།།རྒྱ་གར་སྐད་དུ། ཨཱརྱ་ཀྵེ་མང་ཀ་ར་པ་རི་པྲྀཙྪཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ།་འཕགས་པ་བདེ་བྱེད་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཤཱཀྱའི་ཡུལ་སེར་སྐྱའི་གནས་ན་ཤཱཀྱ་རྣམས་ཀྱི་ཤིང་ནྱ་གྲོ་དྷའི་ཀུན་དགའ་ར་བ་ནས་དགེ་སློང་ལྔ་བརྒྱའི་དགེ་སློང་གི་དགེ་འདུན་ཆེན་པོ་དང་ཐབས་ 265a ༄#། །གཅིག་ཏུ་བཞུགས་སོ། །དེའི་ཚེ་ཤཱཀྱའི་བུ་བདེ་བྱེད་ཅེས་བྱ་བ་སེར་སྐྱའི་གནས་ཀྱི་གྲོང་ཁྱེར་ཆེན་པོ་ནས་བྱུང་སྟེ། ཤིང་ནྱ་གྲོ་དྷའི་ཀུན་ར་བ་ག་ལ་བ་དང།་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས་ཕྱོགས་གཅིག་ཏུ་འདུག་གོ་།དེ་ནས་ཤཱཀྱའི་བུ་བདེ་བྱེད་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་ཆོས་དུ་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར། ཚེགས་ཆུང་དུས་ཀྱང་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་མངོན་པར་སྒྲུབ་པར་བགྱིད། སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་མཆི་བར་བགྱིད། རྨོངས་པ་མ་མཆིས་པར་འགུམ་པའི་དུས་བགྱིད་པར་འགྱུར། སྐྱེས་ནས་ཀྱང་མངོན་པར་ཤེས་པ་ལྔ་དང་ལྡན་པར་འགྱུར། མི་ཁོམ་པ་ཐམས་ཅད་རྣམ་པར་སྤོང་ཞིང་ཁོམ་པ་འབྱོར་པ་ཐོབ་པར་འགྱུར། གཟུངས་ཀྱང་ཐོབ་པར་འགྱུར། སྤོབས་པ་ཐོགས་པ་མ་མཆིས་པ་དང་ཡང་ལྡན་པར་འགྱུར། ཕྱིར་མི་ལྡོག་པའི་ཆོས་དང་ལྡན་ཞིང་སྟོང་པ་ཉིད་ལ་ལྷག་པར་མོས་པར་ཡང་འགྱུར། རྟག་ཏུ་རབ་ཏུ་འབྱུང་བ་ལ་མངོན་པར་དགའ་བར་འགྱུར། ཁྱིམ་ 265b ན་གནས་ཀྱང་རྟག་ཏུ་ཚངས་པར་སྤྱོད་པ་ལ་མངོན་པར་དགའ་བར་འགྱུར་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཤཱཀྱའི་བུ་བདེ་བྱེད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ། ཁྱོད་དེ་བཞིན་གཤེགས་པ་ལ་དོན་འདི་ཡོངས་སུ་ཞུ་བར་སེམས་པ་ནི་རིགས་ཀྱི་བུ་ཁྱོད་སྐྱེ་བོ་མང་པོ་ལ་ཕན་པ་དང ། སྐྱེ་བོ་མང་པོ་ལ་བདེ་བ་དང ། འཇིག་རྟེན་ལ་སྙིང་བརྩེ་བ་དང ། སྐྱེ་བོ་ཕལ་པོ་ཆེའི་དོན་དང ། ལྷ་དང ། མི་རྣམས་ལ་ཕན་པ་དང ། བདེ་བའི་ཕྱིར་ཞུགས་པ་ཡིན་ཏེ། ལེགས་སོ། །ལེགས་སོ། །དེའི་ཕྱིར། རིགས་ཀྱི་བུ། ཁྱོད་ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་དོ། །བྱང་ཆུབ་སེམས་དཔའ་ཆོས་བཞི་དང་ལྡན་ན་ཇི་སྐད་སྨོས་པའི་ཡོན་ཏན་དེ་དག་རྗེས་སུ་འཐོབ་སྟེ། བཞི་གང་ཞེ་ན། རིགས་ཀྱི་བུ། འདི་ལ་བྱང་ཆུབ་སེམས་དཔའ་བཟོད་པའི་སྟོབས་དང་ལྡན་ཞིང་བཟོད་པ་ལ་གནས་པ་དེ་ཕ་རོལ་གཤེའང་སླར་མི་གཤེ་བ་དང ། བརྡེགས་ཀྱང་སླར་མི་རྡེག་པ་དང ། མཚང་བྲུས་ཀྱང་སླར་མཚང་མི་འབྲུ་བ་དང ། ཁྲོས་ཀྱང་སླར་མི་ཁྲོ་བ་སྟེ། རིགས་ཀྱི་བུ། ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་ཇི་སྐད་སྨྲས་པའི་ཡོན་ཏན་ཕུན་སུམ་ཚོགས་པའང་རྗེས་སུ་འཐོབ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ ། 266a ༄#། །བདེ་བར་གཤེགས་པས་དེ་སྐད་གསུངས་ནས་དེ་བཞིན་དུ་སྟོན་པས། གཞན་ཡང ། འདི་སྐད་ཅེས་བཀའ་སྩལ་ཏོ། །ཀུན་ཏུ་སྤྱོས་ཀྱང་གཤེ་བར་མི་བྱེད་ལ། །གནོད་བྱས་གཞན་ལ་དེ་ནི་གནོད་མི་བྱེད། །དེ་ནི་མི་ལུས་སྤང་བ་བྱས་ནས་ཀྱང ། །བྱང་ཆུབ་སེམས་དཔའ་ཡོན་ཏན་དེ་དག་འཐོབ། །སྡིག་པའི་ཚིག་རྣམས་རྟག་ཏུ་སྲུང་བྱེད་ཅིང ། སྡིག་པའི་སེམས་ཀྱི་དབང་དུ་མི་འགྲོ་ལ། །སྡིག་ལས་ལོག་སྟེ་འབྲས་བུ་དེ་ཐོབ་ནས། ཡེ་ཤེས་མཆོག་ཉིད་མྱུར་དུ་ཐོབ་པར་འགྱུར། །སྐྱེ་བོ་གང་དག་འཚོག་རུང་དགའ་བྱེད་ཅིང ། །ཁྲོ་གཏུམ་གནོད་པར་སེམས་པའི་སེམས་ལྡན་རྣམས། །སངས་རྒྱས་ཡེ་ཤེས་ཡོངས་སུ་སྤོངས་ནས་སུ། །མི་མཁས་དེ་དག་སྡུག་བསྔལ་མི་བཟད་ལྡན། །དེ་ལྟ་བས་ན་གཞན་ལ་མི་འཚོག་ཅིང ། །རྒྱུ་དང་མི་རྒྱུ་རྣམས་ལ་དབྱུག་པ་སྤང ། །སེམས་ཅན་ཀུན་ལ་ཕན་ཞིང་སྙིང་བརྩེར་ལྡན། །དེས་འདིར་ཡེ་ཤེས་དམ་པ་མྱུར་དུ་འཐོབ། །སྐྱེ་བོ་རྨོངས་པ་ཁྲོས་པས་ཟིལ་ནོན་པ། །འཇིག་རྟེན་མཁས་པའི་བསྟན་ལས་དེ་རིང་སྟེ། །དེ་ནི་ལོག་ལྟ་རྣམས་ཀྱིས་ངན་འཛིན་ཡིན། །དེ་ལྟ་བས་ན་མཁས་མིས་དཀྲུག་མི་བྱ། །བྱང་ཆུབ་སེམས་དེ་པའི་གང་འདིར་མི་ཁྲོ་ཞིང ། །བདེན་པ་རྗེས་སྲུང་གཞན་ལ་མི་གནོད་པ། །སྤྱད་པ་དཀོན་པ་འདི་དག་རྫོགས་བྱས་ནས། ། 266b སུམ་ཅུ་རྩ་གཉིས་མཚན་མཛེས་ཕུན་སུམ་ཚོགས། །མི་མཁས་རྟག་ཏུ་ཕུང་ཞིང་སྡང་སེམས་ལྡན། །ཕ་མ་ལ་ཡང་འདི་ན་གུས་མི་བྱེད། །ཀུན་ནས་ཉོན་མོངས་རྩ་བ་རབ་གནས་བ། །སྐྱེས་བུ་ཐ་མའི་ཉེས་པ་འདི་རྣམས་ཡིན། །དེ་བས་རྟག་ཏུ་བཟོད་པ་ཁོ་ན་བསྟེན། །དགེ་སློང་ཆོས་སྨྲ་པ་ལ་བསྟེན་པར་བྱ། །དགེ་བའི་བཤེས་གཉེན་ཡོངས་སུ་མི་གཏོང་སྟེ། དེ་ལ་བྱང་ཆུབ་མཆོག་ནི་དཀའ་བ་མེད། །རིགས་ཀྱི་བུ། གཞན་ཡང ། བྱང་ཆུབ་སེམས་དཔའ་ཆོས་བཞི་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་ཇི་སྐད་སྨོས་པའི་ཡོན་ཏན་ཕུན་སུམ་ཚོགས་པའང་རྗེས་སུ་ཐོབ་བོ། །བཞི་གང་ཞེ་ན། རིགས་ཀྱི་བུ། འདི་ལ་ཆོས་དོན་དུ་གཉེར་བ་དང ། ཆོས་འདོད་པ་དང ། ཆོས་ཀྱི་ཀུན་དགའ་ལ་དགའ་ཞིང་མོས་པ་དང ། ཆོས་འཛིན་པ་དང ། ཆོས་སྟོན་པ་ཡིན། བུད་མེད་ཡོངས་སུ་སྤོང་ཞིང་བུད་མེད་ལ་སྟེན་པར་མི་བྱེད་པ་ཡིན། སྦྱིན་པའི་བདག་པོ་དང ། ཀུན་བགེད་པའི་ངང་ཚུལ་ཅན་དང ། ཀུན་བགེད་པ་ལ་དགའ་བ་དང ། རྨུགས་པ་དང ། གཉིད་ཡོངས་སུ་སྤོང་བ་ཡིན། སྟོང་པ་ཉིད་ལ་མོས་པ་དང ། སྟོང་པ་ཉིད་ལ་གནས་པ་ཡིན་ཏེ།་རིགས་ཀྱི་བུ། ཆོས་བཞི་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་ཇི་སྐད་སྨོས་པའི་ 267a ༄#། །ཡོན་ཏན་དེ་དག་ཀྱང་འཐོབ་པར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས་དེ་བཞིན་དུ་སྟོན་པས། གཞན་ཡང ། འདི་སྐད་ཅེས་བཀའ་སྩལ་ཏོ། །སེམས་ཅན་གང་དག་ཆོས་ནི་འདོད་པ་དང ། །ཆོས་ཀྱི་དོན་དུ་བརྩོན་འགྲུས་བསྐྱེད་པ་དཀོན། །གང་དག་ཆོས་ཀྱི་འཁོར་ལོ་སྐོར་བྱེད་པ། །དེ་དག་ཡེ་ཤེས་དམ་པ་ཐོབ་པར་འགྱུར། །གཞན་ལས་ཐོས་ནས་ཡང་དག་འཛིན་བྱེད་ཅིང ། །ཕ་རོལ་དོན་དུ་གཉེར་ལ་ཆོས་སྟོན་ལ། །ཤེས་ལྡན་དེ་དག་འཁོར་དུ་ཞུམ་པ་མེད། །བླ་མེད་བྱང་ཆུབ་མཆོག་ལ་རེག་པར་འགྱུར། །ལོག་པར་ལྟུང་རྒྱུ་བུད་མེད་རྣམ་པར་སྤངས། །རྒྱལ་སྲས་རྟག་ཏུ་ཚངས་པར་སྤྱོད་པར་འགྱུར། །ཚངས་པར་སྤྱོད་ལ་བརྟན་པར་དེ་གནས་ཤིང ། །འཁོར་ལོ་བླ་མེད་དམ་པ་སྐོར་བར་བྱེད། །བུད་མེད་རྣམས་ལ་མཚན་མ་འགའ་ཡོད་དེ། །འདི་ལྟར་སྡུག་བསྔལ་ཉམ་ཐག་སྐེམ་པར་འགྱུར། །དེ་དག་བསྟེན་ན་ཞི་བ་མེད་པ་སྟེ། །དེ་བས་ཡོངས་སུ་སྤོངས་ལ་བྱང་ཆུབ་སྤྱོད། །དེ་ནས་ཤཱཀྱའི་བུ་བདེ་བྱེད་བསྟན་པ་འདི་ཐོས་ནས་ཚིམ་ཞིང་མགུ་ལ་ཡི་རངས་ཤིང་རབ་ཏུ་དགའ་སྟེ། དགའ་བ་དང ། ཡིད་བདེ་བ་སྐྱེས་ནས་རང་གི་ལུས་ལས་རྒྱན་བཀྲོལ་ཏེ། བཅོམ་ལྡན་འདས་ག་ལ་བ་དེ་ལོགས་སུ་གཏོར་རོ། །དེ་ནས་ 267b བཅོམ་ལྡན་འདས་ཀྱི་མཐུས་རྒྱན་དེ་དག་བཅོམ་ལྡན་འདས་ཀྱིས་དབུའི་དྲང་ཐད་ཀྱི་སྟེང་གི་བར་སྣང་ལ་རིན་པོ་ཆེའི་ཁང་པ་བརྩེགས་པ་ཞིག་ཏུ་འདུག་པར་གྱུར་ནས། རིན་པོ་ཆེའི་ཁང་པ་བརྩེགས་པ་དེ་ནས་མི་རྒྱན་ཐམས་ཅད་ཀྱིས་བརྒྱན་པ་ལྔ་བརྒྱ་བྱུང་ནས་བཅོམ་ལྡན་འདས་ལ་རྒྱན་རྣམས་འཐོར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུའང་སེམས་བསྐྱེད་ནས་ཚིག་འདི་སྐད་ཅེས། བཅོམ་ལྡན་འདས། བདག་ཅག་གི་དགེ་བའི་རྩ་བ་འདི་སེམས་ཅན་ཐམས་ཅད་དང་ཐུན་མོང་བགྱིས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ་ཞེས་འཛེར་ཏོ། །དེ་ནས་ཤཱཀྱའི་བུ་བདེ་བྱེད་ཀྱིས་ཀྱང་སྤྲུལ་པའི་མི་དེ་དག་མཐོང་ངོ ། །མཐོང་ནས་ཀྱང་ལུས་ཀྱི་སྤུ་ཟིང་ཞེས་བྱེད་པར་གྱུར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། མི་འདི་རྣམས་གང་ནས་མཆིས། ཤར་ཕྱོགས་སམ། ལྷོ་ཕྱོགས་སམ། ནུབ་ཕྱོགས་སམ། བྱང་ཕྱོགས་སམ་འོག་གམ། སྟེང་གི་ཕྱོགས་སམ། འོན་ཏེ་ཕྱོགས་མཚམས་གང་ནས་མཆིས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ། མི་འདི་རྣམས་ཤར་ཕྱོགས་ནས་མ་འོངས། ལྷོ་དང ། ནུབ་དང ། བྱང་ཕྱོགས་དང ། འོག་དང ། སྟེང་གི་ཕྱོགས་དང ། ཕྱོགས་མཚམས་གང་ནས་མ་འོངས་ཏེ། འདི་རྣམས་ནི་ལྷ་མ་ཡིན། ཀླུ་མ་ཡིན། གནོད་སྦྱིན་ 268a ༄#། །ཡིན།་དྲི་ཟ་མ་ཡིན། ལྷ་མ་ཡིན་མ་ཡིན། ནམ་མཁའ་ལྡིང་མ་ཡིན། མིའམ་ཅི་མ་ཡིན། ལྟོ་འཕྱེ་ཆེན་པོ་མ་ཡིན། མི་མ་ཡིན། མི་མ་ཡིན་པ་མ་ཡིན་ན། །སའི་ཁམས་ལ་མི་བརྟེན། ཆུའི་ཁམས་ལ་མི་བརྟེན། མོའི་ཁམས་ལ་མི་བརྟེན། རླུང་གི་ཁམས་ལ་མི་བརྟེན། ནམ་མཁའི་ཁམས་ལ་མི་བརྟེན་ཏོ། །འདི་དག་ལ་ནི་གཟུགས་མེད། ཚོར་བ་མེད། འདུ་ཤེས་དང ། འདུ་བྱེད་རྣམས་དང ། སེམས་མེད། ཡིད་མེད། རྣམ་པར་ཤེས་པ་མེད། ལས་མེད། ལས་ཀྱི་རྣམ་པར་སྨིན་པ་མེད།་འཇིག་རྟེན་འདི་མེད། འཇིག་རྟེན་ཕ་རོལ་མེད། འོང་བ་མེད། འགྲོ་བ་མེད། གནས་པ་མེད། འཆི་འཕོ་མེད། སྐྱེ་བ་མེད་དོ། །འོན་ཀྱང ། རིགས་ཀྱི་བུ། འདི་དག་ནི་སྤྲུལ་པ་ཞེས་བྱ་བ་ཡིན་ནོ། །འདི་དག་ནི་གཞི་མེད་པ་ཞེས་བྱ་ཡིན་ནོ། །འདི་དག་ནི་སྲོག་མེད་པ་ཞེས་བྱ་བ་ཡིན་ནོ། །འདི་དག་ནི་སྐྱེས་བུ་མེད་པ་ཞེས་བྱ་བ་ཡིན་ནོ། །འདི་དག་ནི་གང་ཟག་མེད་པ་ཞེས་བྱ་བ་ཡིན་ནོ། །འདི་དག་ནི་མཚན་ཉིད་མེད་པ་ཞེས་བྱ་བ་ཡིན་ནོ། །འདི་དག་ནི་དབེན་པ་ཞེས་བྱ་བ་ཡིན་ནོ། །འདི་དག་ནི་སྟོང་པ་ཞེས་བྱ་བ་ཡིན་ནོ། །འདི་དག་ནི་ངོ་བོ་ཉིད་མེད་པ་ཞེས་བྱ་བ་ཡིན་ནོ། །བདེ་བྱེད། རིག་ཀྱི་བུ་དང ། རིགས་ཀྱི་བུ་མོ་གང་དག་དེ་ལྟར་ཆོས་ཐམས་ཅད་སྤྲུལ་པ་ལྟ་བུར་འདོད་པ་དང ། བཟོད་པ་ 268b དང ། ཁོང་དུ་ཆུད་པ་དང ། མངོན་པར་དད་པ་དང ། ཡིད་ཆེས་པ་དང ། གཞན་གྱི་དྲིང་མི་འཇོག་པར་འགྱུར་བའི་རིགས་ཀྱི་བུ་དང ། རིགས་ཀྱི་བུ་མོ་དེ་དག་ནི། བདེ་བྱེད། ངའི་བུ་ཞེས་བྱའོ། །ངའི་རྗེས་སུ་སྐྱེས་པ་ཞེས་བྱའོ། །སྣང་བ་འཛིན་པ་ཞེས་བྱའོ། །འོད་བྱེད་པ་ཞེས་བྱའོ། །མུན་པ་བསལ་བ་ཞེས་བྱའོ། །ཉོན་མོངས་པ་སྤངས་པ་ཞེས་བྱའོ། ། སྟོན་པ་ཞེས་བྱའོ། །བསོད་ནམས་ཀྱི་ཞིང་ཞེས་བྱའོ། །ཡོན་ཏན་གྱི་གནས་ཞེས་བྱའོ། །དགེ་སྦྱོང་ཞེས་བྱའོ། །བྲམ་ཟེ་ཞེས་བྱའོ། །ཚོར་བ་པ་ཞེས་བྱའོ། །གླང་པོ་ཞེས་བྱའོ། ། མི་སྐྱེ་བའི་ཆོས་ལ་བཟོད་པ་དང་ལྡན་པ་ཞེས་བྱའོ། །བྱང་ཆུབ་སེམས་དཔའ་ཞེས་བྱའོ། །སེམས་དཔའ་ཆེན་པོ་ཞེས་བྱའོ། །ཕྱིར་མི་