།།རྒྱ་གར་སྐད་ 455b དུ།་ཀརྨ་བི་བྷྔྒ། བོད་སྐད་དུ། ལས་རྣམ་པར་འབྱེད་པ། བམ་པོ་དང་པོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་\?\་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་གྱི་ཚལ་མགོན་མེད་ཟས་སྦྱིན་གྱི་ཀུན་དགའ་བ་ན་བཞུགས་ཏེ། དེར་བཅོམ་ལྡན་འདས་ཀྱིས་བྲམ་ཟེའི་ཁྱེའུ་ཤུ་ཀ་ལ་བཀའ་སྩལ་བ། བྲམ་ཟེའི་ཁྱེའུ། ཁྱོད་ལ་ལས་རྣམ་པར་འབྱེད་པ་བསྟན་གྱི། དེ་ལེགས་པར་ཤིན་ཏུ་ཉོན་ལ་ཡིད་ལ་ཟུངས་ཤིག་དང་ངས་བཤད་ཀྱི། བཅོམ་ལྡན་འདས། དེ་ལྟར་བགྱིའོ་ཞེས་ནས་བྲམ་ཟེའི་ཁྱེའུ་ཤུ་ཀ་བཅོམ་ལྡན་འདས་ལ་ཕྱིར་ཉན་པ་དང ། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །བྲམ་ཟེའི་བུ། ངས་ནི་སེམས་ཅན་རྣམས་བདག་གི་ལས་ལས་སུ་གྱུར་པ། ལས་ཀྱི་རྒྱུ་ལས་སྐྱེས་པ། ལས་སྐལ་བ་ལ་སྤྱོད་པ། ལས་ལ་བརྟེན་པར་གསུངས་ཏེ། བྲམ་ཟེའི་བུ། ལས་ནི་འདི་ལྟ་སྟེ།་སེམས་ཅན་རྣམས་རབ་དང ། འབྲིང་དང ། ཐ་མར་རྣམ་པར་འབྱེད་དོ། །དེ་ནི་འདི་ལྟར་ཚེ་ཐུང་བར་འགྱུར་བའི་ལས་ཡོད་དེ། དེ་ལ་ཚེ་ཐུང་བར་འགྱུར་བའི་ལས་གང་ཞེ་ན། དེ་ནི་སྲོག་གཅོད་པ་དང ། སྲོག་གཅོད་པ་ལ་རྗེས་སུ་དགའ་བ་དང ། སྲོག་གཅོད་པའི་ལེགས་པ་བརྗོད་པ་དང ། མི་མཛའ་བ་ཚེ་འཕོ་བར་བསྐུལ་བ་དང ། མི་མཛའ་བ་ཚེ་འཕོས་ 456a ༄#། །ན་ལེགས་པར་བརྗོད་པ་དང ། མངལ་ནས་ཚེ་འཕོ་བར་བྱེད་པ་དང ། མངལ་ནས་ཚེ་འཕོ་བའི་ལེགས་པ་བརྗོད་པ་དང ། མ་ཧེ་དང ། བ་ལང་དང ། ཕ་ལ་དང།་བྱ་ལ་སོགས་པ་བསད་པར་འགྱུར་བའི་རྟེན་འཆའ་ཞིང ། མཆོད་སྦྱིན་དེ་བཙུགས་པས་བུ་ཚ་དང ། སྐྱེ་བོ་གཞན་ལ་ཕན་པར་འདོད་པ་རྣམས་དང ། འཇིགས་པས་ཉེན་པ་རྣམས་ཀྱི་ལུགས་སུ་གྱུར་ཅིང་སེམས་ཅན་གསོད་པར་འགྱུར་བ་སྟེ། དཔེར་ན། གྲོང་ཁྱེར་ཀས་མརྱ་ན་དགེ་སློང་དགྲ་བཅོམ་པ་གཅིག་ཅིག་ཁྱིམ་ཞིག་གི་སྒོ་ན་འདུག་འདུག་ན། ཁྱིམ་དེའི་ཐད་ཀ་ལམ་པོ་ཆེ་ནས་ཕྱུགས་ཤིག་སྒྲ་འབྱིན་ཅིང་ཁྲིད་པ་དགེ་སློང་དེས་མཐོང་ནས་ཀྱི་ཧུད་ཨེ་མ་ག་ལ་སྲིད་ཅེས་བྱས་པ་དང ། མི་དག་གིས་དགེ་སློང་དེ་ལ། སློབ་དཔོན། ཅི་ཞིག་དེ་སྐད་དུ་ཀྱི་ཧུད་ཨེ་མ་ག་ལ་སྲིད་ཅེས་བྱ་བའི་སྒྲ་བརྗོད་ཅེས་དྲིས་ན། དེས་སྨྲས་པ། དེ་ནི་མ་དད་པ་རྣམས་ལ་སྨྲ་བར་ཡང་མི་བྱ་བ་ཞིག་སྟེ་སྒོས་ཀྱིས་སྨྲའོ་ཞེས་ནས།་དེས་སྨྲས་པ། ཕྱུགས་པ་བི་ལྟར་སྒྲ་འབྱིན་ཅིང་ཁྲིད་པ་ཕ་བིས་སྔོན་ཚོང་བ་ཕྱུག་པོ་ཞིག་ཏུ་རེད་པའི་ཚེ། རྟེན་བཙུགས་ཏ་ལོ་དུས་ཀྱི་མཆོད་སྦྱིན་བྱས་ནས། དེས་དེར་ཕྱུགས་མང་པོ་དག་ཀྱང་བསད། ཚེ་འཕོ་ཀར་ཡང་བུལ་བོས་ཏེ་སྨྲས་པ། བུ་ཁྱོད་ང་ལ་བྱམས་ཞ་ན། ཕྱུགས་ཀྱི་མཆོད་སྦྱིན་ལོ་དུས་སུ་བྱ་བ་འདི་ང་ཚེ་འཕོས་ནས་ 456b ཀྱང་རྟག་པར་གྱིས་ཤིག་ཅེས་བསྒོ་ནས། བུས་ཀྱང་དེ་ལྟར་བགྱིའོ་ཞེས་ཏེ་དེ་བཞིན་དུ་མཉན་ཏོ། །དེ་ནས་མི་དེ་ཚེ་འཕོས་བ་དང ། གཏི་མུག་ལས་བྱུང་བའི་སྲོག་གཅོད་པ་དང་ལྡན་པས་བདག་གི་ཁྱིམ་དུ་ཕྱུགས་སུ་སྐྱེས་ནས་དེ་དེར་ཡང་དང ། ཡང་སྐྱེས་ཤིང་བསད་བསད་པ་ལས་ལན་འདི་དང་དྲུག་སྟེ་དེ་ཡང་ཁྲིད་པ་ཡིན་ནོ་ཞེས་ནས། དགེ་སློང་དེས་ཕྱུགས་དེ་ལ་སྙིང་བརྩེ་བས་འདི་སྐད་ཅེས་སྨྲས་སོ། །རྟེན་ཀྱང་ཁྱོད་བདག་གིས་བཙུགས། མཆོད་སྦྱིན་ཡང་ཁྱོད་བདག་གིས་བྱས། ཕྱུགས་མང་པོར་ཡང་ཁྱོད་བདག་གིས་བསད་ན། ངེ་དེ་སྐད་དུ་དོན་མེད་པ་བོས་པས་ཅི་ལ་ཕན་ཞེས་བརྗོད་པ་ལྟ་བུ་སྟེ། དེ་ལྟ་བུའི་རྟེན་བཙུགས་པ་དང་དམག་ལྟ་བུ་མི་དང་རྟ་ལ་སོགས་པ་སེམས་ཅན་མང་པོ་དངོག་པ་ལ་ལྟ་བ་དང་འཐབ་མོའི་ཆ་བྱད་ལ་དགའ་བ་ལྟ་བུ་སྟེ། ནག་པོ་ཡོད་པའི་མདོ་ལས་བཅོམ་ལྡན་འདས་ཀྱིས་གསུངས་པ། ཀུན་དགའ་བོ། སྲོག་གཅོད་པ་ལ་བསྟེན་ཅིང་གོམས་པར་བྱས་པ་དང་མང་དུ་བྱས་པ་ནི་སེམས་ཅན་དམྱལ་བར་སྐྱེ་བའི་རྒྱུར་འགྱུར་རོ། །དུད་འགྲོའི་སྐྱེ་གནས་སུ་སྐྱེ་བའི་རྒྱུར་འགྱུར་རོ། །ཡི་དྭགས་སུ་སྐྱེ་བའི་རྒྱུར་འགྱུར་རོ་ཞེས་གསུངས་ཏེ། སྲོག་གཅོད་བ་ནི་ཉུང་ཞིང་ཆུང་ཡང་རྣམ་པར་སྨིན་པ་ཚེ་ཐུང་བར་འགྱུར་རོ། །དེ་ལ་ཚེ་རིང་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་སྲོག་གཅོད་པ་སྤངས་པ་དང ། སྲོག་གཅོད་པ་སྤངས་ 457a ༄#། །པའི་ལེགས་པ་བརྗོད་པ་དང ། དེ་ལ་བསྐུལ་བ་དང ། དེའི་ལེགས་པ་བརྗོད་པ་དང ། གསད་པར་བྱ་བའི་མི་དང ། བ་ལང་དང ། ཕག་དང ། བྱ་ལ་སོགས་པ་སྲོག་བྱིན་པ་དང ། སེམས་ཅན་འཇིགས་པས་ཉེན་པ་རྣམས་ལ་མི་འཇིགས་པ་སྦྱིན་པ་དང ། སེམས་ཅན་མགོན་མེད་པ་རྣམས་ལ་སྙིང་རྗེའི་སེམས་བསྐྱེད་པ་དང ། ནད་པ་དང ། བྱིས་པ་དང ། རྒན་པ་རྣམས་ལ་བྱམས་པའི་སེམས་བསྐྱེད་པ་དང ། དེ་དག་ལ་ཟས་ཀྱི་སྦྱིན་པ་བྱེད་པ་དང ། སློང་པ་ལ་བྱམས་པའི་སེམས་བསྐྱེད་པ་དང ། དམག་ལ་སོགས་པ་སྔར་སྨོན་པ་ཐམས་ཅད་བཟློག་སྟེ། དགེ་བའི་ཕྱོགས་བྱས་པ་དང ། དེ་བཞིན་དུ་མཆོད་རྟེན་དང་གཙུག་ལག་ཁང་ཞིག་པ་དག་བཅོས་ལེགས་བྱས་པ་སྟེ། མདོ་དེ་ཉིད་ལས། ཞིག་ཅིང་རལ་བ་སུས་བཅོས་པ། །དེ་ལ་ཚེ་འཕྲོག་བདུད་མི་འབྱུང ། །ཞེས་གསུངས་པ་ལྟ་བུ་སྟེ། ལས་དེ་ལྟ་བུ་ནི་ཚེ་རིང་བར་འགྱུར་བའོ། །དེ་ལ་ནད་མང་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ཁྲོ་བ་དང ། ཁུ་ཚུར་དང ། ཐལ་མོས་རྡེག་པ་དང ། ཁུ་ཚུར་དང ། ཐལ་མོས་རྡེག་པ་ལ་རྗེས་སུ་དགའ་བ་དང ། ཁུ་ཚུར་དང ། ཐལ་མོས་རྡེག་པའི་ཡོན་ཏན་བརྗོད་པ་དང ། དེ་ལ་བསྐུལ་བ་དང ། ཕ་མའི་སེམས་དང་ལུས་མི་བདེ་བར་བྱས་པ་དང ། རབ་ཏུ་འབྱུང་བ་ཚུལ་ཁྲིམས་དང་ལྡན་པ་དག་གི་ 457b སེམས་མི་བདེ་བར་བྱས་པ་དང ། མི་མཛའ་བ་ནད་ཀྱིས་བཏབ་པ་ལ་དགའ་བར་སེམས་པ་དང ། མི་མཛའ་བ་ནད་སོས་ན་མི་དགའ་བར་སེམས་པ་དང ། ནད་པ་ལ་སྨན་མ་ཡིན་པ་བྱིན་པ་དང ། ཟས་མ་ཞུ་བར་བསྟབས་པ་སྟེ། ལས་དེ་ལྟ་བུ་ནི་ནད་མང་བར་འགྱུར་རོ། །དེ་ལ་ནད་ཉུང་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ཐལ་མོ་དང ། ཁུ་ཚུར་གྱིས་རྡེག་པ་དང ། ཐལ་མོ་དང ། ཁུ་ཚུར་གྱིས་རྡེག་པ་སྤོང་བར་བསྐུལ་བ་དང ། དེའི་ཡོན་ཏན་བརྗོད་པ་དང ། དེ་ལ་རྗེས་སུ་དགའ་བ་དང ། ཕ་མ་ན་བའི་རིམ་གྲོ་བྱེད་པ་དང ། ཁྱིམ་པ་དང ། རབ་ཏུ་བྱུང་བ་དང ། རྒན་ནམ། གཞོན་ཡང་རུང་སྟེ། ན་ན་རིམ་གྲོ་བྱེད་པ་དང ། མི་མཛའ་བ་ནའང་མི་དགའ་བར་སེམས་པ་དང ། དེའི་ནད་སོས་ན་དགའ་བར་སེམས་པ་དང ། སྨན་གྱི་སྦྱིན་པ་བྱེད་པ་དང ། ཁ་ཟས་ཞུ་ནས་སྟོབས་པ་སྟེ། ལས་དེ་ལྟ་བུ་ནི་ནད་ཉུང་བར་འགྱུར་རོ། །དེ་ལ་ཁ་དོག་མི་སྡུག་པར་འགྱུར་པའི་ལས་ཡོད་དེ། དེ་གང་ཞེ་ན། དེ་ནི་ཁྲོ་བ་དང ། འཁོན་དུ་འཛིན་པ་དང ། འཆབ་པ་དང ། ཚིག་པ་དང ། ཕ་མ་ལ་ངན་དུ་བརྗོད་པ་དང ། ཁྱིམ་པ་དང ། རབ་ཏུ་བྱུང་བ་རྒན་གཞོན་ལ་ངན་དུ་བརྗོང་པ་དང ། མཆོད་རྟེན་དང ། གཙུག་ལག་ཁང་དང ། མཆོད་རྟེན་གྱི་ས་གཞི་མི་སྡུག་པར་བྱས་པ་དང ། མཆོད་རྟེན་དང ། སྐུ་གཟུགས་ཀྱི་མར་མེ་བསད་པ་དང ། སེམས་ཅན་ཁ་དོག་མི་སྡུག་པ་རྣམས་ལ་ 458a ༄#། །ཕྱས་འདོགས་པ་དང ། གཙང་སྦྲ་ཆུང་བ་སྟེ། ལས་དེ་ལྟ་བུ་ནི་ཁ་དོག་མི་སྡུག་པར་འགྱུར་བའོ། །དེ་ལ་མཛེས་པར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་མི་ཁྲོ་བ་དང ། འཁོན་དུ་མི་འཛིན་པ་དང ། མི་འཆབ་པ་དང ། མི་ཚིག་པ་དང ། གོས་ཀྱི་སྦྱིན་པ་བྱེད་པ་དང ། མཆོད་རྟེན་དང ། གཙུག་ལག་ཁང་དག་ལ་རྡོ་ཐལ་གྱིས་སྐྱང་ནུལ་བྱེད་པ་དང ། སྣོད་སྤྱད་སྡུག་གུའི་སྦྱིན་པ་བྱེད་པ་དང ། སྤོས་དང ། བྱུག་པ་དང ། གོས་དང ། རྒྱན་གྱི་སྦྱིན་པ་བྱེད་པ་དང ། ཕ་མའི་ལེགས་པ་བརྗོད་པ་དང ། འཕགས་པ་དང ། ཚུལ་ཁྲིམས་དང་ལྡན་པ་དག་གི་ལེགས་པ་བརྗོད་པ་དང ། མཆོད་རྟེན་གྱི་གཞི་དང ། གཙུག་ལག་ཁང་དང ། ཁྱིམ་གྱི་ཕྱག་དར་རྟག་ཏུ་བྱེད་པ་དང ། སེམས་ཅན་མི་སྡུག་པ་རྣམས་ཕྱས་མི་བྱེད་པ་དང ། དེ་བཞིན་དུ་རྒན་པའམ། གཞོན་པ་གཞན་དག་ལ་ཕྱས་མི་བྱེད་པ་དང ། གཙང་སྦྲ་ཆེ་བ་སྟེ། ལས་དེ་ལྟ་བུ་ནི་མཛེས་པར་འགྱུར་བའོ། །དེ་ལ་མཐུ་ཆུང་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་སེར་སྣ་བྱེད་པ་དང ། ཕྲག་དོག་ཆེ་བ་དང ། གཞན་གྱིས་ཐོབ་ན་མི་དགའ་བ་དང ། གཞན་ལ་མི་སྙན་པར་བརྗོད་ན་དགའ་བ་དང ། ཕ་མ་ལ་བརྙས་པ་དང ། འཕགས་པ་དང ། ཚུལ་ཁྲིམས་དང་ལྡན་པ་ལ་བརྙས་པ་དང ། ནད་པ་དང ། རྒན་པ་དང ། གཞོན་པ་ལ་བརྙས་པ་དང ། ཆོས་ 458b ངན་པ་དང ། མི་དགེ་བའི་རྩ་བའི་ལེགས་པ་བརྗོད་པ་དང ། བྱང་ཆུབ་ཀྱི་སེམས་ལས་བཟློག་པ་སྟེ། ལས་དེ་ལྟ་བུ་ནི་མཐུ་ཆུང་བར་འགྱུར་བའོ། །དེ་ལ་མཐུ་ཆེ་བར་འགྱུར་བའི་ལས་ཡོད་དེ།་དེ་གང་ཞེ་ན། དེ་ནི་ཕྲག་དོག་མེད་པ་དང ། སེར་སྣ་མེད་པ་དང ། གཞན་གྱིས་ཐོབ་ན་དགའ་བ་དང ། གཞན་གྱིས་མ་ཐོབ་ན་མི་དགའ་བ་དང ། གཞན་གྱི་གྲགས་པ་དང ། སྒྲ་དང།་ཚིག་སུ་བཅད་པ་སྙན་པ་ཐོས་ན་དགའ་བ་དང ། གཞན་གྱི་ལེགས་པ་བརྗོད་པ་ལ་དགའ་བ་དང ། བཅོམ་ལྡན་འདས་ཀྱི་མཆོད་རྟེན་དང ། གཙུག་ལག་ཁང་བརྩིག་པ་དང།་ཆོས་ངན་པ་དང ། མི་དགེ་བའི་རྩ་བ་ལས་བཟློག་པ་དང ། མཐུ་ཆེ་བར་འགྱུར་བའི་དགེ་བའི་རྩ་བ་ལ་བསྐུལ་བ་དང ། བྱང་ཆུབ་ཏུ་སེམས་བསྐྱེད་པ་དང ། དགེ་བའི་རྩ་བ་ཐམས་ཅད་ཀྱིས་མཐུ་ཆེན་པོར་སེམས་བསྐྱེད་པ་སྟེ། ལས་དེ་ལྟ་བུ་ནི་མཐུ་ཆེ་བར་འགྱུར་བའོ། །དེ་ལ་རིགས་དམའ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ཕོ་ཐེག་ཆེ་བ་དང ། ང་རྒྱལ་བྱེད་པ་དང ། ཕར་མི་འཛིན་པ་དང ། མར་མི་འཛིན་པ་དང ། དགེ་སྦྱོང་དུ་མི་འཛིན་པ་དང ། བྲམ་ཟེར་མི་འཛིན་པ་དང ། རིགས་ཀྱི་གཙོ་བོ་ལ་རིམ་གྲོ་མི་བྱེད་པ་དང ། ཕ་མ་ལ་རིམ་གྲོ་མི་བྱེད་པ་དང ། འཕགས་པ་དང ། ཚུལ་ཁྲིམས་དང་ལྡན་པ་རྣམས་ལ་རིམ་གྲོ་མི་བྱེད་པ་དང ། བླ་མར་གྱུར་པ་གཞན་དང ། མཁན་པོ་དང ། 459a ༄#། །སློབ་དཔོན་ལ་རིམ་གྲོ་མི་བྱེད་པ་དང ། སེམས་ཅན་རིགས་དམའ་བ་རྣམས་ལ་བརྙས་པ་སྟེ། ལས་དེ་ལྟ་བུ་ནི་རིགས་དམའ་བར་འགྱུར་བའོ། །དེ་ལ་རིགས་མཐོ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ཕོ་ཐེག་ཆུང་བ་དང ། ང་རྒྱལ་མེད་པ་དང ། ཕར་འཛིན་པ་དང ། མར་འཛིན་པ་དང ། དགེ་སྦྱོང་དུ་འཛིན་པ་དང ། བྲམ་ཟེར་འཛིན་པ་དང ། རིགས་ཀྱི་གཙོ་བོ་རྣམས་ལ་རིམ་གྲོ་བྱེད་པ་དང ། ཕ་མ་ལ་རིམ་གྲོ་བྱེད་པ་དང ། འཕགས་པ་དང་ཚུལ་ཁྲིམས་དང་ལྡན་པ་རྣམས་ལ་རིམ་གྲོ་བྱེད་པ་དང།་མཁན་པོ་དང་སློབ་དཔོན་ལ་རིམ་གྲོ་བྱེད་པ་དང ། བླ་མར་གྱུར་པ་གཞན་དག་ལ་རིམ་གྲོ་བྱེད་པ་དང ། སེམས་ཅན་རིགས་དམའ་བ་རྣམས་ལ་མི་བརྙས་པ་སྟེ། དཔེར་ན།་བཅོམ་ལྡན་འདས་ཀྱིས་མདོ་ལས་གསུངས་པ། དགེ་སློང་དག་།གྲོང་གང་དུ་རབ་ཏུ་བྱུང་བ་ཚུལ་ཁྲིམས་དང་ལྡན་ཞིང་ཚངས་པར་སྤྱོད་པ། དགེ་བའི་ཆོས་ཅན་རྣམས་འོང་བའི་གྲོང་དེར་ལེགས་པ་ལྔ་འབྱུང་བར་རིག་པར་བྱ་སྟེ། ལྔ་གང་ཞེ་ན། དེ་ནི་ཚུལ་ཁྲིམས་དང་ལྡན་པ་འོངས་པ་རྣམས་ལ་སེམས་དད་པར་འགྱུར་རོ། །དགེ་སློང་དག ། གཞན་ཡང་དེའི་ཚེ། རིགས་དེ་མཐོ་རིས་སུ་སྐྱེ་བའི་ལམ་དུ་ཞུགས་པ་ཡིན་ནོ། །དགེ་སློང་དག་།གཞན་ཡང ། ཚུལ་ཁྲིམས་དང་ལྡན་པ་དག་འོངས་ན་གུས་པར་སྨྲ་བ་དང ། བསུ་ 459b པའི་ལས་བྱེད་དེ། དེའི་ཚེ་རིགས་དེ་དག་རིགས་མཐོ་བར་འགྱུར་བའི་ལམ་དུ་ཞུགས་པ་ཡིན་ནོ་ཞེས་གསུངས་པ་ལྟ་བུ་སྟེ། ལས་དེ་ལྟ་བུ་ནི་རིགས་མཐོ་བར་འགྱུར་བའོ། །དེ་ལ་ལོངས་སྦྱོད་ཆུང་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་མ་བྱིན་པར་ལེན་པ་དང ། མ་བྱིན་པར་ལེན་པར་བསྐུལ་བ་དང ། མ་བྱིན་པར་ལེན་པའི་ལེགས་པ་བརྗོད་པ་དང ། དེ་ལ་རྗེས་སུ་དགའ་བ་དང ། མ་བྱིན་པར་བླངས་པས་དགའ་བ་དང ། ཕ་མའི་འཚོ་བ་འཕྲོག་པ་དང ། འཕགས་པ་དང་ཚུལ་ཁྲིམས་དང་ལྡན་པའི་འཚོ་བ་འཕྲོག་པ་དང ། རབ་ཏུ་བྱུང་བ་རྣམས་དང ། བྱིས་པ་དང ། རྒན་པ་དང ། ཕོངས་པ་དང ། ནད་པ་རྣམས་ཀྱི་འཚོ་བ་འཕྲོག་པ་དང ། གཞན་གྱིས་མཐོབ་ན་དགའ་བ་དང ། གཞན་གྱིས་ཐོབ་པར་འགྱུར་བ་ལ་བགེགས་བྱེད་པ་དང ། ལོ་ཉེས་སུ་དགའ་བ་སྟེ། ལས་དེ་ལྟ་བུ་ནི་ལོངས་སྤྱོད་ཆུང་བར་འགྱུར་བའོ། །དེ་ལ་ལོངས་སྤྱོད་ཆེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་མ་བྱིན་པར་ལེན་པ་སྤངས་པ་དང ། གཞན་གྱིས་མ་བྱིན་པར་ལེན་པ་སྤངས་ན་རྗེས་སུ་དགའ་བ་དང ། ཕ་མ་ལ་འཚོ་བ་འབུལ་བ་དང ། འཕགས་པ་དང ། ཚུལ་ཁྲིམས་དང་ལྡན་པ་རྣམས་ལ་འཚོ་བ་འབུལ་བ་དང ། ནད་པ་དང ། བྱིས་པ་དང ། རྒན་པ་དང ། ཕོངས་པ་གཞན་ལའང་འཚོ་བའི་སྦྱིན་པ་བྱེད་པ་དང ། གཞན་གྱིས་ཐོབ་ན་དགའ་བ་དང ། ལོ་ལེགས་ 460a ༄#། །པར་དགའ་བ་སྟེ། མདོ་དེ་ཉིད་ལས། དགེ་སློང་དག་།གཞན་ཡང ། ཚུལ་ཁྲིམས་དང་ལྡན་པ་རྣམས་འོངས་པ་དག་ལ་སྦྱིན་པ་བྱེད་ཅིང ། བསོད་ནམས་བྱེད་པའི་རིགས་དེ་དག་དེའི་ཚེ་ལོངས་སྤྱོད་ཆེ་བར་འགྱུར་བའི་ལམ་དུ་ཞུགས་པ་ཡིན་ནོ། །ཞེས་གསུངས་པ་ལྟ་བུ་སྟེ། ལས་དེ་ལྟ་བུ་ནི་ལོངས་སྤྱོད་ཆེ་བར་འགྱུར་བའོ། ། དེ་ལ་ཤེས་རབ་ཆུང་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་འདི་ལ་ལ་ལ་ཞིག་དགེ་སྦྱོང་ངམ་བྲམ་ཟེ་གཞན་དག་ལ་ཆོས་ནི་གང་ཡིན། ཆོས་མ་ཡིན་པ་ནི་གང་ཡིན། བདག་གིས་ཅི་ཞིག་བྱས་ན་ལེགས་པར་འགྱུར་ཞེས་མི་འདྲིའི། །ཤེས་རབ་འཆལ་བ་ལ་བསྟོད་ཅིང་མཁས་པ་རྣམས་སྤོང་བ་དང ། དམ་པའི་ཆོས་མ་ཡིན་པ་ཡོངས་སུ་སྟོན་ཅིང་ཆོས་སྨྲ་བ་རྣམས་ཀྱིས་ལེགས་པར་བརྗོད་པ་ཤེས་ཀྱང་འཇུངས་པའི་སེམས་ཡོད་པས་ལེགས་སོ་ཞེས་མི་བརྗོད་ཅིང ། དམ་པའི་ཆོས་མ་ཡིན་པ་སྨྲ་བ་རྣམས་ལ་ལེགས་སོ་ཞེས་བརྗོད་ཅིང་ལོག་པར་ལྟ་བའི་བསྔགས་པ་བརྗོད་པ་དང ། ཡང་དག་པའི་ལྟ་བ་ལ་ཉེས་པར་སྨོད་པ་དང ། གླེགས་བམ་འདྲི་བ་དང ། ཀློག་པ་ལ་ངན་དུ་བརྗོད་པ་དང ། དེ་དག་གི་འཚོ་བ་འཕྲོག་པ་སྟེ། ལས་དེ་ལྟ་བུ་ནི་ཤེས་རབ་ཆུང་བར་འགྱུར་བའོ། །དེ་ལ་ཤེས་རབ་ཆེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ 460b འདི་ལ་ཡོངས་སུ་འདྲི་ཕོད་པའི་ངང་ཚུལ་ཅན་ལ་ལ་ཞིག་གིས་དགེ་སྦྱོང་དང ། བྲམ་ཟེ་མཁས་པ་ལ་འདྲི་བ་དང ། ཤེས་རབ་འཆལ་བ་ཡོངས་སུ་སྤོང་བ་དང ། དམ་པའི་ཆོས་སྟོན་ཅིང་གསལ་བར་བྱེད་པ་དང ། དམ་པའི་ཆོས་མ་ཡིན་པ་ལ་རྣམ་པར་སྨོད་པ་དང ། ཆོས་སྨྲ་བ་རྣམས་ལ་མི་འཇིགས་པ་ཉེ་བར་སྒྲུབ་པ་དང ། རིགས་པ་ལ་ལེགས་སོ་ཞེས་ཟེར་བ་དང ། མི་རིགས་པ་ཡོངས་སུ་སྤོང་བ་དང ། ཡང་དག་པར་ལྟ་བའི་ལེགས་པ་བརྗོད་པ་དང ། ལོག་པར་ལྟ་བ་ལ་ཉེས་པར་དམོད་པ་དང ། གླེགས་བམ་དང ། སྣག་ཚ་དང ། སྨྱུག་གུ་ལ་སོགས་པའི་སྦྱིན་པ་བྱེད་པ་དང ། ཆང་མི་འཐུང་བ་སྟེ། དཔེར་ན། དགའ་བོའི་མདོ་ལས། ཆང་གི་ཉེས་པ་སུམ་ཅུ་རྩ་ལྔ་གསུངས་པ་དགེ་བའི་ཕྱོགས་སུ་སྦྱར་བ་ལྟ་བུ་སྟེ། ལས་དེ་ལྟ་བུ་ནི་ཤེས་རབ་ཆེ་བར་འགྱུར་བའོ། །དེ་ལ་སེམས་ཅན་དམྱལ་བར་སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ཤིན་ཏུ་ཞེ་སྡང་བའི་སེམས་ཀྱིས་ལུས་དང ། ངག་དང ། ཡིད་ཀྱི་ཉེས་པ་ཆེར་བྱས་པ་དང ། ཆད་པར་ལྟ་བ་དང ། རྟག་པར་ལྟ་བ་དང ། མེད་པར་ལྟ་བ་དང ། སེར་སྣ་ཆེ་བ་དང ། དྲིན་དུ་མི་གཟོ་བ་དང ། མཚམས་མེད་པའི་ལས་བྱེད་པ་དང།་འཕགས་པ་དང་ཚུལ་ཁྲིམས་དང་ལྡན་པ་རྣམས་ལ་སྐུར་པ་འདེབས་པ་སྟེ། ལས་དེ་ལྟ་བུ་ནི་སེམས་ཅན་དམྱལ་བར་སྐྱེ་བར་འགྱུར་རོ། །དེ་ལ་དུད་འགྲོའི་སྐྱེ་གནས་སུ་ 461a ༄#། །སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། ལུས་དང ། ངག་དང ། ཡིད་ཀྱིས་ཉེས་པ་འབྲིང་དུ་བྱས་པ་དང ། འདོད་ཆགས་ལས་བྱུང་བའི་ལས་སྣ་ཚོགས་དང ། ཞེ་སྡང་ལས་བྱུང་བའི་ལས་སྣ་ཚོགས་དང ། གཏི་མུག་ལས་བྱུང་བའི་ལས་སྣ་ཚོགས་དང ། ཕ་མ་དང ། རབ་ཏུ་བྱུང་བ་རྣམས་ལ་ཚུལ་དང་མི་འདྲ་བའི་སྦྱིན་པར་བྱེད་པ་དང ། དུད་འགྲོའི་སྐྱེ་གནས་སུ་སྐྱེས་པའི་སེམས་ཅན་རྣམས་ལ་ཕྱས་བྱེད་པ་དང ། དེ་ལྟར་སྨོན་པ་སྟེ། དཔེར་ན། བ་ལང་གི་བརྟུལ་ཞུགས་ཅན་དང ། བྱའི་བརྟུལ་ཞུགས་ཅན་ལ་སོགས་པ་དེ་ལྟར་སྐྱེ་བར་ཤོག་ཅིག་ཅེས་སྨོན་པ་རྣམས་དང ། བྱང་ཆུབ་སེམས་དཔའི་ཆེད་དུ་བརྗོད་པ་སེང་གེའི་སྐྱེས་པའི་རབས་ལས་བྱུང་བ་དང ། བྲམ་ཟེ་ཆར་འབེབས་སྤྲེའུར་སྐྱེས་པར་གྱུར་པ་སྟེ། དཔེར་ན། བྲམ་ཟེ་ཆར་འབེབས་ཀྱིས་གནས་བརྟན་འོད་སྲུང་ཆེན་པོ་བྱ་རྒོད་ཕུང་པོའི་རི་ལ། རྒྱལ་པོའི་ཁབ་ཀྱི་སྟེང་ནས་ནམ་མཁའ་ལ་འགྲོ་བ་མཐོང་ནས། ལྷས་བྱིན་དང་མ་སྐྱེས་དགྲའི་བསྟེན་ལས་ཞེ་སྡང་བའི་སེམས་སུ་གྱུར་ཏེ། དགེ་སློང་འདི་ནི་རི་ལས་རིར། ནམ་མཁའ་ལས་ནམ་མཁར། སྤྲེའུ་ཤིང་ལས་ཤིང་གི་སྟེང་དུ་འཛེག་པ་དང་འདྲ་བར་འགྲོའོ་ཞེས་མི་སྙན་པའི་ཚིག་ཏུ་བརྗོད་པ་དེ་བཅོམ་ལྡན་འདས་ལ་གསོལ་ཏོ། ། 461b བྲམ་ཟེ་ཆར་འབེབས་པ་འདིས་ཁྲོས་པའི་སེམས་ཀྱིས་མི་སྙན་པ་དེ་སྐད་དུ་བརྗོད་ན། བཙུན་པ་བཅོམ་ལྡན་འདས། དེའི་རྣམ་པར་སྨིན་པ་ཅིར་འགྱུར་ཞེས་ཞུས་པ་དང ། བཅོམ་ལྡན་འདས་ཀྱིས་བཀའ་སྩལ་པ། ངན་དུ་བརྗོད་པ་དེའི་རྣམ་པར་སྨིན་པས་བྲམ་ཟེ་ཆར་འབེབས་འདི། ཚེ་རབས་ལྔ་བརྒྱའི་བར་དུ་སྤྲེའུར་འགྱུར་རོ་ཞེས་བཀའ་སྩལ་པ་དང ། དེ་མི་དགའ་བའི་སེམས་ཀྱིས་དད་པའི་སེམས་བསྐྱེད་དེ། དེས་བཅོམ་ལྡན་འདས་མྱ་ངན་ལས་འདའ་ཀར། བཅོམ་ལྡན་འདས། སུག་ལས་དེ་གང་དུ་བས་པར་འགྱུར་ཞེས་ཞུས་པ་དང ། བཅོམ་ལྡན་འདས་ཀྱིས་བཀའ་སྩལ་པ། ཚེ་རབས་ལྔ་བརྒྱ་པོ་དེ་དག་གིས་ཟད་པར་འགྱུར་བར་ཟད་དེ། ཅུང་ཟད་དུ་ན་འཛམ་བུའི་གླིང་གི་ཤིང་འཛམ་བུ་ཞེས་བྱ་བ་ཤིང་ཏོག་ལྔ་བརྒྱ་ཙམ་ཡོད་པ། ཤིང་ཏོག་དེ་དག་ཀྱང་སྦྲང་རྩི་ལྟར་མངར་ཞིང་གཏང་མི་བྲ་བར་ཞིམ་པ་དང་ལྡན་པ་དེའི་དྲུང་དུ་སྐྱེས་ཏེ། དེ་ནས་རྒྱལ་པོ་ཁབ་ཏུ་སྐྱེས་ནས་ཚེ་འཕོས་ཏེ་ཐར་པ་དང་མཐོ་རིས་སུ་སྐྱེ་བར་འགྱུར་རོ་ཞེས་གསུངས་པ་ལྟ་བུ་དང ། དཔེར་ན། ཞེ་སྡང་གི་སེམས་ཀྱིས་སེང་གེའི་ནང་དུ་སྐྱེས་ནས་དེའི་དོན་དུ་བཅོམ་ལྡན་འདས་ཀྱིས་ཚིགས་སུ་བཅད་པ་གསུངས་པ། མེལ་ཚེ་བྱེད་ན་ནམ་ཡང་རིང ། །ངལ་བ་དག་ལ་དཔག་ཚད་རིང ། །དམ་པའི་ཆོས་ནི་ཤེས་གྱུར་ཀྱང ། ། 462a ༄#། །བྱིས་པ་རྣམས་ལ་འཁོར་བ་རིང ། །ཞེས་གསུངས་པ་ལྟ་བུ་སྟེ། ལས་དེ་ལྟ་བུ་ནི་དུད་འགྲོའི་སྐྱེ་གནས་སུ་སྐྱེ་བར་འགྱུར་བའོ། །དེ་ལ་གཤིན་རྗེའི་འཇིག་རྟེན་དུ་སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ཁྲོ་ཞིང་ཞེ་སྡང་བའི་སེམས་ཀྱིས་ལུས་དང ། ངག་དང ། ཡིད་ཀྱིས་ངན་དུ་སྤྱད་པ་དང ། འདོད་ཆགས་དང་མི་རིགས་པར་འདོད་པས་ལོག་པར་འཚོ་བ་དང ། བཀྲེས་ཤིང་སྐོམ་པ་དང ། ཁྲོས་བཞིན་དུ་ཚེ་འཕོས་པ་དང ། ནོར་ལ་མངོན་པར་ཆགས་པའི་སེམས་ཀྱིས་ཚེ་འཕོས་པ་སྟེ།་དཔེར་ན། བརྒྱ་བསྡུས་པའི་མདོ་ལས། བཅོམ་ལྡན་འདས་ཀྱིས་ཀུན་དགའ་བོ་ལ་བཀའ་སྩལ་པ། ཀུན་དགའ་བོ། གང་ཟག་ལ་ལ་ཚེ་རབས་སྔ་མ་ལ་བྱས་པའི་ལས་ཉེ་བར་གནས་པར་གྱུར་ཏམ། ཚེ་འཕོ་བའི་ཚེ་ལོག་པར་ལྟ་བར་གྱུར་པ་བཙན་ནོ་ཞེས་གསུངས་པ་ལྟ་བུ་སྟེ། ལས་དེ་ལྟ་བུ་ནི་གཤིན་རྗེའི་འཇིག་རྟེན་དུ་སྐྱེ་བར་འགྱུར་བའོ། ། དེ་ལ་ལྷ་མ་ཡིན་གྱི་འཇིག་རྟེན་དུ་སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ལུས་དང ། ངག་དང ། ཡིད་ཀྱིས་ཉེས་པ་ཆུང་དུ་སྦྱང་བ་དང ། ང་རྒྱལ་དང ། མངོན་པའི་ང་རྒྱལ་དང ། ངའོ་ཞེས་པའི་ང་རྒྱལ་དང ། ཆུང་བའི་ངན་རྒྱལ་དང ། ལེགས་པ་སྤྱད་པའི་དགེ་བའི་རྩ་བ་དེར་བསྔོས་པ་དང ། ཤེས་རབ་ཀྱི་སྒོ་ནས་འདོད་ཆགས་ཀུན་གྱི་ 462b རབ་ལས་བྱུང་བའི་ཚུལ་ཁྲིམས་ངན་པ་སྤྱད་པ་སྟེ། ལས་དེ་ལྟ་བུ་ནི་ལྷ་མ་ཡིན་གྱི་འཇིག་རྟེན་དུ་སྐྱེ་བར་འགྱུར་བའོ། །དེ་ལ་མིར་སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་དགེ་བ་བཅུའི་ལས་ཀྱི་ལམ་གོམས་པར་བྱས་པ་སྟེ། བཅུ་གང་ཞེ་ན། སྲོག་གཅོད་པ་དང ། མ་བྱིན་པར་ལེན་པ་དང ། འདོད་པས་ལོག་པར་གཡེམ་པ་སྟེ། ལུས་ཀྱི་ལས་གསུམ་དང ། བརྫུན་དུ་སྨྲ་བ་དང ། ཕྲ་མ་དང ། ངག་རྩུབ་པ་དང ། ཚིག་ཀྱལ་པ་སྟེ་ངག་གི་ལས་བཞི་དང ། གཞན་གྱི་ནོར་ལ་ཆགས་སེམས་སུ་བྱེད་པ་དང ། གནོད་སེམས་དང ། ལོག་པར་ལྟ་བ་སྟེ་ཡིད་ཀྱི་ལས་གསུམ་དང ། མི་དགེ་བའི་ལས་བཅུ་པོ་དེ་དག་སྤོང་བ་སྟེ། ལས་དེ་ལྟ་བུ་ནི་མིར་སྐྱེ་བར་འགྱུར་བའོ། །དེ་ལ་འདོད་པའི་ཁམས་ན་སྤྱོད་པའི་ལྷར་སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་དགེ་བ་བཅུའི་ལས་ཀྱི་ལམ་ཡོངས་སུ་རྫོགས་ཤིང་ལེགས་པར་སྦྱངས་པ་སྟེ། ལས་དེ་ལྟ་བུ་ནི་འདོད་པའི་ཁམས་ན་སྤྱོད་པའི་ལྷར་སྐྱེ་བར་འགྱུར་བའོ། །དེ་ལ་གཟུགས་ཀྱི་ཁམས་ན་སྤྱོད་པའི་ལྷར་སྐྱེ་པར་གྱུར་བའི་ལས་ཡོད་དེ། དེ་གང་ཞེ་ན། དགེ་བ་བཅུའི་ལས་ཀྱི་ལམ་རྣམས་ལེགས་པར་སྦྱངས་ཤིང་ཤིན་ཏུ་མཉམ་པར་བཞག་པ་དང ། ཁྱད་པར་དུ་ཤིན་ཏུ་འཕགས་པ་དང ། ཡོངས་སུ་རྫོགས་པར་བྱས་པ་སྟེ། ལས་དེ་ལྟ་བུ་ནི་གཟུགས་ཀྱི་ཁམས་ན་སྤྱོད་ 463a ༄#། །པའི་ལྷར་སྐྱེ་པར་འགྱུར་བའོ། །དེ་ལ་གཟུགས་མེད་པའི་ཁམས་ན་སྤྱོད་པའི་ལྷར་སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། གཟུགས་མེད་པའི་སྙོམས་པར་འཇུག་པ་བཞི་སྟེ། གཟུགས་ཀྱི་འདུ་ཤེས་རྣམས་ལས་རྣམ་པ་ཐམས་ཅད་དུ་ཡང་དག་པར་འདས་ཏེ། ཐོགས་པའི་འདུ་ཤེས་རྣམས་མེད་པར་གྱུར་ཅིང་སྣ་ཚོགས་ཀྱི་འདུ་ཤེས་རྣམས་ཡིད་ལ་མི་བྱེད་པས་ནམ་མཁའ་མཐའ་ཡས་སོ་སྙམ་ནས་ནམ་མཁའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་དང ། རྣམ་པ་ཐམས་ཅད་དུ་ནམ་མཁའ་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། རྣམ་པར་ཤེས་པ་མཐའ་ཡས་སོ་སྙམ་ནས་རྣམ་ཤེས་མཐའ་ཡས་སྐྱེ་མཆེད་རྫོགས་པར་བྱས་ཏེ་གནས་པ་དང ། རྣམ་པ་ཐམས་ཅད་དུ་རྣམ་ཤེས་མཐའ་ཡས་སྐྱེ་མཆེད་ལས་ཡང་དག་པར་འདས་ཏེ། ཅི་ཡང་མེད་དོ་སྙམ་ནས་ཅི་ཡང་མེད་པའི་སྐྱེ་མཆེད་རྫོགས་པར་བྱས་ཏེ་གནས་པ་དང ། རྣམ་པ་ཐམས་ཅད་དུ་ཅི་ཡང་མེད་པའི་སྐྱེ་མཆེད་ལས་ཡང་དག་པར་འདས་ཏེ། འདུ་ཤེས་མེད་འདུ་ཤེས་མེད་མིན་སྐྱེ་མཆེད་རྫོགས་པར་བྱས་ཏེ་གནས་པ་སྟེ། ལས་དེ་ལྟ་བུ་ནི་གཟུགས་མེད་པའི་ཁམས་ལ་སྤྱོད་པའི་ལྷར་སྐྱེ་བར་འགྱུར་བའོ། །དེ་ལ་བྱས་ལ་མ་བསགས་པའི་ལས་ཡོད་དེ། དེ་གང་ཞེ་ན། 463b བྱས་ནས་ངོ་ཚ་བར་འཛིན་པ་དང ། འགྱོད་པ་དང ། སྨོད་པ་དང ། འཆགས་པ་དང ། མཐོལ་བ་དང ། སྤོང་བ་དང ། ཕྱིན་ཆད་མི་བྱེད་པར་སྡོམ་པ་སྟེ། ལས་དེ་ལྟ་བུ་ནི་བྱས་ལ་མ་བསགས་པའོ། །དེ་ལ་བསགས་ལ་མ་བྱས་པའི་ལས་ཡོད་དེ། དེ་གང་ཞེ་ན། ལས་གང་ལུས་ཀྱིས་ཡོངས་སུ་རྫོགས་པར་བྱས་པ་སྟེ། སེམས་ཀྱིས་ཡོངས་སུ་རྫོགས་པར་བྱས་ཤིང་ཚིག་ཏུ་ཡང་ལས་འདི་བྱའོ་ཞེས་སྨྲས་ལ་དེ་མ་བྱས་པ་སྟེ། ལས་དེ་ལྟ་བུ་ནི་བསགས་ལམ་བྱས་པའོ། །དེ་ལ་བྱས་ཀྱང་བྱས་ལ་བསགས་ཀྱང་བསགས་པའི་ལས་ཡོད་དེ། དེ་གང་ཞེ་ན། ལས་གང་བྱས་ནས་མི་འཛེམ་པ་དང ། མི་ལྡོག་པ་དང ། མི་འགྱོད་པ་དང ། མི་སྨོད་པ་དང ། མི་འཆགས་པ་དང ། མི་མཐོལ་བ་དང ། མི་འདོར་བ་དང ། མི་སྤོང་བ་དང ། ཕྱིན་ཆད་མི་སྡོམ་པར་བྱེད་པ་སྟེ། ལས་དེ་ལྟ་བུ་ནི་བྱས་ཀྱང་བྱས་ལ་བསགས་ཀྱང་བསགས་སོ། །དེ་ལ་བྱས་ཀྱང་མ་བྱས་ལ་བསགས་ཀྱང་མ་བསགས་པའི་ལས་ཡོད་དེ། དེ་གང་ཞེ་ན། ལས་གང་ཆེད་དུ་མ་བསགས་པར་བྱས་པ། རྨི་ལམ་ན་བྱས་པའམ་བྱེད་དུ་བཅུག་པ་ལྟ་བུ་སྟེ། ལས་དེ་ལྟ་བུ་ནི་བྱས་ཀྱང་མ་བྱས་ལ་བསགས་ཀྱང་མ་བསགས་པའོ། །ལས་གང་དང་ལྡན་ན་གང་ཟག་སེམས་ཅན་དམྱལ་བར་སྐྱེས་ནས་སེམས་ཅན་དམྱལ་བའི་ཚེ་ཡོངས་སུ་རྫོགས་པར་ཟད་པར་བྱས་ནས་ཚེ་འཕོ་བར་ 464a ༄#། །འགྱུར་བའི་ལས་ཡོད་དེ། དེ་གང་ཞེ་ན། འདི་ནི་ལ་ལ་ཞིག་གིས་སེམས་ཅན་དམྱལ་བའི་ལས་བྱས་ཤིང་བསགས་ཀྱང་ལས་དེ་བྱས་པས་ངོ་ཚར་མི་འཛིན། མི་འགྱོད། མི་སྨོད་པ་དང ། མི་འཆགས། མི་མཐོལ་ཞིང ། ཕྱིན་ཆད་མི་སྡོམ་ལ་ཕྱིར་ཞིང་དགའ་བ་དང ། ཉམས་བདེ་བ་སྐྱེད་པ་སྟེ། དཔེར་ན། ལྷས་བྱིན་དང ། དུས་མིན་ལ་སོགས་པ་ལྟ་བུ་སྟེ། ལས་དེ་ལྟ་བུ་དང་ལྡན་ན་གང་ཟག་དེ་སེམས་ཅན་དམྱལ་བའི་ཚེ་ཡོངས་སུ་རྫོགས་ནས་ཚེ་འཕོ་བར་འགྱུར་བའོ། །དེ་ལ་ལས་གང་དང་ལྡན་ན་གང་ཟག་སེམས་ཅན་དམྱལ་བར་སྐྱེས་ནས། སེམས་ཅན་དམྱལ་བའི་ཚེ་ཕྱེད་ཟད་དེ་ཚེ་འཕོ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་འདི་ལ་ལ་ལས་སེམས་ཅན་དམྱལ་བར་འགྱུར་བའི་ལས་བྱས་ནས་འཛེམ་པ་དང ། འགྱོད་པ་དང ། སྨོད་པ་དང ། འཆགས་པ་དང ། མཐོལ་བ་དང ། འདོར་བ་དང ། སྤོང་བ་དང།་ཕྱིན་ཆད་སྡོམ་པར་བྱེད་པ་སྟེ། འདི་ནི་ལས་གང་དང་ལྡན་ན་གང་ཟག་སེམས་ཅན་དམྱལ་བར་སྐྱེ་སྟེ། སེམས་ཅན་དམྱལ་བའི་ཚེ་ཕྱེད་ཟད་པར་བྱས་ནས་ཚེ་འཕོ་བར་འགྱུར་བའོ། །དེ་ལ་ལས་གང་དང་ལྡན་ན་གང་ཟག་སེམས་ཅན་དམྱལ་བར་སྐྱེས་མ་ཐག་ཏུ་ཚེ་འཕོ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་འདི་ལ་གང་ཟག་ 464b ལ་ལས་སེམས་ཅན་དམྱལ་བའི་ལས་བྱས་ཤིང་བསགས་པར་ན། ལས་དེ་བྱས་པས་ངོ་ཚ་བར་འཛིན་ལ་འགྱོད་ཅིང་སྨོད་པ་དང ། འཆགས་ཤིང་མཐོལ་ན་ཕྱིན་ཆད་མི་བྱའོ་ཞེས་སྡོམ་པར་བྱེད་པས། བརྒྱ་ལ་སེམས་ཅན་དམྱལ་བར་སྐྱེས་ནའང་སྐྱེས་མ་ཐག་ཏུ་ཚེ་འཕོ་བར་འགྱུར་བ་སྟེ། དཔེར་ན། རྒྱལ་པོ་མ་སྐྱེས་དགྲས་མཚམས་མེད་པའི་ལས་ཕ་བསད་པ་དང ། དགེ་འདུན་ཕྱེ་བ་དང ། གླང་པོ་ཆེ་བཀྱེ་བ་དང ། རྡོའི་འཁོར་ལོ་འཕངས་པ་ལྟ་བུ་སྟེ། ལས་དེས་མནར་མེད་པའི་སེམས་ཅན་དམྱལ་བར་འགྲོ་བར་ཐོས་ནས་དེ་མི་དགའ་སྟེ། སེམས་མོས་པར་བྱས་པ་དང ། དགེ་སྦྱོང་གི་འབྲས་བུའི་མདོ་ལས་སྡིག་བཤགས་ཏེ། དགེ་བའི་རྩ་བ་བསགས་པ་དང ། ཚེ་འཕོ་ཀར་རུས་པ་ཡན་ཆད་ཀྱང་སངས་རྒྱས་ལ་སྐྱབས་སུ་མཆིའོ། །ཞེས་གསོལ་བ་ལྟ་བུ་སྟེ། དེ་སྐད་དུ། ཤིན་ཏུ་མི་བཟད་ལས་རྣམས་བྱས་པ་ནི། བདག་ལ་སྨོད་དང་རབ་ཏུ་བཤགས་པ་དང ། །སྡོམ་པར་བྱེད་པས་དེ་དག་སྲབ་འགྱུར་གྱིས། །ཤིན་ཏུ་རྩ་ནས་ཕྱིན་ཅེས་མི་སྨྲའོ། །ཞེས་གསུངས་པ་ལྟ་བུ་སྟེ། ལས་དེ་ལྟ་བུ་དང་ལྡན་ན་གང་ཟག་སེམས་ཅན་དམྱལ་བར་སྐྱེས་མ་ཐག་ཏུ་ཚེ་འཕོ་བར་འགྱུར་བའོ། །དེ་ལ་ངེས་པར་སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ལས་བྱས་ནས་ཆེ་གེ་མོ་ཞིག་ཏུ་སྐྱེ་བར་ཤོག་ཅིག་ཅེས་ཡོངས་སུ་བསྔོས་ 465a ༄#། །པས་དེར་སྐྱེས་པར་འགྱུར་བ་སྟེ། དཔེར་ན། བཅོམ་ལྡན་འདས་ཀྱིས་དཀར་ཤམ་གྱི་སྐྱེས་པའི་རབས་ལས་སྨོན་ལམ་གྱི་དབང་གིས་སྐྱེ་བར་གསུངས་པ་ལྟ་བུ་སྟེ། ལས་དེ་ལྟ་བུ་ནི་ངེས་པར་སྐྱེ་བར་འགྱུར་པའོ། །དེ་ལ་མ་ངེས་པར་སྐྱེ་བར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ལས་བྱས་ནས་ཆེ་གེ་མོ་ཞིག་ཏུ་ཤོག་ཅིག་ཅེས་ཡོངས་སུ་མི་བསྔོ་བ་སྟེ། ལས་དེ་ལྟ་བུ་ནི་མ་ངེས་པར་སྐྱེ་བར་འགྱུར་པའོ། །དེ་ལ་ཡུལ་གཞན་དུ་རྣམ་པར་སྨིན་པར་འགྱུར་བའི་ལས་ཡོད་དེ། དེ་གང་ཞེ་ན། དེ་ནི་ཚེ་འདི་ཉིད་དམ། ཚེ་གཞན་ལ་ཡུལ་གཞན་དུ་བདེ་བའམ། མི་བདེ་བ་རྣམ་པར་སྨིན་པ་སྟེ། དཔེར་ན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག། སྔོན་འདས་པའི་དུས་ན་འཛམ་བུའི་གླིང་གི་མིའི་ཚེ་དཔག་ཏུ་མེད་དེ། རྒྱལ་པོ་མན་ད་ཏ་ལྟར་གྱུར་པའི་ཚེ། གྲོང་ཁྱེར་གཅིག་ཅིག་ན་དེད་དཔོན་གྱི་བུ་བྱམས་པ་མཆོད་སྦྱིན་ཞེས་བྱ་བ་ཞིག་ཡོད་པ་གྲོགས་ལྔ་བརྒྱ་ཙམ་གྱིས་བསྐོར་ཏེ། བཟའ་ཤིང་གི་ར་བར་ཕྱིན་པ་དང ། གྲོགས་པོ་དེ་དག་གིས་སྨྲས་པ། གྲོང་འདི་ན་ཁྱོད་ཀྱི་ཕ་ལ་སོགས་པ་ཚོད་པ་རྣམས་རྒྱ་མཚོ་ལས་རྒྱུ་ཞིང ། གསེར་གནས་ལ་སོགས་པ་ཡུལ་གཞན་དག་ཏུ་ཡང་འདོང ། གླིང་གཞན་དག་ཀྱང་ལྟ་ཞིང་ནོར་ལ་སོགས་པ་ཡང་བྱེད་ན། ཁྱོད་ལ་སོགས་ 465b པ་བདག་ཅག་ཀྱང་རྒྱ་མཚོ་ལས་རྒྱུས་ཏེ་ནོར་བསགས་པར་བྱའོ་ཞེས་སྨྲས་པ་དང ། དེས་དེ་ལྟར་བྱའོ་ཞེས་མཉན་ཏེ་དགོངས་མའི་གན་དུ་སོང་ནས། མ་གསེར་གནས་སུ་འགྲོའོ་ཞེས་མ་ལ་དྲིས་པ་དང ། དེའི་མས་སྨྲས་པ། བུ། ནོར་ལྟ་ཞིག་ཁྱིམ་ན་དཔག་ཏུ་མེད་པ་ཡོད་ཀྱི་མ་འགྲོ་ཞིག་ཅེས་སྨྲས་པ་དང ། དེས་མའི་དག་མཉན་ཏེ། མི་འགྲོ་བར་བྱས་ནས་དེའི་འོག་ཏུ་བཟའ་ཤིང་གི་ར་བར་ཕྱིན་པ་དང ། གྲོགས་པོ་རྣམས་ཀྱིས་དོན་དེ་ཉིད་ལ་ད་དུང་ཡང་གསོལ་བ་འདེབས་སོ་ཞེས་སྨྲས་པ་དང ། དེས་དེ་ལྟར་བྱའོ་ཞེས་ནས་དེ་དག་གི་ངག་མཉན་ཏེ། ཡང་སོང་ནས་མ་ལ་དྲིས་པ་དང ། མས་རྐང་པ་ནས་བཟུང་སྟེ་འདུག་པར་གྱུར་ནས་དེ་ལྟར་ལན་གསུམ་བྱས་པའི་འོག་ཏུ་བཟའ་ཤིང་གི་ར་བ་དེར་ཕྱིན་པ་དང ། གྲོགས་པོ་རྣམས་ཀྱིས་ངེས་པར་མི་འདོང་དུ་མི་རུང་ངོ་ཞེས་བསྒོ་ནས། དེས་ཡང་མ་ལ་ཡུལ་གཞན་དུ་འགྲོའོ་ཞེས་ཞུས་པ་དང ། མས་བདོག་པ་ཐམས་ཅད་བསོག་ནས་རྐང་པ་ཡ་གཅིག་ནས་བཟུང་སྟེ་མི་འགྲོ་བར་བྱས་པ་ལས། དུས་གཞན་ཞིག་ན་ཁྱེའུ་དེ་བཟའ་ཤིང་གི་ར་བ་དེར་ཕྱིན་པ་དང ། གྲོགས་པོ་དག་གིས་སྨྲས་པ། ཁྱོད་ཀྱིས་ཉེས་པས་བདག་ཅག་ཀྱང་ད་དུང་མ་དོང་སྟེ། ད་ནི་ཚེས་བཅུ་གསུམ་ལ་འདོང་ངོ་ཞེས་སྨྲས་པ་དང ། དེས་མ་ལ་མ་བྱས་པར་རྒྱ་རྫས་ཐམས་ཅད་ཕྱིར་བཏོན་ནས་དེ་ལམ་དུ་འཇུག་པར་བྱས་ 466a ༄#། །པ་དང ། དེའི་མས་སྒོ་ཁར་བསྡད་དེ་རྐང་པ་ནས་བཟུང་བ་དང ། བུ། མ་འགྲོ་ཞིག་ཅེས་བྱས་པ་དང ། དེ་ཁྲོས་ནས་མའི་མགོ་ལ་འགོམས་ཏེ་སོང་ནས་རྒྱ་མཚོའི་ངོགས་སུ་ཕྱིན་པ་དང ། དེས་གྲོགས་པོ་རྣམས་ལ་བསྒོ་བ། རྒྱ་མཚོར་འཇུག་པར་ནི་བྱ་ན་འཚོའམ། མི་འཚོར་ཡང་གཏོལ་མེད་ཀྱི་བདག་ཅག་ཀུན་གྱིས་ཁྲིམས་བརྒྱད་གནོད་པར་བྱའོ་ཞེས་སྨྲས་ནས། དེ་དག་གིས་ཀྱང་དེའི་དག་མཉན་ཏེ་ཁྲིམས་མནོས་སོ། །དེ་ལྟར་དེ་དག་རྒྱ་མཚོར་ཞུགས་ཏེ་དོང་དོང་བ་ལས་དབུས་སུ་ཕྱིན་པ་དང་རླུང་ཆེན་པོ་ལངས་ནས་གྲུ་བུབ་སྟེ། གཞན་ཐམས་ཅད་ནི་ཚེ་འཕོས། བྱམས་པ་མཆོད་སྦྱིན་ནི་ཟངས་ཀྱི་རལ་ཆེན་ཁ་སྐྱ་འདར་གྱིས་བཅད་པ་ཞིག་ལ། འཇུ་འཇུ་ནས་རྒྱ་མཚོ་མཐར་ཕྱིན་ཏེ་འཕྱན་ཅིང་སོང་སོང་ན། གྲོང་ཁྱེར་གསེར་གྱི་ར་བ་ཅན་བཟའ་ཤིང་གི་ར་བ་དང་ལྡན་པ། རྫིང་བུ་དང་ལྡན་པ། བདུག་སྤོས་ཀྱིས་གདུགས་པ།་མེ་ཏོག་སིལ་མས་གཏོར་བ། དར་གྱི་ལྔ་ལྡི་མང་པོ་བྲེས་པ་ཞིག་མཐོང་ནས། དེའི་ནང་ན་ལྷ་མོ་བཞི་ཞིག་འཐོན་ཏེ། དེ་དག་གིས་ལག་ནས་བཟུང་སྟེ་ནང་དུ་ཁྲིད་དོ། །དེ་ནས་དེ་དག་དང་ལོ་མང་པོ། ལོ་བརྒྱ་ཕྲག་མང་པོ། ལོ་སྟོང་ཕྲག་མང་པོ། ལོ་བརྒྱ་སྟོང་ཕྲག་མང་པོར་རྩེ་རྩེ་ནས་ལྷ་མོ་དེ་དག་གིས་བསྒོ་བ། འཕགས་ 466b པའི་བུ་འདི་ནི་སྔན་ཆད་ཁྱོད་ལ་མེད་པའི་ཡུལ་ཡིན་གྱི་འདི་ནས་ཕྱི་རོལ་དུ་བྱུང་ཏ་རེ། བརྒྱ་ལ་འབྱུང་ནའང་ཁ་བྱང་ཕྱོགས་སུ་བལྟས་ཏེ་བྱུང་ཞིག་ཅེས་སྨྲས་སོ། །དེ་དུས་གཞན་ཞིག་ན་དེ་ནས་ཕྱི་རོལ་ཏུ་བྱུང་སྟེ་ཡང་འཕྱན་ཅིང་སོང་སོང་བ་དང ། གྲོང་ཁྱེར་དངུལ་གྱི་ར་བ་ཅན། བཟའ་ཤིང་གི་ར་བ་དང་ལྡན་པ། རྫིང་བུ་དང་ལྡན་པ། བདུག་སྤོས་ཀྱིས་བདུགས་པ། མེ་ཏོག་སིལ་མས་གཏོར་བ། དར་གྱི་ལྡ་ལྡི་མང་པོ་བྲེས་པ་ཞིག་མཐོང་ངོ ། །དེའི་ནང་ནས་ལྷ་མོ་བརྒྱད་འཐོན་ཏེ། སྔ་མ་བཞིན་དུ་རྩེ་རྩེ་ནས་དེ་ནས་ཀྱང་དུས་གཞན་ཞིག་ན་ཕྱིར་བྱུང་སྟེ་འཁྱམ་འཁྱམ་པ་ལས་གྲོང་ཁྱེར་བཻ་ཌཱུརྱའི་ར་བ་ཅན་ནས། དར་གྱི་ལྡ་ལྡི་མང་པོ་བྲེས་པ་སྔ་མ་བཞིན་དུ་མཐོང་ནས། དེའི་ནང་ནས་ལྷ་མོ་བཅུ་དྲུག་འཐོན་ཏེ། དེ་དག་གིས་ཀྱང་དེའི་ལག་ནས་བཟུང་སྟེ་ནང་དུ་ཁྲིད་དོ། །དེ་དག་དང་ཡང་ལོ་བརྒྱ་སྟོང་མང་པོར་རྩེ་རྩེ་ནས། དེ་ནས་ཀྱང་དུས་གཞན་ཞིག་ནས་ཕྱིར་བྱུང་སྟེ་འཁྱམ་འཁྱམ་པ་ལས། གྲོང་ཁྱེར་ཤེལ་གྱི་ར་བ་ཅན་ནས་དར་གྱི་ལྡ་ལྡི་མང་པོ་བྲེས་པའི་བར་དུ་སྔ་མ་བཞིན་དུ་མཐོང་ནས། དེའི་ནང་ནས་ལྷ་མོ་སུམ་ཅུ་རྩ་གཉིས་འཐོན་ཏེ། དེ་དག་གིས་ཀྱང་ལག་ནས་བཟུང་སྟེ་ནང་དུ་ཁྲིད་དོ། །དེ་དག་དང་ཡང་སྔ་མ་བཞིན་དུ་རྩེ་རྩེ་བ་ལས་དེ་དག་གིས་བསྒོ་བ། འཕགས་པའི་བུ་འདི་ནི་ཁྱེད་ལ་མེད་ 467a ༄#། །པའི་ས་ཕྱོགས་ཡིན་གྱི། གནས་འདི་ནས་ཕྱི་རོལ་དུ་བྱུང་ཏ་རེ། བརྒྱ་ལ་འབྱུང་ནའང་ཁ་བྱང་ཕྱོགས་སུ་ལྟོས་ཏེ་བྱུང་ཞིག་ཅེས་སྨྲས་པའི་འོག་ཏུ་དེ་ཁང་པ་དེ་ནས་བྱུང་སྟེ་ཁ་བྱང་ཕྱོགས་སུ་བལྟས་ནས་སོང་སོང་བ་ལས། ཚེར་མའི་ནགས་ཚལ་ཞིག་ཏུ་ཕྱིན་པ་དང ། གྲོང་ཁྱེར་ལྕགས་ཀྱི་ར་བ་ནག་པོ་ཅན་ཞིག་མཐོང་སྟེ། དེར་དེར་སོང་སོང་བ་དང་ནང་དུ་ཕྱིན་མ་ཐག་ཏུ་གྲོང་ཁྱེར་གྱི་སྒོ་འགགས་ནས། ར་བའི་གོང་དུ་བལྟས་ན་ཡང་མཐོ་བར་གྱུར་ཏེ་མཐར་སྒྲ་འཇིགས་པ་ཞིག་ཀྱང་ཐོས་ནས། དེ་ན་གནས་བཞིན་དུ་འདི་ཅི་ཞིག་སྙམ་དུ་བསམས་པ་དང ། རལ་གྲི་འཁོར་ལོ་མགོ་ལ་འཁོར་ཞིང་གཅོད་པའི་མི་ཞིག་མཐོང་ནས་དངངས་ཏེ། ཀྱེ་མ། འདི་ཅི་ཞིག་ཅེས་དྲིས་པ་དང ། སེམས་ཅན་དམྱལ་བ་པའི་མི་དེས་འདི་ནི་ཉི་ཚེ་བའི་སེམས་ཅན་དམྱལ་བའོ་ཞེས་སྨྲ་བ་དང ། བྱམས་པ་མཆོད་སྦྱིན་གྱིས། ཁྱོད་ཀྱིས་སྡིག་པའི་ལས་ཅི་ཞིག་བྱས་ཞེས་སྨྲས་སོ། །དེས་སྨྲས་པ། འཛམ་བུའི་གླིང་ན་གྲོང་ཁྱེར་ཀོ་ས་ལི་ཞེས་བྱ་བ་ཞིག་ཡོད་དེ། བདག་ཀྱང་དེ་ན་དེད་དཔོན་གྱི་བུ་ཞིག་ཏུ་གྱུར་ཅིང་འདུག་འདུག་པ་ལས། བདག་གྲོགས་ལྔ་བརྒྱས་བསྐོར་ཏེ་བཟའ་ཤིང་གི་ར་བ་ཆེན་པོར་ཕྱིན་པ་དང ། གྲོགས་པོ་དེ་དག་གིས་སྨྲས་པ། ཁྱོད་ཀྱི་ཕ་ནི་དེད་དཔོན་ཡིན་ 467b ཏེ།་དེ་དག་ལ་སོགས་པ་བདག་ཅག་གི་ཕ་རྣམས་ཡུལ་གཞན་དུ་དོང་ཞིང་ནོར་ལ་གསོག་པ་ཡང་བྱེད། གསེར་གནས་དང ། སིང་གྷ་ལའི་གླིང་ལ་སོགས་པ་གླིང་གཞན་དག་ཀྱང་ལྟ་ན། བདག་ཅག་ཀྱང་ཁྱོད་ཀྱིས་གཙོ་བོ་བྱས་ཏེ་ཡུལ་གཞན་དུ་འདོང་ངོ་ཞེས་སྨྲས་པ་དང ། དེ་དག་གིས་མཉན་ཏེ་ཁྱིམ་དུ་ཕྱིན་ནས་མ་ལ་བདག་གྲུར་ཞུགས་ཏེ་ཡུལ་གཞན་དུ་འགྲོའོ་ཞེས་དྲིས་པ་དང ། བདག་གི་མས་སྨྲས་པ། བུ་ཁྱོད་ཀྱི་ཕ་ཡང་རྒྱ་མཚོ་ལས་གྲུར་ཞུགས་ཏེ་ཡུལ་གཞན་དུ་སོང་སོང་བ་ལས་ཚེ་འཕོས་ཏེ། བུ་ཡང་ཁྱོད་གཅིག་པུར་ཟད་ལ། ཁྱིམ་ཡང་ནོར་གྱིས་གང་བར་ཡོད་ཀྱི་མ་འགྲོ་ཞིག་ཅེས་ནས། བདག་གིས་ཀྱང་མི་འགྲོའོ་ཞེས་མའི་དག་མཉན་ཏེ། དེ་ལྟར་ལན་གསུམ་མམ། བཞིར་མས་རྐང་པ་ནས་བཟུང་སྟེ་བསྒོ་ནས་འདུག་འདུག་པ་ནས། དུས་གཞན་ཞིག་ན་བདག་བཟའ་ཤིང་གི་ར་བར་ཕྱིན་པ་དང་གྲོགས་པོ་རྣམས་ཀྱིས་ངེས་པར་འདོང་ངོ ། །ཞེས་སྨྲས་ནས། འོ་ན་འདོང་བར་བྱའོ་ཞེས་བདག་གིས་ཁས་བླངས་ཏེ་འགྲོ་བར་བྱས་པ་དང ། བདག་གི་མས་སྒོ་ཁར་རྐང་པ་ནས་བཟུང་སྟེ། བུ། ང་དོར་བར་མི་རིགས་སོ་ཞེས་སྨྲས་པ་དང ། བདག་གིས་མའི་མགོ་ལ་འགོམས་ཏེ་སོང་ནས་གྲོགས་པོ་ལྔ་བརྒྱ་དང་བདག་ཅག་རྒྱ་མཚོའི་ངོགས་སུ་ཕྱིན་ཏེ་ཁྲིམས་བརྒྱད་མནོས་ནས་རྒྱ་མཚོར་ཞུགས་ཏེ། གསེར་གནས་སུ་དོང་དོང་ 468a ༄#། །བ་ལས་རླུང་ཆེན་པོ་ལངས་ནས་གྲུ་བུབ་སྟེ་གྲོགས་པོ་དེ་དག་ནི་ཚེ་འཕོས་པར་གྱུར། བདག་ནི་ཉི་མ་དུ་མ་ཞིག་ན་རྒྱ་མཚོའི་མཐར་ཕྱིན་ཏེ། འཁྱམ་ཞིང་སོང་སོང་བ་ལས། གྲོང་ཁྱེར་གསེར་གྱི་ར་བ་ཅན། བཟའ་ཤིང་གི་ར་བ་དང་ལྡན་པ། རྫིང་བུ་དང་ལྡན་པ། བདུག་སྤོས་ཀྱིས་བདུགས་པ། མེ་ཏོག་སིལ་མས་གཏོར་བ། དར་གྱི་ལྡ་ལྡི་མང་པོ་བྲེས་པ་ཞིག་མཐོང་ངོ ། །དེའི་ནང་ནས་ལྷ་མོ་བཞི་ཞིག་འཐོན་པ་ནས། ལྷ་མོ་སུམ་ཅུ་རྩ་གཉིས་འཐོན་པ་དང ། གྲོང་ཁྱེར་ལྕགས་ཀྱི་ར་བས་བསྐོར་བ་ཞིག་མཐོང་བའི་བར་དུ་སྔ་མ་བཞིན་ཏེ། བདག་དེའི་ནང་དུ་ཕྱིན་པ་དང ། དེ་མ་ཐག་ཏུ་སྒོའང་འགགས། དེ་ན་མི་ཞིག་ཀྱང་རལ་གྲི་འཁོར་ལོ་མགོ་ལ་འཁོར་ཞིང་འདུག་པ་མཐོང་ནས།་བདག་འདི་ན་འདུག་འདུག་པའི་མགོ་ལ་འཁོར་ལོ་འཕོས་པར་གྱུར་ཏོ། །བདག་མའི་ཚིག་གིས་ལན་བཞི་ཕྱིར་ལོག་པ་དང ། ཁྲིམས་བརྒྱད་མནོས་པའི་ལས་ཀྱི་རྣམ་པར་སྨིན་པས་གྲོང་ཁྱེར་བཞིར་ཉི་ཚེ་བའི་མཐོ་རིས་ཉམས་སུ་མྱོང་བར་གྱུར་ཏོ། །བདག་གིས་མའི་མགོ་ལ་འགོམས་ཏེ་སོང་བའི་ལས་ཀྱི་རྣམ་པར་སྨིན་པས་ནི། རལ་གྲི་འཁོར་ལོ་མགོ་ལ་འཁོར་ཞིང་གཅོད་པ་འདི་ཡིན་ནོ་ཞེས་བྱས་པ་དང ། བྱམས་པ་མཆོད་སྦྱིན་གྱིས་བསམས་པ། བདག་གིས་ཀྱང་སྔོན་ལས་དེ་ཁོ་ན་དང་འདྲ་བར་བྱས་ 468b ཀྱི།་བདག་གི་ལས་རྣམ་པར་སྨིན་པའང་ཉེ་བར་གནས་པར་གྱུར་པ་ལྟའོ་སྙམ་པ་དང ། སེམས་ཅན་དམྱལ་བའི་མི་དེས། བྱམས་པ་མཆོད་སྦྱིན། ཁྱོད་གང་ནས་འོངས་ཞེས་སྨྲས་པ་དང ། བྱམས་པ་མཆོད་སྦྱིན་གྱིས་སྨྲས་པ། འཛམ་བུའི་གླིང་ན་གྲོང་ཁྱེར་ཏ་མ་ལི་པ་ཏི་ཞེས་བྱ་བ་ཞིག་ཡོད་དེ། བདག་ནི་དེ་ནས་འོངས་ཏེ། བདག་གིས་ཀྱང་ལས་དེ་དག་ཐམས་ཅད་བྱས་སོ། །སེམས་ཅན་དམྱལ་བ་པའི་མི་དེས་སྨྲས་པ། དེ་བདེན་པ་ལྟ་སྟེ། བདག་གིས་ཀྱང་བར་སྣང་ལས་སྒྲ་ཐོས་ནས། ཁྱོད་ཀྱི་ལས་ཀྱི་རྣམ་པར་སྨིན་པ་ཟད་དེ། དེད་དཔོན་གྱི་བུ་ཐམས་པ་མཆོད་སྦྱིན་ཞེས་བྱ་བ་ལས་དེ་དང་འདྲ་བར་བྱས་པ་ཞིག་འོང་ངོ་ཞེས་ཐོས་སོ། །བྱམས་པ་མཆོད་སྦྱིན་གྱིས་ཟས་སུ་ཅི་ཟ་ཞེས་སྨྲས་པ་དང ། དེས་མགོ་འདི་ཉིད་ཀྱི་\?