།།རྒྱ་གར་སྐད་དུ། ཨཱརྱ་པྲྷམ་བི་ 35a ༄#། །ཤེ་ཥ་ཙ་པ་རི་པྲྀ་ཙྪཱ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཚངས་པ་ཁྱད་པར་སེམས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། །བཅོམ་ལྡན་འདས་རྒྱལ་པོའི་ཁབ་ཀྱི་ཀ་ལནྟ་ཀ་གནས་པའི་འོད་མའི་ཚལ་ན་དགེ་སློང་སྟོང་ཕྲག་དྲུག་ཅུ་རྩ་བཞིའི་དགེ་སློང་གི་དགེ་འདུན་ཆེན་པོ་དང ། བྱང་ཆུབ་སེམས་དཔའ་སྟོང་ཕྲག་བདུན་ཅུ་རྩ་གཉིས་དང་ཐབས་གཅིག་ཏུ་བཞུགས་ཏེ། ཐམས་ཅད་ཀྱང་མངོན་པར་ཤེས་པས་མངོན་པར་ཤེས་པ། གཟུངས་ཐོབ་པ། སྤོབས་པ་ཐོགས་པ་མེད་པ། ཏིང་ངེ་འཛིན་ཐོབ་པ། མངོན་པར་ཤེས་པས་རྣམ་པར་རོལ་ཅིང་སྤོབས་པ་མི་འཇིགས་པ་དང་ལྡན་པ། ཆོས་ཐམས་ཅད་ཀྱི་ངོ་བོ་ཉིད་སྟོན་པ་ལ་མཁས་པ། མི་སྐྱེ་བའི་ཆོས་ལ་བཟོད་པ་ཐོབ་པ་རྣམས་ལ། འདི་ལྟ་སྟེ།་གཞོན་ནུར་གྱུར་པ་འཇམ་དཔལ་དང ། གཞོན་ནུར་གྱུར་པ་ལག་ན་རིན་པོ་ཆེ་དང ། གཞོན་ནུར་གྱུར་པ་ལག་ན་ཕྱག་རྒྱ་རིན་པོ་ཆེ་དང ། གཞོན་ནུར་གྱུར་པ་རིན་པོ་ཆེ་དཔལ་དང ། གཞོན་ནུར་གྱུར་པ་ནམ་མཁའ་མཛོད་དང ། གཞོན་ནུར་གྱུར་པ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་དང ། གཞོན་ནུར་ 35b གྱུར་པ་དྲ་བ་ཅན་གྱི་འོད་དང ། གཞོན་ནུར་གྱུར་པ་རྣམ་པར་བསྒྱིངས་པ་དང ། གཞོན་ནུར་གྱུར་པ་དཔལ་གྱི་སྙིང་པོ་དང ། གཞོན་ནུར་གྱུར་པ་བདོག་པ་ཐམས་ཅད་ཡོངས་སུ་གཏོང་བ་དང ། གཞོན་ནུར་གྱུར་པ་པདྨ་བཀོད་པ་དང ། གཞོན་ནུར་གྱུར་པ་སེང་གེ་དང ། གཞོན་ནུར་གྱུར་པ་ཟླ་འོད་དང ། གཞོན་ནུར་གྱུར་པ་ཟླ་བའི་འོད་ཟེར་གྱི་འོད་དང ། གཞོན་ནུར་གྱུར་པ་བློ་གྲོས་མཆོག་དང ། གཞོན་ནུར་གྱུར་པ་རྒྱན་ཐམས་ཅད་བཀོད་པ་དང ། བཟང་སྐྱོང་ལ་སོགས་པ་སྐྱེས་བུ་དམ་པ་བཅུ་དྲུག་ལ། འདི་ལྟ་སྟེ། བཟང་སྐྱོང་དང ། དཀོན་མཆོག་འབྱུང་གནས་དང ། དེད་དཔོན་མཆོག་དང ། མེས་བྱིན་དང ། ཕུག་སྤས་དང ། ཆུས་བྱིན་དང ། དབང་པོས་བྱིན་དང ། བླ་མའི་བློ་གྲོས་དང ། ཁྱད་པར་བློ་གྲོས་དང ། བློ་གྲོས་འཕེལ་དང ། མཐོང་བ་དོན་ཡོད་དང ། ཤིན་ཏུ་ཡང་དག་ཞུགས་དང ། རབ་ཀྱི་རྩལ་གྱིས་རྣམ་པར་གནོན་པ་དང ། བློ་གྲོས་མཐའ་ཡས་པ་དང ། བརྩོན་པ་མི་གཏོང་བ་དང ། ཉི་མའི་སྙིང་པོ་དང ། ས་འཛིན་དང ། དེ་ལྟ་བུ་ལ་སོགས་པ་བྱང་ཆུབ་སེམས་དཔའ་སྟོང་ཕྲག་བདུན་ཅུ་རྩ་གཉིས་དང ། རྒྱལ་པོ་ཆེན་པོ་བཞི་དང ། བརྒྱ་བྱིན་ལྷའི་དབང་པོ་ལ་སོགས་པ་སུམ་ཅུ་རྩ་གསུམ་པའི་ལྷ་རྣམས་དང ། མཚེ་མ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་རྣམས་དང ། ཚངས་པ་ལ་སོགས་པ་ 36a ༄#། །ཚངས་པའི་རིས་ཀྱི་ལྷ་བརྒྱ་སྟོང་དང ། དེ་མ་ཡིན་པ་གཞན་གཟི་བརྗིད་ཆེ་བའི་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་རྣམས་དང་ཡང་ཐབས་གཅིག་སྟེ། དེ་ནས་བཅོམ་ལྡན་འདས་འཁོར་བརྒྱ་སྟོང་དུ་མས་བསྐོར་ཅིང་མདུན་དུ་བདར་ནས་ཆོས་སྟོན་ཏོ། །དེ་ནས་བྱང་ཆུབ་སེམས་དཔའ་གཞོན་ནུར་གྱུར་པ་དྲ་བ་ཅན་གྱི་འོད་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་དེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རབ་ཏུ་གཡོ་བར་བྱས་ནས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་བལྟས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱིས་བདག་ལ་སྐབས་ཕྱེ་ན། བདག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ཕྱོགས་འགའ་ཞིག་ཞུའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་དྲ་བ་ཅན་གྱི་འོད་ལ་འདི་སྐད་ཅེས་བཀའ་སྩལ་ཏོ། །དྲ་བ་ཅན་གྱི་འོད། ཁྱོད་ཅི་དང ། 36b ཅི་འདོད་པ་དེ་བཞིན་གཤེགས་པ་ལ་དྲིས་ཤིག་དང ། དྲིས་པ་དེ་དང ། དེ་ཉིད་ལུང་བསྟན་པས་ངས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་དྲ་བ་ཅན་གྱིས་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་སྐུ་ནི་བལྟ་བས་ཆོག་མི་ཤེས་པ། ཁ་དོག་ཉི་མ་བྱེ་བ་ཁྲག་ཁྲིག་བརྒྱ་སྟོང་བས་ལྷག་པ་ལགས་ཏེ། བཅོམ་ལྡན་འདས། བདག་ནི་དེ་བཞིན་གཤེགས་པའི་སྐུ་བལྟ་པའམ། བརྟག་པར་ནུས་པ་འདི་ནི་ངོ་མཚར་ཏོ་སྙམ་བགྱིད་དོ། །བཅོམ་ལྡན་འདས། ཡང་བདག་ནི་དེ་བཞིན་གཤེགས་པའི་སྐུ་བལྟ་པའམ། རྟོག་པ་དེ་དག་ཐམས་ཅད་ནི་སངས་རྒྱས་ཀྱི་མཐུའོ་སྙམ་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། དྲ་བ་ཅན་གྱི་འོད་།ཇི་སྐད་ཟེར་བ་དེ་བཞིན་ཏེ། དེ་བཞིན་གཤེགས་པས་སྐབས་མ་ཕྱེ་བར་དེ་བཞིན་གཤེགས་པའི་སྐུ་བལྟ་བའམ་བརྟག་པར་མི་ནུས་སོ། །དེ་ཅིའི་ཕྱིར་ཞེ་ན། དྲ་བཅན་གྱི་འོད། དེ་བཞིན་གཤེགས་པ་ལ་རབ་ཏུ་ཞི་བའི་རྣམ་པར་བཀད་པ་ཞེས་བྱ་བའི་འོད་ཟེར་ཡོད་དེ། འོད་ཟེར་དེས་རེག་པའི་སེམས་ཅན་རྣམས་དེ་བཞིན་གཤེགས་པའི་སྐུ་ལའང་བལྟ་ཞིང་རྟོག་ལ་དེ་དག་གི་མིག་གི་དབང་པོའང་ཉམས་པར་མི་འགྱུར་རོ། །དྲ་བ་ཅན་གྱི་འོད། དེ་བཞིན་གཤེགས་པ་ལ་མི་འཇིགས་པ་སྤོབས་པ་ཞེས་བྱ་བའི་འོད་ 37a ༄#། །ཟེར་ཡོད་དེ། འོད་ཟེར་དེས་རེག་པའི་སེམས་ཅན་རྣམས་དེ་བཞིན་གཤེགས་པ་ལ་ཀུན་འདྲི་ཞིང་ཕྱིར་འདྲི་བར་བྱེད་དོ། །དྲ་བ་ཅན་གྱི་འོད། དེ་བཞིན་གཤེགས་པ་ལ་དགེ་བའི་རྩ་བ་བསགས་པ་ཞེས་བྱ་བའི་འོད་ཟེར་ཡོད་དེ། འོད་ཟེར་དེས་རེག་པའི་སེམས་ཅན་རྣམས་འཁོར་ལོས་བསྒྱུར་བའི་རྒྱལ་པོའི་རྒྱལ་སྲིད་ཐོབ་པར་བྱ་བའི་ཕྱིར་དེ་བཞིན་གཤེགས་པ་ལ་ཀུན་འདྲིའོ། །དེ་བཞིན་དུ་སྦྱར་ཏེ། འོད་ཟེར་དགེ་བའི་རྣམ་པར་བཀོད་པ་ཞེས་བྱ་བའི་འོད་ཟེར་དེས་རེག་པའི་སེམས་ཅན་རྣམས་བརྒྱ་བྱིན་ཐོབ་པར་བྱ་བའི་ཕྱིར་དེ་བཞིན་གཤེགས་པ་ལ་ཀུན་འདྲའོ། །འོད་ཟེར་བདག་པོ་ཐོབ་པ་ཞེས་བྱ་བའི་འོད་ཟེར་དེས་རེག་པའི་སེམས་ཅན་རྣམས་ཚངས་པའི་འཇིག་རྟེན་དུ་སྐྱེ་བར་བྱ་བའི་ཕྱིར་དེ་བཞིན་གཤེགས་པ་ལ་ཀུན་འདྲིའོ། །འོད་ཟེར་ཉོན་མོངས་པ་མེད་པར་གྱུར་པ་ཞེས་བྱ་བའི་འོད་ཟེར་དེས་རེག་པའི་སེམས་ཅན་རྣམས་དེ་བཞིན་གཤེགས་པ་ལ་ཉན་ཐོས་ཀྱི་ཐེག་པ་ཀུན་འདྲིའོ། །འོད་ཟེར་རྩེ་གཅིག་པ་དབེན་པ་དང་ལྡན་པ་ཞེས་བྱ་བའི་འོད་ཟེར་དེས་རེག་པའི་སེམས་ཅན་རྣམས་དེ་བཞིན་གཤེགས་པ་ལ་རང་སངས་རྒྱས་ཀྱི་ཐེག་པ་ཀུན་འདྲའོ། །འོད་ཟེར་ཐམས་ཅད་མཁྱེན་པའི་ཡེ་ཤེས་སུ་དབང་བསྐུར་བ་ཐོབ་པ་ཞེས་བྱ་བའི་འོད་ཟེར་དེས་རེག་པའི་སེམས་ཅན་རྣམས་དེ་བཞིན་ 37b གཤེགས་པ་ལ་ཐེག་པ་ཆེན་པོ་སངས་རྒྱས་ཀྱི་ཐེག་པ་ཀུན་འདྲིའོ། །འོད་ཟེར་ཁྱད་པར་དུ་འགྲོ་བ་ཞེས་བྱ་བའི་འོད་ཟེར་དེས་དེ་བཞིན་གཤེགས་པ་བྱོན་པའམ། བཞུད་པའི་ཞབས་ཀྱི་མཐིལ་གྱིས་སེམས་ཅན་གང་ལ་རེག་པ་དེ་དག་ཤི་འཕོས་མ་ཐག་ཏུ་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེའོ། །རྒྱན་ཐམས་ཅད་བཀོད་པ་ཞེས་བྱ་བའི་འོད་ཟེར་དེ། དེ་བཞིན་གཤེགས་པ་གྲོང་དུ་གཤེགས་པ་ན་འབྱིན་ཏེ། དེར་དེ་བཞིན་གཤེགས་པའི་འོད་དེས་སེམས་ཅན་སུ་དག་ལ་རེག་པ་དེ་དག་ཐམས་ཅད་བདེ་བའི་མཆོག་དང་ལྡན་པར་འགྱུར་རོ། །རྒྱན་ཐམས་ཅད་བཀོད་པའང་གྲོང་ཁྱེར་དེར་འབྱུང་བར་འགྱུར་རོ། །རྣམ་པར་འཐོར་བ་ཞེས་བྱ་བའི་འོད་ཟེར་དེས་ནི་དེ་བཞིན་གཤེགས་པ་འཇིག་རྟེན་གྱི་ཁམས་མཐའ་ཡས་མུ་མེད་དུ་རབ་ཏུ་གཡོ་བར་བྱེད་དོ། །བདེ་བ་སྟོན་པ་ཞེས་བྱ་བའི་འོད་ཟེར་དེས་ནི་སེམས་ཅན་དམྱལ་བ་པའི་སེམས་ཅན་རྣམས་ཀྱི་སེམས་ཅན་དམྱལ་བའི་སྡུག་བསྔལ་མེད་པར་བྱེད་དོ། །འོད་ཟེར་བྱམས་པས་འཕགས་པ་ཞེས་བྱ་བ་དེས་ནི་བྱོལ་སོང་གི་སྐྱེ་གནས་སུ་སོང་བའི་སེམས་ཅན་རྣམས་གཅིག་ལ་གཅིག་མི་ཟ་བར་བྱེད་དོ། །འོད་ཟེར་རབ་ཏུ་སིམ་པར་བྱེད་པ་ཞེས་བྱ་བ་དེས་ནི་གཤིན་རྗེའི་འཇིག་རྟེན་པའི་སེམས་ཅན་རྣམས་ཀྱི་གཤིན་རྗེའི་འཇིག་རྟེན་གྱི་སྡུག་བསྔལ་མེད་པར་བྱེད་དོ། །དྲི་མ་མེད་པ་ཞེས་བྱ་བའི་འོད་ཟེར་དེས་ནི་སེམས་ཅན་ལྡོངས་པ་རྣམས་མིག་ 38a ༄#། །ཐོབ་པར་འགྱུར་རོ། །རྣ་བའི་རྗེས་སུ་མཐུན་པ་ཞེས་བྱ་བའི་འོད་ཟེར་དེས་ནི་སེམས་ཅན་འོན་པ་རྣམས་རྣ་བ་ཐོབ་པར་འགྱུར་རོ། །རྣམ་པར་སྤོང་བ་ཞེས་བྱ་བའི་འོད་ཟེར་དེས་ནི་སེམས་ཅན་མི་དགེ་བ་བཅུའི་ལས་ཀྱི་ལམ་ལ་གནས་པ་རྣམས། དགེ་བཅུའི་ལས་ཀྱི་ལམ་ཐོབ་པར་འགྱུར་རོ། །ངོ་ཚེ་ཤེས་པ་ཞེས་བྱ་བའི་འོད་ཟེར་དེས་ནི་སེམས་ཅན་མྱོས་པ་རྣམས་དྲན་པ་འཐོབ་པར་འགྱུར་རོ། །མེད་པར་འགྱུར་བ་ཞེས་བྱ་བའི་འོད་ཟེར་དེས་ནི་སེམས་ཅན་ལོག་པར་ལྟ་བ་ཅན་རྣམས་ཡང་དག་པར་ལྟ་བ་ཐོབ་པར་འགྱུར་རོ། ། རབ་ཏུ་གཏོང་བ་ཞེས་བྱ་བའི་འོད་ཟེར་དེས་ནི་སེམས་ཅན་སེར་སྣ་ཅན་རྣམས་གཏོང་བ་ཐོབ་པར་འགྱུར་རོ། །ཡོངས་སུ་གདུང་བ་མེད་པ་ཞེས་བྱ་བའི་འོད་ཟེར་དེས་ནི་སེམས་ཅན་ངན་པའི་ངང་ཚུལ་ཅན་རྣམས་ཚུལ་ཁྲིམས་ཐོབ་པར་འགྱུར་རོ། །ཕན་པ་དང་ལྡན་པ་ཞེས་བྱ་བའི་འོད་ཟེར་དེས་ནི་སེམས་ཅན་གནོད་པར་སེམས་པ་རྣམས་བཟོད་པ་དང ། དེས་པ་ཐོབ་པར་འགྱུར་རོ། །འབར་བ་ཅན་ཞེས་བྱ་བའི་འོད་ཟེར་དེས་ནི་སེམས་ཅན་ལེ་ལོ་ཅན་རྣམས་བརྩོན་འགྲུས་ཐོབ་པར་འགྱུར་རོ། །རྩེ་གཅིག་པ་ཞེས་བྱ་བའི་འོད་ཟེར་དེས་ནི་སེམས་ཅན་དྲན་པ་ཉམས་པ་རྣམས་བསམ་གཏན་ཐོབ་པར་འགྱུར་རོ། །ཡེ་ཤེས་ཞེས་བྱ་བའི་འོད་ཟེར་དེས་ནི་སེམས་ཅན་འཆལ་བའི་ཤེས་རབ་ཅན་རྣམས་ཤེས་རབ་ 38b ཐོབ་པར་འགྱུར་རོ། །རྙོག་པ་མེད་པ་ཞེས་བྱ་བའི་འོད་ཟེར་དེས་ནི་སེམས་ཅན་མ་དད་པ་རྣམས་དད་པ་ཐོབ་པར་འགྱུར་རོ། །ཀུན་འཛིན་པ་ཞེས་བྱ་བའི་འོད་ཟེར་དེས་ནི་སེམས་ཅན་ཐོས་པ་ཉུང་བ་རྣམས་ཐོས་པ་ཐོབ་པར་འགྱུར་རོ། །སྤྱོད་པ་དང་ལྡན་པ་ཞེས་བྱ་བའི་འོད་ཟེར་དེས་ནི་སེམས་ཅན་ངོ་ཚ་བ་དང ། འཛེམ་པ་མེད་པ་རྣམས་ངོ་ཚ་ཤེས་པ་དང ། ཁྲེལ་ཡོད་པ་ཐོབ་པར་འགྱུར་རོ། །སྐྱོ་བ་ཞེས་བྱ་བའི་འོད་ཟེར་དེས་ནི་སེམས་ཅན་འདོད་ཆགས་སྤྱོད་པ་རྣམས་ཀྱི་འདོད་ཆགས་འཇོམས་པར་འགྱུར་རོ། །དགའ་བ་ཞེས་བྱ་བའི་འོད་ཟེར་དེས་ནི་སེམས་ཅན་ཞེ་སྡང་སྤྱོད་པ་རྣམས་ཀྱི་ཞེ་སྡང་འཇོམས་པར་འགྱུར་རོ། །སྣང་བ་ཅན་ཞེས་བྱ་བའི་འོད་ཟེར་དེས་ནི་སེམས་ཅན་གཏི་མུག་སྤྱོད་པ་རྣམས་རྟེན་ཅིང་འབྲེལ་བར་འབྱུང་བ་ཁོང་དུ་ཆུད་པར་འགྱུར་རོ། །ཀུན་ཏུ་འགྲོ་བ་ཞེས་བྱ་བའི་འོད་ཟེར་དེས་ནི་སེམས་ཅན་ཆ་མཉམ་པར་སྤྱོད་པ་རྣམས་ཆ་མཉམ་པ་སྤྱོད་པ་སྤོང་བར་འགྱུར་རོ། །དྲ་བ་ཅན་གྱི་འོད། དེ་བཞིན་གཤེགས་པ་ལ་གཟུགས་ཐམས་ཅད་སྟོན་པ་ཞེས་བྱ་བའི་འོད་ཟེར་ཡོད་དེ། འོད་ཟེར་དེས་རེག་པའི་སེམས་ཅན་རྣམས་དེ་བཞིན་གཤེགས་པའི་སྐུ་ཁ་དོག་སྣ་ཚོགས། ཁ་དོག་དུ་མ། ཁ་དོག་བརྒྱ་སྟོང་དུ་མས་ལྷག་པར་མཐོང་བར་འགྱུར་རོ། །དྲ་བ་ཅན་གྱི་འོད། ངས་དེ་བཞིན་གཤེགས་པའི་འོད་ཟེར་ལ་བརྩམས་ཏེ་བསྐལ་པའམ། བསྐལ་པ་ལས་ལྷག་པར་བཤད་ 39a ༄#། །ཀྱང་དེ་བཞིན་གཤེགས་པའི་འོད་ཟེར་གྱི་རྣམ་པ་དད་ལྡན་པའི་ཆོས་བསྟན་པ་ཡོངས་སུ་ཟད་པར་མི་འགྱུར་ཏེ། འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་འོད་ཟེར་གྱི་ཡོན་ཏན་མཐའ་ཡས་མུ་མེད་པ་དང་ལྡན་པ་ཡིན་ནོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་དེ་བཞིན་གཤེགས་པའི་སྐུའི་བཀོད་པ་ཚད་མ་མཆིས་པར་བསྟན་པ་འདི་དང ། ཐབས་མཁས་པ་བསམ་གྱིས་མི་ཁྱབ་པ་དང་ལྡན་པའི་ཆོས་བསྟན་པ་ངོ་མཚར་ཏོ། །བཅོམ་ལྡན་འདས། འོད་ཟེར་འདི་དག་ནི་བདག་གིས་སྔོན་མ་ཐོས་ཏེ། ཇི་ལྟ་ཇི་ལྟར་བཅོམ་ལྡན་འདས་ཀྱིས་བཤད་པའི་དོན་བདག་གིས་འཚལ་བ་ལྟར་ན། བཅོམ་ལྡན་འདས། བྱང་ཆུབ་སེམས་དཔའ་གང་ལ་ལ་འོད་ཟེར་འདི་དག་གི་མིང་ཐོས་ནས་དད་པ་རྙེད་པར་འགྱུར་བ་དེ་དག་ཐམས་ཅད་ཡང་དག་པར་རྫོགས་པའི་སངས་རྒྱས་ཀྱི་འོད་ཟེར་འདི་ལྟ་བུས་རབ་ཏུ་སྣང་བར་བགྱིད་པའི་མཐུ་དང་ལྡན་པར་འགྱུར་རོ། །ཡང་བཅོམ་ལྡན་འདས་དེ་བཞིན་གཤེགས་པ་འོད་ཟེར་གང་གིས་སངས་རྒྱས་ཀྱི་ཞིང་གཞན་གྱི་བྱང་ཆུབ་སེམས་དཔའ་རྣམས་བསྐུལ་མ་ཐག་ཏུ་མི་མཇེད་ཀྱི་འཇིག་རྟེན་གྱི་ཁམས་ 39b འདིར་མཆི་བར་འགྱུར་བ་དང ། བྱང་ཆུབ་སེམས་དཔའ་སུ་དག་འདྲི་བ་དང ། ལུང་བསྟན་པ་དང ། བཤད་པ་ལ་མཐར་ཕྱིན་པ་རྣམས་མཆིས་ནས་དེ་བཞིན་གཤེགས་པ་ལ་ཀུན་ཞུ་ཞིང་བསྙེན་བཀུར་བགྱིད་པ་དང ། སླར་ཞུ་བར་འགྱུར་བའི་འོད་ཟེར་བྱང་ཆུབ་སེམས་དཔའ་བསྐུལ་བ་ཞེས་བགྱི་བ་གཏང་དུ་གསོལ། དེ་ནས་བཅོམ་ལྡན་འདས་ཀྱིས་དེའི་ཚེ་འོད་གང་གིས་འཇིག་རྟེན་གྱི་ཁམས་མཐའ་ཡས་མུ་མེད་པར་སྣང་བར་འགྱུར་བའི་འོད་དེ་ལྟ་བུ་སྐུ་ལས་ཕྱུང་སྟེ། བྱང་ཆུབ་སེམས་དཔའ་རྣམས་འོད་དེས་བསྐུལ་མ་ཐག་ཏུ་མི་མཇེད་ཀྱི་འཇིག་རྟེན་གྱི་ཁམས་འདིར་ཕྱིན་པར་གྱུར་ཏོ། །དེ་ནས་སངས་རྒྱས་ཀྱི་ཞིང་འདི་ནས་ཤར་ཕྱོགས་སུ་སངས་རྒྱས་ཀྱི་ཞིང་བརྒྱ་སྟོང་ཕྲག་གངྒཱའི་ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་འདས་པ་ན་ཡོངས་སུ་དག་པ་ཞེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ཟླ་བའི་འོད་ཅེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བཞུགས་ལ་འཚོ་ཞིང་གཞེས་ཏེ། བྱང་ཆུབ་སེམས་དཔའ་འབའ་ཞིག་ལ་ཆོས་ཀྱང་འཆད་པའི་སངས་རྒྱས་ཀྱི་ཞིང་དེ་ནས་ཕྱིར་མི་ལྡོག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཚངས་པ་ཁྱད་པར་སེམས་ཞེས་བྱ་བ་དེ་འོད་དེས་བསྐུལ་མ་ཐག་ཏུ་བཅོམ་ལྡན་འདས་དེ་བཞིན་གཤེགས་པ་ཟླ་བའི་འོད་ག་ལ་བ་དེར་སོང་སྟེ་ཕྱིན་པ་དང ། 40a ༄#། །བཅོམ་ལྡན་འདས་དེའི་ཞབས་ལ་མགོ་བོས་ཕྱག་བཙལ་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་དུ་སྣང་བ་ཆེན་པོ་འདི་བྱུང་བའི་རྒྱུ་གང་ལགས། རྐྱེན་གང་ལགས། བཅོམ་ལྡན་འདས་དེས་འདི་སྐད་ཅེས་བཀའ་སྩལ་ཏོ། །ཚངས་པ། སངས་རྒྱས་ཀྱི་ཞིང་འདི་ནས་ནུབ་ཕྱོགས་ན་སངས་རྒྱས་ཀྱི་ཞིང་བརྒྱ་སྟོང་ཕྲག་གངྒཱའི་ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་འདས་པ་ན་མི་མཇེད་ཅེས་བྱ་བའི་འཇིག་རྟེན་གྱི་ཁམས་ཡོད་དེ། དེ་ན་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །དེ་བཞིན་གཤེགས་པ་དེས། འདི་ལྟ་སྟེ། ཕྱོགས་བཅུའི་བྱང་ཆུབ་སེམས་དཔའ་རྣམས་བསྡུ་བའི་ཕྱིར་སྐུ་ལས་འོད་འདི་བཏང་ངོ ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དེ་བདག་གཟིགས་པར་བཞེད་ན་མི་མཇེད་ཀྱི་འཇིག་རྟེན་གྱི་ཁམས་དེར་བཅོམ་ལྡན་འདས་ཤཱཀྱ་ཐུབ་པ་དེ་ལ་ལྟ་བ་དང ། ཕྱག་འཚལ་བ་དང ། བསྙེན་བཀུར་བགྱི་པ་དང ། ཀུན་ཞུ་པ་དང ། སླར་ཞུ་བའི་སླད་དུ་བདག་མཆིའོ། །བཅོམ་ལྡན་འདས་དེས་བཀའ་སྩལ་པ། ཚངས་པ། 40b ད་ལྟར་མི་མཇེད་ཀྱི་འཇིག་རྟེན་གྱི་ཁམས་དེར་བྱང་ཆུབ་སེམས་དཔའ་བྱེ་བ་ཕྲག་མང་པོའང་ཕྱིན་གྱི། དེའི་དུས་ལ་ད་བབ་པར་ཤེས་ན་ཁྱོད་སོང་ཞིག་།ཚངས་པ། སངས་རྒྱས་ཀྱི་ཞིང་དེར་ལྷག་པའི་བསམ་པ་བཅུ་རྣམས་ཀྱིས་གནས་པར་བྱའོ། །བཅུ་གང་ཞེ་ན། སྙན་པར་སྨྲ་བ་དང ། ངན་དུ་སྨྲ་བ་རྣམས་ལ་ཁོང་ཁྲོ་བ་མེད་པའི་སེམས་དང ། སྙན་པ་ཐོས་པ་དང ། མི་སྙན་པ་ཐོས་པ་ལ་བྱམས་པའི་སེམས་དང ། དུས་ཐམས་ཅད་དུ་སེམས་ཅན་རྣམས་ལ་སྙིང་རྗེ་བའི་སེམས་དང ། སེམས་ཅན་རབ་འབྲིང་ཐ་མ་རྣམས་ལ་ཡང་དག་པར་སྦྱོར་བ་དང ། རི་མོ་བྱེད་པ་དང ། བརྙས་པར་བྱེད་པ་རྣམས་ལ་སེམས་མཉམ་པ་དང ། གཞན་གྱི་ལྟུང་བའི་འཁྲུལ་བ་ཐམས་ཅད་ལ་ཉེས་པར་མི་ལྟ་བ་དང ། ཐེག་པ་སྣ་ཚོགས་ལ་རོ་གཅིག་པ་དང ། ངན་སོང་གི་སྡུག་བསྔལ་ཐམས་ཅད་ཀྱི་སྒྲས་མི་སྐྲག་པ་དང ། བྱང་ཆུབ་སེམས་དཔའ་ཐམས་ཅད་ལ་སྟོན་པར་འདུ་ཤེས་པ་དང ། སངས་རྒྱས་ཀྱི་ཞིང་སྙིགས་མ་ལྔ་ཅན་ན་དེ་བཞིན་གཤེགས་པ་མཐོང་བ་ལ་ངོ་མཚར་དུ་འདུ་ཤེས་པ་སྟེ། ཚངས་པ། ལྷག་པའི་བསམ་པ་བཅུ་པོ་དེ་དག་གིས་སངས་རྒྱས་ཀྱི་ཞིང་དེར་གནས་པར་བྱའོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་སྤྱན་སྔར་བདག་སེང་གེའི་སྒྲ་མི་སྒྲོག་སྟེ། འོན་ཀྱང་བདག་གིས་སྤྱོད་ 41a ༄#། །པ་གང་ལགས་པའི་སྤྱོད་པ་འདི་ལ་བཅོམ་ལྡན་འདས་ཉིད་མངོན་སུམ་དུ་གྱུར་པས། བཅོམ་ལྡན་འདས། བདག་གིས་ལྷག་པའི་བསམ་པ་དེ་དག་ཀྱང་རྣམ་པར་སྦྱང་ཞིང་མཉམ་པར་གཞག་པའི་བྱེ་བྲག་གིས་ཀྱང་སངས་རྒྱས་ཀྱི་ཞིང་དེར་གནས་པར་བགྱིའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཟླ་འོད་ཀྱི་སངས་རྒྱས་ཀྱི་ཞིང་དེའི་བྱང་ཆུབ་སེམས་དཔའ་གཞན་དག་གིས་ཀྱང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ལྟར་སེམས་ཅན་མ་རུངས་པ་རྣམས་ཚོགས་པའི་སངས་རྒྱས་ཀྱི་ཞིང་དེར་བདག་ཅག་མ་སྐྱེས་པ་ནི་རྙེད་པ་ལེགས་པར་རྙེད་དོ། །བཅོམ་ལྡན་འདས་དེས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱེད་རྣམས། དེ་སྐད་ཅེས་མ་འཛེར་ཅིག་།དེ་ཅིའི་ཕྱིར་ཞེ་ན། རིགས་ཀྱི་བུ་དག་།སངས་རྒྱས་ཀྱི་ཞིང་འདི་ན་གང་བསྐལ་པ་བརྒྱ་སྟོང་དུ་ཚངས་པར་སྤྱོད་པ་ལ་གནས་པ་བས་མི་མཇེད་ཀྱི་འཇིག་རྟེན་གྱི་ཁམས་ན་གང་སྔ་དྲོའི་དུས་གཅིག་སེམས་ཞེ་སྡང་མེད་པར་གནས་ན་དེ་བས་དེ་ཤིན་ཏུ་མཆོག་གོ་།དེ་ཅིའི་ཕྱིར་ཞེ་ན། འཇིག་རྟེན་གྱི་ཁམས་དེ་ནི་དེ་ཙམ་དུ་ཀུན་ནས་ཉོན་མོངས་པར་གྱུར་པ་སྟེ། སེམས་ཅན་དེ་དག་ཀྱང་དེ་ཙམ་དུ་གཙེ་བ་མང་ཞིང་ཀུན་ནས་ཉོན་མོངས་པ་མང་པ་ཡིན་ནོ། །དེ་ནས་སངས་རྒྱས་ཀྱི་ཞིང་དེ་ནས་བྱང་ཆུབ་ 41b སེམས་དཔའ་སྟོང་ཕྲག་བཅུ་གཉིས་ཚངས་པ་ཁྱད་པར་སེམས་དང་ལྷན་ཅིག་ཏུ་ཆས་ཏེ། ཚངས་པ། བདག་ཅག་ཀྱང་མི་མཇེད་ཀྱི་འཇིག་རྟེན་གྱི་ཁམས་དེར་མཆིའོ། །བསམ་པ་འདི་དག་ཀྱང་རྣམ་པར་སྤྱོད་དོ། །བཅོམ་ལྡན་འདས་ཤཱཀྱ་ཐུབ་པ་དེ་ལའང་བལྟའོ། །ཕྱག་བགྱིའོ། །བསྙེན་བཀུར་བགྱིའོ། །མཉམ་པར་གཞག་པའི་བྱེ་བྲག་གིས་ཀྱང་སངས་རྒྱས་ཀྱི་ཞིང་དེར་གནས་པར་བགྱིའོ། །དེ་ནས་ཚངས་པ་ཁྱད་པར་སེམས་བྱང་ཆུབ་སེམས་དཔའ་སྟོང་ཕྲག་བཅུ་གཉིས་དང་ལྷན་ཅིག་ཏུ་བཅོམ་ལྡན་འདས་དེ་བཞིན་གཤེགས་པ་ཟླ་འོད་ཀྱི་ཞབས་ལ་མགོ་བོས་ཕྱག་བཙལ་ནས། འདི་ལྟ་སྟེ། སྐྱེས་བུ་སྟོབས་དང་ལྡན་པའི་ལག་པ་བསྐུམ་པ་ལས་བརྐྱང་པའམ། བརྐྱང་པ་ལས་བསྐུམ་པའི་སྐད་ཅིག་ཡུད་ཙམ་ཐང་ཅིག་དེ་ཙམ་གྱིས་སངས་རྒྱས་ཀྱི་ཞིང་དེར་མི་སྣང་བར་གྱུར་ནས་བཅོམ་ལྡན་འདས་ཤཱཀྱ་ཐུབ་པ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཞིང་འདིར་ཕྱིན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་དྲ་བ་ཅན་གྱིས་འོད་ལ་བཀའ་སྩལ་པ། དྲ་བ་ཅན་གྱི་འོད། ཁྱོད་ཀྱིས་ཚངས་པ་ཁྱད་པར་སེམས་འོང་བ་མཐོང་ངམ། གསོལ་པ། བཅོམ་ལྡན་འདས། མཐོང་ངོ ། །བཅོམ་ལྡན་འདས་ཀྱིས་བཀའ་སྩལ་པ། དྲ་བ་ཅན་གྱི་འོད། ཚངས་པ་ཁྱད་པར་སེམས་འདི་ནི་བྱང་ཆུབ་ 42a ༄#། །སེམས་དཔའ་ཚུལ་བཞིན་འདྲི་བ། ཀུན་འདྲི་བ་ལ་མཁས་པ་རྣམས་ཀྱི་ནང་ན་མཆོག་གོ། ཚིག་གཟུང་བ་རྣམས་ཀྱི་ནང་ན་མཆོག་གོ་།ཚིག་བཙུན་པ་རྣམས་ཀྱི་ནང་ན་མཆོག་གོ་།ཚིག་འཇམ་པ་རྣམས་ཀྱི་ནང་ན་མཆོག་གོ་།གསོང་པོར་སྨྲ་བ་རྣམས་ཀྱི་ནང་ན་མཆོག་གོ་།ཚིག་མཆོད་པ་རྣམས་ཀྱི་ནང་ན་མཆོག་གོ་།ཚིག་ཐོགས་པ་མེད་པ་རྣམས་ཀྱི་ནང་ན་མཆོག་གོ་།ལྡམ་པོ་དག་ཏུ་སྨྲ་བ་རྣམས་ཀྱི་ནང་ན་མཆོག་གོ་།སེམས་ཁོང་ཁྲོ་བ་མེད་པ་རྣམས་ཀྱི་ནང་ན་མཆོག་གོ་།བྱམས་པ་ལ་གནས་པ་རྣམས་ཀྱི་ནང་ན་མཆོག་གོ་།སྙིང་རྗེ་ལ་གནས་པ་རྣམས་ཀྱི་ནང་ན་མཆོག་གོ་།དགའ་བ་ལ་གནས་པ་རྣམས་ཀྱི་ནང་ན་མཆོག་གོ ། བཏང་སྙོམས་ལ་གནས་པ་རྣམས་ཀྱི་ནང་ན་མཆོག་གོ་།བྱང་ཆུབ་སེམས་དཔའ་ཐེ་ཚོམ་ཐམས་ཅད་གཅོད་པ་དང ། ཀུན་འདྲི་བ་ལ་མཁས་པ་རྣམས་ཀྱི་ནང་ན་མཆོག་གོ་།དེ་ནས་ཚངས་པ་ཁྱད་པར་སེམས་དང ། བྱང་ཆུབ་སེམས་དཔའ་སྟོང་ཕྲག་བཅུ་གཉིས་པོ་དེ་དག་ལྷན་ཅིག་ཏུ་བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་ 42b རྣམ་པ་མང་པོས་མངོན་པར་བསྟོད་དོ། །རྣམ་པར་སྒྲ་བསྒྲགས་སྲིད་པ་གསུམ་དུ་གྲགས། །བསྔགས་པའི་ཕྲེང་བ་འཇིག་རྟེན་ཀུན་ཏུ་རྒྱུ། །བདག་གིས་སེམས་ཅན་མཆོག་རྣམས་ཞིང་ན་མཐོང ། །དེ་དག་ཀུན་ཀྱང་ཁྱེད་ཀྱི་ཡོན་ཏན་གསུངས། །འདི་ན་ཡོངས་སུ་དག་པའི་ཞིང་མཆིས་ཏེ། །དྲི་མ་མ་མཆིས་ངན་སོང་གསུམ་སྤངས་པ། །དེ་འདྲའི་ཞིང་རྣམས་དེ་དག་རྣམ་སྤངས་ནས། །ཁྱེད་ཀྱི་ཐུགས་རྗེས་ངན་པ་ཡོངས་སུ་བཟུང ། །འཇིག་རྟེན་མགོན་ཁྱོད་ཡེ་ཤེས་དམན་མ་མཆིས། །མ་ལུས་བདེ་བར་གཤེགས་དང་ཁྱོད་དུ་མཚུངས། །ཤིན་ཏུ་རྣམ་དག་བསམ་པ་མངོན་མཛད་པ། །འདི་འདྲ་བ་ཡི་ཞིང་འདི་ཁྱོད་ཀྱིས་བཟུང ། །ཚུལ་ཁྲིམས་ཐམས་ཅད་རྣམ་དག་འདོད་སྤངས་ནས། །གང་ཞིག་བསྐལ་པར་གཞན་ན་སྤྱོད་པ་བས། །སུ་དག་བྱམས་པའི་སེམས་ཀྱིས་ཤིན་ཏུ་འདིར། །སྐད་ཅིག་སྤྱོད་ནའང་འདིར་ནི་ཁྱད་པར་འཕགས། །ལུས་དང་ངག་དང་འོན་ཏེ་ཡིད་ཀྱིས་ཀྱང ། །གང་ལ་ཉེས་བགྱིས་རྣམ་པ་གསུམ་མཆིས་ཏེ། །ངན་སོང་གསུམ་དུ་མྱོང་བར་གྲང་འགྱུར་བ། །དེ་ནི་ཚེ་འདི་ཉིད་ལ་འབྱུང་བར་འགྱུར། །བྱང་ཆུབ་སེམས་དཔའ་འདི་ན་གང་མཆིས་པ། །དེ་དག་རྟག་ཏུ་གདུང་བར་མི་བགྱི་སྟེ། །དེ་ཡི་ལས་གང་ལོག་ལྟུང་མཆི་བ་ཡང ། །དེ་དག་འདིར་ནི་ཀླད་པ་ན་བས་འབྱང ། །འདི་ནི་བྱང་ཆུབ་སེམས་དཔའ་སྐྱོན་མེད་གྲང ། །དམ་པའི་ཆོས་གསུངས་ 43a ༄#། །ཆོས་མཆོག་འཛིན་པ་རྣམས། །དེ་དག་འདི་ལས་ཕྱིན་ཆད་ནམ་དུ་ཡང ། །དྲན་པ་མི་འཁྲུག་བློ་ཡང་ཉམས་མི་འགྱུར། །གང་ཞིང་བདུད་ཀྱིས་བཅིངས་པ་གཅད་པ་དང ། །དེ་བཞིན་ཉོན་མོངས་ལས་བཅས་སྤྱོད་འཚལ་བ། །དེ་ནི་ཞིང་འདིར་དམ་པའི་ཆོས་ཉིད་གསུངས། །འདི་ལ་ཡེ་ཤེས་ལྡན་པའི་མཆོག་ཏུ་འགྱུར། །གང་ཞིག་བསྐལ་པ་བྱེ་བར་ཞིང་གཞན་དུ། །སེམས་ལྡན་དམ་ཆོས་འཛིན་པ་གྱུར་པ་བས། །སུ་དག་སྔ་དྲོ་ཅིག་ཙམ་མི་མཇེད་དུ། །འདི་ནི་དེ་བས་མཆོག་ཏུ་མཁས་པས་དགོངས། །གང་གིས་མངོན་པར་དགའ་བའི་འཇིག་རྟེན་དང ། །དེ་བཞིན་ཚེ་དཔག་མེད་ཀྱི་བདེ་ཅན་མཆོག། དེ་ན་སྡུག་བསྔལ་སྡུག་བསྔལ་སྒྲ་མ་མཆིས། །དེར་ནི་ཡོན་ཏན་བགྱི་བ་རྨད་མི་ཆེ། ། ཉོན་མོངས་འབྱུང་གནས་འཇིག་རྟེན་ཉེས་གང་འདིར། །ཞེ་སྡང་ཅན་གྱི་རབ་ཏུ་ཉེས་བཟོད་ལ། །ཆོས་འདི་ལ་ཡང་གཞན་དག་འཛུད་པ་ནི། །འདི་ནི་དེ་བས་དཀའ་བའི་མཆོག་ཏུ་འགྱུར། །སྙིང་རྗེས་རླན་སེམས་སྡུག་བསྔལ་མང་ལས་གྲོལ། །བླ་མེད་བླ་མ་ཁྱོད་ལ་བདག་ཕྱག་འཚལ། །གཏུམ་སེམས་ཅན་ལ་ཆོས་གང་འཆད་པ་ནི། ། བདག་པོ་འཇིག་རྟེན་ན་ཡང་དེ་སྤྱད་དཀའ། །ཤིན་ཏུ་རྒྱ་ཆེ་བ་ཡི་འཁོར་འདི་དང ། །ཕྱོགས་སུ་རྣམ་པར་གྲགས་པའི་སངས་རྒྱས་སྲས། །ཆོས་ཀྱིས་མི་ངོམས་རྒྱ་མཚོ་འདྲ་བ་ 43b ཚོགས། །དེ་དག་ལ་ནི་རྒྱལ་བའི་བྱང་ཆུབ་གསུངས། །ཚངས་པ་དབང་པོ་འཇིག་རྟེན་སྐྱོང་བ་དང ། །ལྷ་ཀླུ་ལྷ་མིན་མི་འམ་ཅིར་བཅས་པ། །ཆོས་ཉིད་འཚལ་བ་མང་པོ་ཚོགས་པ་ལ།། ཇི་ལྟར་མོས་པ་བཞིན་དུ་ཆོས་ཉིད་གསུངས། །དགེ་བསྙེན་དགེ་བསྙེན་མ་དང་དགེ་སློང་དང ། །དགེ་སློང་མ་དང་འཁོར་བཞི་འདི་དག་ཚོགས། །ཇི་ལྟར་ཐོས་ནས་ནོར་གྲུབ་རབ་འདོད་པར། །དེ་ལྟར་དེ་དག་ལ་ནི་ཆོས་བསྟན་གསོལ། །གང་རྣམས་སངས་རྒྱས་ཐེག་ལ་རྟག་མོས་དང ། །དེ་བཞིན་རང་རྒྱལ་ཐེག་དང་ཉན་ཐོས་ཐེག། །ཐེག་པ་གང་གི་སེམས་བསམ་གང་མཁྱེན་པ། །དེ་ལ་སྨན་པའི་སླད་དུ་དེ་གསུངས་ཤིག་།སངས་རྒྱས་རིགས་ལ་གནས་ཕྱིར་གང་བཞུགས་པ། །དཀོན་མཆོག་གསུམ་པོ་གང་ལས་བྱུང་བ་ཡི། །བྱང་ཆུབ་ངེས་སེམས་ངག་ལ་སྨན་སླད་དུ། །ཆོས་ཀྱི་རྒྱལ་པོ་ཁྱོད་ལ་བདག་གསོལ་ལོ། །ཁྱོད་ཀྱི་བསྔགས་པའི་ཕྲེང་བ་གྲགས་ཐོས་ནས། །ཤེས་རབ་ཡངས་པ་འདི་རྣམས་བདེ་བར་ལྷགས། ། སེམས་ཅན་གཙོ་བོ་དེ་དག་མཁྱེན་པ་བཞིན། །དེ་དག་ལ་ནི་བླ་མེད་སྤྱོད་པ་ཤོད། །འདི་ལྟར་བདེ་གཤེགས་མཁྱེན་པ་བསམ་མི་ཁྱབ། །དགྲ་བཅོམ་བདག་ཉིད་ཆེན་པོས་འདི་མིན། །འདི་ནི་རང་རྒྱལ་གྱི་ཡང་ཡུལ་མ་ལགས། །བདག་ཀྱང་འདྲེན་ལ་དད་པའི་རྗེས་སུ་འབྲང ། །བདག་གིས་གང་ཁྱོད་དོན་ཆེན་འདི་དྲིས་པ། །འཇིག་རྟེན་རྣམ་འདྲེན་ 44a ༄#། །ཁྱོད་ལ་བདག་བཟོད་གསོལ། །གང་ཕྱིར་ཁྱོད་ཀྱི་ཐུགས་ནི་སྐྱོ་མི་མངའ། །དེ་ཕྱིར་བྱང་ཆུབ་ལམ་མཆོག་བསྟན་དུ་གསོལ། །དེ་ནས་བཅོམ་ལྡན་འདས་ཀྱི་སྤྱན་སྔར་ཚངས་པ་ཁྱད་པར་སེམས་ཀྱིས་ཚིགས་སུ་བཅད་པ་འདི་དག་སྨྲས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་དག་ལྷག་པའི་བསམ་པ་བརྟན་ཞིང་ཡིད་མི་སྐྱོ་བ་རྣམས་ལགས། བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་དག་མགོ་གཅིག་ཏུ་སྨྲ་ཞིང་ཚིག་གདུང་བས་མཆིས་པ་རྣམས་ལགས། ཇི་ལྟར་ན་དགེ་བའི་རྩ་བ་རྣམས་མངོན་པར་འཕགས་པ་རྣམས་ལགས། ཇི་ལྟར་ན་སླད་པ་མ་མཆིས་ཤིང་སྤྱོད་ལམ་ཡང་མི་འཁྲུག་པ་རྣམས་ལགས། ཇི་ལྟར་ན་ཆོས་དཀར་པོ་རྣམས་རྣམ་པར་འཕེལ་བར་བགྱིད་པ་རྣམས་ལགས། ཇི་ལྟར་ནས་ནས་སར་འཕར་བར་བགྱིད་པ་རྣམས་ལགས། ཇི་ལྟར་ན་སེམས་ཅན་ཡོངས་སུ་སྨིན་པར་བགྱི་བ་ལ་ཐབས་མཁས་པ་རྣམས་ལགས། ཇི་ལྟར་ན་སེམས་ཅན་རྣམས་ལ་ཉེ་བར་སྤྱོད་པ་ལ་མཁས་པ་རྣམས་ལགས། ཇི་ལྟར་ན་བྱང་ཆུབ་ཀྱི་སེམས་སྲུང་བ་རྣམས་ལགས། ཇི་ལྟར་ན་སེམས་རྩེ་གཅིག་ཅིང་ཡིད་རྣམ་པར་མ་འདྲེས་པ་རྣམས་ལགས། ཇི་ལྟར་ན་ཆོས་རྣམས་ཡོངས་སུ་འཚོལ་བ་ལ་མཁས་པ་རྣམས་ལགས། ཇི་ལྟར་ན་ལྟུང་ 44b བ་ལས་འབྱུང་བ་ལ་མཁས་པ་རྣམས་ལགས། ཇི་ལྟར་ན་ཉོན་མོངས་པ་རྣམས་འདུལ་བ་ལ་མཁས་པ་རྣམས་ལགས། ཇི་ལྟར་ན་འཁོར་གྱི་ནང་དུ་མཆི་བ་ལ་མཁས་པ་རྣམས་ལགས། ཇི་ལྟར་ན་ཆོས་རྣམ་པར་འབྱེད་པ་ལ་མཁས་པ་རྣམས་ལགས། ཇི་ལྟར་ན་རྒྱུའི་སྟོབས་དང་ལྡན་ཞིང་དགེ་བའི་རྩ་བ་ཆབ་མི་འཚལ་བ་ལགས། ཇི་ལྟར་ན་སྦྱིན་པའི་ཕ་རོལ་ཏུ་ཕྱིན་པ་ལ་མ་བསྟན་པར་སྦྱིན་པ་དང ། དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་བར་དུ་མ་བསྟན་པར་ཤེས་པ་རྣམས་ལགས། ཇི་ལྟར་ན་བསམ་གཏན་རྣམས་ཀྱི་བདེ་བ་ལས་ལྡོག་པ་ལ་མཁས་པ་རྣམས་ལགས། ཇི་ལྟར་ན་སངས་རྒྱས་ཀྱི་ཆོས་རྣམས་ལས་ཕྱིར་མི་ལྡོག་པ་རྣམས་ལགས། ཇི་ལྟར་ན་སངས་རྒྱས་ཀྱི་རིགས་མི་གཅོད་པ་རྣམས་ལགས། དེ་སྐད་ཅེས་གསོལ་པ་པ་དང ། བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་བཀའ་སྩལ་ཏོ། །ཚངས་པ། ལེགས་སོ། །ལེགས་སོ། །ཡང་ཚངས་པ། ཁྱོད་དེ་བཞིན་གཤེགས་པ་ལ་དེ་ལྟ་བུའི་དོན་དྲི་བར་སེམས་པ་ལེགས་སོ། །ཚངས་པ། དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུངས་ཤིག་དང་བཤད་དོ། །བཅོམ་ལྡན་འདས། ལེགས་སོ་ཞེས་གསོལ་ནས་ཚངས་པ་ཁྱད་པར་སེམས་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཚངས་པ། ཆོས་བཞི་དང་ལྡན་ན་བྱང་ཆུབ་སེམས་ 45a ༄#། །དཔའ་སེམས་དཔའ་ཆེན་པོ་དག་ལྷག་པའི་བསམ་པ་བརྟན་ཞིང་ཡིད་མི་སྐྱོ་བ་རྣམས་ཡིན་ཏེ། བཞི་གང་ཞེ་ན། སེམས་ཅན་རྣམས་ལ་སྙིང་རྗེ་བ་དང ། མི་སྐྱོ་བའི་བརྩོན་འགྲུས་དང ། འཁོར་བ་ལ་རྨི་ལམ་ལྟ་བུར་མོས་པ་དང ། སངས་རྒྱས་ཀྱི་ཡེ་ཤེས་ལ་མི་མཉམ་པ་དང ། མཉམ་པར་ཡོངས་སུ་འཇལ་བ་སྟེ། ཚངས་པ། ཆོས་བཞི་པོ་དེ་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་དག་ལྷག་པའི་བསམ་པ་བརྟན་ཞིང་ཡིད་མི་སྐྱོ་བ་རྣམས་ཡིན་ནོ། །ཚངས་པ། ཆོས་བཞི་དང་ལྡན་ན། བྱང་ཆུབ་དཔའ་སེམས་དཔའ་ཆེན་པོ་དག་མགོ་གཅིག་ཏུ་སྨྲ་ཞིང་ཚིག་གདུང་བ་མེད་པ་རྣམས་ཡིན་ཏེ། བཞི་གང་ཞེ་ན། བྱང་ཆུབ་སེམས་དཔའ་རྣམས་ཆོས་ཐམས་ཅད་ལ་གང་ཟག་མེད་པར་མགོ་གཅིག་ཏུ་སྨྲའོ། །བྱང་ཆུབ་སེམས་དཔའ་རྣམས་སྐྱེ་གནས་ཐམས་ཅད་ལ་དགའ་བ་མེད་པར་མགོ་གཅིག་ཏུ་སྨྲའོ། །བྱང་ཆུབ་སེམས་དཔའ་རྣམས་ཐེག་པ་ཆེན་པོའི་བསྔགས་པ་མགོ་གཅིག་ཏུ་སྨྲའོ། །བྱང་ཆུབ་སེམས་དཔའ་རྣམས་དགེ་བ་དང ། མི་དགེ་བའི་ལས་རྣམས་ཆུད་མི་ཟ་བར་མགོ་གཅིག་ཏུ་སྨྲའོ། །ཚངས་པ། དེ་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚིག་མགོ་གཅིག་པ་བཞིའོ། །ཚངས་པ། ཆོས་བཞི་པོ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ 45b དགེ་བའི་རྩ་བ་མངོན་པར་འཕགས་པར་འགྱུར་བ་སྟེ། བཞི་གང་ཞེ་ན། ཚུལ་ཁྲིམས་དང ། ཐོས་པ་དང ། གཏོང་བ་དང ། འབྱུང་བ་སྟེ་བཞི་པོ་དེ་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་རྣམས་མི་སླད་ཅིང་སྤྱོད་ལམ་རྣམ་པར་འཁྲུག་པར་མི་འགྱུར་ཏེ། བཞི་གང་ཞེ་ན། རྙེད་པ་མེད་པ་དང ། སྨད་པ་མེད་པ་དང ། གྲགས་པ་མེད་པ་དང ། སྡུག་བསྔལ་པ་སྟེ། ཚངས་པ། ཆོས་བཞི་པོ་དེ་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མི་སླད་ཅིང་སྤྱོད་ལམ་རྣམ་པར་འཁྲུག་པར་མི་འགྱུར་རོ། །ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དགེ་བའི་རྩ་བ་རྣམས་འཕེལ་བར་བྱེད་དེ། བཞི་གང་ཞེ་ན། སེམས་ཅན་རྣམས་བྱང་ཆུབ་ལ་ཡང་དག་པར་འཛུད་པ་དང ། སྦྱིན་པ་བྱིན་པ་ན་རྣམ་པར་སྨིན་པ་ལ་མི་རེ་བ་དང ། དམ་པའི་ཆོས་ཡོངས་སུ་འཛིན་པ་དང ། བྱང་ཆུབ་སེམས་དཔའ་རྣམས་ལ་ཤེས་རབ་སྟོན་པ་སྟེ། བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ས་ནས་སར་འཕར་ཏེ། བཞི་གང་ཞེ་ན། དགེ་བའི་རྩ་བ་བསགས་པ་དང ། ཉེས་པ་ཐམས་ཅད་རྣམ་པར་སྤོང་བ་དང ། བསྔོ་བ་ལ་མཁས་པ་དང ། བརྩོན་འགྲུས་ཤིན་ཏུ་འབར་བ་དང ། བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་ 46a ༄#། །སེམས་དཔའ་སེམས་དཔའ་ཆེན་པོ་རྣམས་སེམས་ཅན་ཡོངས་སུ་སྨིན་པར་བྱ་བ་ལ་ཐབས་མཁས་པ་ཡིན་ཏེ། བཞི་གང་ཞེ་ན། སེམས་ཅན་གྱི་རྗེས་སུ་འཇུག་པ་དང།་གཞན་གྱི་བསོད་ནམས་ལ་རྗེས་སུ་ཡི་རང་བ་དང ། ཉེས་པ་འཆགས་པ་དང ། སངས་རྒྱས་ཐམས་ཅད་ལ་གསོལ་བ་འདེབས་པ་སྟེ་བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སེམས་ཅན་རྣམས་ལ་ཉེ་བར་སྤྱོད་པ་ལ་མཁས་པ་རྣམས་ཡིན་ཏེ། བཞི་གང་ཞེ་ན། སེམས་ཅན་ཐམས་ཅད་ལ་ཕན་པའི་དངོས་པོ་དང ། བདག་བདེ་བ་ལ་མ་ཆགས་པ་དང ། བཟོད་ཅིང་དེས་པ་དང ། ང་རྒྱལ་བཅོམ་པ་སྟེ་བཞི་པོ་དེ་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བྱང་ཆུབ་ཀྱི་སེམས་ཆུད་མི་གཟོན་ཏེ། བཞི་གང་ཞེ་ན། སངས་རྒྱས་རྗེས་སུ་དྲན་པ་ཡིད་ལ་བྱེད་པ་དང ། དགེ་བའི་རྩ་བ་ཐམས་ཅད་ལ་བྱང་ཆུབ་ཀྱི་སེམས་སྔོན་དུ་འགྲོ་བ་དང ། དགེ་བའི་བཤེས་གཉེན་ལ་བསྟེན་པ་དང ། ཐེག་པ་ཆེན་པོ་ལ་ཡང་དག་པར་བསྔགས་པ་སྟེ། བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སེམས་རྩེ་གཅིག་ཅིང་ཡིད་རྣམ་པར་མ་འདྲེས་པ་རྣམས་སུ་རིག་པར་བྱ་སྟེ། བཞི་ 46b གང་ཞེ་ན། ཉན་ཐོས་ཀྱི་སེམས་རྣམ་པར་སྤོང་བ་དང ། རང་སངས་རྒྱས་ཀྱི་ཡིད་ལ་བྱེད་པ་གཏོང་བ་དང ། ཆོས་ཡོངས་སུ་འཚོལ་བས་མི་ངོམས་པ་དང ། ཇི་ལྟར་ཐོས་པ་བཞིན་དུ་ཆོས་སྟོན་པ་སྟེ་བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཡོངས་སུ་འཚོལ་ཏེ། བཞི་གང་ཞེ་ན། རྙེད་པར་དཀའ་བའི་ཕྱིར་རིན་པོ་ཆེར་འདུ་ཤེས་པ་དང ། ནད་ཐམས་ཅད་རབ་ཏུ་ཞི་བར་བྱེད་པའི་ཕྱིར་རྩིར་འདུ་ཤེས་པ་དང ། ཆུད་མི་ཟ་བའི་ཕྱིར་དོན་དུ་འདུ་ཤེས་པ་དང ། མྱ་ངན་ལས་འདའ་བའི་ཕྱིར་སྡུག་བསྔལ་ཐམས་ཅད་ཞི་བར་འདུ་ཤེས་པ་སྟེ། བཞི་པོ་འདི་དག་གོ་།ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལྟུང་བ་ལས་འབྱུང་བ་ལ་མཁས་པ་རྣམས་ཡིན་ཏེ། བཞི་གང་ཞེ་ན། ནང་ནས་མི་སྐྱེ་བའི་ཆོས་ལ་བཟོད་པ་དང ། མི་འཕོ་བས་མི་འགག་པ་ལ་བཟོད་པ་དང ། རྒྱུ་ལ་སོ་སོར་རྟོག་པས་རྟེན་ཅིང་འབྲེལ་པར་འབྱུང་བ་ལ་བཟོད་པ་དང ། གཅིག་ནས་གཅིག་ཏུ་སེམས་ཕན་ཚུན་དུ་གྱུར་པ་སྟེ་བཞི་པོ་འདི་དག་གོ་།ཚངས་པ། ཆོས་བཞི་དང་ལྡན་ན། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཉོན་མོངས་པ་རྣམ་པར་སྦྱོང་སྟེ། བཞི་གང་ཞེ་ན། ཚུལ་བཞིན་དུ་སོ་སོར་རྟོག་པ་དང ། མ་འོངས་པ་ན་སྡོམ་པ་དང ། དཀར་པོའི་ཆོས་ཀྱི་ 47a ༄#། །སྟོབས་བསྐྱེད་པ་དང ། རབ་ཏུ་དབེན་པར་གནས་པ་སྟེ། བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཁོར་གྱི་ནང་དུ་འགྲོ་སྟེ། བཞི་གང་ཞེ་ན། ཆོས་འདོད་པའི་ཕྱིར་ཏེ་ཀླན་ཀ་འཚོལ་བའི་བསམ་པས་མ་ཡིན་པ་དང ། རི་མོ་དང་བཅས་པའི་ཕྱིར་ཏེ་ང་རྒྱལ་དང ། ཁེངས་པས་མ་ཡིན་པ་དང ། དགེ་བ་གང་ཡིན་པ་འཚོལ་བའི་ཕྱིར་ཏེ་བདག་སྦྱོམས་པས་མ་ཡིན་པ་དང ། སེམས་ཅན་རྣམས་དགེ་བའི་རྩ་བ་ལ་གཟུད་པའི་ཕྱིར་ཏེ་རྙེད་པ་དང ། བཀུར་སྟི་དང ། ཚིགས་སུ་བཅད་པའི་ཕྱིར་མ་ཡིན་པ་སྟེ། བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཀྱི་སྦྱིན་པ་རྣམ་པར་འབྱེད་དེ། བཞི་གང་ཞེ་ན། དམ་པའི་ཆོས་ཡོངས་སུ་འཛིན་པ་དང ། བདག་ཉིད་ཀྱི་ཤེས་རབ་གསལ་བར་བྱེད་པ་དང ། སྐྱེས་བུ་དམ་པའི་ལས་བྱེད་པ་དང།་ཀུན་ནས་ཉོན་མོངས་པ་དང ། རྣམ་པར་བྱང་བ་སྟོན་པ་སྟེ། བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྒྱུའི་སྟོབས་དང་ལྡན་པས་དགེ་བའི་རྩ་བ་ཆུད་མི་ཟ་བ་ཡིན་ཏེ། བཞི་གང་ཞེ་ན། གཞན་གྱི་འཁྲུལ་བ་ལ་ཉེས་པར་མི་ལྟ་བ་དང ། ཁྲོས་པ་རྣམས་ལ་བྱམས་པ་སྒོམ་ 47b པ་དང ། ཆོས་རྣམས་ཀྱི་རྒྱུ་སྟོན་པ་དང ། བྱང་ཆུབ་ཀྱི་སེམས་མི་གཏོང་བ་སྟེ་བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཕ་རོལ་ཏུ་ཕྱིན་པ་དྲུག་ལ་མ་བསྟན་པར་ཤེས་པ་རྣམས་ཡིན་ཏེ། བཞི་གང་ཞེ་ན། སྦྱིན་པ་དག་ལ་སྔོན་དུ་འགྲོ་བ་རྣམས་ཡིན། ལྟུང་བ་རྣམས་ཀྱི་ཕ་རོལ་ལ་རྩོད་པར་མི་བྱེད་པ་ཡིན། སེམས་ཅན་ཡོངས་སུ་སྨིན་པར་བྱ་བའི་ཕྱིར་བསྡུ་བའི་དངོས་པོ་ལ་མཁས་པ་ཡིན། ཆོས་རྣམས་ལ་ཟབ་མོར་མོས་པ་རྣམས་ཡིན་ཏེ་བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བསམ་གཏན་ལ་གནས་ནས་འདོད་པའི་ཁམས་སུ་སྐྱེའོ། །བཞི་གང་ཞེ་ན། སེམས་ལས་སུ་རུང་བ་དང ། དགེ་བའི་རྩ་བ་རྣམས་ཀྱིས་སྟོབས་བསྐྱེད་པ་དང ། སེམས་ཅན་རྣམས་ཡོངས་སུ་མི་གཏོང་བ་དང ། ཐབས་དང ། ཤེས་རབ་སྒོམ་པ་སྟེ། བཞི་པོ་འདི་དག་གོ། ཚངས་པ། ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་ཆོས་རྣམས་ལས་ཕྱིར་མི་ལྡོག་པ་ཡིན་ཏེ། བཞི་གང་ཞེ་ན། འཁོར་བ་དཔག་ཏུ་མེད་པ་ཡོངས་སུ་འཛིན་པ་དང ། སངས་རྒྱས་དཔག་ཏུ་མེད་པ་ལ་མཆོད་ཅིང་རིམ་གྲོར་བྱེད་པ་དང ། བྱམས་པ་དཔག་ཏུ་མེད་པ་སྒོམ་པ་དང ། སྙིང་རྗེ་དཔག་ཏུ་མེད་པ་སྒོམ་པ་སྟེ་བཞི་བོ་འདི་དག་གོ་།ཚངས་པ། 48a ༄#། །ཆོས་བཞི་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་རིགས་མི་གཅོད་དེ། བཞི་གང་ཞེ་ན། སྔར་དམ་བཅས་པ་ལས་ཕྱིར་མི་འགྱུར་བ་དང ། ཇི་སྐད་སྨྲས་པ་དེ་བཞིན་བྱེད་པ་དང ། དགེ་བའི་རྩ་བ་རྣམས་ལ་ཤིན་ཏུ་མོས་པ་དང ། བསམ་པའི་ནན་ཏན་ལ་གནས་པ་སྟེ། ཚངས་པ། ཆོས་བཞི་པོ་འདི་དག་དང་ལྡན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སངས་རྒྱས་ཀྱི་རིགས་མི་གཅོད་དོ། །བཅོམ་ལྡན་འདས་ཀྱིས་བཞི་པ་མངོན་པར་བསྒྲུབ་པ་འདི་བཤད་པ་ན།་ལྷ་དང ། མིར་བཅས་པའི་སྐྱེ་དགུ་རྣམས་ལས་སྲོག་ཆགས་སྟོང་ཕྲག་སུམ་ཅུ་རྩ་གཉིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ལྔ་སྟོང་ཡང་མི་སྐྱེ་བའི་ཆོས་ལ་བཟོད་པ་སྐྱེས་སོ། །སངས་རྒྱས་ཀྱི་ཞིང་སྣ་ཚོགས་ནས་འདུས་པའི་བྱང་ཆུབ་སེམས་དཔའ་དེ་དག་གིས་ཀྱང་བཅོམ་ལྡན་འདས་ལ་མཆོད་པ་བྱ་བའི་ཕྱིར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ལྷའི་མེ་ཏོག་རྣམས་ཀྱིས་པུས་མོ་ནུབ་པ་ཙམ་དུ་ཁེབས་པར་བྱས་སོ། །དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་སྨྲས་སོ། །ཚངས་པ། ཁྱོད་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཚུལ་བཞིན་དྲི་བ་ལ་མཁས་པ་ 48b རྣམས་ཀྱི་མཆོག་ཏུ་གསུངས་ན། དེ་ཇི་ལྟར་དྲིས་ན་བྱང་ཆུབ་སེམས་དཔའ་ཚུལ་བཞིན་དྲི་བ་ཡིན། ཁྱད་པར་སེམས་ཀྱིས་སྨྲས་པ། རིགས་ཀྱི་བུ། བདག་ཏུ་སྒྲོ་འདོགས་པས་འདྲི་ན་ཚུལ་བཞིན་མ་ཡིན་པས་འདྲིའོ། །གཞན་དུ་སྒྲོ་འདོགས་པས་འདྲི་ན་ཚུལ་བཞིན་མ་ཡིན་པར་འདྲིའོ། །ཆོས་སུ་སྒྲོ་འདོགས་པས་འདྲི་ན་ཚུལ་བཞིན་མ་ཡིན་པར་འདྲིའོ། །དྲ་བ་ཅན་གྱི་འོད། གང་ལ་བདག་ཏུ་སྒྲོ་འདོགས་པ་མེད་པ་དང ། གཞན་དུ་སྒྲོ་འདོགས་པ་མེད་པ་དང ། ཆོས་སུ་སྒྲོ་འདོགས་པ་མེད་པ་འདི་ནི་ཚུལ་བཞིན་འདྲིའོ། །གཞན་ཡང་དྲ་བ་ཅན་གྱི་འོད། སྐྱེ་བའི་ཕྱིར་འདྲི་ན་ཚུལ་བཞིན་མ་ཡིན་པར་འདྲིའོ། །འགག་པའི་ཕྱིར་འདྲི་ན་ཚུལ་བཞིན་མ་ཡིན་པའོ། །གནས་དང ། གནས་མ་ཡིན་པའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །དྲ་བ་ཅན་གྱི་འོད། གང་ལ་ཆོས་གང་ཡང་སྐྱེ་བའི་ཕྱིར་རམ། འགག་པའི་ཕྱིར་རམ། གནས་དང ། གནས་མ་ཡིན་པའི་ཕྱིར་འདྲི་བ་མེད་པ་དེ་ནི་ཚུལ་བཞིན་འདྲི་བའོ། །གཞན་ཡང ། དྲ་བ་ཅན་གྱི་འོད། ཀུན་ནས་ཉོན་མོངས་པའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །རྣམ་པར་བྱང་བའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། ། འཁོར་བའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །འཁོར་བ་ལས་ཤིན་ཏུ་བཟླ་བའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །ཡོངས་སུ་མྱ་ངན་ལས་འདའ་བའི་ 49a ༄#། །ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །དྲ་བ་ཅན་གྱི་འོད། གང་ལ་ཀུན་ནས་ཉོན་མོངས་པའི་ཕྱིར་མ་ཡིན། རྣམ་པར་བྱང་བའི་ཕྱིར་མ་ཡིན། འཁོར་བའི་ཕྱིར་མ་ཡིན། འཁོར་བ་ལས་ཤིན་ཏུ་བཟླ་བའི་ཕྱིར་མ་ཡིན། ཡོངས་སུ་མྱ་ངན་ལས་འདའ་བའི་ཕྱིར་འདྲི་བ་མེད་པ་དེ་ནི་ཚུལ་བཞིན་འདྲི་བའོ། །དེ་ཅིའི་ཕྱིར་ཞེ་ན། ཆོས་མི་འགྱུར་བ་ཉིད་ནི་ཀུན་ནས་ཉོན་མི་མོངས། རྣམ་པར་བྱང་བར་མི་འགྱུར། མི་འཁོར་ཞིང་ཡོངས་སུ་མྱ་ངན་ལས་མི་འདའོ། །གཞན་ཡང ། དྲ་བ་ཅན་གྱི་འོད། འཐོབ་པའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །མངོན་དུ་བྱ་བའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །མངོན་པར་ཤེས་པའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །ཡོངས་སུ་ཤེས་པ་དང ། སྒོམ་པའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །འབྲལ་བའི་ཕྱིར་འདྲི་ན་དེ་ནི་ཚུལ་བཞིན་མ་ཡིན་པའོ། །དྲ་བ་ཅན་གྱི་འོད། གང་ལ་ཐོགས་པ་མེད་པ་དང ། འཛིན་པ་མེད་པ་དང ། མངོན་པར་འདུ་བྱ་བ་མེད་པ་དང ། ཀུན་ཏུ་རྟོག་པ་མེད་པ་དང ། མངོན་པར་ཤེས་པ་མེད་པ་དང ། གནས་མེད་པ་དང ། བསྒོམ་པ་མེད་པ་དང ། བསྒོམ་པར་ལྟ་བ་མེད་པ་དེ་ནི་ཚུལ་བཞིན་འདྲི་བའོ། །གཞན་ཡང ། དྲ་བ་ཅན་གྱི་འོད། འདི་ནི་དགེ་བའོ། །འདི་ནི་མི་དགེ་བའོ། །འདི་ནི་ཟག་པ་དང་བཅས་པའོ། །འདི་ནི་ཟག་པ་མེད་པའོ། །འདི་ནི་ཁ་ན་མ་ 49b ཐོ་བ་དང་བཅས་པའོ། །འདི་ནི་ཁ་ན་མ་ཐོབ་མེད་པའོ། །འདི་ནི་འདུས་བྱས་སོ། །འདི་ནི་འདུས་མ་བྱས་སོ། །འདི་ནི་འཇིག་རྟེན་པའོ། །འདི་ནི་འཇིག་རྟེན་ལས་འདས་པའོ། །ཞེས་འདྲིན་དེ་ནི་ཚུལ་བཞིན་མ་ཡིན་པ་སྟེ། དྲ་བ་ཅན་གྱི་འོད། ཇི་ཙམ་དུ་གཉིས་སུ་འཇུག་པས་འདྲི་བ་དེ་ཙམ་དུ་ཚུལ་བཞིན་མ་ཡིན་པའོ། །དྲ་བ་ཅན་གྱི་འོད། གང་ལ་གཉིས་མེད་པ་དང ། གཉིས་མ་ཡིན་པ་མེད་པ་དང ། །འདུ་ཤེས་མེད་པ་དང ། མིང་མེད་པ་དང ། སྤྱི་མི་འཇུག་པ་དེ་ནི་ཚུལ་བཞིན་འདྲི་བའོ། །གཞན་ཡང ། དྲ་བ་ཅན་གྱི་འོད། སངས་རྒྱས་ཐ་དད་དུ་བྱེད་པ་དང ། ཆོས་ཐ་དད་དུ་བྱེད་པ་དང ། དགེ་འདུན་ཐ་དད་དུ་བྱེད་པ་དང ། ཞིང་ཐ་དད་དུ་བྱེད་པ་དང ། སེམས་ཅན་ཐ་དད་དུ་བྱེད་པ་དང ། ཐག་པ་ཐ་དད་དུ་བྱེད་པ་དེ་དག་ནི་ཚུལ་བཞིན་མ་ཡིན་པའོ།། དྲ་བ་ཅན་གྱི་འོད། གང་ལ་ཆོས་གང་ཡང་ཐ་དད་པར་རམ། གཅིག་པར་མི་འདྲི་བ་དེ་ནི་ཚུལ་བཞིན་འདྲི་བའོ། །གཞན་ཡང ། དྲ་བ་ཅན་གྱི་འོད། ཆོས་ཐམས་ཅད་ནི་ཚུལ་བཞིན་ནོ། །ཆོས་ཐམས་ཅད་ནི་ཚུལ་བཞིན་མ་ཡིན་པའོ། །སྨྲས་པ། ཚངས་པ་ཇི་ལྟར་ན་ཆོས་ཐམས་ཅད་ནི་ཚུལ་བཞིན། ཆོས་ཐམས་ཅད་ནི་ཚུལ་བཞིན་མ་ཡིན། སྨྲས་པ། ཆོས་ཐམས་ཅད་བསམ་གྱིས་མི་ཁྱབ་པའི་ཕྱིར་ཆོས་ཐམས་ཅད་ནི་ཚུལ་བཞིན་ནོ། །ཆོས་ཐམས་ཅད་བསམ་གྱིས་མི་ཁྱབ་པ་ལ་སེམས་པར་ཞུགས་པ་དེ་དག་ནི་ཚུལ་བཞིན་མ་ཡིན་པའོ། ། 50a ༄#། །ཆོས་ཐམས་ཅད་ནི་དབེན་པའི་མཚན་ཉིད་དེ་ནི་ཚུལ་བཞིན་ནོ། །གང་དབེན་པ་ལ་མ་མོས་པ་དེ་དག་ནི་ལྷག་པར་བྱེད་པ་ལ་ཞུགས་པའོ། །གང་ལྷག་པར་བྱེད་པ་ལ་ཞུགས་པ་དེ་དག་ནི་ལྷག་པར་བྱེད་པ་ལ་བརྩོན་པའོ། །གང་ལྷག་པར་བྱེད་པ་ལ་བརྩོན་པ་དེ་དག་ཇི་ཙམ་དུ་ལྷག་པར་བྱེད་པ་དེ་ཙམ་དུ་ཚུལ་བཞིན་དུ་མ་ཡིན་པའོ། །སྨྲས་པ། ཚངས་པ། ཆོས་རྣམས་ཀྱི་ཚུལ་གང་ཡིན། སྨྲས་པ། རིགས་ཀྱི་བུ། རང་གི་ཡུལ་དབེན་པ་འདོད་ཆགས་དང་བྲལ་བའི་མཐའ་ནི་ཆོས་རྣམས་ཀྱི་ཚུལ་ལོ། །སྨྲས་པ། ཚངས་པ། གང་ཆོས་ཐམས་ཅད་ཀྱི་ཚུལ་འདི་ཁོང་དུ་ཆུད་པའི་སེམས་ཅན་དེ་དག་ནི་ཉུང་ཞིང་འབྱུང་བར་འགྱུར་རོ། །སྨྲས་པ། རིགས་ཀྱི་བུ། འདོད་ཆགས་དང་བྲལ་བའི་མཐའ་ནི་གཅིག་པའང་མ་ཡིན། མང་པོའང་མ་ཡིན་ཏེ། དྲ་བ་ཅན་གྱི་འོད། རིགས་ཀྱི་བུའམ། རིགས་ཀྱི་བུ་མོ་གང་ཆོས་རྣམས་ཀྱི་ཚུལ་བཞིན་འདི་དག་གི་རྗེས་སུ་སོང་བའམ། རྗེས་སུ་འགྲོ་བའམ། རྗེས་སུ་འགྲོ་བར་འགྱུར་བ་དེ་དག་གིས་ཆོས་གང་ཡང་མ་རྟོགས། མི་རྟོགས། རྟོགས་པར་མི་འགྱུར་རོ། །དེ་ཅིའི་ཕྱིར་ཞེ་ན།་ཁོང་དུ་ཆུད་པ་མེད་པར་བཅོམ་ལྡན་འདས་ཀྱིས་ཀུན་ཤེས་པ་ལུང་བསྟན་པ་གསུངས་སོ། །གང་རྣམས་ཚུལ་བཞིན་དུ་ཆོས་བསྟན་པ་འདི་ཐོས་ནས་མོས་པར་ 50b ཁྱད་པ་དེ་དག་ནི་ཇི་ལྟར་བསྟན་པར་དེ་བཞིན་དུ་རབ་ཏུ་སྦྱོར་བ་ཡིན་ཏེ། དེ་དག་ནི་ཆོས་གང་ལའང་སྤྲོས་པར་མི་བྱེད་པར་འགྱུར་རོ། །སུ་ཆོས་གང་ལའང་སྤྲོས་པར་བྱེད་པར་མི་འགྱུར་བ་དེ་དག་ནི་ཆོས་གང་ཡང་ཁོང་དུ་ཆུད་པར་མི་འགྱུར་རོ། །སུ་ཆོས་གང་ཡང་ཁོང་དུ་ཆུད་པར་མི་འགྱུར་བ་དེ་དག་ནི་འཁོར་བར་འགྲོ་བའང་མ་ཡིན། མྱ་ངན་ལས་འདས་པའི་ཆོས་ཅན་ཡང་མ་ཡིན་ནོ། །དེ་ཅིའི་ཕྱིར་ཞེ་ན། བཅོམ་ལྡན་འདས་ཀྱིས་འཁོར་བའང་མ་དམིགས། ཡོངས་སུ་མྱ་ངན་ལས་འདས་པའང་མ་དམིགས་པའི་ཕྱིར་རོ། །སྨྲས་པ། བཅོམ་ལྡན་འདས་ཀྱིས་འཁོར་བ་ལས་བཟླ་བའི་ཕྱིར་ཆོས་མ་བཤད་དམ། སྨྲས་པ། བཅོམ་ལྡན་འདས་ཀྱིས་གང་འཁོར་བ་ལས་བཟླ་བའི་ཆོས་གང་ཡང་མ་བསྟན་ཏམ། སྨྲས་པ། དེ་ནི་མ་ཡིན་ནོ། །སྨྲས་པ། རིགས་ཀྱི་བུ། དེ་ལྟ་བས་ན་བཅོམ་ལྡན་འདས་ཀྱིས་འཁོར་བའང་མི་སེལ། མྱ་ངན་ལས་འདས་པའང་ཐོབ་པར་མི་བྱེད་མོད་ཀྱི། འཁོར་བ་དང ། མྱ་ངན་ལས་འདས་པ་གཉིས་སུ་འདུ་ཤེས་པ་ལས་མྱ་ངན་ལས་འདའ་བར་སྟོན་ཏེ། འདི་ལ་གང་ཡང་འཁོར་བ་ལས་འདའ་བར་ཡང་མི་བྱེད། ཡོངས་སུ་མྱ་ངན་ལས་འདས་པའང་འཐོབ་པར་མི་བྱེད་དོ། །དེ་ཅིའི་ཕྱིར་ཞེ་ན། མཉམ་པ་ཉིད་ནི་མི་འཁོར། མྱ་ངན་ལས་མི་འདའོ། །ཀུན་ནས་ཉོན་མི་མོངས། རྣམ་པར་བྱང་བར་མི་འགྱུར་ 51a ༄#། །རོ། །དེ་ནས་བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ་ལེགས་སོ་ཞེས་བྱ་བ་བྱིན་ཏེ། ཚངས་པ། ལེགས་སོ། །ལེགས་སོ། །ཚངས་པ། ཅི་སྟེ་བཤད་པར་བྱ་ན་དེ་སྐད་བཤད་པར་བྱའོ། །ཚུལ་བཞིན་དུ་ཆོས་བསྟན་པ་འདི་བསྟན་པ་ན་དགེ་སློང་ཉིས་སྟོང་རྣམས་ཟག་པ་ལས་ལེན་པ་མེད་པར་སེམས་རྣམ་པར་གྲོལ་ལོ། ། དེ་ནས་བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་བཀའ་སྩལ་ཏོ། །ཚངས་པ། ངས་འཁོར་བ་དང ། མྱ་ངན་ལས་འདས་པ་མ་དམིགས་སོ། །དེ་ཅིའི་ཕྱིར་ཞེ་ན།་དེ་བཞིན་གཤེགས་པ་འཁོར་བར་འདོགས་ཀྱང་འདི་ལ་གང་ཡང་འཁོར་བ་མེད་དོ། །མྱ་ངན་ལས་འདས་པར་སྟོན་ཀྱང་འདི་ལ་གང་ཡང་ཡོངས་སུ་མྱ་ངན་ལས་མི་འདའོ། ། ཚངས་པ། གང་རྣམས་ཚུལ་འདི་ལ་ཞུགས་པ་དེ་དག་ནི་འཁོར་བའི་ཆོས་ཅན་ཡང་མ་ཡིན། ཡོངས་སུ་མྱ་ངན་ལས་འདའ་བའི་ཆོས་ཅན་ཡང་མ་ཡིན་ནོ། །དེ་ནས་འཁོར་དེའི་ནང་ནས་དགེ་སློང་ལྔ་བརྒྱ་བསྟན་པ་འདི་ཐོས་པ་དང ། སྟན་ལས་ལངས་ཏེ་དོང་ངོ ། །ཚིག་འདི་སྐད་ཅེས་ཀྱང་སྨྲས་ཏེ། གལ་ཏེ་འདི་ལ་གང་ཡང་མི་འཁོར། གལ་ཏེ་གང་ཡང་ཡོངས་སུ་མྱ་ངན་ལས་མི་འདའ་ན། བདག་ཅག་ཚངས་པར་སྤྱོད་པ་ལ་གནས་པའང་དོན་མེད་དོ། །བདག་ཅག་ལམ་སྒོམ་པ་དང ། བསམ་གཏན་དང ། ཏིང་ངེ་འཛིན་དང ། སྙོམས་ 51b བར་འཇུག་པའང་ཅི་དགོས་ཞེས་ཟེར་རོ། །དེ་ནས་བཅོམ་ལྡན་འདས་ལ་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་དག་ཆོས་གང་ལ་སྐྱེ་བའམ། འགག་པར་འཚལ་བ་དེ་དག་ལ་སངས་རྒྱས་འབྱུང་བ་མ་མཆིས་སོ། །བཅོམ་ལྡན་འདས། གང་དག་མྱ་ངན་ལས་འདས་པ་དངོས་པོར་འཚོལ་བ་དེ་དག་ལའང་འཁོར་བ་ལས་འདའ་བ་མ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། མྱ་ངན་ལས་འདས་པ་ཞེས་བགྱི་བ་ནི་གང་མཚན་མ་ཐམས་ཅད་རབ་ཏུ་ཞི་བ་དང ། གཡོ་བ་ཐམས་ཅད་མ་མཆིས་པར་གྱུར་པ་ལགས་ན། བཅོམ་ལྡན་འདས། སྐྱེས་བུ་བླུན་པོ་འདི་དག་ལེགས་པར་བཤད་པའི་ཆོས་འདུལ་བ་ལ་རབ་ཏུ་བྱུང་ནས་མུ་སྟེགས་ཅན་གྱི་ལྟ་བར་ལྷུང་སྟེ་མྱ་ངན་ལས་འདས་པ་དངོས་པོར་འཚོལ་ལོ། །འདི་ལྟ་སྟེ། བཅོམ་ལྡན་འདས། ཏིལ་ལས་ཏིལ་མར་དང ། འོ་མ་ལས་མར་བཞིན་དུ་ཆོས་ཐམས་ཅས་ཤིན་ཏུ་མྱ་ངན་ལས་འདས་པ་ལ་གང་རྣམས་མྱ་ངན་ལས་འདས་པ་ལ་དངོས་པོར་འཚོལ་བ་དེ་དག་ནི་ཉན་ཐོས་མུ་སྟེགས་ཅན་ང་རྒྱལ་ཅན་ཞེས་བདག་མཆིའོ། །བཅོམ་ལྡན་འདས། རྣལ་འབྱོར་སྤྱོད་པ་ཡང་དག་པར་ཞུགས་པའི་ཆོས་གང་ལའང་སྐྱེ་བའམ། འགག་པར་མི་མཐོང ། ཆོས་གང་ལའང་འཐོབ་པའམ། མཐོང་པར་རྟོགས་པར་མི་འཚལ་ལོ། །དེ་ནས་གཞོན་ནུར་གྱུར་པ་དྲ་བ་ཅན་ 52a ༄#། །གྱི་འོད་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་སྨྲས་སོ། །ཚངས་པ། དགེ་སློང་ལྔ་བརྒྱ་འཁོར་འདི་ནས་སྟན་ལས་ལངས་ཏེ་དོང་པ་འདི་དག་ཅི་ནས་ཀྱང་ཆོས་འདུལ་བ་ལ་འཇུག་པ་དང ། མོས་པར་འགྱུར་བ་དང ། སྡིག་པའི་ལྟ་བར་འགྱུར་བ་དེ་ལས་རྣམ་པར་གྲོལ་བར་སྟོན་ཅིག། སྨྲས་པ། རིགས་ཀྱི་བུ། འདོད་ལ་རག་གོ། འདོད་ལ་རག་གོ། གལ་ཏེ་སངས་རྒྱས་ཀྱི་ཞིང་གངྒཱའི་ཀླུང་གི་བྱེ་མ་སྙེད་དུ་དོང་ཡང་བསྟན་པ་འདི་ལས་མི་ཐར་ཏོ། །རིགས་ཀྱི་བུ། འདི་ལྟ་སྟེ། དཔེར་ན། སྐྱེས་བུ་བྱིས་པའི་རང་བཞིན་ཅན་ནམ་མཁས་འཇིགས་ཤིང་སྐྲག་སྟེ་བྲོས་ཀྱང་དེ་ག་ལས་གར་སོང་བ་དེ་དང ། དེ་དག་ཏུ་ནམ་མཁའ་མཐོང་ངོ ། །དེ་བཞིན་དུ་དགེ་སློང་འདི་དག་ཇི་སྲིད་དུ་རིང་དུ་སོང་ཡང་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པའི་མཚན་ཉིད་ལས་མ་འདས་སོ། །འདི་ལྟ་སྟེ། དཔེར་ན། སྐྱེས་བུ་གཞན་ཞིག་ནམ་མཁའ་རྙེད་པར་བྱའོ་ཞེས་ནམ་མཁའ་འཚོལ་ཏེ། ཕྱོགས་དང ། ཕྱོགས་མཚམས་སུ་རྒྱུག་ཅིང་ཇི་ཙམ་ནས་ནམ་མཁའི་མིང་ནས་བརྗོད་ཀྱང་ནམ་མཁའ་མི་རྙེད་དོ། །དེ་ནམ་མཁའ་དེ་ཉིད་ཀྱི་ནང་ནས་འགྲོའང་དེ་མི་མཐོང་ངོ ། །དེ་ཅིའི་ཕྱིར་ཞེ་ན། གང་ནམ་མཁའ་ཞེས་བྱ་བ་འདི་ནི་མིང་ཙམ་མོ། །རིགས་ཀྱི་བུ། དེ་བཞིན་དུ་དགེ་སློང་འདི་དག་ཀྱང་མྱ་ངན་ལས་འདས་ 52b པ་དངོས་པོར་འཚལ་ཏེ། མྱ་ངན་ལས་འདས་པ་དེ་ཉིད་ལ་རྣམ་པར་སྤྱོད་ཀྱང་དེ་མི་མཐོང་ཁོང་དུ་མི་ཆུད་དོ། །དེ་ཅིའི་ཕྱིར་ཞེ་ན། རིགས་ཀྱི་བུ། གང་མྱ་ངན་ལས་འདས་པ་ཞེས་བྱ་བ་དེ་ནི་མིང་ཙམ་མོ། །ཇི་ལྟར་ནམ་མཁའ་ནམ་མཁའ་ཞེས་བརྗོད་ཀྱང་གཟུང་དུ་མེད་པ་དེ་བཞིན་དུ་མྱ་ངན་ལས་འདས་པ་མྱ་ངན་ལས་འདས་པ་ཞེས་བརྗེད་པ་འདི་གཟུང་དུ་མེད་པའོ། །དེ་ནས་དགེ་སློང་ལྔ་བརྒྱ་པོ་དེ་དག་བཤད་པ་འདི་ཐོས་ནས་ཟག་པ་ལས་ལེན་པ་མེད་པར་སེམས་རྣམ་པར་གྲོལ་ཏེ། མངོན་པར་ཤེས་པ་ཐོབ་པ་དེ་དག་གིས་ཚིག་སྨྲས་པ། བཅོམ་ལྡན་འདས། གང་རྣམས་ཆོས་ཐམས་ཅད་ཤིན་ཏུ་ཡོངས་སུ་མྱ་ངན་ལས་འདས་པ་ལ་མྱ་ངན་ལས་འདས་པ་དངོས་པོར་ཚོལ་པ་དེ་དག་ལ་སངས་རྒྱས་འབྱུང་བ་མཆིས་སོ། །བཅོམ་ལྡན་འདས། བདག་ཅག་ནི་སོ་སོ་སྐྱེ་པོའང་མ་ལགས། སློབ་པའང་མ་ལགས། དགྲ་བཅོམ་པའང་མ་ལགས། འཁོར་བའི་ཆོས་ཅན་ཡང་མ་ལགས། མྱ་ངན་ལས་འདས་པའི་ཆོས་ཅན་ཡང་མ་ལགས་སོ། །དེ་ཅིའི་ཕྱིར་ཞེ་ན། བཅོམ་ལྡན་འདས། སངས་རྒྱས་འབྱུང་བ་ནི་བྱེད་པ་དང ། སེམས་དང ། གཡོ་བ་དང ། སྤྲོས་པ་ཐམས་ཅད་མ་མཆིས་པའོ། །དེ་ནས་ཚེ་དང་ལྡན་པ་ཤཱ་རིའི་བུས་དགེ་སློང་དེ་དག་ལ་འདི་སྐད་ཅེས་སྨྲས་སོ། །ཚེ་དང་ལྡན་པ་དག་གིས་དགེ་སྦྱོང་ཉིད་ཁོང་དུ་ཆུད་དོ། །རང་གི་དོན་བྱས་སོ། །དེ་ 53a ༄#། །དག་གིས་སྨྲས་པ། བཙུན་པ་ཤཱ་རིའི་བུ། བདག་ཅག་གིས་ཀུན་ནས་ཉོན་མོངས་པ་ཁོང་དུ་ཆུད་དོ། །མི་བྱ་བ་བྱས་སོ། །ཤཱ་རིའི་བུས་སྨྲས་པ། ཚེ་དང་ལྡན་པ་དག། ཇི་ལས་བསམས་ཏེ་དེ་སྐད་སྟོན། དེ་དག་གིས་སྨྲས་པ། བཙུན་པ་ཤཱ་རིའི་བུ། ཀུན་ནས་ཉོན་མོངས་པ་ཡོངས་སུ་ཤེས་པའི་ཕྱིར་དགེ་སྦྱོང་ཉིད་དོ། །བཙུན་པ་ཤཱ་རིའི་བུ། མི་བྱ་བ་ནི་མྱ་ངན་ལས་འདས་པ་ཡིན་ཏེ། འདི་ལ་བསམ་ནས་བདག་ཅག་གིས་ཀུན་ནས་ཉོན་མོངས་པ་ཁོང་དུ་ཆུད་དོ། །མི་བྱ་བ་བྱས་སོ་ཞེས་སྟོན་ཏོ། །ཤཱ་རིའི་བུས་སྨྲས་པ། ཚེ་དང་ལྡན་པ་རྣམས། ལེགས་སོ། །ལེགས་སོ། །ཚེ་དང་ལྡན་པ་རྣམས་ནི་སྦྱིན་གནས་ཀྱི་སར་གནས་པ་ཡིན་ནོ། །དེ་དག་གིས་སྨྲས་པ། བཙུན་པ་ཤཱ་རིའི་བུ། སྟོན་པ་གང་ཡིན་པ་འདི་ཉིད་ཀྱང་སྦྱིན་པ་མི་སྤྱོད་ན་བདག་ཅག་གིས་ཇི་ལྟར་སྦྱངས། སྨྲས་པ། ཅིའི་ཕྱིར་སྨྲས་པ། བཙུན་པ་ཤཱ་རིའི་བུས་དེ་བཞིན་གཤེགས་པས་ཆོས་ཀྱི་དབྱིངས་རང་བཞིན་གྱིས་ཡོངས་སུ་མཁྱེན་པའི་ཕྱིར་རོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན་གང་དག་སྦྱིན་གནས་ལགས། བཅོམ་ལྡན་འདས་ཀྱིས་བཀའ་སྩལ་པ། ཚངས་པ། གང་དག་འཇིག་རྟེན་གྱི་ཆོས་རྣམས་ཀྱིས་མི་འཕྲོགས་པ་རྣམས་སོ། །གསོལ་པ། འཇིག་རྟེན་ན་སྦྱིན་པ་སྤྱོད་པ་གང་དག་ལགས། 53b བཀའ་སྩལ་པ། གང་དག་ཆོས་གང་ཡང་ཡོངས་སུ་མི་འཛིན་པ་རྣམས་སོ། །གསོལ་པ། །འཇིག་རྟེན་ན་བསོད་ནམས་ཀྱི་ཞིང་གང་དག་ལགས། བཀའ་སྩལ་པ། གང་དག་བྱང་ཆུབ་ཀྱི་སེམས་ཆུད་མི་གཟོན་པ་རྣམས་སོ། །གསོལ་པ། དགེ་བའི་བཤེས་གཉེན་གང་ལགས། བཀའ་སྩལ་པ། གང་དག་གིས་སེམས་ཅན་ཐམས་ཅད་ལ་བྱམས་པ་ཡོངས་སུ་མ་བཏང་བ་རྣམས་སོ། །གསོལ་པ། དེ་བཞིན་གཤེགས་པ་ལ་བགྱིས་པ་གཟོ་བ་གང་དག་ལགས། བཀའ་སྩལ་པ། གང་དག་སངས་རྒྱས་ཀྱི་རིགས་མི་གཅོད་པ་རྣམས་སོ། །གསོལ་བ།་དེ་བཞིན་གཤེགས་པ་ལ་མཆོད་པ་བགྱིད་པ་གང་དག་ལགས། བཀའ་སྩལ་པ། གང་དག་མི་སྐྱེ་བའི་མཐའ་རྟོགས་པ་རྣམས་སོ། །གསོལ་པ། དེ་བཞིན་གཤེགས་པ་དང་ཉེ་བར་གནས་པ་གང་དག་ལགས། བཀའ་སྩལ་པ། གང་དག་སྲོག་གི་ཕྱིར་ཡང་བསླབ་པ་མི་འདྲལ་བ་རྣམས་སོ། །གསོལ་པ། དེ་བཞིན་གཤེགས་པ་ལ་རི་མོ་དང་བཅས་པ་གང་དག་ལགས། བཀའ་སྩལ་པ། གང་དབང་པོ་རབ་ཏུ་བསྡམས་ཏེ་གནས་པ་རྣམས་སོ། །གསོལ་པ། འཇིག་རྟེན་ན་ནོར་ཆེ་བ་གང་དག་ལགས། བཀའ་སྩལ་པ། གང་དག་ནོར་བདུན་དང་ལྡན་པ་རྣམས་སོ། །གསོལ་པ། འཇིག་རྟེན་ན་མཆོག་འཚལ་བ་གང་དག་ལགས། བཀའ་སྩལ་པ། འཇིག་རྟེན་ན་གང་དག་ལ་ཤེས་རབ་བླ་ན་མེད་པ་ཡོད་པ་རྣམས་སོ། ། 54a ༄#། །གསོལ་པ། རབ་ཏུ་དབེན་པ་གང་དག་ལགས། བཀའ་སྩལ་པ། གང་དག་ཁམས་གསུམ་དུ་སྨོན་པ་མེད་པ་རྣམས་སོ། །གསོལ་པ། འཇིག་རྟེན་ན་ཤིན་ཏུ་བསྡམས་པ་གང་དག་ལགས། བཀའ་སྩལ་པ། གང་ཀུན་ཏུ་སྦྱོར་བ་ཐམས་ཅད་ཤིན་ཏུ་བྱང་བ་རྣམས་སོ། །གསོལ་པ། འཇིག་རྟེན་ན་བདེ་བ་རྣམས་གང་དག་ལགས། བཀའ་སྩལ་པ། གང་རྣམས་ལ་ཡོངས་སུ་འཛིན་པ་མེད་པའོ། །གསོལ་པ། ཡོངས་སུ་མི་འཛིན་པ་གང་དག་ལགས། བཀའ་སྩལ་པ། གང་དག་གི་ཕུང་པོ་ཡོངས་སུ་ཤེས་པའོ། ། གསོལ་པ། ཕ་རོལ་ཏུ་མཆིས་པ་གང་དག་ལགས། བཀའ་སྩལ་པ། གང་གིས་སྐྱེ་མཆེད་དྲུག་སྤངས་པ་རྣམས་སོ། །གསོལ་པ། བཅོམ་ལྡན་འདས། འགྲམ་དུ་ཕྱིན་པ་རྣམས་གང་དག་ལགས། བཀའ་སྩལ་པ། ཚངས་པ། གང་གིས་མཉམ་པ་ཉིད་ཐོབ་པ་རྣམས་སོ། །གསོལ་པ། བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་རྣམས་ཀྱི་སྦྱིན་པ་རྒྱས་པ་ལགས། བཀའ་སྩལ་པ། ནམ་སེམས་ཅན་ཐམས་ཅད་ཐམས་ཅད་མཁྱེན་པའི་སེམས་ལ་མོས་པར་བྱེད་པའོ། །གསོལ་པ། ཇི་ལྟར་ན་ཚུལ་ཁྲིམས་དང་ལྡན་པ་རྣམས་ལགས། བཀའ་སྩལ་པ། ནམ་ཐམས་ཅད་མཁྱེན་པའི་སེམས་མི་འདོར་བའོ། །གསོལ་པ། ཇི་ལྟར་ན་བཟོད་པ་དང་ལྡན་པ་རྣམས་ལགས། བཀའ་སྩལ་པ། 54b ནམ་ཐམས་ཅད་མཁྱེན་པའི་སེམས་མི་ཟད་པར་མཐོང་བ་རྣམས་སོ། །གསོལ་པ། ཇི་ལྟར་ན་བརྩོན་འགྲུས་དང་ལྡན་པ་རྣམས་ལགས། བཀའ་སྩལ་པ། ནམ་ཐམས་ཅད་མཁྱེན་པའི་སེམས་ལ་བརྟགས་ནས་མི་དམིགས་པའོ། །གསོལ་པ། ཇི་ལྟར་ན་བསམ་གཏན་པ་རྣམས་ལགས། བཀའ་སྩལ་པ། ནམ་ཐམས་ཅད་མཁྱེན་པའི་སེམས་རང་བཞིན་གྱིས་ཞི་བར་རབ་ཏུ་རྟོགས་པའོ། །གསོལ་པ། ཇི་ལྟར་ན་ཤེས་རབ་དང་ལྡན་པ་རྣམས་ལགས། བཀའ་སྩལ་པ། ནམ་ཆོས་ཐམས་ཅད་ལ་སྤྲོས་པར་མི་བྱེད་པའོ། །གསོལ་པ། ཇི་ལྟར་ན་བྱམས་པ་ལ་གནས་པ་རྣམས་ལགས། བཀའ་སྩལ་པ། ནམ་སེམས་ཅན་དུ་འདུ་ཤེས་འཇུག་པར་མི་བྱེད་པའོ། །གསོལ་པ། ཇི་ལྟར་ན་སྙིང་རྗེ་ལ་གནས་པ་རྣམས་ལགས། བཀའ་སྩལ་པ། ནམ་ཆོས་ཐམས་ཅད་ལ་འདུ་ཤེས་འཇུག་པར་མི་བྱེད་པའོ། །གསོལ་པ། ཇི་ལྟར་ན་དགའ་བ་ལ་གནས་པ་རྣམས་ལགས། བཀའ་སྩལ་པ། ནམ་བདག་ཏུ་འདུ་ཤེས་འཇུག་པར་མི་བྱེད་དོ། །གསོལ་པ། ཇི་ལྟར་ན་བཏང་སྙོམས་ལ་གནས་པ་རྣམས་ལགས། བཀའ་སྩལ་པ། ནམ་བདག་དང ། གཞན་དུ་འདུ་ཤེས་འཇུག་པར་མི་བྱེད་པའོ། །གསོལ་པ།་ཇི་ལྟར་ན་དད་པ་ལ་གནས་པ་རྣམས་ལགས། བཀའ་སྩལ་པ། ནམ་ཆོས་ཐམས་ཅད་བརྗོད་དུ་མེད་པར་མོས་པའོ། །གསོལ་པ། ཇི་ལྟར་ན་ཐོས་པ་ལ་གནས་པ་རྣམས་ལགས། 55a ༄#། །བཀའ་སྩལ་པ། ནམ་སྒྲ་ཐམས་ཅད་ལ་མངོན་པར་མི་ཆགས་པའོ། །གསོལ་པ། ཇི་ལྟར་ན་ངོ་ཚ་འཚལ་བ་དང་ལྡན་པ་རྣམས་ལགས། བཀའ་སྩལ་པ།་ནང་ཡོངས་སུ་ཤེས་པས་སོ། །གསོལ་པ། ཇི་ལྟར་ན་ཁྲེལ་མཆིས་པ་ཕུན་སུམ་ཚོགས་པ་རྣམས་ལགས། བཀའ་སྩལ་པ། ཕྱི་རོལ་གྱི་སྐྱེ་མཆེད་འདོར་བས་སོ། །གསོལ་པ།་བཅོམ་ལྡན་འདས། བྱང་ཆུབ་སེམས་དཔའ་རྣམས་ཇི་ལྟར་ན་ཡོན་ཏན་ཐམས་ཅད་ཚོགས་ཤིན་ཀུན་ཏུ་འགྲོ་བ་རྣམས་ལགས། བཅོམ་ལྡན་འདས་ཀྱིས་བཀའ་སྩལ་པ། ལུས་དང ། ངག་དང ། ཡིད་ཀྱི་ལས་ཡོངས་སུ་དག་པས་སོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ལུས་ནི་རྣམ་པར་དག་ཅིང་སྡིག་པ་མི་བྱེད་དེ། །ངག་ཀྱང་རྣམ་པར་དག་པས་རྟག་ཏུ་རྫུན་རྣམས་སྤངས། །ཡིད་ཀྱང་གཙང་བས་རྟག་ཏུ་བསམ་པ་དྲི་མ་མེད། །དེ་ཕྱིར་དེ་ནི་རྒྱལ་པས་ཀུན་ཏུ་འགྲོ་བར་གསུང ། ། མི་སྡུག་སྒོམ་ཞིང་འདོད་ཆགས་ཀྱིས་ཀྱང་ཆགས་པ་མེད། །བྱམས་ལ་གནས་ཤིང་ཞེ་སྡང་གིས་ནི་གཏུམ་པ་མེད། །ཤེས་རབ་དག་ལ་གནས་ཤིང་གཏི་མུག་བླུན་མ་ཡིན། །མཁས་པ་རྣམས་ནི་དེ་ལ་ཀུན་ཏུ་འགྲོ་བར་གསུངས། །དེ་ནི་གྲོང་དུ་ཅི་བཞིན་དེ་བཞིན་སྒོམ་པ་ཡང ། །དགོན་པ་དང་ནི་གྲོང་དང་འཁོར་དུ་དེ་འདྲ་བར། །དེ་ནི་སྤྱོད་ལམ་རྣམ་པར་འགྱུར་བ་ 55b མ་བྱེད་དེ། །དེ་ཕྱིར་རྒྱལ་བས་དེ་ལ་ཀུན་ཏུ་འགྲོ་བར་བརྗོད། །རྒྱལ་བ་ཀུན་གྱི་ཆོས་ཉིད་ལ་ནི་དེ་མོས་ཏེ། །མཁས་པས་ཆོས་ཉིད་ལ་ཡང་འདོད་ཆགས་བྲལ་བ་དང ། །དགེ་འདུན་ལ་ཡང་འདུས་མ་བྱས་པར་ཤིན་ཏུ་མོས། །དེ་ཕྱིར་རྒྱལ་བ་རྣམས་ཀྱིས་ཀུན་ཏུ་འགྲོ་བར་གསུངས། །འདོད་ཆགས་མོས་པ་དག་གི་སྤྱོད་པ་རབ་ཏུ་ཤེས། །ཞེ་སྡང་མོས་པ་རྣམས་དང་དེ་བཞིན་གཏི་མུག་དང ། །སྤྱོད་པ་རྣམ་པར་འགྱུར་བ་ལ་ཡང་དེ་མཁས་ཏེ། །དེ་ཕྱིར་དེ་ནི་རྒྱལ་བས་ཀུན་ཏུ་འགྲོ་བར་བསྟན། །འདོད་པའི་ཁམས་ལ་ཤིན་ཏུ་གནས་པར་མི་བྱེད་དེ། །གཟུགས་ཀྱི་ཁམས་ལ་ཡང་ནི་གནས་པར་མི་འགྱུར་རོ། །དེ་ནི་གཟུགས་མེད་པ་ཡི་ཁམས་ལ་མི་གནས་ཏེ། །དེ་ཕྱིར་དེ་ནི་རྒྱལ་བས་ཀུན་ཏུ་འགྲོ་བར་བརྗོད། །རྟག་ཏུ་མཚན་མ་དང་ནི་སྨོན་པས་གསོག་གྱུར་དང ། །དངོས་པོ་ཐམས་ཅད་སྟོང་པ་ཉིད་དུ་དེ་མོས་ཏེ། །ཟག་པ་རྣམས་ནི་བར་དུ་ཟད་པར་མི་བྱེད་དེ། །དེ་ཕྱིར་དེ་ནི་རྒྱལ་བས་ཀུན་ཏུ་འགྲོ་བར་བསྟན། །དེ་ནི་རང་རྒྱལ་ཐེག་པ་ལ་ཡང་མཁས་པ་ཡིན། །སྒྲ་ཕྱིར་འབྲང་བ་ཉན་ཐོས་འགྱུར་བའང་དེ་ཡིས་ཤེས། །རྫོགས་པའི་སངས་རྒྱས་ཐེག་པའི་ཕ་རོལ་སོང་བ་ཡིན།། དེ་ཕྱིར་བདེ་བར་གཤེགས་པས་ཀུན་ཏུ་འགྲོ་བར་བརྗོད། །དེ་དག་རྟག་པར་ཀུན་ཏུ་བློ་གྲོས་དྲི་མ་མེད། །དེ་དག་ཚུལ་དང་ཚུལ་མ་ཡིན་ལ་མི་རྨོངས་ཏེ། །མཛའ་བ་དང་ནི་མི་ 56a ༄#། །མཛའ་བ་ལ་མཉམ་པའི་ཡིད། །དེ་ཕྱིར་བྱང་ཆུབ་སེམས་དཔའ་ཀུན་ཏུ་འགྲོ་བ་ཡིན། །འདས་པ་དག་གི་ཆོས་ལའང་རྣམ་པར་མི་རྟོག་ཅིང ། །མ་འོངས་པ་དང་ད་ལྟར་གྱི་ལའང་དེ་བཞིན་ཏེ། །ཐམས་ཅད་དུ་ཡང་དཔའ་པོ་རྣམ་པར་མི་རྟོག་སྤྱོད། །དེ་ཕྱིར་སེམས་ཅན་དག་པ་ཀུན་ཏུ་འགྲོ་བའོ།། །།བམ་པོ་གཉིས་པ། དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་འཇིག་རྟེན་གྱི་ཆོས་རྣམས་ལས་ཤིན་ཏུ་འདའ། འཇིག་རྟེན་གྱི་ཆོས་ཀྱི་ནང་ནའང་གདའ་ལ་འཇིག་རྟེན་གྱི་ཆོས་རྣམས་ཀྱིས་ཀྱང་མི་གོས། འཇིག་རྟེན་གྱི་ཆོས་ཀྱི་འཇུག་པའང་རབ་ཏུ་འཚལ་ལ་འཇིག་རྟེན་གྱི་ཆོས་ཀྱི་འཇུག་པར་ཡང་མི་མཆི། འཇིག་རྟེན་གྱི་ཆོས་ཀྱི་འཇུག་པས་ཀྱང་སེམས་ཅན་རྣམས་འཇིག་རྟེན་གྱི་ཆོས་ལས་ཡོངས་སུ་ཐར་བར་བགྱིད། འཇིག་རྟེན་གྱི་ཆོས་ཀྱི་མཉམ་པ་ཉིད་ཀྱང་ཐོབ་ལ་འཇིག་རྟེན་ནའང་རྣམ་པར་སྤྱོད་ཅིང་འཇིག་རྟེན་གྱི་ཆོས་རྣམས་ཀྱང་རྣམ་པར་འཇིག་པར་མི་འགྱིད་པ་ལགས། དེ་ནས་བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ་ཚིགས་སུ་བཅད་པ་དག་གིས་སླར་བཀའ་སྩལ་པ། འཇིག་རྟེན་ཕུང་པོར་ངས་བཤད་དེ། །འཇིག་རྟེན་དག་ནི་འདི་ 56b ལ་གནས། །འདི་ལ་གནས་པར་མ་བྱས་ན། །འཇིག་རྟེན་ཆོས་ལས་རྣམ་པར་གྲོལ། །བྱང་ཆུབ་སེམས་དཔའ་མཁས་པ་དེར། །འཇིག་རྟེན་རང་བཞིན་ཉིད་ཤེས་ནས། །ཕུང་པོ་རྣམས་དང་རབ་ལྡན་ཡང ། །འཇིག་རྟེན་ཆོས་དང་ལྡན་པ་ཡི། །རྙེད་པ་དང་ནི་མ་རྙེད་དང ། །དེ་བཞིན་གྲགས་དང་མ་གྲགས་དང ། །བསྟོད་སྨད་བདེ་དང་སྡུག་བསྔལ་དང ། །དེ་དག་གིས་ནི་འཇིག་རྟེན་སྐྱོང ། །ཤེས་རབ་ཆེན་པོ་བརྟེན་དེ་རྣམས། །འཇིག་རྟེན་ཆོས་རྣམས་རབ་རྟོགས་ཤིང ། །འཇིག་རྟེན་འཇིག་པ་མཐོང་ནས་ནི། །འདི་དག་ལ་ཡང་གཡོ་མི་འགྱུར། ། རྙེད་པས་ཐོས་པར་མི་སེམས་ཏེ། །མ་རྙེད་པས་ཀྱང་ངོམས་པ་མེད། །རི་རབ་བཞིན་དུ་མཐུ་བརྟན་པ། །རྣམ་པ་ཀུན་ཏུ་གནོད་མི་འགྱུར། །དེ་བཞིན་གྲགས་དང་མ་གྲགས་ཀྱང ། ། རྟག་ཏུ་མཚུངས་པར་འགྱུར་བ་ཡིན། །བདེ་དང་སྡུག་བསྔལ་བསྟོད་སྨད་ལ། །མཉམ་པ་ཉིད་དུ་གནས་པར་འགྱུར། །འཇིག་རྟེན་འདི་ནི་གཉིས་ལས་བྱུང ། །ཕྱིན་ཅི་ལོག་ལས་ཀུན་ཏུ་ལངས། །དེ་ཕྱིར་འཇིག་རྟེན་འགྲོ་རྟོགས་ནས། །མཁས་པ་རྣམས་ནི་འགྲོ་མེད་འགྲོ། འཇིག་རྟེན་འདི་འགྲོ་གང་ཡིན་པ། །འགྲོ་བ་དེ་ནི་དེ་དག་ཤེས། །དེ་ཕྱིར་འཇིག་རྟེན་འགྲོར་ཞུགས་ནས། །མི་བདེ་བ་ལས་སྐྱེ་བོ་འགྲོལ། །དཔའ་བོ་དེ་དག་འཇིག་རྟེན་སྤྱོད། །པདྨ་བཞིན་དུ་ཆགས་པ་མེད། །ཆོས་ཀྱི་དབྱིངས་ལ་རབ་གནས་ནས། །འཇིག་རྟེན་དག་ཀྱང་འཇིག་མི་བྱེད།། 57a ༄#། །འཇིག་རྟེན་ཆོས་ཉིད་མི་ཤེས་པར། །འཇིག་རྟེན་གང་ལ་སྤྱོད་པ་ཡང ། །འཇིག་རྟེན་མཚན་ཉིད་ཤེས་ནས་ནི། །མཁས་པ་དེ་དག་ཉིད་ན་སྤྱོད། །འཇིག་རྟེན་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །དེ་དག་དེ་ཡི་འགྲོ་རིག་ནས། །འཇིག་རྟེན་ཆོས་ཀྱིས་གོས་པ་མེད། །ཇི་ལྟར་འཇིག་རྟེན་རབ་ཤེས་པ།། དེ་བཞིན་སྲོག་ཆགས་རྣམས་ལ་སྨྲ། །ཆོས་ཀྱི་རང་བཞིན་ཤེས་ནས་ནི། །འཇིག་རྟེན་དག་ཀྱང་འཇིག་མི་བྱེད། །ཕུང་པོ་རྣམས་ལ་རང་བཞིན་མེད། །འདི་ནི་འཇིག་རྟེན་ཆོས་ཉིད་དོ། །གང་རྣམས་དེ་ལྟར་མི་ཤེས་པ། །དེ་དག་རྟག་ཏུ་འཇིག་རྟེན་གནས། །མ་སྐྱེས་པ་དང་མ་བྱུང་བར། །གང་གི་ཕུང་པོ་ཀུན་ཤེས་པ། །དེ་དག་འཇིག་རྟེན་སྤྱོད་འགྱུར་ཡང་།། འཇིག་རྟེན་འདི་ལའང་མི་གནས་སོ། །འཇིག་རྟེན་ཆོས་རྣམས་མི་ཤེས་ཤིང ། །འདུ་ཤེས་གཉིས་ལ་གང་གནས་པ། །འདི་བདེན་འདི་ནི་རྫུན་ནོ་ཞེས། །མི་མཁས་དེ་དག་རྩོད་པར་འགྱུར། །འདི་ལྟར་འཇིག་རྟེན་ཆོས་རྣམས་ཀྱི། །ཡང་དག་ཆོས་ཉིད་ངས་ཤེས་པས། །ང་ནི་འཇིག་རྟེན་རྣམས་དང་ཡང ། །ནམ་ཡང་རྩོད་པར་མི་བྱེད་དོ། །རྩོད་པ་མེད་པའི་ཆོས་འདི་ནི། །སངས་རྒྱས་ཀུན་གྱིས་བཤད་པ་སྟེ། །འཇིག་རྟེན་མཉམ་པ་ཉིད་ཤེས་ན། །འདི་ལ་བདེན་པའམ་རྫུན་པ་མེད། །རྫུན་པའམ་ཡང་ན་བདེན་པ་ཞིག། 57b བསྟན་པ་ལ་ནི་རྙེད་གྱུར་ན། །མཐར་འཛིན་པར་ནི་ང་འགྱུར་ཏེ། །མུ་སྟེགས་ཅན་དང་ཁྱད་པར་མེད། །གང་ཕྱིར་ཆོས་རྣམས་ཡང་དག་མིན། །བདེན་པ་དང་ནི་རྫུན་པ་མེད། །དེ་ཕྱིར་འཇིག་རྟེན་འདས་པའི་ཆོས། །ངས་འདི་གཉིས་སུ་མེད་པར་བཤད། །འཇིག་རྟེན་ཆོས་ཉིད་ཇི་ལྟ་བར། །གང་གི་འཇིག་རྟེན་འདི་ཤེས་པ། །མཁས་པ་དེ་དག་བདེན་པའམ། །རྫུན་པའི་ལྟ་བའང་མི་འཛིན་ཏོ། །ནམ་མཁའ་ལྟ་བུར་རྣམ་དག་པར། །གང་གི་འཇིག་རྟེན་འདི་ཤེས་པ། །གྲགས་པ་ཆེན་པོའི་འཇིག་རྟེན་གྱི། །སྣང་བ་ལྟ་བུར་གྱུར་པ་ཡིན། །ང་ཉིད་ཀྱིས་ནི་མཐོང་བ་ལྟར། །དེ་ལྟར་གང་གིས་འཇིག་རྟེན་མཐོང ། །ཕྱོགས་དང་ཕྱོགས་མཚམས་གང་བཞུགས་པ། །རྫོགས་པའི་སངས་རྒྱས་དེ་དག་གཟིགས། །ཆོས་རྣམས་ངོ་བོ་ཉིད་མེད་པར། །བརྟེན་པའི་ཆོས་རྣམས་རབ་ཏུ་ཤེས། །གང་རྣམས་བརྟེན་པ་ཤེས་པ་ནི། །དེ་དག་ཆོས་ཉིད་ཤེས་པ་ཡིན། གང་རྣམས་ཆོས་ཉིད་རབ་ཤེས་པ། །དེ་དག་སྟོང་པ་ཉིད་དེ་ཤེས། །གང་རྣམས་སྟོང་ཉིད་རབ་ཤེས་པ། །དེ་ཡི་འདྲེན་པ་དེ་རྣམས་མཐོང ། །གང་རྣམས་འཇིག་རྟེན་བསྟན་པ་འདི། །རྣ་ལམ་གྲགས་པར་འགྱུར་བ་ནི། །དེ་དག་འཇིག་རྟེན་སྤྱོད་མོད་ཀྱི། །འཇིག་རྟེན་འདི་ལ་གནས་མ་ཡིན། །ལྟ་ལ་གནས་པ་གང་སུ་དག་།གཞན་གྱི་ས་ནི་འདི་མ་ཡིན། །འཇིག་རྟེན་དུ་ནི་སྤྱོད་བྱེད་ཀྱང ། །འཇིག་རྟེན་འདི་ 58a ༄#། །ལ་གནས་པ་མེད། །སངས་རྒྱས་མྱ་ངན་འདས་ནས་ཀྱང ། །གང་རྣམས་བཟོད་པ་འདིར་མོས་པ། །དེ་བཞིན་གཤེགས་པ་ཆོས་ཀྱི་སྐུ། །རྫོགས་པའི་སངས་རྒྱས་དེ་ལ་བཞུགས། །གང་གིས་ཚུལ་འདི་ཤེས་པ་ནི། །དེས་ནི་ང་ཡི་ཆོས་བཟུང་སྟེ། །དེ་ཡིས་ང་ལ་རྟག་ཏུ་མཆོད། །དེ་དག་འཇིག་རྟེན་སྟོན་པའོ། །གང་ཞིག་འཇིག་རྟེན་བསྟན་པ་འདི། །རྣ་ལམ་གྲགས་པར་གྱུར་པ་ནི། །སྡིག་ཅན་བདུད་ཀྱིས་དེ་དག་ལ། །གླགས་ཀྱང་རྙེད་པར་མི་འགྱུར་རོ། །གང་གིས་རྣམ་པ་འདི་ཤེས་པ། །དེ་དག་ཕྱུག་ཅིང་ལོངས་སྤྱོད་ཆེ། །དེ་དག་སྦྱིན་ལ་རྟག་པར་དགའ། །དེ་དག་ཚུལ་ཁྲིམས་ཕུན་སུམ་ཚོགས། །གང་གི་འཇིག་རྟེན་འདི་ཤེས་པ། །དེ་དག་བཟོད་པའི་སྟོབས་ལྡན་པ། །དེ་དག་བརྩོན་འགྲུས་རྟོགས་པར་རིགས། །མཁས་པ་དེ་དག་བསམ་གཏན་དགའ། །གང་གིས་རྣམ་པ་འདི་ཤེས་པ། །དེ་དག་ཏིང་འཛིན་ཕུན་སུམ་ཚོགས། །དེ་དག་ཉེ་བར་ཞི་ལ་དགའ། །བརྟན་པ་དེ་དག་ཤེས་རབ་འཕགས། །གང་ན་འདི་འདྲ་གྲགས་པ་ཡི། །ཕྱོགས་དེ་སངས་རྒྱས་སྟོང་མ་ཡིན། །སེམས་དཔའ་ཆེན་པོ་རིང་མི་ཐོགས། །བྱང་ཆུབ་སྙིང་པོར་འགྲོ་བར་འགྱུར། །གང་རྣམས་འཇིག་རྟེན་བསྟན་པ་འདི། །རྣ་ལམ་གྲགས་པར་འགྱུར་བ་དག། གཡོན་ཅན་བདུད་རྣམས་བཅོམ་ནས་ནི། །བྱང་ཆུབ་མཆོག་ཏུ་རྫོགས་འཚང་རྒྱ། །དེ་ནས་བཅོམ་ལྡན་འདས་ཀྱིས་ 58b ཚངས་པ་ཁྱད་པར་སེམས་ལ་འདི་སྐད་ཅེས་བཀའ་སྩལ་ཏོ། །ཚངས་པ། དེ་བཞིན་གཤེགས་པ་འཇིག་རྟེན་གྱི་ཡུལ་ལས་འདས་པས་འཇིག་རྟེན་དང ། འཇིག་རྟེན་ཀུན་འབྱུང་བ་དང ། ། འཇིག་རྟེན་འགོག་པ་དང ། འཇིག་རྟེན་འགོག་པར་འགྲོ་བའི་ལམ་དུའང་འདོགས་སོ། །ཚངས་པ། །དེ་ལ་འཇིག་རྟེན་ཞེས་བྱ་བ་ནི་ཕུང་པོ་ལྔ་རྣམས་སོ། །གང་དེ་ལ་ཆགས་པ་དེ་ནི་འཇིག་རྟེན་ཀུན་འབྱུང་བའོ། །གང་ཕུང་པོ་རྣམས་ཀྱི་ཟད་པ་དང ། འགག་པ་དེ་ནི་འཇིག་རྟེན་འགག་པའོ། །གང་ཕུང་པོ་རྣམས་འཚོལ་བ་དང ། མི་འཚོལ་བ་གཉིས་སུ་མེད་པ་དེ་ནི་ལམ་མོ། །གཞན་ཡང ། ཚངས་པ། ཕུང་པོ་རྣམས་ཕུང་པོ་རྣམས་ཞེས་ཐ་དད་དུ་འདོགས་པ་ལ་གང་སྨྲ་བ་དང ། སྨྲ་བར་ལྟ་བ་འདི་ནི་འཇིག་རྟེན་ནོ། །གང་ལྟ་བ་དེའི་རྗེས་སུ་འབྲང་བ་འདི་ནི་འཇིག་རྟེན་ཀུན་འབྱུང་བའོ། །གང་ལྟ་བ་དེ་ཇི་ལྟ་བ་བཞིན་དུ་མཚན་ཉིད་འགག་པ་དེ་ནི་འཇིག་རྟེན་འགག་པ་ཞེས་བྱའོ། །ལམ་གང་གིས་ལྟ་བ་དེ་དག་མི་འཛིན་པ་དེ་ནི་འཇིག་རྟེན་འགོག་པར་འགྲོ་བའི་ལམ་སྟེ། ཚངས་པ། ངས་འདི་ལ་བསམ་ནས་ང་ནི་ལུས་འདོམ་གང་བ་འདི་ལ་འཇིག་རྟེན་དང ། འཇིག་རྟེན་ཀུན་འབྱུང་བ་དང ། འཇིག་རྟེན་འགག་པ་དང ། འཇིག་རྟེན་འགག་པར་འགྲོ་བའི་ལམ་དུ་འདོགས་སོ་ཞེས་ཚིག་དེ་སྐད་བཤད་དོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ 59a ༄#། །ལྡན་འདས། དེ་བཞིན་གཤེགས་པས་གང་འདི་འཕགས་པའི་བདེན་པ་བཞི་བསྟན་ན། བཅོམ་ལྡན་འདས། འཕགས་པ་རྣམས་ཀྱི་བདེན་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཚངས་པ། འདི་ནི་སྡུག་བསྔལ་བའོ་ཞེས་བྱ་བ་དེ་ནི་འཕགས་པ་རྣམས་ཀྱི་བདེན་པ་མ་ཡིན་ནོ། །ཚངས་པ། འདི་ནི་སྡུག་བསྔལ་ཀུན་འབྱུང་བའོ། །འདི་ནི་སྡུག་བསྔལ་འགོག་པའོ། །འདི་ནི་སྡུག་བསྔལ་འགོག་པར་འགོར་བའི་ལམ་མོ་ཞེས་བྱ་བ་དེ་ནི་འཕགས་པ་རྣམས་ཀྱི་བདེན་པ་མ་ཡིན་ནོ། །དེ་ཅིའི་ཕྱིར་ཞེ་ན། ཚངས་པ། འདི་ནི་སྡུག་བསྔལ་བའོ་ཞེས་བྱ་བ་ཅི་སྟེ་འཕགས་པ་རྣམས་ཀྱི་བདེན་པ་ཡིན་དུ་ཟིན་ན། དེ་ནི་བྱོལ་སོང་བ་ལང་དང ། བོང་བུ་དང ། སེམས་ཅན་དམྱལ་བ་པ་ཐམས་ཅད་ཀྱིའང་འཕགས་པའི་བདེན་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་སྡུག་བསྔལ་བའི་ཚོར་བ་རྣམས་མྱོང་ངོ ། །ཚངས་པ། འདི་ནི་སྡུག་བསྔལ་ཀུན་འབྱུང་བ་ཞེས་བྱ་བ་དེ་ཇི་སྟེ་འཕགས་པ་རྣམས་ཀྱི་བདེན་པ་ཡིན་དུ་ཟིན་ན། དེ་ནི་གང་འགྲོ་བ་རྣམས་སུ་འབྱུང་བའི་འགྲོ་བ་ཐམས་ཅད་དུ་སྐྱེས་པའི་སེམས་ཅན་རྣམས་ཀྱིའང་འཕགས་པའི་བདེན་པར་འགྱུར་རོ། །འདི་ནི་འགོག་པའོ་ཞེས་བྱ་བ་དེ་ཅི་སྟེ་འཕགས་པའི་བདེན་པ་ཡིན་དུ་ཟིན་ན། དེ་ནི་གང་རྣམས་དངོས་པོ་བཤིགས་པས་མྱ་ངན་ལས་འདས་པ་འཚོལ་བ་དང ། 59b འགོག་པར་ལྟ་བར་ལྟུང་བ། ཆད་པར་སྨྲ་བ་ཐམས་ཅད་ལའང་འཕགས་པའི་བདེན་པར་འགྱུར་རོ། །འདི་ནི་ལམ་མོ་ཞེས་བྱ་བ་དེ་ཅི་སྟེ་འཕགས་པ་རྣམས་ཀྱི་བདེན་པ་ཡིན་དུ་ཟིན་ན། འདི་ནི་འདུས་བྱས་ཀྱི་འདུས་བྱས་ལས་འབྱུང་བར་འཚོལ་བ་འདུས་བྱས་ལམ་དུ་དམིགས་པ་ཐམས་ཅད་ལའང་འཕགས་པའི་བདེན་པར་འགྱུར་ཏེ། དེ་བས་ན། ཚངས་པ། རྣམ་གྲངས་འདི་ཇི་ལྟར་སྡུག་བསྔལ་བ་དང ། ཀུན་འབྱུང་བ་དང ། འགོག་པ་དང ། ལམ་རྣམས་འཕགས་པ་རྣམས་ཀྱི་བདེན་པ་མ་ཡིན་པར་ཁྱོད་ཀྱིས་རིག་པར་བྱའོ། །དེ་ལྟ་མོད་ཀྱི། ཚངས་པ། གང་སྡུག་བསྔལ་མི་སྐྱེ་བ་དེ་ནི་འཕགས་པ་རྣམས་ཀྱིས་བདེན་པའོ། །གང་ཀུན་འབྱུང་བ་ལ་མི་འཇུག་པ་འདི་ནི་འཕགས་པ་རྣམས་ཀྱི་བདེན་པའོ། །གང་ཆོས་ཐམས་ཅད་ཤིན་ཏུ་འགག་པ་ལ་མི་སྐྱེ་མི་འགོག་པ་འདི་ནི་འཕགས་པ་རྣམས་ཀྱི་བདེན་པའོ། །གང་ཆོས་ཐམས་ཅད་ལ་མཉམ་པ་ཉིད་དང་གཉིས་སུ་མེད་པའི་ལམ་སྒོམ་པ་འདི་ནི་འཕགས་པ་རྣམས་ཀྱི་བདེན་པའོ། །ཚངས་པ། གང་བདེན་པ་བདེན་པ་ཞེས་བྱ་བ་ནི་གང་བདེན་པའང་མ་ཡིན། རྫུན་པའང་མ་ཡིན་པའོ། །རྫུན་པ་གང་ཞེ་ན། བདག་ཏུ་འཛིན་པ་དང ། སེམས་ཅན་དུ་འཛིན་པ་དང ། སྲོག་ཏུ་འཛིན་པ་དང ། གང་ཟག་ཏུ་འཛིན་པ་དང ། ཆད་པར་འཛིན་པ་དང ། རྟག་པར་འཛིན་པ་དང ། འབྱུང་བར་འཛིན་པ་དང ། འཇིག་པར་འཛིན་པ་དང ། སྐྱེ་བར་འཛིན་པ་ 60a ༄#། །དང ། འགག་པར་འཛིན་པ་དང ། འཁོར་བར་འཛིན་པ་དང ། མྱ་ངན་ལས་འདས་པར་འཛིན་པ་དེ་ནི་རྫུན་པ་ཞེས་བྱའོ། །གང་འཛིན་པ་འདི་དག་ལ་མི་འཛིན་ཅིང་མཆོག་ཏུ་མི་སྙེམས་པ་འདི་ནི་བདེན་པ་ཞེས་བྱའོ། །སྡུག་བསྔལ་ཡོངས་སུ་ཤེས་པ་ཞེས་བྱ་བ་ནི་རྫུན་ནོ། །ཀུན་འབྱུང་བ་རབ་ཏུ་སྤོང་ངོ་ཞེས་བྱ་བ་ནི་རྫུན་ནོ། །འགོག་པ་མངོན་དུ་བྱའོ་ཞེས་བྱ་བ་ནི་རྫུན་ནོ། །ལམ་སྒོམ་མོ་ཞེས་བྱ་བ་ནི་རྫུན་ནོ། །དེ་ཅིའི་ཕྱིར་ཞེ་ན། དེ་དག་ནི་སངས་རྒྱས་ཀྱིས་བཀའ་སྩལ་པའི་དྲན་པ་ལས་ཉམས་པ་ཡིན་ཏེ། དེའི་ཕྱིར་རྫུན་པ་ཞེས་བྱའོ། །སངས་རྒྱས་ཀྱིས་བཀའ་སྩལ་པའི་དྲན་པ་ཞེས་བྱ་བ་གང་ཞེ་ན། གང་ཆོས་ཐམས་ཅད་ལ་མི་དྲན་ཞིང་ཡིད་ལ་མི་བྱེད་པ་འདི་ནི་སངས་རྒྱས་ཀྱིས་བཀའ་སྩལ་པའི་དྲན་པ་ཞེས་བྱ་སྟེ། གང་དྲན་པ་དེ་ལ་གནས་པ་དེ་ནི་མཚན་མ་ཐམས་ཅད་ལ་མི་གནས་པའོ། །གང་མཚན་མ་ཐམས་ཅད་ལ་མི་གནས་པ་དེ་ནི་ཡང་དག་པའི་མཐའ་ལ་གནས་པའོ། ། གང་ཡང་དག་པའི་མཐའ་ལ་གནས་པ་དེ་ནི་ཡིད་མི་གནས་པའོ། །གང་མི་གནས་པ་དེ་ནི་བདེན་པར་སྨྲ་པའང་མ་ཡིན། རྫུན་པར་སྨྲ་པའང་མ་ཡིན་ཏེ། དེའི་ཕྱིར། ཚངས་པ། རྣམ་གྲངས་འདིས་གང་ལ་བདེན་པའང་མེད། རྫུན་པའང་མེད་པ་དེ་ནི། འཕགས་པ་རྣམས་ཀྱི་བདེན་པ་ཡིན་པར་རིག་པར་བྱའོ། །ཚངས་པ། བདེན་པ་ཞེས་བྱ་བ་དེ་ནི་ནམ་ 60b ཡང་མི་བདེན་པ་མ་ཡིན་ཏེ། དེ་བཞིན་གཤེགས་པ་རྣམས་སྐྱེས་ཀྱང་རུང ། མ་སྐྱེས་ཀྱང་རུང་ཆོས་ཀྱི་དབྱིངས་འདི་ནི་གནས་པའོ། །དེ་བཞིན་དུ་འཁོར་བ་དང ། དེ་བཞིན་དུ་མྱ་ངན་ལས་འདས་པའང་རྟག་ཏུ་རྒྱུན་མི་ཆད་པར་འཕགས་པ་རྣམས་ཀྱི་བདེན་པའོ། །དེ་ཅིའི་ཕྱིར་ཞེ་ན། ཚངས་པ། འཁོར་བ་སྤང་བའི་ཕྱིར་འཕགས་པ་རྣམས་ཀྱི་བདེན་པ་མ་ཡིན། མྱ་ངན་ལས་འདས་པ་ཐོབ་བར་བྱ་བའི་ཕྱིར་ཡང་འཕགས་པ་རྣམས་ཀྱི་བདེན་པ་མ་ཡིན་ཏེ། ཚངས་པ། གང་དག་གིས་འཕགས་པའི་བདེན་པ་བཞི་པོ་འདི་རྣམས་དེ་ལྟར་མངོན་པར་རྟོགས་པ་མངོན་དུ་བྱས་པ་དེ་དག་ནི་བདེན་པར་སྨྲ་བ་ཡིན་ནོ། །ཡང ། ཚངས་པ། མ་འོངས་པའི་དུས་ན་དགེ་སློང་ལུས་མ་བསྒོམས་པ། སེམས་མ་བསྒོམས་པ། ཚུལ་ཁྲིམས་མ་བསྒོམས་པ། ཤེས་རབ་མ་བསྒོམས་པ་ཁ་ཅིག་འབྱུང་སྟེ། དེ་དག་ནི་སྡུག་བསྔལ་སྐྱེ་བ་ལ་སྡུག་བསྔལ་འཕགས་པའི་བདེན་པ་ཞེས་སྨྲ་བར་འགྱུར་རོ། །ཀུན་འབྱུང་བའི་ཕྱིར་ཀུན་འབྱུང་བ་འཕགས་པའི་བདེན་པ་ཞེས་སྨྲ་བར་འགྱུར་རོ། །དངོས་པོ་འཇིག་པའི་ཕྱིར་འགོག་པའི་འཕགས་པའི་བདེན་པ་ཞེས་སྨྲ་བར་འགྱུར་རོ། །ལམ་གྱིས་འབྱུང་བའི་ཕྱིར་ལམ་འཕགས་པའི་བདེན་པ་གཉིས་སུ་སྨྲ་བར་འགྱུར་ཏེ། སྐྱེས་བུ་བླུན་པོ་དེ་དག་ནི་ཉན་ཐོས་མུ་སྟེགས་ཅན་ཞེས་ངས་བཤད་དོ། །གང་རྣམས་དངོས་པོ་འཇིག་པས་འགོག་པ་འཕགས་པའི་བདེན་པའོ་ཞེས་སྨྲ་ 61a ༄#། །བར་འགྱུར་བ་དེ་དག་ནི་ལམ་ལོག་པར་ཞུགས་པ་ཡིན་ཏེ། ང་ཡང་དེ་དག་གི་སྟོན་པ་མ་ཡིན་།དེ་དག་ཀྱང་ངའི་ཉན་ཐོས་མ་ཡིན་ནོ། །ཚངས་པ། ལྟོས་ཤིག། ང་བྱང་ཆུབ་ཀྱི་སྙིང་པོར་འདུག་ནས་བདེན་པའམ། རྫུན་པ་ཞེས་བྱ་བ་ཁོང་དུ་མ་ཆུད་དོ། །ཆོས་གང་ངས་ཁོང་དུ་མ་ཆུད་པའི་ཆོས་དེ་བཞིན་གཤེགས་པ་གཞན་ལ་སྟོན་པར་མཛད་དམ། འཆད་པར་མཛད་དམ། གསོལ་པ། བཅོམ་ལྡན་འདས། དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་བཞིན་གཤེགས་པ་རྣམས་ཀྱིས་བྱང་ཆུབ་ནི་མི་དམིགས་པ་སྟེ། མ་ཟིན་པ་སྲིད་པའི་འགྲོ་བ་ཐམས་ཅད་དང་བྲལ་བའོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་སྟེ་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་ཞུགས་ནས་ཆོས་གང་ཡང་མི་དམིགས་ན། ཅི་མངོན་པར་བརྟགས་པས་དེ་བཞིན་གཤེགས་པ་བྱང་ཆུབ་བརྙེས་ཤིང་ཡང་དག་པར་རྫོགས་པར་སངས་རྒྱས་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། ཚངས་པ། འདི་ཅི་སྙམ་དུ་སེམས། གང་ངས་འདུས་བྱས་སམ། འདུས་མ་བྱས་ཀྱི་ཆོས་བཤད་པ་འདི་དག་དེ་བཞིན་ནམ། དེ་ལྟ་མ་ཡིན། གསོལ་པ། བཅོམ་ལྡན་འདས། མ་མཆིས་པ་ལགས་སོ། །བདེ་བར་གཤེགས་པ། མ་མཆིས་པ་ལགས་ 61b སོ། །བཅོམ་ལྡན་འདས་ཀྱིས་བཀའ་སྩལ་པ། ཚངས་པ། ཆོས་གང་རྣམས་མེད་པ་དེ་དག་ཡོད་དམ། འོན་ཏེ་མེད། གསོལ་པ། བཅོམ་ལྡན་འདས། གང་མ་མཆིས་པ་དེ་ནི་མཆིས་པ་འམ། མ་མཆིས་པ་ཞེས་མི་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཆོས་གང་ཡང་ཡོད་པའང་མ་ཡིན། མེད་པའང་མ་ཡིན་པ་དེ་ལ་མངོན་པར་རྫོགས་པར་བྱང་ཆུབ་པ་གང་ཡང་ཡོད་དམ། གསོལ་པ། བཅོམ་ལྡན་འདས། དེ་ལ་མངོན་པར་རྫོགས་པར་བྱང་ཆུབ་པ་གང་ཡང་མ་མཆིས་སོ། །བཅོམ་ལྡན་འདས་ཀྱིས་བཀའ་སྩལ་པ། ཚངས་པ། དེ་ལྟར་དེ་བཞིན་གཤེགས་པ་བྱང་ཆུབ་ཀྱི་སྙིང་པོ་ལ་ཞུགས་ནས་མེད་པ་ཕྱིན་ཅི་ལོག་ལས་བྱུང་བའི་ཀུན་ནས་ཉོན་མོངས་པ་ཤིན་ཏུ་རང་བཞིན་གྱིས་མི་སྐྱེ་བའི་ངོ་བོ་ཉིད་དུ་མཁྱེན་ཏེ། ཇི་ལྟར་ཤིན་ཏུ་མི་མཁྱེན་པའང་ཤིན་ཏུ་རྣམ་པར་མི་རིག་པ་དེ་ལྟར་མཁྱེན་ཏོ། །དེ་ཅིའི་ཕྱིར་ཞེ་ན། ཚངས་པ། ངས་འདི་ལྟར་ཆོས་གང་ཡང་མངོན་པར་སངས་རྒྱས་པ་དེ་ནི་མ་མཐོང ། །མ་ཐོས། མི་དྲན། མ་རྟོགས། རྣམ་པར་མི་རིག་ཅིང ། གཟུང་བའང་མེད། སྦྱར་བའང་མེད། བརྗོད་དུའང་མེད། རྗེས་སུ་སྦྱོར་བའང་མེད། ཡུལ་ཐམས་ཅད་ལས་འདས་པ། སྨྲར་མེད་པ། རབ་ཏུ་སྨྲར་མེད་པ། དཔྱོད་པ་མེད་པ། རྟོགས་པར་མི་རུང་བ། ཡི་གེ་མེད་པ། ཚིག་གི་ལམ་མེད་པ། རྣམ་པར་རིག་པ་མེད་པ་ཡིན་ཏེ། ཚངས་པ། དེ་ལྟར་ཆོས་གང་ནམ་མཁའ་དང་ 62a ༄#། །འདྲ་བའི་ཆོས་དེ་མངོན་པར་རྟོགས་པར་འདོད་དམ། གསོལ་པ། བཅོམ་ལྡན་འདས། དེ་མ་ལགས་སོ། །བཅོམ་ལྡན་འདས། སངས་རྒྱས་བཅོམ་ལྡན་འདས་རྣམས་ཀྱིས་ཐུགས་རྗེ་ཆེན་པོ་བསམ་གྱིས་མི་ཁྱབ་པའི་ཆོས་དང་ལྡན་ཏེ། དེ་ལྟར་རབ་ཏུ་ཞི་བའི་ཆོས་མངོན་པར་སངས་རྒྱས་ནས་ཡི་གེ་དང ། ངེས་པའི་ཚིག་གིས་གཞན་དག་ལ་གོ་བར་མཛད་པ་ངོ་མཚར་ཏོ། །བཅོམ་ལྡན་འདས། གང་དེ་བཞིན་གཤེགས་པས་བསྟན་པའི་ཆོས་ལ་མངོན་པར་དད་པའི་སེམས་ཅན་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་འདི་ནི་འཇིག་རྟེན་ཐམས་ཅད་དང་མི་མཐུན་པའོ། །བཀའ་སྩལ་པ། ཚངས་པ། ཇི་ལྟར་འཇིག་རྟེན་ཐམས་ཅད་དང་མི་མཐུན་པ་ཡིན། གསོལ་པ། བཅོམ་ལྡན་འདས། ཇི་ལྟར་འཇིག་རྟེན་ནི་བདེན་པ་ལ་མངོན་པར་ཆགས་ན། ཆོས་འདི་ནི་བདེན་པའང་མ་ལགས། རྫུན་པའང་མ་ལགས་སོ། །འཇིག་རྟེན་ནི་ཆོས་ལ་མངོན་པར་ཆགས་ན། ཆོས་འདི་ནི་ཆོས་ཀྱང་མ་ལགས། ཆོས་མ་ལགས་པའང་མ་ལགས་སོ། །འཇིག་རྟེན་ནི་མྱ་ངན་ལས་འདས་པ་ལ་ཆགས་ན། ཆོས་འདི་ལ་ནི་འཁོར་བའང་མ་མཆིས། མྱ་ངན་ལས་འདས་པའང་མ་མཆིས་སོ། །འཇིག་རྟེན་ནི་དགེ་བ་ལ་མངོན་པར་ཆགས་ན། འདི་ལ་ནི་དགེ་བའང་ 62b མ་མཆིས། མི་དགེ་བའང་མ་མཆིས་སོ། །འཇིག་རྟེན་ནི་བདེ་བ་ལ་མངོན་པར་ཆགས་ན། འདི་ལ་ནི་བདེ་བའང་མ་མཆིས། སྡུག་བསྔལ་བའང་མ་མཆིས་སོ། །འཇིག་རྟེན་ནི་སངས་རྒྱས་འབྱུང་བ་ལ་མངོན་པར་ཆགས་ན་འདི་ལ་སངས་རྒྱས་འབྱུང་བའང་མ་མཆིས། མྱ་ངན་ལས་འདས་པའང་མ་མཆིས་སོ། །ཆོས་བསྟན་ཀྱང་དེ་བརྗོད་དུ་མ་མཆིས་པའོ། །དགེ་འདུན་བསྟན་ཀྱང་འདུས་མ་བགྱིས་པའོ། །དེའི་སླད་དུ་ཆོས་འདི་ནི་འཇིག་རྟེན་ཐམས་ཅད་དང་མི་མཐུན་པ་ལགས་སོ། །བཅོམ་ལྡན་འདས། འདི་ལྟ་སྟེ། དཔེར་ན། མེ་དང ། ཆུའམ། ཆུ་དང ། མེའི་གནས་འདི་ནི་མཐུན་པའོ། །དེ་བཞིན་དུ་ཉོན་མོངས་པ་དང ། བྱང་ཆུབ་བམ། བྱང་ཆུབ་དང ། ཉོན་མོངས་པ་ནི་མི་མཐུན་པའོ། །དེ་ཅིའི་སླད་དུ་ཞེ་ན། ཉོན་མོངས་པ་མ་མཆིས་པར་དེ་བཞིན་གཤེགས་པས་མངོན་པར་སངས་རྒྱས་སོ། །བཤད་ཀྱང་སྣང་བའི་གཟུགས་མ་ལགས། ཀུན་མཁྱེན་ཀྱང་རྣམ་པར་མཁྱེན་པ་མ་མཆིས། བསྒོམ་ཀྱང་གཉིས་སུ་མ་བགྱིས། །མངོན་དུ་བགྱིས་ཀྱང་ཐོབ་པར་མ་མཆིས། །མྱ་ངན་ལས་བཟླས་ཀྱང་ཞི་བའང་མ་མཆིས་ཏེ། བཅོམ་ལྡན་འདས། རིགས་ཀྱི་བུའམ། རིགས་ཀྱི་བུ་མོ་གང་རྣམས་ཆོས་ཀྱི་ཚུལ་གྱི་རྣམ་པ་འདི་ལ་མོས་པ་དེ་དག་ནི་ལྟ་བར་གྱུར་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །དེ་བཞིན་གཤེགས་པ་ལ་བསྙེན་བཀུར་བགྱིས་ 63a ༄#། །ཤིང་སྔོན་གྱི་རྒྱལ་བ་ལ་ལྷག་པར་བགྱི་བ་བགྱིས་པ་ལགས་སོ། །དེ་དག་དགེ་བའི་བཤེས་གཉེན་གྱིས་ཡོངས་སུ་བཟུང་བ་ལགས་སོ། །དེ་དག་དགེ་བའི་རྩ་བ་འབར་བའི་སླད་དུ་རྒྱ་ཆེན་པོ་ལས་མོས་པར་འགྱུར་རོ། །དེ་དག་དེ་བཞིན་གཤེགས་པའི་མཛོད་འཆང་བའི་སླད་དུ་གཏེར་རབ་ཏུ་རྙེད་པར་འགྱུར་རོ། །དེ་དག་ལེགས་བར་བགྱི་བའི་ལས་བགྱིད་པའི་སླད་དུ་ལས་ཀྱི་མཐའ་ཤིན་ཏུ་མཐུན་པར་འགྱུར་རོ། །དེ་དག་སངས་རྒྱས་ཀྱི་རིགས་འཛིན་པའི་སླད་དུ་རིགས་བཙུན་པར་འགྱུར་རོ། །དེ་དག་ཉོན་མོངས་པ་ཐམས་ཅད་ཡོངས་སུ་བཏང་བའི་སླད་དུ་གཏོང་བ་ཆེན་པོ་དང་ལྡན་པར་འགྱུར་རོ། །དེ་དག་ཚུལ་ཁྲིམས་ཀྱི་སྟོབས་དང་ལྡན་པར་འགྱུར་ཏེ། ཉོན་མོངས་པའི་སྟོབས་ཅན་མ་ལགས། ལུས་སྲོག་པོར་བའི་སླད་དུ་དེ་དག་བཟོད་པའི་སྟོབས་ཅན་དུ་འགྱུར་རོ། །དེ་དག་ཡིད་ཡོངས་སུ་སྐྱོ་བ་མ་མཆིས་པའི་སླད་དུ་བརྩོན་འགྲུས་ཀྱི་སྟོབས་ཅན་དུ་འགྱུར་རོ། །དེ་དག་སྡིག་པའི་ལས་བསྲེགས་པའི་སླད་དུ་བསམ་གཏན་གྱི་སྟོབས་ཅན་དུ་འགྱུར་རོ། །དེ་དག་སྡིག་པར་ལྟ་བ་རྣམས་དང་བྲལ་བའི་སླད་དུ་ཤེས་རབ་ཀྱི་སྟོབས་ཅན་དུ་འགྱུར་རོ། །དེ་དག་བདུད་རྣམས་ཀྱིས་རབ་ཏུ་ཐུབ་པར་དཀའ་བར་འགྱུར་རོ། །དེ་དག་ཕྱིར་རྒོལ་བ་རྣམས་ཀྱིས་མི་རྫི་བར་འགྱུར་རོ། །དེ་དག་དེ་བཞིན་གཤེགས་པ་རྣམས་ 63b ལ་མི་སླུ་བར་འགྱུར་རོ། །དེ་དག་ཆོས་ཀྱི་རང་བཞིན་སྟོན་པ་ལ་མཁས་པའི་སླད་དུ་ཡང་དག་པར་སྨྲ་བར་འགྱུར་རོ། །དེ་དག་དོན་དམ་པའི་ཆོས་སྟོན་པའི་སླད་དུ་བདེན་པར་སྨྲ་བར་འགྱུར་རོ། །དེ་བཞིན་གཤེགས་པ་རྣམས་ཀྱིས་ཡོངས་སུ་གཟུང་བར་འགྱུར་རོ། །དེ་དག་འགྲོགས་ན་བདེ་བའི་སླད་དུ་ངེས་པར་འགྱུར་རོ། །དེ་དག་འཕགས་པའི་ནོར་རྣམས་ཀྱི་ནོར་དང་ལྡན་པར་འགྱུར་རོ། །དེ་དག་འཕགས་པའི་རིགས་རྣམས་ཀྱིས་མཆོག་འཚལ་བར་འགྱུར་རོ། །གསོ་སླ་ཞིང་དགང་སླ་བར་འགྱུར་རོ། །དེ་དག་ཕ་རོལ་ཏུ་མཆི་བའི་སླད་དུ་དབུགས་འབྱིན་པ་ཐོབ་པར་འགྱུར་རོ། །དེ་དག་མ་བརྒལ་བ་རྣམས་སྒྲོལ་བར་འགྱུར་རོ། །དེ་དག་མ་གྲོལ་བ་རྣམས་གྲོལ་བར་བགྱིད་པར་འགྱུར་རོ། །དེ་དག་དབུགས་འབྱིན་པ་མ་མཆིས་པ་རྣམས་ཀྱི་དབུགས་འབྱིན་པར་འགྱུར་རོ། །ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་ཟློ་བར་འགྱུར་རོ། །དེ་དག་ལམ་སྟོན་པར་འགྱུར་རོ། །དེ་དག་མྱ་ངན་ལས་འདས་པ་སྟོན་པར་འགྱུར་རོ། །དེ་དག་སྨན་ཐམས་ཅད་ཡོངས་སུ་འཚལ་བའི་སླད་དུ་སྨན་པ་རྣམས་ཀྱི་རྒྱལ་པོར་འགྱུར་རོ། །དེ་དག་ནད་ཐམས་ཅད་རབ་ཏུ་ཞི་བར་བགྱིད་པའི་སླད་དུ་སྨན་ལྟ་བུར་འགྱུར་རོ། །དེ་དག་ཡེ་ཤེས་ཀྱི་སྟོབས་དང་ལྡན་པར་འགྱུར་རོ། །དེ་དག་མཐུས་སྤྲོ་བ་དང་ལྡན་པར་འགྱུར་རོ། །དེ་དག་གཞན་གྱི་དྲིང་ལ་མི་འཇོག་པའི་སླད་དུ་ 64a ༄#། །རྩལ་དང་ལྡན་པར་འགྱུར་རོ། །དེ་དག་འཇིགས་པས་སྤུ་ལྡང་བ་མ་མཆིས་པའི་སླད་དུ་སེང་གེ་ལྟ་བུར་འགྱུར་རོ། །དེ་དག་ཅང་ཤེས་པའི་སླད་དུ་བ་གླང་ལྟ་བུར་འགྱུར་རོ། །དེ་དག་སེམས་རབ་ཏུ་དུལ་བའི་སླད་དུ་གླང་པོ་ཆེར་འགྱུར་རོ། །དེ་དག་འཁོར་མང་པོ་ཡོངས་སུ་སྡུད་པའི་སླད་དུ་ཁྱུ་མཆོག་ཏུ་འགྱུར་རོ། །དེ་དག་བདུད་དང་ཕྱིར་རྒོལ་བ་རྣམས་རབ་ཏུ་བཅོམ་པའི་སླད་དུ་དཔའ་བོར་འགྱུར་རོ། །དེ་དག་འཁོར་གྱིས་འཇིགས་པ་མ་མཆིས་པའི་སླད་དུ་བརྟན་པར་འགྱུར་རོ། །དེ་དག་མི་འཇིགས་པ་ཐོབ་པའི་སླད་དུ་མི་ཐུབ་པར་འགྱུར་རོ། །དེ་དག་བདེན་པ་བསྟན་པ་རྣམས་ལ་འཇིགས་པ་མ་མཆིས་པར་འགྱུར་རོ། །དེ་དག་དཀར་པོའི་ཕྱོགས་ཡོངས་སུ་རྒྱས་པའི་སླད་དུ་ཟླ་བ་དང་མཚུངས་པར་འགྱུར་རོ། །དེ་དག་ཤེས་རབ་ཀྱི་སྣང་བར་བགྱིད་པས་ཉི་མ་ལྟ་བུར་འགྱུར་རོ། །དེ་དག་མུན་པ་ཆེན་པོ་དང་བྲལ་བའི་སླད་དུ་སྒྲོན་མེ་ལྟ་བུར་འགྱུར་རོ། །དེ་དག་མཛའ་བ་དང ། ཁོང་ཁྲོ་བ་མ་མཆིས་པའི་སླད་དུ་གཞི་རྟེན་ལྟ་བུར་འགྱུར་རོ། །དེ་དག་སེམས་ཅན་ཐམས་ཅད་ཉེ་བར་འཚོ་བའི་སླད་དུ་ས་དང་མཚུངས་པར་འགྱུར་རོ། །དེ་དག་ཆོས་ཐམས་ཅད་ལ་མི་གནས་པའི་སླད་དུ་རླུང་དང་མཚུངས་པར་འགྱུར་རོ། །དེ་དག་ཉོན་མོངས་པའི་དྲི་མ་ཐམས་ཅད་འཁྲུ་བའི་སླད་དུ་ཆུ་དང་མཚུངས་པར་འགྱུར་རོ། །དེ་ 64b དག་རློམ་སེམས་ཐམས་ཅད་ཡང་དག་པར་འཇོམས་པའི་སླད་དུ་མེ་དང་མཚུངས་པར་འགྱུར་རོ། །དེ་དག་བསྐྱོད་མི་ནུས་པའི་སླད་དུ་རི་རབ་དང་མཚུངས་པར་འགྱུར་རོ། །དེ་དག་ལྷག་པའི་བསམ་པ་བརྟན་ཞིང་མི་ཕྱེད་པའི་སླད་དུ་རྡོ་རྗེ་ལྟར་སྲ་བའི་ཁོར་ཡུག་གི་རི་ལྟ་བུར་འགྱུར་རོ། །དེ་དག་ཕས་ཀྱི་རྒོལ་བ་ཐམས་ཅད་ཀྱིས་གདུལ་དཀའ་བར་འགྱུར་རོ། །དེ་དག་ཉན་ཐོས་དང ། རང་སངས་རྒྱས་ཐམས་ཅད་ཀྱིས་གཏིང་དབག་དཀའ་བར་འགྱུར་རོ། །དེ་དག་ཆོས་རིན་པོ་ཆེ་ཐམས་ཅད་འདུ་བའི་སླད་དུ་རྒྱ་མཚོ་ལྟ་བུར་འགྱུར་རོ། །དེ་དག་ཉོན་མོངས་པ་ཐམས་ཅད་བས་པའི་སླད་དུ་གཏིང་དང་འདྲ་བར་འགྱུར་རོ། །དེ་དག་ཆོས་ཡོངས་སུ་འཚོལ་བས་ཆོག་མི་ཤེས་པར་འགྱུར་རོ། །དེ་དག་ཤེས་རབ་ཀྱིས་ངོམས་པར་འགྱུར་རོ། །དེ་དག་ཆོས་ཀྱི་འཁོར་ལོ་རབ་ཏུ་བསྐོར་བས་རྒྱལ་པོ་དང་མཚུངས་པར་འགྱུར་རོ། །དེ་དག་གཟུགས་འཛིན་པའི་སླད་དུ་བརྒྱ་བྱིན་དང་མཚུངས་པར་འགྱུར་རོ། །དེ་དག་དབང་བསྒྱུར་བའི་སླད་དུ་ཚངས་པ་དང་མཚུངས་པར་འགྱུར་རོ། །དེ་དག་ཆོས་མངོན་པར་སྒྲོགས་པའི་སླད་དུ་སྤྲིན་དང་འདྲ་བར་འགྱུར་རོ། །དེ་དག་བདུད་རྩིའི་ཆར་རབ་ཏུ་འབེབས་པའི་སླད་དུ་ཆར་དང་འདྲ་བར་འགྱུར་རོ། །དེ་དག་དབང་པོ་དང ། སྟོབས་དང ། བྱང་ཆུབ་ཀྱི་ཡན་ལག་རྣམས་རྣམ་པར་འཕེལ་བར་བགྱིད་པར་འགྱུར་རོ། །དེ་དག་འཁོར་བའི་འདམ་ལས་བརྒལ་ 65a ༄#། །བར་འགྱུར་རོ། །དེ་དག་སངས་རྒྱས་ཀྱི་ཡེ་ཤེས་ལ་ཞུགས་པར་འགྱུར་རོ། །དེ་དག་སངས་རྒྱས་ཀྱི་བྱང་ཆུབ་ལ་ཉེ་བར་འགྱུར་རོ། །དེ་དག་བློས་མཉམ་པ་མ་མཆིས་པར་འགྱུར་རོ། །དེ་དག་ཐོས་པས་མི་མཉམ་པ་དང་མཉམ་པར་འགྱུར་རོ། །དེ་དག་གཞལ་བ་ལས་འདས་པའི་སླད་དུ་མཚུངས་པ་མ་མཆིས་པར་འགྱུར་རོ། །དེ་དག་སྤོབས་པས་ཐོགས་པ་མ་མཆིས་པར་འགྱུར་རོ། །དེ་དག་གཟུངས་རབ་ཏུ་ཐོབ་པའི་སླད་དུ་དྲན་པ་དང་ལྡན་པར་འགྱུར་རོ། །དེ་དག་དོན་རྟོགས་པའི་སླད་དུ་འབྲང་བས་རྟོགས་པ་དང་ལྡན་པར་འགྱུར་རོ། །དེ་དག་ཆོས་ལ་ཚུལ་བཞིན་དུ་སོ་སོར་རྟོག་པའི་སླད་དུ་བློ་གྲོས་དང་ལྡན་པར་འགྱུར་རོ། །དེ་དག་སེམས་ཅན་གྱི་བསམ་པ་རྣམས་ལ་མཁས་པར་འགྱུར་རོ། །དེ་དག་འཇིག་རྟེན་ལ་ཕན་པར་བགྱི་བའི་སླད་དུ་བརྩོན་པར་འགྱུར་རོ། །དེ་དག་འཇིག་རྟེན་ལས་འཕགས་པར་འགྱུར་རོ། །དེ་དག་པད་མོ་ལྟ་བུར་མི་ཆགས་པར་འགྱུར་རོ། །དེ་དག་འཇིག་རྟེན་གྱི་ཆོས་རྣམས་ཀྱིས་ཡོངས་སུ་མ་ཟིན་པར་འགྱུར་རོ། །དེ་དག་མཁས་པ་རྣམས་དགའ་བར་འགྱུར་རོ། །དེ་དག་མང་དུ་ཐོས་པ་རྣམས་ཀྱིས་ཆེར་བཀུར་བར་འགྱུར་རོ། །དེ་དག་རིག་པ་རྣམས་ཀྱིས་རི་མོ་བགྱི་བར་འགྱུར་རོ། །དེ་དག་ལྷ་དང ། མི་རྣམས་ཀྱིས་མཆོད་པར་འགྱུར་རོ། །དེ་དག་འཇིག་རྟེན་རྣམས་ཀྱིས་ཕྱག་བགྱི་བར་ 65b འགྱུར་རོ། །དེ་དག་འཕགས་པ་རྣམས་ཀྱི་བཀུར་སྟི་བགྱི་བར་འགྱུར་རོ། །དེ་དག་ཉན་ཐོས་དང ། རང་སངས་རྒྱས་རྣམས་ཀྱིས་སྨོན་པར་བགྱིད་པར་འགྱུར་རོ། །དེ་དག་ཉི་ཚེར་སྤྱོད་པ་ལ་རེ་བ་མ་མཆིས་པར་འགྱུར་རོ། །དེ་དག་ཆགས་པ་མ་མཆིས་པའི་སླད་དུ་ཚུལ་མི་ཆོས་པར་འགྱུར་རོ། །དེ་དག་སྤྱོད་ལམ་མཛེས་པར་འགྱུར་རོ། །དེ་དག་གཟུགས་བལྟ་ན་སྡུག་པར་འགྱུར་རོ། །དེ་དག་གཟི་བརྗིད་ཀྱིས་ཡིད་ཆགས་པར་འགྱུར་རོ། །དེ་དག་མཚན་རྣམས་ཀྱིས་བརྒྱན་པར་འགྱུར་རོ། །དེ་དག་དཔེ་བྱད་བཟང་པོ་རྣམས་ཀྱིས་རྣམ་པར་སྤྲས་པར་འགྱུར་རོ། །དེ་དག་སངས་རྒྱས་ཀྱི་རིགས་ཡང་དག་པར་འཛིན་པར་འགྱུར་རོ། །དེ་དག་ཆོས་ཀྱི་རིགས་ཡོངས་སུ་བསྲུང་བར་འགྱུར་རོ། །དེ་དག་དགེ་འདུན་གྱི་རིགས་ཀུན་ཏུ་བསྲུང་བར་འགྱུར་རོ། །དེ་དག་ནི་སངས་རྒྱས་ཐམས་ཅད་ཀྱིས་གཟིགས་སོ། །དེ་དག་གིས་ཆོས་ཀྱི་སྤྱན་རབ་ཏུ་ཐོབ་བོ། །དེ་དག་སངས་རྒྱས་ཀྱི་ཡེ་ཤེས་སུ་ལུང་བསྟན་པར་འགྱུར་རོ། །དེ་དག་གི་བཟོད་པ་གསུམ་ཡོངས་སུ་རྫོགས་པར་བགྱིས་སོ། །དེ་དག་བྱང་ཆུབ་ཀྱི་སྙིང་པོ་ཡོངས་སུ་རྫོགས་པ་ལ་གནས་སོ། །དེ་དག་གིས་བདུད་ཀྱི་སྡེ་རབ་ཏུ་བཅོམ་མོ། །དེ་དག་ཐམས་ཅད་མཁྱེན་པ་ཉིད་ཐོབ་བོ། །དེ་དག་ཆོས་ཀྱི་འཁོར་ལོ་རབ་ཏུ་བསྐོར་བར་འགྱུར་རོ། །དེ་དག་བཅོམ་ལྡན་འདས་སངས་རྒྱས་ཀྱི་མཛད་པ་བགྱིད་པར་འགྱུར་ཏེ། བཅོམ་ལྡན་འདས། གང་ཆོས་ཀྱི་ཚུལ་ཟབ་མོ་འདི་ 66a ༄#། །ཐོས་ནས་མི་སྐྲག་།མི་དངང ། ཤིན་ཏུ་དངང་བར་མི་འགྱུར་བ་དང ། གང་དེ་བཞིན་གཤེགས་པ་རྣམས་ཀྱི་བྱང་ཆུབ་འདི་ལྟར་ཟབ་པ། འདི་ལྟར་ཞེས་\?