རྒྱ་གར་སྐད་དུ། ཨཱརྱ་དྲུ་མ་ཀིན་ན་ར་རཱ་ཛ་པ་རི་པྲྀཙྪ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་མི་འམ་ཅིའི་རྒྱལ་པོ་སྡོང་པོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་རི་བྱ་རྒོད་ཀྱི་ཕུང་པོ་ལ་དགེ་སློང་དྲུག་ཁྲི་ཉིས་སྟོང་གི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ཕལ་ཆེར་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་བདུན་ཁྲི་ཉིས་སྟོང་ཐམས་ཅད་ཀྱང་མངོན་པར་ཤེས་པས་མངོན་པར་ཤེས་པ། གཟུངས་རབ་ཏུ་ཐོབ་པ། སྤོབས་པ་ཆགས་པ་མེད་པ། ཏིང་ངེ་འཛིན་རབ་ཏུ་ཐོབ་པ། དྲན་པ་དང ། བློ་གྲོས་དང ། རྟོགས་པ་དང ། མོས་པ་དང ། ངོ་ཚ་ཤེས་པ་དང ། ཁྲེལ་ཡོད་པ་ཕུན་སུམ་ཚོགས་པ། བསམ་ 383b པ་རྡོ་རྗེ་ལྟར་བརྟན་ཞིང་མི་ཕྱེད་པ། སངས་རྒྱས་ཀྱི་ཆོས་ཐམས་ཅད་ལ་སྦྱོར་བ་ཕུན་སུམ་ཚོགས་པ། ལྷག་པའི་བསམ་པ་ཁྱད་པར་དུ་འཕགས་པ་ལ་ཞུགས་པ། བདག་ཉིད་བྱང་ཆུབ་ཀྱི་སེམས་མི་འདོར་བ། སེམས་ཅན་གཞན་བྱང་ཆུབ་ཀྱི་སེམས་ཡང་དག་པར་འཛིན་དུ་འཇུག་པ། སྦྱིན་པ་དང ། དུལ་བ་དང ། སྡོམ་པ་དང ། དེས་པ་དང ། བཟོད་པ་དང ། སྡུག་པའི་དངོས་པོ་ཐམས་ཅད་ཡོངས་སུ་གཏོང་བ་དང ། ཡོངས་སུ་བསྔོ་བའི་ཆོ་ག་ཤེས་པ། ལུས་དང ། དག་དང ། སེམས་དང ། ཚུལ་ཁྲིམས་ཀྱི་རྒྱན་གྱིས་ལེགས་པར་བརྒྱན་པ ། སེམས་ཅན་ཐམས་ཅད་ལ་སེམས་སྙོམས་པ་དང ། བཟོད་པ་དང ། དེས་པའི་སྟོབས་ཀྱི་གོ་ཆ་ཤིན་ཏུ་བགོས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་གྲངས་མེད་པར་བརྩོན་འགྲུས་ཤིན་ཏུ་བརྩམས་པ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་དང ། མངོན་པར་ཤེས་པའི་ཡེ་ཤེས་ཀྱིས་རྣམ་པར་རོལ་པ། ཚིག་ཐམས་ཅད་རབ་ཏུ་དབྱེ་བ་ལ་སྤོབས་པ་ཆགས་པ་མེད་པའི་ཤེས་རབ་དང ། ཡེ་ཤེས་ལ་མཁས་པ། རི་རབ་ཀྱི་རི་ལྟར་སེམས་གཡོ་བ་མེད་པ། ས་དང ། ཆུ་དང ། མེ་དང ། རླུང་དང ། རི་ལྟར་རྗེས་སུ་ཆགས་པ་དང ། ཁོང་ཁྲོ་བ་དང་བྲལ་བ། བྱམས་པ་ཆེན་པོ་ལ་གནས་ཏེ་འོད་ཟེར་ཐོགས་པ་མེད་པ། སྙིང་རྗེ་ཆེན་པོ་ལ་གནས་ཏེ་སེམས་ཅན་ཐམས་ཅད་ 384a ༄#། །ཀྱི་བྱ་བ་གཅིག་ལ་བརྩོན་པ། དགའ་བ་ཆེན་པོ་ལ་གནས་ཏེ་ཆོས་ལ་དགའ་ཞིང་མགུ་བ་དང་ལྡན་པ། བཏང་སྙོམས་ཆེན་པོ་ལ་གནས་པར་བརྩོན་པ། གཉིས་སུ་མེད་པའི་ཡེ་ཤེས་རབ་ཏུ་ཐོབ་པ། འཇིག་རྟེན་གྱི་ཆོས་བརྒྱད་པོ་རྙེད་པ་དང ། མ་རྙེད་པ་དང ། གྲགས་པ་དང ། མ་གྲགས་པ་དང ། བསྟོད་པ་དང ། སྨད་པ་དང ། བདེ་བ་དང ། སྡུག་བསྔལ་ལས་རབ་ཏུ་འདས་པ། ཕ་རོལ་རྒོལ་བ་ངན་པའི་ཚོགས་ཅན་གྱི་ཚོགས་ཐམས་ཅད་ཀུན་ཏུ་རབ་ཏུ་འཇོམས་པ། བདུད་དང་ཕྱིར་རྒོལ་བ་བཅོམ་པ། ཨུ་དུ་མ་ཝཱ་རའི་མེ་ཏོག་མཐོང་བ་ལྟར་ཤིན་ཏུ་འབྱུང་བར་དཀའ་བ། གསོལ་བ་མ་བཏབ་པར་སེམས་ཅན་ཐམས་ཅད་ལ་དགེ་བའི་བཤེས་གཉེན་བྱེད་པ། རབ་ཏུ་ཡོངས་སུ་མྱ་ངན་ལས་འདའ་བའི་བཤེས་གཉེན་བྱེད་པ། སེངྒེའི་སྒྲ་ཆེན་པོ་སྒྲོག་པ། སངས་རྒྱས་ཀྱི་ཆོས་ཟབ་མོ་དང་མི་འཇིགས་པ་སྒྲོག་པ། དེ་བཞིན་གཤེགས་པའི་ཕྱག་རྒྱས་བཏབ་པ། མི་འཁྲུགས་པར་ཕྱད་པར་ལུང་སྟོན་པ། ཇི་ལྟར་སྨྲས་པ་དེ་བཞིན་བྱེད་པ། དེ་ཁོ་ནའི་ཆོས་ཀྱི་ཚུལ་ལ་བརྩོན་པ། འོད་ཀྱིས་ཉི་མ་དང་ཟླ་བ་མོག་མོག་པོར་བྱེད་པ། ཕྱོགས་བཅུར་སྒྲ་བསྒྲགས་པ། སངས་རྒྱས་ཀྱི་ཆོས་ཐམས་ཅད་ལ་སེམས་པ། ཆོས་དཀོན་མཆོག་གི་མཛོད་ཡང་དག་པར་འཛིན་པ། དཀོན་མཆོག་གསུམ་གྱི་རིགས་མི་ 384b གཅོད་པར་ཡིད་ལ་བྱེད་པ། སངས་རྒྱས་ཀྱི་ཞིང་མཐའ་ཡས་པ་འདའ་བ་ལ་མཁས་པ། ཤིན་ཏུ་རྣམ་པར་ཕྱེ་བ་རྣམ་པར་འབྱེད་པ། གནས་པའི་བློ་དང་ལྡན་པ། མཐོང་བ་དང་ཐོས་པ་དོན་ཡོད་པས་རྣམ་པར་གནོན་པ། རྟག་པར་རྒྱུན་དུ་སེམས་ཅན་ཡོངས་སུ་སྨིན་པར་བྱེད་པ་ལ་བརྩོན་པ། ཤེས་རབ་དང་ཐབས་ལ་མཁས་པའི་མཆོག་ཐོབ་པ། སེམས་ཅན་ཐམས་ཅད་ཀྱི་དབང་པོ་མཆོག་དང་མཆོག་མ་ཡིན་པ་ཤེས་པས་ཅི་རིགས་པར་ཆོས་སྟོན་པ། སེམས་ཅན་ཐམས་ཅད་ཀྱི་སྤྱོད་པ་ལ་ལྟ་བའི་ཆོ་ག་ལ་མཁས་པ། སེམས་ཅན་ཐམས་ཅད་ཀྱི་འཇུག་པ་དང་བརྟག་པ་ལ་བདེ་བླག་ཏུ་མཁས་པ། མི་འཇིགས་པ་ཆེན་པོས་འཇིགས་པ་མེད་པ། རྒ་བ་དང ། ན་བ་དང ། འཆི་བ་དང ། ཉོན་མོངས་པ་རབ་ཏུ་ཞི་བར་བྱེད་པ།་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་དཔག་ཏུ་མེད་པ་ལ་དགེ་བའི་རྩ་བ་བསྐྲུན་པ། མཚན་དང་དཔེ་བྱད་བཟང་པོ་ཡོངས་སུ་རྫོགས་པའི་བསོད་ནམས་དང ། ཡེ་ཤེས་ཀྱི་ཚོགས་བསགས་པ། སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་ཆོས་ཐམས་ཅད་ལ་མོས་པ་ལ་སྨོན་པ་མེད་པ། སེམས་ཅན་དང ། ཆོས་ཐམས་ཅད་སྒྱུ་མ་དང ། སྨིག་རྒྱུ་དང ། རྨི་ལམ་དང ། ཆུ་ཟླ་དང ། མིག་ཡོར་དང ། བྲག་ཅ་དང ། ནམ་མཁའ་དང་མཚུངས་པར་མོས་པ། སྒྲ་སྐད་ཐམས་ཅད་ངེས་པའི་ཚིག་གིས་སྟོན་པའི་ཡེ་ 385a ༄#། །ཤེས་ལ་མཁས་པ། ཆོས་དང ། དོན་དང ། ངེས་པའི་ཚིག་དང ། སྤོབས་པ་སོ་སོ་ཡང་དག་པར་རིག་པ་ཐོབ་པ། འཇིག་རྟེན་ལས་འདས་པའི་ཤེས་རབ་ཀྱི་དབང་པོ་མངོན་སུམ་དུ་གྱུར་པ། ཤུགས་ཆེན་པོ་འཛིན་པའི་སྟོབས་བཅུ་ལ་ཉེ་བར་གྱུར་པ། ཤའི་མིག་དང ། ལྷའི་མིག་དང ། ཤེས་རབ་ཀྱི་མིག་དང ། ཆོས་ཀྱི་མིག་དང ། སངས་རྒྱས་ཀྱི་སྤྱན་སྣང་བ་ཐོབ་པ། ལམ་གྱི་ཡན་ལག་གི་ཚོགས་ཤིན་ཏུ་བསགས་པའི་ལམ་ཐམས་ཅད་ལ་འཇུག་པའི་ཡེ་ཤེས་ལ་མཁས་པ། བྱང་ཆུབ་སེམས་དཔའི་སྡེ་སྣོད་སྣང་བ་ལ་འཇུག་པའི་ཆོ་ག་ཤེས་པ། ཕྱིར་མི་ལྡོག་པའི་ཆོས་ཀྱི་འཁོར་ལོ་བསྐོར་བ། མཚན་ཉིད་ཀྱི་ཕྱག་རྒྱའི་ཏིང་ངེ་འཛིན་རབ་ཏུ་ཐོབ་པ། རྡོ་རྗེ་དཀྱིལ་འཁོར་གྱི་ཏིང་ངེ་འཛིན་ལ་འཇུག་པའི་ཡེ་ཤེས་ལ་མཁས་པ། ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་མངོན་དུ་གྱུར་པ། ཆོས་དཀོན་མཆོག་གི་སྒྲོན་མ་འཛིན་པ། སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་རྣམ་པར་ལྟ་བ། སེམས་ཅན་ཐམས་ཅད་ཀྱི་སེམས་ཀྱི་བསམ་པ་ལ་རྣམ་པར་ལྟ་བར་མཁས་པ། སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་ཀྱི་བྱ་བས་སོ་སོར་ཉེ་བར་གནས་པ། རྣམ་པའི་མཆོག་ཐམས་ཅད་དང་ལྡན་པའི་ཡོན་ཏན་རིན་པོ་ཆེ་ཐམས་ཅད་ཀྱིས་བརྒྱན་པ། བསྐལ་པ་ཐམས་ཅད་དུ་བསྔགས་པ་ཡོངས་སུ་བརྗོད་ 385b ཀྱང་མཐར་མི་ཕྱིན་པ་ཤ་སྟག་ལ་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བྱེད་དང ། དགའ་འབྱུང་དང ། ལག་ན་རིན་པོ་ཆེ་དང ། རིན་ཆེན་མེ་ཏོག་དང ། རིན་པོ་ཆེའི་ཏོག་དང ། མཐོང་དགའ་དང ། མིག་གིས་མཐོང་དགའ་དང ། མཛེས་པའི་བློ་གྲོས་དང ། དགའ་ཞིང་མཆོག་ཏུ་དགའ་བྱེད་དང ། ས་འཛིན་དང ། སྤྱན་རས་གཟིགས་དབང་ཕྱུག་དང ། མཐུ་ཆེན་ཐོབ་དང ། དཔལ་ཆེན་དང ། བདུད་ཐུལ་དང ། མེ་ཏོག་མནྡཱ་ར་བའི་དྲི་དང ། རླུང་ལྷ་དང ། བདེན་དགའ་དང ། མཉམ་ལྷ་དང ། རི་རབ་རྩེ་འཛིན་དང ། རི་རབ་བརྩེགས་དང ། རི་རབ་མཆོག་དང ། དྲ་བ་ཅན་གྱི་འོད་དང ། རྒྱལ་བའི་བློ་གྲོས་དང ། སྐྱེ་བར་ཚིམ་བྱེད་དང ། འགྲོ་བ་འཛིན་དང ། ལྷའི་རྒྱལ་པོས་མཆོད་དང ། མཆོག་གི་བློ་གྲོས་དང ། ཐོགས་མེད་སེམས་དང ། སྐྱ་རེངས་བློ་གྲོས་དང ། མི་སྐྱོབ་པ་དང ། དཔག་མེད་རིན་ཆེན་མཛོད་དང ། འོད་ཀྱི་ཏོག་དང ། འོད་དཔལ་དང ། སྒྲོན་མའི་རྒྱལ་པོ་དང ། བྱང་ཆུབ་བློ་གྲོས་དང ། འོད་ཀྱིས་ཡང་དག་བརྒྱན་དང ། སྣ་ཚོགས་མེ་ཏོག་དང ། ལྷའི་རྒྱལ་པོ་དང ། ལྷའི་ཚུལ་གྱིས་ལྟ་བ་དང ། དཔུང་བཟང་དང ། ལེགས་པར་བསམ་པ་སེམས་པ་དང ། འཁོར་ལོ་རབ་གནས་རྐང་བ་དང ། མི་གཡོ་རྐང་པས་རྣམ་པར་གནོན་དང ། རྡོ་རྗེའི་རྐང་པས་རྣམ་པར་གནོན་དང ། རྐང་པས་འཇིག་རྟེན་གསུམ་རྣམ་པར་གནོན་དང ། དགའ་སྤོབས་ 386a ༄#། །དང ། སྤོབས་མྱུར་དང ། སྤོབས་པ་མི་འཆད་པ་དང ། སྤོབས་པ་བྱིན་གྱིས་བརླབས་དང ། འཇམ་སྒྲ་དང ། སེམས་ཅན་ཐམས་ཅད་ཚིམ་བྱེད་དང ། ཚངས་དབྱངས་དང ། བཟང་སྐྱོང་དང ། རིན་ཆེན་འབྱུང་གནས་དང ། ངེད་དཔོན་བཟང་པོ་དང ། མེས་བྱིན་དང ། ཆུ་ལྷ་དང ། བྱམས་པ་དང ། འཇམ་དབྱངས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་དཔལ་གཞོན་ནུར་གྱུར་པ་ལ་སོགས་པ་བྱང་ཆུབ་སེམས་དཔའ་བདུན་ཁྲི་ཉིས་སྟོང་དང་ཐབས་ཅིག་ཏུ་བཞུགས་སོ། །གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། དེ་ལས་གཞན་པ་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་རྣམས་བཅོམ་ལྡན་འདས་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བ་དང ། ཆོས་མཉན་པའི་ཕྱིར་འཁོར་དེ་ཉིད་དུ་འདུས་པར་གྱུར་ཏེ་འདུག་གོ་།དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ཞེས་བྱ་བ་འཁོར་དེ་ཉིད་དུ་འདུས་པ་དེས་བྱང་ཆུབ་སེམས་དཔའི་འཁོར་ཆེན་པོ་དེ་འདུས་པར་རིག་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་བཅོམ་ལྡན་འདས་ཀྱི་ཞབས་ལ་མགོ་ 386b བོས་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བུས་མོ་གཡས་པའི་ལྷ་ང་ས་ལ་བཙུགས་ཏེ་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །འཇིག་རྟེན་འདས་པ་འཇིག་རྟེན་སྒྲོན་མ་མཛད། །ཁྱོད་ནི་འཇིག་རྟེན་དོན་མཛད་བློ་གྲོས་ལྡན། ། སྣང་བ་བརྙེས་ཤིང་ཉོན་མོངས་དྲི་བསལ་བ། །འཇིག་རྟེན་སྣང་མཛད་ཁྱོད་ལ་ཕྱག་འཚལ་ལོ། །སྦྱིན་པ་དགྱེས་ཤིང་སྟོབས་བཅུ་མཆོག་མངའ་བ། །དུལ་བ་འདུལ་བ་གདུལ་བའི་ཕ་རོལ་ཕྱིན། །བཅོམ་ལྡན་ལྷ་དང་མི་དང་ལུས་མཆོད་པ། །གདུལ་བའི་མཐར་ཕྱིན་ཁྱོད་ལ་ཕྱག་འཚལ་ལོ། །མཚན་མཆོག་འགྲོ་བ་མང་པོའི་དོན་མཛད་པ། །འདོམ་གང་འོད་ནི་གསེར་གྱི་ཁ་དོག་ལྟ། །དགེ་བའི་མཚན་གྱི་དམ་པའི་གཟུགས་མངའ་བ། །སྲིད་གསུམ་མཚུངས་མེད་ཁྱོད་ལ་ཕྱག་འཚལ་ལོ། །ཕ་རོལ་ཕྱིན་པས་གཞན་གྱི་ཚོགས་འཇོམས་ཤིང ། །ཕ་རོལ་རྒོལ་བའི་རྒོལ་འཇོམས་མི་གཡོ་བ། །སེམས་ཅན་གཞན་གྱི་སེམས་དང་སྤྱོད་ལ་མཁས། །ཐུགས་རྗེ་མཆོག་མངའ་ཁྱོད་ལ་ཕྱག་འཚལ་ལོ། །དགྲ་བཅོམ་རྒྱལ་པོ་ཉོན་མོངས་རྡུལ་བསལ་བ། །འཚོ་བ་དག་ཅིང་བརྟུལ་ཞུགས་ཚུལ་ཁྲིམས་གནས། །ལྷ་ཡི་ལྷ་མཆོག་དྲི་མེད་དྲི་མ་བྲལ། །ཕ་རོལ་ཚོགས་འཇོམས་ཁྱོད་ལ་ཕྱག་འཚལ་ལོ། །བདེ་གཤེགས་རིན་ 387a ༄#། །ཆེན་མཆོག་ཏུ་དགའ་མཛད་པ། །དགོན་པར་རྟག་གནས་རྟག་ཏུ་དགོན་པར་དགྱེས། །རྡུལ་སྐྱོན་གཏི་མུག་རྙོག་པ་མི་མངའ་བ། ནམ་མཁའ་མཉམ་ཐུགས་ཁྱོད་ལ་ཕྱག་འཚལ་ལོ། །ཆུ་བོ་བཞི་རྒལ་བདེན་བཞི་བཀའ་མཆིད་གསུང ། །མིག་སྦྱིན་བདུད་རྩི་ཆོས་ཀྱི་བཀའ་མཆིད་ཅན། །འགྲོ་བའི་དོན་མཛད་འཇིག་རྟེན་གསུམ་རྒྱུ་བ། །འཁོར་ལོ་ཞབས་མངའ་ཁྱོད་ལ་ཕྱག་འཚལ་ལོ། །ལྷ་དང་མིས་མཆོད་པ་ཡི་མཐུ་བོ་ཆེ། །མགོན་པོ་ལྷ་ཡི་དབང་པོ་བདུད་འཇོམས་པ། །མི་དང་ལྷ་ཀླུ་ཚོགས་ཀྱིས་མཆོད་པ་ཡི། །མི་མཆོག་དམ་པ་ཁྱོད་ལ་ཕྱག་འཚལ་ལོ། །རྟག་ཏུ་བདེ་སྡུག་དམ་པའི་ཆོས་ལ་དགྱེས། །མཉམ་ཐུགས་འགྲོ་བ་ཀུན་ལ་བྱམས་པའི་ཐུགས། །ཆོས་ལ་མཉམ་གནས་མི་རྣམས་ཁ་ལོ་སྒྱུར། ། ཡོན་ཏན་མཐར་ཕྱིན་ཁྱོད་ལ་ཕྱག་འཚལ་ལོ། །སྙན་པའི་སྒྲ་དབྱངས་རྣམ་པར་དག་དང་ལྡན། །ཚངས་པའི་སྒྲ་དབྱངས་ལྟ་བུར་འཇམ་པའི་གསུང ། །ཐམས་ཅད་དབྱངས་ཀྱི་ཡན་ལག་གསུང་ཚུལ་རྫོགས། །བདེན་པ་སྙན་གསུང་ཁྱོད་ལ་ཕྱག་འཚལ་ལོ། །སྟོང་པ་མཚན་མ་མེད་ཅིང་སྨོན་དང་བྲལ། །ཟབ་མོ་བལྟ་དཀའ་ཤིན་ཏུ་རྟོགས་པར་དཀའ། །ཐར་ལ་འཇུག་པར་མཁས་པ་བློ་གྲོས་ལྡན། །ཐར་པའི་ལམ་དགྱེས་ཁྱོད་ལ་ཕྱག་འཚལ་ལོ། །རྒྱུ་ལ་བརྟེན་པ་མཁས་པའི་བཅོམ་ལྡན་འདས། །མཐར་གཉིས་ལྟ་བ་རྟག་ཏུ་མི་མངའ་བ། ། 387b ལས་ཀྱི་རྣམ་སྨིན་འབྲས་བུ་ཁོ་ན་གསུང ། །ལྟ་བའི་མུན་བྲལ་ཁྱོད་ལ་ཕྱག་འཚལ་ལོ། །གང་ནས་མ་བྱོན་གང་དུའང་གཤེགས་མ་ལགས། །རྟག་ཏུ་དབེན་པའི་ཆོས་རྣམས་རབ་གསུང་བ། །སྨིག་སྒྱུ་རྒྱུ་བཞིན་ང་ཡི་མི་མངའ་བ། །དགེ་བའི་ཆོས་ཚུལ་ཁྱོད་ལ་ཕྱག་འཚལ་ལོ། །སྐྱེ་བ་མི་སྐྱེ་གང་དུའང་སྐྱེ་མ་ལགས། །སྐྱེ་དང་འཇིག་དང་གང་དུའང་མི་བས་པ། །ཆོས་ཀྱི་གནས་ཉིད་ཇི་ལྟའི་གནས་ལ་གནས། །གནས་ལ་མི་གནས་རྒྱལ་ལ་ཕྱག་འཚལ་ལོ། །དེ་བཞིན་ཁོ་ན་དེ་བཞིན་ཡང་དག་གསུང ། །རྟག་ཏུ་མི་གཡོ་དེ་བཞིན་ཉིད་ལ་བཞུགས། །རི་རབ་རྒྱལ་མཚན་རྡོ་རྗེ་འདྲ་བའི་སྐུ། །མི་གཡོ་རི་རབ་མཚུངས་\?\་ཕྱག་འཚལ་ལོ། །སྐུ་ནི་དབེན་ཞིང་མཉམ་ཐུགས་བློ་ལྡན་པ། །གྲགས་པ་མཐའ་ཡས་འཇིག་རྟེན་གསུམ་གྲགས་པ། ། སྐྱེས་བུ་མཆོག་ལ་ཞུ་བ་ཞུས་པ་རྣམས། །འཇིག་རྟེན་ཟླ་བས་མྱུར་དུ་སྐབས་དབྱེར་གསོལ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། གལ་ཏེ་བདག་གིས་ཞུས་པ་ལུང་བསྟན་པའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སྐབས་དབྱེ་བར་གནང་ན། བཅོམ་ལྡན་འདས་ལ་བདག་ཕྱོགས་འགའ་ཞིག་ཞུའོ། །དེ་ 388a ༄#། །སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ལ་འདི་སྐད་ཅེས་བཀའ་སྩལ་ཏོ། ། རིགས་ཀྱི་བུ། ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཅི་དང་ཅི་འདོད་པ་དྲིས་ཤིག་དང ། ངས་དྲི་བ་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་བཅོམ་ལྡན་འདས་ལ་ལེགས་སོ། །ཞེས་གསོལ་ཏེ། བཅོམ་ལྡན་འདས་ཀྱི་ལྟར་ཉན་ཅིང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་སྤོབས་པ་སྣ་ཚོགས་ཀྱི་རྒྱན་དང་ལྡན་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཆོས་ཟབ་མོ་རྣམ་པར་གདོན་མི་ཟ་བ་ལ་འཇུག་པ་ཤེས་པ་ལ་མཁས་པ་རྣམས་ལགས།་ཇི་ལྟར་ན། བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་དབང་པོ་མཆོག་དང ། མཆོག་མ་ལགས་པ་ཤེས་པ་ལ་མཁས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་སོ་སོ་ཅི་རིགས་པར་ཆོས་སྟོན་པ་ལ་མཁས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་སེམས་ཅན་ཐམས་ཅད་ལ་སེམས་ཀྱི་བསམ་ 388b པ་མཉམ་ཞིང་སྤྱོད་པ་ཤེས་པ་ལ་འཇུག་པར་མཁས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་རྒྱུ་དང ། དབྱེ་བ་དང ། ལས་ཀྱི་རྣམ་པར་སྨིན་པ་ལ་འཇུག་པ་ཤེས་པ་ལ་བརྗེད་པ་མ་མཆིས་པར་སྤྱོད་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་སྦྱིན་པའི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཚུལ་ཁྲིམས་ཀྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་བཟོད་པའི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་བརྩོན་འགྲུས་ཀྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་བསམ་གཏན་གྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཤེས་རབ་ཀྱི་རྒྱན་གྱིས་བརྒྱན་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཚངས་པའི་ལམ་ལ་མཁས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་མངོན་པར་ཤེས་པ་ལས་མི་ཉམས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་གཡུལ་ལས་རྣམ་པར་རྒྱལ་བ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་རྒལ་ནས་ཕ་རོལ་ཐང་ལ་གནས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཉན་ཐོས་དང ། རང་སངས་རྒྱས་ཐམས་ཅད་དང ། སེམས་ཅན་ཐམས་ཅད་ཀྱི་སྤྱོད་ལམ་ཡང་སྟོན་ལ་ 389a ༄#། །མཚུངས་པར་སྤྱོད་པར་ཡང་རྣམ་པར་མི་རྟོག་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་འཁོར་བ་ལའང་ལྟ་ལ་མྱ་ངན་ལས་འདས་པ་ལའང་མི་གནས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཁམས་སྣ་ཚོགས་ལའང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོ་བ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་དོན་ཡང་མི་འདོར་ལ་གནོད་པར་ཡང་ཀུན་ཏུ་གདའ་བ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་བསོད་ནམས་ཀྱི་ནོར་དང་ལྡན་ལ་ཐབས་ཀྱི་ནོར་མ་མཆིས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཨ་ཞེས་བགྱི་བའི་སྒོས་རྣམ་པ་མ་མཆིས་པའི་སྒོར་འཇུག་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་མངོན་སུམ་དུ་འགྱུར་བ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཆོས་རྣམ་པར་གདོན་མི་ཟ་བ་རྣམས་ལ་རྣམ་པར་ཕྱེ་བ་ཤིན་ཏུ་རྣམ་པར་འབྱེད་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་འཇིག་རྟེན་གྱི་བྱ་བ་དང་མཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་གཞན་དག་གིས་བལྟར་མི་མཐོང་བའི་ཆོས་ཀྱི་དབང་ཕྱུག་རྣམས་ལགས། ཇི་ལྟར་ན། བྱང་ཆུབ་སེམས་དཔའ་དེ་ 389b བཞིན་གཤེགས་པ་མཐོང་བ་དང་མི་འབྲལ་བ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཤིན་ཏུ་དུལ་ཞིང་མི་འཁྲུགས་པའི་ཆོས་ཅན་རྣམས་ལགས། ཇི་ལྟར་ན། བྱང་ཆུབ་སེམས་དཔའ་ཆོས་རྣམས་བླང་བ་མ་མཆིས་པར་སློབ་དཔོན་རྣམས་ལགས། ཇི་ལྟར་ན། བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་སྟོན་པར་གྱུར་པ་རྣམས་ལགས། ཇི་ལྟར་ན།་བྱང་ཆུབ་སེམས་དཔའ་སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རྗེས་སུ་བསྐོར་བ་རྣམས་ལགས། ཇི་ལྟར་ན། བྱང་ཆུབ་སེམས་དཔའ་སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ལ་ལེགས་སོ། ། ཞེས་བྱ་བ་གནང་སྟེ། རིགས་ཀྱི་བུ། ལེགས་སོ་ལེགས་སོ། །རིགས་ཀྱི་བུ། ཁྱོད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་པ་སྙིང་བརྩེ་བ་དང ། སྐྱེ་བོ་ཕལ་པོ་ཆེའི་དོན་དང ། ལྷ་དང ། མི་རྣམས་ལ་ཕན་པ་དང ། བདེ་བའི་ཕྱིར་ཞུགས་པ་དང ། རིགས་ཀྱི་བུ། ཁྱོད་ད་ལྟར་གྱི་དང ། མ་འོངས་པའི་སེམས་ཅན་རྣམས་རྗེས་སུ་གཟུང་བ་དང ། ཐེག་པ་ཆེན་པོ་འདི་ཡུན་རིང་དུ་གནས་པར་བྱ་བའི་ཕྱིར་རིགས་ཀྱི་བུ། ཁྱོད་དེ་བཞིན་གཤེགས་པ་ལ་གང་དོན་འདི་ཡོངས་སུ་འདྲི་བར་སེམས་པ་ནི། ལེགས་སོ། ། 390a ༄#། །རིགས་ཀྱི་བུ། དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས། ལེགས་སོ། །ཞེས་གསོལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། སྤོབས་པ་སྣ་ཚོགས་ཀྱི་རྒྱན་དང་ལྡན་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་འོད་ཟེར་ཐོགས་པ་མེད་པ་རྣམས་རིན་པོ་ཆེ་དང་སྡུག་པའི་དངོས་པོ་ཐམས་ཅད་ཡོངས་སུ་བཏང་ཞིང་ཡིད་འགྱོད་པ་མེད་པ་རྣམས་ཡིན། ཆོས་སྨྲ་བ་གཞན་དག་གིས་བཤད་པ་མི་ཟློག་ཅིང་རྗེས་སུ་ཡི་རང་སྟེ་དགའ་བ་དང ། མགུ་བ་དང ། དང་བ་དང ། མཆོག་ཏུ་དགའ་བ་ཐོབ་ནས་ལེགས་སོ། །ཞེས་བྱ་བ་སྦྱིན་པ་དང ། ཆོས་མཉན་པའམ། ཆོས་བགྲོ་བའམ། དེ་བཞིན་གཤེགས་པའི་མཆོད་རྟེན་གྱི་ཕྱིར་རམ། མཚན་མོ་འདུག་པར་བསྐུལ་ན་མཆོག་ཏུ་དགའ་བ་དང་ལྡན་པ་དང ། བྱང་ཆུབ་ཀྱི་སེམས་ཀྱི་ལྷག་པའི་བསམ་པ་དང ། ཟང་ཟིང་མེད་པའི་སེམས་ཀྱི་ཆོས་ཀྱི་སྦྱིན་པ་སྦྱིན་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སྤོབས་པ་སྣ་ཚོགས་རྒྱན་དང་ལྡན་པ་རྣམས་ཡིན་ནོ། །རིགས་ཀྱི་ 390b བུ།་བྱང་ཆུབ་སེམས་དཔའ་ཆོས་བཞི་དང་ལྡན་ན། ཆོས་ཟབ་མོ་རྣམ་པར་གདོན་མི་ཟ་བ་ལ་འཇུག་པ་ཤེས་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། རྟེན་ཅིང་འབྲེལ་པར་འབྱུང་བ་དང་རྗེས་སུ་མཐུན་པ་དང ། བདག་གི་རང་བཞིན་ལྟར་སེམས་ཅན་ཐམས་ཅད་ཀྱི་རང་བཞིན་རྟོགས་པ་དང ། འདུ་བྱེད་ཐམས་ཅད་གང་ཡང་མི་འགྲོ་།གང་ནས་ཀྱང་མ་འོངས་པར་རབ་ཏུ་ཤེས་པ་དང ། ཆོས་ཐམས་ཅད་ནམ་མཁའི་ཕྱག་རྒྱས་བཏབ་པར་མོས་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཆོས་ཟབ་མོ་རྣམ་པར་གདོན་མི་ཟ་བ་ལ་འཇུག་པ་ཤེས་པ་ལ་མཁས་པ་རྣམས་ཡིན་ནོ། རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། སེམས་ཅན་ཐམས་ཅད་ཀྱི་དབང་པོ་མཆོག་དང ། མཆོག་མ་ཡིན་པ་ཤེས་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། ཆོས་ཀྱི་དབྱིངས་ཀྱི་སྒོ་ཤིན་ཏུ་སྦྱངས་པ་དང ། སྒྲིབ་པ་མེད་པའི་སྒོ་མངོན་སུམ་དུ་གྱུར་པ་དང ། མངོན་པར་ཤེས་པས་རྣམ་པར་རྩེ་བ་ཤེས་པ་དང ། སེམས་ལས་སུ་རུང་ཞིང་ཏིང་ངེ་འཛིན་ཕུན་སུམ་ཚོགས་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སེམས་ཅན་ཐམས་ཅད་ཀྱི་དབང་པོ་མཆོག་དང ། མཆོག་མ་ཡིན་པ་ཤེས་པ་ལ་མཁས་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། སོ་སོ་ཅི་ 391a ༄#། །རིགས་པར་ཆོས་སྟོན་པ་ལ་མཁས་པ་རྣམས་ཡིན་ནོ། །བཞི་གང་ཞེ་ན། སོ་སོ་ཡང་དག་པར་རིག་པ་ཤེས་པ་དང ། སེམས་ཅན་གཟུད་པ་ཤེས་པ་དང ། ཆོས་རབ་ཏུ་རྣམ་པར་འབྱེད་པའི་ཤེས་པ་དང ། བདག་གི་སེམས་སྦྱངས་པས་སེམས་ཅན་ཐམས་ཅད་ཀྱི་སེམས་སྦྱངས་པར་རབ་ཏུ་ཤེས་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སོ་སོ་ཅི་རིགས་པར་ཆོས་སྟོན་པ་ལ་མཁས་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། སེམས་ཅན་ཐམས་ཅད་ལ་སེམས་ཀྱི་བསམ་པ་མཉམ་ཞིང་སྤྱོད་པ་ཤེས་པ་ལ་འཇུག་པར་མཁས་པ་རྣམས་ཡིན་ནོ། །བཞི་གང་ཞེ་ན། ཤེས་རབ་ཀྱིས་འཛུད་པ་དང ། ཡེ་ཤེས་ཆགས་པ་མེད་པ་དང ། ཐབས་ཀྱིས་ཞུགས་པས་སྒྲིབ་པ་ཐམས་ཅད་རྒྱུན་བཅད་པ་དང ། བློ་ཤིན་ཏུ་སྦྱངས་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སེམས་ཅན་ཐམས་ཅད་ལ་སེམས་ཀྱི་བསམ་པ་མཉམ་ཞིང ། སྤྱོད་པ་ཤེས་པ་ལ་འཇུག་པར་མཁས་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། རྒྱུ་དང ། བྱ་བ་དང ། ལས་ཀྱི་རྣམ་པར་སྨིན་པ་ལ་འཇུག་པར་ཤེས་པ་ལ་བརྗེད་པ་མེད་པར་སྤྱོད་པ་རྣམས་ཡིན་ནོ། །བཞི་གང་ཞེ་ན། ཆད་པར་ 391b སྨྲ་བ་མ་ཡིན་པ་དང ། རྟག་པར་སྨྲ་བ་མ་ཡིན་པ་དང ། རྒྱུ་དང ། བྱ་བ་དང ། ལས་ཀྱི་འབྲས་བུ་ལ་ཡང་དག་པ་ཇི་ལྟ་བ་བཞིན་དུ་འཇུག་པ་དང ། ཆོས་ལ་ཆོས་ཉིད་དུ་བྱེད་ཅིང་ཆོས་ལ་ཆོས་སུ་སྨྲའི། འདི་ལ་བདག་དང ། བདག་གིར་མི་སྨྲ་བ་སྟེ། དེ་ལྟར་བྱ་བ་ལ་འཇུག་པས་རྒྱུ་དང ། བྱ་བ་དང ། ལས་ཀྱི་འབྲས་བུ་མ་རུང་བར་མི་བྱེད་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། རྒྱུ་དང ། བྱ་བ་དང ། ལས་ཀྱི་རྣམ་པར་སྨིན་པ་ལ་འཇུག་པ་ཤེས་པ་ལ་བརྗེད་པ་མེད་པར་སྤྱོད་པ་རྣམས་ཡིན་ནོ། །རིགས་ཀྱི་བུ།་བྱང་ཆུབ་སེམས་དཔའ་ཆོས་བཞི་དང་ལྡན་ན། སྦྱིན་པའི་རྒྱུན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། མཚན་གྱིས་ལེགས་པར་བརྒྱན་པ་རྣམས་ཡིན། དཔེ་བྱད་བཟང་པོས་རྣམ་པར་སྤྲས་པ་རྣམས་ཡིན། གཟུགས་ལྟ་བས་མི་ངོམས་པ་རྣམས་ཡིན། ལག་ན་རིན་པོ་ཆེ་ཐོབ་པས་ལོངས་སྤྱོད་མི་ཟད་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སྦྱིན་པའི་རྒྱན་གྱིས་བརྒྱན་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཚུལ་ཁྲིམས་ཀྱི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། འཁོར་ལོས་བསྒྱུར་བའི་རྒྱལ་པོར་འགྱུར་ཞིང་བྱང་ཆུབ་ཀྱི་སེམས་ཀྱིས་བརྒྱན་པ་དང ། ལྷའི་དབང་པོ་བརྒྱ་བྱིན་དུ་འགྱུར་ཞིང་བྱང་ཆུབ་ཀྱི་ 392a ༄#། །སེམས་ཀྱིས་བརྒྱན་པ་དང ། མི་མཛེད་ཀྱི་བདག་པོ་ཚངས་པར་འགྱུར་ཞིང་བྱང་ཆུབ་ཀྱི་སེམས་ཀྱིས་བརྒྱན་པ་དང ། ངན་འགྲོ་ཐམས་ཅད་ཡང་དག་པར་བཅད་ནས་ལྷ་དང་མིར་སྐྱེ་བ་ཡོངས་སུ་བཟུང་བར་གྱུར་ཅིང་བྱང་ཆུབ་ཀྱི་སེམས་ཀྱིས་བརྒྱན་པ་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཚུལ་ཁྲིམས་ཀྱི་རྒྱན་གྱིས་བརྒྱན་པ་རྣམས་སུ་རིག་པར་བྱའོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། བཟོད་པའི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན།་ཚངས་པའི་སྐད་དང་སྒྲ་དབྱངས་ལྟ་བུ་དང་ལྡན་པ་རྣམས་ཡིན། ཀ་ལ་པིངྐའི་སྒྲ་དང ། རྔ་སྒྲ་ལྟ་བུ་དང་ལྡན་པ་རྣམས་ཡིན། སྐྱེ་བོ་མང་པོས་མཐོང་ན་སྡུག་ཅིང་ཡིད་དུ་འོང་བ་རྣམས་ཡིན། དགེ་བའི་ཆོས་རྣམས་ལ་ཡི་དམ་ལ་བརྟན་པ་རྣམས་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། བཟོད་པའི་རྒྱན་གྱིས་བརྒྱན་པ་རྣམས་སུ་རིག་པར་བྱའོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། བརྩོན་འགྲུས་ཀྱི་རྒྱན་གྱིས་བརྒྱན་པར་རིག་པར་བྱའོ། །བཞི་གང་ཞེ་ན། དམ་བཅས་པ་ཉམས་འོག་ཏུ་ཆུད་པར་བྱ་བའི་ཆོ་ག་ཤེས་པས་དགེ་བའི་ཆོས་རྣམས་ལ་ཡི་དམ་ལ་བརྟན་པ་རྣམས་ཡིན། ཕ་རོལ་གྱིས་མནན་པ་མེད་པས་རྡོ་རྗེའི་ལུས་རབ་ཏུ་ཐོབ་པ་རྣམས་ 392b ཡིན།་བྱ་བ་ཅི་ཡོད་ཅེས་བྱ་བ་ལ་མོས་པས་གསོལ་བ་མ་བཏབ་པར་སེམས་ཅན་ཐམས་ཅད་ལ་དགེ་བའི་བཤེས་གཉེན་བྱེད་པ་རྣམས་ཡིན། ཐོས་པའི་ཚོགས་བསགས་པས་མི་ངོམས་པའི་ཕྱིར་ཡིད་ཡོངས་སུ་མི་སྐྱོ་བ་རྣམས་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། བརྩོན་འགྲུས་ཀྱི་རྒྱན་གྱིས་བརྒྱན་པ་རྣམས་སུ་རིག་པར་བྱའོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། བསམ་གཏན་གྱི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། མི་རྒོད་པ་རྣམས་ཡིན། མ་ཁེངས་པ་རྣམས་ཡིན། མུ་ཅོར་སྨྲ་བ་མེད་པ་རྣམས་ཡིན། ཅང་ཤེས་ཀྱི་སེམས་མི་འདོར་བ་རྣམས་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། བསམ་གཏན་གྱི་རྒྱན་གྱིས་བརྒྱན་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཤེས་རབ་ཀྱི་རྒྱན་གྱིས་བརྒྱན་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ།་བདག་དང ། སེམས་ཅན་དང ། སྲོག་དང ། གསོ་བ་དང ། སྐྱེས་བུ་དང ། གང་ཟག་ཏུ་སྨྲ་བ་མེད་པ་རྣམས་ཡིན། སྤོབས་པ་ཆགས་པ་མེད་པ་རྣམས་ཡིན། ཚིག་ཐམས་ཅད་རབ་ཏུ་དབྱེ་བ་བསྟན་པ་ཤེས་པ་ལ་མཁས་པ་རྣམས་ཡིན། ཆོས་ཐམས་ཅད་ལ་སོམ་ཉི་མེད་ཅིང་ཐེ་ཚོམ་དང་བྲལ་བ་རྣམས་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་ 393a ༄#། །བཞི་དང་ལྡན་ན། ཤེས་རབ་ཀྱི་རྒྱན་གྱིས་བརྒྱན་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཚངས་པའི་ལམ་ལ་མཁས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཀྱི་དཔུང་གཉེན་བྱ་བའི་ཕྱིར་མངོན་པར་སྒྲུབ་པའི་བྱམས་པ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་མངོན་པར་སྒྲུབ་པའི་སྙིང་རྗེ་ཆེན་པོ་དང ། ཆོས་ཐམས་ཅད་ལ་དགའ་བས་མངོན་པར་སྒྲུབ་པའི་དགའ་བ་དང ། དེ་བཞིན་གཤེགས་པའི་ཡེ་ཤེས་ཀྱི་ཕྱིར་མངོན་པར་སྒྲུབ་པའི་བཏང་སྙོམས་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཚངས་པའི་ལམ་ལ་མཁས་པ་རྣམས་ཡིན་ནོ། །རིགས་ཀྱི་བུ།་བྱང་ཆུབ་སེམས་དཔའ་ཆོས་བཞི་དང་ལྡན་ན། མངོན་པར་ཤེས་པ་ལས་མི་ཉམས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། བསམ་གཏན་བཞི་སྡུད་པའི་ཤེས་པ་དང ། གཟུགས་མེད་པའི་སྙོམས་པར་འཇུག་པ་བཞི་སྒྲུབ་པའི་ཐབས་ཤེས་པ་དང ། རང་གི་སེམས་ལ་དབང་སྒྱུར་བའི་ཆོས་ཤེས་པ་དང ། སངས་རྒྱས་ལ་བལྟ་བའི་ཕྱིར་སངས་རྒྱས་ཀྱི་ཞིང་མཐའ་ཡས་པར་འགྲོ་བ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། མངོན་པར་ཤེས་པ་ལས་མི་ཉམས་པ་རྣམས་ 393b ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། གཡུལ་ལས་རྣམ་པར་རྒྱལ་བ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། ནང་ཉེ་བར་ཞི་བ་དང ། ཕྱི་རོལ་ཏུ་མི་རྒྱུ་བ་དང ། ཆོས་ཐམས་ཅད་ལ་སྒྱུ་མ་ལྟ་བུར་རབ་ཏུ་རྟོག་པའི་ཤེས་པ་དང ། ཡེ་ཤེས་ཀྱི་སྟོབས་ཅན་ཡིན་གྱི་ཉོན་མོངས་པའི་སྟོབས་ཅན་མ་ཡིན་པ་སྟེ། རིགས་ཀྱི་བུ།་བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། གཡུལ་ལས་རྣམ་པར་རྒྱལ་བ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། རྒལ་ནས་ཕ་རོལ་ཐང་ལ་གནས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། འདོད་པའི་ཆུ་བོའང་རབ་ཏུ་ཤེས་ལ་འདོད་ཆགས་དང་བྲལ་བའང་མངོན་སུམ་དུ་མི་བྱེད་པ་དང ། སྲིད་པའི་ཆུ་བོའང་རབ་ཏུ་ཤེས་ལ་བསམ་བཞིན་དུའང་སྐྱེ་བ་དང ། ལྟ་བའི་ཆུ་བོའང་རབ་ཏུ་ཤེས་ལ་ལྟ་བའི་བཅིང་པས་བཅིངས་པའང་མི་འདོར་བ་དང ། མ་རིག་པའི་ཆུ་བོའང་རབ་ཏུ་ཤེས་ལ་རྟེན་ཅིང་འབྲེལ་པར་འབྱུང་བའི་རྗེས་སུ་མཐུན་པར་ཡང་བྱེད་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། རྒལ་ནས་ཕ་རོལ་ཐང་ལ་གནས་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཉན་ཐོས་དང ། རང་སངས་རྒྱས་ཐམས་ཅད་དང ། སེམས་ཅན་ཐམས་ཅད་ཀྱི་སྤྱོད་ 394a ༄#། །ལམ་ཡང་སྟོན་ལ་མཚུངས་པར་སྤྱོད་པའང་རྣམ་པར་མི་རྟོག་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སྒྱུ་མ་ལྟ་བུའི་ཏིང་ངེ་འཛིན་ཤིན་ཏུ་ཡོངས་སུ་བསྒྲུབས་པ་དང ། ཆོས་ཐམས་ཅད་རྣམ་པར་བསྒྲུབས་པས་སོ་སོར་ཉེ་བར་གནས་པའི་མཚན་ཉིད་དུ་ཤིན་ཏུ་བརྟགས་པ་དང ། མངོན་པར་ཤེས་པ་ལྔས་རྣམ་པར་རྩེ་བ་ཤེས་པ་དང་ལྡན་པ་དང ། ཡིད་ཀྱི་ལུས་མངོན་པར་བསྒྲུབས་པ་ལ་མཁས་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཉན་ཐོས་དང ། རང་སངས་རྒྱས་ཐམས་ཅད་དང ། སེམས་ཅན་ཐམས་ཅད་ཀྱི་སྤྱོད་ལམ་ཡང་སྟོན་ལ་མཚུངས་པར་སྤྱོད་པར་ཡང་རྣམ་པར་མི་རྟོག་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། འཁོར་བ་ལའང་ལྟ་ལ་མྱ་ངན་ལས་འདས་པ་ལའང་མི་གནས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སངས་རྒྱས་ཀྱི་བྱིན་གྱི་རླབས་དང ། སྙིང་རྗེ་ཆེན་པོའི་སེམས་དང ། ཐབས་ལ་མཁས་པ་དང ། སྔོན་གྱི་ཡི་དམ་མི་འདོར་བ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན།་འཁོར་བ་ལའང་ལྟ་ལ་མྱ་ངན་ལས་འདས་པ་ལའང་མི་གནས་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཁམས་སྣ་ཚོགས་ 394b ལའང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོའོ། །བཞི་གང་ཞེ་ན། འདི་ལྟ་སྟེ། སེམས་ཅན་རང་བཞིན་མེད་པས་ཆོས་རང་བཞིན་མེད་པར་རྟོག་པ་དང ། ཆོས་རང་བཞིན་མེད་པས་སེམས་ཅན་རང་བཞིན་མེད་པར་རྟོག་པ་དང ། སེམས་ཅན་རང་བཞིན་མེད་པས་སངས་རྒྱས་ཀྱི་ཆོས་རང་བཞིན་མེད་པར་མོས་པ་དང ། སེམས་ཅན་རང་བཞིན་མེད་པ་ལ་སོམ་ཉི་མེད་ཅིང་ཐེ་ཚོམ་དང་བྲལ་བ་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཁམས་སྣ་ཚོགས་ལའང་རྣམ་པར་ལྟ་ལ་ཆོས་ཀྱི་དབྱིངས་ལས་ཀྱང་མི་གཡོའོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། དོན་ཡང་མི་འདོར་ལ་གནོད་པར་ཡང་ཀུན་ཏུ་སྣང་ངོ ། །བཞི་གང་ཞེ་ན། འདི་ལྟ་སྟེ། བསམ་པ་མྱ་ངན་ལས་འདས་པར་སོང་བ་རྣམས་ཡིན། སྦྱོར་བ་འཁོར་བར་སོང་བ་རྣམས་ཡིན། སངས་རྒྱས་ཀྱི་ཆོས་ཐམས་ཅད་ཡོངས་སུ་བསྐང་བ་ལ་བསམ་པ་སོང་བ་རྣམས་ཡིན། ཉན་ཐོས་དང ། རང་སངས་རྒྱས་ཀྱི་ཡུལ་ལའང་ཀུན་ཏུ་སྣང་བ་རྣམས་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། དོན་ཡང་མི་འདོར་ལ་གནོད་པར་ཡང་ཀུན་ཏུ་སྣང་ངོ ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། བསོད་ནམས་ཀྱི་ནོར་དང་ལྡན་ལ་ཐབས་ཀྱི་ནོར་མེད་པ་རྣམས་ཡིན་ནོ། །བཞི་གང་ཞེ་ན། 395a ༄#། །འདི་ལྟ་སྟེ། རྒྱ་ཆེན་པོ་ལ་མོས་པའི་སེམས་ཅན་འདུལ་བའི་ཕྱིར་བསོད་ནམས་ཀྱིས་འཁོར་ལོས་བསྒྱུར་བ་དང ། བརྒྱ་བྱིན་དང་ཚངས་པའི་བསོད་ནམས་ཀྱང་ཉེ་བར་སྟོན་པ་དང ། འགྲོ་བ་ཕལ་པ་འདུལ་བའི་ཕྱིར་དབུལ་ཞིང་དམན་པར་ཡང་ཉེ་བར་སྙོམ་པ་དང ། སློང་བ་མཐོང་ན་བདོག་པ་ཐམས་ཅད་གཏོང་ཞིང་ནོར་མེད་པར་ཡང་འགྱུར་བ་དང ། ནོར་ཆེན་པོ་དང་ལྡན་པ་མཐོང་ན་བསོད་ནམས་ཀྱི་ལོངས་སྤྱོད་ཟད་མི་ཤེས་པར་ཡང་ཉེ་བར་སྟོན་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། བསོད་ནམས་ཀྱི་ནོར་དང་ལྡན་པ་ཡིན་ལ། ཐབས་ཀྱི་ནོར་མེད་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཨ་ཞེས་བྱ་བའི་སྒོས་རྣམ་པ་མེད་པའི་སྒོ་ལ་འཇུག་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། འདུ་བྱེད་ཐམས་ཅད་མི་རྟག་པར་ཤེས་པ་སྦྱོང་བ་དང ། འདུ་བྱེད་ཐམས་ཅད་གཟོད་མ་ནས་སྡུག་བསྔལ་ལོ། །ཞེས་བྱང་ཆུབ་རབ་ཏུ་རྙེད་པ་དང ། །ཆོས་ཐམས་ཅད་བདག་མེད་དོ། །ཞེས་ལྟ་བར་གྱུར་པ་ཡོངས་སུ་སྦྱོང་བ་དང ། མྱ་ངན་ལས་འདས་པ་ནི། གཟོད་མ་ནས་ཞི་བ་ཞེས་ཡེ་ཤེས་ལ་འཇུག་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཨ་ཞེས་བྱ་བའི་སྒོས་རྣམ་པ་མེད་པའི་སྒོ་ལ་འཇུག་པ་རྣམས་ཡིན་ནོ། །རིགས་ 395b ཀྱི་བུ།་བྱང་ཆུབ་སེམས་དཔའ་ཆོས་བཞི་དང་ལྡན་ན། སངས་རྒྱས་ཀྱི་ཆོས་ཐམས་ཅད་མངོན་སུམ་དུ་འགྱུར་བ་ཡིན་ནོ། །བཞི་གང་ཞེ་ན། འདི་ལྟ་སྟེ། ཤེས་རབ་ཀྱི་མིག་ཤིན་ཏུ་རྣམ་པར་དག་པ་རྣམས་ཡིན། ཆོས་ཀྱི་མིག་གིས་སྣང་བ་ཐོབ་པ་རྣམས་ཡིན། སངས་རྒྱས་ཀྱི་སྤྱན་མངོན་སུམ་དུ་གྱུར་པ་རྣམས་ཡིན། སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སངས་རྒྱས་ཀྱི་ཆོས་ཐམས་ཅད་མངོན་སུམ་དུ་འགྱུར་བ་རྣམས་ཡིན་ནོ། །རིགས་ཀྱི་བུ།་བྱང་ཆུབ་སེམས་དཔའ་ཆོས་བཞི་དང་ལྡན་ན། ཆོས་རྣམ་པར་གདོན་མི་ཟ་བ་རྣམས་ལ་རྣམ་པར་ཕྱེ་བ་ཤིན་ཏུ་རྣམ་པར་འབྱེད་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སོ་སོ་ཡང་དག་པར་རིག་པ་ཤེས་པ་སྒྲིབ་པ་མེད་པ་དང ། བདེན་པ་རྣམ་པར་དགོད་པ་ཤེས་པ་དང ། རྟོན་པ་ལ་གནས་སུ་ཤེས་པ་དང ། གཟུངས་ལ་གཡེང་བ་མེད་པར་ཤེས་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཆོས་རྣམ་པར་གདོན་མི་ཟ་བ་རྣམས་ལ་རྣམ་པར་ཕྱེ་བ་ཤིན་ཏུ་རྣམ་པར་འབྱེད་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། འཇིག་རྟེན་གྱི་བྱ་བ་དང་མཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ཡིན་ནོ། །བཞི་གང་ཞེ་ན། འདི་ལྟ་ 396a ༄#། །སྟེ།་འཇིག་རྟེན་གྱི་ཆོས་མངོན་སུམ་དུ་གྱུར་པ་དང ། འཇིག་རྟེན་ལས་སེམས་ཅན་ཡང་དག་པར་སྒྲོལ་བ་དང ། རྗེས་སུ་ཆགས་པ་དང་ཁོང་ཁྲོ་བ་སྤོང་བ་དང ། གཟོད་མ་ནས་རྣམ་པར་དག་ཅིང་འོད་གསལ་བས་ཀྱང་རང་བཞིན་གྱིས་ཉོན་མོངས་པ་མེད་པ་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། འཇིག་རྟེན་གྱི་བྱ་བ་དང་མཐུན་པར་ཞུགས་ཀྱང་ཉོན་མོངས་པ་ཐམས་ཅད་ཀྱིས་མི་གོས་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། གཞན་དག་གིས་བལྟར་མི་མཐོང་བའི་ཆོས་ཀྱི་དབང་ཕྱུག་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཀྱི་དབང་ཕྱུག་དང ། ཤེས་རབ་ཀྱི་དབང་ཕྱུག་དང ། ཡེ་ཤེས་ཀྱི་དབང་ཕྱུག་དང ། ཐབས་ཀྱི་དབང་ཕྱུག་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། གཞན་དག་གིས་བལྟར་མི་མཐོང་བའི་ཆོས་ཀྱི་དབང་ཕྱུག་རྣམས་ཡིན་ནོ། ། རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་རྣམས་སངས་རྒྱས་མཐོང་བ་ཡང་དག་པར་འཛིན་དུ་འཇུག་པ་དང ། སེམས་ཅན་རྣམས་ཆོས་ཉན་པ་ཡང་དག་པར་འཛིན་དུ་འཇུག་པ་དང ། སེམས་ཅན་རྣམས་བྱང་ཆུབ་ཀྱི་ 396b སེམས་ཡང་དག་པར་འཛིན་དུ་འཇུག་པ་དང ། སངས་རྒྱས་རྗེས་སུ་དྲན་པའི་ཏིང་ངེ་འཛིན་དང་མི་འབྲལ་བ་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། དེ་བཞིན་གཤེགས་པ་མཐོང་བ་དང་མི་འབྲལ་བ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཤིན་ཏུ་དུལ་ཞིང་མི་འཁྲུགས་པའི་ཆོས་ཅན་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། འཕགས་པ་འཇིག་རྟེན་ལས་འདས་པའི་ཤེས་རབ་ཀྱིས་རྣམ་པར་གྲོལ་བའི་ཡེ་ཤེས་མཐོང་བ་མངོན་སུམ་དུ་གྱུར་པ་དང ། བདེན་པ་ལ་ཉེ་བར་བརྟགས་པས་ཆོས་ཐམས་ཅད་ཇི་ལྟ་བ་བཞིན་པ་དང ། བག་ཆགས་ཀྱི་མཚམས་སྦྱོར་བ་ཐམས་ཅད་ཡང་དག་པར་གཅོད་པ་ལ་མཁས་པར་གྱུར་པ་དང ། ཉོན་མོངས་པས་མི་འཁྲུགས་པའི་ཆོས་ཅན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཤིན་ཏུ་དུལ་ཞིང་མི་འཁྲུགས་པའི་ཆོས་ཅན་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཆོས་རྣམས་བླང་བ་མེད་པར་སློབ་དཔོན་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་ཕན་པའི་དངོས་པོ་ཕུན་སུམ་ཚོགས་པ་རྣམས་ཡིན། སེམས་ཅན་ཡོངས་སུ་སྨིན་པར་བྱ་བ་ལ་བརྟན་ཟིང་བསམ་པ་སྒྱུ་མེད་པ་རྣམས་ཡིན། བདག་གི་བདེ་བ་ལ་མི་ཆགས་པ་རྣམས་ཡིན། གང་ཡེ་ཤེས་ཡོངས་སུ་ཚོ་ལ་བ་དེའང་སེམས་ཅན་ 397a ༄#། །ཐམས་ཅད་ཀྱི་ཆེད་དུ་ཡིན་གྱི་བདག་འབའ་ཞིག་གི་ཕྱིར་མ་ཡིན་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། ཆོས་རྣམས་བླང་པ་མེད་པར་སློབ་དཔོན་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། སེམས་ཅན་ཐམས་ཅད་ཀྱི་སྟོན་པར་གྱུར་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། བདག་གི་དོན་གཏོང་ཞིང་གཞན་གྱི་དོན་བྱེད་པ་རྣམས་ཡིན། བདག་གི་བདེ་བ་ཐམས་ཅད་གཏོང་ཞིང་སེམས་ཅན་རྣམས་ལ་ཆོས་ཀྱི་བདེ་བ་སྦྱིན་པ་རྣམས་ཡིན། ཇི་ལྟར་ཐོས་པའི་ཆོས་སྟོན་པ་ལ་ངལ་བ་མེད་པ་རྣམས་ཡིན། ཆོས་ཀྱི་འཚོ་བས་འཚོ་ཡི་ཟང་ཟིང་གིས་འཚོ་བ་མ་ཡིན་པ་སྟེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན།་སེམས་ཅན་ཐམས་ཅད་ཀྱི་སྟོན་པར་གྱུར་པ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། སངས་རྒྱས་ཐམས་ཅད་ཀྱི་ཆོས་ཀྱི་འཁོར་ལོ་རྗེས་སུ་བསྐོར་བ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། གཟུངས་རབ་ཏུ་ཐོབ་པ་དང ། སྤོབས་བ་རྒྱུན་མི་ཆད་པ་དང ། སེམས་ཅན་གྱི་བསམ་པ་ཤེས་པ་ལ་འཇུག་པ་དང ། མྱ་ངན་ལས་འདས་པའི་ལམ་དུ་ཁྲིད་ཅིང་མི་ཕྱེད་པའི་ཆོས་སྟོན་པ་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སངས་རྒྱས་ཐམས་ཅད་ 397b ཀྱི་ཆོས་ཀྱི་འཁོར་ལོ་རྗེས་སུ་བསྐོར་བ་རྣམས་ཡིན་ནོ། །རིགས་ཀྱི་བུ། བྱང་ཆུབ་སེམས་དཔའ་ཆོས་བཞི་དང་ལྡན་ན། སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ནོ། །བཞི་གང་ཞེ་ན། འདི་ལྟ་སྟེ། སྤྱོད་པ་ཐམས་ཅད་ལས་རབ་ཏུ་འདས་པ་རྣམས་ཡིན། བྱང་ཆུབ་སེམས་དཔའི་སྤྱོད་པ་ལས་མི་ལྡོག་ཅིང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་རྣམས་ཡིན། བསམ་བཞིན་དུ་ཚེ་དང ། འཆི་འཕོ་དང ། སྐྱེ་བའང་སྟོན་ལ་ཕྱིར་མི་ལྡོག་པའི་ཕྱིར་རྒྱས་ཀྱང་བཏབ་པ་རྣམས་ཡིན། དེ་བཞིན་གཤེགས་པའི་ཕྱག་རྒྱལ་ཡང་དག་པར་གཞོལ་ཞིང་ས་བཅུར་ངེས་པར་བྱུང་ན་ས་ནས་སར་འཕར་བ་ལ་མཁས་པ་ཡིན་ཏེ། རིགས་ཀྱི་བུ། བྱང་ཆུབ་སེམས་དཔའ་ཆོས་འདི་བཞི་དང་ལྡན་ན། སངས་རྒྱས་ཀྱི་ཆོས་ཐམས་ཅད་ལ་དབང་བསྐུར་བ་ཐོབ་པ་རྣམས་ཡིན་ནོ། །བཅོམ་ལྡན་འདས་ཀྱིས་བཞི་པ་སྒྲུབ་པའི་ཆོས་ཀྱི་རྣམ་གྲངས་འདི་བཤད་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ནས་སྣང་བ་ཆེན་པོས་ཀྱང་འཇིག་རྟེན་གྱི་ཁམས་ཁྱབ་པར་གྱུར་ཏོ། །སྟེང་གི་པར་སྣང་ལས་ལྷ་བྱེ་བ་ཁྲིག་ཁྲིག་བརྒྱ་སྟོང་གིས་ལྷའི་གླུ་དབྱངས་བླངས་ཏེ་ལྷའི་མེ་ཏོག་མནྡཱ་ར་བའི་ཆར་རབ་ཏུ་ཕབ་ནས་འདི་སྐད་ཅེས་ཀྱེ་མའོ་བཅོམ་ལྡན་འདས་ཀྱིས་འདིར་སངས་རྒྱས་བཅོམ་ལྡན་འདས་རྣམས་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བཞི་ 398a ༄#། །པ་སྒྲུབ་པའི་ཆོས་ཀྱི་རྣམ་གྲངས་འདི་ལས་བསྟན་པ་འདི་ནི། བསྐལ་པ་བྱེ་བ་ཁྲག་ཁྲིག་གྲངས་མེད་པ་ནས་བསྒྲུབས་པ་ལགས་སོ། །བཅོམ་ལྡན་འདས། གང་བཞི་པ་སྒྲུབ་པའི་ཆོས་ཀྱི་རྣམ་གྲངས་འདི་ཉན་པ་དང ། མཉན་ནས་མོས་པ་དང ། མོས་ནས་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལའང་སྟོན་པ་དང ། བྱང་ཆུབ་ཀྱི་སེམས་དང་མི་འབྲལ་བའི་སེམས་ཅན་དེ་དག་ནི། དགེ་བའི་རྩ་བ་ངན་ངོན་དང་ལྡན་པ་མ་ལགས་ཏེ། དེ་དག་ནི། ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་སེངྒེའི་སྒྲ་སྒྲོག་པ་བཞིན་དུ་ལྷ་དང ། མི་དང ། ལྷ་མ་ཡིན་གྱི་འཇིག་རྟེན་གྱི་མདུན་དུ་སེངྒེའི་སྒྲ་སྒྲོག་པར་འགྱུར་རོ། ། བཅོམ་ལྡན་འདས། བདག་ཅག་ཀྱང་བཞི་པ་སྒྲུབ་པའི་ཆོས་ཀྱི་རྣམ་གྲངས་འདི་ཐོས་པས་རྙེད་པ་ལེགས་པར་རྙེད་དོ། །ཞེས་ཆེད་དུ་བརྗོད་པ་ཆེན་དུ་བརྗོད་དོ། །བཅོམ་ལྡན་འདས་ཀྱིས་བཞི་པ་སྒྲུབ་པའི་ཆོས་ཀྱི་རྣམ་གྲངས་འདི་བཤད་པ་ན་ལྷ་དང ། མིའི་སྲོག་ཆགས་བརྒྱད་ཁྲི་བཞི་སྟོང་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ཁྲི་ཉིས་སྟོང་ནི། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ 398b གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་འདི་འཛིན་པ་དང ། གཞན་དག་ལ་རྒྱ་ཆེར་རབ་ཏུ་སྟོན་པའི་བྱང་ཆུབ་སེམས་དཔའ་དེ་དག་ཆོས་དུ་དང་ལྡན་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གང་དག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་འདི་འཛིན་པ་དང ། གཞན་དག་ལའང་རྒྱ་ཆེར་ཡང་དག་པར་སྟོན་པའི་བྱང་ཆུབ་སེམས་དཔའ་དེ་དག་ནི། ཆོས་བརྒྱད་དང་ལྡན་པར་འགྱུར་རོ། །བརྒྱད་གང་ཞེ་ན། འདི་ལྟ་སྟེ། དེ་དག་ཡང་དག་པར་རྫོགས་པའི་བྱང་ཆུབ་ལ་བསམ་པ་ངེས་ཏེ། བསམ་པ་ཕུན་སུམ་ཚོགས་པར་འགྱུར་བ་དང ། སེམས་ཅན་ཐམས་ཅད་ལ་ཞེ་སྡང་བའི་སེམས་མེད་དེ།་ཤིན་ཏུ་བྱམས་པ་བསྒོམ་པ་བསྒོམས་པར་འགྱུར་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་ལ་གནས་ཏེ་སྙིང་རྗེ་ཆེན་པོ་ལ་གནས་པར་འགྱུར་བ་དང ། ཆོས་འདོད་དེ་ཆོས་དོན་དུ་གཉེར་བར་འགྱུར་བ་དང ། ཐོས་པ་ཚོལ་བས་མི་ངོམས་ཏེ། མཚོ་ཆེན་རྒྱ་མཚོ་ལྟ་བུར་འགྱུར་བ་དང ། ལུས་དང་སྲོག་འདོར་ཞིང་དམ་པའི་ཆོས་ཡོངས་སུ་འཛིན་པར་འགྱུར་བ་དང ། བསོད་ནམས་ཀྱི་ཚོགས་བསགས་ཏེ། དགེ་བའི་རྩ་བ་བརྟན་པར་འགྱུར་བ་དང ། སངས་རྒྱས་ཀྱི་བྱིན་གྱི་རླབས་ཀྱིས་བྱིན་གྱིས་བརླབས་ཏེ་སྨོན་ལམ་གྱིས་ 399a ༄#། །ཡང་དག་པར་བྱུང་བར་འགྱུར་བ་དང ། འཁོར་གྱི་ནང་དུ་འཇིགས་པ་མེད་པས་བདུད་དང་ཕྱིར་རྒོལ་བ་བཅོམ་པར་འགྱུར་བ་སྟེ། རིགས་ཀྱི་བུ། གང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མདོ་སྡེ་འདི་ལྟ་བུ་འདི་འཛིན་པ་དང ། གཞན་དག་ལ་རྒྱ་ཆེར་སྟོན་པའི་བྱང་ཆུབ་སེམས་དཔའ་དེ་དག་ནི། ཆོས་བརྒྱད་པོ་འདི་དག་དང་ལྡན་པར་འགྱུར་རོ། །དེ་ནས་དེའི་ཚེ་སངས་རྒྱས་ཀྱི་མཐུས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་གང་དག་ས་ཕྱོགས་མཐོ་དམའ་ཅན་དང ། རི་ནག་པོ་དང ། ཆུ་མིག་དང ། མཚོ་དང ། ལྟེང་ཀ་དང ། རྒྱ་མཚོ་ཆེན་པོ་དེ་དག་ཐམས་ཅད་མི་སྣང་བར་འགྱུར་ཏོ། །ས་ཆེན་པོ་འདི་ཐམས་ཅད་ཀྱང་ལག་མཐིལ་ལྟར་མཉམ་པར་གནས་པར་གྱུར་ཏོ། །ཆུ་ན་གནས་པའི་སེམས་ཅན་རྣམས་ལའང་གནོད་པ་མེད་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་ཤིང་སྐམ་གང་དག་ལོ་བརྒྱ་ལོན་པ་དེ་དག་ཐམས་ཅད་ལས་ཀྱང་མེ་ཏོག་དང ། འབྲས་བུ་སྣ་ཚོགས་སྐྱེས་པར་གྱུར་ནས་བཅོམ་ལྡན་འདས་ག་ལ་བ་དེ་ལོགས་སུ་བཏུད། མངོན་པར་བཏུད་ནས་ཕྱག་འཚལ་བར་གྱུར་ཏོ། །དེ་མ་ཡིན་པ་ཤིང་གཞན་ 399b ཐམས་ཅད་ལས་ཀྱང་མེ་ཏོག་དང ། འབྲས་བུ་སྣ་ཚོགས་སྐྱེས་ནས་བཅོམ་ལྡན་འདས་ག་ལ་བ་དེ་ལོགས་སུ་བཏུད། མངོན་པར་བཏུད་ནས་ཕྱག་འཚལ་བར་གྱུར་ཏོ། །ས་ཆེན་པོ་ལས་པདྨ་ཚད་ཤིང་རྟའི་འཁོར་ལོ་ཙམ་སྣ་ཚོགས་བལྟ་ན་སྡུག་པ། ཁ་དོག་དང་ལྡན་པ་དྲི་དང་ལྡན་པ་ཡིད་དུ་འོང་བ་སྐྱེས་སོ། །སྣང་བ་ཆེན་པོས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གསལ་བར་གྱུར་ཏོ། །མི་སྣང་ཞིང་མ་དཀྲོལ་བར་སྟེང་གི་བར་སྣང་ལས་ལྷའི་སིལ་སྙན་དང ། གླུ་དབྱངས་ཀྱི་སྒྲ་བྱུང་སྟེ་གྲགས་པར་གྱུར་ཏོ། །རིའི་རྒྱལ་པོ་གངས་ཅན་དང ། རིའི་རྒྱལ་པོ་སྤོས་ཀྱི་ངད་ལྡང་ལས་ཀྱང་ལྷའི་མེ་ཏོག་སྣ་ཚོགས་སྔོན་དྲི་མི་མནམ་པ་རྣམས་ཀྱང་མཆོག་གི་དྲི་ལངས་པར་གྱུར་ཏེ། དྲི་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་དྲི་ཞིམ་པོ་བསྣམ་པར་གྱུར་ཏོ། །རིའི་རྒྱལ་པོ་གངས་ཅན་དང ། རིའི་རྒྱལ་པོ་སྤོས་ཀྱི་ངད་ལྡང་དེ་ལས་མེ་ཏོག་གི་ཆར་ཆེན་པོ་བབས་ཏེ་དེ་དགྲ་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་གང་ན་བ་དེར་མངོན་པར་བབས་ནས་ས་ཆེན་པོ་འདིར་མེ་ཏོག་གི་ཆར་དེ་དག་གིས་བུས་མོ་མན་ཆད་ནུབ་པར་གྱུར་ཏོ། །མེ་ཏོག་གི་འདི་དག་ལས་མེ་ཏོག་སྣ་ཚོགས་ཀྱི་ཆར་རབ་ཏུ་འབབ་ཅིང ། སིལ་སྙན་དང ། གླུ་དབྱངས་སྣ་ཚོགས་ཀྱི་སྒྲ་དག་ཀྱང་བྱུང་ངོ ། །སྟེང་གི་བར་སྣང་ལ་རིན་པོ་ཆེ་སྣ་ཚོགས་ཀྱི་ 400a ༄#། །གདུགས་དཔག་ཚད་བརྒྱ་སྟོང་ཕྲག་བཅུའི་ཚད་ཙམ་ཀུན་ཏུ་གནས་པར་གྱུར་ཏོ། །རིན་པོ་ཆེའི་གདུགས་དེ་ལས་མུ་ཏིག་གི་དོ་ཤལ་དང ། རིན་པོ་ཆེའི་དྲིལ་བ་གཡེར་ཀའི་དྲིལ་བུ་སྣ་ཚོགས་ཀྱི་དྲ་བ་འཕྱང་བར་གྱུར་ཏོ། །དྲིལ་བུ་གཡེར་ཀའི་དྲ་བའི་སྒྲ་ཡིད་དུ་འོང་བ། ཡིད་དགའ་བར་བྱེད་པ། ཆགས་པར་བྱེད་པ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གོ་བར་བྱས་པར་གྱུར་ཏོ། །དེ་ནས་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས།་དགའ་བར་བགྱིད་པ། མགུ་བར་བགྱིད་པའི་མཚན་མ་རྒྱ་ཆེན་པོ་འདི་ལྟ་བུ་འདི་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྒྱུན་ཐམས་ཅད་ཀྱིས་བརྒྱན་པར་གྱུར་པ་དགའ་བ་འདི་སུའི་སྔ་ལས་ལགས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། འདི་ནི། མི་འམ་ཅིའི་རྒྱལ་པོ་སྡོང་པོ་རི་སྤོས་ཀྱི་ངད་ལྡང་ནས་འཁོར་མི་འམ་ཅི་སྟོང་ཕྲག་དུ་མ་དང ། འཁོར་དྲི་ཟ་སྟོང་ཕྲག་དུ་མ་དང ། འཁོར་ལྷ་སྟོང་ཕྲག་དུ་མ་དང་བཅས་ཏེ་འོང་བ་དེའི་སྔ་ལྟས་སོ། །དེ་སྐད་གསུངས་མ་ཐག་ཏུ་དེ་ནས་སྐད་ཅིག་དེ་ལ་མི་འམ་ཅིའི་རྒྱལ་པོ་སྡོང་པོ་སིལ་སྙན་དང ། གླུ་དབྱངས་ལེན་པ་བརྒྱད་ཁྲི་བཞི་སྟོང་དང ། འཁོར་བརྒྱ་སྟོང་དུ་མས་བསྐོར་ནས་སྟེང་གི་བར་སྣང་ལ་མེ་ཏོག་གི་ཆུན་པོའི་ཆར་འབེབས་ 400b ཤིང ། བཅོམ་ལྡན་འདས་ག་ལ་བ་དེར་འོངས་ཏེ་ཕྱིན་ནས་འཁོར་དང་བཅས་པས་བཅོམ་ལྡན་འདས་ཀྱི་ཞབས་ལ་ཕྱག་བཙལ་ཏེ་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་འདུག་གོ་།དེ་ནས་བཅོམ་ལྡན་འདས་ཀྱི་སྤྱན་སྔར་མི་འམ་ཅིའི་རྒྱལ་པོ་སྡོང་པོ་བདག་ཉིད་ཀྱིས་པི་ཝང་གི་ཁོག་པ་བཻ་ཌཱུརྱ་ལས་བྱས་པ། ཛམྦུའི་གླིང་གི་གསེར་གྱི་སབ་ལེའུ་ཅན། ས་ལེ་སྦྲམ་དང ། ནོར་བུ་དང ། རིན་པོ་ཆེ་དུ་མས་སྤྲས་པ། སྔོན་གྱི་ལས་ཀྱི་རྣམ་པར་སྨིན་པས་ཡོངས་སུ་སྦྱངས་པ་བླངས་ཏེ་སིལ་སྙན་བརྒྱད་ཁྲི་བཞི་སྟོང་པོ་དེ་དག་དང་ལྷན་ཅིག་ཏུ་གྲག་པར་བྱེད་དོ། །མི་འམ་ཅིའི་རྒྱལ་པོ་སྡོང་པོས་པི་ཝང་དེ་བླངས་མ་ཐག་ཏུ་དེ་ནས་པི་ཝང་གི་སྒྲ་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དབྱངས་ཀྱིས་གོ་བར་གྱུར་ཏོ། །པི་ཝང་གི་སྒྲ་དེས་འདོད་པ་ན་སྤྱོད་པའི་རྒྱུད་ཀྱི་སྒྲ་དང ། གླུའི་སྒྲ་དང ། ལྷའི་གླུ་དབྱངས་ཀྱི་སྒྲ་རྣམས་ཟིལ་གྱིས་མནན་ཏེ་མི་གསལ་བར་གྱུར་ཏོ། །དེ་ནས་པི་ཝང་གི་སྒྲ་བསྐུལ་བས་འདོད་པ་ན་སྤྱོད་པའི་ལྷའི་བུ་དེ་དག་གིས་ལྷའི་རོལ་མོ་བོར་ཏེ་བཅོམ་ལྡན་འདས་ག་ལ་བ་དེར་ལྷགས་སོ། །མི་འམ་ཅིའི་རྒྱལ་པོ་སྡོང་པོས་པི་ཝང་དེ་བླངས་མ་ཐག་ཏུ་དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ཤིང་དང ། རིའི་རྒྱལ་པོ་རི་རབ་དང ། གངས་ཅན་དང ། སྤོས་ཀྱི་ངད་ལྡང་དང ། བཏང་བཟུང་དང ། བཏང་བཟུང་ཆེན་པོ་ 401a ༄#། །དང ། དེ་མ་ཡིན་པ་གཞན་རི་ནག་པོ་རྣམས་དང ། རྩཝ་དང ། ཤིང་གེལ་པ་དང ། སྨན་དང ། ནགས་ཚལ་ཇི་སྙེད་པ་དེ་དག་ཐམས་ཅད་ལྡེག་།རབ་ཏུ་ལྡེག་།ཀུན་ཏུ་རབ་ཏུ་ལྡེག་གོ་།གཡོ། །རབ་ཏུ་གཡོ། །ཀུན་ཏུ་རབ་ཏུ་གཡོའོ། །འགུལ། རབ་ཏུ་འགུལ། ཀུན་ཏུ་རབ་ཏུ་འགུལ་ལོ། །འདི་ལྟ་སྟེ། དཔེར་ན། ཆང་གིས་ར་རོ་བའི་མི་འཁྱོར།་རབ་ཏུ་འཁྱོར། ཀུན་ཏུ་རབ་ཏུ་འཁྱོར་བ་དེ་བཞིན་དུ་ཤིང་དེ་དག་ཐམས་ཅད་དང ། རི་ཐམས་ཅད་ཀྱང་འདུད། རབ་ཏུ་འདུད། ཀུན་ཏུ་རབ་ཏུ་འདུད་དོ། །བམ་པོ་གཉིས་པ།་མིའམ་ཅིའི་རྒྱལ་པོ་སྡོང་པོས་པི་ཝང་ཁོག་པ་བཻ་ཌཱུརྱ་ལས་བྱས་པ་བླངས་མ་ཐག་ཏུ་དེ་ནས་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་དེར་འདུས་པའི་ནང་ནས་ཕྱིར་མི་ལྡོག་པའི་བྱང་ཆུབ་སེམས་དཔའ་མ་གཏོགས་པར་འདོད་ཆགས་དང་བྲལ་བའི་དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། མི་དང ། མི་མ་ཡིན་པ་དང ། རྣམ་པར་ཐར་པ་བརྒྱད་ལ་བསམ་གཏན་པའི་དགྲ་བཅོམ་པ་དང ། ཐམས་ཅད་དང་ལྡན་པའི་འཁོར་གྱིས་པི་ཝང་གི་སྒྲ་དེ་ཐོས་པ་དང ། པི་ཝང་གི་སྒྲ་དེ་མ་ 401b བཟོད་ནས་རང་རང་གི་སྟན་ལས་ལངས་ཏེ་འདར། རབ་ཏུ་འདར། ཀུན་ཏུ་རབ་ཏུ་འདར་རོ། །འདུད། རབ་ཏུ་འདུད། ཀུན་ཏུ་རབ་ཏུ་འདུད་དོ། །གར་བྱེད། རབ་ཏུ་གར་བྱེད། ཀུན་ཏུ་རབ་ཏུ་གར་བྱེད་དོ། །ཉན་ཐོས་ཆེན་པོ་དེ་དག་ཐམས་ཅད་ཀྱང་རང་རང་གི་སྟན་ལ་མི་དགའ་སྟེ་འགུལ། རབ་ཏུ་འགུལ་ཞིང་སྤྱོད་ལམ་ཡང་འཁྲུགས་ནས་བྱིས་པ་ཆུང་ངུ་བཞིན་དུ་གར་བྱེད་པ་ལྟ་བུར་སྟོན་ཏོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་ཉན་ཐོས་ཆེན་པོ་དེ་དག་ཐམས་ཅད་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་ཉན་ཐོས་ཆེན་པོ་དག་ཉོན་མོངས་པ་དང་བྲལ་བ། རྣམ་པར་ཐར་པ་བརྒྱད་ལ་བསམ་གཏན་པ། བདེན་པ་བཞི་མཐོང་བར་གྱུར་པ་ཡིན་ན། ཅིའི་ཕྱིར་རང་གི་ལུས་འཇོག་པར་མི་ནུས་ཤིང ། ཚེ་དང་ལྡན་པ་དག་བྱིས་པ་ཆུང་ངུ་བཞིན་དུ་གར་བྱད་པ་ལྟ་བུར་སྟོན། ཉན་ཐོས་ཆེན་པོ་དེ་དག་གིས་སྨྲས་པ། རིགས་ཀྱི་བུ། མི་འམ་ཅིའི་རྒྱལ་པོ་སྡོང་པོས་པི་ཝང་འདི་བླངས་པ་དང ། སིལ་སྙན་དང ། གླུ་དབྱངས་སྦྱར་བས་པི་ཝང་གི་སྒྲ་དེས་བདག་ཅག་ལ་དབང་མེད་པར་བདག་ཅག་གི་ལུས་རང་རང་གི་སྟན་ལ་འདུག་པར་མི་དགའ། འདར། རབ་ཏུ་འདར། ཀུན་ཏུ་རབ་ཏུ་འདར་ཏེ་སེམས་རྣམ་པར་བཞག་པར་ཡང་མ་དུས་སོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་གནས་བརྟན་འོད་སྲུང་ཆེན་པོ་ལ་འདི་སྐད་ཅེས་སྨྲས་སོ། །བཙུན་པ་འོད་སྲུང་ཆེན་པོ་རྒས་གཏུགས་འཁོགས་པ། འདོད་པ་ཉུང་ 402a ༄#། །བ།་ཆོག་ཤེས་པ། སྦྱངས་པའི་ཡོན་ཏན་འཛིན་པ་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་གྱི་མཆོད་རྟེན་དུ་གྱུར་པ་ཡིན་ན། ཅིའི་ཕྱིར་རང་གི་ལུས་འཛིན་པར་མི་ནུས་ཤིང ། གནས་བརྟན་དུ་གྱུར་ཀྱང་བྱིས་པ་ཆུང་ངུ་བཞིན་དུ་གར་བྱེད་པ་ལྟ་བུར་སྟོན། གནས་བརྟན་འོད་སྲུང་ཆེན་པོས་སྨྲས་པ། རིགས་ཀྱི་བུ། དཔེར་ན།་དམུ་རླུང་ཕྱད་པའི་རླུང་ལངས་པ་ན་ཤིང་དང ། ནགས་དང ། རི་ཐམས་ཅད་གང་གིས་བདག་རྣམ་པར་གཞག་པའི་སྟོབས་མེད་མཐུ་མེད་དེ། དེ་དག་ཐམས་ཅད་མི་འདོད་བཞིན་དུ་གཡོ། །རབ་ཏུ་གཡོ། །འགུལ། རབ་ཏུ་འགུལ་ལོ། །རིགས་ཀྱི་བུ། དེ་བཞིན་དུ་གང་འདི་མི་འམ་ཅིའི་རྒྱལ་པོ་སྡོང་པོས་པི་ཝང་བླངས་པ་དེའི་སྒྲ་ཐོས་པས་བདག་ཅག་དམུ་རླུང་ཕྱད་པས་རི་ཆེན་པོ་བདས་པ་བཞིན་དུ་བདག་འཛིན་མ་ནུས་པར་གྱུར་ཏོ། །དེ་ཅིའི་ཕྱིར་ཞེ་ན། སྐྱེས་བུ་དམ་པ་འདིའི་སྨོན་ལམ་དང ། བསོད་ནམས་དང ། ཡེ་ཤེས་ཀྱི་ཁྱད་པར་ནི། འདི་འདྲ་སྟེ།་དེས་ཉན་ཐོས་ཀྱི་བསོད་ནམས་དང ། ཡེ་ཤེས་དང ། གཟི་བརྗིད་ཐམས་ཅད་ཟིལ་གྱིས་ནོན་ཏོ། །བྱང་ཆུབ་སེམས་དཔའ་ལྷའི་ཅོད་པན་གྱིས་སྨྲས་པ། བཙུན་པ་འོད་སྲུང་ཆེན་པོ།་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ཀྱི་དཔལ་དང ། གཟི་བརྗིད་དང ། སྟོབས་ལ་གང་གི་ཕྱིར་པི་ཝང་གི་སྒྲ་དེས་བསྐུལ་བའམ། བསྐྱོད་པར་མི་ནུས་པས་ 402b བཙུན་པ་འོད་སྲུང་ཆེན་པོ། སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེད། དེ་ཅིའི་ཕྱིར་ཞེ་ན། གང་ཉི་ཆེའི་ཡེ་ཤེས་དང་ལྡན་པ་རྣམས་ཀྱི་སྟོབས་དང ། གཟི་བརྗིད་དེ་ནི། པི་ཝང་གི་སྒྲ་འདིས་ཟིལ་གྱིས་ནོན་ཏོ། །གང་ཐེག་པ་ཆེན་པོ་ལ་ཞུགས་པ་རྣམས་ཀྱི་སྟོབས་དང ། གཟི་བརྗིད་དེ་ལ་ནི། ཟིལ་གྱིས་གནོན་པར་མི་ནུས་པ་ལ་ལྟོས། དེ་ནས་མི་འམ་ཅིའི་རྒྱལ་པོ་སྡོང་པོས་པི་ཝང་གི་སྒྲ་དེ་སྒྲོག་པ་ན་སངས་རྒྱས་ཀྱི་མཐུ་དང ། མི་འམ་ཅིའི་རྒྱལ་པོ་སྡོང་པོའི་སྔོན་གྱི་སྨོན་ལམ་གྱི་བྱིན་གྱི་རླབས་ཀྱིས་པི་ཝང་དེ་དང ། སིལ་སྙན་བརྒྱད་ཁྲི་བཞི་སྟོང་པོ་དེ་དག་ལས་ཚིགས་སུ་བཅད་པ་འདི་དག་བྱུང་ངོ ། །ཐམ་འབྲིང་དང་དེ་བཞིན་མཆོག་རྣམས་ཀྱི། །ཆོས་རྣམས་ཐམས་ཅད་མཉམ་ཞིང་ཆོས་རྣམས་དབེན། །ཞི་བ་སྟོང་པ་མི་འགྱུར་འཁྲུགས་པ་མེད། །གཟོད་ནས་དག་སྟེ་དྲི་མེད་ནམ་མཁའ་བཞིན། །གང་དག་ད་ལྟར་གྱི་དང་འདས་པ་ཡི། །སེམས་ཅན་ཀུན་མཉམ་སེམས་ཅན་སེམས་ཅན་མེད། །སེམས་ཅན་སྐད་དུ་སྒྲ་རྣམས་འབྱུང་བ་ཡང ། །ཆོས་ཀྱི་སྒྲ་དང་མཚུངས་ཏེ་དེ་ཡང་མེད། །ཞིང་རྣམས་ཐམས་ཅད་ཞིང་མཉམ་ཞིང་མིན་ཏེ། །བར་སྣང་དང་ནི་མཚུངས་ཤིང་མཉམ་པར་སྣང ། །འཕེལ་བ་མ་ཡིན་མི་ཟད་མ་སྐྱེས་ཏེ། །གསོབ་གསོག་ནམ་མཁའ་ལྟ་བུར་རྣམ་པར་དག་།སངས་རྒྱས་ཀུན་མཉམ་སངས་རྒྱས་སངས་རྒྱས་ཡིན། །ཆོས་དབྱིངས་ངེས་པར་འདྲེས་པ་མེད་པ་སྟེ། །ཚུལ་ 403a ༄#། །ཁྲིམས་ཤེས་རབ་ཡེ་ཤེས་རྣམ་གྲོལ་མཉམ། །མཚན་ཉིད་གཅིག་སྟེ་མཚན་མཉམ་མཚན་ཉིད་མེད། །ཉོན་མོངས་ཐམས་ཅད་ཉོན་མོངས་མ་ཡིན་གྲོལ། ། རྟོག་དང་རྟོག་པ་ཀུན་རྟོག་རྣམ་པར་རྟོག་།ནང་ན་རྒྱུ་བམ་ཡིན་ཕྱི་རོལ་མིན། །འདུ་ཤེས་མདུད་པ་ཕྱིན་ཅི་ལོག་ལས་གྱུར། །རྣམ་པར་རྟོག་པས་ཆོས་དབྱིངས་མིང་བཏགས་པ། །མིང་དེ་ཉིད་ཀྱང་གཞན་མིན་དེ་བཞིན་མིན། །མིང་དང་གཟུགས་ཀྱི་རང་བཞིན་རྗེས་རྟོགས་པ། །དེ་དག་རྟག་ཏུ་མི་ཆགས་འཇིག་རྟེན་སྤྱོད། །གང་རྣམས་འདས་པའི་བདེ་གཤེགས་གངས་\?\་མེད་པ། །དེ་དག་གིས་ནི་གང་གསུངས་ཆོས་མང་པོ། །གཟོད་ནས་ཟད་ཅིང་དེངས་དང་འཇིགས་ལས་དབེན། །དེ་དག་ཡུལ་དང་ཕྱོགས་སུ་འགྲོ་མ་ཡིན། །ཆོས་འདི་དག་ནི་ཡི་གེ་ལས་བྱུང་སྟེ། །ཡི་གེ་གང་དག་ཟད་ཅན་ཟད་པའི་ཆོས། །ཡི་གེ་ཟད་པའི་ཆོས་ཉིད་ཤེས་པས་ན། །ཆོས་རྣམས་ཀུན་ལ་རྣམ་པར་རྟོག་མི་བྱེད། །སེམས་ཀྱི་རྒྱུད་ནི་རྒྱུད་མཉམ་རྒྱུད་མ་ཡིན། །རང་བཞིན་གཞན་དང་གཞན་ཏེ་ཆགས་པ་མེད། །སེམས་དང་སེམས་བྱུང་ཆོས་མཐའ་མེད་ཤེས་པས། །འཕགས་པ་རྣམས་ནི་མཉམ་པའི་ཆོས་ལ་འཇུག། མཐའ་དང་མཐའ་མེད་ཀུན་ཆད་རྣམ་པར་ཆད། །ཐོག་མ་ཐ་མ་པར་མ་མཉམ་གྱུར་པ། །དུས་གསུམ་དག་ནི་དབེན་པས་ཤེས་པ་མཉམ། །ཤེས་པ་དེ་ཡང་མཐའ་ཡོད་མ་ཡིན་ནོ། ། 403b སྐྱེ་བོ་རྟག་ཏུ་མིང་དང་གཟུགས་ལ་ཆགས། མཐའ་དང་མཐའ་མེད་ལྟ་བས་གོས་པ་རྣམས། །རྒྱུ་དང་རྐྱེན་ལས་བྱུང་བར་ཤེས་པས་ན། །བདག་དང་སེམས་ཅན་རྣམ་པར་རྟོག་མ་ཡིན། བདག་ལས་ལྡང་བ་རྟག་ཏུ་ལྡང་མ་ཡིན། །ཆོས་དེ་ཀུན་ནས་བསླང་བ་མེད་པ་སྟེ། །གང་དག་ལྡང་དང་ལྡང་པ་མེད་རྟོགས་པ། །དེ་དག་བཟོད་པ་མཉམ་ཉིད་རྗེས་མཐུན་པ། །ཆོས་ཀུན་རྟག་ཏུ་བདག་མེད་རང་བཞིན་ཏེ། །སྤྲིན་དང་གློག་དང་ནམ་མཁའ་ལྟ་བུ་གསོག་།བདག་དང་སེམས་ཅན་རྟག་ཏུ་རང་བཞིན་སྟོང ། །འདི་ནི་གཟུངས་ཀྱི་ཕྱག་རྒྱར་འཇུག་པའོ། །ཆོས་རྣམས་མཚན་ཉིད་གཅིག་སྟེ་མཚན་ཉིད་མེད། །གང་གིས་ཐར་པའི་སྒོ་གསུམ་རྣམ་རྟོགས་ནས། །ཐུག་པ་མེད་པའི་ཆོས་རྣམས་སྟོན་བྱེད་ཀྱང ། །ཆོས་ལ་ཡོངས་སུ་རྟོག་པ་མི་བྱེད་དོ། །ཐ་མ་འབྲིང་དང་དེ་བཞིན་མཆོག་རྣམས་ཀྱི། །ཆོས་འདི་དག་ནི་ཡི་གེ་ལས་བྱུང་སྟེ། །ཡི་གེ་རྣམས་ལ་རྣམ་པར་རྟོག་མི་བྱེད། །དེ་ལྟ་བུར་ནི་དོན་རྣམས་བཤད་པ་ཡིན། །དོན་དང་ཚིག་འབྲུ་གཉིས་ལ་མི་འཇུག་སྟེ། །གཉིས་མེད་རྟག་ཏུ་དོན་ནི་སྒྲ་དང་བྲལ། །གང་གིས་མཐའ་འདི་དབེན་པར་ཤེས་པ་ནི། །དེ་ཡི་སྔོན་གྱི་མཐའ་ནི་ཉེ་བར་ཆད། །གང་དག་སྔོན་མཐའ་ཉེ་བར་ཆད་པ་རྣམས། ། འགྲོ་བའི་དོན་དུ་འདུས་བྱས་རྣམས་ལ་སྤྱོད། །ཡང་དག་མཐའ་ནི་རྟག་ཏུ་མཐའ་མེད་ཤེས། །དེ་ཡི་བྱམས་དང་སྙིང་རྗེ་ཤིན་ཏུ་དག་།གང་གི་བྱམས་དང་སྙིང་རྗེ་རྣམ་དག་པ། །སྡུག་བསྔལ་ 404a ༄#། །དང་ནི་བདེ་བ་མཚུངས་མཉམ་སྦྱོར། །རྒོད་དང་ཁེངས་པ་མ་ཡིན་བརྟན་པ་ཡི། །སྐྱེས་བུ་མཆོག་དེ་དོན་གྱི་ཆོ་ག་ཤེས། །ཆོས་ཀྱི་ཚུལ་འདི་ཞི་ཞིང་དབེན་པ་སྟེ། །འཆད་པ་ན་ནི་དགའ་བ་ཐོབ་པར་འགྱུར། །ནམ་ཡང་འཕེལ་བ་མེད་ཅིང་འབྲི་བ་མེད། །ཆོས་ཉིད་འདི་ནི་ངར་འཛིན་མེད་ཅིང་ཞི། །བར་སྣང་ལམ་གྱི་སྒྲ་ནི་གཟུངས་མེད་དེ། ། གང་གིས་བཤད་པ་མེད་ཀྱང་གྲགས་པར་གྱུར། །གང་གིས་བཤད་དང་གང་ལ་བཤད་པ་རྣམས། །དེ་དག་ཐམས་ཅད་དབང་ཅན་རྫུན་པ་ཡིན། །ཚིགས་སུ་བཅད་པ་མངོན་པར་སྒྲུབ་པ་འདི་བཤད་པ་ན་བྱང་ཆུབ་སེམས་དཔའ་བརྒྱ་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཚིགས་སུ་བཅད་པ་འདི་ལྟ་བུ་འདི་དག་ག་ལས་བྱུང ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ།་ཁྱོད་ཀྱིས་མི་འམ་ཅིའི་རྒྱལ་པོ་ལ་དྲིས་ཤིག་དང ། དེས་དེའི་ལན་གློན་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མི་འམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མི་འམ་ཅིའི་བདག་པོ། ཚིགས་སུ་བཅད་པ་མངོན་པར་སྒྲུབ་པ་འདི་དག་ག་ལས་བྱུང ། སྨྲས་པ། སེམས་ཅན་ཐམས་ཅད་ཀྱི་སྒྲ་ལས་བྱུང་ངོ་།། 404b སྨྲས་པ། མི་འམ་ཅིའི་བདག་པོ། སེམས་ཅན་ཐམས་ཅད་ཀྱི་སྒྲ་ག་ལས་བྱུང ། སྨྲས་པ། རིགས་ཀྱི་བུ། སེམས་ཅན་ཐམས་ཅད་ཀྱི་སྒྲ་ནི། ནམ་མཁའ་ལས་འབྱུང་ངོ ། །སྨྲས་པ་མི་འམ་ཅིའི་བདག་པོ། སེམས་ཅན་ཐམས་ཅད་ཀྱི་སྒྲ་ཁོང་པའི་ནང་ནས་མི་འབྱུང་ངམ། སྨྲས་པ། རིགས་ཀྱི་བུ། དེ་ལ་ཇི་སྙམ་དུ་སེམས། སེམས་ཅན་ཐམས་ཅད་ཀྱི་སྒྲ་ལུས་ཀྱི་ནང་གི་ཁོང་ནས་བྱུང་ངམ། འོན་ཏེ་སེམས་ལས་བྱུང ། སྨྲས་པ། མི་འམ་ཅིའི་བདག་པོ། ལུས་ལས་ཀྱང་མ་ཡིན། སེམས་ལས་ཀྱང་མ་ཡིན་ནོ། །དེ་ཅིའི་ཕྱིར་ཞེ་ན། ལུས་ནི། བེམས་པོ་གཡོ་བ་མེད་པ། བྱེད་པ་མེད་པ། རྩཝ་དང ། བོད་བ་དང ། རྩིག་པ་དང ། ཤིང་དང ། མིག་ཡོར་ལྟ་བུའོ། །སེམས་ནི། གཟུགས་མེད་པ། བསྟན་དུ་མེད་པ། ཐོགས་པ་མེད་པ། རྣམ་པར་རིག་པ་མེད་པ་སྟེ། སྒྱུ་མ་ལྟ་བུའོ། །སྨྲས་པ། རིགས་ཀྱི་བུ། ལུས་དང་སེམས་མ་གཏོགས་པར་གཞན་གང་ནས་སྒྲ་འབྱུང་བར་འགྱུར། སྨྲས་པ། མི་འམ་ཅིའི་བདག་པོ། སེམས་ཅན་རྣམས་ཀྱི་སྒྲ་ནི། ཡིད་ལ་བྱེད་པ་ལས་འབྱུང་བར་བཏགས་སོ། །སྨྲས་པ། གལ་ཏེ་ནམ་མཁའ་མེད་ན། སྒྲ་ག་ལས་འབྱུང ། སྨྲས་པ། མི་འམ་ཅིའི་བདག་པོ། ནམ་མཁའ་མ་གཏོགས་པར་གཞན་གང་ནས་སྒྲ་འབྱུང་བར་འགྱུར། སྨྲས་པ། རིགས་ཀྱི་བུ། དེའི་ཕྱིར་རྣམ་གྲངས་འདིས་སྒྲ་ཇི་སྙེད་པ་དེ་དག་ཐམས་ཅད་ནི། ནམ་མཁའ་ལས་འབྱུང་བར་རིག་པར་བྱའོ། །ནམ་མཁའི་ 405a ༄#། །ངོ་བོ་ཉིད་ནི། སྒྲ་སྟེ། རྣམ་པར་རིག་མ་ཐག་ཏུ་འགག་གོ་།འགགས་ནས་ནམ་མཁའི་ངོ་བོ་ཉིད་དུ་ཡང་དག་པར་གནས་སོ། །དེའི་ཕྱིར་ཆོས་ཐམས་ཅད་ནི། ནམ་མཁའ་དང་མཉམ་ཞེས་བྱ་སྟེ། རྣམ་པར་རིག་པ་མེད་པ་རྣམ་པར་ཤེས་པར་བྱ་བ་མ་ཡིན་མོད་ཀྱི། སྒྲ་དང ། སྒྲའི་བརྡས་བརྗོད་དོ། །བརྗོད་པ་དེའང་ཐ་སྙད་དོ། །གང་སྒྲས་བརྗོད་པ་འདི་འདྲ་བར་རབ་ཏུ་ཤེས་པ་དེ་ནི། ཆོས་གང་ལའང་མངོན་པར་མི་ཆགས་སོ། །གང་མངོན་པར་མི་ཆགས་པ་དེ་ནི། རྣམ་པར་མི་འཕྲོའོ། །གང་རྣམ་པར་མི་འཕྲོ་བ་དེ་མི་འཁོར་རོ། ། གང་མི་འཁོར་བ་དེ་མི་ཕྱེད་པའོ། །གང་མི་ཕྱེད་པ་དེ་མི་སྐྱེའོ། །གང་མི་སྐྱེ་བ་དེ་མི་འཇིགས་པར་འདོད་དོ། །གང་མི་འཇིགས་པ་དེ་དང་བའོ། །གང་དང་བ་དེ་དག་པའོ། །གང་དག་པ་དེ་དྲི་མ་མེད་པའོ། ། གང་དྲི་མ་མེད་པ་དེ་འོད་གསལ་བའོ། །གང་འོད་གསལ་བ་དེ་སེམས་ཀྱི་རང་བཞིན་ནོ། །སེམས་ཀྱི་རང་བཞིན་གང་ཡིན་པ་དེ་འཇུག་པའོ། །གང་འཇུག་པ་དེ་མཚན་མ་ཐམས་ཅད་གནོན་པའོ། ། གང་མཚན་མ་ཐམས་ཅད་གནོན་པ་དེ་སྐྱོན་མེད་པ་ལ་འཇུག་པ་ཞེས་བྱའོ། །བྱང་ཆུབ་སེམས་དཔའི་སྐྱོན་མེད་པ་ལ་འཇུག་པ་གང་ཡིན་པ་དེ་ནི། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་སྟེ།་དེས་ན་སྐྱོན་མེད་པ་ལ་ཞུགས་པའི་བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་ཞེས་བྱའོ། །གང་བཟོད་པ་རབ་ཏུ་ཐོབ་པ་དེས་ཐམས་ཅད་བཟོད་དེ། དེ་སྟོང་ 405b པར་ཡང་བཟོད་དེ། གང་ཟག་ཏུ་འང་བཟོད་དོ། །དེ་ཅིའི་ཕྱིར་ཞེ་ན། གང་ཟག་ལས་སྟོང་པ་གཞན་མ་ཡིན་ཏེ། གང་ཟག་ཉིད་སྟོང་པའོ། །དེ་མཚན་མར་ཡང་བཟོད་དེ། མཚན་མ་མེད་པར་བཟོད་པའོ། །དེ་ཅིའི་ཕྱིར་ཞེ་ན། མཚན་མའི་ངོ་བོ་ཉིད་མཚན་མ་མེད་པའོ། །དེ་སྨོན་པར་ཡང་བཟོད། དེ་སྨོན་པ་མེད་པའང་བཟོད་དོ། །དེ་ཅིའི་ཕྱིར་ཞེ་ན། སྨོན་ལམ་གྱི་ངོ་བོ་ཉིད་ཀྱི་མཚན་ཉིད་སྨོན་པ་མེད་པའོ། །དེ་སེམས་ཅན་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པར་ཡང་བཟོད་དེ། སེམས་ཅན་རྣམས་འཆི་འཕོ་བ་དང་སྐྱེ་བར་ཡང་བཟོད་དོ། །དེ་ཅིའི་ཕྱིར་ཞེ་ན། འཆི་འཕོ་དང ། སྐྱེ་བ་ནི། སྒྱུ་མའི་ངོ་བོ་ཉིད་དོ། །རིགས་ཀྱི་བུ། དེ་ལྟར་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པའི་བྱང་ཆུབ་སེམས་དཔའ་ནི། འགག་པ་མེད་པ་སྟེ། ཆོས་ཐམས་ཅད་དང་འགལ་བ་མེད་པ་ཡིན་ནོ། །བདག་བཟོད་པའི་རྗེས་སུ་འགྲོའང་སེམས་ཅན་ཐམས་ཅད་ཀྱི་རྗེས་སུ་འགྲོ་བས་ཀྱང་འགྲོ་།བདག་བཟོད་པ་རྗེས་སུ་འགྲོའང་ཆོས་ཐམས་ཅད་ཀྱི་རྗེས་སུ་འགྲོ་བས་ཀྱང་འགྲོ་སྟེ། འོང་བའང་མེད། འགྲོ་བའང་མེད་དོ། །ཆོས་ཐམས་ཅད་ཆོས་ཀྱི་དབྱིངས་ལ་གནས་པར་ཡང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཇི་ལྟར་ཆོས་ཀྱི་དབྱིངས་ལ་གནས་པ་དེ་ལྟར་སེམས་ཅན་ཐམས་ཅད་གནས་ཏེ། གང་གི་གནས་དེ་ཐོབ་པའི་གནས་མེད་པའི་ཚུལ་གྱིས་རྗེས་སུ་ཐོབ་པ་དེ་སྒྲའི་བརྡའི་ཐ་སྙད་ཀྱི་སྒྲ་ཉེ་བར་བཟུང་ནས་ 406a ༄#། །མི་སྐྱེ་བའི་ཆོས་ལ་བཟོད་པ་དང་ལྡན་པ་ཞེས་བྱའོ། །མི་སྐྱེ་བའི་ཆོས་ལ་བཟོད་པ་ནི། གང་གིས་ཀྱང་བརྗོད་པའམ། བསྙད་པའམ། བསྟན་པར་མི་ནུས་སོ། །དེ་ཅིའི་ཕྱིར་ཞེ་ན། དོན་དེ་ནི། བརྗོད་དུ་མེད་པ། སྒྲ་མེད་པ། བཤད་དུ་མེད་པ་ཡིན་ཡང་བརྗོད་དུ་མེད་པའི་དོན་བརྗོད་པས་བསྟན་པ་འདི་ནི། རིགས་ཀྱི་བུ། དེ་བཞིན་གཤེགས་པའི་ཆེ་བ་ཉིད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཀྱེ་མ་མི་འམ་ཅིའི་རྒྱལ་པོ་སྡོང་པོ་འདི་ཇི་ཙམ་དུ་ཆོས་ཟབ་མོ་ལ་བཟོད་པ་སྟོན་པར་སྤོབས་པ་དང ། འདི་ལྟ་བུར་རྒྱ་ཆེ་བའི་ཡུལ་ལ་ཉེ་བར་སྤྱོད་ཅིང་ལོངས་སྤྱོད་པས་འབྱོར་པ་དང ། ཆོས་སྟོན་པས་ཟབ་མོའི་བཟོད་པ་འདི་ལྟ་བུ་དང་ལྡན་པ་ནི། ངོ་མཚར་ཏོ། །བཅོམ་ལྡན་འདས། མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་ལ་དགེ་བའི་རྩ་བ་བསྐྲུན་ན། དེས་འདི་སྤོབས་པ་འདི་ལྟ་བུ་གྲུབ་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་ཀྱི་སྐར་མའི་གཟུགས་ཇི་སྙེད་པ་བགྲང་པའི་ཚུལ་གྱིས་ཚད་གཟུང་བར་ནུས་སམ། དེ་བཞིན་དུ་མི་འམ་ཅིའི་རྒྱལ་པོ་སྡོང་པོ་འདིས་ཡང་དག་པར་རྫོགས་པའི་སངས་རྒྱས་ 406b ཇི་སྙེད་ཅིག་ལ་དགེ་བའི་རྩ་བ་སྐྲུན་པ་དང ། བལ་ན་མེད་པ་ཡང་དག་པར་རྫོགས་པའི་བྱང་ཆུབ་བཙལ་བའི་ཕྱིར་དེ་བཞིན་གཤེགས་པ་དེ་དག་གི་གན་ན་ཚངས་པར་སྤྱོད་པ་སྤྱད་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཀྱང་ཚད་གཟུང་བར་མི་ནུས་ཏེ། དེས་ན། འདིའི་སྤོབས་པ་འདི་འདྲའོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མི་འམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མི་འམ་ཅིའི་བདག་པོ། །ཁྱོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མང་པོ་དེ་དག་ལས་དགེ་བའི་རྩ་བ་བསྐྲུན་པའི་དགེ་བའི་རྩ་བ་མང་པོ་དེ་ལྟ་བུ་བསྔོམས་པས་ཅི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱའམ། མི་འམ་ཅིའི་རྒྱལ་པོ་སྡོང་པོས་སྨྲས་པ། རིགས་ཀྱི་བུ། བྱང་ཆུབ་སེམས་དཔའ་རྣམས་དགེ་བའི་རྩ་བ་ཡང་དག་པར་སྒྲུབ་པ་ན་གང་དག་གིས་ནམ་དུའང་ངོམས་པར་མི་འགྱུར་བ་བྱང་ཆུབ་སེམས་དཔའ་རྣམས་ཀྱི་མི་ངོམས་པ་བཅུ་གཉིས་འདི་དག་སྟེ། བཅུ་གཉིས་གང་ཞེ་ན། འདི་ལྟ་སྟེ། དེ་བཞིན་གཤེགས་པ་ལ་མཆོད་པ་དང་རིམ་གྲོ་བྱ་བས་མི་ངོམས་པ་དང ། ཆོས་མཉན་པས་མི་ངོམས་པ་དང ། དམ་པའི་ཆོས་ཡོངས་སུ་གཟུང་བས་མི་ངོམས་པ་དང ། ཆོས་རྒྱ་ཆེར་རབ་ཏུ་བསྟན་པས་མི་ངོམས་པ་དང ། སེམས་ 407a ༄#། །ཅན་ཡོངས་སུ་སྨིན་པར་བྱ་བས་མི་ངོམས་པ་དང ། དགེ་བའི་རྩ་བ་ཡང་དག་པར་སྒྲུབ་པས་མི་ངོམས་པ་དང ། དགོན་པ་ལ་གནས་པས་མི་ངོམས་པ་དང ། ཕ་རོལ་ཏུ་ཕྱིན་པ་ཐམས་ཅད་ཡོངས་སུ་བསྐང་བས་མི་ངོམས་པ་དང ། ཡེ་ཤེས་མངོན་པར་རབ་ཏུ་དང་ཞིང་ཡོངས་སུ་སྨིན་པར་བྱ་བས་མི་ངོམས་པ་དང ། ཆོས་ངེས་པར་སེམས་ཤིང་ཚུལ་བཞིན་ལ་རབ་ཏུ་སྦྱོར་བས་མི་ངོམས་པ་དང ། བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་བཙལ་བས་མི་ངོམས་པ་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡང་དག་པར་སྒྲུབ་པས་མི་ངོམས་པའོ། །རིགས་ཀྱི་བུ། འདི་དག་ནི། བྱང་ཆུབ་སེམས་དཔའ་རྣམས་དགེ་བའི་རྩ་བ་ཡང་དག་པར་སྒྲུབ་པ་ན་གང་དག་ནམ་དུའང་ངོམས་པར་མི་འགྱུར་བ་བྱང་ཆུབ་སེམས་དཔའ་རྣམས་ཀྱི་མི་ངོམས་པ་བཅུ་གཉིས་ཏེ། དེས་ན། བྱང་ཆུབ་སེམས་དཔའ་རྣམས་དགེ་བའི་ཚོགས་བསགས་པ་ལ་མི་ངོམས་བ་ཞེས་བྱའོ། ། དེ་ནས་བཅོམ་ལྡན་འདས་ལ་མི་འམ་ཅིའི་རྒྱལ་པོ་སྟོང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་དཀོན་མཆོག་འབྱུང་གནས་ཞེས་བགྱི་བ་མཆིས་ཏེ། བྱང་ཆུབ་སེམས་དཔའ་ཏིང་ངེ་འཛིན་དེ་ལ་བརྟེན་ན། ཡོན་ཏན་རིན་པོ་ཆེའི་ཁྱད་པར་གྱི་ཆོས་ཐམས་ཅད་ཐོབ་པར་འགྱུར་རོ། །ཞེས་བགྱི་བ་ཞིག་ 407b བདག་གིས་ཐོས་ན། བཅོམ་ལྡན་འདས། གང་ཐོས་པས་བྱང་ཆུབ་སེམས་དཔའ་རྣམས་ཡོན་ཏན་རིན་པོ་ཆེའི་ཁྱད་པར་གྱི་ཆོས་ཐམས་ཅད་ཐོབ་པར་འགྱུར་བར་བགྱི་བའི་སླད་དུ་བྱང་ཆུབ་སེམས་དཔའ་ཏིང་ངེ་འཛིན་དཀོན་མཆོག་འབྱུང་གནས་དེ་བཞིན་གཤེགས་པས་ལེགས་པར་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མི་འམ་ཅིའི་བདག་པོ། །དེའི་ཕྱིར་ཤིན་ཏུ་དེ་ལེགས་པར་ཉོན་ལ་ཡིད་ལ་ཟུངས་ཤིག་དང ། བྱང་ཆུབ་སེམས་དཔའི་ཏིང་ངེ་འཛིན་དཀོན་མཆོག་འབྱུང་གནས་ངས་ཁྱོད་ལ་བཤད་དོ། །མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ལ་ལེགས་སོ། །ཞེས་གསོལ་ནས་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །མི་འམ་ཅིའི་བདག་པོ། འདི་ལ་བྱང་ཆུབ་སེམས་དཔའ་ནི། སངས་རྒྱས་དཀོན་མཆོག་རྒྱུན་མི་འཆད་པ་དང ། ཆོས་དཀོན་མཆོག་རྒྱུན་མི་འཆད་པ་དང ། དགེ་འདུན་དཀོན་མཆོག་རྒྱུན་མི་འཆད་པར་བྱ་བའི་ཕྱིར་སེམས་བསྐྱེད་པ་རིན་པོ་ཆེ་བརྒྱད་ཅུ་པོ་འདི་དག་ལ་འཇུག་གོ་།བརྒྱད་ཅུ་གང་ཞེ་ན། འདི་ལྟ་སྟེ། དེ་ཐམས་ཅད་མཁྱེན་པའི་སེམས་རིན་པོ་ཆེ་མི་མཛད་པ་དང ། ལྷག་པའི་བསམ་པའི་སེམས་རིན་པོ་ཆེ་མི་གཏོང་བ་དང ། དགེ་བ་རིན་པོ་ཆེ་ཐམས་ཅད་ཀྱི་སེམས་མི་འདོར་བ་དང ། དགེ་བ་རིན་པོ་ཆེ་ཐམས་ཅད་ལ་རབ་ཏུ་སྦྱོར་བའི་སེམས་མི་འདོར་བ་དང ། ཡི་དམ་ 408a ༄#། །ལ་བརྟན་པའི་སེམས་རིན་པོ་ཆེ་ཡོངས་སུ་མི་འདོར་བ་དང ། བདོག་པ་ཐམས་ཅད་ཡོངས་སུ་གཏོང་བའི་སེམས་རིན་པོ་ཆེ་བྱང་ཆུབ་ཏུ་ཡོངས་སུ་བསྔོ་བས་རྣམ་པར་སྨིན་པ་ལ་མི་རེ་བའི་སེམས་རིན་པོ་ཆེ་ལ་འཇུག་པ་དང ། མི་དགེ་བའི་རྩ་བ་རྣམ་པ་གསུམ་རྣམ་པར་སྤངས་པས་ལུས་ཀྱི་རྒྱན་གྱི་སེམས་རིན་པོ་ཆེ་དང ། དག་གི་སྐྱོན་རྣམ་པ་བཞི་རྣམ་པར་སྤངས་པས་ངག་གི་རྒྱན་གྱི་སེམས་རིན་པོ་ཆེ་དང ། བརྣབ་སེམས་དང་གནོད་སེམས་དང་ལོག་པར་ལྟ་བ་དང་བྲལ་བས་སེམས་ཀྱི་རྒྱན་གྱི་སེམས་རིན་པོ་ཆེ་དང ། ཚུལ་ཁྲིམས་མ་ཉམས་ཤིང་སྐྱོན་མེད་དེ་འདྲེན་མ་མ་ཡིན་ཞིང་ཐུན་ཚགས་མ་ཡིན་པས་ཚུལ་ཁྲིམས་ཀྱི་རྒྱན་གྱི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་སེམས་སྙོམས་པས་ཁོང་ཁྲོ་བ་མེད་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ཀྱིས་ཉེས་པར་བྱས་པ་ལ་ཇི་མི་སྙམ་པས་བཟོད་པ་དང་དེས་པའི་སེམས་རིན་པོ་ཆེ་དང ། བྱང་ཆུབ་ཀྱི་ཡན་ལག་ལ་ལྟ་བས་ལུས་དང་སྲོག་ལ་མི་ལྟོ་བའི་སེམས་རིན་པོ་ཆེ་དང ། མཐོ་དམན་མེད་པས་རྗེས་སུ་ཆགས་པ་དང་ཁོང་ཁྲོ་བ་དང་བྲལ་བའི་སེམས་རིན་པོ་ཆེ་དང ། ཞུམ་པ་མེད་པས་བརྩོན་འགྲུས་བརྟན་པའི་གོ་ཆའི་སེམས་རིན་པོ་ཆེ་དང ། ལྷོད་པ་མེད་པའི་བརྩོན་པ་ཐམས་ཅད་ཉམས་འོག་ཏུ་ཆུང་བར་བྱེད་པའི་སེམས་རིན་པོ་ཆེ་དང ། བྱང་ཆུབ་ཀྱི་ལམ་གྱི་ཚོགས་བསགས་པས་དྲན་པ་ 408b དང ། བློ་གྲོས་དང ། རྟོགས་པ་དང ། ངོ་ཚ་ཤེས་པ་དང ། མོས་པ་བརྗེད་པ་མེད་པའི་སེམས་རིན་པོ་ཆེ་དང ། སེམས་ལ་དབང་བྱེད་པས་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་དང ། བསྐྱེད་པའི་སེམས་རིན་པོ་ཆེ་དང ། དམ་པའི་ཆོས་བསགས་པས་ཆོས་ཡོངས་སུ་ཚོལ་བའི་སེམས་རིན་པོ་ཆེ་དང ། འཇིགས་པ་མེད་ཅིང་སྤོབས་པས་ཐོས་པ་འཛིན་པའི་སེམས་རིན་པོ་ཆེ་དང ། སྡིག་པ་འདོད་པ་མེད་པས་ཟང་ཟིང་མེད་པར་ཆོས་སྟོན་པའི་སེམས་རིན་པོ་ཆེ་དང ། ཆགས་པའི་སེམས་མེད་པས་སློབ་དཔོན་ཆོས་མི་འཆབ་པའི་སེམས་རིན་པོ་ཆེ་དང ། ནན་ཏན་སྙིང་པོར་བྱེད་པས་ཚུལ་བཞིན་དུ་ཡིད་ལ་བྱེད་པའི་སེམས་རིན་པོ་ཆེ་དང ། དེ་ལྟར་བྱེད་པས་ཇི་ལྟར་ཐོས་པའི་ཆོས་རྣམས་ལ་ནན་ཏན་བྱེད་པའི་སེམས་རིན་པོ་ཆེ་དང ། གཞན་གྱི་དྲིང་ལ་མི་འཇོག་པས་ཤེས་རབ་ཀྱིས་སོ་སོར་རྟོག་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་བྱམས་པས་ཁྱབ་པས་བྱམས་པ་ཆེན་པོའི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་ལྟ་བས་སྙིང་རྗེ་ཆེན་པོའི་སེམས་རིན་པོ་ཆེ་དང ། ཆོས་ལ་དགའ་མོས་དད་པས་དགའ་བ་ཆེན་པོའི་སེམས་རིན་པོ་ཆེ་དང ། ཆོས་ཐམས་ཅད་ངེས་པར་སེམས་པས་བཏང་སྙོམས་ཆེན་པོའི་སེམས་རིན་པོ་ཆེ་དང ། དགེ་བའི་རྩ་བ་བསགས་པས་འཁོར་བ་ན་ཡོངས་སུ་མི་སྐྱོ་བའི་སེམས་རིན་ 409a ༄#། །པོ་ཆེ་དང ། བདག་གི་བདེ་བ་ལ་མི་ཆགས་པས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་སེམས་རིན་པོ་ཆེ་དང ། ཆོས་འཛིན་པས་བསྡུ་བའི་དངོས་པོའི་སེམས་རིན་པོ་ཆེ་དང ། ཐམས་ཅད་དུ་རྣམ་པར་འཕྲུལ་བས་མངོན་པར་ཤེས་པ་ཆེན་པོའི་སེམས་རིན་པོ་ཆེ་དང ། མ་ཐོས་པའི་ཆོས་མཉན་པའི་ཕྱིར་དགེ་བའི་བཤེས་གཉེན་ལ་བརྟེན་པའི་སེམས་རིན་པོ་ཆེ་དང ། དགེ་བའི་རྩ་བ་ཐམས་ཅད་གསོག་པས་སྡིག་པའི་གྲོགས་པོ་སྤོང་བའི་སེམས་རིན་པོ་ཆེ་དང ། ཐ་དད་པ་མེད་པས་སེམས་ཅན་ཐམས་ཅད་ལ་སྦྱོར་བ་མཉམ་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ཀྱི་བསམ་པ་ལ་འཇུག་པས་སེམས་ཅན་ཐམས་ཅད་ཀྱི་ཉོན་མོངས་པའི་ནད་ཡོངས་སུ་ཤེས་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ཀྱི་ཉོན་མོངས་པའི་ནད་རབ་ཏུ་ཞི་བར་བྱེད་པས་ཆོས་ཀྱི་སྨན་ཐམས་ཅད་ཡོངས་སུ་ཚོལ་བའི་སེམས་རིན་པོ་ཆེ་དང ། ཆོས་ཀྱི་བདག་ཉིད་པས་མ་གསབ་\?