༄#། ་རྒྱ་གར་སྐད་དུ། དྷརྨ་ཙཀྲ་པྲ་བརྟན་སཱུ་ཏྲ། བོད་སྐད་དུ། ཆོས་ཀྱི་འཁོར་ལོ་རབ་ཏུ་བསྐོར་བའི་མདོ། འཕགས་པ་དཀོན་མཆོག་གསུམ་ལ་གུས་པར་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་རི་དྭགས་རྒྱུ་བའི་གནས་ན་བཞུགས་སོ། ། དེ་ནས་བཅོམ་ལྡན་འདས་ཀྱིས་དགེ་སློང་ལྔ་སྡེ་རྣམས་བོས་ཏེ་བཀའ་སྩལ་པ། དགེ་སློང་དང ། རབ་ཏུ་བྱུང་བདག་།མཐའ་གཉིས་པོ་འདི་ལ་གནས་པར་མི་བྱའོ། །གང་སུ་དག་འདིར་འདོད་པ་རྣམས་དང ། བདེ་བ་ལ་ཞེན་པ་ནི་མི་རིགས་པ་དང ། དམན་པར་འགྱུར་རོ། །སོ་སོའི་སྐྱེ་བོ་རྣམས་ནི་དོན་མེད་པ་དང་ལྡན་པའི་ཕྱིར། གང་སུ་དག་ལུས་དུབ་པ་དང ། འབྲལ་བའི་སྡུག་བསྔལ་བསྔགས་པར་བྱ་བ་མ་ཡིན་པ་རྣམས་ཀྱིས་དོན་མེད་པ་དང་ལྡན་ནོ། །དགེ་སློང་དག་།འདི་ 268b རྣམས་ནི་མཐའ་གཉིས་ཀྱི་མཐའ་སྟེ། དེ་ལ་འཇུག་པར་མི་བྱའོ། །དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་དབུ་མའི་ལམ་འདི་གསུངས་སོ། །མིག་བྱེད་པ་དང ། ཡེ་ཤེས་བྱེད་པ་དང ། ཞི་བར་བྱེད་པ་དང ། མངོན་པར་ཤེས་པ་དང ། ཡང་དག་པར་ཁོང་དུ་ཆུད་པ་དང ། མྱ་ངན་ལས་འདས་པ་ལ་ཡང་དག་པར་འཇུག་གོ་།དགེ་སློང་དག་།དེ་བཞིན་གཤེགས་པས་མངོན་པར་རྫོགས་པར་སངས་རྒྱས་ནས་གསུངས་པའི་དབུ་མའི་ལམ་གང་ཞེ་ན། མིག་བྱེད་པ་དང ། ཡེ་ཤེས་བྱེད་པ་དང ། ཞི་བར་བྱེད་པ་དང ། མངོན་པར་ཤེས་པ་དང ། ཡང་དག་པར་ཁོང་དུ་ཆུད་པ་དང ། མྱ་ངན་ལས་འདས་པ་ལ་ཡང་དག་པར་འཇུག་གོ་།དབུ་མའི་ལམ་ནི་འཕགས་པའི་ལམ་ཡན་ལག་བརྒྱད་དེ། བརྒྱད་པོ་འདི་ནི། འདི་ལྟ་སྟེ། ཡང་དག་པའི་ལྟ་བ་དང ། ཡང་དག་པའི་རྟོགས་པ་དང ། ཡང་དག་པའི་ངག་དང ། ཡང་དག་པའི་ལས་ཀྱི་མཐའ་དང ། ཡང་དག་པའི་འཚོ་བ་དང ། ཡང་དག་པའི་རྩོལ་བ་དང ། ཡང་དག་པའི་དྲན་པ་དང ། ཡང་དག་པའི་ཏིང་ངེ་འཛིན་ཏོ། །དབུ་མའི་ལམ་འདི་འང་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་གསུངས་སོ། །མིག་བྱེད་པ་དང ། ཡེ་ཤེས་བྱེད་པ་དང ། ཞི་བར་བྱེད་པ་དང ། མངོན་པར་ 269a ༄#། །ཤེས་པ་དང ། ཡང་དག་པར་ཁོང་དུ་ཆུད་པ་དང ། མྱ་ངན་ལས་འདས་པ་ལ་ཡང་དག་པར་འཇུག་གོ་།འདི་འང ། དགེ་སློང་ངག། སྡུག་བསྔལ་འཕགས་པའི་བདེན་པ་སྟེ། སྐྱེ་བའི་སྡུག་བསྔལ་དང ། རྒ་བའི་སྡུག་བསྔལ་དང ། ན་བའི་སྡུག་བསྔལ་དང ། འཆི་པའི་སྡུག་བསྔལ་དང ། མི་སྡུག་པ་དང་ཕྲད་པའི་སྡུག་བསྔལ་དང ། སྡུག་པ་དང་བྲལ་བའི་སྡུག་བསྔལ་དང ། གང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་བ་དང ། མདོར་ན་ཉེ་བར་ལེན་པའི་ཕུང་པོ་ལྔ་སྡུག་བསྔལ་ལོ། །འདི་ཡང ། དགེ་སློང་དག། སྡུག་བསྔལ་ཀུན་འབྱུང་འཕགས་པའི་བདེན་པ་སྟེ། གང་སྲེད་པ་འབྱུང་བ་ཅན་དང ། དགའ་བའི་འདོད་ཆགས་དང་ལྡན་པ་དང ། དེ་དང ། དེ་ལ་མངོན་པར་དགའ་བ་ནི། འདི་ལྟ་སྟེ། འདོད་པའི་སྲེད་པ་དང ། འཁོར་བ་ལ་སྲེད་པ་དང ། འཁོར་བ་དང་བྲལ་བ་ལ་སྲེད་པའོ། །འདི་ཡང ། དགེ་སློང་དག་།སྡུག་བསྔལ་འགོག་པ་འཕགས་པའི་བདེན་པ་སྟེ། གང་ཞིག་འདི་བཞིན་སྲེད་པ་མ་ལུས་པ་ལ་འདོད་ཆགས་དང་བྲལ་བ་དང ། འགོག་པ་དང ། བོར་བ་དང ། སོ་སོར་བསྒྱུར་བ་དང ། གྲོལ་བ་དང ། གྲོལ་བ་ལ་ཞུམ་པ་མེད་པའོ། །འདི་ཡང ། དགེ་སློང་དག། སྡུག་བསྔལ་འགོག་ 269b པར་འགྲོ་བའི་ལམ་འཕགས་པའི་བདེན་པའོ། །འདི་ཡང་འཕགས་པའི་ལམ་ཡན་ལག་བརྒྱད་པ་སྟེ། འདི་ལྟ་སྟེ། ཡང་དག་པའི་ལྟ་བ་དང ། ཡང་དག་པའི་རྟོག་པ་དང ། ཡང་དག་པའི་ངག་དང ། ཡང་དག་པའི་ལས་ཀྱི་མཐའ་དང ། ཡང་དག་པའི་འཚོ་བ་དང ། ཡང་དག་པའི་རྩོལ་བ་དང ། ཡང་དག་པའི་ཏིང་ངེ་འཛིན་ཏོ། །དགེ་སློང་དག ། འདི་ནི་སྡུག་བསྔལ་འཕགས་པའི་བདེན་པ་སྟེ། སྔར་ཆོས་མ་ཐོས་པ་ལ། མིག་བསྐྱེད་པ་དང ། ཡེ་ཤེས་བསྐྱེད་པ་དང ། ཤེས་རབ་བསྐྱེད་པ་དང ། རིག་པ་བསྐྱེད་པ་དང ། སྣང་བ་བསྐྱེད་པའོ། །དེ་ཡང་སྡུག་བསྔལ་འཕགས་པའི་བདེན་པ་སྟེ། དགེ་སློང་དག་།འདི་ཡོངས་སུ་ཤེས་པར་བྱའོ། །སྔར་ཆོས་མ་ཐོས་པ་ལ། མིག་བསྐྱེད་པ་དང ། ཡེ་ཤེས་བསྐྱེད་པ་དང ། ཤེས་རབ་བསྐྱེད་པ་དང ། རིག་པ་བསྐྱེད་པ་དང ། སྣང་བ་བསྐྱེད་པའོ། །འདི་ནི་སྡུག་བསྔལ་ཀུན་འབྱུང་འཕགས་པའི་བདེན་པ་སྟེ། དགེ་སློང་དག། འདི་ནི་སྔར་ཆོས་མ་ཐོས་པ་ལ། མིག་བསྐྱེད་པ་དང ། ཡེ་ཤེས་བསྐྱེད་པ་དང ། ཤེས་རབ་བསྐྱེད་པ་དང ། རིག་པ་བསྐྱེད་པ ་དང ། སྣང་བ་བསྐྱེད་པའོ། །འདི་ཡང་སྡུག་བསྔལ་ཀུན་འབྱུང་འཕགས་པའི་བདེན་པ་སྟེ་རབ་ཏུ་སྤང་བར་བྱའོ། །དགེ་སློང་དག་།འདི་ནི་སྔར་ཆོས་མ་ཐོས་པ་ 270a ༄#། །ལ།་མིག་བསྐྱེད་པ་དང ། ཡེ་ཤེས་བསྐྱེད་པ་དང ། ཤེས་རབ་བསྐྱེད་པ་དང ། རིག་པ་བསྐྱེད་པ་དང ། སྣང་བ་བསྐྱེད་པའོ། །འདི་ནི་སྡུག་བསྔལ་འགོག་པ་འཕགས་པའི་བདེན་པ་སྟེ། དགེ་སློང་དག་།འདི་ནི་སྔར་ཆོས་མ་ཐོས་པ་ལ། མིག་བསྐྱེད་པ་དང ། ཡེ་ཤེས་བསྐྱེད་པ་དང ། ཤེས་རབ་བསྐྱེད་པ་དང ། རིག་པ་བསྐྱེད་པ་དང ། སྣང་བ་བསྐྱེད་པའོ། །འདི་ཡང་སྡུག་བསྔལ་འགོག་པ་འཕགས་པའི་བདེན་པ་སྟེ། མངོན་སུམ་དུ་བྱའོ། །དགེ་སློང་དག་།འདི་ནི་སྔར་ཆོས་མ་ཐོས་པ་ལ། མིག་བསྐྱེད་པ་དང ། ཡེ་ཤེས་བསྐྱེད་པ་དང ། ཤེས་རབ་བསྐྱེད་པ་དང ། རིག་པ་བསྐྱེད་པ་དང ། སྣང་བ་བསྐྱེད་པའོ། །འདི་ནི་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། །དགེ་སློང་དག་།འདི་ནི་སྔར་ཆོས་མ་ཐོས་པ་ལ། མིག་བསྐྱེད་པ་དང ། ཡེ་ཤེས་བསྐྱེད་པ་དང ། ཤེས་རབ་བསྐྱེད་པ་དང ། རིག་པ་བསྐྱེད་པ་དང ། སྣང་བ་བསྐྱེད་པའོ། །འདི་ཡང་སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་སྟེ། བསྒོམ་པར་བྱའོ། །དགེ་སློང་དག་།འདི་ནི་སྔར་ཆོས་མ་ཐོས་པ་ལ། མིག་བསྐྱེད་པ་ 270b དང ། ཡེ་ཤེས་བསྐྱེད་པ་དང ། ཤེས་རབ་བསྐྱེད་པ་དང ། རིག་པ་བསྐྱེད་པ་དང ། སྣང་བ་བསྐྱེད་པའོ། །དགེ་སློང་དག་།དེ་ལྟར་བཤད་པ་རྣམ་པ་བཞི་པོ་འདི་ནི་འཕགས་པའི་བདེན་པའོ། །འདི་ལྟར་ལན་གསུམ་དུ་བཟླས་ཏེ། རྣམ་པ་བཅུ་གཉིས་པོ་ཇི་ལྟར་གྱུར་པ་རྣམས་ཡེ་ཤེས་མཐོང་བ་ཤིན་ཏུ་རྣམ་པར་དག་པ་ཡིན་ནོ། །དགེ་སློང་དག་།ང་སྤངས་ཏེ། ལྷ་དང་བཅས་པའི་འཇིག་རྟེན་དང ། བདུད་དང་བཅས་པ་དང ། ཚངས་པ་དང་བཅས་པ་དང ། དགེ་སྦྱོང་དང་བཅས་པ་དང ། སྐྱེ་དགུའི་བདག་པོ་དང ། ལྷ་དང་མིར་བཅས་པ་རྣམས་ལས། བླ་ན་མེད་པ་ཡང་དག་པར་རྫོགས་པའི་སངས་རྒྱས་གཞན་མེད་དོ། །དགེ་སློང་དག ། གང་ཡང་འདི་ནི་འཕགས་པའི་བདེན་པ་བཞི་པོ་འདི་ལྟར་ལན་གསུམ་དུ་བཟླས་ཏེ། རྣམ་པ་བཅུ་གཉིས་སུ་ཇི་ལྟར་གྱུར་པའི་ཡེ་ཤེས་མཐོང་བ་ཤིན་ཏུ་རྣམ་པར་དག་པ་ཡིན་ནོ། །ཇི་ལྟར་དགེ་སློང་དག་།ང་ནི་འཇིག་རྟེན་ལྷ་དང་བཅས་པ་དང ། བདུད་དང་བཅས་པ་དང ། ཚངས་པ་དང་བཅས་པ་དང ། དགེ་སྦྱོང་དང་བཅས་པ་དང ། སྐྱེ་དགུའི་བདག་པོ་དང་།། ལྷ་དང ། མིར་བཅས་པ་རྣམས་ལས། བླ་ན་མེད་པ་ཡང་དག་པར་རྫོགས་པའི་སངས་རྒྱས་མངོན་པར་རྫོགས་པར་སངས་ 271a ༄#། །རྒྱས་ནས་སོ་སོར་རྟོགས་སོ། །ཡེ་ཤེས་འདི་ཡང་བདག་མཐོང་བར་གྱུར་པ་དང ། སྔར་མེད་པའི་རྣམ་པར་གྲོལ་བ་དང ། བདག་ནི་ལྷག་མ་མེད་པར་ཡང་སྲིད་པ་ལེན་པ་མེད་པར་མྱ་ངན་ལས་འདས་སོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་ལྔ་སྡེ་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའོ། །འདི་ལྟར་ལུང་དུ་བསྟན་པ་དེ་ཚུན་ཆོད་ནས། ཚེ་དང་ལྡན་པ་ཀཽཎྜི་ནྱས་རྡུལ་སྤངས་པ་དང ། དྲི་མ་མེད་པའི་ཆོས་ཀྱི་མིག་སྐྱེས་སོ། །གང་ཅུང་ཟད་ཀུན་འབྱུང་བའི་ཆོས་ཐམས་ཅད་ནི་དེ་འགོག་པའི་ཆོས་ཡིན་ནོ། །བཅོམ་ལྡན་འདས་ཀྱིས་ཆོས་ཀྱི་འཁོར་ལོ་རབ་ཏུ་བསྐོར་ཞིང་བསྐོར་ནས། སའི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་དང ། རི་དྭགས་རྒྱུ་བའི་གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་རབ་ཏུ་མ་བསྐོར་བ་བསྐོར་ཏོ། །དེ་ནས་སའི་ལྷའི་སྒྲ་ཐོས་ནས་རྒྱལ་ཆེན་རིས་བཞིའི་ལྷ་རྣམས་ཀྱིས་བསྟོད་པའི་སྒྲ་ 271b བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་དང ། རི་དྭགས་རྒྱུ་བའི་གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། ། རྒྱལ་ཆེན་རིས་བཞིའི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། སུམ་ཅུ་རྩ་གསུམ་གྱི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི། བཅོམ་ལྡན་འདས་ཀྱིས་ཡུལ་ཝཱ་ར་ཎཱིའི་དྲང་སྲོང་ལྷུང་བ་དང ། རི་དྭགས་རྒྱུ་བའི་གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །སུམ་ཅུ་རྩ་གསུམ་གྱི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། འཐབ་བྲལ་གྱི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི། བཅོམ་ལྡན་འདས་ཀྱིས་ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་དང ། རི་དྭགས་རྒྱུ་བའི་ 272a ༄#། །གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །འཐབ་བྲལ་གྱི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། དགའ་ལྡན་གྱི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་དང ། རི་དྭགས་རྒྱུ་བའི་གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །དགཱ་ལྡན་གྱི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། འཕྲུལ་དགའི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་གཞན་སུས་ཀྱང་བསྐོར་བར་མ་ནུས་པ་འདི་ནི་བཅོམ་ལྡན་འདས་ཀྱིས་ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་དང ། རི་དྭགས་རྒྱུ་བའི་གནས་སུ་བཞུགས་ནས། བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །འཕྲུལ་དགའི་ལྷ་རྣམས་གྱིས་བསྟོད་པའི་སྒྲ་ཐོས་ནས། གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་བསྟོད་པའི་ 