རྒྱ་གར་སྐད་དུ། ཨཱརྱ་བཛྲ་མཎྜ་ནཱ་མ་དྷཱ་ར་ཎི་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་རྡོ་རྗེའི་སྙིང་པོའི་གཟུངས་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་ 432b སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གངས་ཀྱི་རི་དང་ཉེ་བ་སྣ་ཚོགས་ཀྱི་གྲོང་གི་རྩཝའི་སྤྱིལ་པོ་ན་དགེ་སློང་སྟོང་དུ་ཚང་བའི་དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་བསོད་སྙོམས་ཀྱི་ཟན་ཕྱིས་ལེན་པ་སྤངས་ཏེ་རྩཝའི་སྤྱིལ་པོར་སྐྱིལ་མོ་ཀྲུང་བཅས་ནས་སྐུ་དྲང་པོར་བསྲང་སྟེ་དྲན་པ་མངོན་དུ་བཞག་ནས་བཞུགས་སོ། །དེ་ནས་དེའི་ཚེ་བཅོམ་ལྡན་འདས་ཆོས་ཐམས་ཅད་ལ་མཉམ་པ་ཉིད་དུ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བཅོམ་ལྡན་འདས་སྙོམས་པར་ཞུགས་མ་ཐག་ཏུ་དགེ་སློང་གི་དགེ་འདུན་ཐམས་ཅད་ཀྱིས་བཅོམ་ལྡན་འདས་ད་ལྟར་ག་ལ་བཞུགས་པའི་སྐུ་མ་མཐོང་ངོ ། །དེ་ནས་སངས་རྒྱས་ཀྱི་མཐུས་ལྷ་རྣམས་ཀྱི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་དང ། གནས་གཙང་མའི་རིས་ཀྱི་ལྷའི་བུ་སུམ་ཁྲི་ཉིས་སྟོང་བཅོམ་ལྡན་འདས་ག་ལ་བ་དེར་དོང་ངོ་།། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པ་འདི་སྙམ་དུ། བཅོམ་ལྡན་འདས་ད་ལྟར་གང་ན་བཞུགས་སྙམ་དུ་སེམས་པ་དང ། བཅོམ་ལྡན་འདས་རྩཝའི་སྤྱིལ་པོའི་ནང་ན་ཏིང་ངེ་འཛིན་ལ་སྙོམས་པར་ཞུགས་པ་དེ་དག་གིས་མཐོང་ངོ ། །མཐོང་ནས་བཅོམ་ལྡན་འདས་ག་ལ་བ་དེར་དོང་སྟེ་བཅོམ་ལྡན་འདས་ཀྱི་སྤྱན་སྔར་ཅང་མི་སྨྲ་བར་སྐྱིལ་མོ་ཀྲུང་ 433a ༄#། །བཅས་ཏེ་འཁོད་དོ། །གནས་གཙང་མའི་རིས་ཀྱི་ལྷའི་བུ་རྣམས་ཀྱང་ཅང་མི་སྨྲ་བར་བཅོམ་ལྡན་འདས་ཀྱི་སྤྱན་སྔ་དེ་ཉིད་དུ་སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་དེའི་ཚེ་བཅོམ་ལྡན་འདས་ཀྱིས་འདི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་མཛད་དེ། ཇི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་མཛད་པས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་བྱང་ཆུབ་སེམས་དཔའི་ཐེག་པ་པའི་གང་ཟག་ཐེག་པ་ལ་གསར་དུ་ཡང་དག་པར་ཞུགས་པའམ། ཐེག་པ་ལ་ཡང་དག་པར་ཞུགས་ནས་རིང་དུ་ལོན་པའམ། ཕྱིར་མི་ལྡོག་པའམ། སྐྱེ་བ་གཅིག་གིས་ཐོགས་པའང་རུང་སྟེ། ཇི་སྙེད་འཁོད་པ་དེ་དག་ཐམས་ཅད་སྣ་ཚོགས་ཀྱི་གྲོང་ག་ལ་བ་དང ། རྩཝའི་སྤྱིལ་པོ་ག་ལ་བ་དེར་དོང་སྟེ་ཕྱིན་པ་དང ། སངས་རྒྱས་ཀྱི་མཐུས་མི་གང་ཙམ་གྱི་བར་སྣང་ལ་སྐྱིལ་མོ་ཀྲུང་བཅས་ཏེ་འཁོད་དོ། །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པས་སེམས་ཅན་ཐམས་ཅད་ཀྱི་སེམས་མགུ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འཇམ་དཔལ་གཞོན་ནུར་གྱུར་པ་ཏིང་ངེ་འཛིན་འདི་ལ་སྙོམས་པར་ཞུགས་མ་ཐག་ཏུ་འཁོར་དེ་དག་ཐམས་ཅད་སེམས་རབ་ཏུ་དགའ་བ་དང ། སེམས་མགུ་བ་དང ། སེམས་རངས་པ་དང ། སེམས་ཤིན་ཏུ་ཚིམ་པ་སྐྱེས་སོ། །དེ་ནས་དེའི་ཚེ་བྱང་ཆུབ་སེམས་དཔའ་བྱམས་པས་ཆོས་ 433b ཐམས་ཅད་རབ་ཏུ་ཞི་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བྱང་ཆུབ་སེམས་དཔའ་བྱམས་པའི་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་འཁོར་དེ་དག་ཐམས་ཅད་ཀྱི་དབང་པོ་རྣམས་རབ་ཏུ་ཞི་བར་གནས་སོ། །དེ་ནས་བྱང་ཆུབ་སེམས་དཔའ་རིན་པོ་ཆེའི་ཏོག་ཅེས་བྱ་བ་བྱང་ཆུབ་སེམས་དཔའ་དྲུག་ཁྲི་ཉིས་སྟོང་དང་ལྷན་ཅིག་ཏུ་སྣ་ཚོགས་ཀྱི་གྲོང་ག་ལ་བ་དང།་རྩཝའི་སྤྱིལ་བོ་ག་ལ་བ་དེར་སོང་སྟེ་ཕྱིན་མ་ཐག་ཏུ་བདག་ཉིད་སྟེང་གི་ནམ་མཁའ་བར་སྣང་ལ་འདུག་པ་སྙམ་དུ་ཤེས་ཏེ། དེ་སྟེང་གི་ནམ་མཁའ་དེ་ཉིད་ལ་སྐྱིལ་ཀྲུང་བཅས་ཏེ་འདུག་གོ། དེ་ནས་དེའི་ཚེ་བྱང་ཆུབ་སེམས་དཔའ་རིན་པོ་ཆེའི་ཏོག་བཀོད་པ་ཆེན་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བྱང་ཆུབ་སེམས་དཔའ་རིན་པོ་ཆེའི་ཏོག་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་དེ་ནས་བར་སྣང་ཐམས་ཅད་མེ་ཏོག་ཨུཏྤ་ལ་དང ། པདྨ་དང ། ཀུ་མུ་ད་དང ། པདྨ་དཀར་པོས་ཀུན་ཏུ་ཁེབས་ནས་ཉི་མ་དང ། ཟླ་བ་རྣམས་ཀྱི་འོད་ཀྱང་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་བྱང་ཆུབ་སེམས་དཔའ་དྲུག་ཁྲི་ཉིས་སྟོང་དང་ལྷན་ཅིག་ཏུ་སྟེང་གི་ནམ་མཁའ་ལས་སྣ་ཚོགས་ཀྱི་གྲོང་ཁྱེར་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་མ་ཐག་ཏུ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ས་ལ་འདུག་མ་ནུས་ནས་དེ་བྱང་ཆུབ་སེམས་ 434a ༄#། །དཔའ་ལྷག་མ་དེ་དག་དང་ལྷན་ཅིག་ཏུ་སྟེང་གི་བར་སྣང་ནམ་མཁའ་ལ་སྐྱིལ་མོ་ཀྲུང་བཅས་ཏེ་འདུག་གོ་།འདུག་མ་ཐག་ཏུ་དེའི་ཚེ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་སེམས་ཅན་ཐམས་ཅད་ཀྱི་ཉོན་མོངས་པ་འཇོམས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་དེ་ནས་འཁོར་དེ་དག་ཐམས་ཅད་ཀྱི་འདོད་ཆགས་དང ། ཞེ་སྡང་དང ། གཏི་མུག་དང ། ཉོན་མོངས་པ་ཐམས་ཅད་རབ་ཏུ་ཞི་བར་གྱུར་ཏོ། །དེ་ནས་དེའི་ཚེ་བཅོམ་ལྡན་འདས་སྟེང་གི་བར་སྣང་ལ་འཕགས་ནས་འཛུམ་པ་མཛད་དོ། །དེ་ནས་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་དུ་མ་འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་ངོ ། །དེ་ནས་དེའི་ཚེ་འཇམ་དཔལ་གཞོན་ནུར་གྱུར་པས་སྟེང་གི་བར་སྣང་ལ་གོས་ཕྲག་པ་གཅིག་ཏུ་བོགས་ཏེ་པུས་མོ་གཡས་པའི་ལྷ་ང་བར་སྣང་དེ་ཉིད་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཛུམ་པ་མཛད་པའི་རྒྱུ་ནི། གང་ལགས། རྐྱེན་ནི། གང་ལགས། བཅོམ་ལྡན་འདས་ཀྱིས་བཀའ་སྩལ་པ། 434b