rKTs


H311

(e-text produced by ACIP)

see text in transliteration
223b
།།རྒྱ་གར་སྐད་དུ། ཨཱ་ཡུཿ ་པ་ཏཱི་ཡ་ཐཱ་ཀཱ་རོ་པ་རི་པྲྀ་ཙཚ་སཱུ་ཏྲ། བོད་སྐད་དུ། ཚེ་འཕོ་བ་ཇི་ལྟར་འགྱུར་པ་ཞུས་པའི་མདོ། སངས་རྒྱས་དང ། བྱང་ཆུབ་
224a
༄#། །སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་གྲོང་ཁྱེར་ཆེན་པོ་སེར་སྐྱར་ཁྱིམ་བདག་ཐམས་ཅད་འདུལ་བའི་དུས་ལ་བབ་པར་གཟིགས་ནས། དེ་དག་དད་པ་བསྐྱེད་པར་བྱ་བའི་ཕྱིར་འཁོར་ལྔ་བརྒྱ་དང་བཅས་པར་གཤེགས་པ་ལས། དེའི་ཚེ་ཤཱཀྱ་དགའ་སྐྱེས་ཞེས་བྱ་བ་དར་ལ་བབ་པ། གཉེན་གྱི་སྐྱེ་པོ་ཐམས་ཅད་ལ་རབ་ཏུ་གཅེས་པ། མི་ཐམས་ཅད་ཀྱིས་བཀུར་བའི་གནས་སུ་གྱུར་པ་ཞིག་ཚེ་འཕོས་པའི་ཕུང་པོའི་དྲུང་ན་དེའི་བུ་དང ། ཆུང་མ་དང།་སྤུན་དང ། གཡོག་འཁོར་རྣམས་ཀྱིས་རྟའི་ཚོགས་དག། གླང་པོ་ཆེའི་ཚོགས་དང ། གོས་དང ། རྒྱན་སྣ་ཚོགས་པའང་བསགས། གསེར་དངུལ་དང ། མུ་ཏིག་དང ། ཤེལ་ལ་སོགས་པའི་རིན་པོ་ཆེ་སྣ་ཚོགས་པའང་བསགས། བཟའ་བ་དང ། བཏུང་བ་རོ་ཞིམ་པོ་མངར་བ་སྣ་ཚོགས་པའང་བསགས་ཏེ། སྨྲེ་སྔགས་འདོན་ཅིང་དགའ་སྐྱེས་ལ་གསོལ་ལོ་ཞེས་མཆོད་པ་བྱེད་པ་དང ། རྒྱལ་པོ་ཟས་གཙང་མས་བསམས་པ། འདི་ལྟར་ཚེ་འཕོས་པ་ལ་མཆོད་ཅིང་གསོལ་བ་དང ། རྗེད་པ་ནི་བྲམ་ཟེ་དག་གི་སྨྲང་ལས་ཟེར་ན་འདི་དག་ལ་སྨན་པ་དང ། བདེ་བ་ཅི་ཡོད་པ་བཅོམ་ལྡན་འདས་ལ་དྲིའོ་སྙམ་ནས་བཅོམ་ལྡན་འདས་ཀྱི་དྲུང་དུ་སོང་ནས་ཕྱག་བཙལ་ཏེ་འདི་སྐད་ཅེས་གསོལ་ཏོ། །
224b
བཅོམ་ལྡན་འདས། སེམས་ཅན་ཚེ་འཕོས་པ་ཇི་ལྟར་འགྱུར་བའི་དོན་ཞུ་བར་འཚལ་ན་སྐབས་དབྱེ་བར་ཅི་གནང ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཀྱེ་རྒྱལ་པོ་ཆེན་པོ། ཅི་དང ། ཅི་བཞེད་པ་ཞུས་ཤིག་དང ། རྒྱལ་པོ་ཆེན་པོའི་སེམས་རངས་པར་བཤད་པར་བྱའོ། །དེ་སྐད་ཅེས་བཀའ་སྩལ་པ་དང ། བཅོམ་ལྡན་འདས་ལ་རྒྱལ་པོ་ཆེན་པོ་ཟས་གཙང་མས་འདི་སྐད་ཅེས་གསོལ་ཏོ། །བཅོམ་ལྡན་འདས། འཇིག་རྟེན་འདི་ནས་ཚེ་ཕ་རོལ་ཏུ་འཕོས་པའི་སེམས་ཅན་རྣམས་ཕ་རོལ་ཏུ་སྐྱེ་བ་དེ་ལྷ་རྣམས་ཀྱང་ལྷར་སྐྱེའམ། དེ་བཞིན་དུ་མི་དང ། དུད་འགྲོ་དང ། ཡི་དྭགས་དང ། དམྱལ་བ་རྣམས་ཀྱང་མི་དང ། དུད་འགྲོ་དང ། ཡི་དྭགས་དང ། དམྱལ་བ་རྣམས་སུ་ཚེ་འཕོས་པར་རིགས་མ་འདྲེས་པར་སོ་སོར་སྐྱེའམ། བཅོམ་ལྡན་འདས། གཞན་ཡང ། ལྷ་རྣམས་ནས་ཚེ་འཕོས་པ་མི་ལ་སོགས་པ་གཞན་རྣམས་སུ་སྐྱེའམ། དེ་བཞིན་དུ་མི་དང ། དུད་འགྲོ་དང ། ཡི་དྭགས་དང ། དམྱལ་བ་རྣམས་ནས་ཚེ་འཕོས་ནའང་ལྷ་ལ་སོགས་པ་གཞན་རྣམས་སུའང་སྐྱེ་བར་འགྱུར། བཅོམ་ལྡན་འདས། གཞན་ཡང ། སེམས་ཅན་ཐམས་ཅད་འདི་ནས་ཚེ་འཕོས་ནས་ཡེ་མེད་པར་གྱུར་ཏེ། མེ་ཤི་བའི་ཐལ་བ་བཞིན་དུ་གྱུར་ནས་སྐྱེ་བར་ཡེ་མ་མཆིས་སམ། བཅོམ་ལྡན་འདས། གཞན་ཡང ། སེམས་ཅན་ཐམས་ཅད་འདི་ནས་ཚེ་འཕོས་ནས་ཕ་དང ། མེས་པོ་དང ། ཡང་
225a
༄#། །མེས་ལ་སོགས་པ་ཐོག་མ་མེད་པ་ནས་བཟུང་བའི་བར་དུ་བརྒྱུད་པའི་རིས་མཐུན་པ་རྣམས་འཇིག་རྟེན་ཕ་རོལ་ཏུ་སྐྱེ་བ་མི་ལེན་པར་འདིར་ཅི་སྤྱད་པ་བཞིན་འགྲོགས་ཏེ་གནས་སོ་ཞེས་འཇིག་རྟེན་པ་དག་མཆིས་ན་དེ་ལྟར་ལགས་སམ། བཅོམ་ལྡན་འདས། གཞན་ཡང ། འདི་ན་ཕྱུག་དྲེགས་རྒྱགས་པ་རྣམས་ཕ་རོལ་ཏུའང་ཕྱུག་དྲེགས་རྒྱགས་པར་འགྱུར་རམ། འདི་ན་དབུལ་རྒུད་ཉམ་ཆུང་བ་རྣམས་ཕ་རོལ་ཏུའང་དབུལ་རྒུད་ཉམ་ཆུང་བར་འགྱུར་རམ། འོན་ཏེ་དེ་གཉིས་མི་འདྲ་བར་ཕན་ཚུན་བསྣོལ་མར་འགྱུར། བཅོམ་ལྡན་འདས། གཞན་ཡང ། འདི་ན་རྟ་དང ། གླང་པོ་ཆེ་ལ་སོགས་པ་ཞོན་པ་དང ། འདི་ན་གོས་གྱོན་པ་དང ། རྒྱན་ཐོགས་པ་དང ། འདི་ན་ཟས་བཟའ་བ་དང ། བཏུང་བ་དང་ལྡན་པ་རྣམས་ཤི་འཕོས་ནས་ཕ་རོལ་ཏུའང་དེ་བཞིན་དུ་ཞོན་པ་དང ། གྱོན་པ་དང ། ཟ་ཞིང་འཐུང་ངོ་ཞེས་འཇིག་རྟེན་པ་དག་མཆི་ན་དེ་ལྟར་ལགས་སམ། བཅོམ་ལྡན་འདས། གཞན་ཡང ། འདི་ནས་ཤི་འཕོས་པ་ལ་ཕ་མའམ། སྤུན་ནམ། བུ་ལ་སོགས་པ་ཉེ་རིས་རྣམས་ཀྱི་བཟའ་བ་དང ། བཏུང་བ་ཉུང་དུ་ཉུང་དུར་གཏང་བའམ། བསྔོས་པའང་བསྐལ་པ་མང་པོའི་བར་དུ་ཟད་པར་མི་འགྱུར་བར་ཟ་ཞིང་འཐུང་ངོ་ཞེས་འཇིག་རྟེན་པ་དག་མཆི་ན་དེ་ལྟར་ལགས་སམ། བཅོམ་ལྡན་འདས། གཞན་ཡང ། སེམས་ཅན་འདི་ནས་ཚེ་འཕོས་པ་
225b
