།།རྒྱ་གར་སྐད་དུ། ཨཱརྱ་ནནྡི་དེ་ཀཾ་སཱུ་ཏྲ། བོད་སྐད་དུ། འཕགས་པ་དགའ་བ་ཅན་གྱི་མདོ། དཀོན་མཆོག་གསུམ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་དགེ་སློང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོས་ཡོངས་སུ་བསྐོར་ཅིང་མདུན་གྱིས་བལྟས་ཏེ། ཐབས་གཅིག་ཏུ་བཞུགས་ནས་ཆོས་སྟོན་ཏེ། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ།་ཚངས་པར་སྤྱོད་པ་ཡང་དག་པར་རབ་ཏུ་སྟོན་ཏོ། །དེ་ནས་ཡང་དེའི་ཚེ་དགེ་བསྙེན་དགའ་བ་ཅན་འཁོར་དགེ་བསྙེན་ལྔ་བརྒྱ་དང་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ནས་བྱུང་སྟེ། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ནས། བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འདུག་གོ། དེ་ནས་དགེ་བསྙེན་ལྔ་བརྒྱ་པོ་དེ་དག་གིས་ཀྱང་བཅོམ་ལྡན་འདས་ཀྱི་ཞབས་ལ་ཕྱག་བཙལ་ནས་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་དགེ་བསྙེན་དགའ་བ་ཅན་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཁྱེན་ཅིང་གཟིགས་པས་དགེ་བསྙེན་གྱི་བསླབ་པའི་གཞི་ལྔ་པོ་གང་དག་བཅས་པ་དེ་དག་ལས་འདའ་ 410a ༄#། །བར་བགྱིད་པ་དེའི་རྣམ་པར་སྨིན་པ་ཇི་ལྟ་བུར་འགྱུར། དེ་སྐད་ཅེས་གསོལ་པ་དང ། བཅོམ་ལྡན་འདས་ཀྱིས་དགེ་བསྙེན་དགའ་བ་ཅན་ལ་འདི་སྐད་ཅེས་བཀའ་སྩལ་ཏོ། །དགའ་བ་ཅན། ཁྱོད་དེ་བཞིན་གཤེགས་པ་ལ་དོན་འདི་ཡོངས་སུ་ཞུ་བར་སེམས་པ་གང་ཡིན་པ་ལེགས་སོ། །ལེགས་སོ། །ཁྱོད་ཀྱི་བློ་རྒྱ་ཆེ་སྟེ་དཔྱོད་པ་བཟང་ངོ ། །སྤོབས་པ་དགེའོ། །དགའ་བ་ཅན། དེའི་ཕྱིར་ཉེས་དམིགས་བཅུ་ཞེས་བྱ་བའི་ཆོས་ཀྱི་རྣམ་གྲངས་བཤད་པར་བྱ་ཡི། ལེགས་པར་རབ་ཏུ་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བཤད་པར་བྱའོ། །བཅོམ་ལྡན་འདས། ལེགས་སོ། །ལེགས་སོ་ཞེས་གསོལ་ནས་དགེ་བསྙེན་དགའ་བ་ཅན་བཅོམ་ལྡན་འདས་ལ་ཉན་པ་དང ། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །དགའ་བ་ཅན། སྲོག་གཅོད་པའི་ཉེས་དམིགས་བཅུ་ནི་འདི་དག་ཡིན་པར་རིག་པར་བྱ་སྟེ། བཅུ་པོ་དག་གང་ཞེ་ན། འདི་ལྟ་སྟེ། ཚེ་འདི་ལ་འཁོན་སྐྱེད་པ་དང ། སྐྱེ་བ་གཞན་རྣམས་སུའང་འཁོན་དང ། རྗེས་སུ་འབྲེལ་པར་འགྱུར་བ་དང ། སྐྱེ་བོ་མང་པོ་དག་གིས་ཡིད་མི་བརྟན་པར་འགྱུར་བ་དང ། སྡིག་པའི་རྨི་ལམ་མཐོང་བ་དང ། བདག་ཀྱང་འཇིགས་པ་སྐྱེ་ཞིང་སེམས་ཅན་རྣམས་ཀྱང་དེ་ལ་འཇིགས་པ་སྐྱེ་བ་དང ། བདེ་བར་ཉལ་ཡང་སྡུག་བསྔལ་བར་སད་པ་དང ། སྡིག་པ་རྣམ་པར་སེམས་པ་དང ། རྨོངས་པ་དང་བཅས་པར་འཆི་བའི་དུས་བྱེད་པ་དང ། ཚེ་ཐུང་བར་འགྱུར་བའི་ལས་བྱས་ཤིང་བསགས་པས་ལུས་ཞིག་སྟེ་ཤི་ནས་ཀྱང་ངན་ 410b སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་ཞིང ། གལ་ཏེ་དེ་ནས་ཤི་འཕོས་ཏེ་འདིར་མི་རྣམས་དང་སྐལ་བ་མཉམ་པར་སྐྱེས་ནའང་དེ་གང་དང ། གང་དུ་སྐྱེས་པ་དེ་དང ། དེར་ཚེ་ཐུང་བར་འགྱུར་ཞིང་ནད་མང་བར་ཡང་འགྱུར་ཏེ། དགའ་བ་ཅན། །སྲོག་གཅོད་པའི་ཉེས་དམིགས་བཅུ་པོ་དེ་དག་ཡིན་པར་རིག་པར་བྱའོ། །དགའ་བ་ཅན། །མ་བྱིན་པར་ལེན་པའི་ཉེས་དམིགས་བཅུ་ནི་འདི་དག་ཡིན་པར་རིག་པར་བྱ་སྟེ། བཅུ་པོ་དག་གང་ཞེ་ན། འཁོན་ཆེན་པོར་འགྱུར་བ་དང ། བག་ཚ་བ་ཆེན་པོར་འགྱུར་བ་དང ། དུས་མ་ཡིན་པར་འགྲོ་བར་འགྱུར་བ་དང ། ཕྱེ་མ་རེད་ཀྱི་དུས་སུ་འགྲོ་བར་འགྱུར་བ་དང ། སྡིག་པའི་གྲོགས་པོས་ཡོངས་སུ་ཟིན་པར་འགྱུར་བ་དང ། དགེ་བའི་གཤེས་གཉེན་གྱིས་ཡོངས་སུ་སྤངས་པར་འགྱུར་བ་དང ། ཚུལ་ཁྲིམས་འཆལ་བར་འགྱུར་བ་དང ། རྒྱལ་པོས་གནོད་པར་འགྱུར་བ་དང ། ཆོམ་རྐུན་གྱིས་གནོད་པར་འགྱུར་བ་དང ། ཆད་པས་གཅོད་པས་གནོད་པར་འགྱུར་ཏེ། ལོངས་སྤྱོད་ཀྱིས་ཕོངས་པར་འགྱུར་བའི་ལས་བྱས་ཤིང་བསགས་པས་ལུས་ཞིག་སྟེ་ཤི་བའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་ཞིང ། གལ་ཏེ་དེ་ནས་ཤི་འཕོས་ཏེ་འདིར་མི་རྣམས་དང་སྐལ་པ་མཉམ་པར་སྐྱེས་ནའང་དེ་གང་དང ། གང་དུ་སྐྱེས་པ་དེ་དང ། དེར་དབུལ་པོར་འགྱུར་རོ། །དེའི་ལོངས་སྤྱོད་དུ་འགྱུར་བ་གང་ཡིན་པ་འབད་པ་ཆེན་པོས་རྡུལ་ཞིང་དྲི་མ་ཆགས་ཆགས་སུ་རྐང་ལག་གི་མཐས་བསྒྲུབས་ 411a ༄#། །པ་དེ་དག་གནོད་པ་ལྔས་གནོད་པར་འགྱུར་སྟེ། ལྔ་པོ་དག་གང་ཞེ་ན། རྒྱལ་པོ་དང ། མེ་དང ། ཆུ་དང ། བགོ་སྐལ་ལ་སྤྱོད་པ་མི་མཛའ་བ་དང ། སྦས་པ་དག་གིས་དེ་ཆུད་ཟ་བར་འགྱུར་ཏེ། དགའ་བ་ཅན། མ་བྱིན་པར་ལེན་པའི་ཉེས་དམིགས་བཅུ་ནི་དེ་དག་ཡིན་པར་རིག་པར་བྱའོ། །དགའ་བ་ཅན། འདོད་པས་ལོག་པར་གཡེམ་པའི་ཉེས་དམིགས་བཅུ་ནི་འདི་དག་ཡིན་པར་རིག་པར་བྱ་སྟེ། བཅུ་པོ་དག་གང་ཞེ་ན། གང་དག་གི་ཆུང་མ་ཁ་དྲངས་པས་དེ་དག་དང ། དེ་འཁོན་དང་བཅས་པར་འགྱུར་བ་དང ། ཆུང་མ་དང་རྩོད་པར་འགྱུར་བ་དང ། དེའི་མི་དགེ་བའི་ཆོས་མངོན་པར་འཕེལ་བ་དང ། དེའི་དགེ་བའི་ཆོས་ཡོངས་སུ་འགྲིབ་པ་དང ། དེ་བདག་ཉིད་མ་ཞི་བར་འགྱུར་བ་དང ། དེའི་བུ་དང ། ཆུང་མ་མ་བསྲུང་པར་འགྱུར་བ་དང ། དེའི་ནོར་མ་སྦས་མ་བསྲུངས་པར་འགྱུར་བ་དང ། དེའི་ཁྱིམ་མ་སྦས་མ་བསྲུངས་པར་འགྱུར་བ་དང ། དེའི་སྲོག་མ་སྦས་མ་བསྲུངས་པར་འགྱུར་བ་དང ། དེའི་མཛའ་བཤེས་དང ། ཉེ་དུ་དང ། སྣག་གི་གཉེན་མཚམས་དང ། བློན་པོ་དག་ཡིད་འབེབས་པར་མི་འགྱུར་བ་དང ། འགྲན་ཟླ་དང་བཅས་པར་འགྱུར་བའི་ལས་བྱས་ཤིང་བསགས་པས་ལུས་ཞིག་སྟེ་ཤི་ནས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་ཞིང ། གལ་ཏེ་དེ་ནས་ཤི་འཕོས་ཏེ་འདིར་མི་རྣམས་དང་སྐལ་པ་མཉམ་པར་ 411b སྐྱེས་ནས་གལ་ཏེ་བུད་མེད་དུ་གྱུར་ནའང་འགྲན་ཟླ་དང་བཅས་པའི་ཁྱོ་རྙེད་པར་འགྱུར་རོ། །ཅི་སྟེ་སྐྱེས་པར་གྱུར་ན་དེའི་བུ་དང ། ཆུང་མ་མ་བསྲུངས་པར་འགྱུར་ཏེ། དགའ་བ་ཅན། །འདོད་པས་ལོག་པར་གཡེམ་པའི་ཉེས་དམིགས་བཅུ་ནི་དེ་དག་ཡིན་པར་རིག་པར་བྱའོ། །དགའ་བ་ཅན། བརྫུན་དུ་སྨྲ་བའི་ཉེས་དམིགས་བཅུ་ནི་འདི་དག་ཡིན་པར་རིག་པར་བྱ་སྟེ། བཅུ་པོ་དག་གང་ཞེ་ན། དེའི་ཁ་ནས་རང་མནམ་པར་འགྱུར་བ་དང ། དེའི་ལུས་སྲུང་བའི་ལྷས་འཕང་བ་དང ། མི་མ་ཡིན་པས་གླགས་རྙེད་པར་འགྱུར་བ་དང ། བདེན་པར་སྨྲས་ཀྱང་དེའི་ཚིག་ལ་མ་དད་པར་འགྱུར་བ་དང ། དགོས་པ་བྱུང་ཡང་འདི་ལ་མཁས་པ་རྣམས་ཡོངས་སུ་འདྲི་བར་མི་སེམས་པ་དང ། ཡང་དག་པ་མ་ཡིན་པའི་མི་སྙན་པ་རྒྱ་ཆེར་སྒྲོགས་པར་འགྱུར་བ་དང ། ཕྱིར་ལྡང་བའི་འོས་མ་ཡིན་པར་འགྱུར་བ་དང ། སྡུག་བསྔལ་ཞིང་ཡིད་མི་བདེ་བར་འགྱུར་བ་དང ། མི་སྙན་པ་བརྗོད་པ་མང་བར་འགྱུར་བའི་ལས་བྱས་ཤིང་བསགས་པས་ལུས་ཞིག་སྟེ་ཤི་ནས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་ཞིང ། གལ་ཏེ་དེ་ནས་ཤི་འཕོས་ཏེ་འདིར་མི་རྣམས་དང་སྐལ་པ་མཉམ་པར་སྐྱེས་ནའང་དེ་གང་དང ། གང་དུ་སྐྱེས་པ་དེ་དང ། དེར་མི་སྙན་པ་བརྗོད་པ་མང་པོར་འགྱུར་ཏེ། དགའ་བ་ཅན། བརྫུན་དུ་སྨྲ་བའི་ཉེས་དམིགས་བཅུ་ནི་དེ་དག་ཡིན་པར་རིག་པར་བྱའོ། །དགའ་བ་ཅན་འབྲུའི་ཆང་དང ། བཅོས་པའི་ཆང་བག་མེད་པའི་གནས་ཀྱི་ཉེས་ 412a ༄#། །དམིགས་སུམ་ཅུ་རྩ་ལྔ་ནི་འདི་དག་ཡིན་པར་རིག་པར་བྱ་སྟེ། སུམ་ཅུ་རྩ་ལྔ་པོ་དག་གང་ཞེ་ན། ཚེ་འདི་ལ་ནོར་བཟད་པ་དང ། ནད་རྣམས་རྒྱས་པར་བྱེད་པ་དང ། འཐང་བ་དང ། རྩོད་པ་སྐྱེད་པ་དང ། དོན་མེད་པ་ལ་ལྟ་བ་དང ། གྲགས་པ་མ་ཡིན་པ་ཀུན་ཏུ་འབྱུང་བར་བྱེད་པ་དང ། ཤེས་རབ་ཉམ་ཆུང་བར་བྱེད་པ་དང ། ལོངས་སྤྱོད་ཐོབ་པ་མི་འཐོབ་པར་འགྱུར་བ་དང ། ལོངས་སྤྱོད་ཐོབ་པ་ཡོངས་སུ་ཟད་ཅིང་ཡོངས་སུ་གཏུགས་པར་འགྱུར་བ་དང ། གསང་མི་ཐུབ་པར་འགྱུར་བ་དང ། དེ་ལས་ཀྱི་མཐའ་ཡོངས་སུ་འགྲིབ་པ་དང ། མཐུ་སྟོབས་ཆུང་དུར་བྱེད་པར་འགྱུར་བ་དང ། མར་མི་འཛིན་པར་འགྱུར་བ་དང ། ཕར་མི་འཛིན་པར་འགྱུར་བ་དང ། དགེ་སྦྱོང་དུ་མི་འཛིན་པར་འགྱུར་བ་དང ། བྲམ་ཟེར་མི་འཛིན་པར་འགྱུར་བ་དང ། རིགས་ཀྱི་གཙོ་བོ་ལ་བསྙེན་བཀུར་མེད་པར་འགྱུར་བ་དང ། སངས་རྒྱས་ལ་མི་གུས་པར་འགྱུར་པ་དང ། ཆོས་ལ་མི་གུས་པར་འགྱུར་བ་དང ། དགེ་འདུན་ལ་མི་གུས་པར་འགྱུར་བ་དང ། བསླབ་པ་ཡང་དག་པར་བླངས་པ་ལ་མི་གུས་པར་འགྱུར་བ་དང ། ཚུལ་ཁྲིམས་འཆལ་བར་འགྱུར་བ་དང ། དབང་པོའི་སྒོ་མ་བསྡམས་པར་འགྱུར་བ་དང ། བག་མེད་པར་ཤིན་ཏུ་བུད་མེད་དོན་དུ་གཉེར་བ་དང ། ཉེ་དུ་དང ། སྣག་གི་གཉེན་མཚམས་དང ། མཛའ་བཤེས་དང ། བློན་པོ་དག་གིས་སྤོང་བར་འགྱུར་བ་དང ། སྐྱེ་བོ་མང་པོ་དག་གི་ཡིད་དུ་མི་འོང་བར་འགྱུར་བ་དང ། 412b སྐྱེ་བོ་མང་པོ་དག་དང་མི་མཐུན་པར་འགྱུར་བ་དང ། ཆོས་མ་ཡིན་པའི་སྤྱོད་པར་འགྱུར་བ་དང ། ཆོས་མ་ཡིན་པ་ཡོངས་སུ་འཛིན་པར་འགྱུར་བ་དང ། དམ་པའི་ཆོས་ཡོངས་སུ་སྤོང་བར་འགྱུར་བ་དང ། ངོ་ཚ་ཤེས་པ་དང ། ཁྲེལ་ཡོད་པ་ཡོངས་སུ་སྤོང་བར་གྱུར་བ་དང ། མི་མཛའ་བ་དག་དང་གནས་ཀྱང་མཁས་པ་རྣམས་ཡོངས་སུ་འདྲི་བར་མི་སེམས་པ་དང ། བག་མེད་པ་ཉམ་བག་ཏུ་སྤྱོད་པར་འགྱུར་བ་དང ། དེ་བཞིན་གཤེགས་པའི་གསུང་རབ་ལ་ཀུན་ནས་མི་གནས་པ་དང ། མྱ་ངན་ལས་འདས་པ་ལས་ཐག་རིང་དུ་འགྱུར་བ་དང ། སྨྱོན་པར་འགྱུར་བའི་ལས་བྱས་ཤིང་བསགས་པས་ལུས་ཞིག་སྟེ་ཤི་ནས་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་དག་ཏུ་སྐྱེ་ཞིང ། གལ་ཏེ་དེ་ནས་ཤི་འཕོས་ཏེ་འདྲི་མི་རྣམས་དང་སྐལ་པ་མཉམ་པར་སྐྱེས་ནའང་དེ་གང་དང ། གང་དུ་སྐྱེས་པ་དེ་དང ། དེར་སྨྱོན་པར་འགྱུར་ཞིང་དྲན་པ་མི་གསལ་བར་འགྱུར་ཏེ། དགའ་བ་ཅན། འབྲུའི་ཆང་དང ། བཅོས་པའི་ཆང་བག་མེད་པའི་གནས་ཀྱི་ཉེས་དམིགས་ནི་སུམ་ཅུ་རྩ་ལྔ་པོ་དེ་དག་ཡིན་པར་རིག་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་བཀའ་སྩལ་ཏོ། །སྲོག་གཅོད་རྡེག་དང་འཆིང་བ་རྣམ་སྤངས་ཏེ། །སེམས་ཅན་དག་ལ་ཕན་ཞིང་སྙིང་བརྩེ་བ། །བདག་གི་ཚེ་སྐྱབས་དགའ་བ་ཇི་ལྟ་བར། །དེ་བཞིན་གཞན་རྣམས་ཀྱི་ནི་སྲོག་ 