།།རྒྱ་གར་སྐད་དུ། ཨཱརྱ་དཱི་པཾ་ཀ་ར་བྱཱ་ཀ་ར་ཎ་ནཱ་མ་མཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་མར་མེ་མཛད་ཀྱིས་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ 301a ༄#། །ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང་ཐབས་གཅིག་ཏུ་བཞུགས་སོ། །དེའི་ཚེ་བཅོམ་ལྡན་འདས་འཁོར་བརྒྱ་སྟོང་མང་པོས་ཡོངས་སུ་བསྐོར་ཞིང་མདུན་གྱིས་བལྟས་ཏེ་ཆོས་སྟོན་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། དེའི་ཕྱིར་ཁྱོད་ཀྱི་དགེ་བའི་རྩ་བ་ལ་སོ་སོར་བརྟག་པ་ཉིད་ཀྱིས་བསམ་པ་ཤིན་ཏུ་ཡོངས་སུ་དག་པར་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ། ངས་སངས་རྒྱས་བརྒྱ་སྟོང་མང་པོ་ལ་ཞེས་དང་བཅས་པས་བསྙེན་བཀུར་བྱས་ཀྱང་སངས་རྒྱས་བཅོམ་ལྡན་འདས་རྣམས་ཀྱིས་ང་སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་མ་བསྟན་གྱི། གང་གི་ཚེ་ངས་དེ་བཞིན་གཤེགས་པ་མར་མེ་མཛད་མཐོང་ནས་ཨུཏྤ་ལ་ལྔ་ཕུལ་བ་དེའི་འོག་ཏུ་ང་ཆོས་བདག་མེད་པ་ཉིད་ལ་མོས་པར་གྱུར་ཅིང་མི་སྐྱེ་པའི་ཆོས་ལ་བཟོད་པ་ཐོབ་པའི་ཕྱིར་རོ། །ཀུན་དགའ་བོ། དེ་བས་ན་ཁྱོད་དགེ་བའི་རྩ་བས་ཆོག་ཤེས་པར་མི་བྱའོ། །དེ་ཅིའི་ཕྱིར་ཞེ་ན། ཀུན་དགའ་བོ། སྔོན་བྱུང་བ་འདས་པའི་དུས་བསྐལ་པ་གྲངས་མེད་པའི་ཡང་ཆེས་གྲངས་མེད་པ། ཡངས་པ། ཚད་མེད་པ། བསམ་ 301b གྱིས་མི་ཁྱབ་པ་འདས་པ་དེའི་ཚེ་དེའི་དུས་ན་ཛམྦུའི་གླིང་འདིར་རྒྱལ་པོ་མ་སྐྱེས་དགྲ་ཞེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བྱུང་སྟེ། ཀུན་དགའ་བོ། རྒྱལ་པོ་མ་སྐྱེས་དགྲ་དེ་ལ་གྲོང་ཁྱེར་བརྒྱད་ཁྲི་བཞི་སྟོང་ཡོད་དེ། ཐམས་ཅད་ཀྱང་བཀྲ་བ། བལྟ་ན་སྡུག་པ། སྐྱེད་མོས་ཚལ་ཕུན་སུམ་ཚོགས་པ། རྫིང་བུ་ཕུན་སུམ་ཚོགས་པ། མེ་ཏོག་ཕུན་སུམ་ཚོགས་པ། འབྲས་བུ་ཕུན་སུམ་ཚོགས་པ། བདེ་བ། ལོ་ལེགས་པ། ཉམས་དགའ་བ། འབྱོར་པ། རྒྱས་པ། སྐྱེ་བོ་དང ། མི་མང་པོས་གང་བ་ཤ་སྟག་གོ་།ཀུན་དགའ་བོ། མ་སྐྱེས་དགྲ་དེ་ལ་རྒྱལ་པོའི་ཕོ་བྲང་པདྨ་ཅན་ཞེ་བྱ་བ་ཞིག་ཡོད་དེ། རྒྱལ་པོ་མ་སྐྱེས་དགྲ་དེ་དེ་ན་གནས་སོ། །དེ་ནས་རྒྱལ་པོ་མ་སྐྱེས་དགྲའི་མདུན་ན་འདོན་བྲམ་ཟེ་གླིང་ལྡན་ཞེས་བྱ་བ་སྙིང་དུ་སྡུག་ཅིང་མཐོང་ན་མི་མཐུན་པ་མེད་པ་དང་ལྡན་པ་ཞིག་ཡོད་དོ། །ཀུན་དགའ་བོ། དེ་ནས་རྒྱལ་པོ་མ་སྐྱེས་དགྲས་རིགས་བཞིའི་མི་ཐམས་ཅད་བསྡུས་ནས་བྲམ་ཟེ་གླིང་ལྡན་བཀུག་སྟེ། ཅོད་པན་བཅིངས་ནས་རྒྱལ་སྲིད་ཕྱེད་བྱིན་ཏེ་འདི་སྐད་ཅེས་ཀྱང་སྨྲས་སོ། །བྲམ་ཟེ། ཁྱོད་རང་གི་ཡུལ་དུ་སོང་སྟེ། རྒྱལ་པོའི་ཕོ་བྲང་བྱོས་ལ་མིང་ཡང་པདྨ་ཅན་དུ་ཐོགས་ཤིག་།ཀུན་དགའ་བོ། དེ་ནས་རྒྱལ་པོ་གླིང་ལྡན་གྱི་རང་གི་ཡུལ་དུ་རྒྱལ་པོའི་ཕོ་བྲང་བྱས་ཏེ། མིང་ཡང་པདྨ་ཅན་དུ་བཏགས་སོ། །ཀུན་དགའ་བོ། དེ་ 302a ༄#། །ལྟར་དེའི་ཚེ་དེའི་དུས་ན་ཛམྦུའི་གླིང་འདི་ན་རྒྱལ་པོ་གཉིས་རྒྱལ་སྲིད་བྱེད་དེ། གཅིག་ནི་མ་སྐྱེས་དགྲའོ། །གཅིག་ཤོས་ནི་གླིང་ལྡན་ནོ། །ཀུན་དགའ་བོ། དེ་ནས་རྒྱལ་པོ་གླིང་ལྡན་གྱི་བཙུན་མོ་དམ་པ་ཁང་བཟང་གི་ཡང་ཐོག་ན་བདེ་བར་ཉལ་ཞིང་འདུག་གོ་།དེ་ནས་བྱང་ཆུབ་སེམས་དཔའ་མར་མེ་མཛད་དགའ་ལྡན་གྱི་གནས་ནས་ཤི་འཕོས་ནས་གླང་པོ་ཆེའི་ཕྲུག་གུ་ཐལ་ཀར་དུ་བསྒྱུར་ཏེ། འོད་ཟེར་རབ་ཏུ་འགྱེད་ཅིང་མའི་གློ་གཡས་པར་ཞུགས་པར་གྱུར་ཏོ། །དེ་ནས་དེའི་ཚེ་བཙུན་མོ་དམ་པ་དེས་རྒྱལ་པོ་གླིང་ལྡན་ལ་སྐབས་འདི་སྨྲས་སོ། །ཀུན་དགའ་བོ། དེ་ནས་རྒྱལ་པོ་གླིང་ལྡན་གྱིས་བྲམ་ཟེ་མཚན་མཁན་དང ། ལྟས་མཁན་དང ། མཆོད་སྦྱིན་མཁན་རྣམས་བསྡུས་ཏེ་རྨི་ལམ་གྱི་སྐབས་འདི་བསྙད་པ་དང ། བྲམ་ཟེ་མཚན་མཁན་རྣམས་ཀྱིས་སྨྲས་པ། རྒྱལ་པོ་ཆེན་པོ། ཁྱོད་ཀྱིས་རྙེད་པ་ལེགས་པར་རྙེད་དེ། ཁྱོད་ཀྱི་སྲས་སེམས་ཅན་རིན་པོ་ཆེ་ཞིག་བལྟམ་པར་འགྱུར་རོ། །ཀུན་དགའ་བོ། དེ་ནས་རྒྱལ་པོ་གླིང་ལྡན་རྨི་ལམ་བསྟན་པ་འདི་ཐོས་ནས་དགའ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས་དགའ་བ་དང ། ཡིད་བདེ་བ་སྐྱེས་ཏེ། རྒྱལ་པོ་གླིང་ལྡན་དེའི་རྒྱལ་ཁམས་སུ་གཏོགས་པ་ཐམས་ཅད་ལ་སྦྱིན་པ་བྱིན་ཏེ། འདི་ལྟ་སྟེ། ཟས་འདོད་པ་རྣམས་ལ་ནི་ཟས། སྐོམ་འདོད་པ་རྣམས་ལ་ནི་སྐོམ། 302b བཞོན་པ་འདོད་པ་རྣམས་ལ་ནི་བཞོན་པ། སྤོས་དང ། ཕྲེང་བ་རྒྱུ་དང ། བྱུག་པ་དང ། གནས་མལ་རུང་བ་ཁ་ན་མ་ཐོ་བ་མེད་པ་དང ། གང་ཅི་དང ། ཅི་འདོད་པ་ཐམས་ཅད་བྱིན་ནོ། །ཀུན་དགའ་བོ། དེ་ནས་ཟླ་བ་བཅུ་འདས་པ་དང ། རྒྱལ་པོ་གླིང་ལྡན་གྱི་བུ་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བཙས་ཏེ། བཙས་མ་ཐག་ཏུ་ལུས་ལས་འདི་ལྟ་བུའི་འོད་བྱུང་སྟེ། འོད་དེས་རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་ཐམས་ཅད་སྣང་བས་ཁྱབ་པར་གྱུར་ཏོ། །དེ་ནས་དེའི་ཚེ་ལྷའི་དབང་པོ་བརྒྱ་བྱིན་རང་གི་གནས་ནས་མི་སྣང་བར་གྱུར་ནས་གཞོན་ནུ་གང་ན་བ་དེར་སྟོང་སྟེ་ཕྱིན་ནས་གཞོན་ནུ་དེ་ལ་ཤིས་པར་བརྗོད་པ་བྱས་ཏེ། འདི་སྐད་ཅེས་ཀྱང་སྨྲས་སོ། །འདི་བཙས་མ་ཐག་ཏུ་ལུས་ལས་འདི་ལྟ་བུའི་འོད་བྱུང་སྟེ། འོད་དེས་རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་ཐམས་ཅད་སྣང་བས་ཁྱབ་པར་གྱུར་པས་གཞོན་ནུའི་མིང་མར་མེ་མཛད་དུ་བཏགས་སོ། །དེ་ནས་གཞོན་ནུའི་མིང་མར་མེ་མཛད་མར་མེ་མཛད་ཅེས་བྱ་བར་གྱུར་ཏོ། །ཀུན་དགའ་བོ། དེ་ནས་རྒྱལ་པོ་གླིང་ལྡན་དགའ་ཞིང་མགུ་ལ་ཡི་རངས་ཏེ་རབ་ཏུ་དགའ་ནས། དགའ་བ་དང ། ཡིད་བདེ་བ་སྐྱེས་ཏེ།་ཡང་དེའི་རྒྱལ་ཁམས་སུ་གཏོགས་པ་ཐམས་ཅད་ལ་སྦྱིན་པ་བྱིན་ཏེ། འདི་ལྟ་སྟེ། ཟས་འདོད་པ་རྣམས་ལས་ནི་ཟས། སྐོམ་འདོད་པ་རྣམས་ལ་ནི་སྐོམ། བཞོན་པ་འདོད་པ་རྣམས་ 303a ༄#། །ལ་ནི་བཞོན་པ། སྤོས་དང ། ཕྲེང་བ་རྒྱུ་དང ། བྱུག་པ་དང ། གནས་མལ་རུང་བ་ཁ་ན་མ་ཐོ་བ་མེད་པ་དང ། གང་ཅི་དང ། ཅི་འདོད་པ་ཐམས་ཅད་བྱིན་ནོ། །ཀུན་དགའ་བོ། དེ་ནས་རྒྱལ་པོ་གླིང་ལྡན་གྱིས་རྒྱལ་བུ་གཞོན་ནུ་མར་མེ་མཛད་བཀུག་སྟེ། ཅོད་པན་བཅིངས་ནས་རྒྱལ་སྲིད་ཕྱེད་བྱིན་ཏེ་འདི་སྐད་ཅེས་ཀྱང་སྨྲས་སོ། །གཞོན་ནུ། ཁྱོད་སོང་ལ་གཙུན་མོའི་འཁོར་གྱི་ནང་འདུག་ཅིང་རྩེས་ཤིག་།དགའ་བར་གྱིས་ཤིག་།དགའ་དགུར་སྤྱོད་ཅིག་།ཀུན་དགའ་བོ། དེ་ནས་རེ་ཞིག་ན་རྒྱལ་བུ་གཞོན་ནུ་མར་མེ་མཛད་བཙུན་མོའི་འཁོར་གྱི་ནང་དུ་སོང་ནས་བཞོན་པ་ཆེན་པོ་ལ་ཞོན་ཏེ། བུད་མེད་ཀྱི་ཚོགས་ཀྱིས་ཡོངས་སུ་བསྐོར་ནས་སྐྱེད་མོས་ཚལ་གྱི་གནས་སུ་སོང་བ་དང ། གནས་གཙང་མའི་རིས་ཀྱི་ལྷའི་བུ་དག་གཅིག་གིས་བདག་ཅག་ཉིད་རྒས་ཤིང་འཁོགས་པ་དང ། ནད་ཀྱིས་བཏབ་པ་དང ། ཤི་བའང་བསྟན་ཏེ་དགེ་སྦྱོང་ཞིག་ཀྱང་དེར་བཞག་པ་དང ། རྒྱལ་བུ་གཞོན་ནུ་མར་མེ་མཛད་ཀྱིས་མཐོང་ནས་ཁ་ལོ་སྒྱུར་བ་ལ་འདི་སྐད་ཅེས་སྨྲས་སོ། །ཀྱེ་ཁ་ལོ་སྒྱུར་བ། རྣམ་པ་སྣ་ཚོགས་སྣང་བ་འདི་དག་ཅི་ཡིན། ཁ་ལོ་སྒྱུར་པས་སྨྲས་པ། གཞོན་ནུ། འདི་དག་ནི་རྒས་པ་ཞེས་བགྱི་བ་དང ། ན་བ་ཞེས་བགྱི་བ་དང ། ཤིབ་ཞེས་བགྱི་བ་ལགས་ཏེ། གཞོན་ནུ། ཇི་སྲིད་དུ་ 303b ཆོས་ཉིད་གདགས་པ་མཆིས་པ་དེ་སྲིད་དུ་རྒ་བ་དང ། ན་བ་དང ། འཆི་བའི་ཆོས་རྣམས་མཆིས་ཏེ། གཞོན་ནུ་ཁྱོད་དང ། འོ་སྐོལ་ཡང་དེ་ལྟ་བུ་ལགས་ཏེ། འཁོར་བ་ན་གནས་པ་ཁོ་ན་ལགས་སོ། །གཞོན་ནུས་སྨྲས་པ། ཁ་ལོ་སྒྱུར་བ། མགྲོ་བྲེགས་ཏེ་ངུར་སྨྲིག་གྱོན་ལ་ཞི་ཞིང་ཉེ་བར་ཞི་བ་གཉའ་ཤིང་གང་ཙམ་དུ་བལྟ་བ་འདི་སུ་ཞིག་།ཁ་ལོ་སྒྱུར་བས་སྨྲས་པ། གཞོན་ནུ།་འདི་ནི་དགེ་སློང་སྟེ། སྡིག་པ་ཐམས་ཅད་སྤངས་པ་ཐར་པ་ལ་མངོན་པར་དགའ་བའི་འདུ་ཤེས་སྐྱེས་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་བ་ལགས་སོ། །གཞོན་ནུས་སྨྲས་པ། ཁ་ལོ་སྒྱུར་བ། ལེགས་སོ། །ལེགས་སོ། །དགེ་སློང་འདིའི་ལམ་འདི་ནི་འདོད་པ་ཡིན་ནོ་ཞེས་སྨྲས་ནས་ཕྱིར་ལོག་སྟེ་ཁྱིམ་དུ་སོང་ངོ ། །ཀུན་དགའ་བོ། དེ་ནས་རེ་ཞིག་ན་རྒྱལ་བུ་གཞོན་ནུ་མར་མེ་མཛད་ཡང་སྐྱེད་མོས་ཚལ་གྱི་གནས་སུ་སོང་ངོ ། །དེ་སྐྱེད་མོས་ཚལ་གྱི་གནས་སུ་ཕྱིན་པ་དང ། དེ་ན་སངས་རྒྱས་བརྒྱ་སྟོང་མང་པོས་བསྟེན་པའི་བྱང་ཆུབ་ཀྱི་སྙིང་པོ་མཐོང་ངོ། །ཀུན་དགའ་བོ། དེ་ནས་བྱང་ཆུབ་སེམས་དཔའ་མར་མེ་མཛད་ཀྱིས་བྱང་ཆུབ་ཀྱི་སྙིང་པོ་དེ་མཐོང་ནས་སྐྱེས་པ་དང ། བུད་མེད་ཀྱི་ཚོགས་ཐམས་ཅད་ཧ་ཅང་ཐག་མི་རིང་བར་བོར་ནས་བྱང་ཆུབ་ཀྱི་སྙིང་པོ་ག་ལ་བ་དེར་སོང་སྟེ་ཕྱིན་ནས། དེས་བྱང་ཆུབ་ཀྱི་སྙིང་པོ་མཐོང་བ་དང ། ལན་གསུམ་བསྐོར་བ་བྱས་ནས་བྱང་ཆུབ་ཀྱི་སྙིང་པོ་དེར་སྐྱིལ་མོ་ཀྲུང་བཅས་ 304a ༄#། །ཏེ་འདུག་གོ། བྱང་ཆུབ་སེམས་དཔའ་མར་མེ་མཛད་འདུག་མ་ཐག་ཏུ་དེ་ནས་དེའི་ཚེ་དེ་ཉིད་ཀྱི་མཚན་མོའི་སྐྱ་རེངས་དང་བོ་ཤར་བའི་དུས་ན་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །ཀུན་དགའ་བོ། དེ་བཞིན་གཤེགས་པ་མར་མེ་མཛད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་མ་ཐག་ཏུ་དེའི་ཚེ་སྐུ་ལས་འདི་ལྟ་བུའི་འོད་བྱུང་སྟེ། འོད་དེས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་སྣང་བས་ཁྱབ་པར་གྱུར་ཏོ། །དེ་ནས་དེའི་ཚེ་ལྷའི་དབང་པོ་བརྒྱ་བྱིན་རང་གི་གནས་ནས་མི་སྣང་བར་གྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་མཆོད་པ་བྱས་ནས་སྒྲ་འདི་སྐད་ཅེས་ཀྱང་བསྒྲགས་སོ། །ཀྱེ་མའོ། །དེ་བཞིན་གཤེགས་པ་མར་མེ་མཛད་འདི་འཇིག་རྟེན་དུ་བྱུང་སྟེ། འདི་ལྟར་དེའི་འོད་ཀྱིས་འཇིག་རྟེན་གྱི་ཁམས་ཐམས་ཅད་སྣང་བས་ཁྱབ་པར་མཛད་དོ། །དེ་བཞིན་གཤེགས་པ་མར་མེ་མཛད་ལོ་ལྔ་བཅུའི་བར་དུ་བྱང་ཆུབ་ཀྱི་སྙིང་པོ་དེ་ན་བཞུགས་ཀྱང་ཐ་ན་སེམས་ཅན་གཅིག་ཙམ་ཡང་བལྟ་བ་དང ། ཕྱག་བྱ་བ་དང ། བསྙེན་བཀུར་ 304b བྱ་བའི་ཕྱིར་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་འཁོར་གྱི་མི་རྣམས་བདེ་བ་དང་ལྡན་པའི་ཕྱིར་བལྟ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་ཉེ་བར་མི་འགྲོའོ། །ཀུན་དགའ་བོ། དེ་ནས་དེ་བཞིན་གཤེགས་པ་མར་མེ་མཛད་འདི་སྙམ་དུ་དགོངས་ཏེ། རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་འཁོར་བའི་མི་རྣམས་བདེ་བ་དང་ལྡན་པས་ཧ་ཅང་བག་མེད་པར་གྱུར་གྱི། ངས་དེ་རྣམས་ཅུང་ཞིག་ཡིད་བྱུང་བར་བྱ་གོར་མ་ཆག་སྙམ་མོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་དེའི་ཚེ་འདི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དེ། རྫུ་འཕྲུལ་ཇི་ལྟ་བུ་མངོན་པར་འདུ་མཛད་པ་མངོན་པར་འདུ་མཛད་པས་རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་འཁོར་བའི་མི་རྣམས་ཀྱི་ནང་དུ་བཻ་ཌཱུརྱ་ལས་བྱས་པའི་གྲོང་ཁྱེར་ཆེན་པོ། བལྟ་ན་སྡུག་པ། སྐྱེ་བོ་དང ། མི་མང་པོས་གང་ལ། མི་དེ་དག་ཀྱང་ལྷག་པར་མཛེས་པ། ལྷག་པར་བལྟ་ན་སྡུག་པ། རྒྱན་ཐམས་ཅད་ཀྱིས་བརྒྱན་པ་དག་ཅིག་མངོན་པར་སྤྲུལ་ཏོ། །དེ་ནས་རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་འཁོར་བའི་མི་རྣམས་བཻ་ཌཱུརྱ་ལས་བྱས་པའི་གྲོང་ཁྱེར་ན་གནས་པའི་མི་རྣམས་ཀྱིས་སྤ་གོང་བར་ནི་གྱུར་ན་གང་ཡང་སྐྱོ་བར་ནི་མ་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་ 305a ༄#། །པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་འདི་སྙམ་དུ་དགོངས་ཏེ། རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་འཁོར་བའི་མི་རྣམས་ཧ་ཅང་བག་མེད་པ་དང་ལྡན་པར་གྱུར་པ་ངས་ཡང་ཅུང་ཞིག་སྐྱོ་བ་བསྐྱེད་པར་བྱ་གོར་མ་ཆག་སྙམ་མོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་ཡང་འདི་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དེ། རྫུ་འཕྲུལ་ཇི་ལྟ་བུ་མངོན་པར་འདུ་མཛད་པ་མངོན་པར་འདུ་མཛད་པས་བཻ་ཌཱུརྱ་ལས་བྱས་པའི་གྲོང་ཁྱེར་ཆེན་པོ་དེ་ལ་མེ་ཆེན་པོ་འབར་བར་བྱིན་གྱིས་བརླབས་སོ། །བྱིན་གྱིས་བརླབས་མ་ཐག་ཏུ་དེ་ལ་མེ་འབར་བར་གྱུར་ཏོ། །དེ་ནས་དེའི་ཚེ་སེམས་ཅན་དེ་དག་དང ། གྲོང་ཁྱེར་ཆེན་པོ་དེ་ཡོངས་སུ་ཟད་ཅིང་མཐར་ཐུག་པ་དང ། ཞིག་པར་གྱུར་ནས་སེམས་ཅན་དེ་དག་ཀྱང་ཚུལ་མ་ཡིན་པ་མཐོང་བས་སྡུག་བསྔལ་བར་གྱུར་ཏོ། །ཀུན་དགའ་བོ། དེ་ནས་རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་འཁོར་བའི་མི་རྣམས་ཀྱིས་བཻ་ཌའྱྲྱ་ལས་བྱས་པའི་གྲོང་ཁྱེར་ཆེན་པོ་རྒུད་པར་མཐོང་ནས་དངས་སྐྲག་པར་གྱུར་ཅིང་སྐྱོ་བར་གྱུར་ནས་སྤུ་ཟིང་ཞེས་བྱེད་དེ། དེ་དག་འདི་སྙམ་དུ་སེམས་པར་གྱུར་ཏོ། །གང་གི་ཕྱིར་གྲོང་ཁྱེར་དེ་ཡོངས་སུ་ཟད་ཅིང་མཐར་ཐུག་པ་དང ། ཞིག་པར་གྱུར་པ་ལ་ན་རིང་པོ་མི་ཐོགས་པར་བདག་ 305b ཅག་ཀྱང་དེ་ལྟ་བུའི་མི་རྟག་པའི་གནས་སྐབས་སུ་འགྱུར་ན་སུ་ཞིག་བདག་ཅག་གི་སྐྱབས་སུ་འགྱུར་སྙམ་མོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་འདི་སྙམ་དུ་དགོངས་ཏེ། རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་འཁོར་བའི་མི་འདི་རྣམས་ཡོངས་སུ་སྨིན་པས་ངས་ཆོས་བསྟན་པ་ཀུན་ཤེས་པར་ནུས་ཤིང་སྐལ་བ་དང་ལྡན་པ་དང ། མཐུ་ཡོད་པར་གྱུར་ཏོ་སྙམ་མོ། །དེ་ནས་དེ་བཞིན་གཤེགས་པ་མར་མེ་མཛད་ཀྱིས་མི་དེ་རྣམས་ཀྱི་བསམ་པ་ཐུགས་སུ་ཆུད་ནས་དེའི་ཚེ་དྲན་པ་དང ། ཤེས་བཞིན་གྱིས་བྱང་ཆུབ་ཀྱི་སྙིང་པོ་དེ་ནས་བཞེངས་ཏེ། ཕྱི་བཞིན་འབྲང་བའི་དགེ་སྦྱོང་ལྷའི་དབང་པོ་བརྒྱ་བྱིན་དང་ཐབས་གཅིག་ཏུ་རྒྱལ་པོ་གླིང་ལྡན་གྱི་རྒྱལ་པོའི་བྲང་ག་ལ་བ་དེར་གཤེགས་སོ། །ཀུན་དགའ་བོ། དེ་བཞིན་གཤེགས་པ་མར་མེ་མཛད་བྱོན་མ་ཐག་ཏུ་དེ་ནས་དེའི་ཚེ་དེ་བཞིན་གཤེགས་པ་མར་མེ་མཛད་ཀྱིས་ཆོས་བསྟན་པ་དང་པོའི་ཚེ་སྲོག་ཆགས་ཉི་ཁྲི་རབ་ཏུ་ཕྱུང་སྟེ། དེ་དག་ཐམས་ཅད་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ཆོས་བསྟན་པ་གཉིས་པའི་ཚེ་སྲོག་ཆགས་སུ་མ་ཁྲི་རབ་ཏུ་ཕྱུང་སྟེ། དེ་དག་ཐམས་ཅད་ཀྱང་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །ཆོས་བསྟན་པ་གསུམ་པའི་ཚེ་སྲོག་ཆག་བཞིན་ཁྲི་རབ་ཏུ་ཕྱུང་སྟེ། དེ་དག་ཐམས་ཅད་ཀྱང་ཆོས་རྣམས་ 