ན་ཕ་མའམ། སྤུན་ནམ། བུ་ལ་སོགས་པ་ལ་གཏམ་བྱས་ཏེ་ཚིག་ཅི་སྨྲས་པ་དང ། གཟུགས་བྱད་ཅི་འདྲ་བ་དག་ཚེ་འཕོས་ནས་ཕྱིས་ཕ་མའམ། སྤུན་ནམ། བུ་ལ་སོགས་པ་ལ་སྔོན་ཚེ་མ་འཕོས་པའི་དུས་ན་གཏམ་བྱས་པ་ལ་སོགས་པ་སྨྲ་བ་དང ། གཟུགས་བྱད་དག་སྟོན་ཏེ། མཐོང་བ་དང ། ཐོས་པ་ཡོད་ཅེས་འཇིག་རྟེན་པ་དག་མཆི་ན་དེ་ལྟར་ལགས་སམ། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་རྒྱལ་པོ་ཟས་གཙང་མ་ལ་འདི་སྐད་ཅེས་བཀའ་སྩལ་ཏོ། །ཀྱེ་རྒྱལ་པོ་ཆེན་པོ། འདི་ནས་ཤི་འཕོས་ནས་ལྷ་རྣམས་ལྷར་སྐྱེ་བ་ལ་སོགས་པ་འདྲི་བ་དེ་ལྟར་མ་ལགས་ཏེ། ལྷ་རྣམས་ཚེ་འཕོས་པའང་ལྷར་སྐྱེས་ནས་འགྲོ་བ་རིས་གཞན་རྣམས་སུ་མི་སྐྱེ་བ་ལགས་པ་ནས་དེ་བཞིན་དུ་མི་ལ་སོགས་པ་འགྲོ་བ་གཞན་རྣམས་ཀྱང་ཚེ་འཕོས་ནས་འགྲོ་བ་གཞན་དང ། གཞན་རྣམས་སུ་མི་སྐྱེ་བར་རང་རང་གི་སྔ་མའི་རིས་རྣམས་སུ་སྐྱེ་བ་ལགས་ན་ནི། ཀྱེ་རྒྱལ་པོ་ཆེན་པོ། མི་རྣམས་དང་པོ་ལྷ་ལས་གྱུར་པ་ལགས་ལ། ངན་སོང་གསུམ་པོ་རྣམས་ནི་མི་རྣམས་ཀྱིས་མི་དགེ་བ་སྤྱད་པ་ལས་གྱུར་པ་ལགས་པའི་ཕྱིར་གང་ལྷ་ལ་སོགས་པ་ཚེ་འཕོས་པ་དེ་འགྲོ་བ་རིས་གཞན་དང ། གཞན་རྣམས་སུ་སྐྱེ་བ་ལགས་སོ། །ཀྱེ་རྒྱལ་པོ་ཆེན་པོ། གཞན་ཡང ། རྒྱལ་པོ་ཆེན་པོས་གསུངས་པ་ལྟར་ལགས་ན་ནི་ད་ལྟར་གྱི་འགྲོ་བ་རིས་དྲུག་པོ་རྣམས་མང་བ་དང ། ཉུང་བ་རྣམས་ཇི་ལྟར་ཡོད་པ་བཞིན་དུ་དུས་
226a
༄#། །ཐམས་ཅད་དུ་དེ་ལྟར་འགྱུར་བའི་རིགས་ན། མི་རྣམས་ལས་མི་དགེ་བ་སྤྱད་པ་མང་པའི་རྒྱུས་ངན་སོང་གསུམ་པོ་རྣམས་ཕྱིར་ཞིང་མང་བ་ལ་གཟིགས། ཀྱེ་རྒྱལ་པོ་ཆེན་པོ། གཞན་ཡང ། ད་ལྟར་གྱི་དགྲ་བཅོམ་པ་འདི་དག་ནི་མི་ལས་གྱུར་པ་ལགས་ན། འགྲོ་བ་རིས་སོ་སོར་མ་འདྲེས་བར་ཡང་རིས་སོ་སོར་སྐྱེ་བ་ནི་མི་རིགས་སོ། །དགྲ་བཅོམ་པའི་འབྲས་བུ་ཐོབ་པར་ཡང་མི་རིགས་སོ། །ཀྱེ་རྒྱལ་པོ་ཆེན་པོ། དེའི་ཕྱིར་ན་ལས་དགེ་བ་དང ། མི་དགེ་བའི་དབང་གིས་མཐོ་རིས་དང ། ངན་སོང་ལ་སོགས་པར་རིས་ཐ་དད་པར་སྐྱེ་བར་འགྱུར་རོ། །ཀྱེ་རྒྱལ་པོ་ཆེན་པོ། རྒྱལ་པོ་ཆེན་པོས་ལྷ་རྣམས་ཚེ་འཕོས་ནས་མི་ལ་སོགས་པ་གཞན་རྣམས་སུ་སྐྱེའམ་ཞེས་བྱ་བ་ལ་སོགས་པ་དྲིས་པ་ནི་དེ་དེ་བཞིན་ལགས་ཏེ། དེ་དེ་ལྟར་ལགས་སོ། །ཀྱེ་རྒྱལ་པོ་ཆེན་པོ། རྒྱལ་པོ་ཆེན་པོས་སེམས་ཅན་ཐམས་ཅད་ཚེ་འཕོས་ནས་ཡེ་མེད་པར་གྱུར་ཏེ་མེ་ཤི་བའི་ཐལ་བ་བཞིན་དུ་སྐྱེ་བ་ཡེ་མ་མཆིས་སམ་ཞེས་གསུངས་པ་ནི་དེ་ལྟར་མ་ལགས་ཏེ། ཀྱེ་རྒྱལ་པོ་ཆེན་པོ། དཔེར་ན། ས་བོན་ཡོད་ན་འབྲས་བུ་འབྱུང་སྟེ། ཚེ་འདི་ས་བོན་ལྟ་བུ་ལས་ཚེ་ཕྱི་མ་འབྲས་བུ་ལྟ་བུ་ཡོད་དོ། །ཀྱེ་རྒྱལ་པོ་ཆེན་པོ།་ཉི་མ་ཤར་ནས་ཁད་ཀྱིས་ནུབ་སྟེ་སྨག་ཏུ་གྱུར་པ་ལས་ཡང་ནང་པར་འཆར་བ་བཞིན་དུ་ཚེ་འདི་འཕོས་ནས་ཡང་སྐྱེ་བ་ཕྱི་མ་ལེན་ནོ། །ཀྱེ་རྒྱལ་པོ་ཆེན་པོ། ཚེ་འཕོས་ནས་ཕྱི་མར་
226b
སྐྱེ་བ་ཡེ་མ་མཆིས་ན་འགྲོ་བ་རྣམས་ཟད་པའི་རིགས་སོ། །ཀྱེ་རྒྱལ་པོ་ཆེན་པོ། ཕྱི་རོལ་གྱི་རྩཝ་དང ། ཤིང་རྣམས་ཀྱང་དུས་ཀྱི་དབང་གིས་བསྐམས་པ་དེའང་ཕྱིར་སྐྱེའོ། །དེ་བཞིན་དུ་སེམས་ཅན་རྣམས་ལས་དང ། ཉོན་མོངས་པ་དུས་འགྱུར་བ་དང་འདྲ་བའི་དབང་གིས་སྐྱེ་བ་དང ། འཆི་བར་འགྱུར་རོ། །དེའི་ཕྱིར་ན་རྒྱལ་པོ་ཆེན་པོ་ཚེ་ཕྱི་མ་ངེས་པར་ཡོད་པར་མཁྱེན་པར་མཛོད་ཅིག་།ཀྱེ་རྒྱལ་པོ་ཆེན་པོ། རྒྱལ་པོ་ཆེན་པོས་སེམས་ཅན་ཐམས་ཅད་འདི་ནས་ཚེ་འཕོས་ནས་ཕ་དང ། མེས་པོ་དང ། ཡང་མེས་ལ་སོགས་པ་ཐོག་མ་མེད་པ་ནས་བཟུང་བའི་བར་དུ་གཅིག་ནས་གཅིག་ཏུ་བརྒྱུད་པའི་རིས་མཐུན་པ་རྣམས་འཇིག་རྟེན་ཕ་རོལ་ན་སྐྱེ་བ་མི་ལེན་པར་འདི་ན་ཅི་སྤྱོད་པ་བཞིན་འགྲོགས་ཏེ་གནས་སོ་ཞེས་འཇིག་རྟེན་པ་དག་མཆི་ན། དེ་དེ་ལྟར་ལགས་སམ། ཞེས་གསུང་བ་ནི། ཀྱེ་རྒྱལ་པོ་ཆེན་པོ། འདི་ན་ཕ་དང ། བུ་ལ་སོགས་པ་གཅིག་ལ་གཅིག་སྣང་པ་ནི་གཟུགས་དངོས་པོ་ཅན་གཅིག་ལ་གཅིག་སྣང་གི་།སེམས་གཅིག་གིས་གཅིག་མཐོང་བ་ནི་མ་ཡིན་ཏེ། གཟུགས་ཀྱི་ཕུང་པོ་འདིར་ཞིག་སྟེ་མེད་ན། ཕ་རོལ་ན་སེམས་གཅིག་ལ་གཅིག་ཇི་ལྟར་སྣང་སྟེ་འགྲོགས། ཚེ་འཕོས་པའི་ཕ་དང ། མེས་པོ་དང ། ཡང་མེས་ལ་སོགས་པ་ད་ལྟར་ཚེ་མ་འཕོས་པའི་བུ་ཚ་གཟུགས་ཡོད་པས་ཀྱང་མི་མཐོང་ན་ཕ་རོལ་ཏུ་ཚེ་འཕོས་པའི་ལུས་མེད་པས་ཕ་དང ། མེས་པོ་དང ། ཡང་སེམས་ལ་སོགས་པ་གཟུགས་མེད་པ་ཇི་ལྟར་མཐོང་ནས་
227a
༄#། །འགྲོགས། ཀྱེ་རྒྱལ་པོ་ཆེན་པོ། གཞན་ཡང ། འདི་ན་ཕ་དང ། བུ་དང ། སྤུན་མང་པོ་འགྲོགས་པའི་དུས་ནའང་གཟུགས་སོ་སོར་སྣང་བ་ལས་མ་གཏོགས་པ་རང་གི་སེམས་ཀྱང་རང་གིས་མི་མཐོང་ན་སྤད་དང་སྤུན་གྱི་སེམས་གཅིག་གིས་གཅིག་ལྟ་ག་ལ་མཐོང་ན། ཚེ་འཕོས་ནས་ཇི་ལྟར་མཐོང་སྟེ། ཕ་རོལ་ན་སྤད་དང ། སྤུན་དང ། མེས་པོ་དང།་ཡང་མེས་ལ་སོགས་པ་ཇི་ལྟར་སྣང་ནས་འགྲོགས། ཀྱེ་རྒྱལ་པོ་ཆེན་པོ། ཐོག་མ་མེད་པའི་དུས་ན་དེ་བས་སྔ་བ་མེད་པའི་མེས་པོ་དང ། ད་ལྟའི་བུ་ཚ་རྣམས་ཕ་རོལ་ན་འགྲོགས་ན་ད་ལྟར་མིའི་རུས་དང ། རིགས་དང ། ཕྱོགས་དང ། རིས་མི་གཅིག་པ་ཐ་དད་པ་མང་པོ་ཇི་སྙེད་པ་རྣམས་སོ་སོར་དགྲར་གྱུར་པ་རྣམས་དང ། གནས་གང་ན་འདུག་པ་དང ། རུས་རིགས་གཅིག་པ་དང ། སྐད་དང ། ཆ་ལུགས་མ་ཐོས་པ་དང ། མ་མཐོང་བ་དག་ཀྱང་ཐོག་མ་མེས་པོ་གཅིག་ལས་གྱེས་པ་ཡིན་ན་ད་ལྟར་སྤད་དང ། སྤུན་དང ། མེས་པོ་ལ་སོགས་པ་འགྲོགས་མི་འགྲོགས་ཀྱི་མཚམས་སྤུན་དང ། སྤད་གང་ལ་གཟུང ། དང་པོ་མེས་པོ་ནས་བཟུང་སྟེ་ད་ལྟར་སྤུན་དང ། སྤད་ཀྱི་བར་དུ་བརྒྱུད་པ་རྣམས་ཀྱང་ད་ལྟར་གྱི་སྤད་དང ། སྤུན་འདྲ་བར་སོ་སོ་ན་བརྩེ་ཞིང་གདུང་བར་འདྲན་གང་གང་ནི་འགྲོགས། གང་གང་ནི་མི་འགྲོགས། ད་ལྟར་གྱི་མི་རྣམས་སོ་སོ་ནས་བདག་ཅག་གི་མེས་པོ་འདི་ཡིན་ནོ་ཞེས་ཕྱོགས་དང ། རིས་བཟུང་སྟེ། བདག་ཅག་