\་དཀའ་བ།་འདི་ལྟར་བལྟ་དཀའ་བ། འདི་ལྟར་ཁོང་དུ་ཆུད་པར་དཀའ་བ་འདི་ཐོས་ནས་མོས་པར་འགྱུར་བ་དང ། འཛིན་པར་འགྱུར་བ་དང ། འཆང་བར་འགྱུར་བ་དང ། གཞན་ལའང་རྒྱས་པར་བགྱིད་པར་འགྱུར་བ་དང ། ཆོས་འདི་ལ་རབ་ཏུ་ཞུགས་ཤིང་གཞན་ཡང་ནན་ཏན་ལ་འགོད་པར་བགྱིད་པའི་སྐྱེས་བུ་དམ་པ་དེ་དག་གི་བསྔགས་པ་བསྐལ་པའམ། བསྐལ་པ་ལས་ལྷག་པར་བརྗོད་ཅིང་ཡོན་ཏན་ཡོངས་སུ་བསྒྲགས་ཀྱང ། བཅོམ་ལྡན་འདས། བདག་གིས་སྐྱེས་བུ་དམ་པ་དེ་དག་གི་ཡོན་ཏན་མཐར་མི་ཕྱིན་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཚངས་པ། ཁྱོད་ཀྱིས་སྐྱེས་བུ་དེ་དག་གི་བསྔགས་པའམ། ཡོན་ཏན་ཇི་ཙམ་དུ་ཤེས། ཚངས་པས་གསོལ་པ། དེ་བཞིན་གཤེགས་པས་ཟག་པ་མ་མཆིས་པའི་སངས་རྒྱས་ཀྱི་ཡེ་ཤེས་ཇི་སྙེད་པ་མཁྱེན་པ་དང ། དེ་དག་གི་ཡོན་ཏན་དེ་དག་དང ། དེ་ལས་ལྷག་པར་ཡང་འཚལ་བར་བགྱི་སྟེ། གང་དེ་བཞིན་གཤེགས་པས་བཤད་པའི་དོན་དང ། ཚིག་དང ། ཡི་གེ་བཟང་པོ་རྣམས་རྟོགས་པར་རིག་པ་དང ། ལྡེམ་པོ་དག་འཚལ་བ་དང ། མཐུན་པར་བགྱིད་ཅིང་འགལ་ 66b པར་མི་བགྱིད་པ་དང ། ཡང་དག་པར་སྦྱོར་ཞིང་སུན་འབྱིན་པར་མི་བགྱིད་པ་དང ། དོན་རྟོགས་པར་རིག་ཅིང་ཡི་གེའི་ཕྱིར་མི་སྙེགས་པ་དེ་དག་ནི་བརྗོད་པ་གང་གིས་དེ་བཞིན་གཤེགས་པ་རྣམས་ཆོས་གསུངས་པ་དང ། ལྡེམ་པོ་དག་གང་གིས་དེ་བཞིན་གཤེགས་པ་ཆོས་གསུངས་པ་དང ། ཐབས་གང་དང ། ཚུལ་གང་དང ། སྙིང་རྗེ་ཆེན་པོ་གང་གིས་དེ་བཞིན་གཤེགས་པ་ཆོས་སྟོན་པར་ངེས་པའི་ཚིག་བརྗོད་པ་རབ་ཏུ་འཚལ་ཏོ། །བཀའ་སྩལ་པ། ཚངས་པ། བྱང་ཆུབ་སེམས་དཔའ་གང་ལ་ལ་དེ་བཞིན་གཤེགས་པ་སྟོབས་ལྔའི་སྦྱོར་བ་འདི་ཤེས་ན་བྱང་ཆུབ་སེམས་དཔའ་དེ་ནི་སངས་རྒྱས་ཀྱི་མཛད་པས་སེམས་ཅན་རྣམས་ལ་ཉེ་བར་གནས་པ་ཞེས་བྱའོ། །གསོལ་པ། བཅོམ་ལྡན་འདས། དེ་བཞིན་གཤེགས་པའི་སྟོབས་ལྔའི་སྦྱོར་བ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཆོས་སྨྲ་བ་དང ། ལྡེམ་པོ་དག་ཏུ་སྨྲ་བ་བསྟན་པ་དང ། ཐབས་ཀྱི་ཆོས་ལ་མོས་པར་བྱེད་པ་དང ། ཚུལ་ཉེ་བར་བསྟན་པ་དང ། སྙིང་རྗེ་ཆེན་པོའི་རྗེས་སུ་འཇུག་པ་སྟེ། ཚངས་པ། འདི་དག་ནི་གང་ཉན་ཐོས་དང ། རང་སངས་རྒྱས་ཐམས་ཅད་ཀྱིས་མ་ཡིན་པར་དེ་བཞིན་གཤེགས་པའི་སྟོབས་ལྔའི་སྦྱོར་བའོ། །གསོལ་པ། བཅོམ་ལྡན་འདས། གསུང་བ་གང་གིས་དེ་བཞིན་གཤེགས་པ་ཆོས་རྣམས་གསུངས། བཅོམ་ལྡན་འདས་ཀྱིས་བཀའ་སྩལ་པ། ཚངས་པ། འདས་ 67a ༄#། །བ་སྨྲ་བ་དང ། མ་འོངས་པ་སྨྲ་བ་དང ། ད་ལྟར་བྱུང་བ་སྨྲ་བ་དང ། ཀུན་ནས་ཉོན་མོངས་པ་སྨྲ་བ་དང ། རྣམ་པར་བྱང་བ་སྨྲ་བ་དང ། དགེ་བ་དང ། མི་དགེ་བ་སྨྲ་བ་དང ། འཇིག་རྟེན་པ་དང ། འཇིག་རྟེན་ལས་འདས་པ་སྨྲ་བ་དང ། ཟག་པ་དང་བཅས་པ་དང ། ཟག་པ་མེད་པར་སྨྲ་བ་དང ། ཁ་ན་མ་ཐོ་བ་དང་བཅས་པ་དང ། ཁ་ན་མ་ཐོ་བ་མེད་པ་སྨྲ་བ་དང ། འདུས་བྱས་དང ། འདུས་མ་བྱས་སྨྲ་བ་དང ། བདག་དང ། སེམས་ཅན་དང ། སྲོག་དང ། གསོ་བ་དང ། སྐྱེས་བུ་དང ། གང་ཟག་སྨྲ་བ་དང ། ཐོབ་པ་མངོན་དུ་བྱེད་པ་སྨྲ་བ་དང ། འཁོར་བ་དང ། མྱ་ངན་ལས་འདས་པ་སྨྲ་བ་སྟེ། ཚངས་པ། སྨྲ་བ་དེ་དག་ཀྱང་ཡོངས་སུ་མ་གྲུབ་པའི་ཚུལ་གྱིས་སྨྲ་བ་སྒྱུ་མ་ལྟ་བུར་ལྟའོ། །མེད་པར་མཐོང་བའི་ཚུལ་གྱིས་སྨྲ་བ་རྨི་ལམ་ལྟ་བུར་བལྟའོ། །ནམ་མཁའི་སྒྲ་སྐད་ཀྱི་ཚུལ་གྱིས་སྨྲ་བ་བྲག་ཅ་ལྟ་བུར་བལྟའོ། །རྐྱེན་འདུས་པའི་ཚུལ་གྱིས་སྨྲ་བ་མིག་ཡོར་ལྟ་བུར་བལྟའོ། ། རྒྱུ་མི་འཕོ་བའི་ཚུལ་གྱིས་སྨྲ་བ་གཟུགས་བརྙན་ལྟ་བུར་བལྟའོ། །ཕྱིན་ཅི་ལོག་ཏུ་མཐོང་བའི་ཚུལ་གྱིས་སྨྲ་བ་སྨིག་རྒྱུ་ལྟ་བུར་བལྟའོ། །མི་འབྱུང་མི་འཇིག་པའི་ཚུལ་གྱིས་སྨྲ་བ་ནམ་མཁའ་ལྟ་བུར་བལྟའོ། །བརྗོད་དུ་མེད་པའི་ཚུལ་གྱིས་སྨྲ་བ་སྨྲར་མེད་པར་བལྟའོ། །ཚངས་པ། བྱང་ཆུབ་སེམས་དཔའ་གང་ཆོས་སྨྲ་བ་འདི་ཤེས་ན་བྱང་ཆུབ་ 67b སེམས་དཔའ་དེ་དག་ནི་སྨྲ་བ་ཐམས་ཅད་སྨྲའང་ཆོས་གང་ལའང་མངོན་པར་མི་ཆགས་སོ། །དེ་མངོན་པར་མ་ཆགས་པས་ཡེ་ཤེས་ཐོགས་པ་མེད་པའི་སྤོབས་པ་གང་གིས་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཆོས་བཤད་ཀྱང་རྒྱུན་མི་ཆད་པ་དང ། སྨྲ་བ་ཐམས་ཅད་ཀྱང་ཆོས་ཀྱི་དབྱིངས་དང་ཐ་མི་དད་པར་སྨྲ་བ་དང ། ཆོས་རྣམས་ཀྱི་ཐ་མི་དད་པ་ལའང་མངོན་པར་ཆགས་པར་མི་འགྱུར་བའི་ཡེ་ཤེས་ཐོགས་པ་མེད་པའི་སྤོབས་པ་ཐོབ་བོ། །ཚངས་པ། དེ་བཞིན་གཤེགས་པས་དེ་ལྟར་གསུངས་པས་ཆོས་རྣམས་བརྗོད་དོ། །ཚངས་པ། དེ་ལ་ཇི་ལྟར་ན་བྱང་ཆུབ་སེམས་དཔའ་དེ་བཞིན་གཤེགས་པའི་ལྡེམ་པོ་དག་ལ་མཁས་པ་ཁོང་དུ་ཆུད་ཅེ་ན། ཚངས་པ། འདི་ལ་དེ་བཞིན་གཤེགས་པ་ཀུན་ནས་ཉོན་མོངས་པའང་རྣམ་པར་བྱང་བར་སྟོན། རྣམ་པར་བྱང་བའང་ཀུན་ནས་ཉོན་མོངས་པར་སྟོན་ཏེ། དེ་ལས་བྱང་ཆུབ་སེམས་དཔའ་ལྡེམ་པོ་དག་ཏུ་ཤེས་པར་བྱའོ། །ཚངས་པ། དེ་བཞིན་གཤེགས་པ་ཀུན་ནས་ཉོན་མོངས་པ་ལ་རྣམ་པར་བྱང་བར་ཇི་ལྟར་སྟོན་ཅེ་ན། ཀུན་ནས་ཉོན་མོངས་པའི་ངོ་བོ་ཉིད་རློམ་སེམས་མེད་པའི་ཕྱིར་ཀུན་ནས་ཉོན་མོངས་པ་རྣམ་པར་བྱང་བར་སྟོན་ཏོ། ། རྣམ་པར་བྱང་བ་ཀུན་ནས་ཉོན་མོངས་པར་ཇི་ལྟར་སྟོན་ཅེ་ན། རྣམ་པར་བྱང་བའི་ངོ་བོ་ཉིད་རློམ་སེམས་མེད་པའི་ཕྱིར་ཏེ། དེ་ལྟར་རྣམ་པར་བྱང་བ་ཀུན་ནས་ཉོན་མོངས་པར་སྟོན་ 68a ༄#། །ཏོ། །ཚངས་པ། ང་སྦྱིན་པས་མྱ་ངན་ལས་འདས་པར་སྟོན་ཏེ། དེ་ནི་བྱིས་པ་དག་གིས་མི་ཤེས་ཀྱི་དེ་ལ་བྱང་ཆུབ་སེམས་དཔའ་ལྡེམ་པོ་དག་ལ་མཁས་པ་ནི་སྦྱིན་པའང་ཕྱི་མའི་ཚེ། སྐྱིད་པ་ཆེན་པོར་འགྱུར་ཡང་འདི་ལ་ཆོས་གང་ཡང་འཕོ་བ་མེད་དོ། །མི་འཕོ་བས་ན་མྱ་ངན་ལས་འདས་པའོ། །མངོན་པར་འདུ་མི་བྱེད་པའི་ཚུལ་གྱིས་ཚུལ་ཁྲིམས་ཀྱིས་མྱ་ངན་ལས་འདས་པའོ། །སྐད་ཅིག་པའི་ཚུལ་གྱིས་བཟོད་པས་མྱ་ངན་ལས་འདས་པའོ། །བླང་བ་དང ། དོར་བ་མེད་པའི་ཚུལ་གྱིས་བརྩོན་འགྲུས་ཀྱིས་མྱ་ངན་ལས་འདས་པའོ། །རྣམ་པར་མི་རྟོག་པའི་ཚུལ་གྱིས་བསམ་གཏན་གྱིས་མྱ་ངན་ལས་འདས་པའོ། །ཐོགས་པ་མེད་པའི་ཚུལ་གྱིས་ཤེས་རབ་ཀྱིས་མྱ་ངན་ལས་འདས་པའོ། །ཆོས་ཀྱི་དབྱིངས་འདོད་ཆགས་དང་བྲལ་བས་ན་འདོད་ཆགས་ནི་འདོད་ཆགས་དང་བྲལ་བའི་མཐའོ། །ཆོས་ཀྱི་དབྱིངས་ལ་གཏུམ་པ་མེད་པས་ཞེ་སྡང་ནི་ཡང་དག་པའི་མཐའོ། །ཆོས་རྣམས་ལ་རྨོངས་པ་མེད་པའི་ཕྱིར་གཏི་མུག་ནི་གཏི་མུག་མེད་པའི་མཐའོ། །ཤི་འཕོ་མེད་པ་དང ། སྐྱེ་བ་མེད་པའི་ཚུལ་གྱིས་འཁོར་བའང་མྱ་ངན་ལས་འདས་པའོ། །མངོན་པར་ཆགས་པ་མེད་པའི་ཚུལ་གྱིས་མྱ་ངན་ལས་འདས་པའང་འཁོར་བའོ། །ཐ་སྙད་དུ་འདོགས་པའི་ལྟ་བ་བདེན་པའང་རྫུན་པའོ། །མངོན་པའི་ང་རྒྱལ་ཅན་རྣམས་ལ་ནི་རྫུན་ 68b བའང་བདེན་པའོ་ཞེས་དེ་ལྟར་ཤེས་སོ། །གཞན་ཡང ། ཚངས་པ། དེ་བཞིན་གཤེགས་པ་ནི་ལྡེམ་པོ་དག་གི་རྣམ་གྲངས་ཀྱིས་བདག་ཉིད་རྟག་པར་སྨྲ་བར་ཞལ་གྱིས་བཞེས་སོ། །བདག་ཉིད་ཀུན་ནས་ཉོན་མོངས་པར་སྨྲ་བ་དང ། ཆད་པར་སྨྲ་བ་དང ། བྱ་བ་མེད་པར་སྨྲ་བ་དང ། ལོག་པར་སྨྲ་བ་དང ། མ་དད་པ་དང ། བྱས་པ་མི་གཟོ་བ་དང ། མཚམས་གཅོད་པ་དང ། སྐྱུག་པ་ཟ་བ་དང ། གོ་སྐབས་མི་ཕྱེད་པར་ཞལ་གྱིས་བཞེས་ཀྱང་དེ་བཞིན་གཤེགས་པ་ནི་བཤད་པ་འདི་དག་ལ་མི་འབྱུང་མི་སྣང་ངོ ། །ལྡེམ་པོ་དག་གང་གིས་སེམས་ཅན་རྣམས་ལྷག་པའི་ང་རྒྱལ་འཛིན་པ་འདོར་བར་འགྱུར་བའི་ལྡེམ་པོ་དག་དེ་དེ་བཞིན་གཤེགས་པ་སྟོན་ཏེ། དེ་ནི་དེ་བཞིན་གཤེགས་པའི་ལྡེམ་པོ་དག་གོ། ཚངས་པ། དེ་ལྟར་ན་དེ་བཞིན་གཤེགས་པ་ལྡེམ་པོ་དག་ཏུ་ཆོས་སྟོན་ཏོ། །དེ་ལ་བྱང་ཆུབ་སེམས་དཔས་སྤྱོད་པ་ལ་མཁས་པར་བློ་དཔྱད་པར་བྱའོ། །དེ་དེ་ལྟར་མཐར་ཕྱིན་པས་བསྟན་པ་ཐམས་ཅད་ལ་མཁས་པར་འགྱུར་རོ། །དེ་སེམས་ཅན་རྣམས་ལ་གཟུགས་ཀྱི་སྐུ་བསྟན་པས་སངས་རྒྱས་བྱུང་ངོ་སྙམ་དུ་མོས་པར་འགྱུར་རོ། །ཆོས་ཀྱི་སྐུས་རབ་ཏུ་ཕྱེ་བའི་ཕྱིར་དེ་བཞིན་གཤེགས་པ་མ་བྱུང་བའོ་ཞེས་མོས་པར་འགྱུར་རོ། །ཡི་གེ་རྣམ་པར་རིག་པ་ལྷུར་བྱེད་པའི་སེམས་ཅན་རྣམས་ལ་དེ་བཞིན་གཤེགས་པས་ཆོས་བསྟན་ཏོ་ཞེས་མོས་པར་འགྱུར་རོ། །ཆོས་ཉིད་བརྗོད་དུ་མེད་པར་ 69a ༄#། །ངེས་པར་བྱས་ནས་ཆོས་བསྟན་དུ་མེད་དོ་ཞེས་མོས་པར་འགྱུར་རོ། །ཕྱིན་ཅི་ལོག་ལས་བྱུང་བའི་ཉོན་མོངས་པ་ཡོངས་སུ་མྱ་ངན་ལས་བཟླ་བའི་ཕྱིར་ཡོངས་སུ་མྱ་ངན་ལས་འདས་པ་ཡོད་དོ་ཞེས་མོས་པར་འགྱུར་རོ། །མ་སྐྱེས་པའི་ཆོས་རྣམས་མི་འཇིག་པའི་ཕྱིར་མྱ་ངན་ལས་འདས་པ་མེད་དོ་ཞེས་མོས་པར་འགྱུར་རོ། །ཀུན་རྫོབ་ལ་འཇུག་པས་སེམས་ཅན་ཡོད་དོ་ཞེས་མོས་པར་འགྱུར་རོ། །དོན་དམ་པ་བསྟན་པ་སེམས་ཅན་མེད་དོ་ཞེས་མོས་པར་འགྱུར་ཏེ། ཚངས་པ། དེ་ལྟར་ན་དེ་བཞིན་གཤེགས་པས་ལྡེམ་པོ་དག་བསྟན་པས་ཆོས་སྟོན་ཏོ། །དེ་ལ་བྱང་ཆུབ་སེམས་དཔས་བསྟན་པ་ཐམས་ཅད་ལ་མི་སྐྲག་པར་བྱའོ། །དེ་ལ། ཚངས་པ། དེ་བཞིན་གཤེགས་པ་ཐབས་གང་གིས་སེམས་ཅན་རྣམས་ལ་ཆོས་སྟོན་ཅེ་ན། སྦྱིན་པས་ལོངས་སྤྱོད་འཐོབ་པ་དང ། ཚུལ་ཁྲིམས་ཀྱིས་མཐོ་རིས་སུ་སྐྱེ་བ་དང ། བཟོད་པས་གཟུགས་བཟང་པོ་འཐོབ་པ་དང ། བརྩོན་འགྲུས་ཀྱིས་ཡེ་ཤེས་འཐོབ་པ་དང ། བསམ་གཏན་གྱིས་རབ་ཏུ་དབེན་པ་འཐོབ་པ་དང ། ཤེས་རབ་ཀྱིས་ཉོན་མོངས་པ་འདོར་བ་འཐོབ་པ་དང ། ཐོས་པས་ཤེས་རབ་འཐོབ་པ་དང ། དགེ་བ་བཅུའི་ལས་ཀྱི་ལམ་གྱིས་མི་དང ། ལྷའི་ཕུན་སུམ་ཚོགས་པ་རྣམས་འཐོབ་པ་དང ། བྱམས་པ་དང ། སྙིང་རྗེ་དང ། དགའ་བ་དང ། བཏང་སྙོམས་ཀྱིས་ཚངས་པའི་ 69b འཇིག་རྟེན་དུ་སྐྱེ་བ་འཐོབ་པ་དང ། ཞི་གནས་ཀྱིས་ལྷག་མཐོང་འཐོབ་པ་དང ། སློབ་པའི་སས་མི་སློབ་པའི་ས་ཐོབ་པ་དང ། རང་སངས་རྒྱས་ཀྱི་སས་སྦྱིན་པ་ཡོངས་སུ་སྦྱང་བ་དང ། སངས་རྒྱས་ཀྱི་སས་ཚད་མེད་པའི་ཡེ་ཤེས་འཐོབ་པ་དང ། མྱ་ངན་ལས་འདས་པས་སྡུག་བསྔལ་ཐམས་ཅད་ཉེ་བར་ཞི་བ་འཐོབ་པར་འགྱུར་རོ་ཞེས། ཚངས་པ། ང་ནི་ཐབས་ཀྱིས་སེམས་ཅན་རྣམས་ཆོས་འདི་ལ་མོས་པར་བྱེད་དེ། དེ་བཞིན་གཤེགས་པ་ནི་བདག་གམ། སེམས་ཅན་ནམ། སྲོག་གམ། གང་ཟག་ཏུ་མི་དམིགས་སོ། །དེ་བཞིན་གཤེགས་པ་ནི་སྦྱིན་པའང་མི་དམིགས། སྦྱིན་པའི་འབྲས་བུའང་མི་དམིགས། སེར་སྣའང་མི་དམིགས། སེར་སྣའི་འབྲས་བུའང་མི་དམིགས། ཚུལ་ཁྲིམས་ཀྱང་མི་དམིགས། ཚུལ་ཁྲིམས་ཀྱི་འབྲས་བུའང་མི་དམིགས། ངང་ཚུལ་ངན་པའང་མི་དམིགས། ངང་ཚུལ་ངན་པའི་འབྲས་བུའང་མི་དམིགས། བཟོད་པའང་མི་དམིགས། བཟོད་པའི་འབྲས་བུའང་མི་དམིགས། གནོད་སེམས་ཀྱང་མི་དམིགས། གནོད་སེམས་ཀྱི་འབྲས་བུའང་མི་དམིགས་སོ། །བརྩོན་འགྲུས་ཀྱང་མི་དམིགས། བརྩོན་འགྲུས་ཀྱི་འབྲས་བུའང་མི་དམིགས། ལེ་ལོའང་མི་དམིགས། ལེ་ལོའི་འབྲས་བུའང་མི་དམིགས། བསམ་གཏན་ཡང་མི་དམིགས། བསམ་གཏན་གྱི་འབྲས་བུའང་མི་དམིགས། གཡེང་བའང་མི་དམིགས། གཡེང་བའི་འབྲས་བུའང་མི་དམིགས། ཤེས་རབ་ 70a ༄#། །ཀྱང་མི་དམིགས། ཤེས་རབ་ཀྱི་འབྲས་བུའང་མི་དམིགས། འཚལ་བའི་ཤེས་རབ་ཀྱང་མི་དམིགས། འཆལ་བའི་ཤེས་རབ་ཀྱི་འབྲས་བུའང་མི་དམིགས། བདེ་བའང་མི་དམིགས། སྡུག་བསྔལ་ཡང་མི་དམིགས། རྒྱུན་དུ་ཞུགས་པའི་འབྲས་བུའང་མི་དམིགས་པ་ནས་བྱང་ཆུབ་ཀྱི་བར་དུའང་མི་དམིགས། ཡོངས་སུ་མྱ་ངན་ལས་འདས་པའང་མི་དམིགས་ཏེ། ཚངས་པ། སེམས་ཅན་དེ་དག་དེ་ལྟར་བསྟན་པས་སྦྱོར་ཞིང་རྩོལ་ཏེ་འབད་ཀྱང་གང་གི་ཕྱིར་སྦྱོར་བ་དང ། རྩོལ་བ་དང ། འབད་པའི་ཆོས་དེ་དག་ཁོང་དུ་མི་ཆུད་ཅིང་མི་འཐོབ་སྟེ། གང་འདི་རྒྱུན་དུ་ཞུགས་པའི་འབྲས་བུ་ནས་དགྲ་བཅོམ་པ་ཉིད་ཀྱི་བར་དང ། རང་བྱང་ཆུབ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནས་མྱ་ངན་ལས་འདས་པའི་བར་དུ་ཁོང་དུ་མི་ཆུད་མི་འཐོབ་བོ། །ཚངས་པ། འདི་ནི་དེ་བཞིན་གཤེགས་པའི་ཐབས་ཀྱིས་ཆོས་བསྟན་པ་ཡིན་ཏེ། སེམས་ཅན་རྣམས་དམ་པའི་ཆོས་ཡོངས་སུ་འཛིན་དུ་གཞུག་པའི་ཕྱིར། བྱང་ཆུབ་སེམས་དཔས་ཐབས་མཁས་པ་ལ་སྦྱོར་བར་བྱའོ། །ཚངས་པ། དེ་ལ་དེ་བཞིན་གཤེགས་པའི་ཚུལ་བསྟན་པ་གང་ཞེ་ན། མིག་ནི་ཐར་པའི་ཚུལ་ལོ། །དེ་བཞིན་དུ་རྣ་བ་དང ། སྣ་དང ། ལྕེ་དང ། ལུས་དང ། ཡིད་རྣམས་ནི་ཐར་པའི་ 70b ཚུལ་ལོ། །དེ་ཅིའི་ཕྱིར་ཞེ་ན། མིག་ནི་བདག་དང ། བདག་གིས་སྟོང་སྟེ། དེའི་རང་བཞིན་འདི་ཡིན་ནོ། །དེ་བཞིན་དུ་ཡིད་ཀྱི་བར་དུ་བདག་དང ། བདག་གིས་སྟོང་སྟེ། དེའི་རང་བཞིན་འདི་ཡིན་ནོ། །ཚངས་པ། མི་སླུ་བའི་ཕྱིར། སྐྱེ་མཆེད་ཐམས་ཅད་ནི་སེམས་ཅན་རྣམས་ཀྱིས་ཐར་པའི་ཚུལ་དུ་རིག་པར་བྱའོ། །འདི་ནི་སེམས་ཅན་རྣམས་ཀྱི་ཐར་པ་ལ་བརྩོན་པར་མི་སླུ་བ་སྟེ། གཟུགས་དང ། སྒྲ་དང ། དྲི་དང ། རོ་དང ། རེག་དང ། ཆོས་རྣམས་ཀྱང་དེ་བཞིན་ནོ། །ཆོས་ཐམས་ཅད་ཀྱི་ཚུལ་འདི་ཡིན་ཏེ། གང་འདི་སྟོང་པ་ཉིད་ཀྱི་ཚུལ་དང ། མཚན་མ་མེད་པའི་ཚུལ་དང ། སྨོན་པ་མེད་པའི་ཚུལ་དང ། མངོན་པར་འདུ་མི་བྱེད་པའི་ཚུལ་དང ། མི་སྐྱེ་བའི་ཚུལ་དང ། མི་འགག་པའི་ཚུལ་དང ། འགྲོ་བ་མེད་ཅིང་འོང་བ་མེད་པའི་ཚུལ་དང ། ཤི་འཕོ་མེད་ཅིང་སྐྱེ་བ་མེད་པའི་ཚུལ་དང ། རང་བཞིན་གྱིས་འོད་གསལ་བའི་ཚུལ་དང ། དབེན་པའི་ཚུལ་ལོ། །རང་བཞིན་གྱི་བེམས་\?\་པོ་ཡིན་པའི་ཕྱིར་ཕན་ཚུན་མི་ཕྲད་པས་ན་དེ་བཞིན་གཤེགས་པས་ཡི་གེ་ཐམས་ཅད་ལས་ཐར་པའི་སྒོའི་ཚུལ་སྨོས་སོ། །ཚངས་པ། ཡི་གེ་ཐམས་ཅད་ལ་བདེན་པའི་གཏམ་དུ་ལྟ་སྟེ། གཏམ་ཐམས་ཅད་ནི་དེ་བཞིན་གཤེགས་པའི་ཐར་པའི་ཚུལ་བདེན་པ་བསྟན་པ་བསྟན་ཏོ། །དེ་བཞིན་གཤེགས་པའི་ཆོས་བསྟན་པ་གང་ཀུན་ནས་ཉོན་མོངས་པར་འགྱུར་བ་དེ་གང་ཡང་མེད་དོ། །ཆོས་བསྟན་ཏོ་ 71a ༄#། །ཅོག་ཏུ་ཐར་པར་འདྲེན་ཅིང ། མྱ་ངན་འདས་པ་སྟོན་ཏོ། །ཚངས་པ། འདི་ནི་དེ་བཞིན་གཤེགས་པའི་ཚུལ་བསྟན་པ་ཡིན་ཏེ། དེ་ལ་བྱང་ཆུབ་སེམས་དཔས་བསླབ་པར་བྱའོ། །ཚངས་པ། དེ་ལ་དེ་བཞིན་གཤེགས་པ་སྙིང་རྗེ་ཇི་ལྟ་བུས་སེམས་ཅན་རྣམས་ལ་ཆོས་སྟོན་ཅེ་ན། སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་རྣམ་པ་སུམ་ཅུ་རྩ་གཉིས་དང་ལྡན་པ་སྐྱེའོ། །སུམ་ཅུ་རྩ་གཉིས་གང་ཞེ་ན། ཆོས་ཐམས་ཅད་ནི་བདག་མེད་པ་ཡིན་ན་སེམས་ཅན་རྣམས་ནི་བདག་མེད་པར་མ་མོས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སེམས་ཅན་མེད་པ་ཡིན་ན་སེམས་ཅན་རྣམས་ནི་སེམས་ཅན་དུ་སྨྲ་སྟེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སྲོག་མེད་པ་ཡིན་ན་སེམས་ཅན་རྣམས་ནི་སྲོག་ཏུ་ལྟའོ་ཞེས་དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་གང་ཟག་མེད་པ་ཡིན་ན་སེམས་ཅན་རྣམས་ནི་གང་ཟག་ལ་གནས་ཏོ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ངོ་བོ་ཉིད་མེད་པ་ཡིན་ན་སེམས་ཅན་རྣམས་ནི་ངོ་བོར་ལྟ་སྟེ། དེའི་ཕྱིར་སེམས་ཅན་རྣམས་ 71b ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་གནས་མེད་པ་ཡིན་ན་སེམས་ཅན་རྣམས་ནི་གནས་ལ་རྟེན་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ཀུན་གཞི་མེད་པ་ཡིན་ན་སེམས་ཅན་རྣམས་ནི་ཀུན་གཞི་ལ་མངོན་པར་དགའ་སྟེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ང་ཡིར་བྱ་བ་མེད་པ་ཡིན་ན་སེམས་ཅན་རྣམས་ནི་ང་ཡིར་འཛིན་པ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་བདག་པོ་མེད་པ་ཡིན་ན་སེམས་ཅན་རྣམས་ནི་ཡོངས་སུ་འཛིན་པ་ལ་བརྩོན་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་དངོས་པོ་མེད་པ་ཡིན་ན་སེམས་ཅན་རྣམས་ནི་དངོས་པོ་ལ་རྟེན་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་མ་སྐྱེས་པ་ཡིན་ན་སེམས་ཅན་རྣམས་ནི་སྐྱེ་བ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་མ་འཕོས་མ་བྱུང་བ་ཡིན་ན་སེམས་ཅན་རྣམས་ནི་འཆི་འཕོ་དང ། སྐྱེ་བ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། ། 72a ༄#། །ཆོས་ཐམས་ཅད་ནི་ཀུན་ནས་ཉོན་མོངས་པར་གྱུར་པ་ཡོད་པ་མ་ཡིན་ན། སེམས་ཅན་རྣམས་ནི་ཀུན་ནས་ཉོན་མོངས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་འདོད་ཆགས་དང་བྲལ་བ་ཡིན་ན་སེམས་ཅན་རྣམས་ནི་ཆགས་པར་བྱེད་དེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་ཞེ་སྡང་དང་བྲལ་བ་ཡིན་ན་སེམས་ཅན་རྣམས་ནི་ཞེ་སྡང་བར་བྱེད་དེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་གཏི་མུག་དང་བྲལ་བ་ཡིན་ན་སེམས་ཅན་རྣམས་ནི་གཏི་མུག་པར་གྱུར་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་འོང་བ་མེད་པ་ཡིན་ན་སེམས་ཅན་རྣམས་ནི་འོང་བ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་འགྲོ་བ་མེད་པ་ཡིན་ན་སེམས་ཅན་རྣམས་ནི་འགྲོ་བ་ལ་གནས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་མངོན་པར་འདུ་མི་བྱེད་པ་ཡིན་ན་སེམས་ཅན་རྣམས་ནི་མངོན་པར་འདུ་བྱེད་པ་ལ་སྤྱོད་དེ། དེའི་ཕྱིར་སེམས་ཅན་ 72b རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སྤྲོས་པ་མེད་པ་ཡིན་ན་སེམས་ཅན་རྣམས་ནི་སྤྲོས་པ་ལ་དགའ་སྟེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སྟོང་པ་ཉིད་ཡིན་ན་སེམས་ཅན་རྣམས་ནི་ལྟ་བར་ཞུགས་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་མཚན་མ་མེད་པ་ཡིན་ན་སེམས་ཅན་རྣམས་ནི་མཚན་མ་ལ་སྤྱོད་ཡུལ་བར་གྱུར་ཏེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་སྨོན་པ་མེད་པ་ཡིན་ན་སེམས་ཅན་རྣམས་ནི་སྨོན་ལམ་ལ་སྤྱོད་དེ། དེའི་ཕྱིར་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ། འཇིག་རྟེན་གནས་པ་འདི་ནི་ཕན་ཚུན་རྩོད་པས་ཡོངས་སུ་ཟིན་ཅིང་གནོད་སེམས་ཀྱི་ཐ་བའི་སྐྱོན་ལ་ཞུགས་པར་གཟིགས་ནས། དེ་དག་ལ་གནོད་སེམས་ཀྱི་ཐ་བའི་སྐྱོན་སྤང་བའི་ཕྱིར་ཆོས་སྟོན་ཏོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །སྐྱེ་མ། འཇིག་རྟེན་གནས་པ་འདི་ནི་ཕྱིན་ཅི་ལོག་དང་ལྡན་ཞིང་ལམ་ཉམ་ང་བར་ཞུགས་པ་ལམ་གོལ་བ་ལ་གནས་པ་ཡིན་ཏེ། དེ་དག་ཡང་དག་པའི་ལམ་དུ་གཟུད་པར་བྱའོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། 73a ༄#། །ཀྱེ་མ་འཇིག་རྟེན་གནས་པ་འདི་ནི་བརྐམ་ཞིང་ཆགས་པའི་ཟིལ་གྱིས་གནོན་པ་ཆོག་མི་ཤེས་ཤིང་གཞན་གྱི་ནོར་འཕྲོག་པ་ཡིན་ཏེ། དེ་དག་འཕགས་པའི་ནོར་དད་པ་དང ། ཚུལ་ཁྲིམས་དང ། ཐོས་པ་དང ། གཏོང་བ་དང ། ཤེས་རབ་དང ། ངོ་ཚ་ཤེས་པ་དང ། ཁྲེལ་ཡོད་པའི་ནོར་ལ་དགོད་དོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ། སེམས་ཅན་འདི་དག་ནོར་དང ། འབྲུ་དང ། ཁྱིམ་དང ། བུ་དང ། ཆུང་མ་ལ་སྲེད་པས་འཁོལ་ཅིང་སྙིང་པོ་མེད་པ་ལ་སྙིང་པོར་འཛིན་ཏེ། དེ་དག་ལ་ཤིན་ཏུ་མི་རྟག་པ་ཉིད་བསྟན་ཏོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ། སེམས་ཅན་འདི་དག་མ་རིག་པས་འཚོ་ཞིང་གཅིག་ལ་གཅིག་འདྲིད་པ་ལ་གནས་ཏེ། དེ་དག་འཚོ་བ་ཡོངས་སུ་དག་པར་བྱ་བའི་ཕྱིར་ཆོས་བསྟན་ཏོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ།། ཀྱེ་མ། སེམས་ཅན་འདི་དག་མི་མཛའ་བ་ཡིན་ན་ཁེ་དང ། བཀུར་སྟིར་རྒྱས་ནས་བདག་ཅག་མཛའོ་སྙམ་དུ་སེམས་ཏེ། དེ་དག་གི་གང་འདི་སྡུག་བསྔལ་རྣམ་པར་ཞི་བའི་བདེ་བ་མྱ་ངན་ལས་འདས་པ་ལ་ཤིན་ཏུ་ཡང་དག་པའི་དགེ་བའི་བཤེས་གཉེན་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཀྱེ་མ། སེམས་ 73b ཅན་འདི་དག་ནི་ཤིན་ཏུ་ཉོན་མོངས་པར་གྱུར་ཅིང་སྡུག་བསྔལ་གྱི་ཆོས་མང་བ་ཁྱིམ་གྱི་གནས་ལ་མངོན་པར་དགའ་བ་དེ་དག་ཁམས་གསུམ་ལས་འདའ་བའི་ཕྱིར་འབྱུང་བའི་ཆོས་བསྟན་ཏོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཆོས་ཐམས་ཅད་ནི་རྒྱུས་ཉེ་བར་འགྲོ་བ་རྣམ་པར་བསྒྲུབས་པས་ཉེ་བར་གནས་པའི་མཚན་ཉིད་དེ།་འཕགས་པའི་རྣམ་པར་གྲོལ་བ་དེ་ལ་ལེ་ལོ་བྱེད་དོ་ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །སེམས་ཅན་རྣམས་ནི་ཆགས་པ་མེད་པའི་སངས་རྒྱས་ཀྱི་ཡེ་ཤེས་མཆོག་ཁྱད་པར་དུ་འཕགས་པའི་ཡོངས་སུ་མྱ་ངན་ལས་འདས་པ་འདི་བཏང་ཞིང ། གང་འདི་ཐེག་པ་དམན་པ་ཉན་ཐོས་དང ། རང་སངས་རྒྱས་ཀྱི་ཐེག་པ་འཚོལ་ཏེ། དེ་དག་གང་འདི་སངས་རྒྱས་ཀྱི་ཡེ་ཤེས་ལ་དམིགས་པར་བྱ་བའི་ཕྱིར་རྒྱ་ཆེན་པོ་ལ་སེམས་མོས་པར་བྱའོ། །ཞེས་སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་ཆེན་པོ་སྐྱེའོ། །ཚངས་པ། སེམས་ཅན་རྣམས་ལ་དེ་བཞིན་གཤེགས་པའི་སྙིང་རྗེ་རྣམ་པ་སུམ་ཅུ་རྩ་གཉིས་པོ་དེ་དང་ལྡན་པར་སྐྱེ་སྟེ། དེའི་ཕྱིར་དེ་བཞིན་གཤེགས་པ་སྙིང་རྗེ་ཆེན་པོ་ལ་གནས་པ་ཞེས་བྱའོ། །ཚངས་པ། བྱང་ཆུབ་སེམས་དཔའ་གང་ལ་ལ་སྙིང་རྗེ་ཆེན་པོ་རྣམ་པ་སུམ་ཅུ་རྩ་གཉིས་པོ་འདི་དག་དང་ལྡན་པར་སེམས་ཅན་རྣམས་ལ་འཇུག་ 74a ༄#། །ན།་ཚངས་པ། བྱང་ཆུབ་སེམས་དཔའ་སེམས་དཔའ་ཆེན་པོ་འདི་ནི་བསོད་ནམས་ཀྱི་ཞིང ། གཟི་བརྗིད་ཆེན་པོ་ཡོངས་སུ་རྒྱས་པ། ཕྱིར་མི་ལྡོག་པ། སེམས་ཅན་གྱི་དོན་ལ་བརྩོན་པར་ཤེས་པར་བྱའོ། །ཡང་སྙིང་རྗེ་ཆེན་པོའི་ཆོས་ཀྱི་སྒོའི་ལེའུ་འདི་བཤད་པ་ན་སྲོག་ཆགས་སྟོང་ཕྲག་སུམ་ཅུ་རྩ་གཉིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །སྲོག་ཆགས་བརྒྱ་སྟོང་གིས་ནི་བཟོད་པ་རབ་ཏུ་ཐོབ་པར་གྱུར་ཏོ། །ལྷའི་བུ་སྟོང་ཕྲག་བདུན་ཅུ་རྩ་གཉིས་ནི་ཆོས་རྣམས་ལ་རྡུལ་མེད་ཅིང་དྲི་མ་དང་བྲལ་བའི་ཆོས་ཀྱི་མིག་རྣམ་པར་དག་གོ་།དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཚངས་པ་ཁྱད་པར་སེམས་འདི་དེ་བཞིན་གཤེགས་པའི་ཐུགས་རྗེ་ཆེན་པོ་དང་ལྡན་པའི་ཆོས་བསྟན་པ་འདི་ཐོས་ན་དགའ་བར་མི་བགྱིད། རངས་པར་མི་འགྱུར་རོ། །ཁྱད་པར་སེམས་ཀྱིས་སྨྲས་པ། རིགས་ཀྱི་བུ། གང་གི་རྣམ་པར་ཤེས་པ་གཉིས་དང་ལྡན་པ་དེ་དག་ལ་ནི་དགའ་བའམ། རངས་པར་ཡང་འགྱུར་གྱི། གཉིས་སུ་མེད་པ་ཡང་དག་པའི་མཐའ་ལ་གནས་པ་ལ་དགའ་བའང་མེད་དོ། །རངས་པའང་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། སྒྱུ་མས་སྤྲུལ་པའི་སྐྱེས་བུ་ནི་སྒྱུ་མ་གར་བྱེད་པར་ 74b ཞུགས་པ་ལ་དགའ་བའང་མེད། རངས་པའང་མེད་དོ། །རིགས་ཀྱི་བུ། དེ་བཞིན་དུ་ཆོས་ཐམས་ཅད་སྒྱུ་མའི་མཚན་ཉིད་ཀྱི་རང་བཞིན་དང་ལྡན་པའི་ཕྱིར་དེ་བཞིན་གཤེགས་པའི་ཆོ་འཕྲུལ་ལ་དགའ་བའང་མི་སྐྱེ། རངས་པར་ཡང་མི་འགྱུར་རོ། །རིགས་ཀྱི་བུ། འདི་ལྟ་སྟེ། དཔེར་ན། དེ་བཞིན་གཤེགས་པའི་སྤྲུལ་པས་དེ་བཞིན་གཤེགས་པའི་སྤོབས་པ་ཐོབ་ན་དགའ་བར་མི་བྱེད། རངས་པར་མི་འགྱུར་རོ། །རིགས་ཀྱི་བུ། དེ་བཞིན་དུ་ཆོས་རྣམས་སྤྲུལ་པའི་རང་བཞིན་དུ་ཤེས་ནས། དེ་བཞིན་གཤེགས་པ་ལ་ལྷག་པར་དགའ་བའང་མི་སྐྱེའོ།། སེམས་ཅན་གཞན་དག་ལ་ཡང་དམན་པར་མི་འཛིན་ཏོ། །དྲ་བ་ཅན་གྱི་འོད་ཀྱིས་སྨྲས་པ། ཚངས་པ། ཁྱོད་ཀྱི་ཆོས་ཐམས་ཅད་སྒྱུ་མས་སྤྲུལ་པའི་རང་བཞིན་དུ་ཤེས་སམ། སྨྲས་པ།་རིགས་ཀྱི་བུ། གང་རྣམ་པ་གཉིས་སུ་རྣམ་པར་བཞག་པ་སྤྱོད་པ་དེ་དག་ལ་དྲིས་ཤིག་།སྨྲས་པ། ཚངས་པ། ཁྱོད་གང་ལ་སྤྱོད། སྨྲས་པ། གང་ལ་བྱིས་པ་སོ་སོའི་སྐྱེ་བོ་ཐམས་ཅད་སྤྱོད་པ་དེ་ལ་ངའང་སྤྱོད་དོ། །སྨྲས་པ། ཚངས་པ། བྱིས་པ་སོ་སོའི་སྐྱེ་བོ་རྣམས་ནི་འདོད་ཆགས་དང ། ཞེ་སྡང་དང ། གཏི་མུག་རྣམས་ལ་སྤྱོད་དོ། །འཇིག་ཚོགས་ལ་ལྟ་བ་དང ། ཚུལ་ཁྲིམས་དང ། བརྟུལ་ཞུགས་མཆོག་ཏུ་འཛིན་པ་དང ། ཐེ་ཚོམ་དང ། ངར་འཛིན་པ་དང ། ང་ཡིར་འཛིན་པ་དང ། འདོད་པ་དང ། འདོད་ཆེན་དང ། ལོག་པར་ 75a ༄#། །སྦྱོར་བ་རྣམས་ལ་སྤྱོད་པ་ན་ཅི་ཁྱོད་ཀྱང་དེ་དག་ལ་སྤྱོད་དམ། སྨྲས་པ། རིགས་ཀྱི་བུ། ཁྱོད་སོ་སོའི་སྐྱེ་བོ་རྣམས་ཀྱི་སོ་སོའི་སྐྱེ་བོའི་ཆོས་ཡོངས་སུ་གྲུབ་པར་འདོད་དམ། སྨྲས་པ། སོ་སོའི་སྐྱེ་བོ་ཉིད་ཀྱང་ང་མི་འདོད་ན་དེ་དག་གི་ཆོས་ཡོངས་སུ་གྲུབ་པར་ག་ལ་འདོད། སྨྲས་པ། རིགས་ཀྱི་བུ། གང་འདི་ཆོས་ཡོངས་སུ་མ་གྲུབ་པའི་ཆོས་དེ་ལ་ཆགས་པའམ། ཞེ་སྡང་བའམ། གཏི་མུག་པར་བྱ་བ་ཁྱོད་འདོད་དམ། སྨྲས་པ། དེ་ནི་མ་ཡིན་ནོ། །སྨྲས་པ། རིགས་ཀྱི་བུ། ཆོས་ཐམས་ཅད་ནི་འདོད་ཆགས་དང་བྲལ། ཞེ་སྡང་དང་བྲལ། གཏི་མུག་དང་བྲལ་བའི་སྤྱོད་པའང་དེའི་མཚན་ཉིད་དོ། །རིགས་ཀྱི་བུ། དེ་ལྟར་སྤྱོད་པ་གཉིས་སུ་མེད་པའི་ཕྱིར་སོ་སོའི་སྐྱེ་བོའི་སྤྱོད་པ་གང་ཡིན་པ་དེ་ཉིད་འཕགས་པ་རྣམས་ཀྱི་སྤྱོད་པའོ། །རིགས་ཀྱི་བུ། ཡང་སྤྱོད་པ་ཐམས་ཅད་ནི་སྤྱོད་པ་མ་ཡིན་ནོ། །འདོགས་པ་ཐམས་ཅད་ནི་འདོགས་པ་མ་ཡིན་ནོ། །འགྲོ་བ་ཐམས་ཅད་ནི་འགྲོ་བ་མ་ཡིན་པའོ། །སྨྲས་པ། ཚངས་པ། དེ་ཇི་ལྟར་སྤྱོད་པ་ཐམས་ཅད་སྤྱད་པ་མ་ཡིན། སྨྲས་པ། བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་སྤྱད་ཀྱང་ཆོས་ཀྱི་དབྱིངས་ལ་བྲི་བའམ། གང་བར་མི་དམིགས་ཏེ། དེའི་ཕྱིར་སྤྱོད་པ་ཐམས་ཅད་སྤྱོད་པ་མ་ཡིན་ནོ། །སྨྲས་པ། ཚངས་པ། དེ་ཇི་ལྟར་ན་འདོགས་པ་ཐམས་ཅད་འདོགས་པ་མ་ 75b ཡིན་ཞེ་ན། སྨྲས་པ། རིགས་ཀྱི་བུ། ཆོས་ཐམས་ཅད་འདོགས་པ་མ་ཡིན་པས་བཏགས་པ་སྟེ། དེའི་ཕྱིར་ཆོས་ཐམས་ཅད་དུ་འདོགས་པ་ནི་འདོགས་པ་མ་ཡིན་པའོ། །སྨྲས་པ། ཚངས་པ།་དེ་ཇི་ལྟར་ན་འགྲོ་བ་ཐམས་ཅད་འགྲོ་བ་མ་ཡིན་ཞེ་ན། སྨྲས་པ། གར་ཡང་མི་འགྲོ་བའི་ཕྱིར་འགྲོ་བ་ཐམས་ཅད་འགྲོ་བ་མ་ཡིན་པའོ། །དེ་ནས་བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ། ཚངས་པ། ལེགས་སོ། །ལེགས་སོ། །གལ་ཏེ་བཤད་པར་བྱ་བ་དེ་ལྟར་བཤད་པར་བྱའོ་ཞེས་ལེགས་སོ་ཞེས་བྱ་བ་བྱིན་ནོ། །དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་སྨྲས་སོ། །ཚངས་པ། ཁྱོད་གང་འདི་སྐད་དུ་གང་ལ་བྱིས་པ་སོ་སོའི་སྐྱེ་བོ་ཐམས་ཅད་སྤྱོད་པ་དེ་ཉིད་ལ་བདག་སྤྱོད་དོ་ཞེས་ཟེར་ན་སྤྱོད་པ་དེ་ཁྱོད་ཀྱིས་ཐོབ་པ་ཡིན་ནོ། །སྨྲས་པ། རིགས་ཀྱི་བུ། གལ་ཏེ་བདག་ལ་སྐྱེ་བའི་རྒྱུ་ཡོད་ན་ནི། བདག་གི་སྤྱོད་པའང་ཐོབ་པར་འགྱུར་རོ། །སྨྲས་པ། ཚངས་པ། དེ་གལ་ཏེ་མི་སྐྱེ་ན་ཇི་ལྟར་སེམས་ཅན་རྣམས་ཡོངས་སུ་སྨིན་པར་བྱེད། སྨྲས་པ། རིགས་ཀྱི་བུ། དེ་བཞིན་གཤེགས་པས་སྤྲུལ་པའི་སྐྱེ་བ་ཇི་ལྟ་བ་བདག་གི་སྐྱེ་བའང་དེ་དང་འདྲའོ། །སྨྲས་པ། དེ་ནི་དེ་བཞིན་གཤེགས་པས་སྤྲུལ་པ་ལ་སྐྱེ་བ་གང་ཡང་མེད་དོ། །སྨྲས་པ། ཅི་དེ་བཞིན་གཤེགས་པས་སྤྲུལ་པས་སྣང་ངམ། སྨྲས་པ། སངས་རྒྱས་ཁྱུ་ 76a ༄#། །མཆོག་ལྟ་བུར་གྱུར་པའི་ཕྱིར་སྣང་ངོ ། །སྨྲས་པ། རིགས་ཀྱི་བུ་ལས་ཁྱུ་མཆོག་ལྟ་བུར་གྱུར་པའི་ཕྱིར་བདག་གི་སྐྱེ་བའང་དེ་བཞིན་དུ་བལྟའོ། །སྨྲས་པ།་ཚངས་པ། ཇི་ལས་མངོན་པར་འདུ་བྱེད་པ་ལ་སྤྱོད་དམ། སྨྲས་པ། རིགས་ཀྱི་བུ། བདག་ནི་ལས་མངོན་པར་འདུ་བྱེད་པ་ལ་མི་སྤྱོད་དོ། །སྨྲས་པ། ལས་མེད་པ་ལ་དེ་ཇི་ལྟར་ལས་ཁྱུ་མཆོག་ལྟ་བུར་འགྱུར། སྨྲས་པ། ལས་ཇི་ལྟ་བ་བཞིན་དུ་དེའི་ཁྱུ་མཆོག་ཀྱང་དེ་བཞིན་ཉིད་ལས་མི་འདའོ། །དེ་ནས་བཅོམ་ལྡན་འདས་ལ་གནས་བརྟན་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། གླང་པོ་ཆེ་འདི་དག་གི་ལྡེམ་པོ་དག་ལ་གང་འཇུག་པར་འགྱུར་བ་དེ་དག་ནི་བསོད་ནམས་མང་དུ་བསྐྱེད་པར་འགྱུར་རོ། །དེ་ཅིའི་ཕྱིར་ཞེ་ན། བཅོམ་ལྡན་འདས། སྐྱེས་བུ་དམ་པ་དེ་དག་གི་མིང་ཙམ་ཐོས་པའང་ལེགས་པར་ཐོས་པ་ལགས་ན། ཆོས་བསྟན་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས། འདི་ལྟ་སྟེ། དཔེར་ན། ཤིང་ལྗོན་པས་ཆེན་པོ་ལ་མ་བརྟེན་པར་རྩ་བ་དང ། སྡོང་པོ་དང ། ཡལ་ག་དང ། ལོ་མ་དང ། མེ་ཏོག་དང ། འབྲས་བུ་སྟོན་པ་ལྟར། བཅོམ་ལྡན་འདས། སྐྱེས་བུ་དམ་པ་འདི་དག་གི་སྤྱོད་པའི་མཚན་ཉིད་ཀྱང་དེ་བཞིན་དུ་བལྟའོ། །འདི་ལྟར་ཆོས་ཐམས་ཅད་ལ་མི་གནས་ཤིང ། སྤྱོད་པ་དང ། སྐྱེ་བ་དང ། 76b འབྱུང་བ་དང ། འཕོ་བ་དང ། འཆི་བའང་སྟོན་ལ་སངས་རྒྱས་ཀྱི་ཞིང་དག་ནའང་གདའ་བ་དེ་དག་ལ་ལྷག་པར་ཤེས་རབ་ཀྱི་སྤོབས་པ་འདི་ལྟ་བུའང་སྤོབས་པར་འགྱུར་རོ། །བཅོམ་ལྡན་འདས། ཤེས་རབ་ཀྱི་སྤོབས་པས་རྣམ་པར་འཕྲུལ་པ་འདི་ལྟ་བུ་མཐོང་ན་རིགས་ཀྱི་བུའམ། རིགས་ཀྱི་བུ་མོ་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མི་སྐྱེད།། །།བམ་པོ་གསུམ་པ། ཡང་དེའི་ཚེ་བྱང་ཆུབ་སེམས་དཔའ་ཀུན་ཏུ་མེ་ཏོག་ཅེས་བྱ་བ་འཁོར་དེར་འདུས་ཤིང་འདུག་པར་གྱུར་ཏེ། དེས་གནས་བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ། །གནས་བརྟན་ནི་དེ་བཞིན་གཤེགས་པས་ཤེས་རབ་ཅན་གྱི་མཆོག་ཏུ་གསུངས་ན། འདི་ལྟར་ཤེས་རབ་ཀྱི་སྤོབས་པས་རྣམ་པར་འཕྲུལ་པ་འདི་ལྟ་བུས་རྣམ་པར་འཕྲུལ་མི་ནུས་པ་ཅི་གནས་བརྟན་གྱིས་ཆོས་ཀྱི་དབྱིངས་ཁོང་དུ་མ་ཆུད་དམ། གནས་བརྟན་གྱིས་སྨྲས་པ། ཀུན་ཏུ་མེ་ཏོག་།བཅོམ་ལྡན་འདས་ཀྱི་ཉན་ཐོས་རྣམས་ནི་ཡུལ་ཇི་ལྟ་བ་བཞིན་དུ་སྟོན་ཏོ། །སྨྲས་པ། བཙུན་པ་ཤཱ་རིའི་བུ། ཆོས་ཀྱི་དབྱིངས་ཡུལ་དུ་བགྲང་ངམ། སྨྲས་པ། དེ་ནི་མ་ཡིན་ནོ། །སྨྲས་པ། འོ་ན་ཇི་ལྟར་གནས་བརྟན་ཤཱ་རིའི་བུ། ཡུལ་ཇི་ལྟ་བ་བཞིན་དུ་སྟོན། སྨྲས་པ། ཉན་ཐོས་ཀྱི་ཁོང་དུ་ཆུང་པ་ཇི་ཙམ་པ་བསྟན་པའང་དེ་ཙམ་མོ། །སྨྲས་པ། ཅི་གནས་བརྟན་གྱིས་ཆོས་ 77a ༄#། །ཀྱི་དབྱིངས་ཀྱིས་ཡུལ་རྣམ་པ་ཚད་མེད་པ་ཁོང་དུ་ཆུད་དམ། སྨྲས་པ། རིགས་ཀྱི་བུ། དེ་དེ་བཞིན་ནོ། །སྨྲས་པ། ཆོས་ཀྱི་དབྱིངས་ལ་ཚད་ཡོད་པ་མ་ཡིན་པས་ན་ཆོས་ཀྱི་དབྱིངས་ནི་ཚད་མེད་པ་ཡིན་ཏེ། བཙུན་པ་ཤཱ་རིའི་བུ། ཇི་ལྟར་ཚད་མེད་པར་ཁོང་དུ་ཆུད་པ་དེ་བཞིན་དུ་ཚད་མེད་པར་བསྟན་པ་ཡིན་ན། དེ་ཇི་ལྟར་གང་གིས་ཁོང་དུ་ཆུད་པ་ཇི་འདྲ་བར་དེའི་བསྟན་པའང་དེ་འདྲ་བར་འགྱུར། སྨྲས་པ། ཀུན་ཏུ་མེ་ཏོག་།ཆོས་ཀྱི་དབྱིངས་ནི་ཁོང་དུ་ཆུད་པའི་མཚན་ཉིད་མ་ཡིན་ནོ། །སྨྲས་པ། བཙུན་པ་ཤཱ་རིའི་བུ། ཆོས་ཀྱི་དབྱིངས་ཁོང་དུ་ཆུད་པའི་མཚན་ཉིད་མ་ཡིན་ན་ཅི་ཁྱོད་ཆོས་ཀྱི་དབྱིངས་དང་ཐ་དད་དུ་རྣམ་པར་གྲོལ་ལམ། སྨྲས་པ། དེ་ནི་མ་ཡིན་ནོ། །སྨྲས་པ། ཅིའི་ཕྱིར། སྨྲས་པ།་ཆོས་ཀྱི་དབྱིངས་ཐ་དད་པར་འགྱུར་བའི་ཕྱིར་རོ། །སྨྲས་པ། བཙུན་པ་ཤཱ་རིའི་བུ། དེའི་ཕྱིར་ཁོང་དུ་ཆུད་པ་ཇི་ལྟ་བ་བཞིན་དུ་ཆོས་ཀྱི་དབྱིངས་ཀྱང་དེ་བཞིན་ནོ། །སྨྲས་པ། ཀུན་ཏུ་མེ་ཏོག་།བདག་ནི་སྟོན་འདོད་པ་མ་ཡིན་གྱི་བདག་ནི་ཉན་དུ་འདོད་པའོ། །སྨྲས་པ། བཙུན་པ་ཤཱ་རིའི་བུ། ཆོས་ཐམས་ཅད་ཆོས་ཀྱི་དབྱིངས་མི་འགྱུར་བར་ངེས་པ་ལ་ཇི་ལྟར་བཤད་པར་བྱ་བའམ། མཉན་པར་བྱ་བའམ། སྨྲས་པ། དེ་ནི་མ་ཡིན་ནོ། །སྨྲས་པ། འོན་ཅིའི་ཕྱིར་ཁྱོད་བདག་ནི་ཉན་པར་འདོད་པ་ཡིན་གྱི་སྟོན་པར་འདོད་པ་ 77b མ་ཡིན་སྙམ་དུ་སེམས། སྨྲས་པ། རིགས་ཀྱི་བུ། དེ་བཞིན་གཤེགས་པས་ཀྱང་གང་གུས་པར་ཆོས་བསྟན་པ་དང ། གང་གུས་པར་ཆོས་ཉན་པ་གང་ཟག་གཉིས་ནི་བསོད་ནམས་མང་དུ་བསྐྱེད་དོ་ཞེས་གསུངས་ཀྱི། དེའི་ཕྱིར་ཁྱོད་ཀྱིས་ཤོད་ཅིག ། བདག་གིས་མཉན་ཏོ། །སྨྲས་པ། གནས་བརྟན་ཤཱ་རིའི་བུ། འདུ་ཤེས་དང ། ཚོར་བ་ཐམས་ཅད་ལ་འགོག་པར་སྙོམས་པར་ཞུགས་ལ་ཆོས་ཉན་ནུས་ས་མ། སྨྲས་པ། རིགས་ཀྱི་བུ། གང་གིས་མཉན་པར་བྱ་བའི་གཉིས་ལ་འཇུག་པ་འགོག་པ་ལ་མེད་དོ། །སྨྲས་པ། གནས་བརྟན་ཤཱ་རིའི་བུ། ཆོས་ཐམས་ཅད་རང་བཞིན་གྱིས་འགག་པར་འདོད་དམ། སྨྲས་པ། རིགས་ཀྱི་བུ། དེ་བཞིན་ཏེ། ཆོས་ཐམས་ཅད་ནི་ཤིན་ཏུ་འགག་པའོ། །སྨྲས་པ། དེའི་ཕྱིར་གནས་བརྟན་ཤཱ་རིའི་བུ་རྟག་ཏུ་མི་འཆད་པར་ཆོས་མཉན་པའི་སྐལ་བ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་རང་བཞིན་གྱིས་འགག་པའི་ཕྱིར་རོ། །སྨྲས་པ། རིགས་ཀྱི་བུ། ཁྱོད་ཏིང་ངེ་འཛིན་ལས་མ་ལངས་པར་ཆོས་སྟོན་ནུས་སམ། སྨྲས་པ། གནས་བརྟན་ཤཱ་རིའི་བུ། གང་རྟག་ཏུ་མཉམ་པར་མ་བཞག་པའི་ཆོས་གང་ཡང་དམིགས་སམ། སྨྲས་པ། དེ་ནི་མ་ཡིན་ནོ། ། སྨྲས་པ། འོ་ན་བྱིས་པ་སོ་སོའི་སྐྱེ་བོ་ཐམས་ཅད་ཀྱང་མཉམ་པར་བཞག་པར་འགྱུར་རོ། སྨྲས་པ། རིགས་ཀྱི་བུ། ཏིང་ངེ་འཛིན་གང་ལ་བྱིས་པ་སོ་སོའི་སྐྱེ་བོ་རྣམས་མཉམ་པར་ 78a ༄#། །བཞག་པ་ཡིན། སྨྲས་པ། ཆོས་ཀྱི་དབྱིངས་མི་འཁྲུག་པའི་ཏིང་ངེ་འཛིན་ལའོ། །སྨྲས་པ། ཀུན་ཏུ་མེ་ཏོག། དེ་ལྟ་ཡིན་དུ་ཟིན་ན་སོ་སོའི་སྐྱེ་བོ་རྣམས་དང ། འཕགས་པ་རྣམས་སུ་བྱེ་བྲག་མེད་པར་འགྱུར་རོ། །སྨྲས་པ། བཙུན་པ་ཤཱ་རིའི་བུ། དེ་དེ་བཞིན་ཏེ། ང་ནི་འཕགས་པ་དང ། སོ་སོའི་སྐྱེ་བོ་རྣམས་ཐ་དད་དུ་དབྱེ་བར་མི་འདོད་དོ། །དེ་ཅིའི་ཕྱིར་ཞེན། འཕགས་པ་རྣམས་ཀྱིས་ཀྱང་ཆོས་གང་ཡང་མ་འགགས། བྱིས་པ་སོ་སོའི་སྐྱེ་བོ་རྣམས་ཀྱིས་ཀྱང་ཆོས་གང་ཡང་མ་བསྐྱེད་དེ། ཆོས་ཀྱི་དབྱིངས་མཉམ་པ་ཉིད་དེ་གང་ཡིན་པ་དེ་ཉིད་ལས་ཀྱང་མི་འདའོ། །སྨྲས་པ། རིགས་ཀྱི་བུ། ཆོས་རྣམས་ཀྱི་མཉམ་པ་ཉིད་གང་ཡིན། སྨྲས་པ། གང་གནས་བརྟན་གྱིས་ཡོངས་སུ་ཤེས་པ་དེ་སྟོན་ཏེ། གནས་བརྟན་གྱིས་ཀྱང་འཕགས་པའི་ཆོས་རྣམས་བསྐྱེད་དམ། སྨྲས་པ། དེ་མ་ཡིན་ནོ། །སྨྲས་པ། ཇི་ཁྱོད་ཀྱིས་སོ་སོའི་སྐྱེ་བོ་རྣམས་འགག་པར་བྱས་སམ། སྨྲས་པ། དེ་མ་ཡིན་ནོ། །སྨྲས་པ། འོ་ན་ཁྱོད་ཀྱིས་འཕགས་པའི་ཆོས་རྣམས་ཐོབ་བམ། སྨྲས་པ། དེ་མ་ཡིན་ནོ། །སྨྲས་པ། འོ་ན་ཅི་ཁྱོད་ཀྱིས་སོ་སོའི་སྐྱེ་བོའི་ཆོས་རྣམས་ཡོངས་སུ་ཤེས་སམ། སྨྲས་པ། དེ་མ་ཡིན་ནོ། །སྨྲས་པ། འོ་ན་གནས་བརྟན་གྱིས་ཡོངས་སུ་ཤེས་པས་ཅི་མངོན་པར་རྟོགས། སྨྲས་པ། བྱིས་པ་སོ་སོའི་སྐྱེ་བོ་ཐོས་པ་དང་མི་ལྡན་པ་རྣམས་ 78b ཀྱི་དེ་བཞིན་ཉིད་གང་ཡིན་པ་རྣམ་པར་གྲོལ་མ་ཐག་པའི་དེ་བཞིན་ཉིད་ཀྱང་དེ་ཡིན། ཡོངས་སུ་མྱ་ངན་ལས་འདས་པའི་དེ་བཞིན་ཉིད་ཀྱང་དེ་ཡིན་ནོ། །སྨྲས་པ། བཙུན་པ་ཤཱ་རིའི་བུ། དེ་བཞིན་ཉིད་དེ་ནི་མ་ལོག་པ་དེ་བཞིན་ཉིད་དང ། གཞན་མ་ཡིན་པ་དེ་བཞིན་ཉིད་དང ། མི་འགྱུར་བ་དེ་བཞིན་ཉིད་དང ། མི་འཁྲུག་པ་དེ་བཞིན་ཉིད་དེ། བཙུན་པ་ཤཱ་རིའི་བུ། དེ་བཞིན་ཉིད་འདིས་ཆོས་ཐམས་ཅད་ཀྱི་དེ་བཞིན་ཉིད་རྗེས་སུ་རིག་པར་བྱའོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟ་སྟེ།་དཔེར་ན། མེའི་ཕུང་པོ་རབ་ཏུ་འབར་བའི་མེ་ལྕེ་ཐམས་ཅད་ནི་སྲེག་པར་ཉེ་བར་གནས་པ་ལགས་སོ། །བཅོམ་ལྡན་འདས། དེ་བཞིན་དུ་རིགས་ཀྱི་བུ་འདི་དག་གིས་བསྟན་པ་ཐམས་ཅད་ཀྱི་ཆོས་ཀྱི་དབྱིངས་བསྟན་པ་སྟེ། ཆོས་བསྟན་པ་ཐམས་ཅད་ཀྱང་ཉོན་མོངས་པ་ཐམས་ཅད་སྲེག་པར་ཉེ་བར་གནས་པ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དེ་དེ་བཞིན་ནོ། །དེ་ནི་ཇི་སྐད་སྟོན་པ་དེ་བཞིན་ཏེ། རིགས་ཀྱི་བུ་འདི་དག་གིས་བསྟན་པ་ཐམས་ཅད་ཆོས་ཀྱི་དབྱིངས་བསྟན་པ་སྟེ། ཆོས་བསྟན་པ་ཐམས་ཅད་ཀྱང་ཉོན་མོངས་པ་ཐམས་ཅད་སྲེག་པར་ཉེ་བར་གནས་པ་ཡིན་ནོ། །དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་གནས་བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ། ། 79a ༄#། །གནས་བརྟན་ཤཱ་རིའི་བུ། བཅོམ་ལྡན་འདས་ཀྱིས་ཤེས་རབ་དང་ལྡན་པ་རྣམས་ཀྱི་ནང་ན་མཆོག་ཏུ་གསུངས་ན། གནས་བརྟན་ཤཱ་རིའི་བུ། ཤེས་རབ་གང་གིས་ཤེས་རབ་དང་ལྡན་པའི་མཆོག་ཏུ་གསུངས་པའི་ཤེས་རབ་དེ་གང་ཡིན། སྨྲས་པ། དྲ་བ་ཅན་གྱི་འོད། གང་ཉན་ཐོས་སྒྲའི་རྗེས་སུ་འབྲང་བ། རང་གི་རྒྱུད་སྣང་བའི་མཚན་ཉིད། ཉི་ཚེ་བའི་ཡེ་ཤེས་ཀྱིས་རྣམ་པར་གྲོལ་བ་རྣམས་ཀྱི་ཤེས་རབ་སྟེ། ཤེས་རབ་དེས་བདག་ཤེས་རབ་དང་ལྡན་པ་རྣམས་ཀྱི་མཆོག་ཏུ་གསུངས་ཀྱི་བྱང་ཆུབ་སེམས་དཔའི་ཤེས་རབ་ཀྱིས་ནི་མ་ཡིན་ནོ། །སྨྲས་པ། ཅི་ཤེས་རབ་སྤྲོས་པའི་མཚན་ཉིད་དམ། སྨྲས་པ། དེ་མ་ཡིན་ནོ། །སྨྲས་པ། འོ་ན་ཤེས་རབ་མཉམ་པ་ཉིད་རྗེས་སུ་སྤྱོད་པའམ། སྨྲས་པ། རིགས་ཀྱི་བུ། དེ་དེ་བཞིན་ནོ། །སྨྲས་པ། གནས་བརྟན་ཤཱ་རིའི་བུ། མཉམ་པ་ཉིད་ཀྱི་རྗེས་སུ་སྤྱོད་པའི་ཤེས་རབ་ཀྱིས་ཇི་ལྟར་ཤེས་རབ་ཚད་ཅན་དུ་བཤད། སྨྲས་པ། རིགས་ཀྱི་བུ། ཆོས་ཀྱི་དབྱིངས་ཀྱི་རྒྱུས་ནི་ཤེས་རབ་ཚད་མེད་དོ། །ཡུལ་ཇི་ལྟ་བ་བཞིན་དུ་ཡེ་ཤེས་འཇུག་པས་ནི་ཚད་ཟིན་པའོ། །སྨྲས་པ། བཙུན་པ་ཤཱ་རིའི་བུ། ཡེ་ཤེས་ཚད་མེད་པའམ། འོན་ཏེ་ཚད་ཡོད་པ་ཡིན། སྨྲས་པ། རིགས་ཀྱི་བུ། ཡེ་ཤེས་ནི་ཚད་མེད་པའོ། །སྨྲས་པ། འོ་ན་ཚད་མེད་པ་ཇི་ལྟར་ཚད་ཟིན་པ་ 79b སྟོན། དེ་ནས་གནས་བརྟན་ཤཱ་རིའི་བུ་ཅང་མི་ཟེར་བར་འགྱུར་ཏོ། །དེ་ནས་སངས་རྒྱས་ཀྱི་མཐུས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ།། བཅོམ་ལྡན་འདས། གཞོན་ནུར་གྱུར་པ་དྲ་བ་ཅན་གྱི་འོད་ལ་ཅིའི་སླད་དུ་དྲ་བ་ཅན་གྱི་འོད་ཅེར་བགྱི། དེ་ནས་བཅོམ་ལྡན་འདས་ཀྱིས་དྲ་བ་ཅན་གྱི་འོད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། གང་གིས་ལྷ་དང་བཅས་པའི་འཇིག་རྟེན་འདི་དགའ་བར་གྱུར་ནས་དགེ་བའི་རྩ་བ་ཡོངས་སུ་སྨིན་ཅིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་འགྱུར་བའི་འོད་རང་གི་དགེ་བའི་རྩ་བས་ཡོངས་སུ་སྦྱངས་པ་ཁྱོད་ཀྱིས་སྟོན་ཅིག་།དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་བཅོམ་ལྡན་འདས་ལ་ལེགས་སོ། །ཞེས་གསོལ་ཏེ་མཉན་ནས་བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་ནས། ལག་པ་གཡས་པ་དྲ་བ་ཅན་གྱི་སེན་མོ་ཟངས་ལྟ་བུ་ལས་འོད་ཟེར་བྱུང་ནས་འོད་ཟེར་དེས་ཚད་མེད་མུ་མེད་པའི་འཇིག་རྟེན་གྱི་ཁམས་ཐལ་ནས་ཕྱོགས་བཅུའི་སངས་རྒྱས་གྱི་ཞིང་ཚད་མེད་གྲངས་མེད་པ་རྣམས་འོད་ཀྱིས་ཁྱབ་པར་བྱས་ཏེ། འོད་དེས་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གྲངས་མེད་པ་ན་སེམས་ཅན་ང་རྒྱལ་བ་པའི་ 80a ༄#། །སེམས་ཅན་ནམ། དུད་འགྲོའི་སྐྱེ་གནས་སུ་སྐྱེས་པའམ། གཤིན་རྗེའི་འཇིག་རྟེན་པའམ། ལོང་བའམ། འོན་པའམ། ཐེང་པོའམ། ལག་ཞ་འམ། ནད་བུ་ཅན་ནམ། ཆགས་པའམ། གཏུམ་པའམ། རྨོངས་པའམ། གཅེར་བུའམ། ལྟོགས་པའམ། སྐོམ་པའམ། བཅིངས་པའམ། གཟུང་བའམ། དབུལ་བའམ། རིང་པའམ། རྒས་པའམ། འཆི་པའི་ཆོས་ཅན་ནམ། སེར་སྣ་ཅན་ནམ། གནོད་པར་སེམས་པའམ། ངང་ཚུལ་ངན་བ་ཅན་ནམ། འཇུངས་པའམ། དྲན་པ་ཉམས་པའམ། འཆལ་པའི་ཤེས་རབ་ཅན་ནམ། མ་དད་པའམ། ཐོས་པ་ཉུང་བའམ། བསོད་ནམས་ཆུང་པའམ། ངོ་ཚ་མི་ཤེས་པའམ། ཁྲེལ་མེད་པའམ། ལྟ་བ་ཐིབས་པོར་གྱུར་པ་ཇི་སྙེད་ཡོད་པ་དེ་དག་ཐམས་ཅད་འོད་དེས་རེག་མ་ཐག་ཏུ་བདེ་བ་ཐམས་ཅད་དང་ལྡན་པར་འགྱུར་ཏོ། །སེམས་ཅན་གང་ཡང་འདོད་ཆགས་དང ། ཞེ་སྡང་དང ། གཏི་མུག་དང ། ང་རྒྱལ་དང ། འཆབ་པ་དང ། ཕྲག་དོག་དང ། ཁྲོ་བའི་ཡོངས་སུ་གདུང་བས་ཉམ་ང་བར་གྱུར་པ་མེད་དོ། །སེམས་ཅན་ཐམས་ཅད་ཀྱང་དགའ་བ་དང ། བདེ་བ་དང་ལྡན་པར་གྱུར་ཏོ། །གང་སངས་རྒྱས་ཀྱི་སྤྱན་སྔར་བྱང་ཆུབ་སེམས་དཔའི་འཁོར་ཏམ། ཉན་ཐོས་ཀྱི་འཁོར་ཏམ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་ 80b དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མའི་འཁོར་དེ་དག་ཐམས་ཅད། འདི་ལྟ་སྟེ་ཁ་དོག་གཅིག་ཏུ་གསེར་གྱི་ཁ་དོག་ལྟ་བུར་སྣང་ངོ ། །ཐམས་ཅད་ཁ་དོག་གཅིག་ཏུ། འདི་ལྟ་སྟེ། དེ་བཞིན་གཤེགས་པའི་ཁ་དོག་དང ། མཚན་དང ། གཟུགས་འཆང་པར་སྣང་ངོ ། ཐམས་ཅད་ཀྱང་སྤྱི་གཙུག་ལྟར་མི་སྣང་ཞིང་ལུས་མཆོག་གི་གཟུགས་སུ་སྣང་ངོ ། །ཐམས་ཅད་ཀྱང་པདྨའོ་སྟན་ལ་འཁོད་ཅིང་རིན་པོ་ཆེའི་དྲ་བས་ཁེབས་པར་སྣང་ངོ ། །དེ་དག་ཐམས་ཅད་ཀྱང ། འདི་ལྟ་སྟེ། སངས་རྒྱས་མཐོང་བའི་རང་བཞིན་དུ་རང་བཞིན་གཅིག་ཏུ་སྣང་ངོ ། །དེ་དག་ཐམས་ཅད་ཀྱང ། འདི་ལྟ་སྟེ། དཔེར་ན། དགའ་བའི་རྣམ་པར་བཀོད་པའི་ཏིང་ངེ་འཛིན་ཐོབ་པའི་བྱང་ཆུབ་སེམས་དཔའ་བཞིན་དུ་འདི་ལྟ་བུའི་བདེ་བ་སྐྱེས་པར་གྱུར་ཏོ། །དེ་ནས་འཁོར་དེ་ཐམས་ཅད་ངོ་མཚར་དུ་གྱུར་ཅིང་ཕན་ཚུན་དབྱེར་མེད་དེ། སྟོན་པར་ཡང་ལྷག་པར་མི་སེམས། བདག་ཉིད་ཀྱང་དམན་པར་མི་སེམས་སོ། །འོད་དེ་དག་བཏང་མ་ཐག་ཏུ་འོག་གི་ཕྱོགས་ནས་བྱང་ཆུབ་སེམས་དཔའ་བཞི་བྱུང་སྟེ། བཞི་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་སྨོན་ལམ་ཡང་དག་འཕགས་ཞེས་བྱ་བ་དང ། ཁྱད་པར་བཟང་ཞེས་བྱ་བ་དང ། ཡེ་ཤེས་ཟླ་བ་ཞེས་བྱ་བ་དང ། 81a ༄#། །བྱང་ཆུབ་སེམས་དཔའ་སེམས་དཔའ་ཆེན་པོ་གཞན་གྱིས་མི་ཐུབ་རྒྱལ་མཚན་ཞེས་བྱ་བ་སྟེ། དེ་ནས་ཐལ་མོ་སྦྱར་ནས་གང་ལ་ཕྱག་བྱ་བའི་དེ་བཞིན་གཤེགས་པ་ཡང་དག་པ་འདིའི་ནང་ན་གང་ཡིན་སྙམ་སྟེ། ཕྱག་འཚལ་ཞིང་འཁོད་པ་དང ། དེ་དག་གི་བར་སྣང་ལས་འདི་ལྟར་འཁོར་འདི་ཐམས་ཅད། འདི་ལྟ་སྟེ། དེ་བཞིན་གཤེགས་པའི་ཁ་དོག་ཏུ་ཁ་དོག་གཅིག་ཏུ་སྣང་བ་ནི་གཞོན་ནུར་གྱུར་པ་དྲ་བ་ཅན་གྱི་འོད་ཀྱི་བྱེ་བྲག་གོ་ཞེས་སྒྲ་ཐོས་སོ། །དེ་ནས་བྱང་ཆུབ་སེམས་དཔའ་དེ་བཞིས་འདི་སྐད་ཅེས་འཛེར་ཏེ། བདེན་པ་དང ། བདེན་པའི་ཚིག་གང་གིས་ཇི་ལྟར་འཁོར་འདི་ཁ་དོག་དང ། གཟུགས་གཅིག་སྟེ་བྱེ་བྲག་མེད་པར་དེ་བཞིན་དུ་ཆོས་ཐམས་ཅད་ཀྱང་བྱེ་བྲག་མེད་ཅེན། བདེན་པ་དང ། བདེན་པའི་ཚིག་དེས་བཅོམ་ལྡན་འདས་ཤཱཀྱ་ཐུབ་པ་ལ་ཐ་དད་དུ་དབྱེ་བ་ལྷག་པ་གང་མཐོང་བས་དེ་བཞིན་གཤེགས་པ་ལ་མཆོད་པ་བྱེད་པར་འགྱུར་བ་འགའ་ཞིག་མཐོང་བར་ཤོག་ཅིག་ཅེས་བྱས་པ་དང ། དེ་ནས་དེའི་མོད་ལ་བཅོམ་ལྡན་འདས་སེང་གེའི་ཁྲི་པདྨ་ཅན་དང་བཅས་ཏེ། ཏ་ལ་གང་ཙམ་དུ་མངོན་པར་འཕགས་བར་གྱུར་ཏོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བཞི་པོ་དེ་དག་གི་མགོ་བོས་ཕྱག་བཙལ་ནས་ཚིག་འདི་སྐད་ཅེས་འཛེར་ཏོ། །བཅོམ་ལྡན་འདས། དེ་ 81b བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཡེ་ཤེས་ནི་བསམ་གྱིས་མི་ཁྱབ་བོ། །འདི་ལྟར་སེམས་ཅན་རྣམས་ལ་བདེ་བ་བསྟན་པས་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱི་བསོད་ནམས་དང ། སྨོན་ལམ་འདིའང་བསམ་གྱིས་མི་ཁྱབ་བོ། །དེ་ནས་བཅོམ་ལྡན་འདས་ཀྱིས་གཞོན་ནུར་གྱུར་པ་དྲ་བ་ཅན་གྱི་འོད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ།་ཁྱོད་ཀྱིས་སངས་རྒྱས་ཀྱི་བྱ་བ་བྱས་ཏེ་སེམས་ཅན་ཚད་མེད་པ་རྣམས་ཁྱོད་ཀྱིས་བྱང་ཆུབ་ལ་བཀོད་ཀྱི་རྫུ་འཕྲུལ་འདི་ཕྱིར་རྟུལ་ཅིག་།དེ་ནས་གཞོན་ནུར་གྱུར་པ་དྲ་བ་ཅན་གྱི་འོད་ཀྱིས་འོད་དེ་དག་ཕྱིར་བརྟུལ་ཏོ། །འོད་དེ་ཕྱིར་བརྟུལ་མ་ཐག་ཏུ་འཁོར་དེ་ཐམས་ཅད་སྤྱོད་ལམ་སྔ་མ་ཇི་ལྟ་བ་བཞིན་དུ་སྣང་ངོ ། །བཅོམ་ལྡན་འདས་ཀྱང་སྔ་མ་ཁོ་བ་བཞིན་དུ་སེང་གེའི་ཁྲི་པད་མོ་ཅན་ལ་བཞུགས་པར་སྣང་ངོ ། །དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་འདི་བཞི་གང་ནས་མཆིས། བྱང་ཆུབ་སེམས་དཔའ་དེ་བཞིས་སྨྲས་པ། ཁོ་བོ་ཅག་འོག་གི་འཇིག་རྟེན་གྱི་ཁམས་ནས་འོངས་སོ། །སྨྲས་པ། འཇིག་རྟེན་གྱི་ཁམས་དེ་ནི་རིན་པོ་ཆེ་ཐམས་ཅད་སྟོན་པ་ཞེས་བྱའོ། །སྨྲས་པ། དེ་ན་དེ་བཞིན་གཤེགས་པའི་མཚན་ཅི་ཞེས་བྱ་བ་ཞིག་ཆོས་འཆད། སྨྲས་པ། དེ་བཞིན་གཤེགས་པ་དེའི་མཚན་རིན་ 82a ༄#། །པོ་ཆེ་གདུགས་གཅིག་པ་ཞེས་བྱའོ། །སྨྲས་པ། འཇིག་རྟེན་གྱི་ཁམས་དེ་འདི་ནས་ཇི་སྲིད་ཅིག་ཡོད། སྨྲས་པ། བཅོམ་ལྡན་འདས་མཁྱེན་ཏོ། །སྨྲས་པ། ཁྱེད་རྣམས་འདིར་ཅི་ལ་འོངས། སྨྲས་པ། བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འོད་བཏང་ནས་འོད་དེས་ཁོ་བོ་ཅག་ལ་རེག་པ་སྟེ། རེག་མ་ཐག་ཏུ་བཅོམ་ལྡན་འདས་ཤཱཀྱ་ཐུབ་པའི་མཚན་དང ། བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱི་མིང་ཐོས་ནས། བཅོམ་ལྡན་འདས་དང ། སྐྱེས་བུ་དམ་པ་འདི་ལ་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་བདག་ཅག་འདིར་འོངས་སོ། །དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས། འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་གྱི་ཁམས་རིན་པོ་ཆེ་ཐམས་ཅད་སྟོན་པ་ཞེས་བགྱི་བ་བཅོམ་ལྡན་འདས་རིན་པོ་ཆེ་གདུགས་གཅིག་པ་དེ་བཞིན་གཤེགས་པའི་སངས་རྒྱས་ཀྱི་ཞིང་དེ་ཇི་སྲིད་ཅིག་ན་མཆིས། བཅོམ་ལྡན་འདས་ཀྱིས་བཀའ་སྩལ་པ། འཇིག་རྟེན་གྱི་ཁམས་འདི་ནས་འོག་ཏུ་སངས་རྒྱས་ཀྱི་ཞིང་གངྒཱའི་ཀླུང་བདུན་ཅུ་རྩ་གཉིས་ཀྱི་བྱེ་མ་སྙེད་འདས་པ་ན་བྱང་ཆུབ་སེམས་དཔའ་འདི་བཞི་གང་ནས་འདིར་འོངས་པའི་འཇིག་རྟེན་གྱི་ཁམས་རིན་པོ་ཆེ་ཐམས་ཅད་སྟོན་པ་བཅོམ་ལྡན་འདས་རིན་པོ་ཆེ་གདུགས་གཅིག་ 82b པ་དེ་བཞིན་གཤེགས་པའི་སངས་རྒྱས་ཀྱི་ཞིང་ཡོད་དོ། །གསོལ་པ། དེ་དག་དེ་ནས་ཇི་སྲིད་ཀྱིས་འདིར་མཆིས། བཀའ་སྩལ་པ། སེམས་ཀྱི་སྐད་ཅིག་པ་གཅིག་གིས་དེར་མི་སྣང་བར་གྱུར་ཏེ་འདིར་ཕྱིན་ཏོ། །གསོལ་པ། བཅོམ་ལྡན་འདས། འདི་ལྟར་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འོད་ཟེར་ཇི་སྲིད་དུ་མཆིས་པ་དང ། རིགས་ཀྱི་བུ་འདི་དག་དེ་ལྟར་མྱུར་དུ་ཕྱིན་ཏེ། བྱང་ཆུབ་སེམས་དཔའ་རྣམས་ཀྱི་འོད་ཟེར་གཏོང་བ་དང ། རྫུ་འཕྲུལ་གྱི་སྟོབས་ནི་ངོ་མཚར་ཏོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། དེ་དེ་བཞིན་ཏེ། ཇི་སྐད་ཟེར་པ་དེ་བཞིན་ནོ། །གང་ཉན་ཐོས་དང ། རང་སངས་རྒྱས་ཐམས་ཅད་ཀྱིས་མ་ཡིན་པ་བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་བསམ་གྱིས་མི་ཁྱབ་བོ། །དེ་ནས་ཚེ་དང་ལྡན་པ་འོད་སྲུང་ཆེན་པོས་གཞོན་ནུར་གྱུར་པ་དྲ་བ་ཅན་གྱི་འོད་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་ཀྱི་འོད་ཀྱིས་འཁོར་འདི་དག་ལ་རེག་ནས་ཁ་དོག་གཅིག་ཏུ། འདི་ལྟ་སྟེ། གསེར་གྱི་ཁ་དོག་ཏུ་འགྱུར་ན་འདི་གང་གི་མཐུ། སྨྲས་པ། བཅོམ་ལྡན་འདས་ཉིད་ལ་འོད་སྲུང་ཆེན་པོ་ཁྱོད་ཀྱིས་གསོལ་ཅིག་དང ། དེ་ཉིད་ཁྱོད་ལ་སྟོན་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། ལྟས་སྔར་བྱུང་བ་འདི་སུའི་ལགས། བཅོམ་ལྡན་འདས་ཀྱིས་བཀའ་སྩལ་པ་ 83a ༄#། །འོད་སྲུང ། དྲ་བ་ཅན་གྱི་འོད་བྱང་ཆུབ་ཐོབ་པའི་འཁོར་ཁ་དོག་གཅིག་ཏུ། འདི་ལྟ་སྟེ། གསེར་གྱི་ཁ་དོག་ཏུ་འགྱུར་རོ། །འཁོར་རྣམས་གཅིག་ལ་མོས་པ། འདི་ལྟ་སྟེ། ཐམས་ཅད་མཁྱེན་པའི་སེམས་ལ་མོས་པར་འགྱུར་རོ། །དེ་ན་ཉན་ཐོས་དང ། རང་སངས་རྒྱས་རྣམས་ཀྱི་མིང་ཡང་མེད་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཤ་སྟག་གི་དགེ་འདུན་དུ་འགྱུར་རོ། །འོད་སྲུང་ཆེན་པོས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་སངས་རྒྱས་ཀྱི་ཞིང་དེར་སྐྱེ་བར་འགྱུར་བ་དེ་ནི་དེ་བཞིན་གཤེགས་པ་ཉིད་དུ་གཟུང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། ཇི་སྐད་ཟེར་བ་དེ་བཞིན་ཏེ། དེ་ནི་དེ་བཞིན་གཤེགས་པ་ཉིད་དུ་རིག་པར་བྱའོ། །དེ་ནས་འཁོར་དེའི་ནང་ནས་སྲོག་ཆགས་སྟོང་ཕྲག་བཞི་བཅུ་རྩ་བཞི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་སངས་རྒྱས་ཀྱི་ཞིང་དེར་སྨོན་ལམ་འདེབས་ཤིང ། འདི་སྐད་དུ། བཅོམ་ལྡན་འདས། ནམ་བྱང་ཆུབ་སེམས་དཔའ་འདྲ་བ་ཅན་གྱི་འོད་ཀྱིས་བྱང་ཆུབ་ཐོབ་པར་འགྱུར། དེའི་ཚེ་བདག་ཅག་རྣམས་སངས་རྒྱས་ཀྱི་ཞིང་དེར་སྐྱེ་བར་ཞོག་ཅིག་ཅེས་སྨྲས་སོ། །དེ་ནས་བཅོམ་ལྡན་འདས་ལ་གནས་བརྟན་འོད་སྲུང་ཆེན་པོས་འདི་སྐད་ཅེས་གསོལ་ཏོ།། 83b བཅོམ་ལྡན་འདས། བྱང་ཆུབ་སེམས་དཔའ་དྲ་བ་ཅན་གྱི་འོད་ཡུན་ཇི་སྲིད་ཅིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། ཁྱོད་ཀྱིས་དེ་བཞིན་དུ་བྱང་ཆུབ་སེམས་དཔའ་དྲ་བ་ཅན་གྱིས་འོད་ལ། རིགས་ཀྱི་བུ། ཁྱོད་ཡུན་ཇི་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཞེས་དྲིས་ཤིག། དེ་ནས་གནས་བརྟན་འོད་སྲུང་ཆེན་པོས་བྱང་ཆུབ་སེམས་དཔའ་དྲ་བ་ཅན་གྱི་འོད་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་ཡུན་ཇི་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར། དྲ་བ་ཅན་གྱི་འོད་ཀྱིས་སྨྲས་པ། བཙུན་པ་འོད་སྲུང་ཆེན་པོ། ལ་ལ་ཞིག་གིས་སྒྱུ་མ་སྤྲུལ་བའི་སྐྱེས་བུ་ལ། རིགས་ཀྱི་བུ། ཁྱོད་ཡུན་ཇི་ཙམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཞེས་དྲིས་ན་ཇི་སྐད་དུ་ལུང་སྟོན། སྨྲས་པ། རིགས་ཀྱི་བུ། སྒྱུ་མས་སྤྲུལ་པ་ལ་ཡང་དག་པར་ཡོངས་སུ་གྲུབ་པ་མེད་ན་དེ་ཅི་ཞིག་ལུང་སྟོན་པར་འགྱུར། སྨྲས་པ། བཙུན་པ་འོད་སྲུང་ཆེན་པོ། དེ་དེ་བཞིན་ཏེ། རྒྱུ་མས་སྤྲུལ་པ་བཞིན་དུ་ཆོས་ཐམས་ཅད་ཡོངས་སུ་མ་གྲུབ་པ་ཡིན་ན་སུ་ལ་ཁྱོད་ཡུན་ཇི་ཙམ་གྱིས་བླ་ན་མེད་པ་ཡང་ 84a ༄#། །དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཞེས་འདྲི། སྨྲས་པ། རིགས་ཀྱི་བུ། ཇི་ལྟར་སྒྱུ་མས་སྤྲུལ་པ་དབེན་ཞིང་འགྱུར་བ་མེད་པ། ཡོངས་སུ་རྟོགས་པ་མེད་པ། བྱེད་པ་མེད་པ་དེ་བཞིན་དུ་ཁྱོད་ཀྱང་གལ་ཏེ་དེ་འདྲ་ན་ཁྱོད་ཚད་མེད་པའི་སེམས་ཅན་རྣམས་ཀྱི་དོན་ཇི་ལྟར་བྱེད། སྨྲས་པ། བཙུན་པ་འོད་སྲུང་ཆེན་པོ། སྒྱུ་མའི་རང་བཞིན་གང་ཡིན་པ་དེ་བྱང་ཆུབ་ཀྱང་དེའི་རང་བཞི་ནོ། །བྱང་ཆུབ་ཀྱི་རང་བཞིན་གང་ཡིན་པ་དེ་སེམས་ཅན་རྣམས་ཀྱང་དེའི་རང་བཞིན་ནོ། ། སྒྱུ་མ་དང ། བྱང་ཆུབ་དང ། སེམས་ཅན་གྱི་རང་བཞིན་གང་ཡིན་པ་དེ་ཆོས་ཐམས་ཅད་ཀྱང་དེའི་རང་བཞིན་ཡིན་ཏེ། བཙུན་པ་འོད་སྲུང་ཆེན་པོ། ཁོ་བོས་ནི་གང་གི་ཡང་དོན་དང ། དོན་མ་ཡིན་པར་མ་མཐོང་ངོ ། །སྨྲས་པ། རིགས་ཀྱི་བུ། ཁྱོད་སངས་རྒྱས་སུ་འགྱུར་བར་མ་ཞུགས་སམ། སྨྲས་པ། བཙུན་པ་འོད་སྲུང་ཆེན་པོ། ཅི་དེ་བཞིན་གཤེགས་པ་རྣམས་ཀྱི་བྱང་ཆུབ་འཇུག་པའི་མཚན་ཉིད་དམ། སྨྲས་པ། དེ་མ་ཡིན་ནོ། །སྨྲས་པ། དེ་བས་ན་ཁོ་བོ་སངས་རྒྱས་སུ་འགྱུར་བ་དང ། ཉན་ཐོས་སུ་འགྱུར་བ་དང ། རང་སངས་རྒྱས་སུ་འགྱུར་བའི་ཕྱིར་མ་ཞུགས་སོ། །སྨྲས་པ། རིགས་ཀྱི་བུ། ཁྱོད་ཅི་ལ་ཞུགས། སྨྲས་པ། དེ་བཞིན་ཉིད་གང་ལ་ཞུགས་པ་དེ་ལ་བདག་ཞུགས་སོ། །སྨྲས་པ། 84b རིགས་ཀྱི་བུ། དེ་བཞིན་ཉིད་ནི་ཞུགས་པའང་མེད། ལྡོག་པའང་མེད་དོ། །སྨྲས་པ། བཙུན་པ་འོད་སྲུང་ཆེན་པོ། ཇི་ལྟར་དེ་བཞིན་ཉིད་མ་ཞུགས་ཤིང་མི་ལྡོག་པ་དེ་བཞིན་དུ་ཆོས་ཐམས་ཅད་དེ་བཞིན་ཉིད་ཀྱི་འཇུག་པ་ཞུགས་པ་ལ་མི་འཇུག་མི་ལྡོག་གོ། སྨྲས་པ། དྲ་བ་ཅན་གྱི་འོད། གལ་ཏེ་ཁྱོད་མི་འཇུག་མི་ལྡོག་ན་སེམས་ཅན་རྣམས་ཇི་ལྟར་ཡོངས་སུ་སྨིན་པར་བྱེད། སྨྲས་པ། བཙུན་པ་འོད་སྲུང་ཆེན་པོ། གང་སྨོན་ལམ་འདེབས་པ་འདི་དག་ནི་སེམས་ཅན་ཡོངས་སུ་སྨིན་པར་བྱེད་པ་ལ་བརྩོན་པ་མ་ཡིན་ནོ། །གང་ཆོས་གང་ལས་ཀྱང་མི་ལྡོག་པ་དེ་དག་སེམས་ཅན་ཡོངས་སུ་སྨིན་པར་བྱེད་པ་ལ་བརྩོན་པ་མ་ཡིན་ནོ། །སྨྲས་པ། རིགས་ཀྱི་བུ། ཁྱོད་སེམས་ཅན་རྣམས་འཁོར་བ་ལས་མི་ལྡོག་གམ། སྨྲས་པ། བདག་འཁོར་བ་ཉིད་མི་དམིགས་ན། ཇི་ལྟར་སེམས་ཅན་རྣམས་འཁོར་བ་ལས་བཟློག་པར་བྱ། སྨྲས་པ། རིགས་ཀྱི་བུ། ཁྱོད་སེམས་ཅན་རྣམས་མྱ་ངན་ལས་འདས་པ་ལ་མི་འཛུད་དམ། སྨྲས་པ། མྱ་ངན་ལས་འདས་པ་ཉིད་བདག་གིས་མ་མཐོང་ན་སེམས་ཅན་རྣམས་ཇི་ལྟར་དེ་ལ་གཟུད་པར་བྱ། སྨྲས་པ། རིགས་ཀྱི་བུ། དེ་སྟེ་འདི་ལ་འཁོར་བའང་མེད། མྱ་ངན་ལས་འདས་པའང་མེད་ན། འོན་ཅིའི་ཕྱིར་བྱང་ཆུབ་སེམས་དཔའ་སེམས་ཅན་ཡོངས་སུ་མྱ་ངན་ལས་འདའ་བའི་ཕྱིར་ཀུན་ཏུ་སྤྱོད། 85a ༄#། །སྨྲས་པ། བཙུན་པ་འོད་སྲུང་ཆེན་པོ། གང་འཁོར་བར་དམིགས་པ་དང ། མྱ་ངན་ལས་འདས་པར་ཡོངས་སུ་རྟོགས་པ་དང ། སེམས་ཅན་དུ་འདུ་ཤེས་པ་ལ་གནས་པས་བྱང་ཆུབ་ཏུ་སྤྱོད་ན་དེ་དག་བྱང་ཆུབ་སེམས་དཔའ་ཞེས་མི་བྱའོ། །སྨྲས་པ། རིགས་ཀྱི་བུ། ཁྱོད་ཅི་ལ་སྤྱོད། སྨྲས་པ། བཙུན་པ་འོད་སྲུང་ཆེན་པོ། ཁོ་བོ་ནི་འཁོར་བ་དང ། མྱ་ངན་ལས་འདས་པ་དང ། སེམས་ཅན་དུ་འདུ་ཤེས་པ་ལ་མི་སྤྱོད་མོད་ཀྱི། བཙུན་པ་འོད་སྲུང་ཆེན་པོ། ཁྱོད་ཅི་ལ་སྤྱོད་ཅེས་དེ་སྐད་འདྲི་ན། བཙུན་པ་འོད་སྲུང་ཆེན་པོ། ཁོ་བོ་ནི་དེ་བཞིན་གཤེགས་པའི་སྤྲུལ་པ་གང་ལ་སྤྱོད་པ་དེ་ཉིད་ལ་སྤྱོད་དོ། །སྨྲས་པ། རིགས་ཀྱི་བུ། དེ་བཞིན་གཤེགས་པའི་སྤྲུལ་པ་ནི་ཅི་ལའང་མི་སྤྱོད་དོ། ། སྨྲས་པ། བཙུན་པ་འོད་སྲུང་ཆེན་པོ། སེམས་ཅན་ཐམས་ཅད་ཀྱི་སྤྱོད་པའི་མཚན་ཉིད་ཀྱང་དེ་ལྟ་བུར་བལྟའོ། །སྨྲས་པ། རིགས་ཀྱི་བུ། དེ་སྟེ་སེམས་ཅན་ཐམས་ཅད་ཀྱི་སྤྱོད་པའི་མཚན་ཉིད་དེ་ལྟ་བུ་ཡིན་དུ་ཟིན་ན་དེ་བཞིན་གཤེགས་པའི་སྤྲུལ་པ་རྣམས་ནི་ཆགས་པར་མི་འགྱུར། །ཞེ་སྡང་བར་མི་འགྱུར། རྨོངས་པར་མི་འགྱུར་ན། ཅིའི་ཕྱིར་སེམས་ཅན་རྣམས་ལ་འདོད་ཆགས་དང ། ཞེ་སྡང་དང ། གཏི་མུག་འབྱུང ། སྨྲས་པ། དེ་བས་ན་གནས་བརྟན་ཉིད་ལ་འདི་དྲིས་ཤིག ། ཁྱོད་ཀྱི་མོས་པ་ཇི་ལྟ་བ་དེ་བཞིན་དུ་ 85b འདི་ལུང་སྟོན་ཅིག། གནས་བརྟན་འོད་སྲུང་ཆེན་པོ་ལ་ད་ལྟར་འདོད་ཆགས་དང ། ཞེ་སྡང་དང ། གཏི་མུག་རྣམས་ཡོད་དམ། སྨྲས་པ། དེ་ནི་མ་ཡིན་ནོ། །སྨྲས་པ། འོ་ན་ཁྱེད་ཀྱི་འདོད་ཆགས་དང ། ཞེ་སྡང་དང ། གཏི་མུག་ཟད་དམ། མེད་པར་གྱུར་ཏམ། སྨྲས་པ། དེ་ནི་མ་ཡིན་ནོ། །སྨྲས་པ། གལ་ཏེ་གནས་བརྟན་གྱི་འདོད་ཆགས་དང ། ཞེ་སྡང་དང ། གཏི་མུག་ཀྱང་མེད་ལ། ཟད་པའམ། མེད་པར་འགྱུར་བའང་མ་ཡིན་ན་ཅི་ཁྱེད་ཀྱི་འདོད་ཆགས་དང ། ཞེ་སྡང་དང ། གཏི་མུག་རྣམས་འདུག་གམ། སྨྲས་པ། རིགས་ཀྱི་བུ། བྱིས་པ་སོ་སོའི་སྐྱེ་བོ་ཕྱིན་ཅི་ལོག་དང་ལྡན་པ་རྣམས་ཀྱི་རྟོག་པ་དང ། རྣམ་པར་རྟོག་པ་དང ། ཡོངས་སུ་རྟོག་པའི་གནས་ལ་འདོད་ཆགས་དང ། ཞེ་སྡང་དང ། གཏི་མུག་རྣམས་འབྱུང་གི། འཕགས་པའི་ཆོས་འདུལ་བ་ལ་ནི་ཕྱིན་ཅི་ལོག་ཁོང་དུ་ཆུད་པས་རྟོག་པ་དང ། རྣམ་པར་རྟོག་པ་དང ། ཡོངས་སུ་རྟོག་པ་མི་འབྱུང་སྟེ། དེ་ལ་འདོད་ཆགས་ཀྱང་མེད། ཞེ་སྡང་ཡང་མེད། གཏི་མུག་ཀྱང་མེད་དོ། །སྨྲས་པ། བཙུན་པ་འོད་སྲུང་ཆེན་པོ། འདི་ཇི་སྙམ་དུ་སེམས། གང་ཕྱིན་ཅི་ལོག་ལས་བྱུང་བའི་ཉོན་མོངས་པ་དེ་ཡང་དག་པ་མིན་ནམ། སྨྲས་པ། དེ་མ་ཡིན་ཏེ། དེ་ནི་ཡང་དག་པ་མ་ཡིན་ནོ། །སྨྲས་པ། བཙུན་པ་འོད་སྲུང་ཆེན་པོ། འདི་ཅི་སྙམ་དུ་སེམས། གང་ཡང་དག་པ་མ་ཡིན་པ་དེ་ན་མ་ཡང་ 86a ༄#། །ཡང་དག་པར་འགྱུར་རམ། སྨྲས་པ། དེ་མ་ཡིན་ནོ། །སྨྲས་པ། གནས་བརྟན་ཡང་དག་པ་མ་ཡིན་པ་གང་ཡིན་པའི་ཡང་དག་པ་མ་ཡིན་པ་དེ་ལས་འདོད་ཆགས་དང་ཞེ་སྡང་དང ། གཏི་མུག་སྐྱེ་བར་འདོད་དམ། སྨྲས་པ། དེ་ནི་མ་ཡིན་ནོ། །སྨྲས་པ། བཙུན་པ་འོད་སྲུང་ཆེན་པོ། དེ་ལྟ་བུ་ཡིན་དུ་ཟིན་ན་གང་དག་གིས་སེམས་ཅན་རྣམས་ཀུན་ནས་ཉོན་མོངས་པར་འགྱུར་བའི་འདོད་ཆགས་དང ། ཞེ་སྡང་དང ། གཏི་མུག་གང་ཡིན། སྨྲས་པ། རིགས་ཀྱི་བུ། དེ་ལྟར་ན་ཆོས་ཐམས་ཅད་རང་བཞིན་གྱིས་འདོད་ཆགས་དང་བྲལ་བ། ཞེ་སྡང་དང་བྲལ་བ། གཏི་མུག་དང་བྲལ་བའོ། །སྨྲས་པ། བཙུན་པ་འོད་སྲུང་ཆེན་པོ། འདི་ལ་བསམས་ཏེ། འདི་སྐད་དུ། ཆོས་ཐམས་ཅད་སྒྱུ་མས་སྤྲུལ་པའི་རང་བཞིན་ཡིན་ནོ་ཞེས་སྨྲའོ། །ཡང་བསྟན་པ་འདི་བཤད་པ་ན་བྱང་ཆུབ་སེམས་དཔའ་སྟོང་ཕྲག་བཞི་བཅུ་རྩ་བཞི་རྗེས་སུ་མཐུན་པའི་བཟོད་པ་སྐྱེས་སོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། སུ་དག་གི་མིག་གིས་བྱང་ཆུབ་སེམས་དཔའ་དྲ་བ་ཅན་གྱི་འོད་མཐོང་བར་གྱུར་པའི་སེམས་ཅན་དེ་དག་ལ་ངན་སོང་ངན་འགྲོ་ལོག་པར་ལྟུང་བའི་འཇིག་པར་འཚལ་བར་མི་བགྱིའོ། །སུ་དག་འདི་ཆོས་བསྟན་པ་ཐོས་པར་འགྱུར་བའི་ 86b སེམས་ཅན་དེ་དག་ལའང་བདུད་ཀྱི་ལས་ཀྱིས་བར་དུ་གཅོད་པར་འཚལ་བར་མི་བགྱིའོ། །འདི་སུ་དག་ཀྱང་བྱང་ཆུབ་ལ་ཡོངས་སུ་སྨིན་པར་བགྱིས་པའི་སེམས་ཅན་དེ་དག་ཀྱང་ཉན་ཐོས་དང ། རང་སངས་རྒྱས་ཀྱི་སར་འཚལ་བར་མི་བགྱིའོ། །བཅོམ་ལྡན་འདས། བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། བྱང་ཆུབ་སེམས་དཔའ་དྲ་བ་ཅན་གྱི་འོད་སངས་རྒྱས་ཀྱི་ཞིང་གང་དང ། གང་ན་གནས་པ་དེ་དང ། དེར་སེམས་ཅན་ཚད་མེད་པ་རྣམས་ཀྱི་དོན་བྱེད་དོ། །འོད་སྲུང ། རིགས་ཀྱི་བུ་འདིས་འོད་ཕྱུང་བ་ཁྱོད་ཀྱིས་མཐོང་ངམ། གསོལ་པ། བཅོམ་ལྡན་འདས། བདག་གིས་མཐོང་ངོ ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཡུངས་ཀར་གྱིས་གང་བ་ནི་བགྲང་བའི་ཚུལ་གྱིས་མཐར་ཕྱིན་པར་ནུས་ཀྱི། འོད་སྲུང ། བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འོད་འདི་བསྟན་པ་སུ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བའི་སེམས་ཅན་དེ་དག་གི་མཐར་ཕྱིན་པར་མི་ནུས་སོ། །འོད་སྲུང ། བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འོད་བསྟན་པས་ཀྱང་སེམས་ཅན་རྣམས་ཀྱི་དོན་བྱེད་ན་ཆོས་བསྟན་པས་ལྟ་ཅི་སྨོས། 87a ༄#། །འོད་སྲུང ། རིགས་ཀྱི་བུ་འདིའི་སངས་རྒྱས་ཀྱི་ཞིང་གི་ཡོན་ཏན་བཀོད་པའི་བྱེ་བྲག་གི་ཕྱོགས་ཙམ་ཞིག་བརྗོད་ཀྱི་ཉོན་ཅིག། འོད་སྲུང ། བྱང་ཆུབ་སེམས་དཔའ་དྲ་བ་ཅན་གྱི་འོད་བསྐལ་པ་གྲངས་མེད་པ་བརྒྱ་སྟོང་ཕྲག་བདུན་ཅུ་རྩ་དྲུག་ན་འཇིག་རྟེན་གྱི་ཁམས་ཁྱད་པར་གྱི་ཡོན་ཏན་བསྡུས་པ་ཞེས་བྱ་བར་ཀུན་ཏུ་འོད་རྣམ་པར་འཕྲུལ་པའི་འོད་ཟེར་གྱི་རྒྱལ་པོ་ཞེས་བྱ་བ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་འབྱུང་སྟེ། ང་བྱང་ཆུབ་ཀྱི་ཤིང་དྲུང་དུ་ཉེ་བར་སོང་བ་དང ། འཇིག་རྟེན་གྱི་ཁམས་དེའི་བདུད་དམ། བདུད་ཀྱི་རིས་ཀྱི་ལྷ་ཇི་སྙེད་ཡོད་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །སྦྱིན་པ་དང་གཏོང་བ་རྒྱ་ཆེར་འགྱུར་རོ། །འོད་སྲུང ། འཇིག་རྟེན་གྱི་ཁམས་དེ་ལག་མཐིལ་ལྟར་མཉམ་པར་འགྱུར་རོ། །གོས་ཀ་ཙ་ལེན་དི་ཀ་ལྟར་མཉམ་ཞིང་རེག་ན་བདེ་བར་རིན་པོ་ཆེ་ཐམས་ཅད་ཀྱིས་སྤྲས་པར་འགྱུར་རོ། །འཇིག་རྟེན་གྱི་ཁམས་དེ་ན་ངན་སོང་མེད། མི་ཁོམ་པ་མེད། སྡོང་དུ་མ་དང ། ཚེར་མའང་མེད་པར་འགྱུར་རོ། །འཇིག་རྟེན་གྱིས་ཁམས་དེར་པདྨ་བཀོད་པ་དག་ཀྱང་འབྱུང་བར་འགྱུར་རོ། །རིན་པོ་ཆེ་པདྨ་ཆེན་པོ་དྲི་དང་ལྡན་པ་དག་ཀྱང་འབྱུང་བར་ 87b འགྱུར་རོ། །འཇིག་རྟེན་གྱི་ཁམས་དེ་དྲི་མ་མེད་ཅིང་རྒྱ་ཆེ་བར་འགྱུར་རོ། །ཡང ། འོད་སྲུང ། འཇིག་རྟེན་གྱི་ཁམས་ཁྱད་པར་གྱི་ཡོན་ཏན་བསྡུས་པ་དེ་ན་བཅོམ་ལྡན་འདས་ཀུན་ཏུ་འོད་རྣམ་པར་འཕྲུལ་པ་འོད་ཟེར་གྱི་རྒྱལ་པོ་དེ་བཞིན་གཤེགས་པ་དེའི་བྱང་ཆུབ་སེམས་དཔའི་དགེ་འདུན་མཐའ་ཡས་པ། བསྒྲུབ་པའི་ཆོས་བགྲོ་བ་ལ་མཁས་པ། རྫུ་འཕྲུལ་གྱིས་རྣམ་པར་འཕྲུལ་པ། འོད་ཀྱིས་ཀུན་ཏུ་བརྒྱན་པ། གཟུངས་ཀྱི་གཏེར་ཐོབ་པ། ཏིང་ངེ་འཛིན་ཐོབ་པ། ཐོགས་པ་མེད་པའི་སྤོབས་པ་དང ། ཡེ་ཤེས་ཀྱིས་སྟོན་པ་ལ་མཁས་པ། མངོན་པར་ཤེས་པ་དང ། རིག་པ་དང ། མི་འཇིགས་པ་ཐོབ་པ། བདུད་དང ། ཕྱིར་རྒོལ་བ་རྣམས་བཅོམ་པ། དྲན་པ་དང ། བློ་གྲོས་དང ། རྟོགས་པ་དང ། ངོ་ཚ་ཤེས་པ་དང ། ཁྲེལ་ཡོད་པ་དང ། ཤེས་རབ་སྦྱངས་པའི་ཡེ་ཤེས་ཀྱིས་ཡོངས་སུ་སྒོམ་པ་དཔག་ཏུ་མེད་པར་འགྱུར་རོ། །ཡང ། འོད་སྲུང ། སངས་རྒྱས་ཀྱི་ཞིང་དེ་ན་བུད་མེད་སྐྱེ་བར་མི་འགྱུར་ཏེ།་བྱང་ཆུབ་སེམས་དཔའ་དེ་དག་ཐམས་ཅད་པདྨ་ལ་སྐྱིལ་མོ་ཀྲུང་བཅས་ཤིང་འདུག་པར་བརྫུས་ཏེ་སྐྱེ་བར་འགྱུར་རོ། །བྱང་ཆུབ་སེམས་དཔའ་དེ་དག་བསམ་གཏན་གྱི་དགའ་བའི་ཟས་དང་ལྡན་པར་འགྱུར་རོ། །བསམ་པ་ཙམ་གྱིས་བཟའ་བ་དང ། བཏུང་བ་དང ། བཞོན་པ་དང ། གོས་དང ། འཆགས་དང་སྐྱེད་པོས་ཚལ་དང ། ཁང་པ་བརྩེགས་པ་ 88a ༄#། །དང ། འབབ་ཆུ་དང ། ཆུ་མིག་དང ། མཚོ་དང ། རྫིང་དང ། ལྟེང་གའི་ཡོངས་སུ་ལོངས་སྤྱོད་པ་ཐམས་ཅད་འབྱུང་བར་འགྱུར་རོ། །འོད་སྲུང ། ཀུན་ཏུ་འོད་རྣམ་པར་འཕྲུལ་པ་འོད་ཟེར་གྱི་རྒྱལ་པོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ཡི་གེ་དང ། ངེས་པའི་ཚིག་གིས་ཆོས་མི་སྟོན་ཏེ། གཞན་དུ་ན་བྱང་ཆུབ་སེམས་དཔའ་དེ་དག་དེ་བཞིན་གཤེགས་པའི་འོད་དེས་རེག་མ་ཐག་ཏུ་མི་སྐྱེ་བའི་ཆོས་ལ་བཟོད་པ་སོ་སོར་ཐོབ་པར་འགྱུར་རོ། །འོད་དེ་སངས་རྒྱས་ཀྱི་ཞིང་གཞན་དག་ཏུ་འགྲོ་བ་ལ་ཐོགས་པ་མེད་པར་འགྱུར་རོ། །འོད་དེས་སེམས་ཅན་གྱི་ཉོན་མོངས་པ་བསལ་བ་ལ་ཉོན་མོངས་པ་དང་བྲལ་བར་འགྱུར་རོ། །ཡང ། འོད་སྲུང ། དེ་བཞིན་གཤེགས་པ་དེའི་འོད་ལས་ཆོས་ཀྱི་ཚུལ་རབ་ཏུ་དབྱེ་བའི་སྒྲ་སུམ་ཅུ་རྩ་གཉིས་འབྱུང་བར་གྱུར་ཏེ། སུམ་ཅུ་རྩ་གཉིས་གང་ཞེ་ན། ལྟ་བར་གྱུར་པ་ཡོངས་སུ་དག་པས་ཆོས་ཐམས་ཅད་སྟོང་པའོ། །རྟོག་པ་དང ། རྣམ་པར་རྟོག་པ་དང་བྲལ་བས་ཆོས་ཐམས་ཅད་མཚན་མ་མེད་པའོ། །ཁམས་གསུམ་ལས་ཡང་དག་པར་འདས་པས་ཆོས་ཐམས་ཅད་སྨོན་པ་མེད་པའོ། །རང་བཞིན་གྱིས་ཉེ་བར་ཞི་བས་ཆོས་ཐམས་ཅད་འདོད་ཆགས་དང་བྲལ་བའོ། །སྨོན་པ་མེད་པའི་མཚན་ཉིད་ཀྱིས་ 88b ཆོས་ཐམས་ཅད་ཞེ་སྡང་དང་བྲལ་བའོ། །མུན་པ་མུན་ནག་དང་བྲལ་བས་ཆོས་ཐམས་ཅད་གཏི་མུག་དང་བྲལ་བའོ། །ཐོག་མ་ནས་མ་སྐྱེས་པས་ཆོས་ཐམས་ཅད་འོང་བ་མེད་པའོ། ། འཕོ་བ་མེད་པའི་ཚུལ་གྱིས་ཆོས་ཐམས་ཅད་འགྲོ་བ་མེད་པའོ། །རབ་ཏུ་མི་བརྟེན་པའི་ཕྱིར་ཆོས་ཐམས་ཅད་མི་གནས་པའོ། །འདས་པ་དང ། མ་འོངས་པ་དང ། ད་ལྟར་བྱུང་བ་དང་བྲལ་བའི་ཕྱིར་ཆོས་ཐམས་ཅད་དུས་གསུམ་ལས་འདས་པའོ། །རང་བཞིན་གཅིག་པའི་ཕྱིར་ཆོས་ཐམས་ཅད་བྱེ་བྲག་མེད་པའོ། །ལས་ཀྱི་རྣམ་པར་སྨིན་པ་དང་བྲལ་བའི་ཕྱིར་ཆོས་ཐམས་ཅད་མ་སྐྱེས་པའོ། །བྱེད་པ་པོ་མི་དམིགས་པའི་ཕྱིར་ཆོས་ཐམས་ཅད་ལས་དང ། རྣམ་པར་སྨིན་པ་མེད་པའོ། །མངོན་པར་འདུ་མི་བྱེད་པའི་ཚུལ་གྱིས་ཆོས་ཐམས་ཅད་མ་བྱས་པའོ། །མངོན་པར་འདུ་མ་བྱས་པས་རབ་ཏུ་ཕྱེ་བའི་ཕྱིར་ཆོས་ཐམས་ཅད་མངོན་པར་འདུས་མ་བྱས་པའོ། །སྐྱེ་བ་དང ། འཇིག་པ་དང་བྲལ་བའི་ཕྱིར་ཆོས་ཐམས་ཅད་འདུས་མ་བྱས་པའོ། །ཡང་དག་པར་མ་བྱུང་བའི་ཕྱིར་ཆོས་ཐམས་ཅད་ཡང་དག་པ་མ་ཡིན་པའོ། །གཅིག་ཅར་མངོན་པར་རྟོགས་པའི་ཚུལ་གྱིས་ཆོས་ཐམས་ཅད་བདེན་པའོ། །སེམས་ཅན་མི་དམིགས་པའི་ཕྱིར་ཆོས་ཐམས་ཅད་བདག་མེད་པའོ། །དོན་དམ་པའི་ཕྱིར་ཆོས་ཐམས་ཅད་གང་ཟག་མེད་པའོ། །ཤེས་པར་མི་བྱེད་པའི་ཕྱིར་ཆོས་ཐམས་ཅད་སེམས་ 89a ༄#། །པའོ། །མཛའ་བ་དང ། ཁོང་ཁྲོ་བ་མེད་པའི་ཕྱིར་ཆོས་ཐམས་ཅད་བཏང་སྙོམས་པའོ། །ཡོངས་སུ་གཟུང་བ་མེད་པའི་ཕྱིར་ཆོས་ཐམས་ཅད་ཅིའང་མེད་པའོ།། རང་བཞིན་གྱིས་ཀུན་ནས་ཉོན་མོངས་པ་མེད་པའི་ཕྱིར་ཆོས་ཐམས་ཅད་ཉེ་བའི་ཉོན་མོངས་པ་མེད་པའོ། །དབེན་པའི་མཐའ་ཡིན་པའི་ཕྱིར་ཆོས་ཐམས་ཅད་ཚུལ་གཅིག་པའོ། ། དཔེན་པ་ཕུན་སུམ་ཚོགས་པས་ཆོས་ཐམས་ཅད་དབེན་པའོ། །མི་འཁྲུགས་པའི་ཕྱིར་ཆོས་ཐམས་ཅད་ཡང་དག་པའི་མཐའ་ལ་གནས་པའོ། །ཤིན་ཏུ་ཐ་མི་དད་པའི་ཕྱིར་ཆོས་ཐམས་ཅད་དེ་བཞིན་ཉིད་ལ་གནས་པའོ། །ཐམས་ཅད་དུ་རྗེས་སུ་སོང་བའི་ཕྱིར་ཆོས་ཐམས་ཅད་ཆོས་ཀྱི་དབྱིངས་སུ་ཡང་དག་པར་འདུ་བའོ། །ཕན་ཚུན་མི་འདུ་བའི་ཕྱིར་ཆོས་ཐམས་ཅད་རྐྱེན་མེད་པའོ། །མཉམ་པ་ཉིད་ཀྱིས་ཡོངས་སུ་རྒྱས་པའི་ཕྱིར་ཆོས་ཐམས་ཅད་རྟེན་ཅིང་འབྲེལ་བར་འབྱུང་བའོ། །ཇི་ལྟ་བ་བཞིན་དུ་མཐོང་བས་ཕྱེ་བའི་ཕྱིར་ཆོས་ཐམས་ཅད་བྱང་ཆུབ་བོ། །ཡོངས་སུ་མ་གྲུབ་པའི་ཚུལ་གྱིས་ཆོས་ཐམས་ཅད་མྱ་ངན་ལས་འདས་པའོ་ཞེས། འོད་སྲུང ། དེ་ལྟར་བཅོམ་ལྡན་འདས་ཀུན་ཏུ་རྣམ་པར་འཕྲུལ་པ་འོད་ཟེར་གྱི་རྒྱལ་པོ་དེ་བཞིན་གཤེགས་པའི་འོད་དེ་ལས་འདི་ལྟ་བུའི་ཆོས་ཐམས་ཅད་ཀྱི་ཚུལ་རབ་ཏུ་དབྱེ་བའི་ཕྱིར་སྒྲ་སུམ་ཅུ་རྩ་གཉིས་འབྱུང་བར་འགྱུར་རོ། ། 89b གནས་བརྟན་འོད་སྲུང་ཆེན་པོས་གསོལ་པ། བཅོམ་ལྡན་འདས། འོད་ཟེར་དེས་སངས་རྒྱས་ཀྱིས་མཛད་པ་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། དེ་བཞིན་གཤེགས་པ་དེ་ཚེ་དཔག་ཏུ་མེད་པར་འགྱུར་རོ། །སངས་རྒྱས་ཀྱི་ཞིང་དེ་ན་བདུད་ཀྱི་ལས་ཀྱིས་བར་དུ་གཅོད་པ་མེད་པར་འགྱུར་རོ། །འོད་སྲུང་ཆེན་པོས་གསོལ་པ། བཅོམ་ལྡན་འདས།་སངས་རྒྱས་ཀྱི་ཞིང་ཡོངས་སུ་བཟུང་བར་འཚལ་བས་རིགས་ཀྱི་བུ་འདིའི་རྣམ་པ་ཐམས་ཅད་མཆོག་དང་ལྡན་པ་ཇི་འདྲ་བ་དེ་ལྟ་བུར་ཡོངས་སུ་དག་པའི་སངས་རྒྱས་ཀྱི་ཞིང་ཡོངས་སུ་གཟུང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། འདི་ལྟར་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་སངས་རྒྱས་བྱེ་བ་ཁྲག་ཁྲིག་ཕྲག་བརྒྱ་སྟོང་མང་པོ་ལ་སྨོན་ལམ་ཡོངས་སུ་སྦྱངས་ཏེ། དེའི་ཕྱིར་འདིས་སངས་རྒྱས་ཀྱི་ཞིང་དེ་ལྟ་བུའི་ཡོན་ཏན་ཕུན་སུམ་ཚོགས་པ་ཡོངས་སུ་བཟུང་བའོ། །འོད་སྲུང ། དེ་བས་ན་སངས་རྒྱས་ཀྱི་ཞིང་དེ་ལྟ་བུ་ཡོངས་སུ་གཟུང་བར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཀྱང་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱི་རྗེས་སུ་བསླབ་པར་བྱའོ། །དེ་ནས་ཚངས་པ་ཁྱད་པར་སེམས་ཀྱིས་བྱང་ཆུབ་སེམས་དཔའ་དྲ་བ་ཅན་གྱི་འོད་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱེད་དེ་བཞིན་གཤེགས་པས་ལུང་བསྟན་ཏོ། །སྨྲས་པ། ཚངས་པ། དེ་ 90a ༄#། །བཞིན་གཤེགས་པས་སེམས་ཅན་ཐམས་ཅད་ཀྱང་ལུང་བསྟན་ཏོ། །སྨྲས་པ། ཅིར་ལུང་བསྟན། སྨྲས་པ། ལས་ཀྱི་རྣམ་པར་སྨིན་པ་ཇི་ལྟ་བ་བཞིན་དུ་ལུང་སྟོན་ཏོ། །སྨྲས་པ། རིགས་ཀྱི་བུ། ཁྱོད་ཀྱིས་ལས་ཅི་ལྟ་བུ་ཞིག་བྱས་ན་ཁྱོད་འདི་ལྟར་ལུང་བསྟན། སྨྲས་པ། ཚངས་པ། ལས་གང་ལུས་དང ། ངག་དང ། ཡིད་ཀྱི་མ་བྱས་པ་དེ་ལས་དེ་ནི་འདིའོ་ཞེས་བསྟན་དུ་རུང་ངམ། སྨྲས་པ། ཅིའི་ཕྱིར། སྨྲས་པ། ཅི་བྱང་ཆུབ་མངོན་པར་འདུ་བྱེད་པའི་མཚན་ཉིད་དམ། སྨྲས་པ། དེ་ནི་མ་ཡིན་ནོ། །སྨྲས་པ། བྱང་ཆུབ་མངོན་པར་འདུ་མི་བྱེད་པའི་མཚན་ཉིད་དེ། བྱང་ཆུབ་ནི་མངོན་པར་འདུ་བྱེད་པའི་མཚན་ཉིད་མ་ཡིན་ནོ། །སྨྲས་པ། མངོན་པར་འདུ་བྱེད་པས་བྱང་ཆུབ་འདུས་མ་བྱས་པས་ཐོབ་པར་ནུས་སམ། སྨྲས་པ། དེ་ནི་མ་ཡིན་ནོ། །སྨྲས་པ། ཚངས་པ། དེ་ལྟ་བས་ན་འདི་ལ་རྣམ་གྲངས་འདིས་གང་ལ་ལས་ཀྱང་མེད། ལས་ཀྱི་འབྲས་བུའང་མེད། མངོན་པར་འདུ་བྱེད་པའི་འཇུག་པའང་མེད་པ་དེ་ནི་བྱང་ཆུབ་བོ། །བྱང་ཆུབ་ཇི་ལྟ་བར་འཐོབ་པའང་དེ་བཞིན། ལུང་བསྟན་པའང་དེ་བཞིན་ཏེ། མངོན་པར་འདུ་བྱེད་པས་ལུང་བསྟན་པར་མི་འགྱུར་བར་རིག་པར་བྱའོ། །སྨྲས་པ། རིགས་ཀྱི་བུ། ཕ་རོལ་ཏུ་ཕྱིན་པ་དྲུག་ལ་སྤྱད་ནས་ཕྱིས་ལུང་བསྟན་པར་འགྱུར་རམ། སྨྲས་པ། ཚངས་པ། དེ་བཞིན་ཏེ། ཕ་རོལ་ཏུ་ 90b ཕྱིན་པ་དྲུག་ལ་སྤྱད་ནས་ཕྱིས་ལུང་བསྟན་པར་འགྱུར་ཏེ། ཚངས་པ། གང་ཉོན་མོངས་པ་ཐམས་ཅད་ཡོངས་སུ་བཏང་བ་དེ་ནི་སྦྱིན་པའོ། །གང་མངོན་པར་འདུ་མི་བྱེད་པ་དེ་ནི་ཚུལ་ཁྲིམས་སོ། །གང་རྨ་མི་ཐོད་པ་དེ་ནི་བཟོད་པའོ། །གང་དབེན་པ་དེ་ནི་བརྩོན་འགྲུས་སོ། །གང་རབ་ཏུ་མི་གནས་པ་དེ་ནི་བསམ་གཏན་ནོ། །གང་སྤྲོས་པ་མེད་པ་དེ་ནི་ཤེས་རབ་སྟེ། ཚངས་པ། བྱང་ཆུབ་སེམས་དཔའ་གང་ཕ་རོལ་ཏུ་ཕྱིན་པ་དྲུག་ལ་སྤྱོད་པ་དེ་དག་ཅི་ལ་སྤྱོད། སྨྲས་པ། ཅི་ལའང་མི་སྤྱོད་དོ། །དེ་ཅིའི་ཕྱིར་ཞེ་ན། སྤྱོད་པ་ཅི་ཙམ་པ་དེ་ཙམ་དུ་སྤྱོད་པ་མ་ཡིན་ནོ། ། གང་སྤྱོད་པ་དེ་མི་སྤྱོད་པའོ། །གང་མི་སྤྱོད་པ་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་སྤྱོད་པ་སྟེ། ཚངས་པ། རྣམ་གྲངས་འདིས་ཇི་ལྟར་སྤྱོད་པ་མ་ཡིན་པར་ནི་བྱང་ཆུབ་ཀྱི་སྤྱོད་པ་ཡིན་པར་རིག་པར་བྱའོ། །ཚངས་པ། བྱང་ཆུབ་ཏུ་ལུང་བསྟན་ཏོ། །ཞེས་དེ་སྐད་ཟེར་བ་ནི་དེ་བཞིན་ཉིད་དང ། ཆོས་ཀྱི་དབྱིངས་ཇི་ལྟ་བུར་ལུང་བསྟན་པ་དེ་ལྟ་བུ་ངའང་ལུང་བསྟན་ཏོ། །སྨྲས་པ། རིགས་ཀྱི་བུ། དེ་བཞིན་ཉིད་དང ། ཆོས་ཀྱི་དབྱིངས་ནི་ལུང་མི་བསྟན་ཏོ། །སྨྲས་པ། འོ་ན་དེ་བཞིན་ཉིད་དང ། ཆོས་ཀྱི་དབྱིངས་ཇི་ལྟ་བ་བཞིན་དུ་ལུང་བསྟན་པ་དེའི་མཚན་ཉིད་ཀྱང་དེ་བཞིན་ནོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་སྤྱད་ན་བྱང་ 91a ༄#། །ཆུབ་སེམས་དཔའ་དེ་བཞིན་གཤེགས་པ་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཚངས་པ། ནམ་བྱང་ཆུབ་སེམས་དཔའ་སྐྱེ་བ་ལའང་མི་སྤྱོད། འགག་པ་ལའང་མི་སྤྱོད། དགེ་བ་ལའང་མི་སྤྱོད། མི་དགེ་བ་ལའང་མི་སྤྱོད། འཇིག་རྟེན་པ་ལའང་མི་སྤྱོད། འཇིག་རྟེན་ལས་འདས་པ་ལའང་མི་སྤྱོད། ཟག་པ་དང་བཅས་པ་ལའང་མི་སྤྱོད། ཟག་པ་མེད་པ་ལའང་མི་སྤྱོད། ཁ་ན་མ་ཐོ་བ་དང་བཅས་པ་ལའང་མི་སྤྱོད།་ཁ་ན་མ་ཐོ་བ་མེད་པ་ལའང་མི་སྤྱོད། འདུས་བྱས་ལའང་མི་སྤྱོད། འདུས་མ་བྱས་ལའང་མི་སྤྱོད། རྣལ་འབྱོར་ལའང་མི་སྤྱོད། རྣལ་འབྱོར་མ་ཡིན་པ་ལའང་མི་སྤྱོད། སྤོང་བ་ལའང་མི་སྤྱོད། སྤོང་བ་མ་ཡིན་པ་ལའང་མི་སྤྱོད། འཁོར་བ་ལའང་མི་སྤྱོད། མྱ་ངན་ལས་འདས་པ་ལའང་མི་སྤྱོད། མཐོང་བ་ལའང་མི་སྤྱོད། ཐོས་པ་ལའང་མི་སྤྱོད།་དྲན་པ་ལའང་མི་སྤྱོད། རྣམ་པར་ཤེས་པ་ལའང་མི་སྤྱོད། སྦྱིན་པ་ལའང་མི་སྤྱོད། གཏོང་བ་ལའང་མི་སྤྱོད། ཚུལ་ཁྲིམས་ལའང་མི་སྤྱོད། སྡོམ་པ་ལའང་མི་སྤྱོད།་བཟོད་པ་ལའང་མི་སྤྱོད། མི་འགྱུར་བ་ལའང་མི་སྤྱོད། བརྩོན་འགྲུས་ལའང་མི་སྤྱོད། བརྩོན་འགྲུས་རྩོམ་པ་ལའང་མི་སྤྱོད། བསམ་གཏན་ལའང་མི་སྤྱོད། ཏིང་ 91b ངེ་འཛིན་རྣམས་ལའང་མི་སྤྱོད། ཤེས་རབ་ལའང་མི་སྤྱོད། ནན་ཏན་དག་ལའང་མི་སྤྱོད། ཡེ་ཤེས་ལའང་མི་སྤྱོད། ཁོང་དུ་ཆུད་པ་ལའང་མི་སྤྱོད་དེ། བྱང་ཆུབ་སེམས་དཔའ་དེ་ལྟར་སྤྱོད་ན། དེ་བཞིན་གཤེགས་པ་རྣམས་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་ཅིའི་ཕྱིར་ཞེ་ན། སངས་པ། སྤྱོད་པ་དེ་ཙམ་དུ་ལྷག་པར་བྱེད་པ་སྟེ། བྱང་ཆུབ་ནི་ལྷག་པར་བྱེད་པ་མ་ཡིན་ནོ། །སྤྱོད་པ་ཇི་ཙམ་པ་དེ་ཙམ་དུ་ཡོངས་སུ་རྟོག་པ་སྟེ། བྱང་ཆུབ་ནི་ཡོངས་སུ་རྟོག་པ་མེད་པའོ། །སྤྱོད་པ་ཇི་ཙམ་པ་དེ་ཙམ་དུ་མངོན་པར་འདུ་བྱེད་པ་སྟེ། བྱང་ཆུབ་ནི་མངོན་པར་འདུ་བྱེད་པ་མེད་པའོ། །སྤྱོད་པ་ཇི་ཙམ་པ་དེ་ཙམ་དུ་སྤྲོས་པ་སྟེ། བྱང་ཆུབ་ནི་སྤྲོས་པ་མེད་པའོ། །ཚངས་པ། དེ་བས་ན་རྣམ་གྲངས་འདིས་ཅི་ནས་སྤྱོད་པ་ཐམས་ཅད་ལས་ཡང་དག་པར་འདས་པའི་བྱང་ཆུབ་སེམས་དཔའ་རྣམས་ལ་ལུང་བསྟན་པར་འགྱུར་བར་དེ་ལྟར་རིག་པར་བྱའོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ལུང་བསྟན་པ་ལུང་བསྟན་པ་ཞེས་བགྱི་བ་ལུང་བསྟན་པ་དེ་གང་གི་ཚིག་བླ་དྭགས་ལགས། བཅོམ་ལྡན་འདས་ཀྱིས་བཀའ་སྩལ་པ། ཆོས་ཐམས་ཅད་ལ་གཉིས་དང་བྲལ་བ་སྟེ། དེའི་ཕྱིར་ལུང་བསྟན་པ་ཞེས་བྱའོ། །སྐྱེ་བ་དང་འཇིག་ 92a ༄#། །པར་སྒྲོ་མི་འདོགས་པ་སྟེ། དེའི་ཕྱིར་ལུང་བསྟན་པ་ཞེས་བྱའོ། །ལུས་དང ། ངག་དང ། ཡིད་ཀྱི་ལས་རྣམས་ཀྱིས་དབེན་པ་སྟེ། དེའི་ཕྱིར་ལུང་བསྟན་པ་ཞེས་བྱའོ། །ཚངས་པ། ངས་མངོན་པར་ཤེས་པ་འདས་པའི་དུས་ན་བསྐལ་པ་མཛེས་པར་སྣང་བ་ཞེས་བྱ་བ་བྱུང་སྟེ། དེ་ལ་དེ་བཞིན་གཤེགས་པ་ཁྲག་ཁྲིག་ཕྲག་བདུན་ཅུ་རྩ་གཉིས་བྱུང་སྟེ། དེ་བཞིན་གཤེགས་པ་དེ་དག་ཐམས་ཅད་ལ་ངས་བཀུར་སྟིར་བྱས། བཙུན་པར་བྱས། རི་མོར་བྱས། མཆོད་པར་བྱས་ཀྱང་དེ་བཞིན་གཤེགས་པ་དེ་དག་གིས་ང་ལུང་མ་བསྟན་ཏོ། །དེའི་ཕ་རོལ་ཏུ་བསྐལ་པ་ཤིན་ཏུ་སྤྲུལ་པ་ཞེས་བྱ་བ་བྱུང་སྟེ། དེ་ལ་དེ་བཞིན་གཤེགས་པ་བྱེ་བ་ཕྲག་བདུན་ཅུ་རྩ་གཉིས་ལ་ངས་བཀུར་སྟིར་བྱས། བཙུན་པར་བྱས། རི་མོར་བྱས། མཆོད་པར་བྱས་ཀྱང་དེ་བཞིན་གཤེགས་པ་དེ་དག་གིས་ང་ལུང་མ་བསྟན་ཏོ། །ཚངས་པ། དེའང་ཕ་རོལ་ན་ཚངས་པས་བསྟོད་པ་ཞེས་བྱ་བའི་བསྐལ་པ་བྱུང་སྟེ། དེ་ལ་དེ་བཞིན་གཤེགས་པ་སྟོང་ཕྲག་བཅོ་བརྒྱད་ལ་ངས་བཀུར་སྟིར་བྱས། བཙུན་པར་བྱས། རི་མོར་བྱས། མཆོད་པར་བྱས་ཀྱང་དེ་བཞིན་གཤེགས་པ་དེ་དག་གིས་ང་ལུང་མ་བསྟན་ཏོ། །ཚངས་པ། དེའི་ཡང་ཕ་རོལ་ན་བསྐལ་པ་ལེགས་པར་དྲངས་པ་ཞེས་བྱ་བ་བྱུང་སྟེ། དེ་ལ་དེ་བཞིན་གཤེགས་པ་སྟོང་ཕྲག་སུམ་ཅུ་རྩ་ 92b རྩ་གཉིས་ལ་ངས་བཀུར་སྟོར་བྱས། བཙུན་པར་བྱས། རི་མོར་བྱས། མཆོད་པར་བྱས་ཀྱང་དེ་བཞིན་གཤེགས་པ་དེ་དག་གིས་ང་ལུང་མ་བསྟན་ཏོ། །དེའི་ཡང་ཕ་རོལ་ན། ཚངས་པ། བསྐལ་པ་བཀོད་པ་ཞེས་བྱ་བ་བྱུང་སྟེ། དེ་ལ་དེ་བཞིན་གཤེགས་པ་སྟོང་ཕྲག་བརྒྱད་ཅུ་རྩ་བཞི་ལ་ངས་བཀུར་སྟོར་བྱས། བཙུན་པར་བྱས། རི་མོར་བྱས། མཆོད་པར་བྱས་ཀྱང་དེ་བཞིན་གཤེགས་པ་དེ་དག་གིས་ང་ལུང་མ་བསྟན་ཏོ། །ཚངས་པ། ངས་གང་རྣམས་ལ་རི་མོར་བྱས་པ་དང ། མཆོད་པར་བྱས་པ་དང ། བཀུར་སྟིར་བྱས་པ་དང ། བཙུན་པར་བྱས་པ་དང ། གང་ལས་ངས་ཚངས་པར་སྤྱོད་པ་སྤྱད་པ་དང ། ངས་བ་དོག་པ་ཐམས་ཅད་ཡོངས་སུ་གཏོང་བར་བྱས་པ་དང ། ཚུལ་ཁྲིམས་དང ། སྦྱངས་པའི་ཡོན་ཏན་ཡང་དག་པར་བཟུང་བས་ངས་བླངས་པ་དང ། ངས་ཁྲོ་བའི་ཐ་བ་དང ། ཕྲག་དོག་དང ། ང་རྒྱལ་དང ། འཆབ་པ་མེད་པར་བྱས་ནས་ངས་བཟོད་པ་དང ། བྱམས་པ་སྒོམ་པ་དང ། བསམ་གཏན་དང ། རབ་ཏུ་དབེན་པར་སྤྱོད་པ་དང ། དབེན་པར་གནས་མལ་འཆའ་བ་དང ། ཟས་དང ། སྒྲའི་རྗེས་སུ་འགྲོ་བའི་དྲི་བ་ཡོངས་སུ་དྲིས་པ་དང ། དེ་བྱེད་པའི་བརྩོན་འགྲུས་ཀྱིས་ཐོས་པ་ཐམས་ཅད་ཁོང་དུ་ཆུད་པར་བྱས་པའི་དེ་བཞིན་གཤེགས་པ་དེ་དག་གིས་མིང་ཡང་བསྐལ་པའམ། བསྐལ་པ་ལས་ལྷག་པར་བརྗོད་དུ་ཡོད་ཀྱང་དེ་བཞིན་གཤེགས་པ་དེ་དག་གིས་ང་བླ་ན་མེད་པ་ 93a ༄#། །པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། ཚངས་པ། འདི་ལྟར་ང་སྤྱོད་པ་ལ་གནས་པར་གྱུར་ཏེ། དེ་བས་ན། ཚངས་པ།་རྣམ་གྲངས་འདིས་ཀྱང་ཅི་ནས་བྱང་ཆུབ་སེམས་དཔའ་སྤྱོད་པ་ཐམས་ཅད་ལས་འདས་པ་རྣམས་ལ་ལུང་བསྟན་པ་ཡིན་པར་དེ་ལྟར་རིག་པར་བྱའོ། །ཚངས་པ། གང་གི་ཚེ་ངས་དེ་བཞིན་གཤེགས་པ་མར་མེ་མཛད་མཐོང་མ་ཐག་ཏུ་མི་སྐྱེ་བའི་ཆོས་ལ་བཟོད་པ་ཐོབ་བོ། །དེ་ནས་གདོད་དེ་བཞིན་གཤེགས་པ་མར་མེ་མཛད་ཀྱིས་ང་ལ་ཁྱོད་མ་འོངས་པའི་དུས་ན་བསྐལ་པ་གྲངས་མེད་པ་ན་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ཏེ། དེ་ན་ང་སྤྱོད་པ་ཐམས་ཅད་ལས་འདས་སོ། །དེ་ན་ངའི་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་སོ། །དེ་ཅིའི་ཕྱིར་ཞེ་ན། གང་མཚན་མ་ཐམས་ཅད་ཡོངས་སུ་གཏོང་བ་དེ་ནི་སྦྱིན་པའི་པའི་ཕ་རོལ་ཏུ་ཕྱིན་པའོ། །གང་དམིགས་པ་ཐམས་ཅད་རབ་ཏུ་ཞི་བ་དེ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །གང་ཡུལ་རྣམས་ལ་རྨས་པར་མི་འགྱུར་བ་དེ་ནི་བཟོད་པའི་ཕ་རོལ་ཏུ་ཕྱིན་པའོ། །གང་ཆོས་ཐམས་ཅད་དབེན་པ་དེ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །གང་ཡིད་ལ་བྱེད་པ་ཐམས་ཅད་ལ་མི་འཇུག་པ་དེ་ནི་བསམ་གཏན་གྱི་ 93b ཕ་རོལ་ཏུ་ཕྱིན་པའོ། །གང་\?\་རང་བཞིན་གྱིས་མི་སྐྱེ་བའི་ཆོས་ལ་བཟོད་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། ཚངས་པ། དེ་ལྟར་དེ་བཞིན་གཤེགས་པ་མར་མེ་མཛད་ལས་ཕ་རོལ་ཏུ་ཕྱིན་པ་རྣམས་ཡོངས་སུ་རྫོགས་པར་བྱས་སོ། །ཚངས་པ། གང་སེམས་དང་པོ་བསྐྱེད་པ་ཚུན་ཆད་ཀྱི་སྦྱིན་པ་ཡོངས་སུ་གཏོང་བ་དེ་ནི་ཕྱིས་མི་དམིགས་པས་སྦྱིན་པ་ཡོངས་སུ་གཏོང་བ་དེ་ལ་རྒྱའི་ཆར་ཡང་ཉེ་བར་མི་འགྲོ་བ་ནས་དཔེའི་བར་དུའང་ཉེ་བར་མི་འགྲོའོ། །གང་དང་པོའི་ཚུལ་ཁྲིམས་བསླབ་པ་དང ། སྦྱངས་པའི་ཡོན་ཏན་ཡང་དག་པར་བླངས་པའི་ཚུལ་ཁྲིམས་དེ་ནི་ཤིན་ཏུ་སྦྱངས་པའི་ཚུལ་ཁྲིམས་དེ་ལ་དཔེའི་བར་དུའང་ཉེ་བར་མི་འགྲོའོ། །གང་སེམས་དང་པོ་བསྐྱེད་པ་ཚུན་ཆད་ཀྱི་བཟོད་པ་དང ། དེས་པ་དེ་ནི་ཤིན་ཏུ་བཟོད་པའི་ཆོས་ཉིད་དེ་ལ་རྒྱུར་ཡང་ཉེ་བར་མི་འགྲོའོ། །གང་སེམས་དང་པོ་བསྐྱེད་པ་ཚུན་ཆད་ནས་བཟུང་སྟེ། བརྩོན་འགྲུས་བརྩམ་པ་དེ་ནི་བླང་བ་མེད་པ་དང ། དོར་བ་མེད་པའི་བརྩོན་འགྲུས་དེ་ལ་དཔེའི་བར་དུའང་ཉེ་བར་མི་འགྲོའོ། །གང་སེམས་དང་པོ་བསྐྱེད་པ་ཚུན་ཆད་ཀྱི་བསམ་གཏན་རབ་ཏུ་དབེན་པར་གནས་པ་དེ་ནི་རབ་ཏུ་ཞི་བ་མཚན་མ་མེད་པ་དེ་ལ་དཔེའི་བར་དུའང་ཉེ་བར་མི་འགྲོའོ། །ཚངས་པ། གང་སེམས་དང་པོ་བསྐྱེད་པ་ཚུན་ཆད་ཀྱི་ཤེས་རབ་ཀྱིས་སོ་སོར་རྟོགས་པ་དེ་ནི་སྤྲོས་པ་མེད་ 94a ༄#། །པའི་ཤེས་རབ་དེ་ལ་དཔེའི་བར་དུའང་ཉེ་བར་མི་འགྲོ་སྟེ། དེ་བས་ན། ཚངས་པ། རྣམ་གྲངས་འདིས་འདི་ལྟར་ངས་དེའི་ཚེ་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱས་སོ་ཞེས་བྱ་བ་དེ་ལྟར་རིག་པར་བྱའོ། །གསོལ་པ། བཅོམ་ལྡན་འདས། ཇི་ལྟར་ན་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ་ལགས། བཀའ་སྩལ་པ། གང་གཏོང་བ་ལ་རློམ་སེམས་མེད་པ་དང ། ཚུལ་ཁྲིམས་ལ་མི་གནས་པ་དང ། བཟོད་པ་ལ་རྣམ་པར་མི་རྟོག་པ་དང ། བརྩོན་འགྲུས་ལ་བླང་བ་མེད་པ་དང ། བསམ་གཏན་ལ་མི་གནས་པ་དང ། ཤེས་རབ་ལ་གཉིས་སུ་མེད་པ་འདི་ནི། ཚངས་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པ་ཡིན་ནོ། །གསོལ་པ། བཅོམ་ལྡན་འདས། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ནས་ཅི་ཡོངས་སུ་རྫོགས་པར་བགྱིད། བཀའ་སྩལ་པ། ཚངས་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ནས་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བྱེད་དོ། །གསོལ་པ། བཅོམ་ལྡན་འདས། ཇི་ལྟར་ན་ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་ནས་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བགྱིད། བཀའ་སྩལ་པ། ཚངས་པ། སྦྱིན་པའི་ཕ་རོལ་ཏུ་ཕྱིན་པའི་མཉམ་པ་ཉིད་གང་ཡིན་པ་དེ་ནི་ཐམས་ཅད་མཁྱེན་པ་ཉིད་ཀྱི་མཉམ་པ་ཉིད་དོ། །ཚུལ་ཁྲིམས་ཀྱི་ཕ་ 94b རོལ་ཏུ་ཕྱིན་པའི་མཉམ་པ་ཉིད་གང་ཡིན་པ་དང ། བཟོད་པའི་ཕ་རོལ་ཏུ་ཕྱིན་པའི་མཉམ་པ་ཉིད་གང་ཡིན་པ་དང ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་མཉམ་པ་ཉིད་གང་ཡིན་པ་དང ། བསམ་གཏན་གྱི་ཕ་རོལ་ཏུ་ཕྱིན་པའི་མཉམ་པ་ཉིད་གང་ཡིན་པ་དང ། ཤེས་རབ་ཀྱི་ཕ་རོལ་ཏུ་ཕྱིན་པའི་མཉམ་པ་ཉིད་གང་ཡིན་པ་དེ་ནི་ཐམས་ཅད་མཁྱེན་པ་ཉིད་ཀྱི་མཉམ་པ་ཉིད་དོ། །དེ་བས་ན་མཉམ་པ་ཉིད་འདིས་ཆོས་ཐམས་ཅད་མཉམ་པ་ཉིད་དེ། ཆོས་ཐམས་ཅད་ཀྱི་མཉམ་པ་ཉིད་གང་ཡིན་པ་དེ་ནི་ཐམས་ཅད་མཁྱེན་པའི་མཉམ་པ་ཉིད་དོ། །གཞན་ཡང་ཚངས་པ། སྦྱིན་པའི་འདུ་ཤེས་ཡོངས་སུ་རྫོགས་པ་དང ། ཚུལ་ཁྲིམས་ཀྱི་འདུ་ཤེས་དང ། བཟོད་པ་དང ། བརྩོན་འགྲུས་དང ། བསམ་གཏན་དང ། ཤེས་རབ་ཀྱི་འདུ་ཤེས་ཡོངས་སུ་རྫོགས་ནས། ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བྱེད་དོ། །ཐམས་ཅད་མཁྱེན་པ་ཉིད་ནི་འདུ་ཤེས་ཐམས་ཅད་དང་བྲལ་བ་སྟེ། དེ་ལྟར་ན། ཚངས་པ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པས་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བྱེད་དོ། །གསོལ་པ། བཅོམ་ལྡན་འདས། ཐམས་ཅད་མཁྱེན་པ་ཉིད་ཡོངས་སུ་རྫོགས་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གང་མིག་མི་ལེན། གཟུགས་མི་ལེན་པ་ནས། ཡིད་དང ། ཆོས་ཀྱི་བར་དུ་མི་ལེན་ཏེ། ཚངས་པ། གང་ཕྱི་དང ། 95a ༄#། །ནང་གི་སྐྱེ་མཆེད་དྲུག་པོ་འདི་རྣམས་མི་ལེན་པ་འདི་ནི་ཐམས་ཅད་མཁྱེན་པ་ཉིད་ཡོངས་སུ་རྫོགས་པའོ། །ཚངས་པ། དེ་ལྟར་ཐམས་ཅད་མཁྱེན་པ་ཉིད་ཡོངས་སུ་རྫོགས་པར་བྱ་བ་ནས་མིག་ལ་མི་ཆགས། རྣ་བ་ལ་མི་ཆགས། སྣ་ལ་མི་ཆགས། ལྕེ་ལ་མི་ཆགས། ལུས་ལ་མི་ཆགས། ཡིད་ལ་མི་ཆགས་ཏེ། དེ་བས་ན་དེ་བཞིན་གཤེགས་པ་ཐམས་ཅད་མཁྱེན་པའི་ཡེ་ཤེས་ཆགས་པ་མེད་ཅིང་སྒྲིབ་པ་མེད་པ་ཡིན་ནོ། །ཚངས་པ། ཐམས་ཅད་མཁྱེན་པ་ཉིད་ནི་ཆོས་གང་ཡང་མི་ལེན་ཏོ། །ཚངས་པ། འདི་ལྟར་ཐམས་ཅད་མཁྱེན་པ་ཉིད་ནི་ཆོས་ཐམས་ཅད་ཀྱི་སྣོད་དུ་མ་གྱུར་པ་ཡིན་ཏེ། ཚངས་པ། སྣོད་མ་ཡིན་པ་ཞེས་བྱ་བ་ནི་དངོས་པོ་མེད་པའི་ཚིག་བླ་དྭགས་སོ། །དངོས་པོ་མེད་པ་ཞེས་བྱ་བ་ནི་བླ་གབ་མེད་པའི་ཚིག་བླ་དྭགས་སོ། །ཐམས་ཅད་མཁྱེན་པ་ནི་བླ་གབ་མེད་པ་དང་མཚུངས་པ་སྟེ། དེ་བས་ན་དེ་ཆོས་གང་ཡང་མི་ལེན་ཏོ། །ཚངས་པ། འདི་ལྟ་སྟེ། དཔེར་ན། ནམ་མཁའ་ལ་གནས་ཏེ། བྱ་བ་ཐམས་ཅད་བྱེད་ཀྱང་ནམ་མཁའ་དེ་ནི་མི་གནས་པའོ། །དེ་བཞིན་དུ་ཐམས་ཅད་མཁྱེན་པ་ཉིད་ལ་ཡེ་ཤེས་ཐམས་ཅད་རྣམ་པར་བཞག་ཀྱང་ཐམས་ཅད་མཁྱེན་པ་ཉིད་ནི་མི་གནས་པའོ། །གསོལ་པ། བཅོམ་ལྡན་འདས། ཐམས་ཅད་མཁྱེན་པ་ཉིད་ཐམས་ཅད་མཁྱེན་པ་ཉིད་ཅེས་བགྱི་བ། བཅོམ་ལྡན་འདས། 95b ཅིའི་སླད་དུ་རྣམ་པ་ཐམས་ཅད་མཁྱེན་པ་ཉིད་ཅེས་བགྱི། བཀའ་སྩལ་པ། ཚངས་པ། ཉན་ཐོས་རྣམས་དང ། རང་སངས་རྒྱས་རྣམས་ཀྱི་སྤྱོད་པ་ཐམས་ཅད་དེས་ཤེས་ཏེ། དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །དེ་དག་གི་བསམ་པ་ཐམས་ཅད་ཀུན་ཤེས་པ་དང ། སྦྱོར་བ་ཀུན་ཤེས་པ་དང ། སྙིང་རྗེ་ཀུན་ཤེས་པ་དང ། བསླབ་པ་ཀུན་ཤེས་པ་དང ། ཡང་དག་པར་འཛིན་པ་ཀུན་ཤེས་པས་དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །རྒྱུ་བ་ཐམས་ཅད་རྣམ་པར་སྤངས་པ་དང ། རློམ་སེམས་ཐམས་ཅད་བཅོམ་པ་དེ་ནི་ཐམས་ཅད་མཁྱེན་པ་ཉིད་དོ། །ཐོབ་པ་མེད་ཅིང་རྣམ་པར་རིག་པ་མེད་ལ་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དེ་ལས་ཤེས་པར་གྱུར་པས་ན་དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །ཡེ་ཤེས་ཐམས་ཅད་མངོན་པར་རྟོགས་པ་དང ། སློབ་པའི་ཡེ་ཤེས་དང ། མི་སློབ་པའི་ཡེ་ཤེས་དང ། རང་སངས་རྒྱས་ཀྱི་ཡེ་ཤེས་དང ། ཐམས་ཅད་མཁྱེན་པའི་ཡེ་ཤེས་ཀྱང་འདི་ལྟར་རྣམ་པར་བཞག་པས་ན་ཐམས་ཅད་མཁྱེན་པ་ཉིད་ཅེས་བྱའོ། །ཡང་དག་པར་སྦྱོར་བས་འདི་ལ་ཡེ་ཤེས་འཇུག་པས་ན་དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །སྨན་ཐམས་ཅད་ཡོངས་སུ་ཤེས་པས་དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །ནད་ཐམས་ཅད་ཞི་བར་བྱས་པས་དེའི་ཕྱིར་ཐམས་ཅད་མཁྱེན་པ་ཉིད་ཅེས་ 96a ༄#། །བྱའོ། །བཅིང་བ་ཐམས་ཅད་བཅོམ་པས་དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །བག་ཆགས་ཀྱིས་མཚམས་སྦྱོར་བ་ཐམས་ཅད་བཅོམ་པས་དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །རྟག་ཏུ་མཉམ་པར་བཞག་པས་དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །ཆོས་ཐམས་ཅད་ལ་ཐེ་ཚོམ་མེད་པས་དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །འཇིག་རྟེན་པ་དང ། འཇིག་རྟེན་ལས་འདས་པའི་ཡེ་ཤེས་རྣམས་ཀྱང་ཐམས་ཅད་མཁྱེན་པ་འདི་ལས་རྣམ་པར་བཞག་པས་ན། དེའི་ཕྱིར་ཐམས་ཅད་མཁྱེན་པ་ཉིད་ཅེས་བྱའོ། །ཚངས་པ། དེའི་ཕྱིར་ཐམས་ཅད་མཁྱེན་པ་ཞེས་བྱ་བ་ནི་ཐམས་ཅད་མཁྱེན་པའི་ཡེ་ཤེས་ལ་མཁས་པའི་ཚིག་བླ་དྭགས་སོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟར་དེ་བཞིན་གཤེགས་པས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ཐམས་ཅད་ཀྱང་མཁྱེན་ལ། སེམས་ཀྱི་དམིགས་པ་ལའང་འཇུག་པ་མི་མངའ་བ་ནི་སངས་རྒྱས་ཀྱི་ཡེ་ཤེས་བསམ་གྱིས་མི་ཁྱབ་སྟེ་ངོ་མཚར་ཏོ། །བཅོམ་ལྡན་འདས། དེ་ལ་ཡོན་ཏན་གྱི་བྱེ་བྲག་ཚད་མ་མཆིས་པ་འདི་ལྟ་བུ་འདི་དག་གདའ་ན་རིགས་ཀྱི་བུའམ། རིགས་ཀྱི་བུ་མོ་སུ་ཞིག་བླ་ན་མེད་པ་ཡང་དག་ 96b པར་རྫོགས་པའི་བྱང་ཆུབ་ཏུ་སེམས་མི་བསྐྱེད། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སུ་དག་ཡོན་ཏན་རེ་བའི་སླད་དུ་བྱང་ཆུབ་ལ་འཇུག་ན་དེ་དག་ཐེག་པ་ཆེན་པོ་ལ་ཡང་དག་པར་ཞུགས་པ་མ་ལགས་པར་རིག་པར་བགྱིའོ། །དེ་ཅིའི་ཕྱིར་ཞེ་ན། བཅོམ་ལྡན་འདས། རེ་བར་བགྱི་བ་མ་མཆིས་པའི་སླད་དུ་ཆོས་ཐམས་ཅད་ནི་ཡོན་ཏན་དང་བྲལ་ཞིང་ཡོན་ཏན་མ་མཆིས་པ་སྟེ། དེ་བས་ན་བྱང་ཆུབ་སེམས་དཔའ་རྣམས་ཀྱིས་ཡོན་ཏན་གྱི་སླད་དུའམ། ལེགས་པའི་སླད་དུ་བྱང་ཆུབ་ལ་འཇུག་པར་མི་བགྱིའོ། །གཞན་དུ་ན་སྙིང་རྗེ་ཆེན་པོའི་རྒྱུས་བདག་གི་སྡུག་བསྔལ་ལས་ཡོངས་སུ་མི་སྐྲག་པའི་སླད་དུ། དགེ་བའི་ཆོས་བསྐྱེད་པར་བགྱི་པའི་སླད་དུ། ལྟ་བ་ལས་རྣམ་པར་ཐར་བར་བགྱི་བའི་སླད་དུ། ནད་ཐམས་ཅད་བསལ་པའི་སླད་དུ། ཡོངས་སུ་འཛིན་པ་གཏོང་བའི་སླད་དུ། མཛའ་བ་དང་མི་མཛའ་བ་ལ་མི་ལྟ་བའི་སླད་དུ། འཇིག་རྟེན་གྱི་ཆོས་རྣམས་ཀྱིས་མི་གོས་པའི་སླད་དུ། འདུས་བྱས་ལས་སྐྱོ་བའི་སླད་དུ། མྱ་ངན་ལས་འདས་པ་ལ་བདེ་བར་དགོད་པའི་སླད་དུ། དམ་པའི་ཆོས་ཡོངས་སུ་གཟུང་བའི་སླད་དུ། སེམས་ཅན་རྣམས་ཡོངས་སུ་སྨིན་པར་བགྱི་བའི་སླད་དུ། བཅོམ་ལྡན་འདས། བྱང་ཆུབ་སེམས་དཔའ་རེ་བ་མ་མཆིས་ 97a ༄#། །པར་བགྱི་སྟེ། ཕ་རོལ་ལ་མི་རེ་བར་བགྱིའོ། །བཅོམ་ལྡན་འདས། བྱང་ཆུབ་སེམས་དཔས་བགྱིས་པ་དང ། མ་བགྱིས་པ་ལ་འགྱོད་པ་མ་མཆིས་པར་བགྱིའོ། ། བཅོམ་ལྡན་འདས། བྱང་ཆུབ་སེམས་དཔའ་ནི་བདེ་བ་དང ། སྡུག་བསྔལ་གྱིས་གནོད་པར་མི་འགྱུར་རོ། །བཅོམ་ལྡན་འདས། བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡོངས་སུ་དག་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། འཁོར་ལོས་བསྒྱུར་བའི་རྒྱལ་པོའི་སྲིད་ནི་དགེ་བའི་རྩ་བ་ཡོངས་སུ་དག་པར་མི་སྨྲའོ། །བརྒྱ་བྱིན་དུ་འགྱུར་བའང་མ་ཡིན། ཚངས་པར་འགྱུར་བའང་མ་ཡིན་ཏེ། གང་ལ་སྐྱེ་བ་དང ། སྐྱེ་གནས་མེད་པ་དེ་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡོངས་སུ་དག་པའོ། །ནམ་བདག་ཀྱང་དགེ་བའི་རྩ་བ་ཡོངས་སུ་མི་འབྲི་ལ། ཆུང་དུ་ན་དུད་འགྲོའི་སྐྱེ་གནས་སུ་སོང་བ་ཡན་ཆད་སེམས་ཅན་གཞན་གྱི་དགེ་བའི་རྩ་བ་རྣམས་སྐྱེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡོངས་སུ་དག་པའོ། །དངོས་པོ་ཐམས་ཅད་ལ་མི་ལྟ་བའི་ཕྱིར་གཏོང་བ་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །ཡོངས་སུ་གདུང་བ་མེད་པའི་ཕྱིར་ཚུལ་ཁྲིམས་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །གནོད་སེམས་མེད་པའི་ཕྱིར་བཟོད་པ་ནི་བྱང་ 97b ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །ལེ་ལོ་མེད་པའི་ཕྱིར་བརྩོན་འགྲུས་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །རྩེ་གཅིག་པའི་ཕྱིར་བསམ་གཏན་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །ལྟ་བ་དང་བྲལ་བའི་ཕྱིར་ཤེས་རབ་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །སེམས་སྙོམས་པའི་ཕྱིར་བྱམས་པ་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །ལྷག་པའི་བསམ་པ་ཡོངས་སུ་དག་པའི་ཕྱིར་སྙིང་རྗེ་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །ཆོས་ལ་མོས་པ་བསྐྱེད་པའི་ཕྱིར་དགའ་བ་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །མཛའ་བ་དང ། སྡང་བ་མེད་པའི་ཕྱིར་བཏང་སྙོམས་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ། །ཉན་ཐོས་དང ། རང་སངས་རྒྱས་ཀྱིས་མི་འདོད་པའི་ཕྱིར་བྱང་ཆུབ་ཀྱི་སེམས་མི་གཏོང་བ་ནི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བའོ།། །། བམ་པོ་བཞི་པ། དེ་ནས་འཇམ་དཔལ་གཞོན་ནུར་གྱུར་པ་འཁོར་དེར་འདུས་ཏེ་ཅང་མི་ཟེར་བར་འདུག་གོ། དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇམ་དཔལ་གཞོན་ནུར་གྱུར་པ་འདི་འཁོར་འདིར་མཆིས་ཏེ། འདི་ལྟར་ཡང་དག་པར་བརྗོད་པའི་གཏམ་ཅུང་ཟད་ཀྱང་མི་སྟོན་ཏོ། 98a ༄#། །དེའི་ཚེ་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་བ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། ཆོས་བསྟན་པ་འདི་ལ་ཁྱོད་གཏམ་གྱི་རྒྱུད་འགའ་ཞིག་སྤོབས་པར་གྱིས་ཤིག། འཇམ་དཔལ་གྱིས་གསོལ་པ། ཆོས་གང་བཅོམ་ལྡན་འདས་ཀྱིས་མངོན་པར་རྫོགས་པར་སངས་རྒྱས་པའི་ཆོས་དེ་ལ་གདགས་པ་གང་ཡང་མཆིས་སམ། བཀའ་སྩལ་པ། འཇམ་དཔལ། ཆོས་དེ་ལ་གདགས་པ་གང་ཡང་མེད་དོ། །གསོལ་པ། བཅོམ་ལྡན་འདས། ཆོས་དེ་བརྗོད་པར་བགྱི་བ་ལགས་སམ། སྨྲ་བར་བགྱི་བ་ལགས་སམ། བསྟན་པར་བགྱི་བ་ལགས་སམ། བཀའ་སྩལ་པ། འཇམ་དཔལ། ཆོས་དེ་བརྗོད་པར་བྱ་བ་མ་ཡིན་ནོ། །སྨྲ་བར་བྱ་བ་མ་ཡིན་ནོ། །བསྟན་པར་བྱ་བ་མ་ཡིན་ནོ། །གསོལ་པ། བཅོམ་ལྡན་འདས། ཆོས་གང་མ་བརྗོད། མ་སྨྲས། མ་བསྟན་པ་དེ་བཤད་པར་ནུས་སམ། ཁྱད་པར་སེམས་གྱིས་སྨྲས་པ། འཇམ་དཔལ། ཁྱོད་སེམས་ཅན་གཞན་དང ། གང་ཟག་གཞན་དག་ལ་ཆོས་མི་སྟོན་ཏམ། སྨྲས་པ། ཚངས་པ། ཅི་ཆོས་ཀྱི་དབྱིངས་གཉིས་སུ་རབ་ཏུ་ཕྱེ་བ་ཡིན་ནམ། སྨྲས་པ། དེ་མ་ཡིན་ནོ། །སྨྲས་པ། ཆོས་ཐམས་ཅད་ཆོས་ཀྱི་དབྱིངས་སུ་ངེས་པ་མ་ཡིན་ནམ། སྨྲས་པ། ངེས་པ་ཡིན་ནོ། །སྨྲས་པ། ཚངས་པ། གལ་ཏེ་ཆོས་ཀྱི་ 98b དབྱིངས་ཀྱང་གཉིས་སུ་མེད་པ་ཡིན་ལ་ཆོས་ཐམས་ཅད་ཀྱང་ཆོས་ཀྱི་དབྱིངས་སུ་དེས་ན་སེམས་ཅན་གཞན་དང་གང་ཟག་གཞན་དག་ལ་ཇི་ལྟར་ཆོས་བསྟན་པར་བྱ། སྨྲས་པ། འཇམ་དཔལ། གཉིས་ཀྱང་མ་ཡིན་ལ་ཆོས་བསྟན་པ་ཡོད་དམ། སྨྲས་པ། ཚངས་པ། གལ་ཏེ་སྟོན་པའམ། ཉན་པ་འགའ་ཞིག་རྙེད་ན་ནི་ཡོད་དོ། །སྨྲས་པ། འཇམ་དཔལ། དེ་བཞིན་གཤེགས་པས་ཆོས་མ་བསྟན་ནམ། སྨྲས་པ། ཚངས་པ། བསྟན་མོད་ཀྱི་གཉིས་སུ་མ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ནི་གཉིས་སུ་མེད་པར་ཆོས་སྟོན་ཏེ་གཉིས་སུ་མི་མཛད་དོ། །སྨྲས་པ། འཇམ་དཔལ། གལ་ཏེ་ཆོས་ཐམས་ཅད་གཉིས་སུ་མེད་པ་ཡིན་ན། དེ་ཇི་ལྟར་བྱིས་པ་སོ་སོའི་སྐྱེ་བོ་རྣམས་གཉིས་སུ་མེད་པ་གཉིས་སུ་བྱེད། སྨྲས་པ། བདག་གི་རྒྱུད་ལ་བདག་ཏུ་འཛིན་པས་བྱིས་པ་སོ་སོའི་སྐྱེ་བོ་རྣམས་གཉིས་སུ་བྱེད་དེ། གཉིས་སུ་མེད་པ་ནི་ནམ་ཡང་གཉིས་སུ་མི་འགྱུར་ཏོ། །ཇི་ཙམ་དུ་མང་དུ་གཉིས་སུ་བྱས་ཀྱང་གཉིས་སུ་མེད་པའི་མཐའ་ལ་གཉིས་སུ་མེད་དོ། །སྨྲས་པ། འཇམ་དཔལ། གཉིས་སུ་མེད་པ་ཅི་རྣམ་པར་རིག་པར་བྱེད། སྨྲས་པ། གལ་ཏེ་རྣམ་པར་རིག་པར་བྱེད་ན་གཉིས་སུ་མེད་པ་མ་ཡིན་པར་འགྱུར་ཏེ། གཉིས་སུ་མེད་པ་ནི་རྣམ་པར་རིག་པ་མེད་པའོ། །ཚངས་པ། གཉིས་ཞེས་བྱ་བ་ནི་རྣམ་པར་རིག་པའོ། །དེ་བཞིན་གཤེགས་པས་ནི་རྣམ་པར་རིག་པ་ 99a ༄#། །མེད་པར་ཆོས་སྟོན་ཏེ། ཆོས་དེའང་ཇི་ལྟར་སྟོན་པ་དེ་བཞིན་དུ་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་དེ་ཡི་གེ་མེད་པའི་ཕྱིར་རོ། །སྨྲས་པ། འཇམ་དཔལ་དེ་བཞིན་གཤེགས་པས་ཆོས་བསྟན་པ་གང་དུ་འགྲོ། སྨྲས་པ། ཚངས་པ། དེ་བཞིན་གཤེགས་པས་ཆོས་བསྟན་པ་ནི་འགྲོ་བར་མེད་པར་འགྲོའོ། །སྨྲས་པ། འཇམ་དཔལ། དེ་བཞིན་གཤེགས་པས་མྱ་ངན་ལས་འདས་པར་འགྲོ་བའི་ཆོས་མ་བསྟན་ཏམ། སྨྲས་པ། ཅི་མྱ་ངན་ལས་འདས་པ་ལ་འགྲོ་བའམ། འོང་བར་དམིགས་སམ། སྨྲས་པ། མྱ་ངན་ལས་འདས་པ་ལ་འོང་བའང་མེད་འགྲོ་བའང་མེད་དོ། །སྨྲས་པ། ཚངས་པ། དེ་ལྟ་བས་ན་དེ་བཞིན་གཤེགས་པས་འགྲོ་བ་མེད་པར་འགྲོ་བའི་ཆོས་བསྟན་ཏོ། །སྨྲས་པ།་ཇི་ལྟར་ཐོས། སྨྲས་པ། ཇི་ལྟར་བརྗོད་པ་བཞིན་དུའོ། །སྨྲས་པ། ཇི་ལྟ་བུར་བརྗོད། སྨྲས་པ། ཇི་ལྟར་རྣམ་པར་རིག་པ་མེད་པ་དང ། ཐོས་པ་མེད་པ་བཞིན་ནོ། །སྨྲས་པ། དེ་བཞིན་གཤེགས་པའི་ཆོས་ཉན་པ་གང་ཡིན། སྨྲས་པ། གང་ཡུལ་ལ་ཟག་པ་མེད་པ་རྣམས་སོ། །སྨྲས་པ། ཆོས་འདི་སུས་ཤེས་པར་འགྱུར། སྨྲས་པ། གང་རྩོད་པར་མི་འགྱུར་བ་དང ། ཤེས་པར་མི་འགྱུར་བ་དང ། རྗེས་སུ་ཤེས་པར་མི་འགྱུར་བ་རྣམས་སོ། །སྨྲས་པ། འཇམ་དཔལ། ཇི་ལྟར་ན་དགེ་སློང་རྩོད་པ་མང་བ་ཡིན། སྨྲས་ 99b པ།་འདི་ནི་རིགས་སོ། །འདི་ནི་མི་རིགས་སོ་ཞེས་བྱ་བའང་ནི་རྩོད་པའོ། །དེ་བཞིན་དུ་བསྡུས་ཏེ་འདི་ནི་འབྲེལ་བའོ། །འདི་ནི་མ་འབྲེལ་བའོ་ཞེས་བྱ་བ་དང ། འདི་ནི་ཉོན་མོངས་པའོ། །འདི་ནི་རྣམ་པར་བྱང་བའོ་ཞེས་བྱ་བ་དང ། འདི་ནི་དགེ་བའོ། །འདི་ནི་མི་དགེ་བའོ་ཞེས་བྱ་བ་དང ། འདི་ནི་ཁ་ན་མ་ཐོ་བ་དང་བཅས་པའོ། །འདི་ནི་ཁ་ན་མ་ཐོ་བ་མེད་པའོ་ཞེས་བྱ་བ་དང ། འདི་ནི་ཟག་པ་དང་བཅས་པའོ། །འདི་ནི་ཟག་པ་མེད་པའོ་ཞེས་བྱ་བ་དང ། འདི་ནི་འཇིག་རྟེན་པའོ། །འདི་ནི་འཇིག་རྟེན་ལས་འདས་པའོ་ཞེས་བྱ་བ་དང ། འདི་ནི་འདུས་བྱས་སོ། །འདི་ནི་འདུས་མ་བྱས་སོ་ཞེས་བྱ་བ་དང ། འདི་ནི་ཚུལ་ཁྲིམས་སོ། །འདི་ནི་ངང་ཚུལ་ངན་པའོ་ཞེས་བྱ་བ་དང ། འདི་ནི་བྱ་བའོ། །འདི་ནི་བྱ་བ་མ་ཡིན་ནོ།། ཞེས་བྱ་བ་དང ། འདིས་ནི་ཐོབ་པར་འགྱུར་རོ། །འདིས་ནི་ཐོབ་པ་མ་ཡིན་པར་འགྱུར་རོ་ཞེས་བྱ་བ་འདིས་ནི་རྩོད་པའོ། །ཚངས་པ། ཇི་ཙམ་དུ་ཁེངས་པ་དང ། འདུད་པ་དང ། ལེན་པ་དང ། འདོར་བ་དེ་ཙམ་དུ་རྩོད་པ་སྟེ། དེ་བཞིན་གཤེགས་པས་ནི་རྩོད་པ་མེད་པར་ཆོས་བསྟན་ཏོ། །སྤྲོས་པ་ལ་དགའ་བ་ལ་ནི་མི་རྩོད་པ་མེད་དོ། །རྩོད་པ་མང་བ་ལ་ནི་དགེ་སྦྱོང་དུ་གྱུར་པ་མེད་དོ། །དགེ་སྦྱོང་འདོད་པ་ལ་ནི་འཐབ་པ་མེད་དོ། །སྨྲས་པ། འཇམ་དཔལ། ཇི་ལྟར་དགེ་སློང་དེ་བཞིན་གཤེགས་པའི་བསྟན་པ་བྱེད་པ་དང ། 100a ༄#། །བཀའ་བཞིན་བྱེད་པར་འགྱུར། སྨྲས་པ། ཚངས་པ། གང་ནམ་དགེ་སློང་བསྟོད་པའམ། སྨད་པ་བྱས་ཀྱང་གནོད་པ་མེད་ན་དེ་ལྟར་ན་བསྟན་པ་བཞིན་དུ་བྱེད་པ་ཡིན་ནོ། །གང་ཡི་གེའི་རྗེས་སུ་མི་རྩེགས་ན་དེ་ལྟར་ན་བཀའ་བཞིན་བྱེད་པ་ཡིན་ནོ། །གང་མཚན་མ་ཐམས་ཅད་ལས་མིའང་གྱུར་ན། དེ་ལྟར་ན་བསྟན་པ་བཞིན་བྱེད་པ་ཡིན་ནོ། །གང་དོན་དང་མི་འགལ་བར་བྱེད་ན་དེ་ལྟར་ན་བཀའ་བཞིན་བྱེད་པ་ཡིན་ནོ། །གང་ཆོས་ཡོངས་སུ་སྲུང་ན་དེ་ལྟར་ན་བསྟན་པ་བཞིན་དུ་བྱེད་པ་ཡིན་ནོ། །གང་ཚིག་རྣམས་དང་མཐུན་པར་མི་བྱེད་ན། དེ་ལྟར་ན་བཀའ་བཞིན་བྱེད་པ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་དགེ་སློང་དམ་པའི་ཆོས་ཡོངས་སུ་སྲུང་བ་ཡིན།། སྨྲས་པ། གང་མཉམ་པ་ཉིད་ལས་འགལ་བར་མི་བྱེད་ཅིང་ཆོས་ཀྱི་དབྱིངས་རྣམ་པར་འཁྲུག་པར་མི་བྱེད་ན་དེ་ལྟར་ན་དམ་པའི་ཆོས་ཡོངས་སུ་སྲུང་བ་ཡིན་ནོ། །སྨྲས་པ། འཇམ་དཔལ། ཇི་ལྟར་ན་དགེ་སློང་དེ་བཞིན་གཤེགས་པ་ལ་ཉེ་བར་གནས་པ་ཡིན། སྨྲས་པ། ཚངས་པ། གང་ཆོས་གང་ལའང་ཉེ་བའམ། རིང་པ་མེད་པར་མཐོང་བའི་དགེ་སློང་དེ་ནི་དེ་བཞིན་གཤེགས་པ་ལ་ཉེ་བར་གནས་པ་ཡིན་ནོ། །སྨྲས་པ། ཇི་ལྟར་ན། འཇམ་དཔལ། དགེ་སློང་དེ་བཞིན་གཤེགས་པ་ལ་རིམ་གྲོ་དང ། བསྙེན་ 100b བཀུར་བྱེད་པ་ཡིན། སྨྲས་པ། ཚངས་པ། དགེ་སློང་གང་ལུས་དང ། ངག་དང ། ཡིད་ཀྱིས་རྟུལ་བར་མི་བྱེད་པའི་དགེ་སློང་དེ་ནི་དེ་བཞིན་གཤེགས་པ་ལ་རིམ་གྲོ་དང ། བསྙེན་བཀུར་བྱེད་བའོ། །སྨྲས་པ། འཇམ་དཔལ། སུས་དེ་བཞིན་གཤེགས་པ་ལ་མཆོད་པར་འགྱུར། སྨྲས་པ། ཚངས་པ། གང་བསོད་ནམས་དང ། བསོད་ནམས་མ་ཡིན་པ་དང ། མི་གཡོ་བར་ཉེ་བར་འགྲོ་བའི་འདུ་བྱེད་ཐམས་ཅད་མངོན་པར་འདུ་མི་བྱེད་པའོ། །སྨྲས་པ། འཇམ་དཔལ། སུས་དེ་བཞིན་གཤེགས་པ་མཐོང ། སྨྲས་པ། གང་ཤའི་སྤྱན་དང ། ལྷའི་སྤྱན་དང ། ཤེས་རབ་ཀྱི་སྤྱན་དང ། ཆོས་ཀྱི་སྤྱན་དང ། སངས་རྒྱས་ཀྱི་སྤྱན་ལའང་མངོན་པར་མ་ཆགས་པ་དེས་དེ་བཞིན་གཤེགས་པ་མཐོང་ངོ ། །སྨྲས་པ། འཇམ་དཔལ། སུས་ཆོས་མཐོང ། སྨྲས་པ། གང་རྟེན་ཅིང་འབྲེལ་པར་འབྱུང་བ་མཐོང་ཞིང་འགལ་བར་མི་བྱེད་པ་རྣམས་ཀྱིས་སོ། །སྨྲས་པ། སུས་རྟེན་ཅིང་འབྲེལ་བར་འབྱུང་བ་རྣམས་མཐོང ། སྨྲས་པ། གང་མཉམ་པ་ཉིད་མི་སྐྱེད་ཅིང་འགལ་བར་མི་བྱེད་པས་སོ། །སྨྲས་པ། འཇམ་དཔལ། སུ་དག་མངོན་པར་ཤེས་པ་ཐོབ། སྨྲས་པ། གང་ཟག་པ་མི་བསྐྱེད་ཅིང་མི་འགོག་པ་རྣམས་སོ། །སྨྲས་པ། འཇམ་དཔལ། སུས་དེ་བཞིན་གཤེགས་པའི་བསླབ་པ་ལ་སློབ། སྨྲས་པ། གང་མངོན་པར་འདུ་མི་བྱེད་པ་དང ། མྱོང་བར་མི་བྱེད་པ་དང་ 101a ༄#། །མི་སྐྱེད་པ་དང ། སོ་སོར་མི་སྤོང་བ་རྣམས་སོ། །སྨྲས་པ། འཇམ་དཔལ། སུ་ཡང་དག་པར་ཞུགས། སྨྲས་པ། གང་ཁམས་གསུམ་པ་ལ་མ་ཞུགས་པའོ།། སྨྲས་པ། འཇམ་དཔལ། གང་ཤིན་ཏུ་དུལ་བ་ཡིན། སྨྲས་པ། གང་ཡང་སྲིད་པ་མི་ལེན་པའོ། །སྨྲས་པ། འཇམ་དཔལ། གང་བདེ་བར་གྱུར་པ་ཡིན། སྨྲས་པ། གང་ང་ཡིར་བྱ་བ་མེད་པ་རྣམས་སོ། །སྨྲས་པ། འཇམ་དཔལ། སུ་དག་གྲོལ་བ་ཡིན། སྨྲས་པ། གང་དམིགས་པར་འཁྲུག་པར་མི་བྱེད་པ་རྣམས་སོ། །སྨྲས་པ། འཇམ་དཔལ། སུ་དག་བརྒལ་བ་ཡིན། སྨྲས་པ། གང་འཁོར་བ་དང ། མྱ་ངན་ལས་འདས་པ་ལ་མི་གནས་པ་རྣམས་སོ། །སྨྲས་པ། འཇམ་དཔལ། ཟག་པ་ཟད་པའི་དགེ་སློང་ཅི་ཟད། སྨྲས་པ། ཚངས་པ། གལ་ཏེ་ཟད་པར་གྱུར་ན་ནི་ཟག་པ་ཟད་པར་མི་འགྱུར་ཏེ། ཟག་པ་དེ་དག་ནི་སྐད་ཅིག་པ་ཡིན་པས་དེས་དེ་དག་དེ་བཞིན་དུ་ཤེས་པས་ན་དེའི་ཕྱིར་ཟག་པ་ཟད་པ་ཞེས་བྱའོ། །སྨྲས་པ། འཇམ་དཔལ། སུ་དག་བདེན་པར་སྨྲ་བ་ཡིན། སྨྲས་པ། གང་རྩོད་པ་ཐམས་ཅད་ལས་ཤིན་ཏུ་འདས་པ་རྣམས་སོ། །སྨྲས་པ། འཇམ་དཔལ། སུ་ལམ་དུ་ཞུགས་པ་ཡིན། སྨྲས་པ། ཚངས་པ། བྱིས་པ་སོ་སོའི་སྐྱེ་བོ་རྣམས་ལམ་དུ་ཞུགས་པའོ། །སྨྲས་པ། འཇམ་དཔལ། སུ་ལམ་མ་ཡིན་པར་ཞུགས་པ་ཡིན། སྨྲས་པ། 101b གང་གིས་ཆོས་ཐམས་ཅད་གང་ནས་ཀྱང་མ་འོངས་པ་དང ། གང་དུའང་མི་འགྲོ་བར་ཤེས་པའི་འཕགས་པ་རྣམས་སོ། །སྨྲས་པ། འཇམ་དཔལ། བདེན་པ་མཐོང་བ་གང་ཡིན། སྨྲས་པ། ཆོས་གང་ཡང་མི་མཐོང་བའོ། །དེ་ཅིའི་ཕྱིར་ཞེ་ན། ཇི་ཙམ་དུ་མཐོང་བ་དེ་ཙམ་དུ་རྫུན་ཏེ། མཐོང་བ་མེད་པ་ནི་བདེན་པ་མཐོང་བའོ། །སྨྲས་པ། གང་མཐོང་བས་བདེན་པ་མཐོང ། སྨྲས་པ།་ལྟ་བར་གྱུར་པ་ཐམས་ཅད་མ་མཐོང་བས་བདེན་པ་མཐོང་ངོ ། །སྨྲས་པ། དེ་གང་དུ་བཙལ་བར་བྱ། སྨྲས་པ། ཕྱིན་ཅི་ལོག་བཞི་དག་ལས་བདེན་པ་བཙལ་བར་བྱའོ། །སྨྲས་པ། འཇམ་དཔལ། ཅི་ལ་བསམས་ཏེ་དེ་སྐད་སྟོན། སྨྲས་པ། ཕྱིན་ཅི་ལོག་བཞི་ཚོལ་བ་གང་ཡིན་པ་དེ་ལ་རྟག་པའང་མེད། བདེ་བའང་མེད། བདག་ཀྱང་མེད། གཙང་བའང་མེད་དེ།་གང་ལ་རྟག་པ་མེད་པ་དེ་ནི་མི་རྟག་པའོ། །གང་ལ་བདེ་བ་མེད་པ་དེ་ནི་སྡུག་བསྔལ་བའོ། །གང་ལ་བདག་མེད་པ་དེ་ནི་བདག་གོ་།གང་ལ་གཙང་བ་མེད་པ་དེ་ནི་མི་གཙང་བའོ། །ཚངས་པ། ཆོས་ཐམས་ཅད་ལ་བདག་མེད་པ་ནི་འཕགས་པའི་བདེན་པ་འཚོལ་བ་སྟེ། གང་བདེན་པ་འཚོལ་བ་འདི་ནི་སྡུག་བསྔལ་ཡོངས་སུ་མི་ཤེས་པ་ནས་ལམ་གྱི་བར་མི་སྒོམ་པའོ། །སྨྲས་པ། འཇམ་དཔལ། ཇི་ལྟར་ན་ལམ་སྒོམ་པ་ཡིན། སྨྲས་པ། སྒོམ་པ་ན་ཇི་ལྟར་དངོས་པོར་ཡང་མི་ལྟུང ། དངོས་པོ་མེད་པའང་མི་ལྟུང་ཞིང་ཆོས་གང་ཡང་ 102a ༄#། །དངོས་པོར་ཡང་མི་བྱེད། དངོས་པོ་མེད་པའང་མི་བྱེད་དེ། ཚངས་པ། གཉིས་དང་བྲལ་བ་ནི་ལམ་མོ། །ལམ་གང་གིས་བཙལ་པས་ཆོས་ཐམས་ཅད་མི་དམིགས་པ་འདི་ནི་ལམ་མོ། །ལམ་གང་གང་དུའང་ཕྲད་པར་མི་བྱེད་དེ། འདོར་བའང་མི་བྱེད་ཅིང་འཁོར་བའང་མེད། མྱ་ངན་ལས་འདས་པའང་མེད་པའོ། །དེ་ཅིའི་ཕྱིར་ཞེ་ན། ཕྲད་པར་བྱེད་པའང་མེད། དོར་བའང་མེད་པ་ནི་འཕགས་པ་རྣམས་ཀྱི་ལམ་མོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པ་ཞེས་བྱ་བས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཇི་ལྟར་ན་དགེ་བསྙེན་སངས་རྒྱས་ལ་སྐྱབས་སུ་སོང་བ་ཡིན། ཇི་ལྟར་ན་ཆོས་ལ་སྐྱབས་སུ་སོང་བ་ཡིན། ཇི་ལྟར་ན་དགེ་འདུན་ལ་སྐྱབས་སུ་སོང་བ་ཡིན། སྨྲས་པ། རིགས་ཀྱི་བུ། ནམ་དགེ་བསྙེན་ལྟ་བ་གཉིས་ཉེ་བར་མི་ལེན་པ་སྟེ། གཉིས་གང་ཞེ་ན། བདག་ཏུ་ལྟ་བ་མི་ལེན། ཕ་རོལ་ཏུ་ལྟ་བ་མི་ལེན། བདག་ཏུ་ལྟ་བ་མི་ལེན། སངས་རྒྱས་སུ་ལྟ་བ་མི་ལེན། བདག་ཏུ་ལྟ་བ་མི་ལེན། ཆོས་སུ་ལྟ་བ་མི་ལེན། བདག་ཏུ་ལྟ་བ་མི་ལེན། དགེ་འདུན་དུ་ལྟ་བ་མི་ལེན་པ་དེ་ཙམ་གྱིས་དགེ་བསྙེན་སངས་རྒྱས་དང ། ཆོས་དང ། དགེ་འདུན་ལ་སྐྱབས་སུ་སོང་བ་ཡིན་ནོ། །གཞན་ཡང ། རིགས་ཀྱི་བུ། ནམ་ 102b དགེ་བསྙེན་དེ་བཞིན་གཤེགས་པ་གཟུགས་སུ་ཁས་མི་ལེན། ཚོར་བར་མ་ཡིན། འདུ་ཤེས་སུ་མ་ཡིན། འདུ་ཤེས་དུ་མ་ཡིན། དེ་བཞིན་གཤེགས་པ་རྣམ་པར་ཤེས་པར་ཡང་ཁས་མི་ལེན་ན་དེ་ལྟར་ན་སངས་རྒྱས་ལ་སྐྱབས་སུ་སོང་བ་ཡིན་ནོ། །ནམ་ཆོས་གང་ལའང་རྣམ་པར་མི་རྟོག་ཅིང་སྒྲོ་མི་འདོགས་ན་དེ་ལྟར་ན་ཆོས་ལ་སྐྱབས་སུ་སོང་བ་ཡིན་ནོ། །ནམ་དགེ་འདུན་འདུས་མ་བྱས་སུའང་མོས་ལ། འདུས་བྱས་ལས་གུད་ནའང་འདུས་མ་བྱས་སུ་མོས་པར་ཡང་མི་བྱེད་ན། དེ་ལྟར་ན་དགེ་འདུན་ལ་སྐྱབས་སུ་སོང་བ་ཡིན་ནོ། ། གཞན་ཡང ། རིགས་ཀྱི་བུ། ནམ་དགེ་བསྙེན་སངས་རྒྱས་སུའང་མི་དམིགས། ཆོས་སུའང་མི་དམིགས། དགེ་འདུན་དུའང་མི་དམིགས་ན་དེ་ལྟར་ན་སངས་རྒྱས་དང ། ཆོས་དང ། དགེ་འདུན་ལ་སྐྱབས་སུ་སོང་བ་ཡིན་ནོ། །མཉམ་པར་གནས་པས་སྨྲས་པ། འཇམ་དཔལ། བྱང་ཆུབ་སེམས་དཔའ་གང་འདི་དག་བྱང་ཆུབ་ཏུ་རབ་ཏུ་ཞུགས་པ་དེ་དག་གང་དུ་རབ་ཏུ་ཞུགས་པ་ཡིན། སྨྲས་པ། བླ་གབ་མེད་པ་ལ་རབ་ཏུ་ཞུགས་སོ། །དེ་ཅིའི་ཕྱིར་ཞེ་ན། བྱང་ཆུབ་ནི་བླ་ག་བ་མེད་པ་དང་མཚུངས་སོ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་བྱང་ཆུབ་ཏུ་རབ་ཏུ་ཞུགས་པ་ཞེས་བརྗོད་པར་བྱ། སྨྲས་པ། རིགས་ཀྱི་བུ། ནམ་བྱང་ཆུབ་སེམས་དཔའ་རབ་ཏུ་འཇུག་པ་ཐམས་ཅད་རབ་ཏུ་ 103a ༄#། །འཇུག་པ་མ་ཡིན་པར་རབ་ཏུ་ཤེས་པ་དང ། ཆོས་ཐམས་ཅད་ཆོས་མ་ཡིན་པར་རབ་ཏུ་ཤེས་པ་དང ། སེམས་ཅན་ཐམས་ཅད་སེམས་ཅན་མ་ཡིན་པར་རབ་ཏུ་ཤེས་པ་སྟེ། དེ་ལྟར་ན། རིགས་ཀྱི་བུ། བྱང་ཆུབ་སེམས་དཔའ་བྱང་ཆུབ་ལ་རབ་ཏུ་ཞུགས་པ་ཞེས་བརྗོད་པར་བྱའོ། །དེ་ནས་བཅོམ་ལྡན་འདས་ལ་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་བྱང་ཆུབ་སེམས་དཔའ་ཞེས་བགྱི ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། ནམ་བྱང་ཆུབ་སེམས་དཔའ་ལོག་པར་ངེས་པའི་སེམས་ཅན་རྣམས་ལ་སྙིང་རྗེ་བསྐྱེད་ཅིང་ཡང་དག་པར་ངེས་པའི་སེམས་ཅན་རྣམས་ལ་ལྷག་པར་གུས་པ་མི་སྐྱེད་པའི་ཚིག་བླ་དྭགས་ནི་བྱང་ཆུབ་སེམས་དཔའ་ཞེས་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ། བྱང་ཆུབ་སེམས་དཔའ་ནི་ངེས་པ་དང ། མ་ངེས་པའི་སེམས་ཅན་རྣམས་ཀྱི་ཕྱིར་བྱང་ཆུབ་ཏུ་སྨོན་ལམ་མི་འདེབས་ཀྱི། གཞན་དུ་ན་ལོག་པར་ངེས་པའི་སེམས་ཅན་རྣམས་ཀྱི་ཕྱིར་བྱང་ཆུབ་ཏུ་སྨོན་ལམ་འདེབས་ཏེ། དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །དེ་བས་ན་རིགས་ཀྱི་བུ། བྱང་ཆུབ་སེམས་དཔའ་ལོག་པར་ངེས་པའི་སེམས་ཅན་རྣམས་ལ་སྙིང་རྗེ་ 103b བར་བྱས་ནས་བྱང་ཆུབ་ཏུ་སྨོན་ལམ་འདེབས་ཏེ། དེ་དེའི་ཕྱིར་བྱང་ཆུབ་སེམས་དཔའ་ཞེས་བྱའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་བྱང་ཆུབ་ཅེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་གི་སླད་དུ་བྱང་ཆུབ་སེམས་དཔའ་ཞེས་བགྱི་བ་བདག་ཀྱང་སྤོབས་སོ། །བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་ཁྱོད་སྤོབས་པར་གྱིས་ཤིག་།བྱང་ཆུབ་ཀྱིས་གསོལ་པ། བཅོམ་ལྡན་འདས། འདི་ལྟ་སྟེ། སྐྱེས་པའམ། བུད་མེད་ཇི་ལྟ་བུར་བསྟན་པའི་ཡན་ལག་བརྒྱད་དང་ལྡན་པའི་གསོ་སྦྱིན་ལ་མ་རལ་མ་ཞིག་པར་ཉེ་བར་གནས་ན་དེ་ཡན་ལག་བརྒྱད་ཀྱི་གསོ་སྦྱིན་ཡང་དག་པར་བླངས་པ་ཞེས་བགྱི་བའི་གྲངས་སུ་མཆིའོ། །བཅོམ་ལྡན་འདས། དེ་བཞིན་དུ་བྱང་ཆུབ་སེམས་དཔའ་སེམས་དང་པོ་བསྐྱེད་པ་ནས་བཟུང་སྟེ་བྱང་ཆུབ་ཀྱི་སྙིང་པོའི་བར་དུ་བྱང་ཆུབ་ཀྱི་སེམས་ལས་མ་གཡོས་པ་ལགས་ཏེ། དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་བློ་གྲོས་བརྟན་པས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ལྷག་པའི་བསམ་པ་བརྟན་པས་སེམས་ཅན་ལ་མི་དམིགས་པའི་བྱམས་པ་དང་ལྡན་པ་ལགས་ཏེ། དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་སེམས་ཅན་སྒྲོལ་གྱིས་གསོལ་པ། བཅོམ་ལྡན་འདས། འདི་ལྟ་སྟེ། དཔེར་ན། གྲུའམ། ཟམ་པ་ནི་སེམས་ཅན་ 104a ༄#། །རྒལ་བ་ལ་སྐྱོ་བ་མ་མཆིས་ཤིང་རྣམ་པར་མི་རྟོག་པ་དེ་བཞིན་དུ། བཅོམ་ལྡན་འདས། བྱང་ཆུབ་སེམས་དཔའ་གང་ལ་སེམས་ཅན་ཐམས་ཅད་བསྒྲལ་བའི་སླད་དུ་དེ་ལྟ་བུའི་སེམས་མཆིས་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་ངན་སོང་སེལ་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་སངས་རྒྱས་ཀྱི་ཞིང་གང་དུ་སུག་པ་བཞག་མ་ཐག་ཏུ་ངན་སོང་ཐམས་ཅད་རབ་ཏུ་ཞི་བར་འགྱུར་ཏེ། དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་སྤྱན་རས་གཟིགས་ཀྱི་དབང་པོས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་མཐོང་བ་ཙམ་གྱིས་སེམས་ཅན་བྱང་ཆུབ་ཏུ་ངེས་པར་འགྱུར་བ་དང ། མིང་ཐོས་པས་ཀྱང་འཇིགས་པ་ཐམས་ཅད་ལས་ཡོངས་སུ་ཐར་པར་འགྱུར་ཏེ། དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་མཐུ་ཆེན་ཐོབ་ཀྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་གོམ་པ་འདོར་ཞིང་མཆི་བ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་བདུད་ཀྱི་ཁམས་ཐམས་ཅད་རབ་ཏུ་གཡོ་བར་འགྱུར་ཏེ། དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་ཀུན་ཏུ་མི་སྐྱོ་བས་གསོལ་པ། བཅོམ་ལྡན་འདས། གལ་ཏེ་བསྐལ་ 104b བ་གངྒཱའི་ཀླུང་གི་བྱེ་མ་སྙེད་ཉིན་ཞག་གཅིག་ཏུ་གྱུར་ལ། དེ་ཉིན་ཞག་ཏུ་བགྲང་བ་དེ་ལྟ་བུའི་ཚུལ་གྱིས་ཞག་བཅོ་ལྔ་ལ་ཟླ་བ་ཕྱེད། ཞག་སུམ་ཅུ་ལ་ཟླ་བ་གཅིག། ཟླ་བ་བཅུ་གཉིས་ལ་ལོ་གཅིག་པའི་ལོ་བྱེ་བ་བརྒྱ་སྟོང་ལ་སངས་རྒྱས་གཅིག་བྱུང་ནས་མཉེས་པར་བྱེད་དེ། རྣམ་གྲངས་འདི་ལྟ་བུས་གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ཀྱི་ཞིང་ན་ཚངས་པ་སྤྱོད་པ་སྤྱད་ནས་ཕྱིས་ལུང་བསྟན་ཀྱང་ཡོངས་སུ་མི་སྐྱོ་བ་སྟེ། དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་དེད་དཔོན་བཟང་པོས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ལམ་ངན་པར་ཞུགས་པའི་སེམས་ཅན་ལམ་ངན་པར་ཞུགས་པ་རྣམས་ལ་ལམ་བཟང་པོ་ལ་དགོད་པའི་སླད་དུ་སྙིང་རྗེ་ཆེན་པོ་བསྐྱེད་ཅིང་དེ་ལ་ལན་རེ་བ་མ་མཆིས་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་རི་རབ་ཆེན་པོས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ཆོས་ཐམས་ཅད་རི་རབ་དང་མཚུངས་ཤིང་རྣམ་པར་མི་རྟོག་པར་རབ་ཏུ་འཚལ་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་མཐུ་བོ་ཆེས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ཉོན་མོངས་པ་ཐམས་ཅད་ཀྱིས་མི་ཆོམ་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་སེམས་ཀྱིས་ 105a ༄#། །གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་སེམས་ཀྱི་ཆོས་ཐམས་ཅད་ལ་སེམས་ཀྱང་དེ་ལ་མ་རྨས་ཤིང་མཉམས་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་སེང་གེའི་འགྲོས་སུ་འགྲོ་བས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ཆོས་ཟབ་མོ་ལ་བཟོད་ཅིང་མི་འཇིགས་མི་སྐྲག་སྟེ། ཕ་རོལ་གྱི་མུ་སྟེགས་ཅན་ཐམས་ཅད་སྐྲག་པར་བགྱིད་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་བསམ་གྱིས་མི་ཁྱབ་པས་གསོལ་པ། བཅོམ་ལྡན་འདས། གང་སེམས་ལས་བསམ་གྱིས་མི་ཁྱབ་པར་འཇུག་ཅིང་སེམས་རྣམས་པར་མི་སེམས་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །ལྷའི་བུ་མཚམས་བཟང་གིས་གསོལ་པ། གང་ལྷའི་གནས་ཐམས་ཅད་དུའང་སྐྱེ་ལ་ཅི་ལའང་ཆགས་པར་མི་བགྱིད། འདོད་ཆགས་དང་བྲལ་བའི་ཆོས་ཉིད་ཀྱང་ཁོང་དུ་ཆུད་པར་མི་བགྱིད་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་བདེན་པར་སྨྲ་བས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་གི་ངག་ནི་བདེན་པའི་རྗེས་སུ་འཇུག་ཅིང་རྨི་ལམ་ནའང་རྫུན་གྱི་ཚིག་མི་སྨྲ་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། ། 105b བྱང་ཆུབ་སེམས་དཔའ་མཐོང་ན་དགས་གསོལ་པ། གང་གཟུགས་ཐམས་ཅད་སངས་རྒྱས་ཀྱི་གཟུགས་སུ་མཐོང་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་རྟག་ཏུ་སྙིང་བརྩེ་བས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་འཁོར་བར་ཞུགས་པའི་སེམས་ཅན་སྡུག་བསྔལ་བ་རྣམས་མཐོང་ནས་ཆོས་ལ་དགའ་བ་མ་གཏོགས་པ་དང ། སེམས་ཅན་ཡོངས་སུ་སྨིན་པར་བགྱི་བ་མ་གཏོགས་པར་དགའ་བ་ཐམས་ཅད་ལ་དགའ་བར་མི་བགྱིད་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ།། བྱང་ཆུབ་སེམས་དཔའ་ཐོགས་པ་མེད་ཀྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ཉོན་མོངས་པ་ཐམས་ཅད་དང ། བདུད་ཐམས་ཅད་ལའང་ཐོགས་པ་མ་མཆིས་པར་འགྱུར་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་རྟག་ཏུ་དགའ་དགོད་དབང་པོས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་རྟག་ཏུ་དགོད་པ་དང ། རབ་ཏུ་དགའ་བའི་དབང་པོ་དག་གིས་བདག་གི་བསམ་པ་ཡོངས་སུ་རྫོགས་ཤིང་བགྱི་བ་བགྱིས་པ། བགྱིད་པར་བགྱིས་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །སྲིང་མོ་ཡིད་གཉིས་རྣམ་པར་འཇོམ་པས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ཆོས་ཐམས་ཅད་ལ་ཡིད་གཉིས་མ་ 106a ༄#། །མཆིས་ཤིང་ཐེ་ཚོམ་མ་མཆིས་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །གཞོན་ནུ་མ་སེང་གེས་གསོལ་པ། བཅོམ་ལྡན་འདས། གང་ལ་བུད་མེད་ཀྱི་ཆོས་ཀྱང་མ་མཆིས། སྐྱེས་པའི་ཆོས་ཀྱང་མ་མཆིས་ལ་སེམས་ཅན་ཡོངས་སུ་སྨིན་པར་བགྱི་བའི་སླད་དུ་གཟུགས་སྣ་ཚོགས་ཀྱང་སྟོན་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བུ་མོ་རིན་ཆེན་གྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་སངས་རྒྱས་དང ། ཆོས་དང ། དགེ་འདུན་རིན་པོ་ཆེ་མ་གཏོགས་པའི་རིན་པོ་ཆེ་གཞན་ལ་དགའ་བ་མི་སྐྱེད་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །དགེ་བསྙེན་སགས་བྱིན་གྱིས་གསོལ་པ། བཅོམ་ལྡན་འདས། དམིགས་པ་ཅན་ལ་ནི་བྱང་ཆུབ་མ་མཆིས་ཏེ། གང་ཆོས་ཐམས་ཅད་ལ་མི་དམིགས་པ་དང ། མི་སྐྱེད། མི་འགོག་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །ཁྱིམ་བདག་བཟང་སྐྱོང་གིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་གི་མིང་ཙམ་བཟུང་བས་སེམས་ཅན་བྱང་ཆུབ་ཏུ་ངེས་པར་འགྱུར་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །གཞོན་ནུར་གྱུར་པ་རིན་ཆེན་ཟླ་བས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་རྟག་ཏུ། རྒྱུན་མི་ཆད་པར་གཞོན་ནུའི་ཚངས་ 106b པ་སྤྱོད་པ་དང་ལྡན་ཞིང་འདོད་པ་ལ་རྟོག་པས་ཀྱང་ཡོངས་སུ་མི་སྤྱོད་ན། གཉིས་ཀྱི་དབང་པོ་གཉིས་མཇལ་བ་ལྟ་ཅི་སྨོས་ཏེ། དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །ལྷའི་བུ་མནྡཱར་བའི་དྲིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ཚུལ་ཁྲིམས་ཀྱི་དྲིས་ཡོངས་སུ་བསྒོས་པས་གང་ཚུལ་ཁྲིམས་ཀྱི་དྲི་ལས་དྲི་གཞན་གྱི་ངད་མི་ལྡང་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་དགའ་བྱེད་ཀྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་སངས་རྒྱས་ལ་བསྙེན་བཀུར་བགྱི་བ་དང ། དམ་པའི་ཆོས་ཡོངས་སུ་གཟུང་བ་དང ། སེམས་ཅན་ཡོངས་སུ་སྨིན་པར་བགྱི་བ་དང ། ཆོས་གསུམ་གྱིས་དགའ་བ་བགྱིད་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །ཚངས་པ་ཁྱད་པར་སེམས་ཀྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་སངས་རྒྱས་ཀྱི་ཆོས་མ་ལགས་པའི་ཆོས་གང་ཡང་མ་མཆིས་སོ་ཞེས་སྣང་བར་འགྱུར་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་བྱམས་པས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་མཐོང་མ་ཐག་ཏུ་སེམས་ཅན་དག་བྱམས་པའི་ཏིང་ངེ་འཛིན་ཐོབ་པར་འགྱུར་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །འཇམ་དཔལ་གཞོན་ནུར་གྱུར་པས་གསོལ་པ། བཅོམ་ 107a ༄#། །ལྡན་འདས། བྱང་ཆུབ་སེམས་དཔའ་གང་ཆོས་སྟོན་པ་ཐམས་ཅད་ཀྱང་སྟོན་ལ་ཆོས་སུ་འདུ་ཤེས་པའང་མ་མཆིས། ཆོས་མ་ལགས་པར་འདུ་ཤེས་པའང་མ་མཆིས། བདག་ཏུ་འདུ་ཤེས་པའང་མ་མཆིས། ཕ་རོལ་ཏུ་འདུ་ཤེས་པའང་མི་བགྱིད་དེ། དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་གི་འོད་ཀྱིས་སེམས་ཅན་རྣམས་ཀྱི་ཉོན་མོངས་པ་ཐམས་ཅད་རབ་ཏུ་ཞི་བར་བགྱིད་པ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །བྱང་ཆུབ་སེམས་དཔའ་ཀུན་ཏུ་མེ་ཏོག་གིས་གསོལ་པ། བཅོམ་ལྡན་འདས། བྱང་ཆུབ་སེམས་དཔའ་གང་ཕྱོགས་བཅུའི་འཇིག་རྟེན་ན་སངས་རྒྱས་ཀྱི་ཞིང་ཐམས་ཅད་དེ་བཞིན་གཤེགས་པ་རྣམས་ཀྱིས་མེ་ཏོག་རྒྱས་པ་ལྟ་བུར་མཐོང་བ་དེ་ནི་དེའི་སླད་དུ་བྱང་ཆུབ་སེམས་དཔའ་ཞེས་བགྱིའོ། །དེ་ལྟར་བྱང་ཆུབ་སེམས་དཔའ་དེ་དག་གིས་རང་རང་གི་སྤོབས་པ་རྣམ་པར་བཤད་དོ། །དེ་ནས་བཅོམ་ལྡན་འདས་ཀྱིས་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པ་ལ་བཀའ་སྩལ་པ། བྱང་ཆུབ་སེམས་དཔའ་གང་སྡུག་བསྔལ་བའི་སེམས་ཅན་ཐམས་ཅད་ཐར་བར་བྱ་བར་སྤྲོ་ཞིང་དགེ་བའི་རྩ་བ་ཐམས་ཅད་ཀྱང་སེམས་ཅན་ཐམས་ཅད་ལ་གཏོང་བ་དེ་ནི་དེའི་ཕྱིར་ 107b བྱང་ཆུབ་སེམས་དཔའ་ཞེས་བྱའོ། །དེ་ནས་ཚངས་པ་ཁྱད་པར་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁྱོད་གནས་པ་ཅི་ལྟ་བུར་གནས་པར་བྱེད། སྨྲས་པ། གནས་པ་གང་གིས་འདུས་བྱས་ཐམས་ཅད་ལ་ཞུགས་པའི་སེམས་ཅན་ཐམས་ཅད་གནས་པའོ། །སྨྲས་པ། གང་གནས་པ་ནི་འདུས་བྱས་ཐམས་ཅད་ལ་ཞུགས་པའི་སེམས་ཅན་ཐམས་ཅད་གནས་པ་གང་གིས་གནས། སྨྲས་པ། གང་གིས་དེ་བཞིན་གཤེགས་པ་ཐམས་ཅད་གནས་པ་གང་གིས་གནས་པའོ། །སྨྲས་པ། དེ་བཞིན་གཤེགས་པ་ཐམས་ཅད་གནས་པ་གང་གིས་གནས་པ་མཛད། སྨྲས་པ། དོན་དམ་པའི་སྟོང་པ་ཉིད་ལ་གནས་པས་སོ། །སྨྲས་པ། དེ་གལ་ཏེ་རིགས་ཀྱི་བུ་གནས་པ་གང་གིས་བྱིས་པ་སོ་སོའི་སྐྱེ་བོ་ཐམས་ཅད་གནས་པ་དེས་དེ་བཞིན་གཤེགས་པ་ཐམས་ཅད་གནས་པར་མཛད་ན་དེ་བཞིན་གཤེགས་པ་རྣམས་ལ་ཁྱད་པར་དུ་འཕགས་པ་ཅི་ཞིག་ཡོད། སྨྲས་པ། ཚངས་པ། དེ་སྟོང་པ་ཉིད་ལ་ཁྱད་པར་ཡོད་པར་འདོད་དམ། སྨྲས་པ། འཇམ་དཔལ། དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། བཅོམ་ལྡན་འདས་ཀྱིས་ཆོས་ཐམས་ཅད་སྟོང་པ་ཞེས་བཤད་དམ། སྨྲས་པ། དེ་དེ་བཞིན་ནོ། །སྨྲས་པ། ཚངས་པ། དེའི་ཕྱིར་ཆོས་ཐམས་ཅད་བྱེ་བྲག་མེད་དེ། དེ་དག་གིས་གནས་པའང་དེའི་མཚན་ཉིད་དོ། །ཚངས་པ། དེ་བཞིན་གཤེགས་པ་ནི་ཆོས་ཐ་དད་དུ་མི་འདོགས་ 108a ༄#། །སོ། །སྨྲས་པ། འཇམ་དཔལ། གནས་པ་གནས་པ་ཞེས་བྱ་བའི་གནས་པ་དེ་གང་ཡིན། སྨྲས་པ། ཚངས་པ། གང་ལ་ཚངས་པའི་གནས་བཞི་ཡོད་པ་དེ་ནི་གནས་ཞེས་བྱ་སྟེ། གང་ཚངས་པ། ཚངས་པའི་གནས་བཞི་དང་བྲལ་བ་དེ་ནི་གནས་ལ་གནས་པ་མ་ཡིན་ནོ། །གནས་གང་ལ་གནས་པས་ཚངས་པའི་གནས་བཞི་རྫོགས་པར་བྱས་ཏེ་གནས་པ་དེ་དག་ནི་གནས་ལ་གནས་པའོ། །ཚངས་པ། དགོན་པའམ། བླ་གབ་མེད་པ་ན་གནས་ཀྱང་ཚངས་པའི་གནས་བཞི་དང་བྲལ་ན་དེ་གནས་ལ་གནས་པ་མ་ཡིན་ནོ། །གནས་པ་ལ་མཁས་པ་མ་ཡིན་ནོ། །སྨྲས་པ། དེ་སྟེ་ཡང་ཐོག་དང ། ཁང་བུ་བརྩེགས་པར་གསེར་གྱི་ཁྲི་ལ་གདིང་བ་དང ། དགབ་པ་བཤམས་པའི་གནས་ན་གནས་ཀྱང་ཚངས་པའི་གནས་བཞི་དང་ལྡན་ན་དེ་དག་གནས་ལ་གནས་ཤིང་གནས་ལ་མཁས་པ་ཡིན་ནོ། །སྨྲས་པ། གནས་པ་གང་གིས་གནས་ན་ཡེ་ཤེས་མཐོང་བར་འགྱུར། སྨྲས་པ། གནས་པ་གང་གིས་གནས་ན་བདག་མཐོང་བ་རྣམ་པར་དག་པར་འགྱུར་བའོ། །སྨྲས་པ། ཅི་འཇམ་དཔལ། གང་བདག་མཐོང་བ་དེ་ཡེ་ཤེས་མཐོང་བའམ། སྨྲས་པ། ཚངས་པ། དེ་དེ་བཞིན་ཏེ། གང་བདག་མཐོང་བ་དེ་ཡེ་ཤེས་མཐོང་ངོ ། །ཚངས་པ། འདི་ལྟ་སྟེ། དཔེར་ན། སྐྱེས་བུ་གསེར་བལྟ་མཁས་པ་ནི་ངན་པ་བལྟ་ཤེས་པས་བཟང་པོ་བལྟར་ཤེས་པ་ལ་ངེས་པར་འབྱུང་ངོ ། །དེ་བཞིན་ 108b དུ་བདག་མཐོང་བས་ཡེ་ཤེས་མཐོང་བ་རྣམ་པར་དག་པར་འགྱུར་རོ། །སྨྲས་པ། འཇམ་དཔལ། བདག་མཐོང་བ་གང་ཡིན། སྨྲས་པ། གང་བདག་མེད་པའི་ཆོས་ཉིད་དེ། ཚངས་པ། བདག་ནི་ཤིན་ཏུ་དངོས་པོ་མེད་པ། མ་གྲུབ་པ་གང་དེ་ལྟར་མགོ་གཅིག་ཏུ་གྱུར་པ་དེ་ནི་བདག་མཐོང་བ་ཞེས་བྱའོ། །སྨྲས་པ། འཇམ་དཔལ། ཁྱོད་ཀྱིས་ཇི་ལྟར་བཤད་པའི་དོན་དེས་ཤེས་ཏེ། བདག་མཐོང་བས་སངས་རྒྱས་མཐོང་ངོ ། །དེ་ཅིའི་ཕྱིར་ཞེ་ན། བདག་གིས་ངོ་བོ་ཉིད་ཀྱིས་སངས་རྒྱས་ཀྱི་ངོ་བོ་ཉིད་དོ། །སྨྲས་པ། ཚངས་པ། དེ་དེ་བཞིན་ནོ། །སྨྲས་པ། འཇམ་དཔལ། གང་གིས་དེ་བཞིན་གཤེགས་པ་མཐོང ། སྨྲས་པ། གང་བདག་ཏུ་ལྟ་བ་འཁྲུག་པར་མི་བྱེད་པས་སོ། །དེ་ཅིའི་ཕྱིར་ཞེ་ན། བདག་ཏུ་ལྟ་བ་ནི་ཆོས་སུ་ལྟ་བ་སྟེ། ཆོས་མཐོང་བས། སངས་རྒྱས་མཐོང་བའོ། །སྨྲས་པ། འཇམ་དཔལ། རྣམ་གྲངས་གང་གིས་གང་མ་ཞུགས་པ་དེ་དག་ཡང་དག་པར་ཞུགས་པར་འགྱུར་བ་ཡོད་དམ། སྨྲས་པ། ཚངས་པ། གང་འདུས་བྱས་ཀྱི་དངོས་པོ་ཐམས་ཅད་ལའང་མ་ཞུགས་པ་དེ་ཡང་དག་པར་ཞུགས་པ་ཡིན་ནོ། །སྨྲས་པ། ཇི་ལྟ་བུ་ལ་ཞུགས་ན་ཡང་དག་པར་ཞུགས་པ་ཞེས་བྱ། སྨྲས་པ། གང་སྤོང་བའི་ཕྱིར་ཡང་མ་ཡིན། མངོན་དུ་བྱ་བའི་ཕྱིར་ཡང་མ་ཡིན་པ་ལ་འཇུག་པ་དེ་ནི་ཡང་དག་པར་ཞུགས་པ་ཞེས་བྱའོ། །སྨྲས་པ། འཇམ་དཔལ། གང་དག་གིས་དེ་བཞིན་གཤེགས་པ་མ་མཐོང་ 109a ༄#། །ལ་འཕགས་པ་ཤེས་རབ་ཀྱི་མིག་རྣམ་པར་སྦྱངས་པར་འགྱུར་བའི་རྣམ་གྲངས་ཡོད་དམ། སྨྲས་པ། ཚངས་པ། གང་དེ་བཞིན་གཤེགས་པ་ལ་གཉིས་སུ་མི་ལྟ་བ་དེ་དག་གི་འཕགས་པའི་ཤེས་རབ་ཀྱི་མིག་རྣམ་པར་དག་པར་འགྱུར་རོ། །སྨྲས་པ། འཇམ་དཔལ། ཤེས་རབ་ཀྱི་མིག་གིས་ཅི་མཐོང ། སྨྲས་པ། ཚངས་པ། གལ་ཏེ་ཆོས་གང་ཡང་མཐོང་བར་གྱུར་ན་ཤེས་རབ་ཀྱི་མིག་མ་ཡིན་པར་འགྱུར་རོ། །ཚངས་པ། ཤེས་རབ་ཀྱི་མིག་ནི་འདུས་བྱས་ཀྱང་མི་མཐོང ། འདུས་མ་བྱས་ཀྱང་མི་མཐོང་ངོ ། །དེ་ཅིའི་ཕྱིར་ཞེ་ན། ཤེས་རབ་ནི་རྣམ་པར་མི་རྟོག་པ་སྟེ། དེ་ནི་འདུས་བྱས་མ་ཐོབ་བར་རུང་བ་མ་ཡིན་ནོ། །འདུས་མ་བྱས་ཀྱང་མིག་གི་ལམ་ལས་འདས་པས་དེའང་མི་མཐོང་ངོ ། །སྨྲས་པ། འཇམ་དཔལ།་ཡང་དག་པར་ཞུགས་པའི་དགེ་སློང་འབྲས་བུ་ཐོབ་པར་མི་འགྱུར་བའི་རྣམ་གྲངས་ཡོད་དམ། སྨྲས་པ། ཚངས་པ། ཡང་དག་པར་སྦྱོར་བ་ལ་འབྲས་བུ་ཐོབ་པ་མེད་པའང་ཡོད་དོ། །ཡང་དག་པའི་སྦྱོར་བ་ནི་གང་ལའང་མི་སྦྱོར་བའོ། །དེ་ལ་འབྲས་བུ་ཐོབ་པར་རྣམ་པར་རྟོག་པའང་མེད་དེ། ཚངས་པ། འཐོབ་པ་མེད་པ་ལས་འཐོབ་པར་ལྟའོ། །གང་འཐོབ་པ་དེ་ནི་མངོན་པའི་ང་རྒྱལ་དང་བཅས་པའོ། །ཡང་དག་པའི་སྦྱོར་བ་ལ་ནི་མངོན་པའི་ང་རྒྱལ་དང ། མངོན་པའི་ང་རྒྱལ་མེད་པའང་མེད། ཐོབ་པའང་མེད། མངོན་པར་རྟོགས་པའང་ 109b མེད་དོ། །སྨྲས་པ། འཇམ་དཔལ། ཆོས་གང་དག་མངོན་དུ་རྟོགས་པར་བྱ་བའི་ཕྱིར་ཁོང་དུ་ཆུད་པ་ཞེས་བསྟན། སྨྲས་པ། ཚངས་པ། ཆོས་གང་མ་སྐྱེས། མ་བསྐྱེད། བསྐྱེད་པར་མི་འགྱུར་བའི་ཆོས་དེ་དག་མངོན་པར་རྟོགས་པར་བྱ་བའི་ཕྱིར་ཁོང་དུ་ཆུད་པའོ་ཞེས་བསྟན་ཏོ། །སྨྲས་པ། འཇམ་དཔལ། མ་སྐྱེས་པའི་ཆོས་ལ་མངོན་པར་རྟོགས་པ་གང་ཡིན། སྨྲས་པ། གང་མི་སྐྱེ་བ་འདི་ཉིད་མངོན་པར་རྟོགས་པ་ཡིན་ཏེ། དེའི་ཕྱིར་འདུས་བྱས་ཐམས་ཅད་མ་སྐྱེས་པར་མཐོང་ཞིང་ཡང་དག་པ་ཉིད་དུ་ངེས་པར་འཇུག་པར་ཞེས་བྱའོ། །སྨྲས་པ། འཇམ་དཔལ། ཡང་དག་པ་ཉིད་དུ་ངེས་པ་ཞེས་བྱ་བ་དེ་གང་ལ་བྱ། སྨྲས་པ། བདག་དང ། མྱ་ངན་ལས་འདས་པ་མཚུངས་ཏེ། འདི་ནི་གཉིས་སུ་མེད་ཅིང་གཉིས་སུ་བྱར་མེད་དེ། དེ་བས་ན་ཡང་དག་པ་ཉིད་དུ་ངེས་པ་ཞེས་བྱའོ། །ཡང་དག་པར་ཉིད་དུ་ཞུགས་པས་ན་དེའི་ཕྱིར་ཡང་དག་པར་ངེས་པ་ཞེ་བྱའོ། །མཉམ་པ་ཉིད་ཀྱིས་མཉམ་པ་ཉིད་ལ་ངེས་པར་བྱུང་བས་ན་དེའི་ཕྱིར་ཡང་དག་པར་ངེས་པ་ཞེས་བྱའོ། །ངེས་པའི་དོན་ལ་དོན་འདྲེན་པས་ན་དེའི་ཕྱིར་ཡང་དག་པར་ངེས་པ་ཞེས་བྱའོ། །ཏིང་ངེ་འཛིན་ཐམས་ཅད་ལ་སྒྲོ་བཏགས་པ་མེད་པའི་ཕྱིར་དེ་ནི་ཡང་དག་པར་ངེས་པ་ཞེས་བྱའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་ལེགས་སོ་ཞེས་བྱ་བ་བྱིན་ཏེ། འཇམ་དཔལ། ཁྱོད་ཀྱི་ཚིག་འདི་ལེགས་པར་སྨྲས་ཏེ་ཇི་ལྟར་ 110a ༄#། །སྟོན་པ་དེ་དེ་བཞིན་ནོ། །ཁྱོད་ཀྱིས་བསྟན་པ་འདི་བཤད་པ་ན་དགེ་སློང་བདུན་སྟོང་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །ལྷའི་བུ་སྟོང་ཕྲག་སུམ་ཅུ་རྩ་གཉིས་ཆོས་རྣམས་ལ་མིག་རྡུལ་མེད་ཅིང་རྡུལ་དང་བྲལ་བའི་ཆོས་ཀྱི་མིག་སྐྱེས་སོ། །སྲོག་ཆགས་སྟོང་ཕྲག་བཅུ་འདོད་ཆགས་དང་བྲལ་བ་ཐོབ་བོ། །སྲོག་ཆགས་ཉིས་བརྒྱ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་སོ། །བྱང་ཆུབ་སེམས་དཔའ་ལྔ་སྟོང་མི་སྐྱེ་བའི་ཆོས་ལ་བཟོད་པ་སྐྱེས་སོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇམ་དཔལ་གཞོན་ནུར་གྱུར་བས་སངས་རྒྱས་ཀྱི་བགྱི་བ་བགྱིས་སོ། །འཇམ་དཔལ་གྱིས་སྨྲས་པ། ཚངས་པ། སངས་རྒྱས་འབྱུང་བ་གང་ལའང་ཕན་པའམ། གནོད་པར་ཉེ་བར་མི་གནས་སོ། །སྨྲས་པ། འཇམ་དཔལ། བཅོམ་ལྡན་འདས་ཀྱིས་ཚད་མེད་པའི་སེམས་ཅན་ཡོངས་སུ་མྱ་ངན་ལས་འདས་ཏེ། ཁྱོད་ཀྱང་ཚད་མེད་པའི་སེམས་ཅན་ཡོངས་སུ་མྱ་ངན་ལས་འདའ་བར་བྱེད་པ་མ་ཡིན་ནམ། སྨྲས་པ། ཚངས་པ། སེམས་ཅན་མེད་པ་ལ་སེམས་ཅན་དུ་རབ་ཏུ་འབྱེད་པར་འདོད་དམ། སྨྲས་པ། དེ་མ་ཡིན་ནོ། །སྨྲས་པ། ཚངས་པ། སེམས་ཅན་མེད་པ་ལ་སེམས་ཅན་དུ་བསྟན་པའམ། སེམས་ཅན་མེད་པ་ལ་སེམས་ 110b ཅན་ཡོངས་སུ་གྲུབ་པར་འདོད་དམ། སྨྲས་པ། དེ་མ་ཡིན་ནོ། །སྨྲས་པ། ཚངས་པ། དེ་བཞིན་གཤེགས་པ་འབྱུང་བའམ། འགག་པར་འདོད་དམ། སྨྲས་པ། མ་ཡིན་ནོ། །སྨྲས་པ། དེ་བཞིན་གཤེགས་པས་ཡོངས་སུ་མྱ་ངན་ལས་འདས་པའི་སེམས་ཅན་དེ་དག་གང་ཡིན། སྨྲས་པ། འཇམ་དཔལ་གཞོན་ནུར་གྱུར་པ། ཆོས་ཀྱི་ཚུལ་གྱི་རྣམ་པ་གང་གིས་སྟོན་པ་ལྟར་ན་འདི་ལ་འཁོར་བའང་མེད། མྱ་ངན་ལས་འདས་པའང་མེད་དོ། །སྨྲས་པ། ཚངས་པ། དེ་དེ་བཞིན་ཏེ། དེ་བཞིན་གཤེགས་པས་འཁོར་བའང་མ་དམིགས། ཡོངས་སུ་མྱ་ངན་ལས་འདས་པའང་མ་དམིགས་སོ། །ཚངས་པ། བཅོམ་ལྡན་འདས་ཀྱིས་གང་ཉན་ཐོས་བཏུལ་བ་དེ་དག་གིས་ཀྱང་འཁོར་བའང་མ་དམིགས། མྱ་ངན་ལས་འདས་པའང་མ་དམིགས་སོ། །ཚངས་པ། ཡོངས་སུ་མྱ་ངན་ལས་འདས་པ་ཞེས་བྱ་བ་འདི་ནི་བཏགས་པའི་ཚིག་ཐ་སྙད་ཙམ་སྟེ། འདི་ལ་གང་ཡང་འཁོར་བའང་མེད་དོ། །ཡོངས་སུ་མྱ་ངན་ལས་འདས་པའང་མེད་དོ། །སྨྲས་པ།་འཇམ་དཔལ། འདི་ལ་སུ་དག་དད་པར་འགྱུར། སྨྲས་པ། ཆོས་གང་ལའང་མངོན་པར་ཆགས་པར་མི་འགྱུར་བ་རྣམས་སོ། །སྨྲས་པ། འཇམ་དཔལ། མངོན་པར་ཆགས་པ་ཞེས་བྱ་བ་དེ་ཅི་ལ་མངོན་པར་ཆགས། སྨྲས་པ། ཚངས་པ། མངོན་པར་ཆགས་པ་ཞེས་བྱ་བ་ནི་མེད་པ་ལ་མངོན་པར་ཆགས་སོ། །གལ་ཏེ། ཚངས་པ། ཡོད་པ་ལ་མངོན་པར་ 111a ༄#། །ཆགས་པར་གྱུར་ན་འདི་ལྟར་ཤིན་ཏུ་མངོན་པའི་ང་རྒྱལ་དང་བྲལ་བར་གྱུར་པ་མ་ཡིན་ནོ། །འདི་ལྟར་མེད་པ་ལ་མངོན་པར་ཆགས་པ་སྟེ། དེ་བས་ན་མེད་པའོ་ཞེས་རྟོགས་ནས་མངོན་པར་ཆགས་པར་མི་བྱེད་དེ། གང་མངོན་པར་ཆགས་པ་མི་བྱེད་པ་དེ་མི་འཁོར་རོ། །གང་མི་འཁོར་བ་དེ་རྣམ་པར་མི་འགྲོ་བའོ། །གང་རྣམ་པར་མི་འགྲོ་བ་དེ་མྱ་ངན་ལས་འདས་པ་ཞེས་བྱའོ། །སྨྲས་པ། འཇམ་དཔལ། ཡོངས་སུ་མྱ་ངན་ལས་འདས་པ་ཞེས་བྱ་བ་ཅིའི་གཉེན་པོ་ཡིན་པའི་ཕྱིར་མྱ་ངན་ལས་འདས་པ་ཞེས་བྱ། སྨྲས་པ། ཚངས་པ། ཡོངས་སུ་མྱ་ངན་ལས་འདས་པ་ཞེས་བྱ་བ་ནི་ཕན་ཚུན་རྐྱེན་ལ་སྒྲོ་མི་འདོགས་པའི་ཕྱིར་རོ། །མ་རིག་པ་མངོན་པར་འདུ་མི་བྱེད་པ་དང ། འདུ་བྱེད་མི་འཇུག་པས་ཀྱང་ཉེ་བར་མི་སྦྱོར་ཏེ། གང་ཉེ་བར་མི་སྦྱོར་བ་དེ་ནི་ཀུན་ནས་མི་སློང་ངོ ། །གང་ཀུན་ནས་མི་སློང་བ་དེ་ནི་ཡོངས་སུ་མྱ་ངན་ལས་འདས་པ་ཞེས་བྱའོ། །ཀུན་ནས་མི་སློང་བ་སྤྱོད་པ་ནི་ཤིན་ཏུ་འགོག་པའོ། །དེའི་ལམ་མངོན་པར་རྟོགས་པ་ནི་ཤིན་ཏུ་མི་སྐྱེ་བ་ཡིན་ཏེ། འདི་ནི་འཕགས་པའི་བདེན་པ་བཞི་ཞེས་བྱའོ། །དེ་ནས་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཁྱོད་ཀྱིས་བསྟན་པ་ཐམས་ཅད་ནི་ཡང་དག་པར་བསྟན་པའོ། །སྨྲས་པ། རིགས་ 111b ཀྱི་བུ་ཚིག་ཐམས་ཅད་ནི་ཡང་དག་པའོ། །སྨྲས་པ། འཇམ་དཔལ། གང་རྫུན་གྱི་ཚིག་ཡོད་པ་མ་ཡིན་པ་ཡང་དག་པར་མ་ཡིན་པ་དེ་ཡང་དག་པའམ། སྨྲས་པ། རིགས་ཀྱི་བུ། དེ་ཡང་ཡང་དག་པའོ། །དེ་ཅིའི་ཕྱིར་ཞེ་ན། འདི་ལྟར་ངག་ཐམས་ཅད་ནི་དབང་དུ་གྱུར་བ་སྟེ། ཡུལ་ལ་གནས་པའང་མ་ཡིན་ནོ། །ཕྱོགས་ན་གནས་པའང་མ་ཡིན་ནོ། །གང་དབང་དུ་གྱུར་ཅིང་ཡུལ་ལའང་མི་གནས། ཕྱོགས་ལའང་མི་གནས་པ་དེ་ནི་མེད་པའི་ཕྱིར་ཡང་དག་པ་སྟེ། དེའི་ཕྱིར་ཚིག་ཐམས་ཅད་ཀྱང་ཡང་དག་པ་ཞེས་བྱའོ། །གང་ཡང་ལྷ་སྦྱིན་གྱིས་ཚིག་སྨྲས་པ་དང ། གང་དེ་བཞིན་གཤེགས་པས་ཚིག་སྨྲས་པ་ཚིག་དེ་གཉིས་ཐ་དད་པ་མ་ཡིན་ནོ། །དེ་ཅིའི་ཕྱིར་ཞེ་ན། ཚིག་ཐམས་ཅད་ནི་དེ་བཞིན་གཤེགས་པའི་ཚིག་སྟེ། ཚིག་ཐམས་ཅད་ནི་དེ་བཞིན་ཉིད་ལས་མི་འདའ་བའོ། །གང་ཚིག་གི་རྣམ་པར་རིག་པར་བྱས་པ་སྟེ་ཐམས་ཅད་ནི་རྣམ་པར་རིག་པ་མེད་པས་རྣམ་པར་རིག་པར་བྱས་བ་སྟེ། དེ་བས་ན་ཚིག་ཐམས་ཅད་ཡི་གེ་མཉམ་པའི་ཕྱིར། ཡི་གེ་མཚུངས་པའི་ཕྱིར། ཡི་གེ་སྟོང་པའི་ཕྱིར་ཚིག་ཐམས་ཅད་ནི་མཚུངས་པའོ། །མཉམ་པར་གནས་པས་སྨྲས་པ། འཇམ་དཔལ། དེ་བཞིན་གཤེགས་པས་འཕགས་པའི་ཐ་སྙད་དུ་འདོགས་པ་དང ། འཕགས་པ་མ་ཡིན་པའི་ཐ་སྙད་དུ་འདོགས་པ་ཞེས་མ་གསུངས་སམ། སྨྲས་པ། རིགས་ཀྱི་བུ། ཡི་གེ་གང་དག་གིས་འཕགས་པ་རྣམས་ཀྱི་ཐ་སྙད་དུ་འདོགས་ 112a ༄#། །པའི་ཡི་གེ་དེ་དག་ཉིད་ཀྱིས་འཕགས་པ་མ་ཡིན་པ་རྣམས་ཀྱང་ཐ་སྙད་དུ་འདོགས་སོ། །སྨྲས་པ། འཇམ་དཔལ། དེ་དེ་བཞིན་ནོ། །སྨྲས་པ། ཅི་ཡི་གེ་དེ་དག་འཕགས་པའམ། འཕགས་པ་མ་ཡིན་པ་ཞེས་རྟོག་གམ། སྨྲས་པ། དེ་མ་ཡིན་ནོ། །སྨྲས་པ། ཇི་ལྟར་ཡི་གེ་དེ་དག་མི་རྟོག་རྣམ་པར་མི་རྟོག་པ་དེ་བཞིན་དུ་འཕགས་པ་རྣམས་ནི་རྟོག་པ་དང ། རྣམ་པར་རྟོག་པ་ཐམས་ཅད་དང་བྲལ་བའོ། །དེ་དག་ལ་ཐ་སྙད་མེད་དེ། འཕགས་པ་རྣམས་ནི་ཡི་གེར་འདུ་ཤེས་པས་ཐ་སྙད་དུ་མི་འདོགས་སོ། །ཆོས་སུ་འདུ་ཤེས་པས་མ་ཡིན། ཆོས་མ་ཡིན་པར་འདུ་ཤེས་པས་མ་ཡིན། བདག་ཏུ་འདུ་ཤེས་པས་མ་ཡིན། ཕ་རོལ་ཏུ་འདུ་ཤེས་པས་མ་ཡིན་ནོ། །འདི་ལྟ་སྟེ། དཔེར་ན། སིལ་སྙན་དང ། རྔ་བོ་ཆེ་དང ། རྫ་རྔ་དང ། དུང་དག་ནི་རྐྱེན་གྱིས་སྒྲ་འབྱུང་ཡང་དེ་དག་རྣམ་པར་མི་རྟོག་པ་དེ་བཞིན་དུ་འཕགས་པ་རྣམས་རྐྱེན་ཀུན་འབྱུང་བ་མཐོང་བའི་ཕྱིར་ཐ་སྙད་དུ་འདོགས་པས་ཆགས་པར་མི་བྱེད། མངོན་པར་ཆས་པར་མི་བྱེད་དོ། །དེ་ནས་བྱང་ཆུབ་སེམས་དཔའ་མཉམ་པར་གནས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བཅོམ་ལྡན་འདས་ཀྱིས་འདི་ལྟར་དགེ་སློང་དག་འདུས་ཏེ་འཁོད་པས་བྱ་བ་གཉིས་ཡོད་དེ། ཆོས་ཀྱི་གཏམ་བྱ་བ་དང ། འཕགས་པ་མི་སྨྲ་བར་གྱུར་པས་གནས་པར་ 112b བྱའོ་ཞེས་གསུངས་ན། དེ་ལ། འཇམ་དཔལ། ཆོས་ཀྱི་གཏམ་ནི་གང ། འཕགས་པ་མི་སྨྲ་བར་གྱུར་པ་ནི་གང ། སྨྲས་པ། གཏམ་གང་གིས་སངས་རྒྱས་འཁྲུག་པར་མི་བྱེད། ཆོས་འཁྲུག་པར་མི་བྱེད། དགེ་འདུན་འཁྲུག་པར་མི་བྱེད་པ་འདི་ནི་ཆོས་ཀྱི་གཏམ་མོ། །སངས་རྒྱས་ལ་ཆོས་ཉིད་དུ་མོས་པ་དང ། ཆོས་ལ་འདོད་ཆགས་དང་བྲལ་བར་མོས་པ་དང ། དགེ་འདུན་ལ་འདུས་མ་བྱས་སུ་མོས་པ་འདི་ནི་འཕགས་པ་མི་སྨྲ་བར་གྱུར་པའོ། །གཞན་ཡང ། རིགས་ཀྱི་བུ། དྲན་པ་ཉེ་བར་གཞག་པ་བཞི་ལ་བརྩམས་ཏེ་གཏམ་བརྗོད་པ་འདི་ནི་ཆོས་ཀྱི་གཏམ་མོ། །ཡང་ཆོས་ཐམས་ཅད་ལ་མ་དྲན་ཞིང་ཡིད་ལ་མི་བྱེད་པ་འདི་ནི་འཕགས་པ་མི་སྨྲ་བར་གྱུར་པའོ། །གང་ཡང་དག་པར་སྤོང་བ་བཞི་ལ་བརྩམས་ཏེ་གཏམ་བརྗོད་པ་ནི་ཆོས་ཀྱི་གཏམ་མོ། །གང་མཉམ་པ་ཉིད་ཀྱིས་མཚུངས་པར་ཡང་མི་བྱེད། མི་མཚུངས་པར་ཡང་མི་བྱེད་པ་འདི་ནི་འཕགས་པ་མི་སྨྲ་བར་གྱུར་པའོ། །གང་རྫུ་འཕྲུལ་གྱི་རྐང་པ་བཞི་ལ་བརྩམས་ཏེ་གཏམ་བརྗོད་པ་འདི་ནི་ཆོས་ཀྱི་གཏམ་མོ། །གང་ལུས་དང ། ངག་དང ། ཡིད་ཀྱི་བརྩོན་པར་མི་བྱེད་པ་འདི་ནི་འཕགས་པ་མི་སྨྲ་བར་གྱུར་པའོ། །གང་དབང་པོ་ལྔ་དང ། སྟོབས་ལྔ་ལ་བརྩམས་ཏེ་གཏམ་བརྗོད་པ་འདི་ནི་ཆོས་ཀྱི་གཏམ་མོ། །གང་སུ་ལའང་དད་པས་ཆོས་གང་ལའང་དད་པར་ཡང་མི་བྱེད་ཅིང་ཆོས་ཐམས་ཅད་ལའང་བླང་བ་མེད་པ་དང ། དོར་བ་མེད་པར་རབ་ཏུ་རྣམ་ 113a ༄#། །པར་འབྱེད་པ་དེ་ནི་འཕགས་པ་མི་སྨྲ་བར་གྱུར་བའོ། །དྲན་པ་དང ། རྩེ་གཅིག་པ་དང ། རློམ་སེམས་མེད་པ་ལ་གནས་ཤིང་ཆོས་ཐམས་ཅད་རང་བཞིན་གྱིས་མཉམ་པར་བཞག་པར་མོས་པ་དང ། སྤྲོས་པའི་གནས་ཐམས་ཅད་ལ་མི་རྟེན་པའི་རྐྱེན་དུ་གྱུར་པ་འདི་ནི་འཕགས་པ་མི་སྨྲ་བར་གྱུར་པའོ། །གང་བྱང་ཆུབ་ཀྱི་ཡན་ལག་བདུན་ལ་བརྩམས་ཏེ་གཏམ་བརྗོད་པ་འདི་ནི་ཆོས་ཀྱི་གཏམ་མོ། །གང་བཏང་སྙོམས་པས་སྒྲོ་བཏགས་པ་མེད་པ་འཐོབ་ཅིང་བསལ་པའང་མེད། བཞག་པའང་མེད་པར་གནས་པ་འདི་ནི་འཕགས་པ་མི་སྨྲ་བར་གྱུར་པའོ། །གང་འཕགས་པའི་ལམ་ཡན་ལག་བརྒྱད་པ་ལས་བརྩམས་ཏེ་གཏམ་རྗོད་པར་བྱེད་པ་འདི་ནི་ཆོས་ཀྱི་གཏམ་མོ། །གང་གཟིངས་ལྟ་བུར་རྟོགས་ནས་ཆོས་ལའང་མི་རྟེན། ཆོས་མ་ཡིན་པ་ལའང་མི་རྟེན་པར་གནས་པ་འདི་ནི་འཕགས་པ་མི་སྨྲ་བར་གྱུར་པའོ། །རིགས་ཀྱི་བུ། དེ་ལྟར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་ཆོས་འདི་དག་སྨྲ་བ་དང ། འཆད་པ་དང ། སྟོན་པ་དང ། འདོགས་པ་དང ། འཇུག་པར་བྱེད་པ་དང ། འགྲེལ་པ་དང ། རྣམ་པར་འབྱེད་པ་དང ། གསལ་བར་བྱེད་ཅིང་ཡང་དག་པར་ཇི་ལྟ་བུར་སྟོན་པ་གང་ཡིན་པ་འདི་ནི་ཆོས་ཀྱི་གཏམ་མོ། །གང་འདི་ལྟར་ཆོས་ཀྱིས་མངོན་སུམ་དུ་གྱུར་ལ་ལུས་ལས་ལོགས་ཤིག་ནའང་ 113b ཆོས་མི་མཐོང ། ཆོས་ལས་ལོགས་ཤིག་ནའང་ལུས་མི་མཐོང ། ཇི་ནས་གཉིས་སུའང་མི་མཐོང ། གཉིས་མེད་པར་ཡང་མི་མཐོང་བ་དེ་ལྟར་མཐོང་སྟེ། དེ་ལྟར་མཐོང་ནས་མངོན་སུམ་དུ་ཡེ་ཤེས་མཐོང་བའང་མི་མཐོང་སྟེ། གང་མི་མཐོང་བ་འདི་ནི་འཕགས་པ་མི་སྨྲ་བར་གྱུར་པའོ། །གཞན་ཡང ། རིགས་ཀྱི་བུ། གང་བདག་ཏུ་སྒྲོ་འདོགས་པ་དང ། ཕ་རོལ་ཏུ་སྒྲོ་འདོགས་པ་དང ། ཆོས་སུ་སྒྲོ་འདོགས་པ་དང ། ཆོས་མ་ཡིན་པར་སྒྲོ་འདོགས་པས་གཏམ་མི་བརྗོད་པ་འདི་ནི་ཆོས་ཀྱི་གཏམ་མོ། །གང་བརྗོད་དུ་མེད་པའི་ཆོས་ཉིད་ཐོབ་པས་ཡི་གེ་དང ། སྐད་དང ། སྒྲ་དང ། དབྱངས་ཐམས་ཅད་དང་བྲལ་བ་མི་གཡོ་བ་ཐོབ་པ་དབེན་པའི་རང་བཞིན་གྱི་སེམས་ཀྱིས་ཉེ་བར་བསྒྲུབ་པ་ལ་གནས་པ་འདི་ནི་འཕགས་པ་མི་སྨྲ་བར་གྱུར་པའོ། །རིགས་ཀྱི་བུ། གང་སུ་དག་སེམས་ཅན་ཐམས་ཅད་ཀྱི་དབང་པོ་མཆོག་དང ། མཆོག་མ་ཡིན་པ་ཤེས་པས་གཏམ་བརྗོད་པ་དེ་དག་ནི་ཆོས་ཀྱི་གཏམ་བརྗོད་པའོ་གང་ལ་ལ་མཉམ་པར་བཞག་ཅིང་མ་གཡེང་པ་དེ་དག་ནི་འཕགས་པ་མི་སྨྲ་བར་གྱུར་པ་ལ་གནས་པའོ། །དེ་ནས་འཇམ་དཔལ་གཞོན་ནུར་གྱུར་པ་ལ་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པས་འདི་སྐད་ཅེས་སྨྲས་སོ། །ཇི་ལྟར། འཇམ་དཔལ། ཁྱོད་ཀྱིས་བཤད་པའི་དོན་ཁོ་བོས་ཤེས་པ་ལྟར་ན་ཉན་ཐོས་དང ། རང་སངས་རྒྱས་རྣམས་ 114a ༄#། །ལ་ཆོས་ཀྱི་གཏམ་དང ། འཕགས་པ་མི་སྨྲ་བར་གྱུར་པ་མེད་དོ། །དེ་ཅིའི་ཕྱིར་ཞེ་ན། དེ་དག་དབང་པོ་མཆོག་དང ། མཆོག་མ་ཡིན་པར་ཤེས་པ་ལ་མཁས་པའང་མེད། རྟག་ཏུ་མཉམ་པར་བཞག་པའང་མ་ཡིན་ནོ། །འཇམ་དཔལ། སུ་དག་ཆོས་སྨྲ་བ་ཡིན། སུ་དག་འཕགས་པ་མི་སྨྲ་བར་གྱུར་པ་ལ་གནས་པ་ཡིན་ཞེས་གང་ཡང་དག་པར་སྨྲ་བས་སྨྲ་ན། འཇམ་དཔལ། དེ་བཞིན་གཤེགས་པའོ་ཞེས་ཡང་དག་པར་སྨྲ་བས་སྨྲའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ནི་སེམས་ཅན་ཐམས་ཅད་ཀྱི་དབང་པོ་ལ་མཁས་ཤིང་རྟག་ཏུ་མཉམ་པར་བཞག་པའོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ། རིགས་ཀྱི་བུ་མཉམ་པར་གནས་པས་ཇི་ལྟར་བཤད་པ་དེ་དེ་བཞིན་ཏེ། འདི་ལྟར་སངས་རྒྱས་བཅོམ་ལྡན་འདས་རྣམས་དགོངས་སོ། །དེ་ནས་བཅོམ་ལྡན་འདས་ལ་གནས་བརྟན་རབ་འབྱོར་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ལས་བདག་གིས་མངོན་སུམ་དུ་ཐོས་ཤིང་མངོན་སུམ་དུ་བཟུང་སྟེ། དགེ་སློང་འདུས་ཏེ་འཁོད་པ་རྣམས་ཀྱིས་བྱ་བ་གཉིས་ཡོད་དེ། ཆོས་ཀྱི་གཏམ་བརྗོད་པ་ལ་བྱ། འཕགས་པ་མི་སྨྲ་བར་གྱུར་པ་ལ་གནས་པར་བྱའོ་ཞེས་གསུངས་ན། བཅོམ་ལྡན་འདས། 114b གལ་ཏེ་གནས་འདི་ལ་ཉན་ཐོས་རྣམས་མི་ནུས་ན་དེ་ཇི་ལྟར་དེ་བཞིན་གཤེགས་པས་ཉན་ཐོས་རྣམས་ལ་ཆོས་ཀྱི་གཏམ་བརྗོད་ཅིག། ཡང་ན་འཕགས་པ་མི་སྨྲ་བར་གྱུར་པས་གནས་པར་བྱོས་ཤིག་ཅེས་དོན་འདི་ཉེ་བར་བསྟན། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། འདི་ཅི་སྙམ་དུ་སེམས། ཉན་ཐོས་རྣམས་མ་ཐོས་པར་ཆོས་ཀྱི་གཏམ་བརྗོད་དམ། འཕགས་པ་མི་སྨྲ་བར་གྱུར་པ་རྩེ་གཅིག་པས་གནས་སམ། གསོལ་པ། དེ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར། རྣམ་གྲངས་འདིས་འདི་ལྟར་ཉན་ཐོས་དང ། རང་སངས་རྒྱས་རྣམས་ལ་ཆོས་ཀྱི་གཏམ་ཡང་མེད། འཕགས་པ་མི་སྨྲ་བའང་མེད་པར་རིག་པར་བྱའོ། །དེ་ནས་འཇམ་དཔལ་གཞོན་ནུར་གྱུར་པས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་སྨྲས་སོ། །རབ་འབྱོར། སེམས་ཅན་རྣམས་ཀྱི་སྤྱོད་པ་བརྒྱད་ཁྲི་བཞི་སྟོང་གང་དེ་བཞིན་གཤེགས་པས་མཁྱེན་པ་དེ་དག་གནས་བརྟན་གྱིས་ཤེས་སམ། གང་དག་ལ་དེ་ལྟ་བུའི་གཏམ་བརྗོད་པར་བྱ་བ་དེ་དག་ལ་རྗེས་སུ་མཐུན་པའི་གཏམ་བསྟན་པར་བྱ་བ་དེ་ལ་གནས་བརྟན་གྱི་ཡེ་ཤེས་འཇུག་གམ། སྨྲས་པ། འཇམ་དཔལ། དེ་མ་ཡིན་ནོ། །འཇམ་དཔལ་གྱིས་སྨྲས་པ། གནས་བརྟན་རབ་འབྱོར་ཏིང་ངེ་འཛིན་གང་ལ་གནས་ནས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་ལ་ལྟ་ཞིང ། བདག་གི་སེམས་ 115a ༄#། །དང ། ཕ་རོལ་གྱི་སེམས་སུ་སྒྲིབ་པར་མི་འགྱུར་བ་སེམས་ཅན་ཐམས་ཅད་ཀྱི་སེམས་ལ་ལྟ་བའི་ཏིང་ངེ་འཛིན་ལ་མཉམ་པར་འཇོག་གམ། སྨྲས་པ། འཇམ་དཔལ། དེ་མ་ཡིན་ནོ། །འཇམ་དཔལ་གྱིས་སྨྲས་པ། བཙུན་པ་རབ་འབྱོར། དེ་བཞིན་གཤེགས་པ་སེམས་ཅན་གྱི་སྤྱོད་པ་བརྒྱད་ཁྲི་བཞི་སྟོང་སོ་སོ་ཅི་རིགས་སུ་སྨན་པ་སྟོན་པས་ཆོས་ཀྱི་གཏམ་བརྗོད་དོ། །ཏིང་ངེ་འཛིན་མཉམ་པ་ཉིད་ལས་ཀྱང་མི་གཡོ་ལ་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པའང་རབ་ཏུ་མཁྱེན་ཏེ། བཙུན་པ་རབ་འབྱོར། རྣམ་གྲངས་འདིས་ཀྱང་འདི་ལྟར་འདི་ལ་ཉན་ཐོས་དང ། རང་སངས་རྒྱས་རྣམས་ཀྱི་ཡུལ་མ་ཡིན་པར་རིག་པར་བྱའོ། །བཙུན་པ་རབ་འབྱོར། སེམས་ཅན་འདོད་ཆགས་སྤྱོད་པ་གང་དག་སྡུག་པའི་རྣམ་པ་ཉིད་ཀྱིས་རྣམ་པར་འགྲོལ་ཞིང་མི་སྡུག་པའི་རྣམ་པས་རྣམ་པར་མི་འགྲོལ་བའང་ཡོད་དེ། དེ་དག་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །སེམས་ཅན་ཞེ་སྡང་ལ་སྤྱོད་པ་གང་སྐྱོན་མཐོང་བས་རྣམ་པར་གྲོལ་བར་འགྱུར་ལ་བྱམས་པས་རྣམ་པར་འགྲོལ་བར་མི་འགྱུར་བའང་ཡོད་དེ། དེ་དག་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །སེམས་ཅན་གཏི་མུག་སྤྱོད་པ་གང་དག་སྨད་པས་རྣམ་པར་གྲོལ་བར་འགྱུར་ལ། ཆོས་བསྟན་པས་རྣམ་པར་གྲོལ་པར་མི་འགྱུར་བའང་ཡོད་དེ། དེ་དག་ཀྱང་ 115b དེ་བཞིན་གཤེགས་པས་རབ་ཏུ་མཁྱེན་ཏོ། །སེམས་ཅན་ཆ་མཉམ་པར་སྤྱོད་པ་སྡུག་པའི་རྣམ་པས་ཀྱང་རྣམ་པར་མི་འགྲོལ། མི་སྡུག་པའི་རྣམ་པས་ཀྱང་མི་འགྲོལ། བྱམས་པས་ཀྱང་མི་འགྲོལ། སྐྱོན་གྱིས་ཀྱང་མི་འགྲོལ། ཆོས་བསྟན་པས་ཀྱང་མི་འགྲོལ། སྨད་པས་ཀྱང་རྣམ་པར་གྲོལ་བར་མི་འགྱུར་བའང་ཡོད་དེ། དེ་དག་ལ་དེ་བཞིན་གཤེགས་པ་ཅི་ནས་མཉམ་པ་ཉིད་ཀྱིས་དབང་པོའི་ཁམས་ལས་རྣམ་པར་གྲོལ་བ་དེ་ལྟ་དེ་ལྟ་བུར་ཆོས་སྟོན་ཏེ། དེ་དག་ཀྱང་དེ་བཞིན་གཤེགས་པས་རབ་ཏུ་མཁྱེན་ཏོ། །རབ་འབྱོར། རྣམ་གྲངས་འདིས་འདི་ལྟར་དེ་བཞིན་གཤེགས་པ་ནི་ཆོས་སྨྲ་བའི་མཆོག་ཡིན་པ་དང ། བསམ་གཏན་པའི་མཆོག་ཡིན་པ་དང ། མི་སྨྲ་བར་གྱུར་པ་ལ་དགའ་བའི་མཆོག་ཡིན་པར་དེ་ལྟར་རིག་པར་བྱའོ། །དེ་ནས་ཚེ་དང་ལྡན་པ་རབ་འབྱོར་གྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། གལ་ཏེ་ཉན་ཐོས་དང ། རང་སངས་རྒྱས་ཀྱི་ཆོས་བརྗོད་པར་མི་ནུས། འཕགས་པ་མི་སྨྲ་བར་གྱུར་པ་ལ་གནས་པར་མི་ནུས་ན། བྱང་ཆུབ་སེམས་དཔའ་གང་ལ་ལ་ཡོན་ཏན་འདི་ལྟ་བུ་དང་ལྡན་པ་གང་ཇི་ལྟར་ཆོས་ཀྱི་གཏམ་རྗོད་པར་བྱེད་ཅིང་འཕགས་པ་མི་སྨྲ་བར་གྱུར་པ་ལ་གནས་པ་ཡོད་དམ། འཇམ་དཔལ་གྱིས་སྨྲས་པ། བཙུན་བ་རབ་འབྱོར། དེ་བཞིན་གཤེགས་པ་འདི་མངོན་དུ་བཞུགས་ 116a ༄#། །པ་མཁྱེན་ན་དེ་བཞིན་གཤེགས་པས་མཁྱེན་གྱི། འདི་ལ་ཞུས་ཤིག་།དེའི་ཚེ་བཅོམ་ལྡན་འདས་ཀྱིས་ཚེ་དང་ལྡན་པ་རབ་འབྱོར་ལ་འདི་སྐད་ཅེས་བཀའ་སྩལ་ཏོ། །རབ་འབྱོར། སངས་རྒྱས་ཐམས་ཅད་ཀྱི་ཆོས་ཀྱི་རྗེས་སུ་འཇུག་པ་གཡེང་བ་མེད་པའི་སེམས་ཞེས་བྱ་བའི་ཏིང་ངེ་འཛིན་ཡོད་དེ། བྱང་ཆུབ་སེམས་དཔའ་གང་དག་གིས་ཏིང་ངེ་འཛིན་དེ་ཐོབ་པ་དེ་དག་ཐམས་ཅད་ཡོན་ཏན་འདི་དག་དང་ལྡན་པར་འགྱུར་རོ། །དེ་ནས་འཇམ་དཔལ་གཞོན་ནུར་གྱུར་པས་བྱང་ཆུབ་སེམས་དཔའ་མཉམ་པར་གནས་ལ་འདི་སྐད་ཅེས་སྨྲས་སོ། །རིགས་ཀྱི་བུ། གང་སྤྱོད་པ་བརྒྱད་ཁྲི་བཞི་སྟོང་དང ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བསྟན་པ་འདི་ནི་ཆོས་ཀྱི་གཏམ་ཞེས་བྱའོ།། གང་འདུ་ཤེས་དང ། ཚོར་བ་ཐམས་ཅད་འགོག་པའི་སྙོམས་པར་འཇུག་པ་འདི་ནི་འཕགས་པ་མི་སྨྲ་བར་གྱུར་པའོ། །རིགས་ཀྱི་བུ། ངས་བསྐལ་པའམ། བསྐལ་པ་ལས་ལྷག་པར་ཡང་ཆོས་ཀྱི་གཏམ་དང ། འཕགས་པ་མི་སྨྲ་བར་གྱུར་པ་ལ་བརྩམས་ཏེ་ལུང་བསྟན་ཀྱང་ངའི་སྤོབས་པ་ཟད་པར་མི་འགྱུར་རོ། །དེ་ནས་བཅོམ་ལྡན་འདས་ཀྱིས་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པ་ལ་བཀའ་སྩལ་པ། རིགས་ཀྱི་བུ། སྔོན་འདས་པའི་དུས་ན་བྱུང་བ་བསྐལ་བ་གྲངས་མེད་པ་བས་ཆེས་གྲངས་མེད་ 116b པ།་རྒྱ་ཆེ་བ་ཚད་མེད་པ་ནས་བསྐལ་པ་སྙན་པ་རྣམ་པར་གྲགས་པ་ཞེས་བྱ་བ་བྱུང་སྟེ། དེའི་ཚེ་དེའི་དུས་ན་མཐོང་ན་དགའ་བའི་འཇིག་རྟེན་གྱི་ཁམས་སུ་ཀུན་ཏུ་འོད་ཟེར་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་པ་དང་ཞབས་སུ་ལྡན་པ། བ་དེ་བར་གཤེགས་པ། འཇིག་རྟེན་རིག་པ། སྐྱེས་བུ་འདུལ་བ། ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་འཇིག་རྟེན་དུ་བྱུང་ངོ ། །བཅོམ་ལྡན་འདས་ཀུན་ཏུ་འོད་ཟེར་དེ་བཞིན་གཤེགས་པའི་འཇིག་རྟེན་གྱི་ཁམས་མཐོང་ན་དགའ་བ་རིན་པོ་ཆེ་ཐམས་ཅད་རབ་ཏུ་བཀྲམ་པ། འབྱོར་པ་རྒྱས་པ། བདེ་བ། ཤིན་ཏུ་ལོ་ལེགས་པ། ཉམས་དགའ་བ། ལྷ་དང ། མིས་ཀུན་ཏུ་གང་བར་གྱུར་ཏོ། །འཇིག་རྟེན་གྱི་ཁམས་དེ་སྤོས་ཐམས་ཅད་ཀྱིས་ཡོངས་སུ་བསྒོས་པས། རེག་ན་ཤིང་བ་ལ་ལྟར་འཇམ་པ། གོས་ཀ་ཙ་ལིནྡིཀ་ལྟར་རེག་ན་བདེ་བ། རིན་པོ་ཆེ་སྣ་བདུན་གྱིས་མཉམ་པར་བརྒྱན་པར་གྱུར་ཏོ། །མཐོང་ན་དགའ་བའི་འཇིག་རྟེན་གྱི་ཁམས་དེ་ན་གླིང་བཞི་པ་བྱེ་བ་ཕྲག་བཞི་ཡོད་དེ། རེ་རེ་ལའང་གླིང་ཆེན་པོ་དཔག་ཚད་བརྒྱད་ཁྲི་བཞི་སྟོང་ཡོད་དོ། །གྲོང་ཁྱེར་ཆེན་པོ་དེ་དག་ཐམས་ཅད་ཀྱང་རིན་པོ་ཆེ་ཐམས་ཅད་ཀྱིས་བརྒྱན་པ་དཔག་ཚད་ཀྱི་ཚད་ཙམ་དུ་བྱས་པ་ཡིན་ཏེ། གྲོང་ཁྱེར་ 117a ༄#། །ཆེན་པོ་རེ་རེ་ནའང་གྲོང་དང ། རི་ཁྲོད་པ་དང ། ཡུལ་འཁོར་དང ། གྲོང་རྡལ་ལྔ་བརྒྱས་བསྐོར་བར་གྱུར་ཏོ། །གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་ཐམས་ཅད་ནའང་སྲོག་ཆགས་མང་པོ་བརྒྱ་སྟོང་གནས་ཏེ། མི་དེ་དག་གི་མིག་སྔར་ཅི་སྣང་བ་དེ་དག་ཐམས་ཅད་ཀྱང་སྡུག་ཅིང་ཡིད་དུ་འོང་བ་སྣང་སྟེ། ཡིད་དུ་མི་འོང་བ་མི་སྣང་ངོ ། །མི་དེ་དག་ཀྱང་སངས་རྒྱས་རྗེས་སུ་དྲན་པའི་ཏིང་ངེ་འཛིན་ཐོབ་པར་གྱུར་ཏོ། །དེའི་ཕྱིར་འཇིག་རྟེན་གྱི་ཁམས་དེ་མཐོང་ན་དགའ་བ་ཞེས་བྱའོ། །སངས་རྒྱས་ཀྱི་ཞིང་གཞན་ནས་བྱང་ཆུབ་སེམས་དཔའ་འཇིག་རྟེན་གྱི་ཁམས་དེར་འོངས་པ་དེ་དག་ཀྱང ། འཇིག་རྟེན་གྱི་ཁམས་མཐོང་ན་དགའ་བ་བཞིན་དུ་འཇིག་རྟེན་གྱི་ཁམས་གཞན་ལ་དེ་ཙམ་དུ་དགའ་བར་མི་འཛིན་ཏོ། །ཡང་དེ་བཞིན་གཤེགས་པ་ཀུན་ཏུ་འོད་ཟེར་དེ་ཐེག་པ་གསུམ་ལ་བརྩམས་ཏེ་སེམས་ཅན་རྣམས་ལ་ཆོས་སྟོན་ཏེ། ཕལ་ཆེར་ནི། རིགས་ཀྱི་བུ། ཁྱོད་འདི་ལྟར་གནས་པ་གཉིས་ཀྱིས་གནས་པར་བྱོས་ཤིག་།ཆོས་ཀྱི་གཏམ་བརྗོད་ཅིག། ཡང་ན་འཕགས་པ་མི་སྨྲ་བར་གྱུར་པ་ཉེ་བར་ཞི་བ་ལ་གནས་པར་བྱོས་ཤིག་ཅེས་རྒྱས་པར་ཡང་དག་པར་རབ་ཏུ་སྟོན་ཏོ།། །།བམ་པོ་ལྔ་པ། རིགས་ཀྱི་བུ། ཡང་དེའི་ཚེ་སྟེང་གི་ཕྱོགས་ནས་དེ་བཞིན་གཤེགས་པ་སྨན་པའི་ 117b རྒྱལ་པོའི་སངས་རྒྱས་ཀྱི་ཞིང་ནས་བྱང་ཆུབ་སེམས་དཔའ་བློ་གྲོས་མི་ཟད་པ་དང ། ཁྱད་པར་བློ་གྲོས་གཉིས་འོངས་ནས་དེ་གཉིས་བཅོམ་ལྡན་འདས་ཀུན་ཏུ་འོད་ཟེར་དེ་བཞིན་གཤེགས་པ་ག་ལབ་དེར་ཕྱིན་ཏེ། བཅོམ་ལྡན་འདས་ཀྱིས་ཞབས་ལ་མགོ་བོས་ཕྱག་བཙལ་ནས་ལན་གསུམ་བསྐོར་ཏེ་ཕྱོགས་གཅིག་ཏུ་འདུག་གོ་།དེ་གཉིས་ལ་དེ་བཞིན་གཤེགས་པ་དེས་སྣང་བ་ཡོངས་སུ་དག་པ་ཞེས་བྱ་བའི་ཏིང་ངེ་འཛིན་རྒྱ་ཆེར་ཡང་དག་པར་རབ་ཏུ་སྟོན་ཏོ། །ཅིའི་ཕྱིར་སྣང་བ་ཡོངས་སུ་དག་པ་ཞེས་བྱ་ཞེ་ན། བྱང་ཆུབ་སེམས་དཔའ་གང་ཏིང་ངེ་འཛིན་དེ་ཐོབ་པ་དེ་མཚན་མ་དང ། ཉོན་མོངས་པ་ཐམས་ཅད་ལས་རྣམ་པར་གྲོལ་ཞིང་སངས་རྒྱས་ཀྱི་ཆོས་ཐམས་ཅད་ལ་སྣང་བ་ཐོབ་པར་འགྱུར་རོ། །དེའི་ཕྱིར་སྣང་བ་ཡོངས་སུ་དག་པ་ཞེས་བྱའོ། །ཆོས་ཐམས་ཅད་སྔོན་གྱི་མཐའ་ནས་ཡོངས་སུ་དག་པའོ། །ཆོས་ཐམས་ཅད་ཕྱི་མའི་མཐའ་ནས་ཡོངས་སུ་དག་པའོ། །ཆོས་ཐམས་ཅད་ད་ལྟར་བྱུང་བའི་མཐའ་ནས་ཡོངས་སུ་དག་པ་སྟེ། འདི་ནི་དུས་གསུམ་ཡོངས་སུ་དག་པ་ཞེས་བྱའོ། །གང་ཡོངས་སུ་དག་པ་འདི་ནི་ནམ་དུའང་ཡོངས་སུ་མ་དག་པར་མི་འགྱུར་ཏེ། ཡོངས་སུ་དག་པ་གང་\?\། གིས་རང་བཞིན་གྱིས་ཡོངས་སུ་དག་པ་འདི་ནི་ཤིན་ཏུ་ཡོངས་སུ་དག་པ་སྟེ། དེའི་ཕྱིར་ཆོས་ཐམས་ཅད་རང་བཞིན་གྱིས་འོད་གསལ་བ་ཞེས་བྱའོ། །ཆོས་ཐམས་ 118a ༄#། །ཅད་ཀྱི་རང་བཞིན་དེ་གང་ཞེ་ན། ཆོས་ཐམས་ཅད་ནི་སྟོང་པ་ཉིད་ཀྱི་རང་བཞིན་ཅན་ཏེ་དམིགས་པ་དང་བྲལ་བའོ། །ཆོས་ཐམས་ཅད་ནི་མཚན་མ་མེད་པའི་རང་བཞིན་ཅན་ཏེ། རྟོག་པ་དང ། རྣམ་པར་རྟོག་པ་དང་བྲལ་བའོ། །ཆོས་ཐམས་ཅད་ནི་སྨོན་པ་མེད་པའི་རང་བཞིན་ཅན་ཏེ། བླང་བ་མེད་པ། དོར་བ་མེད་པ། བསམ་པ་མེད་པ ། ནུས་པ་མེད་པ། ཤིན་ཏུ་ངོ་བོ་ཉིད་དང་བྲལ་བ་ཡིན་ཏེ། དེ་ནི་རང་བཞིན་གྱིས་འོད་གསལ་བའོ། །འཁོར་བའི་རང་བཞིན་གང་ཡིན་པ་དེ་མྱ་ངན་ལས་འདས་པའི་རང་བཞིན་ཡིན་ནོ། །མྱ་ངན་ལས་འདས་པའི་རང་བཞིན་གང་ཡིན་པ་དེ་ཆོས་ཐམས་ཅད་ཀྱི་རང་བཞིན་ཡིན་ཏེ། དེའི་ཕྱིར་སེམས་རང་བཞིན་གྱི་འོད་གསལ་བ་ཞེས་བྱའོ། །རིགས་ཀྱི་བུ། འདི་ལྟ་སྟེ། དཔེར་ན། ནམ་མཁའ་བླ་གབ་མེད་པ་ཀུན་ནས་ཉོན་མོངས་པར་འགྱུར་པ་ནི་གནས་མ་ཡིན་ཞིང་གོ་སྐབས་མེད་དེ། རིགས་ཀྱི་བུ། དེ་བཞིན་དུ་སེམས་ཀྱི་རང་བཞིན་ཡང་ཀུན་ནས་ཉོན་མོངས་སུ་རུང་བ་ནི་གནས་མ་ཡིན་ཞིང་གོ་སྐབས་མེད་དོ། །རིགས་ཀྱི་བུ། འདི་ལྟ་སྟེ། དཔེར་ན། ནམ་མཁའ་ལ་སྤྲིན་གྱི་ཕུང་པོའམ། དུ་བའམ། རྡུལ་དག་བྱུང་སྟེ། དེས་ནམ་མཁའ་མི་མཛེས་ཤིང་ལྷམ་མེ་ལྷང་ངེར་མི་འགྱུར་མོད་ཀྱི། དེ་དག་གིས་ནམ་མཁའི་རང་བཞིན་ཀུན་ནས་ཉོན་མོངས་པར་མི་འགྱུར་རོ། ། 118b གལ་ཏེ་ནམ་མཁའ་ཀུན་ནས་ཉོན་མོངས་སུ་ཟིན་ན་ཤིན་ཏུ་རྣམ་པར་དག་པར་མི་འགྱུར་ཏེ། འདི་ལྟར་ཀུན་ནས་ཉོན་མོངས་པར་མི་འགྱུར་བས་ན་དེའི་ཕྱིར་ནམ་མཁའ་ཞེས་རབ་ཏུ་དབྱེའོ། །རིགས་ཀྱི་བུ། དེ་བཞིན་དུ་བྱིས་པ་སོ་སོའི་སྐྱེ་བོ་ཚུལ་བཞིན་མ་ཡིན་པ་ཡིད་ལ་བྱེད་པ་དང་ལྡན་པ་རྣམས་ཀྱི་ཉོན་མོངས་པ་སྐྱེད་མོད་ཀྱི་དེ་དག་གིས་སེམས་ཀྱི་རང་བཞིན་ཀུན་ནས་ཉོན་མོངས་པར་མི་འགྱུར་རོ། །གལ་ཏེ་ཀུན་ནས་ཉོན་མོངས་པར་འགྱུར་ན་ནི་ཤིན་ཏུ་རྣམ་པར་དག་པར་མི་འགྱུར་ཏེ། འདི་ལྟར་ཀུན་ནས་ཉོན་མོངས་པར་མི་འགྱུར་བས་ན་དེའི་ཕྱིར་རང་བཞིན་གྱིས་རྣམ་པར་གྲོལ་བས་རྣམ་པར་གྲོལ་ལོ། །རིགས་ཀྱི་བུ། འདི་ནི་སྣང་བ་ཡོངས་སུ་དག་པའི་ཏིང་ངེ་འཛིན་ལ་འཇུག་པའོ། །ཞེས་དེ་ལྟར་དེ་བཞིན་གཤེགས་པ་དེས་བྱང་ཆུབ་སེམས་དཔའ་དེ་གཉིས་ལ་རབ་ཏུ་བསྟན་ཏེ། དེ་གཉིས་ཀྱིས་ཏིང་ངེ་འཛིན་དེ་ཐོས་ནས་བསམ་གྱིས་མི་ཁྱབ་པའི་ཆོས་ལ་ཆོས་ཀྱི་སྣང་བ་ཐོབ་བོ། །དེ་ནས་བཅོམ་ལྡན་འདས་ཀུན་ཏུ་འོད་ཟེར་དེ་བཞིན་གཤེགས་པ་ལ་བྱང་ཆུབ་སེམས་དཔའ་བློ་གྲོས་མི་ཟད་པས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་གིས་ཏིང་ངེ་འཛིན་འདི་ལ་འཇུག་པ་ནི་ཐོས་ན། བཅོམ་ལྡན་འདས། བདག་ཅག་གནས་གང་གིས་གནས་པར་བགྱི། དེ་སྐད་ཅེས་གསོལ་བ་དང ། བཅོམ་ལྡན་འདས་དེས་རིགས་ 119a ༄#། །ཀྱི་བུ་དེ་གཉིས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། འདི་ལ་ཁྱོད་ཆོས་ཀྱི་གཏམ་ཡང་དག་པར་སྟོན་ཅིག་།ཡང་ན་འཕགས་པ་མི་སྨྲ་བར་གྱུར་པ་ལ་གནས་པར་གྱིས་ཤིག། དེ་ནས་བཅོམ་ལྡན་འདས་ལས་བྱང་ཆུབ་སེམས་དཔའ་དེ་གཉིས་ཀྱིས་ལེགས་སོ་ཞེས་བྱ་བ་ཐོས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་དྲུང་ནས་སྐྱེད་མོས་ཚལ་ཞིག་གང་ན་ཡོད་པ་དེར་སོང་སྟེ། དེར་ཕྱིན་ནས་རང་གིས་སྤྲུལ་པའི་ཁང་བུ་བརྩེགས་པའི་ནང་དུ་འདུག་གོ། དེ་གཉིས་དེ་ན་འདུག་པ་དེར་ཚངས་པ་ཆེན་པོ་འོད་ཟེར་བཟང་པོ་ཞེས་བྱ་བ་ཚངས་པ་བརྒྱ་སྟོང་ཕྲག་བདུན་ཅུ་རྩ་གཉིས་དང ། བྱང་ཆུབ་སེམས་དཔའ་དེ་གཉིས་ག་ལ་བ་དེར་སོང་སྟེ་ཕྱིན་ནས་བྱང་ཆུབ་སེམས་དཔའ་དེ་གཉིས་ཀྱི་རྐང་པ་ལ་མགོ་བོས་ཕྱག་བཙལ་ནས་ལན་གསུམ་བསྐོར་བ་བྱས་ཏེ་བྱང་ཆུབ་སེམས་དཔའ་དེ་གཉིས་ལ་འདི་སྐད་ཅེས་སྨྲས་སོ། །རིགས་ཀྱི་བུ། བཅོམ་ལྡན་འདས་ཀུན་ཏུ་འོད་ཟེར་དེ་བཞིན་གཤེགས་པ་དེས་འདི་སྐད་དུ་འདུས་ཤིང་འཁོད་པ་རྣམས་ཀྱིས་བྱ་བ་གཉིས་ཡོད་དེ། ཆོས་ཀྱི་གཏམ་བསྟན་པར་བྱའོ། །ཡང་ན་འཕགས་པ་མི་སྨྲ་བར་གྱུར་པས་གནས་པར་བྱའོ་ཞེས་གསུངས་ན། དེ་ལ་ཆོས་ཀྱི་གཏམ་ནི་གང་ཡིན། འཕགས་པ་མི་ 119b སྨྲ་བར་གྱུར་པ་ནི་གང་ཡིན། དེ་སྐད་ཅེས་སྨྲས་པ་དང ། བྱང་ཆུབ་སེམས་དཔའ་དེ་གཉིས་ཀྱིས་ཚངས་པ་འོད་ཟེར་བཟང་པོ་ལ་འདི་སྐད་ཅེས་སྨྲས་སོ། །ཚངས་པ། དེའི་ཕྱིར་དྲིས་པ་ལུང་བསྟན་པ་འདི་ལས་ཅུང་ཟད་ཅིག་བཤད་ཀྱི་ཉོན་ཅིག་དང ། འདི་ལ་དེ་བཞིན་གཤེགས་པ་ནི་མངོན་སུམ་སྟེ་ཕ་རོལ་གྱི་མཆོག་བརྙེས་སོ། །རིགས་ཀྱི་བུ། དེ་ལྟར་བྱང་ཆུབ་སེམས་དཔའ་དེ་གཉིས་འཁོར་དེའི་ནང་ན། འདི་ལྟ་སྟེ། ཆོས་ཀྱི་གཏམ་དང ། འཕགས་པ་མི་སྨྲ་བར་གྱུར་པ་ལ་བརྩམས་ནས་དོན་གྱི་ཚིག་འདི་ཉིད་རྒྱས་པར་བསྟན་ཏེ། དེའི་ཚེ་ཚངས་པ་བརྒྱ་སྟོང་ཕྲག་བདུན་ཅུ་རྩ་གཉིས་པོ་དེ་དག་མི་སྐྱེ་བའི་ཆོས་ལ་བཟོད་པ་སྐྱེས་སོ། །ཚངས་པ་འོད་ཟེར་བཟང་པོས་ཀྱང་ཏིང་ངེ་འཛིན་ཀུན་ཏུ་སྣང་བ་མངོན་དུ་གྱུར་ཏེ་རབ་ཏུ་ཐོབ་བོ། །རིགས་ཀྱི་བུ། དེ་ལྟར་བྱང་ཆུབ་སེམས་དཔའ་སྤོབས་པ་རྒྱུན་མི་ཆད་པ་དེ་གཉིས་དྲིས་པ་གཉིས་པོ། འདི་ལྟ་སྟེ། ཆོས་ཀྱི་གཏམ་དང ། འཕགས་པ་མི་སྨྲ་བར་གྱུར་པ་ཡང་དག་པར་སྟོན་ཅིང་འདུག་སྟེ། དེ་གཉིས་ཀྱིས་ལོ་སྟོང་ཕྲག་བདུན་ཅུ་རྩ་དྲུག་གི་བར་དུ་དོན་གྱི་ཚིག་འདི་གཉིས་གཏན་ལ་འབེབས་ཤིང་ལན་ལྡོན་པར་གྱུར་ཏེ།་གཅིག་གིའང་མཐར་མ་ཕྱིན། གཉིས་པོའི་ཡང་མཐར་མ་ཕྱིན་ཏོ། །དེ་ནས་དེ་བཞིན་གཤེགས་པ་དེ་སྟེང་གི་ནམ་མཁའ་ལ་བཞུགས་ནས་དེ་གཉིས་ལ་འདི་སྐད་ཅེས་ 120a ༄#། །བཀའ་སྩལ་ཏོ། །རིགས་ཀྱི་བུ། ཆོག་གོ། སྨྲ་བས་རྩོད་པར་མ་བྱེད་ཅིག་།སྨྲ་བས་རྩོད་པ་མ་སྐྱེད་ཅིག་།སྨྲ་བ་ཐམས་ཅད་ནི་བྲག་ཅ་དང་མཚུངས་ཏེ། སྒྲ་ཇི་འདྲ་བ་བཞིན་དུ་སྒྲ་བརྙན་ཡང་དེ་བཞིན་ནོ། །ཁྱོད་ཀྱི་སྤོབས་པ་སོ་སོའི་ཡང་དག་པར་རིག་པ་མི་ཟད་པ་མངོན་པར་བསྒྲུབ་པ་ཁོང་དུ་ཆུད་དོ། །ཁྱེད་འདོད་ན་དྲིས་པ་འདིའི་དོན་བསྐལ་པའམ། བསྐལ་པ་ལས་ལྷག་པར་ཡང་ལན་ལྡོན་ཞིང་ཁྱེད་ཀྱི་སྤོབས་པའི་མཐར་ཕྱིན་པར་ཡང་མི་འགྱུར་མོད་ཀྱི་སངས་རྒྱས་ཀྱི་ཚིག་ནི་ཉེ་བར་ཞི་བ་ཡིན་ཏེ། ཞི་བ། རབ་ཏུ་ཞི་བ། ཉེ་བར་ཞི་བ་དང ། ཡི་གེ་མེད་པའི་དོན་ཏོ། །དོན་ནི་བརྗོད་དུ་མེད་པ་སྟེ། ཇི་ཙམ་དུ་བརྗོད་པ་དེ་ཙམ་དུ་དོན་མེད་པའོ། །དོན་ལ་རྟོན་པ་ཡི་གེ་ལ་མ་རྟོན་ཅིག་ཅེས་དེ་གཉིས་དེ་བཞིན་གཤེགས་པ་དེས་བསྐུལ་བར་རིག་ནས་ཅང་མི་སྨྲ་བར་གྱུར་ཏོ། །རིགས་ཀྱི་བུ། རྣམ་གྲངས་འདིས་ཀྱང་འདི་ལྟར་འདོད་ན་བྱང་ཆུབ་སེམས་དཔའ་དག་བསྐལ་པ་བརྒྱ་སྟོང་ངམ། དེ་ལས་ལྷག་པར་ཡང་སྤོབས་པས་བསྟན་པ་སྟོན་པར་རིག་པར་བྱའོ། །རིགས་ཀྱི་བུ། དེའི་ཚེ་དེའི་དུས་ན་བྱང་ཆུབ་སེམས་དཔའ་གཉིས་བྱུང་བ་གཞན་ཡིན་པར་འཛིན་པ་ཁྱོད་ཀྱིས་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། འཇམ་དཔལ་གཞོན་ནུར་གྱུར་པ་འདི་དེའི་ཚེ་བྱང་ཆུབ་སེམས་དཔའ་བློ་གྲོས་ 120b མི་ཟད་པ་ཞེས་བྱ་བར་གྱུར་ཏོ། །མཉམ་པར་གནས་པ་ཁྱོད་ཀྱང་དེའི་ཚེ་དེའི་དུས་ན་བྱང་ཆུབ་སེམས་དཔའ་ཁྱད་པར་བློ་གྲོས་ཞེས་བྱ་བར་གྱུར་ཏོ། །དེའི་ཚེ་དེའི་དུས་ན་ཚངས་པ་ཆེན་པོ་ཁྱད་པར་སེམས་འདི་ནི་ཚངས་པ་འོད་ཟེར་བཟང་པོ་ཞེས་བྱ་བར་གྱུར་ཏོ། །དེ་ནས་བཅོམ་ལྡན་འདས་ལ་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་འདི་མངོན་པར་བརྩོན་པ་དེ་བགྱིད་པའི་བརྩོན་འགྲུས་བརྩམ་པ་དེ་ལ་དེ་བཞིན་གཤེགས་པ་རྣམས་ཀྱི་བྱང་ཆུབ་ནི་དོན་ཆེན་པོ་འཐོབ་པར་འགྱུར་ཏེ། མངོན་པར་མི་བརྩོན་པ་རྣམས་ལ་ནི་སངས་རྒྱས་བཅོམ་ལྡན་འདས་བརྒྱ་སྟོང་གིས་ཀྱང་ཅི་ཞིག་བགྱི། བཅོམ་ལྡན་འདས། མངོན་པར་བརྩོན་པ་ནི་བྱང་ཆུབ་ལགས་སོ། ། དེ་ནས་འཇམ་དཔལ་གཞོན་ནུར་གྱུར་པས་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་པ་ལ་འདི་སྐད་ཅེས་སྨྲས་སོ། །ཇི་ལྟར་ན་བྱང་ཆུབ་སེམས་དཔའ་མངོན་པར་བརྩོན་པ་མངོན་པར་བརྩོན་པ་ཞེས་བྱ། སྨྲས་པ། བྱང་ཆུབ་སེམས་དཔས་ཇི་ལྟར་བརྩོན་པར་བྱས་པས་མངོན་པར་རྟོགས་པ་འཐོབ་པར་འགྱུར་པ་སྟེ། འདི་ནི་མངོན་པར་བརྩོན་པའོ། །སྨྲས་པ། ཡང་ཇི་ལྟར་མངོན་པར་བརྩོན་པས་མངོན་པར་རྟོགས་པ་འཐོབ་པར་འགྱུར། སྨྲས་པ། གང་ཆོས་གང་ལའང་རྣམ་པར་མི་རྟོག་ན་དེ་ལྟར་མངོན་པར་བརྩོན་ 121a ༄#། །པས་མངོན་པར་རྟོགས་པ་འཐོབ་པར་འགྱུར་རོ། །སྨྲས་པ། ཇི་ལྟར་ན་མངོན་པར་རྟོགས་པ་མངོན་པར་རྟོགས་པ་ཡིན། སྨྲས་པ། མཉམ་པ་ཉིད་གང་གིས་ཆོས་ཐམས་ཅད་མཉམ་པར་མཐོང་བ་ནི་དེ་ལྟར་ན་མངོན་པར་རྟོགས་པ་མངོན་པར་རྟོགས་པ་ཡིན་ནོ། །སྨྲས་པ། རིགས་ཀྱི་བུ། མཉམ་པ་ཉིད་མཐོང་བར་རུང་ངམ། སྨྲས་པ། མི་རུང་ངོ ། །སྨྲས་པ། གལ་ཏེ་མི་རུང་ན་མི་མཉམ་པར་འགྱུར་ཏེ། མཉམ་པར་མི་རུང་ངོ ། །ཁྱད་པར་སེམས་ཀྱིས་སྨྲས་པ། འཇམ་དཔལ། གང་མཉམ་པ་ཉིད་ཀྱིས་ཆོས་ཐམས་ཅད་མི་མཐོང་བ་འདི་ནི་མངོན་པར་རྟོགས་པ་ཞེས་བྱའོ། །འཇམ་དཔལ་གྱིས་སྨྲས་པ། ཚངས་པ། ཅིའི་ཕྱིར་མི་མཐོང ། སྨྲས་པ། གཉིས་དང་བྲལ་བའི་ཕྱིར་མི་མཐོང་ངོ ། །འཇམ་དཔལ། མི་མཐོང་བ་ནི་ཡང་དག་པར་མཐོང་བ་ཡིན་ནོ། །སྨྲས་པ། ཚངས་པ། སུས་འཇིག་རྟེན་གྱི་མཉམ་པ་ཉིད་མཐོང ། སྨྲས་པ། དེ་བཞིན་གཤེགས་པས་སོ། །སྨྲས་པ། ཇི་ལྟར་གཟིགས། སྨྲས་པ། ཇི་ལྟར་གཟུགས་ཀྱི་དེ་བཞིན་ཉིད་ལས་གཞན་དུ་མ་མཛད་པ་དང ། ཚོར་བ་དང ། འདུ་ཤེས་དང ། འདུ་བྱེད་དང ། རྣམ་པར་ཤེས་པའི་དེ་བཞིན་ཉིད་ལས་གཞན་དུ་མ་མཛད་པའོ། །འཇམ་དཔལ། ཕུང་པོ་ལྔའི་དེ་བཞིན་ཉིད་ཇི་ལྟ་བ་བཞིན་དུ་གཟིགས་པ་འདི་ནི་འཇིག་རྟེན་ལ་ 121b ཡང་དག་པར་གཟིགས་པའོ། །སྨྲས་པ། ཚངས་པ། འཇིག་རྟེན་གང་གིས་རབ་ཏུ་ཕྱེ། སྨྲས་པ། ཟད་པའི་མཚན་ཉིད་ཀྱིས་རབ་ཏུ་ཕྱེའོ། །སྨྲས་པ། གལ་ཏེ་འཇིག་རྟེན་ཟད་པའི་མཚན་ཉིད་ཀྱིས་རབ་ཏུ་ཕྱེ་བ་ཡིན་ན། ཚངས་པ། ཅི་འཇིག་རྟེན་གྱི་མཚན་ཉིད་དེ་ཟད་པར་འགྱུར་རམ། སྨྲས་པ། འཇམ་དཔལ། འཇིག་རྟེན་གྱི་མཚན་ཉིད་ཟད་པར་མི་འགྱུར་རོ། །སྨྲས་པ།་འོན་ཇི་ལྟར་འཇིག་རྟེན་ཟད་པའི་མཚན་ཉིད་ཀྱིས་རབ་ཏུ་ཕྱེ་བ་ཡིན། སྨྲས་པ། འཇམ་དཔལ། གང་ཤིན་ཏུ་ཟད་པ་དེ་ནི་ཟད་པར་མི་འགྱུར་རོ། །དེ་ཅིའི་ཕྱིར་ཞེ་ན། གང་ཟད་པ་དེ་ནི་ཟད་པར་མི་འགྱུར་བའི་ཕྱིར་རོ། །སྨྲས་པ། ཚངས་པ། དེ་བཞིན་གཤེགས་པས་འདུས་བྱས་ཟད་པའི་ཆོས་ཅན་དུ་མ་གསུངས་སམ། སྨྲས་པ། འཇམ་དཔལ། ཟད་པའི་ཆོས་ཉིད་གང་ཡིན་པ་དེ་ནམ་ཡང་ཟད་པར་མི་འགྱུར་ཏེ། དེ་བས་ན་དེ་བཞིན་གཤེགས་པས་འདུས་བྱས་ཟད་པའི་ཆོས་ཅན་ནོ་ཞེས་གསུངས་སོ། །སྨྲས་པ། ཚངས་པ།་གང་གིས་འདུས་བྱས་ཀྱི་གྲངས་སུ་འགྲོ། སྨྲས་པ། འཇམ་དཔལ། ཟད་པའི་ཆོས་ཉིད་ཀྱིས་འདུས་བྱས་སོ་ཞེས་བྱ་བའི་གྲངས་སུ་འགྲོའོ། །སྨྲས་པ། ཚངས་པ། འདུས་བྱས་ཅི་ལ་གནས། སྨྲས་པ། འདུས་མ་བྱས་ཀྱི་རང་བཞིན་ལ་གནས་སོ། །སྨྲས་པ། ཚངས་པ། འདུས་བྱས་དང ། འདུས་མ་བྱས་ཀྱི་ཆོས་རྣམས་ལ་ཐ་དད་དུ་བྱ་བ་ཅི་ཡོད། སྨྲས་པ། 122a ༄#། །འཇམ་དཔལ། འདུས་བྱས་དང ། འདུས་མ་བྱས་ཀྱི་ཆོས་རྣམས་ཐ་དད་དུ་བྱ་བ་ནི་ཐ་སྙད་དོ། །དེ་ཅིའི་ཕྱིར་ཞེ་ན། ཐ་སྙད་ཀྱི་འདི་ནི་འདུས་བྱས་སོ། །འདི་ནི་འདུས་མ་བྱས་སོ་ཞེས་བསྟན་ཏོ། །ཡང་འདུས་བྱས་ཀྱི་ཆོས་ཉིད་གང་ཡིན་པ་དེ་ནི་འདུས་མ་བྱས་ཀྱི་ཆོས་ཉིད་ཀྱང་དེ་ཡིན་ཏེ། ཆོས་ཉིད་ལ་ཐ་དད་དུ་བྱ་བ་མེད་དོ། །སྨྲས་པ། ཚངས་པ། ཆོས་ཉིད་ཅེས་བྱ་བ་འདི་གང་གི་ཚིག་བླ་དྭགས་ཡིན། སྨྲས་པ། འཇམ་དཔལ། ཆོས་ཉིད་ཅེས་བྱ་བ་ནི་འདུས་མ་བྱས་དང་བྱེ་བྲག་མེད་པར་གྱུར་པའི་ཆོས་རྣམས་ཀྱི་ཚིག་བླ་དྭགས་སོ། །སྨྲས་པ། ཚིག་བླ་དྭགས་ཞེས་བྱ་བའི་དོན་ཅི། སྨྲས་པ། ཕ་རོལ་རྣམ་པར་རིག་པར་བྱ་བའི་ཆེད་དུ་བསྟན་པས་ན་འདི་ནི་དེའི་ཕྱིར་ཚིག་བླ་དྭགས་ཞེས་བྱའོ། །དེ་ཅིའི་ཕྱིར་ཞེ་ན། ཚིག་བླ་དྭགས་ཐམས་ཅད་ནི་ལྷག་པར་བྱེད་པས་སྒྲོ་འདོགས་པ་ཡིན་ཏེ། དེའི་ཕྱིར་དེ་བཞིན་གཤེགས་པ་སྒྲོ་མི་འདོགས་ཤིང་ལྷག་པར་ཡང་མི་མཛད་ལ་སྟོན་པས་ན་དེ་ནི་ལྷག་པའི་ཚིག་ཅེས་བྱའོ། །ཡང ། འཇམ་དཔལ། ཚིག་ཐམས་ཅད་ཚིག་མ་ཡིན་པས་ན་དེའི་ཕྱིར་སངས་རྒྱས་ཀྱི་ཚིག་ནི་བརྗོད་དུ་མེད་པ་ཞེས་བྱའོ།། དེ་ཅིའི་ཕྱིར་ཞེ་ན། ཡང་དག་པར་རྫོགས་པའི་སངས་རྒྱས་ཉིད་ནི་བརྗོད་པས་རབ་ཏུ་ཕྱེ་བ་མ་ཡིན་ནོ། །སྨྲས་པ། ཡང་དག་པར་རྫོགས་པའི་སངས་རྒྱས་ཇི་ལྟར་རབ་ཏུ་དབྱེ། 122b སྨྲས་པ། གཟུགས་སུའང་མ་ཡིན། མཚན་དུའང་མ་ཡིན། ཆོས་ཉིད་དུའང་རབ་ཏུ་མི་དབྱེའོ། །སྨྲས་པ། ཇི་གཟུགས་ཀྱི་མཚན་ཉིད་ཀྱི་ཆོས་ལས་ཐ་དད་དུ་རབ་ཏུ་དབྱེ་འམ། སྨྲས་པ། དེ་མ་ཡིན་ནོ། །སྨྲས་པ། གཟུགས་ཀྱི་མཚན་ཉིད་ཀྱི་ཆོས་ཀྱི་དེ་བཞིན་ཉིད་གང་ཡིན་པ་དེ་ནི་དེ་ལས་ཀྱང་མ་ཡིན། གཞན་ལས་ཀྱང་མ་ཡིན་ཏེ། དེ་ལྟར་དེ་བཞིན་གཤེགས་པ་རྣམས་རབ་ཏུ་དབྱེའོ། །འདི་ལྟར་དེ་བཞིན་ཉིད་ཀྱིས་རབ་ཏུ་བསྟན་ཅིང་ཆུད་ཟ་བར་ཡང་མི་འགྱུར་བ་དེ་ལྟར་རབ་ཏུ་དབྱེའོ། །སྨྲས་པ། དེ་ལྟར་ན་དེ་བཞིན་གཤེགས་པས་ཅི་ཞིག་མངོན་པར་རྫོགས་པར་སངས་རྒྱས། སྨྲས་པ། འཇམ་དཔལ། དེ་ལྟར་ན་དེ་བཞིན་གཤེགས་པས་ཆོས་ཐམས་ཅད་ཀྱི་རང་བཞིན་དང ། ངོ་བོ་ཉིད་ཀྱིས་ཇི་ལྟ་བ་བཞིན་དུ་མངོན་པར་རྫོགས་པར་སངས་རྒྱས་ཤིང་མངོན་པར་རྟོགས་ཏེ། དེ་ཕྱིར་ཡང་དག་པར་རྫོགས་པའི་སངས་རྒྱས་ཞེས་བྱའོ། །དེ་ནས་བཅོམ་ལྡན་འདས་ལ་བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་གནས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ཇི་ལྟར་ན་བྱང་ཆུབ་སེམས་དཔའ་རྣམས་ཐེག་པ་ཆེན་པོ་ལ་ཡང་དག་པར་ཞུགས་པ་ཞེས་བགྱི། དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །མཁས་པ་དེ་དག་གཟུགས་གཞིག་ཕྱིར། །བྱང་ཆུབ་ཏུ་ནི་མ་ཞུགས་ཏེ། །གཟུགས་བཞིན་ 123a ༄#། །བྱང་ཆུབ་དེ་བཞིན་ཞེས། །མཁས་པ་དག་ནི་དེ་ལྟར་འཇུག། དེ་བཞིན་ཉིད་ཀྱིས་ཕྱེ་བས་ན། །གཟུགས་ལྟར་བྱང་ཆུབ་དེ་བཞིན་ཏེ། །མཁས་མཆོག་དེ་དག་བྱང་ཆུབ་ལ། །ཡོངས་སུ་དབྱེ་བར་མི་འཇུག་གོ་།བྱང་ཆུབ་དོན་ནི་དབྱེར་མེད་དེ། །དོན་ལ་བྱང་ཆུབ་མི་དམིགས་སོ། །དོན་དམ་འདི་ལ་གང་བརྩོན་པ། །དེ་དག་བྱང་ཆུབ་ཉིད་ལ་ཞུགས། །ཕུང་པོ་དང་ནི་ཁམས་རྣམས་དང ། །སྐྱེ་མཆེད་དག་ལ་བྱང་ཆུབ་འཚོལ། །བྱང་ཆུབ་དེ་ཡི་རང་བཞིན་ཏེ། །དེ་དག་གུད་ན་བྱང་ཆུབ་མེད། །ཆོས་རྣམས་རབ་དང་ཐ་མ་དང ། །བར་མའང་ནམ་ཞིག་མི་འཛིན་ཅིང ། །གང་ཡང་འདོར་བར་མི་བྱེད་པ། །དེ་ཚེ་བྱང་ཆུབ་ཡང་དག་ཞུགས། །ནམ་ཞིག་ཆོས་དང་ཆོས་མ་ཡིན། །གཉིས་སུ་དེ་དག་ཁས་མི་ལེན། །གཉིས་སུ་གྱུར་པའང་མ་ཡིན་པ། །དེ་དག་བྱང་ཆུབ་རབ་ཏུ་ཞུགས། །འདུས་མ་བྱས་ནི་གཉིས་སུ་མེད། །འདུས་བྱས་དག་ནི་གཉིས་ཡོད་ན། ། འདི་གཉིས་མཐའ་སྟེ་རྣམ་པར་སྤང ། །བྱང་ཆུབ་སྤྱད་པ་དེ་དག་སྤྱོད། །སོ་སོའི་སྐྱེ་ལས་རབ་འདས་ལ། །མི་འགྱུར་ལའང་མི་གནས་ཤིང ། །འབྲས་བུའང་མ་ཐོབ་འཕགས་པ་རྣམས། །དེ་དག་འཇིག་རྟེན་སྦྱིན་འོས་ཡིན། །འཇིག་རྟེན་ཆོས་རྣམས་ཀུན་ལྟ་ཞིང ། །འཇིག་རྟེན་ན་ཡང་པད་མོ་བཞིན། །སྤྱོད་པ་མཆོག་ལ་སྤྱོད་པ་ནི། །དེ་དག་ 123b བྱང་ཆུབ་ཞུགས་པ་ཡིན། །གང་ལ་འཇིག་རྟེན་སྤྱོད་པ་དེར། །དེ་དག་སྤྱོད་པར་བྱེད་མོད་ཀྱི། །གང་ལ་འཇིག་རྟེན་རྨོངས་འགྱུར་བ། །དེ་ལ་མཁས་པ་དེ་དག་གྲོལ། །དེ་དག་འཁོར་བར་ཉོན་མི་མོངས། །བྱང་ཆུབ་སེམས་དཔའ་འཇིགས་མེད་པ། །ཞན་པ་མེད་ཅིང་ཞུམ་མེད་པ། །དེ་དག་བྱང་ཆུབ་སྤྱད་པ་སྤྱོད། །ཇི་བཞིན་མཁས་ཤིང་བརྟག་པར་བགྱི། ། ཆོས་ཀྱི་དབྱིངས་ཀྱི་ཚུལ་ཡང་རྟོགས། །དེ་དག་ཆོས་དང་ཆོས་མིན་དུ། །འདི་ལ་མཁས་པ་མི་རྟོག་གོ། བྱང་ཆུབ་སྤྱོད་པ་རབ་སྤྱོད་ཅིང ། །དེ་དག་ཆོས་རྣམས་འཇིགས་མི་བྱེད། ། གང་ཡང་བསྐྱེད་པར་མི་བྱེད་དེ། །འདི་ནི་བྱང་ཆུབ་མཚན་ཉིད་དོ། །ཆོས་རྣམས་ཐམས་ཅད་མཚན་ཉིད་མེད། །ནམ་མཁའ་མཚུངས་ཤིང་མཉམ་པ་སྟེ། །མཁས་པ་དེ་དག་ནམ་དུ་ཡང ། །མཚན་གཞི་མཚན་གཞི་མེད་མི་སྙམ། །སྤྱོད་པ་མཁས་པར་གྱུར་པ་ཡིན། །ཐབས་ཀྱི་ཕ་རོལ་རབ་སོང་ཞིང ། །སེམས་ཅན་རྣམས་ཀྱི་བསམ་པ་ཡང ། ། མཁས་པ་དག་ནི་རྫོགས་པར་བྱེད། །རྟག་ཏུ་དམ་པའི་ཆོས་འཛིན་ཅིང ། །མངོན་པ་ཉིད་ལ་རབ་ཏུ་གནས། །ཆོས་ལ་རློམ་སེམས་མི་བྱེད་པ། །འདི་ནི་ང་ཡི་ཆོས་ཡིན་ཏེ། ། སངས་རྒྱས་དག་ནི་སྐྱེས་ཀྱང་རུང ། །འོན་ཏེ་འདྲེན་པ་མ་སྐྱེས་ཀྱང ། །ཆོས་རྣམས་ཐམས་ཅད་སྟོང་པ་སྟེ། །དེ་དག་ཆོས་ཉིད་དེ་མི་འདོར། །ཆོས་རྣམས་ཀུན་ལ་མངོན་སུམ་སྟེ།། 124a ༄#། །ཆོས་ཀྱི་ཆོས་ཉིད་གང་ཡིན་པ། །དེ་བཞིན་ཉིད་ལ་རབ་གནས་ཤིང ། །དེ་དག་བརྟན་པ་ཤིན་ཏུ་སྟོན། །བདུད་ཀྱི་ཟབ་མོ་སྤྱོད་པ་ཡི། །གཏིང་ཡང་རྟག་ཏུ་རིག་མི་འགྱུར། །འདི་ལྟར་དེ་དག་ཆོས་རྣམས་ལ། །མ་ལུས་པར་ནི་མི་འཛིན་ཏོ། །སངས་རྒྱས་ཡེ་ཤེས་རབ་འཚོལ་ན། །ཡང་དག་ཞུགས་པའི་སྤྱོད་ཡུལ་མིན། ། ཡེ་ཤེས་དེ་ཡང་ཡུལ་གནས་དང ། །ཕྱོགས་ལ་གནས་པ་མི་ཐོབ་བོ། །སངས་རྒྱས་ཡེ་ཤེས་ཆགས་མེད་དེ། །ཆོས་དང་ཆོས་ལ་ཆགས་མི་བྱེད། །བྱང་ཆུབ་ཏུ་ནི་གང་གཞོལ་བ། །དེ་བཞིན་དེ་དག་ཆགས་མི་བྱེད། །སྦྱིན་པས་མངོན་པར་རྟག་ཏུ་འཕགས། །སེམས་དུལ་དུལ་ལ་རབ་ཏུ་དགའ། །དེ་དག་མ་ལུས་གཏོང་བ་ན། ། ཞེན་པའི་སེམས་ནི་ཡོང་མེད་དོ། །ཆོས་ནི་གཏོང་བར་མི་ནུས་ཏེ། །གཟུང་བར་ཡང་ནི་མི་ནུས་སོ། །དེ་ལྟར་ཆོས་རྣམས་ཐམས་ཅད་ལ། །བདག་གི་དངོས་པོ་ཡོད་མ་ཡིན། །ཆོས་རྣམས་ཐམས་ཅད་མ་བཅིངས་ཤིང ། །གྲོལ་བའང་མེད་པར་གང་གིས་ཤེས། །གང་ལ་ལྟ་བ་མེད་པ་སྟེ། །དེ་ནི་སྦྱིན་བདག་ཆེན་པོ་ཡིན། །ང་དང་ང་ཡིན་ལྟ་བ་གང ། །དེ་ལ་དེ་དག་ཡོང་མེད་དེ། །དེ་ཕྱིར་དེ་དག་གཏོང་བ་ན། །དངོས་པོ་ཅི་ལའང་རྟེན་མི་འགྱུར། །སྦྱིན་པ་གཏོང་བ་ཐམས་ཅད་ཀྱང ། །བྱང་ཆུབ་ལ་ནི་ 124b བསྔོ་བར་བྱེད། །བྱང་ཆུབ་ལ་ནི་སྦྱིན་པ་ཡི། །གཉིས་སུ་འདུ་ཤེས་མི་བསྐྱེད་དོ། །འདུ་བྱེད་མེད་པའི་ཚུལ་ཁྲིམས་ལ། །རྟག་པར་ཤིན་ཏུ་གནས་པར་འགྱུར། །ཚུལ་ཁྲིམས་ལ་ཡང་བདག་གནས་ཤེས། །དེ་དག་ལ་ནི་རློམ་སེམས་མེད། །ཚུལ་ཁྲིམས་དག་ནི་མ་བྱས་ཤིང ། །མ་སྐྱེས་པར་ཡང་མཁས་པས་ཤེས། །དེ་ཕྱིར་དེ་ཡི་ཚུལ་ཁྲིམས་ནི། །རབ་དག་དྲི་མེད་ནམ་མཁའ་བཞིན། །ལུས་ནི་གཟུགས་བརྙན་ཉིད་དང་འདྲ། །ངག་ནི་བྲག་ཅ་ཇི་བཞིན་ཏེ། །སེམས་ཀྱང་སྒྱུ་མ་འདྲ་རིག་ནས། །དེ་དག་ཚུལ་ཁྲིམས་མི་སྙེམས་སོ། །དེ་དག་ཞི་ཞིང་རབ་ཏུ་ཞི། །ཉེ་བར་ཞི་ཞིང་མཉམ་པར་གཞག། སྡིག་པ་ཐམས་ཅད་ཞི་བྱེད་ཅིང ། །རབ་ཏུ་ཞི་བའི་ཕ་རོལ་སོང ། །ངང་ཚུལ་ངན་དང་ཚུལ་ཁྲིམས་ནི། །གཉིས་སུ་བྱ་བ་དེ་ལ་མེད། །ཆོས་ཀྱི་དབྱིངས་ནི་ཡོངས་ཤེས་ན། །དེ་ཡི་ཚུལ་ཁྲིམས་ཟག་པ་མེད། །བཟོད་པའི་ཕ་རོལ་རབ་ཕྱིན་ཅིང ། །ཉེས་བྱས་ཐམས་ཅད་བཟོད་པར་བྱེད། །དེ་ལྟར་སེམས་ཅན་ཐམས་ཅད་ལ། །དེ་ཡི་འདུ་ཤེས་མཉམ་པར་འཇུག་།ཆོས་རྣམས་ཐམས་ཅད་མི་གནས་ཏེ། །སྐད་ཅིག་འཇོམས་པས་འཇིག་པར་འགྱུར། །འདི་ལ་གང་ཡང་གཤེ་བ་མེད། །འདི་ལ་གང་ཡང་ཕྱག་འཚལ་མེད། །ལུས་རྣམས་གཤགས་ཤིང་བཅད་ན་ཡང ། །དེ་ཡི་སེམས་ལ་ 125a ༄#། །འཁྲུག་མི་འབྱུང ། །ལུས་ཀྱི་ནང་ངམ་ཕྱི་རོལ་ན། །སེམས་ནི་ཤིན་ཏུ་མི་གནས་སོ། །ཁམས་བཞི་ལས་ནི་བྱུང་བ་ཡི། །ལུས་འདི་ཉིད་ནི་དགྲ་དང་མཚུངས། །ཡང་དག་ཡོངས་སུ་རྟོགས་པ་ཡི། །མཁས་པ་དེ་དག་བདག་མི་སྙེམས། །དེ་ལྟར་མངོན་སུམ་གྱུར་པས་ན། །དེ་དག་བཟོད་པར་སྨྲ་བ་ཡིན། །དེ་ཡི་སེམས་ནི་སུན་དབྱུང་བར། །མ་ལུས་སྐྱེ་བོས་མི་ནུས་སོ། །དེ་དག་བརྩོན་འགྲུས་ཆེ་རྩོམ་སྟེ། །མཐུ་བརྟན་འཇིགས་པ་མེད་པ་དག་།ལུས་དང་སེམས་རྣམས་རིག་ནས་ནི། །དེ་དག་ལ་ནི་གནས་མི་འགྱུར།། འཁོར་བ་ཡི་ནི་ཐོག་མ་ཡི། །མཐའ་ནས་བཟུང་སྟེ་མ་སྐྱེས་སོ། །སེམས་ཅན་གཅིག་གི་དོན་ཕྱིར་ཡང ། །སྟོབས་པོ་ཆེ་དག་གོ་ཆ་གྱོན། །ཆོས་ནི་གང་ཡང་མི་སྐྱེ་སྟེ། །འབྱུང་བར་འགྱུར་བའང་མེད་མོད་ཀྱི། །བྱིས་པ་ཕྱིན་ཅི་ལོག་པའི་ཕྱིར། །སྔོན་གྱི་མཐའ་ནི་མི་རྟགས་སོ། །དབྱིངས་འདི་རྟག་ཏུ་གནས་པ་སྟེ། །ཆོས་ཀྱི་དབྱིངས་ནི་བསམ་མི་ཁྱབ། །དེ་ལྟར་ཡང་དག་རབ་ཤེས་ན། །འདི་ལ་སྐྱེ་མེད་འཇིག་པ་མེད། །ཆོས་ཀྱི་ཆོས་ནི་འདི་རྣམས་ནི། །སེམས་ཅན་འདི་དག་མི་ཤེས་ཏེ། །དེ་ཕྱིར་དེ་ཡི་ཕྱིན་ཅི་ལོག། །སྤང་བའི་ཕྱིར་ནི་དེ་དག་བརྩོན། །སེམས་ཅན་རྫོགས་པའི་སངས་རྒྱས་ཀྱིས། །ཇི་ལྟ་བུར་ཡང་ཡོང་མ་སྙེམས། །གོ་ཆ་དག་ཀྱང་མི་འདོར་ཏེ། །བརྩོན་འགྲུས་དག་གི་ཁྱད་པར་ལྟོས། །ཇི་ལྟར་སྒྱུ་མ་སྨིག་རྒྱུ་ལྟར། །ཆོས་ 125b རྣམས་ལ་ནི་རབ་ཏུ་འབྱེད། །འདི་ལ་སྙིང་པོ་མི་རྙེད་དེ། །ནམ་མཁའ་ལ་ནི་ལྟ་བ་བཞིན། །མེད་པའི་ཡོངས་སུ་རྟོགས་པ་ཡི། །སྐྱེ་བོ་མི་མཁས་ཉོན་མོངས་འགྱུར། །གང་གི་མྱ་ངན་འདའ་བ་ཡི། ། རིག་པ་དག་ནི་འདི་ལ་བཤད། །དེ་ཡི་བརྩོན་འགྲུས་དེ་ཕྱིར་ཏེ། །དངོས་པོ་གཞིག་ཕྱིར་མ་ཡིན་ནོ། །དངོས་དང་དངོས་མེད་མི་རྟག་ཕྱིར། །དེ་དག་གི་ནི་བརྩོན་འགྲུས་བསྐྱེད། །དབེན་བདག་ཏུ་རྟག་གནས་ཤིང ། །ཉོན་མོངས་མེད་པར་རྟོག་པར་རིག། འཁོར་བ་ལ་ནི་སྐྲག་པའི་ཡིད། །འདྲིས་པ་མེད་ཅིང་ཡིད་མི་སྟོན། །དགོན་པར་སྤྱོད་པ་བརྟེན་པ་དག། མཁས་པ་རྟག་ཏུ་བསེ་རུ་བཞིན། ཤེས་པར་བཙན་པར་རིག་པ་དང ། །དེ་དག་མངོན་ཤེས་རྟོགས་པར་རིག། །དགོན་པ་བཞིན་དུ་གྲོང་དེ་བཞིན། །མཉམ་པ་ཉིད་ལ་རབ་གནས་པས། །སྤྱོད་དང་སྤྱོད་ལམ་མི་རྟོགས་ཏེ། དེ་དག་རྟག་ཏུ་མཉམ་པར་བཞག་།ནམ་ཞིག་མཉམ་པར་བཞག་པའི་ཆོས། །ཉེ་བར་ཞི་བ་ཟག་མེད་ལ། །མོས་ཤིང་རྣམ་པར་གྲོལ་བ་ན། །དེ་ཕྱིར་མཉམ་པར་བཞག་ཅེས་གསུངས། །མཉམ་པར་བྱེད་ཅིང་མཉམ་པར་འགྲོ། །མཉམ་པ་ཉི་ལ་རབ་གནས་ནས། །མཉམ་པ་ཉིད་དང་འགལ་མི་བྱེད། །དེ་ཕྱིར་མཉམ་པར་བཞག་ཅེས་གསུངས། ། བྱང་ཆུབ་སེམས་ལས་རྣམ་པ་ཀུན། །སེམས་ལས་དེ་དག་རྨོངས་མི་འགྱུར། །སེམས་ཅན་དག་ཀྱང་ཡོངས་སྨིན་བྱེད། །དེ་དག་མཉམ་པར་བཞག་ཅེས་གསུངས། །རྫོགས་པའི་ 126a ༄#། །སངས་རྒྱས་ཆོས་ཀྱི་སྐུ། །དེ་བཞིན་གཤེགས་པ་རྟག་ཏུ་དྲན། །གཟུགས་ལ་འདོད་ཆགས་བྲལ་བ་ཐོབ། །དེ་ཕྱིར་མཉམ་པར་བཞག་ཅེས་གསུངས། །ཆོས་ཀྱི་ཆོས་ཉིད་ཇི་ལྟ་བར། །དེ་དག་ཆོས་རྣམས་སྒོམ་མོད་ཀྱི། །དྲན་པ་ཡིད་ལ་བྱེད་པས་མིན། །དེ་ཕྱིར་མཉམ་པར་བཞག་ཅེས་གསུངས། །དགེ་འདུན་དྲན་པ་སྒོམ་བྱེད་དེ། །དགེ་འདུན་ཉིད་ཀྱང་འདུས་མ་བྱས། །ཚད་དང་བྲལ་བ་ཞི་བ་ཡི། །མཁས་པ་དག་ནི་བསམ་གཏན་སྒོམ། །ལུས་ཅན་དག་གི་ཕྱོགས་བཅུ་ན། །ཞིང་དང་སངས་རྒྱས་རྣམས་མཐོང་སྟེ། ། དེ་དག་མིག་དང་གཟུགས་ལ་ཡང ། །གཉིས་སུ་འདུ་ཤེས་མི་འཇུག་གོ། སངས་རྒྱས་རྣམས་ཀྱིས་ཆོས་བསྟན་པ། །ཇི་སྙེད་ཡོད་པ་ཉན་མོད་ཀྱི། །དེ་དག་སྒྲ་དང་རྣ་བ་ལ། གཉིས་སུ་འདུ་ཤེས་མི་འཇུག་གོ། དེ་དག་སེམས་ཅན་རྣམས་ཀྱི་སེམས། །སེམས་གཅིག་གིས་ནི་རབ་ཤེས་ཀྱང ། །དེ་དག་སེམས་སུ་མ་སེམས་ཅན་ལ། །རྣམ་པར་རྟོག་པར་མི་འགྱུར་རོ། །བསྐལ་པ་གངྒཱའི་ཕྱེ་མ་སྙེད། །བྱེ་མ་ལྟ་བུའི་དྲན་གྱུར་ཀྱང ། །དེ་དག་སྔོན་ནམ་ཕྱི་མ་ཞེས། །སྤྲོས་པ་འདི་ཡང་མི་འཕྱུང་ངོ ། །ཞིང་རྣམས་བྱེ་བ་ཕྲག་སྟོང་དང ། །བསམ་མི་ཁྱབ་པར་འཕྲུལ་གྱིས་འགྲོ། ལུས་ལའང་མེད་ཅིང་སེམས་ལའང་མེད། །དེ་ལས་གུད་ནའང་ཡོད་མ་ཡིན། །ཆོས་རྣམས་རབ་ཏུ་དབྱེ་བར་ཤེས། །སྤོབས་པ་དག་ལ་རྟོགས་ 126b པར་རིག། ཆོས་ཀྱི་དབྱིངས་རྣམས་བསྟན་པ་དག། བསྐལ་པ་བྱེ་བར་སྨྲ་བར་བྱེད། །ཤེས་རབ་ཀྱི་ཡང་ཕ་རོལ་ཕྱིན། །ཕུང་པོ་དག་ལ་མཁས་པར་བསླབ། །བླང་མེད་སྤྲོས་པ་མེད་པ་ཡི། ། ཆོས་མཆོག་དག་ནི་རྗོད་པར་བྱེད། །དེ་དག་རྐྱེན་ལ་མཁས་པ་སྟེ། །མཐའ་གཉིས་དག་ནི་སྤངས་པ་ཡིན། །དེ་དག་ཉོན་མོངས་རྒྱུ་རྣམས་ཀྱང ། །སྡིག་པ་མེད་པར་དག་པར་ཤེས། ། རྐྱེན་ལ་ལྷག་པར་མོས་པ་ལ། །ལྟ་བ་དག་ནི་ཡོད་མ་ཡིན། །འདི་ལྟར་ཆོས་རྣམས་ཐམས་ཅད་ནི། །རྐྱེན་ལས་རག་ལུས་དངོས་པོ་མེད། །བདག་ཏུ་ལྟ་དང་སངས་རྒྱས་ལྟ། །སྟོང་པར་ལྟ་བ་གང་ཡིན་དང ། །མྱ་ངན་འདས་དང་འཁོར་བར་ལྟ། །ཐམས་ཅད་དེ་ལ་ཡོངས་མེད་དོ། །ཤེས་རབ་རང་བཞིན་ཤེས་ནས་ནི། །སྣང་བར་གྱུར་མ་ཐག་ཏུ་ཡང ། །དེ་དག་མུན་བྲལ་ཆགས་མེད་ཅིང ། །བྱང་ཆུབ་སྤྱོད་ལ་སྤྱོད་པར་འགྱུར། །ཐེག་པ་ཆེན་པོའི་ཐེག་པ་འདི། །སངས་རྒྱས་ཐེག་པ་བསམ་མི་ཁྱབ། །སེམས་ཅན་གྱི་ནི་གོ་སྐབས་འབྱེད། །ཐེག་པ་ཆེན་པོ་བླ་ན་མེད། །ཐེག་པ་ཇི་སྙེད་ཡོད་པ། །འདི་ནི་དེ་ཡི་མཆོག་ཏུ་དགོངས། །དེ་ཕྱིར་ཐེག་པ་ཆེན་པོ་ལས། །ཐེག་པ་ཐམས་ཅད་རབ་ཏུ་དབྱེ། །ཐེག་པ་གཞན་དུ་ཆུང་དུ་སྟེ། །ཐམས་ཅད་ཀྱི་ནི་གོ་སྐབས་མེད། །ཐེག་པ་ཆེན་པོ་འདི་ལ་ནི། ལུས་ཅན་ཀུན་གྱི་གོ་སྐབས་ཤོད། །ཐེག་པ་ཆེན་པོ་ནམ་མཁའ་ལྟར། །དྲི་མ་མེད་ལ་གང་ཞུགས་པ། །དེ་དག་ལུས་ཅན་ཐམས་ 127a ༄#། །ཅད་ལ། །སེར་སྣ་བྱེད་པ་ཡོང་མེད་དོ། །ཇི་ལྟར་ནམ་མཁའ་ཚད་མེད་ཅིང ། །གཟུགས་མེད་བསྟན་དུ་མེད་པ་ལྟར། །དེ་བཞིན་ཐེག་པ་ཆེན་པོ་འདི། །ཚད་མེད་སྒྲིབ་པ་མེད་པའོ། །གལ་ཏེ་སེམས་ཅན་ཐམས་ཅད་ཀྱང ། །ཐེག་པ་དམ་པ་འདོད་འགྱུར་ན། །ཐམས་ཅད་ཀྱི་ཡང་གོ་སྐབས་ཡོད། །ཐེག་པའི་ཁྱད་པར་དག་ལ་ལྟོས། །ཐེག་པ་ཆེན་པོའི་ཡོན་ཏན་དང ། །དེ་ལ་གང་རྣམས་གནས་པ་ཡིན། །དེ་དག་གི་ནི་བསྔགས་པའི་མཐའ། །བསྐལ་པ་བྱེ་བར་བཤད་མི་ནུས། །ཚིག་བཞི་པ་ཡི་ཚིགས་བཅད་ཙམ། །མདོ་སྡེ་འདི་ལས་གང་འཛིན་པ། །དེ་དག་གིས་ནི་མི་ཁོམ་སྤངས། །མཁས་པ་དེ་དག་དལ་བ་ཐོབ། །གང་དག་མདོ་སྡེ་འདིར་དགའ་བ། །དེ་དག་ཕྱིན་ཆད་ངན་སོང་དུ། །འགྲོ་བར་འགྱུར་བ་མ་ཡིན་ཏེ། །དེ་དག་ལྷ་དང་མིར་འདུག་\?\་གོ། བྱི་དུས་འཇིགས་པ་ཆེན་པོའི་ཚེ། །མདོ་སྡེ་འདི་ནི་གང་ཉན་པ། །དེ་དག་ཐམས་ཅད་བྱང་ཆུབ་ཏུ། །ཤིན་ཏུ་གཞོལ་བར་ངས་ལུང་བསྟན་དེ་ཡི་ལ་ག་ན་ཆོས་ཡོད་དེ། །དེ་དག་དེ་མའི་ཆོས་ལ་གནས། །ཆོས་འདི་ལ་ནི་གནས་ནས་ཀྱང ། །དེ་དག་ཆོས་ཀྱི་འཁོར་ལོ་བསྐོར། །གང་གིས་མདོ་སྡེ་འདི་བཟུང་བ། །དེ་དག་རྫོགས་པའི་བྱང་ཆུབ་ཉེ། །བསྐལ་པ་མཐའ་ཡས་འཁོར་བ་ལས། །བདག་ཉིད་ཆེན་པོ་དེ་དག་སྤོང ། །གང་གིས་ཚུལ་འདི་བཟུང་བ་དག་།དེ་དག་དཔའ་བོ་ནུབ་པ་སྟེ། །བདུད་ཀྱི་སྡེ་རྣམས་ 127b རབ་ཏུ་འཇོམས། །བརྩོན་འགྲུས་ཆེ་ཞིང་ཤེས་རབ་ཆེ། །མདོ་སྡེ་འདི་ལ་གང་དགའ་བ། །ང་ནི་བཟུང་ལ་གནས་པའི་ཚེ། །མར་མེ་མཛད་ཀྱིས་ལུང་བསྟན་ལྟར། །དེ་ཚེ་དེ་དག་ལུང་བསྟན་ཏོ། །མདོ་སྡེ་འདི་ནི་གང་སྨྲ་བ། །དེ་ནི་སངས་རྒྱས་སྐྱོབ་པ་འདི་འཇིག་རྟེན་སྒྲོལ་བ་མ་བྱུང་ཚེ། །སངས་རྒྱས་མཛད་པ་བྱེད་པར་འགྱུར། །ཡང་ཚིགས་སུ་བཅད་པ་མངོན་པར་བསྒྲུབ་པ་འདི་བཤད་པ་ན་ལྷའི་བུ་ལྔ་སྟོང་བྱང་ཆུབ་སེམས་སྐྱེས་སོ། །བྱང་ཆུབ་སེམས་དཔའ་ཉིས་སྟོང་མི་སྐྱེ་བའི་ཆོས་ལ་བཟོད་པ་སྐྱེས་སོ། །དགེ་སློང་སྟོང་ལྷག་ཙམ་ལེན་པ་མེད་པར་ཟག་པ་ལས་སེམས་རྣམ་པར་གྲོལ་ལོ། །སྲོག་ཆགས་སུམ་ཁྲི་ཉིས་སྟོང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །ཇི་ལྟར་བཅོམ་ལྡན་འདས་ཀྱིས་བཤད་པའི་དོན་བདག་གིས་འཚལ་བ་ལྟར་ན་གང་བྱང་ཆུབ་ཀྱི་ཕྱིར་སྨོན་པ་ནི་ལོག་པར་ལྟ་བ་ལ་སྨོན་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། དམིགས་པ་ནི་ལོག་པ་ལགས་ཏེ། དེ་ལྟ་བས་ན་བྱང་ཆུབ་ལ་དམིགས་པར་བགྱིད་ཅིང ། དམིགས་པ་ལ་སྨོན་པ་དེ་དག་གིས་འབད་པ་ནི་ལོག་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། བྱང་ཆུབ་ནི་འདོད་པའི་ཁམས་ལ་མི་གནས། གཟུགས་ཀྱི་ཁམས་ལ་མི་གནས། གཟུགས་མ་མཆིས་པའི་ཁམ་ 128a ༄#། །ལ་མི་གནས་ཏེ། བཅོམ་ལྡན་འདས། བྱང་ཆུབ་ནི་མི་གནས་པ་ལགས་པས་དེ་ལ་སྨོན་པ་བགྱིད་པ་མ་མཆིས་སོ། །བཅོམ་ལྡན་འདས། འདི་ལྟ་སྟེ། དཔེར་ན།་སྐྱེས་བུ་ལ་ལ་ཞིག་བདག་གིས་ནམ་མཁའ་ཐོབ་པར་བགྱིའོ་ཞེས་ནམ་མཁའ་ལ་སྨོན་ན་དེས་ནམ་མཁའ་ཐོབ་པར་འགྱུར་རམ། བཀའ་སྩལ་པ། འཇམ་དཔལ། དེ་མ་ཡིན་ནོ། །འཇམ་དཔལ་གྱིས་གསོལ་པ། བཅོམ་ལྡན་འདས། དེ་བཞིན་དུ་གང་བྱང་ཆུབ་ནམ་མཁའ་དང་མཚུངས་པ་ལ་སྨོན་པ་དེ་དག་ནི་ནམ་མཁའ་ལ་སྨོན་པ་ལགས་སོ། །བཅོམ་ལྡན་འདས། བྱང་ཆུབ་ནི་སྨོན་པ་མ་མཆིས་པ། དུས་གསུམ་ལས་འདས་པ། ཉེ་བར་མི་མཆི་བ་ལགས་ཏེ། བཅོམ་ལྡན་འདས། བྱང་ཆུབ་སེམས་དཔའ་གང་འདུ་ཤེས་གཉིས་སུ་བགྱིས་ནས་བྱང་ཆུབ་ཀྱང་གཞན་ལ་འཁོར་བའང་གཞན་ནོ། །བྱང་ཆུབ་ཀྱང་གཞན་ལ་ལྟ་བར་གྱུར་པའང་གཞན་ནོ། །བྱང་ཆུབ་ཀྱང་གཞན་ལ་མྱ་ངན་ལས་འདས་པའང་གཞན་ནོ་ཞེས་སྨོན་པར་བགྱིད་ན་བྱང་ཆུབ་སེམས་དཔའ་དེ་དག་ནི་བྱང་ཆུབ་ལ་སྤྱོད་པ་མ་ལགས་སོ། །དེ་ནས་ཚངས་པ་ཁྱད་པར་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། བྱང་ཆུབ་སེམས་དཔའ་ཇི་ལྟར་སྤྱོད་ན་བྱང་ཆུབ་ལ་སྤྱོད་པ་ཡིན། སྨྲས་པ། ཚངས་པ། བྱང་ཆུབ་སེམས་དཔའ་གང་ཆོས་ཐམས་ 128b ཅད་ལའང་སྤྱོད་ལ་ཆོས་གང་ལའང་མི་སྤྱོད་ན་བྱང་ཆུབ་སེམས་དཔའ་དེ་བྱང་ཆུབ་ལ་སྤྱོད་དེ། ཚངས་པ། སྤྱོད་པ་ཡུལ་ལས་འདས་པའི་བྱང་ཆུབ་སེམས་དཔའ་ནི་བྱང་ཆུབ་ཏུ་སྤྱོད་དེ། །སྨྲས་པ། འཇམ་དཔལ། ཇི་ལྟར་ན་བྱང་ཆུབ་སེམས་དཔའ་སྤྱོད་པའི་ཡུལ་ལས་འདས་པ་བྱང་ཆུབ་ལ་སྤྱོད། །སྨྲས་པ། དམིགས་པའི་མཚན་མ་ཐམས་ཅད་དང་བྲལ་ཞིང ། མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་དང་བྲལ་བ་དེ་ལྟར་ན་སྤྱད་པའི་ཡུལ་ཐམས་ཅད་ལས་ཤིན་ཏུ་འདས་པ་ཡིན་ནོ། །སྨྲས་པ། འཇམ་དཔལ། ཡང་དག་པར་འདས་བ་ཞེས་བྱ་བ་ཅི་ལ་བསམ། སྨྲས་པ། མཉམ་པ་ཉིད་ལས་མི་འདའ་བའོ། །དེ་ཅིའི་ཕྱིར་ཞེ་ན། ཚངས་པ། བྱང་ཆུབ་ནི་ཆོས་ཐམས་ཅད་ཀྱི་མཉམ་པ་ཉིད་དོ། །སྨྲས་པ། འཇམ་དཔལ་བྱང་ཆུབ་སེམས་དཔས་ཇི་ལྟར་ན་བྱང་ཆུབ་ཏུ་འཇུག་པར་བྱ། སྨྲས་པ། བྱང་ཆུབ་ཇི་ལྟ་བ་བཞིན་དུའོ། །སྨྲས་པ། བྱང་ཆུབ་ཇི་ལྟ་བུ་ཡིན། སྨྲས་པ། ཚངས་པ། བྱང་ཆུབ་དེ་ནི་འདས་པའང་མ་ཡིན། མ་འོངས་པའང་མ་ཡིན། ད་ལྟར་བྱུང་བའང་མ་ཡིན་ཏེ། དེ་བས་ན་བྱང་ཆུབ་སེམས་དཔས་དུས་གསུམ་ཡོངས་སུ་དག་པའི་རྣམ་པ་དང ། འཁོར་གསུམ་ཡོངས་སུ་དག་པས་བྱང་ཆུབ་ཏུ་ཡང་དག་འཇུག་པར་བྱའོ། །འདས་པ་ཇི་ལྟ་བ་དང ། མ་འོངས་པ་ཇི་ལྟ་བ་དང ། ད་ལྟར་བྱུང་བ་ཇི་ལྟ་བ་དང ། མ་བྱུང་བ་ཇི་ལྟ་བ་དང ། མ་བྱུང་བ་གང་ཡིན་ 129a ༄#། །པ་དེ་ལ་རབ་ཏུ་དབྱེ་བ་མེད་དེ། གང་དེ་ལྟར་རབ་ཏུ་ཞུགས་པ་དེ་གང་ལའང་ཞུགས་པ་མེད་དོ། །དེ་ཅིའི་ཕྱིར་ཞེ་ན། རབ་ཏུ་འཇུག་པ་འདིས་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་རོ། །སྨྲས་པ། འཇམ་དཔལ། ཅིའི་ཕྱིར་ཐམས་ཅད་མཁྱེན་པའི་ཡེ་ཤེས་ཞེས་བྱ། སྨྲས་པ། ཐམས་ཅད་ཤེས་པར་གྱུར་བའི་ཡེ་ཤེས་དེ་ནི་ཐམས་ཅད་མཁྱེན་པའི་ཡེ་ཤེས་ཞེས་བྱའོ། །སྨྲས་པ། འཇམ་དཔལ། ཀུན་ཤེས་པ་གང་ཡིན། སྨྲས་པ། ཚངས་པ། ཀུན་ཤེས་པ་གང་ལ་དངོས་པོ་མེད་ཅིང་ཀུན་ཤེས་པ་ལ་ཀུན་ཤེས་པ་མེད་པ་དེ་ནི་ཀུན་ཤེས་པ་སྟེ། དངོས་པོ་ཇི་ལྟ་བ་དེ་བཞིན་དུ་དེའི་ཀུན་ཤེས་པའང་མེད་དོ། །སྨྲས་པ། ཅིའི་ཕྱིར་དངོས་པོ་མེད། སྨྲས་པ། དངོས་པོ་ནི་མིང་གི་རང་བཞིན་གྱིས་དཔེན་ཏེ།་དེའི་མིང་དང ། རང་བཞིན་དབེན་ལ་དངོས་པོའང་གཞན་མ་ཡིན། བྱང་ཆུབ་ཀྱང་གཞན་མ་ཡིན་ནོ། །གལ་ཏེ་དངོས་པོའང་གཞན་ལ་བྱང་ཆུབ་ཀྱང་གཞན་དུ་ཟིན་ན་འདི་ལྟར་འདི་ལ་བྱང་ཆུབ་ཇི་ལྟ་བར་དངོས་པོའང་དེ་བཞིན་ནོ། །དེ་ལྟ་བས་ན་འདི་ལ་སེམས་ཅན་ཡང་གུད་ན་མེད་ལ་དེ་རྣམ་པ་གཞན་དུའང་རྟོགས་པར་མི་འགྱུར་ཏེ། གཞན་དུ་ན་བདག་གི་མཉམ་པ་ཉིད་ཀྱིས་བྱང་ཆུབ་མཉམ་པ་ཉིད་དང ། བྱང་ཆུབ་ཀྱི་མཉམ་པ་ཉིད་ཀྱིས་བདག་གི་མཉམ་པ་ཉིད་རིག་པར་བྱེད་དེ། དེ་ལྟར་ན་བྱང་ཆུབ་རྟོགས་པར་ 129b འགྱུར་ཏེ་གཞན་དུ་མ་ཡིན་པས་ན་དེའི་ཕྱིར་དེ་ལ་གཞན་དུ་འགྱུར་བ་མེད་དོ། །བདག་ནི་རྟག་ཏུ་བདག་མེད་པ་ཡིན་ཏེ། དེ་ཕྱིར་དེ་ལ་རྣམ་པ་གཞན་དུ་འགྱུར་བ་མེད་དོ། །ཇི་ལྟར་ནམ་མཁའ་ལ་རྣམ་པ་གཞན་དུ་འགྱུར་བ་མེད་པ་དེ་བཞིན་དུ་ཆོས་ཐམས་ཅད་ལའང་གཞན་དུ་འགྱུར་བ་མེད་དོ། །དེ་ནས་ཚངས་པ་ཁྱད་པར་སེམས་ཀྱིས་འཇམ་དཔལ་གཞོལ་ནུར་གྱུར་པ་ལ་འདི་སྐད་ཅེས་སྨྲས་སོ། །འདི་ལྟར་ཆོས་འདི་དག་རབ་ཏུ་ཕྱེ་བ་ལས་ན་དེ་བཞིན་གཤེགས་པ་ནི་བདེན་པར་གསུངས་པའོ། །སྨྲས་པ། ཚངས་པ། དེ་བཞིན་གཤེགས་པས་ནི་ཆོས་གང་ཡང་རབ་ཏུ་མ་ཕྱེའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ཆོས་ཉིད་ཀྱང་མ་དམིགས་ན་གང་རབ་ཏུ་དབྱེ་བ་ལྟ་ཅི་སྨོས། སྨྲས་པ། འཇམ་དཔལ། ཅི་དེ་བཞིན་གཤེགས་པས་ཆོས་འདི་དག་ནི་འདུས་བྱས་སོ། །ཆོས་འདི་དག་ནི་འདུས་མ་བྱས་སོ། །ཆོས་འདི་དག་ནི་འཇིག་རྟེན་པའོ། །ཆོས་འདི་དག་ནི་འཇིག་རྟེན་ལས་འདས་པའོ་ཞེས་ཆོས་རྣམས་རྣམ་པར་མི་མཁྱེན་ཏམ།་སྨྲས་པ། ཚངས་པ། འདི་ཇི་སྙམ་དུ་སེམས། སུས་ཀྱང་ནམ་མཁའ་འདི་རབ་ཏུ་ཕྱེ་བའམ། ཤེས་པར་གྱུར་བ་ཡོད་དམ། སྨྲས་པ། འཇམ་དཔལ། དེ་མ་ཡིན་ནོ། །འཇམ་དཔལ་གྱིས་སྨྲས་པ། གང་ནམ་མཁའ་ཞེས་བྱ་བ་དེ་སྐྱེ་བའམ། འགག་པར་འགྱུར་རམ། སྨྲས་པ། དེ་མ་ཡིན་ནོ། །སྨྲས་པ། ཚངས་པ། དེ་བཞིན་དུ་ཆོས་གང་ཡང་རུང་བའི་རྣམ་པར་རིག་ 130a ༄#། །པར་བྱེད་པ་དེའང་ནམ་མཁའ་རྣམ་པར་རིག་པར་བྱེད་པའོ། །ཆོས་ནི་སྐྱེ་བའམ། འགག་པར་མི་འགྱུར་ཏེ། ཆོས་ཐམས་ཅད་ཀྱི་རྣམ་པར་རིག་པར་བྱེད་པ་ནི་རྣམ་པར་རིག་པར་བྱེད་པ་མེད་པའོ། །ཆོས་དེས་གང་ཀུན་ཤེས་པར་བྱས་པ་དེ་དག་ཀྱང་གཞན་དུ་མ་འགྱུར་བས་ན་རྣམ་པར་རིག་པར་བྱེད་པ་མེད་པས་ཀུན་ཤེས་སོ། །དེ་ཅིའི་ཕྱིར་ཞེ་ན། ཆོས་རྣམ་པར་རིག་པར་བྱེད་པ་དེ་ཇི་འདྲ་བ་དེ་བཞིན་དུ་དེའི་ཀུན་ཤེས་པའང་དེ་འདྲ་སྟེ། དེའི་ཕྱིར་ཆོས་ཐམས་ཅད་དེ་བཞིན་ཉིད་ལ་གནས་ཞེས་བྱ་སྟེ་དེ་བཞིན་ཉིད་ནི་མི་གནས་པའོ། །དེ་ནས་རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། མི་མཇེད་ཀྱི་བདག་པོ་ཚངས་པའང་འཁོར་དེ་ཉིད་དུ་ཚོགས་ནས་འདུག་པར་གྱུར་ཏེ། དེ་དག་ལྷའི་མེ་ཏོག་དེ་དག་གིས་དེ་བཞིན་གཤེགས་པ་ལ་གཏོར་ནས་ཚིག་འདི་སྐད་འཛེར་ཏོ། །བཅོམ་ལྡན་འདས། རིགས་ཀྱི་བུའམ། རིགས་ཀྱི་བུ་མོ་གང་དག་འཇམ་དཔལ་གཞོན་ནུར་གྱུར་པས་བསྟན་པ་འདི་ལ་མོས་པ་དེ་དག་ནི་བདུད་དང ། ཕྱིར་རྒོལ་བ་བཅོམ་པ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། འཇམ་དཔལ་གཞོན་ནུར་གྱུར་པས་བསྟན་པ་ནི་འདུ་ཤེས་ཐམས་ཅད་དང་བྲལ་བ་ལགས་ཏེ། གང་ཆོས་ཟབ་མོ་བསྟན་པ་འདི་ལ་མི་སྐྲག་མི་དངང་ཞིང་ཤིན་ཏུ་དངང་བར་མི་འགྱུར་བའི་རིགས་ཀྱི་བུའམ། 130b རིགས་ཀྱི་བུ་མོ་དེ་དག་ནི་དགེ་བའི་རྩ་བ་ངན་ངོན་དང་ལྡན་པ་མ་ལགས་སོ། །བཅོམ་ལྡན་འདས། ཆོས་ཀྱི་རྣམ་གྲངས་འདིས་ཕྱོགས་གང་དུ་བྱུང་བ་དེ་སངས་རྒྱས་ཀྱི་བྱིན་གྱིས་བརླབས་པ་ལགས་སོ། །གང་དུ་ཆོས་ཀྱི་ཚུལ་ཟབ་མོ་འདི་ཐོས་པར་འགྱུར་བའི་ས་ཕྱོགས་དེ་དག་དེ་བཞིན་གཤེགས་པས་ཡོངས་སུ་ལོངས་སྤྱད་པའོ། །གྲོང་དང ། གྲོང་ཁྱེར་དང ། གྲོང་རྡལ་དང ། ལྗོངས་དང ། གཙུག་ལག་ཁང་དང ། འཆགས་གང་དུ་ཆོས་ཀྱི་རྣམ་གྲངས་འདི་བྱུང་བ་དེར་ཆོས་ཀྱི་འཁོར་ལོ་རབ་ཏུ་བསྐོར་བར་བལྟའོ། །དེར་བདུད་རྣམས་རྒྱུ་བ་མ་མཆིས། དམིགས་པ་ལ་མངོན་པར་ཆགས་པ་རྣམས་ཀྱི་རྒྱུ་བ་མ་མཆིས་ཏེ། བཅོམ་ལྡན་འདས། སེམས་ཅན་སྔོན་གྱི་རྒྱལ་བ་རྣམས་ལ་ལྷག་པར་བགྱི་བ་བགྱིས་པ་རྣམས་ཀྱི་རྣ་ལམ་དུ་ཆོས་ཀྱི་རྣམ་གྲངས་འདི་ཐོས་པར་འགྱུར་རོ། །བཅོམ་ལྡན་འདས། འདི་ལྟར་བདག་ཅག་གིས་ཆོས་ཀྱི་རྣམ་གྲངས་འདི་ལས་ཆོས་ཀྱི་སྣང་བ་ཐོབ་སྟེ། བཅོམ་ལྡན་འདས་དེ་བཞིན་གཤེགས་པ་དང ། འཇམ་དཔལ་གཞོན་ནུར་གྱུར་པ་དང ། ཚངས་པ་འདི་ལ་བདག་ཅག་གིས་རང་གི་ཤ་དང ། ཁྲག་གིས་ཀྱང་ལན་མི་ལོན་ནོ། །བཅོམ་ལྡན་འདས་གང་ལས་ཆོས་ཀྱི་རྣམ་གྲངས་འདི་ཐོས་པར་འགྱུར་བའི་ཆོས་སྨྲ་བ་དེ་ལ་བདག་ཅག་སྟོན་པར་འདུ་ཤེས་བསྐྱེད་པར་བགྱིའོ། །བཅོམ་ལྡན་འདས། ཆོས་སྨྲ་བ་དེའི་དྲུང་དུ་བདག་ཅག་རྟག་ཏུ་རྒྱུན་མི་འཆད་པར་ 131a ༄#། །མཆི་སྟེ། རིགས་ཀྱི་བུ་དེ་ལྷ་དེ་དག་གིས་ཡོངས་སུ་གཟུང་བར་འགྱུར་རོ། །ཆོས་ཀྱི་རྣམ་གྲངས་འདི་ཡི་གེར་འདྲི་བའམ། ཀློག་གམ། སྟོན་ཏམ། ཁ་ཏོན་བྱེད་ན་ལྷའི་བུ་བརྒྱ་སྟོང་ཕྲག་དུ་མ་ཆོས་ཉན་དུ་མཆིའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་དང ། ལྷའི་དབང་པོ་བརྒྱ་བྱིན་དང ། ཚངས་པ་མི་མཇེད་ཀྱི་བདག་པོ་ལ་འདི་སྐད་ཅེས་བཀའ་སྩལ་ཏོ། །ལེགས་སོ། །ལེགས་སོ། །སྐྱེས་བུ་དམ་པ་ཁྱེད་ཇི་སྐད་ཟེར་བ་དེ་དེ་བཞིན་ནོ། །གྲོགས་པོ་དག་།གལ་ཏེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱིས་ཡོངས་སུ་བཀང་བའི་ཆ་གཅིག་བཞག་པ་དང ། ཆོས་ཀྱི་རྣམ་གྲངས་འདི་ཉན་པའི་དགེ་བའི་རྩ་བ་ཆ་གཅིག་བཞག་པ་དང ། དེ་གཉིས་ནི་གང་འདི་ཆོས་ཀྱི་རྣམ་གྲངས་ཉན་པའི་དགེ་བའི་རྩ་བའི་ཆ་འདི་མཆོག་གོ་།སྟོང་གསུམ་གྱི་སྟོང་ཆེན་པོའི་འཇིག་རྟེན་གྱིས་ཁམས་ལྟ་ཞོག་གི་།གལ་ཏེ་ཆུ་བོ་གངྒཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་རིན་པོ་ཆེ་ཐམས་ཅད་ཀྱིས་ཡོངས་སུ་བཀང་བའི་ཆ་གཅིག་བཞག་པ་དང ། ཆོས་ཀྱི་རྣམ་གྲངས་འདི་ཉན་པའི་དགེ་བའི་རྩ་བའི་ཆ་གཅིག་བཞག་པ་དང ། དེ་གཉིས་ནི་གང་འདི་ཆོས་ཀྱི་རྣམ་གྲངས་འདི་ཉན་པའི་དགེ་བའི་རྩ་བའི་ཆ་མཆོག་གོ། གྲོགས་པོ་དག། རིགས་ཀྱི་བུའམ། རིགས་ཀྱི་བུ་མོ་བསོད་ནམས་ 131b འདོད་པས་ཆོས་ཀྱི་རྣམ་གྲངས་འདི་མཉན་པར་བྱའོ། །རྙེད་པ་འདོད་པ་དང ། ཆོས་འདོད་པ་དང ། གཟུགས་འདོད་པ་དང ། ལོངས་སྤྱོད་འདོད་པ་དང ། གཡོག་འདོད་པ་དང ། ཆོས་ཀྱི་དབང་ཕྱུག་འདོད་པ་དང ། ལྷའི་ཕུན་སུམ་ཚོགས་པ་འདོད་པ་དང ། མིའི་ཕུན་སུམ་ཚོགས་པ་འདོད་པ་དང ། གྲགས་པ་འདོད་པ་དང ། བརྗོད་པ་འདོད་པ་དང ། ཐོས་པ་འདོད་པ་དང ། དྲན་པ་དང ། བློ་གྲོས་དང ། རྟོགས་པ་དང ། བརྟན་པ་དང ། ཤེས་རབ་འདོད་པ་དང ། སྤོབས་པ་འདོད་པ་དང ། གཟུངས་འདོད་པ་དང ། དགེ་བའི་བཤེས་གཉེན་རྙེད་པར་འདོད་པ་དང ། མངོན་པར་ཤེས་པ་དང ། རིག་པ་དང ། ཡེ་ཤེས་འདོད་པ་དང ། བྱང་ཆུབ་འདོད་པ་དང ། དགེ་བའི་ཆོས་ཐམས་ཅད་འདོད་པ་དང ། བྱང་ཆུབ་ཀྱི་ཡན་ལག་འདོད་པ་དང ། ཆོག་འདོད་པ་དང ། སེམས་ཅན་ཐམས་ཅད་བདེ་བ་ཐོབ་པར་བྱ་བར་འདོད་པ་དང ། མྱ་ངན་ལས་འདས་པར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཆོས་ཀྱི་རྣམ་གྲངས་འདི་མཉན་པར་བྱ། མོས་པར་བྱ། གཟུང་བར་བྱ། ཀུན་ཆུབ་པར་བྱ། བཅང་བར་བྱ། བཀླག་པར་བྱ། གཞན་ལའང་རྒྱ་ཆེར་རབ་ཏུ་བསྟན་པར་བྱའོ། །གྲོགས་པོ་དག་།ཆོས་ཀྱི་རྣམ་གྲངས་འདི་ཆུང་དུ་ན་མཉན་པ་ཙམ་གྱིས་ཀྱང་གང་དེས་ཡོངས་སུ་མ་བཟུང་བར་གྱུར་པའི་ཕུན་སུམ་ཚོགས་པ་དེ་གནས་མ་མཐོང་ངོ ། །གྲོགས་པོ་དག་།མོས་པར་བྱ། གོ་པར་བྱ་སྟེ། 132a ༄#། །སློབ་དཔོན་ནམ། མཁན་པོ་གང་ལས་ཆོས་ཀྱི་རྣམ་གྲངས་འདི་མཉན་ཏམ། བཟུང་ན་འཇིག་རྟེན་གྱི་ཟང་ཟིང་གང་གིས་དེ་ལ་ལན་གླན་པར་སླ་བ་དེ་ལྟ་བུ་ངས་\?