272b སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་དང ། རི་དྭགས་རྒྱུ་བའི་གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་བསྟོད་པའི་སྒྲ་ཐོས་ནས། ཚངས་རིས་ཀྱི་ལྷ་རྣམས་ཀྱིས་བསྟོད་པའི་སྒྲ་བསྒྲགས་སོ། །དགེ་སྦྱོང་ངམ། བྲམ་ཟེའམ། ལྷའམ། བདུད་དམ། ཚངས་པའམ། འཇིག་རྟེན་དུ་གཞན་སུས་ཀྱང་བསྐོར་བར་མི་ནུས་པ་འདི་ནི་བཅོམ་ལྡན་འདས་ཀྱིས་ཡུལ་ཝཱ་ར་ཎཱ་སིའི་དྲང་སྲོང་ལྷུང་བ་དང ། རི་དྭགས་རྒྱུ་བའི་གནས་སུ་བཞུགས་ནས་བླ་ན་མེད་པའི་ཆོས་ཀྱི་འཁོར་ལོ་མ་བསྐོར་བ་བསྐོར་ཏོ། །དེ་ནས་སྐད་ཅིག་དང ། ཡུད་ཙམ་དེ་ལ་ཚངས་པའི་འཇིག་རྟེན་གྱི་བར་དུ་སྒྲས་ཁྱབ་པར་གྱུར་ཏོ། །འདིར་ཡང་འཇིག་རྟེན་གྱི་ཁམས་སྟོང་ཕྲག་བཅུ་ཡང་དག་པར་གཡོས་སོ། །ཡང་དག་པར་རབ་ཏུ་གཡོས་སོ། །ཡང་དག་པར་རབ་ཏུ་ལྡེག་གོ་།བག་ཡོད་པར་གྱུར། ཡ་མཚན་དུ་གྱུར། སྣང་བར་གྱུར། འཇིག་རྟེན་རྣམས་སུ་དེ་ལྟར་གྱུར་ཏོ། །འཇིག་རྟེན་རྣམས་སུ་དེ་ལྟར་གྱུར་ཏེ། ཚངས་པས་ 273a ༄#། །ཆོས་བསྟན་པ་ཐོས་ནས་ལྷ་རྣམས་རང་རང་གི་གནས་སུ་སོང་ངོ ། །དེ་ནས་ཡང་བཅོམ་ལྡན་འདས་ཀྱིས་ཆེད་དུ་བརྗོད་པ་ཆེད་དུ་བརྗོད་དེ། ཀུན་ཤེས་པའི་ཕྱིར་ཀཽ་ཎྜི་ནྱའོ། །ཀུན་ཤེས་པ་རྣམས་ཀྱིས་ཀཽཎྜི་ནྱའོ། །དེའི་ཕྱིར་འདི་ནི་ཚེ་དང་ལྡན་པ་ཀཽཎྜི་ནྱ་སྟེ། ཀུན་ཤེས་ཀཽཎྜི་ནྱ་ཞེས་བྱ་བའི་མིང་ཐོབ་བོ། །ཆོས་ཀྱི་འཁོར་ལོ་བསྐོར་བའི་མདོ་རྫོགས་སོ།། །།སངས་རྒྱས་ཀྱི་བསྟན་པ་ལ་མི་ཕྱེད་པའི་དད་པ་དང་ལྡན་ཞིང ། གཙུག་ལག་གཉིས་ལ་ཐུགས་ལེགས་པར་བྱང་བ། དཔལ་འབྱོར་དབང་ཕྱུག་དམ་པ་དཀར་ཕྱོགས་ཀྱི་ཟླ་བ་ལྟར་འཕེལ་བའི་ཞ་ལུ་བ་སྐུ་ཞང་གྲགས་པ་རྒྱལ་མཚན་དུ་དབེན་ཤའི་བཀའ་ལུང་གིས་བྱང་ཆུབ་ཀྱི་སྙིང་པོ་རྡོ་རྗེའི་གདན་ལས། ལྷོ་ཕྱོགས་སུ་དཔག་ཚད་དྲུག་བརྒྱ་ཙམ་བགྲོད་པའི་གནས་སིཾ་གྷ་གླིང་བ་བྲམ་ཟེའི་རིགས་ལས་ལེགས་པར་རབ་ཏུ་བྱུང་ཞིང ། བསྙེན་པར་རྫོགས་པ་སྡེ་སྣོད་གསུམ་ལ་ཐུགས་ལེགས་པར་བྱང་བའི་པཎྜི་ཏ་ཆེན་པོ་ཨཱ་ནནྡྷ་ཤྲིའི་ཞལ་སྔ་ནས། མང་དུ་ཐོས་པའི་ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས་གཙུག་ལག་ཁང་ཆེན་པོ་དཔལ་ཐར་བ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སའི་སྟེང་དུ་ཉི་མ་དང་ཟླ་བ་ལྟ་ 273b བུར་གྱུར་ཅིག། |