227b
འདི་དང་ཕ་གཅིག་གི་བུའོ་ཞེས་ཕྱོགས་དང ། རིས་སུ་བཅད་ན་དེ་དག་གིས་མེས་པོ་ཞེས་སོ་སོར་བཟུང་བ་དེ་ཀུན་གྱི་ཡང་ཕ་དང ། མེས་པོ་དང ། ཡང་མེས་དང ། ཞེས་མེས་ནས་དང་པོའི་མེས་པོ་ལ་ཐུག་གི་པར་དུ་བརྒྱུད་པ་ནི་ད་ལྟར་སོ་སོར་ན་བདག་ཅག་གི་མེས་པོ་ཞེས་བཟུང་བ་ཡིན་ན་འཇིག་རྟེན་པ་དག་སྨྲ་བ་ལྟར་འདི་ནས་ཚེ་འཕོས་ནས་སྐྱེ་བ་མི་ལེན་པར་ཕ་རོལ་ན་སྤད་དང ། སྤུན་འགྲོགས་ན་ད་ལྟར་རུས་རིགས་དང ། ཕྱོགས་མི་གཅིག་པ་དང ། དགྲར་གྱུར་པ་ཀུན་ཀྱང་ཕྱོགས་གཅིག་ནས་འགྲོགས་དགོས་སོ། །ཀྱེ་རྒྱལ་པོ་ཆེན་པོ། ད་ལྟར་གྱི་ཚེ་འདི་གཟུགས་ཅན་དངོས་པོར་སྣང་བའང་མུན་པ་དང ། ཕག་ན་འདུག་པ་དག་གཅིག་གིས་གཅིག་མི་མཐོང་ན་ཚེ་འཕོས་པའི་སེམས་གཟུགས་མེད་པས་གཅིག་གིས་གཅིག་ཇི་ལྟར་མཐོང་ནས་འགྲོགས་པར་འགྱུར། ཀྱེ་རྒྱལ་པོ་ཆེན་པོ། ད་ལྟར་གྱི་སེམས་ཅན་གཟུགས་དང་ལྡན་པས་ཀྱང་མི་མཐོང་བའི་གནས་ཡུལ་མི་གཅིག་པ་དང ། གནས་ཐ་དད་པ་དག་ལ་རང་གི་གཟུགས་སྣང་བར་སྟོན་མི་ནུས་ན་ཚེ་འཕོས་ནས་ཇི་ལྟར་གཟུགས་སྣང་བར་སྟོན་ནུས། ཀྱེ་རྒྱལ་པོ་ཆེན་པོ། འཇིག་རྟེན་པ་ཁ་གཅིག་གིས་གྲགས་པ་དང ། རྙེད་པ་དག་བཙལ་བའི་ཕྱིར་བཟླས་པའི་གཏམ་གྱིས་གཞན་སླུ་བར་བྱེད་པ་ལ་གསན་པར་མི་རིགས་སོ། །ཀྱེ་རྒྱལ་པོ་ཆེན་པོ། རྒྱལ་པོ་ཆེན་པོས་འདི་ན་ཕྱུག་དྲེགས་རྒྱགས་པ་རྣམས་ཕ་རོལ་ཏུའང་ཕྱུག་དྲེགས་རྒྱགས་པར་འགྱུར་རམ། འདི་ན་དབུལ་རྒུད་ཉམ་
228a
༄#། །ཆུང་བ་རྣམས་ཕ་རོལ་ཏུའང་དབུལ་རྒུད་ཉམ་ཆུང་བར་འགྱུར་རམ། འོན་ཏེ་དེ་གཉིས་མི་འདྲ་བར་ཕན་ཚུན་སྣོལ་བར་འགྱུར་ཞེས་གསུངས་པ་གང་ཡིན་པ་དེ་ནི། ཀྱེ་རྒྱལ་པོ་ཆེན་པོ། སེམས་ཅན་རྣམས་ཚེ་མ་འཕོས་པའི་སྐྱེ་བ་འདི་ལའང་ལ་ལ་སྐྱེས་མ་ཐག་ཏུ་ཕྱུག་དྲེགས་རྒྱགས་པར་གྱུར་པ་ལས་ལོ་ལྔ་བཅུ་དང ། དྲུག་ཅུ་ནས་འཁོགས་པའི་བར་དུ་དབུལ་རྒུད་ཉམ་ཆུང་བའང་ཡོད། ལ་ལ་སྐྱེས་ནས་གཞོན་དར་བའི་ཚེ་ལ་དབུལ་རྒུད་པ་ལས་ལོ་ལྔ་བཅུ་དང ། དྲུག་ཅུ་ནས་འཁོགས་པའི་བར་དུ་ཕྱུག་དྲེགས་རྒྱགས་པ་དག་ཡོད་ན་ཚེ་འཕོས་ནས་ཕྱུག་དབུལ་མི་རྟག་པ་ལྟ་ཅི་སྨོས། ཀྱེ་རྒྱལ་པོ་ཆེན་པོ། དཔེར་ན། འཇིག་རྟེན་ན་རྩཝ་དང ། ཤིང་ལ་སོགས་པ་དྲོ་བ་དང ། རླན་པའི་རྐྱེན་ཚོགས་པའི་ཚེ་ནི་ལོ་མ་དང ། འདབ་མ་རྒྱས་པར་འགྱུར་ལ། གྲང་ཞིང་རླན་མེད་པའི་རྐྱེན་གྱིས་བསྐམ་པར་འགྱུར་བ་བཞིན་དུ་སྦྱིན་པ་ལ་སོགས་པའི་རྐྱེན་གྱིས་ནི་ཕྱུག་དྲེགས་རྒྱགས་པར་འགྱུར་ལ། རྐུ་འཕྲོག་དང ། སེར་སྣའི་དབང་གིས་ནི་དབུལ་རྒུད་པར་འགྱུར་རོ། །ཀྱེ་རྒྱལ་པོ་ཆེན་པོ། སྦྱིན་པ་རྒྱུན་མ་ཆད་པས་ཚེ་རབས་ནས་ཚེ་རབས་སུ་ཕྱུག་དྲེགས་རྒྱགས་པའང་ཡོད། ཕྱོགས་ཆ་དང ། སྦྱིན་པ་ལ་འགྱོད་པ་བྱས་པས་ཚེ་འགའ་དང ། ཚེ་སྟོད་སྨད་ལ་དབུལ་རྒུད་པའང་ཡོད་དོ། །དུས་ཐམས་ཅད་དུ་རྐུ་འཕྲོག་དང ། སེར་སྣ་དག་ལ་གནས་པས་ཚེ་རབས་ནས་ཚེ་རབས་སུ་
228b
དབུལ་རྒུད་པའང་ཡོད། རྐུ་འཕྲོག་དང ། སེར་སྣ་ལ་འགྱོད་པ་བྱས་པས་ཚེ་འགའམ། ཚེ་སྟོད་སྨད་ལ་ཕྱུག་དྲེགས་པའང་ཡོད་དོ། །ཀྱེ་རྒྱལ་པོ་ཆེན་པོ། སྦྱིན་པའི་རྐྱེན་གྱིས་དབུལ་རྒུད་པའང་མི་འབྱུང་ངོ ། །སེར་སྣའི་དབང་གིས་ཕྱུག་དྲེགས་པའང་མི་འབྱུང་ངོ ། །ཕྱུག་དྲེགས་པ་དང ། དབུལ་རྒུད་པ་འདི་གཉིས་ཚེ་སྔ་ཕྱི་ལ་རྗེ་བའང་མ་ལགས་སོ། །ཀྱེ་རྒྱལ་པོ་ཆེན་པོ། རྒྱལ་པོ་ཆེན་པོས་འདི་ན་རྟ་དང ། གླང་པོ་ཆེ་ལ་སོགས་པ་ཞོན་པ་དང ། འདི་ན་གོས་གྱོན་པ་དང ། རྒྱན་ཐོགས་པ་དང ། འདི་ན་ཟས་བཟའ་བ་དང ། བཏུང་བ་དང་ལྡན་པ་རྣམས་ཚེ་འཕོས་ནས་ཕ་རོལ་ཏུ་འང་དེ་བཞིན་དུ་ཞོན་པ་དང ། གྱོན་པ་དང ། ཟ་ཞིང་འཐུང་ངོ་ཞེས་འཇིག་རྟེན་པ་དག་མཆི་ན་དེ་དེ་ལྟར་ལགས་སམ་ཞེས་གསུངས་པ་ནི། ཀྱེ་རྒྱལ་པོ་ཆེན་པོ། མི་རྣམས་ཚེ་འཕོས་པའི་ཚེ་ལས་དགེ་སྡིག་གང་སྤྱད་པ་བཞིན་མཐོ་རིས་དང ། ངན་སོང་དག་ཏུ་སྐྱེ་བ་ལེན་ཏེ། རྒྱལ་པོ་ཆེན་པོ། འཇིག་རྟེན་པ་དག་མཆི་བ་ལྟར་མ་ལགས་སོ། །ཚེ་འཕོས་པ་འདིའི་ཆ་ལུགས་ལྟར་སྣང་བ་ནི་བར་སྣང་གི་ཁམས་འདི་ན་དྲི་ཟའི་འཇིག་རྟེན་གྱི་ཁམས་དཔག་ཏུ་མེད་པ་བསམ་གྱིས་མི་ཁྱབ་པ་མཐར་ཐུག་པ་མེད་པ་ཡོད་དོ། །དྲི་ཟ་འཆི་ཀ་མའི་སེམས་ལ་ཉེ་བར་འཇུག་པ་ཞེས་བྱ་བའི་རིགས་ཡོད་དེ། དེས་དྲི་ཟའི་ཟས་བཙལ་བའི་ཕྱིར་ཚེ་རབས་སྔ་མའི་ལུས་དང ། གོས་དང ། རྒྱན་དང ། ཆ་ལུགས་ལྟ་བུ་དག་སྤྲུལ་པར་བྱེད་དེ། ཚེ་འཕོས་པ་དེའི་ཆ་ལུགས་དང ། གཏམ་དག་
229a
