rKTs


H160

(e-text produced by ACIP)

see text in transliteration
16a
།།རྒྱ་གར་གྱི་མཁན་པོ་ཛི་ན་མི་ཏྲ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།རྒྱ་གར་སྐད་དུ། ཨཱརྱ་བྲཧྨ་དཏྟ་པ་རི་པྲྀ་ཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཚངས་པས་བྱིན་གྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་དུ་ཡོད་པ་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་ཐམས་ཅད་ཀྱང་མངོན་པར་ཤེས་པ་མངོན་པར་ཤེས་པའི་བྱང་ཆུབ་སེམས་དཔའ་མངོན་པར་ཤེས་པ་ཐོབ་པ། གཟུངས་ཐོབ་པ། ཏིང་ངེ་འཛིན་ཐོབ་པ། ཆགས་པ་མེད་པའི་གཟུངས་ཐོབ་པ། སྒོ་མཐའ་ཡས་པའི་ཕྱག་རྒྱ་བསྒྲུབ་པའི་གཟུངས་ལ་མཁས་པ། སྟོང་པ་ཉིད་ལ་གནས་པ། མཚན་མ་མེད་པའི་སྤྱོད་ཡུལ་བ། མ་བརྟགས་པའི་སྨོན་ལམ་ཅན། མི་སྐྱེ་བའི་
16b
ཆོས་ལ་བཟོད་པ་ཐོབ་པ་ཤ་སྟག་དང་ཐབས་གཅིག་ཏུ་བཞུགས་ཏེ། དེ་ནས་བྱང་ཆུབ་སེམས་དཔའ་མཐོང་བ་དོན་ཡོད་བྱང་ཆུབ་སེམས་དཔའ་ལྔ་བརྒྱ་ཙམ་དང་ལྷན་ཅིག་ཏུ་བཅོམ་ལྡན་འདས་ཀྱི་ཞབས་ལ་ཕྱག་བཙལ་ཏེ། བཅོམ་ལྡན་འདས་ལ་བསྐོར་བ་བྱས་ནས། མཐར་གྱིས་ལྗོངས་རྒྱུ་ཞིང་སོང་བ་ལས་ལྔ་འཛིན་གྱི་ལྗོངས་སུ་ཕྱིན་ཏོ། །དེ་ནས་རྒྱལ་པོ་ཚངས་པས་བྱིན་གྱིས་བྱང་ཆུབ་སེམས་དཔའ་མཐོང་བ་དོན་ཡོད་བདག་གི་ཡུལ་འདིར་ཕྱིན་ཏོ་ཞེས་ཐོས་ནས་དེ་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་བ་དང ། ཡིད་བདེ་བ་སྐྱེས་ནས་སྐྱེ་བོའི་ཚོགས་མང་པོས་ཡོངས་སུ་བསྐོར་ཅིང་མདུན་དུ་བདར་ནས། བྱང་ཆུབ་སེམས་དཔའ་མཐོང་བ་དོན་ཡོད་པ། ག་བ་དེར་སོང་སྟེ་ཕྱིན་ནས། བྱང་ཆུབ་སེམས་དཔའ་མཐོང་བ་དོན་ཡོད་ཀྱི་རྐང་པ་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་གོ། སྐྱེ་བོ་ཕལ་པོ་ཆེ་དེ་དག་ཀྱང་བྱང་ཆུབ་སེམས་དཔའ་མཐོང་བ་དོན་ཡོད་ཀྱི་རྐང་པ་ལ་མགོ་བོས་ཕྱག་བཙལ་ནས། ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བ་དོན་ཡོད་ཀྱིས་རྒྱལ་པོ་ཚངས་པས་བྱིན་གཡོག་འཁོར་དང་བཅས་པ་འཁོད་པར་རིག་ནས་རྒྱལ་པོ་ཚངས་པས་བྱིན་ལ་འདི་སྐད་ཅེས་སྨྲས་སོ། །རྒྱལ་པོ་ཆེན་པོ། རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ཆོས་ལྔ་དང་ལྡན་
17a
༄#། །པ་ནི་འཁོར་བ་ན་འཁོར་བའི་ཚེ་རྟག་ཏུ་ཁྱད་པར་དུ་འགྲོ་བར་འགྱུར་ལ། མི་ཁོམ་པ་རྣམས་སུའང་སྐྱེ་བར་མི་འགྱུར་རོ། །དེ་བཞིན་གཤེགས་པ་དང་ཡང་ཕྲད་ཅིང་མཉེས་པར་བྱེད་པར་འགྱུར་རོ། །སངས་རྒྱས་བཅོམ་ལྡན་འདས་རྣམས་ཆོས་སྟོན་པ་ནའང་ལྡེམ་པོའི་ངག་ལ་མཁས་པར་འགྱུར་རོ། །དྲན་པ་མི་ཆོད་པ་དང་ལྡན་པར་འགྱུར། མཛེས་པར་ཡང་འགྱུར། དབང་པོ་མ་ཚང་བར་མི་འགྱུར། སངས་རྒྱས་བཅོམ་ལྡན་འདས་རྣམས་ཀྱིས་ཀྱང་དོན་དམ་པ་དང་ལྡན་པའི་གཏམ། འདི་ལྟ་སྟེ། བདེན་པ་བཞི་བསྟན་པ་དང་ལྡན་པས་བོད་པར་འགྱུར་ཏེ། ལྔ་གང་ཞེ་ན། རྒྱལ་པོ་ཆེན་པོ། འདི་ལ་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་དད་པ་ཅན་ཡིན་ཏེ། དད་པའི་ཤས་ཆེ་ཞིང་ཞེ་འགྲས་པ་མེད་པའི་ཡིད་དང་ལྡན་ནོ། །དེའི་དད་པ་དེའང་ངེས་པར་རྩ་ཟུག་ཏུ་བསྟན་པ་ཡིན་ནོ། །དད་པ་དེའང་རྣམ་པ་བཅུར་བལྟ་བར་བྱ་སྟེ། བཅུ་གང་ཞེ་ན།་འདི་ལྟ་སྟེ། གཡོ་མེད་པར་སྦྱིན་པ་དང ། བ་དོག་པ་ཐམས་ཅད་ཡོངས་སུ་གཏོང་བ་དང ། ལྷག་པའི་ང་རྒྱལ་མེད་པ་དང ། དད་པའི་ཤས་ཆེ་བ་དང ། འཕགས་པའི་བསྟན་པ་ལ་སྐྱོན་དུ་མི་འཛིན་པ་དང ། དགེ་སློང་རབ་འབྲིང་ཐ་མ་རྣམས་ལ་འཁྲུལ་བ་མི་འཚོལ་བ་དང ། སྟོང་པ་ཉིད་ལ་མོས་པ་དང ། ལུས་ཀྱི་ལས་ཡོངས་སུ་དག་པ་དང །
17b
ངག་གི་ལས་ཡོངས་སུ་དག་པ་དང ། ཡིད་ཀྱི་ལས་ཡོངས་སུ་དག་པ་སྟེ་བཅུ་པོ་དེ་དག་ཡིན་ནོ། །རྒྱལ་པོ་ཆེན་པོ། ཆོས་དང་པོ་འདི་དང་ལྡན་པའི་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་ཇི་སྐད་སྨོས་པའི་ཡོན་ཏན་དེ་དག་ཐོབ་པར་འགྱུར་རོ། །རྒྱལ་པོ་ཆེན་པོ། གཞན་ཡང ། རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་ཆོས་འདོད་པ་ཡིན་ཏེ། རྒྱུན་མི་འཆད་པར་འཕགས་པ་རྣམས་མཐོང་བར་འདོད་པ་དང ། ཐོས་པ་འཚོལ་བ་ལ་ཆོག་མི་ཤེས་སོ། །དེའི་མང་དུ་ཐོས་པ་དེའང་སེམས་ཀྱིས་ཤིན་ཏུ་བརྟགས་པ་དང ། མཐོང་བས་ཤིན་ཏུ་རྟོགས་པ་ཡིན་ནོ། །རྒྱལ་པོ་ཆེན་པོ། ཡན་ལག་བཅུ་དང་ལྡན་ན་ཆོས་དང་ལྡན་པའི་རྒྱལ་པོར་རིག་པར་བྱ་སྟེ། བཅུ་གང་ཞེ་ན། འདི་ལྟ་སྟེ། ཆོས་འདོད་པས་ལུས་ལ་མི་ལྟ་ཞིང་སྲོག་ལ་མི་ལྟ་བ་དང ། འཁོར་བ་ལ་སྐྱོ་བའི་ཡིད་དང་ལྡན་པ་དང ། ཁྱིམ་ན་གནས་པ་ལ་སྐྱོན་མང་བར་སེམས་པ་དང ། དངོས་པོ་ཐམས་ཅད་ལ་མི་ལྟ་བའི་ཡིད་དང་ལྡན་པ་དང ། སྔོན་མངོན་པར་འདུས་བྱས་པའི་ལས་ཀྱི་ནང་ནས་སྡིག་པའི་ལས་ལ་སྨོད་ཅིང་མ་འོངས་པ་མངོན་པར་འདུ་མི་བྱེད་པ་དང ། སྡུག་པ་དང ། མི་སྡུག་པ་རྣམས་ལ་ངེས་པར་སེམས་པའི་ཡིད་དང་ལྡན་པ་དང ། བསམ་པ་ཐག་པ་ནས་སྒྲུབ་པས་བྱང་ཆུབ་སེམས་དཔའི་སྤྱོད་པ་རྫོགས་པར་བྱེད་དེ། ཚིག་ལྷུར་ལེན་པར་མི་བྱེད་པ་དང ། ཡེ་ཤེས་ཡོངས་སུ་འཚོལ་བས་དམ་
18a
༄#། །བཅས་པ་ལ་བརྟན་པ་དང ། རང་གི་གཡོག་འཁོར་བྱང་ཆུབ་ཡང་དག་པར་འཛིན་དུ་འཇུག་ཅིང ། རྒྱུན་མི་འཆད་པར་དེ་དག་ཆོས་ཀྱི་སྦྱིན་པས་ཡོངས་སུ་སྨིན་པར་བྱེད་ལ། དེ་དག་གི་ཟང་ཟིང་ཡང་སྡུད་པར་བྱེད་པ་སྟེ། བཅུ་པོ་དེ་དག་ཡིན་ནོ། །རྒྱལ་པོ་ཆེན་པོ། ཆོས་གཉིས་པོ་འདི་དང་ལྡན་པའི་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་ཇི་སྐད་སྨོས་པའི་ཡོན་ཏན་དེ་དག་ཐོབ་པར་འགྱུར་རོ། །རྒྱལ་པོ་ཆེན་པོ། གཞན་ཡང ། རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་ཆོས་ཟབ་མོའི་བཟོད་པ་ལ་མོས་ཤིང་སྟོང་པ་ཉིད་ཀྱི་ཏིང་ངེ་འཛིན་སྒྲུབ་པ་ཐོབ་པ་ཡིན་ནོ། །དེའི་ཟབ་མོ་ལ་མོས་པ་དེའང་རྣམ་པ་བཅུར་རིག་པར་བྱའོ། །བཅུ་གང་ཞེ་ན། འདི་ལྟ་སྟེ། ཇི་སྐད་སྨྲས་པ་དེ་བཞིན་དུ་བྱེད་པ་དང ། དགེ་བའི་ཆོས་སྤྱོད་པ་ཐམས་ཅད་ཡོངས་སུ་རྫོགས་པར་བྱ་བ་ལས་ཤས་ཆེར་གུས་པ་དྲག་པོ་དང་ལྡན་ཞིང་ཡང་བའི་ལས་མངོན་པར་འདུ་བྱེད་པའང་ཡོངས་སུ་སྤོང་བ་དང ། མངོན་པར་འདུ་བྱེད་པ་ཡིད་དུ་འོང་བའང་མངོན་པར་འདུ་བྱེད་པ་དང ། སྐྱེ་བོ་དབང་ཕྱུག་དང་ལྡན་པ་རྣམས་ལའང་གཟུ་ལུམས་སུ་ནན་གྱིས་གནོན་པར་མི་བྱེད་པ་དང ། ཡིད་དུ་འོང་བའི་སྦྱིན་པའང་གཞན་དག་ལ་སྟོབས་པར་བྱེད་དེ། ཡིད་དུ་མི་འོང་བ་ཡོངས་སུ་སྤོང་བ་དང ། ཆོས་ཐམས་ཅད་ལའང་སྟོང་ངོ་སྙམ་དུ་