ལྡོག་པའི་ཆོས་དང་ལྡན་པ་ཞེས་བྱའོ། །བྱང་ཆུབ་སེམས་དཔའ་ཆོས་དང་ལྡན་པ་ཞེས་བྱའོ། །ལུང་བསྟན་པ་ཞེས་བྱའོ། །རིགས་ཀྱི་བུ། གང་སུའང་རུང་བ་དག་དེ་ལྟར་ཆོས་ཐམས་ཅད་སྤྲུལ་པ་ལྟ་བུར་མི་འདོད། མི་བཟོད། མི་འཇུག། མི་མོས། མི་དད། ཐོས་ནས་ཀྱང་དངང་ཞིང་སྐྲག་ལ་དངང་བར་འགྱུར་བ་དང ། སླར་ཟློག་པ་དང ། ཕྱིར་གཤེ་བའི་རིགས་ཀྱི་བུ་དེ་དག་ནི་དགེ་སྦྱོང་མ་ཡིན་པ་ཞེས་བྱའོ། །བྲམ་ཟེ་མ་ཡིན་པ་ཞེས་བྱའོ། །མུ་སྟེགས་ཅན་ཞེས་བྱའོ། །དམིགས་པ་ཅན་ཞེས་བྱའོ། །དཀྲུགས་མ་པ་ཞེས་བྱའོ། །སྡིག་པའི་གྲོགས་པོ་ཞེས་བྱའོ།། 269a ༄#། །ཡོངས་སུ་སྤང་པར་བྱ་བ་ཞེས་བྱའོ། །བྱང་ཆུབ་སེམས་དཔའ་ངན་གཡོ་ཅན་ཞེས་བྱའོ། །བྱང་ཆུབ་སེམས་དཔའ་འཆལ་བ་ཞེས་བྱའོ། །བྱང་ཆུབ་སེམས་དཔའ་ལྟར་བཅོས་པ་ཞེས་བྱའོ། །བྱང་ཆུབ་སེམས་དཔའ་སྲེད་ལྟ་བུ་ཞེས་བྱའོ། །བྱང་ཆུབ་སེམས་སུན་འབྱིན་པ་ཞེས་བྱའོ། །བྱང་ཆུབ་སེམས་དཔའ་གཏུམ་པ་ཞེས་བྱའོ།། དེ་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདི་བཤད་པས་སེམས་ཅན་ཇི་སྙེད་ཅིག་གི་དོན་མཛད། བཅོམ་ལྡན་འདས་ཀྱིས་བཀའ་སྩལ་པ། སྡིག་ཅན། ཆོས་ཀྱི་རྣམ་གྲངས་འདི་བཤད་པས་འདོད་པ་ན་སྤྱོད་པ་དང ། གཟུགས་ན་སྤྱོད་པའི་ལྷའི་བུ་བརྒྱད་ཁྲི་བཞི་སྟོང་གིས་མི་སྐྱེ་བའི་ཆོས་ལ་བཟོད་པ་ཐོབ་བོ། །དགེ་སློང་ལྔ་བརྒྱ་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དགེ་སློང་མ་བདུན་ཅུ་རྩ་ལྔས་ཀྱང་མི་སྐྱེ་བའི་ཆོས་ལ་བཟོད་པ་ཐོབ་བོ། །བྱང་ཆུབ་སེམས་དཔའ་བདེ་བྱེད་དང ། དགེ་བསྙེན་ལྔ་བརྒྱ་གཞན་དག་ཀྱང་མི་སྐྱེ་བའི་ཆོས་ལ་བཟོད་པ་ཐོབ་བོ། །དགེ་བསྙེན་མ་ཉི་ཤུ་རྩ་ལྔའང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་ 269b