306a ༄#། །ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ་།ཆོས་བསྟན་པ་བཞི་པའི་ཚེ་སྲོག་ཆགས་ལྔ་ཁྲི་རབ་ཏུ་ཕྱུང་སྟེ། དེ་དག་ཐམས་ཅད་ཀྱང་ལེན་པ་མེད་པ་ཟག་པ་རྣམས་ལས་སེམས་རྣམ་པར་གྲོལ་ལོ། །ཀུན་དགའ་བོ། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དགེ་སློང་གི་དགེ་འདུན་མང་པོས་ཡོངས་སུ་བསྐོར་ཞིང་མདུན་གྱིས་བལྟས་ཏེ་ཆོས་སྟོན་ཏོ། །ཀུན་དགའ་བོ། དེ་ནས་རྒྱལ་པོ་མ་སྐྱེས་དགྲས་རྒྱལ་པོ་གླིང་ལྡན་གྱི་བུ་ཞིག་སྐྱེས་ནས་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ་ཞེས་ཐོས་ནས་དེ་ལ་ཕོ་ཉ་བཏང་སྟེ། འདི་ལྟར་བདག་ཀྱང་མཆོད་པར་འཚལ་ན་བདག་གི་ཐད་དུ་གཤེགས་པར་གསོལ་ཞེས་སྤྲིང་ངོ ། །དེ་ནས་ཕོ་ཉ་དེས་རྒྱལ་པོ་མ་སྐྱེས་དགྲ་ལས་མཉན་ནས་རྒྱལ་པོ་གླིང་ལྡན་གྱི་རྒྱལ་པོའི་ཕོ་བྲང་གལ་བ་དང ། རྒྱལ་པོ་གླིང་ལྡན་ག་ལ་བ་དེར་སོང་སྟེ་ཕྱིན་ནས་ཕྲིན་དེ་སྐད་སྨྲས་སོ། །དེ་ནས་རྒྱལ་པོ་གླིང་ལྡན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ཕྱོགས་གཅིག་ཏུ་འདུག་ནས་སྐབས་དེ་གསོལ་པ་དང ། བཅོམ་ལྡན་འདས་ཀྱིས་ 306b བཀའ་སྩལ་པ། རྒྱལ་པོ་ཆེན་པོ། ཁྱོད་སྙིང་ལས་ཆུང་ངུར་གྱིས་ལ་སླར་སོང་ཞིག་།ང་ནི་རྒྱལ་པོའི་ཕོ་བྲང་པདྨ་ཅན་དུ་གཤེགས་སོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་དགེ་སློང་གི་དགེ་འདུན་དང ། བྱང་ཆུབ་སེམས་དཔའི་ཚོགས་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང་ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། མི་དང ། མི་མ་ཡིན་པ་རྣམས་ཀྱིས་ཡོངས་སུ་བསྐོར་ཅིང ། རྒྱལ་པོ་གླིང་ལྡན་ཡང་རྒྱལ་པོའི་མཐུ་ཆེན་པོ་དང ། རྒྱལ་པོའི་ཚོགས་མང་པོ་དང ། རྒྱལ་པོའི་རྣམ་པར་འཕྲུལ་པ་ཆེན་པོ་དང ། རྒྱལ་པོའི་བདོག་པ་ཆེན་པོ་དང ། རྒྱལ་པོའི་འབྱོར་པ་ཆེན་པོ་དང ། རྒྱལ་པོའི་རྣམ་པར་རྩེ་བ་ཆེན་པོ་དང་ཆས་ཏེ་ཡོངས་སུ་བསྐོར་ཅིང་མདུན་གྱིས་བལྟས་ཏེ་ཐབས་གཅིག་ཏུ་གཤེགས་སོ། །ཀུན་དགའ་བོ། དེ་ནས་དེ་བཞིན་གཤེགས་པ་མར་མེ་མཛད་དེ་རིམ་གྱིས་རྒྱལ་པོའི་ཕ་བྲང་པདྨ་ཅན་ག་ལ་བ་དེར་གཤེགས་སོ། །དེའི་ཚེ་ན་རིའི་རྒྱལ་པོ་གངས་རི་ལ་བྲམ་ཟེ་རིན་པོ་ཆེ་ཞེས་བྱ་བ་ཞིག་འདུག་སྟེ། བྲམ་ཟེའི་ཁྱེའུ་ལྔ་བརྒྱ་ཙམ་ལ་བསྟན་བཅོས་དང ། རིག་བྱེད་དང ། གསང་སྔགས་ཐམས་ཅད་སློབ་ཏུ་འཇུག་གོ་།དེ་ན་བྲམ་ཟེའི་ཁྱེའུ་ལྔ་བརྒྱ་ཙམ་པོ་དེ་དག་གི་ནང་ན་བྲམ་ཟེའི་ཁྱེའུ་སྤྲིན་ཅེས་བྱ་བ་གཞོན་ནུ་དར་ལ་བབ་པ། གཟུགས་བཟང་བ། མཛེས་པ། བལྟ་ན་ 307a ༄#། །སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། གསང་སྔགས་དང ། བསྟན་བཅོས་དང ། ཆོ་ག་ཤེས་པ་ཇི་སྙེད་པ་ཐམས་ཅད་ལ་མཁས་པ་ཞིག་ཡོད་དོ། །ཀུན་དགའ་བོ། དེ་ནས་བྲམ་ཟེའི་ཁྱེའུ་སྤྲིན་ཅེས་བྱ་བས་མཁན་པོའི་རྐང་པ་ལ་མགོ་བོས་ཕྱག་བཙལ་ནས་འདི་སྐད་ཅེས་སྨྲས་སོ། །ཀྱེ་མཁན་པོ། བདག་གྲོང་དང ། གྲོང་ཁྱེར་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་རྣམས་སུ་མཆིའོ། །མཁན་པོས་སྨྲས་པ། ཀྱེ་བྲམ་ཟེའི་ཁྱེའུ། བདག་ཅག་བྲམ་ཟེ་རྣམས་ཀྱི་ཆོས་ཉིད་ནི་འདི་ཡིན་ཏེ། གང་གིས་བསྟན་བཅོས་དང ། རིག་བྱེད་དང ། གསང་སྔགས་ཐམས་ཅད་ལོབས་པ་དེས་མཁན་པོ་ལ་ཟོད་ལྔ་བརྒྱ་དང ། རས་ཟུང་གཅིག་དང ། འཁར་བ་དང ། རིལ་བ་རྣམས་སྦྱིན་དགོས་སོ། །བྲམ་ཟེའི་ཁྱེའུ་སྤྲིན་གྱིས་སྨྲས་པ། མཁན་པོ་བདག་ལ་པགས་པ་དང ། འཁར་བ་དང ། རིལ་པ་མ་གཏོགས་པར་ཅིའང་མ་མཆིས་པས་མཆིའོ། །ལན་གསུམ་གྱི་བར་དུ་གསོལ་ནས་དེ་བཞིན་གྱིས་ཤིག་ཅེས་སྨྲས་སོ། །དེ་ནས་བྲམ་ཟེའི་ཁྱེའུ་སྤྲིན་རིམ་གྱིས་རིའི་རྒྱལ་པོ་གངས་ལས་བབས་ནས་གྲོང་དང ། གྲོང་ཁྱེར་དང ། ལྗོངས་དང ། ཡུལ་འཁོར་དང ། རྒྱལ་པོའི་ཕོ་བྲང་འཁོར་དུ་ཞུགས་སོ། །དེའི་ཚེ་ན་གྲོང་ཁྱེར་ཆེན་པོ་བདེ་བར་ཕ་རོལ་ཏུ་འགྲོ་བ་ན་བྲམ་ཟེ་ས་ག་བཟང་པོ་ཞེས་བྱ་ 307b བ་ཞིག་གནས་ཏེ་དེ་ལ་བུ་མོ་བཟང་ལེན་ལྡན་ཞེས་བྱ་བ་གཟུགས་བཟང་བ། མཛེས་པ། བལྟ་ན་སྡུག་པ་ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་ཡོད་པ་དེའི་ཕྱིར་ཉི་མ་རེ་རེ་ཞིང་བྲམ་ཟེ་བཞི་ཁྲི་ལ་ཟན་སྦྱིན་པར་བྱེད་ཅིང ། དེ་རྣམས་ཀྱི་ནང་ན་ཐམས་ཅད་ལས་ཁྱད་པར་དུ་འཕགས་པ་གང་ཡིན་པ་དེ་ལ་བདག་གི་བུ་མོ་སྦྱིན་ནོ་སྙམ་པ་དང ། གནས་གཙང་མའི་རིས་ཀྱི་ལྷའི་བུ་ཞིག་གིས་བྲམ་ཟེའི་ཁྱེའུ་སྤྲིན་ལ་གྲོང་ཁྱེར་ཆེན་པོ་བདེ་བར་ཕ་རོལ་ཏུ་འགྲོ་བའི་ལམ་བསྟན་ནོ། །དེ་ནས་བྲམ་ཟེའི་ཁྱེའུ་སྤྲིན་མཆོད་སྦྱིན་གྱི་གནས་ག་ལ་བ་དེར་སོང་སྟེ་ཕྱིན་ཏོ། །བྲམ་ཟེའི་ཁྱེའུ་སྤྲིན་མཆོད་སྦྱིན་གྱི་གནས་དེར་ཕྱིན་མ་ཐག་ཏུ་དེའི་ཚེ་བུ་མོ་དེས་རང་གི་ཕ་མ་ལ་འདི་སྐད་ཅེས་སྨྲས་སོ། །ཡབ། བྲམ་ཟེའི་ཁྱེའུ་འདིའི་མཚན་མ་ཇི་ལྟར་གདའ་པ་ལས་ན་འདི་བདག་གི་ཁྱིམ་ཐབ་ཏུ་འགྱུར་རོ། །དེ་ནས་བྲམ་ཟེའི་ཁྱེའུ་སྤྲིན་བྲམ་ཟེ་དེ་དག་ཐམས་ཅད་དང་ལྷན་ཅིག་ཀུན་ཏུ་སྨྲ་བར་བྱེད་ཅིང ། དེ་ན་བྲམ་ཟེ་སྤྲིན་ཉིད་བསྟན་བཅོས་དང།་གསང་སྔགས་དག་གིས་ཁྱད་པར་དུ་འཕགས་སོ། །དེའི་ཚེ་ན་མཆོད་སྦྱིན་གྱི་གནས་དེར་བྲམ་ཟེ་དུམ་བུ་བྱིན་ཞེས་བྱ་བ་ཞིག་རྒན་གྲལ་དུ་འདུག་སྟེ་མཆོད་སྦྱིན་བྱེད་དོ། །དེ་ནས་བྲམ་ཟེའི་ཁྱེའུ་སྤྲིན་བྲམ་ཟེ་དུམ་བུ་བྱིན་ག་ལ་བ་དེར་སོང་སྟེ་ཕྱིན་ནས། བྲམ་ཟེ་དུམ་བུ་བྱིན་དང་ལྷན་ཅིག་ཏུ་རིག་བྱེད་དང ། གསང་སྔགས་དག་སྨྲ་བར་བྱེད་ཅིང་དེ་ན། འདི་ལྟ་སྟེ། སྤྲིན་ 308a ༄#། །ཉིད་རིག་བྱེད་དང ། གསང་སྔགས་དང ། བསྟན་བཅོས་དག་གིས་ཁྱད་པར་དུ་འཕགས་སོ། །དེ་ནས་བྲམ་ཟེའི་ཁྱེའུ་སྤྲིན་གྱིས་བྲམ་ཟེ་དུམ་བུ་བྱིན་ལ་འདི་སྐད་ཅེས་སྨྲས་སོ། །ཀྱེ་བྲམ་ཟེ། བདག་ཅག་བྲམ་ཟེ་རྣམས་ཀྱི་ཆོས་ཉིད་ནི་གང་གིས་བསྟན་བཅོས་ཐམས་ཅད་རྟོགས་ཤིང་ཁོང་དུ་ཆུད་པ་དེ་སྟན་མཆོག་ལ་འདུག་པ་ཡིན་ནོ། ། དེ་ནས་ཡང་བྲམ་ཟེའི་ཁྱེའུ་སྤྲིན་གྱིས་བྲམ་ཟེ་དུམ་བུ་བྱིན་ལ་འདི་སྐད་ཅེས་སྨྲས་སོ། །བྲམ་ཟེ་ཆེན་པོ། འདིར་ཁོ་བོ་འདུག་གི་སྟན་འདི་ལས་ལོངས་ཤིག་།དེ་ནས་བྲམ་ཟེ་དུམ་བུ་ཡིན་གྱིས་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ། ང་སྟན་འདི་ལས་མ་བསླང་ཞིག་དང ། ཁོ་བོས་ཟོང་ལྔ་བརྒྱ་ཐོབ་པ་ཁྱོད་ལ་བྱིན་ནོ། །སྨྲས་པ། ཁོ་བོ་ལ་མི་དགོས་སོ། །དེ་མ་ལངས་པ་དང ། དེའི་མགྲིན་པ་ནས་བཟུང་སྟེ་བསླང་ངོ ། །དེ་ནས་བྲམ་ཟེ་དུམ་བུ་བྱིན་གྱིས་བྲམ་ཟེའི་ཁྱེའུ་སྤྲིན་ལ་སྨྲས་པ། བྲམ་ཟེའི་ཁྱེའུ། ཁྱོད་ཀྱིས་ཁོ་བོ་སྟན་འདི་ལས་བསླངས་ནས་མཐོ་བཙམས་ཤིང་དངངས་པར་བྱས་པས་ཁྱོད་གང་དང ། གང་དུ་སྐྱེས་པའི་སྐྱེ་བ་ཐམས་ཅད་དུ་སྦྱིན་པའི་བར་ཆད་བྱའོ་ཞེས་དམ་བཅས་སོ། །དེ་ནས་བྲམ་ཟེའི་ཁྱེའུ་སྤྲིན་སེང་གེའི་ཁྲི་དེ་ལ་འདུག་གོ་།དེ་ནས་བྲམ་ཟེ་ས་ག་བཟང་པོས་བུ་མོ་བཟང་ལེན་ལྡན་ལག་པ་གཡས་པས་བཟུང་སྟེ། གསེར་གྱི་འཁར་པ་དང ། རིལ་བ་དང ། རས་ཟུང་གཅིག་ 308b དང།་ཟོང་ལྔ་བརྒྱ་ཁྱེར་ནས་བྲམ་ཟེའི་ཁྱེའུ་སྤྲིན་ག་ལ་བ་དེར་སོང་སྟེ་ཕྱིན་ནས། བྲམ་ཟེའི་ཁྱེའུའི་སྤྲིན་ལ་འདི་སྐད་ཅེས་སྨྲས་སོ། །རིགས་ཀྱི་བུ། འདི་དག་ལོང་ཞིག་།དེ་ནས་བྲམ་ཟེའི་ཁྱེའུ་སྤྲིན་གྱིས་ཟོང་ལྔ་བརྒྱ་དང ། རས་ཟུང་གཅིག་དང ། འཁར་བ་དང ། རིལ་པ་རྣམས་བླངས་ཏེ་བུ་མོ་དེ་མ་བླངས་སོ། །འདི་སྐད་ཅེས་ཀྱང་སྨྲས་སོ། །བུད་མེད་འདིས་ཅི་ཞིག་བྱ། བུད་མེད་ནི་སྤྲེའུ་དང་འདྲ་སྟེ། རྒོད་པ། འཕྱར་བ། དགེ་བའི་བར་ཆད་བྱེད་པ་ཡིན་ལ། ཁོ་བོ་ནི་དགོན་པ་དང ། རབ་ཏུ་དབེན་པ་རྣམས་ན་གནས་པས་འདི་ཁོ་བོ་ལ་མི་དགོས་སོ། །རིགས་ཀྱི་བུ། བདག་ལ་སྙིང་བརྩེ་བའི་ཕྱིར་ལོང་ཞིག་།དེས་མ་བླངས་སོ། །དེ་ནས་བྲམ་ཟེའི་ཁྱེའུ་སྤྲིན་མཆོད་སྦྱིན་གྱི་གནས་དེ་ནས་སོང་སྟེ། རིའི་རྒྱལ་པོ་གངས་ག་ལ་བ་དེར་སོང་ངོ། །དེ་ནས་བྲམ་ཟེ་ས་ག་བཟང་པོས་བུ་མོ་བཟང་ལེན་ལྡན་ལ་སྨྲས་པ། བུ་མོ། ཁྱོད་ཁྱིམ་ཐབས་ཀྱི་ཕྱི་བཞིན་ཅིའི་ཕྱིར་མི་འགྲོ་།དེས་དེའི་ཚིག་མཉན་ཏེ་མཉན་ནས་རིའི་རྒྱལ་པོ་གངས་ག་ལ་བ་དེར་ལོངས་སུ་འཕགས་སོ། །དེའི་ཚེ་ན་གནས་གཙང་མའི་རིས་ཀྱི་ལྷའི་བུ་ཞིག་གིས་རིའི་རྒྱལ་པོ་གངས་སུ་འགྲོ་བའི་ལམ་མི་སྣང་བར་བྱས་ནས་རྒྱལ་པོའི་ཕོ་བྲང་པདྨ་ཅན་དུ་གང་ནས་འགྲོ་བའི་ལམ་བསྟན་ཅིང ། གང་དུ་བྲམ་ཟེའི་ཁྱེའུ་སྤྲིན་དྲོ་འདེབས་པ་དེར་བུ་མོ་བཟང་ལེན་ལྡན་ཡང་དགོངས་འདེབས་སོ། །དེ་ནས་བྲམ་ཟེའི་ཁྱེའུ་དེས་ 309a ༄#། །རྒྱལ་པོའི་ཕོ་བྲང་པདྨ་ཅན་དར་གི་ལྡ་ལྡི་བྲེས་པ། མེ་ཏོག་བཀྲམ་པ། བདུག་སྤོས་འཐུལ་བའི་སྣོད་དང་ར་བ་མཐོང་ནས་དེས་དྲིས་པ། གྲོང་ཁྱེར་ཆེན་པོ་འདི་ཅིའི་རྒྱུས་མངོན་པར་བརྒྱན་པར་གྱུར། དེ་ནས་རྒྱལ་པོའི་ཕོ་བྲང་པདྨ་ཅན་གྱི་རྒྱལ་པོའི་ཕོ་བྲང་འཁོར་བའི་མི་རྣམས་ཀྱིས་བྲམ་ཟེའི་ཁྱེའུ་སྤྲིན་ལ་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ། ཁྱོད་ཀྱིས་མ་ཐོས་སམ། འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཅེས་བྱ་བ་འཇིག་རྟེན་དུ་བྱུང་སྟེ། དེ་རྒྱལ་པོ་མ་སྐྱེས་དགྲས་སྤྱན་དྲངས་ནས་དེ་འདིར་བྱོན་པའི་ཕྱིར་གྲོང་ཁྱེར་ཆེན་པོ་མངོན་པར་བརྒྱན་ཏོ། །དེ་ནས་བྲམ་ཟེའི་ཁྱེའུ་སྤྲིན་འདི་སྙམ་དུ་སེམས་ཏེ། བདག་ཅག་བྲམ་ཟེ་རྣམས་ཀྱི་ནང་ན་གང་བསྟན་བཅོས་ཐམས་ཅད་ལ་སྤྱོད་པ་གསལ་ཞིང་མཁས་པའང་དཀོན་ན། སེམས་ཅན་རིན་པོ་ཆེ་འདི་ལྟར་འཇིག་རྟེན་དུ་བྱུང་བ་ལྟ་སྨོས་ཀྱང་ཅི་དོགས་ཀྱི། བདག་གིས་ཟོང་ལྔ་བརྒྱ་པོ་འདིས་མེ་ཏོག་ཉོས་ལ་དེ་བཞིན་གཤེགས་པ་ལ་མཆོད་པར་བྱ་གོར་མ་ཆག་སྙམ་ནས་དེས་ཕན་ཚུན་མེ་ཏོག་བཙལ་ན་གང་ནས་ཀྱང་མ་རྙེད་པ་དང ། རྒྱལ་པོའི་ཕོ་བྲང་པདྨ་ཅན་གྱི་རྒྱལ་པོའི་ཕོ་བྲང་འཁོར་བའི་མི་རྣམས་ན་རེ། བྲམ་ཟེའི་ཁྱེའུ། ཁྱོད་ཀྱིས་མ་ཐོས་སམ། རྒྱལ་པོ་མ་སྐྱེས་དགྲས་བཀའ་སྩལ་ 309b ཏེ།་མེ་ཏོག་ཐམས་ཅད་དེ་བཞིན་གཤེགས་པ་མར་མེ་མཛད་ལ་མཆོད་པ་བྱ་དགོས་ཀྱི། འདི་ལྟར་སུའང་མེ་ཏོག་ཉོར་ཡང་མི་གནང ། འཚོང་དུའང་མི་གནང་ངོ ། །གང་ཞིག་གིས་ཉོས་སམ། བཅོངས་ན་ངས་དེ་ཆད་པ་ཆེན་པོས་བཅད་དོ་ཞེའོ། །དེ་མེ་ཏོག་ཚོལ་བ་ན་བུ་མོ་བཟང་ལེན་ལྡན་མདུན་དུ་འདུག་སྟེ་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ། ཅི་ཚོལ་བྲམ་ཟེའི་ཁྱེའུ་སྤྲིན་གྱིས་སྨྲས་པ། བུ་མོ། མེ་ཏོག་འཚོལ་ལོ། །དེ་ནས་བུ་མོ་བཟང་ལེན་ལྡན་མེ་ཏོག་ཕྲེང་བརྒྱུད་མཁན་ཞིག་གི་ཁྱིམ་ག་ལ་བ་དེར་སྟོང་སྟེ་ཕྱིན་ནས་མེ་ཏོག་ཕྲེང་བརྒྱུད་མཁན་དེ་ལ་འདི་སྐད་ཅེས་སྨྲས་སོ། །རིགས་ཀྱི་བུ། ཁོ་མོ་ལ་མེ་ཏོག་བྱིན་ཅིག་།ཁོ་མོའི་ཁྱིམ་ཐབ་ལ་དགོས་སོ། །མེ་ཏོག་ཕྲེང་བརྒྱུད་མཁན་གྱིས་སྨྲས་པ། བུ་མོ། ཁྱོད་ཀྱིས་མ་ཐོས་སམ།་འདི་ལྟར་རྒྱལ་པོ་མ་སྐྱེས་དགྲས་འདི་སྐད་ཅེས་བཀའ་སྩལ་ཏེ། མེ་ཏོག་ཐམས་ཅད་དེ་བཞིན་གཤེགས་པ་མར་མེ་མཛད་ལ་མཆོད་པ་བྱ་དགོས་ཀྱི། འདི་ལྟར་སུའང་མེ་ཏོག་འཚོང་དུའང་མི་གནང ། ཉོར་ཡང་མི་གནང་ངོ ། །གང་ཞིག་གིས་ཉོས་སམ། བཙོངས་ན་ངས་དེ་ཆད་པ་ཆེན་པོ་བཅད་དོ་ཞེའོ། །ལན་གསུམ་གྱི་བར་དུ་བསླངས་པ་དང ། དེ་བཞིན་བྱའོ་ཞེས་ཟེར་རོ། །དེ་ནས་བུ་མོ་བཟང་ལེན་ལྡན་གྱིས་བུམ་པ་བསླངས་ནས་ཨུཏྤ་ལ་བདུན་བཅུག་སྟེ། གྲོང་ཁྱེར་དུ་སོང་ནས་བྲམ་ཟེའི་ཁྱེའུ་སྤྲིན་མཐོང་བ་དང་མདུན་དུ་འདུག་སྟེ། 310a ༄#། །འདི་སྐད་ཅེས་སྨྲས་སོ། །བྲམ་ཟེའི་ཁྱེའུ། ཅི་ཚོལ། བུ་མོ། མེ་ཏོག་ཚོལ་ལོ། །སྨྲས་པ། བྲམ་ཟེའི་ཁྱེའུ་ཅི་བྱ། སྨྲས་པ། བུ་མོ། བསྐྱེད་པར་བྱའོ། ། བུ་མོས་སྨྲས་པ། ཨུཏྤ་ལ་བཏོགས་ཟིན་པ་གང་དག་ཡང་སྐྱེ་བར་འགྱུར་བ་ནི་ཁོ་མོས་ནམ་ཡང་མ་ཐོས་མ་མཐོང་ངོ ། །སྨྲས་པ། བུ་མོ། གང་ལ་བསྐྱེད་པ་ཙམ་གྱིས་སྐྱེ་བའི་བསོད་ནམས་ཀྱི་ཞིང་དེ་ལྟ་བུ་ལ་བསྐྱེད་དོ། །དེས་སྨྲས་པ། གལ་ཏེ་ཁོ་མོ་གང་དང ། གང་དུ་སྐྱེས་པའི་སྐྱེ་བ་ཐམས་ཅད་དུ་ཁྱོད་ཁོ་མོའི་ཁྱིམ་ཐབ་ཏུ་འགྱུར་བར་དམ་འཆའ་ན་དེའི་ཕྱིར་ཨུཏྤ་ལ་སྦྱིན་ནོ། །དེ་ནས་བྲམ་ཟེའི་ཁྱེའུ་སྤྲིན་འདི་སྙམ་དུ་སེམས་ཏེ། བདག་ནི་དགོན་པ་དང ། རབ་ཏུ་དབེན་པ་ན་གནས་པ་ཡིན་ལ། བུད་མེད་ནི་རྒོད་པ། འཕྱར་བ། དགེ་བའི་རྩ་བའི་པར་ཆད་བྱེད་པ་ཡིན་པས་བུད་མེད་འདིས་ཅི་ཞིག་བྱ་སྙམ་མོ། །ལན་བདུན་གྱི་བར་དུ་སྨྲས་པ་དང ། དེ་བཞིན་དུ་གྱུར་ཅིག་ཅེས་སྨྲས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་བཀའ་སྩལ་ཏོ། །འདི་སྐད་ངས་ཐོས་སྔོན་སྲིད་ན། །སངས་རྒྱས་མར་མེ་འཇིག་རྟེན་བྱུང ། །འཁོར་ནི་མང་པོ་བདུན་སྟོང་དང་།། པདྨ་ཅན་དུ་དེ་ཕྱིན་ཏོ། །དེ་ཡི་ཕྱིར་ནི་རྒྱལ་མཚན་བསྒྲེངས། །རྔ་ནི་བརྒྱ་ཁྲག་དེ་ཕྱིར་བརྡུངས། །གྲོང་ཁྱེར་ཐམས་ཅད་ཀུན་སྦྱངས་ཤིང ། །ལམ་སྲང་བཞི་ནི་དེ་ཕྱིར་བརྒྱན། །གྲོང་ཁྱེར་ 310b བརྒྱན་པ་དེ་མཐོང་ནས། །བྲམ་ཟེའི་ཁྱེའུས་དྲིས་པ་ནི། །གང་གི་ཕྱིར་ནི་རྒྱལ་མཚན་སྒྲེངས། །གང་ཕྱིར་རྔ་ནི་བརྒྱ་ཕྲག་བརྡུངས། །གྲོང་ཁྱེར་ཐམས་ཅད་ཀུན་སྦྱངས་ཤིང ། །གང་ཕྱིར་ལམ་སྲང་བཞི་བརྒྱན་པའི། །བསམ་པ་དེ་ནི་ལུང་སྟོན་ཅིག་།རིག་བྱེད་ཤེས་ཁྱོད་མ་ཐོས་སམ། །སངས་རྒྱས་མར་མེ་འཇིག་རྟེན་བྱུང ། །འཁོར་ནི་མང་པོ་བདུན་སྟོང་དང ། །པདྨ་ཅན་དུ་དེ་བྱོན་ཏེ། ། དེ་ཡི་ཕྱིར་ནི་རྒྱལ་མཚན་བསྒྲེངས། །དེ་ཕྱིར་རྔ་ནི་བརྒྱ་ཕྲག་རྡུང ། །གྲོང་ཁྱེར་ཐམས་ཅད་ཀུན་སྦྱངས་ཤིང ། །དེ་ཕྱིར་ལམ་སྲང་བཞི་བརྒྱན་ཏོ། །སངས་རྒྱས་ཀྱི་ནི་སྒྲ་ཐོས་ནས། །སངས་རྒྱས་ཡོན་ཏན་གྱིས་མགུ་སྟེ། །རིངས་པར་མྱུར་དུ་སོང་བ་དང ། །རྒྱང་ནས་བྲམ་ཟེའི་བུ་མོ་མཐོང ། །པདྨ་ཨུཏྤལ་གཡོ་བའི་མིག་།ཆུ་སྐྱེས་ཐོགས་ཤིང་སྒོ་ན་འདུག་།དེ་ཡིས་བྲམ་ཟེའི་ཁྱེའུ་མཐོང་ནས། །སྙན་པར་སྨྲ་བར་བྱ་བའི་ཕྱིར། །ཀ་ལ་པིངྐ་རྨ་བྱའི་སྒྲ། །ཡིད་འོང་ངང་མོ་ཁུ་བྱུག་སྒྲས། །སྒྲ་ཆེན་སྤངས་ནས་ཚངས་པའི་སྒྲས། །བྲམ་ཟེའི་ཁྱེའུ་ལ་བུ་མོས་སྨྲས། །ཁྱེའུ་ཅི་ནགས་ཀྱི་ནང་ན་དེ། །སྦྱིན་སྲེག་བྱེད་ཅིང་རིག་འདོན་ལ། །རྒྱལ་པོའི་དམག་གིས་མ་གཙེས་སམ། །འཁྲུགས་ཤིང་ལམ་སྲང་དག་ཏུ་རྒྱུ། །བུ་མོ་ང་ཁྱིམ་གཉེན་འདུན་མེད། །ཡོངས་སུ་བཟུང་བའང་ང་ལ་མེད། །འདོད་པའི་ཡོན་ཏན་ང་མི་འདོད། །བུ་མོ་རྒྱལ་དམག་ང་མི་གནོད། །ང་དེ་དག་ལས་ཟན་མི་ཟ། །ཆོས་གསོས་གོས་ཀྱང་མི་ལེན་ཏེ། །ཤེས་བཞིན་རྫུན་ནི་ 311a ༄#། །མི་སྨྲ་ན། །བུ་མོ་རྒྱལ་དམག་ང་མི་གནོད། །འབྲས་བུ་རྩ་བས་ནགས་ན་གནས། །བུ་མོ་རྒྱལ་དམག་ང་མི་གནོད། །སེང་ཕྲུག་དག་གིས་མ་གཙེས་སམ། །འབྲས་རྩ་ནགས་ན་མེད་དམ་ཅི། །ཅིའི་ཕྱིར་ཁྱོད་ནི་བརྟན་པར་འོངས། །སེང་གེའི་ཕྲུག་གུས་མ་གཙེས་ཏེ། །ནགས་ན་འབྲས་བུ་རྩ་བ་ཡོད། །བཟང་མོ་ཨུཏྤལ་དགོས་པའི་ཕྱིར། །དེ་ཕྱིར་ང་འདི་གྲོང་ཁྱེར་འོངས། །གལ་ཏེ་ཤེད་བུ་ལང་ཚོ་ཡིས། །དྲེགས་ལུས་བརྒྱན་ཕྱིར་བྲམ་ཟེའི་ཁྱེའུ། །བདག་གི་ཨུཏྤལ་འཚམ་པ་ཡིན། །བདག་གི་ཕྲེང་ཕྱིར་མི་ཉོ་ལ། །ུཏྤལ་བསྣམས་ཕྱིར་འདོད་པ་མིན། །བརྩེ་ལྡན་མར་མེ་མཛད་ཀྱི་ཕྱིར། །བཟང་མོ་བདག་ནི་ཨུཏྤལ་སློང ། །བདེ་བར་ཕ་རོལ་འགྲོ་བ་ན། །གང་དུ་ཕ་ལས་ཟན་ཟོས་ཚེ། །བསླང་བའི་ཚིག་སྨྲས་མི་དྲན་ནས། །འཛེམ་མེད་ཅི་ཕྱིར་མེ་ཏོག་སློང ། །བཟང་མོ་ཨུཏྤལ་རིན་དུ་དབྱིག་།ལྔ་བརྒྱ་འདི་བྱིན་དགེ་མས་གནང ། །སངས་རྒྱས་ཡོན་ཏན་ཚོལ་བ་ལ། །བཟང་མོ་བགེགས་ནི་མ་བྱེད་ཅིག་།བཟང་མོ་བདག་གི་གཞི་བྱས་ནས། །སློང་བ་རྣམས་ཀྱི་བགེགས་སུ་འགྱུར། །གཞན་ལྟ་ཞོག་གི་བྲམ་ཟེའི་ཁྱེའུ། །གལ་ཏེ་སློང་ལ་བདག་བྱིན་ན། །བདག་ནི་ཁྱོད་ཀྱི་བགེགས་མི་བྱེད། །བདག་སྨོན་འདིར་གྱུར་གཞན་དུ་མིན། །དེ་གཉིས་སྨོན་ལམ་བཏབ་ནས་ནི། །བྲམ་ཟེའི་ཁྱེའུས་ཨུཏྤལ་བླངས། །དེ་དག་ཨུཏྤལ་ཐོགས་ནས་ཀྱང ། ། 311b རྒྱལ་བའི་ཞབས་ལ་ཕྱག་བཙལ་ནས། །གལ་ཏེ་བདག་ལུས་སྐམས་གྱུར་ཅིང ། །བདག་གི་རུས་པ་སྐམས་གྱུར་ཀྱང ། །བྱང་ཆུབ་ལུང་མ་བསྟན་པར་དུ། །བདག་ནི་དེ་རིང་མི་ལྡང་ངོ ། ། བདག་སྨོན་དེར་གྱུར་གཞན་དུ་མིན། །དེ་ནས་བུ་མོ་བཟང་ལེན་ལྡན་གྱིས་ཨུཏྤ་ལ་ལྔ་བླངས་ཏེ་བྲམ་ཟེའི་ཁྱེའུ་སྤྲིན་ལ་བྱིན་ནས། བྲམ་ཟེའི་ཁྱེའུ། ཨུཏྤ་ལ་འདི་དག་ལོང་ལ་རང་གི་མིང་གིས་སྐྲུན་ཅིག་།བྲམ་ཟེའི་ཁྱེའུ། ཨུཏྤལ་འདི་གཉིས་ཀྱང་ཁོ་མོའི་མིང་གིས་སྐྲུན་ཅིག་།དེ་ནས་བྲམ་ཟེའི་ཁྱེའུ་སྤྲིན་ཨུཏྤ་ལ་དེ་དག་ཁྱེར་ནས། གྲོང་ཁྱེར་གྱི་ཕྱི་རོལ་ཏུ་བྱུང་བ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་མཛེས་པ། དད་པར་བྱ་བ། དབང་པོ་དུལ་བ། ཐུགས་དུལ་བ། མཆོག་ཏུ་དུལ་བ། དང་ཞིང་ཞི་བའི་ཕ་རོལ་ཏུ་ཕྱིན་པ། དུལ་བ་དང ། ཞི་བའི་དམ་པའི་ཕ་རོལ་ཏུ་ཕྱིན་པ། གླང་པོ་ཆེན་པོ་དབང་པོ་བསྲུང་ཞིང་ཐུལ་བ། མཚོ་ལྟར་དང་ཞིང་རྣམ་པར་དང་ལ་རྙོག་པ་མེད་པ། གསེར་གྱི་མཆོད་སྡོང་ལྟར་མངོན་པར་འཕགས་པ། དཔལ་གྱིས་བརྗིད་པ། གཟི་བརྗིད་ཀྱིས་འབར་བ་མཐོང་ངོ ། །སེམས་ཅན་བྱེ་བ་བརྒྱ་སྟོང་ཕྲག་དུ་མ་དང ། ཁྱེའུ་དང ། བུ་མོ་བརྒྱ་ཕྲག་དུ་མ་དང ། ལྷ་དང ། ལྷ་མ་ཡིན་དང ། ཀླུ་དང ། གནོད་སྦྱིན་དང ། དྲི་ཟ་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་མང་པོ་དང ། རྒྱལ་པོ་མ་སྐྱེས་དགྲའང་ 312a ༄#། །བཙུན་མོའི་འཁོར་དང་ལྷན་ཅིག་ཏུ་མེ་ཏོག་དང ། མེ་ཏོག་ཕྲེང་བ་དང ། སྤོས་དང ། བྱུག་པ་ཐོགས་ཏེ་བཅོམ་ལྡན་འདས་ལ་མཆོད་པའི་ཕྱིར་འོང་བའང་མཐོང་ནས། ཡང་འདི་སྙམ་དུ་སེམས་པར་གྱུར་ཏོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡིན་པར་བདག་གིས་ཐོས་ན། དེ་བཞིན་གཤེགས་པ་འདི་ལ་ནི་མཚན་སུམ་ཅུ་ཞིག་སྣང་སྟེ། མཚན་གཉིས་ནི་མི་སྣང་བར་མཚན་སུམ་ཅུ་རྩ་གཉིས་དང་ལྡན་པ་མ་ཡིན་ནོ་སྙམ་མོ། །དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་བྲམ་ཟེའི་ཁྱེའུ་སྤྲིན་གྱི་སེམས་ཀྱི་ཀུན་ཏུ་རྟོག་པ་ཐུགས་སུ་ཆུད་ནས། རྫུ་འཕྲུལ་ཇི་ལྟ་བུ་མངོན་པར་འདུ་མཛད་པ་མངོན་པར་འདུ་མཛད་པས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་པོ་དེ་དག་སྣང་བར་འགྱུར་བ་དེ་ལྟ་བུའི་རྫུ་འཕྲུལ་མངོན་པར་འདུ་མཛད་པ་མངོན་པར་འདུ་མཛད་དེ། བྲམ་ཟེའི་ཁྱེའུ་སྤྲིན་གྱིས་དེ་མཐོང་ནས་ཡང་བྲམ་ཟེའི་ཁྱེའུ་སྤྲིན་དགའ་ཞིང་མགུ་ལ་ཡི་རངས་ཏེ། རབ་ཏུ་དགའ་བ་དང ། ཡིད་བདེ་བ་སྐྱེས་ནས་པགས་པ་དེ་བཏིང་བ་དང ། དེ་ནས་རྒྱལ་པོའི་ 312b ཕོ་བྲང་པདྨ་ཅན་གྱི་རྒྱལ་པོའི་ཕོ་བྲང་འཁོར་བའི་མི་དེ་དག་གིས་པགས་པ་དེ་བླངས་ནས། ཕན་ཚུན་དུ་བོར་ཏེ་བྲམ་ཟེའི་ཁྱེའུ་སྤྲིན་ལ་འདི་སྐད་ཅེས་སྨྲས་སོ། །བྲམ་ཟེའི་ཁྱེའུ། མ་སྨྱོས་སམ།་གང་དུ་རྒྱལ་པོའི་ན་བཟའ་གདིང་བ་དེར་ཁྱོད་ཀྱིས་པགས་པ་བཙོག་པ་འདི་གདིང་བར་བྱེད། དེ་ནས་བྲམ་ཟེའི་ཁྱེའུ་སྤྲིན་གྱིས་པགས་པ་བླངས་ནས་ལམ་ལས་བཟུར་ཏེ ། ལམ་གོལ་བར་འདུག་ནས་བདེན་པའི་ཚིག་འདི་བྱས་སོ། །བདེན་པ་དང ། བདེན་ཚིག་གང་གིས་འདི་ལྟར་དེ་བཞིན་གཤེགས་པ་ཐམས་ཅད་མཁྱེན་པ། ཐམས་ཅད་གཟིགས་པ། འཇིག་རྟེན་ལ་ཐུགས་བརྩེ་བ་ཡིན་ན། ཤུལ་ལས་བཟུར་ཏེ་བདག་གི་རལ་པ་ལ་ཞབས་འཇོག་པར་གྱུར་ཅིག་།དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཞལ་ཕྱིར་གཟིགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་།གང་དུ་ངའི་ཞབས་གཉིས་འཇོག་པ་དེར་ཁྱོད་ཀྱིས་གཞག་པར་མི་བྱའོ། །དེ་ཅིའི་ཕྱིར་ཞེ་ན། དེ་ནི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་ལ་བསྙེན་བཀུར་བྱས་པའི་རལ་པ་ཡིན་པའི་ཕྱིར་རོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཤུལ་ལས་བཟུར་ནས་བྲམ་ཟེའི་ཁྱེའུ་སྤྲིན་གང་ན་བར་གཤེགས་ཏེ་བྱོན་པ་དང ། ཞབས་གཉིས་རལ་བའི་སྟེང་དེར་བཞག་ 313a ༄#། །གོ་།དེ་ནས་བྲམ་ཟེའི་ཁྱེའུ་སྤྲིན་སའི་སྟེང་དེ་ནས་ལངས་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ལ་ཨུཏྤ་ལ་དེ་དག་གཏོར་ཏོ། །གཏོར་མ་ཐག་ཏུ་དེའི་ཚེ་དེ་བཞིན་གཤེགས་པའི་དབུའི་གཙུག་གི་སྟེང་གི་དྲང་ཐད་དུ་ཨུཏྤ་ལའི་ཁང་པ་བརྩེགས་པ་གྲཝ་བཞིར་ཀ་པ་བཞི་ཟུག་པ། ཆ་མཉམ་པ། ཤིན་ཏུ་རྣམ་པར་ཕྱེ་བ། ཉམས་དགའ་བ། ཡིད་དུ་འོང་བ་ཞིག་གནས་པར་གྱུར་ཏེ། ཁང་པ་བརྩེགས་པ་དེ་ནའང་དེ་བཞིན་གཤེགས་པའི་སྐུ་སྣང་ངོ ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཀྱིས་བྲམ་ཟེའི་ཁྱེའུ་སྤྲིན་ལ་འདི་སྐད་ཅེས་བཀའ་སྩལ་ཏོ། །བྲམ་ཟེའི་ཁྱེའུ། ཁྱོད་དགེ་བའི་རྩ་བ་འདིས་མ་འོངས་པའི་དུས་བསྐལ་པ་གྲངས་མེད་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ། རིག་པ་དང ། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང ། མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་སུ་འགྱུར་རོ། །དེ་ནས་བྲམ་ཟེའི་ཁྱེའུ་སྤྲིན་བདག་ཉིད་ལུང་བསྟན་པ་ཐོས་ནས་དགའ་ཞིང་མགུ་ལ་ཡི་རངས་ཏེ། རབ་ཏུ་ 313b དགའ་བ་དང ། ཡིད་བདེ་བ་སྐྱེས་ནས་དེའི་ཚེ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་བོ། །དེ་བཟོད་པ་ཐོབ་ནས་སྟེང་གི་ནམ་མཁའ་བར་སྣང་ལ་ཏ་ལ་བདུན་སྲིད་དུ་འཕགས་ནས་ཏིང་ངེ་འཛིན་དྲུག་སྟོང་མངོན་དུ་གྱུར་ཅིང ། དེ་བཞིན་གཤེགས་པ་གངྒཱའི་ཀླུང་གི་བྱེ་མ་སྙེད་དག་ཀྱང་མངོན་དུ་གྱུར་ཏོ། །དེ་ནས་བྲམ་ཟེའི་ཁྱེའུ་སྤྲིན་པར་སྣང་ལས་བབས་ཏེ། བཅོམ་ལྡན་འདས་ཀྱི་ཞབས་ལ་ཕྱག་བཙལ་ནས། བཅོམ་ལྡན་འདས་ལས་རབ་ཏུ་བྱུང་བ་དང ། དགེ་སློང་གི་དངོས་པོ་གསོལ་ཏོ། །ཀུན་དགའ་བོ། དེའི་ཚེ་དེའི་དུས་ན་བྲམ་ཟེའི་ཁྱེའུ་སྤྲིན་ཅེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་སོམ་ཉི་འམ། ཡིད་གཉིས་སམ། ཐེ་ཚོམ་ཟ་ན་ཀུན་དགའ་བོ་དེ་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་བྲམ་ཟེའི་ཁྱེའུ་སྤྲིན་ཅེས་བྱ་བར་དེར་གྱུར་ཏོ། །ཀུན་དགའ་བོ། དེའི་ཚེ་དེའི་དུས་ན་བྲམ་ཟེའི་བུ་མོ་བཟང་ལེན་ལྡན་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་སོམ་ཉིའམ། ཡིད་གཉིས་སམ། ཐེ་ཚོམ་ཟ་ན། ཀུན་དགའ་བོ། དེ་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། ཤཱཀྱའི་བུ་མོ་ས་འཚོ་མ་དེའི་ཚེ་དེའི་དུས་ན་བུ་མོ་བཟང་ལེན་ལྡན་ཞེས་བྱ་བར་གྱུར་ཏོ། །ཀུན་དགའ་བོ། དེའི་ཚེ་དེའི་དུས་ན་བྲམ་ཟེ་དུམ་བུ་བྱིན་ཞེས་བྱ་བར་གྱུར་པ་གང་རྒན་གྲལ་དུ་འདུག་སྟེ་སྦྱིན་སྲེག་བྱེད་པ་དེ་གཞན་ཞིག་ཡིན་སྙམ་དུ་སོམ་ཉི་འམ། ཡིད་ 314a ༄#། །གཉིས་སམ། ཐེ་ཚོམ་ཟ་ན། ཀུན་དགའ་བོ། དེ་དེ་ལྟར་མི་ལྟའོ། །དེ་ཅིའི་ཕྱིར་ཞེ་ན། མི་གཏི་མུག་ཅན་ལྷས་བྱིན་དེའི་ཚེ་དེའི་དུས་ན་བྲམ་ཟེ་དུམ་བུ་བྱིན་དུ་གྱུར་ཏོ། །ཀུན་དགའ་བོ། དེ་ལྟ་བས་ན་དེའི་ཕྱིར་དགེ་བའི་རྩ་བས་ཆོག་ཤེས་པར་མི་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཐམས་ཅད་དང་ལྡན་པའི་འཁོར་དེ་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་མར་མེ་མཛད་ཀྱིས་ལུང་བསྟན་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་བི་ཤུདྡྷ་སིདྷ་དང།་ལོ་ཙཱ་བ་པནྡེ་དགེ་བ་དཔལ་གྱིས་བསྒྱུར། རྒྱ་གར་གྱི་མཁན་པོ་ཛྙཱ་ན་གརྦྷ་དང ། ཞུས་ཆེན་གྱི་ལོ་ཙཱ་བ་བནྡེ་ཀླུའི་རྒྱལ་མཚན་གྱིས་ཞུས་ཆེན་བགྱིས་ཏེ་གཏན་ལ་ཕབ་པ།། |