18b
ངེས་པར་འབྱུང་བར་བྱེད་པ་དང ། བྱེད་པ་མེད་པའི་ལྟ་བས་ཡང་དག་པའི་མཐའ་ལ་མཚན་ཉིད་གཅིག་ཏུ་མོས་པར་ཡང་མི་བྱེད་ལ་ཐ་དད་པའི་འདུ་ཤེས་ཅན་ཡང་མ་ཡིན་པ་དང ། རང་གི་ཡོན་ཏན་གྱིས་ཀྱང་གཞན་གྱི་ཡོན་ཏན་ཁྱད་དུ་གསོད་པར་མི་བྱེད་པ་དང ། ཚད་ངེས་པར་འཛིན་པའང་མི་བྱེད་པ་དང ། གང་ཟག་སྦྱོར་བ་མེད་པ་རྣམས་ལའང་ཆོས་ཀྱི་དབྱིངས་བསམ་གྱིས་མི་ཁྱབ་པ་དང ། མཐུན་པར་བྱེད་པ་སྟེ། བཅུ་པོ་དེ་དག་ཡིན་ནོ། །རྒྱལ་པོ་ཆེན་པོ། ཆོས་གསུམ་པོ་འདི་དང་ལྡན་པའི་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་ཇི་སྐད་སྨོས་པའི་ཡོན་ཏན་དེ་དག་ཐོབ་པར་འགྱུར་རོ། །རྒྱལ་པོ་ཆེན་པོ། གཞན་ཡང་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་འཇིག་རྟེན་གནས་པའི་གནོད་པའི་སྦགས་པས་སྦགས་པར་ཡང་དག་པར་མཐོང་བ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྒྲུབ་པའི་ཕྱིར་བསྟན་པ་ཡོངས་སུ་འཛིན་པ་ལ་འཇུག་སྟེ། ཕ་རོལ་ཏུ་ཕྱིན་པ་དྲུག་གི་སྟོབས་བསྐྱེད་པ་ལ་བརྩོན་ཤིང་སེམས་ཅན་ཡོངས་སུ་སྨིན་པར་བྱ་བ་ལ་ཡོངས་སུ་མི་སྐྱོའོ། །དེའི་བསྟན་པ་ཡོངས་སུ་འཛིན་པ་དེའང་རྣམ་པ་བཅུར་རིག་པར་བྱ་སྟེ། བཅུ་གང་ཞེ་ན། འདི་ལྟ་སྟེ། འཇིག་རྟེན་གྱི་ཆོས་བརྒྱད་ཀྱིས་མི་ཚུགས་པའི་ཏིང་ངེ་འཛིན་སྒྲུབ་པ་ལ་བརྩོན་པ་དང ། གཟུངས་ཡོངས་སུ་འཚོལ་བ་ལ་བརྩོན་པ་དང །
19a
༄#། །དམ་པའི་ཆོས་ཡོངས་སུ་གཟུང་བའི་ཕྱིར་རྣམ་པར་ངེས་པ་ལ་མཁས་པ་དང ། གང་ཟག་གང་དག་མངོན་པར་བརྩོན་པ་དེ་དག་གི་གོས་དང ། ཟས་དང ། མལ་ཆ་དང ། སྟན་དང ། ནད་ཀྱི་གསོས་སྨན་དང ། ཡོ་བྱད་རྣམས་བསྟབས་པས་ཡོངས་སུ་མི་སྐྱོ་བ་དང ། བྱང་ཆུབ་ཡང་དག་པར་འཛིན་དུ་འཇུག་པ་ལ་བརྩོན་པ་དང ། ལེགས་པར་བསམ་པ་སེམས་པ་དང ། ལེགས་པར་སྨྲ་བས་སྨྲ་བ་དང ། ལེགས་པའི་ལས་བྱེད་པ་དང ། རབ་ཏུ་འབྱུང་བ་སེམས་པ་དང ། རྒྱལ་པོ་ལ་དགའ་བ་ལ་སྐྱོན་དུ་རྟོག་པ་དང ། གཟུགས་སྡུག་ཅིང་གཟུགས་བཟང་བ་ཐམས་ཅད་ལ་མི་ལྟ་བའི་ཡིད་དང་ལྡན་པ་དང ། ཐ་ན་རྒྱལ་པོ་གཅིག་པུར་སྲེད་པས་བསྒྲུབ་པ་ལའང་མི་ལྟ་བའི་ཡིད་དང་ལྡན་པ་སྟེ། བཅུ་པོ་འདི་དག་ཡིན་ནོ། །རྒྱལ་པོ་ཆན་པོ། ཆོས་བཞི་པོ་འདི་དག་དང་ལྡན་པའི་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་ཇི་སྐད་སྨོས་པའི་ཡོན་ཏན་དེ་དག་ཐོབ་པར་འགྱུར་རོ། ། རྒྱལ་པོ་ཆེན་པོ། གཞན་ཡང་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་གང་ཟག་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བསྐལ་པ་གྲངས་མེད་པ་བྱེ་བ་ཁྲག་ཁྲིག་ཕྲག་འབུམ་གྱིས་ཡང་དག་པར་བསྒྲུབ་པ་འདི་འཛིན་པ་དང ། ཀློག་པ་དང ། སྟོན་པ་དེ་དག་ལ་ཆོས་བཞིན་དུ་བསྲུང་བ་དང ། སྐྱོབ་པ་དང ། སྦེད་
19b
པར་བྱེད་ལ་སེམས་ཅན་གང་དག་གང་ཟག་དེ་ལྟ་བུ་དག་ལ་གནོད་པ་བྱེད་པའི་རང་བཞིན་ཅན་གྱི་གང་ཟག་དེ་ལྟ་བུ་དེ་དག་ལ་ནི་འདི་ལྟར་ཆོས་ཀྱི་ལོངས་སྤྱོད་འདི་ལ་སྤྱོད་པ་ཡོངས་སུ་བསྲུང་བའི་ཕྱིར་ཆད་པས་གཅོད་པར་བྱེད་དོ། །དེའི་དམ་པའི་ཆོས་ཡོངས་སུ་འཛིན་པ་དེའང་རྣམ་པ་བཅུར་རིག་པར་བྱ་སྟེ། བཅུ་གང་ཞེ་ན། འདི་ལྟ་སྟེ། ཡང་དག་པར་བསྒྲུབ་པ་དང ། ངེས་པར་ཕངས་པར་བྱེད་པ་དང ། ཆོས་ལ་མོས་པ་དང ། འཁྲུལ་པ་མེད་པར་ཀུན་ཏུ་སྤྱོད་པ་དང ། ཡེ་ཤེས་འདོད་ཅིང་ཡོན་ཏན་གྱི་ཁྱད་པར་ལ་ཡིད་ཆེས་པ་དང ། དེ་བཞིན་གཤེགས་པའི་ཕོ་ཉ་དང ། ཉེ་བར་སྤྱོད་པ་དང ། སངས་རྒྱས་ཀྱི་སྣོད་དུ་རུང་བ་དང ། དཀོན་མཆོག་གསུམ་གྱི་གདུང་སྡུད་པ་དང ། དམ་པའི་ཆོས་འབར་བར་བྱེད་པ་དང ། སྐྱེ་བོ་མང་པོ་ཡོངས་སུ་སྨིན་པར་བྱེད་པ་སྟེ། བཅུ་པོ་དེ་དག་ཡིན་ནོ། །རྒྱལ་པོ་ཆེན་པོ། ཆོས་ལྔ་པོ་འདི་དང་ལྡན་པའི་རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་ནི་ཇི་སྐད་སྨོས་པའི་ཡོན་ཏན་འདི་དག་ཐོབ་པར་འགྱུར་རོ། །དེ་ནས་བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་དེའི་ཚེ་ཚིགས་སུ་བཅད་པ་འདི་སྐད་སྨྲས་སོ། །རྒྱལ་པོ་སངས་རྒྱས་ཆོས་དང་དགེ་འདུན་ལ། །རྟག་ཏུ་ལྷག་པའི་བསམ་པ་གཡོ་མེད་པས། །དད་པ་དང་ནི་དང་བ་མི་ཕྱེད་པ། །དེ་ལ་ཡོན་ཏན་འདི་དག་དཀོན་པ་མེད། །བཅོས་
20a
༄#། །མ་མ་ཡིན་ཤེས་ནས་དད་པ་སྐྱེས། །དེ་ལ་དངོས་པོ་ཅི་ཡོད་སྲི་བ་མེད། །བྱིན་ནས་ཀྱང་ནི་དེ་ལ་འགྱོད་པ་མེད། །འདིར་ནི་ཡོན་ཏན་དེ་དག་དད་པའི་མཚན། །དེ་དག་བསམ་པ་རྟག་ཏུ་རྙོག་པ་མེད། །མི་ཕྱེད་རི་རབ་བཞིན་དུ་བསྐྱོད་དུ་མེད། །བུམ་པ་གང་བ་ལེགས་གནས་མི་གཡོ་ལྟར། །དེ་དག་དད་པ་ཤིན་ཏུ་གཡོ་མེད་བ། །མཐོང་ལམ་མཐོང་ཐོས་ལ་མ་ཐོས་པ། །གང་དག་རི་བཞིན་དུ་ནི་གཡོ་བ་མེད། །དེ་དག་ལྟ་བུ་དད་པའི་མཚན་ཉིད་དེ། །གནས་རྣམས་ཀུན་ཏུ་ནམ་ཡང་འགྱུར་བ་མེད། ། ཞི་བ་འདོད་ཕྱིར་ཆོས་འདོད་གང་ཡིན་པ། །མཁས་པ་དེས་ནི་ཆོས་དོན་ཀུན་སྤོངས་ཤིང ། །དེ་སྤོངས་ནས་ཀྱང་དེ་ལ་སེམས་པ་མེད། །དེ་དག་ཆོས་འདོད་རྣམས་ཀྱི་མཚན་ཉིད་དོ། །སྐྱོ་བོའི་བདག་པོ་གང་ཞིག་ཆོས་འདོད་པ། །གང་ཚེ་ལེགས་པར་གསུངས་པ་མི་ཉན་པ། །ས་བོན་རུལ་པ་ཞིང་ངན་བཏབ་པ་ལྟར། །འདྲེན་པའི་བསྟན་པ་དག་ལ་སྐྱེ་མི་འགྱུར། །ཐོས་ཀྱང་འདི་ལ་བདག་ནི་མཁས་སྙམ་སེམས། །ཆོས་རྣམས་རང་བཞིན་ཅི་འདྲ་རྟོགས་སྙམ་སྟེ། །ལྷག་པའི་བསམ་པས་སྤྱོད་པ་མ་དག་ལ། །གཉིས་སེམས་ལྡན་ལ་དག་པ་ག་ལས་འོང ། །ཆོས་འདོད་གང་དག་དྲན་པའི་བློ་དང་ནི། །གུས་བཅས་གཡོ་མེད་ལུག་ལྟར་ལྐུགས་མེད་པ། །རྒྱ་མཚོ་ཆེན་པོ་བཞིན་དུ་འབབ་པ་
20b
མེད། །དེ་འདྲ་དེ་དག་བྱང་ཆུབ་མཆོག་གི་སྣོད། །ཆོས་འདོད་པ་ནི་ནང་དང་ཕྱི་རོལ་གྱི། །དངོས་པོ་ཀུན་ལ་སྡུག་འཛིན་ཅི་ཡང་མེད། །ཤེས་པ་རྣམས་ལ་ཕངས་ཤིང་བྱིས་པས་སྨད། །འདིས་ནི་ཆོས་འདོད་གང་ཡིན་ཤེས་པར་བྱ། །དེ་ཡི་ཕྱིར་ན་རྒྱལ་པོ་ཆོས་འདོད་པ། །འདི་ཐོས་ནས་ནི་བསྒྲུབ་པ་དག་པ་ཡིས། །སྨྲས་པ་ཙམ་དང་ཐོས་ལ་གནས་མ་བྱེད། ། བསམ་པ་ཉམས་པ་ལ་ནི་ཤེས་རབ་མེད། །ཟབ་མོ་བཟོད་ལ་མོས་པ་གང་ཡིན་དེ། །སྡུག་དང་མི་སྡུག་རྣམ་ལ་ཆགས་པ་མེད། །དེ་དག་རླུང་ལྟར་ཆགས་པ་མེད་པར་ཡང ། །བསྐལ་པ་བརྒྱ་གྲངས་མཐའ་ཡས་སྤྱོད་པར་འགྱུར། །རྒྱལ་པོ་གལ་ཏེ་བྱང་ཆུབ་ཁྱོད་འདོད་ན། །ལྷག་པའི་བསམ་པས་བསམ་པ་སྦྱང་བར་གྱིས། །བདག་དང་བདག་གི་སྙམ་པའི་ང་རྒྱལ་གྱིས། གནས་འདིར་ཕྱིན་ཅི་ལོག་ཏུ་གནས་མ་བྱེད། །ཁྱོད་ཀྱིས་ཉེས་པ་རྟག་ཏུ་བཤགས་པར་གྱིས། །ཁྱོད་ནི་མཐུན་པའི་སྡོམ་ལ་གནས་པར་གྱིས། །དབང་ཕྱུག་དང་ནི་གཉེན་ལ་མི་རྟག་སོམས། །རྟེན་པ་མེད་པ་འདི་ནི་ཡང་དག་སྟོང ། །སྟོང་པའི་ཆོས་རྣམས་མང་པོ་ཇི་སྙེད་སྨྲ། །སྟོང་ཉིད་ཇི་བཞིན་དེ་ལ་གནས་པ་མིན། །ཆོས་ཉིད་ལས་ནི་གང་གི་འགལ་བྱས་པ། ། དེ་ནི་ཟབ་མོའི་ཚུལ་ལ་བཟོད་པ་མིན། །དེ་ཕྱིར་སྟོང་པ་འདི་ན་ཀུན་ཏུ་འགལ། །སྟོང་ཉིད་ཇི་བཞིན་དེ་ནི་གང་གིས་ཤེས། །དེ་ནི་རང་\?\པའི་རྒྱལ་པོས་རྫ་བ་སྤངས་ཤིང ། །ཁམས་ལས་
