།།རྒྱ་གར་སྐད་དུ། པཉྩ་པཏྟི་ནི་ཀཱ་ཡ་ཤུ་བྷཱ་ཤུབྷ་ཕ་ལ་པ་རཱིཀྵ་སཱུ་ཏྲ། བོད་སྐད་དུ། ལྟུང་བ་སྡེ་ལྔའི་དགེ་བ་དང ། མི་དགེ་བའི་འབྲས་བུ་བརྟག་པའི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། 197b བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ།་དགེ་སློང་དག་།ཛམྦུའི་གླིང་པའི་མི་རྣམས་ཀྱི་ལོ་ལྔ་བཅུ་གང་ཡིན་པ་དེ་ནི་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ཉིན་ཞག་གཅིག་གོ། ཉིན་ཞག་དེ་སུམ་ཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་ལྔ་བརྒྱ་ནི་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ཚེའི་ཚད་དོ། །དགེ་སློང་དག་།བསླབ་པའི་ཆོས་གང་དག་བསྲུང་བ་དང ། སྦེད་པ་དང ། ཡོངས་སུ་སྐྱོང་བ་དང ། འདའ་བར་མི་བྱེད་པ་དང ། དེ་དག་ལས་འདས་པ་སྟོན་པ་དང ། རབ་ཏུ་སྟོན་པ་ནི་ལུས་ཞིག་ནས་བདེ་འགྲོ་རྒྱལ་ཆེན་བཞི་པའི་རིས་ཀྱི་ལྷ་རྣམས་སུ་སྐྱེ་བར་འགྱུར་ཏེ། དེ་དག་དེར་ཡང་ལྷའི་ཚེ་དང ། ལྷའི་ཁ་དོག་དང ། ལྷའི་སྟོབས་དང ། ལྷའི་བདེ་བ་དང ། ལྷའི་དབང་ཕྱུག་ལ་དབང་བྱེད་ཅིང ། ལྷའི་གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ལྷའི་གཡོག་འཁོར་དང་ལྡན་པར་འགྱུར་རོ། །དགེ་སློང་དག་།རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ལོ་ལྔ་བརྒྱ་གང་ཡིན་པ་དེ་ནི་དམྱལ་བ་ཆེན་པོ་ཡང་སོས་ཀྱི་ཉིན་ཞག་གཅིག་གོ ། ཉིན་ཞག་དེ་སུམ་ཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་ལྔ་བརྒྱ་ནི་དམྱལ་བ་ཆེན་པོ་ཡང་སོས་ཀྱི་ཚེའི་ཚད་དོ། །དགེ་སློང་དག་།བསླབ་པའི་ཆོས་གང་ 198a ༄#། །དག་མི་སྲུང་བ་དང ། མི་སྦེད་པ་དང ། ཡོངས་སུ་མི་སྐྱོང་བ་དང ། དེ་དག་ལས་འདའ་བར་བྱེད་པ་དང ། འདས་པ་དེ་དག་མི་སྟོན་པ་དང ། རབ་ཏུ་མི་སྟོན་པ་དེ་ནི་ལུས་ཞིག་ནས་ཤི་བའི་འོག་ཏུ་དམྱལ་བ་ཆེན་པོ་ཡང་སོས་སུ་སྐྱེ་བར་འགྱུར་ཏེ། དེ་དག་དེར་ཡང་སྡུག་བསྔལ་དྲག་པ་དང ། རྩུབ་པ་དང ། ཚ་བ་དང ། ཡིད་དུ་མ་འོང་བའི་ཚོར་བ་མྱོང་བར་འགྱུར་རོ། །དགེ་སློང་དག་།ཛམྦུའི་གླིང་པའི་མི་རྣམས་ཀྱི་ལོ་བརྒྱ་གང་ཡིན་པ་དེ་ནི་སུམ་ཅུ་རྩ་གསུམ་གྱི་ལྷ་རྣམས་ཀྱི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་སྟོང་ནི་སུམ་ཅུ་རྩ་གསུམ་པའི་ལྷ་རྣམས་ཀྱི་ཚེའི་ཚད་དོ། །དགེ་སློང་དག་།སོ་སོར་བཤགས་པའི་ཆོས་གང་དག་སྲུང་བ་དང ། སྦེད་པ་དང ། ཡོངས་སུ་སྐྱོང་བ་དང ། འདའ་བར་མི་བྱེད་པ་དང ། དེ་དག་ལས་འདས་པ་སྟོན་པ་དང ། རབ་ཏུ་སྟོན་པ་དེ་ནི་ལུས་ཞིག་ནས་བདེ་འགྲོ་སུམ་ཅུ་རྩ་གསུམ་གྱི་ལྷ་རྣམས་སུ་སྐྱེ་བར་འགྱུར་ཏེ། དེ་དག་དེར་ཡང་ལྷའི་ཚེ་དང ། ལྷའི་ཁ་དོག་དང ། ལྷའི་སྟོབས་དང ། ལྷའི་བདེ་བ་དང ། ལྷའི་དབང་ཕྱུག་ལ་དབང་བྱེད་ཅིང ། ལྷའི་གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ལྷའི་གཡོག་འཁོར་དང་ལྡན་པར་འགྱུར་རོ། །དགེ་སློང་དག་།སུམ་ཅུ་རྩ་གསུམ་གྱི་ལྷ་རྣམས་ཀྱི་ལོ་སྟོང་གང་ཡིན་པ་དེ་ནི་དམྱལ་ 198b པ་ཆེན་པོ་ཐིག་ནག་གི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་སྟོང་ནི་དམྱལ་བ་ཆེན་པོ་ཐིག་ནག་གི་ཚེའི་ཚད་དོ། །དགེ་སློང་དག་།སོ་སོར་བཤགས་པའི་ཆོས་གང་དག་མི་སྲུང་བ་དང ། མི་སྦེད་པ་དང ། ཡོངས་སུ་མི་སྐྱོང་བ་དང ། དེ་དག་ལས་འདའ་བར་བྱེད་པ་དང ། འདས་པ་དེ་དག་མི་སྟོན་པ་དང ། རབ་ཏུ་མི་སྟོན་པ་དེ་ནི་ལུས་ཞིག་ནས་ཤི་བའི་འོག་ཏུ་དམྱལ་བ་ཆེན་པོ་ཐིག་ནག་ཏུ་སྐྱེ་བར་འགྱུར་ཏེ། དེ་དག་དེར་ཡང་སྡུག་བསྔལ་དྲག་པ་དང ། རྩུབ་པ་དང ། ཚ་བ་དང ། ཡིད་དུ་མི་འོང་བའི་ཚོར་བ་མྱོང་བར་འགྱུར་རོ། །ཉེས་བྱས་ཀྱི་ལྟུང་བ་བརྟག་པའོ། །དགེ་སློང་དག་།ཛམྦུའི་གླིང་པའི་མི་རྣམས་ཀྱི་ལོ་ཉིས་བརྒྱ་གང་ཡིན་པ་དེ་ནི་མཚེ་མའི་ལྷ་རྣམས་ཀྱི་ཉིན་ཞག་གཅིག་གོ་།ཉིན་ཞག་སུམ་ཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་ཏུ་བརྩེས་པའི་ལོ་ཉིས་སྟོང་ནི་མཚེ་མའི་ལྷ་རྣམས་ཀྱི་ཚེའི་ཚད་དོ། །དགེ་སློང་དག་།ལྟུང་བྱེད་ཀྱི་ཆོས་གང་དག་སྲུང་བ་དང ། སྦེད་པ་དང ། ཡོངས་སུ་སྐྱོང་བ་དང ། འདའ་བར་མི་བྱེད་པ་དང ། དེ་དག་ལས་འདས་པ་སྟོན་པ་དང ། རབ་ཏུ་སྟོན་པར་དེ་ནི་ལུས་ཞིག་ནས་བདེ་འགྲོ་མཚེ་མའི་ལྷ་རྣམས་སུ་སྐྱེ་བར་འགྱུར་ཏེ། དེ་དག་དེར་ཡང་ལྷའི་ཚེ་དང ། ལྷའི་ཁ་དོག་དང ། ལྷའི་སྟོབས་དང ། ལྷའི་བདེ་བ་དང ། ལྷའི་དབང་ཕྱུག་ལ་དབང་བྱེད་ཅིང་ལྷའི་གཟུགས་ 199a ༄#། །དང།་སྒྲ་དང ། དྲི་དང ། རོ་དང ། རེག་བྱ་དང ། ལྷའི་གཡོག་འཁོར་དང་ལྡན་པར་འགྱུར་རོ། །དགེ་སློང་དག་།མཚེ་མའི་ལྷ་རྣམས་ཀྱི་ལོ་ཉིས་སྟོང་གང་ཡིན་པ་དེ་ནི་དམྱལ་བ་ཆེན་པོ་བསྡུས་འཇོམས་ཀྱི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་ཉིས་སྟོང་ནི་དམྱལ་བ་ཆེན་པོ་བསྡུས་འཇོམས་ཀྱི་ཚེའི་ཚད་དོ། །དགེ་སློང་དག་།ལྟུང་བྱེད་ཀྱི་ཆོས་གང་དག་མི་སྲུང་བ་དང ། མི་སྦེད་པ་དང ། ཡོངས་སུ་མི་སྐྱོང་བ་དང ། དེ་དག་ལས་འདའ་བར་བྱེད་པ་དང ། འདས་པ་དེ་དག་མི་སྟོན་པ་དང ། རབ་ཏུ་མི་སྟོན་པ་དེ་ནི་ལུས་ཞིག་ནས་ཤི་བའི་འོག་ཏུ་དམྱལ་བ་ཆེན་པོ་བསྡུས་འཇོམས་སུ་སྐྱེ་བར་འགྱུར་ཏེ། དེ་དག་དེར་ཡང་སྡུག་བསྔལ་ཤིན་ཏུ་དྲག་པ་དང ། རྩུབ་པ་དང ། ཚ་བ་དང ། ཡིད་དུ་མི་འོང་བའི་ཚོར་བ་མྱོང་བར་འགྱུར་རོ། །ལྟུང་བྱེད་ཀྱི་ལྟུང་བ་བརྟག་པའོ། །དགེ་སློང་དག་།ཛམྦུའི་གླིང་པའི་མི་རྣམས་ཀྱི་ལོ་བཞི་བརྒྱ་གང་ཡིན་པ་དེ་ནི་དགའ་ལྡན་གྱི་ལྷ་རྣམས་ཀྱི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་བཞི་སྟོང་ནི་དགའ་ལྡན་གྱི་ལྷ་རྣམས་ཀྱི་ཚེའི་ཚད་དོ། །དགེ་སློང་དག་།སྡོམ་པའི་ཆོས་གང་དག་སྒྲུབ་པ་དང ། སྦེད་པ་དང ། ཡོངས་སུ་སྐྱོང་བ་དང ། འདའ་བར་མི་བྱེད་པ་དང ། དེ་དག་ལས་ 199b འདས་པ་སྟོན་པ་དང ། རབ་ཏུ་སྟོན་པ་དེ་ནི་ལུས་ཞིག་ནས་བདེ་འགྲོ་དགའ་ལྡན་གྱི་ལྷ་རྣམས་སུ་སྐྱེ་བར་འགྱུར་ཏེ། དེ་དག་དེར་ཡང་ལྷའི་ཚེ་དང ། ལྷའི་ཁ་དོག་དང ། ལྷའི་སྟོབས་དང ། ལྷའི་བདེ་བ་དང ། ལྷའི་དབང་ཕྱུག་ལ་དབང་བྱེད་ཅིང་ལྷའི་གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ལྷའི་གཡོག་འཁོར་དང་ལྡན་པར་འགྱུར་རོ། །དགེ་སློང་དག་།དགའ་ལྡན་གྱི་ལྷ་རྣམས་ཀྱི་ལོ་བཞི་སྟོང་གང་ཡིན་པ་དེ་ནི་དམྱལ་བ་ཆེན་པོ་དུ་འབོད་ཀྱི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་གོ་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་བཞི་སྟོང་ནི་དམྱལ་བ་ཆེན་པོ་དུ་འབོད་ཀྱི་ཚེའི་ཚད་དོ། །དགེ་སློང་དག་།སྦོམ་པོའི་ཆོས་གང་དག་མི་སྲུང་བ་དང ། མི་སྦེད་པ་དང ། ཡོངས་སུ་མི་སྐྱོང་བ་དང ། དེ་དག་ལས་འདའ་བར་བྱེད་པ་དང ། འདས་པ་དེ་དག་མི་སྟོན་པ་དང ། རབ་ཏུ་མི་སྟོན་པ་དེ་ནི་ལུས་ཞིག་ནས་ཤི་བའི་འོག་ཏུ་དམྱལ་བ་ཆེན་པོ་དུ་འབོད་དུ་སྐྱེ་བར་འགྱུར་ཏེ། དེ་དག་དེར་ཡང་སྡུག་བསྔལ་ཤིན་ཏུ་དྲག་པ་དང ། རྩུབ་པ་དང ། ཚ་བ་དང ། ཡིད་དུ་མི་འོང་བའི་ཚོར་བ་མྱོང་བར་འགྱུར་རོ། །སྦོམ་པའི་ལྟུང་བ་བརྟག་པའོ། །དགེ་སློང་དག་།ཛམྦུའི་གླིང་པའི་མི་རྣམས་ཀྱི་ལོ་བརྒྱད་བརྒྱ་གང་ཡིན་པ་དེ་ནི་འཕྲུལ་དགའི་ལྷ་རྣམས་ཀྱི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་གོ་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་བརྒྱད་ 200a ༄#། །སྟོང་ནི་འཕྲུལ་དགའི་ལྷ་རྣམས་ཀྱི་ཚེའི་ཚད་དོ། །དགེ་སློང་དག་།ལྷག་མའི་ཆོས་གང་དག་སྲུང་བ་དང ། སྦེད་པ་དང ། ཡོངས་སུ་སྐྱོང་བ་དང ། འདའ་བར་མི་བྱེད་པ་དང ། དེ་དག་ལས་འདས་པ་སྟོན་པ་དང ། རབ་ཏུ་སྟོན་པ་དེ་ནི་ལུས་ཞིག་ནས་བདེ་འགྲོ་འཕྲུལ་དགའི་ལྷ་རྣམས་སུ་སྐྱེ་བར་འགྱུར་ཏེ། དེ་དག་དེར་ཡང་ལྷའི་ཚེ་དང ། ལྷའི་ཁ་དོག་དང ། ལྷའི་སྟོབས་དང ། ལྷའི་བདེ་བ་དང ། ལྷའི་དབང་ཕྱུག་ལ་དབང་བྱེད་ཅིང་ལྷའི་གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ལྷའི་གཡོག་འཁོར་དང་ལྡན་པར་འགྱུར་རོ། །དགེ་སློང་དག་།འཕྲུལ་དགའི་ལྷ་རྣམས་ཀྱི་ལོ་བརྒྱད་སྟོང་གང་ཡིན་པ་དེ་ནི་དམྱལ་བ་དུ་འབོད་ཆེན་པོའི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་གོ་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་བརྒྱད་སྟོང་ནི་དམྱལ་བ་དུ་འབོད་ཆེན་པོའི་ཚེའི་ཚད་དོ། །དགེ་སློང་དག་།ལྷག་མའི་ཆོས་གང་དག་མི་སྲུང་བ་དང ། མི་སྦེད་པ་དང ། ཡོངས་སུ་མི་སྐྱོང་བ་དང ། དེ་དག་ལས་འདའ་བར་བྱེད་པ་དང ། འདས་པ་དེ་དག་མི་སྟོན་པ་དང ། རབ་ཏུ་མི་སྟོན་པ་དེ་ནི་ལུས་ཞིག་ནས་ཤི་བའི་འོག་ཏུ་དམྱལ་བ་ཆེན་པོ་དུ་འབོད་ཆེན་པོར་སྐྱེ་བར་འགྱུར་ཏེ། དེ་དག་དེར་ཡང་སྡུག་བསྔལ་ཤིན་ཏུ་དྲག་པ་དང ། རྩུབ་པ་དང ། ཚ་བ་དང ། ཡིད་དུ་མི་འོང་བའི་ཚོར་བ་མྱོང་བར་འགྱུར་རོ། །ལྷག་ 200b མའི་ལྟུང་བ་བརྟག་པའོ། །དགེ་སློང་དག། ཛམྦུའི་གླིང་པའི་མི་རྣམས་ཀྱི་ལོ་བརྒྱ་ཕྲག་བཅུ་དྲུག་གང་ཡིན་པ་དེ་ནི་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་གོ་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་སྟོང་ཕྲག་བཅུ་དྲུག་ནི་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཚེའི་ཚད་དོ། །དགེ་སློང་དག་།ཕམ་པར་འགྱུར་བའི་ཆོས་བཞི་པོ་གང་དག་སྲུང་བ་དང ། སྦེད་པ་དང ། ཡོངས་སུ་སྐྱོང་བ་དང ། འདའ་བར་མི་བྱེད་པ་དང ། དེ་དག་ལས་འདས་པ་སྟོན་པ་དང ། རབ་ཏུ་སྟོན་པ་དེ་ནི་ལུས་ཞིག་ནས་བདེ་འགྲོ་གཞན་འཕྲུལ་དབང་བྱེད་ཀྱི་ལྷ་རྣམས་སུ་སྐྱེ་བར་འགྱུར་ཏེ། དེ་དག་དེར་ཡང་ལྷའི་ཚེ་དང ། ལྷའི་ཁ་དོག་དང ། ལྷའི་སྟོབས་དང ། ལྷའི་བདེ་བ་དང ། ལྷའི་དབང་ཕྱུག་ལ་དབང་བྱེད་ཅིང་ལྷའི་གཟུགས་དང ། སྒྲ་དང ། དྲི་དང ། རོ་དང ། རེག་བྱ་དང ། ལྷའི་གཡོག་འཁོར་དང་ལྡན་པར་འགྱུར་རོ། །དགེ་སློང་དག་།གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ལོ་སྟོང་ཕྲག་བཅུ་དྲུག་གང་ཡིན་པ་དེ་ནི་དམྱལ་བ་ཆེན་པོ་ཚ་བའི་ཉིན་ཞག་གཅིག་གོ་།ཉིན་ཞག་དེ་སུམ་ཅུ་ལ་ཟླ་བ་གཅིག་གོ་།ཟླ་བ་བཅུ་གཉིས་ལ་ལོ་གཅིག་ཏུ་བརྩིས་པའི་ལོ་ཁྲི་དྲུག་སྟོང་ནི་དམྱལ་བ་ཆེན་པོ་ཚ་བའི་ཚེའི་ཚད་དོ། །དགེ་སློང་དག་།ཕམ་པར་འགྱུར་བའི་ཆོས་བཞི་པོ་གང་དག་མི་སྲུང་བ་དང ། མི་སྦེད་པ་དང ། ཡོངས་སུ་མི་སྐྱོང་བ་དང ། དེ་དག་ལས་འདའ་ 201a ༄#། །བར་བྱེད་པ་དང ། འདས་པ་དེ་དག་མི་སྟོན་པ་དང ། རབ་ཏུ་མི་སྟོན་པ་དེ་ནི་ལུས་ཞིག་ནས་ཤི་བའི་འོག་ཏུ་དམྱལ་བ་ཆེན་པོ་ཚ་བར་སྐྱེ་བར་འགྱུར་ཏེ། དེ་དག་དེར་ཡང་སྡུག་བསྔལ་ཤིན་ཏུ་དྲག་པ་དང ། རྩུབ་པ་དང ། ཚ་བ་དང ། ཡིད་དུ་མི་འོང་བའི་ཚོར་བ་མྱོང་བར་འགྱུར་རོ། །ཕམ་པར་འགྱུར་བའི་ཆོས་བཞིའི་ལྟུང་བ་བརྟག་པའོ། །དགེ་སློང་དག་།དེ་ལྟ་བས་ན། གང་དེ་དག་བསྟན་བཅོས་ཐོས་པ་རྣམས་ཀྱིས་བདག་ལ་ཕན་པར་བྱ་བ་དང ། སྙིང་བརྩེ་བ་དང ། སྙིང་རྗེ་བ་དང ། དོན་འདོད་པ་དང ། ཕན་པ་ཚོལ་བས་སྙིང་བརྩེ་བ་འདིས་ཁྱེད་ཅག་རྣམས་ཀྱིས་འདི་ལྟར་བྱ་སྟེ། དགེ་སློང་དག་།དགོན་པ་དང ། ཤིང་དྲུང་དང ། ཁང་སྟོང་དང ། རི་ཁྲོད་དང ། རི་ཕུག་དང ། པ་ལ་པུན་ཛཱ་བྷྱ་བ་ཀ་ཤ་དང ། དུར་ཁྲོད་དང ། ནགས་འདབ་དང ། བས་མཐའི་གནས་མལ་དུ་གནས་ཏེ་འདི་དག་ངེས་པར་བསམ་པར་བྱའོ། །དགེ་སློང་དག་།བག་ཡོད་པར་གྱིས་ཤིག་།ཅི་ནས་ཀྱང་ཕྱིས་འགྱོད་པར་འགྱུར་བ་དེ་ལྟར་མ་བྱེད་ཅིག་།འདི་ནི་ངའི་རྗེས་སུ་བསྟན་པའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །ལྟུང་བ་སྡེ་ལྔའི་དགེ་བ་དང ། མི་དགེ་བའི་འབྲས་བུ་བརྟག་པའི་མདོ་རྫོགས་སོ།། །།རྒྱ་གར་གྱི་མཁན་པོ་ཨཱ་ཙཱརྱ་ཛྙཱ་ 201b ན་ཤྲཱི་གུཔྟ་དང ། བོད་ཀྱི་ལོ་ཙྪ་བ་དགེ་སློང་ཤཱཀྱ་བློ་གྲོས་ཀྱིས་བསྒྱུར་ཅིང་གཏན་ལ་ཕབ་པ།། |