rKTs


H352

(e-text produced by ACIP)

see text in transliteration
446a
།།རྒྱར་སྐད་དུ། ཨཱརྱ་ཛྙཱ་ན་ཀ་སཱུ་ཏྲ་བུད་དྡྷཱ་ཨ་བ་དཱ་ན། བོད་སྐད་དུ། འཕགས་པ་སངས་རྒྱས་ཀྱི་རྟོགས་པ་བརྗོད་པ། ཤེས་ལྡན་གྱི་མདོ། སངས་རྒྱས་དང ། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་ཅིག་ན་བཅོམ་ལྡན་འདས་ཡུམ་གྱི་དོན་དུ་ལྷ་རྣམས་ཀྱི་གནས་སུ་སུམ་ཅུ་རྩ་གསུམ་ན། ཤིང་ཡོངས་འདུས་བརྟོལ་གྱི་དྲུང་ན། ལ་བ་དཀར་པོ་ལྟ་བུའི་རྡོ་ལེབ་ལ་བཞུགས་སོ། །དེར་ལྷའི་བུ་ཞིག་ལ་འཆི་བའི་སྔ་ལྟས་ངན་པ་ལྔ་བྱུང་སྟེ། ཕྲེང་རྒྱན་རྙིས་པ་དང ། གོས་རྙིངས་པ་དང ། ལུས་དྲི་ང་བར་གྱུར་པ་དང ། མཆན་ཁུང་ནས་རྡུལ་འཛག་པ་དང ། རང་གི་སྟན་ལ་དགའ་བ་མེད་པར་གྱུར་ཏོ། །སྐྱེ་བ་ཡང་མཐོང་སྟེ། ཡངས་པའི་ཕག་གི་མངལ་དུ་སྐྱེ་བ་མཐོང་ངོ ། །དེས་དེ་མཐོང་ནས་མྱ་ངན་གྱིས་ཐེབས། སྨྲེ་སྔགས་འདོན། བྲང་རྡུང་ཞིང་དུ་ལ། ཤིན་ཏུ་མོང་མོང་པོར་གྱུར་ཏོ། །དེ་ནས་ལྷའི་བུ་གཞན་ཞིག། ལྷའི་བུ་དེ་ག་ལ་བདེར་སོང་སོང་སྟེ། འདི་སྐད་ཅེས་སྨྲས་སོ། །ལྷའི་བུ། ཁྱོད་འཆི་བས་འཇིགས་སམ། སྨྲས་པ། ལྷའི་བུ། བདག་འཆི་བས་འཇིགས་སོ། །ལྷའི་བུ། དེ་ཅིའི་ཕྱིར་ཞེ་ན། བདག་ལྷ་རྣམས་ཀྱི་ནང་དུ་སུམ་ཅུ་རྩ་གསུམ་འདིར་ལྷའི་བཟའ་བ་ནི་ཟོས། ལྷའི་བཏུང་བ་ནི་འཐུངས། ལྷའི་བགོ་བ་ནི་བགོས་ན། དེ་ནས་ཕྱིར་ཡངས་པའི་ཕག་གི་མངལ་དུ་སྐྱེ་བ་མཐོང་སྟེ། དེར་བདག་
446b
བཤང་བ་ཟ་ཞིང་མཚོན་གྱི་འཆི་བར་འགྱུར་ཏེ། ལྷའི་བུ། དེ་ལྟ་བས་ན་བདག་འཆི་བས་འཇིགས་སོ། །སྨྲས་པ། ལྷའི་བུ། ཁྱོད་འཆི་བས་མ་འཇིགས་ཤིག། དེ་ཅིའི་ཕྱིར་ཞེ་ན། ལྷའི་བུ། འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་དེ། ཡུམ་གྱི་དོན་དུ་སུམ་ཅུ་རྩ་གསུམ་གྱི་གནས་འདི་ན། ཤིང་ཡོངས་འདུས་བརྟོལ་གྱི་དྲུང་ན། ལ་བ་དཀར་པོ་ལྟ་བུའི་རྡོ་ལེབ་ལ་བཞུགས་ཏེ། ཇི་སྟེ་ལྷའི་བུ་ཁྱོད་ཀྱིས་བཅོམ་ལྡན་འདས་དེ་ལ་ཕྱག་འཚལ་དང ། བཅོམ་ལྡན་འདས་དེ་འདིར་གཤེགས་ཏེ། དེས་ཁྱོད་ངན་སོང་རྣམས་ལས་གྲོལ་བར་མཛད་དོ། །དེ་ཅིའི་ཕྱིར་ཞེ་ན། ལྷའི་བུ། སངས་རྒྱས་བཅོམ་ལྡན་འདས་ནི་ཐུགས་རྗེ་ཆེན་པོས་སེམས་ཅན་ཡོངས་སུ་མ་བཏང་བ་ཡིན་ནོ། །དེ་ནས་ལྷའི་བུ་དེ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་ཆེད་དུ་བརྗོད་པ་འདི་ཆེད་དུ་ལན་གསུམ་བརྗོད་དེ། བཅོམ་ལྡན་འདས་དེ་བཞིན་གཤེགས་པ་ལ་ཕྱག་འཚལ་ལོ། །བཅོམ་ལྡན་འདས་དེ་བཞིན་གཤེགས་པ་ལ་ཕྱག་འཚལ་ལོ། །བདག་ལ་ཐུགས་བརྩེ་བའི་སླད་དུ་བཅོམ་ལྡན་འདས་དེ་འདིར་གཤེགས་སུ་གསོལ། བདག་ངན་སོང་དུ་སྐྱེ་བ་རྣམས་ལས་གྲོལ་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་ལྷའི་བུ་དེའི་ལྷག་པའི་བསམ་པ་ཐུགས་སུ་ཆུད་
447a
༄#། །ནས། ལྷའི་བུ་དེ་ག་ལ་བ་དེར་གཤེགས་ཏེ། གདན་བཤམས་པ་དེ་ལ་བཞུགས་སོ། །བཞུགས་ནས་བཅོམ་ལྡན་འདས་ཀྱིས་ལྷའི་བུ་དེ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ། ཁྱོད་འཆི་བས་འཇིགས་སམ། གསོལ་པ། བཅོམ་ལྡན་འདས། བདག་འགུམ་པས་འཇིགས་ལགས་སོ། །དེ་ཅིའི་སླད་དུ་ཞེ་ན། ཡངས་པའི་ཕག་གི་མངལ་མི་སྡུག་པར་སྐྱེ་བ་མཐོང་ལགས་ཏེ། དེར་བདག་སྐྱེས་ནས་བཤང་བ་འཚལ་ཞིང་མཚོན་གྱིས་འགུམ་པར་འགྱུར་ལགས་ཏེ། བཅོམ་ལྡན་འདས། དེའི་སླད་དུ་བདག་འགུམ་པས་འཇིགས་ལགས་སོ། །དེ་ནས་བཅོམ་ལྡན་འདས་ཀྱིས་ལྷའི་བུ་དེ་ལ་འདི་སྐད་ཅེས་བཀའ་སྩལ་ཏོ། །ལྷའི་བུ། ཁྱོད་འཆི་བས་མ་འཇིགས་ཤིག། དེ་ཅིའི་ཕྱིར་ཞེ་ན། ལྷའི་བུ། སའི་ཁམས་དང ། ཆུའི་ཁམས་མི་འགྲོ་མི་འོང་གི་བདག་ཉིད་ཀྱི་ལས་ཀྱིས་འོང་ཞིང་འགྲོ་སྟེ། ལྷའི་བུ། ཁྱོད་ཚུར་ཤོག། སངས་རྒྱས་ལ་སྐྱབས་སུ་སོང་ཞིག། ཆོས་དང ། དགེ་འདུན་ལ་སྐྱབས་སུ་སོང་ཞིག། དེ་ནས་ལྷའི་བུ་དེ་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། དེ་ལྟར་འཚལ་ལོ། །བདག་སངས་རྒྱས་ལ་སྐྱབས་སུ་མཆིའོ། །ཆོས་དང་དགེ་འདུན་ལ་སྐྱབས་སུ་མཆིའོ། །དེ་ནས་བཅོམ་ལྡན་འདས་ཀྱིས་ལྷའི་བུ་དེ་ལ་ཚིགས་སུ་བཅད་དེ་བཀའ་སྩལ་པ། གང་ཞིག་སངས་རྒྱས་ལ་ནི་སྐྱབས་སོང་བ། །དེ་ནི་ངན་འགྲོར་འདིར་
447b
ནི་མི་འགྲོ་སྟེ། །ལྷ་ཡི་བདག་ཉིད་དངོས་པོ་སྤངས་ནས་སུ། །མི་ཡི་བདག་ཉིད་དངོས་པོ་ལེན་པར་འགྱུར། །དེ་ནས་བཅོམ་ལྡན་འདས་ཀྱིས་ལྷའི་བུ་དེ་ལ་ཆོས་དང་ལྡན་པའི་གཏམ་ཡང་དག་པར་བསྟན། ཡང་དག་པར་འཛིན་དུ་བཅུག། ཡང་དག་པར་གཟེངས་བསྟོད། ཡང་དག་པར་དགའ་བའི་བར་དུ་མཛད་ནས། གདན་ལས་བཞེངས་ཏེ་བཞུད་དོ། །བཅོམ་ལྡན་འདས་བཞུད་ནས་རིང་པོ་མ་ལོན་པར་ལྷའི་བུ་དེ་འཆི་བའི་དུས་བྱས་སོ། །དུས་བྱས་ནས་དེ་མ་ཐག་ཏུ་ཡངས་པ་དེར་ཚོང་དཔོན་ཞིག་གི་ཆུང་མ་དམ་པའི་མངལ་དུ་སྐྱེས་སོ། །དེ་ཟླ་བ་དགུ་འདས་ནས། ཁྱེའུ་གཟུགས་བཟང་བ་མཛེས་པ། བལྟ་ན་སྡུག་པ། ཁ་དོག་བཟང་པོ། རྒྱས་པ་མཆོག་དང་ལྡན་པ་ཞིག་བཙས་པར་གྱུར་ཏོ། །དེ་བཙས་མ་ཐག་ཏུ་ཚིག་འདི་སྐད་ཅེས་སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ་ཞེས་བརྗོད་དོ། །དེ་ནས་དེའི་ཕ་དང ། མ་འདི་སྙམ་དུ་སེམས་ཏེ། ཁྱེའུ་འདི་ནི་སངས་རྒྱས་ཤེས། ཆོས་ཤེས། དགེ་འདུན་ཤེས་ཏེ། འདི་ནི་ཤེས་པ་དང་ལྡན་ནོ་སྙམ་དུ་འདུ་ཤེས་སྐྱེས་སོ། །དེ་ནས་ཁྱེའུ་ཤེས་ལྡན་གང་གི་ཚེ། ལོ་བརྒྱད་ལོན་པ་ལྟ་བུར་གྱུར་པ་དེའི་ཚེ། ལི་ཙ་བའི་གཞོན་ནུ་རབ་ཏུ་མང་པོ་རྣམས་ཀྱིས་ལྷན་ཅིག་ཏུ་མདུན་དུ་བདར་ནས་སྐྱེད་མོས་ཚལ་གྱི་བཞི་མདོ་ནས་བྱུང་ངོ ། །དེའི་ཚེ་བཅོམ་ལྡན་འདས་ཡངས་པའི་ཚལ་ཆེན་པོ་ན་ཁང་པ་བརྩེགས་པའི་ཁང་བཟང་ན་བཞུགས་
448a