21a
༄#། །ངེས་བྱུང་བྱང་ཆུབ་མཆོག་ལ་རེག་།དེ་བཞིན་གཤེགས་ལ་གུས་པར་བྱས་ནས་ཀྱང ། །རྒྱལ་པོ་ཁྱོད་ཀྱིས་བསྟན་པ་བརྟག་པར་གྱིས། །རྒྱལ་པོ་ལུས་ནི་རབ་ཏུ་འཇིག་པའི་ཕྱིར། །བྱང་ཆུབ་ཐེག་པ་ལ་ནི་ཡི་མ་ཆད། །སྟོན་པའི་བསྟན་བཅོས་སྤྱོད་ཡུལ་ཆོ་ག་ཤེས། །མཁས་པ་དེ་དག་ལ་ནི་རྟག་ཏུ་བསྲུང ། །སྨྲ་བ་ཙམ་གྱི་དབང་དུ་མ་འགྲོ་ཞིག་།ནད་པ་རྒྱུན་རིང་པོར་ནི་གྱུར་ཏ་རེ། །གང་གིས་བསྟན་པ་འདི་ནི་ལེགས་བརྟགས་པ། །དེ་ནི་དོན་དུ་བསྲུང་བའི་རྒྱུད་ལ་སྒྲིམས། །ལས་དང་ཉོན་མོངས་སྣ་ཚོགས་སྤངས་ནས་དེ། །ཁྱད་པར་དུ་ནི་བྱང་ཆུབ་མཆོག་ཏུ་འགྱུར། །ཕ་རོལ་ཕྱིན་དྲུག་འདི་ལ་ལེགས་པར་སློབས། །དེ་ལ་བསླབ་ན་བྱང་ཆུབ་ཐོབ་པར་འགྱུར། །ཇི་སྙེད་བསྟན་པ་འདི་ནི་བསྒྲུབ་པར་གྱིས། །ཀུན་མཁྱེན་ཆོས་རྣམས་རིང་པོ་མི་ཐོགས་འཐོབ། །མེ་ཏོག་ཁུ་བར་བུང་བ་མི་ཆགས་དང ། །ནམ་མཁའ་ལ་ནི་བྱ་རྗེས་མེད་པ་ལྟར། །ཡུལ་རྣམས་ལ་ནི་གང་སེམས་དེ་འདྲ་བ། །དེ་འདྲ་དེ་ནི་རྒྱལ་པོས་སངས་རྒྱས་འགྱུར། །ཟབ་མོའི་བཟོད་དང་སྤོབས་པ་ཐོབ་ནས་འདིར། །སངས་རྒྱས་རྣམས་ཀྱི་མཛོད་འཛིན་གང་ཡིན་པ། །དེ་དག་ཁྱོད་ཀྱིས་ཆོས་བཞིན་བསྲུང་བར་གྱིས། །མཁས་པ་དེ་འདྲ་སྲེག་ཕྱིར་མ་གཏང་ཞིག་།མཁས་པ་དེ་དག་ལ་ནི་གནོད་བྱེད་མི། །ཆོས་དང་མི་ལྡན་བརྩོན་པ་མང་པོ་རྣམས། །
21b
དེ་དག་རྟག་ཏུ་ཁྱོད་ཀྱིས་ཆད་པས་ཆོད། །ཆོས་ཀྱི་ཚུལ་འདི་མྱུར་དུ་ཉམས་ས་རེ། །གང་ཕྱིར་འཇིག་རྟེན་མགོན་པོ་མི་འབྱུང་ན། །མཁས་པ་དེ་དག་འཇིག་རྟེན་སྟོན་པར་འགྱུར། །སྲོག་ཆགས་ཕན་ཕྱིར་ཆོས་སྒྲོན་འབར་བར་བྱེད། །དེ་ཕྱིར་དེ་དག་དོན་དུ་རྟག་ཏུ་སྒྲིམས། །བྱང་ཆུབ་སེམས་དཔའ་མང་པོ་བྱེ་བ་སྟོང ། །སྙིང་ནས་སེམས་ཅན་དོན་ནི་སྤྱོད་མི་བྱེད། །དེ་དག་ལྷག་སེམས་མེད་ཅིང་ཚུལ་ཁྲིམས་མཆོག་།དེ་དག་ལུང་བསྟན་རྒྱལ་བ་གསུང་མི་འགྱུར། །ཇི་སྐད་སྨྲས་པ་དེ་བཞིན་བྱེད་པ་རྣམས། །དེ་ལྟར་དེ་དག་སྐྱེ་མེད་སྤྱོད་ཡུལ་ཅན། །རྒྱལ་ཁྱོད་ཡང་དག་སྤྱོད་པ་འདི་ཐོས་ཀྱི། །ཇི་སྐད་བསྟན་པའི་བསྟན་འདིར་གནས་པར་གྱིས། །དེ་ནས་རྒྱལ་པོ་ཚངས་པས་བྱིན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བ་དོན་ཡོད་ལ་འདི་སྐད་ཅེས་སྨྲས་སོ། །མཐོང་བ་དོན་ཡོད། སྐྱོན་འདི་དག་ཐམས་ཅད་ནི་བདག་ལ་མཆིས་པར་གདའ་ལ། ཡོན་ཏན་རྣམས་ནི་མི་གདའོ། །མཐོང་བ་དོན་ཡོད། བདག་ནི་གནོད་པའི་སྦགས་པས་སྦགས་པའོ། །མཐོང་བ་དོན་ཡོད་བདག་ནི་གཟུ་ལུམས་ཀྱི་ལས་ལ་ལྷག་པར་ཞེན་པའི་ཤས་ཆེ་བ་དང ། ནོར་ཡོངས་སུ་འཚོལ་བ་དང ། འཁོར་ཡོངས་སུ་བསྡུ་བས་ཀུན་ནས་མནར་སེམས་ཀྱིས་སེམས་སྐྱེས་པ་བསལ་བར་རྡོ་མི་ཐོག་གོ་།གཞན་ཡང ། བདག་ནི་གཞན་དག་ལ་དབྱུག་པས་བསྣུན་པ་དང ། མཚོན་གྱིས་བསྣུན་
22a
༄#། །པས་བསྣུན་པར་བགྱིད་དོ། །མཐོང་བ་དོན་ཡོད། དེས་ན་བདག་གིས་བྱང་ཆུབ་ཏུ་སེམས་མ་བསྐྱེད་དོ། །བདག་ནི་ཐ་ན་རྨི་ལམ་དུའང་གཞན་དག་ལ་ཀུན་ནས་མནར་སེམས་ཀྱིས་སེམས་སྐྱེད་པར་བགྱིད་དོ། །མཐོང་བ་དོན་ཡོད། ད་ནི་བདག་གིས་ལྷག་པའི་བསམ་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །མཐོང་བ་དོན་ཡོད། བདག་གིས་ཇི་ལྟར་བཅས་པའི་བྱང་ཆུབ་སེམས་དཔའི་བསླབ་པ་དག་ལ་མ་བསླབས་ན་བདག་གིས་ཕྱོགས་བཅུའི་འཇིག་རྟེན་གྱི་ཁམས་དག་ན་བཞུགས་པའི་སངས་རྒྱས་བཅོམ་ལྡན་འདས་རྣམས་སླུས་པར་གྱུར་ཅིག་།བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་བསྒྲུབ་པའི་སླད་དུ། ཇི་སྐད་སྨྲས་པ་དེ་བཞིན་དུ་བགྱིད་པར་འགྱུར་བར་བགྱིའོ། །དེ་ནས་རྒྱལ་པོ་ཚངས་པས་བྱིན་གྱི་རྗེས་སུ་བསླབས་པའི་སྲོག་ཆགས་བརྒྱད་ཁྲིས་སྔོན་མ་བསྐྱེད་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། །དེ་དག་གིས་ཀྱང་ཇི་སྐད་བསྟན་པའི་བྱང་ཆུབ་སེམས་དཔའི་སྤྱོད་པ་དག་ལ་སྨོན་ལམ་བཏབ་བོ། །སྲོག་ཆགས་ཉི་ཁྲི་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། དེ་ནས་རྒྱལ་པོ་ཚངས་བས་བྱིན་གྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བ་དོན་
22b
ཡོད་ལ་འདི་སྐད་ཅེས་སྨྲས་སོ། །མཐོང་བ་དོན་ཡོད། བདག་ལ་ཐུགས་བརྩེ་བ་དང ། སྐྱེ་བོ་ཕལ་པོ་ཆེ་འདི་དག་ལ་ཕན་གདགས་པའི་སླད་དུ་བདག་གི་འདི་ཉིད་དུ་དབྱར་གནས་བར་གནང་བར་མཛོད་ཅིག་།མཐོང་བ་དོན་ཡོད། འདི་ལྟར་སྣོད་ཀྱི་རྐྱེན་དུ་མི་འབབ་ཅིང་སྤྱོད་ཡུལ་གྱི་རྐྱེན་དུ་མི་འབབ་ལ་སྐྱེ་བོ་དང་སྐལ་པ་མཉམ་པ་མ་ལགས་ཤིང ། དེ་བཞིན་གཤེགས་པའང་མི་མཐོང་ལ་ཆོས་ཀྱང་རྒྱུན་དུ་མི་ཐོས་ཏེ། དགེ་བའི་རྩ་བའི་ཚོགས་ཀྱང་མི་མང་ལ་སེམས་ཅན་མང་པོ་ཡོངས་སུ་སྨིན་པར་བགྱིར་ཡང་མ་མཆིས་མོད་ཀྱི། འོན་ཀྱང་བདག་ཅག་ལ་ཕན་གདགས་པར་འགྱུར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བ་དོན་ཡོད་བྱང་ཆུབ་སེམས་དཔའ་ལྔ་བརྒྱ་ཙམ་དང་ལྷན་ཅིག་ཏུ་རྒྱལ་པོ་ཚངས་པས་བྱིན་ལ་སྙིང་བརྩེ་བའི་ཕྱིར་ཁས་བླངས་སོ། །དེའི་ཚེ་རྒྱལ་པོ་ཚངས་པས་བྱིན་གྱིས་བྱང་ཆུབ་སེམས་དཔའ་མཐོང་བ་དོན་ཡོད་འཁོར་ལྔ་བརྒྱའི་མལ་ཆ་དང ། སྟན་དང ། གདིང་བ་དང ། བགོ་བ་དང ། བཟའ་བ་ཐམས་ཅད་ཀྱི་ཡོ་ལང་ཡང་བཤམས་སོ། །བྱང་ཆུབ་སེམས་དཔའ་ཆེན་པོ་མཐོང་བ་དོན་ཡོད་ལའང་ཆོས་ཀྱི་མཆོད་པ་ཅི་རིགས་པར་བྱས་སོ། །དེའི་ཚེ་གནས་དེ་ན་དགེ་སློང་དྲུག་ཅུ་གནས་པར་གྱུར་ཏོ། །དེ་དག་མི་བརྩོན་པ་དང ། ཐོས་པ་ཉུང་བ་དང ། ཀུན་ནས་མནར་སེམས་མང་བ་དང་
23a