\་པ་རྣམས་ལ་མི་བརྙས་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་འདུད་པས་ང་རྒྱལ་མེད་པའི་སེམས་རིན་པོ་ཆེ་དང ། འཆོས་པ་མེད་པའི་གཡོ་དང་སྒྱུ་མེད་པའི་སེམས་རིན་པོ་ཆེ་དང ། དམ་པའི་ཆོས་ཡུན་རིང་དུ་གནས་པར་བྱེད་པས་ཆོས་ལ་དགའ་བའི་སེམས་རིན་པོ་ཆེ་དང ། སངས་རྒྱས་ཐམས་ཅད་ལ་བྱས་པ་གཟོ་བས་དམ་ 409b བའི་ཆོས་ཡོངས་སུ་འཛིན་པའི་སེམས་རིན་པོ་ཆེ་དང ། བརྟན་པའི་གྲོགས་པོའི་ཕྱིར་བྱས་པ་ཤེས་ཤིང་བྱས་པ་གཞི་བའི་སེམས་རིན་པོ་ཆེ་དང ། ལྟོས་པ་མེད་པས་ལན་དུ་ཕན་འདོགས་པ་ལ་མི་རེ་བའི་སེམས་རིན་པོ་ཆེ་དང ། དཀར་པོའི་ཕྱོགས་སྲུང་བས་དགོན་པ་ལ་དགའ་བའི་སེམས་རིན་པོ་ཆེ་དང ། ལས་བྱས་པ་ཆུད་མི་གསོན་པས་རྟག་ཏུ་རབ་ཏུ་འབྱུང་པའི་སེམས་རིན་པོ་ཆེ་དང ། སྡོམ་པའི་སྤྱོད་པ་གསོག་པས་འཕགས་པའི་རིགས་ལ་དགའ་བའི་སེམས་རིན་པོ་ཆེ་དང ། སེམས་ཅན་ཐམས་ཅད་མགུ་བར་བྱེད་པས་སྦྱངས་པའི་ཡོན་ཏན་ཐམས་ཅད་དང་ཡོ་བྱད་བསྙུངས་པའི་སེམས་རིན་པོ་ཆེ་དང ། ཤེས་རབ་ཀྱིས་མི་ངོམས་པས་འདོད་པ་ཆུང་ཞིང་ཆོག་ཤེས་པའི་སེམས་རིན་པོ་ཆེ་དང ། ལུས་དང་སེམས་དབེན་པས་དགའ་བ་ལ་དབེན་པའི་སེམས་རིན་པོ་ཆེ་དང ། མཚན་དང་དཔེ་བྱད་བཟང་པོ་ཡོངས་སུ་རྫོགས་པར་བྱེད་པས་བསོད་ནམས་ཀྱི་ཚོགས་ཀྱིས་མི་ངོམས་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ཀྱི་ཐེ་ཚོམ་གཅད་པའི་ཕྱིར་ཡེ་ཤེས་ཀྱི་ཚོགས་ཡོངས་སུ་ཚོལ་བའི་སེམས་རིན་པོ་ཆེ་དང ། སངས་རྒྱས་མཐོང་བ་དང་མི་འབྲལ་བའི་ཕྱིར་སངས་རྒྱས་རྗེས་སུ་དྲན་པའི་སེམས་རིན་པོ་ཆེ་དང ། ཆོས་མཉན་པ་དང་མི་འབྲལ་བའི་ཕྱིར་ཆོས་རྗེས་སུ་དྲན་པའི་སེམས་རིན་པོ་ཆེ་དང ། ཕྱིར་མི་ལྡོག་པའི་དགེ་འདུན་ལ་གཞོལ་ 410a ༄#། །བའི་ཕྱིར་དགེ་འདུན་རྗེས་སུ་དྲན་པའི་སེམས་རིན་པོ་ཆེ་དང ། བྱང་ཆུབ་ཀྱི་སེམས་ལས་མི་གཡོ་བའི་ཕྱིར་ཚུལ་ཁྲིམས་རྗེས་སུ་དྲན་པའི་སེམས་རིན་པོ་ཆེ་དང ། ཉོན་མོངས་པ་ཐམས་ཅད་ཡོངས་སུ་བོར་བས་གཏོང་བ་རྗེས་སུ་དྲན་པའི་སེམས་རིན་པོ་ཆེ་དང ། སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའ་རྗེས་སུ་དྲན་པའི་ཕྱིར་ལྷ་རྗེས་སུ་དྲན་པའི་སེམས་རིན་པོ་ཆེ་དང ། མཚུངས་པར་བྱེད་པའི་ཕྱིར་བྱང་ཆུབ་སེམས་དཔའ་རྗེས་སུ་དྲན་པའི་སེམས་རིན་པོ་ཆེ་དང ། དོན་ཐམས་ཅད་རྟོགས་པས་དོན་སོ་སོ་ཡང་དག་པར་རིག་པའི་སེམས་རིན་པོ་ཆེ་དང ། ཆོས་ཀྱི་དབྱིངས་འདྲེས་པ་མེད་པས་ཆོས་སོ་སོ་ཡང་དག་པར་རིག་པའི་སེམས་རིན་པོ་ཆེ་དང ། སེམས་ཅན་གྱི་ཚིག་ཐམས་ཅད་རྟོགས་པས་ངེས་པའི་ཚིག་སོ་སོ་ཡང་དག་པར་རིག་པའི་སེམས་རིན་པོ་ཆེ་དང ། ཚིག་འབྲུའི་རང་བཞིན་རྗེས་སུ་རྟོགས་པས་སྤོབས་པ་སོ་སོ་ཡང་དག་པར་རིག་པའི་སེམས་རིན་པོ་ཆེ་དང ། རྣམ་པར་ཤེས་པ་སྒྱུ་མ་ལྟ་བུར་ཡོངས་སུ་ཤེས་པའི་ཚུལ་གྱིས་ཡེ་ཤེས་ལ་རྟོན་པའི་སེམས་རིན་པོ་ཆེ་དང ། བཀྲི་བའི་དོན་གྱི་མདོ་སྡེ་ལས་དང་བྱ་བ་དང་འགལ་པས་ངེས་པའི་དོན་གྱི་མདོ་སྡེ་ལ་རྟོན་པའི་སེམས་རིན་པོ་ཆེ་དང ། གང་ཟག་གི་རང་བཞིན་རྗེས་སུ་རྟོག་པས་ཆོས་ཉིད་ལ་རྟོན་པའི་སེམས་རིན་པོ་ཆེ་དང ། ཁམས་གསུམ་ 410b ཐམས་ཅད་ལ་མངོན་པར་ཞེན་པས་འཇིགས་པའི་ཕྱིར་འདུ་བྱེད་ཐམས་ཅད་ལ་མི་རྟག་པ་དང་སྡུག་བསྔལ་བར་སོ་སོར་རྟོག་པའི་སེམས་རིན་པོ་ཆེ་དང ། སེམས་ཅན་ཐམས་ཅད་ལ་བདག་མེད་པས་ཆོས་ཐམས་ཅད་ལ་བདག་མེད་པར་སོ་སོར་རྟོག་པའི་སེམས་རིན་པོ་ཆེ་དང ། འདོད་པའི་ཁམས་ལས་ཤིན་ཏུ་འདའ་བས་མི་གཙང་བར་སོ་སོར་རྟོག་པའི་སེམས་རིན་པོ་ཆེ་དང ། ཤིན་ཏུ་ཞི་ཞིང་ཉེ་བར་ཞི་བས་མྱ་ངན་ལས་འདས་པ་ལ་ཞི་བར་སོ་སོར་རྟོག་པའི་སེམས་རིན་པོ་ཆེ་དང ། བདུད་རྩིའི་སྒོ་ལ་ཡང་དག་པར་གཞོལ་བས་རྣམ་པར་ཐར་པའི་སྒོ་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ལ་མོས་པའི་སེམས་རིན་པོ་ཆེ་དང ། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པས་ཆོས་ཐམས་ཅད་ལ་མ་སྐྱེས་པ་དང ། མ་བྱུང་བར་མོས་པའི་སེམས་རིན་པོ་ཆེ་དང ། ལྟ་བ་ཐམས་ཅད་ལ་མངོན་པར་ཞེན་པ་མེད་པས་ཆོས་ཐམས་ཅད་ལ་སྒྱུ་མ་དང ། སྨིག་རྒྱུ་དང ། ཆུ་ཟླ་དང ། མིག་ཡོར་དང ། རྨི་ལམ་ལྟ་བུར་ཡང་དག་པར་གཞོལ་བས་སེམས་རིན་པོ་ཆེ་དང ། རྟག་པ་དང་ཆད་པ་དང་བྲལ་བས་རྟེན་ཅིང་འབྲེལ་བར་འབྱུང་བ་དང་མཐུན་པའི་སེམས་རིན་པོ་ཆེ་དང ། གཉིས་དང་བྲལ་བས་མཐར་ལྟ་བ་ཐམས་ཅད་སེལ་བའི་སེམས་རིན་པོ་ཆེ་དང ། ཐེག་པ་གཅིག་ཏུ་ཁོང་དུ་ཆུད་པས་གཉིས་སུ་མེད་པའི་ཆོས་ཀྱི་སྒོ་ལ་འཇུག་པའི་སེམས་རིན་པོ་ཆེ་དང ། སྐྱོན་མེད་པ་ལ་འཇུག་པས་ 411a ༄#། །སྤྱོད་པ་ཐམས་ཅད་ལས་ལྡོག་པའི་སེམས་རིན་པོ་ཆེ་དང ། ཆོས་ཐམས་ཅད་མཉམ་པ་ཉིད་ཀྱི་ཕྱིར་ཡང་དག་པར་སྐྱོན་མེད་པ་ལ་སོ་སོར་རྟོག་པའི་སེམས་རིན་པོ་ཆེ་དང ། སངས་རྒྱས་ཀྱི་ཆོས་ཐམས་ཅད་སྐྱེ་བ་མེད་པའི་ཕྱིར་བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཡང་དག་པར་སྒྲུབ་པའི་སེམས་རིན་པོ་ཆེ་དང ། འདི་དག་ནི། ཆོས་རིན་པོ་ཆེ་བརྒྱད་ཅུའོ། །མི་འམ་ཅིའི་བདག་པོ། དེ་ལྟར་གང་ཆོས་བརྒྱད་ཅུ་བོ་འདི་ལ་འཇུག་པ་དང ། ཐོབ་པ་དང ། ནན་ཏན་བྱེད་པ་དེ་ནི། དཀོན་མཆོག་འབྱུང་གནས་ཏིང་ངེ་འཛིན་ཅེས་བྱའོ། ། ཆོས་འདི་དག་ནི། ཏིང་ངེ་འཛིན་སྒྲུབ་པའོ། །བྱང་ཆུབ་སེམས་དཔས་གང་གི་ཚེ་དཀོན་མཆོག་འབྱུང་གནས་ཏིང་ངེ་འཛིན་འདི་རབ་ཏུ་ཐོབ་པར་གྱུར་བ་དེའི་ཚེ་དེས་གང་ལ་དབང་ཐོབ་པར་མ་གྱུར་བའི་རིན་པོ་ཆེའི་འཇིག་རྟེན་གྱིའམ། འཇིག་རྟེན་ལས་འདས་པ་དེ་གང་ཡང་མེད་དོ། །མི་འམ་ཅིའི་བདག་པོ། དེ་ལ་འཇིག་རྟེན་གྱི་རིན་པོ་ཆེ་ནི། གང ། འཇིག་རྟེན་ལས་འདས་པའི་རིན་པོ་ཆེ་ནི། གང་ཞེ་ན། མི་འམ་ཅིའི་བདག་པོ། དེ་ལ་འཇིག་རྟེན་གྱི་རིན་པོ་ཆེ་ནི། འདི་ལྟ་སྟེ། ལྷ་དང་མི་རྣམས་ཀྱི་ཆེ་བ་ཉིད་དང ། བརྒྱ་བྱིན་དང ། ཚངས་པའི་ཆེ་བ་ཉིད་དང ། འཇིག་རྟེན་སྐྱོང་བའི་ཆེ་བ་ཉིད་དང ། འཁོར་ལོས་བསྒྱུར་བའི་ཆེ་བ་ཉིད་དང ། ཚོང་དཔོན་དང ། ཁྱིམ་བདག་དང ། བྲམ་ཟེ་དང ། རྒྱལ་རིགས་ཤིང་སཱ་ལ་ཆེན་པོ་ལྟ་བུའི་ཆེ་བ་ཉིད་དོ། ། 411b དེ་དེ་ལྟར་ལྷ་དང་མི་རྣམས་ཀྱི་ཆེ་བ་ཉིད་རབ་ཏུ་ཐོབ་ཀྱང་རྒྱགས་པ་མི་སྐྱེད། བག་མེད་པ་མི་སྐྱེད་དོ། །དེ་བག་ཡོད་པར་གྱུར་པས་བྱང་ཆུབ་སྒྲུབ་པར་བྱེད་པའི་ཆོས་རྣམས་ཡང་དག་པར་སྒྲུབ་པ་སྟེ། འདི་ནི། འཇིག་རྟེན་གྱི་རིན་པོ་ཆེ་ཞེས་བྱའོ། །དེ་ལ་འཇིག་རྟེན་ལས་འདས་པའི་རིན་པོ་ཆེ་གང་ཞེ་ན། འདི་ལྟ་སྟེ། འཇིག་རྟེན་ལས་འདས་པའི་ཆོས་རིན་པོ་ཆེའོ། །འཇིག་རྟེན་ལས་འདས་པའི་རིན་པོ་ཆེ་གང་ཞེ་ན། ཆོས་གང་འཇིག་རྟེན་ལས་སྒྲོལ་བའོ། །འཇིག་རྟེན་ལས་སྒྲོལ་བའི་ཆོས་གང་ཞེ་ན། འདི་ལྟ་སྟེ། འཕགས་པ་འཇིག་རྟེན་ལས་འདས་པའི་ཤེས་རབ་སྟེ།་ཤེས་རབ་ཀྱི་འཇིག་རྟེན་ལས་སྒྲོལ་ལོ། །ཤེས་རབ་རིན་པོ་ཆེས་ནི། འཇིག་རྟེན་ལས་འདས་པའི་ཆོས་ཐམས་ཅད་བསྡུས་ཏེ། ཤེས་རབ་ནི། འཇིག་རྟེན་ལས་འདས་པའི་ཆོས་ཐམས་ཅད་ཀྱི་གཙོ་བོ་ཡིན་ནོ། །མི་འམ་ཅིའི་བདག་པོ། འདི་ལྟ་སྟེ། དཔེར་ན། ཀླུང་ཐམས་ཅད་ཀྱི་གཙོ་བོ་ནི། རྒྱ་མཚོ་ཆེན་པོའོ། །རི་ཐམས་ཅད་ཀྱི་གཙོ་བོ་ནི། རིའི་རྒྱལ་པོ་རི་རབ་བོ། །སྐར་མ་ཐམས་ཅད་ཀྱི་གཙོ་བོ་ནི། ཟླ་བའོ། །སྣང་བ་ཐམས་ཅད་ཀྱི་གཙོ་བོ་ནི། ཉི་མའོ། །རི་དགས་ཐམས་ཅད་ཀྱི་གཙོ་བོ་ནི། སེངྒེའོ། །སྐྱེ་རྒུ་ཐམས་ཅད་ཀྱི་གཙོ་བོ་ནི། རྒྱལ་པོའོ། །སུམ་ཅུ་རྩ་གསུམ་བ་ཐམས་ཅད་ཀྱི་གཙོ་བོ་ནི། བརྒྱ་བྱིན་ནོ། །ཚངས་པ་ལ་\?\་བྱ་བ་རྣམས་ཀྱི་གཙོ་བོ་ནི། ཚངས་པ་ཆེན་པོའོ། །མིའམ་ཅིའི་བདག་པོ། དེ་བཞིན་དུ་འཇིག་རྟེན་ལས་འདས་པའི་ཆོས་ 412a ༄#། །ཐམས་ཅད་ཀྱི་གཙོ་བོ་ནི། ཤེས་རབ་སྟེ། དེའི་ཕྱིར་ཤེས་རབ་ནི། ཆོས་ཐམས་ཅད་ཀྱི་རྒྱལ་པོ་ཞེས་བྱའོ། །མུ་སྟེགས་ལ་གནས་པ་བསྒྲལ་བའི་ཕྱིར་བདེ་བར་འགྲོ་བས་ལམ་མོ། །ཉོན་མོངས་པའི་མུན་པ་སེལ་བའི་ཕྱིར་སྒྲོན་མའོ། །གཡུལ་ལས་རྒྱལ་བའི་ཕྱིར་དཔའ་བོའོ། །སྨན་རབ་ཏུ་སྦྱོར་བའི་ཕྱིར་སྨན་པའོ། །གཙུག་ལག་ཐམས་ཅད་ཤེས་པའི་ཕྱིར་སློབ་དཔོན་ནོ། །ཆོས་ཐམས་ཅད་ཕིགས་པའི་ཕྱིར་མདའོ། །ཉོན་མོངས་པ་གཅོད་པའི་ཕྱིར་རལ་གྲིའོ། །ཉོན་མོངས་པའི་ཚང་ཚིང་དྲལ་བའི་ཕྱིར་ཐོང་གཤོལ་ལོ། །མཉམ་པའི་ཕྱིར་མི་འགལ་བའོ། །འཐབ་པ་མེད་པའི་ཕྱིར་རྩོད་པ་མེད་པའོ། །འབྱུང་བ་མེད་པའི་ཕྱིར་མི་འགག་པའོ། །བདེན་པའི་དོན་རྣམས་ཡོངས་སུ་ཤེས་པའི་མཐར་ཐུག་པའི་ཕྱིར་མི་འཁྲུགས་པའོ། །དྲན་པ་ཉེ་བར་གཞོག་པའི་ཕྱིར་དྲན་པའོ། །ཡང་དག་པར་སྤོང་བ་རྣམས་ལ་མཉམ་པ་ཉིད་དོ། །རྫུ་འཕྲུལ་གྱི་རྐང་པ་རྣམས་སྐྱེད་པའོ། \?\་དབང་པོ་རྣམས་སྤེད་པའོ། ། སྟོབས་རྣམས་ཀྱིས་མི་རྫི་བའོ། །བྱང་ཆུབ་ཀྱི་ཡིན་ལག་རྣམས་རྗེས་སུ་རྟོག་པའོ། །ལམ་སྟོན་པའོ། །ཞི་གནས་ཞི་བར་བྱེད་པའོ། །ལྷག་མཐོང་རིག་པར་བྱེད་པའོ། །རབ་རིབ་མེད་པའི་ཕྱིར་སྣང་བར་བྱེད་པའོ། །ཆོས་ཀྱི་སྣང་བས་མུན་པ་སེལ་བའོ། །རྡུལ་དང་བྲལ་བའི་ཕྱིར་རྡུལ་མེད་པའོ། །བརྙས་ཐབས་དང་བྲལ་བའི་ཕྱིར་མཐོ་བར་སེམས་པ་མེད་པའོ། །ཡང་བའི་ 412b ལམ་ལས་རབ་ཏུ་འདས་པའི་ཕྱིར་ཀུན་ཏུ་མཐོང་བར་བྱེད་པའོ། །ཕྱི་ནང་དང་བྲལ་བའི་ཕྱིར་ཡུལ་མེད་པའོ། །ལྟ་བས་བྱས་པ་མེད་པའི་ཕྱིར་སྟོང་པ་སྒྲོལ་བའོ། །རྣམ་པར་རྟོག་པ་ཉེ་བར་ཞི་བའི་ཕྱིར་མཚན་མ་མེད་པས་རབ་ཏུ་ཕྱེ་བའོ། །ཁམས་གསུམ་པ་ལས་རྣམ་པར་འདས་པའི་ཕྱིར་སྨོན་པ་མེད་པའི་མཚན་ཉིད་དོ། །མཚན་ཉིད་མེད་པའི་ཕྱིར་མཚན་ཉིད་གཅིག་པའོ།། མཚུངས་པ་མེད་པའི་ཕྱིར་ནམ་མཁའི་མཚན་ཉིད་དོ། །བདུད་ཀྱི་ལས་དང་བྲལ་བའི་ཕྱིར་གཡོ་བ་དང་རློམ་སེམས་འཇོམས་པའོ། །མི་རྟོག་པའི་སྦྱིན་པའོ། །མི་གནས་པའི་ཚུལ་ཁྲིམས་སོ། །རབ་ཏུ་མི་གནས་པའི་བཟོད་པའོ། །བླང་བ་མེད་པ་དང་དོར་བ་མེད་པའི་བརྩོན་འགྲུས་སོ། །སྒྲོ་བཏགས་པ་མེད་པའི་བསམ་གཏན་ནོ། །རྣམ་པར་རིག་བྱེད་མ་ཡིན་པའི་སྒོའོ། །ཐམས་ཅད་ལ་མངོན་དུ་ཕྱོགས་པའོ། །ཐབས་དང་འདྲེས་པའོ། །སེམས་ཅན་ལ་བདག་མེད་པར་ཡང་དག་པར་གཞོལ་བའོ། །དགེ་བའི་རྩ་པ་བསགས་པའོ། །བྱ་བ་མེད་པའོ། །བྱ་བ་དང་བྲལ་བ་སྟེ།་མི་འམ་ཅིའི་བདག་པོ། འདི་ནི། ཤེས་རབ་རིན་པོ་ཆེའོ། །ཤེས་རབ་རིན་པོ་ཆེ་འདི་ནི། དཀོན་མཆོག་འབྱུང་གནས་ཏིང་ངེ་འཛིན་ཐོབ་པའི་བྱང་ཆུབ་སེམས་དཔས་ཐོབ་བོ། །འདི་ཐོབ་པ་ན་རིན་པོ་ཆེ་ཐམས་ཅད་ཡང་དག་པར་འདུ་བ་ཡིན་ནོ། །མི་འམ་ཅིའི་བདག་པོ། འདི་ལྟ་སྟེ། དཔེར་ན། ཆུ་བོ་ཐམས་ཅད་ཀྱི་སྒོ་ནི། རྒྱ་མཚོ་ཆེན་པོ་སྟེ། རིན་པོ་ཆེ་ཐམས་ཅད་ 413a ༄#། །གསོག་པ་རིན་པོ་ཆེ་ཐམས་ཅད་ཡང་དག་པར་འདུ་བ་སྟེ། དེ་ལས་རིན་པོ་ཆེ་ཐམས་ཅད་འབྱུང་ངོ ། །མི་འམ་ཅིའི་བདག་པོ། དེ་བཞིན་དུ་དཀོན་མཆོག་འབྱུང་གནས་ཏིང་ངེ་འཛིན་རབ་ཏུ་ཐོབ་པའི་བྱང་ཆུབ་སེམས་དཔའ་ཡང་རིན་པོ་ཆེ་ཐམས་ཅད་ཀྱི་སྒོ་ཡིན་ཏེ། ཆོས་དཀོན་མཆོག་ཐམས་ཅད་གསོག་པ་རིན་པོ་ཆེ་ཐམས་ཅད་ཡང་དག་པར་འདུ་བའོ། །དཀོན་མཆོག་འབྱུང་གནས་ཏིང་ངེ་འཛིན་ལས་དཀོན་མཆོག་གསུམ་འབྱུང་སྟེ། སངས་རྒྱས་དཀོན་མཆོག་དང ། ཆོས་དཀོན་མཆོག་དང ། དགེ་འདུན་དཀོན་མཆོག་གོ་།དེས་ན་དཀོན་མཆོག་འབྱུང་གནས་ཏིང་ངེ་འཛིན་ནི། རིན་པོ་ཆེ་ཐམས་ཅད་གསོག་པ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། མི་འམ་ཅིའི་རྒྱལ་པོ་སྡོང་པོ་འདི་དཀོན་མཆོག་འབྱུང་གནས་ཏིང་ངེ་འཛིན་འདི་ཐོབ་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ཁྱོད་ཀྱི་དེ་མི་འམ་ཅིའི་རྒྱལ་པོ་སྡོང་པོ་ལ་དྲིས་ཤིག་དང་དེ་ཁྱོད་ལ་སྟོན་པར་འགྱུར་རོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་མི་འམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་སྨྲས་སོ། །མི་འམ་ཅིའི་བདག་པོ། ཁྱོད་ཀྱིས་དཀོན་མཆོག་འབྱུང་གནས་ཏིང་ངེ་འཛིན་འདི་ཐོབ་བམ། སྨྲས་པ། རིགས་ཀྱི་བུ། ཏིང་ངེ་ 413b འཛིན་འདི་ནི། ཐོབ་པའམ། དམིགས་པར་སོ་སོར་ཉེ་བར་གནས་པ་མ་ཡིན་ནོ། །ཏིང་ངེ་འཛིན་འདི་ནི། སུས་ཀྱང་མི་ཐོབ་བོ། །ཏིང་ངེ་འཛིན་འདི་ནི། གཟུགས་སུ་བགྲང་བའམ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པར་བགྲང་བ་མ་ཡིན་ནོ། །ཏིང་ངེ་འཛིན་འདི་ནི། གཟུགས་སུ་སྣང་བ་མ་ཡིན་ནོ། །ཏིང་ངེ་འཛིན་འདི་ནི། མིག་དང ། རྣ་བ་དང ། སྣ་དང ། ལྕ་དང ། ལུས་དང ། ཡིད་ཀྱི་རྣམ་པར་ཤེས་པའི་གཟུང་བ་མ་ཡིན། སྐྱེ་བའི་མཚན་ཉིད་མ་ཡིན། འཇིག་པའི་མཚན་ཉིད་མ་ཡིན། གནས་པའི་མཚན་ཉིད་མ་ཡིན། རྒྱུན་ཆད་པའི་མཚན་ཉིད་མ་ཡིན། མཚན་ཉིད་གཅིག་པ་མ་ཡིན། མཚན་ཉིད་ཐ་དད་པ་མ་ཡིན། མཚན་ཉིད་མ་ཡིན། མཚན་ཉིད་དང་བྲལ་བ་མ་ཡིན། མཚན་ཉིད་མེད་པའང་མ་ཡིན་ཏེ། བརྗོད་པར་བྱ་བ་མ་ཡིན་ནོ། །ཏིང་ངེ་འཛིན་འདི་ནི། ཡོངས་སུ་རྟོགས་པར་མི་ནུས་ཏེ། ཀུན་ཏུ་རྟོགས་པར་མ་ཡིན། རྣམ་པར་རྟོགས་པར་མ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་ཏིང་ངེ་འཛིན་འདི་ཡོངས་སུ་རྟོགས་པའམ།་ཀུན་ཏུ་རྟོགས་པའམ། རྣམ་པར་རྟོགས་པར་གྱུར་ན་ནི། བརྟག་པའི་གཞི་ཉིད་དུ་འགྱུར་གྱི། ཏིང་ངེ་འཛིན་མ་ཡིན་ནོ། །རིགས་ཀྱི་བུ། ཏིང་ངེ་འཛིན་ཅེས་བྱ་བ་ནི། ཆོས་ཐམས་ཅད་མཉམ་པ་ཉིད་དོ། །ཆོས་ཐམས་ཅད་ཀྱི་མཉམ་པ་ཉིད་གང་ཡིན་པ་དེ་དང་ང་མཉམ་མོ། །དེ་དང་སེམས་ཅན་ཐམས་ཅད་ཀྱང་མཉམ་མོ། །རིགས་ཀྱི་བུ། དེའི་ཕྱིར་ཏིང་ངེ་འཛིན་འདི་དང་ 414a ༄#། །སེམས་ཅན་ཐམས་ཅད་མཉམ་མོ། །དེ་ཅིའི་ཕྱིར་ཞེ་ན། སེམས་ཅན་ཐམས་ཅད་ནི། སྟོང་པ་སྟེ། སྟོང་པའི་མཚན་ཉིད་ནི། ཏིང་ངེ་འཛིན་འདིའོ། །སེམས་ཅན་ཐམས་ཅད་ནི། མཚན་ཉིད་མེད་པ་སྟེ། མཚན་ཉིད་མེད་པའི་མཚན་ཉིད་ནི། ཏིང་ངེ་འཛིན་འདིའོ། །སེམས་ཅན་ཐམས་ཅད་ནི། སྨོན་པ་མེད་པ་སྟེ། སྨོན་པ་མེད་པའི་མཚན་ཉིད་ནི།་ཏིང་ངེ་འཛིན་འདིའོ། །སེམས་ཅན་ཐམས་ཅད་ནི། དབེན་པ་སྟེ། དབེན་པའི་མཚན་ཉིད་ནི། ཏིང་ངེ་འཛིན་འདིའོ། །སེམས་ཅན་ཐམས་ཅད་ནི། བདག་མེད་པ་སྟེ། བདག་མེད་པའི་མཚན་ཉིད་ནི། ཏིང་ངེ་འཛིན་འདིའོ། །དེ་ནི། ལུས་དང ། ངག་དང ། སེམས་ཀྱིས་རེག་པར་མི་ནུས་སོ། །གང་ལ་ལ་དག་ཆོས་ལ་རེག་པར་བྱེད་པ་དང ། མཉམ་པར་བྱེད་པ་དང ། མངོན་པར་མཉམ་པར་བྱེད་པ་དེ་དག་ཐམས་ཅད་ནི། ལེགས་པར་གསུངས་པའི་ཆོས་འདུལ་བ་ལ་ང་རྒྱལ་ཅན་དུ་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། མི་འམ་ཅིའི་རྒྱལ་པོ་སྡོང་པོའི་སྤྱོད་པ་བག་མཆིས་པ་འདི་ལྟ་བུ་དང ། ཆོས་ལ་སྤོབས་པ་འདི་ལྟ་བུ་ནི། ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། བྱ་བ་ཐམས་ཅད་ཀྱང་ཀུན་ཏུ་སྟོན་ལ་བྱ་བ་ཐམས་ཅད་ཀྱིས་ཀྱང་མི་གོས་པ་འདི་ནི། ཐབས་དང ། ཤེས་རབ་ 414b ལས་བྱུང་བའི་བྱང་ཆུབ་སེམས་དཔའ་རྣམས་ཀྱི་སའོ། །རིགས་ཀྱི་བུ། མི་འམ་ཅིའི་རྒྱལ་པོ་སྡོང་པོ་འདིས་རྒྱུད་ཀྱི་སྒྲ་དང ། གླུའི་སྒྲ་དང ། སིལ་སྙན་དང ། ཕེག་རྡོབ་པ་བྱས་པའི་ཚུལ་འདི་མི་འམ་ཅི་བྱེ་བ་ཕྲག་བདུན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །དྲི་ཟ་བྱེ་བ་ཕྲག་སུམ་ཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ལྟོ་འཕྱེ་ཆེན་པོ་བྱེ་བ་ཕྲག་བཞི་བཅུའང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱས་སོ། །རང་གི་འཁོར་གྱི་སྲོག་ཆགས་བརྒྱད་ཁྲི་བཞི་སྟོང་ཡང་བྱང་ཆུབ་ཏུ་ཡོངས་སུ་སྨིན་པར་བྱས་སོ། །ཤེས་རབ་དང ། ཐབས་ཀྱི་ཡེ་ཤེས་འདི་དང་ལྡན་པའི་བྱང་ཆུབ་སེམས་དཔའ་ནི། གང་དང ། གང་གི་ཚེ་འཁོར་གྱི་ཆེ་བ་ཉིད་ཐོབ་པ་དེ་དང ། དེའི་ཚེ་སེམས་ཅན་གྲངས་མེད་དཔག་ཏུ་མེད་པ་ཡོངས་སུ་སྨིན་པར་བྱེད་དོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱུ་མེད་པར་མེ་མི་འབར་རོ། །དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་དབེན་པ་ན་གནས་པའང་སེམས་ཅན་ཡོངས་སུ་སྨིན་པར་བྱ་བ་མི་འབར་རོ། །རིགས་ཀྱི་བུ། འདི་ལྟ་སྟེ། དཔེར་ན། རྒྱུ་ཡོད་ན། མེ་འབར་རོ། །རིགས་ཀྱི་བུ།་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་སྐྱེ་བོ་ཕལ་པོ་ཆེའི་ནང་ན་འདུག་ན། སེམས་ཅན་ཡོངས་སུ་སྨིན་པར་བྱ་བ་འབར་རོ། །རིགས་ཀྱི་བུ། དེའི་ཕྱིར་རྣམ་གྲངས་ 415a ༄#། །འདིས་འདི་ལྟར་བྱང་ཆུབ་སེམས་དཔའ་ཇི་ལྟ་ཇི་ལྟ་བུར་ཡུལ་དང་འཁོར་ཆེན་པོ་འབྱོར་བར་གྱུར་པ་དེ་ལྟ་དེ་ལྟ་བུར་སེམས་ཅན་དཔག་ཏུ་མེད་པ་ཡོངས་སུ་སྨིན་པར་བྱེད་པར་རིག་པར་བྱའོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས།་ཇི་ལྟར་ན། མི་འམ་ཅིའི་རྒྱལ་པོ་སྡོང་པོས་རྒྱུད་ཀྱི་སྒྲ་དང ། གླུའི་སྒྲ་དང ། སིལ་སྙན་དང ། ཕེག་རྡོབ་པ་བགྱིས་པས་སེམས་ཅན་ཡོངས་སུ་སྨིན་པར་བགྱིད། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། མི་འམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་གླུ་དང ། རོལ་མོའི་དབྱངས་སྒྲ་ལ་མོས་པ་རྣམས་ལ་མི་འམ་ཅིའི་རྒྱལ་པོ་སྡོང་པོས་གང་གི་ཚེ་པི་ཝང་གི་སྒྲ་ཐོས་པར་བྱེད་ཅིང་སིལ་སྙན་དང ། གླུ་དབྱངས་སྦྱོར་བ་དེ་ན་མི་འམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་དེ་དག་དགའ་བ་དང ། རབ་ཏུ་མགུ་བ་ཆེན་པོ་ཐོབ་བོ། །དེ་དག་དགའ་བ་དང ། མོས་པ་དང ། རབ་ཏུ་མགུ་བ་ཐོབ་ནས་རྒྱུད་ཀྱི་སྒྲ་དང ། སིལ་སྙན་གྱི་སྒྲ་དང ། གླུ་དབྱངས་ཀྱི་སྒྲ་དེ་དག་ལས་སངས་རྒྱས་ཀྱི་སྒྲ་འབྱུང་ངོ ། །ཆོས་ཀྱི་སྒྲ་དང ། དགེ་འདུན་གྱི་སྒྲ་འབྱུང་ངོ ། །བྱང་ཆུབ་ཀྱི་སེམས་ལ་དགའ་བ་དང ། ཐམས་ཅད་མཁྱེན་པའི་སེམས་བསྐྱེད་པར་སྦྱོར་བའི་སྒྲ་འབྱུང་ངོ ། །སྦྱིན་པ་དང ། ཚུལ་ཁྲིམས་ 415b དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་ཀྱི་སྒྲ་འབྱུང་ངོ ། །བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ཀྱི་སྒྲ་དང ། དྲན་པ་ཉེ་བར་གཞག་པ་དང ། ཡང་དག་པར་སྤོང་བ་དང ། རྫུ་འཕྲུལ་གྱི་རྐང་པ་དང ། དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་དང ། ལམ་དང ། ཞི་གནས་དང ། ལྷག་མཐོང་དང ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པའི་སྒྲ་འབྱུང་ངོ ། །མི་རྟག་པ་དང ། སྡུག་བསྔལ་བ་དང ། བདག་མེད་པའི་སྒྲ་འབྱུང་ངོ ། །སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་དང ། མངོན་པར་འདུ་བྱེད་པ་མེད་པ་དང ། སྐྱེ་བ་མེད་པ་དང ། འབྱུང་བ་མེད་པ་དང ། དངོས་པོ་མེད་པའི་སྒྲ་འབྱུང་ངོ ། ། བྱང་ཆུབ་སེམས་དཔའ་སྡེ་སྣོད་ཀྱི་ཆོས་ཀྱི་རྣམ་གྲངས་དང ། གཟུངས་དང ། རྡོ་རྗེའི་ཚིག་དང ། འཁོར་གསུམ་ཡོངས་སུ་སྦྱོང་བའི་སྒྲ་འབྱུང་ངོ ། །ཕྱིར་མི་ལྡོག་པའི་ཆོས་ཀྱི་འཁོར་ལོ་རབ་ཏུ་བསྐོར་བའི་སྒྲ་དང ། ཆོས་ཐམས་ཅད་ལ་རྣམ་པར་གདོན་མི་ཟ་བའི་རྒྱལ་པོའི་ཏིང་ངེ་འཛིན་གྱི་སྒྲ་དང ། རྒྱ་མཚོའི་ཕྱག་རྒྱའི་ཏིང་ངེ་འཛིན་གྱི་སྒྲ་དང ། ཆོས་ཐམས་ཅད་ལ་ཡང་དག་པར་གཞོལ་བའི་ཏིང་ངེ་འཛིན་གྱི་སྒྲ་དང ། ཆོས་ཐམས་ཅད་ལ་དབང་བྱེད་པའི་ཏིང་ངེ་འཛིན་གྱི་སྒྲ་དང ། རྣམ་པར་བཀོད་པའི་ཏིང་ངེ་འཛིན་གྱི་སྒྲ་དང ། རིན་ཆེན་སྒྲོན་མའི་ཏིང་ངེ་ 416a ༄#། །འཛིན་གྱི་སྒྲ་དང ། རིན་ཆེན་འབྱུང་གནས་ཏིང་ངེ་འཛིན་གྱི་སྒྲ་དང ། རིན་ཆེན་བརྩེགས་པའི་ཏིང་ངེ་འཛིན་གྱི་སྒྲ་དང ། ཉོན་མོངས་པ་སྤོང་བའི་ཏིང་ངེ་འཛིན་གྱི་སྒྲ་དང ། དགའ་བྱེད་ཀྱི་ཏིང་ངེ་འཛིན་གྱི་སྒྲ་དང ། པདྨ་བཀོད་པའི་ཏིང་ངེ་འཛིན་གྱི་སྒྲ་དང ། པདྨ་བླ་མའི་ཏིང་ངེ་འཛིན་གྱི་སྒྲ་དང ། ནམ་མཁའ་མཛེད་ཀྱི་ཏིང་ངེ་འཛིན་གྱི་སྒྲ་དང ། ཐམས་ཅད་ཀྱི་རྗེས་སུ་འགྲོ་བའི་ཏིང་ངེ་འཛིན་གྱི་སྒྲ་དང ། དམ་པའི་ཆོས་པུཎྜ་རཱི་ཀའི་ཏིང་ངེ་འཛིན་གྱི་སྒྲ་དང ། ཁྱད་པར་ཅན་གྱི་ཏིང་ངེ་འཛིན་གྱི་སྒྲ་དང ། རྣམ་པར་རྒྱལ་བར་དབང་བྱེད་ཏིང་ངེ་འཛིན་གྱི་སྒྲ་དང ། ཆེར་བསྒྱིངས་ཏིང་ངེ་འཛིན་གྱི་སྒྲ་དང ། རྣམ་པ་ལ་སེམས་དབང་བྱེད་པའི་ཏིང་ངེ་འཛིན་གྱི་སྒྲ་དང ། སེངྒེ་བསྒྱིངས་པའི་ཏིང་ངེ་འཛིན་གྱི་སྒྲ་དང ། ཉི་མ་སྒྲོན་མའི་ཏིང་ངེ་འཛིན་གྱི་སྒྲ་དང ། མཐའ་ཡས་འཁྱིལ་བའི་ཏིང་ངེ་འཛིན་གྱི་སྒྲ་དང ། རྒྱུན་གྱི་རྗེས་སུ་སོང་བའི་ཏིང་ངེ་འཛིན་གྱི་སྒྲ་དང ། རྡོ་རྗེའི་དཀྱིལ་འཁོར་ཏིང་ངེ་འཛིན་གྱི་སྒྲ་དང ། རྡོ་རྗེའི་རྒྱལ་མཚན་ཏིང་ངེ་འཛིན་གྱི་སྒྲ་དང ། རྡོ་རྗེ་ལྟ་བུའི་ཏིང་ངེ་འཛིན་གྱི་སྒྲ་དང ། རྡོ་རྗེ་ལྟེ་བའི་ཏིང་ངེ་འཛིན་གྱི་སྒྲ་དང ། ས་འཛིན་ཏིང་ངེ་འཛིན་གྱི་སྒྲ་དང ། རི་རབ་སྒྲོན་མའི་ཏིང་ངེ་འཛིན་གྱི་སྒྲ་དང ། རི་རབ་རྒྱལ་མཚན་ཏིང་ངེ་འཛིན་གྱི་སྒྲ་དང ། རིན་ཆེན་མཛོད་ཀྱི་ཏིང་ངེ་འཛིན་གྱི་སྒྲ་དང ། སེམས་ལ་དབང་བྱེད་ཏིང་ངེ་འཛིན་གྱི་སྒྲ་དང ། 416b སེམས་ཅན་ཐམས་ཅད་ཀྱི་སེམས་ལ་རྣམ་པར་ལྟ་བའི་ཏིང་ངེ་འཛིན་གྱི་སྒྲ་དང ། སྤྱོད་པ་ཐམས་ཅད་ཀྱི་ཡུལ་ལས་ངེས་པར་འབྱུང་བའི་ཏིང་ངེ་འཛིན་གྱི་སྒྲ་དང ། ཟབ་མོ་སྦེད་པར་སྦྱོར་བའི་ཏིང་ངེ་འཛིན་གྱི་སྒྲ་དང ། སྤོབས་པ་སྣ་ཚོགས་ཀྱི་ཏིང་ངེ་འཛིན་གྱི་སྒྲ་དང ། བལྟར་མི་མཐོང་བའི་ཏིང་ངེ་འཛིན་གྱི་སྒྲ་དང ། ཆོས་ཐམས་ཅད་ལ་རྣམ་པར་ལྟ་བའི་ཏིང་ངེ་འཛིན་གྱི་སྒྲ་དང ། རྣམ་པར་རོལ་བའི་ཏིང་ངེ་འཛིན་གྱི་སྒྲ་དང ། མངོན་པར་ཤེས་པ་ཐམས་ཅད་ལས་ངེས་པར་འབྱུང་བའི་ཏིང་ངེ་འཛིན་གྱི་སྒྲ་དང ། བདུད་ཀྱི་དཀྱིལ་འཁོར་འཇིག་པའི་ཏིང་ངེ་འཛིན་གྱི་སྒྲ་དང ། གཟུགས་ཐམས་ཅད་ཀུན་ཏུ་སྟོན་པའི་ཏིང་ངེ་འཛིན་གྱི་སྒྲ་དང ། སྒྲ་ཐམས་ཅད་ལ་འཇུག་པའི་ཏིང་ངེ་འཛིན་གྱི་སྒྲ་དང ། ལུས་ཐམས་ཅད་རྣམ་པར་གཞིག་པའི་ཏིང་ངེ་འཛིན་གྱི་སྒྲ་དང ། སྤྱོད་པ་ཐམས་ཅད་ལ་དབང་བའི་ཏིང་ངེ་འཛིན་གྱི་སྒྲ་དང ། ཤེས་རབ་སྒྲོན་མའི་ཏིང་ངེ་འཛིན་གྱི་སྒྲ་དང ། ལག་ན་སྒྲོན་མའི་ཏིང་ངེ་འཛིན་གྱི་སྒྲ་དང ། བྱང་ཆུབ་མངོན་སུམ་སྣང་བྱེད་ཏིང་ངེ་འཛིན་གྱི་སྒྲ་དང ། སོ་སོ་ཡང་དག་པར་རིག་པ་ལ་འཇུག་པ་སྟོན་པའི་ཏིང་ངེ་འཛིན་གྱི་སྒྲ་དང ། ཡོན་ཏན་གྱི་རྣམ་པ་ཐམས་ཅད་ལ་འཇུག་པའི་ཏིང་ངེ་འཛིན་གྱི་སྒྲ་འབྱུང་ངོ ། །རིགས་ཀྱི་བུ། དེ་ལྟར་རྒྱུད་ཀྱི་སྒྲ་དང ། སིལ་སྙན་གྱི་སྒྲ་དང ། གླུ་དབྱངས་ཀྱི་སྒྲ་དེ་དག་ལས་ཆོས་ཀྱི་སྒྲ་འདི་ལྟ་བུ་འདི་དང ། ཏིང་ངེ་འཛིན་གྱི་སྒྲ་ 417a ༄#། །འབྱུང་ངོ ། །སྒྲ་དེ་དག་གིས་སེམས་ཅན་དེ་དག་ཡོངས་སུ་སྨིན་པར་བྱེད་པར་འགྱུར་ཏེ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི། ངོ་མཚར་རྨད་དུ་བྱུང་བའི་ཆོས་འདི་ལྟ་བུ་དང་ལྡན་པ་ཡིན་ནོ། །མི་འམ་ཅིའི་རྒྱལ་པོ་སྡོང་པོའི་ཡོན་ཏན་བསྔགས་པ་བསྟན་པ་འདི་བཤད་པ་ན་སངས་རྒྱས་ཀྱི་མཐུས་ཐམས་ཅད་དང་ལྡན་པའི་འཁོར་གྱི་ལག་པར་ལྷའི་མེ་ཏོག་མནྡཱ་ར་བའི་བུར་མ་གྲུབ་ནས་དེ་དག་གིས་མེ་ཏོག་གི་ཕུར་མ་དེ་དག་མི་འམ་ཅིའི་རྒྱལ་པོ་སྡོང་པོ་ལ་གཏོར་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོས་བྱིན་གྱི་རླབས་ཇི་ལྟ་བུས་མེ་ཏོག་དེ་དག་ལག་པ་གཡས་པར་བླངས་ཏེ་མེ་ཏོག་གཅིག་ཀྱང་ས་ལ་མི་ལྟུང་བར་དེ་ལྟ་བུའི་བྱིན་གྱི་རླབས་ཀྱིས་བྱིན་གྱིས་བརླབས་ནས་མེ་ཏོག་བླངས་པ་དེ་དག་བཅོམ་ལྡན་འདས་ལ་མངོན་པར་གཏོར་ཏོ། །དེ་ནས་མེ་ཏོག་དེ་དག་གཏོར་མ་ཐག་ཏུ་སངས་རྒྱས་ཀྱི་མཐུས་སྐད་ཅིག་དེ་ལ་སྟོང་གི་འཇིག་རྟེན་གྱི་ཁམས་མེ་ཏོག་རིན་པོ་ཆེའི་གདུགས་གཅིག་གིས་ཁེབས་པར་གྱུར་ཏོ། །མེ་ཏོག་རིན་པོ་ཆེའི་གདུགས་དེ་ལས་མུ་ཏིག་གི་དོ་ཤལ་བྱེ་བ་ཁྲག་ཁྲིག་བརྒྱ་སྟོང་ཕྲག་རབ་ཏུ་འཕྱང་ངོ ། །མེ་ཏོག་གི་དོ་ཤལ་འཕང་བ་རེ་རེ་ལས་ཀྱང་འོད་ཟེར་བྱེ་བ་ཁྲག་ཁྲིག་བརྒྱ་སྟོང་ཕྲག་དུ་མ་བྱུང་ངོ ། །འོད་ཟེར་ 417b ཐམས་ཅད་ཀྱི་རྩེ་མོ་ལས་ཀྱང་པདྨ་སྣ་ཚོགས་བལྟ་ན་སྡུག་པ། ཁ་དོག་དག་དང་ལྡན་པ། དྲི་དང་ལྡན་པ། ཡིད་དུ་འོང་བ་དག་བྱུང་བར་གྱུར་ཏོ། །པདྨ་ཐམས་ཅད་ལའང་བཅོམ་ལྡན་འདས་ཤཱཀྱ་ཐུབ་པའི་སྐུ་ཅི་འདྲ་བ་དེ་འདྲ་བའི་དེ་བཞིན་གཤེགས་པའི་སྐུ་སྐྱིལ་མོ་ཀྲུང་བཅས་ཤིང་བཞུགས་པར་ཀུན་ཏུ་སྣང་ངོ ། །སངས་རྒྱས་བཅོམ་ལྡན་འདས་དེ་དག་ཐམས་ཅད་ཀྱིས་ཀྱང་མི་འམ་ཅིའི་རྒྱལ་པོ་སྡོང་པོ་ལ་ལེགས་སོ། །ཞེས་བྱ་བ་གནང་སྟེ། སྐྱེས་བུ་དམ་པ། ཁྱོད་ཀྱིས་སེམས་ཅན་མང་པོ་ཡོངས་སུ་སྨིན་པར་བྱས་སོ། །སེམས་ཅན་ཡོངས་སུ་སྨིན་པར་བྱ་བའི་ཕྱིར་གང་ཡུལ་ལས་རྣམ་པར་གྲོལ་ཡང་ཡུལ་ཐམས་ཅད་ཀྱང་སྟོན། འཁོར་བ་ལས་གྲོལ་ཡང་བསམ་བཞིན་དུ་སྲིད་པར་སྐྱེ་བ་ཀུན་ཏུ་སྟོན། མྱ་ངན་ལས་འདས་པའི་སྐྱོན་མེད་པ་ཐོབ་ཀྱང་ཁམས་གསུམ་ན་ཉེ་བར་སྤྱོད་པ་འདི་ལྟ་བུ་ནི། བྱང་ཆུབ་སེམས་དཔའི་བྱ་བ་ཡིན་ཏེ། ལེགས་སོ་ལེགས་སོ། །དེ་ནས་མི་འམ་ཅིའི་རྒྱལ་པོ་སྡོང་པོ་འདི་སྙམ་དུ་སེམས་ཏེ། བདག་གིས་དེ་བཞིན་གཤེགས་པ་དེ་དག་ཐམས་ཅད་ཀྱི་དབུ་ལ་རིན་པོ་ཆེའི་གདུགས་གཞན་དག་བྱིན་གྱིས་བརླབ་པོ་སྙམ་མོ། །དེ་ནས་མི་འམ་ཅིའི་རྒྱལ་པོ་སྡོང་པོ་དེའི་ཚེ་རིན་པོ་ཆེའི་གདུགས་བཀོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །མི་འམ་ཅིའི་རྒྱལ་པོ་སྡོང་པོ་རིན་པོ་ཆེའི་གདུགས་བཀོད་པའི་ཏིང་ངེ་འཛིན་ལ་སྙོམས་པར་ 418a ༄#། །ཞུགས་མ་ཐག་ཏུ་དེ་ནས་དེ་བཞིན་གཤེགས་པ་ཐམས་ཅད་ཀྱི་དབུའི་ཐད་དྲང་གི་སྟེང་ན་རིན་པོ་ཆེའི་གདུགས་རྣམས་གནས་པར་ཀུན་ཏུ་སྣང་ངོ ། །འཁོར་དེར་ཐམས་ཅད་ཀྱི་ལག་པ་གཡས་པ་ནས་ཀྱང་རིན་པོ་ཆེའི་གདུགས་རྣམས་བྱུང་བར་གྱུར་ཏེ། དེ་དག་གིས་རིན་པོ་ཆེའི་གདུགས་དེ་དག་སངས་རྒྱས་བཅོམ་ལྡན་འདས་དེ་དག་ལ་མངོན་པར་བཀབ་བོ། །བམ་པོ་གསུམ་པ། མི་འམ་ཅིའི་རྒྱལ་པོ་སྡོང་པོ་འདི་སྙམ་དུ་སེམས་ཏེ། འདི་ལྟར་བདག་གིས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཉན་ཐོས་དང ། བྱང་ཆུབ་སེམས་དཔའི་དགེ་འདུན་བཅས་པར་བཤོས་ལ་སྤྱན་དྲངས་ཏེ། འདི་ལྟར་བདག་གིས་བཅོམ་ལྡན་འདས་འཁོར་དང་བཅས་པར་རིའི་རྒྱལ་པོ་སྤོས་ཀྱི་ངད་ལྡང་དུ་བདག་གི་གནས་སུ་གཤེགས་པར་གསོལ་ཏོ། །དེ་ལྟར་ན། བདག་གི་གནས་ཡོངས་སུ་སྤྱད་པར་འགྱུར་རོ། །ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོའི་ཚོགས་ཚད་མེད་པ་ལ་ཕན་བཏགས་པར་ཡང་འགྱུར་རོ། །དེ་དག་ཀྱང་བཅོམ་ལྡན་འདས་ལ་བསྙེན་བཀུར་བྱ་བ་དང ། ཡོངས་སུ་སྤྱད་པར་བྱ་བར་སྤྲོ་བར་འགྱུར་ཏེ། དེའི་ཕྱིར་དེ་དག་གི་ཡུན་རིང་པོའི་དོན་དང ། ཕན་པ་དང ། གྲུབ་པ་ 418b དང ། བདེ་བ་དང ། བྱང་ཆུབ་སེམས་དཔའི་སྒྲུབ་པ་ཐོབ་པར་འགྱུར་རོ་སྙམ་མོ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལ་ཐུགས་བརྩེ་བ་དང ། སེམས་ཅན་ཚད་མ་མཆིས་པའི་དགེ་བའི་རྩ་བ་སྤེལ་བའི་སླད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔའི་དགེ་འདུན་དང ། ཉན་ཐོས་ཀྱི་དགེ་འདུན་དང་ཐབས་ཅིག་ཏུ་རི་སྤོས་ཀྱི་ངད་ལྡང་གི་ངོས་ལ་བདག་གི་གནས་སུ་དགུང་བདུན་ཞིག་བཞུགས་པ་ལ་བདག་ལ་གནང་བར་མཛད་དུ་གསོལ། བཅོམ་ལྡན་འདས། བདག་ཅག་ནི། དེ་བཞིན་གཤེགས་པའི་འཁོར་དང་བཅས་པ་ལ་བསྙེན་བཀུར་དང ། ཡོངས་སུ་སྤྱད་པར་བགྱི་བར་སྤྲོའོ། །བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་ལ་ཐུགས་བརྩེ་བའི་ཕྱིར་བྱང་ཆུབ་སེམས་དཔའ་དང ། ཉན་ཐོས་ཀྱི་ཚོགས་དང་བཅས་པ་ལ་ཞག་བདུན་རི་སྤོས་ཀྱི་ངད་ལྡང་གི་ངོས་ལ་བཞུགས་པར་གནང་ངོ ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཀྱིས་གནང་བར་རིག་ནས་ཚིམ་ཞིང་མགུ་ལ་ཡིད་རངས་ཤིང་རབ་ཏུ་དགའ་སྟེ་དགའ་བ་དང ། ཡིད་བདེ་བ་སྐྱེས་ནས་དཔུང་དང་བཅས་གཡོག་འཁོར་དང་བཅས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་ལན་གསུམ་བསྐོར་བ་བྱས་ཏེ་སིལ་ 419a ༄#། །སྙན་དང ། རོལ་མོའི་དབྱངས་སྒྲ་བྱས་ནས་བཅོམ་ལྡན་འདས་ལ་མཆོད་པ་བྱས་ཏེ་འཁོར་གྱི་དཀྱིལ་འཁོར་དེ་ནས་སོང་ནས་རིའི་རྒྱལ་པོ་སྤོས་ཀྱི་ངད་ལྡང་བ་ལ་གནས་སོ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་རང་གི་ཁྱིམ་རྒྱན་ཐམས་ཅད་ཀྱིས་བརྒྱན་ཏེ་འཁོར་གྱི་ཁྱམས་རྒྱར་ཀུན་ནས་དཔག་ཚད་ལྔ་བརྒྱ་པ། བཻ་ཌཱུརྱ་སྔོན་པོ་དང ། ཛམྦུའི་ཀླུང་གི་གསེར་གྱི་པདྨས་ལགས་པར་བརྒྱན་པ། རིན་པོ་ཆེ་དུ་མས་རྣམ་པར་སྤྲས་པ་བྱས་སོ། །འཁོར་གྱི་ཁྱམས་དེར་གདན་ཁྲི་རྩ་བ་རིན་པོ་ཆེ་ལས་བྱས་པ། ལྷའི་རས་བརྒྱ་སྟོན་བཏིང་བ་བརྒྱ་སྟོང་ཕྲག་མང་པོ་བཤམས་སོ། །བཅོམ་ལྡན་འདས་ཀྱི་གདན་སེངྒེའི་ཁྲི་འཕང་དུ་དཔག་ཚད་བཅུ་གཉིས་པ། རིན་པོ་ཆེ་ཐམས་ཅད་ཀྱིས་སྤྲས་པ། རིན་པོ་ཆེའི་ཁ་ཁྱེར་གྱིས་བསྐོར་བ། གདུགས་དང ། རྒྱལ་མཚན་དང ། བ་དན་བསྒྲེང་བ། སྙིང་པོ་མཆོག་གི་བདུག་པས་བདུགས་པ། བླ་རེ་བྲེས་པ། དར་གྱི་ལྡ་ལྡི་མང་པོ་བྲེས་པ། ལྷའི་མེ་ཏོག་གཏོར་བ་བཤམས་སོ། །སེངྒེའི་ཁྲི་དེའི་ཕྱོགས་བཞིར་རིན་པོ་ཆེའི་ཤིང་སྣ་ཚོགས་བལྟ་ན་སྡུག་པ་བཞི་སྤྲུལ་ཏེ་སྐྱེ་བོ་ཐམས་ཅད་བསྡུས་ནས་ཚིགས་སུ་བཅད་པ་འདི་དག་སྨྲས་སོ། །ུ་དུམ་ཝ་རའི་མེ་ཏོག་ཇི་བཞིན་དུ། །སངས་རྒྱས་འབྱུང་བ་བརྒྱ་ལམ་རྙེད་འགྱུར་བ། །མི་མཆོག་དེ་ནི་ད་ལྟར་བྱུང་གྱུར་གྱི། །སྐྱོབ་ལ་ 419b གུས་དང་བཅས་པས་མཆོད་པ་གྱིས། །ང་རྒྱལ་དག་དང་རྒྱགས་དང་གཡོ་སྤོངས་ལ། །ཕྲག་དོག་སེར་སྣ་དེ་བཞིན་སྒྱུ་རྣམས་དང ། །རྒོད་པ་ཐམས་ཅད་ཡོངས་སུ་སྤོང་བྱོས་ལ། །སྟོན་ལ་གུས་དང་བཅས་པས་མཆོད་པ་གྱིས། །སྤོས་ངད་ལྡང་བ་འདི་ན་ལྷ་ཡུལ་བའི། །མེ་ཏོག་ཁྱད་པར་འཕགས་པ་ཇི་སྙེད་པ། །དེ་དག་ཐམས་ཅད་གཅིག་ཏུ་བསྡུས་ནས་སུ། །སྐྱེས་བུ་ཁྱུ་མཆོག་ལ་ནི་མཆོད་པ་གྱིས། །སེམས་ཅན་མཆོག་ལ་མཆོད་པ་བྱ་བའི་ཕྱིར། །དྲི་ཞིམ་ཡིད་འོང་ཁྱད་པར་འཕགས་པའི་དྲི། །དུས་ཀྱི་རྗེས་སུ་འབྲང་བའི་ཙནྡན་གྱིས། །སྤོས་ཀྱི་ངད་ལྡང་འདི་ལ་བདུག་པ་གྱིས། །གླུ་དབྱངས་སིལ་སྙན་རྣམ་མང་ཡིད་འོང་བ། །མི་འམ་ཅི་དག་རྟག་རྩེན་གར་བྱེད་པ། །ལྡན་པར་བྱོས་ལ་དགའ་ཞིང་དང་བ་ཡིས། །རྐང་གཉིས་མཆོག་ལ་མཆོད་པ་རབ་ཏུ་གྱིས། །མཚུངས་པ་མེད་པ་མཐོང་བ་རྙེད་དཀའ་བ། །དེ་བཞིན་གཤེགས་ལ་ལྷ་ཡི་གདུགས་རྣམས་དང ། །བ་དན་དག་དང་རྒྱལ་མཚན་ཆོས་གོས་དང ། །བླ་རེ་མང་པོ་ཡིད་འོང་གཟུང་བར་བྱོས། །སངས་རྒྱས་མཆོད་པས་བདེ་འགྲོར་འགྲོ་བར་འགྱུར། །བརྒྱ་བྱིན་དང་ནི་འཇིག་རྟེན་སྐྱོང་བར་འགྱུར། །ཚངས་པ་དག་དང་དབང་བྱེད་དབང་ཕྱུག་དང ། །ལྷ་དང་མི་ཡི་བདག་པོ་ཆེན་པོར་འགྱུར། །མི་མཆོག་མཆོད་པས་གཟུགས་དང་ཁ་དོག་དང ། །གྲགས་དང་བརྗོད་དང་འཁོར་དང་ལོངས་སྤྱོད་དང ། །དེ་བཞིན་དབང་ཕྱུག་དང་ནི་སྙན་ཚིག་དང ། །དེ་བཞིན་ 420a ༄#། །གཟུང་བར་འོས་པའི་ཚིག་ཏུ་འགྱུར། །གང་དག་འདིར་ནི་ལྷ་དང་དེ་བཞིན་དུ། །མི་རྣམས་ཀྱི་ནི་འདུས་བྱས་བདེ་བ་དང ། །བདེ་བ་བདེ་བས་ཚིམ་པར་འདོད་པ་རྣམས།། འཇིག་རྟེན་མགོན་པོ་དེ་ལ་མཆོད་པ་གྱིས། །རང་རྒྱལ་བྱང་ཆུབ་དེ་བཞིན་ཉན་ཐོས་དང ། །དེ་ལྟར་དམ་པ་མཆོག་གི་ཐེག་པ་དང ། །བདུད་ཀྱི་དཔུང་རྣམས་རབ་འཇོམས་གང་འདོད་པས།། སེམས་ཅན་མཆོག་དེ་ལ་ནི་མཆོད་པ་གྱིས། །དེ་ནས་མི་འམ་ཅིའི་རྒྱལ་པོ་སྡོང་པོས་རང་གི་གཡོག་འཁོར་ཐམས་ཅད་ལ་གོ་བར་བྱས་ཏེ་མེ་ཏོག་དང ། དྲི་དང ། ཕྲེང་བ་དང ། བྱུག་པ་བསྔོགས་ནས་རོ་བརྒྱ་བའི་ཞལ་ཟས་བཤམས་ཏེ་རིའི་རྒྱལ་པོ་སྤོས་ཀྱི་ངད་ལྡང་གི་ལྷོ་ཕྱོགས་ཀྱི་ངོས་ལ་འདུག་ནས་སིལ་སྙན་དང ། གླུ་དབྱངས་བླངས་ཏེ་རྒྱུད་ཀྱི་སྒྲ་དང ། གླུའི་སྒྲ་དང་ལྡན་པའི་ཚིགས་སུ་བཅད་པ་འདི་དག་གི་དབྱངས་ལས་ཚིགས་སུ་བཅད་དེ་བཅོམ་ལྡན་འདས་ལ་དུས་བསྐུལ་བ། ཕན་པ་མཛད་ཅིང་བདེ་མཛད་དགའ་མཛད་བཅོམ་ལྡན་འདས། ། ཞལ་ཡང་རབ་འཛུམ་ཟླ་བའི་ངོས་ལྟར་དྲི་མི་མངའ། །སྐྱེས་མཆོག་དགེ་སྦྱོང་དམ་པ་ལྷ་དང་མིས་མཆོད་པ། །བདེ་བར་གཤེགས་ཁྱོད་འདིར་གཤེགས་པ་ཡི་དུས་འདི་ལགས། །སྟོབས་བཅུ་རྣམས་ཀྱི་སྟོབས་མངའ་ཕ་རོལ་དཔུང་འཇོམས་པ། །གཞན་གྱི་ཚོགས་རྣམས་འཇོམས་ཤིང་འགྲོ་ལ་ཕན་པ་མཛད། །འཇོ་དང་རྙོག་པ་རྣམས་དང་དྲི་མ་འཐབ་སྤངས་པ། །ཕན་པ་ 420b མཛད་པ་ཁྱོད་འདིར་གཤེགས་པའི་དུས་འདི་ལགས། །སྦྱངས་པའི་ཡོན་ཏན་རྡུལ་སྦྱངས་ཐེ་ཚོམ་རྣམ་པར་གཏོར། །དྲན་དང་བློ་གྲོས་བློ་ཡངས་མོས་རྟོགས་བློ་གྲོས་ལྡན། །འགྲོ་རྒྱལ་རྟག་ཏུ་འགྲོ་བ་འགྲོ་མེད་འགྲོ་བ་སྤངས། །ཕན་པ་མཛད་ཅིང་དགའ་མཛད་རབ་ཏུ་དགྱེས་པའི་ཐུགས། །ཉི་མ་ཟླ་བ་ནོར་བུ་གློག་རྣམས་མཛེས་པའི་འདོ། །བརྒྱ་བྱིན་ཚངས་པ་སྲིད་གསུམ་ལྷ་ཚོགས་འོད་འཕྲོག་ཅིང ། །འོད་མཛད་དཔལ་སྟུག་ཐུབ་ཁྱོད་འོད་ནི་ཕན་བགྱིད་པས། །འོད་འདི་བསལ་ནས་རྒྱལ་བའི་འོད་ནི་ལྷག་གེ་ཡི། །ཁྱོད་ཀྱི་ལྷ་སྐད་ཀླུ་སྐད་མི་ཅིའི་གླུ་སྒྲ་ཡིས། །ཡང་དང་ཡང་དུ་འབར་བའི་ཉོན་མོངས་ཞི་བར་བགྱིད། །སྐད་མཆོག་ཡངས་པ་ཚངས་པ་རྣམས་ཀྱི་སྒྲ་སྐད་ཀྱིས། །ཉོན་མོངས་ཐམས་ཅད་ཞི་བར་བགྱིད་པས་འབར་མ་ལགས། །སྨན་པ་གང་དག་ཕྱོགས་བཅུར་རྒྱུ་ཡང་དེ་དག་གིས། །གང་དུའང་འགྲོ་བའི་ཉོན་མོངས་ཞི་བར་བགྱིད་མི་ནུས། །སྨན་པའི་རྒྱལ་པོ་བླ་མེད་གང་ཚེ་གསུང་བརྗོད་པ། །དེ་ཚེ་ཉོན་མོངས་ཀུན་ཞི་བདེ་བ་ཐམས་ཅད་སྦྱིན། །ཤིན་ཏུ་ངོ་མཚར་འོད་དང་སྟོབས་མཆོག་མཚུངས་མེད་སྟོབས། །གསུང་ནི་སྐྱོན་བྲལ་འཁྲུལ་པ་མི་མངའ་དགྲ་འདུལ་བ། །རྡུལ་མེད་རབ་རིབ་བདག་གི་མུན་པ་ཤིན་ཏུ་བཅོམ། །དགྲ་བྲལ་ཕན་མཛད་ཁྱེད་ཀྱི་དུས་ལགས་འདིར་གཤེགས་གསོལ། །སྦྱིན་དང་དུལ་དང་ལེགས་སྤྱོད་མི་མཉམ་མཚུངས་དང་མཉམ། །ཚུལ་ཁྲིམས་བརྟུལ་ཞུགས་མི་འཁྲུགས་ 421a ༄#། །བརྟུལ་ཞུགས་དཀའ་ཐུབ་དགྱེས། །བཟོད་དང་དུལ་དང་ཤིན་ཏུ་དགེ་ལ་ངེས་པའི་ཐུགས། །དགའ་གསུང་དགྲ་རྣམས་ཀྱི་ནི་དགའ་སྤོང་གཤེགས་སུ་གསོལ། ། དབང་པོ་སྟོབས་དང་ལམ་དགྱེས་བསམ་གཏན་མངོན་མཁྱེན་རོལ། །དྲན་དང་བློ་གྲོས་རྟོགས་དང་མོས་ལ་གནས་པའི་ཐུགས། །འོད་ནི་རབ་ཏུ་ལྷག་གེ་ཤིན་ཏུ་དགྱེས་པའི་ཐུགས། །ཡོན་ཏན་མངའ་བ་ཁྱོད་འདིར་གཤེགས་པའི་དུས་འདི་ལགས། །བྱམས་དང་སྙིང་རྗེ་དགའ་དང་བཏང་སྙོམས་བསྒོམས་པའི་ཐུགས། །སྐྱོན་གྱི་མུན་པ་བཅོམ་ཞིང་བག་ལ་ཉལ་དང་བྲལ། ། ཚངས་པའི་ལམ་ནི་རབ་བསླབས་རྒྱལ་བའི་ལམ་ལ་གནས། །དགའ་མཛད་བདེ་བར་གཤེགས་པ་དུས་ལགས་གཤེགས་སུ་གསོལ། །དེ་ནས་བཅོམ་ལྡན་འདས་ཀྱི་མི་འམ་ཅིའི་རྒྱལ་པོ་སྡོང་པོས་དུས་བསྐུལ་བའི་ཚིགས་སུ་བཅད་པ་གསན་ནས་དགེ་སློང་གི་དགེ་འདུན་ལ་བཀའ་སྩལ་པ། དགེ་སློང་དག་།མི་འམ་ཅིའི་རྒྱལ་པོ་སྡོང་པོས་དུས་བསྐུལ་གྱི། ལྷུང་བཟེད་དང ། ཆོས་གོས་ཐོགས་ལ་ཞག་བདུན་གནས་པའི་གཙུག་ལག་ཁང་སྐྱོང་ཡང་སྐོས་ཤིག་།དེ་ནས་བྱང་ཆུབ་སེམས་དཔའ་ལྷའི་ཅོད་པན་འདི་སྙམ་དུ་སེམས་ཏེ། འདི་ལྟར་བདག་གིས་ཁང་པ་བརྩེགས་པ་བཀོད་པ་འདི་ལྟ་བུ་སྤྲུལ་ལ་ཁང་པ་བརྩེགས་པ་དེར་བཅོམ་ལྡན་འདས་བྱང་ཆུབ་སེམས་དཔའ་དང་ཉན་ཐོས་ཀྱི་ཚོགས་དང་བཅས་པ་བཞུགས་ཏེ་རིན་པོ་ཆེ་བཀོད་པའི་སེངྒེའི་ 421b ཁྲི་ལ་བཞུགས་པའི་ཁང་པ་བརྩེགས་པ་བདག་གིས་ལག་པ་གཡས་པར་བླངས་ཏེ་ནམ་མཁའི་ངོས་ལས་རིའི་རྒྱལ་པོ་སྤོས་ཀྱི་ངད་ལྡང་དུ་བཀུར་བར་བྱིན་གྱིས་བརླབ་བོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་དེའི་ཚེ་འདི་ལྟ་བུའི་ཏིང་ངེ་འཛིན་ལ་སྙོམས་པར་ཞུགས་ཏེ། ཏིང་ངེ་འཛིན་དེ་ལ་སྙོམས་པར་ཞུགས་མ་ཐག་ཏུ་བཅོམ་ལྡན་འདས་ཀྱི་སྤྱན་སྔར་ཁང་པ་བརྩེགས་པ་ཚད་དཔག་ཚད་བཅུ་པ། བཀྲ་བ། བལྟ་ན་སྡུག་པ། གྲུ་བཞི་པ། ཀ་བ་བཞི་ཟུག་པ། ཆ་མཉམ་པ། ཤིན་ཏུ་རྣམ་པར་ཕྱེ་བ་བྱུང་ངོ ། །ཁང་པ་བརྩེགས་པ་དེར་སྟོབས་དང་ལྡན་པའི་པདྨ་བཀོད་པའི་ཁྲི་རྣམས་ཀྱང་བྱུང་ངོ ། །ཁང་པ་བརྩེགས་པ་དེར་བཅོམ་ལྡན་འདས་ཀྱི་གདན་རིན་པོ་ཆེའི་པདྨ་བཀོད་པའི་སེངྒེའི་ཁྲི་འཕང་དུ་མི་བདུན་ཡོད་པ་བྱུང་ངོ ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་ཁང་པ་བརྩེགས་པ་བཀོད་པ་དང ། སེངྒེའི་ཁྲི་བཀོད་པ་འདི་ལྟ་བུ་འདི་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བདག་ལ་ཐུགས་བརྩེ་བའི་སླད་དུ་བཅོམ་ལྡན་འདས་བྱང་ཆུབ་སེམས་དཔའ་དང ། ཉན་ཐོས་ཆེན་པོ་འདི་དག་དང་ཐབས་ཅིག་ཏུ་ཁང་པ་བརྩེགས་པ་སེངྒེའི་ཁྲི་བཤམས་པ་འདིར་བཞུགས་སུ་གསོལ། བཅོམ་ལྡན་འདས་བདག་གིས་ཁང་པ་བརྩེགས་པ་འདི་སུག་པ་གཡས་པས་བླངས་ཏེ་རིའི་རྒྱལ་པོ་སྤོས་ཀྱི་ངད་ལྡང་དུ་འཚལ་ནས་གཞག་པར་བགྱིའོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ལྷའི་ 422a ༄#། །ཅོད་པན་ལ་ཐུགས་བརྩེ་བའི་ཕྱིར་བྱང་ཆུབ་སེམས་དཔའ་དང་ཉན་ཐོས་ཆེན་པོ་དེ་དག་དང་ཐབས་ཅིག་ཏུ་ཁང་པ་བརྩེགས་པ་དེར་ཇི་ལྟར་ཁྲི་བཤམས་པ་དེ་དག་ལ་བཞུགས་སོ། །དེ་རས་བྱང་ཆུབ་སེམས་དཔའ་ལྷའི་ཅོད་པན་གྱིས་ཁང་པ་བརྩེགས་པ་དེ་ལགས་མཐིལ་གཡས་པར་བླངས་ཏེ་སྟེང་གི་ནམ་མཁའ་ལས་རྫུ་འཕྲུལ་གྱིས་སོང་ངོ་།། དེ་ནས་འདོད་པ་ན་སྤྱོད་པའི་ལྷའི་བུ་དང ། གཟུགས་ན་སྤྱོད་པའི་ལྷའི་བུ་རྣམས་ཀྱིས་བྱང་ཆུབ་སེམས་དཔའ་ལྷའི་ཅོད་པན་གྱི་རྫུ་འཕྲུལ་གྱི་ཆོ་འཕྲུལ་འདི་མཐོང་ནས་ཚིམ་ཞིང་མགུ་ལ་ཡིད་རངས་ཤིང་རབ་ཏུ་དགའ་སྟེ་དགའ་བ་དང ། ཡིད་བདེ་བ་སྐྱེས་ནས་བཅོམ་ལྡན་འདས་དང ། བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་ལ་མཆོད་པའི་ལས་ཀྱི་ཕྱིར་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་ཐམས་ཅད་ཐོགས་ཏེ་སིལ་སྙན་དང ། ཕེག་རྡོབ་པ་བྱས་ནས་བཅོམ་ལྡན་འདས་ཁང་པ་བརྩེགས་པ་ན་བཞུགས་ཤིང་ནམ་མཁའི་ངོས་ལས་གཤེགས་པ་ལ་མཆོད་པ་བྱས་ཏེ་རིའི་རྒྱལ་པོ་སྤོས་ཀྱི་ངད་ལྡང་དུ་ཕྱིན་ཏོ། །མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ཁང་པ་བརྩེགས་པ་ན་བཞུགས་ཤིང་ནམ་མཁའི་ངོས་ལས་གཤེགས་པ་མཐོང་ངོ ། །མཐོང་ནས་མི་འམ་ཅི་དང ། དྲི་ཟ་བརྒྱད་ཁྲི་བཞི་སྟོང་གིས་བསྐོར་ཏེ་མེ་ཏོག་དང ། བདུག་པ་དང ། སྤོས་དང ། 422b ཕྲེང་བ་དང ། བྱུག་པ་ཐམས་ཅད་ཐོགས་ནས་སིལ་སྙན་དང ། ཕེག་རྡོབ་པ་དང ། གླུ་དབྱངས་ལེན་པའི་བཀོད་པ་བྱས་ཏེ་བཅོམ་ལྡན་འདས་བསུ་བའི་ཕྱིར་བྱུང་ངོ ། །དེ་ནས་མི་འམ་ཅིའི་རྒྱལ་པོ་སྡོང་པོ་དཔུང་དང་བཅས། འཁོར་དང་བཅས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་ཇི་ལྟར་ཐོགས་པའི་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་དེ་དག་དང ། སིལ་སྙན་དང ། ཕེག་རྡོབ་པ་དང ། གླུ་དབྱངས་ལེན་པས་བཅོམ་ལྡན་འདས་ལ་མཆོད་པ་བྱས་སོ། །དེ་ནས་བཅོམ་ལྡན་འདས་ཀྱིས་དུས་ལ་བབ་པར་མཁྱེན་ནས་བྱང་ཆུབ་སེམས་དཔའ་དང་ཉན་ཐོས་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། དེ་མ་ཡིན་པ་གཞན་ལྷའི་བུ་རྣམས་དང་ཐབས་ཅིག་ཏུ་མི་འམ་ཅིའི་རྒྱལ་པོ་སྡོང་པོས་འཁོར་གྱི་ཁྱམས་བཀོད་པ་ག་ལ་བ་དེར་གཤེགས་ཏེ་རང་གི་སེངྒེའི་ཁྲི་ཇི་ལྟར་བཤམས་པ་ལ་བཞུགས་སོ། །བྱང་ཆུབ་སེམས་དཔའི་ཚོགས་དང ། ཉན་ཐོས་ཀྱི་ཚོགས་ཐམས་ཅད་སོ་སོ་ཅི་རིགས་པར་འཁོད་དོ། །མི་འམ་ཅིའི་རྒྱལ་པོ་སྡོང་པོས་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་དེ་དག་ལ་སྨྲས་པ། གྲོགས་པོ་དག་།དེ་བཞིན་གཤེགས་པ་དང་ཐབས་ཅིག་ཏུ་གདུགས་ཚོད་གསོལ་གྱི། ཁྱེད་ཐམས་ཅད་འདུས་ལ་ཆུར་སྤྱོན། དེ་ནས་མི་འམ་ཅིའི་ 423a ༄#། །རྒྱལ་པོ་སྡོང་པོ་སླས་དང་བཅས། བུ་དང་བཅས། རང་གི་སྐྱེ་བོ་དང་བཅས། འཁོར་དང་བཅས། གཡོག་དང་བཅས་ཏེ་རང་རང་གི་ལག་གིས་བཟའ་བ་དང ། བཅའ་བ་གྱ་ནོམ་པ་མང་པོ་རོ་དང་ལྡན་པ། རོ་བརྒྱ་བའི་ཞལ་ཟས་སྣ་ཚོགས་བཅོམ་ལྡན་འདས་དང ། བྱང་ཆུབ་སེམས་དཔའི་དགེ་འདུན་དང ། དགེ་སློང་གི་དགེ་འདུན་དང ། འཁོར་ལ་བྲིམས་ནས་ཅི་བདེ་བར་བསྟབས་ཏེ་ཚིམ་པར་བྱས་སོ། །ཚིམ་པར་བྱས་ནས་བཅོམ་ལྡན་འདས་ཀྱིས་ལྷུང་བཟེད་བཞག་སྟེ་ཕྱག་བཅབས་པར་རིག་ནས་དཔུང་དང་བཅས། གཡོག་དང་བཅས་ཏེ་ཆོས་ཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་ཇི་ལྟར་བདག་ལ་འོས་པའི་སྟན་ལ་འདུག་གོ་།དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་དང ། སྐྱེ་བོའི་ཚོགས་ཕལ་པོ་ཆེ་དེ་དག་ལ་ཆོས་ཀྱི་གཏམ་ཡང་དག་པར་སྟོན་ཏོ། །ཡང་དག་པར་འཛིན་དུ་བཅུག་གོ་།གཟེངས་བསྟོད་དོ། །རབ་ཏུ་དགའ་བར་མཛད་དོ། །དེ་ནས་བཅོམ་ལྡན་འདས་ཀྱིས་ཆོས་ཀྱི་གཏམ་ནི། འདི་ཡིན་ཏེ། མི་འམ་ཅིའི་བདག་པོ། །རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །རྣམ་པ་སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། མི་འམ་ཅིའི་བདག་པོ། །བྱང་ཆུབ་སེམས་དཔའ་སྦྱིན་པ་སྦྱིན་པ་ན་བྱང་ཆུབ་ཀྱི་སེམས་སྔོན་དུ་འགྲོ་བའི་སྦྱིན་ 423b པ་དེ་སྦྱིན་པ་དང ། ཐེག་པ་ཆུང་དུ་སྤངས་པའི་སེམས་ཀྱིས་སྦྱིན་པ་དེ་སྦྱིན་པ་དང ། སློང་བ་ལ་ཞེ་སྡང་བ་མེད་པའི་སེམས་ཀྱིས་སྦྱིན་པ་དེ་སྦྱིན་པ་དང ། ལེན་པ་རྣམས་ལ་སྦྱིན་གནས་སུ་འདུ་ཤེས་བསྐྱེད་དེ་སྦྱིན་པ་དེ་སྦྱིན་པ་དང ། ལེན་པ་རྣམས་ལ་དགེ་བའི་བཤེས་གཉེན་དུ་འདུ་ཤེས་བསྐྱེད་དེ་སྦྱིན་པ་དེ་སྦྱིན་པ་དང ། ནང་གི་ཀུན་ནས་ཉོན་མོངས་པའི་དྲི་མ་སྤངས་ཏེ་སྦྱིན་པ་དེ་སྦྱིན་པ་དང ། ཀུན་ཏུ་འཛིན་པ་མེད་པའི་སེམས་ཀྱིས་དགའ་བ་དང ། དང་བ་དང ། མཆོག་ཏུ་དགའ་བ་ཐོབ་ནས་སྦྱིན་པ་དེ་སྦྱིན་པ་དང ། ལག་པ་བརྐྱང་སྟེ་གྲོལ་བས་གཏོང་བ་རྣམ་པར་གཏོང་བ་ལ་དགའ་བས་སྦྱིན་པ་དེ་སྦྱིན་པ་དང ། རྒྱ་ཆེན་པོ་ལ་མོས་ཏེ་ཞུམ་པ་མེད་པའི་སེམས་ཀྱིས་སྦྱིན་པ་དེ་སྦྱིན་པ་དང ། སྣོད་ཐམས་ཅད་ལ་མི་གནས་པར་སྦྱིན་པ་དེ་སྦྱིན་པ་དང ། རྣམ་པར་སྨིན་པ་ལ་རེ་བ་མེད་པར་སྦྱིན་པ་དེ་སྦྱིན་པ་དང ། ལན་ལ་རེ་བ་མེད་པའི་བློས་སྦྱིན་པ་དེ་སྦྱིན་པ་དང ། སངས་རྒྱས་ཀྱི་ཆོས་ཚོལ་བའི་བློས་སྦྱིན་པ་དེ་སྦྱིན་པ་དང ། ཐམས་ཅད་མཁྱེན་པའི་ཡེ་ཤེས་སུ་བསྔོས་ཏེ་སྦྱིན་པ་དེ་སྦྱིན་པ་དང ། གདུང་བ་མེད་པའི་སེམས་ཀྱིས་སྦྱིན་པ་དེ་སྦྱིན་པ་དང ། བསྡུ་བའི་དངོས་པོ་སྔོན་དུ་འགྲོ་བས་སྦྱིན་པ་དེ་སྦྱིན་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་སྦྱིན་པ་དེ་སྦྱིན་པ་དང ། ཆོས་འཛིན་པར་གྱུར་ཅིག་སྙམ་སྟེ་སྦྱིན་པ་དེ་སྦྱིན་པ་དང ། དེ་བཞིན་གཤེགས་པའི་གསུང་དང་མཐུན་པར་གྱུར་ཅིག་སྙམ་སྟེ་སྦྱིན་པ་དེ་སྦྱིན་པ་དང ། བདག་བདུད་ཀྱི་ཕྱོགས་ཚར་གཅོད་ 424a ༄#། །པར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་བྱང་ཆུབ་ཀྱི་ལམ་རྣམ་པར་སྤྱོད་པར་གྱུར་ཅིག་ཅེས་སྦྱིན་པ་དེ་སྦྱིན་པ་དང ། བདག་སྐྱེས་བུ་དམ་པའི་ལས་བྱེད་པར་གྱུར་ཅིག་ཅེས་སྦྱིན་པ་དེ་སྦྱིན་པ་དང ། བདག་ཡི་དྭགས་ཀྱི་ལམ་རྣམ་པར་སྤོང་བར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་གི་བདོག་པ་ཐམས་ཅད་ཡོངས་སུ་གཏོང་བའི་རྒྱུར་གྱུར་ཅིག་ཅེས་སྦྱིན་པ་དེ་སྦྱིན་པ་དང ། བདག་གིས་ལོངས་སྤྱོད་ཆེན་པོར་འགྱུར་བའི་སྒྲུབ་པ་རབ་ཏུ་བཟུང་བར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། ཆོས་ལ་དགའ་བར་རབ་ཏུ་གནས་པར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་ལ་དགེ་བའི་བཤེས་གཉེན་དཀན་པར་མ་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་ལ་སེམས་ཅན་ཐམས་ཅད་དགའ་བའི་མིག་དང་ལྡན་པར་གྱུར་ཅིག་ཅེས་ཏེ་སྦྱིན་པར་དེ་སྦྱིན་པ་དང ། བདག་གི་སྦྱིན་པ་དེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྒྲུབ་པར་གྱུར་ཅིག་ཅེས་སྦྱིན་པ་དེ་སྦྱིན་པ་དང ། བྱང་ཆུབ་སེམས་དཔའ་གཏོང་བ་ཕུན་སུམ་ཚོགས་པ་གཞན་རྣམས་ཀྱི་རྗེས་སུ་སློབ་པར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་མཚན་དང་དཔེ་བྱད་བཟང་པོ་བསགས་པ་ཡོངས་སུ་འཛིན་པར་གྱུར་ཅིག་ཅེས་ཏེ་སྦྱིན་པ་དེ་སྦྱིན་པ་དང ། བདག་སངས་རྒྱས་ཀྱི་ཞིང་ཡོངས་སུ་སྦྱོང་བ་དང ། བདག་སངས་རྒྱས་ཀྱི་ཆོས་ཐམས་ཅད་མངོན་སུམ་དུ་གྱུར་ཅིག་ཅེས་ 424b ཏེ་སྦྱིན་པ་སྦྱིན་པ་སྟེ། མི་འམ་ཅིའི་བདག་པོ། རྣམ་པ་སུམ་ཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ། རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། འདོད་ཆགས་དང ། ཞེ་སྡང་དང ། གཏི་མགུ་དང་བྲལ་བས་ལུས་ཡོངས་སུ་དག་པའི་ཚུལ་ཁྲིམས་དང ། བདག་གི་ལྷ་སངས་རྒྱས་ལ་མི་སླུ་བའི་མཚན་ཉིད་ཀྱིས་ངག་ཡོངས་སུ་དག་པའི་ཚུལ་ཁྲིམས་དང ། བརྣབ་སེམས་དང ། གནོད་སེམས་དང ། ལོག་པར་ལྟ་བ་མེད་པས་སེམས་ཡོངས་སུ་དག་པའི་ཚུལ་ཁྲིམས་དང ། ལྷ་དང་མིའི་ཕུན་སུམ་ཚོགས་པ་མྱོང་བས་དགེ་བ་བཅུའི་ལས་ཀྱི་ལམ་ཡོངས་སུ་དག་པའི་ཚུལ་ཁྲིམས་དང ། ཉི་ཚེ་བའི་ས་ཐམས་ཅད་མི་སྟོན་པས་བྱང་ཆུབ་ཀྱི་སེམས་དང ། བསམ་པ་མི་བརྗེད་པའི་ཚུལ་ཁྲིམས་དང ། ཤིན་ཏུ་ཉམས་པ་མེད་ཅིང་གཡོ་དང་འབྲལ་བས་ལྷག་པའི་བསམ་པ་ཡོངས་སུ་དག་པའི་ཚུལ་ཁྲིམས་དང ། སྐྱེ་བོ་ཕལ་བ་ཐམས་ཅད་སྡུད་པས་འཕགས་པའི་སྐྱེ་བོས་བསྔགས་པའི་ཚུལ་ཁྲིམས་དང ། སེམས་ཅན་ཐམས་ཅད་ལ་སེམས་སྙོམས་པར་བྱམས་པ་སྔོན་དུ་འགྲོ་བའི་ཚུལ་ཁྲིམས་དང ། སེམས་ཅན་ཐམས་ཅད་ཡོངས་སུ་སྐྱོབ་པས་སྙིང་རྗེ་ཆེན་པོ་ལ་རབ་ཏུ་སྦྱོར་བའི་ཚུལ་ཁྲིམས་དང ། 425a ༄#། །དམ་བཅས་པའི་སྟོབས་ཀྱིས་བསླབ་པ་རྫོགས་པ་མེད་པ་ཡང་དག་པར་འཛིན་པའི་ཚུལ་ཁྲིམས་དང ། ཁ་ན་མ་ཐོ་བ་ཆུང་དུ་ལའང་འཇིགས་པར་ལྟ་བས་ངོ་ཚ་ཤེས་ཤིང་ཁྲེལ་ཡོད་པ་ཕུན་སུམ་ཚོགས་པའི་ཚུལ་ཁྲིམས་དང ། ཤིན་ཏུ་མི་གཏོང་བས་སྐྱོན་མེད་པའི་ཚུལ་ཁྲིམས་དང ། སྤྱོད་པ་ཤིན་ཏུ་དག་པས་ཐུན་ཆགས་མ་ཡིན་པའི་ཚུལ་ཁྲིམས་དང ། སངས་རྒྱས་ཀྱི་ཞིང་གཞན་དུ་འགྲོ་བས་རང་གི་རྣམ་པ་མང་པོ་ལ་དབང་བྱེད་པའི་ཚུལ་ཁྲིམས་དང ། སྐྱེ་བོ་མཁས་པས་རིག་པའི་ཕྱིར་བསྔགས་པའི་ཚུལ་ཁྲིམས་དང ། ངན་སོང་ངན་འགྲོ་ཐམས་ཅད་ཀྱི་ལམ་ལས་སྒྲོལ་བའི་ཚུལ་ཁྲིམས་དང ། བདེ་བའི་དངོས་པོ་ཐམས་ཅད་ལ་རབ་ཏུ་གནས་པའི་ཚུལ་ཁྲིམས་དང ། སངས་རྒྱས་ཀྱི་ཚུལ་ཁྲིམས་ཡོངས་སུ་རྫོགས་པར་བྱེད་པས་སངས་རྒྱས་ཀྱིས་གནང་བའི་ཚུལ་ཁྲིམས་དང ། ཡི་དམ་ལ་བརྟེན་པས་མི་ལྷོད་པའི་ཚུལ་ཁྲིམས་དང ། རང་གི་སེམས་ངེས་པར་སེམས་པས་བདག་ལ་མི་བསྟོང་གཞན་ལ་མི་སྨོད་པའི་ཚུལ་ཁྲིམས་དང ། ཉོན་མོངས་པ་མེད་པས་ངེས་པར་སེམས་པའི་སྙིང་རྗེའི་ཚུལ་ཁྲིམས་དང ། བྱང་ཆུབ་ཀྱི་ཕྱོགས་ཀྱི་ཆོས་ཐམས་ཅད་ཉེ་བར་བྱེད་པའི་ཚུལ་ཁྲིམས་དང ། རབ་ཏུ་དགའ་བར་བྱེད་པ་ལ་དགའ་བར་བྱེད་པའི་ཚུལ་ཁྲིམས་དང ། འདོད་པ་དང་ཆགས་པ་མེད་པས་ཆོག་ཤེས་པར་བྱེད་པའི་ཚུལ་ཁྲིམས་དང ། ནན་ཏན་སྙིང་ 425b པོར་བྱེད་པས་སྒྲུབ་པ་རླབས་པོ་ཆེའི་ཚུལ་ཁྲིམས་དང ། ཁྱིམ་གྱི་གནས་ཐམས་ཅད་ལ་མི་ལྟ་བའི་རབ་ཏུ་འབྱུང་བ་ལ་གཞོལ་བའི་ཚུལ་ཁྲིམས་དང ། ཆོས་ཀྱི་དགའ་བ་ལ་དགའ་མོས་པས་དགོན་པ་ལ་དགའ་བ་དང་ལྡན་པའི་ཚུལ་ཁྲིམས་དང ། འཕགས་མའི་རིགས་ལ་རྟོན་པས་འདོད་པ་ཉུང་ཞིང་ཆོག་ཤེས་པ་ལ་ངེས་པའི་ཚུལ་ཁྲིམས་དང ། སྡིག་པ་འདོད་པ་ཐམས་ཅད་དང་བྲལ་བས་སྦྱངས་པའི་ཡོན་ཏན་ལ་ཡང་དག་པར་རབ་ཏུ་སྦྱོར་བའི་ཚུལ་ཁྲིམས་དང ། སེམས་ཅན་མེད་པར་རྣམ་པར་སྤྱོད་པས་དམིགས་པ་མེད་པར་སྦྱོར་བའི་ཚུལ་ཁྲིམས་དང ། ཆད་པ་དང་རྟག་པ་ཡོངས་སུ་སྤོང་བས་ལྟ་བར་སོང་བ་ཐམས་ཅད་དང་གཏི་མུག་སེལ་བའི་ཚུལ་ཁྲིམས་དང ། རྟེན་ཅིང་འབྲེལ་པར་འབྱུང་བ་དང་མི་འགོལ་བས་བྱང་ཆུབ་ཀྱི་རྗེས་སུ་མཐུན་པའི་ཚུལ་ཁྲིམས་ཏེ། མིའམ་ཅིའི་བདག་པོ། རྣམ་པ་སུམ་ཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མིའམ་ཅིའི་བདག་པོ།། རྣམ་པ་གསུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། ལུས་ལ་མི་ལྟ་བས་བཟོད་པ་བལྟ་བ་དང ། སྲོག་ལ་མི་ཆགས་པས་བཟོད་པར་བལྟ་བ་དང ། ཞེ་སྡང་བའི་སེམས་མེད་པས་བཟོད་པར་བལྟ་བ་དང ། ཉེས་པར་སྨྲས་པའི་ཚིག་དང་དུ་ལེན་པས་བཟོད་པར་བལྟ་བ་ 426a ༄#། །དང ། ཉམ་ཆུང་བའི་སེམས་ཅན་ལ་སྙིང་རྗེ་སྐྱེད་པས་བཟོད་པར་བལྟ་བ་དང ། མ་བསླབ་པ་ལ་མི་བརྙས་པས་བཟོད་པར་བལྟ་བ་དང ། གནོད་པ་བྱེད་པ་རྣམས་ལ་ལན་གླན་པའི་མཐུ་ཡོད་ཀྱང་ལན་མི་ལྡན་པས་བཟོད་པར་བལྟ་བ་དང ། ཡན་ལག་དེང་ཉིང་ལག་ཐམས་ཅད་བཅད་ཀྱང་མི་འཁྲུགས་ཤིང་གནོད་སེམས་མེད་པས་བཟོད་པར་བལྟ་བ་དང ། བརླང་བ་མེད་པས་བཟོད་པར་བལྟ་བ་དང ། གཤེ་བ་ལ་སླར་མི་གཤེ་བས་བཟོད་པར་བལྟ་བ་དང ། བསམ་པ་དག་པས་བཟོད་པར་བལྟ་བ་དང ། རྙོག་པའི་སེམས་མེད་པས་བཟོད་པར་བལྟ་བ་དང ། དཀྲུགས་པའི་སེམས་མེད་པས་བཟོད་པར་བལྟ་བ་དང ། གཞན་གྱི་སེམས་སྲུང་བས་བཟོད་པར་བལྟ་བ་དང ། སེམས་ཅན་ཐམས་ཅད་ལ་ཕན་པའི་དངོས་པོས་བཟོད་པར་བལྟ་བ་དང ། སྙིང་རྗེའི་བློ་དང་ལྡན་པས་བཟོད་པར་བལྟ་བ་དང ། ང་རྒྱལ་མེད་པས་བཟོད་པར་བལྟ་བ་དང ། སེམས་ཅན་ཐམས་ཅད་ལ་བརྙས་ཐབས་མེད་ཅིང་འདུད་པས་བཟོད་པར་བལྟ་བ་དང ། འབར་བ་མེད་པས་བཟོད་པར་བལྟ་བ་དང ། ཉེ་བར་ཞི་བས་བཟོད་པར་བལྟ་བ་དང ། ངེས་པར་སེམས་པས་བཟོད་པར་བལྟ་བ་དང ། བདག་གི་འཁྲུལ་པ་ལ་སོ་སོར་རྟོག་པས་བཟོད་པར་བལྟ་བ་དང ། གཞན་གྱི་འཁྲུལ་པའི་སྐྱོན་ལ་མི་ལྟ་བས་བཟོད་པར་བལྟ་བ་དང ། སངས་རྒྱས་རྗེས་སུ་དྲན་པ་བསྒོམས་ 426b པས་བཟོད་པར་བལྟ་བ་དང ། ཆོས་ལ་སེམས་སྦྱོར་བས་བཟོད་པར་བལྟ་བ་དང ། དད་པའི་དངོས་པོས་བཟོད་པར་བལྟ་བ་དང ། སེམས་ལ་གདུང་བ་མེད་པས་བཟོད་པར་བལྟ་བ་དང ། བཞིན་འཛུམ་ཞིང་ཁྲོ་གཉེར་མེད་པས་བཟོད་པར་བལྟ་བ་དང ། གསོང་པོར་སྨྲ་བས་བཟོད་པར་བལྟ་བ་དང ། རྣམ་པར་ཐར་པའི་སྒོ་གསུམ་ལ་དངང་པ་མེད་པས་བཟོད་པར་བལྟ་བ་དང ། མ་སྐྱེས་པ་དང་མ་བྱུང་བ་ལ་མོས་པས་བཟོད་པར་བལྟ་བ་དང ། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པས་བཟོད་པར་བལྟ་བ་སྟེ། མིའམ་ཅིའི་བདག་པོ། རྣམ་པར་སུམ་ཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའ་རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ། །རྣམ་པར་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། མི་འམ་ཅིའི་བདག་པོ། བྱང་ཆུབ་སེམས་དཔའ་སངས་རྒྱས་ཀྱི་རིགས་རྒྱུན་མི་ཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང ། ཆོས་ཀྱི་རིགས་རྒྱུན་མི་ཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང ། དགེ་འདུན་གྱི་རིགས་རྒྱུན་མི་ཆད་པར་བྱ་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཚད་མེད་པ་ཡོངས་སུ་སྨིན་པར་བྱ་བའི་ཕྱིར་བརྩོན་འགྲུས་རྩོམ་པ་དང ། འཁོར་བ་ཚད་མེད་པ་ཡོངས་སུ་གཟུང་བའི་ཕྱིར་བརྩོན་འགྲུས་རྩོམ་པ་དང ། སངས་རྒྱས་ 427a ༄#། །ཚད་མེད་པ་ལ་མཆོད་པ་དང་ནི་མ་གྲོ་བྱ་བའི་ཕྱིར་བརྩོན་འགྲུས་རྩོམ་པ་དང ། དགེ་བའི་རྩ་བ་ཚད་མེད་པ་གསག་པའི་ཕྱིར་བརྩོན་འགྲུས་རྩོམ་པ་དང ། ཐོས་པ་ཚད་མེད་པ་གཟུང་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ལ་ལེགས་པར་སྨྲ་བ་སྨྲ་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ལ་རབ་ཏུ་གདིང་བར་བྱེད་པའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ལ་བྱ་བ་ཅི་ཡོད་ཅེས་བྱ་བ་ལ་སྤྲོ་བའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ཡོངས་སུ་མི་གཏོང་པའི་ཕྱིར་བརྩོན་འགྲུས་རྩོམ་པ་དང ། སེམས་ཅན་ཐམས་ཅད་ཚུལ་ཁྲིམས་ཀྱི་བསླབ་པ་ལ་གཟུད་པའི་ཕྱིར་བརྩོན་འགྲུས་རྩོམ་པ་དང ། བཟོད་པའི་སྟོབས་ཐམས་ཅད་དང ། དེས་པ་མི་ཉམས་པར་བྱ་བའི་ཕྱིར་བརྩོན་འགྲུས་རྩོམ་པ་དང ། བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་ཐམས་ཅད་བསྐྱེད་པའི་ཕྱིར་བརྩོན་འགྲུས་རྩོམ་པ་དང ། ཆགས་པ་མེད་པའི་ཤེས་རབ་མཆོག་ཡོངས་སུ་བསྐད་པའི་ཕྱིར་བརྩོན་འགྲུས་རྩོམ་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ཚངས་པའི་གནས་པའི་གནས་པ་ཡོངས་སུ་བསྐང་བའི་ཕྱིར་བརྩོན་འགྲུས་རྩོམ་པ་དང ། མངོན་པར་ཤེས་པ་ཐམས་ཅད་ལ་བརྩོན་འགྲུས་བསྐྱེད་པའི་ཕྱིར་ 427b བརྩོན་འགྲུས་རྩོམ་པ་དང ། སངས་རྒྱས་ཀྱི་ཞིང་ཐམས་ཅད་ཀྱི་ཡོན་ཏན་བཀོད་པ་རང་གི་སངས་རྒྱས་ཀྱི་ཞིང་ཡོངས་སུ་བསྡུ་བའི་ཕྱིར་བརྩོན་འགྲུས་རྩོམ་བ་དང ། བདུད་ཐམས་ཅད་གཞོམ་བའི་ཕྱིར་བརྩོན་འགྲུས་རྩོམ་པ་དང ། སྟོབས་བརྟན་པ་ཆེན་པོས་ཕ་རོལ་གནོན་པའི་ཕྱིར་བརྩོན་འགྲུས་རྩོམ་པ་དང ། ཕ་རོལ་རྒོལ་བ་ཐམས་ཅད་ཆོས་དང་མཐུན་པས་ཚར་གཅད་པའི་ཕྱིར་བརྩོན་འགྲུས་རྩོམ་པ་དང ། སྟོབས་བཅུ་དང ། མི་འཇིགས་པ་དང ། སངས་རྒྱས་ཀྱི་ཆོས་ཡོངས་སུ་བསྐང་བའི་ཕྱིར་བརྩོན་འགྲུས་རྩོམ་པ་དང ། ལུས་དང ། ངག་དང ། སེམས་ཀྱི་རྒྱན་གྱི་ཕྱིར་བརྩོན་འགྲུས་རྩོམ་པ་དང ། བྱ་བ་ཐམས་ཅད་ཉམས་འོག་ཏུ་ཆུད་པར་བྱེད་ཅིང་བརྩོན་པ་མི་གཏོང་བའི་ཕྱིར་བརྩོན་འགྲུས་རྩོམ་པ་དང ། སེམས་ཞུམ་པ་མེད་པར་བྱ་བའི་ཕྱིར་བརྩོན་འགྲུས་རྩོམ་པ་དང ། ཉོན་མོངས་པ་ཐམས་ཅད་ཀྱིས་མི་རྫི་བའི་ཕྱིར་བརྩོན་འགྲུས་རྩོམ་པ་དང ། མ་རྒལ་བ་བསྒྲལ། མ་གྲོལ་བ་དགྲོལ། དབུགས་མ་ཕྱིན་པ་དབུགས་འབྱུང ། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བའི་ཕྱིར་བརྩོན་འགྲུས་རྩོམ་པ་དང ། བསོད་ནམས་བརྒྱ་པའི་མཚན་གྱི་ཚོགས་གསག་པའི་ཕྱིར་བརྩོན་འགྲུས་རྩོམ་པ་དང ། སངས་རྒྱས་ཐམས་ཅད་ཀྱི་དམ་པའི་ཆོས་ཡོངས་སུ་གཟུང་བའི་ཕྱིར་བརྩོན་འགྲུས་རྩོམ་པ་དང ། སངས་རྒྱས་ཀྱི་ཞིང་མཐའ་ཡས་པར་རྫུ་འཕྲུལ་གྱིས་འགྲོ་ཞིང་སངས་རྒྱས་ 428a ༄#། །ལ་བལྟ་བའི་ཕྱིར་བརྩོན་འགྲུས་རྩོམ་པ་དང ། སེམས་དང་ལུས་དབེན་པའི་ཕྱིར་དེའི་བརྩོན་འགྲུས་དེ་དབེན་པ་ལས་ངེས་པར་བྱུང་བ་དང ། ཐམས་ཅད་མཁྱེན་པའི་ཡེ་ཤེས་ལ་འཇུག་པའི་ཕྱིར་དེའི་བརྩོན་འགྲུས་དེ་བླང་བ་མེད་ཅིང་དོར་བ་མེད་ལག་དེག་པ་མེད་ཅིང་གཞག་པ་མེད་དེ། སྐྱེ་བར་མེད་ཅིང་འབྱུང་བ་མེད་པས་བསྡུས་པ་ཡིན་ཏེ། མིའམ་ཅིའི་བདག་པོ། །རྣམ་པ་སུམ་ཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའ་རྣམས་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ།་རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། དྲན་པ་ཡོངས་སུ་དག་པ་དང ། བློ་གྲོས་ཡོངས་སུ་དག་པ་དང ། རྟོགས་པ་ཡོངས་སུ་དག་པ་དང ། ངོ་ཚ་ཤེས་པ་ཡོངས་སུ་དག་པ་དང ། ཁྲེལ་ཡོད་པ་ཡོངས་སུ་དག་པ་དང ། མོས་པ་ཡོངས་སུ་དག་པ་དང ། བསྔོ་བ་ཡོངས་སུ་དག་པ་དང ། བྱང་ཆུབ་ཀྱི་སེམས་མི་བརྗེད་པ་ཡོངས་སུ་དག་པ་དང ། དབང་པོས་པས་པ་ཡོངས་སུ་དག་པ་དང ། མི་གནས་པ་ཡོངས་སུ་དག་པ་དང ། དེ་ལ་མ་ཆགས་པ་ཡོངས་སུ་དག་པ་དང ། མངོན་པར་ཤེས་པ་བསྐྱེད་པ་ཡོངས་སུ་དག་པ་དང ། སེམས་ལས་སུ་རུང་བ་ཡོངས་སུ་དག་པ་དང ། ལུས་དབེན་པ་ཡོངས་སུ་དག་པ་དང ། བྲག་ཅ་ 428b ཤེས་པ་ཡོངས་སུ་དག་པ་དང ། ནང་ཉེ་བར་ཞི་བ་ཡོངས་སུ་དག་པ་དང ། ཕྱི་རོལ་ཏུ་མི་རྒྱུ་བ་ཡོངས་སུ་དག་པ་དང ། དམིགས་པའི་ལྟ་བ་སྤོང་བ་ཡོངས་སུ་དག་པ་དང ། བདག་མེད་པ་དང ། སེམས་ཅན་མེད་པ་དང ། སྲོག་མེད་པ་དང ། གསོ་བ་མེད་པ་དང ། གང་ཟག་མེད་པར་སོ་སོར་རྟོག་ཅིང་ཁམས་གསུམ་པ་ལ་མི་གནས་པ་ཡོངས་སུ་དག་པ་དང ། བྱང་ཆུབ་ཀྱི་ཡན་ལག་གི་སྒོ་ཡོངས་སུ་དག་པ་དང ། སེམས་ཅན་ལ་ལྟ་བའི་སྙིང་རྗེ་ཆེན་པོ་ཡོངས་སུ་དག་པ་དང ། ཤེས་རབ་ལ་འཇུག་པས་རབ་རིབ་མེད་ཅིང་སྣང་བ་ཡོངས་སུ་དག་པ་དང ། རྒྱུ་དང་འབྲས་བུ་དང་རྣམ་པར་སྨིན་པ་དང་མི་འགལ་བ་ཡོངས་སུ་དག་པ་དང ། ཆོས་ལ་སེམས་པའི་བཟོད་པ་ཡོངས་སུ་དག་པ་དང ། ཚུལ་བཞིན་གྱི་རྣམ་པའི་ཆོས་ལ་སོ་སོར་རྟོག་པ་ཡོངས་སུ་དག་པ་དང ། ཐབས་ལ་མཁས་པ་བསྡུ་བ་ཡོངས་སུ་དག་པ་དང ། བྱང་ཆུབ་ཀྱི་སྙིང་པོ་སྒྲུབ་པ་ཡོངས་སུ་དག་པ་དང ། ཉན་ཐོས་དང་རང་སངས་རྒྱས་དང་མི་འདྲེ་བ་ཡོངས་སུ་དག་པ་དང ། མི་གཡོ་བའི་བསམ་གཏན་སྒྲུབ་པ་ཡོངས་སུ་དག་པ་དང ། སངས་རྒྱས་ཀྱི་ཏིང་ངེ་འཛིན་ཐོབ་པ་ལ་མི་གཡེང་བ་ཡོངས་སུ་དག་པ་དང ། སེམས་ཅན་ཐམས་ཅད་ཀྱི་སེམས་དང་སྤྱོད་པ་ལྟ་བ་ཡོངས་སུ་དག་པ་དང ། སེམས་ཅན་ཐམས་ཅད་ཀྱི་དབང་པོའི་མཆོག་དང་མཆོག་མ་ཡིན་པ་ཤེས་ནས་སོ་སོར་ཅི་རིགས་པར་ཆོས་སྟོན་པ་ཡོངས་སུ་དག་པ་སྟེ། མིའམ་ཅིའི་བདག་པོ། །རྣམ་པ་སུམ་ཅུ་རྩ་གཉིས་པོ་འདི་ 429a ༄#། །དག་གིས་བྱང་ཆུབ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ། རྣམ་པ་སུམ་ཅུ་རྩ་གཉིས་ཀྱིས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། ཐོས་བ་ཚོལ་བས་མི་ངོམས་པས་མང་དུ་ཐོས་པ་དང ། ཚུལ་བཞིན་ཡིད་ལ་བྱེད་པས་ཆོས་རྣམས་ལ་དཔྱོད་པའི་ཤེས་པ་ལ་མཁས་པ་དང ། བྱང་ཆུབ་མངོན་སུམ་དུ་བྱེད་པའི་བདག་ཉིད་ཆོས་སྒྲུབ་པ་ཤེས་པ་དང ། ཕུང་པོ་ལ་མཁས་པ་ལ་འཇུག་པས་རྣམ་པར་གྲོལ་བ་ཤེས་པ་དང ། ཆོས་ཀྱི་དབྱིངས་ལ་མཁས་པའི་ཤེས་པ་དང ། སྐྱེ་མཆེད་ལ་མཁས་པའི་ཤེས་པ་དང ། རྒྱུ་དང་བྱ་བ་ཁོང་དུ་ཆུད་པས་སྟོང་པའི་རྣམ་པར་རྟེན་ཅིང་འབྲེལ་བར་འབྱུང་བ་ལ་མཁས་པ་དང ། བདེན་པ་ལ་མཁས་པའི་ཤེས་པ་དང ། དེར་མི་ལྟུང་བར་སྐྱོན་མེད་པ་ལ་འཇུག་པ་ཤེས་པ་དང ། བསམ་བཞིན་དུ་སྐྱེ་བས་སྐྱེ་བ་ལ་སོ་སོར་མི་རྟོག་པའི་ཤེས་པ་དང ། གཟོད་མ་ནས་རྣམ་པར་དག་པས་ཆོས་ཐམས་ཅད་མི་སྐྱེ་བར་ཤེས་པ་དང ། ཕྱིན་ཅི་ལོག་ཏུ་གྱུར་པ་ཡོངས་སུ་སྨིན་པར་བྱེད་པས་སེམས་ཅན་ཐམས་ཅད་བདག་མེད་པར་ཤེས་པ་དང ། འདོད་ཆགས་དང་བྲལ་བའི་མཐའི་ཕྱིར་ཆོས་ཐམས་ཅད་ཆོས་གཅིག་ཏུ་ཤེས་པ་དང ། ནམ་མཁའ་དང་མཚུངས་པའི་ཕྱིར་ཞིང་ཐམས་ཅད་ཞིང་གཅིག་ 429b ཏུ་ཤེས་པ་དང ། ཆོས་ཀྱི་དབྱིངས་བསམ་གྱིས་མི་ཁྱབ་པ་ལ་ཞུགས་པས་སངས་རྒྱས་ཐམས་ཅད་སངས་རྒྱས་གཅིག་ཏུ་ཤེས་པ་དང ། ཡི་གེ་ཤེས་པ་ལ་མཁས་པས་ཆོས་ཀྱི་ཚིག་རབ་ཏུ་དབྱེ་བ་བསྟན་པ་ཤེས་པ་དང ། ལེགས་པར་བཤད་པས་སེམས་ཅན་ཐམས་ཅད་ཚིམ་པར་བྱེད་པའི་ཕྱིར་ཆགས་པ་མེད་པའི་སྤོབས་པས་ཆོས་རྒྱ་ཆེར་ཤེས་པ་དང ། ཐོས་པ་ཐམས་ཅད་འཛིན་པས་གཟུངས་བརྗེད་པ་མེད་པའི་ཤེས་པ་དང ། བདུད་དེ་དག་བྱང་ཆུབ་ཏུ་ཡོངས་སུ་སྨིན་པར་བྱེད་པས་བདུད་ཀྱི་ལས་ཐམས་ཅད་ཁོང་དུ་ཆུད་པའི་ཤེས་པ་དང ། རྣམ་པར་བསྒྲུབས་ཏེ་སོ་སོར་ཉེ་བར་གནས་པར་ཤེས་པས་ཆོས་ཐམས་ཅད་སྒྱུ་མ་ལྟ་བུར་རྟོག་པའི་ཤེས་པ་དང ། ཤིན་ཏུ་ཡོངས་སུ་གྲུབ་པ་མེད་པའི་ཚུལ་གྱིས་ཆོས་ཐམས་ཅད་རྨི་ལམ་དང ། སྨིག་རྒྱུ་དང ། ཆུ་ཟླ་དང ། མིག་ཡོར་དང ། བྲག་ཅ་ལྟ་བུའི་ཚུལ་དུ་སྟོན་པ་ཤེས་པ་དང ། ཤེས་པ་རྣམ་པར་དག་པའི་ཕྱིར་སེམས་ཅན་གྱི་སེམས་ཀྱི་སྤྱོད་པ་ཐམས་ཅད་ཁོང་དུ་ཆུད་པའི་ཤེས་པ་དང ། ཤིན་ཏུ་བསླབ་པའི་ཕྱིར་འཁོར་བ་དང་མྱ་ངན་ལས་འདས་པ་བརྟགས་པར་ཤེས་པའི་ཐབས་ལ་མཁས་པ་དང ། རྣམ་པར་ཐར་པའི་སྒོའི་ཕྱིར་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་རྣམ་པའི་ཆོས་ཤེས་པ་དང ། གཟོད་མ་ནས་བྲལ་བ་མེད་པའི་ཕྱིར་ཆོས་ཐམས་ཅད་རང་བཞིན་གྱིས་ཞི་བ་དང ། རབ་ཏུ་ཞི་བ་དང ། ཉེ་བར་ཞི་བར་ཤེས་པ་དང ། མ་རིག་པ་ 430a ༄#། །དང ། གཏི་མུག་གི་མུན་པ་ཀུན་ཏུ་བཅོམ་པའི་ཕྱིར་ཆོས་ཐམས་ཅད་ལ་རབ་རིབ་མེད་ཅིང་སྣང་བ་ཐོབ་པ་དང ། ཆོས་ཐམས་ཅད་གར་ཡང་མི་འགྲོ་།གང་ནས་ཀྱང་མི་འོང་བར་ཤེས་པས་ཤེས་རབ་ཀྱི་འོད་དང་ལྡན་ཞིང་སེམས་ཅན་ཐམས་ཅད་ལ་རྣམ་པར་ཐར་པའི་ཆོས་སྟོན་པ་དང ། ལས་དང་བྱ་བ་ཁོང་དུ་ཆུད་པས་སེམས་ཅན་རྣམས་ཀྱི་འཆི་འཕོ་དང་འགྲོ་བར་སྐྱེ་བ་སྟོན་པ་དང ། དོན་དང ། ཆོས་དང ། ངེས་པའི་ཚིག་དང ། སྤོབས་པའི་ཚུལ་ལ་མཁས་ཏེ་ཁྱད་པར་དེ་ཁོ་ནའི་ལུང་སྟོན་པས་སོ་སོ་ཡང་དག་པར་རིག་པ་བཞི་ཐོབ་པ་དང ། བདག་དུལ་བ་དང ། ཞི་བ་དང ། གྲོལ་བ་དང ། སྦས་པ་དང ། བྱང་བས་ཡོངས་སུ་མྱ་ངན་ལས་བཟླ་བའི་ཕྱིར་དོན་ཡོད་པའི་ཆོས་སྟོན་པ་དང ། དམ་པའི་ཆོས་ཡོངས་སུ་འཛིན་པས་སངས་རྒྱས་བཅོམ་ལྡན་འདས་རྣམས་ཀྱིས་དེ་ཤེས་རབ་ལས་ངེས་པར་འབྱུང་བར་རིག་ནས་ཆོས་ཀྱི་གྲོང་ཁྱེར་ཐམས་ཅད་ཡོངས་སུ་སྐྱོང་བར་བྱིན་གྱིས་རློབ་པ་དང ། ཕྱིར་མི་ལྡོག་པའི་བྱང་ཆུབ་སེམས་དཔའི་ས་ལ་ཡང་དག་པར་གཞོལ་ཏེ་མཐའ་ལ་གནས་པའི་ཚུལ་ངེས་པར་བྱས་པས་ལུང་བསྟན་པའི་ས་རབ་ཏུ་ཐོབ་པ་ཡིན་ཏེ། མི་འམ་ཅིའི་བདག་པོ། །རྣམ་པ་སུམ་ཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཡིན་ནོ། །མི་འམ་ཅིའི་བདག་པོ། བྱང་ཆུབ་སེམས་ 430b དཔའ་རྣམ་པ་སུམ་ཅུ་རྩ་གཉིས་དང་ལྡན་ན། ཐབས་ལ་མཁས་པར་རིག་པར་བྱའོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་བདག་ཟད་པར་མི་བྱེད་པས་སེམས་ཅན་ལ་ལྟ་བ་དང ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་བསོད་ནམས་ཆེན་པོ་ལ་གནས་པ་དང ། སེམས་ཅན་ཐམས་ཅད་ཀྱི་སྦྱིན་གནས་ཀྱི་ཕྱིར་སྦྱིན་གནས་མི་ཚོལ་བ་དང ། སེམས་ཅན་དབུལ་པོ་ཡོངས་སུ་སྨིན་པར་བྱ་བའི་ཕྱིར་རྒྱ་ཆེན་པོ་དོན་དུ་མི་གཉེར་བ་དང ། སེམས་ཅན་ཐམས་ཅད་ངག་བསྡམ་པ་ལ་སྦྱར་བའི་ཕྱིར་ལྐུག་པ་དང ། དགེ་པ་ལྟ་བུར་སྟོན་པ་དང ། བུད་མེད་དང ། བུ་མོ་ཡོངས་སུ་སྨིན་པར་བྱ་བའི་ཕྱིར་བུད་མེད་ཡོངས་སུ་འཛིན་པ་དང ། ཁྱེའུ་ཡོངས་སུ་སྨིན་པར་བྱ་བའི་ཕྱིར་ཁྱེའུའི་གཟུགས་སུ་སྟོན་པ་དང ། སེམས་ཅན་ཡོངས་སུ་སྨིན་པར་བྱ་བ་དང་མཐུན་པར་བྱ་བའི་ཕྱིར་གཟུགས་ཐམས་ཅད་སྟོན་པ་དང ། སེམས་ཅན་མྱོས་པ་ཡོངས་སུ་སྨིན་པར་བྱ་བའི་ཕྱིར་མྱོས་པ་མ་ཡིན་ཡང་མྱོས་པའི་ལུས་སུ་སྟོན་པ་དང ། དེ་ལ་མོས་པའི་སེམས་ཅན་རྣམས་ལ་ཆོས་སྟོན་པའི་ཕྱིར་སྨྱོན་པ་དང ། སེམས་གཡེང་བའི་གཟུགས་སུ་སྟོན་པ་དང ། སེམས་ཅན་ཡོངས་སུ་སྨིན་པར་བྱ་བའི་ཕྱིར་ལོ་བརྒྱར་བསགས་པའི་ཚུལ་ཁྲིམས་ཀྱི་ཕུང་པོ་འདོར་བ་དང ། ཆོས་འཛིན་དུ་གཞུག་པའི་ཕྱིར་སེམས་ཅན་རྣམས་ལ་དགའ་བ་དང ། ཐམས་ཅད་ལ་རྩེ་བ་དང ། ལོངས་སྤྱོད་ 431a ༄#། །སྟོན་པ་དང ། དེ་ལ་མོས་པའི་སེམས་ཅན་ཡོངས་སུ་སྨིན་པར་བྱ་བའི་ཕྱིར་གཡོན་ཅན་མ་རུངས་པས་འཚོ་བའི་ལུས་སུ་སྟོན་པ་དང ། བུད་མེད་གང་ཚོང་དཔོན་དང ། ཁྱིམ་བདག་དང ། རྒྱལ་པོའི་ཆུང་མར་གྱུར་པ་བུ་མེད་པ་བུའི་ཚེ་འདོད་པའི་མྱ་ངན་གྱི་ཟུག་རྔུ་དང་ལྷན་ཞིང་སྡུག་བསྔལ་གྱི་ཚོར་བ་མྱོང་བ་ལ་དེ་ན་བྱང་ཆུབ་སེམས་དཔས་དེ་དག་དགེ་བ་ལ་དད་ཅིང་ཡོངས་སུ་སྨིན་པར་བྱ་བའི་ཕྱིར་དེའི་བུར་ཁས་ལེན་པ་དང ། འབྲོག་དགོན་པར་སོང་བའི་སེམས་ཅན་དབུལ་པོ་ལ་བཟའ་བ་དང ། བཏུང་བ་དང ། ནོར་སྦྱིན་ཞིང་བགོ་བཤའ་བྱ་བའི་ཕྱིར་མགྲོན་པོ་མང་པོའི་ནང་དུ་དེད་དབོན་དུ་འགྱུར་བ་དང ། གཏེར་ཆེན་པོ་མདུན་དུ་བཞག་སྟེ་ནོར་གྱི་ཕུང་པོ་ཆེན་པོ་བྱིན་ནས་ཆོས་སྟོན་པ་དང ། མྱ་ངན་གྱི་ཟུག་རྔུ་དང་ལྡན་པའི་སེམས་ཅན་རྣམས་ཀྱི་མྱ་ངན་གྱི་ཟུག་རྔུ་བསལ་ནས་རྫུ་འཕྲུལ་གྱིས་ཆོས་སྟོན་པ་དང ། གཏེར་སྟོན་པའི་སེམས་ཅན་རྣམས་ཀྱི་མདུན་དུ་གཏེར་ཆེན་པོ་ཉེ་བར་བསྟན་ནས་འཚོ་བ་ཡོངས་སུ་དག་པར་བྱ་བའི་ཕྱིར་ཆོས་སྟོན་པ་དང ། དེ་དག་སངས་རྒྱས་ཀྱི་བསྟན་པ་ལ་གཞུག་པའི་ཕྱིར་གཞན་མུ་སྟེགས་ཅན་སྤྱོད་པ་ཅན་དང ། ཀུན་ཏུ་རྒྱུ་བ་རྣམས་ཀྱི་ནང་དུ་རབ་ཏུ་འབྱུང་བ་དང ། སེམས་ཅན་འདོད་ཆགས་ཀྱི་ལྕགས་ཀྱུས་ཟིན་པ་རྣམས་ཡོངས་སུ་སྨིན་པར་བྱ་བའི་ཕྱིར་སྨད་ཚོད་པའི་ཁྱིམ་དང ། སླས་ཀྱི་ནང་དུ་བུ་ 431b མོའི་གཟུགས་མཛེས་པ་བལྟ་ན་སྡུག་པར་སྟོན་པ་དང ། སེམས་ཅན་རྣམས་མོས་པ་ཇི་ལྟ་བ་བཞིན་དུ་ཆོས་ཀྱིས་ཡོངས་སུ་སྨིན་པར་བྱ་བའི་ཕྱིར་འདུས་པ་ཆེན་པོ་དང ། ཚོགས་པ་མང་པོའི་ནང་དུ་རྔ་དང ། རྔ་མྲི་དང་ག་དང ། རྔ་པ་ན་བ་དང ། དུང་གི་སྒྲས་ས་ཆེན་པོ་མཛེས་པར་བྱས་ནས་བདག་ཉེ་བར་སྟོན་ཅིང་སེམས་ཅན་འདུས་པ་དེ་དག་ལ་རོལ་མོའི་དབྱིངས་སྒྲ་དེ་དག་ལས་ཆོས་སྟོན་པའི་སྒྲ་འབྱིན་ཅིང་བཟོའི་གནས་ཐམས་ཅད་ཉེ་བར་སྟོན་པ་དང ། མྱ་ངན་དུ་སོན་པའི་འགྲོན་པ་བཟའ་བ་དང ། བཏུང་བ་ཟད་པ་ལ་མངོན་པར་ཤེས་པ་ཆེན་པོས་རྣམ་པར་རྩེ་ཞིང་དེའི་སྟོབས་ཀྱིས་བཟའ་བ་དང ། བཏུང་བ་བྱིན་ནས་བཀྲེས་པ་དང་བྲལ་ཞིང་སྐོམ་པ་དང་བྲལ་བའི་སེམས་ཅན་རྣམས་ལ་ཆོས་སྟོན་པ་དང ། སེམས་ཅན་གང་དག་དམུས་ལོང་དུ་གྱུར་པ་དེ་དག་གི་ནང་དུ་དམུས་ལོང་ལྟ་བུར་གྱུར་ནས་དབུལ་པོ་མིག་མེད་པ་དེ་དག་ལ་རྫུ་འཕྲུལ་གྱི་སྟོབས་ཀྱིས་བཟའ་བ་དང ། བཏུང་བ་འབྱོར་བར་བྱས་ནས་མིག་བྱིན་ཏེ་ནང་གི་གཟུགས་བསྟན་ནས་ཇི་ལྟར་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་དེ་ལྟར་ཆོས་སྟོན་པ་དང ། རྒྱལ་པོའི་ཁྲི་མོན་དུ་བཅུག་པའི་སྲོག་ཆགས་བརྒྱ་ཕྲག་དུ་མ་གཡོན་ཅན་སྣ་ཚོགས་དང་ལྡན་པ་དེ་དག་ཡོངས་སུ་སྨིན་པར་བྱ་བའི་ཕྱིར་བསམ་བཞིན་དུ་བདག་རྐུན་པོར་སྟོན་ཅིང་དེ་གཡོན་ཅན་ནོ། །ཞེས་ཤེས་པར་བྱས་ནས་ཁྲི་མོན་དུ་བཅུག་ 432a ༄#། །པ་དང ། དེ་དེར་ཞུགས་ནས་རྫུ་འཕྲུལ་གྱི་སྟོབས་ཀྱིས་བཅིངས་པ་དེ་དག་གི་ལུས་བཀྲུས་ཤིང་བསྐུས་ཏེ་གོས་བཟང་པོ་བསྐོན་ནས་བཟའ་བ་དང ། བཏུང་བས་ལུས་ཚིམ་པར་བྱས་ཏེ་བཅིངས་པ་དམ་པོ་དེ་དག་ལས་བཀྲོལ་ནས་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་བུར་ཆོས་སྟོན་པ་དང ། སེམས་ཅན་གང་དག་རྒྱལ་པོས་གསད་པར་དཀྲི་བ། སྲོག་འཆི་བའི་འཇིགས་པ་ཐོབ་པ། སྡུག་བསྔལ་གྱིས་ཉམ་ཐག་པ་དེ་དག་ཡོངས་སུ་སྨིན་པར་བྱ་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོས་རྫུ་འཕྲུལ་གྱིས་གཞན་དག་ཅིག་སྤྲུལ་ཏེ་རྫུ་འཕྲུལ་གྱིས་གཤེད་མ་ལ་དཀྲིས་ནས་གསད་པར་འོས་པའི་མི་དེ་དག་བཅིངས་པ་དེ་ལས་བཀྲོལ་ཏེ་འཇིགས་པ་དང་བྲལ་བ་སྲོག་རྙེད་པ་དང ། དབུགས་ཕྱིན་པ་དེ་དག་ལ་ཇི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་དེ་ལྟ་དེ་ལྟ་བུར་ཆོས་སྟོན་པ་དང ། ཕྱོགས་གང་ན་དོན་དང ། ནོར་དང ། ཞིང་དང ། ཁྱིམ་གྱི་དངོས་པོ་དང ། བྲན་ཕོ་དང ། བྲན་མོ་དང ། ལས་བྱེད་པ་དང ། དམག་མིའི་ཕྱིར་འཐབ་པ་དང ། རྩོད་པ་དང ། འགྱེད་པ་དང ། མཚང་འདྲུ་བར་གྱུར་པ་དེར་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ཀྱིས་དབུས་སུ་འདུག་ནས་རྫུ་འཕྲུལ་གྱིས་དོན་དང ། ནོར་དང ། རིན་པོ་ཆེ་ཡོངས་ 432b སུ་བཏང་སྟེ་དེ་དག་འདུམ་པར་སྦྱོར་རོ། །དེ་དག་འདུམ་པར་རིག་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་འཇུག་པ་དང ། བྱང་ཆུབ་སེམས་དཔའ་ཐབས་ལ་མཁས་པས་ཡན་ལག་དང ། ཉིང་ལག་ཐམས་ཅད་ཀྱིས་དབང་པོ་ཉམས་པ་མེད་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་དབང་པོ་ཉམས་པར་ཡང་སྟོན་པ་དང ། སྤྱོད་ལམ་ཕུན་སུམ་ཚོགས་ཀྱང་སེམས་ཅན་ཡོངས་སུ་སྨིན་པར་བྱ་བའི་ཕྱིར་སྤྱོད་ལམ་ཐམས་ཅད་འཁྲུགས་པར་ཡང་བྱེད་པ་དང ། བྱང་ཆུབ་སེམས་དཔའ་ཐབས་ལ་མཁས་པས་གཞན་མུ་སྟེགས་ཅན་སྟོན་པ་དང ། རིང་དུ་གནས་པ་བདུད་ཀྱི་སྤྱོད་ཡུལ་ལ་སྤྱོད་པ། བདུད་ཀྱིས་བྱིན་གྱིས་བརླབས་པའི་མུ་སྟེགས་ཅན་དེ་དག་སངས་རྒྱས་ཀྱི་བསྟན་པ་ལ་དགུག་པའི་ཕྱིར་དེ་དག་གི་མདུན་དུ་དཀོན་མཆོག་གསུམ་གྱི་བསྔགས་པ་བརྗོད་པ་དང ། བྱང་ཆུབ་སེམས་དཔའ་ཐབས་ལ་མཁས་པས་སེམས་ཅན་ཡོངས་སུ་སྨིན་པར་བྱ་བའི་ཕྱིར་བསམ་གཏན་དང ། རྣམ་པར་ཐར་པ་དང ། ཏིང་ངེ་འཛིན་དང ། སྙོམས་པར་འཇུག་པ་རྣམས་ལས་ལོག་ནས་བསམ་བཞིན་དུ་འདོད་པའི་ཁམས་སུ་སྐྱེ་སྟེ། མྱ་ངན་ལས་འདས་པ་འདོད་པ་རྣམས་ལ་སྐྱེ་བའི་སྡུག་བསྔལ་བསྟན་ནས་དབེན་པ་ཐོབ་པ་རྣམས་བླ་མའི་ལམ་སྒོམ་དུ་གཟུད་པའི་ཕྱིར་མྱ་ངན་ལས་འདས་པ་སྟོན་པ་དང ། སྐྱོན་མེད་པ་ལ་མ་ཞུགས་པ་ལ་མྱ་ངན་ལས་འདས་ 433a ༄#། །པར་འགྲོ་བར་འདུན་པ་རྣམས་ཀྱི་མདུན་དུ་བྱང་ཆུབ་སེམས་དཔའ་ཐབས་ལ་མཁས་པ་སངས་རྒྱས་ཀྱི་སྐུ་སྟོན་པ་དང ། སངས་རྒྱས་ལ་དད་པ་ཐོབ་ཅིང ། སེམས་མཉམ་པར་བཞག་པ་རྣམས་བྱང་ཆུབ་ཀྱི་སེམས་ལེན་དུ་གཟུད་པའི་ཕྱིར་རྐྱེན་འདི་ཤེས་པ་ལ་འཇུག་པ་ཉེ་བར་སྟོན་པ་སྟེ། མི་འམ་ཅིའི་བདག་པོ། རྣམ་པ་སུམ་ཅུ་རྩ་གཉིས་པོ་འདི་དག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་ཐབས་ལ་མཁས་པར་རིག་པར་བྱའོ། །ཕ་རོལ་ཏུ་ཕྱིན་པ་དང ། ཐབས་ལ་མཁས་པ་ལ་འཇུག་པ་ཡོངས་སུ་དག་པའི་ལེའུ་འདི་བསྟན་པ་ན་མི་འམ་ཅིའི་རྒྱལ་པོ་སྡོང་པོའི་འཁོར་དང ། དེ་མ་ཡིན་པ་གཞན་ལྷ་དང ། ཀླུ་དང ། གནོད་སྦྱིན་དང ། དྲི་ཟའི་སྲོག་ཆགས་དགུ་ཁྲི་བརྒྱད་སྟོང་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བཅོམ་ལྡན་འདས་ཀྱི་འཁོར་བྱང་ཆུབ་སེམས་དཔའ་ལས་བྱང་ཆུབ་སེམས་དཔའ་ཁྲི་བརྒྱད་སྟོང་ནི། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །མི་འམ་ཅིའི་རྒྱལ་པོ་སྡོང་པོ་ནི། ཤེས་རབ་སྒྲོན་མ་ཞེས་བྱ་བའི་ཏིང་ངེ་འཛིན་རབ་ཏུ་ཐོབ་པར་གྱུར་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོ་བཅོམ་ལྡན་འདས་ཀྱིས་ཆོས་ཀྱི་གཏམ་གྱིས་རབ་ཏུ་དགའ་བར་བྱས། ཡང་དག་པར་འཛིན་དུ་བཙུད། གཟེངས་བསྟོད། ཡང་དག་པར་བསྟན་པས་ཚིམ་ཞིང་མགུ་ལ་ཡིད་རངས་ཤིང་རབ་ཏུ་དགའ་སྟེ་དགའ་བ་དང ། 433b ཡིད་བདེ་བ་སྐྱེས་ནས་རིན་ཐང་མེད་པའི་རས་བཅོས་མ་ཕྲུགས་གཅིག་བཅོམ་ལྡན་འདས་ལ་མངོན་པར་བཀབ་བོ། །བྱང་ཆུབ་སེམས་དཔའི་དགེ་འདུན་དང ། ཉན་ཐོས་ཀྱི་དགེ་འདུན་ཐམས་ཅད་ལའང་རིན་ཐང་མེད་པའི་གོས་ཀྱིས་སོ་སོར་བཀབ་བོད། །གནས་ཐམས་ཅད་ནི། ཡོངས་སུ་ལོངས་སྤྱོད་པའི་ཕྱིར་བཅོམ་ལྡན་འདས་ལ་ཕུལ་ལོ། །དེ་ནས་མི་འམ་ཅིའི་རྒྱལ་པོ་སྡོང་པོའི་བུ་བརྒྱད་སྟོང་པོས་རིན་པོ་ཆེའི་པདྨ་བཀོད་པ་དང ། རིན་པོ་ཆེའི་གདུགས་བརྒྱད་སྟོང་དུ་ཚང་བས་བཅོམ་ལྡན་འདས་ལ་མངོན་པར་བཀབ་སྟེ་གཏོར་མ་ཐག་ཏུ་སངས་རྒྱས་ཀྱི་མཐུས་དེ་དག་ཐམས་ཅད་འཁོར་གྱི་ཁྱམས་དེར་བཅོམ་ལྡན་འདས་ཀྱི་དབུའི་དྲང་ཐད་ཀྱི་སྟེང་གི་བར་སྣང་ལ་དཔག་ཚད་སྟོང་ཙམ་ན་རིན་པོ་ཆེའི་གདུགས་གཅིག་ཏུ་གནས་པར་གྱུར་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོའི་བུ་བརྒྱད་སྟོང་པོས་བཅོམ་ལྡན་འདས་ཀྱི་ཆོ་འཕྲུལ་ཆེན་པོ་འདི་མཐོང་ནས་ཚིམ་ཞིང་མགུ་ལ་ཡིད་རངས་ཤིང་རབ་ཏུ་དགའ་སྟེ་དགའ་བ་དང ། ཡིད་བདེ་བ་སྐྱེས་ནས་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་དག་གིས་བྱང་ཆུབ་ཏུ་སེམས་བསྐྱེད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གང་ཐོས་པས་བདག་ཅག་བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་སྒྲུབ་པར་འགྱུར་བ་བྱང་ཆུབ་ཏུ་ཡོངས་སུ་སྨིན་པར་བགྱིད་པའི་ཆོས་དེ་བཞིན་གཤེགས་པ་དགྲ་ 434a ༄#། །བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བདག་ཅག་ལ་བཤད་དུ་གསོལ། དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོའི་བུ་དེ་དག་གི་ལྷག་པའི་བསམ་པ་མཁྱེན་ནས་ཏ་ལ་བདུན་སྲིད་ཀྱི་སྟེང་གི་བར་སྣང་ལ་སྐྱིལ་མོ་ཀྲུང་བཅས་ཏེ་བཞུགས་ནས་སྐུ་ལས་འདི་ལྟ་བུའི་འོད་ཕྱུང་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྣང་བ་ཆེན་པོས་ཁྱབ་པར་གྱུར་ཏོ། །གང་མི་འམ་ཅི་དང ། དྲི་ཟ་དང ། ལྟོ་འཕྱེ་དེ་དག་དང ། འདོད་པ་ན་སྤྱོད་པའི་ལྷའི་བུ་དེ་དག་གི་རོལ་མོ་སིལ་སྙན་རྣམ་པ་སྣ་ཚོགས་དེ་དག་ཐམས་ཅད་མ་བརྡུངས་མ་དཀྲོལ་བར་མཛེས་པ་དང་ལྡན་པར་འཁྲོལ་ལོ། །རིའི་རྒྱལ་པོ་སྤོས་ཀྱི་ངད་ལྡང་ན་དྲིའི་ཤིང་དང ། མེ་ཏོག་གི་ཤིང་དང ། འབྲས་བུའི་ཤིང་ཇི་སྙེད་པ་དེ་དག་ལས་ཀྱང་རོལ་མོ་སིལ་སྙན་གྱི་སྒྲ་བྱུང་ངོ ། །བཅོམ་ལྡན་འདས་ཀྱི་སྤུའི་ཁུང་བུ་ཐམས་ཅད་ནས་ཀྱང་འོད་ཟེར་བྱེ་བ་ཁྲག་ཁྲིག་བརྒྱད་སྟོང་བྱུང་ངོ ། །འོད་ཟེར་ཐམས་ཅད་ཀྱི་རྩེ་མོ་ལས་ཀྱང་པདྨ་ཚད་ཤིང་རྟའི་འཁོར་ལོ་ཙམ་དག་བྱུང་ངོ ། །པདྨའི་སྙིང་པོ་ཐམས་ཅད་ལའང་བྱང་ཆུབ་སེམས་དཔའི་གཟུགས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཀུན་ཏུ་བརྒྱན་པའི་ལུས་དག་གནས་པར་ཀུན་ཏུ་སྣང་ངོ ། །སངས་རྒྱས་ཀྱི་མཐུས་རོལ་མོ་སིལ་སྙན་དེ་དག་ལས་ནི། ཡོངས་སུ་ 434b འདྲི་བའི་ཚིགས་སུ་བཅད་པ་བྱུང ། བྱང་ཆུབ་སེམས་དཔའ་དེ་དག་ཐམས་ཅད་ནི། སྒྲ་དབྱངས་དང ། སྐད་ཅིག་གི་ཚིགས་སུ་བཅད་ནས་ངེས་པར་ལན་འདེབས་སོ། །དེ་ལ་སིལ་སྙན་ལས་ཚིགས་སུ་བཅད་པ། བླ་ན་མེད་པའི་བྱང་ཆུབ་སེམས། །ཇི་ལྟ་བུར་ནི་བསྐྱེད་པ་དང ། །བྱང་ཆུབ་སྙིང་པོར་འདུག་བར་དུ། །སེམས་ནི་བརྗེད་པ་མེད་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། སེམས་ཅན་ཀུན་གྱི་ཆོད་ཀྱི་ཕྱིར། །ལྷག་པའི་བསམ་པ་ཕུན་སུམ་ཚོགས། །སྙིང་རྗེ་ཚེ་དང་ལྡན་པ་ནི། །བྱང་ཆུབ་སེམས་བརྗེད་མི་འགྱུར་རོ། །སིལ་སྙན་རྣམས་ཀྱིས་སྨྲས་པ། དེ་དག་བསམ་པ་ཇི་ལྟ་བུ། །རབ་ཏུ་འབྱོར་པ་ཅི་འདྲ་ཞིག་།དེ་དག་སྙིང་རྗེ་ཆེན་པོ་ལ། །ངེས་པར་སེམས་པ་ཇི་ལྟར་སྐྱེ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ།་གཡོ་མེད་ལྷག་པའི་བསམ་པ་སྟེ། །དེ་དག་སྦྱོར་བ་བཅོས་མ་མིན། །མྱ་ངན་འདའ་སྒོར་འཇོག་པ་ནི། །དེ་དག་སྙིང་རྗེ་དེ་འདྲའོ། །སིལ་སྙན་རྣམས་ཀྱིས་སྨྲས་པ། དེ་དག་གཏོང་བ་ཇི་ལྟ་བུ། །ཇི་ལྟར་བྱིན་ནས་འགྱོད་མེད་ཅིང ། །རྣམ་སྨིན་དོན་དུ་མི་གཉེར་བར། །བྱང་ཆུབ་ཏུ་ནི་བསྔོ་བར་བྱེད། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། དངོས་པོ་ཀུན་ལ་མི་ལྟ་བ། །དེས་ནི་བྱིན་ནས་འགྱོད་པ་མེད། །བྱང་ཆུབ་ལམ་དུ་འཇོག་བྱེད་པ། །དེ་ཕྱིར་རྣམ་སྨིན་རེ་བ་མེད། །སིལ་སྙན་རྣམས་ཀྱིས་སྨྲས་པ། ཇི་ལྟར་ཚུལ་ཁྲིམས་ལྡན་གྱུར་ཀྱང ། ། 435a ༄#། །ཚུལ་ཁྲིམས་ཀྱིས་ནི་རློམ་སེམས་མེད། །ཐེག་ཆེན་བླ་ན་མེད་པ་ལ། །ངང་ཚུལ་ངན་ཅན་སྨིན་པར་བྱིན། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ།་བྱང་ཆུབ་སེམས་ཀྱི་ཚུལ་ཁྲིམས་ལྡན། །སྟོང་པ་ཉིད་ཀྱི་རློམ་སེམས་མེད། །བྱམས་པ་ཆེན་པོ་སྐྱེད་པ་ནི། །ངང་ཚུལ་ངན་ཅན་ཡོངས་སྨིན་བྱེད། །སིལ་སྙན་རྣམས་ཀྱིས་སྨྲས་པ།་ཇི་ལྟར་ན་ནི་སེམས་ཅན་གྱི། །སྤྱོད་ཤིང་བསྡིགས་པ་བཟོད་བྱེད་ཅིང ། །སེམས་ཀྱི་གནོད་པ་མི་བྱེད་ལ། །མཆོག་ཏུ་དགའ་བ་སྐྱེ་བར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། བདག་ནི་སེམས་ཅན་ཐམས་ཅད་ཀྱི། །ཉོན་མོངས་གསོ་བའི་སྨན་པ་སྙམ། །དེ་དག་ངན་པར་སྨྲས་པ་ཡི། །ཚིག་ཐོས་ཞེ་སྡང་མི་འགྱུར་རོ། །སིལ་སྙན་རྣམས་ཀྱིས་སྨྲས་པ། དེ་དག་བརྩོན་འགྲུས་ཇི་ལྟ་བུ། །ཕ་རོལ་གནོན་པའང་ཅི་འདྲ་ཞིག་།ཇི་ལྟར་ཞུམ་པ་མེད་སེམས་ཀྱི། །བྱང་ཆུབ་སྤྱད་པ་སྤྱོད་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ཆོས་དང་སེམས་ཅན་སྲུང་བ་ནི། །ཕ་རོལ་གནོན་དང་བརྩོན་འགྲུས་སོ། །དགེ་བའི་རྩ་བས་བརྟན་པ་ནི། །དེས་ན་སེམས་ནི་ཞུམ་མི་འགྱུར། །སིལ་སྙན་རྣམས་ཀྱིས་སྨྲས་པ། དེ་དག་ཇི་ལྟར་དྲན་དང་ལྡན། །བློ་གྲོས་རྟོགས་པར་ཁོང་དུ་ཆུད། །ཇི་ལྟར་བསམ་གཏན་བསམ་གཏན་བྱེད། །དེ་ལ་ཆགས་པ་མེད་པར་འགྱུར། །བྱང་ཆུབ་ 435b སེམས་དཔའི་གཟུགས་རྣམས་ཀྱིས་སྨྲས་པ། གཡེང་བ་མེད་པ་དྲན་དང་ལྡན། །ཚུལ་འཆོས་མེད་པ་བློ་གྲོས་ལྡན། །ཐབས་ཀྱིས་བསམ་གཏན་བསམ་གཏན་བྱེད། །དེས་ན་དེ་ལ་ཆགས་མི་འགྱུར། །སིལ་སྙན་རྣམས་ཀྱིས་སྨྲས་པ། ཇི་ལྟར་ཤེས་རབ་ལྡན་པ་དང ། །ཡང་དག་ལྟ་བ་དྲང་པོ་དང ། །ཆོས་རྣམས་རྣམ་པར་དབྱེ་བ་ལ། །མཁས་ཤིང་འཇིགས་པ་མེད་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ཐོས་པས་ཤེས་རབ་ཀུན་ཏུ་འཕེལ། །རྟེན་པས་ལྟ་བ་དྲང་པོར་འགྱུར། །ཆོས་ཀྱི་སྦྱིན་པས་ངེས་འགྱུར་ཏེ། །ཚུལ་བཞིན་གྱིས་ནི་དོན་རྟོགས་འགྱུར། །སིལ་སྙན་རྣམས་ཀྱིས་སྨྲས་པ། ཇི་ལྟར་ཐོས་པ་བཙལ་བས་ན། །དེ་དག་ཐོས་པ་མང་དུ་འགྱུར། །གང་གིས་ཆེ་བའི་བདག་འགྱུར་བར། །ཐོས་པའི་ཆོས་རྣམས་སྟོན་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། །གུས་པར་བྱས་ཏེ་ཐོས་ཚུལ་ཞིང ། །སྒྲུབ་པའི་ཐོས་པ་མང་དུ་འགྱུར། །ཟང་ཟིང་མེད་པར་ཆོས་སྦྱིན་པ། །དེས་ནི་ཆེ་བའི་བདག་ཉིད་འགྱུར། །སིལ་སྙན་རྣམས་ཀྱིས་སྨྲས་པ། དེ་དག་བྱམས་པ་ཇི་ལྟ་བུ། །དེ་དག་སྙིང་རྗེ་ཅི་འདྲ་ཞིག་།དེ་དག་དགའ་བ་ཇི་ལྟ་བུ། །བཏང་སྙོམས་ཀྱང་ནི་ཅི་འདྲ་ཞིག་།བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། སེམས་དང་བསམ་སྙོམས་བྱམས་པ་ཞིག་།སེམས་ཅན་འགྲོལ་བ་སྙིང་རྗེའོ། །སངས་རྒྱས་ཆོས་དགའ་དགའ་བ་སྟེ། །གཉིས་སྤངས་པ་ནི་བཏང་སྙོམས་སོ། ། 436a ༄#། །སིལ་སྙན་རྣམས་ཀྱིས་སྨྲས་པ། ཇི་ལྟར་སངས་རྒྱས་མཐོང་བར་འགྱུར། །སེམས་ཀྱང་ཇི་ལྟར་མཐོང་བར་འགྱུར། །ཆོས་ཐོས་ནས་ནི་ཇི་ལྟ་བུར། །དེ་དག་ཐེ་ཚོམ་སྐྱེ་མི་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། སངས་རྒྱས་རྗེས་སུ་དྲན་བསྒོམས་པ། །དེས་ནི་འདྲེན་པ་མཐོང་བར་འགྱུར། །ཐེ་ཚོམ་མེད་ཅིང་བསམ་དག་པས། །ཆོས་ཐོས་ནས་ནི་སོམ་ཉི་མེད། །སིལ་སྙན་རྣམས་ཀྱིས་སྨྲས་པ། བསོད་ནམས་ཚོགས་ནི་ཇི་ལྟ་བུ། །ཡེ་ཤེས་ཚོགས་ཀྱང་ཅི་འདྲ་ཞིག་།དེ་དག་ཞི་གནས་ལྷག་མཐོང་ལ། །བརྩོན་པ་ཡང་ནི་ཇི་ལྟ་བུ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ངོམས་མི་ཤེས་པ་བསོད་ནམས་ཚོགས། །འདྲི་བ་རྣམས་ནི་ཡེ་ཤེས་ཚོགས། །ཞི་བའི་སེམས་ནི་ཞི་གནས་ཏེ། །ཆོས་ཤེས་པ་ནི་ལྷག་མཐོང་ངོ ། །སིལ་སྙན་རྣམས་ཀྱིས་སྨྲས་པ། དེ་དག་གི་ནི་སྤྱོད་ཡུལ་གང ། །དེ་དག་གནས་ཀྱང་ཇི་ལྟ་བུ། །དེ་དག་གནས་པ་ཅི་འདྲ་ཞིག་།དེ་དག་སྦྱོར་བའང་ཇི་ལྟ་བུ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། དེ་དག་སྤྱོད་ཡུལ་སྟོང་པ་ཉིད། །གནས་ནི་ཕ་རོལ་ཕྱིན་པའི་ལམ། །གནས་པ་བསམ་གཏན་བཞི་རྣམས་ཏེ། །སེམས་ཅན་རབ་གྲོལ་སྦྱོར་པའོ། །སིལ་སྙན་རྣམས་ཀྱིས་སྨྲས་པ། དེ་དག་བདུད་ཀྱི་ལས་གང་ཡིན། །སངས་རྒྱས་འཕྲིན་ལས་ཇི་ལྟ་བུ། །ཅི་འདྲ་བ་ཡི་ལས་བྱས་ན། །བྱང་ཆུབ་ལ་ནི་གཞོལ་བར་འགྱུར། ། 436b བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ཐེག་པ་ཆུང་ངུ་བདུད་ཀྱི་ལས། །སངས་རྒྱས་འཕྲིན་ལས་ཐེག་པ་ཆེ། །སྡིག་པ་ཐམས་ཅད་སྤོང་བ་ནི། །བྱང་ཆུབ་གཞོལ་བར་འགྱུར་བའོ། ། སིལ་སྙན་རྣམས་ཀྱིས་སྨྲས་པ། དེ་དག་གྲོགས་བསྟེན་ཇི་ལྟ་བུ། །སྡིག་པའི་གྲོགས་པོ་ཅི་འདྲ་ཞིག་།ལོག་པར་ལྟ་བ་མི་གནས་ཤིང ། །དེ་ལྟར་ཡང་དག་སོང་བར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། གང་ཞིག་བྱང་ཆུབ་ལམ་སྟོན་པ། །རྟག་ཏུ་བདེ་སྦྱིན་གྲོགས་པོའོ། །བྱང་ཆུབ་སེམས་ལས་གང་ཟློག་པ། །དེ་དག་སྡིག་པའི་གྲོགས་པོར་ཤེས། །སིལ་སྙན་རྣམས་ཀྱིས་སྨྲས་པ། ལམ་དུ་འཇུག་པར་འགྱུར་བ་ཡི། །ལྟ་བ་དྲང་པོ་ཇི་ལྟ་བུ། །སྦྱོར་བ་རྣམས་པར་ཤེས་ནས་སུ། །ཇི་ལྟར་ལྟ་དེ་འཇིག་མི་བྱེད། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ།་ལས་དང་བྱ་བར་འཇུག་པ་ནི། །དེ་དག་དྲང་པོར་ལྟ་བ་ཡིན། །ལོག་པར་སྦྱོར་བ་རྣམ་ཤེས་ནས། །ལྟ་བ་དེ་དག་འཇིག་མི་བྱེད། །སིལ་སྙན་རྣམས་ཀྱིས་སྨྲས་པ། ཇི་ལྟར་དམ་པའི་ཆོས་སྲུང་ཞིང ། །སེམས་ཅན་ཡོངས་སུ་སྨིན་པར་བྱེད། །ཇི་ལྟ་བུ་ཡི་ཐབས་ཀྱིས་ནི། །དེ་དག་བྱང་ཆུབ་སྒྲུབ་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། བརྩོན་འགྲུས་ཀྱིས་ནི་ཆོས་སྲུང་སྟེ། །བསྡུ་བས་ཡོངས་སུ་སྨིན་པར་བྱེད། །མཐའ་གཉིས་རྣམ་པར་སྤངས་པས་ནི། །བྱང་ཆུབ་སྒྲུབ་པར་བྱེད་པ་ཡིན། །སིལ་སྙན་རྣམས་ཀྱིས་སྨྲས་པ། དེ་དག་ཤེས་པའི་ལས་ 437a ༄#། །ཅི་འདྲ། །ང་རྒྱལ་ལས་ནི་ཇི་ལྟ་བུ། །ཇི་ལྟར་བཀའ་བློ་བདེ་བ་དང ། །ཐམས་ཅད་དུས་སུ་མཐུན་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ་རྩོད་པ་མེད་པའི་ཤེས་པའི་ལས། །ང་རྒྱལ་ལས་ནི་རྩོད་པ་འབྱུང ། །ངེས་པར་བཀའ་བློ་བདེ་བ་སྟེ། །གུས་པ་ཡིས་ནི་མཐུན་པར་འགྱུར། །སིལ་སྙན་རྣམས་ཀྱིས་སྨྲས་པ། དེ་དག་ལམ་ནི་ཇི་ལྟ་བུ། །ལོག་པའི་ལམ་ཡང་ཅི་འདྲ་ཞིག་།བླ་མེད་བྱང་ཆུབ་ལམ་དུ་ནི། །ཇི་ལྟར་སེམས་ཅན་རབ་ཏུ་འགོད། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ལམ་ནི་ཕ་རོལ་ཕྱིན་པ་དྲུག་།ཐེག་པ་ཆུང་ངུ་ལོག་པའི་ལམ། །ཤེས་རབ་ཐབས་ལ་བསླབ་པ་ནི། །སེམས་ཅན་ལམ་ལ་འཛུད་པའོ། །སིལ་སྙན་རྣམས་ཀྱིས་སྨྲས་པ། ཇི་ལྟར་བུར་ན་ནོར་ཆེན་འགྱུར། ། དེ་དག་རྙེད་པའང་ཅི་འདྲ་ཞིག་།གཏེར་རྣམས་ཀྱང་ནི་ཇི་ལྟ་བུ། །གང་གིས་དེ་དག་འགྲོ་ཚིམ་བྱེད། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ནོར་བདུན་དང་ནི་རྟག་ཏུ་ལྡན། །ཆོས་རྙེད་པ་ནི་རྙེད་པའོ། །དེ་དག་གཏེར་ནི་གཟུགས་ཡིན་ཏེ། །རབ་ཏུ་རྙེད་ནས་ཚིམ་པར་བྱེད། །སིལ་སྙན་རྣམས་ཀྱིས་སྨྲས་པ། དེ་དག་གི་ནི་ཕ་མ་གང ། །ཉེ་དུའི་ཚོགས་ནི་ཇི་ལྟ་བུ། །གཡོག་རྣམས་ཀྱང་ནི་ཅི་འདྲ་ཞིག་།གང་གིས་མཁས་པ་དེ་དག་མཛེས། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། མ་ནི་ཤེས་རབ་ཕ་ནི་ཐབས། །ཉེ་དུ་བྱང་ 437b ཆུབ་ཕྱོགས་རྣམས་ཡིན། །དགེ་བ་རྣམས་ནི་གཡོག་ཡིན་ཏེ། །དེས་ནི་མཁས་པ་དེ་དག་མཛེས། །སིལ་སྙན་རྣམས་ཀྱིས་སྨྲས་པ། ཇི་ལྟར་བདག་མེད་རྟོགས་ནས་ནི། །བྱམས་པས་འགྲོ་བ་ཁྱབ་པར་བྱེད། །བདག་མེད་པ་དང་བྱམས་པ་དག་།དེ་ལ་ཇི་ལྟར་མཚུངས་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། གང་དག་སྟོང་ཉིད་རབ་ཤེས་པ། །དེ་ནི་བདག་མེད་ཁོང་དུ་ཆུད། །གང་གིས་འགྲོ་བ་སྟོང་ཤེས་པ། །དེ་ནི་དེ་ཡི་བྱམས་པ་མཆོག་།སིལ་སྙན་རྣམས་ཀྱིས་སྨྲས་པ། འདུ་བྱེད་རྣམས་ནི་རང་བཞིན་གྱིས། །འོང་བ་མེད་ཅིང་འགྲོ་མེད་ན། །ལས་དང་ལས་ཀྱི་རྣམ་པར་སྨིན། །ཇི་ལྟ་བུར་ན་འཐད་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། དམ་པའི་དོན་དུ་འོང་མེད་དེ། །གང་དུའང་འགྲོ་བ་ཡོད་མ་ཡིན། །ཀུན་རྫོབ་ཏུ་ནི་ལམ་འཇུག་ཅིང ། །རྣམ་པར་སྨིན་པ་ཉེ་བར་སྟོན། །སིལ་སྙན་རྣམས་ཀྱིས་སྨྲས་པ། སྟོང་ཉིད་མཚན་མ་མེད་པ་དང ། །སྨོན་ལམ་རྣམ་པར་སྤངས་པར་ནི། །མཚན་ཉིད་གཅིག་ཏུ་རབ་རྟོགས་ནས། །དེ་ཁོ་ན་ནི་ཇི་ལྟར་ཤེས། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། སྟོང་ཉིད་གང་ཡིན་དེ་མཚན་མེད། །མཚན་མ་དོན་དུ་གཉེར་མེད་པ། །མཚན་ཉིད་གཅིག་ཅིང་དོན་གཅིག་སྟེ། །རྣམ་པར་ཐར་པའི་སྒོ་བསྟན་ཏོ། །སིལ་སྙན་རྣམས་ཀྱིས་སྨྲས་པ། གང་གིས་མྱ་ངན་འདས་འགྲོ་བའི། །སྟོང་པར་རྟོག་པ་ཇི་ལྟ་བུ། །སེམས་ཅན་ལྟ་བ་ཇི་ལྟ་ 438a ༄#། །བུ། །ཡོངས་སུ་སྨིན་བྱེད་ཇི་ལྟ་བུ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། ཤེས་རབ་ཀྱིས་ནི་སྟོང་པར་རྟོག་།ཐབས་ཀྱིས་སེམས་ཅན་རྣམས་ལ་ལྟ། །སྙིང་རྗེས་ཡོངས་སུ་སྨིན་པར་བྱེད། །དེས་ནི་མྱ་ངན་འདས་པར་འགྲོ་།སིལ་སྙན་རྣམས་ཀྱིས་སྨྲས་པ། ཆོས་འདི་དག་ནི་ཆོས་ཉིད་ཀྱིས། །སྐྱེ་བ་མེད་ཅིང་འབྱུང་མེད་པར།། ཚུལ་མཆོག་འདི་འདྲ་ཤེས་ནས་ནི། །གང་གིས་འཁོར་བར་སྐྱེ་བར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། མི་སྐྱེ་བ་དང་མི་འགྱུར་བ། །དེ་ནི་ཤེས་རབ་སྤྱོད་ཡུལ་ལོ། །བསམ་བཞིན་དུ་ནི་གང་སྐྱེ་བ། །དེ་ནི་ཐབས་ཀྱི་ཚུལ་ཡིན་ནོ། །སིལ་སྙན་རྣམས་ཀྱིས་སྨྲས་པ། གཏོང་ལ་དགའ་བར་ཇི་ལྟར་འགྱུར། །ཇི་ལྟ་བུར་ནི་ཕྱིར་མི་ལྡོག་།ཇི་ལྟར་བཟོད་པ་ཕུན་སུམ་ཚོགས། །ཇི་ལྟར་རྣམ་པར་ངེས་པར་འགྱུར། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། མཉམ་པར་གནས་པར་གཏོང་ལ་དགའ། །ཆོས་ཀྱི་དབྱིངས་ལས་ཕྱིར་མི་ལྡོག་།མི་སྐྱེ་བ་ལ་བཟོད་པ་སྟེ། །ཆོས་ཤེས་ནས་ནི་རྣམ་པར་ངེས། །སིལ་སྙན་རྣམས་ཀྱིས་སྨྲས་པ། བྱང་ཆུབ་སྙིང་པོ་སྙིང་པོ་གང ། །རྫོགས་པའི་བྱང་ཆུབ་མཚན་ཉིད་གང ། །ཅི་ཕྱིར་རྫོགས་སངས་རྒྱས་ཞེས་བྱ། །དེ་བཞིན་གཤེགས་པ་ཇི་ལྟར་གྲོལ། །བྱང་ཆུབ་སེམས་དཔའི་གཟུགས་རྣམས་ཀྱིས་སྨྲས་པ། བྱང་ཆུབ་སྙིང་པོ་ནམ་མཁའ་སྟེ། ། 438b བྱང་ཆུབ་ནམ་མཁའི་མཚན་ཉིད་དོ། །གང་ཡང་ཀུན་ནས་གཏི་མུག་མེད། །དེ་བཞིན་ཉིད་ཕྱིར་དེ་བཞིན་གཤེགས། །དེ་ནས་མི་འམ་ཅིའི་རྒྱལ་པོའི་བུ་དེ་དག་གིས་ཚིགས་སུ་བཅད་པ་འདི་དག་ཐོས་ནས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །དེ་དག་གིས་བཟོད་པ་རབ་ཏུ་ཐོབ་ནས་རང་རང་གི་གོས་དང་རྒྱན་བཅོམ་ལྡན་འདས་ལ་མངོན་པར་བཀབ་སྟེ་འདི་སྐད་ཅེས་ཀྱང་གསོལ་ཏོ། །བཅོམ་ལྡན་འདས། །གང་གི་སླད་དུ་བདག་ཅག་གིས་ཉན་པའི་རྣ་བ་འདི་ལྟ་བུ་ཐོབ་པས་སངས་རྒྱས་ནི། བདག་ཅག་གི་ཆེད་དུ་བྱུང་ངོ ། །བཅོམ་ལྡན་འདས། སིལ་སྙན་དང ། གླུ་དབྱངས་འདི་དག་ལས་ཐེ་ཚོམ་འདྲི་བའི་སྒྲ་འདི་ལྟ་བུ་བྱུང་བ་དང ། བྱང་ཆུབ་སེམས་དཔའི་གཟུགས་འདི་དག་གིས་དྲིས་པ་དེ་དག་ཐམས་ཅད་ཀྱི་ལན་བཏབ་པས་འཁོར་འདིའི་དོགས་པ་ཐམས་ཅད་སྤངས་པ་དང ། བདག་ཅག་ཀྱང་ཆོས་སྣང་བ་དཔག་ཏུ་མ་མཆིས་པ་སྐྱེས་པ་ངོ་མཚར་ཏོ། །བཅོམ་ལྡན་འདས། སིལ་སྙན་དེ་དག་ལས་སྒྲ་འདི་ལྟ་བུ་བྱུང་བའི་རྒྱུ་ཅི་ལགས། སུའི་བྱིན་གྱི་རླབས་ཀྱིས་ན། །བྱང་ཆུབ་སེམས་དཔའི་གཟུགས་འདི་དག་གིས་ལན་འདེབས་པར་གྱུར། བཅོམ་ལྡན་འདས་ཀྱིས་བཀའ་སྩལ་པ། བཞིན་བཟང་དག་།དེ་དག་ཐམས་ཅད་ནི། སངས་རྒྱས་ཀྱི་བྱིན་གྱི་རླབས་སུ་བལྟའོ། །བཞིན་བཟང་དག་།དེ་བཞིན་གཤེགས་པའི་བྱིན་རླབས་ཀྱིས་ནམ་མཁའ་ལས་ཀྱང་ཆོས་ཀྱི་སྒྲ་འདི་ལྟ་བུ་བྱུང་ན། སིལ་སྙན་ལས་ཆོས་ཀྱི་སྒྲ་ཅིའི་ཕྱིར་མི་ 439a ༄#། །འབྱུང་སྟེ། བཞིན་བཟང་དག་།དེ་ལྟར་དེ་བཞིན་གཤེགས་པའི་བྱིན་གྱི་རླབས་ནི། བསམ་གྱིས་མི་ཁྱབ་བོ། །མི་འམ་ཅིའི་རྒྱལ་པོའི་བུ་དེ་དག་གིས་གསོལ་པ། བཅོམ་ལྡན་འདས། སེམས་ཅན་ཐམས་ཅད་ཀྱིས་སངས་རྒྱས་ཀྱི་བྱིན་གྱི་རླབས་བསམ་གྱི་མི་ཁྱབ་པ་ཐོབ་པར་གྱུར་ཅིག་།བམ་པོ་བཞི་པ། དེ་ནས་མི་འམ་ཅིའི་རྒྱལ་པོ་སྡོང་པོའི་སླས་མི་འམ་ཅི་མོ་བརྒྱད་ཁྲི་བཞི་སྟོང་མུ་ཏིག་ཁ་དོག་སྣ་ཚོགས་ཀྱི་དོ་ཤལ་ཐོགས་ནས་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཅལ་ནས་ཇི་ལྟར་ཐོགས་པའི་མུ་ཏིག་གི་དོ་ཤལ་དེ་དག་གིས་བཅོམ་ལྡན་འདས་ལ་མངོན་པར་བཀབ་བོ། །མུ་ཏིག་གི་དོ་ཤལ་དེ་དག་ཕུལ་མ་ཐག་ཏུ་སངས་རྒྱས་ཀྱི་མཐུས་དེ་དག་བཅོམ་ལྡན་འདས་ཀྱི་དབུའི་གཙུག་གི་དྲང་ཐད་ཀྱི་སྟེང་གི་བར་སྣང་ལ་མུ་ཏིག་གི་དོ་ཤལ་གྱི་ཁང་པ་བརྩེགས་པ་བརྒྱད་ཁྲི་བཞི་སྟོང་དུ་གྱུར་ཏེ། ཁང་པ་བརྩེགས་པ་དེ་དག་ཐམས་ཅད་ཀྱང་གྲུ་བཞི་ལྷམ་པ། ཀ་བ་བཞི་ཟུག་པ། ཆ་མཉམ་པ། ངོས་ཤིན་ཏུ་རྣམ་པར་ཕྱེ་བ་ཤ་སྟག་གོ་།ཁང་པ་བརྩེགས་པ་དེ་དག་ན་རིན་པོ་ཆེས་སྤྲས་པའི་ཁྲི་རྩ་བའང་རིན་པོ་ཆེ་ལས་བྱས་པ། ལྷའི་རས་བཅོས་མའི་ཟུང་དུ་མ་བཀྲམ་པ་དག་བྱུང་བར་གྱུར་ཏོ། །ཁྲི་དེ་དག་ཐམས་ཅད་ལའང་དེ་བཞིན་གཤེགས་པའི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་ 439b གཉིས་ཀྱིས་ལེགས་པར་བརྒྱན་པ་དག་བཞུགས་པར་ཀུན་ཏུ་སྣང་ངོ ། །དེ་ནས་མི་འམ་ཅི་མོ་བརྒྱད་ཁྲི་བཞི་སྟོང་གིས་བཅོམ་ལྡན་འདས་ཀྱི་ཆོ་འཕྲུལ་འདི་ལྟ་བུ་འདི་མཐོང་ནས་ཚིམ་ཞིང་མགུ་སྟེ་ཡིད་རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་དག་བྱང་ཆུབ་ཏུ་སེམས་བསྐྱེད་ནས་དགའ་ཞིང་མཆོག་ཏུ་དགའ་སྟེ་དང་པ་ཐོབ་ནས་ཐམས་ཅད་ཀྱིས་སྒྲ་སྐད་དང ། དབྱངས་གཅིག་ཏུ་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །བླ་ན་མེད་པའི་དགྲ་བཅོམ་མཆོག་གསུང་བ། །དོན་དགོངས་མཚུངས་པ་མ་མཆིས་བསམ་མི་ཁྱབ། །དོན་དང་ཆོས་དང་འདུལ་བ་རབ་བསླབ་པ། །སེམས་ཅན་མཆོག་ལ་མགོ་བོས་ཕྱག་འཚལ་ལོ། །འདོད་ཆགས་ཞེ་སྡང་གཏི་མུག་ཐ་བ་འཇིག་།དགོན་པར་བཞུགས་དགྱེས་བསྙེངས་བ་མི་མངའ་བ། །རིན་ཆེན་མཛོད་དང་རིན་ཆེན་སྟོན་པ་པོ། །བཅོམ་ལྡན་རྒྱལ་པོའི་རྒྱལ་ལ་ཕྱག་འཚལ་ལོ། །སྤྱན་སྔར་དྲི་བྲལ་ཉོན་མོངས་མི་མངའ་བ། །ས་ཡི་དབང་པོ་ཕ་རོལ་དགྲ་འཇོམས་པ། །པདྨོ་ལྟ་བུར་སྲིད་གསུམ་མི་གོས་པ། །བདེ་གཤེགས་མཆོག་བརྙེས་ཁྱོད་ལ་ཕྱག་འཚལ་ལོ། །འགྲོ་བའི་ནང་ན་མིག་དང་འདྲར་སྤྱོད་ཅིང ། །ཉི་ཟླ་འདི་ཡི་འོད་ནི་སྤ་བཀོང་བ། །འཁོར་ལོས་བསྒྱུར་བའི་རིགས་སུ་རྒྱལ་པོར་སྐྱེས། །འཁོར་ལོའི་མཚན་མངའ་ཁྱོད་ལ་ཕྱག་འཚལ་ལོ།། 440a ༄#། །མིང་དང་གཟུགས་ལ་ནམ་ཡང་མི་ཆགས་ཤིང ། །མགོན་དང་དཔུང་དང་སྐྱབས་དང་དཔུང་གཉེན་གྱུར། །ཁྱོད་དང་མཚུངས་མེད་ལྷག་པ་ག་ལ་ཞིག་།མཐའ་ཡས་དབྱངས་ལ་མགོ་བོས་ཕྱག་འཚལ་ལོ། །བརྙེས་དང་མ་བརྙེས་ནམ་ཡང་ཆགས་མི་མངའ། །འཇིག་རྟེན་ཆོས་རྣམས་ཟིལ་གྱིས་མནན་ཏེ་བཞུགས། །ཆགས་སྲེད་འཁྲི་ཤིང་དྲ་བགྲོལ་མཛད་པ། །བཅོམ་ལྡན་འཇིག་རྟེན་མགོན་ལ་ཕྱག་འཚལ་ལོ། །དུལ་བ་ཐུགས་ནི་རྟག་ཏུ་མཉམ་པར་བཞག་།ཉོན་མོངས་བསྲེགས་ཏེ་སྟོབས་བཅུས་རབ་བཞུགས་ཤིང ། །འགྲོ་ལ་ཟང་ཟིང་མི་མངའ་སྦྱིན་སྩོལ་པ། །སྦྱིན་པའི་གནས་ལ་མགོ་བོས་ཕྱག་འཚལ་ལོ། །སྨྲ་མཆོག་དམ་པ་མཚན་གྱི་འོད་འཕྲོས་པ། །ལམ་ལོག་ཕྱིན་ཅི་ལོག་ནི་རྣམ་པར་སྤངས། །འཇམ་ཞིང་སྣུམ་ལ་སྙན་པའི་གསུང་གསུང་བ། །སྲིད་པ་གསུམ་ལས་འཕགས་ལ་ཕྱག་འཚལ་ལོ། །མི་མཆོག་གདུང་བས་གདུངས་པ་མི་མངའ་བ། །རྫུ་འཕྲུལ་གྱིས་ནི་བྱེ་བའི་ཞིང་དུ་གཤགས།། འགྲོ་བ་རབ་ཏུ་སྒྲོལ་བའི་གྲུ་མཛད་པ། །བཅོམ་ལྡན་བྲན་འདྲ་ཁྱོད་ལ་ཕྱག་འཚལ་ལོ། །བཅོམ་ལྡན་བརྩོན་འགྲུས་དག་ལ་སྟོན་མཛད་པ། །ཆགས་ཤིང་ཞེན་པའི་འགྲོ་དང་མངོན་ཤེས་དྲུག་།ལྡན་ཞིང་མཁས་པའི་ཉན་ཐོས་རྣམས་ཀྱང་འགྲེལ། །འགྲོ་དྲུག་ཉེ་གཤེགས་ཁྱོད་ལ་ཕྱག་འཚལ་ལོ། །གསེར་གྱི་ཁ་དོག་འདྲ་ལ་ཕྱག་འཚལ་ལོ། །ཞི་གནས་དབང་པོ་དུལ་ལ་ 440b ཕྱག་འཚལ་ལོ། །སྟོན་གྱི་ཟླ་ལྟའི་ཞལ་ལ་ཕྱག་འཚལ་ལོ། །མི་མཆོག་ཡོན་ཏན་མངའ་ལ་ཕྱག་འཚལ་ལོ། །ཉོན་མོངས་བསྲེགས་ཤིང་བསྙེངས་པ་མི་མངའ་བ། །སྐྱེ་རྒུ་འདི་དག་བསྒྲལ་དཀའ་ཆུ་བཞི་སྒྲོལ། །བསྒོམས་ཤིང་དབང་པོ་ཐུལ་བའི་བཅོམ་ལྡན་འདས། །ཁྱོད་ལ་སྐྱབས་སུ་མཆི་བར་མཆིད་ཀྱིས་འཚལ། །ཐུབ་པས་སྦྱིན་པ་བསམ་གྱིས་མི་ཁྱབ་སྩལ། །བསླངས་ན་དབང་པོ་དགྱེས་པར་རབ་འགྱུར་བ། །ཕ་རོལ་དག་ལ་སྦྱིན་པ་མཆོག་སྩོལ་བ། །གཏོང་དཔའ་བཅོམ་ལྡན་ཁྱོད་ལ་ཕྱག་འཚལ་ལོ། །སེམས་ཅན་ང་རྒྱལ་རྒྱགས་ཁེངས་གཏི་མུག་པ། །རྒྱུ་དང་རྐྱེན་དང་བྱ་བ་འགལ་བགྱིད་རྣམས། །འཕགས་པ་བླ་ན་མེད་པའི་ལམ་མཆོག་ལ། །རྣམ་པར་འདྲེན་པ་ཆེན་པོ་ཁྱོད་ཀྱིས་བཀོད། །ཕུང་པོ་རང་བཞིན་གྱིས་ནི་སྟོང་མཁྱེན་ནས། །ལས་དང་ཉོན་མོངས་ཟིལ་གྱིས་མནན་ཏེ་བཞུགས། །འདྲེན་པ་འགྲོ་བ་རྣམས་ཀྱི་སོམ་ཉི་གཅོད། །བཅོམ་ལྡན་དུས་གསུང་ཁྱོད་ལ་ཕྱག་འཚལ་ལོ། །བདེན་པའི་ཆོས་ལ་དགྱེས་ཤིང་མཉམ་པར་བཞག་།ཆོས་རྣམས་ཀུན་ལ་མངའ་དབང་ཕ་རོལ་ཕྱིན། །བླ་ན་མེད་པ་ཁ་ལོ་སྒྱུར་བ་མཆོག་།བཅོམ་ལྡན་དེད་དཔོན་ཁྱོད་ལ་ཕྱག་འཚལ་ལོ། །འཆོས་པ་མི་མངའ་གཡོ་སྒྱུ་རྣམས་དང་བྲལ། །བདུད་ཀྱི་སྡེ་རྣམས་འཇོམས་པའི་སྟོབས་པོ་ཆེ། །མི་མཆོག་ལམ་དང་ལམ་ལ་ལགས་ལ་མཁས། །རླུང་དམར་ལྟ་བུར་ཅི་ལའང་ཆགས་མི་མངའ། །གཟིར་བར་གྱུར་གསལ་ཕ་རོལ་ཤིན་ཏུ་གནས། །ཐུབ་པ་བས་མ་འཚལ་བའི་ 441a ༄#། །བང་མཛོད་མངའ། །སྤྱད་པ་སྤྱོད་པའི་ཚེ་ན་གངྒཱ་ཡི། །བྱེ་མ་སྙེད་ཀྱི་མི་མཆོག་རྣམས་ལ་མཆོད། །མཐུ་བརྙེས་མི་གཡོ་བསམ་གྱིས་མི་ཁྱབ་པ། །ཆགས་པའི་སྐྱོན་མི་མངའ་ཞིང་ཐང་ལ་བཞུགས། །གནས་ན་བཞུགས་པའི་རྒྱལ་བ་རྣམས་ཀྱིས་བརྟེན། །དེ་སླད་མི་རྣམས་མཆོག་ལ་ཕྱག་འཚལ་ལོ། །སྐྱེ་དང་ན་དང་རྒ་ཤི་རྣམ་པར་སྤངས། །ཚེ་རབས་བྱེ་བ་བསམ་མི་ཁྱབ་པ་དགོངས། །བཅོམ་ལྡན་འདས་ཀྱི་མཁྱེན་པའི་གདུགས་འོད་ཀྱིས། །འཇིགས་པ་ཆེན་པོའི་དྲ་བ་རབ་ཏུ་འདྲལ། །འདྲེན་པ་རྨི་འདྲར་ཆོས་རྣམས་ཐུགས་སུ་ཆུད། །ཕྱག་དང་ཞབས་ལ་བཀྲ་ཤིས་མཚན་མངའ་ཞིང ། །བཀྲ་ཤིས་བགྱིད་ལས་འཇམ་པའི་ངན་སློང་བ། །བཅོམ་ལྡན་བཀྲ་ཤིས་མཛད་ལ་ཕྱག་འཚལ་ལོ། །གཟུགས་རྣམས་ལ་ནི་དབང་གི་ཕ་རོལ་ཕྱིན། །ཟང་ཟིང་མི་མངའ་ཆོས་ཀྱི་སྦྱིན་པ་སྩོལ། །ཐུབ་པ་ཆོས་ཀྱི་རྔ་ནི་རབ་བརྡུངས་པ། །ཆོས་རྗེ་བཅོམ་ལྡན་ཁྱོད་ལ་ཕྱག་འཚལ་ལོ། །ཤཱཀྱའི་རིགས་རུས་རྒྱལ་པོའི་ལས་བྱུང་བ། །དབང་པོ་ཞི་ཞིང་ཐུགས་ཀྱང་རབ་ཏུ་ཞི། །སྟོན་པ་སྲིད་གསུམ་འཇིག་རྟེན་རྣམ་གཟིགས་པ། །བདེ་གཤེགས་ཞི་ཐུགས་ཁྱོད་ལ་ཕྱག་འཚལ་ལོ། །བདུད་རྣམས་དཔུང་དང་བཅས་པས་རྣོ་པ་ཡི། །རལ་གྲི་ཐོགས་ནས་བྱང་ཆུབ་དྲུང་ལྷགས་ཀྱང ། །ཁྱོད་ཀྱི་བ་སྤུ་ཙམ་ཡང་མ་གཡོས་ཏེ། །བཅོམ་ལྡན་རི་རབ་མཚུངས་ལ་ཕྱག་འཚལ་ལོ། །མི་ཡི་དམ་པ་བཟོད་པའི་ཕ་རོལ་ཕྱིན། །སྐུ་རྣམས་ཀུན་ལ་ནོངས་པ་བགྱིས་ 441b ཀྱང་བཟོད། །ཡང་འབྱུང་བ་དང་སྐྱེ་དང་འཆི་བས་དཔའ། །བཟོད་གསུང་བཅོམ་ལྡན་ཁྱོད་ལ་ཕྱག་འཚལ་ལོ། །མཐུ་བརྙེས་བདེ་བར་གཤེགས་པ་མི་གཡོ་བ། །གནས་དང་གནས་མིན་མཁས་པ་བསྙེངས་མི་མངའ། །ཁྱོད་ཀྱིས་སེམས་ཅན་མང་པོ་བྱང་ཆུབ་བཀོད། །ཆོས་གནས་རྒྱལ་བ་ཁྱོད་ལ་ཕྱག་འཚལ་ལོ། །འདུས་བགྱིས་ཉམ་ཆུང་སྙིང་པོ་མེད་བར་མཁྱེན། །སྐྱེ་བའི་ཚོགས་ནི་ཉུང་བ་མ་ལགས་སེལ། །ཁྱོད་ཀྱི་མཁྱེན་པ་སྲིད་གསུམ་ཁྱད་པར་འཕགས། །ཡེ་ཤེས་ཕ་རོལ་ཕྱིན་ལ་ཕྱག་འཚལ་ལོ། །སེམས་ཅན་ལོང་བ་སྡུག་བསྔལ་མགོན་མེད་པ། །དེ་དག་ཁྱོད་ཀྱིས་དཀོན་མཆོག་གསུམ་ཚིམ་བགྱིས། །ཁྱོད་ནི་བདུད་དཔུང་བཅས་པ་སྐྲག་མཛད་པ། །བཅོམ་ལྡན་མགོན་གྱུར་ཁྱོད་ལ་ཕྱག་འཚལ་ལོ། །སྟོབས་དང་བསམ་གཏན་དང་ནི་དབང་པོ་བསྒོམས། །ཁྱོད་ཀྱིས་བདུད་ནི་དཔུང་དང་བཅས་པ་བཅོམ། །སྲིད་པ་རྣམས་ཀྱི་ནང་ན་མཆོག་གྱུར་པ། །ཐུབ་པ་དབང་པོ་བསྒོམས་ལ་ཕྱག་འཚལ་ལོ། །དད་པའི་རྩ་བ་རྒྱ་ཆེན་ཆོས་བསྟན་པ། །མཚུངས་མེད་བྱང་ཆུབ་ལ་ནི་ཆགས་མི་མངའ། །གྲིབ་མ་ལྟ་བུར་མཁྱེན་ནས་བདེ་གསུངས་པ། །བཅོམ་ལྡན་གདུགས་འདྲ་ཁྱོད་ལ་ཕྱག་འཚལ་ལོ། །འདྲེན་པ་རྨི་འདྲར་ཆོས་རྣམས་ཐུགས་སུ་ཆུད། །འཕགས་པའི་འཁོར་ལོ་རྨི་འདྲ་རབ་ཏུ་བསྐོར། །འདུས་བགྱིས་ཡང་དག་ཏུ་ནི་རྨི་ལམ་འདྲར། །མཁྱེན་ནས་སེམས་ཅན་མང་པོ་དྲན་པར་མཛད། །ཁྱོད་ཀྱི་ལྗགས་མཆོག་དག་པ་དྲི་མི་མངའ། །ལྗགས་ཀྱིས་རང་གི་ཞལ་གྱི་དཀྱིལ་ 442a ༄#། །འཁོར་ཁེབས། །ལྗགས་ནི་པདྨ་འདབ་མ་བརྒྱ་ལྟ་བུ། །ལྗགས་སྐྱོན་མི་མངའ་ཁྱོད་ལ་ཕྱག་འཚལ་ལོ། །སྲིད་གསུམ་ཀུན་ལ་ཆགས་པ་མི་མངའ་བ། །འགྲོ་བ་རྣམས་ལ་འདོད་པའི་སྐྱོན་མི་གསུང ། །འདོད་པའི་ཆགས་བྲལ་སྨད་པ་མ་ལགས་པ། །བྱང་ཆུབ་མཆོག་ལ་སྲོག་ཆགས་མོས་པར་མཛད། །ཉོན་མོངས་དགྲ་དང་སྡིག་པའི་དགྲ་སྤངས་བ། །སེར་སྣའི་འདོད་ཆགས་བྲལ་ཞིང་ཆགས་མི་མངའ། །མི་ཡི་དམ་པ་གསེར་ལྟར་དཔལ་སྟུག་པ། །ཁྱོད་ཀྱི་མཚན་དང་གྲགས་པ་ཆུབ་པར་གྲགས། །གནས་དང་དབང་པོ་རྣམ་པར་འབྱེད་ལ་མཁས། །འདི་ན་བཞུགས་ཤིང་འགྲོ་བའི་མིག་ཏུ་གྱུར། །གནས་དང་ཡིག་འབྲུ་ཚིག་གི་དོན་བསླབ་པས། །ཁྱོད་ཀྱིས་ཆུ་བོ་བཞི་ལ་ཟམ་པ་བཏགས། །གླང་པོ་རིན་ཐང་མ་མཆིས་སྦྱིན་པ་མཛད། །འདྲེན་པ་མི་དང་ལྷ་རྣམས་སྒྲོལ་བ་པོ། །ཁྱོད་ཀྱི་ཡོན་ཏན་མཐའ་མ་མི་རྙེད་དེ། །མགོན་པོ་ཁྱོད་ལ་བདག་ནི་ཐལ་མོ་སྦྱོར། །མི་ཡི་མཆོག་ལ་རྡུལ་ནི་སྦྱིན་བྱིན་པས།། མི་མཇེད་ཛམྦུའི་རྒྱལ་པོར་གྱུར་ལགས་ན། །འདིར་ནི་དབང་པོ་དང་པས་ཐལ་སྦྱར་ནས། །སྐྱབས་སུ་ཉེ་བར་མཆི་བ་སྨོས་ཅི་འཚལ། །ཕུང་པོ་གསོག་སྟེ་ཉམ་ཆུང་སྙིང་པོ་མེད། །སྟོང་པ་སྒྱུ་མ་ཆུ་ཟླ་འདྲ་བར་ནི། །གཽ་ཏམ་ཁྱོད་ཀྱིས་དེ་དག་ཡང་དག་མཁྱེན། །ཕུང་པོ་ཁམས་མཁས་ཁྱོད་ལ་ཕྱག་འཚལ་ལོ། །སྲེད་པའི་སྲད་བུས་དམ་དུ་མདུད་བོར་ཏེ། །སྲིད་པའི་འགྲོ་བར་དྲ་བར་ 442b རབ་གྲགས་པ། །སྲིད་པར་འགྲོ་བ་རྣམས་ཀྱི་དྲ་བ་དེ། །བདེ་གཤེགས་ཁྱོད་ཀྱིས་མཁྱེན་པའི་འོད་ཀྱིས་བྲལ། །ཚངས་པའི་སྒྲ་སྐད་ལྟ་བུའི་གསུང་བརྗོད་པ། །ཤོ་བེ་མ་ལགས་མི་འགྱུར་འདྲིད་མ་ལགས། །ཕུན་ཚོགས་གསུང་དེ་དེ་དག་ཐོས་ནས་ནི། །ཐལ་མོ་སྦྱར་ཏེ་སྐྱབས་སུ་ཉེ་བར་མཆི། །ཕྱག་གི་མཐིལ་གྱིས་ས་འདིར་རེག་པ་ན། །ནགས་ཚལ་བཅས་པར་རྣམ་པ་དྲུག་གཡོས་ཀྱང ། །འདིར་ནི་གཞན་ལ་གནོད་པར་འགྱུར་མ་མཆིས། །བདུད་ཕྱོགས་དགྲ་བཅོམ་ཁྱོད་ལ་ཕྱག་འཚལ་ལོ། །ལྷ་ཡི་རྒྱལ་པོ་ཆེ་དང་མཁས་པ་གང ། །ཁྱོད་ཀྱིས་ཆོས་དོན་གཉེར་ཞིང་མཆིས་པ་རྣམས། །དེ་དག་སོ་སོར་ཆོས་བསྟན་ཐོས་ནས་སུ། །ཞབས་གཉིས་ལ་ནི་རབ་ཏུ་གཏུགས་པར་བགྱིད། །དེ་ནས་མིའམ་ཅིའི་རྒྱལ་པོའི་སླས་རྣམས་ཀྱིས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་ནས་བུད་མེད་ཀྱི་དངོས་པོས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་ནུས་ན། ཇི་ལྟར་བདག་ཅག་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟ་བུའི་ཆོས་དེ་བཅོམ་ལྡན་ 443a ༄#། །འདས་ཀྱིས་བདག་ཅག་ལ་ལེགས་པར་བཤད་དུ་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་མིའམ་ཅིའི་རྒྱལ་པོ་སྡོང་པོའི་སླས་དེ་དག་ལ་འདི་སྐད་ཅེས་བཀའ་སྩལ་ཏོ། །སྲིང་མོ་དག་དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང ། ཇི་ལྟར་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་བ་ངས་ཁྱོད་ལ་བཤད་པར་བྱའོ། །མི་འམ་ཅིའི་རྒྱལ་པོའི་སླས་རྣམས་ཀྱིས་བཅོམ་ལྡན་འདས་ལ་ལེགས་སོ། །ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་དེ་དག་ལ་འདི་སྐད་ཅེས་བཀའ་སྩལ་ཏོ། །སྲིང་མོ་དག་ཆོས་གཅིག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །ཆོས་གཅིག་པོ་དེ་གང་ཞེ་ན། འདི་ལྟ་སྟེ། ལྷག་པའི་བསམ་པས་བྱང་ཆུབ་ཏུ་སེམས་བསྐྱེད་པ་དང ། ཐམས་ཅད་མཁྱེན་པའི་སེམས་བསྐྱེད་པ་དང ། མི་མཉམ་པ་དང་མཉམ་པའི་སེམས་བསྐྱེད་པ་དང ། འཇིག་རྟེན་གསུམ་ལས་ཁྱད་པར་དུ་འཕགས་པའི་སེམས་བསྐྱེད་པ་དང ། དགེ་བའི་རྩ་བ་ཐམས་ཅད་ལ་བརྗེད་པ་མེད་པའི་སེམས་བསྐྱེད་པ་སྟེ། སྲིང་མོ་དག་ཆོས་གཅིག་པོ་འདི་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་ལུས་ 443b ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་གཉིས་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་ལུས་ཐོབ་པར་འགྱུར་རོ། །གཉིས་གང་ཞེ་ན། འདི་ལྟ་སྟེ། ཕྲག་དོག་མེད་པ་དང ། སེར་སྣ་མེད་པ་སྟེ། སྲིང་མོ་དག་ཆོས་འདི་གཉིས་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་གསུམ་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །གསུམ་གང་ཞེ་ན། འདི་ལྟ་སྟེ། ལུས་ཀྱི་སྡོམ་པ་གསུམ་ཡོངས་སུ་དག་པ་དང ། ངག་གི་སྡོམ་པ་བཞི་ཡོངས་སུ་དག་པ་དང ། ཡིད་ཀྱི་སྡོམ་པ་གསུམ་ཡོངས་སུ་དག་པ་སྟེ། སྲིང་མོ་དག་ཆོས་གསུམ་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་གཞན་ཡང་ཆོས་བཞི་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། གཡོ་མེད་པར་སྦྱིན་པ་སྦྱིན་པ་དང ། གཡོ་མེད་པར་བསླབ་པའི་གནས་འཛིན་པ་དང ། གཡོ་མེད་པར་ཚུལ་ཁྲིམས་བསྟེན་པ་དང ། གཡོ་མེད་པར་ཆོས་ཉན་པ་སྟེ། སྲིང་མོ་དག་ཆོས་བཞི་པོ་འདི་དག་དང་ལྡན་ན་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་ 444a ༄#། །གཞན་ཡང་ཆོས་ལྔ་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །ལྔ་གང་ཞེ་ན། འདི་ལྟ་སྟེ། ཆོས་དོན་དུ་གཉེར་བ་དང ། ཆོས་ཐོས་ནས་ཚུལ་བཞིན་དུ་སོ་སོར་རྟོག་པ་དང ། བསམ་པ་ཐག་པ་ནས་བུད་མེད་ཀྱི་དངོས་པོ་ལ་སྨོད་པ་དང ། རྟག་པར་རྒྱུན་དུ་སྐྱེས་པའི་ལུས་ཐོབ་པར་སེམས་བསྐྱེད་པ་དང ། ཇི་སྐད་སྨྲས་པ་དེ་བཞིན་དུ་བྱེད་པ་སྟེ། སྲིང་མོ་དག་།ཆོས་ལྔ་པོ་འདི་དག་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་།གཞན་ཡང་ཆོས་དྲུག་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །དྲུག་གང་ཞེ་ན། འདི་ལྟ་སྟེ། དྲང་པ་དང ། མཉེན་པ་དང ། སྒྱུ་མེད་པ་དང ། གཡོ་མེད་པ་དང ། བསྩལ་བ་མེད་པ་དང ། བཅོས་པ་མེད་པ་སྟེ། སྲིང་མོ་དག་།ཆོས་དྲུག་པོ་འདི་དག་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་།གཞན་ཡང་ཆོས་བདུན་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བདུན་གང་ཞེ་ན། འདི་ལྟ་སྟེ། སངས་རྒྱས་ཀྱི་སྐུ་ཐོབ་པར་བྱ་བའི་ཕྱིར་སངས་རྒྱས་རྗེས་སུ་དྲན་པ་དང ། སངས་རྒྱས་ཀྱི་ཆོས་ཐོབ་པར་བྱ་བའི་ཕྱིར་ཆོས་རྗེས་སུ་དྲན་པ་དང ། རང་ 444b གིས་ཕྱིར་མི་ལྡོག་པའི་དགེ་འདུན་བསྡུ་བའི་ཕྱིར་དགེ་འདུན་རྗེས་སུ་དྲན་པ་དང ། སྨོན་ལམ་ཡོངས་སུ་དག་པར་བྱ་བའི་ཕྱིར་ཚུལ་ཁྲིམས་རྗེས་སུ་དྲན་པ་དང ། ཉོན་མོངས་པ་ཐམས་ཅད་ཡོངས་སུ་དོར་བའི་ཕྱིར་གཏོང་བ་རྗེས་སུ་དྲན་པ་དང ། བྱང་ཆུབ་ཀྱི་སེམས་རྣམ་པར་དག་པར་བྱ་བའི་ཕྱིར་ལྷ་རྗེས་སུ་དྲན་པ་དང ། དེ་དག་དགྲོལ་བའི་ཕྱིར་སེམས་ཅན་ཐམས་ཅད་ལ་སེམས་པ་སྟེ།་སྲིང་མོ་དག་།ཆོས་བདུན་པོ་འདི་དག་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་།གཞན་ཡང་ཆོས་བརྒྱད་དང་ལྡན་ན།་བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བརྒྱད་གང་ཞེ་ན། འདི་ལྟ་སྟེ། ཟས་ལ་སྲེད་པ་མ་ཡིན་པ་དང ། སྐོམ་པ་ལ་སྲེད་པ་མ་ཡིན་པ་དང ། མེ་ཏོག་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་ལ་སྲེད་པ་མ་ཡིན་པ་དང ། སྐྱེད་མོས་ཚལ་དུ་འགྲོ་བར་སྲེད་པ་མ་ཡིན་པ་དང ། རྒོད་པ་དང་འཇོ་བ་ལ་སྲེད་པ་མ་ཡིན་པ་དང ། གླུ་དང ། གར་དང ། རོལ་མོའི་དབྱངས་སྒྲ་ལ་སྲེད་པ་མ་ཡིན་པ་དང ། དགའ་བ་དང ། རྩེ་བ་ལ་སྲེད་པ་མ་ཡིན་པ་དང ། རྣ་བ་དང་སྒྲ་དང ། སྣ་དང་དྲི་དང ། ལྕེ་དང་རོ་དང ། ལུས་དང་རེག་ལ་དགའ་བ་ལ་སྲེད་པ་མ་ཡིན་པ་སྟེ། སྲིང་མོ་དག་།ཆོས་བརྒྱད་པོ་འདི་དག་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། ། 445a ༄#། །སྲིང་མོ་དག་།གཞན་ཡང་ཆོས་དགུ་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །དགུ་གང་ཞེ་ན། འདི་ལྟ་སྟེ། ཆད་པར་ལྟ་བ་མ་ཡིན་པ་དང ། རྟག་པར་ལྟ་བ་མ་ཡིན་པ་དང ། བདག་ཏུ་སྨྲ་བ་མ་ཡིན་པ་དང ། སེམས་ཅན་དུ་སྨྲ་བ་མ་ཡིན་པ་དང ། སྲོག་ཏུ་སྨྲ་བ་མ་ཡིན་པ་དང ། གང་ཟག་ཏུ་སྨྲ་བ་མ་ཡིན་པ་དང ། འབྱུང་བར་ལྟ་བ་མ་ཡིན་པ་དང ། འཇིག་པར་ལྟ་བ་མ་ཡིན་པ་དང ། རྒྱུ་དང་རྐྱེན་ལ་འཇུག་པ་ལ་མཁས་པ་ཡིན་ཏེ། སྲིང་མོ་དག་།ཆོས་དགུ་པོ་འདི་དག་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་།གཞན་ཡང་ཆོས་བཅུ་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །བཅུ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ལ་བྱམས་པར་གནས་པ་དང ། གཞན་གྱི་ལོངས་སྤྱོད་ལ་བརྣབ་སེམས་མི་སྐྱེད་པ་དང ། སྐྱེས་པའི་སེམས་སུ་ཡིད་ལ་བྱེད་པ་སྐྱེད་པ་དང ། སྲོག་གི་ཕྱིར་ཡང་རྫུན་གྱི་ཚིག་མི་སྨྲ་བ་དང ། ཕྲ་མའི་ཚིག་མི་སྨྲ་བ་དང ། ཞེ་གཅོད་པའི་ཚིག་མི་སྨྲ་བ་དང ། ཚིག་ཀྱལ་པ་མི་སྨྲ་བ་དང ། ཕ་རོལ་པོ་དགའ་ཞིང་རྩེ་བ་ལ་ཕྲག་དོག་མེད་པ་དང ། གནོད་སེམས་ཀྱི་བག་ལ་ཉལ་མངོན་པར་མི་སྒྲུབ་པ་དང ། ཡང་དག་པར་ལྟ་བ་དང་ལྡན་པར་ 445b འགྱུར་བ་དང ། རྣམ་པར་སྨིན་པ་ལ་རེ་བ་མེད་པ་སྟེ། སྲིང་མོ་དག་།ཆོས་བཅུ་པོ་འདི་དག་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་པར་འགྱུར་རོ། །སྲིང་མོ་དག་།གཞན་ཡང་བུད་མེད་ཟབ་མོ་ལ་མོས་པ་ཡིན་ཏེ། དེ་གཟུགས་ལ་དབུ་བ་བརྡོས་པ་ལྟ་བུར་སོ་སོར་རྟོག་ཀྱང་གཟུགས་ཀྱིས་རྒྱགས་ཤིང་མྱོས་པར་མི་འགྱུར་བ་དང ། ཚོར་བ་ལ་ཆུའི་ཆུ་བུར་ལྟ་བུར་སོ་སོར་རྟོག་ཀྱང་བདེ་བའི་ཚོར་བ་ལ་རྗེས་སུ་ཆགས་པ་མེད་པ་དང ། སྡུག་བསྔལ་གྱི་ཚོར་བ་ལ་ཁོང་ཁྲོ་བར་མི་འགྱུར་བ་དང ། བདེ་བའང་མ་ཡིན་སྡུག་བསྔལ་བའང་མ་ཡིན་པའི་ཚོར་བའི་ཀུན་ཏུ་གཏི་མུག་པར་མི་འགྱུར་བ་དང ། འདུ་ཤེས་ལ་སྨིག་རྒྱུ་ལྟ་བུར་སོ་སོར་རྟོག་ཅིང་བུད་མེད་ཀྱི་འདུ་ཤེས་མི་སྐྱེད། སྐྱེས་པའི་འདུ་ཤེས་མི་སྐྱེད་པ་དང ། འདུ་བྱེད་རྣམས་ལ་ཆུ་ཤིང་གི་ཕུང་པོ་ལྟ་བུར་སོ་སོར་རྟོག་སྟེ། འདུ་བྱེད་ཐམས་ཅད་ལ་སྙིང་པོ་མེད་པར་རྟོགས་ནས་འདུ་བྱེད་ཐམས་ཅད་ལ་མི་གནས་ཤིང་དེ་ལ་གནས་པ་མི་སྐྱེད་པ་དང ། རྣམ་པར་ཤེས་པ་ལ་སྒྱུ་མ་ལྟ་བུར་སོ་སོར་རྟོག་སྟེ། སེམས་དང ། ཡིད་དང ། རྣམ་པར་རིག་པ་དེ་སྒྱུ་མ་བྱས་པ་བཞིན་དུ་རྟོགས་ནས་ཆོས་ཐམས་ཅད་ལ་ཆགས་པ་མེད། ཞེ་སྡང་མེད། གཏི་མུག་མེད་པ་དང ། ལུས་ལ་འབྱུང་བ་ཆེན་པོ་བཞི་དང་ལྡན་པར་སོ་སོར་རྟོག་སྟེ། འདི་ལྟ་སྟེ། སའི་ཁམས་དང་ལྡན་པ་དང ། ཆུའི་ 446a ༄#། །ཁམས་དང་ལྡན་པ་དང ། མེའི་ཁམས་དང་ལྡན་པ་དང ། རླུང་གི་ཁམས་དང་ལྡན་པར་ལུས་ལ་སོ་སོར་རྟོག་གོ་།ལུས་འདི་ནི། བསྡུས་པ་རྩཝ་དང ། ཤིང་དང ། བོང་བ་དང ། རྩིག་པ་དང ། མིག་ཡོར་ལྟ་བུ་སྟེ། འདི་བདག་མ་ཡིན། སེམས་ཅན་མ་ཡིན། སྲོག་མ་ཡིན། སྐྱེས་བུ་མ་ཡིན། གང་ཟག་མ་ཡིན་གྱི། ཕྱིན་ཅི་ལོག་སྔོན་དུ་སོང་བས་རྒྱུ་དང ། བྱ་བ་དང ། ལས་ཀྱི་བྱུང་བའོ། །གཞན་ཡང་བུད་མེད་མིག་ལ་ཁ་ཟས་ལས་སྐྱེས་པ་ཤའི་གོང་བུ་ངོ་བོ་ཉིད་ཀྱིས་སྟོང་པ་དང ། རང་བཞིན་གྱིས་དབེན་པར་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པ་དང ། དེ་བཞིན་དུ་རྣ་བ་དང ། སྣ་དང ། ལྕེ་དང ། ལུས་དང ། ཡིད་ལ་ངོ་བོ་ཉིད་ཀྱིས་སྟོང་པ་དང ། རང་བཞིན་གྱིས་དབེན་པར་ཡང་དག་པ་ཇི་ལྟ་བ་བཞིན་དུ་སོ་སོར་རྟོག་པའོ། །གཞན་ཡང་བུད་མེད་ལུས་ལ་གཟུགས་བརྙན་ལྟ་བུར་འཇུག་པ་དང ། ངག་ལ་བྲག་ཅ་ལྟ་བུར་འཇུག་པ་དང ། སེམས་ལ་སྒྱུ་མ་ལྟ་བུར་འཇུག་པའོ། །སྲིང་མོ་དག་།ཆོས་འདི་དག་དང་ལྡན་ན། བུད་མེད་བུད་མེད་ཀྱི་དངོས་པོ་ལས་གྱུར་ཏེ་སྐྱེས་པའི་དངོས་པོ་ཐོབ་ཅིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་མི་འམ་ཅིའི་རྒྱལ་པོ་སྡོང་པོའི་སླས་དེ་དག་ཐམས་ཅད་ཀྱིས་བཅོམ་ལྡན་འདས་ལས་བུད་མེད་ཀྱི་ 446b དངོས་པོ་ལས་སྒྱུར་བའི་ཆོས་ཀྱི་རྣམ་གྲངས་འདི་ཐོས་ནས་ཚིམ་ཞིང་མགུ་སྟེ་ཡིད་རངས་ཤིང་རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ་བཅོམ་ལྡན་འདས་ཀྱི་ཞབས་ལ་ཕྱག་བཙལ་ནས་ཚུལ་དང་མཐུན་པའི་ཚིགས་སུ་བཅད་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་དོ། །དྲི་མེད་དྲི་བྲལ་དྲི་མ་གཅོད་མཛད་པ། །རྡུལ་མེད་རྡུལ་བྲལ་ལྷག་པའི་གཟི་བརྗིད་མངའ། །པདྨའི་འདབ་འདྲའི་སྤྱན་དང་མཛེས་པའི་ཐུགས། །དྲི་མེད་ཟླ་ཞལ་ཁྱོད་ལ་ཕྱག་འཚལ་ལོ། །དགའ་མཛད་ཞི་མཛད་ཉོན་མོངས་གཅོད་མཛད་པ། །དགའ་བོ་སྟོན་པ་རྟག་ཏུ་དགོན་པར་དགྱེས། །རིན་ཆེན་འབྱུང་གནས་རིན་ཆེན་མཛོད་མངའ་བ། །ཡོན་ཏན་མཆོག་མངའ་ཁྱོད་ལ་ཕྱག་འཚལ་ལོ། །ཕ་རོལ་གཤེགས་པ་གཞན་གྱི་ཚོགས་རྣམས་འཇོམས། ། པདྨ་ལྟ་བུར་སྟོང་མཆོག་བཀའ་མཆིད་གསུང ། །ལམ་མཆོག་སྩོལ་ཞིང་དམ་པའི་དོན་སྟོན་པ། །མཆོག་ཏུ་དགའ་མཛད་ཁྱོད་ལ་ཕྱག་འཚལ་ལོ། །ཆུ་བོ་བཞི་བརྒལ་བདེན་བཞིའི་བཀའ་མཆིད་གསུང ། །ས་ལ་རྒྱུ་བ་འདི་ལ་མིག་སྩོལ་བ། །འཁོར་ལོ་མཆོག་གི་མཚན་ནི་སྟོང་མངའ་བ། །རྡུལ་མེད་ཕན་མཛད་ཁྱོད་ལ་ཕྱག་འཚལ་ལོ། །ཉོན་མོངས་རྡུལ་བསལ་དམ་པ་མཐུ་བོ་ཆེ། །མགོན་པོ་འགྲོ་ལ་མཆོག་གི་དོན་མཛད་བ། །བདུད་ཀྱི་དཔུང་རྣམས་སྟོབས་མེད་འཇིག་མཛད་པ། །བཅོམ་ལྡན་སྟོབས་བཅུ་ཁྱོད་ལ་ཕྱག་འཚལ་ལོ། །སྲེད་པའི་འཁྲི་ 447a ༄#། །ཤིང་གཅོད་མཛད་མཉམ་པ་མེད། །བརྙེས་པ་དག་དང་མ་བརྙེས་མཚུངས་མཉམ་ཐུགས། །འཇིག་རྟེན་མཐར་འབྱིན་སྣང་བའི་སྒྲོན་མཛད་པ། །རྒྱ་མཚོ་ལྟ་བུ་ཁྱོད་ལ་ཕྱག་འཚལ་ལོ། །དུལ་ཞིང་སྟོབས་བཅུ་ཆེན་པོ་དམ་པ་མངའ། །སྦྱིན་པ་སྩོལ་ཞིང་རྟག་ཏུ་གཏོང་ལ་དགྱེས། །དུལ་བཞི་གནས་ཡོན་ཏན་ཕ་རོལ་ཕྱིན། །ཉོན་མོངས་རྡུལ་བསལ་ཁྱོད་ལ་ཕྱག་འཚལ་ལོ། །མཚན་མཆོག་འགྲོ་བ་ཀུན་ལ་དམ་པ་སྩོལ། །སྐྱེ་བོའི་འདྲེན་པ་ལྷ་ཡི་མཆོག་པས་མཆོག་།བྱམས་དང་སྟོབས་དང་བཟོད་ལ་ངེས་པར་དགྱེས། །མཆོད་འོས་བདེ་གཤེགས་ཁྱོད་ལ་ཕྱག་འཚལ་ལོ། །མར་མེ་ལྟ་བུ་དྲི་མེད་ཟླ་བ་འདྲ། །ཕྱི་ནང་ཉོན་མོངས་དྲི་མ་གཅོད་མཛད་པ། །ཉོན་མོངས་སྤངས་པ་ཡོན་ཏན་བསོད་ནམས་གཏེར། །ཞི་བ་ཐུགས་ཞི་ཁྱོད་ལ་ཕྱག་འཚལ་ལོ། །དད་པ་སྩོལ་བ་དགེ་སྦྱོང་ཞི་མཛད་པ། །སྟོན་པ་སྐྱེ་མཆེད་དྲུག་ལས་ཐར་མཛད་པ། །རྗེས་སུ་དྲན་དྲུག་ཤིན་ཏུ་ཡོངས་དག་དྲན། །རྒྱལ་བ་དགེ་སྦྱོང་རྒྱལ་ལ་ཕྱག་འཚལ་ལོ། །འདོམ་གང་འོད་ནི་གསེར་གྱི་ཁ་དོག་ལྟེ། །གསུང་སྙེན་དམ་པ་རྣམ་པར་དག་པའི་དབྱངས། །བཅོམ་ལྡན་གང་ཟག་དམ་པ་སྐྱེས་བུ་མཆོག་།སྲིད་གསུམ་ཞི་མཛད་ཁྱོད་ལ་ཕྱག་འཚལ་ལོ། །ཤེས་རབ་མུན་པ་མ་མཆིས་ཕ་རོལ་གཤེགས། །རྟག་ཏུ་དཀའ་ཐུབ་བརྟུལ་ཞུགས་རབ་ཏུ་སྤྱོད། །དེ་བཞིན་ཁོ་ན་ 447b གཞན་མིན་དེ་བཞིན་གསུང ། །མུན་པར་སྒྲོན་མ་འཛིན་ལ་ཕྱག་འཚལ་ལོ། །བདེ་གཤེགས་གྲགས་ལྡན་ཡོན་ཏན་བསམ་འཚལ། །དེ་བཞིན་ཉིད་ཀྱི་ཆོས་ཀྱི་གནས་སྟོན་པ། །ཡོན་ཏན་བརྗོད་པ་མཐོང་ཞིང་གྲགས་བསྒྲགས་པས། །མཆོག་ཏུ་དགའ་མཛད་ཁྱོད་ལ་ཕྱག་འཚལ་ལོ། །བསྔགས་ལ་གནས་ཤིང་བརྟུལ་ཞུགས་དཀའ་ཐུབ་འཕགས། །ཁེངས་དང་ང་རྒྱལ་རྒྱགས་པ་གཅོད་མཛད་པ། །ཡེ་ཤེས་འབྱུང་གནས་རྡུལ་བྲལ་བློ་གྲོས་མཆོག་།སྐྱེ་བོ་མཐར་ཕྱིན་ཁྱོད་ལ་ཕྱག་འཚལ་ལོ། །ཀ་ལ་པིངྐ་ཚངས་དབྱངས་ཐུགས་རྗེ་ཅན། །འདོད་པ་བརྩོད་བགྱིད་དྲི་མ་སེལ་མཛད་པ། །ཕུང་པོ་ཡོངས་མཁྱེན་མཁས་པ་བདེ་བར་གཤེགས། །ཡོན་ཏན་ཚོགས་མཆོག་མངའ་ལ་ཕྱག་འཚལ་ལོ། །ཡོན་ཏན་སྟོན་པ་ཡོན་ཏན་བསྟོད་མཆོད་པ། །ཟབ་མོ་བལྟ་དཀའ་ཤིན་ཏུ་རྟོགས་པར་དཀའ། །འཛུམ་ཞལ་ཟླ་འདྲ་གསོང་པོར་གསུང་མཛད་པ། །བདུད་སྟོབས་འཇོམས་མཛད་ཁྱོད་ལ་ཕྱག་འཚལ་ལོ། །མཉམ་ཐུགས་ཁ་ལོ་སྒྱུར་བ་རབ་དུལ་ཐུགས། །ཀུན་གྱིས་མངོན་བསྟོད་མཉམ་པའི་ལམ་ལ་གནས། །ཐུབ་པ་མཆོག་གསུང་བདེན་པའི་བཀའ་མཆིད་ཅན། །བདེ་གཤེགས་མཉམ་ཐུགས་ཁྱོད་ལ་ཕྱག་འཚལ་ལོ། །ལམ་སྩོལ་སྙན་པ་ཤིན་ཏུ་འཇམ་པའི་དབྱངས། །བདུད་ཀྱི་སྡེ་མངའ་འཇོམས་མཛད་ང་རྒྱལ་དང ། །ལྷག་པའི་ང་རྒྱལ་མི་མངའ་ཚུལ་མི་འཆོས། །ཐུབ་པ་དགེ་སྦྱོང་རྒྱལ་ལ་ཕྱག་འཚལ་ལོ། །སྟོབས་དང་མཐུ་དང་བརྩོན་འགྲུས་ 448a ༄#། །བསམ་གཏན་དགྱེས། །རྟག་ཏུ་འདོད་ཆགས་སྐྱོན་དང་རབ་རིབ་བྲལ། །བདེ་བར་གཤེགས་པ་མི་གཡོ་གནས་ལ་ཞུགས། །སྟོབས་བཅུ་མཆོག་མངའ་ཁྱོད་ལ་ཕྱག་འཚལ་ལོ། །ཕྱག་དང་ཞབས་ནི་དྲི་མེད་དྲ་བས་འབྲེལ། །སྐྱེ་དང་རྒ་དང་འཆི་བ་མི་མངའ་བ། །རྒྱལ་བར་འོས་པ་འགྲོ་བ་ཀུན་ལས་རྒྱལ། །ནམ་མཁའ་མཉམ་ཐུགས་ཁྱོད་ལ་ཕྱག་འཚལ་ལོ། །དེ་ནས་མི་འམ་ཅིའི་རྒྱལ་པོ་སྡོང་པོའི་སླས་མི་འམ་ཅི་མོ་བརྒྱད་ཁྲི་བཞི་སྟོང་པ་དེ་དག་གིས་བཅོམ་ལྡན་འདས་ཀྱི་ཞབས་ལ་གཏུགས་པ་དང ། བཅོམ་ལྡན་འདས་ཀྱིས་དེ་དག་གི་ལྷག་པའི་བསམ་པ་མཁྱེན་ནས་དེའི་ཚེ་བཅོམ་ལྡན་འདས་ཀྱི་འཛུམ་པ་མཛད་དོ། །འདི་ནི། སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ་གང་གི་ཚེ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་དུ་མ་ཁ་དོག་སྣ་ཚོགས་བྱུང་སྟེ། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། ལེ་བརྒན་དང ། ཤེལ་དང ། དངལ་གྱི་ཁ་དོག་ལྟ་བུའོ། །དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པར་འོད་ཀྱིས་ཁྱབ་པར་བྱས་ཏེ་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ནས་ཉི་མ་དང ། ཟླ་བའི་འོད་མོག་མོག་པོར་བྱས་ཏེ་སླར་ལོག་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་ 448b དགའ་བོ་སྟན་ལས་ལངས་ཏེ་བླ་གྲོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཞེ་ས་དང་བཅས་ཤིང་གུས་པ་དང་བཅས་པར་བཅོམ་ལྡན་འདས་གང་ན་བ་དེ་ལོགས་སུ་ཐལ་མོ་སྦྱར་བ་བདུད་ད་ཚིགས་སུ་བཅད་པ་མངོན་པར་སྒྲུབ་པ་འདིས་བཅོམ་ལྡན་འདས་ལ་འཛུམ་པ་མཛད་པའི་དོན་ཞུས་པ། བདེ་བར་གཤེགས་པ་ཅི་སླད་འཛུམ་སྟོན་པ། །ཟླ་བ་དྲི་མ་མེད་ཞལ་ཁྱོད་ལ་ཞུ། །དྲི་མེད་གཟི་བརྗིད་མངའ་བ་ཁྱོད་ལ་ཞུ། །གསེར་གྱི་ཁ་དོག་ལྟ་བུ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །དམ་པའི་གཟུགས་རྣམས་མངའ་བ་ཁྱོད་ལ་ཞུ། །འགྲོ་བ་རྣམས་ཀྱི་དོན་མཛད་ཁྱོད་ལ་ཞུ། །ལྷ་དང་མི་རྣམས་ཀྱིས་མཆོད་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། ། སྦྱིན་དང་དུལ་ལ་དགྱེས་པ་ཁྱོད་ལ་ཞུ། །ཚུལ་ཁྲིམས་ཡོངས་དག་གྱུར་པ་ཁྱོད་ལ་ཞུ། །བཟོད་པའི་སྟོབས་དང་སྟོབས་སྩོལ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །བརྩོན་འགྲུས་སྟོབས་དང་མཐུ་མངའ་ཁྱོད་ལ་ཞུ། །བསམ་གཏན་མངོན་ཤེས་དགྱེས་པ་ཁྱོད་ལ་ཞུ། །ཤེས་རབ་ནམ་མཁའ་མཉམ་པ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །རྟག་ཏུ་བྱམས་པའི་ཐུགས་ཅན་ཁྱོད་ལ་ཞུ། །རྟག་ཏུ་ཐུགས་རྗེ་ལྡན་པ་ཁྱོད་ལ་ཞུ། །དགའ་དང་བཏང་སྙོམས་དགྱེས་པ་ཁྱོད་ལ་ཞུ། །བདེ་བར་གཤེགས་ 449a ༄#། །པ་ཅི་སླད་འཛུམ་སྟོན་པ། །སྲིད་པ་གསུམ་པོ་མཐར་འབྱིན་ཁྱོད་ལ་ཞུ། །སྤྱན་གསུམ་དྲི་མ་མི་མངའ་ཁྱོད་ལ་ཞུ། །བདུད་རྩི་ཆོས་རྣམས་གསུང་བ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །བདུད་རྣམས་ཐ་མར་འབྱིན་པ་ཁྱོད་ལ་ཞུ། །ངན་པའི་ཚོགས་རྣམས་འཇོམས་པ་ཁྱོད་ལ་ཞུ། །བདེན་པ་དམ་པ་གཟིགས་པ་ཁྱོད་ལ་ཞུ། །བདེ་བར་གཤེགས་པ་ཅི་སླད་འཛུམ་སྟོན་པ། །སྟོབས་བཅུ་དམ་པ་མངའ་བ་ཁྱོད་ལ་ཞུ། །ཐེ་ཚོམ་དག་ནི་གཅོད་མཛད་ཁྱོད་ལ་ཞུ། །ཡོན་ཏན་སྟོང་གིས་བརྒྱན་པ་ཁྱོད་ལ་ཞུ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ཁྱོད་ཀྱིས་མི་འམ་ཅིའི་རྒྱལ་པོའི་སླས་རྣམས་ང་ལས་དགེ་བའི་རྩ་བ་བསྐྱེད་དེ་བསམ་པ་ཐག་པ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བུད་མེད་ཀྱི་དངོས་པོ་ལས་བསྒྱུར་ཞིང་སྐྱེས་པའི་དངོས་པོ་ཐོབ་པར་བྱ་བའི་ཕྱིར་ངའི་རྐང་པ་གཉིས་ལ་གཏུགས་པ་མཐོང་ངམ། གསོལ་པ། བཅོམ་ལྡན་འདས། མཐོང་ངོ ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། མི་འམ་ཅིའི་སླད་བརྒྱད་ཁྲི་བཞི་སྟོང་པོ་དེ་དག་གིས་བསམ་པ་ཐག་པ་ནས་དགེ་བའི་རྩ་བ་བསྐྲུན་པ་འདིས་འདི་ནི། ཤི་འཕོས་ནས་བུད་མེད་ཀྱི་དངོས་པོ་ལས་ 449b གྱུར་ཏེ་སྐྱེས་པའི་ལུས་ཐོབ་ནས་དགའ་ལྡན་གྱི་ལྷ་རྣམས་དང་སྐལ་བ་མཉམ་པར་སྐྱེ་བར་འགྱུར་རོ། །དེར་སྐྱེས་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་དང་ལྷན་ཅིག་ཏུ་སངས་རྒྱས་བཅོམ་ལྡན་འདས་རྣམས་ཀྱི་རྫོགས་པའི་བྱང་ཆུབ་འདི་ཀུན་བགྲོ་བ་བྱེད་པར་འགྱུར་རོ། །བྱམས་པ་དེ་བཞིན་གཤེགས་པ་བྱང་ཆུབ་ཐོབ་པ་ན་མཉེས་པར་བྱེད་ཅིང་དམ་པའི་ཆོས་ཀྱང་ཀུན་བགྲོ་བར་བྱེད་པར་འགྱུར་རོ། །བསྐལ་པ་བཟང་པོའི་དེ་བཞིན་གཤེགས་པ་ཐམས་ཅད་ལའང་རིམ་གྱིས་མཉེས་པར་བྱེད་པར་འགྱུར། དེ་དག་གིས་དམ་པའི་ཆོས་ཀྱང་ཀུན་བགྲོ་བར་བྱེད་པར་འགྱུར། འཛིན་པར་འགྱུར་རོ། །དེ་དག་རིམ་གྱིས་བྱང་ཆུབ་ཀྱི་ཕྱོགས་ཀྱི་ཆོས་ཡང་དག་པར་བསྒྲུབ་པར་བྱ་བ་ཐམས་ཅད་ཀུན་ཏུ་རྫོགས་པར་བྱས་ནས་གང་གི་ཚེ་མི་འམ་ཅིའི་རྒྱལ་པོ་སྡོང་པོ་བླ་ན་མེད་པ་ཡང་དག་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེའི་ཚེ་དེ་དག་སངས་རྒྱས་ཀྱི་ཞིང་དེར་སྐྱེ་བར་འགྱུར་ཏེ། དེས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་ཡང་འགྱུར་རོ། །དེ་ནས་བཅོམ་ལྡན་འདས་ལ་མི་འམ་ཅིའི་རྒྱལ་པོ་སྡོང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པས་བདག་ཅག་ལ་སངས་རྒྱས་ཀྱི་མཛད་པ་མཛད་དོ། །ངན་སོང་ངན་འགྲོ་ཐམས་ཅད་ཀྱི་ལམ་བཀུམ་མོ། །བདེ་འགྲོ་ཐམས་ཅད་ 450a ༄#། །ཀྱི་ལམ་རྣམ་པར་སྦྱངས་སོ། །བདག་ཅག་བྱང་ཆུབ་ཀྱི་ལམ་ལ་རབ་ཏུ་བཀོད་དོ། །བདག་ཅག་ལ་ཆོས་ཀྱི་གཏེར་བསྟན་ཏོ། །བདག་ཅག་ཡེ་ཤེས་ཀྱིས་ལ་བཀོད་དོ། །དགེ་བའི་རྩ་བ་ཐམས་ཅད་འབར་བར་བགྱིས་སོ། །ཕ་རོལ་ཏུ་ཕྱིན་པའི་ཕྱོགས་བསྟན་ཏོ། །ཐབས་ལ་མཁས་པ་བསྟན་ཏོ། །བདག་ཅག་བྱང་ཆུབ་ཀྱི་སེམས་ཡང་དག་པར་འཛིན་དུ་སྩལ་ཏོ། །ཆོས་བསྒྲགས་པས་རབ་ཏུ་དགའ་བར་མཛད་དོ། །དགའ་བ་དང ། དང་བ་དང ། མཆོག་ཏུ་དགའ་བ་ཐོབ་པས་གཟེངས་བསྟོད་དོ། །ཆོས་ཟབ་མོའི་བཟོད་པ་ལ་རབ་ཏུ་དགའ་བར་མཛད་དོ། །བདག་ཅག་ཕྱིར་མི་ལྡོག་པའི་ས་ལ་རབ་ཏུ་བཀོད་དོ། །བདག་ཅག་ནི། བཅོམ་ལྡན་འདས་ལ་བྱས་བ་གཟོ་བ་ལགས་ཀྱི་བྱས་པ་མི་གཟོ་བ་མ་ལགས་ཀྱང་བཅོམ་ལྡན་འདས། བདག་ཅག་གིས་ཤ་དང ། ཁྲག་གིས་ཀྱང་དེ་བཞིན་གཤེགས་པ་ལ་ལན་མི་ལོན་ན། གཞན་གྱིས་ལན་ལོན་པར་མི་འགྱུར་བ་ལྟ་སྨོས་ཀྱང་ཅི་འཚལ། དེ་ནས་འཁོར་དེའི་ནང་ནས་བྱང་ཆུབ་སེམས་དཔའ་ཁ་ཅིག་འདི་སྙམ་དུ་སེམས་ཏེ། མ་ལ་མི་འམ་ཅིའི་རྒྱལ་པོ་སྡོང་པོ་འདི་ཇི་སྲིད་ཅིག་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། འདིའི་མིང་ནི། ཇི་སྐད་ཅེས་བྱ་བར་འགྱུར། བྱང་ཆུབ་སེམས་དཔའི་དགེ་འདུན་ནི། ཇི་སྙེད་ཅིག་ཏུ་འགྱུར། ལོངས་སྤྱོད་དང ། 450b ཡོངས་སུ་སྤྱོད་པ་ནི། ཇི་འདྲ་ཞིག་ཏུ་འགྱུར། དེའི་སེམས་ཅན་བཀོད་པ་དང ། སངས་རྒྱས་ཀྱི་ཞིང་གི་ཡོན་ཏན་བཀོད་པ་ནི། ཇི་འདྲ་བ་ཞིག་ཏུ་འགྱུར་སྙམ་མོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་རྣམ་པར་རྟོག་པ་ཐུགས་ཀྱི་ཡོངས་སུ་མཁྱེན་ནས་འཛུམ་པ་མཛད་པ་དང ། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་དུ་མ་ཁ་དོག་ཐ་དད་པ་ཁ་དོག་བརྒྱ་སྟོང་ཕྲག་དུ་མ་བྱུང་སྟེ། ཕྱོགས་བཅུ་ཀུན་གྱི་ཕྱོགས་རེ་རེར་ཡང་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་སྣང་བར་བྱས་ཏེ་སེམས་ཅན་རྣམས་ཀྱི་ངན་སོང་གི་སྡུག་བསྔལ་ཐམས་ཅད་ཞི་བར་བྱས་ནས་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་འདུན་པར་བྱས་ཏེ་སླར་ལོག་ནས་བཅོམ་ལྡན་འདས་ལ་ལན་སྟོང་དུ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་ཏུ་ནུབ་བོ། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱིས་སྔོན་ཆད་མ་མཛད་པའི་འཛུམ་པ་མཛད་པ་མཐོང་ནས་སྟན་ལས་ལངས་ཏེ་ཐལ་མོ་སྦྱར་ནས་བཅོམ་ལྡན་འདས་ཀྱི་ཞབས་ལ་ཕྱག་བཙལ་ཏེ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱན་སྔར་འདུག་སྟེ་པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་ཚིགས་སུ་བཅད་པས་གསོལ་པ། བདེ་བར་གཤེགས་ཀྱི་འཛུམ་པ་ཅི་འདྲ་བ། ། 451a ༄#། །དེ་རིང་ཕྱུང་སྟེ་ཐུག་མེད་བྱེ་བའི་ཞིང ། །རྒྱ་ཆེན་ཕྱོགས་བཅུའི་གངྒཱའི་རྡུལ་མཐའ་ཡས། །ཁྱབ་པ་དེ་འདྲ་སྔོན་ཆད་ཡོང་མ་མཐོང ། །ཚངས་པ་དེ་བཞིན་འཇིག་རྟེན་སྐྱོང་བ་དང ། །ནོར་བུ་མེ་དང་ཉི་མ་ཟླ་བའི་འོད། །མི་དབང་གཟི་བརྗིད་ཀྱིས་ནི་མོག་མོག་གྱུར། །འཛུམ་མཛད་འདི་ཡི་རྒྱུ་ནི་ལུང་བསྟན་གསོལ། །སུ་ཡི་ཆེད་དུ་དཔའ་བོ་ཁྱོད་ཀྱིས་འོད་ཕྱུང་བས། །འདིར་ནི་ངན་སོང་གསུམ་ཞི་བྱང་ཆུབ་ཡན་ལག་རྫོགས། །ཆོས་ཀྱི་རྗེ་ཡིས་བདག་ཅག་རྣམས་ཀྱི་དོགས་པ་སོལ། །མི་རྣམས་ཀྱི་ནི་ཡིད་གཉིས་མ་ལུས་ལེགས་པར་ཁུམ། །འཁོར་ཀུན་དགའ་བས་རྟོག་བགྱིད་ན། །སུ་སླད་དེ་རིང་འཛུམ་པ་བསྟན། །དེ་ནས་ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་ནས་བསྐོར་བ་བྱས་ཏེ་རང་གི་སྟན་ལ་འདུག་གོ་།དེ་ནས་བཅོམ་ལྡན་འདས་ཀྱིས་དེའི་ཚེ་གླང་པོ་ཆེའི་བལྟ་སྟངས་ཀྱིས་ཕྱོགས་བཅུར་གཟིགས་ནས་ཚེ་དང་ལྡན་པ་ཀུན་དགའ་བོ་ལ་འདི་སྐད་ཅེས་བཀའ་སྩལ་ཏོ། །ཀུན་དགའ་བོ། ཁྱོད་ཀྱིས་མི་འམ་ཅིའི་རྒྱལ་པོ་སྡོང་པོ་འདིས་ཚུལ་འདི་ལྟ་བུ་དང ། རྒྱ་ཆེ་བ་འདི་ལྟ་བུ་དང ། རྣམ་པ་འདི་ལྟ་བུ་འདིས་དེ་བཞིན་གཤེགས་པ་ལ་མཆོད་པ་བྱས་པ་མཐོང་ངམ། གསོལ་པ། བཅོམ་ལྡན་འདས། མཐོང་ལགས་སོ། །བདེ་བར་གཤེགས་པ། མཐོང་ལགས་སོ། ། 451b བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། མི་འམ་ཅིའི་རྒྱལ་པོ་སྡོང་པོ་འདི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་དྲུག་ཅུ་རྩ་བརྒྱད་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་སྟེ། དཀོན་མཆོག་འབྱུང་ཞེས་བྱ་བའི་བསྐལ་བ་ལ་འཇིག་རྟེན་གྱི་ཁམས་ཟླ་བ་དྲི་མ་མེད་ཅེས་བྱ་བར་ཡོན་ཏན་གྱི་རྒྱལ་པོར་སྣང་བ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བ་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འཇིག་རྟེན་དུ་འབྱུང་ངོ ། །ཀུན་དགའ་བོ། །འཇིག་རྟེན་གྱི་ཁམས་ཟླ་བ་དྲི་མ་མེད་པ་དེ་ནི། ལག་མཐིལ་ལྟར་མཉམ་པར་འགྱུར་ཏེ། བཻ་ཌཱུ་རྱ་དཀར་པོ་ལས་གྲུབ་པ། ཟླ་བ་ལྟ་བུར་སྣང་བ། ཤིན་ཏུ་དྲི་མ་མེད་པ། ཤིན་ཏུ་རྣམ་པར་དག་པ། མཆིད་བུ་མེད་པའོ། །དེ་བཞིན་གཤེགས་པ་དེའི་བྱང་ཆུབ་སེམས་དཔའི་དགེ་འདུན་ཡང་ཚད་མེད་པར་གྱུར་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་དེ་ཐམས་ཅད་ཀྱང་ཕྱིར་མི་ལྡོག་པ། རྣམ་པར་ཐར་པ་བསམ་གྱིས་མི་ཁྱབ་པ་ཐོབ་པ་ཤ་སྟག་གོ་།བྱང་ཆུབ་སེམས་དཔའ་དེ་དག་ནི། ནམ་མཁའ་ལ་ཁང་པ་བརྩེགས་པ་ན་ལོངས་སྤྱོད་དེ། དེ་དག་ནམ་མཁའ་ལ་ཁང་པ་ 452a ༄#། །བརྩེགས་པ་ན་གནས་པ་ན་བཻ་ཌཱུ་རྱ་དཀར་པོ་ལས་གྲུབ་པའི་ས་ཆེན་པོ་དར་བཅོམ་ལྡན་འདས་དེ་བཞིན་གཤེགས་པ་ཡོན་ཏན་གྱི་རྒྱལ་པོར་སྣང་བ་དེའི་གཟུགས་བརྙན་མཐོང་བར་འགྱུར་རོ། །དེ་དག་གིས་མཐོང་མ་ཐག་ཏུ་ཆོས་འདི་དག་ཐམས་ཅད་ནི། གཟུགས་བརྙན་ལྟ་བུའོ། །ཞེས་དྲན་པ་སྐྱེ་བར་འགྱུར་རོ། །བྱང་ཆུབ་སེམས་དཔའ་གང་ཆོས་གང་ལ་ཐེ་ཚོམ་ཟ་བ་ན་དེ་དེ་བཞིན་གཤེགས་པས་དེ་ལ་སྣང་བར་གྱུར་པ་དེ་ལ་ཞུ་བར་འགྱུར་རོ། །དེ་བཞིན་གཤེགས་པ་དེས་ཀྱང་བྱང་ཆུབ་སེམས་དཔའ་དེ་དག་ལ་ཞུས་པའི་ལུང་བསྟན་པས་སེམས་རངས་པར་མཛད་པར་འགྱུར་རོ། །བྱང་ཆུབ་སེམས་དཔའ་དེ་དག་གིས་ཆོས་དེ་ཐོས་ནས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །ཀུན་དགའ་བོ། འཇིག་རྟེན་གྱི་ཁམས་དེ་ན་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་ཡོད་པར་མི་འགྱུར་རོ། །སེམས་ཅན་དེ་དག་ཐམས་ཅད་ཀྱང་ནམ་མཁའ་ལ་ཁང་པ་བརྩེགས་པ་ན་འཁོད་པར་འགྱུར་རོ། །སངས་རྒྱས་ཀྱི་ཞིང་དེར་བུད་མེད་དུ་གདགས་པའང་མེད་པར་འགྱུར་རོ། །སེམས་ཅན་དེ་དག་ཐམས་ཅད་ཀྱང་པདྨའི་སྙིང་པོ་ལས་བརྫུས་ཏེ་སྐྱེ་བར་འགྱུར་རོ། །འཇིག་རྟེན་གྱི་ཁམས་དེ་ན་ཁ་ཟས་སུ་གདགས་པ་མེད་དེ། སེམས་ཅན་ 452b བདག་ཐམས་ཅད་ནི། བསམ་གཏན་ལ་དགའ་བ་དང ། ཆོས་ལ་དགའ་བའི་ཟས་ཅན་དུ་འགྱུར་རོ། །འཇིག་རྟེན་གྱི་ཁམས་དེ་ན་གཞན་རྣམ་པར་གཞག་པ་མེད་དེ། སེམས་ཅན་དེ་དག་ཐམས་ཅད་ནི།་ཐེག་པ་ཆེན་པོ་ལ་ངེས་པར་འགྱུར་བ་དག་གོ་།འཇིག་རྟེན་གྱི་ཁམས་དེ་ན་ཚུལ་ཁྲིམས་ལོག་པར་ཞུགས་པའམ། ལྟ་བ་ལོག་པར་ཞུགས་པའམ། ཆོ་ག་ལོག་པར་ཞུགས་པའམ། འཚོ་བ་ལོག་པར་ཞུགས་པའི་སེམས་ཅན་འགའ་ཡང་མེད་པར་འགྱུར་རོ། །སེམས་ཅན་དེ་དག་ཐམས་ཅད་ནི། ནན་ཏན་དང་ལྡན་པ་སྟེ། སངས་རྒྱས་ཀྱི་ཆོས་རྣམས་ལ་བརྩོན་འགྲུས་བརྩམས་པར་འགྱུར་བ་ཤ་སྟག་གོ་།སངས་རྒྱས་ཀྱི་ཞིང་དེ་ན་བདུད་དམ། བདུད་ཀྱི་རིས་ཀྱི་ལྷའམ། གཞན་མུ་སྟེགས་ཅན་སྤྱོད་པ་ཅན་དང ། ཀུན་ཏུ་རྒྱུ་དང ། དམིགས་པའི་ལྟ་བ་ལ་མངོན་པར་ཞེན་པ་དང ། ཕ་རོལ་རྒོལ་བ་མེད་པར་འགྱུར་རོ། །སེམས་ཅན་དེ་དག་ཐམས་ཅད་ནི། ཟབ་མོའི་སྤྱོད་ཡུལ་སྟོང་པ་ཉིད་ཀྱི་ཕྱག་རྒྱས་བཏབ་པར་འགྱུར་རོ། །འཇིག་རྟེན་གྱི་ཁམས་དེ་ན་མིང་དུ་བཏགས་པ་ཙམ་དང ། འདུ་ཤེས་ཙམ་མ་གཏོགས་པར་ལྷ་དང ། མི་ཞེས་ཐ་དད་དུ་བྱ་བ་མེད་པར་འགྱུར་རོ། །སེམས་ཅན་དེ་དག་ཐམས་ཅད་ནི།་ཡོངས་སུ་སྤྱད་པ་མཚུངས་པར་འགྱུར་རོ། །ཀུན་དགའ་བོ། བཅོམ་ལྡན་འདས་ཡོན་ཏན་གྱི་རྒྱལ་པོར་སྣང་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་ 453a ༄#། །སངས་རྒྱས་དེའང་ལྷ་དང ། མི་རྣམས་ཀྱི་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བའི་ཕྱིར་བར་གྱི་བསྐལ་པ་བཅུ་ཐམ་པར་བཞུགས་པར་འགྱུར་རོ། །བཅོམ་ལྡན་འདས་ཡོན་ཏན་གྱི་རྒྱལ་པོར་སྣང་བ་དེ་བཞིན་གཤེགས་པ་དེ་གང་གི་ཚེ་ཡོངས་སུ་མྱ་ངན་ལས་འདས་པར་བཞེད་པ་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་བརྩོན་འགྲུས་འབར་བ་འདི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། བཀོད་པ་ཆེན་པོ་ཞེས་བྱ་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འགྱུར་རོ། །ཞེས་བྱང་ཆུབ་སེམས་དཔའ་བརྩོན་འགྲུས་འབར་བ་ཞེས་བྱ་བ་ལུང་བསྟན་ནས་མྱ་ངན་ལས་འདའ་བར་འགྱུར་རོ། །ཀུན་དགའ་བོ། བར་གྱི་བསྐལ་པ་དེའང་སངས་རྒྱས་དཀོན་མཆོག་དང ། ཆོས་དཀོན་མཆོག་དང ། དགེ་འདུན་དཀོན་མཆོག་དང་མི་འབྲལ་བར་འགྱུར་ཏེ།་བར་གྱི་བསྐལ་པ་དེ་ནི། དཀོན་མཆོག་འབྱུང་བ་ཞེས་བརྗོད་དོ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་ལས་ལུང་བསྟན་པ་ཐོས་ནས་དགའ་ཞིང་མགུ་སྟེ་ཡིད་ 453b རངས་ཤིང་རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ། བྱང་ཆུབ་སེམས་དཔའི་དགའ་བ་དང ། མཆོག་ཏུ་དགའ་བའི་ཤུགས་ཀྱིས་ས་ལས་སྟེང་གི་བར་སྣང་ལ་ཤིང་ཏ་ལ་བདུན་ཙམ་དུ་འཕགས་ཏེ་ཐམས་ཅད་དང་ལྡན་པའི་འཁོར་དད་པ་རྒྱ་ཆེར་སྤེལ་བ་དང ། དགེ་བའི་རྩ་བ་ཡང་དག་པར་བསྐྱེད་པའི་ཕྱིར་སངས་རྒྱས་ཀྱི་མཐུ་དང ། རང་གི་ཤེས་རབ་ཀྱི་སྤོབས་པས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ཆོས་འདི་ཐམས་ཅད་རབ་ཏུ་དབེན་པ་དང ། །དྲི་མ་མེད་དེ་ནམ་མཁའི་ངོ་བོ་ཉིད། །རྒྱུད་ཀྱི་དམ་པ་འདི་ནི་རྣམ་ཤེས་ན། །དེ་ཕྱིར་དེ་དག་ཐུབ་སྲས་ཐུ་བོར་འགྱུར། །རྨི་ལམ་བཞིན་དུ་མཐོང་བ་ཅུང་ཟད་མེད། །ཐམས་ཅད་མེད་དེ་གཟུང་མེད་གསོག་དང་གསོབ། །ཆོས་རྣམས་ཐམས་ཅད་རྨི་ལམ་འདྲར་ཤེས་ནས། །འདུས་བྱས་དག་པ་སྐྱོ་བར་འགྱུར་བ་མེད། །ལ་ལས་སྒྱུ་མའི་རྟ་དང་གླང་ཆེན་དང ། །ཤིང་རྟ་དཔུང་བུ་ཆུང་དང་བཞོན་མཐོང་བ། །དམ་པའི་དོན་དུ་སྙིང་པོ་མེད་པ་ལྟར། །ཕུང་པོ་འདི་དག་སྒྱུ་འདྲ་སྙིང་པོ་མེད། །གཟུགས་ཀྱི་རང་བཞིན་དབུ་བ་བརྡོས་པ་བཞིན། །ཚོར་བ་འདི་ནི་ཆུ་ཡི་ཆུ་བུར་འདྲ། །འདུ་ཤེས་དག་ནི་སྨིག་རྒྱུ་འདྲ་བར་གཟུངས། །འདུས་བྱས་ཐམས་ཅད་ཆུ་ཤིང་སྙིང་པོ་མེད། །སྲིད་གསུམ་འདི་ནི་སེམས་ཡིད་རྣམ་པར་ཤེས། །རྒྱལ་བས་དེ་བཞིན་སྒྱུ་འདྲ་གསོག་ཏུ་གསུངས། །གཟུགས་ཀྱི་རང་བཞིན་སྟོང་པར་རིག་ནས་ནི། །འདུས་བྱས་དག་ལ་ནམ་ཡང་སྐྱོ་བ་མེད། ། 454a ༄#། །ཁམས་བཞི་པོ་ནི་ཆོས་ཀྱི་དབྱིངས་འདྲ་དང ། །སྐྱེ་མཆེད་རྣམས་ནི་གྲོང་སྟོང་ལྟ་བུ་དང ། །ཆོས་འདི་གསོག་དང་གསོབ་ལྟར་རྣམ་ཤེས་པ། །དེ་དག་རྒྱལ་པའི་ཆོས་མཛོད་འཛིན་པ་ཡིན། །རབ་ཏུ་དུལ་ཕྱིར་སྦྱིན་དང་དུལ་བ་དང ། །དེ་བཞིན་ཚུལ་ཁྲིམས་རྣམ་དག་ཚུལ་ཁྲིམས་དང ། །རྟག་ཏུ་འཕགས་པའི་ཚུལ་གྱིས་བཟོད་མི་ཟད། །སྟོང་པ་ཉིད་ཕྱིར་བརྩོན་འགྲུས་རྣམ་པར་དག་།བསམ་གཏན་རང་བཞིན་འགྱུར་བ་མེད་པ་དང ། །དེ་ལྟར་ཤེས་རབ་ཆགས་མེད་མ་སྤྲོས་པར། །གང་གི་འཇུག་པ་དེ་འདྲར་གྱུར་པ་དེ། །ཕ་རོལ་ཕྱིན་པའི་ཕ་རོལ་རབ་ཏུ་ཕྱིན། །བདག་མེད་ཁོ་ན་ཉིད་ཕྱིར་བྱམས་པ་མཉམ། །ནམ་མཁའ་ལྟ་བུར་གོང་དུ་སྙིང་རྗེ་དག་།ཞི་ཕྱིར་དགའ་དང་བཏང་སྙོམས་བཅས་པ་ཡི། །ལམ་འདི་ཚངས་པའི་ལམ་སྟེ་རྟག་ཏུ་ཞི། །བསྡུ་བ་བཞི་པོ་ཁྱད་པར་འཕགས་པ་འདི། །རྣམ་པར་འདྲེན་པས་རྗེས་སུ་གཟུང་ཕྱིར་གསུངས། །འཛིན་པ་མེད་ཅིང་རྣམ་རྟོག་གང་མེད་པ། །དེ་ནི་བསྡུ་བའི་དངོས་པོའི་ཕ་རོལ་ཕྱིན། །སེམས་ཅན་འདི་དག་བདག་མེད་སེམས་ཅན་མེད། །སྲོག་དང་གསོ་བ་གང་ཟག་མི་རྙེད་དོ། །དབང་པོ་དྲུག་འདི་སྟོང་སྟེ་རབ་ཞི་བར། །གང་ཤེས་དེ་ནི་བྱང་ཆུབ་སེམས་དཔའ་ཡིན། །སེམས་ཅན་མེད་ཅིང་བྱང་ཆུབ་སེམས་དཔའ་མེད། །དེ་ནི་གང་དུའང་བདག་མེད་རློམ་སེམས་མེད། །གཉིས་དང་བྲལ་ཞིང་མ་ཆགས་སྤྲོས་མེད་པ། ། 454b སེམས་ཅན་བྱང་ཆུབ་སེམས་དཔའ་དེ་དཔལ་ལྡན། །ཆོས་འདི་སྙིང་པོ་མེད་དེ་སྒྱུ་མ་འདྲ། །གང་དུའང་མི་འོང་ནམ་ཡང་འགྲོར་མི་འགྱུར། །ཆོས་དབྱིངས་འདི་ཡི་གནས་པ་རིག་ནས་ནི། །རྒྱལ་བས་དེ་བཞིན་ཉིད་ནི་མཉམ་སངས་རྒྱས། །གང་ནའང་ཡོད་པའམ་མེད་པ་མེད་མོད་ཀྱི། །རྒྱུ་ལ་བརྟེན་ནས་ཆོས་རྣམས་འབྱུང་བས་ན། །མཁའ་ལ་གློག་མཐོང་འཇིག་པ་ལྟ་བུར་ནི། །སེམས་ཀྱི་འཁྲི་ཤིང་དེ་ལྟར་ཤེས་པར་བྱ། །རླུང་ནི་ནམ་མཁར་མི་ཆགས་རྒྱུ་བ་བཞིན། །གཟུགས་མེད་སེམས་ནི་འདུས་བྱས་དག་ལ་རྒྱུ། །སེམས་ཀྱི་རང་བཞིན་རྣམ་དག་དེ་ཤེས་ནས། །ཉོན་མོངས་གཟུགས་མེད་གསོག་པར་མི་འགྱུར་རོ། །ལུས་ནི་རྩིག་པ་རྩཝ་དང་ལོ་མ་འདྲ། །བླུན་པ་རྗེ་མེད་རྔོ་ཤིང་ངན་པ་ལྟར། །དེ་ཡིས་སྔ་མའི་རང་བཞིན་འདྲར་ཤེས་ནས། །ལུས་ཀྱི་ཆོས་ལ་གནས་པར་མི་བྱེད་དོ། །ཚིག་ནི་རྟག་ཏུ་གཟུང་མེད་རླུང་དང་འདྲ། །རི་དང་བྲག་གི་བྲག་ཅ་ལྟ་བུ་སྟེ། །དེ་འདྲར་སྒྲ་ནི་རབ་ཏུ་དབེན་ཤེས་པ། །སྒྲ་རྣམས་ཀུན་ལ་འདོད་པའི་ཆགས་པ་མེད། །བདག་ནི་ནམ་མཁའི་ངོས་གནས་མི་ལྟུང་སྟེ། །མཁའ་ལས་ལྟུང་བའི་གནས་ཀྱང་ཡོད་མ་ཡིན། །ཆོས་འདི་ནམ་མཁའ་འདྲ་བར་བསྒོམས་ནས་ནི། །དེ་ལྟར་སེམས་ཅན་སེམས་ཅན་མེད་མཚུངས་གནས། །བསྐལ་པ་བརྒྱ་ཕྲག་མང་པོར་བསྲེགས་ཀྱང་ནི། །ཇི་ལྟར་ནམ་མཁའ་ནམ་ཡང་སྔོན་མ་ཚིག་།ཆོས་རྣམས་ཐམས་ཅད་ནམ་མཁར་འདྲར་ཤེས་པ། །དེ་སྲེག་བསྐལ་ 455a ༄#། །ཚེ་ཞིང་རྣམས་བརྒྱར་ཡང་འགྲོ་།རི་དང་རི་བར་ཁོར་ཁོར་ཡུག་རི། །དེ་བཞིན་རི་དང་བཅས་པའི་ས་རྣམས་ཀུན། །ནམ་མཁའི་ངོས་ཀྱིས་ཕྱེ་བར་རིག་ནས་དེ། ། རྫུ་འཕྲུལ་སྟོབས་ཀྱིས་བྱེ་བའི་ཞིང་དུ་འགྲོ་།ས་དང་ཆུ་དང་མེ་དང་རླུང་དག་དང ། །ཁམས་བཞི་འདི་དག་ནམ་མཁའི་ངོས་མཉམ་པར། །དཔའ་བོ་ཚུལ་འདི་ཁོང་དུ་ཆུད་པ་དག་།མཁའ་ལས་བྱེ་བ་མཐའ་ཡས་ཞིང་དུ་འགྲོ་།སྲིད་པ་གསུམ་ན་སྒྲ་དང་སྐད་ཀྱི་བག་།བཟང་ངན་དེ་བཞིན་འབྲིང་པོ་ཅི་ཡོད་པ། །དེ་ཡི་མཐའ་མ་བསྐལ་པ་བརྒྱར་བརྗོད་ཀྱང ། །སྔོན་གྱི་རང་བཞིན་མི་སྣང་རྒྱུ་བ་མེད། །རང་བྱུང་བ་ནི་མཚན་མཆོག་མ་ཡིན་ཡང ། །སེམས་ཀྱི་ཆོས་ཀྱིས་གཟུགས་ཀྱིས་རབ་ཏུ་ཕྱེ། །སེམས་དང་ཡིད་ནི་མཚུངས་པ་དབེན་པར་གྱུར། །རྒྱལ་བ་ཐམས་ཅད་ཆོས་མཚུངས་ཉིད་ཕྱིར་མཉམ། །སྔོན་གྱི་སྲིད་པར་བྱང་ཆུབ་སྤྱད་སྤྱོད་ཅིང ། །དགེ་བ་བརྒྱ་སྟོང་རབ་ཏུ་བསགས་ནས་ནི། །བྱང་ཆུབ་མཉམ་ཞིང་མཉམ་པར་རབ་ཤེས་པ། །གྲགས་པ་ཆེན་པོ་རྣམས་ནི་ལུང་བསྟན་འགྱུར། །ཆོས་རྣམས་ཀུན་ནི་རང་ཡུལ་ཡོངས་དག་སྟེ། །མཐའ་ཡས་ཕྱིར་ནི་རྒྱལ་བའི་ཡུལ་དུ་མཉམ། །མཉམ་ཉིད་འདི་དག་གང་གིས་རབ་ཤེས་པ། །ཡོན་ཏན་ལྡན་པ་དེ་དག་ལུང་བསྟན་འགྱུར། །བདག་ནི་གཟུགས་མིན་ཚོར་མིན་འདུ་ཤེས་མིན། །སེམས་པ་མ་ཡིན་རྣམ་པར་ཤེས་མེད་ཀྱང ། །བྱང་ཆུབ་ཁོང་དུ་ཆུད་ 455b པས་བདག་ལུང་བསྟན། །ཕུང་པོ་ཁམས་ཀྱིས་བདག་ནི་ལུང་མ་བསྟན། །བཟོད་པ་གང་ཞིག་གཟོད་མ་ནས་ཞི་ཡི། །སྐད་ཅིག་པ་ནི་ཟད་དང་འདྲ་མིན་ལ། །མཚུངས་མེད་མི་སྐྱེ་བ་ལ་བཟོད་པ་ན།། མི་དབང་འགྱུར་ཞེས་རྒྱལ་བས་ལུང་བསྟན་ཏོ། །ཆོས་རྣམས་ཀུན་དང་བདག་ཏུ་རང་བཞིན་མཉམ། །བདག་ནི་བདག་མེད་སྟོང་པའི་རང་བཞིན་ཏེ། །སྟོང་པ་ནམ་མཁའ་འདྲ་བའི་ངོ་བོ་ཉིད། །བྱང་ཆུབ་རྟག་ཏུ་མཁའ་མཉམ་རང་བཞིན་ནོ། །ཟད་པར་བྱ་ཕྱིར་ཟད་པ་ཤེས་མི་ནུས། །མི་ཟད་པ་ནི་ཟད་པས་ཟད་མི་འགྱུར། །ཟད་པའི་སྒོ་ཡིས་ཆོས་རྣམས་ཀུན་མ་སྐྱེས། །བཟོད་དང་ལྡན་ལ་སངས་རྒྱས་ལུང་སྟོན་ཏོ། །མཚན་མེད་གནས་འཇུག་པ་ཡི་གནས་མེད་དེ། །ཡང་དག་འདུས་མ་བྱས་པ་དུས་ལས་གྲོལ། །མ་བྱས་བྱེད་དུ་མ་བཅུག་བྱུང་བ་མིན། །དེ་བཞིན་ཉིད་འདྲར་རྒྱལ་བས་བདག་ལུང་བསྟན། །གལ་ཏེ་བདག་ནི་ལུང་བསྟན་འགྱུར་སྙམ་ན། །ཆོས་ལམ་ཚུལ་ལ་མི་མཉམ་སྦྱོར་བ་ཡིན། །སེམས་དང་ཡིད་ཀྱིས་སྦྱོར་བ་སྦྱོར་མ་ཡིན། །ཆོས་སྦྱོར་ཁྱད་པར་འཕགས་འདི་མཚུངས་ཤིང་མཉམ། །ཁྱེད་ཅག་ཐམས་ཅད་ས་ཡི་སྟེང་ན་འཁོད། །བདག་ནི་ནམ་མཁའི་དཀྱིལ་ན་རྣམ་པར་གནས། །ས་དང་ནམ་མཁའ་མཉམ་པར་ཤེས་ནས་ནི། །སྲིད་པ་གསུམ་ན་ཆགས་མེད་ཡེ་ཤེས་འཇུག་།དེ་ནས་མི་འམ་ཅིའི་རྒྱལ་པོ་སྡོང་པོས་ཚིགས་སུ་བཅད་པ་འདི་དག་སྨྲས་ནས་སྟེང་གི་བར་སྣང་ལས་བབས་ཏེ་ཐལ་མོ་སྦྱར་ནས་བཅོམ་ལྡན་འདས་ལ་ཕྱག་ 456a ༄#། །བཙལ་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སངས་རྒྱས་ནི། བདག་གི་ཆེད་དུ་བྱུང་ངོ ། །དེ་ཅིའི་སླད་དུ་ཞེ་ན། བཅོམ་ལྡན་འདས།་བདག་སྔོན་བྱང་ཆུབ་སེམས་དཔའི་སྤྱོད་པ་དོན་མ་མཆིས་པར་མ་བགྱིས་ཏེ། སྔོན་གྱི་དགེ་བའི་རྩ་བ་རྣམས་ཀྱིས་བདག་མ་བསླུས་པས་བཅོམ་ལྡན་འདས་ཀྱིས་བདག་གི་བསམ་པ་ཐམས་ཅད་ཡོངས་སུ་བསྐང་བའི་སླད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་འཁོར་དེའི་ནང་ན་བྱང་ཆུབ་སེམས་དཔའ་ཁ་ཅིག་འདི་ལྟ་བུའི་སེམས་བསྐྱེད་དེ། མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ལས་དང་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་སྙམ་མོ། །དེ་ནས་བྱང་ཆུབ་སེམས་དཔའ་ལྷའི་ཅོད་པན་གྱིས་བྱང་ཆུབ་སེམས་དཔའ་དེ་དག་གི་སེམས་ཀྱི་རྣམ་པར་རྟོག་པ་སེམས་ཀྱིས་ཤེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་གང་ལས་བྱང་ཆུབ་ཏུ་སེམས་བསྐྱེད་པའི་དེ་བཞིན་གཤེགས་དེའི་མཚན་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སྔོན་བྱུང་བ་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ། རྒྱས་པ། 456b ཚད་མེད་པ། བསམ་གྱིས་མི་ཁྱབ་པར་གྱུར་པ་དེའི་ཚེ་དེའི་དུས་ན་རྣམ་པར་དག་པ་ཞེས་བྱ་བའི་བསྐལ་པ་ལ་འཇིག་རྟེན་གྱི་ཁམས་དགེ་བ་ཞེས་བྱ་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ་བླ་ན་མེད་པ། ལྷ་དང་མི་རྣམས་ཀྱི་སྟོན་པ།་སངས་རྒྱས་བཅོམ་ལྡན་འདས་རིན་ཆེན་ཕུང་པོ་ཞེས་བྱ་བ་འཇིག་རྟེན་དུ་བྱུང་ངོ ། །རིགས་ཀྱི་བུ། དེའི་ཚེ་དེའི་དུས་ན་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཕུང་པོ་དེའི་བྱང་ཆུབ་སེམས་དཔའི་དགེ་འདུན་ནི། བྱེ་བ་ཕྲག་དྲུག་ཅུར་གྱུར་ཏེ། ཐམས་ཅད་ཀྱང་བརྩོན་འགྲུས་བརྩམས་པ། བཟོད་པ་རབ་ཏུ་ཐོབ་པ།་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཤ་སྟག་གོ་།དེའི་ཚེའི་ཚད་ནི། ལོ་བྱེ་བ་ཕྲག་དྲུག་ཅུ་ཐོབ་པར་གྱུར་ཏོ། །དགེ་བ་ཞེས་བྱ་བའི་འཇིག་རྟེན་གྱི་ཁམས་དེའང་བཻཌཱུརྱ་ལས་གྲུབ་པ། རྒྱན་ཐམས་ཅད་ཀྱིས་བརྒྱན་པ། རྣམ་པའི་མཆོག་ཐམས་ཅད་དང་ལྡན་པ། དགའ་ལྡན་གྱི་ལྷའི་རིས་ལྟ་བུར་ཁང་ཁྱིམ་དང ། ལོངས་སྤྱོད་དང ། ཉེ་བར་སྤྱོད་པ་དང ། བཟའ་བ་དང ། བཏུང་བ་བསམ་པ་ཙམ་གྱིས་འབྱོར་བའོ། །སངས་རྒྱས་ཀྱི་ཞིང་དེ་ན་ཐེག་པ་ཆེན་པོ་མ་གཏོགས་པར་ཐེག་པ་གཞན་རྣམ་པར་བཞག་པ་མེད་པར་གྱུར་ཏོ། ། 457a ༄#། །རིགས་ཀྱི་བུ། དེའི་ཚེ་དེའི་དུས་ན་གླིང་བཞི་པ་དབང་བའི་འཁོར་ལོས་བསྒྱུར་བའི་རྒྱལ་པོ་ས་འཛིན་ཅེས་བྱ་བ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་སྟེ། དེའི་སླས་ནི།་སྟོང་ཕྲག་བཞི་བཅུ་ཡོད་དོ། །དེའི་བུ་ནི། སྟོང་ཐམ་པ་ཡོད་དེ། དཔའ་བ། རྟུལ་ཕོད་པ། ཡན་ལག་མཆོག་གི་གཟུགས་ཅན། ཕ་རོལ་གྱི་སྡེ་རབ་ཏུ་འཇོམས་པ་ཤ་སྟག་གོ་།རིགས་ཀྱི་བུ། རྒྱལ་པོ་ས་འཛིན་དེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་དང ། བྱང་ཆུབ་སེམས་དཔའ་བྱེ་བ་ཕྲག་དྲུག་ཅུ་ལ་ལོ་བྱེ་བ་ཐམ་པར་ཡིད་དུ་འོང་བའི་ཆོས་གོས་དང ། ཞལ་ཟས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་དང ། བདེ་བར་སྦྱར་བ་བདེ་བ་ལ་རེག་པར་གནས་པར་བྱ་བ་ཐམས་ཅད་ཀྱིས་བསྙེན་བཀུར་བྱས་ནས་དེས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལ་མཆོད་པ་དཔག་ཏུ་མེད་པ་བྱས་ཏེ་དགེ་བའི་རྩ་བས་ཉེ་བར་བརྟེན་ནས་བུད་མེད་བཞི་སྟོང་པོ་དེ་དག་དང ། བུ་སྟོང་པོ་དེ་དག་དང ། སྲོག་ཆགས་བརྒྱད་ཁྲི་བཞི་སྟོང་དང་ལྷན་ཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེས་བྱང་ཆུབ་ཏུ་སེམས་བསྐྱེད་ནས་ཀྱང་ལོ་བྱེ་བར་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལ་བསྙེན་བཀུར་བྱས་སོ། །དེ་དུས་གཞན་ཞིག་ན་བུ་ཐུ་བོ་བརྟུལ་ཞུགས་ 457b ཡོངས་སུ་དག་པ་ཞེས་བྱ་བ་རྒྱལ་པོར་བཅུག་ནས་རྒྱལ་སྲིད་ཐམས་ཅད་བོར་ཏེ་སྐྲ་དང ། ཁ་སྤུ་བྲེགས་ནས་གོས་ངུར་སྨྲིག་བགོས་ཏེ་བཅོམ་ལྡན་འདས་དེའི་བསྟན་པ་ལ་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ ། །དེ་ནས་རྒྱལ་པོའི་བུ་དེ་དག་གིས་ཀྱང་རིམ་གྱིས་བུ་ཐུ་བོ་རེ་རེ་རྒྱལ་པོར་བཅུག་ནས་ཕའི་རྗེས་སུ་རབ་ཏུ་བྱུང་བར་གྱུར་ཏོ། །རིགས་ཀྱི་བུ། དེ་ལྟར་ན།་རྣམ་གྲངས་འདིས་དེ་བཞིན་གཤེགས་པ་དེའི་ཚེའི་ཚད་རིང་བར་གྱུར་ཏོ། །རྒྱལ་པོ་གཞོན་ནུ་དེ་དག་ཐམས་ཅད་དེ་བཞིན་གཤེགས་པ་དེ་ལས་རབ་ཏུ་བྱུང་ནས་རྒྱལ་བུ་གཞོན་ནུ་ཐ་ཆུང་སྙིང་རྗེའི་བློ་ཞེས་བྱ་བ་གཅིག་པུ་མ་གཏོགས་ཏེ། དེ་ནི། ཆོས་ཀྱིས་རྒྱལ་སྲིད་བྱེད་པ་ཆད་པ་མེད་པ་དང ། མཚོན་ཆ་མེད་པར་ཆོས་དང་མཐུན་པར་དབང་བྱེད་དུ་བཅུག་གོ ། རིགས་ཀྱི་བུ། དེ་ལྟར་རྒྱལ་པོ་ས་འཛིན་དེ་བུ་དང་བཅས་པར་བཅོམ་ལྡན་འདས་དེའི་བསྟན་པ་ལ་རབ་ཏུ་བྱུང་ནས་ཐོག་མ་དང ། བར་མ་དང ། ཐ་མར་དེ་བཞིན་གཤེགས་པ་རིན་ཆེན་ཕུང་པོ་དེའི་དམ་པའི་ཆོས་རབ་ཏུ་བཟུང་ངོ ། །རིགས་ཀྱི་བུ། དེའི་ཚེ་དེའི་དུས་ན་གླིང་བཞི་ལ་དབང་བའི་འཁོར་ལོས་བསྒྱུར་བའི་རྒྱལ་པོ་ས་འཛིན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དོགས་ཤིང་ཐེ་ཚོམ་ཟའམ། ཡིད་གཉིས་སུ་གྱུར་པ་ལྟ་ན། རིགས་ཀྱི་བུ། ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། མི་འམ་ཅིའི་རྒྱལ་པོ་སྡོང་པོ་འདི་དེའི་ཚེ་ 458a ༄#། །དེའི་དུས་ན་རྒྱལ་པོ་ས་འཛིན་ཅེས་བྱ་བར་གྱུར་ཏོ། །རྒྱལ་པོ་དེའི་བུར་གྱུར་པ་དེ་དག་ཐམས་ཅད་ནི། ད་ལྟར་ཕྱོགས་བཅུ་ན་བྱང་ཆུབ་སེམས་དཔའི་སྤྱད་པ་སྤྱོད་དོ། །རིགས་ཀྱི་བུ། དེ་ལྟར་ན་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་དེ་བཞིན་གཤེགས་པ་རིན་ཆེན་ཕུང་པོ་དེ་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དང་པོ་སེམས་བསྐྱེད་ཚུན་ཆད་དེའི་བར་ཐམས་ཅད་དུ་སངས་རྒྱས་མཐོང་བ་དང ། ཆོས་ཉན་པ་དང ། དགེ་འདུན་ལ་རིམ་གྲོ་བྱེད་པ་དང་མ་བྲལ་བར་གྱུར་ཏོ། །འདིས་ཡང་དག་པར་རྫོགས་པའི་བྱང་ཆུབ་ཀྱི་ཚོགས་ཀྱང་མྱུར་དུ་ཡང་དག་པར་བསྒྲུབས་པས་འདི་ལ་ངས་འདི་ནི། མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་གྱི་རྒྱལ་པོ་ཞེས་བྱ་བར་འགྱུར་རོ། །ཞེས་ལུང་ཡང་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ཙམ་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཐོགས་པ་མི་མངའ་པའི་མཁྱེན་པ་དང་ལྡན་པས་འདི་ལྟར་དགེ་བའི་རྩ་བ་མངོན་པར་འདུས་བགྱིས་པའི་རྒྱུ་བ་ནས་ཡུན་རིང་དུ་ 458b ལགས་པའང་བཅོམ་ལྡན་འདས་ཀྱིས་སྒྲིབ་པ་མི་མངའ་བའི་མཁྱེན་པས་གཟིགས་པ་ནི། ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། ཐོགས་པ་མེད་པའི་ཡེ་ཤེས་མཐོང་བ་དང་ལྡན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ།་གང་སེམས་ཅན་ཐམས་ཅད་ཀྱི་འདས་པའི་སེམས་ཀྱི་རྒྱུ་ཟད་པ། འགགས་པ། བྲལ་བ། རྣམ་པར་གྱུར་པ། རྒྱུ་གང་དག་ལས་སེམས་ཀྱི་རྒྱུད་དེ་དག་བྱུང་བ་དང ། རྒྱུ་གང་དག་མེད་པས་ཟད་པ། དགེ་བའམ། མི་དགེ་བའམ། ལུང་དུ་བསྟན་པའམ། ལུང་དུ་མ་བསྟན་པ་དེ་དག་ཐམས་ཅད་རྣམ་པ་དང་བཅས། གཞི་དང་བཅས། གཏན་ཚིགས་དང་བཅས་པས་དེ་བཞིན་གཤེགས་པས་རབ་ཏུ་ཤེས་སོ། །ད་ལྟར་བྱུང་བའི་དུས་ཀྱི་སེམས་ཅན་ཐམས་ཅད་ཀྱི་སེམས་ཀྱི་རྒྱུད་བྱུང་བ་དགེ་བའམ། མི་དགེ་བའམ། ལུང་དུ་བསྟན་པའམ། ལུང་དུ་མ་བསྟན་པའང་རུང་སྟེ། སེམས་གང་གི་འོག་ཏུ་སེམས་གང་བྱུང་བ་དེ་དག་ཐམས་ཅད་ཀྱང་རྣམ་པ་དང་བཅས། གཞི་དང་བཅས། གཏན་ཚིགས་དང་བཅས་པར་དེ་བཞིན་གཤེགས་པས་རབ་ཏུ་ཤེས་སོ། །གང་མ་འོངས་པའི་སེམས་ཅན་ཐམས་ཅད་ཀྱི་སེམས་ཀྱི་རྒྱུད་དང ། སེམས་ལས་བྱུང་བའི་ཆོས་དགེ་བའམ། མི་དགེ་བའམ། ལུང་དུ་བསྟན་པའམ། ལུང་དུ་ 459a ༄#། །མ་བསྟན་པའང་རུང་སྟེ། སེམས་གང་གི་འོག་ཏུ་སེམས་གང་འབྱུང་བར་འགྱུར་བ་དེ་དག་ཐམས་ཅད་ཀྱང་རྣམ་པ་དང་བཅས། གཞི་དང་བཅས་པ། གཏན་ཚིགས་དང་བཅས་པར་དེ་བཞིན་གཤེགས་པས་རབ་ཏུ་ཤེས་སོ། །རིགས་ཀྱི་བུ། དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི། ཐོགས་པ་མེད་པའི་ཡེ་ཤེས་དང་ལྡན་ནོ། །དེ་བཞིན་གཤེགས་པའི་མཁྱེན་པ་ཐོགས་པ་མི་མངའ་བ་བསྟན་པ་འདི་བཤད་པ་ན་སྲོག་ཆགས་སུམ་འབུམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་མི་འམ་ཅིའི་རྒྱལ་པོ་སྡོང་པོས་བཅོམ་ལྡན་འདས་བྱང་ཆུབ་སེམས་དཔའ་དང ། ཉན་ཐོས་ཀྱི་དགེ་འདུན་གྱི་འཁོར་དང་བཅས་པ་ལ་ཞག་བདུན་བདེ་བར་སྦྱར་བ་ཐམས་ཅད་ཀྱིས་བསྙེན་བཀུར་བྱས་ནས་ཡོངས་སུ་ལོངས་སྤྱད་པར་བྱ་བའི་ཕྱིར་རང་གི་ཁང་ཁྱིམ་དང ། འཁོར་གྱི་ཁྱམས་དེའང་བཅོམ་ལྡན་འདས་ལ་ཕུལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་རྟག་ཏུ་འདིར་གཤེགས་ཤིང་བཞུགས་པར་གསོལ། དེས་ན། སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་ཐུགས་བརྩེ་བ་དང ། སྐྱེ་བོའི་ཚོགས་ཕལ་པོ་ཆེའི་དོན་དང ། མི་འམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་རྣམས་ལ་ཕན་པ་དང ། བདེ་བར་འགྱུར་ 459b རོ། །དེ་ནས་མི་འམ་ཅིའི་རྒྱལ་པོ་སྡོང་པོའི་བྱ་དྲི་མ་མེད་པའི་མིག་ཅེས་བྱ་བས་བཅོམ་ལྡན་འདས་ལ་ནོར་བུ་རིན་པོ་ཆེའི་དྲ་བ་ཕུལ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས། མི་འམ་ཅི་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་ཡང་དག་པར་ཞུགས་སུ་ལགས་ཀྱང་བདག་ཅག་ནི། སིལ་སྙན་དང ། རོལ་མོའི་དབྱངས་སྒྲ་དང ། གླུ་དང ། གར་ལ་རབ་ཏུ་ཆགས། མེ་ཏོག་དང ། སྤོས་དང ། བདུག་པ་དང ། བྱུག་བ་དང ། ཕྱེ་མ་ལ་བག་མ་མཆིས་པར་དགའ་ཞིང་རྩེ་བ་ལགས་ན། ཇི་ལྟར་བདག་ཅག་བག་མཆིས་པར་འགྱུར་ཞིང ། བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡང་དག་པར་སྒྲུབ་པར་འགྱུར་བ་དེ་ལྟ་བུའི་ཆོས་རིན་པོ་ཆེའི་ཕྱག་རྒྱའི་སྒོའི་གདམས་དག་བཅོམ་ལྡན་འདས་ཀྱིས་བདག་ཅག་ལ་སྩལ་བར་གསོལ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་མི་འམ་ཅིའི་རྒྱལ་པོའི་བུ་དྲི་མ་མེད་པའི་མིག་ལ་འདི་སྐད་ཅེས་བཀའ་སྩལ་ཏོ། །བཞིན་བཟད། དེའི་ཕྱིར་དེང་ཕྱིན་ཆད་སིལ་སྙན་དང ། གླུ་དབྱངས་དེ་དག་ལས་བྱང་ཆུབ་ཡོངས་སུ་སྨིན་པར་བྱེད་པའི་ཆོས་དྲུག་ཅུ་རྩ་བཞི་བྱུང་བར་ཁྱེད་ལ་བྱིན་གྱིས་བརླབ་པར་བྱའོ། །དྲུག་ཅུ་རྩ་བཞི་གང་ཞེ་ན།་འདི་ལྟ་སྟེ། མི་རྟག་པའི་སྒྲ་འབྱུང་བ་དང ། སྡུག་བསྔལ་གྱི་སྒྲ་དང ། བདག་མེད་པའི་སྒྲ་དང ། ཞི་བའི་སྒྲ་དང ། མངོན་པར་འདུ་མི་བྱེད་པའི་སྒྲ་དང ། དབེན་པའི་སྒྲ་དང ། མི་སྐྱེ་ 460a ༄#། །བའི་སྒྲ་དང ། དངོས་པོ་མེད་པའི་སྒྲ་དང ། འབྱུང་བ་མེད་པའི་སྒྲ་དང ། གནས་མེད་པའི་སྒྲ་དང ། ཇི་ལྟ་བ་བཞིན་གྱི་སྒྲ་དང ། ཡང་དག་པའི་མཐའི་སྒྲ་དང ། ཆོས་ཀྱི་དབྱིངས་ཀྱི་སྒྲ་དང ། སེམས་ཅན་མེད་པའི་སྒྲ་དང ། སྲོག་མེད་པའི་སྒྲ་དང ། གང་ཟག་མེད་པའི་སྒྲ་དང ། སྦྱིན་པའི་སྒྲ་དང ། ཚུལ་ཁྲིམས་ཀྱི་སྒྲ་དང ། བཟོད་པའི་སྒྲ་དང ། བརྩོན་འགྲུས་ཀྱི་སྒྲ་དང ། བསམ་གཏན་གྱི་སྒྲ་དང ། ཤེས་རབ་ཀྱི་སྒྲ་དང ། བྱམས་པའི་སྒྲ་དང ། སྙིང་རྗེའི་སྒྲ་དང ། དགའ་བའི་སྒྲ་དང ། བཏང་སྙོམས་ཀྱི་སྒྲ་དང ། འོང་བ་མེད་པའི་སྒྲ་དང ། འགྲོ་བ་མེད་པའི་སྒྲ་དང ། རྒྱུ་བ་མེད་པའི་སྒྲ་དང ། གནས་མེད་པའི་སྒྲ་དང ། བརྟན་པ་མེད་པའི་སྒྲ་དང ། སྟོང་པ་ཉིད་ཀྱི་སྒྲ་དང ། མཚན་མ་མེད་པའི་སྒྲ་དང ། སྨོན་པ་མེད་པའི་སྒྲ་དང ། འདོད་ཆགས་དང་བྲལ་བའི་སྒྲ་དང ། འབྱུང་བ་མེད་པའི་སྒྲ་དང ། རྟེན་པའི་སྒྲ་དང ། རྟེན་པ་མེད་པའི་སྒྲ་དང ། སངས་རྒྱས་ཀྱི་སྒྲ་དང ། ཆོས་ཀྱི་སྒྲ་དང ། དགེ་འདུན་གྱི་སྒྲ་དང ། བྱང་ཆུབ་ཚད་མེད་པའི་སྒྲ་དང ། དྲན་པ་ཉེ་བར་གཞག་པའི་སྒྲ་དང ། ཡང་དག་པར་སྤོང་བའི་སྒྲ་དང ། རྫུ་འཕྲུལ་གྱི་རྐང་པའི་སྒྲ་དང ། དབང་པོའི་སྒྲ་དང ། སྟོབས་ཀྱི་སྒྲ་དང ། བྱང་ཆུབ་ཀྱི་ཡན་ལག་གི་སྒྲ་དང ། ལམ་གྱི་སྒྲ་དང ། ཞི་གནས་ཀྱི་སྒྲ་དང ། ལྷག་མཐོང་གི་སྒྲ་དང ། ཐབས་ཀྱི་སྒྲ་དང ། བསྡུ་བའི་དངོས་པོའི་ 460b སྒྲ་དང ། སེམས་ཅན་ཡོངས་སུ་སྨིན་པར་བྱ་བའི་སྒྲ་དང ། བདུད་ཆར་གཅད་པའི་སྒྲ་དང ། དམ་པའི་ཆོས་ཡོངས་སུ་གཟུང་བའི་སྒྲ་དང ། ཆོས་ཐམས་ཅད་སྒྱུ་མ་དང ། རྨི་ལམ་དང ། གཟུགས་བརྙན་དང ། ཆུའི་ཟླ་བ་དང ། བྲག་ཅ་ལྟ་བུའི་སྒྲ་དང ། ཆོས་ཀྱི་དབྱིངས་འདྲེས་པ་མེད་པའི་སྒྲ་དང ། འཁོར་བས་ཡོངས་སུ་མི་སྐྱོ་བའི་སྒྲ་དང ། འབྱུང་བའི་སྒྲ་དང ། དགེ་བའི་རྩ་བའི་ཚོགས་ཐམས་ཅད་ཀྱི་སྒྲ་དང ། དབུ་བ་དང ། ཆུའི་ཆུ་བུར་དང ། སྨིག་རྒྱུ་དང ། ཆུ་ཤིང་གི་ཕུང་པོ་དང ། སྒྱུ་མ་དང ། སྙིང་པོ་མེད་པའི་སྒྲ་དང ། ཇི་སྐད་སྨྲས་པ་དེ་བཞིན་དུ་བྱ་ཞིང་ཆོས་སྒྲུབ་པའི་སྒྲ་འབྱུང་བར་འགྱུར་རོ། །བཞིན་བཟང་དག་།དེ་ལྟར་ན། སངས་རྒྱས་ཀྱི་མཐུས་སིལ་སྙན་དང ། གླུ་དབྱངས་དེ་དག་ལས་གང་གིས་ཁྱེད་བག་ཡོད་པར་བྱང་ཆུབ་ཀྱི་ཕྱོགས་ཀྱི་ཆོས་རྣམས་སྒྲུབ་པར་འགྱུར་བ་དེ་ལྟ་བུའི་སྒྲ་འདི་དག་འབྱུང་བར་འགྱུར་རོ། །བམ་པོ་ལྔ་པ་སྟེ་ཐ་མ། དེ་ནས་ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས་བཅོམ་ལྡན་འདས་ལ་ཕྱག་བཙལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ཙམ་དུ་སངས་རྒྱས་བཅོམ་ལྡན་འདས་རྣམས་ཀྱང་བྱང་ཆུབ་འདི་བྱིན་གྱི་རླབས་ཀྱིས་ཤིན་ཏུ་བྱིན་གྱིས་བརླབས་པ་དང ། ཆོས་བསྟན་པ་དང ། ཇི་ཙམ་དུ་དྲོ་བཞིན་གཤེགས་པས་བྱང་ཆུབ་སེམས་དཔའ་རྣམས་ཤིན་ཏུ་ཡོངས་སུ་བཟུང་བ་ནི། ངོ་མཚར་ཏོ། །བཅོམ་ལྡན་འདས་ཀྱིས་ 461a ༄#། །བཀའ་སྩལ་པ། གྲོགས་པོ་དག་།ཇི་སྐད་སྨྲས་པ་དེ་བཞིན་ཏེ། དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ཤིན་ཏུ་ཡོངས་སུ་བཟུང་ངོ ། ། དེ་ཅིའི་ཕྱིར་ཞེ་ན། འདི་ལྟར་བྱང་ཆུབ་སེམས་དཔའ་ཡོངས་སུ་བཟུང་བས་སེམས་ཅན་ཐམས་ཅད་ཡོངས་སུ་བཟུང་བར་འགྱུར་རོ། །གྲོགས་པོ་དག་།དེ་བཞིན་གཤེགས་པས་བྱང་ཆུབ་སེམས་དཔའ་ཡོངས་སུ་བཟུང་བ་གང་ཡིན་པ་དེ་སེམས་ཅན་ཐམས་ཅད་ཀྱི་དོན་ཉིད་དོ། །དེ་ལྟར་ན། སེམས་ཅན་ཐམས་ཅད་ཀྱི་ཆེད་དུ་དེ་དག་གོ་ཆ་གང་གིས་སེམས་ཅན་ཚད་མེད་གྲངས་མེད་པ་འཁོར་བ་ལས་མྱ་ངན་ལས་འདའ་བའི་ལམ་དུ་གཟུང་བར་འགྱུར་བའི་གོ་ཆ་ཆེན་པོ་གྱོན་ནོ། །གྲོགས་པོ་དག་།རྣམ་གྲངས་འདིས་འདི་ལྟར་ང་ད་ལྟར་བཞུགས་ཀྱང་རུང ། ཡོངས་སུ་མྱ་ངན་ལས་འདས་ཀྱང་རུང་སྟེ། བྱང་ཆུབ་སེམས་དཔའ་རྣམས་ཡོངས་སུ་བཟུང་པ་མཛད་པ་གང་ཡིན་པ་དེས་སེམས་ཅན་ཐམས་ཅད་ཡོངས་སུ་བཟུང་བ་ཡིན་པར་རིག་པར་བྱའོ། །གྲོགས་པོ་དག་།བྱང་ཆུབ་སེམས་དཔའ་ལ་ཆོས་གོས་དང ། བསོད་སྙོམས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཀྱིས་རིམ་གྲོར་བྱས་པ་ནི། སེམས་ཅན་ཐམས་ཅད་ལ་རིམ་གྲོ་བྱས་པར་འགྱུར་རོ། །གྲོགས་པོ་དག་།བྱང་ཆུབ་སེམས་དཔའ་ལ་བདེ་བར་སྦྱར་བ་ཉེ་བར་བསྒྲུབས་ 461b པ་ནི།་སེམས་ཅན་ཐམས་ཅད་ལ་བདེ་བར་སྦྱར་བ་ཉེ་བར་བསྒྲུབས་པར་འགྱུར་རོ། །དེ་ཅིའི་ཕྱིར་ཞེ་ན། གྲོགས་པོ་དག་།ཐ་ན་བྱང་ཆུབ་སེམས་དཔའི་དབུགས་འབྱུང་བ་དང ། རྡུབ་བ་གང་ཡིན་པ་དེ་ཐམས་ཅད་ཀྱང་སེམས་ཅན་ཐམས་ཅད་ལ་སྙིང་རྗེ་ཆེན་པོ་རབ་ཏུ་ཐོབ་པ་དང་ལྡན་པ་དང ། སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་ཡོངས་སུ་འཛིན་ཏོ། ། དེ་ནས་འདོད་པ་ན་སྤྱོད་པ་དང ། གཟུགས་ན་སྤྱོད་པ་དང ། གནས་གཙང་མའི་རིས་ཀྱི་ལྷའི་བུ་དེ་དག་དང ། ཀླུ་དང ། གནོད་སྦྱིན་དང ། དྲི་ཟ་དང ། མི་འམ་ཅི་དང ། ལྟོ་འཕྱེ་ཆེན་པོ་དང།་ཐམས་ཅད་དང་ལྡན་པའི་འཁོར་དེ་བཅོམ་ལྡན་འདས་ཀྱིས་ལེགས་པར་གསུངས་པ་ལ་རྗེས་སུ་ཡི་རང་ནས་ལྷའི་མེ་ཏོག་རྣམ་པ་མང་པོ་ཁ་དོག་སྣ་ཚོགས་པས་བཅོམ་ལྡན་འདས་ལ་མངོན་པར་གཏོར་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོས་འདི་སྙམ་དུ་བསམ་སྟེ་བཅོམ་ལྡན་འདས་ཉིད་ཀྱི་རྫུ་འཕྲུལ་གྱིས་སམ། གཞན་བྱང་ཆུབ་སེམས་དཔའི་རྫུ་འཕྲུལ་གྱིས་བདག་གི་གནས་ནས་བྱ་རྒོད་ཀྱི་ཕུང་པོའི་རི་ལ་གཤེགས་པ་ནི། བདག་གི་ཆ་མ་ཡིན་གྱི། བདག་གིས་དེ་བཞིན་གཤེགས་པ་ལ་མཆོད་པའི་ལས་ཀྱི་ཕྱིར་ཤིང་རྟ་གང་ལ་བཅོམ་ལྡན་འདས་བྱང་ཆུབ་སེམས་དཔའི་དགེ་འདུན་དང་བཅས་པ་དང ། ཉན་ཐོས་ཀྱི་དགེ་འདུན་དང་བཅས་པར་བཞུགས་པ་དེ་ལྟ་བུའི་ཤིང་རྟ་བཀོད་པ་བསྒྲུབས་ཏེ། ཤིང་རྟ་དེའང་ 462a ༄#། །བདག་འཁོར་དང་བཅས་པས་དྲངས་ན། དེ་ལྟར་ན་བདག་གིས་དེ་བཞིན་གཤེགས་པ་ལ་མཆོད་པ་བྱས་པར་འགྱུར་སྙམ་མོ། །དེ་ནས་མི་འམ་ཅིའི་རྒྱལ་པོ་སྡོང་པོས་ཡིད་ལས་བྱུང་བ་ལྷའི་རིན་པོ་ཆེ་སྣ་བདུན་གྱི་ཤིང་རྟ་འཕང་དུ་དཔག་ཚད་ལྔ་པ། ཁྱོན་དུ་དཔག་ཚད་ལྔ་པ། ཁ་ཁྱེར་རིན་པོ་ཆེ་སྣ་ཚོགས་ཀྱིས་བསྐོར་བ། ཤིང་སྣ་ཚོགས་ཀྱིས་ལེགས་པར་བརྒྱན་པ། སྟེང་དུ་རིན་པོ་ཆེའི་དྲ་བ་བྲེས་པ། རིན་པོ་ཆེའི་སྐུད་པ་མིག་མང་རིས་སུ་བྲེས་པ་མངོན་པར་སྤྲུལ་ནས་ཤིང་རྟ་དེ་ལ་བཅོམ་ལྡན་འདས་ཀྱི་གདན་སེངྒེའི་ཁྲི་བཀྲ་བ།་བལྟ་ན་སྡུག་པ། འཕང་དུ་མི་བདུན་ཡོད་པ། རས་བཅོས་མ་ཟུང་བརྒྱ་སྟོང་མང་པོ་བཀྲམ་པ་མངོན་པར་སྤྲུལ། བྱང་ཆུབ་སེམས་དཔའ་ཐམས་ཅད་དང ། ཉན་ཐོས་ཀྱི་དགེ་འདུན་ཐམས་ཅད་ཀྱི་སྟན་ཡང་སོ་སོར་མངོན་པར་སྤྲུལ། གང་དག་བཅོམ་ལྡན་འདས་ལ་ཆོས་ཉན་ཞིང་ཞབས་འབྲིང་དུ་འབྲང་བ་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། འདོད་པ་ན་སྤྱོད་པ་དང ། གཟུགས་ན་སྤྱོད་པ་དང ། གནས་གཙང་མའི་རིས་ཀྱི་ལྷའི་བུ་དེ་དག་གི་སྟན་ཡང་ཤིང་རྟ་དེའི་སྟེང་དུ་ཅི་རིགས་པར་སྤྲུལ་ཏོ། །དེ་ནས་མི་འམ་ཅིའི་རྒྱལ་པོ་སྡོང་པོས་དེ་ལྟ་བུའི་ཤིང་རྟ་བཀོད་པ་དེ་སྤྲུལ་ནས་ཐལ་མོ་སྦྱར་ཏེ་བཅོམ་ལྡན་འདས་ལ་ཕྱག་བཙལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ལ་ 462b ཐུགས་བརྩེ་བའི་སླད་དུ་ཤིང་རྟ་འདི་ལ་ཇི་ལྟར་གདན་བཤམས་པ་རྣམས་ལ་འཁོར་ཐམས་ཅད་དང་ཐབས་གཅིག་ཏུ་བཞུགས་སུ་གསོལ། དེ་ནས་སེངྒེའི་ཁྲི་དེ་ལ་བཅོམ་ལྡན་འདས་ཀྱང་བཞུགས། བྱང་ཆུབ་སེམས་དཔའ་དང ། དགེ་སློང་གི་དགེ་འདུན་དང ། འཁོར་ཐམས་ཅད་ཀྱང་ཅི་རིགས་པར་འཁོད་དོ། །དེ་ནས་མི་འམ་ཅིའི་རྒྱལ་པོ་སྡོང་པོས་རྫུ་འཕྲུལ་གྱི་སྟོབས་ཀྱིས་ཤིང་རྟ་དེ་ལག་པ་གཡས་པས་བླངས་ཏེ་ཤིང་ཏ་ལ་བདུན་སྲིད་ཀྱི་སྟེང་གི་བར་སྣང་ལ་འཕགས་ནས་དེ་ནས་མི་འམ་ཅི་མོ་བརྒྱད་ཁྲི་བཞི་སྟོང་དེ་དག་ཐམས་ཅད་དང ། བུ་བརྒྱད་སྟོང་པོ་དེ་དག་དང ། གཞན་ཡང་མི་འམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་བརྒྱ་སྟོང་ཕྲག་དུ་མ་དང ། མི་འམ་ཅིའི་རྒྱལ་པོ་སྡོང་པོ་ཉིད་ཀྱང་རིན་པོ་ཆེའི་ཐག་པ་ཐོགས་ནས་ཤིང་རྟ་ལ་བཏགས་ཏེ་ནམ་མཁའ་ལས་དྲངས་སོ། །དེ་ནས་བཅོམ་ལྡན་འདས་སྟེང་གི་བར་སྣང་གི་ཤིང་རྟ་ལ་བཞུགས་ཤིང ། ནམ་མཁའི་དཀྱིལ་ནས་གཤེགས་པ་ལ་མི་འམ་ཅི་མོ་བརྒྱད་ཁྲི་བཞི་སྟོང་བོ་དེ་དག་གིས་སིལ་སྙན་དང ། གླུ་དབྱངས་བླངས་ནས་མཆོད་པ་བྱེད་དེ་མདུན་དུ་དོང་ཤིང་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །མི་འམ་ཅི་མོ་བརྒྱད་ཁྲི་བཞི་སྟོང་པོ། །གཟུགས་ཀྱི་དམ་པ་དང་ནི་ལྡན་པ་དག་།སིལ་སྙན་རྣམས་ནི་རབ་ཏུ་དཀྲོལ་བགྱིད་ཅིང ། །ཡང་དག་བསྔགས་པས་འདྲེན་ལ་ 463a ༄#། །བསྟོད་པ་བགྱིད། །མཚན་མཆོག་བསོད་ནམས་ཀྱིས་ནི་གཟི་བརྗིད་གྱུར། །གཟུགས་མཆོག་མཐོང་ན་དགའ་བར་བགྱིད་པའི་གཟུགས། །བདེན་པའི་ཡོན་ཏན་ལ་ནི་རྟག་གནས་པ། །ཡོན་ཏན་མཚོ་ཆེན་ཁྱོད་ལ་ཕྱག་འཚལ་ལོ། །སྔོན་གྱི་རྒྱལ་བ་རྣམས་དང་ཁྱོད་མི་འདྲ། །གཡས་གཡོན་ན་ཡང་རྣམ་པར་མཐོང་མ་མྱོང ། །ཇི་ལྟར་རི་རབ་བརྟན་ཞིང་མི་གཡོ་བ། །དེ་ལྟར་ཁྱེད་ཀྱི་སྐུ་ནི་དབལ་གྱིས་མཛེས། །འདྲེན་པ་ཁྱོད་ཀྱི་རྫུ་འཕྲུལ་སྟོབས་ཀྱིས་ནི། །ཆགས་པ་མ་མཆིས་པར་ཡང་མཁའ་ལས་མཆི། །ནམ་མཁའ་ལྟ་བུར་དག་ཅིང་དྲི་མི་མངའ། །བཅོམ་ལྡན་ཉོན་མོངས་བསལ་ལ་ཕྱག་འཚལ་ལོ། །ལྷ་དབང་ལྷ་མིན་དབང་དང་སྲིན་པོ་དང ། །བརྒྱ་བྱིན་ཚངས་པ་དང་ནི་དག་པའི་ལྷ། །ཉི་མ་ཟླ་བ་སྐར་མར་བཅས་པའི་འོད། །ཁྱེད་ཀྱི་མཛོད་སྤུས་འོད་ནི་མ་མཆིས་གྱུར། །ཤེས་རབ་འབྱུང་གནས་ཤེས་རབ་རྒྱ་མཚོ་ལྡན། །སེམས་ཅན་ཀུན་གྱི་སེམས་ཀྱི་སྤྱོད་ལ་མཁས། ། འཇིག་རྟེན་གསུམ་ན་འཇིག་རྟེན་གསུམ་གྱིས་མཆོད། །འཇིག་རྟེན་གྲགས་པའི་ཞབས་ལ་ཕྱག་འཚལ་ལོ། །བདུད་བཞི་པོ་ཡི་སྐྱོན་རྣམས་བསལ་བ་བོ། །བདེན་པ་བཞི་ལ་སྒོམ་ཞིང་དབྱོད་མཛད་པ། །རྫུ་འཕྲུལ་བཞི་ཡི་སྟོབས་ཀྱིས་བསྙེངས་མི་མངའ། །སངས་རྒྱས་གཤེགས་པས་གཤེགས་ཏེ་གཤེགས་པ་མཛེས། །བསྐལ་པ་བརྒྱར་ཡང་སྐྱོ་བ་མི་མངའ་ 463b ཞིང། །རྟག་ཏུ་དུལ་ལ་ཐུགས་ནི་མཉམ་པར་བཞག་།ལེགས་པར་གསུངས་པས་འགྲོ་བ་ཚིམ་མཛད་ཀྱང ། །ཁྱོད་ནི་ཚིག་དང་སྐད་ལ་གནས་མ་ལགས། །ཁྱོད་ཀྱི་གསུང་ནི་ཡིད་འོང་རབ་ཏུ་སྙན། ། ཞིང་བརྒྱ་དག་ཏུ་ཐོགས་པ་མེད་པར་མཆི། །སྒྲ་ནི་སེམས་ཅན་གང་གིས་ཐོས་གྱུར་པ། །དེ་དག་ཐམས་ཅད་བདེ་བས་ཚིམ་པར་འགྱུར། །སེམས་ཅན་ཁ་ལོ་སྒྱུར་པ་སྤུ་གཅིག་ཏུ། །སྟོང་གསུམ་རྒྱ་མཚོའི་ཆ་བ་རྣམས་ཞུགས་གྱུར་ཀྱང ། །སེམས་ཅན་རགས་པ་རྣམས་ལའང་མི་གནོད་ལ། །རྫུ་འཕྲུལ་ལ་ཡང་སྐྱོན་ནི་ཡོང་མི་གདའ། །སྟོང་གསུམ་གྱི་ནི་རི་བོ་རི་རབ་དག་།ཕྱག་གཅིག་གི་ནི་མཐིལ་དུ་བཞག་ནས་སུ། །ཞིང་མང་བྱེ་བ་དག་ཏུ་གཤེགས་མཛད་ཀྱང ། །ཁྱོད་ཀྱི་སྐུ་ཡི་སྟོབས་ནི་ཞུམ་མ་མཆིས། །ཁྱོད་ནི་བསྐལ་པ་བརྒྱ་ཕྲག་བསམ་ཡས་ནས། །བརྟུལ་ཞུགས་དཀའ་ཐུབ་ཚུལ་ཁྲིམས་ཡོན་ཏན་དང ། །སྦྱིན་དང་དུལ་དང་སྡོམ་དང་བཟོད་པ་དང ། །བརྩོན་འགྲུས་བསམ་གཏན་ཤེས་རབ་ཤིན་ཏུ་བསླབས། །སངས་རྒྱས་བྱེ་བ་མང་ལ་བསྙེན་བཀུར་མཛད། །དེ་དག་རྣམས་ཀྱིས་བཤད་པའི་ཆོས་ཀྱང་བཟུང ། །ཐུགས་རྗེ་ལྡན་ཞིང་འགྲོ་བའི་དོན་གྱི་ཕྱིར། །ཁྱོད་ལ་ཡོངས་སུ་སྐྱོ་བའི་ཐུགས་མི་མངའ། །རིམ་གྲོར་མ་བགྱིས་ཞུམ་པར་མི་འགྱུར་ཞིང ། །རིམ་གྲོ་བགྱིས་པས་མཐོ་བར་འགྱུར་མ་ལགས། །དོག་ས་ལྟ་བུར་སྙོམས་ཤིང་མི་གཡོ་སྟེ། །འཇིག་རྟེན་ཆོས་གནས་མི་གོས་པདྨ་བཞིན། །ཆོས་རྣམས་ 464a ༄#། །སྟོང་པ་མཚན་མ་མ་མཆིས་དང ། །ཆུ་ཟླ་འདྲ་ཞིང་སྒྱུ་མ་ལྟ་བུ་དང ། །དབུ་བ་བརྡོས་འདྲ་རྨི་ལམ་གློག་འདྲ་དང ། །སྨིག་རྒྱུའི་མཚན་ཉིད་ལྟ་བུར་རབ་ཏུ་མཁྱེན། །ངོ་བོ་ཉིད་ཀྱིས་གང་ཟག་བདག་མ་མཆིས། །གདོད་ནས་སྟོང་ཞིང་མི་གཡོ་རྗེས་མ་མཆིས། །ནམ་མཁའ་ལྟ་བུར་དག་ཅིང་དྲི་མ་མཆིས། །དངོས་པོ་བས་བར་དངོས་པོ་མ་མཆིས་འདྲ། །ལས་དང་བྱ་བ་རྒྱུ་དང་རྐྱེན་རྣམས་ལས། །བྱུང་བ་ལགས་ཀྱི་རྗེས་ནི་མ་མཆིས་པར། །ཚུལ་འདི་རྣམ་པར་སྦྱང་བ་མཛད་པས་ན། །དེ་ཕྱིར་ཁྱོད་ནི་རྫོགས་སངས་རྒྱས་ཞེས་བགྱི། །གང་དག་འདྲེན་པ་མཐོང་ཞིང་ཐོས་གྱུར་པ། །དེ་དག་ལ་ནི་ངན་སོང་འཇིགས་མ་མཆིས། །དེ་དག་བདེ་འགྲོ་དག་ཏུ་མཆོག་གཞོལ་ཏེ། །སྲོག་ཆགས་དེ་རྣམས་ཀྱི་ནི་རྙེད་པ་ལགས། །བདག་ཅག་རྣམས་ཀྱིས་གང་ཟག་དམ་པ་ཁྱོད། །ཀུན་ཏུ་མཆོད་པས་མཆོད་པ་བགྱིས་ནས་སུ། །བྱང་ཆུབ་ཏུ་ནི་སེམས་ཀྱང་བསྐྱེད་བགྱིས་ཏེ། །གང་ཟག་མཆོག་འདྲར་ཐམས་ཅད་འགྱུར་བར་ཤོག་།ནམ་མཁའ་ལ་ནི་དཔག་ཏུ་ནུས་ཀྱང་གདའ། །རྒྱ་མཚོའི་ཆབ་ནི་བས་བགྱིར་ནུས་ཀྱང་གདའ། །ཉི་ཟླ་མཁའ་ལས་སར་ནི་ལྟུང་གདའ་ཡི། །སངས་རྒྱས་ཡོན་ཏན་པས་བར་འགྱུར་མི་གདའ། །དེ་ནས་བཅོམ་ལྡན་འདས་ཤིང་རྟ་ལ་བཞུགས་ཏེ་ནམ་མཁའི་དཀྱིལ་གྱི་ལམ་ནས་གཤེགས་པས་གཤེགས་ཤིང ། གསེར་གྱི་ཁ་ 464b དོག་ལྟ་བུར་སྐུ་ལས་འོད་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཁྱབ་པར་འགྱུར་བ་དེ་ལྟ་བུའི་འོད་ཕྱུང་བ་དང ། འོད་དེས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དང ། བྱ་རྒོད་ཀྱི་ཕུང་པོའི་རིའང་རབ་ཏུ་ཁྱབ་པར་གྱུར་ཏོ། །དེ་ནས་བཅོམ་ལྡན་འདས་ཤིང་རྟ་དེས་རྒྱལ་པོའི་ཁབ་ཀྱི་གྲོང་ཁྱེར་དང ། བྱ་རྒོད་ཀྱི་ཕུང་པོའི་རི་ག་ལ་བ་དེར་གཤེགས་སོ། །དེ་ནས་རྒྱལ་པོའི་ཁབ་ཀྱི་གྲོང་ཁྱེར་གྱི་རྒྱལ་པོ་མ་སྐྱེས་དགྲ་བློན་པོ་དང ། རྒྱལ་བུ་དང ། ཚོང་དཔོན་དང ། གྲོང་རྡལ་བ་དང ། ཁྱིམ་བདག་ཏུ་བཅས་པ་དང ། དགེ་སློང་དང ། དགེ་སློང་མ་དང ། དགེ་བསྙེན་དང།་དགེ་བསྙེན་མ་རྣམས་འོད་དེས་བསྐུལ་ནས་ཕྱི་དྲོའི་དུས་ཀྱི་ཚེ་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་དང ། གདུགས་དང ། རྒྱལ་མཚན་དང ། བ་དན་ཐོགས་ཏེ་བཅོམ་ལྡན་འདས་བསུ་བའི་ཕྱིར་རིངས་པར་རིངས་པར་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ་བྱ་རྒོད་ཀྱི་ཕུང་པོའི་རི་ལ་བཅོམ་ལྡན་འདས་ག་ལ་བ་དེར་དོང་ངོ ། །སྡོང་པོའི་སླས་རྣམས་ཤིང་རྟ་འདྲེན་བཞིན་དུ་སིལ་སྙན་བརྒྱད་ཁྲི་བཞི་སྟོང་བྱེད་དོ། །མི་འམ་ཅི་མོའི་རོལ་མོ་སིལ་སྙན་གྱི་སྒྲ་དེས་བྱ་རྒོད་ཀྱི་ཕུང་པོའི་རི་ཐམས་ཅད་དུ་གྲག་པར་གྱུར་ཏོ། །དེ་ལྟར་མི་འམ་ཅིའི་རྒྱལ་པོ་སྡོང་པོ་དབུང་དང་བཅས། འཁོར་དང་བཅས་པས་རྫུ་འཕྲུལ་གྱི་སྟོབས་ཀྱིས་བཅོམ་ལྡན་འདས་ནམ་མཁའི་དཀྱིལ་ནས་ཁྱེར་ཏེ་བྱ་རྒོད་ཀྱི་ཕུང་པོའི་རི་ལ་བཞག་གོ་།དེ་ནས་ 465a ༄#། །བཅོམ་ལྡན་འདས་ཤིང་རྟ་དེ་ལས་བབས་ནས་རང་གི་གནས་སུ་གདན་བཤམས་པ་ལ་བཞུགས་སོ། །བྱང་ཆུབ་སེམས་དཔའ་དེ་དག་དང ། ཉན་ཐོས་ཆེན་པོ་དེ་དག་དང ། ཐམས་ཅད་དང་ལྡན་པའི་འཁོར་ཀྱང་ཤིང་རྟ་དེ་ལས་བབས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ཀྱིས་གནང་ནས་བཅོམ་ལྡན་འདས་ལ་ཀུན་ནས་བསྐོར་ཏེ་རང་རང་གི་སྟན་ལ་འཁོད་དོ། །འདོད་པ་ན་སྤྱོད་པ་དང ། གཟུགས་ན་སྤྱོད་པ་དང ། གནས་གཙང་མའི་རིས་ཀྱི་ལྷའི་བུ་དེ་དག་ཀྱང་ཤིང་རྟ་དེ་ལས་བབས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་ཕྱོགས་གཅིག་ཏུ་འཁོད་དོ། །དེ་ནས་རྒྱལ་པོ་མ་སྐྱེས་དགྲ་བློན་པོ་དང ། རྒྱལ་བུ་དང ། ཚོང་དཔོན་དང ། ཁྱིམ་བདག་དང ། གྲོང་རྡལ་བ་དང་བཅས་པ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་རྣམས་ཀྱིས་མེ་ཏོག་དང ། བདུག་པ་དང ། སྤོས་དང ། ཕྲེང་བ་དང ། བྱུག་པ་དང ། ཕྱེ་མ་དང ། ཆོས་གོས་དང ། གདུགས་དང ། རྒྱལ་མཚན་དང ། བ་དན་ཇི་ལྟར་ཐོགས་པ་དེ་དག་གིས་བཅོམ་ལྡན་འདས་ལ་མཆོད་པ་བྱས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་བཅོམ་ལྡན་འདས་ལ་སྐུ་མ་མཉེལ་ཏམ། བདེ་བ་ལ་རེག་པར་གནས་སམ་ཞེས་གསོལ་ནས་ཕྱོགས་གཅིག་ཏུ་ 465b འཁོད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། མི་འམ་ཅིའི་རྒྱལ་པོ་སྡོང་པོ་གཡོག་འཁོར་དང་བཅས་པས་བཅོམ་ལྡན་འདས་འཁོར་དང་བཅས་ཏེ་ཤིང་རྟ་ལ་བཞུགས་པ་ནམ་མཁའི་དཀྱིལ་ནས་དྲངས་པའི་དགེ་བའི་རྩ་བ་འདིས་མི་འམ་ཅིའི་རྒྱལ་པོ་སྡོང་པོ་འཁོར་དང་བཅས་པས་ཅི་ཞིག་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། དགེ་བའི་རྩ་བ་དེས་མི་འམ་ཅིའི་རྒྱལ་པོ་སྡོང་པོ་སླས་དང་བཅས། བུ་དང་བཅས། གཡོག་དང་བཅས་པས་འདིར་བྱང་ཆུབ་ཏུ་སེམས་བསྐྱེད་ནས་དེ་དག་ཐམས་ཅད་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་མངོན་པར་ཤེས་པ་ལས་མི་ཉམས་པ་རབ་ཏུ་ཐོབ་པར་འགྱུར། སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་དུ་ཕན་ཚུན་འགྲོ་བར་འགྱུར། སངས་རྒྱས་མཐོང་བ་དང ། ཆོས་ཉན་པ་དང ། དགེ་འདུན་ལ་བསྙེན་བཀུར་བྱེད་པ་དང་མི་འབྲལ་བར་འགྱུར། ཚེ་རབས་ཐམས་ཅད་དུ་སྐྱེ་བ་དྲན་པར་འགྱུར། ལུང་བསྟན་པ་ཐོབ་པར་འགྱུར། དམ་པའི་ཆོས་ཡོངས་སུ་གཟུང་བ་ལ་བརྩོན་པར་འགྱུར། སེམས་ཅན་ཡོངས་སུ་སྨིན་པར་བྱ་བ་ལ་སྤྲོ་བར་འགྱུར་རོ། །དེ་ནས་རྒྱལ་པོ་མ་སྐྱེས་དགྲས་མི་འམ་ཅིའི་བདག་པོ་སྡོང་པོ་ལ་འདི་སྐད་ཅེས་སྨྲས་སོ། །མི་འམ་ཅིའི་བདག་པོ། བཅོམ་ལྡན་འདས་ཀྱིས་ཁྱོད་ཀྱི་ཡོན་ཏན་ཡོངས་སུ་བརྗོད་པ་མཛད་པས་ཁྱོད་ 466a ༄#། །ཀྱིས་རྙེད་པ་ལེགས་པར་རྙེད་ཀྱི། ཁྱོད་ཀྱིས་དགེ་བའི་རྩ་བ་དེ་ལས་ཤས་ཤིག་ཁོ་བོས་ཀྱང་ཐོབ་པར་འདོད་དོ། །མི་འམ་ཅིའི་རྒྱལ་པོ་སྡོང་པོས་སྨྲས་པ། རྒྱལ་པོ་ཆེན་པོ། དགེ་བའི་རྩ་བ་འདི་ཐམས་ཅད་བདག་གིས་ཁྱོད་དང ། སེམས་ཅན་ཐམས་ཅད་ལ་དབུལ་ལོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ནི། གང་སེམས་ཅན་ཐམས་ཅད་དང་ཐུན་མོང་མ་ཡིན་པ་དེ་དག་གང་ཡང་མེད་དོ། །རྒྱལ་པོ་ཆེན་པོ། བྱང་ཆུབ་སེམས་དཔའ་ཐམས་ཅད་ནི། སེར་སྣ་ཅན་མ་ཡིན་ཏེ། དེ་དག་དགེ་བའི་རྩ་བ་ཐམས་ཅད་ལ་སེར་སྣ་མི་བསྐྱེད་དོ། །དགེ་བའི་རྩ་བ་ཐམས་ཅད་སེམས་ཅན་ཐམས་ཅད་ལ་གཏོང་ཡང་ཡིད་མི་བདེ་བར་མི་བགྱིད། འགྱོད་པར་མི་འགྱུར་རོ། །རྒྱལ་པོ་ཆེན་པོ། བྱང་ཆུབ་སེམས་དཔའི་དགེ་བའི་རྩ་བ་གང་ཐམས་ཅད་མཁྱེན་པར་ཡོངས་སུ་བསྔོས་པ་དེའང་སེམས་ཅན་ཐམས་ཅད་ཀྱི་འཚོ་བར་འགྱུར་རོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ། བྱང་ཆུབ་སེམས་དཔའ་རྣམས་ཀྱི་བྱང་ཆུབ་ནི། སེམས་ཅན་ཐམས་ཅད་ཀྱི་གནས་བྱེད་པ་དང ། སེམས་ཅན་ལ་སྦྱོར་བ་དང ། སེམས་ཅན་གྱི་ཕྱིར་འབྲང་བར་འགྱུར་རོ། །རྒྱལ་པོ་ཆེན་པོ། ཁྱོད་ཀྱིས་གང་གི་ཕྱིར་དགེ་བའི་བཤེས་གཉེན་བཅོམ་ལྡན་འདས་དང ། འཇམ་དཔལ་གཞོན་ནུར་གྱུར་པ་རྙེད་དེ། དེ་གཉིས་ལས་ཁྱོད་ཀྱིས་དམ་པའི་ 466b ཆོས་ཐོས་ནས་དེས་མི་ཤེས་པའི་མུན་པ་དང ། གཏི་མུག་གི་ལིང་རྟོག་ཆེན་པོས་མཚམས་མེད་པའི་འགྱོད་པ་བྱུང་བའི་སེམས་བསལ་ནས་ཁྱོད་ཀྱིས་ཆོས་ལ་ཆོས་ཀྱི་སྣང་བ་ཆེན་པོ་ཐོབ་སྟེ། ཆོས་ཀྱི་སྣང་བ་དེས་ཁྱོད་ད་ལྟར་སྒྲིབ་པ་མེད་པ་ཐོབ་ཅིང་གནས་པས་ཁྱོད་ཀྱིས་ཀྱང་རྙེད་པ་ལེགས་པར་རྙེད་དོ། །རྒྱལ་པོ་ཆེན་པོ། དེ་ལྟ་བས་ན། བྱང་ཆུབ་སེམས་དཔའ་སེམས་དཔའ་ཆེན་པོས་གུས་པར་བྱས་ཏེ་ཅི་ནས་ཀྱང་ཆོས་ཀྱི་ཚིག་དང ། ཡི་གེ་འབྲུ་གཅིག་ཐོས་པའང་བརྗེད་པར་མི་འགྱུར་བ་དང ། ཆུད་ཟ་བར་མི་འགྱུར་བ་དང ། ཀུན་ཏུ་གཟུང་བ་དང ། ཡོངས་སུ་བསྲུང་བའི་ཕྱིར་བདག་ཆོས་ཀྱི་སྣོད་དུ་འགྱུར་བར་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལྷའི་ཅོད་པན་གྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་ཆོས་ཀྱི་སྣོད་དུ་འགྱུར་བ་ལགས། དེ་སྐད་ཅེས་གསོལ་བ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལྷའི་ཅོད་པན་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སུམ་ཅུ་རྩ་གཉིས་དང་ལྡན་ན། ཆོས་ཀྱི་སྣོད་དུ་འགྱུར་རོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། རིགས་ཀྱི་བུ། བྱང་ཆུབ་སེམས་དཔའི་སྣོད་སངས་རྒྱས་ཀྱི་བྱིན་གྱི་རླབས་དང ། ལྷག་པའི་བསམ་པའི་སྣོད་བསམ་པ་དང ། བྱང་ཆུབ་ཀྱི་ལམ་ཉེ་བར་སྟོན་པའི་སྣོད་ 467a ༄#། །སྦྱོར་བ་དང ། དགེ་བའི་རྩ་བ་ཁྱད་པར་དུ་འགྲོ་བའི་སྣོད་ལྷག་པའི་བསམ་པ་དང ། མང་དུ་ཐོས་པའི་སྣོད་དྲན་པ་དང ། ལམ་ལ་འཇུག་པའི་སྣོད་བློ་གྲོས་དང ། དོན་རྟོགས་པ་རྗེས་སུ་རྟོགས་པའི་སྣོད་རྟོགས་པ་དང ། ལོངས་སྤྱོད་ཆེན་པོའི་སྣོད་སྦྱིན་པ་དང ། བསམ་པ་ཡོངས་སུ་རྫོགས་པའི་སྣོད་ཚུལ་ཁྲིམས་དང ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཐོབ་པའི་སྣོད་བཟོད་པ་དང ། སངས་རྒྱས་ཀྱི་ཆོས་ཐམས་ཅད་འགྲུབ་པའི་སྣོད་བརྩོན་འགྲུས་དང ། སེམས་ལས་སུ་རུང་བའི་སྣོད་བསམ་གཏན་དང ། དོགས་པ་ཐམས་ཅད་ལས་རབ་ཏུ་འདས་པའི་སྣོད་ཤེས་རབ་དང ། སེམས་ཅན་ཐམས་ཅད་ལ་སེམས་སྙོམས་པའི་སྣོད་བྱམས་པ་དང ། དབུལ་ཞིང་ཉམ་ཐག་པ་ཐམས་ཅད་བསྐྱབ་པའི་སྣོད་སྙིང་རྗེ་དང ། ཆོས་ལ་དགའ་བའི་སྣོད་དགའ་བ་དང ། རྗེས་སུ་ཆགས་པ་དང ། ཁོང་ཁྲོ་བ་སྤང་བའི་སྣོད་བཏང་སྙོམས་དང ། དགེ་བའི་རྩ་བ་ཐམས་ཅད་འཛིན་དུ་འཇུག་པའི་སྣོད་དགེ་བའི་བཤེས་གཉེན་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་སྣོད་ཐོས་པ་ཚོལ་བས་ངོམས་མི་མྱོང་བ་དང ། མི་ལྟོས་པའི་སྣོད་རབ་ཏུ་འབྱུང་བ་དང ། དོན་ཉུང་ཞིང་བྱ་བ་ཉུང་བའི་སྣོད་དགོན་པ་ལ་གནས་པ་དང ། བསམ་གཏན་དང་མངོན་པར་ཤེས་པའི་སྣོད་དབེན་པ་ལ་དགའ་བ་དང ། སེམས་ཅན་ཡོངས་སུ་སྨིན་པར་བྱ་བའི་སྣོད་བསྡུ་ 467b བའི་དངོས་པོ་དང ། ཆོས་སྣང་བའི་སྣོད་དམ་པའི་ཆོས་ཡོངས་སུ་འཛིན་པ་དང ། ཐོས་པ་ཐམས་ཅད་འཛིན་པའི་སྣོད་གཟུངས་དང ། སེམས་ཅན་ཐམས་ཅད་ཀྱི་ཐེ་ཚོམ་གཅད་པའི་སྣོད་སྤོང་སྩ་པ་དང ། སངས་རྒྱས་མཐོང་བའི་སྣོད་སངས་རྒྱས་རྗེས་སུ་དྲན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་སྣོད་ཆོས་རྗེས་སུ་དྲན་པ་དང ། དགེ་བའི་རྩ་བ་བསྲུང་བའི་སྣོད་ཞེ་སྡང་མེད་པའི་སེམས་དང ། ལྟ་བར་གྱུར་པ་ཐམས་ཅད་སྤང་བའི་སྣོད་སྟོང་པ་ཉིད་ལ་མོས་པ་དང ། མཐར་འཛིན་པ་ཐམས་ཅད་ཡོངས་སུ་སྤང་པའི་སྣོད་རྟེན་ཅིང་འབྲེལ་པར་འབྱུང་བ་དང ། མི་འཁྲུགས་ཤིང་ཕྱད་པར་ལུང་སྟོན་པའི་སྣོད་མི་སྐྱེ་བའི་ཆོས་ལ་བཟོད་པ་དང ། སྟོབས་བཅུ་དང ། མི་འཇིགས་པ་དང ། སངས་རྒྱས་ཀྱི་ཆོས་མ་འདྲེས་པ་རྣམས་ཀྱི་སྣོད་ཕྱིར་མི་ལྡོག་པའི་ས་སྟེ། རིགས་ཀྱི་བུ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་སུམ་ཅུ་རྩ་གཉིས་པོ་འདི་དག་དང་ལྡན་ན། ཆོས་ཀྱི་སྣོད་དུ་རིག་པར་བྱའོ། ། བསྟན་པ་འདི་བཤད་པ་ན་སྲོག་ཆགས་ཁྲིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ཚིག་འདི་སྐད་ཅེས་བཅོམ་ལྡན་འདས། སེམས་ཅན་ཐམས་ཅད་ཀྱང་འདི་འདྲ་བའི་ཆོས་ཀྱི་སྣོད་དུ་གྱུར་ཅིག་།བདག་ཅག་ཀྱང་བཅོམ་ལྡན་འདས་ཀྱིས་ཇི་སྐད་དུ་བསྟན་པའི་ཆོས་དེ་ལྟ་བུའི་སྣོད་དུ་གྱུར་ཅིག་ཅེས་སྨྲས་སོ། །དེ་ནས་བཅོམ་ལྡན་འདས་ 468a ༄#། །ཀྱིས་མི་འམ་ཅིའི་རྒྱལ་པོ་སྡོང་པོ་ལ་འདི་སྐད་ཅེས་བཀའ་སྩལ་ཏོ། །མི་འམ་ཅིའི་བདག་པོ། ཁྱོད་ཀྱིས་འཁོར་འདི་སྐྱོ་བར་འགྱུར་དུ་འོང་གི་།ཁྱོད་རང་གི་གནས་སུ་སོང་ཞིག་།མི་འམ་ཅིའི་རྒྱལ་པོ་སྡོང་པོས་གསོལ་པ། བཅོམ་ལྡན་འདས། གང་ཡོངས་སུ་སྐྱོ་བ་དེ་བྱང་ཆུབ་སེམས་དཔའ་ཞེས་མི་བགྱི་སྟེ། བཅོམ་ལྡན་འདས། བྱང་ཆུབ་སེམས་དཔས་ནི། སྐྱོ་བ་བཟོད་པར་བགྱིའོ། །བཅོམ་ལྡན་འདས། ཇི་ལྟར་བྱང་ཆུབ་སེམས་དཔའ་ཡོངས་སུ་སྐྱོ་བ་ལགས། ཇི་ལྟར་ན། ཡོངས་སུ་མི་སྐྱོ་བ་ལགས། བཅོམ་ལྡན་འདས་ཀྱིས་བཀའ་སྩལ་པ། མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཡོངས་སུ་སྐྱོ་བར་འགྱུར་རོ། །བཞི་གང་ཞེ་ན། འདི་ལྟ་སྟེ། སེམས་ཅན་གྱི་ཁམས་ཚད་མེད་པ་ཐོས་ན་སྐྲག་པ་དང ། འཁོར་བ་ཚད་མེད་པ་ཐོས་ན་སྐྲག་པ་དང ། སངས་རྒྱས་ཀྱི་ཡེ་ཤེས་ཚད་མེད་པར་ཐོས་ན་སྐྲག་པ་དང ། བསོད་ནམས་ཚད་མེད་པས་མཚན་དང་དཔེ་བྱད་བཟང་པོ་འགྲུབ་པ་ཐོས་ན་སྐྲག་པ་སྟེ། མི་འམ་ཅིའི་དེ་དག་པོ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། ཡོངས་སུ་སྐྱོ་བར་རིག་པར་བྱའོ། །མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་དང་ལྡན་ན། ཡོངས་སུ་མི་སྐྱོ་བར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། སེམས་ཅན་གྱི་ཁམས་ཚད་ 468b མེད་པ་དེའང་བདག་གིས་ཡོངས་སུ་མྱ་ངན་ལས་བཟླ་བར་བྱའོ། །ཞེས་ཐོས་ན་མི་སྐྲག་པ་དང ། དགེ་བའི་རྩ་བ་བསྒྲུབ་པའི་ཕྱིར་འཁོར་བ་ཚད་མེད་པ་ཡོངས་སུ་གཟུང་བར་བྱའོ། །ཞེས་ཐོས་ན་མི་སྐྲག་པ་དང ། ཐམས་ཅད་མཁྱེན་པའི་ཡེ་ཤེས་ཚད་མེད་པ་དེ་བདག་གིས་ཡོངས་སུ་རྫོགས་པར་བྱའོ། །ཞེས་ཐོས་ན་མི་སྐྲག་པ་དང ། བསོད་ནམས་ཚད་མེད་པ་བསགས་པས་མཚན་དང་དཔེ་བྱད་བཟང་པོ་འགྲུབ་སྟེ། བདག་གིས་ཀྱང་བསྒྲུབ་པར་བྱའོ། །ཞེས་ཐོས་ན་མི་སྐྲག་པ་སྟེ། མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན།་ཡོངས་སུ་མི་སྐྱོ་བར་རིག་པར་བྱའོ། །མི་འམ་ཅིའི་བདག་པོ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། ཡོངས་སུ་སྐྱོ་བར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། སྐབས་སྐབས་སུ་ཉན་ཐོས་ཀྱི་ཐེག་པ་ལ་རེ་བ་དང ། སྐབས་སྐབས་སུ་རང་སངས་རྒྱས་ཀྱི་ཐེག་པ་ལ་རེ་བ་དང ། དམ་པའི་ཆོས་རྣམ་པར་འཇིག་པ་མ་ཡལ་བར་འདོར་ཞིང་ཡོངས་སུ་མི་འཛིན་པ་དང ། གཞན་ཡང་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་ཏུ་མི་འཇུག་པ་སྟེ། མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། ཡོངས་སུ་སྐྱོ་བར་རིག་པར་བྱའོ། །མི་འམ་ཅིའི་བདག་པོ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། ཡོངས་སུ་མི་སྐྱོ་བར་རིག་པར་བྱའོ། 469a ༄#། །བཞི་གང་ཞེ་ན། འདི་ལྟ་སྟེ། རབ་ཏུ་ཉེན་ཀྱང་བྱང་ཆུབ་ཀྱི་སེམས་མི་གཏོང་བ་དང ། ཉན་ཐོས་དང་རང་སངས་རྒྱས་ཀྱི་ས་ལ་མི་དབང་བ་དང ། ལུས་དང་སྲོག་འདོར་ཞིང་དམ་པའི་ཆོས་སྲུང་བ་དང ། དཔག་ཚད་སྟོང་དུ་འགྲོ་ཞིང་གཞན་དག་བྱང་ཆུབ་ཡང་དག་པར་འཛིན་དུ་འཇུག་པ་སྟེ། མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། ཡོངས་སུ་མི་སྐྱོ་བར་རིག་པར་བྱའོ། །མི་འམ་ཅིའི་བདག་པོ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། ཡོངས་སུ་སྐྱོ་བར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། སློང་བ་མཐོང་ན་ཡོངས་སུ་སྐྱོ་བ་དང ། བསོད་ནམས་བྱེད་པར་སྦྱོར་བ་ལ་བརྩོན་པར་མི་གནས་པ་དང ། མང་དུ་ཐོས་པ་ཚོལ་པ་ལ་མི་བརྩོན་པ་དང ། ཇི་ལྟར་ཐོས་པའི་ཆོས་རྣམས་གཞན་ལ་མི་སྟོན་པ་སྟེ། མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། ཡོངས་སུ་སྐྱོ་བར་རིག་པར་བྱའོ། །མི་འམ་ཅིའི་བདག་པོ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། ཡོངས་སུ་མི་སྐྱོ་བར་རིག་པར་བྱའོ། །བཞི་གང་ཞེ་ན། འདི་ལྟ་སྟེ།་སློང་བ་ལ་བཤེས་གཉེན་དུ་འདུ་ཤེས་སྐྱེད་ཅིང་ཞེ་སྡང་བའི་སེམས་མེད་ལ་བཞིན་འཛུམ་ཞིང་ཁྲོ་གཉེར་མེད་དེ་ཚུར་ཤོག་།ལེགས་པར་འོངས་སམ་ཞེས་བྱ་བའི་ 469b ཚིག་སྨྲ་བ་དང ། བདག་བདེ་བ་ལ་མི་ཆགས་ཤིང་སེམས་ཅན་ཐམས་ཅད་ལ་བདེ་བ་རབ་ཏུ་སྦྱིན་པ་དང ། མང་དུ་ཐོས་པ་ཚོལ་བས་མི་ངོམས་ཤིང ། ཇི་ལྟར་ཐོས་པའི་ཆོས་རྣམས་ཀྱང་གཞན་དག་ལ་རྒྱ་ཆེར་རབ་ཏུ་སྟོན་ཅིང་ཟང་ཟིང་མེད་པའི་སེམས་ཀྱིས་ཆོས་དེ་གཞན་ལ་རབ་ཏུ་སྟོན་པ་སྟེ། མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། ཡོངས་སུ་མི་སྐྱོ་བར་རིག་པར་བྱའོ། །མི་འམ་ཅིའི་བདག་པོ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། ཡོངས་སུ་སྐྱོ་བར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། སྦྱིན་པའི་ཕ་རོལ་ཏུ་ཕྱིན་པའི་ལམ་ཡོངས་སུ་མི་ཚོལ་བ་དང ། བསྡུ་བའི་དངོས་པོ་ལ་མི་སྦྱོར་བ་དང ། སེམས་ཅན་ཡོངས་སུ་སྨིན་པར་བྱེད་པར་བརྩོན་འགྲུས་མི་རྩོམ་པ་དང ། ཡོན་ཏན་ཆུང་དུ་ཙམ་གྱིས་ཆོག་པར་འཛིན་ཅིང་གོང་དུ་མི་ཚོལ་བ་སྟེ། མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། །ཡོངས་སུ་སྐྱོ་བར་རེག་པར་བྱའོ། །མི་འམ་ཅིའི་བདག་པོ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། ཡོངས་སུ་མི་སྐྱོ་བར་རིག་པར་བྱའོ། །བཞི་གང་ཞེ་ན། འདི་ལྟ་སྟེ། མགོའི་ཐོད་ལ་མེ་འབར་བ་བཞིན་དུ་ཕ་རོལ་ཏུ་ཕྱིན་པའི་ལམ་ཡོངས་སུ་ཚོལ་བ་དང ། བསྡུ་བའི་དངོས་པོ་ལ་རྟག་ཏུ་བརྩོན་པ་དང ། སེམས་ཅན་ཡོངས་སུ་སྨིན་པར་ 470a ༄#། །བྱེད་པར་བརྩོན་འགྲུས་རྩོམ་པ་དང ། དགེ་བ་ཐམས་ཅད་ཡོངས་སུ་བསྐང་བའི་ཕྱིར་དེ་ལ་མི་ཆགས་པ་ཡིན་ཏེ། མི་འམ་ཅིའི་བདག་པོ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། ཡོངས་སུ་མི་སྐྱོ་བར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་ཆོས་བཞི་པ་སྒྲུབ་པ་འདི་མི་འམ་ཅིའི་རྒྱལ་པོ་སྡོང་པོ་ལ་ལན་བཏབ་ནས་རྒྱལ་པོ་མ་སྐྱེས་དགྲ་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་ཡོངས་སུ་སྐྱོ་བ་དང ། ཡོངས་སུ་མི་སྐྱོ་བ་བཞི་པ་སྒྲུབ་པ་ལ་འཇུག་པ་འདི་ཐོས་སམ། རྒྱལ་པོས་གསོལ་པ། བཅོམ་ལྡན་འདས། ཐོས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། དེ་ལྟ་བས་ན། ཁྱོད་བྱང་ཆུབ་སེམས་དཔའི་སྤྱོད་པ་ལ་ཡོངས་སུ་མི་སྐྱོ་བར་སྤྱད་པར་བྱའོ། །རྒྱལ་པོ་མ་སྐྱེས་དགྲས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱི་སྤྱོད་པ་གང་ལགས། དེ་ནས་བཅོམ་ལྡན་འདས་ཀྱིས་རྒྱལ་པོ་མ་སྐྱེས་དགྲའི་བྱང་ཆུབ་སེམས་དཔའི་སྤྱད་པ་ཡོངས་སུ་བསྐང་བའི་ཕྱིར་མི་འམ་ཅིའི་རྒྱལ་པོ་སྡོང་པོ་ལ་བཀའ་སྩལ་པ། མི་འམ་ཅིའི་བདག་པོ། ཇི་ལྟར་སེམས་ཅན་ཡོངས་སུ་སྨིན་པར་བྱེད་པའི་རང་གི་ཐབས་མཁས་པའི་ཁྱད་པར་རྒྱལ་པོ་མ་སྐྱེས་དགྲ་འདི་བྱང་ཆུབ་སེམས་དཔའི་སྤྱོད་པ་ཡོངས་སུ་བསྐང་བའི་ཕྱིར་ཁྱོད་ཀྱིས་ 470b སྟོན་ཅིང ། །དེ་ནས་མི་འམ་ཅིའི་རྒྱལ་པོ་སྡོང་པོས་རང་གི་པི་ཝང་དེ་བཅོམ་ལྡན་འདས་ཀྱི་སྤྱན་སྔར་བླངས་སོ། །པི་ཝང་དེ་བླངས་མ་ཐག་ཏུ་དེ་ནས་སངས་རྒྱས་ཀྱི་མཐུ་དང ། མི་འམ་ཅིའི་རྒྱལ་པོ་སྡོང་པོའི་དགེ་བའི་རྩ་བའི་གཟི་བརྗིད་ཀྱིས་པི་ཝང་གི་སྒྲ་དེ་ལས་སེངྒེ་བསྒྱིངས་པ་ལྟར་ཤིང་སཱ་ལ་དུ་མ་གཡོ་བའི་སྒྲར་བྱང་ཆུབ་སེམས་དཔའི་སྤྱོད་པའི་ཚིགས་སུ་བཅད་པ་འདི་དག་བྱུང་ངོ ། །ཕན་པ་སྤྱོད་པ་དག་དང་དོན་སྤྱོད་དང ། །ཆོས་ཐོས་ནན་ཏན་བྱེད་པ་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཡོངས་སུ་སྐྱོ་བ་མེད་པར་སྤྱོད། །བདེ་བ་སྤྱོད་དང་སྐྱིད་པ་སྤྱོད་པ་དང ། །སེམས་ཅན་ཀུན་ལ་སེམས་སྙོམས་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་རྒྱ་ཆེན་མ་ཡིན་སྤྱོད་པ་མེད། །བརྟན་པ་སྤྱོད་དང་བདེན་པ་སྤྱོད་པ་དང ། །བསམ་པ་ཡོངས་སུ་དག་པ་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་སྒྱུ་མེད་སྤྱོད་པ་ཡིན། །དུལ་བ་སྤྱོད་དང་སྦྱིན་པ་སྤྱོད་པ་དང ། །དངོས་པོ་ཐམས་ཅད་ཡོངས་སུ་གཏོང་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་སེར་སྣ་མེད་པར་སྤྱོད་པ་ཡིན། །ཚུལ་ཁྲིམས་སྤྱོད་པ་མ་ཉམས་སྤྱོད་པ་དང ། །ལུས་དང་ངག་ནི་ཡོངས་དག་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ངན་པའི་ངང་ཚུལ་སྤྱོད་པ་མེད། །བརྟུལ་ཞུགས་སྤྱོད་དང་བཟོད་པ་སྤྱོད་པ་དང ། །ཁྲོ་སྐྱོན་ཡོངས་སུ་གཅོད་ 471a ༄#། །པའི་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གནོད་སེམས་མེད་པར་སྤྱོད་པ་ཡིན། །བརྩོན་འགྲུས་སྤྱོད་དང་མཐུ་རྣམས་སྤྱོད་པ་དང ། ། འཁོར་བར་ཡོངས་སུ་མི་སྐྱོ་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ལེ་ལོ་མེད་པར་སྤྱོད་པ་ཡིན། །བསམ་གཏན་སྤྱོད་དང་ཏིང་འཛིན་སྤྱོད་པ་དང ། །ལུས་དང་སེམས་ནི་རབ་ཏུ་དབེན་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གཡེང་བ་མེད་པར་སྤྱོད་པ་ཡིན། །ཤེས་རབ་སྤྱོད་དང་བློ་མཆོག་སྤྱོད་པ་དང ། །ཆོས་རྣམས་ཐམས་ཅད་ཇི་བཞིན་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཤེས་རབ་འཆལ་པའི་སྤྱོད་པ་མེད། །བྱམས་པ་སྤྱོད་དང་ཕན་འདོད་སྤྱོད་པ་དང ། །སེམས་ཅན་ཀུན་ལ་སྙིང་རྗེ་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཁྲོ་བའི་ཐ་པ་མེད་པར་སྤྱོད། །སྟོང་པ་སྤྱོད་དང་རབ་ཏུ་དབེན་སྤྱོད་དང ། །མཚན་མ་མེད་པ་ཡོངས་སུ་དག་སྤྱོད་དང། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་སྨོན་པ་མེད་པར་སྤྱོད་པ་ཡིན། །ཡང་དག་སྤྱོད་དང་དེ་བཞིན་ཉིད་སྤྱོད་དང ། །ཐམས་ཅད་མཁྱེན་པ་ཡོངས་སུ་དག་སྤྱོད་དང ། ། བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་ཆགས་པ་མེད་པར་སྤྱོད། །དད་པ་སྤྱོད་དང་དཔའ་སྤྱོད་པ་དང ། །དྲན་དང་གཡེང་བ་མེད་པར་སྤྱོད་པ་དང ། །བྱང་ཆུབ་མཆོག་ 471b གི་སྤྱོད་པ་གང་སྤྱོད་པ། །དེ་དག་ཡོངས་སུ་གཅོད་པ་མེད་པར་སྤྱོད། །བསམ་གཏན་སྤྱོད་དང་རྣམ་ཐར་སྤྱོད་པ་དང ། །མངོན་ཤེས་ལྔ་རྣམས་ཡོངས་དག་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཆགས་པ་མེད་པར་སྤྱོད་པ་ཡིན། །སངས་རྒྱས་སྤྱོད་དང་དམ་ཆོས་སྤྱོད་པ་དང ། །དགེ་འདུན་དཀོན་མཆོག་ཉེ་བར་བརྟན་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་དཀོན་མཆོག་མཆོག་གི་སྤྱོད་པ་ཡིན། །ཆོས་སྤྱོད་པ་དང་ཤིན་ཏུ་རིགས་སྤྱོད་དང ། །སེམས་ཅན་ཐམས་ཅད་ཡོངས་སུ་སྨིན་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་རྒྱུན་མི་འཆད་པར་སྤྱོད་པ་ཡིན། །བྱ་བ་སྤྱོད་དང་ཆོས་རྣམས་སྡོད་པ་དང ། །མཐའ་ཀུན་ཡོངས་སུ་གཅོད་པའི་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་ལྟ་བར་སྤྱོད་པ་མེད། །དག་པར་སྤྱོད་དང་རྣམ་པར་དག་སྤྱོད་དང ། །ཉོན་མོངས་ཐམས་ཅད་ཡོངས་སུ་གཅོད་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཡོངས་སུ་གདུང་བར་སྤྱོད་པ་མེད། །བདེ་བ་སྤྱོད་དང་ཤིན་ཏུ་རྣམ་ཐར་སྤྱོད། །སེམས་ཅན་ཀུན་ལ་འཇིགས་མེད་མཆོག་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། ། དེ་དག་སྒོ་ན་ལམ་སྤྱོད་པ་མེད་པ་ཡིན། །ཉི་མ་སྤྱོད་དང་སླ་བ་སྤྱོད་པ་དང ། །པདྨ་ལྟ་བུ་མགོས་པ་མེད་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ལྷར་བཅས་འཇིག་ 472a ༄#། །རྟེན་ཕྱག་བྱ་བ། །བརྒྱ་བྱིན་སྤྱོད་དང་ཚངས་པའི་སྤྱོད་པ་དང ། །དཀར་པོའི་ཆོས་རྣམས་ཡོངས་སུ་རྫོགས་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། ། དེ་དག་བདུད་རྣམས་སྡེར་བཅས་སྐྲག་པར་བྱེད། །མཆོག་སྤྱོད་པ་དང་ཁྱད་པར་འཕགས་སྤྱོད་དང ། །འདོད་ཆགས་ཉེས་པ་ཐ་བ་གཅོད་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་གཏི་མུག་སྤྱོད་པ་མེད། །ལམ་སྤྱོད་པ་དང་མུ་སྟེགས་སྤྱོད་པ་དང ། །ཤེས་རབ་མིག་ནི་ཡོངས་སུ་དག་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། ། དེ་དག་ཡོངས་སུ་རྟོག་པར་སྤྱོད་པ་མེད། །དུལ་བ་སྤྱོད་དང་རབ་ཏུ་ཞི་སྤྱོད་དང ། །མིང་དང་གཟུགས་ལ་མི་ཆགས་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ལྷ་དང་མི་ནི་མང་པོས་བསྟོད། །འཕགས་པའི་སྤྱོད་དང་ཤིན་ཏུ་མཉམ་སྤྱོད་དང ། །གཡོན་ཕྱོགས་ལམ་ནི་ཡོངས་སུ་གཅོད་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་རྟག་ཏུ་དོན་ལ་འབབ་པ་ཡིན། །དཔའ་བོ་སྤྱོད་དང་ཤིན་ཏུ་བརྟན་སྤྱོད་པ། །བདུད་ཀྱི་སྡེ་རྣམས་འཇིགས་པར་བྱེད་སྤྱོད་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་བྱང་ཆུབ་སྙིང་པོར་གཞོལ་བ་ཡིན། །གཟུང་བ་སྤྱོད་དང་དོན་ཡོད་སྤྱོད་པ་དང ། །གཟུངས་ལ་གཡེང་བ་མེད་པར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་གང་དུའང་ 472b མ་རིག་སྤྱོད་པ་མེད། །དགོན་པ་སྤྱོད་དང་རབ་ཏུ་དཔེན་སྤྱོད་པ། །རྟག་ཏུ་རབ་ཏུ་འབྱུང་བར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ནན་ཏན་བྱེད་པར་སྤྱོད་པ་ཡིན། །གཙོ་བོའི་སྤྱོད་དང་ཁྱད་པར་འཕགས་སྤྱོད་དང ། །འཇིག་རྟེན་ཐམས་ཅད་ཟིལ་གནོན་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཆུང་དུ་ལ་ནི་སྤྱོད་པ་མེད། །རིགས་པ་སྤྱོད་དང་ཐབས་ལ་སྤྱོད་པ་དང ། །བསམ་གཏན་བདེ་ལས་ལྡོག་པར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་མི་ཤེས་སྤྱོད་པ་མེད་པ་ཡིན། །ལྟ་བ་སྤྱོད་དང་རྣམ་པར་ལྟ་སྤྱོད་དང ། །མིང་དང་གཟུགས་ལ་མི་ཆགས་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་འཇིགས་པ་མེད་པར་སྤྱོད་པ་ཡིན། །ཐམས་ཅད་སྤྱོད་དང་ཀུན་ཏུ་སྤྱོད་པ་དང ། ། དབང་པོ་ཡོངས་སུ་སྨིན་པར་སྤྱོད་པ་དང ། །བྱང་ཆུབ་མཆོག་གི་སྤྱོད་པ་གང་སྤྱོད་པ། །དེ་དག་ཡེ་ཤེས་ནམ་མཁའི་མཐའ་དང་འདྲ། །བྱང་ཆུབ་སེམས་དཔའི་སྤྱོད་པ་བསྟན་པའི་ཚིགས་སུ་བཅད་པ་མངོན་པར་སྒྲུབ་པ་འདི་པི་ཝང་གི་སྒྲ་དེ་ལས་བྱུང་བ་ན་བྱང་ཆུབ་སེམས་དཔའ་ལྔ་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །རྒྱལ་པོ་མ་སྐྱེས་དགྲའི་འཁོར་དང ། རྒྱལ་པོའི་ཁབ་ཀྱི་བྲམ་ཟེ་དང ། ཁྱིམ་བདག་དང ། མི་འམ་ཅི་དང ། དྲི་ཟ་དང ། ལྟོ་འཕྱེ་ཆེན་པོ་དེ་དག་གི་འཁོར་གྱི་སྲོག་ཆགས་བརྒྱད་སྟོང་བླ་ན་མེད་པ་ཡང་དག་པར་རྫོགས་པའི་བྱང་ 473a ༄#། །ཆུབ་ཏུ་སེམས་བསྐྱེད་ནས་ཚིག་འདི་སྐད་ཅེས་བཅོམ་ལྡན་འདས། བདག་ཅག་ཀྱང་བྱང་ཆུབ་སེམས་དཔའི་སྤྱོད་པ་འདི་ལ་བསླབ་པར་བགྱིའོ། །ནན་ཏན་གྱིས་བསྒྲུབ་པར་བགྱིའོ། །སེམས་ཅན་ཚད་མ་མཆིས་པ་དག་ཀྱང་བྱང་ཆུབ་སེམས་དཔའི་སྤྱོད་པ་འདི་ཉིད་ཡང་དག་པར་འཛིན་དུ་སྩལ་བར་བགྱིའོ། །ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་མི་འམ་ཅིའི་རྒྱལ་པོ་སྡོང་པོ་འགྲོར་གནང་ངོ ། །དེ་ནས་བཅོམ་ལྡན་འདས་ཀྱིས་གནང་བས་མི་འམ་ཅིའི་རྒྱལ་པོ་སྡོང་པོ་བུ་དང་བཅས། དཔུང་དང་བཅས། སླས་དང་བཅས། རང་གི་སྐྱེ་བོ་དང་བཅས། འཁོར་དང་བཅས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཟོད་པ་གསོལ་ནས་སིལ་སྙན་དཀྲོལ། མེ་ཏོག་གི་ཆར་ཕབ། འོད་ཟེར་གྱི་དྲ་བ་ཕྱུང་སྟེ། ས་ཆེན་པོ་རྣམ་པ་དྲུག་ཏུ་གཡོས་པར་བྱས་ནས་བཅོམ་ལྡན་འདས་ཀྱི་ཐད་ནས་སོང་སྟེ། དེ་སྐད་ཅིག་ཐང་གཅིག་ཡུད་ཙམ་དེ་ཉིད་ལ་རིའི་རྒྱལ་པོ་སྤོས་ཀྱི་ངད་ལྡང་དུ་རང་གི་ཁྱིམ་དུ་ཕྱིན་ཏོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། ། བཅོམ་ལྡན་འདས། མི་འམ་ཅིའི་རྒྱལ་པོ་སྡོང་པོས་དེ་བཞིན་གཤེགས་པ་ལ་མཆོད་པ་དང་ཆོས་ལ་མཆོད་པས་བདག་ཟིལ་གྱིས་ནོན་ཏོ། །བཅོམ་ལྡན་འདས་ཀྱིས་བཀའ་ 473b སྩལ་པ།་ཀཽ་ཤི་ཀ་།མི་འམ་ཅིའི་རྒྱལ་པོ་སྡོང་པོས་ཁྱོད་འབའ་ཞིག་ཟིལ་གྱིས་མནན་པ་མ་ཡིན་གྱི། ཀཽ་ཤི་ཀ་།བྱང་ཆུབ་སེམས་དཔའ་སེམས་དཔའ་ཆེན་པོ་ས་ཐོབ་པ་མ་གཏོགས་པར་གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། ཉན་ཐོས་དང ། རང་སངས་རྒྱས་དེ་དག་ཐམས་ཅད་མི་འམ་ཅིའི་རྒྱལ་པོ་སྡོང་པོས་ཟིལ་གྱིས་ནོན་ཏོ། །དེ་ཅིའི་ཕྱིར་ཞེ་ན། ཀཽ་ཤི་ཀ་།བྱང་ཆུབ་སེམས་དཔའ་སེམས་བསྐྱེད་མ་ཐག་པས་ཉན་ཐོས་དང་རང་སངས་རྒྱས་ཐམས་ཅད་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་ཐམས་ཅད་ཟིལ་གྱིས་ནོན་ཏོ། །ཀཽ་ཤི་ཀ་།དེ་ལྟ་བས་ན། བྱང་ཆུབ་སེམས་དཔའ་ནི། ལྷར་བཅས་པའི་འཇིག་རྟེན་གྱིས་ཟིལ་གྱིས་མི་ནོན་ཏོ། །གང་བྱང་ཆུབ་སེམས་དཔའ་ལ་ཟིལ་གྱིས་གནོན་པར་སེམས་པ་དེ་ནི། དེ་བཞིན་གཤེགས་པ་ལ་ཟིལ་གྱིས་གནོན་པར་འདོད་པའོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་ནི། དེ་བཞིན་གཤེགས་པ་འབྱུང་ངོ ། །དེ་བཞིན་གཤེགས་པ་ལས་ནི། ཉན་ཐོས་དང་རང་སངས་རྒྱས་འབྱུང་ངོ ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་བསྟན་པ་འདི་ཐོས་ནས་ཐལ་མོ་སྦྱར་ཏེ་མཆི་མ་བླགས་ནས་འདི་སྐད་ཅེས་ཀྱེ་མའོ། །བདག་ནི། སངས་རྒྱས་ཀྱི་མཁྱེན་པ་ཆགས་པ་མི་མངའ་ཞིང་སྒྲིབ་པ་མི་མངའ་བ་འདི་ལྟ་བུ་ལས་ 474a ༄#། །ཉམས་སོ། །ཞེས་སྨྲས་སོ། །དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱི་བུ་ལྷའི་བུ་འོད་ཟེར་སྲུང་ཞེས་བྱ་བ་འཁོར་དེ་ཉིད་དུ་འདུས་བར་གྱུར་ཏེ་འདུག་པ་དེས་ལྷ་རྣམས་ཀྱི་དབང་པོ་བརྒྱ་བྱིན་ལ་འདི་སྐད་ཅེས་སྨྲས་སོ། །ཡང ། འདི་ལྟར་གང་རབ་ཏུ་དབེན་པ་རྣམ་པར་སྒྲུབ་པར་ཉེ་བར་གནས་པའི་མཚན་ཉིད་མ་ལགས་པའི་ཆོས་རྣམས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་བསྐྱེད་པ་དེ་ནི། སེམས་ཅན་ཐམས་ཅད་ལ་སྙིང་རྗེ་\?\རྙེད་པ་མ་ལགས། རྒྱ་ཆེན་པོ་ལ་མོས་པའི་དགེ་བའི་བཤེས་གཉེན་ལ་སྟེན་པ་མ་ལགས་ཏེ། ཕྱིས་འགྱོད་པར་འགྱུར་བའོ། །ཡབ། སྐྱོན་མེད་པ་ལ་ཞུགས་ཏེ་རྒྱུད་ཚིག་ཅིང་ས་བོན་ཚིག་སྟེ་ཐེག་པ་ཆེན་པོའི་སྣོད་དུ་མ་གྱུར་བ་ལ་ད་བགྱིར་ཅི་མཆིས། བསྟན་པ་འདི་བཤད་པ་ན་སུམ་ཅུ་རྩ་གསུམ་རིས་ཀྱི་ལྷའི་བུ་ལས་ལྷའི་བུ་སྟོང་ཐམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ལ་ལྷའི་བུ་འོད་ཟེར་སྲུང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། བཅོམ་ལྡན་འདས་ཀྱི་བྱང་ཆུབ་སེམས་དཔའི་སྤྱོད་པ་དཀའ་བ་སྤྱད་པ་བརྒྱ་སྟོང་ཕྲག་ཇི་སྙེད་པ་བཅོམ་ལྡན་འདས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྟར་པ་ནི། བདག་ལ་མངོན་སུམ་དུ་གྱུར་ 474b ཏོ། །བཅོམ་ལྡན་འདས། བཅོམ་ལྡན་འདས་སྔོན་བྱང་ཆུབ་སེམས་དཔར་གྱུར་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མ་མཛད་ལས་མི་སྐྱ་བའི་ཆོས་ལ་བཟོད་པ་རབ་ཏུ་ཐོབ་པའི་བཟོད་པ་ཐོབ་པ་དེ་ལ་འཇུག་པའི་རྣམ་པར་དབྱེ་བ་བསྟན་པ་ཅུད་ཟད་ཅིག་བཅོམ་ལྡན་འདས་ཀྱིས་བཤད་དུ་གསོལ།་བཅོམ་ལྡན་འདས། ཇི་ལྟར་ན། བྱང་ཆུབ་སེམས་དཔའ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་གང་བདག་གིས་ཐོས་ནས་དེ་བཞིན་ཉིད་དུ་བསྒྲུབས་པས་ཆོས་དེ་འཐོབ་པར་འགྱུར། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ལྷའི་བུ་འོད་ཟེར་སྤུང་ལ་འདི་སྐད་ཅེས་བཀའ་སྩལ་ཏོ། །འོད་ཟེར་སྲུང ། བྱང་ཆུབ་སེམས་དཔའ་དགེ་བའི་རྩ་བ་མ་བསྐྲུན་པ་རྣམས་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་པར་མི་འགྱུར་གྱི། བྱང་ཆུབ་སེམས་དཔའ་དགེ་བའི་རྩ་བ་བསྟན་པ་རྣམས་ཀྱིས་མི་སྐྱེ་བའི་ཆོས་ལ་བཟོད་པར་ཐོབ་པར་འགྱུར་རོ། །འོད་ཟེར་སྲུང ། བྱང་ཆུབ་སེམས་དཔའ་ཆོས་བཞི་དང་ལྡན་ན། མི་སྐྱེ་པའི་ཆོས་ལ་བཟོད་པ་རབ་ཏུ་ཟོད་པར་འགྱུར་རོ། །བཞི་གང་ཞེ་ན།་འདི་ལྟ་སྟེ། སངས་རྒྱས་མཉམ་པ་ཉིད་དང ། ཆོས་མཉམ་པ་ཉིད་དང ། དགེ་འདུན་མཉམ་པ་ཉིད་དང ། ཞིང་མཉམ་པ་ཉིད་དེ། ལྷའི་བུ། །བྱང་ཆུབ་སེམས་དཔའ་ 475a ༄#། །ཆོས་བཞི་པོ་འདི་དག་དང་ལྡན་ན། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །ལྷའི་བུ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། བསམ་གཏན་བཞིས་སྟོང་པ་ཉིད་ལ་རྣམ་པར་རྩེ་བ་དང ། ཕ་རོལ་ཏུ་ཕྱིན་པ་དྲུག་གིས་ཐབས་མཁས་པ་ལ་རྣམ་པར་རྩེ་བ་དང ། མངོན་པར་ཤེས་པ་ལྔས་ཡེ་ཤེས་ལ་རྣམ་པར་རྩེ་བ་དང ། ཐོགས་པ་མེད་པའི་ཡེ་ཤེས་ཀྱིས་རྫུ་འཕྲུལ་ལ་རྣམ་པར་རྩེ་བ་སྟེ། འོད་ཟེར་སྲུང ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། ། འོད་ཟེར་སྲུང ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། ཕུང་པོ་རྣམས་ལ་བྱང་ཆུབ་ཚོལ་ཡང་ཕུང་པོ་རྣམས་ལ་བྱང་ཆུབ་ཀྱི་རང་བཞིན་དུ་མོས་པ་མ་ཡིན་པ་དང ། ཁམས་རྣམས་ལ་བྱང་ཆུབ་ཚོལ་ཡང་ཁམས་རྣམས་ལ་བྱང་ཆུབ་ཀྱི་རང་བཞིན་དུ་མོས་པ་མ་ཡིན་པ་དང ། སྐྱེ་མཆེད་རྣམས་ལ་བྱང་ཆུབ་ཚོལ་ཡང་སྐྱེ་མཆེད་རྣམས་ལ་བྱང་ཆུབ་ཀྱི་རང་བཞིན་དུ་མི་རྟོག་པ་དང ། ཆོས་ཐམས་ཅད་ལ་ 475b བྱང་ཆུབ་ཚོལ་ཡང་ཆོས་ཐམས་ཅད་ལ་བྱང་ཆུབ་ཀྱི་རང་བཞིན་དུ་མོས་པ་མ་ཡིན་པ་སྟེ། འོད་ཟེར་སྲུང ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། མི་སྐྱེ་བའི་ཆོས་ལ་བཟོད་པ་རབ་ཏུ་འཐོབ་པར་འགྱུར་རོ། །འོད་ཟེར་སྲུང ། གཞན་ཡང་བྱང་ཆུབ་སེམས་དཔའ་ཆོས་བཞི་དང་ལྡན་ན། མ་སྐྱེ་བའི་ཆོས་ལ་བཟོད་པ་རབ་ཏུ་འཐོབ་པར་འགྱུར་རོ། །བཞི་གང་ཞེ་ན། འདི་ལྟ་སྟེ། མི་གཡོ་བའི་ཚུལ་གྱིས་ཆོས་ཐམས་ཅད་ཡང་དག་པའི་མཐའ་ལ་གནས་པར་ཤེས་པ་དང ། དུས་གསུམ་མཉམ་པ་ཉིད་པས་ཆོས་ཐམས་ཅད་དེ་བཞིན་ཉིད་ལ་གནས་པར་འཇུག་པ་དང ། ཆོས་ཐམས་ཅད་མཚན་ཉིད་འདྲེས་པ་མེད་པས་ཆོས་ཀྱི་དབྱིངས་སུ་འདུ་བར་ཤེས་པ་དང ། ཆོས་ཐམས་ཅད་མཉམ་པ་ཉིད་ཀྱི་རྗེས་སུ་སོང་བས་ནམ་མཁའི་རང་བཞིན་དུ་སོ་སོར་རྟོག་པ་སྟེ། འོད་ཟེར་སྲུང ། བྱང་ཆུབ་སེམས་དཔའ་ཆོས་བཞི་པོ་འདི་དག་དང་ལྡན་ན། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་འགྱུར་རོ། །མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པ་བསྟན་པ་འདི་བཤད་པ་ན་བྱང་ཆུབ་སེམས་དཔའ་ལྔ་སྟོང་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །ལྷའི་བུ་འོད་ཟེར་སྲུང་ནི། རྗེས་སུ་མཐུན་པའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །ཆོས་ཀྱི་རྣམ་གྲངས་འདིའི་ཐ་མར་བཅོམ་ལྡན་ 476a ༄#། །འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། ཁྱོད་ཀྱིས་མི་འམ་ཅིའི་རྒྱལ་པོ་སྡོང་པོས་ཞུས་པ་ཕ་རོལ་ཏུ་ཕྱིན་པས་འདུལ་བ་བསྟན་པའི་སྒོའི་ལེའུའི་ཆོས་ཀྱི་རྣམ་གྲངས་འདི་བཟུང་ངམ། ཀུན་དགའ་བོས་གསོལ་པ། བཅོམ་ལྡན་འདས། འདི་ལྟ་སྟེ། སངས་རྒྱས་ཀྱི་མཐུ་ཉིད་ཀྱིས་བདག་གིས་ཆོས་ཀྱི་རྣམ་གྲངས་འདི་བཟུང་ལགས་སོ། །བཅོམ་ལྡན་འདས། ཀྱེ་མའོ་ཇི་ཙམ་དུ་ཆོས་ཀྱི་རྣམ་གྲངས་འདི་ཟབ་མོ་རྣམ་པར་ངེས་པ་དང ། དོན་བཟང་པོ་དང ། ཚིག་འབྲུ་བཟང་པོས་བརྒྱན་པ་ནི། མཛེས་ཏེ། ངོ་མཚར་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདི་ལ་བཅོམ་ལྡན་འདས་ཀྱིས་ཆོས་ཀྱི་སྒོ་མ་བསྡུས་པ་དེ་གང་ཡང་མ་མཆིས་སོ། །བཅོམ་ལྡན་འདས། སྔོན་བདག་ལ་ཆོས་སྣང་བར་གྱུར་པ་གང་ལགས་པ་དེའང་ཆོས་ཀྱི་རྣམ་གྲངས་འདི་ལ་བརྟེན་ནས་འབུམ་འགྱུར་དུ་སྐྱེས་སོ། །བཅོམ་ལྡན་འདས། བདག་ནི། འདི་སྙམ་དུ་བདག་ལྟ་བུ་ཉི་ཚེ་བའི་འཚལ་བ་དང་ལྡན་པ། བློ་ཆུང་ངུ ། ཉན་ཐོས་ཀྱི་ཐེག་པའི་སྐྱོན་མཆིས་པ། ཐ་ཆད་ལ་ཞུགས་པར་གནས་པས་ཆོས་ཀྱི་རྣམ་གྲངས་འདི་ཐོས་ནས་ཀྱང་འདི་ལྟ་བུའི་ཆོས་ཀྱི་སྣང་བ་འདི་སྐྱེས་པར་གྱུར་ན། བྱང་ཆུབ་སེམས་དཔའ་སེམས་དཔའ་ཆེན་པོ་ 476b ཡེ་ཤེས་ཚད་མ་མཆིས་པའི་སྣོད་དུ་གྱུར་པ། བློ་རྒྱ་ཆེ་ཞིང་རྒྱ་མཚོ་ལྟ་བུ་དང་ལྡན་པ། ཆོས་རིན་པོ་ཆེ་ཐམས་ཅད་ཡོངས་སུ་འཛིན་པ། གསོལ་བ་མ་བཏབ་པར་སེམས་ཅན་ཐམས་ཅད་ཀྱི་དགེ་བའི་བཤེས་གཉེན་བགྱི་བ་གང་ལགས་པ་དེ་དག་གིས་ཆོས་ཀྱི་རྣམ་གྲངས་འདི་ཐོས་ན། ཆོས་ཀྱི་སྣང་བ་ཇི་སྙེད་ཅིག་ཐོབ་པར་འགྱུར་བ་ལྟ་སྨོས་ཀྱང་ཅི་འཚལ་སྙམ་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ཉི་མ་དང ། ཟླ་བའི་སྣང་བ་ཇི་སྙེད་པ་དེ་དག་ཐམས་ཅད་ནི། དེ་བཞིན་གཤེགས་པའི་སྤུ་གཅིག་གི་འོད་ཀྱིས་མོག་མོག་པོར་འགྱུར་རོ། །ཀུན་དགའ་བོ། དེ་བཞིན་གཤེགས་པའི་སྤུའི་ཁུང་བུ་ཐམས་ཅད་ནས་འོད་ཇི་སྙེད་བྱུང་བ་དེ་དག་ནི། ཤེས་རབ་ཀྱི་འོད་ཀྱི་བརྒྱའི་ཆར་ཡང་ཉེ་བར་མི་འགྲོ་སྟེ། སྟོང་གི་ཆ་དང ། སྟོང་ཕྲག་བརྒྱའི་ཆ་དང ། བྱེ་བའི་ཆ་དང ། བྱེ་བ་ཁྲག་ཁྲིག་བརྒྱ་ཕྲག་སྟོང་གི་ཆ་དང ། གྲངས་དང ། ཆ་དང ། བགྲང་བ་དང ། དཔེ་དང ། རྒྱུར་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། སྣང་བ་ཐམས་ཅད་ནི། ཤེས་རབ་ཀྱི་སྣང་བ་ལས་བྱུང་བའི་ཕྱིར་རོ། །ཀུན་དགའ་བོ། དེ་བཞིན་གཤེགས་པའི་ཤེས་རབ་ཀྱི་སྣང་བ་གང་ཡིན་པ་ཤེས་རབ་ཀྱི་སྣང་བ་དེ་དང་ལྡན་ན། དེ་བཞིན་གཤེགས་པ་དགྲ་བཅོམ་ 477a ༄#། །པ་ཡང་དག་པར་རྫོགས་པའི་སངས་རྒྱས་ཀྱི་འདས་པ་དང ། མ་འོངས་པ་དང ། ད་ལྟར་བྱུང་བའི་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང ། གཡོ་བ་རྣམས་མཁྱེན་པའི་ཤེས་རབ་ཀྱི་སྣང་བ་དེ་ལྟ་བུ་དང་རིགས་ཀྱི་བུ་དང ། རིགས་ཀྱི་བུ་མོ་དག་ལྡན་པར་འགྱུར་རོ། །ཀུན་དགའ་བོ། གང་ཆོས་ཀྱི་རྣམ་གྲངས་འདི་ཉན་པ་དང ། ཐོས་ནས་ཀྱང་མོས་པ་དང ། མོས་ནས་ཀྱང་འཛིན་པ་དང ། འཆད་བ་དང ། ཀློག་པ་དང ། ཀུན་ཆུབ་བར་བྱེད་པ་དང ། གཞན་དག་ལའང་རྒྱ་ཆེར་རབ་ཏུ་སྟོན་པ་དང ། ཚུལ་བཞིན་དུ་སོ་སོར་རྟོག་པ་དང ། དེ་བཞིན་དུ་སྒྲུབ་པ་དེ་དག་ནི། བྱང་ཆུབ་ཀྱི་སེམས་མི་བརྗེད་པ་དང ། སེམས་ཅན་ཡོངས་སུ་སྨིན་པར་བྱ་བ་དོན་དུ་གཉེར་བ་དང ། སྙིང་རྗེ་ཆེན་པོའི་གོ་ཆ་བགོས་པ་དང ། བྱམས་པ་ཆེན་པོའི་གོ་ཆ་བགོས་པ་དང ། བདུད་དང་ཕྱིར་རྒོལ་བ་བཅོམ་པ་དང ། བྱང་ཆུབ་ཀྱི་སྙིང་པོར་གཞོལ་བའི་སྐྱེས་བུ་དམ་པར་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏེ། །བཅོམ་ལྡན་འདས། གང་ཆོས་ཀྱི་རྣམ་གྲངས་འདི་ཐོས་ནས་མོས་པ་དང ། འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བགྱིད་པ་དང ། གཞན་དག་ལའང་རྒྱ་ཆེར་རབ་ཏུ་སྟོན་པའི་རིགས་ཀྱི་ 477b བུའམ་རིགས་ཀྱི་བུ་མོ་དེ་བསོད་ནམས་ཇི་སྙེད་ཅིག་སྐྱེས་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། རིགས་ཀྱི་བུའམ་རིགས་ཀྱི་བུ་མོ་གང་གིས་སྔ་དྲོའི་དུས་ཀྱི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་བཀང་སྟེ་རྒྱུན་དུ་ཞུགས་པ་དང ། ལན་གཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་དང ། རང་སངས་རྒྱས་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སྦྱིན་པ་བྱིན་པ་དང ། དེ་བཞིན་དུ་ཉི་མའི་གུང་དང ། ཕྱེ་མ་རེད་ཀྱི་དུས་དང ། སྲོད་དང ། ནམ་གྱི་གུང་ཐུན་དང ། ཐོ་རངས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་བར་ལ་སྦྱིན་པ་བྱིན་པ་དང ། རྣམ་གྲངས་འདི་ལྟ་བུས་ལོ་གཅིག་གམ། ལོ་བརྒྱའམ། ལོ་སྟོང་ངམ། ལོ་བརྒྱ་ཕྲག་སྟོང་དུ་སྦྱིན་པ་བྱིན་ན། ཀུན་དགའ་བོ། དེ་ལ་ཇི་སྙམ་དུ་སེམས། རིགས་ཀྱི་བུའམ་རིགས་ཀྱི་བུ་མོ་དེ་གཞི་དེ་ལས་བསོད་ནམས་མང་དུ་སྐྱེད་དམ། ཀུན་དགའ་བོས་གསོལ་པ། བཅོམ་ལྡན་འདས། མང་སྟེ། ཚད་མ་མཆིས་སོ། །བདེ་བར་གཤེགས་པ། དཔག་ཏུ་མ་མཆིས་སོ། །བཅོམ་ལྡན་འདས། གདུགས་ 478a ༄#། །གཅིག་བསགས་པའི་བསོད་ནམས་ཀྱི་ཕུང་པོ་དེའང་ཚད་མ་མཆིས་ན། དགུང་ལོ་བརྒྱ་ཕྲག་སྟོང་དུ་བསགས་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། ཁྱོད་མོས་པར་བྱའོ། །ཁྱོད་ཀྱིས་ཁོང་དུ་ཆུད་པར་བྱའོ། །བྱང་ཆུབ་དོན་དུ་གཉེར་བ་དང ། ཆོས་ཀྱི་འཁོར་ལོ་བསྐོར་བ་དོན་དུ་གཉེར་བ་དང ། སེམས་ཅན་རབ་ཏུ་ཐར་བར་བྱ་བ་དོན་དུ་གཉེར་བ་གང་ཆོས་ཀྱི་རྣམ་གྲངས་འདི་ཐོས་ནས་མོས་སམ། འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་ན། རིགས་ཀྱི་བུའམ་རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་པ་དེ་དེ་ལས་བསོད་ནམས་ཀྱི་ཕུང་པོ་མང་དུ་སྐྱེད་ན། གང་དེ་བཞིན་ཉིད་དུ་སྒྲུབ་པ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན།་ཀུན་དགའ་བོ། གང་དག་ཆོས་ཀྱི་རྣམ་གྲངས་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་ཙམ་འཛིན་ཏམ། འཆང་ངམ། ཀློག་གམ། ཀུན་ཆུབ་པར་བྱེད་དམ། གཞན་དག་ལའང་སྟོན་ན། དེ་ནི། སྦྱིན་པ་ཞེས་བྱ་སྟེ། དེ་ནི། སྦྱིན་པ་ཐམས་ཅད་ཟིལ་གྱིས་གནོན་པའོ། །འདི་ལྟ་སྟེ། ཆོས་ཀྱི་སྦྱིན་པ་འདི་ནི། སྦྱིན་པ་རྣམས་ཀྱི་མཆོག་གོ་།འདི་ལྟ་སྟེ། ཆོས་ཀྱི་རྗེས་སུ་འཛིན་པ་དེ་ནི། རྗེས་སུ་བཟུང་བ་རྣམས་ཀྱི་མཆོག་གོ་།འདི་ལྟ་སྟེ། ཆོས་ཀྱི་གདིང་བ་དེ་ནི། གདིང་བ་རྣམས་ཀྱི་མཆོག་གོ་།འདི་ལྟ་སྟེ། ཆོས་ 478b ཡོངས་སུ་འཛིན་པ་དེ་ནི། ཡོངས་སུ་འཛིན་པ་རྣམས་ཀྱི་མཆོག་གོ་།དེ་ཅིའི་ཕྱིར་ཞེ་ན། ཀུན་དགའ་བོ། །ཆོས་ཀྱི་སྦྱིན་པ་བྱིན་པས་ནི། ཉོན་མོངས་པ་འབྲི་བར་འགྱུར་རོ། །ཟང་ཟིང་གི་སྦྱིན་པ་བྱིན་པས་ནི། ལུས་བརྟན་པ་བྱས་པར་འགྱུར་རོ། །ཀུན་དགའ་བོ། །དེ་ལྟ་བས་ན། བྱང་ཆུབ་སེམས་དཔའ་ཉོན་མོངས་པ་འབྲི་བར་བྱེད་འདོད་པས་སངས་རྒྱས་ཀྱིས་གནང་བ་ཆོས་ཀྱི་སྦྱིན་པ་དེ་སྦྱིན་པར་བྱ་སྟེ། ཆོས་ཀྱི་སྦྱིན་པ་དེས་ནི། ཡོན་ཏན་གྱི་ཁྱད་པར་ཐམས་ཅད་ཐོབ་པར་འགྱུར་རོ། །བྱང་ཆུབ་སེམས་དཔའ་ཆོས་ཀྱི་སྦྱིན་པ་སྦྱིན་པ་ནི། ཡོན་ཏན་གྱི་ཕན་ཡོན་ཡང་དག་ཕུལ་སུམ་ཅུ་རྩ་གཉིས་རབ་ཏུ་འཛིན་པར་འགྱུར་རོ། །སུམ་ཅུ་རྩ་གཉིས་གང་ཞེ་ན། འདི་ལྟ་སྟེ། དྲན་པ་དང་ལྡན་པར་འགྱུར་བ་དང ། བློ་གྲོས་དང་ལྡན་པར་འགྱུར་བ་དང ། རྟོགས་པ་དང་ལྡན་པར་འགྱུར་བ་དང ། འདོད་ཆགས་ཆུང་པར་འགྱུར་བ་དང ། ཞེ་སྡང་ཆུང་བར་འགྱུར་བ་དང ། གཏི་མུག་ཆུང་བར་འགྱུར་བ་དང ། བདག་དང་གཞན་གྱི་ཉོན་མོངས་པ་ཚར་གཅོད་པར་འགྱུར་བ་དང ། སྐྱེ་བོ་མང་པོ་དགའ་བར་འགྱུར་བ་དང ། དེའི་བསྔགས་པ་ལྷ་རྣམས་ཀྱིས་བརྗོད་པར་འགྱུར་བ་དང ། ལྷ་དང་ཀླུ་དང་གནོད་སྦྱིན་དང་དྲི་ཟ་རྣམས་ཀྱིས་བསྲུང་བར་འགྱུར་བ་དང ། ལས་བྱས་ནས་བསོད་སྙོམས་ཐ་བར་འགྱུར་བ་དང ། ཆོས་གོས་དང་བསོད་སྙོམས་དང་མལ་ཆ་དང་ 479a ༄#། །ན་བའི་གསོས་སྨན་དང་ཡོ་བྱད་རྙེད་པར་འགྱུར་བ་དང ། གྲགས་པ་དང་སྒྲ་དང་ཚིགས་སུ་བཅད་པ་ཕྱོགས་བཅུར་གྲགས་པར་འགྱུར་བ་དང ། མི་མ་ཡིན་པ་རྣམས་ཀྱིས་གླགས་རྙེད་པར་མི་འགྱུར་བ་དང ། སངས་རྒྱས་བཅོམ་ལྡན་འདས་རྣམས་ཀྱིས་བསྔགས་པར་འགྱུར་བ་དང ། དམ་པའི་ཆོས་ཡོངས་སུ་སྲུང་བ་དང ། སངས་རྒྱས་བཅོམ་ལྡན་འདས་རྣམས་ཀྱིས་དམ་པའི་ཆོས་འཛིན་པར་འགྱུར་བ་དང ། ངན་སོང་ཐམས་ཅད་ཀྱིས་འཇིགས་པར་མི་འགྱུར་ཞིང ། དེ་ལ་ལྷ་དང་མིར་སྐྱེ་བ་དཀའ་བར་མི་འགྱུར་བ་དང ། སངས་རྒྱས་མཐོང་བ་དང་མི་འབྲལ་བར་འགྱུར་བ་དང ། ཆོས་ཉན་པ་དང་འབྲལ་བར་མི་འགྱུར་བ་དང ། དགེ་འདུན་ལ་བསྙེན་བཀུར་བྱེད་པ་དང་འབྲལ་བར་མི་འགྱུར་བ་དང ། སྐྱེ་བ་དྲན་པར་འགྱུར་པ་དང ། སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་བ་དང ། ནམ་དུའང་དབང་པོ་མ་ཚང་བར་མི་འགྱུར་བ་དང ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཐོབ་པར་འགྱུར་བ་དང ། གཟི་བརྗིད་ཅན་གྱི་གཟུངས་ཀྱི་ས་བོན་སྒྲུབ་པར་འགྱུར་བ་དང ། སྤོབས་པ་རྒྱུན་མི་འཆད་པའི་རྒྱུ་རབ་ཏུ་འཛིན་པར་འགྱུར་བ་དང ། སྐྱེ་བོ་མཁས་པས་གཡོག་བྱས་པར་འགྱུར་བ་དང ། ཤེས་རབ་ཆེན་པོའི་རྒྱུ་རབ་ཏུ་འཛིན་ 479b པར་འགྱུར་བ་དང ། མྱུར་དུ་ཆོས་ཀྱི་སྣང་བ་རབ་ཏུ་ཐོབ་པར་འགྱུར་བ་དང ། དེའི་སེམས་ལ་ཚུལ་བཞིན་མ་ཡིན་པའི་ཡིད་ལ་བྱེད་པ་ཀུན་ཏུ་མི་འབྱུང་བ་དང ། འཇིག་རྟེན་གྱི་ཟང་ཟིང་གི་སྦྱིན་པ་ཐམས་ཅད་ཟིལ་གྱིས་མནན་ནས་དེ་ཆོས་ཀྱི་གཏེར་ཟད་མི་ཤེས་པ་ཡོངས་སུ་འཛིན་པར་འགྱུར་བ་སྟེ། ཀུན་དགའ་བོ། བྱང་ཆུབ་སེམས་དཔའ་ཆོས་ཀྱི་སྦྱིན་པ་སྦྱིན་ན།་ཡོན་ཏན་གྱི་ཁྱད་པར་ཡང་དག་ཕུལ་སུམ་ཅུ་རྩ་གཉིས་འདི་དག་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་ལྷ་རྣམས་ཀྱི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གིས་ཀྱང་ཆོས་ཀྱི་རྣམ་གྲངས་འདི་བཟུང་ལགས་ཏེ། བཅོམ་ལྡན་འདས་ཡོངས་སུ་མྱ་ངན་ལས་འདས་པའི་སླད་ན་སེམས་ཅན་སྣོད་དུ་གྱུར་པ་དེ་དག་གི་རྣ་ལམ་དུ་བསྒྲག་པར་བགྱི། ཀུན་བསྲུང་བར་བགྱི། མོས་པར་བགྱི། དེ་ཅིའི་སླད་དུ་ཞེ་ན། བཅོམ་ལྡན་འདས། བདག་ནི། ཡོན་ཏན་ཕུན་སུམ་ཚོགས་པ་འདི་དང ། བསོད་ནམས་ཡོངས་སུ་འཛིན་པ་དོན་དུ་གཉེར་བའི་སླད་དུའོ། །དེ་ནས་བཅོམ་ལྡན་འདས་ཀྱིས་ལྷ་རྣམས་ཀྱི་དབང་པོ་བརྒྱ་བྱིན་ལ་ལེགས་སོ། །ཞེས་བྱ་བ་གནང་སྟེ། ཀཽ་ཤི་ཀ་།ཁྱོད་དམ་པའི་ཆོས་ཡོངས་སུ་གཟུང་བའི་ཕྱིར་བའི་མདུན་དུ་སེངྒེའི་སྒྲ་བསྒྲགས་པ་ལེགས་སོ་ལེགས་སོ། །ཀཽ་ཤི་ཀ་།དགེ་བའི་རྩ་བ་འདི་ཐོབ་དམ་ 480a ༄#། །པའི་ཆོས་ཡུན་ཇི་སྲིད་དུ་གནས་པ་དེ་སྲིད་དུ་ལྷ་དང ། ལྷ་མ་ཡིན་གཡུལ་འགྱེད་པ་ན་ལྷ་མ་ཡིན་རྣམས་ནི། ཕམ་པར་འགྱུར། ལྷ་རྣམས་ནི། རྒྱལ་བར་འགྱུར་རོ། །དེ་ཅིའི་ཕྱིར་ཞེ་ན། ཀཽ་ཤི་ཀ་།ཆོས་ཀྱི་རྣམ་གྲངས་འདི་ནི། ཡང་དག་ཕུལ་ཡིན་ཏེ། ཀཽ་ཤི་ཀ་།འདི་ལྟ་སྟེ། ཆོས་ཐམས་ཅད་མི་དམིགས་པ་དེ་ནི།་འཇིགས་པ་མེད་པའི་སྦྱིན་པའོ། །ཀཽ་ཤི་ཀ་།གང་ཅུང་ཟད་འཇིགས་པ་སྐྱེ་བ་དེ་དག་ཐམས་ཅད་ནི། འཇིག་ཚོགས་ལ་ལྟ་བ་ལ་དམིགས་ཤིང་རབ་ཏུ་གནས་པ་ལས་བྱུང་ངོ ། །ཀཽ་ཤི་ཀ་།གང་མི་དམིགས་པ་དེ་དམ་པའི་ཆོས་ཡོངས་སུ་འཛིན་པའོ། །དེ་ནས་བཅོམ་ལྡན་འདས་ལ་མི་མཇེད་ཀྱི་བདག་པོ་ཚངས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་བསམ་གཏན་གྱི་བདེ་བ་ལ་གནས་པ་ཚད་མ་མཆིས་པ་བཏང་སྟེ་གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་གང་དང་གང་ན་ཆོས་ཀྱི་རྣམ་གྲངས་འདི་རབ་ཏུ་སྤྱོད་པ་དེ་དང ། དེ་དག་ཏུ་བདག་ཆོས་མཉན་པའི་སླད་དུ་ཉེ་བར་མཆི་བར་བགྱིའོ། །མཆིས་ནས་ཀྱང་ཆོས་སྨྲ་བ་དེ་དག་ཆོས་དང་ལྡན་པས་བསྲུང་བ་དང ། སྦ་བ་དང ། བསྐྱབ་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཉན་ཐོས་ 480b དང།་རང་སངས་རྒྱས་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། འཁོར་ལོས་བསྒྱུར་བའི་རྒྱལ་པོ་རྣམས་ནི། འདི་ལས་བྱུང་བའི་སླད་དུའོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞིས་འདི་སྐད་ཅེས་གསོལ་ཏོ། །བཅོམ་ལྡན་འདས། རྒྱལ་པོ་ཆེན་པོ་བཞི་པོ་བདག་ཅག་དང ། བཅོམ་ལྡན་འདས་ཀྱི་ཉན་ཐོས་ཆེན་པོ་དེ་དག་དང་ཅག་གིས་ཆོས་ཀྱི་རྣམ་གྲངས་འདི་ཡུན་རིང་དུ་གནས་པར་བགྱི་བའི་སླད་དུ་བསྲུང་བ་དང ། སྦ་བ་དང ། བསྐྱབ་པ་ལ་བརྩོན་པར་བགྱིའོ། །བདག་ཅག་གི་འཁོར་གང་དག་སངས་རྒྱས་དང ། སངས་རྒྱས་ཀྱི་བསྟན་པ་ལ་མ་དད་པ་དེ་དག་ཀྱང་ཅི་ནས་དེ་བཞིན་གཤེགས་པའི་བསྟན་པ་བསྲུང་བའི་སླད་དུ་བརྩོན་པར་འགྱུར་བར་དང་པར་བགྱིའོ། །བཅོམ་ལྡན་འདས། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་གང་དག་སངས་རྒྱས་ཀྱི་བསྟན་པ་ལ་བརྩོན་པ་དང ། གཞན་ཡང་བཅོམ་ལྡན་འདས་ཀྱི་བསྟན་པ་ལ་མངོན་པར་དད་པ་སྲུང་བ་མ་མཆིས་པ་དེ་དག་བསྲུང་བའི་ཆེད་དུ་གསང་སྔགས་ཀྱི་ཚིག་འདི་དག་ལ་ཁ་ཏོན་དུ་བགྱིའོ། །གསང་སྔགས་ཀྱི་ཚིག་འདི་དག་གིས་གནོད་སྦྱིན་དང ། སྲིན་པོ་དང ། དྲི་ཟ་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། གྲུལ་བུམ་ལ་སོགས་པ་དང ། མི་དང ། མི་མ་ལགས་པ་དང ། གཞན་ཡང་སངས་ 481a ༄#། །རྒྱས་ཀྱི་བསྟན་པ་ལ་ཞེ་སྡང་བར་བགྱིད་པ་རྣམས་ཤིན་ཏུ་ཚར་གཅོད་པར་འགྱུར་རོ། །ཏདྱ་ཐཱ། ཏ་རེ་བེ། ཨ་རེ་བེ། ཨ་ནོ་བེ། ས་ར་བེ། ཧུ་ལུ་མ་ཧཱ་ཧུ་ལུ།་ཧུ་ལུ་ཧུ་ལུ། ཨ་བད་ཊེ། བི་ཀ་ད་ཊེ། པ་ར་ཚེ་ད་ནི། ནི་གྲྀ་ནི་ཧཱ་ཏེ། པྲ་གྷཱ་ཏ་ནི། ཨིད་ཊི་ཨིད་ཊི། བིད་ཊི་བིད་ཊི། ཨད་ཚེ་གད་ཚེ། མ་ར་ནི་གྲ་ཧ་ན། སརྦ་པ་ར་པྲ་པཱ་དི་ནི་གྲ་ཧ་ན། སརྦ་མི་ཐྱ་པྲ་ཡཱ། ཏ་ནན་ནི་གྲ་ཧ་ན། སརྦ་བྷཱུ་ཏ་གྲ་ཧ་ན། བུདྡྷ་བར་ནི་ཏ་དྷརྨ་ནི་ཡ་ཏ་ཤ་ཡ་བྷཱུ་ཏ་ན། བུདྡྷ་བར་ནི་ཏ་ན། ཙ་ཏུར་མ་ཧཱ་རཱ་ཛ་ནིར་དེ་ཤ་ན། མནྟྲ་པ་ལ་ན། ཨ་བ་ཏཱ་ར། པྲོ་ཀྵེཎ་ནི་གྲ་ཧཱ་ཡ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་ལྷའི་ཅོད་པན་ལ་བཀའ་སྩལ་པ།་སྐྱེས་བུ་དམ་པ་དག་།ངས་བསྐལ་པ་མཐའ་ཡས་གྲངས་མེད་པར་བསྒྲུབས་པའི་བྱང་ཆུབ་འདི་ཅི་ནས་ཡུན་རིང་དུ་གནས་པར་འགྱུར་བ་དང ། ནུབ་པར་མི་འགྱུར་བར་བྱ་བའི་ཕྱིར་ཁྱེད་གཉིས་ཀྱི་ལག་ཏུ་བཞག་གོ་།གཏད་དོ། །དེ་གཉིས་ཀྱིས་གསོལ་པ། བཅོམ་ལྡན་འདས། བདག་ཅག་གཉིས་ཀྱིས་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་སླད་ན་ཆོས་ཀྱི་རྣམ་གྲངས་འདི་གཟུང་བར་བགྱིའོ། །རྒྱས་པར་བགྱིའོ། །ཆོས་ཀྱི་རྣམ་གྲངས་འདི་ཆོས་སྨྲ་བ་དང ། དགེ་བའི་རྩ་བ་བསྐྲུན་པའི་རིགས་ 481b ཀྱི་བུའམ་རིགས་ཀྱི་བུ་མོ་དེ་དག་གི་ལག་ཏུ་མཆི་བར་བགྱིའོ། །དེ་དག་མདོ་སྡེ་འདི་ལ་མོས་པར་བགྱི་བ་དང ། ཡོངས་སུ་འཛིན་པར་བགྱི་བའི་སླད་དུ་དེ་དག་གི་ཡིད་རབ་ཏུ་གཟུང་བར་བགྱིའོ། །བཅོམ་ལྡན་འདས། སླད་མའི་ཚེ་སླད་མའི་དུས་ན་ཆོས་ཀྱི་རྣམ་གྲངས་འདི་གང་དག་གི་རྣ་ལམ་དུ་ཐོས་པ་དང ། ཐོས་ནས་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བགྱིད་པ་དང ། འཆད་པ་དེ་དག་ནི། བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་ལྷའི་ཅོད་པན་གྱི་བྱིན་གྱི་རླབས་ལགས་པར་རིག་པར་བགྱིའོ། །དེ་ནས་བདུད་སྡིག་ཅན་འཁོར་དེར་འདུས་པར་གྱུར་ནས་འདུག་པ་དེ་གདོང་ལས་མཆི་མ་ཟག་ཅིང་ང་རོ་ཕྱུང་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གང་བཅོམ་ལྡན་འདས་ཀྱིས་ཉན་ཐོས་ཀྱི་ཐེག་པ་ལས་བརྩམས་ཏེ་ཆོས་བསྟན་པ་དེ་ལ་ནི། བདག་ཐ་ན་སྤུ་ཟིང་དེས་བགྱིད་པ་ཙམ་ཡང་མ་མཆིས་སོ། །གང་བཅོམ་ལྡན་འདས་ཀྱིས་བྱང་ཆུབ་སེམས་དཔའི་ཕྱག་རྒྱ་དེ་བཞིན་གཤེགས་པའི་བྱིན་གྱི་རླབས་ཀྱིས་བྱིན་གྱིས་བརླབས་པ། བྱང་ཆུབ་སེམས་དཔའ་ཐམས་ཅད་ཀྱི་བྱང་ཆུབ་ཀྱི་ལམ་ལ་འཇུག་པ། སེམས་ཅན་ཐམས་ཅད་ཀྱི་རྟོན་པའི་ཆོས་ཀྱི་རྣམ་གྲངས་འདི་གསུངས་པ་དེ་བདག་མྱ་ངན་གྱི་ཟུག་རྔུ་དང་ལྡན་ཞིང་བདག་ཉིད་རྙིས་པར་ 482a ༄#། །གྱུར་པ་སྙམ་བགྱིད་དོ། །བཅོམ་ལྡན་འདས། བདག་ལ་ཕྱག་བརྐྱང་བ་སྩལ་དུ་གསོལ། གང་ཐོས་པས་བདག་མྱ་ངན་གྱི་ཟུག་རྔུ་དང་ལྡན་པར་འགྱུར་བའི་ཆོས་ཀྱི་རྣམ་གྲངས་འདི་ལྟ་བུའང་མ་གསུང་བར་གསོལ། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན། ཁྱོད་དང་མཐུན་པའི་སེམས་ཅན་ཆོས་ཟབ་མོ་འདི་ལྟ་བུ་ལ་མ་མོས་པ་ནི། མང ། གང་དག་མོས་པའི་སེམས་ཅན་དེ་དག་ནི། ཉུང་གི་།མྱ་ངན་མ་བྱེད། སྨྲེ་སྔགས་མ་འདོན་ཅིག་།སྡིག་ཅན། འདི་ལྟ་སྟེ། དཔེར་ན། སའི་སྟེང་ནས་རྡུལ་བླངས་པ་སྙེད་ཀྱི་སེམས་ཅན་ནི། ཆོས་ཀྱི་རྣམ་གྲངས་ཟབ་མོ་འདི་ལྟ་བུ་ལ་མོས་སོ། །སའི་རྡུལ་ཇི་སྙེད་པ་དེ་སྙེད་ཀྱི་སེམས་ཅན་ནི། ཆོས་ཀྱི་རྣམ་གྲངས་ཟབ་མོ་འདི་ལ་མ་མོས་ཏེ། དེ་དག་ཐམས་ཅད་ནི། ཁྱོད་དང་མཐུན་ནོ། །སེམས་ཅན་གྱི་ཁམས་ཚད་མེད་པ་ཁྱོད་དང་མཐུན་གྱི། དེ་བས་ན། སྡིག་ཅན་དགའ་བར་གྱིས་ཤིག ། ཆོས་ཀྱི་རྣམ་གྲངས་འདི་བཤད་པ་ན་སེམས་ཅན་དཔག་ཏུ་མེད་པ་ནི། བྱང་ཆུབ་ལ་ཡང་དག་པར་ཞུགས་སོ། །བྱང་ཆུབ་སེམས་དཔའ་དགུ་ཁྲི་ཉིས་སྟོང་ནི། མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །སྲོག་ཆགས་བརྒྱད་ཁྲི་བཞི་སྟོང་ནི། ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།དགེ་སློང་བརྒྱད་སྟོང་ནི། 482b ཉེ་བར་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་ནས་སྣང་བ་ཆེན་པོས་ཁྱབ་པར་གྱུར་ཏེ། ལྷའི་མེ་ཏོག་གི་ཆར་ནི། རབ་ཏུ་བབ། སིལ་སྙན་བརྒྱ་སྟོང་དག་ནི། མ་དཀྲོལ་པར་རང་འཁྲོལ་ལོ། །ལྷ་བྱེ་བ་ཁྲག་ཁྲིག་བརྒྱ་སྟོང་རྣམས་ནི། སྟེང་གི་བར་སྣང་ལ་ཀྱེ་མ་བདག་ཅག་གིས་ཛམྦུའི་གླིང་དུ་ཆོས་ཀྱི་འཁོར་ལོ་ལན་གཉིས་བསྐོར་བ་འདི་མཐོང་ངོ ། །བཅོམ་ལྡན་འདས་ཀྱིས་གང་ཡང་ཆོས་ཀྱི་རྣམ་གྲངས་འདི་བསྟན་ཏེ་བཤད་པ་སེམས་ཅན་གྱི་དོན་མཛད་པ་གང་ལགས་པ་འདི་ནི། གྲོང་ཁྱེར་འཁོར་མོ་འཇིག་ཏུ་ཆོས་ཀྱི་འཁོར་ལོ་བསྐོར་ཏེ་སེམས་ཅན་ཡོངས་སུ་སྨིན་པར་མཛད་པ་དེ་བས་ཆེས་མཆོག་གོ་།གང་ཆོས་ཀྱི་རྣམ་གྲངས་འདི་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བགྱིད་བ་དང ། གཞན་དག་ལ་རྒྱ་ཆེར་སྟོན་པ་དང ། ཐ་ན་གླེགས་བམ་ལ་བྲིས་ཏེ་འཆང་བའི་སེམས་ཅན་དེ་དག་ཀྱང་ཆོས་ཀྱི་འཁོར་ལོ་བསྐོར་བར་འགྱུར་རོ། །ཞེས་ཆེད་དུ་བརྗོད་པ་ཆེད་དུ་བརྗོད་དོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་ལྷའི་ཅོད་པན་དང ། ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་ 483a ༄#། །བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག། དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་མི་འམ་ཅིའི་རྒྱལ་པོ་སྡོང་པོས་ཞུགས་པ་ཕ་རོལ་ཏུ་ཕྱིན་པ་རྣམ་པར་ངེས་པ་བསྟན་པ་དང ། དམ་པའི་ཆོས་རིན་པོ་ཆེའི་ལེའུ་ཞེས་བྱ་བར་ཡང་ཟུངས་ཤིག། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། བྱང་ཆུབ་སེམས་དཔའ་བྱམས་པ་དང ། བྱང་ཆུབ་སེམས་དཔའ་ལྷའི་ཅོད་པན་དང ། ཚེ་དང་ལྡན་པ་ཀུན་དགའ་བོ་དང ། ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་ཡི་རང་སྟེ་མངོན་པར་དགའོ། །འཕགས་པ་མི་འམ་ཅིའི་རྒྱལ་པོ་སྡོང་པོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །། ཞུ་ཆེན་གྱི་ལོཙྪ་བ་བནྡྷེ་དཔལ་གྱི་ལྷུན་པོ་དང ། དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། |