།།རྒྱ་གར་སྐད་དུ། ཨཱརྱ་དྷརྨ་ཏཱ་སཝ་བྷཱ་ཝ་ཤཱུ་ནྱ་ཏ་ཨ་ཙ་ལ་པྲ་ཏི་སརྦ་ཨཱ་ལོ་ཀ་སཱུ་ཏྲ། བོད་སྐད་དུ། འཕགས་པ་ཆོས་ཉིད་རང་གི་ངོ་བོ་སྟོང་པ་ཉིད་ལས་མི་གཡོ་བར་ཐ་དད་པར་ཐམས་ཅད་ལ་སྣང་བའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན།་བཅོམ་ལྡན་འདས་རི་དྭགས་ཀྱི་རྒྱལ་པོའི་ཆོས་ཀྱི་ཁང་པ་ན་ཡེ་ཤེས་ཀྱི་ཁྱད་པར་ལས་གྲུབ་པའི་རིན་པོ་ཆེ་སྣ་ཚོགས་ཀྱི་ཁྲི་ཆེན་པོ་བཤམས་པ་ལ་ཆོས་ཉིད་རང་གི་ངོ་བོ་ཉིད་ཇི་ལྟ་བ་ལས་མི་གཡོ་བར་བཞུགས་སོ། །དེའི་ཚེ་གནས་དེར་བྱང་ཆུབ་སེམས་དཔའ་ཆེན་པོ་ཚད་མེད་གྲངས་མེད་པ་དག་ཀྱང་འདུས། ལྷ་དང ། མི་དང ། ལྷ་མ་ཡིན་ལ་སོགས་པ་ 270a ༄#། །འཁོར་ཕལ་པོ་ཆེ་ཐམས་ཅད་ཀྱང་འདུས་པར་གྱུར་ཏོ། །དེ་ནས་འཁོར་འདུས་པ་ཐམས་ཅད་ཀྱིས་བཅོམ་ལྡན་འདས་ལ་ཡང་དང་ཡང་དུ་བསྐོར་བ་བྱེད་ཅིང་ཕྱག་བཙལ་ཏེ་རང་རང་གི་ཕྱོགས་ཕྱོགས་སུ་འདུག་སྟེ་མཆོད་པའི་མཆོག་ཐམས་ཅད་ཀྱིས་མཆོད་པར་བྱེད། བསྟི་སྟང་དུ་བྱེད། རི་མོར་བྱེད་པ་ལ་ཡིད་སྐྱོ་བར་མི་བྱེད་དེ། ཆོས་ཉན་པར་བརྩམས་ཏེ་མགོ་བཏུད་ནས་འདུག་པར་གྱུར་ཏོ། །དེའི་ཚེ་བཅོམ་ལྡན་འདས་ནི་རྣམ་གྲངས་དང་དབྱེ་བའི་ཆོས་ལ་རྟོག་པར་མི་མཛད་ཀྱང་སྨོན་ལམ་དང་ཐུགས་རྗེའི་བྱིན་གྱི་རླབས་ཀྱིས་འཁོར་རྣམས་ཀྱི་སོ་སོའི་མོས་པ་དང་བསམ་པ་ཇི་ལྟ་བ་བཞིན་དུ་གསུང་སྒྲོགས་བར་སྣང་སྟེ། བཅོམ་ལྡན་འདས་ནི་བདག་ལ་ཆོས་སྟོན་ཏེ། གཞན་དག་ལ་ནི་མ་ཡིན་ནོ་སྙམ་མོ། །དེའང་འཁོར་ཕལ་པོ་ཆེ་དེ་དག་ལས་ཀྱང་ཁ་ཅིག་གིས་ནི་ཇི་ལྟར་སྣང་བ་བཞིན་དུ་ཡོད་པའི་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། ། ཁ་ཅིག་གིས་ནི་ཆོས་ཐམས་ཅད་སེམས་ཙམ་ལས་མ་གཏོགས་པར་གཞན་མེད་པའི་ཆོས་སྟོན་ཏེ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །ཁ་ཅིག་གིས་ནི་སེམས་ཉིད་ཀྱང་མ་སྐྱེས་པ་ཡིན་པར་བདག་ཅག་ལ་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །ཁ་ཅིག་གིས་ནི་ཆོས་ཐམས་ཅད་སྒྱུ་མ་བཞིན་དུ་སྣང་ཞིང་སྒྱུ་མ་ 