༄#། །གཞན་མཆོད་པ་དག་ལ་སེམས་སྡུག་བསྔལ་བ་དང ། བྱང་ཆུབ་སེམས་དཔར་ཁས་འཆེ་བ་དང ། བྱང་ཆུབ་སེམས་དཔའ་དམུ་རྒོད་དང ། ཅང་ཤེས་མ་ཡིན་པ་དང ། དབང་པོ་ཁོ་རུ་ཆུད་པ་དང ། རྒོད་པ་དང ། ཁེངས་པ་དང ། རྒོད་བག་ཅན་དང ། མུ་ཅོར་སྨྲ་བ་དང ། ཁཝ་ལྟར་སྐུར་བ་དང ། འཇིག་རྟེན་ཕ་རོལ་ལ་མི་ལྟ་བ་དང ། ལས་ཀྱིས་མི་འཇིགས་པ་དང ། བྲེ་མོའི་གཏམ་ལ་དགའ་བ་དང ། གཉིད་ཆེ་བ་དང ། ཆོས་མ་ཡིན་པ་འདོད་པ་དང ། ལུས་དང ། ངག་དང ། ཡིད་ཀྱི་ལས་ཀྱི་མཐའ་མ་བསྡམས་པ་དང ། རྩོད་པ་མང་བ་དང ། ཚུལ་ཁྲིམས་དང་ལྡན་པ་ལ་སྡང་བ་དང ། གཞན་གྱི་ཤེས་པ་ལ་ཤས་ཆེར་མ་མོས་པ་དང ། ཐ་ན་སྟོན་པ་བལྟ་བར་ཡང་མངོན་པར་མི་དགའ་ན་ཚངས་པ་མཚུངས་པར་སྤྱོད་པ་གཞན་དག་ལ་ལྟ་སྨོས་ཀྱང་ཅི་དགོས་པ་ཤ་སྟག་སྟེ། དེ་དག་བྱང་ཆུབ་སེམས་དཔའ་མཐོང་བ་དོན་ཡོད་ལ་ཆོས་བཞིན་མ་ཡིན་པར་སྐུར་པ་འདེབས་སོ། །དེའང་དད་པ་ཆུང་ངུའི་བྲམ་ཟེ་དང ། ཁྱིམ་བདག་རྣམས་ཀྱི་ཁྱིམ་དུ་སོང་ནས་སྒྲོགས་པར་བྱེད་དེ། དེ་ཐོས་ནས་བསྐལ་པ་བྱེ་བ་ཕྲག་བརྒྱད་ཅུར་སེམས་ཅན་དམྱལ་པ་ཆེན་པོར་སྐྱེ་བ་ཡོངས་སུ་འཛིན་པར་གྱུར་ཏོ། །དེ་ནས་བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་སེམས་ཅན་དེ་དག་ཉིད་ལ་སྙིང་བརྩེ་བའི་ཕྱིར། རྒྱལ་པོ་ཚངས་
23b
པས་བྱིན་ལ་མ་བསྙད་དོ། །དེའི་ཚེ་རྒྱལ་པོ་ཚངས་པས་བྱིན་གྱི་མདུན་ན་འདོན་པ་བྲམ་ཟེ་རབ་ཏུ་རྨུགས་བྱེད་ཅེས་བྱ་བ་ཞིག་བྱུང་སྟེ། དེས་དེ་ན་གནས་པའི་དགེ་སློང་རྣམས་བྱང་ཆུབ་སེམས་དཔའ་མཐོང་བ་དོན་ཡོད་དང་བྱེ་བར་བྱས་ཏེ། ཆོས་མ་ཡིན་པས་ཀྱང་སྐུར་པ་བཏབ་བོ། །རྒྱལ་པོ་ཚངས་པས་བྱིན་ཡང་མི་མངོན་པའི་ཐབས་ཀྱིས་བྱང་ཆུབ་སེམས་དཔའ་མཐོང་བ་དོན་ཡོད་དང་བྱེ་བར་བྱས་སོ། །ཆོས་ཀྱི་མཆོག་ཏུ་དགའ་བ་བྱུང་ངོ་ཅོག་ཀྱང་འགོག་པར་བྱེད་དེ། ཅི་ནས་ཀྱང་བྱང་ཆུབ་སེམས་དཔའ་མཐོང་བ་དོན་ཡོད་ལ་སེམས་མི་དགའ་བར་འགྱུར་བར་བྱེད་དོ། །ཆོས་ཀྱི་གཏམ་ལ་ཞུགས་ནའང་དེ་ལས་ཕྱིར་བཟློག་པའི་གཏམ་བྱེད་དེ། ཅི་ནས་ཀྱང་བྱང་ཆུབ་སེམས་དཔའ་དམུ་རྒོད་རྣམས་ཀྱིས་བྱ་བ་བྱེད་དོ། ། དེ་ལ་ཆོས་བཞི་དང་ལྡན་ན་བྱང་ཆུབ་སེམས་དཔའ་དམུ་རྒོད་ཡིན་ཏེ། བཞི་གང་ཞེ་ན། ཁཝ་ལྟར་སྐུར་བ་དང ། མུ་ཅོར་སྨྲ་བ་དང ། གཞན་གྱི་ཡིད་དང་མི་སྦྱོར་བ་ཡིན། བདག་ལ་བསྟོད་པ་དང ། གཞན་ལ་སྨོད་པ་ཡིན། ཚེ་འདི་ཆེད་ཆེར་འཛིན་པ་དང ། སྡིག་པའི་བསམ་པ་ཅན་ཡིན། མཐུན་པར་བྱེད་པའི་ཤས་ཆེ་བ་ཡིན་ཏེ། ཆོས་བཞི་པོ་དེ་དག་དང་ལྡན་ན་བྱང་ཆུབ་སེམས་དཔའ་དམུ་རྒོད་ཡིན་ནོ། །བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་དེར་བདེ་བ་དང ། སྡུག་བསྔལ་བ་དང ། བདེ་བ་དང ། ཡིད་མི་བདེ་
24a
༄#། །བས་དབྱར་གནས་པ་དེ་འདས་པར་བྱའོ། །དེ་ཅིའི་ཕྱིར་ཞེ་ན། འདི་ལྟར་མི་བརྩོན་པ་དང་ལྷན་ཅིག་གནས་པ་ནི་སྡུག་བསྔལ་བའི་ཕྱིར་རོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཐོང་བ་དོན་ཡོད་ཀྱིས་དབྱར་གནས་པར་བྱས་ཏེ། དབྱར་ཟླ་གསུམ་འདས་ནས་ཆོས་གོས་བྱས་ཤིང་ཆོས་གོས་བསྒྲུབས་ཏེ། ལྷུང་བཟེད་དང་གོས་ཟིན་ནས་མཐར་གྱི་ཡུལ་རྒྱུ་ཞིང་མཉན་དུ་ཡོད་པའི་རྒྱལ་བུ་རྒྱལ་བྱེད་ཀྱི་ཚལ་མགོན་མེད་པ་ལ་ཟས་སྦྱིན་པའི་ཀུན་དགའ་ར་བ་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། ཕྱོགས་གཅིག་ཏུ་འདུག་གོ། དེ་ནས་རྒྱལ་པོ་ཚངས་པས་བྱིན་གྱིས་བྱང་ཆུབ་སེམས་དཔའ་མཐོང་བ་དོན་ཡོད་དགེ་སློང་གནས་པ་རྣམས་ཀྱིས་གནོད་པ་བྱས་པས། བཅོམ་ལྡན་འདས་ཀྱི་ཐད་དུ་སོང་ངོ་ཞེས་ཐོས་སོ། །དེ་ནས་རྒྱལ་པོ་ཚངས་པས་བྱིན་སྲོག་ཆགས་ཁྲི་དང་ལྷན་ཅིག་ཏུ་ལྔ་འཛིན་གྱི་ལྗོངས་ནས་ཀོ་ས་ལའི་ལྗོངས་ག་ལ་བ་དང ། བཅོམ་ལྡན་འདས་ག་ལ་བ་དེར་སོང་སྟེ། ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འྩལ་ཏེ་ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་བཅོམ་ལྡན་འདས་ལ་རྒྱལ་པོ་ཚངས་པས་བྱིན་གྱིས་འདི་སྐད་ཅེས་གསོལ་ཏོ། །
24b
བཅོམ་ལྡན་འདས། བྱང་ཆུབ་སེམས་དཔའ་མཐོང་བ་དོན་ཡོད་ནི་བདག་གི་ཡུལ་ནས་ཧ་ཅང་སྔར་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། གང་ཟག་ཕྲག་དོག་ཅན་དང ། མངོན་པར་མི་བརྩོན་པ་དང ། སྨྲ་བ་ལ་དགའ་བ་དང ། བྲེ་མོའི་གཏམ་བྱེད་པ་མང་བ་དང ། ཚུལ་བཞིན་ལས་ཐག་རིང་བ་དང ། སྦྱོར་བ་དང་བྲལ་བ་རྣམས་གང་ན་གནས་པ་དེར་དེ་བཞིན་གཤེགས་པ་དང ། དེ་བཞིན་གཤེགས་པའི་ཉན་ཐོས་མི་གནས་སོ། །རྒྱལ་པོ་ཆེན་པོ། རྒྱུ་བཅུས་ན་གང་ཟག་མངོན་པར་མི་བརྩོན་པ་ཡིན་པར་རིག་པར་བྱ་སྟེ། བཅུ་གང་ཞེ་ན། གཉིད་ཆེ་བ་དང ། མཁས་སོ་སྙམ་དུ་མངོན་པའི་ང་རྒྱལ་བྱེད་པ་དང ། བདག་ལ་བསྟོད་པ་དང ། གཞན་ལ་སྨོད་པ་དང ། བྲེ་མོའི་གཏམ་ལ་དགའ་བ་དང ། སྨྲ་བ་ལ་དགའ་བ་དང ། ཚོགས་ལ་དགའ་བ་དང ། རྙེད་པ་ཆེད་ཆེར་འཛིན་པ་དང ། བཀུར་སྟི་ཆེད་ཆེར་འཛིན་པ་དང ། ཚུལ་འཆོས་པ་སྟེ། རྒྱལ་པོ་ཆེན་པོ། རྒྱུ་བཅུ་པོ་དེ་དག་དང་ལྡན་ན་གང་ཟག་མངོན་པར་མི་བརྩོན་པ་ཡིན་པར་རིག་པར་བྱའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །མི་རིགས་ལྡན་པ་རྟག་ཏུ་མི་མཐུན་ཏེ། །ཇི་ལྟར་རྒྱ་མཚོ་ཆེན་པོ་མི་རོ་དང ། །ཇི་ལྟར་སྐྱེ་བོ་བྱ་དང་ཕྲད་པ་བཞིན། །དེ་ནི་མཁས་པ་རྣམ་དང་ཤིན་ཏུ་རིང ། །དད་མེད་དེ་ནི་
25a
༄#། །འཁྲུལ་པ་འཚོལ་བར་བྱེད། །བྲེ་མོ་གཏམ་སྨྲ་སྤྱོད་ཡུལ་ཚོགས་ལ་དགའ། །རྒྱལ་བ་རྣམས་ཀྱི་བསྟན་ལ་མ་གུས་པ། །འདི་ནས་ཤི་འཕོས་མྱུར་དུ་ངན་འགྲོར་འགྲོ། མི་ལྡན་པ་ལ་དྲན་མེད་ཤེས་རབ་མེད། །མྱ་ངན་མི་འདའ་མི་འགྲོལ་ཚུལ་ཁྲིམས་མེད། །དེ་ནི་དམུས་ལོང་ལམ་དང་ཇི་བཞིན་དུ། །འཕགས་པའི་ལམ་དང་ཤིན་ཏུ་རིང་བས་རིང ། །གང་ཟག་མི་ལྡན་དེ་ནི་སྨྲ་བ་མང ། །རྒོད་ལ་དགའ་ཞིང་རྟག་ཏུ་དབང་པོ་གཡེངས། །དེ་ནི་བསྟན་ལ་ཆུ་རིའི་ཆུ་འོས་མིན། །དེ་ནི་གྲོང་ཟས་ལྕགས་ཀྱི་ཐུ་ལུམ་ཟ། །སྦྱིན་པ་པོ་ཡིས་དད་པས་བྱིན་པ་ནི། །ལྡན་དང་གྲོལ་ལ་ང་ཡིས་གནང་བ་ཡིན། །མི་ལྡན་པས་ནི་ཁམ་ཅིག་ཟོས་ན་ཡང ། །ངོ་ལོན་རི་རབ་ཙམ་ཡང་བྱ་བ་ཡིན། ། བསྟན་ལ་ཡུལ་འཁོར་ཟས་ནི་སྦྱོང་བར་དཀའ། །ལྡན་པ་གང་ཡིན་རྣམས་ཀྱང་འདི་ལ་འཛེམ། །མི་ལྡན་དེ་ཡིས་རྒོད་བཞིན་ཟོས་ན་ནི། །གླང་ཆེན་རྟ་དང་བ་ལང་བོང་བུར་སྐྱེ། །དེ་དག་དེ་ཟོས་བརྙས་པའི་གཟུགས་སུ་འགྱུར། །དེ་དག་རིད་ཅིང་ཉམ་ཆུང་སྨད་པར་འགྱུར། །ཟས་བླང་ཟོས་པས་མི་གཙང་དྲི་ངར་འགྱུར། །དེ་དག་དབྱུག་པས་བསྣུན་པས་སྦྱོང་བར་འགྱུར། །སེམས་ཀྱང་གཡེངས་ཤིང་དྲན་པ་རྣམ་པར་ཉམས། །སློང་མོ་བྱེད་ཅིང་སྨྱོན་པ་དག་ཏུ་འགྱུར། །བསྟན་པ་བསོད་ནམས་སྟེགས་འདི་ཐོབ་ན་ཡང ། །བག་
25b
