༄##། །རྒྱ་གར་སྐད་དུ། ཨཱརྱ་ཀུ་སུ་མ་སཉྩ་ཡ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་མེ་ཏོག་གི་ཚོགས་ཞེས་བྱ་བ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ 2a ༄##། །ཀྱི་ཕུང་པོའི་རི་ལ་དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་གྱི་དགེ་སློང་དང་ཐབས་གཅིག་ཏུ་བཞུགས་ཏེ། དེ་ནས་ཚེ་དང་ལྡན་པ་ཤཱ་རིའི་བུ་སྟན་ལས་ལངས་ནས་བླ་གོས་ཕྱོགས་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བདེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡང་བཅོམ་ལྡན་འདས། ད་ལྟར་སངས་རྒྱས་བཅོམ་ལྡན་འདས་བཞུགས་ལ་འཚོ་ཞིང་གཞེས་ཏེ་ཆོས་ཀྱང་སྟོན་པ་ 2b ཇི་སྙེད་ཅིག་བཞུགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། དེའི་ཕྱིར་ལེགས་པར་ཤིན་ཏུ་ཉོན་ལ་ཡིད་ལ་ཟུངས་ཤིག་དང་བཤད་དོ། །བཅོམ་ལྡན་འདས། ལེགས་སོ་ཞེས་གསོལ་ནས།་ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱི་ལྟར་ཉན་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། སངས་རྒྱས་ཀྱི་ཞིང་འདི་ནས་ཤར་ཕྱོགས་སུ་བྱེ་བ་བརྒྱ་ཕྲག་སྟོང་གིའང་ཐ་མ་ན་སངས་རྒྱས་ཀྱི་ཞིང་མར་མེ་ཅན་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འབྱུང་གནས་ཞེས་བྱ་བ་བཞུགས་ཏེ། ཤཱ་རིའི་བུ། ཡང་དེ་བཞིན་གཤེགས་པ་རིན་ཆེན་འབྱུང་གནས་ཀྱི་མཚན་གང་དག་ཉན་པར་འགྱུར་བ་དང ། དད་པའང་སྐྱེད་པར་བྱེད་པ་དེ་དག་ཐམས་ཅད་ཡང་དག་ 3a ༄##། །པའི་བྱང་ཆུབ་ཀྱི་ཡན་ལག་རིན་པོ་ཆེ་བདུན་རྣམས་ཡོངས་སུ་འཛིན་པར་འགྱུར་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །བསྐལ་པ་དྲུག་ཅུར་འཁོར་བ་ལ་རྒྱབ་ཀྱིས་ཕྱོགས་པར་བྱས་པར་འགྱུར་རོ། །འཇིག་རྟེན་གྱི་ཁམས་མར་མེ་ཅན་གྱི་མིའི་ཉི་མ་སངས་རྒྱས་རིན་ཆེན་འབྱུང་གནས་དེའི་མཚན་ཐོས་པར་དགའ་བ་ནི་བསྐལ་པ་དྲུག་ཅུར་འཁོར་བར་མི་འགྱུར་རོ། །ཤཱ་རིའི་བུ།་དེ་ལ་སོགས་པ་ཤར་ཕྱོགས་ན་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་ཀྱི་མཚན་རིན་ཆེན་འབྱུང་གནས་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །འདི་ནས་སངས་རྒྱས་ཀྱི་ཞིང་བརྒྱའི་འང་ཐ་མ་ན་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དམ་པ་ཞེས་བྱ་བ་ 3b བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་རིན་ཆེན་དམ་པའི་མཚན་གང་དག་ཉན་པར་འགྱུར་བ་དང ། དད་པའང་སྐྱེད་ཅིང་ཐལ་མོ་སྦྱོར་བར་བྱེད་པ་ནི། ཡང་ཤཱ་རིའི་བུ། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། སངས་རྒྱས་བཅོམ་ལྡན་འདས་ལ་ཉིན་གཅིག་བཞིན་དུ་སྦྱིན་པ་ཕུལ་བ་དེ་བཞིན་དུ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ཕུལ་བའི་བསོད་ནམས་ཀྱི་ཕུང་པོ་དེས་བསོད་ནམས་ཀྱི་ཕུང་པོ་འདིའི་བརྒྱའི་ཆར་ཡང་ཉེ་བར་མི་འགྲོའོ། །གྲངས་སུའམ། ཆའམ། དཔེར་རམ།་རྒྱུར་ཡང་ཉེ་བར་མི་འགྲོའོ། །དེ་བཞིན་དུ་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ན་སངས་རྒྱས་རིན་ཆེན་དམ་པ་གཙོ་བོ་བཞུགས་ཏེ། དེའི་མཚན་ཐོས་པས་འདིར་སངས་རྒྱས་འབྱུང་བ་ཡིན་ནོ། །འདི་ནས་སངས་རྒྱས་ཀྱི་ཞིང་བརྒྱ་ཕྲག་དྲུག་ཅུ་ན་འཇིག་རྟེན་གྱི་ཁམས་སྤོས་ལྡན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་འབྱུང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་རིན་ཆེན་འབྱུང་བའི་མཚན་གང་དག་གིས་ཐོས་པ་དེ་དག་ནི་བསྐལ་པ་བཅོ་ལྔར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་གིའང་ཐ་མ་ན་འཇིག་རྟེན་གྱི་ཁམས་འོད་ཟེར་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ 4a ༄#། །ཡང་དག་པར་རྫོགས་པའི་སངས་རྒྱས་རིན་ཆེན་སྣང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་རིན་ཆེན་སྣང་བ་ཞེས་བྱ་བའི་མཚན་གང་དག་ཐོས་པ་དང ། དད་པ་བསྐྱེད་པ་དེ་དག་ནི་ངན་སོང་གསུམ་དུ་འགྲོ་བར་མི་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ལྔ་བརྒྱ་བས་ཆེས་རིག་བ་འཇིག་རྟེན་གྱི་ཁམས་ཏོག་གི་རྒྱལ་མཚན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་ཏོག་ཅེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་རིན་ཆེན་ཏོག་གི་མཚན་གང་དག་ཐོས་པ་དང ། དད་པ་བསྐྱེད་ཅིང་དེ་བཞིན་གཤེགས་པ་དེ་ལ་རྗེས་སུ་དྲན་པར་བྱེད་པ་དེ་དག་ཐམས་ཅད་དཀོན་མཆོག་དང་འདྲ་བར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་གཉིས་ཀྱི་ཆེས་ཕ་རོལ་ན་འཇིག་རྟེན་གྱི་ཁམས་ཡོན་ཏན་ཐམས་ཅད་རབ་ཏུ་སྣང་བ་དང་ལྡན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་རབ་སྣང་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་རིན་ཆེན་རབ་སྣང་གི་མཚན་གང་དག་ཐོས་པ་དང ། ཐོས་ནས་ཀྱང་ལྷག་པའི་བསམ་པས་མོས་པར་བྱེད་ཅིང་ཡན་ལག་ལྔས་ཕྱག་འཚལ་བར་འགྱུར་བ་དེ་དག་ནི་བསྐལ་པ་ཉི་ཤུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ 4b ཞིང་སྟོང་བས་ཆེས་རིང་བ་འཇིག་རྟེན་གྱི་ཁམས་མངོན་པར་དགའ་བ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མི་འཁྲུགས་པ་ཞེས་བྱ་བ་བཞུགས་ཏེ།་ཡང་ཤཱ་རིའི་བུ། དེ་བཞིན་གཤེགས་པ་མི་འཁྲུགས་པ་དེའི་མཚན་གང་དག་ཐོས་པ་དང ། དད་པ་བསྐྱེད་པར་འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་བདུད་སྡིག་ཅན་རྣམས་ཀྱིས་ཀྱང་མི་འཁྲུགས་པར་འགྱུར་རོ། །ཡང་ཤཱ་རིའི་བུ། དེ་བཞིན་གཤེགས་པ་མི་འཁྲུགས་པ་དེའི་མཚན་དང ། ཡོན་ཏན་བརྗོད་པ་བཤད་པ་ན། བདུད་སྡིག་ཅན་གྱིས་ཐོས་ནས་དཔུང་གི་ཚོགས་ཐམས་ཅད་དང་བཅས་ཏེ་ངའི་དྲུང་དུ་འོངས་ནས་ཚིག་འདི་སྐད་དུ་སྨྲས་སོ། །ཡང་བཅོམ་ལྡན་འདས་སངས་རྒྱས་སྟོང་གི་མཚན་ཡོངས་སུ་བརྗོད་པ་ནི་མི་དོང་ཡི། དེ་བཞིན་གཤེགས་པ་མི་འཁྲུགས་པའི་མཚན་ནི་དེ་ལྟ་མ་ལགས་སོ། །དེ་ཅིའི་སླད་དུ་ཞེ་ན། དེ་ནི་བདག་གི་ཡུལ་དུ་འགྱུར་བ་མ་ལགས་སོ། །དེ་བཞིན་གཤེགས་པ་དེའི་མཚན་གང་དག་ཉན་པར་འགྱུར་བ་དེ་ལའང་བདག་གིས་བར་ཆད་བགྱིའོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན། ཁྱོད་ཀྱིས་གང་ཟག་གང་དག་ལ་བར་ཆད་བྱ་བ་དེ་དག་གང་ཡིན། གསོལ་པ། བཅོམ་ལྡན་འདས། ཐེག་པ་ཆེན་པོ་ལ་ཞུགས་པ་གང་དག་དེ་བཞིན་གཤེགས་པ་དེའི་མཚན་ཐོས་པར་འགྱུར་བ་ 5a ༄#། །དེ་དག་ལགས་ཏེ། བཅོམ་ལྡན་འདས། འཇིག་རྟེན་གྱི་ཁམས་འདིར་གང་བཅོམ་ལྡན་འདས་དེའི་མཚན་དང ། ཡོན་ཏན་ཡོངས་སུ་བརྗོད་པས་བག་ཚ་ཞིང་ཡོངས་སུ་གདུངས་སོ། །འོན་ཀྱང་བདག་གིས་མཚན་ཉན་པ་དེ་རྣམས་ལ་བར་ཆད་བགྱི་བའི་སླད་དུ་གོ་བགོ་བར་བགྱིའོ། །དེ་ཅིའི་སླད་དུ་ཞེ་ན། དེ་བཞིན་གཤེགས་པའི་མཚན་གང་གང་ཟག་གང་དག་གིས་ཐོས་པ་བདག་གི་དབང་དུ་མཆི་བར་འགྱུར་བ་དེ་ན་མ་མཆིས་སོ། །དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བདུད་སྡིག་ཅན་ལ་འདི་སྐད་ཅེས་བཀའ་སྩལ་ཏོ། །སྡིག་ཅན། ཁྱོད་གོ་བགོ་བར་མ་བྱེད་ཅིག་།ཁྱོད་ཀྱིས་ནི་སྐྱེས་བུ་དམ་པ་དེ་དག་ལ་བར་ཆད་བྱ་བར་མི་ནུས་སོ། །དེ་ཅིའི་ཕྱིར་ཞེ་ན། དེ་དག་ནི་ངས་དེ་བཞིན་གཤེགས་པ་མི་འཁྲུགས་པ་ལ་གཏད་པ་དང ། དེ་བཞིན་གཤེགས་པ་གཞན་དག་ལའང་གཏད་པས། དེ་དག་དེ་བཞིན་གཤེགས་པ་མི་འཁྲུགས་པས་དགོངས་ཤིང་བྱིན་གྱིས་རློབ་པར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདུད་སྡིག་ཅན་དེ་བཞིན་གཤེགས་པའི་སྤྱན་སྔ་ན་སྔར་མཆིས་ནས། འདི་སྐད་དུ་།སེངྒེའི་སྒྲ་སྒྲོགས་ན།་དེ་བཞིན་གཤེགས་པ་མི་འཁྲུགས་པའི་མཚན་ཐོས་ལ་བདུད་སྡིག་ཅན་འདིའི་དབང་དུ་མཆི་བར་འགྱུར་བ་གང་དག་ལ་བར་ཆད་བགྱི་བའི་སླད་དུ་བདུད་སྡིག་ཅན་གྱིས་གོ་བགོས་ 5b པའི་གང་ཟག་དེ་དག་གང་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། འདི་ལྟ་སྟེ། དེ་བཞིན་གཤེགས་པ་མི་འཁྲུགས་པ་དེ་དང ། དེའི་ཡོན་ཏན་ཡོངས་སུ་བརྗོད་པ་སེམས་ཅན་གང་དག་གིས་ཐོས་ནས་ད་ལྟར་སྤོང་བར་བྱེད་པ་རྣམས་སེམས་ཅན་དམྱལ་བར་འགྱུར་བའི་ཆོས་དམ་དུ་འཛིན་པར་འགྱུར་བ་ངས་མཐོང་ངོ ། །གསོལ་པ། བཅོམ་ལྡན་འདས། ཡོངས་སུ་སྤོང་བར་བགྱིད་པའི་སེམས་ཅན་དུ་ཞིག་མཆིས་པ་ལེགས་པར་བཤད་དུ་གསོལ། བཀའ་སྩལ་པ། ཤཱ་རིའི་བུ། ཕྱོགས་བཅུར་དེ་བཞིན་གཤེགས་པ་དེའི་མཚན་ཐོས་པར་འགྱུར་བ་དང ། དེ་ལྟར་འཇིག་རྟེན་གྱི་ཁམས་གཞན་ན་དེ་བཞིན་གཤེགས་པ་དེ་དག་གིས་དེ་དག་ལས་བརྩམས་ཏེ་ཆོས་སྟོན་ན་སེམས་ཅན་དེ་དག་ནི་ཤེས་རབ་ཆེ་ཞིང་ཤེས་རབ་རྒྱ་ཆེ་བས་དེའི་ཡོན་ཏན་ཡོངས་སུ་རྫོགས་པ་བཤད་ཀྱང་ངོམས་པར་མི་འགྱུར་རོ། །ཤཱ་རིའི་བུ། གང་དག་གིས་དེ་བཞིན་གཤེགས་པ་མངོན་སུམ་དུ་མཐོང་བར་གྱུར་པ་དེ་དག་གིས་དེའི་ཡོན་ཏན་ཡོངས་སུ་བརྗོད་པ་ལ་སྤོང་བར་འགྱུར་བ་འདི་ནི་གནས་མ་ཡིན། སྐབས་མེད་དོ། །སངས་རྒྱས་བཅོམ་ལྡན་འདས་དེ་དག་ནི་ཉོན་མོངས་པའི་སྙིགས་མའི་དུས་སུ་འབྱུང་བ་ནི་གནས་མ་ཡིན་ནོ། །འདི་ལྟ་སྟེ། དཔེར་ན། ད་ལྟར་སྙིགས་མ་ལྔའི་དུས་སུ་ང་བྱུང་ན་མི་མཇེད་ཀྱི་འཇིག་རྟེན་གྱི་ཁམས་ཀྱི་སེམས་ཅན་རྣམས་ཤེས་རབ་ 6a ༄#། །རབ་ཏུ་ཞན་པ་དེ་འདྲ་བ་དག་གིས་ཀྱང་ངས་བཤད་པའི་ཡོན་ཏན་ཁོང་དུ་ཆུད་ན་གང་དེ་བཞིན་གཤེགས་པ་མི་འཁྲུགས་པའི་སྟོང་གི་འཇིག་རྟེན་གྱི་ཁམས་ན་གནས་པས་ཤེས་པར་འགྱུར་པ་ལྟ་ཅི་སྨོས། ཤཱ་རིའི་བུ། དེ་ལྟ་མོད་ཀྱི་ཡོན་ཏན་འདི་ཡོངས་སུ་བརྗོད་པའི་ཆོས་ཀྱི་རྣམ་གྲངས་འདི་ནི་མཐར་གྱིས་བྱང་ཕྱོགས་སུ་འགྲོ་བས་འགྱུར་ཏེ། དེ་ན་སྐྱེས་བུ་དམ་པ་གང་དག་ཐེག་པ་ཆེན་པོ་ལ་ཞུགས་པ་དེ་དག་གིས་ཆོས་ཀྱི་རྣམ་གྲངས་འདི་རྒྱས་པར་བྱེད་པར་འགྱུར་རོ། །དེ་ན་ཤཱ་རིའི་བུ། ཆོས་ཀྱི་རྣམ་གྲངས་འདི་ཉན་ཏོ། །ཐོས་ནས་ཀྱང་སྤོང་བར་འགྱུར་ཏེ། སྐྱེས་བུ་དམ་པ་མ་ཡིན་པ་དེ་དག་ཅི་འདྲ་བ་ཉོན་ཅིག། བཅོམ་ལྡན་འདས། ལེགས་སོ། །ཞེས་གསོལ་ནས། ཚེ་དང་ལྡན་པ་ཤཱ་རིའི་བུ་བཅོམ་ལྡན་འདས་ཀྱི་ལྟར་ཉན་པ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བྱང་ཕྱོགས་ན་ཡུལ་ཁམས་གནྡྷ་ར་ཞེས་བྱ་བར་དེ་ན་ལོ་འབུམ་དུ་མནར་མེད་པའི་ལས་ཡོངས་སུ་འཛིན་པར་འགྱུར་བ་ཡོད་དོ། །བྱང་ཕྱོགས་ཀྱི་རྒྱུད་དེ་ཉིད་ནས་ཁ་ཆེ་ཡུལ་གྱི་ལྗོངས་ཀྱི་ཕྱོགས་གང་ན་དམ་པའི་ཆོས་འདི་ཆེས་ཤིན་ཏུ་སྟོབས་དང་ལྡན་པར་འབར་བར་འགྱུར་བ་དེ་ན་སྤོང་བར་བྱེད་པ་ཁྲི་ཕྲག་ལྔ་འབྱུང་ངོ ། །སྤངས་ནས་ཀྱང་རིགས་ཀྱི་བུ་དེ་དག་གང་དུ་གནོད་པར་འགྱུར་བའི་མཚམས་མེད་པར་འགྱུར་རོ། །གང་དུ་ཕལ་ཆེར་ཚོགས་ནས་མདོ་འདི་ལ་མངོན་དུ་དམོད་པར་བྱེད་པ་དེ་ 6b དག་ཐམས་ཅད་མཚམས་མེད་པར་འགྲོ་བར་འགྱུར་རོ། །བྱང་ཕྱོགས་སུ་མདོ་འདི་ལ་བྱེ་བ་ཕྲག་བརྒྱད་དང་ལྔ་འབུམ་སྤོང་བར་འགྱུར་ཏེ། སྤངས་ནས་མནར་མེད་པར་རབ་ཏུ་ལྟུང་བར་འགྱུར་རོ། ། ཤར་ཕྱོགས་ན་ནི་དད་པར་འགྱུར་བ་ཉུང་ཟད་ཅིག་ཡོད་དེ། མནར་མེད་པའི་ལས་ཕལ་ཆེར་འཛིན་པར་འགྱུར་ཞིང་དེ་ན་བརྒྱ་སྟོང་ཕྲག་མང་པོ་མནར་མེད་པའི་སེམས་ཅན་དམྱལ་བར་འགྲོ་བར་འགྱུར་རོ། །ལྷོ་ཕྱོགས་སུ་སེམས་ཅན་ཉིས་འབུམ་གྱིས་ཆོས་ཀྱི་རྣམ་གྲངས་འདི་སྤོང་བར་འགྱུར་ཏེ། སྤངས་ནས་མནར་མེད་པའི་སེམས་ཅན་དམྱལ་བ་ཆེན་པོར་འགྲོ་བར་འགྱུར་རོ། །ནུབ་ཕྱོགས་ནས་སེམས་ཅན་འབུམ་རྣམས་ཀྱིས་ཆོས་ཀྱི་རྣམ་གྲངས་འདི་སྤངས་ནས་མནར་མེད་པར་འགྲོ་བར་འགྱུར་རོ། །ཤཱ་རིའི་བུ། སངས་རྒྱས་ཀྱི་ཆོས་ནི་རང་སངས་རྒྱས་རྣམས་ཀྱིས་ཀྱང་མ་ཡིན་ན་ཉན་ཐོས་རྣམས་ཀྱིས་ལྟ་ཅི་སྨོས། སོ་སོའི་སྐྱེ་བོ་འཁོར་བ་འཕེལ་བར་བྱེད་པ་ལྟའང་ཅི་སྨོས། ཤཱ་རིའི་བུ། འདི་དང་འཚམས་པ་ནི་འདི་ཡིན་ཏེ། སངས་རྒྱས་ནི་བསམ་གྱིས་མི་ཁྱབ་བོ། །སངས་རྒྱས་ཀྱི་ཆོས་རྣམས་ཀྱང་བསམ་གྱིས་མི་ཁྱབ་སྟེ། སངས་རྒྱས་ཀྱི་ཆོས་རྣམས་ནི་སངས་རྒྱས་ཀྱི་ཆོས་ཉིད་ཀྱིས་རབ་ཏུ་མཁྱེན་གྱི་བདག་གིས་མི་ཤེས་སོ། །མི་ཤེས་པ་ནི་སྤང་བར་མི་བྱ་སྟེ། མདོ་སྡེའི་ཚུལ་འདི་ལྟ་བུའི་ཚིག་བཞི་པའི་ཚིགས་སུ་བཅད་པ་ཙམ་ལའང་སྤང་བ་བྱས་ན་དེ་སྔ་མ་ཇི་ཙམ་དུ་གྱུར་པ་བཞིན་དུ་བསོད་ནམས་མ་ཡིན་པའི་ཕུང་པོ་ཡོངས་སུ་འཛིན་པར་འགྱུར་རོ།། 7a ༄#། །ཤཱ་རིའི་བུ། དེ་བས་ན་རིགས་ཀྱི་བུའམ། རིགས་ཀྱི་བུ་མོས་སྤང་བར་མི་བྱའོ། །དགའ་བར་བྱའོ། །མདོ་སྡེ་འདི་ལྟ་བུ་ལ་གང་བདག་གིས་མ་སྤངས་པས་བདག་བསྐལ་བར་གནས་པའི་ལས་ལས་གྲོལ་བར་འགྱུར་ཏེ། དམ་པའི་ཆོས་སྤོང་བར་བྱེད་པ་སེམས་ཅན་དམྱལ་བ་དེ་དག་གི་དྲུང་དུ་ནི་བདག་གནས་པར་མི་བྱའོ་སྙམ་དུ་སེམས་ཏེ། གང་ཆོས་ཀྱི་རྣམ་གྲངས་འདི་ཉན་བ་དེ་དག་གིས་སངས་རྒྱས་ཀྱི་གསུངས་དབྱངས་རབ་ཏུ་འཛིན་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་བཅུ་ན་འཇིག་རྟེན་གྱི་ཁམས་དཔག་ཏུ་མེད་ལྡན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཆེན་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། འོད་ཆེན་པོའི་མཚན་གང་དག་ཉན་པར་འགྱུར་བ་དང ། དད་པའང་སྐྱེད་པ་དེ་དག་ཐམས་ཅད་སངས་རྒྱས་བཅོམ་ལྡན་འདས་དང་མི་འབྲལ་བར་འགྱུར་ཞིང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་དྲུག་ན་འཇིག་རྟེན་གྱི་ཁམས་མེ་ཏོག་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་དཔག་མེད་ཅེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་དབྱངས་དཔག་མེད་ཀྱི་མཚན་གང་དག་ཉན་པ་དང ། ཐོས་ནས་ཀྱང་དད་པ་སྐྱེད་ཅིང་དེ་ 7b བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་ལ་ཕྱག་འཚལ་ལོ་ཞེས་ཆེད་དུ་བརྗོད་པ་ལན་གསུམ་བརྗོད་པ་དེ་དག། འདི་ལྟ་སྟེ། སངས་རྒྱས་ཀྱི་གསུང་དབྱངས་དཔག་ཏུ་མེད་པའི་དབྱངས་འཛིན་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་བཞིན་འཇིག་རྟེན་གྱི་ཁམས་རྡུལ་མེད་ཅེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདུད་རྩི་དབྱངས་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་བདུད་རྩི་དབྱངས་ཀྱི་མཚན་གང་དག་ཐོས་པར་གྱུར་ལ་ཐོས་ནས་ཀྱང་མོས་པར་བྱེད་པ་དེ་དག་ནི་བསྐལ་བ་བཅུ་གཉིས་ཀྱི་བར་དུ་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་ཉི་ཤུའི་ཕ་རོལ་ན་འཇིག་རྟེན་གྱི་ཁམས་གདུལ་དཀའ་ཞེས་བྱ་བ་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲགས་པ་ཆེན་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་གྲགས་པ་ཆེན་པོའི་མཚན་གང་དག་ཉན་པར་འགྱུར་བ་དང ། ཡོངས་སུ་སྒྲོགས་ཤིང་འཛིན་པ་ནི་བདུད་སྡིག་ཅན་གྱིས་རབ་ཏུ་གདུལ་དཀའ་བར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་བཅུ་གཉིས་ན་འཇིག་རྟེན་གྱི་ཁམས་བདེ་བ་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲགས་པ་མཐའ་ཡས་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་གྲགས་ 8a ༄#། །པ་མཐའ་ཡས་དེའི་མཚན་གང་དག་ཉན་པ་དང ། ཐལ་མོ་སྦྱོར་ཞིང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གྲགས་པ་མཐའ་ཡས་ལ་ཕྱག་འཚལ་ལོ་ཞེས་ཚིག་ཏུ་སྨྲ་བ་དེ་དག་ནི་བསོད་ནམས་ཀྱི་ཕུང་པོ་ཚད་མེད་པ་དང་ལྡན་པར་འགྱུར་རོ། །རིན་པོ་ཆེའི་ཕུང་པོ་རི་རབ་དང་མཉམ་པ་ལོ་བརྒྱར་སྦྱིན་པ་བྱིན་པའི་བསོད་ནམས་ཀྱི་ཕུང་པོ་འདིས་སྔ་མ་དེའི་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུའང་མི་བཟོད་དོ། །འདི་ནས་སངས་རྒྱས་ཀྱི་ཞིང་སྟོང་ཕྲག་གསུམ་ན་འཇིག་རྟེན་གྱི་ཁམས་མན་ཤེལ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་སྣང་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་རིན་ཆེན་སྣང་འདིའི་མཚན་གང་དག་འཛིན་པ་དེ་དག་ནི་བསྐལ་པ་བཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་བར་འགྱུར་རོ། །ཡང་གང་དག་དད་པར་མི་བྱེད་པ་དེ་དག་ནི་བསྐལ་པར་མཚམས་མེད་པར་གནས་པའི་ལས་ཡོངས་སུ་འཛིན་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་བཅོ་ལྔ་ན་འཇིག་རྟེན་གྱི་ཁམས་འོད་གསལ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེ་བ་ཆེན་པོ་ཐོབ་པ་ཞེས་བྱ་བ་བཞུགས་ཏེ། ཡང་ཤཱ་རིའི་ 8b བུ།་དེ་བཞིན་གཤེགས་པ་བདེ་བ་ཆེན་པོ་ཐོབ་པའི་མཚན་གང་དག་ཉན་པར་འགྱུར་བ་དེ་དག་ཐམས་ཅད་ཀྱིས་སེམས་ཅན་ཐམས་ཅད་བདེ་བར་སྒྲོལ་བར་བྱེད་དོ། །བསོད་ནམས་ཀྱི་ཕུང་པོ་ཚད་མེད་པའང་ཡོངས་སུ་འཛིན་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་བདུན་ན་འཇིག་རྟེན་གྱི་ཁམས་ནོར་བུ་སྣང་བ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྐར་མ་མར་མེ་སྣང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་སྐར་མ་མར་མེ་སྣང་བ་དེའི་མཚན་གང་དག་ཉན་པ་དང ། དད་པར་གྱུར་པ་དེ་དག་གང་འདི་དེ་བཞིན་གཤེགས་པའི་སྟོབས་ཞེས་བྱ་བའི་སྟོབས་དེ་དག་རབ་ཏུ་འཛིན་པར་འགྱུར་རོ། །འདི་ནས་སངས་རྒྱས་ཞིང་སྟོང་ཕྲག་བརྒྱད་ན་འཇིག་རྟེན་གྱི་ཁམས་བདེན་ལྡན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བདེན་པའི་དབྱངས་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་བདེན་པའི་དབྱངས་དེའི་མཚན་གང་དག་ཉན་པར་འགྱུར་བ་དེ་དག་ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་རོ། །འདི་ནས་སངས་རྒྱས་ཀྱི་ཞིང་བརྒྱ་ཕྲག་ཉི་ཤུ་ན་འཇིག་རྟེན་གྱི་ཁམས་གསེར་ཅན་ཞེས་བྱ་བ་ན།་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མེད་མཐའ་ཡས་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་གིས་སྟོང་གསུམ་གྱི་སྟོང་ཆེན་པོའི་ 