༄#། །བྱེད་ཅིང་སྤྲུལ་པ་སྟོན་པའང་ཡོད་དོ། །ཀྱེ་རྒྱལ་པོ་ཆེན་པོ། འདི་ལ་གཞན་ཡང་ཡོད་དེ། དྲི་ཟ་ལས་མ་གཏོགས་པ་གཞན་ཡང་གནོད་སྦྱིན་དང ། ཤ་ཟ་དང ། འབྱུང་པོ་ལ་སོགས་པས་ཚེ་འཕོས་པའི་ཕའམ། བུའམ། སྤུན་ལ་སོགས་པ་བསླུ་བའི་ཕྱིར་མི་མ་ཡིན་པ་དེ་ཡིས་འཇིག་རྟེན་པའི་རྫུ་འཕྲུལ་གྱིས་ཚེ་འཕོས་པའི་གཏན་ཚིགས་དང ། ས་མལ་དང ། ལོ་རྒྱུས་དག་ཤེས་པར་བྱས་ནས་མི་མ་ཡིན་པ་དེའི་བྱིན་གྱིས་ཕ་མ་ལ་སོགས་པས་མཐོང་བ་དང ། རྨི་ལམ་དུ་འབྱུང་བ་ཡོད་དོ། །ཀྱེ་རྒྱལ་པོ་ཆེན་པོ། འདི་ལ་གཞན་ཡང་ཡོད་དོ། །སྤད་དང ། སྤུན་ལ་སོགས་པ་ཡུན་རིང་པོར་ལྷན་ཅིག་པའི་བག་ཆགས་རྟས་པས་མཐོང་བ་དང ། རྨི་ལམ་དུ་སྣང་བའང་ཡོད་དེ། དཔེར་ན། མི་ཞིག་གིས་ད་ལྟར་ཚེ་མ་འཕོས་པའི་རང་གི་ཕ་མའམ། སྤུན་ཟླའམ། བྲན་ཁོལ་ལམ། གཞན་སུའང་རུང་བ་དག་དང་འགྲོགས་པ་དང ། ལོངས་སྤྱོད་ཀྱི་བདེ་བའམ། དགྲ་རྐུན་དང ། འཐབ་རྩོད་ལ་སོགས་པ་བདེ་བ་དང ། སྡུག་བསྔལ་གང་ཡང་རུང་བ་དག་རྨིས་ན་མི་དེས་རྨིས་པ་བཞིན་དུ་གང་རྨིས་པའི་ཕ་མའམ། སྤུན་ཟླའམ། བྲན་ཁོལ་ལམ། གཞན་སུའང་རུང་བ་རྨི་ལམ་ན་སྣང་བ་དེས་ཚོར་བ་ཡོད་ན་ནི་རྨིས་པ་དེ་བདེན་པ་ཡིན་ན་དེས་རྨིས་པའི་ཕ་མའམ། སྤུན་ཟླའམ། བྲན་ཁོལ་ལམ། གཞན་སུའང་རུང་བ་རྨི་ལམ་ན་སྣང་བ་དེ་བདེན་པར་
229b
ཇི་ལྟར་བཟུང ། ཀྱེ་རྒྱལ་པོ་ཆེན་པོ། ཚེ་མ་འཕོས་པའང་གཅིག་གིས་རྨིས་པ་གཅིག་གིས་མི་ཚོར་ན་ཚེ་འཕོས་པའི་རྨིས་པ་ཚེ་འཕོས་པ་དེ་ཡིན་པར་ག་ལ་འགྱུར་ཏེ། བག་ཆགས་རྟས་པ་ཡིན་ནོ། །ཀྱེ་རྒྱལ་པོ་ཆེན་པོ། བག་ཆགས་ལགས་པའི་དཔེ་ནི་གཞན་ཡང་མཆིས་ཏེ། མི་ཞིག་སྔོན་ཚེ་སྟོད་ལ་མཆིས་པའི་མཁར་དང ། ཁང་པ་དང ། གྲོང་གང་ཡིན་པ་ཞིག་བོར་ཏེ། ཡུལ་གཞན་ཞིག་ཏུ་ཚེ་སྨད་ལ་འདུག་པ་ན་སྔོན་གྱི་གྲོང་དེའང་ཞིག་སྟེ། སྔོན་མི་འདྲ་བ་ལས་མི་དེས་སྔོན་གྱི་ཁང་བའི་དབྱིབས་དང ། རྒྱ་ཅི་འདྲ་བ་མ་ཞིག་པ། མ་འདྲམས་པ་རྨིས་ན་གྲོང་དང ། ཁང་པ་དེ་ལ་སེམས་ཡོད་ན་ནི་ཁང་པ་དེས་སེམས་སྣང་དུ་རུང་ན། ཁང་པ་དང ། གྲོང་དེས་རྡོ་བེམས་པོ་ཡིན་ན་མི་དེས་རྨིས་པ་དེ་ཅིའི་ཕྱིར་བག་ཆགས་རྟས་པ་མ་ཡིན། དེ་བཞིན་དུ་ཚེ་འཕོས་པའི་དན་རྟགས་དང་བཅས་པའང་ཁང་པ་མ་ཞིག་པ་རྨིས་པ་དང་འདྲ་སྟེ། ཚེ་འཕོས་པའི་སེམས་ཀྱང་ལས་གར་མཐུན་པར་སྐྱེ་བ་བླངས་ཟིན་ན་དེ་སྣང་དུ་བཏུབ་བམ། ཀྱེ་རྒྱལ་པོ་ཆེན་པོ། དེའི་ཕྱིར་བག་ཆགས་མཐུ་རྟས་པའི་དབང་གིས་ཚེ་འཕོས་པའི་གཏན་ཚིགས་དང ། ཆ་ལུགས་མཐོང་བ་དང ། རྨིས་པ་ཡིན་ནོ། །དེ་བཞིན་དུ་རལ་གྲི་ལ་སོགས་པའི་གོ་མཚོན་ཐོགས་པ་དང ། གོས་དང ། རྒྱན་ལ་སོགས་པ་གྱོན་པ་དང ། རྟ་དང ། གླང་པོ་ཆེ་ལ་སོགས་པ་ཞོན་པར་སྣང་བ་དང ། རྨི་ལམ་དུ་འབྱུང་བའང་བག་ཆགས་སྣང་བ་ཡིན་ཏེ། ཁང་པའི་དཔེ་བཞིན་དུ་རིག་པར་བྱའོ། །
230a
༄#། །ཀྱེ་རྒྱལ་པོ་ཆེན་པོ། རྒྱལ་པོ་ཆེན་པོས་འདི་ནས་ཤི་འཕོས་པ་ལ་ཕ་མའམ། སྤུན་ནམ། བུ་ལ་སོགས་པ་ཉེ་རིས་རྣམས་ཀྱིས་བཟའ་བ་དང ། བཏུང་བ་ཉུང་དུ་ཉུང་ངུར་གཏང་བ་དང ། བསྔོས་པའང་བསྐལ་པ་མང་པོའི་བར་དུ་ཟད་པར་མི་འགྱུར་བར་ཟ་ཞིང་འཐུང་ངོ་ཞེས་འཇིག་རྟེན་པ་དག་མཆིས་ན་དེ་ལྟར་ལགས་སམ་ཞེས་གསུངས་པ་ནི། ཀྱེ་རྒྱལ་པོ་ཆེན་པོ། གླིང་བཞི་པ་ནས་སྟོང་གི་འཇིག་རྟེན་གྱི་ཁམས་དང ། སྟོང་གཉིས་པ་དང ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱིས་ཁམ་སང ། འཇིག་རྟེན་གྱི་ཁམས་མཐའ་ཡས་པ་དཔག་ཏུ་མེད་པ་བསམ་གྱིས་མི་ཁྱབ་པ་ཐམས་ཅད་ན་བཟའ་བ་དང ། བཏུང་བ་ཉུང་ངུ་ཉུང་དུས་དུས་ཐམས་ཅད་དང ། བསྐལ་པ་མང་པོར་ཟ་བའི་སེམས་ཅན་གཟིགས་སམ། གསན་ནམ། ཀྱེ་རྒྱལ་པོ་ཆེན་པོ། ཡིད་བཞིན་གྱི་ནོར་བུ་རིན་པོ་ཆེ་ལ་ཅི་བསམས་པའི་འདོད་པ་འབྱུང་བ་འཁོར་ལོས་བསྒྱུར་བའི་རྒྱལ་པོ་ལ་ཡོད་པའང་སྔོན་བསྐལ་པ་མང་པོར་བསོད་ནམས་ཀྱི་ཚོགས་མེད་པ་བསགས་པ་ལས་བྱུང་བ་ཡིན་ཏེ། གནམ་བབས་དང ། གློ་བུར་དུ་བྱུང་བ་ནི་མ་ཡིན་ན་བཟའ་བ་དང ། བཏུང་བ་ཉུང་ངུ་དེ་བསྐལ་པ་མཐའི་བར་དུ་མི་ཟད་པ་དེ་རིགས་ལགས་སམ། ཀྱེ་རྒྱལ་པོ་ཆེན་པོ། ཚེ་མ་འཕོས་པའི་ཕ་སྤད་དང ། སྦུན་གཅིག་ལ་གཅིག་འབྲེལ་བར་འཛིན་པ་ཕན་པར་འདོད་པ་རྣམས་ད་ལྟར་མ་
230b
ཤི་པ་ལུས་དང་ལྡན་པའང་གཅིག་ཡུལ་གཞན་དུ་སོང་ན་དེ་ལ་ཕ་མའམ། པུའམ། སྤུན་གང་ཡང་རུང་བས་ཟས་སྐོམ་མང་པོར་སྦྱིན་ནོ་གསོལ་ལོ་ཞེས་བསྔོས་པའང་ཡུལ་གཞན་དུ་སོང་བའི་རྨི་ལམ་དུའང་མི་འབྱུང་ན་དངོས་པོར་ཟ་ཞིང་འཐུང་བ་ལྟ་ག་ལ་ཡོད། ཚེ་འཕོས་ནས་ལུས་དང་བྲལ་བ་ལ་བསྔོས་ཤིང་གཏད་པ་ཟ་ཞིང་འཐུང་བ་ལྟ་ག་ལ་ཡོད། ཀྱེ་རྒྱལ་པོ་ཆེན་པོ། ཚེ་འཕོས་ནས་སེམས་ལུས་དང་བྲལ་བ་དེས་བུ་དང ། སྤུན་ལ་སོགས་པས་གཏད་པའི་ཟས་དང ། སྐོམ་དངོས་པོ་ཅན་འདི་དག་སེམས་དངོས་པོ་མེད་པ་གཟུགས་མེད་པས་ཇི་ལྟར་བདག་པོ་བྱེད་པར་འགྱུར། དེ་ཅིའི་ཕྱིར་ཞེ་ན། བཟའ་བ་དང ། བཅའ་བ་ནི་ལུས་ཡོད་པའི་ཡན་ལག་གི་རྩོལ་བ་ལ་རག་ལུས་ན་སེམས་ལ་ལུས་ཀྱི་ཡན་ལག་དེའི་རྩོལ་བ་ཡོད་དམ། རྒྱལ་པོ་ཆེན་པོས་གསོལ་པ། བཅོམ་ལྡན་འདས། དེ་ལྟར་ལགས་ན་ཚེ་འཕོས་པ་ལ་འདི་ན་ཕུན་འདོགས་པའི་བཟའ་བཏུང་དང ། ཞོན་པ་དང ། གོས་དང ། རྒྱན་གཏོང་བ་འདི་དག་ལ་དོན་མ་མཆིས་པ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ། ཚེ་འཕོས་པ་དེས་ལས་གང་སྤྱད་པའི་རྣམ་པར་སྨིན་པས་འགོར་བ་རིས་ཐ་དད་པ་གནག་དུ་སྐྱེ་བ་ལེན་པ་དེ་ལ་མི་དགེ་བ་དང་མ་འབྲེལ་བའི་བསོད་ནམས་ཀྱི་ཚོགས་སུ་འགྱུར་བའི་ལས་དགེ་བ་སྣ་ཚོགས་པས་བསྟངས་ན་མཐོ་རིས་དང ། ཐར་པར་ཡང་སྐྱེ་ལ། གལ་ཏེ་སྐྱེ་བ་བླངས་པ་ཞིག་ལ་
