rKTs


H37

(e-text produced by ACIP)

see text in transliteration
420a
།།རྒྱ་གར་སྐད་དུ། མཻ་ཏྲི་བྷཱ་བན་སཱུ་ཏྲ། བོད་སྐད་དུ། བྱམས་པ་བསྒོམ་པའི་མདོ། འཕགས་པ་དཀོན་མཆོག་གསུམ་ལ་གུས་པས་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བྱེད་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་བོས་ནས། དགེ་སློང་དག་བཙུན་པ་བཅོམ་ལྡན་འདས་ཀྱི་སྦྱན་སྔར་སོ་སོར་འོངས་པ་ལ། བཅོམ་ལྡན་འདས་ཀྱིས་ཀྱང་འདི་སྐད་ཅེས་བཀའ་སྩལ་ཏོ། །སེམས་རྣམ་པར་གྲོལ་བར་བྱ་བའི་ཕྱིར་བྱམས་པ་བསྒོམ་པར་བྱའོ། །བསམ་པ་བརྟན་པར་བྱ་བའི་ཕྱིར་རོ། །མང་དུ་བྱེད་པ་དང ། ཞི་བར་བྱེད་པ་དང ། གཞིར་བྱེད་པ་དང ། རྗེས་སུ་གནས་པར་བྱེད་པ་དང ། འདིས་པར་བྱ་བ་དང ། ཤིན་ཏུ་བཙུན་པར་བྱའོ། །ཕན་ཡོན་བཅུ་གཅིག་པོ་སོ་སོར་བཤད་པར་བྱའོ། །བཅུ་གཅིག་གང་ཞེ་ན། བདེ་བར་ཉལ་བ་དང ། བདེ་བར་སད་པ་དང ། སྡིག་པའི་རྨི་ལམ་མི་མཐོང་བ་དང ། དེ་ལ་མི་རྣམས་དགའ་བ་དང ། མི་མ་ཡིན་རྣམས་
420b
དགའ་བ་དང ། ལྷ་རྣམས་ཀྱིས་བསྲུང་བ་དང ། མེ་དང ། དུག་དང ། མཚོན་རྣམས་ཀྱིས་གནོད་བར་མི་འགྱུར་རོ། །དུས་རྟག་ཏུ་སེམས་ཤིན་ཏུ་དགའ་བར་གནས་པ་དང ། བཞིན་གྱི་མདངས་རབ་ཏུ་གསལ་བ་དང ། སེམས་གསལ་བར་འཆི་བ་དང ། ཆེས་ཆེར་བག་ཡོད་བར་བྱེད་པས་ཚངས་པའི་འཇིག་རྟེན་དུ་སྐྱེ་བའོ། །དགེ་སློང་དག་།བྱམས་པའི་སེམས་དང་མི་འབྲལ་བར་བྱའོ། །བསམ་བས་བརྟེན་པར་བྱའོ། །བསྒོམ་པར་བྱ་བ་དང ། མང་དུ་བྱེད་པ་དང ། ཞི་བར་བྱེད་པ་དང ། གཞིའི་བྱེད་པ་དང ། རྗེས་སུ་གནས་བར་བྱེད་པ་དང ། འདྲིས་པར་བྱ་བ་དང ། ཤིན་ཏུ་བརྩོན་པར་བྱའོ། །བཅུ་གཅིག་པོ་རྣམས་ཀྱི་ཕན་ཡོན་རྣམས་སོ་སོར་བཤད་ཟིན་ཏོ། །དགེ་སློང་དག། གཞན་ ་ ་མས་པའི་ཕན་ཡོན་རྣམས་བཤད་པར་བྱའོ། །ཁ་ཟས་དུ་མ་ཐོབ་པ་དང ། །རང་གི་ཡུལ་དུ་ཉེ་བར་གནས། །མང་པོ་རྣམས་ནི་འཚོ་བ་ནི། །གང་གིས་བྱམས་པ་མ ་སྤངས་ནའོ། །གྲོང་རྡལ་གང་གང་འགྲོ་བ་དང ། །གྲོང་ཁྱེར་རྒྱལ་པོའི་ཕོ་བྲང་དང ། །ཐམས་ཅད་དུ་ནི་མཆོད་པར་འགྱུར། །གང་གིས་བྱམས་པ་མ་སྤངས་ནའོ། །དེ་ལ་ཆོམ་རྐུན་མི་འབྱུང་ཞིང ། །དེ་ལ་རྒྱལ་པོ་གནོད་མི་བྱེད། །སེམས་ཅན་ཐམས་ཅད་བཤེས་སུ་འགྱུར། །གང་གིས་བྱམས་པ་མ་སྤངས་ནའོ། །ཁྲོ་མེད་རང་ཡུལ་ ་ཕར་གནས། །སྐྱེ་པོའི་མདུན་སར་སྨོད་མེད་དགའ། །མཆོག་གི་མཉེན་དང་ལྡན་
421a
༄#། །པར་འགྱུར། །གང་གིས་བྱམས་པ་མ་སྤངས་ནའོ། །མཆོད་ན་མཆོད་པ་ཐོབ་པར་འགྱུར། །འདུད་ན་སོ་སོར་འདུད་པར་བྱེད། །སྙན་དང་གྲགས་པ་ཐོབ་པར་འགྱུར། །གང་གིས་བྱམས་པ་མ་སྤངས་ནའོ། །བཀུར་སྟི་བྱས་ན་བཀུར་སྟི་ཐོབ། །གུས་པར་བྱས་ན་གུས་པ་ཐོབ། །ཁ་དོག་གཟི་བརྗིད་ལྡན་པར་འགྱུར། །གང་གིས་བྱམས་པ་མ་སྤངས་ནའོ། །མེ་ལྟར་རབ་ཏུ་འབར་བ་ཡི། །ལྷ་ཡི་ལུས་དང་འདྲ་བར་འགྱུར། །དཔལ་དང་བྲལ་བར་མི་འགྱུར་རོ། །གང་གིས་བྱམས་པ་མ་སྤངས་ནའོ། །ཕྱུགས་རྣམས་མང་པོ་ཐོབ་པ་དང ། །ཞིང་ལ་འབྲུ་མང་སྐྱེ་བ་དང ། །བུ་དང་བུ་མོ་མང་བར་འགྱུར། །གང་གིས་བྱམས་པ་མ་སྤངས་ནའོ། །རི་ལས་ཐུར་དུ་ལྷུང་བ་དང ། །ཤིང་ལས་འོག་ཏུ་ལྷུང་བ་དང ། ། ལྟུང་བར་མི་འགྱུར་གནས་ས་ཐོབ། །གང་གིས་བྱམས་པ་མ་སྤངས་ནའོ། །ཕ་ཊའི་ཤིང་སྟེང་འཛེགས་གྱུར་ན། །རླུང་གིས་བསྐྱོད་བར་མི་ནུས་བཞིན། །དགྲ་བོས་ཅུང་ཟད་བྱ་མི་ནུས། །གང་གིས་བྱམས་པ་མ་སྤངས་ནའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་དེ་དག་ལ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང ། དགེ་སློང་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ ། །བྱམས་པ་བསྒོམ་པའི་མདོ་རྫོགས་སོ།། །།པཎྜི་ཏ་ཆེན་པོ་
421b
ཱནནྡ་ཤྲཱིའི་ཞལ་སྔ་ནས། མང་དུ་ཐོས་པའི་ལོཙྪ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། སྐད་གཉིས་སྨྲ་བ་རྣམས་ཀྱི་གདན་ས། གཙུག་ལག་ཁང་ཆེན་པོ་དཔལ་ཐར་པ་གླིང་དུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །སའི་སྟེང་དུ་ཉི་མ་དང ། ཟླ་བ་ལྟར་གྱུར་ཅིག།།