མེད་གྱུར་ན་ངན་འགྲོར་ལྟུང་བར་འགྱུར། །ལོ་ནི་བྱེ་བ་ཁྲག་ཁྲིག་མཐའ་ཡས་པར། །ངན་སོང་སྡུག་བསྔལ་མང་པོ་དེ་མྱོང་ནས། །མི་ཡི་འཇིག་རྟེན་ཁོམ་པ་ཐོབ་པར་འགྱུར། །སྡིག་བྱས་ཕྱིར་ཡང་ངན་འགྲོར་ལྟུང་བར་འགྱུར། །ལྕགས་ཀྱི་ཐུ་ལུམ་རྒྱ་མཚོ་ཆེན་པོ་ཡི། །ནང་དུ་ལྟུང་བར་གྱུར་ན་གནས་མེད་དེ། །ལོ་ནི་བྱེ་བ་ཕྲག་སྟོང་སྙེད་དུ་ཡང ། །རྒྱ་མཚོ་ཆེ་ལས་སླར་ནི་དབྱུང་མི་ནུས། །དེ་བཞིན་བྱིས་པ་ངན་འགྲོར་ལྟུང་བ་ཡང ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ། །དེ་དག་མིར་སྐྱེ་བ་ཡང་ཐེ་ཚོམ་བཅས། །དེ་དག་མཐོ་རིས་བྱང་ཆུབ་ག་ལ་ཐོབ། །བསམ་པ་དག་ཅིང་རྟག་ཏུ་བརྩོན་པ་དང ། །ལེགས་པར་བསྡམས་ཤིང་གཡོ་སྒྱུ་མེད་པ་དང ། །མཉམ་པའི་སེམས་ཀྱིས་བྱང་ཆུབ་ཐོབ་འགྱུར་ཏེ། །དེ་ལ་ཐམས་ཅད་མཁྱེན་ཉིད་དཀའ་བ་མེད། །རྒྱལ་པོ་ཆེན་པོ། ཆོས་བཅུ་དྲུག་པོ་འདི་དག་ནི་གང་ཟག་ཕྲག་དོག་ཅན་གྱི་མཚན་མ་ཡིན་པར་རིག་པར་བྱ་སྟེ། བཅུ་དྲུག་གང་ཞེ་ན།་ཁཝ་ལྟར་སྐྲུ་བ་དང ། མུ་ཅོར་སྨྲ་བ་དང ། ལེགས་པར་མ་བསྡམས་པ་དང ། གཞན་གྱི་བསྔགས་པ་མ་ཡིན་པས་བདེ་བར་འཛིན་པ་དང ། གཞན་གྱི་ཡོན་ཏན་དག་ལ་ཡིད་མི་ཆེས་པ་དང ། བསམ་པ་མང་བ་དང ། མྱ་ངན་མང་བ་དང ། ཡིད་མི་བདེ་བ་མང་བ་དང ། མིག་སེར་པ་དང ། ཁ་དོག་དང ། དབྱིབས་ཉམས་པ་དང ། ང་རྒྱལ་གྱིས་ནོན་པ་དང །
26a
༄#། །དགེ་སློང་ལ་མི་དགའ་བ་དང ། གློ་བུར་དུ་འོངས་པ་ལ་བསྟིང་བའི་དང་ཚུལ་ཅན་དང ། བརྩད་དུ་རུང་བའི་འཁྲུལ་པ་འཚོལ་བ་དང ། གནས་ལ་སེར་སྣ་བྱེད་པ་དང ། ཆོས་ཉན་དུ་མི་འགྲོ་ལ་རྣ་བླགས་ཏེ་མི་ཉན། སེམས་རྣམ་པར་གཡེངས་ཤིང་གཞན་དང ། གཞན་དུ་གཏམ་རླུང་ལ་སྐུར་བར་བྱེད་ཅིང་ཆོས་ཀྱི་གཏམ་ལ་མི་དགའ་སྟེ།་འདི་སྐད་དུ་ཅི་ཟེར་བ་ངས་མི་ཤེས་སོ། །འདི་ནི་བླུན་པོ་ཡིན་ཏེ། འཇིག་རྟེན་གྱི་ཐ་སྙད་ཀྱི་ཆོས་སྟོན་ཏོ་ཞེས་ཀྱང་ཟེར་ཏེ། གང་འཕགས་པ་རྣམས་ཀྱིས་ཐུགས་སུ་ཆུད་པའི་ཆོས་འདུལ་བ་ལ་མ་གུས་པ་འདི་ཉིད་མི་བླུན་པོ་དེ་དག་མི་ཤེས་པ་ཡིན་ནོ། །བདག་གིས་ནི་བྱང་ཆུབ་ཐོབ་ནས་གདོད་བྱང་ཆུབ་ཀྱི་ཤིང་དྲུང་དུ་ཆོས་ལ་གུས་པར་གནས་པར་བྱའོ་ཞེས་ཟེར་ཞིང ། དགེ་སློང་རྣམས་ལ་ཆོས་སྟོན་པ་ནའང་ཕྱི་སྒོ་ན་འགྲེང་ཞིང་འདུག་ལ་ཆོས་ཉན་པར་བྱེད་དེ་སྟན་ལ་འདུག་མི་འདོད་པ་ནའང་དགེ་སློང་དག་ལ་འཚོ་བར་བྱེད་དེ། བརྒྱད་སྡེའི་བྱང་ཆུབ་ཀྱི་ཡན་ལག་གི་གཏམ་སྟོན་པ་ནའང་བདག་གིས་མཉན་པར་བྱའོ། །དེ་ཐོས་ན་བདག་གིས་ནད་དེ་འབྱང་བར་འགྱུར་རོ་སྙམ་མོ། །དེ་བས་ན་མི་བླུན་པོ་དེ་དག་ཆོས་མ་ཡིན་པ་འདོད་པས་བྱང་ཆུབ་ཡོངས་སུ་བཙལ་བར་སེམས་པ་དག་ནི། དཔེར་ན། མིའི་མིག་གཉིས་ཕྱུང་ནས་བལྟ་བར་འདོད་པའམ། ནོར་
26b
ཐམས་ཅད་མེད་པར་བྱས་ནས་མགྲོན་པ་མང་པོ་དང་མཐུན་པར་འདོད་པའམ། རྐང་པ་བཅད་ནས་ལམ་དུ་འགྲོ་བར་འདོད་པ་དང་འདྲ་སྟེ། རྒྱལ་པོ་ཆེན་པོ། དེ་ལྟར་འདོད་པའི་མི་བླུན་པོ་དེ་དག་གི་བྱང་ཆུབ་ནི་དེ་འདྲ་བ་སྙམ་བྱེད་དོ། །རྒྱལ་པོ་ཆེན་པོ། ཆོས་ཉི་ཤུ་རྩ་ལྔ་དང་ལྡན་ན་གང་ཟག་བྱང་ཆུབ་ལས་ཉམས་པར་རིག་པར་བྱ་སྟེ། ཉི་ཤུ་རྩ་ལྔ་གང་ཞེ་ན། གནས་ལ་སེར་སྣ་བྱེད་པ་དང ། ཁྱིམ་ལ་སེར་སྣ་བྱེད་པ་དང ། བསྔགས་པ་ལ་སེར་སྣ་བྱེད་པ་དང ། ཕྲག་དོག་ཅན་དང ། མ་དད་པ་དང ། ངོ་ཚ་མི་ཤེས་པ་དང ། ཁྲེལ་མེད་པ་དང ། སྡིག་པའི་བསམ་པ་ཅན་དང ། གཡོ་བའི་བསམ་པ་ཅན་དང ། གཞན་ལ་གནོད་པ་དང་ལྡན་པ་དང ། སྤྱོད་ལམ་ཁོ་རེ་ཆུད་པ་དང ། ཚུལ་འཆོས་པ་དང ། འཁོན་དམ་དུ་འཛིན་པ་དང ། གསོག་འཇོག་གི་ཤས་ཆེ་བ་དང ། དེ་བཞིན་གཤེགས་པས་གསུངས་པ་ལ་སྐྲག་ནས་ལོག་པར་བརྡ་སྤྲོད་ཅིང་སྒྲོ་འདོགས་ཏེ། ཆོས་སྤོང་བར་བྱེད་པ་དང ། ལྷག་པའི་ང་རྒྱལ་ཅན་ཡིན་ཏེ་མི་འདྲི་བའི་དང་ཚུལ་ཅན་དང ། ཆོས་ལ་སླུ་བ་བྱས་ཀྱང་འགྱོད་པ་མེད་པ་དང ། སྙིང་མི་འབེབས་ཤིང་དགྲ་ཟླ་མང་བ་དང ། འཁོར་གྱི་ནང་དུ་སོང་ན་མཐོང་མ་ཐག་ཏུ་གཞན་གྱི་མོས་པ་བཟློག་པའི་ཕྱིར་གཞན་དག་གི་མཚང་འདྲུ་བ་དང ། གསང་བའི་གནས་ལ་ཡིད་བརྟན་པ་ལས་འཁུ་བ་དང ། སྔོན་མཐོང་ཡང་རུང་མ་མཐོང་ཡང་རུང་པའི་དགེ་སློང་དག་ལ་འདི་རྣམས་ལ་སུའང་
27a
༄#། །དགའ་བར་མི་འགྱུར་བར་བྱའོ་སྙམ་སྟེ། གནོད་པར་བྱ་བའི་ཕྱིར་བསྔགས་པ་མ་ཡིན་པ་བརྗོད་པ་དང ། གཞན་གྱི་བསྔགས་པ་མ་ཡིན་པ་བརྗོད་པར་བྱ་བའི་ཕྱིར་གཞན་སྤོང་བ་དང ། རྙེད་པའི་བསམ་པས་བདག་གི་བསྙེན་པར་རྫོགས་པ་དེ་ཉམས་པར་གྱུར་ན་མི་རུང་ངོ་སྙམ་སྟེ། སོ་སོར་བརྟགས་ནས་ཚུལ་ཁྲིམས་སྲུང་བའོ། །རྒྱལ་པོ་ཆེན་པོ། གང་ཟག་དེ་འདྲ་བ་དེ་དག་ནི་བསྟན་པ་ལས་ཚབས་ཆེར་ཉམས་པར་འགྱུར་བའམ། ཁྱིམ་གྱི་གནས་སུ་འགྲོ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །ཁཝ་ལྟར་སྐུར་ཞིང་མ་བསྡམས་མུ་ཅོར་སྨྲ། །འཇིག་རྟེན་མཁྱེན་རྣམས་བསྟན་ལ་གུས་པ་མེད། །ཁེངས་པ་ཁྲེལ་མེད་རྟག་ཏུ་མི་མཐུན་པ། །ཕྲག་དོག་ཟིལ་གནོན་རྟགས་ནི་འདི་རྣམས་ཡིན། །གཞན་དག་གིས་ནི་བསྔགས་པ་མ་ཡིན་ལ། །མི་དགར་མི་བྱེད་དབུལ་པོས་གསེར་རྙེད་བཞིན། །སྙིང་པོར་འཛིན་ཅིང་ཐམས་ཅད་རྣམ་པར་སྤངས། །གནོད་སེམས་ཅན་ལ་བྱང་ཆུབ་ག་ལ་ཡོད། །སྔ་མ་དེ་ཡིས་ཀུན་ནས་མནར་སེམས་ལྟས། །དེ་ཡི་རྣམ་སྨིན་གྱིས་ནི་ངན་འགྲོ་མྱོང ། །འདིར་ནི་མི་ལུས་ཐོབ་ནས་མིག་ཀྱང་སེར། །དེ་ཡི་མདོག་ཀྱང་གསལ་ཞིང་མཛེས་མི་འགྱུར། །དེ་ནི་སུ་ལའང་བརྩམ་པ་ཡོད་མེད་དེ། །ཀུན་ཏུ་དེ་ཡི་ཞེ་ནི་འགྲས་པར་འགྱུར། །ལ་ལའི་ཤེས་པའི་ཁྱད་
27b
པར་མཐོང་ན་ཡང ། །ཕྲག་དོག་བསྐྱེད་ནས་ཆོས་ནི་སྤོང་བར་བྱེད། །རྒོད་ཅིང་སྙིང་ལ་ཐོགས་པ་མེད་པ་ཡིས། །གཞན་དང་ལྷན་ཅིག་སྡིག་པ་མང་པོ་སྨྲ། །གལ་ཏེ་གཞན་གྱི་གཏམ་ངན་མ་སྨྲས་ཀྱང ། །འཁྲུག་པའི་སེམས་ཀྱིས་མཚན་མོ་འདའ་བར་བྱེད། །དེ་ནི་གྲོང་དུ་སྤྱོད་ལམ་གཞན་དུ་སྒྱུར། །གཙུག་ལག་ཁང་དུ་དམུ་རྒོད་རྟ་བཞིན་བྱེད། །གཞན་གྱི་སྐྱོན་འཛིན་པ་དག་གི་འཛིན་མི་བྱེད། །ཕྲག་དོག་ཅན་རྣམས་ཆོས་ནི་དེ་འདྲའོ། །འདི་ནི་ཅི་ནས་ཕྱོགས་འདིར་མི་གནས་པར། །འདི་ཡི་ཁྱིམ་དུ་འདི་དང་འདི་སྐད་བྱ། །སང་ནི་བདག་གིས་ངན་དུ་བརྗོད་སྙམ་སྟེ། །དེ་ནི་སྡང་བའི་ཡིད་ཀྱིས་མང་དུ་སེམས། །དེ་ནི་མྱ་ངན་མང་ཞིང་ཡིད་མི་བདེ། །གཞན་གྱིས་ཤེས་ཕྱིར་བཀུར་བ་རྣམས་མཐོང་ན། །དེ་ནི་ལས་ཀྱི་རྣམ་སྨིན་ཡིད་མི་ཆེས། །ཉེས་པས་ནོན་ནས་བསྔགས་པ་མ་ཡིན་སྨྲ། །མཁས་པ་དེ་དག་སྨན་རྣམས་ཁོང་དུ་ཆུད། །དེ་ཕྱིར་དེ་ཡི་བསྙེན་བཀུར་འཕེལ་འགྱུར་ན། །དེ་ནི་སྦྱིན་མཆོག་བླ་མེད་སྦྱིན་བྱེད་ན། །ཆོས་མཆོག་འཛིན་པར་ཡིན་པ་ཡོང་མི་ཤེས། །དགེ་སློང་བྱ་བ་དག་ལ་དེས་བ་ཡི། །གློ་བུར་པ་དག་འོང་པ་མཐོང་ན་གནོད། །ཤིན་ཏུ་སྡུག་བསྔལ་གནས་འདིར་ཅི་འདོད་ཅེས། །གུས་པ་མེད་པར་མ་དད་ཆོས་རྣམས་སྨྲ། །གཙུག་ལག་ཁང་འདི་རྟག་ཏུ་ལས་མང་ལ། །རྙེད་པའང་མེད་དེ་སྤྱོད་ཡུལ་རྣམས་མི་བཟད། །གལ་ཏེ་དེས་བསྐུལ་དེ་ནི་མི་འགྲོ་ན། །ལེགས་པར་མ་
