\ཾཱིཥཥཱིཎG་PཱGཱེཥ\་ 464a ༄#། །དག་གི་དམག་གི་དཔུང་གི་ཚོགས་དང ། དེ་ལས་གཞན་པ་ཡུལ་གྱི་མི་ལུས་ཆབ་འཚལ་བ་རྣམས་ཀྱི་མིང་ཡང་མི་གདའ་བ་དང ། སངས་རྒྱས་ཀྱི་བསོད་ནམས་ཀྱི་མཐུས་སངས་རྒྱས་ཀྱི་སློབ་མ་གང་ཟག་བཞི་པོ་མང་པོ་དེ་དག་ཀྱང་བསྟན་པ་འདི་ལ་འཇུག་ཅིང་རབ་ཏུ་བྱུང་བའི་ཚུལ་ཐོབ་པ་དང ། དེ་དག་ཀྱང་ཕྱི་རོལ་གྱི་གོས་དུར་སྨྲིག་ཙམ་དང ། ཁོང་པའི་ནང་གི་འདུན་པ་དང ། ཞེ་སྡང་དང ། ཤིན་ཏུ་མ་གུས་ཤིང་ཕན་ཚུན་མི་མཐུན་ལ་གཅིག་ལ་གཅིག་སྐུར་པ་འདེབས་པར་བགྱིད་པ་དང ། སྐྱོན་སྒྲོག་པར་བགྱིད་པ་དང ། ཡོན་ཏན་ངེས་པར་སྦེད་པར་བགྱིད་པ་དང ། ང་རྒྱལ་དང ། རྒྱགས་པ་དང ། དྲེགས་པས་ནོན་ཅིང་ངར་འཛིན་པ་དང ། ང་ཡིར་འཛིན་པར་བགྱིད་པ་དང ། དེ་དག་ཤི་འཕོས་ནའང་ངན་སོང་གསུམ་དུ་སྐྱེ་ཞིང་ཡུད་ཙམ་ཞིག་རྙེད་པའི་དཔལ་ཡང་མ་འཚལ་བ་དང ། ཚེ་རབས་གཞན་དག་ཏུ་བསྐལ་པ་མང་པོར་སྡུག་བསྔལ་གྱི་ཚོར་བ་མི་བཟད་པ། རྩུབ་པ། ཚ་བ། ཡིད་དུ་མི་མཆི་བ་དག་འབྱུང་བར་འགྱུར་བའང་མཐོང་ལགས་སོ། །བཅོམ་ལྡན་འདས། དེའི་སླད་དུ་སེམས་ཅན་འདི་དག་ཡོངས་སུ་སྨིན་པར་བགྱི་བ་དང ། ངན་འགྲོའི་ལམ་ལས་རྣམ་པར་བཟློག་ནས་བསོད་ནམས་ཀྱིས་གཞལ་མེད་ཁང་ཐོབ་པར་བགྱི་བའི་ཆོས་རྣམས་གང་ལགས། དེ་སྐད་ཅེས་གསོལ་ 464b པ་དང ། བཅོམ་ལྡན་འདས་ཀྱི་ཚོང་དཔོན་སྤོབས་པའི་བློ་གྲོས་ལ་འདི་སྐད་ཅེས་བཀའ་སྩལ་ཏོ། །སྤོབས་པའི་བློ་གྲོས། དེ་ལྟར་ཁྱོད་སེངྒེའི་སྒྲ་བསྒྲགས་པས་དེ་བཞིན་གཤེགས་པ་ལ་ཞུ་ཞིང ། དེ་ལྟར་སེམས་ཅན་ཐམས་ཅད་དེ་བཞིན་གཤེགས་པ་ལ་ཆོས་ཞུ་བར་སྤྲོ་བ་སྐྱེད་པ་ལེགས་སོ་ལེགས་སོ། །སྤོབས་པའི་བློ་གྲོས། སེམས་ཅན་རྣམས་གང་ཐོབ་ནས་ལེགས་པར་རབ་ཏུ་དཔལ་དང་ལྡན་པར་འགྱུར་ཞིང ། ནག་པོའི་ཕྱོགས་སྒྲུབ་པ་སྤངས་ནས་དཀར་པོའི་ཕྱོགས་ལ་ཞུགས་ཤིང་དོན་ཐམས་ཅད་འགྲུབ་པར་འགྱུར་བའི་ཆོས་དེ་དག་ཁྱོད་ཞུས་ཤིག། ཞུས་ནས་ཀྱང་ཐེ་ཚོམ་མེད་པར་ཉོན་ཅིག་དང་བཤད་པར་བྱའོ། །དེ་ནས་བཅོམ་ལྡན་འདས་ལ་སྤོབས་པའི་བློ་གྲོས་ཀྱིས་ཞུས་པ། བཅོམ་ལྡན་འདས། ལས་གང་དག་གིས་ནི། ལྷ་རྣམས་ཀྱི་རིས་སུ་སྐྱེ་བར་འགྱུར། གང་དག་གིས་ནི། མི་རྣམས་ཀྱི་རིས་སུ་སྐྱེ་བར་འགྱུར། གང་དག་གིས་ནི། སེམས་ཅན་དམྱལ་བ་རྣམས་སུ་སྐྱེ་བར་འགྱུར། གང་དག་གིས་ནི། དུད་འགྲོ་རྣམས་སུ་སྐྱེ་བར་འགྱུར། གང་དག་གིས་ནི། ཡི་དྭགས་རྣམས་སུ་སྐྱེ་བར་འགྱུར། གང་དག་གིས་ནི། རིགས་མཐོན་པོ་རྣམས་སུ་སྐྱེ་བར་འགྱུར། གང་དག་གིས་ནི། བྲན་དང ། བྲན་མོ་རྣམས་སུ་སྐྱེ་བར་འགྱུར། བཅོམ་ལྡན་འདས། ལས་གང་དག་གིས་ནི། མི་རྣམས་ཀྱི་ནང་དུ་སེམས་ཅན་སྐྱེས་པ་རྣམས་སྐལ་པ་ 465a ༄#། །བཟང་པོར་འགྱུར་ཞིང་ཁྱིམ་ཁོལ་དང་ལྡན་པ་དང ། ཁ་དྲི་བདའ་བ་དང ། ཁ་དོག་དང་ལྡན་པ་དང ། མཐོང་ན་དགའ་བ་དང ། གནོད་པ་མ་མཆིས་པ་དང ། ལུས་དང་སེམས་ཤིན་ཏུ་ཐ་མལ་དུ་གནས་པ་དང ། སྐྱེ་བོ་མང་པོས་བསྔགས་པ་རྣམས་སུ་འགྱུར། ལས་གང་དག་གིས་ནི། སེམས་ཅན་རྣམས་མིའི་དམ་པ་ཐོབ་ནས་རྟག་ཏུ་སྐུར་པ་འདེབས་པ་ཐོབ་པར་འགྱུར་ཞིང་སྐྱེ་བོ་མང་པོ་མི་དགའ་བ་དང ། མདོག་མི་སྡུག་པ་དང ། ཁ་དྲི་མི་བདའ་བ་དང ། གནོད་པ་མེད་པ་དང ། སེམས་མི་དགའ་བ་དང ། ལུས་ཤིན་ཏུ་སྦྱངས་པ་མ་ལགས་པ་དང ། ཉེས་བྱས་ཀྱི་ལས་ཐམས་ཅད་བགྱིད་པར་འགྱུར། བཅོམ་ལྡན་འདས། ལས་གང་དག་གིས་ནི། ལེགས་པར་གསུངས་པའི་ཆོས་འདུལ་བ་འདི་ལ་རབ་ཏུ་བྱང་བ་དགེ་སྦྱོང་དང ། རིགས་ཀྱི་བུ་དང ། རིགས་ཀྱི་བུ་མོ་ཉེ་བར་ཞི་བ་གཙོ་བོར་འཛིན་པ་རྣམས་གང་དང་གང་དུ་སྐྱེ་བ་ཐམས་ཅད་དུ་རྒྱུན་དུ་སངས་རྒྱས་དང ། ཆོས་དང ། དགེ་འདུན་དཀོན་མཆོག་རྣམས་དང་མི་འབྲལ་བར་འགྱུར་ཞིང ། སངས་རྒྱས་བཅོམ་ལྡན་འདས་རྣམས་མཐོང་ནས་ཀྱང་དེ་དག་ལས་ཆོས་ཐོས་ནས་ཡིད་དགའ་ཞིང་ཅི་བསམ་པ་བཞིན་དུ་དོན་ཡང་གྲུབ་པར་འགྱུར། བདག་གིས་ཞུ་བ་བཅུ་པོ་དེ་དག་ཞུས་པ་ལགས་ན། འབྱུང་པོ་གྲངས་མ་མཆིས་པ་ཐམས་ཅད་ 465b ལ་སྨན་པའི་སླད་དུ་བཅོམ་ལྡན་འདས་གསོལ་བ་མ་བཏབ་པར་དགེ་བའི་བཤེས་གཉེན་མཛད་པ། ཐུགས་རྗེ་ཆེན་པོ་དང་ལྡན་པ། དབང་དང་ལྡན་པ། ཆོས་ཐམས་ཅད་ལ་ལྐོག་ཏུ་མ་གྱུར་པའི་སྤྱན་དང་ལྡན་པས་རྣམ་པར་ཕྱེ་སྟེ་རྒྱས་པར་ལན་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་སྤོབས་པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས།་ཁྱོད་ཀྱིས་ཇི་ལྟ་བུའི་ཞུ་བ་ཞུས་པ་རྣམས་རྒྱས་པར་རྣམ་པར་ཕྱེ་སྟེ་བཤད་ཀྱི། ཉོན་ཅིག་།ཚོང་དཔོན་སྤོབས་པའི་བློ་གྲོས་ཀྱིས་བཅོམ་ལྡན་འདས། དེ་བཞིན་དུ་འཚལ་ལོ། །ཞེས་གསོལ་ནས་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་ཀྱིས་ནི། ལྷ་ཉིད་ཐོབ་པར་འགྱུར་ཏེ། ལྔ་གང་ཞེ་ན། དང་པོ་བྱམས་པ་དང་ལྡན་པའི་སེམས་ཀྱིས་གནོད་པ་མེད་པར་སེམས་ཅན་རྣམས་ཡོངས་སུ་སྐྱོང་བར་བྱེད་ཅིང་བཟོད་པ་དང་ལྡན་པ་རྣམས་ཡིན། གཞན་གྱི་ནོར་འཕྲོག་པར་མི་བྱེད་ཅིང་བཀྲེན་པའི་སེམས་དང་ལྡན་པ་མ་ཡིན་པས་ཡོངས་སུ་གཏོང་བར་བྱེད་པ་ཡིན། གཞན་གྱི་ཆུང་མ་ལ་སྤྱོད་པ་རྣམས་ཀྱང་ཡོངས་སུ་དག་པ་མ་ཡིན་ཏེ། བསླབ་པའི་གཞི་རྣམས་ཀྱང་སྲུང་བར་བྱེད་པ་ཡིན། གསོ་སྦྱོང་ལ་བརྩོན་ཞིང་བདེན་པར་སྨྲ་བ་ཡིན། རང་ 466a ༄#། །བཞིན་དུ་འདུག་ཅིང་རང་གི་སྐྱོན་ཚད་མེད་པ་སྤོང་བར་བྱེད་ལ་མྱོས་པར་འགྱུར་བའི་བཏུང་བ་སྤངས་པ་ཡིན་ཏེ། ལས་ལྔ་པོ་དེ་དག་དང་ལྡན་པ་རྣམས་ལྷའི་ལུས་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སྲོག་ཆགས་གསོད་ལས་ལྡོག་པ་བྱས་པས་ལྷ་དང་མི་དང་ལྷ་མིན་རྣམས། འཇིག་རྟེན་དུ་ནི་མི་ཐུབ་ལུས་ཅན་ཚེ་རིང་མེད་འགྱུར་བ་ཡིན། །འོད་ཀྱི་དཀྱིལ་འཁོར་དག་པའི་ལུས་ཅན་ཤིས་ལྡན་དྲི་མེད་རྫོགས་པའི་ལུས།། ལྷ་ནང་རབ་མཆོག་དེ་ཡི་ལོངས་སྤྱོད་སྣ་ཚོགས་དཔལ་ཅན་རྟག་ཏུ་འབྱུང ། །པོར་མ་ཐག་ཏུ་ལྷ་ནང་རྟག་ཏུ་ལྷ་ཡི་དབང་ཕྱུག་རྣམས་སུ་འགྱུར། །བསམ་མེད་བསལ་བ་འཕྲོ་བ་རྣམ་ལོག་རིན་ཆེན་ལོངས་སྤྱོད་རྣམས་དང་ལྡན། །རྟག་ཏུ་དགའ་ཞིང་རབ་ཏུ་ཡིད་དགའ་དཔལ་ལྡན་གཞལ་མེད་ཁང་གནས་ཤིང ། །རྩེ་ཞིང་དགའ་བའི་དཔག་བསམ་ཤིང་གི་ཡུལ་ན་མེ་ཏོག་གཏོར་ལུས་ལྡན། །མཁས་ཤིང་འདོད་པ་མི་ཕན་ཡོངས་སྤངས་དྲི་མཆོག་དག་པའི་ལུས་དང་ལྡན། །ཚེ་རབས་ཀུན་ཏུ་དཔེ་མེད་གསེར་མཆོག་ལུས་དང་ལྡན་ཞིང་རབ་ཏུ་མཛེས། །རྟག་ཏུ་ལྷ་ཡི་ནང་དུ་སྐལ་པ་བཟང་ཐོབ་ལུས་ལས་འོད་འབྱུང་འགྱུར། །ལྷ་མོ་སྣ་ཚོགས་ཚོགས་ཀྱིས་བསྐོར་ཅིང་འདོད་པའི་དཔལ་ 