༄#། །ཏེ།་དེ་ནས་བཅོམ་ལྡན་འདས་སྔ་དྲོའི་དུས་ཀྱི་ཚེ། སྨད་གཡོགས་དང ། ཆོས་གོས་གསོལ། ལྷུང་བཟེད་བསྣམས་ཏེ། ཡངས་པར་བསོད་སྙོམས་ལ་ཕྱིར་གཤེགས་སོ།། བཅོམ་ལྡན་འདས་དེ་མཛེས་པ་ནས། འདོད་དང་ལྡན་པའི་བར་དུ་གྱུར་པ། ཁྱེའུ་ཤེས་ལྡན་གྱིས་མཐོང་ངོ ། །མཐོང་ནས་དེ་བཅོམ་ལྡན་འདས་ལ་སེམས་རབ་ཏུ་དགའ་བར་གྱུར་ཏོ། །སེམས་དགའ་ནས་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བཙལ་ཏེ་ལན་གསུམ་བསྐོར་བ་བྱས་ནས། ཕྱོགས་གཅིག་ཏུ་འདུག་གོ། ཕྱོགས་གཅིག་ཏུ་འདུག་ནས་ཁྱེའུ་ཤེས་ལྡན་གྱིས་བཅོམ་ལྡན་འདས་ལ་ཚིགས་སུ་བཅད་དེ་གསོལ་པ། བདག་གི་སྔོན་གྱི་ཚེ་དྲན་ཏེ། །སྡུག་བསྔལ་རྣམས་ལས་རབ་བཀྲོལ་ཞིང ། ། ངན་སོང་ལྟུང་བ་ལས་ནི་བདག་།འཇིག་རྟེན་མགོན་གྱིས་གྲོལ་བར་མཛད། །མི་མཆོག་ཐུགས་ནི་བརྩེར་དགོངས་ཏེ། །བསོད་སྙོམས་འདི་ནི་བཞེས་པར་མཛོད། །བདག་གིས་གདུགས་ཚོད་འདི་དག་ནི། །གྲོལ་བར་མཛད་ནས་དེང་བཞེས་ལ། །སང་ནི་བདག་གི་ཕ་མ་ཡི། །སྡུམ་པར་འདྲེན་པས་བརྩེར་དགོངས་ཏེ། །དགེ་སློང་ཀུན་དང་ཐབས་གཅིག་ཏུ། །གདུགས་ཚོད་དག་ནི་གསོལ་བར་མཛོད། །བཅོམ་ལྡན་འདས་ཅང་མི་གསུངས་པར་གྱུར་པས། ཁྱེའུ་ཤེས་ལྡན་གྱིས་གསོལ་པ་གནང་ངོ ། །དེ་ནས་ཁྱེའུ་ཤེས་ལྡན་བཅོམ་ལྡན་འདས་ཅང་མི་
448b
གསུང་བས་གནང་བར་རིག་ནས། ཕ་མ་ག་ལ་བ་དེར་སོང་སྟེ། ཕ་མ་ལ་འདི་སྐད་ཅེས་སྨྲས་སོ། །ཡབ་ཡུམ། བདག་གིས་ནི་བཅོམ་ལྡན་འདས་ལ་བསོད་སྙོམས་ཕུལ་ལགས་ཏེ། སང་ཡང་གདུགས་ཚོད་ལ་སྤྱན་དྲངས་སོ། །དེ་ནས་ཁྱེའུ་ཤེས་ལྡན་གྱི་ཕ་མ་མགུ་ཞིང་དགའ་ལ། ཡིད་རངས་ཤིང་རབ་ཏུ་དགའ་སྟེ། དགའ་བ་དང ། ཡིད་བདེ་བ་སྐྱེས་ནས། དེའི་མཚན་མོ་བཟའ་བ་དང ། བཅའ་བ་རོ་དང་ལྡན་པ་ཞིམ་པ་མང་པོ་མངོན་པར་བཤམས་ནས་ཡངས་པའི་གྲོང་ཁྱེར་ཆེན་པོ་ཐམས་ཅད་ཕྱག་དར་བྱས་ཏེ། དར་གྱི་ལྡ་ལྡི་བཏགས། པོག་ཕོར་ནས་སྤོས་ཀྱིས་བདུགས། སྤོས་ཆུས་ཆག་ཆག་བཏབ། མེ་ཏོག་གིས་མཛེས་པར་བཀྲམ་སྟེ། དེའི་མཚན་མོ་འདས་ནས་དུས་ལ་བབ་པ་དང ། བཅོམ་ལྡན་འདས་ག་ལ་བ་དེར་སོང་སྟེ། བཙུན་པ་བཅོམ་ལྡན་འདས། གདུགས་ཚོད་ལ་བབ་སྟེ། གདུགས་ཚོད་སྦྱར་ལགས་སོ་ཞེས་གསོལ་ཏོ། །དེ་ནས་བཅོམ་ལྡན་འདས་དེའི་སྔ་དྲོ་སྨད་གཡོགས་དང ། ཆོས་གོས་གསོལ། ལྷུད་བཟེད་བསྣམས་ནས། དགེ་སློང་གི་ཚོགས་ཀྱིས་མདུན་དུ་བདར་ཅིང ། དགེ་སློང་གི་ཚོགས་ཀྱིས་ཡོངས་སུ་བསྐོར་ཏེ། ཤེས་ལྡན་གྱི་ཕ་མའི་ཁྱིམ་ག་ལ་བ་དེར་གཤེགས་ནས་གདན་བཤམས་པ་དེ་ལ་བཞུགས་སོ། །དེ་ནས་ཁྱེའུ་ཤེས་ལྡན་བཅོམ་ལྡན་འདས་དགེ་སློང་གི་དགེ་འདུན་དང་གདན་ལ་བཞུགས་པར་རིག་ནས། རང་གི་ལག་གིས་བཟའ་བ་དང ། བཅའ་བ་རོ་དང་ལྡན་པ་ཞིམ་ཞིང་མང་
449a
༄#། །བདག་ལེགས་པར་བྲིམས། ལེགས་པར་གསོལ་ཏོ། །བཅོམ་ལྡན་འདས་གདུགས་ཚོད་གསོལ་བར་རིག་ནས། སོ་སོ་སོ་སོ་ལ་རས་བཅོས་བུ་ཟུང་དང ། སོ་སོ་ལ་ལྷམ་ཟུང་དག་ཕུལ་ལོ། །བཅོམ་ལྡན་འདས་ལ་ཆོས་གོས་སར་པ་གསུམ་དང ། ཆག་སར་པ་ཟུང་དག་གསོལ་ཏོ། །གསེར་གྱི་མེ་ཏོག་དང ། དངུལ་གྱི་མེ་ཏོག་རྣམས་ཀྱིས་གཏོར་ཏོ། །གང་མངོན་པར་གཏོར་བ་དེ་དག་གཏོར་མ་ཐག་ཏུ་སངས་རྒྱས་ཀྱི་མཐུས་བཅོམ་ལྡན་འདས་ཀྱི་སྤྱི་གཙུག་གི་ཐད་ཀར་ཁང་པ་བརྩེགས་པ་བཀྲ་བ། བལྟ་ན་སྡུག་པ། གྲུ་བཞི་བ། གནས་བཞི་དང་ལྡན་པ་ཞིག་འདུག་པར་གྱུར་ཏོ། །ཁང་པ་བརྩེགས་པ་དེར་དེ་བཞིན་གཤེགས་པའི་སྐུ་སྐྱིལ་མོ་ཀྲུང་བཅས་ཏེ་ཆོས་འཆད་ཅིང་བཞུགས་པ་དེས་མཐོང་ངོ ། །དེ་ནས་ཁྱེའུ་ཤེས་ལྡན་གྱིས། བཅོམ་ལྡན་འདས་ཀྱིས་གཟུགས་དང ། རྫུ་འཕྲུལ་དང ། ཆོ་འཕྲུལ་བསམ་གྱིས་མི་ཁྱབ་པ་དེ་འདྲ་བ་མཐོང་ནས། མགུ་ཞིང་དགའ་བ་ནས་ཡིད་བདེ་བ་སྐྱེས་པའི་བར་དུ་གྱུར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས། བདག་གི་དགེ་བའི་རྩ་བ་འདི་བླ་ན་མ་མཆིས་པ་ཡང་དག་པར་རྫོགས་པའི་བྱང་ཆུབ་ཏུ་བསྔོ་སྟེ། དགེ་བའི་རྩ་བ་དེས་ན། བདག་ད་ལྟར་གྱི་བཅོམ་ལྡན་འདས་བཞིན་དུ་སངས་རྒྱས་སུ་གྱུར་ཅིག་།ཆོས་སྟོན་པར་ཡང་གྱུར་ཅིག་།དགེ་འདུན་ཡོངས་སུ་སྐྱོང་བར་ཡང་
449b
གྱུར་ཅིག། དེ་ནས་བཅོམ་ལྡན་འདས་ཀྱིས་ཁྱེའུ་ཤེས་ལྡན་གྱི་ལྷག་པའི་བསམ་པ་ཐུགས་སུ་ཆུད་དེ། འཛུམ་པ་མཛད་པ་ནས་སྤྱི་བོའི་གཙུག་གི་ནང་དུ་ནུབ་པའི་བར་དུ་མཛད་པ། ཚེ་དང་ལྡན་པ་ཀུན་དགའ་བོས་མཐོང་སྟེ། དོན་མེད་པ་མི་མཛད་དོ་སྙམ་པའི་བར་དུའོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཚིགས་སུ་བཅད་དེ་སླར་བཀའ་སྩལ་པ། ཀུན་དགའ་འདི་ལྟ་ཤེས་ལྡན་གྱིས་ནི་དེ་བཞིན་གཤེགས་པ་མཆོད་པས་ན། །བསྐལ་པ་བྱེ་བ་དགུ་བཅུ་དག་ཏུ་ལོག་པར་ལྟུང་བར་མི་འགྱུར་ལ། །དེ་ནས་དེ་མ་ཐག་ཏུ་རྣམ་པར་འདྲེན་པར་ཉེ་བར་སྐྱེ་འགྱུར་ཏེ། མཚན་ནི་མཁྱེན་གཙོ་རྒྱལ་པོ་ཞེས་བྱ་སངས་རྒྱས་འཇིག་རྟེན་འབྱུང་བར་འགྱུར། །སངས་རྒྱས་ཀྱི་ནི་རྟོགས་པ་བརྗོད་པས་མཁས་རྣམས་ཡང་དག་དགའ་བྱེད་ཅིང ། །མི་ཡི་མཁས་པ་གང་གིས་ཐོས་ནས་དགེ་བ་མང་པོ་བྱེད་འགྱུར་ཏེ། །རྒྱ་མཚོ་མཐས་གཏུགས་དཔག་མེད་ལྟ་བུའི་དེ་བཞིན་གཤེགས་པ་སངས་རྒྱས་ལ། །རབ་ཏུ་དང་བས་ཡོན་རྣམས་ཕུལ་བའི་འབྲས་བུ་ཆུང་བར་མི་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཁྱེའུ་ཤེས་ལྡན་དང ། དགེ་སློང་དེ་དག་དང ། ལྷ་དང་བཅས་པའི་འཇིག་རྟེན་ཡིད་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སངས་རྒྱས་ཀྱི་རྟོགས་པ་བརྗོད་པ་ཤེས་ལྡན་གྱི་མདོ་རྫོགས་སོ།། །།རྒྱ་གར་གྱི་མཁན་པོ་བིདྱཱ་ཀ་ར་སིད་ཧ་དང ། སརྦ་ཛྙཱ་
450a
༄#། །དེ་བ་དང ། ཞུས་ཆེན་གྱི་ལོ་ཙཱ་བ་བནྡེ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།།