28a
༄#། །བསྡམས་འཐབ་མོ་བྱེད་པར་འགྱུར། །འདི་འདྲ་དག་གི་གནས་འདིར་གང་ཡང་མེད། །ཡུལ་ཞིག་ཏུ་ནི་ཅི་འདྲ་དྲན་པར་གྱིས། །གནས་པའི་དགེ་སློང་དག་གི་ཁྱོད་བསྐྲད་ན། །ཡུལ་འདི་སུན་དབྱུང་ཕྱིར་ནི་འོངས་སམ་ཁྱོད། །དགེ་བསྙེན་བླུན་པོ་རྣམས་ནི་འདི་མི་ཤེས། །འདི་དག་ཁྲིམས་འཆལ་ཚུལ་ཁྲིམས་ལྡན་མི་ཤེས། །དགེ་སློང་དགའ་དང་མི་དགས་མྱུར་དུ་སོང ། །མི་སྡུག་པ་དང་དྲག་པོས་སོང་ང་རེ། །སངས་རྒྱས་ལ་ནི་སློབ་པའི་ཆོས་སྨྲ་བ། །དེས་ཤིང་དམ་བརྟན་དག་གི་མཐོང་ན་ནི། །བླུན་དང་མི་མཐུན་འགྱུར་ན་མི་རུང་ཞེས། །དེ་དག་ག་ལས་འོངས་པར་ཕྱིར་ཡང་འགྲོ། །ཀྱེ་མ་བདག་གི་འདྲེན་པའི་བསྟན་པ་པོ། །རྒྱལ་བ་དག་གི་ཆོས་འདི་འགག་པར་འགྱུར། །དགེ་སློང་སྡིག་ཅན་འདི་དག་རབ་ཏུ་འཕེལ། །ཆོས་སྨྲ་གང་ཡིན་རྣམས་ནི་ཉུང་བར་འགྱུར། །གང་ཚེ་མང་དུ་ཐོས་པ་གློ་བུར་འོངས། །སྐྱེ་བོ་མང་པོ་དགའ་བྱེད་སྟོན་པ་ན། །བློ་གྲོས་ཆུང་དུ་འདི་ལྟར་ཅི་ཤེས་ཞེས། །མི་རིགས་དེ་དག་གཞན་ལ་སྦྲོན་པར་བྱེད། །དེས་ནི་ལུང་ཡང་མ་མནོས་ཆོས་མ་དྲིས། །འདི་ཡི་མཁན་པོ་ཅི་འདྲ་སློབ་དཔོན་གང ། །རང་སྐྱེ་ཤིང་ལྟར་ཆོས་གོས་བགོས་ནས་ནི། །བདེ་བའི་དོན་དུ་རྙེད་པ་འཚོལ་བར་བྱེད། །དེ་འདིར་མདོ་སྡེ་དེ་ལ་མི་མཁས་ཏེ། །དེ་ཡིས་ཤེས་པ་བདག་ཅག་ཤེས་སོ་སྙམ། །དེ་དག་བླུན་ཞིང་
28b
བསྟན་པ་སུན་འབྱིན་པ། །ཏིང་འཛིན་མ་ཐོབ་བྱིས་པའི་བསམ་པ་སེམས། །རྒྱལ་པོ་ངས་ནི་འདས་པའི་དུས་དྲན་པས། །སངས་རྒྱས་ཡེ་ཤེས་འོད་ཅེས་བྱ་བ་བྱུང ། །ལོ་ནི་བརྒྱད་ཁྲི་ཐམ་པའི་བར་དག་དུ། །ཆོས་རྣམས་བསྟན་ནས་རྒྱལ་བ་མྱ་ངན་འདས། །རྒྱལ་བ་དེ་ནི་འདས་པའི་དུས་ཀྱི་འོག་།དམ་པའི་ཆོས་ནི་ཉམས་ཤིང་ཐུག་པ་ན། །དགེ་སློང་དྲན་པའི་བློ་ཅན་ཞེས་བྱ་བྱུང ། །གཟུངས་ཐོབ་མ་ཡིན་སྤོབས་པ་ཐོབ་པར་འགྱུར། །མཛེས་ཤིང་དེས་ལ་བཀའ་བློ་བདེ་བ་དང ། །རྟག་ཏུ་ངན་དོན་ཙམ་གྱིས་ཆོས་ཤེས་པ། །སྐྱེ་དགུ་སྤྲིན་གྱི་ཆུས་ནི་ཚིམ་བྱེད་ལྟར། །ལྷར་བཅས་འགྲོ་བ་ཆོས་ཀྱིས་ཚིམ་པར་བྱེད། །དེ་ཡི་དུས་ཀྱི་ཚེ་ནས་སྟེང་དུ། །བཀོད་པའི་རྒྱལ་པོ་ཞེས་བྱ་གྲོང་ཁྱེར་བྱུང ། །ཁོ་ར་ཁོར་ཡུག་དཔག་ཚད་བརྒྱད་དུ་གྱུར། །མི་རྣམས་དེ་དག་བློ་ལྡན་ལོ་ལེགས་བདེ། །ཆོས་སྨྲ་དྲན་པའི་བློ་ཅན་དེ་འོངས་ནས། །སྲོག་ཆགས་རྣམས་ལ་ཕན་ཕྱིར་ཆོས་ཀྱང་བསྟན། །སྲོག་ཆགས་བྱེ་བ་ཕྲག་ནི་ཉི་ཤུ་གསུམ། །བླ་མེད་བྱང་ཆུབ་ལ་ནི་བཀོད་པར་གྱུར། །མེ་ཏོག་རྣམས་དང་སྤོས་དང་གོས་རྣམས་དང ། །བཅའ་བ་ཐུག་པ་དང་ནི་འཚམ་པ་ཡི། །གླུ་དབྱངས་རོལ་མོའི་སྒྲ་རྣམས་རབ་མཆོག་གིས། །དེ་དག་དེ་ལ་སངས་རྒྱས་བཞིན་དུ་མཆོད། །དགེ་སློང་ལྔ་བརྒྱ་ཤིན་ཏུ་མི་མཐུན་གྱུར། །གྲོང་ཁྱེར་དུ་ནི་དེ་ཡི་བསྔགས་མིན་སྒྲོགས། །ཚུལ་ཁྲིམས་མི་
29a
༄#། །ལྡན་ཉེས་པ་ངེད་ཤེས་ཞེས། །རེ་རེ་ནས་ནི་ཕྱིན་པའི་མདུན་དུ་བརྗོད། །ཟླ་བ་ཉ་བའི་གསོ་སྦྱོང་བབ་པ་ན། །གལ་ཏེ་དོ་ནུབ་མྱུར་དུ་མ་སོང་ན། །གནད་རྣམས་གཏུབ་ཅིང་སྲོག་ཀྱང་གཅད་དོ་ཞེས། །སྨྲ་བའི་དགེ་སློང་སྡིག་ཅན་ལངས་པར་གྱུར། །དགེ་སློང་དེ་དག་ཉིད་ལ་སྙིང་རྗེ་ནས། །སེམས་ཅན་དག་པ་དེ་ནི་མ་ཞུམ་སོང ། །སངས་རྒྱས་སྲས་ལ་ཅི་ཕྱིར་བརྙས་བྱེད་ཅེས། །ལྷ་རྣམས་སྟོང་དག་མི་དགའ་དུ་བར་བྱེད། །དེ་ན་དགེ་སློང་ལྔ་བརྒྱ་དེ་དག་ཀུན། །དགོད་ཅིང་མགུ་བས་མཚན་མོ་འདའ་བར་བྱེད། །ཀྱེ་མ་བདག་ཅག་དེ་ལས་ལེགས་པར་ཐར། །ཁུར་ལྕི་བོར་བ་སྙམ་དུ་ཉམས་ལ་སེམས། །དགེ་སློང་ལྔ་བརྒྱ་དུས་ལས་འདས་གྱུར་ན། །བསྐལ་པ་བརྒྱད་ཅུར་དམྱལ་བར་གནས་པར་འགྱུར། ། བསྐལ་པ་བྱེ་སྟོང་བདུན་ཅུ་རྩ་དྲུག་ཏུ། །ཡི་དྭགས་འཇིག་རྟེན་དེར་ནི་དགེ་སློང་གནས། །སེམས་ཅན་དེ་དག་ཚེ་རབས་དག་ཏུ་ལྡོང ། །དེ་དག་སྦྲུལ་གདུག་སྐྱེས་ཏེ་ས་རྡུལ་ཟ། །བྱིས་པ་རྣམས་ཀྱིས་མཐོང་ནས་བོང་བས་བརྒྱབ། །སྐྱབས་ཀྱང་མེད་ཅིང་དཔུང་གཉེན་མེད་པར་གྱུར། །ཚེ་རབས་བྱེ་བ་སྟོང་ཕྲག་བཅོ་བརྒྱད་དུ། །མི་ཡི་ནང་དུ་སྐྱེས་ནས་དབུལ་པོར་གྱུར། །སྨྱོ་ཞིང་ལྡོངས་ལ་རྟག་ཏུ་ལུས་ཀྱང་རུལ། །མདོག་ངན་སྨད་པར་གྱུར་ཏེ་མཐུ་ཡང་ཆུང ། །དེ་ལྟར་བྱེ་བ་ལྔ་བརྒྱ་ཟིལ་གྱིས་གནོན། །བདག་ཉིད་རྟག་ཏུ་མི་སྡུག་མང་པོ་བྱེད།།
29b
གཞན་གྱི་སྦྱིན་པ་ལ་ནི་སྐྱོན་ཡང་འདོགས། །གཡང་ས་ཆེན་པོར་བདག་ཉིད་འདོར་བར་བྱེད། །མ་འོངས་དུས་ན་བསྐལ་པ་དྲུག་ཅུ་པ། །གྲགས་ཆེན་ཞེས་བྱ་བསྐལ་པ་འབྱུང་བར་འགྱུར། ། དེར་ནི་སྐྱོབ་པ་འཇིག་རྟེན་དོན་མཛད་པ། །བདེ་གཤེགས་སྟོང་ཕྲག་བཅུ་དག་འབྱུང་བར་འགྱུར། །དེ་དག་ནང་ན་སངས་རྒྱས་ཐ་མའི་ཚེ། །དེར་ནི་དེ་དག་མི་ལུས་ཐོབ་འགྱུར་ཏེ། །སངས་རྒྱས་དེ་མཐོང་ནས་ནི་བཟོད་པ་ཐོབ། །སངས་རྒྱས་གངྒཱའི་བྱེ་སྙེད་མཐོང་བར་འགྱུར། །སྔོན་ནི་ལྷན་ཅིག་དེ་དག་ཐམས་ཅད་ཀྱིས། །ཐམས་ཅད་མཁྱེན་པའི་སེམས་སུ་སྨོན་ལམ་བཏབ། ། དེར་ནི་དེ་དག་བྱང་ཆུབ་སེམས་མ་ཉམས། །བསམ་པའི་བྱེ་བྲག་གིས་ནི་ངན་འགྲོར་ལྷུང ། །ང་ནི་དེ་ཚེ་ཆོས་སྨྲ་རྒྱལ་བའི་བུ། །དྲན་པའི་བློ་ཅན་ཞེས་བྱ་དེར་ཡང་གྱུར། །སུན་འབྱིན་དེ་ནི་སྟོན་ལ་སུན་འབྱིན་འགྱུར། །དེ་སྲིད་ང་རྒྱལ་སྤངས་ཤིང་བོར་ནས་ནི། །ཚུལ་མིན་སྤངས་ཏེ་ཡེ་ཤེས་སྦྱོར་བར་གྱིས། །གང་ཞིག་བདག་ཉིད་བརླག་པར་མི་འདོད་པ། །དེས་ནི་མི་ཤེས་ཚིག་རྣམས་སྤངས་ནས་ཀྱང ། །མེ་ཡི་ཕུང་པོ་བཞིན་དུ་ཕྲག་དོག་སྤོངས། །མཐོང་དང་མ་མཐོང་ཐོས་དང་མ་ཐོས་དང ། །བདེན་དང་མི་བདེན་པས་ནི་གཞན་མི་གླེང ། །བྱང་ཆུབ་མཆོག་ཏུ་འཚང་རྒྱ་འདོད་པ་ཡི། །དགེ་སློང་དེས་ནི་བདག་གི་ཉེས་པ་བསལ། །དེས་པ་རྣམས་ནི་ནང་དང་ཕྱི་རོལ་གྱི། །དངོས་པོ་དེ་དག་ཐམས་ཅད་གཏོང་བར་བྱེད། །གང་ཞིག་ང་
30a
