།།རྒྱ་གར་སྐད་དུ། ཨཱརྱ་བུདྷ་མ་ཀུ་ཊཾ་ནཱ་མ་མཧཱ་ཡཱ་ན་སཱུ་ཏྲཾ་མཧཱ་དྷརྨ་བ་རྱ་ཡཾ། བོད་སྐད་དུ། འཕགས་པ་སངས་རྒྱས་ཀྱི་དབུ་རྒྱན་ཞེས་བྱ་བ་ཐེག་པ་ཆེན་པོའི་མདོ་ཆོས་ཀྱི་རྣམ་གྲངས་ཆེན་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན། བྱ་རྒོད་ཕུང་པོའི་རིལ་དགེ་སློང་གི་དགེ་འདུན་ཆེན་པོ་ཐམས་ཅད་ཀྱང་དགྲ་བཅོམ་པ་ཟག་པ་ཟད་པ་སྟོང་ཉིས་བརྒྱ་ལྔ་བཅུའི་དགེ་སློང་རྣམས་དང་ཡང་ཐབས་གཅིག། བྱང་ཆུབ་སེམས་དཔའི་འཁོར་ཆེན་པོ་བྱམས་པ་དང ། འཇམ་དཔལ་ལ་སོགས་པ་དང ། ལྷ་དང ། ཀླུ་དང ། གནོད་སྦྱིན་དང ། དྲི་ཟ་དང ། དྲང་སྲོང་དང ། རིག་སྔགས་འཆང་དང ། ལྷའི་བུ་མོའི་ཚོགས་དུ་མ་རྣམས་དང་ཡང་ཐབས་གཅིག་ཏུ་བཞུགས་སོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་འོད་སྲུང་ཆེན་པོ་ལ་བཀའ་སྩལ་པ། འོད་སྲུང་ཆེན་པོ། ལས་དང་པོ་པའི་བྱང་ཆུབ་སེམས་དཔའ་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱ་བའི་རྒྱུ་རབ་ཏུ་བསྟན་པར་བྱ་ཡི། དེའི་ཕྱིར་ཉོན་ལ་ལགས་པར་རབ་ཏུ་ཡིད་ལ་བྱོས་ཤིག་དང་ངས་ཁྱོད་ལ་བཤད་དོ། །བཅོམ་ལྡན་འདས་ལེགས་སོ་ཞེས་གསོལ་ནས། ཚེ་དང་ལྡན་པ་འོད་སྲུང་ཆེན་པོ་བཅོམ་ལྡན་འདས་ལ་ཉན་པ་དང ། བཅོམ་ལྡན་འདས་ཀྱིས་བཀའ་སྩལ་པ། འདོ་སྲུང་ཆེན་པོ། ཤར་ཕྱོགས་ན་སངས་རྒྱས་ཀྱི་ 93b ཞིང་འདི་ནས་འཇིག་རྟེན་གྱི་ཁམས་ཆུ་བོ་གངྒཱའི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་ཏིང་ངེ་འཛིན་གྱིས་བརྒྱན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏིང་ངེ་འཛིན་གླང་པོ་ད་མ་པའི་དཔལ་ཞེས་བྱ་བ་ད་ལྟར་བཞུགས་ཤིང་འཚོལ་གཞེས་སོ། །འོད་སྲུང་ཆེན་པོ། སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྡུལ་མེད་རྣམ་པར་གནོན་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དེ་འདས་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྟག་ཏུ་ཏིང་ངེ་འཛིན་གླང་པོ་དམ་པའི་དཔལ་ཞེས་བྱ་བར་འཇིག་རྟེན་དུ་འབྱུང་བར་འགྱུར་རོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏིང་ངེ་འཛིན་གླང་པོ་དམ་པའི་དཔལ་དེ་དང ། བྱང་ཆུབ་སེམས་དཔའ་སེམས་དཔའ་ཆེན་པོ་རྡུལ་མེད་རྣམ་པར་གནོན་པ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྲེས་པ་ན་ཚེ་རབས་དྲན་པར་འགྱུར་རོ། །བསྐལ་པ་བརྒྱར་འཁོར་བ་ལས་ཕྱིར་ཕྱོགས་པར་འགྱུར་རོ། །དེ་དག་གིས་བསོད་ནམས་ཀྱི་ཕུང་པོ་དཔག་ཏུ་མེད་པའང་ཡོངས་སུ་བཟུང་བར་ 94a ༄#། །འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བར་འཐོབ་པར་ཡང་འགྱུར་རོ། །འོད་སྲུང་ཆེན་པོ། ཤར་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་ཆུ་བོ་གངྒཱ་གཉིས་ཀྱི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་བྱང་ཆུབ་ཀྱི་སྙིང་པོའི་རྒྱན་ལེགས་མཛེས་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པའི་དཔལ་ཞེས་བྱ་བ་ད་ལྟར་བཞུགས་ཤིང་འཚོ་ལ་གཞེས་སོ། །འོད་སྲུང་ཆེན་པོ། སངས་རྒྱས་ཀྱི་ཞིང་དེ་ནའང་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་པདྨ་ཞེས་བྱ་བ་ཡོད་དེ། དེའང་དེ་བཞིན་གཤེགས་པ་དེ་འདྲས་པ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པ་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པའི་གདུགས་ཀྱི་རྒྱལ་པོ་ཞེས་བྱ་བར་འཇིག་རྟེན་དུ་འབྱུང་བར་འགྱུར་རོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་གང་སུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་པདྨ་དམ་པའི་དཔལ་དེ་དང་།བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་པདྨ་དེའི་མིང་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །པདྨ་ 94b དང་འདྲ་བར་འཇིག་རྟེན་ཐམས་ཅད་ཀྱི་མི་དགེ་བའི་ཆོས་རྣམས་ཀྱིས་མི་གོས་པར་འགྱུར་རོ། །པདྨ་ཆུའི་ནང་ནས་བྱུང་བ་དང་འདྲ་བར་མངོན་པར་འཕགས་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །བསྐལ་པ་སུམ་ཅུར་འཁོར་བ་ལས་ཕྱིར་ཕྱོགས་པར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བ་འཐོབ་པར་ཡང་འགྱུར་རོ། །དེ་དག་གིས་བསོད་ནམས་ཀྱི་ཕུང་པོ་དཔག་ཏུ་མེད་པའང་ཡོངས་སུ་བཟུང་བར་འགྱུར་རོ། །འོད་སྲུང་ཆེན་པོ། ཤར་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་ཆུ་བོ་གངྒཱ་གསུམ་གྱི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་རྡུལ་བྲལ་བསགས་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཉི་མའི་དཀྱིལ་འཁོར་སྣང་བ་དམ་པའི་དཔལ་ཞེས་བྱ་བད་ལྟར་བཞུགས་ཤིང་འཚོལ་གཞེས་ཏེ་ཆོས་ཀྱང་སྟོན་ཏོ། །འོད་སྲུང་ཆེན་པོ། སངས་རྒྱས་ཀྱི་ཞིང་དེ་ནའང་བྱང་ཆུབ་སེམས་དཔའ་སེམས་དཔའ་ཆེན་པོ་ཉི་འོད་ཅེས་བྱ་བ་ཡོད་དེ། དེ་བཞིན་གཤེགས་པ་དེ་འདས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་ཞིང ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཕགས་པའི་དཔལ་ཐམས་ཅད་རྫོགས་པ་མཚན་དམ་པའི་ལུས་ཀྱི་སྐུ་ཅན་ 95a ༄#། །ཞེས་བྱ་བར་འཇིག་རྟེན་དུ་འབྱུང་བར་འགྱུར་རོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་སུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཕགས་པའི་དཔལ་དམ་པ་ཐམས་ཅད་རྫོགས་པ་མཚན་དམ་པའི་སྐུ་ཅན་དེ་དང ། བྱང་ཆུབ་སེམས་དཔའ་ཉི་འོད་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །དགེ་བའི་ཆོས་ཐམས་ཅད་ལ་ཉི་མའི་དཀྱིལ་འཁོར་ལྟར་སྣང་བ་ཐོབ་པར་འགྱུར་རོ། །དེ་དག་ལ་ངན་སོང་གསུམ་པོ་དག་ཏུ་ལོག་པར་ལྟུང་བའི་འཇིགས་པའང་མེད་པར་རིག་པར་བྱའོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བ་འཐོབ་པར་ཡང་འགྱུར་རོ། །བསྐལ་པ་སྟོང་དུ་འཁོར་བ་ལས་ཕྱིར་ཕྱོགས་པར་ཡང་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡང་འགྱུར་རོ། །འོད་སྲུང་ཆེན་པོ། ཤར་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་ཆུ་བོ་གངྒཱ་བཞིའི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་དབང་དུ་གྱུར་པ་ཞེས་བྱ་བ་ཞིག་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་གདུགས་གཅིག་པ་དམ་པ་ཞེས་བྱ་བ་ད་ལྟར་བཞུགས་ཤིང་འཚོལ་ 95b གཞེས་སོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་གདུགས་གཅིག་པ་དམ་པ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །རིགས་ངན་རྣམས་སུའང་སྐྱེ་བར་མི་འགྱུར་རོ། །དབུལ་པོའི་རིགས་རྣམས་སུའང་སྐྱེ་བར་མི་འགྱུར་རོ། །གང་དུ་སྐྱེ་བར་འགྱུར་བ་ཐམས་ཅད་དུ་རྒྱལ་པོའི་རིགས་སུ་སྐྱེ་བར་འགྱུར་རོ། །ནམ་ཡང་ཕས་ཕོངས་པའམ། མས་ཕོངས་པའམ། ལོངས་སྤྱོད་ཀྱིས་ཕོངས་པའམ། ནད་ཀྱིས་ཉོན་མོངས་པར་མི་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བ་ཐོབ་པར་ཡང་འགྱུར་རོ། །བསྐལ་པ་སྟོང་ཕྲག་སུམ་ཅུར་འཁོར་བ་ལ་ཕྱིར་ཕྱོགས་པར་ཡང་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་ཕྱིར་མི་ལྡོག་པར་འགྱུར་རོ། །འོད་སྲུང་ཆེན་པོ། ཤར་ཕྱོགས་ན་འཇིག་རྟེན་གྱི་ཁམས་ཆུ་བོ་གངྒཱ་ལྔའི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་ཡོངས་སུ་དག་པ་བསགས་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཏིང་ངེ་འཛིན་དམ་པ་རྣམ་པར་གནོན་པའི་དཔལ་ཞེས་བྱ་བ་ད་ལྟར་བཞུགས་ཤིང་འཚོལ་གཞེས་སོ། །འོད་སྲུང་ཆེན་པོ། དེ་བཞིན་གཤེགས་པ་དགྲ་ 96a ༄#། །བཅོམ་པ་ཡང་དག་པར་རྫོགས་པའི་སངས་རྒྱས་ཏིང་ངེ་འཛིན་དམ་པ་རྣམ་པར་གནོན་པའི་དཔལ་དེ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། སྨོན་ལམ་ཆེན་པོ་འདི་ལྟ་བུ། འདི་སྐད་ཅེས། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་གི་མིང་འཛིན་པར་བྱེད་པ་དེ་དག་སྲིད་པར་སྐྱེས་པ་ན་སྐྱེས་ཤིང་སྐྱེས་པ་ཐམས་ཅད་དུ་རབ་ཏུ་བྱུང་བ་ཐོབ་པར་འགྱུར་བ་དང ། རབ་ཏུ་བྱུང་བ་ཐོབ་ནས་ཏིང་ངེ་འཛིན་སྟོང་འཐོབ་པ་དང ། ཏིང་ངེ་འཛིན་གཅིག་ཁོ་ནས་ཏིང་ངེ་འཛིན་བྱེ་བ་ཁྲག་ཁྲིག་བརྒྱ་སྟོང་མངོན་པར་བསྒྲུབ་པ་དང ། ཏིང་ངེ་འཛིན་དེ་དག་ལས་ཀྱང་རྣམ་པར་མི་ཉམས་པ་དང ། འདས་པའི་སངས་རྒྱས་ཡོངས་སུ་མྱ་ནས་ལས་འདས་པ་ཁྲི་པོ་གང་དག་དང ། ཆོས་སྟོན་པ་ལ་ལྟ་བར་བྱེད་པ་དང ། འདས་པའི་ཇི་ལྟ་བ་བཞིན་དུ་ད་ལྟར་བྱུང་བའི་རྣམས་ལའང་དེ་བཞིན་དུ་འགྱུར་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང ། སྐྱེས་ཤིང་སྐྱེས་པ་ཐམས་ཅད་དུ་བསྐལ་པ་སྟོང་སྟོང་དུ་འཁོར་བ་ལས་ཕྱིར་ཕྱོགས་པར་འགྱུར་བ་དང ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བ་ཐོབ་པར་ཡང་འགྱུར་བར་བཏབ་བོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་ 96b པའི་སངས་རྒྱས་ཏིང་ངེ་འཛིན་དམ་པ་རྣམ་པར་གནོན་པའི་དཔལ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །འཇིག་རྟེན་གྱི་ཁམས་རྣམ་པར་བཀྲ་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་དཀྱིལ་འཁོར་གཟི་བརྗིད་ཀྱིས་མངོན་པར་འཕགས་པའི་རྒྱལ་པོའི་དཔལ་ཞེས་བྱ་བ་ད་ལྟར་བཞུགས་ཤིང་འཚོལ་གཞེས་སོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ལ་ཡང་དག་པར་ཞུགས་པ་གང་སུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་དཀྱིལ་འཁོར་གྱི་གཟི་བརྗིད་ཀྱིས་མངོན་པར་འཕགས་པའི་རྒྱལ་པོའི་དཔལ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པ་དང ། བློ་གྲོས་དང་ལྡན་པ་དང ། ཤེས་རབ་དང་ལྡན་པ་དང ། གཟི་བརྗིད་དང་ལྡན་པ་དང ། མཚན་དང་ལྡན་པར་མི་སྤྲོ་བ་དེ་ལྟ་བུའི་ཚིག་དང ། སྤོབས་པ་མི་ཟློག་པ་རིགས་ཀྱི་བུའམ། རིགས་ཀྱི་བུ་མོ་དེ་དག་དང་ལྡན་པར་འགྱུར་རོ། །དེ་དག་ཆོས་སྟོན་པ་ན་མདུན་ན་སངས་རྒྱས་ཀྱི་གཟུགས་གནས་པར་འགྱུར་རོ། །མ་ཐོས་ཤིང་ལུང་མ་ཕོག་པར་བྱེ་བ་ཁྲག་ཁྲིག་གྲངས་མེད་པར་སྤྲོ་བར་མི་འགྱུར་བ་དེ་ལྟ་བུའི་ཚིག་དང ། སྤོབས་པ་མི་ཟློག་པ་དང་ལྡན་པར་འགྱུར་རོ། །ཅི་ནས་ཀྱང་བླ་ན་མེད་པ་ཡང་དག་ 97a ༄#། །པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དེ་ལྟ་བུའི་ཆོས་སྟོན་པར་འགྱུར་རོ། །བསྐལ་བ་བྱེད་བ་ཁྲག་ཁྲིག་བརྒྱ་སྟོང་གྲངས་མེད་པར་འཁོར་བ་ལས་ཕྱིར་ཕྱོགས་པར་འགྱུར་རོ། །དེ་དག་གིས་བསོད་ནམས་ཀྱི་ཕུང་པོ་དཔག་ཏུ་མེད་པའང་ཡོངས་སུ་བཟུང་བར་འགྱུར་རོ། །འོད་སྲུང་ཆེན་པོ། ཤར་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་སངས་རྒྱས་ཀྱི་ཞིང་སྟོང་ཕྲག་བཞི་བཅུ་འདས་པ་ན། འཇིག་རྟེན་གྱི་ཁམས་རིན་ཆེན་ལྡན་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་ཀུན་ཏུ་སྣང་བའི་དཔལ་ཞེས་བྱ་བ་ད་ལྟར་བཞུགས་ཤིང་འཚོལ་གཞེས་སོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱུ་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མེ་ཏོག་ཀུན་ཏུ་སྣང་བའི་དཔལ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་འདུག་སྟེ་ཆོས་སྟོན་པར་འགྱུར་རོ། །འདོད་ན་ཛམྦུ་གླིང་འདི་སྐད་ཀྱིས་གོ་བར་བྱེད་པར་འགྱུར་རོ། །འདོད་ན་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་སྐད་ཀྱིས་གོ་བར་བྱེད་པར་འགྱུར་རོ། །ཆོས་འཆད་པ་ན་སེམས་ཅན་གང་དག་ཇི་ལྟར་མོས་པ་དང ། ཅི་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ 97b