\་བ་ལས། ཤ་དང་རྣག་ཁྲག་འོང་བ་ཟའོ་ཞེས་སྨྲས་ནས། མི་དེ་ཡང་དེར་ཚེ་འཕོས་པར་གྱུར་ཏོ། །བྱམས་པ་མཆོད་སྦྱིན་འཇིགས་ཤིང་མི་དགའ་བས། མའི་དོན་དུ་སྨོན་ལམ་བཏབ་སྟེ། འདི་སྐད་ཅེས་སྨྲས་སོ། །འཇིག་རྟེན་བགྲང་དུ་མེད་པ་ཐམས་ཅད་ཀྱི། །སྲིད་རྩེ་མན་ཆད་མནར་མེད་ཡན་ཆད་ན། །ལྷ་དང་ལྷ་མིན་ལྟོ་འཕྱེ་ཆེན་པོའི་\?\་ཚོགས། །བདེ་བར་གྱུར་ཅིག་སྡུག་བསྔལ་བདག་གིས་བླང ། །དེ་སྐད་ཅེས་སྨྲས་ནས། བསམ་པ་ཐག་པས་ཕ་མ་ལ་ཕྱག་འཚལ་ཏེ་སྨོན་ལམ་བཏབ་བོ། །གར་སྐྱེས་གར་སྐྱེས་ 469a ༄#། །ཀྱང་ཕ་མའི་རིམ་གྲོ་བྱའོ། །ཉི་ཚེ་བའི་སེམས་ཅན་དམྱལ་བ་འདིར་སྐྱེ་བར་འགྱུར་བ་དེ་དག་གི་དོན་དུ་བདག་འདི་ན་གནས་སོ། །འཇིག་རྟེན་ན་རིགས་པ་དང་ལྡན་པ་དང ། གྲོལ་བར་གྱུར་པ་སུ་བཞུགས་པ་དེ་དག་ལ་ཕྱག་འཚལ་ལོ། །དེ་དག་གིས་ཀྱང་བདག་བསྐྱབ་ཏུ་གསོལ་ཞེས་སྨྲས་ནས། སེམས་ཅན་དམྱལ་བ་པ་འདུག་འདུག་པ་དེར་འདུག་ནས། ཡང་ཕ་མའི་དོན་དུ་སྨོན་ལམ་བཏབ་པ། སེམས་ཅན་དམྱལ་བ་མནར་མེད་མཐའ་ནས་སྲིད་རྩེ་མན་ཆད་ནས། །སེམས་ཅན་ཚེ་འཕོའི་རྣམ་པ་འཆིང་བས་ཇི་སྙེད་བཅིངས་པ་དག་།ཐམས་ཅད་མ་ལུས་ཆོས་དང་ལྡན་ཞིང་བདེ་བར་འཚོ་འགྱུར་ཏེ། །རྒན་མེད་ཚེ་འཕོ་མེད་པའི་མྱ་ངན་འདས་པ་ཐོབ་གྱུར་ཅིག་།དེ་སྐད་ཅེས་བརྗོད་དེ་བསྡད་པ་དང ། འཁོར་ལོ་དེ་མགོ་ལ་མ་རེག་པར་སྟེང་གི་ནམ་མཁའ་ལ་འཁོར་བར་གྱུར་ཏོ། །དེའི་མས་ཀྱང་གལ་ཏེ་བདག་གི་སྦྱིན་པའམ། ཚུལ་ཁྲིམས་སམ། བདག་གིས་ཁྱིམ་ཐབ་ཀྱི་བརྟུལ་ཞུགས་བྱས་པའི་བསོད་ནམས་ཀྱི་འབྲས་བུ་ཞིག་ཡོད་ན། བསོད་ནམས་ཀྱི་འབྲས་བུ་དེས། བདག་གི་བུ་གང་དང་གང་ན་གནས་ཀྱང་བདེ་བར་གྱུར་ཅིག་ཅེས་རྟག་པར་སྨོན་ལམ་བཏབ་པས་དེ་ལྟར་ཞི་བར་གྱུར་ཏོ། །དེ་ཡང་ཉི་ཚེ་བའི་སེམས་ཅན་དམྱལ་བ་དེ་ན་འདུག་འདུག་ནས། ལོ་དྲུག་ཅུའང་མ་ལོན་པར་ཚེ་ 469b འཕོས་པར་གྱུར་ཏེ། དཔེར་ན། རྒྱལ་པོ་མ་སྐྱེས་དགྲ་སེམས་ཅན་དམྱལ་བའི་ཚེ་ཡོངས་སུ་མ་རྫོགས་པར་ཚེ་འཕོས་པ་ལྟ་བུ་སྟེ། ལས་ཀྱི་འབྲས་བུ་ཆུད་ཟ་བ་མེད་པའི་ཕྱིར་རབ་བར་ཀླད་པ་ན་བར་གྱུར་ཏོ། །དེ་ནས་སྐབས་སུ་བབ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་།དེའི་ཚེ་དེའི་དུས་ན་དད་དཔོན་གྱི་བུ་བྱམས་པ་མཆོད་སྦྱིན་ཞེས་བྱ་བ་དེ་གཞན་ཞིག་ཡིན་པར་སེམས་ན་དེ་ནི་དེ་ལྟར་མི་ལྟ་སྟེ། ང་ཉིད་དེའི་ཚེ་དེའི་དུས་ན་དེད་དཔོན་གྱི་བུ་བྱམས་པ་མཆོད་སྦྱིན་ཞེས་བྱ་བར་གྱུར་ཏོ། །དགེ་སློང་དག་།དེ་ལྟ་བས་ན་ངའི་ཚིག་ལ་ཡིད་ཆེས་པར་བྱས་ཏེ་སངས་རྒྱས་བཅོམ་ལྡན་འདས་ལ་རིམ་གྲོ་ཡོད་པར་བྱའོ། །ཆོས་དང་དགེ་འདུན་ལ་རིམ་གྲོ་ཡོད་པར་བྱའོ། །ཕ་མ་དང ། མཁན་པོ་དང ། སློབ་དཔོན་ལ་རིམ་གྲོ་ཡོད་པར་བྱའོ། །དགེ་སློང་དག་།ཁྱེད་ཀྱིས་འདི་ལྟར་ཤེས་པར་བྱ་སྟེ། གང་ཡུལ་གཞན་དུ་སོང་ཞིང་བདེ་བ་དང ། སྡུག་བསྔལ་ཉམས་སུ་མྱོང་བ་ཡོད་དེ། དཔེར་ན། བྱམས་པ་མཆོད་སྦྱིན་ཡུལ་གཞན་དུ་སོང་ནས་ཚེ་དེ་ཉིད་ལ་ཉི་ཚེ་བའི་མཐོ་རིས་དང ། ཉི་ཚེ་བའི་སེམས་ཅན་དམྱལ་བ་མྱོང་བར་གྱུར་པ་ལྟ་བུ་སྟེ། དེ་ལྟར་ཡུལ་གཞན་དུ་བདེ་བ་དང་སྡུག་བསྔལ་ཉམས་སུ་མྱོང་བར་གྱུར་པའི་ལས་དེ་ལྟ་བུ་ནི་ཡུལ་གཞན་དུ་རྣམ་པར་སྨིན་པར་འགྱུར་བའོ། །དེ་ལ་ཡང་བཅོམ་ 470a ༄#། །ལྡན་འདས་ཀྱིས་དེ་སྐད་ཅེས་གསུངས་ཏེ། ང་ལ་ཅི་བྱས་པ་དང ། ཕ་མ་དང ། མཁན་པོ་དང ། སློབ་དཔོན་ལ་ཅི་བྱས་པ་དེ་དག་ནི་བྱེ་བྲག་མེད་ཅིང་མཚུངས་ཏེ། ཚེ་འདི་དང ། ཕྱི་མ་ལའང་རྣམ་པར་སྨིན་པ་མི་མཉམ་པ་མེད་དོ། །ཇི་ལྟར་ན་ཚེ་འདི་ལ་རྣམ་པར་སྨིན་པ་མཚུངས་ཤིང་མཉམ་པ་ཡིན་ཞེ་ན། དཔེར་ན། མཉན་དུ་ཡོད་པ་ན་བཅོམ་ལྡན་འདས་དང་ཉན་ཐོས་ཀྱི་དགེ་འདུན་བཤོས་གསོལ་བ་མི་ཕོངས་པ་གཅིག་ཅིག་གིས་མཐོང་ནས་སེམས་མོས་པར་བྱས་པས་དེས་བསོད་ནམས་ཀྱི་ཚོགས་ཆེན་པོ་ཡང་བསགས་པར་གྱུར། རྒྱལ་པོར་འགྱུར་བའི་ལས་ཀྱང་བྱས། དེ་ཉིད་ཐར་པའི་ས་བོན་དུ་གྱུར་པ་དེ་ཐུགས་སུ་ཆུད་ནས། བཅོམ་ལྡན་འདས་ཀྱིས་ཚིགས་སུ་བཅད་དེ་གསུངས་པ། དེ་ལ་རྗེས་སུ་ཡི་རང་སུ་བྱེད་གང ། །དེ་ཡི་ལས་ནི་ཉམས་སུ་སུ་ལེན་པ། །ཞེས་བྱ་བ་ལ་སོགས་པ་གསུངས་པ་དང ། ཆོས་རྣམས་སྔོན་དུ་ཡིད་འགྲོ་སྟེ། །ཡིད་ཀྱིས་ཆོས་འགྱུར་ཡིད་ཀྱིས་འགྲོ་།ཡིད་ནི་ལེགས་པར་མོས་འགྱུར་ན། །སྨྲ་བའམ་བྱེད་པ་ཀུན་ཏུ་འགྱུར། །གྲིབ་མ་རྗེས་སུ་འབྲང་བ་བཞིན། །དེ་ལས་བདེ་བ་འཐོབ་པར་འགྱུར། །ཞེས་གསུངས་པ་དང ། དེ་ནས་ཚེ་འཕོས་པའི་འོག་ཏུ་ལྷར་སྐྱེས་པ་ལྟ་བུ་དང ། དཔེར་ན། གྲོང་ཁྱེར་གཙུག་ཕུད་ཅེས་བྱ་བའི་རང་སངས་ 470b རྒྱས་ལྟ་བུ་སྟེ། དེ་ལ་ལོ་ཉེས་པ་ཞིག་གི་ཚེ་མི་དབུལ་པོ་ཞིག་གིས་བསོད་སྙོམས་ཤིག་ཕུལ་བས། དེ་དེ་ཉིད་ཀྱི་ཚེ་རྒྱལ་བོར་དབང་བསྐུར་ནས་དུས་གཞན་ཞིག་ན་རང་སངས་རྒྱས་སུ་གྱུར་པ་ལྟ་བུའོ། །དེ་ཡང་མདོ་སྡེ་དག་ལས་གསུངས་པ། །གྲོང་ཁྱེར་གཙུག་ཕུད་ཅེས་བྱ་བ་དེ་དང་འདྲ་བར་སེམས་མོས་པའི་འབྲས་བུ་ཚེ་འདི་ཉིད་ལ་རྣམ་པར་སྨིན་པར་འགྱུར་རོ་ཞེས་གསུངས་པ་དང ། ཕ་མ་ལ་རིམ་གྲོ་བྱས་ན། དེད་དཔོན་གྱི་བུ་བྱམས་པ་མཆོད་སྦྱིན་གྱིས་མའི་ངག་མཉན་ཏེ་ལན་བཞི་ཕྱིར་ལོག་པས་གྲོང་ཁྱེར་ཆེན་པོ་བཞིར་ཉི་ཚེ་བའི་མཐོ་རིས་མྱོང་བར་གྱུར་པ་དེ་དེའི་ཐར་པའི་ས་བོན་དུ་གྱུར་པ་ལྟར། ཚེ་འདི་ལ་འབྲས་བུ་རྣམ་པར་སྨིན་པར་འགྱུར་རོ་ཞེས་གསུངས་པ་ལྟ་བུའོ། །ཇི་ལྟར་ན་བཅོམ་ལྡན་འདས་དང ། ཕ་མ་ལ་ཞེ་སྡང་བར་བྱས་པའི་སེམས་ཀྱིས་སེམས་ཅན་དམྱལ་བར་འགྲོ་བར་འགྱུར་ཞེ་ན། དེ་ནི་དཔེར་ན། ལྷས་བྱིན་གྱིས་བཅོམ་ལྡན་འདས་ལ་ཞེ་སྡང་བའི་སེམས་བསྐྱེད་ནས་ཚེ་འཕོས་པའི་འོག་ཏུ་མནར་མེད་པའི་སེམས་ཅན་དམྱལ་བར་ལྷུང་བ་ལྟ་བུ་དང ། དཔེར་ན། ཡུལ་སིན་དུ་ན་འོ་དོད་ཅན་ཞེས་བྱ་བའི་གྲོང་ཁྱེར་ཞིག་ཡོད་བར་རྒྱལ་པོའི་བུ་ཨུ་ཏྲ་ཀ་ཞེས་བྱ་བས་ཕ་བསད་དེ་སེམས་ཅན་དམྱལ་བར་ལྷུང་བ་ལྟ་བུ་སྟེ། དེ་ལྟར་ན་བཅོམ་ལྡན་འདས་དང ། ཕ་མ་ལ་ཞེ་སྡང་བར་བྱས་པའི་སེམས་ 471a ༄#། །ཀྱིས་སེམས་ཅན་དམྱལ་བར་འགྲོ་བར་འགྱུར་རོ། །དེ་དག་ལ་བྱེ་བྲག་མེད་པ་ཡིན་ནམ་ཞེ་ན། བྱེ་བྲག་མེད་པའང་མ་ཡིན་ཏེ། བཅོམ་ལྡན་འདས་ནི་བསྐལ་པ་བརྒྱ་སྟོང་དུ་མར་དགེ་བའི་རྩ་བ་བསྐྱེད་པ། ཚོགས་བསགས་པ། ལམ་མ་སྐྱེས་པ་རྣམས་ལ་ཆོས་སྟོན་ཅིང་བྱང་ཆུབ་ཏུ་སྟོབས་པ་སྟེ། དེ་ལ་མོས་པ་བསྐྱེད་ན།་འབྲས་བུ་རྣམ་པར་སྨིན་པ་ཚད་མེད་པར་འགྱུར་ཏེ། དེ་མྱ་ངན་ལས་འདའ་བའི་ཚེ་ཡང་ཡབ་ཡུམ་ཐར་པའི་ལམ་ལ་བཀོད་དོ། །དེ་ལྟ་ཡིན་ཡང་ཕ་མའི་ཚིག་ནི་ཐམས་ཅད་མཉན་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། ལ་ལ་ལོག་པར་ལྟ་བ་དང་ལྡན་པ་དག་བུ་ལ་འདི་སྐད་ཅེས་ཟེར་ཏེ། བུ། ངེད་ཁ་འཚོ་བའི་གནས་སུ་ཁྲིད་ཅིག་དང ། ཁྱོད་ལ་ཕན་པ་དང ། བདེ་བར་འགྱུར་རོ་ཞེས་ཟེར་བ་དང ། ངེད་གཡང་དུ་ཐོངས་ཤིག་།མེར་ཆུགས་ཤིག་ཅེས་ཟེར་ཡང་དེ་ལྟ་བུ་ནི་མི་བྱའོ། །དེ་ཅིའི་ཕྱིར་ཞེ་ན། ཕ་མ་བསད་པས་ནི་གདོན་མི་ཟ་བར་སེམས་ཅན་དམྱལ་བར་འགྲོའོ། །དེ་ལྟ་བས་ན་བཅོམ་ལྡན་འདས་ཀྱིས་ཀྱང་ཕ་མ་གསོད་པ་ནི་རབ་ཏུ་འབྱུང་བར་མི་བྱ་སྟེ། དེ་ལ་རབ་ཏུ་འབྱུང་བའི་རྒྱུ་མེད། བསྙེན་པར་རྫོགས་པར་བྱ་བའི་རྒྱུ་མེད་དེ། དེ་ལྟ་བས་ན་དེ་དག་སྤང་བར་བྱའོ་ཞེས་གསུངས་ཏེ། དེ་ལྟ་བས་ན་ཕ་མ་དང ། མཁན་པོ་དང ། སློབ་དཔོན་ 471b དག་ཏུ་མཉམ་ཞིང་མཚུངས་པ་ཡིན་ཞེ་ན། དེ་ནི་བཅོམ་ལྡན་འདས་ཀྱིས་ཕ་མ་བུ་ལ་བྱམས་པ་ནི་རྐང་དང ། རུས་པའི་ཁོང་ནས་བྱམས་སོ་ཞེས་གསུངས་ཏེ། དེ་ལྟ་བས་ན་ཕ་མས་མ་གནང་ན་རབ་ཏུ་མི་འབྱུང་ངོ ། །དེ་ཡང་དཔེར་ན། འཕགས་པ་ཕོ་བྲང་འཁོར་སྐྱོང་ལ་སོགས་པ་ཕ་མས་མ་བཀྱེ་ན་བཅོམ་ལྡན་འདས་ཀྱིས་ཀྱང་རབ་ཏུ་མ་ཕྱུང་བ་ལྟ་བུ་སྟེ། ད་དུང་ཡང་ཕ་མས་མ་གནང་བར་རབ་ཏུ་མི་དབྱུང་སྟེ། དཔེར་ན། བཅོམ་ལྡན་འདས་རབ་ཏུ་བྱུང་བ་ལ། རྒྱལ་པོ་ཟས་གཙང་མ་སྲས་ཀྱི་མྱ་ངན་གྱི་མིག་རུབ་པར་གྱུར་པ་ལྟ་བུའི་ཕ་མས་ནི་བུ་འདི་བདག་ཅག་གིས་བསྐྱེད་བསྐྱེད་ཀྱི། སྐྱེས་ནས་རིམ་གྲོར་བྱེད་པར་འགྱུར་རོ། །བདག་ཅག་གི་དགོས་པ་བསྒྲུབ་པར་འགྱུར་རོ། །ནོར་གྱི་བདག་པོར་འགྱུར་རོ། །ཚེ་འཕོས་ན་ཡང་གཏོར་མ་བྱེད་པར་འགྱུར་རོ། །རིགས་ཀྱི་རྒྱུད་འཚོབ་པར་འགྱུར་རོ་ཞེས་གནས་ལྔ་པོ་དེ་དག་ལ་རེ་ཞིང་ཕ་མ་བུ་འདོད་དོ། །མཁན་པོ་དང ། སློབ་དཔོན་ནི་སྙིང་རྗེའི་སེམས་སྔོན་དུ་བཏང་ཞིང་ཇི་ལྟར་ན་ཐོག་མ་མེད་པ་ནས་འཁྱམ་འཁྱམ་པ་འདི་ད་དུང་ཕ་མས་མ་གནང་ན་རབ་ཏུ་མི་འབྱུང་གི་བར་དུ་ཕྱིན་པར་བྱ་སྙམ་སེམས་ཏེ། དཔེར་ན།་བཅོམ་ལྡན་འདས་ཀྱིས་འདུལ་བ་ལས་གསུངས་པ། མཁན་པོ་ནི་སློབ་མ་ལྟ་བུའི་འདུ་ཤེས་འཇོག་གོ་།སློབ་མ་ནི་མཁན་པོ་ལ་ཕའི་འདུ་ཤེས་འཇོག་གོ་།དེ་བཞིན་དུ་ཕན་ 472a ༄#། །ཚུན་ཕ་མ་དང ། བུའི་འདུ་ཤེས་འཇོག་གོ་ཞེས་གསུངས་པ་ལྟ་བུ་སྟེ། དེ་ལྟར་ན་མཁན་པོ་དང ། སློབ་དཔོན་ནི་ཕ་མ་དང་མཚུངས་ཤིང་མཉམ་མོ། །དེ་ཡང་བཅོམ་ལྡན་འདས་ཀྱིས་འཁོར་ལོས་བསྒྱུར་བའི་མདོ་ལས་གསུངས་པ། ལས་ཀྱི་རྣམ་པར་སྨིན་པ་གང་གིས་འཁོར་ལོས་བསྒྱུར་བའི་རྒྱལ་པོ་གླང་པོ་རིན་པོ་ཆེ་དང ། རྟ་རིན་པོ་ཆེ་འཐོབ་ཅེ་ན། དེ་ནི་ཕ་མ་ཁུར་དུ་ཁྱེར་ཁྱེར་པ་དང ། གླང་པོ་དང ། རྟ་དང ། ཤིང་རྟ་ལ་སོགས་པ་ལ་བསྐྱོན་པ་དང ། མཁན་པོ་དང ། སློབ་དཔོན་བདག་གིས་བཀུར་བ་དང ། གཞན་ལ་བསྐྱོན་པའི་ལས་ཀྱི་རྣམ་པར་སྨིན་པས་འཁོར་ལོས་བསྒྱུར་བའི་རྒྱལ་པོ་གླང་པོ་དང ། རྟ་རིན་པོ་ཆེ་འཐོབ་བོ་ཞེས་གསུངས་པ་ལྟ་བུ་སྟེ། རྒྱུ་དེས་ཀྱང་ཕ་མ་དང ། མཁན་པོ་དང ། སློབ་དཔོན་དག་ཏུ་མཚུངས་ཤིང་མཉམ་མོ། །དེ་ལའང་ཁྱིམ་པ་དག་ལ་ནི་ཕ་མ་མཆོད་པའི་གནས་ཡིན་ནོ། །རབ་ཏུ་བྱུང་བ་རྣམས་ལ་ནི་མཁན་པོ་དང ། སློབ་དཔོན་མཆོད་པའི་གནས་ཡིན་ནོ། །དེ་ལྟར་ན་མཁན་པོ་དང ། སློབ་དཔོན་དང ། ཕ་མར་མཚུངས་ཤིང་མཉམ་པ་ཡིན་ནོ་ཞེས་གསུངས་པ་ལྟ་བུའོ། །དཔེར་ན། བཅོམ་ལྡན་འདས་ཀྱིས་དགེ་སློང་དག་ལ་བཀའ་སྩལ་པ། དགེ་སློང་དག་།ལ་ལ་ཞིག་གིས་ཕ་མ་ཕྲག་པ་ལ་བླངས་ཏེ་འཛམ་བུའི་གླིང་བསྐོར་བ་དང ། འཚོ་བ་ཐམས་ཅད་སྦྱར་བ་དང ། གླིང་བཞི་ 472b ཐམས་ཅད་ནོར་དབྱིག་དང་གསེར་གྱིས་བཀང་སྟེ་བྱིན་ཡང་ཕ་མ་ལ་ཕན་པའི་ལན་ལོན་པར་མི་འགྱུར་གྱི། ལ་ལ་ཞིག་གིས་སངས་རྒྱས་ལ་དད་པ་བསྐྱེད་པ་དང ། ཆོས་དང ། དགེ་འདུན་ལ་དད་པ་བསྐྱེད་པ་དང ། བསླབ་པ་ལྔ་ལ་གཞག་པ་དང ། འཕགས་པས་བསྔགས་པའི་ལམ་ལ་སྐྱབས་སུ་གཏོང་བའི་གང་ཟག་དེ་ལ་ནི་གུས་པར་སྨྲས་པ་དང ། བསུ་བ་དང ། ཐལ་མོ་སྦྱར་བ་དང ། གདིང་བ་དང ། ཆོས་གོས་དང ། བསོད་སྙོམས་དང ། མལ་ཆ་དང ། ན་བའི་སྨན་བྱིན་པ་ཙམ་གྱིས་ཕན་པའི་ལན་ལོན་པར་མི་ནུས་སོ་ཞེས་གསུངས་པ་ལྟ་བུ་སྟེ། དེ་ལྟར་ན་ཕ་མ་བས་ཀྱང་མཁན་པོ་དང ། སློབ་དཔོན་ཁྱད་པར་དུ་འཕགས་སོ། །མདོར་ན་བཅོམ་ལྡན་འདས་མྱ་ངན་ལས་འདས་ཕྱིན་ཆད་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་ཇི་སྙེད་ཅིག་མངོན་པར་མོས་པ་དང ། དུལ་བར་གྱུར་པ་དེ་དག་ཐམས་ཅད་ཀྱང་མཁན་པོ་དང ། སློབ་དཔོན་གྱིས་མངོན་པར་མོས་ཤིང་དུལ་བར་བྱས་སོ། །དེའི་ཕྱིར་བཅོམ་ལྡན་འདས་ཀྱིས་གསུངས་པ། དགེ་སློང་དག་།དེའི་ཚིག་ལ་ཡིད་ཆེས་པ་རྣམས་ཀྱིས་སངས་རྒྱས་བཅོམ་ལྡན་འདས་ལ་དད་པ་མཆོག་བསྐྱེད་པར་བྱའོ། །ཆོས་དང ། དགེ་འདུན་དང ། ཕ་མ་དང ། མཁན་པོ་དང ། སློབ་དཔོན་ལ་དད་པ་མཆོག་བསྐྱེད་པར་བྱའོ། །དེ་ནི་ཁྱོད་ལ་ཡུན་རིང་པོར་ཕན་པ་དང ། བདེ་བའི་ 473a ༄#། །རྒྱུར་འགྱུར་རོ་ཞེས་གསུངས་པ་ལྟ་བུ་སྟེ། ལས་དེ་ལྟ་བུ་ནི་ཡུལ་གཞན་དུ་རྣམ་པར་སྨིན་པར་འགྱུར་རོ། །དེ་ལ་ལས་གང་དང་ལྡན་ན་གང་ཟག་སྔར་བདེ་བར་གྱུར་ལ། ཕྱིས་སྡུག་བསྔལ་བར་འགྱུར་བའི་ལས་ཡོད་དེ། དེ་གང་ཞེ་ན། བཤད་པར་བྱ་སྟེ། འདི་ལ་ལ་ལ་ཞིག་སྦྱིན་པ་བསླངས་ན་རབ་ཏུ་དགའ་སྟེ། ཁས་ལེན་ཅིང་རབ་ཏུ་དགའ་བས་བྱིན་ལ། བྱིན་ནས་དེའི་འོག་ཏུ་འགྱོད་པ་ཡིན་ཏེ། དེ་ནས་མིར་སྐྱེས་ན་ཡང་ཕྱུག་ཅིང་ལོངས་སྤྱོད་ཆེ་བའི་རིགས་སུ་སྐྱེ་སྟེ། ལོངས་སྤྱོད་དེ་དག་ཕྱིས་ཟད་ཅིང་དེངས་པར་འགྱུར་རོ། །དེ་ཕྱིས་དབུལ་པོར་འགྱུར་བ་ནི་ཁྱེའུ་གྲགས་པ་ཞེས་བྱ་བ་བཞིན་ཏེ། དེས་ཡང་དག་པར་རྫོགས་པའི་སངས་རྒྱས་ལོག་པར་དད་སེལ་དང ། དགེ་སློང་གི་དགེ་འདུན་ལ་བ་བཞོན་གཅིག་ཕུལ་ནས། དེ་ཕྱིས་གཞན་དག་གིས་འགྱོད་བཏབ་པ་དང ། དེ་ལྟར་བྱིན་པ་ནི་མ་ལེགས་པ་ཞིག་བྱས་སོ་སྙམ་ནས། དེ་སེམས་ལ་འགྱོད་པ་སྐྱེས་པས་དེ་གར་སྐྱེས་ཀྱང་ཐོག་མ་ཕྱུག་པོར་ནི་གྱུར་ན། ཕྱིས་སེམས་འགྱོང་བ་སྐྱེས་པ་དེས་ཐ་མར་དབུལ་པོར་གྱུར་ཏོ། །དེ་ཕྱིས་རྒྱལ་པོའི་ཁབ་ཏུ་སྐྱེས་ཏེ། སྐྱེ་བ་ན་དེའི་མ་ཚེ་འཕོས་པར་གྱུར་པ་དང ། འདི་སྐྱེས་པས་མ་ཡང་ཚེ་འཕོས་ཏེ། འདི་ནི་སྐར་མ་སྣུབས་ལས་སྐྱེས་པས་རིགས་ཕུང་པར་བྱེད་པར་འགྱུར་ཏེ། 473b འདི་ནི་བཀྲ་མི་ཤིས་སོ་ཞེས་ནས་མ་དང་ལྷན་ཅིག་ཏུ་དུར་ཁྲོད་དུ་བོར་རོ། །དེ་ན་ཡང་དེའི་བསོད་ནམས་ཀྱི་མཐུས་མའི་ནུ་མ་ཡ་གཅིག་ནས་འོ་མ་བྱུང་སྟེ། དེས་གསོས་ནས་ཆེར་སྐྱེས་པ་དང ། བཅོམ་ལྡན་འདས་ཀྱི་གན་དུ་སོང་སྟེ་རབ་ཏུ་བྱུང་ངོ ། །ད་ལྟར་དེས་སྔར་དད་པ་སྐྱེས་ཏེ་བ་བཞོན་ཕུལ་ལ་ཕྱིས་འགྱོད་པར་གྱུར་པས་ལས་དེའི་འབྲས་བུས་སྔར་སེམས་དད་པས་ཕུལ་བས་ནི་དེ་ཉིད་དེའི་ཐར་བའི་ས་བོན་དུ་གྱུར་ཏོ། །ཕྱིས་འགྱོད་པས་ནི་ཐ་མ་དབུལ་པོར་གྱུར་པ་ལྟ་བུ་སྟེ། འདི་ནི་ལས་གང་དང་ལྡན་ན་གང་ཟག་སྔར་བདེ་ལ་ཕྱིས་སྡུག་བསྔལ་བར་འགྱུར་བའོ། །དེ་ལ་ལས་གང་དང་ལྡན་ན་ན་གང་ཟག་སྔར་སྡུག་བསྔལ་ལ་ཕྱིས་བདེ་བར་འགྱུར་བའི་ལས་ཡོད་དེ། དེ་གང་ཞེ་ན། བཤད་པར་བྱ་སྟེ། འདི་ལ་ཁ་ཅིག་སྦྱིན་པ་བྱེད་དུ་བཅུག་ན་ཁ་སྲ་བ་ལས་ཁས་ལེན་ཅིང ། ཁ་སྲ་བཞིན་དུ་སྦྱིན་པ་བྱེད་ལ། སྦྱིན་པ་བྱིན་པའི་འོག་ཏུ་སེམས་དགའ་བ་སྐྱེད་དོ། །དེ་ནི་མིའི་ནང་དུ་སྐྱེས་ན་དབུལ་པོའི་རིགས་སུ་སྐྱེས་ཏེ་ཕྱིས་ལོངས་སྤྱོད་དེ་དག་འཕེལ་བར་འགྱུར་རོ། །དེ་བསླངས་ན་ཁ་སྲ་བར་ཁས་ལེན་པ་དང ། ཁ་སྲ་བཞིན་དུ་སྦྱིན་པ་བྱེད་ནས། ཕྱིས་དགའ་བར་གྱུར་པ་དེའི་རྒྱུས་སྔོན་དབུལ་པོར་གྱུར་ལ་ཕྱིས་ནོར་མང་པོར་གྱུར་པ་ཡིན་ནོ། །འདི་ནི་གང་ཟག་ལས་གང་དང་ལྡན་ན། སྔར་སྡུག་བསྔལ་བར་གྱུར་ལ་ཕྱིས་བདེ་བ་ཡིན་ནོ། ། 474a ༄#། །དེ་ལ་གང་ཟག་ལས་གང་དང་ལྡན་ན། སྔར་ཡང་བདེ་ལ་ཕྱིས་ཀྱང་བདེ་བར་འགྱུར་བའི་ལས་ཡོད་དེ། དེ་གང་ཞེ་ན། ཁ་ཅིག་བསླངས་མ་ཐག་ཏུ་དགའ་ཞིང་ཁས་ལེན། དགའ་བཞིན་དུ་སྦྱིན་པ་བྱིན་ནས་ཀྱང་དགའ་བར་འགྱུར་རོ། །དེ་ནས་མིའི་ནང་དུ་སྐྱེས་ན་ཕྱུག་ཅིང་ལོངས་སྤྱོད་ཆེ་བའི་རིགས་སུ་སྐྱེའོ། །འདི་ནི་གང་ཟག་ལས་གང་དང་ལྡན་ན་སྔར་ཡང་བདེ་ལ་ཕྱིས་ཀྱང་བདེ་བར་འགྱུར་བའོ། །དེ་ལ་ལས་གང་དང་ལྡན་ན། གང་ཟག་སྔར་ཡང་སྡུག་བསྔལ་བར་གྱུར་ལ་ཕྱིས་ཀྱང་སྡུག་བསྔལ་བར་འགྱུར་བའི་ལས་ཡོད་དེ། དེ་གང་ཞེ་ན། འདི་ལ་གང་ཟག་ལ་ལ་དགེ་བའི་བཤེས་གཉེན་དང་བྲལ་བར་གྱུར་ཏེ། དེ་སུས་ཀྱང་སྦྱིན་པ་བྱེད་དུ་མ་བཅུག་དེས་ཀྱང་སྦྱིན་པ་ཅིའང་མ་བྱིན། དེས་སྡིག་པའི་ལས་ཀྱང་ཅིའང་མ་བྱས་ཤིང་མ་བསགས་པ་ཡིན་ཏེ། གང་ཟག་དེ་གང་གི་ཚེ་མི་རྣམས་ཀྱི་ནང་དུ་སྐྱེས་ན། དབུལ་པོ་བཟའ་བ་དང་བཏུང་བ་ཉུང་བ་སྡུག་བསྔལ་བས་འཚོ་བའི་རིགས་སུ་སྐྱེ་བར་གྱུར་ཏེ། དེ་དེར་སྐྱེས་ནས་ཚེགས་ཆེན་པོས་བཟའ་བ་དང་བགོ་བ་རྙེད་པར་འགྱུར་ལ། དེའི་ལོངས་སྤྱོད་དེ་དག་ཕྱིས་ཀྱང་མ་འཕེལ་བ་སྟེ། འདི་ལ་གང་ཟག་ལས་གང་དང་ལྡན་ན་སྔར་ཡང་སྡུག་བསྔལ་ལ་ཕྱིས་ཀྱང་སྡུག་བསྔལ་བར་འགྱུར་བའོ། །དེ་ལ་གང་ཟག་ལས་ 474b གང་དང་ལྡན་ན། ཕྱུག་ཅིང་སེར་སྣ་ཅན་དུ་འགྱུར་བའི་ལས་ཡོད་དེ། དེ་གང་ཞེ་ན། འདི་གང་ཟག་ལ་ལས་ཚུལ་ཁྲིམས་དང་ལྡན་པ་སྦྱིན་གནས་སུ་གྱུར་པ་དག་ལ་སྦྱིན་པ་ཅུང་ཟད་ཙམ་ཡང་བྱིན་པ་ཡིན་ཏེ། དེ་ཡང་སྦྱིན་པ་ལ་སེམས་གོམས་པ་ནི་མ་ཡིན་ནོ། །དེ་ནས་མིའི་ནང་དུ་སྐྱེ་བ་ན་སྦྱིན་པ་དེའི་མཐུས་ཕྱུག་ཅིང་ལོངས་སྤྱོད་ཆེ་བའི་རིགས་སུ་སྐྱེ་སྟེ། ཡང་གཏོང་བ་ལ་སེམས་གོམས་པ་མ་ཡིན་པ་སྟེ། ལས་དེས་ཕྱུག་ལ་སེར་སྣ་ཅན་དུ་འགྱུར་རོ། །གང་ཟག་འདི་ནི་ལས་གང་དང་ལྡན་ན་ཕྱུག་ཅིང་སེར་སྣ་ཅན་དུ་འགྱུར་བའོ། །དེ་ལ་གང་ཟག་ལས་གང་དང་ལྡན་ན། དབུལ་ཞིང་གཏོང་ཕོད་པར་འགྱུར་བའི་ལས་ཡོད་དེ། དེ་གང་ཞེ་ན། འདི་ལ་གང་ཟག་ཁ་ཅིག་དུད་འགྲོ་དང ། མི་ལོག་པའི་ངང་ཚུལ་ཅན་ལ་སྦྱིན་པ་མང་དུ་བྱིན་པ་ཡིན་ཏེ། དེ་ནམ་མིའི་ནང་དུ་སྐྱེས་ནའང་དབུལ་ཞིང་གཏོང་ཕོད་པར་འགྱུར་བ་ནི་སྔོན་སྦྱིན་པ་ལ་གོམས་པས་དབུལ་ཡང་གཏོང་ཕོད་པར་འགྱུར་རོ། །འདི་ནི་གང་ཟག་ལས་གང་དང་ལྡན་ན་དབུལ་ཞིང་གཏོང་ཕོད་པར་འགྱུར་བའོ། །དེ་ལ་གང་ཟག་ལས་གང་དང་ལྡན་ན། ཕྱུག་ཅིང་གཏོང་ཕོད་པར་འགྱུར་བའི་ལས་ཡོད་དེ། དེ་གང་ཞེ་ན། འདི་ལ་གང་ཟག་ཁ་ཅིག་གིས་ཚུལ་ཁྲིམས་དང་ལྡན་པ་སྦྱིན་གནས་སུ་གྱུར་པ་དག་ལ་སྦྱིན་པ་མང་དུ་བྱས་པ་ཡིན། སྦྱིན་པ་ལ་སེམས་གོམས་པ་ 475a ༄#། །ཡིན་ཏེ། དེ་ལས་དེས་མིའི་ནང་དུ་སྐྱེས་ན་ཡང་ཕྱུག་ཅིང་ལོངས་སྤྱོད་ཆེ་བར་འགྱུར་ཏེ། དཔེར་ན། ཁྱིམ་བདག་མགོན་མེད་ཟས་བྱིན་པ་ལྟ་བུའོ། ། དེས་ཡང་དག་པར་རྫོགས་པའི་སངས་རྒྱས་ལོག་པར་དད་སེལ་ལ་རྒྱལ་བུ་རྒྱལ་བྱེད་ཀྱི་ཚལ་ཕུལ། གཙུག་ལག་ཁང་བརྩིགས་པ། དེ་བཞིན་དུ་ཡང་དག་པར་རྫོགས་པའི་སངས་རྒྱས་གསེར་ཐུབ་དང ། འོད་སྲུང་དང ། དོན་ཐམས་ཅད་གྲུབ་པ་དང ། བྱམས་པ་ལ་གསེར་གྱི་ཡག་མག་བཏིང་བ་ཕུལ་བ་ལྟ་བུ་སྟེ། འདི་ནི་གང་ཟག་ལས་གང་དང་ལྡན་པ་ཕྱུག་ཅིང་གཏོང་ཕོད་པར་འགྱུར་བའོ། །དེ་ལ་གང་ཟག་ལ་ལ་ཚེ་ཟད་ལ་ལས་མ་ཟད་པ་ཡོད་དེ། དེ་གང་ཞེ་ན། གང་ཟག་གང་སེམས་ཅན་དམྱལ་བ་ལས་ཚེ་འཕོས་ཏེ་སེམས་ཅན་དམྱལ་བ་ཉིད་དུ་སྐྱེ་བ་དང ། དུད་འགྲོ་ལས་ཚེ་འཕོས་ཏེ་དུད་འགྲོ་ཉིད་དུ་སྐྱེ་བ་དང ། གཤིན་རྗེའི་འཇིག་རྟེན་ལས་ཚེ་འཕོས་ཏེ་གཤིན་རྗེའི་འཇིག་རྟེན་ཉིད་དུ་སྐྱེ་བ་དང ། ལྷ་ལས་ཚེ་འཕོས་ཏེ་ལྷ་ཉིད་དུ་སྐྱེ་བ་དང ། བྲམ་ཟེ་བེ་ཤྱ་ཀ་ར་ཡང་དང་ཡང་ཚེ་འཕོས་ཤིང་སྤྲེའུར་སྐྱེ་བ་དང ། སྔར་སྨོས་པའི་ཁྱིམ་བདག་ཡང་དང་ཡང་ཕྱུགས་སུ་སྐྱེས་པ་བཞིན་ནོ། །མཉན་དུ་ཡོད་པ་ན་ཁྱིམ་བདག་དབུལ་པོ་གཅིག་ཚེ་འཕོས་པ་ནས། དེའི་ཁྱིམ་སྒོ་ན་གླང་སྒལ་བ་ཅན་ཞིག་ཡོད་དོ། །ཁྱིམ་བདག་དེ་སེམས་ཁྱིམ་ལ་ 475b ཆགས་པས་ཚེ་འཕོས་ནས་གླང་དེའི་སྒལ་པའི་སྲིན་བུར་སྐྱེས་ཏེ། སྐྱེས་མ་ཐག་ཏུ་བྱ་རོག་གིས་ཟོས་པ་དང ། ཡང་དེ་ཉིད་དུ་སྲིན་བུར་སྐྱེས་སོ། །དེ་ལྟར་དེ་ཉིད་དུ་ཉིན་གཅིག་ལ་ལན་བདུན་ཚེ་འཕོས་ཤིང་སྐྱེས་པ་ལྟ་བུ་དང ། འཕགས་པ་མཽངྒལ་གྱི་བུ་ཆེན་པོ་ཡུལ་མ་ག་དྷར་བསོད་སྙོམས་ལ་སོང་སོང་བ་ལས་ཁྱིམ་ཞིག་གི་སྒོའི་ནང་དུ་ཕྱིན་པ་དང ། ཁྱིམ་དེ་ན་ཁྱིམ་བདག་བུད་མེད་དང་བཅས་པ་ཞིག་པང་ན་བུ་ཐོགས་ཏེ། ཉ་ཤའི་བྱན་དང་བཅས་པའི་ཁ་ཟས་ཟ་ཞིང་མདུན་ན་ཁྱི་ནག་པོ་ཞིག་འདུག་པ་དེ་ལ་ཉའི་རུས་པ་འདོར་རོ། །དེ་ནས་ཁྱིམ་བདག་དེས་མཽངྒལ་གྱི་བུ་ཆེན་པོ་མཐོང་ནས། འཕགས་པ་འདི་ན་སློང་བ་ལ་སྦྱིན་པ་སུའང་མ་མཆིས་ཀྱི། སླར་བཞུད་ཅིག་ཅེས་སྨྲས་ཏེ་སླར་ལོག་པ་དང ། ཁྱིམ་དེའི་སྒོ་ན་ཡུལ་གཞན་ནས་འོངས་པའི་སྐྱེས་བུ་མཁས་པ་ཞིག་སྔ་ན་འདུག་འདུག་པ་དེས། དེས་དེ་མཐོང་ནས་ངོ་མཚར་དུ་གྱུར་ཏེ། ཀྱེ་མ། བཙུན་པ་འདི་ནི་རྫུ་འཕྲུལ་ཅན་གྱི་མཆོག་སྟེ། ཀླུའི་རྒྱལ་པོ་དགའ་པོ་དང ། ཉེར་དགའ་བོ་ནི་བཏུལ། ལྷའི་ཕོ་བྲང་རྣམ་པར་རྒྱལ་བའང་ཕྱག་གཡོན་པའི་མཐེ་བོས་བསྒུལ་ཏེ་བརྒྱ་བྱིན་ཡང་ངོ་མཚར་དུ་གྱུར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱང་མིག་བཙུམས་པ་ཙམ་གྱིས་བསྐོར་བ་ལགས་ན། བསོད་སྙོམས་མ་གསོལ་བར་སླར་ 476a ༄#། །བཏང་བ་ནི་ངོ་མཚར་ཆེའོ་ཞེས་བྱ་བ་དང ། དེ་ནས་གནས་བརྟན་གྱིས་དེ་དག་སྐྱོ་བར་བྱ་བའི་ཕྱིར་སྨྲས་པ། ཁྱེའུ་ངོ་མཚར་མི་ཆེའོ། །མི་དེས་སྨྲས་པ།་འོ་ན་ངོ་མཚར་ཆེན་པོ་ཅི་མཆིས། ངེས་སྨྲས་པ། འདི་ན་ཁྱིམ་བདག་ཉ་ཤའི་བྱན་དང་བཅས་པའི་ཁ་ཟས་ཟ་བ་དེ། ཉ་དེ་ནི་ཁྱིམ་བདག་དེའི་ཕ་ཡིན་ཏེ། འདི་ནི་ཁྱིམ་གྱི་རྒྱབ་ན་རྫིང་ཉ་མང་པོ་ཞིག་ཡོད་པ་ནས་ཉ་རྣམས་བཅུས་ཤིང་བཅུས་ཤིང་ཟོས་ཏེ། མི་དེ་ཚེ་འཕོས་པ་དང་ཉ་དེ་དག་ཉིད་ཀྱི་ནང་དུ་སྐྱེས་སོ། །དེའི་བུ་འདིས་ཀྱང་ལན་བརྒྱ་ཕྲག་དུ་མར་ཉ་དེ་བཅུས་ཤིང་བཅུས་ཤིང་ཟོས་ཏེ། འདི་ཉིད་དུ་ཡང་དང ། ཡང་དུ་ལན་དུ་མར་སྐྱེས་སོ། །ཁྱི་མོ་འདི་ནི་ཁྱིམ་བདག་དེའི་མ་ཡིན་ཏེ། འདི་ཡང་ཆགས་པའི་ཟིལ་གྱིས་ནོན་པས་སུ་ལ་ཡང་སྦྱིན་པའང་མ་བྱིན། ཚུལ་ཁྲིམས་ཀྱང་མ་བསྲུངས་པར་གྱི་ནར་རིགས་དང་རྒྱུད་ཀྱི་དོན་དུ་རྫས་རྣམས་བསྲུངས་ཏེ། དེའང་ཁྱིམ་འདི་ཉིད་ལ་སེམས་ཆགས་བཞིན་དུ་ཚེ་འཕོས་ནས་ཁྱི་མོ་དེར་སྐྱེས་ཏེ། དེ་ནས་ཚེ་འཕོས་ནས་ཀྱང་ཡང་དང ། ཡང་དུ་འདི་ཉིད་དུ་སྐྱེས་ཏེ། ཁྱིམ་འདིར་མི་གཞན་ཞུགས་སུ་དོགས་ནས་མཚན་ཐོག་ཐག་ཀྱང་ཁྱིམ་ཕྱི་སྐོར་རོ། །མི་དེའི་སྤང་ན་འདུག་པའི་བུ་དེ་ཡང་དེའི་ཆུང་མའི་བྱི་བོ་ཡིན་ཏེ། ཁྱིམ་བདག་འདིས་ཆུང་མ་མི་གཞན་དང་ཉལ་བར་ 476b ཐོས་ནས། ཁྱིམ་བདག་དེ་གྲོང་གཞན་དུ་འགྲོ་བ་ལྟར་བྱས་ཏེ་ཁྱིམ་ནས་ཕྱིར་བྱུང་བ་དང ། བུད་མེད་དེའང་མི་གཞན་དང་ཉལ་བ་ལ་ཁྱིམ་བདག་འདི་སླར་ལྡོག་སྟེ་མི་དེ་བསད་དོ། །དེ་ཡང་བུད་མེད་དེ་ལ་ཆགས་ཤིང་སྡུག་པའི་རྒྱུས་བུད་མེད་འདིའི་རུམ་དུ་སྐྱེས་སོ། །ཁྱེའུ་ལྟོས། ཕ་གང་ཡིན་པ་དེའི་ཤ་ནི་ཟ། མ་གང་ཡིན་པ་དེ་ལ་ནི་ཉའི་རུས་པ་དང་གྲ་མ་འདོར། བྱི་བོ་བྱེད་བྱེད་པའི་དགྲ་བོ་ཁྲོས་པས་བསད་པ་གང་ཡིན་པ་དེ་ནི་པང་དུ་བླངས་སོ། །དེ་ལྟ་བས་ན་འཁོར་བའི་ཉེས་པ་འདི་ལ་སྐྱོ་བར་བྱ་བའི་རིགས་ཏེ་ངོ་མཚར་ནི་འདི་ཆེའོ། །དེ་ནས་དགེ་སློང་མཽངྒལ་གྱི་བུ་དེས་ཕྱི་མའི་སྐྱེ་བོ་ཕལ་པོ་ཆེ་རྣམས་སྐྱོ་བར་བྱ་བའི་ཕྱིར་དོན་འདི་ཉིད་ཚིགས་སུ་བཅད་པས་བསྟན་པ། དེ་ཡི་ཕ་ཡི་ཤ་ཟ་ཞིང ། །མ་ལ་རུས་པ་གྲ་མ་འདོར། །ཆུང་མའི་བྱི་བོ་གསོ་བྱེད་པ། །གཏི་མུག་དང་ནི་ཆགས་པས་བསྒྲིབས། །གང་ཟག་འདི་ནི་ཚེ་ཟད་ལ་ལས་མ་ཟད་པའོ། །དེ་ལ་གང་ཟག་ལ་ལ་ལས་ཟད་ལ་ཚེ་མ་ཟད་པ་ཡོད་དེ། དེ་གང་ཞེ་ན། གང་ཟག་སྔར་བདེ་བར་གྱུར་ལ་ཕྱིས་སྡུག་བསྔལ་བར་གྱུར་པ་དང ། སྔར་སྡུག་བསྔལ་བར་གྱུར་ལ་ཕྱིས་བདེ་བར་གྱུར་པ་སྟེ། གང་ཟག་དེ་ནི་ལས་ཟད་ལ་ཚེ་མ་ཟད་པའོ། །དེ་ལ་གང་ཟག་ལས་ཀྱང་ཟད་ལ་ཚེ་ཡང་ཟད་པ་ཡོད་དེ། དེ་གང་ཞེ་ན། གང་ཟག་གང་སེམས་ཅན་དམྱལ་བ་ནས་ཚེ་འཕོས་ཏེ་དུད་འགྲོར་སྐྱེས་པ་དང ། 477a ༄#། །དུད་འགྲོ་ལས་ཚེ་འཕོས་ཏེ་ཡི་དྭགས་སུ་སྐྱེ་བ་དང ། ཡི་དྭགས་ལས་ཚེ་འཕོས་ཏེ་ལྷ་མ་ཡིན་དུ་སྐྱེ་བ་དང ། ལྷ་མ་ཡིན་ལས་ཚེ་འཕོས་ཏེ་མིའི་ནང་དུ་སྐྱེ་བ་དང ། མི་ལས་ཚེ་འཕོས་ཏེ་ལྷའི་ནང་དུ་སྐྱེ་བ་ལྟ་བུ་སྟེ། གང་ཟག་དེ་ནི་ཚེ་ཡང་ཟད་ལ་ལས་ཀྱང་ཟད་པའོ། །དེ་ལ་གང་ཟག་གང་ཚེ་ཡང་མ་ཟད་ཅིང་ལས་ཀྱང་མ་ཟད་ལ། དེའི་ཉོན་མོངས་པ་ཟད་པ་ཡོད་དེ། དེ་གང་ཞེ་ན། རྒྱུན་དུ་ཞུགས་པ་དང ། ལན་གཅིག་ཕྱིར་འོང་བ་དང ། ཕྱིར་མི་འོང་བ་དང ། དགྲ་བཅོམ་པ་ལྟ་བུ་སྟེ། གང་ཟག་དེ་ནི་ཚེ་ཡང་མ་ཟད་ཅིང་ལས་ཀྱང་མ་ཟད་ལ་དེའི་ཉོན་མོངས་པ་ཟད་པ་ཡིན་ནོ། །དེ་ལ་གང་ཟག་ལུས་བདེ་ལ་སེམས་མི་བདེ་བ་ཡོད་དེ། དེ་གང་ཞེ་ན། སོ་སོའི་སྐྱེ་བོ་ཕལ་པ་བསོད་ནམས་བྱས་པ་ནི་ལུས་བདེ་ལ་སེམས་མི་བདེ་སྟེ། དཔེར་ན། ཡུལ་མ་ག་དྷའི་བྲམ་ཟེ་དང ། ཁྱིམ་བདག་དང ། རྒྱལ་པོ་མན་ཏ་ལ་སོགས་པ་ལྟ་བུ་སྟེ། གང་ཟག་འདི་ནི་ལུས་བདེ་ལ་སེམས་མི་བདེ་བའོ། །དེ་ལ་གང་ཟག་ལ་ལ་སེམས་བདེ་ལ་ལུས་མི་བདེ་བ་ཡོད་དེ། དེ་གང་ཞེ་ན། དཔེར་ན་དགྲ་བཅོམ་པ་ཀ་ར་མ་ཤ་ལྟ་བུ་ནི། སེམས་བདེ་ལ་ལུས་མི་བདེ་བ་ཡིན་ནོ། །འདི་ལྟ་སྟེ། འཕགས་པ་ཤོ་ནོ་ཏ་རས་ཚེ་རབས་སྔ་མ་ལ་རང་སངས་རྒྱས་ཁྲུས་བྱེད་པ་ལ་བ་ལང་གི་ལྕི་བ་དང ། ཀ་པི་ཏ་སུ་ཀ་ར་བསྲེགས་ཏེ་བཀྲུ་ 477b བའི་ཕྱིར་བྱིན་པས་དེའི་ལས་ཀྱི་རྣམ་པར་སྨིན་པས་ལུས་མཛེས་གང་བར་མཐོང་ངོ ། །འདི་ལྟར་ཚིགས་སུ་བཅད་པས་སྨྲས་པ། ལས་ནི་ཤིན་ཏུ་སྟོབས་ཆེ་སྟེ། །རྡོ་རྗེ་ལྟ་བུའི་ལས་རྣམས་ལས། །གང་ལ་བདག་གི་དབང་བྱས་ཀྱང ། །སྡུག་བསྔལ་བ་ཡི་ལས་རྣམས་མྱོང ། །ཞེས་བྱ་བ་ལྟ་བུ་དང ། འཛང་ག་ཀ་ཤས། རང་སངས་རྒྱས་ཤིག་ཡུལ་ཝཱ་ར་ཎཱ་སིར་བྱོན་པ་ལ། ཟན་སྤྱད་དེ་སྦྱིན་ནོ་སྙམ་ནས་དེ་ལ་རིངས་ཤིག་ལོན་ཏེ་དུས་ཡོལ་བར་ཟས་བྱིན་ནོ། །དེ་ཡང་ལས་དེས་ཚེ་ཕྱི་མ་ལ་འཕགས་པར་གྱུར་ཀྱང་སྔ་དྲོ་བསོད་སྙོམས་བསླངས་ན། དུས་ཡོལ་ལ་ཐུག་པ་ན་ཟན་རྙེད་པ་ལྟ་བུ་སྟེ། གང་ཟག་དེ་ལྟ་བུ་ནི་སེམས་བདེ་ལ་ལུས་མི་བདེ་བའོ། །གང་ཟག་ལ་ལ་ལུས་ཀྱང་བདེ་ལ་སེམས་ཀྱང་བདེ་བ་ཡོད་དེ། དེ་གང་ཞེ་ན། འདི་ལ་དགྲ་བཅོམ་པ་ཟག་པ་ཟད་པ་བསོད་ནམས་བྱས་པ་ཡིན་ཏེ། འདི་ལྟ་སྟེ། དཔེར་ན། རྒྱལ་པོ་ཆོས་གྲགས་ཀྱི་བུ་ལུ་ཀུ་བ་ལྟ་བུ་སེངྒེའི་སྒྲ་སྒྲོག་ན། དེ་ནི་རབ་ཏུ་བྱུང་ནས་ལོ་བརྒྱད་ཅུ་ལོན་ཏེ། ནམ་ཡང་ཆུང་དུ་ན་ཀླད་པ་ན་བ་ཙམ་ཡང་མ་མྱོང་ངོ་ཞེས་ཟེར་བ་ལྟ་བུ་སྟེ། དེའང་སྔོན་ཡུལ་ཝཱ་ར་ཎཱ་སིར་སྤོས་འཚོང་ཞིག་ཏུ་གྱུར་པ་ན། སངས་རྒྱས་ལོག་པར་དད་སེལ་ཉན་ཐོས་ཀྱི་དགེ་འདུན་དང་བཅས་པ་ལན་བའི་གསོས་སྨན་ཕུལ་བ་དང ། དགྲ་བཅོམ་པ་ལ་ཨ་ 478a ༄#། །རུ་ར་ཕུལ་བའི་ལས་ཀྱི་རྣམ་པར་སྨིན་པ་དེས་ནད་མེད་ཅིང་བདེ་བའི་མཆོག་ཐོབ་བོ་ཞེས་གསུངས་པ་ལྟ་བུ་སྟེ། གང་ཟག་དེ་ནི་ལུས་ཀྱང་བདེ་ལ་སེམས་ཀྱང་བདེ་བའོ། །ལས་གང་དང་ལྡན་ན། གང་ཟག་ལུས་ཀྱང་མི་བདེ་ལ་སེམས་ཀྱང་མི་བདེ་བ་ཡོད་དེ། དེ་གང་ཞེ་ན། འདི་ལ་སོ་སོའི་སྐྱེ་བོ་བསོད་ནམས་མ་བྱས་པ་དག་རིགས་དང ། རྒྱུད་ཀྱི་གོས་དང ། ཟས་སྐོམ་དང་བྲལ་བ་གཞན་གྱི་ཁྱིམ་རྒྱུ་བ་དག་ཡོད་དེ། འདི་ལྟ་སྟེ། ནད་མཛེ་དང ། ལུང་པ་དང ། རིམས་དང ། ཤུ་བ་དང ། གཡན་པ་ལ་སོགས་པའི་ནད་རྣམས་ཀྱིས་ཡོངས་སུ་གཟིར་ཅིང་རྐང་ལག་མེད་པ་མིག་དང་བྲལ་བ་དག་ཡོད་དེ། གང་ཟག་འདི་ནི་ལུས་ཀྱང་མི་བདེ་ལ་སེམས་ཀྱང་མི་བདེ་བ་ཡིན་ནོ། །དེ་ལ་གང་ཟག་ལས་གང་དང་ལྡན་ན་ངན་སོང་རྣམས་སུ་སྐྱེས་ཀྱང་གཟུགས་བཟང་ཞིང་མཛེས་ལ་ལུས་སྣུམ་ཞིང་མདོག་འཚེར་ལ་མིག་ཏུ་སྡུག་ཅིང་བལྟ་ན་དགའ་བར་འགྱུར་བའི་ལས་ཡོད་དེ། དེ་གང་ཞེ་ན། གང་ཟག་གང་འདོད་ཆགས་ལས་བྱུང་བའི་ངང་ཚུལ་ངན་པ་དང་ལྡན་པ་དེ་ནི་ངན་སོང་རྣམས་སུ་སྐྱེ་སྟེ། དཔེར་ན། རྨ་བྱ་དང ། ནེ་ཙོ་དང ། བྱ་ཤ་རི་ཀ་དང ། ཕྱ་ཀཱ་ར་ཎ་ཌ་པ་དང ། ངུར་བ་ལ་སོགས་པ་ལྟ་བུ་སྟེ། འདི་ནི་གང་ཟག་ལས་གང་དང་ལྡན་ན། ངན་སོང་རྣམས་སུ་སྐྱེས་ཀྱང་གཟུགས་ 478b བཟང་ཞིང་མཛེས་ལ་ལུས་སྣུམ་ཞིང་མདོག་འཚེར་བ་མིག་ཏུ་སྡུག་ཅིང་བལྟ་ན་དགའ་བར་འགྱུར་བའོ། །དེ་ལ་གང་ཟག་ལས་གང་དང་ལྡན་ན། ངན་སོང་དུ་སྐྱེས་ལ་མདོག་མི་བཟང་ཞིང་ལུས་རྩུབ་པ་བལྟ་ན་མི་སྡུག་པར་འགྱུར་བའི་ལས་ཡོད་དེ། དེ་གང་ཞེ་ན། གང་ཟག་དེ་ནི་ཞེ་སྡང་ལས་བྱུང་བའི་ངང་ཚུལ་ངན་པ་དང་ལྡན་པས་ངན་སོང་རྣམས་སུ་སྐྱེས་པ་སྟེ། འདི་ལྟ་སྟེ། སེངྒེ་དང ། སྟག་དང ། བྱ་རོག་དང ། ཝ་དང ། དྲེད་མོ་དང ། སྦྲུལ་ནག་པོ་དང ། ཡི་དྭགས་དང ། ཤ་ཟ་ལ་སོགས་པ་ལྟ་བུའོ། །འདི་ནི་གང་ཟག་ལས་གང་དང་ལྡན་ན། ངན་སོང་རྣམས་སུ་སྐྱེས་ནས་མདོག་མི་བཟང་ཞིང་ལུས་རྩུབ་ལ་བལྟ་ན་མི་སྡུག་བའི་ལས་ཡིན་ནོ། །གང་ཟག་ལས་གང་དང་ལྡན་ན། ངན་སོང་རྣམས་སུ་སྐྱེས་ནས་ལྕེའི་དབང་པོ་དྲི་ང་བར་འགྱུར་བ་ཡོད་དེ། དེ་གང་ཞེ་ན། གང་ཟག་དེ་ནི་གཏི་མུག་ལས་བྱུང་བའི་ངང་ཚུལ་ངན་པ་དང་ལྡན་པས་ངན་སོང་རྣམས་སུ་སྐྱེས་པ་སྟེ།་འདི་ལྟ་སྟེ། སྲོག་ཆགས་ཚུ་ཚུན་ད་རི་དང ། སྲིན་བུ་དང ། སྦྲུལ་དང ། ཤིག་དང ། སྦྲང་མ་དང ། མང་ཀུན་ལ་སོགས་པ་དང ། ལུས་ལ་སྲིན་བུའི་རིགས་ཉི་ཤུ་ཡོད་པ་ལྟ་བུ་སྟེ། འདི་ནི་གང་ཟག་ལས་གང་དང་ལྡན་ན། ངན་སོང་རྣམས་སུ་སྐྱེས་ནས་ལྕེའི་དབང་པོ་དྲི་ང་ཞིང་དབང་པོ་མི་གསལ་བར་འགྱུར་བའི་ལས་སོ། །མི་ 479a ༄#། །དགེ་བའི་ལས་ཀྱི་ལམ་བཅུ་སྟེ། བཅུ་གང་ཞེ་ན། ལུས་ཀྱི་ལས་རྣམ་གསུམ་དང ། ངག་གི་ལས་རྣམ་བཞི་དང ། ཡིད་ཀྱི་ལས་རྣམ་གསུམ་སྟེ། མི་དགེ་བའི་ལས་ཀྱི་ལམ་བཅུ་པོ་འདི་དག་གི་རྣམ་པར་སྨིན་པས་ཕྱི་རོལ་གྱི་དངོས་པོ་བཅུ་རྒུད་པར་འགྱུར་ཏེ། སྲོག་གཅོད་པ་མི་དགེ་བའི་ལས་ཀྱི་རྣམ་པར་སྨིན་པས་སའི་མདངས་དང་གཟི་བྱིན་ནུབ་པར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས་ཚེ་ཐུང་བར་འགྱུར་རོ། །མ་བྱིན་པར་ལེན་པ་མི་དགེ་བའི་ལས་ཀྱི་རྣམ་པར་སྨིན་པས། ས་ལ་སེར་བ་དང ། བྱ་དང ། བ་ལང་དང ། བྱི་བ་དང ། སྲིན་བུ་ལ་སོགས་པ་ལོ་ཐོག་ལ་ཟ་བ་རྣམས་འབྱུང་ངོ ། །ལས་དེ་ཉིད་ཀྱི་རྣམ་པར་སྨིན་པ་ལས་ལོངས་སྤྱོད་འཁྱམ་པར་འགྱུར་རོ། །འདོད་པ་ལ་ལོག་པར་གཡེམ་པ་མི་དགེ་བའི་ལས་ཀྱི་རྣམ་པར་སྨིན་པས། ས་ལ་རྩཝ་དྲི་ང་བ་དང ། ནགས་ཚལ་དྲི་ང་བ་དག་སྐྱེ་བར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས་ལོ་ལེགས་པའི་ཁྱིམ་ན་གནས་པའི་རྟོགས་པ་བརྗོད་པ། ཀ་ཤི་རྒྱལ་པོ་དགའ་བས་ལྷ་འོངས་པ་ལ། ནག་པོ་འཆར་ལྡན་གྱིས་ཚེ་རབས་སྔ་མའི་རྟོགས་པ་བརྗོད་པ་སྨོས་པ་རྣམས་བྱའོ། །རྫུན་སྨྲ་བའི་མི་དགེ་བའི་ལས་ཀྱི་རྣམ་པར་སྨིན་པ་ལ་ཁ་ན་བ་དང ། ལྐོག་མ་ན་བ་དང ། ཁ་མནམ་པ་ལ་ 479b སོགས་པར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས། མི་བདེན་པས་བསླུས་པར་འགྱུར་བའོ། །ཕྲ་མ་ཟེར་བའི་མི་དགེ་བའི་ལས་ཀྱི་རྣམ་པར་སྨིན་པས་ས་ལ་གསེག་མ་དང ། གྱོ་མོ་ལ་སོགས་པ་རེག་ན་མི་བདེ་བ་རྣམས་འབྱུང་ངོ ། །ལས་དེ་ཉིད་ཀྱི་རྣམ་པར་སྨིན་པས་གཡོག་འཁོར་དབྱེར་རུང་བར་འགྱུར་རོ། །ཚིག་རྩུབ་པོ་མི་དགེ་བའི་ལས་ཀྱི་རྣམ་པར་སྨིན་པས་ས་ལ་རྡུལ་དང ། ཉལ་ཉིལ་གྱི་རླུང་ལྡང་ཞིང་ཆར་ཆེན་པོ་ལ་སོགས་པ་འབབ་བོ། །ལས་དེ་ཉིད་ཀྱི་རྣམ་པར་སྨིན་པས་ཡིད་དུ་མི་འོང་བའི་སྒྲ་ཐོས་པ་དང ། ཡིད་དུ་མི་འོང་བ་མཐོང་བར་འགྱུར་རོ། །ཚིག་ཀྱལ་བར་སྨྲ་བ་མི་དགེ་བའི་ལས་ཀྱི་རྣམ་པར་སྨིན་པས་ས་མཐོ་དམན་དང ། སྨན་ལྗོངས་དང ། ངམ་གྲོག་དང ། གཡང་ས་ལ་སོགས་པ་འབྱུང་ངོ ། །ལས་དེ་ཉིད་ཀྱི་རྣམ་པར་སྨིན་པས་ཚིག་མི་བཙུན་པར་འགྱུར་རོ། །ཆགས་སེམས་མི་དགེ་བའི་ལས་ཀྱི་རྣམ་པར་སྨིན་པས་འབྲས་དང ། ནས་དང ། གྲོ་ལ་སོགས་པའི་འབྲས་བུ་ཉུང་ཞིང་གྲ་མ་དང ། སྦུན་པ་ལ་སོགས་པའི་སྐྱོན་མང་བར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས་ལོངས་སྤྱོད་གཞན་གྱིས་ཁྱེར་བར་འགྱུར་རོ། །གནོད་སེམས་མི་དགེ་བའི་ལས་ཀྱི་རྣམ་པར་སྨིན་པས་ལོ་ཏོག་དང ། འབྲས་བུ་དང ། ས་བོན་ཚ་བ་དང ། ཁ་བ་འབྱུང་བར་འགྱུར་རོ། ། 480a ༄#། །ལས་དེ་ཉིད་ཀྱི་རྣམ་པར་སྨིན་པས་མཐོང་ན་མི་སྡུག་པར་འགྱུར་རོ། །ལོག་པར་ལྟ་བ་མི་དགེ་བའི་ལས་ཀྱི་རྣམ་པར་སྨིན་པས་འབྲས་བུ་མེད་པ་དང ། ཆུང་པ་དང ། དུག་དང་རྐུ་བ་ལ་སོགས་པ་འབྱུང་བར་འགྱུར་རོ། །ལས་དེ་ཉིད་ཀྱི་རྣམ་པར་སྨིན་པས་མེད་པར་སྨྲ་བ་དང ། ཆད་པར་ལྟ་ཞིང་འཇིག་རྟེན་རྒྱང་པན་པའི་གཙུག་ལག་ལ་སོགས་པ་ལ་དད་པར་འགྱུར་རོ། །མི་དགེ་བའི་ལས་ཀྱི་ལམ་འདི་བཅུ་ཇི་ལྟ་ཇི་ལྟར་བསྒོམས་པ་དེ་ལྟ་དེ་ལྟར་རབ་ཏུ་འཕེལ་བར་འགྱུར་ཏེ། དེའི་ཕྱིར་རྣམ་པར་འཇིག་པའི་ཚེ་\?\་ཏིལ་ཡོད་ཀྱང་ཏིལ་མར་མི་འབྱུང ། བུ་རམ་ཤིང་ཡོད་ཀྱང་བུ་རམ་མི་འབྱུང ། བུ་རམ་ཡོད་ཀྱང་ཧཝགས་དང ། ཁ་ར་མི་འབྱུང ། བ་ཡོད་ཀྱང་འོ་མ་མི་འབྱུང ། འོ་མ་ཡོད་ཀྱང་མར་མི་འབྱུང ། དེ་ལྟར་མི་དགེ་བ་བཅུའི་ལས་ཀྱི་རྣམ་པར་སྨིན་པས། ཕྱི་རོལ་གྱི་དངོས་པོ་རྣམས་རྒུད་པར་འགྱུར་རོ། །དགེ་བ་བཅུའི་ལས་ཀྱི་ལམ་རྣམས་ཡང་དག་པར་བླངས་པའི་རྒྱུས། ཕྱི་རོལ་གྱི་དངོས་པོ་རྣམས་ཕུན་སུམ་ཚོགས་པར་འགྱུར་ཏེ། བཅུ་གང་ཞེ་ན། སྲོག་གཅོད་པ་སྤངས་པའི་རྣམ་པར་སྨིན་པས་ནི་སའི་མཐུ་དང་གཟི་བྱིན་མེད་པར་མི་འགྱུར་རོ། །མ་བྱིན་པར་ལེན་པ་སྤངས་པའི་རྣམ་པར་སྨིན་པས་ནི་སེར་བ་དང ། བྱི་བ་དང ། སྲིན་དང ། མུ་གེ་ལ་སོགས་པ་འབྱུང་བར་མི་འགྱུར་རོ། ། 480b འདོད་པ་ལ་ལོག་པར་གཡེམ་པ་སྤངས་པའི་རྣམ་པར་སྨིན་པས་ནི་བཙའ་དང ། ས་འབབ་པ་དང ། རྡུལ་དང ། རླུང་དང ། ཆར་དྲག་པོ་འབེབ་པར་མི་འགྱུར་རོ། །བརྫུན་དུ་སྨྲ་བ་སྤངས་པའི་རྣམ་པར་སྨིན་པས་ནི་དྲི་མི་ཞིམ་པ་འབྱུང་བར་མི་འགྱུར་རོ། །ཕྲ་མ་སྤངས་པའི་རྣམ་པར་སྨིན་པས་ནི་ངམ་གྲོག་དང ། གཡང་ས་དང ། འདམ་རྫབ་དང ། ངན་སྐྱུགས་ཀྱི་ལྗན་ལྗིན་དང ། དོང་ལ་སོགས་པར་འབྱུང་བར་མི་འགྱུར་རོ། །ངག་རྩུབ་པོ་སྤངས་པའི་རྣམ་པར་སྨིན་པས་ནི་གསེག་མ་དང ། གྱོ་མོ་དང ། གྱོ་དུམ་གྱིས་རེག་པ་འབྱུང་བར་མི་འགྱུར་རོ། །ཚིག་ཀྱལ་པ་སྤངས་པའི་རྣམ་པར་སྨིན་པས་ནི་རྩ་ཚང་ཚིང་དང ། ནགས་ཐིབས་པོ་དང ། ཚེར་མ་ཚང་ཚིང་རྣམས་འབྱུང་བར་མི་འགྱུར་རོ། །ཆགས་སེམས་སྤངས་པའི་རྣམ་པར་སྨིན་པས་ནི་ལོ་ཐོག་ལ་སོགས་པ་འབྲས་བུ་དང་བཅས་པ་འབྱུང་བར་འགྱུར་རོ། །གནོད་སེམས་སྤངས་པའི་རྣམ་པར་སྨིན་པས་ནི་ལོ་ལེགས་པ་དང ། འབྲས་བུ་དང ། ས་བོན་མི་ཁ་བ་དང ། མི་ཚ་བ་རྣམས་འབྱུང་བར་འགྱུར་རོ། །ལོག་པར་ལྟ་བ་སྤངས་པའི་རྣམ་པར་སྨིན་པས་ནི་འབྲས་བུ་མེད་པ་དང ། འབྲས་བུ་ཆུང་བ་མ་ཡིན་པའི་ས་བོན་རྣམས་འབྱུང་བར་འགྱུར་ཏེ། དགེ་བ་བཅུའི་ལས་ཀྱི་ལམ་བཅུ་པོ་འདི་དག་ཡང་དག་པར་བླངས་པའི་རྒྱུས་ཕྱི་རོལ་གྱི་དངོས་པོ་བཅུ་ཕུན་སུམ་ཚོགས་པར་འགྱུར་རོ། །དེ་ལ་སྲོག་ 481a ༄#། །གཅོད་པ་ལ་ཉེས་དམིགས་བཅུ་པོ་འདི་དག་འབྱུང་བར་རིག་པར་བྱ་སྟེ། བཅུ་གང་ཞེ་ན། དགྲ་མང་བ་དང ། མཐོང་ན་ཡིད་དུ་མི་འོང་བ་དང ། སྡིག་པ་རྣམས་སེམས་པ་དང ། དེས་སེམས་ཅན་རྣམས་འཇིག་པར་འགྱུར་བ་དང ། མི་བདེ་བཞིན་ཉལ་ཞིང་མི་བདེ་བཞིན་སད་པ་དང ། སྡིག་པ་ཅན་གྱི་རྨི་ལམ་རྨི་བ་དང ། རྨུགས་ཏེ་ཚེ་འཕོ་བའི་དུས་བྱེད་པ་དང ། འགྱོད་པར་འགྱུར་བ་དང ། ཚེ་ཐུང་བར་འགྱུར་བའི་ལས་བྱེད་ཅིང་གསོག་པ་དང ། ལུས་ཞིག་སྟེ་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །མ་བྱིན་པར་ལེན་པ་ལ་ཉེས་དམིགས་བཅུར་རིག་པར་བྱ་སྟེ། བཅུ་གང་ཞེ་ན། འཁོན་གཅུགས་སུ་འགྱུར་བ་དང ། དོགས་པར་འགྱུར་བ་དང ། དུས་མ་ཡིན་པར་རྒྱུ་བ་དང ། མཚན་མོ་རྒྱུ་བ་དང ། སྡིག་པའི་གྲོགས་པོས་ཡོངས་སུ་ཟིན་པ་དང ། དགེ་བའི་བཤེས་གཉེན་གྱིས་རྣམ་པར་སྤངས་པ་དང ། ཚུལ་ཁྲིམས་འཆལ་པར་འགྱུར་བ་དང ། རྒྱལ་པོའི་གནོད་པ་དང ། ཆད་པའི་གནོད་པ་འབྱུང་བ་དང ། ལོངས་སྤྱོད་ཀྱིས་ཕོངས་པར་འགྱུར་བའི་ལས་བྱེད་ཅིང་གསོག་པ་དང ། ལུས་ཞིག་ནས་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་ 481b བའོ། །འདོད་པ་ལ་ལོག་པར་གཡེམ་པ་ལ་ཉེས་དམིགས་བཅུར་རིག་པར་བྱ་སྟེ། བཅུ་གང་ཞེ་ན། གང་དག་གི་ཆུང་མ་ལ་ཉལ་པོ་བྱེད་པ་དེ་དག་དེ་ལ་གླགས་ཚོལ་བར་འགྱུར་བ་དང ། དེ་ཆུང་མ་དང་རྩོད་པར་འགྱུར་བ་དང ། དེ་ལ་མི་དགེ་བའི་ཆོས་འཕེལ་བར་འགྱུར་བ་དང ། དེའི་དགེ་བའི་ཆོས་ཡོངས་སུ་འགྲིབ་ཅིང་ཡོངས་སུ་ཟད་པར་འགྱུར་བ་དང ། བདག་མ་སྤས་ཤིང་མ་བསྲུངས་པ་དང ། དེའི་བུ་དང ། ཆུང་མ་དང ། ནོར་རྣམས་མ་སྦས་ཤིང་མ་བསྲུངས་པ་དང ། དོགས་པར་འགྱུར་བ་དང ། མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་རྣམས་ཡིད་མི་རྟོན་པ་དང ། བྱི་བོ་བྱེད་པ་དང་བཅས་པར་འགྱུར་བའི་ལས་བྱེད་ཅིང་གསོག་པ་དང ། ལུས་ཞིག་ནས་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་བའོ། །རྫུན་དུ་སྨྲ་བ་ལ་ཉེས་དམིགས་བཅུར་རིག་པར་བྱ་སྟེ། བཅུ་གང་ཞེ་ན། དེ་ཁ་མནམ་པར་འགྱུར་བ་དང ། དེའི་ལུས་ལས་ལྷ་རྣམས་འཕང་བ་དང ། མི་མ་ཡིན་པ་རྣམས་ཀྱིས་དེ་ལ་གླགས་རྙེད་པར་འགྱུར་བ་དང ། བདེན་པ་སྨྲས་ཀྱང་དེ་ལ་སུ་ཡང་ཡིད་ཆེས་པར་མི་འགྱུར་བ་དང ། རྫུན་སྨྲ་བར་འགྱུར་བ་དང ། ཡིད་ཆེས་པར་བྱ་བའི་གནས་རྣམས་སུ་མཁས་པ་རྣམས་དེ་ལ་དྲི་བར་བྱ་བར་མི་སེམས་པ་དང ། དེའི་བདེན་པ་མ་ཡིན་པ་བསྔགས་ 482a ༄#། །པ་དང ། བརྗོད་པ་དང ། སྒྲ་དང ། ཚིགས་བཅད་པ་མ་ཡིན་པ་འབྱུང་བ་དང ། གཟུང་བའི་ཚིག་ཏུ་མི་འགྱུར་བ་དང ། སྐུར་བ་འདེབས་པའི་ལས་བྱེད་ཅིང་གསོག་པ་དང ། ལུས་ཞིག་ནས་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བའོ། །འབྲུའི་ཆང་དང ། སྦྱར་བའི་ངང་པག་མེད་པའི་གནས་ལ་ཉེས་དམིགས་སུམ་ཅུ་རྩ་དྲུག་ཏུ་རིག་པར་བྱ་སྟེ། སུམ་ཅུ་རྩ་དྲུག་གང་ཞེ་ན། ཚེ་འདི་ལ་ནོར་ཟད་པ་དང ། ནད་ཀྱི་གཞིར་འགྱུར་བ་དང ། འཐབ་པ་དང ། མཚང་འབྲུ་བ་དང ། རྩོད་པ་འཕེལ་བ་དང ། སྦ་བའི་གནས་སྟོན་པ་དང ། མི་སྙན་པ་སྐྱེད་པ་དང ། ཤེས་རབ་ཉམས་པར་བྱེད་པ་དང ། མ་ཐོབ་པའི་ལོངས་སྤྱོད་རྣམས་མི་འཐོབ་པ་དང ། ལོངས་སྤྱོད་ཐོབ་པ་རྣམས་ལས་ཡོངས་སུ་ཉམས་པར་འགྱུར་བ་དང ། གསང་བ་རྣམས་སྨྲ་བ་དང ། ལས་སུ་བྱ་བ་རྣམས་ཡོངས་སུ་ཉམས་པ་དང ། མྱ་ངན་གྱི་རྩ་བར་འགྱུར་བ་དང ། ཉམ་ཆུང་བར་འགྱུར་བ་དང ། མར་མི་འཛིན་པར་འགྱུར་བ་དང ། ཕར་མི་འཛིན་པར་འགྱུར་བ་དང ། དགེ་སྦྱོང་དུ་མི་འཛིན་པར་འགྱུར་བ་དང ། བྲམ་ཟེར་མི་འཛིན་པར་འགྱུར་བ་དང ། རིགས་ཀྱི་གཙོ་བོ་ལ་རིམ་གྲོ་མེད་པར་འགྱུར་བ་དང ། སངས་རྒྱས་ལ་གུས་པར་མི་འགྱུར་བ་དང ། ཆོས་ལ་གུས་པར་མི་འགྱུར་བ་ 482b དང ། དགེ་འདུན་ལ་གུས་པར་མི་འགྱུར་བ་དང ། སྡིག་པའི་གྲོགས་པོས་ཡོངས་སུ་ཟིན་པར་འགྱུར་བ་དང ། དགེ་བའི་བཤེས་གཉེན་གྱིས་རྣམ་པར་སྤངས་པ་དང ། ངོ་ཚ་མེད་པར་འགྱུར་བ་དང ། འཛེམ་པ་མེད་པར་འགྱུར་བ་དང ། དབང་པོའི་སྒོ་མ་བསྡམས་པར་འགྱུར་བ་དང ། བུད་མེད་རྣམས་ལ་ཤིན་ཏུ་བག་མེད་པར་འགྱུར་བ་དང ། སྐྱེ་བོ་མང་པོའི་ཡིད་དུ་མི་འོང་བར་འགྱུར་བ་དང ། སྐྱེ་བོ་མང་པོ་དང་མི་མཐུན་པ་དང ། ཉེ་དུ་དང ། སྣག་གི་གཉེན་མཚམས་བཙུན་པ་རྣམས་ཀྱིས་སྨད་པར་འགྱུར་བ་དང ། དམ་པའི་ཆོས་མ་ཡིན་པ་ཡོངས་སུ་འཛིན་པ་དང ། དམ་པའི་ཆོས་ཡོངས་སུ་སྤོང་བ་དང ། མཁས་པ་རྣམས་དེ་ལ་ཡིད་མི་འཇོག་པར་སེམས་པ་དང ། བག་བྱ་བ་ལ་གཡེལ་བ་དང ། དེ་མྱ་ངན་ལས་འདས་པ་ལས་རིང་དུ་འགྱུར་བ་དང ། མྱོས་པར་འགྱུར་བའི་ལས་བྱེད་ཅིང་གསོག་པ་དང ། ལུས་ཞིག་ནས་ཚེ་འཕོས་པའི་འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བའོ། །དེ་བཞིན་གཤེགས་པའི་མཆོད་རྟེན་ལ་ཐལ་མོ་སྦྱར་བའི་ཕན་ཡོན་ནི་བཅུ་ཡོད་དེ། བཅུ་གང་ཞེ་ན། རྒྱ་ཆེན་པོའི་ཁྱིམ་དུ་སྐྱེ་བ་འཐོབ་པ་དང ། རྒྱ་ཆེ་བའི་གཟུགས་དང ། རྒྱ་ཆེ་བའི་གཡོག་འཁོར་དང ། རྒྱ་ཆེ་བའི་མཆོད་པ་དང ། བཀུར་སྟི་དང ། ནོར་རྒྱ་ཆེ་བ་དང ། ཐོས་པ་རྒྱ་ཆེ་བ་དང ། དད་ 483a ༄#། །པ་རྒྱ་ཆེ་བ་དང ། དྲི་བ་རྒྱ་ཆེ་བ་དང ། ཤེས་རབ་རྒྱ་ཆེ་བ་དང ། རྟོགས་པ་རྒྱ་ཆེ་བ་འཐོབ་པ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཐལ་མོ་སྦྱར་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་ཕྱག་འཚལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་ཞིང་མདོག་གསེར་གྱི་ཁ་དོག་ལྟ་བུར་འགྱུར་བ་དང ། མཛེས་ཤིང་མིག་ཏུ་སྡུག་པར་འགྱུར་བ་དང ། སྐད་སྙན་ཅིང་གཟུང་བའི་ཚིག་ཏུ་འགྱུར་བ་དང ། བག་ཚ་བ་མེད་པར་འཁོར་གྱི་ནང་དུ་འགྲོ་བ་དང ། ལྷ་དང་མི་རྣམས་དགའ་བར་འགྱུར་བ་དང ། གཟི་བྱིན་ཆེན་པོར་འགྱུར་བ་དང ། གཟི་བྱིན་ཆེན་པོའི་གང་ཟག་འདི་ལྟ་སྟེ། སངས་རྒྱས་བཅོམ་ལྡན་འདས་རྣམས་དང ། བྱང་ཆུབ་སེམས་དཔའ་རྣམས་དང ། སངས་རྒྱས་ཀྱི་ཉན་ཐོས་རྣམས་དང་འགྲོགས་པར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཕྱག་འཚལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་ཕྱག་དར་བྱས་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་བ་དང ། བལྟ་ན་སྡུག་པ་དང ། མཛེས་པ་ 483b དང ། སྐད་སྙན་པ་དང ། དེའི་འདོད་ཆགས་དང ། ཞེ་སྡང་དང ། གཏི་མུག་བསྲབས་པར་འགྱུར་བ་དང ། ལམ་དུ་འགྲོ་ན་རྩ་དང ། གྱོ་མོ་དང ། གསེག་མ་རྣམས་མེད་པར་འགྱུར་བ་དང ། བཙུན་པའི་རིགས་སུ་སྐྱེ་བར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཕྱག་དར་བྱས་པའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་གདུགས་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་གདུགས་ལྟ་བུར་འགྱུར་བ་དང ། ལུས་ལ་ཚ་བས་གདུང་བ་མེད་པར་འགྱུར་བ་དང ། སེམས་ལ་གདུང་བ་མེད་པར་འགྱུར་བ་དང ། འཇིག་རྟེན་གྱི་རྟེན་དུ་འགྱུར་བ་དང ། བདག་པོར་འགྱུར་བའི་ལས་བྱེད་ཅིང་གསོག་པ་དང ། འཁོར་ལོས་བསྒྱུར་བའི་རྒྱལ་སྲིད་ཡང་དག་པར་འཐོབ་པ་དང ། དབང་ཆེ་བར་གྲགས་པར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་གདུགས་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་དྲིལ་བུ་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་བར་ 484a ༄#། །འགྱུར་བ་དང ། སྐད་སྙན་པར་འགྱུར་བ་དང ། ཡིད་དུ་འོང་བ་སྨྲ་བ་དང་ལྡན་པར་འགྱུར་བ་དང ། ཀ་ལ་པིང་ཀའི་སྒྲ་ལྟ་བུ་སྨྲ་བ་དང་ལྡན་པར་འགྱུར་བ་དང ། གཟུང་བའི་ཚིག་ཏུ་འགྱུར་བ་དང ། རབ་ཏུ་དགའ་བར་འགྱུར་བ་དང ། ཀུན་ཏུ་དགའ་བ་རྒྱ་ཆེན་པོའི་སྒྲ་འཐོབ་པ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་དྲིལ་བུ་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་བ་དན་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་རྒྱལ་མཚན་ལྟ་བུར་འགྱུར་བ་དང ། མཛའ་བཤེས་དང ། བློན་པོ་དང ། ཉེ་དུ་དང ། སྣག་གི་གཉེན་མཚམས་རྣམས་བསྟི་སྟང་བྱེད། བླ་མར་བྱེད། རི་མོར་བྱེད། མཆོད་པར་བྱེད་པ་དང ། ཕྱོགས་དང་ཕྱོགས་མཚམས་རྣམས་སུ་དེའི་གྲགས་པ་དང ། བརྗོད་པ་དང ། སྒྲ་དང་ཚིགས་སུ་བཅད་པ་མངོན་དུ་འབྱུང་བ་དང ། གཟུགས་བཟང་ཞིང་བལྟ་ན་སྡུག་ལ་མཛེས་པར་འགྱུར་བ་དང ། སྐྱེ་བ་གཞན་རྣམས་སུ་ཚེ་རིང་ཞིང་རིང་དུ་གནས་པར་འགྱུར་བ་དང ། དབང་ཆེ་བར་གྲགས་པར་འགྱུར་བ་དང ། རིགས་བཙུན་པར་སྐྱེ་བར་འགྱུར་བ་དང ། ལོངས་སྤྱོད་ 484b ཆེན་པོར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བར་འགྱུར་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་བ་དན་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་ན་བཟའ་དབུལ་བའི་ཕན་ཡོན་བཅུ་གཉིས་ཡོད་དེ། བཅུ་གཉིས་གང་ཞེ་ན། མཛེས་ཤིང་བལྟ་ན་སྡུག་པར་འགྱུར་བ་དང ། པགས་པ་འཇམ་པ་དང ། པགས་པ་སྣུམ་པ་དང ། པགས་པ་སྲབ་པ་དང ། དེའི་ལུས་ལ་རྡུལ་དང་དྲི་མ་མི་འཆགས་པ་དང ། དེའི་གོས་བཟང་པོར་འགྱུར་བ་དང ། གདིང་བ་དང ། བགོ་བ་ཕྲ་མོ་རྙེད་པར་འགྱུར་བ་དང ། ངོ་ཚ་ཤེས་པ་དང ། ཁྲེ་ལོ་ཡོད་པ་ཕུན་སུམ་ཚོགས་པར་འགྱུར་བ་དང ། མཐོང་ན་དགའ་བར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། ཡོངས་སུ་མྱ་ངན་ལས་འདའ་བ་སྟེ། བཅུ་གཉིས་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ན་བཟའ་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་མེ་ཏོག་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་མེ་ཏོག་ལྟ་བུར་འགྱུར་བ་དང ། དེའི་སྣའི་དབང་པོ་ནམ་ཡང་ཉམས་པར་མི་འགྱུར་བ་དང ། ལུས་ལ་དྲི་ང་བ་མེད་པར་འགྱུར་བ་དང ། ལུས་ལ་དྲི་ཞིམ་པོ་འབྱུང་ 485a ༄#། །བར་འགྱུར་བ་དང ། ཕྱོགས་དང་ཕྱོགས་མཚམས་རྣམས་སུ་དེའི་ཚུལ་ཁྲིམས་ཀྱི་དྲིའི་ངད་ལྡང་བར་འགྱུར་བ་དང ། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང ། ཡིད་དུ་འོང་བའི་ཆོས་རྣམས་འཐོབ་པར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། ཆོས་བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་མེ་ཏོག་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་ཕྲེང་བ་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་ཕྲེང་བ་ལྟ་བུར་འགྱུར་བ་དང ། ལུས་ཀྱི་དྲི་ང་བ་མེད་པར་འགྱུར་བ་དང ། ཕྱོགས་དང་ཕྱོགས་མཚམས་རྣམས་སུ་ཚུལ་ཁྲིམས་ཀྱི་དྲི་ཞིམ་པོའི་ངད་ལྡང་བ་དང ། རྟག་ཏུ་དྲི་ཞིམ་པར་འགྱུར་བ་དང ། བརྒྱན་པར་འགྱུར་བ་དང ། གཡོག་འཁོར་མི་ཕྱེད་པར་འགྱུར་བ་དང ། སྐྱེས་པ་དང་བུད་མེད་རྣམས་ཀྱི་ཡིད་དུ་འོང་བར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་ཕྲེང་བ་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་མར་མེ་དབུལ་ 485b བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་མར་མེ་ལྟ་བུར་འགྱུར་བ་དང ། ཤའི་མིག་རྣམ་པར་འགྱུར་བ་དང ། ལྷའི་མིག་འཐོབ་པར་འགྱུར་བ་དང ། དགེ་བ་དང་མི་དགེ་བའི་ཆོས་རྣམས་ལ་ཤེས་རབ་འགྱུར་བར་འགྱུར་བ་དང ། མ་རིག་པ་དང ། གཏི་མུག་གི་མུན་པ་སེལ་བ་དང ། ཤེས་རབ་ཀྱི་སྣང་བ་འཐོབ་པར་འགྱུར་བ་དང ། དེ་འཁོར་བ་ན་འཁོར་བའི་ཚེ་ནམ་ཡང་མུན་པ་ན་གནས་པར་མི་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་མར་མེ་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་བྱུག་སྤོས་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་བྱུག་སྤོས་ལྟ་བུར་འགྱུར་བ་དང ། སྣའི་དབང་པོ་རྣམ་པར་དག་པར་འགྱུར་བ་དང ། ལུས་ལ་དྲི་མི་ཞིམ་པ་མེད་པར་འགྱུར་བ་དང ། རྟག་ཏུ་དྲི་ཞིམ་པར་འགྱུར་བ་དང ། གཟུགས་བཟང་བར་འགྱུར་བ་དང ། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང ། ཡིད་དུ་འོང་བའི་ཆོས་རྣམས་ཐོས་པར་འགྱུར་བ་དང ། ལོངས་སྤྱོད་ཆེན་པོར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། ཆོས་བཅུ་པོ་དེ་དག་ནི་དེ་བཞིན་གཤེགས་པའི་མཆོད་ 486a ༄#། །རྟེན་ལ་བྱུག་སྤོས་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་ལ་རོལ་མོ་དང ། སིལ་སྙན་དབུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། གཟུགས་བཟང་ཞིང་བལྟ་ན་སྡུག་པར་འགྱུར་བ་དང ། སྐད་སྙན་པར་འགྱུར་བ་དང ། ཡིད་དུ་འོང་བ་སྨྲ་བ་དང་ལྡན་པར་འགྱུར་བ་དང ། གྲགས་པ་དང་ལྡན་པར་འགྱུར་བ་དང ། གཟུང་བའི་ཚིག་ཏུ་འགྱུར་བ་དང ། རྟག་ཏུ་དགའ་བར་འགྱུར་བ་དང ། ཐམས་ཅད་དགའ་བའི་སྒྲ་རྒྱ་ཆེན་པོ་འཐོབ་པར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། ཡོངས་སུ་མྱ་ངན་ལས་འདའ་བར་འགྱུར་བ་སྟེ། བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་རོལ་མོ་སིལ་སྙན་ཕུལ་བའི་ཕན་ཡོན་ནོ། །དེ་བཞིན་གཤེགས་པའི་མཆོད་རྟེན་བྱེད་པའི་ཕན་ཡོན་བཅོ་བརྒྱད་ཡོད་དེ། བཅོ་བརྒྱད་གང་ཞེ་ན། རྒྱ་ཆེན་པོའི་རིགས་སུ་སྐྱེ་བར་འགྱུར་བ་དང ། གཟུགས་བཟང་བར་འགྱུར་བ་དང ། མཛེས་ཤིང་མིག་ཏུ་སྡུག་པར་འགྱུར་བ་དང ། དབང་ཆེ་བར་གྲགས་པར་འགྱུར་བ་དང ། གཡོག་འཁོར་རྒྱ་ཆེན་པོར་འགྱུར་བ་དང ། གཡོག་འཁོར་མི་ཕྱེད་པར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། འཇིག་རྟེན་པ་རྣམས་འཁོར་ཞིང་འདུ་བར་འགྱུར་ 486b བ་དང ། ཀུན་གྱི་རྟེན་དུ་འགྱུར་བ་དང ། ཕྱོགས་བཅུར་བརྗོད་པ་དང ། སྒྲ་དང ། ཚིགས་སུ་བཅད་པ་རྒྱ་ཆེན་པོ་མངོན་དུ་འབྱུང་བར་འགྱུར་བ་དང ། ལྷ་དང ། མིས་མཆོད་པར་འགྱུར་བ་དང ། ཕྱུག་ཅིང་ནོར་མང་པོ་དང་ལྡན་པར་འགྱུར་བ་དང ། འཁོར་ལོས་བསྒྱུར་བའི་རྒྱལ་སྲིད་འཐོབ་པར་འགྱུར་བ་དང ། ཚེ་རིང་བར་འགྱུར་བ་དང ། ལུས་རྡོ་རྗེ་ལྟར་མཁྲེགས་པར་འགྱུར་བ་དང ། ལུས་མཚན་དང ། དཔེ་བྱད་དང་ལྡན་པར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅོ་བརྒྱད་པོ་དེ་དག་ནི་དེ་བཞིན་གཤེགས་པའི་མཆོད་རྟེན་བྱེད་པའི་ཕན་ཡོན་ནོ། །ཁྲི་སྟན་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་གྱི་བླ་མའི་གནས་སུ་འགྱུར་བ་དང ། བསྔགས་པར་འགྱུར་བ་དང ། སྐྱེ་བོ་མང་པོ་ལ་གྲགས་པ་དང ། བརྗོད་པ་དང ། སྒྲ་དང་ཚིགས་སུ་བཅད་པ་མང་པོ་མངོན་དུ་འབྱུང་བར་འགྱུར་བ་དང ། བདེ་བ་དང ། ཡིད་བདེ་བ་མང་པར་འགྱུར་བ་དང ། བཞོན་པ་དང ། ཁྲི་སྟན་དང ། རིམ་གྲོ་བྱེད་པ་དང་ལྡན་པར་འགྱུར་བ་དང ། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། དབང་ཆེ་བར་གྲགས་པར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། 487a ༄#། །བཅུ་པོ་དེ་དག་ནི་ཁྲི་སྟན་བྱིན་པའི་ཕན་ཡོན་ནོ། །ལྷམ་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། དེ་བཞོན་པ་རྣམས་ཀྱིས་བྲེལ་བར་མི་འགྱུར་པ་དང ། རྐང་པ་ལེགས་པར་གནས་པར་འགྱུར་བ་དང ། ལམ་དུ་འགྲོ་ན་སྟོབས་དང་ལྡན་པར་འགྱུར་བ་དང ། དེའི་ལུས་ངལ་བར་མི་འགྱུར་བ་དང ། དེ་འགྲོ་ན་ཚེར་མ་དང ། གསེག་མ་དང ། གྱོ་མོ་རྣམས་ཀྱིས་རྐང་པ་སྣད་པར་མི་འགྱུར་བ་དང ། རྫུ་འཕྲུལ་ཐོབ་པར་འགྱུར་བ་དང ། དེ་ལ་རིམ་གྲོ་བྱེད་པ་དང་ལྡན་པར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་ལྷམ་བྱིན་པའི་ཕན་ཡོན་ནོ། །སྣོད་སྤྱད་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་གྱི་ཡོན་ཏན་གྱི་སྣོད་ལྟ་བུར་འགྱུར་བ་དང ། མདོག་སྣུམ་པར་འགྱུར་བ་དང ། སེམས་ཀྱི་རྒྱུད་མཉེན་པར་འགྱུར་བ་དང ། སྐོམ་པར་མི་འགྱུར་བ་དང ། སྐོམ་ན་ཡང་ཆུ་འབྱུང་བར་འགྱུར་བ་དང ། ཡི་དྭགས་སུ་སྐྱེ་བར་མི་འགྱུར་བ་དང ། ལྷ་དང་མི་རྣམས་དགའ་བར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་སྣོད་སྤྱད་བྱིན་པའི་ཕན་ཡོན་ནོ། །ཁ་ཟས་སྦྱིན་པའི་ཕན་ཡོན་བཅུ་ཡོད་ 487b དེ།་བཅུ་གང་ཞེ་ན། ཚེ་རིང་བར་འགྱུར་བ་དང ། མདོག་བཟང་བར་འགྱུར་བ་དང ། སྟོབས་དང་ལྡན་པར་འགྱུར་བ་དང ། དྲན་པ་དང་ལྡན་ཞིང་སྤོབས་པ་དང་ལྡན་པར་འགྱུར་བ་དང ། བག་ཚ་བ་མེད་པར་འཁོར་གྱི་ནང་དུ་འགྲོ་བ་དང ། འཁོར་འདུན་པར་འགྱུར་བ་དང ། ལྷ་དང ། མི་རྣམས་དགའ་བར་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་ཁ་ཟས་བྱིན་པའི་ཕན་ཡོན་ནོ། །བཞོན་པ་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། རྐང་པ་ཤིན་ཏུ་གཞོན་ཤ་ཆགས་པར་འགྱུར་བ་དང ། རྐང་པ་ཤིན་ཏུ་གནས་པར་འགྱུར་བ་དང ། རྐང་པས་འགྲོ་བ་ན་ལུས་ངལ་བ་མི་འགྱུར་བ་དང ། བདེ་བར་འགྱུར་བ་དང ། མི་མཛའ་བ་མང་བར་མི་འགྱུར་བ་དང ། རྫུ་འཕྲུལ་གྱི་རྐང་པ་རྒྱ་ཆེན་པོ་འཐོབ་པར་འགྱུར་བ་དང ། བཞོན་པ་རྣམས་ཀྱིས་བྲེལ་བར་མི་འགྱུར་བ་དང ། རིམ་གྲོ་བྱེད་པ་དང་ལྡན་པར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་བཞོན་པ་བྱིན་པའི་ཕན་ཡོན་ནོ། །གནས་བྱིན་པའི་ཕན་ཡོན་ནི་རབ་ཏུ་མང་སྟེ། མང་པོ་གང་ཞེ་ན། དེ་ལ་འཇིགས་པ་མི་འབྱུང་ངོ ། །གདིང་བ་དང ། བགོ་བ་ཤིན་ཏུ་འཇམ་པོ་རྙེད་པར་འགྱུར་རོ། །ལྷ་དང ། མི་རྣམས་ཀྱི་འདོད་པའི་ཡོན་ཏན་ལྔ་རྙེད་པར་འགྱུར་རོ། །གལ་ 488a ༄#། །ཏེ་འདོད་དེ་རྒྱལ་རིགས་ཆེ་ཞིང་མཐོ་བའི་རིགས་སུ་སྐྱེ་བར་གྱུར་ཅིག་ཅེའམ། བྲམ་ཟེའི་རིགས་ཆེ་ཞིང་མཐོ་བའི་རིགས་སུ་སྐྱེ་བར་འགྱུར་ཅིག་ཅེའམ། ཁྱིམ་བདག་ཆེ་ཞིང་མཐོ་བའི་རིགས་སུ་སྐྱེ་བར་གྱུར་ཅིག་ཅེ་ན། དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ་བདག་གྲོང་གི་གཙོ་བོར་གྱུར་ཅིག་ཅེའམ། གྲོང་ཁྱེར་གྱི་གཙོ་བོར་གྱུར་ཅིག་ཅེའམ། གྲོང་རྡལ་གྱི་གཙོ་བོར་གྱུར་ཅིག་ཅེའམ། རི་བྲགས་ཀྱི་རྒྱལ་པོར་གྱུར་ཅིག་ཅེའམ། རྒྱལ་ཕྲན་དུ་གྱུར་ཅིག་ཅེའམ། རྒྱལ་པོ་བཙན་པར་གྱུར་ཅིག་ཅེ་ན། དེའི་སྨོན་ལམ་དེ་བཞིན་དུ་འགྲུབ་པར་འགྱུར་རོ། །གལ་ཏེ་འདོད་དེ་གླིང་གཅིག་པའི་རྒྱལ་པོར་གྱུར་ཅིག་ཅེའམ། གླིང་གཉིས་ཀྱི་རྒྱལ་པོར་གྱུར་ཅིག་ཅེའམ། གླིང་གསུམ་གྱི་རྒྱལ་པོར་གྱུར་ཅིག་ཅེའམ། འཁོར་ལོས་བསྒྱུར་བའི་རྒྱལ་པོར་གྱུར་ཅིག་ཅེ་ན། དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ་རྒྱལ་ཆེན་བཞིའི་རིས་ཀྱི་ལྷ་རྣམས་དང་སྐལ་པ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །སུམ་ཅུ་རྩ་གསུམ་དང ། འཐབ་བྲལ་དང ། དགའ་ལྡན་དང ། འཕྲུལ་དགའ་དང ། གཞན་འཕྲུལ་དབང་བྱེད་ཀྱི་ལྷ་རྣམས་དང་སྐལ་པ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ་བདག་ཚངས་རིགས་ 488b ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །ཚངས་པའི་མདུན་ན་འདོན་དང ། ཚངས་ཆེན་དང ། འོད་ཆུང་དང ། ཚད་མེད་འོད་དང ། འོད་གསལ་དང ། དགེ་ཆུང་དང ། ཚད་མེད་དགེ་དང ། དགེ་རྒྱས་དང ། སྤྲིན་མེད་དང ། བསོད་ནམས་སྐྱེས་དང ། འབྲས་བུ་ཆེ་བ་དང ། མི་ཆེ་བ་དང ། མི་གདུང་བ་དང ། གྱ་ནོམ་སྣང་དང ། ཤིན་ཏུ་མཐོང་དང ། འོག་མིན་གྱི་ལྷ་རྣམས་དང་སྐལ་པ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། ། གལ་ཏེ་འདོད་དེ་ནམ་མཁའ་མཐའ་ཡས་སྐྱེ་མཆེད་དང ། རྣམ་ཤེས་མཐའ་ཡས་སྐྱེ་མཆེད་དང ། ཅུང་ཟད་མེད་པའི་སྐྱེ་མཆེད་དང ། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་ལྷ་རྣམས་དང་སྐལ་བ་མཉམ་པར་སྐྱེ་བར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ་རྒྱུན་དུ་ཞུགས་པའི་འབྲས་བུ་མངོན་སུམ་དུ་བྱའོ་ཞེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ་ལན་གཅིག་ཕྱིར་འོང་བའི་འབྲས་བུ་དང ། ཕྱིར་མི་འོང་བའི་འབྲས་བུ་དང ། དགྲ་བཅོམ་པའི་འབྲས་བུ་དང ། བྱང་ཆུབ་མངོན་དུ་བྱའོ་ཞེ་ན་ཡང་དེའི་སྨོན་པ་དེ་འགྲུབ་པར་འགྱུར་རོ། །གལ་ཏེ་འདོད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་ 489a ༄#། །པར་བྱང་ཆུབ་པར་གྱུར་ཅིག་ཅེ་ན་ཡང་དེའི་སྨོན་པ་དེ་འགྲུབ་པར་འགྱུར་ཏེ། མང་པོ་དེ་དག་ནི་གནས་བྱིན་པའི་ཕན་ཡོན་ནོ། །བཏུང་བ་བྱིན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། དབང་པོ་ཐམས་ཅད་ཡོངས་སུ་ཚང་བར་འགྱུར་བ་དང ། དཔྲལ་བ་དག་ཅིང་འཛུམ་པའི་བཞིན་དུ་འགྱུར་བ་དང ། ཡོན་ཏན་དང་ལྡན་པར་འགྱུར་བ་དང ། སེམས་ཀྱི་རྒྱུད་མཉེན་པར་འགྱུར་བ་དང ། སྐོམ་པར་མི་འགྱུར་བ་དང ། སྐོམ་ནའང་ཆུ་འབྱུང་བར་འགྱུར་བ་དང ། ཡི་དྭགས་སུ་སྐྱེ་བར་མི་འགྱུར་བ་དང ། ལོངས་སྤྱོད་ཆེ་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། བཅུ་པོ་དེ་དག་ནི་བཏུང་བ་བྱིན་པའི་ཕན་ཡོན་ནོ། །རབ་ཏུ་བྱུང་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། དེ་བུ་དང ། ཆུང་མ་དང ། ནོར་ལ་སྲེད་པར་མི་འགྱུར་བ་དང ། དེ་འདོད་པའི་ཡོངས་སུ་འཛིན་པར་མི་འགྱུར་བ་དང ། དགོན་པར་གནས་པ་ལ་དགའ་བ་དང ། སངས་རྒྱས་ལ་གུས་པར་འགྱུར་བ་དང ། བདུད་ཀྱི་སྤྱོད་ཡུལ་རྣམ་པར་སྤོང་བ་དང ། བདེ་འགྲོ་ཐོབ་པར་བྱེད་པའི་ཆོས་རྣམས་ཡོངས་སུ་ཚོལ་བ་དང ། ངན་འགྲོ་འཐོབ་པར་བྱེད་པའི་ཆོས་རྣམས་སྤོང་བ་དང ། ལྷ་དང་མིར་སྨོན་པ་མེད་པ་དང ། རྟག་ཏུ་དེ་བཞིན་གཤེགས་པའི་གསུང་ 489b རབ་ལ་རབ་ཏུ་འབྱུང་བར་འགྱུར་བ་དང ། མཐོ་རིས་སུ་སྐྱེ་བར་འགྱུར་བ་དང ། མྱུར་དུ་ཡོངས་སུ་མྱ་ངན་ལས་འདའ་བ་སྟེ། ཆོས་བཅུ་པོ་དེ་དག་ནི་རབ་ཏུ་བྱུང་བའི་ཕན་ཡོན་ནོ། །དགོན་པ་ལ་གནས་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། འདུ་འཛིན་རྣམ་པར་སྤོང་བ་དང ། རབ་ཏུ་དབེན་པ་ལ་བསྟེན་པ་དང ། དེའི་སེམས་བསམ་གཏན་ལ་དམིགས་པར་འགྱུར་བ་དང ། སངས་རྒྱས་བཅོམ་ལྡན་འདས་རྣམས་ལ་སྨོན་པ་དང ། དགའ་བ་དང ། བདེ་བ་དང ། ཡིད་བདེ་བ་ལུས་ལ་སྐྱེད་པ་དང ། དེ་ལ་བར་དུ་གཅོད་པར་མི་འགྱུར་བ་དང ། ཇི་ལྟར་ཐོས་པའི་ཆོས་རྣམས་ཀྱི་དོན་རྒྱ་ཆེར་ཤེས་པར་འགྱུར་བ་དང ། ཞི་གནས་འཐོབ་པ་དང ། ལྷག་མཐོང་ཐོབ་པ་སྟེ། བཅུ་པོ་དེ་དག་ནི་དགོན་པ་ལ་གནས་པའི་ཕན་ཡོན་ནོ། །བསོད་སྙོམས་ལེན་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། དེ་འགྲོ་བ་ལ་གོམས་པར་འགྱུར་བ་དང ། དེ་སྤྱོད་ཡུལ་ལ་གོམས་པར་འགྱུར་བ་དང ། ང་རྒྱལ་བཅག་པར་འགྱུར་བ་དང ། བདག་རྙེད་པ་ལ་སྦྱོར་བ་དང ། གཞན་དག་ཀྱང་བསོད་ནམས་ལ་རབ་ཏུ་འགོད་པ་དང ། སྟོན་པའི་བསྟན་པ་ཡོངས་སུ་སྟོན་པ་དང ། ཕྱི་མའི་སྐྱེ་བོ་ལ་སྣང་བར་བྱས་པར་འགྱུར་བ་དང ། ཚངས་པ་མཚུངས་པར་སྤྱོད་པ་རྣམས་ལ་ཉམ་ང་བ་མེད་པར་བྱས་པར་འགྱུར་བ་དང ། དམའ་བའི་སེམས་ཉེ་བར་གཞག་པར་འགྱུར་བ་དང ། 490a ༄#། །བསོད་སྙོམས་ཀྱིས་ཡོངས་སུ་དུལ་བའི་དགེ་སྦྱོང་གི་ཕྱོགས་ལ་མུན་པ་མད་པར་སྣང་བའོ། །འཇིགས་པ་མེད་པའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིགས་པ་མེད་པར་གྲོང་དུ་འཇུག་པ་དང ། འཇིགས་པ་མེད་པར་གྲོང་ནས་འབྱུང་བ་དང ། འཇིགས་པ་མེད་པར་ཁྱིམ་རྣམས་སུ་འགྲོ་བ་དང ། འཇིགས་པ་མེད་པར་འཁོར་རྣམས་ལ་ཆོས་སྟོན་པ་དང ། འཇིགས་པ་མེད་པར་དགེ་འདུན་གྱི་ནང་དུ་འཇུག་པ་དང ། འཇིགས་པ་མེད་པར་སློབ་དཔོན་དང་མཁན་པོའི་དྲུང་དུ་འགྲོ་བ་དང ། འཇིགས་པ་མེད་པར་བྱམས་པའི་སེམས་ཀྱིས་སློབ་མའི་གན་དུ་འགྲོ་བ་དང ། འཇིག་པ་མེད་པར་གོས་དང ། ཟས་དང ། མལ་ཆ་དང ། ན་བའི་གསོས་སྨན་དང ། ཡོ་བྱད་རྣམས་ཡོངས་སུ་སྤྱོད་པ་དང ། འཇིགས་པ་མེད་པར་ཁ་ཏོན་འདོན་པ་དང ། འཇིགས་པ་མེད་པར་ཚེ་འཕོ་བའི་དུས་བྱེད་པའོ། །བྲམ་ཟེའི་ཁྱེའུ། དེ་ལྟར་ན་སེམས་ཅན་རྣམས་ནི་བདག་གི་ལས་ལས་གྱུར་པ། ལས་ཀྱི་རྒྱུ་ལས་སྐྱེས་པ། ལས་ཀྱི་སྐལ་བ་ལ་སྤྱོད་པ། ལས་ལ་རྟེན་པ་ཡིན་ཏེ། སེམས་ཅན་རྣམས་ནི་ལས་ཀྱིས་རབ་དང ། འབྲིང་དང ། ཐ་མར་རྣམ་པར་ཕྱེ་བའོ་ཞེས་ངས་གང་སྨྲས་པ་དེ་ནི་འདི་ལས་དགོངས་ཏེ་སྨྲས་སོ། །ཆོས་ཀྱི་རྣམ་གྲངས་འདི་བཤད་པ་ན། བྲམ་ཟེའི་ཁྱེའུ་ཤུ་ཀ་ 490b བཅོམ་ལྡན་འདས་ལ་སེམས་མངོན་པར་དད་དོ། །དེ་ནས་བྲམ་ཟེའི་ཁྱེའུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གཽ་ཏ་མ། ཁྱོད་མཉན་དུ་ཡོད་པར་དགེ་བསྙེན་གཞན་དག་གི་ཁྱིམ་དུ་གཤེགས་པར་དགོངས་ན། བདག་གི་ཕ་བྲམ་ཟེ་ཏོའུ་དེ་ཡའི་ཁྱིམ་དུ་ཡང་གཤེགས་པར་དགོངས་སུ་གསོལ། དེ་ནི་བྲམ་ཟེ་ཏོའུ་དེ་ཡའི་ཁྱིམ་དུ་ཡུན་རིང་པོའི་དོན་དུ་བདེ་བ་དང་ཕན་པར་འགྱུར་རོ། །བཅོམ་ལྡན་འདས་ཅང་མི་གསུང་བས་བྲམ་ཟེའི་ཁྱེའུ་ཤུ་ཀ་ལ་གནང་བ་མཛད་དོ། །དེ་ནས་བྲམ་ཟེའི་ཁྱེའུ་ཤུ་ཀ་ས་བཅོམ་ལྡན་འདས་ཅང་མི་གསུང་བས་གནང་བར་རིག་ནས་བཅོམ་ལྡན་འདས་ཀྱིས་གསུངས་པ་ལ་མངོན་པར་དགའ་སྟེ། རྗེས་སུ་ཡི་རངས་ནས་བཅོམ་ལྡན་འདས་ཀྱི་གན་ནས་སོང་ངོ ། །ལས་རྣམ་པར་འབྱེད་པ་རྫོགས་སོ།། |