231a
༄#། །བསོད་ནམས་སུ་འགྱུར་བའི་ལས་དགེ་བ་ཞིག་གིས་བསྟངས་ན་སྐྱེ་བ་བླངས་པ་དེས་ནོར་རྙེད་པ་དང ། ལོ་ལེགས་པ་དང ། འདོད་པའི་ལོངས་སྤྱོད་འཕེལ་བ་དང་འགྲོ་བ་གཞན་ཐམས་ཅད་ཀྱིས་མཆོད་ཅིང་བཀུར་བར་འགྱུར་བའི་ཕན་པ་ཡོད་ཀྱི། ཚེ་འཕོས་པ་སྐྱེ་བ་མི་ལེན་པར་གཤིན་གྱི་འཇིག་རྟེན་ཡོད་ནས་བཟའ་བཏུང་དང ། བཞོན་པ་དང ། གོས་དང ། རྒྱན་དག་བདག་པོར་བྱེད་པ་མ་ཡིན་ནོ། །ཀྱེ་རྒྱལ་པོ་ཆེན་པོ། འཇིག་རྟེན་པ་དག་གང་གིས་མཐོང་བ་དང ། ཕ་མ་ལ་སོགས་པས་རྨི་ལམ་དུ་རྨིས་ཏེ། ཚེ་འཕོས་པ་ལས་བསྔོས་པས་གཤིན་དེ་བཟའ་བཏུང་གིས་མགུའོ། །བཞོན་པ་ཞོན་ནོ། །གོས་གྱོན་ནོ། །རྒྱན་ཐོགས་སོ་ཞེས་སྨྲ་ཞིང་དེ་ལྟར་སྣང་བ་དེའང་བཟའ་བཏུང་གིས་མི་མགུའོ། །བཞོན་པ་མེད་དོ། །གོས་མི་གྱོན་ནོ། །རྒྱན་མི་ཐོགས་སོ་ཞེས་སྨྲ་ཞིང་དེ་ལྟར་སྣང་བ་དག་དྲི་ཟ་འཆི་ཀའི་སེམས་ལ་ཉེ་བར་འཇུག་པ་དང ། མི་མ་ཡིན་པ་དག་གིས་དེ་ལྟར་སྣང་བར་བྱེད་པ་ཡོད་དོ། །ཀྱེ་རྒྱལ་པོ་ཆེན་པོ། རྒྱལ་པོ་ཆེན་པོས་སེམས་ཅན་དག་འདི་ནས་ཚེ་འཕོ་ཁ་ན་ཕ་མའམ། སྤུན་ནམ། བུ་ལ་སོགས་པ་ལ་གཏམ་བྱས་པ་དང ། ཚིག་ཅི་སྨྲས་པ་དང ། གཟུགས་ཅི་འདྲ་བ་དག་དེ་ཚེ་འཕོས་ནས་ཕྱིས་ཕ་མ་དང ། སྤུན་ནམ། བུ་ལ་སོགས་པ་ལ་དེ་སྔོན་ཚེ་མ་འཕོས་པའི་དུས་ན་གཏམ་བྱས་པ་ལ་སོགས་པ་སྨྲ་བ་དང ། གཟུགས་བྱད་སྟོན་ཏེ། དེ་
231b
ལྟ་བུ་མཐོང་བ་དང ། སྟོན་པ་ཡོད་ཅེས་འཇིག་རྟེན་པ་དག་མཆི་ན། དེ་ལྟར་ལགས་སམ། མ་ལགས་ཞེས་གསུངས་པ་ནི། ཀྱེ་རྒྱལ་པོ་ཆེན་པོ། སྨྲ་བ་ནི་ལུས་ཡོད་པའི་ཁ་ལྕེ་ལ་བརྟེན་ནས་སྨྲ་བ་ལགས་ན་ཚེ་འཕོས་པའི་ལུས་ནི་འདིར་བཞག་ན་སེམས་གཟུགས་མེད་པ་དེ་ཇི་ལྟར་སྨྲ། དེ་སྟེ་ཤི་བ་དེ་ལ་ལུས་ཡོད་དོ་ཞེས་ཟེར་བ་ནི་སྐྱེ་བ་བླངས་པ་ཡིན་ཏེ། དེ་ལ་ཕ་མ་དགོས་པས་གཤིན་གྱི་འཇིག་རྟེན་ཡང་མེད་དོ། །ཀྱེ་རྒྱལ་པོ་ཆེན་པོ། དེ་ལྟ་བུའི་ཚེ་མ་འཕོས་པའི་མཚན་མ་དང ། དན་རྟགས་འཇིག་རྟེན་པ་གང་དག་སྨྲ་བ་ནི་དྲི་ཟ་ཁྱབ་བྱེད་ཅེས་བྱ་པའི་རིགས་ཡོད་པས་བྱེད་དེ། དཔེར་ན། རླུང་ཆེན་པོས་ཐང་དང ། ཀླུང་ཡངས་པ་དག་ཏུ་དུས་གཅིག་ཏུ་རླུང་ལྡང་བ་བཞིན་དུ་འཆི་འཕོ་བ་ཐམས་ཅད་ཀྱི་སེམས་ལ་ཁྱབ་པར་བྱེད་པའི་རིགས་དྲི་ཟ་པི་ཙ་ན་ཞེས་བྱ་བ་དང ། གནོད་སྦྱིན་སྨྲ་འདོད་ཀྱི་རིགས་དང ། འབྱུང་པོ་བར་ཧི་ནི་ཏ་ཀུན་ཏུ་རྟོགས་འདོད་ཅེས་བྱ་བ་དག་གིས་བསྒྲུབས་ནས་མི་མ་ཡིན་པ་དེ་དག་གིས་ཤི་བ་དེས་སྔོན་ཇི་ལྟར་གཏམ་བྱས་པ་དང ། ཆ་ལུགས་ཀྱི་དན་རྟགས་དག་འཇིག་རྟེན་པ་དག་བསླུ་བའི་ཕྱིར་སྟོན་ཅིང་སྨྲ་བ་དག་ཡིན་ནོ། །དེའི་ཚེ་ལྷས་བྱིན་དེ་ན་འདུག་པས་བཅོམ་ལྡན་འདས་ཀྱིས་དེ་སྐད་ཅེས་གསུངས་པ་དེ་ལ་ཡིད་མ་ཆེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ། སེམས་ཅན་ཚེ་འཕོས་ནས་ཅིར་འགྱུར་བའི་དན་རྟགས་ཕ་རོལ་ན་ཡོད་པ་དང ། མེད་པ་བཀའ་སྩལ་པ་དེ་གཽ་
232a
༄#། །ཏ་མས་ཐོག་མ་སུ་ལ་གསན། དུས་ནམ་གྱི་ཚེ་མཁྱེན་པར་མཛད། གསན་པ་དང ། མཁྱེན་པར་མཛད་པའི་གྲོགས་པོ་ནི་སུ་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། ལྷས་བྱིན། ངས་ནི་རང་གི་ལུས་བཏང་བ་ལ་སོགས་པ་དཀའ་བ་མང་པོ་དག་བསྐལ་པ་གྲངས་མེད་པར་སྤྱད་དེ་སྒྲིབ་པ་ཐམས་ཅད་ནི་སྦྱངས། ཚོགས་ཆེན་པོ་ཡང་དག་པར་བསགས་པས་ཐམས་ཅད་མཁྱེན་པའི་ཡེ་ཤེས་ཐོབ་སྟེ། འདས་པའི་དུས་ན་སྔོན་བྱུང་བ་དང ། ད་ལྟར་གྱི་དུས་ན་ཕྱོགས་བཅུ་མཐའ་ཡས་པ་ན་ཤེས་བྱ་གང་དག་ཅི་ཡོད་པ་དང ། མ་འོངས་པའི་དུས་ན་འབྱུང་བར་འགྱུར་བའི་ཤེས་བྱ་ཐམས་ཅད་ལ་མི་མཁྱེན་པར་གྱུར་པ་གང་ཡང་མེད་དེ། དཔེར་ན། ཛམྦུའི་གླིང་འདིར་ཉི་མ་ཤར་བ་དེ་ཁང་དང ། རིམ་གྱིས་ཤར་བ་མ་ཡིན་ཏེ། དུས་གཅིག་ཏུ་གསལ་བར་ཤར་བ་བཞིན་དུ་ཤེས་བྱ་ཐམས་ཅད་སྐད་ཅིག་མ་གཅིག་ལ་མཁྱེན་པའི་ཕྱིར་ང་ནི་རྣམ་པ་ཐམས་ཅད་མཁྱེན་པའི་ཡེ་ཤེས་མངའ་བ་ཞེས་བྱའོ། །དེ་སྐད་ཅེས་བཀའ་སྩལ་པ་ལའང་ལྷས་བྱིན་ཡིད་མ་ཆེས་ནས་ཐམས་ཅད་མཁྱེན་པ་མངའ་བ་དེ་ཉམས་སད་པའི་ཕྱིར་ཛམྦུའི་གླིང་འདི་ན་ཤིང་གི་རིགས་ཙན་དན་དང ། བླག་ཤ་དང ། སེང་ལྡེང་ལ་སོགས་པ་ཤིང་ཐ་དད་པ་བརྒྱ་སྟོང་བྱེ་བ་དག་བཅད་དེ། སོ་སོར་བསྲེགས་ནས་ཐལ་བའི་ཕུར་མ་བྱས་ནས་རང་གི་མི་
232b
ནོར་བར་བྱ་བའི་ཕྱིར་ཐལ་བ་ལ་ཤིང་གང་དང ། གང་གི་མིང་ཡི་གེར་བཏགས་ཏེ། བཅོམ་ལྡན་འདས་ཀྱི་དྲུང་དུ་སོང་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཁྱོད་ལ་ཐམས་ཅད་མཁྱེན་པའི་ཡེ་ཤེས་མངའ་ན། འདི་ཤིང་གང་གི་ཐལ་བ། འདི་ཤིང་གང་གི་ཐལ་བ་ལགས་ཞེས་མཐར་ཆགས་སུ་ཐལ་བའི་ཕུར་མ་ཐམས་ཅད་བསྟན་པ་ལས་བཅོམ་ལྡན་འདས་ཀྱིས་ཤིང་གང་གི་ཐལ་བ་ཡིན་པ་མ་ནོར་བར་འདི་ནི་ཙན་དན་གྱི་ཐལ་བའོ། །འདི་ནི་བླག་ཤའི་ཐལ་བའོ། །འདི་ནི་སེང་ལྡེང་གི་ཐལ་བའོ། །ཞེས་ཐལ་བའི་ཕུར་མ་ཐམས་ཅད་མ་ནོར་བར་བཤད་པ་ལས། ལྷས་བྱིན། བཅོམ་ལྡན་འདས་ལ་རྣམ་པ་ཐམས་ཅད་མཁྱེན་པའི་ཡེ་ཤེས་མངའ་བར་ཡིད་ཆེས་བར་གྱུར་ཏེ། ཚེ་འཕོས་པ་ཅིར་འགྱུར་བ་གསུངས་པ་བདེན་པར་བསམས་ནས། བཅོམ་ལྡན་འདས་ལ་འདི་སྐད་ཅེས་བསྟོད་དོ། །བཅོམ་ལྡན་འདས་ནི་ཀུན་མཁྱེན་ལགས། །ཤིང་མང་ཐལ་བའི་བྱེ་བྲག་རྣམས། །མ་གཟིགས་མ་གསན་ངེས་བར་མཁྱེན། །ཚེ་འཕོས་ཅི་འགྱུར་གསུངས་པ་ངེས། །ཞེས་བསྟོད་ནས་སྤོབས་པ་མེད་པར་གྱུར་ཏོ། །དེའི་ཚེ་ཤཱཀྱ་མིང་ཆེན་དེ་ན་འདུག་པས་ཚེ་འཕོས་པ་ཅིར་འགྱུར་བ་བཀའ་སྩལ་པ་ལ་ཡི་དམ་ཆེས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། ཚེ་འཕོས་པའི་སེམས་ཅན་རྣམས་ཅིར་འགྱུར་བ་གསུངས་པ་དེ་མངོན་སུམ་དུ་གཟིགས་སམ།
233a
༄#། །འོན་ཏེ་གཞན་ཞིག་ལ་གསན་པ་ལགས། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་བཀའ་སྩལ་པ། མིང་ཆེན། ངའི་སངས་རྒྱས་ཀྱི་སྤྱན་གྱིས་མི་གཟིགས་པ་ནི་འཇིག་རྟེན་ན་མེད་དེ། སྐྱུ་རུ་ར་རློན་པ་ལག་མཐིལ་དུ་བཞག་ན་ལག་པའི་བྱེ་བྲག་ཐམས་ཅད་གསལ་བ་དེ་བཞིན་དུ་དུས་གསུམ་གྱི་ཤེས་བྱ་ལ་ངས་མ་གཟིགས་པ་ཅིའང་མི་མངའ་སྟེ། ཐོས་པ་ལ་བརྟེན་པ་ནི་མ་ཡིན་ནོ། །དེ་སྐད་ཅེས་བཀའ་སྩལ་པ་དང ། ཤཱཀྱ་མིང་ཆེན་གྱིས་ཐམས་ཅད་གཟིགས་པ་དེ་བདེན་རྫུན་ཉམས་སད་པའི་ཕྱིར་སེར་སྐྱའི་གྲོང་ཁྱེར་ཆེན་པོར་སོང་སྟེ། ཁྱིམ་ཇི་སྙེད་ཡོད་པ་ལ་འབྲས་ཀྱི་ཕུར་མ་རེ་རེ་བླངས་ཏེ། རང་གིས་འབྲས་ཀྱི་ཕུར་མ་མི་གང་ལ་བླངས་པ་མི་ནོར་བར་བྱ་བའི་ཕྱིར་ཤཱཀྱ་གང་ལ་བླངས་པའི་མིང་རྣམས་བྲིས་ཏེ། འབྲས་ཕུར་མའི་ནང་དུ་བཅུག་ནས་འབྲས་ཀྱི་ཕུར་མ་གླང་པོ་ཆེའི་ཁལ་ལོངས་པ་གཅིག་དང ། བཅོམ་ལྡན་འདས་ཀྱིས་སྤྱན་སྔར་སོང་སྟེ་ཕྱིན་པ་དང ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བཅོམ་ལྡན་འདས་ཀྱིས་སངས་རྒྱས་ཀྱི་སྤྱན་གྱིས་ཐམས་ཅད་གཟིགས་ན་འབྲས་ཀྱི་ཕུར་མ་འདི་དག་མི་དབྱེ་བར་ཤཱཀྱ་གང་གང་གི་འབྲས་གང་གང་ལགས་པ་མཁྱེན་པར་མཛོད་ཅིག་ཅེས་གསོལ་ནས། གླང་པོ་ཆེའི་ཁལ་གྱི་འབྲས་ཀྱི་ཕུར་མ་རྣམས་དྲུང་དུ་བཞག་པ་ལས། བཅོམ་ལྡན་འདས་ཀྱིས་འབྲས་ཀྱི་ཕུར་མ་རེ་རེ་བླངས་
233b
ཤིང་འདི་ཤཱཀྱ་དགའ་བྱེད་ཀྱིའོ། །འདི་ཤཱཀྱ་ཀ་ཡའིའོ། །འདི་ཤཱཀྱ་འདོད་སྲེད་ཀྱིའོ་ཞེས་བྱ་བ་ལ་སོགས་པ་འབྲས་ཕུར་མ་རེ་རེ་ལ་ཤཱཀྱ་འདི་ཡིའོ་ཞེས་མིང་མ་ནོར་པར་རིམ་པར་རྫོགས་པར་གསུངས་པ་ལས། བཅོམ་ལྡན་འདས་ཀྱི་སངས་རྒྱས་ཀྱི་སྤྱན་གྱིས་ཐམས་ཅད་གཟིགས་པ་ལ་ཤཱཀྱ་མིང་ཆེན་ལ་སོགས་པ་ཐམས་ཅད་ཡིད་ཆེས་ཏེ། བཅོམ་ལྡན་འདས་ཀྱིས་ཚེ་འཕོས་པ་ཅིར་འགྱུར་བ་བཤད་པ་ནི་ངེས་སོ་སྙམ་ནས་བཅོམ་ལྡན་འདས་ལ་བསྟོད་པ། སངས་རྒྱས་སྤྱན་གྱིས་ཐམས་ཅད་གཟིགས། །འཇིག་རྟེན་པ་ལྟར་རྫུན་མི་མངའ། །ཤཱཀྱའི་གྲོང་ཁྱེར་ཇི་སྙེད་པའི། །འབྲས་ཀྱི་ཕུར་མ་མ་ནོར་མཁྱེན། །སེམས་ཅན་ཚེ་འཕོས་ཕ་རོལ་ན། །ཇི་ལྟར་སྣང་བ་འཇིག་རྟེན་རྫུན། །བཅོམ་ལྡན་འདས་ཀྱིས་གསུངས་པ་མེད། །ཀུན་གཟིགས་ཁྱོད་ལ་ཕྱག་འཚལ་བསྟོད། །ཅེས་བསྟོད་ནས་སྤོབས་པ་མེད་དེ་མི་སྨྲ་བར་འདུག་གོ་།དེ་ནས་ཡབ་རྒྱལ་པོ་ཆེན་པོས་འདི་སྐད་ཅེས་གསོལ་ཏོ། །བཅོམ་ལྡན་འདས། སེམས་ཅན་གང་དག་གིས་མཚམས་མེད་པ་ལ་སོགས་པའི་ལས་མི་དགེ་བ་དག་བགྱིས་པས་དེའི་རྣམ་པར་སྨིན་པ་མི་བཟད་པ་མྱོང་བར་འགྱུར་བ་དག་གིས་ཇི་ལྟར་བགྱིས་ན་བདེ་བ་ཐོབ་པར་འགྱུར་བ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀྱེ་རྒྱལ་པོ་ཆེན་པོ། སེམས་ཅན་གང་དག་གིས་མཚམས་མེད་པ་ལ་སོགས་པའི་ལས་མི་དགེ་བ་བྱས་པ་དག་གིས་སྒྱུ་མེད་པའི་
234a
༄#། །སེམས་དང་བས་རྣམ་པར་སྨིན་པ་ལ་ཡིད་ཆེས་པར་བྱས་ཏེ། སེམས་ཐག་པ་ནས་བཤགས་ན་འབྱང་བར་འགྱུར་རོ། །འཆི་བའི་ཚེ་མི་དགེ་བ་སྔར་བྱས་པ་དག་ལ་འགྱོད་པ་བསྐྱེད་དེ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ཞིང་སྐྱབས་སུ་གསོལ་ན་སྡིག་པ་འབྱང་བར་འགྱུར་རོ། །མཐོ་རིས་སུའང་སྐྱེ་བར་འགྱུར་རོ། །ཚེ་ཕྱི་མ་མེད་པའི་འདུ་ཤེས་བསྐྱེད་པར་མི་བྱའོ། །སྐྱེ་བ་ལེན་པ་ནི་དབང་ཕྱུག་དང ། འདོད་རྒྱལ་དང ། གྱིན་ལ་སོགས་བདག་གིས་བྱེད་པར་མི་བལྟའོ། །འཇིག་རྟེན་པའི་བདེ་བ་དང་།འཁོར་བ་ཐམས་ཅད་ལ་ཆགས་པར་མི་བྱའོ། །ཀྱེ་རྒྱལ་པོ་ཆེན་པོ། འཇིག་རྟེན་འདི་ནས་ཕ་རོལ་ཏུ་འཕོ་སྟེ། སྐྱེ་བ་ལེན་པ་ན་རྟག་པ་འཕོ་བའང་མ་ཡིན་ནོ། །ཆད་པ་འགགས་ཏེ་མེད་པའང་མ་ཡིན་ནོ། །རྒྱུ་མེད་པའང་མ་ཡིན་ནོ། །རྒྱུ་མེད་པ་ལས་བྱུང་བའང་མ་ཡིན་ནོ། །བྱེད་པ་པོས་བྱས་པའང་མ་ཡིན་ཏེ། ལས་དང ། ཉོན་མོངས་པའི་རྒྱུ་རྐྱེན་ཚོགས་པ་ལས་སྐྱ་བར་བལྟའོ། །རྒྱལ་པོ་ཆེན་པོས་གསོལ་པ། བཅོམ་ལྡན་འདས། སེམས་ཅན་རྣམས་ཚེ་འཕོས་ནས་སྐྱེ་བ་ལེན་པ་དེ་དེ་ལྟར་རྟག་པའང་མི་འཕོ། ཆད་པའང་མ་ལགས་།རྒྱུ་མ་\?\་པའང་མ་ལགས། བྱེད་པ་པོས་ཡང་མ་བྱས། འཇིག་རྟེན་ཕ་རོལ་ཏུ་སྐྱེ་བའང་འགྲུབ་པ་དེ་རྟོགས་པར་དཀའ་ན་འདི་ལ་མཐུན་པའི་དཔེ་མཆིས་སམ། བཅོམ་ལྡན་འདས་ཀྱིས་