466b ལ་སྤྱོད་པར་བྱེད། །སྔོན་ཆད་ཆོ་ག་བཞིན་དུ་ངག་སྐྱོན་བཞི་སྤངས་ཁ་ནི་དྲི་ཞིམ་ལྡན། །གསལ་ཞིང་ཐོགས་མེད་མི་འཇིགས་ཚིག་མཆོག་ལྷ་རྣམས་འདིར་ནི་ངེས་པར་འབྱུང་།། ཡང་དག་ལན་འདེབས་རྣམས་བསྒྲགས་སྙན་ཅིང་སྐྱེ་བོས་ཤིན་ཏུ་ཚིག་གཟུང་འོས། །པི་ཝཾ་རོལ་མོ་སྒྲ་འབྱོར་སྤྲིན་སྒྲ་སྐད་སྙན་ཕོ་བྲང་འཁོར་སྐད་ལྡན། །མ་རྨོངས་སེམས་ཀྱིས་མྱོས་འགྱུར་མ་ལེགས་རྗོད་བྱེད་སྤངས་པས་ལྷར་འགྱུར་ཞིང ། །གྲངས་མེད་དགེ་བའི་ལྷ་ཡིས་མཆོད་པ་ལྷ་ཡི་གནས་ན་གནས་པར་འགྱུར། །བློ་དང་ལྡན་ཞིང་ལུས་བརྟན་ཡིད་བཟང་བག་ཡོད་ཀུན་དང་ལྡན་པར་འགྱུར། །དེ་དག་རྟག་ཏུ་བདེ་འགྱུར་དབང་རྣམས་དེ་དག་ཕན་པ་རྗོད་པར་བྱེད། །གལ་ཏེ་ཚེ་ཟད་ལྷ་ཡི་ཡུལ་ནས་ལྷུང་བའི་ལྷ་རྣམས་དེ་ཚེ་སྨད། །སྡིག་མེད་ལོ་བརྒྱ་ཉི་ཤུ་འགྲོ་ན་ལྷ་ཡི་གནས་སུ་འགྲོ་བར་འགྱུར། །བསོད་ནམས་ལྔ་མངོན་གྱུར་པས་དེ་ནི་དམ་པ་དཔལ་ལྡན་ལུས་འོད་ཅིང ། །ལྷ་རྣམས་ལམ་སེལ་བྱེད་ཅིང་ལྷ་རྣམས་བྱེ་བས་མཆོད་དེ་བརྟན་པར་འགྲོ་།དེ་ནས་བཅོམ་ལྡན་འདས་ཀྱིས་ཡང་སྤོབས་པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་མི་རྣམས་ཀྱི་ནང་དུ་སྐྱེ་བར་འགྱུར་ཏེ། ལྔ་གང་ཞེ་ན། དང་པོ་བྱས་པ་གཟོ་བས་སྦྱིན་པ་དང ། བཀྲེན་པ་དང ། དབུལ་པོ་དང ། སྡུག་ 467a ༄#། །བསྔལ་བ་ལ་ཀུན་བགེད་པ་དང ། དགེ་བ་བཅུའི་ལས་ཀྱི་ལམ་མ་ཉམས་པར་བསྟེན་པ་དང ། སེམས་ཅན་ཐམས་ཅད་ལ་ཞེ་འགྲས་པ་མེད་པའི་བཟོད་པ་དང ། བརྩོན་འགྲུས་ཀྱིས་སེམས་ཅན་ལེ་ལོ་ཅན་རྣམས་དགེ་བའི་ཆོས་ལ་སྤྲོ་བར་བྱེད་ཅིང་ངེས་པའི་སེམས་ཀྱིས་གུས་པ་དང་བཅས་ལ་མཐུན་པར་འཛིན་པ་སྟེ།་སྤོབས་པའི་བློ་གྲོས། སེམས་ཅན་ལས་ལྔ་པོ་དེ་དག་དང་ལྡན་པ་རྣམས་མི་ཉིད་ཐོབ་པར་འགྱུར་ཞིང་ལོངས་སྤྱོད་ཀྱང་ཆེན་པོར་འགྱུར་པ་དང ། ཚེ་རིང་བ་དང ། མཛེས་པ་དང ། གཟི་བརྗིད་དང་ལྡན་པ་དང ། འཇིག་རྟེན་གྱི་རྗེ་དཔོན་དུ་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སྦྱིན་པ་བྱིན་པས་མི་ཡི་རྒྱལ་པོ་དམ་པར་འགྱུར། །རྟག་ཏུ་ལོངས་སྤྱོད་འབྱོར་དང་ལྡན་པར་རབ་ཏུ་འགྱུར། །ལུས་ངན་པོ་དང་མཚུངས་པར་སྦྱིན་དང་སྦྱོད་པར་བྱེད། །རིགས་དང་དམ་པ་ཐོབ་པས་རྟག་ཏུ་དགའ་བར་འགྱུར། །ཚུལ་ཁྲིམས་མ་ཉམས་དེ་ནི་དཀོན་མཆོག་མཆོད་པར་བྱེད། །ཉེས་བྱས་ཡོངས་སུ་སྤངས་པས་ཤིན་ཏུ་ངེས་པ་སྟེ། །ཚེ་རིང་དམ་པ་ཐོབ་པས་འཆི་འཕོ་མེད་པ་ཡིན། །བདེ་བ་ཐོབ་པས་སྐྱོན་མེད་རབ་ཏུ་དགའ་བར་འགྱུར། །ངེས་པའི་མི་ནི་ཕ་རོལ་སེམས་འཁྲུགས་མ་ 467b བྱས་ཤིང ། །གཞན་དག་རྣམས་ཀྱིས་གནོད་བྱས་ཕྱིར་ནི་གནོད་མི་བྱེད། །དེ་བཞིན་ཚིག་ངན་བརྗོད་ཀྱང་གཤེ་བར་མི་བྱེད་པས། །དགེ་བ་མཆོག་གི་ཚུལ་ཐོབ་ནས་ནི་མཛེས་པར་འགྱུར། །བརྩོན་འགྲུས་བཟང་ལ་ལྷག་པའི་བསམ་པས་སེམས་དཀར་ཞིང ། །སྟོབས་དང་གཟི་བརྗིད་ཆེན་པོ་དགེ་བ་རྣམས་དང་ལྡན། །དམག་དཔོན་ཉིད་ཀྱི་དམ་པ་ཐོབ་པར་གྱུར་པས་ན། །ལོངས་སྤྱོད་འབྱོར་པའི་སྤྱོད་ཡུལ་ལྡན་པས་ལྷ་དེར་འགྱུར། །མི་འཕྲོག་སེམས་ལྡན་མཁས་ཤིང་ཤིན་ཏུ་མཐུན་པ་སྟེ། །བྱས་པ་གཟོ་ཞིང་ལས་ལ་འདོད་པར་རབ་ཏུ་བྱད། །དཀོན་མཆོག་གསུམ་དང་མ་ལ་སོགས་ལ་མཆོད་མཛངས་པ། །ནམ་ཡང་ཀུན་ལ་ཐེ་ཚོམ་བྱེད་པར་མི་འགྱུར་རོ། །མི་གང་ཁྱད་པར་འཕགས་པ་དགེ་བ་ལྔ་པོ་རྣམས། །བྱེད་པ་དེ་ནི་ས་ཡི་བདག་པོར་རབ་ཏུ་འགྱུར། །སྟོབས་ལ་སོགས་དང་གཟུགས་དང་ལོངས་སྤྱོད་མི་ཟད་ལྡན། །གྲགས་ལྡན་ཤིན་ཏུ་གཙོ་བོ་རྣམས་ཀྱིས་རིམ་གྲོ་བྱས། །དེ་ནས་བཅོམ་ལྡན་འདས་ཀྱིས་ཡང་སྤོབས་པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་ནི། སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཞིང་སྐྱེས་ནས་ཀྱང་དེ་དག་ཏུ་བསྐལ་པ་བྱེ་བ་མང་པོར་གནས་པར་འགྱུར་ཏེ། ལྔ་གང་ཞེ་ན། འདི་ལྟ་སྟེ། སངས་རྒྱས་དང ། ཆོས་དང ། དགེ་འདུན་ 468a ༄#། །དཀོན་མཆོག་ལ་དད་པར་མི་བྱེད་ལ་ཀུན་ཏུ་བསྔགས་པ་མ་ཡིན་པ་བརྗོད་པས་སྐུར་པ་འདེབས་པར་བྱེད་ཅིང་འཕགས་པའི་ལམ་ལ་བརྙས་པ་དང ། དེ་བཞིན་གཤེགས་པའི་མཆོད་རྟེན་འཇིག་པ་དང ། བར་གྱི་དུས་ནའང་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་གང་ཟག་བཞི་པོ་མང་པོར་མི་གུས་པ་མཐུན་པར་མི་འཛིན་པ། འཇིག་རྟེན་གྱི་སྨྲ་བ་ལྷུར་ལེན་པ། དཀོན་མཆོག་གསུམ་གྱི་དཀོར་འཕྲོག་པ་དང ། གཅིག་ལ་གཅིག་ཉེས་རྩོམ་གྱིས་གཅིག་ལ་གཅིག་སྐུར་པ་འདེབས་པའི་ཚིག་གིས་རྒྱལ་པོ་དང ། རྗེ་དཔོན་དང ། བློན་པོ་དང ། ཕ་དང ། བུ་རྣམས་གཅིག་ལ་གཅིག་མི་མཐུན་པས་མི་གུས་པ་རྣམས་དང ། མ་འོངས་པའི་དུས་ན་དགེ་སློང་རྣམས་དེ་བཞིན་གཤེགས་པའི་བསྟན་པ་ལ་ཞུགས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྟོན་པ་ལ་བརྟེན་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ་བདག་ཉིད་དགེ་སློང་ཡིན་པར་ཁས་འཆེ་ཤིང་དགེ་བའི་ཆོས་ཡང་དག་པར་སྒྲུབ་པ་ལ་མི་གནས་ལ། མཁན་པོ་དང ། སློབ་དཔོན་རྣམས་མགུ་བར་མི་བྱེད་ཅིང་བཀའ་བློ་མི་བདེ་ལ་མཐུན་པར་མི་འཛིན་ཅིང་ཡང་དག་པར་རྗེས་སུ་བསྟན་ཀྱང་རྗེས་སུ་བསྟན་པ་ལ་སྒྲུབ་པར་མི་བྱེད་ཅིང་སངས་རྒྱས་ཀྱི་བྱང་ཆུབ་སྤོང་བར་བྱེད་ 468b ལ།་བདག་ལ་བསྟོད་པ་བྱེད། གཞན་ལ་སྨོད་པར་བྱེད་ཅིང་ང་རྒྱལ་དང ། རྒྱགས་པ་དང ། དྲེགས་པའི་ཤས་ཆེ་ལ་བླ་མ་རྣམས་ལ་བརྙས་པར་བྱེད། རྙེད་པ་དང་བཀུར་སྟི་ལ་ལྷག་པར་ཞེན་ཅིང་སྐུར་པ་འདེབས་པར་བྱེད་པ་སྟེ། སྤོབས་པའི་བློ་གྲོས། སེམས་ཅན་ལས་ལྔ་པོ་དེ་དག་དང་ལྡན་པ་རྣམས་ནི། སེམས་ཅན་དམྱལ་བ་རྣམས་སུ་སྐྱེ་བར་འགྱུར་ཞིང་སྐྱེ་ནས་ཀྱང་ཇི་སྲིད་དུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་འཇིག་པ་མ་བྱུང་བ་དེ་སྲིད་དུ་གནས་པར་འགྱུར་ཞིང ། འཇིག་པ་བྱུང་ནས་ཀྱང་འཇིག་རྟེན་གྱི་ཁམས་གཞན་ན་སེམས་ཅན་དམྱལ་བ་གང་དག་ཡོད་པ་དེ་དག་ཏུ་འཕེན་པར་འགྱུར་རོ། །གང་གི་ཚེ་དེར་ཡང་འཇིག་པ་བྱུང་བར་གྱུར་ན། དེའི་ཚེ་འཇིག་རྟེན་གྱི་ཁམས་གཞན་ན་སེམས་ཅན་དམྱལ་བ་གང་དག་ཡོད་པ་དེ་དག་ཏུ་འཕེན་པར་འགྱུར་རོ། །དེ་བཞིན་དུ་སྦྱར་ཏེ། ཀུན་ཏུ་འཇིག་རྟེན་གྱི་ཁམས་གྲངས་མེད་པ་དག་ན་སེམས་ཅན་དམྱལ་བ་གང་དག་ཡོད་པ་དེ་དག་ཏུ་འཁྱམས་ཤིང་སྡུག་བསྔལ་ཉམས་སུ་མྱོང་ལ་འབྱུང་བའི་མཐའ་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྨོངས་པས་ཐོག་མ་མེད་ནས་འཇིགས་པའི་སྡུག་བསྔལ་བྱིང་གྱུར་པའི། །འཇིག་རྟེན་སངས་རྒྱས་ཡོན་ཏན་རྒྱ་མཚོ་ཁས་ལེན་མི་བྱེད་དེ། །དེ་ནི་ཀུན་རིག་མ་ཡིན་རྣལ་ 