ལས་ཕྱིར་མི་ལྡོག་པར་འགྱུར་བ་དེ་ལྟ་བུར་དེ་དག་ལ་ཆོས་སྟོན་པར་འགྱུར་རོ། །བསྐལ་པ་སྟོང་ཕྲག་དྲུག་ཅུར་འཁོར་བ་ལས་རྒྱབ་ཀྱིས་ཕྱོགས་པར་འགྱུར་རོ། །འོད་སྲུང་ཆེན་པོ། ཤར་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་སྟོང་ཕྲག་དྲུག་ཅུ་འདས་པ་ན། འཇིག་རྟེན་གྱི་ཁམས་རིན་པོ་ཆེ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་ཞེས་བྱ་བ་ད་ལྟར་བཞུགས་ཤིང་འཚོལ་གཞེས་སོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་སྙིང་པོ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །རིན་པོ་ཆེ་བདུན་པོ་བྱང་ཆུབ་ཀྱི་ཡན་ལག་གི་རིན་པོ་ཆེ་རྣམས་ཐོབ་པར་འགྱུར་རོ། །འོད་སྲུང་ཆེན་པོ། ལྷོ་ཕྱོགས་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་སྟོང་ཕྲག་སུམ་ཅུ་འདས་པ་ན། འཇིག་རྟེན་གྱི་ཁམས་སྒྲ་ཡིད་དུ་འོང་བ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གོ་འཕང་མཐའ་ཡས་རྣམ་པར་གནོན་ཅེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་སོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་བཅོམ་ལྡན་འདས་དེ་བཞིན་གཤེགས་ 98a ༄#། །པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གོ་འཕང་མཐའ་ཡས་རྣམ་པར་གནོན་པ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །བྱང་ཆུབ་སེམས་དཔའི་ཏིང་ངེ་འཛིན་ཟླ་བའི་དཀྱིལ་འཁོར་རྣམ་པར་དག་པ་ཞེས་བྱ་བ་འཐོབ་པར་འགྱུར་ཏེ། དེ་ལ་གནས་ན་ཤར་ཕྱོགས་སུ་ཆུ་བོ་གངྒཱའི་བྱེ་མ་སྙེད་ཀྱི་སངས་རྒྱས་བཅོམ་ལྡན་འདས་མཐོང་བར་འགྱུར་རོ། །དེ་བཞིན་དུ་ལྷོ་དང ། ནུབ་དང ། བྱང་དང ། ཤར་ལྷོ་དང ། ལྷོ་ནུབ་དང ། ནུབ་བྱང་དང ། བྱང་ཤར་དང ། འོག་དང ། སྟེང་གི་ཕྱོགས་དང ། ཕྱོགས་བཅུ་ཀུན་ཏུའང་ཕྱོགས་རེ་རེར་ཆུ་བོ་གངྒཱའི་བྱ་མ་སྙེད་ཀྱི་སངས་རྒྱས་བཅོམ་ལྡན་འདས་མཐོང་བར་འགྱུར་རོ། །དེ་རྣམས་ཀྱིས་ཆོས་བསྟན་པའང་ཡང་དག་པར་ཤེས་པར་འགྱུར་རོ། །རྟག་ཏུ་སངས་རྒྱས་འབྱུང་བ་མཉེས་པར་བྱེད་པར་འགྱུར་རོ། །བྱང་ཆུབ་ཀྱི་མཐར་ཐུག་གི་བར་དུ་སངས་རྒྱས་བཅོམ་ལྡན་འདས་དེ་རྣམས་དང་མི་འབྲལ་བར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་རོ། །བསྐལ་པ་སྟོང་ཕྲག་སུམ་ཅུ་རྩ་ལྔར་འཁོར་བ་ལས་ཕྱིར་ཕྱོགས་པར་འགྱུར་རོ། །དེ་དག་གིས་བསོད་ནམས་ཀྱི་ཕུང་པོ་དཔག་ཏུ་མེད་པ་ཡོངས་སུ་བཟུང་བར་འགྱུར་རོ། །འོད་སྲུང་ཆེན་པོ། ལྷོ་ཕྱོགས་ན་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་སྟོང་ཕྲག་སུམ་ཅུ་རྩ་ལྔ་ 98b འདས་པ་ན། འཇིག་རྟེན་གྱི་ཁམས་སྤོས་མཆོག་དྲི་ཞིམ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྤོས་མཆོག་མཐའ་ཡས་རྒྱལ་པོ་ཞེས་བྱ་བ་ད་ལྟར་བཞུགས་ཤིང་འཚོལ་གཞེས་སོ། །འོད་སྲུང་ཆེན་པོ། དེ་བཞིན་གཤེགས་པ་སྤོས་མཆོག་མཐའ་ཡས་རྒྱལ་པོས་སྔོན་གྱི་སྨོན་ལམ་འདི་སྐད་ཅེས་བཏབ་བོ། །སྔོན་སྨོན་ལམ་བཏབ་པ་དེ་གང་ཞེ་ན། འདི་ལྟར་སྟེ། རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་བདག་གི་མིང་འཛིན་པར་བྱེད་པ་དེ་ཡོན་ཏན་འདི་ལྟ་སྟེ། སྐྱེས་ཤིང་སྐྱེས་པ་ཐམས་ཅད་དུ་ཚེ་རབས་དྲན་ཞིང་ཚངས་པར་སྤྱོད་པར་འགྱུར་བ་དང ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ལུས་ལེགས་པར་བརྒྱན་པར་འགྱུར་བ་དང ། སངས་རྒྱས་ཀྱི་ཞིང་གཞན་དག་ཏུ་སྣང་བར་བྱེད་ཅིང་ཡང་དག་པར་འགྲོ་བར་བྱེད་ལ། བདག་གིས་ཀྱང་དེ་དག་གི་སངས་རྒྱས་ཀྱི་བྱང་ཆུབ་རྫོགས་པར་བྱ་ཞིང་གལ་ཏེ་ས་ཆེན་པོ་འདི་མེས་གང་བར་གྱུར་ན་མེ་དེའང་བསད་ལ་དེ་དག་ལ་རིན་པོ་ཆེ་དག་འབྱུང་བར་བྱ་བ་དང ། སློང་བར་བྱེད་པ་རྣམས་ལ་ཅི་ནས་ཀྱང་སེམས་ཅན་གྱི་ཡིད་མི་གཅད་པར་བྱ་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་འགྱུར་བ་དང ། བསྐལ་པ་སྟོང་ཕྲག་སུམ་ཅུར་འཁོར་བ་ལས་ཕྱིར་ཕྱོགས་པར་འགྱུར་བ་དང ། དེ་དག་གིས་ 99a ༄#། །བསོད་ནམས་ཀྱི་ཕུང་པོ་ཡོངས་སུ་བཟུང་བར་འགྱུར་བ་འདི་དག་འཐོབ་པར་གསོལ་བ་བཏབ་བོ། །འོད་སྲུང་ཆེན་པོ། ལྷོ་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་ཆུ་བོ་གངྒཱ་བརྒྱད་ཀྱི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དམ་པ་ཞེས་བྱ་བ་ད་ལྟར་བཞུགས་ཤིང་འཚོ་ལ་གཞེས་སོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་བྱང་ཆུབ་སེམས་དཔའི་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དམ་པ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །མངལ་ན་འདུག་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱིས་གཟིགས་པ་དང ། སངས་རྒྱས་བཅོམ་ལྡན་འདས་རྣམས་མཐོང་བ་དང ། མཉེས་པར་བྱེད་པར་འགྱུར་རོ། །དེ་བཞིན་དུ་སངས་རྒྱས་བཅོམ་ལྡན་འདས་དེ་དག་གི་ཞལ་ནས། རིགས་ཀྱི་བུ། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་བྱུང་བ་ཡིན་ནོ། ། རིགས་ཀྱི་བུ། ཁྱོད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་ནོ། །རིགས་ཀྱི་བུ། ཁྱོད་མངལ་ན་འདུག་བཞིན་དུ་ལྷ་དང ། ཀླུ་དང ། གནོད་སྦྱིན་གཞན་ 99b དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྨིན་པར་བྱེད་པར་འགྱུར་རོ། །བསྐལ་པ་སྟོང་དུ་འཁོར་བ་ལས་ཕྱིར་ཕྱོགས་པར་བྱེད་པར་འགྱུར་རོ་ཞེས་གསུང་ངོ ། །དེ་དག་གིས་བསོད་ནམས་ཀྱི་ཕུང་པོ་དཔག་ཏུ་མེད་པ་ཡོངས་སུ་བཟུང་བར་འགྱུར་རོ། །འོད་སྲུང་ཆེན་པོ། ནུབ་ཕྱོགས་ན་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་ཆུ་བོ་གངྒཱ་གསུམ་གྱི་བྱེ་མ་སྙེད་འདས་པ་ན། འཇིག་རྟེན་གྱི་ཁམས་ལེགས་པར་རྣམ་པར་ཕྱེ་བ་རྣམ་པར་འབྱེད་པ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐུ་སྣང་ཆེ་ཞེས་བྱ་བ་ད་ལྟར་བཞུགས་ཤིང་འཚོ་ལ་གཞེས་སོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐུ་སྣང་ཆེ་དེའི་མཚན་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །བྱང་ཆུབ་སེམས་དཔའི་ཏིང་ངེ་འཛིན་ཉི་མའི་དཀྱིལ་འཁོར་སྣང་བ་དམ་པའི་དཔལ་ཞེས་བྱ་བའང་ཐོབ་པར་འགྱུར་ཏེ། དེ་ལ་གནས་ནས་སངས་རྒྱས་ཀྱི་ཞིང་ཆུ་བོ་གངྒཱའི་བྱེ་མ་སྙེད་ཀྱི་སངས་རྒྱས་ཀྱི་ཞིང་རྣམས་དང ། སངས་རྒྱས་བཅོམ་ལྡན་འདས་དེ་རྣམས་ཀྱང་མཐོང་བར་འགྱུར་རོ། །འོད་སྲུང་ཆེན་པོ། དེ་ལྟར་ན་མི་ཕམ་པ་དང་འདྲ་བའི་བྱང་ཆུབ་སེམས་དཔའ་རྣམས་ཀྱི་ཡོན་ 100a ༄#། །ཏན་གང་དག་ཡིན་པའི་ཡོན་ཏན་གྱི་ཕན་ཡོན་དེ་དག་དེ་ལ་འབྱུང་བར་འགྱུར་རོ། །འོད་སྲུང་ཆེན་པོ། བུད་མེད་གང་ཞིག་དེ་བཞིན་གཤེགས་པ་དེའི་མཚན་འཛིན་པར་བྱེད་པའང་དེའི་བུད་མེད་ཀྱི་དངོས་པོ་མཐའ་མའང་དེ་ཡིན་ཏེ། དེ་ནས་ཤི་འཕོས་ནས་སྐྱེས་པའི་དངོས་པོ་འཐོབ་པར་འགྱུར་རོ། །དེ་ལྟར་ན་དེ་བཞིན་གཤེགས་པ་མཐུ་འོད་ཆེན་པོ་དེའི་མཚན་འཛིན་པ་ནི་དོན་ཆེན་པོ་བྱེད་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་སྐད་ཅེས་བཀའ་སྩལ་ཏོ། །བུད་མེད་ཀྱིས་ཀྱང་དྲང་སྲོང་ཆེན་པོ་དེ་ཡི་མཚན་ཐོས་ན། །བུད་མེད་དངོས་པོ་དེ་སྒྱུར་སྐྱེས་བུ་མཁས་པའི་དངོས་པོར་འགྱུར། །ལུས་ཅན་ཀུན་ལ་ཕན་ཕྱིར་བྱང་ཆུབ་དམ་པར་འཚང་རྒྱ་ཞིང ། །ལྷ་དང་བཅས་པའི་འཇིག་རྟེན་དག་གི་རྟེན་དང་དཔུང་གཉེན་འགྱུར། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་མཚན་འདི་འཛིན་པར་བྱེད་པ་དེ་དག་ནི་སྲིད་པར་སྐྱེས་པ་ན་ཚེ་རབས་དྲན་པར་འགྱུར་རོ། །བསྐལ་པ་གྲངས་མེད་པར་འཁོར་བ་ལས་ཕྱིར་ཕྱོགས་པར་འགྱུར་རོ། །དེ་དག་ལ་བསོད་ནམས་ཀྱི་ཕུང་པོ་དཔག་ཏུ་མེད་པའང་འབྱུང་བར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང་ཉེ་བ་ཐོབ་པར་ཡང་འགྱུར་རོ། །འོད་སྲུང་ཆེན་པོ། བྱང་ཕྱོགས་ན་སངས་རྒྱས་ཀྱི་ཞིང་འདི་ནས་ཕ་རོལ་ན་དེ་བཞིན་གཤེགས་ 100b བ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དམ་པ་ཞེས་བྱ་བ་ད་ལྟར་བཞུགས་ཤིང་འཚོ་ལ་གཞེས་སོ། །འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་སུ་དག་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དམ་པ་དེའི་མཚན་འཛིན་པར་བྱེད་པ་དེ་དག་ནི་བསོད་ནམས་ཆེན་པོ་སྐྱེད་པར་འགྱུར་ཏེ། འོད་སྲུང་ཆེན་པོ། རིགས་ཀྱི་བུའམ། རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་གང་ཞིག་གིས་སངས་རྒྱས་བཅོམ་ལྡན་འདས་རྣམས་ལ་རིའི་རྒྱལ་པོ་རི་རབ་ལྟ་བུ་དེ་ཙམ་གྱི་གསེར་གྱི་ཕུང་པོ་འབུལ་ཞིང་གཏོང་ལ་འཇོག་པར་བྱེད་ཅིང་དེ་ལྟ་བུར་དབུལ་བ་འབུལ་བར་བྱེད་པའང་ལོ་བྱེ་བ་ཁྲག་ཁྲིག་བརྒྱ་སྟོང་དུ་དབུལ་བ་འབུལ་བར་བྱེད་པ་བས་ནི་སངས་རྒྱས་ཀྱི་མཚན་ཡོངས་སུ་བཟུང་བའི་དགེ་བའི་རྩ་བ་འདི་ལ་བརྒྱའི་ཆར་ཡང་ཉེ་བར་མི་འགྲོ་།སྟོང་དང ། བརྒྱ་སྟོང་དང ། གྲངས་དང ། བགྲང་བ་དང ། དཔེར་ཡང་ཉེ་བར་མི་འགྲོ་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དམ་པའི་མཚན་འཛིན་པར་བྱེད་པ་རྣམས་ལ་གལ་ཏེ་ཡོད་པ་མཆོག་ནི་འདི་ཁོ་ན་ཡིན་ནོ། །དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་སྐད་ཅེས་བཀའ་སྩལ་ཏོ། །འཇིག་རྟེན་གྱི་ནི་མགོན་པོ་འོད་མཛད་པ། །དེ་དག་དུས་དང་དུས་མིན་མཁྱེན་ 101a ༄#། །པ་ཡིས། །སེམས་ཅན་ཐམས་ཅད་དག་ལ་ཕན་མཛད་པ། །དེ་དག་ཤར་དང་ལྷོ་དང་ནུབ་དང་ནི། །བྱང་གི་ཕྱོགས་རྣམས་དག་ན་རབ་བཞུགས་པ། །སྐྱེས་བུ་རྣམས་ཀྱི་གཙོ་བོ་དེ་དག་ལ། །ཉིན་པར་དང་ནི་མཚན་མོ་དག་ཏུ་ཡང ། །གུས་དང་བཅས་པས་ཐལ་སྦྱར་ཕྱག་བྱོས་ཤིག་།མི་ཡི་དམ་པ་གང་དག་ནི། །བསྐལ་པ་སྟོང་ན་འབྱུང་བ་ཡི། ། མཆོག་ཏུ་རྙེད་དཀའ་དེ་ལ་ཡང ། །ཕྱག་བྱས་མངོན་ཤེས་ཅི་ཞིག་ཡོད། །སངས་རྒྱས་བཀུར་སྟི་བྱེད་འདོད་དང ། །རྫོགས་པའི་བྱང་ཆུབ་འདོད་པ་ཉིད། །དེས་ནི་སངས་རྒྱས་རྣམས་ཀྱི་མཚན། །རྒྱལ་བས་བཤད་པ་འདི་མཉན་བྱ། །སངས་རྒྱས་ཡེ་ཤེས་བསྐྱེད་པ་ལ། །ནམ་ཡང་སོམ་ཉི་མི་ཟ་སྟེ། །དགེ་བའི་རྩ་བ་དེ་ཡིས་ནི། །ཡེ་ཤེས་བསམ་ཡས་འདི་འཐོབ་བོ། །གང་ཞིག་རྟག་ཏུ་སངས་རྒྱས་ལ། །མཆོད་པ་བསམ་ཡས་བྱེད་འདོད་པ། །དེ་ཡིས་སངས་རྒྱས་མཚན་ཐོས་ནས། །གཞན་དག་ལ་ནི་རབ་བསྟན་བྱ། །གང་ཞིག་སེམས་ཅན་བྱེ་བ་དག་།སྲིད་པ་སྤངས་པར་དགྲོལ་འདོད་པ། །དེ་ཡིས་སངས་རྒྱས་མཚན་ཐོས་ན། །མི་ཉིད་དུ་ནི་དེ་མི་སྐྱེ། །གང་ཞིག་ཞིང་ནི་བྱེ་བ་དག་།རྐང་པའི་མཐེ་བོས་བསྒུལ་འདོད་པ། །དེ་ཡིས་སངས་རྒྱས་མཚན་ཐོས་ནས། ། སྐྱེ་བོ་མང་ལ་དེ་བསྟན་བྱ། །གང་ཞིག་སངས་རྒྱས་རྣམས་ཀྱི་འདི་འཛིན་དེ། །རྒྱལ་བ་འདྲེན་པ་མང་པོ་མཆོད་པས་ན། །དེས་ནི་སྐྱེ་བ་གཅིག་གིས་མ་ཡིན་ལ། །བཅུ་ཡིས་མ་ཡིན་ཉི་ 101b ཤུས་མ་ཡིན་ནོ། །འཇིག་རྟེན་འདི་ནི་གངྒཱའི་བྱེ་སྙེད་ཀྱི། །རིན་ཆེན་གསེར་གྱི་མདོག་གིས་བཀང་འབུལ་བས། །གང་ཞིག་སངས་རྒྱས་མཆོག་གི་མཚན་ཐོས་ན། །སྦྱིན་ཕུང་དེ་ཡིས་བརྒྱ་ཡི་ཆར་མི་ཕོད། །གང་ཞིག་སངས་རྒྱས་མཚན་འདི་ཐོས་ནས་འཛིན། །དེ་དག་མིར་གྱུར་མཆོག་ནི་ལེགས་པར་རྙེད། །དེ་མིའི་འཇིག་རྟེན་དབྱངས་ཀྱི་ཡན་ལག་ལྡན། །རབ་ཏུ་འབྱུང་བ་ལེགས་རྙེད་ཟས་ལེགས་སྤྱད། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་དེ་དག་དང ། བྱང་ཆུབ་སེམས་དཔའ་དེ་དག་དང ། གནས་བརྟན་འོད་སྲུང་ཆེན་པོ་དང ། ལྷ་དང ། མི་དང ། ལྷ་མ་ཡིན་དང ། དྲི་ཟར་བཅས་པའི་འཇིག་རྟེན་བཅོམ་ལྡན་འདས་ཀྱིས་གསུངས་པ་ལ་རྗེས་སུ་ཡི་རངས་ནས་མངོན་པར་བསྟོད་དོ། །ཐེག་པ་ཆེན་པོ་ཤིན་ཏུ་རྒྱས་པའི་མདོ་ལས། འཕགས་པ་སངས་རྒྱས་ཀྱི་དབུ་རྒྱན་ཞེས་བྱ་བ་ཐེག་པ་ཆེན་པོའི་མདོའི་ཆོས་ཀྱི་རྣམ་གྲངས་ཆེན་པོ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་སིདྷ་དང ། ལོཙྪ་བ་བནྡེ་བནྡྲེ་རཀྵི་ཏས་བསྒྱུར་ཅིང་ཞུས་ཏེ་གཏན་ལ་ཕབ་པ།། |