270b བཞིན་དུ་མ་གྲུབ་པའི་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །ཁ་ཅིག་གིས་ནི་ཆོས་ཐམས་ཅད་རང་བཞིན་གྱིས་མ་སྐྱེས་པ། ངོ་བོ་ཉིད་ཀྱིས་མི་གནས་པ། ལས་དང་བྱ་བའི་མཐའ་ཐམས་ཅད་དང་བྲལ་བ་རྟོག་པ་དང་རྟོག་པའི་ཡུལ་ལས་འདས་པ། ཐོག་མ་མེད་པའི་དུས་ནས་སྤྲོས་པ་རྣམ་པར་དག་པའི་ཆོས་སྟོན་ཏོ་སྙམ་སྟེ། དེ་ལ་ངེས་པར་འཛིན་ཅིང་རྟོག་པར་བྱེད་དོ། །དེ་ནས་བཅོམ་ལྡན་འདས་ཆོས་ཉིད་རང་གི་ངོ་བོ་ཉིད་ཇི་ལྟ་བ་ལས་མི་གཡོ་བར་བཞུགས་པ་དེ་ལས་སྙིང་རྗེ་དང་ལྡན་པའི་སྐུར་བྱས་ནས་འཁོར་འདུས་པ་དེ་དག་གི་ལྟ་བ་ཐ་དད་པར་གྱུར་པའི་རྟོག་པའི་མུན་པ་སེལ་བ་ཞེས་བྱ་བའི་འོད་ཟེར་ལྗགས་ཀྱི་དབང་པོ་ལས་སྤྲོས་ཏེ། འོད་ཟེར་དེས་ཕྱོགས་བཅུ་ཐམས་ཅད་སྣང་བར་བྱས་ནས་འཁོར་དེ་ན་བྱང་ཆུབ་སེམས་དཔའ་འཇམ་དཔལ་འདུག་པར་གྱུར་པ་ལ་བསྐུལ་བས་བྱང་ཆུབ་སེམས་དཔའ་འཇམ་དཔལ་གྱིས་འཁོར་ཕལ་མོ་ཆེའི་རྟོག་པ་ལྔ་པོ་ཐ་དད་པར་གྱུར་པ་སེམས་ཀྱིས་ཤེས་ནས།་ཅིའི་ཕྱིར་ཆོས་ཐམས་ཅད་ཀྱི་གཞི་གཅིག་ལ་ལྟ་བ་དང་མོས་པ་ཐ་དད་པར་གྱུར་སྙམ་སྟེ། བདག་གིས་བཅོམ་ལྡན་འདས་ལ་ཞུ་པར་བྱའོ་སྙམ་པ་དང ། འོད་ཟེར་དེ་དག་བཅོམ་ལྡན་འདས་ཀྱི་ལྗགས་ཀྱི་དབང་པོ་ལ་སླར་འདུས་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཇམ་དཔལ་གྱིས་འདི་སྐད་ཅེས་གསོལ་ཏོ། ། 271a ༄#། །བཅོམ་ལྡན་འདས། བཅོམ་ལྡན་འདས་ནི་རྣམ་གྲངས་དང་དབྱེ་བའི་ཆོས་ལ་རྟོག་པར་མི་མཛད་ཀྱང་འཁོར་འདུས་པ་འདི་དག་མོས་པ་དང་རྟོག་པ་ཐ་དད་པ་འདི་ཅི་ལས་གྱུར། བཅོམ་ལྡན་འདས། ཆོས་ལ་བརྟག་པའི་མཐའ་ལྔ་པོ་འདི་དག་ཀུན་ཡང་དག་པ་ལགས་སམ། འོན་ཏེ་ཁ་ཅིག་ནི་ཡང་དག་པ་ལགས་ལ། ཁ་ཅིག་ནི་ཡང་དག་པ་མ་ལགས་སམ། བཅོམ་ལྡན་འདས། ཆོས་ལ་བརྟག་པའི་མཐའ་ལྔ་པོ་འདི་དག་གིས་རྣམ་པར་གྲོལ་བ་ཐོབ་པར་མཚུངས་ལགས་སམ། བཅོམ་ལྡན་འདས། ཆོས་ལ་བརྟག་པའི་མཐའ་ལྔ་