སྒྲ་དྲག་པོ་ནི་ཕྱུང ། བསྐྱིངས་པའི་སྒྲ་ནི་བསྒྲགས། སྐྲག་པར་ནི་བྱས་སོ། །དེ་ན་རྡོ་རྗེ་མི་ཕམ་པ་མེ་ལྟར་ 102-1-49a རབ་ཏུ་རྨོངས་བྱེད་ཅེས་བྱ་བའི་གཟུངས་མེ་ལྕེ་འོད་འཕྲོ་ཆེན་པོ་ཁོང་ན་འདུག་པ། སྐྲ་ཚོགས་གསེར་དང་རིན་པོ་ཆེ་འདྲ་བ། རྡོ་རྗེ་འཆང་བ་རྡོ་རྗེའི་བུ་མོ་ཞེས་བྱ་བའི་བཅོམ་ལྡན་འདས་མ་དེས་ལན་གསུམ་བསྐོར་བ་བྱས་ནས། ཡིད་པས་ཆེས་མགྱོགས་པའི་ཤུགས་འོད་འཕྲོ་ཞིང་འབར་བ་ ལྟ་བུར་དྲག་པས་བྱང་ཆུབ་སེམས་དཔའ་སེམས་དཔའ་ཆེན་པོ་རྫུ་འཕྲུལ་ཆེན་པོ་ལ་སྐྱབས་སུ་སོང་ངོ ། །དེ་འོངས་པ་དང ། འཕགས་པ་རྡོ་རྗེ་འཆང་གིས་སྨྲས་པ། སྐལ་བ་ཆེན་པོ་དགེ་མ་དེ་བཞིན་གཤེགས་པའི་ཏིང་ངེ་འཛིན་གྱི་སེམས་དང་ལྡན་མ། འདི་དག་ལ་ལག་ཆ་དང་མཐུན་པར་བྱ་བའི་སྟོབས་ བྱིན་ཅིག་།དེ་ནས་གཟུངས་ཀྱིས་སྨྲས་པ། འདི་དག་བཀའ་སྩལ་པ་དེ་བཞིན་དུ་བགྱིའོ་ཞེས་ལན་གསུམ་ཚིག་ཏུ་སྨྲས་སོ། །ཐོར་ཚུགས་གསུམ་མ། ས་གསུམ་དང ། དུས་གསུམ་དང ། དྲག་པོ་རྩེ་གསུམ་དང ། ཁྱབ་འཇུག་གི་འཁོར་ལོ་དང ། གཤིན་རྗེའི་བེ་ཅོན་དང ། ལུས་ངན་གྱི་དབྱུག་ཐོ་ དང ། དབང་པོའི་རྡོ་རྗེ་དང ། ཆུ་ལྷའི་ཞགས་པ་དང ། ལོག་འདྲེན་རྣམས་ཀྱི་བགེགས་དང ། ལྷ་མ་ཡིན་རྣམས་ཀྱི་སྒྱུ་དང ། རླུང་ལྷ་རྣམས་ཀྱི་གཟི་དང ། ཤུགས་དང་གྲུབ་པ་རྣམས་ཀྱི་རྨོངས་བྱེད་དང ། མ་མོའི་ཚོགས་རྣམས་ཀྱི་གཅོད་པ་དང ། ཀླུ་རྣམས་ཀྱི་དམ་ཚིག་དང ། དུག་དང ། ཁྲོ་བོ་དང ། གནོད་སྦྱིན་དང ། སྲིན་པོ་དང ། མིའམ་ཅི་དང ། ཤ་ཟ་དང ། འབྱུང་པོ་དང ། ཚངས་པའི་སྲིན་པོ་དང ། གྲུལ་བུམ་དང ། བདེན་བྲལ་དང ། གནོན་པོ་དང ། རོ་ལངས་ཀྱི་སྐབས་སུ་རྒོལ་བ་རྣམས་དང ། དེ་བཞིན་དུ་ཐམས་ཅད་ཀྱང་སྦྱོངས་ཤིག་།མིག་གི་འཛུམས་ པ་ཙམ་གྱིས་ཡུད་ཙམ་ལ་ཐམས་ཅད་མཆོད་ནས་ལག་ན་རྡོ་རྗེ་ལ་སྙིང་པོ་འདི་ཕུལ་ཏེ་སྨྲས་པ། དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཏདྱ་ཐཱ། ཏ་ཐཱ་ག་ཏ་ས་མཱ་དྷི་དྷཱ་ར་ཎཱི། མ་ཧཱ་ཨ་བརྟ་ཡི་ཥྱཱ་མི། ཨ་ཧི་ བཛྲེ། ཀུ་ཊི་ལི། ཀོ་ཊི་པཱ་བ་ཀཱ་ཀུ་ལ་ཤི་ཁི།ཀ་བི་ལ་ཀེ་ཤི། ཏ་ཊི་ཙི་ཊ་ཙི་ཊི་མ་ཊ་ནི། ཀརྐ་ཊ་མུ་ཊི་བཊྚི་བཛྲེ། མ་ཧཱ་བི་དྷུ་ལློ་ལོ་ལེ། པ་གུ་པུ་ལུ། སུ་མུ་སུ་མུ། ས་ར་ས་ར། སྥ་ཊ་སྥ་ཊ། སུ་དྱོ་ཏེ། པིཾ་ག་ལེ་ཅི་ཊེ། བི་ཙ་ཊི། །ཛྲ་ལ་བི་ག་ལེ། སརྦ་དེ་བག་ 102-1-49b ན། པྲ་ཧ་ར་ཎ་མཱ་ཡཱ། སིདྡྷ་དཱ་ཡི་གེ། སུ་རུ་ཀེ། སུ་རུ་ཀེ། བཛྲ་གྷོ་ཎེ། བཛྲ་ཌྜྷི། སཱ་ར་པྲ་ཧ་ར་ཎེ། རཏྞ་ཏྲ་ཡ། དི་ཀྲ་ལ་བུདྡྷེ་ཏེ། བཛྲ་དྷ་ར་བི་ཤཝ་ས་ནི་ཀ། ཨ་པྲ་ཏི་ཧ་ཏ་པྲ་མརྡ་ནི་སཝཱ་ཧཱ། གང་གསང་སྔགས་འདི་རྗེས་སུ་དྲན་ནས་ཀློག་གམ། སྒོམ་མམ། འཛིན་ པ་དེ་ཐོས་ན་ངན་འགྲོ་ལོག་པར་ལྟུང་བར་འགྲོ་བར་མི་འགྱུར་རོ། །འཇིག་རྟེན་པ་དང ། འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་ལ་མཆོད་པ་བྱས་པར་འགྱུར་རོ། །དམ་ཚིག་དང་ཕྱག་རྒྱ་ལ་ཞུགས་པར་འགྱུར་རོ། །བསམ་པ་དང་རྗེས་སུ་ཡི་རང་བས་འགུགས་ པར་བྱེད་དོ། །དུག་དང ། གསང་སྔགས་དང ། མདུད་པ་དང ། རྡེག་པ་དང ། འཆིང་བའི་འཇིགས་པ་ལ་སོགས་པས་རྣམ་པར་སྐྲག་པར་བྱེད་དོ། །དེ་ནས་ལྷ་དང ། ལྷའི་བུ་དེ་དག་གིས་དེའི་མཐུས་བཅོམ་ལྡན་འདས་རྡོ་རྗེ་འཆང་དེའི་རྣམ་པར་རོལ་པ་དང ། བཅོམ་ལྡན་འདས་ཀྱིས་གསུངས་པ་རྣམ་པ་མང་པོ་དུ་མ་ཡང་མྱོང་ནས་སྟེང་གི་གནས་གཙང་མ་དང ། འོག་མིན་གྱི་ལྷ་དང ། འཇིག་རྟེན་གྱི་ཁམས་གཞན་ན་གནས་པ་དག་གིས་འོད་དང་ལྡན་པའི་མེ་ཏོག་དང ། བདུག་པའི་སྤྲིན་དང ། རིན་པོ་ཆེ་མང་པོའི་ཆར་ རྒྱ་ཆེན་པོས་མཆོད་ནས་བསྟོད་པ་སྙན་པས་བསྟོད་དེ་སྙན་ཅིང་ཟབ་ལ་རྔ་སྒྲ་ལྟ་བུ་དང ། བསིལ་བ་དང ། བསོད་ནམས་ཀྱི་ཚིགས་སུ་བཅད་པ་དག་ཀྱང་སྨྲས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་དང ། བྱང་ཆུབ་ སེམས་དཔའ་དེ་དག་དང ། ཐམས་ཅད་དང་ལྡན་པའི་འཁོར་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་རྡོ་རྗེ་མི་ཕམ་པ་མེ་ལྟར་རབ་ཏུ་རྨོངས་བྱེད་ཅེས་བྱ་བའི་གཟུངས་རྫོགས་སོ།། །། རྒྱ་གར་གྱི་མཁན་པོ་ཛི་ན་མི་ཏྲ་དང ། དཱ་ན་ཤཱི་ལ་དང ། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ། སྐད་གསར་ཆད་ཀྱིས་ཀྱང་བཅོས་ནས་གཏན་ལ་ཕབ་པ།། །། |