234b
བཀའ་སྩལ་པ། ཀྱེ་རྒྱལ་པོ་ཆེན་པོ། འདི་ལ་མཐུན་པའི་དཔེ་བརྒྱད་ཡོད་དོ། །བླ་མས་ཁ་ཏོན་བརྗོད་པ་སློབ་མས་ཤེས་པའི་དཔེ་དང ། མར་མེ་ལས་མར་མེ་འབྱུང་བའི་དཔེ་དང ། མེ་ལོང་ལས་གཟུགས་བརྙན་འབྱུང་བའི་དཔེ་དང ། རྒྱ་ལས་རྒྱའི་འབུར་དང ། རི་མོ་འབྱུང་བའི་དཔེ་དང ། མེ་ཤེལ་ལས་མེ་འབྱུང་བའི་དཔེ་དང ། ས་བོན་ལས་མྱུ་གུ་འབྱུང་བའི་དཔེ་དང ། སྐྱུར་ཞེས་བརྗོད་པས་འགྲམ་ཆུ་ལྡང་བའི་དཔེ་དང ། བྲག་ཅའི་སྒྲ་རྣམས་ཀྱི་དཔེས་རྟོགས་པར་བྱ་སྟེ། ཀྱེ་རྒྱལ་པོ་ཆེན་པོ། དཔེ་བརྒྱད་པོ་འདི་དག་གིས་སྔ་མ་སྔ་མས་ནི་ཕྱི་མ་ཕྱི་མ་རྣམས་འབྱུང་བའང་ཡོད་པ་ནི་རྟག་པ་འཕོ་བ་མ་ཡིན་པའི་དཔེའོ། །ཕྱི་མ་ཕྱི་མས་ནི་སྔ་མ་སྔ་མ་རྣམས་ལས་འབྱུང་བས་རྒྱུ་མེད་པ་ལས་འབྱུང་བ་མ་ཡིན་པའི་དཔེ་དང ། ཆད་པ་འགག་པ་མ་ཡིན་པའི་དཔེའོ། ། ཀྱེ་རྒྱལ་པོ་ཆེན་པོ། གཞན་ཡང ། དཔེ་འདི་དག་ནི་རྐྱེན་གསུམ་གསུམ་ཚོགས་པ་ལས་འབྱུང་སྟེ། བླ་མ་དང ། སློབ་མ་དེ་ཉིད་དབང་པོ་རྣམས་ཚང་བ་ལས་ཁ་ཏོན་འབྱུང་ཞིང་སྨྲ་ཤེས་པའོ། །མར་དང ། སྡོང་བུ་དང ། སྣོད་ཚོགས་པ་ལས་མར་མེ་འབྱུང་ངོ ། །ནམ་མཁའ་དང་བ་དང ། གདོང་དང ། མེ་ལོང་ཚོགས་པ་ལས་གཟུགས་བརྙན་འབྱུང་ངོ ། །རྒྱ་དང ། འཇིམ་པའི་གོང་བུ་དང ། སྐྱེས་བུ་ལག་བའི་རྩོལ་བ་རྣམས་ཚོགས་པ་ལས་འབུར་དང ། རི་མོ་འབྱུང་ངོ ། །ཤེ་ལ་དང ། ཉི་མའི་འོད་དང ། རྩཝ་ཤིང་ཚོགས་པ་ལས་མེ་འབྱུང་ངོ ། །ས་བོན་དང ། ས་གཞི་དང ། རླན་པ་རྣམས་ཚོགས་པ་
235a
༄#། །ལས་མྱུ་གུ་བྱུང་ངོ ། །ཚཝ་དང ། ཚཝ་ཆུ་འཐུང་མྱོང་བ་དང ། སྐྱུར་ཞེས་བརྗོད་པ་ཚོགས་པ་ལས་འགྲམ་ཆུ་ལྡང་ངོ ། །མིས་བརྗོད་པའི་སྒྲ་དང ། སྒྲ་དྲག་པོ་གཞན་མེད་པ་དང ། རི་བྲག་རྣམས་ཚོགས་པ་ལས་བྲག་ཅ་འབྱུང་སྟེ། དེ་དག་ནི་སེམས་ཅན་སྐྱེ་བ་ནི་བྱེད་པ་པོས་མ་བྱས་ཏེ། ལས་དང ། ཉོན་མོངས་པའི་རྒྱུ་རྐྱེན་གྱིས་བསྐྱེད་པའི་དཔེའོ། །ཀྱེ་རྒྱལ་པོ་ཆེན་པོ། གཞན་ཡང་བླ་མ་ནི་ཚེ་འདིའི་དཔེའོ། །སློབ་མ་ནི་ཚེ་ཕ་རོལ་གྱི་དཔེའོ། །ཁ་ཏོ་ན་ནི་རྣམ་པར་ཤེས་པ་ཉིད་མཚམས་སྦྱོར་བའི་དཔེའོ། །མར་མེ་སྔ་མ་ནི་ཚེ་འདིའི་དཔེའོ། །ཕྱི་མ་ནི་ཕ་རོལ་གྱི་དཔེའོ། །མར་མེ་སྔ་མ་ལས་ཕྱི་མ་བྱུང་བའང་སྔ་མ་ཡོད་པ་ནི་རྟག་པ་འཕོ་བ་མ་ཡིན་པའི་དཔེའོ། །ཕྱི་མ་དེ་སྔ་མ་ལས་བྱུང་བ་རྒྱུ་མེད་པ་ལས་མ་བྱུང་བའི་དཔེའོ། །མེ་ལོང་ནི་ཚེ་འདི་ཡོད་པའི་སྒ་ནས་ཕྱི་མའང་ཡོད་ལ། དངོས་པོའང་མི་འཕོ་ཞིང་ཕ་རོལ་ཡང་ཡོད་ངེས་པའི་དཔེའོ། །རྒྱ་ནི་འདིར་ལས་ཅི་སྤྱད་པ་མཐུན་པར་ཕ་རོལ་ཏུའང་སྐྱེ་བ་ལེན་པའི་དཔེའོ།། མེ་ཤེལ་ནི་འགྲོ་བ་རིས་མི་འདྲ་བ་ནས་མི་འདྲ་བར་སྐྱེ་བའི་དཔེའོ། །ས་བོན་ནི་འགགས་ནས་མེད་པར་མི་འགྱུར་བའི་དཔེའོ། །སྐྱུར་ནི་མྱོང་བའི་ལས་ཀྱིས་སྐྱེ་བ་ལེན་པའི་དཔེའོ། །སྒྲ་ནི་རྒྱུ་རྐྱེན་ཚོགས་ནས་གནོད་པའི་རྐྱེན་གཞན་མེད་ན་སྐྱེ་བ་ལེན་ཏེ། གཅིག་པ་དང ། ཐ་དད་པ་མ་ཡིན་པའི་དཔེའོ། །ཀྱེ་རྒྱལ་པོ་ཆེན་པོ། དཔེ་བརྒྱད་བོ་འདི་ཚང་བར་མ་སྨོས་ཏེ། འགའ་
235b
ཞིག་བསྟན་ན་དབང་ཕྱུག་དང ། འདོད་རྒྱལ་དང ། གྱི་ན་དང ། རྒྱུ་མེད་པར་སྨྲ་བ་དག་གིས་དགེ་སྦྱོང་གཽ་ཏ་མའི་དཔེ་འདི་དག་ཁ་ཏོན་གྱི་དཔེས་ནི་འདིའི་ཕུང་པོ་དང ། རྣམ་པར་ཤེས་པ་གཉིས་མ་བྲལ་བར་ཕ་རོལ་ཏུ་རྣམ་པར་ཤེས་པ་འཕོ་བར་འགྱུར་ཞེས་སྨྲ་བ་དག་དགག་པའི་ཕྱིར་དཔེ་ལྷག་མ་རྣམས་བསྟན་ཏོ། །མར་མེའི་དཔེས་ནི་འདི་དང ། ཕ་རོལ་གཉིས་ཀར་ཕུང་པོ་དུས་གཅིག་ཡོད་དོ་ཞེས་ཟེར་བ་དག་དགག་པའི་ཕྱིར་དཔེ་ལྷག་མ་རྣམས་བསྟན་ཏོ། །མེ་ལོང་གི་དཔེས་ནི་འདྲ་བའི་དཔེ་ཡིན་པས་གྲུམ་པོ་ལས་གྲུམ་པོར་སྐྱེ། དཀར་པོ་ལས་དཀར་པོར་སྐྱེའོ་ཞེས་ཟེར་བ་དག་དགག་པའི་ཕྱིར་དཔེ་ལྷག་མ་རྣམས་བསྟན་ཏོ། །རྒྱའི་དཔེས་ནི་ལྷ་འཕོས་པ་ལྷར་སྐྱེ། མི་འཕོས་པ་མིར་སྐྱེ་བ་ལ་སོགས་པ་ངེས་པའོ་ཞེས་ཟེར་བ་དག་དགག་པའི་ཕྱིར་དཔེ་ལྷག་མ་རྣམས་བསྟན་ཏོ། །མེ་ཤེལ་གྱི་དཔེས་ནི་མི་འདྲ་བའི་དཔེ་ཡིན་པས་དགེ་བས་ངན་སོང་དང ། མི་དགེ་བས་མཐོ་རིས་འགྲུབ་བོ་ཞེས་ཟེར་བ་དག་དགག་པའི་ཕྱིར་དཔེ་ལྷག་མ་རྣམས་བསྟན་ཏོ། །ས་བོན་གྱི་དཔེས་ནི་ཤེས་པ་གཅིག་ལས་མང་པོར་འཕེལ་ལོ་ཞེས་ཟེར་བ་དག་དགག་པའི་ཕྱིར་དཔེ་ལྷག་མ་རྣམས་བསྟན་ཏོ། །སྐྱུར་གྱི་དཔེས་ནི་མྱོང་བའི་དཔེ་ཡིན་པས་ལྷའི་ལོ་རྒྱུས་ཡོད་པ་དག་དགེ་བའི་བསོད་ནམས་མ་བྱས་ཀྱང་ལྷར་སྐྱེའོ། །ངན་སོང་གི་ལོ་རྒྱུས་ཡོད་པ་དག་མི་དགེ་བ་མ་བྱས་ཀྱང་ངན་སོང་དུ་སྐྱེའོ་ཞེས་ཟེར་བ་དག་དགག་པའི་
236a