པོ་འདི་དག་ལ་གང་ཟག་གི་རིགས་ནི་མཆིས་ལགས་སམ། བཅོམ་ལྡན་འདས། ཆོས་ལ་བརྟག་པའི་མཐའ་ལྔ་པོ་འདི་དག་ལ་ཐ་དད་པར་སྣང་བའི་མཐུན་པའི་དཔེ་ནི་ཇི་ལྟར་ལགས། བཅོམ་ལྡན་འདས། ཆོས་ལ་བརྟག་པའི་མཐའ་ལྔ་པོ་འདི་དག་ལྟར་སོ་སོར་རྟོག་པའི་གང་ཟག་མ་འོངས་པའི་དུས་ནའང་འབྱུང་བར་འགྱུར་བ་ལགས་སམ། བཅོམ་ལྡན་འདས། ཆོས་ལ་བརྟག་པའི་མཐའ་ལྔ་པོ་འདི་དག་ལ་སློབ་པའི་གང་ཟག་རྣམས་དོན་ལགས་པ་དང་མ་ལགས་པར་རྩོད་པར་མི་འགྱུར་ལགས་སམ།་བཅོམ་ལྡན་འདས། འཁོར་འདུས་པ་འདི་དག་གི་ཐེ་ཚོམ་གྱི་དྲ་བ་བཅད་པའི་སླད་དུ་བདག་ལ་བཤད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས། 271b ཀྱིས་བཀའ་སྩལ་པ། འཇམ་དཔལ། ཁྱོད་འདི་སྐད་དུ། བཅོམ་ལྡན་འདས་ནི་རྣམ་གྲངས་དང་དབྱེ་བའི་ཆོས་ལ་རྟོག་པར་མི་མཛད་ཀྱང་འཁོར་འདུས་པ་འདི་དག་འདི་ལྟར་མོས་པ་དང་རྟོག་པ་ཐ་དད་པ་ཅི་ལས་གྱུར་ཞེས་ཟེར་བ་ནི་སྦྱངས་པ་དང་མ་སྦྱངས་པའི་དབང་ལས་ཤེས་པ་དང ། མོས་པ་ཆེ་ཆུང་ལས་གྱུར་ཏེ། སངས་རྒྱས་རྣམས་ནི་སྦྱངས་པ་དང་བསགས་པ་དཔག་ཏུ་མེད་པས་རྩོལ་བ་མེད་པར་ཆོས་ཉིད་རང་གི་ངོ་བོ་ཉིད་ཇི་ལྟ་བ་ལས་མི་གཡོ་བ་གཅིག་པུ་ཡིན་ཏེ། འདི་ནི་སངས་རྒྱས་ཐམས་ཅད་ཀྱི་སྤྱོད་ཡུལ་ཡིན་ནོ། །ཆེར་སྦྱངས་པ་དང་ཅུང་ཟད་སྦྱངས་པ་རྣམས་ཀྱི་ནི་ཡང་དག་པ་ཡིན་པ་དང་མ་ཡིན་པ་བརྒྱུད་པ་ལས་ཐོབ་པ་སྟེ། དེའི་ཕྱིར་ན་མོས་པ་དང་རྟོག་པ་ཐ་དད་པར་འགྱུར་རོ། །འཇམ་དཔལ། ཁྱོད་འདི་སྐད་དུ། ཆོས་ལ་བརྟགས་པའི་མཐའ་ལྔ་པོ་འདི་དག་ཀུན་ཡང་དག་པ་ལགས་སམ། འོན་ཏེ་ཁ་ཅིག་ནི་ཡང་དག་པ་ལགས་ལ། ཁ་ཅིག་ནི་ཡང་དག་པ་མ་ལགས་སམ་ཞེས་ཟེར་བ་ནི། ཆོས་ལ་བརྟག་པའི་མཐའ་ལྔ་པོ་འདི་དག་ཐམས་ཅད་ཀྱང་ཡང་དག་པ་ཡིན་པར་གཟུང་སྟེ། ཁ་ཅིག་གིས་ནི་ཆོས་ཐམས་ཅད་ཇི་ལྟར་སྣང་བ་བཞིན་དུ་ཡོད་པའི་ཆོས་སྟོན་ཏོ་སྙམ་པའང་ཡིན་ཏེ། ཅིའི་ཕྱིར་ཞེ་ན། འབྱུང་བ་བཞི་དང་དེས་བྱས་པ་རྣམས་ནི་ཐ་དད་དུ་སྒྱུ་མ་བཞིན་དུ་ཡོད་པའི་ཕྱིར་རོ། །ཁ་ཅིག་གིས་ནི་ཆོས་ཐམས་ཅད་ནི་སེམས་ཙམ་ལས་མ་གཏོགས་པ་གཞན་མེད་པའི་ཆོས་སྟོན་ཏེ། 