\་མ་མཐོང་ངོ ། །དེ་ཅིའི་ཕྱིར་ཞེ་ན། འདི་ནི་འཇིག་རྟེན་ལས་འདས་པའི་ཆོས་ཏེ། འཇིག་རྟེན་གྱི་ཟང་ཟིང་གིས་དེ་སྦྱང་བར་སླ་བ་མ་ཡིན་ནོ། །ཆོས་འདི་དག་ནི་འཇིག་རྟེན་གྱིས་མ་གོས་པ་སྟེ། འཇིག་རྟེན་གྱི་ཟང་ཟིང་གིས་སྦྱང་བར་སླ་བ་མ་ཡིན་ནོ། །ཆོས་འདི་ནི་ཟང་ཟིང་མེད་པ་སྟེ། འཇིག་རྟེན་གྱིས་ཟང་ཟིང་གིས་སྦྱང་བར་སླ་བ་མ་ཡིན་ནོ། །ཆོས་ཀྱི་རྣམ་གྲངས་འདི་ལ་ལན་གླན་པ་ནི་ཆོས་ཀྱི་ནན་ཏན་མ་གཏོགས་པར་གཞན་མེད་དེ། ལོག་པའི་ནན་ཏན་གྱིས་མ་ཡིན་ནོ། །གང་འདི་ལ་ཞུགས་པ་དེ་དག་གིས་མཁན་པོ་དང ། སློབ་དཔོན་ལ་གུས་པར་བྱས་སོ། །དེ་དག་གིས་ལན་གླན་པ་དག་བྱས་སོ། །དེ་དང ། དེ་དག་ནི་བུ་ལོན་མེད་པར་ཡུལ་འཁོར་གྱི་བསོད་སྙོམས་ཟའོ། །དེ་དང ། དེ་དག་ནི་དེ་བཞིན་གཤེགས་པའི་ཚིག་ལ་ནན་ཏན་དུ་བྱེད་པའོ། །དེ་དང ། དེ་དག་ནི་ཆུ་བོ་ལས་བརྒལ་བའོ། །དེ་དང ། དེ་དག་ནི་དགོན་པ་ལས་ཤིན་ཏུ་བརྒལ་བའོ། །དེ་དང ། དེ་དག་ནི་གདུགས་དང ། རྒྱལ་མཚན་དང ། བ་དན་སྒྲེང་བའོ། །དེ་དང ། དེ་དག་ནི་དཔའ་བོ་གཡུལ་ལས་རྣམ་པར་རྒྱལ་བའོ། །དེ་དང ། དེ་དག་ནི་སེང་གེ་ལྟར་འཇིགས་ཤིང་སྐྲག་པ་དང་བྲལ་བའོ། །དེ་དང ། དེ་དག་ནི་བལ་གླང་ 132b ལྟར་ཅང་ཤེས་པའོ། །དེ་དང ། དེ་དག་ནི་གླང་པོ་ཆེ་ལྟར་སེམས་རབ་ཏུ་ཞི་བའོ། །དེ་དང ། དེ་དག་ནི་ཁྱུ་མཆོག་ལྟར་ཕ་རོལ་རྒོལ་བ་ཐམས་ཅད་ཀྱིས་ཟིལ་གྱིས་མི་གནོན་པའོ། །དེ་དང ། དེ་དག་ནི་སྨན་པ་སྟེ།་སེམས་ཅན་ཐམས་ཅད་ནད་ཐམས་ཅད་ལས་རབ་ཏུ་ཐར་བར་བྱེད་པའོ། །དེ་དང ། དེ་དག་ནི་ཆོས་ཟབ་མོ་བསྟན་པ་ལ་མི་དངང་བའོ། །དེ་དང ། དེ་དག་ནི་སྦྱིན་པ་ཕུན་སུམ་ཚོགས་ཤིང་ཉོན་མོངས་པ་ཐམས་ཅད་ཡོངས་སུ་གཏོང་བའོ། །དེ་དང ། དེ་དག་ནི་ཚུལ་ཁྲིམས་ཡོངས་སུ་དག་ཅིང་ཞི་བ་དང ། ཞི་གནས་དམ་པའི་ཕ་རོལ་ཏུ་ཕྱིན་པའོ། །དེ་དང ། དེ་དག་ནི་བཟོད་པའི་སྟོབས་དང་ལྡན་ཞིང་པར་འཛིན་པ་དང ། ང་ཡིར་འཛིན་པ་དང་བྲལ་བའོ། །དེ་དང ། དེ་དག་ནི་བརྩོན་འགྲུས་ཆེ་ཞིང་བསྐལ་པ་གྲངས་མེད་པར་ཚོགས་མུ་མེད་པའི་མཐར་གཏུགས་པའོ། །དེ་དང ། དེ་དག་ནི་བསམ་གཏན་ཕུན་སུམ་ཚོགས་ཤིང་དྲན་པ་དང་ལྡན་ཞིང་སེམས་རྩེ་གཅིག་པའོ། །དེ་དང ། དེ་དག་ནི་ཤེས་རབ་ཆེན་པོ་ཆོས་ཐམས་ཅད་ཀྱི་ཚིག་རབ་ཏུ་དབྱེ་བའི་ཡེ་ཤེས་སྟོན་པ་ལ་མཁས་པའོ།། དེ་དང ། དེ་དག་ནི་བསོད་ནམས་ཆེན་པོ་སྟེ། བསོད་ནམས་བརྒྱ་པའི་མཚན་གྱིས་ལེགས་པར་བརྒྱན་པའོ། །དེ་དང ། དེ་དག་ནི་གཟི་བརྗིད་ཆེན་པོ་སྟེ། ཉི་མ་དང ། ཟླ་བ་ཟིལ་གྱིས་གནོན་པར་བྱེད་པ་ཐོབ་པའོ། །དེ་དང ། དེ་དག་ནི་མཐུ་ཆེན་པོ་ཐོབ་ཅིང་སྟོབས་བཅུའི་ཤུགས་འཛིན་པའོ། །དེ་དང ། དེ་དག་ནི་སྤྲིན་ཆེན་པོ་ལྟར་ཡྖོས་མངོན་པར་སྒྲོག་པའོ། །དེ་དང ། དེ་དག་ནི་ཆོས་ཀྱི་ཆར་ཆེན་ 133a ༄#། །པོ་རབ་ཏུ་འབེབས་པ། ཉོན་མོངས་པ་ཐམས་ཅད་རབ་ཏུ་ཞི་བར་བྱེད་པའོ། །དེ་དང ། དེ་དག་ནི་གནས་ཏེ་མྱ་ངན་ལས་འདས་པའི་གྲོང་དུ་ཞུགས་པའོ། །དེ་དང ། དེ་དག་ནི་འཁོར་བའི་འཇིགས་པས་གཙེས་པ་རྣམས་ཀྱི་མགོན་ནོ། །དེ་དང ། དེ་དག་ནི་སྒྲོན་མ་སྟེ་མུན་པ་མུན་ནག་དང་བྲལ་བའོ། །དེ་དང ། དེ་དག་ནི་བདུད་ཀྱིས་སྐྲག་པ་རྣམས་ཀྱི་སྐྱབས་སོ། །དེ་དང ། དེ་དག་ནི་སེམས་ཅན་ཐམས་ཅད་ཀྱི་རྟེན་ཏོ། །དེ་དང ། དེ་དག་ནི་བྱང་ཆུབ་ཀྱི་སྙིང་པོ་ལ་དབང་བསྐུར་པའོ། །དེ་དང ། དེ་དག་ནི་ཆོས་ཀྱི་མིག་ཐོབ་བོ། །དེ་དག་གིས་ཆོས་ཀྱི་དེ་བཞིན་ཉིད་མཐོང་ངོ ། །དེ་དག་གིས་ཆོས་ཐམས་ཅད་སྟོང་པར་ཤེས་སོ། །དེ་དག་ནི་སྙིང་རྗེ་ཆེན་པོ་ལ་རབ་ཏུ་གནས་པའོ། །དེ་དག་ནི་བྱམས་པ་ཆེན་པོ་ལ་ཡང་དག་པར་ཞུགས་པའོ། །དེ་དག་ནི་སེམས་ཅན་ཐམས་ཅད་མི་གཏོང་བའོ། །དེ་དག་ནི་ཐེག་པ་དམན་པ་ལ་རྒྱབ་ཀྱིས་བལྟས་པའོ། །དེ་དག་ནི་ཐེག་པ་ཆེན་པོ་ལ་མངོན་དུ་ཕྱོགས་པའོ། །དེ་དག་གིས་ནི་ཕྱིན་ཅི་ལོག་སྤངས་སོ། །དེ་དག་ནི་མཉམ་པ་ཉིད་ལ་ཉེ་བའོ། །དེ་དག་ནི་བྱང་ཆུབ་སེམས་དཔའི་ངེས་པ་ལ་ཞུགས་པའོ། །དེ་དག་ནི་བྱང་ཆུབ་ཀྱི་སྙིང་པོ་ལ་གནས་པའོ། །དེ་དག་གིས་བདུད་ཀྱི་སྡེ་རྣམས་བཏུལ་ལོ། །དེ་དག་གིས་ཐམས་ཅད་མཁྱེན་པ་ཉིད་ཁོང་དུ་ཆུད་དོ། །དེ་དག་ནི་ཆོས་ཀྱི་འཁོར་ལོ་རབ་ཏུ་བསྐོར་བར་འགྱུར་བའོ། །དེ་དག་ནི་སངས་རྒྱས་ཀྱི་བྱ་བ་བྱེད་པར་འགྱུར་རོ། ། 133b གྲོགས་པོ་དག་།གང་ཆོས་འདི་ལ་ནན་ཏན་དུ་བྱེད་པའི་སྐྱེས་བུ་དམ་པ་དེ་དག་གིས་བསྔགས་པ་ངས་བསྐལ་པའམ། བསྐལ་པ་ལས་འདས་པར་བཤད་ཀྱང་ཆོས་འདི་ལ་ནན་ཏན་བྱེད་པའི་སྐྱེས་བུ་དམ་པ་དེ་དག་གི་བསྔགས་པའི་མཐར་མི་ཕྱིན་ཏེ། དེ་བཞིན་གཤེགས་པ་ལྟར་སྤོབས་པ་ཕུན་སུམ་ཚོགས་པར་འགྱུར་རོ། །དེ་ནས་འཁོར་དེ་ཉིད་དུ་ལྷའི་བུ་ཕྱིར་མི་ལྡོག་པ་ཞེས་བྱ་བ་འདུས་པར་གྱུར་ཏེ་འདུག་གོ་།དེ་ནས་བཅོམ་ལྡན་འདས་ལ་ལྷའི་བུ་ཕྱིར་མི་ལྡོག་པས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་ནན་ཏན་ཆོས་ཀྱི་ནན་ཏན་ཞེས་བགྱི་བ།་བཅོམ་ལྡན་འདས། ཇི་ཙམ་གྱིས་ན་ཆོས་ཀྱི་ནན་ཏན་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ། ཆོས་ཀྱི་ནན་ཏན་ཞེས་བྱ་བ་ནི་གང་ཆོས་ཐམས་ཅད་ལ་ནན་ཏན་མེད་པ་འདི་ནི་ཆོས་ཀྱི་ནན་ཏན་ནོ། །དེ་ཅིའི་ཕྱིར་ཞེ་ན། གང་ཆོས་རྣམས་ལ་ནན་ཏན་དུ་མི་བྱེད་དེ། དེ་ཆོས་ཐམས་ཅད་མི་བྱེད། རྣམ་པར་མི་བྱེད་དོ། །གང་མི་བྱེད། རྣམ་པར་མི་བྱེད་པ་འདི་ནི་ཆོས་ཀྱི་ནན་ཏན་ནོ། །གང་དགེ་བ་ལའང་མི་འཇུག་།མི་དགེ་བ་ལའང་མི་འཇུག་པ་འདི་ནི་ཆོས་ཀྱི་ནན་ཏན་ནོ། །དེ་བཞིན་དུ་བསྡུས་ཏེ། འཇིག་རྟེན་པ་ལའང་མ་ཡིན། འཇིག་རྟེན་ལས་འདས་པ་ལ་མ་ཡིན། ཟག་པ་དང་བཅས་པ་ལ་མ་ཡིན། ཟག་པ་མེད་པ་ལ་མ་ཡིན། ཁ་ན་མ་ཐོ་བ་དང་བཅས་པ་ལ་མ་ཡིན། ཁ་ན་མ་ཐོ་བ་མེད་པ་ལ་མ་ཡིན། འདུས་བྱས་ལ་མ་ཡིན། 134a ༄#། །འདུས་མ་བྱས་ལ་མ་ཡིན། འཁོར་བ་ལ་མ་ཡིན། མྱ་ངན་ལས་འདས་པ་ལ་མི་འཇུག་པ་འདི་ནི་ཆོས་ཀྱི་ནན་ཏན་ཞེས་བྱ་སྟེ། ཆོས་ཐམས་ཅད་ལ་ནན་ཏན་དུ་བྱ་བ་མེད་པ་འདི་ནི་ཆོས་ཀྱི་ནན་ཏན་ནོ། །ཆོས་སུ་འདུ་ཤེས་པ་ལ་ཆོས་ཀྱི་ནན་ཏན་མེད་དེ། ཆོས་འདི་ལ་ནན་ཏན་བྱའོ་ཞེས་སྤྲོ་བར་བྱེད། ནན་ཏན་དུ་མི་བྱའོ་ཞེས་སྤྲོ་བར་བྱེད་ན་མ་ཞུགས་པའོ། །ཆོས་ཐམས་ཅད་ཀྱི་རྗེས་སུ་ཞུགས་པའི་ནན་ཏན་འདི་ནི་ཆོས་ཀྱི་ནན་ཏན་ནོ། །སྤྲོས་པ་མེད་པས་གཉེན་པོ་མེད་པ་འདི་ནི་ཆོས་ཀྱི་ནན་ཏན་ཞེས་བྱའོ། །དེ་ནས་བཅོམ་ལྡན་འདས་ལ་ལྷའི་བུ་ཕྱིར་མི་ལྡོག་པས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་ཡང་དག་པའི་ནན་ཏན་འདི་ལ་ཞུགས་པ་དང ། འཇུག་པར་འགྱུར་བ་དེ་དག་ལ་ཤིན་ཏུ་ལོག་པའི་ནན་ཏན་མ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཤིན་ཏུ་ཡང་དག་པའི་ནན་ཏན་འདི་ལགས་ཏེ། ལོག་པའི་ལམ་དུ་ཞུགས་པ་རྣམས་ལ་ནན་ཏན་གང་ཡང་མ་མཆིས་སོ། །ཡང་དག་པའི་ལམ་ལ་གནས་པ་རྣམས་ལ་ཆོས་ཀྱི་ནན་ཏན་མ་མཆིས་སོ། །ཡང་དག་པར་ཞུགས་པ་རྣམས་ལ་ནི་མི་མཉམ་པའི་ཆོས་གང་ཡང་མ་མཆིས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཆོས་ཐམས་ཅད་ནི་མཉམ་པ་ཁྱད་པར་མ་མཆིས་བའོ། །དེ་ནས་ཚངས་པ་ཁྱད་པར་སེམས་ཀྱིས་ལྷའི་བུ་དེ་ལ་འདི་སྐད་ཅེས་སྨྲས་སོ། །ལྷའི་བུ་ 134b ཁྱོད།་ནན་ཏན་འདི་ལ་ཞུགས་སམ། སྨྲས་པ། ཚངས་པ། གལ་ཏེ་བཅོམ་ལྡན་འདས་ཀྱིས་ནན་ཏན་ལ་གཉིས་སུ་བཤད་པར་གྱུར་ན་བདག་ཀྱང་ནན་ཏན་འདི་ལ་ནན་ཏན་དུ་བྱེད་དོ། །ནན་ཏན་ནི་གཉིས་སུ་མེད་པ་སྟེ། དེ་ལ་གང་ནན་ཏན་བྱེད་པ་དང ། གང་ལ་ནན་ཏན་བྱེད་པ་དེའང་མེད་དོ། །གང་ཡང་ནན་ཏན་དུ་བྱེད་པར་མེད་དོ། །འོན་ཀྱང ། ཚངས་པ། བདག་ནི་ལྷག་པར་མི་བྱེད་པ་དང ། སྒྲོ་མི་འདོགས་པའི་ཕྱིར་ནན་ཏན་འདི་ལ་ཞུགས་སོ། །ཆོས་ཉིད་ཇི་ལྟ་བར་ཆོས་ཀྱི་ནན་ཏན་ཡང་དེ་བཞིན་ཏེ། དེ་ནི་དེ་བཞིན་ཉིད་ལ་དེ་ལྟར་ཞུགས་པ་ཞེས་བྱའོ། །ཚངས་པས་སྨྲས་པ།་ལྷའི་བུ་ཁྱོད། སངས་རྒྱས་ཀྱི་ཞིང་འདི་ན་སྔོན་ངས་མ་མཐོང་ངོ ། །སྨྲས་པ། ཚངས་པ། སངས་རྒྱས་ཀྱི་ཞིང་འདིས་ཀྱང་སྔོན་བདག་མ་མཐོང་ངོ ། །སྨྲས་པ། སངས་རྒྱས་ཀྱི་ཞིང་འདི་ནི་བལྟའོ་ཞེའམ། མི་ལྟའོ་ཞེས་རྟོག་པའམ། རྣམ་པར་རྟོག་པ་མེད་དོ། །སྨྲས་པ། ཚངས་པ། བདག་སྔོན་མཐོང་ངོ་ཞེའམ། སྔོན་མ་མཐོང་ངོ་ཞེས་བདག་ཀྱང་མི་རྟོག་རྣམ་པར་མི་རྟོག་གོ། སྨྲས་པ།་ལྷའི་བུ། སྔོན་མ་མཐོང་བ་མཐོང་བ་སུ། སྨྲས་པ། བྱིས་པ་སོ་སོའི་སྐྱེ་བོ་ཐམས་ཅད་ཀྱིས་ནི་འཕགས་པའི་ངེས་པར་འཇུག་པ་སྔོན་མ་མཐོང་ངོ ། །ཚངས་པ། ནམ་ཡང་དག་པར་ངེས་པར་ཞུགས་པ་དེ་ནི་སྔོན་མ་མཐོང་བ་མཐོང་ངོ ། །ངེས་པ་དེ་ནི་མིག་གི་རྣམ་པར་ཤེས་པས་ཤེས་པ་མ་ཡིན། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱི་རྣམ་པར་ཤེས་པས་ 135a ༄#། །ཤེས་པར་བྱ་བ་མ་ཡིན་ཏེ། དེ་བཞིན་ཉིད་ཇི་ལྟ་བ་དེ་བཞིན་དུ་བལྟ་བར་བྱའོ། །མིག་གི་དེ་བཞིན་ཉིད་ཇི་ལྟ་བ་དང ། རྣ་བའི་དེ་བཞིན་ཉིད་ཇི་ལྟ་བ་དང ། སྣའི་དེ་བཞིན་ཉིད་ཇི་ལྟ་བ་དང ། ལྕེའི་དེ་བཞིན་ཉིད་ཇི་ལྟ་བ་དང ། ལུས་ཀྱི་དེ་བཞིན་ཉིད་ཇི་ལྟ་བ་དང ། ཡིད་ཀྱི་དེ་བཞིན་ཉིད་ཇི་ལྟ་བ་དེ་བཞིན་དུ་བལྟ་སྟེ།་གང་དེ་ལྟར་མཐོང་བ་དེ་དག་ནི་ཡང་དག་པར་མཐོང་བའོ། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། དེད་དཔོན་ནོར་བུ་རིན་པོ་ཆེའི་གླིང་དུ་ཕྱིན་པའི་མིག་སྔར་ནི་ནོར་བུ་རིན་པོ་ཆེ་འབའ་ཞིག་གདའོ། །དེ་བཞིན་དུ། བཅོམ་ལྡན་འདས། སྐྱེས་བུ་དམ་པ་བསམ་གྱིས་མི་ཁྱབ་པའི་ཆོས་རིན་པོ་ཆེ་དང་ལྡན་པ་རྣམས་ཅི་དང ། ཅི་སྤོབས་པ་དེ་དག་གིས་དེ་ཐམས་ཅད་ཆོས་རིན་པོ་ཆེ་ཉིད་དུ་སྤོབས་སོ། །དེ་ཉིད་ཡང་དག་པའི་མཐའ་ཡོངས་སུ་གསལ་བར་བགྱིད་པར་སྤོབས་སོ། །འདི་ལྟར་དེ་དག་ལ་བདག་ལ་བདག་ཏུ་མངོན་པར་ཆགས་པ་མ་མཆིས། ཆོས་སུ་མངོན་པར་ཆགས་པ་མ་མཆིས། སེམས་ཅན་དུ་མངོན་པར་ཆགས་པ་མ་མཆིས་པའི་སླད་དུའོ། །དེའི་སླད་དུ་ཇི་ལྟར་མི་ལོག་པ་དང ། ཕྱིན་ཅི་མ་ལོག་པར་སྤོབས་པ་དེ་དེ་ལྟར་སྤོབས་སོ། །ཇི་ལྟར་སྔོན་གྱི་མཐའ་ཡང་སྤྱོད་པ་དང ། ཕྱི་མའི་མཐའ་ཡང་མི་དམིགས་པ་དང ། ད་ལྟར་བྱུང་བ་ལའང་དེ་ལྟ་བ་མ་མཆིས་པ་དེ་ལྟར་སྤོབས་སོ། །ཇི་ལྟར་མ་མོས་ 135b པ་རྣམས་ཀྱང་མོས་པར་བགྱིད་ལ། མོས་པ་རྣམས་ཀྱང་རྣམ་པར་འགྲོལ་བ་དེ་དེ་ལྟར་སྤོབས་སོ། །མངོན་པའི་ང་རྒྱལ་ཅན་རྣམས་ཀྱང་ཚར་བཅད་པར་འགྱུར་ལ། ང་རྒྱལ་མ་མཆིས་པ་ཀུན་འཚལ་བ་ལན་ལྡོན་པ་དེ་ལྟར་སྤོབས་སོ། །ཇི་ལྟར་བདུད་ཀྱིས་གླགས་མི་རྙེད་པ་དེ་ལྟར་སྤོབས་སོ། །གང་དེ་ལྟར་ཉན་པ་དེ་དག་ཀྱང་བདུད་ཀྱི་ལས་ལས་འདས་པར་འགྱུར་རོ། །ཇི་ལྟར་དགེ་བའི་རྩ་བ་མ་བསྐྱེད་པ་རྣམས་བསྐྱེད་པ་དང ། དགེ་བའི་རྩ་བ་སྐྱེས་པ་རྣམས་འཆབ་མི་འཚལ་བ་དང ། ཉོན་མོངས་པ་སྐྱེས་པ་རྣམས་སྤོང་བ་དང ། མ་སྐྱེས་པ་རྣམས་མི་སྐྱེད་པ་དེ་ལྟར་སྤོབས་སོ། །ཇི་ལྟར་བྱང་ཆུབ་སེམས་དཔའ་གོ་ཆ་མ་བགོས་པ་རྣམས་གོ་ཆ་འཚལ་བ་དང ། གོ་ཆ་བགོས་པ་རྣམས་མི་ལྡོག་པར་འགྱུར་བ་དེ་ལྟར་སྤོབས་སོ། །ཇི་ལྟར་དམ་པའི་ཆོས་མི་འཆང་ཅིང་དམ་པའི་ཆོས་ཡོངས་སུ་གཟུང་བར་བགྱིད་པ་དེ་ལྟར་སྤོབས་སོ། །ཇི་ལྟར་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་བ་དེ་ལྟར་སྤོབས་སོ། །བཅོམ་ལྡན་འདས། དེ་ལྟ་བུའི་སྤོབས་པས་ནི་མུ་སྟེགས་ཀྱི་གནས་ཐམས་ཅད་གཞོམ་པར་ནུས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས། ཝ་ནི་སེང་གེའི་སྒྲ་བཟོད་པར་ཡང་མི་ནུས་ན་རབ་ཏུ་སྒྲོག་པར་ལྟ་ག་ལ་ནུས་ཏེ། བཅོམ་ལྡན་འདས། དེ་བཞིན་དུ་ཕ་རོལ་རྒོལ་བ་ཐམས་ཅད་ཀྱིས་བླ་ན་མེད་པ་སེང་གེའི་སྒྲ་བཟོད་པར་མ་ནུས་སོ། །དེ་ནས་ལྷའི་བུ་ཕྱིར་མི་ལྡོག་པས་ལྷའི་དབང་པོ་བརྒྱ་བྱིན་ལ་འདི་སྐད་ཅེས་ 136a ༄#། །སྨྲས་སོ། །ཀཽ་ཤི་ཀ། སེང་གེའི་སྒྲ་སེང་གེའི་སྒྲ་ཞེས་བྱ་བ་ཇི་ཙམ་གྱིས་ན་སེང་གེའི་སྒྲ་ཞེས་བྱ། སྨྲས་པ། ལྷའི་བུ། ཆོས་གང་ལའང་མངོན་པར་མ་ཆགས་པར་བརྗོད་པ་དེ་དག་སེང་གེའི་སྒྲ་ཡིན་ནོ། །གང་དེ་ལྟ་བུ་ལ་མངོན་པར་ཆགས་པར་བརྗོད་པ་དེ་དག་ནི་སེང་གེའི་སྒྲ་མ་ཡིན་ཏེ་ཝའི་སྒྲའོ། །གང་ལྟ་བ་ཀུན་ཏུ་སློང་བ་སྟོན་པ་དེ་དག་ལ་སེང་གེའི་སྒྲ་མེད་དོ། །ལྷའི་དབང་པོ་བརྒྱ་བྱིན་གྱིས་སྨྲས་པ། ལྷའི་བུ་ཁྱོད་སེང་གེའི་སྒྲ་ཇི་ལྟ་བུ་ཡིན་པ་སྤོབས་པར་གྱིས་ཤིག་།སྨྲས་པ། ཀཽ་ཤི་ཀ། གང་དེ་བཞིན་གཤེགས་པ་ལའང་མངོན་པར་མ་ཆགས་པར་སྟོན་ན་ཆོས་ངན་པ་གཞན་ལྟ་ཅི་སྨོས་ཏེ། དེའི་ཕྱིར་སེང་གེའི་སྒྲ་ཞེས་བྱའོ། །ཡང་དག་པའི་ནན་ཏན་ནི་སེང་གེའི་སྒྲ་སྟེ། དེའི་ཕྱིར་སེང་གེའི་སྒྲ་ཞེས་བྱའོ། །འདི་ནི་མགོ་གཅིག་ཏུ་བསྟན་པ་ཡིན་ཏེ། དེའི་ཕྱིར་སེང་གེའི་སྒྲ་ཞེས་བྱའོ། །འདི་ནི་མི་སྐྲག་པར་བསྟན་པ་སྟེ། དེའི་ཕྱིར་སེང་གེའི་སྒྲ་ཞེས་བྱའོ། །ཀཽ་ཤི་ཀ། གང་ཆོས་ཐམས་ཅད་མི་སྐྱེ་བ་དང ། མི་འགོག་པ་དང ། མི་འཐོབ་པར་སྒོམ་པའི་ཕྱིར་ཆོས་བསྟན་པ་དེ་དག་ནི་སེང་གེའི་སྒྲ་ཡིན་ཏེ། གང་ཀུན་ནས་ཉོན་མོངས་པ་དང ། རྣམ་པར་བྱང་བ་དང ། ཀུན་ཏུ་སྦྱོར་བ་དང ། འབྲལ་བར་བྱ་བའི་ཕྱིར་ཆོས་སྟོན་བ་དེ་དག་ལ་སེང་གེའི་སྒྲ་མེད་དོ། །ཀཽ་ཤི་ཀ། སེང་གེའི་སྒྲ་ཞེས་བྱ་བ་འདི་ལྟ་སྟེ། མགོ་གཅིག་ཏུ་བསྟན་པ། ཆོས་ཐམས་ཅད་གང་ཟག་མེད་པ། བདག་མེད་ 136b པ་ཡིན་ནོ། །ཀཽ་ཤི་ཀ་།སེང་གེའི་སྒྲ་སེང་གེའི་སྒྲ་ཞེས་བྱ་བ་ནི་འདི་ལྟ་སྟེ། མགོ་གཅིག་ཏུ་ཆོས་ཐམས་ཅད་སྟོང་པ་ཉིད་དང ། མཚན་མ་མེད་པ་དང ། སྨོན་པ་མེད་པ་ཡོངས་སུ་རྟོགས་པ་ནི་སེང་གེའི་སྒྲའོ། །དམ་པའི་ཆོས་བསྲུང་བའི་ཕྱིར་ཚིག་སྨྲ་བ་ནི་སེང་གེའི་སྒྲའོ། །འདི་ལྟ་སྟེ། སེམས་ཅན་ཐམས་ཅད་རབ་ཏུ་ཐར་བར་བྱ་བའི་ཕྱིར་སངས་རྒྱས་སུ་གྱུར་ཅིག་ཅེས་བྱང་ཆུབ་ཏུ་སེམས་བསྐྱེད་པའི་ཚིག་སྨྲ་བ་ནི་སེང་གེའི་སྒྲའོ། །ལོངས་སྤྱོད་རུང་བ་ལ་ཆོག་ཤེས་པར་སྨྲ་བ་ནི་སེང་གེའི་སྒྲའོ། །ཀཽ་ཤི་ཀ། སེང་གེའི་སྒྲ་ཞེས་བྱ་བ་ནི་འདི་ལྟ་སྟེ། དགོན་པར་གནས་པ་དང ། ཡང་དག་པར་ལེན་པ་དང ། གཏོང་བ་སྔོན་དུ་འགྲོ་བ་ནི་སེང་གེའི་སྒྲའོ། །ཚུལ་ཁྲིམས་ཡང་དག་པར་བླངས་པ་མི་འདོར་བ་ནི་སེང་གེའི་སྒྲའོ། །མཛའ་བ་དང ། མི་མཛའ་བ་ལ་སེམས་མཉམ་པ་ནི་སེང་གེའི་སྒྲའོ། །བརྩོན་པ་མི་འདོར་བ་ནི་སེང་གེའི་སྒྲའོ། །ཉོན་མོངས་པ་སྤོང་བ་ནི་སེང་གེའི་སྒྲའོ། །ཤེས་རབ་ཀྱིས་ཤིན་ཏུ་བརྟགས་པ་ནི་སེང་གེའི་སྒྲའོ། །སེང་གེའི་སྒྲ་བསྟན་པ་འདི་བཤད་པའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རྣམ་པ་དྲུག་ཏུ་གཡོས་སོ། །སིལ་སྙན་བརྒྱ་སྟོང་དུ་མ་མ་བརྡུང་བར་སྒྲ་འབྱིན་ཏེ། །འཇིག་རྟེན་རྣམས་སྣང་བ་ཆེན་པོས་ཁྱབ་པར་གྱུར་ཏོ། །ལྷའི་བུ་བརྒྱ་སྟོང་ཨ་ལ་ལ་ཞེས་སྒྲ་འབྱིན་ཅིང་ཚིག་འདི་སྐད་ཅེས་སྨྲས་སོ། །ེ་མའོ། །དེང་འདིར་ལྷའི་བུས་སེང་གེའི་སྒྲ་འདི་བསྒྲགས་པས་ཛམྦུ་གླིང་དུ་ཆོས་ཀྱི་འཁོར་ལོ་ 137a ༄#། །བསྐོར་བ་ལན་གཉིས་བྱུང་ངོ ། །དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་པ་དང ། ཆོས་ཉིད་ཀྱིས་འདི་ལྟར་འགྱུར་ཏེ། ནམ་སངས་རྒྱས་བཅོམ་ལྡན་འདས་འཛུམ་པར་མཛད་པ་དེའི་ཚེ་འོད་ཟེར་ཁ་དོག་སྣ་ཚོགས་འདི་ལྟ་སྟེ། མཐིང་ཀ་དང ། སེར་པོ་དང ། དམར་པོ་དང ། དཀར་པོ་དང ། ལེབ་རྒན་དང ། ཤེལ་དང ། དངུལ་གྱི་ཁ་དོག་ལྟ་བུ་ཞལ་ནས་བྱུང་སྟེ། འཇིག་རྟེན་གྱི་ཁམས་མཐའ་ཡས་པ་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་མངོན་པར་འཕགས་ཏེ་ཕྱིར་ལོག་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་སྤྱི་བོར་མི་སྣང་བར་གྱུར་ཏོ།། །།བམ་པོ་དྲུག་པ་སྟེ་ཐ་མ། དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཡེ་ཤེས་ཀུན་མཆོག་ཕ་རོལ་ཕྱིན་ཅིང་ཐུབ་པ་ཀུན་མཁྱེན་ཀུན་ཟིལ་ནོན། །འདི་ལ་དུས་གསུམ་སེམས་ཅན་སྤྱོད་པ་སྣ་ཚོགས་ཅི་མཆིས་ཁྱོད་ཀྱིས་མཁྱེན། །གང་དེ་ཤིན་ཏུ་གྲོལ་བའི་བློ་ཡུལ་གང་ཡང་དེ་དག་བསམ་པ་རྣམས། །ལྷ་ཡི་གཙོ་བོ་ཀུན་མཁྱེན་འཛུམ་མཛད་འདི་ཡི་རྒྱུ་ནི་ལུང་བསྟན་གསོལ། །ཉན་ཐོས་རང་རྒྱལ་དགྲ་བཅོམ་དྲི་མེད་དེ་དག་གིས་ཀྱང་སྤྱོད་ཡུལ་མིན། །སངས་རྒྱས་ཡེ་ཤེས་བསམ་མི་ཁྱབ་ཅིང་མཐའ་བྲལ་ཁྱོད་ལ་ཆགས་པ་མེད། །ཁྱོད་ཀྱིས་སེམས་ཅན་སྤྱོད་པ་སེམས་ཅན་གང་ལ་ 137b ཅི་འདྲའི་གཏམ་བརྗོད་མཁྱེན། །སྨྲ་མཆོག་ཐུབ་དཀའ་ཚིག་དབང་འཛུམ་པ་མཛད་པའི་རྒྱུ་ནི་བསྟན་པར་གསོལ། །འོད་འདི་ཤིན་ཏུ་ཡིད་འོང་སྡུག་པ་དྲི་མེད་རབ་ཏུ་རྣམ་པར་མཛེས། །ཉི་ཟླའི་འོད་དང་དེ་བཞིན་ཚངས་པ་དབང་པོའི་གཟི་ཡང་ཟིལ་གྱིས་གནོན། །དེ་བཞིན་ཁོར་ཡུག་ཁྲག་ཁྲིག་རི་རབ་དག་ཀྱང་ཤིན་ཏུ་སྣང་བགྱིས་ན། །ཅི་སླད་ཁྱོད་ཀྱིས་འཛུམ་མཛད་དེ་ཡི་རྒྱུ་ནི་རབ་ཏུ་བསྟན་པར་གསོལ། །འདོད་ཆགས་ཞེ་སྡང་དྲེགས་ལ་སོགས་པ་ཟུག་རྡུ་བྲལ་ཞིང་རབ་ཏུ་ཞི། །འཇིག་རྟེན་ལྷ་མི་ལྟོ་འཕྱེའི་ཚོགས་རྣམས་བྱམས་པས་བདག་པོ་ཁྱོད་ཞལ་ལྟ། །བདེ་གཤེགས་བལྟས་ཀྱང་མི་ངོམས་ལུས་ནི་རབ་ཏུ་སིམ་ཞིང་བདེ་བར་འགྱུར། །གང་གི་སླད་དུ་འཛུམ་པ་འདི་བསྟན་ཐུབ་པ་བདག་ཅག་རྣམས་ལ་གསུངས། །ཁྱོད་ཀྱིས་ཆོས་རྣམས་ནམ་མཁའ་ལྟ་བུར་རྟག་ཏུ་བྱེད་མེད་གསོག་ཉིད་དང ། །གློག་དང་སྤྲིན་འདྲ་སྒྱུ་མ་ལྟ་བུར་གསོབ་ཉིད་དབུ་བ་ལྟ་བུ་དང ། །རྨི་ལམ་མཐོང་དང་ཆད་པ་སྟོང་འདྲ་ནམ་མཁའ་ཆུ་ཟླ་ལྟ་བུར་མཁྱེན། །དགེ་བ་འཛུམ་མཛད་འདི་རྒྱུ་རྣར་སྙན་གསུང་ནི་རབ་ཏུ་བརྗོད་པར་མཛོད། །འཛིན་དང་རྟོག་དང་རྣམ་རྟོག་ཀུན་དང་བྲལ་བས་སྟོང་པ་ཉིད་ལ་མོས། །བདག་པོ་ཤེས་བྱ་ཀུན་ལ་རྟོག་བྲལ་རྟག་ཏུ་མཚན་མ་མེད་ལ་དགྱེས། །ཁྱོད་ནི་སྲིད་པ་གསུམ་འདིར་གང་ལའང་མི་སྨོན་བསམ་གཏན་ཏིང་འཛིན་དགྱེས། །གང་གི་སླད་དུ་འཛུམ་པ་བསྟན་མཛད་འདྲེན་པ་འདི་ནི་ལུང་བསྟན་གསོལ། །སྐད་ལ་མི་ཆགས་སྒྲ་དང་དབྱངས་ 138a ༄#། །དང་ཡི་གེ་དག་ལའང་དེ་བཞིན་ཏེ། །འཇིག་རྟེན་དུ་ཡང་ཆོས་སྟོན་བློ་གཙང་བདག་དང་ཆོས་ལའང་གནས་མི་མཛད། །འདུས་པ་སོ་སོར་བདེ་གཤེགས་བདག་ལ་ཐ་དད་ཆོས་སྟོན་སྙམ་དུ་འཛིན། །ཡེ་ཤེས་རྫུ་འཕྲུལ་དབང་པོ་སྟོབས་མཆོག་རྒྱས་པ་ཤེས་རབ་མཚུངས་མེད་གསུངས། །ཁྱོད་ནི་སྡུག་བསྔལ་ཀུན་སེལ་ན་རྒ་འཆི་འཇོམས་སྨན་པའི་མཆོག་ལགས་ཏེ། །ཁྱོད་ནི་དཔའ་བོ་བདུད་ཀྱི་སྟོབས་འཇོམས་མཐུ་བོ་ཆེ་ཡི་མཐུ་དང་ལྡན། །ཁྱོད་ནི་སྐྱོབ་པས་དཔུང་གཉེན་འཇིག་རྟེན་མགོན་སྐྱབས་སྒྲོན་མ་སྣང་མཛད་པ། །ལྷ་མིན་ལྷ་དང་ཀླུས་མཆོད་འཛུམ་པ་མཛད་པའི་རྒྱུ་གང་འདིར་བསྟན་གསོལ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚངས་པ་ཁྱད་པར་སེམས་ལ་འདི་སྐད་ཅེས་བཀའ་སྩལ་ཏོ། ། ཚངས་པ། ཁྱོད་ཀྱིས་ཕྱིར་མི་ལྡོག་པའི་ལྷའི་བུ་འདི་མཐོང་ངམ། གསོལ་པ། བཅོམ་ལྡན་འདས། མཐོང་ངོ ། །བཅོམ་ལྡན་འདས་ཀྱིས་བཀའ་སྩལ་པ། ཚངས་པ། ཕྱིར་མི་ལྡོག་པ་ལྷའི་བུ་འདིས་བསྐལ་པ་བརྒྱ་སྟོང་ཕྲག་སུམ་ཅུ་རྩ་གཉིས་ན་འཇིག་རྟེན་གྱི་ཁམས་ལེགས་པར་སྤྲུལ་པ་ཞེས་བྱ་བར་བསྐལ་པ་ཚངས་པས་བསྟོད་པ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང ། ཞབས་སུ་ལྡན་པ། བདེ་བར་གཤེགས་ 138b པ།་འཇིག་རྟེན་མཁྱེན་པ། བླ་ན་མེད་པ། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང ། མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རི་རབ་སྒྲོན་མའི་རྒྱལ་པོ་ཞེས་བྱ་བ་འཇིག་རྟེན་དུ་འབྱུང་པར་འགྱུར་ཏེ། དེའི་སངས་རྒྱས་ཀྱི་ཞིང་དེའང་བཻ་ཌཱུརྱ་དང ། ཛམྦུ་ཆུ་བོའི་གསེར་དང ། རིན་པོ་ཆེ་གཉིས་ཀྱི་གཞིར་འགྱུར་རོ། །དེའི་བྱང་ཆུབ་སེམས་དཔའ་དགེ་འདུན་འབའ་ཞིག་འབྱུང་སྟེ།་བདུད་དང ། ཕྱིར་རྒོལ་བ་བཅོམ་ཞིང་དཔའ་བོ་ཤ་སྟག་གོ། སངས་རྒྱས་ཀྱི་ཞིང་དེ་ན་བཟའ་བ་དང ། བཏུང་བའང་བསམ་པ་ཙམ་གྱིས་འབྱོར་ཅིང་དགའ་ལྡན་གྱི་ལོངས་སྤྱོད་དང་འདྲ་བར་འགྱུར་རོ། །དེ་བཞིན་གཤེགས་པ་དེ་ཚེ་དཔག་ཏུ་མེད་ཅིང་ལྟུང་བ་མེད་པའི་ཆོས་སྟོན་པར་འགྱུར། ཁྱད་པར་སེམས་ཀྱིས་སྨྲས་པ། ལྷའི་བུ། ཁྱོད་དེ་བཞིན་གཤེགས་པས་ལུང་བསྟན་ཏོ། །སྨྲས་པ། ཚངས་པ། བདག་ནི་དེ་བཞིན་ཉིད་དང ། ཆོས་ཀྱི་དབྱིངས་ཇི་ལྟ་བ་བཞིན་དུ་ལུང་བསྟན་ཏོ། །སྨྲས་པ། ལྷའི་བུ། དེ་བཞིན་ཉིད་དང ། ཆོས་ཀྱི་དབྱིངས་ནི་ལུང་མི་བསྟན་ཏོ། །སྨྲས་པ།་ཇི་ལྟར་དེ་བཞིན་ཉིད་དང ། ཆོས་ཀྱི་དབྱིངས་ལུང་མི་བསྟན་པ་བཞིན་དུ་བྱང་ཆུབ་སེམས་དཔའ་ཐམས་ཅད་ལ་ལུང་བསྟན་པའང་དེ་ལྟར་བལྟའོ། །སྨྲས་པ། ལྷའི་བུ། དེའང་ང་ཁྱོད་དེ་ལྟར་དེ་བཞིན་གཤེགས་པས་ལུང་བསྟན་པས་ན་ཁྱོད་སྔོན་གྱི་ཡང་དག་པར་རྫོགས་པའི་སངས་རྒྱས་རྣམས་ཀྱི་དྲུང་དུ་ཚངས་པར་སྤྱད་པ་ལ་གནས་པ་ནི་དོན་མེད་པ་མ་ཡིན་ནོ། །སྨྲས་པ། ཚངས་ 139a ༄#། །པ།་གང་གནས་མེད་པ་དེ་ནི་ཚངས་པར་སྤྱོད་པ་ལ་གནས་པའོ། །སྨྲས་པ། ལྷའི་བུ། དེ་ལྟར་གང་ལ་གནས་པ་མེད་པ་དེ་ནི་ཚངས་པར་སྤྱོད་པ་ལ་གནས་པ་ཡིན། སྨྲས་པ།་ཚངས་པ། གང་ཁམས་གསུམ་ལ་མི་གནས་པ་དེ་ནི་ཚངས་པར་སྤྱོད་པ་ལ་གནས་སོ། །ཚངས་པ། གང་ཡང་ཁམས་གསུམ་ལ་གནས་པ་དེ་ནི་ཚངས་པར་སྤྱོད་པ་ལ་གནས་མ་ཡིན་ནོ། །གཞན་ཡང ། ཚངས་པ། གང་བདག་ལ་མི་གནས། སེམས་ཅན་དང ། སྲོག་དང ། གང་ཟག་ལ་མི་གནས་པ་དེ་ནི་ཚངས་པར་སྤྱོད་པ་ལ་གནས་པ་ཡིན་ཏེ། ཚངས་པ། མདོར་ན་གང་ཆོས་ཐམས་ཅད་ལ་མི་གནས་པ་དེ་ནི་ཚངས་པར་སྤྱོད་པ་ལ་གནས་པའོ། །སྨྲས་པ། ལྷའི་བུ། ཚངས་པར་སྤྱོད་པ་ལ་གནས་པ་ཞེས་བྱ་བ་དེ་གང་གི་ཆིག་བླ་དྭགས་ཡིན། སྨྲས་པ།་ཚངས་པར་སྤྱོད་པ་ལ་གནས་ཞེས་བྱ་བ་ནི་ཚངས་པ་གཉིས་སུ་མེད་པའི་ལམ་ལ་རབ་ཏུ་གནས་པའི་ཚིག་བླ་དྭགས་སོ། །སྨྲས་པ། ལྷའི་བུ། ལམ་ལ་རབ་ཏུ་གནས་པའང་ཅི་ལ་རབ་ཏུ་གནས་པ་ཡིན། སྨྲས་པ། ཚངས་པ། ལམ་ལ་རབ་ཏུ་གནས་པ་ཞེས་བྱ་བ་དེ་ཆོས་ཐམས་ཅད་ལ་རབ་ཏུ་གནས་པ་མེད་པའི་ཚིག་བླ་དྭགས་སོ། །དེ་ཅིའི་ཕྱིར་ཞེ་ན། རབ་ཏུ་གནས་པ་མེད་པ་དང ། ལེན་པ་མེད་པ་དེ་ནི་ལམ་ལ་རབ་ཏུ་གནས་པའོ། །སྨྲས་པ། ལྷའི་བུ། ཇི་ལྟར་བསྒོམ་ན་ལམ་སྒོམ་པ་ཡིན། སྨྲས་པ། ཚངས་པ། ཇི་ནས་ཀྱང་དངོས་པོ་དང་ 139b དངོས་པོ་མེད་པར་མི་ལྟུང་བ་དང ། ཆོས་གང་ཡང་དངོས་པོར་ཡང་མི་བྱེད། དངོས་པོ་མེད་པར་མི་བྱེད་པར་སྒོམ་པ་སྟེ། དེ་ལྟར་བསྒོམ་ན་ལམ་སྒོམ་པ་ལ་བརྩོན་པ་ཡིན་ནོ། །སྨྲས་པ། ལྷའི་བུ།་གང་གིས་ལམ་བསྒོམ་པར་བྱ། སྨྲས་པ། ཚངས་པ། མཐོང་བས་མ་ཡིན། ཐོས་པས་མ་ཡིན། དྲན་པས་མ་ཡིན། རྣམ་པར་རིག་པས་མ་ཡིན། ཐོབ་པས་མ་ཡིན། མངོན་དུ་བྱས་པས་མ་ཡིན་ཏེ། གང་ཆོས་ཐམས་ཅད་ལ་མི་སྒོམ་པ་འདི་ནི་ལམ་སྒོམ་པའོ། །སྨྲས་པ། ལྷའི་བུ། ཇི་ལྟར་ན་བྱང་ཆུབ་སེམས་དཔའ་བརྩོན་འགྲུས་ཀྱི་གོ་ཆ་སྲ་བ་བགོས་པ་ཞེས་བྱ། ། སྨྲས་པ།་ཚངས་པ། བྱང་ཆུབ་སེམས་དཔའ་གང་ཆོས་གང་ལའང་གཅིག་པའམ། ཐ་དད་པར་ཡང་དག་པར་རྗེས་སུ་མི་མཐོང་བ་འདི་ནི་བྱང་ཆུབ་སེམས་དཔའ་བརྩོན་འགྲུས་ཀྱི་གོ་ཆ་སྲ་བ་བགོས་པ་ཞེས་བྱའོ། །གང་ཆོས་ཀྱི་དབྱིངས་མ་འདྲེས་པའི་ཕྱིར་ཆོས་གང་ལའང་འབྱེད་པར་མི་བྱེད། སྦྱོར་བར་མི་བྱེད་དེ། ཆོས་ཀྱི་དབྱིངས་མ་གཏོགས་པར་ཀུན་ནས་ཉོན་མོངས་པ་དང ། རྣམ་པར་བྱང་བ་མི་མཐོང་བ་འདི་ནི་བྱང་ཆུབ་སེམས་དཔའི་བརྩོན་འགྲུས་རྩོམ་པའི་མཆོག་གོ་།གང་ཆོས་ཐམས་ཅད་ལ་བསལ་བ་དང ། བཞག་པ་མེད་པ་འདི་ནི་བརྩོན་འགྲུས་རྩོམ་པའོ། །ཚངས་པ། གང་ལ་ལུས་དང ། ངག་དང ། ཡིད་ཀྱི་རྩོམ་པ་མེད་པ་འདི་ནི་བརྩོན་འགྲུས་རྩོམ་པའོ། །དེ་ནས་བཅོམ་ལྡན་འདས་ཀྱིས་ལྷའི་བུ་ཕྱིར་མི་ལྡོག་པ་ 140a ༄#། །ལ་ལེགས་སོ་ཞེས་བྱ་བ་བྱིན་ནས། ཚངས་པ་ཁྱད་པར་སེམས་ལ་བཀའ་སྩལ་པ། ཚངས་པ། ལྷའི་བུ་འདི་ཇི་སྐད་སྟོན་པ་དེ་བཞིན་ནོ། །འདི་ནི་དེའི་བརྩོན་འགྲུས་རྩོམ་པའི་མཆོག་སྟེ། གང་ལུས་ཀྱི་རྩོམ་པའང་མེད། ངག་གི་རྩོམ་པ་མེད། ཡིད་ཀྱི་རྩོམ་པའང་མེད་པ་འདི་ནི་བརྩོན་འགྲུས་རྩོམ་པའི་མཆོག་གོ་།ཚངས་པ། ངས་མངོན་པར་ཤེས་པ་འདས་པའི་དུས་ན་སྦྱངས་པའི་ཡོན་ཏན་ཡོ་བྱད་བསྙུངས་པ་ཐམས་ཅད་ཡང་དག་པར་བླང་པའི་བརྩོན་འགྲུས་བརྩམས་ཀྱང་དེ་བཞིན་གཤེགས་པ་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་ཏོ། །དེ་བཞིན་དུ་བླ་མ་རྣམས་ལ་ལྡང་བ་དང ། རིམ་གྲོ་བྱ་བ་དང ། དགོན་པར་གནས་པ་དང ། མང་དུ་ཐོས་པ་དང ། སེམས་ཅན་རྣམས་ཀྱི་བྱ་བ་ལ་ཀུན་ཏུ་འགྲོ་བའི་བརྩོན་འགྲུས་བརྩམས་ཀྱང་ང་ལུང་མ་བསྟན་ཏོ། །དེ་ཅིའི་ཕྱིར་ཞེ་ན། དེ་ནི་འདི་ལྟར་ལུས་དང ། ངག་དང ། སེམས་ཀྱི་རྩོམ་པ་ལ་རབ་ཏུ་གནས་པའི་ཕྱིར་རོ། །ཚངས་པ། ནམ་ང་ལྷའི་བུ་འདིས་ཇི་སྐད་དུ་བསྟན་པའི་བརྩོན་འགྲུས་རྩོམ་པ་དེ་ལྟ་བུ་དང ། ལྡན་པར་གྱུར་པ་དེའི་འོག་ཏུ་ང་དེ་བཞིན་གཤེགས་པ་མར་མེ་མཛད་ཀྱིས་བྲམ་ཟེའི་ཁྱེའུ་ཁྱོད་མ་འོངས་པའི་དུས་ན་ཤཱཀྱ་ཐུབ་པ་ཞེས་བྱ་བ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ་ཞེས་ལུང་བསྟན་ཏོ། །ཚངས་པ། 140b དེ་ལྟ་བས་ན་བྱང་ཆུབ་སེམས་དཔའ་ལུང་བསྟན་པའི་ས་མྱུར་དུ་ཐོབ་པར་འདོད་པས་བརྩོན་འགྲུས་རྩོམ་པ་འདི་ལྟ་བུ། འདི་ལྟ་སྟེ། ཆོས་ཐམས་ཅད་ལ་རྩོམ་པ་མེད་པའི་བརྩོན་འགྲུས་འདི་ལ་བརྩོམ་པར་བྱའོ། །གསོལ་པ། བཅོམ་ལྡན་འདས། རྩོམ་པ་མ་མཆིས་པའི་བརྩོན་འགྲུས་དེ་གང་ལགས། བཀའ་སྩལ་པ། ཚངས་པ། གང་དུས་གསུམ་མཉམ་པ་ཉིད་དང་ལྡན་པའི་བརྩོན་འགྲུས་རྩོམ་པའོ། །གསོལ་པ། བཅོམ་ལྡན་འདས། དུས་གསུམ་མཉམ་པ་ཉིད་དང་ལྡན་པའི་བརྩོན་འགྲུས་རྩོམ་པ་གང་ལགས། བཀའ་སྩལ་པ། འདི་ལྟ་སྟེ། འདས་པའི་སེམས་ནི་ཟད། མ་འོངས་པ་ནི་མ་ཕྱིན། ད་ལྟར་བྱུང་བ་ལ་ནི་གནས་པ་མེད་ཅིང་མི་དམིགས་ཏེ། གང་ཟད་པ་དེ་ནི་དམིགས་སུ་མེད་དོ། །གང་མ་ཕྱིན་པ་དེ་ནི་མི་སྐྱེ་བའི་མཚན་ཉིད་དོ། །དེ་བཞིན་དུ་གང་ད་ལྟར་བྱུང་བ་དེའང་ཆོས་ཉིད་ཀྱིས་མི་གནས་སོ། །ཆོས་ཉིད་གང་ཡིན་པ་དེའང་མ་སྐྱེས་པའོ། །གང་མ་སྐྱེས་པ་དེ་ནི་འདས་པའང་མ་ཡིན། མ་འོངས་པའང་མ་ཡིན། ད་ལྟར་བྱུང་བའང་མ་ཡིན་ནོ། །གང་འདས་པའང་མ་ཡིན། མ་འོངས་པའང་མ་ཡིན། ད་ལྟར་བྱུང་བའང་མ་ཡིན་པ་དེ་ནི་རང་བཞིན་ནོ། །རང་བཞིན་གང་ཡིན་པ་དེ་ནི་མ་སྐྱེས་པ་སྟེ། ཚངས་པ། དུས་གསུམ་མཉམ་ཉིད་དང་ལྡན་པའི་བརྩོན་འགྲུས་རྩོམ་པ་དེ་ལྟ་བུ་འདི་ནི་ལུང་བསྟན་པ་མྱུར་དུ་ཐོབ་པར་བྱེད་དོ། །ཚངས་པ། 141a ༄#། །བྱང་ཆུབ་སེམས་དཔའ་བཟོད་པ་དེ་ལྟ་བུ་དང་ལྡན་པ་ནི་ཆོས་ཐམས་ཅད་གཏོང་བ་མེད་པའི་སྦྱིན་པ་ལ་མོས་སོ། །ཆོས་ཐམས་ཅད་བསྲུང་བ་མེད་པའི་ཚུལ་ཁྲིམས་ལ་མོས་སོ། །ཆོས་ཐམས་ཅད་རློམ་སེམས་མེད་པའི་བཟོད་པ་ལ་མོས་སོ། །ཆོས་ཐམས་ཅད་རྩོམ་པ་མེད་པའི་བརྩོན་འགྲུས་ལ་མོས་སོ། །ཆོས་ཐམས་ཅད་མཉམ་པ་ཉིད་ཀྱི་ཏིང་ངེ་འཛིན་ལ་མོས་སོ། །ཆོས་ཐམས་ཅད་རྣམ་པར་མི་རྟོག་པའོ་ཞེས་ཤེས་རབ་ལ་མོས་སོ། །དེ་དེ་ལྟར་མོས་པས་ལྷག་པར་མི་བྱེད།་བྲི་བར་མི་བྱེད། བྱེད་པ་མ་ཡིན། རྣམ་པར་བྱེད་པ་མ་ཡིན་ནོ། །སྦྱིན་པའང་སྦྱིན་པར་བྱེད་ལ་དེའང་རྣམ་པར་སྨིན་པ་ལ་མི་རེ་བས་སོ། །ཚུལ་ཁྲིམས་ཀྱང་སྲུང་ལ་དེའང་སྒྲོ་བཏགས་པ་མེད་པས་སོ། །བཟོད་པའང་སྒོམ་ལ་དེའང་ཕྱི་ནང་སྟོང་པ་ཉིད་ཀྱིས་སོ། །བརྩོན་འགྲུས་ཀྱང་རྩོམ་ལ་དེའང་ཡོངས་སུ་གྲུབ་པ་མེད་པས་སོ། ། བསམ་གཏན་ལའང་མཉམ་པར་འཇོག་ལ་དེའང་གནས་པ་མེད་པས་སོ། །ཤེས་རབ་ཀྱང་སྒོམ་ལ་དེའང་མཚན་མ་མེད་པས་སོ། །ཚངས་པ། བྱང་ཆུབ་སེམས་དཔའ་བཟོད་པ་དེ་ལྟ་བུ་དང་ལྡན་པ་ནི་བྱ་བ་ཐམས་ཅད་ཀྱང་སྟོན་པ་བྱ་བས་ཀྱང་མི་གོས་སོ། །དེ་མི་གོས་པས་ཆོས་ཐམས་ཅད་ལ་མཉམ་པ་ཉིད་ཐོབ་ཅིང་ 141b རྙེད་པས་ཀྱང་མི་འཕྲོགས། རྙེད་པ་མེད་པས་ཀྱང་མ་ཡིན། སྙན་པས་ཀྱང་མ་ཡིན། མི་སྙམ་པས་ཀྱང་མ་ཡིན། སྨད་པས་ཀྱང་མ་ཡིན། བསྟོད་པས་ཀྱང་མ་ཡིན། སྡུག་བསྔལ་གྱིས་ཀྱང་མ་ཡིན། བདེ་བས་ཀྱང་མི་འཕྲོགས་སོ། །དེ་འཇིག་རྟེན་གྱི་ཆོས་ཐམས་ཅད་ལས་རྣམ་པར་འདས་ཏེ། གཉིས་སུ་དམིགས་པའི་སེམས་དང་བྲལ་ཞིང་གཉིས་སུ་མེད་པའི་ཆོས་རྟོགས་པའི་ཕྱིར་ཁེངས་པར་ཡང་མི་བྱེད། འདུད་པར་ཡང་མི་བྱེད། སྡུད་པར་ཡང་མི་བྱེད། ཁོང་ཁྲོ་བའང་མི་བྱེད། གནོད་པར་ཡང་མི་བྱེད། ཀུན་ནས་གནོད་པར་ཡང་མི་བྱེད། རློམ་སེམས་སུའང་མི་བྱེད། བག་མེད་པར་ཡང་མི་བྱེད། ཀུན་ནས་བག་མེད་པར་ཡང་མི་བྱེད་དོ། །སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་ལྟ་བ་གཉིས་སུ་ལྟུང་བའི་སེམས་ཅན་རྣམས་ཀྱི་དོན་དུ་སྙིང་རྗེ་ཆེན་པོ་བསྐྱེད་ནས་ཆེད་དུ་བསམ་ནས་སྲིད་པ་ཉེ་བར་ལེན་ཏེ། ཚངས་པ། གང་འདི་བདག་མེད་པའི་བཟོད་པ་རབ་ཏུ་ཐོབ་པས་སེམས་ཅན་ཐམས་ཅད་ལ་སྙིང་རྗེ་ཆེན་པོ་བསྐྱེད་དེ། སྐྱེ་བོ་ཡོངས་སུ་འཛིན་པ་འདི་ནི་བརྩོན་འགྲུབ་རྩོམ་པའི་མཆོག་ཡིན་ནོ། །བརྩོན་འགྲུས་བརྩམ་པ་བསྟན་པ་འདི་བཤད་པའི་ཚེ་བྱང་ཆུབ་སེམས་དཔའ་སྟོང་ཕྲག་བརྒྱད་མི་སྐྱེ་བའི་ཆོས་ལ་བཟོད་པ་སྐྱེས་པར་གྱུར་ཏེ། དེ་དག་ཐམས་ཅད་ཀྱང་ 142a ༄#། །བཅོམ་ལྡན་འདས་ཀྱིས་ཐམས་ཅད་མིང་གཅིག་ཏུ་དེ་བཞིན་གཤེགས་པ་བརྩོན་འགྲུས་བརྟན་པ་ཞེས་བྱ་བར་སངས་རྒྱས་ཀྱི་ཞིང་ཐ་དད་པར་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་ལུང་བསྟན་ཏོ། །དེ་ནས་འཁོར་དེར་ཚེ་དང་ལྡན་པ་འོད་སྲུང་ཆེན་པོ་འདུག་པར་གྱུར་པ་དེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། འདི་ལྟ་སྟེ། དཔེར་ན། གང་ཀླུ་ཆེན་པོ་དེ་དག་ནི་ཆར་འབེབས་ན་རྒྱ་མཚོ་ཆེན་པོར་འབེབས་ཏེ། ས་ཕྱོགས་གཞན་དུ་མ་ལགས་སོ། ། བཅོམ་ལྡན་འདས། དེ་བཞིན་དུ་སྐྱེས་བུ་དམ་པ་ཀླུ་ཆེན་པོ་དང་མཚུངས་པ་འདི་དག་ཀྱང་ཆོས་ཀྱི་ཆར་འདི་འདྲ་བ་འདི་སྐྱེས་བུ་དམ་པ་མཚོ་ཆེན་པོ་རྒྱ་མཚོ་ལྟ་བུ་འདི་དག་གི་སེམས་ཀྱི་རྒྱུད་ལ་འབེབས་ཏེ། སེམས་ཅན་གཞན་དག་ལ་ནི་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། འོད་སྲུང ། ཇི་སྐད་ཟེར་བ་དེ་བཞིན་ཡིན་མོད་ཀྱི་ཀླུའི་རྒྱལ་པོ་ཆེན་པོ་དེ་དག་ལ་ནི་གང་གི་ཕྱིར་ཛམྦུའི་གླིང་འདིར་ཆར་པ་མི་འབེབས་པར་འགྱུར་བའི་སེར་སྣ་མེད་དོ། །དེ་ཅིའི་ཕྱིར་ཞེ་ན། ཛམྦུ་གླིང་གི་ས་ཕྱོགས་ཀྱིས་ཆར་པའི་རྒྱུན་ཤིང་རྟའི་སྲོག་ཤིང་ཙམ་དེ་དག་མི་བཟོད་དོ། །འོད་སྲུང ། གལ་ཏེ་ཀླུ་ཆེན་པོ་དེ་དག་གིས་ཛམྦུ་གླིང་འདིར་ཆར་ཕབ་པར་གྱུར་ན་དེ་ས་ཛམྦུ་གླིང་འདི་གྲོང་ 142b དང ། གྲོང་ཁྱེར་དང་བཅས། རི་དང ། བྲག་དང ། རི་བོར་བཅས། ཁོར་ཡུག་དང་འོབས་སུ་བཅས་པ། འདི་ལྟ་སྟེ། རྫ་མའི་ཆུས་རྒྱ་ཤུག་གི་ལོ་མ་བཏེག་པ་བཞིན་དུ་བཏེག་ནས་ཁྱེར་བར་འགྱུར་ཏེ། དེ་བས་ན་ཀླུ་ཆེན་པོ་དེ་དག་ཛམྦུ་གླིང་འདིར་ཆར་པ་མི་འབེབས་སོ། །འོད་སྲུང ། དེ་བཞིན་དུ་སྐྱེས་བུ་དམ་པ་འདི་དག་ལ་ནི་གང་གི་ཕྱིར་སེམས་ཅན་དེ་དག་གཞན་ལ་ཆོས་ཀྱི་ཆར་པ་ཆེན་པོ་མི་འབེབས་པར་འགྱུར་བའི་ཆོས་ཀྱི་སེར་སྣ་མེད་མོད་ཀྱི། འོན་ཀྱང་འདི་དག་ཆོས་འདི་ལྟ་བུ་དག་གི་སྣོད་དུ་མ་གྱུར་ཏེ། དེ་ལྟ་བས་ན་སྐྱེས་བུ་དམ་པ་དེ་དག་རྒྱ་མཚོ་ལྟ་བུའི་བློ་མཆོག་དང་ལྡན་པ་དེ་དག་ལ་ཆོས་ཀྱི་ཆར་པ་ཆེན་པོ་འབེབས་སོ། །འོད་སྲུང ། འདི་ལྟ་སྟེ། དཔེར་ན། ཆར་པའི་རྒྱུན་ཤིང་རྟའི་སྲོག་ཤིང་ཙམ་བབ་པ་དེ་དག་གིས་ཀྱང་རྒྱ་མཚོ་ཆེན་པོ་བྲི་བའང་མེད། གང་བའང་མེད་དོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་བསྐལ་པ་བརྒྱར་ཆོས་ཉན་ཏམ།་འཆད་ཀྱང་ཆོས་གང་ཡང་བྲི་བའམ། གང་བར་མི་འགྱུར་རོ། །འདི་ལྟ་སྟེ། དཔེར་ན། རྒྱ་མཚོ་ཆེན་པོ་དེར་གླིང་ཆེན་པོ་བཞིའི་ཀླུང་སྣ་ཚོགས་ནས་གང་ཆུ་འབབ་པ་དེ་དག་ཐམས་ཅད། འདི་ལྟ་སྟེ། ལན་ཚཝའི་རོར་རོ་གཅིག་པར་འགྱུར་རོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་རྣམ་གྲངས་སྣ་ཚོགས་སུ་ཆོས་སྦྶྟན་པ་བཤད་པ་དག་ཐོས་མ་ཐག་ཏུ་ 143a ༄#། །འདི་ལྟ་སྟེ། སྟོང་པ་ཉིད་ཀྱི་རོར་རོ་གཅིག་ཏུ་མོས་པར་འགྱུར་རོ། །འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་དག་པ། གཙང་བ། དྲི་མ་མེད་པ། གསལ་བ། རྙོག་པ་མེད་པ་ཡིན་ཏེ། ཆུ་རྙོག་པ་ཅན་མི་འཛིན་ཏོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་ཀྱང་དག་པ། གཙང་བ། དྲི་མ་མེད་པ། གསལ་བ་སྟེ། གནོད་སེམས་དང ། ཞེ་སྡང་དང ། ཁྲོ་བ་དང ། འཁོན་དུ་འཛིན་པའི་ཐ་བ་ཐམས་ཅད་མི་འཛིན་ཏོ། །འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་ཟབ་ཅིང་གཏིང་དཔག་དཀའ་བའོ། །དེ་བཞིན་དུ་སྐྱེས་བུ་དམ་པ་དེ་དག་ཀྱང་ཆོས་ཀྱི་ཚུལ་ཟབ་མོ་ལ་རབ་ཏུ་ཞུགས་ཤིང ། ཉན་ཐོས་དང ། རང་སངས་རྒྱས་ཐམས་ཅད་ཀྱི་གཏིང་དཔག་དཀའོ། །འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་ཆུ་ཚད་མེད་ཅིང་རིན་པོ་ཆེའི་ཚོགས་དཔག་ཏུ་མེད་པའོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་ཀྱང་ཤེས་རབ་ཚད་མེད་ཅིང་ཆོས་རིན་པོ་ཆེའི་ཚོགས་དཔག་ཏུ་མེད་དོ། །འོད་སྲུང ། འདི་ལྟ་སྟེ།་དཔེར་ན། རྒྱ་མཚོ་ཆེན་པོ་རིན་པོ་ཆེ་སྣ་ཚོགས་ཀྱི་དབྱིངས་སོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་ཀྱང་མངོན་པར་བསྒྲུབ་པ་སྣ་ཚོགས་ཀྱིས་ཆོས་རིན་པོ་ཆེ་ཆད་མེད་པའི་དབྱིངས་སོ། །འོད་སྲུང ། འདི་ལྟ་སྟེ། དཔེར་ན། རྒྱ་མཚོ་ཆེན་པོའི་ནང་ནས་རིན་པོ་ཆེ་ཁ་ཅིག་རིན་ཐང་ཡོད་པ་དང ། ཁ་ཅིག་རིན་ཐང་མེད་པ་དང ། ཁ་ཅིག་མཆིང་བུ་ལྟ་བུ་ 143b དང་རྣམ་པ་གསུམ་འབྱུང་སྟེ། འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་སེམས་ཅན་གྱི་དབང་པོ་ཇི་ལྟ་བ་བཞིན་དུ་ཆོས་སྟོན་པ་ནའང་ཉན་ཐོས་ཀྱི་ཐེག་པ་དང ། རང་སངས་རྒྱས་ཀྱི་ཐེག་པ་དང ། གང་འོག་མ་ཐེག་པ་ཆེན་པོ་ལ་སེམས་ཀྱི་རྒྱུད་རྣམ་པར་འགྲོལ་ལོ། །འོད་སྲུང ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་སེམས་ཅན་གཅིག་གི་ཆེད་དུ་མི་གནས་སོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་ཀྱང་སེམས་ཅན་གཅིག་གི་དོན་དུ་བྱང་ཆུབ་ཏུ་སེམས་མི་སྐྱེད་དོ། །འོད་སྲུང ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་མཐར་གྱིས་གཞོལ། མཐར་གྱིས་འབབ།་མཐར་གྱིས་བབ་པའོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་ཀྱང་ཐམས་ཅད་མཁྱེན་པ་ཉིད་དུ་གཞོལ། ཐམས་ཅད་མཁྱེན་པ་ཉིད་དུ་འབབ། ཐམས་ཅད་མཁྱེན་པ་ཉིད་དུ་བབ་པའོ། །འོད་སྲུང ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་ཤི་བའི་རོ་དང་ལྷན་ཅིག་མི་གནས་སོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་ཀྱང་ཉན་ཐོས་དང་རང་སངས་རྒྱས་ཀྱི་སེམས་དང་ལྷན་ཅིག་མི་གནས་སོ། །སེར་སྣ་དང ། ངང་ཚུལ་ངན་པའི་སེམས་དང ། གནོད་སེམས་དང ། ལེ་ལོའི་སེམས་དང ། བརྗེད་ངས་པ་དང ། འཆལ་བའི་ཤེས་རབ་ཀྱི་སེམས་དང་ལྷན་ཅིག་མི་གནས་སོ། །བདག་དང ། སེམས་ཅན་དང ། སྲོག་དང ། གང་ཟག་དང ། སྐྱེས་བུར་ལྟ་བ་དང་ལྷན་ཅིག་མི་གནས་སོ། །འོད་སྲུང ། འདི་ལྟ་སྟེ། དཔེར་ 144a ༄#། །ན།་བསྐལ་པས་སྲེག་པར་གྱུར་པའི་ཚེ། ཀླུང་དང ། ཆུ་བྲན་དང ། ཆུ་མིག་དང ། མཚེའུ་དང ། རྫིང་བུ་དང ། མཚོ་ཐམས་ཅད་སྔར་སྐམ་པར་འགྱུར་ཏེ། ཕྱིས་རྒྱ་མཚོ་ཆེན་པོ་ཟད་ཅིང་སྐམ་པར་འགྱུར་རོ། །འོད་སྲུང ། དེ་བཞིན་དུ་དམ་པའི་ཆོས་ནུབ་པར་འགྱུར་བའི་ཚེ་ཉི་ཚེ་བར་སྤྱོད་པ་ལ་ཞུགས་པའི་སེམས་ཅན་ཐམས་ཅད་ཀྱི་དམ་པའི་ཆོས་སྔར་ནུབ་པར་འགྱུར་ཏེ། ཕྱིས་སྐྱེས་བུ་དམ་པ་བློ་གྲོས་རྒྱ་མཚོ་ལྟ་བུ་སངས་རྒྱས་ཀྱི་ཐེག་པ་ཡང་དག་པར་འཛིན་པ་དེ་དག་གི་ལག་ནས་དམ་པའི་ཆོས་ནུབ་པར་འགྱུར་ཏེ། ཡང ། འོད་སྲུང ། སྐྱེས་བུ་དམ་པ་དེ་དག་ནི་སྲོག་ཀྱང་ཡོངས་སུ་གཏོང་པར་བྱེད་ཀྱི་དམ་པའི་ཆོས་ཡོངས་སུ་གཏོང་བར་མི་བྱེད་ན། འོད་སྲུང ། སྐྱེས་བུ་དམ་པ་དེ་ལྟ་བུ་དག་གི་ལག་ནས་དམ་པའི་ཆོས་ནུབ་པར་འགྱུར་བ་ཡོད་དམ། དེ་དག་གི་དམ་པའི་ཆོས་ནུབ་པར་ཁྱོད་ཀྱིས་མི་བལྟའོ། །འོད་སྲུང ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནོར་བུ་རིན་པོ་ཆེ་རིན་པོ་ཆེ་ཐམས་ཅད་འདུས་པ་ཞེས་བྱ་བ་རྡོ་རྗེ་ཚོགས་ཀྱི་ནོར་བུ་རིན་པོ་ཆེ་ཞིག་ཡོད་དོ། །དེ་ཉི་མ་བདུན་ཤར་ནས་ཚངས་པའི་འཇིག་རྟེན་གྱི་བར་དུ་འོད་ཟེར་བྱུང་ཡང་རིན་པོ་ཆེ་དེ་ཚིག་པར་མི་འགྱུར་ཏེ། གང་འཇིག་རྟེན་གྱི་ཁམས་ཀྱི་བར་གྱི་སངས་རྒྱས་ཀྱི་ཞིང་གཞན་དག་ན་རྒྱ་མཚོ་ཆེན་པོ་ཡོད་པ་དེར་ནོར་བུ་ཆེན་པོ་ཆེ་དེ་དེར་འཕོ་བར་འགྱུར་ཏེ། འོད་ 144b སྲུང ། གང་ནོར་བུ་རིན་པོ་ཆེ་དེ་རྒྱ་མཚོ་ཆེན་པོ་ལས་གཞན་དུ་མ་འཕོས་པ་དང ། འཇིག་རྟེན་གྱི་ཁམས་འདིར་ཚིག་པར་མི་འགྱུར་བ་དེ་ནི་གནས་མ་ཡིན་ཞིང་གོ་སྐབས་མེད་དེ། དེ་ནི་གནས་མེད་དོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་ལྟ་བུ་དེ་དག་ཀྱང་དམ་པའི་ཆོས་ཡོངས་སུ་ཟད་པར་འགྱུར་ཏེ། འཇིག་རྟེན་གནས་པར་དམ་པ་མ་ཡིན་པའི་ཆོས་བདུན་བྱུང་བའི་ཚེ་སངས་རྒྱས་ཀྱི་ཞིང་གཞན་དུ་འཕོ་བར་འགྱུར་རོ། །བདུན་གང་ཞེ་ན། འདི་ལྟ་སྟེ། མུ་སྟེགས་ཅན་གྱི་གནས་དང ། སྡིག་པའི་གྲོགས་པོས་ཡོངས་སུ་ཟིན་པ་དང ། ལོག་པའི་སྦྱོར་བ་དང ། གཅིག་ལ་གཅིག་འཚེ་བའི་སྦྱོར་བ་དང ། ལྟ་བར་གྱུར་པའི་ཐིབ་པོ་དང ། དགེ་བའི་རྩ་བ་འཇོམས་པར་བྱེད་པ་དང ། མཐོབ་ཅིང་མངོན་པར་མ་རྟོགས་པ་སྟེ། དམ་པ་མ་ཡིན་པའི་ཆོས་བདུན་པོ་དེ་དག་འཇིག་རྟེན་གནས་པར་བྱུང་བ་དེ་ན་སེམས་ཅན་རྣམས་སྣོད་མ་ཡིན་པར་ཤེས་ནས་སྐྱེས་བུ་དམ་པ་དེ་དག་སངས་རྒྱས་ཀྱི་ཞིང་གཞན་དུ་འཕོ་བར་འགྱུར་ཏེ། སངས་རྒྱས་མཐོང་བ་དང ། དམ་པའི་ཆོས་མཉན་པ་དང ། སེམས་ཅན་ཡོངས་སུ་སྨིན་པར་བྱ་བ་དང ། དགེ་བའི་རྩ་བ་ཡོངས་སུ་འབར་བ་དང་ཡང་མི་འབྲལ་བར་འགྱུར་རོ། །འོད་སྲུང ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ལ་བརྟེན་ཅིང་སེམས་ཅན་ཚད་མེད་པ་དག་གནས་སོ། །འོད་སྲུང ། དེ་བཞིན་དུ་བྱང་ཆུབ་སེམས་དཔའ་ལ་བརྟེན་ཅིང་སེམས་ཅན་ཚད་ 145a ༄#། །མེད་པ་དག་ཕུན་སུམ་ཚོགས་པ་གསུམ་ལ་གནས་སོ། །གསུམ་གང་ཞེ་ན། ལྷའི་ཕུན་སུམ་ཚོགས་པ་དང ། མིའི་ཕུན་སུམ་ཚོགས་པ་དང ། མྱ་ངན་ལས་འདས་པའི་ཕུན་སུམ་ཚོགས་པའོ། །འོད་སྲུང ། འདི་ལྟ་སྟེ། དཔེར་ན། རྒྱ་མཚོ་ཆེན་པོ་ནི་སེམས་ཅན་གཞན་དག་གིས་བཏུང་བར་མི་ནུས་སོ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་གིས་གང་ཆོས་བསྟན་པ་དེ་དག་ཀྱང་ཕ་རོལ་གྱི་རྒོལ་བ་རྣམས་ཀྱིས་བཏུང་བར་མི་ནུས་སོ། །འོད་སྲུང ། འདི་ལྟ་སྟེ། དཔེར་ན། རྒྱ་མཚོ་ཆེན་པོའི་ནང་ན་སེམས་ཅན་གནས་པ་དེ་དག་ནི་ཆུ་གཞན་མི་འཚོལ་གྱི་དེ་ཉིད་ལ་འཐུང་ངོ ། །འོད་སྲུང ། དེ་བཞིན་དུ་སྐྱེས་བུ་དམ་པ་དེ་དག་ཀྱང་གཞན་གྱི་ངོར་ལྟ་བས་ཆོས་ཀྱི་རོ་མི་འཐུང་གི ། རང་བྱུང་གི་ཡེ་ཤེས་ཀྱི་ཆོས་ཀྱི་རོ་འཐུང་ངོ ། །དེ་ནས་གནས་བརྟན་འོད་སྲུང་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་རྒྱ་མཚོ་ཆེན་པོའི་གཏིང་ངམ། ཚད་བཟུང་བ་ནི་ནུས་ཀྱི། ཉན་ཐོས་དང ། རང་སངས་རྒྱས་དང ། ལྷ་དང་བཅས་པའི་འཇིག་རྟེན་གྱིས་སྐྱེས་བུ་དམ་པ་དེ་དག་གི་གཏིང་ངམ་ཚད་བཟུང་བ་ནི་མི་ནུས་ཏེ། དེ་བས་ན་སྐྱེས་བུ་དམ་པ་དེ་དག་སེམས་ནམ་མཁའ་དང་མཚུངས་ཞེས་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། འོད་ 145b སྲུང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་རྒྱ་མཚོ་ཆེན་པོ་རྣམས་ཀྱི་གཏིང་ངམ། ཚད་ནི་བཟུང་བར་ནུས་ཀྱི། ཉན་ཐོས་དང ། རང་སངས་རྒྱས་དང ། ལྷ་དང་བཅས་པའི་འཇིག་རྟེན་གྱིས་སྐྱེས་བུ་དམ་པ་བློ་གྲོས་མཆོག་རྒྱ་མཚོ་ལྟ་བུ་དང་ལྡན་པ་དེ་དག་གི་གཏིང་ངམ། ཚད་བཟུང་བ་ནི་མི་ནུས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །ཇི་ལྟར་ཆོག་མི་ཤེས་པར་ཆུ་ཆེན་གཏེར། །འབབ་ཆུ་ཐམས་ཅད་ཀུན་གྱི་ཆུ་འཚོལ་བ། །དེ་བཞིན་དེ་རྣམས་འདི་ལ་ཆོས་འཚོལ་ཀྱང ། །རྟག་པར་ཆོས་ཀྱིས་ཆོག་པར་འགྱུར་པ་མེད། །ཇི་ལྟར་ཇི་སྙེད་ཆུ་མང་རབ་བསྡུས་ཀྱང ། །འདི་ལ་རྒྱ་མཚོ་འགྲིབས་ཤིང་གང་འགྱུར་མེད། །དམ་པའི་ཆོས་ཐོས་ནས་ཀྱང་ཆོས་ཀྱི་དབྱིངས། །ཤིན་ཏུ་འཕེལ་ཞིང་འགྲིབ་པར་མཐོང་བ་མེད། །ཇི་ལྟར་དྲི་མེད་རྒྱ་མཚོ་ཆུ་སྡུད་ཀྱང ། །རྙོག་པ་ཅན་གྱི་འབབ་ཆུ་དེར་མི་འབབ། །དེ་བཞིན་ཐུབ་མཁས་སྤྱད་པ་སྤྱོད་པ་ཡང ། །དེ་དག་རྣམ་དག་ཉོན་མོངས་མི་སྡུད་དོ། །ཇི་ལྟར་རྒྱ་མཚོ་ཆེན་པོ་ལུས་འཆང་བས། །ཟབ་ཅིང་གཏིང་ཡངས་པས་ན་མི་དཔོགས་པ། །དེ་བཞིན་ཡོན་ཏན་རྒྱ་མཚོ་ཡེ་ཤེས་ཀྱང ། །ཕ་རོལ་རྒོལ་པ་རྣམས་ཀྱིས་དཔག་མི་ནུས། །ཇི་ལྟར་རྒྱ་མཚོར་འབབ་པའི་འབབ་ཆུ་རྣམས། །རྣམ་པ་སྣ་ཚོགས་དག་ཀྱང་རོ་གཅིག་འགྱུར། །དེ་བཞིན་རྣམ་པ་སྣ་ཚོགས་ཆོས་ཐོས་ནས། །དེ་དག་རྣམ་པར་གྲོལ་བར་རོ་གཅིག་ 146a ༄#། །འགྱུར། །ཇི་ལྟར་ཆུ་འཛིན་རྒྱ་མཚོ་ཆེན་པོ་ནི། །སྐྱེ་བོ་གཅིག་གི་དོན་ཕྱིར་མི་གནས་ཏེ། །དེ་བཞིན་བྱང་ཆུབ་ཏུ་ཡང་ཞུགས་པ་དག་།དེ་དག་འགྲོ་བ་ཀུན་ལ་ཕན་ཕྱིར་ཞུགས། །ཇི་ལྟར་རྒྱ་མཚོ་རིན་ཆེན་དབྱིངས་ཡིན་ཞིང ། །དེ་ལ་གནས་ནས་ནོར་བུ་རིན་ཆེན་འབྱུང ། །དེ་བཞིན་རིན་ཆེན་འབྱུང་གནས་སེམས་ཅན་མཆོག་།དེ་དག་ལས་ནི་རིན་ཆེན་གསུམ་འདིར་འབྱུང ། །ཇི་ལྟར་རྣམ་པར་མི་རྟོག་རྒྱ་མཚོ་ན། །རྟག་པར་རིན་ཆེན་རྣམ་པ་གསུམ་འབྱུང་སྟེ། །དེ་བཞིན་དེ་དག་ཆོས་རྣམས་སྟོན་པ་ཡང ། །ཐེག་པ་གསུམ་གྱིས་སེམས་ཅན་དག་པར་འགྱུར། །ཇི་ལྟར་འབབ་པ་དང་ནི་འགྲམ་ཉིད་ནས། །རྒྱ་མཚོ་ཆེན་པོ་མཐར་གྱིས་གཞོལ་བ་ལྟར། །དེ་བཞིན་སེམས་ཅན་མཆོག་རྣམས་ཀུན་མཁྱེན་གཞོལ། ། སེམས་ཅན་རབ་ཏུ་དགྲོལ་ཕྱིར་རྟག་ཏུ་བརྩོན། །ཇི་ལྟར་རྒྱ་མཚོ་རོ་དང་མི་གནས་ཏེ། །དེ་དག་གི་ནི་མ་འདྲེས་ཆོས་འདི་ཡིན། །དེ་བཞིན་བྱང་ཆུབ་མཆོག་ལ་ཞུགས་པ་ཡང ། །དམན་པའི་ཐེག་པ་དང་ནི་གནས་མི་བྱེད། །ཇི་ལྟར་རྒྱ་མཚོ་ལས་བྱུང་རིན་ཆེན་ནི། །རིན་ཆེན་སྡུད་ཅེས་བྱ་བ་སྲ་བསྔགས་པ། །སྲེག་པའི་བསྐལ་པ་བྱུང་ཡང་མི་ཚིག་སྟེ། །དེ་ཡང་འཇིག་རྟེན་འཇིག་ཚེ་གཞན་དུ་འགྲོ་།དེ་བཞིན་དྲི་མ་མེད་པའི་ཆོས་འཛིན་ཚེ། །བརྩོན་འགྲུས་མཆོག་ལྡན་དེ་དག་འབད་ཅིང་འཛིན། །སྣོད་མིན་འཇིག་རྟེན་ཆོས་མིན་འདོད་རིག་ནས། ། 146b མཁས་པ་རྒྱལ་བ་གཞན་གྱི་དྲུང་དུ་འགྲོ། །ནམ་ཞིག་སྲེག་པའི་བསྐལ་པ་བྱུང་གྱུར་ཏེ། །ཆུ་མིག་མཚོ་དང་ལྟེང་ཀ་སྐམ་པར་འགྱུར། །རྒྱ་མཚོ་འདིར་ནི་ཕྱི་ནས་སྐམ་པར་འགྱུར། །སྟོང་གསུམ་ཆེན་པོ་འདི་ཡང་རབ་ཏུ་འཇིག་།ཉི་ཚེའི་སྤྱོད་ལ་ཉེ་བར་གནས་པ་ཡི། །འདི་ལ་མཆོག་ཏུ་བྱ་བའི་ཆོས་ནུས་པ། །དེ་ཚེ་འདིར་ནི་སེམས་ཅན་མཆོག་ཆོས་འདི། །ལུས་དང་སྲོག་ཀྱང་བོར་ནས་སྲུང་བར་བྱེད། །བདེ་གཤེགས་འདས་ནའང་རྟག་པར་བག་མེད་པས། །དེ་དག་རྣམས་ལ་ཆོས་འདི་མི་འཇིག་གོ་།དེ་ལྟར་དེ་རྣམས་བསམ་པའང་རྣམ་པར་དག་།ཆོས་ལ་གནས་ཤིང་སྤྱོད་པ་རྟག་པར་སྤྱོད། །ཇི་ལྟར་རྒྱ་མཚོ་སེམས་ཅན་ཚད་མེད་གནས། །སེམས་ཅན་གཅིག་གི་དོན་དུ་མི་འཇུག་པ། །དེ་བཞིན་འཇིག་རྟེན་ཐམས་ཅད་རྣམ་གྲོལ་ཕྱིར། །གྲགས་པ་ཆེན་པོ་འདི་དག་རབ་ཏུ་འཇུག་།འཇིག་རྟེན་ཁམས་འདི་རྒྱ་མཚོ་ཇི་སྙེད་པ། །མ་ལུས་པར་ནི་ཚད་རྣམས་ཤེས་རུང་ཡང ། །རྒྱལ་བ་དེ་དག་ཀུན་གྱི་སྤྱོད་པ་ནི། །དགྲ་བཅོམ་རང་རྒྱལ་དག་གིས་ཤེས་མི་ནུས། །མ་ལུས་ཕྱོགས་ཀྱི་ནམ་མཁའི་དབྱིངས་རྣམས་ཀྱང ། །མཆོག་རྣམས་ཀྱི་ནི་ཚད་བཟུང་ནུས་སྲིད་ཀྱི། །ནམ་མཁའ་བས་ཀྱང་ལྷག་པ་དེ་དག་གི་།ཡེ་ཤེས་ཚད་ནི་ནམ་ཡང་གཟུང་མི་ནུས། །བྱང་ཆུབ་སེམས་དཔའ་བརྩོན་འགྲུས་བརྟུལ་བརྟན་ཞིང ། །གང་དག་འཇིག་རྟེན་མ་ལུས་དགྲོལ་བའི་ཕྱིར། །རྒྱ་ཆེ་ཡངས་པའི་སེམས་རབ་གཞོལ་བྱས་པ། །འོད་ 147a ༄#། །སྲུང་དེ་དག་མཚུངས་མེད་ག་ལ་ལྷག་།དེ་དག་རིན་ཆེན་འབྱུང་གནས་རྒྱ་མཚོ་འདྲ། །དེ་དག་བསོད་ནམས་ཡིན་ལ་བསོད་ནམས་ཞིང ། །དེ་དག་དཔྱད་པའི་རྒྱལ་པོ་སྨན་པའི་མཆོག་།སེམས་ཅན་ཡུན་རིང་ན་བ་ཐར་བར་བྱེད། །དེ་དག་གནས་ཡིན་སྐྱབས་དང་དཔུང་གཉེན་ཏེ། །སྐྱོབ་པ་སྒྲོན་མ་དེ་བཞིན་འོད་བྱེད་པ། །སྐྱེ་བོ་ལྡོངས་པ་རྣམས་ཀྱི་མིག་སྐྱེད་པ། །དེ་ཐོབ་པས་ན་དེ་དག་བདུད་རྩི་ཐོབ། །དེ་དང་དེ་དག་ཆོས་ཀྱི་རྒྱལ་མཆོག་འབར། །དེ་རྣམས་བརྒྱ་བྱིན་དོན་མང་སེམས་པ་སྟེ། །ཚངས་པ་བསམ་གཏན་བཞི་ལ་གནས་པ་ཡིན། །དེ་དག་ཚངས་པའི་ཆོས་ཀྱི་འཁོར་ལོ་བསྐོར། །དེ་དག་དེད་དཔོན་མཁས་པ་འདྲེན་པ་སྟེ། །ལོག་པའི་ལམ་དུ་གནས་ལ་ལམ་སྟོན་པ། །དེ་དང་དེ་དག་བདུད་འཇོམ་དཔའ་བོ་སྟེ། །སེམས་ཅན་དམ་པ་བྱང་ཆུབ་སྙིང་པོར་གནས། །དེ་དག་ཆོས་དཀར་ཚད་མེད་ཟླ་བ་བཞིན། །དེ་དག་འོད་ཟེར་མངོན་འཕགས་ཉི་མ་འདྲ། །སྤྲིན་ལྟ་བུར་ཡང་ཚད་མེད་བློ་སྒྲོགས་ཤིང ། །འཇིག་རྟེན་གསུམ་ན་བདུད་རྩིའི་ཆར་པ་འབེབས། །དེ་དག་སེང་གེ་ལྟ་བུར་འཇིགས་སྐྱོན་མེད། །གླང་པོ་ཆེ་ལྟར་ཤིན་ཏུ་དུལ་བའི་སེམས། །དེ་དག་རི་རབ་རི་བོ་འདྲ་མཚུངས་ཏེ། །དེ་དག་ཕ་རོལ་རྒོལ་བས་མི་ཐུབ་བོ། །དེ་དག་རྣམ་པར་དང་བ་ཆུ་བཞིན་ཏེ། །རྟག་ཏུ་བསྙེན་པར་དཀའ་བ་མེ་དང་འདྲ། །དེ་དག་རླུང་ལྟར་རྟག་ཏུ་ཆགས་མེད་ཅིང ། །ས་དང་འདྲ་ 147b པར་ཐ་བ་རབ་ཏུ་སྤངས། །གནོད་སེམས་ང་རྒྱལ་ཐ་བ་ཕྲག་དོག་བྲལ། །དེ་དག་རྩི་ཡི་ཤིང་ལྟར་རྟོག་པ་མེད། །འཇིག་རྟེན་ཆོས་རྣམས་བརྒྱད་པོས་མ་གོས་ཤིང ། །དེ་དག་ཚུལ་ཁྲིམས་རྣམ་དག་པདྨ་བཞིན། །དེ་དག་ཨུ་དུ་མ་ཝཱ་རའི་མེ་ཏོག་ལྟར། །དགེ་ཞིང་བསྐལ་པ་ཕྱེ་བར་སྒྲ་ཐོས་དཀའ། །དེ་དག་རྐང་གཉིས་གཙོ་ལ་བྱས་པ་གཟོ། །དེ་དག་སངས་རྒྱས་རིགས་ལ་གནས་པར་བརྩོན། ། དེ་དག་སྙིང་རྗེ་ཆེ་ཞིང་བརྟུལ་ཤུགས་བརྟན། །བྱམས་ལ་གནས་དང་དགའ་ལ་མངོན་པར་འཕགས། །འདོད་པའི་ཡོན་ཏན་ལྔ་ལ་བཏང་སྙོམས་ཞིང ། །རྟག་ཏུ་རྒྱལ་པ་དག་གི་ནོར་རྣམས་འཚོལ།། དེ་དང་དེ་དག་སྦྱིན་པས་ཁྱད་པར་སོང ། །ཡེ་ཤེས་ཚུལ་ཁྲིམས་ལ་ཡང་རབ་ཏུ་གནས། །དེ་དག་བཟོད་པའི་སྟོབས་ཀྱིས་གཅིག་ཏུ་དཔའ། །བརྩོན་འགྲུས་འཕགས་ཤིང་རྟག་ཏུ་མཐུ་དང་ལྡན།། །དེ་དག་བསམ་གཏན་མངོན་པར་ཤེས་ལ་མཁས། །དེ་དག་ཚད་མེད་ཞིང་དུ་འཕྲུལ་གྱིས་འགྲོ་།ཐུབ་པ་དམ་མཆོག་ལ་ཡང་ཆོས་ཉན་ཅིང ། །ཇི་ལྟར་ཐོས་པ་དག་ཀྱང་སྟོན་པར་བྱེད། ། ཇི་ལྟར་འདི་མོས་རྣམ་པར་འགྲོལ་བ་ཡང ། །སྐྱེ་བོ་དག་གི་སྤྱོད་པ་དེ་དག་ཤེས། །ཇི་ལྟར་མོས་པ་མཁས་ཤིང་རྟོགས་པ་སྟེ། །ནན་ཏན་སྙིང་པོར་བྱེད་ཅིང་མུ་སྟེགས་ཐོབ། །འདི་རྣམས་ཚོགས་པ་ལས་ནི་འདི་སྐྱེ་ཞེས། །དེ་དང་དེ་དག་ཆོས་ཀུན་རབ་ཏུ་ཤེས། །དེ་དག་རྐྱེན་ལ་མཁས་ཤིང་རྟོག་པ་སྟེ། །མཐའ་གཉིས་ལྟ་བ་སྤངས་ཤིང་མཉམ་ལ་དགའ། །ཆོས་འདི་གང་ནས་འོང་ 148a ༄#། །ཤིང་གར་འགྲོ་ཞིང ། །དེ་དག་ཆོས་ལ་ཚུལ་བཞིན་རྣམ་པར་ལྟ། །ཆོས་ཀུན་འོང་བ་མ་ཡིན་འབྱུང་བ་ཡིན། །གནས་པ་ཆོས་ཉིད་མཚུངས་པར་རབ་ཏུ་ཤེས། །ཇི་ལྟ་ཇི་ལྟར་འདུས་བྱས་རྫུན་དུ་མཐོང ། །དེ་ལྟ་དེ་ལྟར་སྙིང་རྗེ་ཅན་དུ་འགྱུར། །མི་བདེན་ཉོན་མོངས་སྐྱེ་བོ་སྡུག་བསྔལ་ཏེ། །དེ་དག་ཐར་བར་བྱ་ཕྱིར་སྤྱད་པ་སྤྱོད། །ང་དང་ང་ཡི་ཞེས་ནི་རྣམ་བརྟགས་ནས། །བྱིས་པ་མི་མཉམ་པ་ལ་བརྩོན་པས་སྤྱོད། །ཆོས་དེ་ཡང་དག་མ་ཡིན་ཤེས་ནས་ནི། །ལྟ་བ་སྤང་པའི་ཕྱིར་ནི་ཆོས་ལ་སྤྱོད། །བདག་མེད་བདག་ཏུ་མི་སྡུག་སྡུག་པར་ཏེ། །སྡུག་བསྔལ་བདེ་བར་མི་རྟག་རྟག་པར་ཡང ། །སེམས་ལོག་སོ་སོའི་སྐྱེ་བོ་རྣམས་ལ་ནི། །འཁོར་བའི་སྔོན་གྱི་མཐའ་ཡང་ཡོད་མ་ཡིན། །དེ་དག་ལོག་པའི་སྦྱོར་བ་དེ་ཤེས་ནས། །འདི་ལ་སེམས་ཅན་མེད་དང་གང་ཟག་མེད། །གང་ལ་བདག་སྡུག་རྟག་བདེ་མེད་པ་ཡིན། །ཡང་དག་སྦྱོར་བ་ལ་ཡང་རྣམ་པར་སྒོམ། །འོད་སྲུང་དེ་ཡི་ཡོན་ཏན་འདི་བརྗོད་པ། །ས་ཡི་རྡུལ་ཕྲན་ཇི་བཞིན་ཕྱོགས་ཙམ་སྟེ། །བྱང་ཆུབ་སེམས་དཔའ་དེ་ཡི་སྤྱོད་ཡུལ་གང ། །དེ་དག་ཡེ་ཤེས་བསྔགས་པ་མཐའ་ཡས་སོ། །སྟོང་གསུམ་འཇིག་རྟེན་མཆོད་པ་ཅི་ཡོད་པ། །ཀུན་གྱིས་བྱང་ཆུབ་སེམས་དཔའ་དེ་ལ་མཆོད། །དེ་ལས་ལྷག་པར་ཡང་ནི་མཆོད་འོས་ཏེ། །རྒྱལ་བའི་ཐུགས་སྲས་དག་ནི་ཕྱིར་མི་ལྡོག་།གང་ 148b རྣམས་སངས་རྒྱས་འགྱུར་བར་བརྩོན་ལྡན་པ། །དེ་དག་གིས་ནི་ང་དང་མ་བྱོན་དང ། །གང་ཡང་མྱ་ངན་འདས་པའི་རྒྱལ་བ་དང ། །མ་ལུས་ཕྱོགས་བཞུགས་རིམ་གྲོར་བྱས་པར་འགྱུར། །དེ་ནས་ཚངས་པ་ཁྱད་པར་སེམས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་སྨྲས་སོ། །འཇམ་དཔལ། ཅི་ནས་ཆོས་ཀྱི་རྣམ་གྲངས་འདི་དེ་བཞིན་གཤེགས་པའི་ཕྱིན་གྱི་རླབས་ཀྱིས་ཕྱི་མའི་འདུས་ཕྱི་མའི་ཚེ་ལྔ་བརྒྱ་ཐ་མ་ལ་རབ་ཏུ་སྤྱོད་པ་དང ། རྒྱས་པར་འགྱུར་བར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་གསོལ་བ་ཐོབ་ཅིག་།དེ་སྐད་ཅེས་སྨྲས་པ་དང ། འཇམ་དཔལ་གཞོན་ནུར་གྱུར་པས་ཚངས་པ་ཁྱད་པར་སེམས་ལ་འདི་སྐད་ཅེས་སྨྲས་སོ། །ཚངས་པ། དེ་ཇི་སྙམ་དུ་སེམས། ཆོས་ཀྱི་རྣམ་གྲངས་འདི་ལ་ཆོས་གང་དེ་བཞིན་གཤེགས་པས་བྱིན་གྱིས་བརླབ་པར་བྱ་བའི་ཆོས་གང་ཡང་དེ་བཞིན་གཤེགས་པས་ཡོངས་སུ་བསྟན་ཏམ། སྨྲས་པ། འཇམ་དཔལ། དེ་ནི་མ་ཡིན་ནོ། །འཇམ་དཔལ་གྱིས་སྨྲས་པ། ཚངས་པ། དེ་ལྟ་བས་ན་འདི་ལ་བརྗོད་པ་མེད་པས་ན་ཆོས་ཐམས་ཅད་བྱིན་གྱིས་མ་བརླབས་པ་སྟེ། དེ་ནི་ནུབ་པར་མི་འགྱུར་ཞིང་བསྲུང་བར་བྱ་བ་མ་ཡིན་ནོ། །ཚངས་པ།་གང་ཆོས་གང་ལའང་བྱིན་གྱིས་བརླབ་པར་འདོད་པ་དེ་ནི་ནམ་མཁའ་བྱིན་གྱིས་བརླབ་པར་འདོད་དོ། །ཚངས་པ། བྱང་ཆུབ་སེམས་དཔའ་གང་ཆོས་གང་ཡང་ཁས་ལེན་ན་དེ་ནི་ 149a ༄#། །ཆོས་སྨྲ་བ་དེ་མ་ཡིན་ནོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་སྨྲ་བ་ཐམས་ཅད་ལས་ཕྱིར་ལྡོག་པ་ནི་རྩོད་པ་མེད་པ་ལྷུར་བྱེད་པ་མ་ཡིན་ནོ། །ཚངས་པ། བྱང་ཆུབ་སེམས་དཔའ་གང་དག་འདི་སྙམ་དུ་འཁོར་འདིར་ཆོས་བསྟན་ཏོ་སྙམ་དུ་སེམས་ན་དེ་དག་ལ་ཆོས་པ་མེད་དོ། །དེ་ཅིའི་ཕྱིར་ཞེ་ན། ཐོས་པ་མེད་པ་ནི་ཆོས་ཐོས་པའོ། །སྨྲས་པ།་འཇམ་དཔལ། ཐོས་པ་མེད་པ་ནི་ཆོས་ཐོས་པའོ་ཞེས་བྱ་བ་ཅི་ལས་བསམ་ཏེ་དེ་སྐད་ཟེར། སྨྲས་པ། ཚངས་པ། མིག་དང ། རྣ་བ་དང ། སྣ་དང ། ལྕེ་དང ། ལུས་དང ། ཡིད་ཀྱིས་ཐོས་པ་མེད་པ་ནི་ཆོས་ཐོས་པ་སྟེ། གང་སྐྱེ་མཆེད་དེ་དག་ནི་གཟུགས་དང ། སྒྲ་དང ། དྲི་དང ། རོ་དང ། རེག་དང ། ཆོས་ལ་མི་འཛིན་པ་དེ་དག་ནི་ཆོས་ཐོས་པའོ། །དེ་ནས་འཁོར་དེ་ནས་ལྷའི་བུ་སྟོང་ཕྲག་སུམ་ཅུ་རྩ་གཉིས་དང ། དགེ་སློང་སྟོང་ཕྲག་ལྔ་དང ། དགེ་སློང་མ་སུམ་བརྒྱ་དང ། དགེ་བསྙེན་བརྒྱད་བརྒྱད་དང ། དགེ་བསྙེན་མ་བརྒྱད་བརྒྱ་དེ་དག་ཐམས་ཅད་ཀྱིས་འཇམ་དཔལ་གྱིས་བསྟན་པ་འདི་ཐོས་ནས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་སྟེ། ཚིག་ཀྱང་འདི་སྐད་དུ། འཇམ་དཔལ། དེ་དེ་བཞིན་ནོ། །ཇི་སྐད་སྨྲས་པ་དེ་བཞིན་ཏེ།་ཐོས་པ་མེད་པ་ནི་ཆོས་ཐོས་པའོ་ཞེས་འཛེར་ཏོ། །དེ་ནས་ཚངས་པ་ཁྱད་པར་སེམས་ཀྱིས་བཟོད་པ་རབ་ཏུ་ཐོབ་པའི་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་སྨྲས་སོ། ། 149b ཁྱེད་ཀྱིས་ཆོས་ཀྱི་རྣམ་གྲངས་འདི་ཐོས་སམ། སྨྲས་པ། ཚངས་པ། ཐོས་པ་མེད་པའི་ཚུལ་གྱིས་ཐོས་སོ། །སྨྲས་པ། ཁྱོད་ཀྱིས་ཆོས་ཀྱི་རྣམ་གྲངས་འདི་ཇི་ལྟར་ཤེས། སྨྲས་པ། ཇི་ལྟར་ཤེས་པ་མེད་པ་དང ། རྣམ་པར་ཤེས་པ་མེད་པ་དེ་ལྟར་རོ། །སྨྲས་པ། ཁྱེད་ཀྱིས་ཆོས་གང་རབ་ཏུ་ཐོབ་པས་བཟོད་པ་རབ་ཏུ་ཐོབ་པར་འགྱུར། སྨྲས་པ། ཆོས་ཐམས་ཅད་རབ་ཏུ་ཐོབ་པ་མེད་པའི་ཕྱིར་རོ། ། སྨྲས་པ། ཆོས་ཀྱི་རྣམ་གྲངས་འདི་ཇི་ལྟར་རྟོགས་པར་བྱ། སྨྲས་པ། རྟོགས་པར་བྱ་བ་མེད་པའི་ཚུལ་གྱིས་སོ། །སྨྲས་པ། ཆོས་བསྟན་པ་འདི་ཁྱེད་ཀྱི་མངོན་སུམ་ཡིན་ནམ། སྨྲས་པ། ཚངས་པ། ཆོས་ཐམས་ཅད་བདག་དང ། གཞན་མེད་པའི་ཕྱིར་མངོན་སུམ་ཡིན་ནོ། །དེ་ནས་འཁོར་དེ་ཉིད་དུ་ལྷའི་བུ་དྲི་མ་མེད་ཏོག་ཅེས་བྱ་བ་འདུས་པར་གྱུར་པ་དེས་ཆངས་པ་ཁྱད་པར་སེམས་ལ་འདི་སྐད་ཅེས་སྨྲས་སོ། །ཚངས་པ། གང་ཆོས་ཀྱི་རྣམ་གྲངས་འདི་ལས་ཆུང་དུ་ན་ཉན་པར་འགྱུར་བ་དེ་དག་གལ་ཏེ་དེ་བཞིན་གཤེགས་པས་ལུང་མ་བསྟན་ཀྱང་ཁོ་བོས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ཅིའི་ཕྱིར་ཞེ་ན། ཚངས་པ། ཆོས་ཀྱི་རྣམ་གྲངས་འདི་ནི་འབྲས་བུ་དང་ས་བོན་ཆུད་མི་གཟོན་པའོ། །འཕགས་པ་ཡང་དག་པར་ཞུགས་པ་ཐམས་ཅད་ཀྱིས་ཡོངས་སུ་བཟུང་བའོ། །དགེ་བའི་རྩ་བ་ཐམས་ཅད་ཡང་དག་པར་བསྐྱེད་པའོ། །བདུད་དང་ཕྱིར་རྒོལ་བ་ཚར་གཅོད་པའོ། །བར་དུ་གཅོད་པ་ཐམས་ཅད་དང་ 150a ༄#། །བྲལ་བའོ། །དང་བ་སྐྱེ་བར་བྱེད་པའོ། །དད་པ་དང་ལྡན་པ་རྣམས་དགའ་ཞིང་མགུ་བར་བྱེད་པའོ། །སངས་རྒྱས་ཐམས་ཅད་ཀྱིས་ཤིན་ཏུ་ཡོངས་སུ་གཟུང་བའོ།། ཆོས་ཀྱི་རྣམ་གྲངས་འདི་ནི་ལྷ་དང་བཅས་པའི་འཇིག་རྟེན་གྱིས་ལེགས་པར་བསྲུངས་པའོ། །ཆོས་ཀྱི་རྣམ་གྲངས་འདི་ནི་གཅིག་ཏུ་ངེས་པ་སྟེ་ཕྱིར་མི་ལྡོག་པའོ། །ཆོས་ཀྱི་རྣམ་གྲངས་འདི་ནི་བྱང་ཆུབ་ཀྱི་སྙིང་པོ་ལ་མི་སླུ་བའོ། །ཆོས་ཀྱི་རྣམ་གྲངས་འདི་ནི་སངས་རྒྱས་ཀྱི་ཆོས་ཀྱི་རྣམས་ཀྱི་བདེན་པའི་འབྱུང་གནས་སོ། །ཆོས་ཀྱི་རྣམ་གྲངས་འདི་ནི་ཆོས་ཀྱི་འཁོར་ལོ་བསྐོར་བའོ། །ཆོས་ཀྱི་རྣམ་གྲངས་འདི་ནི་འགྱོད་པ་རྣམས་སེལ་བར་བྱེད་པའོ། །ཆོས་ཀྱི་རྣམ་གྲངས་འདི་ནི་འཕགས་པའི་ལམ་རྣམ་པར་སྤྱོང་བའོ། །ཆོས་ཀྱི་རྣམ་གྲངས་འདི་ནི་ཐར་བར་འདོད་པ་རྣམས་ཀྱིས་ལེགས་པར་ཐོས་པའོ། །ཆོས་ཀྱི་རྣམ་གྲངས་འདི་ནི་གཟུངས་འདོད་པ་རྣམས་ཀྱིས་ལེགས་པར་གཟུང་བའོ། །ཆོས་ཀྱི་རྣམ་གྲངས་འདི་ནི་བསོད་ནམས་འདོད་པ་རྣམས་ཀྱིས་ལེགས་པར་རབ་ཏུ་བསྟན་པའོ། །ཆོས་ཀྱི་རྣམ་གྲངས་འདི་ནི་ཆོས་འདོད་པ་རྣམས་ཀྱིས་ལེགས་པར་བསྲུང་བའོ། །ཆོས་ཀྱི་རྣམ་གྲངས་འདི་ནི་མྱ་ངན་ལས་འདས་པར་འགྲོ་བའི་ཕྱིར་གྲངས་མེད་པའོ། །ཆོས་ཀྱི་རྣམ་གྲངས་འདི་ནི་ཕ་རོལ་གྱི་རྒོལ་བ་དམིགས་པ་ཅན་གྱིས་མི་འཕྲོགས་པའོ། །ཆོས་ཀྱི་རྣམ་གྲངས་འདི་ནི་སྦྱིན་པར་འོས་པ་ 150b རྣམས་དང་མཐུན་པའོ། །ཆོས་ཀྱི་རྣམ་གྲངས་འདི་ནི་མཁས་པ་རྣམས་དགའ་བར་བྱེད་པའོ། །ཆོས་ཀྱི་རྣམ་གྲངས་འདི་ནི་ལྟ་བ་ངན་པ་དང་བྲལ་བས་ཤེས་རབ་བསྐྱེད་པའོ། །ཆོས་ཀྱི་རྣམ་གྲངས་འདི་ནི་གཏི་མུག་འཇོམས་པར་བྱེད་པས་ཡེ་ཤེས་བསྐྱེད་པའོ། །ཆོས་ཀྱི་རྣམ་གྲངས་འདི་ནི་ཡི་གེའི་ཚིག་ངེས་པས་ཤིན་ཏུ་ངེས་པའི་ཚིག་གོ་།ཆོས་ཀྱི་རྣམ་གྲངས་འདི་ནི་འབྲུ་འབྲེལ་པས་ལེགས་པར་བསྟན་པའོ། །ཆོས་ཀྱི་རྣམ་གྲངས་འདི་ནི་དོན་དམ་པ་ཡང་དག་པར་སྟོན་པས་དོན་ཡང་དག་པར་བསྐྱེད་པའོ། །ཆོས་ཀྱི་རྣམ་གྲངས་འདི་ནི་ཆོས་བརྗོད་པ་རྣམས་ཀྱིས་ཡོངས་སུ་མ་བཏང་བའོ། །ཆོས་ཀྱི་རྣམ་གྲངས་འདི་ནི་ཤེས་པ་དང་ལྡན་པ་རྣམས་ཀྱིས་མ་བོར་བའོ། །ཆོས་ཀྱི་རྣམ་གྲངས་འདི་ནི་ནོར་འདོད་པ་རྣམས་ཀྱི་གཏེར་རོ། །ཆོས་ཀྱི་རྣམ་གྲངས་འདི་ནི་ཀུན་ཏུ་གདུངས་པ་རྣམས་ཡོངས་སུ་གདུང་བ་མེད་པར་བྱེད་པའོ། །ཆོས་ཀྱི་རྣམ་གྲངས་འདི་ནི་བྱམས་པ་ལ་གནས་པ་རྣམས་ཀྱི་མཉམ་པ་ཉིད་བསྐྱེད་པའོ། །ཆོས་ཀྱི་རྣམ་གྲངས་འདི་ནི་ལེ་ལོ་ཅན་རྣམས་ཀྱིས་བརྩོན་འགྲུས་བསྐྱེད་པའོ། །ཆོས་ཀྱི་རྣམ་གྲངས་འདི་ནི་བརྗེད་ངས་པ་རྣམས་ཀྱི་བསམ་གཏན་བསྐྱེད་པའོ། །ཆོས་ཀྱི་རྣམ་གྲངས་འདི་ནི་ཤེས་རབ་འཆལ་པ་རྣམས་ལ་སྣང་བར་བྱེད་པའོ། །ཚངས་པ། ཆོས་ཀྱི་རྣམ་གྲངས་འདི་ལ་ནི་སངས་རྒྱས་ཀྱི་ཆོས་ཐམས་ཅད་ཤིན་ཏུ་ལེགས་པར་གནས་སོ། །དེ་ནས་ལྷའི་བུ་དེས་ཆོས་ཀྱི་རྣམ་གྲངས་འདིའི་བསྔགས་ 151a ༄#། །བ་བསྟན་པ་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རྣམ་པ་དྲུག་ཏུ་གཡོས་སོ། །བཅོམ་ལྡན་འདས་ཀྱིས་ཀྱང་ལྷའི་བུད་ལ་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ལ་ཚངས་པ་ཁྱད་པར་སེམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས། ལྷའི་བུ་འདིས་སྔོན་གྱི་ཡང་དག་པར་རྫོགས་པའི་སངས་རྒྱས་དག་ལས་སྔོན་ཆོས་ཀྱི་རྣམ་གྲངས་འདི་ཐོས་སམ། བཅོམ་ལྡན་འདས་ཀྱིས་བཀའ་སྩལ་པ། ཚངས་པ། ལྷའི་བུ་འདིས་སངས་རྒྱས་བྱེ་བ་ཁྲག་ཁྲིག་ཕྲག་དྲུག་ཅུ་རྩ་བཞི་ལས་ཆོས་ཀྱི་རྣམ་གྲངས་འདི་ཐོས་ཏེ། ཚངས་པ། ལྷའི་བུ་དྲི་མ་མེད་པའི་ཏོག་འདི་བསྐལ་པ་བརྒྱ་སྟོང་ཕྲག་བཞི་བཅུ་རྩ་གཉིས་ན་འཇིག་རྟེན་གྱི་ཁམས་རིན་ཆེན་ལྡན་དུ་དེ་བཞིན་གཤེགས་པ་རིན་ཆེན་བཀོད་པ་ཞེས་བྱ་བ་འཇིག་རྟེན་དུ་འབྱུང་བར་འགྱུར་རོ། །གང་ཡང་དེའི་བར་དུ་སངས་རྒྱས་འབྱུང་བ་དེ་དག་ཐམས་ཅད་ལའང་མཉེས་པར་བྱེད་པར་འགྱུར། བཀུར་སྟིར་བྱེད་པར་འགྱུར་ཏེ།་སངས་རྒྱས་བཅོམ་ལྡན་འདས་དེ་དག་ལས་ཆོས་ཀྱི་རྣམ་གྲངས་འདིའང་ཐོས་པར་འགྱུར་རོ། །ཚངས་པ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བསྙེན་མ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་གང་དག་གིས་ཀྱང་ཆོས་ཀྱི་རྣམ་གྲངས་འདི་ལ་བཟོད་པ་རབ་ཏུ་ཐོབ་པ་དེ་དག་ཐམས་ཅད་དེ་བཞིན་གཤེགས་པ་རིན་པོ་ཆེ་བཀོད་པའི་སངས་ 151b རྒྱས་ཀྱི་ཞིང་འཇིག་རྟེན་གྱི་ཁམས་རིན་ཆེན་ལྡན་དུ་སྐྱེ་བར་འགྱུར་རོ། །དེ་ནས་བཅོམ་ལྡན་འདས་ལ་ལྷའི་བུ་དྲི་མ་མེད་པའི་ཏོག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས། གང་བདག་ནི་བྱང་ཆུབ་མི་འཚལ། །མི་སྨོན། མངོན་པར་མི་དགའ། མངོན་པར་མ་ཆགས། མི་དམིགས། མི་སེམས། མི་རྟོག། རྣམ་པར་མི་རྟོག་ན། ཅིའི་སླད་དུ་བཅོམ་ལྡན་འདས་ཀྱིས་བདག་ལ་ལུང་བསྟན།་བཅོམ་ལྡན་འདས་ཀྱིས་བཀའ་སྩལ་པ། ལྷའི་བུ། འདི་ལྟར་སྐྱེས་བུ་ལ་ལ་ཞིག་གིས་རྩཝ་དང ། ཤིང་དང ། ཡལ་ག་དང ། ལོ་མ་དང ། འདབ་མ་དག་མེར་བཅུག་ནས་འདི་སྐད་དུ་རྩཝ་དང ། ཤིང་དང ། ཡལ་ག་དང ། ལོ་མ་དང ། འདབ་མ་དག་མ་ཚིག་ཅེས་སྨྲས་ན། དེ་དེའི་དབང་གིས་མི་འཚིག་པ་ཡིན་ནོ། །ལྷའི་བུ། དེ་བཞིན་དུ་འདི་ལྟར་བྱང་ཆུབ་སེམས་དཔའ་བྱང་ཆུབ་ལ་མངོན་པར་མི་དགའ། མངོན་པར་མ་ཆགས། མི་དམིགས། མི་འདོད། མི་སྨོན། མི་སེམས། རྣམ་པར་མི་རྟོག་ཀྱང་སངས་རྒྱས་ཐམས་ཅད་ལུང་སྟོན་ཏེ། ལྷའི་བུ། འོན་ཀྱང་བྱང་ཆུབ་སེམས་དཔའ་གང་བྱང་ཆུབ་ལ་མངོན་པར་མི་དགའ། མངོན་པར་མ་ཆགས། མི་དམིགས། མི་འདོད། མི་སྨོན། མི་སེམས། རྣམ་པར་མི་རྟོག་པ་དེ་ལ་དེ་བཞིན་གཤེགས་པ་རྣམས་ལུང་སྟོན་ཏོ། །དེ་ནས་འཁོར་དེར་ལྷའི་བུ་ལྔ་བརྒྱ་ཙམ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་ཀྱང་བྱང་ཆུབ་ལ་མངོན་པར་མི་དགའ། མངོན་ 152a ༄#། །པར་མི་ཆགས། མི་དམིགས། མི་འཚལ། མི་སྨོན། མི་རྟོག་།རྣམ་པར་མི་རྟོག་ན། ཅིའི་སླད་དུ་བཅོམ་ལྡན་འདས་ཀྱིས་བདག་ཅག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མི་བསྟན། དེ་ནས་སངས་རྒྱས་ཀྱི་མཐུས་སྟེང་གི་ཕྱོགས་ན་སྟེང་གི་བར་སྣང་ལ་སངས་རྒྱས་སྟོང་ཕྲག་བརྒྱད་ཅུ་རྩ་བཞི་མཐོང་སྟེ། དེ་བཞིན་གཤེགས་པ་དེ་དག་གིས་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བཅོམ་ལྡན་འདས་ལ་ལྷའི་བུ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས།་དེ་བཞིན་གཤེགས་པས་འདི་སྐད་དུ་བྱང་ཆུབ་སེམས་དཔའ་གང་བྱང་ཆུབ་ལ་མངོན་པར་མི་དགའ། མངོན་པར་མི་ཆགས། མི་དམིགས། མི་འདོད། མི་སྨོན། མི་སེམས།་མི་རྟོག་།རྣམ་པར་མི་རྟོག་པ་དེ་བྱང་ཆུབ་ཏུ་ལུང་བསྟན་པར་འགྱུར་རོ་ཞེས་ལེགས་པར་གསུངས་པ་འདི་ནི་ངོ་མཚར་ཏེ། བཅོམ་ལྡན་འདས། བདག་ཅག་གིས་སྟེང་གི་ཕྱོགས་ན་སངས་རྒྱས་སྟོང་ཕྲག་བརྒྱད་ཅུ་རྩ་བཞི་མཐོང་སྟེ། དེ་བཞིན་གཤེགས་པ་དེ་དག་ཐམས་ཅད་བདག་ཅག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏོ། །དེ་ནས་འཇམ་དཔལ་གཞོན་ནུར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། གང་སླད་མའི་དུས་ལྔ་བརྒྱ་ཐ་མ་ལ་ཛམྦུ་གླིང་འདིར་ཆོས་ 152b ཀྱི་རྣམ་གྲངས་འདི་རབ་ཏུ་སྤྱོད་པ་དང ། ཡུན་རིང་དུ་གནས་པར་འགྱུར་བ་དང ། རིགས་ཀྱི་བུ་དང ། རིགས་ཀྱི་བུ་མོ་གང་དག་གོ་ཆ་ཆེན་པོ་བགོས་པ་དག་གི་རྣ་ལམ་དུ་གདའ་བར་འགྱུར་བ་དང ། རིགས་ཀྱི་བུ་དང ། རིགས་ཀྱི་བུ་མོ་དེ་དག་བདུད་ཀྱི་ལས་སྐྱེས་ཤིང་བྱུང་བ་རྣམས་ཀྱི་དབང་དུ་མི་མཆི་བ་དང ། དེ་དག་བདུད་དམ། བདུད་ཀྱི་རིས་ཀྱི་ལྷ་དག་གིས་གླགས་རྙེད་པར་མི་འགྱུར་བ་དང ། ཆོས་ཀྱི་རྣམ་གྲངས་འདིས་ཡོངས་སུ་བཟུང་ཞིང་གོ་ཆ་ཆེན་པོ་བགོས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་མི་ཉམས་པར་བྱིན་གྱིས་བརླབ་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། འཇམ་དཔལ། དེ་བས་ན་ཆོས་ཀྱི་རྣམ་གྲངས་འདི་བྱིན་གྱིས་བརླབ་པ་དང་།ཡུན་རིང་དུ་གནས་པར་བྱ་བའི་ཕྱིར། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མི་འམ་ཅི་དང ། ལྟོ་འཕྱེ་ཆེན་པོ་དང ། གྲུལ་བུམ་འབེབས་པ་ཞེས་བྱ་བའི་རིག་པ་དང ། སྔགས་ཀྱི་ཚིག་འདི་བཤད་ཀྱིས་ཉོན་ཅིག། རིག་པ་དང ། སྔགས་ཀྱི་ཚིག་དེ་བཅངས་པས་རིགས་ཀྱི་བུའམ། རིགས་ཀྱི་བུ་མོ་ཆོས་སྨྲ་བ་དེ་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། གྲུལ་བུམ་རྣམས་ཀྱིས་ཡོངས་སུ་སྲུང་བ་རབ་ཏུ་ཐོབ་སྟེ། རིགས་ཀྱི་བུའམ། རིགས་ཀྱི་བུ་མོ་དེ་དག་ལམ་མམ། ལམ་ལོག་པར་སོང་ 153a ༄#། །ངམ།་གཙུག་ལག་ཁང་དུ་སོང་ངམ། གནས་ཁང་དུ་སོང་ངམ། འཆག་པ་ལ་ཞུགས་སམ། འཁོར་གྱི་ནང་དུ་སོང་ཡང་རུང་སྟེ་སྲུང་བར་བྱེད་དོ། །སྤོབས་པ་སྐྱེད་པར་བྱེད། དྲན་པ་དང ། བློ་གྲོས་དང ། རྟོག་པའི་སྟོབས་བསྐྱེད་པ་ཉེ་བར་སྦྱོར་ཏེ། དེ་ལ་ཕ་རོལ་གྱི་རྒོལ་བ་འམ། ཕས་ཀྱི་དགྲ་གླགས་ཚོལ་བ་དག་གིས་གླགས་ཀྱང་རྙེད་པར་མི་འགྱུར་རོ། །དེ་དྲན་ཞིང་ཤེས་བཞིན་དུ་ལྡང་བར་འགྱུར། འཆག་པར་འགྱུར། འདུག་པར་འགྱུར། ཉལ་བར་འགྱུར་རོ། །འཇམ་དཔལ། དེ་ལ་རིག་པ་དང ། སྔགས་ཀྱི་ཚིག་དེ་དག་གང་ཞེ་ན། འདི་ལྟ་སྟེ། ཨུད་དྷུ་རེ། དྷུ་དྷུ་རེ། མན་ཏེ། ཙ་ཏི་མ། གོ་ཙ་རི། ཤཱི་ལ་ལི། ཧི་ལི་མི་ལི། ཐི་ལི། ཐི་མི་ལི། ཧུ་ལུ་ཧུ་ལུ་ཧུ་ལུ། ཨེ་བད་ཏེ། བེ་ཏ་ཊེ། ཁ་ཁ་རེ། ཁ་རེ། ཁ་ར་ཀེ་།ཱ་སན་ནེ། ཛ་ག་ཏི། མ་ཧི་ལེ། མ་ནུ་ཥ། ཏ་ནེ་མ་ན་སེ་བ་ར་གན་དྷེ། སརྦ་རུ་ཏྲི། ར་བཱ་བ་ག་ཏི། སི་ན་དྷུ་ལེ། ན་མོ་བྷུད་དྷེ་བྷྱཿ ། ཙ་དི་ར་ཏེ། ན་མོ་དྷརྨཱ་ཡ་ནིརྒ་ཏ་ནི། ན་མཿ ་སཾ་གྷཱ་ཡ། བྷ་ཧི་ཏ་པཱ་བེ། བྱུ་པ་ཤཱནྟཱ་ནཻ། སརྦ་པཱ་པཱ་ནི་མཻ་ཏྲེ་མེ། སརྦ་བྷུ་དྷེ་བྷྱཿ ་ས་ཏྱ་ནི་ར་དེ་ཤ་བྲ་ཧྨ་པ་ཐོ། མཧཱ་རྀ་ཥི་བྷིཿ ། པྲཤཱསྟ་ཏ་ཏྲ་ཏྲིཥྛན་ཏི། སརྦ་བྷུ་ཏ་གྲཱ་ཧཱ། ན་མཿ ་སརྦ་བྷུདྡྷེ་བྷྱཿ ་སིདྷྱནྟུ་མེ་མནྟྲ་མེ་མནྟྲ་པ་དཱ་སཝཱཧཱ། འཇམ་དཔལ། རིག་པ་དང་སྔགས་ཀྱི་ཚིག་འདི་བྱང་ཆུབ་སེམས་དཔའ་གང་ཆོས་ཀྱི་རྣམ་གྲངས་འདི་ལ་བརྩོན་པ། རྟག་ཏུ་ཤེས་བཞིན་ 153b དང་ལྡན་པ། མི་རྒོད་པ། ཁེངས་པ་མེད་པ། སེམས་མ་གཡེངས་པ། ཀུན་ཏུ་སྤྱོད་པ་གཙང་བ། སྩོགས་པ་དང་བྲལ་བ། ཆོ་ག་ཤེས་པ། བས་མཐའི་གནས་མལ་ལ་མངོན་པར་དགའ་བ། འདུ་འཛི་ཉུང་བ། ལུས་དང ། སེམས་དབེན་པ། བྱམས་པ་དང ། སྙིང་རྗེ་ལ་མངོན་པར་དགའ་བ། ཆོས་ལ་དགའ་ཞིང་མོས་པ། བདེན་པའི་ཚིག་ལ་རབ་ཏུ་གནས་པ། མི་སླུ་བ། ནང་དུ་ཡང་དག་འཇོག་ལ་མངོན་པར་དགའ་བ། ཚུལ་བཞིན་ཡིད་ལ་བྱེད་པ་ལ་བརྩོན་པ། ཚུལ་བཞིན་མ་ཡིན་པ་ཡིད་ལ་བྱེད་པ་དང་བྲལ་བ། སྦྱངས་པའི་ཡོན་ཏན་དང ། ཡོ་བྱད་བསྙུངས་པ་ལ་མངོན་པར་དགའ་བ། རྙེད་པ་དང་མ་རྙེད་པ་ལ་སེམས་མཉམ་པ། མྱ་ངན་ལས་འདས་པ་ལ་མངོན་དུ་ཕྱོགས་པ། འཁོར་བས་འཇིགས་ཤིང་སྐྲག་པ། སྡུག་པ་དང ། མི་སྡུག་པ་ལ་སེམས་མཉམ་པ། འདུ་ཤེས་སྣ་ཚོགས་དང་བྲལ་བ། ལུས་དང ། སྲོག་འདོར་བ་དང ། དངོས་པོ་ཐམས་ཅད་ལ་མི་ལྟ་བ། སྤྱོད་པ་དང ། ཆོ་ག་ཕུན་སུམ་ཚོགས་པ། ཚུལ་ཁྲིམས་དང ། སྡོམ་པ་ལ་མངོན་པར་དགའ་བ། བཟོད་པ་དང ། དེས་པ་མང་བ། ངན་དུ་ཟེར་བ་བཟོད་པའི་རང་བཞིན་ཅན། བརྩོན་འགྲུས་བརྩམས་པ། སེམས་ཅན་ཐམས་ཅད་ཀྱི་བྱ་བ་ཅི་ཡོད་ཅེས་བྱ་བ་ལ་བརྩོན་པ། བཞིན་འཛུམ་པ། ཁྲོ་གཉེར་དང་བྲལ་བ། གསོང་པོར་སྨྲ་བ། ང་རྒྱལ་བཅོམ་པ། དེས་པ། འགྲོགས་ན་བདེ་བ། དེ་ལྟ་བུའི་སྤྱོད་པ་ལ་རབ་ཏུ་གནས་པའི་རིགས་ཀྱི་བུའམ། རིགས་ཀྱི་བུ་མོས། 154a ༄#། །འཇམ་དཔལ། སྔགས་ཀྱི་ཚིག་འདི་རབ་ཏུ་གདོན་པར་བྱའོ། །འཇམ་དཔལ། དེ་ལྟར་ན་ཆོས་སྨྲ་བ་དེ་ཚེ་འདི་ཉིད་ལ་སྟོབས་བསྐྱེད་པ་བཅུ་རབ་ཏུ་འཐོབ་བོ། ། བཅུ་གང་ཞེ་ན། མི་བརྗེད་པའི་ཆོས་ཉིད་པས་དྲན་པའི་སྟོབས་བསྐྱེད་པ་དང ། ཆོས་རབ་ཏུ་འབྱེད་པ་ལ་མཁས་པས་བློ་གྲོས་ཀྱི་སྟོབས་བསྐྱེད་པ་དང ། མདོ་སྡེའི་ཆུལ་ཁོང་དུ་ཆུད་པས་རྟོགས་པའི་སྟོབས་བསྐྱེད་པ་དང ། སྡོམ་པ་དང ། སྤྱོད་པ་མི་གཏོང་བས་དད་པའི་སྟོབས་བསྐྱེད་པ་དང ། བདག་དང ། གཞན་སྲུང་བས་ངོ་ཚ་ཤེས་ཤིང་ཁྲེལ་ཡོད་པའི་སྟོབས་བསྐྱེད་པ་དང ། ཤེས་རབ་ཡོངས་སུ་རྫོགས་པས་ཐོས་པའི་སྟོབས་བསྐྱེད་པ་དང ། ཐོས་པ་ཐམས་ཅད་ཡོངས་སུ་འཛིན་པས་གཟུངས་ཀྱི་སྟོབས་བསྐྱེད་པ་དང ། སངས་རྒྱས་ཀྱི་བྱིན་གྱིས་ཡོངས་སུ་བཟུང་བས་སྤོབས་པའི་སྟོབས་བསྐྱེད་པ་དང ། མངོན་པར་ཤེས་པ་ལྔ་རབ་ཏུ་ཐོབ་པས་ཟབ་མོའི་སྟོབས་བསྐྱེད་པ་དང ། མྱུར་དུ་ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པས་མི་སྐྱེ་བའི་ཆོས་ལ་བཟོད་པའི་སྟོབས་བསྐྱེད་པ་སྟེ། འཇམ་དཔལ། སྤྱོད་པ་ལ་ཞུགས་པའི་ཆོས་སྨྲ་བ་གང་རིག་པ་དང ། སྔགས་ཀྱི་ཚིག་འདི་རབ་ཏུ་འདོན་པ་དེ་ནི་སྟོབས་བསྐྱེད་པ་དེ་བཅུ་རབ་ཏུ་ཐོབ་པར་འགྱུར་རོ། །རིག་པ་དང ། སྔགས་ཀྱི་ཚིག་བསྟན་པ་འདི་བཅོམ་ལྡན་འདས་ཀྱིས་བཤད་པའི་ཚེ་རྒྱལ་པོ་ཆེན་པོ་བཞི་སྐྲག་ 154b ཅིང་བ་སྤུ་ལངས་པར་གྱུར་ཏེ། གཡོག་བརྒྱ་སྟོང་ཕྲག་དུ་མ་དང ། བཅོམ་ལྡན་འདས་ག་ལ་བ་དེར་དོང་ནས་ཕྱིན་པ་དང ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་རྒྱལ་པོ་ཆེན་པོ་བཞི་པོ་འདི་དག་ནི། རྒྱུན་དུ་ཞུགས་པ། དེ་བཞིན་གཤེགས་པའི་བཀའ་སྒྲུབ་པར་བགྱིད་པ་སྟེ། གཉེན་བཤེས་དང་བཅས། འཁོར་དང་བཅས་པས་རིགས་ཀྱི་བུ་དང ། རིགས་ཀྱི་བུ་མོ་ཆོས་སྨྲ་བ་དང ། ཆོས་སྟོན་པ་གང་མདོ་སྡེ་འདི་ལྟ་བུ་འདི་འཆང་བ་དང ། ཀློག་པ་དེ་དག་ལ།་བཅོམ་ལྡན་འདས། བདག་ཅག་རྒྱལ་པོ་བཞིས་བསྲུང་བ་དང ། བསྐྱབ་པ་དང ། སྦ་བར་བགྱིའོ། །དེ་དག་གྲོང་ངམ། གྲོང་ཁྱེར་རམ། ལྗོངས་སམ། ལྗོངས་ཀྱི་ཕྱོགས་གང་ན་གནས་ཀྱང་རུང ། ཁྱིམ་པའམ། རབ་ཏུ་བྱུང་བའང་རུང་སྟེ། བཅོམ་ལྡན་འདས། བདག་ཅག་རྒྱལ་པོ་བཞི་སྟོབས་དང་བཅས། འཁོར་དང་བཅས་པས་རིགས་ཀྱི་བུའམ། རིགས་ཀྱི་བུ་མོ་དེ་དག་གི་རིམ་གྲོ་བགྱི་བར་བདག་ཅག་སྤྲོའོ། །བསྲུང་བ་དང ། བསྐྱབ་པ་དང ། སྤྲོ་བ་དང ། སྤོབས་པ་དང ། གཞན་གྱིས་གནོད་པར་མི་བགྱི་ཞིང་མི་གཙེ་བར་བགྱི་བའི་སླད་དུ་བདག་ཅག་སྤྲོའོ། །བཅོམ་ལྡན་འདས། ཕྱོགས་གང་ན་ཆོས་ཀྱི་རྣམ་གྲངས་འདི་རབ་ཏུ་སྤྱོད་པར་འགྱུར་བའི་ས་ཕྱོགས་དེར་དཔག་ཚད་བརྒྱ་ཁོ་ར་ཁོར་ཡུག་ཏུ་ལྷའམ། ཀླུའམ། 155a ༄#། །གནོད་སྦྱིན་ནམ། གྲུལ་བུམ་གྱིས་གླགས་མི་རྙེད་དོ། །དེ་ནས་རྒྱལ་པོ་ཆེན་པོ་འཕགས་སྐྱེས་པོས་ཚིགས་སུ་བཅད་པ་འདི་སྐད་ཅེས་གསོལ་ཏོ། ། བདག་ལ་བུ་དང་གཉེན་བཤེས་དང ། །བྲན་དང་འཁོར་རྣམས་ཅི་མཆིས་པ། །དེ་དང་བདག་ཅག་གྲོགས་བཅས་པས། །བདག་པོ་དེ་དག་རིམ་གྲོ་བགྱི། །དེ་ནས་རྒྱལ་པོ་ཆེན་པོ་མིག་མི་བཟང་གིས་ཚིགས་སུ་བཅད་པ་འདི་སྐད་ཅེས་གསོལ་ཏོ། །བདག་ནི་ཆོས་ཀྱི་རྒྱལ་པོའི་སྲས། །ཆོས་ལས་སྐྱེས་པ་ཆོས་ཀྱི་སྤྲུལ། །ཁྱོད་ཀྱི་སྲས་གང་བྱང་ཆུབ་ཏུ། །ཞུགས་པ་དེ་དག་རིམ་གྲོ་བགྱི། ། དེ་ནས་རྒྱལ་པོ་ཆེན་པོ་ཡུལ་འཁོར་སྲུང་གིས་ཚིགས་སུ་བཅད་པ་འདི་སྐད་ཅེས་གསོལ་ཏོ། །སངས་རྒྱས་གསུངས་པའི་མདོ་སྡེ་འདི། །གང་དག་འཛིན་པར་འགྱུར་བ་རྣམས། །དེ་དག་ཕྱོགས་བཅུ་རྣམས་སུ་ཡང ། །བདག་གིས་ཀུན་ཏུ་བསྲུང་བར་བགྱི། །དེ་ནས་རྒྱལ་པོ་ཆེན་པོ་རྣམ་ཐོས་ཀྱི་བུས་ཚིགས་སུ་བཅད་པ་འདི་སྐད་ཅེས་གསོལ་ཏོ། །གང་དག་བྱང་ཆུབ་ཕྱིར་བརྩོན་པ། ། དེ་ལ་ཅི་འདྲ་འོས་པ་ཡི། །དེ་འདྲའི་མཆོད་པར་བགྱི་བ་ནི། །སེམས་ཅན་ཀུན་གྱིས་མི་ནུས་སོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་རྣམ་ཐོས་ཀྱི་བུ་བདེན་པའི་ཟླ་བ་ཞེས་བྱ་བ་དེས་རིན་པོ་ཆེ་སྣ་བདུན་ལས་བྱས་པའི་གདུགས་གསོལ་ནས་ཚིགས་སུ་བཅད་པ་འདི་སྐད་ཅེས་གསོལ་ཏོ། །དེ་བཞིན་གཤེགས་ལས་བདག་ཉིད་ཀྱིས། །ཆོས་ཀྱི་རྣམ་གྲངས་གཟུང་བར་བགྱི།། 155b ཕ་རོལ་ལ་ཡང་བསྟན་པར་བགྱི། །བདག་གི་བསམ་པ་དེ་འདྲའོ། །བཅོམ་ལྡན་འདས་ཀྱིས་བདག་སེམས་དང ། །སྔོན་གྱི་སྤྱོད་པ་ཅི་འདྲ་མཁྱེན། །ཇི་ལྟར་བདག་གི་སེམས་འདུད་པ། །བདག་ནི་འཇིག་རྟེན་རྣམས་འདྲེན་གྱུར། །སངས་རྒྱས་དཔག་མེད་སྐྱོབ་པ་ལ། །བདག་གིས་གདུགས་འདི་ཕུལ་བ་ཡིས། །བདག་ནི་ཐུབ་པ་ཁྱོད་འདྲ་བར། །སྤྱི་གཙུག་ལྟར་ཡང་མི་གདར་འགྱུར། །སངས་རྒྱས་སྐྱེས་བུ་དམ་པ་ཡང ། །བདག་གི་བྱམས་པས་བལྟས་པ་ཡིས། །ཡོངས་སུ་དག་པའི་མིག་ཐོབ་སྟེ། །རྒྱལ་བ་མ་ཕམ་བལྟ་བར་བགྱི། །ཡེ་ཤེས་ཕ་རོལ་ཕྱིན་པ་ཡི། །སྟོན་པས་དེ་ནས་ལུང་བསྟན་ཏེ། ། ཁྱོད་ནི་འདི་ནས་ཕྱི་དུས་ན། །དགའ་ལྡན་དུ་ཡང་སྐྱེ་བར་འགྱུར། །དགའ་ལྡན་ནས་ནི་ཤི་འཕོས་ནས། །རྒྱལ་བ་བྱམས་པ་མཐོང་བར་འགྱུར། །བསྐལ་པ་སྟོང་ཕྲག་ཉི་ཤུར་ནི། །མཆོད་པ་བྱས་ནས་འབྱུང་བར་འགྱུར། །ཁྱོད་ནི་རབ་ཏུ་བྱུང་ནས་ཀྱང ། །ཚངས་པར་སྤྱད་པ་རབ་སྤྱད་དེ། །བསྐལ་པ་བཟང་འདིར་གང་བྱུང་བ། །བདག་པོ་དེ་དག་མཐོང་བར་འགྱུར། །ཐམས་ཅད་ལ་ཡང་མཆོད་བྱས་ཏེ། །ཚངས་པར་སྤྱོད་པ་སྤྱད་ནས་ནི། བསྐལ་པ་བྱེ་བ་དྲུག་ཅུ་ན། །དེ་ནས་ཁྱོད་ནི་སངས་རྒྱས་འགྱུར། །སངས་རྒྱས་ཞིང་ནི་ལེགས་བརྒྱན་པ། །རིན་ཆེན་གདུགས་ཞེས་བྱ་བར་ནི། བྱང་ཆུབ་སེམས་དཔའ་ཤ་སྟག་ལ། །ཁྱོད་ནི་ཆོས་རྣམས་སྟོན་པར་འགྱུར། །ཚེ་ཡི་ཚད་ནི་བསྐལ་པར་འགྱུར། །སེམས་ཅན་རྣམས་ལ་ཕན་པའི་ཕྱིར། །མྱ་ངན་འདས་པའི་དམ་ཆོས་ཀྱང ། ། 156a ༄#། །མ་འདྲེས་བསྐལ་པ་བྱེད་དུ་གནས། །དེ་ནས་བཅོམ་ལྡན་འདས་ལ་ལྷའི་དབང་པོ་བརྒྱ་བྱིན་གཡོག་བརྒྱ་སྟོང་ཕྲག་དུ་མ་དང་བཅས་པས་འདི་སྐད་ཅེས་གསོལ་ཏོ། ། བཅོམ་ལྡན་འདས། བདག་གིས་ཀྱང་ཆོས་སྨྲ་བ་མདོ་སྡེ་འདི་འཆང་བ་དེ་དག་བསྲུང་བ་དང ། ཡོངས་སུ་བསྲུང་བར་བགྱིའོ། །བསྙེན་བཀུར་དང ། རིམ་གྲོའང་བགྱིའོ། །གང་ན་ཆོས་ཀྱི་རྣམ་གྲངས་འདི་ཡི་གེར་འདྲི་བའམ། ཀློག་པ་དེར་ཅི་ནས་ཀྱང་ཆོས་སྨྲ་བ་དེའི་སྟོབས་དང ། མཐུ་དང ། ཆོས་ཀྱི་མཚམས་སྦྱོར་བ་སྤོབས་པར་འགྱུར་བར་བདག་འཁོར་དང་བཅས་ཏེ་ཆོས་ཉན་དུ་མཆིའོ། །དེ་ནས་ལྷའི་དབང་པོ་བརྒྱ་བྱིན་གྱི་བུ་སྤེད་བྱེད་ཅེས་བྱ་བ་དེས་དོ་ཤལ་རིན་པོ་ཆེ་ཐམས་ཅད་ཀྱིས་སྤྲས་པ་དེ་བཞིན་གཤེགས་པ་ལ་ཕུལ་ནས་ཚིགས་སུ་བཅད་པ་འདི་དག་གསོལ་ཏོ། །ཐུབ་པ་བདག་འདིར་མངོན་སུམ་སྟེ། །ཇི་ལྟར་ཁྱོད་ཀྱིས་སྔོན་སྤྱད་པ། །དེ་བཞིན་བདག་ཀྱང་སངས་རྒྱས་ཀྱི། །ཡེ་ཤེས་ཚོལ་བས་བསྒྲུབ་པར་བགྱི། །ཁྱོད་ཀྱིས་སྔོན་ཆད་མ་སྩལ་ཅིང ། །ཡོངས་སུ་མ་བཏང་ཅི་མ་མཆིས། །བདོག་པ་ཐམས་ཅད་གཏོང་བ་ཡི། །བདག་ཀྱང་རྗེས་སུ་བསླབ་པར་བགྱི། །ཁྱོད་ཀྱི་མདོ་སྡེ་འདི་ཡང་ནི། །འཇིག་རྟེན་མགོན་ལས་མངོན་དུ་བླངས། །ཡང་དང་ཡང་དུ་བཤད་པར་བགྱི། །བདག་པོ་ཁྱོད་ལ་བགྱིས་པར་གཟོ། །མདོ་སྡེ་འདི་ལ་སུ་དགའ་བ། །དེ་དག་བདག་གི་སྟོན་པ་འདྲ། །བདག་ནི་སངས་རྒྱས་ཆོས་འཚལ་ 156b བས། །དེ་ལ་རྟག་ཏུ་རིམ་གྲོ་བགྱིད། །དམ་པའི་ཆོས་རྣམས་ཡོངས་སུ་བསྲུང ། །མགོན་པོ་ཉན་ཐོས་མི་ནུས་ཏེ། །ཕྱི་དུས་འཇིག་པ་ཆེན་པོའི་ཚེ། །བདག་གིས་ཡོངས་སུ་བསྲུང་བར་བགྱི། །མགོན་པོ་བདག་ཀྱང་དབུགས་དབྱུང་གསོལ། །ལྷ་རྣམས་ཐེ་ཚོམ་གཅད་དུ་གསོལ། །ཐུབ་པ་ཁྱུ་མཆོག་ཁྱོད་འདྲ་བར། །ཇི་སྲིད་ཡུན་གྱིས་འགྲུབ་པར་འགྱུར། །ཀུན་མཁྱེན་ཡེ་ཤེས་མཁས་པ་ཡི། །བདེ་བར་གཤེགས་པས་དེ་ལུང་བསྟན། །ང་ནི་ཅི་འདྲ་དེ་འདྲ་བར། །ཁྱོད་ཀྱང་རྫོགས་པའི་སངས་རྒྱས་འགྱུར། །བསྐལ་པ་བྱེ་བ་ཕྲག་སྟོང་དང ། །བསྐལ་པ་བྱེ་བ་བརྒྱ་ཡི་ཚེ། །འཇིག་རྟེན་དུ་ནི་སངས་རྒྱས་འགྱུར། །མིང་ནི་ཡེ་ཤེས་འབྱུང་ཞེས་བྱ། །བྱང་ཆུབ་ཞི་བ་ཐོབ་ནས་ཀྱང ། བདུད་རྣམས་རབ་ཏུ་བཏུལ་ནས་ནི། །སེམས་ཅན་བྱེ་བ་བརྒྱ་སྟོང་རྣམས། །བྱང་ཆུབ་ལ་ཡང་འགོད་པར་འགྱུར། །དེ་ནས་མི་མཇེད་ཀྱི་བདག་པོ་ཚངས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་བསམ་གཏན་ལ་གནས་པའང་བཏང་སྟེ། རིགས་ཀྱི་བུའམ། རིགས་ཀྱི་བུ་མོ་གང་ཆོས་ཀྱི་རྣམ་གྲངས་འདི་ཡང་དག་པར་སྟོན་པ་དེ་ལ་ཆོས་ཉན་དུ་མཆིའོ། །དེ་ཅིའི་སླད་དུ་ཞེ་ན། བརྒྱ་བྱིན་དང ། ཚངས་པ་ནི་འདི་ལས་སྐྱེས་ཏེ། བཅོམ་ལྡན་འདས། བདག་རིགས་ཀྱི་བུའམ། རིགས་ཀྱི་བུ་མོ་དེ་དག་ལ་བསྙེན་བཀུར་དང ། རིམ་གྲོ་བགྱི་བར་སྤྲོའོ། །དེ་དག་ནི་ལྷ་དང་བཅས་པའི་འཇིག་རྟེན་གྱིས་རིམ་གྲོ་བགྱི་བ་དང ། མཆོད་ 157a ༄#། །པར་འོས་པ་ལགས་སོ། །དེ་ནས་ཚངས་པ་མི་མཇེད་ཀྱི་བདག་པོས་བཅོམ་ལྡན་འདས་ལ་ཚིགས་སུ་བཅད་པ་འདི་སྐད་ཅེས་གསོལ་ཏོ། །དགེ་སློང་དང་ནི་དགེ་སློང་མ། །དགེ་བསྙེན་དང་ནི་དགེ་བསྙེན་མ། །གང་རྣམས་མདོ་སྡེ་འདི་འཛིན་པ། །སྐྱེ་བོ་ཀུན་གྱི་མཆོད་རྟེན་དེ། །གལ་ཏེ་མདོ་སྡེ་འདི་ལ་ནི། །སེམས་ཅན་གཅིག་འགའ་བཙུད་ན་ཡང ། །འགྲོ་བའི་མགོན་པོ་བདག་སྤྲོའོ། །ཆོས་སྨྲ་བ་ནི་དེ་དག་ལ། །ཁྲི་སྟན་གང་ལ་དེ་མཆིས་ཏེ། །མདོ་སྡེ་འདི་ནི་རབ་སྟོན་པར། །ཚངས་པའི་འཇིག་རྟེན་མན་ཆད་དུ། །མེ་ཏོག་དགྲམ་པར་བདག་སྤྲོའོ། །གང་གི་ལག་ནས་མདོ་སྡེ་འདི། །ཕྱི་མའི་དུས་ན་ཐོས་པར་འགྱུར། །དེ་ལ་ཨ་ལ་ལ་ཞེས་ནི། །ལེགས་སྨྲས་ལེགས་ཞེས་བརྗོད་པར་བགྱི། ། གང་ན་མདོ་སྡེ་འདི་མཆིས་པར། །མེ་ཡི་ཕུང་པོས་གང་བ་ཡི། །བྱེ་བ་སྙེད་ཀྱིས་ཞིང་བརྒལ་ནས། །སྐྱོ་མི་འཚལ་བར་མཆི་བར་བགྱི། །རིན་ཆེན་ཕུང་པོ་རི་རབ་ཙམ། །དགའ་བཞིན་དུ་ནི་ཕུལ་ནས་ཀྱང ། །སངས་རྒྱས་ཀྱི་ཡང་ལམ་སྦྱོང་བ། །མདོ་སྡེ་འདི་ནི་མཉན་པར་བགྱི། །དེ་ནས་བཅོམ་ལྡན་འདས་ཀྱིས་དེའི་ཚེ་རྫུ་འཕྲུལ་མངོན་པར་འདུ་བྱ་བ་འདི་ལྟ་བུ་མཛད་དེ།། རྫུ་འཕྲུལ་མངོན་པར་འདུ་བྱ་བ་ཇི་ལྟ་བུར་མངོན་པར་འདུས་བྱས་པས་བདུད་སྡིག་ཏོ་ཅན་དཔུང་གི་སྟོབས་བཞི་དང ། བཅོམ་ལྡན་འདས་ག་ལ་བ་དེར་དོང་སྟེ་ལྷགས་པ་དང ། བཅོམ་ 157b ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་ཅག་དཔུང་དང་བཅས། གཡོག་དང་བཅས་པ་འདི་དག་དེ་བཞིན་གཤེགས་པའི་སྤྱན་སྔར་དམ་བཅས་ཏེ། གང་ན་ཆོས་ཀྱི་རྣམ་གྲངས་འདི་རབ་ཏུ་སྤྱོད་པར་འགྱུར་བའི་ལྗོངས་ཀྱི་ཕྱོགས་དེར་ཆོས་ཉན་པ་དང ། ཆོས་སྨྲ་བ་དག་ལ་བདུད་ཀྱི་ལས་མི་བགྱིད་པའི་སྟེང་དུ་བསྲུང་བ་དང ། བསྐྱབ་པ་དང ། སྦ་བར་ཡང་བགྱིའོ། །དེ་ནས་བཅོམ་ལྡན་འདས་ཀྱིས་འོད་གསེར་གྱི་ཁ་དོག་ལྟ་བུས་སངས་རྒྱས་ཀྱི་ཞིང་འདི་ཁྱབ་པར་མཛད་དེ། འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ། འདི་ལྟ་སྟེ། སྐྱེས་བུ་དམ་པ་དམ་པའི་ཆོས་ཡོངས་སུ་འཛིན་པ་དེ་དག་གི་དམ་པའི་ཆོས་ཡོངས་སུ་གཟུང་བར་བྱ་བའི་ཕྱིར་ཆོས་ཀྱི་རྣམ་གྲངས་འདི་དེ་བཞིན་གཤེགས་པས་བྱིན་གྱིས་བརླབས་སོ། །འཇམ་དཔལ། ཆོས་ཀྱི་རྣམ་གྲངས་འདི་ཡུན་ཇི་སྲིད་དུ་ཛམྦུ་གླིང་འདིར་སྤྱོད་པར་འགྱུར་བ་ཡུན་དེ་སྲིད་དུ་དམ་པའི་ཆོས་ནུབ་པར་མི་འགྱུར་རོ། །དེ་ནས་འཁོར་དེ་དག་ཐམས་ཅད་དགའ་མགུ་རངས་ཡིད་བདེ་བར་གྱུར་ནས་སྤོས་ཐམས་ཅད་དང ། ཕྲེང་བ་ཐམས་ཅད་དང ། བྱུག་པ་ཐམས་ཅད་དང ། མེ་ཏོག་ཐམས་ཅད་དང ། ཕྱེ་མ་ཐམས་ཅད་ཀྱིས་དེ་བཞིན་གཤེགས་པ་ལ་མངོན་པར་གཏོར་ནས་ཚིག་ཀྱང་འདི་སྐད་དུ། ཨེ་མའོ། ཆོས་ཀྱི་རྣམ་གྲངས་འདི་ཛམྦུའི་གླིང་ན་ཡུན་རིང་དུ་གནས་པ་དང ། རྒྱས་པར་ 158a ༄#། །གྱུར་ཅིག་ཅེས་འཛེར་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་བཟུང་ངམ། གསོལ་པ། བཅོམ་ལྡན་འདས། བདག་གིས་བཟུང་ངོ ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེ་ལྟ་བས་ན་ཆོས་ཀྱི་རྣམ་གྲངས་འདི་གཟུང་བ་དང ། བཅང་བ་དང ། བཀླགས་པ་དང ། ཡང་དག་པར་རབ་ཏུ་བསྟན་པའི་ཕྱིར་ཁྱོད་ལ་ཡོངས་སུ་གཏད་དོ། །གསོལ་པ། བཅོམ་ལྡན་འདས། གང་ཆོས་ཀྱི་རྣམ་གྲངས་འདི་འཛིན་ཏམ། འཆང་ངམ། ཀློག་གམ། གཞན་དག་ལ་སྟོན་ཏམ། ཡི་གེར་བྲིས་པ་ལ་མཆོད་པ་བགྱིད་ན་དེ་བསོད་ནམས་ཇི་ཙམ་ཞིག་བསྐྱེད་པར་འགྱུར། །བཅོམ་ལྡན་འདས་ཀྱིས་བཀའ་སྩལ་པ།་ཡི་གེ་དང ། ངེས་པའི་ཚིག་ཇི་སྙེད་ཀྱིས་ཆོས་ཀྱི་རྣམ་གྲངས་འདི་བསྟན་པ་དེ་སྙེད་ཀྱི་དེ་བཞིན་གཤེགས་པ་དགེ་སློང་གི་དགེ་འདུན་དང་བཅས་པ་ལ་བདེ་བའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་བས། གང་གིས་ཆོས་ཀྱི་རྣམ་གྲངས་འདི་འཛིན་པ་དང ། བཟུང་ནས་ཀྱང་གཞན་ལ་སྟོན་པ་དང ། ཀློག་པ་དེ་ནི་དེ་བས་ཆེས་བསོད་ནམས་མང་དུ་བསྐྱེད་དོ། །ཀུན་དགའ་བོ། གང་གིས་དམ་པའི་ཆོས་ཡུན་རིང་དུ་གནས་པར་བྱ་བའི་ཕྱིར་ཆོས་ཀྱི་རྣམ་གྲངས་འདི་གླེགས་བམ་དུ་བྲིས་ཏེ། མཆོད་ན་དེས་ཚེ་འདི་ཉིད་ལ་གཏེར་འཐོབ་པ་བཅུ་ 158b འཐོབ་བོ། །བཅུ་གང་ཞེ་ན། སངས་རྒྱས་ཀྱི་སྤྱན་རབ་ཏུ་ཐོབ་པས་སངས་རྒྱས་མཐོང་བའི་གཏེར་དང ། ལྷའི་རྣ་བ་རབ་ཏུ་ཐོབ་པས་ཆོས་ཉན་པའི་གཏེར་དང ། ཕྱིར་མི་ལྡོག་པའི་དགེ་འདུན་རབ་ཏུ་ཐོབ་པས་དགེ་འདུན་མཐོང་བའི་གཏེར་དང ། རིན་པོ་ཆེའི་ལག་པ་རབ་ཏུ་ཐོབ་པས་ཟད་མི་ཤེས་པའི་ལོངས་སྤྱོད་ཀྱི་གཏེར་དང ། མཚན་དང ། དཔེ་བྱད་བཟང་པོ་ཡོངས་སུ་རྫོགས་པས་གཟུགས་ཀྱི་གཏེར་དང ། གཡོག་མི་ཕྱེད་པས་གཡོག་གི་གཏེར་དང ། གཟུངས་རབ་ཏུ་ཐོབ་པས་ཐོས་པའི་གཏེར་དང ། སྤོབས་པ་རབ་ཏུ་ཐོབ་པས་དྲན་པའི་གཏེར་དང ། ཕ་རོལ་ཀྱི་རྒོལ་བ་ཚར་གཅོད་པས་མི་འཇིགས་པའི་གཏེར་དང ། སེམས་ཅན་ཐམས་ཅད་ཉེ་བར་འཚོ་བས་བསོད་ནམས་ཀྱི་གཏེར་རོ། །ཡང་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་འདི་བསྟན་པ་ན་བྱང་ཆུབ་སེམས་དཔའ་ས་ཡ་ཁྲག་ཁྲིག་ཕྲག་བདུན་ཅུ་རྩ་གཉིས་ཀྱིས་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པར་གྱུར་ཏོ། །སེམས་ཅན་དཔག་ཏུ་མེད་པ་བྱང་ཆུབ་ལ་རབ་ཏུ་ཞུགས་སོ། །སེམས་ཅན་ཚད་མེད་པའང་ལེན་པ་མེད་པར་རྣམ་པར་གྲོལ་ལོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ།། བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེའི་ཕྱིར་ཁྱོད་ཀྱིས་ཆོས་ཀྱི་རྣམ་ 159a ༄#། །གྲངས་འདིའི་མིང་ཆོས་ཐམས་ཅད་ཡང་དག་པར་འདུ་བ་ཞེས་བྱ་བར་ཡང་ཟུངས་ཤིག་།སངས་རྒྱས་ཀྱི་རྒྱན་བཀོད་པ་ཞེས་བྱ་བར་ཡང་ཟུངས་ཤིག་།ཚངས་པ་ཁྱད་པར་སེམས་ཀྱིས་ཀུན་དྲིས་པ་ཞེས་བྱ་བར་ཡང་ཟུངས་ཤིག་།འཇམ་དཔལ་གྱིས་བསྟན་པ་ཞེས་བྱ་བར་ཡང་ཟུངས་ཤིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས།་འཇམ་དཔལ་གཞོན་ནུར་གྱུར་པ་དང ། ཚངས་པ་ཁྱད་པར་སེམས་དང ། བྲམ་ཟེ་ཤིང་སཱ་ལ་ཆེན་པོ་ལྟ་བུའི་བུ་མཉམ་པར་ཉིད་ལ་གནས་པ་དང ། བྱང་ཆུབ་སེམས་དཔའ་དྲ་བ་ཅན་གྱི་འོད་དང ། གནས་བརྟན་འོད་སྲུང་ཆེན་པོ་དང ། ཚེ་དང་ལྡན་པ་ཀུན་དགའ་བོ་དང ། ཕྱོགས་བཅུ་ནས་འདུས་པའི་བྱང་ཆུབ་སེམས་དཔའ་དེ་དག་དང ། ཉན་ཐོས་ཆེན་པོ་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་ཡི་རངས་ཏེ་མངོན་པར་བསྟོད་དོ། །འཕགས་པ་ཚངས་པ་ཁྱད་པར་སེམས་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་པྲ་བྷ་དང ། དྷརྨཱ་པཱ་ལ་དང ། ཛི་ན་མི་ཏྲ་དང ། ཞུས་ཆེན་གྱི་ལོ་ཙཱ་བ་བནྡེ་དྷརྨ་ཏཱ་ཤཱི་ལ་དང ། བར་ཞུས་ཀྱི་ལོ་ཙཱ་བ་བནྡེ་དེ་བེན་ཏྲ་རཀྵི་ཏ་དང ། ཀུ་མཱ་ར་རཀྵི་ཏ་ལ་སོགས་པས་ཞུས་ཤིང་གཏན་ལ་ཕབ་པ།། |