༄#། །ཕྱིར་དཔེ་ལྷག་མ་རྣམས་བསྟན་ཏོ། །སྒྲའི་དཔེས་ནི་བྱེད་པ་པོའི་དཔེ་ཡིན་པས་རྒྱུ་རྐྱེན་ལས་མ་བྱུང་ངོ་ཞེས་ཟེར་བ་དག་དགག་པའི་ཕྱིར་དཔེ་ལྷག་མ་རྣམས་བསྟན་ཏོ། །དེའི་ཕྱིར་དཔེ་བརྒྱད་བསྟན་ཏོ། །ཀྱེ་རྒྱལ་པོ་ཆེན་པོ། ཚེ་ཞིག་སྟེ་ཕ་རོལ་ཏུ་སྐྱེ་བ་མེད་དེ། ཆད་པ་དང ། འགག་པའང་མ་ཡིན་ནོ། །ཚེ་འདི་དངོས་པོ་རྟག་པ་མ་ཉམས་པར་ཕ་རོལ་ཏུ་འཕོ་བའང་མ་ཡིན་ནོ། །ཚེ་འདི་ལ་མ་བསྟེན་པར་ཕ་རོལ་ཏུ་སྐྱེ་བ་ལེན་པའང་མ་ཡིན་ནོ། །བདག་གིས་སྐྱེ་བ་འདི་བླང་ངོ་ཞེས་བསམས་པས་ཀྱང་སྐྱེ་བ་མི་ལེན་ཏོ། །བདག་གིས་དབང་ཕྱུག་ཆེན་པོ་ལ་སོགས་པ་ལ་བརྟེན་ཏེ་མཐོ་རིས་སུ་སྐྱེ་བར་བྱའོ་སྙམ་པས་ཀྱང་མ་ཡིན་ནོ། །བདག་མཐོ་རིས་དང ། ངན་སོང་གར་འདོད་པར་སྐྱེ་བར་བྱའོ་སྙམ་པས་ཀྱང་མ་ཡིན་ནོ། །ཅིའང་མ་བྱས་ཏེ་རྒྱུ་རྐྱེན་ལ་བརྟེན་མི་དགོས་པར་སྐྱེའོ་སྙམ་བས་ཀྱང་མ་ཡིན་ནོ། །ཕུང་པོ་འདི་ཞིག་སྟེ་ཤི་ནས་ཅིའང་མེད་དོ་ཞེས་སྨྲ་བའང་མ་ཡིན་ནོ། །འདིར་ཚེ་འཕོས་ནས་ཕ་རོལ་ན་གཤིན་གྱི་ཁམས་སུ་མུ་ཆགས་སུ་མཆིས་པས་འདི་ན་ཅི་སྤྱོད་པ་བྱེད་དེ་སྐྱེ་བ་མི་ལེན་ཞེས་ཟེར་བའང་མ་ཡིན་ནོ། །ཚེ་འདིའི་རྣམ་པར་ཤེས་པ་མ་འགགས་པར་རྣམ་པར་ཤེས་པས་སྐྱེ་བ་ལེན་ཞེས་ཟེར་བའང་མ་ཡིན་ནོ། །འདི་དང ། ཕ་རོལ་གཉིས་ཀར་ཕུང་པོ་དུས་གཅིག་ཡོད་ཅེས་ཟེར་བའང་མ་ཡིན་ནོ། །གྲུམ་པོ་ལས་གྲུམ་པོར་སྐྱེ། དཀར་པོ་ལས་
236b
དཀར་པོར་སྐྱེ་ཞེས་བྱ་བ་ལ་སོགས་པའང་མ་ཡིན་ནོ། །ལྷ་ཚེ་འཕོས་པའང་ལྷར་སྐྱེའོ། །མི་ཚེ་འཕོས་པའང་མིར་སྐྱེའོ་ཞེས་ཟེར་བའང་མ་ཡིན་ནོ། །དགེ་བས་ངན་སོང་དང ། མི་དགེ་བས་མཐོ་རིས་སུ་འགྲུབ་ཅེས་ཟེར་བའང་མ་ཡིན་ནོ། །ཤེས་པ་གཅིག་ལས་མང་པོ་འཕེལ་བའང་མ་ཡིན་ནོ། །དགེ་བ་མ་བྱས་ཀྱང་ལྷར་སྐྱེ་བ་དང ། མི་དགེ་བ་མ་བྱས་ཀྱང་ངན་སོང་དུ་སྐྱེ་བའང་མ་ཡིན་ནོ། །སྐྱེ་བ་ནི་བྱེད་པས་བྱས་པའང་མ་ཡིན་ནོ། །དེ་དག་ཅིའི་ཕྱིར་མ་ཡིན་ཞེ་ན། ཁ་ཏོན་གྱི་དཔེ་ལ་གང་དག་གིས་རྣམ་པར་ཤེས་པ་འདི་མ་འགས་པར་ཕ་རོལ་ཏུ་སྐྱེ་བ་ལེན་ནོ་ཞེས་ཟེར་བའི་སྐྱོན་བསལ་བའི་ཕྱིར་ས་བོན་གྱི་དཔེ་བསྟན་ཏེ། ས་བོན་དེ་མ་རུལ་བར་མྱུ་གུ་སྐྱེ་ན་ནི་བདག་ཏུ་སྨྲ་བ་དག་བདེན་ན་ས་བོན་དེ་རུལ་ནས་སྔ་མ་ལས་གྱུར་ཏེ་མི་འདྲ་བར་གྱུར་པ་ལས་མྱུ་གུ་སྐྱེའོ། །མར་མེའི་དཔེ་ལ་གང་གིས་མར་མེ་གཅིག་ལས་གཅིག་བར་ན་གཉིས་ཀ་ཡོད་པས་འདི་དང་ཕ་རོལ་གཉིས་ཀར་ཕུང་པོ་དུས་གཅིག་ཡོད་དོ་ཞེས་ཟེར་བའི་སྐྱོན་བསལ་བའི་ཕྱིར་སྒྲའི་དཔེ་བསྟན་ཏེ། བྲག་ཅ་ནི་མིས་མ་བརྗོད་པར་སྒྲ་མི་གྲག་སྟེ། དུས་གཅིག་ཏུ་མི་འབྱུང་བས་ཕུང་པོའང་དུས་གཅིག་ཏུ་མི་འབྱུང་ངོ ། །མེ་ལོང་གི་དཔེ་ལ་འདྲ་བའི་ཕྱིར་གྲུམ་པོ་ལས་གྲུམ་པོར་སྐྱེ་བ་དག་དགག་པའི་ཕྱིར་མེ་ཤེལ་གྱི་དཔེ་བསྟན་ཏེ། མེ་ཤེལ་ལས་དེ་དང་མི་འདྲ་བའི་མེ་འབྱུང་བའི་ཕྱིར་རོ། །རྒྱའི་དཔེ་ནི་ལྷ་ཚེ་འཕོས་པ་ལྟར་སྐྱེ། མི་
237a
༄#། །ཚེ་འཕོས་པ་མིར་སྐྱེའོ་ཞེས་ཟེར་བ་བསལ་བའི་ཕྱིར་ཁ་ཏོན་གྱི་དཔེ་བསྟན་ཏེ། འདིའི་དཔེ་ནི་བླ་མ་ཡིན་ལ། ཕ་རོལ་གྱི་དཔེ་ནི་སློབ་མ་ཡིན་ཏེ། ཐ་དད་པས་བླ་མའང་སློབ་མ་མ་ཡིན། སློབ་མའང་བླ་མ་མ་ཡིན་པའི་ཕྱིར་རོ། །མེ་ཤེལ་གྱི་དཔེ་ལ་མི་འདྲ་བའི་དཔེ་ཡིན་ཏེ། དགེ་བས་ངན་སོང ། མི་དགེ་བས་མཐོ་རིས་སོ་ཞེས་ཟེར་བ་བསལ་བའི་ཕྱིར་མར་མེའི་དཔེ་བསྟན་ཏེ། མར་མེ་ལས་མར་མེ་མི་འདྲ་བ་མི་འབྱུང་གི་།མར་མེ་ལས་མར་མེ་འབྱུང་བ་བཞིན་དགེ་བས་མཐོ་རིས། མི་དགེ་བས་ངན་སོང་ནི་རིགས་པའོ། །ས་བོན་གྱི་དཔེ་ལ་ཤེས་པ་འཕེལ་ཞེས་ཟེར་བ་དག་དགག་པའི་ཕྱིར་རྒྱའི་དཔེ་བསྟན་ཏེ། རྒྱའི་རི་མོ་ཅི་འདྲ་བ་དེ་ལས་འཇིམ་པའི་གོང་བུ་ལའང་རི་མོ་གཞན་མི་འབྱུང་བའི་ཕྱིར་རོ། །སྐྱུར་གྱི་དཔེ་ལས་གང་དག་གིས་ལྷའི་ལོ་རྒྱུས་མྱོང་བ་དག་དགེ་བ་མ་བྱས་ཀྱང་སྐྱེ་བ་ཐམས་ཅད་དུ་ལྷར་སྐྱེ། ངན་སོང་གི་ལོ་རྒྱུས་མྱོང་བ་དག་མི་དགེ་བ་མ་བྱས་ཀྱང་སྐྱེ་བ་ཐམས་ཅད་དུ་ངན་སོང་དུ་སྐྱེའོ་ཞེས་ཟེར་བ་དག་དགག་པའི་ཕྱིར་མེ་ལོང་གི་དཔེ་བསྟན་ཏེ། མེ་ལོང་ལ་བཞིན་ཅི་འདྲ་བ་སྣང་བ་བཞིན་དུ་དགེ་བ་དང ། མི་དགེ་བའི་འབྲས་བུ་འདྲ་བ་བསྣོལ་ནས་མི་འདྲ་བར་སྦྱོར་བ་འགལ་བའི་ཕྱིར་རོ། །སྒྲའི་དཔེ་ལ་ནི་བྱེད་པ་པོས་བྱས་པ་མ་ཡིན་ཏེ། མིས་སྐད་མ་བསྒྲགས་པར་བྲག་ཅ་མི་འབྱུང་བ་བཞིན་དུ་བྱེད་པ་པོས་མ་བྱས་པར་སེམས་ཅན་རྣམས་
237b
མི་སྐྱེའོ་ཞེས་ཟེར་བ་དེ་བསལ་བའི་ཕྱིར་སྐུར་གྱི་དཔེ་བསྟན་ཏེ། སྔར་འཐུངས་པ་དང ། ཟ་མྱོང་བས་ཕྱིས་བརྗོད་པས་འགྲམ་ཆུ་ལྡང་བ་བཞིན་དུ་ལས་དང ། ཉོན་མོངས་པ་སྔར་སྤྱད་པའི་དབང་གིས་ཕྱིས་སྐྱེ་བ་ལེན་ནོ། །ཀྱེ་རྒྱལ་པོ་ཆེན་པོ། སེམས་ཅན་སྐྱེ་བ་དང ། འཇིག་པ་དང ། འདི་དང་ཕ་རོལ་ཏུ་འཕོ་བ་དང ། ཇི་ལྟར་འགྱུར་བ་དག་ནི་དེ་ལྟར་མཁྱེན་པར་མཛོད་ཅིག་།བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ལ་འཁོར་འདུས་པ་ཐམས་ཅད་ཡི་རངས་ཏེ་མངོན་པར་བསྟོད་དོ། །འཆི་འཕོ་བ་ཇི་ལྟར་འགྱུར་བ་བསྟན་པའི་མདོ་རྫོགས་སོ།། །།