469a ༄#། །འབྱོར་རྒྱལ་པོ་མ་ཡིན་ཞེས། །བདག་ཉིད་ཆུད་གཟན་སྐྱེ་བོ་གཞན་རྣམས་ལ་ཡང་སླུ་བར་བྱེད། །བདེ་བར་གཤེགས་པའི་མཆོད་རྟེན་འབྱོར་པ་སྡུག་པའི་མཆོག་བྱས་ན། །དེ་ནི་དགེ་བ་ཆུང་འགྱུར་འཇིག་པར་བྱེད་པའི་ཆར་འགྱུར་ཞེས། །མི་དགེ་འདི་ནི་མངོན་སུམ་དགེ་བ་མདུན་ན་ཡོད་བཞིན་དུ། །འོན་ཀྱང་སྡིག་པ་རྣམ་པ་སྣ་ཚོགས་ཀུན་ཏུ་སྤྱོད་པར་བྱེད། །བར་མ་རྩོད་པའི་དུས་འདིར་བཞི་པོ་བཀྲེས་པས་ཉམ་ཐག་པ། །ཕན་ཚུན་འཁོན་དུ་འཛིན་པས་དཀྲུགས་ཤིང་བླ་མ་སྨོད་པར་བྱེད། །འཁོར་དུ་འདུས་པ་འདུལ་བའི་དགའ་བ་འདི་ནི་རྣམ་བཤིག་པས། །མི་བཟད་རོ་མེད་ལོག་པར་ལྟུང་བའི་སར་ནི་འགྲོ་བར་འགྱུར། །རྒྱལ་པོ་ཕ་དང་སྲིང་མོ་སྤུན་དང་གཞོན་ནུ་བུ་མོ་རྣམས། །བྱམས་པའི་ཡིད་ནི་ལོག་གྱུར་ལོངས་སྤྱོད་རྣམས་ལ་བརྐམ་ཆགས་ཏེ། །བྱིས་པ་བུ་ལྟར་ཐམས་ཅད་གཅིག་ལ་གཅིག་ནི་བཞད་གད་བྱེད། །ལོག་ལྟུང་དམ་པ་རྣམ་པར་འབྱིང་བར་མྱུར་དུ་འགྲོ་བར་འགྱུར། །མ་འོངས་དུས་འདིར་གང་དག་ཤིན་ཏུ་སྡིག་ཅན་སེམས་ཅན་རྣམས། །མཐུན་པར་མི་འཛིན་དགེ་སྦྱོང་ཁ་དོག་འཛིན་པ་གཟུགས་མི་སྡུག་།ངན་པའི་བདག་ཉིད་ལྡན་པ་སྡིག་པ་ཁྲག་ཁྲིག་བྱེད་འགྱུར་བ། །དེ་དག་ཤི་འཕོས་ནས་ནི་སྡིག་པ་རྩོད་པའི་མཆོག་གིས་ 469b གནོན། །མི་ཡིས་བསྐལ་པ་བརྒྱ་ཕྲག་མང་པོར་སྡིག་པ་ལྔ་པོ་དག་།བསྒྲུབས་ཤིང་བྱས་པ་དག་ནི་བཤགས་པར་ནུས་པ་མ་ཡིན་ཏེ། །གང་དུ་སངས་རྒྱས་ཁྲག་ཁྲིག་གིས་ཀྱང་བསྐྱབ་པར་མི་སྤྱོད་པའི། །མེ་རི་དྲག་པོ་མནར་མེད་པ་ཡི་མེར་ནི་སྲེག་པར་འགྱུར། །དེ་ནས་བཅོམ་ལྡན་འདས་ཀྱིས་ཡང་སྤོབས་པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་ནི། དུད་འགྲོ་རྣམས་སུ་སྐྱེ་བར་འགྱུར་ཏེ། ལྔ་གང་ཞེ་ན། དང་པོ་འཆལ་བའི་ཚུལ་ཁྲིམས་དང ། ཆོམ་རྐུན་དང ། གཞན་གྱི་བུ་ལོན་བླངས་ནས་གནོད་སེམས་སུ་བྱེད་པ་དང ། སྲོག་གཅོད་པ་དང ། མ་དད་པས་དམ་པའི་ཆོས་མ་ཡིན་པ་ཉན་པར་དགའ་ཞིང་དམ་པའི་ཆོས་མ་ཡིན་པ་ཉན་པ་ལ་དགའ་བས་ལོག་པས་འཚོ་བ་ཐམས་ཅད་ལ་དགའ་བ་སྟེ། སྤོབས་པའི་བློ་གྲོས། སེམས་ཅན་ལས་ལྔ་པོ་དེ་དག་དང་ལྡན་པ་རྣམས་ནི། དུད་འགྲོ་རྣམས་སུ་སྐྱེ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྟག་ཏུ་གཞན་གྱི་ནོར་འཕྲོག་པ་ལ་དགའ་བའི་མི་རྣམས་ནི། །བུ་ལོན་བྱིན་པ་རྣམ་པར་བླངས་ནས་མི་གཞན་གསོད་པར་བྱེད། །སྲོག་གཅོད་པ་ལ་དགའ་བའི་རི་དྭགས་འཆི་བདག་རྒྱལ་པོ་རྣམས། །རྒྱལ་སོགས་པས་ 470a ༄#། །བཟུང་ནས་སེམས་ཅན་རྣམས་ལ་གསོད་པར་བྱེད། །དད་པ་ལ་སོགས་དམན་པའི་བློ་གྲོས་དཀར་པོའི་འདུ་ཤེས་ཅན། །ནག་པོ་དཔག་ཏུ་མེད་པ་བདག་ཅག་སྤྱོད་པར་མི་ཤེས་པ། རྨོངས་པ་རྣམས་ནི་དམ་ཆོས་དཀོན་མཆོག་གཏམ་ལ་དགའ་མི་བྱེད། །འཇིག་རྟེན་ཞུགས་པའི་ཆོས་ལ་འདིར་ནི་རྗེས་སུ་འགྲོ་བར་འགྱུར། །ཇི་ལྟར་གངས་རི་ལས་འདིར་ཁ་བ་བབ་དང་རབ་བབ་པ། ཆུ་ནི་ཆུ་ཡི་ཤུགས་ཀྱིས་འཕྲལ་དུ་ས་འོག་འགྲོ་བ་བཞིན། །ལྷ་མིའི་གྲོང་དུ་སྡིག་པའི་ཕུང་པོ་མང་དུ་བྱས་པས་ན། །རྨོངས་པ་རྣམས་ནི་དེ་བཞིན་དུད་འགྲོ་རྣམས་སུ་མྱུར་དུ་འགྲོ་།རྟ་དྲེའུ་རྔ་བོང་གླང་ཆེན་པ་ལང་མ་ཧེ་སེངྒེ་དང ། །ཝ་དང་སྦྲུལ་དང་ཕག་དང་ཁྱི་ལ་སོགས་པར་གྱུར་ནས་སུ། །རྩཝ་ཟ་བ་དང་ཤ་དང་བདུད་རྩི་ལོ་མའི་ཟས་ཟ་ཞིང ། །དེ་དག་རྟག་ཏུ་གཞན་གྱི་ཁུར་འཁྱེར་བྱེད་ཅིང་དུབ་བར་འགྱུར། །བཀྲེས་པས་ཟིལ་གྱིས་ནོན་པས་གཅིག་ལ་གཅིག་ཟ་ལྷུར་བྱེད་པ། །བསྐལ་པ་ཁྲག་ཁྲིག་རྣམས་སུའང་ནམ་ཡང་ཐར་པར་མི་འགྱུར་ཞིང ། །ཇི་ལྟར་རྒྱ་མཚོ་གཅིག་ན་རུས་སྦལ་མིག་ནི་གཅིག་ཡོད་པས། །གཉའ་ཤིང་བུ་གར་མགྲིན་པ་གཏད་པར་ནུས་པ་མ་ཡིན་པ། །དེ་བཞིན་ལྷ་དང་མི་དང་དབང་ཕྱུག་ཆེ་ཉིད་བདེ་བླག་ཏུ། །ལོག་པར་ལྟུང་བ་བརྒྱ་ 470b ཡིས་ཐོབ་པར་ནུས་པ་མ་ཡིན་ཏེ། །སངས་རྒྱས་འོད་ཟེར་དམ་པའི་ཚོགས་ཅན་དཔག་ཏུ་མེད་པ་དང ། །བྱང་ཆུབ་སེམས་དཔའ་ཁྱུ་མཆོག་འོད་ཀྱིས་དེ་དག་འབྱིན་པར་འགྱུར། །དེ་ནས་བཅོམ་ལྡན་འདས་ཀྱིས་ཡང་སྤོབས་པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་ནི། ཡི་དྭགས་ཀྱི་འཇིག་རྟེན་དུ་སྐྱེ་བར་འགྱུར་ཏེ། ལྔ་གང་ཞེ་ན། དང་པོ་བཀྲེན་ཞིང་ཆགས་པ་དང ། མུན་པ་མུན་ནག་ཆེན་པོའི་བཤེས་གཉེན་དང ། གསོག་པ་ལྷུར་བྱེད་པའི་ཕྱིར་བདག་ཉིད་ཀྱང་ལོངས་སྤྱོད་པར་མི་བྱེད་པ་དང ། ཆོས་མ་ཡིན་པ་དང་ལྡན་པའི་ཕྱིར་ཕྲག་དོག་དང ། སེར་སྣ་ལྷུར་བྱེད་པས་སྤུན་དང ། སྲིང་མོ་དང ། བུ་དང ། ཆུང་མ་དང ། བྲན་དང ། ལས་བྱེད་པ་དང ། ཞོ་ཤས་འཚོ་བ་དང ། མཛའ་བཤེས་དང ། བློན་པོ་དང ། ཉེ་དུ་དང ། འབྲེལ་པ་དང ། སྦྱིན་གནས་དང ། དགེ་སྦྱོང་དང ། བྲམ་ཟེ་དང ། བཀྲེན་པ་ཐམས་ཅད་ལ་རབ་ཏུ་སྦྱིན་པར་མི་བྱེད་ཅིང་པ་མ་དག་ལའང་རབ་ཏུ་སྦྱིན་པར་མི་བྱེད་པ་དང ། ངེས་པར་བསྐྱང་བར་འོས་པ་དག་མི་སྐྱོང་ལ་བསྙེན་བཀུར་མི་བྱེད་ཅིང་བླ་མ་ལ་མི་གུས་ལ་གཅེས་པར་མི་བྱེད་པ་སྟེ། སྤོབས་པའི་བློ་གྲོས། སེམས་ཅན་ལས་ལྔ་པོ་དེ་དག་དང་ལྡན་པ་རྣམས་ནི། ཡི་དྭགས་རྣམས་སུ་སྐྱེ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ 471a ༄#། །ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བཀྲེན་པའི་ཉེས་པས་བཅོམ་པ་ནོར་གཏོང་མི་ཕོད་པ། །དེ་དག་གཞན་དག་ལས་ནི་བླང་བར་འདོད་པར་བྱེད། །མཛོད་རྣམས་ཀྱི་ནི་སྒོ་འཕར་དམ་དུ་བསྡམས་པ་རྣམས། །འདིར་ནི་བསྐྱང་འོས་རྩ་ལག་མཆོག་རྣམས་གསོ་མི་བྱེད། །གཞན་ནོར་ཆུད་གཟོན་པ་ཡིས་རྟག་ཏུ་སྐྲག་པ་རྣམས། །བླ་མ་ལ་ཡང་དེ་དག་རབ་རྩུབ་བྱམས་ཅན་མིན། །དེ་དག་བདག་གི་ཆུང་མ་ལ་སོགས་གཡོག་ཚོགས་ལ། །དབྱིག་སྦྱིན་མི་བྱེད་ཤིན་ཏུ་སྙིང་བརྩེ་ཤེས་མེད་ཅིང ། །དཀར་པོ་དག་ལས་ལོག་པ་དེ་དག་འདི་ནས་ཤི་འཕོས་ནས། ཡུན་རིང་མཆོག་ཏུ་ལུས་འབར་སྡུག་བསྔལ་ཡི་དྭགས་འགྱུར། །དེ་དག་ལོ་བརྒྱ་རྣམས་སུ་རྨི་ལམ་རྨིས་པར་ཡང ། །གོས་དང་ཟས་དང་བཏུང་བའང་ནམ་ཡང་རྨི་མི་འགྱུར། །ཁབ་འདྲའི་ཁ་དང་རི་ཆེན་ལྟ་བུའི་ལྟོ་ཅན་རྣམས། །ཉམ་ཐག་ཤར་དང་ནུབ་ཀྱི་རྒྱ་མཚོར་རྒྱུག་པར་བྱེད། །ཁ་ནས་མེ་འབར་ལུས་ངན་ཕྱོགས་དང་ལྷོ་ཕྱོགས་གཞན། །སྐམ་པར་མཐོང་ནས་རིན་ཆེན་མེ་ནང་ལྷུང་བར་འགྱུར། །གཤིན་རྗེའི་ཕོ་ཉ་དཔུང་མགོ་ལས་གྲུབ་རབ་སྟུག་ཅིང ། །སྲ་ལྡན་རྣམས་ཀྱིས་མནན་ནས་ཟངས་ཞུན་བཟོད་དཀའ་རབ། །མི་འདྲ་རོ་བྲོ་མེད་པ་དེ་དག་རྣམས་ལ་ལྡུད། །རྨོངས་རྣམས་ཡན་ལག་བརྒྱད་ལྡན་ཆུ་བཞིན་ 471b འཐུང་བར་བྱེད། །ནང་གྲོལ་ལུས་ཀྱི་ཁོག་པ་བསྲེགས་པ་བསལ་བའི་རླུང་གིས་སུ། །སྐྱེས་པའི་བདག་ཉིད་རྣམས་ལ་སྟོབས་ཆེན་ཡང་ལྡུད་བྱེད། །དེ་ནས་ཤི་འཕོས་མི་ཡི་འཇིག་རྟེན་འདིར་སྐྱེས་རྣམས། །རིགས་དང་ལོངས་སྤྱོད་ལུས་གཡོག་རྣམས་ཀྱིས་དམན་པར་འགྱུར། །དེ་ནས་བཅོམ་ལྡན་འདས་ཀྱིས་ཡང་སྤོབས་པའི་བློ་གྲོས་ལ་བཀའ་སྩལ་པ།་སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་ནི། རིགས་མཐོན་པོ་རྣམས་སུ་འགྱུར་ཏེ། ལྔ་གང་ཞེ་ན། །འདི་ལྟ་སྟེ། ཟང་ཟིང་དང་ཆོས་ཀྱི་སྦྱིན་པ་དག་གིས་འཇིག་རྟེན་ཐམས་ཅད་ལ་གནོད་སེམས་མེད་པར་གྱུར་པ་དང ། དཀོན་མཆོག་གསུམ་དང་ཕ་མ་ལ་གུས་པ་དང ། ལྷན་ཅིག་སྐྱེས་པའི་བཟོད་པ་དང ། དེས་པ་དང ། ཤིན་ཏུ་གྱ་ནོམ་པ་དང ། སངས་རྒྱས་ཀྱི་གསུང་རྣམ་པ་སྣ་ཚོགས་ཀློག་པ་དང་ཁ་ཏོན་བྱ་བ་ལ་བརྩོན་པ་སྟེ། སྤོབས་པའི་བློ་གྲོས། སེམས་ཅན་ལས་ལྔ་པོ་དེ་དག་དང་ལྡན་པ་རྣམས་ནི། རིགས་མཐོན་པོ་རྣམས་སུ་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བསམ་བྱས་གང་དག་བསོད་ནམས་ཚོགས་པ་སྐལ་བཟང་སྦྱིན་པའི་ཆོ་ག་བཞིན། །ཀུན་ཏུ་སེམས་ཅན་མང་ལ་ཀུན་བགེད་དེ་དག་རྟག་ཏུ་ནད་མེད་འགྱུར། །ཚེ་དང་ཁ་དོག་སྟོབས་ལྡན་ལུས་ཅན་འཇིག་རྟེན་ 472a ༄#། །མཆོག་ཏུ་འགྱུར། །མཚུངས་དང་རྒྱ་ཆེན་ཁྱད་པར་ཅན་གྱིས་མཛེས་མཛོད་རིན་ཆེན་རི་དབང་བཞིན། །འདུལ་བ་ཉམས་དགའི་དཀོན་མཆོག་མཚུངས་མེད་ཕ་མ་རྣམས་ལ་བསྙེན་བཀུར་བས། །ཤིན་ཏུ་རྒྱ་ཆེན་གཙོ་མཆོག་ཁྱིམ་དུ་སྐྱེ་བོས་མཆོད། །ཤིན་ཏུ་ནུས་ཀྱང་ཡིད་འཁྲུག་རྣམ་སྤངས་ཀུན་ཏུ་གཟུགས་ཀྱིས་འཕགས་པ་རྣམས། །འཇིག་རྟེན་རྣམས་ཀྱི་མིག་ཏུ་སྡུག་པ་སྐལ་བཟང་རིགས་ནི་མཐོན་པོར་འགྱུར། །གང་ཟག་བརྟན་ཞིང་ཀུན་བཟོད་ཤིན་ཏུ་ཡིད་བཟང་དཀར་དང་མཐུན་རྣམས་དང ། །མི་རྣམས་གང་དག་ཤེས་རབ་དག་མཆོག་སངས་རྒྱས་གསུང་ལ་ཁ་ཏོན་བརྩོན། །དེ་དག་འབྱོར་པ་ཐོབ་ནས་རིགས་མཆོག་སྐྱེས་པ་ཀུན་ཏུ་ཀུན་མཆོག་མཛེས། །དེ་དག་དགེ་བས་རྒྱས་པས་ལུས་ཆེན་རྒྱ་མཚོ་ཆེན་པོ་བཞིན་དུ་སྤ། །དེ་ནས་བཅོམ་ལྡན་འདས་ཀྱིས་ཡང་སྤོབས་པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་ནི། བྲན་དང ། བྲན་མོ་ཉིང་ཐོབ་པར་འགྱུར་ཏེ། ལྔ་གང་ཞེ་ན། འདི་ལྟ་སྟེ། ཕ་མ་རྣམས་ལ་མི་གུས་པ་དང ། གྱ་ནོམ་པའི་སེམས་མ་ཡིན་པ་དང ། ཟློག་པ་མེད་ཅིང་ཅི་དགར་སྡིག་པ་སྤྱོད་པ་དང ། གཞན་གྱི་ནོར་འཕྲོག་པ་དང ། བུ་ལོན་འཕྲོག་ནས་བདག་སྦེད་པ་སྟེ། སྤོབས་ 472b པའི་བློ་གྲོས། སེམས་ཅན་ལས་ལྔ་པོ་དེ་དག་དང་ལྡན་པ་རྣམས་ནི། བྲན་དང ། བྲན་མོ་ཉིད་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །བསོད་ནམས་རྒྱ་ཆེན་འབྱོར་བ་གངས་འོད་ལྟ་བུའི་ཁྱིམ་དུ་སྐྱེ་ཐོབ་ནས། །བླུན་པོ་གང་དག་རྒྱགས་ཁེངས་དྲེགས་པས་དཀྲུགས་ཤིང་གུས་པར་མི་བྱེད་ལ། །ཕ་མ་རྣམས་ལ་རྨད་བྱུང་སྦྱིན་གནས་འདྲ་བར་འདུ་ཤེས་མི་བྱེད་པ། །དེ་དག་ཉེས་པས་གཞན་དུ་འཇིག་རྟེན་དབང་གྱུར་དམན་ཞིང་གཡོན་ཅན་འགྱུར། །དཀོན་མཆོག་མཚུངས་མེད་རྣམས་ལ་མ་གུས་ལྷུར་བྱེད་མ་རུངས་བརླང་ཚིག་འགྱུར། །གང་དག་བྱམས་དང་དེ་བཞིན་སྙིང་རྗེ་མ་ལུས་དགེ་བ་ཆུད་གཟན་པ། །དེ་དག་གྲངས་མེད་སྐྱེ་བར་འཛིན་མེད་གཞན་འཇོམས་ངོ་ཚ་མི་ཤེས་ཤིང ། །མི་ཡི་ཡུལ་དུ་བྲན་ཉིད་སྤངས་ནས་སྐད་ཅིག་གིས་ནི་དམའ་བར་འགྱུར། །གཟུགས་དང་དབང་ཕྱུག་རིགས་མཆོག་བློ་བྲལ་དམན་ལ་མོས་པའི་གླེན་པར་འགྱུར། །དཀོན་མཆོག་རྣམ་མང་མཆོད་པས་ང་རྒྱལ་མེད་ཅིང་ཞེན་ལ་མདངས་ངན་འགྱུར། །དཔལ་ཀུན་མེད་ཅིང་ཏིང་འཛིན་བྲལ་བ་ལས་རྣམས་ཀྱིས་ནི་བསྡིགས་པར་འགྱུར། །དེ་དག་འཇིག་རྟེན་ཀུན་དགའ་དགའ་སྟོན་ཆེ་སོགས་མེད་ཅིང་ཚེགས་ཀྱིས་འཚོ། །དེ་ནས་བཅོམ་ལྡན་འདས་ཀྱིས་ཡང་སྤོབས་ 473a ༄#། །པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་ནི། སྐལ་བ་བཟང་པོར་འགྱུར་ཞིང་ཁྱིམ་ཁེལ་དང ། ཁ་དྲི་ཞིམ་པ་དང ། གནོད་པ་མེད་པ་དང ། ལུས་དང་སེམས་ཤིན་ཏུ་སྦྱངས་པ་དང ། བལྟ་ན་སྡུག་པ་དང ། སྐྱེ་བོ་མང་པོས་བསྔགས་པ་རྣམས་སུ་འགྱུར་ཏེ། ལྔ་གང་ཞེ་ན། འདུ་ཤེས་ཇི་ལྟ་བ་བཞིན་དུ་ཡང་དག་པ་དང ། མ་ཚང་བ་མེད་པ་དང ། སྒྲོ་བཏགས་པ་མེད་པའི་ཚིག་དང ། ཉན་ཐོས་དང ། རང་སངས་རྒྱས་དང ། ཐེག་པ་ཆེན་པོ་དང ། ཐེག་པ་རྣམ་པ་གསུམ་པོ་ཐམས་ཅད་ཀྱི་ཚིག་གི་རང་བཞིན་ལ་མི་བཟོད་པ་མེད་ཅིང་མི་སྨོད་ལ། མི་སྤོང་ཞིང་དེ་ཐམས་ཅད་དུ་གཟུང་བ་དང ། བཤད་པ་དང ། བཀླག་པ་དང ། ཁ་ཏོན་ལ་སོགས་པ་བྱེད་པ་དང ། ངག་གི་སྐྱོན་བཞི་པོ་ཚད་མེད་པ་རྣམ་པར་སྤོང་ཞིང་འཕགས་པའི་ལམ་ལ་སྐུར་པ་མི་འདེབས་པ་དང ། སེམས་ཅན་ལོག་པར་སྒྲུབ་པ་ལ་གནས་པ་རྣམས་ལ་སྙིང་བརྩེ་ཞིང་ཡོངས་སུ་བསྐྱང་བ་དང ། སྐྱོན་དེ་ལས་བཟློག་ཅིང་དགེ་བ་ལ་དགོད་པ་དང ། གཞན་གྱི་སྐྱོན་མཐོང་བའི་བརྗོད་པ་ཡལ་བར་འཇོག་པ་སྟེ། སྤོབས་པའི་བློ་གྲོས། སེམས་ཅན་ལས་ལྔ་པོ་དེ་དག་དང་ལྡན་པ་རྣམས་ནི། མི་རྣམས་ཀྱི་ནང་དུ་སྐྱེས་ནས་སྐལ་བ་བཟང་པོར་འགྱུར་ཞིང་ 473b ཞིང་ཁྱིམ་ཁོལ་དང་ལྡན་པ་དང ། ཁ་དྲི་ཞིམ་པ་དང ། ཡིད་གཞུངས་པ་དང ། མཐུན་པ་དང ། སྐྱེ་བོ་མང་པོ་དགའ་བ་དང ། མྱ་ངན་མེད་པ་དང ། སེམས་ཐ་མ་ལ་དུ་གནས་པ་དང ། ཁྲོ་བ་མེད་པ་དང ། གནོད་པ་མེད་པ་དང ། ཁ་དོག་དང་ལྡན་པ་དང ། གྲགས་པ་དང་ལྡན་པ་རྣམས་སུ་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་སོགས་ལ་ཤིན་ཏུ་ཤས་ཆེར་གུས་འབད་ཕ་མ་རྣམས་མཆོད་པས། །རྟག་ཏུ་ངག་སྐྱོན་ཀུན་བྲལ་འཇིག་རྟེན་དག་ཏུ་རྨད་དུ་བྱུང་བར་འགྱུར། །ཚིག་གི་ཡོན་ཏན་གཟུང་འོས་རྔ་སྒྲར་བཅས་ཤིང་ཚེ་རབས་ཀུན་ཏུ་ཕན། །ུཏྤལ་དྲི་དང་མཛེས་པའི་རླུང་ལྡན་ཁ་ཡིས་ཕྱོགས་སུ་སྙན་པ་གྲགས། །གང་དག་བདག་བྱམས་གཞན་མཚུངས་མི་ཕན་སྐྱོན་བརྗོད་སྡིག་པ་ངན་པ་ལས། །ཕྲལ་ནས་དགེ་བ་ཀུན་ལ་སེམས་ཅན་རྣམས་ནི་སྦྱོར་དུ་འཇུག་བྱེད་པ། །དེ་དག་འཇིག་རྟེན་ཐོབ་ནས་སྐལ་བ་བཟང་པོ་ཀུན་ཏུ་ཐམས་ཅད་དགའ། །ཤིན་ཏུ་ཡིད་འོང་རིན་ཆེན་ཡུལ་ཅན་བདེ་གནས་སྡིག་ལས་ལོག་པར་འགྱུར། །དམ་པའི་ཆོས་ནི་གཟུང་དང་བསྟན་བརྩོན་དེ་སེམས་བྱེད་ཅིང་དེས་པར་འགྱུར། །འདིར་ནི་སེམས་ཅན་ཀུན་ལ་ཕ་མ་འདྲ་བར་བྱམས་པའི་སེམས་ལྡན་འགྱུར། །འདས་པའི་དུས་སུ་ལུས་ཅན་ཀུན་ནི་ངེད་ཀྱི་རྩ་ལག་ཚོགས་གྱུར་ 