༄#། །ཡི་བྱང་ཆུབ་མཆོག་ལ་འདུན། །དེ་དག་ཅི་ཕྱིར་གཞན་ལ་སྤྲོ་བ་སྐྱེད། །ཕྱི་མའི་དུས་ན་ང་ཡི་བསྟན་པ་ལ། །དམུ་རྒོད་མང་པོ་བྱང་ཆུབ་སུན་ཡང་འབྱིན། ། དེ་དག་གཅོད་རོང་གཡང་ས་ཆེན་པོར་འགྲོ། །བསམ་པ་ཉམས་ལ་བྱང་ཆུབ་ཅི་བྱར་ཡོད། །ང་ཡི་བྱང་ཆུབ་མཆོག་འདོད་གང་ཡིན་པས། །རིགས་ངན་བུ་འདྲར་ང་རྒྱལ་སྤངས་བྱས་ནས། །སེམས་ཅན་ཀུན་ལ་བྱམས་པའི་སེམས་བསྐྱེད་ནས། །ཐོབ་དང་མ་ཐོབ་མི་དགར་ཡོང་མི་བྱ། །རྒྱལ་པོ་ཆེན་པོ། གཞན་ཡང ། གང་ན་གུས་པ་མེད་པ་དང ། མ་དད་པ་དང ། གཞན་དག་ལ་སྡང་བ་དང ། གླགས་ལྟ་བ་དག་ཡོད་པ་དེར་ནི་དེ་བཞིན་གཤེགས་པ་རྣམས་དང ། དེ་བཞིན་གཤེགས་པའི་ཉན་ཐོས་རྣམས་ཡུན་རིང་དུ་མངོན་པར་དགའ་བར་མི་འགྱུར་ཏེ། མྱུར་བ་ཁོ་ནར་འདོད་པར་འགྱུར་རོ། །རྒྱལ་པོ་ཆེན་པོ། ཆོས་བཅུ་དྲུག་པོ་འདི་དག་ནི་མ་དད་པའི་གང་ཟག་སྟོན་པ་སྟེ། བཅུ་དྲུག་པོ་གང་ཞེ་ན། མི་མཐུན་པར་འཛིན་དུ་འཇུག་པ་དང ། སྡིག་པའི་བསྟན་པ་ལ་འཐད་པར་ལྟ་བ་དང ། ཆོས་ཀྱི་གཏམ་ལ་མི་འཐད་པར་ལྟ་བ་དང ། སྡིག་པའི་བསམ་པ་ཅན་དང ། སེམས་ཁེངས་པ་དང ། གླགས་ལྟ་བ་དང ། ཁོང་གཡོ་ཅན་དང ། འཚོ་བ་ཡོངས་སུ་མ་དག་པ་དང ། བཀུར་སྟི་འདོད་པ་དང ། སེམས་ཀྱི་རྒྱུད་མི་དགེ་བ་དང ། སྦྱོར་བ་མེད་པ་
30b
དང ། གཞན་ལ་སྐུར་བ་འདེབས་པ་དང ། གཅིག་ཏུ་ངེས་པར་སྐྱོན་འཛིན་པ་དང ། བསྟན་པ་ལ་མ་ངེས་པ་དང ། ལོག་པར་ལྟ་བ་དང ། ལས་ཀྱི་རྣམ་པར་སྨིན་པ་ལ་ཐེ་ཚོམ་ཟ་བ་སྟེ། རྒྱལ་པོ་ཆེན་པོ། ཆོས་བཅུ་དྲུག་པོ་དེ་དག་ནི་མ་དད་པའི་གང་ཟག་སྟོན་པའོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །རྗེས་སུ་བསྟན་པ་མཐུན་པར་མི་འཛིན་པ། །ཁྲོན་པ་རྙིང་པ་བཞིན་དུ་ཡོངས་སུ་སྤངས། །ཐར་དང་མི་མཐུན་རྒྱུན་བཞིན་འགྲོ་བ་དེ། །སྡང་སེམས་མུ་སྟེགས་ཅན་དད་ཁྱད་པར་མེད། །ལས་ཀྱི་རྣམ་པར་སྨིན་ལ་ཡིད་མི་ཆེས། །ཡིད་མི་ཆེས་པས་གཞན་ལ་འདོམས་མི་བྱེད། །བདག་ཉིད་རི་རང་ཟོམ་ལྟར་མཐོར་འཛིན་ཏེ། །ང་རྒྱལ་མྱོས་པ་དེ་ནི་དེ་བཞིན་བྱེད། །ལེགས་པར་གསུངས་པའི་ཆོས་ནི་སྟོན་པ་ན། །སྡིག་པའི་སྤྱོད་ཡུལ་ཅན་དེ་མི་འཐད་འཛིན། །དད་མེད་ཆོས་ལ་སོམ་ཉི་བསྐྱེད་ནས་ནི། །བསྐལ་པ་བྱེ་བ་མང་པོར་སྨྱོན་པར་འགྱུར། །མ་དད་པ་ཡི་བསམ་པས་སྡིག་ཅན་འགྱུར། །བློ་སྡང་གང་གི་ཡིད་ཀྱང་སྲུང་མི་བྱེད། །སྙིང་པོ་ཅན་ཀུན་རྣམ་པར་སྤངས་ནས་ནི། །དད་པ་མེད་པས་སྙིགས་མ་འཛིན་པར་བྱེད། །འགྱིང་བར་བྱེད་ཅིང་རྟག་ཏུ་ཁེབས་པ་སྟེ། །མ་དང་དེ་ནི་གཞན་ལ་འདུད་མི་བྱེད། །ཤི་ནས་རིགས་དམར་སྐྱེ་བ་འཛིན་པར་འགྱུར། །དབུལ་པོར་འགྱུར་ཞིང་གཞན་ལ་འཁུ་བར་བྱེད། །གང་ཟག་མ་
31a
༄#། །དད་བདག་ཉིད་གླེང་མི་བྱེད། །ཀླན་ཀ་འཚོལ་ཞིང་གཞན་གྱི་ཉེས་པ་འཛིན། །ནགས་ཀྱི་ཨེ་རཎྜ་ཡི་ཤིང་ལྟ་བུ། །དེ་ནི་ཁྱིམ་པ་མ་ཡིན་དགེ་སློང་མིན། ། རྣམ་པར་མ་དག་རང་བཞིན་ཁོང་གཡོ་ཅན། །སུ་ཡི་བསྟན་པ་ལ་ཡང་འཇུག་མི་བྱེད། །གཞན་གྱི་ཡིད་བརྟན་ན་ཡང་འཁུ་བར་བྱེད། །བསྐལ་པར་གསོས་ཀྱང་མཛའ་བོར་ཡོང་མི་འགྱུར། །དེ་དག་འཚོ་བ་ནམ་ཡང་དག་པ་མེད། །མ་དད་རབ་ཏུ་བྱུང་བའི་དགེ་སློང་རྣམས། །དེ་དག་ཐར་པའི་ཆོས་མང་སྤངས་པས་ན། །རིང་པོར་མི་ཐོགས་པར་ནི་ལྟུང་བར་འགྱུར། །དད་པ་མེད་པ་བསྙེན་བཀུར་འདོད་པའི་ཕྱིར། །མི་བདེན་ཆོས་རྣམས་གཞན་ལ་གོ་བར་བྱེད། །གཡོ་བྱེད་རང་བཞིན་རྣམ་པར་སྤེད་བྱེད་ཅིང ། །དེ་ནི་གཞོགས་སློང་ཁ་གསག་བྱེད་པ་ཡིན། །དེ་ཡི་སེམས་རྒྱུད་རྟག་ཏུ་གཡན་ཡང་སྤྱོ། །གཞན་དག་གཏམ་བརྗོད་པ་ནི་ཐོས་ན་ཡང ། །གཏམ་འདི་བདག་གི་ཕྱིར་ནི་གཏམ་བྱེད་སྙམ། །དད་པ་མེད་པ་ཁུ་འཕྲིགས་ཟ་བར་འགྱུར། །དེ་ནི་གཞན་གྱི་གཏམ་དག་བརྗོད་བྱས་ནས། །བདག་ཉིད་མ་དག་དེ་བཞིན་གཞན་ཡང་མཐོང ། །མ་དད་པ་ནི་རི་དྭགས་སྐྲག་པ་བཞིན། །སུ་ལའང་མི་འབེབས་ཡིད་ཀྱང་རྟོན་མི་བྱེད། །སྦྱོར་བ་ཉམས་ཤིང་གཞན་ཡིད་མི་སྲུང་བ། །ཚོགས་ཀྱི་ནང་དུ་ཡིད་ཀྱང་ཞུམ་པར་འགྱུར། །ལག་པས་
31b
ཚམ་ངམ་བྱེད་ཅིང་འཐབ་པར་བྱེད། །འོང་པ་དག་ལ་ཚར་ཡང་གཅོད་བྱེད་ཅིང ། །གཞུང་མེད་པར་ནི་འཛུགས་ཤིང་གླེང་བར་བྱེད། །ཕྲ་མའི་རང་བཞིན་སྡིག་པ་མང་པོ་ཅན། ། མཐུན་དང་བྲལ་ལ་འཐབ་ཅིང་སྡང་བ་རྣམས། །མ་དད་རང་བཞིན་མཚན་མ་འདི་དག་ཡིན། །དེ་དག་དད་མེད་རབ་ཏུ་བྱུང་ནས་ནི། །འདྲེན་པའི་བསྟན་ལ་དེ་དག་སུན་ཡང་འབྱིན་མཐུན་པ་གང་གིས་དགེ་འདུན་མཛེས་འགྱུར་ཏེ། །དེ་དག་ཆོས་མིན་ཚིག་གིས་འགལ་བར་བྱེད། །རྒྱལ་བ་རྣམས་ཀྱི་བསྟན་ལ་དེ་མ་ངེས། །མུ་སྟེགས་ཅན་ལྟར་སོམ་ཉི་ཐེ་ཚོམ་བཅས། །དེས་ནི་ཆོས་ལ་གླགས་གཏོང་འགལ་བྱས་ནས། །དད་མེད་དེ་ནི་ཆོས་ཀྱང་སྤོང་བར་བྱེད། །དེ་ཡི་ལོག་པ་ལྟ་བ་མ་སྤངས་ཏེ། །ཕྱི་རོལ་མུ་སྟེགས་ཅན་གྱིས་ནང་དུ་སྨོད། །དེས་ནི་བསྟན་པ་འདི་ལ་གཏིང་མི་ཚུགས། །ཆོས་གོས་འཆང་བ་ཙམ་གྱིས་དགེ་སློང་བརྗོད། །བདག་མེད་རྡོ་རྗེ་ཤིན་ཏུ་སྒོམ་པ་དེས། །འཇིག་ཚོགས་ལྟ་བ་འདི་དང་བྲལ་བ་ཡི། །དགེ་སློང་དེ་ནི་བསྟན་འདིར་ཡེ་ཤེས་ལ། །སྤྱོད་ཡུལ་རླུང་ལྟར་འདུས་བྱས་ཆགས་པ་མེད། །དད་པ་མེད་པ་ལས་ལ་ཡིད་མི་ཆེས། །སྡིག་པའི་སེམས་ཀྱི་དབང་དུ་སོང་ནས་ནི། །དེ་ནི་ཇི་ལྟར་གཞན་ལ་གཙེས་པ་བཞིན། །རིང་པོ་མི་ཐོགས་ངན་སོང་གནས་པར་འགྱུར། །རྒྱ་མཚོ་ཆེ་ལ་ཇི་ལྟར་ཆུ་གནས་བཞིན། །བསྟན་པ་འདི་ལ་དད་པ་གཞི་
32a
༄#། །ཡིན་ཏེ། །གང་ཟག་གང་ཞིག་བསྟན་ལ་མ་དད་དེ། །ང་ཡི་མ་ཡིན་ང་ཡང་དེའི་མ་ཡིན། །བགྲོད་པ་ཕུན་སུམ་ཚོགས་གཞི་དད་པ་ཡིན། །བདུད་རྩི་ཐོབ་པའི་ལམ་དང་སྣང་བ་ཡིན། །ཇི་ལྟར་ཛམྦུ་གླིང་པའི་རྒྱལ་པོ་བཞིན། །འདི་ནི་ཡོན་ཏན་ཀུན་གྱི་ཐོག་མར་འགྲོ། རྒྱལ་པོ་ཆེན་པོ། ཁྱོད་ཀྱི་གཙུག་ལག་ཁང་གི་དགེ་སློང་དེ་དག་ནི་ཡོན་ཏན་དེ་ལྟ་བུ་དེ་དག་དང་མི་ལྡན་པས་ན་དེའི་ཕྱིར་དེར་བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་སོ་སོར་བརྟགས་ནས་མ་འདུག་པར་མྱུར་བ་ཁོ་ནར་སོང་ངོ ། །རྒྱལ་པོ་ཆེན་པོ། དགེ་སློང་དྲུག་ཅུ་པོ་དེ་དག་ཐམས་ཅད་ནི་དེ་ནས་ཤི་འཕོས་ནས་བསྐལ་པ་གསུམ་གྱི་བར་དུ་ངན་སོང་རྣམས་སུ་འཁོར་འཁོར་ནས་ཚེ་རབས་བརྒྱད་ཁྲིའི་བར་དུ་རིགས་ངན་དུ་སྐྱེ་བར་འགྱུར་ཏེ། དམན་པ་དང ། གཞན་གྱི་ཟས་ཀྱིས་འཚོ་བ་དང ། འཇིག་རྟེན་གྱིས་སྨད་པར་འགྱུར་བ་དང ། ལུས་རིད་པ་དང ། མདོག་ངན་པ་དང ། ཆུང་བར་གྲགས་པ་དང ། བྱད་ངན་པ་དང ། ཚེ་རབས་ཐམས་ཅད་དུ་ཤས་ཆེར་ནད་རྒྱུན་རིང་དང ། ཁམས་མ་སྙོམས་ཏེ་འཁྲུག་པ་དང ། ཉམ་ཐག་པའི་སྐད་ཀྱིས་ཆོ་དེ་འདོན་པ་དང ། གཤིས་ངན་དུ་འཆི་བར་འགྱུར་རོ། །དེ་ནས་ཚེ་རབས་ཀྱི་ཐ་མ་ལས་ཤི་འཕོས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། ལོ་བརྒྱད་
32b
ཁྲིའི་བར་དུ་དེ་དག་གིས་དེ་བཞིན་གཤེགས་པ་ཚེ་དཔག་མེད་ཆོས་སྟོན་པར་ཐོས་ལ་ཤེས་པར་ནི་མི་འགྱུར་རོ། །དེ་བཞིན་གཤེགས་པ་དེའི་འོད་མཐོང་ལ་དེ་བཞིན་གཤེགས་པ་དེ་ནི་མི་མཐོང་ངོ ། །དེ་དག་གི་ལུས་ལ་འོད་ཀྱིས་ཕོག་པར་ཡང་མི་འགྱུར་རོ། །དེ་དག་གིས་གཏན་དུ་རྣམ་པར་དག་པར་བྱ་བའི་ཕྱིར་ཉིན་ལན་གསུམ་མཚན་ལན་གསུམ་དུ་བྱང་ཆུབ་སེམས་དཔའ་འདུས་པ་ལ་ཡན་ལག་ལྡས་གཏུགས་ཏེ། ཉེས་པ་བཤགས་ནས་གདོད་དེའི་འོག་ཏུ་ལས་དེ་རྣམ་པར་དག་པར་འགྱུར་རོ། །དེ་ནས་དེ་བཞིན་གཤེགས་པའང་མཐོང ། ཆོས་ཀྱང་ཤེས་པར་འགྱུར་ལ། བྱང་ཆུབ་ཏུ་ལུང་བསྟན་པའང་ཐོབ་པར་འགྱུར་རོ། །དེ་ནས་བཅོམ་ལྡན་འདས་ལ་རྒྱལ་པོ་ཚངས་པས་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དགེ་སློང་དེ་དག་བསལ་དུ་སྩལ་བར་བགྱིའོ། །དགེ་སློང་སྡིག་ཅན་དེ་ལྟ་བུ་དག་ཆགས་འོག་ཐམས་ཅད་དུ་གྲགས་པའང་མི་སྤྲོ་ན། མཐོང་བ་ལྟ་སྨོས་ཀྱང་ཅི་འཚལ། དེ་ནས་རྒྱལ་པོ་ཚངས་པས་བྱིན་གྱིས་ཞོ་ཤས་འཚོ་བ་དག་བཏང་སྟེ། དགེ་སློང་དེ་དག་བསལ་དུ་བཅུག་ནས་ཆབ་འོག་ཐམས་ཅད་དུ་དེ་དག་མི་འདུག་པར་བྱས་སོ། །བཅོམ་ལྡན་འདས། འདི་ནི་དེ་དག་གི་ཆེ་འདིའི་རྣམ་པར་སྨིན་པ་ལགས་སོ། །དེ་དག་ནི་ཚེ་ཕྱི་མ་ལའང་བདག་ཉིད་ཀྱིས་བདག་ཉིད་བརྡེགས་པ་ལགས་སོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་
33a
༄#། །རྒྱལ་པོ་ཚངས་པས་བྱིན་ལ་འདི་སྐད་ཅེས་བཀའ་སྩལ་ཏོ། །རྒྱལ་པོ་ཆེན་པོ། བཞི་པོ་འདི་དག་ནི་བསྟན་པ་འདི་ལ་རབ་ཏུ་བྱུང་བའི་གཡང་ས་ཡིན་ཏེ། བཞི་གང་ཞེ་ན། སངས་རྒྱས་ལ་མ་གུས་པ་དང ། དམ་པའི་ཆོས་སྤོང་བ་དང ། ཆོས་སྨྲ་བ་ལ་སྡང་བ་དང ། མངོན་པར་བརྩོན་པ་མེད་པར་དད་པས་བྱིན་པ་ལེན་པ་སྟེ། རྒྱལ་པོ་ཆེན་པོ། བཞི་པོ་དེ་དག་ནི་བསྟན་པ་འདི་ལ་རབ་ཏུ་བྱུང་བའི་གཡང་ས་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སངས་རྒྱས་སོམ་ཉིས་ཟ་བ་གཡང་སའི་མཆོག། འཇིག་རྟེན་ཀུན་གྱི་སྐྱབས་བྱེད་མི་ནུས་ཏེ། །བློ་ཆུང་དེ་ནི་བསྟན་ལས་ཉམས་གྱུར་པས། །མགོན་མེད་དེ་ནི་ངན་འགྲོར་འགྲོ་བར་འགྱུར། ། དེས་ནི་ཆོས་ཀྱང་སྤངས་པས་ངན་སོང་འགྲོ། །ལོ་ནི་སྟོང་ལས་མི་ཉུང་བར་དུ་ཡང ། །དམུས་ལོང་དབང་པོ་དམན་ཞིང་སེམས་ཀྱང་ཉམས། །སྡུག་བསྔལ་ཆེན་པོ་འདི་ནི་གཡང་ས་གཉིས། །སངས་རྒྱས་ཆོས་འཛིན་མི་འཇིགས་གང་ཡིན་པ། །ཐམས་ཅད་མཁྱེན་པའི་ཡེ་ཤེས་སྐྱོང་བྱེད་པ། །དེ་དག་སྐུར་འདེབས་གཡང་ས་ཆེན་པོ་གསུམ། །བསྐལ་པ་བྱེ་བ་མང་པོར་མྱོང་བར་འགྱུར། །དེ་ནི་དད་པས་བྱིན་པ་མི་རིགས་སྤྱོད། །དེ་ནི་གཡང་ས་ཆེན་པོ་བཞི་པ་ཡིན། །དེ་ནི་འཇིག་རྟེན་སུས་ཀྱང་སྐྱབས་མི་ནུས། །སྡིག་པའི་ལས་
33b
ཅན་ངན་སོང་ཀུན་ཏུ་རྒྱུག། བསམ་པ་དག་པ་འཕགས་པའི་དག་པ་ཡིན། །བྱང་ཆུབ་གཡོ་མེད་དེ་ནི་སེམས་ཀྱི་གཞི། །སྨྲས་པ་ཙམ་གྱིས་བྱང་ཆུབ་མི་འཐོབ་ཀྱི། །སེམས་ཀྱང་དག་བར་བྱ་ཞེས་བདེ་གཤེགས་གསུངས། །བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བཤད་པ་ན་སྲོག་ཆགས་ལྔ་སྟོང་གིས་སྔོན་མ་བསྐྱེད་པ་ལས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ། མི་སྐྱེ་བའི་ཆོས་རྣམས་ལའང་བཟོད་པ་ཐོབ་པར་གྱུར་ཏོ། །རྒྱལ་པོ་ཚངས་པས་བྱིན་ཡང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཏེ། སྲོག་ཆགས་འབུམ་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། ལྷ་དུང་ཕྱུར་གྱིས་ནི་སྔོན་མ་བསྐྱེད་པ་ལས་བྱང་ཆུབ་ཏུ་སེམས་བསྐྱེད་དེ། །དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་དེ། འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། གང་གི་ཚེ་འཛུམ་པ་མཛད་པ་དེའི་མོད་ལ། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཁ་དོག་དུ་མ་ཁ་དོག་སྣ་ཚོགས་པ། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོང་ཀ་དང ། ཤེལ་ཀྱི་ཁ་དོག་དང ། དངུལ་གྱི་ཁ་དོག་ལྟ་བུ་དག་བྱུང་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་སྣང་བས་ཁྱབ་པར་བྱས་ནས་སྟེང་དུའང་
34a
༄#། །ཚངས་པའི་འཇིག་རྟེན་གྱི་བར་དུ་སོང་སྟེ། ཉི་མ་དང ། ཟླ་བ་རྣམས་ཀྱི་གཟི་བརྗིད་ཀྱང་མེད་པར་བྱས་ནས་ཕྱིར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱི་བོའི་གཙུག་ཏུ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་བཅོམ་ལྡན་འདས་གལ་པ་དེར་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཛུམ་པ་མཛད་པའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། མཐོང་བ་དོན་ཡོད། རྒྱལ་པོ་ཚངས་པས་བྱིན་འདི་ནི་བསྐལ་པ་སུམ་ཅུའི་བར་དུ་ལོག་པར་ལྟུང་བར་མི་འགྱུར་ཏེ། ལྷ་དང་མིའི་ཕུན་སུམ་ཚོགས་པ་མྱོང་ནས་སངས་རྒྱས་དུང་ཕྱུར་ཕྲག་བརྒྱད་མཉེས་པར་བྱེད་པར་འགྱུར་རོ། །ཐམས་ཅད་དུའང་འཁོར་ལོས་བསྒྱུར་བའི་རྒྱལ་པོར་འགྱུར་ཏེ། གླིང་བཞི་ཡོངས་སུ་བཏང་ནས་སངས་རྒྱས་བཅོམ་ལྡན་འདས་དེ་དག་ཐམས་ཅད་ལ་ཞེ་འགྲས་པ་མེད་པའི་སེམས་ཀྱིས་དགོངས་པ་བཞིན་དུ་བསྙེན་བཀུར་བྱེད་པར་འགྱུར་རོ། །དེ་དེའི་འོག་ཏུ་བདེ་བ་ཅན་གྱི་བཀོད་པ་དང་འདྲ་བའི་སངས་རྒྱས་ཀྱི་ཞིང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་
34b
ཏེ།་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཀོད་པ་དཔག་ཏུ་མེད་པའི་རྒྱལ་པོ་ཞེས་བྱ་བར་འགྱུར་རོ། །དེ་ནས་རྒྱལ་པོ་ཚངས་པས་བྱིན་ཚི་མ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང ། ཡིད་བདེ་བ་སྐྱེས་ཏེ། བྱང་ཆུབ་སེམས་དཔའ་མཐོང་བ་དོན་ཡོད་ཀྱི་རྐང་པ་ལ་ཡན་ལག་ལྡས་གཏུགས་ནས། བཅོམ་ལྡན་འདས། མཐོང་བ་དོན་ཡོད་ལ་གང་གི་ཕྱིར་བདག་གི་སླད་དུ་དགེ་སློང་གི་དགེ་འདུན་དེ་དག་དང་ལྷན་ཅིག་འོ་བརྒྱལ་ཅིང་བཞུགས་པར་གྱུར་པ་བདག་གིས་ལྷག་པའི་བསམ་པས་བཟོད་པ་གསོལ་ལོ་ཞེས་བྱས་སོ། །བྱང་ཆུབ་སེམས་དཔའ་མཐོང་བ་དོན་ཡོད་ཀྱིས་རྒྱལ་པོ་ཚངས་པས་བྱིན་ལ་སྙིང་བརྩེ་བའི་ཕྱིར་བཟོད་པར་བྱས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་རྒྱལ་པོ་ཚངས་པས་བྱིན་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་ཚངས་པས་བྱིན་གྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་སུ་རེནྡྲ་བོ་དྷི་དང ། པྲཟྙཱ་བརྨ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ། ཤོ་ལོ་ཀ་སུམ་བརྒྱ་མཆིས་སོ།།