འཇམ་དཔལ། བར་སྣང་འདིར་སངས་རྒྱས་ཁྲི་རྣམས་ཀྱིས་བྱང་ཆུབ་སེམས་དཔའ་རྣམས་ལ་རྡོ་རྗེའི་སྙིང་པོའི་གཟུངས་ཞེས་བྱ་བ་བཤད་དེ། ཡང་དག་པར་རབ་ཏུ་བསྟན་ཏོ། །འཇམ་དཔལ་གྱིས་གསོལ་པ། བཅོམ་ལྡན་འདས་ཀྱིས་ད་ཡང་བྱང་ཆུབ་སེམས་དཔའ་འདི་རྣམས་ལ་རྡོ་རྗེའི་སྙིང་པོའི་གཟུངས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ།་ཆོག་གོ་།རྡོ་རྗེའི་སྙིང་པོའི་གཟུངས་ལ་བྱང་ཆུབ་ཀྱང་མེད། སངས་རྒྱས་ཀྱི་ཆོས་རྣམས་ཀྱང་མེད། བྱང་ཆུབ་སེམས་དཔའ་འདི་དག་ནི། བྱང་ཆུབ་མངོན་པར་རྫོགས་པར་འཚང་རྒྱ་བར་འདོད་དོ། །རྡོ་རྗེའི་སྙིང་པོའི་གཟུངས་ལ་འཁོར་བའང་མེད། མྱ་ངན་ལས་འདས་པའང་མེད་ན། བྱང་ཆུབ་སེམས་དཔའ་འདི་དག་ནི། ཡོངས་སུ་མྱ་ངན་ལས་འདའ་བར་འདོད་དོ། །རྡོ་རྗེའི་སྙིང་པོའི་གཟུངས་ལ་དགེ་བའང་མེད། མི་དགེ་བའང་མེད་ན། བྱང་ཆུབ་སེམས་དཔའ་འདི་དག་ནི། མི་དགེ་བ་སྤོང་བར་འདོད་དོ། །རྡོ་རྗེའི་སྙིང་པོའི་གཟུངས་ལ་ཕ་རོལ་ཡང་མེད། ཚུ་རོལ་ཡང་མེད་ན། འདི་དག་ནི། ཕ་རོལ་ཏུ་འགྲོ་བར་འདོད་དོ། །རྡོ་རྗེའི་སྙིང་པོའི་གཟུངས་ལ་ཞིང་ཡང་མེད། ཞིང་ཡོངས་སུ་གྲུབ་པའང་མེད་ན། འདི་དག་ནི། ཞིང་ཡོངས་སུ་སྒྲུབ་པར་འདོད་དོ། །རྡོ་རྗེའི་སྙིང་པོའི་གཟུངས་ལ་བདུད་ཀྱང་མེད། བདུད་དུ་གདགས་པའང་མེད་ན། འདི་དག་ནི། བདུད་འདུལ་བར་འདོད་དོ། །རྡོ་རྗེའི་སྙིང་པོའི་གཟུངས་ལ་ཉན་ཐོས་ཀྱང་མེད། 435a ༄#། །ཉན་ཐོས་སུ་གདགས་པའང་མེད་ན། འདི་དག་ནི། ཉན་ཐོས་ཀྱི་ཆོས་ལས་འདའ་བར་འདོད་དོ། །རྡོ་རྗེའི་སྙིང་པོའི་གཟུངས་ལ་རང་སངས་རྒྱས་ཀྱང་མེད་དེ། རང་སངས་རྒྱས་སུ་གདགས་པའང་མེད་ན། འདི་དག་ནི། རང་སངས་རྒྱས་ཀྱི་ཆོས་ལས་འདའ་བར་འདོད་དོ། །རྡོ་རྗེའི་སྙིང་པོའི་གཟུངས་ལ་སེམས་ཅན་ཡང་མེད། སེམས་ཅན་དུ་གདགས་པའང་མེད་ན།་འདི་དག་ནི། སེམས་ཅན་རྣམས་ཡོངས་སུ་མྱ་ངན་ལས་བཟླ་བར་འདོད་དོ། །རྡོ་རྗེའི་སྙིང་པོའི་གཟུངས་ལ་དོན་ཀྱང་མེད། དོན་མ་ཡིན་པའང་མེད་ན། འདི་དག་ནི། དོན་བྱེད་པར་འདོད་དོ། །རྡོ་རྗེའི་སྙིང་པོའི་གཟུངས་ལ་འདོད་ཆགས་ཀྱང་མེད། འདོད་ཆགས་སུ་གདགས་པའང་མེད་ན། འདི་དག་ནི། འདོད་ཆགས་སྤོང་བར་འདོད་དོ། །རྡོ་རྗེའི་སྙིང་པོའི་གཟུངས་ལ་ཞེ་སྡང་ཡང་མེད། ཞེ་སྡང་དུ་གདགས་པའང་མེད་ན། འདི་དག་ནི། ཞེ་སྡང་སྤོང་བར་འདོད་དོ། །རྡོ་རྗེའི་སྙིང་པོའི་གཟུངས་ལ་གཏི་མུག་ཀྱང་མེད། གཏི་མུག་ཏུ་གདགས་པའང་མེད་ན། འདི་དག་ནི། གཏི་མུག་སྤོང་བར་འདོད་དོ། །རྡོ་རྗེའི་སྙིང་པོའི་གཟུངས་ལ་ཤེས་པའང་མེད། མི་ཤེས་པའང་མེད་ན། འདི་དག་ནི། ཤེས་པ་མངོན་སུམ་དུ་བྱེད་པར་འདོད་དོ། །རྡོ་རྗེའི་སྙིང་པོའི་གཟུངས་ལ་ཀུན་ནས་ཉོན་མོངས་པའང་མེད། ཀུན་ནས་ཉོན་མོངས་པར་གདགས་པའང་མེད་ན། འདི་དག་ནི། ཀུན་ནས་ཉོན་མོངས་པ་སྤོང་བར་འདོད་དོ། །རྡོ་རྗེའི་སྙིང་པོའི་གཟུངས་ 435b ལ་རྣམ་པར་བྱང་བའང་མེད། རྣམ་པར་བྱང་བར་གདགས་པའང་མེད། འདུལ་བའང་མེད། འདུལ་བ་མ་ཡིན་པའང་མེད། བྱམས་པའང་མེད། སྙིང་རྗེའང་མེད། དགའ་བའང་མེད། བཏང་སྙོམས་ཀྱང་མེད། སྦྱིན་པའང་མེད། སེར་སྣའང་མེད། ཚུལ་ཁྲིམས་ཀྱང་མེད། འཆལ་པའི་ཚུལ་ཁྲིམས་ཀྱང་མེད། བཟོད་པའང་མེད། གནོད་སེམས་ཀྱང་མེད། བརྩོན་འགྲུས་ཀྱང་མེད། ལེ་ལོའང་མེད།་བསམ་གཏན་འང་མེད། རྣམ་པར་གཡེང་བའང་མེད། ཤེས་རབ་ཀྱང་མེད། འཆལ་པའི་ཤེས་རབ་ཀྱང་མེད། ལྟུང་བའང་མེད། མི་ལྟུང་བའང་མེད། ཉན་ཐོས་ཀྱང་མེད། རང་སངས་རྒྱས་ཀྱང་མེད། དེ་བཞིན་གཤེགས་པའང་མེད། ཆོས་ཀྱང་མེད། ཆོས་མ་ཡིན་པའང་མེད། ཟབ་མོ་མ་ཡིན་པའང་མེད། སླ་བའང་མེད། ཤེས་པའང་མེད། མི་ཤེས་པའང་མེད། ཐོབ་པའང་མེད། མངོན་པར་རྟོགས་པའང་མེད། འཁོར་བའང་མེད། མྱ་ངན་ལས་འདས་པའང་མེད། དྲན་པ་ཉེ་བར་གཞག་པ་རྣམས་ཀྱང་མེད། ཡང་དག་པར་སྤོང་བ་རྣམས་ཀྱང་མེད། རྫུ་འཕྲུལ་གྱི་རྐང་པ་རྣམས་ཀྱང་མེད། དབང་པོ་རྣམས་ཀྱང་མེད། སྟོབས་རྣམས་ཀྱང་མེད། བྱང་ཆུབ་ཀྱི་ཡན་ལག་རྣམས་ཀྱང་མེད། ལམ་ཡང་མེད་དོ། །འཇམ་དཔལ། རྡོ་རྗེའི་སྙིང་པོའི་གཟུངས་ཐོབ་པར་འདོད་པའི་བྱང་ཆུབ་སེམས་དཔའ་སོ་སོའི་སྐྱེ་བོའི་ཆོས་རྣམས་ལ་གནས་པར་མི་བྱའོ། །སོ་སོའི་སྐྱེ་བོའི་ཆོས་རྣམས་གཟུང་བར་མི་བྱ། དོར་བར་མི་བྱ། རྣམ་པར་བསྒྲུབ་པར་མི་བྱ། འདའ་ 436a ༄#། །བར་མི་བྱ། འཕོ་བར་མི་བྱ། བཏང་སྙོམས་སུ་གནས་པར་མི་བྱ། བསམ་པར་མི་བྱ། མངོན་པར་འབྱུང་བར་མི་བྱ། ལེ་ལོར་མི་བྱ། ཆགས་པར་མི་བྱ། མི་ཆགས་པར་མི་བྱ། ཡོངས་སུ་ཡི་ཆད་པར་མི་བྱ། རེག་པར་མི་བྱའོ། །སོ་སོ་སྐྱེ་བོའི་ཆོས་རྣམས་ལ་ཀུན་ནས་ཉོན་མོངས་པར་འདུ་ཤེས་བསྐྱེད་པར་མི་བྱ། སྦྱིན་པར་འདུ་ཤེས་བསྐྱེད་པར་མི་བྱ།་གཏང་བར་འདུ་ཤེས་བསྐྱེད་པར་མི་བྱའོ། །སོ་སོ་སྐྱེ་བོའི་ཆོས་རྣམས་ཀྱང་སངས་རྒྱས་ཀྱི་ཆོས་སུ་མ་གཏོགས་པར་བལྟ་བར་མི་བྱ། སངས་རྒྱས་ཀྱི་ཆོས་རྣམས་སོ་སོའི་སྐྱེ་བོའི་ཆོས་རྣམས་དང་སྦྱར་བར་མི་བྱ། སོ་སོ་སྐྱེ་བོའི་ཆོས་རྣམས་དང་སངས་རྒྱས་ཀྱི་ཆོས་རྣམས་སྦྱར་བར་མི་བྱ། སོ་སོ་སྐྱེ་བོའི་ཆོས་རྣམས་དམིགས་པར་མི་བྱ། ཉན་ཐོས་ཀྱི་ཆོས་རྣམས་དང ། རང་སངས་རྒྱས་ཀྱི་ཆོས་རྣམས་སྦྱར་བར་མི་བྱའོ། །སངས་རྒྱས་ཀྱི་ཆོས་རྣམས་ཀྱང་གཟུང་བར་མི་བྱ། སོ་སོ་སྐྱེ་བའི་ཆོས་རྣམས་ཀྱང་དོར་བར་མི་བྱ། སོ་སོ་སྐྱེ་བོའི་ཆོས་རྣམས་བསྲུང་བར་མི་བྱ། སངས་རྒྱས་ཀྱི་ཞིང་ཡོངས་སུ་དག་པ་ལའང་གནས་པར་མི་བྱ་སྟེ། སྨོན་ལམ་ཡང་མི་གཏོང་ངོ ། །དེ་ཅིའི་ཕྱིར་ཞེ་ན། འཇམ་དཔལ། རྡོ་རྗེ་སྙིང་པོའི་གཟུངས་ནི། རྣམ་པར་མི་རྟོག་པ་སྟེ། འདོད་ཆགས་སུ་ཡང་དག་པར་འདུ་བ། ཞེ་སྡང་དུ་ཡང་དག་པར་འདུ་བ། གཏི་མུག་ཏུ་ཡང་དག་པར་འདུ་བ། བུད་མེད་དུ་ཡང་དག་པར་འདུ་བ། སྐྱེས་པར་ཡང་དག་ 436b པར་འདུ་བ། ལྷར་ཡང་དག་པར་འདུ་བ། ཀླུར་ཡང་དག་པར་འདུ་བ། གནོད་སྦྱིན་དུ་ཡང་དག་པར་འདུ་བ། དྲི་ཟར་ཡང་དག་པར་འདུ་བ། ལྷ་མ་ཡིན་དུ་ཡང་དག་པར་འདུ་བ། ནམ་མཁའ་ལྡིང་དུ་ཡང་དག་པར་འདུ་བ། ལྟོ་འཕྱེ་ཆེན་པོར་ཡང་དག་པར་འདུ་བ། སངས་རྒྱས་སུ་ཡང་དག་པར་འདུ་བ། ཆོས་སུ་ཡང་དག་པར་འདུ་བ། དགེ་འདུན་དུ་ཡང་དག་པར་འདུ་བ། ཉན་ཐོས་སུ་ཡང་དག་པར་འདུ་བ། རང་སངས་རྒྱས་སུ་ཡང་དག་པར་འདུ་བ། སེམས་ཅན་དམྱལ་བར་ཡང་དག་པར་འདུ་བ། དུད་འགྲོའི་སྐྱེ་གནས་སུ་ཡང་དག་པར་འདུ་བ། གཤིན་རྗེའི་འཇིག་རྟེན་དུ་ཡང་དག་པར་འདུ་བ། ངན་པར་ཡང་དག་པར་འདུ་བའམ། བཟང་པོར་ཡང་དག་པར་འདུ་བ། སར་ཡང་དག་པར་འདུ་བ། ཆུར་ཡང་དག་པར་འདུ་བ། མེར་ཡང་དག་པར་འདུ་བ། རླུང་དུ་ཡང་དག་པར་འདུ་བ། མིག་ཏུ་ཡང་དག་པར་འདུ་བ། རྣ་བར་ཡང་དག་པར་འདུ་བ། སྣར་ཡང་དག་པར་འདུ་བ། ལྕེར་ཡང་དག་པར་འདུ་བ། ལུས་སུ་ཡང་དག་པར་འདུ་བ། ཡིད་དུ་ཡང་དག་པར་འདུ་བ་སྟེ། འཇམ་དཔལ། རྡོ་རྗེ་སྙིང་པོའི་གཟུངས་ནི། ཆོས་ཐམས་ཅད་དུ་ཡང་དག་པར་འདུ་བའོ། །འཇམ་དཔལ། འདི་ལྟ་སྟེ། དཔེར་ན། ཤར་ཕྱོགས་ཀྱི་ནམ་མཁའི་ཁམས་གང་ཡིན་པ་དང ། ལྷོ་ཕྱོགས་ཀྱི་གང་ཡིན་པ་དང ། ནུབ་ཕྱོགས་ཀྱི་གང་ཡིན་པ་དང ། བྱང་ཕྱོགས་ཀྱི་གང་ཡིན་པ་དང ། འོག་གི་གང་ཡིན་པ་དང ། སྟེང་གི་ནམ་མཁའི་ཁམས་གང་ 437a ༄#། །ཡིན་པ་དེ་དག་ཐམས་ཅད་ནམ་མཁའི་ཁམས་སུ་ཡང་དག་པར་འདུ་བར་གྱུར་པ་དེ་བཞིན་དུ་འཇམ་དཔལ། རྡོ་རྗེའི་སྙིང་པོའི་གཟུངས་འདིའང་ཆོས་ཐམས་ཅད་དུ་ཡང་དག་པར་འདུ་བར་འགྱུར་རོ། །དེ་སྐད་ཅེས་བཀའ་སྩལ་པ་དང ། འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན།་འདོད་ཆགས་གཟུངས་ཀྱི་གཞི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདོད་ཆགས་འདོད་ཆགས་ཞེས་བྱ་བ་ནི། ཤར་ཕྱོགས་ནས་འོངས་ཏེ་སེམས་ཅན་རྣམས་ལ་ཀུན་ནས་ཉོན་མོངས་པར་བྱེད་པ་མ་ཡིན། ལྷོ་ཕྱོགས་ནས་མ་ཡིན། ནུབ་ཕྱོགས་ནས་མ་ཡིན། བྱང་ཕྱོགས་ནས་མ་ཡིན། འོག་ནས་མ་ཡིན། སྟེང་གི་ཕྱོགས་ནས་འོངས་ཏེ་སེམས་ཅན་རྣམས་ལ་ཉོན་མོངས་པར་བྱེད་པ་མ་ཡིན་ནོ། །ནང་ནས་སྐྱེས་ཏེ་སེམས་ཅན་རྣམས་ལ་ཀུན་ནས་ཉོན་མོངས་པར་བྱེད་པ་མ་ཡིན། ཕྱི་རོལ་ནས་ཀྱང་མ་ཡིན་ནོ། ། འཇམ་དཔལ། གལ་ཏེ་འདོད་ཆགས་ནང་ནས་ལངས་ཏེ་སེམས་ཅན་རྣམས་ལ་ཀུན་ནས་ཉོན་མོངས་པར་བྱེད་ན་ནི། དེའི་ཕྱིར་སེམས་ཅན་རྣམས་ཀུན་ནས་ཉོན་མོངས་པ་ཅན་ཉིད་དུ་འགྱུར་ཏེ། ཕྱིས་ཀྱང་ཆོས་མངོན་པར་རྟོགས་པར་མི་འགྱུར་རོ། །འཇམ་དཔལ། ཆོས་ནི། མི་འོང ། མི་འགྲོ། ནང་ན་མི་འདུག་།ཕྱི་རོལ་ནའང་མི་འདུག་།གཉིས་ཀ་མེད་པར་ཡང་མི་ 437b འདུག་སྟེ། དེ་ལ་བགྲང་པ་གང་ཡང་མེད་དེ། དེས་ན། འདོད་ཆགས་ནི། གཟུངས་ཀྱི་གཞི་ཞེས་བྱའོ། །ཞེ་སྡང་ནི། གཟུངས་ཀྱི་གཞིའོ། །འཇམ་དཔལ་གྱིས་གསོལ་པ། བཅོམ་ལྡན་འདས།་ཇི་ལྟར་ན། ཞེ་སྡང་གཟུངས་ཀྱི་གཞི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཞེ་སྡང་ནི། ཅ་ཅོ་བཏོན་པ་ལས་འབྱུང་སྟེ། ཅ་ཅོ་བཏོན་པ་དེ་ནི། འདས་པའང་མ་ཡིན། མ་འོངས་པའང་མ་ཡིན། ད་ལྟར་བྱུང་བའང་མ་ཡིན་ནོ། །འཇམ་དཔལ། གལ་ཏེ་འདས་པ་ལས་ཆོས་རྣམས་འབྱུང་དུ་ཟིན་ན། རྟག་པར་འགྱུར་རོ། །འཇམ་དཔལ། མ་འོངས་པའི་རྐྱེན་རྣམས་ལས་ཀྱང་ཞེ་སྡང་འབྱུང་བ་མེད་དོ། །ད་ལྟར་གྱི་རྐྱེན་ཀྱང་འདུག་པ་མེད་ཅིང་མ་འགགས་པའོ། །འཇམ་དཔལ། ཆོས་གང་འདས་པ་ལས་མ་བྱུང ། མ་འོངས་པ་ལས་ཀྱང་མ་ཡིན། ད་ལྟར་གྱི་ལས་ཀྱང་མ་ཡིན་པ་དེ་ནི། དུས་གསུམ་དུ་ཡོངས་སུ་དག་པའི་གཟུངས་ཀྱི་གཞི་ཞེས་བྱའོ། །འཇམ་དཔལ། གཏི་མུག་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། གཏི་མུག་གཟུངས་ཀྱི་གཞི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། གཏི་མུག་ནི། མ་རིག་པ་ལས་བྱུང་སྟེ། མ་རིག་པ་དེའང་སའི་ཁམས་དང་མ་འདྲེས། ཆུའི་ཁམས་དང་མ་ཡིན། མེའི་ཁམས་དང་མ་ཡིན། རླུང་གི་ཁམས་དང་མ་ཡིན། ནམ་མཁའི་ཁམས་དང་མ་ཡིན། རྣམ་པར་ཤེས་པའི་ཁམས་དང་མ་ 438a ༄#། །འདྲེས་པའོ། །འཇམ་དཔལ། མ་འདྲེས་པའི་ཆོས་ནི། ཀུན་ནས་ཉོན་མོངས་པ་ཅན་དུ་མི་འགྱུར་ཞིང་རྣམ་པར་བྱང་བར་མི་འགྱུར་རོ། །འཇམ་དཔལ། གལ་ཏེ་མ་འདྲེས་པའི་ཆོས་དེ་ཀུན་ནས་ཉོན་མོངས་པ་ཅན་དུ་འགྱུར་བའམ། རྣམ་པར་བྱང་བར་འགྱུར་དུ་ཟིན་ན། ནམ་མཁའང་ཀུན་ནས་ཉོན་མོངས་པ་ཅན་དུ་འགྱུར་ཞིང་རྣམ་པར་བྱང་བར་འགྱུར་རོ། །དེ་ཅིའི་ཕྱིར་ཞེ་ན། འཇམ་དཔལ། ནམ་མཁའ་ནི། ཆོས་གང་དང་ཡང་མ་འདྲེས་པ་སྟེ། འཇམ་དཔལ། གང་མ་རིག་པ་དང་མ་འདྲེས་པ། མི་འཕོ་བ། འདུལ་བ་མ་ཡིན་པ། ཡོད་པ་མ་ཡིན་པ། མ་བྱུང་བ། དངོས་པོ་མེད་པ། མི་མཐོང་བ། མི་སྣང་བ། གཟུང་དུ་མེད་པ། མ་བཅིངས་པ། མ་གྲོལ་བ། ཚད་མེད་པ། ཡ་མ་བརླ། གསོབ། གསོག་།སྟོང་པ་ནི། ཀུན་ནས་ཉོན་མོངས་པ་ཞེའམ། རྣམ་པར་བྱང་བ་ཞེས་བརྗོད་པར་བྱའམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། འཇམ་དཔལ། མ་རིག་པ་མ་རིག་པ་ཞེས་དེ་བཞིན་གཤེགས་པས་བསྟན་པ་དེའི་ཐོག་མ་མེད་དོ། །རྟག་ཏུ་གཅིག་པ་ཉིད་ཀྱང་མེད་དོ། །ཐོག་མའི་མཐའ་ཡང་མེད། ཐ་མའི་མཐའ་ཡང་མེད། ད་ལྟར་བྱུང་བའང་མེད་དེ།་དེས་ན་མ་རིག་པ་ཞེས་བྱའོ། །འཇམ་དཔལ། ཆོས་གང་མེད་ཅིང་མི་རྙེད། རྣམ་པར་མི་རིག་།མི་སྣང ། མི་ཆགས། རྣམ་པར་མི་ཆགས། ཞེ་མི་སྡང ། གཏི་མི་མུག་པ་སྟ། 438b ཆོས་གང་ལའང་ཀུན་ནས་ཉོན་མོངས་པའམ། རྣམ་པར་བྱང་བའམ། སྒྲིབ་པའི་བྱ་བ་བྱེད་དམ། གསོལ་བ། བཅོམ་ལྡན་འདས། དེ་ནི། མ་ལགས་སོ། །བདེ་བར་གཤེགས་པ། དེ་ནི། མ་ལགས་སོ། །བཅོམ་ལྡན་འདས། གལ་ཏེ་དེ་ནི། མ་རིག་པའི་ཆོས་གང་ལའང་ཀུན་ནས་ཉོན་མོངས་པའམ། རྣམ་པར་བྱང་བའམ། སྒྲིབ་པའི་བགྱི་བ་མ་བགྱིད་ན། ཇི་ལྟར་ན། བཅོམ་ལྡན་འདས་ཀྱིས་མ་རིག་པ་ཀུན་ནས་ཉོན་མོངས་པ་ཞེས་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདི་ལྟ་སྟེ། དཔེར་ན། གཙུབ་ཤིང་དང་གཙུབ་སྟན་ལའང་བརྟེན། མིའི་ལག་པས་གཙུབས་པ་ལའང་བརྟེན་ནས་དུ་བ་འབྱུང་ཞིང་མེ་མངོན་པར་འགྲུབ་སྟེ། མེ་དེའང་གཙུབ་ཤིང་ལའང་མི་གནས། གཙུབ་སྟན་ལའང་མི་གནས། མིའི་ལག་པས་གཙུབས་པ་ལའང་མི་གནས་སོ། །འཇམ་དཔལ། དེ་བཞིན་དུ་སྐྱེས་བུ་གང་ཟག་རྨོངས་པ་ལ་འདོད་ཆགས་དང ། ཞེ་སྡང་དང ། གཏི་མུག་གིས་ཡོངས་སུ་གདུང་བ་མེད་པ་འབྱུང་སྟེ། ཡོངས་སུ་གདུང་བ་དེའང་ནང་ནའང་མི་གནས། ཕྱི་རོལ་ནའང་མི་གནས། གཉི་ག་མེད་པར་ཡང་མི་གནས་མོད་ཀྱི། འཇམ་དཔལ། འོན་ཀྱང་གཏི་མུག་ཅེས་བྱའོ། །དེ་ཅིའི་ཕྱིར་ཞེ་ན། འཇམ་དཔལ། ཆོས་ཐམས་ཅད་ནི། ཤིན་ཏུ་གྲོལ་བ་ཡིན་པའི་ཕྱིར་ཏེ། ཆོས་གང་ཤིན་ཏུ་གྲོལ་བ་དེ་ནི། གཟུངས་ཀྱི་གཞི་ཞེས་བྱའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་ 439a ༄#། །འདི་སྐད་ཅས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ཆོས་ཀྱི་སྒོ་གང་དང་ལྡན་ན། ཐམས་ཅད་ཀྱི་རྗེས་སུ་སོང་བའི་གཟུངས་ཐོབ་པར་འགྱུར་བའི་ཆོས་ཀྱི་སྒོ་འགའ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་བ། འཇམ་དཔལ། བྱང་ཆུབ་སེམས་དཔའ་ཆོས་ཀྱི་སྒོ་གང་དང་ལྡན་ན། ཐམས་ཅད་ཀྱི་རྗེས་སུ་སོང་བའི་གཟུངས་ཐོབ་པའི་ཆོས་ཀྱི་སྒོ་ཡོད་དེ། ཡི་གེ་གཅིག་ལས་ཡི་གེ་འབུམ་དུ་བཤད་ཀྱང་ཡི་གེ་དེའི་མཐའ་མི་རྟོགས་ཏེ། ཆོས་ཀྱི་སྒོ་གང་དང་གང་གིས་བཤད་པའི་ཆོས་ཀྱི་སྒོ་དེ་དང་དེ་ལས་ཆོས་ཀྱི་སྒོ་མཐའ་ཡས་པ་དག་སྣང་བར་འགྱུར་ཞིང་སྤོབས་པའང་ཐོགས་པ་མེད་དོ། །དེ་སྤོབས་པའང་ཐོགས་པ་མེད་པའི་ཕྱིར་ཆོས་ཀྱི་སྒོ་ཐམས་ཅད་བརྗོད་དོ། །ཆོས་ཀྱི་སྒོའི་ཚིག་གཅིག་ལ་ཆོས་ཀྱི་སྒོའི་ཚིག་ཐམས་ཅད་རྗེས་སུ་འཇུག་པར་བྱེད་དོ། །ཆོས་ཀྱི་སྒོའི་ཚིག་ཐམས་ཅད་ལ་ཆོས་ཀྱི་སྒོའི་ཚིག་གཅིག་རྗེས་སུ་འཇུག་པར་བྱེད་དོ། །འཇམ་དཔལ་གྱིས་གསོལ་པ། བཅོམ་ལྡན་འདས། ཆོས་ཀྱི་སྒོ་དེ་ཇི་ལྟ་བུ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། ཆོས་ཐམས་ཅད་ནི། ལྷའི་སྒོ་སྟེ། འདི་ནི། གཟུངས་གྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ། ཆོས་ཐམས་ཅད་ནི། དུལ་བའི་ས་ལ་གནས་པ་སྟེ། དེ་ནི། ལྷ་ 439b ལྟ་བུར་འཇུག་པའི་གཟུངས་ཀྱི་གཞིའོ། །འཇམ་དཔལ། ཆོས་ཐམས་ཅད་ཀླུའི་སྒོ་སྟེ། འདི་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ། ཆོས་ཐམས་ཅད་ནི། མིང་མེད་པ། ཡི་གེ་ཡོངས་སུ་ཆད་པ། ཡི་གེ་མེད་པ། ཡི་གེས་ཡོངས་སུ་བརྗོད་པ་སྟེ། དེ་ནི། ཀླུ་ལྟ་བུར་འཇུག་པའི་གཟུངས་ཀྱི་གཞིའོ།། འཇམ་དཔལ། ཆོས་ཐམས་ཅད་ནི། གནོད་སྦྱིན་གྱི་སྒོ་སྟེ། འདི་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ།་ཆོས་ཐམས་ཅད་ནི། མ་སྐྱེས་པའི་ཕྱིར་མི་ཟད་པའི་རྣམ་པར་ཞུགས་པའི་སྒོ་སྟེ། དེ་ནི། གནོད་སྦྱིན་ལྟ་བུར་འཇུག་པའི་གཟུངས་ཀྱི་གཞིའོ། །འཇམ་དཔལ། ཆོས་ཐམས་ཅད་ནི། དྲི་ཟའི་སྒོ་སྟེ། དེ་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ། ཆོས་ཐམས་ཅད་ནི། ཚད་མེད། གྲངས་མེད།་དཔག་ཏུ་མེད། ནམ་མཁའ་དང་མཉམ་པའི་ཕྱིར་བགྲང་བ་ལས་འདས་པ་སྟེ། དེ་ནི། དྲི་ཟ་ལྟ་བུར་འཇུག་པའི་གཟུངས་ཀྱི་གཞིའོ། །འཇམ་དཔལ། ཆོས་ཐམས་ཅད་ནི། ལྷ་མ་ཡིན་གྱི་སྒོ་སྟེ། འདི་ནི།་གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ། ཆོས་ཐམས་ཅད་ནི། མེད་པའི་སྒོ་སྟེ། མིང་དུ་རིག་པར་ 440a ༄#། །བྱ་བ་མ་ཡིན། གཟུགས་སུ་རིག་པར་བྱ་བ་མ་ཡིན། སྒྲར་རིག་པར་བྱ་བ་མ་ཡིན། དྲིར་རིག་པར་བྱ་བ་མ་ཡིན། རོར་རིག་པར་བྱ་བ་མ་ཡིན། རེག་པར་རིག་པར་བྱ་བ་མ་ཡིན།་ཡིད་དུ་རིག་པར་བྱ་བ་མ་ཡིན། སངས་རྒྱས་སུ་རིག་པར་བྱ་བ་མ་ཡིན། ཆོས་སུ་རིག་པར་བྱ་བ་མ་ཡིན། དགེ་འདུན་དུ་རིག་པར་བྱ་བ་མ་ཡིན། ཉན་ཐོས་སུ་རིག་པར་བྱ་བ་མ་ཡིན། རང་སངས་རྒྱས་སུ་རིག་པར་བྱ་བ་མ་ཡིན། སོ་སོ་སྐྱེ་བོར་རིག་པར་བྱ་བ་མ་ཡིན་ཞིང ། འཇམ་དཔལ། ཆོས་ཐམས་ཅད་ནི། ཤིན་ཏུ་ཀུན་ནས་མ་སྐྱེས་པའི་ཚུལ་གྱིས་རིག་པར་བྱ་བ་མ་ཡིན་པ་སྟེ། དེ་ནི། ལྷ་མ་ཡིན་ལྟ་བུར་འཇུག་པའི་གཟུངས་ཀྱི་གཞིའོ། །འཇམ་དཔལ། ཆོས་ཐམས་ཅད་ནི། ནམ་མཁའ་ལྡིང་གི་སྒོ་སྟེ། འདི་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ། ཆོས་ཐམས་ཅད་ནི། འོང་བ་མེད་ཅིང་འགྲོ་བ་མེད་པ་སྟེ། མི་རྒྱུག་པ། རྣམ་པར་མི་རྒྱུག་པ། མི་འབྲོས་པ། མི་འགྲོ་བ། མི་འོང་པ། མི་འཕོ་བ། མི་སྐྱེ་བ། མི་རྟེན་པ། མི་གནས་པ། མི་ཆགས་པ། མི་འཆིང་བ། ཞེ་མི་སྡང་བ། གཏི་མི་མུག་པ། མི་འགྲོལ་པ། མི་གནས་པ། རབ་ཏུ་མི་གནས་པ་སྟེ། འཇམ་དཔལ། ནམ་མཁའ་ལ་ཆགས་པ་མེད་པའི་ཕྱིར་ཆོས་ཐམས་ཅད་ནི། གནས་པ་མེད་པའི་སྒོ་སྟེ། དེ་ནི། ནམ་མཁའ་ལྡིང་ལྟ་བུར་འཇུག་པའི་གཟུངས་ 440b ཀྱི་གཞིའོ། །འཇམ་དཔལ། ཆོས་ཐམས་ཅད་ནི། མིའམ་ཅིའི་སྒོ་སྟེ། འདི་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ།་འཇམ་དཔལ། ཆོས་ཐམས་ཅད་ནི། བྱེད་པ་པོ་ལས་ལོག་པ་སྟེ། མི་བྱས་པ། མི་འགྱུར་བ། བྱེད་པ་པོ་ཀུན་ཏུ་བསལ་ན་མི་རྙེད་པ་སྟེ། འཇམ་དཔལ། དེ་ནི། མི་འམ་ཅི་ལྟ་བུའི་སྐོར་འཇུག་པའི་གཟུངས་ཀྱི་གཞིའོ། །འཇམ་དཔལ། ཆོས་ཐམས་ཅད་ལྟོ་འཕྱེ་ཆེན་པོའི་སྒོ་སྟེ། འདི་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ། ཆོས་ཐམས་ཅད་ནི། དྲི་མ་དང་བྲལ་ཞིང་ཤིན་ཏུ་འོད་གསལ་བ་སྟེ། སེམས་ཅན་ཐམས་ཅད་ཀྱིས་ཀུན་ནས་ཉོན་མོངས་པ་ཅན་དུ་བྱ་བའམ། རྣམ་པར་བྱང་བར་བྱར་མི་ནུས་པ་དེ་ནི། རྣམ་པར་དག་པའི་གཟུངས་ཀྱི་གཞིའོ། །དེ་ཅིའི་ཕྱིར་ཞེ་ན། འཇམ་དཔལ། ཆོས་ཐམས་ཅད་རང་བཞིན་གྱིས་མ་སྐྱེས་པའི་ཕྱིར་གཏན་དུ་ཡོངས་སུ་མྱ་ངན་ལས་འདས་པ་སྟེ། དེ་ནི། ལྟོ་འཕྱེ་ཆེན་པོ་ལྟ་བུར་འཇུག་པའི་གཟུངས་ཀྱི་གཞིའོ། །འཇམ་དཔལ། ཆོས་ཐམས་ཅད་ནི། བུད་མེད་ཀྱི་སྒོ་སྟེ། འདི་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ། འདི་ལྟ་སྟེ། ཆོས་ཐམས་ཅད་ནི། དངོས་པོ་མེད་པའི་ཕྱིར་མི་དྲེན་པ། སྐྱེས་པའི་དབང་པོ་དང ། 441a ༄#། །བུད་མེད་ཀྱི་དབང་པོ་དང་བྲལ་བ་སྟེ། དེ་ནི། བུད་མེད་ལྟ་བུར་འཇུག་པའི་གཟུངས་ཀྱི་གཞིའོ། །འཇམ་དཔལ། ཆོས་ཐམས་ཅད་ནི། སྐྱེས་པའི་སྒོ་སྟེ། འདི་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཀའ་སྩལ་པ། འཇམ་དཔལ། རྣམ་པ་ཐམས་ཅད་དུ་སྐྱེས་པ་ཉིད་ནི། མི་དམིགས་ཏེ། ཐོག་མའི་མཐར་ཡང་མི་དམིགས། ཐ་མའི་མཐར་ཡང་མི་དམིགས། ད་ལྟར་བྱུང་བར་ཡང་མི་དམིགས་སོ། །འཇམ་དཔལ། གང་དུས་གསུམ་དུ་མི་དམིགས་པ་དེ་ལ་སྐྱེས་པའང་མེད། བུད་མེད་ཀྱང་མེད་དེ། གཞན་དུ་ན་མིང་གི་བརྡས་བརྗོད་པར་ཟད་དོ། །མིང་དེའང་བདེན་པ་སྟེ། གཟུངས་ཀྱི་བརྡས་དེ་དག་བཏགས་སོ། །གཟུངས་དེའང་འབྱུང་བ་ཆེན་པོ་བཞི་ལས་གྱུར་པ་སྟེ། འབྱུང་བ་ཆེན་པོ་བཞི་རྣམས་ཀྱི་སྐྱེ་བའང་མི་དམིགས་སོ། །ཆོས་ཐམས་ཅད་མ་སྐྱེས་པའི་ཕྱིར་ཆོས་ཐམས་ཅད་གཏན་དུ་ཡོངས་སུ་མྱ་ངན་ལས་འདས་པ་སྟེ། དེ་ནི། སྐྱེས་པ་ལྟ་བུར་འཇུག་པའི་གཟུངས་ཀྱི་གཞིའོ། །འཇམ་དཔལ། ཆོས་ཐམས་ཅད་ནི། སེམས་ཅན་དམྱལ་བའི་སྒོ་སྟེ། འདི་ནི། གཟུངས་ཀྱི་གཞིའོ། །གསོལ་པ། བཅོམ་ལྡན་འདས། ཇི་ལྟར་ན། དེ་གཟུངས་ཀྱི་གཞི་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། སེམས་ཅན་དམྱལ་བ་གང་དུ་ཡང་དག་པར་འདུ་བར་འགྱུར། འཇམ་དཔལ་གྱིས་གསོལ་པ། བཅོམ་ 