474a ༄#། །ཅེས། །དེ་ལྟ་ཟླ་བ་ལྟ་བུའི་སེམས་སྦྱངས་དེ་དག་ལ་ནི་ཕན་པར་བྱེད། །འགྲན་དྲེགས་ཁྱད་གསོད་ལ་སོགས་རྣམ་པ་སྣ་ཚོགས་ཕན་ཚུན་སུན་འབྱིན་པའི། །སྡིག་པ་ཡོངས་སུ་སྤངས་ནས་དག་པའི་ཡིད་ཅན་སྐྱོན་རྣམས་ཀུན་སྦས་ནས། །སེམས་ཅན་ལྷག་པའི་བསམ་པ་དགེ་བས་སྙན་ཚོགས་ཕན་ཚུན་རྗོད་པར་བྱེད། །མྱུར་དུ་ལྷ་ཡི་དབང་ཕྱུག་མཚུངས་མེད་ཐོབ་ནས་སངས་རྒྱས་དགེ་བར་འགྱུར། །དེ་ནས་བཅོམ་ལྡན་འདས་ཀྱིས་ཡང་སྤོབས་པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས། སེམས་ཅན་ལས་ལྔ་དང་ལྡན་པ་རྣམས་ནི། མིའི་དམ་པ་ཐོབ་ནས་རྟག་ཏུ་སྐུར་པ་འདེབས་པ་ཐོབ་པར་འགྱུར་ཞིང་སྐྱེ་བོ་མང་པོ་མི་དགའ་བ་དང ། ཁ་དྲི་མི་ཞིམ་པ་དང ། སེམས་མི་དགའ་བ་དང ། གནོད་པ་མང་བ་དང ། ལུས་ཤིན་ཏུ་སྦྱངས་པ་མ་ཡིན་པར་འགྱུར་ཏེ། ལྔ་གང་ཞེ་ན། བརྫུན་དུ་སྨྲ་བ་དང ། བརྫུན་དུ་སྨྲ་བས་རྟག་ཏུ་གཞན་སླུ་བའི་སེམས་ལྷུར་ལེན་པ་དང ། ཆོས་ཀྱི་འབེལ་པའི་གཏམ་ཆེན་པོ་ལ་འདུས་པ་ན་ཆོས་ཀྱི་གཏམ་དེ་ལ་རྣམ་པར་སྨོད་པ་དང ། ཚངས་པ་མཚུངས་པར་སྤྱོད་པ་རྣམས་མཐོང་ན་དེ་དག་ལ་བརྙས་ཤིང་ཁྱད་དུ་གསོད་པ་དང ། དམའ་བའི་སེམས་སུ་བྱེད་པ་སྟེ། སྤོབས་པའི་བློ་གྲོས། སེམས་ཅན་ལས་ལྔ་པོ་དེ་དག་དང་ལྡན་པ་ 474b རྣམས་ནི། མིའི་དམ་པ་ཐོབ་ནས་རྟག་ཏུ་སྐུར་པ་འདེབས་པ་ཐོབ་པར་འགྱུར་ཞིང་སྐྱེ་བོ་མང་པོ་མི་དགའ་བ་དང ། མདོག་མི་སྡུག་པ་དང ། ཁ་དྲི་མི་ཞིམ་པ་དང ། སེམས་མི་དགའ་བ་དང ། གནོད་པ་མང་པ་དང ། ལུས་ཤིན་ཏུ་སྦྱངས་པ་མ་ཡིན་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སེམས་ཡིད་རྣམས་ཀྱིས་གཞན་སེམས་དྲག་ཏུ་འཁྲུག་དང་སྡིག་པ་རྣམས་བྱས་པས། །ལོག་པའི་ངག་དང་གཞན་ལ་གནོད་པར་དགའ་བ་ཐ་མ་རྣམས་སེམས་དང ། ལུས་ཀྱིས་སྡུག་བསྔལ་གཞལ་མེད་རྫོགས་པ་བར་མེད་ཉམས་སུ་མྱོང་བར་འགྱུར། །ལྕགས་ཀྱི་ལྕགས་ཀྱུ་ཆེན་པོ་རྣོན་པོ་རྣམས་ཀྱིས་ཉམ་ཐག་ལྕེ་འབྱིན་འགྱུར། །གཤིན་རྗེའི་དབང་ཕྱུག་གནས་སུའང་མི་རྣམས་ཤིན་ཏུ་ཟངས་བསྐོལ་ལྡུད་པར་འགྱུར། །དམྱལ་བར་མི་བདེན་ཚིག་ཅན་སྐྱེས་པ་དེ་དག་དགའ་བར་ཡོང་མི་འགྱུར། །གང་ཚེ་འདིར་ནི་ཚིག་བཟང་བྲལ་བ་རོ་ལྟར་ཁ་དྲི་མི་ཞིམ་ཞིང ། །འཇིག་རྟེན་མིག་ཏུ་ཡིད་འོང་བལྟ་ན་སྡུག་པ་མ་ཡིན་རྣམས་སུ་འགྱུར། །རྒྱལ་པོའི་ཕོ་བྲང་འཁོར་དུ་མི་སྙན་སྐུར་འདེབས་རྩོད་པའི་སྐྱོན་མང་ཞིང ། །དེ་དག་རྟག་ཏུ་སྐྱོན་གནས་མི་ནི་ས་ཡ་མང་པོས་གླེང་བར་འགྱུར། །སེམས་ཅན་རྫུན་སྨྲ་རྣམས་ཀྱིས་ཐ་མལ་སེམས་དང་ལུས་བདེ་མ་ཡིན་ཕྱིར། །སྔར་བཤད་ཉེས་ 475a ༄#། །འགྲོ་དེ་ཡི་འབྲས་བུ་སྡུག་བསྔལ་མང་པོ་སྤྱོད་པར་འགྱུར། །མི་ཉིད་སྤངས་ནས་དབང་མེད་མི་རྣམས་བདེ་བ་ཀུན་ལ་སླུ་བྱེད་པའི། །སེམས་ཅན་དམྱལ་བའི་འཇིག་རྟེན་འགྲོ་འགྱུར་དེ་ནས་ཤི་འཕོས་གྱུར་ནས་ནི། །འགྲོ་བ་ལྔ་པོའི་འཁོར་བའི་འཁོར་ལོ་རྩུབ་པར་དུད་འགྲོ་རྣམས་སུ་སྐྱེ། །དེ་ལྟར་ལུས་ཅན་འཁྱམས་པ་རྣམས་ཀྱི་སྡུག་བསྔལ་ཟད་པར་འགྱུར་བ་མེད། །དེ་ནས་བཅོམ་ལྡན་འདས་ཀྱིས་ཡང་སྤོབས་པའི་བློ་གྲོས་ལ་བཀའ་སྩལ་པ། སྤོབས་པའི་བློ་གྲོས། དགེ་སྦྱོང་དང ། རིགས་ཀྱི་བུ་དང ། རིགས་ཀྱི་བུ་མོ་ཉེ་བར་ཞི་བ་གཙོ་བོར་འཛིན་པའི་སེམས་ཅན་ཆོས་ལྔ་དང་ལྡན་པ་རྣམས་ནི། གང་དང་གང་དུ་སྐྱེ་བའི་སྐྱེ་བ་ཐམས་ཅད་དུ་རྟག་པར་སངས་རྒྱས་དང ། ཆོས་དང ། དགེ་འདུན་དང་ཕྲད་པ་ཐོབ་པར་འགྱུར་ཞིང ། སངས་རྒྱས་བཅོམ་ལྡན་འདས་རྣམས་མཐོང་ནས་ཀྱང་དེ་དག་ལས་ཆོས་ཀྱང་ཐོས་ནས་ཡིད་དགའ་ཞིང་ཅི་བསམ་པ་བཞིན་དུ་བྱང་ཆུབ་རྣམས་ཐོབ་པར་འགྱུར་ལ། ཅི་འདོད་པ་བཞིན་དུ་ཕུན་སུམ་ཚོགས་པ་རྣམས་ཀྱང་ཐོབ་པར་འགྱུར་ཏེ། ལྔ་གང་ཞེ་ན། འདི་ལྟ་སྟེ། བདག་ཉིད་དཀོན་མཆོག་གསུམ་ལ་སྐྱབས་སུ་སོང་ནས་གཞན་དག་ཀྱང་གསུམ་ལ་སྐྱབས་སུ་འགྲོ་བ་སྒྲུབ་པ་ལ་རྣམ་པར་འཇོག་པར་བྱེད་པ་དང ། རྣམ་པ་ 475b ཐམས་ཅད་ཀུན་ཏུ་རྫོགས་ཤིང་རྒྱས་ལ་རྒྱ་ཆེན་པོ་ལེགས་པར་བྱས་པའི་དེ་བཞིན་གཤེགས་པའི་སྐུ་གཟུགས་བྱེད་དུ་འཇུག་པ་དང ། མཁན་པོ་དང་སློབ་དཔོན་ཤེས་ཤིང་གུས་པ་དང་བཅས་པ་དང ། བཀའ་བློ་བདེ་བ་དང་མཐུན་པར་འཛིན་པར་སྒྲུབ་པ་དང ། ཀུན་ཏུ་ཐོགས་པ་མེད་པའི་འོད་ཟེར་རྣམས་ཀྱིས་སེམས་ཅན་ཐམས་ཅད་བདག་དང་འདྲ་ཞིང་བུ་གཅིག་པའི་བྱིས་པ་དང་འདྲ་བར་མཐོང་བ་དང ། ཇི་ལྟར་བརྩམས་པའི་མདོ་སྒྲུབ་པ་དང ། བཀླག་པ་དང ། ཁ་ཏོན་དང ། ལུང་མནོད་པ་དང ། བཤད་པ་རྣམས་ཡིད་ལ་བྱེད་པ་ཡངས་ཤིང་རྣམ་པ་སྣ་ཚོགས་པ་དག་གིས་བར་ཆད་མེད་པར་སྒོམ་པ་ལ་མངོན་པར་ཞེན་ཅིང་སྒྲུབ་པར་བྱེད་པ་སྟེ། སྤོབས་པའི་བློ་གྲོས། དགེ་སྦྱོང་དང ། རིགས་ཀྱི་བུ་དང ། རིགས་ཀྱི་བུ་མོ་ཉེ་བར་ཞི་བ་གཙོ་བོར་འཛིན་པའི་སེམས་ཅན་ཆོས་ལྔ་པོ་དེ་དག་དང་ལྡན་པ་རྣམས་ནི། གང་དང་གང་དུ་སྐྱེ་བའི་སྐྱེ་བ་ཐམས་ཅད་དུ་བར་ཆད་མེད་པར་སངས་རྒྱས་དང ། ཆོས་དང ། དགེ་འདུན་དཀོན་མཆོག་རྣམས་དང་མི་བྲལ་བར་འགྱུར་ཞིང ། སངས་རྒྱས་བཅོམ་ལྡན་འདས་མཐོང་ནས་ཀྱང་དེ་དག་ལས་ཆོས་ཀྱང་ཐོས་ནས་ཡིད་དགའ་ཞིང་ཅི་བསམ་པ་བཞིན་དུ་བྱང་ཆུབ་རྣམས་ཐོབ་པར་འགྱུར་ལ། ཅི་འདོད་པ་བཞིན་དུ་ཕུན་སུམ་ཚོགས་པ་རྣམས་ཀྱང་ཐོབ་པར་ 476a ༄#། །འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་དག་སངས་རྒྱས་ཡོན་ཏན་མཆོག་གི་ཆོས་ལ་གནས། །དེ་དག་ཉིད་ཀྱིས་སེམས་ཅན་ཐམས་ཅད་འདུལ་བར་བྱེད། །སངས་རྒྱས་སྐུ་གཟུགས་གཟུགས་ལེགས་རྣམས་ནི་བྱེད་པར་འགྱུར། །མཁས་པ་རྣམས་ནི་སློབ་དཔོན་ཚིག་ལ་མཆོད་པར་བྱེད། །གང་དག་ཕྱོགས་བཅུ་རྣམས་ཀྱི་འཇིག་རྟེན་མ་ལུས་ལ། །བདག་དང་བུ་གཅིག་བྱིས་པ་རྣམས་དང་འདྲར་མཐོང་བ། །དེ་དག་སྲེག་པ་ཀུན་ཏུ་མྱ་ངན་མེད་ངེས་འགྱུར། །ཤིན་ཏུ་རྣམ་དག་ཐུགས་མངའ་སངས་རྒྱས་རྣམས་ཀྱང་མཐོང ། །གང་དག་ཤེས་རབ་རིན་ཆེན་ཆེན་པོ་འབྱོར་མཛད་རྣམས། །ཉིན་དང་མཚན་དུ་དགེ་བ་ཀུན་ཏུ་སྤྱོད་པར་བྱེད། །འདིར་ནི་རྨད་དུ་བྱུང་བའི་འོད་དང་ལྡན་པ་རྣམས། །འཇིག་རྟེན་མུན་པ་ཆེ་ལ་སྣང་ལ་མཆོག་བྱེད་འགྱུར། ། ཀུན་ཏུ་ཆོས་རྣམས་ཐམས་ཅད་རབ་ཏུ་རྣམ་ཕྱེ་ནས། །སངས་རྒྱས་ལམ་ལས་མཆོག་ནི་གཞན་མེད་པར། །ངེས་པར་བྱས་ནས་ལྷ་དང་བཅས་པའི་འཇིག་རྟེན་གྱི། ། མཐར་ཐུག་འགྲོ་བར་འགྱུར་བའི་རྒྱུ་ནི་ཤེས་པར་འགྱུར། །དེ་ནས་ཚོང་དཔོན་སྤོབས་པའི་བློ་གྲོས་ཆོས་ཀྱི་རྣམ་གྲངས་འདི་ཐོས་ནས་ཚིམ་ཞིང་མགུ་སྟེ་ཡིད་རངས་ནས་ 