272a ༄#། །སྙམ་པའང་ཡིན་ཏེ། ཅིའི་ཕྱིར་ཞེ་ན། ཆོས་སྣ་ཚོགས་སུ་འདོགས་པ་རྣམས་རྟག་པ་ཐེར་ཟུག་ཏུ་བརྟགས་པའི་བག་ཆགས་སེམས་ལ་བཞག་པའི་མཐུས་དུས་ཐམས་ཅད་དུ་བདག་དང་ཆོས་རྣམས་སུ་སྣང་བ་ཐ་སྙད་ཙམ་དུས་ནང་ཡང་དོན་དུ་རང་བཞིན་མེད་དེ། སེམས་ཙམ་ལས་མེད་པའི་ཕྱིར་རོ། །ཁ་ཅིག་གིས་ནི་སེམས་ཉིད་ཀྱང་མ་སྐྱེས་བ་ཡིན་པར་བདག་ཅག་ལ་ཆོས་སྟོན་ཏོ་སྙམ་པའང་ཡིན་ཏེ། ཅིའི་ཕྱིར་ཞེ་ན། འདི་ལ་དབྱིབས་སམ། ཁ་དོག་གམ། དུས་གསུམ་མམ། མཐའ་དབུས་མེད་པའི་ཕྱིར་རོ། །ཁ་ཅིག་གིས་ནི་ཆོས་ཐམས་ཅད་སྒྱུ་མ་བཞིན་དུ་སྣང་ཞིང་སྒྱུ་མ་བཞིན་དུ་མ་གྲུབ་པའི་ཆོས་སྟོན་ཏོ་སྙམ་པའང་ཡིན་ཏེ། ཅིའི་ཕྱིར་ཞེ་ན། ཆོས་ཐམས་ཅད་ནི་རྒྱུ་རྐྱེན་ལས་སྐྱེ་ཞིང་འབྱུང་བའི་ཕྱིར་རོ། །ཁ་ཅིག་གིས་ནི་ཆོས་ཐམས་ཅད་རང་བཞིན་གྱི་མ་སྐྱེས་པ། ངོ་བོ་ཉིད་ཀྱིས་མི་གནས་པ། ལས་དང་བྱ་བའི་མཐའ་ཐམས་ཅད་དང་བྲལ་བ། རྟོག་པ་དང་རྟོག་པའི་ཡུལ་ལས་འདས་པ། ཐོག་མ་མེད་པའི་དུས་ནས་སྤྲོས་པ་རྣམ་པར་དག་པའི་ཆོས་སྟོན་ཏོ་སྙམ་པའང་ཡིན་ཏེ། ཅིའི་ཕྱིར་ཞེ་ན། ཆོས་ཐམས་ཅད་ཀྱི་རང་གི་ངོ་བོ་ཉིད་ཕྱིན་ཅི་མ་ལོག་པ་དེ་ཡིན་པའི་ཕྱིར་རོ། །འཇམ་དཔལ། ཡང་ཁ་ཅིག་ཡང་དག་པ་མ་ཡིན་པར་ཡང་བཟུང་སྟེ། སྦྱངས་པ་ཆུང་བ། མོས་པ་དམན་པ། ཤེས་རབ་ཞན་པ་དག་གིས་རྟོགས་པའོ།། 272b ཁ་ཅིག་སྦྱངས་པ་དང ། མོས་པ་དང ། ཤེས་རབ་འབྲིང་བ་རྣམས་ཀྱིས་རྟོགས་པའོ། །ལྷག་མ་ནི་ཡང་དག་པ་སྟེ་མཆོག་ཏུ་གྱུར་པའི་རྟོགས་པའོ། །འཇམ་དཔལ། ཁྱོད་འདི་སྐད་དུ། ཆོས་ལ་བརྟག་པའི་མཐའ་ལྔ་པོ་འདི་དག་གིས་རྣམ་པར་གྲོལ་བ་ཐོབ་པར་མཚུངས་སམ་ཟེར་བ་ནི། ཤེས་རབ་མཆོག་ཏུ་གྱུར་པའི་རྟོགས་པ་ཡང་དག་པ་ལས་ལྷག་མ་བཞི་པོ་གཅིག་ལ་གཅིག་བརྒྱུད་པའི་ཁྱད་པར་གྱིས་ཉེ་རིང་ཡོད་ཀྱང་རྣམ་པར་གྲོལ་བ་ཐོབ་པར་མཚུངས་པར་བལྟའོ། །འཇམ་དཔལ། ཁྱོད་ཀྱིས་འདི་སྐད་དུ། ཆོས་ལ་བརྟག་པའི་མཐའ་ལྔ་པོ་འདི་དག་ལ་གང་ཟག་གི་རིགས་ནི་མཆིས་ལགས་སམ་ཞེས་ཟེར་བ་ནི་ཐེག་པ་ཆུང་ངུའི་རིགས་དང་ཐེག་པ་ཆེན་པོའི་རིགས་གཉིས་ཀྱིས་ཆོས་ལ་བརྟག་པའི་མཐའ་ལྔ་ལས་བཞི་ལས་བརྒྱུད་ནས་ལྷག་མ་གཅིག་ཏུ་ཡང་དག་པ་ཕྱིན་ཅི་མ་ལོག་པ་སངས་རྒྱས་ཀྱི་སྤྱོད་ཡུལ་རྟོགས་པར་བྱའོ། །འཇམ་དཔལ། ཁྱོད་འདི་སྐད་དུ། ཆོས་ལ་བརྟག་པའི་མཐའ་ལྔ་པོ་འདི་དག་ལ་ཐ་དད་པར་སྣང་བའི་མཐུན་པའི་དཔེ་ནི་ཇི་ལྟར་ལགས་ཞེས་ཟེར་བ་ནི། ཆོས་ཀྱི་གཞི་གཅིག་ལ་ཐ་དད་པར་རྟོག་པའི་དཔེ་ནི་ཛམྦུའི་གླིང་དུ་ཉི་མ་འཆར་བས་བསྟན་ཏེ། ཛམྦུའི་གླིང་དུ་ཉི་མ་འཆར་བ་དཔག་ཚད་བཞི་ཁྲིའི་ནམ་མཁའ་ལས་འཆར་བའི་ཚེ་མི་རྣམས་ཀྱིས་རང་གི་གྲོང་ཁྱེར་དང་རི་འདི་ལས་ཤར་བར་སོ་སོ་ནས་རྟོག་གོ་།དེ་བཞིན་དུ་དེ་ལྟར་གྱི་འཁོར་འདུས་པ་འདི་དག་གིས་ཆོས་ཀྱི་གཞི་གཅི་ 273a ༄#། །ལ་སོ་སོར་རྟོག་གོ་།སོ་སོར་མཐོང་ངོ ། །སོ་སོར་འཛིན་ཏོ། །འཇལ་དཔལ། རྣམ་པར་མ་བརྟགས་པའི་ཚེ་རང་གི་གྲོང་ཁྱེར་གྱི་རི་ལས་མི་འཆར་བ་མ་ཡིན་པ་བཞིན་དུ་ཆོས་ལ་བརྟག་པའི་མཐའ་འདི་དག་ཀྱང་ཡང་དག་པ་ཕྱིན་ཅི་མ་ལོག་པ་སངས་རྒྱས་རྣམས་ཀྱི་སྤྱོད་ཡུལ་ལ་མ་ལྟོས་པ་གཞན་བཞི་པོ་དེ་བཞིན་དུ་སྣང་ངོ ། །འཇམ་དཔལ། རང་གི་གྲོང་ཁྱེར་གྱི་རི་དེ་ལས་ཡང་དག་པར་འཆར་བ་མ་ཡིན་པ་དེ་བཞིན་དུ་བཞི་པོ་ནི་རྟོགས་པའི་ཐབས་བློའི་རིམ་པ་ལ་དེ་ལྟར་སྣང་སྟེ། དོན་ཡང་དག་པ་ཉིད་མ་ཡིན་ནོ། ། འཇམ་དཔལ། བརྟག་པ་ལྔ་པོ་འདི་དག་ལས་རྣམ་པར་གྲོལ་བ་མཚུངས་པ་ཐོབ་པའི་དཔེ་ནི་ནོར་བུ་རིན་པོ་ཆེས་བསྟན་ཏེ། རིན་པོ་ཆེ་དེའང་སེམས་ཅན་རྣམས་ཀྱིས་བསྟེན་པའི་ལས་བྱས་པ་དང་མ་བྱས་པ་ཡོད་དེ། གང་ཟག་རྟོག་པ་མེད་པ་དང་ལོག་པར་རྟོག་པ་རྣམས་ཀྱིས་ནི་ཆོས་ལ་བརྟག་པའི་མཐའ་ལྔ་ལ་མི་རྟེན་པ་སྟེ། རིན་པོ་ཆེ་བསྟེན་པའི་ལས་མ་བྱས་པའི་གང་ཟག་གིས་རིན་པོ་ཆེ་མི་རྙེད་པ་དང ། དགོས་པ་མི་འབྱུང་བ་བཞིན་དུ་དེ་དག་ལ་མི་དཔྱོད་མི་སེམས་པས་ཁམས་གསུམ་ལས་མི་ཐར་པ་ཡིན་ནོ། །བསྟེན་པའི་ལས་བྱས་པ་ནི་ཁྱད་པར་དུ་བསགས་པ་དང ། ཆེར་བསགས་པ་དང ། ཅུང་ཟད་བསགས་པ་དང ། ཅུང་ཟད་བསགས་པ་རྣམས་ལ་རིན་པོ་ཆེའི་དགོས་པའང་རིམ་པ་གསུམ་དུ་འབྱུང་བ་དེ་བཞིན་དུ་ཡང་ 273b དག་པ་ཕྱིན་ཅི་མ་ལོག་པ་དང ། ལྷག་མ་བཞི་པོ་བརྒྱུད་པར་བརྟག་པ་ཐེག་པ་ཆེ་ཆུང་རིམ་པ་གསུམ་ཡང་དཔེ་རིམ་པ་བཞིན་ནོ། །ངས་བཤད་པའི་མདོ་སྡེ་བཅུ་གཉིས་དང ། ཆོས་ལ་བརྟག་པའི་མཐའ་ལྔ་ཇི་ལྟ་བུ་ཡིན་པའི་དཔེ་ནི་རྒྱ་མཚོ་ལ་ཕྱོགས་བཞི་ནས་ཆུ་འབབ་པས་བསྟན་ཏེ། ཕྱོགས་བཞི་ནས་ཆུ་བོ་བཞི་ཡན་ལག་མང་པོ་དང་བཅས་པ་ཕྱོགས་བཞི་ནས་བབས་ཀྱང་གཞི་རྒྱ་མཚོ་ཆེན་པོ་ལས་བབས་པར་འདུ་བས་རྒྱ་མཚོ་ནི་ཕྱོགས་བཞི་ནས་འབབ་པའི་ཆུ་ཐམས་ཅད་ཀྱི་གཞི་ཡིན་ནོ། །སྤྱི་ཡིན་ནོ། །དེ་བཞིན་དུ་ཆོས་ལ་བརྟག་པའི་མཐའ་ལྔ་ཐ་དད་ཀྱང་ངས་མདོ་སྡེ་བཅུ་གཉིས་བཤད་པ་ལ་བརྟེན་པ་ཡིན་པས་མདོ་སྡེ་བཅུ་གཉིས་ནི་གཞི་ཡིན་ནོ། །སྤྱི་ཡིན་ནོ། །འཇམ་དཔལ། ཁྱོད་འདི་སྐད་དུ། ཆོས་ལ་བརྟག་པའི་མཐའ་ལྔ་པོ་འདི་དག་ལྟར་སོ་སོར་རྟོག་པའི་གང་ཟག་མ་འོངས་པའི་དུས་ནའང་འབྱུང་བར་འགྱུར་བ་ལགས་སམ་ཞེས་ཟེར་བ་ནི། ད་ལྟར་ངས་ཆོས་རྣམས་ཀྱི་རང་གི་ངོ་བོ་ཉིད་ཇི་ལྟ་བ་བཞིན་དུ་སྟོན་པ་ནའང་འཁོར་འདུས་བ་རྣམས་ལ་རྟོག་པ་འདི་ལྟ་བུར་ཐ་དད་པར་གྱུར་ང་མྱ་ངན་ལས་འདས་ནས་ཐ་དད་པར་འགྱུར་བ་ལྟ་ཅི་སྨོས་ཏེ། ཆེས་མང་བར་འགྱུར་རོ། །འཇམ་དཔལ། ང་མྱ་ངན་ལས་འདས་ནས་ལོ་ལྔ་བརྒྱ་དང ། དགུ་བརྒྱ་དང ། སྟོང་དགུ་བརྒྱ་དང ། ཉིས་སྟོང་དང ། ཉིས་སྟོང་ལྔ་བརྒྱའི་བར་དུ་ཆོས་ལ་བརྟག་པའི་མཐའ་ལྔ་པོ་འདི་དག་ལ་སོ་སོར་རྟོག་པའི་གང་ 274a ༄#། །ཟག་རིམ་པར་འབྱུང་བར་འགྱུར་རོ། །འཇམ་དཔལ། ཁྱོད་འདི་སྐད་དུ། ཆོས་ལ་བརྟག་པའི་མཐའ་ལྔ་པོ་འདི་དག་ལ་སློབ་པའི་གང་ཟག་རྣམས་ལ་དོན་ལགས་པ་དང་མ་ལགས་པར་རྩོད་པར་མི་འགྱུར་ལགས་སམ་ཞེས་ཟེར་བ་ནི། མ་འོངས་པའི་དུས་ང་མྱ་ངན་ལས་འདས་ནས་ལོ་ལྔ་བརྒྱ་ནས་རྩོད་པར་འགྱུར་ཏེ། དེའི་ཚེ་གང་ཟག་རྣམས་མོས་པ་དང་ཤེས་རབ་ཆེ་ཆུང་གི་དབང་གིས་དོན་མ་ནོར་བར་རྟོགས་མ་རྟོགས་ཀྱི་བྱེ་བྲག་མེད་པར་བདག་ཉིད་ཀྱི་དོན་མ་ཡིན་པ་ལ་ཡིན་ངེས་པར་བྱས་ཏེ། གཞན་གྱི་དོན་ཡིན་པའང་མ་ཡིན་པར་བསྒྲུབས་ནས་རྩོད་པར་འགྱུར་རོ། །གཞན་དྲུང་ན་འཁོད་ཅིང་ཉན་པ་རྣམས་ཀྱིས་ཀྱང་དོན་བཞིན་དུ་ཕྱོགས་འཛིན་པར་མི་བྱེད་ཀྱི། ཡུལ་གྱིས་བསྡུས་པ་དང་གཉེན་གྱི་ཕྱོགས་འཛིན་པར་འགྱུར་རོ། །དོན་མ་ནོར་བར་ཤེས་པ་རྣམས་ཀྱིས་ཀྱང་མི་ཤེས་པ་རྣམས་ལ་བསྟན་པར་བྱ་བའི་ཕྱིར་མི་རྩོད་ཀྱི། སྨད་བབ་པ་དང་ཤེད་གཅད་པའི་ཕྱིར་རྩོད་དེ། ཁྱོད་ཀྱི་དོན་གྱི་ངོ་བོ་ཇི་ལྟར་མཐོང་བ་སྨྲོས་ཞེས་དྲིས་ནས། དེས་སྨྲས་པ་དང ། དོན་མ་ནོར་ཡང་མདོ་སྡེ་གཞན་ལ་བརྩམས་ནས་སྨྲ་བར་འགྱུར་རོ། །ཁྱོད་འདི་སྐད་ཟེར་ཞེས་ནོར་པ་གཞན་ལ་སྒྲོགས་པར་འགྱུར་རོ། །བདག་ཉིད་ལས་མ་གཏོགས་པ་གཞན་གྱིས་མ་ཤེས་ན་ཅི་མ་རུང་སྙམ་པར་འགྱུར་རོ། །བྱང་ཆུབ་ཀྱི་ཕྱིར་མ་ 274b ཡིན་གྱི་ཟང་ཟིང་གི་ཕྱིར་སྒྲོགས་པར་འགྱུར་རོ། །དེ་སྐད་ཅེས་བཀའ་སྩལ་པ་དང ། འཇམ་དཔལ་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ལ་བརྟག་པའི་མཐའ་ལྔ་པོ་འདི་དག་ཆོས་ཀྱི་གཞི་གཅིག་ལ་ཐ་དད་པར་འགྱུར་ན་ཆོས་ཀྱི་གཞི་དེ་ནི་གང་ལགས། དེ་ལ་ཇི་ལྟར་བརྟགས་ན་ནི་འཁྲུལ་པ་ལགས། དེའི་མ་ནོར་བའི་རང་གི་ངོ་བོ་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། གཞི་ནི་ཕུང་པོ་རྣམས་སོ། །འབྱུང་བ་རྣམས་སོ། །ཁམས་དང་སྐྱེ་མཆེད་རྣམས་སོ། །དེ་དག་སྒྱུ་མ་བཞིན་ཐ་སྙད་ཙམ་དུ་སྣང་བ་ལས་རྟག་པ་དང་ཐར་ཟུག་ཏུ་བཟུང་ན་འཁྲུལ་པ་ཡིན་ནོ། །རང་བཞིན་སྐྱེ་བ་མེད་པ་ལ་དངོས་པོ་ཐ་སྙད་དུ་སྣང་བ་བསལ་ནས་མེད་པར་བརྟགས་ནའང་འཁྲུལ་པ་ཡིན་ནོ། །དེའི་གཞི་མ་ནོར་བའི་རང་གི་ངོ་བོ་ཆོས་དེ་དག་གི་རང་བཞིན་སྐྱེ་བ་མེད་པ་ཡིན་ནོ། །གསོལ་པ། འོ་ན་ཡུལ་འཁྲུལ་པའི་གཞི་མ་མཆིས་ན་ཡུལ་