9a ༄#། །འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ་སྦྱིན་པ་བྱིན་པ་བས། དེ་བཞིན་གཤེགས་པ་དྲི་མེད་མཐའ་ཡས་ཀྱི་མཚན་ཉན་ཅིང་དད་པའང་སྐྱེད་པར་འགྱུར་བ་དེ་དག་ནི་དེ་བས་ཆེས་བསོད་ནམས་འདི་མང་དུ་འཕེལ་ལོ། །བསོད་ནམས་ཆུང་ངུས་ནི་དེ་བཞིན་གཤེགས་པ་དྲི་མེད་མཐའ་ཡས་ཀྱི་མཚན་ཐོས་པར་མི་ནུས་སོ།། གང་དག་དེ་བཞིན་གཤེགས་པ་དྲི་མེད་མཐའ་ཡས་ཀྱི་མཚན་ཐོས་པ་དེ་དག་ནི་སངས་རྒྱས་གཅིག་ལ་དགེ་བའི་རྩ་བ་བསྐྱེད་པ་མ་ཡིན། གཉིས་དང ། གསུམ་དང ། བཞི་དང ། ལྔ་ནས་བཅུའི་བར་དུ་མ་ཡིན་གྱི། སེམས་ཅན་དེ་དག་གིས་ནི་སངས་རྒྱས་བརྒྱ་ལ་དགེ་བའི་རྩ་བ་བསྐྱེད་པ་ཡིན་ནོ། །དེ་དག་ནི་བསྐལ་པ་ལྔ་བཅུ་རྩ་བརྒྱད་ཀྱི་བར་དུ་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་དགུ་ན་འཇིག་རྟེན་གྱི་ཁམས་དབྱངས་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་ལྟར་དཀར་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་ཟླ་བ་ལྟར་དཀར་བའི་མཚན་གང་དག་ཉན་པ་དེ་དག་ཐམས་ཅད་ཀྱི་ཆོས་དཀར་པོའང་ཟླ་བ་ལྟ་བུར་འགྱུར་ཞིང་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་གི་ཐ་མ་ན་འཇིག་རྟེན་གྱི་ཁམས་ཉི་མ་ 9b ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་འོད་ཅེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་ཟླ་འོད་ཀྱི་མཚན་གང་དག་ཉན་ཅིང་ཐོས་ནས་ཀྱང་པུས་མོ་གཡས་པའི་ལྷ་ང་ས་ལ་བཙུགས་ཏེ་དེ་བཞིན་གཤེགས་པ་ཟླ་འོད་དེ་ལ་ཕྱག་འཚལ་ལོ་ཞེས་ཆེད་དུ་བརྗོད་པ་ལན་གསུམ་དུ་བརྗོད་པ་དང ། ཡང་གང་དག་གིས་ཆེད་དུ་བརྗོད་པར་བྱ་བརྗོད་པར་བྱེད་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་བར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་སུམ་ཅུ་ན་འཇིག་རྟེན་གྱི་ཁམས་དྲི་མ་མེད་པ་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དྲི་མ་མེད་པའི་འོད་ཅེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་དྲི་མ་མེད་པའི་འོད་ཀྱི་མཚན་ལྷའམ། ཀླུའམ། མི་གང་དག་ཉན་པར་འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་དག་ལོག་པར་ལྟུང་བའི་འཇིགས་པའང་དོགས་པར་མི་བྱའོ། །འདི་ནས་སངས་རྒྱས་ཀྱི་ཞིང་ཉིས་སྟོང་ལྔ་བརྒྱ་ན་འཇིག་རྟེན་གྱི་ཁམས་བཻ་ཌཱུརྱའི་སྣང་བ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དག་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་འོད་དག་པའི་མཚན་ལྷའམ། ཀླུའམ། གནོད་སྦྱིན་ནམ། དྲི་ཟའམ། མི་འམ། 10a ༄#། །ཅིའམ། ལྟོ་འཕྱེ་ཆེན་པོའམ། མིའམ། མི་མ་ཡིན་པ་གང་དག་ཉན་པར་འགྱུར་བ་དེ་དག་ཐམས་ཅད་མིར་འགྱུར་བ་འཐོབ་པར་འགྱུར་རོ། །འདོད་ཆགས་དང།་ཞེ་སྡང་དང ། གཏི་མུག་ཀྱང་ཡོངས་སུ་སྦྱོང་བར་བྱེད་དོ། །ཤཱ་རིའི་བུ། གང་དག་དེ་བཞིན་གཤེགས་པ་འོད་དག་པ་དེའི་མཚན་ཐོས་པ་དང་ལྡན་པའི་དགེ་བའི་རྩ་བ་ལ་དེ་དག་དད་པར་མི་བྱེད་ཅིང་ཡིད་མཆེས་པ་ལས་བྱུང་བ་མི་དགེ་བའི་ལས་ཀྱིས་དེ་ལྟ་བུར་ག་ལ་འགྱུར་ཞེས་ཚིག་ཏུ་འང་སྨྲས་ན། ལོ་སྟོང་ཕྲག་དྲུག་ཅུར་དམྱལ་བ་ཆེན་པོ་འོ་དོད་འབོད་པ་ཞེས་བྱ་བར་བཙོ་བར་འགྱུར་རོ། །འདི་ནས་སངས་རྒྱས་ཀྱི་ཞིང་བརྒྱ་སྲིད་ན་འཇིག་རྟེན་གྱི་ཁམས་ལེགས་པར་ཐོབ་པ་དང་ལྡན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་འོད་ཅེས་བྱ་བ་བཞུགས་ཏེ། ཡང་ཤཱ་རིའི་བུ། གང་དག་དེ་བཞིན་གཤེགས་པ་ཉི་འོད་ལ་རྗེས་སུ་དྲན་པར་བྱེད་ན་དེ་དག་ཐམས་ཅད་ཀྱི་ཆོས་དཀར་པོ་ཉི་མའི་དཀྱིལ་འཁོར་ལྟ་བུར་འགྱུར་རོ། །བདུད་ཀྱི་སྡེ་ཐམས་ཅད་ཀྱང་རྣམ་པར་འཇིག་པར་བྱེད་དོ། །མུ་སྟེགས་གཞན་ཡང་ཕམ་པར་བྱེད་དོ། །བསྐལ་པ་སུམ་ཅུར་འཁོར་བ་ལ་རྒྱབ་ཀྱིས་ཕྱོགས་པར་འགྱུར་རོ། །འདི་ནས་སངས་རྒྱས་ཀྱི་ཞིང་སྟོང་ཕྲག་དྲུག་ཅུ་པས་ཆེས་རིང་བར་འཇིག་རྟེན་གྱི་ཁམས་བྱང་ཆུབ་ཀྱི་ཡན་ལག་རབ་ཏུ་བརྒྱན་པ་ཞེས་བྱ་ 10b བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མཐའ་ཡས་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་རིན་ཆེན་མཐའ་ཡས་ཀྱི་མཚན་གང་དག་ཉན་པ་དེ་དག་ཐམས་ཅད་ཀྱིས་བྱང་ཆུབ་ཀྱི་ཡན་ལག་འཐོབ་པར་འགྱུར་རོ། །སེམས་ཅན་ཡང་དཀོན་མཆོག་དམ་པ་ལ་འགོད་པར་བྱེད་དོ། །དེ་དག་ཉིན་མཚན་དུའང་བསོད་ནམས་ཀྱི་ཕུང་པོ་ཚད་མེད་པར་འགྱུར་རོ། །འདི་ནས་སངས་རྒྱས་ཀྱི་ཞིང་ལྔ་བརྒྱ་སྙེད་ན་འཇིག་རྟེན་གྱི་ཁམས་པད་མོ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མོའི་བླ་མ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་པད་མོའི་བླ་མའི་མཚན་གང་དག་ཉན་པ་དང ། དད་པའང་སྐྱེད་པ་ནི་འཇིག་རྟེན་ན་དེ་དག་ཐམས་ཅད་པད་མོ་དང་འདྲ་བར་འགྱུར་ཏེ། དགེ་བའི་ཆོས་ཀྱིས་མངོན་པར་འཕགས་པར་འགྱུར་རོ། །པད་མོ་ཆུའི་ནང་ནས་སྐྱེས་ཀྱང་ཆུ་མི་ཆགས་པ་བཞིན་དུ་བསྐལ་པ་ལྔ་བཅུ་རྩ་ལྔར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་བྱེ་བ་བརྒྱ་ཕྲག་སྟོང་པས་ཆེས་རིང་བ་འཇིག་རྟེན་གྱི་ཁམས་མྱ་ངན་དང ། གནོད་པ་ཐམས་ཅད་ལས་འདས་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡན་ལག་བླ་མ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་ཡན་ལག་བླ་མའི་མཚན་གང་དག་ཉན་ 11a ༄#། །པར་འགྱུར་བ་དེ་དག་ཐམས་ཅད་ཀྱིས་སྲིད་པའི་ཆུའི་རྒྱ་མཚོ་ཆེན་པོ་ལས་འཇིག་རྟེན་གྱི་ཁམས་མྱ་ངན་དང ། གནོད་པ་ཐམས་ཅད་ལས་སྒྲོལ་བ་ཞེས་བྱ་བར་སྒྲོལ་བར་བྱེད་དོ། །འཇིག་རྟེན་ཐམས་ཅད་ཀྱི་སྦྱིན་གནས་སུའང་འགྱུར་རོ། །གང་དག་ཐོས་ནས་དད་པ་སྐྱེད་པ་དེ་དག་ཐམས་ཅད་མེ་ཏོག་དང་འདྲ་བར་གྱུར་ཏེ། འཇིག་རྟེན་ཐམས་ཅད་ཀྱི་སློབ་དཔོན་དུ་འགྱུར་རོ། །མཐུ་བོ་ཆེའི་ལུས་ལྟར་མཁྲེགས་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་ལྡོག་པར་མི་འགྱུར་རོ། །ཡང་བུད་མེད་གང་དག་དེ་བཞིན་གཤེགས་པ་ཡན་ལག་བླ་མའི་མཚན་ཉན་ཅིང་ཐོས་ནས་ཀྱང་དད་པ་སྐྱེད་པ་ནི་དེས་བུད་མེད་ལས་བསྒྱུར་བར་འགྱུར་རོ། །ཤཱ་རིའི་བུ། དེ་བས་ན་རིགས་ཀྱི་བུའམ། རིགས་ཀྱི་བུ་མོས་ཕན་ཡོན་འདི་དག་འདོད་པ་དང ། སེམས་ཅན་སྡུག་བསྔལ་བ་རྣམས་དགྲོལ་བར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱ་ན། དེ་བཞིན་གཤེགས་པ་ཡན་ལག་གི་བླ་མའི་མཚན་མཉན་པར་བྱའོ། །འདི་ནས་སངས་རྒྱས་ཀྱི་ཞིང་བརྒྱ་ཕྲག་ཉི་ཤུ་ན་འཇིག་རྟེན་གྱི་ཁམས་སྙིང་པོ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་འོད་དམ་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་གསེར་འོད་དམ་པའི་མཚན་གང་དག་ 11b ཉན་ཅིང་ཐོས་ནས་ཀྱང་དད་པ་སྐྱེད་པ་དེ་དག་ཐམས་ཅད་ཀྱིས་འོད་འཐོབ་པར་འགྱུར་ཏེ། གང་འདི་སངས་རྒྱས་ཀྱི་འོད་དང ། སྟོབས་རྣམས་ཀྱང་རབ་ཏུ་འཛིན་པར་འགྱུར་རོ། །མི་འཇིགས་པ་རྣམས་དང།་སངས་རྒྱས་ཀྱི་ཕན་ཡོན་རྣམས་ཀྱང་རབ་ཏུ་ཐོབ་པར་འགྱུར་རོ། །སངས་རྒྱས་ཐམས་ཅད་ལ་དད་པར་བྱ་བ་དང ། བསོད་ནམས་རྒྱ་ཆེན་པོའང་བྱའོ། །བསོད་ནམས་ཆུང་ངུས་ནི་འདི་ལ་རེ་བར་མི་བྱ་སྟེ།་དེ་བཞིན་གཤེགས་པའི་བསྟན་པ་འདི་འདྲ་བས་རྡོ་རྗེ་ལྟ་བུའི་སེམས་བསྐྱེད་ནས་བྱང་ཆུབ་པར་བྱ་བའི་ཕྱིར་བྱང་ཆུབ་ཏུ་སེམས་སྐྱེད་པར་བྱེད་པ་ནི་མཚན་འདི་ཐོས་པར་མི་དཀའོ། །བསྐལ་པ་བཅུ་གཉིས་སུ་འཁོར་བ་ལ་རྒྱབ་ཀྱི་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་བཅོ་བརྒྱད་ན་འཇིག་རྟེན་གྱི་ཁམས་མུ་ཏིག་གི་དྲ་བ་ཡོངས་སུ་དག་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚངས་པའི་དབང་ཕྱུག་རྒྱལ་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་ཚངས་པའི་དབང་ཕྱུག་རྒྱལ་པོའི་མཚན་གང་དག་ཐོས་པར་འགྱུར་ཞིང་ཐོས་ནས་ཀྱང་དད་པ་རབ་ཏུ་འཐོབ་པ་དང ། ཐལ་མོ་སྦྱོར་བར་བྱེད་པ་དེ་དག་ཐམས་ཅད་དེ་བཞིན་གཤེགས་པ་དང་འབྲལ་བར་མི་འགྱུར་ཞིང་དེ་ནས་འཁོར་ལོས་བསྒྱུར་བའི་རྒྱལ་པོ་བྱེད་པར་འགྱུར་ཏེ། ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །འདི་ནས་སངས་རྒྱས་ཀྱི་ཞིང་བརྒྱ་ཕྲག་ཉི་ཤུ་ན་འཇིག་རྟེན་གྱི་ 12a ༄#། །ཁམས་ཟླ་བ་ཅན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་ལྟར་སྣང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ།་དེ་བཞིན་གཤེགས་པ་གསེར་ལྟར་སྣང་བའི་མཚན་གང་དག་ཐོས་པར་འགྱུར་བ་དེ་དག་ཐམས་ཅད་ཐ་ན་རྨི་ལམ་ནའང་ཆོས་ཀྱི་རང་བཞིན་མིག་ཡོར་དང་འདྲ་བར་རྒྱ་ཆེར་སྟོན་པར་འགྱུར་རོ། ། ལོག་པར་ལྟུང་བའང་མི་འགྱུར་ཏེ། བསོད་ནམས་ཀྱི་ཕུང་པོ་ཆེན་པོ་དང་ལྡན་པར་འགྱུར་རོ། །སེམས་ཅན་ཚད་མེད་པ་རྣམས་ལའང་བདེ་བ་དང ། ཡིད་བདེ་བར་བྱེད་པར་འགྱུར། འཇིག་རྟེན་འཛིན་པར་བྱེད། ཐེག་པ་ཆེན་པོས་ཀྱང་ངེས་པར་འབྱུང་བར་འགྱུར་རོ། །སངས་རྒྱས་ཀྱི་ཞིང་བཅུའི་ཐ་མ་ན་འཇིག་རྟེན་གྱི་ཁམས་མེ་སྒྲོན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་གྱི་འབྱུང་གནས་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་གསེར་གྱི་འབྱུང་གནས་ཀྱིས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སངས་རྒྱས་པའི་སངས་རྒྱས་ཀྱི་ཞིང་དུ་སེམས་ཅན་གང་དག་སྐྱེ་བར་འགྱུར་བ་དང ། འཇིག་རྟེན་གྱི་ཁམས་གཞན་དག་གི་སེམས་ཅན་གང་དག་གིས་བདག་གི་མིང་ཐོས་པར་གྱུར་པ་དེ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་བྱ་བའི་ཕྱིར། དེ་ལྟར་བདག་གིས་སངས་རྒྱས་ཀྱི་ཆོས། 12b ཐམས་ཅད་ཡོངས་སུ་རྫོགས་པར་བྱའོ་ཞེས་དེ་སྙམ་དུ་བསམས་སོ། །འདི་ནས་སངས་རྒྱས་ཀྱི་ཞིང་བཅོ་བརྒྱད་ན་འཇིག་རྟེན་གྱི་ཁམས་སྤྲང་རྩི་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀླུའི་དབང་ཕྱུག་རྒྱལ་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། །དེ་བཞིན་གཤེགས་པ་ཀླུའི་དབང་ཕྱུག་རྒྱལ་པོ་དེའི་མཚན་གང་དག་ཐོས་པར་འགྱུར་བ་ནི་ཀླུ་རྣམས་ཀྱིས་གང་གི་ཚེ་ན་གྲོང་ངམ། ཕྱོགས་སུ་ལྕེ་འབབ་པ་དེའི་ཚེ་ན། པུས་མོ་གཡས་པའི་ལྷ་ང་ས་ལ་བཙུགས་ཏེ། འདི་སྐད་དུ་སྨྲ་བར་བྱའོ། །བདེན་པ་གང་དང ། བདེན་པའི་ཚིག་གིས་དེ་བཞིན་གཤེགས་པ་ཀླུའི་དབང་ཕྱུག་རྒྱལ་པོས་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཀླུར་གྱུར་པས། གང་ཀླུ་རྣམས་ཀྱི་ཉམ་ང་བ་ལས་བྱུང་བ་དེ་དང ། དེ་ལས་ཐར་བར་བྱས། ཀླུ་མང་པོ་དང ། ཀླུ་མང་པོ་བརྒྱ་དང།་ཀླུ་མང་པོ་སྟོང་དང ། ཀླུ་མང་པོ་བརྒྱ་སྟོང་རྣམས་ཉམ་ང་བ་ལས་ཐར་བར་བྱས་པས། དགེ་བའི་རྩ་བ་འདིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་གནས་པའམ། ཡོངས་སུ་མྱ་ངན་ལས་འདས་ཀྱང་རུང་སྟེ། འཇིག་རྟེན་གྱིས་ཁམས་གཞན་དག་ཏུའང་ཀླུ་གང་དག་གིས་ལྕེ་འབེབས་པའམ། གནོད་པའི་སེར་བ་འབེབས་པར་འགྱུར་བའམ། འཇིགས་པའམ། ནད་དམ། གནོད་པའམ། ནད་འོག་བ་གཏོང་བ་དེར་བདག་གི་མིང་བརྗོད་ན་གནོད་པ་དེ་དག་ཐམས་ཅད་མེད་པར་གྱུར་ཅིག་།བདེན་པའི་ཚིག་དེས་བདེ་བར་ 13a ༄#། །གྱུར་ཅིག་ཅེས་སྨོན་ལམ་བཏབ་སྟེ། ཤཱ་རིའི་བུ། བདེན་པ་དང ། བདེན་པའི་ཚིག་དེས་སེམས་ཅན་དེ་རྣམས་ཀྱི་རྣམ་པར་སྨིན་པའང་བདེ་བ་ལ་གཞག་གོ་།ཀླུ་རྣམས་ལྕེ་གཏོང་བའང་མཚན་བརྗོད་པ་ཙམ་གྱིས་མེད་པར་འགྱུར་ཏེ། ཀླུའི་སྐྱེ་གནས་དེ་ལས་ཤི་འཕོས་ནས་ཀྱང་སངས་རྒྱས་ཀྱི་ཞིང་དེར་སྐྱེ་བར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །གང་དག་ཡང་མོས་པ་དང ། མངོན་པར་དད་པར་བྱེད་པ་དེ་དག་ཀྱང་ཉིན་མཚན་དུ་བསོད་ནམས་ཀྱི་ཕུང་པོ་དཔག་ཏུ་མེད་པར་འགྱུར་རོ། །དེ་དག་ལ་སངས་རྒྱས་ཀྱི་ཡེ་ཤེས་རྙེད་དཀའ་བ་མ་ཡིན་ནོ། །འདི་ནས་སངས་རྒྱས་ཀྱི་ཞིང་བྱེ་བ་བརྒྱ་ཕྲག་སྟོང་གི་ཕ་རོལ་ན། འཇིག་རྟེན་གྱི་ཁམས་ཟླ་བ་ལྟ་བུ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཐམས་ཅད་ཀྱི་དྲིའི་དབང་ཕྱུག་རྒྱལ་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་དག་དེ་བཞིན་གཤེགས་པ་མེ་ཏོག་ཐམས་ཅད་ཀྱི་དྲིའི་དབང་ཕྱུག་རྒྱལ་པོ་དེའི་མཚན་ཐོས་པར་འགྱུར་བ་དེ་དག་ནི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་དུ། འདི་ལྟ་སྟེ། ཚུལ་ཁྲིམས་ཀྱི་སྤོས་ཀྱི་ངད་ལྡང་བར་འགྱུར་རོ། །ཡང་ཤཱ་རིའི་བུ། དེ་བཞིན་གཤེགས་པ་བཞུགས་སམ། མྱ་ངན་ལས་འདས་ཀྱང་རུང ། དེའི་མཚན་གང་དག་ཐོས་པར་འགྱུར་བ་དེ་དག་ཐམས་ཅད་དེ་དག་གིས་ཆོས། འདི་ལྟ་སྟེ། སངས་རྒྱས་ཀྱི་ཆོས་ཐམས་ 13b ཅད་ཐོབ་པ་དང་ལྡན་པར་འགྱུར་རོ། །དེ་ཅིའི་ཕྱིར་ཞེ་ན། གང་འདི་ལྟ་སྟེ། དེ་བཞིན་གཤེགས་པ་དེ་ཉིད་ཀྱི་སྔོན་གྱི་སྨོན་ལམ་ཡིན་ནོ། །དེ་བས་ན་སངས་རྒྱས་བཅོམ་ལྡན་འདས་རྣམས་ལ་ལྷག་པའི་བསམ་པས་དད་པར་བྱའོ། །འདི་ལྟར་སངས་རྒྱས་བཅོམ་ལྡན་འདས་རྣམས་ལ་དད་པར་བྱེད་པ་ནི་དོན་ཆེན་པོ་དང་ལྡན་པར་འགྱུར་རོ། །སེམས་དད་པ་གཅིག་གིས་གང་འདོད་པ་དེ་ཐོབ་པར་འགྱུར་ཏེ། གང་འདི་འདྲ་བའི་དེ་བཞིན་གཤེགས་པ་དག་གཏམས་པ་འཛིན་པར་མཛད་པ་རྣམས་ལ་གང་དག་སེམས་དད་པ་གཅིག་གིས་ཐལ་མོ་སྦྱར་ཏེ། སངས་རྒྱས་ལ་ཕྱག་འཚལ་ལོ་ཞེས་ཚིག་ཏུ་སྨྲས་ནས་བྱམས་པ་ལ་གནས་པར་བྱེད་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །ལྷག་པའི་བསམ་པས་སེམས་དད་ན་ཆོས་འདི་དག་ཡོངས་སུ་རྫོགས་པར་འགྱུར་རོ། །དེ་བས་ན་དེ་བཞིན་གཤེགས་པའི་མཚན་རྒྱུན་མི་འཆད་པར་བརྗོད་པར་བྱའོ། །ཐེག་པ་དེས་འགྲོ་བར་འདོད་པས་དེ་བཞིན་གཤེགས་པ་དེའི་ཡོན་ཏན་རྗེས་སུ་དྲན་པར་བྱས་ནས་བསྐལ་པ་བཅུ་བཞིར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །འདི་ནས་སངས་རྒྱས་ཀྱི་ཞིང་བྱེ་བ་ཕྲག་ཉིས་སྟོང་ན་འཇིག་རྟེན་གྱི་ཁམས་སྐར་མའི་རྒྱལ་པོ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སཱ་ལའི་རྒྱལ་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་སཱ་ལའི་རྒྱལ་པོའི་མཚན་གང་དག་ཐོས་ནས་ 14a ༄#། །དད་པར་མི་བྱེད་ཅིང་འཕྱ་བ་དང ། སྟིང་པ་དེ་དག་ནི་ལོ་སྟོང་ཕྲག་དྲུག་ཅུར་སེམས་ཅན་དམྱལ་བ་ཆེན་པོ་བསྡུས་གཞོམ་དུ་བཙོ་བར་འགྱུར། མ་དད་དོ་ཞེས་ཚིག་ཏུ་སྨྲས་པས་ལོ་སྟོང་ཕྲག་བདུན་དུ་ཡི་དྭགས་མེ་མདག་ཟ་བའི་སྡུག་བསྔལ་མྱོང་བར་འགྱུར་རོ། །འདི་ནས་སངས་རྒྱས་ཀྱི་ཞིང་ལྔ་བཅུ་རྩ་ལྔ་ན་འཇིག་རྟེན་ཀྱི་ཁམས་སྟོབས་ལྡན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔའ་བརྟན་པའི་སྡེ་མཚོན་ཆས་ཉོན་མོངས་པ་སེལ་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་དཔའ་བརྟན་པའི་སྡེ་མཚོན་ཆས་ཉོན་མོངས་པ་སེལ་པའི་མཚན་གང་དག་ཐོས་པར་འགྱུར་བ་ནི་ཐ་ན་རྨི་ལམ་གྱི་ཚེ་ནའང་རྡོ་རྗེ་ལྟ་བུར་འགྱུར། བདུད་དང ། བདུད་ཀྱི་འཁོར་གྱིས་གདུལ་དཀའ་བར་འགྱུར། གཡུལ་ཆེན་པོ་ལས་ཀྱང་སྒྲོལ་བར་བྱེད་པ་དང ། གང་འདི་ཐམས་ཅད་མཁྱེན་པའི་ཡེ་ཤེས་ཀྱང་འཐོབ་བོ། །ཡང་ཤཱ་རིའི་བུ། གང་དག་དེ་བཞིན་གཤེགས་པ་དེའི་མཚན་དྲན་པ་ཙམ་གྱིས་དད་པ་སྐྱེད་པ་དང ། དགའ་བར་བྱེད་པའི་རིགས་ཀྱི་བུའམ། རིགས་ཀྱི་བུ་མོ་དེ་དག་བྱང་ཆུབ་ཀྱི་ཕྱིར་སྤྱད་པ་སྤྱོད་པ་ན། བདག་ཅག་གིས་དེ་བཞིན་གཤེགས་པ་མཐོང་བ་དང ། མཐར་ཕྱིན་པར་ཤེས་པར་བྱའོ། །ཡང་དེ་དག་གིས་བྱང་ཆུབ་ཀྱི་སེམས་འདི་ལྟར་བསྐྱེད་པར་བྱ་སྟེ། བདག་ཅག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ 14b ལྡོག་པར་བྱ། རྒྱ་ཆེར་སེམས་ཡང་དག་པར་རབ་ཏུ་དགའ་བར་བྱའོ། །གང་དག་ལས་བདག་ཅག་གིས་མཚན་འདི་རྣ་ལམ་དུ་གྲག་ཅིང་ཐོས་པ་དང ། དགའ་བ་ཡང་དག་པར་བསྐྱད་ནས་སེམས་ཅན་མང་པོའི་དོན་བྱེད་པར་འགྱུར་ཏེ། དེ་ལྟར་རྫུ་འཕྲུལ་ཆེའོ། །ཡང་ཤཱ་རིའི་བུ། དེ་བཞིན་གཤེགས་པའི་མཚན་གང་དག་ཉན་ཅིང་ཐོས་ནས་ཀྱང་མོས་པར་བྱེད་པ་དེའི་བསོད་ནམས་ཀྱི་ཕུང་པོ་ཅི་ཡོད་པ་དེའི་ཕྱོགས་ཙམ་ཞིག་བཤད་པར་བྱའོ། །གང་ལ་ལ་ཞིག་གིས་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་རིན་པོ་ཆེས་རབ་ཏུ་གང་བར་བྱས་ཏེ། སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་ལ་ཉིན་རེ་ཞིང་སྦྱིན་པ་ཕུལ་བ་དེ་ལྟར་གངྒཱའི་ཀླུང་གི་བྱེ་མ་སྙེད་དང་མཉམ་པའི་བསྐལ་པར་ཕུལ་བའི་བསོད་ནམས་ཀྱི་ཕུང་པོ་དེས། མཚན་ཐོས་པ་ལས་བྱུང་བའི་བསོད་ནམས་ཀྱི་ཕུང་པོ་འདིའི་ཆ་འགའ་ཙམ་དུའང་བརྗོད་པར་མི་བྱའོ། །གལ་ཏེ་ལ་ལ་ཞིག་གིས་མཚན་འདི་མཉན་པར་བྱའོ་སྙམ་ནས་འཇིག་རྟེན་གྱི་ཁམས་དེ་སྙེད་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ་སྦྱིན་པ་བྱིན་ན། དེ་འང་བསོད་ནམས་མ་བྱས་པས་དེ་ཐོས་པར་མི་ནུས་སོ། །དེ་ཅིའི་ཕྱིར་ཞེ་ན། ཇི་སྟེ་བསོད་ནམས་མ་བྱས་པར་ཐོས་པར་འགྱུར་ན་ནི་སེམས་ཅན་དམྱལ་བ་དང ། དུད་འགྲོའི་སྐྱེ་གནས་དང ། གཤིན་རྗེའི་འཇིག་རྟེན་པ་རྣམས་དང ། ལྷ་ཚེ་རིང་པོ་རྣམས་ཀྱིས་ཀྱང་ཐོས་པ་དང ། ཡོན་ཏན་བརྗོད་པ་འདི་ཤེས་པར་འགྱུར་ཏེ། དེ་དག་ཐམས་ཅད་བསོད་ནམས་ 15a ༄#། །ཀྱི་ཕུང་པོ་དེ་སྙེད་དང་ལྡན་པར་འགྱུར་རོ། །སངས་རྒྱས་ཀྱི་ཞིང་བཅུ་པའི་འཇིག་རྟེན་གྱི་ཁམས་དཔལ་ལྡན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་སྣང་བ་ཞེས་བྱ་བ་བཞུགས་ཏེ། ཤཱ་རིའི་བུ། གང་དག་དེ་བཞིན་གཤེགས་པ་དེའི་མཚན་ཉན་པ་དང ། ལྷག་པའི་བསམ་པ་ལ་གནས་པའི་སེམས་ཀྱི་རྒྱུད་ཀྱིས་མོས་པ་དེ་དག་ཐམས་ཅད་བསོད་ནམས་ཀྱི་ཕུང་པོ་དཔག་ཏུ་མེད་པ་འཛིན་པར་འགྱུར་རོ། །དེ་དག་ནི་ངན་སོང་གིས་འཇིགས་པར་མི་འགྱུར་ཏེ་སྨོན་ལམ་ཅི་འདྲ་བར་སྨོན་ལམ་འདེབས་པ་དེ་འདྲ་བས་སངས་རྒྱས་ཀྱི་ཐེག་པ་བླ་ན་མེད་པས་ཡོངས་སུ་མྱ་ངན་ལས་འདའ་བར་འགྱུར་རོ། །དེ་བཞིན་གཤེགས་པ་བཞུགས་ཀྱང་རུང ། མྱ་ངན་ལས་འདས་ཀྱང་རུང ། གང་གིས་མཚན་ཐོས་པ་དེ་དག་ཐམས་ཅད་ཐེག་པ་ཆེན་པོའི་བདེ་བ་དང ། ཡིད་བདེ་བ་དང་ལྡན་པར་འགྱུར་རོ། །ལྷ་དང ། མིའི་ནང་ན་འཁོར་བ་ནའང་སྨོན་ལམ་ཇི་ལྟར་བཏབ་པ་བཞིན་དུ་སངས་རྒྱས་ཀྱི་ཞིང་གི་ཡོན་ཏན་བཀོད་པ་ཆེན་པོས་ཡོངས་སུ་མྱ་ངན་ལས་འདའ་བར་འགྱུར་རོ། །སངས་རྒྱས་ལས་བྱུང་བའི་བསོད་ནམས་ཀྱི་ཕུང་པོ་ནི་དེ་ལྟ་བུ་སྟེ། གང་དག་བསྐལ་པ་གངྒཱའི་ཀླུང་གི་བྱེ་མ་སྙེད་དུ་ལོག་པར་ལྟུང་བར་འགྱུར་བ་དེ་དག་ཏུ་འགྲོ་བར་མི་འགྱུར་ཏེ། དེ་ལྟར་སངས་རྒྱས་ལ་དགེ་བའི་རྩ་བ་བསྐྱེད་པ་བསམ་གྱིས་མི་ཁྱབ་བོ། །མཚམས་མེད་པ་ 15b ལས་བྱུང་བ་དང ། འཕགས་པ་ལ་སྐུར་པ་མ་གཏོགས་ཏེ། དེ་དག་ཀྱང་ཡུན་རིང་པོ་འདས་ནས་ཇི་ལྟར་སྨོན་ལམ་བཏབ་པ་བཞིན་དུ་ཡོངས་སུ་མྱ་ངན་ལས་འདའ་བར་འགྱུར་རོ། །ཤཱ་རིའི་བུ། སྡིག་པའི་ལས་ཐམས་ཅད་ནི་མི་བྱ་སྟེ། ཡང་ངས་སྡོང་དུམ་ཚིག་པ་ལའང་གནོད་སེམས་བསྐྱེད་པར་མི་བྱ་ན་མིར་གྱུར་པ་ལྟ་ལ་ཅི་སྨོས་ཞེས་བསྟན་པ་ཡིན་ཏེ། དེ་དག་ལའང་ཞེ་སྡང་བསྐྱེད་ན་སེམས་ཅན་དམྱལ་བ་ཆེན་པོའི་སྡུག་བསྔལ་རྣམ་པ་དུ་མའི་ལུས་ལེན་པར་འགྱུར་ན། དེ་བཞིན་གཤེགས་པའི་བསྟན་པ་ལ་མོས་པ་དང་བའི་རྗེས་སུ་འབྲང་བ་དང་ལྡན་པ་ལྟ་ལ་ཅི་སྨོས། གང་དེ་བཞིན་གཤེགས་པ་ཡེ་ཤེས་མཐའ་ཡས་པ་དང་ལྡན་པ་ལ་ཞེ་སྡང་སྐྱེད་པ་ལྟ་ཅི་སྨོས་ཏེ། སྐྱེས་བུ་གླེན་པ་དེ་དག་བསྐལ་པ་གཅིག་གམ། གཉིས་སམ། གསུམ་ནས། བསྐལ་པ་བརྒྱའི་བར་དུའང་དེ་དག་ལྡང་བར་མ་མཐོང་སྟེ། དེ་དག་ནི་བསྐལ་པ་བྱེ་བ་བརྒྱ་སྟོང་དུའང་དེ་ལས་ལྡང་བ་མེད་དོ། །གང་སངས་རྒྱས་ཀྱི་བྱང་ཆུབ་འདི་ལ་སྤོང་བ་དེ་དག་ནི་སྡུག་བསྔལ་བར་འགྱུར་རོ་ཞེས་ངས་བཤད་དོ། །གང་དག་ཡང་གཉིས་སུ་མི་གསུང་བའི་ཚིག་ཆོས་ཀྱི་ཚུལ་རྣམ་པར་དག་པ་ལ་སྤོང་བར་མི་བྱེད་པ་དེ་དག་ཐམས་ཅད་ཀྱི་ཕྱིར་མི་ལྡོག་པར་བྱས་ནས་གདོད་སངས་རྒྱས་ཀྱི་ཡེ་ཤེས་སུ་འགྱུར་རོ་ཞེས་དེ་ལྟར་སེམས་བསྐྱེད་པར་བྱའོ། །སངས་རྒྱས་ཀྱི་ཞིང་བརྒྱད་ཅུ་པ་ན་འཇིག་རྟེན་གྱི་ཁམས་རྒྱ་མཚོའི་སྤོས་ཀྱིས་བདུགས་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་ 16a ༄#། །པ་ཡང་དག་པར་རྫོགས་པའི་སངས་རྒྱས་སྤོས་དཔག་མེད་སྣང་བ་ཞེས་བྱ་བ་བཞུགས་ཏེ། ཤཱ་རིའི་བུ། ཡང་དེ་བཞིན་གཤེགས་པ་སྤོས་དཔག་མེད་སྣང་བ་ཞེས་བྱ་བའི་མཚན་གང་དག་ཐོས་པར་འགྱུར་ཞིང་ཐོས་ནས་ཀྱང་ལྷག་པའི་བསམ་པས་མོས་པ་དང ། ཡིད་ལ་བྱེད་ན། དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ནས་ཀྱང་བ་སྤུའི་གསེབ་ཐམས་ཅད་ནས་དྲི་ཡིད་དུ་འོང་ཞིང་ཕྱོགས་སུ་སྣང་བར་བྱེད་པ་འབྱུང་བར་འགྱུར་རོ། །ཡང་ཤེས་རབ་དམན་པས་ནི་ཡེ་ཤེས་ཆེན་པོ་འདི་ལ་སྨོན་པར་མི་ནུས་སོ། །གང་དག་ཤེས་རབ་རྒྱ་ཆེ་བ་དེ་དག་གིས་ནི་མཚན་འདི་ཡོངས་སུ་བརྗོད་པ་ཐོས་ནས་དད་པར་འགྱུར་བ་དེ་དག་ངས་མཐོང་ངོ ། །དེ་དག་ནི་སངས་རྒྱས་གཞན་དག་ལས་བསྐལ་པ་དུ་མར་ཤེས་རབ་ཡང་དག་པར་བསྒྲུབས་པར་འགྱུར་རོ། །ཤཱ་རིའི་བུ། གང་དག་གིས་སངས་རྒྱས་གཞན་དག་ལས་ཆོས་འདི་ཐོས་ནས། དེ་དག་ལྔ་བརྒྱའི་ཐ་མ་ལ་འདི་ཐོས་ན་མ་དད་པ་དང ། ཡིད་མི་ཆེས་པར་འགྱུར་བ་དང ། ཁོང་དུ་མི་ཆུད་པར་འགྱུར་བའི་གནས་མ་ཡིན། གོ་སྐབས་མེད་དོ། །དེ་དག་ནི་བསྐལ་པ་བཞི་བཅུ་རྩ་ལྔར་འཁོར་བ་ལ་རྒྱབ་ཀྱིས་ཕྱོགས་པར་འགྱུར་བས་འདི་ནི་གནས་མ་ཡིན་ཞིང་སྐབས་མེད་དོ། །གང་དག་འདི་ལ་མངོན་པར་དད་པར་འགྱུར་ 16b བ་དེ་དག་ནི་ཤེས་རབ་ཟླ་བ་ལྟ་བུ་དང་ལྡན་པ་དང ། དེ་དག་ལྷ་དང་བཅས་པའི་འཇིག་རྟེན་ཐམས་ཅད་ཀྱི་སྦྱིན་གནས་སུ་འགྱུར་རོ། །སངས་རྒྱས་ཀྱི་ཞིང་བཅོ་ལྔ་པ་འཇིག་རྟེན་གྱི་ཁམས་ཀླུ་དང་ལྡན་པ་སྣང་བ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་དབྱངས་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་སེང་གེའི་དབྱངས་དེའི་མཚན་གང་དག་ཐོས་པར་འགྱུར་ཞིང་ཚུལ་ཁྲིམས་རྗེས་སུ་དྲན་པར་བྱེད་པ་དང ། མོས་པ་དང ། ཡིད་ཆེས་པར་བྱེད་ན། དེ་དག་ཐམས་ཅད་དགེ་བའི་ཆོས་རྣམས་ལས་མི་བསྐྱོད་པ་དང ། བསྐལ་པ་ཉི་ཤུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །དེ་བཞིན་གཤེགས་པ་དེའི་མཚན་བུད་མེད་གང་གིས་ཐོས་པར་འགྱུར་བ་དེ་མཚན་འགྱུར་ཞིང་འཇིག་རྟེན་ན་མཆོད་རྟེན་དང་འདྲ་བར་འགྱུར་རོ། །སངས་རྒྱས་ཀྱི་ཞིང་སུམ་ཅུ་པ་ཡང་ག་ར་བ་ཏིའི་འཇིག་རྟེན་གྱི་ཁམས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐུ་ཆེན་པོའི་བརྩོན་འགྲུས་ཀྱིས་ངེས་པར་འབྱུང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་མཐུ་ཆེན་པོའི་བརྩོན་འགྲུས་ཀྱིས་ངེས་པར་འབྱུང་བའི་མཚན་གང་དག་ཉན་ཅིང་དད་པའང་སྐྱེད། བུས་མོ་གཡས་པའི་ལྷ་ང་ས་ལ་བཙུགས་ཏེ། དེ་བཞིན་གཤེགས་པ་མཐུ་ཆེན་པོའི་བརྩོན་འགྲུས་ངེས་པར་འབྱུང་བ་དེ་ལ་ཕྱག་འཚལ་ལོ་ཞེས་ཐལ་མོ་སྦྱར་ན། འཁོར་ 17a ༄#། །བ་ན་ཚེ་རབས་གཞན་དུ་དེ་དག་རྨོངས་པར་མི་འགྱུར་བ་དང ། བདུད་དང ། མུ་སྟེགས་གཞན་དུ་བཅས་པ་དང ། ཕ་རོལ་རྒོལ་བ་ཐམས་ཅད་ལ་མཚོན་ཆ་སྲ་བར་འགྱུར་རོ། །བསྐལ་པ་ཉི་ཤུ་རྩ་ལྔར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་བཞི་བཅུ་པ་རྒྱ་མཚོ་རབ་ཏུ་གནས་པ་ཞེས་བྱ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྙིང་པོ་ཟིལ་གྱིས་གནོན་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་དག་དེ་བཞིན་གཤེགས་པ་སྙིང་པོ་ཟིལ་གྱིས་གནོན་པ་དེའི་མཚན་ཉན་པ་དང ། ཐོས་ནས་ཀྱང་དད་ཅིང་མོས་པ་དེ་དག་ཐམས་ཅད་སྙིང་པོ་ལ་རབ་ཏུ་གནས་པར་འགྱུར་རོ། །ཐེག་པ་མཆོག་ཐོབ་པར་འགྱུར་རོ། །འདི་ལྟར་ཆོས་ཀྱི་སྦྱིན་པ་ཐོབ་པ་དང་ལྡན་པ་ནི་ཉིན་མཚན་དུ་ཆོས་ཀྱི་སྦྱིན་པའི་བསོད་ནམས་ཀྱི་ཕུང་པོ་ཚད་མེད་པར་འགྱུར་རོ། །སངས་རྒྱས་ཀྱི་ཞིང་སུམ་ཅུ་རྩ་དྲུག་གི་ཕ་རོལ་ན་འཇིག་རྟེན་གྱི་ཁམས་སྣང་བ་དང་ལྡན་པ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྔ་དབྱངས་རྒྱལ་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་གིས་དེ་བཞིན་གཤེགས་པ་རྔ་དབྱངས་རྒྱལ་པོའི་མཚན་ཉན་ཅིང་སོར་མོ་བཅུའི་ཐལ་མོ་སྦྱར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྔ་དབྱངས་ 17b དབྱངས་རྒྱལ་པོ་ལ་ཕྱག་འཚལ་ལོ་ཞེས་ཟེར་ན་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། རང་སངས་རྒྱས་ལ་ཉིན་རེ་ཞིང་སྦྱིན་པ་བྱིན་པ་དེ་ལྟར་བསྐལ་པ་གངྒཱའི་ཀླུང་གི་བྱེ་མ་སྙེད་དུ་བྱིན་པའི་བསོད་ནམས་ཀྱི་ཕུང་པོས་ནི་དེའི་བརྒྱའི་ཆར་ཡང་ཉེ་བར་མི་འགྲོ་བ་ནས། དཔེའི་བར་དུའང་མི་བཟོད་དོ། །སངས་རྒྱས་ཀྱི་ཞིང་བརྒྱ་ལྔ་བཅུའི་ཕ་རོལ་ན་འཇིག་རྟེན་གྱི་ཁམས་ཟླ་བ་ཅན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་བླ་མ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་ཟླ་བའི་བླ་མ་ཞེས་བྱ་བའི་མཚན་གང་དག་ཉན་པ་ལྷ་དང ། ཀླུ་དང ། གནོད་སྦྱིན་དང ། མི་དང ། མི་མ་ཡིན་པ་དེ་དག་ཐམས་ཅད་མི་དགེ་བའི་ཆོས་ཀྱིས་མི་གོས་ཤིང་འཇིག་རྟེན་ན་པདྨ་ལྟ་བུར་འགྱུར་རོ། །གལ་ཏེ་བུད་མེད་ཉན་པར་བྱེད་དམ། མངོན་པར་དད་དམ། ལྷག་པའི་བསམ་པས་མོས་པར་བྱེད་ན་དེའི་བུད་མེད་ཀྱི་ལུས་ཀྱི་མཐའ་མར་འགྱུར་རོ། །གང་དག་ཡིད་མི་ཆེས་ཤིང་ཡོངས་སུ་སྤོང་ན་དེ་དག་སངས་རྒྱས་ཀྱི་སྟོབས་སྤངས་པར་འགྱུར་ཏེ། བསྐལ་པ་ཉི་ཤུ་ཚང་བར་མཚམས་མེད་པའི་དམྱལ་བ་ཆེན་པོར་བཙོ་བར་འགྱུར་རོ། །ཡང་ཤཱ་རིའི་བུ། གང་དག་སངས་རྒྱས་བཅོམ་ལྡན་འདས་རྣམས་ཀྱི་བསམ་གྱིས་མི་ཁྱབ་པ་ཉིད་ལ་ཡིད་ཆེས་པ་དང ། སེམས་པ་དང ། མོས་པར་བྱེད་ན་དེ་ཉིད་ཀྱིས་བསྐལ་པ་ 18a ༄#། །བཅུ་དགུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་བྱེ་བ་བརྒྱ་སྟོང་ཕྲག་གསུམ་གྱི་ཕ་རོལ་ན་འཇིག་རྟེན་གྱིས་ཁམས་ཙནྡན་གྱི་ཀ་བ་རབ་ཏུ་གནས་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཏོག་ཟིལ་གྱིས་གནོན་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ།་གང་གིས་དེ་བཞིན་གཤེགས་པ་མེ་ཏོག་ཟིལ་གྱིས་གནོན་པ་ཞེས་བྱ་བ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། དེ་འདི་སྙམ་དུ་གྱུར་ཏེ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པའི་སངས་རྒྱས་ཀྱི་ཞིང་དུ་མི་ཁོམ་པ་བརྒྱད་པོ་ཐམས་ཅད་འབྱུང་བར་མ་གྱུར་ཅིག་ཅེས་ཇི་ལྟར་སྨོན་ལམ་བཏབ་པ་བཞིན་དུ། དེ་བཞིན་གཤེགས་པ་དེའི་སངས་རྒྱས་ཀྱི་ཞིང་ཡོངས་སུ་དག་སྟེ། སངས་རྒྱས་དེའི་ཞིང་གི་སེམས་ཅན་རྣམས་ཤིན་ཏུ་བདེ་བ་དང་ལྡན་ནོ། །ཡང་ཤཱ་རིའི་བུ། གང་དག་དེ་བཞིན་གཤེགས་པའི་མཚན་ཉན་ཅིང་དད་པའང་སྐྱེད་པར་བྱེད་པ་ནི་འཇིག་རྟེན་ན་ངོ་མཚར་དུ་གྱུར་ཏེ། མངོན་པར་རྫོགས་པར་སངས་རྒྱས་ནའང ། སངས་རྒྱས་ཀྱི་ཞིང་མི་ཁོམ་པ་བརྒྱད་མེད་པར་འགྱུར་རོ། །སངས་རྒྱས་ཀྱི་ཞིང་བྱེ་བ་བརྒྱ་སྟོང་ཕྲག་གཉིས་ཀྱི་ཕ་རོལ་ན་འཇིག་རྟེན་གྱི་ཁམས་ཛམྦུའི་ཆུ་བོ་རབ་ཏུ་གནས་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ 18b ཡང་དག་པར་རྫོགས་པའི་སངས་རྒྱས། འཇིག་རྟེན་གྱི་སྒྲོན་མ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་དག་དེ་བཞིན་གཤེགས་པ་འཇིག་རྟེན་གྱི་སྒྲོན་མའི་མཚན་ཉན་ན། མཚམས་མེད་པའི་ལས་བྱས་པ་དང ། འཕགས་པ་ལ་སྐུར་པ་འདེབས་པ་མ་གཏོགས་པར་དེ་དག་ཐམས་ཅད་ངན་སོང་གི་གཞི་ལས་ཐར་བར་འགྱུར་རོ། །དཀོན་མཆོག་དམ་པ་འཐོབ་པའི་རྒྱུར་ཡང་འགྱུར་རོ། །གང་དག་མཚམས་མེད་པའི་ལས་བྱེད་པ་དང ། འཕགས་པ་ལ་སྐུར་པ་འདེབས་པས་ཐོས་ནའང་དེ་དག་ཀྱང་དེའི་ལས་ཟད་ནས་མཐར་གྱིས་སངས་རྒྱས་སུ་འགྱུར་རོ། །བསྐལ་པ་ཉི་ཤུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ།། །།བམ་པོ་གཉིས་པ། སངས་རྒྱས་ཀྱི་ཞིང་བྱེ་བ་བརྒྱ་སྟོང་ཕྲག་བརྒྱད་འདས་པ་ནི། འཇིག་རྟེན་གྱི་ཁམས་འོད་གསལ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་ཞེས་བྱ་བ་བཞུགས་ཏེ། ཤཱ་རིའི་བུ། དེ་ཇི་སྙམ་དུ་སེམས། ཅིའི་ཕྱིར་འཇིག་རྟེན་གྱི་ཁམས་འོད་གསལ་ཞེས་བྱ་ཞེ་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཐམས་ཅད་ལག་མཐིལ་ལྟར་མཉམ་ལ་པདྨོ་ལྟར་སྣང་སྟེ། ཤཱ་རིའི་བུ། འཇིག་རྟེན་གྱི་ཁམས་དེ་ནའང་མུན་པའི་ནང་ན་མེའི་ཕུང་པོ་ལྟར་གཟི་བརྗིད་འབར་ཞིང་ལྷམ་མེ། ལྷན་ནེ། ལྷང་ངེས་ཞིང་ཆོས་སྟོན་པས་སྟོང་སུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དབྱངས་ཀྱིས་གོ། 19a ༄#། །བར་མཛད་དོ། །གང་ཡང་འདི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གསེར་གྱི་སྤང་ལེབ་ཀྱིས་གཡོགས་པ། ཤིང་ཐམས་ཅད་གོས་ཀྱིས་བརྒྱན་ནས་སངས་རྒྱས་བཅོམ་ལྡན་འདས་གངྒཱའི་ཀླུང་གི་བྱེ་མ་སྙེད་དུ་གྲངས་མེད་པ་ལ་ཉིན་རེ་ཞིང་སྦྱིན་པ་འབུལ་ཞིང་དེ་བཞིན་དུ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་མཉམ་པར་ཕུལ་བ་བས།་གང་གིས་དེ་བཞིན་གཤེགས་པ་དེའི་མཚན་ཐོས་ན་དེའི་བསོད་ནམས་ཀྱི་ཕུང་པོ་དེ་ལ་བསོད་ནམས་ཀྱི་ཕུང་པོ་འདིས་བརྒྱའི་ཆར་ཡང་ཉེ་བར་མི་འགྲོ་བ་ནས་རྒྱུའི་བར་དུའང་ཉེ་པར་མི་འགྲོའོ། །གང་དག་ཐོས་ནས་དགའ་བ་རྙེད་ཅིང་གང་འདོད་པ་དེ་ལ་ནན་ཏན་བྱེད་པ། བསྐལ་པ་དྲུག་ཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །བླ་ན་མེད་པའི་སངས་རྒྱས་ཀྱི་ཞིང་ཡང་འཛིན་པར་འགྱུར་རོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་ཀུན་ཏུ་བཀོད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྨང་ཞེས་བྱ་བ་བཞུགས་སོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་སངས་རྒྱས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟག་པར་ཡོངས་སུ་མྱ་ངན་ལས་འདས་པ་ཞེས་བྱ་བ་བཞུགས་ཏེ། ཕྱིར་མི་ལྡོག་པའི་ཆོས་ཀྱི་འཁོར་ལོ་རབ་ཏུ་བསྐོར་ 19b རོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་རི་རབ་ཀྱི་ངོས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟུག་རྔུ་མེད་པའི་བློ་ཞེས་བྱ་བ་བཞུགས་སོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་ཕོངས་པ་དང་བྲལ་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤྲུལ་པ་ཚད་མེད་པར་སྣང་བ་ཞེས་བྱ་བ་བཞུགས་སོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་གོས་ཀ་ཅ་ལིནད་ལྟར་རེག་ན་འཇམ་པ་ཞེ་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་རྣམ་པར་གནོན་པ་ཞེས་བྱ་བ་བཞུགས་སོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་མཉམ་པ་དམ་པའི་དཔལ་དང་ལྡན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་གླང་པོ་དམ་པ་ཞེས་བྱ་བ་བཞུགས་སོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་རིན་པོ་ཆེ་འབྱུང་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་འདུས་པའི་དཔལ་ཞེས་བྱ་བ་བཞུགས་སོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་རྣམ་པར་མ་དག་པ་དང་བྲལ་བ་ཞེས་བྱ་བ་ཡོད་དེ། །དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་ 20a ༄#། །པར་རྫོགས་པའི་སངས་རྒྱས་ཕྱིར་མི་ལྡོག་པའི་འཁོར་ལོ་རིན་པོ་ཆེ་རྟག་ཏུ་དོན་དཔལ་ཞེས་བྱ་བ་བཞུགས་ཏེ། བྱང་ཆུབ་སེམས་དཔའི་དགེ་འདུན་གྱིས་བསྐོར་ནས་ཕྱིར་མི་ལྡོག་པའི་འཁོར་ལོ་བསྐོར་རོ། །ཤཱ་རིའི་བུ། ཤར་ཕྱོགས་ན་འཇིག་རྟེན་གྱི་ཁམས་རྣམ་པར་དག་པ་གནས་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་རྣམ་པར་སྣང་མཛད་རྣམ་པར་དག་པ་ཐོབ་པ་ཞེས་བྱ་བ་བཞུགས་ཏེ། ཤཱ་རིའི་བུ། ཤར་ཕྱོགས་ན་དེ་དག་ལ་སོགས་པ་ཚད་མེད་པའི་སངས་རྒྱས་བཅོམ་ལྡན་འདས་རྣམས་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །བུས་མོ་གཡས་པའི་ལྷ་ང་ས་ལ་བཙུགས་ནས་སོར་མོ་བཅུའི་ཐལ་མོ་སྦྱར་ཏེ། དེ་རྣམས་ཀྱི་མཚན་ནས་ཡོངས་སུ་བརྗོད་ཅིང་ཡོན་ཏན་ཚད་མེད་པ་དང་ལྡན་པའི་སངས་རྒྱས་བཅོམ་ལྡན་འདས་དེ་དག་ལ་ཕྱག་འཚལ་ལོ་ཞེས་ཆེད་དུ་བརྗོད་པ་ལ་ན་གསུམ་དུ་བརྗོད་པར་བྱའོ། །ཤར་ཕྱོགས་ན་གང་དག་སྣང་བར་མཛད་པ་དེ་དག་གི་མཚན་ནས་ཡོངས་སུ་བརྗོད་པར་བྱས་ན་བསོད་ནམས་ཀྱི་ཕུང་པོ་ཚད་མེད་པར་འགྱུར་རོ། །ལྷོ་ཕྱོགས་ན་སངས་རྒྱས་ཀྱི་ཞིང་བྱེ་བ་བརྒྱ་ཕྲག་སྟོང་གི་ཐ་མ་ན་འཇིག་རྟེན་གྱི་ཁམས་གྲོལ་བ་ཅན་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་ཟླ་སྒྲོན་མ་ཞེས་ 20b བྱ་བ་བཞུགས་ཏེ། ཤཱ་རིའི་བུ། ཡང་གང་དག་ཉི་ཟླ་སྒྲོན་མ་དེའི་མཚན་ཉན་ཅིང་ཐོས་ནས་ཀྱང་དགའ་བ་ཆེར་སྐྱེད་ཅིང་མོས་པར་བྱེད་པ་དང ། དེ་བཞིན་གཤེགས་པའི་བཀའ་ལ་རྣམ་པ་བརྒྱ་སྟོང་དུ་བསམས་ནས་པ་སྤུ་ཟིང་ཞེས་བྱེད་པ་དང ། མཆི་མའང་བླགས་ན་རིགས་ཀྱི་བུའམ། རིགས་ཀྱི་བུ་མོ་དེ་དག་གིས་འདི་ལྟར་དེ་བཞིན་གཤེགས་པ་དེ་ནི་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་ཅག་གིས་མཐོང་ངོ་སྙམ་དུ་རྟོགས་པར་བྱའོ། །བུད་མེད་ཀྱིས་ཀྱང་བཅོམ་ལྡན་འདས་དེ་བཞིན་གཤེགས་པ་ཉི་ཟླ་སྒྲོན་མ་དེའི་མཚན་བདག་གིས་ཐོས་ཀྱི། བདག་གི་བུད་མེད་ཀྱི་ལུས་ཀྱི་མཐའ་མར་འགྱུར་རོ་སྙམ་དུ་སེམས་རབ་ཏུ་དགའ་བར་བྱ་སྟེ། དེ་དག་ཐམས་ཅད་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ། །ཕྱོགས་བཅུའི་སེམས་ཅན་ཇི་སྙེད་ཀྱིས་ཐོས་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། སེམས་ཅན་འདི་དག་ལ་ཇི་ལྟ་བ་བཞིན་དུ་སེམས་ཅན་དེ་དག་ལ་སྒྲིབ་པར་མི་འགྱུར་རོ། །མི་མཇེད་ཀྱི་འཇིག་རྟེན་གྱི་ཁམས་ན་གང་ཡོད་པ་དེ་དག་ཀྱང ། རྩིས་པའམ་རྩིས་པ་ཆེན་པོ་སུས་ཀྱང་རྩི་བའམ་བསྡོམ་པར་བྱ་སླ་བ་མ་ཡིན་ནོ། །འཇིག་རྟེན་གྱི་ཁམས་ཇི་སྙེད་དུ་དེའི་མཚན་གྲགས་པའི་འཇིག་རྟེན་གྱི་ཁམས་དེ་དག་ཏུ་བདུད་སྡིག་ཅན་བར་ཆད་བྱེད་པར་མི་འགྱུར་ཏེ། དེ་བཞིན་གཤེགས་པ་ཉི་ཟླ་སྒྲོན་མ་དེའི་མཚན་ཇི་སྙེད་ཀྱིས་ཐོས་ཤིང་ 21a ༄#། །དད་པའང་རྙེད་པ་དེ་དག་གི་མཐར་རྟོགས་པར་སླ་བ་མ་ཡིན་ནོ། །ཡང་ཤཱ་རིའི་བུ། མདོ་སྡེ་འདི་ལྟ་བུ་ཉན་པའི་སེམས་ཅན་རྣམས་ལ་འཇིག་རྟེན་གྱི་ཁམས་འདིའི་བདུད་སྡིག་ཅན་རྣམས་ཀྱིས་བར་ཆད་བྱ་བའི་ཕྱིར་དཔུང་དང ། བཞོན་པར་བཅས་པས་བརྩོན་པར་བྱེད་དེ། དེ་ནི་སྒྲིབ་པར་འགྱུར་བའི་ལས་བྱས་ཤིང་བསགས་པའི་ཕྱིར་རོ། །ཤཱ་རིའི་བུ། དུས་ཕྱི་མ་འདི་ལྟ་བུ་འབྱུང་སྟེ། དེའི་ཚེ་སེམས་ཅན་གང་མཚན་བརྗོད་པའི་བསོད་ནམས་འདི་ལ་མོས་ཤིང་དད་པའི་སེམས་ཅན་དེ་དག་ནི་ཨུ་དུམྦཱ་རའི་མེ་ཏོག་དང་འདྲ་སྟེ ། འཇིག་རྟེན་གྱི་སྦྱིན་པར་འོས་པར་འགྱུར་རོ། །དེ་སྐད་ཅེས་བཀའ་སྩལ་པ་དང ། ཚེ་དང་ལྡན་པ་ཤཱ་རིའི་བུས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས ། སླད་མའི་དུས་ན་འདི་རབ་ཏུ་དཀའ་བ་ལགས་ན། དེ་ན་སེམས་ཅན་ཇི་སྙེད་ཅིག་གིས་དེ་བཞིན་གཤེགས་པ་ཉི་ཟླ་སྒྲོན་མ་དེའི་མཚན་ཐོས་པར་འགྱུར་བ་དང ། སངས་རྒྱས་བཅོམ་ལྡན་འདས་གཞན་གྱི་མཚན་ཀྱང་ཐོས་ནས་དད་པ་ཡང་དག་པར་བསྐྱེད་པར་འགྱུར་བ་ཇི་སྙེད་ཅིག་མཆིས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ། །ཤཱ་རིའི་བུ། གང་གིས་ཐོས་པར་འགྱུར་བ་དེ་དག་ངས་མཐོང་སྟེ། འདི་ལྟ་སྟེ། དཔེར་ན། དེ་ལྟར་གྱི་སེམས་ཅན་དག་མཐོང་ 21b བཞིན་ཏེ།་ཤཱ་རིའི་བུ། དཔེར་ན། ད་ལྟར་གྱི་དགེ་སློང་གི་དགེ་འདུན་གོས་ངུར་སྨྲིག་བགོས་པའི་དྲུང་ན། ཁྱིམ་པ་གོས་དཀར་པོ་གྱོན་པ་གཅིག་ཡོད་པ་དེ་བཞིན་དུ་གང་འདི་མཚན་ཐོས་པར་འགྱུར་བའི་སེམས་ཅན་དེ་དག་རྙེད་པར་དཀའོ། །ཐོས་ནས་ཀྱང་དད་པར་འགྱུར་བ་དེ་དག་ནི། ཤཱ་རིའི་བུ། བསོད་ནམས་ཀྱི་ཕུང་པོ་དཔག་ཏུ་མེད་པ་ཡོངས་སུ་འཛིན་པར་འགྱུར་རོ། །གང་དག་ཐོས་ནས་དད་པར་འགྱུར་བ་དེ་དག་ནི། ཤཱ་རིའི་བུ། ཕྱི་མའི་དུས་ན་དེ་དག་ལ་རྣམ་པར་ལྟུང་བའི་འཇིགས་པ་མི་འབྱུང་ངོ ། །སངས་རྒྱས་བཅོམ་ལྡན་འདས་རྣམས་དང་མེ་འབྲལ་པར་འགྱུར་རོ། །འཇིག་རྟེན་ཐམས་ཅད་ལས་བྱེ་བྲག་ཏུ་འཕགས་པར་འགྱུར་རོ། །སངས་རྒྱས་བཅོམ་ལྡན་འདས་ཀྱིས་ཀྱང་དེ་དག་ལ་བརྩམས་ནས་ཆོས་སྟོན་པར་འགྱུར་ཏེ། དེ་དག་སེམས་ཅན་མང་པོའི་དོན་བྱེད་པར་འགྱུར་རོ། །ཆོས་བསྟན་པ་དེ་ལའང་གང་དག་ཉན་པ་དང ། དད་པ་ཡང་དག་པར་བསྐྱེད་པར་འགྱུར་བ་དེ་དག་ངའི་སངས་རྒྱས་ཀྱི་བྱང་ཆུབ་བསམ་པ་ཐག་པ་ནས་འཛིན་པར་འགྱུར་ཏེ། བསྐལ་པ་བརྒྱར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །ཡང་གང་དག་དད་པར་མི་བྱེད་པ་དེ་དག་ཀྱང་ངས་མཐོང་སྟེ།་དཔེར་ན། ད་ལྟར་ཁྱོད་མཐོང་བ་བཞིན་ནོ། །དེ་སྐད་ཅེས་བཀའ་སྩལ་པ་དང ། ཚེ་དང་ལྡན་པ་ཤཱ་རིའི་བུས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་ 22a ༄#། །འདས། སངས་རྒྱས་བཅོམ་ལྡན་འདས་དེ་དག་གི་མཚན་གང་དག་ཐོས་ནས་དེ་དག་དད་པར་མི་བགྱིད་ཅིང་སངས་རྒྱས་ཀྱི་བྱང་ཆུབ་འདིའང་སྤོང་བར་བགྱིད་པ་དེ་དག་ལ་བསོད་ནམས་མ་ལགས་པའི་ཕུང་པོ་ཇི་ཙམ་དུ་འགྱུར། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དེ་དག་ནི་སེམས་ཅན་དམྱལ་བར་ལོ་བྱེ་བ་དྲུག་ཅུར་གནས་ཤིང་དེ་ན་སྡུག་བསྔལ་ཆེན་པོའི་ཚོར་བ་མྱོང་བར་འགྱུར་རོ། །ཤཱ་རིའི་བུ། ཕྱོགས་གང་དུ་བསྟན་པ་རབ་ཏུ་འབར་བར་གྱུར་པ་དེ་ན། དམ་པའི་ཆོས་སྤོང་བའི་སྐྱེས་བུ་བླུན་པོ་ཤིན་ཏུ་མང་བར་གྱུར་ཏེ། དེ་བས་ན། ཤཱ་རིའི་བུ། ཆོས་ཀྱི་རྣམ་གྲངས་འདི་ལ་སྤོང་བར་མི་བྱེད་པའི་རིགས་ཀྱི་བུའམ། རིགས་ཀྱི་བུ་མོ་དེ་དག་གིས་དགའ་བ་རྒྱ་ཆེན་པོ་ཡང་དག་པར་བསྐྱེད་ཅིང ། བདག་ནི་ངན་སོང་ཐམས་ཅད་ལས་ཐར་ཏོ་སྙམ་ནས་བ་དན་བསྒྲེང་བར་བྱའོ། །གལ་ཏེ་ལ་ལ་ཞིག་གིས། འདི་སྐད་དུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེས་གང་བར་བྱས་ནས་མཚན་འདི་མཉན་པར་བྱའོ་ཞེས་དེ་སྐད་ཟེར་ན། དེས་ཆུང་དུ་ཞིག་སྨྲས་པ་ཡིན་ཏེ། ཐམས་ཅད་མཁྱེན་པའི་ཡེ་ཤེས་ཁོང་དུ་ཆུད་པ་ལ་གནས་པར་འདོད་པས། འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་གྲངས་མེད་པ་རིན་པོ་ཆེས་ཡོངས་སུ་གང་བར་བྱས་ནས་མཉན་པར་བྱའོ། །སངས་རྒྱས་ཀྱི་ཞིང་སྟོང་ཕྲག་བཅུ་པ་ན་འཇིག་རྟེན་གྱི་ཁམས་ 22b ཚུལ་ཁྲིམས་ཀྱི་འོད་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་ཅེས་བྱ་བ་བཞུགས་ཏེ། ཡང་ཤཱ་རིའི་བུ། གང་གིས་དེ་བཞིན་གཤེགས་པ་རི་རབ་དེའི་མཚན་ཐོས་པར་འགྱུར་བ་དེ་དག་ནི་ཐ་ན་རྨི་ལམ་ནའང་འཕགས་པ་ལ་སྐུར་པ་འདེབས་པར་མི་འགྱུར་རོ། །ལྷག་པའི་བསམ་པ་ཡང་དག་པར་འགྱུར་རོ། །དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང་ཆོས་རྣམས་ལའང་རྨི་ལམ་ལྟ་བུར་མྱུར་དུ་རབ་ཏུ་ཤེས་པར་གྱུར་ཏེ། བསྐལ་པ་བརྒྱད་དུ་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་ལྔ་སྟོང་པ་ན་འཇིག་རྟེན་གྱི་ཁམས་གཟུགས་གསེར་མདོག་བཟང་པོ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་མངོན་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་གིས་དེ་བཞིན་གཤེགས་པ་རི་རབ་མངོན་པའི་མཚན་ཐོས་པར་འགྱུར་བ་དང ། མཚན་རྒྱུན་མི་འཆད་པར་འཛིན་པ་དེ་དག་ནི་བསྐལ་པ་བཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་ཉི་ཤུ་ན་འཇིག་རྟེན་གྱི་ཁམས་སྣང་བ་ཅན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རི་རབ་འདྲ་བ་ཞེས་བྱ་བ་བཞུགས་ཏེ། ཤཱ་རིའི་བུ། ཡང་གང་དག་དེ་བཞིན་གཤེགས་པ་རི་རབ་འདྲ་བ་དེའི་མཚན་ཉན་ 23a ༄#། །ཅིང་ཐོས་ནས་ཀྱང་ཐ་ན་སེ་གོལ་གཏོགས་པ་ཙམ་ཡང་རི་མོར་བསྐྱེད་ནས་ཡིད་ལ་བྱེད་པ་ནི། ཤཱ་རིའི་བུ། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཛམྦུའི་ཆུ་བོའི་གསེར་གྱི་སྤང་ལེབ་བཏིང་ནས་སྦྱིན་པ་བྱིན་པ་བས། གང་གིས་དེ་བཞིན་གཤེགས་པ་འདི་ཡིད་ལ་བྱེད་ན། བསོད་ནམས་ཀྱི་ཕུང་པོ་འདིས་སྔ་མའི་བསོད་ནམས་ཀྱི་ཕུང་པོའི་བརྒྱའི་ཆར་ཡང་ཉེ་བར་མི་འགྲོ་བ་ནས། རྒྱུའི་བར་དུ་གང་མི་བཟོད་དོ། །དེ་ཅིའི་ཕྱིར་ཞེ་ན། དེ་ལྟར་སངས་རྒྱས་ཀྱི་སྒྲ་ནི་མཐུ་ཆེན་པོ་ཡིན་ཏེ། གང་དེ་བཞིན་གཤེགས་པ་བཞུགས་པ་ལ་བསྟི་སྟང་བྱད་པ་དང ། མྱ་ངན་ལས་འདས་པའི་སྐུ་གདུང་ལ་མཆོད་པ་བྱེད་པ་ལྟ་ཅི་སྨོས། སངས་རྒྱས་ཀྱི་ཞིང་སྟོང་ཕྲག་གྲངས་མེད་པ་འདས་ནས་འཇིག་རྟེན་གྱི་ཁམས་སྟོབས་ཀྱི་ཤུགས་ཐམས་ཅད་ཐོབ་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་ཏུ་སྤོས་ཞེས་བྱ་བ་བཞུགས་ཏེ། ཡང་ཤཱ་རིའི་བུ། དེ་བཞིན་གཤེགས་པ་ཀུན་ཏུ་སྤོས་དེ་བྱང་ཆུབ་སེམས་དཔའི་སྤྱད་པ་སྤྱོད་པ་ན་སྨོན་ལམ་འདི་ལྟར་བཏབ་སྟེ། གང་བདག་གིས་སངས་རྒྱས་ལ་བཀུར་སྟི་བྱས་པ་དང ། གང་ཡང་དེ་བཞིན་གཤེགས་པ་སྤྲིན་སྟུག་པོ་ལ་བདུག་སྤོས་ཀྱི་རིལ་བུ་ཡུངས་འབྲུ་ཙམ་བསྲེགས་པས་དགེ་བའི་རྩ་བ་བསྒྲུབས་པ། དགེ་བའི་རྩ་བ་དེས་བླ་ན་མེད་པ་ཡང་དག་ 23b པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ན། བ་སྤུའི་ཁུང་བུ་ཐམས་ཅད་ནས་དྲི་ཡིད་དུ་འོང་བ་འབྱུང་བར་གྱུར་ཅིག། བྱུང་ནས་ཀྱང་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་སྤོས་ཀྱི་སྤྲིན་གྱིས་རྒྱས་པར་གྱུར་ཏེ། གང་འཇིག་རྟེན་གྱི་ཁམས་དེ་དག་གི་སེམས་ཅན་རྣམས་ཀྱིས། དྲི་མ་བསྣོམས་ཤིང་མཚན་ཀྱང་ཐོས་པར་གྱུར་པ་དེ་དག་ཐམས་ཅད་བྱང་ཆུབ་ཐོབ་པའི་ཚེ་བ་སྤུའི་ཁུང་བུ་ནས་དྲི་ཡིད་དུ་འོང་བ་འབྱུང་བར་གྱུར་ཅིག་ཅེས་བྱས་སོ། །ཤཱ་རིའི་བུ། ཡང་དག་པར་བླངས་པ་གང་གིས་དེ་བཞིན་གཤེགས་པ་ཀུན་ཏུ་སྤོས་ངེས་པར་བྱུང་བའི་ཡང་དག་པར་བླངས་པ་དེས་ངེས་པར་འབྱུང་བར་འདོད་པའི་རིགས་ཀྱི་བུའམ། རིགས་ཀྱི་བུ་མོས་ཞག་བདུན་དུ་ཟན་ཆད་དེ་ཁ་ཟས་མ་ཟོས་ཀྱང་མཚན་ཉན་པ་དེ་ལྟ་བུ་ནི་ཡོན་ཏན་ཡོངས་སུ་བརྗོད་པར་འགྱུར་རོ། །དེ་ཅིའི་ཕྱིར་ཞེ་ན། དེ་ཐོས་མ་ཐག་ཏུ་བསོད་ནམས་ཀྱི་ཕུང་པོ་ཚད་མེད་པ་ཡོངས་སུ་འཛིན་པར་འགྱུར་རོ། །དེ་ནས་ཚེ་དང་ལྡན་པ་ཤཱ་རིའི་བུས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་བཞིན་གཤེགས་པ་ཀུན་ཏུ་སྤོས་ཀྱི་ཡོན་ཏན་བརྗོད་པ་ཉན་པའི་བསོད་ནམས་ཀྱི་ཚོགས་བཅོམ་ལྡན་འདས་ཀྱིས་བརྗོད་དུ་གསོལ། དེ་ལ་སླད་མའི་དུས་ཀྱི་ཚེ་རིགས་ཀྱི་བུའམ། རིགས་ཀྱི་བུ་མོས་དེ་དག་ཐོས་ནས་དགའ་བ་དང ། རངས་པ་རྒྱ་ཆེན་པོ་འཐོབ་པར་འགྱུར་རོ། །གང་ཇི་ལྟ་ཇི་ལྟ་ 24a ༄#། །བུར་སངས་རྒྱས་ཀྱི་ཆོས་ཉན་པ་དེ་ལྟ་དེ་ལྟ་བུར་བདུད་སྡིག་ཅན་གྱིས་གླགས་མི་རྙེད་པར་འགྱུར་རོ། །དེ་ཅིའི་སླད་དུ་ཞེ་ན། འདི་ལྟར་དེ་དག་སངས་རྒྱས་ཀྱིས་དགོངས་པར་འགྱུར་ཏེ། དེའི་ཚེ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མ་སྤངས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དེ་བཞིན་གཤེགས་པ་ཀུན་ཏུ་སྤོས་ཀྱི་བསོད་ནམས་ཀྱི་ཚོགས་གང་ཅི་ཡོད་པ་ཐམས་ཅད་ངས་ཁྱོད་ལ་བཤད་ན་སེམས་ཅན་རྣམས་མྱོས་པར་འགྱུར་ཏེ། དེ་དག་མཚན་ཐོས་པའི་དགེ་བའི་རྩ་བ་ལ་མོས་པའམ། དད་པར་འགྱུར་བའི་བསོད་ནམས་དང་ལྡན་པ་མེད་དོ། །ཤཱ་རིའི་བུ། གང་དག་མོས་པ་དང ། དད་པ་དང ། དེ་བཞིན་དུ་སེམས་ཡང་དག་པར་དགའ་བར་བྱེད་ཅིང་བདག་ནི་སངས་རྒྱས་ཀྱི་ཆོས་ལས་ཕྱིར་མ་ལོག་པའོ་སྙམ་དུ་སེམས་ན། ཤཱ་རིའི་བུ། བསོད་ནམས་ཀྱི་ཕུང་པོ་དེའི་ཕྱོགས་ཙམ་ཞིག་བསྟན་པར་བྱའོ། ། མཁས་པ་དག་ཡེ་ཤེས་ཆེན་པོ་དང་ལྡན་པར་གྱུར་པ་དགོངས་ཏེ་གསུངས་པ་ལ་འཇུག་པར་འགྱུར་རོ། །ཡང་ཤཱ་རིའི་བུ། སངས་རྒྱས་ཀྱི་ཞིང་མི་མཛེད་ཙམ་གྱི་འཇིག་རྟེན་གྱི་ཁམས་བཅུ་རིན་པོ་ཆེ་སྣ་བདུན་གྱིས་ཡོངས་སུ་གང་བར་བྱས་ཏེ། ཚད་མེད་པའི་སངས་རྒྱས་ལ་བསྐལ་པ་ཚད་མེད་ཉིན་རེ་ཞིང་སྦྱིན་པ་བྱིན་པ་བས་སྔ་མའི་བསོད་ནམས་ཀྱི་ 24b ཕུང་པོའི་ཆ་གང་དུའང་བརྗོད་དུ་མི་རུང་ངོ ། །གང་གིས་ཚད་མེད་པ་དང་ལྡན་པའི་དེ་བཞིན་གཤེགས་པ་ལ་རྗེས་སུ་དྲན་ནས་ཡན་ལག་ལྔས་ཕྱག་བྱས་པའི་བསོད་ནམས་ཀྱི་ཕུང་པོ་ནི་བསོད་ནམས་ཀྱི་ཕུང་པོ་དེ་བས་ཆེས་ཚད་མེད། ཆེས་གྲངས་མེད་པར་འགྱུར་ཏེ། དེ་དག་བསྐལ་པ་བརྒྱར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་བྱེ་བ་ཕྲག་བཅུ་འདས་ནས་འཇིག་རྟེན་གྱི་ཁམས་དྲི་མ་མེད་པའི་འོད་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྣང་བ་ཡོངས་སུ་དག་པ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་དག་གི་དེ་བཞིན་གཤེགས་པ་འོད་ཡོངས་སུ་དག་པ་དེའི་མཚན་ཉན་པ་དང ། སེ་གོལ་གཏོགས་པ་སྲིད་དུའང་བྱམས་པའི་སེམས་སྒོམ་ཞིང་མངོན་པར་དད་པར་བྱེད་པ་དང ། མོས་པར་བྱེད་ཅིང་བདག་གིས་དེ་བཞིན་གཤེགས་པའི་མཚན་ཐོས་པ་དང ། བྱམས་པའི་སེམས་བསྒོམས་པའི་བདག་གི་དགེ་བའི་རྩ་བ་འདིས་སེམས་ཅན་ཐམས་ཅད་སངས་རྒྱས་ཀྱི་ཡེ་ཤེས་དང་ལྡན་པར་གྱུར་ཅིག་ཅེས་ཚིག་འདི་སྐད་དུ་སྨྲ་ན། ཤཱ་རིའི་བུ། དེའི་བསོད་ནམས་ཀྱི་ཕུང་པོ་ནི། ཤཱ་རིའི་བུ། གང་གི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ཏེ། གངྒཱའི་ཀླུང་གི་བྱེ་མ་སྙེད་ཀྱི་སངས་རྒྱས་ལ་ཉིན་རེ་ཞིང་སྦྱིན་པ་ཕུལ་ 25a ༄#། །བ་དེ་བཞིན་དུ་བསྐལ་པ་གངྒཱའི་ཀླུང་གི་བྱེ་མ་སྙེད་དུ་སྦྱིན་པ་ཕུལ་བ་འདི་བས་སྔ་མའི་བསོད་ནམས་ཀྱི་ཕུང་པོ་ལ། བསོད་ནམས་ཀྱི་ཕུང་པོ་འདིས་ཅིའི་ཆ་ཙམ་དུའང་མི་བཟོད་དོ། །དེ་ཅིའི་ཕྱིར་ཞེ་ན། བསོད་ནམས་ཀྱི་ཕུང་པོ་སྔ་མས་ནི་བྱང་ཆུབ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། ཤཱ་རིའི་བུ། གང་དག་ཆོས་ཀྱི་སྦྱིན་པ་ལ་འཛུད་པར་བྱེད་པའི་བྱང་ཆུབ་སེམས་དཔའ་ཆོས་ཀྱི་སྦྱིན་པ་ལ་དཔའ་བ་དེ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཉེ་བར་གྱུར་པ་ཡིན་ནོ། །དེ་བས་ན། ཤཱ་རིའི་བུ། ཆོས་ཀྱི་སྦྱིན་པ་མཆོག་ལ་གཟུད་པར་བྱ་ཡི་ཟང་ཟིང་གི་སྦྱིན་པ་ལ་གཟུད་པར་མི་བྱའོ། །གང་དག་སྐྱེས་བུ་དམ་པ་དེ་དག་ལ་སྦྱིན་པ་སྦྱིན་པར་བྱེད་པ་དེ་དག་གིས་ཆོས་ཀྱི་སྦྱིན་པ་ཉིད་སྦྱིན་པར་བྱ་ཡི། ཟང་ཟིང་གི་སྦྱིན་པ་ནི་མ་ཡིན་ཏེ། དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་བསྙེན་པར་འགྱུར་རོ། །བསྐལ་པ་བརྒྱད་ཅུའི་བར་དུ་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་བརྒྱ་ན་འཇིག་རྟེན་གྱི་ཁམས་ཆོས་ལྡན་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ཀྱི་བླ་མ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་དག་དེ་བཞིན་གཤེགས་པ་ཆོས་ཀྱི་བླ་མ་དེའི་མཚན་ཉན་པ་དང ། དད་པའང་ 25b སྐྱེད་པ་དང ། ཐལ་མོ་སྦྱོར་བར་བྱེད་ཅིང་དེ་དག་ཐམས་ཅད། འདི་ལྟ་སྟེ། སངས་རྒྱས་ཀྱི་ཆོས་འདི་ལ་ཆོས་གྲུབ་པར་བྱ་བའི་ཕྱིར་སློབ་པར་འགྱུར་རོ། །ཕན་ཡོན་འདི་དག་འདོད་པས་རི་མོར་བྱས་ཏེ་མོས་པར་བྱའོ། །དེ་བཞིན་གཤེགས་པ་རྣམས་ཀྱི་ཡོན་ཏན་ཡོངས་སུ་བརྗོད་པ་ལ་སོ་སོའི་སྐྱེ་བོའི་ཤེས་པས་དེ་བཞིན་གཤེགས་པའི་ཡེ་ཤེས་ལ་ཚད་གཟུང་བར་མི་བྱ་སྟེ། གང་སངས་རྒྱས་བཅོམ་ལྡན་འདས་རྣམས་ཀྱི་ཡེ་ཤེས་དེ་ནི་རང་སངས་རྒྱས་རྣམས་ཀྱིས་ཀྱང་མ་ཡིན་པས་ན། དཔེ་འདི་དག་ཐོས་པ་ལས་སངས་རྒྱས་ཀྱི་ཡེ་ཤེས་ལ་བརྙས་པར་མི་བྱ་སྟེ། སེམས་བསྐྱེད་པ་གཅིག་གམ། ངག་གི་ལས་གཅིག་གིས་སེམས་ཅན་དམྱལ་བ་ཆེན་པོའི་ལུས་རྣམ་པ་དུ་མར་འགྱུར་བའི་ལས་ཡོངས་སུ་གཟུང་བར་མི་བྱའོ། །དེ་ཅིའི་ཕྱིར་ཞེ་ན། སངས་རྒྱས་བཅོམ་ལྡན་འདས་རྣམས་འཇིག་རྟེན་དུ་འབྱུང་བའང་དཀའ། མིར་འགྱུར་བ་དང ། དལ་བ་ཕུལ་སུམ་སོགས་པ་བསྒྲུབ་པའང་ཤིན་ཏུ་དཀའོ། །དེའི་ཕྱིར་དཔེ་ཞིག་བསྟན་པར་བྱ་སྟེ། ཤཱ་རིའི་བུ། དཔེར་ན། ས་ཆེན་པོ་འདི་རྒྱ་མཚོ་ཆེན་པོ་གཅིག་ཏུ་གྱུར་ཏེ། དེའི་ནང་ན་གཉའ་ཤིང་བུག་གཅིག་པ་ཞིག་ཡོད་ལ། རུས་སྦྲལ་ཞར་བ་ཞིག་ཀྱང་ཡོད་དེ། རྒྱ་མཚོ་ཆེན་པོ་དེ་ལ་རླུང་ཡར་ལྡང་བ་མར་ལྡང་བ་ཞེས་བྱ་བ་ལྡང་བ་ལ། རུས་སྦལ་ཞར་བ་དེའང་ལོ་བརྒྱ་བརྒྱ་ཞིང་ལན་གཅིག་ཕྱིར་འབྱུང་བ་རབ་ཏུ་མྱུར་བར་གཉའ་ཤིང་གི་བུག་གཅིག་པ་དེར། རུས་སྦལ་ཞར་བ་ལོ་ 26a ༄#། །བརྒྱ་བརྒྱ་ཞིང་ཕྱིར་བྱུང་བའི་མགུལ་པ་ཆུད་པར་སྨྲ་ཡི། ལོག་པར་ལྟུང་བ་ལས་ཕྱིར་ཡང་མིར་འགྱུར་བ་ནི་དེ་ལྟ་མ་ཡིན་ཏེ། དེ་ལྟར་ལོག་པར་ལྟུང་བ་རྣམས་ཀྱི་མིར་འགྱུར་བ་རབ་ཏུ་དཀའ་བ་ཡིན་ནོ། །གང་ཡང་མི་ཁོམ་པ་ལ་སོགས་པ་སྤངས་ཏེ། ད་ལྟར་མིར་འགྱུར་བ་ཐོབ་ནས་སངས་རྒྱས་བྱུང་བ་ལའང་མཉེས་པར་བྱས་ཏེ། དེ་བཞིན་གཤེགས་པ་འཇིག་རྟེན་ཐམས་ཅད་ཀྱི་མཆོག་གི་ཡེ་ཤེས་དམ་པ་མངའ་བ་ལ་དད་པ་ཐོབ་ནས་བདག་གིས་མིར་འགྱུར་བ་ལེགས་པར་ཐོབ་ཀྱི། དེ་བཞིན་གཤེགས་པ་ཐམས་ཅད་མཁྱེན་པའི་ཡེ་ཤེས་ཆེན་པོ་དང་ལྡན་པ་ལ་བདག་གིས་སེམས་བསྐྱེད་པ་གཅིག་ཙམ་ཡང་མོས་པར་བྱའོ་སྙམ་ནས་བདག་ཉིད་ཡང་དག་པར་དགའ་བར་བྱའོ། །དེ་དག་གིས་བསྐལ་པ་སུམ་ཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་ལྔ་བཅུ་རྩ་ལྡན་འཇིག་རྟེན་གྱི་ཁམས་རྒྱུ་བའི་དབང་པོ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་ཀྱི་དབང་ཕྱུག་རྒྱལ་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་དེ་བཞིན་གཤེགས་པ་སྤོས་ཀྱི་དབང་ཕྱུག་རྒྱལ་པོའི་མཚན་ཉན་པ་དང ། དད་པ་བསྐྱེད་པར་འགྱུར་པ་དང ། མོས་པར་བྱེད་ཅིང་ཐལ་མོ་སྦྱར་ཏེ། ཚིག་འདི་སྐད་དུ། བཅོམ་ལྡན་འདས་དེ་བཞིན་གཤེགས་པ་སྤོས་ཀྱི་དབང་ཕྱུག་རྒྱལ་པོ་ལ་ཕྱག་ 26b འཚལ་ལོ་ཞེས་ཟེར་ན་དེ་དག་གི་བསོད་ནམས་ཀྱི་ཕུང་པོ་ཚད་མེད་པར་འགྱུར་ཏེ། དེའི་ཕྱོགས་ཙམ་ཞིག་བསྟན་པར་བྱའོ། །ཡང་ཤཱ་རིའི་བུ། གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་རིན་པོ་ཆེ་སྣ་བདུན་གྱིས་རབ་ཏུ་གང་བར་བྱས་ནས་སངས་རྒྱས་བཅོམ་ལྡན་འདས་ལ་ཉིན་རེ་ཞིང་སྦྱིན་པ་ཕུལ་ཏེ། དེ་བཞིན་དུ་འབུལ་ཞིང་ལོ་སྟོང་དུ་ཕུལ་བ་བས། གང་གིས་དེ་བཞིན་གཤེགས་པའི་མཚན་ཐོས་ནས་དད་པ་ཡང་དག་པར་བསྐྱེད་པ་དང ། མོས་པར་བྱེད་ཅིང་ཐལ་མོ་སྦྱར་ཏེ། བཅོམ་ལྡན་འདས་དེ་བཞིན་གཤེགས་པ་སྤོས་ཀྱི་དབང་ཕྱུག་རྒྱལ་པོ་ལ་ཕྱག་འཚལ་ལོ་ཞེས་ཚིག་དེ་སྐད་དུ་སྨྲ་བ་འདིའི་བསོད་ནམས་ཀྱི་ཕུང་པོ་ལ་སྔ་མའི་བསོད་ནམས་ཀྱི་ཕུང་པོས་བརྒྱའི་ཆར་ཡང་ཉེ་བར་མི་འགྲོ་བ་ནས། དཔེར་ཡང་མི་བཟོད་དེ།་བསྐལ་པ་སུམ་ཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་བཅུ་ན་འཇིག་རྟེན་གྱི་ཁམས་བདེན་པ་དང་ལྡན་པ་ཞེས་བྱ་བ་ནི། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་ཆེན་པོ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་དེ་བཞིན་གཤེགས་པ་ཡོན་ཏན་ཆེན་པོ་དེའི་མཚན་ཉིད་པར་འགྱུར་བ་ངེས་པ་ལ་ཞུགས་པ་མ་གཏོགས་པར་དེ་དག་ཐམས་ཅད་སངས་རྒྱས་ཀྱི་ཆོས་ཐམས་ཅད་གྲུབ་པར་བྱེད་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་ 27a ༄#། །བརྒྱད་ན་འཇིག་རྟེན་གྱི་ཁམས་རྒྱན་ཆེན་པོ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་འོད་ཅེས་བྱ་བ་བཞུགས་ཏེ། ཤཱ་རིའི་བུ། དེ་བཞིན་གཤེགས་པ་སྤོས་འོད་བྱང་ཆུབ་སེམས་དཔའི་སྤྱད་པ་སྤྱོད་པ་ན་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པའི་མིང་གང་གིས་ཉན་པ་དང ། གང་ཉན་པ་དང ། ཐོས་ནས་ཀྱང་མོས་པར་འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཅིག་།དེ་དག་ཕྱི་མ་ལ་ངན་སོང་དུ་འགྲོ་བར་མ་གྱུར་ཅིག་ཅེས་སྨོན་ལམ་དེ་ལྟར་བཏབ་པར་གྱུར་ཏོ། །ཡང་ཤཱ་རིའི་བུ། དེ་བཞིན་གཤེགས་པ་དེའི་མཚན་གང་ཉན་ཅིང་ཐོས་ནས་ཀྱང ། ལྷག་པའི་བསམ་པས་མོས་པར་བྱེད་པ་ནི་སྔོན་གྱི་སྨོན་ལམ་དེས་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །སངས་རྒྱས་ཀྱི་ཞིང་དུ་སུམ་ཅུ་ན་འཇིག་རྟེན་གྱི་ཁམས་དྲི་མ་མེད་པ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་འཕྲོ་ཞེས་བྱ་བ་བཞུགས་ཏེ། ཤཱ་རིའི་བུ། དེ་བཞིན་གཤེགས་པ་འོད་འཕྲོ་དེའི་མཚན་ཐོས་པར་འགྱུར་བ་ཉུང་སྟེ། ཐོས་ནས་མོས་པ་དང ། དད་པར་ 27b འགྱུར་བ་དེ་དག་གི་བསོད་ནམས་ཀྱི་ཕུང་པོ་ཚད་མེད་པར་འགྱུར་རོ། །གང་ཉན་པར་མི་བྱེད་པ་དེ་དག་ནི་བསོད་ནམས་མ་ཡིན་པའི་ཕུང་པོ་ཚད་མེད་པ་ཡོངས་སུ་འཛིན་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་བཅོ་ལྔ་ན་འཇིག་རྟེན་ཁམས་ཀུན་ཏུ་དགའ་བ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་ཚད་མེད་ཅེས་བྱ་བ་བཞུགས་ཏེ། ཡང་ཤཱ་རིའི་བུ། གང་དེ་བཞིན་གཤེགས་པ་འོད་ཚད་མེད་དེའི་མཚན་ཉན་པར་འགྱུར་བ་དང ། ལྷག་པའི་བསམ་པས་དད་པར་བྱེད་པ་དེ་དག་ཐམས་ཅད་དེ་བཞིན་གཤེགས་པ་དེའི་འོད་ཐོབ་པར་འགྱུར་རོ། །གང་དད་པར་མི་བྱེད་པ་དེ་དག་བསྐལ་པ་ཉི་ཤུར་ཚ་བའི་སེམས་ཅན་དམྱལ་བར་བཙོ་བར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་ཉི་ཤུ་ན། འཇིག་རྟེན་གྱི་ཁམས་སྙིང་པོ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་བཏང་བ་ཞེས་བྱ་བ་བཞུགས་ཏེ། ཡང་ཤཱ་རིའི་བུ། གང་དེ་བཞིན་གཤེགས་པ་འོད་བཏང་བ་དེའི་མཚན་ཉན་པར་འགྱུར་བ་དང ། ཐོས་མ་ཐག་ཏུའང་དད་པ་སྐྱེད་པར་བྱེད་པ་དེ་དག་ཐམས་ཅད་བདུད་སྡིག་ཅན་གྱིས་ཐུབ་པར་དཀའ་བར་འགྱུར་རོ། །སངས་རྒྱས་ཀྱི་ཞིང་ཉིས་སྟོང་ལྔ་བརྒྱ་ན་འཇིག་རྟེན་གྱི་ཁམས་སྤུག་གི་ཤིང་ཏོག་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་ 28a ༄#། །དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་སྒྲོན་མ་ཞེས་བྱ་བ་བཞུགས་ཏེ། ཤཱ་རིའི་བུ། ཡང་གང་དེ་བཞིན་གཤེགས་པ་ཟླ་བའི་སྒྲོན་མ་དེའི་མཚན་ཉན་པར་འགྱུར་བ་དེ་དག་ལྷ་དང་བཅས་པའི་འཇིག་རྟེན་གྱི་སྦྱིན་གནས་སུ་འགྱུར་རོ། །དེ་དག་ཡུལ་གང་ན་གནས་པའི་ཡུལ་དེའང་མཆོད་རྟེན་དུ་འགྱུར་རོ། །དེ་ཅིའི་ཕྱིར་ཞེ་ན། ཕྱི་མའི་དུས་ན་དེ་བཞིན་གཤེགས་པའི་མཚན་ཉན་པར་འགྱུར་བའི་སྐྱེས་བུ་དམ་པ་དེ་དག་ནི་དཀོན་ཏོ། །སངས་རྒྱས་ཀྱི་ཞིང་སྟོང་ཕྲག་བརྒྱད་ན་འཇིག་རྟེན་གྱི་ཁམས་དྲི་མཆོག་ཅེས་བྱ་བ་ན། དེ་བཞིན་གཤེགས་པ་ཟླ་འོད་ཅེས་བྱ་བ་བཞུགས་ཏེ། ཤཱ་རིའི་བུ། གང་དེ་བཞིན་གཤེགས་པ་ཟླ་འོད་དེ་མཚན་ཉན་པར་འགྱུར་བ་དང ། ཐ་ན་རྨི་ལམ་གྱི་ཚེ་ཐོས་ནའང་དད་པ་ཡང་དག་པར་སྐྱེད་པ་དེ་དག་ཐམས་ཅད་བསོད་ནམས་ཀྱི་ཕུང་པོ་ཆེན་པོར་སྐྱེད་པར་འགྱུར་རོ། །རི་དང་འདྲ་བར་བདུད་ཐམས་ཅད་ཀྱིས་མི་བསྐྱོད་པར་འགྱུར་རོ། ། སངས་རྒྱས་ཀྱི་ཞིང་སྟོང་ཕྲག་བཅུ་གཉིས་ན་འཇིག་རྟེན་གྱི་ཁམས་ཉི་མ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་སྣང་བ་ཞེས་བྱ་བ་བཞུགས་ཏེ། ཤཱ་རིའི་བུ། དེ་བཞིན་གཤེགས་པ་ཟླ་བ་སྣང་བའི་སངས་རྒྱས་ཀྱི་ཞིང་ན་ངན་སོང་གི་གཞི་མེད་དོ། །ཤཱ་རིའི་བུ། དེ་བཞིན་གཤེགས་པ་དེའི་ 28b སྨོན་ལམ་སྔོན་འདི་ལྟར་བཏབ་སྟེ། བྱང་ཆུབ་ཐོབ་པའི་མཚན་དང ། མྱ་ངན་ལས་འདས་པ་ཐོས་པ་དེ་དག་ཐམས་ཅད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་གྱུར་ཅིག་།བདག་གི་སངས་རྒྱས་ཀྱི་ཞིང་གི་བཀོད་པ་དེ་དག་གི་སངས་རྒྱས་ཀྱི་ཞིང་གི་བཀོད་པའང ། ད་ལྟར་གྱི་བདག་གི་ཅི་འདྲ་བ་དེ་འདྲ་བར་གྱུར་ཅིག་ཅེས་བྱས་སོ། །ཤཱ་རིའི་བུ། གང་ལ་ལ་ཞིག་གིས་དེ་བཞིན་གཤེགས་པ་ཟླ་བ་སྣང་བའི་མཚན་ཉན་པར་འགྱུར་བ་དེ་དག་ཐམས་ཅད་ཀྱང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཇི་ལྟར་སྨོན་ལམ་བཏབ་པ་དེ་བཞིན་དུ་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་བཅོ་བརྒྱད་ན་འཇིག་རྟེན་གྱི་ཁམས་གསེར་གྱི་ནོར་བུ་སྣང་བ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མེ་འོད་ཅེས་བྱ་བ་བཞུགས་ཏེ། ཤཱ་རིའི་བུ། གང་དེ་བཞིན་གཤེགས་པ་མེ་འོད་ཀྱི་མཚན་ཉན་པར་འགྱུར་བ་དེ་དག་ཐམས་ཅད་ཆོས་ཀྱི་སྒྲོན་མ་ཐོགས་པར་འགྱུར། འཇིག་རྟེན་ཐམས་ཅད་དང ། སེམས་ཅན་རྣམས་འཁོར་བའི་རྒྱ་མཚོ་ལས་སྒྲོལ་བར་འགྱུར་རོ། །དེ་དག་གི་ཉིན་མཚན་སེམས་ཅན་རྣམས་ལ་ཕན་འདོགས་པ་ལ་ཞུགས་པས་འདའ་བར་འགྱུར་རོ། །དེ་དག་ཆོས་ཀྱི་སྦྱིན་པ་མངོན་པར་གཏོང་ངོ ། །དེ་དག་ནི་བདུད་ཐམས་ཅད་དང ། མུ་སྟེགས་ཅན་གཞན་གྱིས་མི་ཐུབ་པར་འགྱུར་རོ། །སངས་ 29a ༄#། །རྒྱས་ཀྱི་ཞིང་སྟོང་ཕྲག་བཅུ་ན་འཇིག་རྟེན་གྱི་ཁམས་གཟུགས་སྣང་བ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་རྣམ་པར་རྒྱལ་བའི་དབྱངས་ཞེས་བྱ་བ་བཞུགས་ཏེ། ཅིའི་ཕྱིར་འཇིག་རྟེན་གྱི་ཁམས་དེ་གཟུགས་སྣང་བ་དང་ལྡན་པ་ཞེས་བྱ་ཞེ་ན། འཇིག་རྟེན་གྱི་ཁམས་དེར་སེམས་ཅན་གང་སུ་དག་སྐྱེས་པ་དང ། སྐྱེ་བ་དང།་སྐྱེ་བར་འགྱུར་བ་དེ་དག་ཐམས་ཅད་མིའི་ཁ་དོག་ལས་འདས་པར་འགྱུར་བ་ཡིན། སེམས་ཅན་དེ་དག་ཐམས་ཅད་གཟུགས་བཟང་ཞིང་མཛེས་པར་འགྱུར་བ་ཡིན་ནོ། །ཤཱ་རིའི་བུ། གང་དག་དེ་བཞིན་གཤེགས་པ་རྣམ་པར་རྒྱལ་བའི་མཚན་ཉན་པ་དེ་དག་ཐམས་ཅད་བླ་ན་མེད་པའི་སངས་རྒྱས་ཀྱི་ཆོས་ཀྱིས་གཟུགས་བཟང་པོར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་བཅུ་གསུམ་ན་འཇིག་རྟེན་གྱི་ཁམས་རྣམ་པར་རྒྱལ་བ་དང་ལྡན་པ་ན་དེ་བཞིན་གཤེགས་པ་མཆོག་མཛད་ཅེས་བྱ་བ་བཞུགས་ཏེ། ཡང་ཤཱ་རིའི་བུ། གང་དེ་བཞིན་གཤེགས་པ་མཆོག་མཛད་དེའི་མཚན་ཉན་པར་འགྱུར་བ་དང ། དད་པའང་སྐྱེད་པར་འགྱུར་བ་ནི་ལྷ་དང ། མི་དང ། ལྷ་མ་ཡིན་དུ་བཅས་པའི་འཇིག་རྟེན་གྱི་མཆོག་ཏུ་འགྱུར་རོ། ། བསྐལ་པ་ཉི་ཤུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་བྱེ་བ་བརྒྱ་སྟོང་གི་ཐ་མ་ན་འཇིག་རྟེན་གྱི་ཁམས་གཡུལ་ལས་རྣམ་པར་རྒྱལ་ཏེ་རྒལ་ 29b བ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མང་པོའི་བླ་མ་ཞེས་བྱ་བ་བཞུགས་ཏེ། ཤཱ་རིའི་བུ། གང་དེ་བཞིན་གཤེགས་པ་མང་པོའི་བླ་མའི་མཚན་ལྷའམ། ཀླུའམ། གནོད་སྦྱིན་ནམ། མིའམ། མི་མ་ཡིན་པ་ཉན་པར་འགྱུར་བ་དེ་ཉིད་དེ་དག་ཐམས་ཅད་ཀྱི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རྒྱུར་འགྱུར་རོ། །དེ་དག་གིས་བསྐལ་པ་སུམ་ཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །གང་དག་མཚན་འདི་ལ་དད་པར་མི་བྱེད་པ་དེ་དག་ནི་བསྐལ་པ་ཉིད་ཤུ་དང ། ལོ་སྟོང་དུ་དམྱལ་བར་བཙོ་བར་འགྱུར་རོ། །སངས་རྒྱས་ཀྱི་ཞིང་ལྔ་སྟོང་ན་འཇིག་རྟེན་གྱི་ཁམས་རིན་པོ་ཆེ་སྣ་བདུན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨའི་སྡེ་ཞེས་བྱ་བ་བཞུགས་ཏེ། ཤཱ་རིའི་བུ། གང་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེས་རབ་ཏུ་གང་བར་བྱས་ཏེ། སངས་རྒྱས་བཅོམ་ལྡན་འདས་པ་ཉིན་རེ་ཞིང་སྤྱིན་པ་ཕུལ་ལ་དེ་བཞིན་དུ་བསྐལ་པ་གངྒཱའི་ཀླུང་གི་བྱེ་མ་སྙད་དང་མཉམ་པར་སྦྱིན་པ་ཕུལ་ནས་དེ་འདི་སྙམ་དུ་སེམས་ཏེ། བདག་གིས་རིན་པོ་ཆེ་འདི་ཡོངས་སུ་བཏང་བ་འདིས་དེ་བཞིན་གཤེགས་པ་པདྨའི་སྡེ་དེའི་མཚན་ཐོས་པར་གྱུར་ཅིག་སྙམ་སྟེ། གང་སངས་རྒྱས་མཐོང་བ་དེ་དག་གིས་ཐོས་པར་ནུས་སོ། །དེ་ཅིའི་ཕྱིར་ཞེ་ན། ཤཱ་རིའི་བུ། 30a ༄#། །དེ་བཞིན་གཤེགས་པ་དེ་ནི་སྤྱོད་པ་བསམ་གྱིས་མི་ཁྱབ་པ་ལས་ངེས་པར་བྱུང་བ་སྟེ། གང་དག་དེ་བཞིན་གཤེགས་པ་དེའི་མཚན་ཉན་པར་འགྱུར་བ་དང།་དད་པའང་སྐྱེད་པར་འགྱུར་བ་དེ་དག་ནི་པདྨ་ཆུ་ལས་བྱུང་བ་བཞིན་ཁམས་གསུམ་ཐམས་ཅད་ལས་མངོན་པར་འཕགས་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་སུམ་ཅུ་ན་འཇིག་རྟེན་གྱི་ཁམས་ཟླ་བ་ཅན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མོའི་དབྱངས་ཞེས་བྱ་བ་བཞུགས་ཏེ། ཤཱ་རིའི་བུ། དེ་ཡིད་ལ་ཇི་སྙམ་དུ་སེམས། ཅིའི་ཕྱིར་པདྨོའི་དབྱངས་ཞེས་བྱ་ཞེ་ན། དེ་བཞིན་གཤེགས་པ་དེ་པདྨ་ལ་བཞུགས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང ། སུམ་ཅུ་རྩ་གསུམ་པའི་ལྷ་རྣམས་ཀྱིས། ཀྱེ་མ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མོའི་དབྱངས་བྱུང་ངོ་ཞེས་སྒྲ་བསྒྲགས་སོ། །ཤཱ་རིའི་བུ། གང་དེ་བཞིན་གཤེགས་པ་པདྨོའི་དབྱངས་ཀྱི་མཚན་ཉན་པ་དང ། དད་པ་བསྐྱེད་པར་འགྱུར་བ་དང ། པུས་མོ་གཡས་པའི་ལྷ་ང་ས་ལ་བཙུགས་ནས་དེ་བཞིན་གཤེགས་པ་དེ་ལ་ཕྱག་འཚལ་ལོ་ཞེས་ཚིག་དེ་སྐད་དུ་སྨྲ་ན་མཚམས་མེད་པ་ལས་བྱུང་བ་དང ། འཕགས་པ་ལ་སྐུར་བ་འདེབས་པ་མ་གཏོགས་ 30b པར་དེ་དག་ཐམས་ཅད་ལོག་པར་མི་ལྟུང་བའི་ཆོས་ཅན་དུ་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་སུམ་ཅུ་ན་འཇིག་རྟེན་གྱི་ཁམས་མཐུ་པོ་ཆེ་དང་ལྡན་པའི་ས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མང་ཞེས་བྱ་བ་བཞུགས་ཏེ། ཅིའི་ཕྱིར་རིན་ཆེན་མང་ཞེས་བྱ་ཞེ་ན། སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་ཤིན་ཏུ་མང་སྟེ།་ཉན་ཐོས་ཀྱི་ཐེག་པ་ཅན་མང་བ་མ་ཡིན་ལ་ཉིན་རེ་ཞིང་ཡང་དེའི་བསྟན་པ་ཚད་མེད་པར་ཕྱུང་སྟེ། དེའི་ཕྱིར་དེ་བཞིན་གཤེགས་པ་རིན་ཆེན་མང་ཞེས་བྱའོ། །ཤཱ་རིའི་བུ། རིགས་ཀྱི་བུའམ། རིགས་ཀྱི་བུ་མོ་གང་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་དེ་བཞིན་གཤེགས་པ་རིན་ཆེན་མང་དེ་ལ་ཕྱག་འཚལ་ལོ་ཞེས་ཆེད་དུ་བརྗོད་པ་ལན་གསུམ་དུ་རྗོད་པར་བྱེད་ན། དེ་དག་ནི་དེ་བཞིན་གཤེགས་པའི་སྔོན་གྱི་སྨོན་ལམ་གྱི་སྤྱོད་པ་ཡོངས་སུ་རྫོགས་པར་འགྱུར་ཏེ། དེ་ནི་གཡོག་རིན་པོ་ཆེ་དང་ལྡན་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་ཉི་ཤུ་ན་འཇིག་རྟེན་གྱི་ཁམས་མེ་ཏོག་ཅན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་ང་རོ་ཞེས་བྱ་བ་བཞུགས་ཏེ། ཤཱ་རིའི་བུ། གང་དག་དེ་བཞིན་གཤེགས་པ་སེང་གེའི་ང་རོའི་མཚན་ཉན་པ་དང ། པུས་མོ་གཡས་པའི་ལྷ་ང་ས་ལ་བཙུགས་ནས། དེ་བཞིན་གཤེགས་པ་ 31a ༄#། །དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་ང་རོ་དེ་ལ་ཕྱག་འཚལ་ལོ་ཞེས་ཆེད་དུ་བརྗོད་པ་ལན་གསུམ་དུ་རྗོད་པར་བྱེད་ན། དེ་དག་ཐམས་ཅད་སེམས་ཅན་དགྲོལ་བའི་ཕྱིར་འཇིག་རྟེན་གསུམ་ཟིལ་གྱིས་མནན་ནས་སེང་གེའི་སྒྲར་སྒྲོགས་སོ། །བསྐལ་པ་ལྔར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། ། སངས་རྒྱས་ཀྱི་ཞིང་སྟོང་ཕྲག་བཅུ་ན་འཇིག་རྟེན་གྱི་ཁམས་དགོན་པ་ཅན་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེང་གེའི་དབྱངས་ཞེས་བྱ་བ་བཞུགས་ཏེ། ཤཱ་རིའི་བུ། གང་དེ་བཞིན་གཤེགས་པ་སེང་གེའི་དབྱངས་ལ་རྗེས་སུ་དྲན་པར་བྱེད་ཅིང་ཐ་ན་ནམ་མཁའ་ལའང་མེ་ཏོག་གིས་འཐོར་བ་དང ། གང་གིས་དེ་བཞིན་གཤེགས་པའི་མཆོད་རྟེན་བཙུགས་ནས་སྦྱིན་པ་ཡོངས་སུ་གཏོང་བས་དེ་བཞིན་གཤེགས་པ་དེ་ལ་མཆོད་པར་གྱུར་ཅིག་ཅེས་མོས་པ་ལྟ་ཅི་སྨོས་ཏེ། དེ་དག་ཐམས་ཅད་འཇིག་རྟེན་ན་མེ་ཏོག་ལྟ་བུར་འགྱུར་རོ། །གསུང་དབྱངས་དེ་ཐོབ་པར་འགྱུར་ཏེ་དེ་ནས་སངས་རྒྱས་ཀྱི་གསུང་དབྱངས་སོ། །སངས་རྒྱས་ཀྱི་ཞིང་སྟོང་ཕྲག་བཅོ་ལྔ་ན་འཇིག་རྟེན་གྱི་ཁམས་མྱ་ངན་མེད་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔའ་བོའི་སྡེ་ཞེས་བྱ་བ་བཞུགས་ཏེ། ཤཱ་རིའི་བུ། གང་དེ་བཞིན་གཤེགས་པ་དཔའ་ 31b བོའི་སྡེའི་མཚན་ཉན་པ་དང ། དད་པ་བསྐྱེད་པར་འགྱུར་བ་དང ། ལྷག་པའི་བསམས་པས་འཇིག་རྟེན་གྱི་ཁམས་མྱ་ངན་མེད་པ་ལའང་མོས་པར་བྱེད་པ་དང ། དེ་བཞིན་གཤེགས་པ་དེ་ལ་ལྷག་པའི་བསམ་པས་སེམས་བསྐྱེད་པ་ཙམ་ཡང་དད་པ་སྐྱེད་ན་དེ་དག་ཐམས་ཅད་ཀྱིས་དེ་བཞིན་གཤེགས་པ་ཆོས་སྟོན་པ་མཐོང་བར་འགྱུར་རོ། །དེ་ཅིའི་ཕྱིར་ཞེ་ན། བཅོམ་ལྡན་འདས། དེའི་སྔོན་གྱི་སྨོན་ལམ་གྱིས་ཏེ། འཇིག་རྟེན་གཞན་དུ་བྱང་ཆུབ་ཐོབ་པའི་མིང་ཐོས་ན་དེ་ནས་ཤི་འཕོས་ནས་དེ་དག་བདག་གི་སངས་རྒྱས་ཀྱི་ཞིང་དུ་སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་གྱུར་ཅིག་ཅེས་སྨོན་ལམ་དེ་ལྟར་བཏབ་པར་གྱུར་ཏོ། །གང་དེ་བཞིན་གཤེགས་པ་དེའི་མཚན་ཐོས་ནས་དད་པར་མི་བྱེད་ཅིང་སྤོང་བ་དང ། རྣ་བ་བླགས་ཏེ་ཉན་པར་མི་བྱེད་པ་དེ་དག་ནི་ལོ་བྱེ་བ་སྙེད་དུ་སེམས་ཅན་དམྱལ་བའི་ལས་ཡོངས་སུ་བཟུང་བར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་དྲུག་ཅུའི་ཐ་མ་ན་འཇིག་རྟེན་གྱི་ཁམས་འཇམ་དབྱངས་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡང་དག་པར་བླངས་པ་ཐམས་ཅད་ལས་རྒལ་བ་ཐེ་ཚོམ་གཅོད་པ་ཞེས་བྱ་བ་བཞུགས་ཏེ། ཤཱ་རིའི་བུ། གང་དེ་བཞིན་གཤེགས་པ་ཡང་དག་པར་བླངས་པ་ཐམས་ཅད་ལས་རྒལ་བ་ཐེ་ཚོམ་གཅོད་པ་དེའི་མཚན་ཉན་པ་དང ། དད་པ་བསྐྱེད་པར་འགྱུར་བ་དང ། མོས་པར་བྱེད་པ་དེ་དག་ནི་གང་ཡང་ 32a ༄#། །དག་པར་བླངས་ནས་ཚིག་ཏུ་སྨྲ་བ་དེ་ལ་ཇི་ལྟར་སྨྲས་པ་དེ་ལྟར་བྱེད་པར་འགྱུར་རོ། །བདུད་ཐམས་ཅད་དང ། ཕ་རོལ་རྒོལ་བ་ཐམས་ཅད་བཏུལ་ནས་ཐེ་ཚོམ་ཐམས་ཅད་གཅོད་པ་དང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་བཅོ་བརྒྱད་ན་འཇིག་རྟེན་གྱི་ཁམས་མེ་ཏོག་གི་དྲིས་བསྒོས་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་རིན་པོ་ཆེ་དང ། མེ་ལྟ་བུ་ཞེས་བྱ་བ་བཞུགས་ཏེ། ཤཱ་རིའི་བུ། གང་དེ་བཞིན་གཤེགས་པ་འཁོར་རིན་པོ་ཆེ་དང ། མེ་ལྟ་བུ་དེའི་མཚན་ཉན་པ་དང ། མཚན་ཐོས་མ་ཐག་ཏུ་དད་པ་བསྐྱེད་པར་འགྱུར་བ་དེ་དག་ཐམས་ཅད་འཁོར་རིན་པོ་ཆེ་དང ། མེ་ལྟ་བུར་འགྱུར་ཞིང ། འཇིག་རྟེན་ལའང་ཆོས་ཀྱི་འཁོར་ལོ་མྱུར་དུ་བསྐོར་བར་འགྱུར་རོ། །དེ་ལྟར་ན་སངས་རྒྱས་རྣམས་ལ་དད་པ་འདི་ནི་རྫུ་འཕྲུལ་ཆེ་སྟེ། དེ་དག་ཉན་ཐོས་ཀྱི་ཐེག་པས་སམ། རང་སངས་རྒྱས་ཀྱི་ཐེག་པས་སམ། བླ་ན་མེད་པའི་ཐེག་པ་ཆེན་པོས་ཀྱང་རུང ། བསོད་ནམས་ཀྱི་ཕུང་པོ་ཇི་ལྟར་བསྔོས་པ་དེ་ལྟར་འགྲུབ་སྟེ། དེ་ལ་གང་དག་ཤེས་རབ་རྒྱ་ཆེ་བ་དེ་དག་ནི་སངས་རྒྱས་སུ་འགྲུབ་པར་བྱ་བའི་ཕྱིར་ཐེག་པ་ཆེན་པོ་བླ་ན་མེད་པ་ཡོངས་སུ་འཛིན་ཏོ། །མོས་པ་དམན་པའི་ཤེས་རབ་ཅན་དག་ནི་སངས་རྒྱས་སུ་འགྲུབ་པ་ཚད་མེད་པ་དེ་ལྟ་བུ་བཏང་སྟེ། 32b དེའི་འབྲས་བུ་འགྲུབ་པར་བྱ་བའི་ཕྱིར་ཉན་ཐོས་དང ། རང་སངས་རྒྱས་ཀྱི་ཐེག་པ་ཡོངས་སུ་འཛིན་ཏོ། །གཏེར་ཆེན་པོ་དེ་ལྟ་བུ་རྙེད་ནས་སེར་སྣ་མི་སྐྱེད་བ་དང ། དེ་བཞིན་གཤེགས་པ་ལ་ཡོན་ཕུལ་བ་ལ་མོས་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་བསོད་ནམས་དེ་ཐམས་ཅད་ཀྱང་སེམས་ཅན་ཐམས་ཅད་ལ་ཕན་པ་དང ། བདེ་བར་བྱ་བའི་ཕྱིར་ཡོངས་སུ་བསྔོ་བ་འདི་ནི་ངོ་མཚར་དུ་རིག་པར་གྱིས་ཤིག་།ཤཱ་རིའི་བུ། གང་དེ་བཞིན་གཤེགས་པ་དེའམ། སངས་རྒྱས་གཞན་རྣམས་ཀྱི་ཡོན་ཏན་ཡོངས་སུ་བརྗོད་པ་ལ་དད་པར་མི་བྱེད་པ་དེ་དག་ཐམས་ཅད་ལོ་སྟོང་ཕྲག་བཞི་བཅུར་སེམས་ཅན་དམྱལ་བ་ཆེན་པོ་ཐིག་ནག་པོར་གནས་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་དྲུག་ཅུའི་ཐ་མ་ན་འཇིག་རྟེན་གྱི་ཁམས་དགའ་བ་དང་བཅས་པར་སྐྱེད་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་པ་ཞེས་བྱ་བ་བཞུགས་ཏེ། ཤཱ་རིའི་བུ། གང་དེ་བཞིན་གཤེགས་པ་དེའི་མཚན་ཐོས་པ་ཙམ་གྱིས་གང་དག་དགའ་བ་རབ་ཏུ་རྙེད་པ་དེ་དག་ཐམས་ཅད་ཉེ་བའི་ཉོན་མོངས་པས་མི་གོས་ཤིང་མྱ་ངན་མེད་པར་འགྱུར་རོ། །བྱང་ཆུབ་རྗེས་སུ་ཐོབ་ནས་སེམས་ཅན་མང་པོ་ཡང་མྱ་ངན་མེད་པར་བྱེད་དོ། །དེ་བཞིན་གཤེགས་པ་བཞུགས་སམ། མྱ་ངན་ལས་འདས་ཀྱང་རུང ། དེ་ལ་དད་པར་བྱེད་པའི་སེམས་ཅན་དེ་དག་ནི་འཇིག་རྟེན་ 33a ༄#། །ཐམས་ཅད་ཀྱི་མཆོག་ངོ་མཚར་དུ་གྱུར་བ་སྟེ། དེ་དག་གིས་བསོད་ནམས་ཀྱི་ཕུང་པོ་དཔག་ཏུ་མེད་པ་ཡོངས་སུ་བཟུང་བར་འགྱུར་རོ། །སངས་རྒྱས་བཅོམ་ལྡན་འདས་རྣམས་དང་མི་འབྲལ་བར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་བཅུ་བཞི་ན་འཇིག་རྟེན་གྱི་ཁམས་འཚོ་བ་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དམ་པའི་དགའ་ལྡན་ཞེས་བྱ་བ་བཞུགས་ཏེ། ཤཱ་རིའི་བུ། གང་དག་དེ་བཞིན་གཤེགས་པ་དམ་པའི་དགའ་ལྡན་དེའི་མཚན་ཉན་ཅིང་ཐོས་ནས་ཀྱང་དགའ་བ་དང ། རབ་ཏུ་དགའ་བ་ཆེན་པོ་ཐོབ་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས། དེ་བཞིན་གཤེགས་པ་དམ་པའི་དགའ་ལྡན་དེ་ལ་ཕྱག་འཚལ་ལོ་ཞེས་ཚིག་ཏུ་སྨྲ་བ་དེ་དག་ཐམས་ཅད་ཐེག་པ་དམ་པ་འཐོབ་པར་འགྱུར་རོ། །སེམས་ཅན་མང་པོའི་དོན་ཀྱང་བྱེད་པར་འགྱུར་རོ། །དེ་དག་ལ་ལོག་པར་ལྟུང་བའི་འཇིགས་པ་མི་འབྱུང་ངོ ། ། སངས་རྒྱས་ཀྱི་ཞིང་སྟོང་ཕྲག་བརྒྱད་ན་འཇིག་རྟེན་གྱི་ཁམས་ཟླ་བ་སྣང་བ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབང་པོའི་འབྱུང་གནས་ཞེས་བྱ་བ་བཞུགས་ཏེ། ཤཱ་རིའི་བུ། གང་དག་དེ་བཞིན་གཤེགས་པ་དབང་པོའི་འབྱུང་གནས་ཀྱི་མཚན་གཅིག་ནས་གཅིག་ཏུ་བརྒྱུད་པ་ལས་ཉན་པ་དེ་དག་ཀྱང་བསོད་ནམས་ 33b ཀྱི་ཕུང་པོ་ཚད་མེད་པ་ཡོངས་སུ་འཛིན་པར་འགྱུར་རོ། །མཚན་ཇི་ཙམ་དུ་བསྒྲགས་པ་ལ་ལྷའམ། ཀླུའམ། གནོད་སྦྱིན་ནམ། མི་འམ། མི་མ་ཡིན་པ་ཉན་པར་འགྱུར་བ་དེ་དག་ཐམས་ཅད་ཡེ་ཤེས་ཆེན་པོ་ལས་ཕྱིར་མི་ལྡོག་པར་འགྱུར་རོ། །སངས་རྒྱས་ཀྱི་ཞིང་བྱེ་བ་བརྒྱ་སྟོང་ཕྲག་གཉིས་ན་འཇིག་རྟེན་གྱི་ཁམས་སིལ་སྙན་ཐམས་ཅད་ཀུན་ནས་མཐོ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་ཚད་མེད་པ་ཞེས་བྱ་བ་བཞུགས་ཏེ། ཤཱ་རིའི་བུ། གང་དག་དེ་བཞིན་གཤེགས་པ་དབྱངས་ཚད་མེད་ཀྱི་མཚན་ཉན་ཅིང་བདག་གི་དགེ་བའི་རྩ་བ་འདིས་ཡེ་ཤེས་དམ་པ་དེ་ཐོབ་པར་གྱུར་ཅིག་ཅེས་དེ་ལྟར་སེམས་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འགྱུར་རོ། །འདི་ལ་དད་པར་མི་བྱེད་པ་དེ་དག་སངས་རྒྱས་ལ་མི་མཉེས་པར་བྱེད་པའི་རྣམ་པར་སྨིན་པ་སེམས་ཅན་དམྱལ་བ་ན་གནས་པའི་ལས་བྱེད་པར་འགྱུར་རོ། །འཇིག་རྟེན་གྱི་ཁམས་དེ་ཅིའི་ཕྱིར་སིལ་སྙན་ཐམས་ཅད་ཀུན་ནས་མཐོ་བ་ཞེས་བྱ་ཞེ་ན། ཤཱ་རིའི་བུ། དེ་བཞིན་གཤེགས་པ་དབྱངས་ཚད་མེད་དེ་དགའ་ལྡན་གྱི་གནས་ནས་འཆི་འཕོ་བ་ནས་མྱ་ངན་ལས་འདས་པ་ཆེན་པོའི་བར་དུ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ལྷ་དང ། མི་རྣམས་ཀྱི་སིལ་སྙན་དེ་དག་རབ་ཏུ་དཀྲོལ་ཅིང་བླངས་སོ། །དེའི་ཕྱིར་འཇིག་རྟེན་གྱི་ཁམས་དེ་སིལ་སྙན་ཐམས་ཅད་ཀུན་ནས་མཐོ་བ་ 34a ༄#། །ཞེས་བྱའོ། །ཅིའི་ཕྱིར་དེ་བཞིན་གཤེགས་པ་དེ་དབྱངས་ཚད་མེད་ཅེས་བྱ་ཞེ་ན། ཤཱ་རིའི་བུ། དེ་བཞིན་གཤེགས་པ་དབྱངས་ཚད་མེད་དེ་ཆོས་སྟོན་པ་ན་ཕྱོགས་བཅུའི་འཇིག་རྟེན་གྱི་ཁམས་བརྒྱ་ཕྲག་ཉི་ཤུ་སྙེད་དུ་དབྱངས་ཀྱིས་གོ་བར་མཛད་པས་ན། དེ་བཞིན་གཤེགས་པ་དེ་དབྱངས་ཚད་མེད་པ་ཞེས་བྱའོ། །སངས་རྒྱས་ཀྱི་ཞིང་བྱེ་བ་ཕྲག་སུམ་བརྒྱའི་ཐ་མ་ན་འཇིག་རྟེན་གྱི་ཁམས་རྣམ་པར་རྒྱལ་བའི་འོད་ཅེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་ཅེས་བྱ་བ་བཞུགས་ཏེ། ཤཱ་རིའི་བུ། དེ་བཞིན་གཤེགས་པ་མར་མེ་མཛད་དེའི་འོད་ཀྱིས་ཕྱོགས་བཅུའི་སངས་རྒྱས་ཀྱི་ཞིང་བྱེ་བ་བརྒྱ་སྟོང་ཀུན་ཏུ་འོད་ཀྱི་སྣང་བས་ཁྱབ་པས་ན་དེའི་ཕྱིར་དེ་བཞིན་གཤེགས་པ་དེ་མར་མེ་མཛད་ཅེས་བྱའོ། །ཤཱ་རིའི་བུ། གང་དག་དེ་བཞིན་གཤེགས་པ་དེའི་མཚན་ཐོས་ནས་དད་པ་སྐྱེད་པ་དང ། དགའ་བ་དང ། རབ་ཏུ་དགའ་བ་རྒྱ་ཆེན་པོ་རྙེད་ཅིང་འབྱུང་བ་ལ་གཡོ་དང་ལྡན་པར་མི་འགྱུར་རོ། །དེ་དག་ཐམས་ཅད་ཀྱིས་འོད་དེ་ཐོབ་པར་འགྱུར་རོ། །སངས་རྒྱས་ཀྱི་ཞིང་སྟོང་ཕྲག་བརྒྱད་ཅུའི་ཕ་རོལ་ན་འཇིག་རྟེན་གྱི་ཁམས་སྤོས་ཐམས་ཅད་སྣང་བ་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་སྣང་བ་ཞེས་བྱ་བ་བཞུགས་ཏེ། ཤཱ་ 34b རིའི་བུ། གང་དག་དེ་བཞིན་གཤེགས་པ་རིན་པོ་ཆེ་སྣང་བ་དེའི་མཚན་ཉན་པ་དང ། ཐོས་ནས་ཀྱང་དད་པ་བསྐྱེད་པར་འགྱུར་བ་དང ། ལྷག་པའི་བསམ་པས་དད་པར་འགྱུར་བ་དེ་དག་ཐམས་ཅད་རིན་པོ་ཆེ་ལྟ་བུར་འགྱུར་བ་དང ། སངས་རྒྱས་ཀྱི་ཆོས་ལས་ཕྱིར་མི་ལྡོག་པ་དང ། སངས་རྒྱས་བཅོམ་ལྡན་འདས་དང་མི་འབྲལ་བར་འགྱུར་རོ། །བྱང་ཆུབ་སེམས་དཔའི་སྤྱད་པ་སྤྱོད་པ་ན་བསྐལ་པ་ལྔར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །དེ་བས་ན། ཤཱ་རིའི་བུ། དེ་བཞིན་གཤེགས་པ་དང ། ཐེག་པ་ཆེན་པོ་ལ་ཞུགས་པའི་སྐྱེས་བུ་ཆེན་པོ་རྣམས་ལ་ཐ་བའི་ཞེ་སྡང་གི་སེམས་བསྐྱེད་པར་མི་བྱའོ། །ཤཱ་རིའི་བུ། གང་དག་དེ་བཞིན་གཤེགས་པ་དང ། ཐེག་པ་ཆེན་པོ་ལ་ཞུགས་པའི་སྐྱེས་བུ་ཆེན་པོ་སྲས་ཐུ་བོ་པ་རྣམས་ལ་ཡིད་མི་ཆེས་པ་བསྐྱེད་པ་དེ་དག་གི་ངེས་པ་ལ་ཞུགས་པ་དང ། མེ་ཏོག་གི་ཚོགས་ལ་མོས་པ་མ་གཏོགས་པར་སངས་རྒྱས་ཀྱི་བྱང་ཆུབ་ཉེ་བར་གྱུར་ཀྱང་རིང་དུ་བྱེད་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོའི་ཐད་ཏུ་འགྲོ་བར་མི་བྱ་སྟེ། སྐྱེས་བུ་དམ་པ་དེ་དག་ལ་གནོད་སེམས་བསྐྱེད་པ་དེ་དག་ནི་ལོ་བྱེ་བར་དམྱལ་བ་ཆེན་པོའི་སྡུག་བསྔལ་ཡོངས་སུ་འཛིན་པར་འགྱུར་རོ། །དུད་འགྲོའི་སྐྱེ་གནས་སུ་གྱུར་པ་ལའང་གནོད་སེམས་མི་སྐྱེད་དོ་ཞེས་གསུངས་ན་སྐྱེས་བུ་དམ་པ་དེ་དག་ལྟ་ལ་ཅི་སྨོས། ཤཱ་རིའི་བུ། གང་དག་སྐྱེས་བུ་ཆེན་པོ་དེ་དག་མེ་ཏོག་གི་ཚོགས་ལ་མོས་པ་དེ་དག་ལ་ 35a ༄#། །གནོད་པར་བྱེད་པ་དང ། ཡིད་ཆེས་པ་མི་སྐྱེད་པ་དང ། འཁྲུག་པར་བྱེད་པ་དང ། བརྙས་པར་བྱེད་པ་དེ་དག་ཐམས་ཅད་སེམས་ཅན་དམྱལ་བའི་ལས་ཤིན་ཏུ་མི་བཟང་པ་ཡོངས་སུ་འཛིན་པར་འགྱུར་རོ། །དེ་ཅིའི་ཕྱིར་ཞེ་ན། སྐྱེས་བུ་དམ་པ་དེ་དག་བྱང་ཆུབ་ཏུ་སེམས་བསྐྱེད་ནས་དེ་ལས་ཕྱིར་མི་ལྡོག་པའི་བྱང་ཆུབ་སེམས་དཔའ་དེ་དག་ནི་འཇིག་རྟེན་དུ་འབྱུང་བ་རབ་ཏུ་རྙེད་པར་དཀའོ། །དེ་བས་ན་གང་དག་ཡང་དག་པར་བླངས་པ་ལ་བརྟན་ཞིང་བྱང་ཆུབ་ཏུ་སེམས་བསྐྱེད་ནས་ཞུམ་པར་མི་བྱེད་ལ། བྱང་ཆུབ་མངོན་པར་རྫོགས་པར་སངས་རྒྱས་ནས་ཇི་ལྟར་གཉེར་བ་རྣམས་ལ་ཆོས་ཀྱི་སྦྱིན་པས་ཚིམ་པར་བྱེད་པ་དེ་དག་ནི་ཨུ་དུམྦཱ་རའི་མེ་ཏོག་དང་འདྲའོ་ཞེས་ངས་བཤད་དོ། །ཤཱ་རིའི་བུ། དེ་དག་ལ་སོགས་པ་ཚད་མེད་གྲངས་མེད་པའི་སངས་རྒྱས་བཅོམ་ལྡན་འདས་རྣམས་ལྷོ་ཕྱོགས་ན་ད་ལྟར་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་པའི་ཕྱོགས་དེ་ལོགས་སུ་ཡན་ལག་ལྔས་ཕྱག་བྱས་ཏེ་མཆོད་ལ་མིང་ཇི་སྐད་དུ་བསྟན་པ་ཉན་ཅིང ། ཡོན་ཏན་ཡོངས་སུ་བསྒྲགས་པ་ཡིད་ལ་བྱས་ན་བསོད་ནམས་ཀྱི་ཕུང་པོ་ཚད་མེད་པ་ཡོངས་སུ་འཛིན་པར་འགྱུར་རོ། །ནུབ་ཕྱོགས་ཀྱི་སངས་རྒྱས་ཀྱི་ཞིང་བྱེ་བ་བརྒྱ་སྟོང་གི་ཐ་མ་ན་འཇིག་རྟེན་གྱི་ཁམས་བདེ་བ་ཅན་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚེ་དཔག་མེད་ཅེས་བྱ་བ་བཞུགས་ཏེ། ཤཱ་རིའི་བུ། གང་ 35b དག་དེ་བཞིན་གཤེགས་པ་ཚེ་དཔག་མེད་དེའི་མཚན་ཐོས་པ་ཙམ་གྱིས་དགའ་བ་ཆེན་པོ་སྐྱེད་པ་དང ། རྣམ་པ་བརྒྱ་སྟོང་དུ་ཡང་དག་པར་མོས་པར་འགྱུར་བ་དེ་དག་ཐམས་ཅད་བསོད་ནམས་ཚད་མེད་པ་ཡོངས་སུ་འཛིན་པར་འགྱུར་རོ། །དེ་དག་ལ་ལོག་པར་ལྟུང་བའི་འཇིགས་པ་མི་འབྱུང་སྟེ། འདི་ནས་ཤི་འཕོས་ནས་སངས་རྒྱས་ཀྱི་ཞིང་དུ་སྐྱེ་བར་འགྱུར་རོ། །གང་དག་རྒྱུན་དུ་ཡིད་ལ་བྱེད་པ་དེ་དག་ནི་འཆི་བའི་ཚེ་དེ་བཞིན་གཤེགས་པ་འོད་དཔག་མེད་དགེ་སློང་གི་དགེ་འདུན་དང་ཐབས་གཅིག་ཏུ་མདུན་ན་བཞུགས་པར་འགྱུར་རོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཐུགས་རྗེ་ཆེན་པོ་དེ་ནི་སེམས་ཅན་རྣམས་ལ་ཕན་པར་དགོངས་པའི་ཕྱིར་འཇིག་རྟེན་གྱི་ཁམས་གཞན་ན་བཞུགས་ཀྱང་སེམས་ཅན་རྣམས་ལ་བདུད་སྡིག་ཅན་གྱིས་བར་ཆད་བྱེད་པར་འགྱུར་ཞེས་ནས་ཀུན་ནས་སྲུང་བར་མཛད་དེ། དེ་ནས་ཤི་འཕོས་པ་དང་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་ཏེ། དེ་དག་ཐམས་ཅད་ཀྱིས་དེ་ཉིད་དུ་སངས་རྒྱས་ཀྱི་ཆོས་རྣམས་ཡོངས་སུ་རྫོགས་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་དེ་བཞིན་གཤེགས་པ་དེས་བདག་བྱང་ཆུབ་ཐོབ་པའི་སངས་རྒྱས་ཀྱི་ཞིང་དུ་སེམས་ཅན་སྐྱེ་བ་ཐེག་པ་ཆེན་པོ་ལ་ཞུགས་པ་དེ་དག་གི་བསམ་པ་ཐམས་ཅད་བདག་གིས་བཀང་བར་བྱ་སྟེ། དེ་ནི་གང་ལ་ལ་བྱང་ཆུབ་ཀྱི་ཕྱོགས་ཀྱི་ཆོས་བྱང་ཆུབ་བྱེད་པ་གང་ཅི་ཡོད་པའོ། །ཉན་ཐོས་ཀྱི་ཐེག་པ་ཅན་གང་དག་སངས་ 36a ༄#། །རྒྱས་ཀྱི་ཞིང་དུ་སྐྱེ་བར་འགྱུར་བ་དེ་ཉིད་དུ་དགྲ་བཅོམ་པར་གྱུར་ཅིག་ཅེས་སྨོན་ལམ་དེ་ལྟར་བཏབ་བོ། །ཤཱ་རིའི་བུ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ཕྱི་མའི་དུས་ན་འོད་དཔག་མེད་ཀྱི་ཡོན་ཏན་བརྗོད་པ་ལ་དད་པར་བྱེད་པ་དང ། ལྷག་པའི་བསམ་པས་དགའ་བ་སྐྱེད་པ་དང ། དེ་བཞིན་གཤེགས་པ་དེ་ལ་ལྷག་པའི་བསམ་པས་རངས་པར་བྱེད་པ་ནི་སངས་རྒྱས་ཀྱི་ཞིང་དེར་སྐྱེས་ཏེ། དེ་ན་གནས་པ་རྣམས་བསམ་པ་ཐམས་ཅད་ཡོངས་སུ་རྫོགས་པར་འགྱུར་ཞིང་དེ་དག་ཇི་ལྟར་བརྗོད་པ་བཞིན་བྱང་ཆུབ་ཏུ་ཉེ་བར་འགྱུར་རོ། །དེ་བཞིན་གཤེགས་པ་འདུས་པ་དེའང་མཐོང་བར་འགྱུར་རོ། །སངས་རྒྱས་ཀྱི་ཞིང་དེར་སེམས་ཅན་སྐྱེས་པ་དེ་དག་མཐོང་བར་འགྱུར་རོ། །དེ་བཞིན་གཤེགས་པའི་ཡོན་ཏན་བརྗོད་པ་དེ་ལ་ཡིད་ཆེས་པར་མི་བྱེད་པ་དང ། འཕྱ་བ་དང ། སྤོང་བར་འགྱུར་བ་དེ་དག་ནི་བསྐལ་པ་ལྔར་སེམས་ཅན་དམྱལ་བའི་ལས་ཡོངས་སུ་བཟུང་བར་འགྱུར་རོ། །སངས་རྒྱས་ཀྱི་ཞིང་བརྒྱ་ཕྲག་སྟོང་གི་ཐ་མ་ན་འཇིག་རྟེན་གྱི་ཁམས་བདུད་ཐམས་ཅད་རབ་ཏུ་བཅོམ་པ་དང་ལྡན་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་རྒྱལ་བ་མངའ་བ་ཞེས་བྱ་བ་བཞུགས་ཏེ། ཤཱ་རིའི་བུ། གང་དག་དེ་བཞིན་གཤེགས་པ་རྣམ་པར་རྒྱལ་པ་མངའ་བ་དེའི་མཚན་ཉན་པར་འགྱུར་བ་དེ་དག་ནི་བདུད་ཀྱི་ཞགས་པ་ཐམས་ཅད་བཅད་ 36b པར་འགྱུར། བསྐལ་པ་དྲུག་ཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་བརྒྱ་ཕྲག་སྟོང་གི་ཐ་མ་ན་འཇིག་རྟེན་གྱི་ཁམས་བདུད་ཐམས་ཅད་རབ་ཏུ་འཇོམས་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་རྒྱལ་བའི་དབྱངས་ཞེས་བྱ་བ་བཞུགས་ཏེ། གང་དག་དེ་བཞིན་གཤེགས་པ་དེའི་མཚན་ཉན་པར་འགྱུར་བ་དེ་དག་ནི་སྒྲ་དབྱངས་ཐམས་ཅད་ཀྱི་སྨྲ་བ་དང་ལྡན་པར་འགྱུར། བདུད་སྡིག་ཅན་ཡང་རྒྱང་རིང་པོར་ཡོངས་སུ་སྤོང་བར་འགྱུར་རོ། །དེ་དག་བསྐལ་པ་བརྒྱད་དུ་འཁོར་བ་ལ་རྒྱབ་ཀྱིས་ཕྱོགས་པ་བྱས་པ་འགྱུར་རོ།། །།བམ་པོ་གསུམ་པ་སྟེ་ཐ་མ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་དང་ལྡན་ན། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཞིང ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་དེ་ལྟ་བུའི་ཆོས་འགའ་མཆིས་སམ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་ལ་འདི་སྐད་ཅེས་བཀའ་སྩལ་ཏོ། །མ་ཕམ་པ། ཡོད་དོ། །བྱང་ཕྱོགས་ཀྱི་ལོགས་ན་འཇིག་རྟེན་གྱིས་ཁམས་དཔལ་བརྩེགས་པ་ན། དེ་བཞིན་གཤེགས་པ་དགྲ་ 37a ༄#། །བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོ་ཞེས་བྱ་བ་བཞུགས་ཏེ། མ་ཕམ་པ། གང་དག་དེ་བཞིན་གཤེགས་པ་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོའི་མཚན་ཉན་པར་འགྱུར་བ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཏེ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བསྐལ་པ་བྱེ་བ་ཚང་བར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །མ་ཕམ་པ། གང་དག་དེ་བཞིན་གཤེགས་པ་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོའི་མཚན་ཉན་པ་ནི་སངས་རྒྱས་ལྔ་བཅུའི་དྲུང་དུ་སྤྱད་པ་ཡིན་ཏེ། དེ་ནས་ཤི་འཕོས་ནས་ཀྱང་ནམ་དུའང་རྫུ་འཕྲུལ་དང་བྲལ་བར་མི་འགྱུར། མྱ་ངན་ལས་ཡོངས་སུ་མ་འདས་ཀྱི་བར་དུ་རྣ་བ་དང་ནམ་ཡང་བྲལ་བར་མི་འགྱུར། ནམ་དུའང་གཟུགས་ཕུན་སུམ་ཚོགས་པ་དང་བྲལ་བར་མི་འགྱུར། ནམ་དུའང་གསད་པ་དང ། བཅིང་བར་མི་འགྱུར། རྣ་བའི་ནད་མི་འབྱུང ། སྣ་ནད་མི་འབྱུང ། ལྕེ་ནད་མི་འབྱུང ། ལུས་ཀྱི་ནད་མི་འབྱུང་སྟེ། མྱ་ངན་ལས་མ་འདས་ཀྱི་བར་དུ་དེ་དག་ནམ་དུའང་འཇིག་རྟེན་གྱི་ཁམས་སངས་རྒྱས་མེད་པ་དང ། སངས་རྒྱས་འབྱུང་བ་དང་བྲལ་བར་མི་སྐྱེ་སྟེ། ནམ་དུའང་ 37b ཆོས་དང་འབྲལ་བར་མི་འགྱུར། ནམ་དུ་འང་མི་ཁོམ་པར་སྐྱེ་བར་མི་འགྱུར། ནམ་དུའང་བསླབ་པ་དང་བྲལ་བར་མི་འགྱུར། ནམ་དུའང་དྲན་པ་དང་བྲལ་བར་མི་འགྱུར། མྱ་ངན་ལས་མ་འདས་ཀྱི་བར་དུ་ནམ་དུའང་ཡེ་ཤེས་དང་བྲལ་བར་མི་འགྱུར་རོ། །མ་ཕམ་པ། གང་དེ་བཞིན་གཤེགས་པའི་མཚན་ཉན་པར་འགྱུར་བ་དང ། ངའི་ཐམས་ཅད་མཁྱེན་པ་ཉིད་ལའང་ཡིད་ཆེས་ཤིང་མོས་པ་དང ། མངོན་པར་དད་པ་དེ་དག་ཐམས་ཅད་གནས་ཡོངས་སུ་གཟུང་བར་འགྱུར། འཇིག་རྟེན་ཐམས་ཅད་ཀྱིས་མཆོག་དང ། དམ་པ་དང ། རབ་མཆོག་དང ། བླ་ན་མེད་པ་ཡང་འགྱུར་རོ། ། དེ་བས་ན་གནས་ཐམས་ཅད་ཡོངས་སུ་འཛིན་པར་འདོད་པ་དང ། འཇིག་རྟེན་ཐམས་ཅད་ལས་མཆོག་ཏུ་གྱུར་པར་གནས་པར་འདོད་པ་དང ། དམ་པ་དང ། རབ་མཆོག་ཏུ་གྱུར་པར་གནས་བར་འདོད་པ་དེས། དེ་བཞིན་གཤེགས་པ་འཇིག་རྟེན་ཐམས་ཅད་ཀྱི་མཆོག་ཏུ་གྱུར་པའི་མཚན་མཉན་པར་བྱའོ། །ཐོས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོ་དེ་ལ་ཕྱག་འཚལ་ལོ་ཞེས་ཕྱག་བྱའོ། །དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་བཞིན་གཤེགས་པ་དེ་བཞུགས་པའི་འཇིག་རྟེན་གྱི་ཁམས་དེ་ཇི་ཙམ་དུ་རིང ། 38a ༄#། །དེ་བཞིན་གཤེགས་པ་དེ་བྱུང་ནས་ཇི་སྲིད་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་ལ་འདི་སྐད་ཅེས་བཀའ་སྩལ་ཏོ། །མ་ཕམ་པ། འདི་ལྟ་སྟེ། དཔག་ཚད་བརྒྱ་ཁོར་ཡུག་ཏུ་བྱེ་མའི་ཕུང་པོར་གྱུར་པ་དེ་ལས་བྱེ་མའི་འབྲུ་རེ་རེ་བླངས་ཏེ། སངས་རྒྱས་ཀྱི་ཞིང་རེ་རེར་བཞག་པ་རྣམ་གྲངས་དེས་བྱེ་མ་དེ་དག་ཐམས་ཅད་རྣམ་པར་ཕྱེ་ལ་འཇིག་རྟེན་གྱི་ཁམས་གང་དུ་བྱེ་མ་བཞག་པ་ཇི་སྙེད་ཡོད་པ་ཐམས་ཅད་བྱེ་མས་ཡོངས་སུ་གང་བར་གྱུར་ཏེ། འཇིག་རྟེན་གྱི་ཁམས་བྱེ་མས་གང་བ་དེ་དག་གི་བྱེ་མའི་རྡུལ་ཕྲ་རབ་ཇི་སྙེད་ཡོད་པ་དེ་བས་ཆེས་མང་ཞིང་ཆེས་གྲངས་མེད་པའི་འཇིག་རྟེན་གྱི་ཁམས་འདས་པ་ན། འཇིག་རྟེན་གྱི་ཁམས་དཔལ་གྱི་སྙིང་པོ་བརྩེགས་པ་ཞེས་བྱ་བ་དེ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོ་དེ་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །མ་ཕམ་པ། དེ་བཞིན་གཤེགས་པ་དཔལ་གྱི་སྙིང་པོ་བརྩེགས་པ་རྣམ་པར་བསྒྲགས་པའི་རྒྱལ་པོ་དེ་མངོན་པར་རྫོགས་པར་སངས་རྒྱས་ནས་བསྐལ་པར་ལོན་ཏེ། མ་ཕམ་པ། དེ་བཞིན་གཤེགས་པ་དེ་ཉན་ཐོས་ཀྱི་དགེ་འདུན་དང་བཅས་པ་དང ། འཇིག་རྟེན་གྱི་ཁམས་དེའང་གདན་འདི་ཉིད་ལ་འདུག་ 38b བཞིན་དུ་ངས་ལྷན་ཅིག་སྐྱེས་པའི་ཤའི་མིག་གིས་མཐོང་ངོ ། །དེ་བཞིན་གཤེགས་པ་དེས་ཀྱང་འཇིག་རྟེན་གྱི་ཁམས་དེ་ན་གདན་ལ་བཞུགས་བཞིན་དུ་ལྷན་ཅིག་སྐྱེས་པའི་ཤའི་སྤྱན་གྱིས་མི་མཇེད་ཀྱི་འཇིག་རྟེན་གྱི་ཁམས་འདི་དང ། ང་དང ། འཁོར་དུ་བཅས་པ་གཟིགས་སོ། །མ་ཕམ་པ། གང་དེ་བཞིན་གཤེགས་པའི་ལྷན་ཅིག་སྐྱེས་པའི་ཤའི་སྤྱན་འདི་ལ་ཡིད་ཆེས་པ་དང ། མོས་པར་བྱེད་པ་དང ། མངོན་པར་དད་པར་བྱེད་པ་དང ། ངའི་ཐམས་ཅད་མཁྱེན་པ་ཉིད་ལའང་དད་པར་བྱེད་པ་དང ། མངོན་པར་དད་པར་བྱེད་པ་དང ། དེ་བཞིན་གཤེགས་པ་དེའི་སྨོན་ལམ་གྱིས་བྱིན་གྱིས་རླབས་ཡོངས་སུ་རྫོགས་པ་ལ་ཡིད་ཆེས་པར་བྱེད་པ་དང ། མོས་པར་བྱེད་པ་དང ། ནེམ་ནུར་མི་བྱེད་པ་དང ། ཐེ་ཚོམ་མི་ཟ་བ་དེ་དག་གིས་འཇིག་རྟེན་ཐམས་ཅད་ལས་བྱེ་བྲག་ཏུ་འཕགས་པའི་ཆོས་ཐམས་ཅད་ཡོངས་སུ་བཟུང་བར་འགྱུར་རོ། །དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཀྱང་ཕྱིར་མི་ལྡོག་པར་འགྱུར་རོ། །དེ་བས་ན། མ་ཕམ་པ། རིགས་ཀྱི་བུའམ། རིགས་ཀྱི་བུ་མོས་དེ་བཞིན་གཤེགས་པ་དེའི་མཚན་དང ། དེ་བཞིན་གཤེགས་པ་དེའི་སྨོན་ལམ་གྱི་བྱིན་གྱི་རླབས་མཉན་པའི་ཕྱིར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་མེས་ཡོངས་སུ་གང་པ་ལས་ཀྱང་བརྒལ་ཏེ་འགྲོ་བར་བྱའོ། །དེ་སྐད་ཅེས་བཀའ་སྩལ་པ་ཏྡང ། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པས་འདི་སྐད་ཅེས་གསོལ་ཏོ། །ཡང་ 39a ༄#། །བཅོམ་ལྡན་འདས། གཞན་ཡང ། བྱང་ཆུབ་སེམས་དཔའ་སེམས་དཔའ་ཆེན་པོ་གང་ཆོས་གཅིག་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བ་མཆིས་སམ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་ལ་འདི་སྐད་ཅེས་བཀའ་སྩལ་ཏོ། །མ་ཕམ་པ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་དང་ལྡན་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་ཞིང ། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བའི་ཆོས་གཅིག་པོ་ཡོད་དོ། །མ་ཕམ་པ། བྱང་ཕྱོགས་ལོགས་སུ་འཇིག་རྟེན་གྱི་ཁམས་ཚད་མེད་པ་འདས་ནས་འཇིག་རྟེན་གྱི་ཁམས་རྡོ་རྗེའི་སྙིང་པོ་ཅན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་རབ་ཏུ་འཇོམས་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །མ་ཕམ་པ། གང་དག་དེ་བཞིན་གཤེགས་པ་རྡོ་རྗེས་རབ་ཏུ་འཇོམས་པ་དེའི་མཚན་ཉན་པར་འགྱུར་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་ཅིང ། བླ་ན་མེད་པ་ཡང་དག་ 39b པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུར་འཁོར་བ་ལ་རྒྱབ་ཀྱིས་ཕྱོགས་པར་བྱས་པར་འགྱུར་རོ། །དེ་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འདི་མཐུ་ཆེའོ། །མ་ཕམ་པ། ངས་མངོན་པར་ཤེས་པ་དེ་བཞིན་གཤེགས་པ་མར་མེ་མཛད་ལས་དེ་བཞིན་གཤེགས་པ་དེའི་མཚན་ཐོས་ནས་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུར་འཁོར་བ་ལ་རྒྱབ་ཀྱིས་ཕྱོགས་པར་བྱས་པར་གྱུར་ཏོ། །མ་ཕམ་པ། གལ་ཏེ་ངས་དེ་བཞིན་གཤེགས་པ་མར་མེ་མཛད་དེ་ལས་དེ་བཞིན་གཤེགས་པ་དེའི་མཚན་ཐོས་པར་མ་གྱུར་ན། ང་འདི་ལྟར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་མི་འགྱུར་རོ། །རྡོ་རྗེས་རབ་ཏུ་འཇོམས་པ་ཞེས་བྱ་བའི་ཚིག་གི་དོན་ཇི་ལྟ་བུ་ཞེ་ན། མ་ཕམ་པ། འདི་ལྟ་སྟེ། དཔེར་ན། ནོར་བུའམ། རྡོ་བའམ། བོང་བའམ། གསེག་མའམ། གྱོ་མོའམ། སའང་རུང་རྡོ་རྗེས་བཅོམ་སྟེ་ནང་དུ་འགྲོ་བ་དེ་བཞིན་དུ། མ་ཕམ་པ། དེ་བཞིན་གཤེགས་པ་དེའི་མཚན་ཉན་པར་འགྱུར་བ་དང ། འདིའི་བྱིན་གྱི་རླབས་པ་དང ། ངའི་ཐམས་ཅད་མཁྱེན་པ་ཉིད་ལ་དད་པར་འགྱུར་བ་དེ་དག་སོ་སོའི་སྐྱེ་བོའི་ས་དང ། རང་སངས་རྒྱས་ཀྱི་ས་ཐམས་ཅད་ཀྱང་རྣམ་པར་གཏོར་ཅིང་རྣམ་པར་བཤིག། མངོན་པར་བཅོམ་ཞིང་དྲལ་ཏེ་ཐམས་ཅད་མཁྱེན་པ་ཉིད་རྗེས་སུ་འཐོབ་ 40a ༄#། །པར་འགྱུར་རོ། །དེའི་ཕྱིར་དེའི་མིང་རྡོ་རྗེས་རབ་ཏུ་འཇོམས་པ་ཞེས་བྱ་སྟེ། དེ་ལྟར་སྨོན་ལམ་ཕུན་སུམ་ཚོགས་ཤིང་དེ་བཞིན་གཤེགས་པ་དེ་བསམ་གྱིས་མི་ཁྱབ་པའི་ཡོན་ཏན་དང་ལྡན་ནོ། །བྱང་ཕྱོགས་སུ་སངས་རྒྱས་ཀྱི་ཞིང་བྱེ་བ་བརྒྱ་སྟོང་གི་ཐ་མ་ན་འཇིག་རྟེན་གྱི་ཁམས་ནོར་བུ་སྣང་བ་ཅན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཞེས་བྱ་བ་བཞུགས་ཏེ། གང་དེ་བཞིན་གཤེགས་པ་དེའི་མཚན་ཉན་པར་འགྱུར་བ་ངེས་པ་ལ་ཞུགས་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །འཇིག་རྟེན་གྱི་ཁམས་དེ་ན་ཉན་ཐོས་ཀྱི་ཐེག་པ་ཅན་ནམ། རང་སངས་རྒྱས་ཀྱི་ཐེག་པ་ཅན་གང་ཡང་མེད་དེ། དེ་དག་ཐམས་ཅད་བྱང་ཆུབ་སེམས་དཔའ་སེམས་དཔའ་ཆེན་པོ་སྟེ། དེ་བཞིན་གཤེགས་པ་རིན་ཆེན་མེ་ལ་བསྙེན་བཀུར་བྱེད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་བཀའ་སྩལ་པ། འོད་སྲུང ། སངས་རྒྱས་བཅོམ་ལྡན་འདས་ནི་མཐུ་བསམ་གྱིས་མི་ཁྱབ་པ་མངའ་པའོ། །འོད་སྲུང ། སངས་རྒྱས་ཀྱི་ཞིང་སྟོང་ཕྲག་ལྔ་བཅུ་རྩ་ལྔའི་ཐ་མ་ན་འཇིག་རྟེན་གྱི་ཁམས་ཨ་ག་རུའི་དྲི་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བའི་འོད་ཅེས་བྱ་བ་བཞུགས་ཏེ། འོད་སྲུང ། གང་དེ་བཞིན་གཤེགས་པ་དེའི་ 40b