476b རབ་ཏུ་དགའ་སྟེ། དགའ་བ་དང ། ཡིད་བདེ་བ་སྐྱེས་ནས་མི་སྐྱེ་བའི་ཆོས་ལ་བཟོད་པ་ཐོབ་ནས་ཚོང་དཔོན་གྱི་བུ་ལྔ་བརྒྱ་ཙམ་པོ་དང ། སོ་སོའི་གཡོག་འཁོར་ལྔ་བརྒྱ་ཙམ་པོ་དེ་དག་ནི། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་ཐོབ་བོ། །བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་དུ་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་ཇི་སྙེད་འདུས་པར་གྱུར་པ་དེ་དག་ཐམས་ཅད་ཀྱིས་ནི།་ཅི་བསམ་པ་བཞིན་གྱི་ཐེག་པ་རྣམས་ལ་སེམས་བསྐྱེད་དོ། །ཅི་འདོད་པ་བཞིན་དུ་ཕུན་སུམ་ཚོགས་པའང་ཐོབ་ཅིང ། མེ་ཏོག་དང ། སྤོས་དང ། ཕྲེང་བ་དང ། གོས་དང ། རྒྱན་ལ་སོགས་པ་དཔག་ཏུ་མེད་པ་རྣམས་ཀྱིས་བཅོམ་ལྡན་འདས་ལ་གཏོར་ཏོ། །དེ་ནས་ཚོང་དཔོན་སྤོབས་པའི་བློ་གྲོས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ངས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཁམས་གསུམ་པའི་བླ་མས་ཆོས་ལྔ་པོ་འདི་དག་ལེགས་པར་གསུངས་པ་ལེགས་སོ་ལེགས་སོ། །ཆོས་ལྔ་པོ་དེ་དག་ཐོས་ནས་འཁོར་འདི་ཡིད་བཞིན་དུ་ཐམས་ 477a ༄#། །ཅད་རྫོགས་པར་དོན་གྲུབ་པར་གྱུར་ལགས་སོ། །མ་འོངས་པའི་སེམས་ཅན་རྣམས་ཀྱང་འདི་ཉིད་ཐོབ་ནས་ནག་པོའི་ཕྱོགས་སྤངས་ཏེ་དཀར་པོའི་ཕྱོགས་ལ་ཞུགས་ཤིང་བརྟུལ་ཞུགས་འགྲུབ་པར་འགྱུར་ལགས་སོ། །བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་ཏུ་སང་བདག་གི་སྡུམ་པར་སྤྱན་འདྲེན་ན། བདག་ཅག་ལ་ཐུགས་བརྩེ་བའི་སླད་དུ་ཁྱོད་ཀྱིས་དེ་ལྟར་གནང་བར་མཛད་དུ་གསོལ། བཅོམ་ལྡན་འདས་ཀྱིས་ཚོང་དཔོན་སྤོབས་པའི་བློ་གྲོས་ལ་ཐུགས་བརྩེ་བའི་སླད་དུ་གནང་བ་མཛད་དོ། །དེ་ནས་ཚོང་དཔོན་སྤོབས་པའི་བློ་གྲོས་བཅོམ་ལྡན་འདས་ཀྱིས་གནང་བར་རིག་ནས་ཚིམ་ཞིང་མགུ་སྟེ་ཡིད་རངས་ནས་རབ་ཏུ་དགའ་སྟེ། དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་གཡོག་འཁོར་དང་བཅས་ཏེ་བཅོམ་ལྡན་འདས་ཀྱི་ཐད་ནས་སོང་ངོ ། །དེ་རང་གི་ཁྱིམ་དུ་སོང་ནས་ཕ་མ་གཉིས་ཀྱི་རྐང་པ་ལ་ཕྱག་བྱས་ཏེ་ཐལ་མོ་སྦུག་སྦུག་པོར་སྦྱར་ནས་འདི་སྐད་ཅེས་སྨྲས་སོ། །ཡབ་ཡུམ ། འདི་ལྟར་གང་འཇིག་རྟེན་ན་ཤིན་ཏུ་དཀོན་མཆོག་གཤེགས་པ། བླ་ན་མེད་པ། ཆོས་ཀྱི་རྒྱལ་པོ། ཁམས་གསུམ་པ་ཐམས་ཅད་ལས་འདས་པ། བཅོམ་ལྡན་འདས་དགེ་སློང་གི་ 477b དགེ་འདུན་དང་ཐབས་ཅིག་ཏུ་སང་བདག་གིས་གདུགས་ཚོད་ལ་སྤྱན་དྲངས་ན། དེས་ཀྱང་བདག་ཅག་ལ་ཐུགས་བརྩེ་བའི་སླད་དུ་གནང་ལགས་ཀྱི། མཁྱེན་པར་མཛོད་ཅིག ། དེ་ནས་སྤོབས་པའི་བློ་གྲོས་ཀྱི་ཕ་མ་དག་ཡིད་དགའ་སྟེ་འདི་སྐད་ཅེས་སྨྲས་སོ། །བུ། ལེགས་སོ། །ཁྱོད་ཀྱིས་ལགས་པར་བྱས་སོ། །ཞེས་མངོན་པར་བསྟོད་དེ། དེ་བཞིན་གཤེགས་པ་མཆོད་པའི་ལས་ལ་སྤྲོ་བར་གྱུར་ཏེ། དེ་ནས་སྤོབས་པའི་བློ་གྲོས་ཀྱིས་རང་གི་ཆུང་མ་པདྨ་གཡོག་འཁོར་དང་བཅས་པ་ལ་བསྒོ་བ། བཟང་མོ། །ཁྱོད་ཀྱིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་དང་བཅས་པའི་དོན་དུ་བཟའ་བ་དང་བཏུང་བ་རོ་བརྒྱ་དང་ལྡན་པ་མང་བ་དང ། བསོད་པར་སྦྱོར་ཅིག་།སྦྱར་ནས་ཀྱང་ཁྱིམ་ཐམས་ཅད་ཆག་ཆག་གདབ་པ་དང ། ཕྱག་དར་བྱ་བ་དང ། བླ་བྲེ་བྲེ་བ་དང ། དར་གྱི་ལྡ་ལྡི་གདགས་པ་དང ། མེ་ཏོག་ཆལ་པར་དགྲམ་པ་དང ། བདུག་སྤོས་དྲི་ཞིམ་པོས་བདུག་པར་བྱེད་དུ་བཅུག་ལ། དེ་བཞིན་གཤེགས་པ་དགེ་སློང་གི་དགེ་འདུན་དང་ཐབས་ཅིག་པའི་གདན་ཅི་འོས་སུ་བཏིང་སྟེ་མཆོད་ཡོན་དང་ཞབས་ལ་དབུལ་བ་སྤྱན་སྔར་བཞག་པས་བཅོམ་ལྡན་འདས་དམ་པ་དེ་ལ་སྡོད་ཅིག་ཅེས་བསྒོ་སྟེ། སྤོབས་པའི་བློ་གྲོས་མཛའ་བཤེས་དང ། བློན་པོ་དང ། 478a ༄#། །ཉེ་དུ་དང ། རྒན་རབས་ལ་སོགས་པ་དང་ལྷན་ཅིག་འགྲོགས་ཤིང་ཇི་སྐད་སྨྲས་པ་ཐམས་ཅད་བྱས་སོ། །དེ་ནས་བཅོམ་ལྡན་འདས་དེའི་མཚན་མོ་འདས་ནས་དགེ་སློང་གི་དགེ་འདུན་དང་ཐབས་ཅིག་ཏུ་རྒྱལ་བུ་རྒྱལ་བྱེད་ཀྱི་ཚལ་སྐྱེད་མོས་ཚལ་ཆེན་པོ་ནས་བྱུང་ནས་སེམས་ཅན་རྣམས་ལ་ཐུགས་བརྩེ་བས་དེ་བཞིན་གཤེགས་པའི་རྫུ་འཕྲུལ་གྱི་དཔལ་རྣམ་པར་འཕྲུལ་པ་ཡང་དག་པར་བསྟན་པའི་རོལ་པས་ཆོ་འཕྲུལ་དང་བཅས་པས་མཉན་དུ་ཡོད་པའི་གྲོང་ཁྱེར་ཆེན་པོར་གཤེགས་སོ། །གཤེགས་ནས་ཀྱང་རིམ་གྱིས་སྤོབས་པའི་བློ་གྲོས་ཀྱི་ཁྱིམ་ག་ལ་བ་དེ་ལོགས་སུ་བཞུད་དོ། །དེ་ནས་སྤོབས་པའི་བློ་གྲོས་གཡོག་འཁོར་དང་བཅས་པས་བཅོམ་ལྡན་འདས་བསུས་ནས་མཆོད་ཡོན་དང་ཞབས་ལ་དབུལ་བས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་བཅོམ་ལྡན་འདས་ཞབས་འབྲིང་བ་དང་བཅས་པར་ཁྱིམ་གྱི་ནང་དུ་གཤེགས་ཏེ། བཅོམ་ལྡན་འདས་ནི། ཅི་འོས་པའི་གདན་མཆོག་ལ་བཞུགས་སོ། །དགེ་སློང་གི་དགེ་འདུན་ཅི་འོས་པ་ལ་འཁོད་དོ། །དེ་ནས་སྤོབས་པའི་བློ་གྲོས་ཀྱི་ཕ་མ་དང ། སླས་དང ། མཛའ་བཤེས་དང ། བློན་པོ་དང ། ཉེ་དུ་དང ། རྒན་རབས་རྣམས་ནི། ཡིད་དགའ་ཞིང་འདུད་ལ་བླ་མ་ལ་གུས་པ་དང ། 478b གཅེས་པར་བྱེད་པ་ཆེན་པོས་བཅོམ་ལྡན་འདས་དགེ་སློང་གི་དགེ་འདུན་དང་ཐབས་ཅིག་པ་ལ་འབྲིམ་པར་རྩོམ་མོ། །སྤོབས་པའི་བློ་གྲོས་ནི། མེ་ཏོག་དང ། སྤོས་ཆུར་བཅས་པས་བཀང་བའི་རིལ་བ་ཐོགས་ནས་སྟོན་པའི་སྤྱན་སྔར་འདུག་པར་གྱུར་ཏོ། །ཡང་དེའི་ཚེ་སྡུག་བསྔལ་བའི་གྲོགས་པོ་གཉིས་ཤིག་སྤོབས་པའི་བློ་གྲོས་ཀྱི་ཁྱིམ་དུ་ཕྱིན་པར་གྱུར་ནས་དེ་གཉིས་ལས་གཅིག་ནི། དགེ་འདུན་གྱི་ནང་དུ་ཞུགས་སོ། །དེའི་ཚེ་དགེ་སློང་ཐམས་ཅད་ལ་བཟའ་བ་དང་བཏུང་བ་འབྱོར་ཚོགས་ཞེས་མ་སྨྲས་ལ། བཅོམ་ལྡན་འདས་ཀྱིས་ཀྱང་རྗེས་སུ་ཐུགས་རང་བ་མ་གསུངས་པས། དེ་གང་གིས་ཀྱང་ཅིའང་མ་བྱིན་ནས་དེ་ཁྲོས་ཏེ་ཕྱིར་བྱུང་ནས་འདི་སྙམ་དུ་ཀྱེ་མ་སྡུག་བསྔལ་བ་བདག་ལ་གང་གིས་ཅིའང་མ་བྱིན་པ་ནི། དགེ་སྦྱོང་བདག་ཉིད་ངན་པ་རྣམས་ཏེ། སེམས་ཉེ་བར་ཞི་བ་མ་ཡིན་ཞིང་སྙིང་རྗེ་མེད་ལ་བྱམས་པའི་སེམས་ལྡན་པ་མ་ཡིན་པ་དག་གོ་།གང་དེ་དག་ལ་བྱིན་ཡང་འབྲས་བུ་མེད་པ་དེ་ལྟ་བུ་དག་ལ་སྦྱིན་པར་བྱེད་པ་ནི། སྦྱིན་བདག་བླུན་པོ་སྟེ། གལ་ཏེ་བདག་རྒྱལ་པོར་གྱུར་ན། ཐམས་ཅད་ཀྱི་མགོ་ལྕགས་ཀྱི་འཁོར་ལོས་གཅད་དོ། ། སྙམ་དུ་སེམས་པར་གྱུར་ཏོ། །དེ་ནས་དེའི་འོག་ཏུ་དགེ་སློང་ཐམས་ཅད་ལ་བཟའ་བ་དང ། བཅའ་བ་དག་འབྱོར་ཚོགས་ཞེས་བྱས་ཤིང ། བཅོམ་ལྡན་འདས་ཀྱིས་ཀྱང་རྗེས་སུ་ 479a ༄#། །ཐུགས་རངས་པར་མཛད་པ་དང ། གཅིག་ཤོས་འོངས་པར་གྱུར་ཏོ། །དེས་ནི། བཟའ་བ་དང་བཏུང་བ་མང་བ་དང ། བསོད་པ་ཐོབ་ནས་དེ་ཡིད་རངས་ཏེ་ཕྱིར་བྱུང་ནས་འདི་སྙམ་དུ་ཀྱེ་མ་སྡུག་བསྔལ་བ་བདག་ལ་གང་དག་གིས་བཟའ་བ་དང་བཏུང་བ་མང་བ་དང ། བསོད་པ་བྱིན་པ་ནི། དགེ་སྦྱོང་བདག་ཉིད་ཆེན་པོ་རྣམས་ཏེ། སྙིང་བརྩེ་བར་བྱེད་ལ་སེམས་ཉེ་བར་ཞི་བ་ཡིན་ཞིང་བྱམས་པའི་བདག་ཉིད་ཅན་དག་གོ་།འདིས་ནི། བདག་ཞག་བདུན་དུ་ཚིམ་པར་འགྱུར་བར་བྱས་སོ། །གང་འདི་དག་ལ་བྱིན་ན་འབྲས་བུ་ཆེ་བ་སྦྱིན་གནས་ཆེན་པོ་འདི་ལྟ་བུ་དག་ལ་སྦྱིན་པར་བྱེད་པ་ནི། སྦྱིན་བདག་ཆེན་པོ་མཁས་པ་སྟེ། ལེགས་སོ། །གལ་ཏེ་བདག་རྒྱལ་པོར་གྱུར་ན།་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་ཞག་བདུན་དུ་བསྙེན་བཀུར་ཐམས་ཅད་ཀྱིས་རིམ་གྲོ་བྱེད་པར་གྱུར་ཅིག་སྙམ་དུ་སེམས་པར་གྱུར་ཏོ། ། དེ་ནས་བཅོམ་ལྡན་འདས་གདུགས་ཚོད་གསོལ་ནས་གསང་སྡེར་གྱུ་སྟེ་ཕྱག་བཅབས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། དེང་ཕྱིན་ཆད་བཟའ་བ་དང ། བཏུང་བ་མ་བླངས་པ་ཉིད་དུ་རྗེས་སུ་ཡི་རང་བརྗོད་ཅིག་།དེ་ནས་སྤོབས་པའི་བློ་གྲོས་གཡོག་འཁོར་དང་བཅས་ཏེ་བཅོམ་ལྡན་འདས་ཀྱི་སྤྱན་སྔར་ 479b འདུག་གོ་།བཅོམ་ལྡན་འདས་ཀྱིས་དེ་ལ་ཡང་དག་པར་དགའ་བ་དང ། ཡང་དག་པར་གཟངས་བསྟོད་པ་དང ། ཡང་དག་པར་འཛིན་དུ་གཞུག་པ་སྔོན་དུ་མཛད་པའི་ཆོས་ཀྱི་གཏམ་སེམས་ཅན་མང་པོའི་དགེ་བའི་རྩ་བ་རྣམ་པ་སྣ་ཚོགས་བསྐྱེད་པ་མཛད་དོ། གདན་ལས་བཞེངས་ནས་བཞུད་དེ་རྒྱལ་བུ་རྒྱལ་བྱེད་ཀྱི་ཚལ་དུ་གཤེགས་ནས་དེ་ན་བཞུགས་སོ། །དེ་ནས་སྡུག་བསྔལ་བ་དེ་གཉིས་འཁོར་འཁོར་འཁྱམས་འཁྱམས་ཏེ་ཡུལ་གཞན་ཞིག་ཏུ་སོང་ནས་ཕ་ཟད་ཚུ་ཟད་ཙམ་གྱི་ཕྱོགས་སུ་ཉལ་བར་གྱུར་ཏོ། ། དེར་བསོད་ནམས་ཀྱི་ལས་ཅན་དེ་ལ་སྟེང་གི་ནམ་མཁའ་ལ་གྲིབ་མའི་དོན་དུ་སྤྲིན་གྱི་བླ་བྲེ་གློག་དང་རླུང་འབྱུང་བ་དང་བཅས་པ་རབ་ཏུ་གནས་པར་གྱུར་ཏོ། །དེའི་ཚེ་ཡུལ་དེ་ན་རྒྱལ་པོ་གང་ཡིན་པ་དེ་འཆི་བའི་དུས་བྱས་སོ། །དེ་ན་གང་རྒྱལ་སྲིད་ལ་དབང་བསྐུར་བར་བྱ་བའི་རྒྱལ་པོའི་མཚན་དང་ལྡན་པའང་གཞན་མེད་དོ། །དེ་ན་ཚོང་དཔོན་དང ། གྲོང་མི་དང ། ཡུལ་མི་དང ། བློན་པོ་ཆེན་པོ་དང ། བློན་པོ་དང ། སྒོ་བ་དང ། འཁོར་བ་ན་འཁོད་པ་རྣམས་ནི། མཚན་མཁན་དང ། ལྟས་མཁན་དང་སྐར་མ་དང ། གཟའ་སྤྱོད་པ་ལ་མཁས་པ་ལ་རྒྱལ་པོར་འགྱུར་བ་སུ་ཡོད་ཅེས་བརྩོན་པར་གྱུར་ཅིང་འདྲིའོ། །དེས་སྨྲས་པ། སྐྱེས་བུ་དབུལ་པོ་མཚན་དང་ལྡན་པ་ཞིག་ 480a ༄#། །ཡོད་དེ།་དེ་ནི། རྒྱལ་པོར་འགྱུར་རོ། །དེ་ནས་དེ་དག་རྒྱན་ཐམས་ཅད་ཀྱིས་བརྒྱན་པ་རྒྱལ་པོ་ལ་འོས་པ་རིན་ཐང་ཆེ་བའི་ཁྲི་སྟན་བཟང་པོ་གསེར་གྱི་རྐང་རྟེན་དང་བཅས་པ་དང ། ཡུ་བ་ནོར་བུ་ལས་བྱས་པའི་གདུགས་དཀར་པོ་དང ། ཡུ་བ་གསེར་ལས་བྱས་ཤིང་ནོར་བུ་དང་ལྡན་པའི་རྔ་མའི་བསིལ་ཡབ་དང ། སྤོས་ཆུས་བཀང་བའི་བུམ་པ་དུ་མ་དང ། མེ་ཏོག་དང ། རྒྱན་ཕྲེང་དང ། གོས་དང ། དབུ་རྒྱན་དང ། ཐོད་དང་བཅས་པ་ལ་སོགས་པའི་རྒྱན་དང ། སྤོས་ཀྱི་ཕུར་མ་དང ། སློ་མ་དག་ཐོགས་ཏེ་སོལ་སྙན་དང ། ཕེག་རྡོབ་པ་དང ། གླུ་དབྱངས་དང་བཅས་པ་དག་དང ། རྒྱལ་པོའི་ཕོ་བྲང་འཁོར་ནས་བྱུང་སྟེ་ཀུན་ནས་དེ་ཀུན་ཏུ་བཙལ་ཏོ། །ལྟས་མཁན་དེས་སྤྲིན་གྱི་ཚོགས་ཀྱིས་བཀབ་པའི་ཕྱོགས་དེ་མཐོང་སྟེ། མཐོང་ནས་ཀྱང་དེ་དག་ལ་སྨྲས་པ། གྲོགས་པོ་དག་།ཁྱེད་ཅག་གིས་སྤྲིན་སྔོན་པོའི་དཀྱིལ་འཁོར་གྱིས་ཁེབས་པ་དགའ་ཞིང་གསལ་བའི་ཕྱོགས་དེ་མཐོང་ངམ། དེ་དག་གིས་སྨྲས་པ། གྲོགས་པོ། །མཐོང་ངོ ། དེས་སྨྲས་པ།་དེ་ན་རྒྱལ་པོའི་མཚན་དང་ལྡན་པའི་སྐྱེས་བུ་དེ་འདུག་སྟེ། དེའི་བསོད་ནམས་ཀྱི་ལས་ཀྱིས་གྲིབ་མའི་དོན་དུ་སྤྲིན་དེ་དག་འདུས་སོ། །དེ་ནས་དེ་དག་དེར་དོང་ནས་ 480b སིལ་སྙན་དང ། གླུ་དབྱངས་ཀྱི་སྒྲས་སྤྲན་ཏེ་བཏུད་ནས་དེ་ལ་འདི་སྐད་ཅེས་སྨྲས་སོ། །དབང་བསྐུར་བ་བཞེས་ལ་རྒྱལ་པོར་གྱུར་ཅིག་།དེ་ས་སྨྲས་པ། ཁོ་བོ་ལྟ་བུ་རྒྱལ་པོའི་འོས་ག་ལ་ཡིན། དེ་དག་གིས་སྨྲས་པ། བསོད་ནམས་ཀྱི་ལས་ཅན་ཁྱོད་དེ་སྐད་མི་ཟེར་བར་གདོན་མི་ཟ་བར་རྒྱལ་པོ་བྱ་དགོས་སོ། །སྨྲས་པ། དེ་བཞིན་དུ་གྱུར་ཅིག། དེ་ནས་དེ་དག་གིས་མལ་གྱི་རྐང་རྟེན་ལ་རྐང་པ་བཞག་པ་དེ་སྟན་བཟང་པོ་ལ་འདུག་ཏུ་བཅུག་ནས་བཀྲ་ཤིས་ཐམས་ཅད་ཀྱིས་རྒྱས་པར་བྱེད་ཅིང་དབང་བསྐུར་ཏེ། དབུ་རྒྱན་དར་ཐོད་ཅན་ལ་སོགས་པའི་རྒྱན་རྣམས་ཀྱིས་བརྒྱན་ནས་ཤིང་རྟའི་མགོ་ལོགས་སུ་གདུགས་ཆེན་པོ་བསྒྲེངས་ཏེ་བཙུགས་ཤིང་ཡུ་བ་གསེར་ལས་བྱས་པ་ནོར་བུ་ཅན་གྱི་རྔ་མའི་བསིལ་ཡབ་དག་གིས་གཡོབ་ཅིང ། ལྷ་རྒྱལ་བར་གྱུར་ཅིག་།རྒྱལ་བར་གྱུར་ཅིག་ཅེས་ཀུན་ནས་མངོན་པར་བསྟོད་དེ་རྒྱལ་པོ་ཕོ་བྲང་འཁོར་དུ་ཁྲིད་དོ། །དེ་ནས་རྒྱལ་པོའི་ཤིང་རྟ་དེ་སྒྱུར་བའི་འཁོར་ལོས་བཀྲེན་པ་གཅིག་ཤོས་གཉིད་ལོག་པའི་མགོ་ཆད་དོ། །དེ་ནས་བསོད་ནམས་ཀྱི་ལས་ཅན་དེའང་རྒྱལ་སྲིད་ལ་གནས་པར་གྱུར་ཏོ། །དེའི་རྒྱལ་སྲིད་དེའང་ཡམས་ཀྱི་ནད་མེད་པ་དང ། གནོད་པ་མེད་པ་དང ། འབྱོར་བ་དང ། རྒྱས་པ་དང ། བདེ་བ་དང ། ལོ་ལེགས་པ་དང ། སྐྱེ་བོ་དང་མི་མང་པོས་གང་བར་ 481a ༄#། །གྱུར་ཏོ། །རྒྱལ་པོའི་མིང་གིས་ཡོན་ཏན་ཐམས་ཅད་འབྱོར་ཅིང་ལྡན་པར་གྱུར་ལ། དགའ་མགུར་སྤྱོད་པ་དེ་འདི་སྙམ་དུ་འདི་གང་གི་མཐུ་ཡིན། བདག་གི་རྒྱལ་སྲིད་སྐལ་བ་བཟང་པོ་དང་ལྡན་པ་འདི་གང་གིས་བྱུང་བར་གྱུར་སྙམ་པ་དང ། དེ་སངས་རྒྱས་ཀྱི་མཐུས་སྔོན་གྱི་ལས་མངོན་པར་འདུ་བྱས་པ་དེ་ཐམས་ཅད་རྗེས་སུ་དྲན་ནོ། །ཡང་དག་པར་དྲན་ནས་ཀྱང་བཅོམ་ལྡན་འདས་ཀྱི་ཐད་དུ་བཅོམ་ལྡན་འདས་བདག་ཅག་སེམས་ཅན་མང་པོ་གཞན་རྣམས་ལ་ཐུགས་བརྩེ་བའི་སླད་དུ་ཚུར་གཤེགས་སུ་གསོལ་ཞེས་ཕོ་ཉ་ཞིག་བཏང་ངོ ། །ཕོ་ཉ་བཏང་ནས་ཀྱང་རྒྱལ་བུ་རྒྱལ་བྱེད་ཀྱི་ཚལ་གྱི་བར་དང ། རང་གི་ཁྱིམ་གྱི་བར་དུ་བར་དེར་བཅོམ་ལྡན་འདས་ཀྱི་ཐམས་ཅད་དང་ལྡན་པའི་ལམ་ཆག་ཆག་བཏབ་ཅིང་ཕྱག་དར་བྱས་ཏེ་མེ་ཏོག་ཆལ་བར་བཀྲམ་ནས་གདུགས་དང ། རྒྱལ་མཚན་དང ། བ་དན་དང ། རྟ་བབས་བཙུགས་ཤིང་པོ་ཕོར་དག་གིས་བདུགས་ནས་མངོན་པར་བརྒྱན་ཏེ་བཅོམ་ལྡན་འདས་ཀྱང་དེ་ལ་ཐུགས་བརྩེ་བའི་སླད་དུ་གཤེགས་སོ། །དེ་ནས་རྒྱལ་པོ་དེ་གྲོང་ཁྱེར་གྱི་མི་དང ། ཡུལ་མི་དང་བཅས་ཤིང་བློན་པོ་ཆེན་པོ་དང ། བློན་པོ་དང ། སྒོ་བ་དང ། འཁོར་གྱི་ཚོགས་དང་བཅས་པས་བསུའོ། །དེ་ནས་བཅོམ་ལྡན་འདས་ 481b ཀྱི་ཞབས་ལ་མེ་ཏོག་དང ། སྤོས་དང ། མེ་ཏོག་ཕྲེང་དང ། བྱུག་པ་དང ། ཕྱེ་མས་བསྒོས་པའི་སློ་མ་དཔག་ཏུ་མེད་པས་མཆོད་དེ། དགེ་སློང་གི་དགེ་འདུན་དང་བཅས་པའི་ཞབས་ལ་ལུས་ཐམས་ཅད་ཀྱིས་ཕྱག་བཙལ་ནས་འཁོར་དང་བཅས་ཏེ་བཅོམ་ལྡན་འདས་ལ་བླ་མ་ལ་གུས་པ་དང ། གཅེས་པར་བྱེད་པ་ཆེན་པོ་མཆོག་གིས་བཅོམ་ལྡན་འདས་དགེ་འདུན་དང་ཐབས་ཅིག་ཏུ་རང་གི་ཁྱིམ་གྱི་ནང་རིན་པོ་ཆེ་ཐམས་ཅད་ཀྱིས་བརྒྱན་པ་སྐྱེད་མོས་ཚལ་ཆེན་པོས་ཡོངས་སུ་བསྐོར་བར་གཤེགས་སུ་གསོལ་ནས་ཞག་བདུན་དུ་བདེ་བའི་ཡོ་བྱད་ཐམས་ཅད་ཀྱིས་རིམ་གྲོ་བྱས་སོ། །དེ་ནས་རྒྱལ་པོ་དེས་བཅོམ་ལྡན་འདས་གདུགས་ཚོད་གསོལ་ནས་གསང་སྡེར་གྱུ་སྟེ་ཕྱག་བཅབས་པར་རིག་ནས་ཆོས་མཉན་པའི་ཕྱིར་གཡོག་འཁོར་དང་བཅས་པར་བཅོམ་ལྡན་འདས་ཀྱི་སྤྱན་སྔར་འདུག་སྟེ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ནི། དམའ་བ་དང ། དབུལ་བ་ལགས་ན། བདག་གི་རྒྱལ་སྲིད་ཕུན་སུམ་ཚོགས་པ་འདི་ག་ལས་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། མཉན་དུ་ཡོད་པའི་གྲོང་ཁྱེར་ཆེན་པོ་ན་སྦྱིན་བདག་ཆེན་པོ་སྤོབས་པའི་བློ་གྲོས་ཞེས་བྱ་བ་ཞིག་ཡོད་དེ། དེས་དུས་གཞན་ཞིག་ན་རང་གི་ཁྱིམ་དུ་སངས་ 482a ༄#། །རྒྱས་ལ་སོགས་པ་དགེ་སློང་གི་དགེ་འདུན་གདུགས་ཚོད་གསོལ་ཏོ། །དེ་ནས་དེར་སྡུག་བསྔལ་བ་གཉིས་ཤིག་ལྷགས་ཞེས་བྱ་བ་ནས་རྒྱས་པར་སྔ་མ་བཞིན་ཏེ། གཅིག་གི་མགོ་ཁྱེད་ཀྱིས་ཤིང་རྟའི་འཁོར་ལོས་ཆོད་པ་ཞེས་བྱ་བའི་བར་དུའོ། །དེའང་ཤི་འཕོས་ནས་སེམས་ཅན་དམྱལ་བར་སྐྱེས་ཏེ།་དེར་སྐྱེས་པ་དེའི་མགོ་སྐད་ཅིག་སྐད་ཅིག་ལ་སྐྱེས་སོ་ཅོག་ན་ལྕགས་ཀྱི་འཁོར་ལོ་འབར་བས་བཅད་དོ། །དེའང་དེ་ནས་བསྐལ་པ་བྱེ་བས་ཐར་པར་འགྱུར་རོ། །ཁྱོད་ཀྱིས་ནི། རྒྱལ་པོའི་དཔལ་ཐོབ་སྟེ། བདག་དེ་ལྟ་བུར་གྱུར་ནས་སངས་རྒྱས་ལ་སོགས་པ་དགེ་སློང་གི་དགེ་འདུན་ཞག་བདུན་དུ་གདུགས་ཚོད་གསོལ་བར་གྱུར་ཅིག་ཅེས་ཁྱོད་ཀྱིས་སྨོན་ལམ་བཏབ་སྟེ། ཁྱོད་ཀྱི་བསམ་པ་དེའང་རྫོགས་སོ། །དེ་ཕྱིན་ཆད་ནི། ཚེ་རབས་དཔག་ཏུ་མེད་པ་ཐམས་ཅད་དུ་ཕུན་སུམ་ཚོགས་པ་ཆེས་ཁྱད་པར་དུ་འཕགས་པ་དག་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །འཇིག་རྟེན་ནག་པོ་འབྱུང་བའི་ཕྱིར། །ཡིད་ནི་དུག་གི་རྩ་བ་ཡིན། །ཉེས་པར་སྨྲ་རྣམས་འབྱུང་བའི་ཕྱིར། ཁ་ནི་སྡིག་པའི་སྒོ་ཉིད་དོ། །སེམས་ཀྱིས་ 482b སྣ་ཚོགས་སེམས་པར་བྱེད། །དེ་ནས་ཚིག་ཏུ་སྨྲ་བར་འགྱུར། །ངག་ཡིད་དག་གིས་སྡིག་བྱས་པ། །ལུས་ཀྱིས་སྡུག་བསྔལ་སྦྱིན་པར་བྱེད། །ཕན་དང་མི་ཕན་མ་བསམ་པར། །བློ་གྲོས་མེད་པས་སྡིག་བྱེད་པ། །དེས་ན་སྡུག་བསྔལ་སྣོད་འགྱུར་ཏེ། །ཉོན་མོངས་པ་དག་དེ་ལྟར་འགྱུར། །མཁས་པ་རྣམས་ཀྱི་མགོ་བོ་དག་།ཡིད་ཀྱིས་གཅོད་པར་འདོད་པ་དེ། །བློ་གྲོས་ངན་པ་མི་ཤེས་པའི། །མགོ་ནི་འཁོར་ལོས་ཡང་དག་གཅོད། །དཔལ་ལྡན་ཡིད་འདི་ཁོ་ནས་ནི། །ཆོས་དཀར་བདུད་རྩི་སྟེན་པ་ཡི། །སེམས་ཅན་བསོད་ནམས་བྱས་དགེ་རྣམས། །ལྷ་ཡི་འཇིག་རྟེན་རྣམས་སུ་ཁྲིད། །འདིར་ནི་སྙིང་གིས་ཀུན་བསྡམ་ནས། །ཚིག་ཏུ་བརྗོད་པས་ལེགས་སྨྲས་པ། །དེ་ཕྱིར་དེ་ནི་ལུས་ཀྱིས་སུ། །བསོད་ནམས་མཛོད་ནི་ལེན་པར་འགྱུར། །མི་ཡིས་བློ་ནི་སྔོན་བཏང་སྟེ། །ལས་དགེ་མི་དགེ་རྣམས་ཕྱེ་ནས། །གལ་ཏེ་བསོད་ནམས་ཆེ་བྱེད་ན། ། རྟག་ཏུ་རབ་ཏུ་ལྷ་དེར་འགྱུར། །སེམས་ཀྱིས་མི་དགེ་བ་ཡི་ལས། །རྟག་ཏུ་ཡོངས་སུ་སྤངས་ནས་ནི། །རབ་ཏུ་དགའ་བས་བསོད་ནམས་ཉིད། །མི་ཡིས་བྱ་སྟེ་སྡིག་པ་མིན། །ཚེ་རབས་བྱེ་བ་གྲངས་མེད་པར། །འཁོར་ལོས་བསྒྱུར་སོགས་གོ་འཕང་གི་།ལྷ་མིའི་ནང་དུ་རྒྱལ་པོའི་དཔལ། །ཐམས་ཅད་ཐོབ་ནས་ཁྱོད་བཞིན་ནོ། ། 483a ༄#། །མི་ཡི་དབང་ཕྱུག་དུས་ཀུན་ཏུ། །སྲིད་རྣམས་སྙིང་པོ་མེད་ཤེས་ནས། །ཁྱོད་ཀྱིས་སངས་རྒྱས་ཆོས་རྣམས་ལ། །མངོན་པར་བརྩོན་པ་མཐའ་ཡས་བྱ། །དེ་ནས་བཅོམ་ལྡན་འདས་ལ་རྒྱལ་པོ་དེས་ཡང་དག་ཕུལ་གྱི་ཆོས་བསྟན་པ་འདི་ཐོས་ནས་མཆོག་ཏུ་ཡིད་བྱུང་སྟེ་འཁོར་དང་བཅས་པས་རྒྱུན་དུ་ཞུགས་པའི་འབྲས་བུ་ཐོབ་བོ། །གཞན་སྟོང་ཕྲག་མང་པོ་ཞིག་གིས་ནི། བཅོམ་ལྡན་འདས་མཐོང་བ་དང ། ཆོས་མཉན་པས་ལྷ་དང་མིའི་ཕུན་སུམ་ཚོགས་པ་རྣམ་པ་སྣ་ཚོགས་ཐོབ་པར་འགྱུར་བ་དང ། ཐར་པའི་ཆ་དང་མཐུན་པའི་དགེ་བའི་རྩ་བ་དག་བསྐྱེད་དོ། །དེ་ནས་བཅོམ་ལྡན་འདས་ཀྱིས་དེར་གང་སེམས་ཅན་རྣམས་ཀྱི་དོན་མཛད་པ་དེ་ཐམས་ཅད་རྒྱས་པར་མཛད་ནས་རྒྱལ་བུ་རྒྱལ་བྱེད་ཀྱི་ཚལ་དུ་བྱོན་ཏེ་གཙུག་ལག་ཁང་གི་སྐྱབས་ཤིན་ཏུ་དགེ་སློང་གི་དགེ་འདུན་གྱི་ནང་དུ་སངས་རྒྱས་ཀྱི་གདན་བཤམས་པ་ཉིད་ལ་བཞུགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་ཀྱིས་ཆོས་ཀྱི་རྣམ་གྲངས་འདི་ཟུངས་ཤིག་།ཆོངས་ཤིག་།ལྷོགས་ཤིག་།གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་ཅིག་།ཀུན་དགའ་བོ། རིགས་ཀྱི་ 483b བུའམ། རིགས་ཀྱི་བུ་མོ་གང་སུ་དག་ཆོས་ཀྱི་རྣམ་གྲངས་འདི་འཛིན་པར་བྱེད་པ་དེ་ཐམས་ཅད་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱམས་པ་ལས་ཇི་ལྟར་སྨོན་ལམ་བཏབ་པའི་ཐེག་པ་རྣམས་ལ་ལུང་བསྟན་པ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ།་ཀུན་དགའ་བོ། །དེའི་ཕྱིར་ཆོས་ཀྱི་རྣམ་གྲངས་འདི་ནི། ལས་རྣམ་པར་འབྱེད་པ་བསྟན་པ་ཞེས་བྱ་བར་ཟུངས་ཤིག་།ཚོང་དཔོན་སྤོབས་པའི་བློ་གྲོས་ཀྱིས་ཞུས་པ་ཞེས་བྱ་བར་ཡང་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཚེ་དང་ལྡན་པ་ཀུན་དགའ་བོ་དང ། དགེ་སློང་དེ་དག་དང ། བྱང་ཆུབ་སེམས་དཔའ་དེ་དག་དང ། ཚོང་དཔོན་སྤོབས་པའི་བློ་གྲོས་གཡོག་འཁོར་དང་བཅས་པ་དང ། ཐམས་ཅད་དང་ལྡན་པའི་འཁོར་དེ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རང་སྟེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྤོབས་པའི་བློ་ 484a ༄#། །གྲོས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲ་ཛྙཱ་ཝརྨ་དང ། ཞུ་ཆེན་གྱི་ལོ་ཙྪ་བ་བེནྡྷ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། |