rKTs


H206

(e-text produced by ACIP)

see text in transliteration
142a
།།རྒྱ་གར་སྐད་དུ། ཨཱརྱ་ནཱ་ག་ར་ཨ་བ་ལ་མ་བི་ཀཱ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་གྲོང་ཁྱེར་གྱིས་འཚོ་བ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉམ་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མངོན་མེད་ཟས་སྦྱིན་གྱི་ཀུན་དགའ་རབ་ན་ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། ལྷ་མ་ཡིན་དང ། ནམ་མཁའ་ལྡིང་དང ། མིའམ་ཅི་དང ། ལྟོ་འཕྱེ་ཆེན་པོ་དང ། བརྒྱ་བྱིན་དང ། ཚངས་པ་དང ། འཇིག་རྟེན་སྐྱོང་བ་དང ། རྒྱལ་པོ་དང ། བློན་པོ་དང ། བྱང་ཆུབ་སེམས་དཔའ་དང ། དགེ་སློང་དང ། དགེ་སློང་མ་དང ། དགེ་བསྙེན་དང ། དགེ་བ་སྙེན་མ་རྣམས་ཀྱིས་བཀུར་སྟིར་བྱས། བླ་མར་བྱས། མཆོད་
142b
ཅིང་རྗེད་དེ་པདྨ་ཆུས་མ་གོས་པ་བཞིན་དུ་བཞུགས་སོ། །དེ་ནས་དེའི་ཚེ་རྒྱལ་པོ་གསལ་རྒྱལ་གྱིས་དེ་བཞིན་གཤེགས་པ་ལ་མཆོད་པའི་ཕྱིར་སྟོན་ཟླ་ཐ་ཆུང་ཟླ་བ་ཉ་བའི་ཚེས་བཅོ་ལྔ་ལ། འབྲུ་མར་གྱིས་ཟངས་པོ་ཆེ་སྟོང་བཀང་སྟེ་དངར་ནས་མར་མེ་སྤར་བའི་འོད་ཀྱིས་ཁོར་ཁོར་ཡུག་ཏུ་དཔག་ཚད་བཞིར་སྣང་བས་ཁྱབ་པར་བྱས་སོ། །དེ་ནས་ཡང་དེའི་ཚེ་མཉན་ཡོད་ཀྱི་གྲོང་ཁྱེར་ཆེན་པོ་ན་དགའ་བྱེད་མ་ཞེས་བྱ་བ་གྲོང་ཁྱེར་གྱིས་འཚོ་བ་ཞིག་འདུག་གོ་།དེས་འབྲུ་མར་སྲན་གྲེའུ་དང་སྦྱར་བ་ཉོས་ནས་ཞག་བཞི་ཁ་འཚོས་ཏེ་ཉམ་ཆུང་བར་གྱུར་ཏོ། ། དེ་ནས་འབྲུ་མར་དེ་ཁྱེར་ཏེ་རྒྱལ་བུ་རྒྱལ་བྱེད་ཀྱི་ཚལ་དུ་སོང་ནས་ཁྱིམ་གྱི་ནང་ལོགས་སུ་མར་མེ་སྤར་ཏེ་བཞག་ནས་འདི་ལྟར་སེམས་བསྐྱེད་དེ། བཅོམ་ལྡན་འདས། བདག་དགེ་བའི་རྩ་བ་འདིས་མ་འོངས་པའི་དུས་ན་ཇི་ལྟར་ད་ལྟར་གྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་ལྟ་བ་བཞིན་དུ་བདག་ཀྱང་མ་འོངས་པའི་དུས་ན་སྟོན་པར་གྱུར་ཏེ་ཆོས་སྟོན་པར་གྱུར་ཅིག་།དགེ་འདུན་ཡང་སྡུད་པར་གྱུར་ཅིག་ཅེས་བྱས་སོ། །འདི་ལྟར་ཡང་སེམས་བསྐྱེད་དེ། གལ་ཏེ་བདག་མ་འོངས་པའི་དུས་ན་སངས་རྒྱས་སུ་འགྱུར་བ་ཞིག་ན་མར་མེ་འདི་བདག་ཕྱིར་མ་འོངས་ཀྱི་བར་དུ་འབར་བར་གྱུར་ཅིག་ཅེས་བྱས་ནས་མར་མེ་དེ་སྤར་ཏེ་གྲོང་ཁྱེར་དུ་སོང་ན། མར་
143a