441b ལྡན་འདས། སེམས་ཅན་དམྱལ་བ་ནི། ནམ་མཁར་ཡང་དག་པར་འདུ་བ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདི་ཇི་སྙམ་དུ་སེམས། སེམས་ཅན་དམྱལ་བ་རང་གི་རྟོག་པ་ལས་བྱུང་ངམ། འོན་ཏེ་ངོ་བོ་ཉིད་ལས་བྱུང ། འཇམ་དཔལ་གྱིས་གསོལ་པ། བཅོམ་ལྡན་འདས། བྱིས་པ་སོ་སོ་སྐྱེ་བོ་རང་གི་རྟོག་པས་སེམས་ཅན་དམྱལ་བ་དང ། དུད་འགྲོ་དང ། གཤིན་རྗེའི་འཇིག་རྟེན་དུ་རིག་སྟེ། དེ་དག་མ་མཆིས་པ་ལ་སྒྲོ་བཏགས་པའི་སླད་དུ་ངན་སོང་གསུམ་དུ་གནོད་པ་ཚོར་ཞིང་སྡུག་བསྔལ་མྱོང་ལགས་སོ། །བཅོམ་ལྡན་འདས། བདག་གིས་སེམས་ཅན་དམྱལ་བ་ཇི་ལྟར་མི་མཐོང་བ་དེ་བཞིན་དུ་སེམས་ཅན་དམྱལ་བ་པ་རྣམས་མི་མཐོང་སྟེ། སེམས་ཅན་དམྱལ་བའི་སྡུག་བསྔལ་ཡང་མ་མཆིས་སོ། །བཅོམ་ལྡན་འདས། འདི་ལྟ་སྟེ།་དཔེར་བགྱི་ན། མི་ལ་ལ་ཞིག་གཉིད་ཀྱིས་ལོག་པའི་རྨི་ལམ་ན་བདག་སེམས་ཅན་དམྱལ་བར་ལྟུང་བ་སྙམ་དུ་རིག་ནས་དེ་དེ་ན་ལྕགས་ཀྱི་བུམ་པ་རབ་ཏུ་ཁོལ་བ། ཤིན་ཏུ་འབར་པ་འོང་མ་དུ་མ་མཆིས་པའི་ནང་ན་བདག་བཅུག་ནས་དེ་དེ་ན་སྡུག་བསྔལ་གྱི་ཚོར་བ་མྱོང་བར་རབ་ཏུ་འཚལ་ཏེ། དེ་ཡིད་དངངས་ཤིང་ཡོངས་སུ་གདུང་བར་རིག་ནས་འཇིགས་སྐྲག་སྟེ་དངངས་ནས་དེ་སླར་སད་པ་དང ། ཀྱེ་མའོ་སྡུག་བསྔལ་ལོ། །ཀྱེ་མ་སྡུག་བསྔལ་ལོ། །ཞེས་ཆོ་ངེས་འདེབས་ན། དེའི་མཛའ་བཤེས་དང ། ཉེ་དུ་དང ། ཕུ་ནུ་རྣམས་ཀྱིས་ཁྱོད་ཅིས་སྡུག་ 442a ༄#། །བསྔལ་ཞེས་དྲིས་པ་དང ། མི་དེས་དེ་དག་ལ་འདི་སྐད་ཅེས་བདག་ནི། སེམས་ཅན་དམྱལ་བའི་སྡུག་བསྔལ་མྱོང་ངོ ། །ཞེས་སྨྲས་ནས་ཡང་དེ་མཛའ་བཤེས་དང ། ཉེ་དུ་དང ། ཕུ་ནུ་རྣམས་ལ་གཤེ་ཞིང་འཚིག་སྟེ། བདག་ནི། སེམས་ཅན་དམྱལ་བའི་སྡུག་བསྔལ་མྱོང་ན། ཁྱོད་ཀྱིས་སླར་ཕྱི་ཕྱིར་ཞིང་ང་ལ་ཅིས་སྡུག་བསྔལ་ཞེས་དྲིར་ཅི་ཡོད་ཅེས་མཆི་ལ། དེ་ནས་མཛའ་བཤེས་དང ། ཉེ་དུ་དང ། ཕུ་ནུ་དེ་དག་གིས་མི་དེ་ལ་འདི་སྐད་ཅེས་ཀྱེ་མ་མ་འཇིགས་ཤིག་།མ་འཇིགས་ཤིག་།མི་ཁྱོད་ནི། གཉིད་ཀྱིས་ལོག་སྟེ་ཁྱིམ་འདི་ནས་གར་ཡང་མ་སོང་ངོ ། །ཞེས་བགྱིས་པ་དང ། མི་དེས་སླར་དྲན་པ་རྙེད་ནས་བདག་ནི། གཉིད་ཀྱིས་ལོག་སྟེ། ཡང་དག་པ་མ་ཡིན་པ་དངོས་པོ་མེད་པ་དེ་ལ་བདག་གིས་བརྟགས་པ་ལྟ་ཞིག་སྟེ། དངོས་པོ་ཅིའང་མེད་དོ། །སྙམ་བགྱིད་ནས་དེ་ལྟར་ཡང་ཡིད་བདེ་བ་རྙེད་ནས་བཅོམ་ལྡན་འདས། ཇི་ལྟར་མི་དེ་གཉིད་ཀྱིས་ལོག་པའི་རྨི་ལམ་ན་མ་མཆིས་པ་ལ་སྒྲོ་བཏགས་ནས་བདག་སེམས་ཅན་དམྱལ་བར་མཆིས་སོ། །སྙམ་དུ་རིག་པ་དེ་བཞིན་དུ། བཅོམ་ལྡན་འདས། བྱིས་པ་སོ་སོ་སྐྱེ་བོ་ཐམས་ཅད་མཆིས་པ་མ་ལགས་པའི་འདོད་ཆགས་ཀྱིས་ཀུན་ཏུ་དཀྲིས་པས་བུད་མེད་ཀྱི་མཚན་མར་རྟོག་གོ། དེ་དག་གིས་བུད་མེད་ཀྱི་མཚན་མར་བརྟགས་ནས་བུད་མེད་དང་བདག་ལྷན་ཅིག་ཏུ་རྩེ་དགའ་མགུར་སྤྱོད་པར་རིག་སྟེ། དེ་ 442b དག་འདི་སྙམ་དུ་བདག་ནི། སྐྱེས་བ། འདི་ནི། བུད་མེད་དོ། །འདི་ནི། བདག་གི་བུད་མེད་དོ་སྙམ་ནས་དེ་སྲེད་པའི་འདོད་ཆགས་ཀྱིས་ཀུན་ཏུ་དཀྲིགས་པའི་སེམས་གྱིས་དེ་ལོངས་སྤྱོད་ཚོལ་བར་སེམས་བཏང་ངོ ། །དེ་གཞི་དེ་ལས་འཐབ་པ་དང ། འགྱེད་པ་དང ། རྩོད་པ་སྐྱེད་དེ། དེའི་དབང་པོ་རབ་ཏུ་ཁྲོས་པས་འཁོན་བྱུང་ངོ ། །དེ་འདུ་ཤེས་ཕྱིན་ཅི་ལོག་པ་དེས་གུ་མ་མ་ཐག་ཏུ་བསྐལ་པ་སྟོང་ཕྲག་མང་པོར་བདག་སེམས་ཅན་དམྱལ་བའི་སྡུག་བསྔལ་གྱི་ཚོར་བ་མྱོང་བ་སྙམ་དུ་འཚལ་ཏོ། །བཅོམ་ལྡན་འདས། འདི་ལྟ་སྟེ། མི་དེ་ལ་མཛའ་བཤེས་དང་ཉེ་དུ་དང ། ཕུ་ནུ་རྣམས་ཀྱིས་འདི་སྐད་ཅེས་མ་འཇིགས་ཤིག་།མ་འཇིགས་ཤིག་།མི་ཁྱོད་ནི། གཉིད་ཀྱིས་ལོག་སྟེ། ཁྱིམ་འདི་ནས་གར་ཡང་མ་སོང་ངོ ། །ཞེས་མཆི་བ་ལྟར། བཅོམ་ལྡན་འདས། སངས་རྒྱས་བཅོམ་ལྡན་འདས་ཀྱིས་ཕྱིན་ཅི་ལོག་བཞིས་རྣམ་པར་མྱོས་པའི་སེམས་ཅན་རྣམས་ལ་ཆོས་བསྟན་ཏེ། འདི་ལ་བུད་མེད་ཀྱང་མེད། སྐྱེས་པའང་མེད། སེམས་ཅན་ཡང་མེད། སྲོག་ཀྱང་མེད། གསོ་བའང་མེད། གང་ཟག་ཀྱང་མེད། ཆོས་འདི་དག་ཐམས་ཅད་ནི། ཡང་དག་པ་མ་ཡིན་པའོ། །ཆོས་འདི་དག་ཐམས་ཅད་ནི། མེད་པའོ། །ཆོས་འདི་དག་ཐམས་ཅད་ནི། རྣམ་པར་བསྒྲུབས་པའོ། །ཆོས་འདི་དག་ཐམས་ཅད་ནི། བཏགས་པའོ། །ཆོས་འདི་དག་ཐམས་ཅད་ནི། སྟོང་པའོ། །ཆོས་འདི་དག་ཐམས་ཅད་ནི། སྐྱེ་བ་མེད་པའོ་ 443a ༄#། །ཆོས་འདི་དག་ཐམས་ཅད་ནི། འགག་པ་མེད་པའོ། །ཆོས་འདི་དག་ཐམས་ཅད་ནི། དངོས་པོ་མེད་པའོ། །ཆོས་འདི་དག་ཐམས་ཅད་ནི། མ་འབྲེལ་བའོ། །ཆོས་འདི་དག་ཐམས་ཅད་ནི། རྨི་ལམ་ལྟ་བུའོ། །ཆོས་འདི་དག་ཐམས་ཅད་ནི། སྒྱུ་མ་ལྟ་བུའོ། །ཆོས་འདི་དག་ཐམས་ཅད་ནི། ཆུ་ཟླ་ལྟ་བུ་སྟེ། འདི་ལ་སུའང་མི་ཆགས། མི་སྡང ། མི་རྨོངས་ཏེ། ཡང་དག་པ་མ་ཡིན་པ་ལ་མ་རྟོགས་ཤིག་ཅེས་བསྟན་པ་དང ། དེ་དག་གིས་དེ་བཞིན་གཤེགས་པའི་ཆོས་དེ་ཐོས་ནས་ཆོས་ཐམས་ཅད་ལ་འདོད་ཆགས་མ་མཆིས་པར་མཐོང་ངོ ། །ཆོས་ཐམས་ཅད་ལ་ཞེ་སྡང་མ་མཆིས་པ་དང ། གཏི་མུག་མ་མཆིས་པ་དང ། སྒྲིབ་པ་མ་མཆིས་པ་དང ། ཆགས་པ་མ་མཆིས་པར་མཐོང་ངོ ། །ཆོས་ཐམས་ཅད་ཤིན་ཏུ་གྲོལ་བ་དང ། གཏན་དུ་ཡོངས་སུ་མྱ་ངན་ལས་འདས་པར་མཐོང་ནས་དེ་དག་སེམས་ནམ་མཁའ་ལ་གནས་ཏེ་འགུམ་པའི་དུས་བགྱིས་སོ། །འགུམ་པའི་དུས་བགྱིས་མ་ཐག་ཏུ་ཕུང་པོའི་ལྷག་མ་མ་མཆིས་པའི་མྱ་ངན་ལས་འདས་པའི་དབྱིངས་སུ་མྱ་ངན་ལས་འདའ་བ་དེའང་དེ་དང་འདྲ་སྟེ། བཅོམ་ལྡན་འདས། བདག་གིས་སེམས་ཅན་དམྱལ་བ་དེ་ལྟར་མཐོང་ལགས་སོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ། །ཞེས་བྱ་བ་བྱིན་ཏེ། ལེགས་སོ། །ལེགས་སོ། །འཇམ་དཔལ། ཇི་ལྟར་ཁྱོད་ཀྱིས་སེམས་ 443b