མཚན་རིགས་ཀྱི་བུའམ། རིགས་ཀྱི་བུ་མོས་ཐོས་ན་སྐྱེ་བ་ལས་རྣམ་པར་ལོག་པའི་བྱིན་གྱི་རླབས་ཞེས་བྱ་བའི་ཏིང་ངེ་འཛིན་རབ་ཏུ་ཐོབ་སྟེ། དེ་ལ་གནས་ན་གངྒཱའི་བྱེ་མ་སྙེད་ཀྱི་སངས་རྒྱས་གྲངས་མེད་པ་རྣམས་མཐོང་བ་དང ། དེ་དག་གིས་བཤད་པ་ཀུན་འཛིན་པ་དང ། ཆོས་ཅི་འདྲ་བ་ཉན་ཅིང་སྨྲ་བར་འདོད་པ་དེ་འདྲ་བར་ཐོས་ཤིང་སྨྲ་བར་འགྱུར་རོ། །དེ་ཅིའི་ཕྱིར་ཞེ་ན། དེ་ནི་བཅོམ་ལྡན་འདས་དེའི་སྔོན་གྱི་སྨོན་ལམ་གྱི་སྟོབས་བསྐྱེད་པ་ཡིན་ཏེ། གང་དག་གིས་བདག་གི་མིང་ཐོས་ན་དེས་ཏིང་ངེ་འཛིན་འདི་ཐོབ་པར་གྱུར་ཅིག་ཅེས་དེའི་སྨོན་ལམ་དེ་ལྟར་བཏབ་བོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །འདི་ནས་སྟོང་ཕྲག་ལྔ་བཅུ་ན། །འཇིག་རྟེན་ཁམས་ནི་ལེགས་སྤྲུལ་པ། ། ག་རུ་ཡི་དྲི་ཞེས་བྱ། །སྤོས་ངད་རྟག་ཏུ་ལྡང་བ་ན། །རིན་ཆེན་ཟླ་བ་དམ་པའི་འོད། །རྫོགས་པའི་སངས་རྒྱས་དེ་ན་བཞུགས། །འཇིག་རྟེན་མགོན་པོ་སྐྱོབ་པ་ཡི། །གང་གིས་དེ་ཡི་མཚན་ཐོས་པ། །སྐྱེ་བ་གཅིག་གིས་ཐོགས་གྱུར་ཅིང ། །བྱིན་གྱིས་རློབ་ཅེས་བྱ་བ་ཡི། །ཏིང་འཛིན་དམ་པ་ཐོབ་པར་འགྱུར། །རྟག་པར་ཀུན་ཏུ་སྣང་བར་བྱེད། །ཏིང་ངེ་འཛིན་འདི་ཐོབ་ནས་ནི། །སྲོག་ཆགས་ཀུན་ལ་ཕན་པའི་ཕྱིར། །གཞལ་མེད་ཆོས་ཀྱང་སྟོན་པ་ཡི། ། འཇིག་རྟེན་འདྲེན་པ་རྣམས་ཀྱང་མཐོང ། །ཆོས་ཀུན་སྙིང་པོ་མེད་པར་ནི། །འཇིག་རྟེན་མགོན་པོས་རབ་ཏུ་བསྟན། །ཚིག་འདི་ཡང་དག་འཛིན་པ་རྣམས། །སེམས་ཅན་དག་ནི་དགེ་བ་སྐྱེས། །ཁམས་ 41a ༄#། །ཀུན་དངོས་པོ་མེད་པར་ཡང ། །དེ་ཡི་ཁམས་ལ་རྣམ་པར་ལྟ། །ཆོས་གང་མཚན་ཉིད་མེད་པ་ལ། །དངོས་པོ་མེད་པར་ཡོངས་སུ་སྨྲ། །དངོས་པོ་དེ་ནི་མི་རྙེད་དེ། ། དངོས་པོ་མེད་པའང་དེ་འདྲ་ཞིང ། །བདག་མེད་པས་ན་སྙིང་པོ་མེད། །དེ་ལྟར་དེ་ནི་ཆོས་རྣམས་སྟོན། །ཆོས་གང་རབ་ཏུ་སྟོན་པ་ཡང ། །དེ་ནི་བདེན་པ་བླ་མེད་དེ། །དེ་ཕྱིར་དེ་ཡི་ཡེ་ཤེས་འཇུག ། མི་ཤེས་པ་ལའང་དེ་བཞིན་ནོ། །མི་ཤེས་པ་དང་ཡེ་ཤེས་དང ། །གཉིས་པོ་འདི་ནི་ཡོད་མ་ཡིན། །འདི་ལ་ཆོས་ནི་རྣམ་བྱང་མེད། །ཉོན་མོངས་པ་ཡང་ཡོད་མ་ཡིན། །ཆོས་ཀུན་གཏན་ལ་བབ་པར་ནི། །དེ་ལྟར་མགོན་པོ་རབ་ཏུ་སྟོན། །གནས་པ་མེད་པར་རབ་བཤད་ནས། །སངས་རྒྱས་གནས་པ་མེད་པར་འགྱུར། །གང་ཚེ་བྱང་ཆུབ་འགྱུར་བ་ལ། །ཆོས་རྣམས་དེ་ཡིས་མི་རྙེད་ཅིང ། །བྱང་ཆུབ་སེམས་དཔའ་མི་གནས་པ། །དེ་ལྟར་མང་དུ་ཐོས་པ་ཡིན། །སྒྲ་དང་དོན་ཀྱང་མེད་པ་སྟེ། །མཁས་པ་དེ་ལ་མི་རྟོག་གོ་།མང་དུ་ཐོས་པས་དེ་རྒྱགས་ཤིང ། །འཇིག་རྟེན་དག་ན་མི་རྩོད་དོ། ། འོད་སྲུང ། བྱང་ཕྱོགས་ལོགས་སུ་སངས་རྒྱས་ཀྱི་ཞིང་སྟོང་ཕྲག་དྲུག་ཅུ་འདས་ནས། འཇིག་རྟེན་གྱི་ཁམས་རབ་ཏུ་དགའ་བ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཟང་པོ་དམ་པའི་དཔལ་ཞེས་བྱ་བ་བཞུགས་ཏེ། འོད་སྲུང ། དེ་བཞིན་གཤེགས་པ་དེའི་མཚན་ཐོས་ནས་རིགས་ཀྱི་བུའམ། རིགས་ཀྱི་བུ་མོ་དག་ཕྱིར་མི་ 41b ལྡོག་ཅིང་སྐྱེ་བོ་ཐམས་ཅད་ལ་སྡུག་པར་འགྱུར་བ་དང ། འདུ་བར་འགྱུར་བ་དང ། ཚིགས་འཛིན་པར་འགྱུར་བའི་ལས་དེ་དག་གིས་ཡོངས་སུ་བཟུང་བར་འགྱུར་རོ། །སྤོབས་པའང་ཟབ་མོར་འགྱུར་རོ། །སེམས་ཅན་གང་དག་ལ་ཆོས་སྟོན་པ་དེ་དག་ཆོས་སྟོན་པ་དེ་ལ་མོས་པར་འགྱུར་རོ། །བུད་མེད་ཀྱིས་ཀྱང་ཐོས་ན་དེ་བུད་མེད་ཀྱི་དངོས་པོའི་མཐའ་མར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །སྟོང་ཕྲག་དག་ནི་དྲུག་ཅུར་ཡང ། །ཚང་ཞིང་ཆད་པ་མེད་པའི་ཞིང ། །རབ་ཏུ་དགའ་ཞེས་བྱ་བ་ཡི། །འཇིག་རྟེན་ཁམས་ནི་ལེགས་པར་གནས། །དེ་ནས་སངས་རྒྱས་བཞུགས་པ་ནི། །ཆོས་རྣམས་ཀུན་གྱི་ཕ་རོལ་ཕྱིན། །བཟང་མཆོག་དཔལ་ཞེས་བྱ་བ་ཡི། །འཇིག་རྟེན་མགོན་པོ་བླ་ན་མེད། །ལྷར་གྱུར་པ་ཡི་སྐྱོབ་པ་སྟེ། །དེ་ཡི་མཚན་ནི་ཐོས་ནས་སུ། །གང་དང་གང་དུ་སྐྱེས་པར་ཡང ། །སྡུག་ཅིང་ཡིད་དུ་འོང་བར་འགྱུར། །ཚིག་བཙུན་ཤེས་རབ་མཆོག་དང་ལྡན། །སྲོག་ཆགས་རྣམས་ལ་ཆོས་སྟོན་ཏེ། །ཆོས་དེ་རབ་ཏུ་ཐོས་ནས་ཀྱང ། །དགའ་བ་དམ་པ་ཐོབ་པར་འགྱུར། །སངས་རྒྱས་དག་ནི་མཚན་འདི་ནི། །བུད་མེད་དག་གིས་ཐོས་ན་ཡང ། །བུད་མེད་སྐྱེ་གནས་འཇིགས་ཆེན་གྱི། །སྐྱེ་གནས་ལས་ནི་ཡོངས་སུ་ཐར། །གང་ལ་འཇིག་རྟེན་མ་རྟོགས་པ། །ཟབ་ཅིང་ཤིན་ཏུ་མཁས་པ་དང ། །ཇི་ལྟར་དྲི་མེད་གོ་འཕང་བཞིན། །དེ་ལྟ་བུ་ཡི་སེམས་སུ་འགྱུར། །ཇི་བཞིན་པ་དང་ཇི་བཞིན་མིན། །དེ་དག་ 42a ༄#། །གཉིས་ཀ་དངོས་པོ་མེད། །ཆོས་གང་སྐྱོ་བར་གྱུར་པ་ལ། །དེ་ལ་བརྗོད་པ་ག་ལ་ཡོད། །འོད་སྲུང ། འདི་ནས་བྱང་ཕྱོགས་ལོགས་སུ་སངས་རྒྱས་ཀྱི་ཞིང་སྟོང་ཕྲག་བརྒྱད་ཅུའི་ཕ་རོལ་ན་འཇིག་རྟེན་གྱི་ཁམས་ལེགས་པར་འཇུག་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པད་མོ་ལ་བཞུད་པ་ཞེས་བྱ་བ་བཞུགས་ཏེ། རིགས་ཀྱི་བུའམ། རིགས་ཀྱི་བུ་མོས་དེའི་མཚན་ཐོས་ན། ཚེ་འཕོས་ནས་གཟུགས་བཟང་ཞིང་མཛེས་པ་དང ། སེམས་ཅན་རྣམས་མཐོང་ན་དགའ་བ་དང ། སྡུག་ཅིང་ཡིད་དུ་འོང་བར་འགྱུར་རོ། །བསྐལ་པ་གྲངས་མེད་པ་རྗེས་སུ་དྲན་ཞིང་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འགྲོ་བ་ཐམས་ཅད་དང ། སྐྱེ་བ་ཐམས་ཅད་དུ་བླ་ན་མེད་པའི་སྤོབས་པ་དང་ལྡན་པར་འགྱུར་ཞིང་རྟག་ཏུ་རྒྱུན་མི་འཆད་པར་ཆོས་སྟོན་ཏོ། །དེའི་སྨོན་ལམ་དང ། མིག་ཀྱང་རྣམ་པར་དག་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སྟོང་ཕྲག་དག་ནི་བརྒྱད་ཅུ་ཡི། །སངས་རྒྱས་ཞིང་ནི་ཚང་པ་ན། །བདེ་བར་འཇུག་པའི་འཇིག་རྟེན་ཁམས། །དེ་ནི་ཤིན་ཏུ་བཟང་བ་སྟེ། །དེ་ན་སངས་རྒྱས་བཞུགས་པ་ནི། །འཇིག་རྟེན་མགོན་པོ་བླ་ན་མེད་པ། ། རིན་ཆེན་པད་མོ་བཞུད་ཅེས་བྱ། །འཇིག་རྟེན་མགོན་པོ་འོད་མཛད་པ། །དེ་ཡི་མཚན་ཀྱང་ཐོས་ནས་ནི། །དེ་ཡི་མིག་ནི་རྣམ་དག་ཅིང ། །གཟུགས་ཀྱང་ཤིན་ཏུ་བཟང་པོར་འགྱུར། །བལྟ་ན་ 42b སྡུག་པའང་དེ་བཞིན་ནོ། །མཉམ་པར་བཞག་པའི་སངས་རྒྱས་ཀྱི། །ཉན་ཐོས་རྣམས་ཀྱང་གནས་པ་ནི། །རྣམ་པར་ཐར་པས་ཞི་བར་གྱུར། །དེ་ལ་འཇིག་རྟེན་རྟོགས་མི་འགྱུར། །ལོ་སྟོང་དུ་ཡང་ཚང་བ་དང། །ཏིང་ངེ་འཛིན་ལས་ལངས་ནས་ཀྱང ། །སངས་རྒྱས་དེ་ཡི་ཉན་ཐོས་རྣམས། །ཇི་ལྟར་གནས་པས་གནས་པར་བྱེད། །བཟང་མཆོག་སངས་རྒྱས་དེ་ཡི་མཚན། །ཐོས་ནས་དེ་འདྲ་དེ་ལྟར་འགྱུར། ། དེ་ཡི་མཚན་འདི་འདིར་ཐོས་ནས། །དེ་དག་བསྐལ་པ་གྲངས་མེད་པར། །ཡོན་ཏན་རྗེས་སུ་མྱོང་བར་འགྱུར། །དེ་ཚེ་དཔའ་བོས་ཡོན་ཏན་ཤེས། །སྤོབས་པ་ཕུན་སུམ་ཚོགས་པ་ཡིས། །མདོ་སྡེ་ཤིན་ཏུ་བཟང་པོ་རྣམས། །མ་ཆགས་ཐོགས་པ་མེད་པའི་ཚིག་།སྲོག་ཆགས་རྣམས་ལ་ཆོས་སྟོན་ཏོ། །ཡང་འོད་སྲུང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་མཚན་རྣམས་རིགས་ཀྱི་བུའམ། རིགས་ཀྱི་བུ་མོ་གང་དག་ཉན་པ། འོད་སྲུང ། བུད་མེད་ཀྱིས་དེ་བཞིན་གཤེགས་པའི་མཚན་ཐོས་ན། བུད་མེད་ཀྱི་དངོས་པོ་ལས་འགྱུར་བ་ངས་སྔར་བཤད་པ་དང་འདྲ་བས་རེ་ཞིག་གཞག་གོ་།ཇི་ལྟར་ཡོན་ཏན་བྱེ་བྲག་མེད་པར་བཤད་པ་དེ་དག་ཐམས་ཅད་ཀྱི་གོ་སྐབས་སུ་འགྱུར་ཏེ། མཚན་འདི་དག་ཐོས་ན་ཡོན་ཏན་གྱི་ཁྱད་པར་ཇི་སྐད་དུ་བཤད་པ་རྣམས་འཛིན་ཏོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །འདོད་པའི་སྲེད་པ་ཆད་པ་དང ། །ཀུན་ཏུ་སྦྱོར་བ་ཟད་པ་ཡི། །སངས་རྒྱས་རྣམས་ཀྱི་མཚན་འདི་དག་།མཉན་ཅིང་རྟོགས་ 43a ༄#། །པར་བྱེད་པ་ནི། །ཡོན་ཏན་ཁྱད་པར་ཤིན་ཏུ་མང ། །ཚེ་འཕོས་ཡོན་ཏན་འདི་དག་འབྱུང ། །འཇིག་རྟེན་མགོན་པོ་སྐྱོབ་པ་ཡི། །མཚན་རྣམས་ཐོས་པར་གྱུར་ནས་ནི། བུད་མེད་སྨོན་ལམ་འདི་འདེབས་ན། །དེ་ཚེ་སྐྱེས་བུ་མཆོག་ཏུ་འགྱུར། །བུད་མེད་དངོས་པོ་འདིར་འདོད་པས། །འཇིག་རྟེན་མ་རུང་འགྱུར་བ་ཡི། །བུད་མེད་དངོས་པོ་རྣམ་པར་ལྡོག། མྱུར་དུ་སེམས་ཅན་རྣམས་ཀྱི་ནི། །བླ་མེད་དགེ་བའི་བཤེས་གཉེན་འགྱུར། །མི་གང་འདོད་པ་སྤོང་བ་ནི། །བསོད་ནམས་རྣམ་པ་མང་པོ་སྐྱེད། །བདག་ཉིད་དང་ནི་ཕ་རོལ་དག་།དགེ་བ་ལ་ནི་འཇོག་བྱེད་པ། ། སྡུག་བསྔལ་དག་ལས་ཡོངས་སུ་ཐར། །བུད་མེད་ཡང་དང་ཡང་དུ་ནི། །བུད་མེད་དངོས་པོ་སྤང་བ་དང ། །ཡོངས་སུ་ཐར་པར་འདོད་པ་ནི། །ཇི་ལྟར་གྲོང་ཁྱེར་དབུས་སུ་ཡང ། །དུག་གི་ཤིང་ཆེན་ཡོད་པ་ལས། །དེ་ཡང་ཤིན་ཏུ་གཅད་གྱུར་ན། །སྲོག་ཆགས་རྣམས་ནི་བདེ་བར་འགྱུར། །དེ་བཞིན་དུག་གི་དངོས་པོ་ཡི། །བུད་མེད་དངོས་པོ་སྡིག་པ་ལ། །སྡིག་པ་དེ་ནི་རབ་སྤངས་ན། ། སངས་རྒྱས་ལམ་ལ་རབ་ཏུ་གནས། །བདག་གིས་དངོས་དང་སེམས་ཅན་དངོས། །འདི་དག་གཉིས་ཀ་མི་རྙེད་དེ། །གང་ལ་སྡོམ་པ་མི་རྙེད་པ། །དེ་ནི་བླ་ན་མེད་པའི་ལམ། །སྐྱེས་པའམ་ཡང་ན་བུད་མེད་ཀྱང ། །དམ་པའི་དོན་དུ་ཡོད་མ་ཡིན། །གང་ལ་དངོས་པོ་མི་རྙེད་པ། །དེར་ནི་སྨོན་ལམ་སྦྱངས་པ་ཡིན། །སྨོན་ལམ་དག་ནི་མེད་པ་ལ། །རྣམ་པར་ཤེས་པ་འབྱུང་བ་མེད། །དེ་ 43b ནི་དམ་པའི་མཐའ་ཡིན་ཏེ། །དམིགས་པ་མེད་པ་ཉིད་དུ་འགྱུར། །བུད་མེད་དངོས་པོ་སེམས་ཀྱིས་བརྟགས། །སེམས་དེ་ཉིད་ཀྱང་མ་རྙེད་དེ། །སེམས་ཉིད་དེ་ནི་མི་རྙེད་ན། །བླ་ན་མེད་པའི་སྨོན་ལམ་ཡིན། །བུད་མེད་དངོས་པོ་སྤང་བའི་ཕྱིར། །གང་སུ་མངོན་པར་བརྩོན་བྱེད་པ། །ཀུན་ཏུ་རྟོག་ལ་སྤྱོད་པ་སྟེ། །ཀུན་ནས་ལྡང་ལ་དེ་གནས་སོ། །བུད་མེད་དངོས་པོར་གང་བརྗོད་པ། །དངོས་པོ་དེ་ནི་ཡོད་མ་ཟིན། །དེ་ལྟར་རབ་ཏུ་ཤེས་པ་ནི། །བསྟན་པ་དག་ལ་དེ་སྦྱོར་རོ། །སྦྱོར་བ་དང་ནི་མི་སྦྱོར་དང ། །དེ་དག་གཉིས་ཀ་ཅི་ཡང་མེད། །ཆོས་རྣམས་ཡོད་པ་མ་ཡིན་པ། །དེ་ནི་སྦྱོར་བ་ཞེས་ཀྱང་བྱ། ། འཇིག་རྟེན་མགོན་པོ་སྐྱོབ་པ་ཡི། །མཚན་འདི་རབ་ཏུ་ཐོས་ནས་ནི། །སངས་རྒྱས་ཀུན་གྱི་དྲུང་དུ་ཡང ། །དགེ་བ་མང་པོ་སྐྱེད་པར་བྱེད། །ཐམས་ཅད་གཟིགས་ཀྱི་མཚན་ཀུན་དང ། །དེ་ལྟ་བུ་ཡི་མིང་ཐོས་ནས། །གང་དང་གང་དུ་སྐྱེད་པར་ཡང ། །ཡོན་ཏན་འདི་དག་ཡོངས་སུ་འཛིན། །གང་ཉན་དེ་དག་ངས་མཐོངས་ཏེ། །ལུང་ནོད་པ་ཡང་ངས་མཐོང་ངོ ། །ངས་ནི་དེ་དག་མང་མཐོང་བ། །དེ་ལ་གང་དག་མ་མོས་ཤིང ། །འདི་ནི་སངས་རྒྱས་མ་བཤད་ཅེས། །དེ་སྐད་གང་སྨྲ་ངས་མཐོང་སྟེ། །སངས་རྒྱས་ཆོས་རྣམས་སྤངས་ནས་སུ། །སེམས་ཅན་དམྱལ་བ་མང་པོར་འགྲོ། །འཇིག་རྟེན་གཉེན་གྱི་ཆོས་རྣམས་ནི། །རབ་ཏུ་སྤང་བ་བྱས་ནས་ཀྱང ། །སྡིག་པའི་ལས་རྣམས་བྱས་པས་ན། །སྡིག་པའི་འགྲོ་བ་དག་ཏུ་འགྲོ་།གླེན་ཞིང་ལྐུགས་ལ་བླུན་པ་དང ། །དབང་པོ་ཉམས་པའང་དེ་བཞིན་ 44a ༄#། །ཏེ། །བྱང་ཆུབ་སེམས་ནི་རྣམ་སྤངས་ནས། །དེ་དག་སེམས་ཀྱང་གཡེངས་པར་འགྱུར། །དབང་ཐང་ཆུང་ཞིང་མདོག་ཀྱང་ངན། །གཟི་བརྗིད་ཉམས་ཞིང་བལྟ་མི་སྡུག། སྡིག་པ་དམན་པའི་སྐྱེ་གནས་སུ། །མི་དེ་སྐྱེ་བར་འགྱུར་བ་ཡིན། །ཡང་དག་རྫོགས་པའི་སངས་རྒྱས་ཀྱིས། །བཤད་པའི་ཆོས་ནི་དེ་མི་ཤེས། །ཟབ་མོ་ལ་ཡང་མི་འཇུག་སྟེ། །འབྲས་བུ་ཆོས་ཀྱིས་ཕོངས་པར་འགྱུར། །ཆོས་ཀྱིས་ཕོངས་པ་ཐོས་ནས་ནི། །མི་དེ་ཤེས་རབ་འཆལ་བར་འགྱུར། །འཇིག་རྟེན་མགོན་པོ་འོད་མཛད་པ། །ཡེ་ཤེས་ཆེན་པོ་མི་མཉེས་བྱེད། །དགེ་སློང་རྣམས་དང་དེ་བཞིན་དུ། །དགེ་བསྙེན་རྣམས་ལ་གོ་བར་བྱ། །ཆོས་ལ་འགལ་བར་གང་བྱེད་པ། །ཕོངས་པ་འདི་ནི་སྡུག་བསྔལ་ལོ། །ཕྱོགས་བཅུ་ཡི་ནི་འཇིག་རྟེན་ན། །སངས་རྒྱས་འདྲེན་པ་རྣམས་བཞུགས་ཤིང། །གང་ན་སྐྱེ་བོ་ཡོད་པ་དེར། །ཟབ་མོ་ཡི་ནི་ཆོས་སྟོན་ཏོ། །དེ་ཕྱིར་འཇིག་རྟེན་མགོན་པོ་ལ། །མོས་པ་དག་ཀྱང་རབ་ཏུ་སྐྱེད། །རྫོགས་པའི་སངས་རྒྱས་ཆགས་མེད་ཆོས། །འདྲེན་པ་དག་ནི་ཆོས་གསུངས་ཏེ། །དེ་དག་གི་ནི་མཚན་འདི་ལ། །སུ་དག་མོས་པར་འགྱུར་བ་ནི། །མཁས་པ་དེ་དག་བསོད་ནམས་ཀྱང ། །དཔག་ཏུ་མེད་དང་ལྡན་པར་འགྱུར། །མི་གང་འདིར་ནི་འདི་ལྟ་ཡིས། །མཚན་རྣམས་འཛིན་པར་འགྱུར་བ་ནི། །སྤོབས་པ་ཕུན་སུམ་ཚོགས་པ་དང ། །མཁས་པར་ཡང་ནི་རབ་ཏུ་འགྱུར། །འདི་ལྟ་བུ་ཡི་མཚན་རྣམས་ཀྱང ། །ཆགས་མེད་གྱུར་ནས་ 44b རབ་སྟོན་ན། །འཇིག་རྟེན་ཀུན་གྱིས་བཀུར་བ་དང ། །ཚིག་བཙུན་པར་ཡང་རྟག་ཏུ་འགྱུར། །ཕྱོགས་བཞིར་དེ་ཡི་མཚན་འདི་རྣམས། །གང་དག་རབ་ཏུ་བརྗོད་པ་ནི། །གང་དང ། གང་དུ་སྐྱེས་པར་ཡང། །དེ་ནི་འཇིགས་པ་མེད་པར་འགྱུར། །སངས་རྒྱས་མཚན་རྣམས་ཐོས་ནས་ཀྱང ། །མི་གང་འདིར་ནི་འདི་ལྟ་ཡི། །མཚན་རྣམས་མཆོད་པར་བྱེད་པ་ནི། །དེ་ལ་བྱང་ཆུབ་རྒྱང་མི་རིང ། །སུ་དག་འདི་ལྟའི་མཚན་རྣམས་ལ། །སྐྱེ་བོ་མང་པོ་འཛུད་བྱེད་པ། །འཇིག་རྟེན་མགོན་པོའི་སྤྱོད་ཡུལ་ནི། །དེ་ལ་རྙེད་པར་དཀའ་མ་ཡིན། །འོད་སྲུང ། ཆོས་བཞི་དང་ལྡན་པའི་དགེ་སློང་ནི་མཚན་འདི་དག་ལ་མོས་པར་འགྱུར་རོ། །བཞི་གང་ཞེ་ན། དེས་སྔོན་སངས་རྒྱས་བཅོམ་ལྡན་འདས་ལ་བསྙེན་བཀུར་བྱས་པ་ཡིན། ཟབ་མོ་ལ་མོས་པ་ཡིན། དབེན་པར་མོས་པ་ཡིན། དགེ་བའི་བཤེས་གཉེན་ལ་བསྟེན་ཅིང་དམ་པའི་ཆོས་ཀྱིས་ཕོངས་པར་འགྱུར་བའི་ལས་མ་བྱས་མ་བསགས་པ་ཡིན་ནོ། །འོད་སྲུང ། ཆོས་བཞི་པོ་དེ་དག་དང་ལྡན་པའི་དགེ་སློང་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དག་གི་མཚན་རྣམས་ལ་མོས་པར་བྱེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། ། དེས་སྔོན་རྫོགས་པའི་སངས་རྒྱས་རྣམས། །མཐོང་ཞིང་མཆོད་པར་བྱས་པ་ཡིན། །དགེ་བའི་རྩ་བ་དེ་ཉིད་ཀྱིས། །དེ་དག་མཚན་རྣམས་ཐོས་པར་འགྱུར། །ཟབ་མོ་ལ་ཡང་རབ་མོས་ཤིང ། ། 45a ༄#། །ང་ཡི་སངས་རྒྱས་ཆོས་ལ་ཉན། །སྔོན་གྱི་ལས་རྣམས་ཡོངས་དག་པས། །དེ་ནས་འདིར་ནི་འོངས་པ་སྟེ། །སྔོན་ཡང་མདོ་སྡེ་བཤད་པ་ལ། །དེ་དག་ཡིད་གཉིས་ཡོང་མེད་དེ། །ཡང་དག་རྫོགས་པས་བཤད་པ་ཡི། །མདོ་སྡེ་དེ་ལ་འགལ་མི་བྱེད། །ཉི་ཚེ་བ་ཡི་བཟོད་པ་ལ། །འདྲེན་པ་དག་ནི་མོས་པར་བྱེད། །ཤིན་ཏུ་དང་བའི་སེམས་ཀྱིས་ཀྱང ། །ངས་བཤད་པ་ལ་མཉན་པར་གྱིས། །གདམས་པ་དག་ལ་མངོན་དགའ་ཞིང ། །ཆོས་ཉིད་ལ་ནི་འབྲང་བར་བྱ། །དེ་དག་ཆོས་སུ་འདུ་ཤེས་པས། །ཆོས་དེ་ཐམས་ཅད་སྡུད་པར་བྱེད། །འདུ་ཤེས་པ་དང་འདུས་ཤེས་མེད། །དེ་དག་ཡོད་པ་མ་ཡིན་ནོ། །སངས་རྒྱས་ཀུན་གྱི་ཡུལ་རྣམས་ནི། །བསམ་གྱིས་མི་ཁྱབ་རྟོག་པར་བྱེད། །དེ་དག་གི་ནི་ཆོས་ཉིད་འདི། །ཟབ་མོ་ལ་ནི་གང་མོས་ཤིང ། །མོས་པ་དག་ནི་མང་གྱུར་བ། །དེ་དག་ལ་ནི་རྩོད་པ་མེད། །ཟབ་མོ་སྤྱོད་པ་དེ་དག་ལ། །ཡིད་གཉིས་དག་ནི་ཡོང་མེད་དོ། །ནོར་ལ་སྲེད་པ་གཏེར་དང་ཡང ། །འདྲ་བར་འགྱུར་བ་མ་ཡིན་ནོ། །འཇིག་རྟེན་གྱི་ནི་མགོན་པོ་ལ། །སུ་དག་ནེམ་ནུར་སྐྱེ་བ་ནི། །དབང་པོ་རྟུལ་ཞིང་མྱོས་པ་དང ། །མི་བརྩོན་པར་ནི་རིག་པར་བྱ། །གང་དག་མོས་པར་གྱུར་པ་ནི། །དེ་དག་ལ་ཡང་ཡིད་གཉིས་མེད། །འདི་དག་འགོག་པར་བྱེད་པ་ནི། །མངོན་པར་བརྩོན་པའི་འབྲས་བུ་མེད། །སངས་རྒྱས་མཚན་ནི་ལེགས་བཤད་པ། །དེ་ལྟ་བུ་ཡི་མཚན་ཐོས་ནས། །སངས་རྒྱས་དག་གི་ 45b བསྔགས་བ་སྨྲ། །ཕྱོགས་བཅུ་དག་ན་འཇིག་རྟེན་མགོན། །རྫོགས་པའི་སངས་རྒྱས་མཚན་བསྟོད་དེ། །ཡང་དང་ཡང་དུ་སངས་རྒྱས་ཀྱི། །མཚན་རྣམས་མི་གང་དྲན་བྱེད་པ། །དེ་ནི་མྱུར་དུ་དྲི་མེད་འགྱུར། །སྲོག་ཆགས་རྣམས་ཀྱིས་བཀུར་བ་ཡིན། །ཆགས་པ་མེད་པའི་སྤོབས་པ་ཡིས། །སངས་རྒྱས་བྱང་ཆུབ་རབ་ཏུ་སྟོན། །འོད་སྲུང ། སྟེང་གི་ཕྱོགས་ན་འཇིག་རྟེན་གྱི་ཁམས་ཟླ་བའི་བླ་མ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་སྣང་བས་རྣམ་པར་གནོན་པ་ཞེས་བྱ་བ་བཞུགས་སོ། །འོད་སྲུང ། སངས་རྒྱས་ཀྱི་ཞིང་འདི་ནས་སྟེང་གི་ཕྱོགས་ན་འཇིག་རྟེན་གྱི་ཁམས་རྩོད་པ་ལ་དགའ་བ་མདོག་ངན་བརྩེགས་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་ཕམ་པའི་དཔལ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་སློབ་དཔོན་དང་ལྡན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚད་མེད་པའི་བླ་མ་བདེ་བར་གཤེགས་པ་རྒྱལ་པོ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་རི་རབ་རྒྱལ་མཚན་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མ་རླན་པའི་གླང་པོ་དམ་པ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཤིན་ཏུ་མཛེས་པ་རྟོག་པའི་བྱང་ཆུབ་ཅེས་བྱ་བ་དེ་ན། དེ་བཞིན་ 46a ༄#། །གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བརྩོན་འགྲུས་གྲངས་མེད་པ་ལ་ཞུགས་པའི་དཔལ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཡོངས་སུ་འཛིན་པ་མེད་པ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དགོངས་པ་བརྗོད་ཀྱིས་མི་ལང་བ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཚངས་པར་སྤྱོད་པས་བརྒྱན་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཏི་མུག་མེད་པའི་སྤོས་དཔལ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཉི་མ་སྣང་བ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཟླ་བ་དཔལ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཆོས་མཆོག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་མི་རྟོག་པའི་འོད་ཅེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཆོས་སྤྱོད་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནམ་མཁའ་སྣང་བ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་དགེ་བ་གསོག་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་ 46b