འཁྲུལ་པ་སྣང་ཞེས་བྱ་བ་ཇི་ལྟ་བུ་ལགས། བཀའ་སྩལ་པ། ཆོས་སྒྱུ་མ་བཞིན་ཐ་སྙད་ཙམ་དུ་སྣང་ཞིང་ཡོད་པ་དེ་སེམས་འཁྲུལ་པས་སྣང་བར་ནི་མི་བཟུང་གི་།ཆོས་དེ་དག་གི་རང་བཞིན་སྐྱེ་བ་མེད་པར་མི་ཤེས་ནས་རྟག་པ་ཐེར་ཟུག་ཏུ་བཟུང་བའི་འཁྲུལ་པའི་སྣང་བ་ལ་སེམས་འཁྲུལ་པ་ཡུལ་དུ་སྣང་བར་ཟུངས་ཤིག་།དེ་ཅིའི་ཕྱིར་ཞེ་ན། ཆོས་རྣམས་ལ་གང་གིས་རྟག་པ་དང་ཐེར་ཟུག་ཏུ་བཟུང་ན་འཁོར་བར་འགྱུར་རོ། །འཁོར་བར་གྱུར་ 275a ༄#། །ན་ཕུང་པོ་དང ། ཁམས་དང ། སྐྱེ་མཆེད་རྣམས་ཡོད་པར་འགྱུར་རོ། །དེ་ཡོད་ན་བདེ་བ་དང་སྡུག་བསྔལ་རྣམས་མྱོང་བར་འགྱུར་རོ། །གང་གིས་ཆོས་རྣམས་གྱི་རང་བཞིན་སྐྱེ་བ་མེད་པ་ཤེས་ནས་ཆོས་རྣམས་ཀྱི་དངོས་པོ་རྟག་པ་ཐེར་ཟུག་དང ། མེད་པ་དང་ཆད་པའི་མཐའ་གཉིས་པོ་བསལ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ། །དེ་ཐོབ་པ་དང ། མཚན་དང ། དཔེ་བྱད་དང ། སངས་རྒྱས་ཀྱི་ཞིང་ཡོངས་སུ་དག་པར་སྣང་བར་འགྱུར་རོ། །འཇམ་དཔལ། མདོར་ན་ཆོས་ཀྱི་རང་བཞིན་སྐྱེ་བ་མེད་པར་མ་ཤེས་ཆོས་རྣམས་ལ་རྟག་པ་དང་ཐེར་ཟུག་ཏུ་བཟུང་བས་འཁོར་པར་གྱུར་ནས། ཆོས་རྣམས་སྣང་བ་ལ་སེམས་འཁྲུལ་པ་སྣང་ཞེས་བྱ་ཡི། ཐོག་མ་ནམ་མཁའ་ལྟ་བུ་མེད་པ་ལས་སེམས་འཁྲུལ་པའི་མཐུས་ཆོས་རྣམས་སྣང་བ་ནི་མ་ཡིན་ནོ། །འཇམ་དཔལ། མཐོང་བ་དག་པ་དང་མ་དག་པ་གཉིས་ཀྱིས་འཁོར་དང་མྱ་ངན་ལས་འདས་པར་སྣང་བ་ལའང་ཡུལ་ནི་སེམས་སྣང་བ་ཡིན་ཞེས་བྱའོ། །དེ་སྐད་ཅེས་བཀའ་སྩལ་པ་དང་འཁོར་འདུས་པ་དེ་དག་ཐམས་ཅད་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།ཆོས་ཉིད་རང་གི་ངོ་བོ་ཉིད་ལས་མི་གཡོ་བར་ཐ་དད་པར་ཐམས་ཅད་སྣང་བའི་མདོ་རྫོགས་སོ།། །།རྒྱ་གར་གྱི་མཁན་ 275b པོ་དཱ་ན་ཤའི་ལ་དང ། བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། དཱ་ན་ཤའི་ལའི་ཞལ་ནས་སྡེ་སྣོད་ཀྱི་བསྟན་བཅོས་དང་དབུ་མའི་ལྟ་བ་ཐ་དད་རྣམས་འདི་ལས་འཕྲོས་པ་ཡིན་གསུང་སྐད།། |