ཅན་དམྱལ་བ་མཐོང་བ་དེ་བཞིན་དུ་བལྟའོ། །ཇི་ལྟར་ཁྱོད་རྣམ་པར་མི་རྟོག་པ་དེ་བཞིན་དུ་མི་བརྟག་པར་བྱའོ། །འཇམ་དཔལ། སེམས་ཅན་དམྱལ་བ་དེ་ལྟར་མཐོང་ན། མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ། །སེམས་ཅན་དམྱལ་བ་ངེས་པར་བསྟན་པ་འདི་བཤད་པ་ན་བྱང་ཆུབ་སེམས་དཔའ་དགུ་ཁྲི་ཉིས་སྟོང་མི་སྐྱེ་བའི་ཆོས་ལ་བཟོད་པ་ཐོབ་ནས་དེ་དག་ཚིག་མཐུན་པར་འདི་སྐད་ཅེས་འདི་ལྟར་སེམས་ཅན་དམྱལ་བའི་ཆོས་རྣམས་ལས་སངས་རྒྱས་ཀྱི་ཆོས་རྙེད་པར་རུང་བ་ནི། སངས་རྒྱས་ཀྱི་ཡུལ་འདི་ངོ་མཚར་ཏེ། ལེགས་སོ། །ཞེས་འཛེར་ཏོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། གཉིས་སུ་མ་མཆིས་པའི་སྒོ་གང་གིས་བྱང་ཆུབ་སེམས་དཔའ་རྣམས་ཆོས་ཐམས་ཅད་སངས་རྒྱས་ཀྱི་ཆོས་སུ་རྟོགས་ཤིང་གཉིས་ལྟ་བུར་མི་བགྱིད་པ་གཉིས་སུ་མ་མཆིས་པའི་ཆོས་ཀྱི་སྒོ་བྱང་ཆུབ་སེམས་དཔའ་རྣམས་ལས་བསྟན་དུ་གསོལ། དེ་སྐད་ཅེས། གསོལ་པ་དང ། བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། དེའི་ཕྱིར་ཀུན་ནས་ངེས་པར་བསྟན་པ་ཞེས་བྱ་བའི་ཆོས་ཀྱི་སྒོ་འདི་ནི། ཆོས་ཀྱི་སྒོ་གང་གིས་བྱང་ཆུབ་སེམས་དཔའ་རྣམས་ཉོན་མོངས་པ་ཐམས་ཅད་ལ་སངས་རྒྱས་ཀྱི་ཆོས་རྣམས་ཡང་དག་པར་བགྲོ་བར་བྱེད་པའོ། །འཇམ་དཔལ་གྱིས་གསོལ་པ། 444a ༄#། །བཅོམ་ལྡན་འདས། གཉིས་སུ་མ་མཆིས་པའི་སྒོ་དེ་ཇི་ལྟ་བུ་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེའི་ཕྱིར་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང ། ཉོན་མོངས་པ་ཐམས་ཅད་རབ་ཏུ་རྣམ་པར་ཕྱེ་བ་ཞེས་བྱ་བའི་གཟུངས་ཀྱི་སྒོ་འདི་ངས་ཁྱོད་ལ་བཤད་དོ། །དེ་ལྟར་འཚལ་ལོ། །ཞེས་གསོལ་ཏེ་འཇམ་དཔལ་གཞོན་ནུར་གྱུར་པ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། མ་རིག་པ་ནི།་བྱང་ཆུབ་སྟེ། འདི་ནི། གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན། མ་རིག་པ་བྱང་ཆུབ་ལགས། བཀའ་སྩལ་པ། འཇམ་དཔལ། མེད་པའི་ཕྱིར་མ་རིག་པ་ཞེས་བྱའོ། །གང་མེད་པ་དེ་ལ་སྐྱེ་བ་མེད་དོ། །གང་མ་སྐྱེས་པ་དེ་ལ་ཀུན་ནས་ཉོན་མོངས་པ་མེད་དོ། །འཇམ་དཔལ། ཀུན་ནས་ཉོན་མོངས་པ་ཅན་མ་ཡིན་པ་ནི། བྱང་ཆུབ་སྟེ།་རང་བཞིན་གྱིས་འོད་གསལ་བ་རྟག་ཏུ་མ་སྐྱེས་བའོ། །འཇམ་དཔལ། དེ་བཞིན་གཤེགས་པས་དོན་གྱི་དབང་འདི་གཟིགས་ནས་མ་རིག་པ་དང ། བྱང་ཆུབ་གཉིས་སུ་མེད་པར་སྟོན་ཏོ། །འཇམ་དཔལ། ངས་མ་རིག་པ་འདི་མ་རྙེད་དེ། དེའི་ཕྱིར་མ་རིག་པ་ཞེས་བསྟན་ཏོ། །འཇམ་དཔལ། དེ་ནི། མ་རིག་པ་ལྟ་བུར་འཇུག་པ་ཞེས་བྱ་བའི་གཟུངས་ཀྱི་སྒོ་སྟེ། 444b འཇུག་པ་གང་གིས་སྤོབས་པ་མྱུར་བར་འགྱུར་བ། སྤོབས་པ་རྣོ་བར་འགྱུར་བ། སྤོབས་པ་ཟབ་མོར་འགྱུར་བ། སྤོབས་པ་མ་ཆགས་པར་འགྱུར་བ། སྤོབས་པ་ཐོགས་པ་མེད་པར་འགྱུར་བའོ། །འཇམ་དཔལ། འདུ་བྱེད་རྣམས་ནི། བྱང་ཆུབ་སྟེ། འདི་ནི། གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན། འདུ་བྱེད་རྣམས་བྱང་ཆུབ་ལགས། བཀའ་སྩལ་པ།་འཇམ་དཔལ། འདུ་བྱེད་རྣམས་ནི། གྲངས་མེད་པ། བགྲང་དུ་མེད་པ་སྟེ། དེའི་ཕྱིར་དེ་དག་གི་ཚད་མི་དམིགས་སོ། །མི་དགེ་བ་དང་མཚུངས་པར་ལྡན་ན། སེམས་ཅན་དམྱལ་བར་སྐྱེ་བ་སྟོན་མོད་ཀྱི། འདི་ནས་ཀྱང་མི་འགྲོའོ། །དེར་འཕོ་བའང་མེད་དོ། །འཇམ་དཔལ། མི་འཕོ་བ་ནི། བྱང་ཆུབ་སྟེ། འོང་བ་དང ། འགྲོ་བ་མེད་པའོ། །འཇམ་དཔལ། དེ་ནི། འདུ་བྱེད་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། རྣམ་པར་ཤེས་པ་ནི། བྱང་ཆུབ་སྟེ། འདི་ནི། གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན། རྣམ་པར་ཤེས་པ་བྱང་ཆུབ་ལགས། བཀའ་སྩལ་པ། འཇམ་དཔལ། རྣམ་པར་ཤེས་པ་ནི། སྒྱུ་མ་ལྟ་བུ་སྟེ། ཡང་དག་པ་མ་ཡིན་པ་ལས་བྱུང་བར་དེ་བཞིན་གཤེགས་པས་གསུངས་སོ། །འཇམ་དཔལ། ཇི་ལྟར་བྱིས་པ་སོ་སོའི་སྐྱེ་པོ་ཡང་དག་པ་མ་ཡིན་པ་ལ་གནས་པ་རྣམས་ཀྱིས་སྒྱུ་མ་ལྟ་བུའི་རྣམ་པར་ཤེས་པ་བརྟགས་ཤིང་རྣམ་པར་བསྒྲུབས་ནས་བསྡུས་པ་དེ་བཞིན་དུ། འཇམ་དཔལ། སངས་ 445a ༄#། །རྒྱས་ཀྱི་བྱང་ཆུབ་ཀྱང་སྒྱུ་མ་ལྟ་བུ་སྟེ། བྱིས་པ་སོ་སོ་སྐྱེ་བོ་རྣམས་ཀྱིས་བརྟགས་ཤིང་རྣམ་བར་བསྒྲུབས་ནས་བསྡུས་ཏེ། དེ་དག་སངས་རྒྱས་ཀྱི་ཆོས་ལ་ལྷག་པར་དམིགས་ཤིང ། བདག་ཅག་སངས་རྒྱས་སུ་གྱུར་ཅིག་།བདག་ཅག་སེམས་ཅན་གྲོལ་བར་བྱེད་པར་གྱུར་ཅིག། བདག་ཅག་འཇིག་རྟེན་གྱི་མཆོག་ཏུ་གྱུར་ཅིག། སྙམ་དུ་དེ་དག་སངས་རྒྱས་ཀྱི་བྱང་ཆུབ་ནམ་མཁའ་དང་འདྲ་བ་ལ་བརྟགས་ནས་རབ་ཏུ་སྤྱོད་དོ། །འཇམ་དཔལ། ངས་ནི། བྱང་ཆུབ་ཀྱི་སྙིང་པོ་ལ་འདུག་ནས་སངས་རྒྱས་སམ། ཉན་ཐོས་སམ། རང་སངས་རྒྱས་སམ། སོ་སོ་སྐྱེ་བོའི་ཆོས་གང་ཡང་མ་དམིགས་ཏེ། འཇམ་དཔལ། དེ་ནི། རྣམ་པར་ཤེས་པ་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། མིང་དང་གཟུངས་ནི། བྱང་ཆུབ་སྟེ། འདི་ནི། གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན། མིང་དང་གཟུགས་བྱང་ཆུབ་ལགས། བཀའ་སྩལ་པ། འཇམ་དཔལ། མིང་ནི། དངོས་པོ་མེད་པར་སྒྲ་བརྗོད་པའོ། །འཇམ་དཔལ།་གཟུགས་ཀྱང་བྱེད་པ་པོ་མེད་པ་སྟེ། འཇམ་དཔལ། གང་ན་བྱེད་པ་པོ་མེད་པ་དེ་ལ་བདག་མེད་དོ། །འཇམ་དཔལ། བདག་མེད་པ་ནི། སངས་རྒྱས་ཀྱི་བྱང་ཆུབ་སྟེ། མིང་གིས་བསྟན་པའོ། །མིང་དེ་ནི། ཕྱོགས་བཅུ་ཀུན་ཏུ་བཙལ་ཀྱང་མི་རྙེད་དེ། འཇམ་དཔལ། དེ་ནི། མིང་དང་གཟུགས་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། སྐྱེ་མཆེད་དྲུག་ནི། བྱང་ 445b ཆུབ་སྟེ།་འདི་ནི། གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན་སྐྱེ་མཆེད་དྲུག་བྱང་ཆུབ་ལགས། བཀའ་སྩལ་པ། འཇམ་དཔལ། སྐྱེ་མཆེད་ཐམས་ཅད་ནི། རང་གི་ཡུལ་དབེན་པ་སྟེ། མིག་གི་དབང་པོའང་བདག་གིས་གཟུགས་བལྟའོ། །སྙམ་དུ་དེ་ལྟར་མི་སེམས་སོ། །རྣ་བའི་དབང་པོའང་བདག་གིས་སྒྲ་མཉན་ཏོ་སྙམ་དུ་དེ་ལྟར་མི་སེམས་སོ། ། སྒའི་དབང་པོའང་བདག་གིས་དྲི་ལ་མནམ་མོ་སྙམ་དུ་དེ་ལྟར་མི་སེམས་སོ། །ལྕེའི་དབང་པོའང་བདག་གིས་རོ་མྱང་ངོ་སྙམ་དུ་དེ་ལྟར་མི་སེམས་སོ། །ལུས་ཀྱི་དབང་པོའང་བདག་གིས་རེག་པ་ཚོར་རོ་སྙམ་དུ་དེ་ལྟར་མི་སེམས་སོ། །ཡིད་ཀྱི་དབང་པོའང་བདག་གིས་ཆོས་རྣམ་པར་ཤེས་སོ་སྙམ་དུ་དེ་ལྟར་མི་སེམས་སོ། །མིག་ཀྱང་གཟུགས་ཡུལ་དུ་མི་ཤེས། གཟུགས་ཀྱང་མིག་གི་ཡུལ་དུ་མི་ཤེས། རྣ་བའང་སྒྲ་ཡུལ་དུ་མི་ཤེས། སྒྲའང་རྣ་བའི་ཡུལ་དུ་མི་ཤེས། སྣའང་དྲི་ཡུལ་དུ་མི་ཤེས། དྲིའང་སྣའི་ཡུལ་དུ་མི་ཤེས། ལྕེའང་རོ་ཡུལ་དུ་མི་ཤེས། རོའང་ལྕེའི་ཡུལ་དུ་མི་ཤེས། ལུས་ཀྱང་རེག་བྱ་ཡུལ་དུ་མི་ཤེས། རེག་བྱའང་ལུས་ཀྱི་ཡུལ་དུ་མི་ཤེས། ཡིད་ཀྱང་ཆོས་ཡུལ་དུ་མི་ཤེས། ཆོས་ཀྱང་ཡིད་ཀྱི་ཡུལ་དུ་མི་ཤེས་ཏེ།་འཇམ་དཔལ། སྐྱེ་མཆེད་རྣམས་ནི། ཕན་ཚུན་མི་མཐུན་པ་རྣམས་གཡོ་བ་མེད་པ། བྱེད་པ་མེད་པ། ཕན་ཚུན་སེམས་པ་མེད་པ། ཕན་ཚུན་ངོ་བོ་ཉིད་ཀྱིས་སྟོང་པའོ།། 