དག་པར་རྫོགས་པའི་སངས་རྒྱས་སྤྱོད་པ་ཡོངས་སུ་དག་པའི་ཏོག་ཅེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་རྣམ་པར་རྒྱལ་བ་ཞེས་བྱ་བདེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཏེར་ལེགས་པར་གནས་པ་ཞི་བ་རྒྱལ་པོ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་བརྩོན་འགྲུས་སྐྱེས་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དོན་ཐམས་ཅད་གྲུབ་པ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་སྨོན་ལམ་གྱི་སྟོབས་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤེས་རབ་ཀྱིས་སྤེད་པའི་དཔལ་ཞེས་བྱ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་མདངས་དགའ་བའི་ཕྱོགས་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཏམ་ཤིན་ཏུ་ཡོངས་སུ་དག་པ་མཛད་པ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཙནྡན་གྱི་དྲིའི་ཕུག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཻ་ཌཱུརྱའི་སྙིང་པོ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་རིན་པོ་ཆེ་དང་ལྡན་པ་ཞེས་བྱ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ 47a ༄#། །རྒྱས་ཀུན་ཏུ་ཡོན་ཏན་རིན་པོ་ཆེས་རྣམ་པར་གནོན་པ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཡོན་ཏན་ཚད་མེད་དཔལ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་ཤིན་ཏུ་ཡོངས་སུ་དག་པ་རབ་ཏུ་གནས་པ་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཉན་ཐོས་མ་འོངས་པ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་སྣང་བས་རྣམ་པར་གནོན་པའི་མཆོད་རྟེན་ཞེས་བྱ་བ་བཞུགས་སོ། །སྟེང་གི་ཕྱོགས་ན་འཇིག་རྟེན་གྱི་ཁམས་གཉིད་མེད་པའི་མིག་ཅེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཚད་མེད་པའི་ཁྲེལ་ཡོད་པ་གསེར་དམ་པའི་དཔལ་ཞེས་བྱ་བ་བཞུགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །སངས་རྒྱས་དཔལ་གྱི་ཟླ་བ་ཅན། །རྒྱལ་ཆེན་མི་ཡི་ཁྱུ་མཆོག་སྟེ། །སངས་རྒྱས་ཁྱུ་མཆོག་དེ་དག་ནི། །ཆོས་ཀུན་རྣམ་པར་སྤྱོད་པ་མཛད། །སངས་རྒྱས་དེ་དག་མིང་རྣམས་ཀྱིས། །སངས་རྒྱས་ཞིང་ནི་རྣམ་པར་སྤྱོད། །མི་གང་དེ་ཡི་མཚན་རྣམས་ནི། །བསྐལ་པ་འདིར་ནི་ཉན་འགྱུར་ཞིང ། །གང་དག་དད་པར་འགྱུར་བ་དང ། །དེ་ལ་རི་མོར་བཅས་པ་དག་།དེ་དག་དཔའ་བོ་ཤེས་རབ་ཆེ། །དེ་དག་སངས་རྒྱས་དམ་པར་འགྱུར་ 47b དེ་དག་ཡེ་ཤེས་མཐའ་ཡས་ཏེ། དེ་ལ་ནེ་མ་ནུར་མ་བྱེད་ཅིག ། །སྟེང་གི་ཕྱོགས་ན་འཇིག་རྟེན་གྱི་ཁམས་ཤིན་ཏུ་མཛེས་པའི་པདྨ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པ་རྣམ་པར་འཕྲུལ་པའི་དཔལ་ཞེས་བྱ་བ་བཞུགས་ཏེ། དེའི་མཚན་ཐོས་ན་ངན་སོང་གསུམ་ཡང་བཅད་པར་འགྱུར། སངས་རྒྱས་ཀྱི་ཆོས་ཀྱི་མེ་ཏོག་ཀྱང་ལེགས་པར་རྒྱས་པར་འགྱུར་རོ། །དེ་དག་བསྐལ་པ་སུམ་ཅུ་རྩ་དྲུག་ཏུ་འཁོར་བ་ལ་རྒྱབ་ཀྱིས་ཕྱོགས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་ཁམས་ནི་ལེགས་བརྒྱན་པ། །པདྨ་ཤིན་ཏུ་མཛེས་ཞེས་བྱ། །ལྷ་ཡི་དགའ་བའི་ཚལ་བཞིན་དུ། །རྟག་པར་ཤིན་ཏུ་བརྒྱན་པ་སྟེ། །དེ་ནས་སངས་རྒྱས་བཞུགས་པ་ནི། ། པདྨ་བླ་དཔལ་མཁས་པ་སྟེ། །སངས་རྒྱས་ཞིང་དེར་རྣམ་པར་འཕྲུལ། །སྲོག་ཆགས་རྣམས་ལ་ཆོས་ཀྱང་སྟོན། །སྐྱེས་པ་དང་ནི་བུད་མེད་ཀྱིས། །དེ་ཡི་མཚན་ཀྱང་ཐོས་ནས་ནི། །ངན་སོང་གསུམ་ནི་རྣམ་སྤོང་ཞིང ། །སངས་རྒྱས་དག་ཀྱང་མང་པོ་མཐོང ། །བསྐལ་པ་སུམ་ཅུ་རྩ་དྲུག་འདོར། །འདུས་བྱས་རྣམས་ཀྱང་རྣམ་པར་བཟློག་།སངས་རྒྱས་ཀྱི་ནི་བྱང་ཆུབ་ལས། །ཕྱིར་ཡང་ལྡོག་པར་མི་འགྱུར་རོ། །ལོང་བ་ཞ་བོར་མི་འགྱུར་ཏེ། །བླུན་པོར་རྟག་ཏུ་དེ་མི་འགྱུར། །འཇིག་རྟེན་ཀུན་ན་རྣམ་པར་དག་ཅིང ། །ཤེས་རབ་བསོད་ནམས་ཤིན་ཏུ་འཕེལ། །དེ་བཞིན་ 48a ༄#། །གཤེགས་ལ་ཕྱག་བྱས་ན། །སྡིག་པའི་གྲོགས་པོ་མི་འཕེལ་ཞིང ། །གསོད་དང་ཕྱིར་རྒོལ་དེ་བཞིན་ཏེ། །དགེ་བའི་བཤེས་གཉེན་རྙེད་པར་འགྱུར། ། སངས་རྒྱས་དེ་དང་འཇིག་རྟེན་གྱི། །མཆོད་རྟེན་གཞན་ལ་ཕྱག་བྱས་ན། །ཆོས་ཀུན་རྟོགས་པར་རིག་པ་ཡིས། །བྱང་ཆུབ་ལ་ནི་ནེམ་ནུར་མེད། །སྟེང་གི་ཕྱོགས་ན་འཇིག་རྟེན་གྱི་ཁམས་རིན་པོ་ཆེ་སྒྲོལ་མ་ཞེས་བྱ་བ་དེ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དམ་པ་འབྱུང་བའི་དཔལ་ཞེས་བྱ་བ་བཞུགས་ཏེ། དེའི་མཚན་ཐོས་ན་བྱང་ཆུབ་ཀྱི་ཡན་ལག་རིན་ཆེན་བདུན་ཐོབ་པར་འགྱུར་རོ། །བསྐལ་པ་སུམ་ཅུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །རིན་ཆེན་སྒྲོལ་མ་འཇིག་ཏེན་ཁམས་མཆོག་ན། །རིན་ཆེན་འབྱུང་ཞེས་བྱ་བའི་སངས་རྒྱས་ཏེ། །དེ་ཡི་མཚན་མཆོག་དམ་པ་ཐོས་ནས་ནི། ། སྲོག་ཆགས་རྣམས་ཀྱིས་བྱང་ཆུབ་ཡན་ལག་ཐོབ། །བསྐལ་པ་སུམ་ཅུ་དག་ནི་འདོར་བར་བྱེད། །བྱང་ཆུབ་ལ་ཡང་ཤིན་ཏུ་ལེགས་པར་གནས། །སྨྲ་བ་དཔའ་བོ་རབ་ཏུ་མི་བསྐྱོད་པ། ། སྐྱེས་བུ་དམ་པ་དག་ཀྱང་མང་དུ་མཐོང ། །སྟེང་གི་ཕྱོགས་ན་འཇིག་རྟེན་གྱི་ཁམས་གློག་གི་འོད་ཅེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་ 48b རྒྱས་གློག་གི་སྒྲོན་མ་ཏོག་གི་རྒྱལ་པོ་ཞེས་བྱ་བ་བཞུགས་ཏེ། དེའི་མཚན་ཐོས་ན་མི་ཁོམ་པ་ཐམས་ཅད་ཡོངས་སུ་སྤོང་བར་འགྱུར་རོ། །དེ་དག་བསྐལ་པ་ཉི་ཤུར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཡང་རྒྱ། །སྟེང་གི་ཕྱོགས་ན་འཇིག་རྟེན་གྱི་ཁམས་གསེར་གྱི་ཞིང་དེ་ན། །སངས་རྒྱས་རྫུ་འཕྲུལ་ཆེན་པོ་ནི། །གློག་འོད་ཏོག་གི་རྒྱལ་ཞེས་བྱ། །པདྨོ་དམ་པ་ལེགས་པར་བྱུང ། །དེ་ཡི་མཚན་ཡང་ཐོས་ནས་ནི། །མི་ཁོམ་ཐམས་ཅད་རྣམ་པར་སྤོང ། །བསྐལ་པ་ཉིད་ཤུར་འདོར་བར་བྱེད། །མྱུར་དུ་བྱང་ཆུབ་འཚང་ཡང་རྒྱ། །སྟེང་གི་ཕྱོགས་ན་འཇིག་རྟེན་གྱི་ཁམས་གསེར་གྱི་ཤིང་ཏ་ལ་རབ་ཏུ་བརྒྱན་པ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏ་ལའི་རྒྱལ་པོ་མངོན་པར་འཕགས་པའི་དཔལ་ཞེས་བྱ་བ་བཞུགས་ཏེ། དེའི་མཚན་ཐོས་ན་སེམས་ཅན་ཐམས་ཅད་ལས་མངོན་པར་འཕགས་པར་འགྱུར་རོ། །སྟེང་གི་ཕྱོགས་ན་འཇིག་རྟེན་གྱི་ཁམས་ཏ་ལ་ནམ་མཁའ་ལ་ཉེ་བ་ཞེས་བྱ་བ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་ནམ་མཁའི་སྒྲོན་མ་ཞེས་བྱ་བ་བཞུགས་ཏེ། དེའི་མཚན་ཐོས་ན་བསྐལ་པ་དྲུག་ཅུར་འཁོར་བ་ལ་རྒྱབ་ཀྱི་ཕྱོགས་པ་བྱས་པར་འགྱུར་རོ། །སངས་རྒྱས་ཀྱི་ཞིང་ཡང་དག་པར་འགྲོ་བ་ལས་ཀྱང་ཕྱིར་མི་ལྡོག་གོ་།ཚེ་འདི་ལ་དེ་བཞིན་གཤེགས་ 49a ༄#། །པ་མཐོང་བའང་ཐོབ་པར་འགྱུར་རོ། །ཐ་ན་རྨི་ལམ་ནའང་དེ་བཞིན་གཤེགས་པ་དེ་ལ་ཡན་ལག་ལྔས་ཕྱག་འཚལ་ལོ། །སངས་རྒྱས་བཅོམ་ལྡན་འདས་རྣམས་ལ་ལྷག་པའི་བསམ་པས་རི་མོ་བྱེད་པར་འགྱུར་རོ། །བལྟ་བར་བྱ་བ་དང ། ཕྱག་བྱ་བ་དང ། བསྙེན་བཀུར་བྱ་བའི་ཕྱིར་བླ་ན་མེད་པ་མཁས་པ་དང་ལྡན་པའི་སེམས་ཅན་ཡང་རྙེད་པར་འགྱུར་རོ། །ཚེ་འདི་ལ་ཡོན་ཏན་འདི་དག་ཐོབ་པར་འགྱུར་ཏེ། ཤཱ་རིའི་བུ། དེ་བཞིན་གཤེགས་པ་དེ་ནི་ཡོན་ཏན་དང ། ཕན་ཡོན་ཚད་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །ནམ་མཁའ་ཡོངས་སུ་བརྒྱན་པའི་ཞིང ། །དེ་ན་གྲགས་ཆེན་སངས་རྒྱས་ནི། །ཆོས་ཀྱི་ནམ་མཁའ་སྒྲོན་མའི་མཚན། །སྐྱེས་བུ་དག་ནི་ཁྱུ་མཆོག་སྟེ། །དེ་ཡི་མཚན་ཀྱང་ཐོས་ནས་ནི། །བསྐལ་པ་དྲུག་ཅུ་ཕྱིར་བཟློག་ཅིང ། །བླ་མེད་སངས་རྒྱས་ཆོས་རྣམས་དང ། །སངས་རྒྱས་འགྲོ་བའང་ཐོབ་པར་འགྱུར། ། སངས་རྒྱས་དཔའ་བོ་ཆེན་པོ་དག་།ཚེ་འདི་ཉིད་ལ་མཐོང་བར་འགྱུར། །ལྷག་པའི་བསམ་པས་བྱམས་པའི་སེམས། །དཀྱིལ་འཁོར་ལྔ་ཡིས་ཕྱག་བྱས་ཏེ། །རྨི་ལམ་ན་ཡང་རྫོགས་སངས་རྒྱས། །ཀུན་ཏུ་བཟང་པོ་མཐོང་བར་འགྱུར། །ཡིད་ཀྱི་རྟོག་པ་གཞན་གྱིས་སེམས། །ཆོས་ཀྱི་རྒྱལ་པོ་དྲན་ནས་སུ། །ཤེས་ལ་མཁས་པའི་སེམས་ཅན་རྣམས། །བསྙེན་བཀུར་བྱ་ 49b བ་རྙེད་པར་འགྱུར། །དེ་ནི་ཚེ་འདིའི་ཡོན་ཏན་ཏེ། །སྟོན་པ་ཡོན་ཏན་ཚད་མེད་ཅིང ། །ཆོས་ཀུན་གྱི་ཡང་ཕ་རོལ་ཕྱིན། །ཕུན་སུམ་ཚོགས་པ་ཀུན་གཉེར་བས། །བྱམས་པའི་སེམས་ཀྱིས་ཕྱག་གྱིས་ཤིག། སྟེང་གི་ཕྱོགས་ན་ཤིན་ཏུ་རྣམ་པར་ཕྱེ་བའི་འཇིག་རྟེན་གྱི་ཁམས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་ཐམས་ཅད་འབྱུང་བ་ཞེས་བྱ་བ་བཞུགས་སོ། །ཅིའི་ཕྱིར་འཇིག་རྟེན་གྱི་ཁམས་དེ་ཤིན་ཏུ་རྣམ་པར་ཕྱེ་བ་ཞེས་བྱ་ཞེ་ན། འཇིག་རྟེ་གྱི་ཁམས་དེ་གཞི་གསེར་ལ་བཻ་ཌཱུརྱས་མིག་མངས་རིས་སུ་བྲིས་པ།་མིག་མངས་རིས་ཐམས་ཅད་ནས་མེ་ཏོག་གི་ཤིང་དང ། རིན་པོ་ཆེའི་ཤིང་དང ། ཙནྡན་ལ་སོགས་པ་སྤོས་ཀྱི་ཤིང་དག་གིས་ཤིན་ཏུ་རྣམ་པར་ཕྱེ་ཞིང་དེ་དག་ལས་དྲི་བྱུང་བས་སངས་རྒྱས་ཀྱི་ཞིང་ཐམས་ཅད་གདུགས་གཅིག་ཏུ་ཁྱབ་པར་འགྱུར་རོ། །དེ་བཞིན་གཤེགས་པ་ཡོན་ཏན་ཐམས་ཅད་འབྱུང་བ་དེ་ཆོས་ཀྱི་གདན་ལ་བཞུགས་པའི་མཚན་ཐོས་ནས་དབང་པོ་ཐམས་ཅད་རབ་ཏུ་རྣམ་པར་ཕྱེ་བ་ཡོངས་སུ་འཛིན་ཏོ། །སངས་རྒྱས་ཀྱི་ཆོས་རབ་ཏུ་རྣམ་པར་ཕྱེ་བའང་ཡོངས་སུ་འཛིན་ཏོ། །བསྐལ་པ་བརྒྱད་ཅུར་འཁོར་བ་ལ་རྒྱབ་ཀྱིས་ཕྱོགས་པར་ཡང་བྱས་པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་གྱི་ཁམས་ནི་བླ་མེད་པ། །ཤིན་ཏུ་རྣ་པར་ཕྱེ་ཞེས་བྱ། །ཤིང་གིས་ 50a ༄#། །མིག་མངས་རིས་སུ་བྱས། །སྤོས་ཀྱི་ཤིང་གིས་ཤིན་ཏུ་མཛེས། །དེ་དག་ལས་ནི་དྲི་བྱུང་བས། །ས་ཀུན་ཏུ་ཡང་རྒྱས་པར་འགྱུར། །གདུགས་གཅིག་ཏུ་ནི་བྱས་ནས་སུ། །བར་སྣང་ལ་ཡང་དེ་གནས་སོ། །དེ་ལ་སངས་རྒྱས་བཞུགས་པ་ནི། །ཡོན་ཏན་ཡན་ལག་ཐམས་ཅད་འབྱུང ། །མིང་མཚན་ཤིན་ཏུ་ཕུན་སུམ་ཚོགས། །ཆོས་ཀྱི་རྒྱལ་པོ་འཇིགས་མེད་དེ། །དེ་ཡི་མཚན་ཀྱང་ཐོས་ནས་ནི། །ཡན་ལག་ཐམས་ཅད་མཛེས་པར་འགྱུར། །བྱད་བཞིན་བཟང་ཞིང་བལྟ་ན་སྡུག། གཟུགས་མཛེས་མཐོང་ན་དགའ་བ་དང ། །ཤིན་ཏུ་ཕྱེ་བའི་ལུས་སུ་འགྱུར། །ཆུ་ཞེང་གབ་པ་ནྱ་གྲོ་བཞིན། །དཔལ་གྱིས་ཤིན་ཏུ་འབར་གྱུར་ཅིང ། །སངས་རྒྱས་དག་གི་ཞིང་དུ་འགྲོ་།བསྐལ་པ་བརྒྱད་ཅུར་འདོར་བར་བྱེད། །འདུས་བྱས་རྣམས་ཀྱང་རྣམ་པར་ཟློག་།སངས་རྒྱས་ཆོས་རྣམས་ཕྱེ་བ་ཡང ། །རྣམ་པ་ཐམས་ཅད་མྱུར་དུ་འཐོབ། །ཡོན་ཏན་ཡན་ལག་ཀུན་འབྱུང་བ། །སངས་རྒྱས་རྗེས་སུ་དྲན་བྱས་ན། །ཡོན་ཏན་ཕན་ཡོན་དག་པ་ནི། །སངས་རྒྱས་ཆོས་ཀྱི་གོ་འཕང་གནས། །སྟེང་གི་ཕྱོགས་ན་འཇིག་རྟེན་གྱི་ཁམས་བཟང་པོའི་མཆོག་ཅེས་བྱ་བ་ན། དེ་བཞིན་གཤེགས་པ་བཟང་པོའི་ཏོག་གི་རྒྱལ་མཚན་རྒྱལ་པོ་ཞེས་བྱ་བ་བཞུགས་ཏེ། དེའི་མཚན་ཐོས་ན་སངས་རྒྱས་ཀྱི་ཆོས་རྣམས་ལས་ཕྱིར་མི་ལྡོག་པར་འགྱུར་རོ། །དེ་དག་གིས་བསྐལ་པ་ལྔ་བཅུར་འཁོར་བ་བརྒྱབ་ཀྱིས་ཕྱོགས་པ་བྱས་ 50b པར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་ཁམས་ནི་བཟང་མཆོག་སྟེ། །བཟང་པོ་དགའ་བ་ཞེས་ཀྱང་བྱ། །དེ་ན་རྫོགས་པའི་སངས་རྒྱས་ནི། །བཟང་ཏོག་རྒྱལ་མཚན་དྲང་སྲོང་སྟེ། །རྒྱལ་མཆོག་ཆོས་ཀྱི་རྒྱལ་པོ་ཡིན། །མཚན་མཆོག་སུམ་ཅུ་རྩ་གཉིས་ལྡན། །དེ་ཡི་མཚན་ཀྱང་ཐོས་ནས་ནི། །སངས་རྒྱས་ཆོས་རྣམས་མི་འབྲི་ཞིང ། །བསྐལ་པ་དག་ནི་ལྔ་བཅུར་ཡང ། །འཁོར་བ་དག་ནི་རྣམ་པར་སྤོང ། །འཇིག་རྟེན་དུ་ཡང་མྱུར་བར་ནི། །གྲགས་ཆེན་ལྷ་ཡི་ལྷར་འགྱུར་རོ། །སྟེང་གི་ཕྱོགས་ན་འཇིག་རྟེན་གྱིས་ཁམས་རིན་པོ་ཆེའི་རིགས་ཞེས་བྱ་བ་ན། དེ་བཞིན་གཤེགས་པ་རིན་པོ་ཆེ་ཐམས་ཅད་ཀྱིས་བརྒྱན་པའི་གཟུགས་འཛིན་པ་ཞེས་བྱ་བ་བཞུགས་སོ། །ཅིའི་ཕྱིར་འཇིག་རྟེན་གྱི་ཁམས་དེ་རིན་པོ་ཆེའི་རིགས་ཞེས་བྱ་ཞེ་ན། འོད་སྲུང ། སངས་རྒྱས་ཀྱི་ཞིང་དེའི་སེམས་ཅན་རྣམས་བླ་ན་མེད་པ་ཡང་དག་པ་རྫོགས་པའི་བྱང་ཆུབ་ཏུ་ཡང་དག་པར་རབ་ཏུ་ཞུགས་ཏེ། སངས་རྒྱས་ཀྱི་ཞིང་དེ་ནས་སེ་གོལ་གཏོགས་པ་ཙམ་གྱིས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་ཕྱོགས་བཅུའི་འཇིག་རྟེན་གྱི་ཁམས་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་རྣམས་བྱང་ཆུབ་ཏུ་ཡོངས་སུ་སྨིན་པར་བྱེད། སངས་རྒྱས་བཅོམ་ལྡན་འདས་ལ་མཆོད་པ་བྱེད་ཅིང་ཕྱིར་ཡང་འཇིག་རྟེན་གྱི་ཁམས་དེར་འོང་ངོ ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་འོད་ 51a ༄#། །སྲུང་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། བྱང་ཆུབ་སེམས་དཔའ་སེམས་དཔའ་ཆེན་པོ་དེའི་མིང་ཇི་སྐད་བགྱི་བ་དག་མཆིས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་སྟེ། སེང་གེ་རྣམ་པར་རོལ་པ་དང ། སེང་གེ་རྣམ་པར་བསྒྱིངས་དང ། སེང་གེའི་ཏོག་དང ། སེང་གེ་རྣམ་པར་སྤྲུལ་པ་དང ། ཤིན་ཏུ་བརྟན་པའི་མཐུ་རྟུལ་དང ། རྡོ་རྗེའི་བློ་གྲོས་མཚོན་ཆ་དང ། འོད་སྲུང ། དེ་ལྟ་བུ་ལ་སོགས་པ་རྟག་ཏུ་བརྩོན་འགྲུས་བརྩམས་པའི་བྱང་ཆུབ་སེམས་དཔའ་དག་གི་མིང་གང་སུ་དག་གིས་ཐོས་པར་འགྱུར་བ་དེ་དག་ཐམས་ཅད་དེ་བཞིན་གཤེགས་པ་རིན་པོ་ཆེ་ཐམས་ཅད་ཀྱིས་བརྒྱན་པའི་གཟུགས་འཛིན་པ་དེའི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་རྣམས་ཐོབ་པར་འགྱུར་རོ། །རིན་པོ་ཆེའི་རིགས་ཀྱང་རྗེས་སུ་ཐོབ་པར་འགྱུར་རོ། །ཕྱིར་མི་ལྡོག་པའི་ཆོས་ཀྱི་འཁོར་ལོའང་རྙེད་པར་འགྱུར་རོ། །བསྐལ་པ་བརྒྱ་ཚང་བར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །འཇིག་རྟེན་ཁམས་ནི་རིན་ཆེན་རིགས། །རིགས་ཆེན་ཀུན་གྱིས་བརྒྱན་པ་སྟེ། །དེ་ན་སངས་རྒྱས་བཞུགས་པ་ནི། །དཔའ་བོ་དག་གིས་ཡོངས་སུ་བསྐོར། །འཇིག་རྟེན་སྒྲོན་མ་དེ་མཚན་ནི། །རིན་ཆེན་ཀུན་གྱིས་འཕགས་པ་སྟེ། །རབ་ཏུ་ 51b བརྒྱན་པའི་གཟུགས་འཛིན་པ། །ཆོས་ཏོག་རྒྱལ་མཚན་དྲང་སྲོང་སྟེ། །བྱང་ཆུབ་སེམས་དཔས་ཡོངས་བསྐོར་ཅིང ། །འདྲེན་པ་ཆོས་རྣམས་སྟོན་པ་མཛད། །འཇིག་རྟེན་དུ་ནི་མ་བསྐོར་བ། །ཕྱིར་མི་ལྡོག་པའི་འཁོར་ལོ་བསྐོར། །དེ་ཡི་མཚན་ཀྱང་ཐོས་ནས་ནི། །བསྐལ་པ་བརྒྱར་ཡང་མི་འཁོར་ཞིང ། །ཕྱིར་མི་ལྡོག་པའི་འཁོར་ལོ་ཡང ། །བླ་ན་མེད་པ་ཐོབ་པར་འགྱུར། །གང་དག་གིས་ནི་མཚན་བརྗོད་པ། །ཆོས་ཀྱི་རྒྱལ་པོ་དེ་དག་དང ། །རབ་འབྱུང་དག་ན་བཞུགས་པ་དང ། །འཇིག་རྟེན་དག་གིས་ཁམས་ཀྱང་རུང ། །མིང་དང་རིགས་ནི་རྣམ་པར་དག་།སྤྱོད་པ་དག་ཀྱང་རྣམ་དག་པ། །ཆོས་ཀྱི་སྤྱན་ནི་རྣམ་པར་དག་།ཆོས་རྣམས་ཀུན་ཀྱང་རྣམ་སྦྱངས་པ། །ཤེས་རབ་ལྡན་པའི་སྤྱོད་ཡུལ་གྱིས། །བླ་ན་མེད་པའི་ཡེ་ཤེས་ལ། །སྐྱེ་བོ་མང་པོ་གང་དག་ནི། །ཤིན་ཏུ་འདོད་པའི་ཤཱ་རིའི་བུ། །གང་དག་ཕྱི་མའི་དུས་བྱུང་བ། །ཤིན་ཏུ་འཇིགས་པར་གྱུར་པའི་ཚེ། །ཆོས་འདི་རབ་ཏུ་ཉན་འགྱུར་ཞིང ། །ཐོས་ནས་དད་པར་བྱེད་པ་ནི། །ཐེ་ཚོམ་མེད་པར་དེ་དག་གིས། །ཤཱ་རིས་ང་ལ་བསྙེན་བཀུར་བྱས། །ཇི་ལྟར་རིན་ཆེན་རིན་ཐང་མེད། །དབུལ་པོས་མཐོང་ན་ཞུམ་གྱུར་ཏེ། །གང་གིས་རིན་ཆེན་རྙེད་འགྱུར་བ། །དེ་ལྟའི་ནོར་ནི་ག་ལས་འོང ། །དེ་བཞིན་བླ་མེད་སངས་རྒྱས་ཀྱང ། །བསོད་ནམས་ཆུང་ངུས་ཐོས་ནས་ནི། །མིག་ལ་གནོད་བྱེད་བློ་ཅན་རྣམས། །དེ་དག་དད་པར་ག་ལ་འགྱུར། །ནོར་དང་མཛོད་རྣམས་ 52a ༄#། །མང་པོ་དག་།ནོར་བུ་རིན་ཆེན་ཐོས་ནས་ནི། །ཤིན་ཏུ་བརྒྱན་པར་བྱའོ་ཞེས། །དེ་དག་ཡང་དང་ཡང་ཚོལ་ལོ། །དེ་བཞིན་ཤེས་རབ་ཆེན་པོ་ཡང ། །སངས་རྒྱས་ཀྱིས་ནི་མཚན་ཐོས་ནས། །ཇི་ལྟར་བྱང་ཆུབ་རེག་འགྱུར་ཞེས། །དེ་དག་ཡོངས་སུ་ཚོལ་བར་བྱེད། །དམན་པའི་ལས་དང་ལྡན་པ་དང ། །སྡིག་པ་འདོད་དང་གཡོ་ཅན་དང ། །ཤེས་རབ་བསོད་ནམས་མེད་པ་ལ། །འདི་ལྟ་བུ་ཡི་ཐོས་པ་མེད། །འདོད་ཆགས་ཀྱིས་ནི་ཆགས་གྱུར་དང ། །གཏི་མུག་གིས་ནི་རྨོངས་པའམ། །ཆགས་པས་ཟིལ་གྱིས་མནོན་པ་ལ། །འདི་ལྟ་བུ་ཡི་ཐོས་པ་མེད། །ང་རྒྱལ་ཅན་དང་ཁེངས་པ་དང ། །ལེ་ལོ་ཅན་དང་བློ་ཆུང་དང ། །མུ་སྟེགས་གཞན་ལ་བརྩོན་པ་ལ། །འདི་ལྟ་བུ་ཡི་ཐོས་པ་མེད། །བྱེ་བ་སྟོང་གི་ལྷ་རྣམས་ནི། །ཀྱེ་མ་སངས་རྒྱས་ཀྱེ་མ་ཆོས། །ཀྱེ་མ་དགེ་འདུན་བླ་ན་མེད། །དེ་ཞེས་དེ་ཚེ་སྒྲ་ཡང་སྒྲོག་།མེ་ཏོག་གི་ཡང་ཆར་འབེབས་ཤིང ། །སྟོང་གསུམ་འདིར་ནི་རབ་ཏུ་གཏོར། །སིལ་སྙན་བྱེ་བ་དཀྲོལ་བར་བྱེད། །སྤོས་ཀྱིས་ས་ལ་ཆག་ཆག་བཏབ། །ཞིང་འདི་སྣང་བར་བྱེད་ནས་ནི། །རྣམ་པ་དྲུག་ཏུ་གཡོ་བར་བྱས། །མེ་ཏོག་བསགས་པ་དམ་པ་ཡི། །མདོ་སྡེ་འདི་ནི་རབ་བཤད་པ། ། དེ་ནི་འཁོར་སུ་གང་དག་ནི། །སངས་རྒྱས་མཚམས་གནས་མ་གཏོགས་པར། །གང་གཞན་ཐོས་པ་ཐམས་ཅད་ནི། །སངས་རྒྱས་བླ་ན་མེད་པར་འགྱུར། ཕྱོགས་བཅུ་དག་ནི་ཐམས་ 52b ཅད་དུ། །གངྒཱའི་བྱེ་སྙེད་ཞིང་ནས་ནི། །བྱང་ཆུབ་སེམས་དཔའ་ལྷགས་ནས་སུ། །མཉན་ནས་ཕྱིར་ཡང་སོ་སོར་དོང ། །མདོ་སྡེ་འདི་ནི་བཤད་པའི་ཚེ། །དགེ་སློང་བྱེ་བ་མང་ཚང་པ། །དེ་དག་ཐམས་ཅད་དགྲ་བཅོམ་འགྱུར། །དེ་དག་གིས་ནི་འདྲེན་པ་མཐོང ། །དགེ་སློང་དག་ནི་བརྒྱ་སྟོང་དང ། །དགེ་སློང་མ་ཡང་དེ་བཞིན་ཏེ། །སྟོང་ཕྲག་དྲུག་ཅུར་ཚང་བ་ཡིས། །དེ་ཚེ་ཆོས་ལ་བཟོད་པ་ཐོབ། ། མི་སྐྱེ་བ་ཡི་ཆོས་རྣམས་ལ། །བཟོད་པ་བླ་ན་མེད་ཐོབ་ནས། །དེ་དག་སངས་རྒྱས་རྣམས་བལྟ་ཞིང ། །སྲོག་ཆགས་རྣམས་ལ་ཆོས་ཀྱང་འཆད། །དགེ་སློང་མ་ནི་ལྔ་བརྒྱ་དང ། །དགེ་བསྙེན་མ་ནི་བཞི་བཅུ་དག། རང་རང་གི་ནི་གོས་རྣམས་ཀྱིས། །དེ་བཞིན་གཤེགས་ཀྱི་སྐུ་ལ་གསོལ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་ཡི་རངས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང ། དགེ་སློང་དེ་དག་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་བཤད་པ་ལ་མངོན་པར་བསྟོད་དོ། །འཕགས་པ་མེ་ཏོག་གི་ཚོགས་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛྙཱ་ན་སིདྡྷི་དང ། ཞུས་ཆེན་གྱི་ལོ་ཙཱ་བ་བནྡྷེ་དྷརྨ་ཏཱ་ཤཱི་ལ་ལ་སོགས་པས་ཞུས་ཆེན་བགྱིས་ཏེ་གཏན་ལ་ཕབ་པ།། |