༄#། །མེ་དེའི་འོད་ཟེར་ཀྱིས་ཛམྦུའི་གླིང་ཐམས་ཅད་སྣང་བར་གྱུར་ཏེ་ནམ་ནངས་ཀྱི་བར་དུའང་མར་མེ་དེ་མ་ཤིའོ། །དེ་ནས་ཚེ་དང་ལྡན་པ་མཽངྒལ་གྱི་བུ་ཆེན་པོས་ཆོས་གོས་ཀྱི་མཐའ་མས་མར་མེ་དེ་གསད་པར་བྱས་ནས་གསད་པར་མ་ནུས་སོ། །དེ་ནས་ཚེ་དང་ལྡན་པ་མཽངྒལ་གྱི་བུ་ཆེན་པོས་རྣམ་པར་འཐོར་རླུང་གིས་གསད་པར་བྱས་ཀྱང་གསད་པར་མ་ནུས་སོ། །དེ་ནས་ཚེ་དང་ལྡན་པ་མཽངྒལ་གྱི་བུ་ཆེན་པོས་ཚངས་པའི་འཇིག་རྟེན་དུ་འདུག་ནས་སྟོང་གསུམ་འདིར་ཤིང་རྟའི་སྲོག་ཤིང་ཙམ་གྱི་ཆར་གྱི་རྒྱུན་དབབ་པར་བྱིན་གྱིས་བརླབས་ཏེ་མར་མེ་དེ་ཡི་སྟེང་དུ་བཏང་ཡང་གསད་པར་མ་ནུས་སོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། མཽངྒལ་གྱི་བུ། ཐོང་ཤིག། མར་མེ་འདི་ནི་བྱང་ཆུབ་ཀྱི་སེམས་ཀྱིས་སྦར་བ་ཡིན་ལ། བྱང་ཆུབ་ཀྱི་སེམས་ནི་ཉན་ཐོས་ཀྱིས་ཟིལ་གྱིས་མནན་པར་མི་ནུས་སོ། །དེ་ཅིའི་ཕྱིར་ཞེ་ན། ཐམས་ཅད་མཁྱེན་པ་ཉིད་ཀྱི་སེམས་ནི་ཉན་ཐོས་དང ། རང་སངས་རྒྱས་ཐམས་ཅད་ཀྱིས་ཟིལ་གྱིས་མནན་དུ་མེད་པའི་ཕྱིར་རོ། །དེ་ནས་རེ་ཞིག་ན་བུད་མེད་དེ་ཉི་མ་ཤར་ཏེ་གྲོང་ཁྱེར་ནས་ཕྱིར་འོངས་ནས་དེས་མར་མེ་དེ་ཤིན་ཏུ་འབར་བ་མཐོང་བ་དང ། དེས་མཆོག་ཏུ་དགའ་བ་ཆེན་པོས་རྒྱས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་དོ། །སངས་རྒྱས་བཅོམ་ལྡན་
143b
འདས་རྣམས་ཀྱི་ཆོས་ཉིད་ནི་འདི་ཡིན་ཏེ། གང་གི་ཚེ་སངས་རྒྱས་བཅོམ་ལྡན་འདས་འཛུམ་པ་མཛད་པ་དེའི་ཚེ་སངས་རྒྱས་བཅོམ་ལྡན་འདས་རྣམས་ཀྱི་ཞལ་གྱི་སྒོ་ནས་འོད་ཟེར་ཁ་དོག་དུ་མ། འདི་ལྟ་སྟེ། སྔོན་པོ་དང ། སེར་པོ་དང ། དམར་པོ་དང ། དཀར་པོ་དང ། བཙོད་ཀ་དང ། ཤེལ་དང ། དངུལ་གྱི་ཁ་དོག་ལྟ་བུ་དག་བྱུང་བར་གྱུར་ཏེ། འཇིག་རྟེན་གྱི་ཁམས་མཐའ་ཡས་མུ་མེད་པ་དག་སྣང་བས་ཁྱབ་པར་བྱས་ནས་ཚངས་པའི་འཇིག་རྟེན་གྱི་བར་དུ་སོང་སྟེ། ཟླ་བ་དང ། ཉི་མའི་འོད་ཀྱང་ཟིལ་གྱིས་མནན་ནས་ཡང་སླར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་བཅོམ་ལྡན་འདས་ཀྱི་དབུའི་གཙུག་ཏོར་དུ་ནུབ་པར་གྱུར་ཏོ། །དེ་ནས་འོད་ཟེར་དེ་དག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་བཅོམ་ལྡན་འདས་ཀྱི་དབུའི་གཙུག་ཏོར་དུ་མི་སྣང་བར་གྱུར་ཏོ། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཀུན་དགའ་བོས་ཚིགས་སུ་བཅད་དེ་གསོལ་པ། །རྒྱལ་མཆོག་རྣམ་པར་འདྲེན་པ་གང་ཟག་མཆོག། རྒྱུ་མེད་པར་ནི་འཛུམ་པ་མི་མཛད་ན། །ཅི་ཡི་རྐྱེན་གྱིས་ཞལ་ནི་འཛུམ་མཛད་པ། །འཇིག་རྟེན་ཕན་པ་ཐུགས་བརྩེས་བདག་ལ་གསུངས། ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ། གྲོང་ཁྱེར་གྱིས་འཚོ་བ་འདི་བསྐལ་པ་ཉི་ཤུ་རྩ་བརྒྱད་ཀྱི་བར་དུ་ངན་འགྲོ་ལོག་པར་ལྟུང་བར་འགྲོ་བར་མི་འགྱུར་ཏེ། རྟག་ཏུ་