446a ༄#། །འཇམ་དཔལ། ཆོས་གང་ངོ་བོ་ཉིད་ཀྱིས་སྟོང་པ་དེ་ནི། བྱང་ཆུབ་སྟེ། དེ་ནི། སྐྱེ་མཆེད་དྲུག་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། རེག་པ་ནི། བྱང་ཆུབ་སྟེ། འདི་ནི། གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན། རེག་པ་བྱང་ཆུབ་ལགས། བཀའ་སྩལ་པ། འཇམ་དཔལ། རེག་པ་ཞེས་བྱ་བ་ནི། གཟུགས་སུ་འདུ་ཤེས་ཏེ་རེག་པ་དང ། སྒྲ་ར་འདུས་ཏེ་རེག་པ་དང ། དྲིར་འདུས་ཏེ་རེག་པ་དང ། རོར་འདུས་ཏེ་རེག་པ་དང ། རེག་བྱར་འདུས་ཏེ་རེག་པ་དང ། ཆོས་སུ་འདུས་ཏེ་རེག་པའོ། །འཇམ་དཔལ།་གཟུགས་སུ་འདུས་ཏེ་རེག་པ་ནས་ཆོས་སུ་འདུས་ཏེ་རེག་པའི་བར་གང་ཡིན་པ་དེ་ནི། རྟེན་པའོ། །གང་རྟེན་པ་དེ་ནི། རྐྱེན་མང་པོ་ལས་སྐྱེའོ། །འཇམ་དཔལ། རྐྱེན་མང་པོ་ལས་སྐྱེ་བ་དེ་ནི། ཚོགས་ཀྱི་ཚུལ་དུ་གནས་པའོ། །འཇམ་དཔལ། ཚོགས་ཀྱི་ཚུལ་གང་ཡིན་པ་དེ་ནི། སྒྱུ་མའི་ཚུལ་ལོ། །སྒྱུ་མའི་ཚུལ་གང་ཡིན་པ་དེ་ནི། ཡང་དག་པ་མ་ཡིན་པའི་ཚུལ་ལོ། །ཡང་དག་པ་མ་ཡིན་པའི་ཚུལ་གང་ཡིན་པ་དེ་ནི། མེད་པའོ། མེད་པ་གང་ཡིན་པ་དེ་ནི། མི་སྐྱེ་བའོ། །མི་སྐྱེ་བ་གང་ཡིན་པ་དེ་ནི། མི་འགག་པའོ། །འཇམ་དཔལ། གང་སྐྱེ་བ་མེད་ཅིང་འགག་པ་མེད་པ་དེ་ནི། སངས་རྒྱས་ཀྱི་བྱང་ཆུབ་སྟེ། དེ་ནི། རེག་པ་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། ཚོར་བ་ནི། བྱང་ཆུབ་སྟེ། འདི་ནི། གཟུངས་ཀྱི་ 446b སྒོའོ། །གསོལ་བ། བཅོམ་ལྡན་འདས། ཇི་ལྟར་ན་ཚོར་བ་བྱང་ཆུབ་ལགས། བཀའ་སྩལ་པ། འཇམ་དཔལ། ཚོར་བ་ཞེས་བྱ་བ་ནི། རྣམ་པ་གསུམ་སྟེ། བདེ་བའི་ཚོར་བ་དང ། སྡུག་བསྔལ་གྱི་ཚོར་བ་དང ། བདེ་བའང་མ་ཡིན། སྡུག་བསྔལ་བའང་མ་ཡིན་པའི་ཚོར་བའོ། །འཇམ་དཔལ། བདེ་བའི་ཚོར་བ་ནི། ནང་ནའང་མི་འདུག། ཕྱི་རོལ་ནའང་མི་འདུག་།གཉིག་མེད་པར་མི་དམིགས་སོ།། འཇམ་དཔལ། སྡུག་བསྔལ་གྱི་ཚོར་བའང་ནང་ནའང་མི་འདུག་།ཕྱི་རོལ་ནའང་མི་འདུག་།གཉིག་མེད་པར་ཡང་མི་དམིགས་སོ། །འཇམ་དཔལ། བདེ་བའང་མ་ཡིན། སྡུག་བསྔལ་བའང་མ་ཡིན་པའི་ཚོར་བའང་ནང་ནའང་མི་འདུག་།ཕྱི་རོལ་ནའང་མི་འདུག་།གཉིས་ཀ་མེད་པར་ཡང་མི་དམིགས་སོ། །འཇམ་དཔལ་གྱིས་གསོལ་པ། བཅོམ་ལྡན་འདས། འོ་ན་ཇི་ལྟར་སེམས་ཅན་རྣམས་ཀྱི་བདེ་བའི་ཚོར་བ་དང ། སྡུག་བསྔལ་གྱི་ཚོར་བ་དང ། བདེ་བའང་མ་ལགས། སྡུག་བསྔལ་བའང་མ་ལགས་པའི་ཚོར་བ་དག་གང་ལགས། བཅོམ་ལྡན་འདས་ཀྱིས་བཀའ་སྩལ་བ། འཇམ་དཔལ།་འདུ་ཤེས་ཕྱིན་ཅི་ལོག་གི་ཕྱིན་ཅི་ལོག་ཏུ་གྱུར་པའི་བྱིས་པ་སོ་སོ་སྐྱེ་བོ་རྣམས་ནི། ཡང་དག་པ་མ་ཡིན་པའི་རྐྱེན་སྣ་ཚོགས་ཀྱིས་བདེའོ་སྙམ་དུ་ཤེས། སྡུག་བསྔལ་ལོ་སྙམ་མམ། བདེ་པའང་མ་ཡིན། སྡུག་བསྔལ་བའང་མ་ཡིན་སྙམ་དུ་ཤེས་མོད་ཀྱི། འཇམ་དཔལ། ཚོར་བ་ཐམས་ཅད་སྒྱུ་མའི་རང་བཞིན་ཏེ། མ་བྱས་པ། མ་སྐྱེས་པ། རྟག་ཏུ་མ་ 447a ༄#། །བྱུང་བ་སྟེ། འཇམ་དཔལ། རྣམ་གྲངས་དེས་ན། ཚོར་བ་ནི། བྱང་ཆུབ་སྟེ། དེ་ནི། ཚོར་བ་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། སྲེད་པ་ནི། བྱང་ཆུབ་སྟེ།་འདི་ནི། གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན། སྲེད་པ་བྱང་ཆུབ་ལགས། བཅོམ་ལྡན་འདས་ཀྱིས་སྲེད་པ་ཀུན་ནས་ཉོན་མོངས་པ་ལགས་པར་བཀའ་མ་སྩལ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདི་ཇི་སྙམ་དུ་སེམས། མི་བུ་མེད་པའི་བུའི་སྲེད་པ་བུའི་ནང་ན་འདུག་གམ། འོན་ཏེ་ཕྱི་རོལ་ན་འདུག་གམ།་འོན་ཏེ་ཕྱོགས་དང་མཚམས་རྣམས་ན་འདུག་།འཇམ་དཔལ་གྱིས་གསོལ་པ། བཅོམ་ལྡན་འདས། དེའི་བུ་ཉིད་ཀྱང་མ་བྱུང་ན། བུའི་སྲེད་པ་ཉིད་ལྟ་ག་ལ་མཆིས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། གང་གི་ཚེ་མི་དེ་འདུ་བ་དང་ལྡན་ཏེ་བུ་སྐྱེད་ཅིང་སྲེད་པ་སྐྱེད་པའི་དུས་དེ་ཡོད། ཚིགས་དེ་ཡོད་ན། འཇམ་དཔལ། འདི་ཇི་སྙམ་དུ་སེམས། མི་དེའི་བུ་ལ་སྲེད་པ་ཤར་ཕྱོགས་ནས་འོངས་སམ། འོན་ཏེ་ལྷོ་ཕྱོགས་ནས་སམ། འོན་ཏེ་ནུབ་ཕྱོགས་ནས་སམ། འོན་ཏེ་བྱང་ཕྱོགས་ནས་སམ། འོན་ཏེ་འོག་གི་ཕྱོགས་ནས་སམ། འོན་ཏེ་སྟེང་གི་ཕྱོགས་ནས་སམ། འོན་ཏེ་ནང་ན་འདུག་གམ། འོན་ཏེ་ཕྱི་རོལ་ནའམ། གཉིས་ཀ་མེད་པར་གནས་སམ། འཇམ་དཔལ་གྱིས་གསོལ་པ། བཅོམ་ལྡན་འདས། སྲེད་པ་ 447b ཤར་ཕྱོགས་ན་མི་དམིགས། ལྷོ་ཕྱོགས་ནའང་མ་ལགས། ནུབ་ཕྱོགས་ནའང་མ་ལགས། བྱང་ཕྱོགས་ནའང་མ་ལགས། སྟེང་ནའང་མ་ལགས། འོག་ནའང་མ་ལགས། ནང་ནའང་མ་ལགས། སླད་རོལ་ནའང་མ་ལགས། གཉིས་ཀ་མ་མཆིས་པར་ཡང་མི་དམིགས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདི་ཇི་སྙམ་དུ་སེམས། སྲེད་པ་དེ་སུས་ཀྱང་བྱས་སམ། བྱེད་དུ་བཅུག་པ་ཡིན་ནམ། འཇམ་དཔལ་གྱིས་གསོལ་པ། བཅོམ་ལྡན་འདས། སྲེད་པ་ནི། མ་བགྱིས་པ་སྟེ། སྲེད་པ་ལ་བྱེད་པ་པོ་གང་ཡང་མ་མཆིས་ན། བཅོམ་ལྡན་འདས། བྱིས་པ་སོ་སོའི་སྐྱེ་བོ་ལོག་པ་དང་ལྡན་པ་རྣམས་ཀྱིས་ཡང་དག་པ་མ་ལགས་པ་ལ་བཏགས་སོ། །བཀའ་སྩལ་པ། འཇམ་དཔལ། འདི་ཇི་སྙམ་དུ་སེམས། ཡང་དག་པ་མ་ཡིན་པ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བདེ་བར་གཤེགས་པ། དེ་ནི། མ་ལགས་སོ། །བཀའ་སྩལ་པ། འཇམ་དཔལ། མེད་པ་དེ་ལ་ཅི་ཀུན་ནས་ཉོན་མོངས་པའམ། རྣམ་པར་བྱང་བ་ཡོད་དམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། འཇམ་དཔལ། ཆོས་གང་ཤར་ཕྱོགས་ནས་མི་རྙེད། ལྷོ་ཕྱོགས་ནས་ཀྱང་མ་ཡིན། ནུབ་ཕྱོགས་ནས་ཀྱང་མ་ཡིན། བྱང་ཕྱོགས་ནས་ཀྱང་མ་ཡིན། ནང་ནས་ཀྱང་མ་ཡིན། ཕྱི་རོལ་ནས་ཀྱང་མ་ཡིན། གཉིས་ཀ་མེད་པར་ཡང་མི་དམིགས་པ་དེ་ནི། ཀུན་ནས་ཉོན་མོངས་པ་ཅན་དུ་མི་འགྱུར་ཞིང ། རྣམ་པར་བྱང་ 448a ༄#། །བར་མི་འགྱུར་བ་སྟེ། འཇམ་དཔལ། དེ་ནི། སྲེད་པ་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། ལེན་པ་ནི། བྱང་ཆུབ་སྟེ། འདི་ནི། གཟུངས་ཀྱི་སྒོའོ། ། གསོལ་པ། བཅོམ་ལྡན་འདས། ཇི་ལྟར་ན། ལེན་པ་བྱང་ཆུབ་ལགས། བཅོམ་ལྡན་འདས་ཀྱིས་ལེན་པ་འཆིང་བ་ལགས་པར་བཀའ་མ་སྩལ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདི་ཇི་སྙམ་དུ་སེམས། བྱིས་པ་སོ་སོའི་སྐྱེ་བོ་རྣམས་ཅིའང་སྐྱེད་དམ། གསོལ་པ། བཅོམ་ལྡན་འདས། སྐྱེད་ལགས་ཏེ། གཟུགས་དང ། སྒྲ་དང ། དྲི་དང ། རོ་དང ། རེག་པ་དང ། འདོད་པའི་ཡོན་ཏན་འདི་ལྔ་སྐྱེད་ལགས་སོ། །བཀའ་སྩལ་པ། འཇམ་དཔལ། འདི་ཇི་སྙམ་དུ་སེམས། གཟུགས་ཀྱིས་གཟུགས་སྐྱེད་དམ། གསོལ་པ།་དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཅི་ཚོར་བས་ཚོར་བ་སྐྱེད་དམ། འདུ་ཤེས་ཀྱིས་འདུ་ཤེས་སྐྱེད་དམ། འདུ་བྱེད་རྣམས་ཀྱིས་འདུ་བྱེད་རྣམས་སྐྱེད་དམ།་ཅི་རྣམ་པར་ཤེས་པས་རྣམ་པར་ཤེས་བསྐྱེད་དམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདི་ཇི་སྙམ་དུ་སེམས། ཆོས་གང་ཞིག་ཆོས་གང་སྐྱེད་པར་བྱེད་པ་དེ་ཡོད་དམ། གསོལ་པ། བཅོམ་ལྡན་འདས། དེ་ནི། མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། འཇམ་ 448b དཔལ།་ཆོས་གང་ཞིག་ཆོས་གང་ཞིག་ལ་འཆིང་བའི་བྱ་བ་བྱེད་དམ། གསོལ་པ། བཅོམ་ལྡན་འདས། དེ་ནི། མ་ལགས་སོ། །བཀའ་སྩལ་པ། འཇམ་དཔལ། དེ་ལྟར་ཆོས་ཐམས་ཅད་སྐྱེ་བ་མེད་པ། འགག་པ་མེད་པ། སྒྲིབ་པ་མེད་པ་སྟེ། འདི་དག་ནི། གཅིག་ལ་གཅིག་མི་སྐྱེད་དོ། །གཅིག་ལ་གཅིག་མི་དམིགས་སོ། །མི་སྨྲའོ། །བེམ་པོ་ཡིན་པའི་ཕྱིར་དག་གིས་ལས་འབྱིན་པར་མི་བྱེད་དོ། །འཇམ་དཔལ། རྣམ་གྲངས་དེས་ན། ལེན་པ་ནི། བྱང་ཆུབ་སྟེ། དེ་ནི། ལེན་པ་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། སྲིད་པ་ནི། བྱང་ཆུབ་སྟེ། འདི་ནི།་གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན། སྲིད་པ་བྱང་ཆུབ་ལགས། བཅོམ་ལྡན་འདས། སྲིད་པ་འགག་པའི་སླད་དུ་ཉན་ཐོས་རྣམས་ལ་བཅོམ་ལྡན་འདས་ཀྱིས་ཆོས་མ་བསྟན་ལགས་སམ། བཀའ་སྩལ་པ། འཇམ་དཔལ། ངས་སྲིད་པ་བཤད་པ་དེ་ནི། དངོས་པོ་མེད་པ་སྟེ། དེས་ན། སྲིད་པ་ཞེས་བྱའོ། །འཇམ་དཔལ། གང་གིས་ཆོས་ཐམས་ཅད་དངོས་པོ་མེད་པར་མཐོང་བ་དེ་ཅིའང་སྐྱེད་པར་མི་བྱེད་དོ། །འགག་པར་མི་བྱེད་དོ། །ཆོས་ཐམས་ཅད་ནམ་མཁའི་རང་བཞིན་དུ་མཐོང་ནས་སངས་རྒྱས་ཀྱི་ཆོས་རྣམས་ལའང་མི་དམིགས་མི་འདོར་རོ། །འཇམ་དཔལ། རྣམ་གྲངས་དེས་ན། སྲིད་པ་བྱང་ཆུབ་སྟེ། དེ་ནི། སྲིད་པ་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། སྐྱེ་བ་ནི། བྱང་ཆུབ་སྟེ། འདི་ 449a ༄#། །ནི།་གཟུངས་ཀྱི་སྒོའོ། །གསོལ་པ། བཅོམ་ལྡན་འདས། ཇི་ལྟར་ན། སྐྱེ་བ་བྱང་ཆུབ་ལགས། བཅོམ་ལྡན་འདས་ཀྱིས་སྐྱེ་བ་ལས་ཡང་དག་པར་བཟླ་བའི་སླད་དུ་ཆོས་མ་བསྟན་ལགས་སམ། བཀའ་སྩལ་པ། འཇམ་དཔལ། བྱང་ཆུབ་སེམས་དཔའ་སྐྱེ་བ་ཡོངས་སུ་བཙལ་ན། སྐྱེ་བ་མེད་པ། འཕོ་བ་མེད་པ། འབྱུང་བ་མེད་པར་མཐོང་ངོ ། །འཇམ་དཔལ། རྣམ་གྲངས་དེས་ན། སྐྱེ་བ་བྱང་ཆུབ་སྟེ། དེ་ནི། སྐྱེ་བ་ལྟ་བུར་འཇུག་པའི་གཟུངས་ཀྱི་སྒོའོ། །འཇམ་དཔལ། རྡོ་རྗེའི་སྙིང་པོའི་གཟུངས་ལ་འཇུག་པའི་སྒོ་འདི་ནི། འཇུག་པའི་སྒོ་གང་གིས་བྱང་ཆུབ་སེམས་དཔའ་སྤོབས་པ་མྱུར་དུ་འཐོབ་ཅིང་སྤོབས་པ་རྣོ་བར་འགྱུར་བ་དང ། སྤོབས་པ་ཟབ་མོར་འགྱུར་བ་དང ། སྤོབས་པ་ཆགས་པ་མེད་པ་དང ། སྤོབས་པ་ཐོགས་པ་མེད་པར་འགྱུར་བའོ། །དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །འདི་བྱང་ཆུབ་སེམས་དཔའ་གང་རྣམས་ཀྱི་ས་ལགས། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། འདི་ནི། གང་དག་བྱང་ཆུབ་ལ་མ་ཞུགས་པ་རྣམས་དང ། གང་དག་བྱང་ཆུབ་ཏུ་སེམས་མ་བསྐྱེད་པ་རྣམས་དང ། གང་དག་སངས་རྒྱས་ཀྱི་ཆོས་རྣམས་ལ་མི་དམིགས་པ་དང ། གང་དག་འདོད་ཆགས་དང ། ཞེ་སྡང་དང ། གཏི་མུག་ལས་བསྐྱེད་པར་མི་འདོད་པ་རྣམས་དང ། གང་དག་འཁོར་བ་ལས་འདའ་ 449b བར་མི་འདོད་པ་རྣམས་དང ། གང་དག་སེམས་ཅན་དགྲོལ་བར་མི་འདོད་པ་རྣམས་དང ། གང་དག་སངས་རྒྱས་ཀྱི་ཆོས་རྣམས་ཁོང་དུ་ཆུད་པར་མི་འདོད་པའི་བྱང་ཆུབ་སེམས་དཔའ་དེ་དག་གིས་ཡིན་ནོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས། རིགས་ཀྱི་བུ་དང ། རིགས་ཀྱི་བུ་མོ་གང་ལ་ལ་ཞིག་གཟུངས་འདི་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལ་རྒྱ་ཆེར་རབ་ཏུ་སྟོན་པ་དེ་ལ་ཚེ་འདི་ལ་ཡོན་ཏན་ཇི་སྙེད་ཅིག་མཆིས་པར་འཚལ་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། དེ་ལ་ལྷ་དང ། ཀླུ་དང ། གནོད་སྦྱིན་དང ། དྲི་ཟ་རྣམས་སྲུང་བར་ཤེས་པར་བྱའོ། །དེ་ཆོས་ཐམས་ཅད་ལ་ཐེ་ཚོམ་མེད་པར་ཤེས་པར་བྱའོ། །དེ་ཆོས་རབ་ཏུ་དབྱེ་བའི་ཤེས་པ་དང་ལྡན་པར་ཤེས་པར་བྱའོ། །འཇམ་དཔལ། གཟུངས་འདིའི་ཡོན་ཏན་ནི། མཐའ་ཡས་ཏེ། བསྐལ་པ་བརྒྱར་ཡང་ཟད་པར་བྱར་མི་ནུས་སོ། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་བྱང་ཆུབ་སེམས་དཔའ་ཁྲིས་རྡོ་རྗེའི་སྙིང་པོའི་གཟུངས་འདི་ཐོབ་བོ། །ལས་དང་པོ་པའི་བྱང་ཆུབ་སེམས་དཔའ་སུམ་ཁྲི་ཉིས་སྟོང་གིས་རྗེས་སུ་མཐུན་པའི་ཆོས་ལ་བཟོད་པ་ཐོབ་བོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་འཇམ་དཔལ་གཞོན་ནུར་གྱུར་པ་དང ། ལྷ་དང ། ཀླུ་དང ། 450a ༄#། །གནོད་སྦྱིན་དང ། དྲི་ཟ་དེ་དག་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དེ། །འཕགས་པ་རྡོ་རྗེའི་སྙིང་པོ་ཞེས་བྱ་བའི་གཟུངས་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང ། ཞུ་ཆེན་གྱི་ལོ་ཙཱ་བ་བནྡྷེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། |