413a ༄#། །ཀྱང་བསྲུང ། །སྡུག་བསྔལ་མང་པོས་བསགས་པ་གཞན་གྱི་ནོར། །མ་བྱིན་དེ་ལ་ཡིད་ཀྱང་བསམས་མི་བྱ། །འཇིག་རྟེན་གྱིས་མཐོང་དགའ་དང་བྲལ་འགྱུར་ཞིང ། ། གཞན་ཡང་དེ་བཞིན་ཕན་པར་གནས་པར་གྱིས། །གཞན་གྱི་བུད་མེད་རྒྱན་གྱིས་བརྒྱན་པ་དག། མེ་ལྕེ་འབར་བ་བཞིན་དུ་ཡོངས་སྤོངས་ལ། །རང་གི་ཆུང་མ་རྙེད་པས་ཆོག་པར་བྱོས། ། འདོད་རྒྱུ་དུག་དང་འདྲ་བ་མ་སྤྱོད་ཅིག། རང་གི་དོན་དང ། གཞན་གྱི་དོན་ཆེད་དུ། །སུས་ཀྱང་ཤེས་བཞིན་རྫུན་དག་མ་སྨྲ་བར། །གཞན་ལ་མི་གནོད་གཞན་ལ་མི་གདུང་བར། །བརྟགས་ཏེ་འཇམ་པོའི་ཚིག་གིས་སྨྲ་བར་གྱིས། །ཆང་འཐུང་བ་ལ་མངོན་པར་དགའ་བའི་མི། །བདག་ལ་ཕན་དང་གཞན་ལ་བདེ་མི་ནུས། །རྨོངས་དང་མདོག་ངན་བྱེད་པ་ཆང་ཡིན་ཏེ། །ཇི་ལྟར་ཧ་ལའི་དུག་བཞིན་དེ་མི་བཏུང ། །སྲོག་ཆགས་མི་གསོད་གཞན་གྱི་ནོར་མི་འཕྲོག། བརྫུན་དུ་མི་སྨྲ་ཆང་ཡང་མི་བཏུང་ཞིང ། །གཞན་གྱི་ཆུང་མ་ཡིན་ལའང་མི་འདོད་པ། །མཐོ་རིས་གང་འདོད་ཁྱིམ་དུ་འཇུག་པ་བཞིན། །གོས་དཀར་གྱོན་པ་ཁྱིམ་པ་རྣམས་ཀྱིས་ནི། །ཁྱིམ་གནས་རྣམས་ཀྱི་བསླབ་པ་འདི་ཡིན་ཏེ། །རྒྱལ་བས་དེ་གོང་རབ་ཏུ་བྱུང་རྣམས་ཀྱི། །བསླབ་གཞིའི་ཆོས་ནི་རབ་ཏུ་བསྟན་པ་ཡིན། །དེ་ནས་དགེ་བསྙེན་དགའ་བ་ཅན་བཅོམ་ལྡན་འདས་ལ་ཆོས་ཀྱི་རྣམ་གྲངས་འདི་ཐོས་ནས་དགའ་ཞིང་མགུ་ལ་ཡི་རངས་ཏེ། རབ་ཏུ་དགའ་བ་ 413b དང ། བདེ་བ་དང ། ཡིད་བདེ་བ་སྐྱེས་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱིས་བཀའ་སྩལ་པ་ལ་མངོན་པར་དགའ་ནས་རྗེས་སུ་ཡི་རངས་ཏེ། བཅོམ་ལྡན་འདས་ཀྱི་སྤྱན་སྔ་ནས་སོང་ངོ ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་དགའ་བ་ཅན་གྱི་མདོ་རྫོགས་སོ།། །།རྒྱ་གར་གྱི་མཁན་པོ་ཤཱཀྱ་སིདྷ་དང ། ལོ་ཙཱ་བ་བནྡེ་བྱིན་གྱི་སྙིང་པོས་བསྒྱུར་ཏེ། ཞུས་ཆེན་གྱི་ལོ་ཙཱ་བ་བནྡེ་དེ་བ་ཙནྡྲས་ཞུས་ཏེ་གཏན་ལ་ཕབ་པ།། |