144a
༄#། །ལྷ་དང ། མིའི་ཕུན་སུམ་ཚོགས་པ་དག་ཉམས་སུ་མྱོང་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་སྣང་བ་ཞེས་བྱ་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །སྟོབས་བཅུ་ལྡན་པ་མཆོད་ཕྱིར་ཟངས་ཆེན་ཕྲག་སྟོང་གསལ་རྒྱལ་གྱིས། །མར་མེ་བཟང་པོ་སྦར་བས་དཔག་ཚད་བཞིར་ནི་ཀུན་ཏུ་སྣང ། །གྲོང་ཁྱེར་འཚོ་བའི་འབྲུ་མར་སྲན་མ་གྲེའུ་སྦྱར་སྤར་བ་ཡིས། །འཛམ་གླིང་སྣང་བས་ཁྱབ་གྱུར་དེ་ནི་བྱང་ཆུབ་སེམས་ཀྱི་མཐུས། ། མཽངྒལ་གྱིས་ནི་མར་མེ་གསད་འདོད་རྫུ་འཕྲུལ་རྒྱ་ཆེན་བྱས། །རྣམ་པར་འཐོར་བའི་རླུང་གི་ཤུགས་བཏང་གསད་པར་ཡོད་མ་ནུས། །ཚངས་པའི་འཇིག་རྟེན་འདུག་ནས་ཆུ་རྒྱུན་ཤིང་རྟའི་སྲོག་ཤིང་ཙམ། །ཕབ་ཀྱང་གསད་པར་མ་ནུས་མར་མེ་ཉི་མའི་འོད་བཞིན་སྣང ། །དེ་ནི་ཞག་བཞི་ཁ་འཚོས་རྒྱལ་བྱེད་དགའ་བའི་ཚལ་དུ་འོངས། །དགའ་བའི་སེམས་ཀྱིས་བདེ་གཤེགས་ཞབས་ལ་ཕྱག་བྱས་ཐལ་སྦྱར་འདུག་།མཉམ་མེད་འཛུམ་པ་མཛད་པས་ཀུན་དགའ་བོ་ཡང་རབ་དགའ་ནས། །གཟི་བརྗིད་མཐའ་ཡས་འཛུམ་མཛད་འདི་ཡི་འབྲས་བུ་ཇི་འདྲ་གསུངས། །དགའ་བྱེད་འདི་ནི་བསྐལ་པ་ཉི་ཤུ་བརྒྱད་ན་རྒྱལ་བར་འགྱུར། །རང་འབྱུང་ཀུན་སྣང་ཞེས་བྱ་འོད་ཀྱིས་སྟོང་ཆེན་བཞི་སྣང་བྱེད། །མ་འོངས་དུས་ན་བདེ་བར་
144b
གཤེགས་པ་བྱེ་བ་མཆོད་པར་འགྱུར། །དེ་ནི་ཀུན་ཏུ་འཁོར་ལོས་བསྒྱུར་འགྱུར་རྒྱལ་རྣམས་བཀུར་སྟིར་བྱེད། །སངས་རྒྱས་རྟོགས་པ་བརྗོད་པ་ཡི་ནི་དད་རྣམས་རབ་དགའ་བྱེད། །སྐྱེ་བོ་མཁས་པ་དག་གིས་དེ་ཐོས་སེམས་ཀྱང་རབ་ཏུ་དགའ། །དེ་ལྟར་རྒྱལ་བ་བསམ་ཡས་སྟོབས་བཅུའི་ཆོས་ཀྱང་བསམ་མི་ཁྱབ། །དགའ་བ་བསྐྱེད་ན་རྣམ་སྨིན་མཚུངས་མེད་བསམ་གྱིས་མི་ཁྱབ་འགྱུར། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཀུན་དགའ་བོ་དང ། གྲོང་ཁྱེར་གྱིས་འཚོ་བ་དེ་དང ། བྱང་ཆུབ་སེམས་དཔའ་དེ་དག་དང ། དགེ་སློང་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་གྲོང་ཁྱེར་གྱིས་འཚོ་བ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛྙཱ་ན་གརྦྷ་དང ། ལོ་ཙཱ་བ་བནྡེ་ཀླུའི་དབང་པོས་བསྒྱུར་བ། རྒྱ་གར་གྱི་མཁན་པོ་པི་\?\་དྱ་ཀ་ར་སིདྷ་དང ། ཞུས་ཆེན་གྱི་ལོ་ཙཱ་བ་བནྡེ་དེ་བ་ཙནྡྲ་ས་ཞུས་ཏེ་གཏན་ལ་ཕབ་པ།།