པར་དག་སྟེ། དེ་དག་ཐམས་ཅད་ཀྱང་མི་སྐྱེ་བའི་ཆོས་ལ་བཟོད་པ་དང་ལྡན་པར་གྱུར་ཏོ། །དེ་དག་ཐམས་ཅད་ཀྱང་འདི་ནས་ཤི་འཕོས་ནས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །དེར་སྐྱེས་ནས་ཐམས་ཅད་ལྷན་ཅིག་མཐུན་པར་སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ཀྱིས་སངས་རྒྱས་ཀྱི་བྱང་ཆུབ་འཛིན་པར་འགྱུར། བརྗོད་པར་འགྱུར། སྟོན་པར་འགྱུར། ཡང་དག་པར་རབ་ཏུ་སྟོན་པར་འགྱུར་རོ། །དེ་དག་ཕྱིས་གངྒཱའི་ཀླུང་གི་བྱེ་མ་སྙེད་ཀྱི་བསྐལ་པ་འདས་ནས་བསྐལ་པ་བཟང་པོ་ཞེས་བྱ་བ་འདི་ཉིད་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་བདུད་སྡིག་ཅན་སྡུག་བསྔལ་ཞིང་ཡིད་མི་བདེ་ལ་འགྱོད་ཅིང་མཆིམས་བརྣངས་ལ་དུ་བཞིན་དུ་གྱུར་ཏེ། དེ་ཉིད་ནས་ཕྱིར་འགྲོ་ཞིང་ཚིག་འདི་སྐད་དུ། བཅོམ་ལྡན་འདས། ཆོས་ཀྱི་རྣམ་གྲངས་འདི་སླན་ཆད་མི་བཤད་དུ་གསོལ་ཞེས་སྨྲས་སོ། །བཅོམ་ལྡན་འདས་ཀྱི་བཀའ་སྩལ་པ། སྡིག་ཅན་ཁྱོད། དེ་སྐད་མ་སྨྲ་ཞིག་།དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་ཐམས་ཅད་ཀྱི་ཆོས་ཀྱི་འཁོར་ 270a ༄#། །ལོ་བསྐོར་བ་འདི་ནི་ཐོགས་པ་མེད་པ་ཡིན་ནོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བྱང་ཆུབ་སེམས་དཔའ་ངེས་པར་འབྱུང་བ་ཞེས་བྱ་བར་ཟུངས་ཤིག་།བདེ་བྱེད་ཀྱིས་ཞུས་པ་ཞེས་བྱ་བར་ཡང་ཟུངས་ཤིག་།ཀུན་དགའ་བོ། ངས་ཆོས་ཀྱི་རྣམ་གྲངས་འདི་ཁྱོད་ལ་གཏད་དེ།་གཟུང་བ་དང ། བཀླག་པ་དང ། བཤད་པ་དང ། གཞན་དག་ལ་རྒྱ་ཆེར་ཡང་དག་པར་རབ་ཏུ་བསྟན་པར་བྱ་བའི་ཕྱིར་ཡོངས་སུ་གཏད་དོ། །དེ་ཅིའི་ཕྱིར་ཞེ་ན། ཀུན་དགའ་བོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་གིས་ཤེས་རབ་ཀྱི་ཕ་རོལ་ཏུ་ཕྱིན་པ་མ་གཏོགས་པར་ཕ་རོལ་ཏུ་ཕྱིན་པ་ལྔ་པོ་དག་ལ་བསྐལ་པ་བཅུར་སྤྱད་པ་བས། རིགས་ཀྱི་བུའམ། རིགས་ཀྱི་བུ་མོ་གང་ཞིག་ཆོས་ཀྱི་རྣམ་གྲངས་འདི་འཛིན་པ་དང ། འཆང་བ་དང ། ཀློག་པ་དང ། ཀུན་ཆུབ་པར་བྱེད་པ་དང ། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་པ་དང ། ཐ་ན་གླེགས་བམ་དུ་བྱས་ཏེ་འཆང་བ་དེ་ནི་དེ་བསོད་ནམས་ཆེས་མང་དུ་སྐྱེད་པའི་ཕྱིར་རོ། །དེ་ནས་བཅོམ་ལྡན་ 270b འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །གང་ཞིག་ཚུལ་འདི་མ་ཐོས་པར། །བསྐལ་པ་བཅུར་ནི་སྦྱིན་བྱིན་ཡང ། །བླ་ན་མེད་པའི་སྦྱིན་པ་ཞེས། །དེ་ནི་བསྔགས་པར་མི་འགྱུར་རོ། །གང་ཞིག་བསྐལ་པ་བཅུ་རྣམས་སུ། །འཇིག་རྟེན་པ་ཡི་ཚུལ་ཁྲིམས་སྲུང ། །དེ་ནི་དམིགས་ལ་གནས་པས་ན། །ཚུལ་ཁྲིམས་དེ་ནི་དག་མི་འགྱུར།། གང་ཞིག་སངས་རྒྱས་ཀྱིས་བསྔགས་པའི། །མདོ་སྡེ་ཟབ་མོ་འདི་འཛིན་པ། །ཚུལ་ཁྲིམས་དེ་ནི་བླ་ན་མེད། །སངས་རྒྱས་ཀུན་གྱིས་བསྔགས་པ་ཡིན། །གང་འདིར་བསྐལ་པ་བཅུ་རྣམས་སུ། །བཟོད་པ་སྨྲ་བའི་མིང་གྱུར་ལ། །གཤེ་བར་བྱེད་པའི་སྲོག་ཆགས་རྣམས། །ཀུན་ལ་བཟོད་པར་བྱེད་གྱུར་ཀྱང ། །འདི་ནི་ཚུལ་འདི་མ་ཐོས་ན། །བཟོད་པ་དེ་ནི་བསྔགས་མ་ཡིན། །གང་ཞིག་མདོ་སྡེ་འདི་འཛིན་ཅིང ། །གཞན་དག་ལ་ཡང་རབ་སྟོན་ན། །བཟོད་པ་དེ་ནི་བླ་ན་མེད། །སངས་རྒྱས་ཀུན་གྱིས་བསྔགས་པ་ཡིན། །གང་ཞིག་ཚུལ་འདི་མཐོས་པར། །བསྐལ་པ་དག་ནི་བཅུ་རྣམས་སུ། །འཆག་པ་དག་ལས་མི་འདའ་ཡང ། །བརྩོན་འགྲུས་དེ་ནི་བསྔགས་མ་ཡིན། །གང་ཞིག་སངས་རྒྱས་ཀྱིས་བཤད་པ། ། མདོ་སྡེ་ཟབ་མོ་འདི་འཛིན་ན། །བརྩོན་འགྲུས་དེ་ནི་བླ་ན་མེད། །སངས་རྒྱས་ཀུན་གྱིས་བསྔགས་པ་ཡི། །གང་ཞིག་བསྐལ་པ་བཅུ་རྣམས་སུ། །བསམ་གཏན་ལྡན་པའི་མིར་གྱུར་ 271a ༄#། །གྱུར་ལ། །བསམ་གཏན་རོ་ལ་དེ་གནས་ན། །བསམ་གཏན་པ་ཞེས་དེ་མི་བརྗོད། །ནང་དང་ཕྱི་རོལ་རྣམས་ལ་ཡང ། །རྡུལ་ཙམ་ཆོས་ཀྱང་མི་རྟོགས་ན། །བསམ་གཏན་དེ་ནི་བླ་ན་མེད། །དེ་ནི་བསམ་གཏན་པ་ཞེས་བྱ། །དེ་ལྟར་སྦྱིན་དང་ཚུལ་ཁྲིམས་དང ། །བཟོད་པ་དང་ནི་བརྩོན་འགྲུས་དང ། །བསམ་གཏན་ཤེས་རབ་མཉམ་ཉིད་ཀྱིས། །དེ་ནི་བྱང་ཆུབ་མྱུར་འཐོབ་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང ། ཤཱཀྱའི་བུ་བདེ་བྱེད་དང ། ཐམས་ཅད་དང་ལྡན་པའི་འཁོར་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བདེ་བྱེད་ཀྱིས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་ཝརྨ་དང ། ཞུས་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། |